ܦܘܫܩܐ ܕܡܙܡܘܪ̈ܐ ܕܕܘܝܕ ܢܒܝܐ
ܠܡܳܪܝ ܕܳܢܝܐܝܠ ܨܰܠܚܳܝܐ (542)
ܡܛܰܟܣ ܡ̣ܢ ܕܪܝܫ
ܒܕܰܝܪܐ ܕܡܳܪܝ ܐܰܦܪܝܡ ܣܘܪܝܳܝܐ
ܗܘܠܢܕܐ – ܫܢܰܬ 2004
ܥܘܬܕܐ
ܫܘܒܚܐ ܠܐܠܗܐ ܥܠ ܐܦܰܝ̈ ܛܝܒܘܬܗ ܫܦܝܥܬܐ ܕܥܠ ܓܢܣܐ ܐ̱ܢܫܝܐ܆ ܕܓܶܠܝ̈ܢܘܗܝ ܐܠܗܝ̈ܐ ܠܰܢܒܝ̈ܘܗܝ ܕܰܒܥܬܝܩܬܐ ܐܘܕܥ܆ ܘܚܟܡܬܐ ܘܣܘܟܠܐ ܠܡܠܦ̈ܢܐ ܘܐܒܗ̈ܬܐ ܕܰܒܕܝܬܩܝ ܚܕܬܐ ܠܰܡܦܫܩܽܘ ܢܒܝ̈ܘܬܐ ܕܢܒܝ̈ܐ ܡܛܠ ܒܶܢܝܢ ܢܦܫ̈ܬܐ ܕܰܡܗܝ̈ܡܢܐ ܫܰܟܶܢ ܘܟܢ:
ܟܬܳܒܐ ܗܢܐ ܕܦܘܫܳܩ ܡܙܡܘܪ̈ܐ ܕܕܰܘܝܕ ܢܒܝܐ ܕܰܒܝܕ ܡܪܝ ܕܢܝܐܝܠ ܨܠܚܝܐ (542 +) ܐܶܬܦܰܫܩ܆ ܨܝܪ ܒܗ ܣܘܟ̈ܠܐ ܪ̈ܡܐ ܪ̈ܘܚܢܝܐ ܘܝܘܠܦܢܐ ܡܰܘܬܪܢܐ ܬܐܘܠܘܓܳܝܐ ܕܥܠ ܡܕܒܪܢܘܬܐ ܦܳܪܘܩܝܬܐ ܕܡܪܢ ܝܫܘܥ ܕܒܰܒܣܪ ܡܢ ܡܰܘܠܕܗ ܥܕܡܐ ܠܣܘܠܩܗ ܕܠܫܡܝܐ ܘܥܠ ܩܝܳܡܬܗ ܬܪܝܢܝܬܐ ܗܳܝ ܕܒܗ̇ ܥܬܝܕ ܠܥܠܡܐ ܢܕܽܘܢ. ܣܳܟܐ ܠܡܐܡܪ ܐܰܝܢܐ ܕܥܰܡܝܩܐܝܬ ܒܦܘܫܳܩ̈ܐ ܗܠܝܢ ܪ̈ܘܚܢܝܐ ܠܐ ܢܗܪܘܓ܆ ܒܨܝܪ ܝܕܥܬܐ ܡܢ ܣܝ̈ܡܳܬܐ ܕܰܒܕܦ̈ܐ ܕܦܘܫ̈ܩܐ ܗܠܝܢ ܛܡܝܪܝܢ ܡܩܰܘܐ. ܥܠܗܕܐ ܡܛܠ ܩܠܝܪܘܣ ܥܕܬܢܝܐ ܘܪ̈ܚܡܰܝ ܬܶܐܘܠܘܓܝܰܐ ܠܰܙܒܰܢ̱ܬܐ ܩܕܡܳܝܬܐ ܟܬܳܒܐ ܗܢܐ ܡܶܬܦܪܣ. ܡܢܳܚ ܢܦܫܐ ܦܰܛܪܝܪܟܐ ܐܦܪܝܡ ܩܕܡܝܐ ܕܒܝܬ ܒܪܨܘܡ ܒܰܟܬܒܐ ܕܝܠܗ «ܒܪ̈ܘܠܐ ܒܕܝܪ̈ܐ» ܥܠ ܡܪܝ ܕܢܝܐܝܠ ܨܠܚܝܐ ܗܳܠܝܢ ܟܬܰܒ:
ܐܬܝܕܥ ܡܳܪܝ ܕܢܝܐܝܠ ܨܰܠܚܝܐ ܒܦܶܠܓܐ ܩܰܕܡܝܐ ܕܡܰܐܬܐ ܫܬܝܬܳܝܬܐ. ܘܰܣܒܪܘ ܐܢܫ̈ܝܢ ܡܢ ܒܢ̈ܝ ܕܳܪܢ ܦܰܕܝܕܳܐܝܬ ܕܝܠܝܕ ܒܨܰܠܚ ܩܪܝܬܐ ܕܛܘܪܥܒܕܝܢ. ܐܝܬ ܗܘܐ ܓܝܪ ܐܬܪܐ ܐܚܪܢܐ ܒܫܡ ܨܰܐܠܚܝܗ ܡܕܝܢܬܐ ܕܰܒܬܰܝܡܢ ܓܳܙܪܬܐ ܥܶܠܝܬܐ ܕܫܟܝܚܐ ܗܘܬ ܒܙܰܒܢ̈ܐ ܕܪ̈ܘܡܝܐ ܘܡܶܬܚܙ̈ܝܢ ܚܰܪ̈ܒܬܗ̇ ܒܩܘܪܒܐ ܕܐܒܘܟܰܡܐܠ ܩܪܝܬܐ. ܘܐܬܓܠܝܘ ܒܗ̇ ܝܰܘܡܢ ܐܬܘ̈ܬܐ ܡܰܟܬܒܙܰܒܢܝ̈ܬܐ. ܘܐܝܬܘܗܝ ܗܘܐ ܗܽܘ ܕܢܝܐܝܠ ܒܩܰܕܡܝܬܳܐ ܪܝܫܐ ܕܕܰܝܪܐ ܕܨܠܚܝ̈ܐ. ܘܠܗ ܡܬܒܰܝܬܐ ܗܳܝ ܕܫܪܝܪܐ. ܘܰܒܗܘ ܡܬܚܐ ܟܬܒ ܐܓܪܬܐ ܠܕܝܪܝܐ ܕܡܪܝ ܒܣܘܣ ܕܐܬܕܟܪ ܒܗ̇ ܬܪܥܣܪ ܙܢ̈ܝܢ ܕܡܶܬܩܛܪܓ ܥܠܝܗܘܢ ܫܡ ܚܒܳܠܐ. ܗܕܐ ܡܰܢ ܟܕ ܐܬܬܥܝܪ ܕܪܳܫܐ ܗܳܝܕܝܟ. ܟܕ ܐܬܬܩܝܡ ܐܦܣܩܘܦܐ ܠܬܶܠܐ ܕܡܰܘܙܠܬܰ ܒܬܪ ܫܢܬ 542 ܒܩܠܝܠ ܐܝܟ ܕܐܩܪܚܘ ܦܰܛܪܝܪܟܐ ܒܗܢܡ ܚܶܕܠܳܝܐ ܘܕܰܝܪܝܐ ܕܘܝܕ ܦܘܢܝܩܳܝܐ ܘܐܚܪ̈ܢܐ ܡܰܠܘܢ ܓܝܪ ܟܬܝܒ ܒܰܟܬܒܗ ܕܦܘܫܩ ܡܙܡܘܪ̈ܐ ܕܡܢ ܡܕܝܢܬ ܬܶܠܐܴ ܐܝܬܰܘܗܝ. ܘܐܝܬܘܗܝ ܡܢ ܛܳܒ̈ܐ ܕܪ̈ܝܫܰܝ ܟܳܗܢ̈ܐ ܕܒܙܒܢܗ ܘܰܡܗܝܪ ܒܝܕܥܬܐ ܕܟܬܒܐ ܩܕܝܫܐ܆ ܘܒܰܫܢܬ 542 ܩܕܡ ܐܦܣܩܘܦܘܬܗ ܦܰܫܩ ܣܶܦܪܐ ܕܡܙܡܘܪܐ ܦܘܫܳܩܐ ܦܰܬܝܐ ܒܰܬܠܬܐ ܕܘܒܳܩ̈ܝܢ ܪܘܪ̈ܒܐ. ܟܠ ܕܘܒܩܐ ܐܝܬ ܒܗ ܚܰܡܫܝܢ ܡܰܙܡܘܪ̈ܐ: ܠܦܘܬ ܒܥܳܬܐ ܕܕܰܝܪܝܐ ܘܩܫܝܫܐ ܪܝܫܕܰܝܪܐ ܕܡܪܝ ܐܘܣܝܒ ܕܰܒܟܰܦܪܐ ܕܒܺܐܪܐ. ܦܘܫܳܩܗ ܕܝܢ ܬܶܐܘܳܠܘܓܝ ܪܘܚܢܐ ܕܰܡܠܐܷ ܝܘܬܪ̈ܢܐ ܘܡܰܪ̈ܬܝܢܘܬܐ܆ ܘܰܣܝܳܡܗ ܦܫܝܩ ܘܡܰܬܝܢ. ܘܠܐ ܡܰܝܬܐ ܒܗ ܣܳܗܕܘ̈ܬܐ ܕܐܢܫ̈ܝܢ ܐܒܗ̈ܬܐ ܐܠܐ ܩܠܝܠ. ܐܝܬ ܗܘܐ ܡܢܗ ܚܰܕ ܢܘܣܟܐ ܡܫܰܡܠܝܐ ܒܰܚܒܳܒ ܩܪܝܬܐ ܕܛܘܪܥܰܒܕܝܢ ܐܶܒܕ. ܘܩܘܝܘ ܬܪܝܢ ܢܘܣܟ̈ܝܢ ܒܒܝܬܓܰܙܢ ܘܰܒܩܘܣܛܢܛܝܢܘܦܳܘܠܝܣ. ܘܬܠܬܐ ܢܘܣܟ̈ܝܢ ܒܠܢܕܘܢ ܕܐܝܬ ܒܗܘܢ ܕܘܒܳܩܐ ܩܕܡܝܐ ܘܰܬܪܝܢܐ ܘܚܕ ܢܘܣܟܐ ܒܪܝܡܳܐ ܒܒܰܝܪܘܬ ܕܐܝܬ ܒܗ ܕܘܒܳܩܐ ܩܰܕܡܝܐ ܒܨܝܪ ܩܠܝܠ. ܩܰܦܣܗ ܕܘܝܕ ܦܘܢܝܩܳܝܐ ܒܰܫܢܬ 1461
ܘܠܘ ܒܕܳܪܐ ܥܣܝܪܝܐ ܐܝܟ ܕܰܣܒܪ ܫܰܐܒܐ. ܘܐܝܬ ܡܢܗ ܢܘܣܟ̈ܐ ܒܒܰܪܛܶܠܠܝ ܘܰܒܒ̈ܬܰܝ ܓܰܙܐ ܕܕܰܝܪܐ ܕܙܰܥܦܪܐܢ ܘܰܕܡܪܝ ܡܰܬܝ ܘܒܳܘܣܬܘܢ ܘܒܰܪܡܶܢܟܗܰܐܡ. ܘܐܬܝܰܒܠ ܢܘܣܟܳܐ ܦܰܬܝܐ ܠܐܪܒܝܐ ܒܠܶܥܙܐ ܕܣܰܩܘܒܠܳܝ ܠܩܳܢܘܢ̈ܐ ܥܪ̈ܒܝܐ ܒܡܶܨܥܬ ܕܳܪܐ ܕܝܚ̄.
ܡܢ ܫܘܬܳܐܣ ܡܰܪܥܝܬܐ ܣܘܪܝܝܬܐ ܕܐܘܪܝܦܝ ܡܨܥܳܝܬܐ ܫܢܰܬ 1977 ܫܩܳܠܛܥܢܐ ܩܒܠܢܢ ܠܡܦܪܣ ܟܡܐ ܕܡܰܨܝܐ ܣܝܳܡ̈ܐ ܕܐܒܗ̈ܬܐ ܕܥܕܬܐ ܕܝܠܢ ܣܘܪܝܝܬܐ ܘܟܰܬܒ̈ܐ ܕܩܪ̈ܝܢܐ ܠܡܰܕܪ̈ܫܬܐ ܘܛܶܟܣ̈ܐ ܥܕܬܳܢܝ̈ܐ ܘܡܰܪ̈ܕܘܬܢܝܐ ܠܡܘܠܳܝ ܚܫܚܬܐ ܕܥ̈ܕܬܐ ܘܡܰܕܪ̈ܫܬܐ ܒܡܰܠܟܘܬܐ ܕܗܘܠܰܢܕܐ ܟܪ ܕܚܐܪܘܬܐ ܠܐ ܡܬܰܚܡܬܐ ܠܰܦܪܣܐ ܫܟܝܚܳܐ. ܥܰܠܗܕܐ ܐܫܬܩܰܕܝ ܒܫܘܪܝ ܨܰܘܡܐ ܩܰܕܝܫܐ ܐܪܒܥܝܢܝܐ ܒܛܘܟܳܣ ܣܝܡܬܐ ܗܳܕܐ ܪܘܚܢܝܬܐ ܫܰܪܝܢܢ ܘܰܒܫܘܠܳܡܗ ܕܨܰܘܡܐ ܠܫܘܡܠܳܝܐ ܡܰܛܝܢܢ. ܢܘܣܟܐ ܝܚܕܝܐ ܕܰܥܠܘܗܝ ܡܶܢܕܪܝܫ ܒܝܰܕ ܟܘܡܒܝܘܬܪ ܛܰܟܣܢܢ܆ ܗܘܝܘ ܢܘܣܟܐ ܕܒܰܫܢܬ 1908 ܡܳܪܢܝܬܳܐ ܒܐܝ̈ܕܰܝ ܐܣܟܘܠܳܝܐ ܒܰܪܨܰܘܡܐ ܒܪ ܡܶܣܩܐ ܡܶܢ ܩܪܝܬܐ ܡܫܰܡܗܬܐ ܡܙܝܙܚ ܟܬܝܒ. ܟܶܢ ܐܶܬܦܰܚܡ ܥܰܠ ܢܘܣܟܐ ܕܕܰܝܪܐ ܕܡܰܪܩܘܣ ܕܐܘܪܫܠܡ ܕܣܘܪ̈ܝܝܐ ܕܰܒܠܫܢܐ ܥܪܒܝܐ ܒܰܫܢܰܬ 1852 ܡܪܢܝܬܐ ܟܬܝܒ.
ܬܰܘܕ̈ܝܬܐ ܕܝܠܢ ܠܕܝܪ̈ܝܐ ܚܒܝ̈ܒܝܢ ܕܕܰܝܪܐ ܕܡܪܝ ܐܦܪܝܡ ܕܗܘܠܢܕܐ ܚܠܳܦ ܥܡܠܐ ܕܝܠܗܘܢ ܒܬܘܪܳܨ ܦܰܘܕ̈ܐ ܘܛܰܥܘ̈ܢܐ ܕܒܰܟܬܒܐ ܗܢܐ ܡܩܰܪܒܝܢܢ ܘܕܝܠܢܐܝܬ ܠܚܒܝܒܢ ܪܘܚܢܝܐ ܪܒܢ ܓܒܪܐܝܠ ܐܩܬܘܪܟ ܕܙܰܒܢܐ ܐܪܝܟܐ ܒܗ ܦܠܚ ܟܕ ܠܙܰܘܥ̈ܐ ܡܛܠ ܦܘܫܳܩ ܩܪܝܢܐ ܣܳܐܡ ܘܥܠ ܢܘܣܟܐ ܐܚܪܢܐ ܕܕܝܪܐ ܕܝܠܢ ܕܡܪܝ ܡܪܩܘܣ ܡܦܰܚܡ ܘܒܛܘܟܳܣܗ ܠܐܘܬܐ ܪܒܬܐ ܡܣܰܝܒܪ.
ܘܠܐܠܗܐ ܡܦܝܣܝܢܢ ܕܡܰܘܬܪܢ ܢܶܥܒܕܝܘܗܝ ܠܣܺܝܡܬܐ ܗܕܐ ܪܘܚܳܢܝܬܐ ܠܰܩܠܝܪܘܣ ܥܕܬܳܢܝܐ ܘܰܠܪ̈ܳܚܡܰܝ ܬܶܐܘܳܠܘܓܝܰܐ ܕܒܰܨܠܘ̈ܬܗܘܢ ܡܳܪܝܐ ܢܥܰܕܪܢ ܠܰܦܪܣ ܣܝܳܡ̈ܐ ܣܓܝ̈ܐܐ ܪ̈ܘܚܢܝܐ ܕܰܠܗܠܝܢ ܕܡܝܢ ܡܛܠ ܒܶܢܝܢ ܢܰܦܫ̈ܬܐ ܕܰܡܗܝ̈ܡܢܐ. ܘܥܠ ܐܠܗܐ ܐܝܬܘܗܝ ܬܘܟܠܳܢܐ ܘܣܒܪܐ ܕܝܠܢ.
ܕܰܝܪܐ ܕܡܳܪܝ ܐܦܪܝܡ ܣܘܪܝܝܐ – ܗܘܠܢܕܐ.
15 ܐܝܪ 2004 ܥܐܕܐ ܕܝܳܠܕܬ ܐܠܗܐ ܕܥܠ ܫܶܒ̈ܠܐ.
♱ ܝܘܠܝܘܣ ܝܫܘܥ ܓܝܓܟ
ܡܛܪܦܘܠܝܛܐ ܕܣܘܪ̈ܝܝܐ ܐܪ̈ܬܕܘܟܣܘ ܕܐܘܪܝܦܝ ܡܨܥܝܬܐ
ܒܫܡܐ ܕܐܒܐ ܘܕܒܪܐ ܘܕܪܘܚܐ ܩܕܝܫܐ ܚܕ ܐܠܗܐ ܫܪܝܪܐ
ܡܫܰܪܶܝܢܰܢ ܠܡܶܟܬܰܒ ܐܶܓܰܪܬܳܐ ܕܶܐܬܐܡܪܰܬ ܡܶܢ ܛܘܒܳܢܳܐ ܕܪܳܚܶܡ ܐܰܠܳܗܳܐ ܡܳܪܝ ܝܘܚܰܢܢ ܪܺܝܫܕܰܝܪܳܐ ܕܡܳܪܝ ܐܳܘܒܽܘܣ ܕܟܰܦܪܳܐ ܕܒܺܝܪܬܳܐ ܠܡܳܪܝ ܕܳܢܝܐܝܠ ܡܰܠܦܳܢܐ ܡܶܛܠ ܦܘܫܳܩܳܐ ܕܡܰܙܡܘܪ̈ܐ ܕܛܘܒܳܢܳܐ ܕܰܘܺܝܕ ܢܒܺܝܳܐ ܟܰܕ ܡܫܰܪܶܝܢܰܢ ܥܰܠ ܣܰܒܪܳܐ ܕܰܐܠܳܗܳܐ ܡܚܰܝܠܳܢܳܐ ܕܰܡܚܺܝ̈ܠܐ ܐܰܠܳܗܳܐ ܕܥܰܕܰܪ ܠܚܰܛܳܝܽܘܬܝ܀
ܠܡܰܠܦܳܢܳܐ ܕܰܐܠܳܗܐ ܘܪܳܚܶܡ ܫܪܳܪܐ ܩܢܶܐ ܝܺܕܰܥܬܳܐ ܡܫܰܡܠܰܝܬܳܐ: ܡܠܶܐ ܚܘܒܳܐ ܕܰܡܫܝܚܳܐ ܚܰܟܺܝܡ ܒܕܶܚܠܰܬ ܡܳܪܶܗ܆ ܘܰܡܫܰܪܪ ܥܰܠ ܗܰܝܡܳܢܘܬܳܐ ܬܪܝܨܰܬ ܫܘܒܚܳܐ. ܚܘܬܪܳܗ̇ ܘܫܘܒܗܳܪܗ̇ ܕܰܒܨܺܝܪܘܬܝ܆ ܛܥܺܝܢ ܚܰܫܳܐ ܕܡܳܪܶܗ ܒܰܩܢܘܡܗ: ܡܳܪܝ ܕܳܢܝܐܝܠ ܪܝܫܕܰܝܪܳܐ ܘܩܰܫܝܫܳܐ. ܡܶܢ ܒܨܺܝܪܐ ܘܩܰܫܝܫܳܐ ܘܪܝܫܕܰܝܪܳܐ ܝܘܚܰܢܢ ܕܥܘܡܪܳܐ ܩܰܕܝܫܳܐ ܕܡܳܪܝ ܐܳܘܒܽܘܣ ܕܟܰܦܪܳܐ ܕܒܺܝܪܬܳܐ ܕܟܘܪܳܐ ܕܰܐܦܳܡܳܝܷ̈ܐ܆ ܒܝܶܫܽܘܥ ܐܰܠܳܗܳܐ ܡܶܠܬܳܐ ܓܳܡܪܳܐ ܟܽܠ ܒܚܰܫܳܐ ܕܰܩܢܘܡܗ. ܣܰܓܝ ܫܠܳܡ.
ܥܶܢܝܳܢܳܐ ܡܳܪܝ ܫܰܦܝܪܳܐ ܕܡܶܫܬܰܡܰܪ ܒܬܰܦ̈ܐ ܕܚܘܒܳܐ ܠܝܕܰܥܬܳܐ. ܘܰܠܡܶܬܰܠ ܦܺܐܪ̈ܐ ܐܰܝܠܶܝܢ ܕܥܰܠ ܙܰܪ̈ܥܰܝ ܟܬܝ̈ܒܳܬܳܐ ܐܳܬܝ̈ܢ: ܐܰܝܟ ܕܳܫܢ̈ܐ ܕܒܘܣܳܡܳܐ ܠܟܰܦܢܘܬܳܗ̇ ܕܢܰܦܫܳܐ. ܗܳܟܰܢܳܐ ܡܶܫܬܟܰܚ ܘܦܳܬܘܪܐ ܠܗܰܘ ܐܰܝܢܳܐ ܕܰܟܦܶܢ ܟܰܕ ܡܠܶܐ ܛܥܘ̈ܡܶܐ ܗܰܢܺܝ̈ܐܐ ܘܣܳܦܳܐ ܡܶܢܗ ܣܰܒܥܘܬܳܐ ܠܟܰܦܢܳܗ̇. ܗܳܟܰܢܳܐ ܐܶܫܬܟܰܚ ܠܰܒܨܺܝܪܘܬܰܢ ܥܶܢܝܳܢܟܘܢ ܡܰܘܬܪܳܢܐ. ܟܰܕ ܒܰܦܓܰܪ ܪܰܚܺܝܩܝܢܰܢ ܡܶܢ ܠܘܳܬܟܘܢ ܒܰܐܬܪܳܐ ܗܳܢܳܐ ܕܒܗ ܥܳܡܪܝܢܰܢ. ܘܗܺܝ ܗܳܕܶܐ ܩܰܪܝܒܽܘܬܳܗ̇ ܕܥܶܢܝܳܢܟܽܘܢ ܫܰܦܝܪܳܐ ܘܡܰܘܬܪܳܢܘܬܟܘܢ ܐܰܠܳܗܳܝܬܳܐ ܐܶܬܬܣܺܝܡ ܓܶܝܪ ܪܶܚܡܬܳܟ ܐܰܠܳܗܳܝܬܳܐ ܒܪܶܥܝܳܢܰܢ ܐܳܘ ܡܰܠܦܳܢܳܐ ܚܰܟܝܡܳܐ ܐܰܝܟ ܫܰܒܛܶܗ ܕܰܐܗܪܘܢ ܗܰܘ ܕܰܒܦܘܩܕܳܢܳܐ ܐܰܠܗܳܝܳܐ: ܥܒܰܪ ܡܶܢ ܝܰܒܺܝܫܘܬܳܐ ܠܪܰܛܺܝܒܽܘܬܳܐ. ܟܰܕ ܡܰܦܪܰܥ ܒܬܶܕܡܘܪܬܳܐ ܠܐ ܡܶܬܕܰܪܟܳܢܺܝܬܳܐ. ܗܳܐ ܓܶܝܪ ܡܰܟܺܝܟܳܐܝܬ ܥܘܗܕܳܢܟܽܘܢ ܠܬܰܪܥܺܝܬܰܢ܆ ܐܰܝܟ ܗܳܝ ܟܺܐܦܳܐ ܐܪܳܙܳܢܳܝܬܳܐ ܠܫܰܒ̈ܛܶܐ ܝܺܣܰܪ̈ܠܳܝܐ. ܟܡܳܐ ܗܳܟܺܝܠ ܝܰܬܝܪܳܐܝܬ ܥܶܢܝܳܢܳܐ ܕܡܰܠܦܳܢܘܬܳܐ ܗܳܝ ܥܰܡܺܝܩܬܳܐ ܒܣܶܦܪ̈ܐ ܕܪܘܚܳܐ ܩܰܕܝܫܳܐ ܢܺܐܢܰܩ ܚܰܠܒܳܐ ܪܘܚܳܢܳܝܐ ܠܐܝܠܶܝܢ ܕܚܰܒܺܝܒܳܐܝܬ ܦܳܓܥܺܝܢ ܒܰܫܟܳܚ̈ܬܗ ܡܫܰܝ̈ܢܢܝܬܳܐ. ܗܳܠܶܝܢ ܕܶܝܢ ܐܳܘ ܩܰܕܝܫܳܐ ܘܰܣܒܺܝܣ ܒܟܠ ܫܘܦܪ̈ܺܝܢ ܟܶܬܒܶܬ ܠܚܘܒܳܟ: ܕܰܚܙܺܝܬܟ ܕܰܐܟܡܳܐ ܕܟܽܠܗܽܘܢ ܩܰܕܝ̈ܫܶܐ ܘܡܰܠܦܳܢ̈ܐ ܡܶܢ ܗܰܘ ܪܶܕܝܳܐ ܕܪܘܚܳܐ ܡܬܰܩܬ ܘܶܐܫܬܺܝܬ ܘܗܳܐ ܐܳܦ ܠܐܚܪ̈ܳܢܐ ܡܰܫܩܶܐ ܐܰܢܬ. ܡܶܢ ܡܰܪܕܺܝܬܳܐ ܕܪܘܚܳܐ ܩܰܕܝܫܳܐ. ܘܫܳܐܶܠ ܐܢܳܐ ܕܳܐܦ ܠܝ ܬܰܫܩܶܐ ܘܠܐܚܪ̈ܳܢܶܐ ܬܰܡܝ̈ܡܶܐ ܕܥܰܡܝ ܒܰܛܝܳܪܐ ܗܳܢܳܐ ܡܕܰܝܪܝܢ ܥܰܠ ܣܰܒܪܗ ܕܰܐܠܳܗܳܐ ܓܳܠܶܐ ܥܰܡܝ̈ܩܳܬܗ ܠܪ̈ܳܚܡܰܘܗܝ. ܗܳܢܰܘ ܕܶܝܢ ܕܬܶܥܡܰܠ ܥܰܠ ܚܰܝܠܗ ܕܦܰܪܩܠܝܛܳܐ ܡܚܰܟܡܳܢܳܟ. ܘܰܬܦܰܫܶܩ ܠܰܢ ܬܶܫܒ̈ܚܳܬܗ ܕܛܘܒܳܢܳܐ ܕܰܘܺܝܕ ܡܙܰܡܪܳܢܐ ܘܩܺܝܬܳܪܘܕܳܐ ܐܰܠܳܗܝܳܐ. ܘܒܳܥܶܐ ܐܢܳܐ ܘܰܡܦܺܝܣ ܐܢܳܐ ܥܰܡ ܟܠܗܘܢ ܬܰܡܺܝ̈ܡܶܐ ܕܥܰܡܝ܆ ܕܬܶܬܡܰܠܐ ܫܶܐܠܬܰܢ ܘܨܰܗܝܘܬܰܢ ܬܶܬܦܰܝܰܓ ܡܶܢ ܡܰܒܘܥܳܟ. ܝܳܕܰܥ ܐܢܳܐ ܓܶܝܪ ܘܐܰܕܪܟܶܬ ܕܳܐܦ ܐܢܰܬ ܡܬܰܩܬ ܡܶܢ ܗܰܘ ܫܶܩܝܳܐ ܫܡܰܝܳܢܐ. ܐܰܝܟ ܡܶܠܬܳܐ ܐܰܠܳܗܳܝܬܳܐ ܕܡܰܙܥܩܳܐ: ܢܰܗܪ̈ܘܳܬܳܐ ܕܡܰܝ̈ܐ ܚܰܝܷ̈ܐ ܪܳܕܶܝܢ ܡܶܢ ܟܰܪܣܳܟ. ܡܶܟܝܠ ܐܶܬܬܦܺܝܣ ܡܳܪܝ ܘܩܰܒܶܠ ܡ̈ܠܐ ܕܰܡܚܺܝܠܘܬܝ ܘܠܐ ܬܟܽܘܡ ܥܰܠ ܣܺܝܡܬܳܐ ܕܶܐܬܓܰܥܠܰܬ ܠܳܟ ܘܬܶܗܘܶܐ ܛܳܠܘܡܳܐ ܐܰܝܟ ܥܰܒܕܳܐ ܒܺܝܫܳܐ ܕܛܰܫܝ ܟܰܟܪܳܐ ܕܡܳܪܶܗ ܘܰܫܡܰܥ ܒܰܪܬ ܩܳܠܳܐ ܗܳܝ ܙܥܺܝܦܬܳܐ: ܐܶܠܳܐ ܢܶܬܒܛܶܠ ܠܳܟ ܕܬܶܥܒܶܕ ܡܶܢ ܚܰܡܫܳܐ ܥܶܣܪܐ. ܘܬܶܫܬܰܘܫܰܛ ܠܳܟ ܐܳܘ ܚܠܝܡܬܳܐ ܕܳܐܘ ܥܰܒܕܳܐ ܡܗܰܝܡܢܳܐ ܘܛܳܒܳܐ ܕܥܰܠ ܩܰܠܝܠ ܡܗܰܝܡܰܢ ܗܘܰܝܬ: ܥܰܠ ܣܰܓܝ ܐܰܩܝܡܳܟ܆ ܥܽܘܠ ܠܚܰܕܘܬܗ ܕܡܳܪܳܟ. ܟܰܕ ܗܳܟܺܝܠ ܚܳܐܪ ܐܰܢܬ ܠܗܰܘ ܦܳܪܘܥܳܐ ܕܛܳܒ̈ܬܳܐ. ܗܽܘ ܕܶܝܢ ܪܘܚܳܐ ܩܰܕܝܫܳܐ ܠܝܕܰܥܬܳܟ ܡܫܰܡܠܰܝܬܳܐ ܡܳܪܶܩ ܘܡܰܥܬܰܪ ܘܚܳܨܶܕ ܐܰܢܬ ܡܰܠܝܳܐܝܬ ܕܠܳܐ ܩܶܢܛܳܐ. ܘܰܬܨܰܠܐ ܪܰܒܘܬܳܟ ܥܰܠ ܒܨܺܝܪܘܬܰܢ ܐܰܝܟ ܕܰܐܡܝ̣ܪ ܒܰܟܬܳܒܳܐ ܕܪܘܚܳܐ ܕܪܰܒ ܗܽܘ ܚܰܝܠܳܗ̇ ܕܰܨܠܘܬܳܐ ܐܰܝܕܳܐ ܕܙܰܕܝܩܳܐ ܡܨܰܠܶܐ ܠܳܗ̇. ܘܪܘܚܳܐ ܩܰܕܝܫܳܐ ܢܶܬܶܠ ܠܳܟ ܕܰܬܫܰܪܶܐ ܘܰܬܫܰܠܶܡ ܒܰܥܒܳܕܐ ܡܰܘܬܪܳܢܐ ܒܰܨܠܘܬܳܐ ܕܟܠܗܘܢ ܩܰܕܝ̈ܫܶܐ ܐܡܝܢ܀
ܘܰܚܢܰܢ ܘܟܽܠܗܘܢ ܕܥܰܡܰܢ ܩܰܫܝ̈ܫܶܐ ܘܰܡܫܰܡ̈ܫܳܢܶܐ: ܡܠܺܝܠܳܐ ܘܰܫܡܳܐ ܦܰܐܝܳܐ ܕܰܐܚ̈ܐ ܕܥܰܡܰܢ ܫܳܐܠܝܢܰܢ ܫܠܳܡܳܟ ܒܡܳܪܰܢ ܕܢܶܬܶܠ ܠܳܟ ܕܰܬܫܰܪܶܐ ܘܰܬܫܰܠܶܡ ܒܗܳܢܳܐ ܦܘܠܚܳܢܐ. ܩܘܠܳܣܳܐ ܠܰܫܡܗ ܕܡܳܪܳܟ. ܕܢܶܬܶܠ ܐܰܓܪܳܐ ܠܚܶܟܡܬܳܟ ܕܰܢܡܰܕܶܟ ܝܺܕܰܥܬܳܐ ܒܚܰܝܠܳܐ ܕܐܪ̈ܳܙܶܐ ܟܣܰܝܴ̈ܐ ܘܰܐܠܳܗܳܝ̈ܐ܆ ܟܰܕ ܢܛܝܪ ܐܰܢܬ ܡܶܢ ܟܽܠܗܘܢ ܦܰܚܰܘ̈ܗܝ ܕܒܝܫܳܐ. ܐܳܘ ܪܝܫܳܐ ܪܰܒܳܐ ܘܪܳܚܡܳܐ ܕܰܐܠܳܗܳܐ ܗܘܺܝ ܚܠܝ̣ܡ܀
ܫܶܠܡܰܬ ܐܶܓܰܪܬܳܐ ܕܰܦܝܳܣܳܐ ܕܝܘܚܰܢܢ ܩܰܫܝܫܳܐ ܕܰܠܘܳܬ ܕܳܢܝܐܝܠ ܩܰܫܝܫܐ܀
ܐܓܪܬܐ ܕܦܘܢܝܐ
ܕܰܥܒܰܕ ܕܳܢܝܐܝܠ ܩܰܫܝܫܳܐ ܠܚܰܣܝܳܐ ܡܳܪܝ ܝܘܚܰܢܢ ܪܝܫܕܰܝܪܐ ܡܶܛܠ ܦܘܫܳܩܳܐ ܕܡܰܙܡܘܪ̈ܐ.
ܠܪܰܒܐ ܘܰܡܠܶܐ ܛܘ̈ܒܐ ܐܰܒܳܐ ܣܰܓܝ ܢܶܨܚܳܢ̈ܐ ܘܰܓܡܺܝܪ ܒܰܐܠܳܗܝ̈ܬܳܐ ܘܰܡܫܰܡܠܰܝ ܒܟܠ ܫܘܦܪ̈ܺܝܢ ܪ̈ܘܚܳܢܶܐ ܘܰܐܘܳܢܳܐ ܕܕܶܚܠܰܬ ܐܰܠܳܗܳܐ ܡܳܪܝ ܝܘܚܰܢܢ ܩܰܫܝܫܳܐ ܘܪܝܫ ܕܰܝܪܳܐ ܕܥܘܡܪܳܐ ܕܡܳܪܝ ܐܘܒܘܣ ܕܟܰܦܪܐ ܕܒܺܝܪܬܳܐ. ܕܳܢܝܐܝܠ ܒܨܺܝܪܳܐ ܡܰܚܒܳܢܳܟ ܒܡܳܪܰܢ ܫܠܳܡ.
ܟܬܝ̈ܒܳܬܳܐ ܕܰܓܡܺܝܪܘܬܳܟ ܐܳܘ ܐܰܒܳܐ ܪܘܚܳܢܳܐ ܗܳܠܶܝܢ ܕܰܟܬܰܒܬ ܠܘܳܬ ܒܨܺܝܪܘܬܝ ܩܰܒܠܶܬ ܘܰܚܠܳܦ ܗܳܠܶܝܢ ܐܶܬܚܰܦܛܶܬ ܕܕܳܫܢ̈ܐ ܕܫܽܘܒܚܳܐ ܐܶܩܰܪܶܒ ܠܰܐܠܳܗܳܐ ܕܰܐܫܘܝܰܢܝ ܠܝ ܠܰܒܨܺܝܪܽܘܬܝ ܕܰܐܝܟ ܗܳܠܶܝܢ ܕܬܶܣܰܒ ܥܠܰܝ ܕܶܚܠܰܬ ܐܰܠܳܗܳܐ ܕܒܳܟ܆ ܘܟܰܕ ܠܟܽܠ ܓܰܒ̈ܝܢ ܦܪܰܚܘ ܚܽܘ̈ܫܳܒܰܝ ܡܚܺܝ̈ܠܐ܆ ܕܢܶܫܟܚܽܘܢ ܡܶܕܶܡ ܕܫܳܘܶܐ ܕܰܢܩܰܪܒܘܢ ܠܙܰܗܝܽܘܬܶܗ ܠܦܘܪܥܳܢܳܐ ܕܚܽܘܒܳܟ ܕܰܠܘܳܬܰܢ: ܗܰܘ ܕܰܒܚܘܒܗ ܓܡܺܝܪܳܐ ܦܳܪܰܥ ܠܩܰܕܝ̈ܫܶܐ ܥܰܡ̈ܠܐ ܕܕܘܒܳܪ̈ܝܗܘܢ. ܘܠܰܝܬ ܐܺܝܕܳܐ ܕܣܳܦܩܳܐ ܠܡܶܐܚܰܕ ܡܰܘܗܰܒܬܳܐ ܕܡܰܦܢܝܳܐ ܠܳܟ ܐܰܓܪܳܐ ܕܚܘܒܳܟ ܕܨܶܐܕܰܝܢ. ܐܶܠܳܐ ܗܳܝ ܐܝ̣ܕܳܐ ܐܰܠܳܗܳܝܬܳܐ ܕܛܰܦܚܰܬ ܠܰܫܡܰܝܐ ܒܰܠܚܘܕܶܝܗ̇. ܘܟܰܕ ܐܶܬܳܬ ܠܪܘܟܳܒܳܐ ܐܢܳܫܳܝܳܐ܆ ܘܐܶܣܬܰܟܟܰܬ ܒܨ̈ܨܶܐ ܥܰܠ ܨܠܝܒܳܐ ܦܳܪܘܩܳܝܳܐ: ܐܶܢܳܐ ܓܶܝܪ ܟܰܕ ܒܶܐܓܰܪܬܳܟ ܡܥܰܠܰܝܬܳܐ ܚܳܐܰܪ ܐܢܳܐ܆ ܘܰܠܘܳܬ ܬܰܚܘܒܘܬܳܗ̇ ܕܢܰܦܫܝ̱ ܡܶܬܦܢܶܐ ܐܢܳܐ܆ ܐܰܝܟ ܗܰܘ ܪܰܒܳܐ ܕܰܘܺܝܕ ܕܩܳܥܶܐ ܗܘܳܐ ܘܳܐܡܰܪ: ܕܡܰܢ ܐܢܳܐ ܡܳܪܝܳܐ ܐܠܗܐ ܕܡܰܛܝܬܳܢܝ ܥܕܰܡܳܐ ܠܗܳܪܟܳܐ. ܡܰܙܥܶܩ ܐܢܳܐ ܠܘܳܬܳܟ ܣܳܒܐ ܡܒܰܪܟܳܐ ܘܳܐܡܰܪ ܐܢܳܐ: ܕܡܰܢ ܐܢܳܐ ܘܡܳܢܳܐ ܗܝ ܝܺܕܰܥܬܝ ܘܡܳܢܳܐ ܐܶܢܘܢ ܚܰܘܪܳܐ ܕܚܽܘ̈ܫܳܒܰܝ؟
ܘܰܥܕܰܡܳܐ ܠܗܳܢܐ ܪܰܘܡܳܐ ܥܰܠܺܝ ܘܰܐܣܶܩ ܐܰܩܺܝܡܰܢܝ ܚܘܒܳܟ: ܝܳܕܰܥ ܐܢܳܐ ܓܶܝܪ: ܝܳܕܥ ܐܢܳܐ ܕܟܰܕ ܛܳܒ ܥܰܠ ܥܰܦܪܳܐ ܡܶܬܓܰܪܓܰܚ ܐܢܳܐ. ܐܶܠܐ ܐܶܓܰܪܬܟ ܠܥܶܠ ܡܶܢ ܥܢ̈ܢܶܐ ܕܰܫܡܰܝܳܐ ܦܳܩܕܳܐ ܐܬܥܰܠܐ܆ ܘܒܰܝܢܳܬ ܟܽܘ̈ܒܶܐ ܡܗܰܕܝܳܐ ܠܝ ܐܶܦܣܰܥ: ܠܰܡܕܝܢܬܳܐ ܕܡܰܠܟܳܐ ܪܰܒܳܐ ܕܒܰܢܝܳܐ ܒܰܫܦܘ̈ܠܰܝ ܓܰܪܒܝܳܐ ܪܳܡܙܳܐ ܠܝ ܐܶܬܥܰܠܐ. ܘܶܐܥܽܘܠ ܐܶܡܘܫ ܓܰܙ̈ܐ ܣܒܺܝ̈ܣܰܝ ܒܟܽܠ ܥܘܬܪ̈ܺܝܢ ܡܚܰܦܛܳܐ ܠܝ. ܘܗܳܐ ܩܳܐܶܡ ܐܢܳܐ ܒܶܝܬ ܕܶܚܠܬܳܐ ܠܚܘܒܳܐ: ܘܠܳܐ ܚܳܙܶܐ ܠܝ ܡܰܪܳܚܳܐ ܘܛܳܠܘܡܳܐ ܟܰܕ ܥܰܠ ܣܰܒܪܳܐ ܕܰܐܠܳܗܳܐ ܝܳܗܶܒ ܐܢܳܐ ܢܰܦܫܝ ܕܰܐܙܺܝܥ ܐܶܠܦܳܐ ܕܚܽܘ̈ܫܳܒܰܝ ܒܡܰܪܕܺܝܬܶܗ ܕܝܰܡܳܐ ܗܳܢܳܐ ܪܰܒܳܐ ܘܰܪܘܝܚܳܐ܆ ܟܰܕ ܫܳܐܠ ܐܢܳܐ ܡܶܢ ܪܰܒܘܬܳܟ ܘܡܶܢ ܩܰܕܝ̈ܫܶܐ ܕܥܰܡܳܟ ܕܢܶܗܘ̈ܝܳܢ ܠܝ ܨܠܰܘ̈ܬܳܟ ܣܰܘܟܳܢ̈ܐ ܘܠܺܝ̈ܩܶܐ ܒܰܝܢܳܬ ܓ̈ܠܠܐ ܕܡܶܬܬܙܺܝܥܺܝܢ ܒܺܝ ܕܦܘܫ̈ܩܶܐ ܪ̈ܘܚܳܢܶܐ ܕܬܶܫܒܚ̈ܬܗ ܕܗܰܘ ܕܰܗܘܳܐ ܠܶܫܳܢܗ ܩܰܢܝܳܐ ܕܣܳܦܪܳܐ ܡܗܺܝܪܐ: ܕܠܳܐ ܢܶܫܠܐ ܪܘܚܳܐ ܩܰܕܝܫܳܐ ܡܶܢ ܕܢܶܡܠܐ ܡܰܫ̈ܒܶܐ ܠܐܪܡܶܢܘܢ ܕܢܰܦܫܝ̱: ܥܕܰܡܳܐ ܕܣܳܡܟܳܐ ܠܘܰܥܕܳܐ ܕܰܠܡܺܐܢܳܐ. ܐܶܢܳܐ ܓܶܝܪ ܟܰܕ ܠܝܰܡܳܐ ܗܳܢܳܐ ܡܶܫܚܶܬ ܣܰܓܝ ܐܶܫܟܰܚܬܗ ܕܥܳܒܰܪ ܠܡܰܘܒܠܳܐ ܕܝܠܝ̱ ܙܥܽܘܪܬܳܐ. ܡܶܛܠ ܗܳܢܳܐ ܒܰܐܓܡܳܐ ܪܰܒܳܐ ܐܰܩܝܡܽܘܢܝ ܚܽܘ̈ܫܳܒܰܝ ܕܶܐܫܠܐ ܡܶܢ ܪܶܕܝܗ. ܘܐܶܦܽܘܫ ܡܶܢ ܐܘܪܚܳܐ. ܘܟܰܕ ܕܶܝܢ ܡܶܬܬܕܝܢ ܐܢܳܐ ܡܶܢ ܢܰܦܫܝ̱ ܠܡܶܫܬܰܩ: ܩܰܪܢܳܐ ܐܰܠܳܗܳܝܬܳܐ ܕܶܐܓܰܪܬܟ ܐܰܙܥܩܰܬ ܒܶܐܕ̈ܢܰܝ ܢܰܦܫܝ܆ ܕܠܐ ܐܶܢܽܘܡ ܘܠܐ ܐܶܕܡܰܟ ܘܠܐ ܐܶܫܠܐܷ. ܟܰܕ ܒܰܙܒܰܢ ܡܳܢܝܳܐ ܠܝ ܥܰܡ ܩܰܕܝ̈ܫܶܐ܆ ܗܳܕܶܐ ܕܛܳܒ ܡܰܒܥܰܕ ܐܢܳܐ ܡܶܢܗ. ܬܘܒ ܕܶܝܢ ܚܒܰܢܳܢܳܐ ܕܛܰܫܺܝ ܡܶܢܝ ܥܣܰܪ ܟܰܟܪ̈ܶܐ ܚܠܳܦ ܚܰܡܶܫ܆ ܟܰܕ ܛܳܒ ܘܠܐ ܠܰܡܫܽܘܚܬܳܐ ܕܗܰܘ ܕܰܐܝܬܝ ܐܰܪܒܰܥ ܚܠܳܦ ܬܰܪܬܶܝܢ ܐܶܬܡܰܛܺܝܬ ܡܗܰܝܡܢ ܐܢܳܐ ܕܶܝܢ ܒܡܳܪܝܳܐ܆ ܕܶܐܢ ܨܠܘܬܳܟ ܡܶܬܠܰܘܝܳܐ ܠܝ ܟܽܠܗܶܝܢ ܗܳܠܶܝܢ ܕܡܶܣܬܰܒܪ̈ܢ ܕܥܰܣ̈ܩܳܢ ܠܝ ܦܫܝ̈ܩܳܬܳܐ ܘܰܕܠܺܝ̈ܠܳܬܳܐ ܗܳܘ̈ܝܢ ܠܝ. ܘܰܐܬܪܐ ܥܰܣܩܳܐ ܠܰܦܩܰܥܬܳܐ ܡܶܫܬܰܚܠܰܦ. ܘܥܰܪܡܳܐ ܡܶܬܪܰܟܟ ܘܡܶܫܬܰܦܶܐ ܘܰܫܩܝ̈ܦܶܐ ܗܳܘ̈ܝܳܢ ܣܶܬܳܪܐ ܠܰܚܓܳܣ̈ܐ. ܘܛܘܪ̈ܶܐ ܗܳܘܶܝܢ ܡܰܥܡܪܳܐ ܠܕܰܝ̈ܨܐ ܘܰܠܕܰܝ̈ܨܳܬܳܐ. ܘܗܳܠܶܝܢ ܡܳܐ ܕܰܐܡܛܪܰܬ ܠܝ ܒܳܥܘܬܳܟ܆ ܠܰܚܡܳܐ ܡܶܢ ܫܡܰܝܳܐ ܐܶܟܠܶܬ ܡܶܢ ܠܰܚܡܳܐ ܕܡܰܠܐܟ̈ܐ. ܠܐ ܓܶܝܪ ܐܶܫܟܰܚ ܥܰܡܳܐ ܝܣܰܪܠܳܝܐ ܕܰܢܩܰܒܶܠ ܠܚܶܙܘ̈ܐ ܫܡܰܝ̈ܢܶܐ ܥܕܰܡܳܐ ܕܶܐܬܬܪܣܝ ܡܶܢ ܡܰܢܢܳܐ ܕܰܐܡܛܰܪ ܠܗܘܢ ܐܰܠܳܗܳܐ ܒܰܨܠܘܬܗ ܕܡܘܫܶܐ. ܟܰܕ ܕܶܝܢ ܐܶܬܒܰܣܰܡܘ ܡܶܢ ܠܰܚܡܳܐ ܗܰܘ ܓܰܐܝܳܐ܆ ܐܶܬܕܟܝܰܬ ܟܰܪܣܳܐ ܕܢܰܦܫܗܘܢ ܡܶܢ ܥܘܗܕܳܢ̈ܐ ܫܓܝ̈ܫܶܐ ܕܡܶܨܪ̈ܝܶܐ. ܘܰܐܝܟ ܢܘܪܳܐ ܡܶܬܚܰܘܶܐ ܗܘܳܐ ܠܗܘܢ ܐܰܠܳܗܳܐ ܐܰܝܟ ܕܰܢܬܽܘܒ. ܡܳܢܳܐ ܓܶܝܪ ܐܳܡܰܪ ܐܢܳܐ ܗܳܝ ܪܰܥܡܳܐ ܒܰܠܚܽܘܕ ܐܰܝܟܳܐ ܕܐܝܬ ܠܡܶܚܙܳܐ. ܕܳܐܦܠܐ ܐܠܝܳܐ ܢܒܺܝܳܐ ܐܶܫܬܘܝ ܠܡܶܚܙܳܐ ܚܶܙܘܳܐ ܗܰܘ ܪܰܒܳܐ ܕܒܰܡܥܰܪܬܳܐ ܥܕܰܡܳܐ ܕܰܛܥܶܡ ܠܰܚܡܳܐ ܡܰܠܐܟܳܝܐ. ܟܰܕ ܓܶܝܪ ܐܶܚܰܕ ܐܘܪܚܳܐ ܕܰܠܚܘܪܒܳܐ ܢܺܐܙܰܠ ܡܰܠܐܟܳܐ ܕܰܐܠܳܗܐ ܡܩܰܪܶܒ ܗܘܳܐ ܠܶܗ ܚܳܚܘܪܬܳܐ ܘܩܘܩܬܳܐ ܕܡܰܝܴ̈ܐ. ܗܳܟܰܢܳܐ ܬܘܒ ܐܳܦ ܚܰܙܩܝܐܝܠ ܗܰܘ ܪܰܒܳܐ ܕܰܢܒܝ̈ܐ܆ ܐܝ̣ܕܳܐ ܕܰܐܚܺܝܕܳܐ ܟܶܪܟܳܐ ܠܘܳܬܗ ܡܶܬܦܰܫܛܳܐ ܗܘܳܬ ܡܶܢ ܡܰܪܟܰܒܬܳܐ ܗܳܝ ܕܰܚܙܳܐ ܒܬܰܪܥܳܐ ܕܰܫܡܰܝܳܐ܆ ܘܰܠܗܳܢܳܐ ܟܰܕ ܐܶܟܰܠ܆ ܐܶܬܢܣܟܰܬ ܪܘܚܳܐ ܒܟܰܪܣܶܗ܆ ܘܶܐܬܡܠܝܘ ܡܥܰܝܴ̈ܐ ܕܢܰܦܫܗ. ܐܪ̈ܳܙܶܐ ܩܰܕܝ̈ܫܶܐ ܐܳܦ ܥܠܰܝܢ ܬܨܰܠܐܷ ܩܰܕܝܫܘܬܳܟ ܕܠܗܰܘ ܠܰܚܡܳܐ ܡܰܠܐܟܳܝܳܐ ܒܰܡܢܳܬܳܐ ܢܶܫܬܘܶܐ ܡܶܛܠܬܟ. ܘܗܳܠܶܝܢ ܢܰܗܪ̈ܘܳܬܳܐ ܕܶܐܬܢܰܒܝܰܬ ܠܝ ܐܶܓܰܪܬܟ ܢܶܪܕܘܢ ܫܦܺܝܥܳܐܝܬ ܡܶܢ ܟܰܪܣܳܗ̇ ܕܢܰܦܫܝ̱. ܘܗܳܐ ܡܫܰܪܶܐ ܐܢܳܐ ܠܰܡܦܰܫܳܩܽܘ ܙܡܺܝܪ̈ܬܗ ܕܛܘܒܳܢܳܐ ܕܰܘܺܝܕ ܐܶܢ ܝܳܗܒ ܡܫܝܚܳܐ. ܬܶܗܘܶܐ ܝܳܕܥܳܐ ܚܰܣܝܘܬܳܟ ܕܚܰܝܠܳܐ ܕܰܟܬܳܒܳܐ ܗܳܢܳܐ ܕܡܰܙܡܘܪܳܐ ܥܰܡ ܟܬܳܒ̈ܐ ܕܕܺܝܰܬܩܝ ܚܕܰܬܳܐ ܘܥܰܬܝܩܬܳܐ ܡܶܬܦܰܚܰܡ. ܥܰܠ ܟܠ ܡܶܕܶܡ ܓܶܝܪ ܗܶܢܘܢ ܡܡܰܠܠܝܢ ܘܥܰܠ ܒܶܪ̈ܝܳܬܳܐ ܘܥܰܠ ܒܛܺܝܠܘܬܐ ܕܰܐܠܳܗܐ. ܘܥܰܠ ܕܺܝܢܳܐ ܕܰܥܬܺܝܕ ܘܥܰܠ ܡܰܠܟܽܘܬܳܐ ܕܰܡܛܰܝܒܳܐ ܠܩܰܕܝ̈ܫܶܐ. ܡܶܛܠ ܕܠܰܘ ܟܽܠܗܘܢ ܦܶܬܓܳܡ̈ܐ ܕܡܰܙܡܘܪ̈ܐ ܣܢܺܝܩܺܝܢ ܥܰܠ ܦܘܫܳܩܳܐ ܫܳܐܶܠ ܐܢܳܐ ܕܠܐ ܐܶܬܬܒܰܥ ܡܶܢ ܗܢܘܢ ܕܩܳܪܝܢ ܕܬܶܐܘܪ̈ܝܰܐܣ ܐܶܬܶܠ ܠܟܽܠ ܦܶܬܓܳܡܳܐ. ܐܝܬ ܐܰܝܟܳܐ ܕܰܡܨܰܠܳܝܽܘ ܡܨܰܠܐ ܡܙܰܡܪܳܢܐ. ܘܐܝܬ ܐܰܝܟܳܐ ܕܡܰܠܦܳܢܳܐܝܬ ܡܙܰܡܰܪ. ܘܗܳܠܶܝܢ ܠܐ ܣܢܺܝܩܝܢ ܥܰܠ ܦܘܫܳܩܳܐ. ܢܺܝܫܳܐ ܓܶܝܪ ܗܳܢܳܐ ܣܺܝܡ ܠܝ܆ ܕܠܐ ܣܢܺܝܩ ܥܰܠ ܦܘܫܳܩܳܐ ܥܰܡܝܩܳܐ ܒܟܽܠ ܦܪܽܘܣ ܓܶܝܪ ܡܶܬܒܰܥܝܳܐ ܗܳܕܶܐ. ܕܢܶܬܬܰܓܰܪ ܝܘܬܪܳܢܳܐ ܕܢܰܦܫܳܐ ܘܥܰܠ ܗܳܕܶܐ ܐܳܠܨܳܐ. ܘܟܰܕ ܗܳܠܶܝܢ ܟܶܬܒܶܬ ܒܫܘܪܳܝܳܐ ܕܬܰܫܥܺܝܬܰܢ ܠܚܽܘܒܟܽܘܢ܆ ܠܰܦܝܳܣܳܐ ܫܰܪܝܪܳܐ ܕܬܰܪܥܺܝܬܟܘܢ ܢܶܬܬܦܺܝܣ ܗܰܘ ܕܩܳܪܶܐ܆ ܕܠܰܘ ܡܶܢ ܨܶܒܝܳܢܐ ܕܢܰܦܫܰܢ ܐܶܬܰܝܢܰܢ ܠܥܰܡܠܳܐ ܕܰܐܝܟ ܗܳܢܐ: ܐܶܠܐ ܡܶܢ ܚܦܺܝܛܘܬܳܐ ܘܰܫܩܳܠ ܛܰܥܢܳܐ ܕܚܽܘܒܟܽܘܢ܀
ܫܶܠܡܰܬ ܐܶܓܰܪܬܐ ܕܰܥܒܰܕ ܡܳܪܝ ܕܢܝܐܝܠ ܦܘܢܝܐ.
ܟܬܒܐ ܩܕܡܝܐ ܕܦܘܫܩܐ ܕܡܙܡܘܪ̈ܐ
ܡܺܐܡܪܐ ܩܰܕܡܳܝܳܐ ܕܰܐܡܝܪ ܠܪܳܚܶܡ ܐܰܠܳܗܐ ܡܳܪܝ ܕܳܢܺܝܐܝܠ ܡܰܠܦܳܢܳܐ ܕܡܶܢ ܬܶܠܴܐ ܥܰܠ ܡܰܙܡܽܘܪܳܐ ܩܰܕܡܳܝܐ.
ܐܰܝܠܶܝܢ ܕܰܪܓܺܝܓܺܝܢ ܠܛܘܒܳܐ ܕܡܶܬܝܗܶܒ ܡܶܢ ܪܘܚܳܐ ܩܰܕܝܫܳܐ܆ ܢܩܰܪܒܘܢ ܐܶܕܢܳܐ ܕܢܰܦܫܗܘܢ ܠܡܶܫܡܰܥ܆ ܕܰܠܡܰܢ ܐܶܬܝܗܶܒ ܒܝܰܕ ܡܙܰܡܪܳܢܐ ܐܰܠܳܗܳܝܳܐ ܕܰܘܝܕ. ܢܩܰܪܒܘܢ ܠܦܘܠܚܳܢܳܐ ܪܘܚܳܢܳܝܐ. ܗܰܘ ܕܰܢܬܰܦ ܠܘܳܬܗܘܢ ܨܶܒܝܳܢܗ ܕܰܐܠܳܗܐ. ܩܰܪܝܒܘܬܳܐ ܕܰܠܘܳܬ ܛܘܒܳܐ ܐܰܠܳܗܳܝܐ ܐܝܬܶܝܗ̇ ܡܶܬܪܰܚܩܳܢܘܬܳܐ ܡܶܢ ܥܒܴ̈ܕܶܐ ܕܥܰܘܠܐ. ܐܰܝܟܰܢܳܐ ܓܶܝܪ ܕܰܚܛܺܝܬܳܐ ܡܰܥܒܕܳܐ ܒܰܢ܆ ܗܳܟܰܢܳܐ ܒܝܰܕ ܪܶܓܬܳܐ ܕܛܽܘ̈ܒܶܐ ܫܡܰܝ̈ܢܶܐ ܡܶܬܪܰܚܩܝܢܰܢ ܡܶܢ ܘܳܝܷ̈ܐ ܥܰܘܠܳܝ̈ܐ. ܕܢܶܗܘܶܐ ܐܢܳܫ ܒܛܽܘ̈ܒܶܐ ܦܘܪܣܳܐ ܠܐ ܐܺܝܬ. ܐܶܠܐ ܡܳܐ ܕܰܥܪܰܩ ܡܶܢ ܦܘܠܚܳܢܳܐ ܕܢܰܩܺܝܦ ܠܶܗ ܘܳܝܳܐ. ܡܶܛܠܗܳܢܳܐ ܛܘܒܳܢܳܐ ܕܰܘܺܝܕ ܗܰܘ ܕܝܳܕܰܥ ܗܘܳܐ ܠܛܘ̈ܒܶܐ ܐܰܠܳܗܳܝܷ̈ܐ ܒܝܰܕ ܓܶܠܝܳܢ̈ܐ ܕܪܘܚܳܐ ܩܰܕܝܫܳܐ ܕܩܰܒܶܠ ܒܢܰܦܫܶܗ ܘܰܡܦܳܣ ܗܘܳܐ ܕܶܝܢ ܒܰܡܣܳܡ ܒܪ̈ܝܫܶܐ ܕܳܐܬܶܝܢ ܥܰܠ ܥܳܒ̈ܕܰܝ ܥܰܘܠܐ ܒܕܺܝܢܳܐ ܟܺܐܢܳܐ. ܗܳܢܳܐ ܓܶܝܪ ܡܰܙܡܘܪܳܐ ܡܶܬܐܶܡܰܪ ܡܶܢ ܐܰܝܠܶܝܢ ܕܰܡܦܳܣܝܢ ܒܠܶܫܳܢܳܐ ܥܶܒܪܳܝܐ. ܟܰܕ ܐܶܙܰܠ ܫܳܐܘܳܠ ܕܢܰܣܶܩ ܒܙܳܟܘܪ̈ܶܐ ܠܰܫܡܽܘܐܝܠ܆ ܐܰܡܪܶܗ ܕܰܘܺܝܕ ܥܠܰܘܗܝ ܟܰܕ ܫܒܰܩ ܡܰܠܟܳܐ ܕܺܝܣܪܳܐܝܠ ܐܘܪܚܳܐ ܕܟܺܐܢܽܘܬܳܐ ܘܗܰܠܶܟ ܒܐܘܪܚܳܐ ܕܥܰܘ̈ܳܠܐܷ ܘܰܕܫܘܩܪܳܐ ܘܛܳܥܝܽܘܬܳܐ ܕܫܺܐܕ̈ܐ ܘܰܢܚܶܬ ܡܶܢ ܟܘܪܣܝܳܐ ܕܙܰܕܺܝܩܘܬܳܐ. ܘܺܝܬܶܒ ܥܰܠ ܡܰܘܬܒܳܐ ܕܰܐܢܬܬܳܐ ܗܳܝ ܕܡܰܣܩܳܐ ܙܰܟܘܪ̈ܶܐ ܒܥܰܕܘܳܥܺܝܪ. ܡܶܛܠܗܳܢܐ ܐܶܬܬܙܺܝܥ ܛܘܒܳܢܳܐ ܕܰܘܺܝܕ ܟܰܕ ܗܽܘ ܒܰܪܕܘܦܝܳܐ ܘܡܰܠܶܠ ܬܶܫܒܽܘܚܬܳܐ ܗܳܕܶܐ ܡܶܛܠ ܫܘܚܠܳܦܶܗ ܕܫܳܐܘܳܠ ܘܰܕܠܳܐ ܢܳܨܚܳܐ ܓܰܠܝܳܐܝܬ ܠܡܰܠܟܳܐ ܗܰܘ ܕܡܶܬܩܪܶܐ ܡܫܝܚܶܗ ܕܡܳܪܝܳܐ: ܩܳܥܶܐ ܗܘܳܐ ܟܰܕ ܡܙܰܡܰܪ:
ܛܘܒܰܘܗܝ ܠܓܰܒܪܳܐ ܕܒܽܐܘܪܚܳܐ ܕܥܰܘܴ̈ܠܐ ܠܐ ܗܰܠܶܟ. ܘܰܒܪܶܥܝܳܢܳܐ ܕܚܰܛܳܝܷ̈ܐ ܠܐ ܩܳܡ: ܘܥܰܠ ܡܰܘܬܒܳܐ ܕܰܡܡܰܝ̈ܩܳܢܶܐ ܠܐ ܝܺܬܶܒ. ܘܠܳܐ ܗܘܳܐ ܐܰܝܟ ܫܳܐܘܳܠ ܕܰܫܒܰܩ ܐܘܪܚܳܐ ܕܟܺܐܢܘܬܳܐ ܘܗܰܠܶܟ ܒܐܘܪܚܳܐ ܕܥܰܘ̈ܠܐܷ܆ ܗܳܝ ܕܰܩܕܳܡ ܙܰܒܢܳܐ ܐܰܣܠܝ ܘܒܰܛܶܠ ܘܰܫܒܰܩ ܥܶܢܝܳܢܳܐ ܕܰܢܒܺܝܷ̈ܐ ܡܡܰܠܠܰܝ̈ ܒܪܘܚܳܐ. ܘܩܳܡ ܒܪܶܥܝܳܢܳܐ ܡܰܚܛܝܳܢܳܐ ܗܳܢܰܘ ܕܰܐܫܰܪ ܠܫܺܐܕ̈ܐ ܕܰܣܠܶܩܘ ܡܶܢ ܐܰܪܥܳܐ ܕܡܶܬܢܰܒܝܢ ܠܶܗ ܡܶܕܶܡ ܕܰܥܬܺܝܕ ܠܡܶܗܘܳܐ ܠܗ. ܘܰܟܒܰܪ ܬܺܐܡܰܪ: ܕܠܰܘ ܫܺܐܕ̈ܐ ܗܘܰܘ. ܕܗܳܐ ܠܰܫܡܽܘܐܝܠ ܐܶܡܪܰܬ ܐܰܢܬܬܳܐ ܕܰܚܙܳܬ. ܒܪܰܡ ܫܡܰܥ ܘܠܳܐ ܬܰܫܰܪ ܐܳܘ ܦܳܪܘܫܳܐ ܚܰܟܝܡܳܐ: ܐܶܬܒܰܝܢ ܡܳܢܳܐ ܐܶܡܪܰܬ ܟܰܕ ܫܰܐܠܳܗ̇ ܗܘܳܐ ܫܳܐܘܳܠ: ܕܡܳܢܳܐ ܚܙܰܝܬܝ؟ ܐܶܡܪܰܬ ܕܶܝܢ ܕܰܐܠܳܗ̈ܐ ܚܙܺܝܬ ܕܣܳܠܩܺܝܢ ܡܶܢ ܐܰܪܥܳܐ (ܐ ܫܡܘܐܝܠ ܟܚ: ܝܓ). ܗܳܢܰܘ ܠܫܺܐܕ̈ܐ ܗܳܢܽܘܢ ܕܰܚܫܺܝܒܝܢ ܗܘܰܘ ܠܳܗ̇ ܐܰܠܳܗ̈ܐ ܘܣܳܓܕܳܐ ܠܗܽܘܢ. ܗܳܢܽܘܢ ܕܰܡܥܳܕܺܝܢ ܗܘܰܘ ܡܶܬܚܙܶܝܢ ܠܳܗ̇. ܘܰܡܕܰܓܠܐ ܒܗܳܢܽܘܢ ܕܛܳܥܶܝܢ ܒܳܬܪܳܗ̇. ܘܒܳܬܰܪܟܶܢ ܐܶܡܪܰܬ: ܕܓܰܒܪܳܐ ܣܳܒܳܐ ܣܳܠܶܩ ܘܰܡܥܰܛܰܦ ܒܰܦܪܺܝܣܳܐ (ܐ ܫܡܘܐܝܠ ܟܚ: ܝܕ). ܘܰܐܣܒܪ ܫܳܐܘܳܠ ܕܗܽܘܝܽܘ ܫܡܽܘܐܝܠ. ܘܟܰܕ ܗܰܘ ܫܺܐܕܳܐ ܕܰܣܠܶܩ ܢܰܛܥܶܐ ܒܫܳܐܘܳܠ ܐܶܫܬܰܚܠܰܦ ܠܚܶܙܘܳܐ ܕܰܢܒܺܝܳܐ ܕܰܢܕܰܓܶܠ ܒܡܰܠܟܳܐ ܗܰܘ ܚܰܛܳܝܳܐ. ܠܗܳܢܳܐ ܗܳܟܺܝܠ ܥܒܳܕܳܐ ܣܰܢܝܳܐ ܛܘܒܳܢܳܐ ܕܰܘܺܝܕ ܟܰܕ ܚܙܳܐ ܘܰܫܡܰܥ܆ ܝܰܗܒ ܛܘܒܳܐ ܠܓܰܒܪܳܐ ܕܠܳܐ ܡܗܰܠܶܟ ܒܐܘܪܚܳܐ ܒܺܝܫܬܳܐ ܕܥܰܘܴ̈ܠܐ. ܒܡܰܠܟܘܬܳܐ ܓܶܝܪ ܕܰܡܥܰܠܝܳܐ ܡܢ ܘܳܝܳܐ ܩܳܐܡ ܗܘܳܐ ܐܳܕܳܡ ܟܰܕ ܗܽܘ ܒܦܰܪܕܰܝܣܳܐ. ܘܟܰܕ ܐܰܣܛܝ ܗܰܠܟ̈ܬܶܗ ܡܶܢ ܐܘܪܚܳܐ ܢܰܗܺܝܪܬܳܐ܆ ܗܳܝ ܕܰܒܦܰܪܕܰܝܣܳܐ ܒܰܝܢܳܬ ܢܶܨܒ̈ܬܳܐ ܢܰܗܺܝܪ̈ܬܳܐ. ܒܬܰܘܫܳܐ ܕܠܳܐ ܐܘܪܚܳܐ ܢܦܰܩ ܠܘܳܬ ܣܝܳܓܳܐ ܒܰܪܳܝܳܐ ܕܦܰܪܕܰܝܣܳܐ ܘܰܗܘܳܐ ܬܰܠܡܺܝܕܳܐ ܠܚܶܘܝܳܐ ܒܡܶܠܟܳܗ̇ ܕܚܰܘܳܐ. ܐܰܝܟ ܕܳܐܦ ܫܳܐܘܳܠ ܗܘܳܐ ܥܰܒܕܳܐ ܠܙܰܟܽܘܪܳܐ ܡܰܛܥܝܳܢܳܐ܆ ܒܝܰܕ ܡܰܠܦܳܢܘܬܳܐ ܕܰܐܢܬܬܳܐ. ܗܰܘ ܡܰܢ ܩܰܕܡܳܝܳܐ ܢܦܰܠ ܡܶܢ ܓܰܢܬܳܐ ܕܚܰܝܷ̈ܐ܆ ܗܳܢܐ ܕܶܝܢ ܢܦܰܠ ܡܶܢ ܡܰܠܟܘܬܳܐ ܕܗܰܘ ܥܰܡܳܐ ܩܰܕܝܫܳܐ. ܗܳܠܶܝܢ ܬܰܪܬܶܝܢ ܬܶܐܘܳܪ̈ܺܝܰܐܣ ܥܰܠ ܗܳܢܳܐ ܡܰܙܡܘܪܳܐ ܩܰܕܡܳܝܳܐ ܢܣܰܒܢܰܢ. ܡܶܫܟܚܺܝܢܰܢ ܕܛܘܒܳܢܳܐ ܕܰܘܺܝܕ ܚܰܟܝܡܳܐܝܬ ܐܶܬܢܰܒܺܝ ܥܰܠ ܦܶܬܓܳܡ̈ܐ ܗܳܠܶܝܢ ܬܠܳܬܐ ܕܰܥܒܰܪܘ. ܗܳܝ ܓܶܝܪ ܕܛܘܒܰܘܗܝ ܠܓܰܒܪܳܐ ܕܒܽܐܘܪܚܳܐ ܕܥܰܘܴ̈ܠܶܐ ܠܐ ܗܰܠܶܟ ܡܶܬܓܰܡܪܳܐ ܡܳܐ ܕܬܳܟ̈ܣܳܢ ܪ̈ܶܓܠܶܐ ܕܢܰܦܫܳܐ ܡܶܢ ܗܶܠܟܬܳܐ ܕܦܳܠܚܱ̈ܝ ܥܰܘܠܐ. ܐܳܦ ܚܰܟܝܡܳܐ ܩܘܗܠܰܬ ܟܰܕ ܗܶܠܟܬܳܐ ܝܳܕܰܥ ܠܳܗ̇ ܠܢܰܦܫܳܐ ܐܳܡܰܪ ܗܘܳܐ: ܕܛܳܒ ܚܶܙܘܳܐ ܕܥܰܝ̈ܢܶܐ ܡܶܢ ܗܶܠܟܬܳܐ ܕܢܰܦܫܳܐ (ܩܘܗܠܬ ܘ: ܛ). ܗܰܘ ܕܶܝܢ ܕܩܳܐܶܡ ܒܪܶܥܝܳܢܳܐ ܕܚܰܛܳܝܷ̈ܐ܆ ܡܶܢ ܗܶܠܟܬܳܐ ܫܳܬܶܩ ܘܳܐܬܶܐ ܠܘܳܬ ܠܗܳܝ ܕܢܶܣܥܽܘܪ. ܘܗܰܘ ܕܝܳܬܶܒ ܥܰܠ ܡܰܘܬܒܳܐ ܕܰܡܡܰܝ̈ܩܳܢܶܐ܆ ܕܰܫܪܶܟ ܠܦܘܠܚܳܢܳܐ ܕܰܦܣܳܩ ܣܰܒܪܳܐ܆ ܘܗܰܘ ܡܰܢ ܕܰܫܠܺܝ ܡܶܢ ܒܺܝ̈ܫܳܬܳܐ ܢܺܐܠܰܦ ܠܡܶܦܠܰܚ ܛܳܒ̈ܬܳܐ ܘܢܶܬܪܕܶܐ ܒܢܳܡܘܣܳܐ ܐܰܠܳܗܳܝܳܐ ܘܩܰܕܝܫܳܐ.
ܐܶܠܐ ܒܢܳܡܘܣܶܗ ܕܡܳܪܝܳܐ ܨܶܒܝܳܢܗ. ܒܗܳܕܶܐ ܓܶܝܪ ܡܰܠܶܦ: ܕܢܳܡܘܣܶܗ ܕܡܳܪܝܳܐ ܠܐ ܡܫܰܥܒܰܕ ܠܰܚܕܳܐ ܡܶܢ ܒܺܝ̈ܫܳܬܳܐ ܘܩܳܡ ܠܶܗ ܡܶܢ ܡܰܘܬܒܳܐ ܕܰܡܡܰܝ̈ܩܳܢܶܐ. ܘܡܶܛܠ ܗܳܢܳܐ.
ܒܢܳܡܘܣܶܗ ܕܡܳܪܝܳܐ ܢܶܬܗܰܓܶܐ ܐܝܡܳܡܳܐ ܘܠܶܠܝܳܐ. ܠܗܳܝ ܡܥܳܕܝܢ ܩܰܕܝ̈ܫܶܐ ܠܰܡܕܰܒܳܪܽܘ ܗܳܠܶܝܢ ܕܥܳܠܡܳܐ. ܡܶܛܠ ܕܗܰܘ ܕܚܳܐܰܪ ܒܰܐܠܳܗܳܐ. ܠܐ ܡܰܦܢܶܐ ܚܰܘܪܗ ܡܶܢ ܢܘܗܪܳܐ ܫܰܪܺܝܪܳܐ. ܠܳܐ ܢܳܦܶܠ ܡܶܢ ܥܶܢܝܳܢܳܐ ܐܝܡܳܡܳܝܳܐ ܕܰܐܠܳܗܐ. ܘܠܳܐ ܐܶܢ ܕܰܡܕܰܒܰܪ ܨܶܒ̈ܘܳܬܳܐ ܥܳܠܡܳܢܳܝ̈ܬܳܐ ܘܰܐܝܟ ܕܳܐܦ ܛܘܒܳܢܳܐ ܕܰܘܺܝܕ ܡܶܬܗܰܓܶܐ ܗܘܳܐ ܒܢܳܡܘܣܗ ܕܰܐܠܳܗܳܐ ܕܠܐ ܫܰܠܘܳܐ. ܠܰܘ ܒܰܠܚܽܘܕ ܡܳܐ ܕܩܳܐܶܡ ܗܘܳܐ ܒܥܽܘܕܪ̈ܳܢܶܐ ܐܰܠܳܗܳܝܷ̈ܐ ܐܶܠܐ ܐܳܦ ܡܳܐ ܕܠܰܡܕܰܒܪܳܢܘܬܳܐ ܕܫܰܒ̈ܛܶܐ ܝܳܗܶܒ ܗܘܳܐ ܢܰܦܫܶܗ. ܗܰܘ ܕܗܳܟܰܢܳܐ ܣܥܰܪ ܡܳܢܳܐ ܐܝܬܰܘܗܝ ܘܰܐܝܟܰܢܳܐ ܢܶܗܘܶܐ.
ܢܶܗܘܶܐ ܠܰܡ ܐܰܝܟ ܐܺܝܠܳܢܳܐ ܕܰܢܨܝܒ ܥܰܠ ܬܰܦܳܐ ܕܡܰܝܴ̈ܐ: ܕܦܺܐܪ̈ܰܘܗܝ ܝܳܗܶܒ ܒܙܰܒܢܗ ܘܛܰܪ̈ܦܰܘܗܝ ܠܳܐ ܢܳܬܪܝܢ. ܘܟܽܠ ܕܥܳܒܶܕ ܡܫܰܠܶܡ. ܐܰܪܰܐ ܠܰܡ ܣܳܒܰܪ ܐܰܢܬ ܕܗܳܫܳܐ ܠܐܝܠܳܢܳܐ ܡܶܬܚܰܒܠܳܢܳܐ ܕܰܢܨܺܝܒ ܥܰܠ ܬܰܦܳܐ ܕܡܰܝܴ̈ܐ ܡܶܬܰܐܫܕܳܢ̈ܐ ܡܕܰܡܶܐ ܠܶܗ ܠܗܰܘ ܕܗܳܟܰܢܳܐ ܥܳܒܶܕ. ܐܶܢܳܐ ܣܳܒܰܪ ܐܢܳܐ ܕܳܡܶܐ ܓܶܝܪ ܕܰܠܘܳܬ ܗܰܘ ܬܰܦܢܟܳܐ ܕܰܠܩܽܘܫܬܝܢ ܡܥܰܠܐ ܠܗ܆ ܠܗܰܘ ܒܘܣܳܡܳܐ ܐܰܠܳܗܳܝܳܐ. ܠܘܳܬ ܕܘܡܝܳܐ ܕܰܐܠܳܗܳܐ ܡܶܠܬܳܐ. ܠܘܳܬ ܗܰܘ ܐܺܝܠܳܢܳܐ ܕܚܰܝ̈ܐ ܕܰܢܨܺܝܒ ܒܦܰܪܕܰܝܣܳܐ ܛܘܒܬܳܢܐ ܗܰܘ ܕܝܳܗܶܒ ܦܐܪ̈ܰܘܗܝ ܒܙܰܒܢܶܗ ܘܛܰܪ̈ܦܰܘܗܝ ܠܐ ܢܳܬܪܺܝܢ. ܗܰܘ ܕܰܗܘܳܐ ܚܶܟܡܬܳܐ ܡܶܢ ܐܰܠܳܗܳܐ܆ ܗܰܘ ܕܰܐܘܥܺܝ ܠܰܢ ܦܺܐܪ̈ܶܐ ܕܫܘܒܩܳܢ ܚܛܳܗܷ̈ܐ ܒܰܨܠܝܒܳܐ. ܗܰܘ ܕܝܰܗܒܠܰܢ ܦܺܐܪ̈ܐ ܕܠܐ ܡܶܬܚܰܒܠܳܢܘܬܳܐ ܒܰܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ. ܗܰܘ ܕܡܰܘܫܶܛ ܠܢ ܐܰܝܟ ܐܺܝܠܳܢܳܐ ܡܶܢ ܒܶܝܬ ܩܘܕܫܳܐ܆ ܫܰܘܬܳܦܽܘܬܳܐ ܕܐܪ̈ܳܙܶܐ ܩܰܕܝ̈ܫܶܐ ܩܽܘܕܳܕܳܐ ܕܶܐܫܛܳܪ ܚܰܘ̈ܒܰܝܢ ܘܦܘܢܳܝܰܢ ܕܰܠܦܰܪܕܰܝܣܳܐ ܐܶܣܛܠܐܴ ܪܝܫܳܝܬܳܐ ܕܠܳܐ ܡܶܬܚܰܒܠܳܢܘܬܳܐ ܢܘܗܪܳܐ ܠܰܣܡܰܝܴ̈ܐ: ܕܘܟܳܝܳܐ ܠܓܰܪ̈ܒܶܐ: ܐܳܣܝܽܘܬܳܐ ܠܰܟܪ̈ܝܗܶܐ: ܚܰܝ̈ܐ ܠܡܳܝ̈ܘܬܶܐ: ܒܰܩܝܳܡܬܶܗ ܕܡܶܢ ܒܶܝܬ ܡܺܝ̈ܬܶܐ. ܘܰܗܘܳܐ ܗܽܘ ܐܺܝܠܳܢܳܐ ܕܰܢܨܺܝܒ ܥܰܠ ܬܰܦܳܐ ܕܡܰܝܴ̈ܐ. ܗܳܢܰܘ ܥܰܠ ܪܓܶܠܬܳܐ ܕܰܥܡܳܕܳܐ ܩܰܕܝܫܳܐ ܕܰܢܕܰܟܶܐ ܘܰܢܚܰܠܶܠ ܠܰܡܟܰܬܡܱ̈ܝ ܒܒܺܝ̈ܫܳܬܳܐ. ܡܶܬܕܰܡܶܐ ܗܰܘ ܕܡܶܬܗܰܓܶܐ ܒܢܳܡܽܘܣܗ ܕܡܳܪܝܳܐ ܐܺܝܡܳܡܳܐ ܘܠܺܠܝܳܐ. ܠܗܰܘ ܐܺܝܠܳܢܳܐ ܕܠܐ ܢܳܬܪܝܢ ܛܰܪ̈ܦܰܘܗܝ ܡܶܢ ܡܰܫ̈ܒܶܐ ܕܪ̈ܘܚܶܐ ܕܰܚܛܺܝܬܳܐ. ܘܠܐ ܡܶܬܢܟܶܐ ܡܶܢ ܩܰܪܺܝܪܽܘܬ ܣܰܬܘܳܐ. ܘܠܳܐ ܝܳܒܫܝܢ ܥܢܳܩܰܘ̈ܗܝ ܡܶܢ ܩܰܫܝܽܘܬܗ ܕܰܓܠܝܕܳܐ ܐܶܠܐ ܟܰܕ ܪܳܘܶܙ ܝܳܗܶܒ ܦܐܪ̈ܐ. ܒܰܕܢܳܫܒܳܐ ܒܗ ܪܘܚܳܐ ܫܰܚܺܝܢܬܳܐ ܘܡܰܦܪܝܳܢܺܝܬܳܐ ܡܛܠܗܳܢܳܐ ܟܽܠ ܕܥܳܒܶܕ ܡܫܰܠܶܡ܆ ܘܠܳܐ ܡܶܬܕܰܡܝܢ ܒܶܗ ܪ̈ܰܫܺܝܥܶܐ ܘܠܳܐ ܡܶܬܦܰܚܡܝܢ ܒܶܗ ܥܰܘܴ̈ܠܐ ܐܶܡܰܪ ܓܝܪ:
ܕܠܳܐ ܗܳܟܰܢܳܐ ܪ̈ܰܫܺܝܥܶܐ: ܐܶܠܐ ܐܰܝܟ ܥܽܘܪܳܐ ܕܕܳܪܝܳܐ ܪܘܚܳܐ. ܠܰܘ ܗܳܟܰܢܳܐ ܐܶܢܘܢ ܕܰܓܳܠܰܝ̈ ܫܡܳܐ ܗܳܢܘܢ ܕܰܒܛܳܥܝܘܬܳܐ ܐܶܬܩܪܺܝܘ ܐܰܠܳܗ̈ܐ ܘܰܡܫܺܝ̈ܚܶܐ ܕܙܺܐܦܳܐ ܐܶܠܐ ܐܰܝܟ ܕܘܡܝܳܐ ܙܥܘܪܳܐ܆ ܡܳܐ ܕܰܫܩܰܠܬܶܗ ܪܘܚܳܐ ܬܰܩܺܝܦܬܳܐ ܘܠܳܐ ܡܶܬܝܰܕܥܳܐ ܕܘܟܬܶܗ. ܗܳܟܰܢܳܐ ܐܢܽܘܢ ܐܰܝܠܶܝܢ ܕܩܳܝܡܺܝܢ ܒܟܽܘܢܳܝ̈ܐ ܕܰܓ̈ܠܶܐ. ܘܰܦܠܰܚܘ ܥܰܘܳܠܐܝܬ ܠܰܐܠܳܗ̈ܐ ܕܰܓܳܠܰܝ̈ ܫܡܳܐ. ܢܶܬܕܰܡܘܢ ܠܗܽܘܢ ܐܰܝܟ ܥܘܪܳܐ ܕܕܳܪܝܳܐ ܪܘܚܳܐ ܘܰܡܛܰܠܩܳܐ ܠܗ. ܘܠܳܐ ܢܶܩܢܽܘܢ ܩܰܘܡܳܐ ܩܕܳܡ ܗܳܝ ܒܺܐܝܡܰܐ ܕܚܺܝܠܬܳܐ ܕܕܰܝܳܢܳܐ ܟܺܐܢܳܐ ܘܠܐ ܢܺܐܬܘܢ ܠܰܟܢܘܫܝܳܐ ܕܙܰܕܺܝ̈ܩܶܐ. ܐܶܠܐ ܡܶܢ ܪܘܚܩܳܐ ܩܳܝܡܺܝܢ ܘܢܳܦܶܩ ܥܠܰܝܗܘܢ ܡܣܳܡ ܒܪܺܝܫܳܐ ܩܰܫܝܳܐ ܡܶܢ ܐܝ̈ܕܰܝ ܟܺܐܢܘܬܳܐ. ܡܶܛܠ ܕܶܐܬܓܡܰܪܘ ܒܒܺܝ̈ܫܳܬܳܐ. ܘܶܐܡܰܪ ܓܶܝܪ:
ܕܳܐܦܠܳܐ ܚܰܛܳܝ̈ܐ ܒܰܟܢܘܫܬܳܐ ܕܙܰܕܺܝ̈ܩܶܐ. ܐܶܢ ܐܺܝܬ ܓܶܝܪ ܕܰܚܛܰܘ ܘܬܳܒܘ. ܠܐ ܢܶܬܚܰܠܛܽܘܢ ܥܰܡ ܗܳܢܽܘܢ ܕܣܳܟ ܠܐ ܐܶܬܛܰܢܰܦܘ ܒܰܚܛܺܝܬܳܐ. ܐܚܪܺܢܳܐ ܐܝܬܰܘܗܝ ܦܘܪܥܳܢܳܐ ܕܰܚܢܽܘܟ ܘܐܠܝܳܐ. ܡܶܛܠ ܕܗܰܘ ܕܰܐܠܶܦ ܥܰܠ ܚܛܺܝܬܳܐ܆ ܡܰܠܶܦ ܥܰܠ ܚܰܛܳܝܷ̈ܐ ܕܰܚܛܰܘ: ܐܶܢܕܶܝܢ ܬܳܒܘ ܡܚܰܦܝܳܐ ܬܝܳܒܽܘܬܳܐ ܕܺܝܠܗܽܘܢ ܘܳܐܬܶܝܢ ܠܕܺܝܢܳܐ ܒܣܳܗܕܽܘܬܳܐ ܕܰܫܡܰܝ̈ܢܶܐ ܘܕܰܐܪ̈ܥܳܢܳܝܶܐ܆ ܕܢܶܬܚܙܶܐ ܦܘܪܥܳܢܳܗ̇ ܕܟܺܐܢܘܬܳܐ. ܕܠܳܐ ܗܘܳܐ ܒܡܰܣܰܒ ܒܰܐܦܷ̈ܐ ܕܳܢܰܬ ܘܰܐܚܝܰܬ ܐܶܢܘܢ. ܐܶܠܐ ܥܰܠ ܕܶܐܬܬܦܺܝܣܰܬ ܒܰܬܝܳܒܽܘܬܗܽܘܢ܆ ܚܰܛܳܝܳܐ ܗܘܳܐ ܓܶܝܪ ܓܰܝܳܣܳܐ܆ ܘܥܰܠ ܕܗܰܝܡܶܢ ܐܶܬܚܢܶܢ. ܚܰܛܳܝܳܐ ܗܘܳܐ ܐܳܦ ܙܰܟܰܝ ܘܥܰܠ ܕܩܰܒܠܶܗ ܠܡܳܪܰܢ ܒܒܰܝܬܶܗ ܐܶܬܦܪܶܩ. ܘܗܳܢܐ ܠܰܘ ܐܰܝܟ ܝܘܚܰܢܢ ܒܰܪ ܙܰܒܕܰܝ ܐܶܬܓܡܰܪ ܘܶܐܬܥܰܠܝ. ܘܟܰܕ ܛܳܒ ܒܰܪ ܡܰܠܟܘܬܰܐ ܗܘ ܡܶܛܠ ܬܝܳܒܽܘܬܶܗ܆ ܐܶܠܐ ܠܰܘ ܒܰܪ ܟܢܽܘܫܬܳܐ ܕܒܶܝܬ ܦܶܛܪܳܘܣ ܠܰܡ ܐܝܬܰܘܗܝ. ܚܳܙܶܐ ܐܰܢܬ ܗܳܟܺܝܠ ܐܰܝܟ ܕܩܰܕܡܶܬ ܐܶܡܪܶܬ ܕܚܰܝܠܳܐ ܕܰܟܬܳܒܷ̈ܐ ܩܰܕܝ̈ܫܶܐ ܡܫܰܘܕܰܥ ܠܰܢ ܣܶܦܪܳܐ ܕܡܰܙܡܘܪ̈ܶܐ. ܗܳܐ ܓܶܝܪ ܡܒܰܕܶܩ ܒܶܗ ܥܰܠ ܡܕܰܒܪܳܢܘܬܳܐ ܕܰܐܠܳܗܳܐ ܘܰܡܦܰܫܶܩ ܒܶܗ ܥܰܠ ܕܺܝܢܳܐ ܕܰܥܬܺܝܕ܆ ܘܡܶܬܦܰܪܫܳܢܘܬܳܐ ܕܙܰܕܝ̈ܩܶܐ ܡܶܢ ܥܰܘܴ̈ܠܐ܆ ܘܡܰܠܶܦ ܕܡܶܕܶܡ ܐܚܪܺܢܳܐ ܐܶܢܘܢ ܪ̈ܰܫܺܝܥܶܐ܆ ܘܡܶܕܶܡ ܐܚܪܺܢܳܐ ܚܰܛܳܝ̈ܐ. ܘܰܡܒܰܕܶܩ ܒܶܗ ܐܘܪܚܳܐ ܩܰܛܺܝܢܬܳܐ ܘܽܐܘܪܚܳܐ ܦܬܺܝܬܳܐ. ܒܗܳܝ ܕܶܐܡܰܪ:
ܕܝܳܕܰܥ ܗܽܘ ܡܳܪܝܳܐ ܐܘܪܚܳܐ ܕܙܰܕܺܝ̈ܩܶܐ. ܗܳܝ ܕܐܝܬܶܝܗ̇ ܒܥܳܠܡܳܐ ܐܰܠܝܨܬܳܐ ܘܰܪܕܺܝܦܬܳܐ܆ ܘܝܳܕܰܥ ܡܳܪܝܳܐ ܠܰܐܝܠܶܝܢ ܕܪܳܕܶܝܢ ܒܳܗ̇ ܘܐܘܪܚܳܐ ܦܬܺܝܬܳܐ ܕܥܰܘܴ̈ܠܐ ܕܡܰܘܒܠܳܐ ܠܰܐܒܕܳܢܳܐ. ܐܶܡܪ ܓܶܝܪ:
ܕܽܐܘܪܚܳܐ ܕܪ̈ܰܫܝܥܶܐ ܬܺܐܒܰܕ. ܗܳܝ ܕܰܢܨܰܠܐ ܟܽܠܰܢ ܕܢܶܬܦܰܨܶܐ ܡܶܢܳܗ̇. ܘܒܐܘܪܚܳܐ ܕܙܰܕܺܝ̈ܩܶܐ ܗܳܝ ܕܝܳܕܰܥ ܠܳܗ̇ ܡܳܪܝܳܐ ܢܶܬܥܢܶܐ. ܟܰܕ ܡܶܬܕܰܡܶܝܢܰܢ ܒܐܝܠܳܢܳܐ ܗܰܘ ܕܰܢܨܺܝܒ ܥܰܠ ܬܰܦܳܐ ܕܡܰܝܴ̈ܐ. ܘܡܶܬܒܰܣܡܝܢܰܢ ܡܶܢ ܦܺܐܪ̈ܰܘܗܝ ܠܐ ܡܶܬܚܰܒܠܳܢܷ̈ܐ. ܒܰܬܪ̈ܰܝܗܘܢ ܥܳܠܡܷ̈ܐ ܐܰܡܝܢ܀ ܫܠܶܡ ܡܺܐܡܪܳܐ ܩܰܕܡܳܝܐ.
ܬܘܒ ܡܐܡܪܐ ܕܬܪܝܢ
ܥܰܠ ܡܰܙܡܘܪܳܐ ܕܰܬܪܶܝܢ ܕܒܶܗ ܡܰܘܕܰܥ ܥܠ ܠܐ ܪܺܝܫܺܝܬܶܗ ܕܰܐܠܳܗܐ ܘܥܰܠ ܕܡܶܢ ܥܳܠܰܡ ܗ̱ܘ ܘܥܰܠ ܫܽܘܠܛܳܢܗ ܕܥܰܠ ܟܠ.
ܦܰܘܠܘܣ ܗܰܘ ܪܰܒܳܐ ܘܰܐܠܳܗܳܝܳܐ ܗܰܘ ܕܶܐܬܚܣܶܠ ܡܶܢ ܚܰܠܒܶܗ ܕܢܳܡܘܣܳܐ ܕܒܶܝܬ ܡܘܫܶܐ: ܘܶܐܬܳܐ ܠܰܓܡܺܝܪܘܬܳܐ ܕܝܘܠܦܳܢܳܐ ܕܰܨܠܝܒܳܐ: ܟܰܕ ܒܐܪ̈ܳܙܶܐ ܕܚܶܟܡܬܳܐ ܕܰܨܠܝܒܳܐ ܬܰܗܺܝܪ ܗܘܳܐ ܘܰܒܦܘܪܢܳܣܳܐ ܕܰܡܕܰܒܪܳܢܘܬܳܐ ܕܰܐܠܳܗܳܐ ܡܶܠܬܳܐ ܕܒܰܒܣܰܪ: ܘܚܳܐܰܪ ܗܘܳܐ ܕܰܐܝܟܰܢܳܐ ܛܰܫܝ ܕܶܢܚܳܐ ܕܡܶܐܬܝܬܶܗ ܡܶܢ ܫܰܠܝ̈ܛܳܢܰܘܗܝ ܕܥܳܠܡܳܐ ܗܳܢܐ ܟܰܕ ܗܘܐ ܒܰܪܢܳܫܳܐ: ܗܰܘ ܒܰܪ ܟܝܳܢܶܗ ܕܰܐܒܳܐ. ܘܒܰܕܡܽܘܬ ܐܶܡܪܳܐ ܠܢܶܟܣܬܳܐ ܐܶܬܩܰܪܰܒ܆ ܟܰܕ ܪ̈ܳܥܰܘܳܬܐ ܕܒܶܝܬ ܐܰܒܘܗܝ ܠܳܐ ܐܰܪܓܶܫܘ ܒܗ. ܟܳܬܶܒ ܗܘܳܐ ܠܘܳܬ ܩܘܪ̈ܝܢܬܳܝܶܐ ܘܳܐܡܰܪ: ܕܚܶܟܡܬܳܐ ܡܡܰܠܠܝܢܰܢ ܒܰܓܡܺܝܪ̈ܐ. ܚܶܟܡܬܳܐ ܠܐ ܕܗܳܢܳܐ ܥܳܠܡܳܐ. ܐܳܦܠܐ ܕܫܰܠܝ̈ܛܳܢܰܘܗܝ ܕܥܳܠܡܳܐ ܗܳܢܐ ܕܒܳܛܠܝܢ. ܐܶܠܐ ܡܡܰܠܠܝܢܰܢ ܚܶܟܡܬܳܐ ܕܰܐܠܳܗܳܐ ܒܐܪܳܙ: ܗܳܝ ܕܰܡܟܰܣܝܳܐ ܗܘܳܬ ܘܩܰܕܶܡ ܦܰܪܫܳܗ̇ ܐܰܠܳܗܳܐ ܡܶܢ ܥܳܠܡܷ̈ܐ ܠܫܘܒܚܳܐ ܕܝܠܰܢ. ܗܳܝ ܕܚܰܕ ܡܶܢ ܫܰܠܝ̈ܛܳܢܶܐ ܕܥܳܠܡܳܐ ܗܳܢܐ ܠܐ ܝܰܕܥܳܗ̇. ܐܶܠܘ ܓܶܝܪ ܝܰܕܥܘܗ̇ ܠܰܘ ܓܶܝܪ ܠܡܳܪܳܗ̇ ܕܬܶܫܒܽܘܚܬܳܐ ܙܳܩܦܺܝܢ ܗܘܰܘ (ܐ ܩܘܪ̈ܢܬܝܐ ܒ: ܘ-ܚ). ܕܫܘܪܳܝܳܐ ܗܳܢܐ ܐܰܪܝܟܳܐ ܥܶܒܕܶܬ ܠܡܺܐܡܪܳܐ ܗܳܢܐ܆ ܙܳܕܶܩ ܗܘܳܐ ܓܶܝܪ ܕܡܶܢ ܗܳܪܟܳܐ ܢܶܣܰܒ ܫܘܪܳܝܳܐ ܠܦܘܫܳܩܶܗ ܕܡܰܙܡܘܪܳܐ ܕܰܬܪܶܝܢ. ܡܶܛܠ ܕܥܰܝܢܳܐ ܕܰܢܒܺܝܘܬܳܐ ܚܳܬܳܐ ܐܝܬܶܝܗ̇ ܕܥܰܝܢܳܐ ܕܰܫܠܝܚܽܘܬܳܐ. ܐܰܝܟܰܢܳܐ ܓܶܝܪ ܕܦܰܘܠܽܘܣ ܠܰܟܢܘܫܝܳܐ ܕܚܰܢܳܢ ܘܰܕܩܰܝܳܦܳܐ ܘܰܕܪ̈ܰܒܰܝ ܟܳܗܢ̈ܐ ܘܰܦܪ̈ܝܫܶܐ ܘܓܘܕܳܐ ܕܨܳܠܘ̈ܒܐ܆ ܥܰܡ ܗܳܠܶܝܢ ܘܦܺܝܠܰܛܳܘܣ ܘܐܝܪܳܘܕܝܣ ܘܟܶܢܫܳܐ ܕܰܒܢ̈ܝ ܝܣܪܳܐܝܠ ܕܚܰܕ ܡܶܢܗܘܢ ܠܚܶܟܡܬܳܐ ܘܡܶܠܬܳܐ ܠܐ ܝܺܕܰܥܘ ܗܘܰܘ ܠܰܐܠܳܗܳܐ܆ ܘܥܰܠܗܳܕܶܐ ܐܰܡܪܰܚܘ ܘܰܨܠܰܒܘ ܠܡܳܪܳܗ̇ ܕܬܶܫܒܽܘܚܬܳܐ. ܘܗܳܟܰܢܳܐ ܐܳܦ ܕܘܝܕ ܗܰܘ ܪܰܒܳܐ ܘܰܢܒܺܝܳܐ܆ ܚܳܙܶܐ ܗܘܳܐ ܡܶܢ ܪܘܚܩܳܐ ܠܰܟܢܘܫܝܳܐ ܗܰܘ ܙܺܐܦܳܢܳܐ܆ ܕܶܐܬܟܰܢܰܫܘ ܥܰܠ ܡܳܪܝܳܐ ܘܥܰܠ ܡܫܺܝܚܶܗ܆ ܘܰܪܢܰܘ ܘܰܢܣܰܒܘ ܡܶܠܟܳܐ ܕܢܶܨܠܒܘܢܳܝܗܝ. ܘܰܫܠܝܚܳܐ ܐܰܠܳܗܳܝܳܐ ܡܰܟܬܶܒ ܗܘܳܐ ܗܳܠܶܝܢ܆ ܐܰܝܟ ܚܰܙܳܝܳܐ ܩܰܪܺܝܒܳܐ ܕܙܰܒܢܳܐ ܗܰܘ ܕܶܐܫܬܰܡܰܫ ܒܶܗ ܚܰܫܳܐ ܦܳܪܘܩܳܝܳܐ ܕܡܳܪܳܗ̇ ܕܬܶܫܒܽܘܚܬܳܐ. ܕܰܘܺܝܕ ܗܰܘ ܛܘܒܳܢܳܐ ܡܶܢ ܪܘܚܩܳܐ ܩܳܐܶܡ ܗܘܳܐ ܘܚܳܐܰܪ ܓܰܠܝܳܐܝܬ܆ ܟܰܕ ܬܰܡܺܝܗ ܒܡܰܓܪܰܬ ܪܘܚܶܗ ܕܰܐܠܳܗܳܐ. ܕܰܠܒܶܙܚܳܐ ܘܫܺܝܛܘܬܳܐ ܕܰܐܝܟ ܗܳܕܶܐ ܡܛܰܝܰܒ ܕܢܰܪܟܶܢ ܪܝܫܶܗ: ܡܒܰܓܶܢ ܡܶܢ ܡܰܪܳܚܘܬܳܐ ܕܰܡܕܰܒܪ̈ܳܢܐ ܥܰܘ̈ܠܐ ܘܫܰܠܝ̈ܛܳܢܶܐ ܣܡܰܝܴ̈ܐ. ܡܫܰܪܶܐ ܒܰܙܡܺܝܪܬܗ ܕܬܰܪܬܶܝܢ ܘܳܐܡܰܪ:
ܠܡܳܢܳܐ ܪܓܰܫܘ ܥܰܡ̈ܡܶܐ. ܘܶܐܡܘ̈ܬܳܐ ܪ̈ܢܰܝ ܣܪܺܝܩܘܬܳܐ܆ ܩܳܡܘ ܡܰܠܟܷ̈ܐ ܕܰܐܪܥܳܐ ܘܫܰܠܝ̈ܛܳܢܶܐ. ܘܶܐܬܡܰܠܰܟܘ ܐܰܟܚܕܳܐ: ܥܰܠ ܡܳܪܝܳܐ ܘܥܰܠ ܡܫܺܝܚܶܗ. ܗܳܠܶܝܢ ܗܳܟܝܠ ܠܗܰܘ ܕܰܒܪܶܥܝܳܢܳܐ ܕܝܽܘܕܳܝܘܬܳܐ ܠܐ ܐܰܚܺܝܕ܇ ܓܰܠܝܳܐܝܬ ܝܺܕܝ̈ܥܳܢ. ܐܰܡܝܪ̈ܳܢ ܠܛܘܒܳܢܳܐ ܕܰܘܺܝܕ: ܟܰܕ ܠܰܡ ܫܠܰܚܘ ܥܰܡ̈ܡܶܐ ܠܰܚܕ̈ܕܶܐ ܦܠܶܫܬܳܝ̈ܐ ܘܥܰܡܘܢܳܝ̈ܐ ܘܰܐܕܘ̈ܡܳܝܶܐ ܘܡܘܐܒܳܝ̈ܐ: ܘܡܰܠܟܘܬܳܐ ܕܨܰܘܒܳܐ ܕܢܶܣܩܽܘܢ ܥܰܠ ܐܘܪܺܫܠܶܡ ܡܶܢ ܒܳܬܰܪ ܕܶܐܬܡܫܰܚ ܕܰܘܺܝܕ ܘܰܐܡܠܶܟ ܒܳܗ̇܆ ܡܶܛܠܗܳܕܶܐ ܠܰܡ ܥܶܠܬܐ܆ ܗܳܢܳܐ ܡܰܙܡܘܪܳܐ ܕܰܬܪܶܝܢ ܐܶܬܶܐܡܰܪ. ܒܪܰܡ ܘܶܐܢ ܗܳܟܰܢܳܐ ܢܺܐܡܪܘܢ܆ ܢܰܫܰܪ ܕܥܰܠ ܡܫܝܚܳܐ ܐܰܡܝܪ.
ܐܺܝܬ ܗܘܳܐ ܓܶܝܪ ܥܝܳܕܳܐ ܠܰܢܒܺܝܘܬܳܐ: ܕܰܒܨܰܠܡܷ̈ܐ ܡܶܬܚܰܙܝܳܢ̈ܐ ܬܨܽܘܪ ܕܘ̈ܡܝܶܐ ܠܳܐ ܡܶܬܚܰܙܝܳܢܷ̈ܐ. ܐܰܟܙܢܳܐ ܓܶܝܪ ܕܡܳܐ ܕܶܐܡܰܪ ܢܒܺܝܳܐ: ܕܠܳܐ ܫܒܰܩܬ ܠܢܰܦܫܝ ܒܰܫܝܽܘܠ ܘܠܳܐ ܝܰܗܒܬ ܠܚܰܣܝܳܟ ܕܢܶܚܙܶܐ ܚܒܳܠܐ (ܡܙܡܘܪܐ ܝܘ: ܝ). ܠܰܘ ܥܰܠ ܢܰܦܫܶܗ ܡܶܬܢܰܣܒܳܐ ܢܒܺܝܘܬܳܐ ܗܳܕܶܐ. ܐܶܠܐ ܥܰܠ ܕܡܰܠܶܠ ܒܰܢܒܺܝܳܐ ܐܪܳܙܳܢܳܐܝܬ ܗܰܘ ܡܰܠܟܳܐ ܕܡܰܠܟܷ̈ܐ ܡܳܪܝܳܐ ܡܫܝܚܳܐ. ܟܰܕ ܨܒܳܐ ܘܰܛܥܶܡ ܡܰܘܬܳܐ ܒܰܒܣܰܪ ܠܐ ܚܙܳܐ ܚܒܳܠܐ. ܐܶܠܐ ܩܳܡ ܒܠܳܐ ܡܶܬܚܰܒܠܳܢܘܬܳܐ. ܟܰܕ ܠܳܐ ܚܙܳܐ ܒܶܣܪܗ ܚܒܳܠܐ. ܗܳܟܰܢܳܐ ܗܳܠܶܝܢ ܕܰܒܡܰܙܡܘܪܳܐ ܗܳܢܳܐ ܫܳܪ̈ܥܳܢ ܡܶܢ ܕܰܘܺܝܕ ܘܡܶܢ ܟܠ ܥܒܺܝ̈ܕܶܐ. ܘܒܰܠܚܽܘܕ ܕܰܠܘܳܬ ܡܫܝܚܳܐ ܐܰܡܺܝܪ̈ܳܢ. ܗܰܘ ܕܐܝܬܰܘܗܝ ܣܳܟܳܗ̇ ܕܰܢܒܺܝܘܬܳܐ. ܒܪܰܡ ܕܶܝܢ ܢܶܩܪܽܘܒ ܠܘܳܬ ܡܷ̈ܠܐ ܘܰܒܢܴ̈ܬ ܩܴ̈ܠܐ ܕܰܫܠܝ̈ܚܶܐ ܘܰܕܬܰܠܡܝ̈ܕܶܐ. ܗܳܠܶܝܢ ܕܟܰܕ ܫܡܰܥܘ ܠܦܶܛܪܽܘܣ ܘܰܠܝܽܘܚܰܢܢ ܪ̈ܝܫܳܢܶܐ ܕܰܫܠܝ̈ܚܶܐ܆ ܕܰܐܝܟܰܢܳܐ ܡܰܠܶܠܘ ܥܰܡܗܘܢ ܟܳܗܢ̈ܐ ܘܰܐܪ̈ܟܘܢܶܐ ܕܗܰܝܟܠܐ. ܡܶܛܠ ܗܰܘ ܚܓܺܝܪܳܐ ܕܶܐܬܰܐܣܝ ܒܬܰܪܥܳܐ ܫܰܦܺܝܪܳܐ. ܘܡܳܢܐ ܦܘܢܳܝ ܦܶܬܓܳܡܳܐ ܥܒܰܕܘ ܠܘܳܬܗܘܢ: ܐܰܪܺܝܡܘ ܩܳܠܗܽܘܢ ܟܰܕ ܡܶܬܬܙܝܥܺܝܢ ܒܪܘܚܳܐ ܘܶܐܡܰܪܘ: ܡܳܪܝܳܐ ܐܰܠܳܗܐ ܐܰܢܬ ܗܽܘ ܕܰܥܒܰܕܬ ܫܡܰܝܳܐ ܘܰܐܪܥܳܐ܇ ܘܝܰܡ̈ܡܶܐ ܘܟܽܠ ܕܺܐܝܬ ܒܗܘܢ. ܐܰܢܬ ܗܘ ܕܡܰܠܶܠܬ ܒܦܽܘܡܳܐ ܕܕܰܘܺܝܕ ܥܰܒܕܳܟ ܒܪܘܚܳܐ ܕܩܽܘܕܫܳܐ ܠܡܳܢܳܐ ܪܓܰܫܘ ܥܰܡ̈ܡܶܐ܇ ܘܶܐܡܘ̈ܬܳܐ ܪ̈ܢܰܝ ܣܪܺܝܩܘܬܳܐ܇ ܩܳܡܘ ܡܰܠܟܷ̈ܐ ܕܰܐܪܥܳܐ ܘܫܰܠܝ̈ܛܳܢܶܐ܇ ܘܶܐܬܡܰܠܰܟܘ ܐܰܟܚܕܳܐ ܥܰܠ ܡܳܪܝܳܐ ܘܥܰܠ ܡܫܝܚܶܗ. ܐܶܬܟܰܢܰܫܘ ܓܶܝܪ ܫܰܪܝܪܳܐܝܬ ܒܰܡܕܝܢܬܳܐ ܗܳܕܐ܇ ܥܰܠ ܒܪܳܟ ܩܰܕܝܫܳܐ. ܐܰܝܢܳܐ ܕܰܐܢܬ ܡܫܰܚܬ. ܗܳܢܰܘ ܕܶܝܢ ܐܝ̣ܪܽܘܕܝܣ ܘܦܺܝܠܰܛܽܘܣ ܥܰܡ ܥܡ̈ܡܶܐ ܟܶܢܫܳܐ ܕܺܝܣܪܳܐܝܠ. ܠܡܶܥܒܰܕ ܟܽܠܡܳܐ ܕܨܶܒܝܳܢܟ ܩܰܕܶܡ ܪܫܰܡ ܕܢܶܗܘܶܐ. ܘܗܳܫܳܐ ܡܳܪܝܳܐ: ܚܽܘܪ ܘܰܚܙܺܝ ܠܠܘܚܳܡܰܝ̈ܗܘܢ. ܘܗܰܒ ܠܥܰܒ̈ܕܰܝܟ ܕܥܺܝܢ ܒܰܓܠܐܷ ܕܶܝܢ ܢܶܗܘܘܢ ܡܰܟܪܙܝܢ ܡܶܠܬܳܟ (ܦܪܟܣܝܣ ܕ: ܟܕ-ܟܛ).
ܚܳܙܶܐ ܐܰܢܬ ܗܳܟܺܝܠ ܐܰܝܟܰܢܳܐ ܐܶܬܝܰܕܥܰܬ ܡܶܠܬܳܐ܆ ܕܰܠܘܳܬ ܟܢܘܫܝܳܐ ܕܨܳܠܘ̈ܒܶܐ ܚܳܐܰܪ ܡܰܙܡܘܪܳܐ ܗܳܢܳܐ ܒܫܘܪܳܝܶܗ. ܘܡܰܝܬܶܐ ܡܶܢ ܒܳܬܰܪܟܶܢ:
ܕܰܢܦܰܣܶܩ ܚܢܳܩܰܝ̈ܗܘܢ. ܕܰܐܝܠܶܝܢ ܕܶܐܬܟܰܢܰܫܘ ܥܰܠ ܡܳܪܳܗ̇ ܕܥܳܢܴ̈ܐ. ܚܢ̈ܩܶܐ ܕܶܝܢ ܡܶܛܠ ܕܰܐܝܟ ܬܰܘܪ̈ܐ ܒܢܺܝܪܳܐ ܡܰܢ ܟܕܺܝܢܺܝܢ ܗܘܰܘ܆ ܟܳܗܢܷ̈ܐ ܕܒܶܝܬ ܐܰܕܽܘܢܰܝ ܒܰܚܢ̈ܩܶܐ ܕܢܺܝܪܗ ܕܢܳܡܘܣܳܐ ܦܰܣܶܩ ܝܳܪܬܳܐ ܚܢܴ̈ܩܶܐ ܡܶܢ ܩܕܳܠܗܽܘܢ܆ ܘܰܫܪܳܐ ܘܫܰܡܰܪ ܐܶܢܽܘܢ ܡܶܢ ܒܰܝܬܳܐ ܕܰܐܒܽܘܗܝ܆ ܘܰܐܥܶܠ ܟܕܰܢ ܚܠܳܦܰܝܗܘܢ ܬܰܘܪ̈ܶܐ ܢܝ̈ܚܶܐ ܫܠܝ̈ܚܶܐ ܩܰܕܝ̈ܫܶܐ. ܗܳܠܶܝܢ ܕܰܦܠܰܚܘ ܬܰܡܝܡܳܐܝܬ ܠܐܪܥܳܐ ܟܽܠܳܗ̇ ܒܩܺܝܩܢܶܗ ܕܰܨܠܝܒܳܐ. ܘܰܫܪܳܐ ܡܶܢܰܢ ܢܺܝܪܗܘܢ ܕܠܳܐ ܬܘܒ ܢܫܰܥܒܕܽܘܢ ܠܥܰܡܗ ܕܰܐܠܳܗܳܐ ܒܝܰܕ ܕܶܒܚ̈ܐ ܕܚܰܝ̈ܘܳܬܳܐ܆ ܘܢܶܗܘܘܢ ܠܓܘܚܟܳܐ ܘܰܠܚܶܣܕܳܐ ܒܟܽܠܗܘܢ ܥܰܡ̈ܡܶܐ. ܟܰܕ ܠܰܘ ܡܶܢ ܥܒܺܝ̈ܕܶܐ ܒܢܱ̈ܝ ܟܝܳܢܗܽܘܢ ܡܶܬܓܰܚܟܝܢ ܐܳܦ ܡܶܬܡܰܝܩܺܝܢ ܐܶܠܐ ܡܶܢ ܥܳܡܘܪܳܗ̇ ܕܰܫܡܰܝܳܐ. ܐܡ̣ܪ ܓܶܝܪ:
ܕܝܳܬܶܒ ܒܰܫܡܰܝܳܐ ܢܶܓܚܰܟ: ܘܡܳܪܝܳܐ ܢܡܰܝܶܩ ܒܗܽܘܢ. ܠܰܘ ܟܰܕ ܚܙܳܐ ܢܶܓܚܰܟ ܥܠܰܝܗܘܢ܆ ܐܶܠܐ ܟܰܕ ܡܚܰܘܶܐ ܠܗܽܘܢ ܐܰܦ̈ܐ ܕܚܶܡܬܳܐ ܘܰܕܪܘܓܙܳܐ.
ܗܳܝܕܶܝܢ ܢܡܰܠܶܠ ܥܠܰܝܗܘܢ ܒܪܘܓܙܶܗ: ܘܰܒܚܶܡܬܶܗ ܢܕܰܠܰܚ ܐܶܢܘܢ. ܥܰܠ ܕܰܓܙܰܡܘ ܥܰܠ ܝܳܪܬܳܐ ܟܰܕ ܚܙܰܐܘܗܝ ܘܰܐܦܩܽܘܗܝ ܠܒܰܪ ܡܶܢ ܟܰܪܡܳܐ ܘܩܰܛܠܘܗܝ. ܡܶܛܠ ܗܳܢܳܐ ܡܳܐ ܕܰܢܣܰܒ ܡܰܠܟܘܬܳܐ ܘܰܗܦܰܟ܆ ܘܰܩܛܰܪ ܥܰܠ ܛܘܪܳܐ ܕܨܶܗܝܽܘܢ ܟܠܺܝܠܳܐ ܕܠܐ ܡܶܬܚܰܒܠܳܢܘܬܳܐ. ܢܰܝܬܶܐ ܠܰܐܝܠܶܝܢ ܕܶܝܢ ܕܶܐܫܬܐܶܠܘ ܡܶܢܗ ܕܠܐ ܢܰܡܠܶܟ ܥܠܰܝܗܘܢ. ܘܰܢܩܰܛܶܠ ܐܶܢܘܢ ܩܕܳܡܰܘܗܝ. ܐܶܡܰܪ ܓܶܝܪ ܒܝܕ ܕܰܘܝܕ ܕܡܰܠܟܳܐ ܐܝܬܰܘܗܝ ܘܰܕܡܶܢ ܐܰܒܳܐ ܢܣܰܒ ܡܰܠܟܽܘܬܳܐ. ܥܰܠ ܛܘܪܳܐ ܩܰܕܝܫܳܐ ܕܨܶܗܝܽܘܢ ܡܕܺܝܢܬܳܐ ܡܥܰܠܰܝܬܳܐ ܘܪܳܡܬܳܐ ܕܰܠܥܶܠ ܡܶܢ ܫܡܰܝܳܐ.
ܐܶܢܳܐ ܐܰܩܝܡܶܬ ܡܰܠܟܝ ܥܰܠ ܨܶܗܝܽܘܢ ܛܘܪܳܐ ܕܩܽܘܕܫܝ: ܕܢܶܫܬܰܥܶܐ ܥܰܠ ܩܝܳܡܝ. ܡܶܫܟܚܝܢܰܢ ܓܶܝܪ ܐܳܦ ܗܳܟܰܢܳܐ. ܕܒܰܬܠܳܬ ܕܘܟܝ̈ܬܳܐ ܐܰܘܕܺܝ ܐܰܒܳܐ ܡܶܛܠ ܒܪܳܐ. ܕܰܒܪܳܐ ܐܝܬܰܘܗܝ ܚܰܒܝܒܳܐ܆ ܩܥܳܐ ܓܶܝܪ ܥܰܠ ܝܽܘܪܕܢܳܢ ܟܰܕ ܥܡܰܕ ܒܪܳܐ ܘܝܰܗܒ ܫܘܪܳܝܳܐ ܕܰܒܪܺܝܬܳܐ ܚܕܰܬܳܐ ܠܓܶܢܣܳܐ ܐܢܳܫܳܝܳܐ. ܕܗܳܢܰܘ ܒܶܪܝ ܚܰܒܺܝܒܳܐ ܒܳܟ ܐܶܨܛܒܺܝܬ (ܡܬܝ ܓ: ܝܙ ܡܪܩܘܣ ܐ: ܝܐ ܠܘܩܐ ܓ: ܟܒ). ܘܰܒܛܘܪܳܐ ܕܬܳܒܽܘܪ ܠܥܺܝܢ ܦܶܛܪܽܘܣ ܘܝܰܥܩܽܘܒ ܘܝܘܚܰܢܳܢ ܘܰܠܥܺܝܢ ܡܘܫܶܐ ܘܺܐܠܝܐ. ܗܺܝ ܟܰܕ ܗܺܝ ܒܰܪܬ ܩܳܠܐ ܩܥܳܐ ܡܶܢ ܫܡܰܝܳܐ. ܘܰܒܗܰܝܟܠܳܐ ܬܘܒ ܟܰܕ ܐܶܡܰܪ ܒܪܳܐ ܠܘܳܬ ܐܰܒܳܐ. ܕܰܐܒܳܐ ܫܰܒܰܚ ܫܡܳܟ: ܦܰܢܺܝ ܠܶܗ ܩܳܠܐ ܡܶܢ ܫܡܰܝܳܐ: ܕܫܰܒܚܶܬ ܘܬܽܘܒ ܡܫܰܒܰܚ ܐܢܳܐ (ܝܘܚܢܢ ܝܒ: ܟܙ). ܗܳܠܶܝܢ ܕܳܡ̈ܝܳܢ ܠܗܳܝ ܕܶܐܢܳܐ ܐܰܩܝܡܶܬ ܡܰܠܟܝ ܥܰܠ ܨܶܗܝܽܘܢ ܛܘܪܳܐ ܕܩܽܘܕܫܝ. ܘܡܰܝܬܶܐ ܒܳܬܰܪܟܶܢ ܟܰܕ ܐܳܡܰܪ:
ܕܡܳܪܝܳܐ ܐܶܡܰܪ ܠܝ ܕܒܶܪܝ ܐܰܢܬ: ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ. ܢܶܫܬܩܽܘܢ ܗܳܫܳܐ ܗܳܢܘܢ ܕܳܐܡܪܺܝܢ ܕܥܰܠ ܢܰܦܫܶܗ ܐܰܡܪܗ ܓܶܝܪ ܠܡܰܙܡܘܪܳܐ ܗܳܢܳܐ ܕܰܘܺܝܕ. ܠܰܐܕܽܘܢܰܝ ܒܪܳܐ ܟܝܳܢܳܝܳܐ ܠܰܝܬ܆ ܐܠܐ ܗܰܘ ܝܺܚܝܕܳܝܳܐ ܡܶܠܬܐ ܕܺܝܠܝܕ ܡܶܢܶܗ ܟܝܳܢܳܐܝܬ ܘܰܡܬܘܡܳܐܝܬ. ܕܰܠܘܳܬܶܗ ܐܶܡܰܪ: ܐܶܡܪ ܕܝܰܘܡܳܢܳܐ ܝܺܠܶܕܬܳܟ. ܝܰܘܡܳܢܳܐ ܕܶܝܢ ܕܰܐܠܳܗܳܐ ܚܰܕ ܐܝܬܰܘܗܝ ܒܰܠܚܽܘܕ ܠܘܳܬ ܐܰܠܳܗܳܐ. ܠܘܳܬ ܐܰܠܳܗܐ ܟܝܳܢܳܐܝܬ ܠܰܝܬ ܐܶܬܡܳܠ ܘܠܐ ܬܽܘܒ ܠܰܡܚܳܪ ܡܶܬܡܢܶܐ ܠܗ. ܐܶܬܡܳܠ ܓܶܝܪ ܘܝܰܘܡܳܢܳܐ ܘܰܡܚܳܪ܆ ܠܘܳܬ ܥܒܺܝ̈ܕܶܐ ܡܶܬܡܢܶܝܢ. ܠܘܳܬ ܗܳܢܽܘܢ ܕܫܰܪܺܝܘ ܘܡܰܨܥܘ ܘܰܡܫܰܠܡܺܝܢ. ܠܘܳܬ ܗܰܘ ܕܥܶܠܳܝ ܡܶܢܟܽܠ ܫܘܪ̈ܳܝܝܢ. ܘܪܰܚܺܝܩ ܘܡܰܒܥܰܕ ܡܶܢ ܗܳܝ ܕܰܢܡܰܨܰܥ. ܘܠܰܝܬ ܡܶܢܝܳܢܐ ܕܝܰܘܡ̈ܬܳܐ. ܘܠܳܐ ܫܰܪܝ ܕܰܢܫܰܠܶܡ. ܘܠܐ ܥܳܒܪܺܝܢ ܥܠܰܘܗܝ ܫܘ̈ܚܠܳܦܶܐ ܘܠܳܐ ܡܫܰܥܒܰܕ ܠܫܘܓܢܳܝܳܐ ܕܡܰܪܕܺܝܬܳܐ. ܡܶܛܠ ܕܰܠܘܳܬ ܟܠ ܫܘܚܠܳܦܳܐ ܠܐ ܡܶܫܬܰܓܢܝܳܢܳܐ ܐܝܬܰܘܗܝ. ܘܟܠܡܶܕܶܡ ܕܚܳܐܰܪ ܠܘܳܬ ܐܘܣܝܰܐ ܕܺܝܠܶܗ ܡܰܢ ܡܬܘܡܳܝܰܐ ܗܘ. ܘܶܐܢ ܡܰܢ ܝܺܠܕ ܡܶܢܗ ܐܰܝܟ ܟܝܳܢܶܗ ܝܺܠܶܕ. ܘܶܐܢ ܐܰܝܟ ܟܝܳܢܶܗ ܝܺܠܶܕ ܕܠܐ ܫܘܪܳܝܰܐ ܗܘ. ܐܰܝܟܰܢܳܐ ܕܫܶܡܫܳܐ ܡܰܘܠܶܕ ܢܽܘܗܪܳܐ ܟܰܕ ܠܐ ܚܳܣܰܪ. ܘܡܰܦܪܶܐ ܨܶܡܚܳܐ ܡܶܢ ܐܶܣܦܝܪܗ ܟܝܳܢܳܐܝܬ ܕܠܐ ܦܣܳܩ. ܘܗܳܕܶܐ ܕܶܝܢ ܝܰܘܡܳܢܳܐ ܝܺܠܶܕܬܳܟ ܨܶܐܕܰܝܢ ܒܰܠܚܽܘܕ ܐܺܝܬ ܠܳܗ̇ ܐܰܬܪܳܐ ܕܬܶܬܡܰܠܰܠ. ܠܘܳܬ ܐܰܠܳܗܳܐ ܕܶܝܢ ܠܰܘ ܒܐܣܟܺܡܳܐ ܕܝܠܰܢ ܡܶܬܡܰܠܠܐܴ܆ ܐܶܠܐ ܒܗܰܘ ܛܘܦܣܳܐ ܕܶܐܡܪܶܬ ܕܠܰܝܬ ܠܐܠܳܗܳܐ ܝܰܘܡ̈ܬܳܐ ܡܶܬܡܰܢܝܳܢ̈ܐ ܡܶܛܠ ܕܚܰܕ ܗܘ ܝܰܘܡܶܗ ܕܰܐܠܳܗܳܐ. ܒܗܰܘ ܝܰܘܡܳܐ ܐܰܡܺܝܪܳܐ ܡܶܠܬܳܐ ܗܳܕܐ. ܒܗܰܘ ܝܰܘܡܳܐ ܕܰܡܥܰܠܰܝ ܡܶܢ ܡܶܬܚܳܐ ܕܫܳܥܷ̈ܐ. ܘܡܶܢ ܡܰܪܕܺܝܬܳܐ ܕܥܶܕܳܢ̈ܐ. ܒܗܰܘ ܕܐܝܬܰܘܗܝ ܟܽܠܗ ܨܰܦܪܳܐ ܕܠܐ ܡܩܰܒܶܠ ܦܢܳܝܳܐ ܕܫܽܘ̈ܚܠܳܦܶܐ ܘܠܳܐ ܦܳܓܰܥ ܒܶܗ ܪܰܡܫܳܐ ܕܫܽܘܠܳܡܐ. ܐܶܠܐ ܐܰܡܝܪܐ ܡܶܠܬܳܐ ܗܳܕܶܐ ܐܰܝܟ ܕܰܠܘܳܬ ܝܰܠܕܳܐ ܕܡܶܬܦܰܚܰܡ ܒܟܠܡܶܕܶܡ ܒܝܳܠܘܕܶܗ. ܒܗܳܝ ܕܠܐ ܫܰܪܝ ܐܰܒܳܐ ܕܢܶܗܘܶܐ ܐܰܒܳܐ. ܘܠܐ ܒܪܳܐ ܬܽܘܒ ܫܰܪܺܝ ܕܢܶܗܘܶܐ ܝܰܠܕܳܐ. ܐܶܠܐ ܐܰܝܟܰܢܳܐ ܕܐܝܬܰܘܗܝ ܐܰܒܳܐ ܒܰܐܒܳܗܘܬܶܗ ܕܠܳܐ ܫܘܪܳܝܳܐ܆ ܗܳܟܰܢܳܐ ܐܝܬܰܘܗܝ ܒܪܳܐ ܒܺܝܠܝܕܘܬܶܗ ܕܠܐ ܫܘܪܳܝܳܐ. ܡܳܕܶܝܢ ܡܳܐ ܕܳܐܡܰܪ ܐܰܒܳܐ ܠܘܳܬ ܒܪܳܐ ܕܝܰܘܡܳܢܳܐ ܝܺܠܶܕܬܳܟ܆ ܠܰܘ ܕܰܢܚܰܘܶܐ ܕܺܐܝܬ ܠܰܒܪܳܐ ܫܘܪܳܝܳܐ ܒܳܥܶܐ. ܐܶܠܐ ܕܰܢܚܰܘܶܐ ܕܺܐܝܬ ܠܗ ܒܪܳܐ ܒܰܪ ܟܝܳܢܳܐ. ܐܶܢܕܶܝܢ ܨܳܒܶܝܢܰܢ ܕܰܠܘܳܬ ܢܝܫܳܐ ܦܳܪܘܩܳܝܳܐ ܕܰܡܕܰܒܪܳܢܘܬܳܐ ܕܒܰܒܣܰܪ ܕܥܰܡܢܘܐܝܠ ܢܰܦܢܶܐ ܚܰܘܪܳܐ ܕܬܶܐܘܳܪܺܝܰܐ ܗܳܕܶܐ. ܒܢܺܝܫܳܐ ܐܚܪܺܢܳܐ ܡܶܣܬܰܟܠܝܢܰܢ ܠܶܗ ܠܦܶܬܓܳܡܳܐ ܗܳܢܐ. ܐܳܡܰܪ ܐܢܳܐ ܡܶܛܠ ܕܰܨܒܳܐ ܐܰܠܳܗܐ ܘܶܐܬܓܠܝ ܒܰܒܣܰܪ ܘܰܗܘܳܐ ܬܚܶܝܬ ܪܘܟܳܒܳܐ ܐܢܳܫܳܝܳܐ. ܗܰܘ ܡܬܽܘܡܳܝܳܐ ܘܰܦܫܝܛ ܒܰܟܝܳܢܗ ܘܶܐܬܡܢܝ ܒܚܽܘܫܒܳܢܳܐ ܕܫܰܪ̈ܒܳܬܳܐ ܕܰܐܪ̈ܥܳܢܶܐ ܗܰܘ ܕܰܐܟܺܝܢ ܛܘ̈ܗܡܶܐ ܘܓܶܢ̈ܣܶܐ ܕܰܐܪܥܳܐ. ܒܗܳܢܳܐ ܢܝܫܳܐ ܐܺܝܬ ܠܳܗ̇ ܠܒܰܪܬ ܩܳܠܐ ܕܝܰܘܡܳܢܳܐ ܝܺܠܶܕܬܳܟ. ܘܥܰܠ ܗܳܕܶܐ ܐܳܦ ܦܰܘܠܘܣ ܟܳܬܶܒ ܗܘܳܐ ܠܘܳܬ ܥܶܒܪ̈ܳܝܐ ܟܰܕ ܐܳܡܰܪ: ܕܝܶܫܽܘܥ ܡܫܝܚܳܐ ܐܶܬܡܳܠܝ ܘܝܰܘܡܳܢܳܐ ܘܗܽܘܝܽܘ ܘܰܠܥܳܠܰܡ (ܥܒܪ̈ܝܐ ܝܓ: ܚ). ܘܣܳܐܡ ܐܶܬܡܳܠܝ ܠܗܳܝ ܕܐܝܬܰܘܗܝ ܗܘܳܐ ܩܕܳܡ ܒܪܺܝܬܶܗ ܕܥܳܠܡܳܐ. ܝܰܘܡܳܢܳܐ ܕܶܝܢ ܡܦܰܚܶܡ ܠܰܡܕܰܒܪܳܢܘܬܶܗ ܕܰܒܗܳܢܳܐ ܥܳܠܡܳܐ. ܗܳܝ ܕܰܠܥܳܠܰܡ ܠܗܳܝ ܐܳܚܘܕܬܳܐ ܕܠܳܐ ܦܳܓܰܥ ܒܳܗ̇ ܫܘܠܳܡܳܐ. ܐܰܡܺܝܪܳܐ ܒܰܪܬ ܩܳܠܐ ܗܳܕܶܐ ܡܶܢ ܐܰܒܳܐ ܕܥܰܠ ܒܪܳܐ. ܕܒܶܪܝ ܐܰܢܬ ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ. ܡܰܝܬܶܐ ܒܳܬܰܪܟܶܢ ܘܳܐܡܰܪ:
ܫܰܐܠ ܡܶܢܝ ܘܶܐܬܶܠ ܠܳܟ ܥܰܡ̈ܡܶܐ ܠܝܳܪܬܘܬܳܟ. ܘܽܐܘܚܕܳܢܰܝ̈ܟ ܥܶܒܪ̈ܶܝܗ̇ ܕܰܐܪܥܳܐ. ܒܗܰܘ ܓܶܝܪ ܟܝܳܢܳܐ ܡܬܘܡܳܝܳܐ ܘܐܝܬܝܳܝܳܐ. ܠܳܐ ܫܶܐܠ ܘܠܐ ܢܣܰܒ. ܡܶܛܠ ܕܰܒܗܳܝ ܕܐܝܬܰܘܗܝ ܡܶܢ ܐܰܒܳܐ. ܟܠܡܶܕܶܡ ܕܺܐܝܬ ܠܰܐܒܳܐ ܐܝܬ ܠܰܒܪܳܐ. ܐܶܢܓܶܝܪ ܥܰܡܗ ܐܝܬܰܘܗܝ ܟܝܳܢܳܐܝܬ. ܒܗܳܕܶܐ ܕܶܝܢ ܕܰܗܘܳܐ ܒܰܪܢܳܫܳܐ. ܫܶܐܠ ܐܰܝܟ ܣܢܺܝܩܳܐ ܘܰܢܣܰܒ ܐܰܝܟ ܫܳܐܘܠܐ. ܒܗܳܝ ܕܶܐܡܰܪ ܕܶܐܬܶܠ ܥܰܡ̈ܡܶܐ ܠܝܳܪܬܘܬܳܟ. ܕܳܡܝܳܐ ܠܗܳܝ ܕܶܐܡܰܪ: ܕܰܐܒܳܐ ܠܐܢܳܫ ܠܐ ܕܳܐܶܢ. ܐܶܠܐ ܟܽܠܗ ܕܺܝܢܳܐ ܝܰܗܒܶܗ ܠܰܒܪܳܐ (ܝܘܚܢܢ ܗ: ܟܒ). ܒܗܳܝ ܕܶܐܡܰܪ:
ܕܬܶܪܥܶܐ ܐܶܢܘܢ ܒܫܰܒܛܳܐ ܕܦܰܪܙܠܳܐ. ܫܰܒܛܳܐ ܕܦܰܪܙܠܐ ܡܫܰܘܕܰܥ ܕܺܝܢܳܐ ܘܫܳܩܶܠ ܫܘܠܳܡܳܐ. ܘܡܰܪܕܘܬܳܐ ܕܠܐ ܡܶܬܬܰܒܪܝܢ ܫܰܒ̈ܛܶܐ ܕܰܡܢܰܓܕܳܢ̈ܐ ܟܰܕ ܡܰܘܕܰܥ ܚܰܣܺܝܢܽܘܬ ܕܺܝܢܗ. ܘܫܘܠܛܳܢܳܐ ܕܰܐܚܺܝܕ ܘܰܡܩܰܘܶܐ ܠܥܳܠܰܡ. ܘܰܢܚܰܘܶܐ ܒܺܐܝܕܶܗ ܫܰܒܛܳܐ ܕܦܰܪܙܠܐ. ܗܳܢܘܢ ܕܰܒܕܺܝܢܳܐ ܡܶܬܚܰܝܒܺܝܢ. ܐܰܝܟ ܡܳܐܢ̈ܐ ܐܶܢܘܢ ܕܦܰܚܳܪܐ ܕܠܰܝܬ ܒܗܽܘܢ ܚܰܝܠܐ ܕܰܢܥܰܙܘܢ ܠܘܩܒܰܠ ܡܚܽܘܬܳܐ ܕܚܘܛܪܳܐ ܕܦܰܪܙܠܳܐ. ܡܶܛܠܗܳܢܐ ܩܳܪܶܐ ܠܗܽܘܢ ܠܡܰܠܟܷ̈ܐ ܠܡܶܬܦܰܢܝܳܢܘܬܳܐ ܕܰܠܘܳܬܗ ܢܒܺܝܳܐ ܟܰܕ ܐܳܡܰܪ:
ܗܳܫܳܐ ܡܰܠܟܷ̈ܐ ܐܶܣܬܰܟܠܘ. ܘܐܶܬܪܕܰܘ ܕܰܝܳܢ̈ܐ ܕܰܐܪܥܳܐ. ܘܚܽܘܪܘ ܠܘܳܬܶܗ ܒܰܬܝܳܒܘܬܳܐ ܘܬܺܚܘܢ. ܘܰܒܥܰܘ ܗܰܝܡܳܢܘܬܶܗ ܘܬܶܬܚܰܣܽܘܢ.
ܘܢܰܫܶܩܘ ܒܪܳܐ ܕܠܳܐ ܢܶܪܓܰܙ. ܚܕܳܐ ܓܶܝܪ ܒܢܘܫ̈ܩܳܬܳܐ ܕܬܰܝܳܒܷ̈ܐ. ܐܰܝܟ ܕܰܚܕܺܝ ܒܢܽܘܫ̈ܩܳܬܳܗ̇ ܕܚܰܛܳܝܬܳܐ. ܕܠܶܒܟܰܬ ܪ̈ܶܓܠܘܰܗܝ ܘܶܐܬܪܰܥܝ ܠܳܗ̇ ܘܰܫܒܰܩ ܚܰܘ̈ܒܶܝܗ̇. ܘܟܰܬܒܳܗ̇ ܠܰܬܝܳܒܘܬܳܗ̇ ܒܰܟܬܳܒܐ ܕܰܣܒܰܪܬܳܐ. ܘܰܪܫܳܐ ܠܫܶܡܥܘܢ ܦܪܝܫܳܝܳܐ ܘܶܐܡܰܪ ܠܶܗ: ܕܰܐܢܬ ܠܳܐ ܢܰܫܶܩܬܳܢܝ (ܠܘܩܐ ܙ: ܡܗ). ܗܰܘ ܕܠܳܐ ܡܢܰܫܶܩ ܪ̈ܶܓܠܰܘܗܝ ܗܳܪܟܳܐ ܒܰܬܝܳܒܘܬܳܐ܆ ܘܠܐ ܡܳܐ ܕܶܐܚܰܕ ܫܰܒܛܳܐ ܕܦܰܪܙܠܐ ܓܶܝܪ ܡܶܬܪܰܥܶܐ ܠܶܗ܆ ܐܠܐ ܡܰܘܒܶܕ ܠܶܗ ܒܕܺܝܢܳܐ. ܘܳܐܦ ܗܽܘ ܐܳܒܶܕ ܡܶܢܳܗ̇. ܡܶܛܠ ܕܰܛܥܳܐ ܐܘܪܚܳܐ ܕܢܳܡܘܣܗ ܘܠܳܐ ܗܰܠܶܟ ܒܳܗ̇. ܐܶܡܪ ܓܶܝܪ ܡܙܰܡܪܳܢܳܐ.
ܕܬܺܐܒܕܽܘܢ ܡܶܢ ܐܘܪܚܶܗ: … ܘܛܘܒܰܝܗܘܢ ܠܟܽܠ ܕܰܬܟܺܝܠܝܢ ܥܠܰܘܗܝ. ܢܶܕܚܰܠ ܡܳܕܶܝܢ ܡܶܢ ܚܛܳܗ̈ܐ ܙܥܘܪ̈ܶܐ ܕܳܐܦ ܗܶܢܘܢ ܡܥܺܝܪܺܝܢ ܪܘܓܙܶܗ ܕܰܐܠܳܗܐ. ܘܬܶܢܳܢܳܐ ܡܰܣܩܺܝܢ ܒܪܽܘܓܙܗ ܕܬܳܒܘܥܳܐ܆ ܐܰܝܟܙܢܳܐ ܕܒܰܬܝܳܒܘܬܳܐ ܙܥܘܪܬܳܐ ܡܶܬܪܰܥܶܐ. ܗܳܟܰܢܳܐ ܒܝܰܕ ܣܰܟܠܘܬܳܐ ܗܝ ܙܥܽܘܪܬܳܐ ܝܳܩܶܕ ܪܽܘܓܙܶܗ. ܘܒܳܬܰܪܟܶܢ ܐܳܡܰܪ.
ܛܘܒܰܝܗܽܘܢ ܠܟܽܠ ܕܰܬܟܺܝܠܝܢ ܥܠܰܘܗܝ. ܬܘܟܠܳܢܳܐ ܓܶܝܪ ܗܳܢܐ ܛܘܒܳܐ ܝܳܗܶܒ ܠܩܰܢܳܝ̈ܘܗܝ. ܠܰܝܬ ܬܘܟܠܳܢܳܐ ܕܺܐܝܬ ܒܶܗ ܛܘܒܳܐ. ܐܶܠܐ ܣܰܒܪܳܐ ܕܰܐܠܳܗܳܐ ܗܘ ܕܶܐܫܬܰܘܕܝ ܕܦܳܪܰܥ ܠܟܽܠ ܐܢܳܫ ܐܰܝܟ ܥܒܳܕܰܘ̈ܗܝ. ܕܗܽܘ ܢܶܬܶܠ ܠܰܢ ܕܰܒܢܘܫ̈ܩܬܳܐ ܕܒܰܬܝܳܒܘܬܳܐ ܢܪܰܥܶܝܘܗܝ ܒܥܳܠܡܳܐ ܗܳܢܐ. ܘܢܰܫܘܶܐ ܠܰܢ ܠܚܰܝ̈ܐ ܕܠܐ ܥܳܒܪܺܝܢ ܒܥܳܠܡܳܐ ܕܰܥܬܺܝܕ ܐܰܡܝܢ܀ ܫܠܶܡ ܡܰܙܡܘܪܐ ܬܪܰܝܳܢܐ.
ܡܙܡܘܪܐ ܕܬܠܬܐ
ܡܰܘܕܰܥ ܒܶܗ ܥܰܠ ܐܘܠܨܳܢܐ ܕܕܰܘܺܝܕ ܡܶܢ ܐܰܒܺܝܫܳܠܽܘܡ ܒܪܶܗ: ܘܥܰܠ ܚܰܫܳܐ ܕܦܳܪܘܩܰܢ: ܘܥܰܠ ܡܣܳܡ ܒܪܝܫܳܐ ܕܰܡܩܰܒܠܝܢ ܒܥܶܠܕܒܳܒ̈ܐ ܕܰܨܠܝܒܳܐ.
ܪܰܘܪ̈ܒܳܬܳܐ ܘܰܫܒܺܝ̈ܚܳܬܳܐ ܫܡܰܥܬܘܢ ܕܶܐܫܬܰܥܝ ܠܰܢ ܪܘܚܳܐ ܩܰܕܝܫܳܐ ܒܝܰܕ ܛܘܒܳܢܳܐ ܕܰܘܝܕ ܥܰܠ ܐܪܳܙܗ ܕܰܨܠܝܒܳܐ ܘܥܰܠ ܡܕܰܒܪܳܢܘܬܶܗ ܕܶܝܢ ܕܥܰܡܰܢܽܘܐܝܠ ܒܗܳܠܶܝܢ ܬܰܪܬܶܝܢ ܬܶܫܒܚ̈ܬܳܐ ܕܰܩܕܳܡ ܗܳܕܐ. ܒܗܳܝ ܡܰܢ ܩܰܕܡܳܝܬܳܐ ܐܰܘܕܰܥ ܥܰܠ ܛܘܒܳܐ ܕܡܶܬܝܗܶܒ ܠܗܰܘ ܕܡܶܫܬܐܶܠ ܡܶܢ ܐܘܪܚܳܐ ܕܥܰܘܴ̈ܠܶܐ܆ ܘܥܰܠ ܡܕܰܒܪܳܢܘܬܶܗ ܕܰܡܫܝܚܳܐ ܕܡܶܬܕܰܡܝܳܐ ܒܺܐܝܠܳܢܳܐ ܕܰܢܨܺܝܒ ܥܰܠ ܬܰܦܳܐ ܕܡܰܝܴ̈ܐ. ܘܰܒܗܳܝ ܕܬܰܪܬܶܝܢ ܥܰܠ ܟܢܘܫܝܳܐ ܕܡܰܠܟܷ̈ܐ ܘܫܰܠܝܛܳܢ̈ܐ ܘܰܕܪ̈ܰܒܰܝ ܟܳܗܢ̈ܐ ܕܝܘܕܳܝ̈ܐ ܕܥܰܠ ܡܫܝܚܳܐ. ܘܰܒܗܳܕܶܐ ܬܶܫܒܽܘܚܬܳܐ ܕܰܬܠܳܬ: ܐܰܝܟ ܝܰܘܡܳܐ ܡܝܰܩܪܳܐ ܘܩܰܕܝܫܳܐ ܕܰܩܝܳܡܬܳܐ ܕܥܰܡܢܽܘܐܝܠ ܕܡܶܢ ܒܶܝܬ ܡܺܝ̈ܬܶܐ܆ ܘܙܳܟܘܬܳܐ ܕܰܗܘܳܬ ܒܰܩܝܳܡܬܶܗ ܡܶܢ ܡܰܘܬܳܐ ܘܰܚܒܳܠܐ. ܡܶܫܬܰܥܝܳܐ ܠܰܢ ܪܘܚܳܐ ܕܰܢܒܺܝܘܬܳܐ ܟܰܕ ܡܫܰܘܕܥܳܐ ܠܰܢ. ܐܳܦ ܩ̈ܠܐ ܕܡܰܪܳܚܽܘܬܳܐ܆ ܕܰܩܥܰܘ ܝܽܘܕܳܝ̈ܐ ܥܰܠ ܡܫܺܝܚܳܐ܆ ܟܰܕ ܡܫܰܪܶܐ ܡܙܰܡܪܳܢܳܐ ܕܰܘܺܝܕ ܡܶܢ ܐܘܠܨܳܢ̈ܐ ܣܰܓܝ̈ܐܐ ܕܰܥܫܶܢܘ ܥܠܰܘܗܝ. ܝܰܬܝܪܳܐܝܬ ܒܰܡܪܳܕܐ ܗܰܘ ܕܰܐܩܺܝܡ ܥܠܰܘܗܝ ܐܰܒܝܫܳܠܘܡ ܒܪܶܗ ܗܰܘ ܓܘܡܕܳܢܳܐ ܘܡܰܪܳܚܳܐ. ܒܗܳܢܳܐ ܓܶܝܪ ܙܰܒܢܳܐ ܡܰܥܗܕܳܐ ܡܶܢ ܥܶܠܬܳܐ ܠܐ ܢܳܡܽܘܣܳܝܬܳܐ ܕܰܡܪܳܕܶܗ ܕܰܐܒܝܫܳܠܘܡ. ܡܰܙܡܘܪܳܐ ܗܳܢܳܐ ܕܰܬܠܳܬܳܐ ܐܶܬܶܐܡܰܪ ܡܶܢ ܕܰܘܺܝܕ. ܘܟܰܕ ܗܽܘ ܢܒܺܝܳܐ ܐܰܝܟ ܢܽܘܘܳܓܳܐ ܒܰܝܢܳܬ ܓ̈ܠܠܐ ܒܝܰܡܳܐ ܕܐܘܠܨܳܢܳܐ ܡܶܬܚܰܦܶܐ ܗܘܳܐ. ܘܡܶܢ ܒܪܶܗ ܡܶܬܛܪܶܕ ܗܘܳܐ ܕܢܶܦܽܘܩ ܡܶܢ ܡܰܠܟܽܘܬܶܗ. ܘܡܶܢ ܫܰܡܥܺܝ ܒܰܪ ܓܶܐܪܳܐ ܩܳܛܘܠܐ ܘܳܐܫܶܕ ܕܡܳܐ ܘܓܰܒܪܳܐ ܥܰܘܳܠܐ ܡܶܬܩܪܶܐ ܗܘܳܐ ܕܰܘܝܕ ܡܶܨܛܰܚܝܳܢܳܐܝܬ. ܘܡܶܢ ܒܰܪ ܡܢܳܬܶܗ ܕܺܝܗܘܕܳܐ ܐܰܚܺܝܬܽܘܦܺܝܠ ܡܰܠܟܷ̈ܐ ܒܺܝ̈ܫܶܐ ܥܠܰܘܗܝ ܡܶܬܪܰܟܒܺܝܢ ܗܘܰܘ. ܘܗܽܘ ܐܰܝܟ ܓܰܒܪܳܐ ܕܰܡܫܰܪܰܪ ܒܰܐܠܳܗܗ ܠܐ ܡܶܬܪܰܦܝܳܢܳܐܝܬ ܘܠܐ ܡܶܙܕܰܥܙܥܳܢܳܐܝܬ ܠܚܺܐܦ̈ܐ ܩܫܰܝܴ̈ܐ ܕܳܐܠܘܨ̈ܐ ܡܣܰܝܒܰܪ ܗܘܳܐ ܟܰܕ ܠܐ ܡܪܰܛܶܢ. ܐܶܠܐ ܠܰܘ ܗܳܕܶܐ ܒܰܠܚܽܘܕ ܘܟܰܕ ܥܰܠ ܕܪܳܕܦܺܝܢ ܠܶܗ ܒܰܣܺܝܡܳܐܝܬ ܡܨܰܠܶܐ ܗܘܳܐ ܘܰܡܪܰܚܶܡ ܘܥܰܠ ܐܰܒܺܝܫܳܠܽܘܡ ܪܝܫܳܐ ܕܡܳܪ̈ܘܕܶܐ ܒܳܟܶܐ ܗܘܳܐ ܘܡܶܬܡܰܪܡܰܪ ܒܒܶܟܝܶܗ. ܘܥܰܠ ܫܰܡܥܺܝ ܒܰܪ ܓܶܐܪܳܐ ܪ̈ܰܚܡܶܐ ܥܒܰܕ ܗܘܳܐ ܗܰܘ ܕܰܡܨܰܚܶܐ ܗܘܳܐ ܠܶܗ ܒܰܐܦܰܘ̈ܗܝ ܠܕܰܘܺܝܕ. ܘܠܐ ܬܒܰܥ ܡܶܢܗ ܣܰܟܠܘܬܳܐ ܕܰܡܨܰܥܪܳܢܘܬܗ. ܘܰܠܗܳܢܽܘܢ ܕܰܟܦܰܪܘ ܗܘܰܘ ܒܪܳܚܡܽܘܬܶܗ ܦܢܳܐ ܗܘܳܐ ܘܰܡܩܰܒܶܠ. ܘܒܶܝܬ ܠܶܗ ܘܠܐܠܳܗܳܐ ܡܙܺܝܥ ܗܘܳܐ ܩܳܠܗ ܒܬܶܫܒܘܚܬܳܐ ܘܳܐܡܰܪ:
ܡܳܪܝܳܐ ܡܳܐ ܣܓܺܝܘ ܐܳܠܘ̈ܨܰܝ. ܘܣܰܓܝ̈ܐܐ ܕܩܳܡܘ ܥܠܰܝ: ܘܣܰܓܝ̈ܐܐ ܕܳܐܡܪܺܝܢ ܠܳܗ̇ ܠܢܰܦܫܝ: ܕܠܰܝܬ ܠܶܟܝ ܦܘܪܩܳܢܳܐ ܒܰܐܠܳܗܶܟܝ: ܘܰܐܢܬ ܡܳܪܝܳܐ ܡܣܰܝܥܳܢܝ ܘܐܝܩܳܪܝ. ܘܰܡܪܰܡܪܡܳܢܶܗ ܕܪܺܝܫܝ. ܐܰܪܰܐ ܗܳܐ ܓܰܠܝܳܐܝܬ ܡܚܰܘܶܐ ܒܝܰܕ ܗܳܕܶܐ ܨܰܠܡܳܐ ܢܰܗܺܝܪܳܐ ܕܰܡܪܺܝܩ ܡܶܢ ܨܳܐܬܳܐ܆ ܕܗܰܘ ܕܰܒܕܰܘܝܕ ܡܶܬܡܬܶܠ ܐܪܳܙܳܢܳܐܝܬ. ܕܗܰܘ ܪܳܥܝܳܐ ܘܡܰܠܟܳܐ ܕܺܝܣܪܳܐܝܠ܆ ܕܟܰܕ ܐܶܬܚܙܺܝ ܒܰܒܣܰܪ ܒܨܶܗܝܽܘܢ ܐܶܡܳܐ ܕܨܳܠܘ̈ܒܐ ܢܓܰܕܘ ܘܰܐܦܩܽܘܗܝ ܡܶܢ ܡܕܺܝܢܬܳܐ ܠܰܨܠܝܒܳܐ. ܐܰܟܡܳܐ ܕܰܠܕܰܘܺܝܕ ܛܪܰܕܘ ܡܳܪ̈ܘܕܶܐ ܕܥܰܡ ܐܰܒܝܫܳܠܘܡ ܡܶܢ ܐܘܪܺܫܠܶܡ. ܘܠܐ ܩܥܰܘ ܠܘܳܬܗ ܡܰܪ̈ܚܐ ܟܰܕ ܐܳܡܪܺܝܢ. ܕܶܐܢ ܐܰܢܬ ܗܘ ܡܫܝܚܳܐ ܒܪܶܗ ܗܰܘ ܕܰܐܠܳܗܳܐ (ܡܬܝ ܟܙ: ܡ): ܢܶܚܽܘܬ ܗܳܫܳܐ ܡܶܢ ܙܩܺܝܦܳܐ ܘܰܢܗܰܝܡܶܢ ܒܶܗ. ܬܟܺܝܠ ܥܰܠ ܐܰܠܳܗܳܐ ܢܶܦܪܩܺܝܘܗܝ ܗܳܫܳܐ ܐܶܢ ܨܳܒܶܐ ܒܶܗ. ܐܳܡܰܪ ܓܶܝܪ ܕܰܒܪܶܗ ܐܢܳܐ ܕܰܐܠܳܗܳܐ (ܡܬܝ ܟܙ: ܡܒ-ܡܓ). ܐܶܠܐ ܠܘܳܬ ܗܳܠܶܝܢ ܡܳܢܳܐ ܣܳܥܰܪ ܗ̱ܘܳܐ ܗܰܘ ܒܰܣܺܝܡܳܐ. ܐܰܒܳܐ ܠܰܡ ܫܒܽܘܩ ܠܗܽܘܢ. ܠܐ ܓܶܝܪ ܝܳܕܥܺܝܢ ܡܳܢܳܐ ܥܳܒܕܺܝܢ (ܠܘܩܐ ܟܓ: ܠܕ). ܥܰܠܗܳܕܶܐ ܐܳܦ ܕܰܘܺܝܕ ܐܰܘܣܶܦ ܘܶܐܡܰܪ:
ܒܩܳܠܝ ܠܡܳܪܝܳܐ ܩܪܺܝܬ. ܘܰܥܢܳܢܝ ܡܶܢ ܛܽܘܪܶܗ ܩܰܕܺܝܫܳܐ. ܘܶܐܢܓܶܝܪ ܕܓܳܓܘܠܬܳܐ ܡܶܬܩܰܪܝܳܐ ܛܘܪܳܐ ܩܰܕܺܝܫܳܐ. ܗܽܘܝܽܘ ܒܰܫܪܳܪܳܐ ܩܰܕܺܝܫܳܐ ܕܩܰܕܶܫ ܠܚܰܛܳܝ̈ܐ ܒܕܶܒܚܬܳܐ ܝܰܩܺܝܪܬܳܐ ܕܰܗܘܳܬ ܥܠܰܘܗܝ. ܘܩܳܠܐܴ ܗܰܘ ܕܰܥܢܳܐ ܡܳܪܝܳܐ ܠܙܰܕܺܝܩܳܐ ܡܶܢ ܛܽܘܪܶܗ ܩܰܕܝܫܳܐ܆ ܗܳܢܰܘ ܗܰܘ ܕܶܐܡܰܪ ܠܘܳܬ ܓܰܝܳܣܳܐ. ܕܰܐܡܺܝܢ ܐܰܡܺܝܢ ܐܳܡܰܪ ܐܢܳܐ ܠܳܟ ܕܥܰܡܝ ܬܶܗܘܶܐ ܒܦܰܪܕܰܝܣܳܐ (ܠܘܩܐ ܟܓ: ܡܓ). ܡܶܛܠ ܕܰܢܫܰܪܪܶܗ ܠܡܽܘܠܟܳܢܳܐ. ܐܳܦ ܠܘܳܬ ܫܶܢܬܳܐ ܕܡܰܘܬܳܐ ܨܶܒܝܳܢܳܝܳܐ ܒܳܬܰܪܟܶܢ ܡܶܬܕܟܰܪ ܗܘܳܐ. ܐܰܝܟܰܢܳܐ ܕܰܠܡܰܘܬܳܐ ܘܠܰܫܝܽܘܠ ܢܚܰܠܶܨ ܘܢܶܒܽܘܙ. ܘܥܰܠ ܗܳܕܶܐ ܐܳܦ ܢܒܺܝܳܐ ܒܳܬܪܟܶܢ ܡܰܝܬܶܐ ܠܣܳܗܕܘܬܳܐ ܗܳܝ ܕܰܗܘܳܬ ܡܶܢ ܡܳܪܝܳܐ ܨܶܒܝܳܢܳܐܝܬ ܟܰܕ ܐܳܡܰܪ:
ܕܶܐܢܳܐ ܫܶܟܒܶܬ ܘܕܶܡܟܶܬ ܘܶܐܬܬܥܝܪܶܬ. ܡܶܛܠ ܕܡܳܪܝܳܐ ܣܰܡܟܰܢܝ. ܗܳܢܳܐ ܦܶܬܓܳܡܳܐ ܠܳܐ ܠܳܚܶܡ ܕܥܰܠ ܒܰܪܢܳܫܳܐ ܢܶܬܶܐܡܰܪ. ܠܰܘ ܓܶܝܪ ܕܫܽܘܠܛܳܢܳܐ ܐܢܳܫܳܝܳܐ ܐܝܬܶܝܗ̇ ܕܡܶܢ ܢܰܦܫܶܗ ܢܡܽܘܬ ܘܢܶܬܩܒܰܪ ܘܢܶܬܬܥܺܝܪ ܡܶܢ ܫܶܢܬܶܗ ܕܡܰܘܬܳܐ ܒܳܬܰܪ ܕܰܕܡܶܟ. ܡܳܕܶܝܢ ܓܰܠܝܳܐ ܗܝ ܕܗܺܝ ܐܝܬܶܝܗ̇ ܗܳܕܶܐ ܕܶܐܡܰܪ ܡܳܪܰܢ ܒܡܰܠܦܳܢܘܬܶܗ ܠܥܰܡܳܐ ܕܝܘܕܳܝ̈ܐ. ܕܶܐܢܳܐ ܣܳܐܶܡ ܐܢܳܐ ܢܰܦܫܝ ܕܬܽܘܒ ܐܶܣܒܺܝܗ̇. ܘܠܳܐ ܐܢܳܫ ܫܳܩܶܠ ܠܳܗ̇ ܡܶܢܝ. ܐܶܠܐ ܐܶܢܳܐ ܡܶܢ ܨܶܒܝܳܢܝ ܣܳܐܶܡ ܐܢܳܐ ܠܳܗ̇. ܐܶܢܐ ܓܶܝܪ ܫܰܠܝܛ ܐܢܳܐ ܕܶܐܣܺܝܡܺܝܗ̇: ܘܫܰܠܝܛ ܐܢܳܐ ܕܶܐܣܒܺܝܗ̇. ܕܗܳܢܳܐ ܦܘܩܕܳܢܳܐ ܩܰܒܠܶܬ ܡܶܢ ܐܳܒܝ (ܝܘܚܢܢ ܝ: ܝܚ). ܗܳܝ ܕܰܐܟܬܶܒ ܠܰܢ. ܕܡܳܪܝܳܐ ܣܰܡܟܰܢܝ ܗܳܝ ܕܛܘܒܳܢܳܐ ܦܰܘܠܘܣ ܕܰܐܠܳܗܳܐ ܐܰܒܽܘܗܝ ܐܰܩܝܡܶܗ ܡܶܢ ܒܶܝܬ ܡܺܝ̈ܬܶܐ (ܓܠܛܝ̈ܐ ܐ: ܐ).
ܗܝ ܕܠܳܐ ܐܶܕܚܰܠ ܡܶܢ ܪ̈ܶܒܘܳܬܶܗ ܕܥܰܡܳܐ. ܗܳܢܘܢ ܕܚܰܕܪܽܘܢܝ ܘܣܳܡܘ ܥܠܰܝ. ܟܰܕ ܩܳܥܶܝܢ ܥܠܝ. ܨܠܘܒܳܝܗܝ ܨܠܘܒܳܝܗܝ.
ܩܽܘܡ ܡܳܪܝܳܐ ܐܰܠܳܗܝ ܘܰܦܪܽܘܩܰܝܢܝ. ܗܳܕܶܐ ܒܰܪܬ ܩܳܠܐ ܫܰܦܺܝܪܳܐ ܐܶܬܐܡܪܰܬ ܠܘܳܬ ܗܰܘ ܕܶܐܡܰܪ. ܕܶܐܢܐ ܫܶܟܒܶܬ ܘܕܶܡܟܶܬ ܘܶܐܬܬܥܺܝܪܶܬ ܐܰܝܟ ܕܡܶܢ ܦܰܪܨܽܘܦܳܐ ܕܰܐܠܳܗܳܐ ܐܶܡܰܪ. ܕܶܐܢܳܐ ܫܶܟܒܶܬ ܘܕܶܡܟܶܬ ܘܶܐܬܬܥܝܪܶܬ. ܪܗܶܛ ܣܚܺܝܦܳܐ ܘܰܥܓܺܝܢܳܐ ܘܡܶܢ ܩܺܩܰܠܬܳܐ ܕܰܚܒܳܠܐ ܐܰܪܺܝܡ ܪܺܝܫܶܗ. ܘܩܰܪܶܒ ܒܳܥܘܬܳܐ ܒܦܽܘܡܳܐ ܕܰܢܒܺܝܘܬܳܐ ܟܰܕ ܡܶܬܟܰܫܰܦ ܐܳܡܰܪ ܗܘܳܐ. ܕܩܽܘܡ ܡܳܪܝܳܐ ܐܰܠܳܗܝ ܡܶܢ ܡܰܘܬܳܐ ܘܰܦܪܽܘܩܰܝܢܝ ܘܠܳܐ ܬܰܪܦܶܝܢܝ ܒܰܐܬܪܗ ܕܡܰܘܬܳܐ. ܐܰܦܶܩ ܢܰܦܫܝ ܡܶܢ ܒܶܝܬ ܚܒܘܫܝܳܐ ܕܰܐܘܕܶܐ ܠܰܫܡܳܟ ܕܰܫܦܰܪ ܠܳܟ ܕܬܶܫܬܶܐ ܟܳܣܳܐ ܕܡܰܘܬܳܐ ܕܰܡܙܰܓ ܠܝ ܚܶܘܝܳܐ. ܕܠܳܐ ܢܰܗܠܽܘܢ ܒܝ ܒܥܶܠܕ̈ܒܳܒܰܝ ܘܢܺܐܡܪܘܢ ܠܝ. ܕܠܳܐ ܐܶܬܳܐ ܒܳܬܪܳܟ ܘܠܐ ܦܰܪܩܳܟ ܡܶܢ ܐܝ̈ܕܰܝܢ. ܡܚܺܝ ܐܶܢܘܢ ܒܥܽܘܫܢܳܟ ܥܰܠ ܦܰܟܰܝ̈ܗܘܢ ܘܬܰܒܰܪ ܫܶܢܰܝ̈ܗܘܢ ܕܪ̈ܰܫܺܝܥܶܐ ܘܰܐܦܶܩܰܝܢܝ ܠܝ ܠܰܛܠܝܡܳܐ ܡܶܢ ܥܰܪ̈ܫܰܝܗܘܢ. ܥܠܰܝܟ ܓܶܝܪ ܩܳܥܶܐ ܗܘܳܐ ܐܺܝܽܘܒ ܙܰܕܺܝܩܳܐ ܟܰܕ ܡܠܰܒܶܒ ܠܝ ܕܬܰܒܰܪܬ ܐܢܬ ܢܺܝ̈ܒܰܘܗܝ ܕܥܰܘܳܠܐ. ܘܶܐܡܰܪܬ ܕܥܰܡܳܐ ܡܶܣܟܺܢܳܐ ܐܶܦܪܘܩ (ܐܝܘܒ ܟܛ: ܝܙ-ܝܚ). ܫܰܦܺܝܪ ܗܳܠܶܝܢ ܡܨܰܠܝܳܐ ܗܘܳܬ ܢܒܺܝܘܬܳܐ. ܠܘܳܬ ܡܳܪܝܳܐ ܐܰܠܳܗܳܐ.
ܕܩܽܘܡ ܡܳܪܝܳܐ ܐܰܠܳܗܳܐ ܘܰܦܪܽܘܩܰܝܢܝ: ܡܶܛܠ ܕܰܐܢܬ ܡܚܰܝܬ ܠܟܽܠܗܘܢ ܒܥܶܠܕ̈ܒܳܒܰܝ ܥܰܠ ܦܰܟܰܝ̈ܗܘܢ: ܘܫܶܢܷ̈ܐ ܕܪ̈ܰܫܺܝܥܶܐ ܬܰܒܰܪܬ. ܡܰܢ ܐܶܢܘܢ ܒܥܶܠܕܒ̈ܒܶܐ ܕܰܟܝܳܢܰܢ܆ ܐܶܠܐ ܚܶܘܝܳܐ ܗܰܘ ܡܶܬܝܰܕܥܳܢܳܐ. ܘܡܰܘܬܳܐ ܘܰܫܝܽܘܠ. ܕܰܦܥܰܪܘ ܦܽܘܡܗܽܘܢ ܥܰܠ ܟܝܳܢܳܐ ܐܢܳܫܳܝܳܐ ܘܒܰܠܥܽܘܗܝ ܕܠܐ ܚܰܘܣܳܢ. ܟܰܕ ܕܶܝܢ ܐܶܬܳܐ ܡܳܪܶܗ ܕܰܟܝܳܢܳܐ ܒܳܬܰܪ ܚܳܛܘܦܰܘ̈ܗܝ ܐܰܝܟ ܓܰܢ̱ܒܳܪܐ ܕܡܶܫܟܰܚ ܒܦܽܘܡܳܐ ܕܰܛܠܳܝܷ̈ܐ ܒܶܙܬܳܐ ܕܠܰܘ ܕܺܝܠܗܘܢ ܗ̱ܝ. ܫܰܩܶܦ ܐܶܢܘܢ ܠܓܘܡܕܳܢ̈ܐ ܒܺܐܝܕܶܗ ܚܰܝܠܬܳܢܺܝܬܳܐ. ܘܰܡܚܳܐ ܐܶܢܘܢ ܥܰܠ ܦܰܟܰܝ̈ܗܘܢ ܘܰܐܦܩܶܗ ܠܳܐܕܳܡ ܚܛܺܝܦܳܐ ܡܶܢ ܦܽܘܡܰܝ̈ܗܘܢ. ܘܬܰܒܰܪ ܫܶܢܰܝ̈ܗܘܢ ܕܬܽܘܒ ܠܐ ܢܶܣܥܽܘܢ ܥܰܠ ܟܝܳܢܳܐ ܐܢܳܫܳܝܳܐ. ܡܶܛܠܗܳܕܶܐ ܐܶܡܰܪ. ܕܶܐܡܰܪ ܡܳܪܝܳܐ ܕܡܶܢ ܒܶܝܬ ܫܶܢܷ̈ܐ ܐܰܗܦܶܟ. ܘܰܐܗܦܶܟ ܡܶܢ ܥܽܘܡ̈ܩܰܘܗܝ ܕܝܰܡܳܐ (ܡܙܡܘܪܐ ܣܚ: ܟܒ). ܡܶܛܠܗܳܕܐ ܛܘܒܳܢܳܐ ܕܰܘܺܝܕ.
ܕܡܳܪܝܰܐ ܗ̱ܘ ܦܘܪܩܳܢܳܐ: ܘܥܰܠ ܥܰܡܳܟ ܒܘܪܟܬܳܟ ܠܥܳܠܰܡ. ܘܛܳܒ ܟܺܐܢܳܐܝܬ ܡܶܬܩܪܶܐ ܦܘܪܩܳܢܳܐ ܕܰܒܝܰܕ ܨܠܝܒܐ ܒܽܘܪܟܬܳܐ. ܐܰܝܟܰܢܳܐ ܕܡܰܘܬܐ ܒܳܬܰܪ ܠܰܘܛܬܳܐ ܪܳܗܛ: ܒܳܬܰܪ ܠܰܘܛܬܳܐ ܥ̣ܰܠ ܘܶܐܫܬܰܠܰܛ ܒܳܐܕܳܡ. ܗܳܟܰܢܳܐ ܒܳܬܰܪ ܩܝܳܡܬܳܐ ܥܳܐܠܐ ܒܽܘܪܟܬܳܐ ܕܬܶܫܪܶܐ ܘܰܬܒܰܛܶܠ ܒܕܶܢܚܳܗ̇ ܠܰܘܛܬܳܐ ܗܳܝ ܕܥ̣ܶܠܰܬ ܥܠܰܝܢ ܒܰܥܒܳܪ ܦܘܩܕܳܢܳܐ. ܡܶܛܠܗܳܕܶܐ ܩܥܳܐ ܦܳܪܘܩܳܐ ܕܟܽܠܰܢ ܒܝܰܘܡܳܐ ܕܰܩܝܳܡܬܳܐ ܕܥܳܠܡ̈ܐ. ܕܬܰܘ ܒܪ̈ܝܟܰܘܗܝ ܕܳܐܒܝ ܝܺܪܰܬܘ ܡܰܠܟܘܬܳܐ: ܕܰܥܬܺܝܕܳܐ ܗܘܳܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܕܳܐܦ ܚܢܰܢ ܢܶܫܬܘܶܐ ܠܳܗ̇ ܟܠܢ ܒܥܳܠܡܳܐ ܚܰܕܬܳܐ ܐܰܡܝܢ܀ ܫܠܶܡ ܡܰܙܡܘܪܳܐ ܕܰܬܠܳܬܳܐ.
ܡܙܡܘܪܐ ܕܐܪܒܥܐ
ܡܰܘܕܰܥ ܥܰܠ ܨܠܘܬܳܐ ܕܙܰܕܝܩܳܐ ܕܰܫܡܰܥ ܐܰܠܳܗܳܐ: ܘܡܰܪܬܝܳܢܘܬܳܐ ܐܳܦ ܡܰܠܦܳܢܘܬܳܐ ܕܰܐܝܠܶܝܢ ܕܪܳܓܺܝܢ ܕܢܶܚܙܽܘܢ ܓܶܠܝܳܢܗ ܕܰܐܠܳܗܳܐ ܡܶܠܬܳܐ.
ܒܡܰܙܡܘܪܳܐ ܕܰܬܠܳܬܳܐ ܗܰܘ ܕܰܩܕܳܡ ܗܳܢܳܐ ܡܰܘܕܰܥ ܛܘܒܳܢܳܐ ܕܰܘܺܝܕ ܕܨܰܠܝܰܬ ܪܘܚܳܐ ܕܰܢܒܺܝܘܬܳܐ ܠܘܳܬ ܡܳܪܝܳܐ ܗܰܘ ܕܰܛܥܶܡ ܡܰܘܬܳܐ ܨܶܒܝܳܢܳܐܝܬ. ܗܳܫܳܐ ܒܬܶܫܒܘܚܬܳܐ ܗܳܕܶܐ ܕܰܐܪܒܰܥ ܡܰܘܕܰܥ ܥܰܠ ܙܰܒܢܳܐ ܪܒܝܥܳܝܳܐ ܕܰܢܒܝ̈ܐ. ܘܡܰܘܕܥܳܐ ܪܘܚܳܐ ܕܰܢܒܝܘܬܐ ܕܨܰܠܺܝܘ ܢܒܺܝ̈ܐ ܘܙܰܕܝ̈ܩܶܐ ܘܰܫܡܰܥ ܐܶܢܽܘܢ ܡܳܪܝܳܐ. ܡܶܛܠ ܓܶܝܪ ܕܰܠܚܰܡܫܳܐ ܙܰܒܢܷ̈ܐ ܡܶܬܦܰܠܰܓ ܡܶܬܚܗ ܕܥܳܠܡܳܐ ܗܳܢܐ. ܗܰܘ ܕܰܢܒܺܝ̈ܐ ܕܐܝܬܰܘܗܝ ܕܰܐܪܒܥܳܐ ܠܙܰܒܢܳܐ ܕܰܢܒܺܝ̈ܐ ܡܛܳܐ. ܘܟܰܕ ܙܰܒܢܳܐ ܩܰܕܡܳܝܳܐ ܡܬܰܚ ܥܕܰܡܳܐ ܕܰܗܘܐ ܛܰܘܦܳܢܳܐ. ܘܗܰܘ ܕܰܬܪܶܝܢ ܥܕܰܡܳܐ ܕܶܐܬܝܠܶܕ ܐܰܒܪܳܗܳܡ. ܕܰܬܠܳܬܳܐ ܥܕܰܡܳܐ ܠܡܘܫܶܐ. ܗܰܘ ܦܘܠܳܓܳܐ ܐܚܪܺܢܳܐ ܕܰܐܪܒܥܳܐ ܟܽܠܗ ܡܶܬܚܳܐ ܕܠܶܒܟܰܬ ܢܒܺܝܘܬܳܐ ܡܶܢ ܡܘܫܶܐ ܥܕܰܡܳܐ ܠܓܶܠܝܳܢܶܗ ܕܡܶܠܬܳܐ ܐܰܠܳܗܳܐ. ܕܚܰܡܫܳܐ ܕܶܝܢ ܕܡܶܢ ܕܶܢܚܶܗ ܕܰܐܠܳܗܳܐ ܕܒܶܝܬ ܒܢܰܝ̈ܢܳܫܳܐ ܥܕܰܡܳܐ ܠܕܺܝܢܳܐ ܕܦܳܣܺܝ̈ܩܳܬܳܐ. ܗܳܟܰܢܳܐ ܡܰܘܕܰܥ ܐܳܦ ܗܰܘ ܡܰܬܠܐ ܕܡܶܛܠ ܦܳܥ̈ܠܐܷ܆ ܐܶܡܰܪ ܓܶܝܪ ܡܳܪܰܢ: ܕܕܳܡܝܳܐ ܡܰܠܟܽܘܬܳܐ ܕܰܫܡܰܝܳܐ: ܠܓܰܒܪܳܐ ܕܰܢܦܰܩ ܒܨܰܦܪܳܐ ܕܢܶܐܓܽܘܪ ܦܳܥ̈ܠܐܷ ܠܟܰܪܡܶܗ. … ܘܰܢܦܰܩ ܬܽܘܒ ܒܰܬܠܳܬ ܫܳܥܺܝ̈ܢ … ܘܰܒܫܶܬ ܘܒܰܬܫܰܥܫܳܥ̈ܝܢ ܘܰܥܒܰܕ ܗܳܟܘܳܬ. ܘܠܰܐܦܱ̈ܝ ܚܕܰܥܶܣܪ̈ܶܐ ܫܳܥܺܝ̈ܢ ܢܦܰܩ ܘܶܐܫܟܰܚ ܦܳܥ̈ܠܐܷ ܐܚܪ̈ܢܶܐ ܕܩܳܝܡܺܝܢ ܘܒܰܛܺܝܠܝܢ (ܡܬܝ ܟ: ܐ-ܘ). ܚܳܙܶܐ ܐܰܢܬ ܗܳܟܺܝܠ ܐܰܝܟܰܢܳܐ ܕܠܰܐܚܪܺܝܢ ܩܳܝܡܳܐ ܗܳܝ ܕܶܐܡܪܰܬ܆ ܕܙܰܒܢܳܐ ܕܰܐܪܒܥܳܐ ܦܘܠܳܓܐ. ܟܰܕ ܡܶܬܚܫܶܒ ܘܡܶܬܦܰܚܰܡ ܙܰܒܢܳܐ ܕܰܢܒܺܝ̈ܐ ܕܒܶܗ ܡܶܬܢܰܒܶܐ ܗܘܳܐ ܛܘܒܳܢܳܐ ܕܰܘܺܝܕ. ܘܰܚܠܳܦܰܘܗܝ ܘܰܚܠܳܦ ܟܽܠܗܽܘܢ ܢܒܺܝ̈ܐ ܘܙܰܕܺܝ̈ܩܶܐ ܒܪܶܓܬܳܐ ܕܰܐܠܳܗܳܐ ܢܰܦܫܶܗ ܢܰܦܺܝܩܳܐ ܗܘܳܬ. ܐܰܝܟ ܕܶܐܡܰܪ: ܕܢܶܦܩܰܬ ܢܰܦܫܝ̱ ܒܳܬܪܳܟ (ܡܙܡܘܪܐ ܣܓ: ܛ). ܘܟܰܕ ܨܒܳܐ ܕܢܰܘܕܰܥ ܕܰܢܒܺܝ̈ܐ ܒܙܰܒܢܶܗ ܡܩܰܒܠܝܢ ܠܶܗ ܠܓܶܠܝܳܢܶܗ ܕܗܰܘ ܕܪܳܥܗ ܕܰܐܒܳܐ ܓܢܺܝܙܳܐ. ܡܰܝܬܶܐ ܒܳܬܪܳܗ̇ ܕܡܶܠܬܳܐ ܘܳܐܡܰܪ. ܘܰܥܠܰܝ ܣܶܡܟܰܬ ܝܰܡܝܢܳܟ (ܡܙܡܘܪܐ ܣܓ: ܛ). ܡܰܢܽܘ ܝܰܡܺܝܢܗ ܕܰܐܒܳܐ܆ ܐܶܠܐ ܝܚܝܕܳܝܐ ܕܡܶܢܶܗ. ܗܰܘ ܕܰܣܡܰܝܟ ܥܰܠ ܢܒܺܝܘܬܳܐ ܒܓܶܠܝܳܢܶܗ ܕܒܰܒܣܰܪ ܘܫܰܪܰܪ ܘܚܰܬܶܡ ܦܶܬܓܳܡܷ̈ܝܗ̇ ܕܰܢܺܒܝܘܬܳܐ. ܡܶܛܠ ܕܶܝܢ ܕܠܳܐ ܢܶܚܒܽܘܟ ܦܘܫܳܩܳܐ ܕܡܰܙܡܘܪܳܐ ܒܚܰܒܪܶܗ. ܢܶܥܛܽܘܦ ܠܰܢ ܩܰܠܝܠܳܐܝܬ ܠܘܳܬ ܬܶܫܒܽܘܚܬܳܐ ܗܳܕܶܐ ܕܰܐܪܒܰܥ ܕܣܺܝܡܳܐ ܩܕܳܡܰܝܢ. ܒܳܗ̇ ܡܶܫܟܚܝܢܰܢ ܙܰܒܢܳܐ ܕܰܢܒܺܝ̈ܐ ܕܶܐܡܰܪ ܪܘܚܳܐ ܩܰܕܝܫܳܐ.
ܟܰܕ ܠܰܡ ܩܪܺܝܬܳܟ ܥܢܰܝܬܳܢܝ: ܐܰܠܳܗܝ ܘܦܳܪܘܩܳܐ ܕܙܰܕܺܝܩܽܘܬܝ. ܒܽܐܘܠܨܳܢܱ̈ܝ ܐܰܪܘܰܚܬ ܠܝ: ܪܰܚܶܡ ܥܠܰܝ ܘܰܫܡܰܥ ܨܠܽܘܬܝ. ܗܳܢܳܐ ܡܰܙܡܘܪܳܐ ܐܰܡܺܝܪ ܠܕܰܘܺܝܕ ܣܘܥܪܳܢܳܐܝܬ ܟܰܕ ܐܶܬܚܰܫܰܒ ܫܳܐܘܳܠ ܥܠܰܘܗܝ ܡܰܘܬܳܐ ܒܺܝܫܳܐ. ܘܡܰܠܟܺܝܠ ܒܰܪܬܶܗ ܦܰܨܝܰܬ̣ܶܗ ܡܶܢ ܐܝ̈ܕܰܝ ܐܰܒܽܘܗ̇. ܡܶܛܠ ܕܟܰܕ ܥܪܰܩ ܗܘܳܐ ܡܨܰܠܶܐ ܗܘܳܐ. ܘܒܐܘܠܨܳܢ̈ܐ ܕܩܳܡܘ ܥܠܰܘܗܝ ܡܶܢ ܫܳܐܘܳܠ ܐܰܪܘܰܚ ܠܶܗ ܐܰܠܳܗܳܐ ܘܦܰܨܝܶܗ ܡܶܢܟܽܠ ܕܶܐܬܚܰܫܰܒ ܥܠܰܘܗܝ. ܘܒܰܐܪܥܳܐ ܕܰܦܠܶܫܬܳܝ̈ܐ ܒܰܣܝܡܳܐܝܬ ܐܶܬܩܰܒܰܠ ܡܶܢ ܐܰܟܺܝܫ ܡܰܠܟܳܐ ܕܓܳܬ. ܡܩܰܪܶܒ ܗܘܳܐ ܩܘܒܳܠܛܰܝܒܽܘܬܳܐ ܠܰܐܠܳܗܳܐ ܘܳܐܡܰܪ ܗܘܳܐ: ܕܠܰܘ ܐܰܝܟ ܪܶܥܝܳܢܗܽܘܢ ܕܰܒܥܶܠܕ̈ܒܒܰܝ. ܐܶܠܐ ܐܰܝܟ ܕܰܐܠܳܗܳܐ ܦܳܪܘܩܳܐ ܕܙܰܕܺܝܩܽܘܬܝ܆ ܗܰܘ ܕܝܳܕܰܥ ܕܠܳܐ ܡܬܽܘܡ ܐܰܣܟܠܶܬ ܒܫܳܐܘܳܠ. ܦܰܨܝܰܢܝ ܡܶܢ ܐܝܕܰܘ̈ܗܝ ܘܠܳܐ ܐܰܫܠܡܰܢܝ ܠܡܰܘܬܳܐ. ܘܪܰܚܶܡ ܥܠܰܝ ܘܰܫܡܰܥ ܨܠܽܘܬܝ. ܡܶܛܠ ܕܡܶܢ ܙܺܐܦ̈ܢܶܐ ܥܰܒ̈ܕܰܘܗܝ ܕܕܰܘܺܝܕ ܘܪ̈ܳܚܡܶܐ ܕܺܝܠܗ ܕܫܳܐܘܳܠ ܡܶܬܪܕܶܦ ܗܘܳܐ. ܘܐܝܩܳܪܶܗ ܡܚܰܦܶܝܢ ܗܘܰܘ ܓܶܝܪ ܒܣܶܢ̱ܐܬܳܐ. ܐܰܝܟ ܢܳܒܳܠ ܕܶܐܡܰܪ ܗܘܳܐ: ܕܡܰܢܽܘ ܕܰܘܺܝܕ ܘܡܰܢܽܘ ܒܰܪ ܐܝܫܰܝ (ܐ ܫܡܘܐܝܠ ܟܗ: ܝ). ܡܙܰܡܰܪ ܠܘܩܒܰܠܗܽܘܢ ܟܰܕ ܐܳܡܰܪ:
ܒܢܰܝ̈ܢܳܫܳܐ ܥܕܰܡܳܐ ܠܶܐܡܰܬܝ: ܐܝܩܳܪܝ ܡܚܰܦܶܝܬܽܘܢ. ܘܪܳܚܡܺܝܬܽܘܢ ܣܪܺܝܩܘܬܳܐ: ܘܒܳܥܶܝܢ ܐܢܬܽܘܢ ܕܰܓܳܠܘܬܳܐ ܠܥܳܠܡܺܝܢ. ܠܰܘ ܓܶܝܪ ܥܕܰܡܳܐ ܠܫܘܠܳܡܳܐ ܡܶܬܩܰܦܰܚ ܘܡܶܬܪܕܶܦ ܘܡܶܬܛܪܶܕ ܗܰܘ ܕܡܶܢ ܐܰܠܳܗܳܐ ܡܫܺܝܚ ܕܢܰܡܠܶܟ܆ ܐܶܠܐ ܡܳܐ ܕܫܶܠܡܰܬ ܡܰܠܟܘܬܳܐ ܕܪܘܫܥܳܐ ܗܳܢܰܘ ܕܒܶܝܬ ܫܳܐܘܳܠ. ܡܶܬܚܙܶܐ ܒܫܰܒ̈ܛܶܐ ܕܡܰܠܟܽܘܬܳܐ ܕܝܣܪܳܐܝܠ ܗܰܘ ܙܥܽܘܪܳܐ ܘܡܰܟܺܝܟܳܐ ܕܰܘܺܝܕ. ܕܰܦܪܰܫ ܐܰܠܳܗܳܐ ܘܰܓܒܳܝܗܝ ܡܶܢ ܐܰܚܰܘ̈ܗܝ ܠܰܡܕܰܒܪܳܢܘܬܳܐ ܕܥܰܡܗ.
ܡܶܛܠ ܕܰܦܪܰܫ ܠܶܗ ܡܳܪܝܳܐ ܓܰܒܝܳܐ ܒܬܶܕܡܽܘܪܬܳܐ. ܐܶܢܓܶܝܪ ܠܳܐ ܡܶܬܚܪܶܐ ܩܳܪܘܝܳܐ ܙܳܕܶܩ ܕܥܰܠ ܥܰܡܰܢܽܘܐܝܠ ܢܶܣܰܒ ܐܶܢܽܘܢ ܠܦܶܬܓܳܡܷ̈ܐ ܗܳܠܶܝܢ. ܗܽܘܝܽܘ ܓܶܝܪ ܗܰܘ ܕܶܐܬܦܪܶܫ ܡܶܢ ܐܰܠܳܗܳܐ ܒܬܶܕܡܽܘܪܬܳܐ ܘܓܰܒܝܳܐ. ܘܡܶܢ ܕܶܐܬܚܰܝܰܒ ܠܡܰܘܬܳܐ܆ ܬܽܘܒ ܥܛܰܦ ܘܰܐܩܺܝܡ ܟܘܪܣܝܳܐ ܕܡܰܠܟܽܘܬܶܗ ܕܕܰܘܺܝܕ ܒܝܰܕ ܟܳܪܽܘܙܘܬܳܐ ܕܰܫܠܝ̈ܚܶܐ ܩܰܕܺܝ̈ܫܶܐ. ܡܶܛܠ ܕܡܳܪܝܳܐ ܣܥܰܪ ܗܳܕܶܐ. ܡܰܝܬܶܐ ܘܳܐܡܰܪ:
ܡܳܪܝܳܐ ܢܶܫܡܰܥ ܟܰܕ ܐܶܩܪܶܝܘܗܝ. ܒܳܬܰܪܟܶܢ ܡܰܠܶܦ ܢܒܺܝܳܐ ܘܡܰܪܬܶܐ ܘܳܐܡܰܪ:
ܪܓܰܙܘ ܘܠܳܐ ܬܶܚܛܽܘܢ: ܐܶܡܰܪܘ ܒܠܶܒ̈ܘܳܬܟܘܢ ܘܥܰܠ ܡܰܫܟܒܰܝ̈ܟܽܘܢ ܪܢܰܘ. ܐܳܘ ܠܡܰܠܦܳܢܐ ܚܰܟܝܡܳܐ. ܐܰܪܰܐ ܐܰܝܟܰܢ ܡܰܪܬܶܐ ܠܰܢ ܢܒܺܝܳܐ܇ ܪܓܰܙܘ ܘܠܐ ܬܶܚܛܽܘܢ. ܘܡܳܢܳܐ ܢܶܚܫܽܘܒ ܠܗܳܝ ܕܶܐܡܰܪ ܝܰܥܩܽܘܒ ܫܠܝܚܳܐ. ܕܪܽܘܓܙܶܗ ܕܓܰܒܪܳܐ ܙܰܕܺܝܩܘܬܶܗ ܕܰܐܠܳܗܳܐ ܠܳܐ ܥܳܒܶܕ (ܝܥܩܘܒ ܐ: ܟ). ܕܠܳܐ ܚܶܪܝܳܢܳܐ ܬܰܪ̈ܬܰܝܗܶܝܢ ܫܰܪܝܪ̈ܳܢ. ܗܳܝ ܕܶܐܡܰܪ ܢܒܺܝܳܐ. ܪܓܰܙܘ ܘܠܳܐ ܬܶܚܛܽܘܢ. ܘܗܳܝ ܕܶܐܡܰܪ ܝܰܥܩܽܘܒ ܥܰܒܕܶܗ ܕܰܐܠܳܗܳܐ: ܕܪܽܘܓܙܶܗ ܕܓܰܒܪܳܐ ܙܰܕܺܝܩܘܬܳܐ ܕܰܐܠܳܗܳܐ ܠܐ ܥܳܒܶܕ. ܡܳܐ ܗܳܟܺܝܠ ܕܠܘܩܒܰܠ ܒܢܰܝ̈ܢܳܫܳܐ ܪܳܓܙܝܢܰܢ܆ ܟܺܐܢܳܐܝܬ ܡܶܬܚܰܝܒܺܝܢܰܢ ܠܰܚܛܺܝܬܳܐ. ܡܳܐ ܕܠܘܩܒܰܠ ܒܺܝ̈ܫܳܬܳܐ ܡܶܬܬܙܺܝܥܝܢܰܢ ܒܪܽܘܓܙܳܐ: ܕܟܰܕ ܪܳܓܙܺܝܢܰܢ ܥܰܠ ܫܰܝܢܳܐ ܡܰܚܣܪܳܢܳܐ. ܢܶܗܘܶܐ ܪܘܓܙܰܢ ܙܰܕܺܝܩܘܬܳܐ. ܐܶܢ ܓܶܝܪ ܥܰܡ ܚܰܫܷ̈ܐ ܒܺܝ̈ܫܶܐ ܢܶܩܢܶܐ ܫܰܝܢܳܐ ܘܠܳܐ ܢܶܪܓܰܙ ܠܘܩܒܰܠܗܘܢ. ܗܳܝܕܶܝܢ ܡܶܬܕܰܡܶܝܢܰܢ ܠܗܰܘ ܕܚܳܙܶܐ ܠܶܣܛܳܝ̈ܐ ܕܦܳܠܫܺܝܢ ܒܰܝܬܶܗ. ܘܗܳܘܐ ܠܗܽܘܢ ܚܰܒܪܳܐ. ܘܡܰܥܕܶܐ ܘܓܳܢܶܒ ܕܺܝܠܗ ܡܶܢ ܒܥܶܠܕ̈ܒܳܒܰܘܗܝ. ܡܶܛܠ ܗܳܢܳܐ ܫܰܦܺܝܪ ܢܶܪܓܰܙ ܠܘܩܒܰܠ ܚܰܫܷ̈ܐ ܒܺܝ̈ܫܶܐ ܕܡܶܢ ܫܺܐܕ̈ܐ ܡܶܬܬܥܺܝܪܝܢ ܒܰܢ. ܪܽܘܓܙܳܐ ܓܶܝܪ ܕܠܽܘܩܒܰܠ ܫܺܐܕ̈ܐ ܫܰܝܢܰܐ ܗ̱ܘ ܕܢܰܦܫܳܐ. ܗܰܘ ܕܶܝܢ ܕܪܳܓܶܙ ܠܘܩܒܰܠ ܩܰܪܝܒܶܗ܆ ܡܰܚܶܫ ܘܕܳܠܰܚ ܘܡܰܥܡܶܛ ܠܳܗ̇ ܠܬܰܪܥܝܬܳܐ. ܗܳܟܰܢܳܐ ܐܳܦ ܫܰܝܢܳܐ ܕܥܰܡ ܚܱ̈ܫܶܐ ܕܡܶܬܬܰܥܒܕܺܝܢ ܡܶܢ ܕܰܝ̈ܘܶܐ. ܚܰܪܒܰܐ ܗܘ ܕܫܰܝܢܳܐ. ܫܰܝܢܳܐ ܘܚܘܒܳܐ ܕܰܠܘܳܬ ܩܰܪ̈ܝܒܰܝܢ. ܐܰܟܙܢܳܐ ܓܶܝܪ ܕܟܰܠܒܷ̈ܐ ܕܥܳܢܴ̈ܐ ܠܰܘ ܒܪܳܥܝܳܐ ܘܰܒܥ̈ܢܳܐ ܣܳܝܡܺܝܢ ܠܡܶܒܰܚ܆ ܐܶܠܐ ܒܕܺܐܒܷ̈ܐ ܘܰܒܓܰܢܴ̈ܒܶܐ. ܗܳܟܰܢܳܐ ܐܳܦ ܚܶܡܬܳܐ ܕܒܰܢ. ܠܰܘ ܒܰܒ̈ܢܰܝ ܟܝܳܢܰܢ ܣܺܝܡܳܐ ܕܬܶܬܚܰܡܰܬ ܘܬܶܪܓܰܙ. ܐܶܠܐ ܠܘܩܒܰܠ ܫܺܐܕ̈ܐ ܒܥܶܠܕܒܳܒܰܘ̈ܗܝ ܕܰܟܝܳܢܰܢ. ܣܳܡܳܗ̇ ܒܰܢ ܥܳܒܘܕܐ. ܫܰܦܺܝܪ ܡܳܕܶܝܢ ܪܘܓܙܳܐ ܕܠܘܩܒܰܠ ܚܛܺܝܬܳܐ ܡܶܛܠ ܕܠܐ ܡܰܚܛܶܐ ܠܗܰܘ ܕܗܳܟܰܢܳܐ ܪܳܓܶܙ. ܘܥܰܠܗܳܕܶܐ ܡܦܰܫܶܩ ܦܰܘܠܘܣ ܘܳܐܡܪܰ: ܪܓܰܙܘ ܘܠܳܐ ܬܶܚܛܽܘܢ: ܘܫܶܡܫܳܐ ܥܰܠ ܪܽܘܓܙܟܽܘܢ ܠܳܐ ܢܶܥܪܰܒ (ܐܦܣ̈ܝܐ ܕ: ܟܘ). ܗܳܢܰܘ ܕܠܳܐ ܢܶܥܪܰܒ ܢܽܘܗܪܳܐ ܡܶܬܝܰܕܥܳܢܳܐ ܕܢܰܦܫܟܽܘܢ ܒܕܽܘܘܳܕܳܐ ܥܰܡܽܘܛܳܐ ܕܠܘܩܒܰܠ ܐܰܚܰܝ̈ܟܽܘܢ. ܐܰܟܙܢܳܐ ܕܰܡܚܰܒܶܠ ܚܶܫܘܟܳܐ ܕܠܺܠܝܳܐ ܦܰܐܝܽܘܬܳܐ ܕܢܽܘܗܪܶܗ ܕܐܝܡܳܡܳܐ. ܗܳܟܰܢܳܐ ܡܶܬܚܰܒܰܠ ܢܽܘܗܪܳܐ ܕܺܝܕܰܥܬܳܗ̇ ܕܢܰܦܫܳܐ. ܡܳܐ ܕܪܳܓܶܙ ܪܘܓܙܳܐ ܕܰܚܛܺܝܬܳܐ. ܐܶܡܰܪ ܓܶܝܪ ܕܰܘܺܝܶܕ:
ܕܶܐܡܰܪܘ ܒܠܶܒ̈ܘܳܬܟܘܢ ܘܥܰܠ ܡܰܫܟܒܰܝ̈ܟܽܘܢ ܪܢܰܘ. ܕܰܒܰܚܘ ܕܶܒܚܷ̈ܐ ܕܙܰܕܺܝܩܘܬܳܐ ܘܣܰܒܰܪܘ ܒܡܳܪܝܳܐ. ܡܳܐ ܕܰܠܚ̈ܝܘܳܬܳܐ ܒܺܝ̈ܫܳܬܳܐ ܕܣܳܥܶܝܢ ܥܠܰܝܢ ܒܠܰܝ̈ܠܰܘܳܬܳܐ ܢܳܟܣܺܝܢܰܢ ܘܡܰܘܒܕܺܝܢܰܢ. ܗܳܝܕܶܝܢ ܕܶܒܚܷ̈ܐ ܕܙܰܕܺܝܩܘܬܳܐ ܡܕܰܒܚܝܢܰܢ ܩܕܳܡ ܐܰܠܳܗܳܐ. ܚܳܕܶܐ ܓܶܝܪ ܐܰܠܳܗܳܐ ܡܳܐ ܕܰܠܚܰܝܘܬܳܐ ܒܺܝܫܬܳܐ ܙܳܢܝܽܘܬܳܐ ܘܣܳܥܪܰܬ ܚܒܳܠܐܴ ܢܶܕܒܽܘܚ. ܘܰܠܚܶܪܝܳܢܳܐ ܘܠܰܚܣܳܡܳܐ ܥܰܡ ܪܳܡܽܘܬܳܐ ܘܰܠܟܽܠ ܕܰܠܗܳܠܶܝܢ ܕܳܡܶܝܢ. ܗܳܝܕܶܝܢ ܚܰܝܳܒܝܢܰܢ ܥܰܡ ܟܶܢ̈ܫܶܐ ܕܰܢܒܺܝܷ̈ܐ ܘܙܰܕܺܝ̈ܩܶܐ ܗܳܢܽܘܢ ܕܰܡܫܰܐܠܝܢ ܗܘܰܘ ܘܳܐܡܪܺܝܢ:
ܡܰܢܽܘ ܢܚܰܘܶܝܢ ܛܳܒܳܐ: ܘܢܶܦܪܽܘܣ ܥܠܰܝܢ ܢܽܘܗܪܳܐ ܕܦܰܪܨܽܘܦܶܗ. ܚܳܙܶܐ ܐܰܢܬ ܐܰܝܟܰܢܳܐ ܡܰܝܬܶܐ ܢܒܺܝܳܐ ܥܘܗܕܳܢܳܐ ܕܣܰܓܝ̈ܐܐ ܢܒܺܝܷ̈ܐ ܘܙܰܕܺܝ̈ܩܶܐ ܕܡܶܬܪܰܓܪܓܺܝܢ ܗܘܰܘ ܘܰܡܨܰܠܶܝܢ ܘܒܳܥܶܝܢ. ܕܡܰܢܽܘ ܢܚܰܘܶܝܢ ܛܳܒܳܐ ܘܒܰܣܝܡܳܐ. ܗܰܘ ܕܠܰܝܬ ܐܰܬܪܳܐ ܠܒܺܝܫܘܬܳܐ ܕܰܬܚܰܒܶܠ ܟܝܳܢܶܗ ܫܰܦܺܝܪܳܐ. ܕܠܰܝܬ ܛܳܒܳܐ ܐܶܠܐ ܐܶܢ ܚܰܕ ܐܰܠܳܗܳܐ. ܣܳܗܶܕ ܐܰܠܳܗܳܐ ܡܶܠܬܳܐ ܗܰܘ ܕܦܰܢܝ ܠܰܥܠܰܝܡܳܐ ܗܰܘ ܕܩܳܪܶܐ ܗܘܳܐ ܠܶܗ ܡܰܠܦܳܢܳܐ ܛܳܒܳܐ. ܕܡܳܢܳܐ ܩܳܪܶܐ ܐܰܢܬ ܠܝ ܛܳܒܳܐ؟ ܠܰܝܬ ܛܳܒܳܐ ܐܶܠܐ ܐܶܢ ܚܰܕ ܐܰܠܳܗܳܐ (ܡܬܝ ܝܛ: ܝܙ). ܡܳܕܶܝܢ ܠܐܠܳܗܳܐ ܛܳܒܳܐ ܡܶܬܪܰܓܪܓܺܝܢ ܗܘܰܘ ܣܰܓܺܝ̈ܐܐ ܘܳܐܡܪܺܝܢ: ܕܡܰܢܽܘ ܢܚܰܘܶܝܢ ܛܳܒܳܐ ܘܢܶܦܪܽܘܣ ܥܠܰܝܢ ܢܽܘܗܪܳܐ ܦܰܐܝܳܐ ܕܦܰܪܨܽܘܦܶܗ. ܢܒܺܝܳܐ ܕܶܝܢ ܛܘܒܳܢܳܐ ܕܰܘܺܝܕ. ܗܰܘ ܕܡܶܢ ܟܰܕܽܘ ܚܙܳܝܗܝ ܡܚܰܘܶܐ ܒܓܶܠܝܳܢܳܐ. ܘܡܛܠܗܢܐ ܐܳܡܪ ܗܘܐ.
ܡܪܝܐ ܝܰܗܒܬ ܚܰܕܽܘܬܳܟ ܒܠܶܒܝ. ܫܰܦܺܝܪ ܚܰܕܘܬܳܐ ܩܪܳܝܗܝ ܠܥܰܡܰܢܽܘܐܶܝܠ܆ ܡܶܛܠ ܕܗܽܘ ܐܰܥܒܰܪ ܥܳܩܬܳܗ̇ ܕܰܐܪܥܳܐ. ܘܒܰܛܶܠ ܡܶܢܳܗ̇ ܟܽܘ̈ܒܶܐ ܕܰܐܘܥܝܰܬ ܒܰܥܒܳܪ ܦܽܘܩܕܳܢܳܐ. ܘܰܐܣܓܺܝ ܠܳܗ̇ ܥܒܽܘܪܳܐ ܕܰܡܣܰܠܰܩ ܒܪܰܦܫܳܐ ܘܰܒܡܰܕܪܝܳܐ. ܘܚܰܡܪܳܐ ܕܰܡܠܶܐ ܚܰܕܘܬܳܐ ܘܡܶܫܚܳܐ ܡܰܦܨܚܳܢܳܐ ܡܶܫܬܰܘܕܰܥ ܠܳܗ̇ ܠܚܰܕܽܘܬܳܐ ܗܳܝ ܕܩܰܒܶܠ.
ܡܶܢ ܙܰܒܢܳܐ ܠܰܡ ܕܰܥܒܽܘܪܗܘܢ ܘܰܕܚܰܡܪܗܽܘܢ ܘܰܕܡܶܫܚܗܽܘܢ. ܒܗܳܠܶܝܢ ܓܶܝܪ ܬܠܳܬܳܐ ܐܪ̈ܙܶܐ ܐܰܥܬܪܳܗ̇ ܛܳܒܳܐ ܐܰܠܳܗܳܐ ܠܐܢܳܫܘܬܳܐ. ܗܰܘ ܕܣܰܟܺܝܘ ܟܺܐܢ̈ܐ ܘܙܰܕܝ̈ܩܶܐ ܕܢܶܚܙܘܢܳܝܗܝ. ܘܝܰܗܒ ܠܥܺܕܬܶܗ ܚܠܳܦ ܥܒܽܘܪܳܐ ܦܰܓܪܶܗ. ܘܰܚܠܳܦ ܚܰܡܪܳܐ ܕܡܶܗ ܝܰܩܺܝܪܳܐ. ܘܰܒܝܰܕ ܡܶܫܚܳܐ ܡܙܰܓ ܪܘܚܶܗ ܦܰܪܰܩܠܻܝܛܳܐ ܒܰܥܡܳܕܳܐ. ܘܣܳܡܶܗ ܐܰܝܟܰܢ ܕܢܶܗܘܶܐ ܡܫܺܝܚܽܘܬܳܐ ܕܠܳܐ ܡܶܬܚܰܒܠܐܴ. ܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ. ܘܥܰܠܗܳܕܶܐ ܐܶܡܰܪ ܢܒܺܝܳܐ.
ܣܓܺܝܘ ܒܰܫܠܳܡܳܐ ܐܰܟܚܕܳܐ. ܡܶܐܟܽܘܠܬܳܐ ܕܫܰܝܢܳܐ ܘܫܳܩܘܬܳܐ ܕܰܫܠܳܡܳܐ ܐܝܬܶܝܗ̇ ܫܳܪܘܬܳܐ ܕܥܺܕܬܳܐ. ܫܰܝܢܳܐ ܘܰܫܠܳܡܳܐ ܓܶܝܪ ܩܰܢܝܳܐ. ܒܰܫܠܳܡܳܐ ܣܰܓܺܝܐܐ ܐܰܝܟ ܕܶܐܡܰܪ ܢܒܺܝܳܐ.
ܘܶܐܢܳܐ ܠܰܡ ܐܶܫܟܰܒ ܘܶܐܕܡܰܟ: ܡܶܛܠ ܕܰܐܢܬ ܡܳܪܝܳܐ ܒܰܠܚܘܕܰܝ ܒܫܶܠܝܳܐ ܬܰܥܡܪܰܢܝ. ܗܳܝ ܕܶܐܫܟܰܒ ܘܶܐܕܡܰܟ ܕܳܡܝܳܐ ܠܗܳܝ ܕܶܐܡܰܪ ܕܳܢܝܐܝܠ. ܕܙܶܠ ܠܩܶܨܰܬ ܢܽܘܚ! ܘܰܬܩܽܘܡ ܠܙܰܒܢܳܟ ܠܣܽܘܦ ܝܰܘܡ̈ܬܳܐ (ܕܢܝܐܝܠ ܝܒ: ܝܓ). ܒܪܰܡ ܒܫܶܠܝܳܐ ܒܰܠܚܘܕܰܝ ܡܰܥܡܰܪ ܠܝ ܡܳܪܝܳܐ. ܟܰܕ ܩܳܪܶܐ ܠܝ ܠܙܰܒܢܳܐ ܕܰܩܝܳܡܬܳܐ ܕܚܰܝ̈ܐ ܕܠܳܐ ܡܶܬܚܰܒܠܺܝܢ. ܕܒܳܗ̇ ܐܶܩܽܘܡ ܡܶܢ ܥܰܦܪܐ ܕܡܰܘܬܳܐ ܘܰܐܘܕܶܐ ܠܶܗ ܠܥܳܠܰܡ ܥܳܠܡܺܝܢ܀
ܡܙܡܘܪܐ ܕܚܡܫܐ
ܡܰܘܕܰܥ ܥܰܠ ܨܠܘܬܳܐ ܕܰܢܒܺܝܽܘܬܳܐ: ܕܰܡܟܰܣܝܳܐ ܗܘܳܬ ܠܢܽܘܗܪܳܐ ܨܰܦܪܳܝܳܐ ܕܓܶܠܝܳܢܶܗ ܕܡܶܠܬܳܐ ܕܥܰܡܰܢܽܘܐܝܠ: ܘܕܰܡܦܺܝܣܺܝܢ ܗܘܰܘ ܢܒܺܝ̈ܐ ܕܰܒܥܺܕܬܳܐ ܢܶܣܓܕܽܘܢ ܠܶܗ.
ܐܪ̈ܳܙܶܐ ܪܰܘܪ̈ܒܶܐ ܘܰܐܠܳܗܳܝܷ̈ܐ ܡܶܫܬܰܥܶܐ ܠܰܢ ܪܽܘܚܳܐ ܕܰܢܒܺܝܽܘܬܳܐ ܒܦܽܘܡܶܗ ܕܛܘܒܳܢܳܐ ܕܰܘܺܝܕ܆ ܐܰܠܳܗܳܐ ܕܡܶܢ ܐܰܠܳܗܳܐ ܡܰܟܪܶܙ ܠܶܗ ܠܥܰܡܰܢܽܘܐܝܠ ܗܳܢܳܐ ܡܰܠܟܳܐ ܘܰܢܒܺܝܳܐ܆ ܘܢܽܘܗܪܳܐ ܕܡܶܢ ܢܽܘܗܪܳܐ܆ ܡܶܢ ܒܳܬܰܪ ܓܶܝܪ ܕܰܒܗܰܘ ܡܰܙܡܽܘܪܳܐ ܩܰܕܡܳܝܳܐ ܩܪܳܝܗܝ ܐܺܝܠܳܢܳܐ ܦܺܐܪܳܝܳܐ ܘܠܳܐ ܡܶܬܚܰܒܠܳܢܳܐ ܘܰܒܗܰܘ ܕܰܬܪܶܝܢ ܐܰܟܪܙܶܗ ܝܰܠܕܳܐ ܡܬܽܘܡܳܝܳܐ. ܘܰܒܗܰܘ ܕܰܬܠܳܬܳܐ ܫܰܡܗܶܗ ܡܳܪܝܳܐ ܐܰܠܳܗܳܐ. ܘܰܕܕܺܝܠܶܗ ܐܝܬܰܘܗܝ ܦܽܘܪܩܳܢܳܐ. ܘܰܒܗܰܘ ܕܰܐܪܒܥܳܐ ܐܰܟܪܙܶܗ ܛܳܒܳܐ ܘܢܽܘܗܪܳܐ ܕܦܰܪܨܽܘܦܶܗ ܕܰܐܒܳܐ. ܘܰܒܗܳܢܳܐ ܕܚܰܡܫܳܐ ܫܳܐܶܠ ܘܒܳܥܶܐ ܘܡܶܬܟܰܫܰܦ ܡܙܰܡܪܳܢܳܐ ܐܰܠܗܳܝܳܐ ܐܰܝܟ ܕܡܶܢ ܦܰܪܨܽܘܦܳܐ ܕܰܢܒܺܝܘܬܳܐ܆ ܕܢܶܦܽܘܩ ܡܶܢ ܠܶܠܝܳܐ ܗܰܘ ܕܒܶܗ ܢܳܡܽܘܣܳܐ ܡܶܬܡܰܠܰܠ ܘܢܺܐܬܶܐ ܠܨܰܦܪܳܐ ܦܨܺܝܚܳܐ ܐܳܦ ܢܰܗܝܪܳܐ ܕܐܝܬܰܘܗܝ ܡܶܠܬܳܐ ܕܡܶܢ ܐܰܒܳܐ. ܒܠܺܠܝܳܐ ܓܶܝܪ ܥܰܡܽܘܛܳܐ ܡܚܰܦܰܝ ܗܘܳܐ ܟܶܢܳܪܳܐ ܕܰܢܒܺܝ̈ܐ ܛܘܒܳܢܷ̈ܐ. ܟܡܳܐ ܕܥܰܡ ܢܳܡܽܘܣܳܐ ܕܒܶܝܬ ܡܘܫܶܐ ܦܳܠܚܺܝܢ ܗܘܰܘ. ܪ̈ܰܟܺܝܟܳܢ ܓܶܝܪ ܥܰܝ̈ܢܶܝܗ̇ ܕܰܟܢܽܘܫܬܳܐ. ܗܳܢܰܘ ܕܐܘܪܺܫܠܶܡ ܐܰܪܥܳܢܳܝܬܳܐ. ܐܰܟܡܳܐ ܕܳܐܦ ܠܶܝܰܐ ܗܳܝ ܕܒܳܗ̇ ܡܶܬܡܰܬܠܐܴ. ܕܥܺܕܬܳܐ ܕܶܝܢ ܢܰܗܺܝܪ̈ܳܢ ܘܫܰܦܺܝܪ̈ܳܢ ܥܰܝ̈ܢܶܝܗ̇. ܘܨܰܦܪܳܝܬܳܐ ܗ̱ܝ ܘܒܶܝܬ ܐܺܝܡܳܡܳܐ. ܐܰܟܡܳܐ ܕܳܐܦ ܪܳܚܶܝܠ ܫܰܦܺܝܪ̈ܳܢ ܗܘܱ̈ܝ ܥܰܝ̈ܢܶܝܗ̇ ܘܝܳܐܝܳܐ ܩܽܘܒܠܠܳܗ̇. ܗܳܕܶܐ ܓܶܝܪ ܡܶܬܡܰܬܠܐܴ ܒܐܘܪܺܫܠܶܡ ܚܺܐܪܬܳܐ ܕܒܰܫܡܰܝܳܐ. ܡܳܕܶܝܢ ܠܰܘ ܣܪܺܝܩܳܐܝܬ ܡܨܰܠܐܷ ܗܘܳܐ ܕܰܘܺܝܕ ܕܢܶܦܓܰܥ ܒܗܰܘ ܢܽܘܗܪܳܐ ܕܓܶܠܝܳܢܳܗ̇ ܕܥܺܕܬܳܐ. ܐܶܡܰܪ ܓܶܝܪ ܟܰܕ ܡܨܰܠܐܷ ܗܳܟܰܢܳܐ:
ܡܶܠܰܝ̈ ܨܽܘܬ ܡܳܪܝܳܐ ܘܶܐܣܬܰܟܠ ܒܰܗܓܳܝܝ. ܘܨܽܘܬ ܠܩܳܠܐܴ ܕܰܓܥܳܬܝ ܡܰܠܟܝ ܘܰܐܠܳܗܝ: ܡܶܛܠ ܕܰܠܘܳܬܳܟ ܗܘ ܡܨܰܠܐܷ ܐܢܳܐ. ܘܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ. ܚܙܺܝ ܗܳܟܺܝܠ ܐܰܝܟܰܢܳܐ ܡܷ̈ܠܶܐ ܪ̈ܰܟܺܝܟܳܬܳܐ ܐܶܡܰܪ ܒܰܨܠܽܘܬܶܗ. ܗܰܘ ܓܶܝܪ ܕܶܐܡܰܪ. ܡܶܠܰܝ̈ ܨܽܘܬ ܡܳܪܝܳܐ. ܡܚܰܘܶܐ ܥܰܠ ܢܰܦܫܶܗ ܕܡܷ̈ܠܶܐ ܕܫܳܘ̈ܝܳܢ ܠܰܐܠܳܗܳܐ ܐܶܡܰܪ ܒܰܨܠܽܘܬܶܗ. ܗܳܝ ܕܶܐܡܰܪ ܠܰܐܠܳܗܳܐ. ܕܶܐܣܬܰܟ̱ܠ ܒܰܗܓܳܝܝ ܚܰܙܳܝܳܐ ܩܳܪܶܐ ܠܗ ܕܢܶܗܘܶܐ ܠܚܽܘܫܳܒܰܘ̈ܗܝ. ܚܽܘܪ ܐܰܝܟܰܢܳܐ ܠܐ ܩܳܪܶܐ ܢܰܦܫܶܗ ܡܰܠܟܳܐ ܒܰܨܠܽܘܬܳܐ. ܐܶܠܳܐ ܫܠܰܚ ܢܰܦܫܶܗ ܡܶܢ ܪܰܒܽܘܬܳܐ ܡܰܠܟܳܝܬܳܐ. ܘܠܰܐܠܳܗܳܐ ܩܳܪܶܐ ܗܘܳܐ ܡܰܠܟܶܗ ܘܰܐܠܳܗܶܗ. ܕܰܢܫܰܘܕܰܥ ܕܠܰܝܬ ܡܰܠܟܳܐ ܒܰܫܪܳܪܳܐ ܐܶܠܳܐ ܐܰܠܳܗܳܐ ܒܰܠܚܽܘܕ. ܗܰܘ ܓܶܝܪ ܕܰܬܚܶܝܬ ܫܽܘܥܒܳܕܶܗ ܕܡܰܠܟܳܐ ܐܝܬܰܘܗܝ܆ ܠܳܐ ܐܝܬܰܘܗܝ ܡܰܠܟܳܐ. ܡܳܕܶܝܢ ܒܗܳܝ ܕܶܐܡܰܪ ܕܰܘܺܝܕ. ܡܰܠܟܝ ܘܰܐܠܳܗܝ. ܗܽܘ ܐܝܬܰܘܗܝ ܡܰܠܟܳܐ ܒܰܠܚܽܘܕܰܘܗܝ. ܡܶܛܠܗܳܢܳܐ ܠܘܳܬܳܟ ܡܨܰܠܶܐ ܐܢܳܐ ܕܶܐܫܬܘܶܐ ܠܰܚܙܳܬܳܐ ܗܳܝ ܕܢܽܘܗܪܳܟ ܦܨܺܝܚܳܐ. ܘܬܶܫܡܰܥ ܩܳܠܝ ܒܨܰܦܪܳܐ ܢܰܗܺܝܪܳܐ ܗܰܘ ܕܰܡܛܰܝܰܒ ܕܢܺܐܬܶܐ ܒܳܬܰܪ ܠܺܠܝܳܐ.
ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ. ܡܳܢܳܐ ܐܶܢܽܘܢ ܦܶܬܓܳܡܷ̈ܝܗ̇ ܕܰܨܠܘܬܳܐ ܗܳܕܶܐ. ܘܡܳܢܰܘ ܚܰܝܠܳܗ̇. ܒܗܳܝ ܕܶܐܡܰܪ. ܕܡܳܪܝܳܐ ܒܨܰܦܪܳܐ ܬܶܫܡܰܥ ܒܩܳܠܝ. ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ. ܠܰܘ ܡܶܕܶܡ ܐܚܪܺܝܢ ܡܰܠܶܦ ܠܰܢ. ܐܶܠܐ ܠܶܗ ܠܥܰܡܰܢܽܘܐܝܠ ܩܳܪܶܐ ܨܰܦܪܳܐ. ܗܽܘ ܓܶܝܪ ܐܝܬܰܘܗܝ ܨܰܦܪܳܐ ܫܰܪܺܝܪܳܐ. ܕܠܳܐ ܡܩܰܒܶܠ ܠܠܝܳܐ ܕܥܰܡܛܳܢܳܐ. ܗܰܘ ܕܳܐܬܶܐ ܒܳܬܰܪ ܠܺܠܝܶܗ ܕܢܳܡܘܣܳܐ. ܗܳܢܰܘ ܨܰܦܪܳܐ ܕܰܩܪܳܝܗܝ ܝܽܘܚܰܢܳܢ ܢܽܘܗܪܳܐ ܫܰܪܺܝܪܳܐ ܕܡܰܢܗܰܪ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ (ܝܘܚܢܢ ܐ: ܛ). ܘܡܶܢ ܗܰܘ ܚܶܫܽܘܟܳܐ ܠܳܐ ܡܶܬܕܪܶܟ. ܘܚܶܫܽܘܟܳܐ ܠܳܐ ܐܰܕܪܟܶܗ (ܝܘܚܢܢ ܐ: ܗ). ܐܰܟܡܳܐ ܕܶܐܡܰܪ ܝܽܘܚܰܢܳܢ ܒܰܪ ܙܰܒܕܰܝ. ܗܳܟܰܢܳܐ ܐܶܬܳܐ ܡܳܪܰܢ ܗܰܘ ܨܰܦܪܳܐ ܘܢܽܘܗܪܳܐ ܫܰܪܺܝܪܳܐ. ܒܳܬܪܰ ܕܰܚܫܶܟ ܗܘܳܐ ܥܳܠܡܳܐ ܒܰܚܛܺܝܬܳܐ. ܫܪܳܗ̇ ܠܰܚܛܺܝܬܳܐ ܘܒܰܛܠܳܗ̇ ܕܶܐܡܰܪ ܡܙܰܡܪܳܢܳܐ. ܕܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ. ܡܒܰܕܶܩ ܒܝܰܕ ܗܳܕܶܐ. ܕܰܒܡܳܪܰܢ ܡܶܬܛܰܝܒܺܝܢ ܩܰܕܺܝ̈ܫܶܐ ܕܢܶܚܙܽܘܢ ܠܰܐܒܳܐ. ܘܗܽܘ ܗܘܳܐ ܐܽܘܪܚܳܐ ܠܥܳܠܡܳܐ ܣܰܡܝܳܐ. ܕܢܰܢܗܰܪ ܫܪ̈ܳܓܰܘܗܝ ܕܰܕܥܶܟܘ ܒܰܚܛܳܗܷ̈ܐ. ܘܥܰܠ ܗܳܕܶܐ ܐܶܡܰܪ ܗܘܳܐ ܗܰܘ ܨܰܦܪܳܐ ܕܚܰܝܷ̈ܐ. ܕܶܐܢܳܐ ܐܢܳܐ ܢܽܘܗܪܶܗ ܕܥܳܠܡܳܐ. ܘܬܽܘܒ ܡܰܘܣܶܦ. ܕܡܰܢ ܕܒܳܬܰܪܝ ܐܳܬܶܐ ܠܳܐ ܢܩܰܘܶܐ ܒܚܶܫܽܘܟܳܐ. ܐܶܠܳܐ ܢܶܫܟܰܚ ܠܶܗ ܢܽܘܗܪܳܐ ܕܚܰܝܷ̈ܐ (ܝܘܚܢܢ ܚ: ܝܒ). ܫܰܦܺܝܪ ܡܳܕܶܝܢ ܕܰܘܺܝܕ ܡܨܰܠܶܐ ܗܘܳܐ. ܘܨܰܦܪܳܐ ܠܡܳܪܰܢ ܩܳܪܶܐ ܗܘܳܐ. ܘܡܶܢ ܚܰܝܠܐܴ ܕܦܶܬܓܳܡܷ̈ܐ ܗܳܠܶܝܢ ܡܰܝܬܶܐ ܒܳܬܰܪܟܶܢ.
ܡܶܛܠ ܕܰܐܠܳܗܳܐ ܐܰܢܬ ܠܳܐ ܨܳܒܶܐ ܪܽܘܫܥܳܐ. ܗܳܐ ܠܗܰܘ ܕܰܩܪܳܝܗܝ ܨܰܦܪܳܐ. ܐܳܦ ܐܰܠܳܗܳܐ ܕܣܳܢܶܐ ܪܽܘܫܥܳܐ ܩܪܳܝܗܝ.
ܘܠܳܐ ܠܰܡ ܢܶܥܡܰܪ ܥܰܡܳܟ ܒܺܝܫܳܐ. ܘܠܳܐ ܢܩܽܘܡܽܘܢ ܫܰܒܗܪ̈ܳܢܶܐ ܩܕܳܡ ܥܰܝ̈ܢܰܝܟ: ܣܢܰܝܬ ܠܟܽܠ ܥܳܒ̈ܕܰܝ ܫܽܘܩܪܳܐ. ܘܬܰܘܒܶܕ ܠܰܡܡܰܠܠܰܝ̈ ܕܰܓܳܠܘܬܳܐ: ܠܓܰܒܪܳܐ ܐܳܫܶܕ ܕܡܳܐ ܘܢܰܟܽܘܠܬܳܢܳܐ ܢܰܣܠܶܝܘܗܝ ܡܳܪܝܳܐ. ܒܗܳܠܶܝܢ ܣܳܒܰܪ ܐܢܳܐ ܕܡܰܘܕܰܥ ܕܠܰܝܬ ܡܢܳܬܳܐ ܒܡܳܪܝܳܐ ܠܗܳܢܽܘܢ ܕܰܒܗܳܠܶܝܢ ܒܺܝ̈ܫܳܬܳܐ ܡܥܰܪܙܠܺܝܢ. ܓܰܒܪܳܐ ܓܶܝܪ ܐܳܫܶܕ ܕܡܳܐ ܘܢܰܟܽܘܠܬܳܢܳܐ. ܣܳܒܰܪ ܐܢܳܐ ܕܰܠܗܰܘ ܥܰܡܳܐ ܚܰܪܡܳܐ ܕܶܐܫܰܕܘ ܕܡܶܗ ܕܰܐܠܳܗܳܐ ܒܰܙܩܺܝܦܳܐ ܡܰܘܕܰܥ. ܗܳܢܳܐ ܓܶܝܪ ܐܰܣܠܝܶܗ ܐܰܒܳܐ ܘܛܰܪܕܶܗ ܡܶܢ ܝܳܪܬܽܘܬܳܐ ܐܰܠܳܗܳܝܬܳܐ. ܡܶܛܠ ܕܰܢܒܺܝܽܘܬܳܐ ܡܦܺܝܣܳܐ. ܕܰܒܥܺܕܬܳܐ ܗܳܝ ܕܰܡܛܰܝܒܳܐ ܗܘܳܬ ܕܬܶܬܓܠܐܷ ܠܰܡܩܰܒܳܠܽܘ ܘܰܠܡܶܣܓܰܕ ܘܠܳܐ ܢܰܣܠܶܝܗ̇ ܡܳܪܝܳܐ ܥܰܡ ܥܰܡܳܐ ܐܳܫܶܕ ܕܡܳܐ. ܐܶܡܰܪ ܢܒܺܝܳܐ:
ܘܶܐܢܳܐ ܒܣܽܘܓܳܐܐ ܕܛܰܝܒܽܘܬܳܟ ܐܶܥܽܘܠ ܠܒܰܝܬܳܟ: ܘܶܐܣܓܽܘܕ ܒܗܰܝܟܠܐܴ ܕܩܘܕܫܳܟ. ܘܠܳܐ ܐܶܬܓܰܙܶܐ ܡܢ ܡܰܥܡܪܳܟ ܐܰܝܟ ܥܰܡܳܐ ܒܺܝܫܳܐ. ܘܠܳܐ ܐܶܪܚܰܩ ܡܶܢ ܩܰܘܡܳܐ ܕܰܩܕܳܡ ܐܰܦܰܝ̈ܟ ܐܰܝܟ ܨܳܠܘ̈ܒܶܐ ܫܰܒܰܗܪ̈ܳܢܶܐ. ܘܠܳܐ ܬܰܘܒܶܕܰܝܢܝ ܥܰܡ ܗܳܢܽܘܢ ܕܡܰܠܶܠܘ ܥܠܰܝܟ ܕܰܓܳܠܘܬܳܐ. ܐܶܠܐ ܐܶܥܽܘܠ ܒܺܐܝܳܠܳܟ ܠܒܰܝܬܳܟ ܘܶܐܣܓܽܘܕ ܒܗܰܝܟܠܳܟ ܩܰܕܝܫܳܐ. ܘܰܐܘܕܶܐ ܠܳܟ ܒܥܺܕܬܳܐ ܪܰܒܬܳܐ. ܘܰܐܓܗܶܐ ܡܶܢ ܡܶܣܟܺܢܘܬܶܗ ܕܥܰܡܳܐ. ܘܰܒܥܽܘܬܪܳܐ ܕܥܰܡ̈ܡܶܐ ܣܰܓܝ̈ܐܶܐ ܐܶܙܡܰܪ ܠܳܟ.
ܒܕܶܚܠܬܳܟ ܡܳܪܝܳܐ ܕܰܒܰܪܰܝܢܝ ܘܰܒܙܰܕܺܝܩܘܬܳܟ: ܡܶܛܠ ܒܥܶܠܕ̈ܒܳܒܰܝ ܬܪܽܘܨ ܩܕܳܡܰܝ ܐܘܪܚܳܟ. ܡܶܛܠ ܕܠܰܝܬ ܒܦܽܘܡܗܽܘܢ ܟܺܐܢܘܬܳܐ: ܐܶܠܳܐ ܥܰܘܠܐ ܒܓܰܘܗܽܘܢ. ܘܠܶܫܴ̈ܢܰܝܗܽܘܢ ܡܗܰܦܟܺܝܢ. ܚܰܝܶܒ ܐܶܢܽܘܢ ܐܰܠܳܗܳܐ: ܘܢܶܦܠܽܘܢ ܡܶܢ ܡܽܘܠܟܳܢܰܝ̈ܗܽܘܢ. ܘܰܒܣܽܘܓܳܐܐ ܕܥܰܘܠܗܘܢ ܕܚܽܘܩ ܐܶܢܽܘܢ: ܡܶܛܠ ܕܡܰܪܡܪܽܘܟ. ܐܰܪܰܐ ܠܰܘ ܢܰܗܺܝܪܳܐܝܬ ܡܰܟܪܙܺܝܢ ܩܴ̈ܠܶܐ ܗܳܠܶܝܢ ܥܰܠ ܡܰܪܳܚܽܘܬܗܽܘܢ ܕܨܳܠܘ̈ܒܶܐ. ܘܥܰܠ ܡܰܦܽܘܠܬܗܽܘܢ ܕܡܶܢ ܡܽܘܠܟܳܢܷ̈ܐ ܫܡܰܝܳܢܷ̈ܐ ܘܰܐܒܳܗܳܝܷ̈ܐ. ܡܰܢ ܐܶܢܽܘܢ ܓܶܝܪ ܗܳܠܶܝܢ ܕܠܰܝܬ ܒܦܽܘܡܗܽܘܢ ܟܺܐܢܽܘܬܳܐ. ܐܶܠܳܐ ܗܳܢܽܘܢ ܕܩܳܥܶܝܢ ܗܘܰܘ ܩܕܳܡ ܦܺܝܠܰܛܽܘܣ ܕܠܰܝܬ ܠܰܢ ܡܰܠܟܳܐ ܐܶܠܳܐ ܐܶܢ ܩܶܣܪܰ. ܘܟܺܐܢܽܘܬܳܐ ܦܳܩܕܳܐ ܘܫܰܠܝܛܳܐ ܥܠܰܝܗܘܢ. ܘܢܶܦܩܰܬ ܡܶܢ ܦܽܘܡܗܽܘܢ ܙܰܕܺܝܩܽܘܬܳܐ. ܘܥܶܠܰܬ ܚܠܳܦܶܝܗ̇ ܥܰܘܳܠܽܘܬܳܐ. ܩܶܣܰܪ ܓܶܝܪ ܒܗܰܘ ܙܰܒܢܳܐ ܡܰܠܟܳܐ ܗܘܳܐ ܕܪ̈ܽܗܘܡܳܝܶܐ ܡܶܢ ܗܳܢܽܘܢ ܕܦܳܠܚܺܝܢ ܠܰܦܬܰܟܪ̈ܶܐ. ܘܡܶܛܽܠܗܳܕܶܐ ܐܶܡܰܪ ܢܒܺܝܳܐ. ܕܥܰܘܠܳܐ ܐܺܝܬ ܒܓܰܘܗܽܘܢ. ܘܡܺܝܬܘ ܠܗܽܘܢ ܡܶܢ ܚܰܝܷ̈ܐ ܕܙܰܕܺܝܩܽܘܬܳܐ.
ܘܐܰܝܟ ܩܰܒܪ̈ܶܐ ܦܬܝ̈ܚܶܐ ܓܰܓܪ̈ܳܬܗܽܘܢ. ܕܳܡܝܳܐ ܗܳܕܶܐ ܒܰܫܪܳܪܳܐ ܐܰܟܙܢܳܐ ܓܶܝܪ ܕܰܒܩܰܒܪܳܐ ܠܰܝܬ ܒܶܗ ܐܶܠܐ ܡܺܝ̈ܬܶܐ. ܗܳܟܰܢܳܐ ܦܽܘܡܗܽܘܢ ܕܪ̈ܰܫܺܝܥܶܐ ܡܰܘܬܳܐ ܡܠܐܷ. ܘܪܺܝܚܳܐ ܣܰܪܝܳܐ ܕܰܚܛܳܗܷ̈ܐ ܦܳܐܰܚ ܡܶܢ ܓܰܓܪ̈ܳܬܗܘܢ. ܘܠܰܝܬ ܠܡܶܫܡܰܥ ܡܶܢܗܽܘܢ ܐܶܠܳܐ ܬܰܫܥ̈ܝܳܬܳܐ ܕܓܰܘܪܳܐ ܘܙܳܢܝܽܘܬܳܐ ܘܛܰܢܦܽܘܬܳܐ ܘܳܐܣܽܘܛܽܘܬܳܐ ܘܡܰܕܡܟܳܐ ܛܰܢܦܳܐ ܘܚܰܪܳܫܽܘܬܳܐ ܐܳܦ ܘܦܰܚܙܽܘܬܳܐ ܘܰܣܕܽܘܡܳܝܽܘܬܳܐ. ܘܟܽܠ ܕܰܠܗܳܠܶܝܢ ܕܳܡܶܝܢ. ܗܳܠܶܝܢ ܐܶܢܽܘܢ ܥܒܴ̈ܕܶܐ ܡܺܝ̈ܬܶܐ. ܥܰܠܗܳܕܶܐ ܡܰܝܬܶܐ ܥܠܰܝܗܽܘܢ ܚܰܝܳܒܘܬܳܐ ܢܒܺܝܳܐ ܒܠܰܘܛܬܳܐ ܘܳܐܡܰܪ: ܢܚܰܝܶܒ ܐܶܢܽܘܢ ܐܰܠܳܗܳܐ ܘܢܶܦܠܽܘܢ ܡܶܢ ܡܽܘܠܟܳܢܰܝ̈ܗܽܘܢ. ܗܳܕܶܐ ܕܶܝܢ ܐܺܝܬܶܝܗ̇ ܗܳܝ ܕܶܐܡܰܪ ܡܳܪܰܢ ܠܪ̈ܰܒܰܝ ܟܳܗܢܷ̈ܐ ܨܳܠܘ̈ܒܶܐ. ܗܳܝ ܕܬܶܫܬܩܶܠ ܡܶܢܟܽܘܢ ܡܰܠܟܽܘܬܳܐ ܕܰܐܠܳܗܳܐ: ܘܬܶܬܝܗܶܒ ܠܥܰܡܳܐ ܕܥܳܒܶܕ ܦܺܐܪ̈ܶܐ (ܡܬܝ ܟܐ: ܡܓ). ܠܗܳܠܶܝܢ ܐܶܡܰܪ ܢܒܺܝܳܐ. ܕܰܒܣܽܘܓܳܐܐ ܕܥܰܘܠܗܽܘܢ ܕܚܽܘܩ ܐܶܢܽܘܢ. ܡܶܛܠ ܕܡܰܪܡܪܽܘܟ.
ܘܢܶܚܕܽܘܢ ܒܟ ܟܽܠ ܕܰܡܣܰܒܪܺܝܢ ܒܳܟ. ܠܥܳܠܰܡ ܢܫܰܒܚܽܘܢܳܟ. ܘܬܶܥܡܰܪ ܒܗܽܘܢ. ܡܰܢ ܐܶܢܽܘܢ ܓܝܪ ܗܳܠܶܝܢ ܕܰܡܣܰܒܪܺܝܢ ܒܶܗ܆ ܐܶܠܳܐ ܥܰܡ̈ܡܶܐ ܩܰܕܺܝ̈ܫܶܐ ܘܰܡܗܰܝ̈ܡܢܶܐ ܕܩܰܒܶܠܘ ܫܪܳܪܳܐ ܕܓܶܠܝܳܢܶܗ ܒܡܰܠܦܳܢܽܘܬܳܐ ܡܰܠܝܰܬ ܚܰܝ̈ܐ ܕܰܫܠܺܝ̈ܚܶܐ. ܗܳܢܽܘܢ ܕܩܰܒܠܽܘܗܝ ܐܰܝܟ ܪܺܝܚܳܐ ܒܰܣܺܝܡܳܐ ܘܶܐܬܥܰܫܰܢܘ ܒܶܗ ܘܰܪܚܶܡܘ ܫܡܶܗ. ܡܶܛܠܗܳܢܳܐ ܐܶܡܰܪ ܢܒܺܝܳܐ:
ܕܢܶܬܥܰܫܢܽܘܢ ܒܳܟ ܟܽܠ ܪ̈ܳܚܡܰܝ ܫܡܳܟ. ܘܰܠܥܳܠܰܡ ܢܫܰܒܚܽܘܢܳܟ. ܘܬܶܥܡܰܪ ܒܗܽܘܢ܆ ܘܠܳܐ ܢܶܫܬܰܒܩܽܘܢ ܡܶܢܳܟ ܐܰܝܟ ܝܘܕܳܝ̈ܐ ܡܰܪ̈ܳܚܶܐ. ܐܶܠܐ ܢܶܗܘܽܘܢ ܠܳܟ ܗܰܝ̈ܟܠܐܷ ܪ̈ܘܚܳܢܶܐ ܘܟܳܗܢܷ̈ܐ ܩܰܕܺܝ̈ܫܶܐ.
ܡܶܛܠ ܕܰܐܢܬ ܬܒܰܪܶܟ ܠܙܰܕܺܝ̈ܩܶܐ. ܘܒܳܟ ܢܶܦܪܥܘܢ ܫܰܒ̈ܛܶܐ ܕܟܺܐܢܷ̈ܐ.
ܡܳܪܝܳܐ ܐܰܝܟ ܣܰܟܪܳܐ ܡܩܰܒܰܠܬܳܐ ܬܰܥܛܦܰܢܝ. ܠܡܳܢܳܐ ܐܰܝܟ ܣܰܟܪܳܐ ܡܦܺܝܣ ܠܶܗ ܠܡܶܠܬܳܐ ܕܢܶܗܘܶܐ. ܐܰܢܬ ܠܰܡ ܒܠܰܥ ܚܠܳܦܰܝܢ ܘܦܰܨܳܐ ܠܰܢ. ܠܰܝܬ ܓܶܝܪ ܠܰܡܕܰܥܳܟܽܘ ܓܶܐܪ̈ܶܐ ܝܳܩ̈ܕܶܐ ܕܒܺܝܫܳܐ. ܐܶܠܳܐ ܡܳܪܝܳܐ ܗܰܘ ܕܰܗܘܳܐ ܠܰܢ ܣܰܟܪܳܐ ܕܦܘܪܩܳܢܳܐ ܒܓܶܠܝܳܢܶܗ ܕܒܰܒܣܰܪ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܝܢ܀
ܡܙܡܘܪܐ ܕܫܬܐ
ܡܰܘܕܰܥ ܒܶܗ ܘܰܡܚܰܘܶܐ ܥܰܠ ܡܰܦܽܘܠܬܳܐ ܕܰܗܘܳܬ ܒܶܗ ܠܰܟܝܳܢܳܐ ܐܢܳܫܳܝܳܐ ܒܝܰܘܡܳܐ ܕܶܫܬܳܐ. ܘܥܰܠ ܕܶܚܠܬܳܐ ܕܕܺܝܢܳܐ ܐܚܪܳܝܐ.
ܪ̈ܰܚܡܶܐ ܘܳܐܣܝܽܘܬܳܐ ܕܡܶܢ ܐܰܠܳܗܳܐ ܡܚܰܘܝܳܐ ܠܰܢ ܪܽܘܚܳܐ ܕܰܢܒܺܝܽܘܬܳܐ. ܕܫܳܐܠܳܐ ܗܘܳܬ ܡܶܢ ܡܳܪܝܳܐ ܠܰܟܝܳܢܳܐ ܐܢܳܫܳܝܳܐ. ܒܝܰܕ ܛܽܘܒܳܢܳܐ ܕܰܘܺܝܕ ܒܬܶܫܒܽܘܚܬܳܐ ܗܳܕܶܐ ܕܫܶܬ. ܡܶܛܠ ܕܰܒܝܰܘܡܳܐ ܕܶܐܬܟܪܰܗ ܕܰܘܺܝܕ܆ ܐܰܡܪܶܗ ܠܡܰܙܡܽܘܪܳܐ ܗܳܢܐ. ܙܳܕܶܩ ܕܢܶܒܥܶܐ ܡܶܛܠ ܐܰܝܠܶܝܢ ܕܒܶܗ ܡܰܠܶܠ. ܕܡܶܛܽܠ ܐܰܝܕܳܐ ܥܶܠܬܳܐ ܐܰܡܣܝ ܬܶܫܘܺܝܬܶܗ ܒܕܶܡܥܬܶܗ. ܘܰܥܕܰܡܳܐ ܠܗܳܕܶܐ ܟܽܠܳܗ̇ ܟܰܪܝܘܬܳܐ ܐܶܬܡܰܛܺܝ. ܐܰܝܟܰܢܳܐ ܕܕܶܡ̈ܥܶܐ ܕܥܰܝ̈ܢܰܘܗܝ ܡܰܣܝܽܘܬܳܐ ܒܬܶܫܘܺܝܬܶܗ ܢܶܥ̈ܒܕܳܢ. ܡܳܢܳܐ ܢܶܬܡܰܠܰܠ ܥܰܠ ܓܰܒܪܳܐ ܗܳܢܳܐ ܙܰܕܺܝܩܳܐ. ܠܐ ܫܰܪܺܝܪ ܗܘܳܐ ܠܶܗ ܚܽܘܕܳܬܳܐ ܕܰܗܘܳܐ ܒܡܶܐܬܺܝܬܶܗ ܕܥܰܡܰܢܽܘܐܝܠ. ܘܪܽܘܚܳܐ ܕܰܢܒܺܝܽܘܬܳܐ ܕܰܢܣܰܒ. ܕܰܐܝܟ ܦܰܘܠܘܣ. ܕܶܐܦܛܰܪ ܐܶܢܳܐ ܪܓܺܝܓ ܐܢܳܐ: ܕܥܰܡ ܡܫܺܝܚܳܐ ܐܶܗܘܶܐ (ܦܝܠܝ̈ܦܣܝܐ ܐ: ܟܓ). ܠܳܐ ܚܙܳܝܗܝ ܡܶܢ ܪܽܘܚܩܳܐ ܠܗܰܘ ܡܽܘܠܟܳܢܳܐ ܕܩܰܕܝ̈ܫܶܐ ܘܰܚܕܺܝ ܒܶܗ. ܐܰܝܟ ܕܰܐܣܗܶܕ ܥܠܰܘܗܝ ܦܰܘܠܘܣ ܐܰܠܳܗܳܝܳܐ ܒܶܐܓܰܪܬܶܗ ܕܰܠܘܳܬ ܥܶܒܪ̈ܳܝܶܐ. ܕܠܰܝܬ ܒܰܪܢܳܫܳܐ ܕܢܺܚܶܐ ܝܰܘܡܳܐ ܚܰܕ ܘܠܳܐ ܢܶܚܛܶܐ (ܩܘܗܠܬ ܙ:ܟ). ܠܳܐ ܝܳܕܰܥ ܗܘܳܐ ܘܰܡܦܳܣ ܗܘܳܐ ܚܰܟܺܝܡܳܐܝܬ ܒܡܰܙܡܽܘܪܳܐ ܗܳܢܳܐ ܕܶܫܬܳܐ ܠܟܽܘܪܗܳܢܳܐ ܗܰܘ ܕܰܢܦܰܠ ܒܶܗ ܟܝܳܢܳܐ ܐܢܳܫܳܝܳܐ ܒܝܰܘܡܳܐ ܕܶܫܬܳܐ܆ ܒܶܗ ܒܗܳܢܳܐ ܡܶܢܝܳܢܳܐ ܐܶܬܬܙܺܝܥ ܐܰܠܳܗܳܐ ܠܽܘܩܒܰܠ ܐܳܕܳܡ ܒܓܰܘ ܦܰܪܕܰܝܣܳܐ ܕܰܥܕܶܢ. ܘܰܪܓܶܙ ܥܰܠ ܚܶܘܝܳܐ ܘܥܰܠ ܚܰܘܳܐ ܘܥܰܠ ܐܳܕܳܡ ܘܥܰܠ ܐܰܪܥܳܐ. ܘܰܒܗܳܢܳܐ ܝܰܘܡܳܐ ܕܶܫܬܳܐ ܐܶܫܬܡܰܥ ܩܳܠܐ ܕܠܰܘ̈ܛܳܬܳܐ ܡܶܢ ܗܰܘ ܦܽܘܡܳܐ ܡܰܒܘܥܳܐ ܕܒܽܘܪ̈ܟܳܬܳܐ. ܘܰܒܝܰܘܡܳܐ ܕܶܫܬܳܐ ܫܡܰܥ ܚܶܘܝܳܐ ܗܳܝ: ܕܠܺܝܛ ܐܰܢܬ ܡܶܢ ܟܽܠܳܗ̇ ܒܥܺܝܪܳܐ: ܘܡܶܢ ܟܽܠܳܗ̇ ܚܰܝܽܘܬܳܐ. ܘܥܰܠ ܟܰܪܣܟ ܬܗܰܠܶܟ. … ܘܰܒܥܶܠܕܒܳܒܽܘܬܳܐ ܐܶܣܺܝܡ ܒܰܝ̈ܢܰܝܟ ܠܰܐܢܬܬܳܐ (ܒܪܝܬܐ ܓ: ܝܕ-ܝܗ). ܘܒܶܗ ܬܘܒ ܒܝܰܘܡܳܐ ܕܶܫܬܳܐ ܫܶܡܥܰܬ ܚܰܘܳܐ ܒܰܪܬ ܩܳܠܐ ܗܳܝ ܡܰܪܺܝܪܬܳܐ. ܕܡܰܣܓܳܝܽܘ ܐܰܣܓܶܐ ܟܺܐܒܰܝ̈ܟܝ ܘܟܺܐܒܷ̈ܐ ܕܒܰܛܢܰܝ̈ܟܝ (ܒܪܝܬܐ ܓ: ܝܘ). ܘܥܰܡܳܗ̇ ܐܳܦ ܐܰܪܥܳܐ ܡܶܬܬܠܝܛܳܐ ܗܘܳܬ ܡܶܛܠ ܐܳܕܳܡ܇ ܟܰܕ ܐܳܡܰܪ ܠܶܗ ܐܰܠܳܗܳܐ. ܕܠܺܝܛܳܐ ܐܰܪܥܳܐ ܡܶܛܠܬܳܟ. ܒܟܺܐܒܷ̈ܐ ܬܶܐܟܠܺܝܗ̇ ܟܽܠ ܝܰܘ̈ܡܰܝ ܚܰܝ̈ܝܟ. ܘܟܽܘ̈ܒܶܐ ܘܕܰܪܕܪ̈ܶܐ ܬܰܘܥܶܐ ܠܳܟ. ܘܬܶܐܟܽܘܠ ܥܶܣܒܳܐ ܕܚܰܝ̈ܘܳܬܳܐ. ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ. ܥܕܰܡܳܐ ܕܬܶܗܦܽܘܟ ܠܰܐܪܥܳܐ ܕܡܶܢܳܗ̇ ܐܶܬܢܣܶܒܬ (ܒܪܝܬܐ ܓ: ܝܙ-ܝܛ). ܚܳܙܶܐ ܐܰܢܬ ܡܰܥܒܕܳܢܘܬܳܐ ܗܳܕܶܐ ܪܰܒܬܳܐ ܥܒܰܕܬܶܗ ܠܗܰܘ ܒܰܣܺܝܡܳܐ ܘܰܡܪܰܚܡܳܢܳܐ ܕܡܶܢ ܕܒܰܪܶܟ ܐܶܢܽܘܢ ܒܐܝ̈ܕܰܘܗܝ ܟܰܕ ܐܶܬܒܪܺܝܘ ܘܶܐܬܬܰܩܰܢܘ ܢܶܪܓܰܙ ܘܢܶܬܚܰܡܰܬ ܘܢܶܦܢܶܐ ܢܠܽܘܛ ܐܶܢܘܢ ܠܰܐܝܠܶܝܢ ܕܶܐܬܒܰܪܰܟܘ. ܡܳܕܶܝܢ ܫܰܦܺܝܪ ܐܶܬܢܰܒܝ ܕܰܘܺܝܕ ܒܡܰܙܡܽܘܪܳܐ ܕܶܫܬܳܐ. ܟܰܕ ܡܶܬܥܗܰܕ ܠܕܺܝܢܳܐ ܘܰܠܬܰܫܢܺܝܩܳܐ ܗܰܘ ܕܶܐܬܥܰܬܰܕ ܠܰܢ ܡܶܛܠܬܗ. ܟܰܕ ܕܳܚܶܠ ܘܡܶܣܬܰܪܰܕ ܡܶܢܗ܆ ܡܫܰܪܶܐ ܒܡܰܙܡܽܘܪܳܐ ܗܳܢܳܐ ܘܳܐܡܰܪ:
ܡܳܪܝܳܐ ܠܐ ܒܪܽܘܓܙܳܟ ܬܰܟܣܰܢܝ. ܐܶܠܐ ܒܪ̈ܰܚܡܶܐ ܥܒܶܕ ܠܘܳܬܝ ܡܰܟܣܳܢܽܘܬܳܐ ܒܕܺܝܢܳܐ. ܘܠܳܐ ܐܰܝܟ ܦܣܳܩܳܐ ܩܰܕܡܳܝܳܐ ܕܰܢܦܰܩ ܥܰܠ ܪܺܝܫ ܓܒܺܝܠܬܰܢ: ܘܰܐܦܩܶܗ ܡܶܢ ܦܰܪܕܰܝܣܳܐ ܡܠܶܐ ܛܘ̈ܒܶܐ. ܢܶܦܽܘܩ ܥܠܰܝ ܡܶܢ ܒܺܐܡܰܐ ܕܰܬܪܺܝܨܘܬܳܟ. ܘܢܶܫܕܶܝܢܝ ܡܶܢ ܚܰܝܷ̈ܐ ܛܘܒܬܳܢ̈ܐ ܕܰܐܬܪܳܟ. ܘܳܐܦܠܳܐ ܗܳܫܳܐ ܕܡܶܬܬܒܰܥ ܐܢܳܐ ܠܕܺܝܢܳܟ ܐܶܥܽܘܠ ܐܰܝܟ ܚܰܝܳܒܳܐ.
ܒܚܶܡܬܳܟ ܬܶܪܕܶܝܢܝ: ܐܶܠܐ ܪܰܚܶܡܥܠܰܝ ܡܳܪܝܳܐ ܡܶܛܠ ܕܰܟܪܺܝܗ ܐܢܳܐ. ܘܰܐܣܳܢܝ ܡܳܪܝܳܐ ܡܶܛܠ ܕܙܳܥܘ ܓܰܪ̈ܡܰܝ: ܘܢܰܦܫܝ ܐܶܬܬܙܺܝܥܰܬ ܛܳܒ. ܚܙܺܝ ܠܰܡ ܕܰܟܪܺܝܗܳܐ ܠܐ ܡܶܫܟܰܚ ܕܰܢܣܰܝܒܰܪ ܢܶܓ̈ܕܶܐ ܥܰܠ ܟܺܐܒܷ̈ܐ. ܘܠܳܐ ܛܳܥܢܺܝܢ ܓܰܪ̈ܡܶܐ ܕܶܐܬܬܙܺܝܥܘ ܡܶܢ ܡܚܺܝܠܘܬܳܐ ܡܰܚ̈ܘܳܬܳܐ ܕܫܰܒ̈ܛܶܐ ܥܰܙܝ̈ܙܶܐ ܕܕܺܝܢܳܟ ܚܰܣܺܝܢܳܐ. ܢܶܣܦܰܩ ܠܰܢ ܕܰܚܠܳܦ ܣܰܟܠܽܘܬܰܢ ܫܽܘܩܳܦܰܢ ܕܒܰܝܢܳܬ ܟܽܘ̈ܒܶܐ. ܘܗܳܐ ܐܰܪܥܳܐ ܕܠܰܘ̈ܛܳܬܳܐ ܐܶܬܢܰܩܡܰܬ ܡܶܢܰܢ. ܟܡܳܐ ܢܶܬܪܕܶܐ ܟܪܺܝܗܳܐ: ܟܡܳܐ ܢܶܫܬܰܩܰܦ ܡܚܺܝܠܐܴ. ܘܠܳܐ ܒܳܬܰܪ ܟܘܪܗܢܐ ܡܘܬܐ ܬܶܢܝܳܢܐ. ܠܐ ܒܬܪ ܚܒܳܠܐ ܥܛܳܝܳܐ ܓܡܺܝܪܳܐ܆ ܠܳܐ ܬܰܘܪܶܟ ܪܘܓܙܳܟ ܐܰܝܟ ܪ̈ܰܚܡܰܝܟ. ܘܠܳܐ ܬܶܡܬܽܘܚ ܓܶܐܪ̈ܶܐ ܕܚܶܡܬܳܟ ܐܰܝܟ ܫܰܒ̈ܛܶܐ ܐܰܪ̈ܝܟܶܐ ܕܰܚܢܳܢܳܟ. ܟܰܪܳܐ ܪܽܘܓܙܳܟ ܘܰܐܘܪܶܟ ܪ̈ܰܚܡܰܝܟ. ܩܦܽܘܣ ܚܶܡܬܳܟ ܘܰܡܬܽܘܚ ܫܰܒ̈ܛܶܐ ܕܒܰܣܺܝܡܽܘܬܳܟ. ܐܰܝܟ ܐܳܣܝܳܐ ܛܳܒܳܐ ܥܽܘܠ ܥܰܠ ܟܪܺܝܗܽܘܬܰܢ. ܘܠܳܐ ܐܰܝܟ ܬܳܒܽܘܥܳܐ ܐܰܝܟ ܥܳܨܽܘܒܳܐ ܚܰܘܳܐ ܓܶܠܝܳܢܳܟ ܥܰܠ ܓܰܪ̈ܡܶܐ ܡܙܰܥܙ̈ܥܶܐ. ܠܰܝܬ ܣܰܝܦܳܐ ܠܳܐܣܝܳܐ ܛܳܒܳܐ. ܘܠܳܐ ܚܰܪܒܳܐ ܘܠܳܐ ܪܽܘܡܚܳܐ ܠܥܳܨܽܘܒܳܐ ܚܰܟܺܝܡܳܐ. ܘܠܳܐ ܠܰܐܠܳܗܳܐ ܐܺܝܬ ܪܽܘܓܙܳܐ ܒܰܟܝܳܢܶܗ. ܘܠܳܐ ܚܶܡܬܳܐ ܫܟܺܝܚܳܐ ܒܗܰܘ ܟܝܳܢܳܐ ܫܰܦܝܳܐ. ܒܶܝܬ ܓܰܙܳܟ ܪ̈ܰܚܡܶܐ ܡܠܶܐ܆ ܘܚܶܡܬܳܐ ܘܪܽܘܓܙܳܐ ܒܰܐܘ̈ܘܳܢܰܝܟ ܠܳܐ ܥܳܡܪܺܝܢ. ܚܢܳܢܳܟ: ܛܳܒܷ̈ܐ ܠܐ ܫܳܐܠܝܢ. ܒܺܝ̈ܫܶܐ ܘܡܰܣܟܠܳܢܷ̈ܐ ܣܢܺܝܩܺܝܢ ܥܰܠ ܪ̈ܰܚܡܶܐ. ܡܶܛܠ ܕܠܰܝܬ ܛܳܒܳܐ ܐܶܠܐ ܐܰܢܬ ܒܰܠܚܽܘܕܰܝܟ. ܘܒܳܬܰܪ ܗܳܢܳܐ ܪܶܥܝܳܢܳܐ ܕܶܐܬܢܰܗܰܪ܆ ܬܽܘܒ ܡܰܝܬܶܐ ܘܳܐܡܰܪ:
ܘܰܐܢܬ ܡܳܪܝܳܐ ܥܕܰܡܳܐ ܠܶܐܡܬܰܝ. ܚܳܙܶܐ ܐܰܢܬ ܐܰܝܟܰܢܳܐ ܕܚܶܠ ܡܶܢ ܢܰܓܝܺܪܘܬܶܗ ܕܕܺܝܢܳܐ. ܘܰܚܙܺܝ ܐܰܝܟܰܢܳܐ ܫܶܐܠ ܥܽܘܕܪܳܢܳܐ ܒܬܶܢ̈ܚܳܬܳܐ ܐܰܝܟ ܐܰܝܢܳܐ ܕܣܰܓܝ ܐܰܓܰܪ ܒܟܽܘܪܗܳܢܳܐ܆ ܐܰܢܬ ܡܳܪܝܳܐ ܥܕܰܡܳܐ ܠܶܐܡܰܬܝ ܡܫܰܩܦܺܝܢ ܠܝ ܚܶܡܬܳܟ ܘܪܽܘܓܙܳܟ. ܐܶܡܰܪ ܓܶܝܪ:
ܐܶܬܦܰܢ ܡܳܪܝܳܐ ܘܦܰܨܳܗ̇ ܠܢܰܦܫܝ. ܘܰܦܪܽܘܩܰܝܢܝ ܡܶܛܠ ܛܰܝܒܽܘܬܳܟ. ܫܰܦܺܝܪ ܠܟܺܐܢܷ̈ܐ ܡܳܐ ܕܰܡܨܰܠܶܝܢ܆ ܠܳܐ ܐܶܡܰܪ ܡܶܛܠ ܥܒܴ̈ܕܰܝ ܫܰܦܺܝܪ̈ܶܐ ܘܠܳܐ ܡܶܛܠ ܕܗܰܠܟܶܬ ܩܕܳܡܰܝܟ ܒܩܽܘܫܬܳܐ ܘܰܒܠܶܒܳܐ ܫܰܠܡܳܐ ܘܒܰܬܪܺܝܨܽܘܬܳܐ. ܐܶܠܐ ܡܶܛܠ ܛܰܝܒܽܘܬܳܟ ܠܰܡ ܦܪܽܘܩܰܝܢܝ. ܘܒܰܫܪܳܪܳܐ ܕܠܰܝܬ ܦܽܘܪܩܳܢܳܐ ܟܰܕ ܪܰܚܺܝܩܳܐ ܛܰܝܒܽܘܬܳܐ. ܘܠܰܝܬ ܙܳܟܽܘܬܳܐ ܠܺܝܠܝ̈ܕܰܝ ܒܶܣܪܳܐ ܟܰܕ ܪܰܚܺܝܩܺܝܢ ܪ̈ܰܚܡܶܐ܆ ܐܶܢܓܝܶܪ ܫܠܝ̈ܚܶܐ ܫܳܡܥܺܝܢ ܗܘܰܘ ܡܶܢ ܐܰܠܳܗܳܐ ܟܰܕ ܦܰܩܶܕ ܐܶܢܘܢ. ܕܡܳܐ ܕܰܥܒܰܕܬܽܘܢ ܟܠܗܶܝܢ ܐܰܝܠܶܝܢ ܕܰܦܩܝ̈ܕܳܢ ܠܟܽܘܢ܆ ܐܶܡܰܪܘ ܕܥܰܒ̈ܕܶܐ ܚܢܰܢ ܒܰܛܝ̈ܠܐܷ. ܘܡܳܐ ܕܚܰܝܳܒܺܝܢ ܗܘܰܝܢ ܠܡܶܥܒܰܕ ܥܒܰܕܢ (ܠܘܩܐ ܝܙ: ܝ). ܐܰܝܟܰܢܳܐ ܠܰܘ ܝܰܬܝܪܳܐܝܬ ܢܰܘܕܶܐ ܗܘܳܐ ܕܰܘܺܝܕ ܗܰܘ ܕܢܳܛܰܪ ܦܽܘܩ̈ܕܳܢܶܐ ܢܳܡܘ̈ܣܳܝܶܐ ܕܒܶܝܬ ܡܽܘܫܶܐ. ܘܠܰܘ ܗܳܢܘܢ ܕܶܝܢ ܝܰܩܺܝܪ̈ܶܐ ܕܶܐܬܝܗܶܒܘ ܒܝܰܕ ܡܳܪܰܢ. ܢܺܐܡܰܪ ܗܘܳܐ ܒܰܨܠܽܘܬܶܗ ܕܰܠܘܳܬ ܐܰܠܳܗܳܐ. ܕܰܦܪܽܘܩܰܝܢܝ ܡܶܛܠ ܛܰܝܒܽܘܬܳܟ.
ܘܡܶܛܠ ܕܠܰܝܬ ܒܡܰܘܬܳܐ ܕܘܟܪܳܢܳܟ. ܘܒܰܫܝܽܘܠ ܡܰܢܽܘ ܡܰܘܕܶܐ ܠܳܟ. ܚܙܺܝ ܗܳܟܺܝܠ ܐܰܝܟܰܢܳܐ ܕܚܶܠ ܕܰܘܺܝܕ ܡܶܢ ܡܰܘܬܳܐ. ܗܰܘ ܕܠܰܝܬ ܒܶܗ ܕܽܘܟܪܳܢܳܐ ܕܰܐܠܳܗܳܐ. ܘܠܰܘ ܥܰܠ ܡܰܘܬܳܐ ܗܳܢܳܐ ܕܫܳܪܶܐ ܠܰܡܪ̈ܰܟܒܶܐ ܐܶܡܰܪ܆ ܐܶܠܐ ܥܰܠ ܡܰܘܬܳܐ ܗܰܘ ܬܶܢܝܳܢܳܐ. ܕܒܳܬܰܪ ܫܽܘܠܳܡܳܐ ܕܪܶܗܛܶܗ ܕܥܳܠܡܳܐ ܗܳܢܳܐ ܡܶܬܦܣܶܩ ܥܰܠ ܪ̈ܰܫܺܝܥܶܐ. ܘܶܐܢ ܨܳܒܶܐ ܐܰܢܬ ܫܡܰܥ ܡܶܢܶܗ ܕܡܶܢ ܐܰܝܢܳܐ ܡܰܘܬܳܐ ܕܚܶܠ. ܐܶܡܰܪ ܓܶܝܪ ܒܡܰܙܡܽܘܪܳܐ ܐܚܪܺܢܳܐ. ܕܶܐܢ ܐܶܣܰܩ ܠܰܫܡܰܝܳܐ ܬܰܡܳܢ ܐܰܢܬ. ܘܐܶܢ ܐܶܚܽܘܬ ܠܰܫܝܽܘܠ ܐܳܦ ܬܰܡܳܢ ܐܝܬܰܝܟ (ܡܙܡܘܪܐ ܩܠܚ: ܚ). ܐܰܝܟܰܢܳܐ ܗܳܪܟܳܐ ܐܶܡܰܪ ܕܠܰܝܬ ܒܡܰܘܬܳܐ ܕܽܘܟܪܳܢܳܟ. ܘܠܳܐ ܒܰܫܝܽܘܠ ܐܢܳܫ ܡܰܘܕܶܐ ܠܳܟ. ܓܰܠܝܳܐ ܗܝ ܗܳܕܶܐ܆ ܡܰܘܬܳܐ ܕܠܰܝܬ ܒܶܗ ܕܽܘܟܪܳܢܳܐ ܕܰܐܠܳܗܳܐ. ܗܰܘ ܗ̱ܽܘ ܕܡܶܬܦܣܶܩ ܒܶܝܬ ܕܺܝܢܳܐ. ܥܰܠ ܗܳܢܽܘܢ ܕܳܐܙܠܝܢ ܠܬܰܫܢܺܝܩܳܐ ܘܒܰܫܝܽܘܠ ܕܰܡܓܰܙܝܳܐ ܡܶܢ ܗܳܢܽܘܢ ܕܡܰܘܕܶܝܢ ܠܰܐܠܳܗܳܐ. ܗܳܝ ܕܶܐܡܰܪ ܥܠܶܝܗ̇ ܒܡܰܙܡܽܘܪܳܐ ܐܚܪܺܢܳܐ. ܗܳܝ ܕܢܶܬܗܰܦܟܽܘܢ ܪ̈ܰܫܺܝܥܶܐ ܠܰܫܝܽܘܠ. ܘܟܽܠܗܽܘܢ ܥܰܡ̈ܡܶܐ ܕܛܳܥܶܝܢ ܠܰܐܠܳܗܳܐ (ܡܙܡܘܪܐ ܛ: ܝܚ). ܟܰܕ ܕܳܚܶܠ ܛܘܒܳܢܳܐ ܕܰܘܺܝܕ܆ ܘܰܡܨܰܒܰܥ ܗܘܳܐ ܬܶܫܘܺܝܬܶܗ ܒܕܶܡ̈ܥܶܐ ܕܥܰܝ̈ܢܰܘܗܝ. ܘܟܳܝ̈ܒܳܢ ܗܘܱ̈ܝ ܥܰܝ̈ܢܰܘܗܝ ܡܶܢ ܪܽܘܓܙܳܐ ܕܰܐܠܳܗܳܐ. ܘܡܶܬܕܰܠܰܚ ܗܘܳܐ ܘܡܶܬܡܰܪܡܰܪ ܡܶܢ ܫܺܐܕ̈ܶܐ ܣܳܢܷ̈ܐܐ ܕܰܟܝܳܢܰܢ. ܘܥܰܠܗܳܕܶܐ ܐܳܡܰܪ ܗܘܳܐ:
ܕܰܠܐܝ̣ܬ ܒܬܶܢܚܴ̈ܬܝ ܘܨܰܒܥܶܬ ܒܟܽܠ ܠܰܝ̈ܠܐܷ ܥܰܪܣܝ. ܘܰܒܕܶܡܥܰܬܝ ܬܰܫܘܺܝܬܝ ܐܰܡܣܺܝܬ. ܘܟܶܐܒܰܬ ܡܶܢ ܪܽܘܓܙܳܐ ܥܰܝܢܝ. ܘܶܐܬܕܰܠܚܶܬ ܡܶܢ ܟܽܠܗܽܘܢ ܒܥܶܠܕܒ̈ܒܰܝ. ܡܶܛܠ ܕܰܣܢܺܝܬ ܥܒܴ̈ܕܶܐ ܕܥܰܘܠܳܐ. ܘܥܰܡ ܪ̈ܰܫܺܝܥܶܐ ܠܳܐ ܝܶܬܒܶܬ.
ܦܪܽܘܩܘ ܡܶܢܝ ܟܽܠ ܥܳܒ̈ܕܰܝ ܫܽܘܩܪܳܐ. ܚܽܘܪ ܗܳܟܺܝܠ ܐܰܝܟܰܢ ܓܳܥܰܪ ܒܕܰܝ̈ܘܶܐ ܡܰܚ̈ܛܝܳܢܶܐ. ܘܰܒܟܽܠ ܚܽܘ̈ܫܳܒܶܐ ܕܰܡܫܰܥܒܕܺܝܢ ܠܫܽܘܩܪܳܐ ܘܠܰܚܛܺܝܬܳܐ. ܘܰܚܙܺܝ ܕܠܰܘ ܫܚܺܝܡܳܐܝܬ ܙܥܰܩ ܒܗܽܘܢ. ܦܪܽܘܩܘ ܠܟܽܘܢ ܡܶܢܝ ܒܥܶܠܕ̈ܒܳܒܰܘܗܝ ܕܓܶܢܣܰܢ ܘܫܰܢܰܘ ܡܶܢ ܨܶܐܕܰܝ. ܐܶܠܽܘ ܓܶܝܪ ܐܶܡܰܪ ܗܘܳܐ ܐܳܕܳܡ ܠܚܶܘܝܳܐ ܘܰܠܚܰܘܳܐ. ܕܰܦܪܽܘܩܘ ܠܟܽܘܢ ܡܶܢ ܦܳܠܚܱ̈ܝ ܫܽܘܩܪܳܐ. ܠܰܘ ܒܟܽܘܪܗܳܢܳܐ ܕܰܐܝܟ ܗܳܢܳܐ ܡܶܬܢܰܣܶܐ ܗܘܳܐ ܟܝܳܢܳܐ ܐܢܳܫܳܝܳܐ. ܐܶܠܐ ܡܶܢ ܡܰܘܬܳܐ ܕܠܰܝܬ ܒܶܗ ܕܽܘܟܪܳܢܳܐ ܕܰܐܠܳܗܳܐ ܕܐܝܬܰܘܗܝ ܫܽܘܪܳܝܶܗ ܡܶܢ ܚܛܺܝܬܳܐ ܡܶܬܦܰܨܶܝܢ ܗܘܰܘ. ܠܰܫܝܽܘܠ ܗܳܝ ܕܠܰܝܬ ܒܳܗ̇ ܡܰܢ ܕܡܰܘܕܶܐ ܠܰܐܠܳܗܳܐ ܠܐ ܢܳܚܬܺܝܢ ܗܘܘ.ܒܪܡ ܕܝܢ ܛܘܒܢܐ ܕܘܝܕ ܡܚܰܘܶܐ܆ ܡܰܝܬܶܐ ܘܳܐܡܰܪ:
ܡܶܛܠ ܕܰܫܡܰܥ ܡܳܪܝܳܐ ܩܳܠܳܐ ܕܰܒܟܳܬܝ: ܫܡܰܥ ܡܳܪܝܳܐ ܒܳܥܽܘܬܝ. ܡܳܪܝܳܐ ܨܠܽܘܬܝ ܩܰܒܶܠ. ܠܗܳܠܶܝܢ ܬܪܶܝܢ ܩܴ̈ܠܶܐ ܫܡܰܥܘ ܪ̈ܳܚܡܰܝ ܪ̈ܓܺܝܓܳܬܳܐ ܘܶܐܡܪܰܘ: ܕܫܽܘܠܳܡܳܐ ܗܳܘܶܐ ܠܕܺܝܢܳܐ. ܐܰܝܟ ܕܡܶܢ ܚܰܝܠܳܐ ܕܦܘܫܳܩܳܐ ܕܰܢܒܺܝܳܐ. ܐܶܢ ܠܰܡ ܫܰܪܝܪܳܐ ܕܰܫܡܰܥ ܡܳܪܝܳܐ ܒܟܳܬܶܗ ܕܰܢܒܺܝܳܐ. ܘܰܐܝܟܰܢܳܐ ܠܐ ܓܰܠܝܳܐ ܗܝ ܕܡܶܢ ܬܰܫܢܺܝܩܳܐ ܦܳܪܶܩ ܠܶܗ܆ ܢܒܺܝܳܐ ܓܶܝܪ ܐܶܡܰܪ: ܕܰܠܐܝ̣ܬ ܒܬܶܢܚܴ̈ܬܝ ܘܨܰܒܥܶܬ ܒܟܽܠ ܠܰܝ̈ܠܶܐ ܥܰܪܣܝ ܘܰܒܕܶܡܥܰܬܝ ܬܶܫܘܺܝܬܝ ܐܰܡܣܺܝܬ. ܗܳܐ ܡܳܕܝܶܢ ܠܗܰܘ ܕܶܐܬܶܐܒܶܠ ܥܰܠ ܒܺܝ̈ܫܳܬܶܗ ܫܡܰܥ ܘܪܰܚܶܡ ܕܰܝܳܢܳܐ. ܘܠܰܘ ܠܗܰܘ ܕܫܰܠܶܡ ܒܒܺܝ̈ܫܳܬܳܐ ܘܒܰܪ̈ܓܺܝܓܳܬܳܐ ܟܽܠ ܝܰܘܡ̈ܬܶܗ. ܐܶܠܳܐ ܥܰܠ ܗܰܘ ܕܶܐܬܡܰܣܝܰܬ ܬܶܫܘܺܝܬܶܗ ܒܕܶܡܥܰܘ̈ܗܝ. ܘܠܰܘ ܥܰܠ ܗܳܢܽܘܢ ܕܶܐܬܡܰܣܝܰܬ ܬܶܫܘܺܝܬܗܽܘܢ ܒܛܰܡܽܐܘܬܳܐ ܢܕܺܝܕܬܳܐ ܕܰܚܛܳܗܰܝ̈ܗܽܘܢ. ܘܗܳܝ ܕܙܰܡܰܪ ܒܡܰܙܡܽܘܪܳܐ ܐܚܪܺܢܳܐ ܐܶܡܰܪ: ܡܶܛܠ ܕܬܰܡܳܢ ܢܳܦܠܺܝܢ ܟܽܠ ܥܳܒ̈ܕܰܝ ܫܽܘܩܪܳܐ. ܘܡܶܣܬܰܚܦܺܝܢ ܘܠܐ ܡܶܫܟܚܺܝܢ ܠܰܡܩܳܡ (ܡܙܡܘܪܐ ܠܘ: ܝܒ). ܗܳܪܟܳܐ ܬܽܘܒ ܐܳܡܰܪ:
ܢܶܒܗܬܽܘܢ ܘܢܶܬܬܰܒܪܽܘܢ ܛܳܒ ܟܽܠܗܽܘܢ ܒܥܶܠܕ̈ܒܳܒܰܝ: ܢܶܗܦܟܽܘܢ ܘܢܺܐܒܕܽܘܢ ܡܶܢ ܫܶܠܝܳܐ. ܐܶܬܢܰܒܺܝ ܠܥܳܒ̈ܕܰܝ ܫܽܘܩܪܳܐ ܡܶܣܬܰܚܦܳܢܽܘܬܳܐ ܒܕܺܝܢܳܐ. ܘܰܒܥܶܠܕ̈ܒܳܒܶܐ ܕܙܰܕܺܝ̈ܩܶܐ ܐܳܒܕܺܝܢ ܡܶܢ ܫܶܠܝܳܐ. ܢܶܫܠܽܘܢ ܗܳܢܽܘܢ ܕܳܐܡܪܺܝܢ ܕܫܘܠܳܡܳܐ ܗܳܘܶܐ ܠܕܺܝܢܳܐ. ܕܰܘܺܝܕ ܓܶܝܪ ܐܶܡܰܪ ܡܰܘܬܳܐ ܕܰܓܠܺܝܙ ܘܡܰܪܚܰܩ ܡܶܢ ܐܰܠܳܗܳܐ. ܚܢܰܢ ܕܶܝܢ ܢܶܒܥܶܐ ܒܰܬܝܳܒܽܘܬܳܐ ܘܰܒܕܶܡ̈ܥܶܐ ܪ̈ܰܚܡܶܐ ܕܕܰܝܳܢܳܐ. ܘܰܢܩܽܘܡ ܒܟܽܠ ܠܺܠܝܳܐ ܘܢܶܒܟܶܐ ܘܢܶܬܬܰܢܰܚ ܕܢܶܫܡܰܥ ܡܳܪܝܳܐ ܩܳܠܐ ܕܰܒܟܳܬܰܢ. ܘܰܐܝܟ ܕܰܥܢܳܐ ܠܰܢܒܺܝܳܐ ܢܶܥܢܶܐ ܠܰܢ. ܘܰܢܪܰܚܶܡ ܥܠܰܝܢ ܒܕܺܝܢܳܐ ܟܺܐܢܳܐ ܐܰܡܝܢ܀
ܡܙܡܘܪܐ ܕܫܒܥܐ
ܕܡܰܘܕܰܥ ܒܶܗ ܪܕܘܦܝܳܐ ܕܡܶܢ ܫܺܐܕ̈ܐ: ܘܐܘܠܨܳܢܳܐ ܕܗܳܘܶܐ ܠܩܰܕܺܝ̈ܫܶܐ: ܘܥܰܠ ܩܪ̈ܳܒܶܐ ܕܳܐܟܶܠܩܰܪܨܳܐ ܘܕܰܐܝܟܰܢܳܐ ܗܶܢܘܢ ܕܰܝ̈ܘܶܐ ܒܓܽܘܡܳܨܳܐ ܕܚܳܦܪܺܝܢ ܢܳܦܠܺܝܢ.
ܒܰܨܠܘܬܳܐ ܗܳܝ ܕܰܐܠܶܦ ܡܳܪܰܢ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܡܚܰܘܶܐ܆ ܕܡܶܫܟܰܚ ܐܢܳܫ ܕܢܶܒܥܶܐ ܡܶܢ ܐܰܠܳܗܳܐ ܚܢܳܢܳܐ ܘܫܽܘܒܩܳܢܳܐ ܠܣܰܟ̈ܠܘܳܬܶܗ. ܡܳܐ ܕܫܳܒܶܩ ܗܽܘ ܠܰܐܝܠܶܝܢ ܕܚܰܝܳܒܺܝܢ ܠܶܗ ܣܰܟܠܘܬܳܐ. ܗܳܝܕܶܝܢ ܬܽܘܒ ܫܳܐܶܠ ܡܶܢ ܐܰܠܳܗܳܐ ܕܠܳܐ ܢܰܥܠܶܗ ܠܢܶܣܝܽܘܢܳܐ ܕܡܶܢ ܒܺܝܫܳܐ. ܘܟܰܕ ܡܨܰܠܶܐ ܐܳܡܰܪ. ܕܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ (ܡܬܝ ܘ: ܝܓ). ܟܰܕ ܡܩܰܕܶܡ ܗܘܳܐ ܪܽܘܚܳܐ ܕܰܢܒܺܝܽܘܬܳܐ. ܘܰܠܐܪܳܙܳܐ ܕܰܨܠܘܬܳܐ ܨܳܐܰܪ ܗܘܳܐ. ܡܰܠܶܦ ܗܘܳܐ ܛܽܘܒܳܢܳܐ ܕܰܘܺܝܕ܆ ܕܰܨܠܘܬܳܐ ܘܬܰܟܫܶܦܬܳܐ ܕܫܳܐܠܳܐ ܡܶܬܦܰܨܝܳܢܽܘܬܳܐ ܕܡܶܢ ܒܺܝܫܳܐ. ܢܨܰܠܶܐ ܒܡܰܙܡܽܘܪܳܐ ܗܳܢܳܐ ܕܫܰܒܥܳܐ܇ ܒܪܰܡ ܠܰܘ ܕܠܳܐ ܥܶܠܬܳܐ ܘܠܳܐ ܨܠܽܘܬܳܐ ܗܳܝ ܕܰܡܨܰܒܬܳܐ ܒܰܟܠܺܝܠܳܐ ܫܰܦܺܝܪܳܐ ܡܶܫܟܰܚ ܗܘܳܐ ܠܰܡܨܰܠܳܝܽܘ܆ ܟܰܕ ܩܳܡ ܥܰܠ ܕܰܘܺܝܕ ܡܪܳܕܳܐ ܕܡܶܢ ܐܰܒܺܝܫܳܠܘܡ ܒܪܶܗ܆ ܘܟܽܠܗܽܘܢ ܫܰܒ̈ܛܶܐ ܕܝܣܪܳܐܝܠ ܡܪܰܕܘ ܥܠܰܘܗܝ. ܘܡܶܟܺܝܠ ܡܶܢ ܡܕܺܝܢܬܶܗ ܕܐܘܪܺܫܠܶܡ ܥܪܰܩ. ܘܪ̈ܳܚܡܰܘܗܝ ܥܰܠ ܟܺܐܒܶܗ ܐܰܒܺܝܠܺܝܢ ܗܘܰܘ. ܘܶܐܬܳܐ ܠܘܳܬܶܗ ܟܰܕ ܗܽܘ ܒܡܰܕܒܪܳܐ ܕܝܽܘܪܕܢܳܢ ܚܽܘܫܺܝ ܐܰܪܟܳܝܐ. ܓܰܒܪܳܐ ܟܺܐܢܳܐ ܘܙܰܕܺܝܩܳܐ. ܗܳܢܳܐ ܕܶܝܢ ܠܰܘ ܡܶܢ ܥܰܡܳܐ ܗ̱ܘܳܐ ܕܝܣܪܳܐܝܠ܆ ܐܶܠܳܐ ܡܶܢ ܐܰܬܪܳܐ ܕܟܽܘ̈ܫܳܝܶܐ. ܐܶܬܳܐ ܠܘܳܬ ܕܰܘܺܝܕ ܓܙܰܪ ܘܰܗܘܳܐ ܝܘܕܳܝܳܐ. ܘܪܳܚܶܡ ܗܘܳܐ ܠܶܗ ܠܕܰܘܺܝܕ ܘܦܳܠܰܚ ܗܘܳܐ ܠܶܗ ܥܰܒܕܽܘܬܳܐ. ܐܰܟܡܰܢ ܕܚܳܙܶܐ ܗܘܳܐ ܙܰܕܺܝܩܘܬܶܗ ܕܰܢܒܺܝܳܐ ܡܶܛܠ ܕܗܽܘ ܓܰܒܪܳܐ ܒܪܶܚܡܰܬ ܐܰܠܳܗܳܐ ܫܰܒܩܶܗ ܠܰܐܬܪܳܐ ܕܗܶܢܕܘܴ̈ܝܶܐ ܘܶܐܬܳܐ ܠܘܳܬ ܥܰܡܳܐ ܕܝܣܪܳܐܝܠ. ܣܰܓܝ̈ܐܐ ܓܶܝܪ ܒܝܰܘ̈ܡܰܝ ܕܰܘܺܝܕ ܐܳܬܶܝܢ ܗܘܰܘ ܘܗܳܘܶܝܢ ܝܣܰܪ̈ܠܳܝܶܐ. ܕܰܐܝܟ ܗܳܢܳܐ ܗܘܳܐ ܓܶܝܪ ܐܳܦ ܐܰܬܺܝ ܓܳܬܳܝܳܐ܆ ܚܰܕ ܡܶܢ ܬܠܳܬܳܐ ܪ̈ܰܒܰܝ ܚܰܝ̈ܠܰܘܳܬܳܐ ܗܳܠܶܝܢ ܕܰܢܦܰܩܘ ܥܰܠ ܥܰܡܳܐ ܕܥܰܡ ܐܰܒܝܫܳܠܘܡ ܠܰܩܪܳܒܳܐ. ܗܳܢܳܐ ܕܶܝܢ ܦܠܶܫܬܳܝܐ ܗܘܳܐ ܚܽܘܫܺܝ ܗܰܘ ܗܶܢܕܘܳܝܳܐ. ܘܗܳܢܳܐ ܟܰܕ ܐܶܬܳܐ ܠܘܳܬ ܕܰܘܺܝܕ ܚܰܘܺܝ ܠܶܗ ܡܪܳܕܳܐ ܕܰܡܪܰܕܘ ܥܠܰܘܗܝ ܥܰܡܳܐ ܘܰܐܒܝܫܳܠܘܡ. ܨܪܳܐ ܗܘܳܐ ܟܽܘܬܺܝܢܶܗ ܘܥܰܦܪܳܐ ܒܕܰܪ ܥܰܠ ܪܺܝܫܶܗ. ܘܰܐܘܕܥܶܗ ܕܰܡܪܰܕܘ ܐܰܚܺܝܬܽܘܦܶܠ ܥܰܡ ܐܰܒܺܝܫܳܠܘܡ. ܘܡܶܢ ܒܳܬܰܪ ܕܶܐܨܛܰܚܺܝ ܡܶܢ ܫܰܡܥܺܝ ܒܰܪ ܓܶܐܪܳܐ܆ ܘܡܶܢ ܒܳܬܰܪ ܕܰܡܚܰܘ ܩܪܳܒܳܐ ܠܘܩܒܰܠ ܐܰܒܺܝܫܳܠܘܡ܆ ܘܰܢܦܰܠ ܐܰܒܺܝܫܳܠܘܡ ܒܓܽܘܡܳܨܳܐ ܘܶܐܬܟܰܫܺܝ ܥܠܰܘܗܝ ܝܰܓܪܳܐ. ܘܶܐܬܳܐ ܚܽܘܫܺܝ ܘܣܰܒܰܪ ܠܕܰܘܺܝܕ ܥܰܠ ܙܳܟܽܘܬܳܐ ܕܰܗܘܳܬ. ܘܥܰܠ ܡܰܘܬܶܗ ܕܡܳܪܽܘܕܳܐ܆ ܘܬܽܘܒ ܡܪܳܕܳܐ ܕܰܐܩܺܝܡ ܗܘܳܐ ܗܰܘ ܕܶܐܬܥܰܫܰܢ ܒܝܰܕ ܫܡܽܘܥ ܒܰܪ ܒܰܟܪܺܝ܆ ܘܰܡܫܰܪܶܐ ܕܰܘܺܝܕ ܒܳܬܰܪ ܟܺܐܡܘܢܳܐ ܗܳܢܳܐ ܪܰܒܳܐ ܘܰܡܙܰܡܰܪ ܘܰܡܨܰܠܶܐ ܘܳܐܡܰܪ:
ܡܳܪܝܳܐ ܐܰܠܳܗܝ ܒܳܟ ܣܰܒܪܶܬ ܦܪܽܘܩܰܝܢܝ: ܘܡܶܢ ܟܽܠ ܪ̈ܳܕܘܦܰܝ ܦܰܨܳܢܝ. ܚܳܙܶܐ ܐܰܢܬ ܐܰܝܟܰܢܳܐ ܠܐ ܡܶܫܬܰܒܗܰܪ ܒܓܰܢܒܳܪܘܬܳܐ. ܘܠܳܐ ܡܶܬܬܟܶܠ ܗܘܳܐ ܥܰܠ ܐܺܝܕܳܐ ܕܓܰܢܒܳܪ̈ܶܐ ܕܥܰܡܶܗ܆ ܐܶܠܐ ܫܳܐܷܠ ܗܘܳܐ ܘܒܳܥܶܐ ܦܘܪܩܳܢܳܐ ܡܶܢ ܐܰܠܳܗܳܐ. ܘܳܐܡܰܪ ܗܘܳܐ ܕܰܐܢܬ ܡܳܪܝܳܐ ܦܰܨܳܢܝ ܡܶܢ ܪ̈ܳܕܘܦܰܝ. ܡܶܛܠ ܕܶܐܡܰܪ:
ܕܰܠܡܳܐ ܐܰܝܟ ܐܰܪܝܳܐ ܠܡܶܬܒܰܪ ܠܢܰܦܫܝ. ܕܳܡܝܳܐ ܕܰܠܗܰܘ ܡܚܰܦܛܳܢܳܐ ܘܡܰܠܦܳܢܳܐ ܕܒܺܝ̈ܫܳܬܳܐ ܕܡܰܥܒܶܕ ܗܘܳܐ ܟܰܣܝܳܐܝܬ ܠܡܶܪܕܳܐ. ܚܙܳܐ ܗܘܳܐ ܒܥܰܝܢܳܐ ܕܰܢܒܺܝܘܬܳܐ. ܘܠܳܐ ܡܟܝܠ ܐܡ̣ܪ ܕܦܰܓܪܐ ܒܠܚܘܕ ܢܶܬܦܰܨܶܐ. ܐܶܠܐ ܬܒܳܪܳܐ ܕܢܰܦܫܳܐ ܢܶܫܬܰܘܙܰܒ. ܘܚܳܪ ܗܘܳܐ ܬܽܘܒ ܘܰܚܙܳܐ. ܠܗܰܘ ܡܪܳܕܳܐ ܩܰܕܡܳܝܳܐ ܕܰܡܪܰܕ ܣܳܛܳܢܳܐ ܥܰܠ ܐܰܠܳܗܳܐ. ܘܰܐܩܶܦ ܠܶܗ ܠܚܰܝ̈ܠܰܘܳܬܳܐ ܘܰܠܠܶܓܝ̈ܘܢܶܐ ܗܳܢܽܘܢ ܕܫܺܐܕ̈ܐ ܘܰܠܕܰܝ̈ܘܶܐ ܛܰܡܷ̈ܐܐ ܘܰܠܪ̈ܘܚܶܐ ܒܺܝ̈ܫܳܬܳܐ. ܘܰܐܠܶܦ ܐܶܢܽܘܢ ܕܢܶܡܪܕܽܘܢ ܥܰܠ ܗܰܘ ܡܰܠܟܳܐ ܕܰܫܪܳܪܳܐ ܐܳܕܳܡ. ܒܐܘܪܺܫܠܶܡ ܗܳܝ ܕܰܠܥܶܠ ܗܰܘ ܕܶܐܠܘ ܐܶܫܟܰܚ ܠܟܽܠܗܽܘܢ ܚܰܝܠܰܘ̈ܬܳܐ ܩܰܕܝ̈ܫܶܐ ܒܳܥܶܐ ܗܘܳܐ ܕܢܰܣܛܶܐ. ܡܶܢ ܒܳܬܰܪ ܡܰܠܟܳܐ ܗܰܘ ܕܰܫܪܳܪܳܐ. ܟܰܕ ܚܳܐܰܪ ܗܘܳܐ ܕܰܘܺܝܕ ܐܳܡܰܪ ܗܘܳܐ.
ܕܠܰܝܬ ܕܦܳܪܶܩ ܠܺܝ ܘܰܡܦܰܨܶܐ. ܡܶܢ ܦܽܘܡܽܗ ܕܰܐܪܝܳܐ ܡܶܬܝܰܕܥܳܢܳܐ. ܐܶܠܐ ܐܺܝܳܠܳܟ ܘܝܰܡܺܝܢܳܟ ܚܰܝܠܬܳܢܺܝܬܳܐ. ܬܳܢܶܐ ܐܢܳܐ ܩܕܳܡܰܝܟ ܠܰܘ ܛܳܒܴ̈ܬܝ ܐܶܠܳܐ ܗܳܝ ܕܠܳܐ ܥܒܺܝܕܳܐ ܠܝ ܒܺܝܫܬܳܐ. ܘܥܰܠܗܳܝ ܐܳܡܰܪ ܗܘܳܐ ܠܘܳܬ ܐܰܠܳܗܳܐ.
ܡܳܪܝܳܐ ܐܰܠܳܗܝ ܐܶܢ ܥܶܒܕܶܬ ܗܳܕܶܐ. ܐܰܝܕܳܐ ܐܝܬܶܝܗ̇ ܗܳܝ ܕܶܐܡܰܪ ܕܶܐܢ ܥܶܒܕܶܬ؟ ܐܶܢ ܠܰܡ ܡܰܪܕܶܬ ܥܰܠ ܡܕܰܒܪܳܢܳܐ ܕܰܗܘܳܐ ܡܶܢܳܟ. ܘܶܐܢ ܐܶܬܚܰܫܒܶܬ ܕܶܐܨܰܥܰܪ ܘܶܐܫܽܘܛ ܠܰܐܒ̈ܗܰܝ. ܘܶܐܢ ܕܳܠ ܒܺܝ ܙܰܘܥܳܐ ܕܡܰܡܪܰܚ ܥܰܠ ܫܘܠܛܳܢܳܐ ܕܡܰܠܟܽܘܬܳܟ. ܘܚܳܐܰܪ ܗܰܦܟܳܐܝܬ ܕܡܶܢ ܫܽܘܥܒܳܕܳܟ ܢܶܣܛܶܐ. ܘܡܳܢܳܐ ܐܳܡܰܪ ܐܢܳܐ ܗܳܕܶܐ܆ ܕܠܳܐ ܡܶܪܕܶܬ ܥܰܠ ܢܳܡܘܣܳܟ ܘܥܰܠ ܐܺܝܩܳܪܳܐ ܕܰܐܒܳܗܷ̈ܐ. ܐܶܠܳܐ ܗܳܕܶܐ ܕܥܳܠܒܳܐ ܠܗܳܠܶܝܢ ܐܳܡܰܪ ܐܢܳܐ.
ܕܶܐܢ ܦܶܪܥܶܬ ܠܡܰܢ ܕܰܥܒܰܕ ܠܺܝ ܒܺܝܫܬܳܐ: ܐܶܢ ܐܶܠܨܶܬ ܠܰܒܥܳܠܕ̈ܒܰܒܰܝ ܣܪܺܝܩܳܐܝܬ. ܢܶܪܕܽܘܦ ܒܥܶܠܕܒܳܒܳܐ ܠܢܰܦܫܝ ܕܺܝܠܝ ܘܢܰܕܪܟܺܝܗ̇: ܘܰܢܕܽܘܫ ܚܰܝܱ̈ܝ ܒܰܐܪܥܳܐ. ܘܫܽܘܒܚܝ ܒܥܰܦܪܳܐ ܢܰܫܪܶܐ. ܚܙܰܝܬ ܐܳܘ ܦܳܪܘܫܳܐ ܚܰܟܺܝܡܳܐ ܐܰܝܟܰܢܳܐ ܡܰܠܶܦ ܘܰܡܚܰܘܶܐ ܢܰܗܝܪܳܐܝܬ ܘܰܠܡܺܐܡܰܪ ܠܰܐܠܳܗܳܐ:
ܕܩܽܘܡ ܡܳܪܝܳܐ ܒܪܽܘܓܙܳܟ ܘܶܐܫܬܰܩܠ ܥܰܠ ܩܕܳܠܐܴ ܕܰܒܥܶܠܕܒ̈ܒܰܝ: ܘܶܐܬܬܥܺܝܪ ܥܠܰܝ ܒܕܺܝܢܳܐ ܕܰܦܩܰܕܬ. ܗܳܢܰܘ ܕܶܝܢ ܕܰܬܚܰܝܶܒ ܠܣܴ̈ܢܰܐܝ. ܘܬܰܘܒܶܕ ܠܰܒܥܶܠܕ̈ܒܳܒܰܝ. ܘܒܳܬܰܪܟܶܢ ܡܰܝܬܶܐ ܘܳܐܡܰܪ ܠܰܘ ܦܶܬܓܳܡܷ̈ܐ ܕܠܳܚܡܺܝܢ ܠܗܳܠܶܝܢ ܕܡܶܢ ܩܕܳܡܰܝܗܽܘܢ. ܐܶܠܳܐ ܥܘܗܕܳܢܳܐ ܕܥܺܕܬܳܐ ܡܰܝܬܶܐ ܟܰܕ ܐܳܡܰܪ.
ܕܥܺܕܬܳܐ ܕܶܐܡ̈ܘܳܬܳܐ ܬܶܚܕܪܳܟ: ܘܥܰܠ ܐܰܦܶܝ̈ܗ̇ ܠܰܡܪܰܘܡܳܐ ܬܶܗܦܽܘܟ. ܘܡܳܪܝܳܐ ܢܕܽܘܢ ܥܰܡ̈ܡܶܐ. ܘܡܳܐ ܕܶܐܙܕܟܺܝ ܗܰܘ ܛܪܽܘܢܳܐ ܘܡܳܪܽܘܕܳܐ. ܘܶܐܬܚܰܝܰܒ ܒܰܨܠܝܒܳܐ. ܗܰܘ ܕܰܐܠܶܦ ܡܳܪܘܕܽܘܬܳܐ ܥܰܠ ܐܰܠܳܗܳܐ ܡܶܢܩܕܺܝܡ. ܗܳܝܕܶܝܢ ܥܺܕܬܳܐ ܕܥܰܡ̈ܡܶܐ ܡܶܬܟܰܪܟܳܐ ܘܚܳܕܪܳܐ ܠܰܙܩܺܝܦܳܐ ܡܟܺܝܪܳܗ̇ ܟܕ ܡܰܗܦܟܳܐ ܚܝܳܪܗ̇ ܠܘܳܬ ܐܰܠܳܗܳܐ. ܘܒܳܥܝܳܐ ܐܰܬܪܳܗ̇ ܘܡܶܬܪܰܓܪܓܳܐ ܠܰܓܢܽܘܢܳܗ̇. ܗܳܝܕܶܝܢ ܡܳܪܝܳܐ ܢܕܽܘܢ ܥܰܡ̈ܡܶܐ. ܕܗܽܘ ܢܦܰܨܶܐ ܐܶܢܽܘܢ ܡܶܢ ܛܪܽܘܢܽܘܬܶܗ ܕܳܐܟܶܠܩܰܪܨܳܐ. ܘܢܶܫܪܶܐ ܡܶܢ ܩܕܳܠܗܘܢ ܠܢܺܝܪܶܗ ܕܡܳܪܽܘܕܳܐ. ܘܢܶܟܕܽܘܢ ܐܶܢܘܢ ܒܢܺܝܪܶܗ ܕܰܨܠܝܒܳܐ. ܘܢܶܫܡܰܥ ܡܳܢܳܐ ܐܳܡܰܪ ܡܶܢ ܒܳܬܰܪܟܶܢ:
ܕܽܘܢܰܝܢܝ ܡܳܪܝܳܐ ܐܰܝܟ ܙܰܕܺܝܩܽܘܬܝ ܘܰܐܝܟ ܬܰܡܺܝܡܽܘܬܝ. ܬܶܓܡܰܪ ܒܺܝܫܬܳܐ ܥܰܠ ܪ̈ܰܫܺܝܥܶܐ: ܘܬܰܬܩܶܢ ܠܙܰܕܺܝ̈ܩܶܐ. ܕܳܡܝܳܐ ܕܪ̈ܰܫܺܝܥܶܐ ܠܚܰܝܠܰܘ̈ܬܳܐ ܡܳܪ̈ܘܕܶܐ ܩܳܪܶܐ ܬܢܳܢ. ܙܰܕܺܝ̈ܩܶܐ ܕܶܝܢ܆ ܠܗܳܢܽܘܢ ܕܰܢܛܰܪܘ ܢܳܡܽܘܣܶܗ ܕܡܳܪܝܳܐ ܘܰܥܒܰܕܘ ܦܘܩܕܢܰܘ̈ܗܝ. ܡܚܰܘܶܐ ܐܳܦ ܡܶܢ ܒܳܬܰܪ ܗܳܠܶܝܢ. ܚܰܝܠܳܐ ܘܫܽܘܠܛܳܢܳܐ ܕܰܐܠܳܗܳܐ ܕܥܳܐܶܠ ܘܒܳܨܶܐ ܬܰܘ̈ܢܶܐ ܕܠܶܒܳܐ ܘܡܳܐܶܫ ܚܘ̈ܫܳܒܶܐ ܕܢܰܦܫܳܐ.
ܘܒܳܚܰܪ ܠܶܒܳܐ ܘܟܽܘܠܝ̈ܬܳܐ: ܐܰܠܳܗܳܐ ܙܰܕܺܝܩܳܐ ܡܣܰܝܥܳܢܝ. ܐܰܠܳܗܳܐ ܕܦܳܪܶܩ ܠܰܬܪ̈ܝܨܰܝ ܠܶܒܳܐ: ܐܰܠܳܗܳܐ ܕܰܝܳܢܳܐ ܕܩܽܘܫܬܳܐ. ܠܡܳܢܳܐ ܡܰܝܬܶܐ ܬܠܳܬ ܙܰܒ̈ܢܺܝܢ ܫܡܳܐ ܕܰܐܠܳܗܳܐ ܡܫܰܡܠܝܳܐܝܬ. ܟܰܕ ܠܳܐ ܡܒܰܨܰܪ ܘܠܳܐ ܡܰܘܣܶܦ ܘܕܰܣܪܝܩܳܐܝܬ ܐܰܡܺܝܪܳܐ ܠܰܝܬ ܐܰܬܪܳܐ. ܠܡܺܐܡܰܪ ܐܶܢܓܶܝܪ ܢܒܺܝܳܐܝܬ ܐܰܡܺܝܪܺܝܢ ܡܶܢ ܕܰܘܺܝܕ ܦܶܬܓܳܡܷ̈ܐ ܗܳܠܶܝܢ ܒܪܘܚܳܐ ܩܰܕܺܝܫܳܐ. ܙܳܕܶܩ ܕܢܶܒܥܶܐ ܡܶܛܠ ܕܠܰܝܬ ܒܗܽܘܢ ܣܶܪܛܳܐ ܐܰܘ ܐܳܬܽܘܬܳܐ ܙܥܘܪܬܳܐ. ܕܠܐ ܚܰܝܠܐ ܪܰܒܳܐ ܩܰܢܝܳܐ ܨܶܝܕ ܚܰܘܪܳܐ ܕܣܽܘ̈ܟܳܠܶܐ ܪ̈ܘܚܳܢܳܝܶܐ. ܚܙܺܝ ܡܳܕܶܝܢ ܡܶܛܠ ܡܳܢܳܐ ܐܰܠܳܗܳܐ ܙܰܕܺܝܩܳܐ ܫܰܡܰܗ. ܘܡܶܛܠ ܡܳܢܳܐ ܐܰܠܳܗܳܐ ܦܳܪܘܩܳܐ. ܟܰܕ ܬܪܰܝܳܢܽܘܬ ܠܗ ܠܰܫܡܳܐ ܣܳܐܶܡ ܟܰܢܺܝ. ܘܡܶܛܠܡܳܢܳܐ ܬܽܘܒ ܫܰܡܰܗ ܗܽܘ ܟܰܕ ܗܽܘ. ܐܰܠܳܗܳܐ ܕܰܝܳܢܳܐ ܩܪܳܝܗܝ. ܐܶܠܽܘ ܐܪ̈ܳܙܶܐ ܘܓܶܠܝܴ̈ܢܶܐ ܡܶܕܶܡ ܘܰܐܠܳܗܳܝܷ̈ܐ. ܐܶܠܐ ܐܰܘܫܶܛ ܠܥܺܕܬܳܐ ܗܳܝ ܕܶܐܡܘ̈ܬܳܐ ܕܶܐܡܰܪ ܡܶܢ ܠܥܶܠ ܕܚܶܕܪܰܬ ܠܰܐܠܳܗܳܐ ܒܓܶܠܝܳܢܶܗ ܕܒܰܒܣܰܪ. ܠܡܳܢܳܐ ܠܳܐ ܐܶܡܰܪ ܚܰܕ ܐܰܠܳܗܳܐ. ܘܰܐܝܬܺܝ ܒܳܬܪܶܗ ܗܰܘ ܫܡܳܐ ܕܰܡܣܰܝܥܳܢܝ. ܘܗܰܘ ܕܦܳܪܶܩ ܠܰܬܪ̈ܝܨܰܝ ܠܶܒܳܐ. ܘܰܐܠܳܗܳܐ ܕܰܝܳܢܳܐ ܕܩܽܘܫܬܳܐ. ܡܶܛܠ ܕܚܰܕ ܫܡܳܐ ܫܰܘܝܳܐ ܣܳܡ ܥܰܠ ܬܠܳܬܳܐ. ܘܦܰܫܶܩ ܘܰܓܠܳܐ ܐܪܳܙܳܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܰܬܠܝܬܳܝܽܘܬܳܐ ܕܰܐܠܳܗܘܬܳܐ. ܘܣܳܗܶܕ ܛܘܒܳܢܳܐ ܡܘܫܶܐ ܕܶܐܡܰܪ ܥܠܰܘܗܝ ܒܬܶܫܒܽܘܚܬܳܐ. ܐܰܠܳܗܳܐ ܡܗܰܝܡܢܳܐ ܘܠܳܐ ܗܘܳܐ ܥܰܘܳܠܐ. ܙܰܕܺܝܩܳܐ ܘܰܬܪܺܝܨܳܐ (ܬܢܝܢ ܢܡܘܣܐ ܠܒ: ܕ). ܟܰܕ ܥܰܠ ܩܢܽܘܡܶܗ ܕܡܶܠܬܳܐ ܐܰܠܳܗܳܐ ܒܰܕܶܩ. ܒܗܰܘ ܩܳܠܐ ܬܪܰܝܳܢܳܐ. ܟܰܕ ܐܰܝܬܺܝ ܘܶܐܡܰܪ:
ܐܰܠܳܗܳܐ ܕܦܳܪܶܩ ܠܰܬܪ̈ܝܨܰܝ ܠܶܒܳܐ. ܫܰܦܺܝܪ ܕܶܝܢ ܠܘܳܬ ܩܢܽܘܡܶܗ ܕܰܒܪܳܐ ܥܒܰܕ. ܡܶܛܠ ܕܒܶܗ ܐܶܬܦܪܶܩܘ ܬܪ̈ܝܨܰܝ ܠܶܒܳܐ ܡܶܢ ܛܪܽܘܢܽܘܬܶܗ ܕܳܐܟܶܠܩܰܪܨܳܐ ܘܕܺܝܠܶܗ ܐܝܬܰܘܗܝ ܫܡܳܐ ܕܦܳܪܽܘܩܽܘܬܳܐ. ܟܰܕ ܡܰܘܕܰܥ ܥܰܠ ܩܢܽܘ̈ܡܶܐ ܕܰܬܠܝܬܳܝܘܬܳܐ. ܘܥܰܠ ܕܺܝܠܳܝܴ̈ܬܗܽܘܢ ܗܳܢܽܘܢ ܕܒܺܐܝܬܘܬܳܐ. ܗܳܟܰܢܳܐ ܟܰܕ ܡܚܰܘܶܐ ܩܢܽܘܡܶܗ ܕܪܘܚܳܐ ܩܰܕܺܝܫܳܐ. ܗܰܘ ܕܕܳܐܶܢ ܠܟܠܡܶܕܶܡ. ܐܰܝܬܺܝ ܘܶܐܡܰܪ:
ܐܰܠܳܗܳܐ ܕܰܝܳܢܳܐ ܕܩܽܘܫܬܳܐ. ܕܒܶܗ ܢܰܘܕܰܥ ܕܰܐܠܳܗܳܐ ܗܘܳܐ ܐܰܒܳܐ ܒܰܐܒܳܗܽܘܬܶܗ. ܘܰܐܠܳܗܰܐ ܗ̄ܘ ܒܪܳܐ ܒܺܝܠܺܝܕܘܬܶܗ ܘܰܒܦܳܪܘܩܽܘܬܶܗ. ܘܰܐܠܳܗܰܐ ܗ̄ܘ ܪܽܘܚܳܐ ܒܢܳܦܽܘܩܽܘܬܶܗ ܘܡܶܫܬܰܕܪܳܢܽܘܬܶܗ ܘܰܒܕܰܝܳܢܽܘܬܶܗ. ܘܰܐܝܟܰܢܳܐ ܕܠܰܝܬ ܒܨܺܝܪܽܘܬܳܐ ܠܚܰܕ ܡܶܢ ܟܘ̈ܢܳܝܶܐ ܗܳܠܶܝܢ. ܗܳܟܰܢܳܐ ܠܰܝܬ ܝܰܬܺܝܪܘܬܳܐ ܒܰܩܢܘ̈ܡܶܐ ܕܰܬܠܝܬܳܝܽܘܬܳܐ ܩܰܕܺܝܫܬܳܐ. ܘܚܰܕ ܐܶܢܽܘܢ ܒܚܰܝܠܳܐ ܘܰܒܣܳܥܘܽܪܘܬܳܐ ܘܰܒܡܰܥܒܕܳܢܽܘܬܳܐ ܘܰܒܪܰܒܽܘܬܳܐ ܘܒܰܟܝܳܢܳܐ ܐܳܦ ܒܺܐܝܬܽܘܬܳܐ. ܘܰܒܗܽܘܢ ܐܶܬܦܰܪܩܰܬ ܥܺܕܬܳܐ ܩܰܕܝܫܬܳܐ. ܟܰܕ ܡܚܰܘܶܐ ܕܠܳܐ ܫܳܒܶܩ ܠܳܗ̇ ܘܠܐ ܡܫܰܢܶܐ ܡܶܢܳܗ̇. ܐܶܡܰܪ ܓܶܝܪ:
ܕܠܳܐ ܪܳܓܶܙ ܟܽܠܝܽܘܡ ܐܶܠܐ ܗܳܦܶܟ. ܠܰܘ ܓܶܝܪ ܐܰܝܟ ܕܰܐܪܦܺܝ ܠܰܟܢܽܘܫܬܳܐ ܕܨܳܠܘ̈ܒܶܐ ܡܰܪܦܶܐ ܠܥܺܕܬܶܗ. ܡܰܘܕܰܥ ܕܶܝܢ ܛܘܒܳܢܳܐ ܕܰܘܺܝܕ. ܐܳܦ ܠܳܐܟܶܠܩܰܪܨܳܐ ܕܠܘܩܒܰܠ ܥܺܕܬܳܐ. ܟܰܕ ܐܳܡܰܪ:
ܣܰܝܦܶܗ ܠܳܛܶܫ ܘܩܶܫܬܶܗ ܡܳܬܰܚ. ܐܰܬܩܶܢ ܘܡܰܬܩܶܢ ܠܶܗ ܡܳܐܢܷ̈ܐ ܕܪܘܓܙܳܐ: ܓܶܐܪ̈ܰܘܗܝ ܥܒܰܕ ܠܰܕܝܳܩܕܺܝܢ. ܡܶܛܠ ܕܚܰܒܶܠ ܥܰܘܠܳܐ ܘܰܒܛܶܢ ܫܽܘܩܪܳܐ ܘܺܝܠܶܕ ܥܶܬܳܐ: ܒܺܐܪܳܐ ܚܦܰܪ ܘܚܰܛܳܗ̇: ܘܰܢܦܰܠ ܒܓܽܘܡܳܨܳܐ ܕܰܥܒܰܕ. ܠܘܩܒܰܠ ܗܳܢܳܐ ܩܪܰܒܬܳܢܳܐ ܥܰܘܳܠܐ. ܕܰܡܬܺܝܚܳܐ ܠܶܗ ܩܶܫܬܶܗ ܠܘܳܬ ܣܶܕܪ̈ܶܝܗ̇ ܕܥܕܬܳܐ ܘܰܫܡܺܝܛ ܠܶܗ ܣܰܝܦܳܐ ܥܰܠ ܨܰܘܪܳܐ ܕܩܰܕܝ̈ܫܶܐ. ܫܠܝܚܳܐ ܐܰܠܳܗܳܝܳܐ ܡܰܠܶܦ ܠܬܰܠܡܺܝ̈ܕܶܐ ܐܶܦܶܣܳܝܷ̈ܐ ܘܳܐܡܰܪ: ܕܰܠܒܰܫܘ ܟܽܠܶܗ ܙܰܝܢܶܗ ܕܰܐܠܳܗܳܐ ܐܰܝܟܰܢܳܐ ܕܬܶܫܟܚܽܘܢ ܠܰܡܩܳܡ ܠܘܩܒܰܠ ܨܶܢܥܴ̈ܬܶܗ ܕܳܐܟܶܠܩܰܪܨܳܐ. ܕܬܶܬܟܰܬܫܽܘܢ ܠܐ ܗܘܳܐ ܥܰܡ ܒܶܣܪܳܐ ܘܰܕܡܳܐ. ܐܶܠܳܐ ܥܰܡ ܐܰܪ̈ܟܰܐܣ ܘܫܰܠܺܝܛܳܢܷ̈ܐ ܐܰܚܺܝ̈ܕܰܝ ܥܳܠܡܳܐ ܕܗܳܢܳܐ ܚܶܫܘܟܳܐ. ܘܥܰܡ ܪ̈ܘܚܶܐ ܒܺܝ̈ܫܳܬܳܐ ܕܰܬܚܶܝܬ ܫܡܰܝܳܐ. ܡܶܛܠܗܳܢܳܐ ܠܒܰܫܘ ܟܽܠܶܗ ܙܰܝܢܳܐ ܕܰܐܠܳܗܳܐ. ܕܬܶܫܟܚܽܘܢ ܬܶܐܪܥܽܘܢ ܒܺܝܫܳܐ (ܐܦܣ̈ܝܐ ܘ: ܝܐ-ܝܓ). ܐܶܢܓܶܝܪ ܒܕܺܝܢܳܐ ܕܰܐܝܟ ܗܳܢܳܐ ܢܶܬܚܢܶܩ. ܒܗܰܘ ܡܳܐ ܕܨܳܒܶܐ ܛܪܽܘܢܳܐ ܕܰܢܚܰܝܶܒ ܠܰܢ. ܒܶܗ ܡܶܫܬܰܦܰܠ ܘܡܶܬܚܰܝܰܒ. ܗܳܝܕܶܝܢ ܡܶܬܡܰܠܝܳܐ ܒܰܥܒܳܕܳܐ ܗܳܝ
ܕܢܶܗܦܽܘܟ ܥܰܘܠܶܗ ܒܪܺܝܫܶܗ ܘܥܰܠ ܒܺܥܬܶܗ ܥܰܘܠܶܗ ܢܶܚܽܘܬ. ܘܰܚܢܰܢ ܥܰܡ ܢܒܺܝܳܐ ܢܶܩܥܶܐ. ܡܳܐ ܕܶܐܬܛܡܰܪܘ ܒܥܶܠܕܒ̈ܒܶܐ ܕܚܱ̈ܝܰܝܢ. ܒܓܘܡܳܨܳܐ ܕܡܶܙܕܰܟܝܳܢܘܬܳܐ ܘܰܕܚܰܝܳܒܽܘܬܳܐ. ܐܰܝܟ ܕܰܢܦܰܠ ܗܘܳܐ ܐܰܒܺܝܫܳܠܘܡ ܒܓܽܘܡܳܨܳܐ ܕܰܚܦܰܪ. ܕܠܳܐ ܢܳܡܽܘܣ ܠܗܰܘ ܡܰܟܝܟܳܐ ܕܰܘܺܝܕ ܘܙܰܕܺܝܩܳܐ.
ܕܰܐܘܕܶܐ ܠܡܳܪܝܳܐ ܐܰܝܟ ܙܰܕܺܝܩܽܘܬܝ. ܘܶܐܙܡܰܪ ܠܰܫܡܶܗ ܕܡܳܪܝܳܐ ܡܪܰܝܡܳܐ. ܗܳܕܶܐ ܕܶܝܢ ܗܳܘܝܳܐ. ܡܳܐ ܕܰܥܛܰܦ ܟܝܳܢܳܐ ܐܢܳܫܳܝܳܐ ܠܐܘܪܺܫܠܶܡ ܥܶܠܳܝܬܳܐ ܗܳܝ ܕܰܢܦܰܩ ܡܶܢܳܗ̇ ܒܢܶܟܠܶܗ ܕܡܳܪܽܘܕܳܐ. ܐܰܟܡܳܐ ܕܳܐܦ ܕܰܘܺܝܕ ܦܢܳܐ ܠܨܶܗܝܽܘܢ ܐܰܪܥܳܢܳܝܬܳܐ. ܡܶܢ ܒܳܬܰܪ ܕܶܐܬܩܛܶܠ ܐܰܒܺܝܫܳܠܽܘܡ ܒܪܶܗ ܘܫܳܡܽܘܥ. ܕܬܰܡܳܢ ܢܶܫܬܘܶܐ ܕܢܰܘܕܶܐ ܥܰܡ ܢܒܺܝܳܐ ܠܰܐܒܳܐ ܘܠܰܒܪܳܐ ܘܰܠܪܘܚܳܐ ܩܰܕܺܝܫܳܐ ܐܰܡܝܢ܀
ܡܙܡܘܪܐ ܕܬܡܢܝܐ
ܕܡܰܘܕܰܥ ܥܰܠ ܡܽܘܟܳܟܶܗ ܕܥܰܡܰܢܘܐܝܠ: ܘܥܰܠ ܪܽܘܡܪܳܡܶܗ: ܘܥܰܠ ܓܶܠܝܳܢܶܗ ܕܥܰܡܰܢܽܘܐܝܠ ܕܒܰܒܣܰܪ ܘܥܰܠ ܫܽܘܠܛܳܢܶܗ.
ܦܰܘܠܘܣ ܪܰܒܳܐ ܘܰܐܠܳܗܳܝܳܐ ܗܰܘ ܡܰܠܦܳܢܳܐ ܕܥܰܡ̈ܡܶܐ ܡܗܰܝ̈ܡܢܶܐ ܗܰܘ ܕܶܐܬܚܛܶܦ ܥܕܰܡܳܐ ܠܰܫܡܰܝܳܐ ܕܰܬܠܳܬܳܐ܆ ܒܩܳܠܶܗ ܕܝܶܫܽܘܥ ܢܳܨܪܳܝܳܐ ܗܰܘ ܕܰܢܚܶܬ ܒܳܬܪܶܗ ܡܶܢ ܫܡܰܝܳܐ ܘܰܐܣܩܶܗ ܠܪܰܘܡܳܐ ܟܰܕ ܡܰܠܶܦ ܠܬܰܠܡܝ̈ܕܶܐ ܦܺܝܠܝ̈ܦܺܣܳܝܶܐ܆ ܟܳܬܶܒ ܗܘܳܐ ܠܗܽܘܢ ܡܶܛܠ ܥܰܡܰܢܽܘܐܝܠ ܕܠܳܐ ܢܶܣܒܪܽܘܢ ܥܠܰܘܗܝ ܪ̈ܶܥܝܳܢܶܐ ܡܚܺܝ̈ܠܐܷ ܘܐܢܳܫܳܝܷ̈ܐ. ܐܶܠܐ ܐܳܦ ܪ̈ܳܡܶܐ ܘܰܐܠܳܗܳܝܷ̈ܐ. ܘܠܳܐ ܢܶܡܢܽܘܢܳܝܗܝ ܒܰܪܢܳܫܳܐ ܡܳܝܽܘܬܳܐ ܘܰܢܣܰܝܟܽܘܢ ܫܰܪܒܶܗ ܟܰܕ ܚܳܙܶܝܢ ܓܶܠܝܳܢܶܗ ܐܢܳܫܳܝܳܐ ܕܡܶܢܰܢ. ܘܣܽܘܪܳܩܶܗ ܕܡܶܢ ܒܬܽܘܠܬܳܐ ܘܡܶܬܒܰܪܢܫܳܢܽܘܬܶܗ. ܘܢܶܚܬܡܽܘܢ ܬܰܫܥܺܝܬܳܐ ܕܰܥܠܰܘܗܝ ܐܶܠܐ ܥܰܡ ܐܢܳܫܳܝ̈ܬܳܐ ܕܰܗܘܱ̈ܝ ܠܶܗ܆ ܢܶܣܒܽܘܢ ܐܳܦ ܐܰܠܳܗܳܝ̈ܬܳܐ ܕܺܐܝܬ ܠܗ. ܐܳܦ ܠܫܺܝ̈ܛܳܬܳܐ ܢܚܰܕܽܘܢ ܫܒܺܝ̈ܚܳܬܳܐ ܕܰܡܬܘܡܳܝܽܘܬܶܗ. ܟܰܕ ܠܰܘ ܥܰܡ ܣܘܥܪ̈ܳܢܶܐ ܕܕܳܡܶܝܢ ܠܰܚ̈ܕܳܕܶܐ ܢܶܡܢܽܘܢ ܟܝܳܢܳܐ ܘܰܢܦܰܪܫܽܘܢ ܒܶܗ ܩܢܽܘܡܷ̈ܐ. ܘܠܰܘ ܡܶܛܠ ܕܪ̈ܳܡܳܢ ܐܰܠܳܗܳܝܴ̈ܬܳܐ ܘܫܺܝ̈ܛܳܢ ܐܢܳܫܳܝܴ̈ܬܳܐܳ ܢܶܪܢܽܘܢ ܥܠܰܘܗܝ ܟܝܳܢܳܐ ܚܰܕ ܕܪܳܡ ܘܰܐܚܪܺܢܳܐ ܕܡܰܟܺܝܟ. ܐܶܠܐ ܡܶܛܠ ܗܳܠܶܝܢ ܘܡܶܢ ܗܳܢܽܘܢ ܢܶܕܥܽܘܢ ܕܐܝܬܰܘܗܝ ܥܰܡܰܢܽܘܐܝܠ. ܟܰܕ ܠܐ ܡܦܰܠܰܓ. ܚܰܕ ܦܰܪܨܽܘܦܳܐ ܚܰܕ ܩܢܽܘܡܳܐ. ܘܚܰܕ ܟܝܳܢܳܐ ܕܰܐܠܳܗܳܐ ܡܶܠܬܳܐ. ܐܰܠܳܗܳܐ ܕܰܡܒܰܣܰܪ. ܘܥܰܠܗܳܕܶܐ ܐܶܡܰܪ ܗܘܳܐ ܦܰܘܠܘܣ ܕܗܳܕܶܐ ܐܶܬܪܰܥܰܘ ܒܢܰܦܫܟܽܘܢ: ܗܳܝ ܕܳܐܦ ܝܶܫܽܘܥ ܡܫܺܝܚܳܐ. ܗܰܘ ܕܟܰܕ ܒܰܕܡܽܘܬܳܐ ܐܝܬܰܘܗܝ ܕܐܠܗܐ܇ ܠܳܐ ܗܘܳܐ ܚܛܘܦܝܳܐ ܚܰܫܒܳܗ̇. ܗܰܘ ܕܐܝܬܰܘܗܝ ܦܶܚܡܳܐ ܕܰܐܠܳܗܳܐ. ܐܶܠܐ ܢܰܦܫܶܗ ܣܰܪܶܩ. ܘܰܕܡܽܘܬܳܐ ܕܥܰܒܕܳܐ ܢܣܰܒ. ܘܰܗܘܳܐ ܒܰܕܡܽܘܬܳܐ ܕܰܒܢܰܝ̈ܢܳܫܳܐ. ܘܒܶܐܣܟܺܡܳܐ ܐܶܫܬܟܰܚ ܐܰܝܟ ܒܰܪܢܳܫܳܐ. ܘܡܰܟܶܟ ܢܰܦܫܶܗ ܗܳܝ ܕܰܥܕܰܡܳܐ ܠܡܰܘܬܳܐ: ܡܰܘܬܳܐ ܕܶܝܢ ܕܰܙܩܺܝܦܳܐ. ܡܶܛܠܗܳܢܳܐ ܐܳܦ ܐܰܠܳܗܳܐ ܐܰܣܓܺܝ ܪܰܡܪܡܶܗ. ܘܝܰܗܒ ܠܶܗ ܫܡܳܐ ܕܰܡܝܰܬܰܪ ܡܶܢܟܽܠ ܫܡܴ̈ܗܺܝܢ. ܕܒܰܫܡܶܗ ܕܝܶܫܽܘܥ ܟܽܠ ܒܪܽܘܟ ܬܶܟܽܘܦ ܕܒܰܫܡܰܝܳܐ ܘܒܰܐܪܥܳܐ. … ܘܟܽܠ ܠܶܫܳܢ ܢܰܘܕܶܐ ܕܡܳܪܝܰܐ ܗ̱ܘ ܝܶܫܽܘܥ ܡܫܺܝܚܳܐ ܠܫܽܘܒܚܳܐ ܕܰܐܠܳܗܳܐ ܐܰܒܽܘܗܝ (ܦܝܠܝ̈ܦܣܝܐ ܒ: ܗ-ܝܐ). ܘܡܰܣܒܰܪ ܐܢܳܐ ܕܰܟܒܰܪ ܐܢܳܫ ܐܳܡܰܪ ܕܡܳܢܰܘ ܗܳܢܳܐ ܫܽܘܪܳܝܳܐ ܡܬܺܝܚܳܐ܆ ܥܰܠ ܡܷ̈ܠܶܐ ܟܰܪ̈ܝܳܬܳܐ ܕܡܰܙܡܽܘܪܳܐ ܗܳܢܳܐ. ܕܟܽܠܶܗ ܥܰܠ ܫܽܘܠܛܳܢܶܗ ܗ̱ܘ ܕܥܰܡܰܢܽܘܐܝܠ. ܘܙܳܕܩܶ ܗܳܟܺܝܠ ܕܢܶܒܥܶܐ ܐܳܦ ܥܶܠܬܳܐ ܕܡܶܛܠܬܳܗ̇ ܡܶܢ ܕܰܘܺܝܕ ܡܶܬܡܰܠܰܠ. ܟܰܕ ܗܳܟܺܝܠ ܡܰܣܶܩ ܕܰܘܺܝܕ ܐܳܪܽܘܢܶܗ ܕܰܐܠܳܗܳܐ ܠܰܡܕܺܝܢܬܶܗ. ܡܶܢ ܒܳܬܰܪ ܕܛܰܥܢܽܘܗ̇ ܟܳܗ̈ܢܶܐ ܠܩܺܐܒܽܘܬܳܐ ܥܰܠ ܟܰܬܦ̈ܬܳܐ ܕܺܝܠܗܺܘܢ ܐܰܝܟ ܢܳܡܽܘܣܳܐ. ܘܫܰܪܺܝܘ ܥܠܰܝ̈ܡܶܐ ܘܫܰܒܪ̈ܶܐ ܘܰܛܠܳܝܷ̈ܐ ܢܣܰܓܽܘܢ ܩܕܳܡܰܘܗܝ. ܐܶܬܬܙܺܝܥ ܛܘܒܳܢܳܐ ܕܰܘܺܝܕ ܒܪܽܘܚܳܐ ܕܰܢܒܺܝܘܬܳܐ ܘܰܡܙܰܡܰܪ ܗܘܳܐ ܒܰܝܢܳܬ ܥܰܡܳܐ ܕܰܛܠܳܝܷ̈ܐ ܘܰܡܫܰܒܰܚ ܗܘܳܐ ܘܳܐܡܰܪ:
ܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܒܟܽܠܳܗ̇ ܐܰܪܥܳܐ. ܕܝܰܗܒܬ ܫܽܘܒܚܳܟ ܥܰܠ ܫܡܰܝܳܐ: ܡܶܢ ܦܽܘܡܳܐ ܕܰܥܠܰܝ̈ܡܶܐ ܘܕܰܛܠܳܝܷ̈ܐ ܬܰܩܶܢܬ ܬܶܫܒܽܘܚܬܳܟ. ܕܡܶܛܠ ܓܶܠܝܳܢܶܗ ܕܥܰܡܰܢܽܘܐܝܠ ܐܰܡܝܪ̈ܳܢ ܗܳܠܶܝܢ. ܠܰܝܬ ܐܢܳܫ ܐܰܝܟ ܕܣܳܒܰܪ ܐܢܳܐ ܕܢܺܐܡܰܪ ܕܠܐ. ܘܶܐܢ ܡܶܬܚܪܶܐ ܢܶܬܬܛܦܺܝܣ ܠܡܳܪܰܢ ܟܰܕ ܥܳܐܶܠ ܠܐܘܪܺܫܠܶܡ ܒܽܐܘܫܰܥ̈ܢܶܐ܆ ܘܡܳܢܳܐ ܦܶܬܓܳܡܳܐ ܦܰܢܺܝ ܠܪ̈ܰܒܰܝ ܟܳܗ̈ܢܶܐ ܘܰܠܣܳܦܪ̈ܶܐ ܟܰܕ ܐܳܡܪܺܝܢ ܠܶܗ ܡܶܛܠ ܩܳܠܐ ܕܰܛܠܳܝܷ̈ܐ܆ ܕܩܳܥܶܝܢ ܗܘܰܘ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ. ܡܰܠܦܳܢܳܐ ܟܐܺܝ ܒܬܰܠܡܺܝ̈ܕܰܝܟ (ܠܘܩܐ ܝܛ: ܠܛ). ܡܶܡܬܽܘܡ ܠܳܐ ܩܪܰܝܬܽܘܢ: ܕܡܶܢ ܦܽܘܡܳܐ ܕܰܛܠܳܝܷ̈ܐ ܘܰܕܝܰܠܘܕ̈ܐ ܬܰܩܶܢܬ ܬܶܫܒܽܘܚܬܳܟ (ܡܬܝ ܟܐ: ܝܘ). ܟܰܕ ܕܶܝܢ ܚܳܐܰܪ ܗܘܳܐ ܒܗܳܠܶܝܢ ܕܰܒܥܰܘ ܠܰܡܫܰܬܳܩܽܘ ܠܰܛܠܳܝܷ̈ܐ ܕܰܡܫܰܒܚܺܝܢ ܗܘܰܘ ܬܶܫܒܽܘܚܬܳܐ ܗܳܝ ܚܕܰܬܳܐ܆ ܐܶܡܰܪ.
ܡܶܛܠ ܒܥܶܠܕܒ̈ܒܰܝܟ ܕܢܶܬܒܰܛܰܠ ܒܥܶܠܕܒܳܒܳܐ ܕܡܶܬܢܰܩܰܡ. ܟܰܕ ܡܰܘܕܰܥ ܕܗܰܘ ܕܡܶܬܩܥܶܐ ܡܶܢ ܝܰܠܘܕ̈ܐ ܨܶܒܥܴ̈ܬܶܗ ܨܰܒܶܬܝ̈ ܠܰܫܡܰܝܳܐ ܒܢܰܗܺܝܪ̈ܶܐ. ܘܰܪܩܺܝܥܳܐ ܥܒܳܕ ܐܝ̈ܕܰܘܗܝ ܐܝܬܰܘܗܝ. ܡܰܘܣܶܦ ܐܳܡܰܪ.
ܡܶܛܠ ܕܰܚܙܰܘ ܫܡܰܝ̈ܟ ܥܒܳܕܳܐ ܕܨܶܒ̈ܥܳܬܳܟ. ܣܰܗܪܳܐ ܘܟܰܘܟ̈ܒܶܐ ܕܬܰܩܶܢܬ. ܠܰܘ ܘܡܶܢ ܗܳܫܳܐ. ܡܶܛܠ ܕܡܶܢ ܝܰܠܘܕ̈ܐ ܡܶܫܬܰܒܰܚ ܐܰܢܬ. ܥܰܠ ܕܰܨܒܰܝܬ ܕܬܺܐܬܶܐ ܠܡܽܘܟܳܟܳܐ. ܘܬܶܬܓܠܶܐ ܒܰܒܣܰܪ ܘܬܶܗܘܶܐ ܒܰܪܢܳܫܳܐ. ܡܶܢ ܗܳܫܳܐ ܫܰܪܺܝܬ ܠܡܶܫܬܰܒܳܚܽܘ. ܐܶܠܐ ܡܶܢ ܥܳܠܰܡ ܡܫܰܒܚܳܐ ܐܝܬܰܝܟ. ܘܰܫܡܰܝܴ̈ܐ ܪ̈ܳܡܶܐ ܩܳܥܶܝܢ ܫܘܒܚܳܟ. ܘܣܰܗܪܳܐ ܘܟܰܘܟ̈ܒܶܐ ܟܳܪ̈ܘܙܶܐ ܐܶܢܽܘܢ ܒܕܶܢ̈ܚܰܝܗܽܘܢ. ܐܶܠܐ ܡ̇ܫܰܒ̣ܚ ܗ̣ܘ ܫܡܳܟ ܒܟܽܠܳܗ̇ ܐܰܪܥܳܐ ܐܰܝܟ ܕܒܰܫܡܰܝܳܐ. ܐܰܝܟ ܐܰܝܢܳܐ ܕܩܰܕܺܝܡ ܠܰܡܫܰܒ̈ܚܳܢܶܐ ܒܪܰܒܽܘܬܶܗ.
ܡܰܢܽܘ ܠܰܡ ܓܰܒܪܳܐ ܕܶܐܬܕܟܰܪܬܳܝܗܝ. ܘܒܰܪܢܳܫܳܐ ܕܰܦܩܰܕܬܳܝܗܝ: ܘܒܰܨܰܪܬܳܝܗܝ ܩܰܠܝܠ ܡܶܢ ܡܰܠܰܐܟܷ̈ܐ. ܘܒܳܬܰܪܟܶܢ ܒܺܐܝܩܳܪܳܐ ܘܰܒܫܽܘܒܚܳܐ ܐܰܥܛܶܦܬܳܝܗܝ. ܠܦܽܘܫܳܩܳܐ ܕܗܳܠܶܝܢ ܣܳܦܶܩ ܗܽܘ ܩܳܠܶܗ ܕܰܫܠܝܚܳܐ ܗܰܘ ܕܰܩܥܳܐ ܝܰܬܺܝܪ ܡܶܢ ܫܺܝܦܘܪ̈ܶܐ ܠܘܳܬ ܥܶܒܪ̈ܳܝܶܐ. ܗܰܘ ܕܡܰܟ ܩܰܠܝܠ ܡܶܢ ܡܰܠܰܐܟܷ̈ܐ: ܚܳܙܶܝܢܰܢ ܕܗܽܘܝܽܘ ܝܶܫܽܘܥ ܡܶܛܠ ܚܰܫܳܐ ܕܡܰܘܬܶܗ. ܘܬܶܫܒܽܘܚܬܳܐ ܘܺܐܝܩܳܪܳܐ ܣܳܡ ܒܪܺܝܫܶܗ (ܥܒܪ̈ܝܐ ܐ: ܛ). ܘܠܶܗ ܠܗܳܢܳܐ ܕܶܐܬܡܰܟܰܟ ܝܰܬܺܝܪ ܡܶܢ ܡܳܐ ܕܡܶܫܟܰܚ ܦܽܘܡܳܐ ܕܰܢܡܰܠܶܠ. ܐܳܦ ܐܶܬܒܰܨܰܪ ܩܰܠܝܠ ܡܶܢ ܡܰܠܐܟܷ̈ܐ. ܒܗܳܝ ܕܡܺܝܬ ܡܶܛܠ ܕܰܗܘܳܐ ܒܰܪܢܳܫܳܐ. ܘܗܶܢܽܘܢ ܠܐ ܡܳܝܬܺܝܢ. ܐܶܡܰܪ ܢܒܺܝܳܐ:
ܕܰܐܫܠܶܛܬܳܝܗܝ ܒܰܥܒܳܕܳܐ ܕܐܝ̈ܕܰܝܟ. ܘܟܽܠ ܣܳܡܬ ܬܚܶܝܬ ܪ̈ܶܓܠܰܘܗܝ: ܥܳܢܴ̈ܐ ܘܒܰܩܪ̈ܶܐ ܟܠܗܶܝܢ. ܐܳܦ ܚܰܝܽܘܬܳܐ ܕܕܰܒܪܳܐ ܘܨܶܦܪ̈ܶܐ ܕܰܫܡܰܝܳܐ: ܘܢܽܘ̈ܢܶܐ ܕܝܰܡܳܐ ܕܥܳܒܪܺܝܢ ܒܰܫܒܺܝ̈ܠܐܷ ܕܝܰܡ̈ܡܶܐ. ܐܶܢ ܟܽܠ ܡܶܕܶܡ ܐܶܬܬܣܺܝܡ ܬܚܶܝܬ ܪ̈ܶܓܠܰܘܗܝ ܘܟܽܠܡܶܕܶܡ ܐܶܫܬܰܥܒܰܕ ܠܶܗ܆ ܒܗܳܝ ܕܰܗܘܳܐ ܒܰܪܢܳܫܳܐ. ܓܰܠܝܳܐ ܗ̄ܝ ܕܠܰܝܬ ܡܶܕܶܡ ܕܠܳܐ ܡܫܰܥܒܰܕ ܠܶܗ. ܐܶܡܰܪ ܓܶܝܪ ܢܒܺܝܳܐ ܕܥܳܢܴ̈ܐ ܘܒܰܩܪ̈ܶܐ ܟܠܗܶܝܢ. ܟܰܕ ܒܥܴ̈ܢܳܐ ܚܳܒܶܫ ܠܟܽܠܗܽܘܢ ܬܰܡܺܝ̈ܡܶܐ ܘܡܰܟܺܝ̈ܟܰܝ ܠܶܒܳܐ. ܘܰܠܥܶܪ̈ܒܶܐ ܘܠܰܢܩܱ̈ܘܳܬܳܐ ܗܳܢܽܘܢ ܕܶܐܬܗܰܝܡܰܢ ܥܠܰܝܗܘܢ ܦܶܛܪܽܘܣ ܗܰܘ ܪܰܒܳܐ ܠܡܶܪܥܳܐ. ܒܰܩܪ̈ܶܐ ܡܟܰܢܶܐ ܠܰܫܠܺܝ̈ܚܶܐ ܘܰܠܡܰܠܦܳܢܷ̈ܐ ܘܰܠܟܳܗ̈ܢܶܐ. ܚܰܝܽܘܬܳܐ ܕܕܰܒܪܳܐ ܠܥܰܡ̈ܡܶܐ ܒܰܪܒܪ̈ܳܝܶܐ. ܕܡܶܫܬܰܥܒܕܺܝܢ ܠܶܗ ܠܰܡܫܺܝܚܳܐ ܘܰܡܗܰܝܡܢܺܝܢ ܒܗ. ܨܶܦܪ̈ܶܐ ܬܽܘܒ ܕܒܰܫܡܰܝܳܐ. ܠܡܰܠܰܐܟ̈ܐ ܘܰܠܟܽܠܗܽܘܢ ܚܰܝ̈ܠܰܘܳܬܳܐ ܝܰܕܽܘܥܬܳܢ̈ܐ ܕܒܰܡܪ̈ܰܘܡܶܐ. ܢܽܘ̈ܢܶܐ ܕܶܝܢ ܕܝܰܡܳܐ ܡܦܰܚܶܡ ܠܡܺܝ̈ܬܶܐ ܕܒܰܫܝܽܘܠ. ܘܰܠܫܺܐܕ̈ܐ ܬܽܘܒ ܕܪܰܚܺܝܩܺܝܢ ܡܶܢ ܐܰܠܳܗܳܐ. ܡܶܛܠܗܳܢܳܐ ܫܠܝܚܳܐ ܐܰܠܳܗܳܝܳܐ ܦܰܫܶܩ. ܐܰܝܟ ܕܩܰܕܡܶܬ ܐܶܡܪܶܬ ܒܪܺܝܫܶܗ ܕܡܰܙܡܘܪܳܐ. ܕܝܰܗܒܠܶܗ ܐܰܠܳܗܳܐ ܫܡܳܐ ܕܰܡܝܰܬܰܪ ܡܶܢ ܟܽܠ ܫܡܳܗܻ̈ܝܢ: ܕܒܰܫܡܶܗ ܕܝܶܫܽܘܥ ܟܠ ܒܪܽܘܟ ܬܶܟܽܘܦ ܕܒܰܫܡܰܝܳܐ ܘܒܰܐܪܥܳܐ (ܦܝܠܝ̈ܦܣܐ ܒ: ܛ-ܝ). ܥܰܠ ܡܰܠܐܟ̈ܐ ܕܟܳܦܺܝܢ ܒܽܘܪܟܳܐ ܘܥܰܠ ܫܺܐܕ̈ܐ ܕܣܳܓܕܺܝܢ ܠܶܗ ܕܠܐ ܒܨܶܒܝܳܢܗܽܘܢ܆ ܕܰܠܗܽܘܢ ܩܳܪܶܐ ܢܒܺܝܳܐ ܨܶܦܪ̈ܶܐ ܕܳܐܐܰܪ ܕܒܰܫܡܰܝܳܐ. ܘܡܰܝܬܶܐ ܐܳܠܶܦ ܕܟܳܦܺܝܢ ܒܽܘܪܟܳܐ ܠܣܶܓܕܬܳܐ ܕܰܡܢܰܚܡܳܢܗܽܘܢ. ܐܰܝܠܶܝܢ ܕܰܥܠܰܝܗܽܘܢ ܐܶܬܢܰܒܺܝ ܕܰܘܺܝܕ ܕܐܝܬܰܝܗܽܘܢ ܢܽܘ̈ܢܶܐ ܕܝܰܡܳܐ ܕܥܳܒܪܺܝܢ ܒܰܫܒܺܝܠܳܐ ܕܝܰܡ̈ܡܶܐ. ܫܒܺܝܠܳܐ ܐܝܬܰܘܗܝ ܗܰܘ ܕܰܒܕܽܘܟܬܳܐ ܐܚܪܺܬܳܐ ܩܪܳܝܗܝ ܢܰܚܠܳܐ. ܫܒܺܝܠܳܐ ܕܶܝܢ ܚܰܕ ܐܝܬܰܘܗܝ ܡܶܛܽܠ ܕܚܰܕ ܗ̄ܘ ܡܰܘܬܳܐ ܫܰܘܝܳܐ ܠܟܽܠܗܽܘܢ ܒܢܰܝ̈ܢܳܫܳܐ. ܐܶܪܝܛܝܩܳܝܳܐ ܐܳܡܰܪ: ܒܗܳܝ ܕܰܐܒܳܐ ܝܰܗܒ ܫܽܘܠܛܳܢܳܐ ܗܳܢܐ ܠܰܒܪܳܐ܆ ܪܰܒ ܗ̄ܘ ܡܶܢܶܗ. ܘܰܠܘܳܬ ܗܳܢܳܐ ܡܦܰܢܶܝܢܰܢ ܦܶܬܓܳܡܳܐ ܘܳܐܡܪܝܢܰܢ: ܕܠܰܘ ܒܗܰܘ ܛܶܟܣܳܐ ܕܰܡܥܰܠܶܝܢ ܝܳܗܽܘ̈ܒܶܐ ܥܳܠܡܴ̈ܢܳܝܶܐ ܡܶܢ ܢܳܣܽܘ̈ܒܶܐ܆ ܡܶܬܢܰܣܒܺܝܢ ܦܶܬܓܳܡ̈ܐ ܗܳܠܶܝܢ ܩܰܕܝ̈ܫܶܐ. ܐܶܠܐ ܕܰܡܕܰܒܪܳܢܘܬܳܐ ܡܚܰܘܶܝܢ܆ ܘܚܰܕ ܗ̱ܘܳܐ ܟܝܳܢܳܐ ܕܠܳܥܳܙܳܪ ܕܰܡܡܰܚܰܝ ܗܘܳܐ ܒܫܽܘܚ̈ܢܶܐ ܣܪ̈ܰܝܳܐ ܐܰܝܟ ܗܰܘ ܥܰܬܺܝܪܳܐ ܕܶܐܡܰܪ ܡܳܪܰܢ ܥܠܰܘܗܝ ܕܡܶܬܒܰܣܰܡ ܗܘܳܐ ܓܰܐܝܳܐܝܬ. ܗܳܐ ܡܳܕܶܝܢ ܒܗܳܝ ܝܰܗܒ ܐܰܒܳܐ ܘܰܢܣܰܒ ܒܪܳܐ܆ ܘܠܳܐ ܡܶܕܶܡ ܡܚܰܘܝܳܐ ܕܰܙܥܽܘܪ ܒܪܳܐ ܡܶܢ ܐܰܒܳܐ ܟܝܳܢܳܐܝܬ. ܡܶܛܠ ܕܚܰܕ ܗܘ ܟܝܳܢܳܐ ܕܺܐܝܠܳܢܳܐ ܘܰܕܦܺܐܪܳܐ ܗܳܟܰܢܳܐ ܐܺܝܬ ܠܐܒܳܐ ܗܳܝ ܕܢܶܬܶܠ. ܘܐܺܝܬ ܠܰܒܪܳܐ ܕܰܐܝܟ ܦܺܐܪܳܐ ܢܳܣܶܒ. ܘܰܒܗܳܕܶܐ ܠܐ ܐܰܒܳܐ ܝ̣ܪܶܒ܆ ܘܰܒܪܳܐ ܠܐ ܙܥܰܪ. ܘܗܳܕܶܐ ܪܘܫܥܳܐ ܗ̱ܝ ܗܳܝ ܕܢܶܣܕܽܘܩ ܠܗܰܘ ܦܺܐܪܳܐ ܩܰܕܺܝܫܳܐ ܘܠܐ ܡܶܬܚܰܒܠܳܢܳܐ ܡܶܢ ܐܺܝܠܳܢܳܐ ܕܚܰܝܷ̈ܐ. ܗܰܘ ܕܦܺܐܪܶܗ ܗܘ ܕܠܐ ܥܽܘܩܳܒܳܐ. ܟܡܳܐ ܝܰܬܝܪܳܐܝܬ ܒܗܳܕܶܐ ܬܰܚܘܺܝܬܳܐ ܡܶܬܚܰܙܝܳܢܺܝܬܳܐ ܢܶܬܗܰܝܡܰܢ. ܗܰܘ ܟܝܳܢܳܐ ܡܥܰܠܝܳܐ ܕܐܝܬܽܘܬܳܐ ܡܥܰܠܰܝܬܳܐ. ܕܪܳܡ ܡܶܢ ܦܽܘܡܳܐ ܘܠܶܫܳܢܳܐ ܘܪܰܒ ܗ̄ܘ ܡܶܢ ܦܘܚܳܡܳܐ ܘܰܡܥܰܠܰܝ ܡܶܢ ܕܶܡܘ̈ܬܳܐ. ܗܳܠܶܝܢ ܡܰܢ ܐܳܡܪܺܝܢ܆ ܠܘܳܬ ܐܺܝܠܳܢܳܐ ܘܫܶܡܫܳܐ. ܐܶܠܐ ܗܳܫܳܐ ܢܶܬܦܢܶܐ ܠܘܳܬ ܫܽܘܠܳܡ ܡܰܙܡܘܪܳܐ ܘܢܶܒܥܶܐ ܕܰܐܝܕܳܐ ܗܝ ܥܶܠܬܳܐ. ܕܰܐܝܟ ܦܶܬܓܳܡܳܐ ܕܫܘܪܳܝܶܗ ܗܳܟܰܢܳܐ ܐܝܬܰܘܗܝ ܫܘܠܳܡܶܗ. ܣܳܒܰܪ ܐܢܳܐ ܕܗܳܕܶܐ ܒܳܥܶܐ ܢܦܰܫܶܩ. ܡܶܛܠ ܕܟܰܕ ܠܳܐ ܐܺܝܬ ܗܘܳܐ ܒܶܪ̈ܝܳܬܳܐ. ܚܕܳܐ ܗܘܳܬ ܬܶܫܒܽܘܚܬܶܗ ܕܰܒܪܳܐ. ܘܡܶܢ ܒܳܬܰܪ ܕܰܗ̈ܘܰܝ ܘܰܣܓܶܕ̈ܝ ܠܶܗ܆ ܠܰܘ ܫܽܘܒܚܳܐ ܡܶܕܶܡ ܐܰܘܣܶܦ ܠܶܗ. ܗܳܕܶܐ ܩܳܥܶܐ. ܕܰܐܢܬ ܐܰܝܟ ܕܐܝܬܰܝܟ ܐܰܢܬ ܘܰܫܢܱ̈ܝܟ ܠܳܐ ܓܳܡܪ̈ܳܢ. ܘܠܐ ܐܰܘܪܒܳܟ ܩܘܠܳܣܳܐ ܕܰܥܒܺܝ̈ܕܶܐ ܘܠܳܐ ܪܰܡܪܡܳܟ ܪܽܘܡܪܳܡܳܐ ܕܡܰܠܰܐܟܷ̈ܐ. ܡܫܰܒܰܚ ܗܘ ܓܶܝܪ ܫܡܳܟ ܡܶܢܩܕܳܡ ܟܠܗܶܝܢ ܒܶܪ̈ܝܳܬܳܐ. ܘܰܡܫܰܒܰܚ ܗܘ ܐܰܢܬ ܘܰܫܡܳܟ ܡܶܢ ܒܳܬܰܪ ܕܰܒܪܰܝܬ. ܡܶܛܠܗܳܢܳܐ ܐܶܡܰܪ.
ܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܒܟܽܠܳܗ̇ ܐܰܪܥܳܐ. ܠܥܳܠܰܡ ܥܳܠܡܺܝܢ ܐܰܡܝܢ܀
ܡܙܡܘܪܐ ܕܬܫܥܐ
ܡܰܘܕܰܥ ܥܰܠ ܚܘܒܳܐ ܡܫܰܡܠܝܳܐ ܕܕܰܘܺܝܕ ܕܰܠܘܳܬ ܐܰܠܳܗܳܐ: ܘܥܰܠ ܥܩܽܘܪܝܳܐ ܕܰܐܬܪܗ ܕܡܘܬܐ ܘܕܰܫܝܽܘܠ ܕܰܥܩܰܪ ܐܶܢܘܢ ܡܰܘܬܶܗ ܕܰܐܠܳܗܳܐ.
ܠܡܽܘܫܶܐ ܪܰܒܳܐ ܘܩܰܕܡܳܝܳܐ ܕܰܢܒܺܝ̈ܐ ܫܳܡܥܺܝܢܰܢ ܕܶܐܡܰܪ ܟܰܕ ܡܰܠܶܦ ܒܬܶܢܝܳܢ ܢܳܡܽܘܣܳܐ ܠܝܣܪܳܐܝܠ܆ ܪܚܰܡ ܕܶܝܢ ܠܡܳܪܝܳܐ ܐܰܠܳܗܳܟ ܡܶܢ ܟܽܠܶܗ ܚܰܝܠܳܟ܆ ܘܡܶܢ ܟܽܠܶܗ ܪܶܥܝܳܢܳܟ (ܬܢܝܢ ܢܡܘܣܐ ܘ: ܗ). ܘܶܐܢ ܠܰܡ ܬܶܥܒܶܕ ܗܳܕܶܐ. ܐܰܣܠܳܐ ܠܣܳܐܢܰܝ̈ܟ ܘܰܐܥܺܝܩ ܠܰܒܥܶܠܕܒ̈ܒܰܝܟ ܒܗܳܕܶܐ ܡܰܠܦܳܢܽܘܬܳܐ ܐܰܝܟܳܐ ܕܡܶܫܬܰܡܠܝܳܐ. ܡܶܫܟܰܚ ܗܰܘ ܩܰܪܺܝܒܽܘܬܳܐ ܘܒܰܝܬܳܝܽܘܬܳܐ ܕܰܠܘܳܬ ܐܰܠܳܗܳܐ ܒܰܢܛܳܪܶܗ ܕܦܽܘܩܕܳܢܳܐ ܗܳܢܳܐ. ܕܰܢܛܰܪ ܕܰܘܺܝܕ ܦܽܘܩܕܢܰܘ̈ܗܝ ܕܰܐܠܳܗܳܐ. ܗܽܘ ܐܰܠܳܗܳܐ ܐܰܣܗܶܕ ܥܠܰܘܗܝ. ܘܡܶܛܠ ܕܰܢܚܰܘܶܐ ܛܘܒܳܢܳܐ ܕܰܘܺܝܕ܆ ܡܰܘܕܶܐ ܘܰܡܙܰܡܰܪ ܒܡܰܙܡܽܘܪܳܐ ܗܳܢܳܐ ܕܬܶܫܥܳܐ:
ܐܰܘܕܶܐ ܠܡܳܪܝܳܐ ܡܶܢ ܟܽܠܶܗ ܠܶܒܝ. ܘܶܐܫܬܰܥܶܐ ܟܽܠܗܶܝܢ ܬܶܕܡܪ̈ܳܬܳܟ: ܘܶܐܚܕܶܐ ܘܶܐܪܘܰܙ ܒܳܟ. ܘܶܐܙܡܰܪ ܠܰܫܡܳܟ ܡܪܰܝܡܳܐ. ܐܰܝܟ ܕܳܐܡܪܺܝܢ ܐܰܝܠܶܝܢ ܕܰܒܠܶܫܳܢܳܐ ܥܶܒܪܳܝܳܐ ܡܕܰܪܫܺܝܢ܆ ܬܶܫܒܽܘܚܬܳܐ ܗܳܕܶܐ. ܟܰܕ ܚܪܰܒ ܕܰܘܺܝܕ ܠܗܳܕܳܪ ܡܰܠܟܳܐ ܕܰܢܨܺܝܒܺܝܢ ܐܰܡܪܶܗ: ܒܪܰܡ ܢܶܒܥܶܐ ܐܶܢ ܕܳܡܶܐ ܣܘܥܪܳܢܳܐ ܒܡܶܕܶܡ ܠܗܳܝ ܕܰܗܘܳܬ܆ ܐܶܢܕܶܝܢ ܐܚܪ̈ܳܢܝܳܬܳܐ ܡܶܬܢܰܒܶܐ ܡܶܢ ܐܰܝܠܶܝܢ ܕܡܶܬܢܰܒܶܐ ܢܶܣܰܒ ܥܶܠܬܳܐ ܕܦܽܘܫܳܩܳܐ ܗܳܢܳܐ ܕܣܺܝܡ ܩܕܳܡܰܝܢ. ܐܶܡܰܪ ܓܶܝܪ ܕܰܐܘܕܶܐ ܠܡܳܪܝܳܐ ܡܶܢ ܟܽܠܶܗ ܠܶܒܝ. ܗܳܕܶܐ ܕܶܝܢ ܡܚܰܘܝܳܐ ܗܳܝ ܕܰܒܟܽܠܶܗ ܠܶܒܶܗ ܪܳܚܶܡ ܗܘܳܐ ܠܐܠܳܗܳܐ. ܘܡܰܘܣܶܦ܆ ܘܶܐܫܬܰܥܶܐ ܟܽܠܗܶܝܢ ܬܶܕܡܪ̈ܳܬܳܟ. ܘܰܐܝܠܶܝܢ ܐܶܢܶܝܢ ܬܶܕܡܪ̈ܳܬܶܗ ܕܰܐܠܳܗܳܐ ܕܢܶܫܬܰܥܶܐ. ܫܳܡܥܺܝܢܰܢ ܕܶܐܡܰܪ: ܘܰܕܫܰܪܺܝܪ ܡܙܰܡܪܳܢܳܐ ܗܳܝ ܕܰܪܘܺܝܚܽܘܬܶܗ ܕܝܰܡܳܐ. ܘܚܰܡܺܝܡܽܘܬܶܗ ܕܫܶܡܫܳܐ. ܘܕܶܢܚܶܗ ܘܢܽܘܗܪܶܗ ܕܣܰܗܪܳܐ ܘܰܡܛܰܟܣܽܘܬܳܐ ܬܡܺܝܗܬܳܐ ܘܠܐ ܡܶܬܕܰܪܟܳܢܺܝܬܳܐ ܕܟܰܘܟ̈ܒܶܐ ܘܬܶܫܒܽܘܚܬܳܐ ܕܡܰܠܰܐܟܷ̈ܐ ܕܒܰܫܡܰܝܳܐ. ܚܕܳܐ ܡܶܢ ܗܳܠܶܝܢ ܠܐ ܐܺܝܬܰܝܗܶܝܢ ܬܶܕܡܪ̈ܳܬܶܗ ܕܰܐܠܳܗܳܐ. ܐܶܢܳܐ ܕܶܝܢ ܕܶܐܫܬܰܥܝ ܐܳܡܰܪ ܐܢܳܐ. ܘܰܕܠܰܘ ܬܽܘܒ ܒܚܰܪܒܳܐ ܕܰܗܘܳܬ ܒܗܰܕܪܰܥܙܰܪ ܡܰܠܟܳܐ ܕܰܢܨܺܝܒܺܝܢ ܡܰܘܕܰܥ ܡܰܙܡܽܘܪܳܐ ܗܳܢܳܐ ܡܚܰܘܶܐ ܐܢܳܐ. ܐܶܠܐ ܝܰܬܺܝܪܳܐܝܬ ܚܰܪܒܳܐ ܕܰܗܘܳܬ ܒܡܰܫܪ̈ܝܳܬܳܐ ܕܰܒܥܶܠܕ̈ܒܳܒܰܘܗܝ ܕܓܶܢܣܰܢ܆ ܬܶܕܡܪ̈ܳܬܳܐ ܓܶܝܪ ܗܳܠܶܝܢ ܐܶܢܶܝܢ. ܐܶܢ ܚܳܙܶܝܢܰܢ ܕܰܒܠܰܥܘ ܠܶܓܝܽܘ̈ܢܶܐ ܕܫܺܐܕ̈ܐ ܘܓܽܘ̈ܕܶܐ ܕܕܰܝ̈ܘܶܐ ܡܳܪ̈ܽܘܕܶܐ ܕܗܳܠܶܝܢ ܕܰܣܥܰܪ ܒܓܶܠܝܳܢܶܗ ܕܒܰܒܣܰܪ. ܗܰܘ ܪܳܥܝܳܐ ܕܶܐܬܳܐ ܡܶܢ ܫܡܰܝܳܐ. ܗܰܘ ܕܰܒܕܰܘܺܝܕ ܡܶܬܡܬܶܠ. ܐܶܡܰܪ ܡܙܰܡܪܳܢܳܐ ܕܡܶܫܬܰܥܶܐ ܬܶܕܡܪ̈ܬܶܗ ܕܰܐܠܳܗܳܐ. ܕܗܳܕܶܐ ܕܶܝܢ ܗܳܘܝܳܐ:
ܟܰܕ ܢܶܗܦܟܽܘܢ ܒܥܶܠܕ̈ܒܳܒܰܝܟ ܠܒܶܣܬܰܪܗܽܘܢ. ܘܢܶܬܬܰܩܠܽܘܢ ܘܢܺܐܒܕܽܘܢ ܡܶܢ ܩܕܳܡܰܝܟ. ܡܶܛܠ ܕܰܥܒܰܕܬ ܦܽܘܪܥܳܢܝ ܘܕܺܝܢܝ. ܘܺܝܬܶܒܬ ܥܰܠ ܟܽܘܪܣܝܳܐ ܕܰܝܳܢܳܐ ܙܰܕܺܝܩܳܐ. ܡܰܢܽܘ ܗܰܘ ܕܰܥܒܰܕ ܦܽܘܪܥܳܢܶܗ ܕܰܟܝܳܢܳܐ ܐܢܳܫܳܝܳܐ. ܐܶܠܐ ܗܰܘ ܕܕܳܢ ܘܚܰܝܒܶܗ ܠܰܐܪܟܽܘܢܶܗ ܕܥܳܠܡܳܐ ܗܳܢܳܐ. ܘܰܫܩܰܠ ܡܶܢܶܗ ܫܽܘܠܛܳܢܶܗ. ܗܰܘ ܕܰܚܛܰܦ ܒܰܛܪܽܘܢܽܘܬܶܗ ܡܳܪܽܘܕܬܳܐ ܠܶܒܰܘܴ̈ܬܳܐ ܕܥܰܡ̈ܡܶܐ. ܘܠܰܘ ܒܟܺܐܢܽܘܬܳܐ ܬܫܰܥܒܶܕ ܐܶܢܽܘܢ. ܘܟܰܕ ܝܺܬܶܒ ܥܰܠ ܟܽܘܪܣܝܳܐ ܕܰܝܳܢܳܐ ܙܰܕܺܝܩܳܐ ܗܰܘ ܕܶܐܬܚܙܝ̣ ܒܰܒܣܰܪ ܘܰܢܦܰܩ ܠܡܰܕܒܪܳܐ ܘܚܰܝܒܶܗ ܠܰܛܪܘܢܳܐ. ܘܒܰܟܐܳܬܶܗ ܙܓܰܪ ܠܪ̈ܽܘܚܶܐ ܛܰܢ̈ܦܳܬܳܐ. ܘܥܰܠܗܳܕܶܐ ܡܰܝܬܶܐ ܘܳܐܡܰܪ:
ܟܐܰܝܬ ܒܥܰܡ̈ܡܶܐ ܘܰܐܘܒܶܕܬ ܠܪ̈ܰܫܺܝܥܶܐ. ܘܰܫܡܳܗܰܝ̈ܗܽܘܢ ܥܛܰܝܬ ܠܥܳܠܰܡ ܥܳܠܡܺܝܢ. ܗܳܫܳܐ ܕܶܝܢ ܒܰܡܢܳܬܳܐ ܚܳܙܶܝܢܰܢ ܕܶܐܣܬܰܥܪܰܬ ܗܳܕܶܐ܆ ܡܫܰܡܠܝܳܐܝܬ ܕܶܝܢ ܡܳܐ ܕܩܳܥܶܐ ܠܘܳܬ ܗܳܢܽܘܢ ܕܒܰܓܕܰܝܴ̈ܐ ܐܶܬܡܬܶܠܘ: ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ (ܡܬܝ ܟܗ: ܡܐ). ܬܰܡܳܢ ܓܶܝܪ ܢܳܦܩܳܐ ܠܰܥܒܳܕܳܐ.
ܗܳܝ ܕܰܒܥܶܠܕܒ̈ܒܰܝ ܓܡܰܪܘ ܒܣܰܝܦܳܐ ܠܥܳܠܰܡ. ܘܩܽܘܪ̈ܝܳܐ ܥܩܰܪܬ ܘܰܐܘܒܶܕܬ ܕܽܘܟܪܳܢܗܶܝܢ. ܒܥܶܠܕ̈ܒܳܒܶܐ ܠܡܰܘܬܳܐ ܘܰܠܣܳܛܳܢܳܐ ܡܰܘܕܰܥ܆ ܕܰܒܣܰܝܦܳܐ ܡܰܢ ܟܺܐܢܳܐ ܡܶܬܩܰܛܠܺܝܢ. ܘܩܰܒܪ̈ܶܐ ܘܰܫܝܽܘܠ ܩܘܪ̈ܝܳܐ ܥܰܫܺܝ̈ܢܳܬܳܐ ܡܰܘܒܶܕ ܠܚܰܪܬܳܐ ܕܽܘܟܪܳܢܗܶܝܢ. ܡܶܛܽܠ ܕܰܡܬܰܒܰܪ ܥܰܡܰܢܽܘܐܷܝܠ ܬܰܪ̈ܥܶܐ ܕܰܢܚܳܫܳܐ ܕܰܚܫܰܠ ܡܰܘܬܳܐ. ܘܰܡܓܰܕܶܡ ܡܽܘܟ̈ܠܐܷ ܕܦܰܪܙܠܳܐ ܕܒܰܓܪܰܬ ܐܶܢܽܘܢ ܕܳܘܺܝܬܳܐ ܫܝܽܘܠ ܒܰܐܦܱ̈ܝ ܡܺܝ̈ܬܶܐ ܕܠܳܐ ܢܶܦܩܽܘܢ ܡܶܢܳܗ̇. ܘܒܳܬܰܪ ܗܳܠܶܝܢ ܐܶܡܰܪ:
ܡܳܪܝܳܐ ܠܥܳܠܰܡ ܩܰܝܳܡ. ܘܡܰܬܩܰܢ ܟܽܘܪܣܝܶܗ ܠܕܺܝܢܳܐ. ܕܰܢܕܽܘܢ ܬܺܒܝܠ ܒܩܽܘܫܬܳܐ. ܘܰܠܥܰܡ̈ܡܶܐ ܒܰܬܪܺܝܨܘܬܳܐ. ܕܠܰܝܬ ܕܺܝܢܳܐ ܩܕܳܡ ܫܽܘܠܳܡܳܐ ܓܰܠܝܳܐ ܗܝ ܠܡܶܬܬܕܺܝ̈ܢܳܢܶܐ. ܐܰܝܟ ܕܡܶܢ ܚܰܝܠܳܐ ܗܰܘ ܕܰܟܬܳܒܷ̈ܐ ܩܰܕܺܝ̈ܫܶܐ. ܟܽܠܗܽܘܢ ܓܶܝܪ ܨܶܝܕ ܫܽܘܠܳܡܳܐ ܢܳܓܕܺܝܢ ܠܶܗ ܠܕܺܝܢܳܐ. ܡܶܛܠ ܡܳܢܳܐ ܐܡ̣ܪ ܐܶܫܰܥܝܳܐ ܢܒܺܝܳܐ: ܕܰܒܢܽܘܪܳܐ ܕܳܐܶܢ ܡܳܪܝܳܐ: ܘܒܳܚܰܪ ܒܳܗ̇ ܠܟܽܠ ܒܣܰܪ (ܐܫܥܝܐ ܣܘ: ܝܘ). ܘܕܳܢܺܝܐܝܠ ܐܶܡܰܪ ܒܰܢܒܺܝܽܘܬܶܗ. ܕܚܳܙܶܐ ܗܘܺܝܬ ܟܽܘܪ̈ܣܰܘܳܬܳܐ ܕܶܐܬܬܣܺܝܡܘ: ܘܥܰܬܺܝܩ ܝܰܘ̈ܡܬܳܐ ܝܺܬܶܒ. … ܘܬܽܘܒ ܕܰܝܳܢܳܐ ܝܬܶܒ. ܘܣܶܦܪ̈ܶܐ ܐܶܬܦܬܰܚܘ (ܕܢܝܐܝܠ ܙ: ܛ-ܝ). ܘܗܳܕܶܐ ܠܐ ܗܳܘܝܳܐ ܩܕܳܡ ܚܰܪܬܳܐ. ܬܽܘܒ ܚܰܟܺܝܡܳܐ ܩܘܗܠܰܬ ܐܶܡܰܪ: ܕܟܽܠ ܥܒܳܕܳܐ ܡܳܪܝܳܐ ܡܰܥܶܠ ܒܕܺܝܢܳܐ. ܥܰܠ ܟܽܠ ܕܰܟܣܶܐ ܘܥܰܠ ܟܽܠ ܕܰܓܠܐܷ (ܩܘܗܠܬ ܝܒ: ܝܗ). ܘܠܳܐ ܐܶܡܰܪ ܕܰܐܥܶܠ ܐܶܠܐ ܕܡܰܥܶܠ. ܐܶܠܽܘ ܓܶܝܪ ܥܰܠܘ ܗܘܰܘ ܡܶܢ ܟܰܕܽܘ. ܠܳܐ ܐܳܡܰܪ ܗܘܳܐ ܕܡܰܥܶܠ: ܐܶܠܐ ܕܰܐܥܶܠ. ܘܗܳܪܟܳܐ ܬܽܘܒ ܕܰܘܺܝܕ ܐܶܡܰܪ: ܕܡܰܬܩܰܢ ܟܽܘܪܣܝܶܗ ܠܕܺܝܢܳܐ. ܕܰܢܕܽܘܢ ܠܬܺܒܝܠ ܒܩܽܘܫܬܳܐ. ܡܳܕܶܝܢ ܠܐ ܥܕܰܟܺܝܠ ܗ̣ܘܳܐ ܕܺܝܢܳܐ. ܘܓܰܠܝܳܐ ܗ̄ܝ ܕܠܰܘ ܡܶܛܠ ܡܶܙܕܰܟܝܳܢܽܘܬܳܐ ܕܗܰܕܪܰܥܙܰܪ ܐܶܡܰܪ: ܢܨܺܝܒܺܝܢ ܐܶܡܰܪ: ܩܘܪ̈ܝܳܐ ܥܩܰܪܬ ܘܰܐܘܒܶܕܬ ܕܽܘܟܪܳܢܗܶܝܢ. ܗܳܐ ܓܶܝܪ ܩܰܝܳܡܳܐ ܗ̄ܝ ܡܕܺܝܢܬܳܐ ܗܳܕܶܐ ܘܠܳܐ ܥܩܺܝܪܳܐ. ܘܗܳܝܕܶܝܢ ܓܶܝܪ ܡܳܐ ܕܡܶܬܥܰܩܪ̈ܳܢ ܩܘܪ̈ܝܳܗ̇ ܕܡܰܘܬܳܐ. ܘܡܶܬܬܕܺܝܢܺܝܢ ܥܰܡ̈ܡܶܐ ܒܰܬܪܺܝܨܽܘܬܳܐ.
ܟܬܺܝܒ ܕܢܶܗܘܶܐ ܡܳܪܝܳܐ ܒܶܝܬ ܓܰܘܣܳܐ ܠܡܶܣ̈ܟܺܢܶܐ. ܘܰܡܥܰܕܪܳܢܗܽܘܢ ܒܙܰܒܢܳܐ ܕܽܐܘܠܨܳܢܳܐ. ܡܳܐ ܕܳܐܡܰܪ ܠܗܽܘܢ ܒܙܰܒܢܳܐ ܗܰܘ ܕܽܐܘܠܨܳܢܳܐ ܕܒܶܗ ܡܶܬܚܙܶܐ ܬܰܫܢܺܝܩܳܐ ܥܰܠ ܪ̈ܰܫܺܝܥܶܐ. ܘܡܳܐ ܕܳܐܡܰܪ: ܠܙܰܕܺܝ̈ܩܶܐ ܕܬܰܘ ܒܪ̈ܺܝܟܰܘܗܝ ܕܳܐܒܝ ܝܺܪܰܬܘ ܡܰܠܟܽܘܬܳܐ ܕܰܡܛܰܝܒܳܐ ܗܘܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܘܰܡܣܰܬܰܪ ܠܗܽܘܢ ܠܓܰܘ ܡܶܢ ܟܶܢ̈ܦܶܐ ܕܰܡܪܰܚܡܳܢܘܬܶܗ. ܘܦܳܪܶܣ ܐܰܝܟ ܢܶܫܪܳܐ ܓܶܦܰܘ̈ܗܝ ܥܰܠ ܦܰܪ̈ܽܘܓܰܘܗܝ ܘܫܳܩܶܠ ܠܗܽܘܢ ܥܰܠ ܥܽܘܫܢܳܐ ܕܶܐܒܪ̈ܰܘܗܝ ܘܡܰܥܶܠ ܘܡܰܫܪܶܐ ܠܗܽܘܢ ܒܰܐܘܳܢ̈ܐ ܕܡܰܠܟܽܘܬܶܗ. ܐܰܪܰܐ ܠܘܳܬ ܡܰܢ ܡܶܬܓܰܠܝܳܐ ܗܳܝ ܕܢܶܗܘܶܐ ܡܳܪܝܳܐ ܒܝܬ ܓܰܘܣܳܐ ܠܡܶܣ̈ܟܺܢܶܐ. ܡܶܣ̈ܟܺܢܶܐ ܩܳܪܶܐ ܠܗܽܘܢ ܡܳܪܝܳܐ ܠܩܰܕܺܝ̈ܫܶܐ. ܥܰܠ ܕܰܢܒܰܕܶܩ ܕܠܰܝܬ ܥܰܬܺܝܪܳܐ ܐܶܠܐ ܚܰܕ ܐܰܠܳܗܳܐ. ܗܳܝ ܕܠܰܘ ܡܶܢ ܐܚܪܺܢܳܐ ܢܣܰܒ ܗܳܝ ܕܢܶܗܘܶܐ ܥܰܬܺܝܪܳܐ. ܘܒܳܬܰܪܟܶܢ ܡܰܠܶܦ ܛܽܘܒܳܢܳܐ ܕܰܘܺܝܕ ܥܰܠ ܣܰܒܪܳܐ ܕܙܰܕܺܝ̈ܩܶܐ ܟܰܕ ܐܳܡܰܪ:
ܘܰܢܣܰܒܪܽܘܢ ܒܳܟ ܟܽܠ ܝܳܕ̈ܥܰܝ ܫܡܳܟ. ܡܶܛܽܠ ܕܠܳܐ ܫܳܒܶܩ ܐܰܢܬ ܠܰܐܝܠܶܝܢ ܕܒܳܥܶܝܢ ܠܳܟ ܡܳܪܝܳܐ. ܣܰܒܪܳܐ ܥܰܠ ܚܰܝܷ̈ܐ ܕܰܬܢܳܢ ܡܰܘܕܰܥ: ܟܽܠ ܟܡܳܐ ܕܰܒܥܳܠܡܳܐ ܗܳܢܳܐ ܚܢܰܢ܆ ܒܣܰܒܪܳܐ ܫܪܶܝܢ ܩܰܕܺܝ̈ܫܶܐ. ܘܡܰܝܬܶܐ ܒܳܬܪܟܶܢ ܥܰܠ ܙܽܘܡܳܪܳܐ ܗܰܘ ܕܰܡܙܰܡܪܺܝܢ ܩܰܕܺܝ̈ܫܶܐ ܒܳܬܰܪ ܕܺܝܢܳܐ ܡܰܠܶܦ:
ܙܡܰܪܘ ܠܡܳܪܝܳܐ ܕܥܳܡܰܪ ܒܨܶܗܝܽܘܢ. ܒܰܐܝܕܳܐ ܨܶܗܝܽܘܢ ܣܳܒܪܺܝܢܰܢ ܕܶܐܡܰܪ: ܒܗܳܝ ܕܪܰܟܒܰܬ ܠܶܗ ܨܠܺܝܒܳܐ. ܠܳܐ ܐܝܬܶܝܗ̇ ܨܳܠܽܘܒܬܳܐ. ܒܶܝܬ ܡܰܥܡܪܳܐ ܕܗܰܘ ܕܶܐܨܛܠܶܒ ܡܶܢܳܗ̇. ܐܶܠܐ ܗܳܝ ܗ̱ܝ ܨܶܗܝܽܘܢ. ܗܳܝ ܡܕܺܝܢܬܳܐ ܪܰܒܬܳܐ ܕܒܰܢܝܳܐ ܠܥܶܠ ܡܶܢ ܫܡܰܝܳܐ܆ ܥܰܠ ܛܽܘܪ̈ܶܐ ܡܟܰܬܪ̈ܳܢܶܐ܆ ܘܥܳܡܪܺܝܢ ܒܳܗ̇ ܢܽܘܪ̈ܳܢܶܐ ܘܚܰܝܠܰܘ̈ܬܳܐ ܩܰܕܺܝ̈ܫܶܐ. ܒܗܳܕܶܐ ܓܶܝܪ ܡܙܰܡܪܺܝܢ ܩܰܕܺܝ̈ܫܶܐ ܟܰܕ ܡܚܰܘܶܝܢ ܨܶܢܥܴ̈ܬܶܗ ܕܰܐܠܳܗܳܐ ܒܶܝܬ ܝܰܗ̈ܠܐܷ ܫܡܰܝܳܢܷ̈ܐ.
ܡܶܛܠ ܕܶܐܬܕܟܰܪ ܠܡܶܬܒܰܥ ܕܶܡܗܽܘܢ. ܘܠܳܐ ܛܳܥܶܐ ܓܥܳܬܶܗ ܕܡܶܣܟܺܢܳܐ. ܡܶܣܟܺܢܳܐ ܠܳܐܕܳܡ ܡܟܰܢܶܐ ܘܰܠܟܽܠܶܗ ܟܝܳܢܳܐ ܐܢܳܫܳܝܳܐ. ܕܫܳܐܶܠ ܪ̈ܰܚܡܶܐ ܘܳܐܡܰܪ:
ܪܰܚܡܥܠܝ ܡܳܪܝܐ: ܡܶܛܠ ܕܰܟܪܝܗ ܐ̱ܢܐ. ܘܰܚܙܺܝ ܫܽܘܥܒܳܕܝ ܕܡܶܢ ܣܳܢܱ̈ܐܝ. ܡܰܢ ܐܶܢܽܘܢ ܣܴ̈ܢܰܐܘܗܝ ܕܓܶܢܣܰܢ. ܠܰܘ ܗܳܢܽܘܢ ܐܺܝܬܰܝܗܽܘܢ ܕܡܶܢ ܒܪܺܝܫܺܝܬ ܐܰܠܦܽܘܗܝ ܕܰܢܦܰܠ ܡܶܢ ܐܰܠܳܗܳܐ. ܘܰܗܘܰܘ ܠܶܗ ܒܥܶܠܕܒܳܒ̈ܐ ܘܫܰܥܒܕܽܘܗܝ ܠܡܰܘܬܳܐ ܘܠܰܚܒܳܠܐ. ܐܰܠܳܗܳܐ ܕܶܝܢ ܪܰܚܶܡ ܥܠܰܘܗܝ ܘܦܰܪܩܶܗ ܡܶܢ ܫܽܘܥܒܳܕܳܐ ܩܛܺܝܪܳܝܳܐ. ܘܰܐܦܩܶܗ ܡܶܢ ܥܽܘܡܪܳܗ̇ ܣܰܢܝܳܐ ܕܰܫܝܽܘܠ. ܘܡܶܢ ܬܰܪ̈ܥܰܘܗܝ ܕܡܰܘܬܳܐ. ܘܥܰܠܗܕܐ ܐܶܡ̣ܪ ܕܰܘܝܕ.
ܡܪܰܡܪܡܳܢܝ ܡܶܢ ܬܰܪ̈ܥܰܘܗܝ ܕܡܰܘܬܐ. ܐܰܝܢܳܐ ܟܰܝ ܦܽܘܫܳܩܳܐ ܠܦܶܬܓܳܡܳܐ ܗܳܢܳܐ ܡܶܫܟܚܺܝܢܰܢ: ܐܶܠܐ ܒܗܰܘ ܝܰܘܡܳܐ ܕܡܶܬܒܰܛܰܠ ܓܡܺܝܪܳܐܝܬ ܫܽܘܠܛܳܢܶܗ ܕܡܰܘܬܳܐ. ܡܶܢ ܨܰܘܪܳܐ ܕܟܽܠܗܽܘܢ ܝܰܠܕܰܘ̈ܗܝ ܕܳܐܕܳܡ. ܡܶܛܠܗܳܢܳܐ ܡܰܟܪܶܙ ܡܙܰܡܪܳܢܳܐ ܘܳܐܡܰܪ:
ܡܶܛܠ ܕܶܐܫܬܰܥܶܐ ܟܽܠܗܶܝܢ ܬܶܕܡܪ̈ܳܬܳܟ. ܒܬܰܪ̈ܥܶܐ ܕܒܰܪܬ ܨܶܗܝܽܘܢ. ܗܳܠܶܝܢ ܐܶܢܽܘܢ ܬܰܪ̈ܥܶܐ ܠܳܐ ܡܶܬܥܰܛܝܳܢܷ̈ܐ ܕܶܐܡܰܪ ܚܰܙܩܺܝܐܝܠ ܒܫܽܘܠܳܡܳܐ ܕܰܟܬܳܒܶܗ. ܘܗܳܝ ܕܳܐܦ ܛܘܒܳܢܳܐ ܝܽܘܚܰܢܳܢ ܐܶܘܰܢܓܶܠܝܣܛܳܐ ܒܰܕܶܩ ܒܓܶܠܝܳܢܳܐ ܗܰܘ ܕܰܗܘܳܐ ܥܠܰܘܗܝ ܒܦܰܛܡܳܘܣ ܓܳܙܰܪܬܳܐ. ܐܳܦ ܗܳܢܳܐ ܓܶܝܪ ܩܰܕܺܝܫܳܐ. ܡܶܛܠ ܕܗܳܠܶܝܢ ܬܪܶܥܣܰܪ ܬܰܪ̈ܥܶܐ ܕܨܶܗܝܽܘܢ ܥܶܠܳܝܬܳܐ ܐܰܘܕܰܥ. ܘܦܰܘܠܘܣ ܐܰܠܳܗܳܝܳܐ ܠܘܳܬ ܗܳܕܶܐ ܨܶܗܝܽܘܢ ܡܰܝܬܶܐ ܒܶܐܓܰܪܬܶܗ ܕܰܠܘܳܬ ܥܶܒܪ̈ܳܝܶܐ ܟܰܕ ܐܶܡܰܪ: ܕܰܐܢܬܽܘܢ ܠܰܡ ܐܶܬܩܰܪܰܒܬܽܘܢ ܠܛܽܘܪܳܐ ܕܨܶܗܝܽܘܢ: ܠܰܡܕܺܝܢܬܳܐ ܕܰܐܠܳܗܳܐ ܚܰܝܳܐ. ܠܐܘܪܺܫܠܶܡ ܕܒܰܫܡܰܝܳܐ: ܕܰܠܟܶܢ̈ܫܶܐ ܘܰܠܪ̈ܶܒܘܳܬܳܐ ܕܡܰܠܰܐܟܷ̈ܐ (ܥܒܪ̈ܝܐ ܝܒ: ܟܒ). ܒܗܳܕܶܐ ܡܕܺܝܢܬܳܐ ܘܰܒܬܰܪ̈ܥܶܝܗ̇ ܪ̈ܳܡܶܐ ܡܶܫܬܰܥܶܝܢ ܡܰܢ ܬܶܕܡܪ̈ܳܬܶܗ ܕܰܐܠܳܗܳܐ. ܟܽܠܗܽܘܢ ܐܰܝܠܶܝܢ ܕܰܡܪܰܡܪܶܡ ܠܗܽܘܢ ܐܰܠܳܗܳܐ ܒܰܩܝܳܡܬܳܐ ܕܡܶܢ ܬܰܪ̈ܥܰܘܗܝ ܕܡܰܘܬܳܐ. ܘܩܳܥܶܝܢ ܟܰܕ ܐܳܡܪܺܝܢ ܥܰܡ ܕܰܘܺܝܕ.
ܕܰܢܕܽܘܨ ܒܦܽܘܪܩܳܢܳܟ. ܡܶܛܠ ܕܰܛܒܰܥܘ ܡܳܪ̈ܘܕܶܐ ܒܓܽܘܡܳܨܳܐ ܕܰܥܒܰܕܘ. ܘܰܒܦܰܚܳܐ ܕܰܛܡܰܪܘ ܐܶܬܬܰܚܕܰܬ ܪܶܓܠܗܘܢ. ܒܗܰܘ ܡܳܐ ܕܶܐܬܚܰܫܰܒܘ ܫܺܐܕ̈ܐ ܡܳܪ̈ܽܘܕܶܐ ܠܰܟܝܳܢܳܐ ܐܢܳܫܳܝܳܐ܆ ܒܶܗ ܐܶܬܬܚܶܕܘ ܘܶܐܬܚܰܝܰܒܘ. ܘܡܶܛܠ ܕܠܰܘ ܐܳܕܳܡ ܐܶܫܟܚܳܗ̇ ܠܡܰܦܽܘܠܬܳܐ. ܐܶܠܳܐ ܐܳܟܶܠܩܰܪܨܳܐ ܐܰܪܡܝ ܥܠܰܘܗܝ ܘܰܐܣܛܝܶܗ ܡܶܢ ܠܳܐ ܡܳܝܽܘܬܽܘܬܳܐ ܕܝܰܗܒܠܶܗ ܐܰܠܳܗܳܐ ܒܛܰܝܒܽܘܬܳܐ. ܟܺܐܢܳܐܝܬ ܐܶܬܪܰܥܺܝ ܥܠܰܘܗܝ ܐܰܠܳܗܳܐ ܦܽܘܪܩܳܢܳܐ. ܘܰܐܗܦܶܟ ܡܣܳܡ ܒܪܺܝܫܳܐ ܥܰܠ ܫܺܐܕܳܐ. ܕܰܒܟܺܐܢܽܘܬܳܐ ܐܶܬܚܰܝܰܒ. ܘܒܰܬܪܺܝܨܽܘܬܳܐ ܐܶܬܦܪܶܩ ܐܳܕܳܡ. ܐܶܡܰܪ ܓܶܝܪ ܢܒܺܝܳܐ.
ܕܡܰܘܕܰܥ ܡܳܪܝܳܐ ܕܺܝܢܳܐ ܕܥܳܒܶܕ. ܘܒܰܥܒܳܕ ܐܝ̈ܕܰܘܗܝ ܡܶܬܬܚܶܕ ܪܰܫܺܝܥܳܐ. ܓܰܠܝܳܐܗܝ ܡܳܕܶܝܢ ܕܡܶܬܝܕܰܥ ܕܺܝܢܳܐ ܥܰܠ ܪ̈ܰܫܺܝܥܶܐ. ܡܶܛܠܗܳܕܶܐ ܐܶܠܽܘ ܬܳܒܘ ܠܘܳܬ ܐܰܠܳܗܳܐ. ܘܥܰܠܗܳܕܶܐ ܡܰܝܬܶܐ ܘܳܐܡܰܪ:
ܢܶܗܦܟܽܘܢ ܪ̈ܰܫܺܝܥܶܐ ܠܰܫܝܽܘܠ: ܘܟܽܠܗܽܘܢ ܥܰܡ̈ܡܶܐ ܕܛܳܥܶܝܢ ܠܐܠܳܗܳܐ. ܡܳܐ ܓܶܝܪ ܕܫܳܡܥܺܝܢ ܗܳܝ ܒܰܪܬ ܩܳܠܐ ܟܡܺܝܪܬܳܐ܇ ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ. ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ (ܡܬܝ ܟܗ: ܡܐ). ܠܰܘ ܓܶܝܪ ܢܦܰܩ ܠܓܶܠܝܳܐ ܐܪܳܙܳܐ ܗܳܢܳܐ. ܪ̈ܰܫܺܝܥܶܐ ܓܶܝܪ ܕܦܳܢܶܝܢ ܠܰܫܝܽܘܠ ܗܳܠܶܝܢ ܐܶܢܽܘܢ ܕܡܶܢ ܕܰܛܥܶܡܘ ܛܰܥܡܳܐ ܕܚܰܝܷ̈ܐ ܒܰܩܝܳܡܬܳܐ. ܘܥܰܠ ܕܶܐܫܟܰܚ ܐܶܢܽܘܢ ܪܳܥܝܳܐ ܕܺܐܝܬܰܝܗܽܘܢ ܓܕܰܝܴ̈ܐ ܘܠܰܘ ܐܶܡܪ̈ܶܐ. ܦܪܰܫ ܐܶܢܽܘܢ ܡܶܢ ܥܶܪ̈ܒܰܘܗܝ ܘܫܰܕܰܪ ܐܶܢܽܘܢ ܠܢܽܘܪܳܐ ܕܰܠܥܳܠܰܡ܆ ܠܰܫܝܽܘܠ ܗܳܝ ܕܒܺܝܫܳܐ ܡܶܢ ܗܳܝ ܕܰܣܠܶܩܘ ܡܶܢܳܗ̇ ܢܶܥܛܦܽܘܢ ܒܰܓܙܳܪ ܕܺܝܢܳܐ. ܥܰܡ̈ܡܶܐ ܕܶܝܢ ܕܛܳܥܶܝܢ ܠܰܐܠܳܗܳܐ ܗܳܠܶܝܢ ܐܶܢܽܘܢ܆ ܕܣܳܟ ܠܳܐ ܐܶܬܬܛܦܺܝܣܘ ܠܰܫܪܳܪܳܐ.
ܡܶܛܠ ܕܠܳܐ ܠܥܳܠܰܡ ܡܶܬܛܥܶܐ ܡܶܣܟܺܢܳܐ. ܥܰܡܳܐ ܕܶܝܢ ܕܙܰܕܺܝ̈ܩܶܐ ܡܶܣܟܺܢܳܐ ܡܫܰܡܰܗ ܠܶܗ ܡܶܛܠ ܡܰܟܺܝܟܽܘܬܶܗ. ܘܗܳܢܳܐ ܠܳܐ ܡܰܘܒܶܕ ܣܰܒܪܶܗ. ܐܶܠܳܐ ܡܶܫܟܰܚ ܠܶܗ ܠܗܰܘ ܡܶܕܶܡ ܕܰܡܣܰܒܰܪ ܗܘܳܐ. ܐܶܡܰܪ ܓܶܝܪ ܢܒܺܝܳܐ.
ܘܣܰܒܪܳܐ ܕܡܶܣ̈ܟܺܢܶܐ ܠܳܐ ܬܰܘܒܶܕ ܠܥܳܠܰܡ. ܠܳܐ ܓܶܝܪ ܕܢܰܘܒܕܽܘܢ ܗܰܘ ܡܶܕܶܡ ܕܰܐܘܙܶܦܘ ܡܶܛܽܠܳܬܳܟ. ܘܠܳܐ ܢܰܗܠܽܘܢ ܒܥܶܠܕܒܳܒܰܝ̈ܗܽܘܢ.
ܐܶܠܳܐ ܩܽܘܡ ܡܳܪܝܳܐ ܘܠܳܐ ܢܶܬܥܰܫܰܢ ܒܰܪܢܳܫܳܐ. ܘܢܶܬܬܕܺܝܢܽܘܢ ܥܰܡ̈ܡܶܐ ܩܕܳܡ ܐܰܦܰܝ̈ܟ. ܗܳܠܶܝܢ ܓܶܝܪ ܕܰܩܕܳܡ ܐܰܦܱ̈ܝܟ ܐܳܡܰܪ ܕܢܶܬܬܕܺܝܢܽܘܢ܆ ܒܟܺܐܢܽܘܬܳܐ ܘܒܰܬܪܺܝܨܽܘܬܳܐ ܡܶܬܬܕܺܝܢܺܝܢ. ܘܡܳܐ ܕܢܳܦܶܩ ܥܠܰܝܗܽܘܢ ܕܺܝܢܳܐ ܕܰܡܚܰܝܶܒ ܠܗܽܘܢ. ܘܰܡܙܰܟܶܐ ܠܙܰܕܺܝ̈ܩܶܐ. ܗܳܝܕܶܝܢ ܝܳܕܥܺܝܢ ܕܠܰܘ ܡܳܪ̈ܰܝܳܐ ܐܝܬܰܝܗܽܘܢ ܐܰܝܟ ܕܰܣܒܰܪܘ܆ ܐܶܠܐ ܡܫܰܥܒ̈ܕܶܐ ܘܥܰܒ̈ܕܶܐ ܕܒܳܪܽܘܝܗܽܘܢ. ܐܳܦ ܝܳܕܥܺܝܢ ܥܰܡ̈ܡܶܐ ܕܰܒܢܰܝ̈ܢܳܫܳܐ ܐܶܢܽܘܢ.
ܘܰܐܩܺܝܡ ܠܗܽܘܢ ܣܳܐܶܡ ܢܳܡܽܘܣܳܐ. ܕܢܶܕܥܽܘܢ ܥܰܡ̈ܡܶܐ ܕܰܒܢܰܝ̈ܢܳܫܳܐ ܐܶܢܽܘܢ܀ ܕܳܡܝܳܐ ܗܳܕܶܐ ܕܠܰܬܒܰܥܬܳܐ ܕܥܳܒܶܕ ܐܰܠܳܗܳܐ ܒܓܶܠܝܳܢܶܗ ܕܒܰܒܣܰܪ. ܠܟܽܠܶܗ ܥܳܠܡܳܐ ܡܫܰܘܕܥܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܐ
ܕܡܰܘܕܰܥ ܥܰܠ ܡܣܰܝܒܪܳܢܽܘܬܳܐ ܕܩܰܕܺܝ̈ܫܶܐ: ܘܥܰܠ ܫܽܘܥܠܳܝܳܐ ܕܡܳܪ̈ܽܘܕܐ: ܘܥܰܠ ܡܰܓܪܰܬ ܪܽܘܚܶܗ ܕܰܐܠܳܗܳܐ.
ܢܰܦܫܳܐ ܕܪܳܚܡܳܐ ܠܰܐܠܳܗܳܐ܆ ܠܳܐ ܡܶܬܩܰܛܥܳܐ ܠܳܗ̇ ܒܽܐܘܠܨ̈ܢܶܐ ܕܥܳܕܶܝܢ ܥܠܶܝܗ̇ ܡܶܢ ܫܽܘܥܠܳܝܳܐ ܕܡܰܪ̈ܳܚܶܐ. ܝܳܕܰܥ ܐܢܳܐ ܓܶܝܪ ܕܰܒܢܰܓܺܝܪܽܘܬ ܪܽܘܚܳܐ ܘܰܡܣܰܝܒܪܳܢܽܘܬܳܐ ܠܰܘ ܬܽܘܒ ܠܘܳܬ ܚܽܘܣܪܳܢܳܐ ܕܪܽܘܚ ܡܶܫܬܰܘܫܛܳܐ. ܐܶܠܳܐ ܠܰܟܠܝܠܳܐ ܕܠܳܐ ܡܶܬܚܰܒܰܠ ܢܳܣܒܳܐ. ܐܰܟܙܢܳܐ ܓܶܝܪ ܕܕܰܗܒܳܐ ܕܰܠܟܽܘܪܳܐ ܠܳܐ ܥܰܠ ܠܳܐ ܐܳܬܶܐ ܠܰܡܩܰܒܳܠܽܘ ܨܽܘܪ̈ܳܬܳܐ ܦܰܐܝ̈ܬܳܐ ܕܒܶܝܬ ܡܰܠܟܽܘܬܳܐ܆ ܕܗܰܘ ܝܽܘܩܢܳܐ ܫܰܪܺܝܪܳܐ ܘܬܰܦܢܟܳܐ ܕܰܠܩܽܘܫܬܺܝܢ. ܘܕܰܘܺܝܕ ܐܰܠܳܗܳܝܳܐ ܢܦܺܝܣ ܠܰܢ ܕܰܐܝܠܶܝܢ ܐܽܘܠܨܳܢ̈ܐ ܣܰܝܒܰܪ ܘܰܟܡܳܐ ܙܰܒܢܺܝ̈ܢ ܥܶܠܰܬ ܢܰܦܫܶܗ ܒܢܶܣܝܽܘ̈ܢܶܐ. ܘܰܒܟܽܠܗܽܘܢ ܕܰܗܒܳܐ ܓܰܒܝܳܐ ܘܰܒܚܺܝܪܳܐ ܐܶܬܚܙܺܝ. ܠܰܘ ܒܰܠܚܽܘܕ ܕܡܶܢ ܫܳܐܘܳܠ ܗܰܘ ܥܰܘܳܠܳܐ ܡܶܬܪܕܶܦ ܗܘܳܐ ܘܰܡܣܰܝܒܰܪ. ܐܶܠܳܐ ܘܡܶܢ ܒܪܶܗ ܐܰܒܝܫܳܠܽܘܡ ܐܶܬܢܰܣܺܝ. ܘܥܰܡ ܗܳܠܶܝܢ ܘܳܐܦ ܡܶܢ ܡܰܠܟܷ̈ܐ ܐܰܝܠܶܝܢ ܕܒܰܚܕܳܪ̈ܰܘܗܝ ܐܽܘܠܨܳܢܷ̈ܐ ܪܰܘܪ̈ܒܶܐ ܩܳܝܡܺܝܢ ܗܘܰܘ ܥܠܰܘܗܝ. ܘܰܒܟܽܠܗܽܘܢ ܐܰܓܽܘ̈ܢܶܐ ܠܳܐ ܡܶܬܪܰܦܝܳܢܳܐ ܡܶܬܚܙܶܐ ܗܘܳܐ. ܘܗܳܐ ܝܰܘܡܳܢܳܐ ܡܰܫܡܰܥ ܠܰܢ ܩܳܠܶܗ ܒܬܶܫܒܽܘܚܬܳܐ ܗܳܕܶܐ ܕܰܥܣܰܪ. ܕܰܐܝܟܰܢܳܐ ܡܣܰܝܒܰܪ ܗܘܳܐ ܐܘܠܨܳܢܷ̈ܐ ܕܩܳܡܘ ܥܠܰܘܗܝ. ܡܶܢ ܡܰܠܟܷ̈ܐ ܕܶܐܬܟܰܢܰܫܘ ܕܢܶܕܚܽܘܢܳܝܗܝ ܡܶܢ ܡܰܠܟܽܘܬܳܐ. ܐܳܡܪܺܝܢ ܓܝܪ ܕܟܰܕ ܗܘܳܐ ܥܠܰܘܗܝ ܩܪܳܒܳܐ ܘܽܐܘܠܨܳܢܳܐ ܡܶܢ ܡܰܠܟܷ̈ܐ܆ ܐܶܬܢܰܒܺܝ ܗܳܠܶܝܢ ܘܶܐܡܰܪ:
ܠܡܳܢܳܐ ܡܳܪܝܳܐ ܩܳܡܬ ܒܪܽܘܚܩܳܐ. ܘܰܐܗܡܺܝܬ ܚܝܳܪܳܟ ܒܙܰܒ̈ܢܶܐ ܕܽܐܘܠܨܳܢܳܐ. ܒܪܰܡ ܕܶܝܢ ܕܰܘܺܝܕ ܡܶܛܠ ܕܪܽܘܚܳܢܳܐ ܗܘܳܐ܆ ܬܪܶܝܢ ܩܪ̈ܳܒܶܐ ܒܚܰܕ ܚܙܳܐ ܗܘܳܐ. ܠܳܐ ܓܶܝܪ ܛܥܶܐ ܗܘܳܐ ܠܶܗ ܟܰܣܝܳܐ ܗܰܘ ܕܰܡܙܺܝܥ ܗܘܳܐ ܥܠܰܘܗܝ ܫܓܽܘܫܝܳܐ. ܡܶܛܠܗܳܢܳܐ ܐܳܡܰܪ.
ܒܫܽܘܒܗܳܪܶܗ ܕܪܰܫܺܝܥܳܐ ܝܳܩܶܕ ܡܶܣܟܺܢܳܐ. ܟܡܳܐ ܠܰܡ ܕܗܰܘ ܣܳܢܶܐ ܒܢܰܝ̈ܢܳܫܳܐ ܓܳܙܶܡ ܒܰܐܚܪ̈ܳܢܶܐ. ܗܳܢܽܘܢ ܕܰܥܒܰܕ ܐܶܢܽܘܢ ܡܳܐܢܰܘ̈ܗܝ ܘܰܡܫܰܡ̈ܫܳܢܶܐ ܕܨܶܒܝܳܢܶܗ. ܐܶܠܳܐ ܠܰܢ ܠܕܳܚ̈ܠܰܝܟ ܡܰܫܪܺܝܬܳܐ ܕܡܰܠܰܐܟܷ̈ܐ ܩܰܕܺܝ̈ܫܶܐ ܕܺܝܠܳܟ ܚܕܺܝܪܳܐ ܘܰܡܦܰܨܝܳܐ ܠܰܢ. ܘܡܶܛܠܗܳܢܳܐ ܐܳܡܰܪ ܐܢܳܐ ܬܟܺܝܠܳܐܝܬ܆ ܟܰܕ ܡܶܬܬܟܶܠ ܐܢܳܐ ܥܰܠ ܐܺܝܳܠܳܟ.
ܕܢܶܬܬܰܚܕܽܘܢ ܒܬܰܪܥܺܝܬܳܐ ܗܳܝ ܕܶܐܬܚܰܫܰܒܘ. ܘܶܐܬܟܰܢܰܫܘ ܥܠܰܝܢ ܐܰܝܟܰܢܳܐ ܕܢܶܚܪܒܘܢ ܠܰܢ ܘܢܶܦܠܓܽܘܢ ܘܢܶܦܠܽܘܢ ܒܚܰܪܒܳܐ ܓܰܢ̱ܒܳܪ̈ܰܝܗܽܘܢ ܒܫܽܘܒܗܳܪܳܐ ܪܰܒܳܐ ܣܠܶܩܘ ܥܰܠ ܐܰܪܥܳܟ ܘܥܰܠ ܥܰܡܳܟ. ܕܠܰܘ ܡܶܢܳܟ ܡܶܬܬܙܺܝܥܺܝܢ ܠܰܟܢܘܫܝܳܐ. ܘܰܒܪܶܓܬܳܐ ܕܡܶܢܗܽܘܢ ܡܶܬܢܰܦܚܺܝܢ.
ܘܡܶܛܽܠ ܕܡܶܫܬܰܒܗܰܪ ܪܰܫܺܝܥܳܐ ܒܰܪ̈ܓܺܝܓܳܬܳܐ ܕܢܰܦܫܶܗ. ܥܰܘܳܠܳܐ ܡܶܬܒܰܪܰܟ ܘܪܳܓܶܙ ܡܳܪܝܳܐ. ܠܰܘ ܕܶܝܢ ܒܒܽܘܪܟܬܳܐ ܪܳܓܶܙ ܗܰܘ ܟܝܳܢܳܐ ܫܰܦܝܳܐ ܘܠܳܐ ܡܶܬܕܰܠܰܚ. ܒܽܘܪܟܬܶܗ ܕܪܰܫܺܝܥܳܐ ܠܒܽܘܣܳܡܰܘ̈ܗܝ ܩܳܪܶܐ. ܐܶܢ ܓܶܝܪ ܒܽܘܪܟܬܳܐ ܕܪܽܘܚ ܒܶܠܥܳܕ ܡܶܢ ܐܰܠܳܗܳܐ ܡܶܫܬܰܡܠܝܳܐ. ܒܳܗ̇ ܓܶܝܪ ܐܳܦ ܡܒܰܪܟܺܝܢ ܙܰܕܝ̈ܩܶܐ. ܟܰܕ ܩܳܥܶܝܢ ܘܩܳܪܶܝܢ ܠܶܗ ܡܶܨܥܳܝܳܐ. ܡܳܕܶܝܢ ܒܽܘܪܟܬܶܗ ܕܪܰܫܺܝܥܳܐ ܠܰܢܝܳܚܳܐ. ܠܡܰܨܠܚܳܢܽܘܬܳܐ ܕܰܒܗܳܢܳܐ ܥܳܠܡܳܐ ܩܳܪܶܐ ܢܒܺܝܳܐ. ܗܳܠܶܝܢ ܟܰܕ ܐܶܫܟܰܚ ܐܶܢܶܝܢ ܥܰܘܳܠܳܐ. ܚܠܳܦ ܩܽܘܒܳܠܛܰܝܒܘܬܳܐ ܕܡܶܬܬܚܺܝܒ ܗܘܳܐ ܕܰܢܩܰܪܶܒ ܠܐܠܳܗܳܐ܆ ܪ̈ܛܽܘܢܝܶܐ ܘܨܽܘܚ̈ܝܳܬܳܐ ܘܫܽܘ̈ܥܠܳܝܶܐ ܡܰܘܫܶܛ. ܘܰܒܡܰܙܡܽܘܪܳܐ ܐܚܪܺܢܳܐ ܐܶܡܰܪ ܢܒܺܝܳܐ: ܥܰܠ ܕܰܐܝܟ ܗܳܢܳܐ. ܡܶܛܠ ܕܢܰܦܫܶܗ ܗ̣ܽܘ ܡܒܰܪܶܟ ܒܚܰܝܰܘ̈ܗܝ. ܗܳܢܰܘ ܡܒܰܣܶܡ ܢܰܦܫܶܗ ܒܗܰܢܺܝ̈ܘܳܬܳܐ ܕܰܓ̈ܠܳܬܳܐ ܕܰܪ̈ܓܺܝܓܳܬܳܐ. ܘܥܰܠܗܳܕܶܐ ܐܶܡܰܪ ܢܒܺܝܳܐ.
ܘܪܰܫܺܝܥܳܐ ܒܪܳܡܽܘܬܶܗ ܠܐ ܡܥܰܩܶܒ. ܥܰܠ ܟܽܠ ܓܶܝܪ ܚܛܳܗܷ̈ܐ ܕܦܳܓܥܺܝܢ ܒܶܗ ܕܠܳܐ ܕܶܚܠܬܳܐ ܦܳܣܰܥ ܘܡܰܡܣܰܪ ܥܰܠ ܒܺܝ̈ܫܳܬܳܐ ܘܠܐ ܕܳܚܶܠ܆ ܘܠܐ ܟܳܘܙܳܐ ܠܶܗ ܬܺܐܪܬܶܗ ܒܬܶܫܡܶܫܬܳܐ ܕܰܚܛܺܝܬܳܐ. ܘܠܰܝܬ ܕܺܝܢܳܐ ܕܟܺܐܢܽܘܬܳܐ ܩܕܳܡ ܥܰܝܢܰܘ̈ܗܝ.
ܘܠܰܝܬ ܐܰܠܳܗܳܐ ܒܟܠܗܶܝܢ ܬܰܪ̈ܥܝܳܬܶܗ: ܫܰܪ̈ܝܳܢ ܐܽܘܪ̈ܚܳܬܶܗ ܒܟܽܠܙܒܰܢ. ܘܪܳܗܶܛ ܥܰܠ ܩܶܛܠܳܐ ܘܠܐ ܕܳܚܶܠ. ܘܰܬܪܺܝܥ ܦܽܘܡܶܗ ܠܨܽܘܚ̈ܝܳܬܳܐ ܘܠܳܐ ܡܶܬܢܰܟܰܦ. ܘܠܰܝܬ ܡܶܕܶܡ ܕܬܳܟܶܣ ܠܶܗ ܡܶܢ ܬܶܫܡܶܫܬܳܐ ܕܒܺܝ̈ܫܳܬܳܐ. ܡܶܢ ܕܺܝܢܳܐ ܕܚܰܪܬܳܐ ܠܳܐ ܡܶܬܪܗܶܒ܆ ܘܡܶܢ ܬܰܫܺܢܝܩܳܐ ܕܢܽܘܪܳܐ ܠܳܐ ܡܶܣܬܰܪܰܕ.
ܘܰܡܥܰܠܰܝ ܕܺܝܢܳܟ ܡܶܢ ܠܩܘܒܠܠܶܗ. ܐܶܠܽܘ ܓܶܝܪ ܚܳܐܰܪ ܗܘܳܐ ܒܕܺܝܢܳܟ܆ ܕܳܚܶܠ ܗܘܳܐ ܡܶܢ ܠܘ̈ܚܳܡܶܐ ܕܟܺܐܢܽܘܬܳܟ. ܠܐ ܓܶܝܪ ܡܰܡܪܰܚ ܗܘܳܐ ܥܰܠ ܒܺܝ̈ܫܳܬܳܐ. ܡܶܛܠܗܳܢܳܐ:
ܘܰܠܟܽܠܗܽܘܢ ܒܥܶܠܕ̈ܒܳܒܰܘܗܝ ܫܳܐܶܛ. ܘܳܐܡܰܪ ܒܠܶܒܶܗ ܕܠܳܐ ܐܶܙܽܘܥ ܠܕܳܪܕܳܪ̈ܺܝܢ: ܪܳܢܶܐ ܒܺܝܫܬܳܐ܆ ܘܠܰܘܛܬܳܐ ܡܠܶܐ ܦܽܘܡܶܗ. ܬܽܘܟܳܐ ܘܢܶܟܠܳܐ ܬܚܶܝܬ ܠܶܫܳܢܶܗ. ܥܰܘܠܳܐ ܘܥܶܬܳܐ: ܝܳܬܶܒ ܒܰܟܡܺܐܢܳܐ ܒܕܰܝܪܳܐ. ܘܰܒܛܘܫܝܳܐ ܩܳܛܶܠ ܠܙܰܕܺܝܩܳܐ: ܥܰܝܢܰܘ̈ܗܝ ܠܒܳܝܫܳܐ ܕܳܝ̈ܩܳܢ. ܘܟܳܡܶܢ ܠܡܶܚܛܰܦ ܠܡܶܣܟܺܢܳܐ ܒܢܶܓܕܳܐ ܕܰܡܨܺܝܕܬܶܗ. ܗܳܠܶܝܢ ܠܐ ܣܢܺܝܩܺܝܢ ܥܰܠ ܦܽܘܫܳܩܳܐ ܝܰܬܺܝܪܳܐ. ܩܰܕܡܶܬ ܓܶܝܪ ܐܶܡܪܶܬ܆ ܕܗܳܠܶܝܢ ܐܶܢܶܝܢ ܐܽܘܪ̈ܚܳܬܶܗ ܫܰܪܺܝܪ̈ܳܬܳܐ ܕܥܰܘܳܠܐ ܡܳܪܘܕܳܐ. ܒܪܰܡ ܘܰܚܢܰܢ ܢܶܕܚܰܠ ܠܰܘ ܡܶܢ ܗܳܢܳܐ ܒܰܠܚܽܘܕ܆ ܐܶܠܳܐ ܘܡܶܢ ܗܰܘ ܕܰܒܛܽܘܫܝܳܐ ܘܒܰܟܡܺܐܢܳܐ ܝܳܬܶܒ ܒܕܰܝܪܳܐ. ܡܥܳܕ ܗ̱ܽܘ ܓܶܝܪ ܒܥܶܠܕܒܳܒܳܐ ܕܚܰܝܱ̈ܝܢ. ܥܳܐܶܠ ܟܳܡܶܢ ܒܓܰܘ ܕܰܝܪܳܐ ܕܪܶܥܝܳܢܳܐ. ܘܡܶܬܛܰܫܶܐ ܒܰܪ̈ܓܺܝܓܬܳܐ ܕܒܶܣܪܳܐ. ܘܣܳܥܶܐ ܥܰܠ ܚܽܘܫܳܒܳܐ ܛܳܒܳܐ ܕܒܰܢ. ܘܩܳܛܶܠ ܠܶܗ ܠܗܰܘܢܳܐ ܒܰܟܡܺܐܢܶܗ. ܘܚܳܛܶܦ ܠܶܗ ܠܡܶܣܟܺܢܳܐ ܒܰܓܪܘܦܝܳܐ ܫܓܺܝܫܳܐ ܕܢܶܓܕܳܐ ܕܰܡܨܺܝܕܬܶܗ.
ܘܡܶܬܡܰܟܰܟ ܘܢܳܦܶܠ ܡܶܢ ܪܰܘܡܶܗ. ܘܰܒܓܰܪ̈ܡܰܘܗܝ ܟܽܘܪ̈ܗܳܢܶܐ ܘܟܺܐܒܷ̈ܐ. ܟܰܕ ܗܳܟܰܢܳܐ ܠܰܡ ܡܫܰܪܰܪ ܒܒܺܝ̈ܫܳܬܳܐ. ܘܰܡܠܶܐ ܡܶܢ ܣܽܘܓܳܐܐ ܕܰܪ̈ܓܺܝܓܳܬܳܐ. ܟܽܘܪ̈ܗܳܢܶܐ ܐܳܦ ܟܺܐܒܷ̈ܐ ܡܠܶܝܢ ܓܰܪ̈ܡܰܘܗܝ. ܘܥܰܠܗܳܕܶܐ ܐܳܡܰܪ. ܟܰܕ ܡܶܬܒܰܣܰܡ ܒܰܪ̈ܓܺܝܓܳܬܶܗ܆ ܘܠܳܐ ܡܶܬܟܣܶܣ. ܘܡܰܨܠܰܚ ܒܒܺܝ̈ܫܳܬܶܗ܆ ܘܠܳܐ ܡܶܬܪܕܶܐ. ܕܠܰܝܬ ܗ̇ܘ ܕܚܳܙܶܐ ܘܠܰܝܬ ܕܰܝܳܢܳܐ ܥܰܠ ܗܳܠܶܝܢ ܣܽܘܥܪ̈ܳܢܶܐ. ܘܠܰܝܬ ܗܳܕܶܐ ܒܥܽܘܗܕܳܢܳܐ ܘܰܒܪܶܢܝܳܐ ܕܰܐܠܳܗܳܐ ܕܢܰܝܬܶܐ ܬܒܰܥܬܳܐ ܥܠܰܝܢ. ܡܶܛܽܠ ܕܨܶܒܝܳܢܰܘ̈ܗܝ ܕܒܶܣܪܳܐ ܥܳܒܕܺܝܢܰܢ. ܗܳܠܶܝܢ ܟܰܕ ܚܙܳܐ ܢܒܺܝܳܐ܆ ܐܶܡܰܪ ܥܰܠ ܕܰܐܝܟ ܗܳܢܳܐ.
ܘܳܐܡܰܪ ܒܠܶܒܶܗ ܕܰܛܥܳܐ ܐܰܠܳܗܳܐ. ܘܰܐܦܢܺܝ ܐܰܦܰܘ̈ܗܝ ܘܠܐ ܚܳܙܶܐ ܠܥܳܠܰܡ. ܡܳܢܳܐ ܕܶܝܢ ܠܽܘܩܒܰܠ ܗܳܠܶܝܢ ܐܳܡܰܪ. ܠܐ ܐܶܬܚܰܡܰܬ ܘܠܐ ܪܰܛܶܢ ܐܰܝܟ ܚܰܣܺܝܪܳܐ ܐܶܠܐ ܒܰܠܚܽܘܕ ܐܰܦܺܝܣ ܠܐܠܳܗܳܐ ܠܺܐܺܝܠܶܗ ܘܳܐܡܰܪ ܗܘܳܐ:
ܩܽܘܡ ܡܳܪܝܳܐ ܐܰܠܳܗܝ ܘܰܐܪܺܝܡ ܐܺܝܕܳܟ. ܘܠܐ ܬܶܛܥܶܐ ܠܒܳܝܫܳܐ. ܒܰܠܚܽܘܕ ܐܰܢܬ ܗܰܒ ܙܳܟܽܘܬܳܐ. ܘܗܰܘ ܕܥܳܩܰܪ ܡܶܢ ܒܺܝ̈ܫܳܬܳܐ ܘܠܐ ܣܳܥܰܪ ܐܶܢܶܝܢ. ܠܐ ܢܶܬܛܥܶܐ ܡܶܢܳܟ ܥܒܳܕܶܗ ܫܰܦܺܝܪܳܐ. ܥܰܬܺܝܪ̈ܶܐ ܐܶܬܒܰܣܰܡܘ ܘܰܥܒܰܪܘ. ܘܡܶܣ̈ܟܺܢܶܐ ܐܶܬܶܐܠܶܨܘ ܘܰܦܛܰܪܘ. ܡܶܟܺܝܠ ܕܺܝܠܳܟ ܕܠܳܐ ܬܶܛܥܶܐ ܐܶܢܽܘܢ ܠܥܳܠܰܡ. ܗܳܠܶܝܢ ܓܶܝܪ ܕܰܚܙܰܘ ܗܳܪܟܳܐ ܡܰܓܪܰܬ ܪܘܚܳܟ ܠܐ ܡܣܰܒܪܺܝܢ ܕܺܐܝܬ ܕܺܝܢܳܐ ܘܦܽܘܪܥܳܢܳܐ ܠܰܥܒܳܕܰܝ̈ܗܽܘܢ. ܘܥܰܠܗܳܕܶܐ ܚܳܛܶܝܢ ܕܠܐ ܩܶܢܛܳܐ ܘܡܰܪܫܥܺܝܢ ܕܠܐ ܕܶܚܠܬܳܐ. ܠܡܳܢܳܐ ܕܶܝܢ ܗܳܟܰܢܳܐ ܠܺܝ ܠܰܝܬ ܠܡܺܐܡܰܪ. ܟܽܠܗܽܘܢ ܓܶܝܪ ܕܺܝ̈ܢܰܝܟ ܡܗܰܝܡܢܺܝܢ. ܘܥܰܒܕܰܝ̈ܟ ܡܣܰܒܪܺܝܢ ܘܠܳܐ ܡܪܰܛܢܝܢ.
ܠܡܳܢܳܐ ܐܰܪܓܶܙ ܚܰܛܳܝܳܐ ܠܰܐܠܳܗܳܐ. ܘܳܐܡܰܪ ܒܠܶܒܶܗ ܕܠܳܐ ܬܳܒܰܥ: ܘܚܳܙܶܐ ܐܰܢܬ ܕܺܐܝܬ ܥܰܘܠܳܐ ܘܪܽܘܫܥܳܐ. ܘܚܳܐܰܪ ܐܰܢܬ ܕܢܶܫܬܠܶܡ ܒܺܐܝ̈ܕܰܝܟ. ܐܰܝܟܰܢܳܐ ܡܰܗܡܶܐ ܐܰܢܬ ܡܶܢ ܒܺܝ̈ܫܶܐ. ܘܥܰܠ ܥܰܒ̈ܕܰܝܟ ܩܫܶܐ ܫܰܒܛܳܟ. ܠܡܳܢܳܐ ܚܳܙܶܐ ܐܰܢܬ ܘܰܫܠܶܐ ܢܶܓܕܳܟ. ܘܰܥܠܰܝܢ ܠܚܺܝܡܺܝܢ ܓܙܳܡܰܝ̈ܟ. ܗܰܘ ܡܰܥܘܶܠ ܘܡܰܪܓܶܙ܆ ܘܠܳܐ ܒܳܠܰܥ. ܘܠܰܢ ܚܳܐܰܪ ܐܰܢܬ ܕܢܶܫܬܠܶܡ ܠܡܰܪܕܽܘܬܳܐ. ܘܡܶܢ ܟܺܐܢܽܘܬܳܐ ܢܶܬܢܰܓܰܕ. ܐܺܝܢ ܠܰܡ ܟܰܕ ܓܶܝܪ ܠܗܰܘ ܡܰܓܰܪ ܐܢܳܐ ܪܘܚܳܐ. ܐܳܦ ܡܶܬܚܰܫܰܒ ܐܢܳܐ ܒܰܣܺܝܡܳܐ ܘܠܐ ܡܶܬܪܕܶܐ. ܠܰܘ ܥܰܠ ܕܨܳܒܶܐ ܐܢܳܐ ܐܶܢܳܐ ܒܰܚܛܳܗܰܘ̈ܗܝ. ܐܶܠܳܐ ܕܶܝܢ ܒܳܠܰܥ ܬܽܘܒ ܡܰܥܘܶܠ. ܘܰܠܟܺܐܢܷ̈ܐ ܐܶܢ ܪܳܕܶܐ ܐܢܳܐ ܡܶܛܽܠ ܕܠܳܐ ܢܶܚܡܽܘܢ ܡܶܕܶܡ ܠܟܺܐܢܽܘܬܳܐ. ܘܠܳܐ ܕܶܝܢ ܡܪܰܛܢܺܝܢ ܡܳܐ ܕܒܳܠܥܺܝܢ. ܘܢܶܫܬܒܶܩ ܥܰܘܳܠܳܐ ܕܗܳܪܟܳܐ ܢܩܰܒܶܠ ܛܳܒ̈ܬܶܗ ܒܚܰܝܰܘ̈ܗܝ. ܠܐ ܓܶܝܪ ܙܳܕܶܩ ܕܰܬܢܳܢ ܢܶܬܪܕܶܐ ܘܰܒܕܺܝܢܳܐ ܢܶܬܢܰܓܰܕ. ܘܢܶܬܪܕܽܘܢ ܙܰܕܺܝ̈ܩܶܐ ܒܥܳܠܡܳܐ ܗܳܢܳܐ. ܕܢܶܬܒܰܣܡܽܘܢ ܒܥܳܠܡܳܐ ܕܠܐ ܦܳܛܰܪ. ܠܐ ܓܶܝܪ ܫܰܦܺܝܪܳܐ ܕܥܰܘܴ̈ܠܶܐ ܢܶܬܒܰܣܡܽܘܢ ܗܳܪܟܳܐ܆ ܘܰܒܡܰܠܟܘܬܳܐ ܢܶܬܦܰܛܡܽܘܢ. ܥܰܠܗܳܕܶܐ ܟܰܕ ܡܳܐܶܫ ܢܒܺܝܳܐ ܨܶܒܝܳܢܶܗ ܕܰܐܠܳܗܳܐ. ܘܺܝܕܰܥ ܕܺܝܢܰܘ̈ܗܝ ܐܶܡܰܪ:
ܘܰܥܠܰܝܟ ܢܶܫܬܒܶܩ ܒܳܝܫܳܐ. ܐܳܦ ܝܰܬܡܳܐ ܐܰܢܬ ܗ̄ܘ ܥܳܕܽܘܪܶܗ. ܘܗܰܘ ܠܰܡ ܕܡܶܛܠܬܳܟ ܗܘܳܐ ܒܳܝܫܳܐ ܘܺܝܬܶܒ ܟܰܕ ܡܡܰܚܰܝ ܒܫܽܘܚ̈ܢܶܐ ܠܽܘܩܒܰܠ ܦܳܬܽܘܪܶܗ ܕܥܰܬܺܝܪܳܐ. ܘܡܶܢ ܦܰܪܬܽܘ̈ܬܶܐ ܕܰܢܦܰܠܘ ܡܶܢܶܗ ܠܐ ܣܰܒܥܶܗ. ܥܠܰܝܟ ܓܶܝܪ ܢܶܫܬܒܶܩ. ܕܡܶܢܳܟ ܢܶܬܒܰܝܰܐ ܘܢܶܬܬܰܪܣܶܐ. ܥܰܠܗܳܕܶܐ ܐܳܦ ܢܒܺܝܳܐ ܐܚܪܺܢܳܐ ܫܳܡܥܺܝܢܰܢ ܕܶܐܡܰܪ: ܟܰܕ ܡܫܰܪܰܪ ܠܐܝܠܶܝܢ ܕܰܐܡܺܝܪ̈ܳܢ ܥܰܠ ܒܳܝܫܳܐ ܘܝܰܬܡܳܐ. ܕܰܫܒܽܘܩ ܠܰܡ ܝܰܬܡܰܝ̈ܟ ܘܶܐܢܳܐ ܐܰܚܶܐ. ܘܰܐܪ̈ܡܠܳܬܳܟ ܥܠܰܝ ܢܶܬܬܰܟ̈ܠܳܢ (ܐܪܡܝܐ ܡܛ: ܝܐ). ܒܳܝܫܳܐ ܕܶܝܢ ܣܳܒܰܪ ܐܢܳܐ܆ ܕܫܰܡܰܗ ܢܒܺܝܳܐ ܐܶܠܐ ܕܗܽܘ ܐܝܬܰܘܗܝ ܪܺܝܫ ܓܶܢܣܰܢ܆ ܕܶܐܬܡܰܣܟܰܢ ܡܶܢ ܥܽܘܬܪܳܐ ܕܓܰܢܬܳܐ ܕܛܽܘ̈ܒܶܐ ܘܠܶܗ ܩܪܳܐ ܝܰܬܡܳܐ. ܒܗܳܝ ܕܶܐܬܓܰܙܺܝ ܗܘܳܐ ܡܶܢ ܗܰܘ ܐܰܒܳܐ ܕܚܰܝܷ̈ܐ. ܘܡܰܝܬܶܐ ܢܒܺܝܳܐ ܘܳܐܡܰܪ:
ܬܰܒܰܪ ܕܪܳܥܶܗ ܕܚܰܛܳܝܳܐ. ܠܡܳܢܳܐ ܠܐ ܐܶܡܰܪ ܕܬܰܒܰܪ ܠܚܰܛܳܝܳܐ ܐܶܠܐ ܠܰܕܪܳܥܶܗ. ܚܰܛܳܝܳܐ ܓܶܝܪ ܠܒܰܪܢܳܫܳܐ ܩܳܪܶܐ. ܘܠܐ ܨܳܒܶܐ ܐܰܠܳܗܳܐ ܕܰܠܒܰܪܢܳܫܳܐ ܢܬܰܒܪ. ܘܡܶܛܠ ܕܶܝܢ ܕܣܳܛܳܢܳܐ ܐܺܝܬܰܘܗܝ ܕܪܳܥܶܗ ܕܚܰܛܳܝܳܐ܆ ܘܗܽܘ ܚ̣ܰܝܠܶܗ ܘܰܐܠܦܶܗ ܕܢܶܚܛܶܐ. ܥܰܠܗܳܝ ܐܳܡܰܪ ܪܽܘܚܳܐ ܕܪܳܥܶܗ ܕܚܰܛܳܝܳܐ ܢܶܬܬܒܰܪ. ܘܡܳܐ ܕܰܗܘܳܬ ܗܳܕܶܐ ܘܶܐܬܬܒܰܪ ܕܪܳܥܗܽܘܢ ܕܚܰܛܳܝܷ̈ܐ. ܡܶܬܒܰܥܝܳܐ ܚܛܺܝܬܳܐ ܘܠܳܐ ܡܶܫܬܰܟܚܳܐ. ܐܰܝܟ ܕܶܐܡܰܪ ܢܒܺܝܳܐ.
ܘܰܕܒܳܝܫܳܐ ܠܰܡ ܬܶܬܒܥܶܐ ܚܛܺܝܬܶܗ ܘܠܳܐ ܬܶܫܬܟܰܚ. ܗܳܢܰܘ ܐܳܕܳܡ. ܡܳܐ ܓܶܝܪ ܕܠܰܝܬ ܐܰܬܪܳܐ ܠܡܶܚܛܳܐ܆ ܐܳܦܠܐ ܚܛܺܝܬܳܐ ܡܶܫܬܰܟܚܳܐ. ܡܶܛܠ ܕܶܐܬܬܒܰܪ ܠܶܗ ܕܪܳܥܳܐ ܡܰܚܛܝܳܢܳܐ. ܘܗܳܝܕܶܝܢ ܗܳܘܶܐ ܡܳܪܝܳܐ ܡܰܠܟܳܐ ܠܥܳܠܰܡ ܥܳܠܡܺܝܢ. ܘܠܐ ܚܳܛܶܦ ܡܳܪܽܘܕܳܐ ܠܰܒܢܰܝ̈ܢܳܫܳܐ ܘܡܰܡܠܶܟ ܥܠܰܝܗܽܘܢ. ܘܡܰܘܒܶܕ ܡܶܢ ܡܰܠܟܽܘܬܶܗ ܡܳܪܰܢ ܠܟܽܠܗܽܘܢ ܡܳܪ̈ܘܕܐ. ܐܰܝܟ ܕܶܐܬܢܰܒܺܝ ܕܰܘܺܝܕ ܘܶܐܡܰܪ:
ܐܶܒܰܕܘ ܥܰܡ̈ܡܶܐ ܡܶܢ ܐܰܪܥܶܗ. ܗܳܢܰܘ ܟܽܠܗܽܘܢ ܚܰܝ̈ܠܰܘܳܬܳܐ ܕܕܰܠܩܽܘܒܠܐ. ܘܰܠܗܳܕܶܐ ܡܰܠܟܽܘܬܳܐ ܗܳܝ ܕܰܫܡܰܝܳܐ ܡܶܫܬܰܘܕܶܐ ܠܩܰܕܺܝ̈ܫܶܐ ܕܣܰܟܺܝܘ ܠܶܗ.
ܣܰܒܪܳܐ ܕܡܶܣܟܺܢܷ̈ܐ ܫܳܡܰܥ ܐܰܢܬ ܡܳܪܝܳܐ. ܘܛܽܘܝܳܒܳܐ ܕܠܶܒܗܽܘܢ ܬܨܽܘܬ ܐܶܕܢܳܟ: ܠܰܡܕܳܢ ܠܝܰܬܡܷ̈ܐ ܘܰܠܒܳܝ̈ܫܶܐ. ܘܬܽܘܒ ܕܶܝܢ ܘܡܳܐ ܕܰܐܘܒܶܕ ܠܪ̈ܰܫܺܝܥܶܐ ܘܕܳܐܶܢ ܕܺܝܢܳܐ ܕܝܰܬܡܰܘ̈ܗܝ ܘܕܰܐܝܠܶܝܢ ܕܶܐܬܡܰܣܟܰܢܘ ܡܶܛܽܠܳܬܗ. ܘܡܰܫܪܶܐ ܠܗܽܘܢ ܒܓܰܘ ܐܰܘܳܢܷ̈ܐ ܕܡܰܠܟܽܘܬܶܗ. ܘܬܽܘܒ ܠܐ ܡܰܘܒܶܕ ܠܰܐܝܠܶܝܢ ܕܡܶܫܟܰܚ ܒܢܽܘܚܳܡܶܗ. ܐܰܟܡܳܐ ܕܶܐܡܰܪ ܗܰܘ ܕܰܡܙܰܡܰܪ:
ܕܠܳܐ ܢܰܘܣܶܦ ܬܽܘܒ ܠܡܰܘܒܳܕܽܘ ܒܢܰܝ̈ܢܳܫܳܐ ܡܶܢ ܐܰܪܥܶܗ. ܐܶܠܳܐ ܝܳܪܬܺܝܢ ܠܳܗ̇ ܒܢܰܝ̈ܢܳܫܳܐ ܠܰܐܪܥܳܐ ܕܰܠܥܠ ܡ̣ܢ ܫܡܰܝܳܐ ܐܳܦ ܫܳܪܶܝܢ ܥܠܶܝܗ̇ ܠܥܳܠܰܡ. ܘܰܡܫܰܒܚܺܝܢ ܠܰܡܫܺܝܚܳܐ ܕܰܐܘܪܶܬ ܐܶܢܽܘܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܕܥܣܪ
ܡܰܘܕܰܥ ܥܰܠ ܩܪܳܒܳܐ ܕܗܳܘܶܐ ܥܰܡ ܩܰܕܺܝ̈ܫܶܐ ܡܶܢ ܕܰܝ̈ܘܶܐ: ܘܥܰܠ ܡܣܳܡ ܒܪܺܝܫܳܐ ܕܳܐܬܶܐ ܡܶܢ ܐܰܠܳܗܳܐ ܥܰܠ ܡܳܪ̈ܘܕܶܐ ܘܥܰܠ ܚܰܛܳܝ̈ܐ.
ܐܰܝܠܶܝܢ ܕܰܬܟܺܝܠܺܝܢ ܥܰܠ ܡܳܪܝܳܐ ܘܰܡܣܰܒܪܺܝܢ ܒܶܗ܆ ܡܥܳܕܺܝܢ ܐܶܢܽܘܢ ܚܰܝ̈ܠܰܘܳܬܳܐ ܕܕܰܠܩܽܘܒܠܳܐ ܡܥܺܝܪܺܝܢ ܥܠܰܝܗܽܘܢ ܩܪ̈ܳܒܶܐ ܚܰܣܺܝ̈ܢܶܐ. ܡܶܛܠ ܕܰܠܘܳܬ ܙܽܘ̈ܥܙܳܥܶܐ ܕܡܶܢ ܐܰܠܳܗܳܐ ܢܫܰܪܓܠܽܘܢ ܐܶܢܽܘܢ. ܘܝܰܬܺܝܪܳܐܝܬ ܒܙܰܒܢܳܐ ܕܡܶܬܪܰܕܦܺܝܢ ܩܰܕܺܝ̈ܫܶܐ ܡܰܢ ܥܰܘܳܠܐܝܬ ܡܶܢ ܐܰܝܠܶܝܢ ܕܡܶܣܬܰܒܪܺܝܢ ܡܗܰܝ̈ܡܢܶܐ. ܘܺܐܝܬ ܠܰܢ ܕܢܺܐܠܰܦ ܡܶܢ ܛܘܒܳܢܳܐ ܕܰܘܺܝܕ. ܗܳܢܳܐ ܕܰܗܘܳܐ ܡܰܠܟܳܐ ܘܰܢܒܺܝܳܐ ܐܰܟܚܕܳܐ. ܟܰܕ ܓܶܝܪ ܩܳܡ ܥܠܰܘܗܝ ܪܕܽܘܦܝܳܐ ܡܶܢ ܫܳܐܘܳܠ ܚܡܽܘܗܝ܆ ܘܰܐܝܠܶܝܢ ܕܠܐ ܝܳܕܥܺܝܢ ܡܰܣܒܪܺܝܢ ܗܘܰܘ ܥܰܠ ܫܳܐܘܳܠ ܒܥܶܠܕܒܳܒܶܗ܇ ܕܓܰܒܪܰܐ ܗܘ ܟܺܐܢܳܐ ܘܙܰܕܺܝܩܳܐ. ܘܥܰܠ ܕܰܘܺܝܕ ܡܶܬܚܰܫܒܺܝܢ ܗܘܰܘ ܒܠܐ ܝܺܕܰܥܬܳܐ. ܘܟܺܐܢܳܐܺܝܬ ܪܕܺܝܦ ܘܰܛܪܺܝܕ ܡܶܢ ܫܳܐܘܳܠ. ܘܒܰܝܢܳܬ ܗܳܠܶܝܢ ܡܳܢܳܐ ܐܺܝܬ ܗܘܳܐ ܠܶܗ ܠܕܰܘܺܝܕ ܕܝܳܕܰܥ ܗܘܳܐ ܚܰܝܠܶܗ ܕܣܽܘܥܪܳܢܳܐ ܢܺܐܡܰܪ ܝܰܬܺܝܪܳܐܝܬ. ܘܟܰܕ ܒܶܗ ܒܰܪܕܽܘܦܝܳܐ ܥܰܙܺܝܙܳܐ ܕܰܢܦܰܠ ܓܶܢܣܳܐ ܕܰܥܡܳܠܺܝ̈ܩܳܝܶܐ܆ ܘܰܕܒܰܪܘ ܢܶܫܰܘ̈ܗܝ ܘܰܒܢܰܘ̈ܗܝ ܕܕܰܘܝܕ ܘܢܶܫ̈ܐ ܘܓܰܒܪ̈ܐ ܘܰܒܢܰܝ̈ܐ ܕܰܐܝܠܶܝܢ ܕܥܰܡܶܗ. ܘܥܰܡ ܟܽܠܗܶܝܢ ܗܳܠܶܝܢ ܒܺܝ̈ܫܳܬܳܐ ܡܶܬܬܰܘܣܰܦ ܗܘܳܐ ܥܰܠ ܐܽܘܠܨܳܢܶܗ ܪܛܽܘܢܝܳܐ ܕܓܰܒܪ̈ܶܐ ܕܥܰܡܶܗ ܗܳܠܶܝܢ ܕܶܐܬܬܥܺܝܩܘ ܥܰܠ ܡܳܐ ܕܰܓܕܰܫ ܠܗܽܘܢ. ܘܩܳܡ ܗܘܰܘ ܠܡܶܪܓܡܶܗ ܠܕܰܘܺܝܕ. ܘܒܰܝܢܳܬ ܕܶܝܢ ܐܽܘܠܨܳܢܷ̈ܐ ܥܰܙܺܝ̈ܙܶܐ ܘܢܶܣܝܽܘ̈ܢܶܐ ܥܦܺܝ̈ܦܶܐ ܬܶܫܒܽܘܚܬܳܐ ܗܳܕܶܐ ܕܰܚܕܰܥܣܰܪ ܫܰܒܰܚ ܘܶܐܡܰܪ:
ܒܡܳܪܝܳܐ ܣܰܒܪܶܬ ܐܰܝܟܰܢ ܐܳܡܪܺܝܢ ܐܢܬܽܘܢ ܠܗ̇ ܠܢܰܦܫܝ: ܢܽܘܕܝ ܘܰܫܟܰܢܝ ܥܰܠ ܛܘܪ̈ܶܐ ܐܰܝܟ ܨܶܦܪܳܐ. ܠܡܳܢܳܐ ܠܰܡ ܕܶܐܥܪܽܘܩ ܡܚܰܦܛܺܝܢ ܐܢܬܽܘܢ ܠܺܝ. ܘܰܕܠܐ ܐܶܩܰܘܶܐ ܠܘܳܬ ܥܰܡܳܐ ܡܣܰܪܗܒܺܝܢ ܐܢܬܽܘܢ ܠܺܝ. ܘܕܶܐܫܒܽܘܩ ܠܢܶܣܝܽܘܢܳܐ ܘܶܐܫܰܢܶܐ ܐܳܡܪܺܝܢ ܐܢܬܽܘܢ ܠܺܝ. ܒܡܳܪܝܳܐ ܣܰܒܪܶܬ ܠܐ ܥܳܪܶܩ ܐܢܳܐ. ܘܠܳܐ ܡܰܪܦܶܐ ܐܢܳܐ ܠܗܰܘ ܕܰܐܚܺܝܕ ܐܢܳܐ ܒܶܗ ܓܰܘܣܳܐ. ܐܶܠܐ ܡܚܰܡܣܶܢ ܐܢܳܐ ܒܶܗ. ܘܰܬܟܺܝܠ ܐܢܳܐ ܥܠܰܘܗܝ ܕܗܽܘ ܡܦܰܨܶܐ ܫܒܺܝܬܝ ܘܡܰܦܢܶܐ ܕܒܳܪܬܝ. ܐܶܠܐ ܡܶܛܠܡܳܢܳܐ ܐܶܡܰܪ ܟܬܳܒܳܐ܆ ܕܚܰܡܣܶܢ ܕܰܘܺܝܕ ܒܰܐܠܳܗܳܐ. ܘܫܶܐܠ ܒܡܳܪܝܳܐ ܘܶܐܡܰܪ: ܐܶܪܕܽܘܦ ܒܳܬܰܪ ܓܰܝܣܳܐ ܗܳܢܳܐ: ܘܡܰܕܪܶܟ ܐܢܳܐ ܠܶܗ؟ ܘܶܐܡܰܪ ܠܶܗ ܐܰܠܳܗܳܐ ܪܕܽܘܦ ܡܶܛܠ ܕܡܰܕܪܶܟ ܐܰܢܬ ܘܰܡܦܰܨܶܐ ܐܰܢܬ (ܐ ܫܡܘܐܝܠ ܠ: ܚ). ܘܗܳܠܶܝܢ ܐܚܪ̈ܳܢܝܳܬܳܐ ܕܡܰܘܕܥܳܐ ܬܰܫܥܺܝܬܳܐ ܕܰܟܬܳܒܷ̈ܐ ܕܰܥܒܰܕ ܕܰܘܺܝܕ ܒܚܰܪܒܳܐ ܕܰܥܡܳܠܺܝ̈ܩܳܝܶܐ. ܡܶܛܽܠ ܐܰܝܠܶܝܢ ܕܓܳܕ̈ܫܳܢ ܗ̈ܘܰܝ ܠܗܽܘܢ ܒܰܩܪܳܒܳܐ ܕܥܰܡ̈ܡܶܐ ܠܰܢܒܺܝܳܐ. ܠܘܳܬ ܢܺܝܫܳܐ ܡܥܰܠܝܳܐ ܕܪ̈ܘܚܳܢܝܳܬܳܐ. ܥܳܒܶܕ ܠܰܢ ܕܢܶܬܦܢܶܐ. ܢܶܫܒܽܘܩ ܫܰܪܒܳܗ̇ ܕܬܰܫܥܺܝܬܳܐ ܕܰܗܘܳܬ ܠܘܳܬ ܕܰܘܺܝܕ. ܟܰܕ ܐܶܬܢܰܒܺܝ ܡܰܙܡܽܘܪܳܐ ܗܳܢܳܐ܆ ܙܳܕܶܩ ܕܰܢܥܰܩܶܒ ܥܰܠ ܡܶܠܰܘ̈ܗܝ ܕܡܰܙܡܽܘܪܳܐ ܗܳܢܳܐ. ܘܢܶܒܥܶܐ ܣܽܘܟܳܠܐܴ ܕܰܛܡܺܝܪ ܒܗܶܝܢ. ܡܰܢ ܐܶܢܽܘܢ ܗܳܠܶܝܢ ܕܰܡܬܺܝ̈ܚܳܢ ܠܗܽܘܢ ܩܶܫ̈ܬܳܬܳܐ ܠܽܘܩܒܰܠ ܓܒܰܝܴ̈ܐ܆ ܘܡܰܢ ܐܶܢܽܘܢ ܕܫܳܕܶܝܢ ܡܰܢ ܒܥܰܡܛܳܢܳܐ ܒܰܬܪ̈ܺܝܨܰܝ ܠܶܒܳܐ. ܠܐ ܓܰܠܝܳܐ ܗܝ ܘܺܝܕܺܝܥܳܐ. ܕܡܶܢ ܕܰܝ̈ܘܶܐ ܘܡܶܢ ܟܽܠܗܽܘܢ ܚܰܝ̈ܠܰܘܳܬܳܐ ܕܫܺܐܕ̈ܐ ܡܶܬܟܰܫܛܺܝܢ ܥܰܠ ܩܰܕܺܝ̈ܫܶܐ. ܟܰܕ ܠܐ ܡܶܬܚܙܶܝܢ ܗܳܢܽܘܢ ܕܟܳܫܛܺܝܢ. ܘܰܢܫܰܪܶܐ ܡܶܟܺܝܠ ܕܢܰܥܶܠ ܬܰܫܥܺܝܬܳܐ ܕܡܰܙܡܽܘܪܳܐ.
ܡܶܛܽܠ ܕܗܳܐ ܠܰܡ ܚܰܛܳܝܷ̈ܐ ܡܠܰܘ ܩܶܫܬܳܐ. ܗܳܝܕܶܝܟ ܥܰܠ ܕܰܘܺܝܕ ܥܰܡܠܺܝ̈ܩܳܝܶܐ. ܥܰܠ ܙܰܕܺܝ̈ܩܶܐ ܕܶܝܢ܆ ܚܰܝ̈ܠܰܘܳܬܶܗ ܕܗܰܘ ܥܡܳܠܺܝܩ ܡܶܬܝܰܕܥܳܢܳܐ.
ܐܰܬܩܶܢܘ ܓܶܐܪ̈ܰܝܗܽܘܢ ܥܰܠ ܝܰܬܪ̈ܶܐ: ܠܡܶܫܕܳܐ ܒܛܽܘܫܝܳܐ ܘܰܒܥܰܡܛܳܢܳܐ ܒܰܬܪ̈ܺܝܨܰܝ ܠܶܒܳܐ. ܗܳܢܽܘܢ ܠܰܡ ܕܫܳܕܶܝܢ ܠܐ ܡܶܬܚܙܶܝܢ. ܗܳܢܽܘܢ ܕܶܝܢ ܕܒܳܠܥܺܝܢ ܡܶܬܚܙܶܝܢ. ܘܺܐܝܬ ܐܶܡܰܬܝ ܕܟܰܕ ܗܰܘ ܕܡܳܚܶܐ܆ ܢܳܐܰܚ ܓܶܐܪܶܗ ܥܰܠ ܡܚܽܘܬܳܐ ܕܰܡܩܰܒܠܳܢܶܗ. ܐܶܠܐ ܗܰܘ ܕܒܳܠܰܥ܆ ܠܐ ܟܳܐܶܒ ܠܶܗ ܥܰܠ ܡܚܽܘܬܳܐ. ܘܶܐܡܰܬܝ ܓܶܝܪ ܕܒܳܠܰܥ ܐܢܳܫ ܒܓܶܐܪܳܐ ܕܡܰܘܬܳܐ܆ ܠܐ ܡܶܬܬܦܺܝܣ ܕܢܰܫܰܪ ܕܰܡܚܽܘܬܳܐ ܗ̱ܝ ܗܳܕܶܐ ܕܡܶܢ ܓܶܐܪܳܐ ܫܺܐܕܳܢܳܝܳܐ ܐܶܬܡܰܚܝܰܬ ܒܶܗ ܘܠܐ ܬܽܘܒ ܓܶܐܪܳܐ ܕܰܚܣܳܡܳܐ ܐܰܘ ܓܶܐܪܳܐ ܕܰܒܥܶܠܕܒܳܒܽܘܬܳܐ܆ ܐܰܘ ܕܒܺܝܫܽܘܬ ܥܰܝܢܳܐ. ܐܰܘ ܕܣܶܢ̱ܐܬܳܐ. ܘܣܰܓܺܝܷ̈ܐܐ ܓܶܐܪ̈ܶܐ ܡܳܚܶܝܢ ܗܳܢܽܘܢ ܕܰܠܩܽܘܒܠܳܐ. ܘܟܰܕ ܝܳܕܥܺܝܢ ܗܶܢܽܘܢ ܡܰܚ̈ܘܳܬܳܐ ܕܡܶܢܗܽܘܢ. ܐܶܠܐ ܬܪ̈ܺܝܨܰܝ ܠܶܒܳܐ ܘܙܰܕܺܝ̈ܩܶܐ. ܠܐ ܛܰܥ̈ܝܳܢ ܠܗܽܘܢ ܛܳܟ ܡܰܚ̈ܘܳܬܳܐ ܕܡܶܢ ܓܶܐܪ̈ܶܐ ܡܶܬܝܰܕ̈ܥܳܢܶܐ. ܐܺܝܬ ܓܶܝܪ ܣܰܓܺܝܷ̈ܐܐ ܕܟܰܕ ܡܶܫܬܰܦ̈ܕܳܢ ܢܰܦ̈ܫܳܬܗܽܘܢ ܘܰܡܡܰܚܶܝܢ ܦܰܓܪ̈ܰܝܗܽܘܢ ܒܚܽܘܪܳܦܳܐ ܕܓܰܘܪܳܐ ܘܩܶܛܠܳܐ ܘܙܳܢܝܽܘܬܳܐ ܘܰܕܪܳܡܽܘܬܳܐ ܘܰܕܦܰܚܙܽܘܬܳܐ ܘܰܕܠܰܥܒܽܘܬܳܐ. ܘܡܳܚܶܝܢ ܒܗܽܘܢ ܐܶܪ̈ܝܛܝܩܳܝܶܐ ܕܠܐ ܗܰܝܡܳܢܘܽܬܳܐ. ܘܰܡܚܰܦܶܝܢ ܘܛܳܡܪܺܝܢ ܡܽܘܡܳܐ ܕܡܰܚ̈ܘܳܬܗܽܘܢ. ܘܡܶܫܬܰܘܕܶܝܢ ܚܽܘܠܡܳܢܳܐ. ܟܰܕ ܛܳܒ ܟܪܺܝܗܺܝܢ ܘܰܣܒܺܝܣܺܝܢ ܒܡܰܚ̈ܘܳܬܳܐ ܕܡܶܢ ܓܶܐܪ̈ܶܐ ܗܳܠܶܝܢ܆ ܘܥܰܠ ܕܶܝܢ ܗܳܠܶܝܢ ܡܡܰܚ̈ܝܰܝ ܒܠܽܘ̈ܠܝܳܬܳܐ ܕܕܰܝ̈ܘܶܐ܆ ܐܶܡܰܪ ܬܢܳܢ ܢܒܺܝܳܐ.
ܡܶܛܠ ܕܡܶܕܶܡ ܕܥܰܬܶܕܬ ܣܚܰܦܘ. ܘܩܳܡܘ ܕܠܐ ܡܰܪܓܫܳܢܽܘܬܳܐ ܠܽܘܩܒܰܠ ܦܽܘܩ̈ܕܳܢܰܝܟ. ܘܚܰܒܶܠܘ ܢܳܡܘܣܳܟ ܗܰܘ ܕܡܰܠܶܦ ܘܡܰܪܬܶܐ. ܡܶܛܽܠ ܕܕܰܚܩܽܘܗܝ ܗܘܰܘ ܠܡܺܐܡܰܪ ܩܽܘܫܬܳܐ. ܘܰܠܟܽܠ ܡܰܢ ܕܰܡܟܰܘܶܢ ܘܡܰܟܶܣ ܡܶܢܗܽܘܢ. ܘܥܰܠܗܳܝ ܕܶܐܬܛܠܶܡ ܡܰܠܦܳܢܳܐ ܡܶܢ ܐܰܝܠܶܝܢ ܕܶܐܫܬܰܦܰܕܘ ܡܶܢ ܓܶܐܪ̈ܶܐ ܡܰܒ̱ܐܫ̈ܢܶܐ ܕܳܐܟܶܠܩܰܪܨܳܐ. ܐܰܘܣܶܦ ܕܶܝܢ ܢܒܺܝܳܐ ܘܶܐܡܰܪ:
ܙܰܕܺܝܩܳܐ ܕܶܝܢ ܡܳܢܳܐ ܥܳܒܶܕ. ܕܠܐ ܩܶܫ̈ܬܳܬܳܐ ܡܶܬܝܰܕ̈ܥܳܢܶܐ ܡܢܺܝ̈ܚܳܢ ܒܰܩܪܳܒܳܐ܆ ܕܫܳܕܶܝܢ ܒܰܩܪܳܒܳܐ ܒܥܰܡܛܳܢܳܐ ܟܰܕ ܠܳܐ ܡܶܬܚܙܶܝܢ. ܘܠܐ ܗܳܢܽܘܢ ܕܰܒܠܰܥܘ ܡܶܢܗܽܘܢ ܫܳܠܶܝܢ ܡܶܢ ܕܰܡܣܰܚܦܺܝܢ ܘܰܡܚܰܒܠܺܝܢ. ܡܶܕܶܡ ܕܥܰܬܕܰܬ ܪܽܘܚܳܐ ܕܚܶܟܡܬܳܟ. ܘܰܐܠܦܰܬ ܪܽܘܚܳܐ ܠܙܰܕܺܝ̈ܩܰܝܟ ܕܢܰܪܬܽܘܢ ܠܥܰܡܳܟ. ܐܶܠܐ ܡܶܟܳܐ ܡܰܝܬܶܐ ܒܳܬܰܪ ܗܳܠܶܝܢ ܘܳܐܡܰܪ ܠܘܳܬ ܗܰܘ ܕܡܶܬܟܰܬܰܫ. ܠܐ ܬܶܕܚܰܠ ܠܐ ܬܙܽܘܥ. ܠܐ ܬܰܪܚܶܩ ܡܶܢ ܡܰܫܪܺܝܬܳܐ ܕܰܩܪܳܒܳܐ܆ ܕܗܳܐ ܥܰܝ̈ܢܰܘܗܝ ܕܡܰܠܟܳܐ ܕܺܝܠܳܟ ܚܳܝܪ̈ܳܢ ܒܰܐܓܽܘܢܳܟ. ܗܳܐ ܒܬܰܟܬܽܘܫܳܟ ܡܶܬܒܰܩܶܐ ܗܰܘ ܕܰܛܥܺܝܢ ܟܠܺܝܠܳܐ ܠܙܰܟܳܝܷ̈ܐ.
ܡܳܪܝܳܐ ܒܗܰܝܟܠܐ ܕܩܘܕܫܶܗ. ܘܡܶܢ ܬܰܡܳܢ ܚܳܐܰܪ ܘܚܳܙܶܐ ܢܶܟܠܳܐ ܕܰܒܠܶܒܳܐ ܕܰܒܥܶܠܕ̈ܒܳܒܰܝܟ.
ܡܳܪܝܳܐ ܒܰܫܡܰܝܳܐ ܟܽܘܪܣܝܶܗ. ܘܰܩܕܳܡܰܘܗܝ ܡܶܬܬܕܺܝܢܺܝܢ ܒܥܶܠܕ̈ܒܳܒܶܐ ܘܠܰܝܬ ܒܥܰܡܛܳܢܳܐ ܡܰܘܬܒܳܐ ܠܐܠܳܗܳܐ. ܕܰܒܢܽܘܗܪܳܐ ܕܰܫܡܰܝܳܐ ܡܰܬܩܰܢ ܟܽܘܪܣܝܶܗ. ܐܰܝܟܳܐ ܕܠܰܝܬ ܐܰܬܪܳܐ ܠܚܶܫܘܟܳܐ ܠܰܡܚܰܘܳܝܽܘ ܫܽܘܠܛܳܢܶܗ. ܐܰܢܬ ܠܰܡ ܠܰܫܡܰܝܳܐ ܚܽܘܪ ܠܰܐܝܟܳܐ ܕܝܳܬܶܒ ܡܰܠܟܳܟ ܘܰܐܠܳܗܳܟ. ܒܰܫܡܰܝܰܐ ܗ̱ܘ ܟܽܘܪܣܝܶܗ ܕܡܳܪܝܳܐ.
ܘܥܰܝܢܰܘ̈ܗܝ ܚܳܙ̈ܝܳܢ ܘܬܶܡܪ̈ܰܘܗܝ ܒܳܚܪܺܝܢ ܠܰܒܢܰܝ̈ܢܳܫܳܐ. ܠܰܝܬ ܠܰܡ ܕܢܶܫܟܰܚ ܢܰܛܥܶܐ ܒܗܰܘ ܕܰܐܝܟ ܕܡܶܢ ܪܰܘܡܳܐ ܥܶܠܳܝܳܐ. ܒܢܽܘܗܪܳܐ ܒܳܚܰܪ ܘܚܳܙܶܐ ܥܒܳܕ̈ܝܗܽܘܢ ܕܰܒܢܰܝ̈ܢܳܫܳܐ܆ ܠܡܳܢܳܐ ܕܶܝܢ ܡܫܰܡܰܗ ܥܰܝ̈ܢܶܐ ܘܬܶܡܪ̈ܶܐ. ܟܽܠܶܗ ܕܺܐܝܬܰܘܗܝ ܦܫܺܝܛܳܐ ܘܰܡܥܰܠܰܝ ܡܶܢ ܪܽܘܟܳܒܳܐ. ܠܚܰܝ̈ܠܰܘܳܬܶܗ ܩܰܕܺܝ̈ܫܶܐ ܩܪܳܐ ܥܰܝ̈ܢܶܐ. ܕܰܒܗܽܘܢ ܚܳܙܶܐ ܛܶܫܝܰܝ̈ܗܽܘܢ ܕܰܒܢܰܝ̈ܢܳܫܳܐ. ܬܶܡܪ̈ܰܘܗܝ ܕܶܝܢ ܠܕܺܝ̈ܢܰܘܗܝ ܡܫܰܡܰܗ܆ ܗܶܢܽܘܢ ܓܶܝܪ ܒܳܚܪܺܝܢ ܘܒܳܕܩܺܝܢ ܠܰܒܢܰܝ̈ܢܳܫܳܐ. ܘܒܳܬܰܪ ܗܳܠܶܝܢ ܐܶܡܰܪ:
ܡܳܪܝܳܐ ܒܳܚܰܪ ܠܙܰܕܺܝ̈ܩܶܐ. ܠܡܳܢܳܐ ܓܶܝܪ ܐܶܡܰܪ: ܕܠܰܒܢܰܝ̈ܢܳܫܳܐ ܒܳܚܪܺܝܢ ܬܶܡܪ̈ܶܐ ܕܥܰܝ̈ܢܰܘܗܝ. ܠܙܰܕܺܝ̈ܩܶܐ ܡܳܪܝܳܐ ܒܳܚܰܪ. ܒܗܳܕܶܐ ܨܳܒܶܐ ܕܰܢܚܰܘܶܐ ܕܠܐ ܡܰܝܬܶܐ ܠܗܽܘܢ ܠܒܽܘܚܪܳܢܳܐ ܠܟܺܐܢܷ̈ܐ ܩܕܳܡ ܥܰܘܴ̈ܠܐ. ܘܠܐ ܡܦܰܪܣܶܐ ܠܗܽܘܢ ܠܙܰܕܺܝ̈ܩܶܐ ܩܕܳܡ ܚܰܛܳܝܷ̈ܐ܆ ܟܰܕ ܠܳܐ ܡܰܪܓܫܺܝܢ ܥܰܘܴ̈ܠܶܐ ܕܰܐܝܠܶܝܢ ܐܶܢܽܘܢ ܡܽܘ̈ܡܶܐ ܕܙܰܕܺܝ̈ܩܶܐ. ܘܗܳܕܶܐ ܐܶܡܰܪ ܢܒܺܝܳܐ ܕܰܢܚܰܘܶܐ ܕܠܰܝܬ ܕܰܕܟܶܐ ܠܘܳܬ ܐܰܠܳܗܳܐ ܡܶܢ ܒܢܰܝ̈ܢܳܫܳܐ ܡܶܢ ܚܛܳܗܷ̈ܐ. ܘܟܰܕ ܝܺܕܰܥܘ ܙܰܕܺܝ̈ܩܶܐ܆ ܐܶܣܬܰܪܗܰܒܘ ܘܰܐܚܠܶܡܘ ܡܽܘܡܰܝ̈ܗܽܘܢ ܒܰܬܝܳܒܽܘܬܳܐ. ܘܰܒܣܰܡ̱̈ܡܳܢܶܐ ܕܰܨܠܰܘ̈ܬܳܐ ܕܰܟܺܝܘ ܣܽܘܪ̈ܛܶܐ ܘܫܽܘ̈ܡܳܬܳܐ ܕܡܶܢ ܓܶܐܪ̈ܶܐ ܕܒܺܝܫܳܐ. ܗܳܠܶܝܢ ܕܳܢܰܬ ܟܺܐܢܽܘܬܳܐ. ܕܰܒܕܺܝ̈ܢܶܐ ܕܬܶܡܪ̈ܰܘܗܝ ܕܕܰܝܳܢܳܐ ܠܳܐ ܢܶܬܦܰܪܣܽܘܢ ܘܢܶܬܒܰܚܪܽܘܢ. ܐܶܠܳܐ ܡܳܪܝܳܐ ܗܽܘ ܒܰܠܚܽܘܕ ܒܳܚܰܪ ܘܰܡܟܰܘܶܢ ܠܙܰܕܺܝ̈ܩܶܐ. ܘܒܰܝ̈ܢܰܘܗܝ ܘܰܠܗܽܘܢ ܡܰܚܠܶܡ ܘܰܡܕܰܟܶܐ ܡܽܘܡܰܝ̈ܗܽܘܢ. ܘܡܰܥܶܠ ܠܗܽܘܢ ܠܒܽܘܣܳܡܳܐ ܕܰܓܢܽܘܢܶܗ. ܥܰܠ ܥܱ̈ܘܳܠܶܐ ܕܶܝܢ ܠܰܘ ܗܳܟܰܢܳܐ. ܐܶܠܳܐ ܐܰܝܟ ܕܰܒܣܶܢ̱ܐܬܳܐ ܕܳܚܶܩ ܠܗܽܘܢ ܘܡܰܪܚܶܩ ܡܶܢ ܩܕܳܡ ܬܰܪܥܶܗ ܟܰܕ ܐܳܡܰܪ: ܐܰܪܚܶܩܘ ܠܟܽܘܢ ܡܶܢܝ ܦܳܠܚܱ̈ܝ ܥܰܘܠܳܐ (ܠܘܩܐ ܝܓ: ܟܙ). ܘܥܰܠܗܳܝ ܐܶܡܰܪ ܢܒܺܝܳܐ.
ܠܥ̈ܘܠܐ ܘܰܠܪ̈ܳܚܡܰܝ ܥܰܘܠܐ ܣܢܳܬ ܢܰܦܫܶܗ. ܗܳܠܶܝܢ ܠܐ ܐܳܬܶܝܢ ܠܒܽܘܚܪܳܢܳܐ ܘܠܳܐ ܥܳܐܠܺܝܢ ܠܕܺܝܢܳܐ ܕܡܰܘܕܰܥ ܛܳܒ̈ܬܳܐ ܘܒܺܝ̈ܫܳܬܳܐ. ܐܶܠܐ ܡܶܢ ܪܽܘܚܩܳܐ ܩܳܝܡܺܝܢ ܘܰܡܣܰܟܶܝܢ ܕܢܶܦܽܘܩ ܥܠܰܝܗܽܘܢ ܦܣܳܩܳܐ ܡܰܪܺܝܪܳܐ. ܒܢܰܝ̈ܢܳܫܳܐ ܕܶܝܢ ܕܡܶܬܒܰܚܪܺܝܢ ܘܳܐܦܠܐ ܓܡܺܝܪܳܐܝܬ ܡܶܬܚܰܝܒܺܝܢ܆ ܐܰܝܟ ܡܶܕܶܡ ܕܛܳܒ̈ܬܳܐ ܡܶܣܬܰܒܪܺܝܢ ܕܰܥܒܰܕܘ. ܥܰܠܗܳܕܶܐ ܠܰܘ ܠܰܓܡܳܪ ܡܶܬܚܰܝܒܺܝܢ ܒܕܺܝܢܳܐ. ܥܱ̈ܘܳܠܶܐ ܕܶܝܢ ܕܰܣܢܳܬ ܢܰܦܫܶܗ ܘܪ̈ܳܚܡܰܝ ܥܰܘܠܳܐ܆ ܠܰܝܬ ܠܗܽܘܢ ܣܰܒܪܳܐ ܕܡܶܬܦܰܨܝܳܢܽܘܬܳܐ ܡܶܢ ܬܰܫܢܺܝ̈ܩܶܐ. ܐܰܘ ܙܰܕܺܝ̈ܩܶܐ ܗܳܢܽܘܢ ܕܗܽܘ ܡܳܪܝܳܐ ܒܳܚܰܪ ܠܗܽܘܢ܆ ܡܶܫܬܰܟܚܺܝܢ ܒܓܰܒܳܐ ܕܚܰܝܳܒܽܘܬܳܐ. ܕܰܗܒܳܐ ܕܡܶܬܒܚܰܪ ܓܶܝܪ ܠܰܘ ܡܶܛܠ ܕܢܶܬܶܐܟܶܠ ܡܶܢ ܢܽܘܪܳܐ ܥܳܐܶܠ ܠܓܰܘ ܟܽܘܪܳܐ. ܐܶܠܐ ܡܰܢ ܕܢܰܪܦܶܐ ܬܰܡܳܢ ܣܽܘܠܳܐܢܶܗ. ܗܳܟܰܢܳܐ ܐܳܦ ܕܰܗܒܳܐ ܕܙܰܕܺܝ̈ܩܶܐ ܡܳܐ ܕܥܳܒܰܪ ܒܢܽܘܪܳܐ ܗܳܝ ܕܒܳܚܰܪ ܒܳܗ̇ ܡܳܪܝܳܐ ܠܟܽܠ ܒܣܰܪ. ܠܰܘ ܗܽܘ ܕܰܗܒܳܐ ܦܳܐܶܫ ܒܓܰܘ ܢܽܘܪܳܐ܆ ܐܶܠܐ ܗܽܘ ܟܝܳܢܳܐ ܫܳܦܰܪ ܘܡܶܬܕܰܟܶܐ ܡܶܢ ܨܳܐܬܶܗ. ܘܡܳܐ ܕܶܐܨܛܰܠܰܠ ܡܩܰܒܶܠ ܠܶܗ ܥܽܘܒܳܐ ܢܺܝܚܳܐ ܕܡܰܠܟܽܘܬܳܐ. ܘܰܐܟܙܢܳܐ ܕܰܒܚܰܪ ܐܰܬܽܘܢܳܐ ܠܗܳܠܶܝܢ ܬܠܳܬܳܐ ܛܠܳܝܷ̈ܐ ܒܓܰܘ ܒܳܒܶܝܠ ܘܝܶܗܒܰܬ ܐܶܢܽܘܢ ܢܽܘܪܳܐ ܕܟܰܝܴ̈ܐ ܘܫܰܦܺܝܪ̈ܶܐ: ܗܳܟܰܢܳܐ ܒܳܚܪܳܐ ܢܽܘܪܳܐ ܠܙܰܕܺܝ̈ܩܶܐ ܒܥܳܠܡܳܐ ܚܰܕܬܳܐ. ܘܢܳܛܪܳܐ ܠܗܽܘܢ ܕܠܐ ܚܒܳܠܐ܆ ܐܰܝܟ ܕܢܶܛܪܰܬ ܢܽܘܪܳܐ ܒܳܒܠܳܝܬܳܐ ܠܗܳܢܽܘܢ ܕܠܐ ܐܶܬܟܰܬܰܡܘ ܒܣܶܓܕܰܬ ܨܰܠܡܷ̈ܐ. ܘܒܳܬܰܪܟܶܢ ܦܳܢܝܳܐ ܐܺܝܕܳܐ ܕܰܐܠܳܗܳܐ ܕܬܰܗܦܶܟ ܦܽܘܪܥܳܢܳܐ ܥܰܠ ܪ̈ܰܫܝܥܶܐ ܟܰܕ ܡܰܡܛܪܳܐ ܥܠܰܝܗܽܘܢ ܓܶܐܪ̈ܶܐ ܚܰܪ̈ܺܝܦܶܐ ܕܪܽܘܓܙܳܐ. ܐܰܘܟܺܝܬ ܦܰܚ̈ܐ ܐܰܝܟ ܡܶܠܬܳܐ ܢܒܺܝܳܝܬܳܐ ܕܶܐܡܪܰܬ.
ܕܰܢܚܶܬܘ ܥܰܠ ܪ̈ܰܫܺܝܥܶܐ ܦܰܚܷ̈ܐ ܐܰܝܟ ܡܶܛܪܳܐ: ܢܽܘܪܳܐ ܘܟܶܒܪܺܝܬܳܐ. ܘܪܽܘܚܳܐ ܕܰܡܚܽܘܬܳܐ ܡܢܳܬܳܐ ܕܟܳܣܗܽܘܢ. ܠܡܳܢܳܐ ܕܶܝܢ ܐܶܡܰܪ ܕܦܰܚܷ̈ܐ ܕܢܳܚܬܺܝܢ ܥܠܰܝܗܽܘܢ ܐܰܝܟ ܡܶܛܪܳܐ. ܐܰܟܙܢܳܐ ܓܶܝܪ ܕܠܰܝܬ ܠܡܶܥܪܰܩ ܡܶܢ ܛܽܘ̈ܦܰܝ ܡܶܛܪܳܐ. ܗܳܟܰܢܳܐ ܢܶܗܘܶܐ ܡܣܳܡ ܒܪܺܝܫܳܐ ܕܳܐܬܶܐ ܡܶܢ ܫܡܰܝܳܐ ܒܕܺܝܢܳܐ ܟܺܐܢܳܐ. ܥܰܠ ܐܳܟܶܠܩܰܪܨܳܐ ܡܳܪܽܘܕܳܐ ܘܥܰܠ ܪ̈ܰܫܺܝܥܶܐ ܐܰܝܠܶܝܢ ܕܦܰܠܚܽܘܗܝ ܒܥܰܘܠܳܐ. ܘܰܐܝܟܰܢܳܐ ܕܢܽܘܪܳܐ ܢܶܚܬܰܬ ܥܰܠ ܣܕܽܘ̈ܡܳܝܶܐ. ܘܰܠܟܽܠܗܽܘܢ ܥܳܡܘܪ̈ܰܘܗܝ ܕܰܐܬܪܳܐ ܚܰܒܠܰܬ ܘܰܠܟܽܠ ܕܺܐܝܬ ܒܶܗ ܒܢܽܘܪܳܐ ܘܟܶܒܪܺܝܬܳܐ. ܦܰܚܷ̈ܐ ܡܫܰܡܰܗ ܠܗܳܠܶܝܢ ܕܢܳܚܬܺܝܢ ܡܶܢ ܫܡܰܝܳܐ܆ ܡܶܛܠ ܕܳܐܚܕܺܝܢ ܠܥܰܘܴ̈ܠܶܐ ܘܠܰܝܬ ܕܡܶܬܦܰܨܶܐ. ܘܰܐܝܟܰܢ ܡܶܫܟܚܺܝܢ ܠܡܶܥܪܰܩ ܡܶܢ ܗܰܘ ܕܡܰܩܪܶܒ ܥܰܡܗܽܘܢ ܡܶܢ ܫܡܰܝܳܐ ܗܳܝ ܕܠܐ ܡܰܨܝܳܐ. ܡܢܳܬܳܐ ܓܶܝܪ ܕܰܡܛܳܬ ܐܶܢܽܘܢ ܡܶܢ ܫܡܰܝܳܐ܆ ܪܘܚܳܐ ܕܰܡܚܽܘܬܳܐ܆ ܗ̇ܝ ܕܠܰܝܬ ܠܡܶܫܬܐܳܠܽܘ ܡܶܢܳܗ̇ ܘܡܶܢ ܬܶܛܪܳܐ ܕܥܳܩܬܳܗ̇. ܗܳܠܶܝܢ ܡܶܬܦܰܪܥܺܝܢ ܪ̈ܰܫܺܝܥܶܐ ܐܰܝܟ ܚܽܘܒ̈ܠܐܷ ܕܰܐܪܡܺܝܘ. ܡܶܛܠ ܕܰܕܠܐ ܪ̈ܰܚܡܶܐ ܚܰܝܶܒܘ ܘܩܰܛܶܠܘ ܠܙܰܕܺܝ̈ܩܶܐ. ܐܳܦ ܕܠܐ ܪ̈ܰܚܡܶܐ ܢܶܬܚܰܝܒܽܘܢ.
ܡܶܛܽܠ ܕܙܰܕܺܝܩ ܗܘ ܡܳܪܝܳܐ ܘܙܰܕܺܝܩܽܘܬܳܐ ܪܳܚܶܡ: ܘܰܬܪܺܝܨܽܘܬܳܐ ܚܳܙ̈ܝܳܢ ܐܰܦܰܘ̈ܗܝ. ܘܠܐ ܡܶܫܟܰܚ ܠܰܡܚܳܪ ܒܥܰܘܴ̈ܠܶܐ ܡܶܛܠ ܕܙܰܕܺܝܩܰܐ ܗ̄ܘ. ܘܠܳܐ ܡܶܬܛܦܺܝܣ ܠܰܡܚܳܪ ܒܰܐܝܠܶܝܢ ܕܰܡܦܰܬܠܺܝܢ ܫܒܺܝ̈ܠܰܝܗܽܘܢ. ܡܶܛܠ ܕܰܬܪܺܝܨܽܘܬܳܐ ܚܳܙ̈ܝܳܢ ܐܰܦܰܘ̈ܗܝ. ܕܠܶܗ ܝܳܐܶܐ ܫܽܘܒܚܳܐ ܠܥܳܠܡܺܝܢ ܐܰܡܝܢ܀
ܡܙܡܘܪܐ ܕܬܪܥܣܪ
ܕܡܰܘܕܰܥ ܕܡܶܢ ܒܳܬܰܪ ܕܰܓܡܰܪ ܛܳܒܳܐ ܡܶܢ ܐܰܪܥܳܐ: ܘܠܰܝܬ ܗ̱ܘܳܐ ܗܰܝܡܳܢܘܬܳܐ ܒܰܒܢܰܝ̈ܢܳܫܳܐ: ܐܶܬܓܠܝ̣ ܐܰܠܳܗܳܐ ܒܰܒܣܰܪ ܥܰܠ ܐܰܪܥܳܐ ܘܰܦܪܰܩ ܠܥܳܠܡܳܐ.
ܒܥܳܬܳܐ ܡܰܠܝܰܬ ܥܽܘܕܪ̈ܳܢܶܐ ܡܶܬܚܰܙܝܳܐ ܠܺܝ ܕܺܐܝܬܶܝܗ̇܆ ܗܳܝ ܕܶܐܥܰܩܶܒ ܚܰܬܺܝܬܳܐܝܬ. ܘܶܐܫܟܰܚ ܥܶܠܬܳܐ ܕܡܶܢܳܗ̇ ܫܩܰܠ ܕܰܘܺܝܕ ܗܰܘ ܢܒܺܝܳܐ ܘܰܡܙܰܡܪܳܢܳܐ ܘܶܐܬܢܰܒܺܝ ܡܰܙܡܽܘܪܳܐ ܗܳܢܳܐ ܕܰܬܪܶܥܣܰܪ܆ ܕܗܳܟܰܢܳܐ ܦܫܺܝܩܳܐܝܬ ܢܰܝܬܶܐ ܠܓܶܠܝܳܐ. ܐܳܦ ܦܽܘܫܳܩܶܗ ܗܰܘ ܪܽܘܚܳܢܳܐ. ܒܗܳܝ ܓܶܝܪ ܕܰܕܠܳܐ ܥܶܠܬܳܐ ܚܰܕ ܡܶܢ ܡܰܙܡܽܘܪ̈ܶܐ ܠܐ ܐܶܬܡܰܠܰܠ. ܡܶܢ ܥܷ̈ܠܠܳܬܗܽܘܢ ܡܶܫܟܚܺܝܢܰܢ ܟܡܳܐ ܙܰܒ̈ܢܺܝܢ ܐܳܦ ܦܽܘܫܳܩܰܝ̈ܗܘܢ ܒܰܟܬܳܒܳܐ ܕܛܽܘܒܳܢܳܐ ܫܡܽܘܐܶܝܠ ܡܚܰܘܶܐ܆ ܕܡܶܢ ܒܳܬܰܪ ܕܺܝܬܶܒ ܕܰܘܺܝܕ ܠܘܳܬ ܐܰܟܺܝܫ ܡܰܠܟܳܐ ܕܰܦܠܶܫܬܳܝܷ̈ܐ ܫܰܢ̱ܬܳܐ ܚܕܳܐ ܘܝܰܪ̈ܚܶܐ ܐܰܪܒܥܳܐ. ܗܘܳܐ ܩܪܳܒܳܐ ܠܰܦܠܶܫܬܳܝܷ̈ܐ ܥܰܡ ܒܢܱ̈ܝ ܝܺܣܪܳܐܶܝܠ. ܗܰܘ ܕܒܶܗ ܫܶܩܠܰܬ ܫܽܘܠܳܡܳܐ ܡܰܠܟܽܘܬܶܗ ܕܫܳܐܘܳܠ. ܘܟܰܕ ܢܦܰܩ ܐܰܟܺܝܫ ܕܢܺܐܙܰܠ ܠܰܩܪܳܒܳܐ ܕܝܣܪܳܐܝܠ܆ ܐܶܡܰܪ ܠܕܰܘܺܝܕ. ܡܶܕܰܥ ܬܶܕܰܥ: ܕܥܰܡܝ ܬܶܦܽܘܩ ܠܰܩܪܳܒܳܐ ܕܡܰܫܪܺܝܬܳܐ. ܘܶܐܡܰܪ ܠܶܗ ܕܰܘܺܝܕ. ܡܶܛܠܗܳܢܳܐ ܐܰܢܬ ܬܶܕܰܥ ܡܶܕܶܡ ܕܰܥܬܺܝܕ ܕܢܶܥܒܶܕ ܥܰܒܕܳܟ (ܐ ܫܡܘܐܝܠ ܟܚ: ܐ-ܒ). ܟܰܕ ܕܶܝܢ ܢܦܰܩ ܐܰܟܺܝܫ ܢܺܐܙܰܠ ܠܰܩܪܳܒܳܐ ܘܥܰܡܶܗ ܟܽܠܗܽܘܢ ܛܪ̈ܽܘܢܶܐ ܕܰܦܠܶܫܬܳܝܷ̈ܐ. ܘܕܰܘܺܝܕ ܬܽܘܒ ܘܓܰܒܪ̈ܰܘܗܝ ܥܰܡܶܗ ܕܡܰܠܟܳܐ ܥܰܡܶܗ. ܟܰܕ ܚܙܰܘ ܥܰܒܕܰܘ̈ܗܝ ܕܰܐܟܺܝܫ ܐܳܡܪܺܝܢ. ܡܳܢܳܐ ܥܳܒܕܝܢ ܗܳܠܶܝܢ (ܐ ܫܡܘܐܝܠ ܟܛ: ܓ). ܘܟܰܕ ܦܰܢܺܝ ܠܗܽܘܢ ܐܰܟܺܝܫ ܦܶܬܓܳܡܳܐ ܐܳܡܪܺܝܢ ܠܶܗ: ܕܰܒܡܳܢܳܐ ܡܶܬܪܰܥܶܐ ܓܰܒܪܳܐ ܗܳܢܳܐ ܥܰܡ ܡܳܪܶܗ. ܐܶܠܐ ܒܪܺܝܫܰܢ ܕܺܝܠܰܢ (ܐ ܫܡܘܐܝܠ ܟܛ: ܕ). ܘܰܡܥܰܛܦܺܝܢ ܗܘܰܘ ܠܶܗ ܛܪ̈ܽܘܢܶܐ ܕܰܦܠܶܫܬܳܝ̈ܐ ܠܕܰܘܺܝܕ ܡܶܢ ܩܪܳܒܳܐ ܟܰܕ ܡܩܰܕܡܺܝܢ ܗܘܰܘ ܕܳܚܠܺܝܢ. ܕܕܰܠܡܳܐ ܢܶܬܗܰܦܟܽܘܢ ܥܠܰܝܗܽܘܢ ܘܰܢܒܰܛܶܠ ܐܶܢܽܘܢ ܘܦܽܘܪܢܳܣܳܐ ܗܳܘܶܐ ܗܘܳܐ ܗܳܝܕܶܝܢ ܠܰܘ ܡܶܢ ܗܳܠܶܝܢ ܕܰܒܨܶܒܝܳܢܳܐ ܒܺܝܫܳܐ ܐܰܥܛܦܽܘܗܝ ܠܕܰܘܺܝܕ. ܐܶܠܐ ܡܶܢ ܪܽܘܚܳܐ ܕܰܐܠܳܗܳܐ. ܣܰܓܝ̈ܐܬܳܐ ܓܶܝܪ ܗܘܱ̈ܝ ܚܠܳܦ ܕܰܘܺܝܕ ܬܰܡܳܢ. ܘܰܚܕܳܐ ܡܰܢ: ܕܠܳܐ ܢܶܗܘܶܐ ܓܰܒܪܳܐ ܙܰܕܺܝܩܳܐ ܡܥܰܕܪܳܢܳܐ ܠܐܢ̈ܫܳܐ ܒܺܝ̈ܫܶܐ. ܕܬܰܪܬܶܝܢ ܕܶܝܢ: ܕܠܐ ܐܳܙܶܠ ܠܰܩܪܳܒܳܐ ܗܰܘ ܕܡܺܝܬ ܒܶܗ ܫܳܐܘܳܠ܆ ܢܺܐܡܰܪ ܥܰܡܳܐ ܕܡܶܢ ܕܰܘܺܝܕ ܐܶܬܩܛܶܠ. ܕܰܬܠܳܬ ܕܶܝܢ: ܕܶܐܠܽܘܠܳܐ ܠܳܐ ܡܦܰܨܶܐ ܗܘܳܐ ܠܢܶܫܰܘ̈ܗܝ ܘܠܰܒܢܰܘ̈ܗܝ ܡܶܢ ܫܶܒܝܳܐ ܕܥܰܡܠܺܝܩ̈ܝܶܐ ܒܙܰܒܢܳܐ ܗܳܟܺܝܠ ܕܩܳܡܘ ܥܰܠ ܕܰܘܺܝܕ ܟܺܐܡܽܘ̈ܢܶܐ ܗܳܠܶܝܢ. ܘܶܐܙܕܶܩܦ ܥܠܰܘܗܝ ܡܰܚܫܽܘܠܳܐ ܡܶܢ ܗܳܢܽܘܢ ܕܰܥܪܰܩ ܠܘܳܬܗܽܘܢ ܘܶܐܬܓܰܘܰܣ ܒܗܽܘܢ. ܥܰܠ ܕܚܳܙܶܐ ܗܘܳܐ ܠܗܽܘܢ ܕܶܐܫܬܰܚܠܰܦܘ ܠܘܳܬܶܗ܆ ܡܶܢ ܛܳܒܬܳܐ ܗܳܝ ܕܚܰܘܺܝܘ ܠܶܗ ܩܰܕܡܳܐܝܬ ܟܰܕ ܥܪܰܩ ܨܶܐܕܰܝܗܽܘܢ. ܐܶܬܬܙܺܝܥ ܒܪܽܘܚܳܐ ܕܰܢܒܺܝܽܘܬܳܐ. ܘܶܐܬܢܰܒܺܝ ܘܶܐܡܰܪ ܗܘܳܐ:
ܦܪܽܘܩ ܡܳܪܝܳܐ ܡܶܛܠ ܕܰܓܡܰܪ ܛܳܒܳܐ: ܘܒܶܛܠܰܬ ܗܰܝܡܳܢܘܬܳܐ ܡܶܢ ܐܰܪܥܳܐ. ܘܰܒܢܰܝ̈ܢܳܫܳܐ ܣܪܺܝܩܽܘܬܳܐ ܡܡܰܠܠܺܝܢ: ܓܰܒܪܳܐ ܥܰܡ ܚܰܒܪܶܗ ܒܣܶܦ̈ܘܳܬܳܐ ܡܦܰܠܓ̈ܬܳܐ. ܒܠܶܒܳܐ ܘܰܒܠܶܒܳܐ ܡܡܰܠܠܺܝܢ. ܡܳܐ ܕܶܝܢ ܕܰܓܡܰܪ ܠܶܗ ܛܳܒܳܐ. ܠܰܝܬ ܐܰܬܪܳܐ ܠܛܳܒܬܳܐ ܘܠܳܐ ܡܳܐ ܕܶܐܫܬܰܠܛܰܬ ܒܺܝܫܬܳܐ. ܐܺܝܬ ܡܰܥܰܠܬܳܐ ܠܛܳܒܬܳܐ. ܐܶܠܳܐ ܡܶܬܕܰܘ̈ܕܳܢ ܠܗܶܝܢ ܡܶܟܺܝܠ ܟܠܗܶܝܢ ܬܰܩܢ̈ܬܳܐ. ܘܡܳܐ ܬܽܘܒ ܣܶܦ̈ܘܳܬܳܐ ܡܦܰܠܓ̈ܬܳܐ܆ ܠܰܝܬ ܬܪܺܝܨܽܘܬܳܐ ܠܘܳܬ ܡܡܰܠܠܳܢܷ̈ܐ. ܐܶܠܐ ܟܰܕ ܐܚܪ̈ܳܢܝܳܬܳܐ ܡܡܰܠܠܺܝܢ. ܘܰܐܚܪ̈ܳܢܝܳܬܳܐ ܡܶܬܪܰܥܶܝܢ ܘܣܳܥܪܺܝܢ. ܘܟܰܕ ܫܠܳܡܳܐ ܡܡܰܠܶܠ ܦܽܘܡܳܐ ܐܰܝܟ ܕܢܰܛܥܶܐ܆ ܒܥܶܠܕܒܳܒܽܘܬܳܐ ܟܡܺܝܢܳܐ ܒܓܰܘ ܠܶܒܳܐ. ܘܡܳܐ ܕܶܝܢ ܕܶܐܬܦܰܠܓܰܬ ܠܳܗ̇ ܢܰܦܫܳܐ ܠܰܬܪܶܝܢ ܡܳܪ̈ܰܘܳܢ. ܠܰܝܬ ܐܰܬܪܳܐ ܠܚܺܐܪܘܬܳܐ ܘܰܠܢܰܟܦܽܘܬܳܐ. ܘܡܳܐ ܕܰܗܘܳܐ ܠܶܗ ܗܰܘ ܒܰܪܢܳܫܳܐ ܥܦܺܝܦܳܐ ܘܰܨܢܺܝܥܳܐ. ܠܰܝܬ ܒܶܗ ܕܽܘܟܬܳܐ ܠܗܰܝܡܳܢܽܘܬܳܐ. ܐܶܠܳܐ ܐܚܪ̈ܳܢܝܳܬܳܐ ܐܳܡܰܪ: ܘܰܐܚܪ̈ܳܢܝܳܬܳܐ ܣܳܥܰܪ. ܐܰܝܟ ܕܳܐܦ ܗܳܫܳܐ ܚܳܙܶܝܢܰܢ ܫܟܺܝ̈ܚܳܢ ܠܘܳܬ ܣܰܓܺܝ̈ܐܶܐ. ܕܟܰܕ ܡܶܫܬܰܘܕܶܝܢ ܢܰܟܦܽܘܬܳܐ ܒܶܐܣܟܺܡܳܐ ܒܰܪܳܝܳܐ. ܡܫܰܟܪ̈ܳܬܳܐ ܣܳܥܪܺܝܢ ܒܟܶܣܝܳܐ. ܘܰܐܚܪ̈ܳܢܶܐ ܬܽܘܒ ܕܡܶܫܬܰܘܕܶܝܢ ܨܰܘܡܳܐ ܘܥܳܢܘܳܝܽܘܬܳܐ ܩܕܳܡ ܒܢܰܝ̈ܢܳܫܳܐ܆ ܘܡܶܢ ܠܓܰܘ ܐܺܝܬܰܝܗܽܘܢ ܠܰܥ̈ܒܶܐ ܘܳܐܣܽܘ̈ܛܶܐ. ܘܰܐܚܪ̈ܳܢܶܐ ܕܡܰܠܦܺܝܢ ܡܣܰܪܩܽܘܬܳܐ ܘܰܐܒܺܝܠܽܘܬܳܐ ܠܥܺܝܢ ܥܳܠܡܳܐ. ܘܡܶܫܬܰܟܚܺܝܢ ܡܫܰܥܒ̈ܕܶܐ ܠܡܳܡܽܘܢܳܐ ܘܰܠܪܶܚܡܰܬ ܟܶܣܦܳܐ. ܝܰܬܺܝܪ ܡܶܢ ܟܽܠ ܐܢܳܫ. ܘܰܐܚܪ̈ܳܢܶܐ ܕܡܶܫܬܰܘܕܶܝܢ ܒܬܽܘܠܽܘܬܳܐ ܘܩܰܕܺܝܫܽܘܬܳܐ. ܘܓܳܥܨܺܝܢ ܡܶܢ ܙܽܘܘܳܓܳܐ ܒܰܕܡܶܬܦܰܪܣܺܝܢ ܕܢܰܛܥܽܘܢ ܒܚܰܙܳܝܷ̈ܐ. ܘܺܐܝܬܰܝܗܽܘܢ ܒܰܥܒܳܕܰܝ̈ܗܽܘܢ ܓܰܝܳܪ̈ܶܐ ܘܰܡܚܰܒ̈ܠܶܐ. ܕܡܶܛܠܬܗܽܘܢ ܕܗܳܠܶܝܢ ܐܶܡܰܪ ܡܳܪܰܢ. ܐܶܙܕܰܗ̱ܪܘ ܡܶܢ ܢܒܺܝܷ̈ܐ ܕܰܓ̈ܠܐ: ܕܳܐܬܶܝܢ ܠܘܳܬܟܽܘܢ ܒܰܠܒܽܘ̈ܫܶܐ ܕܶܐܡܪ̈ܶܐ: ܘܡܶܢ ܠܓܰܘ ܐܺܝܬܰܝܗܽܘܢ ܕܺܐܒܷ̈ܐ ܚܳܛܽܘ̈ܦܶܐ (ܡܬܝ ܙ: ܝܗ). ܢܒܺܝܳܐ ܕܶܝܢ:
ܕܢܰܘܒܶܕ ܡܳܪܝܳܐ ܟܠܗܶܝܢ ܣܶܦ̈ܘܳܬܳܐ ܡܦܰܠܓ̈ܬܳܐ. ܘܠܶܫܳܢܷ̈ܐ ܕܰܡܡܰܠܠܺܝܢ ܪܰܘܪ̈ܒܳܬܳܐ: ܕܶܐܡܰܪܘ ܠܶܫܳܢܰܢ ܢܰܘܪܶܒ. ܘܣܶܦ̈ܘܳܬܳܐ ܕܺܝܠܰܢ ܐܶܢܶܝܢ ܡܰܢܽܘ ܡܳܪܰܢ. ܚܳܙܶܐ ܐܰܢܬ ܠܡܰܪܳܚܽܘܬܳܐ ܕܓܽܘ̈ܡܕܳܢܶܐ. ܚܙܰܝܬ ܐܰܝܟܰܢܳܐ ܡܳܐ ܕܡܶܬܠܒܶܟ ܒܰܪܢܳܫܳܐ ܒܩܽܘܕܡܳܐ ܕܒܺܝ̈ܫܳܬܳܐ. ܡܰܡܪܰܚ ܕܢܺܐܡܰܪ ܟܰܕ ܠܳܐ ܡܶܬܟܰܚܰܕ. ܡܰܢܽܘ ܡܳܪܰܢ. ܕܰܐܝܟ ܗܳܟܰܢܳܐ ܗܘܰܘ ܒܢܝ̈ܢܳܫܳܐ ܩܕܳܡ ܓܶܠܝܳܢܗܶ ܕܰܐܠܳܗܳܐ ܕܒܰܒܣܰܪ. ܘܠܰܝܬ ܗܘܳܐ ܛܳܒܳܐ ܐܳܦܠܳܐ ܚܰܕ. ܡܶܛܽܠ ܕܶܐܬܛܰܠܰܩܘ ܗܘܰܘ ܘܰܓܡܰܪܘ ܡܶܢ ܐܰܪܥܳܐ ܟܽܠܗܽܘܢ ܛܳܒܷ̈ܐ. ܘܡܶܢ ܕܰܐܘܦܝܰܬ ܛܳܒܬܳܐ ܡܶܢ ܐܰܪܥܳܐ. ܘܶܐܚܕܰܬ ܒܺܝܫܬܳܐ ܣܳܟܶܗ ܕܥܳܠܡܳܐ. ܘܶܐܒܕܰܬ ܗܰܝܡܳܢܽܘܬܳܐ ܡܶܢ ܥܰܡ̈ܡܶܐ ܟܽܠܗܽܘܢ ܕܰܬܚܶܝܬ ܫܡܰܝܳܐ. ܘܰܫܒܰܩ ܥܳܠܡܳܐ ܬܰܪܥܳܐ ܕܰܢܒܺܝܘܬܳܐ. ܘܺܝܬܶܒ ܥܰܠ ܬܰܪܥܳܐ ܕܪ̈ܽܘܚܶܐ ܒܺܝ̈ܫܳܬܳܐ. ܕܩܶܨ̈ܡܶܐ ܘܙܰܟܽܘܪ̈ܶܐ ܘܝܰܕܽܘ̈ܥܶܐ. ܘܰܥܪܰܩ ܘܫܰܢܺܝ ܪܽܘܚܳܐ ܕܩܽܘܕܫܳܐ ܡܶܢ ܐܳܕܳܡ. ܐܰܝܟ ܕܡܶܢ ܫܳܐܘܳܠ. ܘܰܒܙܺܝܙܺܝܢ ܗܘܰܘ ܕܠܳܐ ܚܰܘܣܳܢ ܙܰܕܺܝ̈ܩܶܐ ܘܡܰܟܺܝ̈ܟܶܐ. ܐܰܝܟ ܕܰܘܺܝܕ ܕܰܪܕܺܝܦ ܗܘܳܐ ܡܶܢ ܫܳܐܘܳܠ ܫܺܐܕܳܢܳܐ.
ܡܶܛܠ ܒܶܙܬܳܐ ܕܡܶܣܟ̈ܢܶܐ ܘܶܐܢܰܩܬܳܐ ܕܒܳܝ̈ܫܶܐ. ܡܶܫܬܰܘܕܶܐ ܡܳܪܝܳܐ ܠܕܰܘܺܝܕ ܕܗܽܘ ܩܳܐܶܡ ܘܥܳܒܶܕ ܦܽܘܪܩܳܢܳܐ. ܗܳܕܶܐ ܓܶܝܪ ܡܰܘܕܰܥ ܓܶܠܝܳܢܳܐ ܕܪܽܘܚܳܐ ܩܰܕܺܝܫܳܐ ܬܢܳܢ. ܒܗܳܝ ܕܶܐܡܰܪ ܓܰܠܝܳܐܝܬ ܘܰܕܠܐ ܬܰܚܦܺܝܬܐ.
ܕܡܶܟܺܝܠ ܐܶܩܽܘܡ ܐܳܡܰܪ ܡܳܪܝܳܐ: ܘܶܐܥܒܶܕ ܦܽܘܪܩܳܢܳܐ ܓܰܠܝܳܐܝܬ. ܘܗܽܘ ܦܽܘܪܩܳܢܳܐ ܩܰܕܶܡ ܐܰܘܕܥܶܗ. ܗܳܝ ܕܡܶܛܠ ܒܶܙܬܳܐ ܕܡܶܣܟ̈ܢܶܐ ܘܶܐܢܰܩܬܳܐ ܕܒܳܝ̈ܫܶܐ. ܡܶܬܥܒܶܕ ܗܘܳܐ ܡܶܢ ܡܳܪܝܳܐ. ܘܰܕܠܰܘ ܒܠܶܒܳܐ ܘܰܒܠܶܒܳܐ ܐܶܬܐܡܪܰܬ ܡܶܢ ܡܳܪܝܳܐ. ܐܰܝܟ ܛܽܘܪܳܐ ܠܐ ܫܰܦܝܪܳܐ. ܕܗܳܢܽܘܢ ܕܰܡܡܰܠܠܝܢ ܒܣܶܦ̈ܘܳܬܳܐ ܡܦܰܠܓ̈ܬܳܐ. ܡܰܣܗܶܕ ܢܒܺܝܳܐ ܘܳܐܡܰܪ:
ܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ. ܘܰܡܕܰܟܰܝ ܚܰܕ ܒܫܰܒܥܳܐ. ܡܶܛܠܡܳܢܳܐ ܕܶܝܢ ܒܚܺܝܪܳܐ ܩܳܪܶܐ ܠܶܗ ܢܒܺܝܳܐ. ܘܚܰܕ ܒܫܰܒܥܳܐ ܐܶܬܒܚܰܪ. ܘܰܐܝܟܰܢܳܐ ܐܶܡܰܪ ܕܒܰܐܪܥܳܐ ܒܚܺܝܪ. ܘܰܫܡܳܐ ܕܢܽܘܪܳܐ ܠܐ ܐܰܥܶܠ ܠܰܡܨܰܥܬܳܐ. ܡܳܢܳܐ ܕܶܝܢ ܨܳܒܶܐ ܕܢܰܘܕܰܥ ܒܫܶܡ ܡܺܐܡܪܳܐ. ܘܰܠܡܳܢܳܐ ܬܽܘܒ ܩܪܳܝܗܝ ܣܺܐܡܳܐ ܘܠܰܘ ܐܰܝܟ ܣܺܐܡܳܐ. ܐܶܢܳܐ ܐܳܡܰܪ ܐܢܳܐ. ܕܡܺܐܡܪܳܐ ܗܳܪܟܳܐ ܠܶܗ ܠܡܶܠܬܳܐ ܐܰܠܳܗܳܐ ܟܰܢܺܝ ܢܒܺܝܳܐ. ܘܰܒܗܳܢܳܐ ܡܰܙܡܽܘܪܳܐ ܕܰܬܪܶܥܣܰܪ ܥܰܡ ܝܽܘܚܰܢܳܢ ܗܰܘ ܪܳܚܡܳܐ ܘܶܐܘܰܢܓܶܠܺܝܣܛܳܐ ܣܶܠܩܰܬ ܦܶܨܬܶܗ ܕܰܢܒܺܝܳܐ ܕܢܺܐܡܰܪ ܘܢܰܟܬܶܒ. ܡܳܢܳܐ ܓܶܝܪ ܦܽܘܪܫܳܢܳܐ ܐܺܝܬ ܡܰܢ ܒܶܝܬ ܡܶܠܬܳܐ ܐܳܦ ܠܡܺܐܡܪܳܐ. ܠܰܝܬ ܘܠܳܐ ܚܰܕ. ܡܶܠܬܳܐ ܓܶܝܪ ܡܺܐܡܪܳܐ. ܘܡܺܐܡܪܳܐ ܡܶܠܬܳܐ. ܘܚܰܕ ܗ̱ܘ ܚܰܝܠܳܐ ܕܰܬܪ̈ܰܝܗܽܘܢ ܟܽܘ̈ܢܳܝܶܐ. ܘܡܳܐ ܕܫܳܡܥܺܝܢܰܢ ܠܝܽܘܚܰܢܳܢ ܐܶܘܰܢܓܶܠܝܣܛܳܐ ܕܳܐܡܰܪ. ܒܪܺܝܫܺܝܬ ܐܝܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܝܬܰܘܗܝ ܗܘܳܐ ܠܘܳܬ ܐܰܠܳܗܳܐ. ܘܰܐܠܳܗܳܐ ܐܝܬܰܘܗܝ ܗܘܳܐ ܗܽܘ ܡܶܠܬܳܐ (ܝܘܚܢܢ ܐ: ܐ). ܗܳܕܶܐ ܡܶܣܬܰܟܠܝܢܰܢ ܕܶܐܡܰܪ ܬܢܳܢ ܢܒܺܝܳܐ. ܡܺܐܡܪܶܗ ܕܡܳܪܝܳܐ ܦܰܫܶܩ. ܠܰܝܬ ܓܶܝܪ ܫܽܘܚܠܳܦܳܐ ܒܶܝܬ ܡܶܠܬܶܗ ܕܰܐܠܳܗܳܐ ܘܰܠܡܺܐܡܪܶܗ. ܘܡܶܟܺܝܠ ܕܗܳܕܶܐ ܐܶܬܝܰܕܥܰܬ ܠܳܗ̇. ܢܶܒܥܶܐ ܕܡܶܛܠܡܳܢܳܐ ܒܣܺܐܡܳܐ ܐܶܬܡܬܶܠ ܘܠܰܘ ܒܕܰܗܒܳܐ. ܒܰܢܒܺܝܽܘܬܳܐ ܡܶܛܽܠ ܕܰܙܥܘܪܝܳܐ ܗ̱ܝ ܡܶܢ ܫܠܺܝܚܽܘܬܳܐ. ܒܣܺܐܡܳܐ ܓܶܝܪ ܡܰܡܬܠܺܝܢ ܗܘܰܘ ܠܶܗ ܢܒܺܝ̈ܐ ܐܰܠܳܗܳܐ. ܠܘܳܬ ܫܠܺܝܚܽܘܬܳܐ ܕܶܝܢ ܐܰܝܟ ܓܡܺܝܪܽܘܬܳܐ ܕܠܐ ܚܰܣܺܝܪܳܐ܆ ܒܕܰܗܒܳܐ ܡܶܬܦܰܚܰܡ ܥܰܡܰܢܽܘܐܶܝܠ. ܗܳܝܕܶܝܢ ܕܰܒܫܰܒܥܳܐ ܐܶܬܒܚܰܪ. ܡܶܠܬܶܗ ܕܰܐܠܳܗܳܐ ܐܰܒܳܐ. ܘܶܐܬܝܕܰܥ ܕܕܰܟܝܳܐ ܐܝܬܰܘܗܝ. ܕܠܰܝܬ ܒܶܗ ܙܺܐܦܳܐ. ܥܰܠ ܗܳܠܶܝܢ ܫܰܒܥܳܐ ܛܶܟ̈ܣܶܐ ܕܰܡܕܰܒܪܳܢܽܘܬܳܐ ܕܣܺܝܡܺܝܢ ܒܥܺܕܬܳܐ ܡܶܣܬܰܟܠܝܢܰܢ. ܕܰܐܝܠܶܝܢ ܕܶܝܢ ܐܺܝܬܰܝܗܽܘܢ. ܩܰܕܡܳܐܝܬ ܝܺܠܶܦܢܰܢ ܡܶܢ ܢܒܺܝܳܐ ܕܶܐܡܰܪ. ܕܗܳܠܶܝܢ ܐܶܢܶܝܢ ܫܒܰܥ ܥܰܝ̈ܢܰܘܗܝ ܕܡܳܪܝܳܐ ܕܚܳܝܪ̈ܳܢ ܒܟܽܠܳܗ̇ ܐܰܪܥܳܐ (ܙܟܪܝܐ ܕ: ܝ). ܘܬܽܘܒ ܡܘܫܶܐ ܡܶܬܦܩܶܕ ܗܘܳܐ. ܟܰܕ ܥܒܰܕ ܡܢܳܪܬܳܐ ܕܫܰܒܥܳܐ ܫܪ̈ܳܓܺܝܢ ܕܕܰܗܒܳܐ ܢܣܺܝܡ ܥܠܶܝܗ̇. ܘܰܫܠܶܝܡܽܘܢ ܐܶܡܰܪ ܒܡܱ̈ܬܠܶܐ: ܕܚܶܟܡܬܳܐ ܒܢܳܬ ܒܰܝܬܳܐ ܘܐܰܩܝܡܰܬ ܒܶܗ ܫܰܒܥܳܐ ܥܰܡܽܘ̈ܕܶܐ (ܡ̈ܬܠܐ ܛ: ܐ). ܒܰܝܬܳܐ ܕܶܝܢ ܐܝܬܰܘܗܝ ܥܺܕܬܶܗ ܕܰܐܠܳܗܳܐ. ܗܳܝ ܕܰܥܠܶܝܗ̇ ܐܶܡܰܪ ܦܰܘܠܘܣ ܐܰܠܳܗܳܝܳܐ. ܕܣܳܡ ܐܰܠܳܗܳܐ ܒܥܺܕܬܶܗ. ܠܘܩܕܰܡ ܫܠܝ̈ܚܶܐ: ܒܳܬܰܪܗܽܘܢ ܢܒܺܝܷ̈ܐ: ܒܳܬܰܪܗܽܘܢ ܡܰܠܦܳܢܷ̈ܐ: ܒܳܬܰܪܗܽܘܢ ܣܳܥܪ̈ܰܝ ܚܰܝ̈ܠܐܷ: ܒܳܬܰܪܗܽܘܢ ܡܰܘܗ̈ܒܳܬܳܐ ܕܳܐܣܝܽܘܬܳܐ: ܡܥܰܕܪ̈ܳܢܶܐ ܘܰܡܕܰܒܪ̈ܳܢܶܐ: ܘܰܙܢܰܝܴ̈ܐ ܕܠܶܫܳܢܷ̈ܐ (ܐ ܩܘܪ̈ܢܬܝܐ ܝܒ: ܟܚ). ܘܰܒܗܳܠܶܝܢ ܫܰܒܥܳܐ ܐܶܬܒܩܺܝ ܘܐܶܬܒܚܰܪ ܡܶܠܬܶܗ ܕܰܐܠܳܗܳܐ. ܘܟܽܠܗܽܘܢ ܡܺܐܡܪ̈ܶܐ ܓܒܰܝܴ̈ܐ. ܘܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ. ܐܰܪܥܳܐ ܕܶܝܢ ܐܰܘ ܠܢܰܦܫܳܐ ܡܫܰܡܰܗ ܐܰܘ ܠܥܺܕܬܳܐ. ܘܡܶܛܠ ܗܳܢܽܘܢ ܕܗܳܢܽܘܢ ܡܥܰܪ̈ܦܳܢܶܐ ܚܰܟܺܝ̈ܡܶܐ. ܘܐܶܫܬܰܘܕܥܽܘܗܝ ܕܰܐܠܳܗܳܐ ܐܰܒܳܐ. ܕܶܐܬܳܐ ܢܒܰܛܶܠ ܒܓܶܠܝܳܢܳܐ ܕܡܶܐܬܝܬܶܗ ܠܥܳܠܡܳܐ. ܣܶܦ̈ܘܳܬܳܐ ܕܕܰܓܳܠܘܬܳܐ ܡܶܢ ܥܰܡ̈ܡܶܐ ܘܡܶܢ ܠܶܫܳܢܷ̈ܐ. ܡܨܰܠܐܷ ܢܒܺܝܳܐ ܘܐܳܡܰܪ.
ܘܰܐܢܬ ܡܳܪܝܳܐ ܬܶܛܰܪ ܐܶܢܽܘܢ. ܘܬܽܘܒ ܥܰܠ ܢܰܦܫܶܗ ܒܥܳܐ ܘܶܐܡܰܪ:
ܫܰܘܙܶܒܰܝܢܝ ܘܦܰܨܳܢܝ ܡܶܢ ܕܳܪܳܐ ܗܳܢܐ ܠܥܳܠܰܡ. ܕܰܠܟܽܠܗܽܘܢ ܥܰܘܴ̈ܠܐ ܘܥܳܒ̈ܕܰܝ ܒܺܝ̈ܫܳܬܳܐ ܐܰܚܺܝܕܺܝܢ. ܘܡܰܪ̈ܳܚܶܐ ܘܙܰܠܺܝ̈ܠܐ ܠܒܺܝܟܺܝܢ.
ܘܰܟܪܺܝܟܺܝܢ ܪ̈ܰܫܺܝܥܶܐ ܘܰܡܗܰܠܟܺܝܢ. ܐܰܝܟ ܪܰܘܡܳܐ ܙܰܠܺܝܠܳܐ ܕܰܒ̈ܢܰܝ ܐܰܕܽܘܡ. ܡܶܛܽܠ ܡܳܢܳܐ ܕܶܝܢ ܙܰܠܺܝܠܘܬܳܐ ܕܗܳܘܝܳܐ ܗܘܳܬ ܒܪܰܘܡܳܐ ܕܰܐܕܽܘܡ. ܘܰܡܦܰܚܶܡ ܠܗܳܢܽܘܢ ܕܰܐܚܺܝܕܺܝܢ ܗܘܰܘ ܒܗܰܘ ܙܰܒܢܳܐ. ܐܳܦ ܗܳܕܶܐ ܙܳܕܶܩ ܕܢܶܒܥܶܐ܆ ܐܢܳܫܺܝ̈ܢ ܕܶܝܢ ܐܳܡܪܺܝܢ ܥܰܠ ܐܰܕܘ̈ܡܝܶܐ ܗܳܠܶܝܢ ܕܶܐܬܺܝܠܶܕܘ ܡܶܢ ܥܺܝܣܽܘ. ܕܨܰܠܡܳܐ ܗܰܘ ܕܰܦܪܘܕܝܛܺܝ ܐܺܝܬ ܗܘܳܐ ܠܗܽܘܢ ܒܗܰܘ ܪܰܘܡܳܐ ܕܙܰܠܺܝܠܽܘܬܳܐ. ܘܟܰܕ ܠܐܠܳܗܷ̈ܐ ܐܚܪ̈ܳܢܶܐ ܣܳܓܕܺܝܢ ܗܘܰܘ. ܒܗܰܘ ܪܰܘܡܳܐ ܥܺܐܕ̈ܐ ܦܪ̈ܺܝܫܶܐ ܥܳܒܕܺܝܢ ܗܘܰܘ ܒܶܗ. ܡܶܛܽܠ ܕܰܦܪܽܘܕܺܝܛܺܝ ܡܶܬܟܰܢܝܳܐ ܒܶܝܬ ܝܰܘ̈ܢܳܝܶܐ. ܟܰܕ ܡܰܢ ܥܰܪܛܶܠܳܝܳܐܝܬ ܓܰܒܪ̈ܶܐ ܘܢ̈ܫܶܐ ܣܳܠܩܺܝܢ ܗܘܰܘ. ܠܗܰܘ ܪܰܘܡܳܐ ܕܩܳܐܶܡ ܗܘܳܐ ܨܰܠܡܳܐ ܥܠܰܘܗܝ ܕܰܦܪܽܘܕܝܛܺܝ. ܘܬܽܘܒ ܕܠܳܐ ܬܰܚܦܺܝܬܳܐ ܕܒܶܗܬܬܳܐ ܡܶܬܚܰܫܚܺܝܢ ܗܘܰܘ ܕܶܝܢ ܒܪܶܓܬܳܐ ܦܰܩܪܳܐܝܬ ܓܰܒܪ̈ܶܐ ܥܰܡ ܢܷ̈ܫܶܐ. ܠܰܢܝܳܚܶܗ ܕܫܺܐܕܳܐ ܗܰܘ ܕܰܒܨܰܠܡܳܐ ܥܳܡܰܪ ܗܘܳܐ. ܘܠܐ ܡܶܬܟܠܶܝܢ ܗܘܰܘ ܡܶܢ ܗܰܘ ܥܺܐܕܳܐ ܙܰܠܺܝܠܐ. ܘܠܐ ܒܬܽܘ̈ܠܳܬܳܐ ܐܶܢ ܨܳܒ̈ܝܳܢ ܗ̈ܘܰܝ ܠܡܶܣܰܩ ܠܶܗ. ܘܥܰܠ ܗܳܕܶܐ ܠܰܝܬ ܗܘܳܐ ܥܘܩܳܒܳܐ ܥܰܠ ܒܬܽܘ̈ܠܳܬܳܐ ܒܰܐܪܥܳܐ ܕܰܐܕܘ̈ܡܳܝܶܐ. ܡܶܛܠ ܕܰܒܥ̈ܐܕܶܐ ܕܰܦܪܽܘܕܝܛܺܝ ܨܰܠܡܬܳܐ ܡܶܬܚܰܒܠܺܝܢ ܗܘܰܘ ܒܬܽܘܠܰܝ̈ܗܶܝܢ ܕܰܒܬܽܘ̈ܠܳܬܳܐ. ܘܬܰܢܘܰܝ ܡܶܟܺܝܠ ܗܳܘܝܳܐ ܗܘܳܬ ܕܕܰܓܳܠܘܬܳܐ ܒܶܝܬ ܥܠܰܝ̈ܡܶܐ ܠܰܥܠܰܝ̈ܡܳܬܳܐ. ܘܡܶܢ ܒܬܽܘ̈ܠܳܬܳܐ ܠܘܳܬ ܓܰܕܘ̈ܕܶܐ. ܕܟܰܕ ܗܶܢܽܘܢ ܡܶܛܠ ܪܶܓܬܳܐ ܣܳܠܩܺܝܢ ܗܘܰܘ ܠܪܰܘܡܳܐ. ܡܛܰܝܒܺܝܢ ܗܘܰܘ ܘܰܡܫܰܗܶܝܢ. ܘܣܶܓܕܬܳܐ ܕܰܐܠܳܗ̈ܐ ܡܥܺܝܪܳܐ ܠܗܽܘܢ ܠܗܳܕܶܐ ܒܰܛܢܳܢܳܐ ܒܺܝܫܳܐ. ܘܡܶܛܽܠ ܕܰܒܠܶܒܳܐ ܘܰܒܠܶܒܳܐ ܡܡܰܠܠܺܝܢ ܗܘܰܘ. ܘܟܰܕ ܣܳܠܩܺܝܢ ܗܘܰܘ ܡܶܛܠ ܙܰܠܺܝܠܽܘܬܳܐ ܘܰܕܢܶܚܙܽܘܢ ܦܽܘܪܣܳܝܳܐ ܕܰܚܕ̈ܕܶܐ܆ ܗܳܢܽܘܢ ܒܰܛܢܳܢܳܐ ܕܨܰܠܡܬܳܐ ܕܡܶܣܬܰܓܕܳܐ ܡܶܢܗܽܘܢ ܣܳܥܪܺܝܢ ܗܳܕܶܐ ܐܳܡܪܺܝܢ ܗܘܰܘ. ܗܳܟܰܢܳܐ ܠܰܡ ܐܰܚܺܝܕܺܝܢ ܝܰܘܡܳܢܳܐ ܪ̈ܰܫܺܝܥܶܐ ܫܽܘ̈ܠܛܳܢܶܐ ܕܕܰܓܳܠܘܬܳܐ. ܚܢܰܢ ܕܶܝܢ ܢܩܰܒܶܠ ܛܰܝܒܽܘܬܳܐ ܕܰܐܠܳܗܳܐ ܘܢܰܘܕܶܐ ܠܶܗ ܕܰܒܓܶܠܝܳܢܶܗ ܡܶܢ ܐܢܳܫܽܘܬܳܐ ܐܶܣܟܝ̈ܡܶܐ ܛܰܡ̈ܐܐ ܘܙܰܠܺܝ̈ܠܐܷ ܕܰܐܠܦܰܬ ܚܛܺܝܬܳܐ ܠܰܒܢܰܝ̈ܢܳܫܳܐ. ܘܰܬܟܺܝܠܝܢܰܢ ܥܰܠ ܡܫܺܝܚܳܐ ܕܗܽܘ ܢܶܨܽܘܒ ܒܰܢ ܪܶܥܝܳܢܳܐ ܕܢܰܟܦܽܘܬܳܐ ܘܰܕܕܰܟܝܽܘܬܳܐ ܘܰܕܟܺܐܢܘܬܳܐ ܒܝܰܕ ܪܽܘܚܶܗ ܩܰܕܺܝܫܳܐ ܐܰܡܝܢ܀
ܡܙܡܘܪܐ ܕܬܠܬܥܣܪ
ܡܰܘܕܰܥ ܥܰܠ ܡܶܫܬܰܒܩܳܢܘܬܳܐ ܕܰܟܝܳܢܳܐ ܐܢܳܫܳܝܳܐ ܡܶܢ ܐܰܠܳܗܳܐ: ܘܥܰܠ ܟܰܪܝܽܘܬܳܐ ܕܺܐܝܬ ܗܘܳܐ ܠܩܰܕܺܝ̈ܫܶܐ ܥܰܠ ܡܰܦܽܘܠܬܶܗ ܕܳܐܕܳܡ ܡܶܢ ܦܰܪܕܰܝܣܳܐ.
ܟܽܠܗܽܘܢ ܟܺܐܢܷ̈ܐ ܘܙܰܕܺܝ̈ܩܶܐ ܕܰܗܘܰܘ ܒܥܳܠܡܳܐ ܗܳܢܳܐ ܗܳܐ ܡܶܢܥܳܠܰܡ܆ ܘܶܐܫܬܘܺܝܘ ܠܓܶܠܝܳܢܷ̈ܐ ܐܰܠܳܗܳܝܷ̈ܐ ܕܡܶܢ ܫܡܰܝܳܐ. ܘܥܰܠܘ ܒܝܰܕ ܡܰܘܗܰܒܬܳܐ ܕܪܽܘܚܳܐ ܘܓܰܫܘ ܓܰܙܰܘ̈ܗܝ ܥܰܬܺܝܪ̈ܶܐ ܕܰܐܠܳܗܳܐ܆ ܘܰܚܙܰܘ ܠܗܰܘ ܒܽܘܣܳܡܳܐ ܠܳܐ ܡܶܬܚܰܒܠܳܢܳܐ. ܕܩܳܝܡܺܝܢ ܒܶܗ ܚܰܝܠܰܘ̈ܬܳܐ ܥܶܠܳܝܷ̈ܐ. ܒܥܶܢܝܳܢܗܽܘܢ ܕܗܰܘ ܟܝܳܢܳܐ ܡܠܶܐ ܛܘ̈ܒܶܐ. ܘܰܛܪܳܬ ܚܙܳܬܳܐ ܕܢܰܦܫܗܽܘܢ ܥܰܠ ܒܽܘܣܳܡܶܗ ܘܦܽܘܛܳܡܶܗ ܕܦܰܪܕܰܝܣܳܐ ܕܰܢܦܰܩ ܡܶܢܶܗ ܐܳܕܳܡ. ܘܺܝܕܰܥܘ ܕܒܰܐܝܢܳܐ ܪܰܘܡܳܐ ܥܶܠܳܝܳܐ ܩܳܐܶܡ ܗܘܳܐ ܟܝܳܢܳܐ ܐܢܳܫܳܝܳܐ ܒܰܒܪܺܝܬܶܗ ܩܰܕܡܳܝܬܳܐ. ܘܰܐܝܕܳܐ ܡܰܦܽܘܠܬܳܐ ܥܰܦܶܩ ܒܚܰܝܳܒܽܘܬܶܗ. ܘܰܒܡܶܫܬܰܡܥܳܢܽܘܬܶܗ ܕܰܠܘܳܬ ܚܶܘܝܳܐ܆ ܘܠܐ ܫܠܺܝܘ ܡܶܢ ܐܶܒܠܳܐ ܘܡܶܢ ܒܟܳܬܳܐ ܘܡܶܢ ܬܶܢܚ̈ܬܳܐ܆ ܟܽܠ ܟܡܳܐ ܕܰܒܚܰܝܷ̈ܐ ܗܳܠܶܝܢ ܡܶܬܗܰܦܟܺܝܢ ܗܘܰܘ. ܘܡܶܢ ܕܰܡܦܺܝܣܺܝܢ ܘܡܶܬܟܰܫܦܺܝܢ ܠܐܠܳܗܳܐ ܕܢܶܫܪܶܐ ܡܶܢܗܽܘܢ ܓܙܳܪܕܺܝܢܳܐ ܕܰܢܦܰܩ ܥܰܠ ܥܳܠܡܳܐ. ܘܶܐܬܚܰܝܰܒܘ ܒܶܗ ܙܰܕܺܝ̈ܩܶܐ ܥܰܡ ܥ̈ܘܳܠܶܐ ܐܰܟܚܕܳܐ. ܟܰܕ ܩܰܕܡܳܝܳܐ ܐܰܦܺܝܣ ܚܠܳܦ ܐܳܕܳܡ ܚܢܽܘܟ ܓܰܒܪܳܐ ܙܰܕܺܝܩܳܐ. ܗܰܘ ܕܡܶܛܽܠ ܣܰܓܺܝ ܡܥܺܝܩܳܐ ܗܘܳܬ ܠܶܗ ܣܰܟܠܽܘܬܳܐ ܩܰܕܡܳܝܬܳܐ ܕܒܶܝܬ ܐܳܕܳܡ. ܟܰܕ ܬܠܳܬܡܳܐܐ ܫ̈ܢܺܝܢ ܠܐܠܳܗܳܐ ܒܕܶܡ̈ܥܶܐ ܘܰܒܚܰܫܳܐ. ܟܰܕ ܡܦܺܝܣ ܗܘܳܐ ܕܬܶܥܒܰܪ ܣܰܟܠܘܬܳܐ ܗܳܝ ܕܰܗܘܳܬ ܘܢܶܫܬܪܶܐ ܣܝܳܓܳܐ ܕܰܒܥܶܠܕܒܳܒܽܘܬܳܐ ܕܰܥܒܰܕ ܚܶܘܝܳܐ ܒܶܝܬ ܐܰܠܳܗܳܐ ܠܥܳܠܡܳܐ. ܘܗܳܢܳܐ ܥܰܠ ܕܣܰܓܺܝ ܫܦܰܪ ܠܐܠܳܗܳܐ. ܘܰܠܚܳܐ ܒܕܶܡܥܰܘ̈ܗܝ ܟܬܳܒܰܬ ܐܺܝܕܳܐ ܕܰܥܠܰܘܗܝ. ܐܶܫܬܰܢܺܝ ܘܠܐ ܛܥܶܡ ܡܰܘܬܳܐ ܐܰܝܟ ܕܰܟܬܺܝܒ. ܘܬܽܘܒ ܡܣܰܟܶܐ ܗܘܳܐ ܐܳܦ ܢܽܘܚ ܙܰܕܺܝܩܳܐ. ܘܥܰܠܗܳܕܶܐ ܚܰܡܶܫܡܳܐܐ ܫܢܺܝ̈ܢ ܒܰܒܬܽܘܠܽܘܬܳܐ ܥܰܙܺܝ. ܥܕܰܡܳܐ ܕܰܗܘܳܐ ܓܶܠܝܳܢܳܐ ܕܰܐܠܳܗܳܐ. ܘܺܝܕܰܥ ܕܰܠܦܘܪ̈ܢܳܣܶܐ ܐܚܪ̈ܳܢܶܐ ܢܛܺܝܪ ܡܶܢ ܡܕܰܒܪܳܢܽܘܬܳܐ ܐܰܠܗܳܝܬܳܐ. ܒܗܳܢܳܐ ܙܰܒܢܳܐ ܕܡܶܫܬܰܒܩܳܢܽܘܬܳܐ ܕܡܶܢ ܐܰܠܳܗܳܐ ܡܶܬܛܰܪܦܺܝܢ ܗܘܰܘ. ܘܗܳܠܶܝܢ ܪ̈ܺܝܫܰܝ ܐܰܒܳܗ̈ܬܳܐ ܕܒܶܝܬ ܐܰܒܪܳܗܳܡ ܘܥܰܠ ܕܒܳܥܶܝܢ ܗܘܰܘ ܘܡܶܬܪܰܓܪܓܺܝܢ ܕܢܶܚܙܽܘܢ ܠܰܡܕܝܢܬܳܐ ܗܳܝ ܥܶܠܳܝܬܳܐ. ܠܐ ܒܢܰܘ ܠܗܽܘܢ ܒܴ̈ܬܶܐ ܒܰܐܪܥܳܐ ܗܳܕܶܐ ܕܠܰܘ̈ܛܳܬܐ. ܐܶܠܐ ܒܡܰܫ̈ܟܢܶܐ ܥܳܡܪܺܝܢ ܗܘܰܘ. ܟܰܕ ܡܣܰܟܶܝܢ ܗܘܰܘ ܠܦܽܘܢܳܝܳܐ ܕܰܠܦܰܪܕܰܝܣܳܐ. ܒܗܳܕܶܐ ܬܰܟܫܶܦܬܳܐ ܐܦ ܛܽܘܒܳܢܳܐ ܡܽܘܫܶܐ ܡܚܰܘܶܐ ܐܳܦ ܪܶܓܬܶܗ ܒܰܨܠܽܘܬܐ: ܘܰܪܢܳܐ ܕܢܶܓܠܶܐ ܐܪܳܙܳܐ ܕܠܶܒܶܗ ܐܶܠܳܐ ܒܰܠܚܽܘܕ ܠܰܐܠܳܗܳܐ ܒܳܥܶܐ ܗܘܳܐ ܕܢܶܥܒܰܪ ܠܰܐܪܥܳܐ ܕܦܰܠܶܣܛܺܝܢܺܝ ܟܰܕ ܗܽܘ ܒܫܶܡ ܐܰܪܥܳܐ ܠܗܳܝ ܐܰܪܥܳܐ ܕܰܠܥܶܠ ܡܶܢ ܫܡܰܝܳܐ ܡܨܰܠܐ ܗܘܳܐ ܕܢܶܚܙܶܐ. ܐܳܦ ܗܽܘ ܛܽܘܒܳܢܳܐ ܐܻܠܝܳܐ܆ ܗܰܘ ܕܠܐ ܐܶܬܬܦܺܝܣ ܕܢܶܩܢܶܐ ܠܶܗ ܒܰܐܪܥܳܐ ܒܶܝܬ ܡܰܥܡܪܳܐ. ܐܶܠܳܐ ܒܢܰܚ̈ܠܐܷ ܘܰܒܛܽܘܪ̈ܶܐ ܥܳܡܰܪ ܗܘܳܐ. ܟܰܕ ܬܽܘܒ ܡܶܬܪܰܓܪܰܓ ܗܘܳܐ ܠܡܰܥܡܪܳܐ ܕܡܰܠܐܟ̈ܐ. ܘܰܐܒܺܝܠ ܗܘܳܐ ܘܰܟܡܺܝܪ ܗܘܳܐ ܒܚܶܙܘܶܗ. ܘܰܡܣܰܟܶܐ ܘܚܳܐܰܪ ܕܢܶܫܬܪܶܐ ܓܙܳܪܕܺܝܢܳܐ ܕܰܢܦܰܩ ܥܰܠ ܥܳܠܡܳܐ ܒܥܶܠܰܬ ܚܰܘܳܐ. ܘܡܶܛܠܗܳܢܳܐ ܠܳܐ ܨܒܳܐ ܕܢܶܬܦܢܶܐ ܥܰܠ ܐܰܝܠܶܝܢ ܕܡܶܢ ܐܰܪܥܳܐ ܐܶܢܶܝܢ ܐܶܠܳܐ ܒܰܡܣܰܪܩܽܘܬܳܐ ܘܰܒܥܳܢܘܳܝܽܘܬܳܐ ܘܒܰܒܬܽܘܠܽܘܬܳܐ ܥܡܰܪ ܥܰܠ ܐܰܪܥܳܐ. ܘܦܳܠܰܚ ܗܘܳܐ ܦܽܘܠܚܳܢܳܐ ܡܰܠܐܟܳܝܳܐ. ܘܥܰܠ ܕܠܳܐ ܥܕܰܟܺܝܠ ܐܶܬܡܰܠܝ ܗܘܳܐ ܙܰܒܢܳܐ ܕܰܡܣܳܡ ܒܪܺܝܫܳܐ. ܗܰܘ ܚܠܳܦ ܐܰܓܪܳܐ ܕܡܶܬܬܚܺܝܒ ܗܘܳܐ ܠܶܗ ܕܢܶܬܦܪܰܥ ܩܰܒܶܠ ܣܽܘܠܳܩܳܐ ܠܰܫܡܰܝܳܐ. ܘܶܐܬܚܛܶܦ ܒܓܰܘ ܡܰܪܟܰܒܬܳܐ ܕܢܽܘܪܳܐ ܠܰܐܬܪܳܐ ܥܶܠܳܝܳܐ ܕܡܰܠܐܟ̈ܐ. ܘܒܳܬܰܪ ܗܳܢܳܐ ܐܚܪ̈ܳܢܶܐ ܕܶܝܢ ܨܰܠܺܝܘ ܕܢܶܬܦܰܪܩܽܘܢ ܒܶܗ ܡܶܢ ܡܣܳܡ ܒܪܺܝܫܳܐ ܕܰܗܘܳܐ ܒܝܰܕ ܣܰܟܠܽܘܬܳܐ ܩܰܕܡܳܝܬܳܐ. ܒܰܡܨܰܥܬܳܐ ܕܶܝܢ ܕܙܰܕܺܝ̈ܩܶܐ ܒܳܬܰܪ ܚܢܽܘܟ ܘܰܩܕܳܡ ܐܻܠܝܳܐ. ܕܰܘܺܝܕ ܡܶܬܚܙܶܐ ܕܡܰܫܡܰܥ ܩܳܠܶܗ ܒܶܐܒܠܳܐ ܗܳܢܳܐ. ܡܶܛܠ ܕܰܠܗܳܢܳܐ ܝܰܬܺܝܪ ܡܶܢ ܟܽܠܗܽܘܢ ܟܺܐܢܷ̈ܐ ܐܶܬܝܰܗܒܰܬ ܪܘܚܳܐ ܕܰܡܙܰܡܪܳܢܽܘܬܳܐ. ܕܟܽܠܗܽܘܢ ܓܶܠܝ̈ܢܶܐ ܕܗܳܘܶܝܢ ܥܠܰܘܗܝ܆ ܒܩܳܠܳܐ ܢܰܫܠܶܡ ܐܶܢܽܘܢ. ܡܰܫܡܰܥ ܩܳܠܶܗ ܒܡܰܙܡܽܘܪܳܐ ܗܳܢܳܐ ܕܰܬܠܳܬܰܥܣܰܪ ܟܰܕ ܚܳܐܶܫ ܥܰܠ ܬܰܘܚܰܪܬܰܢ ܕܒܰܐܪܥܳܐ ܗܳܕܶܐ ܡܰܠܝܰܬ ܟܽܘ̈ܒܶܐ ܘܳܐܡܰܪ ܟܺܐܢܳܐܺܝܬ:
ܥܕܰܡܳܐ ܠܶܐܡܰܬܝ ܬܶܛܥܶܝܢܝ ܡܳܪܝܳܐ ܠܥܳܠܰܡ. ܥܕܰܡܳܐ ܠܶܐܡܰܬܝ ܬܰܗܦܶܟ ܐܰܦܱ̈ܝܟ ܡܶܢܝ: ܥܕܰܡܳܐ ܠܶܐܡܰܬܝ ܬܣܺܝܡ ܬܰܟܪܺܝܬܳܐ ܒܢܰܦܫܝ. ܘܕܽܘܘܳܢܳܐ ܒܠܶܒܝ ܟܽܠܝܽܘܡ. ܚܳܙܶܐ ܐܰܢܬ ܠܢܰܦܫܳܐ ܦܳܪܽܘܫܬܳܐ. ܚܳܙܶܐ ܐܰܢܬ ܠܓܰܒܪܳܐ ܕܰܐܪܓܶܫ ܒܛܽܘ̈ܒܶܐ ܡܰܠܝܱ̈ܝ ܒܽܘ̈ܣܳܡܶܐ ܐܰܠܳܗܳܝܷ̈ܐ. ܐܰܝܟܰܢܳܐ ܠܳܐ ܡܦܰܚܶܡ ܗܘܳܐ ܒܗܽܘܢ ܦܽܘ̈ܛܳܡܶܐ ܡܰܠܟܳܝܷ̈ܐ ܕܝܠܶܗ. ܚܳܙܶܐ ܐܰܢܬ ܐܰܝܟܰܢܳܐ ܚܫܺܝܒܺܝܢ ܗܘܰܘ. ܐܰܝܟ ܠܐ ܡܶܕܶܡ ܢܝܴ̈ܚܶܐ ܕܡܰܠܟܽܘܬܶܗ. ܘܡܶܬܢܰܒܶܐ ܘܰܡܙܰܡܰܪ ܘܳܐܡܰܪ. ܕܡܶܛܥܳܐ ܛܥܶܐ ܡܶܢ ܐܰܠܳܗܳܐ ܘܡܶܫܒܰܩ ܫܒܺܝܩ ܡܶܢܶܗ. ܟܽܠ ܟܡܳܐ ܕܺܐܝܬܰܘܗܝ ܒܚܰܝܷ̈ܐ ܗܳܠܶܝܢ ܕܥܳܠܡܳܐ ܗܳܢܳܐ ܒܺܝܫܳܐ. ܘܠܰܘ ܗܳܕܶܐ ܒܰܠܚܽܘܕ. ܐܶܠܐ ܬܽܘܒ ܡܚܰܘܶܐ ܕܗܳܟܰܢܳܐ ܠܰܡ ܛܥܺܝܢܺܝܢ ܟܽܠ ܟܡܳܐ ܕܰܒܥܳܠܡܳܐ ܗܳܢܳܐ ܚܢܰܢ. ܟܰܕ ܡܰܗ̈ܦܟܳܢ ܡܶܢ ܠܘܳܬܰܢ ܐܰܦܰܘ̈ܗܝ ܕܰܐܠܳܗܳܐ. ܘܗܽܘ ܪܽܘܚܳܐ ܡܒܰܕܶܩ ܠܰܢ ܒܰܢܒ̈ܝܶܐ. ܕܰܐܝܟ ܕܰܒܚܶܡܬܳܐ ܡܰܗܦ̈ܟܳܢ ܗܘܱ̈ܝ ܠܶܗ ܠܐܠܳܗܳܐ ܐܰܦܱ̈ܘܗܝ ܡܶܢ ܥܳܠܡܳܐ. ܡܶܛܠ ܣܰܟܠܽܘܬܳܐ ܩܰܕܡܳܝܬܳܐ. ܘܬܽܘܒ ܡܰܘܣܶܦ ܢܒܺܝܳܐ܆ ܕܰܥܕܰܡܳܐ ܠܶܐܡܰܬܝ ܬܣܺܝܡ ܬܰܟܪܺܝܬܳܐ ܒܢܰܦܫܝ. ܟܡܳܐ ܠܰܡ ܐܶܢ ܪܰܒ ܐܝܩܳܪܳܐ ܕܡܰܠܟܽܘܬܳܐ ܕܝܣܪܳܐܝܠ. ܠܺܝ ܟܰܪܝܽܘܬܳܐ ܠܐ ܚܳܣܪܳܐ. ܟܽܠ ܟܡܳܐ ܕܝܳܕܰܥ ܐܢܳܐ ܕܰܓܠܺܝܙ ܐܢܳܐ ܡܶܢܳܟ܆ ܡܳܢܳܐ ܐܶܢܽܘܢ ܒܽܘ̈ܣܳܡܶܐ ܗܳܠܶܝܢ ܒܦܽܘܚܳܡܳܐ ܕܗܰܘ ܕܝܠܳܟ. ܘܰܐܝܕܳܐ ܚܰܕܽܘܬܳܐ ܬܶܗܘܶܐ ܠܡܰܢ ܕܰܐܪܓܶܫ ܒܳܟ. ܟܰܕ ܪܰܚܺܝܩ ܡܶܢܳܟ. ܠܰܝܬ ܠܳܗ̇ ܠܢܰܦܫܝ ܒܽܘܣܳܡܳܐ ܟܡܳܐ ܕܡܶܢ ܥܶܢܝܳܢܳܟ ܡܰܒܥܕܳܐ. ܘܕܽܘܘܳܢܳܐ ܘܬܶܢܚ̈ܬܳܐ ܟܪ̈ܺܝܟܳܢ ܠܳܗ̇ ܥܕܰܡܳܐ ܠܝܰܘܡܳܐ ܕܡܶܬܬܪܺܝܡ ܡܶܢ ܡܨܰܥܬܳܐ ܣܝܳܓܳܐ ܕܰܒܥܶܠܕܒܳܒܽܘܬܐ ܘܰܒܫܰܝܢܳܐ ܚܳܙܝܳܐ ܐܰܦܰܝ̈ܟ. ܚܽܘܪ ܗܳܟܺܝܠ ܡܳܢܳܐ ܐܶܡܰܪ ܓܰܒܪܳܐ ܗܳܢܳܐ ܟܺܐܢܳܐ. ܘܰܚܙܺܝ ܐܰܝܟܰܢܳܐ ܐܶܡܰܪ ܕܣܺܝܡܳܐ ܗܘܳܬ ܬܰܟܪܺܝܬܳܐ ܒܢܶܦܫܶܗ. ܗܰܘ ܡܰܢ ܕܟܽܠܝܽܘܡ ܐܺܝܬ ܗܘܳܐ ܠܗ ܕܽܘܘܳܢܳܐ ܒܠܶܒܶܗ ܕܠܐ ܢܶܚܛܶܐ. ܘܡܶܬܕܰܝܰܒ ܥܰܠ ܒܺܝ̈ܫܳܬܳܐ ܕܰܐܚܪ̈ܳܢܶܐ ܕܗܳܘ̈ܝܳܢ ܒܡܰܪܳܚܽܘܬܳܐ. ܘܥܰܠܗܳܢܳܐ ܡܶܫܬܰܡܠܶܐ ܛܘܒܳܐ ܗܰܘ ܕܶܐܡܰܪ ܡܳܪܰܢ܆ ܕܛܽܘܒܰܝܗܽܘܢ ܠܰܐܒܺܝ̈ܠܶܐ ܕܗܶܢܽܘܢ ܢܶܬܒܰܝܐܘܢ (ܡܬܝ ܗ: ܕ). ܡܳܕܶܝܢ ܗܳܠܶܝܢ ܐܶܢܽܘܢ ܐܰܝܠܶܝܢ ܕܫܳܘܶܝܢ ܠܛܽܘܒܳܐ ܗܳܢܳܐ. ܟܰܕ ܡܶܫܬܰܐܠܺܝܢ ܡܶܢ ܒܺܝ̈ܫܳܬܳܐ ܕܡܶܬܥܒ̈ܕܳܢ ܒܥܳܠܡܳܐ ܗܳܢܳܐ ܒܺܝܫܳܐ. ܠܰܘ ܟܰܕ ܓܠܺܝܙܺܝܢ ܡܶܢ ܒܽܘܣܳܡܷ̈ܐ ܦܰܓܪ̈ܳܢܳܝܶܐ ܡܶܢ ܥܶܠܰܬ ܚܰܣܺܝܪܘܬܳܐ. ܘܶܐܠܳܐ ܟܰܕ ܪܰܘܪܒܺܝܢ ܘܥܰܒܺܝܛܺܝܢ ܒܥܽܘܬܪܳܐ. ܐܰܝܟ ܕܳܐܦ ܕܰܘܺܝܕ ܗܰܘ ܕܰܐܠܶܦ. ܕܫܳܒܶܩ ܗܘܳܐ ܦܽܘܪ̈ܦܳܥܶܐ ܘܰܢܝܳܚܷ̈ܐ ܡܰܠܟܳܝܷ̈ܐ ܟܰܕ ܣܳܐܶܡ ܗܘܳܐ ܟܽܠܝܽܘܡ ܕܽܘܘܳܢܳܐ ܒܠܶܒܶܗ. ܠܗܳܠܶܝܢ ܓܶܝܪ ܕܗܳܟܰܢܳܐ ܡܶܬܰܐܒܠܺܝܢ ܦܫܺܝܩ ܠܗܽܘܢ ܕܰܢܨܰܠܽܘܢ ܠܘܳܬ ܐܰܠܳܗܳܐ ܐܰܝܟ ܕܰܘܺܝܕ. ܘܰܒܬܽܘܟܠܳܢܳܐ ܕܰܥܠܰܘܗܝ ܢܺܐܡܰܪ:
ܕܚܽܘܪ ܘܰܥܢܺܝܢܝ ܡܳܪܝܳܐ ܐܰܠܳܗܝ: ܘܰܐܢܗܰܪ ܥܰܝ̈ܢܰܝ ܕܠܐ ܐܶܕܡܰܟ ܠܡܰܘܬܳܐ. ܘܠܐ ܢܺܐܡܰܪ ܒܥܶܠܕܒܳܒܝ ܕܰܙܟܺܝܬܶܗ. ܚܳܙܶܐ ܐܰܢܬ ܐܰܝܟܰܢܳܐ ܒܺܝܕܰܥܬܳܐ ܓܡܺܝܪܬܳܐ ܡܨܰܠܐܷ. ܡܶܛܠ ܕܶܐܡܰܪ ܡܶܢ ܠܥܶܠ܇ ܕܰܥܕܰܡܳܐ ܠܶܐܡܰܬܝ ܬܰܗܦܶܟ ܐܰܦܱ̈ܝܟ ܡܶܢܝ܆ ܘܡܶܬܟܰܫܰܦ ܕܢܶܬܦܢܶܐ ܘܰܢܪܰܚܶܡ ܥܰܠ ܓܶܢܣܰܢ. ܚܰܘܪܶܗ ܕܶܝܢ ܕܰܐܠܳܗܳܐ ܠܰܘ ܡܶܕܶܡ ܣܳܒܰܪ ܐܢܳܐ ܕܺܐܝܬܰܘܗܝ ܐܶܠܐ ܝܰܠܕܶܗ ܡܬܽܘܡܳܝܳܐ. ܗܰܘ ܕܒܶܗ ܐܶܬܦܢܺܝ ܐܰܠܳܗܳܐ ܐܰܒܳܐ ܥܰܠ ܥܳܠܡܳܐ. ܐܳܦ ܫܶܡܫܳܐ ܚܰܘܪܶܗ ܕܒܰܢ ܙܰܠܺܝܩܶܗ ܐܝܬܰܘܗܝ. ܡܳܕܶܝܢ ܚܰܘܪܶܗ ܕܰܐܒܳܐ ܕܒܰܢ ܝܺܚܺܝܕܳܝܶܗ ܐܝܬܰܘܗܝ ܐܰܝܟ ܡܶܠܬܳܐ ܕܰܢܒܺܝܳܐ ܕܰܘܺܝܕ ܘܗܳܕܳܐ ܗ̱ܝ ܡܶܠܬܶܗ ܕܰܢܒܺܝܳܐ. ܕܠܐ ܠܰܡ ܐܶܕܡܰܟ ܠܡܰܘܬܳܐ. ܐܶܠܐ ܐܰܢܗܰܪ ܥܰܝ̈ܢܰܝ ܒܡܰܚܰܬܬܳܟ ܕܨܶܐܕܝ. ܘܠܳܐ ܬܶܒܠܥܰܢܝ ܗܰܘܬܳܐ ܘܰܬܟܽܘܡ ܥܠܰܝ ܘܰܢܡܰܝܶܩ ܒܺܝ ܚܶܘܝܳܐ ܩܳܛܽܘܠܳܐ. ܗܰܘ ܕܰܫܕܳܢܝ ܡܶܢ ܦܰܪܕܰܝܣܳܐ. ܘܠܳܐ ܢܺܐܡܰܪ ܒܥܶܠܕܒܳܒܝ ܕܰܙܟܺܝܬܶܗ. ܘܠܳܐ ܢܰܗܶܠ ܒܡܰܘܬܝ ܐܰܝܟ ܕܰܓܚܶܟ ܥܰܠ ܚܱ̈ܝܰܝ. ܐܶܠܳܐ ܢܶܒܗܰܬ ܒܺܝܫܳܐ ܡܳܐ ܕܡܰܢܗܰܪ ܠܺܝ ܐܰܠܳܗܝ ܥܰܝ̈ܢܰܝ ܒܩܰܒܪܳܐ ܝܰܘܡܳܐ ܪܰܒܳܐ ܕܰܩܝܳܡܬܶܗ. ܚܙܺܝ ܕܰܚܕܺܝܘ ܠܝ ܐܳܠܽܘܨ̈ܝ. ܘܰܓܚܶܟܘ ܒܺܝ ܒܥܶܠܕ̈ܒܳܒܰܝ. ܟܰܕ ܡܶܪܓܰܬ ܪܶܓܠܝ ܘܢܶܦܠܶܬ ܡܶܢ ܫܽܘܥܳܐ ܕܡܰܬܩ̈ܢܳܢ ܗܘܱ̈ܝ ܪ̈ܶܓܠܰܝ ܥܠܰܘܗܝ. ܐܶܠܳܐ ܗܳܫܳܐ ܗܳܐ ܡܦܺܝܣ ܐܢܳܐ. ܕܗܳܝ ܕܰܗܘܳܬ ܬܽܘܒ ܠܐ ܬܶܗܘܶܐ:
ܐܳܠܽܘ̈ܨܰܝ ܢܶܚܕܽܘܢ ܠܺܝ ܟܰܕ ܐܶܙܽܘܥ. ܚܰܝ̈ܠܰܘܳܬܳܐ ܕܚܶܫܽܘܟܳܐ ܢܶܚܕܽܘܢ ܒܡܰܦܰܩܬܶܗ ܘܰܒܙܰܘܥܬܳܐ ܕܰܒܪܶܒܺܝܬܳܐ ܕܺܝܠܳܟ ܢܽܘܗܪܳܐ ܫܰܪܺܝܪܳܐ ܚܳܣ. ܐܶܠܳܐ ܐܰܗܦܶܟ ܬܽܘܒ ܥܠܰܝܗܽܘܢ ܙܰܘܥܬܳܐ ܗܳܝ ܕܰܐܝܬܺܝܘ ܥܠܰܝ. ܘܰܒܟܳܣܳܐ ܕܰܡܙܰܓܘ ܠܺܝ ܐܰܫܩܶܐ ܐܶܢܽܘܢ. ܐܶܢܳܐ ܕܶܝܢ ܐܶܬܒܰܣܰܡ ܒܦܽܘܪܩܳܢܳܟ ܘܕܶܐܚܕܶܬ ܒܳܟ ܓܰܘܣܳܐ ܠܐ ܐܶܙܽܘܥ.
ܘܥܰܠ ܛܰܝܒܽܘܬܳܟ ܐܶܬܬܰܟܠܶܬ. ܠܐ ܢܶܚܕܽܘܢ ܠܺܝ ܒܥܶܠܕܳܒ̈ܒܰܝ. ܐܶܠܐ ܟܰܕ ܚܳܙܶܐ ܐܢܳܐ ܒܡܶܬܦܰܨܝܳܢܽܘܬܳܟ.
ܢܶܪܘܰܙ ܠܶܒܝ ܒܦܽܘܪܩܳܢܳܟ. ܘܶܐܫܰܒܰܚ ܠܡܳܪܝܳܐ ܕܦܰܪܩܰܢܝ. ܘܡܶܢ ܒܳܬܰܪ ܕܶܐܡܰܪ ܢܶܪܘܰܙ ܠܶܒܝ ܒܦܽܘܪܩܳܢܳܟ. ܘܶܐܫܰܒܰܚ ܠܡܳܪܝܳܐ ܕܦܰܪܩܰܢܝ. ܡܶܢ ܐܰܝܟܳܐ ܐܶܡܰܪ ܢܒܺܝܳܐ ܕܶܐܬܦܪܶܩ: ܬܪܶܝܢ ܓܶܝܪ ܦܘܪ̈ܩܳܢܶܐ ܫܰܡܰܗ܆ ܢܶܪܘܰܙ ܠܶܒܝ ܒܦܽܘܪܩܳܢܳܟ. ܗܳܕܶܐ ܡܚܰܘܝܳܐ ܠܢ ܥܰܠ ܚܰܕܽܘܬܳܐ ܕܰܗܘܳܬ ܠܩܰܕܺܝ̈ܫܶܐ ܒܦܽܘܪܩܳܢܳܐ ܕܡܶܢ ܒܺܝܫܳܐ. ܘܶܐܫܰܒܰܚ ܠܡܳܪܝܳܐ ܕܦܰܪܩܰܢܝ. ܥܰܠ ܗܰܘ ܦܽܘܪܩܳܢܳܐ ܓܡܺܝܪܳܐ ܘܰܡܫܰܡܠܝܳܐ ܕܗܳܘܶܐ ܠܶܗ ܠܰܟܝܳܢܳܐ ܐܢܳܫܳܝܳܐ. ܡܶܢ ܡܰܘܬܳܐ ܘܰܚܒܳܠܐܴ ܒܰܩܝܳܡܬܳܐ ܒܝܰܕ ܥܰܡܰܢܽܘܐܝܠ. ܐܰܝܟܰܢܳܐ ܕܟܽܠܰܢ ܢܶܫܬܘܶܐ ܠܓܶܠܝܳܢܶܗ ܕܡܶܢ ܫܡܰܝܳܐ ܕܦܳܪܽܘܩܰܢ ܐܰܡܝܢ܀
ܡܙܡܘܪܐ ܕܐܪܒܥܣܪ
ܕܡܰܘܕܥ ܥܰܠ ܡܣܳܡ ܒܪܺܝܫܳܐ ܕܪ̈ܰܫܺܝܥܶܐ: ܘܥܰܠ ܦܘܢܳܝܳܐ ܕܥܰܡ̈ܡܶܐ.
ܒܡܰܙܡܽܘܪܳܐ ܗܰܘ ܕܰܩܕܳܡ ܗܳܢܳܐ܆ ܡܰܘܕܰܥ ܠܰܢ ܡܙܰܡܪܳܢܳܐ ܕܰܐܝܟܰܢܳܐ ܡܕܰܝܰܪ ܗܘܳܐ ܟܠܝܽܘܡ ܕܽܘܘܳܢܳܐ ܒܠܶܒܶܗ܆ ܥܰܠ ܕܪܰܚܺܝܩ ܗܘܳܐ ܟܝܳܢܳܐ ܐܢܳܫܳܝܳܐ ܡܶܢ ܒܰܝܬܳܝܽܘܬܳܐ ܕܰܐܠܳܗܳܐ. ܝܰܘܡܳܢܳܐ ܕܶܝܢ ܒܬܶܫܒܽܘܚܬܳܐ ܗܳܕܶܐ ܕܰܐܪܒܰܥܣܰܪ ܟܰܕ ܡܶܫܬܰܥܶܐ ܡܰܪܳܚܽܘܬܳܐ ܕܰܐܝܠܶܝܢ ܕܰܡܥܰܪܙܠܺܝܢ ܒܡܰܚܫ̈ܒܳܬܳܐ ܘܰܒܨܶܢ̈ܥܳܬܳܐ ܕܥܰܘܠܳܐ. ܡܶܫܬܰܥܶܐ ܬܽܘܒ ܐܳܦ ܥܰܠ ܥܽܘܗܕܳܢܳܐ ܕܦܽܘܢܳܝܳܐ ܕܥܰܡ̈ܡܶܐ ܕܰܠܘܳܬ ܐܰܠܳܗܳܐ ܡܶܢ ܫܒܺܝܬܶܗ ܕܣܳܛܳܢܳܐ. ܘܡܰܙܡܽܘܪܳܐ ܗܳܢܳܐ ܫܩܰܠ ܥܶܠܬܳܐ ܕܢܶܬܡܰܠܰܠ ܒܰܢܒܺܝܽܘܬܳܐ ܡܶܢ ܫܽܘܚܠܳܦܳܐ ܕܰܗܘܳܐ ܠܰܐܚܺܝܬܘܦܶܠ ܪܳܚܡܗܶ ܡܶܢ ܠܘܳܬܶܗ ܘܟܰܕ ܡܪܰܕ ܥܠܰܘܗܝ ܥܰܡ ܐܰܒܺܝܫܳܠܽܘܡ ܒܪܶܗ. ܘܡܰܘܕܰܥ ܓܶܝܪ ܟܬܳܒܳܐ ܥܰܠ ܡܶܠܟܰܘ̈ܗܝ ܚܰܟܺܝ̈ܡܶܐ ܕܰܐܚܺܝܬܘܦܶܠ܆ ܕܐܢܳܫ ܐܢܳܫ ܠܰܡ ܕܢܶܫܰܐܠ ܒܰܐܠܳܗܳܐ. ܗܳܟܰܢܳܐ ܟܽܠܗܽܘܢ ܡܶܠܟܰܘ̈ܗܝ ܕܰܐܚܺܝܬܘܦܶܠ. ܐܳܦ ܠܕܰܘܺܝܕ ܐܳܦ ܠܰܐܒܺܝܫܳܠܽܘܡ. ܟܰܕ ܕܶܝܢ ܛܥܳܐ ܗܳܢܳܐ ܚܽܘܒܶܗ ܕܕܰܘܺܝܕ ܙܰܕܺܝܩܳܐ ܘܰܗܘܳܐ ܚܰܒܪܳܐ ܘܡܳܠܘܟܳܐ ܠܗܰܘ ܒܪܳܐ ܡܳܪܽܘܕܳܐ ܘܒܺܝܫܳܐ ܐܰܒܺܝܫܳܠܽܘܡ܆ ܠܰܘ ܡܶܟܺܝܠ ܡܶܠܟܷ̈ܐ ܛܳܒܷ̈ܐ ܕܙܰܕܺܝܩܽܘܬܳܐ ܡܳܠܶܟ ܗܘܳܐ ܐܰܝܟ ܕܰܒܝܰܘ̈ܡܰܝ ܕܰܘܺܝܕ ܠܰܐܒܺܝܫܳܠܽܘܡ܇ ܐܶܠܳܐ ܐܰܝܠܶܝܢ ܕܰܡܥܰܫܢܺܝܢ ܗܘܰܘ ܠܶܗ ܠܰܡܪܳܕܳܐ. ܟܡܳܐ ܐܶܢ ܕܡܶܣܬܰܒܪܺܝܢ ܕܰܡܠܶܝܢ ܗܘܰܘ ܚܛܺܝܬܳܐ. ܘܺܝܕܺܝܥܳܐ ܡܶܢ ܗܳܝ ܕܡܰܠܟܶܗ ܕܢܶܕܡܰܟ ܥܰܡ ܢܶܫܰܘ̈ܗܝ ܕܰܐܒܽܘܗܝ ܕܰܘܺܝܕ܆ ܘܰܡܠܰܟ ܠܶܗ ܕܢܶܓܒܶܐ ܓܰܒܪ̈ܶܐ ܘܢܶܪܕܽܘܦ ܒܳܬܰܪ ܕܰܘܺܝܕ. ܒܙܰܒܢܳܐ ܗܰܘ ܕܰܡܛܰܪܰܦ ܗܘܳܐ ܡܰܠܟܳܐ ܡܶܢ ܥܰܡܠܳܐ ܕܰܪܕܽܘܦܝܳܐ. ܠܗܳܢܳܐ ܕܗܳܟܰܢܳܐ ܐܶܫܬܰܚܠܰܦ. ܘܟܰܕ ܚܙܳܐ ܕܰܘܺܝܕ ܐܰܝܟ ܕܰܒܕܽܘܡܳܪܳܐ ܒܙܰܘܥܳܐ ܕܪܘܚܳܐ ܕܰܢܒܺܝܽܘܬܳܐ ܐܳܡܰܪ ܗܘܳܐ:
ܕܳܐܡܰܪ ܥܰܘܳܠܳܐ ܒܠܶܒܗܶ ܕܠܰܝܬ ܐܰܠܳܗܳܐ ܣܳܟ. ܐܶܬܚܰܒܰܠܘ ܘܶܐܬܛܰܢܰܦܘ ܒܨܶܢ̈ܥܳܬܗܽܘܢ. ܡܳܢܳܐ ܓܶܝܪ ܟܰܕ ܚܙܳܐ ܗܘܳܐ ܐܰܚܺܝܬܘܦܶܠ. ܕܠܐ ܫܰܪ ܡܶܠܟܶܗ ܗܰܘ ܕܰܬܪܶܝܢ. ܐܰܪܡܺܝ ܥܰܠ ܚܡܳܪܶܗ ܘܶܐܙܰܠ ܠܒܰܝܬܶܗ ܘܰܦܩܰܪ ܥܰܠ ܒܰܝܬܶܗ. ܘܰܚܢܰܩ ܢܰܦܫܶܗ ܒܚܰܒܠܳܐ ܘܡܺܝܬ. ܗܳܢܳܐ ܐܝܬܰܘܗܝ ܚܰܕ ܡܶܢ ܗܳܠܶܝܢ ܕܶܐܬܚܰܒܰܠܘ ܒܨܶܢ̈ܥܳܬܗܽܘܢ. ܡܶܛܽܠ ܕܠܳܐ ܩܳܡ̈ܝ ܨܶܢ̈ܥܳܬܶܗ ܐܰܝܟ ܕܰܡܠܰܟ. ܥܶܠܬܳܐ ܗܘܱ̈ܝ ܠܰܐܒܕܳܢܶܗ. ܘܥܰܠ ܕܟܽܠܗܽܘܢ ܪ̈ܳܚܡܰܘܗܝ ܐܰܪܚܶܩܘ ܗܘܰܘ ܡܶܢܶܗ܆ ܐܶܡܰܪ:
ܕܠܰܝܬ ܕܥܳܒܶܕ ܛܳܒܬܳܐ. ܟܰܕ ܛܳܒ̈ܬܳܐ ܡܰܢ ܣܰܓܝ̈ܐܬܳܐ ܥܶܒܕܶܬ ܠܗܽܘܢ. ܗܶܢܽܘܢ ܒܺܝ̈ܫܳܬܳܐ ܦܰܪܥܽܘܢܝ. ܘܠܳܐ ܐܶܬܕܟܰܪܘ ܠܺܝ ܚܽܘ̈ܒܠܐܷ ܛܳܒܷ̈ܐ ܕܰܐܪܡܺܝܬ ܠܗܽܘܢ. ܚܢܰܢ ܕܶܝܢ ܡܶܟܺܝܠ ܢܶܬܦܢܶܐ ܠܘܳܬ ܚܰܘܪܳܐ ܕܣܽܘ̈ܟܳܠܶܐ ܪ̈ܽܘܚܳܢܶܐ. ܘܢܶܒܥܶܐ ܕܡܶܛܠ ܡܳܢܳܐ ܡܰܙܡܽܘܪܳܐ ܗܳܢܳܐ ܐܶܡܰܪ ܒܓܶܠܝܳܢܳܐ ܐܰܠܳܗܳܝܳܐ. ܘܡܰܢܽܘ ܥܰܘܳܠܳܐ ܒܰܫܪܳܪܳܐ ܕܶܐܡܰܪ ܕܠܰܝܬ ܐܰܠܳܗܳܐ. ܠܐ ܗܘܳܐ ܗܰܘ ܕܩܳܛܶܠ ܐܢܳܫܳܐ ܘܰܒܥܶܠܕܒܳܒܳܐ ܕܟܺܐܢܽܘܬܳܐ. ܗܳܢܰܘ ܓܶܝܪ ܗܰܘ ܕܰܐܠܶܦ ܡܳܪܽܘܕܽܘܬܳܐ ܠܓܶܢܣܳܐ ܕܰܒܢܰܝ̈ܢܳܫܳܐ ܡܶܢ ܒܪܺܝܫܺܝܬ. ܐܳܦ ܐܰܝܠܶܝܢ ܕܰܗܘܰܘ ܠܶܗ ܐܰܪܥܳܐ ܘܩܰܒܶܠܘ ܙܰܪܥܶܗ. ܘܰܐܪܡܺܝ ܚܒܳܠܶܗ ܒܓܰܘ ܠܶܒܰܝ̈ܗܽܘܢ. ܘܰܥܒܰܕ ܐܶܢܽܘܢ ܕܢܺܐܡܪܽܘܢ ܒܠܶܒܗܽܘܢ ܕܠܰܝܬ ܐܰܠܳܗܳܐ. ܘܥܰܠܗܳܕܶܐ ܐܶܬܚܰܒܰܠܘ ܘܶܐܬܛܰܢܰܦܘ ܒܨܶܢ̈ܥܳܬܗܽܘܢ. ܘܰܒܓܰܘ ܠܶܒܳܐ ܐܰܬܪܳܐ ܕܙܳܕܶܩ ܗܘܳܐ ܕܡܶܢܶܗ ܬܶܕܢܰܚ ܬܰܩܢܽܘܬܳܐ. ܪ̈ܕܰܝ ܡܶܢܶܗ ܒܺܝ̈ܫܳܬܳܐ ܕܟܽܠ ܓܢܶܣ. ܘܛܰܢܶܦ̈ܝ ܘܚܰܒܷ̈ܠܝ ܠܰܒܢܰܝ̈ܢܳܫܳܐ. ܘܡܶܛܠܗܳܕܶܐ ܐܶܬܬܙܺܝܥ ܐܰܠܳܗܳܐ ܡܶܢ ܡܰܘܬܒܶܗ. ܘܰܨܠܳܐ ܚܝܳܪܶܗ ܡܶܢ ܪܰܘܡܳܐ ܥܶܠܳܝܳܐ ܕܰܫܡܰܝܳܐ ܕܰܢܕܺܝܩ ܥܰܠ ܒܢܰܝ̈ܢܳܫܳܐ. ܐܶܡܰܪ ܓܶܝܪ ܢܒܺܝܳܐ:
ܕܡܳܪܝܳܐ ܐܰܕܺܝܩ ܡܶܢ ܫܡܰܝܳܐ ܥܰܠ ܒܢܰܝ̈ܢܳܫܳܐ. ܘܠܰܘ ܕܠܐ ܥܶܠܬܳܐ. ܐܶܠܐ ܕܰܢܚܰܘܶܐ: ܐܶܢ ܐܺܝܬ ܕܣܰܟܽܘܠܬܳܢ ܘܒܳܥܶܐ ܠܐܠܳܗܳܐ. ܠܡܳܢܳܐ ܐܶܡܰܪ ܕܰܐܕܺܝܩ ܡܶܢ ܫܡܰܝܳܐ. ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢܶܗ܆ ܘܝܰܡ̈ܡܶܐ ܘܰܬܗܽܘ̈ܡܶܐ ܘܟܽܠ ܕܺܐܝܬ ܒܗܽܘܢ. ܬܰܪܥܳܐ ܐܰܪܰܐ ܦܬܰܚ ܡܶܢ ܕܰܬܠܰܘ ܘܺܝ̈ܠܐܷ ܩܕܳܡܰܘܗܝ܆ ܐܰܕܺܝܩ ܘܰܚܙܳܐ. ܘܰܠܡܳܢܳܐ ܫܡܳܐ ܕܡܳܪܝܳܐ ܣܳܡ ܘܠܰܘ ܕܰܐܠܳܗܳܐ. ܫܡܳܐ ܓܶܝܪ ܕܰܐܠܳܗܳܐ ܥܰܠ ܚܳܙܶܐ ܟܽܠ ܡܶܬܢܣܶܒ. ܫܡܳܐ ܕܶܝܢ ܕܡܳܪܝܳܐ ܥܰܠ ܡܳܪܽܘܬܳܐ ܕܥܰܠ ܟܽܠ ܡܒܰܕܶܩ. ܥܰܠ ܕܰܢܒܰܕܶܩ ܒܝܰܕ ܗܳܕܶܐ܇ ܐܰܝܟ ܕܥܰܠ ܥܰܒ̈ܕܶܐ ܒܺܝ̈ܫܶܐ ܘܡܰܪ̈ܳܚܶܐ. ܘܥܰܠ ܕܰܚܙܳܐ:
ܕܟܽܠܗܽܘܢ ܣܛܰܘ ܐܰܟܚܕܳܐ ܘܶܐܣܬܠܺܝܘ: ܘܠܰܝܬ ܕܥܳܒܶܕ ܛܳܒܬܳܐ ܐܳܦܠܳܐ ܚܰܕ. ܐܰܗܡܺܝ ܒܗܰܘ ܙܰܒܢܳܐ ܘܠܐ ܢܚܶܬ ܒܳܬܰܪܗܽܘܢ. ܕܒܺܝܫܳܐ ܕܶܝܢ ܘܣܰܓܺܝ ܘܡܰܒܥܕܳܐ ܡܶܢ ܗܳܝ ܕܰܠܪ̈ܰܚܡܶܐ ܬܶܫܬܘܶܐ ܐܝܬܶܝܗ̇. ܗܳܝ ܕܶܝܢ ܕܟܰܕ ܚܳܛܶܝܢ ܠܳܐ ܩܢܶܝܢ ܗܘܰܘ ܡܰܪܓܫܳܢܽܘܬܳܐ ܕܒܺܝ̈ܫܳܬܳܐ ܕܣܳܥܪܺܝܢ ܗܘܰܘ. ܗܳܕܶܐ ܓܶܝܪ ܥܶܒܪܰܬ ܠܡܳܪܝܳܐ܇ ܕܰܐܝܟ ܕܥܰܒ̈ܕܶܐ ܒܺܝ̈ܫܶܐ ܢܕܺܝܩ. ܐܶܡܰܪ ܓܶܝܪ ܢܒܺܝܳܐ:
ܘܠܳܐ ܝܺܕܰܥܘ ܟܽܠ ܥܳܒ̈ܕܰܝ ܥܰܘܠܳܐ. ܕܥܰܘܠܳܐ ܗ̄ܘ ܕܡܶܢܗܘܢ ܡܶܬܥܒܶܕ. ܘܠܳܐ ܚܳܪܘ ܒܰܚ̈ܛܳܗܶܐ. ܘܡܶܛܠܗܳܢܳܐ ܒܰܕܡܽܘܬ ܢܽܘܪܳܐ ܗܳܝ ܕܳܐܟܠܳܐ ܚܰܒܬܳܐ ܐܳܟܠܺܝܢ ܠܥܰܡܝ ܒܫܶܢܰܝ̈ܗܽܘܢ. ܐܶܡܰܪ ܓܶܝܪ ܟܰܕ ܡܰܟܶܣ ܠܡܰܪ̈ܳܚܶܐ:
ܐܳܟܠܰܝ̈ ܠܥܰܡܝ ܡܶܐܟܰܠ ܠܰܚܡܳܐ. ܘܰܠܡܳܪܝܳܐ ܠܐ ܩܪܰܘ. ܕܰܐܝܟ ܗܳܟܰܢܳܐ ܗܘܰܘ ܢܒܺܝܷ̈ܐ ܕܰܓ̈ܠܶܐ ܕܰܗܘܰܘ ܒܥܰܡܳܐ ܕܝܣܪܳܐܝܶܠ. ܕܟܰܕ ܐܳܟܠܺܝܢ ܗܘܰܘ ܕܶܒܚܰܝ̈ܗܽܘܢ ܕܥܰܡܳܐ. ܘܰܐܓܪܳܐ ܕܰܢܒܺܝܽܘܬܗܽܘܢ ܕܠܐ ܢܳܡܽܘܣ ܢܳܣܒܺܝܢ ܗܘܰܘ ܡܶܢܗܽܘܢ. ܘܰܡܛܰܢܦܺܝܢ ܗܘܰܘ ܒܕܰܓܳܠܘܬܳܐ ܕܺܝܠܗܽܘܢ ܐܘܪ̈ܚܳܬܳܐ ܕܬܰܡܺܝ̈ܡܶܐ. ܠܡܳܪܝܳܐ ܠܐ ܩܳܪܶܝܢ ܗܘܰܘ. ܘܕܳܚܠܺܝܢ ܗܘܰܘ ܕܶܚܠܬܳܐ ܐܰܝܠܶܝܢ ܕܛܳܥܶܝܢ ܒܳܬܰܪܗܽܘܢ ܡܶܢ ܓܙܳܡܗܽܘܢ ܕܰܓܳܠܐ. ܠܰܬܪܶܝܢ ܓܰܒܻ̈ܝܢ ܡܦܰܠܓܳܐ ܗܘܳܬ. ܐܶܡܰܬܝ ܕܠܐ ܡܰܣܓܶܝܢ ܡܰܝܬܶܝܢ ܩܽܘܪ̈ܒܳܢܶܐ. ܢܒܺܝܽܘܬܗܽܘܢ ܓܶܝܪ ܕܰܢܒܺܝܷ̈ܐ ܕܰܓ̈ܠܶܐ. ܥܰܠ ܗܳܢܽܘܢ ܕܡܰܪܡܶܝܢ ܗܘܰܘ ܒܦܽܘܡܗܽܘܢ ܡܶܬܢܰܒܶܝܢ ܗܘܰܘ ܥܠܰܝܗܽܘܢ ܫܠܳܡܳܐ ܘܫܰܝܢܳܐ. ܘܰܐܝܠܶܝܢ ܕܠܳܐ ܡܰܝܬܶܝܢ ܗܘܰܘ ܠܗܽܘܢ ܢܶܕܪ̈ܶܐ ܘܡܰܥܣܳܪ̈ܶܐ܆ ܡܰܟܪܙܺܝܢ ܗܘܰܘ ܠܗܽܘܢ ܐܽܘܠܨܳܢܳܐ ܘܰܩܪܳܒܳܐ. ܡܶܛܠܗܳܢܳܐ ܐܳܦ ܢܒܺܝܳܐ ܐܶܡܰܪ ܥܠܰܝܗܽܘܢ: ܕܗܳܐ ܐܶܢܳܐ ܠܰܡ ܥܰܠ ܢܒܺܝܷ̈ܐ ܕܰܓ̈ܠܐ ܐܳܡܰܪ ܡܳܪܝܳܐ. ܕܡܰܛܥܶܝܢ ܠܥܰܡܝ ܕܢܳܟܬܺܝܢ ܒܫܷ̈ܢܰܝܗܽܘܢ. ܘܡܰܟܪܙܺܝܢ ܥܠܰܘܗܝ ܫܠܳܡܳܐ. ܘܡܰܢ ܕܠܐ ܗܳܘܶܐ ܐܰܟܘܳܬܗܽܘܢ ܘܪܳܡܶܐ ܠܗܽܘܢ ܒܦܽܘܡܗܽܘܢ܆ ܡܰܟܪܙܺܝܢ ܗܘܰܘ ܥܠܰܘܗܝ ܩܪܳܒܳܐ (ܡܝܟܐ ܓ: ܗ). ܥܰܠܗܳܕܶܐ ܐܶܡܰܪ ܛܘܒܳܢܳܐ ܕܰܘܺܝܕ ܒܬܶܫܒܽܘܚܬܳܐ ܗܳܕܶܐ ܕܳܐܟܠܰܝ̈ ܠܥܰܡܝ ܡܶܐܟܰܠ ܠܰܚܡܳܐ. ܡܶܛܽܠ ܕܰܒܙܰܒܢܳܐ ܕܰܡܪܰܕ ܐܰܒܺܝܫܳܠܽܘܡ܆ ܗܘܳܐ ܗ̱ܘܳܐ ܐܰܬܪܳܐ ܠܰܢܒܺܝܷ̈ܐ ܕܰܓ̈ܠܶܐ. ܘܡܶܬܢܰܒܶܝܢ ܗܘܰܘ ܠܶܗ ܒܕܰܓܳܠܽܘܬܳܐ܆ ܕܩܳܛܶܠ ܠܶܗ ܠܕܰܘܺܝܕ ܐܰܒܽܘܗܝ ܘܳܐܚܶܕ ܡܰܠܟܽܘܬܶܗ. ܡܶܛܠܗܳܢܳܐ ܟܰܕ ܡܚܰܘܶܐ ܕܰܘܺܝܕ ܕܰܡܓܰܙܰܝ ܗܘܳܐ ܟܢܽܘܫܝܳܐ ܕܗܳܠܶܝܢ ܡܶܢ ܩܰܪܺܝܒܽܘܬܳܐ ܕܰܐܠܳܗܳܐ. ܘܰܐܠܳܗܳܐ ܥܰܡ ܥܰܘܴ̈ܠܶܐ ܠܳܐ ܡܶܬܚܰܠܰܛ. ܐܶܡܰܪ ܓܶܝܪ:
ܡܶܛܠ ܕܰܐܠܳܗܳܐ ܒܕܳܪܰܐ ܗ̱ܘ ܕܙܰܕܺܝ̈ܩܶܐ. ܒܗܳܢܳܐ ܠܰܡ ܕܳܪܳܐ ܠܐ ܡܶܬܚܙܶܐ ܥܽܘܕܪܳܢܶܗ ܕܰܐܠܳܗܳܐ. ܕܪܰܚܺܝܩ ܗ̱ܘ ܡܶܢ ܫܰܪܒܬܳܐ ܕܡܳܪܝܳܐ ܦܽܘܪܩܳܢܶܗ. ܥܰܠ ܕܰܐܡܪܰܚܘ ܥܰܠ ܙܰܕܺܝ̈ܩܶܐ.
ܘܬܰܪܥܺܝܬܶܗ ܕܡܶܣܟܺܢܳܐ ܐܰܒܗܶܬܘ. ܘܠܐ ܠܰܡ ܦܰܪܥܽܘܗܝ ܠܡܰܟܺܝܟܳܐ ܚܽܘܒ̈ܠܐܷ ܕܙܰܕܺܝܩܽܘܬܶܗ. ܘܥܰܠܗܳܕܶܐ ܕܶܐܬܛܠܶܡ ܡܶܢܗܽܘܢ ܙܰܕܺܝܩܳܐ ܘܶܐܬܩܰܦܰܚ ܡܶܣܟܺܢܳܐ. ܡܠܰܒܶܒ ܠܶܗ ܟܺܐܢܳܐ ܠܙܰܕܺܝܩܳܐ܇ ܕܠܳܐ ܢܶܬܪܰܦܶܐ ܡܳܐ ܕܚܳܙܶܐ ܒܺܝ̈ܫܶܐ ܕܡܰܨܠܚܺܝܢ ܘܰܠܗܳܢܽܘܢ ܕܥܰܡ ܥܰܘܴ̈ܠܶܐ ܐܳܡܪܝܢ ܒܠܶܒܗܽܘܢ ܕܠܰܝܬ ܐܰܠܳܗܳܐ. ܡܰܪܬܶܐ ܠܗܽܘܢ ܕܰܢܬܽܘܒܽܘܢ. ܒܗܳܝ ܕܶܐܡܰܪ ܥܰܠ ܡܶܣܟܺܢܳܐ ܙܰܕܺܝܩܳܐ.
ܡܶܛܠ ܕܡܳܪܝܰܐ ܗܘ ܬܽܘܟܠܳܢܶܗ. ܥܕܰܡܳܐ ܠܗܳܪܟܳܐ ܡܰܠܦܳܢܽܘܬܳܐ ܘܡܰܟܣܳܢܽܘܬܳܐ ܡܰܣܪܰܚ ܗܘܳܐ ܢܒܺܝܳܐ. ܗܳܫܳܐ ܕܶܝܢ ܡܫܰܐܳܠܽܘ ܡܫܰܐܶܠ ܘܳܐܡܰܪ:
ܡܰܢ ܢܶܬܶܠ ܡܶܢ ܨܶܗܝܽܘܢ ܦܽܘܪܩܳܢܳܐ ܠܺܝܣܪܳܐܝܠ. ܐܶܢ ܐܶܢܳܐ ܦܳܪܶܩ ܗܘܺܝܬ ܠܝܣܪܳܐܝܠ ܒܥܽܘܕܪܳܢܳܐ ܕܰܐܠܳܗܳܐ ܡܣܰܝܥܳܢܝ. ܐܶܠܐ ܗܳܫܳܐ ܐܚܪܺܢܳܐ ܡܪܰܕ ܘܰܐܡܠܶܟ ܒܳܗ̇. ܒܪܰܡ ܠܰܘ ܗܳܕܶܐ ܢܶܒܥܶܐ܆ ܠܰܘ ܓܶܝܪ ܥܰܠ ܨܶܗܝܽܘܢ ܐܰܪܥܳܢܳܝܬܳܐ ܡܫܰܐܶܠ܆ ܐܶܠܐ ܥܰܠ ܫܡܰܝܳܐ ܐܰܝܕܳܐ ܕܰܐܕܺܝܩ ܡܶܢܳܗ̇ ܡܳܪܝܳܐ. ܣܳܐܶܡ ܫܡܳܐ ܕܨܶܗܝܽܘܢ. ܡܶܢܳܗ̇ ܓܶܝܪ ܝܰܗܒ ܡܳܪܝܳܐ ܦܽܘܪܩܳܢܳܐ ܠܺܝܣܪܳܐܝܠ ܕܰܐܠܳܗܳܐ. ܘܡܶܢܳܗ̇ ܐܶܬܳܐ ܦܳܪܽܘܩܳܐ ܘܰܐܗܦܶܟ ܫܒܺܝܬܶܗ ܕܥܳܠܡܳܐ ܡܶܢ ܣܳܛܳܢܳܐ. ܥܰܡܶܗ ܓܶܝܪ ܕܡܳܪܝܳܐ ܐܝܬܰܘܗܝ ܥܰܡܳܐ ܗܳܢܳܐ ܩܰܕܺܝܫܳܐ. ܕܰܒܝܰܕ ܥܡܳܕܳܐ ܪܽܘܚܳܢܳܐ ܐܶܬܚܙܺܝ ܒܝܰܕ ܡܳܪܰܢ. ܐܶܡܰܪ ܡܙܰܡܪܳܢܳܐ:
ܡܳܐ ܕܡܰܗܦܶܟ ܡܳܪܝܳܐ ܫܒܺܝܬܳܐ ܕܥܰܡܶܗ: ܢܕܽܘܨ ܝܰܥܩܽܘܒ ܘܢܶܚܕܶܐ ܝܺܣܪܳܐܝܠ. ܝܰܥܩܽܘܒ ܕܶܝܢ ܡܳܐ ܕܶܐܡܰܪ ܟܬܳܒܳܐ܆ ܥܰܠ ܦܰܪܨܽܘܦܳܐ ܕܚܰܕ ܓܰܒܪܳܐ ܘܰܕܚܰܕ ܥܰܡܳܐ ܐܶܡܰܪ. ܡܳܐ ܕܶܐܡܰܪ ܝܣܪܳܐܝܠ܆ ܥܰܠ ܬܪܶܥܣܰܪ ܫܰܒ̈ܛܶܐ ܡܫܰܘܕܰܥ. ܐܰܘ ܥܰܠ ܟܽܠܗܽܘܢ ܒܢܱ̈ܝ ܡܰܠܟܽܘܬܳܐ. ܝܰܥܩܽܘܒ ܓܶܝܪ ܡܶܬܩܪܶܐ ܗܘܳܐ ܝܰܥܩܽܘܒ ܛܘܒܳܢܳܐ. ܥܕܰܡܳܐ ܕܰܐܘܠܶܕ ܬܪܶܥܣܰܪ ܒܢܰܝܴ̈ܐ ܘܰܐܒܳܐ ܗܘܳܐ ܠܣܰܓܝ̈ܐܶܐ܆ ܐܶܬܩܪܺܝ ܝܣܪܳܐܶܝܠ. ܡܳܕܶܝܢ ܗܳܪܟܳܐ ܝܰܥܩܽܘܒ ܡܶܬܢܣܶܒ ܕܕܳܐܶܨ ܒܦܽܘܢܳܝܳܐ ܕܰܫܒܺܝܬܳܐ ܕܥܺܕܬܶܗ. ܥܰܠ ܡܶܠܬܳܐ ܗܳܝ ܕܗܰܝܡܢܰܬ ܡܶܢ ܝܣܪܳܐܝܠ ܡܶܬܪܰܓܫܳܢܳܐ. ܕܕܳܝܨܳܐ ܒܦܽܘܢܳܝܳܗ̇ ܕܰܠܘܳܬ ܐܰܠܳܗܳܐ. ܗܳܠܶܝܢ ܐܶܢܽܘܢ ܫܰܒ̈ܛܶܐ ܠܳܐ ܡܶܬܚܰܒܠܳܢܷ̈ܐ ܕܩܳܝܡܺܝܢ ܒܓܰܘ ܡܰܠܟܽܘܬܳܐ ܥܶܠܳܝܬܳܐ ܕܰܫܡܰܝܳܐ ܕܚܳܕܶܝܢ ܘܰܡܫܰܒܚܺܝܢ ܠܐܠܳܗܳܐ. ܠܫܶܛܚܷ̈ܐ ܪ̈ܳܡܶܐ ܕܐܘܪܺܫܠܶܡ ܥܶܠܳܝܬܳܐ. ܘܡܶܬܚܰܠܛܺܝܢ ܒܗܽܘܢ ܐܰܝܟ ܡܶܠܰܬ ܡܳܪܰܢ ܕܰܥܠܰܝܗܽܘܢ. ܡܶܛܠ ܬܰܚܘܺܝܬܳܐ ܕܥܶܪܒܳܐ ܗܰܘ ܕܰܐܒܺܝܕ ܗܘܳܐ ܘܶܐܫܬܟܰܚ. ܕܰܗܘܳܬ ܚܰܕܽܘܬܳܐ ܒܰܫܡܰܝܳܐ ܠܟܽܠܗܽܘܢ ܡܰܠܰܐܟܷ̈ܐ ܡܶܛܽܠܳܬܶܗ. ܕܗܽܘ ܢܰܫܘܶܐ ܠܰܢ ܕܢܶܚܕܶܐ ܥܰܡ ܝܣܪܳܐܝܠ ܘܢܰܣܶܩ ܠܶܗ ܫܽܘܒܚܳܐ ܥܰܠ ܦܽܘܢܳܝܰܢ ܗܳܫܳܐ ܘܰܒܟܽܠܙܒܰܢ ܐܰܡܝܢ܀
ܡܙܡܘܪܐ ܕܚܡܫܬܥܣܪ
ܡܰܘܕܰܥ ܕܰܠܒܶܝܬ ܡܰܥܡܪܳܐ ܕܰܐܠܳܗܳܐ܆ ܙܰܕܝ̈ܩܶܐ ܒܰܠܚܽܘܕ ܫܳܘܶܝܢ
ܛܽܘܒܳܢܳܐ ܕܰܘܺܝܕ ܟܰܕ ܢܦܰܩ ܡܶܢ ܐܘܪܺܫܠܶܡ܆ ܘܰܥܪܰܩ ܡܶܢ ܩܕܳܡ ܐܰܒܺܝܫܳܠܘܡ ܡܳܪܽܘܕܳܐ܆ ܛܥܶܢܘ ܗܘܰܘ ܨܳܕܽܘܩ ܘܰܐܒܝܬܳܪ ܩܺܐܒܽܘܬܶܗ ܕܡܳܪܝܳܐ. ܘܰܢܦܰܩܘ ܗܘܰܘ ܕܢܺܐܙܽܠ̱ܘܢ ܥܰܡܶܗ. ܐܰܝܟ ܕܥܰܡ ܓܰܒܪܳܐ ܙܰܕܺܝܩܳܐ. ܘܗܶܢܽܘܢ ܐܰܝܟ ܓܰܒܪ̈ܶܐ ܫܰܪܺܝܪ̈ܶܐ ܕܡܰܚܒܺܝܢ ܗܘܰܘ ܠܓܰܒܪܳܐ ܫܰܪܺܝܪܳܐ ܘܰܠܡܰܠܟܳܐ ܕܰܡܫܺܝܚ ܡܶܢ ܐܰܠܳܗܳܐ. ܟܰܕ ܕܶܝܢ ܡܶܣܬܰܪܰܕ ܗܘܳܐ ܕܰܘܺܝܕ ܡܶܢ ܩܰܫܝܽܘܬܶܗ ܕܰܐܒܺܝܫܳܠܽܘܡ܆ ܘܠܳܐ ܝܳܕܰܥ ܗܘܳܐ ܕܰܐܝܢܳܐ ܫܘܠܳܡܳܐ ܫܳܩܶܠ܆ ܕܠܳܐ ܬܺܐܙܰܠ ܩܺܐܒܽܘܬܶܗ ܕܡܳܪܝܳܐ ܒܰܥܪܘܩܝܳܐ܆ ܘܬܶܫܪܶܐ ܒܕܽܘ̈ܟܝܬܳܐ ܕܺܐܝܬܰܝܗܶܝܢ ܠܐ ܡܝܰܩܪ̈ܳܬܳܐ. ܐܶܡܰܪ ܗܘܳܐ ܠܘܳܬ ܪ̈ܰܒܰܝ ܟܳܗ̈ܢܶܐ. ܕܰܐܗܦܶܟܶܝܗ̇ ܩܺܐܒܽܘܬܶܗ ܕܡܳܪܝܳܐ: ܛܳܟ ܐܶܫܟܰܚ ܪ̈ܰܚܡܶܐ ܒܥܰܝ̈ܢܰܝ ܡܳܪܝܳܐ. ܘܢܰܥܛܦܰܢܝ ܡܶܢ ܐܽܘܠܨܳܢܳܐ ܘܰܢܚܰܘܶܝܢܝ ܠܶܗ ܘܰܠܕܰܝܪܶܗ (ܒ ܫܡܘܐܝܠ ܝܗ: ܟܗ). ܟܰܕ ܕܶܝܢ ܥܶܛܦܰܬ ܩܺܐܒܽܘܬܳܐ܆ ܡܶܬܟܰܫܰܦ ܗܘܳܐ ܕܰܘܺܝܕ ܘܒܳܟܶܐ܆ ܕܢܶܦܢܶܐ ܡܶܢ ܪܕܽܘܦܝܳܐ ܘܢܶܣܓܽܘܕ ܩܕܳܡ ܐܳܪܽܘܢܶܗ ܕܡܳܪܝܳܐ. ܘܰܒܗܰܘ ܙܰܒܢܳܐ ܐܶܬܢܰܒܺܝ ܡܰܙܡܽܘܪܳܐ ܗܳܢܳܐ ܕܚܰܡܶܫܬܰܥܣܰܪ. ܘܟܰܕ ܝܺܕܰܥ ܕܡܶܛܠ ܥܰܘܠܳܐ ܕܒܶܝܬ ܐܽܘܪܺܝܳܐ ܒܺܝ̈ܫܳܬܳܐ ܗܳܠܶܝܢ ܣܳܒܶܠ܆ ܐܶܬܬܙܺܝܥ ܗܘܳܐ ܒܠܶܒܶܗ ܕܕܰܠܡܳܐ ܬܽܘܒ ܫܰܒܛܳܐ ܐܚܪܺܢܳܐ ܚܰܝܳܒ. ܕܢܶܬܡܬܰܚ ܥܠܰܘܗܝ ܡܶܢ ܟܺܐܢܽܘܬܳܐ. ܘܥܰܠܗܳܕܶܐ ܐܰܝܟ ܕܰܒܫܽܘܐܳܠܳܐ ܡܙܰܡܰܪ ܗܘܳܐ ܘܳܐܡܰܪ:
ܡܪܝܳܐ ܡܰܢܽܘ ܢܶܥܡܰܪ ܒܡܰܫܟܢܳܟ: ܘܡܰܢܽܘ ܢܶܫܪܶܐ ܒܛܽܘܪܳܟ ܩܰܕܺܝܫܳܐ. ܡܰܢ ܫܳܘܶܐ ܡܶܢ ܐܰܝܠܶܝܢ ܕܥܰܡ ܒܶܣܪܳܐ ܡܥܰܪܙܠܺܝܢ ܕܢܶܥܡܰܪ ܒܓܰܘ ܡܰܫܟܢܳܐ ܕܰܟܝܳܐ ܘܩܰܕܺܝܫܳܐ. ܘܡܰܢܽܘ ܕܰܡܨܰܠܰܠ ܡܶܢ ܬܶܛܪܳܐ ܕܒܺܝ̈ܫܳܬܳܐ܆ ܟܰܕ ܠܰܝܬ ܝܽܘܩܪܳܐ ܕܰܚܛܳܗ̈ܐ ܕܢܳܬܰܥ ܠܶܗ ܠܘܳܬ ܥܽܘܡܩܳܐ. ܕܢܶܬܥܰܠܶܐ ܠܛܘܪܳܟ ܩܰܕܺܝܫܳܐ ܘܢܶܥܡܰܪ ܒܶܗ. ܚܢܰܢ ܕܶܝܢ ܡܳܐ ܕܫܳܡܥܺܝܢܰܢ ܕܳܐܡܰܪ ܡܰܫܟܢܳܐ. ܠܐ ܢܶܣܰܒ ܒܬܰܪܥܺܝܬܰܢ܆ ܕܥܰܠ ܡܰܫܟܢܳܐ ܕܣܳܗܕܽܘܬܳܐ. ܗܰܘ ܕܒܰܙܒܰܢ ܥܡܰܪ ܒܶܗ ܚܰܦܢܺܝ ܐܳܦ ܦܺܝܢܚܶܣ ܒܢܱ̈ܝ ܥܺܝܠܺܝ ܟܳܗܢܳܐ. ܟܳܗ̈ܢܶܐ ܡܛܰܡܱ̈ܐܝ ܩܽܘܕܫܳܐ ܢܰܣܒܰܪ. ܘܠܐ ܬܽܘܒ ܠܛܽܘܪܳܐ ܕܨܶܗܝܽܘܢ ܗܰܘ ܕܒܰܙܒܰܢ ܙܒܰܢ ܥܳܡܪܺܝܢ ܗܘܰܘ ܒܶܗ ܢܒܺܝܷ̈ܐ ܕܰܓ̈ܠܶܐ ܕܶܐܡܰܪ. ܐܶܠܐ ܡܰܫܟܢܳܐ ܗܰܘ ܕܶܐܡܰܪ ܐܝܬܰܘܗܝ ܗܰܘ ܕܰܚܙܳܐ ܡܽܘܫܶܐ ܠܥܶܠ ܡܶܢ ܫܡܰܝܳܐ. ܘܰܢܚܶܬ ܘܰܥܒܰܕ ܐܰܟܘܳܬܶܗ ܒܡܰܕܒܪܳܐ. ܛܘܪܳܐ ܕܶܝܢ ܩܰܕܺܝܫܳܐ܆ ܕܡܳܪܝܳܐ ܫܪܶܐ ܒܶܗ ܐܝܬܰܘܗܝ. ܗܰܘ ܕܒܰܢܝܳܐ ܥܠܰܘܗܝ ܠܥܶܠ ܡܶܢ ܫܡܰܝܳܐ ܨܶܗܝܽܘܢ ܡܕܺܝܢܬܶܗ ܕܡܰܠܟܳܐ ܪܰܒܳܐ܇ ܕܡܶܬܪܰܓܪܓܝܺܢ ܗܘܰܘ ܠܳܗ̇ ܢܒܺܝܷ̈ܐ ܕܢܶܩܪܒܽܘܢ ܠܛܽܘܪܳܗ̇. ܕܰܥܠܶܝܗ̇ ܐܶܡܰܪ ܫܠܝܚܳܐ ܐܰܠܳܗܳܝܳܐ ܦܰܘܠܘܣ܆ ܠܩܰܕܺܝ̈ܫܶܐ ܕܗܰܝܡܶܢܘ ܡܶܢ ܥܶܒܪ̈ܳܝܶܐ ܒܡܳܪܝܳܐ. ܕܰܐܢܬܽܘܢ ܠܰܡ ܐܶܬܩܰܪܰܒܬܽܘܢ ܠܛܘܪܳܐ ܕܨܶܗܝܽܘܢ܆ ܘܠܰܡܕܺܝܢܬܶܗ ܕܡܰܠܟܳܐ ܪܰܒܳܐ. ܘܠܐܘܪܺܫܠܶܡ ܕܒܰܫܡܰܝܳܐ: ܘܰܠܟܶܢ̈ܫܶܐ ܕܪ̈ܶܒܘܳܬܳܐ ܕܡܰܠܰܐܟܷ̈ܐ (ܥܒܪ̈ܝܐ ܝܒ: ܟܒ). ܗܳܢܰܘ ܗܰܘ ܛܽܘܪܳܐ ܩܰܕܺܝܫܳܐ ܕܶܐܡܰܪ ܕܰܘܺܝܕ. ܕܡܰܢܽܘ ܢܶܫܪܶܐ ܒܶܗ. ܡܶܛܠ ܕܰܠܡܰܣܩܳܢܰܘ̈ܗܝ ܕܗܳܢܳܐ ܠܐ ܣܳܠܩܺܝܢ ܣܳܥܪ̈ܰܝ ܡܽܘ̈ܡܶܐ ܘܰܡܗܰܠܟܱ̈ܝ ܒܽܐܘܪ̈ܚܳܬܳܐ ܕܥܰܘܠܳܐ. ܘܰܡܦܰܫܶܩ ܠܶܗ ܪܽܘܚܳܐ ܘܳܐܡܰܪ:
ܕܰܐܝܢܰܐ ܗ̄ܘ ܕܰܡܗܰܠܶܟ ܕܠܐ ܡܽܘܡ ܘܥܳܒܶܕ ܙܰܕܺܝܩܽܘܬܳܐ. ܘܰܡܡܰܠܶܠ ܩܘܫܬܳܐ ܒܠܶܒܶܗ: ܘܠܐ ܢܰܟܽܘܠܬܳܢ ܒܠܶܫܳܢܶܗ: ܘܠܐ ܥܳܒܶܕ ܠܚܰܒܪܶܗ ܒܺܝܫܬܳܐ. ܫܘܚܕܳܐ ܥܰܠ ܩܰܪܝܒܶܗ ܠܐ ܡܩܰܒܶܠ: ܡܰܣܠܰܝ ܒܥܰܝ̈ܢܰܘܗܝ ܡܰܪܓܙܳܢܳܐ. ܘܰܠܕܳܚܠܰܘ̈ܗܝ ܕܡܳܪܝܳܐ ܡܝܰܩܰܪ. ܝܳܡܶܐ ܠܚܰܒܪܶܗ ܘܠܐ ܡܕܰܓܶܠ: ܘܟܶܣܦܶܗ ܒܪܶܒܺܝܬܳܐ ܠܐ ܝܳܗܶܒ: ܘܫܽܘܚܕܳܐ ܥܰܠ ܙܰܟܳܝܳܐ ܠܐ ܢܳܣܶܒ. ܗܳܠܶܝܢ ܦܶܬܓܳܡܷ̈ܐ ܠܳܐ ܣܢܺܝܩܺܝܢ ܕܰܢܢܰܗܰܪ ܐܶܢܽܘܢ ܒܦܽܘܫܳܩܳܐ ܝܰܬܺܝܪܳܐ. ܟܽܠܗܽܘܢ ܓܶܝܪ ܒܕܶܢܚܰܝ̈ܗܽܘܢ ܓܠܰܝܴ̈ܐ܆ ܡܢܰܗܪ̈ܳܢܶܐ ܐܶܢܽܘܢ ܘܰܡܦܰܫܩܳܢܷ̈ܐ ܕܢܰܦܫܗܽܘܢ. ܘܡܰܠܦܳܢܘܬܳܐ ܐܶܢܽܘܢ ܡܚܰܪܰܪܬܳܐ ܕܠܰܝܬ ܠܳܗ̇ ܬܰܚܦܺܝܬܳܐ ܐܳܦ ܫܽܘܫܶܦܳܐ ܕܒܶܝܬ ܡܽܘܫܶܐ. ܘܦܽܘܫܳܩܗܽܘܢ ܕܗܳܠܶܝܢ ܗܳܢܰܘ. ܕܢܶܥܒܶܕ ܐܶܢܽܘܢ ܦܳܪܽܘܫܳܐ. ܬܰܥܕܘ̈ܕܶܐ ܐܶܢܽܘܢ ܓܶܝܪ ܕܰܐܝܠܶܝܢ ܕܚܳܙܩܺܝܢ ܒܽܐܘܪܚܳܐ ܫܡܰܝܳܢܺܝܬܳܐ. ܘܰܙܘܴ̈ܕܶܐ ܐܶܢܽܘܢ ܕܰܐܝܢܳܐ ܕܨܳܒܶܐ ܒܛܽܘܪܶܗ ܩܰܕܺܝܫܳܐ ܕܰܐܠܳܗܳܐ. ܗܰܘ ܕܒܰܢܝܳܐ ܥܠܰܘܗܝ ܡܕܺܝܢܬܳܐ ܕܡܰܠܟܽܘܬܶܗ. ܘܡܰܢ ܕܗܽܘ ܚܰܣܺܝܪ܆ ܠܰܝܬ ܠܶܗ ܐܘܪܚܳܐ ܕܢܶܥܽܘܠ ܠܬܰܪܥܳܐ ܕܰܡܕܺܝܢܬܶܗ ܕܡܰܠܟܳܐ ܪܰܒܳܐ. ܗܰܘ ܕܢܳܛܰܪ ܠܗܽܘܢ ܘܰܡܗܰܠܶܟ ܒܗܽܘܢ. ܘܰܡܚܰܘܶܐ ܦܺܐܪ̈ܰܝܗܽܘܢ ܒܰܩܢܘܡܶܗ. ܡܰܢܰܥ ܡܶܟܺܝܠ ܠܒܶܝܬ ܡܰܫܪܝܳܐ ܕܠܳܐ ܙܳܐܰܥ. ܘܥܰܠܗܳܕܶܐ ܡܰܝܬܶܐ ܢܒܺܝܳܐ ܘܳܐܡܰܪ:
ܕܡܰܢ ܕܥܳܒܶܕ ܗܳܠܶܝܢ܆ ܟܺܐܝܢ ܗ̱ܘ ܘܠܐ ܡܶܬܬܙܺܝܥ ܠܥܳܠܰܡ܀
ܡܙܡܘܪܐ ܕܫܬܥܣܪ
ܡܰܘܕܰܥ ܥܰܠ ܝܳܪܬܽܘܬܳܐ ܕܩܰܕܺܝ̈ܫܶܐ: ܘܥܰܠ ܩܝܳܡܬܶܗ ܕܰܡܫܺܝܚܳܐ ܕܰܗܘܳܬ ܕܠܳܐ ܚܒܳܠܳܐ.
ܐܰܝܠܶܝܢ ܕܡܶܫܬܰܥܶܐ ܠܰܢ ܡܙܰܡܪܳܢܳܐ ܒܬܶܫܒܽܘܚܬܳܐ ܗܳܕܶܐ ܕܶܫܬܳܬܰܥܣܰܪ܆ ܠܢܺܝ̈ܫܶܐ ܕܠܐ ܕܳܡܶܝܢ ܠܰܚ̈ܕܳܕܶܐ ܡܚܰܘܶܝܢ ܠܰܢ܆ ܠܰܘ ܓܶܝܪ ܛܶܟܣܳܐ ܕܫܰܪܺܝ ܟܰܕ ܡܙܰܡܰܪ܆ ܒܶܗ ܩܪܶܒ ܨܶܝܕ ܫܽܘܠܳܡܳܐ. ܥܰܡ ܓܶܝܪ ܐܚܪ̈ܳܢܝܳܬܳܐ ܕܠܐ ܠܳܚ̈ܡܳܢ ܠܰܐܝܠܶܝܢ ܕܺܐܝܬ ܒܫܘܪܳܝܳܐ ܘܰܒܫܽܘܠܳܡܳܐ. ܕܰܒܡܶܨܥܰܬ ܬܶܫܒܽܘܚܬܳܐ ܐܰܟܬܶܒ ܐܶܢܶܝܢ. ܒܪܰܡ ܕܶܝܢ ܡܶܫܟܚܺܝܢܰܢ ܕܰܒܙܰܒܢܳܐ ܕܰܙܩܺܝܦ ܗ̱ܘܐ ܥܠܰܘܗܝ ܟܺܝܡܽܘܢܳܐ ܕܽܐܘܠܨܳܢܳܐ ܡܶܢ ܫܳܐܘܳܠ ܒܥܶܠܕܒܳܒܶܗ ܐܶܬܢܰܒܺܝ ܗܳܠܶܝܢ. ܐܳܡܪܺܝܢ ܓܶܝܪ ܕܰܒܗܰܘ ܙܰܒܢܳܐ ܕܡܶܬܛܰܫܶܐ ܗܘܳܐ ܒܡܰܕܒܪܳܐ ܕܰܡܥܽܘܢ ܐܶܡܰܪ ܗܘܳܐ ܗܳܠܶܝܢ: ܘܗܳܪܟܳܐ ܐܶܫܬܟܰܚܘ ܐܢ̈ܫܳܐ ܙܺܐܦܴ̈ܢܶܐ ܘܪ̈ܰܫܺܝܥܶܐ ܕܰܡܥܰܕܪܺܝܢ ܗܘܰܘ ܠܒܺܝܫܽܘܬܶܗ ܕܫܳܐܘܳܠ ܥܰܠ ܕܰܘܺܝܕ. ܡܰܘܕܰܥ ܗܳܟܺܝܠ ܟܬܳܒܳܐ܇ ܕܰܣܠܶܩܘ ܐܢ̈ܫܳܐ ܙܺܐܦܴ̈ܢܶܐ ܠܘܳܬ ܫܳܐܘܳܠ ܘܶܐܡܰܪܘ ܠܶܗ: ܕܗܳܐ ܕܰܘܺܝܕ ܡܶܬܛܰܫܶܐ ܥܰܡܰܢ ܒܥܳܒܳܐ ܕܓܶܒܥܘܬ ܡܶܢ ܝܰܡܺܝܢܳܐ ܕܰܐܫܺܝܡܽܘܢ. ܘܗܳܫܳܐ … ܚܽܘܬ ܥܠܰܝܢ ܘܰܚܢܰܢ ܢܰܫܠܡܺܝܘܗܝ ܒܺܐܝܕܳܟ ܡܳܪܝ ܡܰܠܟܳܐ (ܐ ܫܡܘܐܝܠ ܟܓ: ܝܛ-ܟ). ܗܳܠܶܝܢ ܕܶܝܢ ܐܰܝܟ ܕܡܶܢ ܣܽܘܟܳܠܳܐ ܠܶܣܛܳܝ̈ܐ ܗܘܰܘ ܘܐܢܴ̈ܫܳܐ ܕܰܒܟܽܠܙܒܰܢ ܡܦܰܠܦ̈ܠܳܢ ܗܘܱ̈ܝ ܐܝ̈ܕܰܝܗܽܘܢ ܒܰܕܡܳܐ ܙܰܟܳܝܳܐ. ܟܰܕ ܕܶܝܢ ܩܰܒܶܠ ܐܶܢܽܘܢ ܫܳܐܘܳܠ ܒܚܰܕܽܘܬܳܐ܆ ܫܰܕܰܪ ܐܶܢܽܘܢ ܕܰܢܥܰܩܒܽܘܢ ܕܽܘܟܬܶܗ ܕܕܰܘܺܝܕ ܒܰܒܛܺܝܠܽܘܬܳܐ. ܘܢܶܗܦܟܽܘܢ ܠܘܳܬܶܗ ܘܢܶܕܒܪܽܘܢ ܠܫܳܐܘܳܠ ܠܡܺܐܙܰܠ ܒܳܬܰܪ ܕܰܘܺܝܕ. ܘܦܰܢܺܝ ܠܗܽܘܢ ܫܳܐܘܳܠ ܘܶܐܡܰܪ: ܒܪܺܝܟܺܝܢ ܐܢܬܽܘܢ ܠܡܳܪܝܳܐ ܕܚܳܣܬܽܘܢ ܥܠܰܝ. ܗܳܫܳܐ ܙܶܠܘ ܬܶܒܘ ܛܰܒܘ ܘܰܐܝܬܰܘ ܝܰܬܒܶܗ. ܘܕܰܥܘ ܘܰܚܙܰܘ ܕܽܘܟܬܶܗ ܕܬܶܗܘܶܐ ܪܶܓܠܶܗ ܕܡܰܢ ܕܰܚܙܳܝܗܝ ܬܰܡܳܢ (ܐ ܫܡܘܐܝܠ ܟܓ: ܟܐ-ܟܒ). ܘܟܰܕ ܓܳܫܽܘ̈ܫܶܐ ܗܘܰܘ ܙܺܐܦܳܢܷ̈ܐ ܘܥ̈ܘܳܠܶܐ ܠܡܰܠܟܳܐ. ܕܡܶܬܬܰܥܒܰܕ ܗܘܳܐ ܡܶܢ ܪܽܘܚܳܐ ܒܺܝܫܬܳܐ. ܘܰܥܛܰܦܘ ܠܘܳܬܶܗ ܡܶܢܗܽܘܢ. ܘܡܶܢܗܽܘܢ ܦܳܫܘ ܠܘܳܬ ܕܰܘܺܝܕ. ܘܰܢܦܰܩ ܫܳܐܘܳܠ ܥܰܡ ܚܰܝ̈ܠܰܘܳܬܳܐ ܕܝܣܪܳܐܝܠ ܠܡܶܒܥܳܐ ܠܕܰܘܺܝܕ. ܛܽܘܪܳܐ ܡܶܕܶܡ ܩܳܡ ܒܰܡܨܰܥܬܳܐ ܕܰܬܪ̈ܰܝܗܽܘܢ. ܘܕܰܘܺܝܕ ܘܓܰܒܪ̈ܰܘܗܝ ܡܶܢ ܚܰܕ ܓܰܒܳܐ ܕܛܽܘܪܳܐ ܥܳܪܩܺܝܢ ܗܘܰܘ. ܘܫܳܐܘܳܠ ܘܰܕܥܰܡܶܗ ܘܪܳܕܦܺܝܢ ܗܘܰܘ ܡܶܢ ܓܰܒܳܐ ܐܚܪܺܢܳܐ ܕܛܽܘܪܳܐ ܠܕܰܘܺܝܕ ܘܠܐܝܠܶܝܢ ܕܥܰܡܶܗ. ܛܶܒܳܐ ܡܶܟܺܝܠ ܕܰܦܠܶܫܬܳܝ̈ܐ ܕܰܣܠܶܩܘ ܘܰܫܪܰܘ ܥܰܠ ܐܰܪܥܳܐ ܕܺܝܣܪܳܐܝܠ ܘܰܥܛܰܦ ܗܘܳܐ ܫܳܐܘܳܠ ܡܶܢ ܒܳܬܰܪ ܕܰܘܺܝܕ. ܟܰܕ ܕܶܝܢ ܠܗܳܢܳܐ ܢܽܘܛܳܪܳܐ ܕܡܶܢ ܐܰܠܳܗܳܐ ܚܙܳܐ ܗܘܳܐ ܕܰܘܺܝܕ. ܡܙܺܝܥ ܗܘܳܐ ܩܺܝܬܳܪܶܗ ܘܰܡܙܰܡܰܪ ܘܡܰܘܕܶܐ ܘܳܐܡܰܪ:
ܢܰܛܰܪܰܝܢܝ ܐܰܠܳܗܳܐ ܡܶܛܠ ܕܰܥܠܰܝܟ ܐܶܬܬܰܟܠܶܬ: ܘܶܐܡܪܶܬ ܠܡܳܪܝܳܐ ܕܡܳܪܝ ܐܰܢܬ ܘܛܳܒܬܝ ܡܶܢ ܠܘܳܬܳܟ ܗܝ: ܐܳܦ ܠܩܰܕܺܝ̈ܫܶܐ ܕܒܰܐܪܥܳܐ ܘܰܡܫܰܒ̈ܚܶܐ. ܕܟܽܠܶܗ ܨܶܒܝܳܢܝ ܒܗܽܘܢ. ܚܙܰܝܬ ܗܳܟܺܝܠ: ܒܗܰܘ ܐܘܠܨܳܢܳܐ ܪܰܒܳܐ ܕܩܳܡ ܥܠܰܘܗܝ. ܠܐ ܐܶܬܕܰܘܰܕ ܘܰܛܥܳܐ ܠܗܰܘ ܕܡܶܢܶܗ ܡܶܬܦܰܨܶܐ ܗܘܳܐ. ܐܶܠܐ ܒܥܳܐ ܒܳܥܽܘܬܳܐ ܟܰܕ ܚܳܐܰܪ ܒܡܰܘܬܳܐ ܕܠܐ ܪܰܚܺܝܩ ܡܶܢܶܗ ܘܳܐܡܰܪ ܗܘܳܐ: ܢܰܛܰܪܰܝܢܝ ܐܰܠܳܗܳܐ ܡܶܛܠ ܕܰܥܠܰܝܟ ܐܶܬܬܰܟܠܶܬ. ܬܽܘܟܠܳܢܳܐ ܠܰܡ ܥܰܠ ܒܰܪܢܳܫܳܐ ܠܐ ܗܘܳܐ ܠܝ ܘܒܽܐܘܠܨܳܢܝ ܠܘܳܬ ܐܚܪܺܢܳܐ ܠܐ ܚܳܪܶܬ. ܘܠܐ ܡܳܪܳܐ ܐܚܪܺܢܳܐ ܐܰܩܝܡܶܬ ܠܝ ܠܒܰܪ ܡܶܢܳܟ. ܐܶܠܐ ܠܳܟ ܡܳܪܝܳܐ ܐܶܡܪܶܬ. ܕܡܳܪܝ ܐܰܢܬ. ܘܡܶܢ ܠܘܳܬܳܟ ܐܺܝܬܰܝܗܶܝܢ ܛܳܒܴ̈ܬܝ. ܘܠܳܐ ܚܳܐܰܪ ܐܰܢܬ ܕܡܶܕܶܡ ܡܶܢ ܛܳܒܴ̈ܬܝ ܕܺܝܠܝ ܬܶܬܗܰܢܶܐ. ܘܠܳܐ ܡܶܢ ܩܰܕܺܝ̈ܫܶܐ ܕܺܐܝܬ ܠܳܟ ܒܰܐܪܥܳܐ ܘܰܡܫܰܒ̈ܚܶܐ ܗܳܠܶܝܢ ܕܟܽܠܶܗ ܨܶܒܝܳܢܳܟ ܥܳܒܕܺܝܢ. ܘܠܳܐ ܨܪܺܝܟ ܐܰܢܬ ܡܶܢ ܛܳܒ̈ܬܳܐ ܕܡܶܢܗܽܘܢ ܬܶܬܒܰܣܰܡ. ܐܶܠܐ ܗܶܢܘܢ ܡܶܢ ܛܳܒܴ̈ܬܳܟ ܡܶܬܒܰܣܡܺܝܢ. ܘܰܒܝܰܕ ܡܰܘܗ̈ܒܳܬܳܟ ܥܳܬܪܺܝܢ. ܘܗܳܢܽܘܢ ܐܰܝܠܶܝܢ ܕܰܪܢܰܘ ܕܠܰܘ ܒܺܐܝ̈ܕܰܝܟ ܐܶܢܽܘܢ ܥܽܘܕܪܳܢܗܽܘܢ ܘܠܰܘ ܒܚܰܝܠܳܟ ܘܒܰܕܪܳܥܳܟ ܡܶܬܦܰܨܶܝܢ ܡܶܢ ܐܘܠܨܳܢܷ̈ܐ ܕܦܳܓܥܺܝܢ ܒܗܽܘܢ.
ܢܶܣܓܽܘܢ ܟܺܐܒ̈ܐ ܕܺܝܠܗܘܢ ܐܚܪ̈ܳܝܶܐ ܒܰܥܓܰܠ. ܕܠܐ ܐܶܢܰܩܶܐ ܢܽܘܩܳܝܗܽܘܢ ܡܶܢ ܕܡܳܐ: ܘܠܐ ܐܶܬܕܟܰܪ ܫܡܳܗܰܝ̈ܗܽܘܢ ܒܣܶܦ̈ܘܳܬܝ. ܠܡܳܢܳܐ ܐܶܡܰܪ ܕܢܶܣܓܽܘܢ ܟܺܐܒܰܝ̈ܗܽܘܢ ܐܚܪ̈ܳܝܶܐ ܕܒܶܝܬ ܫܳܐܘܳܠ. ܘܰܠܡܳܢܳܐ ܐܶܡܰܪ ܕܠܐ ܢܰܩܺܝܘ ܢܽܘܩܳܝܳܐ ܕܰܕܡܳܐ. ܕܳܡܝܳܐ ܗܳܕܶܐ ܡܶܠܬܳܐ ܥܰܠ ܐܽܘܠܨܳܢܳܐ ܕܩܳܡ ܥܰܠ ܫܳܐܘܳܠ. ܠܰܘ ܒܳܬܰܪ ܙܰܒܢܳܐ ܣܰܓܺܝ ܟܰܕ ܐܰܕܪܟܽܘܗܝ ܦܠܶܫܬܳܝܷ̈ܐ ܒܛܽܘܪܳܐ ܕܓܰܠܒܘܥ. ܘܬܰܡܳܢ ܩܛܰܠ ܗܘܳܐ ܢܰܦܫܶܗ ܡܶܢ ܟܺܐܒܷ̈ܐ ܕܡܰܘܬܳܐ ܕܰܐܕܪܟܽܘܗܝ. ܐܶܡܰܪ ܗܳܕܶܐ: ܗܳܝ ܬܽܘܒ ܕܠܐ ܐܶܢܰܩܶܐ ܢܽܘܩܳܝܗܽܘܢ ܡܶܢ ܕܡܳܐ. ܡܚܰܘܝܳܐ܆ ܕܡܶܛܠܰܡ ܛܳܠܶܡ ܗܘܳܐ ܫܳܐܘܳܠ ܕܶܒ̈ܚܶܐ ܘܢܽܘ̈ܩܳܝܶܐ ܕܰܕܡܳܐ ܗܳܢܽܘܢ ܕܰܒܢܳܡܘܣܳܐ ܡܶܬܩܰܪܒܺܝܢ ܗܘܰܘ. ܘܝܰܬܝܪܳܐܝܬ ܫܰܪܺܝܪܳܐ ܗܳܕܶܐ. ܡܶܢ ܗܳܝ ܕܶܐܬܬܙܺܝܥ ܗܘܳܐ ܘܰܩܛܰܠ ܠܟܳܗ̈ܢܶܐ ܕܢܟܚ. ܥܰܠ ܕܝܰܗܒ ܐܰܚܺܝܡܰܠܰܟ ܟܳܗܢܳܐ ܠܕܰܘܺܝܕ ܣܰܝܦܶܗ ܕܓܽܘܠܝܰܕ ܓܰܢ̱ܒܳܪܳܐ ܟܰܕ ܥܪܰܩ ܡܶܢ ܩܕܳܡ ܫܳܐܘܳܠ. ܘܬܽܘܒ ܐܳܦ ܥܰܠ ܗܳܢܽܘܢ ܕܦܳܫܘ ܒܦܘܠܚܳܢܳܐ ܕܰܦܬܰܟܪ̈ܶܐ. ܘܠܐ ܐܶܬܕܰܟܺܝܘ ܡܶܢ ܛܰܢܦܽܘܬܳܐ ܕܪ̈ܽܘܚܶܐ ܒܺܝ̈ܫܳܬܳܐ. ܕܗܳܠܶܝܢ ܐܶܢܽܘܢ ܕܣܳܓܶܝܢ ܟܺܐܒܰܝ̈ܗܘܢ ܐܚܪ̈ܳܝܶܐ ܒܰܥܓܰܠ ܒܬܰܫܢܺܝ̈ܩܶܐ. ܡܳܐ ܕܡܶܬܬܢܺܝܚܺܝܢ ܡܶܢ ܐܽܘܠܨܳܢܳܐ ܕܒܶܟܝܳܐ ܘܚܽܘܪܳܩ ܫܶܢܷ̈ܐ. ܕܰܒܙܰܒܢܳܐ ܗܰܘ ܗܳܘܶܐ ܡܳܪܝܳܐ ܡܢܳܬܳܐ ܘܝܳܪܬܽܘܬܳܐ ܕܩܰܕܝ̈ܫܶܐ. ܐܰܝܟ ܕܶܐܡܰܪ ܢܒܺܝܳܐ.
ܡܳܪܝܳܐ ܡܢܳܬܳܐ ܕܝܳܪܬܽܘܬܝ ܘܰܕܟܳܣܝ: ܐܰܢܬ ܗܽܘ ܡܦܰܢܶܐ ܠܺܝ ܝܳܪܬܽܘܬܝ. ܘܚܰܒ̈ܠܶܐ ܢܦܰܠܘ ܠܺܝ ܒܛܰܪ̈ܩܶܐ: ܐܳܦ ܝܳܪܬܽܘܬܝ ܫܶܦܪܰܬ ܠܝ. ܚܙܰܝܬ ܐܰܝܟܰܢܳܐ ܟܽܠܗܶܝܢ ܗܳܠܶܝܢ ܥܰܠ ܒܽܘ̈ܣܳܡܶܐ ܕܩܰܕܺܝ̈ܫܶܐ ܡܫܰܘܕ̈ܥܳܢ. ܘܰܒܗܰܘ ܙܰܒܢܳܐ ܐܶܡܰܪ ܗܘܳܐ ܕܰܘܺܝܕ ܗܳܠܶܝܢ܆ ܥܰܠ ܕܰܛܪܺܝܕ ܗܘܳܐ ܡܶܢ ܝܳܪܬܽܘܬܳܐ ܕܰܐܒܳܗܰܘ̈ܗܝ. ܕܡܶܟܺܝܠ ܕܰܐܦܩܰܢܝ ܫܳܐܘܳܠ ܡܶܢ ܐܰܪܥܳܐ ܕܒܶܝܬܠܚܶܡ. ܘܡܶܢ ܝܳܪܬܽܘܬܳܐ ܕܰܐܒܴ̈ܗܰܝ. ܡܳܪܝܳܐ ܗܘܳܐ ܠܝ ܡܢܳܬܳܐ ܘܝܳܪܬܽܘܬܳܐ ܘܽܐܘܟܠܳܐ ܘܫܶܩܝܳܐ. ܝܳܕܥܺܝܢܰܢ ܕܰܐܝܟ ܕܰܐܦܩܶܗ ܫܳܐܘܳܠ ܠܕܰܘܺܝܕ ܡܶܢ ܡܰܠܟܽܘܬܳܐ ܕܝܣܪܳܐܝܠ. ܗܳܟܰܢܳܐ ܗܘܳܐ ܐܳܕܳܡ ܥܶܠܬܳܐ ܠܡܰܦܰܩܬܳܐ ܕܩܰܕܺܝ̈ܫܶܐ ܡܶܢ ܦܰܪܕܰܝܣܳܐ. ܘܡܶܟܺܝܠ ܡܳܪܝܳܐ ܗܰܘ ܕܶܐܬܓܠܺܝ ܒܰܒܣܰܪ. ܗܘܳܐ ܠܢ ܡܢܳܬܳܐ ܡܶܬܰܐܟܠܳܢܺܝܬܳܐ ܘܟܳܣܳܐ ܕܫܳܩܘܬܳܐ ܕܚܰܝܷ̈ܐ. ܐܰܝܟ ܡܶܠܬܶܗ ܕܰܢܒܺܝܳܐ. ܕܗܽܘ ܐܰܦܢܺܝ ܠܰܢ ܠܝܳܪܬܽܘܬܰܢ ܩܰܕܡܳܝܬܳܐ. ܘܠܰܘ ܠܦܰܪܕܰܝܣܳܐ ܒܰܠܚܽܘܕ܆ ܐܶܠܐ ܠܡܰܠܟܽܘܬܳܐ ܗܳܝ ܕܰܫܡܰܝܳܐ. ܕܬܰܡܳܢ ܢܦܰܠܘ ܠܰܢ ܗܳܫܳܐ ܚܰܒ̈ܠܐܷ ܕܝܳܪܬܽܘܬܳܐ. ܘܛܰܪ̈ܩܶܐ ܕܡܰܠܟܽܘܬܳܐ ܥܶܠܳܝܬܳܐ ܢܳܣܒܺܝܢ ܛܘ̈ܒܳܢܶܐ ܡܢܳܬܳܐ. ܐܳܡܰܪ ܐܢܳܐ ܕܰܢܦܰܠܘ ܚܰܒ̈ܠܐܷ ܠܩܰܕܺܝ̈ܫܶܐ. ܐܶܠܐ ܒܶܗ ܒܰܟܝܳܢܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܩܢܶܐ ܗܘܳܐ ܓܶܢܣܳܐ ܕܩܰܕܺܝ̈ܫܶܐ ܫܰܘܬܳܦܽܘܬܳܐ ܘܚܽܘܠܛܳܢܳܐ. ܐܰܝܟ ܡܶܠܬܶܗ ܕܗܰܘ ܕܰܡܙܰܡܰܪ ܘܳܐܡܰܪ: ܡܳܪܝܳܐ ܡܢܳܬܳܐ ܕܝܳܪܬܽܘܬܝ ܘܰܕܟܳܣܝ. ܘܥܰܠܗܳܕܶܐ ܡܰܘܣܶܦ ܘܳܐܡܰܪ:
ܐܶܒܰܪܶܟ ܠܡܳܪܝܳܐ ܕܡܰܠܟܰܢܝ: ܘܰܒܠܰܝ̈ܠܰܘܳܬܳܐ ܪ̈ܕܰܝܳܢܝ ܟܽܘ̈ܠܝܳܬܝ܀ ܗܳܪܟܳܐ ܠܰܡ ܠܰܝܬ ܠܐ ܟܽܘ̈ܒܶܐ ܘܠܐ ܟܺܐܒܷ̈ܐ. ܘܠܳܐ ܕܒܳܟܶܐ ܘܠܐ ܕܰܐܒܺܝܠ. ܘܠܐ ܕܠܳܐ ܫܰܦܺܝܪܳܐ ܝܳܪܬܽܘܬܶܗ ܒܥܰܝ̈ܢܰܘܗܝ. ܘܠܐ ܕܰܡܪܰܛܶܢ ܘܠܳܐܛ ܝܰܘܡܳܐ ܕܶܐܬܺܝܠܶܕ ܒܶܗ. ܐܰܝܟ ܐܺܝܽܘܒ. ܘܠܳܐ ܕܡܰܘܒܶܕ ܒܶܗ ܠܝܰܘܡܳܐ ܐܰܝܟ ܐܶܪܰܡܝܳܐ. ܐܶܠܳܐ ܟܠܢܳܫ ܕܡܶܫܬܘܶܐ ܕܢܺܐܪܰܬ ܡܢܳܬܳܐ ܘܝܳܪܬܽܘܬܳܐ ܒܡܳܪܝܳܐ. ܫܳܦܪܳܐ ܠܶܗ ܝܳܪܬܽܘܬܶܗ. ܘܠܳܐ ܡܶܫܟܰܚ ܒܳܗ̇ ܡܶܕܶܡ ܕܠܳܐ ܫܰܦܺܝܪ. ܘܡܰܘܕܶܐ ܠܗܰܘ ܕܰܡܠܰܟ ܠܶܗ ܘܠܐ ܕܰܓܶܠ ܒܫܘܘܕܳܝܶܗ. ܥܰܠܗܳܝ ܐܶܡܰܪ ܡܙܰܡܪܳܢܳܐ ܐܰܝܟ ܕܡܶܢ ܦܰܪܨܽܘܦܳܐ ܕܩܰܕܺܝ̈ܫܶܐ ܕܰܒܡܽܘܠܟܳܢܰܝ̈ܗܽܘܢ ܚܳܕܶܝܢ. ܕܶܐܒܰܪܶܟ ܠܡܳܪܝܳܐ ܕܡܰܠܟܰܢܝ. ܗܳܝ ܕܰܒܠܺܠܝܳܐ ܡܶܬܪܕܶܐ ܗܘܳܐ ܡܶܢ ܟܽܘ̈ܠܝܳܬܶܗ. ܡܶܬܒܰܝܰܢ ܗܘܳܐ ܢܒܺܝܳܐ ܒܥܳܠܡܳܐ ܗܳܢܳܐ ܕܺܐܝܬܰܘܗܝ ܠܺܠܝܳܐ ܘܚܶܫܽܘܟܳܐ. ܘܥܳܪܶܩ ܗܘܳܐ ܡܶܢ ܒܺܝ̈ܫܳܬܳܐ ܕܡܶܬܥܰܒ̈ܕܳܢ ܒܶܗ. ܘܣܺܝܡ ܗܘܳܐ ܡܳܪܝܳܐ ܢܺܝܫܳܐ ܘܚܰܘܪܳܐ ܩܕܳܡ ܥܰܝ̈ܢܶܐ ܕܺܝܠܶܗ ܘܒܶܗ ܚܳܐܰܪ ܗܘܳܐ ܘܡܶܬܒܰܣܰܡ ܐܰܝܟ ܕܶܐܡܰܪ:
ܕܣܳܡܶܬ ܠܡܳܪܝܳܐ ܠܽܘܩܒܰܠܝ ܒܟܠܙܒܰܢ: ܘܰܗܘܳܐ ܡܶܢ ܝܰܡܺܝܢܝ ܕܠܐ ܐܶܙܽܘܥ. ܡܶܛܠ ܗܳܢܳܐ ܚܕܺܝ ܠܶܒܝ ܘܕܳܨ ܐܝܩܳܪܝ. ܐܳܘ ܠܢܰܦܫܳܐ ܐܰܠܳܗܳܝܬܳܐ ܒܰܫܪܳܪܳܐ ܒܟܽܠܶܗ ܗܰܘ ܐܘܠܨܳܢܳܐ ܕܡܶܬܬܰܩ̈ܠܳܢ ܗܘܱ̈ܝ ܪ̈ܶܓܠܰܘܗܝ ܥܰܠ ܛܽܘܪ̈ܶܐ ܟܰܕ ܥܳܪܶܩ. ܠܐ ܒܰܓܶܢ ܘܠܐ ܪܰܛܶܢ ܘܠܐ ܨܰܥܰܪ ܠܪ̈ܳܕܘܦܰܘܗܝ. ܘܠܐ ܬܚܶܝܬ ܥܶܕܠܳܝܳܐ ܣܳܡ ܠܕܺܝ̈ܢܶܐ ܟܺܐܢܷ̈ܐ ܕܰܡܕܰܒܪܳܢܽܘܬܳܐ ܕܰܐܠܳܗܳܐ. ܐܶܠܐ ܣܳܡܶܗ ܠܢܽܘܗܪܳܐ ܗܰܘ ܕܺܐܝܬܰܘܗܝ ܡܳܪܝܳܐ. ܕܰܡܚܰܘܶܐ ܐܘܪܚܳܐ ܬܪܺܝܨܬܳܐ ܠܙܰܕܺܝ̈ܩܶܐ܆ ܘܥܰܠܗܳܕܶܐ ܠܐ ܐܶܫܟܰܚ ܚܶܫܽܘܟܳܐ ܕܰܚܛܺܝܬܳܐ ܕܢܶܣܪܽܘܚ ܘܰܢܚܰܒܶܠ ܚܙܳܬܳܐ ܕܢܰܦܫܶܗ. ܗܰܘ ܓܶܝܪ ܕܰܒܢܽܘܗܪܳܐ ܚܳܐܰܪ܆ ܠܐ ܡܶܫܟܰܚ ܚܶܫܽܘܟܳܐ ܡܕܰܘܶܕ ܗܰܠܟܴ̈ܬܶܗ. ܕܰܐܝܟ ܗܳܢܳܐ ܗܘܳܐ ܪܶܗܛܶܗ ܕܗܰܘ ܫܠܺܝܚܳܐ ܕܬܶܕܡܽܘܪܬܳܐ ܘܡܳܐܢܳܐ ܓܰܒܝܳܐ ܦܰܘܠܘܣ. ܘܥܰܠܗܳܕܶܐ ܐܳܡܰܪ ܗܘܳܐ. ܕܒܶܣܬܰܪܝ ܛܳܥܶܐ ܐܢܳܐ: ܘܠܰܩܕܳܡܰܝ ܡܶܫܬܰܘܫܰܛ ܐܢܳܐ. ܘܪܳܗܶܛ ܐܢܳܐ ܠܽܘܩܒܰܠ ܢܺܝܫܳܐ (ܦܝܠܝ̈ܦܣܝܐ ܓ: ܝܓ). ܗܳܐ ܓܶܝܪ ܬܰܪ̈ܬܰܝܗܶܝܢ ܒܢܴ̈ܬ ܩܴ̈ܠܐ ܚܰܕ ܗܘ ܣܽܘܟܳܠܗܶܝܢ. ܗܳܝ ܕܣܳܡܶܬ ܠܡܳܪܝܳܐ ܠܘܩܒܰܠܝ ܒܟܽܠܙܒܰܢ. ܘܗܳܝ ܕܶܐܡܰܪ ܕܪܳܗܶܛ ܐܢܳܐ ܠܽܘܩܒܰܠ ܢܺܝܫܳܐ. ܘܰܠܗܳܢܳܐ ܠܳܚܡܳܐ ܕܢܺܐܡܰܪ: ܘܰܗܘܳܐ ܡܳܪܝܳܐ ܡܶܢ ܝܰܡܺܝܢܗ ܕܠܳܐ ܢܙܽܘܥ. ܠܡܳܢܳܐ ܐܶܡܰܪ ܡܶܢ ܝܰܡܺܝܢܳܐ. ܘܠܳܐ ܐܶܡܰܪ ܕܡܶܢ ܣܶܡܳܠܐ. ܠܳܐ ܓܶܝܪ ܙܳܕܶܩ ܕܢܰܥܒܪܺܝܗ̇ ܠܗܳܕܶܐ ܕܠܳܐ ܒܽܘܚܳܢܳܐ. ܝܰܡܺܝܢܳܐ ܓܶܝܪ ܥܰܠ ܕܽܘܒܳܪ̈ܶܐ ܪ̈ܽܘܚܳܢܶܐ ܕܚܳܝܪܺܝܢ ܒܰܐܠܳܗܳܐ ܡܶܬܢܰܣܒܳܐ. ܣܶܡܳܠܳܐ ܕܶܝܢ ܥܰܠ ܡܰܪ̈ܢܝܳܬܳܐ ܕܥܳܠܡܳܐ ܗܳܢܳܐ ܒܺܝܫܳܐ ܕܰܚܢܰܢ ܒܶܗ. ܫܰܦܺܝܪ ܡܳܕܶܝܢ ܐܶܡܰܪ ܢܒܺܝܳܐ ܕܣܳܡܶܗ ܠܘܩܒܰܠ ܥܰܝ̈ܢܰܘܗܝ ܒܟܽܠܙܒܰܢ ܠܡܳܪܝܳܐ ܘܥܰܠ ܝܰܡܺܝܢܶܗ. ܘܰܗܘܳܐ ܡܶܢ ܝܰܡܺܝܢܶܗ ܕܠܳܐ ܢܙܽܘܥ. ܥܕܰܡܳܐ ܠܗܳܪܟܳܐ ܢܰܗܺܝܪܳܐܺܝܬ ܪܕܳܬ ܡܶܠܬܳܐ ܟܰܕ ܡܰܘܕܥܳܐ ܥܰܠ ܐܪ̈ܳܙܶܐ ܘܣܽܘ̈ܟܳܠܶܐ ܗܳܠܶܝܢ ܕܶܐܬܡܰܠܰܠܘ. ܗܳܫܳܐ ܕܶܝܢ ܡܚܰܦܝܳܐ ܡܶܠܬܳܐ ܥܰܡܺܝܩܳܐܝܬ. ܡܰܝܬܶܐ ܓܶܝܪ ܢܒܺܝܳܐ ܘܳܐܡܰܪ:
ܕܳܐܦ ܒܶܣܪܝ ܢܶܫܪܶܐ ܒܫܶܠܝܳܐ. ܡܶܛܽܠ ܕܠܳܐ ܫܒܰܩܬ ܠܢܰܦܫܝ ܒܰܫܝܽܘܠ: ܘܠܳܐ ܝܰܗܒܬ ܠܚܰܣܝܳܟ ܕܢܶܚܙܶܐ ܚܒܳܠܐܴ. ܠܗܳܠܶܝܢ ܦܶܬܓܳܡܷ̈ܐ ܦܰܫܶܩ ܐܶܢܽܘܢ ܦܶܛܪܳܘܣ ܗܰܘ ܪܺܝܫܳܐ ܕܰܫܠܝ̈ܚܶܐ.ܟܰܕ ܡܰܟܪܶܙ ܗܘܳܐ ܩܝܳܡܬܶܗ ܕܰܡܫܺܝܚܳܐ ܘܳܐܡܰܪ ܠܘܳܬ ܝܽܘܕܳܝ̈ܐ. ܓܰܒܪ̈ܶܐ ܐܰܚܱ̈ܝܢ: ܡܰܦܰܣ ܠܡܺܐܡܰܪ ܥܺܝܢ ܒܰܓܠܶܐ ܠܘܳܬܟܽܘܢ: ܥܰܠ ܪܺܝܫ ܐܰܒܳܗ̈ܬܳܐ ܕܰܘܺܝܕ ܕܡܺܝܬ ܐܳܦ ܐܶܬܩܒܰܪ. ܘܒܶܝܬ ܩܒܽܘܪܶܗ ܐܝܬܰܘܗܝ ܠܘܳܬܰܢ ܥܕܰܡܳܐ ܠܝܰܘܡܳܢܳܐ. ܢܒܺܝܳܐ ܗܘܳܐ ܓܶܝܪ ܘܝܳܕܰܥ ܗܘܳܐ ܕܡܰܘ̈ܡܬܳܐ ܝܺܡܳܐ ܠܶܗ ܐܰܠܳܗܳܐ. ܕܡܶܢ ܦܺܐܪ̈ܶܐ ܕܟܰܪܣܶܗ. ܘܩܰܕܶܡ ܚܙܳܐ ܘܡܰܠܶܠ ܥܰܠ ܩܝܳܡܬܶܗ ܕܰܡܫܺܝܚܳܐ܇ ܕܠܳܐ ܢܰܦܫܶܗ ܐܶܫܬܰܒܩܰܬ ܒܰܫܝܽܘܠ. ܘܠܐ ܦܰܓܪܶܗ ܚܙܳܐ ܚܒܳܠܐܴ (ܦܪܟܣܝܣ ܒ: ܟܛ-ܠܐ). ܘܬܽܘܒ ܡܰܢܗܰܪ ܠܳܗ̇ ܠܡܶܠܬܳܐ ܘܰܠܦܘܫܳܩܳܐ ܘܶܐܡܰܪ: ܕܰܘܺܝܕ ܓܶܝܪ ܒܫܰܪܒܬܶܗ ܫܰܡܶܫ ܨܶܒܝܳܢܶܗ ܕܰܐܠܳܗܳܐ ܘܰܫܟܶܒ: ܘܶܐܬܬܰܘܣܰܦ ܥܰܠ ܐܰܒܳܗܰܘ̈ܗܝ ܘܰܚܙܳܐ ܚܒܳܠܐܴ (ܦܪܟܣܝܣ ܝܓ: ܠܘ). ܐܶܠܐ ܡܳܢܳܐ ܐܶܡܰܪ ܢܒܺܝܳܐ ܡܶܛܠܬܶܗ܆ ܐܳܦܚܢܰܢ ܢܶܒܥܶܐ. ܐܳܦ ܒܶܣܪܝ ܢܶܫܪܶܐ ܒܫܶܠܝܳܐ. ܚܙܺܝ ܡܳܢܳܐ ܐܶܡܰܪ. ܒܶܣܪܳܐ ܠܰܡ ܢܶܫܪܶܐ ܒܫܶܠܝܳܐ. ܒܶܣܪܳܐ ܕܰܡܫܰܥܒܰܕ ܠܰܚܒܳܠܐ ܘܰܕܦܳܐܶܫ ܒܩܰܒܪܳܐ. ܠܐ ܫܳܪܶܐ ܒܫܶܠܝܳܐ. ܡܶܚܕܳܐ ܓܶܝܪ ܕܢܳܦܶܠ ܒܩܰܒܪܳܐ. ܡܫܰܪܶܐ ܠܶܗ ܕܢܶܬܚܰܒܰܠ. ܐܳܦ ܗܰܕܳܡܷ̈ܐ ܟܽܠܗܽܘܢ ܡܶܬܢܰܦܚܺܝܢ ܡܶܢ ܪܺܝܚܳܐ ܕܣܰܪܝܽܘܬܳܐ. ܘܺܐܝܕܰܝܴ̈ܐ ܠܥܶܠ ܡܶܙܕܰܩ̈ܦܳܢ. ܘܬܰܠܝܴ̈ܢ ܠܒܽܘܫܰܘ̈ܗܝ ܘܪܽܘܚܳܐ ܕܡܶܬܚܰܒܠܳܢܽܘܬܳܐ ܪܳܗܛܳܐ ܠܰܡܒܰܕܳܪܽܘ. ܘܰܠܡܶܫܪܳܐ ܪܽܘܟܳܒܳܐ ܕܗܰܕܳܡܷ̈ܐ ܡܶܢ ܚ̈ܕܳܕܶܐ. ܘܥܰܡ ܗܳܕܶܐ ܪܳܦܶܬ ܓܽܘܫܡܳܐ ܒܬܰܘ̈ܠܥܶܐ ܘܰܒܪ̈ܰܚܫܳܐ. ܘܗܳܠܶܝܢ ܡܰܘܕ̈ܥܳܢ ܕܠܰܘ ܒܫܶܠܝܳܐ ܡܶܟܺܝܠ ܫܳܪܶܐ ܒܶܣܪܳܐ. ܐܶܠܐ ܝܰܬܝܪܳܐܝܬ ܒܰܪܗܺܝܒܽܘܬܳܐ. ܐܶܠܐ ܡܳܕܶܝܢ ܠܐ ܠܳܚܡܳܐ ܠܗܳܝ ܕܰܒܫܶܠܝܳܐ ܢܶܫܪܶܐ ܒܶܣܪܳܐ. ܥܰܠ ܗܰܘ ܕܰܒܩܰܒܪܳܐ ܣܒܰܠ ܚܒܳܠܐ. ܐܶܠܐ ܗܳܢܳܐ ܦܶܬܓܳܡܳܐ ܥܰܡ ܗܳܠܶܝܢ ܕܒܳܬܪܶܗ܆ ܥܰܠ ܥܰܡܰܢܽܘܐܝܠ ܙܳܕܶܩ ܕܢܶܬܢܣܶܒ. ܟܽܠܗܽܘܢ ܓܶܝܪ ܓܽܘܫ̈ܡܶܐ ܘܒܶܣܪ̈ܶܐ ܕܥܰܠܘ ܠܩܰܒܪ̈ܶܐ ܡܶܢ ܕܶܐܬܒܪܺܝ ܐܳܕܳܡ܆ ܒܶܣܪܶܗ ܓܶܝܪ ܕܰܐܠܳܗܳܐ ܒܰܠܚܽܘܕ ܫܪܶܐ ܒܓܰܘ ܩܰܒܪܳܐ ܒܫܶܠܝܳܐ. ܡܶܛܠ ܕܠܐ ܪܶܗܛܰܬ ܪܽܘܚܳܐ ܕܣܰܪܝܽܘܬܳܐ ܒܓܽܘܫܡܶܗ ܩܰܕܺܝܫܳܐ. ܘܠܐ ܐܝ̈ܕܰܘܗܝ ܐܶܙܕܩܶܦܘ ܒܩܰܒܪܳܐ ܡܶܢ ܢܦܺܝܚܽܘܬܳܐ ܕܰܚܒܳܠܳܐ. ܘܠܐ ܗܰܕܳܡܰܘ̈ܗܝ ܐܶܫܬܪܺܝܘ ܡܶܢ ܪܽܘܟܳܒܳܐ ܕܰܚ̈ܕܳܕܶܐ. ܘܠܐ ܬܰܘ̈ܠܥܶܐ ܐܰܪܚܶܫ ܒܶܣܪܶܗ ܘܶܐܬܚܰܒܰܠ. ܘܠܐ ܪܺܝܚܳܐ ܣܰܪܝܳܐ ܦܳܚ ܒܩܰܒܪܳܐ ܡܶܢ ܗܰܘ ܦܰܓܪܳܐ ܩܰܕܺܝܫܳܐ. ܐܶܠܳܐ ܡܶܢ ܟܽܠܗܶܝܢ ܗܳܠܶܝܢ ܕܰܚܒܳܠܳܐ. ܫܶܠܝܳܐ ܐܺܝܬ ܗܘܳܐ ܠܳܗ̇ ܟܰܕ ܒܢܰܘܚܳܐ ܘܰܒܪܺܝܚܳܐ ܒܰܣܺܝܡܳܐ ܕܰܐܠܳܗܳܐ ܡܶܠܬܳܐ ܕܰܟܣܶܐ ܗܘܳܐ ܒܳܗ̇. ܒܠܳܐ ܡܶܬܚܰܒܠܳܢܽܘܬܳܐ ܡܶܟܺܝܠ ܡܶܬܒܰܣܰܡ ܗܘܳܐ. ܘܰܒܗܶܪ̈ܽܘܡܶܐ ܒܰܣܺܝ̈ܡܰܝ ܪܺܝܚܳܐ ܕܠܐ ܡܳܝܽܘܬܽܘܬܳܐ ܡܶܬܦܰܛܰܡ ܗܘܳܐ. ܘܰܢܒܰܥ ܗܘܳܐ ܡܶܢ ܗܰܘ ܩܰܒܪܳܐ ܒܰܩܝܳܡܬܶܗ ܕܡܳܪܝܳܐ. ܪܺܝܚܳܐ ܒܰܣܺܝܡܳܐ ܕܚܰܝܰܬ ܡܺܝ̈ܬܶܐ. ܐܰܝܟ ܡܶܠܬܳܗ̇ ܕܟܰܠܬܳܐ ܕܰܒܬܶܫܒ̈ܚܳܬ ܬܶܫܒ̈ܚܳܬܳܐ ܡܶܬܢܰܒܝܳܐ ܘܳܐܡܪܳܐ: ܠܰܘ ܪܽܘܚܳܐ ܕܓܰܪܒܝܳܐ܆ ܕܶܐܬܬܥܺܝܪܝ ܓܰܪܒܝܳܐ ܘܬܳܝ ܬܰܝܡܢܳܐ. ܘܫܰܒܝ ܒܓܰܢܰܬܝ. ܘܢܶܪܕܽܘܢ ܒܶܣ̈ܡܳܢܰܝ (ܬܫܒ̈ܚܬ ܬܫܒ̈ܚܬܐ ܕ: ܝܘ). ܚܳܙܶܐ ܐܰܢܬ ܗܳܟܺܝܠ ܐܰܝܟܰܢܳܐ ܡܶܢ ܓܰܢܬܳܐ ܗܳܝ ܕܒܳܗ̇ ܐܺܝܬ ܗܘܳܐ ܩܰܒܪܳܐ. ܗܰܘ ܕܣܺܝܡ ܗܘܳܐ ܒܶܗ ܗܰܘ ܦܰܓܪܳܐ ܩܰܕܺܝܫܳܐ܇ ܕܗܽܘ ܩܰܕܡܳܝܳܐ ܙܟܳܐ ܠܡܰܘܬܳܐ ܘܠܰܚܒܳܠܳܐ. ܗܶܪ̈ܘܡܶܐ ܒܰܣܺܝ̈ܡܰܝ ܪܺܝܚܳܐ ܕܠܐ ܡܶܬܚܰܒܠܳܢܘܬܳܐ܆ ܐܳܡܪܳܐ ܗܘܳܬ ܟܰܠܬܳܐ ܪܘܚܳܢܳܝܬܳܐ ܕܰܪܕܰܘ ܠܶܗ. ܕܠܳܐ ܕܶܝܢ ܢܰܘܪܶܟ ܡܶܠܬܳܐ ܥܰܠ ܗܳܠܶܝܢ ܕܣܰܓܺܝ ܓܰܠܝܴ̈ܢ ܘܡܰܢܗܪ̈ܳܢ ܠܡܰܠܦܳܢܷ̈ܐ ܕܡܶܢ ܩܕܳܡܰܝܢ܆ ܢܶܥܒܰܪ ܠܘܳܬ ܦܶܬܓܳܡܷ̈ܐ ܗܳܠܶܝܢ ܕܡܶܢ ܒܳܬܰܪܟܶܢ. ܡܚܰܘܶܐ ܢܒܺܝܳܐ ܓܶܝܪ ܕܡܶܢ ܗܳܪܟܳܐ ܒܰܫܪܳܪܳܐ ܐܶܬܓܰܠܝܰܬ ܘܶܐܬܚܰܘܝܰܬ ܐܘܪܚܳܐ ܕܚܰܝܷ̈ܐ ܠܡܳܝܽܘ̈ܬܶܐ.
ܗܳܝ ܕܰܬܚܰܘܶܝܢܝ ܐܘܪܚܳܟ ܕܚܰܝܷ̈ܐ. ܥܕܰܡܳܐ ܠܰܡ ܠܩܰܒܪܳܐ. ܒܐܘܪܚܳܐ ܕܡܳܝܽܘ̈ܬܶܐ ܡܗܰܠܶܟ ܗܘܰܝܬ. ܐܰܝܟ ܕܳܐܦ ܬܳܒܰܥ ܗܘܳܐ ܟܝܳܢܳܐ ܐܢܳܫܳܝܳܐ ܕܡܶܢܶܗ ܐܶܬܓܰܫܰܡܬ. ܘܡܶܛܽܠ ܕܶܝܢ ܕܰܒܓܰܘ ܩܰܒܪܳܐ ܫܪܳܐ ܦܰܓܪܳܟ ܒܫܶܠܝܳܐ ܘܠܐ ܐܶܬܚܰܒܰܠ. ܓܠܳܐ ܠܥܳܠܡܳܐ ܘܚܰܘܝ ܠܶܗ ܐܽܘܪܚܳܐ ܕܚܰܝ̈ܐ. ܕܫܶܩܠܰܬ ܫܽܘܪܳܝܳܐ ܒܰܩܝܳܡܬܳܟ. ܗܳܝ ܕܰܗܘܳܬ ܒܫܽܘܒܚܳܐ ܒܠܳܐ ܡܶܬܚܰܒܠܳܢܽܘܬܳܐ.
ܘܢܶܣܒܰܥ ܡܶܢ ܚܰܕܽܘܬܶܗ ܕܦܰܪܨܽܘܦܳܟ. ܗܰܘ ܕܰܠܡܰܘܬܳܐ ܙܟܳܐ ܐܳܦ ܠܰܟܡܺܝܪܽܘܬܶܗ. ܘܰܐܢܗܰܪ ܠܰܢ ܒܚܰܝܷ̈ܐ ܕܚܰܕܽܘܬܳܐ.
ܘܡܶܢ ܒܰܣܺܝܡܽܘܬܳܐ ܕܙܳܟܽܘܬܳܐ ܕܝܰܡܺܝܢܳܟ. ܗܳܪܟܳܐ ܣܳܒܰܪ ܐܢܳܐ. ܕܠܶܗ ܠܰܐܒܳܐ ܡܶܬܕܟܰܪ. ܒܗܳܝ ܕܶܐܡܰܪ ܘܡܶܢ ܒܰܣܺܝܡܽܘܬܳܐ ܕܙܳܟܽܘܬܳܐ ܕܝܰܡܺܝܢܳܟ. ܐܰܝܟ ܗܰܘ ܓܶܝܪ ܕܗܽܘ ܘܝܰܡܺܝܢܶܗ ܡܶܬܝܰܕܥܺܝܢ ܠܰܢ ܒܦܶܬܓܳܡܳܐ ܗܳܢܳܐ. ܝܰܡܺܝܢܳܐ ܓܶܝܪ ܕܰܙܟܳܬ ܠܡܰܘܬܳܐ. ܗܰܘ ܗܽܘ ܕܪܳܥܳܐ ܓܰܢ̱ܒܳܪܳܐ ܕܰܐܒܳܐ. ܘܒܰܪ ܡܰܘܬܒܳܐ ܕܫܽܘܒܚܶܗ. ܕܡܶܛܽܠ ܕܰܛܥܶܡ ܟܳܣܳܐ ܡܰܪܺܝܪܳܐ ܕܡܰܘܬܳܐ. ܒܝܰܕ ܕܶܐܬܚܰܝܰܕ ܠܰܟܝܳܢܳܐ ܐܢܳܫܳܝܳܐ ܘܡܳܝܽܘܬܳܐ. ܘܬܽܘܒ ܦܢܳܐ ܘܶܐܬܒܰܣܰܡ ܒܚܰܠܝܽܘܬܳܐ ܕܰܩܝܳܡܬܳܐ. ܗܳܝ ܕܰܡܨܰܠܶܐ ܢܒܺܝܳܐ. ܕܠܳܗ̇ ܢܶܫܬܘܶܐ ܢܶܛܥܰܡ ܒܚܰܝܷ̈ܐ ܕܠܳܐ ܡܳܝܬܺܝܢ. ܘܠܶܗ ܢܒܰܪܶܟ ܘܢܰܘܕܶܐ ܥܰܡ ܫܳܠܘܚܶܗ ܘܪܽܘܚܶܗ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܒܥܣܪ
ܕܡܰܘܕܰܥ ܕܒܰܨܠܘܬܳܐ ܡܶܫܟܰܚ ܐܢܳܫ ܡܶܬܦܰܨܶܐ ܡܶܢ ܟܡܺܐܢ̈ܐ ܕܚܰܛܳܝ̈ܐ: ܘܥܰܠ ܬܰܫܢܺܝ̈ܩܶܐ: ܐܳܦ ܥܰܠ ܬܗܘܡܳܐ ܕܚܶܫܘܟܳܐ ܒܰܪܳܝܳܐ ܕܢܳܦܠܝܢ ܒܶܗ ܒܚܰܪܬܳܐ ܥܳܒ̈ܕܰܝ ܒܺܝ̈ܫܳܬܳܐ ܥܕܰܡܳܐ ܠܥܳܠܰܡ.
ܝܰܥܩܽܘܒ ܫܠܺܝܚܳܐ ܘܥܰܡܽܘܕܳܐ ܕܥܺܕܬܳܐ ܬܠܺܝܬܳܝܳܐ܆ ܗܰܘ ܕܝܰܡܺܝܢܳܐ ܝܰܗܒ ܕܫܰܘܬܳܦܽܘܬܳܐ ܠܦܰܘܠܽܘܣ ܥܰܡ ܟܺܐܦܳܐ ܘܝܽܘܚܰܢܳܢ ܫܠܝ̈ܚܶܐ ܕܬܶܕܡܽܘܪܬܳܐ. ܡܰܠܶܦ ܒܶܐܓܰܪܬܶܗ ܘܳܐܡܰܪ: ܕܪܰܒ ܗܘ ܚܰܝܠܳܗ̇ ܕܰܨܠܽܘܬܳܐ ܐܰܝܕܳܐ ܕܙܰܕܺܝܩܳܐ ܡܨܰܠܶܐ ܠܳܗ̇ (ܝܥܩܘܒ ܗ: ܝܘ). ܘܰܒܗܳܕܶܐ ܡܰܘܕܰܥ܆ ܕܠܰܝܬ ܡܶܕܶܡ ܕܚܳܣܶܢ ܠܰܨܠܽܘܬܳܐ ܕܩܰܕܝ̈ܫܶܐ. ܘܥܰܠܗܳܕܶܐ ܐܳܦ ܕܰܘܺܝܕ ܢܒܺܝܳܐ ܐܰܠܳܗܳܝܳܐ ܒܳܗ̇ ܝܰܬܝܪܳܐܝܬ ܡܶܫܟܚܺܝܢܰܢ ܠܶܗ ܕܰܡܫܰܪܶܐ ܒܬܶܫܒ̈ܚܳܬܶܗ ܣܰܓܝ̈ܐܳܬܳܐ. ܘܺܐܝܬ ܐܰܝܟܳܐ ܕܠܐ ܡܫܰܪܶܐ ܘܰܡܡܰܨܰܥ ܕܶܝܢ ܘܒܰܡܨܰܥܬܳܐ ܥܒܰܕ ܥܽܘܗܕܳܢܳܐ ܕܰܨܠܽܘܬܳܐ. ܘܡܳܢܳܐ ܐܳܡܰܪ ܐܢܳܐ ܕܰܡܫܰܪܶܐ ܘܰܡܡܰܨܰܥ ܒܰܠܚܽܘܕ. ܐܰܝܟܳܐ ܕܡܶܫܟܚܺܝܢܰܢ ܕܟܽܠܗܽܘܢ ܡܰܙܡܽܘܪ̈ܶܐ ܕܶܐܬܢܰܒܺܝ܆ ܨܠܽܘܬܳܐ ܐܶܢܽܘܢ. ܘܗܳܫܳܐ ܬܽܘܒ ܘܟܰܕ ܐܽܘܠܨܳܢܳܐ ܥܦܺܝܦܳܐ ܩܳܡ ܥܠܰܘܗܝ ܡܶܢ ܙܺܐܦܴ̈ܢܶܐ܆ ܘܰܥܒܰܕܘ ܟܡܺܐܢܳܐ ܥܰܡ ܫܳܐܘܳܠ ܕܢܰܪܡܽܘܢܳܝܗܝ ܐܰܝܟ ܕܡܶܢ ܨܶܐܕܰܝܗܽܘܢ ܒܰܐܪܥܳܐ. ܬܽܘܒ ܒܰܨܠܽܘܬܳܐ ܡܶܬܓܰܘܰܣ ܗܘܳܐ ܐܰܝܟ ܕܡܶܢ ܩܕܺܝܡ. ܗܳܢܳܐ ܓܶܝܪ ܡܰܙܡܽܘܪܳܐ ܘܗܰܘ ܕܰܩܕܳܡܰܘܗܝ ܡܶܛܠ ܥܶܠܬܳܐ ܕܪܽܘܫܥܗܽܘܢ ܕܙܺܐܦܳܢܷ̈ܐ ܐܶܙܕܰܡܰܪ ܡܶܢ ܡܙܰܡܪܳܢܳܐ. ܘܒܳܗ̇ ܒܬܶܫܒܽܘܚܬܳܐ ܡܰܘܕܰܥ ܢܶܟܠܳܐ ܒܺܝܫܳܐ ܕܡܰܪ̈ܳܚܶܐ. ܡܶܛܽܠ ܕܠܐ ܢܰܝܬܶܐ ܠܬܰܫܥ̈ܝܳܬܳܐ ܗܳܠܝܶܢ ܕܰܒܡܰܙܡܽܘܪܳܐ ܗܰܘ ܐܶܡܰܪܢܰܢ. ܢܶܩܪܽܘܒ ܠܘܳܬ ܡܶܠܰܘ̈ܗܝ ܕܡܰܙܡܽܘܪܳܐ ܗܳܢܳܐ ܘܢܶܫܡܰܥ ܩܴ̈ܠܶܐ ܡܰܠܝܱ̈ܝ ܚܰܫܳܐ ܕܒܶܗ ܡܙܰܡܰܪ ܟܰܕ ܩܳܥܶܐ ܒܒܳܥܽܘܬܶܗ ܘܳܐܡܰܪ:
ܫܡܰܥ ܡܳܪܝܳܐ ܩܰܕܺܝܫܳܐ ܘܚܽܘܪ ܒܒܳܥܽܘܬܝ. ܘܨܽܘܬ ܨܠܽܘܬܝ ܕܠܐ ܡܶܢ ܣܶܦ̈ܘܳܬܳܐ ܢܰܟܘ̈ܠܬܳܢܝܳܬܳܐ: ܡܶܢ ܩܕܳܡܰܝܟ ܕܺܝܢܝ ܢܶܦܽܘܩ. ܥܰܝ̈ܢܰܝܟ ܢܶܚܙ̈ܝܳܢ ܬܪܺܝܨܽܘܬܳܐ. ܢܶܬܒܰܝܰܢ ܗܳܟܺܝܠ ܡܰܢ ܒܦܶܬܓ̈ܡܶܐ ܗܳܠܶܝܢ ܩܰܕܺܝ̈ܫܶܐ. ܫܡܰܥ ܡܳܪܝܳܐ܇ ܐܰܝܟ ܗܰܘ ܓܶܝܪ ܕܡܰܗܡܳܝܽܘ ܐܰܗܡܺܝ ܡܰܘܕܰܥ. ܥܰܠ ܡܰܨܠܚܳܢܽܘܬܐ ܕܰܚܙܳܐ ܗܘܳܐ ܕܰܗܘܳܬ ܠܪ̈ܰܫܺܝܥܶܐ ܕܩܳܡܘ ܥܠܰܘܗܝ. ܘܟܰܕ ܡܚܰܘܶܐ ܕܳܐܦ ܗܽܘ ܟܢܺܝܟܳܐܝܬ ܘܩܰܕܺܝܫܳܐܝܬ ܡܩܰܪܶܒ ܒܳܥܽܘܬܶܗ. ܘܰܡܦܺܝܣ ܠܶܗ ܕܢܶܚܽܘܪ ܒܒܳܥܽܘܬܶܗ ܗܳܝ ܕܰܡܩܰܪܶܒ ܗܘܳܐ ܒܣܶܦ̈ܘܳܬܳܐ ܕܰܟܝ̈ܬܳܐ ܘܠܳܐ ܢܰܟܘܠܬܳܢ̈ܝܳܬܳܐ. ܨܽܘܬ ܠܰܡ ܨܠܘܬܳܐ ܕܦܽܘܡܳܐ ܬܪܺܝܨܳܐ. ܕܰܒܣܶܦ̈ܘܳܬܳܐ ܕܰܡܚܰܪܪ̈ܳܢ ܡܶܢ ܢܶܟܠܳܐ ܡܩܰܪܶܒ ܠܳܗ̇ ܩܕܳܡܰܝܟ. ܘܥܰܝ̈ܢܰܝܟ ܢܶܚܙ̈ܝܳܢ ܬܪܺܝܨܽܘܬܳܐ. ܠܰܘ ܕܶܝܢ ܕܰܢܚܽܘܪ ܒܰܬܪܺܝܨܽܘܬܳܐ ܕܰܐܚܪ̈ܳܢܶܐ ܡܨܰܠܶܐ ܢܒܺܝܳܐ. ܐܶܠܳܐ ܕܒܰܬܪܺܝܨܽܘܬܳܐ ܕܝܠܶܗ ܢܚܽܘܪ. ܘܶܐܢ ܐܺܝܬ ܒܺܝ ܡܦܰܬܠܘܬܳܐ ܕܰܚܛܳܗܷ̈ܐ܆ ܠܳܐ ܐܶܬܩܰܒܰܠ. ܕܰܐܝܟ ܗܳܕܶܐ ܐܳܡܰܪ ܗܘܳܐ ܐܺܝܽܘܒ ܗܰܘ ܙܰܕܺܝܩܳܐ. ܕܠܳܐ ܐܶܙܕܰܕܩܶܬ ܠܳܐ ܐܶܬܥܢܶܐ. ܘܰܠܕܰܝܳܢܝ ܐܶܬܟܰܫܰܦ (ܐܝܘܒ ܛ: ܝܗ). ܗܳܟܰܢܳܐ ܐܳܦ ܕܰܘܺܝܕ ܛܽܘܒܬܳܢܳܐ܇ ܒܕܰܟܝܳܐ ܗܘܳܐ܆ ܬܪܺܝܨܽܘܬܳܐ ܕܢܰܦܫܶܗ ܕܕܰܟܝܳܐ ܡܶܢ ܥܰܘܠܳܐ. ܡܦܺܝܣ ܗܘܳܐ ܠܐܠܳܗܳܐ ܕܢܶܚܙܶܐ ܬܪܺܝܨܽܘܬܶܗ. ܘܳܐܡܰܪ ܗܘܳܐ:
ܒܚܰܪܬ ܠܶܒܝ ܘܰܣܥܰܪܬܳܢܝ ܒܠܺܠܝܳܐ. ܘܰܒܩܰܝܬܳܢܝ ܘܠܐ ܐܶܫܟܰܚܬ ܒܺܝ ܥܰܘܠܐܴ: ܘܠܳܐ ܥܒܰܪܘ ܥܰܠ ܦܽܘܡܝ: ܥܒܴ̈ܕܶܐ ܕܰܒܢܰܝ̈ܢܳܫܳܐ. ܒܡܰܡܠܠܳܐ ܕܣܶܦ̈ܘܳܬܳܐ. ܚܙܺܝ ܗܳܟܺܝܠ ܐܰܝܟܰܢܳܐ ܐܳܡܰܪ: ܠܰܘ ܕܗܽܘ ܢܒܺܝܳܐ ܒܳܚܰܪ ܠܶܒܶܗ܆ ܐܶܠܳܐ ܚܳܐܰܪ ܗܘܳܐ ܘܚܳܙܶܐ ܠܕܺܝ̈ܢܶܐ ܟܺܐܢܷ̈ܐ ܕܰܐܠܳܗܳܐ. ܟܰܕ ܥܳܐܠܺܝܢ ܗܘܰܘ ܠܢܰܦܫܶܗ ܘܒܳܚܪܺܝܢ ܚܽܘܫܳܒܰܘ̈ܗܝ. ܕܕܰܠܡܳܐ ܐܺܝܬ ܒܗܽܘܢ ܥܰܘܠܳܐ ܘܰܚܛܺܝܬܳܐ. ܘܡܶܛܠ ܕܶܐܬܒܩܺܝ ܒܺܝܕܰܥܬܳܐ ܕܰܐܠܳܗܳܐ ܐܰܝܟ ܕܰܗܒܳܐ ܕܥܳܐܶܠ ܠܟܽܘܪܳܐ. ܘܠܐ ܐܶܫܟܚܰܬ ܒܶܗ ܟܺܐܢܽܘܬܳܐ ܣܽܘܠܳܐܢܳܐ ܕܙܺܐܦܳܐ. ܕܰܒܩܰܝܬܳܢܝ ܟܰܕ ܬܟܺܝܠ ܘܠܐ ܐܶܫܟܰܚܬ ܒܺܝ ܥܰܘܠܳܐ. ܘܠܐ ܐܶܚܰܕܬܳܢܝ ܒܣܰܟ̈ܠܘܳܬܳܐ ܕܰܐܚܪ̈ܳܢܶܐ ܕܡܰܠܠܶܬ ܒܗܽܘܢ. ܘܠܐ ܩܶܒܠܶܬ ܠܟܺܐܢܽܘܬܳܟ ܥܰܠ ܡܰܪܳܚܽܘܬܳܐ ܕܥܳܒ̈ܕܰܝ ܥܰܘܠܳܐ. ܩܰܕܡܶܬ ܓܶܝܪ ܝܶܕܥܶܬ ܕܳܐܦܶܢ ܫܪܳܪܳܐ ܐܳܡܰܪ ܐܢܳܐ ܩܕܳܡ ܬܰܪܥܳܟ. ܠܳܐ ܓܶܝܪ ܣܢܺܝܩ ܕܰܚܢܰܢ ܢܩܰܛܪܶܓ ܠܥܳܒ̈ܕܰܝ ܒܺܝ̈ܫܳܬܳܐ. ܘܠܰܘ ܡܶܢ ܒܰܪܢܳܫܳܐ ܢܳܣܶܒ ܐܰܢܬ ܣܳܗܕܽܘܬܳܐ. ܘܟܶܢ ܡܚܰܝܶܒ ܐܰܢܬ ܠܡܰܣܟ̈ܠܳܢܶܐ. ܡܶܛܽܠܗܳܢܳܐ ܚܽܘܪ ܒܒܳܥܽܘܬܝ ܘܰܫܡܰܥ ܠܬܰܟܫܶܦܬܝ. ܕܠܐ ܡܬܽܘܡ ܩܶܒܠܶܬ ܠܳܟ ܥܰܠ ܒܺܝ̈ܫܶܐ. ܘܠܳܐ ܩܰܛܪܓܶܬ ܠܰܒܢܰܝ̈ܢܳܫܳܐ. ܘܥܰܠܗܳܕܶܐ ܟܰܕ ܚܙܳܐ ܗܘܳܐ ܕܡܶܢ ܗܳܠܶܝܢ ܡܚܰܣܰܝ ܗܘܳܐ ܐܳܡܰܪ:
ܕܰܢܛܰܪܬܳܢܝ ܡܶܢ ܐܘܪ̈ܚܳܬܳܐ ܒܺܝ̈ܫܳܬܳܐ. ܠܐ ܠܰܡ ܫܒܰܩܬ̣ܰܢܝ ܒܛܺܝܠܽܘܬܳܟ ܕܰܥܠܰܝ ܐܰܝܟܰܢܳܐ ܕܶܐܗܰܠܶܟ ܥܰܡ ܫܰܩܳܪ̈ܶܐ. ܘܰܡܪ̈ܰܡܝܳܢܶܐ ܙܺܐܦܳܢܷ̈ܐ. ܕܰܐܘܕܰܥ ܠܫܳܐܘܳܠ ܕܢܶܦܽܘܩ ܒܳܬܰܪܝ ܘܶܐܢ ܡܶܫܟܰܚ ܠܺܝ ܢܶܩܛܠܰܢܝ. ܘܟܰܕ ܡܶܢ ܒܺܝ̈ܫܳܬܳܐ ܚܣܰܟܬܳܢܝ.
ܘܣܰܡܶܟܬ ܗܰܠܟܴ̈ܬܝ ܒܰܫܒܺܝ̈ܠܰܝܟ ܕܠܐ ܢܙܽܘ̈ܥܳܢ ܦܣܳܥܴ̈ܬܝ. ܫܒܺܝ̈ܠܰܘܗܝ ܕܰܐܠܳܗܳܐ ܠܦܽܘ̈ܩܕܳܢܶܐ ܘܰܠܙܽܘܗܳܪ̈ܶܐ ܘܰܠܢܳܡܽܘܣܳܐ ܕܶܐܬܬܣܺܝܡ ܡܶܢ ܪܽܘܚܳܐ ܡܫܰܡܰܗ. ܕܰܪܚܰܡ ܠܡܳܪܝܳܐ ܐܰܠܳܗܳܟ ܡܶܢ ܟܽܠܶܗ ܠܶܒܳܟ ܘܡܶܢ ܟܽܠܳܗ̇ ܢܰܦܫܳܟ. ܘܡܶܢ ܟܽܠܶܗ ܪܶܥܝܳܢܳܟ. ܗܳܢܰܘ ܫܒܺܝܠܳܐ ܩܰܕܡܳܝܳܐ ܕܰܐܠܳܗܳܐ. ܕܰܐܚܶܒ ܠܩܰܪܺܝܒܳܟ ܐܰܝܟ ܢܰܦܫܳܟ. ܘܗܳܢܰܘ ܫܒܺܝܠܳܐ ܕܠܐ ܬܶܩܛܽܘܠ. ܠܐ ܬܓܽܘܪ. ܠܐ ܬܶܓܢܽܘܒ. ܠܳܐ ܬܶܪܰܓ ܐܰܢܬܬܶܗ ܕܚܰܒܪܳܟ. ܘܠܐ ܒܰܝܬܶܗ ܘܠܳܐ ܐܰܡܬܶܗ. ܘܠܳܐ ܬܰܘܪܶܗ ܘܠܳܐ ܚܡܳܪܶܗ. ܘܠܐ ܟܽܠܡܶܕܶܡ ܕܺܐܝܬ ܠܚܰܒܪܳܟ. ܗܳܠܶܝܢ ܐܶܢܽܘܢ ܫܒܺܝ̈ܠܶܐ ܟܺܐܢܷ̈ܐ ܕܰܡܣܰܡܟܺܝܢ ܗܘܰܘ ܗܰܠܟܴ̈ܬܶܗ ܕܕܰܘܺܝܕ. ܘܥܰܠ ܗܳܕܶܐ ܠܐ ܙܳܝ̈ܥܳܢ ܗܘܱ̈ܝ ܦܣܳܥܴ̈ܬܶܗ. ܟܰܕ ܪܳܕܶܐ ܗܘܳܐ ܒܽܐܘܪܚܳܐ ܕܟܺܐܢܽܘܬܳܐ. ܘܰܬܟܺܝܠ ܗܘܳܐ ܐܰܝܟ ܐܰܪܝܳܐ ܕܠܳܐ ܙܳܐܰܥ ܠܶܒܶܗ ܘܰܐܝܟ ܓܰܒܪܳܐ ܕܶܐܫܬܰܡܥܰܬ ܒܳܥܽܘܬܶܗ ܘܰܨܠܽܘܬܶܗ ܘܳܐܡܰܪ ܗܘܳܐ:
ܐܶܢܳܐ ܩܪܺܝܬܳܟ ܡܶܛܽܠ ܕܰܥܢܰܝܬܳܢܝ. ܐܰܠܳܗܳܐ ܨܠܺܝ ܐܶܕܢܳܟ ܠܘܳܬܝ ܘܰܫܡܰܥ ܡܶܠܰܝ̈: ܘܰܥܒܶܕܳܝܗܝ ܬܶܕܡܽܘܪܬܳܐ ܠܚܰܣܝܳܟ. ܚܽܘܪ ܟܡܳܐ ܚܽܘܒܳܐ ܐܺܝܬ ܠܶܗ ܒܰܨܠܽܘܬܶܗ. ܨܠܺܝ ܠܘܳܬܝ ܐܳܕܢܶܟ. ܐܰܘ ܕܰܠܡܳܐ ܠܰܘ ܦܰܪܶܗܣܺܝܰܐ ܡܰܘܕܥܳܐ ܡܶܠܬܳܐ ܗܳܕܶܐ. ܐܶܠܳܐ ܝܰܬܝܪܳܐܝܬ ܡܰܟܺܝܟܳܐܝܺܬ ܡܶܫܬܰܡܥܳܢܽܘܬܶܗ ܕܗܰܘ ܕܰܡܨܰܠܶܐ. ܘܚܽܘܒܶܗ ܕܗܰܘ ܕܫܳܡܰܥ܇ ܗܳܢܰܘ ܐܰܪܟܶܢ ܛܰܝܒܽܘܬܳܟ ܘܶܐܬܡܰܟܟ ܠܘܳܬ ܟܝܳܢܳܐ ܕܥܰܦܪ̈ܳܢܶܐ. ܘܒܳܗ̇ ܠܰܡ ܒܗܳܕܶܐ ܕܫܳܡܰܥ ܐܰܢܬ ܨܠܽܘܬܝ ܥܳܒܶܕ ܐܰܢܬ ܡܶܬܢܰܚܬܳܢܽܘܬܳܐ ܠܘܳܬ ܫܶܦܠܶܗ ܕܰܟܝܳܢܰܢ. ܡܰܪܟܶܢ ܐܰܢܬ ܐܶܕܢܳܟ ܘܡܶܬܪܰܚܡܳܢܳܐܝܬ ܠܐ ܫܳܐܶܛ ܐܰܢܬ ܨܠܽܘܬܰܢ. ܟܰܕ ܡܶܬܕܰܡܪܺܝܢ ܒܺܝ ܚܰܝ̈ܠܰܘܳܬܳܐ ܥܶܠܳܝܷ̈ܐ ܕܩܳܝܡܺܝܢ ܒܬܰܪܥܳܟ. ܕܟܰܕ ܐܺܝܬܰܝ ܥܰܦܪܳܐ ܘܩܶܛܡܳܐ܆ ܐܰܪܟܶܢܬ̣ܳܟ ܐܶܕܢܳܟ ܘܰܫܡܰܥܬܳܢܝ. ܘܥܰܠܗܳܕܶܐ ܐܳܡܰܪ ܐܢܳܐ.
ܕܰܥܒܶܕܳܝܗܝ ܬܶܕܡܽܘܪܬܳܐ ܠܚܰܣܝܳܟ. ܘܦܳܪܽܘܩܳܐ ܠܰܐܝܠܶܝܢ ܕܰܡܣܰܒܪܺܝܢ ܒܳܟ. ܡܶܠܬܳܐ ܗܳܕܶܐ ܐܰܝܟ ܕܕܳܡܝܳܐ ܫܳܪܥܳܐ ܠܳܗ̇ ܒܪܰܒܽܘܬܳܗ̇ ܥܰܠ ܕܰܪܓܳܐ ܕܰܡܥܰܠܰܝ ܡܶܢ ܟܝܳܢܶܗ ܕܒܰܪܢܳܫܳܐ. ܚܰܣܝܶܗ ܓܶܝܪ ܕܰܐܒܳܐ ܗܰܘ ܕܰܦܪܰܩ ܠܐܝܠܶܝܢ ܕܒܶܗ ܡܣܰܒܪܺܝܢ. ܡܰܢ ܐܚܪܺܢܳܐ ܢܶܬܪܢܶܐ ܕܐܝܬܰܘܗܝ܆ ܐܶܠܳܐ ܝܺܚܝܕܳܝܶܗ ܘܰܒܪܶܗ ܚܰܒܺܝܒܳܐ. ܘܗܳܝ ܕܰܥܒܶܕܳܝܗܝ ܬܶܕܡܽܘܪܬܳܐ. ܐܰܝܟ ܗܳܝ ܕܰܩܪܳܝܗܝ ܐܶܫܰܥܝܳܐ ܕܽܘܡܳܪܳܐ. ܒܶܝܬ ܕܽܘܡܳܪܳܐ ܠܬܶܕܡܽܘܪܬܳܐ ܠܰܝܬ ܫܽܘܚܠܳܦܳܐ ܡܶܕܶܡ. ܡܶܛܠ ܕܚܰܕ ܗܘ ܚܰܝܠܳܐ ܕܰܬܪ̈ܰܝܗܽܘܢ ܟܽܘ̈ܢܳܝܶܐ. ܘܰܐܟܙܢܳܐ ܕܢܺܐܡܰܪ ܐܢܳܫ. ܫܽܘܒܚܳܐ܇ ܘܳܐܡܰܪ ܐܚܪܺܢܳܐ ܬܶܫܒܽܘܚܬܳܐ. ܚܰܕ ܗܘ ܚܰܝܠܳܐ ܗܰܘ ܕܰܬܪ̈ܰܝܗܽܘܢ. ܘܥܰܠ ܕܽܘܡܳܪܳܐ ܘܬܶܕܡܽܘܪܬܳܐ ܢܺܐܡܰܪ ܩܰܠܺܝܠ. ܕܡܳܢܳܐ ܗܝ ܬܶܕܡܽܘܪܬܳܐ ܕܰܥܒܰܕ ܐܰܒܳܐ ܠܡܶܠܬܶܗ ܚܰܣܝܳܐ. ܩܰܕܡܳܐܝܺܬ ܢܫܰܪܶܐ ܡܶܢ ܪܺܝܫܳܐ ܕܽܐܘܪܚܳܐ ܕܰܡܕܰܒܪܳܢܽܘܬܶܗ ܕܒܰܒܣܰܪ. ܡܶܢ ܗܳܝ ܕܰܢܚܶܬ ܡܶܢ ܫܡܰܝܳܐ. ܟܰܕ ܦܳܫ ܒܰܫܡܰܝܳܐ. ܘܡܶܢ ܗܳܝ ܕܶܐܬܳܐ ܠܒܰܛܢܳܐ ܗܰܘ ܨܳܐܰܪ ܒܛܺܝ̈ܢܶܐ. ܘܰܩܢܳܐ ܓܽܘܫܡܳܐ ܘܪܽܘܟܳܒܳܐ܆ ܗܰܘ ܦܫܺܝܛܳܐ ܘܰܡܬܽܘܡܳܝܳܐ. ܘܰܗܘܳܐ ܠܓܰܘ ܡܶܢ ܡܽܘܫܚ̈ܬܳܐ ܕܰܟܝܳܢܰܢ܆ ܗܰܘ ܕܥܶܠܳܝ ܡܶܢܟܽܠ ܡܽܘܫ̈ܚܳܢ ܘܪܳܡ ܡܶܢܟܽܠ ܛܶܟܣܺܝ̈ܢ ܕܰܟܝܳܢܷ̈ܐ ܡܪ̈ܰܟܒܶܐ. ܘܶܐܬܳܐ ܠܝܰܠܕܳܐ ܘܰܠܥܰܙܪܽܘܪ̈ܶܐ܆ ܗܰܘ ܥܳܒܽܘܕܳܐ ܕܥܽܘ̈ܠܐܷ ܒܟܰܪ̈ܣܳܬܳܐ. ܘܡܶܢ ܬܕܰܝܴ̈ܐ ܒܬܽܘܠܳܝܷ̈ܐ ܝܺܢܶܩ ܚܰܠܒܳܐ܆ ܗܰܘ ܕܝܳܗܶܒ ܚܰܝ̈ܐ ܠܟܽܠ ܒܣܰܪ. ܘܶܐܬܛܥܶܢ ܥܰܠ ܒܽܘܪ̈ܟܶܐ ܕܰܥܠܰܝܡܬܳܐ܆ ܗܰܘ ܕܠܳܐ ܡܣܰܝܟܳܐ ܠܶܗ ܡܰܪܟܰܒܬܳܐ ܕܰܟܪ̈ܽܘܒܶܐ. ܘܶܐܬܬܣܺܝܡ ܒܽܐܘܪܝܳܐ ܘܰܥܪܰܩ ܠܡܶܨܪܶܝܢ. ܘܶܐܬܪܰܒܺܝ ܒܡܽܘܫ̈ܚܳܬܳܐ ܐܢܳܫܳܝ̈ܬܳܐ܆ ܗܰܘ ܕܰܡܪܰܒܶܐ ܠܟܽܠ ܐܰܝܟ ܐܰܠܳܗܳܐ. ܘܶܐܬܩܰܪܰܒ ܠܡܽܘܟܳܟܳܐ ܕܰܨܠܺܝܒܳܐ܆ ܗܰܘ ܕܨܰܠܒܳܗ̇ ܠܰܚܛܺܝܬܳܐ. ܘܚܰܫ ܒܰܒܣܰܪ܆ ܗܰܘ ܕܥܶܠܳܝ ܡܶܢ ܚܰܫܷ̈ܐ. ܘܰܛܥܶܡ ܡܰܘܬܳܐ ܒܦܰܓܪܳܐ ܡܳܝܽܘܬܳܐ܆ ܗܰܘ ܠܳܐ ܡܳܝܽܘܬܳܐ ܘܕܰܠܥܶܠ ܡܶܢ ܚܒܳܠܳܐ. ܘܰܣܠܶܩ ܠܰܫܡܰܝܳܐ ܒܦܰܓܪܳܐ ܕܰܢܣܰܒ ܡܶܢܰܢ ܒܫܽܘܒܚܳܐ ܕܺܝܠܶܗ ܘܡܶܢܶܗ. ܗܰܘ ܕܰܢܚܶܬ ܠܳܐ ܡܶܣܬܰܝܟܳܢܳܐܝܬ܆ ܣܠܶܩ ܠܳܐ ܡܶܬܕܰܪܟܳܢܳܐܝܬ. ܗܳܢܰܘ ܚܰܝܠܳܐ ܕܦܶܬܓܳܡܳܐ ܕܶܐܡܰܪ ܢܒܺܝܳܐ ܕܰܘܺܝܕ. ܕܰܥܒܶܕܳܝܗܝ ܬܶܕܡܽܘܪܬܳܐ ܠܚܰܣܝܳܟ. ܘܦܳܪܽܘܩܳܐ ܠܰܐܝܠܶܝܢ ܕܰܡܣܰܒܪܺܝܢ ܒܳܟ. ܠܝܽܘܚܰܢܳܢ ܢܺܐܡܰܪ: ܐܷܠܳܐ ܥܰܡ̈ܡܶܐ ܡܗܰܝܡ̈ܢܶܐ ܐܰܝܠܶܝܢ ܕܩܰܒܠܽܘܗܝ ܠܚܰܣܝܶܗ ܕܰܐܒܳܐ. ܘܣܳܐܶܡ ܦܰܪܨܽܘܦܶܗ ܚܠܳܦܰܘܗܝ ܕܡܶܠܬܳܐ ܐܰܠܳܗܳܐ ܘܶܐܡܰܪ:
ܡܶܢ ܐܰܝܠܶܝܢ ܕܩܳܝܡܺܝܢ ܠܽܘܩܒܰܠ ܝܰܡܺܝܢܳܟ܆ ܢܰܛܰܪܰܝܢܝ ܐܰܝܟ ܒܳܒܬܳܐ ܕܥܰܝܢܳܐ. ܕܝܰܡܺܝܢܶܗ ܕܰܐܒܳܐ ܕܶܝܢ ܒܪܶܗ ܗܘ܆ ܠܰܝܬ ܒܗܽܘܢ ܐܢܳܫ ܡܶܢ ܐܰܝܠܶܝܢ ܕܺܐܝܬ ܒܗܽܘܢ ܣܽܘܟܳܠܳܐ ܕܡܶܬܚܪܶܝܢ. ܘܗܳܢܽܘܢ ܕܩܳܡܘ ܠܩܽܘܒܠܶܗ. ܡܶܢܗܽܘܢ ܐܺܝܬܰܝܗܽܘܢ ܚܰܝܠܰܘܴ̈ܬܶܗ ܕܚܶܫܘܟܳܐ. ܗܳܢܽܘܢ ܕܰܣܕܰܪ ܠܩܽܘܒܠܶܗ ܩܪܳܒܳܐ ܒܡܰܕܒܪܳܐ. ܥܰܡ ܐܳܟܶܠܩܰܪܨܳܐ ܪܰܒܗܽܘܢ. ܬܪ̈ܰܝܳܢܶܐ ܕܗܳܠܶܝܢ ܓܽܘܕܳܐ ܟܬܺܝܫܬܳܐ ܕܨܳܠܽܘ̈ܒܶܐ. ܘܟܽܠܗܽܘܢ ܐܰܝܠܶܝܢ ܕܥܰܬܶܕܘ ܠܶܗ ܩܶܛܠܳܐ. ܘܥܰܠܗܳܝ ܨܶܢܥܬܳܐ ܡܥܰܬܕܺܝܢ ܗܘܰܘ ܕܒܶܝܬ ܫܳܐܘܳܠ. ܥܰܠ ܬܰܡܺܝܡܳܐ ܘܡܰܟܺܝܟܳܐ ܕܰܘܺܝܕ. ܐܰܝܟ ܕܳܐܦ ܗܳܢܽܘܢ ܕܒܶܝܬ ܚܰܢܳܢ ܥܰܠ ܥܰܡܰܢܽܘܐܝܠ. ܡܰܝܬܶܐ ܘܳܐܡܰܪ:
ܢܰܛܰܪܰܝܢܝ ܐܰܝܟ ܒܳܒܬܳܐ ܕܥܰܝܢܳܐ. ܘܰܒܛܶܠܳܠܐ ܕܟܶܢ̈ܦܰܝܟ ܣܰܬܰܪܰܝܢܝ. ܡܶܢ ܩܕܳܡ ܚܰܛܳܝܷ̈ܐ ܗܳܠܝܶܢ ܕܒܰܙܽܘܢܝ: ܒܥܶܠܕ̈ܒܳܒܶܝܗ̇ ܕܢܰܦܫܝ ܕܣܳܡܘ ܥܠܰܝ. ܕܳܡܝܳܐ ܕܚܰܛܳܝܷ̈ܐ ܡܫܰܡܰܗ ܠܗܳܢܽܘܢ ܕܪܳܕܦܺܝܢ ܠܶܗ ܘܰܒܥܶܠܕܒܴ̈ܒܶܐ ܕܢܰܦܫܶܗ ܠܚܰܝ̈ܠܰܘܳܬܳܐ ܕܚܶܫܽܘܟܳܐ. ܒܥܶܠܕ̈ܒܳܒܶܐ ܕܶܝܢ ܕܢܰܦܫܳܐ ܫܺܐܕ̈ܐ ܐܶܢܘܢ. ܡܶܛܠܗܳܢܳܐ ܒܥܶܠܕ̈ܒܳܒܶܝܗ̇ ܕܢܰܦܫܳܐ ܗܳܝ ܦܳܪܽܘܫܬܳܐ. ܡܚܰܛܦܺܝܢ ܗܘܰܘ ܠܰܪ̈ܕܺܝܦܶܐ ܕܰܢܥܰܬܕܽܘܢܳܝܗܝ ܠܫܳܐܘܳܠ. ܕܠܳܐ ܢܰܗܡܶܐ ܡܶܢ ܩܶܛܠܶܗ ܕܕܰܘܺܝܕ. ܘܰܟܡܳܐ ܕܡܶܢ ܫܺܐܕ̈ܐ ܡܶܬܬܰܥܒܕܺܝܢ ܗܘܰܘ܇ ܡܥܺܝܪܺܝܢ ܗܘܰܘ ܠܰܛܢܳܢܶܗ ܕܫܳܐܘܳܠ܆ ܕܰܐܝܟ ܢܽܘܪܳܐ ܢܶܬܓܰܘܙܰܠ ܥܰܠ ܓܰܒܪܳܐ ܙܰܕܺܝܩܳܐ. ܘܗܳܢܽܘܢ ܕܒܰܙܒܰܢ ܡܫܰܒܚܺܝܢ ܘܰܡܩܰܠܣܺܝܢ ܠܶܗ ܥܰܠ ܕܰܩܛܰܠ ܠܓܽܘܠܝܰܕ ܦܠܶܫܬܳܝܳܐ܆ ܗܦܰܟܘ ܘܚܰܕܪܽܘܗܝ ܐܰܝܟ ܒܥܶܠܕ̈ܒܳܒܶܐ ܕܢܰܪܡܘܢܳܝܗܝ ܒܰܐܪܥܳܐ. ܐܶܡܰܪ ܓܶܝܪ ܕܰܘܺܝܕ:
ܕܫܰܒܚܽܘܢܝ ܘܗܳܫܳܐ ܟܰܪܟܽܘܢܝ: ܘܣܳܡܘ ܥܰܝ̈ܢܰܝܗܽܘܢ ܕܢܰܪܡܽܘܢܳܢܝ ܒܰܐܪܥܳܐ: ܕܳܡܶܝܢ ܠܰܐܪܝܳܐ ܕܒܳܥܶܐ ܠܡܶܬܒܰܪ. ܘܰܐܝܟ ܓܽܘܪܝܳܐ ܕܰܐܪܝܳܐ ܕܝܳܬܶܒ ܒܛܽܘܫܝܳܐ. ܟܡܳܐ ܠܰܡ ܐܶܢ ܚܰܝܠܬܢܝܳܐ ܒܺܝܫܬܳܐ܇ ܐܶܠܳܐ ܠܰܝܬ ܠܳܗ̇ ܦܰܪܶܗܣܝܰܐ ܘܠܳܐ ܡܶܬܝܗܶܒ ܠܳܗ̇ ܫܽܘܠܛܳܢܳܐ ܕܓܰܠܝܳܐܝܬ ܬܶܩܛܽܘܠ. ܐܳܦ ܐܰܪܝܳܐ ܓܶܝܪ ܘܓܽܘܪܝܳܐ ܕܰܐܪܝܳܐ ܟܰܕ ܛܳܒ ܡܶܢ ܟܽܠܳܗ̇ ܒܥܺܝܪܳܐ ܚܰܝܠܬܳܢܝ̣ܢ܆ ܐܶܠܳܐ ܒܢܶܟܠܳܐ ܘܒܰܟܡܺܐܢܳܐ ܡܚܰܘܶܝܢ ܕܣܳܥܶܝܢ ܥܰܠ ܬܒܳܪܳܐ. ܗܳܟܰܢܳܐ ܐܳܦ ܐܳܟܶܠܩܰܪܨܳܐ ܗܰܘ ܐܰܪܝܳܐ ܡܶܬܝܰܕܥܳܢܳܐ. ܡܳܐ ܕܰܟܡܶܢ ܒܛܽܘܫܝܳܐ ܠܰܬܒܳܪܳܐ ܕܢܰܦܫܳܐ܆ ܒܣܶܬܪܳܐ ܕܰܪ̈ܓܺܝܓܳܬܳܐ ܡܶܬܓܢܶܐ ܘܟܳܡܶܢ. ܚܙܰܝܬ ܪܶܓܬܳܐ ܡܰܣܠܰܝܬܳܐ ܕܓܰܘܪܳܐ ܛܰܡܳܐܐ ܘܙܳܢܝܽܘܬܳܐ. ܗܳܠܶܝܢ ܐܶܢܽܘܢ ܓܰܢܳܢ̈ܐ ܕܡܶܛܫܳܐ ܛܳܫܶܐ ܒܗܽܘܢ. ܗܰܘ ܕܰܨܗܶܐ ܠܰܬܒܳܪܳܐ ܕܩܰܕܺܝ̈ܫܶܐ. ܚܙܰܝܬ ܪܶܚܡܰܬ ܟܶܣܦܳܐ ܥܶܩܳܪܳܐ ܕܟܽܠܗܶܝܢ ܒܺܝ̈ܫܳܬܳܐ. ܗܳܢܰܘ ܟܡܺܐܢܶܗ ܡܰܪܺܝܪܳܐ ܕܰܐܪܝܳܐ ܡܶܬܝܰܕܥܳܢܳܐ. ܐܳܡܰܪ ܐܢܳܐ ܨܢܺܝܥܘܬܳܐ: ܚܰܪܳܫܽܘܬܳܐ: ܒܥܶܠܕܒܳܒܽܘܬܳܐ: ܐܳܣܽܘܛܽܘܬܳܐ: ܪܰܘܳܝܽܘܬܳܐ: ܙܡܳܪܳܐ: ܚܶܪܝܳܢܳܐ: ܛܢܳܢܳܐ: ܚܣܳܡܳܐ: ܡܪܰܡܝܳܢܽܘܬܳܐ܆ ܡܰܡܠܠܳܐ ܛܰܢܦܳܐ. ܗܳܠܶܝܢ ܘܕܰܐܝܟ ܗܳܠܶܝܢ܆ ܟܡܺܐܢܷ̈ܐ ܐܶܢܽܘܢ ܚܰܣܺܝ̈ܢܶܐ ܕܡܶܬܛܰܫܶܐ ܒܗܽܘܢ ܘܟܳܡܶܢ ܠܰܬܒܳܪܳܐ ܒܥܶܠܕܒܳܒܳܐ ܕܚܱ̈ܝܰܝܢ. ܘܥܰܠܗܳܕܶܐ ܡܨܰܠܶܐ ܢܒܺܝܳܐ ܘܳܐܡܰܪ:
ܩܽܘܡ ܡܳܪܝܳܐ ܩܕܳܡ ܐܰܦܰܝ̈ܗܽܘܢ ܘܰܐܒܪܶܟ ܐܶܢܽܘܢ. ܘܦܰܨܳܗ̇ ܠܢܰܦܫܝ ܡܶܢ ܪ̈ܰܫܺܝܥܶܐ ܘܡܶܢ ܚܰܪܒܳܐ: ܘܡܶܢ ܡܺܝ̈ܬܶܐ ܕܡܳܝܬܺܝܢ ܡܶܢ ܐܝ̈ܕܰܝܟ ܡܳܪܝܳܐ. ܘܡܶܢ ܡܺܝ̈ܬܶܐ ܕܚܶܦܪܳܐ: ܬܦܰܠܶܓ ܐܶܢܽܘܢ ܒܚܰܝܷ̈ܐ. ܡܨܰܠܶܐ ܗܳܪܟܳܐ ܢܒܺܝܳܐ ܘܳܐܡܰܪ: ܕܠܐ ܢܶܦܶܠ ܒܚܰܪܒܳܐ ܕܡܶܢ ܚܰܝ̈ܘܳܬܳܐ ܗܳܠܶܝܢ. ܘܰܢܦܺܝܣ ܕܢܰܒܪܶܟ ܐܶܢܽܘܢ ܡܳܪܝܳܐ ܠܰܒܥܶܠܕܒ̈ܒܶܐ ܗܳܠܝܶܢ ܡܶܬܝܰܕܥܴ̈ܢܶܐ. ܡܶܛܽܠ ܕܟܳܡܢܺܝܢ ܠܢܰܦ̈ܫܳܬܳܐ ܕܩܰܕܺܝ̈ܫܶܐ ܒܓܰܘ ܬܰܚܦܺܝܬܳܐ ܡܛܰܫܰܝܬܳܐ ܕܰܪ̈ܓܺܝܓܳܬܳܐ. ܡܶܛܽܠܗܳܕܶܐ ܟܽܠܡܰܢ ܕܒܰܪ̈ܓܺܝܓܳܬܳܐ ܟܳܡܶܢ ܒܥܶܠܕܒܳܒܳܐ ܘܩܳܛܶܠ ܠܶܗ܆ ܡܺܝܬ ܠܶܗ ܐܳܦܶܢ ܕܚܰܝ. ܘܡܶܢ ܐܝ̈ܕܰܘܗܝ ܕܡܳܪܝܳܐ ܡܺܝܬ ܠܶܗ. ܗܳܢܰܘ ܓܶܝܪ ܕܠܰܝܬ ܠܶܗ ܡܢܳܬܳܐ ܘܝܳܪܬܽܘܬܳܐ ܒܚܰܝܷ̈ܐ ܕܠܐ ܚܒܳܠܳܐ. ܐܰܟܙܢܳܐ ܓܶܝܪ ܕܗܰܘ ܕܚܰܝ ܒܙܰܕܺܝܩܽܘܬܳܐ܆ ܚܰܝ ܗܽܘ ܠܐܠܳܗܳܐ ܘܠܰܘ ܡܺܝܬܳܐ ܡܶܬܚܫܶܒ. ܐܰܝܟ ܡܶܠܬܳܐ ܫܰܪܺܝܪܬܳܐ ܕܳܐܡܪܐ: ܕܟܽܠ ܡܰܢ ܕܰܡܗܰܝܡܶܢ ܒܺܝ܇ ܘܳܐܦܶܢ ܢܡܽܘܬ ܢܺܚܶܐ. ܘܟܽܠ ܕܚܰܝ ܘܰܡܗܰܝܡܶܢ ܒܺܝ܆ ܠܥܳܠܰܡ ܠܳܐ ܢܡܽܘܬ (ܝܘܚܢܢ ܝܐ: ܟܗ). ܗܳܟܰܢܳܐ ܕܶܐܬܩܛܶܠ ܒܚܰܕ ܡܶܢ ܚܰܫܷ̈ܐ ܕܰܪ̈ܓܺܝܓܳܬܳܐ. ܕܰܡܛܰܫ̈ܝܳܢ ܒܗܽܘܢ ܚܰܝ̈ܘܳܬܳܐ ܗܳܠܶܝܢ ܕܟܳܡ̈ܢܳܢ ܠܰܬܒܳܪܳܐ ܕܙܰܕܺܝ̈ܩܶܐ܆ ܗܳܢܳܐ ܡܶܟܺܝܠ ܡܺܝܬ ܠܶܗ ܡܶܢ ܐܝ̈ܕܰܘܗܝ ܕܡܳܪܝܳܐ. ܟܡܳܐ ܐܶܢ ܡܶܣܬܒܰܪ ܕܚܰܝ. ܘܡܶܟܺܝܠ ܕܰܒܚܰܫܳܐ ܐܰܝܢܳܐ ܕܗܽܘ ܡܶܬܠܒܶܟ܆ ܡܶܬܦܰܠܛܳܐ ܠܳܗ̇ ܐܺܝܕܳܐ ܕܰܐܠܳܗܳܐ ܘܫܳܕܝܳܐ ܠܶܗ ܡܶܢܳܗ̇. ܐܰܝܟ ܝܰܡܳܐ ܕܡܶܬܗܰܦܟܺܝܢ ܓܰܠܠܰܘ̈ܗܝ. ܘܫܳܕܶܝܢ ܠܒܰܪ ܡܶܢܶܗ ܫܠܰܕ̈ܐ ܡܺܝ̈ܬܳܬܳܐ. ܘܗܳܠܶܝܢ ܗܳܘ̈ܝܳܢ ܒܕܺܝܢܳܐ. ܘܡܺܝ̈ܬܶܐ ܕܚܶܦܪܳܐ. ܕܰܡܦܰܠܶܓ ܠܗܽܘܢ ܒܚܰܝܷ̈ܐ ܒܝܰܘܡܳܐ ܪܰܒܳܐ ܕܕܺܝܢܳܐ. ܚܶܦܪܳܐ ܕܶܝܢ ܡܫܰܡܰܗ ܗܳܪܟܳܐ ܪܽܘܚܳܐ ܕܰܢܒܺܝܽܘܬܳܐ܇ ܠܐܬܪܳܐ ܕܡܶܬܚܰܒܫܺܝܢ ܒܶܗ ܥܳܒ̈ܕܰܝ ܒܺܝ̈ܫܳܬܳܐ. ܘܺܐܝܬ ܢܒܺܝܳܐ ܕܰܩܪܳܝܗܝ ܢܰܚܠܳܐ ܕܢܽܘܪܳܐ. ܘܰܐܚܪܺܢܳܐ ܩܪܳܝܗܝ ܥܽܘܡܩܳܐ. ܘܡܳܪܰܢ ܩܪܳܝܗܝ ܬܰܫܢܺܝܩܳܐ. ܘܬܽܘܒ ܐܶܬܩܪܺܝ ܚܶܫܽܘܟܐܳ ܒܰܪܳܝܳܐ. ܘܬܽܘܒ ܐܶܬܩܪܝ ܒܶܟܝܳܐ ܘܚܽܘܪܳܩ ܫܶܢܷ̈ܐ. ܐܰܝܟܰܢܳܐ ܕܠܐ ܢܶܣܬܒܰܪ ܕܺܐܝܬ ܠܶܗ ܫܽܘܠܳܡܳܐ. ܒܗܳܢܳܐ ܢܳܦܠܺܝܢ ܡܺܝ̈ܬܶܐ ܡܶܢ ܐܝ̈ܕܰܘܗܝ ܕܡܳܪܝܳܐ. ܐܶܠܐ ܟܰܕ ܢܳܚܬܺܝܢ ܚܰܪܺܝܦܳܐܝܬ܆ ܡܶܬܗܰܓܡܺܝܢ ܘܠܐ ܫܳܠܶܝܢ ܡܶܢ ܡܰܚܬܬܳܐ. ܐܰܝܟܰܢܳܐ ܕܟܰܕ ܗܰܘ ܕܡܶܫܬܰܡܰܪ ܠܥܽܘܡܩܳܐ ܕܡܰܦܽܘܠܬܳܐ܆ ܠܐ ܦܳܢܶܐ ܕܰܢܚܽܘܪ ܠܥܶܠ ܘܢܶܒܥܶܐ ܡܰܣܩܳܢܳܐ. ܘܠܳܐ ܗܳܢܽܘܢ ܕܢܳܚܬܺܝܢ ܠܓܽܘܒܳܐ ܕܰܐܒܕܳܢܳܐ. ܐܶܫܬܶܗ ܕܓܽܘܒܳܐ ܠܐ ܡܶܫܟܚܺܝܢ ܕܢܶܫܠܽܘܢ ܘܰܢܩܽܘܡܽܘܢ. ܘܠܳܐ ܓܶܝܪ ܪܰܘܡܳܐ ܕܙܰܕܺܝ̈ܩܶܐ ܡܶܬܡܫܰܚ ܐܽܘܪܟܶܗ ܐܳܦ ܡܰܣܝܽܘ̈ܢܰܘܗܝ. ܘܠܳܐ ܚܶܦܪܳܐ ܕܢܳܚ̈ܬܰܝ ܫܝܽܘܠ ܬܰܚܬܳܝܬܳܐ ܘܠܳܐ ܡܶܬܓܫܶܫ ܘܠܳܐ ܐܺܝܬ ܠܶܗ ܐܘܪܟܳܐ ܘܰܦܬܳܝܳܐ. ܡܶܢ ܗܳܢܳܐ ܫܶܐܠ ܕܰܘܺܝܕ ܕܢܶܬܦܰܨܶܐ. ܐܰܟܡܰܢ ܕܶܐܬܓܠܺܝ ܠܶܗ ܡܶܢ ܪܽܘܚܳܐ ܕܰܢܒܺܝܽܘܬܳܐ܆ ܐܘܠܨܳܢܳܐ ܕܗܳܘܶܐ ܒܶܗ ܠܐܝܠܶܝܢ ܕܢܳܚܬܺܝܢ ܠܶܗ. ܕܶܐܡܰܪ ܕܶܝܢ ܬܦܰܠܶܓ ܐܶܢܽܘܢ ܒܚܰܝܷ̈ܐ܇ ܒܗܳܕܶܐ ܡܰܘܕܰܥ܆ ܕܒܳܬܰܪ ܩܝܳܡܬܳܐ ܡܳܐ ܕܶܐܬܒܰܛܰܠ ܡܰܘܬܳܐ܆ ܠܰܝܬ ܡܶܟܺܝܠ ܡܺܝ̈ܬܶܐ. ܐܶܠܳܐ ܚܰܝܷ̈ܐ ܐܳܚܕܺܝܢ ܪܺܝܫܳܢܽܘܬܳܐ. ܘܗܳܠܶܝܢ ܕܝܳܪܬܺܝܢ ܡܰܠܟܽܘܬܳܐ܆ ܚܳܐܶܝܢ ܘܡܶܬܦܰܛܡܺܝܢ ܒܚܰܝܷ̈ܐ ܡܰܠܝܱ̈ܝ ܒܽܘ̈ܣܳܡܶܐ ܥܰܡ ܡܰܠܐܟܷ̈ܐ. ܗܳܠܶܝܢ ܐܶܢܽܘܢ ܕܰܥܠܰܝܗܽܘܢ ܐܶܡܰܪ ܡܙܰܡܪܳܢܳܐ:
ܕܣܺܝ̈ܡܳܬܳܟ ܡܠܺܝ ܟܰܪܣܗܽܘܢ. ܡܰܪܘܶܐ ܓܶܝܪ ܢܰܦ̈ܫܳܬܗܽܘܢ ܕܙܰܕܺܝ̈ܩܶܐ ܕܽܘܗܳܢܳܐ ܘܡܶܢ ܛܘܒܶܗ ܣܳܒܥܺܝܢ. ܐܰܝܟ ܡܶܠܬܳܐ ܢܒܺܝܳܝܬܳܐ ܕܐܶܬܢܰܒܝܰܬ ܗܳܠܶܝܢ. ܡܶܛܽܠܗܳܢܳܐ:
ܢܶܣܒܥܽܘܢ ܒܢܰܝܴ̈ܐ ܘܢܶܫܒܩܽܘܢ ܫܰܪܟܳܐ ܠܰܒ̈ܢܰܝܗܽܘܢ. ܒܢܰܝܴ̈ܐ ܕܶܝܢ ܩܳܪܶܐ ܠܰܫܠܺܝ̈ܚܶܐ ܩܰܕܺܝ̈ܫܶܐ. ܘܠܰܐܝܠܶܝܢ ܕܰܐܟܘܳܬܗܽܘܢ ܐܶܬܓܡܰܪܘ. ܗܳܢܽܘܢ ܩܰܕܡܳܝܷ̈ܐ ܡܶܬܒܰܣܡܺܝܢ ܒܛܘ̈ܒܶܐ ܘܒܰܣܺܝ̈ܡܳܬܳܐ ܐܰܠܳܗܳܝ̈ܬܳܐ ܕܡܶܬܓܠܝܴ̈ܢ ܒܰܩܝܳܡܬܳܐ. ܡܶܛܽܠ ܕܗܶܢܽܘܢ ܩܰܕܡܳܝܷ̈ܐ ܩܳܝܡܺܝܢ ܒܚܰܝܷ̈ܐ ܕܠܳܐ ܚܒܳܠܳܐ. ܒܢܰܝ̈ܗܽܘܢ ܕܶܝܢ ܐܺܝܬܰܝܗܘܢ ܐܰܝܠܶܝܢ ܕܒܳܬܰܪܗܽܘܢ ܐܳܬܶܝܢ ܠܚܰܝܷ̈ܐ. ܗܳܢܰܘ ܐܰܝܠܶܝܢ ܕܗܰܝܡܶܢܘ ܒܺܐܝ̈ܕܰܝܗܽܘܢ ܕܺܐܝܬܰܝܗܽܘܢ ܐܰܝܠܶܝܢ ܕܰܒܥܶܪ̈ܒܶܐ ܐܰܡܬܶܠ ܐܶܢܽܘܢ ܪܳܥܝܳܐ ܛܳܒܳܐ. ܕܰܠܘܳܬܗܽܘܢ ܐܶܡܰܪ: ܬܰܘ ܒܪ̈ܺܝܟܰܘܗܝ ܕܳܐܒܝ܆ ܝܺܪܰܬܘ ܡܰܠܟܽܘܬܳܐ: ܗܳܝ ܕܰܡܛܰܝܒܳܐ ܗܘܳܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܕܬܰܡܳܢ ܡܚܰܘܶܐ ܩܳܠܶܗ ܪܳܥܝܳܐ ܠܰܒܢܰܝܴ̈ܐ ܕܰܣܒܰܥܘ ܛܘ̈ܒܶܐ ܘܠܰܒ̈ܢܰܝ ܒܢܰܝܴ̈ܐ ܕܣܳܒܥܺܝܢ ܡܶܢ ܫܰܪܟܳܢܳܐ ܕܫܳܒܩܺܝܢ ܠܗܽܘܢ ܐܰܒܳܗܰܝ̈ܗܽܘܢ. ܐܰܚܰܘ̈ܗܝ ܓܶܝܪ ܙܥܽܘܪ̈ܶܐ ܕܪܳܥܝܳܐ܇ ܗܳܠܶܝܢ ܕܶܐܡܰܪ: ܘܰܠܘܳܬ ܥܶܪ̈ܒܶܐ ܕܰܥܒܰܕܘ ܛܳܒ̈ܬܳܐ܆ ܗܳܠܶܝܢ ܥܰܡ ܕܰܘܺܝܕ ܚܳܙܶܝܢ ܐܰܦܰܘ̈ܗܝ ܕܪܳܥܝܳܐ ܒܙܰܕܺܝܩܽܘܬܳܐ. ܘܣܳܒܥܺܝܢ ܗܰܝܡܳܢܘܬܳܐ ܕܰܫܪܳܪܳܐ. ܒܰܕܠܳܐ ܢܳܦܠܺܝܢ ܒܦܽܘܠܳܓ̈ܐ. ܐܶܡܰܪ ܓܶܝܪ ܛܽܘܒܳܢܳܐ ܡܙܰܡܪܳܢܳܐ:
ܐܶܢܳܐ ܕܶܝܢ ܒܙܰܕܺܝܩܽܘܬܳܐ ܐܶܚܙܶܐ ܐܰܦܰܝ̈ܟ: ܘܶܐܣܒܰܥ ܡܳܐ ܕܶܐܬܬܥܺܝܪܰܬ ܗܰܝܡܳܢܽܘܬܳܟ. ܒܗܳܢܳܐ ܓܶܝܪ ܥܳܠܡܳܐ ܠܳܐ ܡܶܫܟܰܚ ܒܰܪܢܳܫܳܐ ܣܳܒܰܥ ܗܰܝܡܳܢܽܘܬܳܐ. ܠܡ̇ܢܳܐ ܠܳܐ ܓܶܝܪ ܚܳܙܶܐ ܗܳܠܶܝܢ ܕܰܥܠܰܝܗܶܝܢ ܡܰܣܗܕܳܐ ܗܺܝ ܗܰܝܡܳܢܽܘܬܳܐ. ܡܳܐ ܕܶܝܢ ܕܶܐܬܬܥܺܝܪ ܟܝܳܢܳܐ ܐܢܳܫܳܝܳܐ ܠܚܰܝܷ̈ܐ ܕܠܳܐ ܡܳܝܬܺܝܢ܆ ܗܳܝܕܶܝܢ ܚܳܙܶܐ ܥܺܝܢ ܒܰܓܠܐܷ ܟܽܠܗܶܝܢ ܗܳܠܶܝܢ ܕܰܐܟܪܙܰܬ ܠܥܳܠܡܳܐ ܗܰܝܡܳܢܽܘܬܳܐ. ܘܡܶܬܒܰܣܰܡ ܒܚܰܝܷ̈ܐ ܕܠܳܐ ܚܒܳܠܳܐ. ܒܝܰܕ ܡܰܚܝܳܢܰܢ ܘܡܳܪܰܢ ܡܫܺܝܚܳܐ ܝܶܫܽܘܥ ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܙܡܘܪܐ ܕܬܡܢܬܥܣܪ
ܕܡܰܘܕܰܥ ܥܰܠ ܐܪ̈ܳܙܶܐ ܕܨܳܐܱܪ ܕܰܘܺܝܕ ܠܥܰܡܰܢܽܘܐܝܠ ܡܫܺܝܚܳܐ.
ܨܰܠܡܷ̈ܐ ܪܰܘܪ̈ܒܶܐ ܘܪ̈ܽܘܚܳܢܶܐ ܘܕܶܡ̈ܘܳܬܳܐ ܡܥܰܠܝ̈ܬܳܐ ܘܰܐܠܳܗܳܝ̈ܬܳܐ܆ ܩܰܕܶܡ ܨܳܪ ܠܶܗ ܪܽܘܚܳܐ ܠܥܰܡܰܢܘܐܝܠ ܒܛܽܘܒܳܢܳܐ ܕܰܘܺܝܕ. ܠܰܘ ܒܰܠܚܽܘܕ ܒܗܳܝ ܕܶܐܬܢܰܒܺܝ ܥܰܠ ܓܶܠܝܳܢܶܗ ܕܒܰܒܣܰܪ܆ ܘܥܰܠ ܡܕܰܒܪܳܢܽܘܬܶܗ ܘܥܰܠ ܚܰܫܰܘ̈ܗܝ ܘܥܰܠ ܡܰܘܬܶܗ ܦܳܪܘܩܳܝܳܐ. ܘܥܰܠ ܩܝܳܡܬܶܗ ܕܰܐܘܥܝܰܬ ܠܰܢ ܠܐ ܡܶܬܚܰܒܠܳܢܽܘܬܳܐ ܘܥܰܠ ܣܽܘܠܳܩܶܗ ܘܪܽܘܡܪܳܡܶܗ ܕܡܶܢ ܝܰܡܺܝܢܳܐ܆ ܐܶܠܐ ܘܗܽܘ ܒܰܩܢܘܡܶܗ ܒܣܰܓܺܝ̈ܐܬܳܐ ܡܶܬܢܣܶܒ. ܕܢܶܗܘܶܐ ܨܰܠܡܳܐ ܠܡܰܠܟܳܐ ܗܰܘ ܕܡܶܢ ܥܳܠܰܡ. ܢܩܰܫ ܗܘܳܐ ܓܶܝܪ ܒܩܺܝܬܳܪܳܐ ܠܥܶܠ ܡܶܢ ܫܳܐܘܳܠ ܘܰܪܕܰܦ ܡܶܢܶܗ ܪܽܘܚܳܐ ܒܺܝܫܬܳܐ. ܒܗܳܕܶܐ ܨܳܐܰܪ ܗܘܳܐ ܨܰܠܡܳܐ ܠܥܰܡܰܢܽܘܐܝܠ. ܕܳܐܦ ܗܽܘ ܒܝܰܕ ܦܰܓܪܳܐ ܕܰܠܒܶܫ ܐܰܫܡܰܥ ܩܳܠܶܗ ܒܪ̈ܶܓܫܶܐ ܡܪ̈ܰܟܒܶܐ ܘܐܢܳܫ̈ܝܶܐ܆ ܘܰܪܕܰܦ ܡܶܢ ܥܳܠܡܳܐ ܫܳܐܘܳܠ܇ ܡܰܥܒܕܳܢܽܘܬܳܐ ܕܪ̈ܽܘܚܶܐ ܒܺܝ̈ܫܳܬܳܐ. ܦܳܪܰܥ ܗܘܳܐ ܫܳܐܘܳܠ ܠܕܰܘܺܝܕ ܐܰܓܪܳܐ ܕܗܳܝ ܛܰܝܒܽܘܬܳܐ ܕܰܥܒܰܕ ܗܘܳܐ ܒܶܗ܆ ܘܡܰܪܘܰܚ ܗܘܳܐ ܠܶܗ ܒܰܢܩܳܫܶܗ ܕܰܡܪܺܝܡ ܗܘܳܐ ܥܠܰܘܗܝ ܡܽܘܪܳܢܺܝܬܳܐ ܕܢܶܡܚܶܝܘܗܝ ܒܰܫܢܳܢܳܐ ܕܒܳܗ̇ ܘܢܶܩܛܠܝܘܗܝ. ܗܳܟܰܢܳܐ ܦܪܰܥ ܥܳܠܡܳܐ ܒܝܰܕ ܥܰܡܳܐ ܗܰܘ ܕܝܘܕܳܝܷ̈ܐ ܠܰܐܠܳܗܳܐ ܡܶܠܬܳܐ ܕܰܒܝܰܕ ܪܽܘܡܚܳܐ ܕܶܐܣܛܪ̈ܰܛܝܽܘܛܶܐ ܬܪܰܥܘ ܕܰܦܢܶܗ ܒܰܨܠܺܝܒܳܐ. ܛܰܪܕܶܗ ܫܳܐܘܳܠ ܠܕܰܘܺܝܕ ܡܶܢ ܒܳܬܰܪܟܶܢ ܕܠܳܐ ܢܩܰܘܶܐ ܒܰܬܚܽܘܡܳܐ ܕܒܶܝܬ ܝܺܣܪܳܐܶܝܠ܆ ܘܳܐܦ ܠܥܰܡܰܢܽܘܐܝܠ ܢܓܰܕܘ ܘܰܐܦܩܽܘܗܝ ܦܰܠܳܚܷ̈ܐ ܕܒܶܝܬ ܐܰܒܳܐ ܠܒܰܪ ܡܶܢ ܟܰܪܡܳܐ ܕܺܝܣܪܳܐܝܠ ܘܩܰܛܠܽܘܗܝ. ܐܶܠܳܐ ܗܳܫܳܐ ܠܰܘ ܙܰܒܢܰܐ ܗ̄ܘ ܠܰܢ ܕܥܰܠ ܚܕܳܐ ܚܕܳܐ ܡܶܢ ܗܳܠܶܝܢ ܢܺܐܡܰܪ. ܢܺܝܫܳܐ ܓܶܝܪ ܣܺܝܡ ܠܰܢ ܕܢܶܓܡܽܘܪ ܦܘܫܳܩܳܐ ܕܡܰܙܡܽܘܪܳܐ. ܘܙܳܕܶܩ ܕܥܰܠ ܗܳܢܳܐ ܢܙܺܝܥ ܡܶܠܬܳܐ. ܕܰܘܺܝܕ ܗܳܟܺܝܠ ܐܰܝܟ ܕܶܐܡܪܶܬ ܒܣܰܓܝ̈ܐܬܳܐ ܕܶܡ̈ܘܳܬܳܐ ܡܶܬܢܣܶܒ܆ ܕܢܶܗܘܶܐ ܨܰܠܡܳܐ ܠܦܳܪܽܘܩܰܢ. ܡܳܕܶܝܢ ܒܳܥܶܝܢܰܢ ܥܶܠܬܳܐ ܕܡܰܙܡܽܘܪܳܐ ܗܳܢܳܐ ܕܰܬܡܳܢܬܰܥܣܰܪ. ܐܶܫܟܰܚܢܰܢ ܡܶܢ ܟܬܳܒܳܐ ܐܰܡܺܝܪ ܒܪܽܘܚܳܐ܇ ܕܰܒܗܰܘ ܙܰܒܢܳܐ ܕܶܐܬܩܛܶܠ ܦܠܶܫܬܳܝܳܐ ܐܚܪܳܝܳܐ܆ ܐܶܬܡܰܠܰܠ ܡܶܢ ܛܽܘܒܳܢܳܐ ܕܰܘܺܝܕ ܗܳܢܳܐ ܡܰܙܡܽܘܪܳܐ. ܫܡܶܗ ܕܶܝܢ ܕܓܰܢ̱ܒܳܪܳܐ ܗܳܢܳܐ ܦܠܶܫܬܳܝܳܐ ܠܳܐ ܐܰܘܕܰܥ ܟܬܳܒܳܐ. ܘܠܳܐ ܡܳܐܢܷ̈ܐ ܕܙܰܝܢܶܗ ܪܰܘܪ̈ܒܶܐ ܐܺܝܬܰܝܗܽܘܢ ܗܘܰܘ. ܐܶܡܰܪ ܓܶܝܪ ܟܬܳܒܳܐ ܗܳܟܰܢܳܐ܆ ܘܰܕܚܶܠ ܕܰܘܺܝܕ ܘܝܽܘܐܳܒ ܘܰܐܒܺܝܫܰܝ ܡܶܢ ܗܳܢܳܐ ܓܰܢ̱ܒܳܪܳܐ. ܕܡܰܬܩܳܠܳܐ ܕܫܶܪܝܳܢܶܗ ܡܶܢ ܬܠܳܬܡܳܐܐ ܡܰܬܩܳܠܺܝ̈ܢ. ܘܰܐܣܺܝܪ ܗܘܳܐ ܣܰܦܣܺܝܪܳܐ ܚܰܕܬܳܐ ܘܶܐܬܳܐ ܠܡܶܩܛܠܶܗ ܠܕܰܘܺܝܕ. ܘܥܰܕܪܶܗ ܐܰܒܺܝܫܰܝ ܒܰܪ ܨܽܘܪܺܝܳܐ. ܘܰܡܚܳܝܗܝ ܗܘܳܐ ܠܰܦܠܶܫܬܳܝܳܐ ܘܩܰܛܠܶܗ. ܐܰܝܟܰܢܳܐ ܗܳܟܺܝܠ ܕܶܐܡܪܶܬ ܡܶܢ ܠܥܶܠ. ܒܗܳܢܳܐ ܙܰܒܢܳܐ ܐܶܬܢܰܒܺܝ ܘܡܰܠܶܠ ܬܶܫܒܽܘܚܬܳܐ ܗܳܕܶܐ ܕܰܬܡܳܢܬܰܥܣܰܪ. ܙܳܕܶܩ ܕܶܝܢ ܕܢܶܒܥܶܐ ܕܡܶܛܠܡܳܢܳܐ ܟܰܕ ܩܛܰܠ ܠܓܽܘܠܝܰܕ ܦܠܶܫܬܳܝܳܐ: ܗܰܘ ܕܰܗܘܳܐ ܗ̱ܘܳܐ ܡܰܬܩܳܠܳܐ ܕܫܶܪܝܳܢܶܗ܆ ܚܰܡܫܳܐ ܐܰܠܦܰܝܴ̈ܐ ܡܰܬܩܳܠܺܝ̈ܢ܆ ܠܐ ܕܚܶܠ ܡܶܢ ܗܰܘ ܓܽܘܠܝܰܕ. ܐܶܠܐ ܡܶܢ ܗܳܢܳܐ ܕܚܶܠ. ܣܳܒܰܪ ܐܢܳܐ ܕܰܚܕܳܐ ܡܶܢ ܗܳܠܶܝܢ ܕܠܳܐ ܡܕܰܒܪܳܢܽܘܬܳܐ ܠܳܐ ܗ̈ܘܰܝ. ܡܶܛܠ ܗܳܟܺܝܠ ܕܕܰܘܺܝܕ ܐܰܝܟܰܢܳܐ ܕܶܐܡܪܶܬ: ܐܪ̈ܳܙܶܐ ܕܥܰܡܰܢܽܘܐܝܠ ܡܫܰܡܶܫ ܗܘܳܐ܆ ܡܶܢ ܗܰܘ ܩܪܳܒܳܐ ܩܰܕܡܳܝܳܐ ܕܓܽܘܠܝܰܕ ܠܐ ܕܚܶܠ. ܡܶܛܽܠ ܕܰܒܨܰܠܡܳܐ ܕܳܐܟܶܠܩܰܪܨܳܐ ܡܶܬܡܬܶܠ ܗ̣ܘܐ ܗܰܘ. ܡܳܪܰܢ ܕܶܝܢ ܡܶܢ ܐܳܟܶܠܩܰܪܨܳܐ ܠܳܐ ܟܬܺܝܒ ܕܰܕܚܶܠ. ܟܰܕ ܐܶܬܢܰܣܺܝ ܡܶܢܶܗ ܒܡܰܕܒܪܳܐ. ܡܶܢ ܡܰܘܬܳܐ ܕܶܝܢ ܡܚܰܘܶܐ ܕܰܕܚܶܠ ܗܘܳܐ. ܡܶܛܽܠ ܕܰܢܫܰܘܕܰܥ ܒܝܰܕ ܗܳܕܶܐ ܕܫܰܪܺܝܪܳܐܝܬ ܗܘܳܐ ܒܰܪܢܳܫܳܐ. ܘܳܐܡܪܺܝܢܰܢ ܕܒܰܫܪܳܪܳܐ ܠܳܐ ܕܚܶܠ. ܡܶܛܽܠ ܕܰܐܠܳܗܳܐ ܗܘܳܐ ܘܚܰܝ̈ܐ ܗܘܳܐ. ܚܰܝܷ̈ܐ ܕܶܝܢ ܡܶܢ ܡܰܘܬܳܐ ܠܐ ܕܳܚܠܺܝܢ. ܡܳܕܶܝܢ ܗ̣ܘܳܐ ܒܕܶܚܠܬܳܐ. ܥܰܠ ܕܰܢܚܰܘܶܐ ܕܰܠܒܶܫ ܒܶܣܪܳܐ ܚܳܫܽܘܫܳܐ ܘܡܳܝܽܘܬܳܐ. ܘܠܳܐ ܣܥܰܪ ܕܕܶܚܠܬܳܐ. ܘܠܐ ܐܰܫܦܶܠ ܐܰܝܟ ܡܚܺܝܠܳܐ. ܥܰܠ ܕܢܰܘܕܰܥ ܕܰܒܗܳܝ ܕܺܐܝܬܰܘܗܝ ܐܰܠܳܗܳܐ܆ ܠܒܺܝܒܰܐ ܗ̄ܘ. ܗܳܟܰܢܳܐ ܐܳܦ ܦܠܶܫܬܳܝܳܐ ܐܚܪܳܝܳܐ. ܣܰܓܺܝ ܕܚܶܠ ܡܶܢܶܗ ܕܰܘܺܝܕ. ܗܰܘ ܕܰܒܡܰܘܬܳܐ ܡܶܬܡܬܶܠ. ܥܰܠ ܕܰܢܩܰܕܶܡ ܢܰܣܶܩ ܨܰܠܡܳܐ ܠܡܰܘܬܳܐ. ܗܰܘ ܕܶܐܡܰܪ ܡܳܪܰܢ ܟܰܕ ܡܛܳܐ ܥܶܕܳܢܶܗ. ܕܟܰܪܝܳܐ ܗ̱ܝ ܠܳܗ̇ ܠܢܰܦܫܝ ܥܕܰܡܳܐ ܠܡܰܘܬܳܐ (ܡܬܝ ܟܘ: ܠܚ ܡܪܩܘܣ ܝܕ: ܠܕ). ܐܶܠܐ ܡܶܬܩܛܶܠ ܗܘܳܐ ܗܳܝܕܶܝܢ ܦܠܶܫܬܳܝܳܐ ܐܚܪܳܝܳܐ܆ ܘܦܳܐܶܫ ܕܰܘܺܝܕ ܒܚܰܝܷ̈ܐ. ܐܰܟܡܳܐ ܕܳܐܦ ܥܰܡܰܢܽܘܐܝܠ ܩܰܛܠܶܗ ܠܡܰܘܬܳܐ ܘܰܢܒܰܥ ܕܠܳܐ ܚܒܳܠܳܐ ܡܶܢ ܩܰܒܪܳܐ. ܕܰܙܥܽܘܪ ܕܶܝܢ ܫܶܪܝܳܢܶܗ ܕܗܰܘ ܐܚܪܳܝܳܐ ܕܰܡܬܺܝܠ ܒܡܰܘܬܳܐ܆ ܡܶܢ ܗܰܘ ܩܰܕܡܳܝܳܐ ܕܒܳܐܟܶܠܩܰܪܨܳܐ ܡܶܬܦܰܚܰܡ. ܡܫܰܘܕܰܥ ܒܝܰܕ ܗܳܕܶܐ: ܕܰܙܥܽܘܪ ܗ̱ܽܘ ܙܰܝܢܶܗ ܕܡܰܘܬܳܐ ܡܶܢ ܕܣܳܛܳܢܳܐ. ܗܳܢܰܘ ܙܰܝܢܶܗ ܕܡܰܘܬܳܐ. ܕܡܳܐ ܕܩܰܒܶܠ ܦܽܘܩܕܳܢܳܐ ܡܶܢ ܐܰܠܳܗܳܐ ܢܶܩܛܽܘܠ. ܣܳܛܳܢܳܐ ܕܶܝܢ ܟܰܕ ܡܰܪܺܝܪ ܒܰܛܪܽܘܢܽܘܬܶܗ ܥܰܠ ܡܰܓܪܰܬ ܪܽܘܚܶܗ ܕܰܐܠܳܗܳܐ ܘܥܰܠ ܨܶܒܝܳܢܶܗ܆ ܡܶܬܟܰܬܰܫ ܥܰܡ ܩܰܕܺܝ̈ܫܶܐ. ܡܶܛܠܗܳܢܳܐ ܓܶܝܪ ܕܚܶܠ ܕܰܘܺܝܕ ܡܶܢ ܗܰܘ ܕܰܡܚܰܘܶܐ ܐܪܳܙ ܡܰܘܬܳܐ. ܕܰܒܗܳܕܶܐ ܢܰܘܕܰܥ ܕܟܽܠܗܽܘܢ ܒܢܰܝ̈ܢܳܫܳܐ ܕܳܚܠܝܢ ܡܶܢ ܡܰܘܬܳܐ. ܟܡܳܐ ܐܶܢ ܢܶܗܘܽܘܢ ܪܰܘܪܒܺܝܢ. ܡܙܰܡܰܪ ܗܘܳܐ ܕܰܘܺܝܕ ܬܶܫܒܽܘܚܬܳܐ ܗܳܕܶܐ ܒܳܬܰܪ ܕܶܐܬܦܰܨܺܝ. ܟܰܕ ܡܰܘܕܰܥ ܒܳܗ̇ ܕܰܥܕܰܡܳܐ ܠܕܶܚܠܬܳܐ ܕܡܰܘܬܳܐ ܥ̣ܰܠ ܒܶܗ. ܟܰܕ ܡܩܰܒܶܠ ܛܰܝܒܽܘܬܶܗ ܠܰܡܦܰܨܝܳܢܶܗ ܡܶܢ ܡܰܘܬܳܐ ܕܣܰܝܦܳܐ ܘܡܶܢ ܩܪ̈ܳܒܶܐ ܕܰܒܥܶܠܕ̈ܒܳܒܰܘܗܝ ܐܶܡܰܪ ܗܘܳܐ:
ܐܶܪܚܡܳܟ ܡܳܪܝܳܐ ܚܰܝܠܝ ܘܬܽܘܟܠܳܢܝ܆ ܘܒܶܝܬ ܓܰܘܣܝ ܘܰܡܦܰܨܝܳܢܝ: ܐܰܠܳܗܳܐ ܬܰܩܺܝܦܳܐ ܕܰܬܟܺܝܠ ܐܢܳܐ ܥܠܰܘܗܝ. ܡܣܰܝܥܳܢܝ ܘܩܰܪܢܳܐ ܕܦܽܘܪܩܳܢܝ: ܘܒܶܝܬ ܓܰܘܣܝ ܡܫܰܒܚܳܐ. ܚܙܰܝܬ ܩܴ̈ܠܐ ܦܳܪ̈ܘܫܶܐ ܕܰܡܩܰܪܒܳܐ ܗܘܳܬ ܗܳܕܶܐ ܢܰܦܫܳܐ ܐܰܠܳܗܳܝܬܳܐ܆ ܐܶܪܚܡܳܟ ܡܳܪܝܳܐ ܚܰܝܠܝ ܘܬܘܟܠܳܢܝ. ܡܶܛܽܠ ܕܠܰܝܬ ܡܶܕܶܡ ܕܰܒܪܶܚܡܬܳܟ ܢܶܬܦܰܚܰܡ܆ ܘܢܶܗܘܶܐ ܬܽܘܟܠܳܢܝ ܥܠܰܝܟ ܓܰܢ̱ܒܳܪܳܐ ܘܬܰܩܺܝܦܳܐ. ܡܶܛܽܠ ܕܰܒܬܽܘܩܦܳܟ ܕܳܫܬ ܥܰܠ ܓܰܢ̱ܒܳܪܽܘܬܶܗ ܕܡܰܘܬܳܐ. ܘܰܐܢܬ ܐܰܥܕܺܝܬܳܢܝ̱ ܡܶܢ ܦܽܘܡܳܗ̇ ܕܰܫܝܽܘܠ. ܡܣܰܝܥܳܢܳܐ ܐܰܢܬ ܗ̣ܘܰܝܬ ܠܺܝ. ܘܩܰܪܢܳܐ ܪܳܡܬܳܐ ܕܦܽܘܪܩܳܢܝ. ܘܡܰܘܣܶܦ ܬܽܘܒ ܘܳܐܡܰܪ.
ܐܶܩܪܶܐ ܠܡܳܪܝܳܐ ܘܡܶܢ ܒܥܶܠܕ̈ܒܳܒܰܝ ܐܶܬܦܪܶܩ. ܟܡܳܐ ܠܰܡ ܐܶܢ ܐܺܝܬ ܙܰܝܢܳܐ܆ ܐܶܠܐ ܦܽܘܪܩܳܢܳܟ ܗ̣ܘܳܐ ܠܺܝ ܡܦܰܨܝܳܢܳܐ. ܡܶܢ ܒܳܬܰܪ ܕܰܐܙܺܝܥܶܬ ܩܳܠܰܝ̈ ܘܰܩܪܺܝܬܳܟ ܘܟܰܕ ܣܳܢܱ̈ܐܝ ܦܪܰܣܘ ܥܠܰܝ ܡܨܺܝ̈ܕܳܬܳܐ ܕܡܰܘܬܳܐ. ܘܰܛܡܰܪܘ ܠܝ ܚܰܒ̈ܠܐܷ ܡܚܰܒܠܳܢܷ̈ܐ ܕܦܳܟܪܺܝܢ ܠܰܚܒܳܠܳܐ܆ ܐܰܢܬ ܦܪܰܩܬܳܢܝ ܡܶܢ ܒܥܶܠܕ̈ܒܳܒܰܝ. ܡܚܰܘܶܐ ܕܶܝܢ ܕܰܥܕܰܡܳܐ ܠܕܶܚܠܬܳܐ ܕܡܰܘܬܳܐ ܐܶܬܡܰܛܺܝ ܒܗܳܢܳܐ ܩܪܳܒܳܐ ܐܚܪܳܝܳܐ. ܘܶܐܡܰܪ.
ܡܶܛܽܠ ܕܚܰܕܪܽܘܢܝ ܚܶܒ̈ܠܐܷ ܕܡܰܘܬܳܐ: ܘܪ̈ܶܓܠܳܬܳܐ ܕܥܰܘܴ̈ܠܐ ܕܰܠܚܴ̈ܢܝ: ܘܚܶܒ̈ܠܐ ܕܰܫܝܽܘܠ ܟܰܪܟܽܘܢܝ܆ ܘܩܰܕܡܽܘܢܝ ܦܰܚܰܘ̈ܗܝ ܕܡܰܘܬܳܐ. ܘܟܰܕ ܗܳܟܺܝܠ ܡܦܰܢܶܝܢܰܢ ܬܶܐܘܳܪܺܝܰܐ ܕܦܶܬܓܳܡܷ̈ܐ ܗܳܠܶܝܢ ܥܰܠ ܡܶܐܬܺܝܬܶܗ ܕܦܳܪܽܘܩܰܢ ܠܘܳܬ ܡܰܘܬܳܐ܆ ܐܰܪܰܐ ܠܳܐ ܗܳܐ ܓܰܠܝܳܐܝܬ ܡܰܘܕܥܺܝܢ ܠܰܢ܆ ܡܶܬܩܰܪܒܳܢܽܘܬܳܐ ܕܠܳܐ ܚܰܣܺܝܪܳܐ ܘܰܡܫܰܡܠܰܝܬܳܐ ܕܰܗܘܳܬ ܠܶܗ ܠܘܳܬ ܚܱ̈ܫܶܐ ܠܳܐ ܥܕܺܝ̈ܠܐܷ. ܘܡܰܘܬܳܐ ܕܓܰܘܳܐ ܕܠܳܚܡܺܝܢ ܠܰܟܝܳܢܰܢ.
ܒܽܐܘܠܨܳܢܝ ܩܪܺܝܬ ܠܡܳܪܝܳܐ ܘܠܐܱܠܳܗܝ ܩܪܺܝܬ: ܘܰܫܡܰܥ ܡܶܢ ܗܰܝܟܠܶܗ ܒܩܳܠܝ: ܘܰܓܥܳܬܝ ܩܕܳܡܰܘܗܝ ܥܶܠܰܬ ܒܶܐܕ̈ܢܰܘܗܝ. ܐܶܢ ܐܶܫܬܡܰܥ ܕܰܘܺܝܕ ܐܰܝܟܰܢܳܐ ܕܶܐܡܰܪ܆ ܘܡܶܢ ܚܶܒ̈ܠܐܷ ܕܡܰܘܬܳܐ ܐܶܫܬܪܺܝ. ܘܥܶܠܰܬ ܓܥܳܬܶܗ ܠܘܳܬ ܗܰܝܟܠܶܗ ܕܰܐܠܳܗܳܐ. ܐܰܝܟܰܢܳܐ ܕܶܐܡܰܪ ܟܬܳܒܳܐ܆ ܕܰܫܟܶܒ ܕܰܘܺܝܕ ܥܰܡ ܐܰܒܳܗܰܘ̈ܗܝ ܘܶܐܬܩܒܰܪ ܒܰܩܪܺܝܬܶܗ. ܘܦܶܛܪܳܘܣ ܪܺܝܫܳܐ ܕܰܫܠܺܝ̈ܚܶܐ ܗܳܐ ܡܰܘܕܰܥ ܥܠܰܘܗܝ ܕܡܺܝܬ ܠܰܡ ܘܶܐܬܩܒܰܪ. ܘܒܶܝܬ ܩܒܽܘܪܶܗ ܐܝܬܰܘܗܝ ܠܘܳܬܰܢ ܥܕܰܡܳܐ ܠܝܰܘܡܳܢܳܐ. ܐܶܢܕܶܝܢ ܗܘܱ̈ܝ ܗܳܠܶܝܢ܆ ܘܗܳܪܟܳܐ ܗܳܢܳܐ ܕܰܩܕܳܡܰܘܗܝ ܦܰܚܷ̈ܐ ܡܶܫܬܰܘܕܶܐ܆ ܘܶܐܬܦܰܨܺܝ ܡܶܢ ܒܥܶܠܕ̈ܒܳܒܰܘܗܝ. ܐܳܦ ܦܰܚܰܘ̈ܗܝ ܕܡܰܘܬܳܐ ܠܐ ܩܰܕܡܽܘܗܝ ܡܶܢ ܒܳܬܰܪ ܕܰܨܒܳܐ ܕܢܶܦܠܰܛ ܡܶܢ ܡܰܘܬܳܐ. ܡܳܕܶܝܢ ܓܰܠܝܳܐ ܗ̱ܝ ܕܥܰܠ ܥܰܡܰܢܽܘܐܝܠ ܠܳܚܡܺܝܢ ܕܢܶܬܐܡܪܽܘܢ ܩܴ̈ܠܶܐ ܗܳܠܶܝܢ܆ ܘܝܰܬܺܝܪܳܐܝܬ ܕܳܐܬܶܝܢ ܒܳܬܰܪܗܽܘܢ. ܟܰܕ ܓܶܝܪ ܚܳܐܰܪ ܗܘܳܐ ܕܰܘܺܝܕ ܒܙܰܘ̈ܥܶܐ ܕܰܗܘܰܘ ܒܰܙܩܺܝܦܳܐ܆ ܘܰܚܙܳܐ ܗܘܳܐ ܒܥܰܝܢܳܐ ܕܪܽܘܚܳܐ ܫܽܘ̈ܥܶܐ ܕܡܶܨܛܰܪܶܝܢ ܒܩܳܠܶܗ ܕܗܰܘ ܕܰܬܠܶܐ ܗܘܳܐ ܒܰܙܩܺܝܦܳܐ܆ ܐܰܘܣܶܦ ܘܶܐܬܢܰܒܺܝ ܘܶܐܡܰܪ:
ܐܶܬܕܰܠܚܰܬ ܘܙܳܥܰܬ ܐܰܪܥܳܐ: ܘܫܶܬܶܐܣܷ̈ܐ ܕܛܽܘܪ̈ܶܐ ܙܳܥ̈ܝ ܘܶܐܬܬܰܠܰܚ̈ܝ. ܡܶܛܽܠ ܕܶܐܬܚܰܡܰܬ ܥܠܰܝܗܽܘܢ. ܐܰܪܰܐ ܕܰܠܡܳܐ ܐܺܝܬ ܐܰܬܪܳܐ ܠܡܺܐܡܰܪ: ܕܟܰܕ ܐܶܬܩܛܶܠ ܦܠܶܫܬܳܝܳܐ ܐܚܪܳܝܳܐ܇ ܗܘܱ̈ܝ ܗܳܠܶܝܢ܆ ܠܳܐ. ܘܶܐܢ ܐܳܡܰܪ ܐܢܳܫ ܕܰܗ̈ܘܰܝ. ܡܶܕܶܡ ܕܠܐ ܐܶܡܰܪ ܟܬܳܒܳܐ܆ ܡܳܕܶܝܢ ܐܶܢ ܗ̣ܘܱ̈ܝ ܡܶܬܟܰܬܒܴ̈ܢ ܗ̱ܘܱ̈ܝ. ܐܶܢܓܝܶܪ ܟܰܕܐܰܡܠܶܟ ܫܳܐܘܳܠ܇ ܟܬܺܝܒ ܕܰܗܘܳܐ ܡܶܛܪܳܐ ܒܰܚܨܳܕܳܐ ܕܚܷ̈ܛܶܐ. ܘܶܐܢ ܐܰܡܶܢ ܟܬܳܒܳܐ ܕܢܺܐܡܪܳܗ̇ ܠܗܳܝ ܕܰܗܘܳܬ ܒܰܨܠܽܘܬܶܗ ܕܰܫܡܽܘܐܝܠ. ܡܶܛܽܠ ܚܛܺܝܬܶܗ ܕܥܰܡܳܐ܆ ܟܡܳܐ ܝܰܬܺܝܪܳܐܝܬ ܐܶܠܽܘ ܗ̣ܘܳܬ ܗܳܕܶܐ. ܡܶܛܽܠ ܙܰܕܺܝܩܽܘܬܶܗ ܕܕܰܘܺܝܕ ܡܶܬܟܰܬܒܳܐ ܗܘܳܬ ܐܰܝܟ ܕܰܗܘܳܬ. ܐܶܠܐ ܓܰܠܝܳܐܗܝ ܕܗܳܝ ܕܶܐܬܕܰܠܚܰܬ ܘܙܳܥܰܬ ܐܰܪܥܳܐ. ܥܰܠܗܳܝ ܐܶܡܰܪ ܐܶܘܰܢܓܶܠܺܝܣܛܳܐ ܡܰܬܰܝ ܟܰܕ ܡܰܟܬܶܒ ܥܰܠ ܙܩܺܝܦܳܐ. ܕܡܶܢ ܫܶܬܫܳܥܺܝ̈ܢ ܗ̣ܘܳܐ ܚܶܫܽܘܟܳܐ ܥܰܠ ܐܰܦܱ̈ܝ ܟܽܠܳܗ̇ ܐܰܪܥܳܐ ܥܕܰܡܳܐ ܠܫܳܥܷ̈ܐ ܬܫܰܥ (ܡܬܝ ܟܙ: ܡܗ). ܘܰܐܪܥܳܐ ܐܶܬܬܙܺܝܥܰܬ ܐܳܦ ܟܺܐܦܷ̈ܐ ܐܶܨܛܰܪ̈ܺܝ܆ ܘܒܶܝܬ ܩܒܽܘܪ̈ܶܐ ܐܶܬܦܰܬܰܚܘ (ܡܬܝ ܟܙ: ܢܐ-ܢܒ). ܘܗܳܕܶܐ ܐܺܝܬܶܝܗ̇ ܗܳܝ ܕܶܐܡܰܪ ܕܰܘܺܝܕ. ܫܶܬܶܐܣܷ̈ܐ ܕܛܽܘܪ̈ܶܐ ܙܳܥ̈ܝ ܘܶܐܬܬܰܠܰܚ̈ܝ. ܡܶܬܢܰܒܶܐ ܐܳܦ ܥܰܠ ܚܶܫܽܘܟܳܐ ܕܰܗܘܳܐ ܥܰܠ ܥܳܠܡܳܐ. ܘܠܰܘ ܟܰܕ ܡܫܰܡܰܗ ܠܗ ܚܶܫܘܟܳܐ ܓܰܠܝܳܐܝܬ܆ ܐܶܠܐ ܩܳܪܶܐ ܠܗ ܬܶܢܳܢܳܐ. ܬܶܢܳܢܳܐ ܓܰܠܝܳܐ ܗܝ ܡܳܕܶܝܢ ܕܚܶܫܽܘܟܰܐ ܗ̱ܘ:
ܣܠܶܩ ܬܶܢܳܢܳܐ ܒܪܽܘܓܙܶܗ. ܡܰܘܕܰܥ ܕܶܐܬܚܰܡܰܬ ܐܰܒܳܐ ܥܰܠ ܥܰܘܠܳܐ. ܘܥܰܠܗܳܕܶܐ ܐܳܦ ܒܪܳܐ ܡܨܰܠܐ ܗܘܳܐ ܘܳܐܡܰܪ. ܐܰܒܳܐ ܫܒܽܘܩ ܠܗܽܘܢ: ܠܐ ܓܶܝܪ ܝܳܕܥܺܝܢ ܡܳܢܳܐ ܥܳܒܕܺܝܢ (ܠܘܩܐ ܟܓ: ܠܕ). ܡܰܘܕܰܥ ܒܗܳܕܶܐ ܥܰܠ ܪܽܘܓܙܶܗ ܕܰܐܒܳܐ. ܐܶܠܽܘܠܳܐ ܕܰܣܠܶܩ ܪܽܘܓܙܳܐ ܘܬܶܢܳܢܳܐ ܥܰܠ ܠܶܒܳܐ ܕܟܺܐܢܽܘܬܳܐ. ܐܶܡܰܪ ܓܶܝܪ:
ܘܢܽܘܪܳܐ ܡܶܢ ܦܰܪܨܽܘܦܶܗ ܐܶܬܓܰܘܙܠܰܬ: ܘܓܽܘܡܪ̈ܶܐ ܚܰܒܶܝ̈ܢ ܡܶܢܶܗ. ܢܽܘܪܳܐ ܕܶܝܢ ܐܶܬܓܰܘܙܠܰܬ ܡܶܢ ܦܰܪܨܽܘܦܶܗ ܕܰܐܠܳܗܳܐ. ܡܰܘܕܥܳܐ ܥܰܠܗܳܝ ܒܪܺܝܬܳܐ ܕܢܽܘܪ̈ܳܢܶܐ. ܗܳܠܶܝܢ ܕܩܳܝܡܺܝܢ ܒܪ̈ܰܘܡܶܐ ܥܶܠܳܝܷ̈ܐ ܕܰܫܡܰܝܳܐ. ܕܡܶܢ ܚܰܝܠܳܐ ܘܡܰܥܒܕܳܢܽܘܬܳܐ ܕܫܽܘܠܛܳܢܶܗ ܝܰܗܒ ܠܗܽܘܢ ܠܪ̈ܰܒܰܝ ܚܰܝ̈ܠܰܘܳܬܳܐ ܒܪܰܘܡܳܐ ܕܰܫܡܰܝܳܐ. ܕܢܶܬܩܰܝܡܽܘܢ ܡܶܢ ܟܝܳܢܳܐ ܡܰܘܩܕܳܢܳܐ ܕܢܽܘܪܳܐ. ܘܥܰܠܗܳܕܶܐ ܟܰܕ ܡܚܰܘܶܐ ܕܠܰܘ ܫܓܺܝܫܳܐܝܺܬ ܩܢܽܘ̈ܡܶܐ ܦܪ̈ܺܝܫܶܐ ܘܺܝܕܺܝ̈ܥܶܐ ܐܺܝܬ ܠܗܽܘܢ ܒܥܳܠܡܳܐ ܕܢܽܘܗܪܳܐ ܕܩܳܝܡܺܝܢ ܒܶܗ܆ ܡܰܝܬܶܐ ܕܶܝܢ ܘܳܐܡܰܪ: ܘܓܽܘܡܪ̈ܶܐ ܚܰܒܷ̈ܝܢ ܡܶܢܶܗ. ܓܽܘܡܪ̈ܶܐ ܕܢܽܘܪܳܐ ܡܫܰܡܰܗ ܠܗܽܘܢ܆ ܐܰܝܟ ܕܢܰܘܕܰܥ ܕܰܐܝܟ ܕܰܦܪ̈ܺܝܫܳܢ ܓܽܘܡܪ̈ܶܐ ܒܪܽܘܟܳܒܳܐ ܚܕܳܐ ܡܶܢ ܚܕܳܐ܆ ܚܠܺܝ̈ܛܳܢ ܒܢܰܗܺܝܪܽܘܬܳܐ ܘܰܒܚܰܡܺܝܡܽܘܬܳܐ ܘܰܒܝܳܩܽܘܕܽܘܬܳܐ. ܗܳܟܰܢܳܐ ܐܳܦ ܐܽܘܣܺܝܱ̈ܐܣ ܥܶܠܳܝ̈ܬܳܐ ܘܪ̈ܽܘܚܶܐ ܩܰܕܺܝ̈ܫܳܬܳܐ ܕܡܰܠܐܟܷ̈ܐ ܒܰܕܡܽܘܬܳܐ ܕܓܽܘܡܪ̈ܶܐ ܕܢܽܘܪܳܐ ܐܺܝܬܰܝܗܶܝܢ. ܘܡܳܐ ܕܡܶܫܬܰܕܪܺܝܢ ܠܣܳܥܽܘܪܽܘܬܳܐ ܕܬܶܫܡܶܫܬܳܐ ܡܶܛܽܠ ܐܰܝܠܶܝܢ ܕܰܥܬܺܝܕܺܝܢ ܠܡܺܐܪܰܬ ܚܰܝܷ̈ܐ. ܘܰܕܡܶܢ ܐܰܠܳܗܳܐ ܚܴ̈ܒܳܢ. ܗܳܢܰܘ ܫܳܩ̈ܠܳܢ ܕܢܶܕܠܩܴ̈ܢ ܢܽܘܪܳܢܳܐܝܺܬ. ܗܳܝ ܕܕܳܢܚܺܝܢ ܒܢܽܘܪܳܐ܆ ܐܶܠܳܐ ܠܰܘ ܡܶܢ ܟܝܳܢܳܐ ܕܢܰܦܫܗܶܝܢ ܐܺܝܬ ܠܗܶܝܢ ܗܳܕܶܐ. ܐܶܠܐ ܡܶܢ ܐܰܠܳܗܳܐ ܐܺܝܬ ܠܗܽܘܢ. ܘܗܳܝ ܕܰܗܘܰܘ܆ ܘܡܶܢܶܗ ܕܠܶܩܘ ܘܰܢܗܰܪܘ. ܘܰܒܡܶܠܬܶܗ ܚ̈ܒܳܢ ܘܶܐܬܢܰܒܪ̈ܰܫܝ ܘܰܒܪܽܘܚܳܐ ܕܦܽܘܡܶܗ ܢܗܰܪܘ ܒܙܰܠܺܝ̈ܩܶܐ ܡܰܘܩܕܳܢܷ̈ܐ. ܘܩܰܘܡܳܐ ܐܰܡܺܝܢܳܐ ܘܰܡܛܰܝܒܳܐ ܒܬܰܪ̈ܥܶܐ ܥܶܠܳܝܷ̈ܐ ܕܰܡܕܺܝܢܰܬ ܢܽܘܗܪܳܐ ܥܶܠܳܝܬܳܐ ܒܰܡܫܰܠܛܽܘܬܳܐ ܡܰܠܐܟܳܝܬܳܐ܆ ܕܠܳܐ ܡܶܫܬܰܚܠܦܳܐ ܠܘܳܬ ܡܶܨܛܰܠܝܳܢܽܘܬܳܐ. ܘܪ̈ܰܒܰܝ ܡܰܠܐܟܷ̈ܐ ܘܪ̈ܺܝܫܳܢܘܳܬܳܐ ܐܳܦ ܫܽܘܠܛܳܢܷ̈ܐ ܥܰܠ ܐܰܝܠܶܝܢ ܕܶܐܬܗܰܝܡܰܢܘ ܡܕܰܒܪܳܢܽܘܬܳܐ ܕܟܳܗܢܽܘܬܳܐ ܒܰܟܢܽܘ̈ܫܬܳܐ ܕܥܰܡ̈ܡܶܐ. ܘܡܰܠܐܟܷ̈ܐ ܡܶܫܬܰܕܪܳܢܽܘܬܳܐ ܕܬܶܫܡܶܫܬܳܐ ܠܟܽܠ ܦܶܢ̈ܝܳܢ ܨܶܝܕ ܩܰܕܺܝ̈ܫܶܐ ܕܰܒܟܽܠ ܐܰܬܰܪ ܡܶܛܠ ܐܰܝܠܶܝܢ ܕܰܥܬܺܝܕܺܝܢ ܠܡܺܐܪܰܬ ܚܰܝܷ̈ܐ. ܗܳܠܶܝܢ ܐܶܢܶܝܢ ܓܽܘܡܪ̈ܶܐ ܕܰܒܐܪܳܙܳܐ ܥܰܡܺܝܩܳܐ ܐܶܡܰܪ ܛܽܘܒܳܢܳܐ ܕܰܘܺܝܕ. ܕܓܽܘܡܪ̈ܶܐ ܚ̈ܒܶܝܢ ܡܶܢ ܐܰܠܳܗܳܐ ܒܡܰܥܒܕܳܢܽܘܬܳܐ ܡܫܰܠܰܛܬܳܐ. ܘܒܰܫܒܺܝܚܽܘܬܳܐ ܟܝܳܢܳܝܬܳܐ ܕܠܐ ܡܶܫܬܰܓܢܝܳܐ ܘܠܳܐ ܡܶܨܛܰܠܝܳܐ. ܘܗܳܠܶܝܢ ܐܶܢܶܝܢ ܡܰܥܒܕܳܢ̈ܘܳܬܳܐ ܕܩܰܒܶܠܘ ܟܽܠܚܰܕ ܚܰܕ ܡܶܢܗܽܘܢ ܡܶܢ ܬܶܓܡܷ̈ܐ ܢܽܘܪ̈ܳܢܳܝܶܐ܆ ܒܦܽܘܠܳܓ̈ܐ ܕܠܐ ܚܣܳܡ ܕܝܰܗܒ ܠܗܽܘܢ ܥܳܒܽܘܕܳܐ. ܠܰܘ ܡܶܢ ܟܝܳܢܳܐ ܡܥܰܠܝܳܐ ܕܰܐܠܳܗܽܘܬܶܗ ܐܺܝܬܝܳܝܬܳܐ܆ ܐܶܠܳܐ ܐܶܡܰܪ ܘܰܗܘܰܘ ܘܰܦܩܰܕ ܘܶܐܬܒܪܺܝܘ. ܟܡܳܐ ܐܶܢ ܢܶܗܘܶܐ ܘܣܰܓܺܝ ܫܒܺܝܚܺܝܢ ܘܕܽܘܡܝܳܐ ܕܰܒܗܳܠܶܝܢ. ܥܰܠ ܐܰܠܳܗܳܐ ܡܶܠܬܳܐ ܡܶܬܢܰܒܶܐ ܗܘܳܐ ܕܰܥܒܰܕ. ܗܳܝ ܕܝܰܗܒ ܗܘܳܐ ܠܡܰܠܐܟܷ̈ܐ ܕܢܶܗܘܽܘܢ. ܘܰܐܩܺܝܡ ܠܗܽܘܢ ܐܳܦ ܕܰܐܝܟܰܢܳܐ ܢܶܗܘܽܘܢ. ܘܰܥܒܰܕ ܣܪ̈ܳܦܶܐ ܘܣܳܡ ܡܰܘ̈ܬܒܶܐ ܘܰܟܕܰܢ ܡܰܪ̈ܟܒܳܬܳܐ ܕܰܟܪ̈ܽܘܒܶܐ. ܘܰܐܩܺܝܡ ܚܰܝܠܰܘ̈ܬܳܐ ܘܰܣܕܰܪ ܡܳܪ̈ܰܘܳܬܳܐ. ܘܰܡܬܰܚ ܫܽܘ̈ܠܛܳܢܶܐ. ܘܛܰܟܶܣ ܐܰܪ̈ܟܰܐܣ. ܘܣܳܡ ܪ̈ܰܒܰܝ ܡܰܠܐܟܷ̈ܐ. ܘܰܐܬܩܶܢ ܪ̈ܽܘܚܶܐ ܕܬܶܫܡܶܫܬܳܐ ܕܐܝܬܰܝܗܽܘܢ ܡܰܠܐܟܷ̈ܐ. ܘܗܽܘ ܗܳܢܳܐ: ܐܰܪܟܶܢ ܫܡܰܝܳܐ ܘܰܢܚܶܬ܆ ܘܗܽܘ ܐܶܬܓܠܺܝ ܒܰܒܣܰܪ ܘܰܗܘܳܐ ܒܰܪܢܳܫܳܐ. ܘܰܒܥܰܝ̈ܢܶܐ ܢܰܗܺܝܪ̈ܬܳܐ ܕܟܰܣܝܴ̈ܬܳܐ ܚܳܙ̈ܝܳܢ ܒܪܽܘܚܳܐ ܢܒܺܝܳܝܬܳܐ ܡܰܬܒܰܩܶܐ ܗܘܳܐ ܕܰܘܺܝܕ ܘܡܶܬܢܰܒܶܐ ܗܘܳܐ. ܘܚܳܙܶܐ ܗܘܳܐ ܪܰܒܽܘܬܶܗ ܕܡܶܠܬܳܐ ܘܡܽܘܟܳܟܶܗ ܨܶܒܝܳܢܳܝܳܐ. ܢܶܒܥܶܐ ܕܶܝܢ ܕܡܳܢܳܐ ܗ̱ܝ ܗܳܝ:
ܕܰܐܪܟܶܢ ܫܡܰܝܳܐ ܘܰܢܚܶܬ. ܫܡܰܝܳܐ ܡܶܬܪܰܓܫܳܢܳܐܝܬ ܗܳܕܳܐ ܗ̄ܝ. ܗܳܝ ܕܒܰܚܙܳܬܳܐ ܓܠܺܝܬܳܐ ܡܚܰܘܝܳܐ ܠܰܢ ܦܰܐܝܽܘܬܳܐ ܕܢܰܗܝܪ̈ܶܐ܆ ܫܶܡܫܳܐ ܘܣܰܗܪܳܐ ܘܟܰܘܟ̈ܒܶܐ. ܐܶܢܕܶܝܢ ܐܢܳܫ ܝܳܕܰܥ ܠܡܶܚܙܳܐ ܒܢܰܗܺܝܪܽܘܬ ܡܰܕܥܳܐ ܡܶܣܬܰܟܠܳܢܳܐ. ܗܳܝ ܕܰܐܪܟܶܢ ܪܰܘܡܳܐ ܕܰܟܝܳܢܶܗ. ܘܰܢܚܶܬ ܠܒܶܫ ܒܶܣܪܳܐ ܚܳܫܘܫܳܐ. ܡܶܢ ܟܝܳܢܳܐ ܕܶܐܬܚܰܝܰܒ ܒܰܚܛܺܝܬܳܐ. ܐܰܟܡܰܢ ܕܢܶܗܘ̈ܝܳܢ ܬܰܪܬܶܝܢ ܢܶܫܺܝ̈ܢ ܠܚܰܕ. ܘܬܶܗܘܶܐ ܚܕܳܐ ܫܰܦܺܝܪܬܳܐ ܘܥܰܬܺܝܪܬܳܐ ܘܡܳܪܰܬ ܡܰܠܟܽܘܬܳܐ. ܗܳܝ ܕܶܝܢ ܐܚܪܺܬܳܐ ܬܶܗܘܶܐ ܡܫܰܟܰܪܬܳܐ ܘܰܣܢܺܝܬܳܐ ܘܒܺܝܫܰܬ ܥܒܴ̈ܕܶܐ. ܘܒܰܪܬ ܓܶܢܣܳܐ ܘܛܽܘܗܡܳܐ ܕܡܶܣ̈ܟܺܢܶܐ. ܘܢܺܐܬܶܐ ܒܰܪ ܡܰܠܟܳܐ ܡܳܪܳܗ̇ ܘܢܶܥܒܰܪ ܥܰܠ ܗܳܝ ܕܣܰܓܺܝ ܫܰܦܺܝܪܳܐ ܘܚܺܐܪܳܝܳܐ ܘܡܰܠܝܳܐ ܥܽܘܬܪܳܐ܆ ܘܺܐܝܬܶܝܗ̇ ܡܶܢ ܛܽܘܗܡܳܐ ܕܡܰܠܟܷ̈ܐ. ܘܢܶܫܒܩܺܝܗ̇ ܠܗܳܕܶܐ ܘܰܠܪܰܒܽܘܬܳܗ̇ ܘܢܺܐܙܰܠ ܘܢܶܣܰܒ ܠܶܗ ܠܫܰܘܬܳܦܽܘܬܳܐ ܠܗܳܝ ܕܰܡܟܰܬܡܳܐ ܒܣܰܓܺܝܐܘܬ ܒܺܝ̈ܫܳܬܳܐ ܘܺܐܝܬܶܝܗ̇ ܒܰܪܬ ܡܶܣܟ̈ܢܶܐ. ܒܗܳܕܶܐ ܡܰܪܟܶܢ ܠܳܗ̇ ܘܰܡܡܰܟܶܟ ܠܳܗ̇ ܠܗܳܝ ܕܣܰܓܺܝ ܪܰܒܳܐ ܐܳܦ ܫܰܦܺܝܪܳܐ. ܘܡܰܘܪܶܒ ܘܰܡܫܰܒܰܚ ܠܗܳܝ ܕܣܰܓܺܝ ܡܬܰܚܬܝܳܐ ܘܣܰܢܝܳܐ ܐܳܦ ܒܨܺܝܪܳܐ. ܗܳܟܰܢܳܐ ܙܳܕܶܩ ܕܢܶܣܬܰܟܰܠ ܘܢܶܪܢܶܐ ܥܰܠ ܦܶܬܓܳܡܳܐ ܗܰܘ ܕܶܐܡܰܪ. ܕܰܐܪܟܶܢ ܫܡܰܝܳܐ ܘܰܢܚܶܬ ܡܳܪܝܳܐ. ܠܡܳܢܳܐ. ܡܶܛܽܠ ܕܰܡܚܰܕܝܳܐ ܗܘܳܬ ܠܥܶܠܳܝܷ̈ܐ ܘܰܠܥܳܡܪ̈ܰܝ ܫܡܰܝܳܐ܆ ܕܡܶܢܗܽܘܢ ܢܶܣܰܒ ܘܢܶܬܛܰܗܰܡ. ܘܗܳܕܶܐ ܠܳܐ ܗܘܳܬ. ܡܶܛܽܠ ܕܠܳܐ ܣܢܺܝܩܺܝܢ ܗܘܰܘ ܥܰܠ ܦܽܘܪܩܳܢܳܐ. ܘܥܰܠ ܗܳܕܶܐ ܫܬܶܩܘ ܥܶܠܳܝܷ̈ܐ ܡܶܢ ܒܥܳܬܳܐ ܘܢܳܚܘ ܡܶܢ ܛܢܳܢܳܐ. ܥܰܠܗܳܝ ܕܠܐ ܣܢܺܝܩ ܗܘܳܐ ܟܝܳܢܗܽܘܢ ܥܰܠ ܗܳܠܶܝܢ ܕܰܗܘܱ̈ܝ ܠܘܳܬ ܓܶܢܣܳܐ ܐܢܳܫܳܝܳܐ ܕܶܐܬܚܰܝܰܒ ܠܰܚܛܺܝܬܳܐ. ܘܡܶܛܽܠܗܳܢܳܐ ܗܽܘ ܡܳܪܰܢ ܐܶܡܰܪ: ܕܠܐ ܐܶܬܺܝܬ ܡܰܢ ܕܶܐܩܪܶܐ ܠܙܰܕܺܝ̈ܩܶܐ܆ ܐܶܠܐ ܠܚܰܛܳܝܷ̈ܐ ܠܰܬܝܳܒܽܘܬܳܐ (ܡܬܝ ܛ: ܝܓ ܡܪܩܘܣ ܒ: ܝܙ ܠܘܩܐ ܗ: ܟܓ). ܒܪܰܡ ܐܰܝܟ ܕܡܰܘܕܰܥ ܡܙܰܡܪܳܢܳܐ. ܘܠܐ ܗܳܟܰܢܳܐ ܢܰܟܪܺܝ ܐܶܢܽܘܢ ܠܚܰܝ̈ܠܰܘܳܬܳܐ ܫܡܰܝܳܢܷ̈ܐ. ܡܶܢ ܗܳܝ ܕܢܶܬܕܰܡܶܐ ܒܗܽܘܢ. ܐܶܠܳܐ ܪܡܰܙ ܠܰܢ ܕܡܶܢ ܒܳܬܰܪ ܕܰܢܚܶܬ ܘܡܰܠܺܝ ܟܽܠܳܗ̇ ܡܕܰܒܪܳܢܽܘܬܶܗ. ܘܰܠܒܶܫ ܦܰܓܪܳܐ ܡܶܢ ܒܬܽܘܠܬܳܐ ܗܰܘ ܣܰܓܝ ܟܺܐܒܷ̈ܐ. ܘܰܠܗܳܢܳܐ ܥܰܒܕܶܗ ܕܢܶܡܪܰܕ ܥܰܠ ܚܒܳܠܳܐ ܕܰܒܩܰܒܪ̈ܶܐ ܘܥܰܠ ܡܰܘܬܳܐ. ܘܩܳܡ ܡܶܢ ܒܶܝܬ ܡܺܝ̈ܬܶܐ ܒܫܽܘܒܚܳܐ ܘܰܒܚܰܝܷ̈ܐ ܘܰܒܠܳܐ ܡܳܝܽܘܬܽܘܬܳܐ ܘܠܐ ܡܶܬܚܰܒܠܳܢܽܘܬܳܐ. ܘܟܰܕ ܦܢܳܐ ܡܶܠܬܳܐ ܠܡܶܣܰܩ ܠܐܬܪܳܐ ܕܝܠܶܗ. ܡܶܢ ܒܳܬܰܪ ܕܶܐܬܓܢܺܝ ܡܶܢ ܚܙܳܬܳܐ ܕܬܰܠܡܝ̈ܕܶܐ܆ ܫܰܪܺܝ ܕܰܢܚܰܕܶܬ ܘܰܢܫܰܝܶܢ ܠܰܫܡܰܝܳܢ̈ܐ. ܘܟܰܕ ܥܒܰܪ ܒܰܐܬܪ̈ܰܘܳܬܗܽܘܢ܆ ܠܗܽܘܢ ܡܶܬܕܰܡܶܐ ܗܘܳܐ. ܐܶܡܰܪ ܓܶܝܪ ܡܙܰܡܪܳܢܳܐ:
ܕܰܪܟܶܒ ܥܰܠ ܟܪ̈ܽܘܒܶܐ ܘܰܦܪܰܚ: ܘܛܳܣ ܥܰܠ ܟܶܢ̈ܦܶܝܗ̇ ܕܪܽܘܚܳܐ. ܗܳܠܶܝܢ ܡܚܰܘ̈ܝܳܢ ܠܰܢ ܥܰܠ ܡܶܠܬܳܐ ܐܰܠܳܗܳܐ. ܕܡܶܢ ܒܳܬܰܪ ܕܶܐܬܥܰܠܺܝ ܡܶܢ ܐܰܬܪܳܐ ܕܚܱ̈ܫܶܐ ܠܰܐܬܪܶܗ ܥܶܠܳܝܳܐ. ܟܰܕ ܥܒܰܪ ܥܰܠ ܐܽܘܣܺܝܱ̈ܐܣ ܥܶܠܳܝ̈ܬܳܐ܆ ܥܰܡ ܡܰܠܐܟ̈ܐ ܡܰܠܰܐܟܳܐ ܡܶܬܚܙܶܐ ܗܘܳܐ. ܘܥܰܡ ܪ̈ܰܒܰܝ ܡܰܠܐܟܷ̈ܐ ܪܰܒ ܡܰܠܐܟܷ̈ܐ. ܘܥܰܡ ܐܰܪ̈ܟܰܐܣ ܐܰܟܘܳܬܗܽܘܢ. ܘܥܰܡ ܫܽܘ̈ܠܛܳܢܶܐ ܒܰܕܡܽܘܬܗܽܘܢ. ܘܡܳܪ̈ܰܘܳܬܳܐ ܒܶܐܣܟܺܡܗܽܘܢ. ܘܥܰܡ ܚܰܝ̈ܠܰܘܳܬܳܐ ܐܰܝܟ ܚܰܝ̈ܠܰܘܳܬܳܐ. ܘܥܰܡ ܟܪ̈ܽܘܒܶܐ ܟܪܽܘܒܳܐ. ܘܥܰܡ ܡܰܘܬܒܷ̈ܐ ܪܺܝܫ ܟܽܘܪ̈ܣܰܘܳܬܳܐ. ܘܥܰܡ ܣܪ̈ܳܦܶܐ ܣܪܳܦܳܐ. ܠܗܳܠܶܝܢ ܟܽܠܗܽܘܢ ܪ̈ܽܘܚܶܐ ܫܰܡܰܗ ܢܒܺܝܳܐ ܟܰܕ ܡܦܰܪܶܫ ܩܢܽܘ̈ܡܶܐ ܘܬܶܓܡܷ̈ܐ. ܐܰܝܬܺܝ ܫܡܳܐ ܕܟܶܢ̈ܦܶܐ. ܥܰܠ ܕܠܰܘ ܡܶܗܘܳܐ ܗܘܳܐ ܩܢܽܘܡܳܐܝܬ ܐܰܝܟ ܪ̈ܽܘܚܳܢܶܐ. ܐܶܠܳܐ ܡܶܬܕܰܡܳܝܽܘ ܡܶܬܕܰܡܶܐ ܗܘܳܐ ܠܗܽܘܢ ܒܶܐܣܟܺܡܳܐ. ܐܶܡܰܪ ܕܰܪܟܶܒ ܥܰܠ ܟܪ̈ܽܘܒܶܐ ܘܰܦܪܰܚ. ܘܛܳܣ ܥܰܠ ܟܶܢ̈ܦܶܐ ܕܪܽܘܚܳܐ. ܒܥܳܠܡܰܢ ܕܶܝܢ ܠܰܘ ܡܶܪܟܰܒ ܪܟܶܒ. ܘܠܳܐ ܡܶܦܪܰܚ ܦܪܰܚ ܐܶܠܳܐ ܒܰܫܪܳܪܳܐ ܒܰܪܢܳܫܳܐ ܗܘܳܐ. ܘܒܶܣܪܳܐ ܠܒܶܫ. ܘܰܕܡܽܘܬܳܐ ܕܥܰܒܕܳܐ ܢܣܰܒ. ܐܶܡܰܪ ܓܶܝܪ:
ܕܣܳܡ ܚܶܫܽܘܟܳܐ ܠܓܶܢܝܶܗ ܘܟܰܪܟܶܗ ܡܰܛܠܠܶܗ: ܚܶܫܽܘܟܳܐ ܕܡܰܝܴ̈ܐ ܒܰܥ̈ܢܳܢܶܐ ܕܳܐܐܰܪ. ܚܶܫܽܘܟܳܐ ܣܳܡ ܕܢܶܬܓܢܶܐ ܒܶܗ. ܠܰܘ ܕܢܶܬܕܰܡܶܐ ܠܗܳܢܳܐ ܠܒܺܝܕܳܐ ܕܰܗܘܳܐ ܒܥܳܠܡܰܢ ܡܶܢ ܛܶܠܴ̈ܠܶܐ ܕܩܳܝܡܺܝܢ ܒܰܐܦܱ̈ܝ ܫܶܡܫܳܐ. ܘܡܶܢ ܥܶܠܰܬ ܚܰܣܺܝܪܽܘܬܶܗ ܕܢܽܘܗܪܳܐ. ܐܰܝܟܳܐ ܓܶܝܪ ܕܠܰܝܬ ܓܽܘܫ̈ܡܶܐ ܥܒܰܝܴ̈ܐ ܘܠܳܐ ܚܶܫܽܘܟܳܐ ܕܕܳܡܶܐ ܠܗܳܢܳܐ ܕܰܗܘܳܐ ܬܢܳܢ ܒܠܺܠܝܳܐ. ܡܳܕܶܝܢ ܚܶܫܘܟܳܐ ܗܰܘ ܕܣܳܡ ܐܰܠܳܗܳܐ ܠܓܶܢܝܶܗ ܡܶܢ ܒܳܬܰܪ ܕܰܣܠܶܩ ܠܰܐܬܪܶܗ. ܒܣܰܓܝ̈ܐܬܳܐ ܡܝܰܬܰܪ ܡܶܢ ܦܰܐܝܽܘܬܶܗ ܕܫܶܡܫܳܐ. ܘܰܡܥܰܠܰܝ ܡܶܢ ܢܽܘܗܪܳܐ ܗܳܢܳܐ ܡܶܬܚܰܙܝܳܢܳܐ. ܕܠܐ ܕܶܝܢ ܢܰܠܐܷܐ ܠܩܳܪܘܝܳܐ. ܐܶܠܐ ܐܳܡܪܺܝܢܰܢ ܕܡܳܢܳܐ ܐܝܬܰܘܗܝ ܗܰܘ ܚܶܫܽܘܟܳܐ ܕܣܳܡ ܠܓܶܢܝܶܗ. ܚܶܫܽܘܟܳܐ ܐܝܬܰܘܗܝ ܠܐ ܡܶܬܕܰܪܟܳܢܽܘܬܶܗ ܕܰܐܠܳܗܳܐ. ܘܗܳܕܶܐ ܐܶܡܰܪ ܢܒܺܝܳܐ. ܕܳܐܦܶܢ ܝܰܗܒ ܢܰܦܫܶܗ ܘܶܐܬܚܙܺܝ ܒܰܒܣܰܪ܆ ܐܶܠܐ ܡܶܟܺܝܠ ܐܶܬܓܢܺܝ ܠܶܗ. ܘܬܽܘܒ ܠܐ ܡܶܬܚܙܶܐ. ܘܡܰܝܴ̈ܐ ܩܳܪܶܐ ܠܗܽܘܢ ܠܚܰܝ̈ܠܰܘܳܬܳܐ ܥܶܠܳܝܷ̈ܐ ܡܶܛܽܠ ܟܢܺܝܫܽܘܬܳܐ ܡܛܰܝܰܒܬܳܐ ܘܰܐܘܝܽܘܬܳܐ ܘܫܰܘܝܽܘܬܳܐ ܕܰܩܢܶܝܢ ܒܰܟܝܳܢܗܽܘܢ. ܥܢܴ̈ܢܶܐ ܕܳܐܐܰܪ ܡܟܰܢܶܐ ܠܗܽܘܢ. ܡܶܛܽܠ ܩܰܠܺܝܠܽܘܬ ܓܶܦܷ̈ܐ ܘܰܦܪ̈ܳܚܰܝܗܽܘܢ ܕܰܠܟܽܠ ܦܶܢ̈ܝܳܢ. ܘܡܶܛܽܠ ܢܰܩܕܽܘܬܳܐ ܕܰܟܝܳܢܗܽܘܢ. ܘܒܶܝܬ ܠܗܽܘܢ ܘܰܠܘܳܬ ܟܝܳܢܳܐ ܗܰܘ ܡܠܶܐ ܛܽܘ̈ܒܶܐ. ܐܺܝܬ ܠܳܐ ܡܶܬܕܰܪܟܳܢܽܘܬܳܐ ܘܠܳܐ ܡܶܬܩܰܕܡܳܢܽܘܬܳܐ ܕܺܝܠܶܗ ܫܟܺܝܚܳܐ. ܗܳܝ ܡܰܢ ܕܡܶܬܟܰܢܝܳܐ ܚܶܫܽܘܟܳܐ. ܕܰܐܝܟ ܗܳܟܰܢܳܐ ܓܢܺܝܙ ܘܰܡܥܰܠܰܝ ܡܶܢ ܡܰܠܐܟܷ̈ܐ ܘܡܶܢ ܚܰܝ̈ܠܰܘܳܬܳܐ܇ ܐܰܟܡܳܐ ܕܰܟܣܶܝܢ ܗܶܢܽܘܢ ܡܶܢܰܢ. ܠܰܘ ܗܳܟܰܢܳܐ ܒܰܠܚܽܘܕ ܐܶܠܐ ܪ̈ܶܒܽܘ ܙܰܒ̈ܢܺܝܢ ܥܰܠ ܗܳܕܶܐ ܬܰܚܘܺܝܬܳܐ. ܘܟܽܠܗܽܘܢ ܡܣܰܬܪܺܝܢ ܐܰܦܰܝ̈ܗܽܘܢ ܒܓܶܦܰܝ̈ܗܽܘܢ ܘܰܡܟܰܣܶܝܢ ܩܢܽܘܡܰܝ̈ܗܽܘܢ ܒܶܐܒܪ̈ܰܝܗܽܘܢ ܡܶܢ ܙܰܗܪܳܐ ܥܰܫܺܝܢܳܐ ܕܡܰܛܠܠܶܗ. ܘܡܶܢ ܒܳܬܰܪ ܗܳܠܶܝܢ ܕܶܐܬܢܰܗܰܪ ܒܰܫܩܳܠܛܰܥܢܳܐ ܣܰܓܺܝܐܳܐ ܥܰܠ ܦܶܬܓܳܡܷ̈ܐ ܗܳܠܶܝܢ ܙܥܽܘܪ̈ܶܐ. ܬܽܘܒ ܓܶܠܝܳܢܷ̈ܐ ܡܶܕܶܡ ܥܰܡܺܝ̈ܩܶܐ ܡܰܝܬܶܐ ܢܒܺܝܳܐ. ܗܳܠܶܝܢ ܕܠܳܐ ܕܳܡܶܝܢ ܒܢܺܝܫܳܐ ܠܰܐܝܠܶܝܢ ܕܶܐܬܡܰܠܰܠܘ. ܒܪܰܡ ܕܶܝܢ ܠܐ ܗܘܳܐ ܠܪܽܘܚܩܳܐ ܣܰܓܺܝܳܐܐ ܘܡܰܒܥܕܳܐ. ܘܰܕܡܳܢܳܐ ܐܺܝܬ ܠܚܰܝ̈ܠܰܘܳܬܳܐ ܥܶܠܳܝܷ̈ܐ ܕܢܶܣܥܪܽܘܢ ܠܚܰܪܬܳܐ. ܘܰܒܡܳܢܳܐ ܢܶܬܕܰܡܽܘܢ. ܐܶܡܰܪ ܓܶܝܪ ܢܒܺܝܳܐ.
ܕܰܥܢܳܢܰܘ̈ܗܝ ܥܒܰܕ ܒܰܪܕܳܐ ܘܓܽܘܡܪ̈ܶܐ ܕܢܽܘܪܳܐ. ܘܰܪܥܶܡ ܒܰܫܡܰܝܳܐ ܡܳܪܝܳܐ: ܘܥܶܠܳܝܳܐ ܝܰܗܒ ܩܳܠܶܗ. ܒܰܪܕܳܐ ܘܓܽܘܡܪ̈ܶܐ ܕܢܽܘܪܳܐ. ܫܰܕܰܪ ܓܶܐܪ̈ܰܘܗܝ ܘܒܰܕܰܪ ܐܶܢܽܘܢ: ܘܒܰܪ̈ܩܰܘܗܝ ܐܰܣܓܺܝ ܘܕܰܠܰܚ ܐܶܢܽܘܢ. ܘܶܐܬܚܙܺܝܘ ܡܰܒܽܘ̈ܥܶܐ ܕܡܰܝܴ̈ܐ. ܘܶܐܬܓܠܺܝܘ ܫܶܬܶܐܣܷ̈ܐ ܕܬܺܒܶܝܠ: ܡܶܢ ܟܐܳܬܳܟ ܡܳܪܝܳܐ. ܘܡܶܢ ܢܫܰܡܬܳܐ ܕܪܽܘܚܳܐ ܕܪܽܘܓܙܳܟ. ܗܳܠܶܝܢ ܟܽܠܗܽܘܢ ܦܶܬܓ̈ܡܶܐ ܕܰܡܠܶܝܢ ܕܶܚܠܬܳܐ܆ ܘܣܽܘܪܳܕܳܐ ܡܳܢܳܐ ܢܺܐܡܰܪ ܕܡܰܘܕܥܺܝܢ܇ ܐܶܠܐ ܫܽܘ̈ܢܩܶܐ ܡܰܪܺܝܪ̈ܶܐ ܘܕܺܝ̈ܢܶܐ ܕܠܳܐ ܡܰܘܦܶܝܢ. ܘܚܶܒ̈ܠܐܷ ܕܡܶܬܚܙܶܝܢ ܒܚܰܪܬܳܐ ܩܕܳܡ ܡܶܐܬܝܶܗ ܕܥܰܡܰܢܽܘܐܝܠ. ܗܳܝܕܶܝܢ ܡܶܬܚܙܶܝܢ ܡܰܠܰܐܟܷ̈ܐ ܗܳܠܶܝܢ ܕܣܺܝܡܺܝܢ ܗܘܰܘ ܥܰܠ ܡܛܰܟܣܽܘܬܳܐ ܕܰܥ̈ܢܳܢܶܐ ܘܕܰܒܢܰܝ̈ܢܳܫܳܐ. ܘܡܶܫܬܰܚܠܦܳܐ ܡܕܰܒܪܳܢܽܘܬܳܐ ܕܡܰܝܴ̈ܐ ܕܰܥ̈ܢܳܢܶܐ ܠܒܰܪܕܳܐ ܕܚܺܝܠܳܐ. ܐܰܟܡܳܐ ܕܰܗܘܳܐ ܒܡܶܨܪܶܝܢ ܥܰܠ ܡܶܨܪ̈ܳܝܶܐ. ܒܰܪܕܳܐ ܘܓܽܘܡܪ̈ܶܐ ܕܢܽܘܪܳܐ. ܗܳܟܰܢܳܐ ܢܳܦܩܺܝܢ ܡܰܠܰܐܟܷ̈ܐ ܕܰܦܩܺܝܕܺܝܢ ܥܰܠ ܡܰܝܴ̈ܐ ܘܥܰܠ ܢܽܘܪܳܐ ܩܕܳܡ ܦܰܪܨܽܘܦܶܗ ܕܕܰܝܳܢܳܐ. ܘܗܳܘܶܝܢ ܥܢܳܢ̈ܐ ܕܒܰܪܕܳܐ ܘܢܽܘܪܳܐ. ܘܰܡܚܰܒܠܺܝܢ ܠܥܳܒ̈ܕܰܝ ܒܺܝ̈ܫܳܬܳܐ ܡܶܢ ܐܰܪܥܳܐ. ܘܡܶܛܠܗܳܢܳܐ ܚܠܳܦ ܡܽܘܫܶܐ ܕܰܦܩܰܕ ܗܘܳܐ: ܘܰܐܚܶܬ ܒܰܪܕܳܐ ܕܰܚܠܝܛܳܐ ܒܶܗ ܢܽܘܪܳܐ ܥܰܠ ܡܶܨܪ̈ܳܝܶܐ. ܘܰܠܫܽܘܠܳܡܳܐ ܗ̣ܘܳܐ ܐܰܠܳܗܳܐ ܪܳܥܶܡ ܒܰܥܢ̈ܢܶܐ ܥܶܠܳܝ̈ܬܳܐ. ܘܳܐܦ ܡܶܛܪ̈ܶܐ ܬܟܺܝ̈ܒܶܐ. ܘܰܥܢܴ̈ܢܶܐ ܕܡܰܡܛܪ̈ܳܢ ܒܰܪܕܳܐ. ܘܓܽܘܡܪ̈ܶܐ ܕܢܽܘܪܳܐ ܕܗܳܢܽܘܢ ܥܰܡ̈ܡܶܐ ܠܳܐ ܡܶܬܬܦܺܝܣܳܢܷ̈ܐ. ܘܰܡܫܰܕܰܪ ܠܗܳܢܽܘܢ ܕܰܡܫܰܡܫܺܝܢ ܨܶܒܝܳܢܶܗ ܒܰܕܡܽܘܬ ܓܶܐܪ̈ܶܐ. ܘܰܡܒܰܕܰܪ ܒܚܶܡܬܶܗ ܠܡܰܫܪ̈ܝܳܬܶܗ ܕܳܐܟܶܠܩܰܪܨܳܐ ܐܳܦ ܠܐܝܠܶܝܢ ܕܰܟܢܺܝܫܺܝܢ ܥܰܡܶܗ. ܡܕܰܠܰܚ ܒܒܰܪ̈ܩܰܘܗܝ ܚܰܪ̈ܝܦܶܐ ܐܰܝܟ ܕܶܐܡܰܪ ܕܰܘܺܝܕ: ܫܰܕܰܪ ܓܶܐܪ̈ܰܘܗܝ ܘܒܰܕܰܪ ܐܶܢܽܘܢ. ܘܒܰܪ̈ܩܰܘܗܝ ܐܰܣܓܺܝ ܘܕܰܠܰܚ ܐܶܢܽܘܢ. ܗܳܝܕܶܝܢ ܒܰܕܡܽܘܬܳܐ ܕܒܰܪ̈ܩܶܐ ܢܳܦܩܺܝܢ ܡܰܠܰܐܟܷ̈ܐ ܥܰܠ ܐܰܪܥܳܐ ܟܰܕ ܢܰܗܺܝܪܺܝܢ ܡܶܢ ܥ̈ܢܳܢܶܐ ܢܰܗܺܝܪ̈ܳܬܳܐ. ܘܥܰܪ̈ܦܶܠܐܷ ܕܫܰܠܗܶܒܺܝܬܳܐ. ܕܳܐܬܶܐ ܒܗܽܘܢ ܡܳܪܰܢ. ܘܡܶܣܬܰܪܗܒܺܝܢ ܠܡܰܘܩܳܕܽܘ ܠܙܺܝ̈ܙܳܢܶܐ ܒܢܶܫ̈ܒܰܝܗܽܘܢ ܥܰܙܺܝ̈ܙܶܐ. ܘܡܶܬܕܰܠܚܴ̈ܢ ܐܰܦܰܝ̈ܗܽܘܢ ܕܟܽܠܗܽܘܢ ܡܰܠܟܷ̈ܐ ܕܰܐܪܥܳܐ. ܘܟܽܠܗܽܘܢ ܡܕܰܒܪ̈ܳܢܶܐ ܕܪܽܘܫܥܳܐ. ܐܳܦ ܡܶܬܓܰܠܝܴ̈ܢ ܫܶܬܶܐܣܷ̈ܐ ܕܬܺܒܶܝܠ. ܒܰܕܠܳܐ ܦܳܝܫܺܝܢ ܛܶܡܪ̈ܶܐ ܘܚ̈ܶܙܶܐ ܘܚܽܘ̈ܫܳܒܶܐ ܕܢܰܦ̈ܫܳܬܳܐ ܕܠܐ ܐܳܬܶܝܢ ܠܓܶܠܝܳܐ. ܘܚܳܦܪܳܐ ܬܰܡܳܢ ܩܰܢܝܳܐ ܕܪܽܘܚܳܐ ܘܟܳܬܒܳܐ ܒܨܶܒܥܳܗ̇ ܟܰܣ̈ܝܳܬܳܐ ܘܰܡܛܫ̈ܝܳܬܳܐ ܘܡܰܝܬܝܳܐ ܠܓܶܠܝܳܐ ܩܕܳܡ ܕܰܝܳܢܳܐ. ܘܕܰܗ̈ܘܰܝ ܒܛܽܘܫܝܳܐ ܡܶܬܕܰܢ̈ܚܳܢ ܕܠܐ ܬܰܚܦܺܝܬܳܐ. ܐܰܝܟ ܕܚܰܘܺܝ ܠܛܘܒܳܢܳܐ ܚܰܙܩܺܝܐܝܠ. ܟܰܕ ܓܠܳܐ ܠܶܗ ܐܪܳܙܳܐ ܕܕܺܝܢܳܐ. ܐܶܡܰܪ ܓܶܝܪ: ܘܰܐܥܠܰܢܝ ܒܬܰܪܥܳܐ ܕܕܳܪܬܳܐ. ܘܰܚܙܺܝܬ ܢܶܩܒܳܐ ܚܰܕ ܒܶܐܣܬܳܐ. … ܘܶܐܫܟܚܶܬ ܬܰܪܥܳܐ ܚܰܕ. ܘܶܐܡܰܪ ܠܺܝ: ܥܽܘܠ ܘܰܚܙܺܝ ܛܰܢܦ̈ܘܳܬܳܐ ܘܒܺܝ̈ܫܳܬܳܐ … ܕܰܒ̈ܢܰܝ ܝܣܪܳܐܝܠ ܕܨܺܝܪ̈ܳܢ ܥܰܠ ܐܶܣܬܳܐ ܟܰܕ ܚܳܕܪܳܐ. ܘܥܰܡ ܗܳܠܶܝܢ ܬܽܘܒ ܘܫܰܒܥܺܝܢ ܓܰܒܪ̈ܶܐ ܡܶܢ ܣܳܒܷ̈ܐ ܕܝܣܪܳܐܝܠ. ܘܝܰܥܙܰܢܝܳܐ ܒܰܪ ܫܳܦܳܢ ܩܳܐܶܡ ܒܰܝܢܳܬܗܽܘܢ. ܘܗܶܢܽܘܢ ܩܳܝܡܺܝܢ ܗܘܰܘ ܩܕܳܡܰܘܗܝ. ܘܐܢܳܫ ܦܺܝܪܡܶܗ ܒܺܐܝܕܶܗ. ܘܥܶܛܪܳܐ ܕܬܶܢܳܢܳܐ ܕܒܶܣ̈ܡܶܐ ܕܣܳܠܶܩ ܗܘܳܐ. ܘܶܐܡܰܪ ܠܺܝ: ܚܳܙܶܐ ܐܰܢܬ ܒܰܪܢܳܫܳܐ܇ ܡܶܕܶܡ ܕܥܳܒܕܺܝܢ ܣܳܒܷ̈ܐ ܕܝܣܪܳܐܝܠ ܒܚܶܫܽܘܟܳܐ܇ … ܘܳܐܡܪܺܝܢ ܕܠܐ ܚܳܙܶܐ ܠܰܢ ܡܳܪܝܳܐ (ܚܙܩܐܝܠ ܚ: ܙ-ܝܒ). ܗܳܠܶܝܢ ܐܶܢܶܝܢ ܫܶܬܶܐܣܶܝ̈ܗ̇ ܕܬܺܒܝܠ ܕܶܐܡܰܪ ܢܒܺܝܳܐ. ܕܡܶܬܓܰܠܝܴ̈ܢ ܒܰܟܐܳܬܶܗ ܕܡܳܪܝܳܐ. ܘܰܐܝܠܶܝܢ ܕܰܡܒܰܟ̈ܝܳܢ ܗܘܱ̈ܝ ܠܬܰܡܘܙܳܐ. ܘܰܐܝܬܝܰܢܝ ܠܡܰܥܠܳܢܳܐ ܕܬܰܪܥܳܐ ܕܒܰܝܬܶܗ ܕܡܳܪܝܳܐ ܕܰܒܓܰܪܒܝܳܐ. ܘܰܚܙܺܝܬ ܬܰܡܳܢ ܢܶܫܷ̈ܐ ܕܝܳܬܒܴ̈ܢ ܘܰܡܒܰܟ̈ܝܳܢ ܠܬܰܡܘܙܳܐ (ܚܙܩܐܝܠ ܚ: ܝܕ). ܘܬܽܘܒ ܟܰܕ ܠܗܳܠܶܝܢ ܩܪܳܐ ܛܰܢܦ̈ܘܳܬܳܐ. ܩܰܪܒܶܗ ܠܘܳܬ ܓܶܠܝܳܢܳܐ ܘܚܶܙܘܳܐ ܐܚܪܺܢܳܐ. ܘܰܐܥܠܰܢܝ ܠܕܳܪܬܳܐ ܕܒܰܝܬܶܗ ܕܡܳܪܝܳܐ ܓܰܘܳܝܬܳܐ. ܘܰܚܙܺܝܬ ܒܬܰܪܥܳܐ ܕܗܰܝܟܠܶܗ ܕܡܳܪܝܳܐ܇ ܒܶܝܬ ܩܶܣܛܪܘܡܳܐ ܠܡܰܕܒܚܳܐ܆ ܥܶܣܪܺܝܢ ܘܚܰܡܫܳܐ ܓܰܒܪ̈ܺܝܢ ܕܩܳܝܡܺܝܢ: ܘܚܰܨ̈ܝܗܽܘܢ ܠܘܩܒܰܠ ܗܰܝܟܠܶܗ ܕܡܳܪܝܳܐ. ܘܰܐܦܰܝ̈ܗܽܘܢ ܠܡܰܕܢܚܳܐ. ܘܰܡܩܰܕܡܺܝܢ ܣܳܓܕܺܝܢ ܠܫܶܡܫܳܐ. ܘܶܐܡܰܪ ܠܺܝ: ܚܳܙܶܐ ܐܰܢܬ ܒܰܪܢܳܫܳܐ ܕܰܠܡܳܐ ܙܥܽܘܪܝܳܐ ܗܝ ܠܰܕܒܶܝܬ ܝܺܗܽܘܕܳܐ ܛܰܢܦܽܘܬܳܐ ܗܳܕܶܐ ܕܥܳܒܕܺܝܢ ܗܳܪܟܳܐ ܕܰܡܠܰܘ ܠܰܐܪܥܳܐ ܥܰܘܠܳܐ ܘܰܗܦܰܟܘ ܠܡܰܪܓܳܙܽܘܬܢܝ (ܚܙܩܐܝܠ ܚ: ܝܘ-ܝܚ). ܗܳܠܶܝܢ ܐܶܢܽܘܢ ܚܛܳܗܷ̈ܐ ܐܰܝܠܶܝܢ ܕܶܐܬܦܠܰܚܘ ܒܟܶܣܝܳܐ. ܡܶܢ ܐܰܝܠܶܝܢ ܕܶܐܣܬܒܰܪܘ ܟܺܐܢܷ̈ܐ ܐܶܢܽܘܢ. ܘܡܶܛܽܠ ܕܰܚܙܳܐ ܢܒܺܝܳܐ ܣܰܓܺܝܐܽܘܬܗܽܘܢ. ܠܐ ܐܶܬܢܰܒܺܝ ܒܡܰܚ̈ܘܳܬܳܐ ܐܰܝܟ ܚܰܙܩܺܝܐܝܠ. ܐܶܠܳܐ ܫܰܡܰܗ ܐܶܢܽܘܢ ܕܰܘܺܝܕ ܫܶܬܶܐܣܷ̈ܝܗ̇ ܕܬܺܒܝܠ ܕܡܶܬܓܰܠܝ̈ܢ. ܘܕܰܘܺܝܕ ܐܶܡܰܪ ܕܶܐܬܚܰܡܰܬ ܡܳܪܝܳܐ ܘܰܣܠܶܩ ܬܶܢܳܢܳܐ ܒܪܽܘܓܙܶܗ. ܘܰܪܥܶܡ ܒܰܫܡܰܝܳܐ ܥܰܠ ܬܒܰܥܬܳܐ ܕܡܰܪ̈ܳܚܶܐ. ܘܝܰܗܒ ܩܳܠܶܗ ܒܒܰܪܕܳܐ ܘܓܽܘܡܪ̈ܶܐ ܕܢܽܘܪܳܐ. ܘܡܶܢ ܒܳܬܰܪ ܕܰܚܙܳܐ ܚܛܳܗܷ̈ܐ ܕܝܽܘܕܳܝܷ̈ܐ ܘܕܽܐܘܪ̈ܺܫܠܶܡܳܝܶܐ ܕܰܢܦܰܩ̈ܝ ܠܦܽܘܪܣܳܝܳܐ. ܘܰܩܪܳܐ ܠܓܰܒܪܳܐ ܕܰܠܒܺܝܫ ܒܽܘܨܳܐ ܘܶܐܡܰܪ ܠܶܗ: ܥܽܘܠ ܠܒܶܝܬ ܓܺܝ̈ܓܠܶܐ ܠܬܰܚܬ ܡܶܢ ܟܪ̈ܽܘܒܶܐ. ܘܰܡܠܺܝ ܚܽܘܦ̈ܢܰܝܟ ܓܽܘܡܪ̈ܶܐ ܕܢܽܘܪܳܐ … ܘܰܕܪܺܝ ܥܰܠ ܥܰܡܳܐ ܕܰܡܕܺܝܢܬܳܐ. … ܘܟܰܕ ܥܳܐܶܠ ܓܰܒܪܳܐ ܗܰܘ. ܘܕܳܪܬܳܐ ܓܰܘܳܝܬܳܐ ܘܶܐܬܡܰܠܝܰܬ ܗܘܳܬ ܥܢܳܢܳܐ (ܚܙܩܐܝܠ ܝ: ܒ-ܓ). ܗܳܕܶܐ ܥܢܳܢܳܐ ܚܕܳܐ ܡܶܢ ܗܳܠܶܝܢ ܕܰܥܒܱ̈ܕܝ ܒܰܪܕܳܐ ܘܓܽܘܡܪ̈ܶܐ ܕܢܽܘܪܳܐ. ܢܰܫܰܪ ܕܺܐܝܬܶܝܗ̇. ܕܰܗܘܳܬ ܠܗܳܝ ܕܶܐܡܰܪ ܠܗܰܘ ܕܶܐܬܦܩܶܕ. ܕܢܶܡܠܶܐ ܚܽܘܦ̈ܢܰܘܗܝ ܓܽܘܡܪ̈ܶܐ ܕܢܽܘܪܳܐ. ܘܢܶܕܪܶܐ ܥܰܠ ܡܕܺܝܢܬܳܐ. ܡܰܝܬܶܐ ܘܳܐܡܰܪ ܟܰܕ ܩܳܪܶܐ ܠܓܰܒܪܳܐ ܕܰܠܒܺܝܫ ܒܽܘܨܳܐ. ܘܶܐܡܰܪ ܠܶܗ: ܣܰܒ ܢܽܘܪܳܐ ܡܶܢ ܒܶܝܬ ܓܺܝ̈ܓܠܐ ܘܡܶܢ ܒܶܝܬ ܟܪ̈ܽܘܒܶܐ. ܘܶܐܬܳܐ ܥܰܠ ܓܶܢܒ ܓܺܝ̈ܓܠܶܐ. ܘܰܐܘܫܶܛ ܟܪܽܘܒܳܐ ܐܺܝܕܶܗ … ܘܰܫܩܰܠ ܘܰܐܪܡܺܝ ܒܚܽܘܦ̈ܢܰܘܗܝ ܕܓܰܒܪܳܐ ܕܰܠܒܺܝܫ ܒܽܘܨܳܐ (ܚܙܩܐܝܠ ܝ: ܘ-ܙ). ܓܰܒܪܳܐ ܗܳܟܺܝܠ ܕܰܠܒܺܝܫ ܗܘܳܐ ܒܽܘܨܳܐ܇ ܡܰܢ ܐܝܬܰܘܗܝ܆ ܐܶܠܳܐ ܐܶܢ ܥܰܡܰܢܽܘܐܝܠ. ܗܰܘ ܕܠܳܐ ܐܺܝܬ ܐܢܳܫ ܕܰܩܢܶܐ ܫܽܘܠܛܳܢܳܐ ܒܕܺܝܢܳܐ ܐܶܠܐ ܠܶܗ ܒܰܠܚܽܘܕ. ܐܰܝܟ ܕܶܐܡܰܪ. ܕܰܐܒܳܐ ܠܐܢܳܫ ܠܐ ܕܳܐܶܢ. ܐܶܠܐ ܟܽܠܶܗ ܕܺܝܢܳܐ ܝܰܗܒܶܗ ܠܰܒܪܳܐ (ܝܘܚܢܢ ܗ: ܟܒ). ܟܰܕ ܗܳܟܺܝܠ ܗܳܠܶܝܢ ܚܶܙܘܷ̈ܐ ܕܰܢܒܺܝܘܬܳܐ ܠܳܚܡܺܝܢ ܚܰܕ ܠܚܰܕ. ܘܰܒܗܳܝ ܕܰܒܓܽܘܡܪ̈ܶܐ ܕܢܽܘܪܳܐ ܘܰܒܗܳܝ ܕܒܰܥ̈ܢܳܢܶܐ ܘܰܒܗܳܝ ܕܡܶܬܓܰܠܝܴ̈ܢ ܫܶܬܶܐܣܷ̈ܝܗ̇ ܕܬܺܒܝܠ. ܐܰܝܟ ܕܶܐܬܓܠܺܝ ܠܚܰܙܩܺܝܐܝܠ ܛܰܢ̈ܦܘܳܬܳܐ ܕܥܳܒܕܺܝܢ ܗܘܰܘ ܐܘܪ̈ܺܫܠܶܡܳܝܶܐ ܒܟܶܣܝܳܐ. ܢܶܪܕܶܐ ܡܶܟܺܝܠ ܒܣܶܕܪܳܐ ܕܬܰܫܥܺܝܬܳܐ ܕܰܡܙܰܡܪܳܢܳܐ ܡܶܢ ܒܳܬܰܪ ܕܶܐܡܰܪ. ܕܓܶܐܪ̈ܰܘܗܝ ܫܰܕܰܪ ܘܒܰܕܰܪ ܐܶܢܽܘܢ ܠܪ̈ܰܫܺܝܥܶܐ. ܘܒܰܪ̈ܩܰܘܗܝ ܐܰܣܓܺܝ ܘܕܰܠܰܚ ܠܦܳܠܚܱ̈ܝ ܫܽܘܩܪܳܐ. ܡܫܰܪܶܐ ܢܒܺܝܳܐ ܕܰܢܩܰܒܶܠ ܛܰܝܒܽܘܬܳܐ ܕܰܐܠܳܗܳܐ ܘܡܰܘܕܶܐ ܘܳܐܡܰܪ:
ܫܰܕܰܪ ܡܶܢ ܡܪܰܘܡܳܐ ܘܰܫܠܳܢܝ. ܘܩܰܒܠܰܢܝ ܡܶܢ ܡܰܝܴ̈ܐ ܣܰܓܺܝ̈ܐܶܐ: ܘܦܰܨܝܰܢܝ ܡܶܢ ܒܥܶܠܕ̈ܒܳܒܰܝ ܥܰܫܺܝ̈ܢܶܐ. ܘܡܶܢ ܣܳܢܱ̈ܐܝ ܕܰܥܫܶܢܘ ܡܶܢܝ. ܘܰܐܝܟ ܕܰܠܢܽܘܘܳܓܳܐ ܡܶܢ ܒܰܝܢܳܬ ܓ̈ܠܠܶܐ ܫܰܘܙܒܰܢܝ. ܘܡܶܢ ܓܰܠܠܰܘ̈ܗܝ ܕܝܰܡܳܐ ܕܰܠܝܰܢܝ. ܡܰܝܴ̈ܐ ܣܰܓܺܝ̈ܐܶܐ ܠܰܟܢܘܫܝܳܐ ܕܥܰܡ̈ܡܶܐ ܕܠܳܐ ܡܶܬܡܢܶܝܢ ܫܰܕܰܪ ܘܰܫܠܳܢܝ܆ ܕܠܳܐ ܐܶܛܒܰܥ ܥܰܡܗܽܘܢ ܒܗܰܘܬܳܐ ܕܢܽܘܪܳܐ. ܘܦܰܨܝܰܢܝ ܡܶܢ ܡܰܘܬܳܐ ܘܣܳܛܳܢܳܐ ܒܥܶܠܕ̈ܒܳܒܰܝ ܥܰܫܝ̈ܢܶܐ. ܗܳܠܶܝܢ ܓܶܝܪ ܒܗܳܢܳܐ ܥܳܠܡܳܐ ܥܫܶܢܘ ܡܶܢܝ. ܠܰܘ ܗܳܪܟܳܐ ܒܰܠܚܽܘܕ܆ ܐܶܠܳܐ ܘܰܒܝܰܡܳܐ ܕܰܟܢܽܘܫܝܳܐ ܩܰܕܶܡܘ ܩܳܡܘ ܩܕܳܡܰܝ ܕܢܶܣܒܽܘܢܳܢܝ ܠܰܡܢܳܬܗܽܘܢ. ܐܶܠܘܠܳܐ ܡܳܪܝܳܐ ܕܰܗܘܳܐ ܠܺܝ ܥܳܕܽܘܪܳܐ.
ܘܰܗܘܳܐ ܠܝ ܡܳܪܝܳܐ ܦܳܪܽܘܩܳܐ ܘܰܐܦܩܰܢܝ̱ ܠܰܪܘܰܚܬ̣ܳܐ. ܘܦܰܨܝܰܢܝ̱ ܡܶܛܠ ܕܰܨܒܳܐ ܒܺܝ: ܘܦܰܪܥܰܢܝ̱ ܡܳܪܝܳܐ ܡܳܪܰܢ ܐܰܝܟ ܙܰܕܺܝܩܽܘܬܝ. ܘܰܐܝܟ ܕܰܟܝܽܘܬܳܐ ܕܺܐܝ̈ܕܰܝ ܫܰܠܡܰܢܝ. ܕܰܒܗܳܢܳܐ ܥܳܠܡܳܐ. ܦܽܘܪܥܳܢܳܐ ܕܙܰܕ̈ܝܩܶܐ ܠܳܐ ܡܶܬܺܝܗܶܒ ܠܗܽܘܢ ܡܶܢ ܐܰܠܳܗܳܐ ܒܗܳܢܳܐ ܥܳܠܡܳܐ. ܓܰܠܝܳܐ ܗ̱ܝ ܘܺܝܕܺܝܥܳܐ ܠܟܽܠܡܰܢ ܕܠܳܐ ܒܡܰܗܡܝܳܢܽܘܬܳܐ ܩܳܪܶܐ ܒܰܟܬܳܒ̈ܐ ܩܰܕܺܝ̈ܫܶܐ. ܐܳܦ ܗܽܘ ܓܶܝܪ ܛܘܒܳܢܳܐ ܕܰܘܺܝܕ ܡܚܰܘܶܐ ܠܳܗ̇ ܠܗܳܕܶܐ ܕܶܐܡܪܶܬ. ܟܰܕ ܡܫܰܘܕܰܥ ܒܬܶܫܒܘܚܬܳܐ ܕܰܬܫܰܥܫܴ̈ܥܺܝܢ. ܥܰܠ ܡܽܘܫܶܐ ܘܰܐܗܪܽܘܢ ܘܰܫܡܽܘܐܝܠ ܡܶܢ ܒܳܬܰܪ ܕܶܐܡܰܪ. ܕܰܩܪܰܘ ܠܡܳܪܝܳܐ ܘܰܥܢܳܐ ܐܶܢܽܘܢ. ܘܰܒܥܰܡܽܘܕܳܐ ܕܰܥܢܳܢܳܐ ܡܰܠܶܠ ܗܘܳܐ ܥܰܡܗܽܘܢ (ܡܙܡܘܪܐ ܨܛ: ܚ). ܡܰܝܬܶܐ ܘܳܐܡܰܪ: ܗܳܝ ܕܰܒܚܰܪܬܳܐ ܗܳܘܝܳܐ ܠܘܳܬܗܽܘܢ ܡܶܢ ܐܰܠܳܗܳܐ. ܦܪܽܘܥ ܐܶܢܽܘܢ ܐܰܝܟ ܥܒܳܕܰܝ̈ܗܽܘܢ. ܠܐ ܐܶܡܰܪ ܕܰܦܪܰܥ ܐܶܢܽܘܢ. ܐܶܠܐ ܕܶܐܦܪܽܘܥ ܐܶܢܽܘܢ. ܓܰܠܝܳܐ ܗܝ ܗܳܕܶܐ. ܘܳܐܦܠܐ ܕܰܘܝܺܕ ܡܶܢܟܰܕܽܘ ܩܰܒܶܠ ܗܘܳܐ ܦܽܘܪܥܳܢܶܗ܇ ܐܶܠܐ ܗܳܝ ܕܶܐܡܰܪ. ܕܦܰܪܥܰܢܝ̱ ܡܳܪܝܳܐ ܐܳܡܪܺܝܢܰܢ. ܗܳܝ ܕܠܐ ܥܕܰܟܺܝܠ ܢܶܦܩܰܬ ܠܰܥܒܳܕܳܐ.
ܡܶܛܠ ܕܢܶܛܪܶܬ ܐܽܘܪ̈ܚܳܬܶܗ ܕܡܳܪܝܳܐ. ܘܠܳܐ ܐܶܬܡܰܪܕܶܬ ܡܶܢ ܐܰܠܳܗܝ. ܡܶܛܠ ܕܟܽܠܗܽܘܢ ܕܺܝܢܰܘ̈ܗܝ ܠܽܘܩܒܰܠܝ܇ ܘܢܳܡܽܘ̈ܣܰܘܗܝ ܠܐ ܐܰܥܒܪܶܬ ܡܶܢܝ: ܘܰܗܘܺܝܬ ܕܠܐ ܡܽܘܡ ܥܰܡܶܗ. ܘܶܐܙܕܰܗܪܶܬ ܡܶܢ ܚܛܳܗܷ̈ܐ: ܘܦܰܪܥܰܢܝ̱ ܡܳܪܝܳܐ ܐܰܝܟ ܙܰܕܺܝܩܽܘܬܝ: ܘܰܐܝܟ ܕܰܟܝܽܘܬܳܐ ܕܺܐܝ̈ܕܰܝ ܩܕܳܡ ܥܰܝܢܰܘ̈ܗܝ. ܚܳܙܶܐ ܐܰܢܬ ܠܗܰܘ ܕܰܢܛܰܪ ܐܽܘܪ̈ܚܳܬܶܗ. ܘܒܰܫܒܺܝܠܳܐ ܕܦܽܘܩܕ̈ܢܰܘܗܝ ܕܠܐ ܡܽܘܡ ܗܰܠܶܟ. ܘܥܰܠ ܐܰܠܳܗܳܐ ܠܐ ܐܶܫܬܰܥܠܺܝ ܘܠܳܐ ܡܪܰܕ. ܘܣܳܡ ܟܽܠܗܽܘܢ ܕܺܝ̈ܢܰܘܗܝ ܕܡܳܪܝܳܐ ܠܩܽܘܒܠܶܗ ܘܰܕܚܶܠ ܡܶܢܶܗ. ܘܢܳܡܘ̈ܣܰܘܗܝ ܕܰܐܠܳܗܳܐ ܠܐ ܐܰܥܒܰܪ ܡܶܢܶܗ. ܘܰܕܠܳܐ ܡܽܘܡ ܗܘܳܐ ܥܰܡ ܕܰܝܳܢܶܗ. ܘܶܐܙܕܗܰܪ ܡܶܢ ܚܛܳܗܷ̈ܐ ܘܠܳܐ ܚܛܳܐ. ܠܰܘ ܕܗܳܢܳܐ ܥܳܠܡܳܐ ܐܺܝܬܰܘܗܝ ܦܽܘܪܥܳܢܶܗ. ܐܶܠܐ ܕܥܳܠܡܳܐ ܪܰܒܳܐ ܕܙܰܕ̈ܝܩܶܐ. ܒܗܳܠܶܝܢ ܡܦܰܫܶܩ ܕܶܐܢܗܽܘ ܕܰܐܝܟ ܙܰܕܺܝܩܽܘܬܶܗ ܚܙܳܐ ܡܳܪܝܳܐ ܘܦܰܪܥܶܗ. ܡܳܕܶܝܢ ܘܰܠܪ̈ܰܫܺܝܥܶܐ ܐܰܝܟ ܪܽܘܫܥܗܽܘܢ ܦܳܪܰܥ ܠܗܽܘܢ. ܘܠܰܝܬ ܫܠܳܡܳܐ ܠܘܳܬ ܦܳܠܚܱ̈ܝ ܥܰܘܠܳܐ ܒܕܺܝܢܳܐ. ܘܠܐ ܚܶܡܬܳܐ ܥܰܠ ܦܳܠܚܱ̈ܝ ܛܳܒ̈ܬܳܐ. ܐܶܠܐ ܡܶܢ ܟܽܠ ܦܪܽܘܣ ܗܳܘܶܐ ܕܺܝܢܳܐ. ܘܰܠܘܳܬ ܛܳܒܷ̈ܐ ܗܳܘܶܐ ܡܰܛܐܒܳܢܳܐ. ܘܰܠܘܳܬ ܟܺܐܢܷ̈ܐ ܟܺܐܢܳܐ. ܘܟܽܠܢܳܫ ܓܶܝܪ ܐܰܝܟ ܗܽܘ̈ܦܳܟܰܘܗܝ ܕܰܒܗܳܢܳܐ ܥܳܠܡܳܐ ܡܶܬܚܙܶܐ ܠܶܗ ܕܰܝܳܢܳܐ ܟܺܐܢܳܐ ܒܗܰܘ ܝܰܘܡܳܐ. ܡܰܝܬܶܐ ܢܒܺܝܳܐ ܘܳܐܡܰܪ:
ܥܰܡ ܚܰܣܝܳܐ ܚܰܣܝܳܐ ܬܶܗܘܶܐ: ܘܥܰܡ ܬܰܡܺܝܡܳܐ ܬܶܬܬܰܡܰܡ: ܘܥܰܡ ܓܰܒܝܳܐ ܬܶܬܓܒܶܐ: ܘܥܰܡ ܥܩܺܝܡܳܐ ܬܶܬܦܰܬܰܠ. ܚܙܰܝܬ ܐܰܝܟܰܢܳܐ ܦܰܫܶܩ ܢܒܺܝܳܐ ܬܰܪ̈ܥܝܳܬܶܗ ܕܕܰܝܳܢܳܐ. ܕܰܒܗܶܝܢ ܡܶܬܚܰܘܶܐ ܒܗܰܘ ܝܰܘܡܳܐ ܕܦܽܘܪܥܳܢܳܐ ܠܰܬܪ̈ܰܝܗܽܘܢ ܓܰܒܷ̈ܐ. ܥܰܡ ܛܳܒܷ̈ܐ ܓܶܝܪ ܛܳܒܰܐ ܗ̱ܘ. ܘܥܰܡ ܬܰܡܺܝ̈ܡܶܐ ܬܰܡܺܝܡܰܐ ܗ̱ܘ. ܘܥܰܡ ܚܣܰܝܴ̈ܐ ܡܰܢ ܚܰܣܝܰܐ ܗܘ. ܘܠܰܓܒ̈ܝܳܐ ܓܰܒܝܰܐ ܗܘ. ܘܥܰܡ ܡܥܰܩ̈ܡܶܐ ܡܶܬܥܰܩܰܡ. ܡܶܫܟܚܺܝܢܰܢ ܕܶܐܡܰܪ ܢܒܺܝܳܐ ܡܶܛܽܠ ܥܰܘܠܶܗ ܕܥܰܡܳܐ. ܘܶܐܢܳܐ ܠܰܡ ܐܶܗܘܶܐ ܐܰܝܟ ܕܳܠܽܘܚܳܐ ܠܐܦܪܶܝܡ (ܗܘܫܥ ܗ: ܝܒ). ܠܗܰܘ ܕܰܣܪܰܚ ܘܚܰܒܶܠ ܢܳܡܽܘܣܰܘ̈ܗܝ. ܥܰܠ ܕܰܕܠܰܚ ܐܽܘܪܚܳܐ ܕܦܽܘܩܕ̈ܢܰܝ. ܕܳܠܽܘܚܳܐ ܐܶܗܘܶܐ ܠܶܗ. ܘܬܽܘܒ ܐܶܡܰܪ: ܘܶܐܢܳܐ ܐܶܗܘܶܐ ܐܰܝܟ ܐܰܪܝܳܐ ܠܐܦܪܶܝܡ ܘܰܐܝܟ ܓܘܪܝܳܐ ܕܰܐܪܝܳܐ ܠܰܕܒܶܝܬ ܝܣܪܳܐܝܠ (ܗܘܫܥ ܗ: ܝܕ). ܘܰܒܗܳܠܶܝܢ ܡܰܘܕܰܥ ܐܰܝܟ ܕܰܗܘܰܘ ܥܰܡܶܗ ܒܚܶܡܬܳܐ܆ ܐܳܦ ܗܽܘ ܢܶܗܘܶܐ ܥܰܡܗܽܘܢ ܒܪܽܘܓܙܳܐ. ܡܶܛܽܠ ܕܰܒܗܳܠܶܝܢ ܚܰܘܪ̈ܶܐ ܩܰܕܡܰܬ ܚܳܪܰܬ ܒܶܗ ܢܰܦܫܳܐ ܒܥܳܠܡܳܐ ܗܳܢܳܐ. ܐܳܦ ܗܽܘ ܡܶܬܚܙܶܐ ܠܳܗ̇ ܒܕܺܝܢܳܐ. ܘܰܐܝܟ ܕܦܳܣܺܝ̈ܩܳܬܳܐ ܢܺܐܙܰܠ ܠܘܳܬ ܗܰܘ ܩܳܠܳܐ ܕܰܐܫܡܰܥ ܠܰܢ ܒܰܣܒܰܪܬܶܗ. ܟܰܕ ܗܳܘܶܐ ܥܰܡ ܚܣܰܝܴ̈ܐ ܚܰܣܝܳܐ. ܘܥܰܡ ܬܰܡܝ̈ܡܶܐ ܬܰܡܺܝܡܳܐ. ܘܥܰܡ ܛܳܒܷ̈ܐ ܛܳܒܳܐ. ܘܡܶܢ ܕܶܝܢ ܕܳܐܬܶܐ ܒܪܶܗ ܕܐܢܳܫܳܐ ܒܫܽܘܒܚܶܗ: ܘܟܽܠܗܽܘܢ ܡܰܠܐܟܱ̈ܘܗܝ ܩܰܕܺܝ̈ܫܶܐ ܥܰܡܶܗ ܗܳܝܕܶܝܢ ܢܶܬܶܒ ܥܰܠ ܬܪܳܘܢܳܘܣ ܕܫܽܘܒܚܶܗ. ܘܢܶܬܟܰܢܫܽܘܢ ܕܶܝܢ ܩܕܳܡܰܘܗܝ ܟܽܠܗܽܘܢ ܥܰܡ̈ܡܶܐ. ܘܰܢܦܰܪܶܫ ܐܶܢܽܘܢ ܚܰܕ ܡܶܢ ܚܰܕ. ܐܰܝܟ ܪܳܥܝܳܐ ܕܰܡܦܰܪܶܫ ܐܶܡܪ̈ܶܐ ܡܶܢ ܓܕܰܝܴ̈ܐ. ܘܰܢܩܺܝܡ ܥܶܪ̈ܒܶܐ ܡܶܢ ܝܰܡܺܝܢܶܗ ܘܰܓܕܰܝܴ̈ܐ ܡܶܢ ܣܶܡܳܠܶܗ. ܗܳܝܕܶܝܢ ܢܺܐܡܰܪ ܡܰܠܟܳܐ ܠܗܳܢܽܘܢ ܕܡܶܢ ܝܰܡܺܝܢܶܗ. ܬܰܘ ܒܪ̈ܺܝܟܰܘܗܝ ܕܳܐܒܝ̱ ܝܺܪܰܬܘ ܡܰܠܟܽܘܬܳܐ܇ ܕܰܡܛܰܝܒܳܐ ܗܘܳܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ. ܟܶܦܢܶܬ ܓܶܝܪ ܘܝܰܗܒܬܽܘܢ ܠܺܝ ܠܡܶܐܟܰܠ܆ ܘܰܨܗܺܝܬ ܘܰܐܫܩܺܝܬܽܘܢܳܢܝ. … ܘܰܡܦܰܢܶܝܢ ܥܶܪ̈ܒܶܐ ܬܰܡܺܝ̈ܡܶܐ ܘܳܐܡܪܺܝܢ: ܕܶܐܡܰܬܝ ܚܙܰܝܢܳܟ ܕܰܟܦܶܢ ܐܰܢܬ ܘܬܰܪܣܺܝܢܳܟ. ܘܕܰܨܗܶܐ ܐܰܢܬ ܘܰܐܫܩܺܝܢܳܟ (ܡܬܝ ܟܗ: ܠܐ-ܠܙ). ܚܳܙܶܐ ܐܰܢܬ ܠܰܟܢܽܘܫܝܳܐ ܗܳܢܳܐ ܕܥܶܪ̈ܒܶܐ ܐܰܠܳܗܳܝܷ̈ܐ ܗܳܠܶܝܢ ܕܰܗܘܰܘ ܚܣܰܝܴ̈ܐ ܥܰܡ ܐܰܠܳܗܳܐ. ܘܡܶܛܽܠܗܳܢܳܐ ܐܳܦ ܗܽܘ ܗ̣ܘܳܐ ܥܰܡܗܽܘܢ ܚܰܣܝܳܐ. ܠܘܳܬ ܗܳܢܳܐ ܟܶܢܫܳܐ ܕܰܓܒܰܝܴ̈ܐ ܐܶܡܰܪ ܢܒܺܝܳܐ ܠܘܳܬ ܥܰܡܰܢܽܘܐܝܠ. ܘܟܰܕ ܠܘܳܬ ܗܰܘ ܓܰܒܳܐ ܐܚܪܺܢܳܐ ܡܦܰܢܶܐ ܪܳܥܝܳܐ ܘܳܐܡܰܪ: ܙܶܠܘ ܠܟܽܘܢ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ. ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܐܟܰܘ̈ܗܝ. ܟܶܦܢܶܬ ܓܶܝܪ܆ ܘܠܳܐ ܝܰܗܒܬܽܘܢ ܠܺܝ ܠܡܶܐܟܰܠ. ܘܰܨܗܺܝܬ܆ ܘܠܐ ܐܰܫܩܺܝܬܽܘܢܳܢܝ̱. ܥܰܪܛܶܠܳܝܳܐ ܗܘܺܝܬ܆ ܘܠܐ ܟܰܣܺܝܬܽܘܢܳܢܝ̱. ܘܰܐܟܣܢܳܝܳܐ܆ ܘܠܳܐ ܟܰܢܶܫܬܽܘܢܳܢܝ̱. ܘܒܶܝܬ ܐܰܣܺܝܪ̈ܶܐ܆ ܘܠܐ ܐܶܬܰܝܬܽܘܢ ܠܘܳܬܝ̱ (ܡܬܝ ܟܗ: ܡܐ-ܡܓ). ܗܳܢܳܐ ܩܳܠܐ ܠܰܘ ܐܰܝܟ ܪܳܥܝܳܐ ܡܡܰܠܶܠ܇ ܐܶܠܐ ܐܰܝܟ ܐܰܪܝܳܐ ܓܳܣܰܪ. ܥܰܠ ܐܰܦܪܶܝܡ ܗܰܘ ܦܳܠܰܚ ܦܬܰܟܪ̈ܶܐ. ܘܗܳܝܕܶܝܢ ܡܶܬܦܰܬܰܠ ܥܰܡ ܥܩܺܝܡܳܐ ܗܰܘ ܬܪܺܝܨܳܐ ܘܕܰܝܳܢܳܐ ܟܺܐܢܳܐ. ܕܰܐܟܡܳܐ ܕܠܳܐ ܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܐܰܚܱ̈ܝ ܙܥܽܘܪ̈ܶܐ܆ ܐܳܦܠܐܴ ܠܺܝ ܥܒܰܕܬܽܘܢ (ܡܬܝ ܟܗ: ܡܗ). ܕܰܒܗܳܠܶܝܢ ܬܪܶܝܢ ܓܰܒܷ̈ܐ ܚܳܐܰܪ ܗܘܳܐ ܢܒܺܝܳܐ ܕܚܰܕ ܡܶܬܦܪܶܩ ܡܶܢ ܕܺܝܢܳܐ܆ ܘܰܐܚܪܺܢܳܐ ܡܶܫܬܰܦܰܠ ܘܡܶܬܡܰܟܰܟ. ܐܰܘܣܶܦ ܬܽܘܒ ܘܶܐܡܰܪ:
ܡܶܛܽܠ ܕܰܐܢܬ ܥܰܡܳܐ ܡܶܣܟܺܢܳܐ ܬܶܦܪܽܘܩ. ܘܥܰܝ̈ܢܶܐ ܪ̈ܳܡܳܬܳܐ ܬܡܰܟܶܟ. ܗܳܢܰܘ ܕܶܝܢ ܟܶܢܫܳܐ ܕܶܐܡܪ̈ܶܐ ܘܥܶܪ̈ܒܶܐ ܬܰܡܝ̈ܡܶܐ. ܘܥܰܝ̈ܢܶܐ ܪ̈ܳܡܳܬܳܐ ܬܡܰܟܶܟ ܗܰܘ ܟܢܽܘܫܝܳܐ ܫܳܘܶܐ ܠܐܷܒܠܳܐ ܕܰܓܕܰܝܴ̈ܐ. ܕܫܰܕܰܪ ܐܶܢܽܘܢ ܠܬܰܫܢܺܝܩܳܐ ܗܰܘ ܕܰܠܥܳܠܰܡ. ܘܰܠܢܽܘܪܳܐ ܕܠܳܐ ܕܳܥܟܳܐ. ܡܦܺܝܣ ܒܳܬܰܪ ܗܳܠܶܝܢ ܢܒܺܝܳܐ. ܕܡܶܢ ܐܰܠܳܗܳܐ ܢܶܢܗܰܪ ܫܪܳܓܶܗ ܒܥܳܠܡܳܐ ܚܰܕܬܳܐ. ܥܰܡ ܠܰܡܦܻ̈ܝܕܶܐ ܕܚܰܟܺܝ̈ܡܳܬܳܐ.
ܐܰܢܬ ܬܰܢܗܰܪ ܫܪܳܓܝ. ܘܬܰܡܳܢ ܒܡܰܫܟܢܳܟ ܐܰܢܗܰܪ ܫܪܳܓܝ.
ܘܡܳܪܝܳܐ ܐܰܠܳܗܳܐ ܢܰܢܗܰܪ ܚܶܫܽܘܟܝ. ܠܬܰܚܦܺܝܬܳܐ ܕܡܰܘܬܳܐ ܕܰܦܪܺܝܣܳܐ ܒܩܰܒܪ̈ܶܐ ܥܰܠ ܩܰܕܺܝ̈ܫܶܐ. ܘܰܒܢܽܘܚܳܡܶܗ ܕܡܶܠܬܳܐ ܡܶܬܩܰܦܠܳܐ ܡܶܢ ܐܰܦܰܝ̈ܗܽܘܢ ܘܢܳܗܪܺܝܢ. ܥܕܰܡܳܐ ܠܗܳܪܟܳܐ ܥܰܠ ܓܶܠܝܳܢܳܐ ܘܥܰܠ ܕܺܝܢܳܐ ܐܶܡܰܪ ܢܒܺܝܳܐ. ܗܳܫܳܐ ܕܶܝܢ ܠܐ ܠܳܚܡܺܝܢ ܦܶܬܓܳܡܷ̈ܐ ܕܡܰܝܬܶܐ ܥܰܡ ܗܳܠܶܝܢ ܕܰܩܕܳܡܰܝܗܽܘܢ. ܘܶܐܢ ܐܢܳܫ ܟܰܕ ܩܳܪܶܐ ܡܶܫܟܰܚ. ܐܶܡܰܪ ܓܶܝܪ ܗܳܫܳܐ.
ܡܶܛܽܠ ܕܒܳܟ ܐܶܪܗܰܛ ܥܰܠ ܓܰܝܣܳܐ. ܘܗܳܕܶܐ ܠܐ ܗܘܳܐ ܠܶܗ ܐܰܬܪܳܐ ܒܚܰܪܬܳܐ. ܓܰܝ̈ܣܶܐ ܕܰܒܥܶܠܕ̈ܒܳܒܶܐ ܡܶܬܚܰܘܶܐ ܕܡܶܬܟܰܬܰܫ ܘܡܰܩܪܶܒ. ܘܡܶܛܽܠܗܳܢܳܐ ܛܽܘܒܳܢܳܐ ܕܰܘܺܝܕ ܟܰܕ ܚܙܳܐ ܪܰܒܽܘܬܶܗ ܕܥܳܠܡܳܐ ܚܰܕܬܳܐ. ܘܦܽܘܪܥܳܢܳܐ ܕܡܶܬܺܝܗܶܒ ܒܶܗ ܠܩܰܕܺܝ̈ܫܶܐ܆ ܦܢܳܐ ܠܶܗ ܕܢܶܥܒܶܕ ܩܪܳܒܳܐ ܥܰܡ ܒܥܶܠܕ̈ܒܳܒܶܐ ܕܚܰܝ̈ܝܢ. ܘܰܩܥܳܐ ܠܒܺܝܒܳܐܝܺܬ ܘܶܐܡܰܪ: ܕܰܚܙܰܝܬ ܐܰܝܟܰܢ ܡܶܬܚܰܝܰܒ ܓܰܝܣܳܐ ܕܫܺܐܕ̈ܐ ܒܕܺܝܢܳܐ. ܒܳܟ ܐܶܬܚܰܝܰܠ ܘܶܐܪܗܰܛ ܥܠܰܘܗܝ.
ܘܒܰܐܠܳܗܝ ܐܶܫܘܰܪ ܫܽܘܪܳܐ. ܕܠܳܐ ܠܰܡ ܡܶܢ ܚܰܝܠܳܟ ܠܰܝܬ ܕܡܶܫܟܰܚ ܘܫܳܘܰܪ ܡܰܫܪ̈ܝܳܬܳܐ ܡܶܬܝܰܕܥܳܢ̈ܝܳܬܳܐ ܕܓܰܝ̈ܣܶܐ ܕܰܚܛܺܝܬܳܐ. ܐܰܝܟ ܕܗܳܕܶܐ ܐܶܡܰܪ. ܕܰܐܢܬ ܚܽܘܬ ܘܰܬܪܽܘܥ ܣܶܕܪ̈ܶܐ ܕܡܰܫܪ̈ܝܳܬܳܐ ܕܓܰܝ̈ܣܶܐ ܕܡܰܩܪܒܺܝܢ ܥܰܡܰܢ. ܘܒܳܟ ܐܰܠܳܗܰܢ ܢܶܫܘܰܪ ܘܢܶܥܒܰܪ ܫܽܘܪܳܐ ܕܰܒܢܳܬ ܠܩܽܘܒܠܰܢ ܚܛܺܝܬܳܐ. ܐܰܢܬ ܕܺܐܝܬܶܝܗ̇ ܐܘܪܚܳܟ ܕܠܳܐ ܡܽܘܡܳܐ ܘܰܕܠܳܐ ܚܛܺܝܬܳܐ. ܒܳܟ ܓܶܝܪ ܠܳܐ ܡܶܫܟܰܚ ܒܥܶܠܕܒܳܒܳܐ ܛܳܡܰܪ ܦܰܚܷ̈ܐ. ܡܶܛܠܗܳܢܳܐ ܐܶܡܰܪ:
ܐܰܠܳܗܳܐ ܕܰܕܠܳܐ ܡܽܘܡ ܐܘܪܚܶܗ. ܟܰܕ ܨܒܳܐ ܘܰܗܘܳܐ ܒܰܪܢܳܫܳܐ. ܠܐ ܗܘܰܘ ܒܶܗ ܡܽܘ̈ܡܶܐ ܕܰܚܛܺܝܬܳܐ.
ܘܡܺܐܡܪܶܗ ܕܡܳܪܝܳܐ ܒܩܶܐ. ܗܳܕܶܐ ܒܰܪܬ ܩܳܠܐ ܐܰܝܟ ܗܳܝ ܕܶܐܡܰܪ ܝܽܘܚܰܢܳܢ. ܒܪܺܝܫܺܝܬ ܐܝܬܰܘܗܝ ܗܘܳܐ ܡܶܠܬܳܐ (ܝܘܚܢܢ ܐ: ܐ). ܡܺܐܡܪܳܐ ܓܶܝܪ ܘܡܶܠܬܳܐ ܚܰܕ ܐܶܢܽܘܢ. ܡܶܛܽܠ ܕܡܺܐܡܪܳܐ ܡܠܺܝܠܳܐ ܐܝܬܰܘܗܝ.
ܘܰܡܥܰܕܰܪ ܠܟܽܠ ܕܰܬܟܺܝܠܺܝܢ ܥܠܰܘܗܝ. ܡܰܢ ܓܶܝܪ ܡܶܫܟܰܚ ܡܥܰܕܰܪ ܠܐܝܠܶܝܢ ܕܰܬܟܺܝܠܺܝܢ ܥܠܰܘܗܝ܆ ܐܶܠܐ ܡܶܠܬܶܗ ܕܰܐܒܳܐ. ܗܰܘ ܕܶܐܡܰܪ. ܕܟܽܠ ܕܰܡܗܰܝܡܶܢ ܒܺܝ ܐܺܝܬ ܠܶܗ ܚܰܝܷ̈ܐ ܕܰܠܥܳܠܰܡ. ܘܰܠܕܺܝܢܳܐ ܠܐ ܐܳܬܶܐ ܠܚܰܪܬܳܐ. ܐܶܠܐ ܫܰܢܺܝ ܠܶܗ ܡܶܢ ܡܰܘܬܳܐ ܠܚܰܝܷ̈ܐ ܕܰܠܥܳܠܰܡ (ܝܘܚܢܢ ܗ: ܟܕ). ܬܽܘܟܠܳܢܳܐ ܘܗܰܝܡܳܢܽܘܬܳܐ܆ ܚܰܕ ܗ̱ܽܘ ܚܰܝܠܗܶܝܢ ܕܡܷ̈ܠܶܐ ܗܳܠܶܝܢ. ܗܰܘ ܓܶܝܪ ܕܡܶܬܬܟܶܠ܆ ܡܶܛܽܠ ܕܰܡܗܰܝܡܶܢ ܡܶܬܬܟܶܠ. ܡܶܛܽܠ ܕܢܰܘܕܰܥ ܪܽܘܚܳܐ ܩܰܕܺܝܫܳܐ ܥܰܠ ܐܰܠܳܗܳܐ ܡܶܠܬܳܐ܆ ܡܶܬܡ̈ܠܠܳܢ ܗܘܱ̈ܝ ܗܳܠܶܝܢ ܒܰܢܒܺܝܘܬܳܐ. ܐܰܝܟ ܗܰܘ ܕܡܶܢ ܟܰܕܽܘ ܒܦܽܘ̈ܠܳܓܶܐ ܘܰܒܟܷ̈ܫܠܶܐ ܡܩܰܕܶܡ ܠܡܶܗܘܳܐ ܥܠܰܘܗܝ ܒܥܳܠܡܳܐ. ܒܗܳܝ ܕܰܗܘܳܐ ܒܰܪܢܳܫܳܐ. ܟܰܕ ܒܓܽܘܡܳܕܳܐ ܕܢܶܣܛܽܘܪ̈ܝܰܢܽܘ ܚܳܐܰܪ ܗܘܳܐ. ܗܳܢܽܘܢ ܕܳܐܡܪܺܝܢ ܥܰܠ ܡܳܪܰܢ. ܕܠܰܘ ܐܰܠܳܗܰܐ ܗ̱ܘ. ܩܥܳܐ ܢܒܺܝܳܐ ܘܶܐܡܰܪ:
ܡܶܛܠ ܕܠܰܝܬ ܐܰܠܳܗܳܐ ܠܒܰܪ ܡܶܢ ܡܳܪܝܳܐ: ܘܠܰܝܬ ܕܬܰܩܺܝܦ ܐܰܝܟ ܐܰܠܳܗܰܢ. ܟܡܳܐ ܠܰܡ ܐܶܢ ܡܰܙܥܪܺܝܢ ܠܶܗ ܐܶܪ̈ܺܝܛܺܝܩܽܘ ܘܢܶܕܥܽܘܢ ܗܳܕܶܐ܆ ܕܠܰܝܬ ܐܚܪܺܢܳܐ ܠܒܰܪ ܡܶܢܶܗ. ܐܶܠܳܐ ܐܶܢ ܗܳܢܳܐ ܕܶܐܬܓܠܺܝ ܠܶܗ ܒܰܒܣܰܪ. ܘܠܰܝܬ ܕܬܰܩܺܝܦ ܐܰܟܘܳܬܶܗ. ܡܶܛܽܠ ܕܰܠܚܽܘܕܳܐܝܬ ܐܰܠܳܗܰܐ ܗ̱ܘ. ܘܰܟܡܳܐ ܐܶܢ ܨܒܳܐ ܘܰܙܥܰܪ ܒܡܶܬܒܰܪܢܫܳܢܽܘܬܶܗ܆ ܐܶܠܳܐ ܙܥܽܘܪܽܘܬܶܗ ܡܶܢ ܐܰܠܳܗܽܘܬܶܗ ܠܐ ܡܟܰܪܝܳܐ ܠܗ. ܘܐܢܳܫܽܘܬܶܗ ܡܶܢ ܐܺܝܬܽܘܬܶܗ ܠܐ ܡܬܰܚܬܝܳܐ. ܗܳܢܰܘ ܠܰܡ ܕܶܐܡܰܪ ܢܒܺܝܳܐ. ܠܰܝܬ ܕܬܰܩܺܝܦ ܐܰܝܟ ܐܰܠܳܗܰܢ.
ܗܰܘ ܐܰܠܳܗܳܐ ܕܚܰܙܩܰܢܝ ܚܰܝܠܳܐ: ܘܝܰܗܒ ܕܠܳܐ ܡܽܘܡ ܐܽܘܪܚܝ. ܗܽܘ ܠܰܡ ܕܰܟܺܝ ܐܽܘܪܚܶܗ ܡܟܰܬܰܡܬܳܐ ܡܶܢ ܚܛܺܝܬܳܐ ܕܥܳܠܡܳܐ. ܘܰܕܪܰܫ ܕܠܐ ܬܽܘܩ̈ܠܳܬܳܐ ܫܒܺܝ̈ܠܐܷ ܠܡܰܠܟܽܘܬܶܗ. ܡܶܛܽܠ ܕܰܥܕܰܡܳܐ ܕܗܽܘ ܐܶܬܓܠܺܝ ܒܰܒܣܰܪ܆ ܡܟܰܬܡܳܐ ܗܘܳܬ ܐܘܪܚܳܐ ܕܩܰܕܺܝ̈ܫܶܐ ܠܰܚܛܺܝܬܳܐ. ܗܽܘ ܓܶܝܪ ܡܶܛܽܠ ܕܠܳܐ ܥܒܰܕ ܚܛܺܝܬܳܐ܆ ܚܰܪܪܳܗ̇ ܠܐܘܪܚܰܢ ܡܶܢ ܫܒܺܝ̈ܠܐܷ ܡܰܚ̈ܛܝܳܢܶܐ. ܘܕܰܟܝܳܗ̇ ܡܶܢ ܦܽܘܠܦܴ̈ܠܶܐ ܡܟܰܬܡܰܝ̈ ܒܒܺܝ̈ܫܳܬܳܐ. ܘܰܚܣܰܟ ܪ̈ܶܓܠܰܘܗܝ ܕܥܳܠܡܳܐ ܡܶܢ ܬܽܘܩ̈ܠܳܬܳܐ ܕܚܶܫܽܘܟܳܐ. ܘܫܰܪܰܪ ܥܶܩ̈ܒܰܝܢ ܕܰܕܠܳܐ ܕܶܚܠܬܳܐ ܢܶܪܕܶܐ ܠܘܳܬ ܐܰܬܪܰܢ ܩܰܕܡܳܝܳܐ.
ܘܰܥܒܰܕ ܪ̈ܶܓܠܰܝܢ ܐܰܝܟ ܕܰܐܝܠܳܐ܇ ܘܥܰܠ ܪܰܘܡܳܐ ܐܰܩܺܝܡܰܢܝ. ܘܡܶܢ ܒܰܪܬ ܩܳܠܳܐ ܗܳܕܶܐ ܝܶܠܦܰܬ ܟܰܠܬܳܐ ܕܗܳܘܝܳܐ ܩܳܪܝܳܐ ܠܶܗ ܠܚܰܬܢܳܗ̇ ܐܰܝܠܳܐ. ܘܥܰܠ ܗܳܕܶܐ ܒܰܟܬܳܒܳܐ ܕܬܶܫܒ̈ܚܳܬ ܬܶܫܒ̈ܚܳܬܳܐ ܩܳܥܝܳܐ ܗܘܳܬ ܠܘܳܬܶܗ ܟܰܕ ܐܳܡܪܳܐ. ܥܪܽܘܩ ܠܰܡ ܕܳܕܝ: ܘܶܐܬܕܰܡܳܐ ܠܛܰܒܝܳܐ ܘܰܠܥܽܘܙܰܝܠܐܴ ܕܰܐܝܠܳܐ ܥܰܠ ܛܘܪ̈ܶܐ ܕܒܶܝܬ ܐܺܝܠ (ܬܫܒ̈ܚܬ ܬܫܒ̈ܚܬܐ ܒ: ܝܙ؛ ܚ: ܝܕ). ܘܥܰܠ ܕܰܐܝܠܐ ܟܝܳܢܳܐ ܡܶܕܶܡ ܐܺܝܬ ܠܶܗ܆ ܕܢܶܗܘܶܐ ܕܳܐܶܫ ܘܰܡܓܰܡܰܪ ܓܶܢܣܳܐ ܕܰܚ̈ܘܰܘܳܬܳܐ. ܒܳܠܰܥ ܠܗܶܝܢ ܠܓܰܘ ܟܰܪܣܶܗ. ܕܰܐܝܟ ܗܳܢܳܐ ܫܽܘܠܛܳܢܳܐ ܝܰܗܒ ܠܶܗ ܐܰܠܳܗܳܐ. ܗܰܘ ܕܚܰܙܶܩ ܒܚܰܝܠܳܐ ܕܪܽܘܚܳܐ ܩܰܕܺܝܫܳܐ ܠܰܫܠܺܝ̈ܚܰܘܗܝ. ܕܢܶܗܘܽܘܢ ܐܳܦ ܗܶܢܽܘܢ ܐܰܝ̈ܠܶܐ ܩܰܕܺܝ̈ܫܶܐ܆ ܘܰܢܕܽܘܫܽܘܢ ܚܘܰܘ̈ܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ. ܡܳܕܶܝܢ ܐܰܝܟ ܡܶܠܬܶܗ ܕܰܡܙܰܡܪܳܢܳܐ. ܐܰܝܟ ܪ̈ܶܓܠܰܘܗܝ ܩܰܕܺܝ̈ܫܳܬܳܐ ܡܳܪܰܢ܆ ܗܳܠܶܝܢ ܕܕܳܫ̈ܝ ܐܰܪܝܳܐ ܘܬܰܢܺܝܢܳܐ. ܝܰܗܒ ܐܳܦ ܗܳܫܳܐ ܠܥܰܒ̈ܕܰܘܗܝ ܕܰܢܕܽܘܫܽܘܢ ܥܰܠ ܗܳܢܽܘܢ ܕܡܰܥܒܕܺܝܢ ܚܛܺܝܬܳܐ. ܘܠܰܘ ܐܰܝܟ ܗܳܢܽܘܢ ܕܰܗܘܰܘ ܪ̈ܺܝܫܶܐ ܠܓܶܢܣܰܢ. ܘܕܳܫ ܐܶܢܽܘܢ ܬܰܢܺܝܢܳܐ ܡܶܬܝܰܕܥܳܢܳܐ܆ ܡܶܬܬܕܺܝܫܺܝܢ ܗܳܫܳܐ ܩܰܕܺܝ̈ܫܶܐ ܘܢܳܦܠܺܝܢ ܡܶܢ ܪܰܘܡܳܐ ܫܡܰܝܳܢܳܐ. ܢܶܕܚܰܠ ܕܶܝܢ ܘܡܶܢ ܗܳܕܶܐ. ܡܶܛܠ ܕܗܰܘ ܕܠܰܝܬ ܠܶܗ ܪ̈ܶܓܠܐ ܕܰܐܝܠܐ܆ ܠܐ ܡܶܫܟܰܚ ܩܳܐܶܡ ܥܰܠ ܪܰܘܡܳܐ ܕܶܐܡܰܪ ܢܒܺܝܳܐ. ܪܰܘܡܳܐ ܕܶܝܢ ܐܺܝܬܰܘܗܝ ܗܰܘ ܪܰܘܡܳܐ ܕܦܰܪܕܰܝܣܳܐ ܕܰܢܦܰܠ ܐܳܕܳܡ ܡܶܢܶܗ. ܘܥܰܠ ܗܳܢܳܐ ܩܳܝܡܺܝܢ ܒܝܰܕ ܡܫܺܝܚܳܐ. ܘܗܽܘ ܐܶܡܰܪ ܠܬܰܠܡܺܝ̈ܕܶܐ ܩܰܕܺܝ̈ܫܶܐ ܕܺܝܠܶܗ. ܕܗܳܐ ܝܳܗܶܒ ܐܢܳܐ ܠܟܽܘܢ ܫܽܘܠܛܳܢܳܐ. ܕܰܬܕܽܘܫܽܘܢ ܚܘܰܘ̈ܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ (ܠܘܩܐ ܝ: ܝܛ). ܐܰܝܟ ܡܶܠܬܶܗ ܕܰܢܒܺܝܳܐ ܕܶܐܡܰܪ:
ܕܰܐܠܶܦ ܐܝ̈ܕܰܝ ܠܰܩܪܳܒܳܐ. ܘܠܰܘ ܕܠܐ ܒܽܘܝܳܢܳܐ ܡܶܟܺܝܠ ܫܳܕܶܐ ܐܢܳܐ. ܐܶܠܐ ܟܰܕ ܝܶܠܦܶܬ ܕܰܐܝܟܰܢܳܐ ܐܶܫܕܶܐ܆ ܫܳܕܶܐ ܐܢܳܐ ܠܐ ܡܶܬܡܰܚܠܳܢܳܐܝܬ܆ ܠܰܘ ܒܰܕܪ̈ܳܥܶܐ ܪ̈ܦܰܝܳܐ ܕܒܶܣܪܳܐ. ܐܶܠܐ ܐܺܝܬ ܠܝ ܕܪ̈ܳܥܶܐ ܕܩܶܫܬܳܐ ܢܽܘܪܳܢܳܝܬܳܐ ܕܡܰܠܐܟܷ̈ܐ. ܗܳܝ ܕܫܳܕܝܳܐ ܒܳܐܟܶܠܩܰܪܨܳܐ ܘܠܐ ܡܶܬܬܰܒܪܳܐ. ܘܰܕܪ̈ܳܥܰܝ ܐܶܫܬܰܪܰܪܘ ܒܡܳܪܝܳܐ ܘܰܗܘܰܘ ܕܰܢܚܳܫܳܐ ܘܰܕܦܰܪܙܠܳܐ.
ܡܶܛܠ ܕܫܰܪܰܪ ܐܰܝܟ ܩܶܫܬܳܐ ܕܰܢܚܳܫܳܐ ܕܪ̈ܳܥܰܝ. ܩܶܫܬܳܐ ܕܰܢܚܳܫܳܐ ܡܫܰܡܰܗ ܠܰܩܪܳܒܳܐ ܕܰܫܠܺܝ̈ܚܶܐ ܥܰܡ ܣܳܛܳܢܳܐ. ܘܒܳܬܰܪܟܶܢ ܐܶܡܰܪ.
ܝܰܗܒܬ ܠܺܝ ܣܰܟܪܳܐ ܗܳܝ ܕܦܽܘܪܩܳܢܳܐ. ܣܰܟܪܳܐ ܕܶܝܢ ܐܺܝܬܶܝܗ̇ ܕܰܟܬܰܒ ܦܰܘܠܘܣ ܠܶܐܦܶܣܳܝ̈ܐ. ܕܥܰܡ ܗܳܠܶܝܢ ܣܰܒܘ ܠܟܽܘܢ ܣܰܟܪܳܐ ܕܗܰܝܡܳܢܽܘܬܳܐ ܕܒܶܗ ܬܶܬܡܨܽܘܢ ܚܰܝܠܳܐ ܠܰܡܕܰܥܳܟܽܘ ܓܶܐܪ̈ܰܘܗܝ ܝܳܩ̈ܕܶܐ ܕܒܺܝܫܳܐ (ܐܦܣ̈ܝܐ ܘ: ܝܘ). ܕܶܐܢ ܗܳܕܶܐ ܢܶܣܥܽܘܪ܆ ܦܫܺܝܩ ܠܰܢ ܥܰܡܶܗ ܕܰܡܙܰܡܪܳܢܳܐ ܕܢܺܐܡܰܪ ܠܘܳܬ ܡܳܪܝܳܐ:
ܝܰܡܺܝܢܳܟ ܬܣܰܝܥܰܢܝ ܘܡܰܪܕܽܘܬܳܟ ܬܪܰܒܶܝܢܝ. ܐܰܪܘܰܚܬ ܦܣܳܥܴ̈ܬܝ ܬܚܽܘܬܰܝ ܕܠܐ ܢܙܽܘܥܽܘܢ ܩܽܘܪ̈ܨܠܰܝ. ܗܰܘ ܕܶܐܬܪ̈ܰܘܰܚܝ ܦܣܳܥܴ̈ܬܶܗ ܒܽܐܘܪܚܳܐ ܕܡܰܠܟܽܘܬܳܐ ܕܳܡܶܐ ܠܙܰܟܰܝ ܗܰܘ ܡܳܟܣܳܐ. ܕܰܒܚܰܕ ܥܶܕܳܢܳܐ ܕܥ̣ܰܠ ܡܳܪܰܢ ܠܒܰܝܬܶܗ ܩܥܳܐ ܘܶܐܡܰܪ. ܡܳܪܝ ܗܳܐ ܦܶܠܓܽܘܬ ܢܶܟ̈ܣܰܝ ܝܳܗܶܒ ܐܢܳܐ ܠܡܶܣ̈ܟܺܢܶܐ. ܘܰܠܟܽܠܢܳܫ ܡܶܕܶܡ ܕܓܶܠܙܶܬ܆ ܚܰܕ ܒܰܐܪܒܥܳܐ ܦܳܪܰܥ ܐܢܳܐ (ܠܘܩܐ ܝܛ: ܚ). ܥܰܠܗܳܕܶܐ ܠܳܐ ܢܙܽܘܥܽܘܢ ܩܽܘܪ̈ܨܠܰܘܗܝ. ܕܗܳܢܳܐ ܫܡܰܥ ܗܘܳܐ ܡܶܢ ܡܳܪܰܢ ܕܶܐܡܰܪ ܠܶܗ. ܕܝܰܘܡܳܢܳܐ ܗܘܰܘ ܚܰܝܷ̈ܐ ܠܒܰܝܬܳܐ ܗܳܢܳܐ (ܠܘܩܐ ܝܛ: ܛ). ܘܡܶܬܪ̈ܰܘܚܳܢ ܗܘܱ̈ܝ ܬܽܘܒ ܦܣܳܥܴ̈ܬܶܗ ܕܦܰܘܠܘܣ ܐܰܠܳܗܳܝܳܐ. ܕܡܶܢ ܫܽܘܪܳܝܳܐ ܕܰܩܪܳܝܬܶܗ ܩܪܳܝܗܝ ܡܳܪܝܳܐ ܒܩܳܠܶܗ ܡܳܪܳܢܳܝܳܐ ܘܰܐܣܩܶܗ ܠܰܫܡܰܝܳܐ. ܘܰܕܠܳܐ ܬܽܘܗܳܝܳܐ ܒܳܬܰܪ ܬܠܳܬܳܐ ܝܰܘ̈ܡܺܝܢ ܐܶܬܡܰܛܺܝ ܠܰܓܡܺܝܪܽܘܬܳܐ. ܗܳܠܶܝܢ ܦܰܫܶܩ ܗܘܳܐ ܠܗܽܘܢ ܕܰܐܝܟ ܕܰܘܺܝܕ ܢܺܐܡܪܽܘܢ:
ܐܶܪܕܽܘܦ ܒܥܶܠܕ̈ܒܳܒܰܝ ܘܰܐܕܪܶܟ ܐܶܢܽܘܢ: ܘܠܐ ܐܶܗܦܽܘܟ ܥܕܰܡܳܐ ܕܶܐܓܰܡܰܪ ܐܶܢܽܘܢ. ܐܶܡܚܶܐ ܐܶܢܽܘܢ ܘܠܐ ܢܶܫܟܚܽܘܢ ܠܰܡܩܳܡ: ܢܶܦܠܽܘܢ ܬܚܶܝܬ ܪ̈ܶܓܠܰܝ. ܡܳܐ ܓܶܝܪ ܕܰܩܢܳܐ ܐܢܳܫ ܪ̈ܶܓܠܶܐ ܐܰܝܠܳܢ̈ܝܳܬܳܐ: ܘܰܗܘܰܘ ܠܶܗ ܕܪ̈ܳܥܶܐ ܡܶܣܬܰܟܠܳܢܷ̈ܐ ܕܰܢܚܳܫܳܐ܆ ܗܳܢܳܐ ܒܰܫܪܳܪܳܐ ܡܶܬܚܰܝܰܠ ܥܰܠ ܒܥܶܠܕܒܳܒܷ̈ܐ ܡܶܬܝܰܕܥܴ̈ܢܶܐ. ܘܡܰܕܪܶܟ ܠܗܽܘܢ ܘܰܡܓܰܡܰܪ ܘܡܰܫܦܶܠ ܠܗܽܘܢ. ܐܰܝܟ ܐܰܝܠܳܐ ܕܰܡܣܺܝܦ ܘܰܡܓܰܡܰܪ ܠܓܶܢܣܳܐ ܕܰܚ̈ܘܰܘܳܬܳܐ. ܘܡܰܘܣܶܦ ܢܒܺܝܳܐ ܘܳܐܡܰܪ:
ܬܰܚܙܩܰܢܝ ܚܰܝܠܐ ܒܰܩܪܳܒܳܐ: ܘܬܰܒܪܶܟ ܠܰܕܩܳܝܡܺܝܢ ܥܠܰܝ ܬܚܽܘܬܰܝ. ܘܠܰܒܥܶܠܕ̈ܒܳܒܰܝ ܬܶܬܒܰܪ ܩܕܳܡܰܝ. ܘܰܠܣܳܢܱ̈ܐܝ ܐܶܫܰܬܶܩ ܐܶܢܽܘܢ. ܢܶܓܥܽܘܢ ܘܠܐ ܢܶܗܘܶܐ ܠܗܽܘܢ ܦܳܪܽܘܩܳܐ: ܢܶܒܥܽܘܢ ܡܶܢ ܡܳܪܝܳܐ܆ ܘܠܐ ܢܶܥܢܶܐ ܐܶܢܽܘܢ. ܡܳܐ ܓܶܝܪ ܕܰܒܪܰܟܘ ܚܰܝ̈ܠܰܘܳܬܳܐ ܕܚܶܫܘܟܳܐ. ܘܚܳܒܘ ܒܰܩܪܳܒܳܐ ܡܶܢ ܩܰܕܺܝ̈ܫܶܐ. ܟܡܳܐ ܐܶܢ ܓܳܥܶܝܢ܆ ܠܳܐ ܢܶܗܘܶܐ ܠܗܽܘܢ ܡܰܢ ܕܫܳܡܰܥ ܘܠܳܐ ܕܥܳܢܶܐ ܠܗܽܘܢ. ܘܠܳܐ ܗܳܘܶܐ ܠܗܽܘܢ ܡܳܪܝܳܐ ܦܳܪܽܘܩܳܐ. ܐܶܠܐ ܐܰܝܟ ܕܶܐܡܰܪ ܢܒܺܝܳܐ:
ܢܶܫܚܽܘܩ ܐܶܢܽܘܢ ܐܰܝܟ ܥܰܦܪܳܐ ܥܰܠ ܐܰܦܱ̈ܝ ܪܽܘܚܳܐ. ܐܰܟܙܢܳܐ ܓܶܝܪ ܕܠܐ ܩܳܐܶܡ ܥܰܦܪܳܐ ܠܽܘܩܒܰܠ ܡܰܫ̈ܒܶܐ ܥܰܙܺܝ̈ܙܶܐ ܕܪܽܘܚܳܐ܆ ܗܳܟܰܢܳܐ ܠܐ ܡܶܫܟܚܺܝܢ ܚܰܝ̈ܠܰܘܳܬܳܐ ܡܶܬܝܰܕܥ̈ܢܶܐ ܕܚܶܫܽܘܟܳܐ ܢܥܰܙܽܘܢ ܩܕܳܡ ܕܰܝܳܢܳܐ ܕܟܺܐܢܽܘܬܳܐ. ܘܡܶܛܠܗܳܢܳܐ ܡܶܬܬܕܺܝܫܺܝܢ ܡܶܢ ܪ̈ܶܓܠܶܐ ܕܩܰܕܺܝ̈ܫܶܐ. ܐܰܝܟ ܕܶܐܡܰܪ ܢܒܺܝܳܐ.
ܘܰܐܝܟ ܣܝܳܢܳܐ ܕܫܽܘ̈ܩܶܐ ܐܶܕܽܘܫ ܐܶܢܽܘܢ. ܘܒܳܬܰܪ ܗܳܠܶܝܢ ܡܶܬܦܢܶܐ ܢܒܺܝܳܐ ܬܽܘܒ ܘܢܳܣܶܒ ܦܰܪܨܽܘܦܳܐ ܗܰܘ ܕܰܡܫܺܝܚܳܐ ܥܠܰܘܗܝ: ܘܡܶܬܢܰܒܶܐ ܥܰܠ ܡܕܰܒܪܳܢܽܘܬܶܗ. ܘܥܰܠܗܳܝ ܕܡܶܫܬܰܐܰܠ ܗܘܳܐ ܡܶܢ ܪ̈ܰܒܰܝ ܟܳܗ̈ܢܶܐ ܘܣܳܦܪ̈ܶܐ ܕܝܽܘܕ̈ܝܶܐ. ܘܰܡܨܰܠܶܐ ܘܳܐܡܰܪ:
ܬܦܰܨܶܝܢܝ ܡܶܢ ܕܺܝ̈ܢܰܘܗܝ ܕܥܰܡܳܐ: ܘܬܶܥܒܕܰܢܝ ܪܺܝܫܳܐ ܠܥܰܡ̈ܡܶܐ. ܐܶܢ ܥܰܠ ܕܰܘܺܝܕ ܐܰܡܺܝܪ̈ܳܢ ܗܳܠܶܝܢ܆ ܗܳܐ ܨܰܠܺܝ ܕܠܐ ܐܶܬܥܢܺܝ. ܘܠܐ ܓܶܝܪ ܕܰܝܳܢܷ̈ܐ ܕܥܰܡܳܐ ܩܳܡܘ ܥܠܰܘܗܝ. ܡܶܢ ܒܳܬܰܪ ܕܰܩܛܰܠ ܠܰܦܠܶܫܬܳܝܳܐ ܐܚܪܺܢܳܐ. ܘܠܐ ܬܽܘܒ ܪܺܝܫܳܐ ܗܘܳܐ ܠܥܰܡ̈ܡܶܐ. ܐܶܠܳܐ ܓܰܠܝܳܐ ܗ̱ܝ ܕܥܰܠ ܡܳܪܰܢ ܡܶܬܢܰܒܶܐ ܗܘܳܐ ܗܳܠܶܝܢ. ܗܽܘ ܓܶܝܪ ܐܶܬܦܰܨܺܝ ܡܶܢ ܕܺܝܢܳܐ ܕܥܰܡܳܐ. ܒܗܳܝ ܕܠܰܘ ܗܶܢܽܘܢ ܕܳܢܽܘܗܝ ܒܫܽܘܠܳܡܳܐ ܕܰܨܠܝܒܳܐ. ܐܶܠܳܐ ܦܺܝܠܰܛܽܘܣ ܢܰܓܕܶܗ ܘܰܐܫܠܡܶܗ ܕܢܶܙܕܩܶܦ. ܡܶܛܽܠ ܕܬܶܕܰܥ ܕܗܳܠܶܝܢ ܗܳܟܰܢܳܐ ܐܶܢܶܝܢ: ܐܳܡܰܪ ܗܘܳܐ ܓܶܝܪ ܦܺܝܠܰܛܽܘܣ ܠܘܳܬ ܥܰܡܳܐ܇ ܗܳܢܰܘ ܠܪ̈ܰܒܰܝ ܟܳܗ̈ܢܶܐ ܘܠܰܦܪ̈ܺܝܫܶܐ ܘܰܠܣܳܦܪ̈ܶܐ. ܕܽܘܒܪܽܘܗܝ ܐܰܢܬܽܘܢ ܘܕܽܘܢܽܘܗܝ ܐܰܝܟ ܢܳܡܽܘܣܟܽܘܢ. ܗܶܢܽܘܢ ܕܶܝܢ ܐܶܡܰܪܘ. ܠܰܝܬ ܠܰܢ ܫܽܘܠܛܳܢܳܐ ܠܡܶܩܛܰܠ ܠܐܢܳܫ (ܝܘܚܢܢ ܝܚ: ܠܐ). ܕܬܶܫܠܰܡ ܡܶܠܬܳܐ ܕܶܐܡܰܪ ܝܶܫܽܘܥ: ܟܰܕ ܡܰܘܕܰܥ ܒܰܐܝܢܳܐ ܡܰܘܬܳܐ ܡܳܐܶܬ. ܡܳܕܶܝܢ ܫܰܦܺܝܪ ܐܶܬܢܰܒܺܝ ܕܰܘܺܝܕ. ܕܶܐܬܦܰܨܺܝ ܡܶܢ ܕܺܝ̈ܢܰܘܗܝ ܕܥܰܡܳܐ. ܘܰܗܘܳܐ ܪܺܝܫܳܐ ܠܥܰܡ̈ܡܶܐ ܡܗܰܝܡ̈ܢܶܐ. ܠܰܘ ܕܰܘܺܝܕ ܐܶܠܐ ܡܳܪܶܗ ܕܕܰܘܺܝܕ. ܗܰܘ ܕܶܐܬܳܐ ܒܨܶܒܝܳܢܶܗ ܠܚܰܫܳܐ ܘܡܰܘܬܳܐ. ܘܡܶܛܽܠ ܕܥܰܠ ܦܳܪܽܘܩܰܢ ܡܶܬܢܰܒܶܐ ܗܘܳܐ܆ ܡܰܘܣܶܦ ܘܡܰܘܕܰܥ ܐܳܦ ܦܽܘܢܳܝܳܐ ܕܥܰܡ̈ܡܶܐ ܕܰܠܘܳܬ ܐܰܠܳܗܳܐ. ܗܰܘ ܕܰܗܘܳܐ܆ ܒܳܬܰܪ ܕܶܐܨܛܠܶܒ ܘܰܦܪܰܩ ܐܶܢܽܘܢ.
ܥܰܡܳܐ ܕܠܐ ܝܶܕܥܶܬ ܢܶܦܠܚܽܘܢܳܢܝ: ܘܡܰܫܡܰܥ ܐܶܕܢܳܐ ܢܶܫܡܥܽܘܢܳܢܝ̱. ܐܶܠܐ ܐܳܡܰܪ ܗܳܫܳܐ ܐܶܪܺܝܛܺܝܩܳܝܳܐ܆ ܕܶܐܢ ܐܰܠܳܗܳܐ ܗ̄ܘܳܐ܆ ܐܰܝܟܰܢܳܐ ܐܶܡܰܪ ܕܥܰܡܳܐ ܕܠܳܐ ܝܶܕܥܶܬ ܢܶܦܠܚܽܘܢܳܢܝ. ܡܶܛܽܠ ܕܥܰܠ ܐܰܠܳܗܳܐ ܠܳܐ ܠܳܚܶܡ ܦܶܬܓܳܡܳܐ ܗܳܢܳܐ. ܘܶܐܢ ܐܳܡܰܪ ܠܒܺܝ̈ܫܶܐ ܒܝܰܘܡܳܐ ܐܚܪܳܝܳܐ: ܕܰܐܡܺܝܢ ܐܳܡܰܪ ܐܢܳܐ ܠܟܽܘܢ. ܕܠܐ ܝܳܕܰܥ ܐܢܳܐ ܠܟܽܘܢ: ܐܰܪܚܶܩܘ ܡܶܢܝ ܦܳܠܚܱ̈ܝ ܥܰܘܠܳܐ (ܠܘܩܐ ܝܓ: ܟܙ). ܐܰܪܰܐ ܐܰܟܡܰܢ ܕܠܐ ܝܳܕܰܥ ܗܘܳܐ ܠܗܽܘܢ. ܒܰܫܪܳܪܳܐ ܐܶܡܰܪ. ܐܰܘ ܡܶܛܠ ܕܡܶܡܬܽܘܡ ܠܳܐ ܐܶܫܟܰܚ ܐܶܢܽܘܢ ܒܦܽܘܠܚܳܢܳܐ ܕܙܰܕܺܝܩܽܘܬܳܐ. ܥܰܡ̈ܡܶܐ ܓܶܝܪ ܗܳܢܽܘܢ ܕܠܐ ܡܶܡܬܽܘܡ ܝܺܕܰܥ ܐܶܢܽܘܢ ܐܰܠܳܗܳܐ ܒܰܢܛܽܘܪܽܘܬܳܐ ܕܦܽܘܩܕ̈ܢܰܘܗܝ܆ ܗܶܢܽܘܢ ܥܰܠܘ ܘܰܦܠܰܚܘ ܟܰܪܡܳܐ ܐܰܠܳܗܳܝܳܐ. ܘܰܗܘܰܘ ܓܰܘܳܝܷ̈ܐ ܘܺܝܕܺܝ̈ܥܶܐ ܘܩܰܪ̈ܺܝܒܶܐ. ܕܰܠܗܽܘܢ ܩܪܳܐ ܡܶܢ ܒܳܬܰܪܟܶܢ ܒܢܰܝܴ̈ܐ ܢܽܘܟܪ̈ܳܝܶܐ. ܘܶܐܡܰܪ:
ܒܢܰܝܴ̈ܐ ܢܽܘܟܪ̈ܳܝܶܐ ܢܶܫܬܰܥܒܕܽܘܢ ܠܺܝ: ܒܢܰܝܴ̈ܐ ܢܽܘܟܪ̈ܳܝܶܐ ܢܶܬܟܠܽܘܢ ܘܢܶܬܚܰܓܪܽܘܢ ܡܶܢ ܫܒܺܝܠܰܝ̈ܗܽܘܢ. ܫܒܺܝ̈ܠܐ ܕܶܝܢ ܕܰܢܦܰܠܘ ܘܶܐܬܚܰܓܰܪܘ ܡܶܢܗܽܘܢ. ܦܽܘ̈ܠܚܳܢܶܐ ܕܰܚܛܺܝܬܳܐ ܕܟܽܠ ܓܢܶܣ. ܡܶܛܽܠ ܕܰܐܒܺܝܕܳܐ ܗܘܳܬ ܡܶܢܗܽܘܢ ܐܘܪܚܳܐ ܕܟܺܐܢܽܘܬܳܐ. ܒܝܰܕ ܫܒ̈ܝܠܶܐ ܣܰܓܺܝ̈ܐܐ ܕܠܐ ܕܳܡܶܝܢ ܚܰܕ ܠܚܰܕ ܡܶܬܛܰܪܦܺܝܢ ܗܘܰܘ. ܒܳܬܰܪ ܣܶܓ̈ܕܳܬܳܐ ܣܪ̈ܺܝܩܳܬܳܐ ܕܰܐܠܳܗܷ̈ܐ ܚܰܪ̈ܒܶܐ ܘܕܰܓܳܠܰܝ̈ ܫܡܳܐ܆ ܟܰܕ ܕܶܝܢ ܐܶܬܓܠܺܝ ܐܰܠܳܗܳܐ ܒܰܒܣܰܪ. ܣܚܰܦ ܘܰܫܕܳܐ ܕܶܚ̈ܠܳܬܳܐ ܣܪ̈ܺܝܩܳܬܳܐ ܕܥܰܡ̈ܡܶܐ. ܘܰܐܥܛܶܦ ܐܶܢܽܘܢ ܡܶܢ ܬܰܘܫܳܐ ܕܰܚܛܺܝܬܳܐ ܠܐܘܪܚܳܐ ܕܡܰܠܟܽܘܬܶܗ ܡܰܠܝܰܬ ܚܰܝܷ̈ܐ. ܘܟܰܕ ܚܙܳܐ ܦܽܘܢܳܝܗܽܘܢ ܣܳܡ ܡܶܢ ܟܶܢ ܬܰܘܕܺܝܬܳܐ ܕܰܒܚܰܕ ܡܳܪܝܳܐ ܘܶܐܡܰܪ:
ܚܰܝ ܗ̱ܽܘ ܡܳܪܝܳܐ ܘܰܒܪܺܝܟ ܗܘ ܡܚܰܝܠܳܢܝ: ܐܶܬܬܪܺܝܡ ܐܰܠܳܗܝ ܘܦܳܪܽܘܩܝ̱. ܐܰܠܳܗܳܐ ܕܝܰܗܒܠܺܝ ܬܒܰܥܬܳܐ. ܘܫܰܥܒܶܕ ܠܥ̈ܡܡܶܐ ܬܚܽܘܬܰܝ. ܗܳܠܶܝܢ ܩܴ̈ܠܶܐ ܕܥܰܡ̈ܡܶܐ ܕܗܰܝܡܶܢܘ ܗܳܕܶܐ ܬܰܘܕܺܝܬܳܐ. ܕܰܒܢܰܝܴ̈ܐ ܢܽܘܟܪ̈ܳܝܶܐ ܕܶܐܫܬܰܥܒܰܕܘ ܠܰܨܠܺܝܒܳܐ: ܘܰܗܘܰܘ ܓܰܘܳܝܷ̈ܐ ܘܒܰܝܬܳܝܷ̈ܐ ܕܗܰܝܡܳܢܽܘܬܳܐ: ܘܺܝܠܶܦܘ ܠܡܺܐܡܰܪ ܘܰܠܡܺܐܡܳܐ. ܚܰܝ ܗܘ ܡܳܪܝܳܐ ܕܚܰܝܶܠ ܠܰܢ. ܘܶܐܬܬܪܺܝܡ ܐܰܠܳܗܳܐ ܦܳܪܽܘܩܰܢ. ܐܰܠܳܗܳܐ ܕܝܰܗܒܠܰܢ ܬܒܰܥܬܳܐ ܡܶܢ ܕܰܝ̈ܘܶܐ ܡܳܪ̈ܽܘܕܶܐ. ܘܫܰܥܒܶܕ ܬܚܽܘܬܰܝܢ ܫܺܐܕ̈ܐ ܡܳܪ̈ܽܘܕܶܐ ܒܥܶܠܕܒ̈ܒܰܝܢ.
ܘܦܰܨܝܰܢܝ̱ ܡܶܢܗܽܘܢ: ܘܡܶܢ ܐܰܝܠܶܝܢ ܕܩܳܝܡܺܝܢ ܥܠܰܝ ܐܰܪܺܝܡܰܢܝ̱. ܘܡܶܢ ܓܰܒܪ̈ܶܐ ܥܰܘܴ̈ܠܶܐ ܬܦܰܨܶܝܢܝ. ܗܳܠܶܝܢ ܩܴ̈ܠܐ ܕܥܰܡܳܐ ܩܰܕܺܝܫܳܐ. ܕܶܐܬܦܪܶܩ ܡܶܢ ܛܪܽܘܢܽܘܬܳܐ ܕܡܳܪ̈ܘܕܶܐ ܒܝܰܕ ܡܳܪܰܢ. ܘܡܶܛܽܠܗܳܢܳܐ ܡܙܰܡܰܪ ܢܒܺܝܳܐ ܘܳܐܡܰܪ. ܕܡܶܟܺܝܠ ܕܥܰܡܳܐ ܢܦܰܠ ܡܶܢ ܒܰܝܬܳܝܽܘܬܳܐ ܕܰܐܠܳܗܳܐ. ܒܗܳܝ ܕܰܐܪܡܺܝ ܥܠܰܘܗܝ ܐܺܝܕܳܐ ܘܩܰܛܠܶܗ. ܘܰܦܩܰܕ ܠܪ̈ܘܚܶܐ ܕܰܢܒܺܝܽܘܬܳܐ ܕܬܶܣܰܒ ܙܡܺܝܪ̈ܳܬܳܐ ܕܙܶܡܪܰܬ ܥܰܠ ܓܶܠܝܳܢܳܐ ܕܡܶܬܒܰܪܢܫܳܢܽܘܬܳܟ.
ܘܰܐܘܕܶܐ ܠܳܟ ܒܶܝܬ ܥܰܡ̈ܡܶܐ ܡܳܪܝ. ܘܠܰܫܡܳܟ ܐܶܙܰܡܰܪ ܡܰܘܪܶܒ ܦܽܘܪܩܳܢܳܐ ܕܡܰܠܟܶܗ: ܘܥܳܒܶܕ ܛܰܝܒܽܘܬܳܐ ܠܰܡܫܺܝܚܶܗ. ܡܰܠܟܳܐ ܡܫܺܝܚܳܐ ܠܥܰܡܰܢܽܘܐܝܠ ܡܟܰܢܶܐ. ܗܰܘ ܕܶܝܢ ܕܰܥܒܰܕ ܘܰܐܘܪܶܒ ܦܽܘܪܩܳܢܳܐ ܕܡܰܠܟܶܗ. ܐܝܬܰܘܗܝ ܐܰܒܳܐ. ܒܗܳܝ ܓܶܝܪ ܕܰܐܣܗܶܕ ܐܰܒܳܐ ܥܰܠ ܒܪܶܗ ܚܰܒܺܝܒܳܐ. ܒܗܳܕܶܐ ܡܶܬܐܡܰܪ: ܕܰܐܘܪܶܒ ܦܽܘܪܩܳܢܳܐ ܕܡܰܠܟܶܗ ܘܰܠܥܳܠܡܳܐ. ܘܠܰܘ ܕܠܐ ܫܽܘܡܠܳܝܳܐ. ܕܗܳܠܶܝܢ ܬܠܳܬܳܐ ܫܡܳܗܷ̈ܐ ܩܰܕܺܝ̈ܫܶܐ ܡܶܬܓܡܰܪ ܥܡܳܕܳܐ ܩܰܕܺܝܫܳܐ. ܟܰܕ ܕܶܝܢ ܡܦܰܪܶܫ ܫܡܳܐ ܕܡܰܠܟܳܐ ܘܕܰܡܫܺܝܚܳܐ ܡܶܢ ܕܺܝܠܶܗ ܐܶܡܰܪ:
ܠܕܰܘܝܕ ܘܰܠܙܰܪܥܶܗ ܥܕܰܡܳܐ ܠܥܳܠܰܡ. ܗܳܢܳܐ ܩܳܠܐ ܐܚܪܺܢܳܐ ܡܶܬܢܣܶܒ ܥܰܠ ܡܶܣܟܺܢܽܘܬܳܐ ܕܺܝܠܰܢ. ܕܗܽܘ ܐܝܬܰܘܗܝ ܗ̱ܘܳܐ ܐܰܠܳܗܳܐ ܥܒܰܕ ܛܰܝܒܽܘܬܳܐ ܒܓܶܢܣܳܐ ܕܰܒܢܰܝ̈ܢܳܫܳܐ܆ ܒܝܰܕ ܓܶܠܝܳܢܳܐ ܕܚܰܒܺܝܒܶܗ. ܕܠܶܗ ܫܽܘܒܚܳܐ ܘܽܐܘܚܕܳܢܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܣܪ
ܡܰܘܕܰܥ ܥܰܠ ܬܶܫܒܽܘܚܬܳܐ ܕܰܐܠܳܗܳܐ ܕܡܰܟܪܙܺܝܢ ܟܝܳܢܷ̈ܐ ܕܠܐ ܡܶܠܬܳܐ ܟܰܕ ܫܰܬܝܩܺܝܢ: ܘܥܰܠ ܕܰܬܠܳܬ ܫܡܰܝܴ̈ܐ ܐܺܝܬ ܣܛܰܪ ܡܶܢ ܪܩܺܝܥܳܐ: ܘܥܰܠ ܪܶܗܛܳܐ ܕܰܡܣܰܒܪ̈ܳܢܶܐ: ܘܥܰܠ ܩܰܠܺܝܠܽܘܬܳܐ ܕܕܶܢܚܶܗ ܕܰܡܫܺܝܚܳܐ ܕܗܳܘܶܐ ܒܫܽܘܠܳܡܳܐ.
ܛܘܒܳܢܳܐ ܡܽܘܫܶܐ ܗܰܘ ܕܰܐܟܬܶܒ ܬܰܫܥܺܝܬܳܐ ܕܒܶܪ̈ܝܳܬܳܐ. ܘܫܰܘܕܰܥ ܝܰܘܡ̈ܬܳܐ ܕܟܽܠ ܚܕܳܐ ܡܶܢܗܶܝܢ ܒܰܐܝܢܳܐ ܝܰܘܡܳܐ ܐܶܬܳܬ ܠܰܗܘܳܝܳܐ. ܒܝܰܘܡܳܐ ܕܰܬܪܶܝܢ ܐܶܡܰܪ ܕܶܐܬܥܒܶܕ ܪܩܺܝܥܳܐ. ܥܰܠ ܫܡܰܝܳܐ ܕܶܝܢ ܒܝܰܘܡܳܐ ܩܰܕܡܳܝܳܐ. ܟܰܕ ܠܰܫܡܰܝܳܐ ܝܰܗܒ ܪܺܝܫܺܝܬܳܐ ܕܰܗܘܰܝܴ̈ܐ ܩܕܳܡ ܟܽܠܡܶܕܶܡ. ܘܰܒܗܳܕܶܐ ܦܰܫܶܩ ܢܰܗܺܝܪܳܐܝܬ ܕܡܶܕܶܡ ܐܚܪܺܢܳܐ ܡܶܬܪܰܢܝܳܐ ܫܡܰܝܳܐ ܠܒܰܪ ܡܶܢ ܪܩܺܝܥܳܐ. ܒܗܳܝ ܕܰܪܩܺܝܥܳܐ ܒܳܬܰܪ ܝܰܘܡܳܐ ܩܰܕܡܳܝܳܐ ܡܰܘܕܰܥ ܕܶܐܬܒܪܺܝ. ܚܢܰܢ ܕܶܝܢ ܗܳܫܳܐ ܛܘܽܒܳܢܳܐ ܕܰܘܺܝܕ ܩܳܪܶܐ ܠܰܢ܆ ܕܰܢܦܰܫܶܩ ܬܶܫܒܽܘܚܬܳܐ ܗܳܕܶܐ ܕܰܬܫܰܥܶܣܪ̈ܶܐ. ܗܳܕܶܐ ܕܒܳܗ̇ ܐܰܘܕܰܥ ܠܰܢ ܫܡܳܐ ܕܰܫܡܰܝܳܐ. ܘܟܽܘܢܳܝܳܐ ܕܰܪܩܺܝܥܳܐ. ܐܶܡܰܪ ܓܶܝܪ.
ܫܡܰܝܴ̈ܐ ܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ܆ ܘܰܥܒܳܕ ܐܝ̈ܕܰܘܗܝ ܡܚܰܘܶܐ ܪܩܺܝܥܳܐ. ܘܥܰܠ ܪܩܺܝܥܳܐ ܛܳܟ ܦܫܺܝܩ ܕܢܺܐܡܰܪ ܕܰܡܚܰܘܶܐ ܥܒܳܕܰܘ̈ܗܝ. ܟܰܕ ܦܳܓܥܺܝܢܰܢ ܐܰܡܺܝܢܳܐܝܬ ܒܰܚܙܳܬܳܐ ܕܪܶܗܛܳܐ ܐܰܡܺܝܢܳܐ ܕܰܟܪܽܘܟܝܶܗ ܕܰܠܥܶܠ ܡܶܢܰܢ܆ ܕܶܐܡܰܪ ܫܡܰܝܴ̈ܐ ܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ. ܘܠܳܐ ܒܡܶܕܶܡ ܝܳܗܒܝܢ ܐܺܝܕܳܐ ܕܢܺܐܡܰܪ. ܕܰܐܝܟܰܢܳܐ ܥܒܺܝܕܺܝܢ ܡܶܫܬܰܥܝܳܢܷ̈ܐ ܠܫܽܘܒܚܶܗ ܕܰܐܠܳܗܳܐ. ܘܠܽܘܩܕܰܡ ܙܳܕܶܩ ܕܢܶܒܥܶܐ ܕܰܟܡܳܐ ܗܳܘܶܝܢ. ܘܗܳܝܕܶܝܢ ܡܶܢ ܒܳܬܰܪܟܶܢ ܟܰܕ ܡܰܝܬܶܝܢܰܢ ܦܽܘܫܳܩܳܐ ܕܡܳܢܳܐ ܐܺܝܬܰܝܗܽܘܢ܆ ܐܰܝܟ ܕܡܶܢ ܚܰܝܠܳܐ ܕܰܟܬܳܒܳܐ. ܬܠܳܬܳܐ ܫܡܰܝܴ̈ܐ ܗܳܘܶܝܢ. ܕܺܐܝܬ ܠܥܶܠ ܡܶܢ ܪܩܺܝܥܳܐ. ܩܰܕܡܳܝܳܐ ܓܶܝܪ ܡܽܘܫܶܐ ܐܶܡܪ ܠܘܳܬ ܥܶܒܪ̈ܳܝܶܐ. ܕܡܳܪܝܳܐ ܐܶܢܽܘܢ ܫܡܰܝܳܐ ܘܰܫܡܱ̈ܝ ܫܡܱ̈ܝܳܐ (ܬܢܝܢ ܢܡܘܣܐ ܝ: ܝܕ). ܟܰܕ ܠܗܰܘ ܩܰܕܡܳܝܳܐ ܐܶܣܬܰܟܰܠ ܚܰܕ. ܘܰܠܗܳܠܶܝܢ ܕܡܶܢ ܒܳܬܰܪܟܶܢ ܬܪܶܝܢ. ܫܠܺܝܚܳܐ ܕܶܝܢ ܐܶܡܰܪ: ܕܶܐܬܥܰܠܺܝ ܥܕܰܡܳܐ ܠܰܫܡܰܝܳܐ ܕܰܬܠܳܬܳܐ (ܒ ܩܘܪ̈ܢܬܝܐ ܝܒ: ܒ). ܣܛܰܪ ܡܶܢ ܪܩܺܝܥܳܐ ܗܳܢܳܐ ܕܡܶܬܚܙܶܐ. ܕܡܶܢ ܦܪ̈ܳܣܶܐ ܗܳܠܶܝܢ ܕܰܗܘܰܘ ܠܡܰܫܟܢܳܐ ܕܣܳܗܕܽܘܬܳܐ. ܕܗܰܘ ܡܰܢ ܓܰܘܳܝܳܐ ܡܶܬܩܰܝܰܡ ܗܘܳܐ ܡܶܢ ܝܳܪ̈ܺܝܥܳܬܳܐ ܥܣܰܪ ܕܒܽܘܨܳܐ ܥܙܺܝܠܳܐ. ܘܗܰܘ ܕܰܠܒܰܪ ܡܶܢ ܗܳܢܳܐ܆ ܡܶܢ ܚܕܰܥܶܣܪ̈ܶܐ ܝܳܪ̈ܺܝܥܳܬܳܐ ܕܣܰܥܪܳܐ. ܗܰܘ ܕܶܝܢ ܐܚܪܺܢܳܐ ܕܰܠܥܶܠ ܡܶܢ ܗܳܠܶܝܢ ܬܪܶܝܢ܆ ܕܡܶܫ̈ܟܶܐ ܕܕܶܟܪ̈ܶܐ ܕܶܐܣܦܰܝܢܺܝܩܳܐ. ܗܰܘ ܕܕܳܡܶܐ ܗܘܳܐ ܓܰܘܢܶܗ ܠܢܽܘܪܳܐ. ܗܰܘ ܕܶܝܢ ܐܚܪܺܢܳܐ ܕܰܐܪܒܥܳܐ܆ ܕܰܠܒܰܪ ܡܶܢ ܗܳܠܶܝܢ ܡܶܬܦܪܶܣ ܗܘܳܐ. ܕܡܶܬܦܪܶܣ ܡܶܬܚܙܶܐ ܗܘܳܐ ܠܫܰܒ̈ܛܶܐ ܕܺܝܣܪܳܐܝܠ ܡܟܰܣܶܐ ܠܗܳܠܶܝܢ ܕܰܠܓܰܘ ܡܶܢܶܗ ܡܰܬܩܰܢ ܗܘܳܐ ܡܶܢ ܡܶܫܟܷ̈ܐ ܕܕܶܟܪ̈ܶܐ ܕܣܳܣܓܰܘܢܳܐ. ܕܺܐܝܬ ܗܘܳܐ ܠܶܗ ܓܰܘܢܳܐ ܕܝܽܘܩܰܢܬܳܐ. ܗܰܘ ܕܰܡܣܰܒܰܗ ܗܘܳܐ ܓܰܘܢܶܗ ܠܕܽܘܡܝܳܐ ܚܰܬܺܝܬܳܐ ܕܰܪܩܺܝܥܳܐ. ܘܗܳܐ ܡܳܕܶܝܢ ܝܺܠܶܦܢܰܢ ܡܶܢ ܗܰܘ ܕܶܐܬܗܰܝܡܰܢ ܥܰܠ ܟܽܠܶܗ ܒܰܝܬܳܐ ܕܒܳܪܽܘܝܽܘܬܶܗ ܕܰܐܠܳܗܳܐ܇ ܕܰܬܠܳܬܳܐ ܫܡܰܝܴ̈ܐ ܐܺܝܬ ܒܰܠܚܽܘܕ ܠܥܶܠ ܡܶܢ ܪܩܺܝܥܳܐ. ܐܺܝܬ ܐܢ̈ܫܺܝܢ ܕܳܐܡܪܺܝܢ. ܕܫܰܒܥܳܐ ܫܡܰܝܴ̈ܐ ܗܳܘܶܝܢ ܘܫܰܒܥܳܐ ܪ̈ܩܺܝܥܶܐ. ܚܢܰܢ ܕܶܝܢ ܡܶܢ ܬܰܪ̈ܥܝܳܬܳܐ ܗܳܠܶܝܢ ܡܰܠܝܳܐܝܬ ܥܳܪܩܺܝܢܰܢ. ܘܒܰܠܚܽܘܕ ܬܠܳܬܳܐ ܫܡܰܝܴ̈ܐ ܐܳܡܪܺܝܢܰܢ ܕܺܐܝܬ ܠܥܶܠ ܡܶܢ ܪܩܺܝܥܳܐ. ܐܰܝܟ ܕܺܝܠܶܦܢܰܢ ܡܶܢ ܗܳܢܽܘܢ ܕܶܐܬܥܰܠܺܝܘ ܥܕܰܡܳܐ ܠܘܳܬܗܽܘܢ ܘܰܚܙܰܘ ܐܶܢܽܘܢ. ܕܰܒܗܳܠܶܝܢ ܥܳܡܪܺܝܢ ܫܡܰܝ̈ܢܶܐ ܟܽܠܗܽܘܢ ܒܗܳܠܶܝܢ ܫܡܰܝܴ̈ܐ ܬܠܳܬ. ܒܗܰܘ ܡܰܢ ܬܰܚܬܳܝܳܐ ܩܳܝܡܺܝܢ ܡܰܠܐܟܷ̈ܐ ܐܰܝܟ ܕܰܒܬܰܪ̈ܥܶܐ ܒܰܪ̈ܳܝܶܐ. ܘܰܠܥܶܠ ܡܶܢ ܗܳܠܶܝܢ ܪ̈ܰܒܰܝ ܡܰܠܐܟܷ̈ܐ. ܘܰܠܥܶܠ ܡܶܢ ܪ̈ܰܒܰܝ ܡܰܠܐܟܷ̈ܐ ܐܰܪ̈ܟܰܐܣ. ܗܳܠܶܝܢ ܗܳܟܺܝܠ ܬܠܳܬܳܐ ܬܶܓ̈ܡܶܐ ܩܳܝܡܺܝܢ ܘܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ ܒܰܫܡܰܝܳܐ ܗܰܘ ܬܰܚܬܳܝܳܐ. ܘܰܠܥܶܠ ܡܶܢ ܗܳܢܳܐ ܐܺܝܬ ܫܡܰܝܳܐ ܐܚܪܺܢܳܐ. ܘܒܰܫܦܽܘ̈ܠܰܘܗܝ ܬܰܚܬܳܝܷ̈ܐ ܩܳܝܡܺܝܢ ܫܽܘܠܛܳܢܷ̈ܐ. ܘܰܠܥܶܠ ܡܶܢܽܗܘܢ ܚܰܝ̈ܠܰܘܳܬܳܐ. ܘܰܠܥܶܠ ܡܶܢ ܗܳܠܶܝܢ ܡܳܪ̈ܰܘܳܬܳܐ. ܕܳܐܦ ܗܶܢܽܘܢ ܒܬܶܓ̈ܡܰܝܗܽܘܢ ܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ. ܠܥܶܠ ܡܶܢ ܗܳܢܳܐ ܫܡܰܝܳܐ ܐܺܝܬ ܐܚܪܺܢܳܐ ܫܡܰܝܳܐ. ܗܰܘ ܕܩܳܝܡܺܝܢ ܒܶܗ ܒܬܰܪ̈ܥܶܐ ܬܰܚܬܳܝܷ̈ܐ ܘܒܰܡ̈ܢܰܘܳܬܳܐ ܕܰܫܦܽܘ̈ܠܰܘܗܝ. ܗܳܢܽܘܢ ܕܡܶܬܩܪܶܝܢ ܟܽܘܪ̈ܣܰܘܳܬܳܐ. ܠܥܶܠ ܡܶܢܗܽܘܢ ܕܶܝܢ ܐܰܝܟ ܡܶܨܥܳܝܷ̈ܐ ܩܳܝܡܺܝܢ ܟܪ̈ܽܘܒܶܐ. ܗܳܠܶܝܢ ܕܶܝܢ ܕܡܶܢܗܽܘܢ ܐܶܬܚܙܺܝܘ ܠܚܰܙܩܺܝܐܝܠ ܒܕܽܘܡܝܳܐ ܕܚܰܝ̈ܘܳܬܳܐ. ܘܰܠܥܶܠ ܡܶܢ ܗܳܠܶܝܢ ܩܳܝܡܺܝܢ ܣܪ̈ܳܦܶܐ ܫܬܺܝ̈ܬܳܝܰܝ ܓܶܦܷ̈ܐ. ܗܳܠܶܝܢ ܕܡܶܢܗܽܘܢ ܐܶܬܚܙܺܝܘ ܠܶܐܫܰܥܝܳܐ ܢܒܺܝܳܐ ܒܗܰܝܟܠܳܐ. ܥܰܠ ܬܠܳܬܳܐ ܫܡܰܝܴ̈ܐ ܗܳܠܶܝܢ܆ ܘܥܰܠ ܬܶܓ̈ܡܶܐ ܘܟܶܢ̈ܫܶܐ ܕܩܳܝܡܺܝܢ ܒܗܽܘܢ ܘܰܩܒܺܝܥܺܝܢ ܘܰܣܕܺܝܪܺܝܢ. ܐܶܡܰܪ ܕܰܘܺܝܕ ܕܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ. ܘܗܳܠܶܝܢ ܟܽܠܗܽܘܢ ܥܒܺܝ̈ܕܶܐ ܐܝܬܰܝܗܽܘܢ. ܘܝܳܕܥܺܝܢܰܢ ܪܰܒܽܘܬܳܐ ܕܫܽܘܒܚܶܗ ܕܰܐܠܳܗܳܐ. ܥܰܠ ܪܩܺܝܥܳܐ ܕܶܝܢ ܠܐ ܐܶܡܰܪ ܕܡܶܫܬܰܥܶܐ ܫܽܘܒܚܶܗ ܕܰܐܠܳܗܳܐ. ܐܶܠܐ ܕܰܡܚܰܘܶܐ ܥܒܳܕܳܐ ܕܺܐܝܕܰܘ̈ܗܝ ܕܰܐܠܳܗܳܐ. ܡܶܛܠ ܡܳܢܳܐ ܐܳܡܰܪ ܐܢܳܐ. ܒܗܳܢܳܐ ܩܳܐܶܡ ܗܘܳܐ ܐܳܟܶܠܩܰܪܨܳܐ ܟܰܕ ܐܶܬܒܪܺܝ. ܘܒܶܗ ܗܘܰܘ ܗܳܠܶܝܢ ܬܠܳܬܳܐ ܬܶܓ̈ܡܶܐ ܕܰܢܦܰܠܘ ܥܰܡܶܗ. ܕܳܐܦ ܗܶܢܽܘܢ ܡܶܬܩܪܶܝܢ ܗܘܰܘ ܡܰܠܐܟܷ̈ܐ ܘܫܰܠܺܝ̈ܛܳܢܶܐ ܘܚܰܝ̈ܠܰܘܳܬܳܐ. ܡܶܢ ܕܰܣܛܰܘ ܡܶܢ ܐܰܠܳܗܳܐ ܘܰܢܦܰܠܘ ܡܶܢ ܪܰܒܽܘܬܳܐ ܕܩܳܝܡܺܝܢ ܗܘܰܘ ܒܳܗ̇܆ ܐܶܬܩܪܺܝܘ ܠܗܽܘܢ ܬܠܳܬܳܐ ܫܡܳܗܷ̈ܐ ܐܚܪ̈ܳܢܶܐ. ܐܳܟܶܠܩܰܪܨܳܐ ܘܣܳܛܳܢܳܐ ܐܳܦ ܫܺܐܕܳܐ. ܐܳܟܶܠܩܰܪܨܳܐ ܥܰܠ ܕܶܐܟܰܠ ܩܰܪܨܳܐ ܕܒܶܝܬ ܐܳܕܳܡ ܘܰܐܪܡܺܝ ܐܶܢܽܘܢ ܡܶܢ ܦܰܪܕܰܝܣܳܐ ܕܒܽܘ̈ܣܳܡܶܐ. ܘܣܳܛܳܢܳܐ ܥܰܠ ܕܰܣܛܳܐ ܡܶܢ ܐܽܘܪܚܶܗ ܕܰܡܫܰܒܰܚ ܗܘܳܐ ܠܐܠܳܗܳܐ ܘܗܽܘ ܥܰܠ ܬܶܫܡܶܫܬܶܗ ܐܰܝܟ ܚܰܒܪ̈ܰܘܗܝ. ܘܥܰܠ ܕܶܐܬܚܰܫܰܒ ܚܽܘܫܳܒܳܐ ܠܳܐ ܢܳܡܘܣܳܝܳܐ܆ ܐܰܣܛܺܝ ܘܰܢܦܰܠ ܡܶܢ ܕܰܪܓܶܗ. ܘܶܐܬܟܰܢܺܝ ܠܶܗ ܫܡܳܐ ܐܚܪܺܢܳܐ ܕܰܬܠܳܬܳܐ ܫܺܐܕܳܐ܇ ܥܰܠ ܡܰܢ ܕܶܐܫܬܕܺܝ ܡܶܢ ܕܰܪܓܳܐ ܕܺܝܠܶܗ ܘܰܗܘܳܐ ܓܽܘܚܟܳܐ ܘܡܰܫܪܽܘܩܺܝܬܳܐ ܠܟܽܠܗܽܘܘܢ ܚܰܝ̈ܠܰܘܳܬܳܐ ܥܶܠܳܝܷ̈ܐ. ܘܒܳܬܰܪܟܶܢ ܐܶܫܬܕܝ ܠܥܽܘ̈ܡܩܶܐ ܬܰܚܬܳܝܷ̈ܐ ܕܫܳܘܶܐ ܗܘܳܐ. ܘܥܰܠܗܳܕܶܐ ܢܶܗܦܽܘܟ ܠܰܢ ܥܰܠ ܫܶܕܬܰܢ ܩܰܕܡܳܝܬܳܐ ܘܢܶܫܬܰܥܶܐ ܥܰܠ ܪܩܺܝܥܳܐ ܗܳܫܳܐ. ܘܥܰܠܗܳܕܶܐ ܠܰܘ ܒܩܳܠܳܐ ܡܡܰܠܶܠ ܪܩܺܝܥܳܐ. ܐܶܠܳܐ ܕܠܳܐ ܡܶܠܬܳܐ ܡܚܰܘܶܐ ܥܒܳܕܳܐ ܕܺܐܝܕܰܘ̈ܗܝ ܕܰܐܠܳܗܳܐ. ܟܰܕ ܡܶܬܟܪܶܟ ܠܥܶܠ ܡܶܢ ܐܰܪܥܳܐ ܘܰܠܬܰܚܬ ܡܶܢ ܐܰܪܥܳܐ. ܘܰܫܩܺܝܠ ܒܰܩܢܘܡܶܗ ܢܰܗܺܝܪ̈ܶܐ ܡܶܬܚܰܙܝ̈ܢܶܐ ܘܰܣܕܺܝܪ̈ܳܢ ܒܶܗ ܐܳܬܘ̈ܬܳܐ ܕܰܡܫܰܘܕ̈ܥܳܢ ܙܰܒ̈ܢܶܐ ܕܫܰܢܬܳܐ܇ ܕܩܰܝܛܳܐ ܘܰܕܣܰܬܘܳܐ. ܟܰܕ ܠܳܐ ܛܳܥܶܐ ܘܠܳܐ ܡܕܰܘܶܕ ܒܰܟܪܽܘܟܝܶܗ ܫܳܥܷ̈ܐ ܘܥܶܕܳܢܷ̈ܐ. ܘܟܰܕ ܡܶܬܚܰܙܝܳܐ ܐܰܝܟ ܕܰܡܨܰܥܬܶܗ ܥܳܓܰܠܬܳܐ ܕܢܳܛܪܳܐ ܘܡܶܬܗܰܦܟܳܐ ܘܩܳܥܝܳܐ ܕܠܐ ܡܶܠܬܳܐ ܥܰܠ ܟܪܽܘܟܝܶܗ. ܘܟܺܝܡܳܐ ܐܳܦ ܥܺܝܽܘܬܳܐ ܘܓܰܢ̱ܒܳܪܳܐ. ܘܟܳܪܟܺܝܢ ܠܓܰܒܳܐ ܕܬܰܝܡܢܳܐ. ܠܽܘܩܒܰܠ ܬܚܽܘ̈ܡܶܐ ܕܥܳܓܰܠܬܳܐ ܕܡܶܬܚܰܙܝܳܐ ܒܶܗ ܡܶܢ ܓܰܪܒܝܳܐ. ܘܪܳܗܛܺܝܢ ܟܰܘ̈ܟܒܶܐ ܕܪܰܡܫܳܐ ܘܰܕܦܶܠܓܽܘܬ ܠܺܠܝܳܐ ܘܰܕܨܰܦܪܳܐ. ܘܪܳܕܶܐ ܒܳܗ̇ ܣܰܗܪܳܐ ܒܓܰܒܰܘ̈ܗܝ ܬܰܚܬܳܝܷ̈ܐ. ܠܰܐܦܱ̈ܝ ܬܚܽܘ̈ܡܶܐ ܕܰܐܪܥܳܐ. ܟܰܕ ܡܳܠܳܐ ܘܚܳܣܰܪ. ܘܰܡܗܰܠܶܟ ܒܶܗ ܫܶܡܫܳܐ ܟܰܕ ܚܳܕܰܪ ܠܟܽܠܗܽܘܢ ܬܚܽܘ̈ܡܶܐ. ܘܦܳܠܶܓ ܒܫܰܢ̱ܬܳܐ ܠܫܽܘܚܠܳܦܷ̈ܐ ܐܰܪܒܥܳܐ ܒܡܰܣܩܶܗ ܘܰܒܡܰܚܬܶܗ. ܐܳܦ ܗܳܠܶܝܢ ܟܽܠܗܽܘܢ ܒܡܶܠܬܳܐ ܟܢܺܝܫܬܳܐ.
ܟܰܕ ܝܰܘܡܳܐ ܠܝܰܘܡܳܐ ܡܰܒܰܥ ܡܺܐܡܪܳܐ. ܘܠܺܠܝܳܐ ܠܠܺܠܝܳܐ ܡܚܰܘܶܐ ܡܰܕܥܳܐ: ܘܠܰܝܬ ܡܺܐܡܪܳܐ ܐܳܦܠܳܐ ܡܷ̈ܠܐ܆ ܕܠܐ ܢܶܫܬܡܰܥ ܒܩܳܠܗܽܘܢ. ܕܶܚܠܬܳܐ ܓܶܝܪ ܪܰܒܬܳܐ ܗܳܘܝܳܐ ܗܘܳܬ ܕܢܰܗܺܝܪ̈ܶܐ ܢܶܬܠܽܘܢ ܩܳܠܐ. ܐܶܠܽܘ ܓܶܝܪ ܡܰܠܶܠ ܫܶܡܫܳܐ ܩܴ̈ܠܐ ܕܥܰܙܺܝܙܺܝܢ ܒܰܩܥܳܬܳܐ ܐܰܝܟ ܕܚܰܝܠܬܳܢ ܒܚܽܘܡܶܗ܆ ܡܰܢ ܡܰܘܦܶܐ ܗܘܳܐ ܕܢܶܫܡܰܥ ܩܳܠܶܗ ܬܰܩܺܝܦܳܐ. ܘܶܐܠܽܘ ܩܢܰܘ ܟܰܘ̈ܟܒܶܐ ܦܽܘ̈ܡܶܐ ܡܠܺܝ̈ܠܐ܆ ܐܰܝܕܳܐ ܐܰܪܥܳܐ ܡܶܫܟܚܳܐ ܗܘܳܬ ܠܰܡܣܰܝܒܳܪܽܘ ܠܰܒ̈ܢܳܬ ܩܴ̈ܠܐ ܥܰܙܺܝ̈ܙܶܐ ܕܰܐܝܟ ܗܳܠܶܝܢ. ܫܰܦܺܝܪ ܡܳܕܶܝܢ ܡܚܰܘܶܐ ܪܩܺܝܥܳܐ ܥܒܳܕܰܘ̈ܗܝ ܕܰܐܠܳܗܳܐ ܕܠܳܐ ܡܶܠܬܳܐ܆ ܘܠܳܐ ܡܶܫܬܡܰܥ ܩܳܠܳܐ ܕܢܰܗܺܝܪ̈ܶܐ ܕܒܶܗ. ܥܕܰܡܳܐ ܠܗܳܪܟܳܐ ܥܰܠ ܫܡܰܝܳܐ ܘܥܰܠ ܪܩܺܝܥܳܐ ܘܥܰܠ ܢܰܗܺܝܪ̈ܶܐ ܕܒܶܗ ܐܶܡܰܪ ܢܺܒܝܳܐ. ܗܳܫܳܐ ܕܶܝܢ ܠܰܘ ܒܗܰܘ ܢܺܝܫܳܐ ܕܫܰܪܺܝ ܡܚܰܘܶܐ. ܐܶܠܳܐ ܟܰܕ ܡܶܬܥܰܗܰܕ ܠܡܰܦܰܩܬܳܐ ܕܰܒܢܱ̈ܝ ܝܣܪܳܐܶܝܠ ܡܶܢ ܡܶܨܪܶܝܢ ܐܶܡܰܪ.
ܒܟܽܠܳܗ̇ ܐܰܪܥܳܐ ܢܶܦܩܰܬ ܣܒܰܪܬܗܽܘܢ: ܘܰܒܣܰܘ̈ܦܶܝܗ̇ ܕܬܺܒܝܠ ܡܶܠܰܝ̈ܗܽܘܢ. ܟܽܠܢܳܫ ܓܶܝܪ ܫܡܰܥ ܟܰܕ ܢܶܦܩܰܬ ܟܢܽܘܫܬܳܐ ܡܶܢ ܡܶܨܪܶܝܢ. ܘܟܽܠ ܥܰܡ̈ܡܺܝܢ ܫܡܰܥܘ ܗܘܰܘ ܛܶܒܳܐ ܕܝܰܡܳܐ ܕܣܽܘܦ ܕܶܐܣܬܕܶܩ ܡܶܢ ܩܕܳܡܰܝܗܽܘܢ ܟܰܕ ܥܒܰܪܘ ܒܶܗ ܒܝܰܒܫܳܐ. ܘܥܰܠܗܳܕܶܐ ܐܰܝܟ ܕܰܐܝܬܺܝ ܛܽܘܒܳܢܳܐ ܕܶܐܬܥܰܗܰܕ ܠܐܫܰܥܝܳܐ ܢܒܺܝܳܐ ܕܶܐܡܰܪ. ܡܳܪܝܳܐ ܡܰܢܽܘ ܗܰܝܡܶܢ ܠܫܶܡܥܰܢ (ܐܫܥܝܐ ܢܓ: ܐ). ܐܶܠܐ ܐܳܡܰܪ ܐܢܳܐ ܕܰܠܡܳܐ ܠܐ ܫܡܰܥܘ: ܘܗܳܐ ܒܟܽܠܳܗ̇ ܐܰܪܥܳܐ ܢܶܦܩܰܬ ܒܰܪܬ ܩܳܠܗܽܘܢ ܘܰܒܣܰܘ̈ܦܰܝ ܬܺܒܶܝܠ ܡܶܠܰܝ̈ܗܽܘܢ. ܢܶܬܦܢܶܐ ܕܶܝܢ ܚܢܰܢ ܗܳܫܳܐ. ܘܰܢܠܰܚܶܡ ܐܶܢܽܘܢ ܠܩܴ̈ܠܐ ܗܳܠܶܝܢ ܠܟܳܪܽܘܙܽܘܬܳܐ ܕܰܫܠܺܝ̈ܚܶܐ. ܕܗܳܠܶܝܢ ܓܶܝܪ ܟܰܕ ܡܰܠܦܺܝܢ ܠܶܗ ܠܥܳܠܡܳܐ ܕܢܶܦܽܘܩ ܡܶܢ ܡܶܨܪܶܝܢ ܕܰܚܛܺܝܬܳܐ ܘܢܶܥܡܰܕ ܒܝܰܡܳܐ ܣܽܘܡܳܩܳܐ ܕܰܥܡܳܕܳܐ ܩܰܕܺܝܫܳܐ ܒܡܽܘܪܽܘܢ ܩܰܕܺܝܫܳܐ. ܝܰܡܳܐ ܗ̱ܝ ܓܶܝܪ ܣܽܘܡܳܩܳܐ ܡܰܥܡܽܘܕܺܝܬܳܐ ܡܶܛܽܠ ܕܡܳܐ ܕܰܡܙܺܝܓ ܒܳܗ̇. ܒܟܽܠܳܗ̇ ܐܰܪܥܳܐ ܢܶܦܩܰܬ ܣܒܰܪܬܗܽܘܢ. ܘܶܐܫܬܡܰܥ ܩܳܠܳܐ ܕܟܳܪܽܘܙܽܘܬܗܽܘܢ. ܒܳܬܰܪ ܗܳܠܶܝܢ ܩܴ̈ܠܶܐ ܐܰܠܘܶܬ ܥܰܡܗܽܘܢ ܥܰܠ ܗܰܘ ܫܶܡܫܳܐ ܕܙܰܕܺܝܩܽܘܬܳܐ. ܕܰܢܩܰܫ ܡܰܫܟܢܶܗ ܒܓܰܘ ܥܳܠܡܳܐ ܘܚܰܘܺܝ ܡܕܰܒܪܳܢܽܘܬܳܐ ܥܺܕܬܳܢܳܝܬܳܐ. ܡܶܛܽܠ ܗܳܕܶܐ ܐܶܡܰܪ ܗܰܘ ܕܰܡܙܰܡܰܪ.
ܘܥܰܠ ܫܶܡܫܳܐ ܢܩܰܫ ܡܰܫܟܢܶܗ ܒܗܽܘܢ. ܘܗܽܘ ܐܰܝܟ ܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ. ܓܳܓܽܘܠܬܳܐ ܗܘܳܬ ܡܰܕܢܚܳܐ ܠܥܳܠܡܳܐ ܕܰܚܫܶܟ ܗܘܳܐ ܒܥܰܡܛܳܢܳܐ ܕܰܦܬܰܟܪܽܘܬܳܐ. ܘܡܶܢ ܬܰܡܳܢ ܕܢܰܚ ܘܰܢܦܰܩ ܥܰܠ ܥܰܡ̈ܡܶܐ ܡܰܘ̈ܟܡܰܝ ܒܠܺܠܝܳܐ ܕܚܰܢܦܽܘܬܳܐ. ܘܰܐܢܗܰܪ ܐܶܢܽܘܢ ܒܰܬܪܶܥܣܰܪ ܙܰܠܝ̈ܩܶܐ. ܐܰܝܟ ܕܰܒܬܰܪܬܰܥܶܣܪ̈ܶܐ ܫܳܥܷ̈ܐ ܕܺܐܝܡܳܡܳܐ ܗܳܠܶܝܢ܆ ܕܰܐܣܡܶܩܘ ܒܓܰܘܢܳܐ ܢܽܘܪܳܢܳܝܳܐ ܕܰܕܡܶܗ ܕܚܰܬܢܳܐ. ܡܶܛܠܗܳܢܳܐ ܟܰܕ ܐܰܝܟ ܫܶܡܫܳܐ ܥ̣ܰܠ ܠܥܳܠܡܳܐ ܚܶܫܽܘܟܳܐ. ܘܰܐܢܗܪܶܗ ܒܙܰܠܝ̈ܩܶܐ ܕܰܣܒܰܪܬܶܗ. ܠܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ ܡܕܰܡܶܐ ܠܶܗ ܪܽܘܚܳܐ ܕܰܢܒܺܝܽܘܬܳܐ. ܘܗܳܕܶܐ ܣܳܒܰܪ ܐܢܳܐ ܕܥܰܠ ܗܳܝ ܡܶܐܬܺܝܬܳܐ ܐܚܪܳܝܬܳܐ ܘܰܬܪܰܝܳܢܺܝܬܳܐ ܡܰܢ ܡܒܰܕܩܳܐ. ܒܕܰܐܝܟ ܗܳܠܶܝܢ ܓܶܝܪ ܐܳܬܶܐ ܚܰܬܢܳܐ ܕܬܶܥܽܘܠ ܠܰܓܢܽܘܢܶܗ ܟܰܠܬܳܐ ܒܰܪܬ ܥܰܡ̈ܡܶܐ. ܗܳܝ ܕܰܡܟܰܪܘ ܠܳܗ̇ ܫܠܺܝ̈ܚܶܐ. ܘܗܽܘ ܐܰܝܟ ܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ. ܘܠܰܘ ܡܶܟܺܝܠ ܐܰܝܟ ܡܚܺܝܠܳܐ ܐܳܬܶܐ. ܐܶܠܐ ܐܰܝܟ ܕܝܳܐܶܐ ܠܙܰܘܚܳܐ ܘܰܠܪܰܒܽܘܬܳܐ ܕܰܐܠܳܗܳܐ.
ܢܕܽܘܨ ܐܰܝܟ ܓܰܢܒܳܪܳܐ ܠܡܶܪܗܰܛ ܐܽܘܪܚܶܗ. ܡܳܕܶܝܢ ܠܰܝܬ ܢܺܝܫܳܐ ܕܰܡܚܺܝܠܽܘܬܳܐ܆ ܐܶܠܳܐ ܒܕܽܘܡܝܳܐ ܕܓܰܢ̱ܒܳܪܳܐ ܕܠܳܐ ܕܳܚܶܠ ܡܶܢ ܡܶܕܶܡ. ܗܳܟܰܢܳܐ ܢܶܗܘܶܐ ܙܰܘܚܳܐ ܕܡܶܐܬܺܝܬܶܗ. ܓܰܢܒܳܪܽܘܬܳܐ ܐܰܝܟ ܕܰܐܠܳܗܳܐ ܘܠܰܘ ܐܰܝܟ ܕܒܰܪܢܳܫܳܐ ܗܳܝ ܕܳܐܚܕܳܐ ܘܠܳܒܟܳܐ ܠܟܽܠܗܽܘܢ ܣܰܘ̈ܦܰܘܗܝ ܕܥܳܠܡܳܐ. ܒܕܽܘܡܝܳܐ ܩܰܠܺܝܠܳܐ ܕܚܰܪܺܝܦܽܘܬܳܐ ܕܒܰܪܩܳܐ. ܘܰܐܝܟ ܕܡܰܢܗܰܪ ܫܶܡܫܳܐ ܠܟܽܠܳܗ̇ ܬܚܶܝܬ ܫܡܰܝܳܐ.
ܡܶܢ ܣܰܘ̈ܦܰܝ ܫܡܰܝܳܐ ܡܰܦܩܶܗ: ܘܡܰܣܡܟܶܗ ܥܰܠ ܣܰܘ̈ܦܰܝ ܫܡܰܝܳܐ. ܠܗܳܢܳܐ ܡܰܦܩܳܐ ܩܰܠܺܝܠܳܐ ܕܶܐܚܰܕ ܣܰܘ̈ܦܰܝ ܫܡܰܝܳܐ܇ ܡܳܪܰܢ ܦܰܫܶܩ ܘܕܰܡܺܝ ܒܶܗ ܝܰܘܡܳܐ ܕܓܶܠܝܳܢܶܗ ܗܰܘ ܐܚܪܳܝܳܐ. ܐܶܡܰܪ ܓܶܝܪ ܒܶܐܘܰܢܓܶܠܝܽܘܢ. ܕܰܐܝܟܰܢܳܐ ܕܒܰܪܩܳܐ ܒܳܪܶܩ ܡܶܢ ܡܰܕܢܚܳܐ: ܘܡܶܬܚܙܶܐ ܥܕܰܡܳܐ ܠܡܰܥܪܒܳܐ: ܗܳܟܰܢܳܐ ܬܶܗܘܶܐ ܡܶܐܬܺܝܬܶܗ ܕܰܒܪܶܗ ܕܐܢܳܫܳܐ (ܡܬܝ ܟܕ: ܟܙ). ܘܰܐܝܟܰܢܳܐ ܕܫܶܡܫܳܐ ܠܟܽܠ ܡܰܚܶܡ ܘܡܰܪܬܰܚ ܘܰܡܫܰܚܶܢ܆ ܗܳܟܰܢܳܐ ܘܠܰܗܓܳܐ ܫܰܚܺܝܢܳܐ ܗܰܘ ܕܳܐܬܶܐ ܒܕܽܘܡܝܳܐ ܕܒܰܪܩܳܐ. ܡܶܬܒܩܶܐ ܒܶܗ ܘܡܶܬܒܚܰܪ ܟܽܠܢܳܫ.
ܘܠܰܝܬ ܕܛܳܫܶܐ ܡܶܢ ܠܰܗܓܶܗ. ܚܙܰܝܬ ܐܰܝܟܰܢܳܐ ܡܶܫܬܰܘܕܰܥ ܠܶܗ ܢܒܺܝܳܐ. ܒܝܰܕ ܠܰܗܓܳܐ ܒܰܪܩܳܢܳܝܳܐ. ܠܗܰܘ ܢܰܗܪܳܐ ܕܢܽܘܪܳܐ ܕܪܳܕܶܐ ܘܢܳܦܶܩ ܡܶܢ ܩܕܳܡ ܟܽܘܪܣܝܶܗ ܕܕܰܝܳܢܳܐ. ܫܰܚܺܝܢܽܘܬܳܐ ܓܶܝܪ ܘܪܰܬܚܳܐ ܕܢܽܘܪܳܐ. ܒܠܰܗܓܳܐ ܫܰܡܰܗ ܐܶܢܶܝܢ ܢܒܺܝܳܐ ܬܢܳܢ. ܗܳܪܟܳܐ ܡܶܫܬܰܒܗܪܺܝܢ ܘܡܶܫܬܰܒܚܺܝܢ ܢܳܛܪ̈ܰܝ ܢܳܡܽܘܣܶܗ ܕܚܰܬܢܳܐ. ܘܡܶܬܦܰܢ̈ܝܳܢ ܢܰܦ̈ܫܳܬܗܽܘܢ ܠܘܳܬ ܡܳܪܝܳܐ. ܘܢܳܗܪܺܝܢ ܒܦܰܐܝܽܘܬܳܐ ܕܙܺܝܘܶܗ ܘܠܐ ܝܳܩ̈ܕܳܢ ܐܰܦܰܝ̈ܗܽܘܢ ܒܚܰܡܺܝܡܽܘܬܳܐ ܕܒܰܪܩܳܐ ܗܰܘ ܢܽܘܗܪܳܢܳܝܳܐ ܘܢܽܘܪܳܢܳܝܳܐ. ܘܡܶܛܠ ܗܳܢܳܐ ܡܶܬܦܢܶܝܢ ܩܰܕܺܝ̈ܫܶܐ ܕܰܢܛܰܪܘ ܢܳܡܽܘܣܶܗ ܠܘܳܬ ܢܽܘܗܪܶܗ. ܟܰܕ ܠܐ ܡܰܪܗܒܳܐ ܬܶܫܒܽܘܚܬܶܗ ܕܚܰܬܢܳܐ. ܟܰܕ ܠܐ ܢܳܦܩܳܐ ܠܽܐܘܪܰܥܗܽܘܢ ܚܰܡܺܝܡܽܘܬܳܐ ܥܰܡ ܢܰܗܺܝܪܽܘܬܳܐ. ܥܰܠ ܗܳܠܶܝܢ ܐܶܡܰܪ ܢܒܺܝܳܐ܆
ܢܳܡܽܘܣܶܗ ܕܡܳܪܝܳܐ ܕܠܐ ܡܽܘܡ ܘܡܰܦܢܶܐ ܢܰܦܫܳܐ. ܣܳܗܕܽܘܬܶܗ ܕܡܳܪܝܳܐ ܡܗܰܝܡܢܳܐ ܘܰܡܚܰܟܡܳܐ ܝܰܠܽܘ̈ܕܶܐ: ܦܽܘ̈ܩܕܳܢܰܘܗܝ ܕܡܳܪܝܳܐ ܬܪܺܝܨܺܝܢ ܘܰܡܚܰܕܶܝܢ ܠܶܒܳܐ. ܦܽܘܩܕܳܢܶܗ ܕܡܳܪܝܳܐ ܓܒܶܐ ܘܡܰܢܗܰܪ ܥܰܝ̈ܢܶܐ: ܕܶܚܠܬܶܗ ܕܡܳܪܝܳܐ ܕܰܟܝܳܐ ܘܩܰܝܳܡܳܐ ܠܥܳܠܰܡ. ܕܺܝ̈ܢܰܘܗܝ ܕܡܳܪܝܳܐ ܒܩܽܘܫܬܳܐ ܘܟܺܐܢܺܝܢ ܒܟܽܠܡܶܕܶܡ: ܘܰܪܓܺܝܓܺܝܢ ܡܶܢ ܕܰܗܒܳܐ ܘܡܶܢ ܟܺܐܦܷ̈ܐ ܛܳܒ̈ܬܳܐ. ܘܰܚܠܶܝܢ ܡܶܢ ܕܶܒܫܳܐ ܘܡܶܢ ܟܰܟܳܪܺܝܬܳܐ. ܬܰܡܳܢ ܓܶܝܪ ܚܳܕܶܝܢ ܢܳܛܪ̈ܰܝ ܦܽܘ̈ܩܕܳܢܶܐ ܘܢܳܗܪܺܝܢ ܒܝܰܕ ܫܶܡܫܳܐ ܕܙܰܕܺܝܩܽܘܬܳܐ ܓܒܰܝܴ̈ܐ. ܘܰܐܝܠܶܝܢ ܕܺܝܕܰܥܘ ܕܕܰܟܝܳܐ ܕܶܚܠܬܶܗ ܕܡܳܪܝܳܐ܆ ܡܩܰܘܶܝܢ ܠܥܳܠܰܡ. ܘܡܶܬܒܰܣܡܺܝܢ ܒܦܽܘܪ̈ܥܳܢܶܐ ܕܰܥ̈ܒܳܕܶܐ ܛܳܒܷ̈ܐ ܒܪܶܓܬܳܐ ܕܠܳܐ ܡܶܫܬܰܪܝܳܐ. ܘܚܳܙܶܝܢ ܕܰܪܓܺܝܓܺܝܢ ܛܳܒ ܡܶܢ ܕܰܗܒܳܐ ܘܡܶܢ ܟܺܐܦܴ̈ܐ ܛܳܒ̈ܬܳܐ. ܘܡܶܬܚܰܠܶܝܢ ܒܗܽܘܢ. ܡܳܐ ܕܰܡܩܰܒܠܺܝܢ ܕܶܝܢ ܦܽܘܪ̈ܥܳܢܰܝܗܽܘܢ ܝܰܬܺܝܪ ܡܶܢ ܛܥܴ̈ܡܳܬܳܐ ܗܰܢܺܝ̈ܐܳܬܳܐ ܕܕܰܗܒܳܐ ܚܰܠܝܳܐ ܘܟܰܟܳܪܺܝܬܳܐ. ܡܶܛܠܗܳܕܶܐ ܐܶܡܰܪ ܢܒܺܝܳܐ.
ܐܳܦ ܥܰܒܕܳܟ ܢܶܙܕܗܰܪ ܒܗܽܘܢ: ܘܶܐܢ ܢܶܛܰܪ ܐܶܢܽܘܢ ܢܶܬܦܪܰܥ ܣܰܓܺܝ. ܡܶܟܺܝܠ ܡܫܰܪܶܐ ܕܳܐܦ ܥܽܘܗܕܳܢܳܐ ܕܰܚܛܳܗܷ̈ܐ ܢܰܝܬܶܐ.
ܒܫܳܪ̈ܥܳܬܳܐ ܠܡ ܡܰܢܽܘ ܡܶܣܬܰܟܰܠ܆ ܘܡܶܢ ܛܰܫ̈ܝܳܬܳܐ ܙܰܟܳܢܝ: ܐܳܦ ܡܶܢ ܥܰܘܠܳܐ ܚܣܽܘܟܳܝܗܝ ܠܥܰܒܕܳܟ. ܕܠܳܐ ܢܶܫܬܰܠܛܽܘܢ ܒܺܝ ܒܺܝ̈ܫܶܐ. ܘܗܳܐ ܗܳܫܳܐ ܚܳܙܶܐ ܐܰܢܬ ܐܰܝܟܰܢܳܐ ܒܟܽܠܕܽܘܟ ܡܶܬܥܰܗܰܕ ܠܕܺܝܢܳܐ. ܘܰܐܝܟܰܢܳܐ ܡܨܰܠܶܐ ܕܢܶܬܦܪܶܩ ܡܶܢ ܕܺܝܢܳܐ ܘܡܶܢ ܚܛܳܗܷ̈ܐ ܕܡܰܝܬܶܝܢ ܠܘܳܬ ܗܳܢܳܐ. ܘܕܳܡܝܳܐ ܐܰܝܟ ܕܡܶܢ ܡܶܠܬܶܗ. ܕܡܳܐ ܕܰܫܪܰܥܘ ܒܺܝ̈ܫܶܐ ܘܡܰܪ̈ܳܚܶܐ: ܘܰܢܦܰܠܘ ܠܗܽܘܢ ܒܥܽܘܡܩܳܐ ܕܬܰܫܢܺܝܩܳܐ: ܘܶܐܣܬܚܶܦܘ ܠܗܽܘܢ ܒܥܽܘܡܩܳܐ ܕܬܰܫܢܺܝܩܳܐ ܟܽܠ ܥܳܒ̈ܕܰܝ ܫܽܘܩܪܳܐ ܒܢܽܘܪܳܐ ܕܰܠܥܳܠܰܡ܆ ܬܚܶܝܬ ܫܽܘܠܛܳܢܳܐ ܕܚܰܝ̈ܠܰܘܳܬܳܐ ܕܰܛܪ̈ܘܢܶܐ ܡܶܬܬܣܺܝܡܺܝܢ. ܐܶܡܰܪ ܓܶܝܪ.
ܘܠܐ ܢܶܫܬܰܠܛܽܘܢ ܒܺܝ ܒܺܝ̈ܫܶܐ. ܕܶܐܢ ܗܳܕܶܐ ܗܳܘܝܳܐ ܦܫܺܝܩܳܐܝܬ ܐܳܡܰܪ ܐܢܳܐ.
ܘܶܐܬܕܰܟܶܐ ܡܶܢ ܚܛܰܗܱ̈ܝ. ܢܶܗܘ̈ܝܳܢ ܠܨܶܒܝܳܢܳܟ ܡܶܠܰܘ̈ܗܝ ܕܦܽܘܡܝ. ܟܽܠ ܡܶܕܶܡ ܕܰܡܡܰܠܶܠ ܐܢܳܐ܆ ܠܨܶܒܝܳܢܳܟ ܢܶܗܘܶܐ. ܨܶܒܝܳܢܳܟ ܕܶܝܢ ܗܳܢܰܘ: ܕܢܺܚܶܐ ܥܰܒܕܳܟ ܡܶܛܠ ܕܰܠܘܳܬܳܟ ܚܳܐܰܪ ܐܢܳܐ ܒܠܺܠܝܳܐ ܘܒܺܐܝܡܳܡܳܐ ܘܡܶܬܒܰܩܶܝܢ ܚܽܘ̈ܫܳܒܶܝܗ̇ ܕܢܰܦܫܝ.
ܘܪܶܢܝܶܗ ܕܠܶܒܝ ܩܕܳܡܰܝܟ ܡܳܪܝܳܐ ܥܳܕܽܘܪܝ ܘܦܳܪܽܘܩܝ. ܕܰܐܢܬ ܥܰܕܰܪܬܳܢܝ ܘܦܰܨܺܝܬܳܢܝ. ܘܠܳܟ ܡܰܘܕܶܐ ܐܢܳܐ ܘܰܡܫܰܒܰܚ ܐܢܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ
ܡܰܘܕܰܥ ܕܒܰܨܠܘܬܳܐ ܕܰܠܘܳܬ ܐܰܠܳܗܳܐ ܡܶܬܦܰܨܶܐ ܐܢܳܫ ܡܶܢ ܒܥܶܠܕ̈ܒܳܒܶܐ: ܘܰܒܦܽܘܩܕܳܢܳܐ ܕܰܐܠܳܗܳܐ.
ܗܳܕܶܐ ܚܶܟܡܬܳܐ ܕܰܐܠܳܗܳܐ ܕܒܳܟ ܐܳܘ ܐܰܒܽܘܢ ܪܽܘܚܳܢܳܐ܆ ܕܡܶܢ ܩܕܳܡ ܕܰܠܬܰܫܥܺܝܬܳܐ ܗܳܕܶܐ ܕܦܽܘܫܳܩܳܐ ܕܡܰܙܡܽܘܪܳܐ ܐܶܬܩܰܪܰܒ܆ ܩܰܕܡܶܬ ܗܘܺܝܬ ܐܶܡܪܶܬ ܠܚܽܘܒܳܟ܇ ܕܠܰܘ ܟܽܠܗܶܝܢ ܡܷ̈ܠܶܐ ܘܦܶܬܓܳܡܷ̈ܐ ܕܰܐܡܺܝܪܺܝܢ ܒܡܰܙܡܽܘܪ̈ܶܐ ܐܳܠܨܳܐ ܕܢܰܝܬܶܐ ܠܦܽܘܫܳܩܳܐ. ܡܶܛܠ ܕܺܐܝܬ ܐܰܝܟܳܐ ܕܰܡܨܰܠܳܝܽܘ ܡܨܰܠܶܐ ܛܽܘܒܳܢܳܐ ܕܰܘܺܝܕ ܟܰܕ ܡܙܰܡܰܪ. ܘܺܐܝܬ ܬܽܘܒ ܐܰܝܟܳܐ ܕܬܰܫܥܺܝܬܳܐ ܕܦܽܘܪܩܳܢܳܐ ܡܬܰܢܶܐ. ܘܺܐܝܬ ܐܰܝܟܳܐ ܕܡܰܠܦܳܢܽܘܬܳܐ ܡܰܫܠܶܡ ܠܥܰܡܳܐ. ܡܳܕܶܝܢ ܗܳܫܳܐ ܒܡܰܙܡܽܘܪܳܐ ܗܳܢܳܐ ܡܶܬܚܙܶܐ ܠܰܢ ܛܽܘܒܳܢܳܐ ܡܙܰܡܪܳܢܳܐ܆ ܕܰܡܨܰܠܳܝܽܘ ܡܨܰܠܶܐ. ܘܠܰܘ ܥܰܠ ܢܰܦܫܶܗ ܐܶܠܐ ܐܰܝܟ ܕܰܐܕܪܶܟܢܰܢ ܡܶܢ ܬܰܫܥܺܝܬܳܐ ܐܚܪܺܬܳܐ܆ ܥܰܠ ܫܠܶܝܡܽܘܢ ܒܪܶܗ ܥܠܰܘܗܝ ܒܡܰܙܡܽܘܪܳܐ ܗܳܢܳܐ ܡܨܰܠܶܐ ܗܘܳܐ ܘܡܰܪܬܶܐ ܠܶܗ. ܕܒܰܨܠܽܘܬܳܐ ܢܶܗܘܶܐ ܒܳܥܶܐ ܦܽܘܪܩܳܢܳܐ ܕܰܐܠܳܗܳܐ ܡܶܢ ܒܥܶܠܕ̈ܒܳܒܶܐ. ܘܠܐ ܒܝܰܕ ܪ̈ܰܟܫܳܐ ܘܡܰܪ̈ܟܒܳܬܳܐ ܘܙܰܝܢܳܐ. ܘܥܰܠ ܟܽܠ ܩܪܳܒܳܐ ܕܩܳܐܶܡ ܥܰܠ ܩܰܕܺܝ̈ܫܶܐ܆ ܐܶܢ ܡܶܢ ܒܥܶܠܕܒ̈ܒܶܐ ܡܶܬܚܰܙܝܴ̈ܢܶܐ܆ ܘܶܐܢ ܡܶܢ ܒܥܶܠܕܒܴ̈ܒܶܐ ܡܶܬܝܰܕ̈ܥܳܢܶܐ. ܡܶܢܟܽܠ ܦܪܽܘܣ ܐܽܘܠܨܳܢܳܐ ܡܥܰܬܶܕ ܕܢܰܡܠܶܟ ܥܰܠ ܢܰܦܫܶܗ. ܡܨܰܠܶܐ ܥܰܠ ܗܰܘ ܕܺܐܝܬ ܠܶܗ ܕܢܰܡܠܶܟ ܒܳܬܪܶܗ ܘܶܐܡܰܪ:
ܢܶܥܢܶܝܟ ܡܳܪܝܳܐ ܒܝܰܘܡܳܐ ܕܽܐܘܠܨܳܢܳܐ: ܘܰܢܥܰܕܪܳܟ ܫܡܳܐ ܕܰܐܠܳܗܶܗ ܕܝܰܥܩܽܘܒ. ܢܫܰܕܰܪ ܠܳܟ ܥܽܘܕܪܳܢܳܐ ܡܶܢ ܡܰܩܕܫܶܗ: ܘܡܶܢ ܨܶܗܝܽܘܢ ܢܣܰܝܥܳܟ. ܚܙܺܝ ܡܳܢܳܐ ܐܶܡܰܪ. ܕܠܳܐ ܠܰܡ ܢܰܣܢܩܳܟ ܥܰܠ ܥܽܘܕܪ̈ܳܢܶܐ ܕܰܐܚܪ̈ܳܢܶܐ܆ ܐܶܠܐ ܗܽܘ ܢܶܥܢܶܝܟ ܒܽܐܘܠܨܳܢܳܐ. ܐܶܢܕܶܝܢ ܗܽܘ ܥܳܢܶܐ ܠܳܟ ܒܽܐܘܠܨܳܢܳܐ܆ ܠܐ ܣܢܺܝܩ ܐܰܢܬ ܥܰܠ ܥܽܘܕܪܳܢܳܐ ܕܰܒܝܰܕ ܒܰܪܢܳܫܳܐ. ܘܶܐܢ ܡܶܢ ܡܰܩܕܫܶܗ ܗܳܢܰܘ ܡܶܢ ܫܡܰܝܴ̈ܐ ܥܶܠܳܝܷ̈ܐ ܡܶܫܬܰܕܰܪ ܠܟ ܥܽܘܕܪܳܢܳܐ܆ ܠܐ ܡܰܣܢܶܩ ܠܳܟ ܥܰܠ ܡܰܠܐܟܷ̈ܐ ܕܰܢܢܰܛܪܘܢܳܟ. ܕܗܰܘ ܕܒܺܐܝܕܰܘ̈ܗܝ ܥܽܘܕܪܳܢܳܐ ܡܶܢ ܒܶܝܬ ܡܰܩܕܫܳܐ ܕܰܐܠܳܗܳܐ ܢܳܚܶܬ. ܕܒܺܐܝܳܠܳܐ ܡܶܬܚܰܙܝܳܢܳܐ ܬܶܗܘܶܐ ܙܳܟܽܘܬܳܐ. ܡܰܝܬܶܐ ܥܰܡ ܫܡܳܐ ܡܫܰܒܚܳܐ ܕܡܰܩܕܫܳܐ ܥܶܠܳܝܳܐ ܕܰܐܠܳܗܳܐ ܐܳܦ ܫܡܳܐ ܕܨܶܗܝܽܘܢ ܡܶܬܝܰܕܥܳܢܺܝܬܳܐ. ܘܶܐܡܰܪ: ܕܡܶܢ ܨܶܗܝܽܘܢ ܢܣܰܝܥܳܟ. ܐܳܦ ܬܽܘܒ ܡܚܰܦܶܛ ܕܩܽܘܪ̈ܒܳܢܶܐ ܢܩܰܪܶܒ ܠܰܐܠܳܗܳܐ ܕܡܶܬܪܰܥܶܐ ܒܗܽܘܢ. ܘܟܶܢ ܒܳܥܶܝܢܰܢ ܕܢܶܬܥܢܶܐ ܒܽܐܘܠܨܳܢܳܐ. ܐܶܡܰܪ: ܕܡܶܢ ܨܶܗܝܽܘܢ ܢܣܰܝܥܳܟ. ܐܳܦ ܬܽܘܒ ܡܚܰܦܶܛ.
ܢܶܬܕܟܰܪ ܠܳܟ ܡܳܪܝܳܐ ܟܽܠܗܽܘܢ ܩܽܘܪ̈ܒܳܢܰܝܟ: ܘܝܰܩܕܰܝ̈ܟ ܗܽܘ ܢܰܕܗܶܢ. ܢܶܬܶܠ ܠܳܟ ܡܳܪܝܳܐ ܐܰܝܟ ܠܶܒܳܟ: ܘܰܐܝܟ ܟܽܠܳܗ̇ ܬܰܪܥܺܝܬܳܟ ܢܫܰܡܠܶܐ. ܘܶܐܢ ܡܳܐ ܕܥܳܢܶܐ ܒܽܐܘܠܨܳܢܳܐ ܩܽܘܪ̈ܒܳܢܶܐ ܕܗܰܘ ܕܰܐܠܺܝܨ ܡܶܬܕܟܰܪ. ܡܳܕܶܝܢ ܒܟܽܠ ܦܽܘܪ̈ܣܺܝܢ ܕܩܽܘܪ̈ܒܳܢܶܐ ܙܳܕܶܩ ܕܢܺܐܨܰܦ ܕܢܶܗܘܽܘܢ ܕܟܶܝܢ ܘܰܡܫܰܡܠܶܝܢ. ܕܕܰܠܡܳܐ ܒܗܰܘ ܐܽܘܠܨܳܢܳܐ ܕܬܰܫܢܺܝ̈ܩܶܐ ܡܶܬܒܥܶܝܢ ܠܰܢ. ܘܶܐܢܕܶܝܢ ܐܰܝܟ ܠܶܒܳܐ ܢܶܒܥܶܐ ܙܰܕܺܝܩܽܘܬܳܐ ܘܡܰܠܟܽܘܬܳܐ ܕܰܐܠܳܗܳܐ. ܐܰܝܟ ܡܶܠܬܶܗ ܕܥܰܡܰܢܽܘܐܝܠ ܕܶܐܡܰܪ. ܕܰܒܥܰܘ ܠܘܩܕܰܡ ܡܰܠܟܽܘܬܶܗ ܕܰܐܠܳܗܳܐ ܐܳܦ ܙܰܕܺܝܩܽܘܬܶܗ (ܡܬܝ ܘ: ܠܓ). ܘܶܐܢ ܐܰܝܟ ܟܽܠܳܗ̇ ܬܰܪܥܺܝܬܳܐ ܡܫܰܡܠܶܐ ܘܠܐ ܡܒܰܨܰܪ. ܐܶܠܐ ܢܶܒܥܶܐ ܗܳܢܶܝܢ ܫܡܰܝܳܢ̈ܝܳܬܳܐ. ܘܠܐ ܢܶܬܦܰܫܰܚ ܒܫܷ̈ܐܠܳܬܳܐ ܐܰܪ̈ܥܳܢܳܝܳܬܳܐ܆ ܐܶܠܳܐ ܡܳܪܰܢ ܘܰܐܠܳܗܰܢ ܗܳܕܶܐ ܡܰܠܶܦ. ܕܰܒܥܰܘ ܠܽܘܩܕܰܡ ܡܰܠܟܽܘܬܶܗ ܕܰܐܠܳܗܳܐ ܘܙܰܕܺܝܩܽܘܬܳܐ. ܘܗܳܠܶܝܢ ܟܽܠܗܶܝܢ ܡܶܢ ܝܰܬܺܝܪܽܘ ܢܶܬܬܰܘܣ̈ܦܳܢ ܠܟܽܘܢ. ܘܗܳܝܕܶܝܢ ܡܳܐ ܕܶܐܬܦܪܶܩܢܰܢ ܡܶܢ ܒܺܝ̈ܫܳܬܳܐ ܕܨܶܦܬܳܐ ܐܰܪܥܳܢܳܝܬܳܐ܆ ܡܶܫܬܘܶܝܢܰܢ ܠܦܽܘܪܩܳܢܳܐ ܕܡܶܢ ܐܰܠܳܗܳܐ. ܘܳܐܬܶܐ ܪܽܘܚܳܐ ܒܝܰܕ ܢܒܺܝܳܐ ܘܳܐܡܰܪ:
ܘܰܢܫܰܒܰܚ ܒܦܽܘܪܩܳܢܳܟ: ܘܒܰܫܡܶܗ ܕܰܐܠܳܗܰܢ ܢܶܬܬܪܺܝܡ. ܘܢܶܥܒܶܕ ܡܳܪܝܳܐ ܟܽܠܶܗ ܨܶܒܝܳܢܳܟ. ܨܶܒܝܳܢܳܐ ܕܒܰܪܢܳܫܳܐ ܠܐ ܥܳܒܶܕ ܐܰܠܳܗܳܐ܇ ܐܶܠܐ ܡܳܐ ܕܚܳܐܰܪ ܘܚܳܙܶܐ ܠܶܗ. ܕܠܰܝܬ ܒܨܶܒܝܳܢܶܗ ܡܶܕܶܡ ܕܰܠܩܽܘܒܠܳܐ ܕܨܶܒܝܳܢܶܗ ܕܰܐܠܳܗܳܐ. ܡܳܕܶܝܢ ܗܰܘ ܕܒܳܥܶܐ ܕܢܶܥܒܶܕ ܐܰܠܳܗܳܐ ܟܽܠܶܗ ܨܶܒܝܳܢܶܗ܆ ܢܩܰܕܶܡ ܕܢܺܐܠܰܦ ܡܳܢܰܘ ܨܶܒܝܳܢܶܗ ܕܰܐܠܳܗܳܐ. ܘܰܢܪܰܥܶܐ ܘܰܢܢܺܝܚ ܠܐܠܳܗܳܐ ܒܣܽܘܥܪ̈ܳܢܰܘܗܝ. ܟܰܕ ܬܟܺܝܠ ܗ̱ܽܘ ܡܶܢ ܟܰܕܽܘ ܕܰܥܒܰܕ ܐܰܠܳܗܳܐ ܨܶܒܝܳܢܶܗ. ܕܢܶܥܒܶܕ ܨܶܒܝܳܢܶܗ ܕܒܰܪܢܳܫܳܐ ܗܽܘ ܐܰܠܳܗܳܐ ܟܰܕ ܣܳܥܰܪ ܗܳܝ ܕܰܠܩܽܘܒܠܳܐ ܕܰܐܠܳܗܳܐ܆ ܦܽܘܪܣܳܐ ܠܐ ܐܺܝܬ. ܡܳܕܶܝܢ ܐܶܢ ܡܨܰܠܶܝܢܰܢ ܘܠܐ ܡܶܫܬܰܡܥܺܝܢܰܢ ܐܰܝܟ ܨܶܒܝܳܢܰܢ܆ ܡܶܢܰܢ ܐܺܝܬܶܝܗ̇ ܥܶܠܬܳܐ ܘܠܰܘ ܡܶܢ ܐܰܠܳܗܳܐ. ܐܰܘ ܓܶܝܪ ܠܨܶܒܝܳܢܶܗ ܩܰܕܶܡܢܰܢ ܥܨܰܝܢܰܢ܆ ܘܡܶܛܽܠ ܗܳܕܶܐ ܠܐ ܥܳܒܶܕ ܨܶܒܝܳܢܰܢ. ܐܰܘ ܡܶܕܶܡ ܕܠܳܐ ܡܥܰܕܰܪ ܒܳܥܶܝܢܰܢ. ܥܰܠܗܳܕܶܐ ܐܰܗܡܺܝ ܘܠܳܐ ܥܒܰܕ ܨܶܒܝܳܢܰܢ. ܡܳܕܶܝܢ ܥܰܠ ܬܰܪܬܶܝܢ ܣܢܺܝܩ ܒܰܪܢܳܫܳܐ ܕܒܳܥܶܐ ܕܢܶܥܒܶܕ ܐܰܠܳܗܳܐ ܨܶܒܝܳܢܶܗ. ܡܰܢ ܕܡܶܢ ܗܳܠܶܝܢ ܬܰܪܬܶܝܢ ܙܳܐܰܥ܆ ܘܠܐ ܨܶܒܝܳܢܶܗ ܕܰܐܠܳܗܳܐ ܢܳܬܰܥ ܠܘܳܬܶܗ܆ ܕܟܽܠܶܗ ܨܶܒܝܳܢܶܗ ܢܶܥܒܶܕ܆ ܘܒܳܬܰܪ ܗܳܠܶܝܢ ܡܰܝܬܶܐ ܘܳܐܡܰܪ:
ܡܶܟܝܠ ܝܺܕܺܝܥܳܐ ܗ̱ܝ ܕܰܦܪܰܩ ܐܰܠܳܗܳܐ ܠܰܡܫܺܝܚܶܗ. ܘܰܥܢܳܝܗܝ ܡܶܢ ܫܡܰܝܳܐ ܕܩܽܘܕܫܶܗ: ܒܚܰܝܠܳܐ ܘܦܽܘܪܩܳܢܳܐ ܕܝܰܡܺܝܢܶܗ. ܗܳܪܟܳܐ ܢܽܘܗܪܳܐ ܕܦܽܘܪܩܳܢܳܐ ܕܰܐܒܳܐ ܕܰܗܘܳܐ ܠܥܳܠܡܳܐ ܒܝܰܕ ܒܪܶܗ ܡܰܨܠܶܦ ܘܰܡܚܰܘܶܐ ܠܰܢ ܡܙܰܡܪܳܢܳܐ. ܟܰܕ ܓܶܝܪ ܢܚܶܬ ܡܶܠܬܳܐ ܡܶܢ ܫܡܰܝܳܐ܆ ܡܨܰܠܶܐ ܗܘܳܐ ܐܰܝܟ ܒܰܪܢܳܫܳܐ ܠܘܳܬ ܐܰܒܳܐ. ܕܢܶܬܓܡܰܪ ܦܽܘܪܩܳܢܳܐ ܠܥܳܠܡܳܐ܆ ܗܰܘ ܕܡܶܛܠܬܶܗ ܐܶܬܳܐ ܠܣܽܘܪܳܩܳܐ. ܘܥܰܠ ܕܰܒܟܽܠܡܶܕܶܡ ܨܳܒܶܐ ܗܘܳܐ ܕܰܢܚܰܘܶܐ ܕܰܗܘܳܐ ܒܰܪܢܳܫܳܐ. ܘܠܳܐ ܡܶܢ ܗܳܝ ܕܰܢܨܰܠܶܐ ܠܘܳܬ ܐܰܒܳܐ ܐܰܗܡܺܝ. ܘܡܶܛܠܗܳܢܳܐ ܒܩܴ̈ܠܐ ܓܠܰܝܴ̈ܐ ܥܳܒܶܕ ܗܘܳܐ ܨܠܽܘܬܶܗ ܘܳܐܡܰܪ. ܡܰܘܕܶܐ ܐܢܳܐ ܠܳܟ ܐܰܒܳܐ ܡܳܪܳܐ ܕܰܫܡܰܝܳܐ ܐܳܦ ܕܰܐܪܥܳܐ ܕܟܰܣܺܝܬ ܗܳܠܶܝܢ ܡܶܢ ܚܰܟܺܝ̈ܡܶܐ ܘܰܓܠܰܝܬ ܐܶܢܽܘܢ ܠܝܰܠܘ̈ܕܶܐ. ܐܺܝܢ ܐܳܒܝ ܕܗܳܟܰܢܳܐ ܗܘܳܐ ܨܶܒܝܳܢܳܐ ܩܕܳܡܰܝܟ (ܡܬܝ ܝܐ: ܟܗ-ܟܘ). ܘܬܽܘܒ ܟܰܕ ܡܢܰܚܶܡ ܗܘܳܐ ܠܠܳܥܳܙܳܪ ܐܶܡܰܪ. ܐܰܠܳܗܳܐ ܐܰܒܳܐ ܡܰܘܕܶܐ ܐܢܳܐ ܠܳܟ ܕܰܫܡܰܥܬܳܢܝ. ܘܶܐܢܳܐ ܝܳܕܰܥ ܐܢܳܐ ܕܰܒܟܽܠܙܒܰܢ ܫܳܡܰܥ ܐܰܢܬ ܠܺܝ (ܝܘܚܢܢ ܝܐ: ܡܐ-ܡܒ). ܡܶܛܽܠ ܗܳܠܶܝܢ ܩܴ̈ܠܐ ܐܰܠܳܗܳܝܷ̈ܐ ܘܡܶܫܬܰܡ̈ܥܳܢܶܐ ܕܰܒܗܽܘܢ ܡܙܰܡܰܪ܆ ܕܡܶܟܺܝܠ ܝܺܕܺܝܥܳܐ ܗܳܝ ܕܰܦܪܰܩ ܐܰܠܳܗܳܐ ܠܰܡܫܺܝܚܶܗ ܘܰܥܢܳܝܗܝ ܡܶܢ ܫܡܰܝܳܐ ܕܩܽܘܕܫܶܗ܆ ܡܶܬܕܟܰܪ ܐܳܦ ܠܰܡܫܰܩܠܽܘܬܳܐ ܕܗܳܢܽܘܢ ܕܒܰܡܫܰܩܠܽܘܬܳܐ ܕܰܒܡܰܪ̈ܟܒܳܬܳܐ ܕܡܰܠܟܽܘܬܳܐ ܕܪ̈ܽܘܡܳܝܶܐ. ܐܳܦ ܒܪ̈ܰܟܫܳܐ ܕܒܶܝܬ ܐܺܝܪܳܘܕܺܝܣ ܘܦܺܝܠܰܛܽܘܣ ܡܶܫܬܥܶܝܢ ܗܘܰܘ ܒܗܰܘ ܙܰܒܢܳܐ ܕܶܐܬܚܙܺܝ ܦܳܪܽܘܩܰܢ. ܘܥܰܠܗܳܕܶܐ ܐܳܡܰܪ ܗܘܳܐ:
ܗܳܠܶܝܢ ܒܡܰܪ̈ܟܒܳܬܳܐ ܘܗܳܠܶܝܢ ܒܪ̈ܰܟܫܳܐ: ܘܰܚܢܰܢ ܒܰܫܡܶܗ ܕܡܳܪܝܳܐ ܐܰܠܳܗܰܢ ܢܶܥܫܰܢ. ܐܶܠܽܘܠܐ ܓܶܝܪ ܒܰܡܣܰܪܩܽܘܬܳܐ ܕܰܫܠܺܝ̈ܚܶܐ ܛܽܘ̈ܒܳܢܶܐ ܚܳܐܰܪ ܗܘܳܐ܆ ܗܳܝ ܕܰܙܟܳܬ ܠܟܠܗܽܘܢ ܡܰܠܟܷ̈ܐ ܕܰܐܪܥܳܐ. ܟܰܕ ܦܳܪܚܳܐ ܠܟܽܠ ܦܶܢ̈ܝܳܢ ܒܪ̈ܶܓܠܶܐ ܕܶܝܢ ܕܰܡ̈ܫܰܠܚܳܢ ܡܶܢ ܬܰܚܦܺܝܬܳܐ ܘܰܡܣܴ̈ܐܢܶܐ. ܠܡܳܢܳܐ ܡܶܬܕܟܰܪ ܗܘܳܐ ܫܡܳܐ ܕܡܰܪ̈ܟܒܳܬܳܐ ܘܰܕܪ̈ܰܟܫܳܐ. ܣܳܒܰܪ ܐܢܳܐ ܒܗܳܕܶܐ. ܐܳܦ ܠܗܳܠܶܝܢ ܕܡܶܢ ܗܰܘ ܓܰܒܳܐ ܕܰܠܩܽܘܒܠܳܐ ܡܶܬܝܰܕܥܳܢܳܐܝܺܬ ܟܳܢܫܺܝܢ ܠܰܩܪܳܒܳܐ ܕܥܰܡ ܩܰܕܺܝ̈ܫܶܐ ܡܫܰܘܕܰܥ. ܗܳܠܶܝܢ ܓܶܝܪ ܒܚܽܘܬܪܳܐ ܕܕܰܐܝܟ ܗܳܢܳܐ ܕܳܝܫܺܝܢ ܥܰܠ ܐܰܪܥܳܐ. ܘܒܰܕܡܽܘܬ ܡܰܪ̈ܟܒܳܬܳܐ ܕܡܰܢܗܪ̈ܳܢ ܥܰܠ ܪܺܝܫ ܛܽܘܪ̈ܶܐ ܥܳܒ̈ܕܳܢ ܙܰܘܚܳܐ ܠܡܶܐܬܺܝܬܗܽܘܢ ܥܰܠ ܙܰܕܺܝ̈ܩܶܐ܆ ܟܰܕ ܪ̈ܺܝܫܳܢܰܝܗܽܘܢ ܒܕܽܘܡܝܳܐ ܕܗܳܢܽܘܢ ܕܡܶܙܕܰܝܚܺܝܢ ܥܰܠ ܚܽܘܬܪܳܐ ܕܡܰܪ̈ܟܒܳܬܳܐ. ܘܰܡܙܺܝܥܺܝܢ ܒܕܶܚܠܬܳܐ ܬܰܟܬܽܘܫܗܽܘܢ ܥܰܠ ܩܰܕܺܝ̈ܫܶܐ ܘܙܰܕܺܝ̈ܩܶܐ. ܒܕܽܘܡܝܳܐ ܕܰܐܝܟ ܗܳܢܳܐ ܬܪܰܝܳܢܳܐ ܕܗܳܢܽܘܢ ܕܰܪܟܺܝܒܺܝܢ ܪ̈ܰܟܫܳܐ. ܡܶܢ ܠܶܓܝܽܘ̈ܢܶܐ ܕܰܐܝܟ ܗܳܠܶܝܢ ܦܪܰܩ ܠܰܢ ܓܶܠܝܳܢܶܗ ܕܡܰܠܟܳܐ ܡܫܺܝܚܳܐ. ܘܗܳܢܰܘ ܦܽܘܪܩܳܢܳܐ ܗܰܘ ܕܶܐܡܰܪ ܕܰܘܺܝܕ: ܕܶܐܬܦܪܶܩ. ܘܰܚܢܰܢ ܒܰܫܡܶܗ ܕܡܳܪܝܳܐ ܐܰܠܳܗܰܢ ܢܶܥܫܰܢ. ܠܽܘܩܒܰܠ ܗܳܢܳܐ ܛܽܘܝܳܒܳܐ ܣܳܦܶܩ ܠܰܢ ܫܡܶܗ ܕܰܐܠܳܗܰܢ. ܘܥܰܡ ܗܳܠܶܝܢ ܓܽܘ̈ܕܶܐ ܫܓܺܝ̈ܓܳܬܳܐ ܘܠܶܓܝܽܘ̈ܢܶܐ ܒܠܺܝ̈ܠܳܬܳܐ܆ ܠܰܝܬ ܠܰܢ ܠܰܡܚܰܘܳܝܽܘ ܥܰܠ ܙܰܝܢܰܢ. ܐܶܠܳܐ ܫܡܶܗ ܕܡܳܪܝܳܐ ܐܰܠܳܗܰܢ. ܘܥܰܠ ܕܰܚܙܳܐ ܗܘܳܐ ܢܒܺܝܳܐ ܒܥܰܝܢܳܐ ܕܪܽܘܚܳܐ. ܕܰܐܝܟܰܢܳܐ ܡܶܬܬܰܒܪܺܝܢ ܘܢܳܦܠܺܝܢ ܚܰܝ̈ܠܰܘܳܬܳܐ ܕܰܠܩܽܘܒܠܳܐ ܡܶܢ ܫܡܳܐ ܕܚܺܝܠܳܐ ܕܰܐܠܳܗܳܐ܆ ܐܶܡܰܪ.
ܕܗܶܢܽܘܢ ܒܪܰܟܘ ܘܰܢܦܰܠܘ܆ ܘܰܚܢܰܢ ܩܳܡ̱ܢ ܘܶܐܬܛܰܝܰܒ̱ܢ. ܡܳܐ ܓܶܝܪ ܕܢܳܦܠܺܝܢ ܒܥܶܠܕ̈ܒܳܒܶܝܗ̇ ܕܢܰܦܫܳܐ܆ ܗܳܝܕܶܝܢ ܚܰܝܠܳܐ ܡܶܕܶܡ ܚܬܺܝܪܳܐ ܩܳܢܝܳܐ. ܘܰܡܚܰܘܝܳܐ ܡܛܰܝܒܽܘܬܳܐ ܘܪܳܗܛܳܐ ܒܽܐܘܪܚܳܐ ܠܘܳܬ ܡܰܠܟܳܗ̇. ܡܶܛܽܠ ܕܚܳܕܝܳܐ ܟܰܕ ܚܳܙܝܳܐ ܠܰܒܥܶܠܕܒܳܒܳܗ̇ ܕܰܪܡܶܐ. ܒܪܰܡ ܒܟܽܠ ܦܽܘܪ̈ܣܺܝܢ ܡܰܠܶܦ ܢܒܺܝܳܐ܆ ܕܠܳܐ ܢܰܣܒܰܪ ܗܰܘ ܕܙܳܟܶܐ ܠܚܰܝ̈ܠܰܘܳܬܳܐ ܕܰܐܝܟ ܗܳܠܶܝܢ ܕܒܶܠܥܳܕ ܐܰܠܳܗܳܐ ܗܳܘܶܐ ܦܽܘܪܩܳܢܳܐ. ܘܟܰܕ ܣܰܓܺܝ ܢܶܬܟܰܬܰܫ܆ ܠܡܳܪܝܳܐ ܢܶܩܪܶܐ. ܘܰܠܡܰܠܟܳܐ ܢܶܒܥܶܐ ܥܽܘܕܪܳܢܳܐ. ܡܶܛܽܠܗܳܕܶܐ ܐܶܡܰܪ.
ܡܳܪܝܳܐ ܢܶܦܪܩܰܢ ܘܡܰܠܟܰܢ ܢܶܥܢܶܝܢ ܒܝܰܘܡܳܐ ܕܢܶܩܪܶܝܘܗܝ. ܡܶܢ ܗܳܠܶܝܢ ܚܰܨܺܝ̈ܦܶܐ ܘܓܽܘ̈ܡܕܳܢܶܐ ܕܶܐܬܕܰܪܰܫܘ ܒܰܩܪ̈ܳܒܶܐ ܟܰܣܝܳܐܝܬ ܗܳܐ ܡܶܢ ܥܳܠܰܡ ܠܩܽܘܒܠܰܢ. ܡܳܪܝܳܐ ܢܶܦܪܩܢ. ܡܰܢܽܘ ܡܳܪܝܳܐ ܗܳܢܳܐ ܕܳܐܡܰܪ ܐܰܢܬ܆ ܗܰܘ ܕܶܐܬܓܠܺܝ ܒܰܒܣܰܪ ܘܰܥܒܰܕ ܐܰܓܽܘܢܳܐ ܠܘܩܒܰܠ ܛܪܽܘܢܽܘܬܶܗ ܕܳܐܟܶܠܩܰܪܨܳܐ ܒܡܰܕܒܪܳܐ. ܘܡܰܠܟܰܢ ܢܶܥܢܶܝܢ ܒܝܰܘܡܳܐ ܕܢܶܩܪܶܝܘܗܝ. ܡܰܢܽܘ ܗܳܢܳܐ ܡܰܠܟܳܐ ܕܳܐܡܰܪ ܐܰܢܬ. ܗܳܢܳܐ ܐܺܝܬܰܘܗܝ ܕܠܰܘ ܡܶܢ ܥܳܠܡܳܐ ܗܳܢܳܐ ܐܺܝܬܰܘܗܝ ܫܽܘܠܛܳܢܶܗ. ܗܰܘ ܕܰܩܛܺܝܪ ܬܳܓܳܐ ܕܡܰܠܟܽܘܬܶܗ ܒܠܳܐ ܡܶܬܚܰܒܠܳܢܽܘܬܳܐ. ܗܰܘ ܕܟܰܕ ܨܒܳܐ ܡܶܛܽܠ ܦܽܘܪܩܳܢܰܢ ܩܰܒܶܠ ܟܠܺܝܠܳܐ ܕܟܽܘ̈ܒܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܚܕ
ܡܰܘܕܰܥ ܕܗܰܘܢܳܐ ܕܒܰܢ: ܡܰܠܟܳܐ ܡܥܳܕܺܝܢ ܡܟܰܢܶܝܢ ܠܶܗ ܟܬܳܒܷ̈ܐ ܩܰܕܺܝ̈ܫܶܐ.
ܟܽܠ ܚܰܕܽܘܬܳܐ ܕܰܒܝܰܕ ܐܰܠܳܗܳܐ ܗܳܘܝܳܐ܆ ܠܐ ܟܕܺܝܢܳܐ ܬܚܶܝܬ ܢܺܝܪܳܐ ܕܟܰܪܝܽܘܬܳܐ. ܚܰܕܽܘܬܳܐ ܓܶܝܪ ܕܒܰܐܠܳܗܳܐ ܠܰܐܠܳܗܳܐ ܡܶܬܕܰܡܝܳܐ. ܘܗܰܘ ܕܒܰܐܠܳܗܳܐ ܚܳܕܶܐ܆ ܥܳܒܰܪ ܠܗ ܡܶܢ ܗܳܝ ܕܢܶܗܘܶܐ ܒܟܰܪܝܽܘܬܳܐ. ܘܡܰܒܥܕܳܐ ܡܶܢ ܟܡܺܝܪܘܬܐ ܥܳܠܡܳܢܳܝܬܳܐ. ܚܰܕܽܘܬܳܐ ܡܰܠܝܰܬ ܒܽܘܝܳܐܳܐ ܕܰܒܝܰܕ ܡܳܪܰܢ. ܡܶܛܠܗܳܕܶܐ ܚܰܟܺܝܡ ܒܟܽܠ ܦܰܘܠܘܣ ܛܽܘܒܳܢܳܐ ܡܰܪܬܶܐ ܘܡܰܪܬܶܐ ܠܰܢ ܕܰܒܟܽܠܙܒܰܢ ܢܶܚܕܶܐ ܒܡܳܪܰܢ. ܐܶܡܰܪ ܓܶܝܪ: ܕܰܚܕܰܘ ܒܡܳܪܰܢ ܒܟܽܠܙܒܰܢ. ܘܬܽܘܒ ܐܳܡܰܪ ܐܢܳܐ ܚܕܰܘ (ܦܝܠܝ̈ܦܣܝܐ ܕ: ܕ). ܘܰܠܗܳܕܶܐ ܗܳܟܺܝܠ ܚܰܕܽܘܬܳܐ ܥܦܺܝܦܰܬ ܒܟܽܠ ܒܽܘܝܳܐܻܝ̈ܢ ܩܰܕܶܡ ܝܰܘܡܳܢܳܐ ܣܳܡ ܒܪܺܝܫܶܗ ܕܡܰܙܡܽܘܪܳܐ ܛܘܒܳܢܳܐ ܕܰܘܺܝܕ. ܘܰܐܝܟܰܢܳܐ ܕܰܫܠܺܝܚܳܐ ܥܳܐܶܦ ܗܘܳܐ ܠܳܗ̇ ܠܚܰܕܽܘܬܳܐ܆ ܗܳܟܰܢܳܐ ܐܳܦ ܗܽܘ ܒܰܕܡܽܘܬܶܗ ܕܗܰܘ ܡܰܠܦܳܢܳܐ ܕܥܰܡ̈ܡܶܐ ܥܳܐܶܦ ܚܰܕܽܘܬܳܐ ܕܰܒܝܰܕ ܡܳܪܰܢ. ܘܡܰܝܬܶܐ ܘܳܐܡܰܪ:
ܡܳܪܝܳܐ ܒܚܰܝܠܳܟ ܢܶܚܕܶܐ ܡܰܠܟܳܐ. ܘܰܒܦܽܘܪܩܳܢܳܟ ܢܕܽܘܨ ܪܰܘܪܒܳܐܝܺܬ. ܚܙܺܝ ܐܰܝܟܰܢܳܐ ܐܶܡܰܪ. ܠܐ ܐܰܝܬܺܝ ܡܰܢ ܥܽܘܗܕܳܢܳܐ ܕܺܐܝܩܳܪ̈ܶܐ ܡܰܠܟܴ̈ܝܶܐ: ܘܠܳܐ ܒܥܳܐ ܕܰܒܣܶܕܪ̈ܶܐ ܕܚܰܝ̈ܠܰܘܳܬܳܐ ܠܒܺܝ̈ܫܰܝ ܙܰܝܢܳܐ ܢܶܚܕܶܐ: ܘܠܳܐ ܬܽܘܒ ܒܪܰܘܪ̈ܒܳܢܶܐ ܘܡܳܪ̈ܰܘܳܬܳܐ ܘܫܰܠܝ̈ܛܳܢܶܐ: ܘܠܳܐ ܒܚܽܘܬܪܳܐ ܕܨܶܒ̈ܬܶܐ ܡܰܦܪ̈ܓܶܐ ܕܰܠܒܽܘ̈ܫܶܐ ܡܫܰܒ̈ܚܶܐ ܕܒܽܘܨܳܐ ܘܕܰܐܪܓܘܳܢܳܐ: ܘܠܳܐ ܒܬܽܘܩܳܢܳܐ ܡܛܰܝܒܳܐ ܕܡܰܪ̈ܟܒܳܬܳܐ ܕܰܡܨܰܒ̈ܬܳܢ ܠܙܰܘܚܳܐ ܕܪܰܒܽܘܬܳܐ: ܘܠܳܐ ܒܪ̈ܰܟܫܳܐ ܕܡܰܦܪܓܺܝܢ ܒܚܶܫ̈ܠܳܬܳܐ ܕܕܰܗܒܳܐ ܘܰܒܦܰܐܝܽܘܬܳܐ ܕܛܰܒ̈ܥܶܐ: ܘܠܳܐ ܒܣܰܓܺܝܐܽܘܬܳܐ ܕܰܒܢܰܝܴ̈ܐ ܪ̈ܚܺܝܡܶܐ ܕܡܶܙܕܰܝܚܺܝܢ ܥܰܠ ܚܰܨܳܐ ܕܰܪ̈ܟܽܘܒܶܐ ܡܛܰܟ̈ܣܰܝ ܒܟܽܠ ܫܽܘܦܪ̈ܺܝܢ ܘܰܡܗܰܕܪܺܝܢ ܒܰܚܙܳܬܳܐ ܕܰܠܒܘ̈ܫܶܐ ܡܪ̈ܰܝܡܶܐ ܙܩܺܝܪ̈ܰܝ ܒܽܐܘܡܳܢܽܘܬܳܐ ܕܚܰܟܺܝ̈ܡܶܐ܆ ܐܶܠܐ ܟܰܕ ܝܺܬܶܒ ܥܰܠ ܟܘܪܣܝܳܐ ܕܡܰܠܟܘܬܶܗ. ܒܗܰܘ ܓܶܝܪ ܙܰܒܢܳܐ ܐܶܬܢܰܒܺܝ ܡܰܙܡܽܘܪܳܐ ܗܳܢܳܐ. ܟܰܕ ܫܒܰܩ ܗܘܳܐ ܗܳܠܶܝܢ ܕܶܡ̈ܘܳܬܳܐ ܕܶܐܡܰܪܢܰܢ܆ ܕܰܩܕܳܡܰܘܗܝ ܩܳܝ̈ܡܳܢ ܗܘܱ̈ܝ ܕܰܡܕܰܒܪܳܐ ܠܗܽܘܢ ܕܶܚܠܬܳܐ. ܘܶܐܬܦܢܺܝ ܠܘܳܬ ܡܳܪܝܳܐ ܘܶܐܡܰܪ. ܡܳܪܝܳܐ ܒܚܰܝܠܳܟ ܢܶܚܕܶܐ ܡܰܠܟܳܐ. ܘܰܒܦܽܘܪܩܳܢܳܟ ܢܕܽܘܨ ܪܰܘܪܒܳܐܝܺܬ. ܠܰܘ ܒܗܳܠܶܝܢ ܡܶܬܚܰܙ̈ܝܳܢܝܳܬܳܐ ܕܒܰܡܠܶܐ ܥܶܕܳܢܳܐ ܩܳܐܶܡ ܒܫܽܘܒܗܳܪܳܐ ܬܶܗܘܶܐ ܚܰܕܽܘܬܳܐ ܕܺܝܠܶܗ ܕܥܰܒܕܳܟ܆ ܘܠܐ ܬܽܘܒ ܒܡܰܫܪ̈ܝܳܬܳܐ ܕܫܰܠܝ̈ܛܳܢܶܐ܆ ܕܰܒܥܶܕܳܢܳܐ ܙܥܽܘܪܳܐ ܡܬܺܝܚܺܝܢ ܣܶܕܪ̈ܰܝܗܽܘܢ ܠܚܶܙܘܳܐ ܕܥܰܝ̈ܢܶܐ ܒܰܪ̈ܳܝܳܬܳܐ ܢܕܽܘܨ ܗܰܘ ܕܰܐܚܺܝܕ ܓܰܘܣܳܐ ܒܥܽܘܫܢܳܟ. ܘܰܒܦܽܘܪܩܳܢܳܟ ܠܰܡ ܐܶܕܽܘܨ. ܡܶܛܽܠ ܕܨܶܒܝܳܢܶܗ ܕܰܡܙܰܡܪܳܢܳܐ ܐܶܬܚܙܺܝ ܠܶܗ ܒܗܳܠܶܝܢ ܕܶܐܬܡܱ̈ܠܰܠܝ.
ܢܶܬܦܢܶܐ ܠܰܢ ܡܶܟܺܝܠ ܠܘܳܬ ܗܰܘ ܢܺܝܫܳܐ ܓܰܘܳܢܳܝܳܐ ܕܨܰܠܡܳܐ ܕܡܰܠܟܳܐ ܠܐ ܡܶܬܚܰܒܠܳܢܳܐ. ܘܡܶܢ ܬܰܡܳܢ ܢܶܥܒܶܕ ܫܽܘܪܳܝܳܐ ܠܦܽܘܫܳܩܳܐ ܪܽܘܚܳܢܳܝܳܐ. ܐܶܢܳܐ ܣܳܒܰܪ ܐܢܳܐ ܕܠܰܘ ܒܢܺܝܫܳܐ ܡܶܬܚܰܙܝܳܢܳܐ ܕܚܳܐܰܪ ܠܘܳܬ ܡܰܠܟܳܐ ܥܳܠܡܳܢܳܝܳܐ. ܕܒܰܙܒܰܢ ܐܺܝܬܰܘܗܝ ܡܰܠܟܳܐ ܘܒܰܙܒܰܢ ܠܐ. ܪܽܘܚܳܐ ܕܰܐܠܳܗܳܐ ܗܳܠܶܝܢ ܐܶܡܰܪ: ܐܶܠܐ ܒܗܰܘ ܡܰܠܟܳܐ ܕܒܰܢ ܕܺܐܝܬܰܘܗܝ ܒܰܫܪܳܪܳܐ ܡܰܠܟܳܐ. ܡܶܛܠ ܕܳܡܝܽܘܬܶܗ ܕܰܒܗܰܘ ܡܰܠܟܳܐ ܕܰܫܪܳܪܳܐ ܡܶܬܢܰܒܶܐ ܗܳܠܶܝܢ ܡܰܙܡܽܘܪܳܐ܆ ܘܠܶܗ ܓܶܝܪ ܠܗܰܘ ܦܫܺܝܩ ܠܡܶܚܕܳܐ ܒܡܳܪܝܳܐ. ܡܰܠܟܳܐ ܕܶܝܢ ܕܒܰܢ ܗܰܘܢܳܐ ܐܳܡܰܪ ܐܢܳܐ ܕܺܐܝܬܰܘܗܝ܇ ܗܳܢܳܐ ܓܶܝܪ ܒܨܰܠܡܳܐ ܕܗܰܘ ܡܰܠܟܳܐ ܕܰܠܩܽܘܫܬܺܝܢ ܐܶܬܒܪܺܝ ܡܶܢ ܐܰܠܳܗܳܐ܆ ܘܗܳܢܰܘ ܕܫܰܠܺܝܛ ܥܰܠ ܡܕܰܒܪܳܢܽܘܬܳܐ ܕܰܩܢܽܘܡܰܢ. ܘܰܚܢܰܢ ܕܢܶܫܬܰܠܰܛ ܥܠܰܘܗܝ ܠܐ ܡܨܶܝܢܰܢ܇ ܡܶܛܽܠ ܕܰܡܥܰܠܰܝ ܗ̱ܽܘ ܡܶܢܰܢ ܒܟܽܠܡܶܕܶܡ. ܘܟܰܕ ܒܰܢ ܗ̱ܘ ܐܰܟܡܳܐ ܕܠܰܘ ܒܰܢ ܗ̱ܽܘ܆ ܘܟܰܕ ܒܰܢ ܫܪܶܐ܆ ܐܰܬܪܶܗ ܕܒܰܢ ܠܐ ܝܺܕܺܝܥ ܠܰܢ ܐܰܝܟܰܘ. ܘܟܽܠܶܗ ܒܰܢ ܗ̱ܘ܆ ܘܟܽܠܶܗ ܠܒܰܪ ܡܶܢܰܢ ܗܘ܆ ܘܒܰܢ ܗܘ ܟܰܕ ܠܐ ܡܶܣܬܰܝܰܟ ܒܰܢ. ܘܰܠܒܰܪ ܡܶܢܰܢ ܗܘ. ܟܰܕ ܟܽܠܶܗ ܫܪܶܐ ܒܰܢ. ܘܰܐܝܢܰܘ ܐܰܬܪܶܗ܆ ܐܢܳܫ ܠܳܐ ܡܶܫܟܰܚ ܠܡܶܕܰܥ. ܘܰܫܪܶܐ ܒܰܢ ܕܠܐ ܐܰܬܪܳܐ. ܘܣܳܠܶܩ ܠܪܰܘܡܳܐ ܟܽܠܶܗ ܟܰܕ ܡܶܢܰܢ ܠܳܐ ܡܫܰܢܶܐ. ܘܢܳܚܶܬ ܠܥܽܘܡܩܳܐ ܟܰܕ ܡܶܢ ܪܰܘܡܳܐ ܠܐ ܡܶܣܬܰܦܰܩ. ܘܥܳܒܰܪ ܒܓܽܘ̈ܫܡܶܐ ܛܡܺܝ̈ܡܶܐ ܘܰܓܫܺܝ̈ܡܶܐ ܘܠܳܐ ܡܶܬܟܠܶܐ. ܘܦܳܪܰܚ ܥܰܡ ܩܰܠܺܝ̈ܠܐܷ܆ ܘܡܶܬܬܰܗܶܐ ܘܠܐ ܕܨܳܒܶܐ ܥܰܡ ܝܰܩܺܝܪ̈ܶܐ. ܘܗܳܘܶܐ ܥܰܡ ܟܽܠ ܟܽܠ. ܟܰܕ ܗܽܘ ܡܶܢ ܟܝܳܢܶܗ ܠܐ ܡܶܫܬܰܚܠܰܦ. ܗܳܢܰܘ ܡܰܠܟܳܐ ܕܰܡܕܰܒܰܪ ܠܰܢ ܡܶܢ ܠܓܰܘ. ܗܳܢܰܘ ܕܡܶܬܩܪܶܐ ܨܰܠܡܳܐ ܕܰܐܠܳܗܳܐ. ܥܰܠܗܳܢܳܐ ܣܳܡ ܐܰܠܳܗܳܐ ܙܺܝܘܶܗ ܘܫܽܘܒܚܶܗ܆ ܡܶܛܠܗܳܢܳܐ ܐܶܡܰܪ ܐܰܠܳܗܳܐ ܡܶܢ ܒܪܺܝܫܺܝܬ܆ ܢܶܥܒܶܕ ܐܢܳܫܳܐ ܒܨܰܠܡܰܢ ܐܰܝܟ ܕܡܽܘܬܰܢ (ܒܪܝܬܐ ܐ: ܟܘ). ܘܙܳܕܶܩ ܕܢܶܕܰܥ ܕܠܶܗ ܩܪܳܐ ܡܙܰܡܪܳܢܳܐ ܡܰܠܟܳܐ ܪܰܒܳܐ. ܘܶܐܢܗܽܘ ܕܠܰܘ ܥܰܠ ܗܰܘ ܡܰܠܟܳܐ ܕܒܰܢ ܐܰܡܺܝܪ̈ܳܢ ܗܳܠܶܝܢ: ܡܳܕܶܝܢ ܗܳܕܶܐ ܬܶܫܒܽܘܚܬܳܐ ܠܡܰܠܟܳܐ ܒܰܠܚܽܘܕ ܠܳܚܡܳܐ. ܘܠܰܘ ܠܟܽܠ ܐܢܳܫ. ܘܡܰܠܟܳܐ ܡܳܕܶܝܢ ܙܳܕܶܩ ܕܢܶܚܕܶܐ ܒܚܰܝܠܐ ܕܰܐܠܳܗܳܐ. ܘܠܰܘ ܟܽܠܶܗ ܥܳܠܡܳܐ ܕܰܡܣܰܒܰܪ ܒܡܳܪܝܳܐ. ܘܰܠܡܰܠܟܳܐ ܡܳܕܶܝܢ ܐܺܝܬ ܠܶܗ ܕܰܢܕܽܘܨ ܒܦܽܘܪܩܳܢܶܗ ܕܡܰܠܟܳܐ ܪܰܘܪܒܳܐܝܺܬ. ܘܠܰܘ ܠܫܰܪܟܳܐ ܕܡܶܣ̈ܟܺܢܶܐ. ܗܳܢܽܘܢ ܘܳܐܦ ܝܰܬܺܝܪ ܣܢܺܝܩܺܝܢ ܥܰܠ ܦܽܘܪܩܳܢܳܐ. ܒܪܰܡ ܐܰܝܟ ܕܶܐܡܪܶܬ. ܢܶܪܕܶܐ ܒܬܰܫܥܺܝܬܳܐ ܕܢܺܝܫܳܐ ܓܰܘܳܢܳܝܐ ܕܥܰܠ ܡܰܠܟܳܐ ܕܒܰܢ. ܟܰܕ ܝܳܕܥܺܝܢܰܢ ܕܡܰܠܟܳܐ ܠܗܰܘܢܳܐ ܩܪܳܐ ܗܳܪܟܳܐ ܡܙܰܡܪܳܢܳܐ. ܠܗܰܘ ܕܶܐܬܬܰܩܰܢ ܒܚܶܟܡܬܳܐ ܕܰܐܠܳܗܳܐ ܕܠܳܐ ܡܶܬܕܰܪܟܳܐ. ܘܰܗܘܳܐ ܒܨܰܠܡܳܐ ܘܰܒܕܽܘܡܝܳܐ ܕܥܳܒܽܘܕܶܗ. ܘܰܚܙܺܝ ܗܳܠܶܝܢ ܕܒܳܬܰܪܟܶܢ. ܐܶܡܰܪ ܥܠܰܘܗܝ.
ܪܶܓܬܳܐ ܕܠܶܒܶܗ ܝܰܗܒܬ ܠܶܗ. ܐܳܦ ܛܽܘܝܳܒܳܐ ܕܣܶܦ̈ܘܳܬܶܗ ܠܐ ܟܠܰܝܬܳܝܗܝ. ܠܗܳܕܶܐ ܓܶܝܪ ܕܳܡܝܽܘܬܳܐ ܕܰܐܠܗܽܘܬܳܐ ܡܶܬܪܰܓܪܰܓ ܡܶܢ ܩܕܺܝܡ ܟܰܕ ܠܐ ܝܳܕܰܥ. ܘܟܰܕ ܠܐ ܚܳܣܶܡ ܒܗܰܘ ܥܳܒܽܘܕܳܐ ܠܐ ܟܠܳܝܗܝ ܕܢܶܬܕܰܡܶܐ ܒܶܗ. ܡܶܛܠ ܕܰܐܠܒܫܶܗ ܫܽܘܒܚܳܐ ܕܕܳܡܝܽܘܬ ܐܠܰܗܽܘܬܳܐ. ܗܳܢܰܘ ܕܶܝܢ ܛܳܒܬܳܐ ܕܰܡܚܰܪܪܳܐ ܡܶܢ ܫܰܘܬܳܦܽܘܬܳܐ ܕܒܺܝܫܽܘܬܳܐ. ܘܒܽܘܪܟܬܳܐ ܕܠܳܐ ܢܳܩܦܳܐ ܠܳܗ̇ ܠܰܘܛܬܳܐ. ܐܶܡܰܪ ܓܶܝܪ.
ܡܶܛܽܠ ܕܩܰܕܶܡܬܳܝܗܝ ܒܽܘܪܟܬܳܐ ܛܳܒܬܳܐ. ܘܒܰܪܶܟ ܐܶܢܽܘܢ ܐܰܠܳܗܳܐ ܒܝܰܘܡܳܐ ܕܰܒܪܳܐ ܐܶܢܽܘܢ. ܥܰܡ ܗܳܕܶܐ ܒܽܘܪܟܬܳܐ ܠܰܝܬ ܗܘܳܐ ܒܺܝܫܽܘܬܳܐ. ܗܳܝ ܕܥܶܠܰܬ ܡܶܢ ܥܒܳܪ ܦܽܘܩܕܳܢܳܐ. ܐܶܠܐ ܛܰܝܒܽܘܬܶܗ ܕܥܳܒܽܘܕܳܐ: ܫܽܘܒܚܳܐ ܕܰܐܠܳܗܽܘܬܳܐ: ܘܨܰܠܡܳܐ ܘܙܺܝܘܳܐ ܕܥܳܒܽܘܕܳܐ ܣܳܡܬ ܥܰܠ ܒܪܺܝܫܳܐ܆ ܘܒܰܟܠܺܝܠܳܐ ܡܝܰܩܪܳܐ ܗܰܕܰܪܬܶܗ ܕܰܐܝܟ ܡܰܠܟܳܐ ܢܶܬܚܙܶܐ ܒܰܡܫܰܠܛܽܘܬܶܗ ܕܥܰܠ ܗܳܢܽܘܢ ܕܠܳܐ ܡܶܠܬܳܐ.
ܘܣܳܡܬ ܠܡ ܒܪܺܝܫܶܗ ܟܠܺܝܠܳܐ ܡܫܰܒܚܳܐ: ܘܚܰܝܷ̈ܐ ܫܶܐܠ ܠܳܟ ܘܝܰܗܒܬ ܠܶܗ. ܢܽܘܓܪܳܐ ܕܝܰܘ̈ܡܳܬܳܐ ܠܥܳܠܰܡ ܥܳܠܡܺܝܢ. ܘܰܐܝܟܰܢ ܡܶܫܟܚܳܐ ܕܗܳܕܶܐ ܬܶܬܢܣܶܒ ܥܰܠ ܡܰܠܟܳܐ ܕܡܶܫܬܪܶܐ ܘܒܳܛܶܠ ܫܽܘܠܛܳܢܶܗ. ܐܶܠܳܐ ܥܰܠ ܗܰܘ ܕܚܰܝ ܘܰܡܩܰܘܶܐ ܫܽܘܠܛܳܢܶܗ. ܗܳܕܶܐ ܕܶܐܬܐܡܪܰܬ. ܡܰܠܟܳܐ ܓܶܝܪ ܕܒܰܢ ܠܥܳܠܰܡ ܥܳܠܡܺܝܢ ܚܰܝ ܘܠܳܐ ܡܳܐܶܬ. ܒܰܕܡܽܘܬܳܐ ܕܰܐܠܳܗܳܐ ܗܰܘ ܕܥܰܒܕܶܗ ܒܨܰܠܡܶܗ. ܡܶܛܽܠ ܕܰܒܗܳܕܶܐ ܡܶܬܝܕܰܥ ܕܺܐܝܬܰܘܗܝ ܒܨܰܠܡܳܐ ܕܰܐܠܳܗܳܐ ܚܰܝܳܐ. ܒܚܰܝܷ̈ܐ ܕܠܳܐ ܡܶܬܒܰܛܠܺܝܢ ܒܡܰܘܬܳܐ. ܠܗܳܢܳܐ ܓܶܝܪ ܡܰܘܬܳܐ ܠܐ ܠܳܒܶܟ ܠܓܰܘ ܬܰܪ̈ܥܰܘܗܝ ܟܡܺܝܪ̈ܶܐ. ܐܶܠܐ ܡܳܐ ܕܡܶܫܬܪܶܐ ܡܶܢ ܪܽܘܟܳܒܶܗ ܕܦܰܓܪܳܐ܆ ܡܶܬܚܛܶܦ ܥܰܡ ܢܰܦܫܶܗ ܘܡܶܬܕܒܰܪ ܠܰܐܬܪ̈ܰܘܳܬܳܐ ܢܰܗܺܝܪ̈ܶܐ ܕܠܰܝܬ ܒܗܽܘܢ ܡܰܘܬܳܐ. ܘܫܳܪܶܐ ܠܓܰܘ ܡܶܢ ܬܚܽܘܡܳܐ ܕܚܰܝܷ̈ܐ. ܘܰܡܩܰܘܶܐ ܒܓܰܘ ܦܰܪܕܰܝܣܳܐ. ܘܰܥܕܰܡܳܐ ܕܡܶܬܦܩܶܕ ܠܫܽܘܠܳܡܳܐ ܕܢܶܦܢܶܐ ܨܶܝܕ ܪܽܘܟܳܒܳܐ ܕܦܰܓܪܳܐ ܗܰܘ ܕܶܐܫܬܒܶܩ ܡܶܢܶܗ. ܐܶܠܽܘ ܓܶܝܪ ܡܶܬܬܚܶܕ ܗܘܳܐ ܒܡܰܘܬܳܐ ܘܠܐ ܕܢܶܗܘܶܐ ܒܨܰܠܡܳܐ ܕܰܐܠܳܗܳܐ ܡܶܫܟܰܚ ܗܘܳܐ. ܡܺܝܬܳܐ ܓܶܝܪ ܕܢܶܗܘܶܐ ܨܰܠܡܳܐ ܠܚܰܝܳܐ܆ ܠܐ ܡܶܫܟܰܚ. ܘܢܶܚܙܶܐ ܟܡܳܐ ܡܰܘܕܰܥ. ܕܥܰܠ ܗܳܢܳܐ ܐܶܡܰܪ ܡܶܢ ܒܳܬܰܪ ܗܳܠܶܝܢ.
ܝܺܪܶܒ ܫܽܘܒܚܶܗ ܒܦܽܘܪܩܳܢܳܟ. ܫܽܘܒܚܳܐ ܘܙܺܝܘܳܐ ܣܳܡܬ ܥܠܰܘܗܝ. ܕܠܐ ܡܳܝܽܘܬܽܘܬܳܐ ܘܠܐ ܡܶܬܚܰܒܠܳܢܽܘܬܳܐ. ܡܰܢܽܘ ܗܰܘ ܕܣܳܦܶܩ ܢܶܥܽܘܠ ܢܶܚܙܶܐ ܗܰܘ ܫܽܘܒܚܳܐ ܘܙܺܝܘܳܐ ܕܠܳܐ ܡܶܬܚܰܒܰܠ܆ ܕܣܳܡ ܐܰܠܳܗܳܐ ܥܰܠ ܪܺܝܫܶܗ ܕܡܰܠܟܳܐ ܕܒܰܢ܇ ܐܶܠܐ ܗܰܘ ܕܰܡܕܰܪܰܫ ܒܓܶܠܝ̈ܢܶܐ ܕܪܽܘܚܳܐ. ܘܝܳܕܰܥ ܬܶܫܒܽܘܚܬܳܐ ܕܺܐܝܬ ܠܐܝܠܶܝܢ ܕܠܐ ܡܥܰܪܙܠܺܝܢ ܥܰܡ ܒܶܣܪܳܐ. ܫܽܘܒܚܶܗ ܕܶܝܢ ܝܺܪܶܒ ܒܦܽܘܪܩܳܢܶܗ ܕܰܐܠܳܗܳܐ܇ ܟܰܕ ܐܶܬܓܠܺܝ ܒܰܒܣܰܪ ܗܳܕܶܐ ܡܰܘܕܰܥ. ܡܶܛܽܠ ܠܰܡ ܕܒܰܚܙܳܬܳܐ ܠܥܺܝܢ ܡܰܠܐܟܷ̈ܐ ܘܰܒܢܰܝ̈ܢܳܫܳܐ ܝܰܩܰܪܬܳܝܗܝ ܠܒܶܣܪܳܐ ܕܺܝܠܰܢ. ܒܗܳܝ ܕܰܫܩܰܠܬ ܦܰܓܪܳܐ ܘܰܗܘܰܝܬ ܒܰܪܢܳܫܳܐ ܡܶܢ ܐܰܢܬܬܳܐ. ܐܰܘܪܶܒܬܳܝܗܝ ܐܳܦ ܠܗܰܘܢܳܐ ܡܰܠܟܳܐ. ܘܚܰܝܶܕܬܳܝܗܝ ܥܰܡ ܢܰܦܫܳܐ ܡܠܺܝܠܬܳܐ. ܘܺܝܪܶܒ ܘܶܐܬܝܰܩܰܪ ܒܦܽܘܪܩܳܢܳܟ. ܡܶܛܽܠ ܕܶܐܬܚܰܠܰܛ ܘܶܐܫܬܘܺܝ ܠܚܽܘܠܛܳܢܳܐ ܠܐ ܡܶܬܦܰܪܫܳܢܳܐ ܕܥܰܡܳܟ. ܘܒܳܟ ܡܶܟܺܝܠ ܐܶܬܚܰܪܰܪ ܡܶܢ ܠܰܘܛܬܳܐ ܕܰܥܒܳܪ ܦܽܘܩܕܳܢܳܐ.
ܡܶܛܠ ܕܰܥܒܰܕܬܳܝܗܝ ܒܽܘܪܟܬܳܐ ܠܥܳܠܰܡ ܥܳܠܡܺܝܢ. ܘܚܰܕܺܝܬܳܝܗܝ ܒܚܰܕܽܘܬܶܗ ܕܦܰܪܨܽܘܦܳܟ: ܡܶܛܠ ܕܡܰܠܟܳܐ ܡܣܰܒܰܪ ܒܡܳܪܝܳܐ. ܗܳܢܳܐ ܠܰܡ ܠܰܘ ܕܠܺܝܠܳܐܝܬ ܢܳܦܶܠ ܡܶܢ ܣܰܒܪܳܐ ܕܰܐܠܳܗܳܐ. ܘܠܰܘ ܐܰܝܟ ܢܰܦܫܳܐ ܕܒܰܙܒܰܢ ܡܶܬܕܰܒܪܳܐ ܠܰܪ̈ܓܺܝܓܳܬܶܗ ܕܦܰܓܪܳܐ܆ ܗܳܟܰܢܳܐ ܐܳܦ ܗܰܘܢܳܐ ܢܳܦܶܠ ܡܶܢ ܣܰܒܪܶܗ܇ ܐܶܠܳܐ ܐܰܝܟ ܠܳܐ ܡܶܨܛܰܠܝܳܢܳܐ ܩܳܐܶܡ ܠܽܘܩܒܰܠ ܚܺܐܦܶܝ̈ܗ̇ ܕܢܰܦܫܳܐ ܘܡܰܟܶܣ ܠܳܗ̇. ܘܕܳܐܶܢ ܥܰܡܳܗ̇ ܟܰܕ ܠܐ ܡܒܰܣܰܪ. ܘܥܳܒܶܕ ܠܳܗ̇ ܕܬܶܬܘܶܐ ܡܳܐ ܕܓܰܡܪܰܬ ܨܶܒܝܳܢܶܗ ܕܦܰܓܪܳܐ. ܐܶܠܳܐ ܚܙܺܝ ܐܰܝܟܰܢܳܐ ܒܶܗ ܒܥܶܕܳܢܳܐ ܥܰܠ ܕܡܶܬܕܒܰܪ ܒܰܩܛܺܝܪܳܐ ܡܶܢ ܚܺܐܦܳܐ ܕܒܶܣܪܳܐ. ܘܡܶܬܬܙܺܝܥ ܡܶܢ ܫܰܠܡܽܘܬܳܗ̇ ܕܢܰܦܫܳܐ ܕܰܠܘܳܬ ܒܺܝܫܬܳܐ. ܘܣܳܡܶܟ ܠܶܗ ܪܽܘܚܳܐ ܕܰܐܠܳܗܳܐ ܘܳܐܡܰܪ.
ܘܰܒܛܰܝܒܽܘܬܶܗ ܕܰܡܪܰܝܡܳܐ ܠܐ ܢܶܬܬܙܺܝܥ. ܘܠܐ ܢܶܬܪܗܶܒ. ܩܰܘܳܐ ܒܰܬܘܳܬܳܐ. ܐܰܟܶܣ܆ ܟܰܘܶܢ܆ ܡܰܪܬܶܐ ܚܰܘܳܐ ܐܰܝܟ ܨܰܠܡܳܐ ܕܰܐܠܳܗܳܐ ܛܢܳܢܳܐ ܚܰܪܺܝܦܳܐ. ܟܐܺܝ ܒܣܳܢܱ̈ܐܝܟ. ܟܰܕ
ܬܶܫܟܰܚ ܐܺܝܕܳܟ ܠܟܽܠܗܽܘܢ ܒܥܶܠܕܒܴ̈ܒܰܝܟ. ܘܝܰܡܺܝܢܳܟ ܬܶܫܟܰܚ ܠܣܳܢܱ̈ܐܝܟ. ܡܳܐ ܕܶܝܢ ܕܝܰܡܺܝܢܳܐ ܘܣܶܡܳܠܳܐ ܡܶܬܟܰܬܫܺܝܢ ܫܰܘܝܳܐܝܬ ܠܽܘܩܒܰܠ ܗܳܢܽܘܢ ܒܥܶܠܕ̈ܒܳܒܶܐ ܕܢܰܦܫܰܢ܆ ܙܳܟܽܘܬܳܐ ܡܫܰܡܠܰܝܬܳܐ ܙܳܟܶܝܢܰܢ. ܘܡܳܢܳܐ ܐܶܡܰܪ: ܐܶܢܳܐ ܣܶܡܳܠܐ. ܕܗܰܘ ܕܶܐܬܢܰܒܺܝ ܠܳܐ ܐܺܝܬ ܫܡܳܐ ܕܣܶܡܳܠܳܐ ܘܠܳܐ ܝܰܡܺܝܢܳܐ. ܐܺܝܕܳܟ ܓܶܝܪ ܐܶܡܰܪ ܕܡܶܫܟܚܳܐ ܠܰܒܥܶܠܕ̈ܒܳܒܶܐ. ܫܰܦܺܝܪ ܠܳܐ ܐܶܡܰܪ ܣܶܡܳܠܳܐ܆ ܐܶܠܐ ܐܺܝܕܳܐ. ܡܳܐ ܓܶܝܪ ܕܡܶܬܚܙܶܐ ܦܰܓܪܳܐ ܒܕܰܟܝܽܘܬܳܐ܆ ܠܰܘ ܣܶܡܳܠܰܐ ܗܘ ܡܶܟܺܝܠ. ܐܶܠܳܐ ܐܺܝܕܳܐ ܕܺܝܠܳܟ ܡܶܫܟܚܳܐ ܗܳܝ ܐܺܝܕܳܟ ܠܰܒܥܶܠܕ̈ܒܳܒܰܝܟ. ܐܳܦ ܝܰܡܺܝܢܳܟ ܬܶܫܟܰܚ ܠܣܳܢܱ̈ܐܝܟ.
ܬܶܥܒܶܕ ܐܶܢܽܘܢ ܐܰܝܟ ܬܰܢܽܘܪܳܐ ܕܢܽܘܪܳܐ ܠܙܰܒܢܳܐ ܕܪܽܘܓܙܳܐ. ܙܰܒܢܳܐ ܕܶܝܢ ܕܪܽܘܓܙܳܐ ܠܙܰܒܢܳܐ ܕܕܺܝܢܳܐ ܡܫܰܡܰܗ. ܬܰܡܳܢ ܓܶܝܪ ܡܰܘܩܶܕ ܡܳܪܝܳܐ ܠܰܒܥܶܠܕ̈ܒܳܒܰܘܗܝ ܕܨܰܠܡܶܗ ܒܪܽܘܓܙܶܗ.
ܡܳܪܝܳܐ ܒܪܽܘܓܙܶܗ ܢܰܘܩܶܕ ܐܶܢܽܘܢ: ܘܬܶܐܟܽܘܠ ܐܶܢܽܘܢ ܢܽܘܪܳܐ. ܗܳܝ ܕܰܡܛܰܝܒܳܐ ܡܶܢ ܡܳܪܝܳܐ ܠܳܐܟܶܠܩܰܪܨܳܐ ܘܰܠܡܰܠܐܟܰܘ̈ܗܝ. ܘܬܰܡܳܢ ܡܰܘܦܶܝܢ ܥܽܘܬܳܕ̈ܐ ܕܥܰܘܠܳܐ ܘܙܰܪܥܳܐ ܕܰܐܒܕܳܢܳܐ ܕܰܙܪܰܥܘ ܒܝܰܕ ܢܶܟܠܗܽܘܢ ܒܠܶܒܱ̈ܘܳܬܳܐ ܕܥܰܡ̈ܡܶܐ. ܘܶܐܒܰܕܘ ܙܳܪ̈ܽܘܥܶܐ ܡܶܢ ܢܰܦܫܳܐ ܒܳܒܶܝܠ܆ ܘܳܐܚܶܕ ܡܰܓܠܳܐ ܒܙܰܒܢܳܐ ܕܰܚܨܳܕܳܐ (ܐܪܡܝܐ ܢܢ: ܝܘ). ܘܰܐܝܟ ܡܶܠܬܳܐ ܢܒܺܝܳܝܬܳܐ ܕܶܐܡܪܰܬ. ܘܠܳܐ ܬܽܘܒ ܡܶܬܚܰܙܝܳܐ ܡܰܦܪܝܳܢܽܘܬܗܽܘܢ ܢܽܘܟܪܳܝܬܳܐ ܕܰܛܪ̈ܽܘܢܶܐ ܒܰܐܪܥܳܐ ܕܢܰܦܫܳܐ. ܡܶܛܽܠ ܕܶܐܡܰܪ ܢܒܺܝܳܐ ܓܰܠܝܳܐܝܬ:
ܘܦܺܐܪ̈ܰܝܗܘܢ ܡܶܢ ܐܰܪܥܳܐ ܬܰܘܒܶܕ: ܘܙܰܪܥܗܽܘܢ ܡܶܢ ܒܢܰܝ̈ܢܳܫܳܐ. ܘܒܰܡܨܺܝܕܬܳܐ ܕܥܰܬܶܕܘ ܠܡܶܛܡܰܪ ܢܶܬܬܰܚܕܽܘܢ. ܘܰܐܟܡܳܐ ܕܶܐܬܚܰܫܰܒܘ ܠܡܶܥܒܰܕ܆ ܢܶܗܘܶܐ ܠܗܽܘܢ ܒܕܺܝܢܳܐ ܟܺܐܢܳܐ ܕܰܐܠܳܗܳܐ.
ܡܶܛܽܠ ܕܰܨܠܰܘ ܥܠܰܝܟ ܒܺܝܫܬܳܐ. ܘܰܒܥܰܘ ܕܢܶܫܕܽܘܢܳܢܝ ܡܶܢ ܪܰܘܡܳܐ ܕܓܰܢܰܬ ܚܰܝܷ̈ܐ. ܘܰܣܒܰܪܘ ܕܳܐܦ ܠܺܝ ܢܶܥܒܕܽܘܢ ܡܳܪܘܕܳܐ ܐܰܟܡܳܐ ܕܗܶܢܽܘܢ ܗ̣ܘܰܘ ܡܳܪ̈ܽܘܕܶܐ. ܘܰܪܢܰܘ ܕܢܶܥܒܕܽܘܢ ܬܶܫܒܽܘܚܬܗܽܘܢ ܐܰܝܟ ܬܶܫܒܽܘܚܬܳܐ ܕܰܐܠܗܳܐ.
ܘܶܐܬܚܰܫܰܒܘ ܬܰܪܥܺܝܬܳܐ ܘܠܳܐ ܐܶܬܡܨܺܝܘ ܚܰܝܠܐ. ܡܶܛܠܗܳܢܳܐ ܐܰܝܟ ܥܒܳܕ ܐܺܝܕܰܝ̈ܗܽܘܢ ܬܰܗܦܶܟ ܠܗܽܘܢ ܡܳܪܝܳܐ: ܘܬܶܫܕܶܐ ܐܶܢܽܘܢ ܡܶܢ ܪܳܡܽܘܬܳܐ ܕܩܳܝܡܺܝܢ ܒܳܗ̇.
ܘܰܬܣܺܝܡ ܒܗܽܘܢ ܟܽܘܬܡܳܐ: ܘܛܘܝܳܒܳܟ ܬܰܬܩܶܢ ܥܰܠ ܦܰܪ̈ܨܽܘܦܰܝܗܽܘܢ. ܗܰܘ ܛܽܘܝܳܒܳܐ ܕܬܰܫܢܺܝܩܳܐ ܕܢܽܘܪܳܐ ܕܰܠܥܳܠܰܡ. ܘܗܰܘ ܠܽܘܚܳܡܳܐ ܕܛܰܝܶܒܬ ܠܓܽܘܡܳܕܳܐ ܕܡܰܪܳܚܽܘܬܗܽܘܢ ܐܰܗܦܶܟ ܥܠܰܝܗܽܘܢ.
ܘܶܐܬܬܪܺܝܡ ܡܳܪܝܳܐ ܒܥܽܘܫܢܳܟ. ܘܫܰܦܶܠ ܩܰܪܢܳܐ ܡܫܰܩܰܠܬܳܐ ܕܶܐܬܬܪܝܡܰܬ ܥܰܠ ܩܰܕܺܝ̈ܫܶܐ ܒܟܽܠܙܒܰܢ. ܘܰܚܢܰܢ ܥܰܡܳܟ ܦܪ̈ܺܝܩܰܝ ܒܓܰܢܒܳܪܽܘܬܳܟ ܘܓܳܠܘܬܳܐ ܕܰܐܦܢܺܝ ܕܪܳܥܳܟ ܡܶܢ ܫܽܘܥܒܳܕܶܗ ܕܡܳܪܽܘܕܳܐ.
ܢܙܰܡܰܪ ܘܰܢܫܰܒܰܚ ܓܰܢܒܳܪܽܘܬܳܟ. ܐܶܢ ܐܢܳܫ ܟܰܕ ܩܳܪܶܐ ܗܳܠܶܝܢ ܕܥܰܠ ܡܰܙܡܽܘܪܳܐ ܗܳܢܳܐ܆ ܣܳܒܰܪ ܕܠܰܘ ܐܰܝܟ ܕܶܐܬܒܰܚܰܢ̈ܝ ܐܳܦ ܐܶܬܟܬܶܒ̈ܝ ܐܺܝܬܰܝܗܶܝܢ. ܘܡܶܛܽܠ ܕܰܘܺܝܕ ܡܰܠܟܳܐ ܒܰܠܚܽܘܕ ܐܰܡܺܝܪ̈ܳܢ. ܘܠܰܘ ܐܰܝܟ ܕܶܐܬܚܙܺܝ ܠܰܢ ܒܝܰܕ ܛܰܝܒܽܘܬܳܐ ܕܪܽܘܚܳܐ ܓܳܠܶܐ ܥܰܡܺܝ̈ܩܳܬܶܗ ܠܪ̈ܳܚܡܰܘܗܝ. ܢܶܕܰܥ ܕܠܰܘ ܪ̈ܽܘܚܳܢܝܳܬܳܐ ܚܳܫܶܒ ܠܗܶܝܢ ܠܡܷ̈ܠܶܐ ܗܳܠܶܝܢ܆ ܐܶܠܳܐ ܦܰܓܪ̈ܳܢܝܳܬܳܐ. ܘܡܶܕܶܡ ܝܰܬܺܝܪܳܐ ܠܳܐ ܫܳܒܶܩ ܠܳܗ̇ ܠܢܰܦܫܳܐ ܕܬܶܬܪܰܥܶܐ. ܐܶܠܐ ܗܰܘ ܡܶܕܶܡ ܕܡܶܢ ܠܒܰܪ ܫܳܡܥܳܐ. ܚܢܰܢ ܕܶܝܢ ܟܰܕ ܗܳܠܶܝܢ ܐܶܬܪܰܥܺܝܢܰܢ ܒܝܰܕ ܡܳܪܢ ܘܰܐܟܬܶܒܢܰܢ܆ ܡܰܘܕܶܝܢܰܢ ܠܗܰܘ ܕܰܐܢܗܰܪ ܥܰܝ̈ܢܶܐ ܕܠܶܒܰܢ ܘܰܒܛܰܝܒܽܘܬܶܗ ܚܰܟܡܰܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܬܪܝܢ
ܡܰܘܕܰܥ ܥܰܠ ܚܰܫܰܘ̈ܗܝ ܠܐ ܥܕܺܝ̈ܠܶܐ ܕܥܰܡܰܢܽܘܐܝܠ: ܘܥܰܠ ܦܽܘܢܳܝܳܐ ܕܥܰܡ̈ܡܶܐ ܕܰܠܘܳܬ ܐܰܠܳܗܳܐ.
ܪܽܘܚܳܐ ܩܰܕܺܝܫܳܐ ܓܠܳܐ ܥܰܡܺܝ̈ܩܳܬܳܗ̇ ܕܰܐܠܳܗܽܘܬܳܐ ܗܰܘ ܕܒܰܕܶܩ ܐܪ̈ܳܙܶܐ ܠܙܰܕܺܝ̈ܩܶܐ܆ ܘܰܐܘܕܰܥ ܠܚܰܙܳܝܷ̈ܐ ܡܶܕܶܡ ܕܶܐܬܪܰܥܺܝ ܐܰܠܳܗܳܐ ܥܰܠ ܦܽܘܪܩܳܢܳܐ ܕܒܶܝܬ ܐܳܕܳܡ. ܘܬܽܘܒ ܒܕܰܘܺܝܕ ܫܦܺܝܥܽܘܬ ܐܪ̈ܳܙܶܐ ܓܠܳܐ ܘܚܰܘܺܝ ܢܰܗܺܝܪܳܐܺܝܬ. ܘܡܶܛܽܠ ܕܗܽܘ ܛܽܘܒܳܢܳܐ ܕܰܘܺܝܕ ܢܰܦܫܳܐ ܚܳܫܽܘܫܬܳܐ ܘܡܰܪܓܫܳܢܺܝܬܳܐ ܐܺܝܬ ܗܘܳܐ ܠܶܗ. ܘܪܰܘܪܒܳܐܝܬ ܡܦܰܫܶܩ ܠܶܗ ܠܐܪܳܙܳܐ܇ ܕܠܰܘ ܗܳܕܶܐ ܒܰܠܚܽܘܕ܆ ܐܶܠܐ ܟܰܕ ܡܚܰܘܶܐ ܐܶܒܠܐ ܘܚܰܫܳܐ ܗܰܘ ܕܺܐܝܬ ܗܘܳܐ ܠܶܗ ܥܰܠ ܡܶܫܬܰܒܩܳܢܽܘܬܳܐ ܕܓܶܢܣܳܐ ܕܰܒܢܰܝ̈ܢܳܫܳܐ ܡܶܢ ܒܛܺܝܠܽܘܬܳܐ ܐܰܠܳܗܳܝܬܳܐ. ܘܠܰܘ ܡܶܢ ܚܰܫܷ̈ܐ ܡܫܰܪܶܐ ܕܰܢܡܰܠܶܠ܆ ܗܳܠܶܝܢ ܡܳܪ̈ܳܢܳܝܶܐ ܘܦܳܪ̈ܽܘܩܳܝܶܐ ܕܰܐܪܓܶܫ ܒܓܶܠܝܳܢܗܽܘܢ. ܐܶܠܐ ܡܶܢ ܡܶܫܬܰܒܩܳܢܽܘܬܳܐ ܗܳܝ ܕܰܗܘܳܬ ܥܶܠܬܳܐ܆ ܘܰܐܝܟ ܐܰܝܢܳܐ ܕܣܰܓܝ ܐܰܒܺܝܠ ܥܰܠ ܡܰܦܽܘܠܬܳܐ ܘܥܰܠ ܡܶܫܬܰܒܩܳܢܽܘܬܳܐ ܘܡܶܬܪܰܚܩܳܢܽܘܬܳܐ܆ ܒܩܳܠܳܐ ܕܰܡܠܶܐ ܟܰܪܝܽܘܬܳܐ ܘܬܶܢܚܴ̈ܬܳܐ ܡܶܢ ܥܰܡܺܝܩܽܘܬ ܚܰܫܳܐ ܕܰܐܓܰܪ ܘܰܐܘܚܰܪ ܐܳܡܰܪ.
ܐܰܠܗܝ ܐܰܠܗܝ ܠܡܳܢܳܐ ܫܒܰܩܬܳܢܝ. ܘܰܐܪܚܶܩܬ ܡܶܢܝ ܦܽܘܪܩܳܢܝ ܒܡܷ̈ܠܐ ܕܣܰܟ̈ܠܘܳܬܝ. ܠܰܘ ܚܛܺܝܬܳܐ ܛܥܳܐ ܘܰܡܫܰܐܶܠ܇ ܕܡܶܛܠܡܳܢܳܐ ܐܶܫܬܒܶܩ ܓܶܢܣܳܐ ܐܢܳܫܳܝܳܐ. ܘܠܰܘ ܒܗܰܘ ܕܰܐܝܬܺܝ ܡܣܳܡ ܒܪܺܝܫܳܐ ܡܶܬܥܕܶܠ. ܘܰܐܝܟ ܚܰܣܺܝܪܳܐ ܪܳܫܶܐ ܠܕܰܝܳܢܳܐ. ܘܰܐܝܟ ܗܰܘ ܕܡܶܕܶܡ ܕܠܐ ܟܺܐܝܢ ܦܣܰܩ ܥܰܠ ܐܰܝܠܶܝܢ ܕܰܥܒܰܪܘ ܦܽܘܩܕܳܢܶܗ. ܐܶܠܐ ܟܰܕ ܐܰܪܓܶܫ ܒܚܰܫܳܐ ܐܰܠܳܗܳܝܳܐ ܕܒܶܗ ܡܶܬܓܡܰܪ ܦܽܘܪܩܳܢܶܗ ܕܥܳܠܡܳܐ. ܘܒܶܗ ܒܳܛܠܳܐ ܐܰܦܽܘܦܰܣܺܝܣ ܕܰܐܦܩܰܬ ܟܺܐܢܽܘܬܳܐ ܥܰܠ ܡܰܣܟ̈ܠܳܢܶܐ. ܡܦܺܝܣ ܗܘܳܐ ܢܒܺܝܳܐ ܘܳܐܡܰܪ: ܕܡܶܛܽܠܡܳܢܳܐ ܗܘܳܬ ܬܰܘܚܰܪܬܳܐ ܥܕܰܡܳܐ ܠܝܰܘܡܳܢܳܐ ܠܦܽܘܪܩܳܢܰܢ. ܘܡܶܛܽܠ ܡܳܢܳܐ ܒܟܽܠܶܗ ܗܳܢܳܐ ܪܽܘܚܩܳܐ ܢܰܓܺܝܪܳܐ ܣܳܡܬ ܐܶܢܽܘܢ ܠܙܰܕܺܝ̈ܩܶܐ ܒܰܓܠܺܝܙܽܘܬܳܐ ܗܳܝ ܕܡܶܢܳܟ. ܘܰܐܝܕܳܐ ܗ̱ܝ ܥܶܠܬܳܐ ܕܡܶܛܽܠܳܬܳܗ̇ ܐܶܫܬܒܶܩ ܐܳܡܰܪ. ܐܰܪܚܶܩܬ ܠܰܡ ܡܶܢܝ ܦܽܘܪܩܳܢܝ̱ ܒܡܷ̈ܠܶܐ ܕܣܰܟ̈ܠܘܳܬܝ. ܒܪܰܡ ܘܠܳܐ ܗܳܟܰܢܳܐ ܫܶܬܩܰܬ ܩܰܪܢܳܐ ܕܩܰܕܺܝ̈ܫܶܐ. ܡܶܢ ܗܳܝ ܕܬܰܙܥܶܩ ܘܬܶܫܰܐܠ ܒܬܰܪܥܳܐ ܕܦܳܪܽܘܩܳܐ. ܘܬܶܒܥܶܐ ܡܶܬܦܰܨܝܳܢܽܘܬܳܐ. ܐܶܠܐ ܓܳܥܶܝܢ ܗܘܰܘ ܒܠܺܠܝܳܐ ܘܒܺܐܝܡܳܡܳܐ ܕܢܶܬܥܢܽܘܢ. ܘܕܳܡܝܳܐ ܒܰܪܬ ܩܳܠܶܗ ܕܰܡܙܰܡܪܳܢܳܐ ܕܳܐܡܰܪ:
ܐܰܠܗܝ ܐܶܩܪܶܝܟ ܒܺܐܝܡܳܡܳܐ ܘܠܐ ܬܶܥܢܶܝܢܝ̱. ܘܰܒܠܺܠܝܳܐ ܘܠܐ ܬܟܰܬܰܪ ܠܺܝ. ܚܙܺܝ ܐܰܝܟܰܢܳܐ ܡܰܣܗܶܕ: ܕܠܐ ܫܠܺܝܘ ܩܰܕܺܝ̈ܫܶܐ ܡܶܢ ܕܩܳܪܶܝܢ ܠܶܗ ܒܺܐܝܡܳܡܳܐ ܘܰܒܠܺܠܝܳܐ: ܘܢܳܩܫܺܝܢ ܒܬܰܪܥܳܐ ܕܰܐܠܗܳܐ܆ ܕܢܶܫܡܰܥ ܐܶܢܽܘܢ ܘܰܢܚܰܘܶܐ ܦܽܘܪܩܳܢܗܽܘܢ ܒܝܰܘ̈ܡܰܝܗܽܘܢ. ܘܠܰܘ ܐܰܝܟ ܕܰܠܦܽܘܪܩܳܢܳܐ ܐܢܳܫܳܝܳܐ ܚܳܝܪܺܝܢ ܗܘܰܘ ܘܰܡܣܰܟܶܝܢ ܠܶܗ܆ ܐܶܠܳܐ ܟܰܕ ܝܳܕܥܺܝܢ ܠܗܰܘ ܕܡܶܬܓܠܶܐ ܕܩܰܕܺܝܫܰܐ ܗܘ ܡܶܢ ܥܳܠܰܡ. ܘܰܒܫܽܘܒܚܶܗ ܝܳܬܶܒ ܗܘܳܐ ܝܣܪܳܐܶܝܠ ܕܰܐܠܳܗܳܐ. ܘܡܰܘܕܶܐ ܡܙܰܡܪܳܢܳܐ ܐܰܝܟ ܕܡܶܢ ܦܽܘܡܳܐ ܕܟܽܠܗܽܘܢ ܕܡܰܢ ܐܺܝܬܰܘܗܝ. ܘܳܐܡܰܪ.
ܐܰܢܬ ܩܰܕܺܝܫ ܘܝܳܬܶܒ ܒܫܽܘܒܚܳܟ ܝܺܣܪܳܐܶܝܠ. ܒܟ ܣܰܒܰܪܘ ܐܰܒܴ̈ܗܰܝ: ܣܰܒܰܪܘ ܒܳܟ ܘܦܰܨܺܝܬ ܐܶܢܽܘܢ. ܠܘܳܬܳܟ ܓܥܰܘ ܘܶܐܬܦܰܨܺܝܘ: ܒܳܟ ܣܰܒܰܪܘ ܘܠܐ ܒܗܶܬܘ. ܫܰܦܺܝܪܳܐ ܓܶܝܪ ܡܰܘܕܝܳܢܽܘܬܳܐ ܕܣܳܒܷ̈ܐ ܩܰܕܺܝ̈ܫܶܐ ܕܒܶܝܬ ܐܰܒܪܳܗܳܡ. ܐܳܡܰܪ ܛܽܘܒܳܢܳܐ ܕܰܘܺܝܕ ܘܰܐܣܗܶܕ ܥܠܰܝܗܽܘܢ. ܕܰܒܡܶܠܬܶܗ ܕܰܐܒܳܐ ܡܣܰܒܪܺܝܢ ܗܘܰܘ. ܘܠܶܗ ܝܳܕܥܺܝܢ ܐܰܠܳܗܳܐ ܕܡܶܢ ܐܰܠܳܗܳܐ. ܘܰܠܘܳܬܶܗ ܓܳܥܶܝܢ ܗܘܰܘ ܒܽܐܘ̈ܠܨܳܢܰܝܗܽܘܢ. ܕܳܡܶܐ ܕܚܰܘܺܝ ܕܗܳܠܶܝܢ ܕܰܗܘܰܘ ܐܰܒܳܗܷ̈ܐ ܕܙܰܕܺܝ̈ܩܶܐ ܠܥܳܠܡܳܐ. ܠܘܳܬ ܐܰܠܳܗܳܐ ܡܶܠܬܳܐ ܓܳܥܶܝܢ ܗܘܰܘ. ܘܡܶܫܬܰܘܙܒܺܝܢ ܡܶܢ ܒܥܶܠܕ̈ܒܳܒܰܝܗܽܘܢ. ܘܢܰܫܪܽܘܢ ܕܰܐܠܳܗܰܐ ܗܘ ܕܰܐܒܳܗܴ̈ܬܳܐ ܕܺܝܠܗܽܘܢ ܘܰܢܗܰܝܡܢܽܘܢ ܒܶܗ. ܘܠܰܘ ܡܶܢ ܕܽܘܡܝܳܐ ܪܰܒܳܐ ܡܰܝܬܶܐ ܠܗܽܘܢ ܥܠܰܘܗܝ ܣܳܗܕܽܘܬܳܐ. ܘܠܰܘ ܡܶܢ ܓܰܘ ܢܽܘܪܳܐ ܕܫܰܪܝܳܐ ܒܣܰܢܝܳܐ ܡܰܫܡܰܥ ܩܳܠܳܐ ܕܰܥܠܰܘܗܝ. ܐܶܠܐ ܡܶܢ ܬܰܚܘܺܝܬܳܐ ܡܡܰܟܰܟܬܳܐ. ܘܡܶܢ ܚܙܳܬܳܐ ܕܒܰܣܝܳܐ ܘܫܺܝܛܳܐ. ܘܠܰܘ ܐܰܝܟ ܐܰܪܝܳܐ ܕܰܕܚܺܝܠ. ܘܠܐ ܐܰܝܟ ܓܰܢ̱ܒܳܪܳܐ ܕܥܰܙܺܝܙ. ܐܶܠܐ ܡܶܢ ܬܰܘܠܥܳܐ ܡܫܰܪܶܐ ܕܰܢܚܰܘܶܐ ܡܰܦܩܳܢܳܐ ܕܓܶܠܝܳܢܳܐ ܕܡܶܬܒܰܪܢܫܳܢܽܘܬܶܗ.
ܐܶܢܳܐ ܠܡ ܬܰܘܠܥܳܐ ܐܢܳܐ ܘܠܐ ܒܰܪܢܳܫܳܐ. ܗܳܕܶܐ ܡܶܠܬܳܐ ܠܰܘ ܡܶܢ ܢܒܺܝܳܐ ܫܳܡܥܺܝܢܰܢ ܠܳܗ̇. ܥܕܰܡܳܐ ܓܶܝܪ ܠܗܳܢܳܐ ܦܶܬܓܳܡܳܐ ܪܽܘܚܳܐ ܡܡܰܠܶܠ ܗܘܳܐ ܒܰܢܒܺܝܳܐ. ܗܳܫܳܐ ܕܶܝܢ ܠܰܘ ܪܽܘܚܳܐ ܘܠܐ ܢܒܺܝܳܐ. ܐܶܠܐ ܗܽܘ ܡܶܠܬܳܐ ܐܰܠܳܗܳܐ ܐܶܡܰܪ ܥܰܠ ܢܰܦܫܶܗ܆ ܕܬܰܘܠܥܳܐ ܐܢܳܐ ܘܠܐ ܒܰܪܢܳܫܳܐ. ܬܰܘܠܥܳܐ ܕܶܝܢ ܠܰܘ ܡܶܛܠ ܗܳܝ ܕܡܶܢ ܣܰܪܝܽܘܬܳܐ ܕܦܰܓܪ̈ܶܐ ܕܰܫܪܶܟܘ ܠܰܚܒܳܠܳܐ ܢܳܦܩܳܐ ܡܶܢ ܥܶܠܰܬ ܡܶܬܚܰܒܠܳܢܽܘܬܳܐ ܘܣܰܪܝܽܘܬܳܐ. ܐܶܠܐ ܐܶܢ ܨܳܒܶܐ ܐܰܢܬ ܢܰܓܰܪ ܠܘܳܬ ܡܶܠܬܳܐ ܩܰܠܺܝܠ ܥܶܕܳܢܳܐ܆ ܘܡܶܫܟܚܺܝܢܰܢ ܕܣܰܓܺܝ ܠܳܚܶܡ ܟܽܘܢܳܝܳܐ ܗܳܢܳܐ ܠܗܰܘ ܣܽܘܥܪܳܢܳܐ ܕܡܶܬܒܰܪܢܫܳܢܽܘܬܶܗ ܕܡܳܪܰܢ ܘܦܳܪܘܩܰܢ. ܬܪܶܝܢ ܕܶܝܢ ܢܺܝ̈ܫܶܐ ܐܺܝܬ ܠܰܢ ܕܰܢܚܰܘܶܐ܆ ܥܰܠ ܟܽܘܢܳܝܳܐ ܕܬܰܘܠܥܳܐ ܗܳܕܶܐ ܕܶܐܡܰܪ ܡܶܠܬܳܐ ܒܰܢܒܺܝܳܐ܆ ܕܬܰܘܠܥܳܐ ܐܢܳܐ ܘܠܐ ܒܰܪܢܳܫܳܐ. ܬܰܘܠܥܳܐ ܩܳܪܶܐ ܢܰܦܫܶܗ ܟܰܕ ܡܚܰܘܶܐ ܒܝܰܕ ܗܳܕܶܐ܆ ܕܡܶܢܶܗ ܕܫܽܘܪܳܝܳܐ ܕܓܶܠܝܳܢܶܗ܆ ܠܰܒܢܰܝ̈ܢܳܫܳܐ ܐܶܬܕܰܡܺܝ. ܒܗܳܝ ܕܗܳܢܰܘ ܛܶܟܣܳܐ ܕܟܽܠ ܒܰܪܢܳܫܳܐ ܕܥܳܐܶܠ ܠܥܳܠܡܳܐ. ܡܳܐ ܕܰܡܫܰܪܶܐ ܕܢܶܬܒܛܶܢ܆ ܕܡܽܘܬܳܐ ܠܽܘܩܕܰܡ ܕܬܰܘܠܥܳܐ ܢܳܣܶܒ ܒܫܽܘܪܳܝܶܗ. ܡܳܐ ܓܶܝܪ ܕܰܢܦܰܠ ܙܰܪܥܳܐ ܒܓܰܘ ܡܰܪܒܥܳܐ. ܗܰܘ ܕܰܟܝܳܢܳܐܝܬ ܐܝܬܰܘܗܝ ܚܶܘܳܪܳܐ܆ ܗܳܝܕܶܝܢ ܡܩܰܒܶܠ ܚܽܘܠܛܳܢܳܐ ܡܶܢ ܡܰܪܒܥܳܐ ܕܡܳܐ. ܘܡܳܐ ܕܶܝܢ ܕܶܐܬܚܰܝܰܕܘ ܠܰܚ̈ܕܳܕܶܐ ܘܰܗܘܰܘ ܚܰܕ܆ ܘܒܶܗ ܒܥܶܕܳܢܳܐ ܡܶܬܢܰܦܚܳܐ ܒܶܗ ܢܰܦܫܳܐ. ܠܰܘ ܡܪܰܟܒܳܐ ܒܗܰܕ̈ܡܶܐ ܡܶܬܦܰܪ̈ܫܳܢܶܐ ܡܶܬܩܰܝܰܡ ܡܶܢܶܗ ܒܫܽܘܪܳܝܳܐ. ܢܰܦܫܳܐ ܒܳܗ̇ ܒܫܳܥܬܳܐ ܡܩܰܒܶܠ. ܘܥܰܠܗܳܕܶܐ ܫܳܩܶܠ ܬܰܘܠܥܳܐ ܕܽܘܡܝܳܐ ܕܬܰܘܠܥܳܐ ܚܶܘܳܪܬܳܐ ܕܪ̈ܰܚܫܳܐ. ܘܰܡܫܰܪܶܐ ܡܶܟܺܝܠ ܕܢܶܬܩܰܝܰܡ ܒܚܰܝܽܘܬܳܐ. ܘܰܠܓܰܘ ܡܶܢ ܫܽܘܪܺܝܩܳܐ ܒܰܪܳܝܬܳܐ ܘܬܰܘܠܥܳܢܺܝܬܳܐ ܡܶܬܪܰܟܰܒ ܘܡܶܬܩܰܝܰܡ ܒܓܰܘܳܗ̇ ܒܗܰܕܳܡܷ̈ܐ ܥܕܰܡܳܐ ܠܝܰܘ̈ܡܳܬܳܐ ܐܰܪܒܥܺܝܢ. ܘܡܶܢ ܕܶܝܢ ܕܰܡܠܰܘ ܠܶܗ ܐܰܪܒܥܺܝܢ ܝܰܘܡܺܝ̈ܢ܆ ܥܳܒܰܪ ܠܶܗ ܡܶܟܺܝܠ ܡܶܢ ܕܡܽܘܬܳܐ ܕܬܰܘܠܥܳܐ ܒܗܳܝ ܕܡܶܬܓܡܰܪ ܒܪܽܘܟܳܒܳܐ ܕܗܰܕܳܡܷ̈ܐ ܡܦܰܪ̈ܫܶܐ. ܘܥܰܡܶܗ ܫܳܩܠܳܐ ܬܰܪܒܺܝܬܳܐ ܐܳܦ ܫܽܘܪܺܝܩܳܐ ܬܰܘܠܥܳܢܺܝܬܳܐ ܘܰܡܫܰܪܝܳܐ ܡܶܟܺܝܠ ܕܬܶܗܘܶܐ ܠܳܗ̇ ܒܓܰܘ ܡܰܪܒܥܳܐ ܫܠܺܝܬܳܐ. ܘܰܥܠܰܘܗܝ ܡܩܰܘܝܳܐ ܥܕܰܡܳܐ ܠܝܰܘܡܳܐ ܕܡܰܘܠܳܕܶܗ܇ ܘܗܺܝ ܢܳܛܪܳܐ ܢܫܰܡܬܶܗ. ܘܰܒܓܰܘ ܟܰܪܣܳܐ ܠܳܐ ܢܶܬܢܟܶܐ. ܘܥܰܡܶܗ ܓܶܝܪ ܢܳܦܩܳܐ. ܘܗܳܝܕܶܝܢ ܫܳܒܶܩ ܠܳܗ̇ ܥܽܘܠܳܐ ܡܳܐ ܕܡܶܬܺܝܠܶܕ. ܘܰܡܫܰܪܶܐ ܕܰܢܩܰܒܶܠ ܚܰܝܷ̈ܐ ܐܢܳܫܳܝܷ̈ܐ. ܠܗܳܢܳܐ ܕܗܳܘܶܐ ܡܶܢܶܗ ܒܰܪܢܳܫܳܐ. ܚܰܘܺܝ ܐܰܠܳܗܳܐ ܕܶܐܬܢܰܚܰܬ ܟܰܕ ܗܘܳܐ ܒܰܪܢܳܫܳܐ܆ ܡܶܛܠ ܕܠܳܐ ܢܶܡܢܶܝܘܗܝ ܡܶܢ ܙܽܘܘܳܓܳܐ܆ ܘܢܰܣܒܰܪ ܕܥܰܠ ܕܰܗܘܳܐ ܡܶܢܰܢ ܘܒܰܕܡܽܘܬܰܢ܆ ܐܳܦ ܡܶܢ ܙܰܪܥܳܐ ܕܙܽܘܘܳܓܳܐ ܫܶܘܚܰܬ ܡܰܘܥܺܝܬܶܗ܆ ܒܳܗ̇ ܒܰܕܡܽܘܬܳܐ ܐܶܡܰܪ: ܕܬܰܘܠܥܳܐ ܡܰܢ ܗܳܘܶܐ ܐܢܳܐ܆ ܐܶܠܳܐ ܠܰܘ ܒܰܪܢܳܫܳܐ. ܗܳܢܰܘ ܕܠܰܘ ܓܰܒܪܳܐ ܗܘܳܐ ܥܶܠܬܳܐ ܕܒܰܛܢܳܐ ܕܺܝܠܝ ܕܡܶܢ ܒܬܽܘܠܬܳܐ. ܦܰܫܶܩ ܕܶܝܢ ܘܛܳܒ ܢܰܗܺܝܪܳܐܝܬ. ܒܗܳܝ ܕܶܐܡܰܪ: ܕܬܰܘܠܥܳܐ ܐܢܳܐ ܘܠܳܐ ܒܰܪܢܳܫܳܐ. ܡܶܛܽܠ ܕܙܳܕܶܩ ܕܶܝܢ ܕܰܢܚܰܘܶܐ ܕܰܐܝܕܳܐ ܬܰܘܠܥܳܐ ܢܳܒܥܳܐ ܘܫܳܘܚܳܐ ܕܠܳܐ ܙܽܘܘܳܓܳܐ. ܘܳܐܦ ܗܳܕܶܐ ܦܫܺܝܩܳܐܝܺܬ ܡܚܰܘܶܐ ܐܢܳܐ. ܦܳܪܰܚܬܳܐ ܚܕܳܐ ܕܡܶܬܩܰܪܝܳܐ ܦܽܘܢܺܝܟܳܘܣ ܗܳܕܶܐ ܐܰܝܟ ܕܳܐܡܪܺܝܢ ܕܰܥܕܰܡܳܐ ܠܚܰܡܶܫܡܳܐܐ ܫܢܺܝ̈ܢ ܚܳܝܳܐ. ܘܡܶܫܬܰܟܚܳܐ ܒܰܐܬܪ̈ܰܘܳܬܳܐ ܕܗܶܢܕܘܴ̈ܝܶܐ. ܗܳܕܶܐ ܕܶܝܢ ܡܳܐ ܕܩܳܪܶܐ ܠܳܗ̇ ܙܰܒܢܳܐ ܕܰܬܫܰܢܶܐ ܡܶܢ ܗܳܠܶܝܢ ܚܰܝܷ̈ܐ܆ ܐܳܬܝܳܐ ܠܗܺܝܠܺܝܦܳܘܣ ܕܺܐܝܬ ܒܡܶܨܪܶܝܢ܆ ܘܚܳܙܶܐ ܠܳܗ̇ ܟܳܗܢܳܐ ܕܬܰܡܳܢ. ܘܝܳܕܰܥ ܗܘܳܐ ܠܗ ܕܝܢ ܠܐܪܳܙܳܐ. ܘܡܶܢ ܒܳܬܰܪܟܶܢ ܦܳܪܚܳܐ ܗܘܳܬ܆ ܘܰܡܫܰܢܝܳܐ ܠܛܽܘܪܳܐ ܕܡܶܬܩܪܶܐ ܕܠܶܒܢܳܢ. ܘܡܶܢ ܬܰܡܳܢ ܦܳܪܚܳܐ ܒܛܺܝܠܳܐܝܬ ܘܰܡܟܰܢܫܳܐ ܥܶܩܳܪ̈ܶܐ ܒܰܣܺܝ̈ܡܶܐ ܘܡܳܠܝܳܐ ܓܶܦܶܝ̈ܗ̇. ܟܳܗܢܳܐ ܕܶܝܢ ܥܰܕ ܐܳܬܝܳܐ ܡܳܠܶܐ ܗܘܳܐ ܠܳܗ̇ ܥܠܳܬܳܐ ܗܳܝ ܕܰܒܢܳܐ ܗܘܳܐ ܩܰܝ̈ܣܶܐ ܕܟܰܪܡܳܐ. ܘܡܳܐ ܕܶܐܬܳܬ ܦܳܪܰܚܬܳܐ ܗܳܝ܆ ܘܶܐܫܟܚܰܬ ܥܠܳܬܳܐ ܟܰܕ ܒܰܢܝܳܐ ܘܡܰܠܝܳܐ ܩܰܝ̈ܣܶܐ: ܘܪܳܒܥܳܐ ܠܥܶܠ ܡܶܢܳܗ̇: ܘܩܳܕܚܳܐ ܢܽܘܪܳܐ ܡܶܢ ܥܠܳܬܳܐ ܕܡܶܫܬܰܓܪܳܐ ܒܚܰܡܺܝܡܽܘܬܳܐ ܕܓܶܦܶܝ̈ܗ̇ ܕܦܽܘܢܺܝܟܳܘܣ ܘܝܳܩܕܳܐ ܗܳܝ ܥܠܳܬܳܐ. ܘܰܒܝܰܘܡܳܐ ܩܰܕܡܳܝܳܐ ܐܳܬܶܐ ܟܳܗܢܳܐ ܘܰܡܦܰܠܶܐ ܠܶܗ ܠܩܶܛܡܳܐ ܗܰܘ ܕܦܳܪܰܚܬܳܐ: ܘܡܶܫܟܰܚ ܒܶܗ ܬܰܘܠܥܳܐ ܕܪ̈ܰܚܫܳܐ ܡܶܢ ܩܶܛܡܳܐ. ܘܰܒܝܰܘܡܳܐ ܕܰܬܪܶܝܢ ܡܶܫܟܰܚ ܠܳܗ̇ ܦܳܪܰܚܬܳܐ ܚܶܘܳܪܬܳܐ ܘܰܡܫܰܡܠܰܝܬܳܐ ܐܰܝܟ ܗܳܝ ܕܝܶܩܕܰܬ. ܘܗܳܝܕܶܝܢ ܣܳܓܕܳܐ ܦܳܪܰܚܬܳܐ ܗܳܝ ܘܫܳܐܠܳܐ ܫܠܳܡܶܗ ܕܟܳܗܢܳܐ ܘܦܳܢܝܳܐ ܠܰܐܬܪܳܗ̇. ܠܗܳܕܶܐ ܬܰܘܠܥܳܐ ܗܳܟܺܝܠ ܕܪܶܚܫܰܬ ܘܢܶܦܩܰܬ ܡܶܢ ܩܶܛܡܳܐ ܕܠܐ ܙܽܘܘܳܓܳܐ ܕܰܡܺܝ ܡܳܪܰܢ ܢܰܦܫܶܗ. ܕܰܐܝܟܰܢܳܐ ܕܬܰܘܠܥܳܐ ܗܳܝ ܢܳܦܩܳܐ ܟܰܕ ܠܳܐ ܡܶܣܬܰܢܩܳܐ ܥܰܠ ܬܶܫܡܶܫܬܳܐ ܕܙܽܘܘܳܓܳܐ܆ ܗܳܟܰܢܳܐ ܐܳܦ ܡܶܠܬܶܗ ܕܰܐܒܳܐ܆ ܗܰܘ ܦܳܪܰܚܬܳܐ ܚܶܘܳܪܬܳܐ ܘܕܰܛܥܺܝܢ ܪܺܝܚܳܐ ܒܰܣܺܝܡܳܐ܆ ܐܶܬܳܐ ܠܘܳܬ ܟܳܗ̈ܢܶܐ ܕܥܰܡܳܐ ܕܝܽܘ̈ܕܳܝܶܐ ܒܐܪ̈ܳܙܶܐ ܘܰܒܦܷ̈ܠܳܐܬܳܐ. ܘܟܰܕ ܐܰܪܓܶܫܘ܆ ܥܰܬܶܕܘ ܠܶܗ ܥܠܳܬܳܐ ܥܰܠ ܓܳܓܽܘܠܬܳܐ. ܘܟܰܕ ܐܰܝܬܺܝ ܠܗܽܘܢ ܓܶܦܰܘ̈ܗܝ ܕܰܡܠܶܝܢ ܪܺܝܚܳܐ ܒܰܣܺܝܡܳܐ ܡܶܢ ܛܽܘܪܳܐ ܥܶܠܳܝܳܐ ܕܰܫܡܰܝܳܐ. ܬܠܰܐܘܽܗܝ ܥܰܠ ܩܰܝܣܳܐ ܕܰܙܩܺܝܦܳܐ܆ ܥܰܠ ܕܢܶܗܘܶܐ ܝܳܕܰܥ ܟܽܠܢܳܫ. ܕܰܥܕܰܡܳܐ ܕܶܐܬܳܐ ܠܝܰܠܕܳܐ ܠܳܐ ܩܪܶܒ ܨܶܝܕ ܚܱ̈ܫܶܐ. ܚܠܳܦ ܣܰܓܺܝ̈ܐܳܬܳܐ ܐܚܪ̈ܳܢܝܳܬܳܐ ܕܶܐܬܡܱ̈ܠܰܠܝ ܒܰܢܒܺܝܷ̈ܐ ܐܚܪ̈ܳܢܶܐ ܥܰܠ ܡܰܘܠܳܕܶܗ. ܘܡܰܠܶܠ ܝܰܘܡܳܢ ܒܡܰܙܡܽܘܪܳܐ ܗܳܢܳܐ. ܕܶܐܢܳܐ ܬܰܘܠܥܳܐ ܐܢܳܐ ܘܠܳܐ ܒܰܪܢܳܫܳܐ. ܘܰܚܠܳܦ ܗܳܝ ܕܢܺܐܡܰܪ. ܒܰܪܢܳܫܳܐ܇ ܘܠܶܒܫܶܬ ܒܰܪܢܳܫܳܐ: ܘܰܗܘܺܝܬ ܝܰܠܽܘܕܳܐ܆ ܘܶܐܬܺܝܬ ܠܬܰܪܒܺܝܬܳܐ. ܗܳܕܶܐ ܒܰܠܚܽܘܕ ܣܶܦܩܰܬ ܠܬܶܫܡܶܫܬܳܐ ܕܐܪܳܙܶܗ ܒܕܽܘܟܬܳܐ ܗܳܕܶܐ. ܥܰܡ ܗܳܝ ܕܒܳܬܪܶܗ ܕܶܐܡܰܪ:
ܚܶܣܕܳܐ ܕܰܒܢܰܝ̈ܢܳܫܳܐ ܘܣܽܘܠܳܐܢܶܗ ܕܥܰܡܳܐ. ܟܽܠ ܕܰܚܙܰܐܘܽܢܝ ܡܰܝܶܩܘ ܒܺܝ: ܐܰܦܛܰܪܘ ܒܣܶܦ̈ܘܳܬܗܽܘܢ ܘܰܐܢܺܝܕܘ ܒܪ̈ܺܝܫܰܝܗܽܘܢ. ܥܰܠ ܡܰܢ ܓܶܝܪ ܗܘܳܬ܆ ܥܰܠ ܕܰܘܺܝܕ ܠܳܐ ܗܘܳܬ. ܥܰܠ ܐܶܫܰܥܝܳܐ ܠܳܐ ܗܘܳܬ. ܩܰܪܺܝܒ ܓܶܝܪ ܠܦܽܘܫܳܩܶܗ ܕܦܶܬܓܳܡܳܐ ܗܳܢܳܐ ܗܰܘ ܚܶܣܕܳܐ ܕܪܰܘܒܳܐ ܕܟܳܗܢܷ̈ܐ ܘܰܕܣܳܦܪ̈ܶܐ܇ ܕܰܣܥܰܘ ܥܰܠ ܡܶܠܬܶܗ ܕܰܐܒܳܐ. ܘܰܐܝܠܶܝܢ ܕܥܳܒܪܺܝܢ ܗܘܰܘ ܘܰܡܓܰܕܦܺܝܢ ܗܘܰܘ ܥܠܰܘܗܝ ܟܰܕ ܗܽܘ ܒܰܙܩܺܝܦܳܐ. ܘܰܡܢܺܝܕܺܝܢ ܒܪ̈ܺܝܫܰܝܗܽܘܢ ܘܳܐܡܪܺܝܢ. ܣܳܬܰܪ ܗܰܝܟܠܳܐ ܘܒܳܢܶܐ ܠܶܗ ܠܰܬܠܳܬܳܐ ܝܰܘ̈ܡܺܝܢ. ܚܽܘܬ ܡܶܢ ܙܩܺܝܦܳܐ ܘܰܢܗܰܝܡܶܢ ܒܳܟ (ܡܬܝ ܟܙ:ܠܛ-ܡ). ܐܚܪ̈ܳܢܶܐ ܟܰܕ ܡܡܰܠܠܺܝܢ ܗܘܰܘ ܘܰܡܫܰܡܠܶܝܢ ܗܳܕܶܐ ܕܶܐܡܰܪ ܢܒܺܝܳܐ ܬܢܳܢ. ܬܟܺܝܠ ܥܰܠ ܐܰܠܳܗܳܐ ܢܶܦܪܩܺܝܘܗܝ ܗܳܫܳܐ܇ ܐܶܢ ܨܳܒܶܐ ܒܶܗ. ܐܶܡܰܪ ܓܶܝܪ ܕܰܒܪܶܗ ܐܢܳܐ ܕܰܐܠܗܳܐ (ܡܬܝ ܟܙ: ܡܓ). ܡܳܢܳܐ ܫܽܘܚܠܳܦܳܐ ܐܺܝܬ ܒܰܝܢܳܬ ܗܳܠܶܝܢ ܩܴ̈ܠܶܐ ܠܗܳܠܶܝܢ ܕܶܐܡܰܪ ܕܰܘܺܝܕ.
ܐܶܬܬܟܶܠ ܥܰܠ ܡܳܪܝܳܐ܆ ܢܦܰܨܺܝܘܗܝ܇ ܘܰܢܦܰܠܛܺܝܘܗܝ ܐܶܢ ܨܳܒܶܐ ܒܶܗ. ܡܶܛܽܠ ܕܰܐܢܬ ܗܘ ܬܽܘܟܠܳܢܝ̱ ܡܶܢ ܡܰܪܒܥܳܐ: ܘܣܰܒܪܝ ܡܶܢ ܬܕܶܝ̈ܗ̇ ܕܶܐܡܝ̱. ܥܠܰܝܟ ܐܶܫܬܕܺܝܬ ܡܶܢ ܡܰܪܒܥܳܐ: ܘܡܶܢ ܟܰܪܣܳܗ̇ ܕܶܐܡܝ̱. ܐܰܠܳܗܝ ܐܰܢܬ ܠܳܐ ܬܰܪܚܶܩ ܡܶܢܝ܆ ܡܶܛܠ ܕܽܐܘܠܨܳܢܳܐ ܩܪܶܒ ܘܠܰܝܬ ܕܰܡܥܰܕܰܪ. ܗܳܠܶܝܢ ܦܶܬܓܳܡܷ̈ܐ ܦܝܴ̈ܣܶܐ ܐܶܢܽܘܢ ܕܟܺܐܢܷ̈ܐ ܠܘܳܬ ܡܶܠܬܳܐ ܐܠܰܗܳܐ. ܕܠܳܐ ܡܶܛܽܠ ܒܺܝܫܽܘܬܶܗ ܕܥܰܡܳܐ ܢܰܪܦܶܐ ܘܰܢܫܰܢܶܐ. ܘܠܳܐ ܢܶܓܡܽܘܪ ܘܰܢܫܰܡܠܶܐ ܦܽܘܪܩܳܢܳܐ ܗܰܘ ܕܡܶܛܽܠܳܬܶܗ ܐܶܬܳܐ. ܒܳܬܰܪܗܽܘܢ ܕܶܝܢ ܥܳܐܠܳܐ ܡܶܠܬܶܗ ܕܺܝܠܶܗ ܕܥܰܡܰܢܽܘܐܝܠ. ܘܰܡܚܰܘܶܐ ܕܶܝܢ ܐܘܠܨܳܢܷ̈ܐ ܐܰܝܠܶܝܢ ܕܩܰܒܶܠ ܥܠܰܘܗܝ ܕܢܶܣܒܽܘܠ. ܐܶܡܰܪ ܓܶܝܪ.
ܐܶܬܟܰܪܟܽܘܢܝ̱ ܬܰܘܪ̈ܶܐ ܣܰܓܝܷ̈ܐ: ܘܰܐܪ̈ܘܳܢܶܐ ܕܒܰܝܫܳܢ ܚܰܕܪܽܘܢܝ̱. ܬܰܘܪ̈ܶܐ ܗܳܪܟܳܐ ܩܳܪܶܐ ܠܪ̈ܰܒܰܝ ܟܳܗ̈ܢܶܐ ܕܝܽܘܕܳܝܷ̈ܐ. ܡܶܛܽܠ ܕܗܶܢܽܘܢ ܗܘܰܘ ܒܗܰܘ ܙܰܒܢܳܐ ܡܰܠܦܳܢܷ̈ܐ ܕܥܰܡܳܐ. ܗܳܢܽܘܢ ܕܰܒܬܰܘܪ̈ܶܐ ܡܶܬܡܰܬܠܺܝܢ. ܐܰܪ̈ܘܳܢܶܐ ܕܶܝܢ ܕܒܰܝܫܳܢ. ܠܥܰܡ̈ܡܶܐ ܐܰܝܠܶܝܢ ܕܺܐܝܬ ܗܘܰܘ ܥܰܡ ܐܺܝܪܳܘܕܺܝܣ ܘܦܺܝܠܰܛܽܘܣ ܡܟܰܢܶܐ. ܗܳܢܽܘܢ ܓܶܝܪ ܠܳܐ ܟܕܺܝܢܺܝܢ ܗܘܰܘ ܒܢܺܝܪܶܗ ܕܢܳܡܽܘܣܳܐ. ܐܰܝܟܰܢܳܐ ܕܳܐܦ ܐܰܪ̈ܘܳܢܶܐ ܗܳܕܶܐ ܡܰܘܕܥܺܝܢ ܒܟܽܘܢܳܝܳܐ. ܥܰܠܗܳܝ ܕܠܳܐ ܥܕܰܟܺܝܠ ܐܶܬܟܒܶܫܘ ܒܢܺܝܪܳܐ ܡܰܢ ܕܦܽܘܠܚܳܢܳܐ. ܡܰܝܬܶܐ ܕܶܝܢ ܢܒܺܝܳܐ ܐܳܦ ܚܦܺܝܛܽܘܬܳܐ ܕܰܗܘܳܬ ܠܗܽܘܢ ܥܰܠ ܩܶܛܠܶܗ ܡܳܪܳܢܳܝܳܐ. ܠܰܘ ܐܰܝܟ ܬܰܘܪ̈ܶܐ ܘܠܰܘ ܐܰܝܟ ܐܰܪ̈ܘܳܢܶܐ. ܗܳܠܶܝܢ ܓܶܝܪ ܠܳܐ ܐܺܝܬܰܝܗܽܘܢ ܡܶܢ ܟܝܳܢܳܐ ܩܳܛܘ̈ܠܶܐ ܐܶܠܳܐ ܡܫܰܥܒ̈ܕܶܐ. ܡܶܛܠܗܳܢܳܐ ܠܰܘ ܐܰܝܟ ܬܰܘܪ̈ܶܐ ܡܫܰܝ̈ܢܶܐ. ܐܶܠܳܐ ܐܰܝܟ ܚܰܝ̈ܘܳܬܳܐ ܐܶܫܬܰܚܠܰܦܘ ܥܰܠ ܡܶܠܬܶܗ ܕܰܐܒܳܐ.
ܦܬܰܚܘ ܥܠܰܝ ܦܽܘܡܗܽܘܢ. ܐܰܝܟ ܐܰܪܝܳܐ ܕܢܳܗܡܶ ܘܚܳܛܶܦ. ܘܡܶܟܺܝܠ ܠܰܝܬ ܐܶܢܽܘܢ ܐܶܠܳܐ ܐܰܪ̈ܝܰܘܳܬܳܐ.
ܘܰܐܝܟ ܡܰܝܴ̈ܐ ܐܶܬܰܐܫܕܶܬ. ܟܝܳܢܳܐ ܓܶܝܪ ܐܢܳܫܳܝܳܐ ܒܛܶܟܣܳܐ ܡܶܕܶܡ ܕܡܰܝܴ̈ܐ ܡܶܬܶܐܫܶܕ ܡܳܐ ܕܡܶܫܬܪܶܐ ܒܡܰܘܬܳܐ. ܘܥܰܠܗܳܕܶܐ ܐܳܦ ܥܰܡܰܢܽܘܐܶܝܠ܆ ܒܗܳܝ ܕܩܰܒܶܠ ܥܠܰܘܗܝ ܫܪܳܝܳܐ ܕܰܒܝܰܕ ܡܰܘܬܳܐ. ܫܪܳܝܳܐ ܕܶܝܢ ܕܡܰܘܬܳܐ ܐܺܝܬܰܘܗܝ܆ ܦܽܘܪܫܳܢܳܐ ܕܢܰܦܫܳܐ ܡܶܢ ܦܰܓܪܳܐ. ܥܰܠܗܳܝ ܐܶܡܰܪ ܢܒܺܝܳܐ ܚܠܳܦܰܘܗܝ. ܕܰܐܝܟ ܡܰܝܴ̈ܐ ܐܶܬܰܐܫܕܶܬ. ܘܗܽܘ ܓܶܝܪ ܡܶܠܬܳܐ ܐܶܡܰܪ ܠܘܳܬ ܝܽܘ̈ܕܳܝܶܐ. ܕܰܫܪܰܘ ܗܰܝܟܠܳܐ ܗܳܢܳܐ܆ ܘܠܰܬܠܳܬܳܐ ܝܰܘ̈ܡܺܝܢ ܒܳܢܶܐ ܐܢܳܐ ܠܶܗ (ܝܘܚܢܢ ܒ: ܝܛ). ܗܳܝ ܕܟܰܕ ܐܶܬܒܰܕܰܪܘ ܗܘܰܘ ܬܰܠܡܺܝ̈ܕܰܘܗܝ ܥܕܰܡܳܐ ܕܩܳܡ ܕܠܳܐ ܚܒܳܠܳܐ ܠܝܰܘܡܳܐ ܬܠܺܝܬܳܝܳܐ. ܘܰܐܩܺܝܡ ܠܗܰܝܟܠܳܐ ܕܦܰܓܪܶܗ ܗܰܘ ܕܰܩܪܳܝܗܝ ܗܰܝܟܠܳܐ. ܘܡܶܛܽܠܗܳܕܶܐ ܐܶܡܰܪ ܢܒܺܝܳܐ.
ܘܶܐܬܒܰܕܰܪܘ ܟܽܠܗܽܘܢ ܓܰܪ̈ܡܰܝ. ܕܓܰܪ̈ܡܰܘܗܝ ܡܶܬܟܰܢܶܝܢ ܬܰܠܡܺܝ̈ܕܰܘܗܝ ܩܰܕܺܝ̈ܫܶܐ. ܢܶܫܡܰܥ ܠܦܰܘܠܘܣ ܫܠܝܚܳܐ ܟܰܕ ܡܰܠܶܦ ܘܳܐܡܰܪ: ܕܡܶܢ ܒܶܣܪܶܗ ܚܢܰܢ ܘܡܶܢ ܓܰܪ̈ܡܰܘܗܝ ܕܰܡܫܺܝܚܳܐ (ܐܦܣ̈ܝܐ ܗ:ܠ). ܬܽܘܒ ܒܕܽܘܟܬܳܐ ܐܚܪܺܬܳܐ ܐܶܡܰܪ: ܕܦܰܓܪܶܗ ܐܢܬܽܘܢ ܕܰܡܫܺܝܚܳܐ ܘܗܰܕܳܡܷ̈ܐ ܒܕܽܘܟܰܬܗܽܘܢ (ܐ ܩܘܪ̈ܢܬܝܐ ܝܒ: ܟܙ). ܡܶܛܠܗܳܢܳܐ ܗܳܝ ܕܶܐܬܒܰܕܰܪܘ ܓܰܪ̈ܡܰܘܗܝ ܥܰܠ ܬܰܠܡܺܝ̈ܕܰܘܗܝ ܡܶܬܪܰܢܝܳܐ. ܒܗܳܝ ܕܓܰܪ̈ܡܶܐ ܕܡܶܬܓܰܫܡܳܢܽܘܬܳܐ ܕܡܶܢ ܒܬܽܘܠܬܳܐ܆ ܠܳܐ ܐܶܬܒܰܕܰܪܘ ܒܩܰܒܪܳܐ. ܒܰܕܠܳܐ ܩܰܒܶܠ ܥܠܰܘܗܝ ܝܰܬܺܝܪ ܡܶܢ ܬܠܳܬܳܐ ܝܰܘܡܺܝ̈ܢ ܢܶܗܘܶܐ ܒܶܗ. ܘܠܳܐ ܢܰܦܫܶܗ ܐܶܫܬܰܒܩܰܬ ܒܰܫܝܽܘܠ ܘܠܳܐ ܒܶܣܪܶܗ ܚܙܳܐ ܡܶܬܚܰܒܠܳܢܽܘܬܳܐ. ܐܰܝܟ ܕܶܐܡܰܪ ܢܒܺܝܳܐ. ܘܒܳܬܰܪ ܗܳܠܶܝܢ ܐܶܡܰܪ ܡܙܰܡܪܳܢܳܐ.
ܘܰܗܘܳܐ ܠܶܒܝ ܐܰܝܟ ܫܥܽܘܬܳܐ: ܘܶܐܬܡܣܺܝܘ ܒܓܰܘܝ ܡܥܰܝ̈: ܘܺܝܒܶܫ ܐܰܝܟ ܚܶܨܦܳܐ ܕܦܰܚܳܪܳܐ ܚܰܝܠܝ. ܗܳܠܶܝܢ ܬܽܘܒ ܩ̈ܠܶܐ ܥܰܠ ܕܶܚܠܬܳܐ ܕܰܗܘܳܬ ܠܬܰܠܡܺܝ̈ܕܶܐ ܒܢܺܝܫܶܗ ܕܡܰܘܬܳܐ ܢܣܰܒ ܐܶܢܽܘܢ. ܗܶܢܽܘܢ ܓܶܝܪ ܐܰܝܟ ܫܥܽܘܬܳܐ ܐܶܬܦܰܫܰܪܘ ܡܶܢ ܩܶܢܛܳܐ ܘܕܶܚܠܬܳܐ ܕܝܽܘܕ̈ܝܶܐ. ܘܗܳܝ ܕܶܐܡܰܪ.
ܘܠܶܫܳܢܝ̱ ܕܒܶܩ ܠܰܫ̈ܡܰܝ ܚܶܟܝ̱: ܘܰܠܥܰܦܪܳܐ ܕܡܰܘܬܳܐ ܫܕܰܝܬܳܢܝ. ܗܳܠܶܝܢ ܥܠܰܘܗܝ ܕܡܳܪܰܢ ܐܰܡܺܝܪ̈ܳܢ ܠܰܡܙܰܡܪܳܢܳܐ. ܕܒܶܩ ܓܶܝܪ ܠܶܫܳܢܝ̱ ܠܰܫ̈ܡܰܝ ܚܶܟܝ̱ ܘܰܠܥܰܦܪܳܐ ܕܡܰܘܬܳܐ ܫܕܰܝܬܳܢܝ̱. ܗܳܠܶܝܢ ܒܢܴ̈ܬ ܩܴ̈ܠܶܐ ܠܰܡܙܰܡܪܳܢܳܐ ܐܰܡܺܝܪ̈ܳܢ. ܕܒܶܩ ܓܶܝܪ ܠܶܫܳܢܶܗ ܠܰܫ̈ܡܰܝ ܚܶܟܶܗ. ܕܟܰܕ ܒܨܶܗܝܳܐ ܕܰܗܘܳܐ ܡܶܢ ܚܰܡܺܝܡܽܘܬܳܐ ܕܢܶܓ̈ܕܶܐ. ܐܳܦ ܡܶܬܝܰܒܰܫ ܗܘܳܐ ܫܡܰܝ ܚܶܟܶܗ܆ ܘܫܶܐܠ ܗܘܳܐ ܡܰܝܴ̈ܐ ܒܰܙܩܺܝܦܳܐ. ܘܰܚܠܳܦ ܡܰܝܴ̈ܐ ܡܰܘܫܛܺܝܢ ܗܘܰܘ ܠܶܗ ܨܳܠܘ̈ܒܶܐ ܚܰܠܳܐ. ܗܳܢܽܘܢ ܕܟܰܕ ܠܟܰܠܒܷ̈ܐ ܡܕܰܡܶܐ ܠܗܽܘܢ ܘܳܐܡܰܪ:
ܡܶܛܽܠ ܕܚܰܕܪܽܘܢܝ ܟܰܠܒܷ̈ܐ: ܘܰܟܢܽܘܫܬܳܐ ܕܒܺܝ̈ܫܶܐ ܟܰܪܟܽܘܢܝ. ܒܰܙܰܥܘ ܐܝ̈ܕܰܝ ܘܪ̈ܶܓܠܰܝ: ܘܰܐܝܠܶܠܘ ܟܽܠܗܽܘܢ ܓܰܪ̈ܡܰܝ. ܢܶܫܬܩܽܘܢ ܐܳܦ ܗܳܫܳܐ ܬܰܠܡܺܝ̈ܕܶܐ ܕܗܰܓܳܓܽܘܬܳܐ ܘܰܒ̈ܢܰܝ ܫܳܢܝܽܘܬܶܗ ܕܡܰܐܢܺܝ. ܕܳܐܡܪܺܝܢ ܥܰܠ ܦܳܪܽܘܩܰܢ ܕܦܰܓܪܳܐ ܠܳܐ ܚܳܫܽܘܫܳܐ ܐܺܝܬ ܗܘܳܐ ܠܶܗ ܒܚܱ̈ܫܶܐ. ܗܰܘ ܓܶܝܪ ܕܠܳܐ ܚܳܐܶܫ܇ ܐܰܝܟܰܢܳܐ ܡܰܝܠܠܺܝܢ ܟܠܗܽܘܢ ܓܰܪ̈ܡܰܘܗܝ. ܘܗܰܘ ܕܠܳܐ ܡܰܪܓܶܫ ܒܢܷ̈ܓܕܶܐ܇ ܐܰܝܟܰܢܳܐ ܐܳܡܰܪ ܕܒܰܙܰܥܘ ܐܺܝ̈ܕܰܝ ܘܪ̈ܶܓܠܰܝ. ܐܶܠܳܐ ܗܶܢܽܘܢ ܥܰܡ ܨܳܠܽܘ̈ܒܶܐ ܡܒܰܙܚܺܝܢ. ܘܰܟܒܰܪ ܥܠܰܝܗܽܘܢ ܐܳܡܰܪ:
ܕܗܶܢܽܘܢ ܚܳܪܘ ܘܰܚܙܰܘ ܒܺܝ: ܘܦܰܠܶܓܘ ܢܰܚ̈ܬܰܝ ܒܰܝܢܳܬܗܽܘܢ܆ ܘܥܰܠ ܠܒܽܘܫܝ̱ ܐܰܪܡܺܝܘ ܦܶܣܷ̈ܐ. ܠܳܐ ܣܢܺܝ̈ܩܳܢ ܥܰܠ ܦܽܘܫܳܩܳܐ ܡ̈ܠܶܐ ܗܳܠܶܝܢ. ܝܺܕܺܝ̈ܥܳܢ ܐܶܢܶܝܢ ܓܝܶܪ܇ ܕܡܶܢ ܡܶܠܬܳܐ ܐܰܠܳܗܳܐ ܐܰܡܺܝܪ̈ܳܢ ܒܰܢܒܺܝܳܐ. ܥܰܠ ܐܰܝܠܶܝܢ ܕܰܣܥܰܪܘ ܠܘܳܬܶܗ ܐܰܝܠܶܝܢ ܕܦܰܠܶܓܘ ܢܰܚ̈ܬܰܘܗܝ. ܘܰܐܪܡܺܝܘ ܦܶܣܷ̈ܐ ܥܰܠ ܟܽܘܬܺܝܢܶܗ.
ܘܰܐܢܬ ܡܳܪܝܳܐ ܠܳܐ ܬܰܪܚܶܩ ܡܶܢܝ̱: ܐܺܝܠ ܐܝܠ ܠܥܽܘܕܪܳܢܝ ܟܰܬܰܪ܆ ܘܦܰܨܳܗ̇ ܡܶܢ ܚܰܪܒܳܐ ܠܢܰܦܫܝ. ܘܡܶܢ ܐܺܝܕܳܐ ܕܟܰܠܒܷ̈ܐ ܝܺܚܺܝܕܽܘܬܝ. ܡܰܘܕܥܺܝܢ ܩܴ̈ܠܶܐ ܗܳܠܶܝܢ. ܕܟܰܕ ܐܶܬܳܐ ܠܘܳܬ ܚܰܫܷ̈ܐ ܡܚܰܘܶܐ ܗܘܳܐ ܕܰܗܘܳܐ ܒܰܪܢܳܫܳܐ. ܘܠܳܐ ܡܰܣܠܶܐ ܠܡܽܘܟܳܟܳܐ ܘܠܳܐ ܫܳܐܶܛ ܗܘܳܐ ܠܗܶܝܢ ܠܐܢܳܫܳܝܴ̈ܬܳܐ. ܐܶܠܳܐ ܟܰܕ ܡܰܘܕܶܐ ܒܗܶܝܢ܆ ܡܶܬܚܰܫܚ ܗܘܳܐ ܒܰܡܚܺܝܠܽܘܬܳܐ. ܘܰܐܝܟ ܒܰܪܢܳܫܳܐ ܫܳܐܷܠ ܗܘܳܐ ܡܶܢ ܐܰܒܳܐ ܕܰܢܩܰܘܶܐ ܠܘܳܬܶܗ ܒܥܶܕܳܢܳܐ ܕܚܰܫܳܐ. ܘܕܰܢܦܰܨܶܝܘܗܝ ܡܶܢ ܫܳܥܬܳܐ ܘܰܕܢܰܦܩܶܗ ܡܶܢ ܒܰܝܢܳܬ ܦܰܩܪܽܘܬܳܐ ܕܟܰܠܒܷ̈ܐ ܝܽܘ̈ܕܳܝܶܐ. ܘܰܕܢܶܬܦܰܨܶܐ ܡܶܢ ܡܰܘܬܳܐ ܐܰܝܟ ܕܡܶܢ ܦܽܘܡܳܐ ܕܰܐܪܝܳܐ ܫܳܐܷܠ. ܗܳܠܶܝܢ ܟܽܠܗܶܝܢ ܚܠܳܦܰܝܢ ܡܶܬܡܱ̈ܠܠܳܢ ܗܘܱ̈ܝ. ܕܰܚܢܰܢ ܢܶܬܦܪܶܩ ܘܢܶܬܦܰܨܶܐ ܒܺܐܝܕܰܘ̈ܗܝ ܡܶܢ ܐܰܝܠܶܝܢ ܕܥܳܐܠܺܝܢ ܥܠܰܝܢ ܒܝܰܕ ܚܛܺܝܬܳܐ ܘܡܰܘܬܳܐ. ܘܬܽܘܒ ܐܶܡܰܪ.
ܕܡܶܢ ܩܰܪܢܳܐ ܪܳܡܬܳܐ ܡܽܘܟܳܟܝ. ܩܰܪܢܳܐ ܪܳܡܬܳܐ ܡܫܰܡܰܗ ܠܰܡܫܰܩܠܽܘܬܳܐ ܘܪܳܡܽܘܬܳܐ ܕܫܺܐܕ̈ܐ. ܗܳܝ ܕܟܰܣܝܳܐܝܬ ܡܚܰܦܛܳܐ ܠܝܽܘ̈ܕܳܝܶܐ ܥܰܠ ܡܰܘܬܶܗ.
ܥܕܰܡܳܐ ܠܗܳܪܟܳܐ ܐܶܫܬܰܥܺܝ ܢܒܺܝܳܐ ܥܰܠ ܚܰܫܰܘ̈ܗܝ ܕܡܶܠܬܳܐ ܘܥܰܠ ܡܰܘܬܶܗ ܦܳܪܽܘܩܳܝܳܐ. ܗܳܫܳܐ ܕܶܝܢ ܠܰܘ ܚܱ̈ܫܶܐ ܨܳܒܶܐ ܕܢܰܘܕܰܥ܆ ܐܶܠܳܐ ܥܰܠ ܟܳܪܽܘܙܽܘܬܳܐ ܕܶܐܘܰܢܓܶܠܝܽܘܢ ܘܥܰܠ ܕܶܢܚܶܗ ܘܰܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ. ܘܡܶܢ ܒܳܬܰܪ ܓܶܝܪ ܕܰܢܒܰܓ ܘܰܣܠܶܩ ܡܶܢ ܡܰܘܬܳܐ. ܘܰܚܙܳܝܗܝ ܢܒܺܝܳܐ ܘܳܐܡܰܪ. ܗܳܝ ܕܣܰܒܰܪ ܩܝܳܡܬܶܗ ܒܰܓܠܺܝܠܳܐ ܠܬܰܠܡܺܝ̈ܕܰܘܗܝ. ܗܳܢܽܘܢ ܕܰܐܚܰܘ̈ܗܝ ܩܪܳܐ ܐܶܢܽܘܢ.
ܕܶܐܣܰܒܰܪ ܫܡܳܟ ܠܰܐܚܱ̈ܝ܆ ܘܰܒܓܰܘ ܟܢܽܘܫܬܳܐ ܐܶܫܰܒܚܳܟ. ܗܳܠܶܝܢ ܓܶܝܪ ܗܘܱ̈ܝ ܒܰܩܝܳܡܬܶܗ. ܟܰܕ ܐܶܡܰܪ ܠܡܰܪܝܰܡ ܘܰܠܡܰܪܝܰܡ. ܕܙܶܠܶܝ̈ܢ ܐܶܡܰܪ̈ܶܝܢ ܠܰܐܚܱ̈ܝ ܕܢܺܐܙܽܠ̱ܘܢ ܠܰܓܠܺܝܠܳܐ ܘܬܰܡܳܢ ܢܶܚܙܽܘܢܳܢܝ̱ (ܡܬܝ ܟܚ: ܝ). ܘܒܳܬܰܪܟܶܢ ܠܘܳܬ ܥܰܡ̈ܡܶܐ ܡܶܬܦܢܶܐ ܘܳܐܡܰܪ:
ܕܳܚܠܰܘ̈ܗܝ ܕܡܳܪܝܳܐ ܫܰܒܚܽܘܗܝ. ܘܟܽܠܶܗ ܙܰܪܥܶܗ ܕܝܰܥܩܽܘܒ ܐܽܘܩܪܽܘܗܝ: ܘܰܕܚܰܠܘ ܡܶܢܶܗ ܟܽܠܶܗ ܙܰܪܥܶܗ ܕܺܝܣܪܳܐܝܠ. ܠܰܘ ܕܶܝܢ ܥܰܠ ܗܳܢܽܘܢ ܒܢܰܝ̈ ܝܰܥܩܘܒ ܕܰܨܠܰܒܘ ܐܳܡܰܪ. ܕܚܰܫܒܽܘܗܝ ܝܰܩܺܝܪܳܐ. ܘܥܰܠ ܬܽܘܒ ܒܢܱ̈ܝ ܝܣܪܳܐܶܝܠ܆ ܗܳܢܽܘܢ ܕܰܥܒܰܕܘ ܥܠܰܘܗܝ ܟܢܽܘܫܝܳܐ ܩܕܳܡ ܦܺܝܠܰܛܽܘܣ ܐܳܡܰܪ: ܕܫܰܒܚܽܘܗܝ. ܐܶܠܳܐ ܥܰܠ ܗܳܢܽܘܢ ܕܡܶܢ ܒܳܬܰܪ ܕܗܰܝܡܶܢܘ ܐܶܬܟܰܢܺܝܘ ܝܣܪܳܐܶܝܠ ܕܰܐܠܳܗܳܐ. ܘܥܰܠ ܕܺܝܠܶܦܘ ܘܰܚܙܰܘ܆ ܕܠܳܐ ܫܳܐܶܛ ܘܠܳܐ ܡܰܣܠܶܐ ܓܥܳܬܶܗ ܕܳܐܕܳܡ ܡܶܣܟܺܢܳܐ ܘܠܳܐ ܐܰܗܦܶܟ ܐܰܦܰܘ̈ܗܝ ܡܶܢܶܗ. ܐܶܠܳܐ ܟܰܕ ܓܥܳܐ ܠܘܳܬܶܗ ܡܶܢ ܥܰܦܪܳܗ̇ ܕܰܫܝܽܘܠ ܫܰܡܥܶܗ. ܗܰܘ ܕܡܰܘܕܶܐ ܒܦܽܘܡܳܐ ܕܰܒܢܰܘ̈ܗܝ ܥܰܡ̈ܡܶܐ ܚܰܛܳܝܷ̈ܐ ܗܳܢܽܘܢ ܕܶܐܬܦܪܶܩܘ ܘܳܐܡܰܪ:
ܡܶܢ ܩܕܳܡܰܝܟ ܗ̱ܺܝ ܬܶܫܒܽܘܚܬܝ ܒܥܺܕܬܳܐ ܪܰܒܬܳܐ. ܢܶܕܪ̈ܰܝ ܐܶܫܰܠܶܡ ܩܕܳܡ ܕܳܚܠܰܘ̈ܗܝ. ܘܰܩܕܳܡ ܫܠܺܝܚܰܘ̈ܗܝ ܐܶܩܰܪܶܒ ܩܽܘܪ̈ܒܳܢܰܝ.
ܢܶܐܟܠܽܘܢ ܡܶܣܟܺܢܷ̈ܐ ܘܢܶܣܒܥܽܘܢ. ܟܰܦ̈ܢܶܐ ܘܡܶܣܟ̈ܢܶܐ ܠܥܰܡ̈ܡܶܐ ܕܰܣܒܰܥܘ ܡܶܢ ܥܺܕܬܳܐ ܪܰܒܬܳܐ ܡܶܢ ܬܰܘܪܳܐ ܕܦܶܛܡܳܐ ܡܰܘܕܰܥ.
ܐܳܦ ܢܫܰܒܚܽܘܢ ܠܡܳܪܝܳܐ ܐܰܝܠܶܝܢ ܕܒܳܥܶܝܢ ܠܶܗ. ܫܰܦܺܝܪ ܩܪܳܐ ܠܗܰܘ ܕܬܰܢܺܝ ܚܰܫܰܘ̈ܗܝ. ܘܡܰܠܶܠ ܥܰܠ ܚܰܫܰܘ̈ܗܝ ܘܡܽܘܟܳܟܶܗ ܕܡܳܪܝܳܐ. ܘܒܳܬܰܪܟܶܢ ܬܳܢܶܐ ܘܳܐܡܰܪ. ܕܰܡܫܰܒܚܺܝܢ ܠܶܗ ܐܰܝܟ ܕܰܠܡܳܪܝܳܐ ܘܰܐܠܳܗܳܐ. ܘܥܰܠܗܳܕܶܐ:
ܢܺܚܶܐ ܠܶܒܗܽܘܢ ܠܥܳܠܡܺܝܢ. ܢܶܬܕܰܟܪܽܘܢ ܘܢܶܬܦܢܽܘܢ ܠܘܳܬ ܡܳܪܝܳܐ ܟܽܠܗܽܘܢ ܥܶܒܪ̈ܶܝܗ̇ ܕܰܐܪܥܳܐ: ܘܰܩܕܳܡܰܘܗܝ ܢܶܣܓ̈ܕܳܢ ܟܽܠܗܶܝܢ ܫܰܪ̈ܒܳܬܳܐ ܕܥܰܡ̈ܡܶܐ. ܘܗܳܕܶܐ ܡܳܐ ܕܶܐܬܒܰܛܰܠ ܟܽܠ ܪܺܝܫ ܘܟܽܠ ܫܽܘܠܛܳܢ (ܐ ܩܘܪ̈ܢܬܝܐ ܝܗ: ܟܕ). ܗܳܝܕܶܝܢ ܗܳܘܶܐ ܡܳܪܝܳܐ ܚܰܕ ܘܰܫܡܶܗ ܚܰܕ. ܘܡܶܫܬܰܩܠܳܐ ܡܰܢ ܡܰܠܟܽܘܬܳܐ ܡܶܢ ܡܳܪܽܘܕܳܐ. ܘܚܰܕ ܒܰܠܚܽܘܕ ܡܰܡܠܶܟ܇ ܡܶܠܬܶܗ ܕܰܐܒܳܐ.
ܡܶܛܽܠ ܕܰܕܡܳܪܝܳܐ ܗܝ ܡܰܠܟܽܘܬܳܐ: ܘܗܽܘܝܽܘ ܫܰܠܺܝܛ ܥܰܠ ܥܰܡ̈ܡܶܐ. ܠܰܝܬ ܓܶܝܪ ܕܡܶܫܬܰܘܕܶܐ ܡܰܠܟܽܘܬܳܐ ܐܶܠܳܐ ܚܰܕ. ܘܠܳܐ ܦܳܬܽܘܪܳܐ ܐܺܝܬ ܐܶܠܳܐ ܚܰܕ. ܡܶܛܠܗܳܢܳܐ ܐܰܝܠܶܝܢ ܕܳܐܟܠܺܝܢ ܡܶܢܶܗ܆ ܣܳܓܕܺܝܢ ܠܡܳܪܝܳܐ ܐܰܝܟ ܡܶܠܬܶܗ ܕܰܢܒܺܝܳܐ.
ܕܢܶܐܟܠܘܢ ܘܢܶܣܓܕܽܘܢ ܩܕܳܡ ܡܳܪܝܳܐ ܟܽܠܗܽܘܢ ܟܰܦ̈ܢܶܝܗ̇ ܕܰܐܪܥܳܐ: ܘܰܩܕܳܡܰܘܗܝ ܢܶܒܪܟܽܘܢ ܟܽܠ ܢܳܚ̈ܬܰܝ ܥܰܦܪܳܐ. ܟܰܦ̈ܢܶܐ ܐܳܟܠܺܝܢ ܘܣܳܓܕܺܝܢ ܩܕܳܡ ܡܳܪܝܳܐ: ܟܽܠ ܢܳܚ̈ܬܰܝ ܥܰܦܪܳܐ ܠܰܘ ܡܶܐܟܰܠ ܐܳܟܠܺܝܢ܇ ܡܶܒܪܰܟ ܒܳܪܟܺܝܢ ܘܣܳܓܕܺܝܢ ܩܕܳܡܰܘܗܝ. ܗܳܠܶܝܢ ܓܶܝܪ ܕܡܶܬܗܰܦܟܺܝܢ ܠܡܶܐܟܰܠ ܥܰܦܪܳܐ ܐܰܝܟ ܚܶܘܝܳܐ. ܗܰܘ ܕܠܶܗ ܫܡܰܥܘ. ܣܳܓܕܺܝܢ ܐܶܢܽܘܢ ܠܡܶܠܬܳܐ. ܢܒܺܝܳܐ ܕܶܝܢ ܡܰܘܕܶܐ ܕܠܰܐܠܳܗܳܐ ܚܰܝ ܗܘܳܐ ܘܳܐܡܰܪ:
ܢܰܦܫܝ ܠܶܗ ܗ̱ܽܘ ܚܰܝܳܐ. ܘܥܰܠܗܳܕܶܐ ܠܰܘ ܥܰܡ ܢܳܚ̈ܬܰܝ ܥܰܦܪܳܐ ܡܶܬܚܰܝܒܳܐ. ܐܶܠܳܐ ܥܰܡ ܐܰܝܠܶܝܢ ܕܰܟܦܶܢܘ ܠܶܗ܆ ܐܳܟܠܳܐ ܘܣܳܒܥܳܐ ܡܶܢ ܦܳܬܽܘܪܶܗ. ܡܰܪܬܶܐ ܘܡܰܠܶܦ ܢܒܺܝܳܐ: ܕܟܽܠܢܳܫ ܢܶܦܠܰܚ ܠܶܗ. ܥܰܠ ܗܳܕܶܐ ܐܶܡܰܪ:
ܕܙܰܪܥܳܐ ܕܢܶܦܠܚܺܝܘܗܝ܆ ܢܣܰܒܰܪ ܕܳܪܶܗ ܠܡܳܪܝܳܐ. ܢܺܐܬܽܘܢ ܘܰܢܚܰܘܽܘܢ ܙܰܕܺܝܩܽܘܬܶܗ ܠܥܰܡܳܐ ܕܡܶܬܝܠܶܕ ܕܥܳܒܶܕ ܡܳܪܝܳܐ. ܗܳܠܶܝܢ ܐܝܬܰܝܗܽܘܢ ܕܩܰܕܡܳܝܷ̈ܐ ܗ̣ܘܰܘ ܒܰܣܒܰܪܬܳܐ ܘܰܚܙܰܘ ܠܥܰܡܳܐ ܕܶܐܬܺܝܠܶܕ ܒܝܰܕ ܡܳܪܰܢ ܡܶܢ ܟܰܪܣܳܐ ܕܡܰܥܡܽܘܕܺܝܬܳܐ. ܘܗܶܢܽܘܢ ܚܰܘܺܝܘ ܙܰܕܺܝܩܽܘܬܶܗ ܕܰܐܠܳܗܳܐ ܦܳܪܽܘܩܰܢ. ܕܠܶܗ ܫܽܘܒܚܳܐ ܡܶܢ ܟܽܠ ܕܶܐܬܦܪܶܩ ܒܺܐܝܕܶܗ. ܠܥܳܠܰܡܥܳܠܡܺܝܢ ܐܰܡܝܢ܀
ܡܙܡܘܪܐ ܕܥܣܪܝܢ ܘܬܠܬܐ
ܕܒܶܗ ܡܰܘܕܰܥ ܥܰܠ ܪܳܥܝܽܘܬܳܐ ܕܰܡܫܺܝܚܳܐ: ܘܕܰܒܡܳܢܳܐ ܪܳܥܶܐ ܠܩܰܕܺܝ̈ܫܶܐ.
ܚܰܝܠܰܘ̈ܬܳܐ ܩܰܕܺܝ̈ܫܶܐ ܥܶܪ̈ܒܰܘܗܝ ܕܪܳܥܝܳܐ ܫܰܪܺܝܪܳܐ܆ ܗܳܢܽܘܢ ܕܩܳܝܡܺܝܢ ܒܪ̈ܰܘܡܶܐ ܥܶܠܳܝܷ̈ܐ ܕܰܫܡܰܝܳܐ. ܘܡܶܬܪܥܶܝܢ ܡܶܢ ܪܳܥܝܳܐ ܛܳܒܳܐ ܒܡܰܪ̈ܓܶܐ ܩܰܕܺܝ̈ܫܶܐ ܘܰܐܠܳܗ̈ܝܶܐ ܕܗܰܘ ܒܽܘܣܳܡܳܐ ܠܳܐ ܡܶܬܚܰܒܠܳܢܳܐ. ܡܫܰܐܠܺܝܢ ܗܘܰܘ ܠܳܗ̇ ܠܟܰܠܬܳܐ ܪܽܘܚܳܢܳܝܬܳܐ ܗܳܝ ܕܒܰܟܬܳܒܳܐ ܕܬܶܫܒ̈ܚܳܬ ܬܶܫܒ̈ܚܳܬܳܐ ܠܰܢ ܐܶܬܝܰܕܥܰܬ. ܕܠܰܐܝܟܳܐ ܐܶܙܰܠ ܕܳܕܶܟܝ ܫܰܦܺܝܪܰܬ ܒܢܷ̈ܫܶܐ (ܬܫܒ̈ܚܬ ܬܫܒ̈ܚܬܐ ܗ: ܝܚ). ܗܳܝܕܶܝܢ ܟܰܠܬܳܐ ܡܶܢ ܕܶܐܫܬܰܘܕܰܥܬܶܗ ܠܚܰܬܢܳܐ ܡܶܢ ܪܺܝܚܶܗ ܒܰܣܺܝܡܳܐ ܘܰܕܪܳܥܝܰܐ ܗ̄ܘ ܛܳܒܳܐ܆ ܘܦܰܢܝܰܬ ܠܗܽܘܢ ܦܶܬܓܳܡܳܐ ܚܰܟܺܝܡܳܐܝܺܬ ܘܶܐܡܪܰܬ: ܕܳܕܝ ܕܰܢܚܶܬ ܠܶܗ ܠܓܰܢܬܳܐ ܠܡܰܫܟ̈ܒܳܬܳܐ ܕܒܶܣ̈ܡܶܐ ܕܢܶܪܥܶܐ ܒܓܰܢܷ̈ܐ ܘܢܶܠܩܽܘܛ ܫܽܘ̈ܫܰܢܶܐ (ܬܫܒ̈ܚܬ ܬܫܒ̈ܚܬܐ ܘ: ܐ). ܘܰܒܗܳܕܶܐ ܡܰܘܕܥܳܐ ܗܘܳܬ ܥܰܠ ܪܺܝܚܳܐ ܒܰܣܺܝܡܳܐ ܕܩܰܕܺܝ̈ܫܶܐ ܕܒܶܗ ܪܳܥܶܐ ܘܡܶܬܒܰܣܰܡ ܪܳܥܝܳܐ ܛܳܒܳܐ. ܘܡܰܫܟ̈ܒܳܬܳܐ ܓܶܝܪ ܕܒܶܣ̈ܡܶܐ: ܢܰܦ̈ܫܳܬܳܐ ܐܶܢܶܝܢ ܕܩܰܕܺܝ̈ܫܶܐ܇ ܕܡܰܦܺܝ̈ܚܳܢ ܒܒܶܣ̈ܡܶܐ ܘܪ̈ܺܝܚܳܢܶܐ ܐܰܠܳܗܳܝܷ̈ܐ. ܗܳܠܶܝܢ ܕܺܐܝܬܰܝܗܽܘܢ: ܗܰܝܡܳܢܽܘܬܳܐ: ܣܰܒܪܳܐ: ܚܽܘܒܳܐ: ܕܰܟܝܽܘܬܳܐ: ܩܰܕܺܝܫܽܘܬܳܐ: ܢܰܟܦܽܘܬܳܐ: ܒܰܣܺܝܡܽܘܬܳܐ: ܡܪܰܚܡܳܢܽܘܬܳܐ: ܛܳܒܽܘܬܳܐ ܥܰܡ ܫܰܪܟܳܐ ܕܰܡܝܰܬܪ̈ܳܬܳܐ. ܓܰܢܷ̈ܐ ܕܶܝܢ ܐܺܝܬܰܝܗܽܘܢ ܥܰܠ ܦܽܘܠܚܳܢܳܐ ܕܩܰܕܺܝ̈ܫܶܐ ܡܫܰܘܕ̈ܥܳܢ. ܒܕܰܐܝܟ ܗܳܠܶܝܢ ܐܶܡܪܰܬ ܟܰܠܬܳܐ ܥܰܠ ܚܰܬܢܳܐ ܕܪܳܥܶܐ. ܛܽܘܒܳܢܳܐ ܕܶܝܢ ܕܰܘܺܝܕ. ܗܰܘ ܕܰܐܘܠܶܕ ܠܰܫܠܶܝܡܽܘܢ ܚܰܟܺܝܡܳܐ܆ ܗܰܘ ܕܗܳܠܶܝܢ ܐܶܡܰܪ ܒܚܶܟܡܬܶܗ܆ ܒܬܶܫܒܽܘܚܬܳܐ ܕܥܶܣܪܺܝܢ ܘܰܬܠܳܬ ܐܶܡܰܪ:
ܡܳܪܝܳܐ ܢܶܪܥܶܝܢܝ ܘܡܶܕܶܡ ܠܳܐ ܢܚܰܣܰܪ ܠܺܝ܆ ܘܥܰܠ ܡܰܪ̈ܓܶܐ ܕܥܽܘܫܢܳܐ ܢܰܫܪܶܝܢܝ. ܘܥܰܠ ܡܰܝܴ̈ܐ ܢܺܝ̈ܚܶܐ ܢܕܰܒܪܰܢܝ. ܘܕܳܡܝܳܐ ܕܳܐܦ ܛܽܘܒܳܢܳܐ ܕܰܘܺܝܕ ܠܗܳܠܶܝܢ ܡܰܫ̈ܟܒܳܬܳܐ ܕܒܶܣ̈ܡܶܐ ܩܪܳܐ ܡܰܪ̈ܓܶܐ ܕܥܽܘܫܢܳܐ ܕܰܒܗܽܘܢ ܫܳܡܢܳܐ ܐܳܦ ܡܶܬܦܰܛܡܳܐ ܢܰܦܫܳܐ ܕܩܰܕܺܝ̈ܫܶܐ: ܘܒܳܥܝܳܐ ܬܽܘܒ ܢܝܴ̈ܚܶܐ ܥܰܠ ܡܰܪܕܺܝܬܳܐ ܕܝܽܘܠܦܳܢܳܐ ܪܽܘܚܳܢܳܝܳܐ ܡܰܘܕܥܺܝܢ ܠܰܢ܆ ܗܳܠܶܝܢ ܕܪܳܕܶܝܢ ܟܰܣܝܳܐܝܺܬ ܐܳܦ ܡܰܠܦܳܢܳܐܝܺܬ ܡܶܢ ܗܰܘ ܡܰܠܦܳܢܳܐ ܕܚܰܝܷ̈ܐ. ܠܘܳܬ ܢܰܦܫܳܐ ܕܰܡܣܰܟܝܳܐ ܕܬܶܬܦܰܨܶܐ ܡܶܢ ܡܰܘܬܳܐ. ܗܳܠܶܝܢ ܐܶܢܽܘܢ ܡܰܝܴ̈ܐ ܚܰܝ̈ܐ ܕܶܐܡܰܪ ܡܳܪܰܢ ܟܰܕ ܡܰܠܶܦ. ܕܟܽܠ ܕܰܡܗܰܝܡܶܢ ܒܺܝ ܐܰܝܟ ܕܶܐܡܰܪ ܟܬܳܒܳܐ܇ ܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝܷ̈ܐ ܢܶܪܕܽܘܢ ܡܶܢ ܟܰܪܣܶܗ (ܝܘܚܢܢ ܙ: ܠܚ). ܡܶܛܠ ܕܰܒܡܰܝܴ̈ܐ ܘܰܒܠܰܚܡܳܐ ܡܶܬܦܰܫܰܩ ܢܰܗܺܝܪܳܐܝܺܬ ܝܽܘܠܦܳܢܶܗ ܥܰܬܺܝܪܳܐ ܕܡܳܪܝܳܐ. ܒܥܶܕܳܢܳܐ ܕܰܢܝܳܚܳܐ ܕܦܳܬܽܘܪܶܗ ܐܶܬܕܰܟܪܶܗ ܛܽܘܒܳܢܳܐ ܕܰܘܺܝܕ. ܘܰܫܒܰܩ ܢܝܳܚܷ̈ܐ ܕܬܽܘܩܳܢܷ̈ܐ ܕܦܳܬܽܘܪ ܡܰܠܟܽܘܬܶܗ܆ ܘܶܐܬܦܢܺܝ ܠܘܳܬ ܡܳܪܝܳܐ. ܟܰܕ ܒܳܥܶܐ ܡܶܢܶܗ ܕܢܶܬܪܥܶܐ. ܘܥܰܠ ܦܳܬܽܘܪܶܗ ܢܶܬܒܰܣܰܡ. ܘܰܒܫܶܩܝܶܗ ܢܺܝܚܳܐ ܢܶܫܪܶܐ ܘܢܶܬܒܰܣܰܡ. ܟܰܕ ܝܳܕܰܥ ܕܰܒܝܰܕ ܗܳܠܶܝܢ ܐܺܝܬ ܠܳܗ̇ ܠܢܰܦܫܳܐ ܕܬܶܦܢܶܐ ܠܘܳܬ ܡܳܪܝܳܐ. ܡܶܛܽܠܗܳܕܶܐ ܐܶܡܰܪ. ܕܡܳܪܝܳܐ ܢܶܪܥܶܝܢܝ ܘܡܶܕܶܡ ܠܳܐ ܢܚܰܣܰܪ ܠܺܝ. ܥܠ ܕܰܡܦܳܣ ܗܘܳܐ܆ ܕܡܰܢ ܕܡܶܢ ܡܶܬܪܥܶܐ܆ ܠܳܐ ܢܶܚܣܰܪ ܠܶܗ ܡܶܕܶܡ. ܠܳܐ ܗܰܝܡܳܢܽܘܬܳܐ: ܠܳܐ ܣܰܒܪܳܐ: ܠܳܐ ܚܽܘܒܳܐ: ܠܳܐ ܡܪܰܚܡܳܢܽܘܬܳܐ: ܠܳܐ ܟܺܐܢܽܘܬܳܐ: ܠܳܐ ܕܰܟܝܽܘܬܳܐ: ܠܳܐ ܢܰܟܦܽܘܬܳܐ: ܠܳܐ ܙܰܗܝܽܘܬܳܐ: ܠܳܐ ܩܰܕܺܝܫܽܘܬܳܐ: ܠܳܐ ܒܬܽܘܠܽܘܬܳܐ: ܠܳܐ ܚܶܟܡܬܳܐ: ܠܳܐ ܝܺܕܰܥܬܳܐ: ܠܳܐ ܓܰܢ̱ܒܳܪܽܘܬ ܢܰܦܫܳܐ: ܠܳܐ ܪܽܘܚܳܐ ܩܰܕܺܝܫܳܐ: ܗܳܠܶܝܢ ܕܰܐܦܺܝܣ ܕܰܘܺܝܕ ܕܢܶܫܪܶܐ ܥܠܰܝܗܽܘܢ. ܕܰܠܗܽܘܢ ܩܪܳܐ ܫܠܶܝܡܽܘܢ ܡܰܫܟ̈ܒܳܬܳܐ ܕܒܶܣ̈ܡܶܐ. ܒܕܰܐܝܟ ܗܳܠܶܝܢ ܦܺܐܪ̈ܶܐ ܟܰܗܺܝܢܺܝܢ. ܕܰܒܗܳܠܶܝܢ ܐܶܡܰܪ ܕܰܘܺܝܕ ܕܡܶܬܦܰܢܝܳܐ ܢܰܦܫܳܐ ܡܳܐ ܕܪܳܥܝܳܐ ܒܗܽܘܢ.
ܢܰܦܫܝ ܐܰܦܢܺܝ ܘܕܰܒܪܰܢܝ ܒܰܫܒܺܝ̈ܠܰܝ ܩܽܘܫܬܳܐ. ܚܙܰܝܬ ܐܰܝܟܰܢܳܐ ܦܰܫܶܩ. ܡܶܢ ܒܳܬܰܪ ܕܰܪܥܳܬ ܢܰܦܫܶܗ ܡܶܢ ܗܳܠܶܝܢ ܥܶܩܳܪ̈ܶܐ ܚܠܰܝܴ̈ܐ ܘܒܰܣܺܝ̈ܡܶܐ ܕܺܐܝܬ ܒܗܳܠܶܝܢ ܡܰܪ̈ܓܶܐ ܩܰܕܺܝ̈ܫܶܐ ܕܡܰܘܥܶܝܢ ܡܝܰܬܪ̈ܳܬܳܐ. ܐܶܬܦܰܢܝܰܬ ܢܰܦܫܶܗ ܠܘܳܬ ܡܳܪܝܳܐ. ܘܒܰܫ̈ܒܺܝܠܶܐ ܕܩܽܘܫܬܳܐ ܐܶܬܕܰܒܰܪ. ܗܳܠܶܝܢ ܕܺܐܝܬܰܝܗܽܘܢ ܦܽܘ̈ܩܕܳܢܶܐ ܘܢܳܡܽܘ̈ܣܶܐ ܩܰܕܺܝ̈ܫܶܐ. ܘܥܰܠܗܳܕܶܐ ܐܳܡܰܪ ܗܘܳܐ.
ܡܶܛܽܠ ܫܡܳܟ ܐܳܦܶܢ ܐܶܗܰܠܶܟ ܒܢܰܚ̈ܠܰܝ ܛܶܠܳܠܰܝ̈ ܡܰܘܬܳܐ܆ ܠܳܐ ܐܶܕܚܰܠ ܡܶܢ ܒܺܝܫܬܳܐ܇ ܡܶܛܽܠ ܕܰܐܢܬ ܥܰܡܝ. ܟܡܳܐ ܕܥܰܡ ܪܳܥܝܳܐ ܕܚܰܝܷ̈ܐ ܡܗܰܠܶܟ ܐܢܳܐ. ܘܪܶܥܝܳܐ ܕܚܰܝܷ̈ܐ ܪܳܥܶܐ ܐܢܳܐ܆ ܠܳܐ ܕܳܚܶܠ ܐܢܳܐ ܡܶܢ ܡܰܘܬܳܐ. ܘܰܟܡܳܐ ܕܥܰܡ ܫܶܡܫܳܐ ܥܰܬܺܝܪ ܙܰܠܺܝ̈ܩܶܐ ܪܳܕܶܐ ܐܢܳܐ܆ ܠܳܐ ܡܰܟܡܪܺܝܢ ܠܺܝ ܢܰܚ̈ܠܶܐ ܥܰܡܽܘ̈ܛܶܐ ܕܰܫܝܽܘܠ ܟܡܺܝܪܬܳܐ. ܥܰܡ ܓܰܢ̱ܒܳܪ ܥܳܠܡܷ̈ܐ ܦܳܣܰܥ ܐܢܳܐ. ܒܢܺܐܪ̈ܒܶܐ ܕܓܰܝ̈ܣܶܐ ܡܰܗܶܠ ܐܢܳܐ ܒܗܽܘܢ܆ ܘܠܳܐ ܡܥܺܝܩܺܝܢ ܠܺܝ ܫܰܒ̈ܛܶܐ ܕܕܰܝܳܢܝ. ܡܶܛܽܠ ܕܝܳܕܰܥ ܐܢܳܐ ܕܠܰܘ ܡܶܢ ܣܶܢܐܬܳܐ ܡܳܚܶܐ. ܕܰܢܚܰܟܡܰܢܝ ܒܡܰܪܕܽܘܬܶܗ ܐܰܪܺܝܡ ܥܠܰܝ ܢܶܓ̈ܕܶܐ. ܘܡܶܟܺܝܠ ܐܳܡܰܪ ܐܢܳܐ.
ܕܫܰܒܛܳܟ ܘܚܽܘܛܪܳܟ ܗܶܢܽܘܢ ܒܰܝܐܽܘܢܝ. ܘܫܰܒܛܳܐ ܘܚܽܘܛܪܳܐ ܩܳܪܶܐ ܚܰܟܺܝܡܳܐ ܕܰܘܺܝܕ ܠܰܫܝܽܘܠ ܘܰܠܡܰܘܬܳܐ. ܐܰܝܟ ܓܰܒܪܳܐ ܕܩܰܕܶܡ ܐܰܪܓܶܫ ܒܛܽܘ̈ܒܶܐ ܕܠܳܐ ܡܳܝܽܘܬܽܘܬܳܐ ܕܡܶܬܝܰܗܒܺܝܢ ܡܶܢ ܐܰܠܳܗܳܐ ܒܰܩܝܳܡܬܳܐ. ܟܰܕ ܡܳܕܶܝܢ ܗܘܰܘ ܠܶܗ ܫܰܒ̈ܛܶܐ ܕܡܰܪܕܽܘܬܳܐ ܕܰܐܠܳܗܳܐ ܡܒܰܝܳܐܢܳܐ ܠܰܢܒܺܝܳܐ܆ ܐܰܘܕܰܥ ܕܡܶܛܽܠ ܡܳܢܳܐ. ܘܶܐܡܰܪ.
ܣܕܰܪܬ ܩܕܳܡܰܝ ܦܳܬܽܘܪܳܐ ܠܘܩܒܰܠ ܒܥܶܠܕ̈ܒܳܒܰܝ. ܫܰܦܺܝܪ ܠܰܛܢܳܢܳܐ ܕܡܳܪ̈ܽܘܕܶܐ ܘܕܰܒܥܶܠܕ̈ܒܳܒܶܐ ܕܚܰܝܱ̈ܝܢ. ܕܦܳܬܽܘܪܳܐ ܐܪܳܙܳܢܳܝܳܐ ܕܰܡܕܰܒܪܳܢܽܘܬܐ ܕܦܳܪܘܩܰܢ ܐܶܣܬܕܰܪ ܒܥܺܕܬܳܐ܇ ܟܰܕ ܡܠܶܐ ܠܰܚܡܳܐ ܠܳܐ ܡܶܬܚܰܒܠܳܢܳܐ. ܗܳܢܳܐ ܓܶܝܪ ܟܰܕ ܡܚܰܘܶܐ ܕܦܰܓܪܳܐ ܗܰܘ ܠܳܐ ܡܶܬܚܰܒܠܳܢܳܐ ܛܥܺܝܢ. ܚܰܝܠܬܳܢܳܐܝܬ ܡܥܺܝܩ ܠܰܒܥܶܠܕ̈ܒܳܒܶܐ ܕܚܱ̈ܝܰܝܢ. ܗܰܘ ܕܫܰܠܚܶܗ ܠܳܐܕܳܡ ܒܢܶܟܠܶܗ ܡܶܢ ܠܒܽܘ̈ܫܶܐ ܕܠܳܐ ܡܶܬܚܰܒܠܳܢܽܘܬܳܐ܇ ܕܫܰܟܢܰܬ ܠܶܗ ܛܰܝܒܽܘܬܳܐ. ܘܫܰܦܺܝܪ ܐܶܡܰܪ ܢܒܺܝܳܐ ܦܳܬܽܘܪܳܐ ܚܰܕ ܘܠܰܘ ܦܳܬܽܘܪ̈ܶܐ. ܥܰܠ ܕܰܢܦܰܫܶܩ ܒܝܰܕ ܦܳܬܽܘܪܳܐ܇ ܕܚܰܕ ܗܽܘ ܦܳܬܘܪܳܗ̇ ܕܥܺܕܬܳܐ ܘܠܰܘ ܬܪܶܝܢ. ܒܥܳܠܡܳܐ ܟܽܠܶܗ ܚܰܕ ܗ̱ܽܘ ܦܳܬܘܪܳܐ ܩܰܕܺܝܫܳܐ ܘܰܕܚܰܝܷ̈ܐ. ܡܰܝܬܶܐ ܕܶܝܢ ܥܰܡ ܦܳܬܽܘܪܳܐ ܥܺܕܬܳܢܳܝܳܐ ܗܰܘ ܕܰܣܕܰܪ ܐܰܠܳܗܳܐ ܩܕܳܡܘܰܗܝ ܥܽܘܗܕܳܢܳܐ ܕܡܰܘܗܰܒܬܳܐ ܘܕܰܡܫܺܝܚܽܘܬܳܐ ܕܪܽܘܚܳܐ ܕܩܽܘܕܫܳܐ. ܐܶܡܰܪ ܓܶܝܪ ܕܠܰܘ ܒܰܠܚܽܘܕ ܒܦܳܬܽܘܪܳܐ ܕܚܰܝܷ̈ܐ܇ ܕܺܐܝܬ ܥܠܰܘܗܝ ܦܰܓܪܳܐ ܠܳܐ ܡܶܬܚܰܒܠܳܢܳܐ ܕܺܝܠܝ ܒܰܣܶܡܬܳܢܝ܆ ܐܶܠܳܐ ܘܰܒܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ ܝܰܩܰܪܬܳܢܝ.
ܐܰܕܗܶܢܬ ܪܺܝܫܝ ܒܡܶܫܚܳܐ܇ ܘܟܳܣܝ ܡܰܪܘܶܐ ܐܰܝܟ ܚܰܝܳܐ. ܪܺܝܫܶܗ ܡܫܰܡܰܗ ܠܗܰܘ ܕܰܥܒܺܝܕ ܡܕܰܒܪܳܢܳܐ ܠܢܰܦܫܳܐ ܘܡܰܟܶܣ ܠܳܗ̇܇ ܕܺܐܝܬܰܘܗܝ ܗܰܘܢܳܐ. ܠܗܳܢܳܐ ܓܶܝܪ ܐܰܟܡܰܢ ܕܗܽܘܝܽܘ ܪܺܝܫܳܐ ܘܰܡܕܰܒܪܳܢܳܐ ܕܟܽܠܶܗ ܒܰܪܢܳܫܳܐ܇ ܘܰܡܢܳܬܳܐ ܪܺܝܫܳܝܬܳܐ ܕܒܰܢ. ܠܶܗ ܡܰܘܕܰܥ ܛܽܘܒܳܢܳܐ ܕܰܘܺܝܕ ܕܡܶܫܬܰܘܬܦܳܐ ܛܰܝܒܽܘܬܳܐ ܕܪܽܘܚܳܐ ܕܩܽܘܕܫܳܐ. ܘܡܶܛܽܠ ܕܫܰܢܝܰܬ ܗܘܳܬ ܗܳܕܶܐ ܡܶܢ ܒܰܪܢܳܫܳܐ ܩܰܕܡܳܝܳܐ ܒܥܶܠܰܬ ܥܒܳܪ ܦܽܘܩܕܳܢܳܐ. ܟܰܕ ܐܰܠܳܗܳܐ ܐܶܬܳܐ ܒܰܒܣܰܪ܆ ܩܪܳܝܗܝ ܕܢܶܦܢܶܐ ܠܰܐܬܪܶܗ ܩܰܕܡܳܝܳܐ. ܐܰܥܛܶܦ ܠܶܗ ܡܰܘܗܒܬܳܐ ܗܳܝ ܕܪܽܘܚܳܐ ܕܩܽܘܕܫܳܐ ܗܳܝ ܕܶܐܬܢܰܣܒܰܬ ܡܶܢܶܗ. ܘܡܶܬܕܟܰܪ ܠܳܗ̇ ܡܙܰܡܪܳܢܳܐ ܠܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ. ܕܰܒܝܰܕ ܥܡܳܕܳܐ ܩܰܒܶܠ ܓܶܢܣܳܐ ܕܰܒܢܰܝ̈ܢܳܫܳܐ ܒܰܫܡܳܐ ܕܰܡܫܺܝܚܳܐ. ܡܫܺܝܚܳܐ ܓܶܝܪ ܗܽܘܝܽܘ ܪܽܘܚܳܐ ܩܰܕܺܝܫܳܐ. ܟܳܣܝ ܡܰܪܘܶܐ ܐܰܝܟ ܚܰܝܳܐ. ܫܽܘܘܕܳܥܳܐ ܕܫܳܩܽܘܬܳܐ ܕܡܰܥܒܕܳܐ ܒܢܰܦܫܳܐ ܡܶܢ ܒܳܬܪܰ ܕܰܡܩܰܒܠܳܐ ܡܶܫܚܳܐ ܩܰܕܺܝܫܳܐ ܕܠܳܐ ܡܳܝܽܘܬܽܘܬܳܐ ܕܰܚܛܺܝܬܳܐ. ܗܰܘ ܓܶܝܪ ܕܫܳܬܶܐ ܡܶܢ ܟܳܣܶܗ ܕܡܳܪܝܳܐ܆ ܪܳܘܶܐ ܡܶܢ ܫܽܘܡܢܳܐ ܕܒܰܝܬܶܗ. ܐܰܝܟ ܕܰܟܬܺܝܒ. ܘܬܽܘܒ ܟܰܠܬܳܐ ܗܳܝ ܪܽܘܚܳܢܳܝܬܳܐ ܐܳܡܪܳܐ. ܕܶܐܫܬܰܘ ܘܰܪܘܰܘ ܐܰܚܰܝ̈ (ܬܫܒ̈ܚܬ ܬܫܒ̈ܚܬܐ ܗ: ܒ). ܡܳܕܶܝܢ ܟܳܣܳܐ ܡܰܪܘܝܳܢܳܐ ܥܰܡ ܡܫܺܝܚܽܘܬܳܐ ܩܰܕܺܝܫܬܳܐ ܥܳܐܶܠ ܒܢܰܦܫܳܐ. ܕܶܐܢ ܗܳܕܶܐ ܪܰܘܳܝܽܘܬܳܐ ܕܡܰܥܒܕܳܐ ܡܗܰܘܢܽܘܬܳܐ ܒܗܰܘ ܕܫܳܬܶܐ ܦܳܓܥܳܐ ܒܰܢ. ܡܶܢ ܪܶܗܛܳܐ ܕܒܳܬܰܪ ܛܳܒ̈ܬܳܐ ܠܳܐ ܫܳܠܶܝܢܰܢ܆ ܥܕܰܡܳܐ ܕܡܶܬܡܰܛܝܢܰܢ ܠܒܶܝܬ ܡܰܥܡܪܳܐ ܕܒܰܝܬܶܗ ܕܡܳܪܝܳܐ. ܘܰܦܫܺܝܩ ܠܶܗ ܕܢܺܐܡܰܪ ܡܶܢ ܒܳܬܰܪܟܶܢ ܥܰܡ ܢܒܺܝܳܐ.
ܛܰܝܒܽܘܬܳܟ ܘܪ̈ܰܚܡܰܝܟ ܪܰܕܦܽܘܢܝ ܟܽܠܗܽܘܢ ܝܰܘ̈ܡܳܬܳܐ ܕܚܱ̈ܝܰܝ܆ ܕܶܐܥܡܰܪ ܒܒܰܝܬܶܗ ܕܡܳܪܝܳܐ ܢܽܘܓܪܳܐ ܕܝܰܘ̈ܡܳܬܳܐ. ܠܰܘ ܕܡܶܪܕܰܦ ܪܳܕܦܺܝܢ ܪ̈ܰܚܡܶܐ ܕܡܳܪܝܳܐ ܡܰܠܶܦ ܗܳܪܟܳܐ ܛܘܒܳܢܳܐ ܕܰܘܺܝܕ. ܐܶܠܳܐ ܗܳܕܶܐ ܒܳܥܶܐ ܕܢܰܘܕܰܥ܇ ܕܡܳܐ ܕܪܶܓܫܰܬ ܢܰܦܫܳܐ ܒܚܽܘܒܳܐ ܕܰܐܠܳܗܳܐ܆ ܠܳܐ ܫܳܠܝܳܐ ܡܶܢ ܪܕܽܘܦܝܳܐ ܒܨܰܘ̈ܡܶܐ ܘܰܒܫܰܗܪ̈ܶܐ ܐܺܝܡܳܡܷ̈ܐ ܘܠܰܝ̈ܠܰܘܳܬܳܐ: ܥܕܰܡܳܐ ܕܦܳܓܥܳܐ ܒܪܶܚܡܬܶܗ ܕܚܰܬܢܳܐ. ܡܰܢ ܓܶܝܪ ܕܰܒܪܶܚܡܬܶܗ ܕܚܰܬܢܳܐ ܠܳܐ ܪܳܕܶܦ ܢܰܦܫܶܗ܆ ܘܠܳܐ ܠܰܓܢܽܘܢܳܐ ܡܶܫܬܘܶܐ. ܗܰܘ ܓܶܝܪ ܕܪܳܕܦܺܝܢ ܠܶܗ ܪ̈ܰܚܡܶܐ ܘܛܰܝܒܽܘܬܳܐ ܕܰܐܠܳܗܳܐ܆ ܗܳܢܳܐ ܡܶܛܽܠ ܕܰܪܕܰܦ ܒܥܳܠܡܳܐ ܗܳܢܳܐ܆ ܥܰܡܶܗ ܒܒܰܝܬܶܗ ܕܡܳܪܝܳܐ ܢܽܘܓܪܳܐ ܕܝܰܘ̈ܡܳܬܳܐ. ܘܡܶܬܒܰܣܰܡ ܥܰܡܶܗ ܕܠܳܐ ܫܽܘܠܳܡܳܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܐܰܡܝܢ܀
ܡܙܡܘܪܐ ܕܥܣܪܝܢ ܘܐܪܒܥܐ
ܥܰܠ ܐܪ̈ܳܙܶܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ: ܘܥܰܠ ܟܳܪܽܘܙܽܘܬܳܐ ܕܰܫܠܝ̈ܚܶܐ: ܘܥܰܠ ܣܽܘܠܳܩܶܗ ܕܥܰܡܰܢܽܘܐܝܠ ܠܰܫܡܰܝܳܐ: ܘܥܰܠ ܫܽܘ̈ܐܳܠܐ ܕܚܰܝ̈ܠܰܘܳܬܳܐ ܫܡܰܝܳܢܷ̈ܐ ܡܶܛܽܠܳܬܶܗ.
ܐܪ̈ܳܙܶܐ ܪܰܘܪ̈ܒܶܐ ܘܰܫܡܰܝܳܢܷ̈ܐ ܘܰܐܠܳܗܳܝܷ̈ܐ ܡܶܫܬܰܥܝܳܐ ܠܰܢ ܪܽܘܚܳܐ ܕܰܢܒܺܝܽܘܬܳܐ ܒܦܽܘܡܶܗ ܕܛܽܘܒܳܢܳܐ ܕܰܘܺܝܕ ܒܬܶܫܒܽܘܚܬܳܐ ܗܳܕܶܐ ܕܥܶܣܪܺܝܢ ܘܰܐܪܒܰܥ. ܫܽܘܪܳܝܳܐ ܕܚܽܘܕܳܬܳܐ ܕܰܗܘܳܐ ܠܰܓܒܺܝܠܬܰܢ ܡܶܢ ܒܳܬܰܪ ܕܶܐܬܚܰܒܠܰܬ ܓܳܠܝܳܐ ܘܰܡܒܰܕܩܳܐ ܠܰܢ܇ ܘܬܽܘܩܳܢܳܐ ܕܰܒܪܺܝܬܳܐ ܚܕܰܬܳܐ ܡܰܟܪܙܳܐ ܠܰܢ. ܗܳܢܳܐ ܕܶܝܢ ܡܰܙܡܽܘܪܳܐ ܐܶܫܟܰܚܢܰܢ ܕܰܐܡܺܝܪ ܠܰܡܙܰܡܪܳܢܳܐ ܥܰܠ ܗܰܘ ܝܰܘܡܳܐ ܩܰܕܡܳܝܳܐ ܕܰܒܪܳܐ ܒܶܗ ܐܰܠܳܗܳܐ ܒܪܺܝܬܳܐ. ܘܕܳܡܝܳܐ ܡܶܠܬܳܐ ܠܣܽܘܥܪܳܢܳܐ. ܘܥܰܠܗܳܕܶܐ ܐܶܡܰܪ ܢܒܺܝܳܐ:
ܕܡܳܪܝܳܐ ܗ̱ܝ ܐܰܪܥܳܐ ܒܰܡܠܳܐܗ̇. ܬܺܒܶܝܠ ܘܟܽܠܗܽܘܢ ܥܳܡܽܘܪ̈ܶܝܗ̇: ܡܶܛܽܠ ܕܗܽܘ ܒܝܰܡܳܐ ܣܳܡ ܫܶܬܶܐܣܶܝ̈ܗ̇: ܘܰܒܢܰܗܪ̈ܰܘܳܬܐܳ ܐܰܬܩܢܳܗ̇. ܕܰܐܝܟ ܗܳܟܰܢܳܐ ܗܘܳܬ ܓܶܝܪ ܐܰܪܥܳܐ ܒܰܫܪܳܪܳܐ. ܟܰܕ ܡܚܰܦܝܳܐ ܗܘܳܬ ܐܰܪܥܳܐ ܒܡܰܝܴ̈ܐ ܕܰܬܗܽܘ̈ܡܶܐ. ܘܺܐܝܬܶܝܗ̇ ܗܘܳܬ ܬܽܘܗ ܘܒܽܘܗ. ܘܠܳܐ ܡܶܬܚܰܙܝܳܐ ܗܘܳܬ ܘܠܳܐ ܡܰܬܩܢܳܐ ܗܘܳܬ. ܚܢܰܢ ܕܶܝܢ ܙܳܕܶܩ ܠܰܢ ܗܳܫܳܐ ܕܢܰܪܦܶܐ ܡܰܢ ܬܰܫܥܺܝܬܳܐ ܕܥܰܠ ܐܰܪܥܳܐ. ܘܢܶܬܦܢܶܐ ܠܘܳܬ ܨܰܠܡܷ̈ܐ ܩܰܕܺܝ̈ܫܶܐ ܕܨܳܪܰܬ ܠܰܢ ܨܶܒܥܳܐ ܕܪܽܘܚܳܐ ܒܡܰܙܡܽܘܪܳܐ ܗܳܢܳܐ. ܡܶܛܽܠ ܕܛܽܘܒܳܢܳܐ ܕܰܘܺܝܕ܆ ܠܘܳܬ ܢܺܝܫܳܐ ܕܦܽܘܪܩܳܢܰܢ ܚܳܐܰܪ ܗܘܳܐ ܟܰܕ ܐܶܡܰܪ ܗܳܠܶܝܢ. ܠܘܳܬ ܬܽܘܩܳܢܳܐ ܕܶܝܢ ܕܡܰܘܠܳܕܰܢ ܕܡܶܢ ܕܪܺܝܫ. ܐܰܪܥܳܐ ܓܶܝܪ ܕܶܐܬܬܣܺܝ̈ܡܝ̱ ܫܶܬܶܐܣܶܝ̈ܗ̇ ܒܝܰܡܳܐ܇ ܡܳܢܳܐ ܐܺܝܬܶܝܗ̇܆ ܐܶܠܳܐ ܥܺܕܬܳܐ ܕܰܒܓܰܘ ܝܰܡܳܐ ܕܡܰܥܡܽܘܕܺܝܬܳܐ ܡܶܢ ܐܰܠܳܗܳܐ ܣܺܝܡܳܐ ܘܰܡܫܰܬܐܣܳܐ. ܝܰܡܳܐ ܕܶܝܢ ܗܽܘܝܽܘ ܥܰܡܰܢܽܘܐܶܝܠ ܕܒܰܩܢܽܘܡܶܗ ܢܰܨܒܳܗ̇ ܠܗܳܕܶܐ ܒܪܺܝܬܳܐ ܚܕܰܬܳܐ ܕܰܒܪܳܐ ܒܓܶܠܝܳܢܶܗ܆ ܐܰܝܟ ܡܶܠܬܶܗ ܕܶܝܢ ܕܰܐܠܗܳܝܳܐ ܦܰܘܠܘܣ ܕܶܐܡܰܪ. ܕܰܐܟܚܕܳܐ ܐܶܬܢܨܶܒܢ ܥܰܡܶܗ ܒܰܕܡܽܘܬܳܐ ܕܡܰܘܬܶܗ. ܘܗܳܟܰܢܳܐ ܐܳܦ ܒܰܩܝܳܡܬܶܗ ܢܶܗܘܶܐ (ܪ̈ܗܘܡܝܐ ܘ: ܗ). ܘܗܳܕܶܐ ܡܰܢ ܡܚܰܘܝܳܐ ܠܰܢ ܕܒܰܩܢܽܘܡܶܗ ܢܰܨܒܳܗ̇ ܠܗܳܕܶܐ ܒܪܺܝܬܳܐ ܚܕܰܬܳܐ. ܠܰܒܪܺܝܬܰܢ ܐܰܝܟ ܫܪܳܪܳܐ ܕܡܰܠܦܳܢܽܘܬܳܐ ܫܠܺܝܚܳܝܬܳܐ. ܘܬܽܘܒ ܟܰܕ ܟܬܰܒ ܠܘܳܬ ܩܽܘ̈ܠܰܣܳܝܶܐ ܐܶܡܰܪ. ܕܟܽܠܡܶܕܶܡ ܒܺܐܝܕܶܗ ܘܒܶܗ ܐܶܬܒܪܺܝ (ܩܘ̈ܠܣܝܐ ܐ: ܝܘ). ܘܗܳܝ ܡܰܢ ܕܒܺܐܝܕܶܗ܆ ܡܰܠܦܳܐ ܥܰܠ ܒܪܺܝܬܰܢ ܩܰܕܡܳܝܬܳܐ ܕܒܺܐܝܕܶܗ ܐܶܬܒܰܪܝܰܬ. ܐܰܝܟ ܛܺܝܢܳܐ ܕܰܠܬܽܘܩܳܢܳܐ ܐܳܬܶܐ ܒܺܐܝ̈ܕܰܝ ܦܰܚܳܪ̈ܶܐ. ܡܳܕܶܝܢ ܫܰܦܺܝܪ ܟܰܕ ܩܳܪܶܐ ܠܳܗ̇ ܕܰܘܺܝܕ ܝܰܡܳܐ. ܐܶܡܰܪ ܓܶܝܪ ܥܰܠ ܥܺܕܬܳܐ܇ ܕܰܒܝܰܡܳܐ ܣܳܡ ܫܶܬܶܐܣܶܝ̈ܗ̇. ܡܶܛܠܗܳܕܶܐ ܟܰܕ ܠܰܫܠܺܝ̈ܚܶܐ ܚܙܳܐ ܒܥܰܝܢܳܐ ܢܒܺܝܳܝܬܳܐ ܐܰܘܣܶܦ ܘܶܐܡܰܪ. ܘܰܒܢܰܗܪ̈ܰܘܳܬܳܐ ܐܰܬܩܢܳܗ̇. ܢܰܗܪ̈ܰܘܳܬܳܐ ܠܰܘ ܒܰܠܚܽܘܕ ܗܽܘ ܫܰܡܰܗ ܐܶܢܽܘܢ ܠܰܫܠܺܝ̈ܚܶܐ܆ ܐܶܠܳܐ ܐܳܦ ܗܽܘ ܡܳܪܰܢ. ܢܰܗܪ̈ܰܘܳܬܳܐ ܐܶܡܰܪ: ܕܪܳܕܶܝܢ ܡܶܢ ܟܰܪܣܶܗ ܕܟܽܠ ܕܰܡܗܰܝܡܶܢ ܒܶܗ (ܝܘܚܢܢ ܙ: ܠܚ). ܚܙܰܝܬ ܠܛܽܘܒܳܢܳܐ ܡܰܬܰܝ ܟܳܪܽܘܙܳܐ܇ ܗܳܢܰܘ ܢܰܗܪܳܐ ܩܰܕܡܳܝܳܐ ܕܰܪܕܳܐ ܡܶܢ ܡܫܺܝܚܳܐ. ܘܰܐܬܩܢܳܗ̇ ܠܥܺܕܬܳܐ ܒܟܳܪܽܘܙܽܘܬܳܐ ܕܡܶܬܒܰܪܢܫܳܢܽܘܬܶܗ ܕܡܶܠܬܳܐ܆ ܕܬܶܬܩܰܢ ܘܬܶܫܬܰܪܰܪ. ܕܡܶܢ ܙܰܪܥܳܐ ܕܰܐܒܳܗܴ̈ܬܳܐ ܟܺܐܢܷ̈ܐ ܘܡܰܠܟܷ̈ܐ ܕܒܶܝܬ ܕܰܘܺܝܕ ܕܢܰܚ ܐܰܠܳܗܳܐ ܟܰܕ ܐܶܬܓܠܺܝ ܒܰܒܣܰܪ. ܚܙܰܝܬ ܠܛܽܘܒܳܢܳܐ ܡܰܪܩܽܘܣ ܫܠܺܝܚܳܐ. ܗܰܘ ܢܰܗܪܳܐ ܬܪܰܝܳܢܳܐ ܕܰܐܬܩܢܳܗ̇ ܠܥܺܕܬܳܐ ܒܝܽܘܠܦܳܢܶܗ܆ ܕܬܰܫܰܪ ܘܰܬܗܰܝܡܶܢ: ܕܶܐܘܰܢܓܶܠܝܽܘܢ ܕܡܰܟܪܶܙ ܝܶܫܽܘܥ ܗܰܘ ܡܫܺܝܚܳܐ ܒܪܶܗ ܕܰܐܠܳܗܳܐ. ܚܙܰܝܬ ܠܛܽܘܒܳܢܳܐ ܠܘܩܳܐ ܗܰܘ ܢܰܗܪܳܐ ܕܰܬܠܳܬܳܐ ܕܶܩܠܰܬ܆ ܗܰܘ ܕܳܐܙܶܠ ܠܽܘܩܒܰܠ ܐܳܬܽܘܪ܆ ܗܰܘ ܕܰܐܬܩܢܳܗ̇ ܐܳܦ ܗܽܘ ܠܥܺܕܬܳܐ ܕܬܰܫܰܪ ܘܰܬܗܰܝܡܶܢ ܕܪܽܘܚܳܐ ܩܰܕܺܝܫܳܐ ܐܶܬܳܐ ܥܰܠ ܒܬܽܘܠܬܳܐ ܘܒܶܛܢܰܬ ܠܡܶܠܬܶܗ ܕܰܐܒܳܐ ܘܚܰܝܠܶܗ ܕܥܶܠܳܝܳܐ ܐܰܓܶܢ ܒܰܕܟܺܝܬܳܐ܆ ܘܗܰܘ ܕܶܐܬܺܝܠܶܕ ܒܳܗ̇ ܩܰܕܺܝܫܰܐ ܗ̱ܘ ܘܰܒܪܶܗ ܕܰܐܠܳܗܳܐ ܐܶܬܩܪܺܝ. ܘܒܳܬܰܪ ܗܳܠܶܝܢ ܐܶܬܳܐ ܢܰܗܪܳܐ ܕܰܐܪܒܥܳܐ ܦܪܳܬ܆ ܝܽܘܚܰܢܳܢ ܗܰܘ ܟܳܪܽܘܙܳܐ ܘܰܡܡܰܠܶܠ ܐܰܠܳܗܳܝ̈ܬܳܐ܆ ܘܰܡܫܰܪܰܪ ܠܳܗ̇ ܘܡܰܬܩܶܢ ܠܳܗ̇ ܠܥܺܕܬܳܐ ܕܟܰܕ ܠܳܐ ܡܶܙܕܰܥܙ̈ܥܳܢ ܫܶܬܶܐܣܶܝ̈ܗ̇܆ ܬܰܫܰܪ ܘܰܬܗܰܝܡܶܢ܇ ܕܗܰܘ ܕܣܳܡ ܫܶܬܶܐܣܶܝ̈ܗ̇ ܒܝܰܡܳܐ ܕܚܰܝܷ̈ܐ ܘܒܰܥܡܳܕܳܐ ܩܰܕܺܝܫܳܐ. ܒܪܺܝܫܺܝܬ ܡܶܠܬܳܐ ܡܰܢ ܐܝܬܰܘܗܝ ܗܘܳܐ ܠܘܳܬ ܐܰܠܳܗܳܐ܆ ܘܰܐܠܳܗܳܐ ܐܝܬܰܘܗܝ ܗܘܳܐ ܗܽܘ ܡܶܠܬܳܐ. ܘܗܳܢܳܐ ܐܝܬܰܘܗܝ ܗܘܳܐ ܒܪܺܝܫܺܝܬ ܠܘܳܬ ܐܰܠܳܗܳܐ. ܘܟܽܠ ܒܺܐܝܕܶܗ ܗ̣ܘܳܐ܆ ܘܒܶܠܥܳܕܰܘܗܝ ܐܳܦܠܳܐ ܚܕܳܐ ܗ̣ܘܳܬ ܡܶܕܶܡ ܕܰܗ̣ܘܳܐ (ܝܘܚܢܢ ܐ: ܓ). ܘܰܠܕܺܝܠܶܗ ܐܶܬܳܐ ܠܘܳܬ ܥܰܒ̈ܕܶܐ. ܘܕܺܝܠܶܗ ܠܳܐ ܩܰܒܠܽܘܗܝ. ܘܰܐܝܠܶܝܢ ܕܩܰܒܠܽܘܗܝ ܝܰܗܒ ܠܗܽܘܢ ܫܽܘܠܛܳܢܳܐ ܕܰܒܢܰܝܴ̈ܐ ܕܰܐܠܳܗܳܐ ܢܶܗܘܽܘܢ (ܝܘܚܢܢ ܐ: ܝܐ-ܝܒ). ܘܛܽܘܒܳܢܳܐ ܦܰܘܠܘܣ ܐܰܠܳܗܳܝܳܐ ܕܶܐܢ ܙܳܕܶܩ ܕܢܰܗܪܳܐ ܒܰܠܚܽܘܕ ܢܶܩܪܶܝܘܗܝ܆ ܐܶܠܳܐ ܬܗܽܘܡܳܐ ܕܡܰܪܕܶܐ ܢܰܗܪ̈ܰܘܳܬܳܐ ܣܰܓܝ̈ܐܐ. ܗܳܢܽܘܢ ܕܡܶܬܕܰܡܶܐ ܒܢܰܗܪ̈ܰܘܳܬܳܐ ܣܰܓܺܝ̈ܐܶܐ ܕܢܳܦܩܺܝܢ ܡܶܢ ܗܶܢܕܽܘܣ ܐܰܬܪܳܐ. ܗܰܘ ܕܡܰܢ ܡܰܪܕܺܝܬܶܗ ܡܶܢ ܡܰܕܢܚܳܐ ܐܺܝܬܶܝܗ̇. ܘܰܠܟܽܠܗܶܝܢ ܥܺܕ̈ܬܳܐ ܕܥܰܡ̈ܡܶܐ ܡܰܠܦܳܢܽܘܬܳܐ ܐܰܝܟ ܝܰܡܳܐ ܡܰܣܪܰܚ ܗܘܳܐ. ܘܡܰܬܩܶܢ ܠܳܗ̇ ܠܥܺܕܬܳܐ ܒܝܽܘܠܦܳܢܶܗ܆ ܕܰܢܩܺܝܡܺܝܗ̇ ܩܕܳܡ ܚܰܬܢܳܐ ܕܠܳܐ ܛܘܠܫܳܐ ܘܰܕܠܳܐ ܟܽܘܬܡܳܐ. ܥܰܡ ܦܶܛܪܽܘܣ ܗܰܘ ܪܰܒܳܐ ܕܰܥܒܺܝܕ ܗܘܳܐ ܢܰܗܪܳܐ ܣܰܓܺܝ ܫܶܦ̈ܥܶܐ. ܒܓܰܘ ܡܕܺܝܢܬܳܐ ܪܰܒܬܳܐ ܕܰܬܗܽܘܡܳܐ. ܘܗܳܟܰܢܳܐ ܢܰܗܪܳܐ ܕܢܰܟܦܽܘܬܳܐ ܘܰܕܥܳܢܘܳܝܽܘܬܳܐ ܝܰܥܩܽܘܒ ܒܽܐܘܪܺܫܠܶܡ. ܘܬܽܐܘܡܰܐ ܢܰܗܪܳܐ ܓܰܐܝܳܐ ܘܚܶܘܳܪ ܫܶܦ̈ܥܶܐ. ܕܰܐܫܩܺܝ ܠܰܐܪܥܳܐ ܕܽܐܘ̈ܟܳܡܶܐ ܘܰܥܒܰܕ ܐܶܢܽܘܢ ܚܶܘܳܪ̈ܶܐ. ܒܰܪ ܬܽܘܠܡܰܝ ܗܰܘ ܕܰܐܛܺܝܦ ܐܰܬܪ̈ܰܘܳܬܳܐ ܕܡܰܕܢܚܳܐ ܒܝܽܘܠܦܳܢܶܗ. ܥܰܡ ܐܰܕܰܝ ܫܠܝܚܳܐ ܗܰܘ ܕܰܐܣܚܺܝ ܠܦܰܪ̈ܬܘܳܝܶܐ ܘܰܠܡܳܕܳܝܷ̈ܐ ܘܠܰܐܬܪ̈ܰܘܳܬܳܐ ܕܰܐܪ̈ܡܢܳܝܶܐ. ܘܡܳܢܳܐ ܚܳܫܶܒ ܐܢܳܐ ܚܰܕ ܚܰܕ ܒܰܫܡܶܗ. ܐܰܝܟܳܐ ܕܶܐܬܦܰܫܩܰܬ ܐܳܦ ܐܶܬܢܰܗܪܰܬ܇ ܕܰܒܗܳܠܶܝܢ ܢܰܗܪ̈ܘܳܬܳܐ ܐܶܬܬܰܩܢܰܬ ܥܺܕܬܳܐ ܕܰܐܠܳܗܳܐ ܒܟܽܠܳܗ̇ ܬܺܒܶܝܠ. ܐܶܠܳܐ ܗܳܫܳܐ ܥܰܡ ܢܒܺܝܳܐ ܘܢܶܫܡܰܥ ܕܡܳܢܰܘ ܫܽܘܐܳܠܐ ܗܳܢܳܐ܆ ܕܡܶܢ ܒܳܬܰܪܟܶܢ ܡܫܰܐܶܠ.
ܡܰܢܽܘ ܢܶܣܰܩ ܠܛܽܘܪܶܗ ܕܡܳܪܝܳܐ: ܘܡܰܢܽܘ ܢܩܽܘܡ ܒܛܽܘܪܶܗ ܩܰܕܺܝܫܳܐ. ܫܰܦܺܝܪ ܡܰܣܰܩܬܳܐ ܕܰܠܘܳܬ ܛܽܘܪܳܐ ܗܰܘ ܕܰܠܥܶܠ ܡܶܢ ܫܡܰܝܳܐ ܡܶܬܕܟܰܪ ܠܶܗ ܒܕܽܘܟܬܳܐ ܐܚܪܺܬܳܐ ܕܰܥܡܳܕܳܐ ܩܰܕܺܝܫܳܐ. ܐܶܠܳܐ ܠܰܝܬ ܘܠܳܐ ܚܰܕ ܕܡܶܬܡܰܛܶܐ ܠܡܶܥܰܠ ܠܰܩܕܽܘܫܩܽܘ̈ܕܫܺܝܢ ܥܶܠܳܝܳܐ ܕܺܐܝܬܝܳܐ. ܐܶܠܳܐ ܗܰܘ ܕܺܐܝܬܰܘܗܝ ܠܥܶܠ ܡܶܢ ܚܛܺܝܬܳܐ. ܗܰܘ ܐܰܝܢܳܐ ܕܟܰܕ ܨܒܳܐ ܘܰܗܘܳܐ ܒܰܪܢܳܫܳܐ ܠܳܐ ܥܒܰܕ ܚܛܺܝܬܳܐ. ܡܶܛܠܡܳܢܳܐ ܡܙܰܡܪܳܢܳܐ:
ܐܰܝܢܳܐ ܕܕܰܟ̈ܝܳܢ ܐܝܕܰܘ̈ܗܝ ܘܰܓܒܶܐ ܒܠܶܒܶܗ. ܘܠܳܐ ܝܳܡܶܐ ܒܢܰܦܫܶܗ ܒܕܰܓܳܠܘܬܳܐ ܘܠܳܐ ܝܳܡܶܐ ܒܢܶܟܠܳܐ. ܗܳܠܶܝܢ ܓܶܝܪ ܠܚܰܕ ܗ̱ܽܘ ܠܳܚ̈ܡܳܢ. ܠܗܰܘ ܕܟܰܕ ܐܶܬܓܠܺܝ ܒܰܒܣܰܪ܆ ܠܳܐ ܐܶܫܬܰܟܚܰܬ ܒܶܗ ܕܰܓܳܠܽܘܬܳܐ ܕܰܚܛܺܝܬܳܐ. ܘܠܳܐ ܗ̣ܘܳܐ ܬܚܶܝܬ ܠܰܘܛܬܳܐ ܕܰܥܒܳܪ ܦܽܘܩܕܳܢܳܐ. ܘܠܳܐ ܐܶܬܬܠܺܝܛ ܐܰܝܟ ܐܳܕܳܡ ܥܰܠ ܕܰܐܥܘܶܠ ܒܢܳܡܽܘܣܳܐ ܕܰܐܠܳܗܳܐ.
ܐܶܠܐ ܗܳܢܳܐ ܐܳܡܰܪ ܢܩܰܒܶܠ ܒܽܘܪܟܬܳܐ ܡܶܢ ܡܳܪܝܳܐ. ܘܙܰܕܺܝܩܽܘܬܳܐ ܡܶܢ ܐܠܰܗܳܐ ܦܳܪܽܘܩܰܢ. ܕܰܒܝܰܕ ܒܽܘܪܟܬܳܐ ܗܳܝ ܕܩܰܒܶܠ ܡܶܢ ܐܰܒܳܐ܆ ܫܪܳܐ ܘܒܰܛܶܠ ܠܰܘܛܬܳܐ ܗܳܝ ܕܥܶܠ̣ܰܬ ܥܰܠ ܐܰܪܥܳܐ ܡܶܛܽܠ ܐܳܕܳܡ. ܘܫܰܦܺܝܪ ܐܶܡܰܪ ܒܽܘܪܟܬܳܐ. ܒܗܳܕܶܐ ܕܽܘܟܬܳܐ ܕܰܒܪܺܝܬܰܢ ܚܕܰܬܳܐ ܥܰܠ ܕܰܢܚܰܘܶܐ܇ ܕܰܐܝܟܰܢܳܐ ܕܳܐܕܳܡ ܒܰܪܢܳܫܳܐ ܩܰܕܡܳܝܳܐ ܗܰܘ ܕܶܐܬܒܪܺܝ ܒܶܗ ܩܰܕܡܳܐܝܺܬ ܠܰܚܛܺܝܬܳܐ. ܐܰܝܬܺܝ ܥܠܰܝܢ ܠܰܘܛܬܳܐ. ܗܳܟܰܢܳܐ ܡܫܺܝܚܳܐ ܗܰܘ ܕܰܗܘܳܐ ܐܳܕܳܡ ܬܪܰܝܳܢܳܐ ܒܰܒܪܺܝܬܳܐ ܚܕܰܬܳܐ܆ ܡܰܥܶܠ ܥܠܰܝܢ ܒܽܘܪܟܬܳܐ. ܗܳܝ ܕܩܰܒܶܠ ܡܶܢ ܐܰܒܳܐ. ܘܡܶܛܽܠܳܬܶܗ ܡܶܬܒܰܪܟܺܝܢܰܢ ܒܶܗ܆ ܡܶܛܠ ܕܗܽܘ ܠܳܐ ܚܛܳܐ. ܘܠܳܐ ܗ̱ܘܳܐ ܒܰܠܚܽܘܕ ܒܽܘܪܟܬܳܐ. ܐܶܠܳܐ ܘܳܐܦ ܙܰܕܺܝܩܽܘܬܳܐ. ܡܶܛܽܠ ܕܰܐܠܗܰܐ ܗ̱ܘ ܕܰܡܙܰܕܰܩ. ܕܰܐܟܡܳܐ ܕܒܰܪܢܳܫܳܐ ܐܰܚܛܺܝ ܡܚܰܘܶܐ ܐܳܦ ܛܘܒܳܢܳܐ ܣܰܒܪܳܐ ܕܰܡܗܰܝܡ̈ܢܶܐ ܕܰܒܡܳܪܰܢ.
ܗܳܢܰܘ ܠܰܡ ܕܳܪܳܐ ܕܒܳܥܶܐ ܘܰܡܣܰܒܰܪ ܠܦܰܪܨܽܘܦܳܐ ܕܰܐܦܰܝ̈ܟ ܐܠܰܗܶܗ ܕܝܰܥܩܽܘܒ. ܗܳܪܟܳܐ ܠܰܝܬ ܥܽܘܗܕܳܢܳܐ ܕܐܢܳܫܽܘܬܳܐ ܘܠܳܐ ܫܽܘܡܳܗܳܐ ܕܰܒܨܺܝܪܽܘܬܳܐ. ܐܶܠܳܐ ܟܰܕ ܡܶܢ ܐܰܪܥܳܐ ܚܙܳܝܗܝ ܕܰܣܠܶܩ܆ ܬܰܘܕܺܝܬܳܐ ܐܰܝܟ ܕܠܰܐܠܳܗܶܗ ܕܝܰܥܩܽܘܒ ܩܰܪܶܒ ܠܶܗ. ܘܶܐܬܦܢܺܝ ܬܽܘܒ ܕܢܶܦܬܰܚ ܬܰܪ̈ܥܶܐ ܥܶܠܳܝܷ̈ܐ ܕܪ̈ܰܘܡܶܐ ܫܡܰܝܴ̈ܢܶܐ ܐܳܡܰܪ. ܗܰܘ ܕܰܐܬܩܶܢ ܠܰܐܪܥܳܐ܆ ܗܳܐ ܠܰܫܡܰܝܳܐ ܡܶܬܥܰܠܶܐ. ܗܰܘ ܕܩܰܒܠܽܘܗܝ ܥܰܡ̈ܡܶܐ ܒܫܰܪ̈ܒܳܬܗܽܘܢ ܘܟܰܕ ܚܳܕܶܝܢ܆ ܦܬܰܚܘ ܬܰܪ̈ܥܶܐ ܕܠܶܒܰܘ̈ܬܗܽܘܢ ܘܥ̣ܰܠ ܘܰܫܪܳܐ ܒܗܽܘܢ. ܘܡܰܠܺܝ ܐܽܘܪܚܳܐ ܕܰܡܕܰܒܪܳܢܽܘܬܶܗ. ܘܰܥܛܰܦ ܠܰܫܡܰܝܳܐ ܐܰܬܪܶܗ܆ ܕܢܶܣܰܩ ܠܛܽܘܪܶܗ ܩܰܕܺܝܫܳܐ ܠܘܳܬܶܗ ܕܰܐܒܳܐ ܝܳܠܘܕܶܗ.
ܐܰܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ܇ ܐܶܬܬܪܺܝܡܘ ܬܰܪ̈ܥܶܐ ܕܡܶܢ ܥܳܠܰܡ: ܢܶܥܽܘܠ ܡܰܠܟܳܐ ܕܺܐܝܩܳܪ̈ܶܐ. ܡܰܢܽܘ ܗܳܢܳܐ ܡܰܠܟܳܐ ܕܺܐܝܩܳܪ̈ܶܐ. ܗܳܠܶܝܢ ܐܶܡܰܪ ܛܽܘܒܳܢܳܐ ܕܰܘܺܝܕ ܟܰܕ ܣܠܶܩ ܡܶܠܬܳܐ ܐܠܰܗܳܐ ܠܰܫܡܰܝܳܐ. ܡܶܛܽܠ ܕܰܒܚܰܝܠܳܐ ܕܪܽܘܚܳܐ ܡܰܙܥܶܩ ܗܘܳܐ܆ ܩܰܠܺܝܠܳܐܝܬ ܐܶܫܬܰܡܥܰܬ ܗܳܕܶܐ ܒܰܪܬ ܩܳܠܳܐ ܠܰܫܡܰܝܳܐ. ܘܰܪܗܶܛܘ ܬܰܪ̈ܳܥܶܐ ܘܢܳܛܪ̈ܰܝ ܬܰܪ̈ܥܶܐ ܕܰܡܕܺܝܢܬܳܐ ܕܰܠܥܶܠ ܘܣܳܡܘ ܥܰܠ ܡܰܛܪ̈ܳܬܗܽܘܢ. ܘܰܠܒܰܟܘ ܬܰܪ̈ܥܶܐ ܕܬܶܓܡܰܝ̈ܗܽܘܢ ܘܡܶܟܺܝܠ ܡܫܰܐܠܺܝܢ ܗܘܰܘ. ܕܡܳܢܰܘ ܩܳܠܳܐ ܗܳܢܳܐ ܚܰܕܬܳܐ ܕܳܐܡܰܪ ܐܰܢܬ؟ ܕܢܶܦܬܰܚ ܬܰܪ̈ܥܶܐ: ܕܠܳܐ ܐܶܬܦܬܰܚܘ ܗܳܐ ܡܶܢ ܥܳܠܰܡ ܩܕܳܡ ܒܰܪܢܳܫܳܐ. ܡܰܢܽܘ ܗܳܢܳܐ؟ ܗܳܢܳܐ ܡܰܠܟܳܐ ܕܺܐܝܩܳܪ̈ܶܐ. ܐܶܢ ܡܶܢ ܐܰܪܥܰܐ ܗ̱ܘ ܠܳܐ ܦܳܬܚܺܝܢܰܢ. ܐܶܢ ܕܶܝܢ ܡܶܢ ܫܡܰܝܰܐ ܗ̱ܘ܆ ܐܰܝܕܳܐ ܗ̱ܝ ܥܶܠܬܳܐ ܕܡܶܢܳܟ ܡܶܬܦܰܩܕܺܝܢܰܢ܆ ܕܢܶܦܬܰܚ ܬܰܪ̈ܥܶܐ ܕܰܫܡܰܝܳܐ ܩܕܳܡ ܡܰܠܟܳܐ ܕܺܐܝܩܳܪ̈ܶܐ. ܗܳܪܟܳܐ ܡܶܢ ܒܳܬܰܪ ܕܰܩܥܳܐ ܢܒܺܝܳܐ: ܘܡܶܢ ܡܰܠܐܟܷ̈ܐ ܘܡܶܢ ܢܳܛܪ̈ܰܝ ܬܰܪ̈ܥܶܐ ܬܰܚܬܳܝܷ̈ܐ ܕܰܫܡܰܝܳܐ ܐܶܫܬܰܐܰܠ ܥܰܠ ܡܰܠܟܳܐ܆ ܩܪܶܒ ܪܽܘܚܳܐ ܘܰܐܠܶܦ ܐܶܢܽܘܢ ܘܶܐܡܰܪ:
ܡܳܪܝܰܐ ܗ̱ܘ ܥܰܫܺܝܢܳܐ ܘܓܰܢ̱ܒܳܪܳܐ. ܡܳܪܝܳܐ ܓܰܢ̱ܒܳܪܳܐ ܘܰܩܪܰܒܬܳܢܳܐ. ܢܶܥܽܘܠ ܡܰܠܟܳܐ ܕܺܐܝܩܳܪ̈ܶܐ. ܢܶܬܩܰܒܰܠ ܡܶܢܟܽܘܢ ܒܺܐܝܩܳܪܳܐ. ܕܡܳܪܝܰܐ ܗ̱ܘ ܥܰܫܺܝܢܳܐ ܘܓܰܢ̱ܒܳܪܳܐ. ܢܶܬܺܝܕܰܥ ܠܟܽܘܢ ܕܡܳܪܝܰܐ ܗ̱ܘ ܥܰܫܺܝܢܳܐ. ܗܳܪܟܳܐ ܡܚܰܘܶܐ ܡܰܚ̈ܘܳܬܳܐ ܕܒܺܐܝܕܰܘ̈ܗܝ ܘܕܰܦܢܶܗ ܟܰܕ ܬܪܺܝܥܳܐ ܒܪܽܘܡܚܳܐ ܕܶܐܣܛܪܰܛܺܝܽܘܬܳܐ. ܗܳܪܟܳܐ ܡܫܰܐܠܺܝܢ ܗܘܰܘ ܘܳܐܡܪܺܝܢ܇ ܠܰܘ ܠܕܰܘܺܝܕ ܐܶܠܳܐ ܠܡܶܠܬܳܐ ܐܰܠܳܗܳܐ. ܡܳܢܳܐ ܐܶܢܶܝܢ ܗܳܢܶܝܢ ܡܰܚ̈ܘܳܬܳܐ ܕܒܺܐܝ̈ܕܰܝܟ؟ ܘܰܡܦܰܢܶܐ ܗܘܳܐ ܦܶܬܓܳܡܳܐ ܠܚܰܝ̈ܠܰܘܳܬܳܐ ܩܰܕܺܝ̈ܫܶܐ ܘܳܐܡܰܪ. ܗܳܠܶܝܢ ܡܰܚ̈ܘܳܬܳܐ ܡܰܢ ܕܒܶܠܥܶܬ ܐܶܢܶܝܢ ܒܶܝܬ ܪ̈ܳܚܡܰܝ (ܙܟܪܝܐ ܝܓ: ܘ). ܙܳܕܶܩ ܕܶܝܢ ܕܢܶܒܥܶܐ܆ ܕܡܶܛܽܠܡܳܢܳܐ ܥܳܐܶܦ ܩܳܠܰܘ̈ܗܝ ܢܒܺܝܳܐ. ܘܕܰܐܝܟ ܗܳܠܶܝܢ ܩܴ̈ܠܶܐ ܩܰܕܡܳܝܷ̈ܐ ܩܳܥܶܐ ܠܘܳܬ ܬܰܪ̈ܥܶܐ ܥܶܠܳܝܷ̈ܐ ܘܨܶܝܕ ܚܰܝ̈ܠܰܘܳܬܳܐ ܬܳܐܪ̈ܶܐ ܕܡܰܠܟܽܘܬܳܐ ܕܰܠܥܶܠ܆ ܡܳܢܳܐ ܗ̄ܝ ܥܶܠܬܳܐ ܢܺܐܡܰܪ܇ ܕܰܡܩܰܒܳܠܽܘ ܠܳܐ ܡܩܰܒܠܺܝܢ ܗܘܰܘ ܚܰܝ̈ܠܰܘܳܬܳܐ ܠܡܰܠܟܗܽܘܢ ܠܰܝܬ ܐܰܬܪܳܐ. ܘܰܕܢܺܐܡܰܪ ܕܰܠܘܳܬ ܗܳܢܽܘܢ ܕܩܳܝܡܺܝܢ ܗܘܰܘ ܒܬܰܪ̈ܥܶܐ ܕܪ̈ܰܘܡܶܐ ܥܶܠܳܝܷ̈ܐ ܥܳܐܶܦ ܗܘܳܐ ܩܳܠܳܐ܆ ܐܳܦ ܗܳܕܶܐ ܣܰܓܺܝ ܥܰܛܠܳܐ. ܐܶܠܳܐ ܗܳܕܶܐ ܐܺܝܬܶܝܗ̇. ܕܡܶܢ ܒܳܬܰܪ ܕܶܐܬܓܢܺܝ ܡܶܢ ܡܰܫܪ̈ܝܳܬܳܐ ܕܬܶܓ̈ܡܶܐ ܬܰܚܬܳܝܷ̈ܐ ܕܺܐܝܬ ܒܰܫܡܰܝܴ̈ܐ ܬܰܚܬܳܝܷ̈ܐ ܕܰܠܥܶܠ ܡܶܢ ܪܩܺܝܥܳܐ. ܗܳܢܽܘܢ ܕܺܐܝܬܰܝܗܽܘܢ ܡܰܠܐܟܷ̈ܐ ܘܪ̈ܰܒܰܝ ܡܰܠܐܟܷ̈ܐ ܘܰܐܪ̈ܟܰܐܣ. ܘܟܰܕ ܥܒܰܪ ܡܶܢ ܨܶܝܕ ܗܳܠܶܝܢ ܠܰܐܬܪܳܐ ܕܰܠܥܶܠ ܡܶܢܗܽܘܢ܇ ܗܰܘ ܕܰܡܡܰܨܰܥ ܒܶܝܬ ܠܗܽܘܢ ܠܰܫܡܰܝܳܐ ܕܬܰܪܬܶܝܢ. ܟܰܕ ܩܪܶܒ ܠܘܳܬ ܬܰܪ̈ܥܶܐ ܕܗܳܢܽܘܢ ܫܡܰܝܴ̈ܐ ܬܪ̈ܰܝܳܢܶܐ: ܘܡܰܛܺܝ ܗܘܳܐ ܡܶܢ ܟܰܕܽܘ ܠܘܳܬ ܬܰܪ̈ܥܶܐ ܕܫܽܘܠܛܳܢܷ̈ܐ. ܐܳܦ ܗܳܪܟܳܐ ܬܽܘܒ ܒܰܩܥܳܬܳܐ ܡܶܬܚܰܫܰܚ ܗܘܳܐ ܢܒܺܝܳܐ. ܟܰܕ ܩܳܥܶܐ ܠܘܳܬ ܗܳܠܶܝܢ ܕܰܠܥܶܠ ܩܰܕܡܳܝܷ̈ܐ.
ܕܰܐܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ. ܘܶܐܢܗܽܘ ܕܠܰܘ ܡܰܪܳܚܽܘܬܳܐ ܗ̱ܝ ܐܳܡܰܪ ܐܢܳܐ. ܕܗܳܢܳܐ ܩܳܠܳܐ ܬܪܰܝܳܢܳܐ ܡܰܫܪ̈ܝܳܬܳܐ ܗܳܠܶܝܢ ܕܩܰܒܶܠܘ ܩܰܕܡܳܐܝܺܬ ܡܶܢ ܢܒܺܝܳܐ. ܩܳܥܶܝܢ ܠܘܳܬ ܗܳܠܶܝܢ ܕܰܠܥܶܠ ܡܶܢܗܽܘܢ. ܥܝܳܕܳܐ ܓܶܝܪ ܐܺܝܬ ܠܚܰܝ̈ܠܰܘܳܬܳܐ. ܕܚܰܕ ܡܶܢ ܚܰܕ ܢܶܗܘܽܘܢ ܡܩܰܒܠܺܝܢ ܩܴ̈ܠܶܐ ܕܢܳܚܬܺܝܢ ܡܶܢ ܠܥܶܠ. ܘܰܕܢܶܗܘܽܘܢ ܡܝܰܒܠܺܝܢ ܘܡܰܘܫܛܺܝܢ ܗܳܠܶܝܢ ܕܡܶܬܥܰܠܶܝܢ ܡܶܢ ܠܬܰܚܬ. ܐܰܟܡܳܐ ܕܡܰܘܕܰܥ ܐܳܦ ܛܽܘܒܳܢܳܐ ܙܟܰܪܝܳܐ. ܕܰܢܦܰܩ ܡܰܠܐܟܳܐ ܕܡܰܠܶܠ ܒܺܝ ܘܗܳܐ ܡܰܠܐܟܳܐ ܐܚܪܺܢܳܐ ܐܶܬܳܐ ܠܐܘܪܥܶܗ ܘܶܐܡܰܪ ܠܶܗ: ܗܰܪܛ ܘܐܡܰܪ ܠܰܥܠܰܝܡܳܐ ܗܰܘ! ܐܰܓܽܘܪ̈ܣܶܐ ܬܶܬܶܒ ܐܘܪܶܫܠܶܡ (ܙܟܪܝܐ ܒ: ܕ). ܘܬܽܘܒ ܐܳܦ ܠܘܳܬ ܕܳܢܺܝܐܶܝܠ ܡܰܘܕܰܥ ܓܰܒܪܺܐܝܠ ܡܰܠܐܟܳܐ. ܕܟܰܕ ܒܳܥܶܐ ܕܢܶܫܪܶܐ ܠܥܰܡܳܐ ܡܶܢ ܐܰܣܽܘܪ̈ܶܐ ܕܒܳܒܶܝܠ. ܘܩܳܡ ܠܩܽܘܒܠܶܗ ܫܰܠܺܝܛܳܐ ܗܰܘ ܕܡܰܠܟܽܘܬܳܐ ܕܦܳܪ̈ܣܳܝܶܐ. ܡܘܕܰܥ ܟܰܕ ܐܳܡܰܪ. ܠܳܐ ܬܶܕܚܰܠ ܕܳܢܺܝܐܶܝܠ: ܡܶܛܽܠ ܕܡܶܢ ܝܰܘܡܳܐ ܩܰܕܡܳܝܳܐ ܕܝܰܗܒ̣ܬ ܠܶܒܳܟ ܠܺܝܕܰܥܬܳܐ ܠܰܡܩܳܡ ܩܕܳܡ ܐܠܰܗܳܟ ܐܶܫܬܡܱ̈ܥܝ ܡܶܠܰܝ̈ܟ ܘܶܐܢܳܐ ܐܶܬܺܝܬ ܒܡܶܠܰܝ̈ܟ. ܘܫܰܠܺܝܛܳܐ ܕܡܰܠܟܽܘܬܳܐ ܕܦܳܪܶܣ ܩܳܡ ܠܽܘܩܒܰܠܝ ܥܶܣܪܺܝܢ ܘܚܰܕ ܝܰܘܡܳܐ. ܘܗܳܐ ܡܺܝܟܳܐܝܠ܇ ܚܰܕ ܡܶܢ ܪܰܘܪ̈ܒܳܢܶܐ ܩܰܕܡܳܝܷ̈ܐ: ܐܶܬܳܐ ܠܰܡܥܰܕܳܪܽܘܬܰܢ (ܕܢܝܐܝܠ ܝ: ܝܒ-ܝܓ). ܡܳܕܶܝܢ ܡܶܢ ܚܰܝܠܳܐ ܕܗܳܠܶܝܢ ܬܰܚܘ̈ܝܳܬܳܐ. ܡܫܰܐܠܺܝܢ ܐܶܢܽܘܢ ܚܰܝ̈ܠܰܘܴܬܳܐ ܚܰܕ ܠܚܰܕ: ܘܡܶܢ ܚܰܕ ܚܰܕ ܝܳܠܦܺܝܢ. ܓܰܠܝܳܐ ܗ̱ܝ ܡܳܕܶܝܢ ܕܚܰܝ̈ܠܰܘܳܬܳܐ ܬܰܚܬܳܝܷ̈ܐ ܩܥܰܘ ܗܘܰܘ ܗܳܠܶܝܢ ܩܴ̈ܠܶܐ ܬܪ̈ܰܝܳܢܶܐ ܨܶܝܕ ܗܳܠܶܝܢ ܕܰܠܥܶܠ ܡܶܢܗܽܘܢ.
ܕܰܐܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ. ܘܶܐܬܬܪܺܝܡܘ ܬܰܪ̈ܥܶܐ ܕܡܶܢ ܥܳܠܰܡ܆ ܕܢܶܥܽܘܠ ܡܰܠܟܳܐ ܕܺܐܝܩܳܪ̈ܶܐ. ܘܗܳܠܶܝܢ ܬܽܘܒ ܟܰܕ ܫܡܰܥܘ ܩܴ̈ܠܶܐ ܕܡܶܬܩܥܶܝܢ܆ ܡܫܰܐܠܺܝܢ ܗܘܰܘ.
ܕܡܰܢܽܘ ܗܳܢܳܐ ܡܰܠܟܳܐ ܕܺܐܝܩܳܪ̈ܶܐ؟ ܘܰܐܝܟ ܕܰܫܡܰܥܘ ܡܶܢ ܕܰܘܺܝܕ ܡܦܰܢܶܝܢ ܗܘܰܘ ܦܶܬܓܳܡܳܐ.
ܕܡܳܪܝܳܐ ܚܰܝܠܬܳܢܳܐ. ܘܗܽܘܝܽܘ ܡܰܠܟܳܐ ܡܝܰܩܪܳܐ ܠܥܳܠܰܡ. ܘܗܳܠܶܝܢ ܚܰܝ̈ܠܰܘܳܬܳܐ ܕܒܰܫܡܰܝܳܐ ܡܡܰܨܥܺܝܢ. ܕܰܠܥܶܠ ܡܶܢ ܬܰܚܬܳܝܷ̈ܐ ܘܰܠܬܰܚܬ ܡܶܢ ܥܶܠܳܝܷ̈ܐ܆ ܕܺܐܝܬܰܝܗܽܘܢ ܫܰܠܺܝܛܳܢܷ̈ܐ ܘܚܰܝ̈ܠܰܘܳܬܳܐ ܡܳܪ̈ܰܘܳܬܳܐ. ܠܳܐ ܕܳܡܝܳܐ ܕܰܩܥܰܘ ܡܶܛܽܠܳܬܶܗ ܟܰܕ ܥܒܰܪ ܡܶܢ ܠܘܳܬܗܽܘܢ. ܡܩܰܒܠܺܝܢ ܗܘܰܘ ܠܶܗ ܡܶܢ ܒܳܬܰܪܗܽܘܢ. ܘܗܳܠܶܝܢ ܕܩܳܝܡܺܝܢ ܒܰܫܡܰܝܳܐ ܕܰܬܠܳܬܳܐ. ܕܡܶܢܗܽܘܢ ܐܝܬܰܘܗܝ ܗܘܳܐ ܓܰܒܪܺܐܝܠ ܗܰܘ ܩܰܫܺܝܫ ܡܰܠܐܟܷ̈ܐ. ܘܩܰܕܡܳܝܳܐ ܕܟܽܠܗܽܘܢ ܡܰܠܐܟܷ̈ܐ ܘܰܕܚܰܝ̈ܠܰܘܳܬܳܐ. ܘܡܶܛܽܠ ܕܗܳܠܶܝܢ ܩܰܕܶܡ̈ܝ ܐܶܬܪ̈ܫܶܡܝ ܒܣܽܘܥܪ̈ܳܢܶܐ ܐܰܠܳܗܳܝܷ̈ܐ. ܘܰܒܡܰܚܰܬܬܶܗ ܕܡܰܠܐܟܳܐ ܕܰܠܘܳܬ ܒܬܽܘܠܬܳܐ ܝܳܕܥܺܝܢ ܗܘܰܘ. ܠܳܐ ܣܢܺܝܩܺܝܢ ܗܘܰܘ ܕܰܢܫܰܐܠܽܘܢ ܐܰܝܟ ܗܳܢܽܘܢ ܕܰܠܬܰܚܬ ܡܶܢܗܽܘܢ. ܐܶܠܳܐ ܐܰܝܟ ܥܰܒ̈ܕܶܐ ܕܝܳܬܒܺܝܢ ܥܰܠ ܡܰܛܰܪܬܳܐ ܒܬܰܪܥܳܐ ܕܰܓܢܽܘܢܳܐ. ܘܰܡܣܰܟܶܝܢ ܘܚܳܝܪܺܝܢ ܠܡܳܪܗܽܘܢ ܕܠܶܐܡܰܬܝ ܢܶܦܢܶܐ ܡܶܢ ܒܶܝܬ ܡܶܫܬܽܘܬܳܐ. ܘܡܳܐ ܕܶܐܬܳܐ ܘܰܢܩܰܫ܆ ܡܶܚܕܳܐ ܢܶܦܬܚܽܘܢ ܠܶܗ (ܠܘܩܐ ܝܒ: ܠܘ). ܗܳܟܰܢܳܐ ܩܳܝܡܺܝܢ ܗܘܰܘ ܘܰܡܣܰܟܶܝܢ ܠܡܰܣܰܩܬܶܗ ܕܰܐܠܳܗܳܐ ܡܶܢ ܐܰܪܥܳܐ ܠܘܳܬܗܽܘܢ. ܘܰܒܫܰܝܢܳܐ ܩܰܒܠܽܘܗܝ ܕܠܳܐ ܫܽܘܐܠܳܐ. ܘܠܳܐ ܓܝܶܪ ܗܳܢܽܘܢ ܕܶܝܢ ܕܫܰܐܶܠܘ ܘܺܝܠܶܦܘ ܕܡܰܢܽܘ ܐܶܬܬܥܺܝܩܘ܇ ܕܠܰܘ ܚܰܬܺܝܬܳܐܝܬ ܝܳܕܥܺܝܢ ܗܘܰܘ ܟܽܠܗܽܘܢ. ܠܳܐ ܬܽܘܒ ܗܳܢܽܘܢ ܕܶܐܬܗܰܝܡܰܢܘ ܠܐܪܳܙܳܐ ܩܕܳܡ ܚܰܒܪ̈ܰܝܗܽܘܢ܆ ܐܶܬܬܪܺܝܡܘ ܥܰܠ ܕܠܳܐ ܩܰܕܶܡܘ ܝܺܠܶܦܘ. ܠܗܳܠܶܝܢ ܕܶܝܢ ܘܰܠܗܳܠܶܝܢ ܫܰܝܶܢ ܐܶܢܽܘܢ ܡܶܠܬܳܐ ܐܰܠܳܗܳܐ ܟܰܕ ܣܠܶܩ ܒܰܕܡܳܐ ܕܰܙܩܺܝܦܶܗ ܒܺܐܝܕܰܘ̈ܗܝ. ܐܰܝܟ ܡܶܠܬܳܐ ܫܠܺܝܚܳܝܬܳܐ ܕܡܰܠܦܳܐ. ܕܫܰܝܶܢ ܡܳܐ ܕܒܰܫܡܰܝܳܐ ܘܡܳܐ ܕܒܰܐܪܥܳܐ (ܩܘ̈ܠܣܝܐ ܐ: ܟ). ܕܠܶܗ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܚܡܫܐ
ܕܡܰܠܶܦ ܕܒܰܐܝܠܶܝܢ ܩ̈ܠܶܐ ܢܶܬܚܰܫܰܚ ܒܰܨܠܘܬܳܐ: ܠܗܰܘ ܕܗܳܘܶܐ ܒܽܐܘܠܨܳܢܳܐ.
ܢܰܦܫܳܐ ܕܰܐܪܓܫܰܬ ܒܬܶܐܓܽܘܪܬܳܐ ܕܗܳܘܝܳܐ ܠܳܗ̇ ܡܶܢ ܐܽܘ̈ܠܨܳܢܶܐ ܕܰܚܠܳܦ ܕܶܚܠܰܬ ܐܰܠܳܗܳܐ܆ ܕܠܺܝܠܳܐܝܬ ܘܰܕܠܳܐ ܩܽܘܛܳܥܳܐ ܡܣܰܝܒܪܳܐ ܠܗܽܘܢ. ܘܠܳܐ ܡܶܫܬܰܓܫܳܐ ܡܶܢ ܟܺܐܡܽܘ̈ܢܶܐ ܕܰܡܩܺܝܡܺܝܢ ܥܠܶܝܗ̇ ܪ̈ܳܕܽܘܦܶܐ. ܘܠܳܐ ܡܕܰܚܶܠ ܠܳܗ̇ ܩܪܳܒܳܐ ܕܰܒܥܶܠܕ̈ܒܳܒܶܐ. ܘܠܳܐ ܡܕܰܘܶܕ ܠܳܗ̇ ܫܓܽܘܫܝܳܐ ܕܳܐܠܘ̈ܨܶܐ. ܘܠܳܐ ܡܰܟܡܰܪ ܠܳܗ̇ ܕܠܽܘܚܝܳܐ ܕܪܽܘܓܙܳܐ ܕܥܰܘܴ̈ܠܶܐ. ܐܶܠܳܐ ܒܢܰܘܚܳܐ ܕܠܳܐ ܫܓܽܘܫܝܳܐ ܡܟܰܬܪܳܐ. ܘܝܰܬܺܝܪܳܐܝܺܬ ܐܶܢ ܣܳܡܰܬ ܥܰܝ̈ܢܶܝܗ̇ ܠܽܘܩܒܰܠ ܡܳܪܝܳܐ. ܐܰܟܡܳܐ ܕܶܐܡܰܪ ܛܽܘܒܳܢܳܐ ܕܰܘܺܝܕ. ܐܳܦ ܗܽܘ ܓܶܝܪ ܩܺܝܬܳܪܽܘܕܳܐ ܪܽܘܚܳܢܳܝܳܐ ܢܰܦܫܳܐ ܩܢܶܐ ܗܘܳܐ. ܐܰܝܟ ܗܳܕܶܐ ܕܗܳܫܳܐ ܐܶܡܪܶܬ. ܘܡܶܛܠܗܳܢܳܐ ܒܙܰܒܢܳܐ ܕܶܐܬܟܰܪܟܽܘܗ̇ ܒܥܶܠܕ̈ܒܳܒܶܐ ܡܶܢ ܟܽܠ ܓܰܒܺܝ̈ܢ܆ ܕܠܳܐ ܫܓܽܘܫܝܳܐ ܘܰܕܠܳܐ ܕܠܽܘܚܝܳܐ ܥܰܒܕܳܗ̇ ܠܢܰܦܫܶܗ ܦܳܪܽܘܫܬܳܐ. ܘܰܚܠܳܦ ܩ̈ܠܶܐ ܕܪܶܛܢܳܐ ܕܰܡܠܶܝܢ ܒܽܘ̈ܓܳܢܶܐ ܘܰܕܡܰܫܡܰܥܬܳܐ ܐܰܠܝ̈ܨܰܝ ܬܰܪ̈ܥܝܳܬܳܐ ܘܡܶܣܟܻ̈ܢܰܝ ܢܰܦܫܳܐ܇ ܡܳܐ ܕܩܳܐܶܡ ܥܠܰܝܗܽܘܢ ܐܽܘܠܨܳܢܳܐ ܡܶܢ ܒܥܶܠܕ̈ܒܳܒܶܐ܆ ܗܽܘ ܛܽܘܒܳܢܳܐ ܒܩܳܠܳܐ ܕܒܳܥܽܘܬܳܐ ܕܰܡܠܶܐ ܣܰܒܪܳܐ ܡܪܺܝܡ ܗܘܳܐ ܥܰܝ̈ܢܶܐ ܕܢܰܦܫܶܗ ܠܘܳܬ ܐܠܰܗܳܐ ܘܳܐܡܰܪ:
ܠܘܳܬܳܟ ܡܳܪܝܳܐ ܢܰܦܫܝ ܐܰܪܺܝܡܶܬ. ܐܰܠܳܗܝ ܒܳܟ ܣܰܒܪܶܬ ܠܳܐ ܐܶܒܗܰܬ: ܠܳܐ ܢܶܫܬܰܒܗܪܽܘܢ ܥܠܰܝ ܒܥܶܠܕ̈ܒܳܒܰܝ. ܘܳܐܦ ܟܽܠ ܕܰܡܣܰܒܪܺܝܢ ܒܳܟ ܠܳܐ ܢܶܒܗܬܽܘܢ. ܫܰܦܺܝܪ ܐܶܡܰܪ ܕܰܠܘܳܬܳܟ ܡܳܪܝܳܐ ܢܰܦܫܝ ܐܰܪܺܝܡܶܬ. ܗܳܢܰܘ ܓܶܝܪ ܢܺܝܫܳܐ ܬܪܺܝܨܳܐ ܗܰܘ ܕܒܳܥܶܐ ܒܳܥܽܘܬܳܐ. ܕܢܶܬܠܶܐ ܢܰܦܫܶܗ ܡܶܢ ܚܛܳܗܷ̈ܐ. ܘܰܢܪܺܝܡܺܝܗ̇ ܡܶܢ ܥܶܢܝܳܢܷ̈ܐ ܐܰܪ̈ܥܳܢܳܝܶܐ. ܟܰܕ ܥܒܰܕ ܠܳܗ̇ ܩܰܠܺܝܠ ܠܰܦܪܳܚܳܐ ܘܶܐܒܪܳܢܺܝܬܳܐ. ܐܰܟܡܰܢ ܕܰܠܘܳܬ ܟܝܳܢܳܐ ܕܰܡܥܰܠܰܝ ܡܶܢܟܽܠ ܡܶܬܥܰܠܝܳܐ ܠܡܶܒܥܳܐ ܒܳܥܽܘܬܳܐ. ܢܒܺܝܳܐ ܓܶܝܪ ܐܶܡܰܪ. ܕܶܐܢܳܐ ܐܰܪܺܝܡܶܬ ܢܰܦܫܝ ܠܘܳܬ ܡܳܪܝܳܐ. ܗܳܢܰܘ ܕܶܝܢ ܩܰܪܒܶܬ ܩܕܳܡܰܘܗܝ ܘܰܒܥܺܝܬ ܡܶܢܶܗ. ܘܢܶܩܫܶܬ ܒܬܰܪܥܶܗ. ܡܶܛܽܠ ܕܝܶܕܥܶܬ ܕܠܳܐ ܥܳܢܶܐ ܡܶܢ ܠܶܒܳܐ. ܥܕܰܡܳܐ ܕܩܳܪܶܐ ܘܡܶܬܟܰܫܰܦ ܩܕܳܡܰܘܗܝ. ܐܶܡܰܪ ܓܶܝܪ. ܕܶܐܢ ܬܶܩܪܶܝܢܝ ܐܶܥܢܶܝܟ (ܡܙܡܘܪܐ ܨܐ: ܝܗ). ܘܬܽܘܒ. ܕܰܒܥܰܘ ܠܡܳܪܝܳܐ ܘܡܳܐ ܕܶܐܫܟܰܚܬܽܘܢܳܝܗܝ ܩܪܰܐܽܘܗܝ. ܡܳܕܶܝܢ ܗܰܘ ܕܒܳܥܶܐ ܕܢܰܪܟܶܢ ܠܘܳܬܶܗ ܗܰܘ ܟܝܳܢܳܐ ܡܠܶܐ ܛܽܘ̈ܒܶܐ܆ ܢܪܺܝܡ ܢܰܦܫܶܗ ܡܶܢ ܡܽܘܟܳܟܳܐ ܕܰܚܛܺܝܬܳܐ ܘܗܳܐ ܐܶܬܢܰܚܰܬ ܠܘܳܬܶܗ ܡܳܪܝܳܐ ܗܰܘ ܕܰܡܪܺܝܡ ܠܡܰܟܺܝ̈ܟܶܐ. ܘܗܳܢܳܐ ܕܠܺܝܠܳܐܝܬ ܡܰܪܓܶܫ ܗܽܘ ܒܢܰܦܫܶܗ܆ ܕܠܳܐ ܒܳܗܶܬ ܡܶܢ ܣܰܒܪܶܗ. ܘܳܐܡܰܪ. ܐܠܰܗܝ ܒܟ ܣܰܒܪܶܬ ܠܳܐ ܐܶܒܗܰܬ܆ ܘܠܳܐ ܢܶܫܬܰܒܗܪܽܘܢ ܥܠܰܝ ܒܥܶܠܕ̈ܒܳܒܰܝ܆ ܘܳܐܦ ܟܽܠ ܕܰܡܣܰܒܪܺܝܢ ܒܳܟ ܠܳܐ ܢܶܒܗܬܽܘܢ.
ܢܶܒܗܬܽܘܢ ܥܰܘܴ̈ܠܶܐ ܒܰܣܪܺܝܩܽܘܬܗܽܘܢ. ܘܠܳܐ ܠܰܡ ܠܥܰܘܴ̈ܠܶܐ ܠܳܐܛ ܐܢܳܐ ܘܠܳܐ ܡܥܺܝܪܐܢܳܐ ܟܺܐܢܽܘܬܳܐ ܕܺܝܠܳܟ ܠܢܶܓܕܳܐ ܥܠܰܝܗܽܘܢ. ܐܶܠܳܐ ܐܳܡܰܪ ܐܢܳܐ: ܕܰܒܗܰܘ ܡܶܕܶܡ ܕܡܰܪܫܥܺܝܢ ܢܶܬܟܰܚܕܽܘܢ ܘܢܶܒܗܬܽܘܢ. ܗܳܕܶܐ ܓܶܝܪ ܐܶܢ ܗܳܘܝܳܐ܆ ܬܰܪܥܽܘܬܳܐ ܡܶܫܟܚܺܝܢܰܢ ܒܬܰܪܥܳܟ. ܐܳܦ ܐܳܚܳܒ ܡܰܠܟܳܐ ܟܰܕ ܒܗܶܬ ܩܕܳܡ ܐܠܰܗܳܐ ܒܡܶܕܶܡ ܕܰܥܒܰܕ܇ ܦܩܰܕ ܐܰܠܳܗܳܐ ܕܠܳܐ ܢܰܝܬܶܐ ܒܺܝܫܬܳܐ ܒܝܰܘ̈ܡܰܘܗܝ. ܡܳܕܶܝܢ ܠܰܘ ܡܠܳܛ ܠܳܛ ܐܶܢܽܘܢ ܗܳܪܟܳܐ. ܐܶܠܳܐ ܡܨܰܠܳܝܽܘ ܨܰܠܺܝܘ ܗܘܰܘ ܢܒܺܝܷ̈ܐ ܥܰܠ ܥܰܘܴ̈ܠܶܐ ܕܰܢܬܽܘܒܽܘܢ. ܗܰܘ ܓܶܝܪ ܕܠܳܐ ܦܪܰܥ ܗܘܳܐ ܠܥܰܘܳܠܳܐ ܕܰܥܒܰܕ ܠܶܗ ܒܺܝܫܬܳܐ܆ ܐܰܝܟܰܢܳܐ ܗܳܪܟܳܐ ܡܩܰܛܪܶܓ ܗܘܳܐ ܢܰܦܫܶܗ ܩܕܳܡ ܟܺܐܢܽܘܬܳܐ ܘܠܳܐܛ ܠܥܰܘܴ̈ܠܶܐ. ܡܶܛܠܗܳܕܶܐ ܡܨܰܠܶܐ ܘܳܐܡܰܪ:
ܐܘܪ̈ܚܳܬܳܟ ܡܳܪܝܳܐ ܚܰܘܳܢܝ̱. ܚܙܺܝ ܡܳܢܳܐ ܐܶܡܰܪ ܓܰܒܪܳܐ ܙܰܕܺܝܩܳܐ ܕܠܳܐ ܡܶܫܬܰܒܗܰܪ ܐܰܝܟ ܝܳܕܽܘܥܳܐ ܕܽܐܘܪܚܳܐ ܕܰܐܠܳܗܳܐ. ܘܠܳܐ ܐܶܡܰܪ ܕܶܐܬܕܟܰܪ ܕܗܰܠܟܶܬ ܒܽܐܘܪ̈ܚܳܬܳܟ ܒܩܽܘܫܬܳܐ. ܐܶܠܳܐ ܐܰܝܟ ܗܰܘ ܕܠܳܐ ܝܳܕܰܥ ܐܽܘܪܚܳܐ܆ ܒܳܥܶܐ ܕܢܺܐܠܰܦ ܐܽܘܪ̈ܚܳܬܶܗ ܕܡܳܪܝܳܐ. ܘܗܳܠܶܝܢ ܐܶܢܶܝܢ ܐܽܘܪ̈ܚܳܬܶܗ ܕܡܳܪܝܳܐ܇ ܕܰܟܝܽܘܬܳܐ: ܘܩܰܕܺܝܫܽܘܬܳܐ: ܡܪܰܚܡܳܢܽܘܬܳܐ: ܟܺܐܢܽܘܬܳܐ: ܢܰܟܦܽܘܬܳܐ: ܡܰܟܺܝܟܽܘܬܳܐ: ܡܣܰܝܒܪܳܢܽܘܬܳܐ: ܨܰܘܡܳܐ܆ ܨܠܽܘܬܳܐ. ܗܳܢܶܝܢ ܕܒܳܥܶܐ ܗܘܳܐ ܕܰܘܺܝܕ ܕܰܢܚܰܘܶܐ ܠܶܗ ܡܳܪܝܳܐ ܥܰܡ ܦܽܘ̈ܩܕܳܢܶܐ ܘܢܳܡܽܘ̈ܣܶܐ. ܘܡܰܝܬܶܐ ܡܶܢ ܒܳܬܰܪܟܶܢ.
ܘܰܫܒܺܝ̈ܠܰܝܟ ܐܰܘܕܰܥܰܝܢܝ. ܘܕܰܒܰܪܰܝܢܝ ܒܩܽܘܫܬܳܟ ܘܰܐܠܶܦܰܝܢܝ: ܡܶܛܽܠ ܕܰܐܢܬ ܗܘ ܐܰܠܳܗܝ ܘܦܳܪܽܘܩܝ: ܘܠܳܟ ܣܰܟܺܝܬ ܒܟܽܠܝܽܘܡ. ܗܰܘ ܓܶܝܪ ܕܒܽܐܘܪ̈ܚܳܬܳܐ ܗܳܠܶܝܢ ܕܶܐܬܶܐܡܰܪ̈ܝ ܗܰܠܶܟ ܐܰܡܺܝܢܳܐܝܬ܆ ܟܽܠܝܽܘܡ ܠܰܐܠܳܗܳܐ ܡܣܰܟܶܐ. ܘܰܦܫܺܝܩ ܠܶܗ ܠܡܺܐܡܰܪ ܥܰܡ ܢܒܺܝܳܐ.
ܐܶܬܕܰܟܪ ܡܳܪܝܳܐ ܪ̈ܰܚܡܰܝܟ ܕܡܶܢ ܥܳܠܰܡ ܘܛܰܝܒܘܴ̈ܬܳܟ. ܘܣܰܟ̈ܠܘܳܬܳܐ ܕܛܰܠܝܽܘܬܝ ܠܳܐ ܬܶܬܕܟܰܪ ܠܺܝ. ܣܰܓܺܝ̈ܐܳܬܳܐ ܓܶܝܪ ܣܳܥܪܳܐ ܛܰܠܝܽܘܬܳܐ ܒܠܳܐ ܝܺܕܰܥܬܳܐ. ܘܡܳܐ ܕܩܳܐܶܡ ܓܰܒܪܳܐ ܒܰܡܫܽܘܚܬܳܐ ܕܒܰܪܢܳܫܳܐ ܡܫܰܡܠܝܳܐ܆ ܗܳܝܕܶܝܢ ܟܰܕ ܡܶܫܬܶܐܠ ܡܶܢܗܶܝܢ܆ ܐܰܝܟ ܕܡܶܢ ܡܟܰܬܡܴ̈ܬܳܐ ܘܰܕܠܳܐ ܦܰܐܝܴ̈ܢ܆ ܫܳܐܶܠ ܚܽܘܣܳܝܳܐ ܕܰܥܠܰܝܗܶܝܢ. ܘܳܐܡܰܪ ܘܒܳܥܶܐ ܪ̈ܰܚܡܶܐ.
ܐܶܠܐ ܐܰܝܟ ܣܽܘܓܳܐܐ ܕܪ̈ܰܚܡܰܝܟ ܐܶܬܕܰܟܪܰܝܢܝ. ܡܶܛܽܠ ܛܰܝܒܽܘܬܳܟ ܐܰܠܳܗܳܐ: ܛܳܒ ܗ̱ܽܘ ܘܰܬܪܺܝܨ ܡܳܪܝܳܐ. ܗܰܘ ܕܳܐܡܰܪ ܗܳܕܶܐ܆ ܠܳܐ ܡܦܰܬܶܠ ܫܒܺܝ̈ܠܶܐ ܕܪܳܕܶܐ ܒܗܽܘܢ. ܘܥܰܠܗܳܕܶܐ ܐܶܡܰܪ:
ܡܶܛܽܠ ܗܳܢܳܐ ܬܳܪܶܨ ܠܚܰܛܳܝܷ̈ܐ ܒܽܐܘܪܚܳܐ. ܟܺܐܢܳܐ ܓܶܝܪ ܕܰܐܝܟ ܕܰܬܪܺܝܨ ܗܘ܆ ܢܶܥܒܶܕ ܬܪ̈ܺܝܨܶܐ ܠܰܐܝܠܶܝܢ ܕܰܡܗܰܠܟܺܝܢ ܠܗܽܘܢ ܒܽܐܘܪܚܶܗ.
ܘܡܰܠܶܦ ܠܡܶܣܟܺܢܷ̈ܐ ܐܽܘܪܚܶܗ: ܘܟܽܠܗܶܝܢ ܐܽܘܪ̈ܚܳܬܶܗ ܕܡܳܪܝܳܐ ܛܰܝܒܽܘܬܳܐ ܘܩܽܘܫܬܳܐ. ܗܳܠܶܝܢ ܡܶܢ ܟܰܕܽܘ ܐܶܬܢܰܗܰܪ̈ܝ ܠܗܶܝܢ ܒܰܐܝܠܶܝܢ ܕܡܶܢ ܠܥܶܠ ܐܶܬܡܱ̈ܠܰܠܝ. ܘܝܰܬܺܝܪܳܐܝܺܬ ܒܗܳܝ ܕܶܐܡܰܪ:
ܠܰܐܝܠܶܝܢ ܕܢܳܛܪܺܝܢ ܩܝܳܡܶܗ ܘܣܳܗܕ̈ܘܳܬܶܗ. ܡܶܛܠ ܓܶܝܪ ܕܒܽܐܘܪ̈ܚܳܬܳܐ ܕܡܰܟܺܝܟܽܘܬܳܐ ܪܳܕܶܝܢ. ܟܡܳܐ ܐܶܢ ܓܡܺܝܪܺܝܢ ܒܙܰܕܺܝܩܽܘܬܳܐ܆ ܒܪܶܥܝܳܢܳܐ ܢܺܝܚܳܐ ܐܳܡܪܺܝܢ.
ܡܶܛܽܠ ܫܡܳܟ ܡܳܪܝܳܐ ܚܰܣܳܢܝ̱ ܡܶܢ ܥܰܘܠܝ̱ ܕܪܰܒ ܗ̱ܽܘ. ܐܶܢܓܶܝܪ ܕܰܘܺܝܕ ܙܰܕܺܝܩܳܐ ܐܶܡܰܪ ܗܳܕܶܐ܆ ܡܰܢܽܘ ܢܰܣܒܰܪ ܕܰܡܚܰܪܰܪ ܡܶܢ ܚܛܳܗܷ̈ܐ. ܐܶܠܳܐ ܢܺܐܡܰܪ ܒܟܽܠܙܒܰܢ.
ܡܰܢܽܘ ܓܰܒܪܳܐ ܕܕܳܚܶܠ ܡܶܢ ܡܳܪܝܳܐ: ܢܰܠܦܺܝܘܗܝ ܐܽܘܪܚܳܐ ܕܰܓܒܳܐ. ܐܶܠܳܐ ܡܰܟܺܝܟܽܘܬܳܐ ܘܡܶܣܟܺܢܽܘܬܳܐ ܕܡܶܛܽܠ ܐܰܠܳܗܳܐ.
ܘܢܰܦܫܶܗ ܬܒܽܘܬ ܒܛܰܝܒܽܘܬܳܐ܇ ܘܙܰܪܥܶܗ ܢܺܐܪܰܬ ܐܰܪܥܳܐ. ܗܳܝ ܕܰܠܥܶܠ ܡܶܢ ܫܡܰܝܳܐ.
ܡܶܛܽܠ ܕܬܰܪܥܺܝܬܶܗ ܕܡܳܪܝܳܐ ܥܰܠ ܕܳܚܠܰܘ̈ܗܝ: ܘܰܩܝܳܡܶܗ ܐܰܘܕܰܥ ܐܶܢܽܘܢ. ܩܝܳܡܳܐ ܓܶܝܪ ܕܰܐܘܕܰܥ ܠܕܳܚ̈ܠܰܘܗܝ ܗܳܢܰܘ܆ ܡܽܘܠܟܳܢܳܐ ܕܚܰܘܺܝ ܠܩܰܕܺܝ̈ܫܶܐ ܒܓܶܠܝܳܢܶܗ. ܟܰܕ ܨܒܳܐ ܘܶܐܬܓܠܺܝ ܒܰܒܣܰܪ. ܘܰܐܝܠܶܝܢ ܕܰܠܗܳܢܳܐ ܩܝܳܡܳܐ ܐܰܫܰܪܘ܆ ܬܠܰܘ ܪ̈ܺܝܫܰܝܗܽܘܢ ܠܘܳܬ ܣܰܒܪܗܽܘܢ ܠܰܫܡܰܝܳܐ. ܘܰܐܝܟ ܕܰܘܺܝܕ ܘܳܐܡܪܺܝܢ:
ܥܰܝ̈ܢܰܝ ܒܟܽܠܙܒܰܢ ܠܘܳܬ ܡܳܪܝܳܐ. ܗܰܘ ܓܶܝܪ ܕܰܒܟܽܠܙܒܰܢ ܥܰܝܢܰܘ̈ܗܝ ܚܳܝܪ̈ܳܢ ܒܡܳܪܝܳܐ܆ ܐܰܓܗܺܝ ܠܶܗ ܡܶܢ ܚܶܫܽܘܟܳܐ ܕܰܐܥܠܰܬ ܚܛܺܝܬܳܐ. ܘܬܰܒܪܶܗ ܠܦܰܚܳܐ ܕܰܨܠܳܐ ܚܶܘܝܳܐ ܒܡܶܐܟܽܘܠܬܳܐ ܕܦܺܐܪܳܐ ܕܠܳܐ ܡܶܫܬܰܡܥܳܢܽܘܬܳܐ. ܐܰܘ ܡܶܛܠܡܳܢܳܐ ܐܶܡܰܪ ܟܰܕ ܬܟܺܝܠ؟
ܡܶܛܽܠ ܕܗܽܘ ܡܰܦܶܩ ܡܶܢ ܡܨܺܝܕܬܳܐ ܪ̈ܶܓܠܰܝ. ܡܶܢ ܡܨܺܝܕܬܳܐ ܕܶܝܢ܆ ܗܳܝ ܕܦܶܪܣܰܬ ܚܛܺܝܬܳܐ ܒܽܐܘܪܚܳܐ ܦܬܺܝܬܳܐ ܕܥܳܠܡܳܐ. ܘܨܳܕܰܬ ܒܶܗ ܠܓܰܒܪ̈ܶܐ ܘܰܠܢܷ̈ܫܶܐ ܣܰܓܺܝ̈ܐܶܐ. ܘܓܳܥܶܐ ܡܶܢ ܠܶܒܳܐ ܘܳܐܡܰܪ:
ܐܶܬܦܰܢ ܥܠܰܝ ܘܪܰܚܶܡܥܠܰܝ: ܡܶܛܠ ܕܺܝܚܝܕܳܝܳܐ ܐܢܳܐ ܘܒܳܝܫܳܐ. ܡܳܐ ܓܶܝܪ ܕܚܳܪ̈ܝ ܘܰܚ̈ܙܰܝ ܥܰܝ̈ܢܶܐ ܠܢܽܘܗܪܳܐ ܗܰܘ ܫܡܰܝܳܢܳܐ: ܘܰܐܩܒܶܠܝ ܚܙܳܬܶܗ ܕܗܰܘ ܥܽܘܬܪܳܐ ܕܠܳܐ ܡܶܣܬܰܝܰܟ܆ ܦܫܺܝܩܳܐܝܺܬ ܡܰܘܕ̈ܝܳܢ ܒܡܶܣܟܺܢܽܘܬܶܗ ܕܰܟܝܳܢܰܢ. ܘܠܳܐ ܡܶܟܺܝܠ ܡܶܬܦܰܢ̈ܝܳܢ ܥܰܠ ܚܰܕܽܘܬܶܗ ܕܥܳܠܡܳܐ. ܐܶܠܳܐ ܟܰܕ ܐܰܒܺܝ̈ܠܳܢ ܥܰܠ ܒܺܝ̈ܫܳܬܳܐ ܕܰܬܢܳܢ ܐܳܡܪ̈ܳܢ.
ܥܳܩܴ̈ܬܶܗ ܕܠܶܒܝ ܣܓܺܝ̈: ܘܡܶܢ ܥܳܩܴ̈ܬܝ̱ ܐܰܦܶܩܰܝܢܝ. ܗܳܪܟܳܐ ܓܶܝܪ ܒܚܰܝܷ̈ܐ ܗܳܠܶܝܢ܆ ܒܶܐܒܠܳܐ ܘܰܒܥ̈ܩܳܬܳܐ ܐܝܬܰܝܗܽܘܢ ܩܰܕܺܝ̈ܫܶܐ. ܡܶܛܠܗܳܢܳܐ ܒܟܽܠ ܙܒܰܢ ܡܨܰܠܶܝܢ ܕܢܰܦܶܩ ܐܶܢܽܘܢ ܐܠܰܗܳܐ ܡܶܢ ܥܴ̈ܩܳܬܶܗ ܕܥܳܠܡܳܐ ܗܳܢܳܐ ܥܳܒܽܘܪܳܐ. ܟܰܕ ܡܶܬܬܰܢܚܺܝܢ ܐܳܡܪܺܝܢ:
ܚܙܺܝ ܫܽܘܥܒܳܕܝ ܘܥܰܡܠܝ: ܘܰܫܒܽܘܩ ܠܺܝ ܟܽܠܳܗ̇ ܚܛܺܝܬܝ. ܗܰܘ ܕܗܳܕܶܐ ܐܳܡܰܪ: ܬܽܘܟܠܳܢܳܐ ܐܺܝܬ ܠܶܗ ܥܰܠ ܥܰܡܠܶܗ ܗܰܘ ܕܰܥܒܳܕܰܘ̈ܗܝ ܢܽܘܗܪܳܐ ܐܶܢܽܘܢ. ܘܥܰܠܗܳܝ ܡܦܺܝܣ ܠܕܰܝܳܢܳܐ. ܕܗܽܘ ܢܶܗܘܶܐ ܚܰܙܳܝܳܐ ܠܦܽܘܠܚܳܢܶܗ. ܐܳܦ ܡܰܘܕܰܥ ܕܟܰܕ ܟܪܺܝܟܺܝܢ ܠܶܗ ܚܰܝ̈ܠܰܘܳܬܳܐ ܕܰܠܩܽܘܒܠܳܐ܆ ܥܡܰܠ ܥܰܡ ܐܰܠܳܗܳܐ ܥܰܡܠܳܐ ܕܰܐܝܟ ܗܳܢܳܐ. ܘܥܰܠܗܳܕܶܐ ܐܶܡܰܪ.
ܕܰܚܙܺܝ ܕܰܣܓܺܝܘ ܒܥܶܠܕ̈ܒܳܒܰܝ: ܘܣܶܢܐܬܳܐ ܕܥܰܘܠܳܐ ܣܢܰܐܽܘܢܝ̱. ܟܰܕ ܣܳܢܶܝܢ ܠܺܝ ܕܠܳܐ ܣܰܟܠܽܘܬܳܐ. ܠܳܐ ܦܳܫܶܬ ܡܶܢ ܐܽܘܪ̈ܚܳܬܳܟ. ܘܠܳܐ ܦܶܪܥܶܬ ܐܶܢܽܘܢ ܒܺܝܫܬܳܐ ܣܳܟ.
ܡܶܛܠܗܳܢܳܐ ܛܰܪ ܢܰܦܫܝ̱ ܘܦܰܨܳܢܝ̱ ܡܶܛܠ ܕܒܳܟ ܣܰܒܪܶܬ. ܘܠܰܘ ܟܰܕ ܡܥܰܩܡܺܝܢ ܫܒܺܝ̈ܠܰܝ. ܘܰܟܢܺܝܫܺܝܢ ܥܰܡܝ̱ ܥܰܘܴ̈ܠܶܐ܇ ܐܶܠܳܐ ܟܺܐܢܷ̈ܐ ܘܡܰܟܺܝ̈ܟܶܐ ܥܶܒܕܶܬ ܠܺܝ ܣܺܝܥܬܳܐ.
ܘܬܰܡܺܝ̈ܡܶܐ ܘܰܬܪ̈ܺܝܨܶܐ ܢܩܶܦܘ ܠܺܝ܆ ܡܶܛܽܠ ܕܠܳܟ ܣܰܟܺܝܬ. ܕܳܡܝܳܐ ܗܳܕܶܐ ܕܬܰܡܺܝ̈ܡܶܐ ܘܰܬܪ̈ܺܝܨܶܐ ܠܚܽܘ̈ܫܳܒܶܐ ܕܢܰܦܫܶܗ ܩܳܪܶܐ ܗܘܳܐ. ܗܳܫܳܐ ܕܶܝܢ ܒܦܶܬܓܳܡܳܐ ܗܳܢܳܐ ܕܫܽܘܠܳܡܳܐ܇ ܠܰܘ ܐܰܝܟ ܕܥܰܠ ܢܰܦܫܶܗ ܒܰܠܚܽܘܕ ܐܶܡܰܪ: ܐܶܠܳܐ ܦܽܘܪܩܳܢܳܐ ܕܺܝܣܪܳܐܝܠ ܕܰܐܠܗܳܐ ܡܶܫܬܰܘܕܶܐ. ܕܳܐܦ ܗܽܘ ܡܰܘܕܰܥ ܒܝܰܕ ܓܶܠܝܳܢܶܗ ܕܰܐܠܗܳܐ ܕܡܶܢ ܫܡܰܝܳܐ ܡܶܬܓܡܰܪ.
ܘܰܦܪܰܩ ܐܰܠܳܗܳܐ ܠܺܝܣܪܳܐܷܝܠ ܡܶܢ ܟܽܠܗܽܘܢ ܐܳܠܽܘܨܰܘ̈ܗܝ. ܒܰܡܢܳܬܳܐ ܗ̣ܘܳܬ ܗܳܕܶܐ ܒܝܰܘ̈ܡܰܝ ܕܰܘܺܝܕ܇ ܗܰܘ ܕܦܰܨܺܝ ܠܺܝܣܪܳܐܝܠ ܡܶܢ ܥܰܡ̈ܡܷܐ ܗܳܢܽܘܢ ܕܰܚܕܺܝܪܺܝܢ ܗܘܰܘ ܠܶܗ. ܘܳܐܠܨܺܝܢ ܠܶܗ ܡܫܰܡܠܝܳܐܝ̣ܬ ܒܝܰܕ ܓܶܠܝܳܢܶܗ ܕܰܐܠܳܗܳܐ ܗܰܘ ܕܶܐܬܚܰܘܺܝ ܒܰܪܢܳܫܳܐ. ܘܰܦܪܰܩ ܠܺܝܣܪܳܐܝܠ ܕܰܐܠܳܗܳܐ ܡܶܢ ܐܳܠܘ̈ܨܶܐ ܕܰܚܛܺܝܬܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܫܬܐ
ܥܰܠ ܕܠܳܐ ܙܳܕܶܩ: ܕܥܰܡ ܓܰܒܪܳܐ ܪܰܫܺܝܥܳܐ ܘܒܺܝܫܳܐ ܢܶܥܡܰܪ ܙܰܕܺܝܩܳܐ ܘܰܡܗܰܝܡܢܳܐ.
ܒܰܨܠܽܘܬܳܐ ܐܳܦ ܒܒܳܥܽܘܬܳܐ ܐܶܫܟܰܚܢܳܝܗܝ ܠܛܽܘܒܳܢܳܐ ܕܰܘܺܝܕ ܘܣܰܓܺܝ ܢܶܨܚܳܢܷ̈ܐ: ܟܰܕ ܡܫܰܪܶܐ ܒܟܽܠܕܽܘܟ܇ ܘܳܐܦܶܢ ܕܡܶܣܬܒܰܪ ܕܠܰܘ ܒܢܺܝܫܳܐ ܕܰܨܠܽܘܬܳܐ ܒܕܽܘܟ ܕܽܘܟ ܥܳܒܶܕ ܫܽܘܪܳܝܳܐ ܠܬܶܫܒ̈ܚܳܬܶܗ܇ ܐܶܠܳܐ ܟܰܕ ܡܶܬܒܰܨ̈ܝܳܢ ܡܶܠܰܘ̈ܗܳܝ. ܟܽܠܗܶܝܢ ܨܠܰܘ̈ܬܳܐ ܐܺܝܬܰܝܗܶܝܢ. ܗܳܟܰܢܳܐ ܐܳܦ ܗܳܫܳܐ ܟܰܕ ܬܶܫܒܽܘܚܬܳܐ ܗܳܕܶܐ ܕܥܶܣܪܺܝܢ ܘܫܶܬ ܙܰܡܰܪ: ܒܰܨܠܽܘܬܳܐ ܘܒܳܥܽܘܬܳܐ ܐܰܙܥܶܩ ܒܩܳܠܶܗ ܠܘܳܬ ܐܠܰܗܳܐ. ܕܗܽܘ ܢܕܽܘܢ ܕܺܝܢܶܗ ܘܢܶܚܙܶܐ ܐܽܘܪܚܶܗ. ܗܳܕܶܐ ܕܶܝܢ ܕܢܶܒܥܶܐ ܐܢܳܫ ܕܡܶܢ ܐܰܠܳܗܳܐ ܢܶܬܬܕܺܝܢ. ܕܗܰܘ ܗ̱ܽܘ ܕܰܬܟܺܝܠ ܥܰܠ ܢܰܦܫܶܗ܇ ܕܡܶܕܶܡ ܕܰܡܥܰܨܶܐ ܠܕܰܝܳܢܶܗ ܠܳܐ ܥܒܺܝܕ ܠܶܗ. ܘܡܶܛܽܠ ܕܗܳܟܰܢܳܐ ܗ̱ܘܳܐ ܛܽܘܒܳܢܳܐ ܕܰܘܺܝܕ.
ܕܽܘܢܰܝܢܝ ܡܳܪܝܳܐ ܡܶܛܽܠ ܕܶܐܢܳܐ ܒܬܰܡܺܝܡܽܘܬܝ ܗܰܠܟܶܬ. ܒܡܳܪܝܳܐ ܣܰܒܪܶܬ ܠܳܐ ܐܶܙܽܘܥ: ܒܚܽܘܪܰܝܢܝ ܡܳܪܝܳܐ ܘܢܰܣܳܢܝ. ܘܰܒܩܺܝ ܟܽܘ̈ܠܝܳܬܝ ܘܠܶܒܝ. ܗܳܠܶܝܢ ܟܽܠܗܶܝܢ ܡܰܢܽܘ ܡܶܫܟܰܚ ܐܳܡܰܪ ܠܘܳܬ ܐܰܠܳܗܳܐ. ܐܶܠܳܐ ܒܰܫܪܳܪܳܐ ܗܰܘ ܕܰܕܟܶܐ ܝܰܬܺܝܪ ܡܶܢ ܫܶܡܫܳܐ܆ ܫܳܐܶܠ ܡܶܢ ܡܳܪܝܳܐ ܕܢܶܬܬܕܺܝܢ. ܘܬܽܘܒ ܐܰܘܕܺܝ ܕܰܡܣܰܒܰܪ ܒܡܳܪܝܳܐ ܘܰܒܥܳܐ ܕܢܶܬܒܚܰܪ ܡܶܢ ܡܳܪܝܳܐ. ܕܰܒܩܺܝ ܟܽܘ̈ܠܝܳܬܝ ܘܠܶܒܝ. ܘܶܐܠܽܘ ܐܺܝܬ ܗܘܳܐ ܒܶܗ ܚܕܳܐ ܡܶܢ ܗܳܠܶܝܢ ܕܠܳܐ ܨܳܒܶܐ ܗܘܳܐ ܒܗܶܝܢ ܕܰܝܳܢܳܐ. ܘܠܳܐ ܠܕܺܝܢܳܐ ܩܳܪܶܐ ܗܘܳܐ ܠܥܰܡܰܢܽܘܐܶܝܠ. ܘܗܳܠܶܝܢ ܠܰܡ ܥܶܒܕܶܬ. ܟܰܕ ܣܺܝܡ ܠܽܘܩܒܰܠܝ ܝܰܡܳܐ ܕܰܡܪܰܚܡܳܢܽܘܬܶܗ ܕܕܰܝܳܢܳܐ.
ܡܶܛܽܠ ܠܰܡ ܕܪ̈ܰܚܡܰܝܟ ܠܽܘܩܒܰܠ ܥܰܝ̈ܢܰܝ. ܘܰܒܛܰܝܒܽܘܬܳܟ ܡܶܬܒܰܩܝܳܐ ܘܚܳܝܪܳܐ ܢܰܦܫܝ. ܘܥܰܠܗܳܕܶܐ ܢܶܛܪܶܬ ܕܠܳܐ ܬܽܘܩ̈ܠܳܬܳܐ ܢܰܦܫܝ ܘܰܫܒܺܝ̈ܠܰܝ.
ܘܗܰܠܟܶܬ ܒܗܰܝܡܳܢܽܘܬܳܐ. ܘܟܰܕ ܝܶܕܥܶܬ ܕܗܰܘ ܕܰܡܗܰܠܶܟ ܒܗܰܝܡܳܢܽܘܬܳܐ܆ ܙܳܕܶܩ ܠܶܗ ܕܢܶܫܬܶܐܠ ܡܶܢ ܐܰܝܠܶܝܢ ܕܺܐܝܬܰܝܗܶܝܢ ܕܰܠܩܽܘܒܠܶܗ. ܐܰܟܡܰܢ ܕܠܰܝܬ ܠܶܗ ܚܽܘܠܛܳܢܳܐ ܠܢܽܘܗܪܳܐ ܥܰܡ ܚܶܫܽܘܟܳܐ. ܘܰܠܕܰܓܳܠܘܬܳܐ ܥܰܡ ܫܪܳܪܳܐ. ܘܰܠܛܳܥܝܽܘܬܳܐ ܠܳܐ ܐܺܝܬ ܠܳܗ̇ ܡܢܳܬܳܐ ܥܰܡ ܩܽܘܫܬܳܐ. ܘܠܳܐ ܠܙܰܕܺܝ̈ܩܶܐ ܕܢܶܥܡܪܽܘܢ ܥܰܡ ܚܰܛܳܝܷ̈ܐ. ܘܠܳܐ ܠܬܰܡܺܝ̈ܡܶܐ ܥܰܡ ܥܩܺܝ̈ܡܰܝ ܬܰܪܥܺܝܬܳܐ.
ܠܳܐ ܝܶܬܒܶܬ ܥܰܡ ܒܺܝ̈ܫܶܐ. ܘܥܰܡ ܫܳܛܰܝܴ̈ܐ ܠܳܐ ܥܶܠܶܬ: ܣܢܺܝܬ ܟܢܽܘܫܬܳܐ ܕܒܺܝ̈ܫܶܐ. ܠܳܐ ܓܶܝܪ ܡܶܫܟܰܚ ܗܰܘ ܕܝܳܬܶܒ ܥܰܡ ܕܰܐܝܟ ܗܳܠܶܝܢ ܕܰܢܗܰܠܶܟ ܒܬܰܡܺܝܡܽܘܬܳܐ ܘܠܳܐ ܒܗܰܝܡܳܢܽܘܬܳܐ. ܘܠܳܐ ܣܳܦܶܩ ܕܗܰܘ ܕܥܰܡ ܒܺܝ̈ܫܶܐ ܝܳܬܶܒ܆ ܕܰܢܗܰܠܶܟ ܒܽܐܘܪܚܳܐ ܛܳܒܬܳܐ ܕܰܫܪܳܪܳܐ. ܘܡܶܛܠܗܳܢܳܐ ܟܰܕ ܡܶܫܬܶܐܠ ܐܢܳܐ ܡܶܢ ܪ̈ܰܫܺܝܥܶܐ ܘܒܺܝ̈ܫܶܐ ܘܡܶܢ ܒܺܝ̈ܫܳܬܗܽܘܢ.
ܐܰܫܺܝܓܶܬ ܕܰܟܝܳܐܝܬ ܐܺܝ̈ܕܰܝ. ܘܶܐܬܟܰܪܟܶܬ ܡܰܕܒܚܳܟ ܡܳܪܝܳܐ. ܠܳܐ ܓܶܝܪ ܡܶܫܟܰܚ ܐܢܳܫ ܡܶܬܕܟܰܪ ܡܰܕܒܚܶܗ ܕܡܳܪܝܐ (ܗܳܢܰܘ ܡܫܰܒܰܚ) ܟܰܕ ܐܺܝܬܰܘܗܝ ܥܰܡ ܟܢܽܘܫܝܳܐ ܕܪ̈ܰܫܺܝܥܶܐ. ܘܝܰܬܺܝܪܳܐܝܺܬ ܡܳܐ ܕܥܰܡ ܗܶܪ̈ܺܝܛܺܝܩܽܘ ܡܚܰܓܶܐ. ܬܶܫܒܽܘܚܬܳܐ ܓܶܝܪ ܕܥܰܘܴ̈ܠܶܐ܇ ܟܡܳܐ ܐܶܢ ܡܶܣܬܰܒܪܳܐ ܗܳܝ ܕܰܒܫܶܡ ܡܳܪܝܳܐ ܡܶܬܡܰܠܠܳܐ܆ ܠܳܐ ܢܬܺܝܥܳܐ ܡܶܢ ܓܽܘܕܳܦܳܐ. ܡܶܛܠܗܳܕܶܐ ܐܺܝܕܰܝܴ̈ܐ ܕܠܶܒܶܗ ܡܫܺܝܓ ܗܘܳܐ ܢܒܺܝܳܐ. ܘܗܳܝܕܶܝܢ ܡܶܬܟܪܶܟ ܗܘܳܐ ܠܡܰܕܒܚܶܗ ܕܡܳܪܝܳܐ. ܡܳܐ ܕܶܝܢ ܕܰܗܘܳܬ ܗܳܕܶܐ ܡܶܢ ܢܰܦܫܳܐ܆ ܦܫܺܝܩ ܠܳܗ̇ ܕܥܰܡ ܕܰܘܺܝܕ ܬܶܩܥܶܐ ܐܳܦ ܬܺܐܡܰܪ:
ܕܶܐܫܡܰܥ ܩܳܠܶܗ ܕܫܽܘܒܚܳܟ. ܦܰܪܶܗܣܝܰܐ ܡܶܟܺܝܠ ܐܺܝܬ ܠܶܗ܆ ܕܢܶܗܘܶܐ ܟܳܪܽܘܙܳܐ ܕܫܽܘܒܚܶܗ ܕܰܐܠܳܗܳܐ. ܘܰܢܡܰܠܶܠ ܥܰܠ ܫܪܳܪܶܗ ܩܕܳܡ ܥܰܡ̈ܡܶܐ. ܘܡܳܐ ܕܶܐܫܬܶܐܠ ܡܶܢܢ ܟܢܽܘܫܝܳܐ ܕܠܳܐ ܡܗܰܝܡ̈ܢܶܐ܆ ܡܦܺܝܣ ܘܳܐܡܰܪ.
ܕܶܐܫܬܰܥܶܐ ܟܽܠܗܶܝܢ ܬܶܕܡܪ̈ܳܬܳܟ. ܬܶܕܡܪ̈ܳܬܳܐ ܕܶܝܢ ܕܰܐܠܳܗܳܐ܇ ܠܳܐ ܡܗܰܝܡܢܳܐ ܠܳܐ ܡܶܬܩܰܒܰܠ ܕܢܶܫܬܰܥܶܐ ܐܶܢܶܝܢ. ܫܪܳܪܳܐ ܡܶܢ ܕܰܓ̈ܠܶܐ ܠܳܐ ܡܶܬܬܦܺܝܣ ܕܢܶܬܡܰܠܰܠ. ܐܶܠܳܐ ܡܶܢ ܐܰܝܠܶܝܢ ܕܩܳܝܡܺܝܢ ܩܕܳܡ ܡܳܪܝܳܐ. ܘܳܐܡܪܺܝܢ ܥܰܡ ܩܰܕܺܝ̈ܫܶܐ.
ܡܳܪܝܳܐ ܪܶܚܡܶܬ ܬܶܫܡܶܫܬܶܗ ܕܒܰܝܬܳܟ. ܘܰܐܬܪܳܐ ܕܡܰܫܪܝܶܗ ܕܫܽܘܒܚܳܟ. ܘܗܳܠܶܝܢ ܕܗܳܟܰܢܳܐ ܡܰܘܕܶܝܢ ܚܠܳܦ ܥܺܕܬܶܗ ܕܰܐܠܳܗܳܐ ܒܰܟܢܽܘܫܝܳܐ ܕܶܐܪ̈ܺܝܛܺܝܩܽܘ܆ ܦܫܺܝܩܳܐ ܐܳܡܪܺܝܢ ܠܘܳܬ ܡܳܪܝܳܐ:
ܕܠܳܐ ܬܰܘܒܶܕܰܝܢܝ ܥܰܡ ܚܰܛܳܝܷ̈ܐ: ܘܥܰܡ ܓܰܒܪ̈ܶܐ ܕܰܕܡܳܐ ܚܱ̈ܝܰܝ. ܕܒܺܐܝ̈ܕܰܝܗܽܘܢ ܢܶܟܠܳܐ ܘܝܰܡܺܝܢܗܽܘܢ ܡܰܠܝܳܐ ܫܽܘܚܕܳܐ. ܠܰܘ ܓܶܝܪ ܐܰܝܟ ܕܳܐܡܪܺܝܢ ܐܶܪ̈ܺܝܛܺܝܩܽܘ ܣܳܥܪܺܝܢ. ܐܚܪܺܬܳܐ ܗ̱ܝ ܗܳܝ ܕܰܩܕܳܡ ܥܰܡܳܐ ܐܳܡܪܺܝܢ ܠܡܰܛܥܳܝܽܘ ܒܰܦܫܺܝ̈ܛܶܐ܇ ܘܰܐܚܪܺܬܳܐ ܗܳܝ ܕܰܒܦܰܚܷ̈ܐ ܕܢܶܟܠܳܐ ܛܳܡܪܺܝܢ ܩܕܳܡ ܢܰܦ̈ܫܳܬܳܐ ܕܰܡܚܺܝ̈ܠܶܐ. ܠܰܘ ܕܶܝܢ ܗܳܟܰܢܳܐ ܐܺܝܬܰܘܗܝ ܗܰܘ ܕܰܡܗܰܝܡܶܢ ܒܡܳܪܝܳܐ ܐܰܝܟ ܕܰܘܺܝܕ ܗܰܘ ܪܰܒܳܐ. ܐܶܠܳܐ ܐܶܡܰܪ ܟܰܕ ܡܰܘܕܶܐ:
ܕܶܐܢܳܐ ܒܬܰܡܺܝܡܽܘܬܝ ܗܰܠܟܶܬ: ܦܪܽܘܩܰܝܢܝ ܘܪܰܚܶܡܥܠܰܝ. ܪܶܓܠܝ ܩܳܡܰܬ ܒܰܬܪܺܝܨܽܘܬܳܐ. ܬܪܺܝܨܽܘܬܳܐ ܡܳܢܰܘ: ܐܶܠܳܐ ܡܶܠܬܶܗ ܕܰܐܒܳܐ. ܗܰܘ ܕܰܐܩܺܝܡ ܪܶܓܠܳܐ ܕܩܰܕܺܝ̈ܫܶܐ ܒܽܐܘܪܚܳܐ ܪܰܒܬܳܐ ܕܡܰܠܟܽܘܬܶܗ. ܗܳܢܽܘܢ ܕܡܶܛܽܠ ܕܶܐܬܢܰܟܰܬܘ ܡܶܢ ܚܶܘܝܳܐ܆ ܫܰܪܝܳܐ ܗܘܳܬ ܪܶܓܠܗܽܘܢ ܒܡܰܚ̈ܘܳܬܳܐ ܕܡܶܢ ܢܽܘ̈ܟܬܳܬܶܗ. ܘܗܳܝܕܶܝܢ ܟܰܕ ܩܳܡܰܬ ܒܡܳܪܰܢ ܕܺܐܝܬܰܘܗܝ ܬܪܺܝܨܽܘܬܳܐ܆ ܩܳܡܘ ܒܰܟܢܽܘܫܝܳܐ ܟܰܕ ܡܰܘܕܶܝܢ. ܡܰܘܕܶܝܢ ܘܳܐܡܪܺܝܢ:
ܘܰܒܥܺܕܬܳܐ ܐܶܒܰܪܶܟ ܠܡܳܪܝܳܐ. ܠܗܰܘ ܕܶܐܬܓܠܺܝ ܐܳܦ ܐܰܩܺܝܡܰܢ ܕܰܢܙܰܡܰܪ ܬܶܫܒ̈ܚܳܬܶܗ ܘܢܰܘܕܶܐ ܠܶܗ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܫܒܥܐ
ܡܰܘܕܰܥ ܥܰܠ ܥܰܡܰܢܽܘܐܝܠ ܕܗܽܘܝܽܘ ܢܽܘܗܪܳܐ ܕܩܰܕܺܝ̈ܫܶܐ: ܘܥܰܠ ܪܶܓܬܳܐ ܕܩܰܕܺܝ̈ܫܶܐ: ܕܫܳܐܠܳܐ ܗܘܳܬ ܕܬܶܗܘܶܐ ܠܳܗ̇ ܒܒܰܝܬܶܗ ܕܰܐܠܳܗܳܐ ܠܥܳܠܰܡ.
ܐܰܠܳܗܳܐ ܡܶܠܬܳܐ ܒܰܪ ܟܝܳܢܶܗ ܕܰܐܒܳܐ ܗܰܘ ܕܺܐܝܬ ܠܶܗ ܕܶܢܚܳܐ ܐܰܡܺܝܢܳܐ ܡܶܢ ܟܝܳܢܶܗ ܕܰܐܒܳܐ ܡܬܽܘܡܳܐܺܝܬ. ܐܰܟܡܳܐ ܕܰܠܙܰܠܝܩܶܗ ܕܫܶܡܫܳܐ ܡܶܢ ܐܶܣܦܺܝܪܶܗ. ܟܰܕ ܐܰܪܡܺܝ ܙܰܠܺܝܩܳܐ ܕܢܽܘܗܪܶܗ ܒܥܳܠܡܳܐ ܚܶܫܽܘܟܳܐ ܐܳܡܰܪ ܗܘܳܐ ܒܡܰܠܦܳܢܽܘܬܶܗ ܠܝܽܘ̈ܕܳܝܶܐ: ܕܶܐܢܳܐ ܐܢܳܐ ܢܽܘܗܪܶܗ ܕܥܳܠܡܳܐ. ܡܰܢ ܕܒܳܬܰܪܝ ܐܳܬܶܐ ܠܳܐ ܢܩܰܘܶܐ ܠܶܗ ܒܚܶܫܽܘܟܳܐ. ܐܶܠܳܐ ܢܶܫܟܰܚ ܠܶܗ ܢܽܘܗܪܳܐ ܕܚܰܝ̈ܐ (ܝܘܚܢܢ ܚ: ܝܒ). ܘܰܒܗܳܕܶܐ ܡܰܠܶܦ ܗܘܳܐ ܕܗܽܘܝܽܘ ܗܰܘ ܕܩܰܕܶܡ ܪܽܘܚܳܐ ܐܰܟܪܶܙ ܥܠܰܘܗܝ ܒܰܢܒܺܝܽܘܬܳܐ. ܕܳܐܬܐ ܘܡܰܥܒܰܪ ܡܢ ܥܳܠܡܳܐ ܚܶܫܽܘܟܳܐ ܕܰܐܥܠܰܬ ܚܛܺܝܬܳܐ܆ ܚܰܕ ܡܶܢ ܗܳܠܶܝܢ ܕܶܝܢ ܕܝܰܕܥܳܗ̇ ܠܡܶܠܬܳܐ ܕܢܽܘܗܪܳܐ. ܘܚܰܝ̈ܐ ܐܺܝܬܰܘܗܝ ܡܶܫܟܚܺܝܢܰܢ ܠܛܽܘܒܳܢܳܐ ܐܰܠܳܗܳܝܳܐ ܕܰܘܺܝܕ܆ ܗܳܢܳܐ ܓܶܝܪ ܟܰܕ ܒܢܽܘܗܪܳܐ ܕܢܰܦܫܳܐ ܕܰܡܕܰܟܝܳܐ ܡܶܢ ܥܰܡܛܳܢܳܐ. ܚܳܐܰܪ ܗܘܳܐ ܒܳܗ̇ ܒܡܶܠܬܳܐ܆ ܕܗܽܘܝܽܘ ܢܽܘܗܪܶܗ ܕܥܳܠܡܳܐ. ܡܫܰܪܶܐ ܟܰܕ ܚܳܐܰܪ ܠܘܳܬܶܗ ܢܺܐܡܰܪ ܟܰܕ ܡܰܠܶܦ:
ܡܳܪܝܳܐ ܢܽܘܪܗܝ ܘܦܽܘܪܩܳܢܝ ܡܶܢ ܡܰܢ ܐܶܕܚܰܠ: ܡܳܪܝܳܐ ܥܽܘܫܢܳܐ ܕܚܰܝܰܝ̈ ܡܶܢ ܡܰܢܽܘ ܙܳܐܰܥ ܐܢܳܐ. ܗܳܠܶܝܢ ܕܶܝܢ ܐܶܡܰܪ ܗܘܳܐ ܡܶܢ ܥܶܠܰܬ ܩܪܳܒܳܐ ܣܰܓܺܝܳܐܐ ܕܩܳܡ ܥܠܰܘܗܝ. ܘܰܐܣܒܰܪܘ ܚܰܝ̈ܠܰܘܳܬܳܐ ܗܳܢܽܘܢ ܕܥܰܡܶܗ ܕܚܳܒ ܗܘܳܐ ܒܰܩܪܳܒܳܐ. ܗܽܘ ܕܶܝܢ ܠܘܳܬ ܥܽܘܕܪܳܢܳܐ ܐܰܠܳܗܳܝܳܐ ܡܶܬܦܢܶܐ ܗܘܳܐ. ܨܶܡܚܷ̈ܐ ܘܓܶܠܝܴ̈ܢܶܐ ܕܰܡܕܰܒܪܳܢܽܘܬܶܗ ܕܒܰܒܣܰܪ܆ ܕܰܐܠܳܗܳܐ ܡܶܠܬܳܐ ܐܰܝܟ ܕܥܰܠ ܓܰܒܪܳܐ ܙܰܕܺܝܩܳܐ ܕܫܳܘܶܐ ܗܘܳܐ ܠܗܽܘܢ. ܘܡܶܛܽܠ ܕܠܳܐ ܗܘܳܐ ܗ̱ܘܳܐ ܙܰܒܢܳܐ ܕܓܶܠܝܳܢܳܐ ܕܢܺܐܬܝܴ̈ܢ ܟܰܣܝܴ̈ܬܳܐ ܕܒܶܝܬ ܐܰܠܳܗܳܐ. ܐܰܝܟ ܕܰܒܐܪ̈ܳܙܶܐ ܘܦܷ̈ܠܳܐܬܳܐ ܡܶܬܡܱ̈ܠܠܳܢ ܗܘܱ̈ܝ. ܘܗܳܫܳܐ ܠܰܘ ܚܠܳܦܰܘܗܝ ܐܷܡܰܪ ܕܰܘܺܝܕ ܬܶܫܒܽܘܚܬܳܐ ܗܳܕܶܐ ܕܥܶܣܪܺܝܢ ܘܰܫܒܰܥ. ܐܶܠܳܐ ܡܶܛܽܠ ܟܽܠܶܗ ܥܳܠܡܳܐ ܘܰܐܝܟ ܠܒܺܝ̈ܒܶܐ ܐܳܡܪܺܝܢ ܩܰܕܺܝ̈ܫܶܐ ܠܽܘܩܒܰܠ ܗܰܘ ܡܰܠܟܳܐ ܕܚܶܫܟܳܐ: ܟܰܕ ܡܒܰܙܚܺܝܢ ܒܶܗ ܘܡܰܗܠܺܝܢ ܒܰܡܫܰܟܪܽܘܬܶܗ. ܡܳܪܝܳܐ ܗܘܳܐ ܠܰܢ ܢܽܘܗܪܳܐ ܒܓܶܠܝܳܢܶܗ. ܘܠܳܐ ܕܳܚܠܺܝܢܰܢ ܡܶܢ ܥܰܡܛܳܢܳܐ ܕܰܐܬܪܳܟ. ܐܶܫܬܪܺܝ ܠܶܗ ܚܶܫܟܳܟ ܘܶܐܬܒܰܛܰܠ ܠܶܗ ܫܽܘܠܛܳܢܳܟ ܐܳܦ ܢܶܦܠܰܬ ܠܳܗ̇ ܡܰܠܟܽܘܬܳܟ ܐܶܬܬܕܺܝܫܘ ܠܗܽܘܢ ܡܰܫܪ̈ܝܳܬܳܐ ܕܣܶܕܪ̈ܰܝܟ ܡܶܢ ܚܰܝ̈ܠܐܷ ܕܢܽܘܗܪܳܐ ܕܶܐܬܰܘ ܥܰܡ ܡܰܠܟܳܐ ܕܢܽܘܗܪܳܐ. ܘܥܶܪܩܰܬ ܠܳܗ̇ ܓܳܠܽܘܬܳܐ ܡܶܢ ܚܶܣ̈ܢܶܐ ܟܡܺܝܪ̈ܶܐ ܕܰܫܝܽܘܠ. ܕܡܰܠܟܳܐ ܕܢܽܘܗܪܳܐ ܥܰܠ ܘܰܦܪܰܩ ܐܶܢܽܘܢ. ܘܡܶܟܺܝܠ ܕܡܳܪܝܳܐ ܗܘܳܐ ܠܰܢ ܢܽܘܗܪܳܐ ܘܦܽܘܪܩܳܢܳܐ ܘܚܰܝ̈ܐ ܘܥܽܘܫܢܳܐ. ܠܰܝܬ ܕܙܳܐܰܥ ܡܶܢ ܚܰܣܺܝܢܳܐ. ܢܶܫܡܰܥ ܗܳܠܶܝܢ ܕܡܶܢ ܒܳܬܰܪܟܶܢ.
ܟܰܕ ܠܰܡ ܩܪܶܒܘ ܠܺܝ ܒܺܝ̈ܫܶܐ ܠܡܶܐܟܰܠ ܒܶܣܪܝ: ܒܥܶܠܕ̈ܒܳܒܰܝ ܘܣܳܢܱ̈ܐܝ: ܐܰܟܚܕܳܐ ܐܶܣܬܰܚܰܦܘ ܘܰܢܦܰܠܘ. ܡܳܢܳܐ ܐܺܝܬܰܝܗܽܘܢ ܩܴ̈ܠܶܐ ܗܳܠܶܝܢ ܪܺܝܫܶܗ ܕܡܰܙܡܽܘܪܳܐ ܕܳܡܝܳܐ ܕܕܰܘܺܝܕ ܐܰܡܪܶܗ. ܗܳܫܳܐ ܕܶܝܢ ܠܳܐ ܕܳܡܝܳܐ ܡܶܠܬܳܐ ܕܰܐܝܟ ܕܡܶܢ ܕܰܘܺܝܕ ܐܰܡܺܝܪܳܐ. ܐܶܠܳܐ ܟܰܕ ܠܳܐ ܥܳܨܶܐ ܠܐܪܳܙܳܐ. ܡܚܰܘܝܳܐ ܠܗܳܝ ܕܟܰܕ ܢܦܰܩܘ ܗܘܰܘ ܝܽܘ̈ܕܳܝܶܐ ܥܰܠ ܦܳܪܽܘܩܰܢ. ܕܢܶܚܕܽܘܢܳܝܗܝ. ܗܳܢܽܘܢ ܕܺܐܝܬ ܗܘܳܐ ܥܰܡܗܽܘܢ ܣܰܦܣܺܝܪ̈ܶܐ ܘܚܽܘܛܪ̈ܶܐ ܘܰܒܪܺܝܫܗܽܘܢ ܘܰܩܕܳܡܰܝܗܽܘܢ ܐܳܬܶܐ ܗܘܳܐ ܝܺܗܽܘܕܳܐ ܡܰܫܠܡܳܢܳܐ ܗܰܘ ܕܳܘܝܳܐ. ܢܦܰܩ ܗܘܳܐ ܗܽܘ ܡܶܠܬܳܐ ܦܳܪܽܘܩܰܢ ܘܶܐܡܰܪ ܠܗܽܘܢ: ܠܡܰܢ ܒܳܥܶܝܬܽܘܢ. ܗܶܢܽܘܢ ܕܶܝܢ ܐܶܡܰܪܘ ܠܝܶܫܽܘܥ ܢܳܨܪܳܝܳܐ. ܐܳܡܰܪ ܠܗܽܘܢ ܝܶܫܽܘܥ ܐܶܢܳܐ ܐܢܳܐ. ܘܟܰܕ ܐܶܡܰܪ ܠܗܽܘܢ ܕܶܐܢܳܐ ܐܢܳܐ. ܐܶܙܰܠܘ ܠܒܶܣܬܰܪܗܽܘܢ ܘܰܢܦܰܠܘ ܥܰܠ ܐܰܪܥܳܐ (ܝܘܚܢܢ ܝܚ: ܗ-ܘ). ܚܙܺܝ ܐܰܝܟܰܢܳܐ ܢܒܺܝܽܘܬܳܐ ܩܰܕܡܰܬ ܨܳܪܰܬ ܠܛܽܘܝܳܒܳܐ ܗܳܢܳܐ. ܘܠܳܐ ܡܶܬܒܰܨܪܳܢܳܐܺܝܬ ܪܰܫܡܰܬ ܥܽܘܬܳܕܗܽܘܢ ܕܡܰܪ̈ܳܚܶܐ. ܘܗܳܠܶܝܢ ܬܽܘܒ ܕܡܶܢ ܒܳܬܰܪܟܶܢ. ܠܳܐ ܡܰܒ̈ܥܕܳܢ ܡܶܢ ܢܺܝܫܳܐ. ܗܳܪܟܳܐ ܢܺܐܡܰܪ ܡܶܠܬܳܐ ܠܘܳܬ ܬܰܠܡܺܝ̈ܕܶܐ ܕܺܝܠܶܗ ܕܠܳܐ ܢܶܬܪܰܗܒܽܘܢ ܡܶܢ ܗܳܝ ܕܡܶܬܚܰܙܝܳܐ ܗܘܳܬ ܕܰܡܚܺܝܠܳܐ. ܠܳܐ ܬܶܬܙܺܝܥܽܘܢ
ܕܶܐܢ ܬܶܫܪܶܐ ܥܠܰܝ ܡܰܫܪܺܝܬܳܐ ܠܳܐ ܕܳܚܶܠ ܠܶܒܝ. ܘܶܐܢ ܢܩܽܘܡ ܥܠܰܝ ܩܪܳܒܳܐ ܒܗܳܕܶܐ ܬܟܺܝܠ ܐܢܳܐ. ܡܶܛܽܠܗܳܕܶܐ ܐܶܡܰܪ ܠܦܶܛܪܽܘܣ: ܐܰܗܦܶܟ ܣܰܦܣܺܝܪܳܟ ܠܕܽܘܟܬܶܗ܆ ܟܳܣܳܐ ܕܝܰܗܒܠܺܝ ܐܳܒܝ ܠܳܐ ܐܶܫܬܶܝܘܗܝ (ܝܘܚܢܢ ܝܚ: ܝܐ). ܐܰܘ ܣܳܒܰܪ ܐܰܢܬ ܕܠܳܐ ܡܶܫܟܰܚ ܐܢܳܐ ܕܶܐܒܥܶܐ ܡܶܢ ܐܳܒܝ܆ ܘܰܢܩܺܝܡ ܠܺܝ ܝܰܬܺܝܪ ܡܶܢ ܬܰܪܬܰܥܶܣܪ̈ܶܐ ܠܶܓܝܽܘ̈ܢܺܝܢ ܕܡܰܠܐܟ̈ܐ (ܡܬܝ ܟܘ: ܢܓ). ܠܰܘ ܡܶܛܽܠ ܕܰܐܩܪܶܒ ܐܶܬܺܝܬ܆ ܘܠܰܘ ܠܬܰܟܬܽܘܫܳܐ ܘܠܰܐܓܽܘܢܳܐ ܕܰܩܪܳܒܳܐ ܣܳܡܶܬ ܐܰܦܰܝ̈. ܚܕܳܐ ܒܳܥܶܐ ܐܢܳܐ ܕܰܐܢܬܽܘܢ ܬܺܚܽܘܢ.
ܕܰܚܕܳܐ ܫܶܐܠܶܬ ܡܶܢ ܡܳܪܝܳܐ ܘܠܳܗ̇ ܗܽܘ ܒܳܥܶܐ ܐܢܳܐ. ܕܶܐܥܡܰܪ ܒܒܰܝܬܶܗ ܕܡܳܪܝܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈: ܘܶܐܚܙܶܐ ܒܒܰܣܺܝܡܽܘܬܶܗ ܕܡܳܪܝܳܐ ܘܶܐܦܩܽܘܕ ܗܰܝܟܠܶܗ. ܕܢܺܐܡܰܪ ܕܥܰܠ ܡܶܠܬܶܗ ܕܰܐܒܳܐ ܐܰܡܺܝܪܺܝܢ ܩܴ̈ܠܶܐ ܗܳܠܶܝܢ܆ ܡܶܣܬܰܒܰܪ ܡܶܢ ܐܢܳܫܺܝ̈ܢ ܕܰܡܚܺܝ̈ܠܐ ܢܶܫܬܰܩܠܽܘܢ ܡܷ̈ܠܶܐ ܗܳܠܶܝܢ ܡܢܳܚܴ̈ܬܳܐ. ܥܰܠ ܗܰܘ ܕܰܒܟܽܠܡܶܕܶܡ ܐܺܝܬܰܘܗܝ ܒܰܪ ܟܝܳܢܳܐ ܕܰܐܒܳܐ ܘܒܰܪ ܐܺܝܬܽܘܬܳܐ. ܒܪܰܡ ܕܶܝܢ ܟܰܕ ܡܶܬܒܰܩܶܝܢܰܢ ܒܗܳܝ ܕܰܗܘܳܐ ܒܰܪܢܳܫܳܐ. ܘܰܒܗܳܝ ܕܰܒܟܽܠܡܶܕܶܡ ܐܶܬܕܰܡܺܝ ܠܰܢ ܣܛܰܪ ܡܶܢ ܚܛܺܝܬܳܐ. ܠܳܐ ܡܢܰܟܪܺܝܢ ܡܶܢܶܗ ܩܴ̈ܠܶܐ ܗܳܠܶܝܢ. ܘܝܰܬܺܝܪܐܺܝܬ ܡܳܐ ܕܰܚܙܰܝܢܰܢ ܕܡܶܛܽܠ ܫܳܐܶܠ ܘܢܳܣܶܒ ܡܶܢ ܐܰܒܳܐ. ܐܰܝܠܶܝܢ ܕܺܐܝܬܰܝܗܶܝܢ ܕܺܝܠܶܗ ܟܝܳܢܳܐܺܝܬ. ܐܳܦ ܗܽܘ ܓܶܝܪ ܐܶܡܰܪ ܥܰܠ ܢܰܦܫܶܗ ܠܬܰܠܡܺܝܕܰܘ̈ܗܝ. ܕܶܐܢܳܐ ܐܶܒܥܶܐ ܡܶܢ ܐܰܒܳܐ ܘܰܐܚܪܺܢܳܐ ܦܰܪܶܩܠܺܝܛܳܐ ܢܶܬܶܠ ܠܟܽܘܢ܆ ܕܢܶܗܘܶܐ ܥܰܡܟܽܘܢ ܠܥܳܠܰܡ (ܝܘܚܢܢ ܝܕ: ܝܘ). ܘܬܽܘܒ ܐܶܡܰܪ: ܕܳܐܙܶܠ ܐܢܳܐ ܕܶܐܛܰܝܶܒ ܠܟܽܘܢ ܐܰܬܪܳܐ. ܘܬܽܘܒ ܐܺܬܶܐ ܘܶܐܕܒܰܪܟܽܘܢ ܠܘܳܬܝ. ܕܰܐܝܟܳܐ ܕܶܐܢܳܐ ܐܺܝܬܰܝ ܐܳܦ ܐܰܢܬܽܘܢ ܬܶܗܘܽܘܢ (ܝܘܚܢܢ ܝܕ: ܒ-ܓ). ܡܳܕܶܝܢ ܐܶܢ ܐܶܡܰܪ ܝܰܘܡܳܢܳܐ ܒܰܢܒܺܝܳܐ. ܕܫܶܐܠ ܡܶܢ ܐܰܒܳܐ ܕܢܶܥܡܰܪ ܒܒܰܝܬܶܗ ܕܡܳܪܝܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ. ܗܳܝ ܕܒܰܫܪܳܪܳܐ ܐܺܝܬܶܝܗ̇ ܠܶܗ ܟܝܳܢܳܐܺܝܬ ܥܰܡ ܐܰܒܳܐ. ܠܰܢ ܫܶܐܠ ܘܰܒܥܳܐ ܡܶܢ ܐܰܒܳܐ. ܕܢܰܫܘܶܐ ܠܰܢ ܠܗܰܘ ܒܶܝܬ ܡܰܥܡܪܳܐ ܐܰܠܳܗܳܝܳܐ܆ ܐܚܪܳܢܝܳܐܝܬ ܓܶܝܪ ܕܢܶܫܬܰܪܰܪ ܠܰܢ ܒܶܝܬ ܡܰܥܡܪܳܐ ܥܰܡ ܐܰܠܳܗܳܐ ܦܽܘܪܣܳܐ ܠܳܐ ܐܺܝܬ܆ ܐܶܠܳܐ ܟܰܕ ܗܘܐ ܒܪܳܐ ܫܳܘܽܐܠܳܐ ܘܢܳܣܽܘܒܳܐ. ܗܳܕܶܐ ܝܰܗܒ ܗܘܳܐ ܥܳܒܽܘܕܳܐ ܠܳܐܕܳܡ ܡܶܢ ܩܕܺܝܡ. ܕܥܰܡ ܐܰܠܳܗܳܐ ܢܶܥܡܰܪ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ. ܟܰܕ ܕܶܝܢ ܢܦܰܠ ܡܶܢ ܗܰܘ ܪܰܘܡܳܐ ܕܰܥܕܶܝܢ ܕܬܰܡܳܢ ܣܳܡܶܗ ܐܰܠܳܗܳܐ܆ ܐܰܢܰܢܩܺܝ ܗܘܳܬ ܠܰܐܠܳܗܳܐ܆ ܕܟܰܕ ܗܘܳܐ ܒܰܪܢܳܫܳܐ ܡܶܛܽܠܬܶܗ܆ ܢܶܥܛܽܘܦ ܢܶܫܰܐܠ ܘܢܶܒܥܶܐ ܡܶܢ ܐܰܒܳܐ ܐܰܝܠܶܝܢ ܕܕܺܝܠܶܗ ܗܘܱ̈ܝ ܥܰܡܶܗ ܕܠܳܐ ܫܽܘܪܳܝܳܐ܆ ܕܟܰܕ ܫܳܐܷܠ ܘܢܳܣܶܒ. ܘܗܰܘ ܕܡܶܛܽܠܳܬܰܢ ܡܶܬܚܙܶܐ ܒܶܗ ܒܳܥܽܘܝܳܐ ܘܰܕܢܳܣܶܒ ܢܩܰܘ̈ܝܳܢ ܠܘܳܬܰܢ. ܐܰܟܡܰܢ ܕܢܶܬܢܰܛܪ̈ܳܢ ܒܗܰܘ ܕܰܢܣܰܒ ܐܶܢܶܝܢ. ܘܠܳܐ ܡܶܬܓܰܢ̈ܒܳܢ ܐܰܝܟ ܕܡܶܢ ܐܳܕܳܡ ܩܰܕܡܳܝܳܐ. ܡܳܕܶܝܢ ܫܰܦܺܝܪ ܫܶܐܠ ܕܢܶܥܡܰܪ ܒܒܰܝܬܶܗ ܕܡܳܪܝܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ. ܡܶܛܽܠ ܕܢܶܫܬܰܪܰܪ ܠܰܢ ܒܺܐܝܕܰܘ̈ܗܝ ܡܽܘܠܟܳܢܶܗ ܕܰܐܒܳܐ. ܘܡܳܐ ܕܶܐܡܰܪ ܬܽܘܒ ܢܒܺܝܳܐ:
ܡܶܛܽܠ ܕܰܢܛܰܫܶܝܢܝ ܒܣܶܬܪܶܗ ܒܝܰܘܡܳܐ ܒܺܝܫܳܐ. ܗܳܪܟܳܐ ܥܠܰܝܢ ܒܳܥܶܐ܆ ܘܒܰܢ ܚܳܐܱܪ ܚܰܝܠܶܗ ܕܦܶܬܓܳܡܳܐ. ܝܰܘܡܳܐ ܕܶܝܢ ܒܺܝܫܳܐ ܠܝܰܘܡܳܐ ܕܕܺܝܢܳܐ ܡܫܰܡܰܗ. ܐܰܘ ܠܰܐܓܽܘܢܳܐ ܕܰܩܪܳܒܳܐ ܕܡܶܢ ܗܰܘ ܕܰܠܩܽܘܒܠܳܐ.
ܘܰܢܛܰܫܶܝܢܝ ܒܛܶܠܳܠܳܐ ܕܡܰܫܟܢܶܗ. ܘܥܰܠ ܫܽܘܥܳܐ ܢܪܺܝܡܰܢܝ. ܗܳܫܳܐ ܕܺܝܠܰܢ ܗܺܝ ܡܶܠܬܳܐ ܘܰܥܠܰܝܢ ܠܳܚܡܳܐ ܕܬܶܬܢܣܶܒ ܛܶܠܳܠܳܐ ܕܶܝܢ ܕܡܰܫܟܢܶܗ ܕܥܰܡܰܢܽܘܐܶܝܠ ܥܺܕܬܳܐ ܐܺܝܬܶܝܗ̇. ܫܽܘܥܳܐ ܕܶܝܢ ܕܰܫܪܳܪܳܐ ܗܰܝܡܳܢܽܘܬܳܐ. ܗܰܘ ܫܽܘܥܳܐ ܕܶܐܡܰܪ ܡܳܪܰܢ ܠܦܶܛܪܽܘܣ ܕܰܐܢܬ ܗܘ ܫܽܘܥܳܐ ܘܥܰܠ ܗܳܢܳܐ ܫܽܘܥܳܐ ܐܶܒܢܶܝܗ̇ ܠܥܺܕܬܝ (ܡܬܝ ܝܘ: ܝܚ). ܡܳܐ ܕܶܝܢ ܕܥܰܠ ܗܳܢܳܐ ܒܰܢܝܳܐ ܢܰܦܫܳܐ܆ ܚܰܝܠܬܳܢܳܐܺܝܬ ܡܙܺܝܥܳܐ ܩܪ̈ܳܒܶܐ ܠܽܘܩܒܰܠ ܒܥܶܠܕܰܐܪܳܗ̇. ܘܰܐܝܟ ܕܡܶܢ ܪܰܘܡܳܐ ܡܰܗܠܳܐ ܘܰܡܒܰܙܚܳܐ ܒܶܗ ܟܰܕ ܐܳܡܪܳܐ.
ܕܡܶܢ ܗܳܫܳܐ ܢܶܬܬܪܺܝܡ ܪܺܝܫܝ ܥܰܠ ܒܥܶܠܕ̈ܒܳܒܰܝ ܕܚܰܕܪܽܘܢܝ. ܘܟܰܕ ܠܳܐ ܕܳܚܠܳܐ ܡܙܰܡܪܳܐ ܘܳܐܡܪܳܐ:
ܐܶܕܰܒܰܚ ܒܡܰܫܟܢܶܗ ܕܶܒܚܷ̈ܐ ܕܫܽܘܒܚܳܐ. ܐܶܫܰܒܰܚ ܘܶܐܙܰܡܰܪ ܠܡܳܪܝܳܐ: ܫܡܰܥ ܡܳܪܝܳܐ ܩܳܠܝ ܡܳܐ ܕܰܩܪܺܝܬܳܟ. ܪܰܚܶܡ ܥܠܰܝ ܘܰܥܢܺܝܢܝ: ܠܳܟ ܐܳܡܰܪ ܠܶܒܝ ܘܒܳܥ̈ܝܳܢ ܐܰܦܰܝ̈ ܠܰܐܦܰܝ̈ܟ. ܡܳܪܝܳܐ ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ. ܗܳܠܶܝܢ ܟܽܠܗܶܝܢ ܩܴ̈ܠܶܐ ܐܶܢܽܘܢ ܕܥܰܡܳܐ ܩܰܕܺܝܫܳܐ ܕܗܰܘ ܕܰܒܥܳܐ ܒܪܳܐ ܘܰܐܥܶܠ ܠܒܶܝܬ ܡܰܥܡܪܳܐ ܕܰܐܒܳܐ. ܘܫܶܐܠ ܗܘܳܐ ܚܠܳܦܰܝܗܽܘܢ ܘܰܢܣܰܒ ܡܶܢ ܐܰܒܳܐ ܫܽܘܘܕܳܝܳܐ. ܕܢܶܥܡܪܽܘܢ ܒܕܳܪ̈ܳܬܳܐ ܩܰܕܺܝ̈ܫܳܬܳܐ ܘܰܫܡܰܝܳܢ̈ܝܳܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ. ܘܡܶܛܽܠ ܗܳܢܳܐ ܡܩܰܪܒܺܝܢ ܩܽܘܪ̈ܒܳܢܶܐ ܡܶܬܝܰܕ̈ܥܳܢܶܐ ܘܕܶܒܚܷ̈ܐ ܕܫܽܘܒܚܳܐ ܘܰܕܬܰܘܕܺܝܬܳܐ. ܘܒܳܥܶܝܢ ܕܰܐܦܺܝ̈ܢ ܒܰܐܦܺܝ̈ܢ ܢܶܚܙܽܘܢܳܝܗܝ ܠܡܳܪܝܳܐ. ܘܰܡܦܺܝܣ ܕܰܘܺܝܕ ܡܶܟܺܝܠ ܕܠܳܐ ܢܩܽܘܡ ܬܽܘܒ ܐܰܒܕܳܢܳܐ ܘܳܐܠܽܘܨܳܐ ܒܥܰܡܶܗ ܕܡܳܪܝܳܐ. ܘܳܐܡܰܪ:
ܘܠܳܐ ܠܡ ܬܰܐܠܨܺܝܘܗܝ ܒܪܽܘܓܙܳܐ ܠܥܰܒܕܳܟ. ܐܶܠܳܐ ܟܰܕ ܡܶܬܦܰܨܶܐ ܡܶܢ ܚܶܡܬܶܗ ܕܕܰܝܳܢܳܐ ܒܕܺܝܢܳܐ ܐܚܪܳܝܳܐ.
ܥܳܕܽܘܪܝ ܗܘܰܝܬ ܡܳܪܝܳܐ: ܠܳܐ ܬܶܫܕܶܝܢܝ ܘܠܳܐ ܬܶܫܒܩܰܢܝ ܐܰܠܳܗܝ. ܡܶܛܽܠ ܕܳܐܒܝ ܘܶܐܡܝ ܫܰܒܩܽܘܢܝ ܘܡܳܪܝܳܐ ܚܰܡܠܰܢܝ. ܘܠܳܐ ܐܳܕܳܡ ܘܠܳܐ ܚܰܘܳܐ ܗܘܰܘ ܠܺܝ ܦܳܪ̈ܽܘܩܶܐ ܡܶܢ ܫܰܒܳܝܷ̈ܐ. ܐܶܠܳܐ ܡܳܪܝܳܐ ܐܰܥܛܦܰܢܝ ܠܰܐܬܪܶܗ ܘܚܰܡܠܰܢܝ ܒܰܐܘܳܢܰܘ̈ܗܝ. ܘܡܶܛܽܠ ܗܳܕܶܐ ܡܨܰܠܶܐ ܐܢܳܐ.
ܐܰܠܶܦܰܝܢܝ ܡܳܪܝܳܐ ܐܽܘܪܚܳܟ܆ ܘܕܰܒܰܪܰܝܢܝ ܒܰܫܒܺܝ̈ܠܰܝܟ ܬܪ̈ܺܝܨܶܐ. ܘܠܳܐ ܬܽܘܒ ܬܰܫܠܡܰܢܝ ܠܰܒܥܶܠܕ̈ܒܳܒܰܝ. ܡܶܛܽܠ ܕܩܳܡܘ ܥܠܰܝ ܣܳܗ̈ܕܶܐ ܕܫܽܘܩܪܳܐ ܘܡܰܠܶܠܘ ܥܰܘܠܳܐ. ܠܡܶܬܕܰܡܳܪܽܘ ܙܳܕܶܩ܆ ܐܰܝܟܰܢܳܐ ܒܰܝܢܳܬ ܗܳܠܶܝܢ ܕܺܝܠܶܗ ܣܳܐܷܡ ܗܳܠܶܝܢ ܕܥܰܠ ܦܳܪܽܘܩܰܢ ܒܰܠܚܽܘܕ ܦܰܐܝܴ̈ܢ ܕܢܶܬܡܱ̈ܠܠܳܢ. ܣܳܗ̈ܕܶܐ ܓܶܝܪ ܕܫܽܘܩܪܳܐ ܕܩܳܡܘ ܘܡܰܠܶܠܘ ܥܰܘܠܳܐ. ܘܡܳܢܳܐ ܐܶܢܽܘܢ ܒܰܫܪܳܪܳܐ ܐܶܠܳܐ ܗܳܢܽܘܢ ܕܶܐܡܰܪܘ ܟܳܪ̈ܽܘܙܶܐ ܕܰܣܒܰܪܬܳܐ. ܕܶܐܬܰܘ ܣܰܓܺܝ̈ܐܷܐ ܣܳܗ̈ܕܶܐ ܕܫܽܘܩܪܳܐ. ܘܰܐܣܗܶܕܘ ܕܰܓܳܠܽܘܬܳܐ ܥܰܠ ܥܰܡܰܢܽܘܐܶܝܠ ܩܕܳܡ ܪ̈ܰܒܰܝ ܟܳܗ̈ܢܶܐ (ܡܪܩܘܣ ܝܕ: ܢܘ-ܢܙ). ܡܶܛܽܠܳܬܗܽܘܢ ܐܶܡܰܪ ܢܒܺܝܳܐ:
ܕܩܳܡܘ ܥܠܰܝ ܣܳܗ̈ܕܶܐ ܕܫܽܘܩܪܳܐ ܘܡܰܠܶܠܘ ܥܰܘܠܳܐ: ܐܶܢܳܐ ܕܶܝܢ ܗܰܝܡܢܶܬ ܕܶܐܚܙܶܐ ܒܛܳܒܴ̈ܬܶܗ ܕܡܳܪܝܳܐ ܒܰܐܪܥܳܐ ܕܚܰܝܷ̈ܐ. ܣܰܒܰܪܘ ܒܡܳܪܝܳܐ ܢܶܬܚܰܝܰܠ ܠܶܒܟܽܘܢ: ܣܰܒܰܪܘ ܒܡܳܪܝܳܐ. ܘܳܐܦܶܢ ܠܰܡ ܩܳܡܘ ܥܠܰܘܗܝ ܣܳܗ̈ܕܶܐ ܕܫܽܘܩܪܳܐ. ܐܶܠܳܐ ܣܰܒܰܪܘ ܒܶܗ ܕܡܳܪܝܰܐ ܗ̄ܘ ܘܰܕܡܶܢ ܐܰܪܥܳܐ ܕܚܰܝܷ̈ܐ ܢܚܶܬ. ܘܗܰܘ ܕܰܡܗܰܝܡܶܢ ܠܶܗ ܚܳܙܶܐ ܛܳܒܴ̈ܬܶܗ ܒܰܐܪܥܳܐ ܕܚܰܝܷ̈ܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܬܡܢܝܐ
ܡܰܘܕܰܥ ܥܰܠ ܬܰܟܫܶܦܬܳܐ ܘܰܨܠܽܘܬܳܐ ܕܰܡܩܰܪܶܒ ܗܘܳܐ ܛܽܘܒܳܢܳܐ ܕܰܘܺܝܕ ܟܰܕ ܫܶܐܠ ܕܢܶܬܦܰܨܶܐ ܡܶܢ ܕܺܝܢܳܐ.
ܕܶܚܠܬܳܐ ܕܡܶܢ ܕܺܝܢܳܐ ܐܚܪܳܝܳܐ ܒܟܽܠܙܒܰܢ ܡܙܺܝܥܳܐ ܗܘܳܬ ܠܶܗ ܠܛܽܘܒܳܢܳܐ ܕܰܘܺܝܕ ܘܡܶܛܠܗܳܢܳܐ ܒܕܽܘ̈ܟܝܳܬܳܐ ܡܶܬܥܰܗܰܕ ܠܕܺܝܢܳܐ ܘܬܰܫܢܺܝܩܳܐ ܟܰܕ ܡܦܺܝܣ ܕܢܶܬܦܰܨܶܐ ܡܶܢܗܽܘܢ. ܘܰܒܩܴ̈ܠܶܐ ܬܟܺܝ̈ܒܶܐ ܘܰܕܠܳܐ ܫܶܠܝܳܐ ܓܳܥܶܐ ܗܘܳܐ ܠܘܳܬ ܐܰܠܳܗܳܐ ܕܰܢܦܰܨܶܝܘܗܝ ܡܶܢ ܦܣܳܩܳܐ ܗܰܘ ܟܡܺܝܪܳܐ܆ ܕܰܦܣܺܝܩ ܥܰܠ ܥܳܒ̈ܕܰܝ ܫܽܘܩܪܳܐ. ܘܡܶܛܠܗܳܢܳܐ ܐܳܡܰܪ ܗܘܳܐ. ܕܦܰܨܳܗ̇ ܠܢܰܦܫܝ̱ ܡܶܢ ܪ̈ܰܫܺܝܥܶܐ ܘܡܶܢ ܚܰܪܒܳܐ: ܘܡܶܢ ܡܺܝ̈ܬܶܐ ܕܡܳܝܬܺܝܢ ܡܶܢ ܐܺܝ̈ܕܰܝܟ ܡܳܪܝܳܐ. ܘܡܶܢ ܡܺܝ̈ܬܶܐ ܕܚܶܦܪܳܐ (ܡܙܡܘܪܐ ܝܙ: ܝܓ-ܝܕ). ܘܗܳܕܶܐ ܐܶܡܰܪ ܒܡܰܙܡܽܘܪܳܐ ܕܰܫܒܰܥܣܰܪ. ܒܡܰܙܡܽܘܪܳܐ ܗܳܢܳܐ ܕܥܶܣܪܺܝܢ ܘܰܬܡܳܢܝܳܐ. ܟܰܕ ܓܽܘܒܳܐ ܡܰܥܶܠ ܚܠܳܦ ܚܶܦܪܳܐ. ܘܰܒܥܳܐ ܒܬܰܟܫܶܦܬܳܐ ܡܶܢ ܐܰܠܳܗܳܐ ܕܠܳܐ ܢܶܫܬܠܶܡ ܠܕܺܝܢܳܐ. ܥܰܡ ܗܳܢܽܘܢ ܕܒܰܡܣܳܡ ܒܪܺܝܫܳܐ ܕܟܺܐܢܽܘܬܳܐ ܡܶܣܬܰܚܦܺܝܢ ܘܢܳܦܠܺܝܢ. ܒܓܰܘܶܗ ܕܓܽܘܒܳܐ. ܘܰܓܥܳܐ ܠܘܳܬ ܐܰܠܳܗܳܐ ܘܶܐܡܰܪ:
ܠܳܟ ܡܳܪܝܳܐ ܩܪܺܝܬ ܐܰܠܳܗܝ ܠܳܐ ܬܶܫܬܽܘܩ ܡܶܢܝ: ܕܰܠܡܳܐ ܬܶܫܬܽܘܩ ܡܶܢܝ ܘܐܶܫܬܠܶܡ ܥܰܡ ܢܳܚ̈ܬܰܝ ܓܽܘܒܳܐ. ܚܙܺܝ ܡܳܢܳܐ ܐܳܡܰܪ ܠܘܳܬ ܡܳܪܝܳܐ. ܠܳܐ ܠܰܡ ܬܶܫܬܽܘܩ ܡܶܢܝ. ܐܶܢܓܶܝܪ ܡܰܗܡܶܐ ܩܳܠܳܟ ܪܳܥܝܳܐ ܛܳܒܳܐ ܡܶܢ ܥܶܪܒܳܟ ܫܳܩܠܺܝܢ ܠܺܝ ܠܰܡܢܳܬܗܽܘܢ ܟܢܽܘܫܝܳܐ ܕܕܺܐܒܷ̈ܐ. ܘܶܐܠܳܐ ܚܳܠܶܛ ܐܰܢܬ ܠܺܝ ܒܝܰܕ ܩܳܠܳܟ ܒܥܶܪ̈ܒܶܐ ܕܫܳܡܥܺܝܢ ܡܶܢܳܟ. ܕܬܰܘ ܒܪ̈ܺܝܟܰܘܗܝ ܕܳܐܒܝ ܝܺܪܰܬܘ ܡܰܠܟܽܘܬܳܐ ܕܡܶܢ ܩܕܺܝܡ ܡܛܰܝܒܳܐ ܠܟܽܘܢ (ܡܬܝ ܟܗ: ܠܕ). ܕܠܺܝܠܳܐܝܬ ܡܶܬܓܪܶܦ ܐܢܳܐ ܡܶܢ ܟܶܢܫܳܐ ܟܡܺܝܪܳܐ ܕܰܓܕܰܝܴ̈ܐ. ܐܶܠܳܐ ܢܶܦܽܘܩ ܒܳܬܰܪܝ ܩܳܠܳܟ ܘܢܰܝܬܶܝܢܝ ܨܶܐܕܰܝܟ ܕܠܳܐ ܟܰܕ ܫܬܶܩܬ ܡܶܢܝ܆ ܐܶܣܬܚܶܦ ܘܶܐܦܶܠ ܒܓܽܘܒܳܐ ܕܰܐܒܕܳܢܳܐ ܥܰܡ ܪ̈ܰܫܺܝܥܶܐ ܘܠܳܐ ܢܶܗܘܶܐ ܕܰܡܕܰܠܶܐ ܠܝ. ܘܓܽܘܒܳܐ ܗܳܢܳܐ ܥܰܠ ܡܰܘܬܳܢܳܐ ܬܶܢܝܳܢܳܐ ܡܶܬܢܣܶܒ. ܘܥܰܠ ܚܶܫܽܘܟܳܐ ܒܰܪܳܝܳܐ ܒܣܰܓܝ̈ܐܳܬܳܐ ܐܺܝܬ ܠܡܶܚܙܳܐ. ܘܗܳܐ ܩܳܥܶܐ ܘܳܐܡܰܪ ܒܡܰܙܡܽܘܪܳܐ ܐܚܪܺܢܳܐ: ܐܰܢܬ ܕܶܝܢ ܐܰܠܳܗܳܐ ܐܰܚܶܬ ܐܶܢܽܘܢ ܠܓܽܘܒܳܐ ܕܰܐܒܕܳܢܳܐ ܠܓܰܒܪ̈ܶܐ ܐܳܫ̈ܕܰܝ ܕܡܳܐ ܘܢܳܟ̈ܠܰܝ ܢܶܟܠܳܐ (ܡܙܡܘܪܐ ܢܗ: ܟܕ). ܘܬܽܘܒ ܒܡܰܙܡܽܘܪܳܐ ܐܚܪܺܢܳܐ ܐܳܡܰܪ: ܘܰܐܣܩܰܢܝ ܡܶܢ ܓܽܘܒܳܐ ܕܕܽܘܘܳܢܳܐ (ܡܙܡܘܪܐ ܡ: ܒ). ܘܰܙܟܰܪܝܳܐ ܐܶܡܰܪ: ܕܒܰܕܡܳܐ ܕܕܺܝܰܬܺܩܺܝ ܕܺܝܠܳܟ܆ ܫܪܰܝܬ ܐܰܣܺܝܪ̈ܶܐ ܡܶܢ ܓܽܘܒܳܐ ܕܠܰܝܬ ܒܶܗ ܡܰܝ̈ܳܐ (ܙܟܪܝܐ ܛ: ܝܐ). ܠܥܰܬܺܝܪܳܐ ܗܰܘ ܕܡܶܫܬܰܢܰܩ ܒܶܗ܆ ܘܠܳܐ ܠܳܥܳܙܳܪ ܕܰܡܪܰܛܶܒ ܒܪܺܝܫ ܨܶܒܥܶܗ ܠܠܶܫܳܢܶܗ܆ ܫܶܐܠ ܗܘܳܐ ܕܰܘܺܝܕ ܡܶܢ ܐܰܠܳܗܳܐ܆ ܕܠܳܐ ܢܶܫܬܠܶܡ ܥܰܡ ܐܰܝܠܶܝܢ ܕܢܳܚܬܺܝܢ ܠܶܗ ܐܶܡܰܪ:
ܫܡܰܥ ܩܳܠܳܐ ܕܒܳܥܽܘܬܝ ܟܰܕ ܐܶܓܥܶܐ ܠܘܳܬܳܟ. ܐܺܝܬ ܗܽܘ ܠܺܝ ܠܰܡ ܙܰܒܢܳܐ ܕܰܐܦܺܝܣ ܥܰܠܗܳܕܶܐ ܡܳܐ ܕܡܶܬܚܙܶܝܢ ܠܽܘ̈ܚܳܡܶܝܗ̇ ܕܟܺܐܢܽܘܬܳܐ.
ܘܟܰܕ ܐܰܪܺܝܡ ܐܺܝ̈ܕܰܝ ܠܗܰܝܟܠܳܟ ܩܰܕܺܝܫܳܐ. ܡܳܐ ܕܡܶܬܓܠܶܐ ܗܰܘ ܡܰܕܒܚܳܐ ܕܒܰܫ̈ܡܰܝ ܫܡܰܝܳܐ܆ ܘܰܡܩܰܪܒܺܝܢ ܠܳܟ ܒܶܗ ܟܺܐܢܷ̈ܐ ܩܽܘܪ̈ܒܳܢܰܝܗܽܘܢ ܒܗܰܘ ܝܰܘܡܳܐ.
ܠܳܐ ܬܶܡܢܶܝܢܝ ܥܰܡ ܪ̈ܰܫܺܝܥܶܐ ܘܥܰܡ ܥܳܒ̈ܕܰܝ ܥܰܘܠܳܐ: ܕܰܡܡܰܠܠܺܝܢ ܫܠܳܡܳܐ ܥܰܡ ܚܰܒܪ̈ܰܝܗܽܘܢ ܘܒܺܝܫܬܳܐ ܒܠܶܒܗܽܘܢ. ܦܪܽܘܥ ܐܶܢܽܘܢ ܐܰܝܟ ܥܒܳܕܰܝ̈ܗܽܘܢ ܘܰܐܝܟ ܒܺܝܫܽܘܬܗܽܘܢ. ܗܳܪܟܳܐ ܕܳܡܝܳܐ ܕܡܶܛܠܗܳܕܶܐ ܐܶܡܰܪ: ܕܰܦܪܽܘܥ ܐܶܢܽܘܢ ܐܰܝܟ ܥܒܳܕܰܝ̈ܗܽܘܢ ܥܰܠ ܕܢܰܘܕܰܥ ܕܠܳܐ ܡܶܫܟܚܺܝܢ ܙܰܕܺܝ̈ܩܶܐ ܡܦܺܝܣܺܝܢ ܚܠܳܦ ܥܰܘܴ̈ܠܶܐ ܕܢܶܬܦܰܨܽܘܢ ܡܶܢ ܕܺܝܢܳܐ. ܠܳܐ ܓܶܝܪ ܡܶܫܟܚܺܝܢ ܕܟܰܕ ܚܳܙܶܝܢ ܠܡܰܠܟܳܐ ܕܰܠܒܺܝܫ ܠܽܘܩܒܰܠܗܽܘܢ ܦܰܪܨܽܘܦܳܐ ܕܚܶܡܬܳܐ. ܕܢܶܒܥܽܘܢ ܡܶܢܶܗ ܬܰܪܥܽܘܬܳܐ ܥܰܠ ܡܰܪ̈ܓܙܳܢܶܐ ܒܙܰܒܢܳܐ ܓܶܝܪ ܕܽܐܘܠܨܳܢܳܐ. ܟܽܠܢܳܫ ܠܡܰܚܣܶܢ ܡܶܫܟܰܚ ܕܰܢܦܰܨܶܐ ܢܰܦܫܶܗ. ܘܒܰܩܢܽܘܡܶܗ ܪܳܢܶܐ. ܘܕܰܐܝܟܰܢܳܐ ܢܶܬܦܰܠܰܛ ܡܶܢ ܕܺܝܢܳܐ ܡܨܰܠܶܐ. ܘܡܳܢܳܐ ܐܳܡܰܪ ܐܢܳܐ ܗܳܕܶܐ ܕܥܰܡܶܗ ܕܕܰܝܳܢܳܐ ܡܶܬܚܰܡܬܺܝܢ ܙܰܕܺܝ̈ܩܶܐ. ܘܰܐܝܟ ܕܰܘܺܝܕ ܐܳܡܪܺܝܢ.
ܡܶܛܽܠ ܕܠܳܐ ܐܶܣܬܰܟܰܠܘ ܒܰܥܒܳܕܰܘ̈ܗܝ ܕܡܳܪܝܳܐ. ܘܒܰܥܒܳܕ ܐܝܕܰܘ̈ܗܝ ܢܶܣܚܽܘܦ ܐܶܢܽܘܢ ܘܠܳܐ ܢܶܒܢܶܐ ܐܶܢܽܘܢ. ܡܳܢܳܐ ܐܺܝܬ ܠܡܺܐܡܰܪ ܐܰܝܟܳܐ ܕܡܶܬܚܰܙܝܳܐ ܕܣܰܓܺܝ ܛܰܘܪܳܐ ܪܰܚܺܝܩܺܝܢ ܓܰܒܷ̈ܐ ܡܶܢ ܚܕܳܕ̈ܐ ܐܰܝܟ ܢܽܘܗܪܳܐ ܡܶܢ ܚܶܫܽܘܟܳܐ. ܟܰܕ ܠܰܘ ܐܰܠܳܗܳܐ ܗܘܳܐ ܥܶܠܬܳܐ ܕܡܶܬܪܰܚܩܳܢܽܘܬܗܽܘܢ ܕܥܳܒ̈ܕܰܝ ܥܰܘܠܳܐ ܡܶܢ ܙܰܕܺܝ̈ܩܶܐ. ܐܶܠܳܐ ܗܶܢܽܘܢ ܕܰܥܪܰܩܘ ܡܶܢ ܢܳܡܽܘ̈ܣܶܐ ܘܕܺܝ̈ܢܶܐ. ܡܶܛܠ ܠܳܐ ܚܽܘܠܛܳܢܳܐ ܕܩܰܕܺܝ̈ܫܶܐ. ܘܠܳܐ ܟܳܫܪܽܘܬܳܐ ܕܰܥܒܳܕܰܝ̈ܗܽܘܢ. ܗܳܟܰܢܳܐ ܐܳܦ ܬܰܡܳܢ ܗܳܘܶܝܢ ܘܰܢܒܺܝܳܐ ܓܶܝܪ ܐܰܪܓܶܫ ܕܥܰܡ ܗܳܠܶܝܢ ܠܳܐ ܡܶܬܡܢܶܐ ܒܕܺܝܢܳܐ. ܡܒܰܪܶܟ ܠܡܳܪܝܳܐ ܘܳܐܡܰܪ:
ܒܪܺܝܟ ܗܽܘ ܡܳܪܝܳܐ ܕܰܫܡܰܥ ܩܳܠܳܐ ܕܒܳܥܘܽܬܝ. ܒܳܥܽܘܬܶܗ ܕܶܝܢ ܗܳܕܶܐ ܗܘܳܬ܆ ܕܥܰܡ ܢܳܚ̈ܬܰܝ ܓܽܘܒܳܐ ܠܳܐ ܢܶܫܬܠܶܡ. ܘܗܳܐ ܡܶܢ ܠܥܶܠ ܓܳܥܶܐ ܘܳܐܡܰܪ܆
ܫܡܰܥ ܩܳܠܳܐ ܕܒܳܥܽܘܬܝ ܟܰܕ ܐܶܓܥܶܐ ܠܘܳܬܳܟ܆ ܡܳܪܝܳܐ ܥܳܕܽܘܪܝ ܘܰܡܣܰܝܥܳܢܝ: ܕܰܥܠܰܘܗܝ ܐܶܬܬܟܶܠ ܠܶܒܝ̱ ܘܰܫܘܰܚ ܒܶܣܪܝ. ܒܶܣܪܳܐ ܕܰܫܘܰܚ ܡܰܘܕܰܥ܆ ܥܰܠ ܡܰܘܥܺܝܬܳܐ ܕܗܳܘܝܳܐ ܠܶܗ ܡܶܢ ܚܒܳܠܳܐ. ܠܘܳܬ ܠܳܐ ܡܶܬܚܰܒܠܳܢܽܘܬܳܐ ܒܰܩܝܳܡܬܳܐ. ܗܳܟܰܢܳܐ ܓܶܝܪ ܢܳܒܥܺܝܢ ܦܰܓܪ̈ܶܐ ܕܩܰܕܺܝ̈ܫܶܐ ܒܢܽܘܚܳܡܳܐ ܐܰܟܡܳܐ ܕܫܳܘܚܺܝܢ ܥܶܩܳܪ̈ܶܐ ܝܰܩܺܝܪ̈ܶܐ ܘܝܰܒܺܝ̈ܫܶܐ ܘܰܡܚܰܘܶܝܢ ܡܰܘ̈ܥܝܳܬܳܐ ܪ̈ܰܓܝܳܬܳܐ ܒܡܶܛܪܳܐ ܢܺܝܣܳܢܳܝܳܐ. ܘܡܶܛܠܗܳܢܳܐ ܡܳܐ ܕܶܐܬܥܰܛܰܦ ܒܶܣܪܗܽܘܢ ܬܶܫܒܽܘܚܬܳܐ ܕܠܳܐ ܡܳܝܽܘܬܽܘܬܳܐ. ܘܩܳܡܘ ܒܚܰܝܷ̈ܐ ܚܰܕ̈ܬܶܐ ܕܠܰܝܬ ܒܗܽܘܢ ܥܰܬܺܝܩܽܘܬܳܐ. ܘܰܥܛܺܝܦܺܝܢ ܫܽܘܒܚܳܐ ܕܠܳܐ ܡܳܝܽܘܬܽܘܬܳܐ. ܗܳܝܕܶܝܢ ܐܳܡܰܪ ܟܢܽܘܫܝܳܐ ܕܰܒ̈ܢܰܝ ܡܰܠܟܽܘܬܳܐ. ܗܳܢܰܘ ܥܰܡ ܛܽܘܒܳܢܳܐ ܕܰܘܺܝܕ.
ܘܰܒܬܶܫܒܽܘܚܬܳܐ ܐܰܘܕܶܐ ܠܶܗ. ܕܬܽܘܒ ܝܰܬܺܝܪܳܐܝܬ ܢܶܬܢܰܗܰܪ ܠܰܢ ܦܶܬܓܳܡܳܐ ܗܳܢܳܐ. ܕܶܐܡܰܪ ܡܙܰܡܪܳܢܳܐ ܡܶܛܠ ܒܶܣܪܶܗ ܕܥܰܠ ܡܳܪܝܳܐ ܫܘܰܚ. ܕܳܡܝܳܐ ܓܶܝܪ ܡܶܠܬܳܐ ܕܥܠ ܡܕܰܒܪܳܢܽܘܬܳܐ ܟܰܕ ܐܳܡܰܪ: ܡܶܢ ܒܳܬܰܪ ܕܰܫܪܶܟ ܒܶܣܪܳܐ ܐܢܳܫܳܝܳܐ ܠܘܳܬ ܚܒܳܠܳܐ ܓܡܺܝܪܳܐ. ܐܰܝܟ ܟܝܳܢܶܗ. ܗܳܝܕܶܝܢ ܡܶܢ ܒܳܬܰܪܟܶܢ ܥܰܠ ܐܰܠܳܗܳܐ ܡܶܠܬܳܐ ܚܳܙܶܐ ܗܘܳܐ ܠܶܗ ܢܒܺܝܳܐ. ܟܰܕ ܫܘܰܚ ܒܠܳܐ ܡܶܬܚܰܒܠܳܢܽܘܬܳܐ ܒܰܩܝܳܡܬܶܗ ܕܥܰܡܰܢܽܘܐܶܝܠ ܠܳܐ ܓܶܝܪ ܡܶܫܟܚܳܐ ܗܘܳܬ ܕܥܰܠ ܚܽܘܕܳܬܳܐ ܡܫܰܡܠܝܳܐܺܝܬ ܢܶܬܬܟܶܠ ܠܶܒܳܐ ܕܩܰܕܺܝ̈ܫܶܐ ܕܰܗܘܳܐ ܠܒܶܣܪܳܐ. ܐܶܠܳܐ ܟܰܕ ܒܰܩܢܘܡܶܗ ܕܰܐܠܳܗܳܐ ܚܳܙܶܝܢ ܗܘܰܘ ܠܶܗ ܕܰܫܘܰܚ. ܘܶܐܬܥܰܠܺܝ ܒܫܽܘܒܚܳܐ ܒܚܰܝܷ̈ܐ ܕܪܰܚܺܝܩܺܝܢ ܡܶܢ ܚܒܳܠܳܐ. ܫܰܦܺܝܪ ܐܶܡܰܪ ܐܳܦ ܡܙܰܡܪܳܢܳܐ ܕܰܥܠܰܘܗܝ ܐܶܬܬܟܶܠ ܠܶܒܝ̱ ܘܰܫܘܰܚ ܒܶܣܪܝ̱ ܘܒܶܗ ܐܶܬܚܰܕܰܬ ܟܝܳܢܰܢ ܡܶܢ ܒܳܬܰܪ ܕܰܐܥܬܶܩ ܒܰܚܒܳܠܳܐ. ܘܒܶܗ ܫܶܘܚܰܬ ܡܺܝܬܽܘܬܰܢ ܠܠܳܐ ܡܳܝܽܘܬܽܘܬܳܐ. ܡܶܛܽܠ ܗܳܢܳܐ ܒܬܶܫܒܽܘܚܬܳܐ ܐܰܘܕܶܐ ܠܶܗ ܘܰܒܩܴ̈ܠܶܐ ܕܩܽܘܒܳܠܛܰܝܒܽܘܬܳܐ ܐܶܦܪܽܘܥ ܠܡܽܘܟܳܟܶܗ. ܡܶܛܽܠ ܕܰܗܘܳܐ ܡܚܰܕܬܳܢܳܐ ܘܝܳܗܶܒ ܚܰܝܠܳܐ ܠܰܟܝܳܢܳܐ ܐܢܳܫܳܝܳܐ ܕܶܐܬܡܚܶܠ ܐܶܡܰܪ ܓܶܝܪ ܗܳܕܶܐ:
ܡܳܪܝܳܐ ܚܰܝܠܰܐ ܗ̄ܘ ܕܥܰܡܶܗ: ܘܰܡܣܰܝܥܳܢܳܐ ܘܦܳܪܽܘܩܳܐ ܕܰܡܫܺܝܚܶܗ. ܒܶܗ ܓܶܝܪ ܒܰܐܒܳܐ ܩܢܰܘ ܡܗܰܝܡ̈ܢܶܐ ܚܰܝܠܳܐ. ܘܗܽܘܝܽܘ ܡܣܰܝܰܥ ܠܰܐܝܠܶܝܢ ܕܶܐܬܦܪܶܩ ܒܰܒܪܶܗ. ܐܶܡܰܪ ܓܶܝܪ ܘܗܽܘ ܒܪܳܐ. ܕܠܳܐ ܐܢܳܫ ܡܶܫܟܰܚ ܐܳܬܶܐ ܠܘܳܬܝ̱ ܐܶܠܳܐ ܢܰܓܕܶܗ ܐܰܒܳܐ ܕܫܰܕܪܰܢܝ (ܝܘܚܢܢ ܘ: ܡܕ). ܒܗܳܕܶܐ ܡܶܬܶܐܡܰܪ ܕܰܡܣܰܝܰܥ ܠܰܐܝܠܶܝܢ ܕܡܶܬܦܰܪܩܺܝܢ ܒܰܡܫܺܝܚܶܗ. ܡܰܝܬܶܐ ܡܶܢ ܒܳܬܰܪܟܶܢ. ܐܳܦ ܨܠܽܘܬܳܐ ܠܘܳܬ ܐܰܠܳܗܳܐ ܟܰܕ ܡܦܺܝܣ ܠܶܗ܆ ܐܰܝܟܰܢܳܐ ܕܢܶܦܪܽܘܩ ܠܥܰܡܶܗ ܘܰܢܒܰܪܶܟ ܠܝܳܪܬܽܘܬܶܗ.
ܦܪܽܘܩ ܠܥܰܡܳܟ ܘܒܰܪܶܟ ܠܝܳܪܬܘܬܳܟ܆ ܪܥܺܝ ܐܶܢܽܘܢ ܘܕܰܒܰܪ ܐܶܢܽܘܢ ܥܕܰܡܳܐ ܠܥܳܠܰܡ. ܗܳܢܽܘܢ ܠܰܡ ܕܒܳܟ ܡܶܬܦܰܪܩܺܝܢ ܟܺܐܢܳܐ ܗܝ ܕܡܶܢܳܟ ܢܶܬܪܥܽܘܢ ܘܰܐܢܬ ܬܶܪܥܶܐ ܐܶܢܽܘܢ. ܘܗܳܢܽܘܢ ܕܒܰܩܢܽܘܡܳܟ ܫܘܰܚ ܒܶܣܪܗܽܘܢ. ܘܰܩܢܰܘ ܥܰܡܳܟ ܚܽܘܠܛܳܢܳܐ. ܫܰܦܺܝܪ ܕܰܐܢܬ ܬܶܗܘܶܐ ܠܗܽܘܢ ܪܳܥܝܳܐ. ܒܚܰܝܷ̈ܐ ܕܠܰܝܬ ܠܗܽܘܢ ܫܽܘܠܳܡܳܐ ܘܠܳܟ ܢܰܘܕܽܘܢ ܘܰܢܫܰܒܚܽܘܢ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܥܣܪܝܢ ܘܬܫܥܐ
ܥܰܠ ܕܰܚܛܺܝܬܳܐ ܒܰܫܡܳܐ ܕܢܶܩܒܬܳܐ ܡܶܬܩܰܪܝܳܐ ܒܰܟܬܳܒܷ̈ܐ ܩܰܕܺܝ̈ܫܶܐ: ܘܥܰܠ ܓܡܽܘܪܝܳܐ ܘܒܽܘܛܳܠܳܐ ܕܚܰܝ̈ܠܰܘܳܬܳܐ ܕܡܳܪ̈ܽܘܕܶܐ: ܘܥܰܠ ܦܽܘܠܳܓܳܐ ܕܢܽܘܪܳܐ ܠܚܰܪܬܳܐ ܘܫܽܘܠܳܡܳܐ.
ܟܬܳܒܳܐ ܩܰܕܡܳܝܳܐ ܡܰܘܕܰܥ ܘܡܰܠܶܦ ܥܰܠ ܬܽܘܩܳܢܳܐ ܕܒܶܪ̈ܝܳܬܳܐ. ܕܟܰܕ ܥܒܰܕ ܐܰܠܳܗܳܐ ܒܰܪܢܳܫܳܐ. ܕܟܰܪ ܢܶܩܒܳܐ ܥܒܰܕ ܐܶܢܽܘܢ ܐܰܠܳܗܳܐ܆ ܘܰܕܡܶܛܽܠܡܳܢܳܐ ܥܒܰܕ ܐܶܢܽܘܢ ܐܰܠܳܗܳܐ ܗܳܟܰܢܳܐ. ܕܠܳܐ ܙܰܒܢܳܐ ܣܰܓܺܝܐܳܐ ܡܰܘܕܰܥ܆ ܠܰܘ ܡܶܛܠ ܫܽܘܚܠܳܦܳܐ ܕܡܰܦܪܝܳܢܽܘܬܳܐ ܐܳܡܰܪ ܐܢܳܐ. ܐܶܠܳܐ ܡܶܛܽܠ ܫܽܘܚܠܳܦܳܐ ܕܨܶܒܝܳܢܳܐ. ܗܰܘ ܕܰܕܠܺܝܠܳܐܝܬ ܐܶܨܛܠܺܝ ܠܘܳܬ ܪܶܟܢܳܐ ܕܒܺܝܫܬܳܐ. ܥܒܰܕ ܐܠܗܐ ܢܶܩܒܬܳܐ ܠܗܳܝ ܕܰܡܛܰܝܒܳܐܺܝܬ ܐܶܫܬܰܡܥܰܬ ܠܚܶܘܝܳܐ. ܕܶܟܪܳܐ ܕܶܝܢ ܠܰܘ ܕܠܳܐ ܚܛܳܐ ܘܠܳܐ ܥܒܰܪ ܥܰܠ ܦܽܘܩܕܳܢܳܐ. ܡܳܕܶܝܢ ܠܰܘ ܣܪܺܝܩܳܐܺܝܬ ܐܶܬܥܰܒܕܰܬ ܗܳܝ ܕܰܚܛܳܬ ܢܶܩܒܬܳܐ. ܐܶܠܳܐ ܝܰܬܺܝܪܳܐܺܝܬ ܒܟܺܐܢܽܘܬܳܐ. ܘܥܰܠ ܗܳܕܶܐ ܐܳܦ ܝܰܬܺܝܪܳܐܺܝܬ ܐܶܫܬܰܥܒܕܰܬ ܠܟܺܐܒܷ̈ܐ ܘܰܠܥ̈ܩܳܬܳܐ. ܘܰܐܝܟ ܕܰܒܗܰܢܺܝܐܘܬܳܐ ܕܰܚܛܺܝܬܳܐ ܗܺܝ ܩܰܕܡܳܐܺܝܬ ܐܶܬܒܰܣܡܰܬ. ܘܠܳܗ̇ ܫܶܦܪܰܬ ܒܺܝܫܬܳܐ ܘܡܰܦܽܘܠܬܳܐ ܕܡܶܢ ܐܰܬܪܳܐ ܩܰܕܺܝܫܳܐ. ܘܡܶܢܳܗ̇ ܫܩܰܠܘ ܚܛܳܗܷ̈ܐ ܫܽܘܪܳܝܳܐ ܕܢܶܥܠܽܘܢ ܠܥܳܠܡܳܐ. ܕܶܟܪܳܐ ܕܶܝܢ ܥܶܠܬܳܐ ܠܰܚܕܳܐ ܡܶܢ ܗܳܠܶܝܢ ܠܳܐ ܗܘܳܐ. ܐܰܝܟ ܕܰܟܬܰܒ ܡܶܛܠܳܬܳܗ̇ ܗܰܘ ܣܢܺܐܓܪܳܐ ܕܰܐܠܳܗܳܐ ܦܰܘܠܘܣ. ܕܳܐܕܳܡ ܠܳܐ ܛܥܳܐ. ܐܰܢܬܬܳܐ ܕܶܝܢ ܛܥܳܬ ܘܥܶܒܪܰܬ ܥܰܠ ܦܽܘܩܕܳܢܳܐ (ܐ ܛܝܡܬܐܘܣ ܒ: ܝܕ). ܡܳܕܶܝܢ ܟܰܕ ܠܰܬܪܶܝܢ ܡܶܬܦܰܠܰܓ ܨܰܠܡܳܐ ܕܟܽܠ ܒܰܪܢܳܫܳܐ. ܘܰܠܗܳܝ ܕܕܶܟܪܳܐ ܘܰܠܗܳܝ ܕܢܶܩ̈ܒܳܬܳܐ ܡܚܰܘܶܐ ܦܽܘܠܚܳܢܶܗ. ܢܶܩܒܬܳܐ ܗܳܘܶܐ ܡܳܐ ܕܠܰܚܛܝܬܳܐ ܣܳܥܰܪ. ܗܳܟܰܢܳܐ ܓܶܝܪ ܐܶܬܝܰܕܥܰܬ ܢܶܩܒܬܳܐ ܡܶܢ ܫܽܘܪܳܝܳܐ. ܘܥܰܠܗܳܕܶܐ ܗܘܳܬ ܢܶܩܒܬܳܐ ܥܰܠ ܕܣܶܥܪܰܬ ܚܛܺܝܬܳܐ. ܕܶܟܪܳܐ ܬܽܘܒ ܡܚܰܘܶܐ ܢܰܦܫܶܗ. ܡܳܐ ܕܰܠܛܳܒܬܳܐ ܥܳܒܶܕ. ܗܳܟܰܢܳܐ ܓܶܝܪ ܗܘܳܐ ܕܶܟܪܳܐ ܡܶܢ ܒܪܺܝܫܺܝܬ. ܗܰܘ ܕܠܳܐ ܚܛܳܐ. ܐܰܝܟ ܕܡܶܠܬܳܐ ܫܠܺܝܚܳܝܬܳܐ ܡܰܠܦܳܐ. ܒܢܰܝܴ̈ܐ ܕܶܝܢ ܕܢܶܩܒܬܳܐ܆ ܡܶܬܝܰܕܥܳܢܳܐܝܬ ܠܰܚ̈ܛܳܗܶܐ ܡܶܣܬܰܟܠܺܝܢܰܢ. ܕܕܰܒܢܰܝܴ̈ܐ ܕܕܶܟܪ̈ܶܐ ܡܶܣܬܰܟܠܳܢܳܐܺܝܬ ܙܰܕܺܝܩܽܘܬܳܐ ܐܶܢܽܘܢ. ܘܡܳܐ ܗܳܟܺܝܠ ܕܫܳܡܥܺܝܢܰܢ ܐܰܝܟ ܕܡܶܢ ܚܰܝܠܳܐ ܕܗܳܠܶܝܢ ܕܶܐܬܦܰܫܰܩ܆ ܕܶܐܡܰܪ ܟܬܳܒܳܐ ܫܡܳܐ ܕܕܶܟܪܳܐ. ܐܰܘ ܫܡܳܐ ܕܰܒ̈ܢܰܝ ܕܶܟܪ̈ܶܐ. ܠܰܘ ܡܶܕܶܡ ܐܚܪܺܢܳܐ ܙܳܕܶܩ ܕܰܢܣܰܒܰܪ. ܐܶܠܳܐ ܠܛܳܒ̈ܬܳܐ ܡܫܰܡܰܗ. ܐܶܢܕܶܝܢ ܢܶܩܒܬܳܐ ܡܰܥܶܗܕ܆ ܐܰܘ ܒܢܴ̈ܬ ܢܶܩ̈ܒܳܬܳܐ܆ ܥܰܠ ܕܰܠܩܽܘܒܠܳܐ ܢܶܪܢܶܐ܆ ܙܳܕܶܩ ܡܳܕܶܝܢ ܝܰܘܡܳܢܳܐ܆ ܕܟܰܕ ܠܛܽܘܒܳܢܳܐ ܕܰܘܺܝܕ ܫܳܡܥܺܝܢܰܢ ܕܳܐܡܰܪ ܒܪܺܝܫ ܡܰܙܡܽܘܪܶܗ ܗܳܢܳܐ ܕܥܶܣܪܺܝܢ ܘܬܶܫܥܳܐ ܫܡܳܐ ܕܰܒ̈ܢܰܝ ܕܶܟܪ̈ܶܐ܆ ܕܠܰܘ ܡܶܕܶܡ ܐܚܪܺܢܳܐ ܡܰܠܶܦ. ܐܶܠܳܐ ܕܝ̈ܠܕܶܐ ܡܝܰܬܪ̈ܶܐ ܕܢܰܦܫܳܐ ܕܕܰܟܝܳܐ ܡܶܢ ܚܛܳܗܷ̈ܐ ܢܩܰܪܶܒ ܠܡܳܪܝܳܐ. ܐܶܡܰܪ ܓܝܪ ܗܽܘ ܛܽܘܒܳܢܳܐ ܕܰܘܺܝܕ:
ܐܰܝܬܰܘ ܠܡܳܪܝܳܐ ܒܢܱ̈ܝ ܕܶܟܪ̈ܶܐ. ܐܰܝܬܰܘ ܠܡܳܪܝܳܐ ܫܽܘܒܚܳܐ ܘܺܐܝܩܳܪܳܐ: ܐܰܝܬܰܘ ܠܡܳܪܝܳܐ ܐܺܝܩܳܪܳܐ ܠܰܫܡܶܗ. ܬܠܳܬ ܙܰܒܢܻ̈ܝܢ ܥܳܐܶܦ ܠܳܗ̇ ܠܡܶܠܬܳܐ. ܟܰܕ ܡܶܢ ܗܳܠܶܝܢ ܬܰܪܬܶܝܢ ܕܒܳܬܰܪ ܗܳܝ ܩܰܕܡܳܝܬܳܐ ܡܚܰܘܶܐ. ܕܠܰܘ ܡܶܛܽܠ ܬܰܘܪ̈ܶܐ ܘܥܶܪ̈ܒܶܐ ܕܡܶܬܩܰܪܒܺܝܢ ܗܘܰܘ ܒܢܳܡܽܘܣܳܐ ܡܰܠܶܦ܆ ܬܰܘܪ̈ܶܐ ܓܶܝܪ ܘܥܶܪ̈ܒܶܐ ܥܰܡ ܫܰܪܟܳܐ ܕܟܽܠܳܗ̇ ܒܥܺܝܪܳܐ܆ ܡܶܢ ܗܳܝ ܕܢܶܩܒܬܳܐ ܡܶܬܟܰܢܶܝܢ ܒܢܰܝܴ̈ܐ. ܠܰܘ ܓܶܝܪ ܕܠܺܝܠܳܐܝܬ ܡܶܫܟܰܚ ܐܢܳܫ ܒܰܓܙܳܪܳܐ ܕܥܳܢܴ̈ܐ ܡܳܐ ܕܣܰܓܝ̈ܐܝܢ ܐܰܒܳܗܷ̈ܐ ܕܰܐܝܢܰܘ ܐܰܒܳܐ ܕܗܰܘ ܡܶܬܺܝܠܶܕ. ܐܶܡܳܐ ܕܶܝܢ ܠܳܐ ܛܳܥܝܳܐ ܠܡܰܘܠܕܳܢܳܐ ܘܣܳܐܶܡ ܢܳܡܽܘܣܳܐ ܓܶܝܪ ܟܰܕ ܡܦܰܩܶܕ ܡܶܛܠ ܒܽܘܟܪ̈ܶܐ ܐܰܝܠܶܝܢ ܕܡܶܬܩܰܪܒܺܝܢ ܠܡܳܪܝܳܐ ܗܳܕܶܐ ܐܳܡܰܪ. ܬܰܘܪܳܐ ܐܰܘ ܐܶܡܪܳܐ ܟܰܕ ܢܶܬܺܝܠܶܕ܆ ܫܰܒܥܳܐ ܝܰܘ̈ܡܺܝܢ ܢܶܗܘܶܐ ܒܳܬܰܪ ܐܶܡܶܗ. ܘܰܒܝܰܘܡܳܐ ܕܰܬܡܳܢܝܳܐ ܬܶܬܠܺܝܘܗܝ ܠܺܝ (ܡܦܩܢܐ ܟܒ: ܠ). ܡܳܕܶܝܢ ܠܰܘ ܡܶܛܽܠ ܕܶܟܪ̈ܶܐ ܕܚܰܝ̈ܘܳܬܳܐ ܐܶܡܰܪ ܕܰܘܺܝܕ ܗܳܪܟܳܐ. ܕܢܰܝܬܽܘܢ ܠܡܳܪܝܳܐ. ܘܥܰܠ ܗܳܕܶܐ ܒܢܱ̈ܝ ܢܶܩ̈ܒܳܬܳܐ ܐܶܢܽܘܢ ܕܶܒܚܷ̈ܐ ܢܳܡܽܘ̈ܣܳܝܶܐ. ܕܶܒܚܷ̈ܐ ܕܶܝܢ ܙܰܕܺܝ̈ܩܶܐ ܒܢܱ̈ܝ ܕܶܟܪ̈ܶܐ ܐܶܢܽܘܢ. ܘܗܳܟܰܢܳܐ ܗܳܪܟܳܐ ܡܶܢ ܒܳܬܰܪ ܕܶܐܡܰܪ ܐܰܝܬܰܘ ܠܡܳܪܝܳܐ ܒܢܱ̈ܝ ܕܶܟܪ̈ܶܐ. ܦܰܫܶܩ ܥܶܠܬܶܗ ܕܡܳܢܳܐ ܐܶܢܽܘܢ ܒܢܱ̈ܝ ܕܶܟܪ̈ܶܐ ܘܶܐܡܰܪ:
ܐܰܝܬܰܘ ܠܡܳܪܝܳܐ ܫܽܘܒܚܳܐ ܘܺܐܝܩܳܪܳܐ: ܐܰܝܬܰܘ ܠܡܳܪܝܳܐ ܐܺܝܩܳܪܳܐ ܠܰܫܡܶܗ. ܒܢܱ̈ܝ ܕܶܟܪ̈ܶܐ ܡܳܕܶܝܢ ܫܽܘܒܚܳܐ ܘܺܐܝܩܳܪܳܐ ܐܶܢܽܘܢ. ܕܰܬܠܳܬ ܙܰܒܢܺܝ̈ܢ ܐܶܡܰܪ. ܡܚܰܘܶܐ ܓܡܺܝܪܽܘܬܳܐ ܕܺܝܠܗܽܘܢ ܕܩܽܘܪ̈ܒܳܢܶܐ. ܐܰܝܟ ܗܳܝ: ܕܰܬܠܳܬ ܙܰܒ̈ܢܺܝܢ ܒܫܰܢܬܳܐ ܢܶܬܚܙܶܐ ܕܽܘܟܪܳܢܳܟ ܩܕܳܡ ܡܪܳܝܳܐ ܐܰܠܳܗܳܟ (ܡܦܩܢܐ ܟܓ: ܝܙ ܠܕ: ܟܓ ܬܢܝܢ ܢܡܘܣܐ ܝܘ: ܝܘ). ܘܰܐܝܟ ܗܳܝ ܕܶܐܬܚܛܶܦ ܦܰܘܠܘܣ ܥܕܰܡܳܐ ܠܰܫܡܰܝܳܐ ܕܰܬܠܳܬܳܐ. ܥܳܐܠܺܝܢܰܢ ܡܶܟܺܝܠ ܠܘܳܬ ܣܶܓܕܬܳܐ ܡܳܪܢܳܝܬܳܐ ܠܕܳܪ̈ܳܬܳܐ ܥܶܠܳܝ̈ܬܳܐ ܘܩܰܕܺܝ̈ܫܳܬܳܐ. ܘܫܳܡܥܺܝܢܰܢ ܠܕܰܘܺܝܕ ܕܳܐܡܰܪ:
ܣܓܽܘܕܘ ܠܡܳܪܝܳܐ ܒܕܳܪܬܳܐ ܕܩܽܘܕܫܶܗ. ܕܳܪܬܳܐ ܕܶܝܢ ܕܩܽܘܕܫܶܗ ܐܺܝܬܶܝܗ̇܆ ܗܳܝ ܕܰܠܒܰܪ ܡܶܢ ܩܕܽܘܫܩܽܘ̈ܕܫܺܝܢ ܡܶܬܚܰܙܝܳܐ ܠܥܶܠ ܡܶܢ ܪ̈ܰܘܡܶܐ ܗܳܝ ܕܠܳܗ̇ ܡܶܬܟܰܢܫܺܝܢ ܟܽܠܗܽܘܢ ܩܰܕܺܝ̈ܫܶܐ. ܘܠܳܗ̇ ܡܶܬܘܰܥ̈ܕܳܢ ܪ̈ܽܘܚܳܬܳܐ ܕܙܰܕܺܝ̈ܩܶܐ ܒܥܳܠܡܳܐ ܚܰܕܬܳܐ. ܘܟܽܠ ܕܰܛܥܺܝܢ ܠܰܡܩܰܪܳܒܽܘ ܢܶܩ̈ܒܳܬܳܐ ܠܒܰܪ ܡܶܢ ܬܰܪܥܳܐ ܡܶܫܬܒܶܩ. ܥܰܡ ܗܳܠܶܝܢ ܒܬܽܘ̈ܠܳܬܳܐ ܕܠܳܐ ܢܣܰܒ̈ܝ ܡܶܫܚܳܐ ܒܠܰܡܦܺܐܝ̈ܕܰܝܗܶܝܢ. ܘܰܕܗܳܠܶܝܢ ܐܺܝܬܶܝܗ̇ ܪܺܝܫܽܘܬ ܩܝܳܡܬܳܐ ܕܰܐܝܠܶܝܢ ܕܰܒܢܱ̈ܝ ܕܶܟܪ̈ܶܐ ܡܩܰܪܒܺܝܢ ܠܡܳܪܝܳܐ. ܘܡܶܢ ܒܳܬܰܪ ܕܶܝܢ ܕܰܡܩܰܒܶܠ ܒܕܳܪ̈ܳܬܶܗ ܩܰܕܺܝ̈ܫܳܬܳܐ ܒܰܗܕܺܝܪܽܘܬܳܐ ܕܡܰܠܐܟܷ̈ܐ. ܠܟܽܠܗܽܘܢ ܓܡܺܝܪ̈ܶܐ ܘܡܰܫܪܶܐ ܠܗܽܘܢ ܒܒܽܘ̈ܣܳܡܶܐ. ܢܶܦܽܘܩ ܢܶܫܡܰܥ ܩܳܠܶܗ ܕܡܳܪܝܳܐ. ܟܰܕ ܡܶܬܺܝܗܶܒ ܒܪ̈ܰܥܡܶܐ ܕܠܳܐ ܡܶܫܟܰܚ ܟܝܳܢܳܐ ܐܢܳܫܳܝܳܐ ܕܰܢܣܰܝܒܰܪ ܕܶܚܠܬܳܐ ܕܩܳܠܰܝ̈ܗܽܘܢ. ܘܗܳܕܶܐ ܡܶܛܠ ܡܢܳܬܳܐ ܐܚܪܺܬܳܐ ܕܰܐܝܠܶܝܢ ܕܠܳܐ ܥܕܰܟܺܝܠ ܫܩܰܠܘ ܦܽܘܪ̈ܥܳܢܰܝܗܽܘܢ. ܘܗܳܝܕܶܝܢ ܡܦܰܪܶܫ ܠܙܰܕܺܝ̈ܩܶܐ ܡܶܢ ܚܰܛܳܝܷ̈ܐ ܐܰܝܟ ܕܰܦܩܰܕ ܡܶܢ ܪܺܝܫܺܝܬܳܐ. ܘܰܗܘܳܐ ܪܩܺܝܥܳܐ ܡܶܨܥܰܬ ܡܰܝܴ̈ܐ. ܘܰܦܪܰܫ ܒܶܝܬ ܡܰܝܴ̈ܐ ܥܶܠܳܝܷ̈ܐ ܠܬܰܚ̈ܬܳܝܶܐ. ܡܶܛܽܠ ܗܳܕܶܐ ܓܶܝܪ ܡܶܬܦܰܪܫܳܢܽܘܬܳܐ ܕܠܳܐ ܐܳܬܝܳܐ ܠܚܽܘܠܛܳܢܳܐ ܐܶܡܰܪ ܡܙܰܡܪܳܢܳܐ:
ܩܳܠܶܗ ܕܡܳܪܝܳܐ ܥܰܠ ܡܰܝܴ̈ܐ. ܐܰܠܳܗܳܐ ܡܫܰܒܚܳܐ ܪܥܶܡ: ܡܳܪܝܳܐ ܥܰܠ ܡܰܝܴ̈ܐ ܣܰܓܺܝ̈ܐܷܐ. ܡܰܝܴ̈ܐ ܩܰܕܡܳܝܷ̈ܐ ܘܡܰܝܴ̈ܐ ܣܰܓܝ̈ܐܶܐ ܠܰܟܢܽܘ̈ܫܝܶܐ ܕܠܳܐ ܡܶܬܟܰܢܫܺܝܢ ܘܠܳܐ ܡܶܬܡܢܶܝܢ ܗܳܠܶܝܢ ܕܒܰܕܡܽܘܬ ܝܰܡ̈ܡܶܐ ܡܶܫܬܰܓܫܺܝܢ ܒܩܴ̈ܠܶܐ ܡܙܺܝ̈ܥܳܢܶܐ ܡܰܢ ܕܕܶܚܠܬܳܐ. ܕܝܳܗܶܒ ܐܰܠܳܗܳܐ ܥܠܰܝܗܽܘܢ ܩܴ̈ܠܶܐ ܕܚܺܝ̈ܠܶܐ ܘܰܡܦܰܪܶܫ ܠܗܽܘܢ ܡܶܢ ܚ̈ܕܳܕܶܐ. ܐܰܝܟ ܕܶܐܡܰܪ ܒܪܺܝܫܺܝܬ: ܢܶܗܘܶܐ ܪܩܺܝܥܳܐ. ܘܢܶܦܪܽܘܫ ܒܶܝܬ ܡܰܝܴ̈ܐ ܕܰܠܥܶܠ ܡܶܢ ܪܩܺܝܥܳܐ ܘܰܠܡܰܝܴ̈ܐ ܕܰܠܬܰܚܬ (ܒܪܝܬܐ ܐ: ܘ-ܙ). ܡܳܕܶܝܢ ܟܰܕ ܐܰܟܙܢܳܐ ܟܢܺܝܫܺܝܢ ܗܘܰܘ ܡܰܝܴ̈ܐ. ܠܚܽܘܠܛܳܢܳܐ ܕܥܰܘܴ̈ܠܶܐ ܡܚܰܘܶܝܢ ܗܘܰܘ. ܟܰܕ ܕܶܝܢ ܗܘܳܐ ܪܩܺܝܥܳܐ ܡܶܨܥܳܝܳܐ ܒܶܝܬ ܡܰܝܴ̈ܐ ܠܡܰܝܴ̈ܐ. ܚܰܝܠܳܐ ܕܰܐܠܳܗܳܐ ܐܶܚܰܕ ܗܘܳܐ ܬܚܽܘܡܳܐ ܕܩܳܡ ܡܶܨܥܳܝܳܐ. ܕܠܳܐ ܢܶܬܚܰܒܟܽܘܢ ܡܰܝܴ̈ܐ ܒܡܰܝܴ̈ܐ. ܫܰܦܺܝܪ ܡܳܕܶܝܢ ܐܶܡܰܪ ܕܰܘܺܝܕ:
ܩܳܠܶܗ ܕܡܳܪܝܳܐ ܒܚܰܝܠܳܐ ܩܳܠܶܗ ܕܡܳܪܝܳܐ ܒܫܽܘܒܚܳܐ. ܕܰܒܫܽܘܒܚܳܐ ܕܠܳܐ ܡܶܬܡܰܠܰܠ܆ ܡܰܫܪܶܐ ܠܗܽܘܢ ܓܶܝܪ ܠܩܰܕܺܝ̈ܫܶܐ ܒܰܓܢܽܘܢܳܐ ܕܡܰܠܟܽܘܬܶܗ ܘܡܶܬܦܢܶܐ ܡܶܢ ܒܳܬܰܪܟܶܢ ܕܰܢܚܰܘܶܐ ܓܙܳܡܶܗ ܥܰܠ ܡܳܪ̈ܽܘܕܶܐ. ܟܰܕ ܡܩܰܛܶܠ ܘܰܡܒܰܣܒܶܣ ܠܗܽܘܢ ܠܩܰܘ̈ܡܳܬܳܐ ܕܪ̈ܰܫܺܝܥܶܐ. ܘܫܳܛܰܚ ܘܫܳܕܶܐ ܡܶܢ ܪܰܘܡܳܐ ܡܰܫܩܠܽܘܬܗܽܘܢ ܐܰܝܟ ܡܶܠܬܶܗ ܕܰܢܒܺܝܳܐ ܕܶܐܡܰܪ:
ܩܳܠܶܗ ܕܡܳܪܝܳܐ ܕܰܡܚܰܬܶܦ ܐܰܪ̈ܙܶܐ: ܘܬܰܒܰܪ ܡܳܪܝܳܐ ܐܰܪ̈ܙܶܐ ܕܠܶܒܢܳܢ. ܗܳܪܟܳܐ ܐܰܪ̈ܙܶܐ ܠܪ̈ܺܝܫܳܢܶܐ ܕܫܺܐܕ̈ܐ ܩܳܪܶܐ ܠܗܽܘܢ. ܕܩܰܕܺܝܡܺܝܢ ܒܗܽܘܢ ܒܒܺܝܫܬܳܐ ܡܚܰܬܶܦ ܠܗܽܘܢ ܡܳܕܶܝܢ. ܗܳܢܰܘ ܦܳܣܶܩ ܒܢܳܪ̈ܓܶܐ ܕܟܺܐܢܽܘܬܳܐ. ܘܥܰܠ ܪܺܝܫܳܢܽܘܬܳܐ ܕܶܐܬܬܪܺܝܡ ܥܠܰܘܗܝ. ܡܓܰܕܶܡ ܠܗܽܘܢ ܡܶܢ ܥܽܘ̈ܦܰܝܗܽܘܢ. ܘܰܡܬܰܒܰܪ ܠܩܰܘ̈ܡܳܬܳܐ ܕܰܥܒܺܝ̈ܛܶܐ ܡܶܢ ܥܳܒܳܐ ܕܡܰܫܩܠܽܘܬܳܐ. ܠܶܒܢܳܢ ܕܶܝܢ ܠܡܳܪܽܘܕܳܐ ܩܳܪܶܐ. ܡܳܐ ܕܦܳܣܶܩ ܒܢܳܪܓܳܐ ܕܟܺܐܢܽܘܬܳܐ. ܩܰܘ̈ܡܳܬܳܐ ܕܰܐܪ̈ܙܰܘܗܝ ܘܰܓܒܱ̈ܝܳܐ ܕܫܰܪ̈ܘܰܝܢܰܘܗܝ ܘܚܶܪܒܰܬ ܒܰܝܫܳܢ ܘܟܰܪܡܠܳܐ ܡܕܺܝ̈ܢܳܬܶܗ ܟܰܗܺܝ̈ܢܳܬܳܐ. ܗܳܢܰܘ ܛܽܘܥܝܰܝ ܐܳܦ ܚܛܺܝܬܳܐ ܗܳܝܕܶܝܢ ܢܳܦܶܠ ܐܳܦ ܗܽܘ ܛܽܘܪܳܐ ܡܚܰܒܠܳܢܳܐ (ܗܳܢܰܘ ܫܠܳܡܳܐ) ܘܡܶܬܡܰܠܝܳܐ ܐܳܦ ܗܳܝ ܕܶܐܡܰܪ ܢܒܺܝܳܐ: ܘܠܶܒܢܳܢ ܒܫܽܘܒܚܳܐ ܢܳܦܶܠ (ܐܫܥܝܐ ܝ: ܠܕ). ܘܥܳܛܶܦ ܥܠܰܝܗܽܘܢ ܕܺܝܢܳܐ ܟܺܐܢܳܐ ܕܰܐܠܳܗܳܐ. ܕܢܶܫܚܽܘܩ ܘܰܢܕܰܩܶܩ ܐܶܢܽܘܢ ܒܥܽܘܙܳܐ ܕܬܰܫܢܺܝ̈ܩܶܐ. ܐܶܡܰܪ ܢܒܺܝܳܐ ܡܶܢ ܒܳܬܰܪ ܕܶܐܬܬܰܒܰܪܘ ܐܰܪ̈ܙܶܐ ܘܶܐܬܦܣܶܩܘ ܒܢܳܪ̈ܓܶܐ ܕܰܓܙܳܪܕܺܝܢܳܐ:
ܘܕܰܩܶܩ ܐܶܢܽܘܢ ܐܰܝܟ ܕܰܠܥܶܓܠܳܐ. ܐܶܠܐ ܐܳܡܰܪ ܗܰܘ ܕܫܳܡܰܥ ܠܒܰܪܬ ܩܳܠܐܴ ܗܳܕܶܐ ܕܕܰܩܶܩ ܐܶܢܽܘܢ. ܠܰܘ ܕܕܳܩ ܐܶܢܽܘܢ. ܐܶܠܳܐ ܕܡܶܫܚܰܩ ܫܳܚܶܩ ܠܗܽܘܢ ܝܰܘܡܳܐ ܕܕܺܝܢܳܐ ܠܡܳܪܽܘܕܳܐ. ܐܰܝܟ ܗܰܘ ܥܶܓܠܳܐ ܕܕܰܩܶܩ ܡܽܘܫܶܐ ܒܡܰܕܒܪܳܐ ܟܰܕ ܫܳܦܶܗ ܒܫܽܘܦܺܝܢܳܐ ܘܒܰܙܩܶܗ ܠܕܩܬܶܗ ܥܰܠ ܐܰܦܱ̈ܝ ܡܰܝܴ̈ܐ. ܘܰܐܫܩܺܝ ܠܰܒ̈ܢܰܝ ܝܣܪܳܐܝܠ. ܗܳܟܰܢܳܐ ܡܶܬܕܰܩܩܺܝܢ ܘܡܶܫܬܰܚܩܺܝܢ ܐܰܪ̈ܙܶܐ ܕܰܝ̈ܘܶܐ. ܘܰܐܝܟ ܡܶܕܶܡ ܡܶܬܝܰܕܥܳܢܳܐ ܕܠܳܐ ܡܶܬܡܰܠܰܠ܆ ܡܶܬܚܰܒܟܺܝܢ ܒܚܱ̈ܝܶܐ ܕܥܳܒ̈ܕܰܝ ܒܺܝ̈ܫܳܬܳܐ ܒܬܰܫܢܺܝܩܳܐ. ܘܰܐܟܙܢܳܐ ܕܗܳܝ ܕܶܝܢ ܠܘܳܬ ܥܰܡܳܐ ܒܡܰܕܒܪܳܐ ܫܰܡܶܫ ܡܽܘܫܶܐ܆ ܘܚܰܒܟܳܗ̇ ܠܰܚܛܺܝܬܳܐ ܒܡܰܝܴ̈ܐ. ܘܰܐܝܠܶܝܢ ܕܰܐܪܫܰܥܘ ܡܶܢܶܗ܆ ܟܰܕ ܫܳܬܶܝܢ ܠܶܗ ܒܡܰܝܴ̈ܐ ܕܶܐܫܬܚܶܩ ܒܗܽܘܢ ܢܣܺܝܒܳܐ. ܘܶܐܬܡ̈ܣܺܝ ܥܰܛܡܴ̈ܬܗܽܘܢ ܘܢܶܦܚܰܬ ܟܰܪܣܗܽܘܢ. ܘܟܰܕ ܗܳܟܰܢܳܐ ܡܶܬܕܰܩܩܳܐ ܘܡܶܫܬܰܚܩܳܐ ܚܛܺܝܬܳܐ ܒܩܴ̈ܠܐܷ ܕܟܺܐܢܽܘܬܳܐ. ܘܡܶܬܚܰܒܟܳܐ ܒܢܽܘܪܳܐ ܗܳܝ ܕܰܢܛܺܝܪܳܐ ܠܳܐܟܶܠܩܰܪܨܳܐ ܘܰܠܡܰܠܐܟܰܘ̈ܗܝ܆ ܟܺܐܢܳܐ ܗܝ ܓܶܝܪ ܕܰܐܝܟ ܕܺܐܝܬܰܘܗܝ ܐܰܠܳܗܳܐ ܒܽܘܣܳܡܳܐ ܕܩܰܕܺܝ̈ܫܶܐ ܟܰܕ ܡܶܬܚܰܠܰܛ ܒܗܽܘܢ ܘܫܳܪܶܐ ܒܗܽܘܢ. ܐܳܦ ܣܳܛܳܢܳܐ ܢܶܗܘܶܐ ܫܽܘܢܳܩܳܐ ܠܡܰܪ̈ܳܚܶܐ ܟܰܕ ܡܶܬܡܰܙܰܓ ܒܗܽܘܢ ܘܥܳܡܰܪ ܒܢܰܦ̈ܫܳܬܗܽܘܢ ܗܳܝ ܕܶܐܡܰܪ:
ܠܠܶܒܢܳܢ ܘܰܠܣܳܢܺܝܪ ܐܰܝܟ ܒܢܱ̈ܝ ܪܰܝܡܳܐ. ܠܶܗ ܟܰܕ ܠܶܗ ܠܚܰܝܠܳܐ ܩܰܢܝܳܐ ܕܡܰܘܣܶܦ ܣܳܢܺܝܪ. ܥܰܠ ܣܰܓܺܝܐܘܬܳܐ ܕܒܺܝܫܬܳܐ ܡܫܰܘܕܰܥ. ܐܶܠܳܐ ܡܳܢܳܐ ܐܳܡܰܪ ܡܶܢ ܒܳܬܰܪܟܶܢ ܥܰܠ ܕܺܝܢܳܐ.
ܩܳܠܶܗ ܕܡܳܪܝܳܐ ܕܦܳܣܶܩ ܫܰܠܗܶܒܺܝܬܳܐ ܕܢܽܘܪܳܐ. ܐܳܘ ܠܶܐܕ̈ܢܶܐ ܩܰܠܺܝ̈ܠܳܬܳܐ ܕܰܢܒܺܝܽܘܬܳܐ܆ ܘܰܠܨܰܘܬܳܐ ܪܽܘܚܳܢܳܐ ܕܚܰܙܳܝܷ̈ܐ. ܡܰܢܽܘ ܡܶܫܟܰܚ ܢܦܰܫܶܩ ܩܰܛܺܝܢܽܘܬܳܐ ܕܡܷ̈ܠܶܐ ܗܳܠܶܝܢ ܡܳܢܳܐ ܐܶܢܽܘܢ ܦܶܬܓܳܡܷ̈ܐ ܗܳܠܶܝܢ ܕܚܺܝ̈ܠܶܐ. ܐܰܝܟܰܢܳܐ ܝܳܗܶܒ ܩܳܠܳܐ ܗܰܘ ܕܠܰܝܬ ܠܶܗ ܓܽܘܫܡܳܐ. ܘܰܐܝܟܰܢܳܐ ܬܽܘܒ ܡܶܬܦܰܣܩܳܐ ܗܳܝ ܕܠܳܐ ܐܺܝܬ ܠܳܗ̇ ܪܽܘܟܳܒܳܐ. ܘܶܐܡܰܬܝ ܡܶܬܦܰܣܩܳܐ ܫܰܠܗܶܒܺܝܬܳܐܳ ܘܗܳܘܝܳܐ ܠܰܬܪܶܝܢ. ܐܶܠܳܐ ܡܳܐ ܕܰܡܦܰܠܶܓ ܠܳܗ̇ ܩܳܠܶܗ ܕܕܰܝܳܢܳܐ. ܕܰܐܝܟ ܗܳܕܶܐ ܚܰܘܺܝ ܠܛܽܘܒܳܢܳܐ ܡܽܘܫܶܐ. ܟܰܕ ܐܶܬܓܠܺܝ ܥܠܰܘܗܝ ܒܚܶܙܘܳܐ ܩܰܕܡܳܝܳܐ܆ ܕܫܰܪܝܳܐ ܗܘܳܬ ܢܽܘܪܳܐ ܒܣܰܢܝܳܐ. ܟܰܕ ܟܳܠܝܳܐ ܗܘܳܬ ܡܶܢ ܐܽܘܟܠܳܐ. ܘܰܐܝܟ ܢܽܘܪܳܐ ܕܡܶܬܓܰܘܙܠܳܐ ܗܘܳܬ ܒܣܰܘ̈ܟܰܘܗܝ ܕܣܰܢܝܳܐ. ܗܳܠܶܝܢ ܕܢܽܘܪܳܐ ܠܐ ܣܳܥܪܳܐ ܗܘܳܬ. ܬܽܘܒ ܕܶܝܢ ܩܴ̈ܠܶܐ ܕܡܶܬܡܰܠܠܺܝܢ ܥܰܠ ܬܒܰܥܬܳܐ ܕܗܰܘ ܕܰܠܩܽܘܒܠܳܐ ܡܫܰܘܕܥܳܐ ܪܽܘܚܳܐ.
ܩܳܠܶܗ ܕܡܳܪܝܳܐ ܕܰܡܙܺܝܥ ܡܰܕܒܪܳܐ: ܘܰܡܙܺܝܥ ܡܳܪܝܳܐ ܡܰܕܒܪܳܐ ܕܰܩܕܶܫ. ܩܳܠܶܗ ܕܡܳܪܝܳܐ ܕܰܡܙܺܝܥ ܐܰܝ̈ܠܳܬܳܐ ܘܰܡܥܰܩܰܪ ܥܳܒܷ̈ܐ. ܡܰܕܒܪܳܐ ܩܳܪܶܐ ܠܶܗ. ܡܶܛܽܠ ܕܺܐܝܬܰܘܗܝ ܚܰܪܒܳܐ ܘܡܶܢ ܫܰܝܢܳܐ ܘܡܶܢ ܚܽܘܒܳܐ. ܗܳܝܕܶܝܢ ܕܫܰܡܰܗ ܩܕܶܫ ܥܰܠ ܕܒܰܐܬܪܳܐ ܗܳܢܐ ܣܰܓܺܝ ܟܰܗܺܝܢܳܐ ܗܘܳܬ ܚܛܺܝܬܳܐ ܕܙܳܢܝܽܘܬܳܐ ܘܰܦܬܰܟܪܽܘܬܳܐ. ܗܳܝ ܕܳܐܦ ܥܕܰܟܺܝܠ ܠܳܐ ܫܶܩܠܰܬ ܫܽܘܠܳܡܳܐ. ܡܶܢ ܡܢܳܬܶܗ ܓܶܝܪ ܕܗܳܢܳܐ ܡܰܕܒܪܳܐ ܐܺܝܬܶܝܗ̇ ܒܰܥܠܰܒܰܟ. ܗܳܝ ܣܰܓܺܝܰܐܬ ܒܕܶܚܠܰܬ ܫܺܐܕ̈ܐ ܘܡܰܠܝܰܬ ܙܳܢܝܽܘܬܳܐ. ܐܰܝ̈ܠܳܬܳܐ ܩܳܪܶܐ ܠܰܟܢܽܘ̈ܫܳܬܳܐ ܗܳܢܶܝܢ ܕܪ̈ܽܘܚܶܐ ܒܺܝ̈ܫܳܬܳܐ. ܬܽܘܒ ܥܳܒܷ̈ܐ ܠܰܐܝܠܶܝܢ ܕܰܗܘܰܘ ܒܥܳܠܡܳܐ ܗܳܢܳܐ ܩܰܝ̈ܣܶܐ ܕܠܳܐ ܦܺܐܪ̈ܶܐ. ܕܰܐܝܟ ܗܳܟܰܢܳܐ ܐܶܢܽܘܢ ܩܰܝ̈ܣܶܐ ܕܥܳܒܳܐ. ܡܳܐ ܕܶܝܢ ܕܰܗ̈ܘܰܝ ܗܳܠܶܝܢ ܘܰܢܦܱ̈ܩܝ ܠܰܥܒܳܕܳܐ. ܗܳܝܕܶܝܢ ܫܳܪܶܝܢ ܙܰܕܺܝ̈ܩܶܐ ܒܢܰܘܚܳܐ. ܡܶܛܽܠ ܕܡܰܘܦܶܝܢ ܡܰܝܴ̈ܐ ܕܛܰܘܦܳܢܳܐ ܕܰܚܛܺܝܬܳܐ ܘܫܳܩܠܳܐ ܒܺܝܫܬܳܐ ܫܽܘܠܳܡܳܐ ܘܡܰܥܒܰܪ ܡܳܪܝܳܐ ܪܽܘܚܳܐ ܡܶܢ ܐܰܦܱ̈ܝ ܐܰܪܥܳܐ ܘܡܶܬܚܙܶܝܢ ܪ̈ܺܝܫܰܝ ܛܽܘܪ̈ܶܐ ܕܟܰܣܺܝܘ ܐܶܢܽܘܢ ܡܳܡܽܘ̈ܠܶܐ ܕܪܽܘܫܥܳܐ. ܘܢܳܦܩܺܝܢ ܩܰܕܺܝ̈ܫܶܐ ܘܰܢܝܰܬܒܽܘܢ ܐܰܪܥܳܐ ܕܡܰܠܟܽܘܬܳܐ ܐܰܝܟ ܢܽܘܚ ܒܝܰܘ̈ܡܳܬܶܗ ܕܰܢܦܰܩ ܡܶܢ ܟܶܐܘܝܠܳܐ ܘܝܬܶܒ ܐܰܪܥܳܐ. ܡܶܛܽܠ ܗܳܢܳܐ ܐܳܡܰܪ ܗܘܳܐ ܢܒܺܝܳܐ:
ܡܳܪܝܳܐ ܡܳܡܽܘܠܳܐ ܐܰܗܦܶܟ. ܘܠܳܐ ܓܶܝܪ ܕܶܐܫܬܰܬܰܩܘ ܩܴ̈ܠܶܐ ܠܙܺܝ̈ܙܰܝ ܒܺܝ̈ܫܳܬܳܐ ܘܶܐܬܒܠܶܡܘ ܦܽܘܡܳܐ ܕܡܰܪ̈ܳܚܶܐ ܒܘܳܝܷ̈ܐ ܘܰܒܒܶܟܝܳܐ. ܘܢܳܚܘ ܡܳܡܽܘ̈ܠܶܐ ܕܒܺܝܫܬܳܐ ܗܳܝܕܶܝܢ:
ܝܳܬܶܒ ܡܳܪܝܳܐ ܡܰܠܟܳܐ ܠܥܳܠܰܡ. ܘܠܳܐ ܬܽܘܒ ܡܶܬܥܰܫܰܢ ܗܰܘ ܕܰܠܩܽܘܒܠܳܐ ܕܢܶܗܘܶܐ ܡܰܠܟܳܐ ܒܡܳܪܽܘܕܽܘܬܳܐ. ܘܒܳܛܶܠ ܟܽܠ ܪܺܝܫ ܘܟܽܠ ܫܽܘܠܛܳܢ ܘܟܽܠ ܚܰܝ̈ܠܺܝܢ ܘܥܳܒܪ̈ܳܢ ܡܰܠܟ̈ܘܳܬܳܐ ܡܶܢ ܦܳܩܽܘܕܽܘܬܳܐ. ܘܡܶܬܚܰܙܝܳܐ ܚܕܳܐ ܡܰܠܟܽܘܬܳܐ ܕܰܫܪܳܪܳܐ. ܘܝܳܗܶܒ ܡܳܪܝܳܐ ܚܰܝܠܳܐ ܠܰܒ̈ܢܰܝ ܡܰܠܟܽܘܬܶܗ. ܐܰܝܟ ܕܶܐܡܰܪ ܢܒܺܝܳܐ.
ܡܳܪܝܳܐ ܢܶܬܶܠ ܚܰܝܠܳܐ ܠܥܰܡܶܗ: ܡܳܪܝܳܐ ܢܒܰܪܶܟ ܠܥܰܡܶܗ ܒܰܫܠܳܡܳܐ. ܗܳܪܟܳܐ ܠܳܐ ܐܰܕܟܰܪ ܫܡܳܐ ܕܥܰܡ̈ܡܶܐ. ܠܰܝܬ ܓܶܝܪ ܥܰܡ̈ܡܶܐ ܒܡܰܠܟܽܘܬܶܗ ܕܡܳܪܝܳܐ. ܡܶܛܽܠ ܕܚܰܕ ܗܽܘ ܥܰܡܳܐ ܘܚܰܕ ܠܶܫܳܢܳܐ ܘܚܰܕ ܗܽܘ ܡܳܪܝܳܐ ܗܰܘ ܕܝܳܬܶܒ ܒܡܰܠܟܽܘܬܶܗ ܠܥܳܠܰܡ. ܘܰܚܕܳܐ ܗܺܝ ܡܕܰܒܪܳܢܽܘܬܳܐ ܕܠܶܗ ܫܽܘܒܚܳܐ ܐܰܡܺܝܢ.
ܡܙܡܘܪܐ ܕܬܠܬܝܢ
ܥܰܠ ܕܰܒܝܰܕ ܓܶܠܝܳܢܶܗ ܕܰܐܠܳܗܳܐ ܘܰܕܝܰܠܕܶܗ ܕܡܶܢ ܒܬܽܘܠܬܳܐ: ܐܶܫܬܰܚܠܦܰܬ ܒܟܳܬܗܽܘܢ ܕܩܰܕܺܝ̈ܫܶܐ ܠܚܰܕܽܘܬܳܐ. ܐܳܦ ܥܶܒܪܰܬ ܡܶܢܗܽܘܢ ܬܰܠܒܶܫܬܳܐ ܣܰܢܝܰܬ ܓܰܘܢܳܐ ܕܰܚܒܳܠܳܐ ܘܰܠܒܶܫܘ ܠܳܐ ܡܶܬܚܰܒܠܳܢܽܘܬܳܐ: ܘܥܰܠ ܩܝܳܡܬܶܗ ܕܰܡܫܺܝܚܳܐ.
ܩܴ̈ܠܶܐ ܩܽܘ̈ܠܳܣܶܐ ܘܪܽܘܡܪ̈ܳܡܶܐ ܘܩܽܘܒܳܠܛܰܝܒܽܘܬܳܐ ܡܩܰܪܶܒ ܛܽܘܒܳܢܳܐ ܕܰܘܺܝܕ ܒܡܰܙܡܽܘܪܳܐ ܗܳܢܳܐ ܕܰܬܠܳܬܺܝܢ ܠܰܐܠܳܗܳܐ ܡܶܠܬܳܐ ܦܳܪܽܘܩܰܢ. ܗܰܘ ܕܶܐܬܡܰܟܰܟ ܘܪܰܡܪܶܡ ܫܶܦܠܰܢ: ܘܶܐܬܡܰܣܟܰܢ ܘܰܐܥܬܪܰܢ: ܘܶܐܬܢܰܚܰܬ ܘܥܰܠܝܰܢ: ܘܰܙܥܰܪ ܘܰܐܘܪܒܰܢ. ܘܫܰܦܺܝܪ ܒܡܶܢܝܳܢܳܐ ܗܳܢܳܐ ܕܰܬܠܳܬܺܝܢ ܡܚܰܘܶܐ ܥܽܘܗܕܳܢܳܐ ܗܳܢܳܐ ܐܪܳܙܳܢܳܝܳܐ ܕܰܠܒܽܘ̈ܫܶܐ ܕܠܳܐ ܡܶܬܚܰܒܠܳܢܽܘܬܳܐ. ܗܳܠܶܝܢ ܕܰܐܠܒܶܫ ܟܝܳܢܳܐ ܐܢܳܫܳܝܳܐ ܘܣܰܓܺܝ ܐܶܒ̈ܠܶܐ ܒܡܰܘܗܰܒܬܳܐ ܕܶܐܬܝܰܗܒܰܬ ܠܶܗ ܡܶܢ ܥܡܳܕܳܐ ܩܰܕܺܝܫܳܐ ܕܰܐܠܳܗܳܐ ܕܰܬܠܳܬܺܝܢ ܕܓܶܠܝܳܢܶܗ ܩܕܳܡ ܝܽܘܚܰܢܳܢ ܥܰܠ ܢܰܗܪܳܐ ܪܰܒܳܐ. ܬܽܘܒ ܘܰܫܒܺܝܚܳܐ ܡܰܘܗܰܒܬܳܐ ܗܳܕܶܐ ܕܐܪ̈ܳܙܶܐ ܕܰܒܬܶܫܒܽܘܚܬܳܐ ܕܰܬܠܳܬܺܝܢ ܡܕܰܡܶܐ ܠܳܗ̇ ܛܳܒ ܫܒܺܝܚܳܐܺܝܬ. ܘܠܳܚܡܳܐ ܠܫܰܢ̱ܬܳܐ ܕܰܬܠܳܬܺܝܢ. ܡܳܢܳܐ ܨܳܒܶܐ ܡܙܰܡܪܳܢܳܐ ܢܺܐܡܰܪ:
ܐܶܪܰܡܪܡܳܟ ܡܳܪܝܳܐ ܕܰܐܪܺܝܡܬܳܢܝ: ܘܠܳܐ ܚܰܕܺܝܬ ܒܺܝ ܠܰܒܥܶܠܕ̈ܒܳܒܰܝ. ܠܡܰܢ ܡܪܰܡܪܶܡ ܘܡܰܘܕܶܐ؟ ܠܳܐ ܓܰܠܝܳܐ ܗܝ ܕܠܰܐܠܳܗܳܐ ܡܶܠܬܳܐ. ܡܶܢ ܐܰܝܟܳܐ ܐܰܪܺܝܡܳܟ ܢܒܺܝܳܐ ܢܶܬܶܐܡܰܪ. ܗܰܘ ܓܶܝܪ ܕܶܐܡܰܪ ܡܰܦܽܘܠܬܶܗ ܗܽܘ ܡܶܫܟܰܚ ܡܶܫܬܰܥܶܐ ܬܶܫܒܽܘܚܬܳܐ ܕܰܡܩܺܝܡܳܢܳܗ̇. ܒܡܰܦܽܘܠܬܳܐ ܠܰܡ ܕܰܚܛܺܝܬܳܐ ܗܘܺܝܬ ܘܰܐܩܺܝܡܬܳܢܝ. ܘܰܒܗܰܘܬܳܐ ܛܰܒܺܝܥ ܗܘܺܝܬ ܕܚܶܫܟܳܐ ܣܰܢܝܳܐ ܘܕܰܠܺܝܬܳܢܝ. ܒܰܣܝܳܢܳܐ ܕܡܶܬܚܰܒܠܳܢܽܘܬܳܐ ܗܘܺܝܬ ܒܰܫܝܽܘܠ ܘܰܐܣܚܺܝܬܳܢܝ ܘܚܰܘܰܪܬܳܢܝ. ܘܰܐܠܒܶܫܬܳܢܝ ܠܒܽܘ̈ܫܶܐ ܢܰܗܺܝܪ̈ܶܐ ܕܠܳܐ ܡܶܬܚܰܒܠܳܢܽܘܬܳܐ. ܕܰܐܝܬܺܝܬ ܠܺܝ ܥܰܡܳܟ ܡܶܢ ܐܰܬܪܳܟ. ܒܥܽܘܡܩܳܐ ܕܥܰܘܴ̈ܠܶܐ ܣܚܺܝܦ ܗܘܺܝܬ ܘܰܐܘܫܶܛܬ ܠܺܝ ܐܺܝܕܳܟ ܘܰܐܩܺܝܡܬܳܢܝ. ܚܛܺܝܬܳܐ ܛܶܡܪܰܬ ܠܺܝ ܦܰܚܷ̈ܐ ܘܰܦܟܰܪܬܳܢܝ ܠܓܰܘ ܡܶܢ ܬܰܪ̈ܥܶܐ ܕܰܫܝܽܘܠ. ܘܰܢܚܶܬ ܗܰܘ ܕܺܐܝܬܰܘܗܝ ܒܰܟܝܳܢܶܗ ܙܰܕܺܝܩܽܘܬܳܐ. ܘܥܰܠ ܩܺܝܩܰܠܬܳܐ ܝܳܬܶܒ ܗܘܺܝܬ ܘܰܪܡܶܐ. ܘܰܐܣܶܩ ܐܰܘܬܒܰܢܝ ܥܰܡܶܗ ܒܝܰܡܺܝܢܶܗ ܕܰܐܒܳܐ ܘܡܶܢ ܫܝܽܘܠ ܐܰܣܩܰܢܝ ܘܡܶܢ ܡܰܘܬܳܐ ܐܰܥܕܝܰܢܝ. ܗܳܠܶܝܢ ܩ̈ܠܶܐ ܕܡܶܬܚܙܶܝܢ ܠܺܝ ܕܰܛܡܺܝܪܺܝܢ ܒܗܳܕܶܐ ܬܶܫܒܽܘܚܬܳܐ ܕܰܬܠܳܬܺܝܢ. ܐܶܡܰܪ ܓܶܝܪ:
ܕܠܳܐ ܚܰܕܺܝܬ ܒܺܝ ܠܰܒܥܶܠܕ̈ܒܳܒܰܝ. ܒܥܶܠܕ̈ܒܳܒܶܐ ܕܓܶܢܣܰܢ ܡܰܢ ܐܶܢܽܘܢ. ܐܶܠܳܐ ܚܶܘܝܳܐ ܩܰܕܡܳܝܳܐ. ܘܓܰܝ̈ܣܶܐ ܒܢܱ̈ܝ ܣܺܝܥܬܶܗ ܗܳܠܶܝܢ ܕܰܟܡܶܢܘ ܘܰܐܣܛܺܝܘܗܝ ܠܒܰܪܢܳܫܳܐ ܩܰܕܡܳܝܳܐ ܡܶܢ ܡܰܘܗܰܒܬܳܐ ܕܠܳܐ ܡܶܬܚܰܒܠܳܢܽܘܬܳܐ. ܕܫܰܟܶܢ ܠܶܗ ܥܳܒܽܘܕܳܐ ܒܛܰܝܒܽܘܬܳܐ ܟܰܕ ܥܰܒܕܶܗ ܘܓܰܒܠܶܗ. ܡܳܕܶܝܢ ܗܽܘ ܐܺܝܬܰܘܗܝ ܝܰܘܡܳܢܳܐ ܗܰܘ ܕܶܐܡܰܪ ܠܳܐ ܚܰܕܺܝܬ ܒܺܝ ܠܰܒܥܶܠܕ̈ܒܳܒܰܝ. ܥܕܰܡܳܐ ܠܝܰܘܡܳܐ ܕܰܥܡܳܕܶܗ ܕܡܶܠܬܳܐ ܕܰܐܦܢܺܝ ܠܶܗ ܐܶܣܛܠܳܐ ܕܠܳܐ ܡܶܬܚܰܒܠܳܢܽܘܬܳܐ ܒܓܰܘ ܡܰܝܴ̈ܐ. ܠܗܰܘ ܕܰܢܦܰܠܘ ܥܠܰܘܗܝ ܠܶܣܛܳܝܷ̈ܐ ܘܫܰܠܚܽܘܗܝ. ܘܚܰܕܽܘܬܳܐ ܘܩܽܘܬܰܩܬܳܐ ܥܒܺܝܕ ܗܘܳܐ ܠܕܰܝ̈ܘܶܐ ܒܥܶܠܕ̈ܒܳܒܰܘܗܝ. ܟܰܕ ܕܶܝܢ ܥܡܰܕ ܗܰܘ ܠܳܐ ܣܢܺܝܩܳܐ܆ ܗܶܦܟܰܬ ܚܰܕܽܘܬܳܐ ܕܰܒܥܶܠܕ̈ܒܳܒܰܘܗܝ ܕܳܐܕܳܡ ܠܟܰܪܝܽܘܬܳܐ ܘܠܳܐܣܝܽܘܬܳܐ ܕܡܶܢ ܟܽܘܪ̈ܗܳܢܶܐ ܕܰܐܥܠܰܬ ܚܛܺܝܬܳܐ. ܡܶܬܥܰܗܰܕ ܢܒܺܝܳܐ ܘܳܐܡܰܪ:
ܡܳܪܝܳܐ ܐܰܠܳܗܝ ܒܥܺܝܬ ܡܶܢܳܟ ܘܰܐܣܺܝܬܳܢܝ. ܫܡܰܥܬ ܐܰܝܟܰܢܳܐ ܩܳܪܶܐ ܠܗܰܘ ܕܶܐܬܰܐܣܺܝ ܡܳܪܝܳܐ ܐܰܠܳܗܳܐ. ܘܠܳܐ ܡܰܝܬܶܐ ܘܠܳܐ ܚܰܕ ܥܽܘܗܕܳܢܳܐ ܕܡܽܘܟܳܟܳܐ ܘܰܕܡܳܢܳܐ ܗܝ ܐܳܣܝܽܘܬܳܐ ܡܰܠܘܶܬ ܘܳܐܡܰܪ:
ܘܰܐܣܶܩܬ ܡܶܢ ܫܝܽܘܠ ܠܢܰܦܫܝ. ܡܳܢܳܐ ܗܝ ܒܰܪܬ ܩܳܠܳܐ ܗܳܕܶܐ܆ ܘܰܐܝܟܰܢܳܐ ܘܶܐܡܰܬܝ ܣܶܠܩܰܬ ܢܰܦܫܶܗ ܕܰܡܙܰܡܪܳܢܳܐ ܡܶܢ ܫܝܽܘܠ. ܕܳܡܝܳܐ ܗܳܕܶܐ ܒܳܥܶܐ ܕܢܰܘܕܰܥ܆ ܕܰܥܕܰܡܳܐ ܕܢܶܚܬܰܬ ܢܰܦܫܶܗ ܕܡܳܪܰܢ ܠܰܫܝܽܘܠ ܬܰܡܳܢ ܗܘܱ̈ܝ ܢܰܦ̈ܫܳܬܳܐ ܕܩܰܕܺܝ̈ܫܶܐ. ܟܰܕ ܕܶܝܢ ܡܫܺܝܚܳܐ ܢܚܶܬ ܠܡܰܟܪܳܙܽܘ ܒܰܫܝܽܘܠ ܠܢܰܦ̈ܫܳܬܳܐ ܕܰܚܒܰܫ ܬܰܡܳܢ ܡܰܘܬܳܐ .ܐܰܦܶܣ ܠܢܰܦ̈ܫܳܬܳܐ ܕܩܰܕܺܝ̈ܫܶܐ ܐܰܝܠܶܝܢ ܕܕܰܟܝܴ̈ܢ ܗܘܱ̈ܝ ܡܶܢ ܚܛܺܝܬܳܐ ܕܢܶܣ̈ܩܳܢ ܥܰܡܶܗ ܠܪܰܘܡܳܐ ܕܦܰܪܕܰܝܣܳܐ. ܡܶܛܽܠ ܕܡܰܠܐܟܷ̈ܐ ܕܪܽܘܓܙܳܐ ܩܳܝܡܺܝܢ ܗܘܰܘ ܒܰܐܦܰܝ̈ܗܽܘܢ ܘܬܳܟܣܺܝܢ ܠܗܶܝܢ ܕܠܳܐ ܢܶܦ̈ܩܳܢ. ܥܕܰܡܳܐ ܕܶܐܬܳܐ ܡܳܪܝܳܐ ܘܰܫܪܳܐ ܐܰܣܘܪ̈ܰܝܗܽܘܢ ܘܰܐܣܶܩ ܐܶܢܽܘܢ ܡܶܢ ܥܽܘ̈ܡܩܶܐ ܬܰܚܬܳܝܷ̈ܐ ܕܰܫܝܽܘܠ. ܘܡܶܛܽܠ ܗܳܢܳܐ ܟܰܕ ܢܚܶܬ ܡܳܪܰܢ ܠܰܫܝܽܘܠ ܘܰܫܪܳܐ ܐܶܢܶܝܢ ܠܢܰܦ̈ܫܳܬܳܐ ܘܰܐܣܶܩ ܐܶܢܶܝܢ. ܗܳܝܕܶܝܢ ܐܶܬܡܰܠܝܰܬ ܡܶܠܬܶܗ ܕܰܢܒܺܝܳܐ ܕܶܐܬܢܰܒܺܝ ܘܶܐܡܰܪ. ܠܰܐܝܠܶܝܢ ܕܒܰܐܣܽܘܪ̈ܶܐ ܕܦܽܘܩܘ ܘܠܰܐܣܺܝܪ̈ܶܐ ܕܶܐܫܬܪܰܘ ܘܠܰܚܒܺܝ̈ܫܶܐ ܕܶܐܬܓܠܰܘ (ܐܫܥܝܐ ܡܛ: ܛ). ܡܰܝܬܶܐ ܕܶܝܢ ܒܳܬܪ ܗܳܠܶܝܢ܆ ܡܶܬܡܰܨܝܳܢܽܘܬܳܐ ܕܡܶܢ ܡܰܘܬܳܐ ܬܶܢܝܳܢܳܐ܆ ܘܚܰܝܷ̈ܐ ܕܡܶܬܝܰܗܒܺܝܢ ܠܩܰܕܺܝ̈ܫܶܐ ܡܶܢ ܐܰܠܳܗܳܐ ܒܥܳܠܡܳܐ ܚܰܕܬܳܐ ܟܰܕ ܐܳܡܰܪ:
ܘܰܐܚܺܝܬܳܢܝ ܡܶܢ ܢܳܚ̈ܬܰܝ ܓܽܘܒܳܐ. ܓܽܘܒܳܐ ܕܶܝܢ ܗܳܢܳܐ ܕܶܐܡܰܪ ܕܰܘܺܝܕ܆ ܕܰܐܢܺܝܚܶܗ ܐܰܠܳܗܳܐ ܡܶܢܶܗ. ܕܶܐܡܰܪ ܗܘܳܐ ܠܘܳܬ ܐܰܠܳܗܳܐ. ܕܠܳܐ ܢܶܫܬܽܘܩ ܡܶܢܶܗ ܕܰܠܡܳܐ ܟܰܕ ܢܶܫܬܽܘܩ ܢܶܫܬܠܶܡ ܥܰܡ ܢܳܚ̈ܬܰܝ ܓܽܘܒܳܐ. ܢܳܚ̈ܬܰܝ ܓܽܘܒܳܐ ܐܺܝܬܰܝܗܽܘܢ܆ ܗܳܢܽܘܢ ܕܶܐܡܰܪ ܥܠܰܝܗܽܘܢ ܒܕܽܘܟܬܳܐ ܐܚܪܺܬܳܐ. ܢܶܬܗܰܦܟܽܘܢ ܪ̈ܰܫܺܝܥܶܐ ܠܰܫܝܽܘܠ. ܐܳܦ ܟܽܠܗܽܘܢ ܥܰܡ̈ܡܶܐ ܕܛܳܥܶܝܢ ܠܰܐܠܳܗܳܐ (ܡܙܡܘܪܐ ܛ: ܝܚ). ܡܶܛܽܠ ܕܰܦܫܺܝܩܳܐܝܬ ܨܳܒܶܐ ܕܰܢܚܰܘܶܐ ܠܗܳܝ ܕܗܳܘܝܳܐ ܒܕܺܝܢܳܐ. ܘܰܕܠܐܴ ܐܺܝܬ ܐܰܬܪܳܐ ܠܥܰܘܴ̈ܠܶܐ ܕܥܰܡ ܩܰܕܺܝ̈ܫܶܐ ܢܶܬܚܰܠܛܽܘܢ ܒܬܶܫܒܽܘܚܬܳܐ. ܐܶܠܳܐ ܙܽܘܡܳܪܳܐ ܘܚܰܕܽܘܬܳܐ ܠܰܒܢܱ̈ܝ ܓܢܽܘܢܳܐ ܡܶܬܝܰܗܒܺܝܢ. ܡܰܝܬܶܐ ܘܳܐܡܰܪ:
ܙܰܡܰܪܘ ܠܡܳܪܝܳܐ ܓܒܰܘ̈ܗܝ: ܘܰܐܘܕܰܘ ܠܕܽܘܟܪܳܢܳܐ ܕܩܽܘܕܫܶܗ. ܬܰܡܳܢ ܓܶܝܪ ܡܳܐ ܕܣܶܠܩܰܬ ܢܰܦܫܳܐ ܡܶܢ ܫܝܽܘܠ܆ ܘܦܶܠܛܰܬ ܡܶܢ ܢܳܚ̈ܬܰܝ ܓܽܘܒܳܐ ܕܰܐܒܕܳܢܳܐ܆ ܠܰܝܬ ܙܽܘܡܳܪܳܐ ܘܚܰܕܽܘܬܳܐ ܐܶܠܳܐ ܒܰܠܚܽܘܕ ܠܰܓܒܰܝܴ̈ܐ.
ܘܡܶܛܽܠ ܠܰܡ ܕܰܟܳܐܬܳܐ ܒܪܽܘܓܙܶܗ ܘܚܰܝܷ̈ܐ ܒܨܶܒܝܳܢܶܗ. ܟܡܳܐ ܠܰܡ ܐܶܢ ܡܶܣܬܒܰܪ ܕܰܪܓܺܝܙ ܟܰܕ ܟܳܐܷܐ܆ ܐܶܠܳܐ ܚܰܝ̈ܐ ܡܛܰܫܶܝܢ ܒܰܟܳܐܬܶܗ. ܘܟܽܠ ܕܗܳܪܟܳܐ ܕܳܡܶܟ ܒܰܒܟܳܬܳܐ ܕܥܰܠ ܚܛܳܗܰܘ̈ܗܝ܆ ܨܰܦܪܳܐ ܡܩܰܒܶܠ ܠܶܗ ܕܰܡܠܶܐ ܚܰܕ̈ܘܳܬܳܐ. ܠܗܽܘܢ ܒܰܠܚܽܘܕ ܦܨܺܝܚ ܨܰܦܪܶܗ ܕܢܽܘܚܳܡܳܐ. ܠܰܐܝܠܶܝܢ ܕܰܣܡܰܟܘ ܥܰܠ ܪܰܡܫܶܗ ܕܡܰܘܬܳܐ. ܟܰܕ ܐܰܒܺܝܠܺܝܢ ܘܡܶܬܬܰܢܚܺܝܢ ܥܰܠ ܒܺܝ̈ܫܳܬܗܽܘܢ. ܘܥܰܠܗܳܝ ܓܶܝܪ ܐܶܡܰܪ ܢܒܺܝܳܐ.
ܒܪܰܡܫܳܐ ܬܒܽܘܬ ܒܟܳܬܳܐ ܘܰܒܨܰܦܪܳܐ ܚܰܕܽܘܬܳܐ. ܪܰܡܫܳܐ ܓܶܝܪ ܡܫܰܡܰܗ ܠܪܶܗܛܶܗ ܕܥܳܠܡܳܐ ܗܳܢܳܐ ܕܰܚܢܰܢ ܒܶܗ܆ ܡܶܛܽܠ ܕܟܽܠ ܟܡܳܐ ܕܰܒܥܳܠܡܳܐ ܗܳܢܳܐ ܚܢܰܢ܆ ܒܪܰܡܫܳܐ ܚܢܰܢ ܘܰܒܠܺܠܝܳܐ. ܨܰܦܪܳܐ ܕܶܝܢ ܕܺܐܝܬܰܘܗܝ ܗܰܘ ܕܶܢܚܳܐ ܦܨܺܝܚܳܐ ܕܨܰܦܪܳܐ ܕܢܽܘܚܳܡܳܐ. ܗܰܘ ܕܡܳܐ ܕܰܕܢܰܚ܇ ܠܳܐ ܬܽܘܒ ܦܳܓܰܥ ܒܶܗ ܪܰܡܫܳܐ ܕܫܽܘܠܳܡܳܐ ܐܶܠܳܐ ܒܺܐܝܡܳܡܳܐ ܡܟܰܬܪܺܝܢ ܩܰܕܺܝ̈ܫܶܐ. ܘܠܳܐ ܗܘܳܐ ܐܰܬܪܳܐ ܠܚܶܫܽܘܟܳܐ ܥܠܰܝܗܽܘܢ. ܡܶܛܽܠ ܕܬܰܡܳܢ ܡܩܰܒܠܺܝܢ ܚܰܕܽܘܬܶܗ ܕܢܽܘܚܳܡܳܐ. ܗܰܘ ܕܶܐܡܰܪ ܢܒܺܝܳܐ ܘܡܶܬܦܢܶܐ ܒܳܬܰܪ ܦܽܘ̈ܫܳܩܶܐ ܡܥܰܠܰܝܴ̈ܐ ܘܒܳܬܰܪ ܗܳܠܶܝܢ ܓܶܠܝ̈ܢܶܐ ܢܰܗܺܝܪ̈ܶܐ. ܕܢܰܟܶܣ ܠܬܰܪ̈ܥܝܳܬܳܐ ܕܗܳܢܽܘܢ ܕܟܰܗܺܝܢܺܝܢ ܒܥܳܠܡܳܐ. ܡܶܛܽܠ ܕܥܳܡܪܺܝܢ ܒܢܰܘܚܳܐ ܘܰܒܒܽܘܣܳܡܳܐ ܘܰܒܫܶܠܝܳܐ. ܘܣܳܒܪܺܝܢ ܒܢܰܦܫܗܽܘܢ ܕܠܳܐ ܡܶܬܬܙܺܝܥܺܝܢ ܠܥܳܠܰܡ ܡܶܢ ܡܰܘܬܳܐ. ܘܠܳܐ ܚܳܐܫܺܝܢ ܥܰܠ ܒܺܝ̈ܫܳܬܗܽܘܢ ܘܠܳܐ ܡܶܬܕܰܟܪܝܢ ܝܰܘܡܳܐ ܕܡܰܦܩܳܢܗܽܘܢ ܕܡܶܢ ܦܰܓܪܳܐ. ܘܠܰܘ ܐܰܝܟ ܕܠܽܘܩܒܰܠܗܽܘܢ ܡܙܺܝܥ ܡܶܠܬܶܗ ܐܶܠܳܐ ܕܗܽܘ ܡܶܬܪܰܥܶܐ ܗܳܟܰܢܳܐ ܡܶܬܢܰܒܶܐ ܘܳܐܡܰܪ:
ܐܶܢܳܐ ܐܶܡܪܶܬ ܒܫܰܠܝܽܘܬܝ ܕܠܳܐ ܐܶܙܽܘܥ ܠܥܳܠܰܡ. ܟܡܳܐ ܠܰܡ ܕܰܒܫܶܠܝܳܐ ܥܳܡܰܪ ܐܢܳܐ. ܠܳܐ ܕܳܚܶܠ ܐܢܳܐ ܡܶܢ ܙܰܘܥܳܐ. ܘܰܟܡܳܐ ܕܩܰܪܺܝܒ ܢܝܳܚܳܐ ܘܒܽܘܣܳܡܳܐ ܠܳܐ ܡܣܰܪܶܕ ܠܺܝ ܛܶܐܒܶܗ ܕܬܰܫܢܺܝܩܳܐ. ܘܰܟܡܳܐ ܕܰܒܥܽܘܬܪܳܐ ܡܶܬܦܰܪܦܰܥ ܐܢܳܐ ܠܳܐ ܕܳܚܶܠ ܐܢܳܐ ܡܶܢ ܨܪܺܝܟܽܘܬܳܐ. ܘܰܟܡܳܐ ܕܰܡܫܰܪܰܪ ܐܢܳܐ ܒܚܽܘܠܡܳܢܳܐ܆ ܠܳܐ ܡܶܬܪܗܶܒ ܐܢܳܐ ܡܶܢ ܟܽܘܪ̈ܗܳܢܶܐ. ܘܰܟܡܳܐ ܕܰܒܚ̈ܝܶܐ ܗܳܠܶܝܢ ܥܳܒܽܘܪ̈ܶܐ ܚܳܐܰܪ ܐܢܳܐ܆ ܕܠܰܝܬ ܒܗܽܘܢ ܢܶܟܝܳܢܳܐ܆ ܠܳܐ ܩܳܢܶܛ ܐܢܳܐ ܘܙܳܐܰܥ ܐܢܳܐ ܡܶܢ ܡܰܘܬܳܐ. ܗܳܠܶܝܢ ܪ̈ܶܥܝܳܢܶܐ ܡܦܰܫܶܩ ܗܘܳܐ ܕܰܘܺܝܕ ܐܰܠܳܗܳܝܳܐ ܕܳܐܡܪܺܝܢ ܗܘܰܘ ܕܰܐܣܺܝܪܺܝܢ ܒܚܰܝܷ̈ܐ ܥܳܒܽܘܪ̈ܶܐ. ܘܥܰܠ ܕܠܳܐ ܡܶܬܕܰܟܪܺܝܢ ܝܰܘܡܳܐ. ܕܡܰܦܛܰܪ ܠܗܽܘܢ ܡܶܢ ܥܳܠܡܳܐ ܗܳܢܳܐ. ܘܫܳܪܶܐ ܘܫܳܩܶܠ ܡܶܢܗܽܘܢ ܥܽܘܬܪܗܽܘܢ ܘܰܢܝܳܚܷ̈ܐ ܕܰܒܗܽܘܢ ܘܠܳܐ ܡܶܫܬܘܶܝܢ ܠܚܰܕܽܘܬܶܗ ܕܗܰܘ ܨܰܦܪܳܐ ܦܨܺܝܚܳܐ ܕܢܽܘܚܳܡܳܐ. ܡܶܛܠܗܳܢܳܐ ܗܽܘ ܢܒܺܝܳܐ ܡܰܘܕܶܐ ܚܠܳܦܰܝܗܽܘܢ ܘܳܐܡܰܪ:
ܐܰܠܳܗܳܐ ܒܨܶܒܝܳܢܳܟ ܐܰܩܺܝܡܬ ܥܰܠ ܫܽܘܒܚܝ ܚܰܝܠܳܐ. ܐܰܢܬ ܠܰܡ ܝܰܗܒܬ ܠܺܝ ܥܽܘܬܪܳܐ ܗܳܢܳܐ ܠܒܽܘܣܳܡܳܐ ܕܢܰܦܫܝ. ܘܰܐܩܺܝܡܬ ܥܠܰܘܗܝ ܚܰܝܠܳܐ. ܕܰܡܫܰܪܪܳܐ ܢܶܗܘܶܐ ܠܺܝ ܒܽܘܣܳܡܳܐ. ܐܳܡܪܺܝܢ ܓܶܝܪ ܐܰܝܠܶܝܢ ܕܡܶܬܒܰܣܡܺܝܢ ܒܚܰܝܷ̈ܐ ܕܰܬܢܳܢ ܕܠܳܐ ܡܰܪܢܺܝܬܳܐ ܕܕܺܝܢܳܐ ܕܰܐܠܳܗܳܐ ܠܰܡ ܝܰܗܒ ܠܰܢ ܕܢܶܬܒܰܣܰܡ ܘܰܠܗܳܠܶܝܢ ܕܰܐܠܺܝܨܺܝܢ ܬܢܳܢ ܡܶܛܽܠ ܚܽܘܒܳܐ ܕܰܐܠܳܗܳܐ. ܐܳܡܪܺܝܢ ܠܰܡ ܕܡܶܢ ܐܰܠܳܗܳܐ ܐܶܬܦܪܶܫܘ ܡܰܢ ܐܽܘܠܨ̈ܢܰܝܗܽܘܢ. ܐܶܠܳܐ ܡܳܢܳܐ ܡܰܝܬܶܐ ܢܒܺܝܳܐ ܠܘܩܒܰܠ ܗܳܠܶܝܢ ܡܳܐ ܕܳܐܬܶܝܢ ܠܕܺܝܢܳܐ ܩܕܳܡ ܐܰܠܳܗܳܐ. ܘܡܳܢܳܐ ܐܳܡܪܺܝܢ ܠܘܳܬ ܗܰܘ ܕܡܰܗܦܶܟ ܐܰܦܰܘ̈ܗܝ ܡܶܢܗܽܘܢ ܘܙܳܝܥܺܝܢ. ܗܳܫܳܐ ܐܳܦ ܒܳܥܽܘܬܳܐ ܒܳܥܶܐ ܡܶܢ ܐܰܠܳܗܳܐ ܕܠܳܐ ܢܰܗܦܶܟ ܐܰܦܰܘ̈ܗܝ ܡܶܢ ܨܠܽܘܬܶܗ. ܘܰܡܦܺܝܣ ܘܳܐܡܰܪ:
ܩܪܺܝܬܳܟ ܡܳܪܝܳܐ ܘܡܶܢܳܟ ܡܳܪܝ ܒܥܺܝܬ: ܡܳܢܳܐ ܝܽܘܬܪܳܢܳܐ ܐܺܝܬ ܒܕܶܡܝ ܕܶܐܚܽܘܬ ܠܰܚܒܳܠܳܐ. ܠܳܐ ܡܰܘܕܶܐ ܠܳܟ ܥܰܦܪܳܐ ܘܠܳܐ ܡܚܰܘܶܐ ܗܰܝܡܳܢܽܘܬܳܟ. ܡܶܢ ܡܺܝ̈ܬܶܐ ܠܰܡ ܠܳܐ ܡܶܕܶܡ ܗܳܘܶܐ ܠܳܟ ܗܶܢܝܳܢܳܐ. ܒܥܰܦܪܳܐ ܠܳܐ ܫܟܺܝܚܳܐ ܬܰܘܕܺܝܬܳܐ. ܘܠܳܐ ܗܰܝܡܳܢܽܘܬܳܐ ܡܶܬܚܰܙܝܳܐ ܡܶܢ ܐܰܒܕܳܢܳܐ. ܗܳܠܶܝܢ ܓܶܝܪ ܐܶܡܰܪ. ܡܶܢ ܒܳܬܰܪ ܕܰܚܙܳܐ ܕܰܐܗܦܶܟ ܐܰܠܳܗܳܐ ܐܰܦܰܘ̈ܗܝ ܒܕܺܝܢܳܐ ܡܶܢ ܓܰܒܳܐ ܕܡܰܪ̈ܳܚܶܐ. ܘܥܰܠܗܳܕܶܐ ܡܶܬܟܰܫܰܦ ܗܘܳܐ ܕܠܳܐ ܢܶܬܚܰܝܰܒ ܐܳܦ ܗܽܘ ܠܰܐܒܕܳܢܳܐ. ܘܠܳܐ ܢܶܬܛܡܰܪ ܬܶܢܝܳܢܽܘܬ ܒܡܰܘܬܳܐ ܕܰܦܣܳܩ ܣܰܒܪܳܐ. ܒܳܥܽܘܬܳܐ ܡܩܰܪܶܒ ܗܘܳܐ ܟܰܕ ܐܳܡܰܪ:
ܫܡܰܥ ܐܰܠܳܗܳܐ ܘܪܰܚܶܡܥܠܰܝ. ܡܳܪܝܳܐ ܗܘܺܝ ܠܝ ܥܳܕܺܘܪܳܐ. ܕܠܳܐ ܥܽܘܕܪܳܢܳܐ ܕܺܝܠܳܟ ܠܰܝܬ ܠܡܶܬܦܰܨܳܝܽܘ ܡܶܢ ܢܽܘܪܳܐ ܕܬܰܫܢܺܝܩܳܐ. ܟܰܕ ܕܶܝܢ ܨܰܠܺܝ ܘܶܐܬܩܰܒܰܠ ܒܳܥܶܐ ܕܢܰܐܠܰܦ ܘܳܐܡܰܪ:
ܘܰܐܗܦܶܟܬ ܡܰܪ̈ܩܕܳܬܝ ܠܚܰܕܽܘܬܳܐ. ܐܰܝܟ ܗܰܘ ܕܠܳܐ ܥܕܰܟܺܝܠ ܗܘܳܬ ܗܳܝ ܕܰܡܦܺܝܣ ܥܠܶܝܗ̇. ܐܶܠܳܐ ܚܳܐܪ ܘܚܳܙܶܐ ܕܶܐܬܓܠܺܝ ܐܰܠܳܗܳܐ ܒܰܒܣܰܪ ܘܰܕܢܰܚ ܡܶܢ ܒܬܽܘܠܬܳܐ ܘܰܗܘܳܐ ܥܶܩܳܪܳܐ ܡܰܚܠܡܳܢܳܐ. ܘܰܐܣܺܝ ܟܺܐܒܰܘ̈ܗܝ ܕܥܳܠܡܳܐ ܟܪܺܝܗܳܐ. ܘܰܠܒܶܫ ܦܰܓܪܳܐ ܡܳܝܽܘܬܳܐ. ܒܰܛܶܠ ܒܡܶܐܬܺܝܬܶܗ ܐܶܒܠܳܐ ܕܰܐܥܠܰܬ ܚܛܺܝܬܳܐ ܘܰܐܥܒܰܪ ܚܰܓܳܐ ܕܡܰܪܩܳܕܬܳܐ ܡܶܢ ܫܰܪ̈ܒܳܬܳܐ ܕܰܐܪܥܳܐ܆ ܘܡܶܢ ܟܰܕܽܘ ܒܶܛܠܰܬ ܠܳܗ̇ ܟܰܪܝܽܘܬܳܐ ܐܶܡܰܪ:
ܐܰܗܦܶܟܬ ܡܰܪ̈ܩܕܳܬܝ ܠܚܰܕܽܘܬܳܐ. ܫܪܰܝܬ ܠܒܶܟܝܳܐ ܟܡܺܝܪܳܐ ܗܰܘ ܕܢܰܦܫܝ ܒܰܦܨܺܝܚܽܘܬܳܐ ܕܰܩܝܳܡܬܳܟ.
ܘܰܫܪܰܝܬ ܣܰܩܝ ܘܐܰܟܒܶܢܬܳܢܝ ܚܰܕܽܘܬܳܐ. ܐܰܫܠܰܚܬܳܢܝ ܟܡܺܝܪܽܘܬܳܐ ܘܰܐܠܒܶܫܬܳܢܝ ܦܨܺܝܚܽܘܬܳܐ. ܫܪܰܝܬ ܡܶܢܝ ܟܡܺܝܪܽܘܬܳܐ ܕܡܰܘܬܳܐ ܘܰܦܟܳܪ̈ܶܐ ܕܰܫܝܽܘܠ. ܡܳܢܳܐ ܐܺܝܬܰܘܗܝ ܣܰܩܳܐ ܐܶܠܳܐ ܡܶܬܚܰܒܠܳܢܽܘܬܳܐ ܓܡܺܝܪܬܳܐ ܕܰܫܪܶܟ ܠܳܗ̇ ܟܝܳܢܳܐ ܐܢܳܫܳܝܳܐ. ܠܗܳܢܳܐ ܣܰܩܳܐ ܟܡܺܝܪ ܒܰܚܙܳܬܶܗ. ܟܒܺܝܢ ܗܘܳܐ ܗܰܘ ܪܺܝܫ ܓܶܢܣܰܢ ܥܰܠ ܨܰܠܡܶܗ ܫܦܺܝܪܳܐ. ܐܰܝܟ ܝܰܥܩܽܘܒ ܕܰܠܒܺܝܫ ܗܘܳܐ ܣܰܩܳܐ ܥܰܠ ܦܰܓܪܶܗ ܡܶܛܽܠ ܐܶܒܠܳܐ ܟܡܺܝܪܳܐ ܕܝܰܘܣܶܦ ܒܪܶܗ. ܒܗܳܝ ܕܰܡܟܰܣܶܝܢ ܗܘܰܘ ܟܽܠܗܽܘܢ ܩܰܕܺܝ̈ܫܶܐ ܥܛܳܦܬܳܐ ܕܡܶܬܚܰܒܠܳܢܽܘܬܳܐ. ܟܰܕ ܕܶܝܢ ܐܶܬܳܐ ܡܳܪܗܽܘܢ ܐܶܬܟܰܣܺܝ ܠܒܽܘܫܳܐ ܡܶܬܚܰܒܠܳܢܳܐ ܡܶܢ ܟܝܳܢܗܽܘܢ. ܗܳܝܕܶܝܢ ܫܪܳܐ ܚܒܳܠܶܗ ܕܡܰܘܬܳܐ ܡܶܢܗܽܘܢ ܒܠܳܐ ܡܶܬܚܰܒܠܳܢܽܘܬܶܗ. ܟܰܕ ܚܳܐܰܪ ܗܘܳܐ ܕܰܘܺܝܕ ܗܰܘ ܪܰܒܳܐ ܒܠܳܐ ܡܶܬܚܰܒܠܳܢܽܘܬܳܐ ܕܦܰܓܪܳܐ ܕܰܡܫܺܝܚܳܐ ܩܰܕܺܝܫ ܒܟܽܠ ܗܘܳܐ ܠܶܗ ܠܰܟܝܳܢܳܐ ܡܶܬܚܰܒܠܳܢܳܐ ܪܺܝܫܺܝܬܳܐ ܕܢܶܪܗܰܛ ܨܶܝܕ ܠܳܐ ܡܶܬܚܰܒܠܳܢܽܘܬܳܐ. ܡܶܛܽܠ ܕܚܰܝܕܶܗ ܠܶܗ ܩܢܽܘܡܳܐܺܝܬ܆ ܘܰܐܥܒܰܪ ܒܶܗ ܢܽܘܪܳܢܳܝܽܘܬܳܐ ܕܚܰܝܷ̈ܐ ܠܳܐ ܡܳܝܽܘ̈ܬܶܐ ܕܺܝܠܶܗ. ܘܰܢܒܺܝܳܐ ܩܳܥܶܐ ܗܘܳܐ ܘܳܐܡܰܪ ܫܪܰܝܬ ܣܰܩܝ ܡܶܬܚܰܒܠܳܢܳܐ ܘܰܐܠܒܶܫܬܳܢܝ ܚܰܕܽܘܬܳܐ ܠܳܐ ܡܶܬܚܰܒܠܳܢܺܝܬܳܐ. ܣܒܰܪܬܳܐ ܕܰܩܝܳܡܬܳܟ.
ܡܶܛܽܠܗܳܢܳܐ ܐܶܙܰܡܰܪ ܠܳܟ ܫܽܘܒܚܳܐ ܘܠܳܐ ܐܶܫܬܽܘܩ. ܡܳܪܝܳܐ ܐܰܠܳܗܝ ܠܥܳܠܰܡ ܐܰܘܕܶܐ ܠܳܟ. ܫܰܦܺܝܪ ܒܗܰܝܡܳܢܽܘܬܳܐ ܫܰܪܺܝ ܘܫܰܠܶܡ. ܐܰܝܟ ܕܰܩܪܳܝܗܝ ܠܗܰܘ ܕܰܐܣܺܝ ܡܳܪܝܳܐ ܐܰܠܳܗܶܗ. ܗܳܟܰܢܳܐ ܗܳܪܟܳܐ ܟܰܕ ܫܪܳܐ ܡܶܢܶܗ ܣܰܩܳܐ ܕܰܟܡܺܝܪܽܘܬܳܐ. ܡܰܘܕܶܐ ܠܶܗ ܡܳܪܝܳܐ ܐܰܠܳܗܶܗ. ܗܰܘ ܕܶܐܬܓܠܺܝ ܘܰܦܪܰܩ ܠܰܢ. ܘܗܽܘ ܬܽܘܒ ܡܶܬܚܙܶܐ ܘܰܡܚܰܕܶܬ ܚܒܳܠܰܢ ܠܠܳܐ ܡܶܬܚܰܒܠܳܢܽܘܬܳܐ. ܕܠܶܗ ܫܽܘܒܚܳܐ ܠܥܳܠܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܠܬܝܢ ܘܚܕ
ܥܰܠ ܡܣܰܝܒܪܳܢܽܘܬܶܗ ܕܕܰܘܺܝܕ: ܘܥܰܠ ܕܒܽܐܘܠܨܳܢܳܐ ܥܳܐܶܠ ܐܢܳܫ ܠܡܰܠܟܽܘܬܳܐ ܕܰܫܡܰܝܳܐ.
ܣܰܒܪܳܐ ܕܩܰܕܝ̈ܫܶܐ ܒܗܳܕܶܐ ܡܝܰܩܰܪ ܠܘܳܬ ܐܰܠܳܗܳܐ܆ ܡܶܛܽܠ ܕܒܽܐܘܠܨܳܢܷ̈ܐ ܩܳܢܶܝܢ ܗܘܰܘ ܠܶܗ. ܘܟܰܕ ܡܶܕܶܡ ܡܶܬܚܰܙܝܴ̈ܢܶܐ ܠܥܰܝ̈ܢܶܐ ܕܦܰܓܪܳܐ ܠܳܐ ܡܓܰܪܶܓ ܗܘܳܐ ܐܰܝܟ ܗܰܘ ܕܒܶܗ ܒܣܰܒܪܳܐ ܡܶܬܒܰܩܶܝܢ ܗܘܰܘ ܒܥܰܝܢܳܐ ܕܢܰܦܫܳܐ ܘܰܡܣܰܝܒܪܺܝܢ ܗܘܰܘ ܐܰܓܽܘ̈ܢܶܐ ܥܰܠ ܣܰܒܪܳܐ܆ ܘܒܽܐܘ̈ܠܨܳܢܶܐ ܡܕܰܪܫܺܝܢ ܗܘܰܘ ܢܰܦ̈ܫܳܬܗܽܘܢ܆ ܐܰܝܟ ܡܶܠܬܶܗ ܕܦܰܘܠܽܘܣ ܐܰܠܳܗܳܝܳܐ܆ ܕܣܰܒܪܳܐ ܕܡܶܬܚܙܶܐ ܠܐ ܗܘܳܐ ܣܰܒܪܰܐ ܗ̄ܘ܆ ܐܶܢܕܶܝܢ ܚܳܙܶܝܢܰܢ ܠܶܗ ܡܳܢܳܐ ܡܣܰܟܶܝܢܰܢ ܠܶܗ (ܪ̈ܗܘܡܝܐ ܚ: ܟܕ). ܘܬܽܘܒ ܐܶܡܰܪ: ܒܽܐܘ̈ܠܨܳܢܰܝܢ ܡܶܫܬܰܒܗܪܝܢܰܢ ܕܝܳܕܥܺܝܢܰܢ ܕܽܐܘܠܨܳܢܳܐ ܡܣܰܝܒܪܳܢܽܘܬܳܐ ܓܳܡܰܪ ܒܰܢ. ܘܰܡܣܰܝܒܪܳܢܽܘܬܳܐ ܒܽܘܩܝܳܐ. ܘܒܽܘܩܝܳܐ ܣܰܒܪܳܐ. ܣܰܒܪܳܐ ܕܶܝܢ ܠܐ ܡܰܒܗܶܬ (ܪ̈ܗܘܡܝܐ ܗ: ܓ-ܕ). ܚܰܝܠܳܐ ܕܗܳܠܶܝܢ ܩܴ̈ܠܐ ܡܰܙܥܶܩ ܗܘܳܐ ܒܦܽܘܡܶܗ ܕܛܽܘܒܳܢܳܐ ܕܰܘܺܝܕ. ܟܰܕ ܡܣܰܝܒܰܪ ܗܘܳܐ ܒܺܝ̈ܫܳܬܳܐ ܕܡܶܬܥ̈ܬܕܳܢ ܗܘܱ̈ܝ ܥܠܰܘܗܝ ܕܠܐ ܣܰܟܠܽܘܬܳܐ ܡܶܢ ܫܳܐܘܳܠ. ܡܶܛܠܗܳܢܳܐ ܟܰܕ ܡܣܰܝܒܰܪ ܘܛܳܥܶܢ ܗܘܳܐ ܟܺܐܒܷ̈ܐ ܕܰܪܕܽܘܦܝܳܐ܆ ܐܰܝܟܰܢܳܐ ܕܳܐܦܠܐܴ ܒܰܐܪܥܳܐ ܕܺܝܣܪܳܐܷܝܠ ܫܰܒܩܽܘܗܝ. ܐܶܠܐ ܠܰܐܪܥܳܐ ܕܰܦܠܶܫܬܳܝܷ̈ܐ ܥܪܰܩ ܘܫܰܢܺܝ. ܘܬܰܡܳܢ ܙܰܡܰܪ ܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܰܚܕܳܐ. ܡܶܛܽܠ ܕܒܽܐܘܠܨܳܢܳܐ ܪܰܒܳܐ ܗܘܳܐ. ܠܣܰܓܝ̈ܐܳܬܳܐ ܡܶܢ ܒܺܝ̈ܫܳܬܳܐ ܕܰܣܒܰܠ ܒܰܪܕܽܘܦܝܶܗ ܡܶܬܥܰܗܰܕ ܒܳܗ̇܆ ܘܡܶܢ ܣܰܒܪܳܐ ܕܒܰܐܠܳܗܳܐ ܡܫܰܪܶܐ ܘܳܐܡܰܪ:
ܒܳܟ ܡܳܪܝܳܐ ܣܰܒܪܶܬ ܠܐ ܐܶܒܗܰܬ ܠܥܳܠܰܡ. ܘܰܒܙܰܕܺܝܩܽܘܬܳܟ ܦܰܠܶܛܰܝܢܝ: ܨܠܺܝ ܠܘܳܬܝ ܐܶܕܢܳܟ ܘܒܰܥܓܰܠ ܥܢܺܝܢܝ. ܗܘܺܝ ܠܺܝ ܐܰܠܳܗܳܐ ܡܥܰܕܪܳܢܳܐ ܘܒܶܝܬ ܓܰܘܣܳܐ ܘܰܦܪܽܘܩܰܝܢܝ: ܡܶܛܠ ܕܥܽܘܫܢܝ ܘܒܶܝܬ ܓܰܘܣܝ ܐܰܢܬܽ ܗܘ. ܚܙܺܝ ܐܰܝܟܰܢܳܐ ܡܶܬܓܰܘܰܣ ܒܣܰܒܪܳܐ ܕܰܐܠܳܗܳܐ. ܘܡܶܢܶܗ ܫܳܐܶܠ ܗܘܳܐ ܕܢܶܬܦܰܠܰܛ. ܘܰܒܙܰܕܺܝܩܽܘܬܶܗ ܒܳܥܶܐ ܡܶܬܦܰܨܝܳܢܽܘܬܳܐ. ܘܠܶܗ ܝܳܕܰܥ ܒܶܝܬ ܓܰܘܣܳܐ ܥܰܫܺܝܢܳܐ. ܘܠܳܐ ܡܰܪܦܶܐ ܠܐܠܳܗܳܐ. ܘܟܰܕ ܛܳܒ ܐܢܳܫܰܘ̈ܗܝ ܠܘܳܬܶܗ ܗܘܰܘ ܒܗܰܘ ܙܰܒܢܳܐ܆ ܠܐ ܡܶܬܒܰܝܰܐ ܗܘܳܐ ܒܩܰܪܺܝܒܽܘܬܳܐ ܕܐܢܳܫܽܘܬܶܗ ܕܥܶܪܩܰܬ ܨܶܐܕܰܘܗܝ. ܐܶܠܐ ܒܽܘܝܳܐܳܐ ܕܰܐܠܳܗܳܐ ܒܳܥܶܐ ܗܘܳܐ ܘܳܐܡܰܪ:
ܡܶܛܽܠ ܫܡܳܟ ܡܳܪܝܳܐ ܒܰܝܰܐܱܝܢܝ: ܘܰܐܦܶܩܰܝܢܝ ܡܶܢ ܡܨܺܝܕܬܳܐ ܗܳܕܶܐ ܕܰܦܪܰܣܘ ܠܺܝ. ܡܶܛܽܠ ܕܰܐܢܬ ܗ̱ܽܘ ܡܣܰܝܥܳܢܝ ܘܠܳܟ ܐܰܛܪܶܬ ܪܽܘܚܝ. ܐܰܝܟ ܕܡܶܢ ܡܶܠܬܳܐ ܗܳܕܶܐ܆ ܒܟܽܠܗܶܝܢ ܐܽܘܪ̈ܚܳܬܳܐ ܣܳܡ ܫܳܐܘܳܠ ܟܡܻܐܢܷ̈ܐ ܐܰܝܟ ܕܰܢܨܽܘܕܺܝܘܗܝ ܠܕܰܘܺܝܕ. ܡܶܛܽܠ ܕܡܶܢ ܟܽܠ ܓܰܒܺܝ̈ܢ ܟܪܺܝܟܺܝܢ ܗܘܰܘ ܠܶܗ ܐܽܘ̈ܠܨܳܢܶܐ. ܘܰܒܟܽܠܗܶܝܢ ܗܳܠܶܝܢ ܢܳܛܰܪ ܗܘܳܐ ܐܽܘܪܚܶܗ ܘܰܡܣܰܝܒܰܪ ܐܽܘܠܨܳܢܳܐ ܕܩܳܡ ܥܠܰܘܗܝ. ܘܠܳܐ ܡܪܰܛܶܢ ܗܘܳܐ. ܡܶܛܠܗܳܕܶܐ ܡܰܘܕܶܐ ܗܘܳܐ.
ܘܰܦܪܰܩܬܳܢܝ ܡܳܪܝܳܐ ܐܰܠܳܗܳܐ ܕܩܽܘܫܬܳܐ. ܣܢܰܝܬ ܠܰܐܝܠܶܝܢ ܕܢܳܛܪܺܝܢ ܕܶܚ̈ܠܳܬܳܐ ܣܪ̈ܺܝܩܳܬܳܐ. ܘܠܐ ܠܰܡ ܟܰܕ ܥܳܡܰܪ ܐܢܳܐ ܒܰܐܪܥܳܐ ܗܳܕܶܐ ܕܰܦܠܶܫܬܳܝܷ̈ܐ ܦܳܠܚܰܝ̈ ܠܕܶܚ̈ܠܳܬܳܐ ܣܪ̈ܺܝܩܳܬܳܐ. ܠܰܘ ܒܚܽܘܒܳܐ ܕܰܥܒܳܕܰܝ̈ܗܽܘܢ ܥܳܡܰܪ ܐܢܳܐ ܒܰܐܬܪܗܽܘܢ. ܘܰܟܡܳܐ ܕܰܡܛܰܫܰܝ ܐܢܳܐ ܒܰܬܚܽܘ̈ܡܰܝܗܽܘܢ܆ ܡܰܘܕܶܐ ܐܢܳܐ ܕܣܳܢܶܐ ܐܢܳܐ ܥܒܳܕܰܝ̈ܗܽܘܢ. ܘܒܳܟ ܡܣܰܒܰܪ ܐܢܳܐ ܕܰܐܢܬ ܗ̱ܽܘ ܐܠܰܗܝ ܒܰܫܪܳܪܳܐ.
ܐܶܕܽܘܨ ܘܶܐܚܕܶܐ ܒܛܰܝܒܽܘܬܳܟ: ܕܰܚܙܰܝܬ ܡܽܘܟܳܟܝ ܘܺܝܕܰܥܬ ܒܽܐܘܠܨܳܢܳܗ̇ ܕܢܰܦܫܝ. ܘܠܐ ܐܰܫܠܶܡܬܳܢܝ ܒܺܐܝܕܳܐ ܕܰܒܥܶܠܕ̈ܒܳܒܰܝ. ܟܡܳܐ ܝܺܕܺܝܥܺܝܢ ܩܴ̈ܠܐ ܗܳܠܶܝܢ. ܕܡܶܢ ܢܰܦܫܳܐ ܕܡܰܠܝܳܐ ܚܱ̈ܫܶܐ ܘܙܳܪܒܺܝܢ ܠܳܗ̇ ܐܽܘ̈ܠܨܳܢܶܐ ܐܰܡܺܝܪܺܝܢ. ܚܙܰܝܬ ܠܰܡ ܡܽܘܟܳܟܝ ܘܺܝܕܰܥܬ ܒܽܐܘܠܨܳܢܳܗ̇ ܕܢܰܦܫܝ. ܚܙܺܝ ܐܰܝܟܰܢܳܐ ܩܰܫܝܳܐܝܺܬ ܡܒܰܓܶܢ. ܛܳܒܬܳܐ ܪܰܒܬܳܐ ܡܳܪܝ ܥܒܰܕܬ ܒܺܝ ܕܺܐܝܕܳܐ ܕܰܒܥܶܠܕ̈ܒܳܒܰܝ ܠܐ ܐܶܫܬܰܠܛܰܬ ܥܠܰܝ. ܐܶܡܰܪ ܓܶܝܪ:
ܕܰܐܩܺܝܡܬ ܒܰܪܘܰܚܬܳܐ ܪ̈ܶܓܠܰܝ. ܪܘܰܚܬܳܐ ܗܳܪܟܳܐ ܩܳܪܶܐ ܠܗܳܝ ܡܰܢ ܕܶܐܬܦܰܨܺܝ ܡܶܢ ܫܳܐܘܳܠ ܟܰܕ ܐܳܡܰܪ:
ܪܰܚܶܡܥܠܰܝ ܡܳܪܝܳܐ ܡܶܛܽܠ ܕܥܳܩܰܬ ܠܺܝ: ܘܶܐܬܕܰܠܚܰܬ ܥܰܝܢܝ ܒܪܽܘܓܙܳܐ ܢܰܦܫܝ ܘܟܰܪܣܝ. ܡܶܛܽܠ ܕܰܓܡܰܪܘ ܚܰܝܱ̈ܝ ܒܕܽܘܘܳܢܳܐ: ܘܰܫܢܱ̈ܝ ܒܬܶܢܚܴ̈ܬܳܐ. ܐܶܬܟܪܰܗ ܚܰܝܠܝ ܒܡܶܣܟܺܢܽܘܬܳܐ: ܘܐܶܬܕܰܠܰܚܘ ܓܰܪ̈ܡܰܝ ܡܶܢ ܟܽܠܗܽܘܢ ܒܥܶܠܕ̈ܒܳܒܰܝ. ܘܰܗܘܺܝܬ ܚܶܣܕܳܐ ܠܰܫܒܴ̈ܒܰܝ. ܗܳܠܶܝܢ ܐܳܡܰܪ ܗܘܳܐ ܕܰܘܺܝܕ. ܥܰܠ ܕܰܛܪܺܝܕ ܗܘܳܐ ܡܶܢ ܡܰܠܟܽܘܬܳܐ ܕܺܝܣܪܳܐܷܝܠ. ܘܥܰܠ ܕܪܰܚܺܝܩ ܗܘܳܐ ܡܶܢ ܥܶܢܝܳܢܳܐ ܕܰܢܒܺܝܷ̈ܐ ܩܰܕܺܝ̈ܫܶܐ ܕܺܐܝܬ ܗܘܳܐ ܒܗܰܘ ܥܰܡܳܐ ܩܰܕܺܝܫܳܐ. ܚܢܰܢ ܕܶܝܢ ܒܬܶܐܘܳܪܺܝܰܐ ܪܽܘܚܳܢܳܝܬܳܐ ܚܳܝܪܺܝܢܰܢ ܒܗܶܝܢ. ܡܶܛܽܠ ܓܶܢܣܳܐ ܐܢܳܫܳܝܳܐ ܕܰܗܘܳܬ ܠܶܗ ܡܶܬܪܰܚܩܳܢܽܘܬܳܐ ܕܡܶܢ ܐܰܠܳܗܳܐ ܢܶܣܰܒ ܐܶܢܶܝܢ. ܐܰܝܕܳܐ ܥܳܩܬܳܐ ܕܪܰܒܳܐ ܡܶܢ ܗܳܕܶܐ. ܕܐܢܳܫ ܢܶܦܽܘܩ ܡܶܢ ܦܰܪܕܰܝܣܳܐ ܕܒܽܘ̈ܣܳܡܶܐ ܘܢܶܫܬܰܦܰܠ ܒܰܐܪܥܳܐ ܕܟܽܘ̈ܒܶܐ. ܠܐ ܠܳܚܶܡ ܟܺܐܢܳܐܝܺܬ ܩܳܠܳܐ ܗܳܢܳܐ ܠܪܺܝܫ ܓܶܢܣܰܢ ܘܰܠܟܽܠܗܽܘܢ ܩܰܕܺܝ̈ܫܶܐ ܕܰܗܘܰܘ ܡܶܢ ܙܰܪܥܶܗ. ܘܡܳܐ ܕܚܳܙܶܝܢ ܗܘܰܘ ܫܽܘܩܳܦܗܽܘܢ ܕܒܰܐܪܥܳܐ ܕܠܰܘ̈ܛܳܬܳܐ ܕܒܺܐܝ̈ܕܰܝ ܫܺܐܕܳܐ ܒܥܶܠܕܒܳܒܳܐ܇ ܕܒܺܐܝ̈ܕܰܘܗܝ ܐܶܬܡܰܝܰܩܢܰܢ ܘܶܐܬܚܰܣܰܕܢܰܢ ܘܶܐܫܬܰܦܰܠܢܰܢ ܘܶܐܬܟܪܰܗܢܰܢ. ܘܡܶܢ ܝܳܪܬܽܘܬܳܐ ܐܶܬܛܪܶܕܢܰܢ. ܘܠܐܪܥܳܐ ܕܟܽܘ̈ܒܶܐ ܐܶܫܬܕܺܝܢܰܢ. ܬܽܘܒ ܡܰܝܬܶܐ ܢܒܺܝܳܐ ܒܳܬܰܪ ܗܳܠܶܝܢ ܐܳܦ ܗܳܝ ܕܠܳܐ ܡܶܫܟܚܺܝܢ ܗܘܰܘ ܕܰܢܩܰܒܠܽܘܢܳܝܗܝ ܪ̈ܳܚܡܰܘܗܝ ܡܶܛܽܠ ܕܶܚܠܬܶܗ ܕܫܳܐܘܳܠ. ܕܠܰܘ ܒܰܠܚܽܘܕ ܚܶܣܕܳܐ ܗܘܺܝܬ ܠܰܫ̈ܒܳܒܰܝ܆ ܐܶܠܳܐ ܘܰܕܒܺܝܫܳܐ ܡܶܢ ܟܽܠܗܶܝܢ܆
ܘܕܶܚܠܬܳܐ ܠܰܐܝܠܶܝܢ ܕܝܳܕܥܺܝܢ ܠܺܝ. ܘܰܐܝܠܶܝܢ ܕܚܳܙܶܝܢ ܗܘܰܘ ܠܺܝ ܒܫܽܘܩܳܐ ܢܳܕܺܝܢ ܗܘܰܘ ܡܶܢܝ. ܡܶܣܬܰܪܕܺܝܢ ܗܘܰܘ ܠܰܡ ܪ̈ܳܚܡܰܝ ܕܰܢܩܰܒܠܽܘܢܳܢܝ ܒܒܳܬܰܝ̈ܗܽܘܢ. ܘܰܐܝܟ ܝܽܘܩܪܳܐ ܪܰܒܳܐ ܣܺܝܡܳܐ ܗܘܳܬ ܚܙܳܬܝ ܥܠܰܝܗܽܘܢ. ܘܟܰܕ ܡܶܢ ܚܽܘܒܳܐ ܡܶܬܟܰܚܕܺܝܢ ܗܘܰܘ܆ ܕܶܚܠܬܳܐ ܥܳܒܕܳܐ ܗܘܳܬ ܠܗܽܘܢ ܕܰܢܚܰܦܽܘܢ ܐܰܦܰܝ̈ܗܽܘܢ ܡܶܢܝ. ܕܰܐܝܟ ܗܳܟܰܢܰܐ ܗ̄ܘ ܓܶܝܪ ܥܳܫܶܢ ܥܽܘܙܳܐ ܕܽܐܘܠܨܳܢܳܐ ܥܰܠ ܩܰܕܺܝ̈ܫܶܐ. ܕܳܐܦ ܡܶܢ ܪ̈ܳܚܡܰܝܗܽܘܢ ܘܩܰܪ̈ܺܝܒܰܝܗܽܘܢ ܡܶܬܩܰܛܠܺܝܢ ܗܘܰܘ. ܘܡܳܢܳܐ ܐܳܡܰܪ ܐܢܳܐ ܒܰܠܚܽܘܕ ܗܳܕܳܐ ܗ̱ܝ ܕܫܳܡܥܺܝܢܰܢ ܠܡܳܪܰܢ ܕܳܐܡܰܪ ܠܬܰܠܡܺܝ̈ܕܶܐ ܕܺܝܠܶܗ܆ ܕܢܰܫܠܡܽܘܢܳܟܽܘܢ ܐܰܚܰܝ̈ܟܽܘܢ ܐܳܦ ܐܰܒܳܗܰܝ̈ܟܽܘܢ. ܘܬܺܐܬܶܐ ܫܳܥܬܳܐ ܕܟܽܠ ܕܢܶܩܛܽܘܠܟܽܘܢ ܢܰܣܒܰܪ ܬܶܫܡܶܫܬܳܐ ܡܩܰܪܶܒ ܠܰܐܠܳܗܳܐ (ܝܘܚܢܢ ܝܘ: ܒ). ܐܰܟܡܳܐ ܕܶܐܡܰܪ ܕܰܘܺܝܕ. ܕܰܐܝܠܶܝܢ ܕܚܳܙܶܝܢ ܗܘܰܘ ܠܺܝ ܒܫܽܘܩܳܐ ܢܳܕܺܝܢ ܗܘܰܘ ܡܶܢܝ.
ܐܶܬܛܥܺܝܬ ܐܰܝܟ ܡܺܝܬܳܐ ܡܶܢ ܠܶܒܳܐ. ܘܰܗܘܺܝܬ ܐܰܝܟ ܡܳܐܢܳܐ ܐܰܒܺܝܕܳܐ. ܚܳܙܶܝܢܰܢ ܓܶܝܪ ܕܳܐܦ ܠܘܳܬ ܡܕܰܒܪܳܢܽܘܬܳܐ ܚܳܝܪܺܝܢ ܩܴ̈ܠܶܐ ܗܳܠܶܝܢ. ܗܳܠܶܝܢ ܕܒܶܝܬ ܩܠܶܝܽܘܦܰܐ ܐܰܝܟ ܕܰܠܡܺܝܬܳܐ ܛܥܰܐܘܽܗܝ ܠܡܶܠܬܳܐ ܐܰܠܳܗܳܐ ܒܩܰܒܪܳܐ. ܘܰܐܝܟ ܡܳܐܢܳܐ ܐܰܒܺܝܕܳܐ ܚܰܫܒܽܘܗܝ. ܢܦܰܩܘ ܡܶܢ ܐܽܘܪܺܫܠܶܡ ܒܝܰܘܡܳܐ ܕܚܰܕ ܒܫܰܒܳܐ ܘܰܠܒܰܟܘ ܐܽܘܪܚܳܐ ܕܳܐܙܳܠܐ ܠܥܶܡܰܐܘܳܣ ܩܪܺܝܬܳܐ. ܒܕܰܣܒܰܪܘ܇ ܬܽܘܒ ܠܳܐ ܩܳܐܶܡ ܡܶܢ ܒܶܝܬ ܡܺܝ̈ܬܶܐ ܗܰܘ ܕܡܺܝܬ ܨܶܒܝܳܢܳܐܝܺܬ܇ ܟܰܕ ܐܺܝܬܰܘܗܝ ܚܰܝܷ̈ܐ ܕܟܽܠ. ܘܒܳܬܰܪ ܗܳܠܶܝܢ ܟܰܕ ܡܰܘܕܰܥ ܥܰܠ ܡܰܚܫ̈ܒܳܬܳܐ ܕܪ̈ܰܒܰܝ ܟܳܗ̈ܢܶܐ ܕܶܐܬܚܰܫܰܒܘ ܥܰܠ ܩܶܛܠܶܗ ܕܦܳܪܽܘܩܰܢ ܐܶܡܰܪ:
ܡܶܛܠ ܕܫܶܡܥܶܬ ܪܶܢܝܳܐ ܕܣܰܓܝܷ̈ܐܐ܇ ܟܰܕ ܐܶܬܡܰܠܰܟܘ ܥܠܰܝ ܐܰܟܚܕܳܐ: ܘܶܐܬܚܰܫܰܒܘ ܕܢܶܣܒܽܘܢ ܠܢܰܦܫܝ. ܕܰܗܘܳܬ ܗܳܕܶܐ ܥܰܠ ܕܰܘܺܝܕ܆ ܫܰܪܺܝܪܳܐ ܗܝ. ܒܳܥܶܐ ܗܘܳܐ ܫܳܐܘܳܠ ܕܢܶܣܰܒ ܢܰܦܫܶܗ. ܒܪܰܡ ܠܗܳܝ ܨܳܝܪܳܐ ܗܘܳܬ܆ ܕܶܐܡܰܪ ܩܰܝܳܦܳܐ ܠܝܽܘ̈ܕܳܝܶܐ: ܕܦܰܩܳܚ ܠܰܢ ܕܚܰܕ ܓܰܒܪܳܐ ܢܡܽܘܬ ܚܠܳܦ ܥܰܡܳܐ܆ ܘܠܳܐ ܟܽܠܶܗ ܥܰܡܳܐ ܢܺܐܒܰܕ (ܝܘܚܢܢ ܝܐ: ܢܢ). ܟܰܕ ܡܶܢ ܥܽܘ̈ܬܳܕܶܐ ܕܗܳܠܶܝܢ܆ ܕܰܘܺܝܕ ܠܳܐ ܡܶܬܬܙܝܺܥ ܗܘܳܐ. ܐܶܠܳܐ ܡܶܬܦܢܶܐ ܠܘܳܬ ܡܳܪܝܳܐ ܘܳܐܡܰܪ:
ܐܶܢܳܐ ܕܶܝܢ ܥܠܰܝܟ ܡܳܪܝܳܐ ܐܶܬܬܰܟܠܶܬ. ܝܶܠܦܶܬ ܓܶܝܪ ܒܢܶܣܝܽܘ̈ܢܶܐ܇ ܕܡܶܢ ܟܽܠܡܶܕܶܡ ܚܰܣܺܝܢ ܬܽܘܟܠܳܢܳܐ ܕܰܥܠܰܝܟ. ܘܰܕܡܶܢܳܟ ܩܳܡܘ ܥܠܰܝ ܙܰܒ̈ܢܶܐ ܣܒܺܝ̈ܣܰܝ ܒܟܽܠ ܢܶܣܝܽܘ̈ܢܺܝܢ. ܐܶܠܳܐ ܟܠ ܥܳܒܪܺܝܢ܆ ܐܶܡܰܬܝ ܕܠܳܟ ܫܳܦܰܪ ܐܢܳܫ.
ܐܶܡܪܶܬ ܓܶܝܪ ܕܰܐܠܗܝ ܐܰܢܬ ܡܳܪܝܳܐ. ܘܒܺܐܝ̈ܕܰܝܟ ܐܶܢܽܘܢ ܙܰܒ̈ܢܶܐ. ܘܰܐܢܬ ܦܳܩܶܕܬ ܠܗܽܘܢ ܘܥܳܐܠܺܝܢ. ܘܰܒܪܶܡܙܳܟ ܫܳܩܠܺܝܢ ܦܽܘܩܕܳܢܳܐ ܘܰܡܫܰܢܶܝܢ. ܘܠܰܘ ܒܶܠܥܳܕܰܝܟ ܩܳܐܶܡ ܗܘܽ ܐܽܘܠܨܳܢܳܐ ܥܰܠ ܛܳܒܷ̈ܐ. ܘܠܰܘ ܐܰܢܬ ܡܰܗܡܶܐ ܐܰܢܬ ܕܰܢܩܽܘܡܽܘܢ ܪ̈ܺܝܫܳܢܶܐ ܘܰܡܕܰܒܪ̈ܳܢܶܐ ܕܥܰܘܠܳܐ. ܘܡܶܢܳܟ ܫܳܩܠܺܝܢ ܫܽܘܪܳܝܳܐ ܫܰܠܺܝ̈ܛܳܢܶܐ ܕܟܺܐܢܽܘܬܳܐ.
ܡܶܛܠܗܳܢܳܐ: ܦܪܽܘܩܰܝܢܝ ܡܶܢ ܒܥܶܠܕ̈ܒܳܒܰܝ ܘܡܶܢ ܐܰܝܠܶܝܢ ܕܪܳܕܦܺܝܢ ܠܺܝ: ܐܰܢܗܰܪ ܐܰܦܰܝ̈ܟ ܥܰܠ ܥܰܒܕܳܟ ܘܰܦܪܽܘܩܰܝܢܝ ܒܛܰܝܒܽܘܬܳܟ. ܗܳܪܟܳܐ ܕܶܝܢ ܒܢܽܘܗܪܳܐ ܕܰܐܦܷ̈ܐ ܐܰܠܳܗܳܝܴ̈ܬܳܐ ܠܕܶܢܚܳܐ ܕܓܶܠܝܳܢܶܗ ܕܡܶܠܬܳܐ ܐܰܠܳܗܳܐ ܫܳܐܶܠ. ܘܗܽܘܝܽܘ ܓܶܝܪ ܢܽܘܗܪܶܗ ܕܰܐܒܳܐ. ܘܥܰܠܗܳܕܶܐ ܐܶܡܰܪ:
ܕܡܳܪܝܳܐ ܠܳܐ ܐܶܒܗܰܬ ܕܰܩܪܺܝܬܳܟ: ܢܶܒܗܬܽܘܢ ܪ̈ܰܫܺܝܥܶܐ ܘܢܶܚܬܽܘܢ ܠܰܫܝܽܘܠ. ܗܳܢܽܘܢ ܕܰܨܠܰܘ ܠܶܗ ܠܨܰܠܡܳܟ ܦܰܚܳܐ ܕܢܶܟܠܳܐ. ܘܰܒܡܶܠܟܗܽܘܢ ܢܦܰܠܘ ܘܶܐܬܬܨܺܝܕܘ ܠܰܐܒܕܳܢܳܐ. ܢܶܬܬܰܚܕܽܘܢ ܒܡܰܦܽܘܠܬܳܐ ܡܳܐ ܕܢܳܚܬܺܝܢ ܠܓܰܘ ܫܝܽܘܠ.
ܕܢܶܣܬܰܟܪ̈ܳܢ ܣܶܦ̈ܘܳܬܗܽܘܢ ܕܥܰܘܴ̈ܠܶܐ. ܡܳܐ ܕܡܶܬܬܰܚܕܺܝܢ ܘܢܳܦܠܺܝܢ ܒܦܰܚܳܐ ܕܰܛܡܰܪܘ ܠܪܶܓܠܰܢ.
ܥܰܠ ܕܰܡܡܰܠܠܺܝܢ ܥܰܠ ܙܰܕܺܝܩܳܐ ܫܽܘܩܪܳܐ ܘܫܳܛܝܽܘܬܳܐ. ܘܟܰܕ ܠܳܐ ܡܶܬܚܙܶܝܢ܆ ܨܳܠܶܝܢ ܦܰܚܰܝ̈ܗܽܘܢ ܘܡܰܘܒܕܺܝܢ ܠܬܰܡܺܝ̈ܡܶܐ ܒܓܰܘ ܟܡܺܐܢܷ̈ܐ ܕܰܐܒܕܳܢܳܐ. ܘܠܳܐ ܝܳܕܥܺܝܢ ܦܽܘܪܩܳܢܳܐ ܕܶܐܬܪܰܥܺܝܬ ܥܰܠ ܥܰܡܳܟ. ܘܠܳܐ ܕܰܟܡܳܐ ܣܰܓܺܝܳܐܐ ܛܰܝܒܽܘܬܳܟ܇ ܕܢܳܛܰܪ ܐܰܢܬ ܠܕܳܚ̈ܠܰܝܟ. ܠܕܰܡܣܰܒܪܺܝܢ ܒܳܟ ܩܕܳܡ ܒܢܰܝ̈ܢܳܫܳܐ. ܢܰܗܺܝܪܳܐܝܺܬ ܡܦܰܫܶܩ ܛܽܘܒܳܢܳܐ ܕܰܘܺܝܕ. ܕܰܐܝܕܳܐ ܦܰܪܶܗܣܺܝܰܐ ܡܶܬܒܰܥܝܳܐ ܠܩܰܕܺܝ̈ܫܶܐ ܒܙܰܒܢܳܐ ܕܰܪܕܽܘܦܝܳܐ. ܡܰܘܕܰܥ ܐܳܦ ܥܽܘܬܪܳܐ ܘܛܰܝܒܽܘܬܳܐ ܕܢܳܛܰܪ ܠܰܐܝܠܶܝܢ ܕܰܡܣܰܒܪܺܝܢ ܒܶܗ. ܘܡܶܬܕܰܡܰܪ ܒܳܗ̇ ܕܥܳܒܪܳܐ ܠܰܡܫܽܘܚܬܳܐ ܡܚܺܝܠܳܐ ܕܰܡܩܰܒ̈ܠܳܢܶܐ. ܘܳܐܡܰܪ ܥܠܶܝܗ̇:
ܡܳܐ ܣܰܓܺܝܳܐܐ ܛܰܝܒܽܘܬܳܟ ܕܢܳܛܰܪ ܐܰܢܬ ܠܕܳܚ̈ܠܰܝܟ: ܠܕܰܡܣܰܒܪܺܝܢ ܒܳܟ ܩܕܳܡ ܒܢܰܝ̈ܢܳܫܳܐ. ܘܰܒܝܰܕ ܗܳܕܶܐ ܦܰܫܶܩ܇ ܕܡܳܐ ܕܗܳܘܶܐ ܪܕܽܘܦܝܳܐ܆ ܠܳܐ ܙܳܕܶܩ ܕܰܢܛܰܫܶܐ ܬܰܘܕܺܝܬܰܢ ܘܣܰܒܪܰܢ. ܐܶܠܳܐ ܩܕܳܡ ܡܰܠܟܷ̈ܐ ܘܰܩܕܳܡ ܫܰܠܺܝ̈ܛܳܢܶܐ ܢܣܰܒܰܪ ܒܶܗ ܘܠܳܐ ܢܶܕܚܰܠ. ܘܝܰܬܺܝܪܳܐܝܺܬ ܡܶܛܠ ܕܪܳܡܶܙ ܩܳܠܶܗ ܕܗܰܘ ܡܙܰܡܪܳܢܳܐ. ܕܡܰܘܪܶܒ ܛܰܝܒܽܘܬܳܐ ܕܢܳܛܰܪ ܐܰܠܳܗܳܐ ܠܕܳܚ̈ܠܰܘܗܝ. ܗܳܕܳܐ ܗ̱ܝ ܓܶܝܪ ܗܳܝ ܕܶܐܡܰܪ ܦܰܘܠܽܘܣ ܐܰܠܳܗܳܝܳܐ. ܕܡܶܕܶܡ ܕܶܐܕܢܳܐ ܠܳܐ ܫܶܡܥܰܬ܇ ܘܥܰܝܢܳܐ ܠܳܐ ܚܙܳܬ: ܘܥܰܠ ܠܶܒܳܐ ܕܒܰܪܢܳܫܳܐ ܠܳܐ ܣܠܶܩ. ܡܶܕܶܡ ܕܛܰܝܶܒ ܐܰܠܳܗܳܐ ܠܰܐܝܠܶܝܢ ܕܪܳܚܡܺܝܢ ܠܶܗ (ܐ ܩܘܪ̈ܢܬܝܐ ܒ: ܛ). ܡܶܛܽܠ ܕܠܰܘ ܠܪܽܘܚܩܳܐ ܫܳܪܶܐ ܠܳܗ̇ ܠܡܶܠܬܳܐ ܗܽܘ ܢܒܺܝܳܐ܆ ܒܰܡܢܳܬܳܐ ܡܶܕܶܡ ܡܶܢ ܩܽܘܪܒܳܐ ܝܳܠܦܺܝܢܰܢ ܦܽܘܫܳܩܳܗ̇܆ ܘܣܳܒܰܪ ܐܢܳܐ ܕܗܳܝ ܕܶܐܡܰܪ ܕܣܰܓܺܝܳܐܐ܇ ܗܳܕܳܐ ܗ̱ܝ:
ܕܰܬܟܰܣܶܐ ܐܶܢܽܘܢ ܒܣܶܬܳܪܶܗ ܕܦܰܪܨܽܘܦܳܟ. ܡܳܢܳܐ ܓܶܝܪ ܕܪܰܒ ܡܶܢ ܗܳܕܶܐ ܠܰܥܒܺܝ̈ܕܶܐ. ܕܢܶܗܘܶܐ ܐܰܠܳܗܳܐ ܐܰܝܟ ܢܶܫܪܳܐ ܕܛܳܐܶܣ ܥܰܠ ܩܶܢܶܗ. ܘܗܳܢܽܘܢ ܕܣܰܒܰܪܘ ܒܶܗ ܢܶܬܟܰܣܽܘܢ ܬܚܶܝܬ ܛܶܠܳܠܳܐ ܕܶܐܒܪ̈ܰܘܗܝ. ܘܡܳܐ ܕܡܶܬܥܰܫܰܢ ܐܽܘܠܨܳܢܳܐ ܒܝܰܘܡܳܐ ܐܚܪܳܝܳܐ. ܘܰܚܙܺܝ ܐܰܝܟܰܢܳܐ ܐܶܡܰܪ.
ܡܶܢ ܕܠܽܘܚܝܳܐ ܕܰܒܢܰܝ̈ܢܳܫܳܐ. ܠܰܝܬ ܓܶܝܪ ܡܶܕܶܡ ܕܡܶܬܦܰܚܰܡ ܒܗܰܘ ܕܠܽܘܚܝܳܐ ܕܥܳܪܶܨ ܥܰܠ ܗܳܢܽܘܢ ܕܡܶܢ ܓܰܒܳܐ ܕܣܶܡܳܠܳܐ. ܡܳܐ ܕܫܳܡܥܺܝܢ ܡܶܢ ܡܰܠܟܳܐ ܩܳܠܳܐ ܡܙܺܝܥܳܢܳܐ. ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ (ܡܬܝ ܟܕ: ܡܐ). ܡܶܛܠܗܳܢܳܐ ܡܰܘܣܶܦ ܘܳܐܡܰܪ:
ܬܟܰܣܶܐ ܐܶܢܽܘܢ ܒܛܶܠܳܠܳܟ ܡܶܢ ܚܶܪܝܳܢܳܐ. ܥܰܠ ܗܳܢܽܘܢ ܕܰܐܘܕܺܝܘ ܒܶܗ ܩܕܳܡ ܒܢܰܝ̈ܢܳܫܳܐ܇ ܘܠܳܐ ܟܦܰܪܘ ܒܶܗ: ܡܳܐ ܕܩܳܡ ܪܕܽܘܦܝܳܐ܆ ܠܓܰܘ ܡܶܢ ܛܶܠܳܠܶܗ ܡܣܰܬܰܪ ܘܰܡܟܰܣܶܐ ܘܒܰܓܢܽܘܢܶܗ ܡܰܥܡܰܪ ܠܗܽܘܢ. ܘܗܳܐ ܕܰܘܺܝܕ ܡܰܘܕܶܐ ܥܰܠ ܓܒܺܝܬܗܽܘܢ ܕܡܶܢ ܥܳܠܡܳܐ ܗܳܢܳܐ. ܘܳܐܡܰܪ:
ܒܪܺܝܟ ܗܽܘ ܡܳܪܝܳܐ ܕܰܓܒܳܐ ܠܶܗ ܓܒܰܝܴ̈ܐ ܒܰܩܪܺܝܬܳܐ ܥܰܫܺܝܢܬܳܐ. ܘܟܰܕ ܐܶܢܳܐ ܐܰܝܟ ܡܣܰܪܗܒܳܐ ܒܪܶܥܝܳܢܳܐ ܥܳܠܡܳܢܳܝܳܐ ܪܢܺܝܬ ܕܶܐܒܰܕܘ ܘܠܰܝܬ ܐܶܢܽܘܢ. ܗܳܢܰܘ ܕܶܝܢ.
ܕܶܐܢܳܐ ܐܶܡܪܶܬ ܒܰܡܣܰܪܗܒܽܘܬܝ܆ ܕܶܐܒܕܶܬ ܡܶܢ ܩܕܳܡ ܥܰܝ̈ܢܰܝܟ. ܐܶܠܳܐ ܠܳܐ ܐܰܘܒܕܶܬ ܘܠܳܐ ܐܶܬܛܥܺܝܬ.
ܘܰܫܡܰܥܬ ܩܳܠܳܐ ܕܒܳܥܽܘܬܝ ܟܰܕ ܩܪܺܝܬܳܟ. ܡܶܛܽܠܗܳܢܳܐ ܐܳܡܰܪ.
ܪܚܰܡܘ ܠܡܳܪܝܳܐ ܙܰܕܺܝ̈ܩܰܘܗܝ: ܘܠܰܡܗܰܝ̈ܡܢܶܐ ܢܳܛܰܪ ܡܳܪܝܳܐ. ܠܳܐ ܠܰܡ ܛܳܥܶܝܢ ܠܶܗ ܫܰܪܺܝܪ̈ܶܐ ܘܠܳܐ ܐܳܒܕܺܝܢ ܡܶܢ ܨܪܳܪܳܐ ܕܡܰܠܟܽܘܬܶܗ ܡܗܰܝ̈ܡܢܶܐ. ܐܶܠܳܐ ܚܳܕܶܐ ܒܗܽܘܢ. ܐܰܝܟ ܗܳܝ ܕܶܐܫܟܚܶܬ ܠܙܽܘܙܝ ܕܰܐܒܺܝܕ ܗܘܳܐ. ܒܗܳܕܶܐ ܢܳܛܰܪ ܡܳܪܝܳܐ ܠܰܡܗܰܝܡ̈ܢܶܐ. ܕܠܳܐ ܢܳܛܰܪ ܠܰܐܝܠܶܝܢ ܕܰܠܩܽܘܒܠܳܐ ܡܰܠܶܦ. ܐܶܡܰܪ ܓܶܝܪ.
ܘܦܳܪܰܥ ܠܥܰܘܴ̈ܠܶܐ ܥܒܳܕܰܝ̈ܗܽܘܢ. ܘܬܽܘܒ ܟܰܕ ܡܠܰܒܶܒ ܠܰܐܝܠܶܝܢ ܕܰܡܣܰܒܪܺܝܢ ܘܰܡܗܰܝܡܢܺܝܢ ܒܡܳܪܝܳܐ. ܘܶܐܡܰܪ:
ܐܶܬܚܰܝܠܘ ܘܢܶܬܥܰܫܰܢ ܠܶܒܟܽܘܢ܆ ܟܽܠ ܕܰܡܣܰܒܪܺܝܢ ܒܡܳܪܝܳܐ܀
ܡܙܡܘܪܐ ܕܬܠܬܝܢ ܘܬܪܝܢ
ܡܰܘܕܰܥ ܥܰܠ ܛܽܘܒܳܐ ܕܶܐܬܺܝܗܶܒ ܡܰܓܳܢ ܒܫܽܘܒܩܳܢܳܐ ܕܰܚܛܳܗܷ̈ܐ ܕܰܗܘܳܐ ܒܰܥܡܳܕܳܐ ܩܰܕܺܝܫܳܐ ܠܥܰܡ̈ܡܶܐ ܡܗܰܝ̈ܡܢܶܐ ܒܝܰܕ ܓܶܠܝܳܢܶܗ ܕܥܰܡܰܢܽܘܐܶܝܠ.
ܟܽܠܡܰܢ ܕܡܶܢ ܐܰܠܳܗܳܐ ܐܶܬܺܝܗܶܒ ܠܶܗ ܛܽܘܒܳܐ܆ ܗܳܢܰܘ ܒܰܫܪܳܪܳܐ ܛܽܘܒܳܢܳܐ܆ ܕܰܡܚܰܪܰܪ ܡܶܢܟܽܠ ܡܶܕܶܡ ܕܰܠܩܽܘܒܠܳܐ. ܚܰܕ ܗ̱ܽܘ ܓܶܝܪ ܛܽܘܒܳܢܳܐ ܟܝܳܢܳܐܝ̣ܬ. ܘܗܽܘ ܝܳܕܰܥ ܡܳܢܳܐ ܐܺܝܬܰܘܗܝ ܚܰܝܠܶܗ ܕܛܽܘܒܳܐ. ܘܡܶܛܽܠ ܕܗܽܘܝܽܘ ܡܠܶܐ ܛܽܘ̈ܒܶܐ. ܘܝܳܕܰܥ ܐܳܦ ܠܰܐܝܠܶܝܢ ܕܫܳܘܶܝܢ ܠܛܽܘ̈ܒܶܐ. ܗܰܘ ܕܟܰܕ ܝܠܶܦ ܡܶܢܶܗ ܝܗܰܒ ܛܽܘܒܳܐ. ܛܽܘ̈ܒܳܢܶܐ ܐܶܢܽܘܢ ܐܰܝܠܶܝܢ ܕܒܺܐܝ̈ܕܰܘܗܝ ܢܳܣܒܺܝܢ ܛܽܘ̈ܒܶܐ ܘܡܶܫܬܰܡܗܺܝܢ ܛܽܘ̈ܒܳܢܶܐ. ܛܽܘܒܳܢܳܐ ܡܳܕܶܝܢ ܕܰܘܺܝܕ ܐܰܠܳܗܳܝܳܐ܆ ܗܰܘ ܟܝܳܢܳܐ ܡܠܶܐ ܛܽܘܒ̈ܐ ܒܰܐܝܠܶܝܢ ܕܶܐܬܢܰܒܺܝ ܘܰܐܟܬܶܒ ܫܡܰܥܢܳܝܗܝ. ܕܝܳܗܶܒ ܝܰܘܡܳܢܳܐ ܒܪܺܝܫܳܗ̇ ܕܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܬܰܪܬܶܝܢ. ܠܰܐܝܠܶܝܢ ܕܶܐܫܬܒܶܩܘ ܠܗܽܘܢ ܡܰܢ ܥܰܘܠܗܽܘܢ. ܘܶܐܬܟܰܣܺܝܘ ܚܛܳܗܰܝ̈ܗܽܘܢ܆ ܘܕܳܡܝܳܐ܇ ܗܳܢܳܐ ܛܽܘܒܳܐ ܠܰܘ ܠܰܐܝܠܶܝܢ ܕܰܒܥܰܡܠܳܐ ܘܒܰܬܝܳܒܽܘܬܳܐ ܬܰܪܶܨܘ ܕܽܘܒܳܪ̈ܰܝܗܽܘܢ ܘܰܫܘܰܘ ܠܫܽܘܒܩܳܢܳܐ ܐܶܬܺܝܗܶܒ܆ ܐܶܠܳܐ ܐܰܝܠܶܝܢ ܕܰܐܠܳܗܳܐ ܚܳܫܶܒ ܠܗܽܘܢ ܙܰܕܺܝܩܽܘܬܳܐ ܕܠܳܐ ܥܒܴ̈ܕܶܐ. ܗܳܟܰܢܳܐ ܦܰܫܩܶܗ ܠܛܽܘܒܳܐ ܗܳܢܐ ܚܰܟܺܝܡܳܐ ܒܟܽܠ ܛܽܘܒܳܢܳܐ ܦܰܘܠܽܘܣ ܟܰܕ ܠܘܳܬ ܪ̈ܽܘܡܳܝܶܐ ܟܬܰܒ ܗܘܳܐ܆ ܟܰܕ ܡܶܛܽܠ ܓܙܽܘܪܬܳܐ ܘܥܽܘܪܠܽܘܬܳܐ ܥܳܒܶܕ ܡܶܠܬܳܐ܇ ܐܰܝܟܰܢܳܐ ܕܳܐܦ ܕܰܘܺܝܕ ܐܶܡܰܪ ܥܰܠ ܛܽܘܒܶܗ ܕܓܰܒܪܳܐ: ܐܰܝܢܳܐ ܕܰܐܠܳܗܳܐ ܚܳܫܶܒ ܠܶܗ ܙܰܕܺܝܩܽܘܬܳܐ ܕܠܳܐ ܥܒܴ̈ܕܶܐ. ܟܰܕ ܐܳܡܰܪ: ܛܽܘܒܰܘܗܝ ܠܰܐܝܠܶܝܢ ܕܶܐܫܬܒܶܩ ܠܗܽܘܢ ܥܰܘܠܗܘܢ܇ ܘܶܐܬܟܰܣܺܝܘ ܚܛܳܗܰܝ̈ܗܘܢ. ܛܽܘܒܰܘܗܝ ܠܓܰܒܪܳܐ ܕܠܳܐ ܢܶܚܫܽܘܒ ܠܶܗ ܐܰܠܗܳܐ ܚܛܺܝܬܶܗ. ܗܳܢܳܐ ܗܳܟܺܝܠ ܛܽܘܒܳܐ ܥܰܠ ܓܙܽܘܪܬܰܐ ܗ̄ܘ ܐܰܘ ܥܰܠ ܥܽܘܪܠܽܘܬܳܐ (ܪ̈ܘܡܝܐ ܕ: ܘ-ܛ). ܐܰܝܟ ܐܢܳܫ ܢܺܐܡܰܪ: ܠܳܐ ܥܰܠ ܓܙܽܘܪܬܳܐ ܘܠܳܐ ܥܰܠ ܥܽܘܪܠܽܘܬܳܐ. ܐܶܠܳܐ ܥܰܠ ܗܰܝܡܳܢܽܘܬܳܐ. ܠܰܓܙܽܘܪܬܳܐ ܓܶܝܪ ܘܰܠܥܽܘܪܠܽܘܬܳܐ܆ ܗܰܝܡܳܢܽܘܬܳܐ ܗ̣ܘܳܬ ܥܶܠܬܳܐ ܠܙܰܕܺܝܩܽܘܬܳܐ ܒܝܰܕ ܐܰܠܳܗܳܐ܇ ܗܰܘ ܕܙܰܕܶܩ ܐܶܢܶܝܢ ܒܓܶܠܝܳܢܶܗ. ܡܶܛܽܠ ܕܚܰܕ ܗ̱ܽܘ ܠܰܡ ܐܰܠܳܗܳܐ ܕܰܡܙܰܕܶܩ ܓܙܽܘܪܬܳܐ ܒܗܰܝܡܳܢܽܘܬܳܐ (ܪ̈ܗܘܡܝܐ ܓ: ܠ). ܐܶܢ ܡܳܕܶܝܢ ܐܰܠܳܗܳܐ ܐܺܝܬܘܰܗܝ ܗܰܘ ܕܰܡܙܰܕܶܩ. ܘܰܡܙܰܕܶܩ ܬܽܘܒ ܠܰܘ ܕܠܳܐ ܡܶܨܥܳܝܽܘܬܳܐ ܕܗܰܝܡܳܢܽܘܬܳܐ. ܓܰܠܝܳܐ ܗ̱ܝ ܗܳܝ ܕܶܐܡܰܪ ܝܰܘܡܳܢܳܐ ܛܽܘܒܳܢܳܐ ܕܰܘܺܝܕ.
ܛܽܘܒܰܘܗܝ ܠܡܰܢ ܕܶܐܫܬܒܶܩ ܠܶܗ ܥܰܘܠܶܗ. ܥܰܡܳܐ ܩܰܕܺܝܫܳܐ ܘܰܡܗܰܝܡܢܳܐ ܙܳܕܶܩ ܕܢܶܣܬܰܟܰܠ ܕܺܐܝܬܰܘܗܝ ܗܳܢܳܐ: ܕܟܰܕ ܗܰܝܡܶܢ ܒܡܳܪܝܳܐ܆ ܩܰܒܶܠ ܫܽܘܒܩܳܢܳܐ ܕܰܚܛܳܗܷ̈ܐ ܒܗܰܝܡܳܢܽܘܬܳܐ ܕܠܳܐ ܥܒܴ̈ܕܶܐ. ܘܪܺܝܫܺܝܬܳܐ ܕܗܳܢܳܐ ܐܝܬܰܘܗܝ ܙܰܟܰܝ ܗܰܘ ܪܺܝܫ ܡܳܟ̈ܣܶܐ ܘܚܰܛܳܝܷ̈ܐ. ܗܰܘ ܕܡܶܛܽܠ ܕܗܰܝܡܶܢ ܒܡܳܪܰܢ ܘܰܣܠܶܩ ܠܶܗ ܠܬܺܬܳܐ ܦܰܟܺܝܗܬܳܐ ܕܢܶܚܙܶܝܘܗܝ܇ ܫܡܰܥ ܠܗܰܘ ܕܰܡܙܰܕܶܩ ܒܗܰܝܡܳܢܽܘܬܳܐ ܕܶܐܡܰܪ ܠܶܗ. ܐܶܣܬܰܪܗ̱ܒ ܚܽܘܬ ܙܰܟܰܝ܆ ܝܰܘܡܳܢܳܐ ܓܶܝܪ ܘܳܠܶܐ ܠܺܝ ܕܰܒܒܰܝܬܳܟ ܐܶܗܘܶܐ (ܠܘܩܐ ܝܛ: ܗ). ܗܳܟܰܢ ܬܽܘܒ ܐܳܦ ܡܰܪܝܰܡ ܡܰܓܕܠܳܝܬܳܐ܆ ܗܳܝ ܕܟܰܕ ܣܰܓܺܝ ܗܰܝܡܢܰܬ ܒܡܳܪܰܢ܇ ܒܝܰܕ ܕܶܡ̈ܥܶܐ ܕܰܡܠܶܐ ܥܶܕܳܢܳܐ ܕܶܐܫܕܰܬ ܥܰܠ ܪ̈ܶܓܠܰܘܗܝ ܕܰܐܠܳܗܳܐ. ܕܗܰܘ ܕܰܡܙܰܕܶܩ ܒܗܰܝܡܳܢܽܘܬܳܐ܆ ܘܰܒܝܰܕ ܡܶܫܚܳܐ ܕܰܐܫܦܥܰܬ ܥܰܠ ܪܺܝܫܶܗ ܟܰܕ ܣܡܺܝܟ ܒܒܰܝܬܶܗ ܕܫܶܡܥܽܘܢ ܦܪܺܝܫܳܝܳܐ܆ ܒܢܽܘ̈ܫܩܳܬܳܐ ܕܪ̈ܶܓܠܰܘܗܝ ܐܶܬܪܰܥܺܝ ܠܳܗ̇܆ ܟܰܕ ܡܰܫܡܰܥ ܠܳܗ̇ ܩܳܠܳܐ ܕܒܽܘܝܳܐܳܐ ܕܰܡܠܶܐ ܛܘ̈ܒܶܐ: ܐܶܬܠܰܒܒܝ ܒܪܰܬܝ܆ ܫܒܺܝܩܺܝܢ ܠܶܟܝ ܚܛܳܗܰܝ̈ܟܝ (ܠܘܩܐ ܙ: ܡܚ). ܡܶܢ ܗܳܠܶܝܢ ܬܽܘܒ ܕܶܐܡܰܪ ܕܰܘܺܝܕ. ܛܽܘܒܰܝܗܽܘܢ ܠܰܐܝܠܶܝܢ ܕܶܐܫܬܒܶܩܘ ܠܗܽܘܢ ܥܰܘܠܗܽܘܢ܆ ܐܺܝܬܰܘܗܝ ܓܰܝܳܣܳܐ ܗܰܘ ܪܺܝܫ ܠܶܣܛܳܝܷ̈ܐ܆ ܕܥܰܠ ܕܗܰܝܡܶܢ ܒܰܐܠܳܗܳܐ ܕܡܶܫܟܰܚ ܕܰܡܙܰܕܶܩ ܒܗܰܝܡܳܢܽܘܬܳܐ܆ ܘܟܰܕ ܙܩܺܝܦ ܥܰܡܶܗ ܘܠܰܝܬ ܠܶܗ ܒܡܶܬܚܰܙܝܳܢܝܴ̈ܬܳܐ ܙܺܝܘܳܐ ܕܪܰܒܽܘܬܳܐ܆ ܩܰܪܶܒ ܠܶܗ ܗܰܝܡܳܢܽܘܬܳܐ ܟܰܕ ܐܳܡܰܪ. ܒܳܥܶܐ ܐܢܳܐ ܡܶܢܳܟ ܡܳܪܝ ܐܶܬܕܰܟܪܰܝܢܝ ܒܡܰܠܟܽܘܬܳܟ (ܠܘܩܐ ܟܓ: ܡܒ). ܘܫܳܡܰܥ ܗܘܳܐ ܡܶܢܶܗ ܩܰܪܺܝܒܳܐܝܺܬ ܡܽܘܠܟܳܢܳܐ ܛܽܘܒܳܢܳܐ. ܕܰܐܡܺܝܢ ܐܳܡܰܪ ܐܢܳܐ ܠܳܟ܆ ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ (ܠܘܩܐ ܟܓ: ܡܓ). ܘܒܳܬܰܪ ܗܳܠܶܝܢ ܕܶܝܢ ܥܳܐܠܺܝܢ ܥܰܡ̈ܡܶܐ ܚܰܛܳܝܷ̈ܐ܆ ܗܳܠܶܝܢ ܕܰܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ ܕܳܐܬܶܝܢ ܗܘܰܘ ܠܰܥܡܳܕܳܐ ܘܡܶܫܬܰܒܩܺܝܢ ܗܘܰܘ ܠܗܽܘܢ ܚܛܳܗܰܝ̈ܗܽܘܢ. ܘܥܰܠ ܕܠܳܐ ܢܶܚܫܽܘܒ ܪܽܘܚܳܐ ܫܡܳܗܷ̈ܐ ܕܟܽܠܗܽܘܢ ܥܰܡ̈ܡܶܐ܆ ܘܰܕܟܶܢ̈ܫܶܐ ܕܚܰܛܳܝܷ̈ܐ ܕܶܐܫܬܘܺܝܘ ܠܛܽܘܒܳܐ ܗܳܢܳܐ܆ ܚܰܕ ܥܰܡܳܐ ܡܫܰܡܰܗ ܠܶܗ ܒܰܠܚܽܘܕ. ܘܠܰܘ ܥܰܡܳܐ ܝܺܕܺܝܥܳܐܝܬ.
ܐܶܠܳܐ ܛܘܒܰܘܗܝ ܠܡܰܢ ܕܶܐܫܬܒܶܩ ܠܶܗ ܥܰܘܠܶܗ܆ ܘܶܐܬܟܰܣܺܝܘ ܠܶܗ ܚܛܳܗܰܘ̈ܗܝ. ܘܟܰܕ ܒܳܥܶܐ ܕܢܰܘܕܰܥ ܗܳܢܳܐ ܛܽܘܒܳܐ ܠܰܐܪ̈ܥܳܢܳܝܶܐ ܐܶܬܺܝܗܶܒ܆ ܐܰܘܣܶܦ.
ܕܛܽܘܒܰܘܗܝ ܠܒܰܪܢܳܫܳܐ ܕܠܳܐ ܢܶܚܫܽܘܒ ܠܶܗ ܡܳܪܝܳܐ ܚܛܺܝܬܶܗ܆ ܘܠܰܝܬ ܢܶܟܠܳܐ ܒܠܶܒܶܗ. ܚܳܙܶܐ ܐܰܢܬ ܐܰܝܟܰܢܳܐ ܟܽܠܡܶܕܶܡ ܡܦܰܫܶܩ ܪܽܘܚܳܐ. ܡܰܢ ܘܳܠܶܐ ܕܢܶܪܢܶܐ ܕܺܐܝܬܰܘܗܝ܆ ܗܰܘ ܕܺܐܝܬ ܢܶܟܠܳܐ ܒܠܶܒܶܗ. ܐܺܝܬ ܗ̱ܽܘ ܕܠܰܘ ܒܠܶܒܳܐ ܡܗܰܝܡܢܳܐ ܩܳܪܒܺܝܢ ܠܰܥܡܳܕܳܐ ܩܰܕܺܝܫܳܐ. ܡܶܛܽܠ ܕܰܒܢܶܟܠܳܐ ܩܳܪܒܺܝܢ܆ ܠܳܐ ܡܶܫܬܘܶܝܢ ܠܛܽܘܒܳܐ ܕܡܶܬܺܝܗܶܒ ܒܫܽܘܒܩܳܢܳܐ ܠܗܰܘ ܕܥܳܡܶܕ ܒܗܰܝܡܳܢܽܘܬܳܐ. ܕܰܐܝܟ ܗܳܟܰܢܳܐ ܗ̱ܘܳܐ ܣܺܝܡܽܘܢ ܗܰܘ ܚܰܪܳܫܳܐ ܫܳܡܪܳܝܳܐ܆ ܠܰܘ ܓܶܝܪ ܗܳܢܳܐ ܒܰܦܫܺܝܛܽܘܬܳܐ ܥܡܰܕ ܡܶܢ ܦܺܝܠܺܝܦܳܘܣ ܡܣܰܒܪܳܢܳܐ. ܐܶܠܳܐ ܒܢܶܟܠܳܐ ܥܡܰܕ. ܘܶܐܬܓܠܶܙ ܡܶܢ ܫܽܘܒܩܳܢܳܐ ܗܳܢܳܐ. ܐܰܝܟ ܕܦܰܪܣܝܶܗ ܦܶܛܪܽܘܣ ܗܰܘ ܪܺܝܫܳܐ ܕܰܫܠܝ̈ܚܶܐ. ܘܰܓܠܳܐ ܢܶܟܠܳܐ ܕܠܶܒܶܗ ܘܶܐܡܰܪ ܠܶܗ. ܒܪܰܡ ܬܽܘܒ ܡܶܢ ܒܺܝܫܽܘܬܳܟ ܗܳܕܶܐ. ܘܰܒܥܺܝ ܡܶܢ ܐܰܠܳܗܳܐ܆ ܕܰܠܡܳܐ ܢܶܫܬܒܶܩ ܠܳܟ ܢܶܟܠܳܐ ܕܠܶܒܳܟ. ܒܟܰܒܕܳܐ ܓܶܝܪ ܡܰܪܺܝܪܬܳܐ ܘܰܒܩܶܛܪ̈ܶܐ ܕܥܰܘܠܳܐ ܚܳܙܶܐ ܐܢܳܐ ܕܺܐܝܬܰܝܟ (ܦܪܰܟܣܝܣ ܚ: ܟܒ-ܟܓ). ܘܠܰܘ ܗܳܫܳܐ ܒܰܠܚܽܘܕܰܘܗܝ ܗܳܢܳܐ܇ ܐܶܠܳܐ ܐܳܦ ܣܰܓܺܝܷ̈ܐܐ. ܟܰܕ ܡܣܰܟܶܝܢ ܠܪܺܝܫܳܢܽܘܬܳܐ ܕܥܺܕܬܳܐ. ܘܒܳܥܶܝܢ ܕܰܒܥܶܠܰܬ ܥܡܳܕܳܐ ܢܺܐܬܽܘܢ ܠܐܺܝܩܳܪܳܐ ܘܰܠܕܰܪܓܳܐ ܕܟܳܗܢܽܘܬܳܐ ܒܓܰܘ ܥܺܕܬܳܐ. ܗܳܠܶܝܢ ܒܢܶܟܠܳܐ ܕܠܶܒܗܽܘܢ ܩܳܪܒܺܝܢ ܠܰܥܡܳܕܳܐ. ܘܥܰܠ ܕܠܳܐ ܡܰܘܕܶܝܢ ܒܰܚܛܳܗܰܝ̈ܗܽܘܢ ܘܰܒܪܶܚܡܬܳܐ ܕܛܳܒܴ̈ܬܳܐ ܩܳܪܒܺܝܢ ܠܘܳܬܶܗ܆ ܠܳܐ ܡܶܫܬܘܶܝܢ ܠܫܽܘܒܩܳܢܳܐ. ܟܰܕ ܐܺܝܬܰܝܗܽܘܢ ܡܳܐܢܷ̈ܐ ܒܠܳܝܷ̈ܐ ܕܰܚܫܰܚܬܶܗ ܕܳܐܟܶܠܩܰܪܨܳܐ. ܢܳܚܬܺܝܢ ܠܡܰܒܽܘܥܳܐ ܕܦܽܘܪܩܳܢܳܐ ܟܰܕ ܩܰܝܳܡ ܒܗܽܘܢ ܫܽܘܘܕܳܥܳܐ ܕܒܰܪܢܳܫܳܐ ܩܰܕܡܳܝܳܐ ܘܥܰܬܺܝܩܳܐ ܣܳܠܩܺܝܢ ܡܶܢܶܗ. ܘܕܳܡܶܝܢ ܗܳܠܶܝܢ ܠܓܶܒܥܽܘ̈ܢܳܝܶܐ ܢܟܺܝ̈ܠܐܷ. ܗܳܢܽܘܢ ܕܒܶܐܣܟܺܡܳܐ ܢܟܺܝܠܳܐ ܐܶܬܰܘ ܠܘܳܬ ܝܶܫܽܘܥ ܒܰܪܢܽܘܢ܆ ܘܰܒܥܰܘ ܕܢܶܣܬܰܬܪܽܘܢ ܒܥܰܡܳܐ ܩܰܕܺܝܫܳܐ ܡܶܢ ܚܰܪܒܳܐ. ܠܰܘ ܟܰܕ ܓܙܺܝܪܺܝܢ ܘܗܳܘܶܝܢ ܝܺܣܰܪ̈ܠܳܝܶܐ܆ ܐܶܠܳܐ ܟܰܕ ܡܩܰܘܶܝܢ ܒܥܽܘܪܠܽܘܬܳܐ ܕܺܝܠܗܽܘܢ ܛܰܡܰܐܬܳܐ. ܐܰܝܟ ܙܶܩܷ̈ܐ ܒܠܳܝܴ̈ܬܳܐ ܘܢܰܚ̈ܬܶܐ ܒܠܳܝܷ̈ܐ. ܘܠܰܚܡܳܐ ܦܰܓܽܘܪܳܐ ܡܚܰܘܶܝܢ ܠܝܶܫܽܘܥ. ܟܰܕ ܒܢܶܟܠܳܐ ܕܠܶܒܗܽܘܢ ܦܽܘܪܩܳܢܳܐ ܕܡܶܢ ܡܰܘܬܳܐ ܫܳܐܠܺܝܢ ܗܘܰܘ܆ ܘܥܰܠܗܳܕܶܐ ܝܺܠܶܦ ܝܶܫܽܘܥ ܘܩܰܫܝ̈ܫܶܐ ܢܶܟܠܐܴ ܕܓܶܒܥܽܘ̈ܢܳܝܶܐ. ܚܠܳܦ ܒܽܘܪܟܬܳܐ ܠܰܘܛܬܳܐ ܝܳܪܬܺܝܢ ܗܘܰܘ. ܠܰܘ ܡܶܟܺܝܠ ܒܢܱ̈ܝ ܚܺܐܪ̈ܶܐ ܡܶܫܬܰܒܩܺܝܢ ܗܘܰܘ܆ ܐܰܝܟ ܕܰܦܐܶܐ ܠܥܰܡܳܐ ܩܰܕܺܝܫܳܐ܆ ܐܶܠܳܐ ܦܽܘܠܚܳܢܳܐ ܕܨܳܠܚܰܝ̈ ܩܰܝ̈ܣܶܐ ܘܡܳܠܝܰܝ̈ ܡܰܝܴ̈ܐ ܐܰܫܠܶܡ ܠܗܽܘܢ ܝܶܫܽܘܥ ܟܰܕ ܐܳܡܰܪ ܠܗܽܘܢ. ܠܡܳܢܳܐ ܢܟܰܠܬܽܘܢܳܢܝ. … ܡܶܟܺܝܠ ܬܶܗܘܽܘܢ ܠܺܝܛܺܝܢ܆ ܘܠܳܐ ܢܶܥܢܰܕ ܡܶܢܟܽܘܢ ܡܰܢ ܕܠܳܩܶܛ ܩܰܝ̈ܣܶܐ ܘܡܳܠܶܐ ܡܰܝܴ̈ܐ (ܝܫܘܥ ܒܪܢܘܢ ܛ: ܟܒ-ܟܓ). ܐܳܦ ܗܳܠܶܝܢ ܓܶܝܪ ܕܩܳܪܒܺܝܢ ܒܢܶܟܠܳܐ ܠܘܳܬ ܥܡܳܕܳܐ ܩܰܕܺܝܫܳܐ܆ ܒܗܰܘ ܛܽܘܦܣܳܐ ܕܰܒܢܱ̈ܝ ܓܶܒܥܽܘܢ ܡܳܐܢܷ̈ܐ ܒܠܳܝܷ̈ܐ ܘܙ̈ܩܶܐ ܕܰܡܨܰܪ̈ܝܳܢ ܡܩܰܪܒܺܝܢ ܠܡܳܪܝܳܐ. ܘܡܶܛܽܠܗܳܢܳܐ ܠܳܐ ܢܳܩܦܳܐ ܐܽܘܪܩܰܥܬܳܐ ܒܠܳܝܬܳܐ ܠܡܳܐܢܳܐ ܚܰܕܬܳܐ ܕܰܥܡܳܕܳܐ ܩܰܕܺܝܫܳܐ. ܘܠܳܐ ܢܰܦ̈ܫܳܬܳܐ ܕܰܡܨܰܪ̈ܝܳܢ ܘܰܡܒܰܙ̈ܥܳܢ ܠܰܚܛܺܝܬܳܐ܆ ܡܶܫܟ̈ܚܳܢ ܕܶܝܢ ܠܰܡܩܰܒܳܠܽܘ ܚܰܡܪܳܐ ܚܰܡܺܝܡܳܐ ܘܚܰܕܬܳܐ ܕܰܣܒܰܪܬܶܗ ܕܰܡܫܺܝܚܳܐ. ܢܒܺܝܳܐ ܓܶܝܪ ܐܶܡܰܪ ܥܰܠ ܫܶܬܩܳܐ ܕܽܐܘܡܳܢܽܘܬܳܐ ܢܟܺܝܠܬܳܐ ܕܗܳܠܶܝܢ:
ܡܶܛܽܠ ܕܫܶܬܩܶܬ ܒܠܺܝܘ ܓܰܪ̈ܡܰܝ: ܟܰܕ ܢܳܗܶܡ ܗ̱ܘܺܝܬ ܝܰܘܡܳܐ ܟܽܠܶܗ. ܐܰܝܟ ܗܰܘ ܓܶܝܪ ܕܥܰܠ ܗܳܠܶܝܢ ܡܶܬܶܐܒܶܠ ܘܢܳܗܶܡ܇ ܕܰܒܢܶܟܠܐܴ ܕܠܶܒܗܽܘܢ ܐܰܣܠܺܝܘ ܠܛܽܘܒܳܐ ܕܫܽܘܒܩܳܢܳܐ ܕܰܚܛܳܗܷ̈ܐ. ܘܝܽܘܩܪܳܐ ܣܳܡܳܗ̇ ܠܗܳܕܶܐ ܒܢܰܦܫܶܗ܆ ܕܟܰܕ ܥܠܰܘܗܝ ܝܰܩܺܝܪܳܐ ܘܰܫܒܺܝܚܳܐ. ܐܻܝܕܳܐ ܕܰܐܠܳܗܳܐ ܗܳܝ ܕܝܰܩܺܝܪܳܐ ܘܰܫܒܺܝܚܳܐ ܘܥܶܒܕܰܬ ܦܽܘܪܩܳܢܳܐ ܗܳܢܳܐ. ܐܰܝܠܶܝܢ ܕܠܳܐ ܩܰܪܶܒܘ ܒܗܰܝܡܳܢܽܘܬܳܐ܆ ܐܽܘܡܳܢܽܘܬܳܐ ܕܢܶܟܠܳܐ ܚܰܫܒܽܘܗ̇. ܒܪܰܡ ܕܶܝܢ ܠܗܳܕܶܐ ܕܝܶܩܪܰܬ ܥܠܰܘܗܝ ܐܺܝܕܳܐ ܕܰܐܠܳܗܳܐ܆ ܠܘܳܬ ܢܺܝܫܳܐ ܐܚܪܺܢܳܐ ܡܶܬܚܰܙܝܳܐ ܠܺܝ ܕܚܳܝܪܳܐ. ܟܰܕ ܐܶܪܰܡܝܳܐ ܢܒܺܝܳܐ ܐܳܡܰܪ ܗܘܳܐ: ܡܶܢ ܒܳܬܰܪ ܕܡܰܠܶܠ ܘܠܳܐ ܐܶܬܩܰܒܰܠ ܡܶܢ ܥܰܡܐܳ. ܐܶܡܪܶܬ ܠܰܡ ܕܠܳܐ ܐܶܬܕܰܟܪܺܝܘܗܝ ܘܠܳܐ ܐܶܡܰܠܶܠ ܬܽܘܒ ܒܰܫܡܶܗ. ܘܰܗܘܳܐ ܠܰܡ ܒܠܶܒܝ ܐܰܝܟ ܢܽܘܪܳܐ ܕܝܳܩܕܳܐ ܘܚܳܒܳܐ ܒܓܰܪ̈ܡܰܝ: ܘܰܒܥܺܝܬ ܠܰܡ ܠܰܡܣܰܝܒܳܪܽܘ ܘܠܳܐ ܐܶܫܟܚܶܬ (ܐܪܡܝܐ ܟ: ܛ). ܗܳܟܰܢܳܐ ܐܳܦ ܥܰܠ ܕܰܘܺܝܕ܇ ܝܶܩܪܰܬ ܥܠܰܘܗܝ ܐܺܝܕܳܐ ܕܰܐܠܳܗܳܐ ܐܺܝܡܳܡܳܐ ܘܠܺܠܝܳܐ܆ ܘܶܐܬܗܦܶܟ ܥܠܰܘܗܝ ܟܺܐܒܳܐ ܒܚܰܕܝܶܗ ܠܡܶܩܛܠܶܗ. ܘܠܳܐ ܡܶܫܟܰܚ ܗܘܳܐ ܡܣܰܝܒܰܪ ܝܰܩܕܳܢܳܐ ܕܚܰܡܺܝܡܽܘܬܳܗ̇ ܕܢܽܘܪܳܐ ܐܰܠܳܗܳܝܬܳܐ. ܐܶܡܰܪ ܓܶܝܪ:
ܘܶܐܬܗܦܶܟ ܠܰܡ ܒܚܰܕܺܝܝ ܟܺܐܒܳܐ ܠܡܶܩܛܠܰܢܝ. ܕܰܒܚܰܕܝܳܐ ܕܶܝܢ ܐܺܝܬܰܘܗܝ ܠܶܒܳܐ܆ ܘܓܰܠܝܳܐ ܗܝ ܠܟܽܠܢܳܫ. ܡܳܕܶܝܢ ܒܠܶܒܶܗ ܩܳܡܘ ܥܠܰܘܗܝ ܟܺܐܒܷ̈ܐ܆ ܕܰܐܝܠܶܝܢ ܕܠܳܐ ܡܰܘܕܶܝܢ ܒܰܚܛܳܗܰܝ̈ܗܽܘܢ. ܘܰܐܝܟ ܗܰܘ ܕܗܳܕܶܐ ܐܶܡܰܪ. ܕܰܚܠܳܦ ܗܳܠܶܝܢ ܠܡܳܢܳܐ ܒܳܠܰܥ ܐܢܳܐ. ܡܳܢܳܐ ܚܰܝܳܒ ܐܢܳܐ܆ ܕܰܚܠܳܦ ܡܰܣܟ̈ܠܳܢܶܐ ܐܶܬܢܰܓܰܕ. ܐܶܢܳܐ ܠܳܐ ܡܟܰܣܶܐ ܐܢܳܐ ܐܰܝܟ ܐܢܳܫ ܚܛܳܗܱ̈ܝ ܘܠܳܐ ܛܳܡܰܪ ܐܢܳܐ ܒܛܽܘܫܝܳܐ ܚܰܘ̈ܒܰܝ.
ܚܛܳܗܱ̈ܝ ܐܰܘܕܰܥܬܳܟ: ܘܣܰܟ̈ܠܘܳܬܝ ܠܐ ܟܰܣܺܝܬ ܡܶܢܳܟ. ܐܶܡܪܶܬ ܕܰܐܘܕܶܐ ܠܡܳܪܝܳܐ ܥܰܠ ܣܰܟ̈ܠܘܳܬܝ܆ ܘܰܐܢܬ ܫܳܒܶܩ ܐܰܢܬ ܠܺܝ ܟܽܠܗܽܘܢ ܚܛܳܗܱ̈ܝ. ܡܰܢ ܕܠܰܘ ܒܡܰܗܡܝܳܢܽܘܬܳܐ ܩܪܶܝܢ ܠܶܗ ܡܷ̈ܠܶܐ ܗܳܠܶܝܢ܆ ܕܠܳܐ ܚܶܪܝܳܢܳܐ ܡܶܬܬܦܺܝܣ: ܕܗܳܝ ܕܝܶܩܪܰܬ ܥܰܠ ܢܒܺܝܳܐ ܐܺܝܕܶܗ ܕܡܳܪܝܳܐ. ܒܗܳܠܶܝܢ ܐܶܬܦܰܫܩܰܬ ܘܶܐܬܢܰܗܪܰܬ. ܒܳܥܶܐ ܗܘܳܐ ܓܶܝܪ ܕܠܳܐ ܢܰܟܶܣ ܘܠܳܐ ܫܰܒܩܶܗ ܪܽܘܚܳܐ. ܘܡܶܛܽܠ ܕܠܰܘ ܙܰܒܢܳܐ ܗ̱ܘܳܐ܆ ܢܶܦܫܽܘܛ ܢܒܺܝܽܘܬܶܗ ܨܶܝܕ ܗܳܢܽܘܢ ܕܠܳܐ ܒܥܳܠܡܳܐ. ܫܰܩܠܶܗ ܠܝܽܘܩܪܳܐ ܕܺܐܝܕܳܐ ܐܰܠܳܗܳܝܬܳܐ ܡܶܢܶܗ܆ ܘܳܐܡܰܪ. ܕܰܚܛܳܗܱ̈ܝ ܐܰܘܕܰܥܬܳܟ ܘܣܰܟ̈ܠܘܳܬܝ. ܘܬܽܘܒ ܕܰܐܘܕܶܐ ܠܡܳܪܝܳܐ ܥܰܠ ܣܰܟ̈ܠܘܳܬܝ. ܘܬܽܘܒ ܡܚܰܘܶܐ ܕܗܰܘ ܕܰܥܒܰܕ ܗܳܕܶܐ܆ ܠܫܽܘܒܩܳܢܳܐ ܡܶܫܬܘܶܐ. ܘܰܐܢܬ ܠܰܡ ܡܳܐ ܕܰܐܘܕܰܥܬܳܟ ܣܰܟ̈ܠܘܳܬܝ ܘܦܰܪܣܺܝܬ ܘܰܐܘܕܺܝܬ ܚܛܳܗܱ̈ܝ ܩܕܳܡ ܛܰܝܒܽܘܬܳܐ ܕܰܥܡܳܕܳܟ܆ ܫܳܒܶܩ ܐܰܢܬ ܠܺܝ ܟܽܠܗܽܘܢ ܚܛܳܗܱ̈ܝ. ܗܳܕܶܐ ܕܢܰܘܕܰܥ ܐܢܳܫ ܚܛܳܗܷ̈ܐ ܕܢܰܦܫܶܗ ܩܕܳܡ ܕܰܝܳܢܳܐ ܗܳܕܶܐ ܐܺܝܬܶܝܗ̇܆ ܕܰܢܨܰܠܶܐ ܘܢܶܒܥܶܐ ܫܽܘܒܩܳܢܳܐ. ܘܝܰܬܺܝܪܳܐܝܺܬ ܡܳܐ ܕܡܶܬܚܙܶܐ ܓܰܙܳܐ ܕܰܦܬܺܝܚ ܘܺܐܝܬܰܘܗܝ ܙܰܒܢܳܐ ܡܩܰܒܠܳܐ. ܥܰܠܗܳܕܶܐ ܐܰܝܬܺܝ ܡܙܰܡܪܳܢܳܐ ܘܶܐܡܰܪ:
ܡܶܛܠܗܳܢܳܐ ܢܨܰܠܶܐ ܠܳܟ ܟܽܠܡܰܢ ܕܰܓܒܶܐ ܠܳܟ ܒܙܰܒܢܳܐ ܡܩܰܒܠܳܐ. ܪܺܝܫܺܝܬܳܐ ܕܰܓܒܰܝܴ̈ܐ ܕܶܐܬܓܒܺܝܘ ܒܙܰܒܢܳܐ ܡܩܰܒܠܳܐ ܠܰܡܨܰܠܳܝܽܘ܆ ܗܳܢܽܘܢ ܐܶܢܽܘܢ ܕܓܰܒܺܝ ܡܶܢ ܨܰܝ̈ܕܶܐ ܥܰܡܰܢܽܘܐܶܝܠ. ܘܰܥܒܰܕ ܐܶܢܽܘܢ ܨܰܝܴ̈ܕܶܐ ܕܰܒܢܰܝ̈ܢܳܫܳܐ. ܗܰܘ ܓܶܝܪ ܕܨܰܠܺܝ ܝܰܬܺܝܪ ܡܶܢ ܟܽܠܗܽܘܢ ܘܰܐܠܶܦ ܠܥܰܡ̈ܡܶܐ ܕܳܐܡܰܪ ܗܘܳܐ: ܕܗܳܫܳܐ ܙܰܒܢܳܐ ܡܩܰܒܠܳܐ: ܘܗܳܐ ܗܳܫܳܐ ܝܰܘܡܳܐ ܕܚܰܝܷ̈ܐ (ܒ ܩܘܪ̈ܢܬܝܐ ܘ: ܒ). ܗܳܢܳܐ ܡܰܠܦܳܢܳܐ ܚܰܟܺܝܡܳܐ ܒܳܬܰܪ ܗܳܠܶܝܢ܇ ܟܰܕ ܠܚܺܐܦܷ̈ܐ ܕܚܰܛܳܝܷ̈ܐ ܘܠܰܓܪ̈ܽܘܦܝܶܐ ܕܢܶܣܝܽܘ̈ܢܶܐ ܕܩܳܝܡܺܝܢ ܥܰܠ ܗܳܢܽܘܢ ܕܰܫܘܰܘ ܠܫܽܘܒܩܳܢܳܐ ܕܰܥܡܳܕܳܐ. ܒܳܥܶܐ ܕܢܰܘܕܰܥ ܐܳܡܰܪ.
ܚܺܐܦܳܐ ܕܶܝܢ ܕܡܰܝܴ̈ܐ ܣܰܓܺܝܷ̈ܐܐ ܠܘܳܬܶܗ ܠܳܐ ܢܶܬܩܰܪܒܽܘܢ. ܗܰܘ ܓܶܝܪ ܕܡܶܢ ܕܰܥܡܰܕ ܘܶܐܬܩܰܕܰܫ܆ ܒܢܳܐ ܒܰܝܬܶܗ ܥܰܠ ܫܽܘܥܳܐ ܕܗܰܝܡܳܢܽܘܬܳܐ. ܗܰܘ ܕܶܐܡܰܪ ܡܳܪܰܢ܆ ܕܰܢܚܶܬ ܡܶܛܪܳܐ ܗܰܘ ܕܚܰܢܦܽܘܬܳܐ: ܘܰܓܙܳܡܷ̈ܐ ܕܦܳܠܚܱ̈ܝ ܦܬܰܟܪ̈ܶܐ: ܘܶܐܬܰܘ ܡܶܢ ܪ̈ܳܕܽܘܦܶܐ ܢܰܗܪ̈ܰܘܳܬܳܐ ܕܢܶܣܝܽܘ̈ܢܶܐ: ܘܰܢܫܱ̈ܒܝ ܪ̈ܽܘܚܶܐ ܐܶܪ̈ܺܝܛܺܝܩܝܳܬܳܐ ܡܶܢ ܐܳܠܽܘ̈ܨܶܐ. ܘܠܳܐ ܡܶܬܩܰܪܒܺܝܢ ܠܚܰܝܠܳܐ ܕܢܰܦܫܶܗ. ܒܗܳܝ ܕܥܰܠ ܫܽܘܥܳܐ ܣܺܝܡܳܐ ܫܶܬܶܐܣܬܶܗ. ܘܠܳܐ ܡܶܬܪܗܶܒ ܡܶܢ ܓܪ̈ܽܘܦܝܶܐ ܕܰܡܙܺܝܥܺܝܢ ܙܰܝܢܳܐ ܠܩܽܘܒܠܶܗ. ܟܬܺܝܒ ܓܶܝܪ. ܕܡܰܝܴ̈ܐ ܣܰܓ̈ܝܐܶܐ ܠܐ ܡܶܫܟܚܺܝܢ ܠܰܡܕܰܥܳܟܽܘ ܪܶܚܡܬܳܐ: ܘܠܳܐ ܢܰܗܪ̈ܰܘܳܬܳܐ ܓܳܪܦܺܝܢ ܠܳܗ̇ (ܬܫܒ̈ܚܬ ܬܫܒ̈ܚܬܐ ܚ: ܙ). ܘܡܶܢ ܒܥܶܠܕ̈ܒܳܒܶܐ ܠܳܐ ܕܳܚܠܳܐ ܘܠܳܐ ܡܶܬܪܰܗܒܳܐ ܗܰܝܡܳܢܽܘܬܳܐ.
ܘܡܶܢ ܒܥܶܠܕ̈ܒܳܒܰܝ ܢܰܛܰܪܰܝܢܝ. ܠܳܐ ܠܰܡ ܡܶܫܟܚܳܐ ܕܠܳܐ ܢܺܐܬܶܐ ܢܶܣܝܽܘܢܳܐ ܒܳܬܰܪ ܛܳܒܬܳܐ ܕܫܽܘܒܩܳܢܳܐ. ܐܶܠܳܐ ܐܺܝܬ ܠܶܗ ܠܗܰܘ ܕܥܳܡܶܕ ܣܶܬܳܪܳܐ: ܘܢܽܘܛܳܪܳܐ: ܚܰܝܠܳܐ: ܘܫܽܘܒܚܳܐ: ܘܦܽܘܪܩܳܢܳܐ ܕܰܐܠܳܗܳܐ ܕܰܟܪܺܝܟ ܠܶܗ ܘܰܡܨܰܠܶܐ. ܐܶܡܰܪ ܓܶܝܪ ܢܒܺܝܳܐ.
ܐܰܢܬ ܣܰܬܰܪܰܝܢܝ. ܘܶܐܡܰܪ: ܕܫܽܘܒܚܳܐ ܘܦܽܘܪܩܳܢܳܐ ܐܰܟܪܶܟܰܝܢܝ ܕܶܐܣܬܰܟܠܳܟ. ܘܰܐܘܕܥܳܟ ܐܽܘܪܚܳܐ ܕܬܺܐܙܰܠ ܒܳܗ̇. ܘܶܐܣܺܝܡ ܥܰܝ̈ܢܰܝ ܥܠܰܝܟ. ܐܽܘܪܚܳܐ ܕܶܝܢ ܗܽܘܝܽܘ ܡܳܪܰܢ܇ ܗܰܘ ܕܶܐܡܰܪ. ܕܶܐܢܳܐ ܐܢܳܐ ܐܽܘܪܚܳܐ (ܝܘܚܢܢ ܝܕ: ܘ). ܘܠܰܘ ܐܽܘܪܚܳܐ ܒܰܠܚܽܘܕ. ܐܶܠܳܐ ܐܳܡܰܪ. ܐܶܢܳܐ ܐܢܳܐ ܢܽܘܗܪܶܗ ܕܥܳܠܡܳܐ (ܝܘܚܢܢ ܚ: ܝܒ). ܡܳܕܶܝܢ ܗܽܘܝܽܘ ܐܽܘܪܚܳܐ ܕܰܐܝܠܶܝܢ ܕܶܐܬܦܪܶܩܘ ܒܺܐܝܕܶܗ ܒܰܥܡܳܕܳܐ ܩܰܕܺܝܫܳܐ. ܘܒܳܬܰܪ ܗܳܠܶܝܢ ܡܰܪܬܶܐ ܢܒܺܝܳܐ ܠܰܐܝܠܶܝܢ ܕܰܠܗܳܢܳܐ ܛܽܘܒܳܐ ܕܫܽܘܒܩܳܢܳܐ ܐܶܫܬܘܺܝܘ. ܕܠܳܐ ܢܶܬܕܰܡܽܘܢ ܠܗܰܘ ܥܰܡܳܐ ܩܫܶܐ ܩܕܳܠܐܴ. ܘܠܐܴ ܒܰܩܛܺܝܪܳܐ ܢܶܦܠܚܽܘܢ ܒܢܳܡܽܘ̈ܣܰܘܗܝ ܕܰܨܠܺܝܒܳܐ܆ ܐܶܠܳܐ ܒܨܶܒܝܳܢܳܐ.
ܘܠܳܐ ܠܰܡ ܬܶܗܘܽܘܢ ܐܰܝܟ ܣܽܘܣܝܳܐ ܘܰܐܝܟ ܟܽܘܕܰܢܝܳܐ ܕܠܳܐ ܚܰܟܺܝܡܺܝܢ܆ ܕܒܰܦܓܽܘܕܬܳܐ ܡܟܰܒܫܺܝܢ ܠܗܽܘܢ ܡܶܢ ܛܰܠܝܽܘܬܗܽܘܢ. ܘܠܳܐ ܩܳܪܒܺܝܢ ܠܘܳܬܶܗ. ܣܽܘܣܝܳܐ ܓܶܝܪ ܘܟܽܘܕܰܢܝܳܐ ܡܟܰܢܶܐ ܠܶܗ ܠܥܰܡܳܐ ܩܫܶܐ ܩܕܳܠܐܴ܇ ܥܰܠܗܳܝ ܕܰܒܢܳܡܽܘܣܳܐ ܕܰܩܛܺܝܪܳܐ ܠܡܰܚܣܶܢ ܟܰܦ ܨܰܘܪܶܗ ܘܶܐܫܬܰܥܒܰܕ ܠܢܺܝܪܳܐ ܕܦܽܘ̈ܩܕܳܢܶܐ. ܟܰܕ ܡܶܬܬܠܶܝܢ ܗܘܰܘ ܒܦܽܘܡܶܗ ܦܓܽܘ̈ܕܶܐ ܕܕܺܝ̈ܢܶܐ ܥܰܡ ܠܰܘ̈ܛܳܬܳܐ. ܘܟܰܕ ܒܳܥܶܛ ܘܰܡܬܰܒܰܪ ܢܺܝܪܶܗ: ܘܕܳܐܶܫ ܗܘܳܐ ܥܰܠ ܬܚܽܘ̈ܡܶܐ ܕܟܺܐܢܽܘܬܳܐ ܕܣܺܝܡܺܝܢ ܠܶܗ. ܘܠܳܐ ܡܰܠܝܳܐܝܺܬ ܩܪܶܒ ܠܘܳܬ ܐܰܠܳܗܳܐ. ܐܶܠܳܐ ܐܰܢܬܽܘܢ ܠܗܳܠܶܝܢ ܠܳܐ ܬܶܬܕܰܡܽܘܢ. ܐܶܠܳܐ ܡܶܢ ܚܽܘܒܳܐ ܦܠܽܘܚܘ ܐܰܢܬܽܘܢ ܥܰܡ ܡܳܪܟܽܘܢ. ܘܰܥܪܽܘܩܘ ܡܶܢ ܟܺܐܒܷ̈ܐ ܕܥܳܒܕܺܝܢ ܦܓܽܘ̈ܕܶܐ ܒܦܽܘܡܳܐ ܕܗܳܢܽܘܢ ܕܠܳܐ ܡܶܠܬܳܐ.
ܡܶܛܽܠ ܕܣܰܓܺܝܐܻܝܢ ܐܶܢܽܘܢ ܟܺܐܒܰܘ̈ܗܝ ܕܥܰܘܳܠܳܐ. ܘܠܰܝܬ ܐܳܣܝܽܘܬܳܐ ܠܗܰܘ ܕܠܳܐ ܡܰܘܕܶܐ ܒܰܚܛܳܗܘ̈ܗܝ.
ܘܰܐܝܢܳܐ ܕܶܝܢ ܕܰܡܣܰܒܰܪ ܒܡܳܪܝܳܐ܆ ܛܰܝܒܽܘܬܳܐ ܬܶܚܕܪܺܝܘܗܝ. ܚܕܰܘ ܙܰܕܺܝ̈ܩܶܐ ܘܶܐܬܒܰܣܡܘ ܒܡܳܪܝܳܐ: ܘܫܰܒܚܽܘܗܝ ܟܽܠ ܬܪ̈ܺܝܨܰܝ ܠܶܒܳܐ. ܕܰܦܪܰܩܟܽܘܢ ܡܶܢ ܩܛܺܝܪܶܗ ܕܢܳܡܽܘܣܳܐ. ܘܝܰܗܒ ܠܟܽܘܢ ܫܽܘܒܩܳܢܳܐ ܕܰܚܛܳܗܷ̈ܐ ܕܠܳܐ ܥܰܡܠܳܐ ܕܰܚܠܳܦܰܘܗܝ ܕܠܶܗ ܫܽܘܒܚܳܐ ܠܥܳܠܡܺܝܢ܀
ܡܙܡܘܪܐ ܕܬܠܬܝܢ ܘܬܠܬܐ
ܕܥܰܠ ܟܽܠܡܶܕܶܡ ܒܗܰܝܡܳܢܽܘܬܳܐ ܩܳܐܶܡ: ܘܥܰܠ ܫܽܘܘܕܳܥܳܐ ܕܰܬܠܺܝܬܳܝܽܘܬܳܐ: ܘܥܰܠ ܒܪܺܝܬܳܐ ܕܥܶܠܳܝܷ̈ܐ ܘܰܕܬܰܚܬܳܝܷ̈ܐ: ܘܕܰܒܝܰܕ ܡܶܠܬܶܗ ܕܰܐܠܳܗܳܐ ܐܶܬܒܪܺܝܘ ܘܶܐܬܩܰܝܰܡܘ ܡܶܢ ܠܳܐ ܡܶܕܶܡ ܡܶܢ ܫܽܘܪܳܝܳܐ.
ܐܶܠܽܘ ܐܰܝܟ ܡܫܽܘܚܬܳܐ ܕܚܰܝܠܳܐ ܕܦܶܬܓ̈ܡܶܐ ܕܺܐܝܬ ܒܟܽܠ ܡܰܙܡܽܘܪܳܐ ܡܳܬܰܚ ܗܘܺܝܬ ܡܶܠܬܳܐ ܥܠܰܝܗܽܘܢ܆ ܟܒܰܪ ܕܶܝܢ ܥܕܰܡܳܐ ܠܗܳܫܳܐ ܠܳܐ ܩܰܪܺܝܒ ܗܘܺܝܬ ܕܶܐܡܰܛܶܐ ܠܘܳܬ ܫܽܘܠܳܡܳܐ ܕܦܶܬܓܳܡܷ̈ܐ ܕܗܰܘ ܡܰܙܡܽܘܪܳܐ ܩܰܕܡܳܝܳܐ. ܘܠܳܐ ܐܳܡܰܪ ܐܢܳܐ ܗܳܕܶܐ: ܐܶܠܳܐ ܘܠܳܐ ܠܣܳܟܳܐ ܕܚܰܕ ܡܶܢ ܓܶܠܝܳܢܷ̈ܐ ܕܪܽܘܚܳܐ ܡܰܘܦܶܝܢܰܢ܆ ܟܽܠܚܰܕ ܡܶܢ ܦܶܬܓܳܡܷ̈ܐ ܗܳܠܶܝܢ ܕܰܐܡܺܝܪ ܠܪܽܘܚܳܐ܆ ܥܳܒܰܪ ܗܽܘ ܒܚܰܝܠܶܗ ܠܟܽܠ ܡܰܟܬܒܳܢܷ̈ܐ ܘܰܠܬܰܫܥ̈ܝܳܬܗܽܘܢ. ܘܝܰܬܺܝܪܳܐܝ̣ܬ ܟܰܕ ܚܳܙܶܐ ܐܢܳܐ ܕܠܰܘ ܟܽܠܢܳܫ ܨܳܒܶܐ ܒܥܰܡܠܳܐ ܘܰܒܕܽܘܥܬܳܐ ܢܶܒܥܶܐ ܠܥܰܡܺܝܩܽܘܬ ܣܽܘ̈ܟܳܠܶܐ ܢܰܗܺܝܪ̈ܶܐ ܕܰܡܛܰܫܶܝܢ ܒܬܶܫܒ̈ܚܳܬܳܐ ܗܳܠܶܝܢ ܩܰܕܺܝ̈ܫܳܬܳܐ. ܒܟܰܪ̈ܝܳܬܳܐ ܥܰܠ ܐܰܪ̈ܺܝܟܳܬܳܐ ܡܰܟܬܶܒ ܐܢܳܐ. ܡܶܛܽܠ ܕܢܶܗܘ̈ܝܳܢ ܕܠܺܝ̈ܠܳܢ ܠܩܳܪ̈ܽܘܝܶܐ ܠܡܰܕܪܳܟܽܘ ܚܰܝܠܳܐ ܕܐܪ̈ܳܙܰܝܗܽܘܢ. ܗܳܠܶܝܢ ܐܶܡܪܶܬ ܒܪܺܝܫ ܐܽܘܪܚܳܐ ܕܦܽܘܫܳܩܳܐ ܕܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܰܬܠܳܬܳܐ܇ ܥܰܠ ܕܚܳܐܰܪ ܐܢܳܐ ܒܥܽܘܡܩܳܐ ܘܰܒܦܰܬܝܽܘܬܳܐ ܕܐܪ̈ܳܙܶܐ ܗܳܠܶܝܢ ܕܰܛܡܺܝܪܺܝܢ ܒܳܗ̇. ܡܣܰܪܗܒܳܐ ܠܺܝ ܬܽܘܒ ܥܰܡ ܗܳܠܶܝܢ ܡܰܐܝ̣ܢܽܘܬܳܐ ܕܰܐܝܠܶܝܢ ܕܠܳܐ ܚܳܕܶܝܢ ܒܡܶܬܚܳܐ ܕܡܶܠܬܳܐ ܐܰܠܳܗܳܝܬܳܐ. ܗܳܠܶܝܢ ܕܒܳܥܶܝܢ ܕܡܶܢ ܠܘܳܬܗܽܘܢ ܐܶܠܽܘ ܡܰܨܝܳܐ ܕܢܶܗܘܶܐ ܦܽܘܫܳܩܳܐ ܟܪܶܐ ܡܶܢ ܐܪ̈ܳܙܶܐ. ܘܡܷ̈ܠܶܐ ܟܰܪ̈ܝܳܬܳܐ ܨܳܒܶܝܢ ܗܘܰܘ ܕܢܶܫܡܥܽܘܢ ܥܰܠ ܓܶܠܝܴ̈ܢܶܐ ܐܰܪ̈ܺܝܟܶܐ. ܘܡܶܟܺܝܠ ܢܶܬܩܰܪܰܒ ܠܫܽܘܪܳܝܳܐ ܕܡܰܙܡܽܘܪܳܐ ܗܳܢܳܐ ܕܰܬܠܳܬܺܝܢ ܘܰܬܠܳܬܳܐ. ܥܳܐܶܠ ܓܶܝܪ ܒܡܶܢܝܳܢܳܐ ܒܳܬܰܪ ܗܰܘ ܕܰܐܘܕܰܥܢܰܢ ܕܰܐܡܺܝܪ ܡܶܛܽܠ ܫܽܘܒܩܳܢܳܐ ܕܰܗܘܳܐ ܠܥܰܡܳܐ ܒܰܥܡܳܕܳܐ. ܘܶܐܬܚܰܫܒܰܬ ܠܶܗ ܙܰܕܺܝܩܽܘܬܳܐ ܕܠܳܐ ܥܒܴ̈ܕܶܐ. ܟܰܕ ܗܳܟܺܝܠ ܡܰܪܬܶܐ ܠܕܰܐܝܟ ܗܳܠܶܝܢ ܡܙܰܡܪܳܢܳܐ܆ ܡܰܩܶܦ ܬܶܫܒܽܘܚܬܳܐ ܠܘܳܬܗܽܘܢ ܘܳܐܡܰܪ:
ܫܰܒܰܚܘ ܙܰܕܺܝ̈ܩܶܐ ܠܡܳܪܝܳܐ: ܘܠܰܬܪ̈ܺܝܨܶܐ ܝܳܐܝܳܐ ܬܶܫܒܽܘܚܬܳܐ. ܠܡܳܢܳܐ ܕܶܝܢ ܐܶܡܰܪ ܙܰܕܺܝ̈ܩܶܐ ܘܰܬܪ̈ܺܝܨܶܐ ܢܫܰܒܚܽܘܢ ܠܡܳܪܝܳܐ. ܡܶܢ ܥܰܘܴ̈ܠܶܐ ܕܶܝܢ ܘܡܶܢ ܚܰܛܳܝܷ̈ܐ ܐܰܦܢܝܳܗ̇ ܠܬܶܫܒܽܘܚܬܳܐ. ܗܳܠܶܝܢ ܐܰܪܰܐ ܕܰܥܡܺܝܠܺܝܢ ܒܰܚܛܳܗܷ̈ܐ܆ ܢܶܫܠܽܘܢ ܠܗܽܘܢ ܡܶܢ ܬܶܫܒܽܘܚܬܳܐ. ܐܺܝܢ ܠܰܡ ܙܰܕܺܝ̈ܩܶܐ ܘܰܬܪ̈ܺܝܨܶܐ ܢܫܰܒܚܽܘܢ ܘܚܰܛܳܝܷ̈ܐ ܢܶܬܓܰܘܣܽܘܢ ܒܰܬܝܳܒܽܘܬܳܐ. ܘܬܽܘܒ ܐܶܡܰܪ:
ܐܰܘܕܰܘ ܠܶܗ ܒܟܶܢܳܪܳܐ: ܘܰܒܩܺܝܬܳܪܳܐ ܕܰܥܣܰܪ ܡܶܢܺܝ̈ܢ ܙܡܰܪܘ ܠܶܗ. ܩܺܝܬܳܪܳܐ ܕܰܥܣܰܪ ܡܶܢܷ̈ܐ ܐܺܝܬܰܘܗܝ ܒܰܪܢܳܫܳܐ܇ ܕܰܫܘܶܝܢ ܪ̈ܶܓܫܰܘܗܝ ܓܰܘܴ̈ܝܶܐ ܘܒܰܪ̈ܳܝܶܐ. ܘܰܚܠܺܝܡ ܘܰܡܫܰܪܰܪ ܒܢܰܦܫܳܐ ܘܰܒܦܰܓܪܳܐ. ܘܙܳܐܰܥ ܟܽܠܶܗ ܒܦܳܪܽܘܫܽܘܬܳܐ ܕܪܽܘܚ. ܒܗܰܘ ܛܽܘܦܣܳܐ ܕܺܐܝܬ ܪ̈ܶܓܫܶܐ ܚܰܡܫܳܐ ܒܒܰܪܢܳܫܳܐ ܗܳܢܳܐ ܒܰܪܳܝܳܐ. ܕܺܐܝܬܰܝܗܽܘܢ ܚܙܳܬܳܐ: ܘܫܶܡܥܳܐ: ܘܣܰܘܩܳܐ: ܘܰܛܥܳܡܬܳܐ܆ ܘܓܶܫܬܳܐ. ܗܳܟܰܢܳܐ ܓܶܝܪ ܡܶܣܬܰܟܠܺܝܢܰܢ ܕܺܐܝܬ ܐܳܦ ܠܢܰܦܫܳܐ ܚܰܡܫܳܐ ܪ̈ܶܓܫܶܐ ܓܰܘܳܝܷ̈ܐ ܘܡܶܬܝܰܕܥܳܢܷ̈ܐ: ܕܰܒܗܽܘܢ ܡܥܳܕܳܐ ܠܡܶܦܪܰܫ ܘܠܰܡܩܰܒܳܠܽܘ ܡܰܪ̈ܓܫܳܢܘܳܬܳܐ ܕܠܳܚ̈ܡܳܢ ܠܩܽܘܝܳܡܳܐ ܕܚܰܝܷ̈ܝܗ̇. ܠܗܳܠܶܝܢ ܪ̈ܶܓܫܶܐ ܚܰܡܫܳܐ ܕܡܶܬܥܰܦܦܺܝܢ ܘܗܳܘܶܝܢ ܥܶܣܪܳܐ܆ ܥܣܰܪ ܡܶܢܷ̈ܐ ܕܩܺܝܬܳܪܳܐ ܫܰܡܰܗ ܐܶܢܶܝܢ ܡܙܰܡܪܳܢܳܐ. ܘܰܕܠܳܐ ܗܳܠܶܝܢ܆ ܐܢܳܫ ܠܳܐ ܡܶܫܟܰܚ ܕܰܢܫܰܒܰܚ ܬܶܫܒܽܘܚܬܳܐ ܚܕܰܬܳܐ ܠܥܳܒܽܘܕܳܐ. ܡܶܛܠܗܳܢܳܐ ܐܶܡܰܪ ܢܒܺܝܳܐ: ܕܡܳܐ ܕܰܬܪܺܝܨ ܩܺܝܬܳܪܳܐ ܫܰܦܺܝܪ:
ܫܰܒܰܚܘ ܠܶܗ ܬܶܫܒܽܘܚܬܳܐ ܚܕܰܬܳܐ. ܐܶܠܳܐ ܬܰܘܕܺܝܬܳܐ ܕܥܰܡܳܐ ܕܰܩܢܶܐ ܚܽܘܕܳܬܳܐ ܒܝܰܕ ܡܳܪܰܢ܆ ܐܰܝܟ ܐܢܳܫ ܢܺܐܡܰܪ. ܥܰܠ ܬܶܫܒܽܘܚܬܳܐ ܕܥܶܒܪܰܬ ܠܳܐ ܬܶܬܟܶܠ. ܗܳܝ ܥܶܒܪܰܬ ܠܳܗ̇ ܥܰܡ ܥܶܕܳܢܳܗ̇. ܐܶܠܳܐ ܐܰܝܟ ܕܥܶܕܳܢܷ̈ܐ ܘܙܰܒ̈ܢܶܐ ܕܰܡܩܰܒܶܠ ܐܰܢܬ܆ ܚܰܕ̈ܬܶܐ ܐܶܢܽܘܢ. ܒܗܳܝ ܕܠܳܐ ܦܓܺܝܥ ܗܘܳܐ ܠܳܟ ܒܗܽܘܢ ܘܩܰܒܶܠܬ ܐܶܢܽܘܢ. ܗܳܟܰܢܳܐ ܬܶܫܒ̈ܚܳܬܳܐ ܚܰܕ̈ܬܳܬܳܐ ܒܥܶܕܳܢܷ̈ܐ ܚܰܕ̈ܬܶܐ ܩܰܪܶܒ ܠܰܐܠܳܗܳܐ.
ܘܶܐܡܰܪ ܫܰܦܺܝܪ ܒܩܳܠܳܐ. ܡܶܛܠ ܕܰܬܪܺܝܨ ܗܽܘ ܦܶܬܓܳܡܶܗ ܕܡܳܪܝܳܐ: ܘܟܽܠܗܽܘܢ ܥܒܳܕܰܘ̈ܗܝ ܒܗܰܝܡܳܢܽܘܬܳܐ. ܟܽܠ ܡܶܕܶܡ ܕܶܐܬܥܒܶܕ ܡܶܢ ܐܰܠܳܗܳܐ܆ ܒܗܰܝܡܳܢܽܘܬܳܐ ܡܶܬܩܰܒܰܠ ܗ̱ܽܘ: ܕܠܰܐܠܳܗܳܐ ܥܒܺܝܕ. ܒܗܳܝ ܓܶܝܪ ܕܰܥ̈ܒܳܕܶܐ ܕܰܐܠܗܳܐ ܓܠܶܝܢ ܐܶܢܘܢ. ܘܥܳܒܽܘܕܳܐ ܠܳܐ ܡܶܬܚܙܶܐ ܗܽܘ. ܒܗܰܝܡܳܢܽܘܬܳܐ ܡܰܫܪܺܝܢܰܢ: ܕܰܐܠܗܳܐ ܐܝܬܰܘܗܝ܇ ܡܶܢ ܥܒܳܕܰܘ̈ܗܝ. ܟܰܕ ܩܳܪܒܳܐ ܢܰܦܫܳܐ ܠܡܶܬܒܰܩܳܝܽܘ ܒܬܶܐܘܳܪܺܝܰܐ ܕܡܰܕܥܳܐ ܒܗܳܠܶܝܢ ܕܡܶܢ ܐܰܠܳܗܳܐ ܫܩܰܠܝ̈ ܫܽܘܪܳܝܳܐ ܕܢܺܐܬܝܴ̈ܢ ܠܰܗܘܳܝܳܐ. ܒܕܺܝ̈ܢܶܐ ܙܰܕܺܝ̈ܩܶܐ ܕܠܳܐ ܡܶܨܛܠܶܝܢ. ܘܥܳܒܽܘܕܳܐ ܪܳܚܶܡ ܠܗܽܘܢ.
ܪܳܚܶܡ ܠܰܡ ܙܰܕܺܝܩܽܘܬܳܐ ܘܕܺܝܢܳܐ. ܠܡܳܢܳܐ ܥܰܡ ܙܰܕܺܝܩܽܘܬܳܐ ܘܕܺܝܢܳܐ܆ ܠܳܐ ܡܩܰܘܶܐ ܒܥܶܠܕܒܳܒܳܐ ܕܚܰܝܱ̈ܝܢ܆ ܡܶܢ ܗܳܝ ܕܢܰܩܪܶܒ ܠܽܘܩܒܰܠ ܛܳܒܴ̈ܬܳܐ ܠܳܐ ܫܳܠܶܐ. ܘܥܰܠܗܳܕܶܐ ܠܳܐ ܡܶܫܟܚܺܝܢܰܢ ܕܢܶܩܢܶܐ ܙܰܕܺܝܩܽܘܬܳܐ ܕܠܳܐ ܕܺܝܢܳܐ. ܘܥܰܠܗܳܕܶܐ ܐܳܦ ܐܶܪܰܡܝܳܐ ܡܰܘܕܰܥ܆ ܕܰܐܝܟ ܠܰܡ ܚܰܓܠܳܐ ܕܩܳܪܶܐ ܠܰܐܝܠܶܝܢ ܕܠܳܐ ܝܺܠܶܕ܆ ܗܳܟܰܢܳܐ ܟܽܠ ܕܰܩܢܶܐ ܥܽܘܬܪܳܐ ܕܠܳܐ ܒܕܺܝܢܳܐ ܒܦܶܠܓܽܘܬ ܝܰܘ̈ܡܰܘܗܝ ܢܶܫܒܩܺܝܘܗܝ. ܘܚܰܪܬܶܗ ܡܨܰܥܪܳܐ ܬܶܗܘܶܐ (ܐܪܡܝܐ ܝܙ: ܝܐ). ܡܳܕܶܝܢ ܪܳܚܶܡ ܠܳܗ̇ ܡܳܪܝܳܐ ܠܢܰܦܫܳܐ. ܡܳܐ ܕܚܳܙܶܐ ܕܥܳܒܕܳܐ ܕܺܝܢܳܐ ܠܽܘܩܒܰܠ ܒܥܶܠܕ̈ܒܳܒܶܐ ܕܚܰܝܷ̈ܝܗ̇܆ ܦܳܪܶܣ ܛܰܝܒܽܘܬܶܗ ܘܰܡܣܰܬܰܪ ܠܳܗ̇.
ܛܰܝܒܽܘܬܶܗ ܓܶܝܪ ܕܡܳܪܝܳܐ ܡܰܠܝܳܐ ܐܰܪܥܳܐ. ܘܒܳܗ̇ ܡܟܰܣܶܐ ܥܰܠ ܥܰܒܕܰܘ̈ܗܝ ܒܳܬܰܪ ܗܳܕܶܐ. ܡܳܢܳܐ ܨܳܒܶܐ ܢܺܐܡܰܪ. ܥܰܠ ܒܪܺܝܬܳܐ ܕܥܶܠܳܝܷ̈ܐ ܘܥܰܠ ܬܽܘܩܳܢܳܐ ܕܰܫܡܰܝܳܐ ܡܶܬܢܰܒܶܐ. ܝܰܬܺܝܪܳܐܝ̣ܬ ܕܶܝܢ ܫܽܘܘܕܳܥܳܐ ܕܰܬܠܺܝܬܳܝܽܘܬܳܐ ܡܰܥܶܠ܆
ܒܡܶܠܬܶܗ ܠܰܡ ܕܡܳܪܝܳܐ ܐܶܬܥܒܶܕ ܫܡܰܝܳܐ: ܘܰܒܪܽܘܚܳܐ ܕܦܽܘܡܶܗ ܟܽܠܗܽܘܢ ܚܰܝ̈ܠܰܘܳܬܶܗ. ܢܰܗܺܝܪܳܐܝܺܬ ܚܰܘܺܝ ܐܶܢܽܘܢ ܠܰܡܫܰܒܚܳܢܷ̈ܐ ܕܒܶܝܬ ܐܰܕܽܘܢܰܝ. ܗܳܢܽܘܢ ܕܦܳܩܕܺܝܢ ܗܘܰܘ ܥܰܠ ܡܰܛܰܪܬܳܐ ܕܬܶܫܒܽܘܚܬܳܐ ܗܳܝ ܢܳܡܽܘܣܳܝܬܳܐ: ܐܪܳܙܳܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ. ܘܡܳܢܳܐ ܐܳܡܰܪ ܐܢܳܐ ܐܪܳܙܳܐ. ܐܰܝܟܳܐ ܕܰܬܠܳܬܳܐ ܐܰܘܕܰܥ ܕܠܳܐ ܬܰܚܦܺܝܬܳܐ. ܒܡܶܠܬܶܗ ܕܡܳܪܝܳܐ ܐܶܬܥܒܶܕܘ ܫܡܰܝܴ̈ܐ. ܝܰܗܒ ܠܰܐܒܳܐ ܫܡܳܐ ܕܡܳܪܽܘܬܳܐ. ܘܝܰܗܒ ܠܰܒܪܳܐ ܫܡܳܐ ܕܡܶܠܬܳܐ. ܘܶܐܡܰܪ ܒܡܶܠܬܳܐ ܕܡܳܪܝܳܐ ܐܶܬܥܒܶܕ ܫܡܰܝܳܐ. ܠܳܐ ܪܰܚܺܝܩܺܝܢ ܩܴ̈ܠܶܐ ܗܳܠܶܝܢ ܡܶܢ ܗܳܝ ܕܰܟܬܰܒ ܝܽܘܚܰܢܳܢ ܫܠܺܝܚܳܐ. ܕܰܒܪܺܝܫܺܝܬ ܐܺܝܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܺܝܬܰܘܗܝ ܗܘܳܐ ܠܘܳܬ ܐܰܠܳܗܳܐ. ܘܟܽܠ ܒܺܐܝܕܶܗ ܗ̣ܘܳܐ. ܘܒܶܠܥܳܕܰܘܗܝ ܐܳܦܠܳܐ ܚܕܳܐ ܗ̣ܘܳܬ ܡܶܕܶܡ ܕܰܗܘܳܐ (ܝܘܚܢܢ ܐ: ܐ-ܓ). ܘܠܳܐ ܢܽܘܟܪܳܝܺܝܢ ܗܳܠܶܝܢ ܠܰܐܝܠܶܝܢ ܕܰܟܬܰܒ ܦܰܘܠܽܘܣ ܠܩܽܘ̈ܠܰܣܳܝܶܐ. ܕܟܽܠܡܶܕܶܡ ܒܺܐܝܕܶܗ ܘܒܶܗ ܐܶܬܒܪܺܝ. ܘܗܽܘܝܽܘ ܕܡܶܢ ܩܕܳܡ ܟܽܠ: ܘܟܽܠܡܶܕܶܡ ܒܶܗ ܩܳܐܶܡ (ܩܘ̈ܠܣܝܐ ܐ: ܝܘ-ܝܙ). ܡܶܢ ܗܳܠܶܝܢ ܝܳܠܦܺܝܢܰܢ: ܕܚܰܕ ܗ̱ܽܘ ܪܽܘܚܳܐ ܕܙܰܡܰܪ ܐܶܢܽܘܢ ܠܗܳܠܶܝܢ ܩ̈ܠܶܐ ܩܰܕܺܝ̈ܫܶܐ. ܠܰܘ ܒܰܠܚܽܘܕ ܒܰܫܠܺܝ̈ܚܶܐ܆ ܐܶܠܳܐ ܒܰܢܒ̈ܝܶܐ ܩܰܕܺܝ̈ܫܶܐ. ܐܳܦ ܫܰܦܺܝܪ ܐܶܬܦܰܫܩܰܬ ܗܳܪܟܳܐ ܬܠܺܝܬܳܝܽܘܬܳܐ ܕܠܳܐ ܒܽܘܨܳܪܳܐ. ܐܶܢ ܡܳܪܝܳܐ ܥܒܰܕ ܕܗܽܘܝܽܘ ܐܰܒܳܐ܆ ܘܰܒܡܶܠܬܳܐ ܘܰܒܪܽܘܚܳܐ ܡܩܺܝܡ ܠܗܳܠܶܝܢ ܕܢܶܗܘ̈ܝܳܢ܇ ܗܳܐ ܡܳܕܶܝܢ ܠܰܝܬ ܐܶܡܰܬܝ ܕܠܰܝܬ ܬܠܺܝܬܳܝܽܘܬܳܐ. ܥܰܠ ܦܽܘܪܫܳܢܳܐ ܕܰܩܢܽܘ̈ܡܶܐ ܕܠܳܐ ܦܣܺܝܩ: ܘܥܰܠ ܚܽܘܠܛܳܢܳܐ ܕܰܟܝܳܢܳܐ ܕܠܳܐ ܒܠܺܝܠ: ܘܥܰܠ ܕܰܚܕܳܐ ܗ̱ܝ ܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܰܚܕܳܐ ܗ̱ܝ ܡܰܥܒܕܳܢܽܘܬܳܐ ܕܺܐܝܬܽܘܬܳܐ: ܘܰܚܕܳܐ ܣܳܥܽܘܪܽܘܬܳܐ ܕܰܐܠܗܽܘܬܳܐ: ܘܰܕܡܶܢ ܐܰܒܳܐ ܫܳܩ̈ܠܳܢ ܙܰܘ̈ܥܶܐ ܐܰܝܠܶܝܢ ܕܳܐܬܝܴ̈ܢ ܠܰܗܘܳܝܳܐ: ܘܰܒܝܰܕ ܒܪܳܐ ܘܪܽܘܚܳܐ ܩܰܕܺܝܫܳܐ ܢܳܦ̈ܩܳܢ ܟܽܠܗܶܝܢ ܠܰܥܒܳܕܳܐ. ܘܰܐܝܟܰܢܳܐ ܕܠܐܴ ܐܺܝܬ ܠܗܰܘܢܳܐ ܕܰܢܦܽܘܫ ܡܶܢ ܡܶܠܬܳܐ: ܘܠܳܐ ܡܶܠܬܳܐ ܕܰܬܫܰܢܶܐ ܡܶܢ ܢܰܦܫܳܐ: ܘܠܳܐ ܠܢܰܦܫܳܐ ܕܬܰܪܚܶܩ ܡܶܢ ܡܶܠܬܳܐ ܘܗܰܘܢܳܐ܆ ܗܳܟܰܢܳܐ ܐܳܦ ܗܳܠܶܝܢ ܩܢܽܘ̈ܡܶܐ ܩܰܕܺܝ̈ܫܶܐ ܕܰܬܠܺܝܬܳܝܽܘܬܳܐ ܐܺܝܬ ܠܗܽܘܢ ܡܶܬܪܰܚܩܳܢܽܘܬܳܐ ܐܰܘ ܫܽܘܢܳܝܳܐ ܚܰܕ ܡܶܢ ܠܘܳܬ ܚܰܕ. ܠܰܝܬ ܓܶܝܪ ܠܰܐܒܳܐ ܕܰܢܦܽܘܫ ܡܶܢ ܒܪܳܐ܇ ܘܠܳܐ ܠܡܶܠܬܳܐ ܕܢܶܪܚܰܩ ܡܶܢ ܐܰܒܳܐ܇ ܘܠܳܐ ܠܪܽܘܚܳܐ ܕܢܶܬܦܣܶܩ ܡܶܢ ܐܰܒܳܐ ܘܰܒܪܳܐ. ܐܶܠܳܐ ܒܰܚܕܳܐ ܚܠܺܝܛܽܘܬܳܐ ܕܠܳܐ ܒܽܘܠܒܳܠܳܐ. ܘܒܰܚܕܳܐ ܐܰܘܝܽܘܬܳܐ ܘܒܰܚܕܳܐ ܫܰܘܝܽܘܬ ܙܰܘܥܳܐ ܠܳܐ ܡܶܬܦܰܪܫܳܢܺܝܬܳܐ ܐܺܝܬܶܝܗ̇ ܐܺܝܬܽܘܬܳܐ ܕܗܰܘ ܟܝܳܢܳܐ ܠܚܽܘܕܳܝܳܐ ܘܰܡܠܶܐ ܛܽܘ̈ܒܶܐ ܒܟܽܠܙܒܰܢ. ܟܰܕ ܛܳܒ ܡܶܢ ܗܳܠܶܝܢ ܣܰܓܺܝ ܪܰܚܺܝܩܺܝܢܰܢ ܡܶܢ ܡܰܕܪܟܳܢܽܘܬܗܽܘܢ. ܘܝܰܬܺܝܪܳܐܝܺܬ ܡܶܢ ܗܳܠܶܝܢ ܕܶܐܡܰܪ ܢܒܺܝܳܐ.
ܟܢܰܫ ܐܰܝܟ ܕܰܒܙܶܩܷ̈ܐ ܡܰܝܴ̈ܐ ܕܝܰܡ̈ܡܶܐ: ܘܣܳܡ ܒܰܐܘܨܪ̈ܶܐ ܬܗܽܘ̈ܡܶܐ. ܠܡܳܢܳܐ ܐܰܝܟ ܕܰܒܙܶܩܷ̈ܐ ܐܶܡܰܪ ܕܟܰܢܶܫ ܐܶܢܽܘܢ ܠܡܰܝܴ̈ܐ ܕܝܰܡ̈ܡܶܐ. ܕܗܳܟܰܢܳܐ ܠܰܡ ܐܰܩܺܝܡ ܐܶܢܽܘܢ. ܠܗܳܠܶܝܢ ܕܣܰܓܺܝ ܐܰܫܺܝܕܺܝܢ ܘܰܨܠܶܝܢ ܠܘܳܬ ܗܳܝ ܕܢܶܬܰܐܫܕܽܘܢ. ܐܰܝܟܰܢܳܐ ܕܰܐܝܟ ܕܰܒܠܳܐ ܡܶܨܛܰܠܝܳܢܽܘܬܳܐ ܢܩܽܘܡܽܘܢ. ܡܶܢ ܠܬܰܚܬ ܓܶܝܪ ܘܡܶܢ ܠܥܶܠ܇ ܚܰܙܶܩ ܐܶܢܽܘܢ ܒܚܰܝܠܳܐ ܕܚܳܣܶܢ ܘܠܳܒܶܟ ܠܗܽܘܢ. ܕܠܳܐ ܢܶܫܟܚܽܘܢ ܕܰܠܘܳܬ ܚܰܕ ܡܶܢ ܪ̈ܶܟܢܶܐ ܢܶܨܛܠܽܘܢ ܒܶܠܥܳܕ ܡܶܢ ܪܶܡܙܶܗ. ܐܰܝܟܰܢܳܐ ܕܠܰܝܬ ܠܗܽܘܢ ܠܡܰܝܴ̈ܐ ܕܰܚܒܺܝܫܺܝܢ ܒܓܰܘ ܙܶܩܷ̈ܐ ܕܢܶܬܰܐܫܕܽܘܢ܇ ܥܕܰܡܳܐ ܕܡܶܫܬܪܶܐ ܩܶܛܪܳܐ ܘܶܐܣܳܪܳܐ ܕܰܥܠܰܝܗܽܘܢ: ܕܰܒܗܳܕܶܐ ܢܰܪܓܶܫ ܟܽܠ ܐܢܳܫ ܒܚܰܝܠܶܗ ܕܥܳܒܽܘܕܳܐ. ܐܰܝܟܰܢܳܐ ܠܒܺܝܟ ܒܰܟܝܳܢܳܐ ܪܰܦܝܳܐ ܘܰܐܫܺܝܕܳܐ ܕܡܰܝܴ̈ܐ ܡܶܨܛܰܠܝܴ̈ܢܶܐ: ܘܰܡܛܰܟܰܣ ܒܚܰܝܠܶܗ ܘܰܠܒܺܝܟ ܘܠܳܐ ܙܳܐܰܥ. ܐܰܘܨܪ̈ܶܐ ܕܶܝܢ ܩܳܪܶܐ܆ ܠܒܶܝܬ ܟܢܽܘ̈ܫܝܶܐ ܕܰܒܗܽܘܢ ܚܒܺܝܫܺܝܢ ܬܗܽܘ̈ܡܶܐ. ܐܶܢܕܶܝܢ ܠܰܘ ܡܰܪܳܚܽܘܬܳܐ ܗ̱ܝ܆ ܢܶܥܽܘܠ ܠܓܰܘ ܡܶܢ ܐܰܦܰܝ̈ ܬܰܪ̈ܥܶܐ ܓܰܘܳܝ̈ܐ ܕܡܶܠܬܳܐ܆ ܘܢܶܒܥܶܐ ܦܽܘ̈ܫܳܩܶܐ ܟܣܰܝܴ̈ܐ ܕܡܷ̈ܠܶܐ ܗܳܠܶܝܢ. ܝܰܡܳܐ ܗܳܪܟܳܐ ܣܳܒܰܪ ܐܢܳܐ܇ ܕܰܠܗܰܘ ܥܽܘܡܩܳܐ ܕܠܳܐ ܡܶܬܡܫܰܚ ܕܐܪ̈ܳܙܶܐ ܩܰܕܺܝ̈ܫܶܐ ܕܰܐܠܳܗܳܐ ܩܳܪܶܐ ܢܒܺܝܳܐ. ܗܽܘܝܽܘ ܓܶܝܪ ܝܰܡܳܐ ܕܚܰܝܷ̈ܐ. ܙܶܩܷ̈ܐ ܕܶܝܢ ܐܰܘ ܠܰܢܒܺܝܷ̈ܐ ܩܳܪܶܐ܆ ܐܰܘ ܠܰܫܠܺܝ̈ܚܶܐ܆ ܐܰܘ ܠܡܰܠܦܳܢܷ̈ܐ. ܕܰܒܗܳܠܶܝܢ ܟܰܢܶܫ ܝܰܡܳܐ ܕܡܶܠܬܳܐ. ܫܡܰܥ ܠܡܳܪܰܢ ܟܰܕ ܩܳܪܶܐ ܠܙܶܩܷ̈ܐ ܚܰܕ̈ܬܳܬܳܐ ܠܗܳܠܶܝܢ ܕܰܗܘܰܘ ܡܩܰܒܠܳܢܷ̈ܐ ܠܚܰܡܪܶܗ ܚܰܕܬܳܐ. ܘܟܰܕ ܐܶܬܡܠܺܝܘ ܡܶܢ ܫܶܦܥܰܘ̈ܗܝ ܪ̈ܽܘܚܳܢܳܝܶܐ܆ ܡܡܰܠܠܺܝܢ ܗܘܰܘ ܒܠܶܫܳܢܷ̈ܐ ܚܱ̈ܕܬܶܐ ܒܥܶܠܺܝܬܳܐ. ܘܣܳܒܪܺܝܢ ܗܘܰܘ ܥܠܰܝܗܽܘܢ ܝܽܘ̈ܕܳܝܶܐ ܕܰܫܡܰܥܘ ܡܶܠܰܝ̈ܗܽܘܢ܇ ܕܰܠܪܰܘܳܝܽܘܬܳܐ ܐܶܫܬܰܚܠܰܦܘ. ܬܽܘܒ ܕܶܝܢ ܘܗܳܝ ܕܰܐܘܨܪ̈ܶܐ ܘܰܬܗܽܘ̈ܡܶܐ. ܐܶܫܟܰܚܢܰܢ ܕܠܰܘ ܗܳܟܰܢܳܐ ܐܰܡܺܝܪܳܐ ܒܠܶܫܳܢܳܐ ܝܰܘܢܳܝܳܐ܇ ܐܶܠܳܐ ܬܰܡܳܢ ܡܶܙܕܰܡܪܳܐ. ܕܣܳܡ ܠܶܗ ܣܺܝ̈ܡܳܬܳܐ ܒܰܬܗܽܘ̈ܡܶܐ. ܐܰܝܟܰܢܳܐ ܕܡܶܢ ܚܰܝܠܶܗ ܕܦܶܬܓܳܡܳܐ ܢܶܣܬܰܟܰܠ. ܕܰܬܗܽܘܡܳܐ ܩܳܪܶܐ ܠܰܟܬܳܒܷ̈ܐ ܩܰܕܺܝ̈ܫܶܐ. ܣܺܝ̈ܡܳܬܳܐ ܕܶܝܢ ܠܐܪ̈ܳܙܶܐ ܐܰܘ ܠܓܶܠܝ̈ܢܶܐ ܕܰܡܛܰܫܶܝܢ ܒܣܶܦܪ̈ܶܐ ܩܰܕܺܝ̈ܫܶܐ. ܕܡܶܛܽܠ ܗܳܠܶܝܢ ܕܗܳܟܰܢܳܐ ܪܰܘܪ̈ܒܳܢ ܘܰܫܒܺܝ̈ܚܳܢ.
ܬܶܕܚܰܠ ܡܶܢ ܡܳܪܝܳܐ ܟܽܠܳܗ̇ ܐܰܪܥܳܐ. ܘܰܢܙܽܘܥܽܘܢ ܡܶܢ ܩܕܳܡܰܘܗܝ ܟܽܠܗܽܘܢ ܥܳܡܽܘܪ̈ܶܝܗ̇ ܕܬܺܒܶܝܠ. ܡܶܛܽܠ ܕܗܽܘ ܐܶܡܰܪ ܘܰܗܘܰܘ. ܘܗܽܘܝܽܘ ܦܩܰܕ ܘܰܐܩܺܝܡ. ܗܳܠܶܝܢ ܡܦܰܫ̈ܩܳܢ ܐܶܢܶܝܢ ܡܶܢ ܠܥܶܠ. ܒܗܳܝ ܕܶܐܡܰܪ ܦܰܘܠܽܘܣ܆ ܕܟܽܠ ܡܶܕܶܡ ܒܶܗ ܘܒܺܐܝܕܶܗ ܐܶܬܒܪܺܝ (ܩܘ̈ܠܣܝܐ ܐ: ܝܘ). ܡܳܢܳܐ ܕܶܝܢ ܒܳܬܰܪ ܗܳܠܶܝܢ:
ܡܳܪܝܳܐ ܠܰܡ ܡܒܰܛܶܠ ܡܶܠܟܳܐ ܕܥܰܡ̈ܡܶܐ. ܘܰܡܒܰܛܶܠ ܡܳܪܝܳܐ ܡܰܚܫ̈ܒܳܬܗܽܘܢ ܕܥܰܡ̈ܡܶܐ. ܠܗܳܠܶܝܢ ܕܶܝܢ ܕܥܰܠ ܒܨܳܬܳܐ ܕܰܐܠܳܗܳܐ ܡܶܬܡܰܠܟܺܝܢ܆ ܠܰܘ ܬܪܺܝܨܳܐܝܺܬ ܡܥܰܩܒܺܝܢ ܒܶܪ̈ܝܳܬܶܗ. ܘܣܳܒܪܺܝܢ ܕܶܝܢ: ܕܠܰܘ ܡܶܢ ܚܰܕ ܥܳܒܽܘܕܳܐ ܫܩܱ̈ܠܝ ܫܽܘܪܳܝܳܐ ܕܢܶܗܘ̈ܝܳܢ. ܡܒܰܛܶܠ ܘܫܳܪܶܐ ܠܗܶܝܢ ܐܰܝܟ ܕܰܠܒܱ̈ܛܳܠܳܬܳܐ ܘܦܰܟܺܝ̈ܗܳܬܳܐ. ܘܶܐܡܰܪ:
ܬܰܪܥܺܝܬܶܗ ܕܡܳܪܝܳܐ ܠܥܳܠܰܡ ܩܰܝܳܡܳܐ. ܘܡܰܚܫܰܒܬܳܐ ܕܠܶܒܶܗ ܠܕܳܪܕܳܪ̈ܺܝܢ. ܗܰܘ ܓܶܝܪ ܡܶܕܶܡ ܕܰܐܠܗܳܐ ܐܶܬܪܰܥܺܝ܆ ܠܰܘ ܚܰܕܬܳܐܝܺܬ ܫܩܰܠ ܙܰܘܥܳܐ ܒܰܩܢܽܘܡܶܗ ܘܰܢܦܰܩ ܠܰܥܒܳܕܳܐ܆ ܐܶܠܳܐ ܐܰܟܘܳܬܶܗ ܩܰܝܳܡ ܠܥܳܠܰܡ. ܐܶܠܳܐ ܡܳܢܳܐ ܒܳܬܰܪ ܗܳܕܶܐ ܡܰܝܬܶܐ.
ܛܘܒܰܘܗܝ ܠܥܰܡܳܐ ܕܡܳܪܝܰܐ ܗ̱ܘ ܐܰܠܳܗܶܗ. ܥܰܡܳܐ ܕܰܓܒܳܐ ܠܶܗ ܠܝܳܪܬܽܘܬܳܐ. ܗܳܪܟܳܐ ܛܽܘܒܳܐ ܠܗܳܢܽܘܢ ܕܰܫܘܰܘ ܕܢܶܬܓܒܽܘܢ ܒܳܬܰܪ ܙܩܺܝܦܳܐ. ܕܢܶܗܘܽܘܢ ܥܰܡܳܐ ܠܰܐܠܳܗܳܐ ܒܗܰܝܡܳܢܽܘܬܳܐ. ܘܥܰܠܗܳܝ ܥܳܐܠܐ ܒܳܬܪܳܗ̇:
ܕܡܶܢ ܫܡܰܝܳܐ ܐܰܕܺܝܩ ܡܳܪܝܳܐ: ܘܰܚܙܳܐ ܠܟܽܠܗܽܘܢ ܒܢܰܝ̈ܢܳܫܳܐ. ܠܰܘ ܕܰܒܪܰܘܡܳܐ ܕܰܫܡܰܝܳܐ ܒܰܠܚܽܘܕ ܡܚܰܘܶܐ ܠܶܗ܆ ܐܶܠܳܐ ܥܰܠ ܡܥܰܠܝܽܘܬܳܐ ܗܰܘ ܕܰܟܝܳܢܶܗ ܡܒܰܕܩܳܐ. ܘܰܕܗܳܟܰܢܳܐ ܠܥܶܠ ܡܶܢ ܟܽܠ ܐܝܬܰܘܗܝ܇ ܒܗܰܘ ܛܽܘܦܣܳܐ ܕܰܫܡܝܳܐ ܠܥܶܠ ܡܶܢܟܽܠ ܡܬܺܝܚܳܐ. ܘܰܐܝܟ ܐܰܝܢܳܐ ܕܺܐܝܬܰܘܗܝ ܠܥܶܠ ܡܶܢ ܟܽܠ: ܘܥܰܠ ܚܽܘ̈ܫܳܒܶܐ ܕܟܽܠ ܡܕܺܝܩ: ܘܰܒܬܪܥܺܝܬܳܐ ܕܟܽܠܗܽܘܢ ܝܳܬܒܶܝ̈ܗ̇ ܕܰܐܪܥܳܐ ܡܶܬܒܰܩܶܐ ܘܚܳܐܰܪ. ܘܥܰܠܗܳܕܶܐ ܐܶܡܪ ܢܒܺܝܳܐ܆
ܕܰܓܒܰܠ ܐܰܟܚܕܳܐ ܠܶܒܗܽܘܢ. ܘܠܳܐ ܐܶܡܰܪܘ ܠܶܒ̈ܘܳܬܗܽܘܢ. ܐܶܠܳܐ ܫܰܡܰܗ ܠܶܒܳܐ ܚܰܕ. ܕܰܒܝܰܕ ܗܳܕܶܐ ܢܰܘܕܰܥ܆ ܕܰܒܚܰܕ ܠܶܒܳܐ ܡܶܬܒܰܩܶܐ ܘܚܳܐܰܪ ܒܠܶܒ̈ܘܳܬܳܐ ܕܟܽܠܗܽܘܢ ܥܰܡ̈ܡܶܐ ܕܰܬܚܶܝܬ ܫܡܰܝܳܐ.
ܘܡܶܬܒܰܝܰܢ ܒܟܽܠܗܽܘܢ ܥܒܳܕܰܝ̈ܗܽܘܢ. ܠܰܝܬ ܓܶܝܪ ܠܡܶܥܪܰܩ ܡܶܢ ܩܕܳܡ ܗܰܘ ܕܰܐܝܟ ܕܡܶܢ ܪܰܘܡܳܐ ܥܶܠܳܝܳܐ ܕܰܫܡܰܝܳܐ ܚܳܐܰܪ ܒܟܽܠ ܕܽܘܟܳܐ.
ܐܶܠܳܐ ܘܠܳܐ ܡܰܠܟܳܐ ܡܶܬܦܪܶܩ ܒܣܽܘܓܳܐܐ ܕܚܰܝܠܳܐ. ܘܠܳܐ ܡܶܫܟܰܚ ܡܚܰܦܶܐ ܢܰܦܫܶܗ ܒܰܠܒܽܘ̈ܫܰܝ ܙܰܝܢܳܐ܆ ܕܠܳܐ ܢܺܐܬܶܐ ܠܕܺܝܢܳܐ ܕܗܰܘ ܕܡܶܢܟܽܠ ܚܰܝܠܬܳܢ.
ܘܳܐܦܠܳܐ ܓܰܢܒܳܪܳܐ ܡܶܬܦܰܨܶܐ ܒܣܽܘܓܳܐܐ ܕܚܰܝܠܶܗ. ܡܰܢܽܘ ܓܶܝܪ ܕܚܰܝܠܬܳܢ ܡܶܢ ܗܰܘ ܕܰܐܚܺܝܕ ܠܥܳܠܡܳܐ ܒܓܰܢܒܳܪܽܘܬܶܗ.
ܕܰܓܳܠ ܗ̱ܽܘ ܦܽܘܪܩܳܢܶܗ ܕܣܽܘܣܝܳܐ܇ ܕܰܒܣܽܘܓܳܐܐ ܕܚܰܝܠܶܗ ܠܳܐ ܡܦܰܨܶܐ ܠܪܳܟ̣ܒܶܗ. ܡܳܐ ܓܶܝܪ ܕܡܶܬܓܰܐܷܐ ܥܰܠ ܪ̈ܰܟܫܳܐ ܘܪ̈ܳܟܒܰܝܗܽܘܢ ܡܰܪܡܶܐ ܒܝܰܡܳܐ ܕܢܽܘܪܳܐ. ܡܳܢܳܐ ܡܶܫܟܰܚ ܢܶܥܒܶܕ ܣܘܣܝܳܐ ܕܰܓܳܠܳܐ܇ ܕܰܐܛܥܺܝ ܒܰܐܝܠܶܝܢ ܕܶܐܬܬܟܶܠܘ ܥܠܰܘܗܝ. ܐܶܠܳܐ ܗܳܝܕܶܝܢ ܡܳܐ ܕܶܐܬܚܰܝܰܒ ܣܽܘܣܝܳܐ ܗܰܘ ܕܥܰܬܶܕ ܩܪ̈ܳܒܶܐ ܘܡܰܨ̈ܘܳܬܳܐ.
ܗܳܘ̈ܝܳܢ ܥܰܝ̈ܢܰܘܗܝ ܕܡܳܪܝܳܐ ܥܰܠ ܙܰܕܺܝ̈ܩܶܐ܆ ܕܰܡܣܰܟܶܝܢ ܠܛܰܝܒܽܘܬܶܗ: ܕܰܢܦܰܨܶܐ ܢܰܦ̈ܫܳܬܗܽܘܢ ܡܶܢ ܡܰܘܬܳܐ. ܘܢܰܚܶܐ ܐܶܢܽܘܢ ܒܟܰܦܢܳܐ. ܘܡܳܐ ܕܰܓܡܰܪ ܘܰܐܘܦܺܝ ܬܽܘܪܣܳܝܳܐ ܕܦܳܬܽܘܪ̈ܶܐ ܡܶܬܚܰܒܠܳܢܷ̈ܐ ܕܙܰܒܢܳܐ܆ ܢܣܰܒܰܥ ܐܶܢܽܘܢ ܡܶܢ ܛܽܘܒܳܐ ܕܦܳܬܽܘܪܶܗ. ܘܰܚܢܰܢ ܢܺܐܡܰܪ ܥܰܡ ܢܒܺܝܳܐ.
ܢܰܦܫܰܢ ܕܶܝܢ ܣܰܟܝܰܬ ܠܡܳܪܝܳܐ. ܡܶܛܽܠ ܕܗܽܘܝܽܘ ܡܥܰܕܪܳܢܰܢ ܘܰܡܣܰܝܥܳܢܰܢ܆ ܘܒܶܗ ܗ̱ܽܘ ܢܶܚܕܶܐ ܠܶܒܰܢ. ܡܳܐ ܓܶܝܪ ܕܰܦܓܰܥܘ ܒܶܗ ܩܰܕܺܝ̈ܫܶܐ ܡܶܢ ܒܳܬܰܪ ܡܰܦܩܳܢܗܽܘܢ ܕܡܶܟܳܐ܆ ܗܳܝܕܶܝܢ ܚܳܙܶܝܢ ܠܶܗ ܘܚܳܕܶܝܢ ܠܶܒܰܘܴ̈ܬܗܽܘܢ ܐܰܝܟ ܕܶܐܡܰܪ: ܘܚܰܕܘܰܬܗܽܘܢ ܠܳܐ ܐܢܳܫ ܢܳܣܶܒ ܡܶܢܗܽܘܢ
ܘܥܰܠ ܗܳܝ: ܕܒܰܫܡܶܗ ܩܰܕܺܝܫܳܐ ܣܰܒܰܪܢ. ܐܳܡܪܺܝܢܰܢ: ܬܶܗܘܶܐ ܛܰܝܒܽܘܬܳܟ ܥܠܰܝܢ ܡܳܪܝܳܐ܆ ܐܰܝܟܰܢܳܐ ܕܣܰܟܺܝܢܰܢ ܠܳܟ. ܘܠܳܟ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܠܬܝܢ ܘܐܪܒܥܐ
ܡܰܘܕܰܥ ܒܶܗ ܕܙܳܕܶܩ ܕܰܒܟܽܠܥܶܕܳܢ ܢܨܰܠܶܐ: ܘܥܰܠ ܢܰܩܺܝܦܽܘܬܳܐ ܕܠܳܐ ܡܶܬܚܰܙܝܳܐ: ܘܩܰܪܺܝܒܽܘܬܳܐ ܕܡܰܠܐܟܷ̈ܐ ܩܰܕܺܝ̈ܫܶܐ ܠܰܐܝܠܶܝܢ ܕܦܳܠܚܺܝܢ ܥܰܡ ܐܠܰܗܳܐ.
ܒܟܽܠܙܒܰܢ ܢܳܡܘ̈ܣܶܐ ܕܰܨܠܽܘܬܳܐ ܕܰܒܟܽܠܙܒܰܢ ܡܰܠܦܺܝܢ܆ ܦܰܘܠܽܘܣ ܟܳܪܽܘܙܳܐ ܕܰܣܒܰܪܬܳܐ܆ ܘܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ܆ ܦܰܘܠܽܘܣ ܡܰܢ ܟܬܰܒ. ܕܰܚܕܰܘ ܒܟܽܠܙܒܰܢ ܒܡܳܪܰܢ. ܘܬܘܒ ܐܳܡܰܪ ܐܢܳܐ ܕܰܚܕܰܘ (ܦܝܠܝ̈ܦܣܝܐ ܓ: ܐ؛ ܕ: ܕ). ܐܳܦ ܕܰܘܺܝܕ ܬܘܒ ܡܰܠܶܦ܆ ܕܶܐܒܰܪܶܟ ܠܡܳܪܝܳܐ ܒܟܽܠܙܒܰܢ. ܘܟܰܕ ܥܳܐܦ ܠܳܗ̇ ܠܡܶܠܬܳܐ ܐܳܡܰܪ.
ܘܰܒܟܽܠܙܒܰܢ ܬܶܫܒܚܴ̈ܬܶܗ ܒܦܽܘܡܝ. ܐܰܝܟܰܢܳܐ ܓܶܝܪ ܕܦܰܘܠܽܘܣ ܐܰܝܟ ܢܳܡܽܘܣܳܐ ܣܳܡܳܗ̇܆ ܠܗܳܝ ܕܢܶܚܕܽܘܢ ܒܡܳܪܰܢ ܒܟܽܠܙܒܰܢ. ܗܳܕܶܐ ܐܺܝܬܶܝܗ̇ ܗܳܝ ܕܟܰܕ ܚܳܕܶܝܢ܆ ܢܶܦܠܚܽܘܢ ܥܰܡܶܗ. ܗܳܟܰܢܳܐ ܐܳܦ ܕܰܘܺܝܕ ܟܬܰܒ ܘܦܰܩܶܕ ܠܟܳܗ̈ܢܶܐ ܕܰܒܩܽܘܪ̈ܝܳܐ܇ ܕܰܒܟܽܠܙܒܰܢ ܢܶܗܘܽܘܢ ܡܨܰܠܶܝܢ ܩܕܳܡ ܐܰܕܽܘܢܰܝ. ܡܶܛܠ ܓܶܝܪ ܗܳܕܶܐ ܥܶܠܬܳܐ܆ ܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܰܐܪܒܰܥ ܙܰܡܰܪ. ܒܗܳܝ ܕܰܥܕܰܡܳܐ ܠܝܰܘ̈ܡܰܘܗܝ ܕܕܰܘܺܝܕ ܠܐ ܡܨܰܠܶܝܢ ܗܘܰܘ ܟܳܗ̈ܢܶܐ ܘܠܶܘܳܝܷ̈ܐ ܕܺܐܝܬ ܗܘܰܘ ܒܟܰܦܪ̈ܽܘܢܶܐ ܘܰܒܩܽܘܪ̈ܝܳܐ. ܟܕ ܕܶܝܢ ܗܘܰܘ ܡܰܠܟܷ̈ܐ܆ ܣܳܡܳܗ̇ ܠܗܳܕܶܐ ܒܢܳܡܽܘܣܳܐ܆ ܠܟܳܗ̈ܢܶܐ ܘܰܠܠܶܘܳܝܷ̈ܐ܇ ܕܰܒܟܽܠܙܒܰܢ ܢܶܗܘܽܘܢ ܡܨܰܠܶܝܢ ܘܰܡܒܰܪܟܺܝܢ ܠܡܳܪܝܳܐ. ܘܥܰܠܗܳܕܶܐ ܒܩܳܠܐܴ ܡܙܰܡܰܪ ܗܘܳܐ ܘܳܐܡܰܪ:
ܐܶܒܰܪܶܟ ܠܡܳܪܝܳܐ ܒܟܽܠܙܒܰܢ܆ ܘܰܒܟܽܠܙܒܰܢ ܬܶܫܒ̈ܚܳܬܶܗ ܒܦܽܘܡܝ. ܗܳܐ ܓܶܝܪ ܫܰܦܺܝܪܳܐ ܠܢܰܦܫܳܐ ܕܰܐܣܺܝܪܳܐ ܒܚܽܘܒܶܗ. ܕܠܳܐ ܬܶܥܢܰܕ ܬܶܫܒܽܘܚܬܳܐ ܡܶܢ ܦܽܘܡܳܗ̇. ܘܰܕܢܶܗܘܶܐ ܦܳܐܱܚ ܡܶܢ ܦܺܝܪܡܳܐ ܕܰܒܓܰܘ ܪܶܥܝܳܢܳܗ̇ ܥܶܛܪܳܐ ܕܰܨܠܽܘܬܳܐ:
ܒܡܳܪܝܳܐ ܬܶܫܬܰܒܗܰܪ ܢܰܦܫܝ. ܢܶܫܡܥܽܘܢ ܡܶܣܟ̈ܺܢܶܐ ܘܢܶܚܕܽܘܢ. ܠܡܳܢܳܐ ܠܐ ܚܳܕܶܝܢ ܒܗܳܢܳܐ ܫܶܡܥܳܐ ܐܳܦ ܥܰܬܺܝܪ̈ܶܐ. ܠܐܴ ܠܰܡ ܣܳܦܩܺܝܢ ܥܰܬܺܝܪ̈ܶܐ ܕܰܒܟܽܠܙܒܰܢ ܢܒܰܪܟܽܘܢ ܠܡܳܪܝܳܐ. ܡܶܛܽܠ ܕܡܶܣܟܻ̈ܢܶܐ ܒܦܽܘܠܚܳܢܳܐ ܕܰܐܝܟ ܗܳܢܳܐ ܥܳܬܪܺܝܢ ܘܚܳܕܶܝܢ. ܘܡܳܐ ܕܰܡܒܰܪܶܟ ܡܳܪܝܳܐ ܠܗܳܢܽܘܢ ܕܡܶܛܽܠ ܪܶܚܡܬܳܐ ܕܡܰܠܟܽܘܬܳܐ ܢܰܦܫܗܽܘܢ ܥܒܰܕܘ ܡܶܣܟܻ̈ܢܶܐ. ܘܠܰܐܝܠܶܝܢ ܕܗܳܟܰܢܳܐ ܐܶܢܽܘܢ ܡܙܰܡܶܢ ܠܗܽܘܢ ܡܙܰܡܪܳܢܳܐ ܘܳܐܡܰܪ:
ܐܰܘܪܶܒܘ ܥܰܡܝ ܠܡܳܪܝܳܐ܆ ܘܰܢܪܺܝܡ ܫܡܶܗ ܐܰܟܚܕܳܐ. ܕܳܡܝܳܐ ܗܳܕܶܐ ܒܰܪܬ ܩܳܠܐܴ܆ ܠܗܰܘ ܕܒܳܙܰܥ ܣܶܕܪ̈ܶܐ ܕܡܰܫܪ̈ܝܳܬܳܐ ܕܰܒܥܶܠܕ̈ܒܳܒܶܐ. ܘܩܳܥܶܐ ܠܰܒܢܱ̈ܝ ܚܰܝܠܶܗ ܕܢܶܥܠܽܘܢ ܥܰܡܶܗ ܠܰܩܪܳܒܳܐ. ܐܶܢܓܶܝܪ ܗܳܟܰܢܳܐ ܬܶܩܪܽܘܢ܆ ܡܶܬܥܢܶܝܢ ܐܢܬܽܘܢ. ܘܠܺܝ ܓܶܝܪ ܕܰܒܟܠܙܒܰܢ ܩܳܪܶܐ ܐ̱ܢܳܐ ܠܶܗ܆ ܥܳܢܶܐ ܠܺܝ. ܘܡܶܛܽܠ ܕܢܳܩܶܫ ܐܢܳܐ ܒܬܰܪܥܶܗ:
ܒܥܺܝܬ ܡܶܢ ܡܳܪܝܳܐ ܘܰܥܢܳܢܝ. ܘܡܶܢ ܟܽܠܗܽܘܢ ܐܽܘ̈ܠܨܳܢܰܝ ܦܰܨܝܰܢܝ. ܗܳܢܰܘ ܓܶܝܪ ܐܰܓܪܳܐ ܕܒܳܥܽܘܬܳܐ ܕܰܐܝܠܶܝܢ ܕܰܡܨܰܠܶܝܢ ܒܟܽܠܙܒܰܢ܇ ܕܢܶܒܥܽܘܢ ܡܶܢ ܡܳܪܝܳܐ. ܘܢܶܥܢܶܐ ܐܶܢܽܘܢ ܘܰܢܦܰܨܶܐ ܐܶܢܽܘܢ ܡܶܢ ܐܽܘ̈ܠܨܳܢܰܝܗܽܘܢ. ܐܶܠܐܴ ܐܳܦ ܗܳܫܳܐ:
ܚܽܘܪܘ ܠܘܳܬܶܗ ܘܣܰܒܰܪܘ ܒܶܗ. ܘܰܐܦܰܝ̈ܟܽܘܢ ܠܐ ܢܰܚܦܪ̈ܳܢ. ܠܐܴ ܓܶܝܪ ܡܰܒܗܶܬ ܠܰܐܝܢܳܐ ܕܰܡܣܰܒܰܪ ܒܶܗ܆ ܘܠܳܐ ܡܰܚܦܪ̈ܳܢ ܐܰܦܷ̈ܐ ܕܰܐܝܠܶܝܢ ܕܰܬܟܺܝܠܺܝܢ ܥܠܰܘܗܝ:
ܗܳܢܰܘ ܡܶܣܟܺܢܳܐ ܕܰܩܪܳܝܗܝ ܘܫܰܡܥܶܗ. ܘܡܶܢ ܟܽܠܗܶܘܢ ܐܽܘ̈ܠܨܳܢܰܘܗܝ ܦܰܨܝܶܗ. ܕܳܡܝܳܐ ܓܶܝܪ ܕܗܳܪܟܳܐ ܩܪܳܐ ܢܰܦܫܶܗ ܡܶܣܟܺܢܳܐ ܛܽܘܒܳܢܳܐ ܕܰܘܺܝܕ. ܡܶܬܕܟܰܪ ܗܘܳܐ ܓܶܝܪ ܕܡܶܢ ܒܺܝ̈ܫܳܬܳܐ ܕܠܳܐ ܡܶܢܝܳܢ ܘܡܶܢ ܐܽܘ̈ܠܨܳܢܶܐ ܣܰܓܺܝ̈ܐܐ ܦܰܨܝܶܗ ܒܝܰܘ̈ܡܳܬܶܗ ܕܫܳܐܘܳܠ. ܡܓܰܪܶܓ ܕܶܝܢ܆ ܕܰܒܟܽܠܙܒܰܢ ܚܰܝܳܒ ܬܶܫܒܚܴ̈ܬܳܐ ܘܩܴ̈ܠܐ ܕܙܽܘܡܳܪܳܐ. ܡܶܛܽܠܗܳܝ ܕܰܒܥܰܝܢܳܐ ܕܪܽܘܚܳܐ ܚܳܐܱܪ ܗܘܳܐ ܒܰܡܛܰܝܒܽܘܬܳܐ ܕܪ̈ܽܘܚܶܐ ܩܰܕܺܝ̈ܫܳܬܳܐ ܕܡܰܠܐܟܷ̈ܐ܇ ܕܰܚܕܺܝܪ̈ܳܢ ܠܰܐܝܠܶܝܢ ܕܰܒܬܰܘܕܺܝܬܳܐ ܕܡܳܪܝܳܐ ܘܰܒܕܶܚܠܰܬ ܐܰܠܳܗܳܐ ܚܳܐܷܝܢ ܘܡܶܫܬܰܒܗܪܺܝܢ. ܡܰܝܬܶܐ ܓܶܝܪ ܘܳܐܡܰܪ:
ܡܰܫܪܺܝܬܳܐ ܕܡܰܠܐܟܰܘ̈ܗܝ ܕܡܳܪܝܳܐ ܚܕܺܝܪܳܐ ܠܕܳܚ̈ܠܰܘܗܝ ܘܰܡܦܰܨܶܐ ܠܗܽܘܢ. ܡܳܢܳܐ ܒܳܥܶܐ ܢܺܐܡܰܪ ܒܗܳܕܶܐ. ܡܳܐ ܓܶܝܪ ܕܩܳܝ̈ܡܳܢ ܓܽܘ̈ܕܶܐ ܩܰܕܺܝ̈ܫܳܬܳܐ ܒܬܶܫܡܶܫܬܳܐ܆ ܐܳܦ ܚܰܝ̈ܠܰܘܳܬܳܐ ܕܕܰܠܩܽܘܒܠܐܴ ܡܩܺܝܡܺܝܢ ܓܰܒܳܐ ܒܰܩܪܳܒܳܐ: ܘܰܡܚܰܦܛܺܝܢ ܕܰܢܕܰܘܕܽܘܢ ܠܣܶܕܪ̈ܶܐ ܕܩܰܕܺܝ̈ܫܶܐ. ܘܡܰܥܠܺܝܢ ܕܰܠܩܽܘܒܠܐܴ ܕܙܽܘܡܳܪܳܐ ܘܰܡܥܰܬܕܺܝܢ ܚܶܪ̈ܝܳܢܶܐ ܒܰܐܝܠܶܝܢ ܕܰܡܙܰܡܪܺܝܢ ܘܰܡܒܰܪܟܺܝܢ ܠܡܳܪܝܳܐ. ܘܰܨܠܽܘܬܳܐ ܕܪ̈ܺܝܫܝ ܡܰܫܪܺܝܬܳܐ ܕܙܰܕܺܝ̈ܩܶܐ܇ ܐܰܝܟ ܩܶܫܬܳܐ ܡܰܪܡܝܳܢܺܝܬܳܐ: ܓܶܐܪ̈ܶܐ ܕܢܽܘܪܳܐ ܡܰܡܛܪܳܐ ܥܰܠ ܣܶܕܪ̈ܰܝܗܽܘܢ. ܘܶܐܠܽܘ ܡܶܫܬܰܒܩܺܝܢ ܗܘܰܘ ܡܶܢ ܐܰܠܳܗܳܐ ܟܽܠ ܐܶܡܰܬܝ ܕܩܳܝܡܳܐ ܗܘܳܬ ܬܶܫܡܶܫܬܳܐ܆ ܩܴ̈ܠܐ ܕܙܰܘܥܳܐ ܡܫܰܢܩܺܝܢ ܗܘܰܘ ܠܰܐܝܠܶܝܢ ܕܰܡܙܰܡܪܺܝܢ. ܡܶܛܽܠܗܳܢܳܐ ܐܰܝܟ ܕܶܐܡܰܪ ܢܒܺܝܳܐ. ܡܫܰܕܰܪ ܐܰܠܳܗܳܐ ܚܰܝ̈ܠܰܘܳܬܳܐ ܕܡܰܠܐܟܷ̈ܐ. ܘܒܰܕܡܽܘܬ ܡܰܫܪܺܝܬܳܐ ܕܠܐܴ ܡܶܬܚܰܣܢܳܐ܆ ܚܳܕܪܳܐ ܠܕܳܚ̈ܠܰܘܗܝ ܘܰܡܦܰܨܝܳܐ ܠܗܽܘܢ. ܐܶܢ ܠܰܡܗܰܝܡܳܢܽܘ ܠܰܡ ܨܳܒܝܬܽܘܢ܆
ܛܥܰܡܘ ܘܰܚܙܰܘ ܕܛܳܒ ܗ̱ܘ ܡܳܪܝܳܐ. ܒܡܳܢܳܐ ܡܶܬܛܥܶܡ ܕܶܝܢ ܗܰܘ ܟܝܳܢܳܐ ܠܐܴ ܡܶܬܠܰܒܟܳܢܳܐ. ܘܰܐܝܢܰܘ ܛܰܥܡܶܗ. ܕܡܳܐ ܕܶܐܬܛܥܶܡ܆ ܢܶܚܙܶܐ ܛܥܳܡܬܳܐ ܕܒܽܘܣܳܡܶܗ. ܡܶܬܛܥܶܡ ܠܰܡ ܒܥܽܘܕܪ̈ܳܢܰܘܗܝ. ܗܰܘ ܕܰܡܣܰܒܰܪ ܒܶܗ ܘܡܶܬܬܟܶܠ ܠܶܗ ܥܠܰܘܗܝ. ܘܡܶܛܽܠܗܳܢܳܐ ܓܶܝܪ ܐܰܘܣܶܦ ܘܶܐܡܰܪ:
ܛܽܘܒܰܝܗܽܘܢ ܠܟܽܠ ܕܰܬܟܺܝܠܺܝܢ ܥܠܰܘܗܝ. ܥܰܬܺܝܪ̈ܶܐ ܐܶܬܡܰܣܟܰܢܘ ܘܰܟܦܶܢܘ. ܘܰܐܝܠܶܝܢ ܕܰܠܡܳܪܝܳܐ ܒܳܥܶܝܢ ܠܐܴ ܬܶܚܣܰܪ ܠܗܽܘܢ ܛܳܒܬܳܐ. ܚܙܰܝܬ ܛܥܳܡܬܳܐ ܕܥܽܘܕܪ̈ܳܢܰܘܗܝ ܕܰܐܠܳܗܳܐ. ܡܳܐ ܕܡܶܬܡܰܣܟܢܺܝܢ ܥܰܬܺܝܪ̈ܶܐ ܡܶܢ ܥܽܘܬܪܗܽܘܢ: ܘܡܶܫܬܰܦܠܺܝܢ ܪ̈ܳܡܶܐ ܡܶܢ ܚܽܘܬܪܗܽܘܢ܆ ܘܢܳܦܠܺܝܢ ܪܰܘܪ̈ܒܳܢܶܐ ܡܶܢ ܫܽܘ̈ܠܛܳܢܰܝܗܽܘܢ: ܗܳܝܕܶܝܢ ܡܰܡܠܟܺܝܢ ܒܬܳܓ̈ܐ ܕܠܳܐ ܡܶܬܚܰܒܠܳܢܽܘܬܳܐ܇ ܐܰܝܠܶܝܢ ܕܰܒܥܰܘ ܠܡܳܪܝܳܐ. ܡܶܛܽܠܗܳܢܳܐ ܠܐܴ ܚܳܣܪܳܐ ܠܗܽܘܢ ܛܳܒܬܳܐ. ܛܳܒܬܳܐ ܕܶܝܢ ܗܽܘܝܽܘ ܡܳܪܰܢ. ܟܬܺܝܒ ܓܶܝܪ. ܕܠܰܝܬ ܛܳܒܳܐ܆ ܐܷܠܐ ܐܶܢ ܚܰܕ ܐܠܰܗܳܐ. ܘܡܶܛܽܠ ܕܰܠܡܳܪܝܳܐ ܒܥܰܘ ܕܗܽܘܝܽܘ ܛܳܒܬܳܐ܆ ܡܶܫܬܟܰܚ ܠܗܽܘܢ. ܟܰܕ ܗܳܘܶܐ ܠܗܽܘܢ ܛܳܒܬܳܐ: ܘܠܐܴ ܚܒܺܝܟܳܐ ܒܳܗ̇ ܒܺܝܫܬܳܐ. ܘܰܠܗܽܘܢ ܩܳܪܶܐ ܠܗܽܘܢ ܡܙܰܡܪܳܢܳܐ. ܡܰܠܽܘܢ ܕܶܝܢ ܡܰܠܦܳܢܳܐ ܘܰܐܒܳܐ.
ܬܰܘ ܒܢܰܝܴ̈ܐ ܫܽܘܡܥܽܘܢܝ܇ ܘܰܐܠܶܦܟܽܘܢ ܕܶܚܠܬܶܗ ܕܰܐܠܗܳܐ. ܡܳܢܳܐ ܕܶܝܢ ܨܳܒܶܐ ܕܢܰܠܶܦ ܐܶܢܽܘܢ. ܠܰܘ ܡܶܕܶܡ ܕܠܳܐ ܩܰܕܶܡܘ ܐܰܪܓܶܫܘ ܒܶܗ܆ ܐܶܠܐ ܒܺܐܝ̈ܕܰܝܗܽܘܢ ܠܰܐܝܠܶܝܢ ܕܠܐܴ ܥܕܰܟܺܝܠ ܝܺܠܶܦܘ ܡܰܠܶܦ. ܡܳܢܳܐ ܐܶܡܰܪ:
ܐܰܝܢܰܘ ܓܰܒܪܳܐ ܕܨܳܒܶܐ ܚܰܝܷ̈ܐ: ܘܪܳܚܶܡ ܝܰܘ̈ܡܳܬܳܐ ܛܳܒ̈ܐ ܠܡܶܚܙܳܐ: ܛܰܪ ܠܶܫܳܢܳܟ ܡܶܢ ܒܺܝܫܬܳܐ. ܘܣܶܦ̈ܘܳܬܳܟ ܠܐܴ ܢܡܱ̈ܠܠܳܢ ܢܶܟܠܐ: ܥܒܰܪ ܡܶܢ ܒܺܝܫܬܳܐ܆ ܘܰܥܒܶܕ ܛܳܒܬܳܐ. ܒܥܺܝ ܫܠܳܡܳܐ܆ ܘܗܰܪܛ ܒܳܬܪܶܗ. ܥܰܠ ܐܰܝܠܶܝܢ ܚܰܝ̈ܐ ܐܶܡܰܪ ܕܨܳܒܶܐ ܒܗܽܘܢ. ܚܰܝ̈ܐ ܓܶܝܪ ܗܽܘܝܽܘ ܡܪܢ. ܗܳܠܶܝܢ ܚܰܝ̈ܐ ܕܰܒܝܰܕ ܣܒܰܪܬܳܐ ܐܶܬܓܠܺܝܘ ܠܰܢ. ܘܰܒܕܶܢܚܗܽܘܢ ܡܰܘܬܳܐ ܐܶܬܒܰܛܰܠ. ܐܰܝܠܶܝܢ ܕܶܝܢ ܐܺܝܬܰܝܗܽܘܢ ܝܰܘ̈ܡܳܬܳܐ ܛܳܒ̈ܐ. ܗܳܠܶܝܢ ܕܒܳܬܰܪ ܥܡܳܕܳܐ ܩܰܒܶܠܘ ܥܰܡ̈ܡܶܐ ܡܗܰܝܡ̈ܢܶܐ ܒܰܡܢܳܬܳܐ ܒܡܰܠܦܳܢܽܘܬܳܐ ܕܰܫܠܺܝ̈ܚܶܐ ܩܰܕܺܝ̈ܫܶܐ. ܡܫܰܡܠܝܳܐܝܺܬ ܚܳܙܶܐ ܝܰܘ̈ܡܳܬܳܐ ܛܳܒ̈ܐ ܗܰܘ ܕܨܳܒܶܐ ܚܰܝ̈ܐ܇ ܡܳܐ ܕܶܐܬܚܙܺܝ ܗܰܘ ܥܳܠܡܳܐ ܕܢܽܘܗܪܳܐ ܕܠܰܝܬ ܒܶܗ ܚܶܫܽܘܟܳܐ. ܘܠܳܐ ܗܳܘܶܐ ܐܰܬܪܳܐ ܠܚܶܫܽܘܟܳܐ. ܡܶܛܽܠ ܕܰܠܗܰܘ ܒܽܘܣܳܡܳܐ ܕܝܰܘ̈ܡܳܬܳܐ ܛܳܒ̈ܐ ܠܐܴ ܡܩܰܒܠܺܝܢ ܐܰܝܠܶܝܢ ܕܰܥܢܰܕܘ ܒܒܺܝܫܬܳܐ. ܛܳܒܬܶܗ ܓܶܝܪ ܕܰܐܠܗܳܐ ܒܒܺܝܫܬܶܗ ܕܒܰܪܢܳܫܳܐ ܠܐ ܩܳܢܝܳܐ ܚܽܘܠܛܳܢܳܐ. ܥܰܠܗܳܝ ܡܦܰܩܶܕ ܠܶܗ ܠܗܰܘ ܕܨܳܒܶܐ ܕܢܶܬܒܰܣܰܡ ܒܚܰܝ̈ܐ ܗܳܠܶܝܢ. ܢܶܛܰܪ ܠܶܫܳܢܶܗ ܡܶܢ ܒܺܝܫܬܳܐ: ܘܣܶܦ̈ܘܳܬܶܗ ܠܐ ܢܡܱ̈ܠܠܳܢ ܢܶܟܠܐܴ. ܡܶܛܠ ܕܠܐ ܥܳܐܠܺܝܢ ܬܰܥ̈ܠܐܷ ܢܟܺܝ̈ܠܐ ܠܒܶܝܬ ܡܰܠܟܽܘܬܳܐ ܗܳܝ ܒܰܣܺܝܡܰܬ ܪܺܝܚܳܐ. ܘܢܶܥܒܰܪ ܡܶܢ ܒܺܝܫܬܳܐ ܘܢܶܥܒܶܕ ܛܳܒܬܳܐ. ܡܶܛܠ ܕܠܐ ܡܩܰܒܶܠ ܗܰܘ ܕܟܽܠܶܗ ܛܳܒܬܰܐ ܗ̱ܘ܆ ܕܢܶܥܠܽܘܢ ܒܺܝ̈ܫܶܐ ܠܒܽܘܣܳܡܶܗ. ܘܢܶܒܥܶܐ ܫܠܳܡܳܐ: ܘܢܶܪܗܰܛ ܒܳܬܪܶܗ. ܡܶܛܠ ܕܠܐ ܡܩܰܒܶܠ ܗܰܘ ܕܟܽܠܶܗ ܫܠܳܡܰܐ ܗ̱ܘ܆ ܕܢܶܬܶܠ ܕܽܘܟܬܳܐ ܒܰܐܬܪܶܗ ܠܪ̈ܰܓܽܘܙܬܳܢܶܐ. ܒܳܬܰܪ ܗܳܠܶܝܢ ܐܳܡܰܪ ܡܙܰܡܪܳܢܳܐ.
ܥܰܝ̈ܢܰܘܗܝ ܕܡܳܪܝܳܐ ܥܰܠ ܙܰܕܺܝ̈ܩܶܐ: ܘܶܐܕܢܰܘ̈ܗܝ ܠܡܶܫܡܰܥ ܐܶܢܽܘܢ. ܥܰܠ ܕܟܽܠܡܶܕܶܡ ܫܳܐܠܺܝܢ ܠܶܗ܆ ܚܰܒܺܝܒܳܐܝܺܬ ܡܦܰܢܶܐ ܠܗܽܘܢ. ܥܳܐܷܠ ܕܶܝܢ ܒܳܬܰܪ ܗܳܠܶܝܢ܇ ܐܳܦ ܠܽܘܚܳܡܳܐ ܕܰܢܛܺܝܪ ܠܥܳܒ̈ܕܰܝ ܒܺܝ̈ܫܳܬܳܐ.
ܐܰܦܰܘ̈ܗܝ ܕܡܳܪܝܳܐ ܥܰܠ ܒܺܝ̈ܫܶܐ܆ ܕܢܶܥܛܶܐ ܡܶܢ ܐܰܪܥܳܐ ܕܽܘܟܪܳܢܗܽܘܢ. ܠܐ ܓܶܝܪ ܫܳܒܶܩ ܠܗܽܘܢ ܒܰܐܪܥܳܐ ܕܚܰܝ̈ܐ܇ ܠܰܐܝܠܶܝܢ ܕܰܐܚܶܒܘ ܥܒܴ̈ܕܶܐ ܕܚܶܫܽܘܟܳܐ. ܡܶܛܠܗܳܕܶܐ ܣܳܡ ܥܰܝ̈ܢܰܘܗܝ ܥܠܰܝܗܽܘܢ. ܐܠܐ ܐܰܦܰܘ̈ܗܝ ܛܰܝܶܒ ܒܦܰܪܨܽܘܦܳܐ ܕܚܶܡܬܳܐ܆ ܕܢܶܥܛܶܐ ܘܰܢܓܰܡܰܪ ܐܶܢܽܘܢ. ܒܗܳܝ ܒܰܪܬ ܩܳܠܐܴ ܟܡܺܝܪܬܳܐ. ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܐ ܝܳܕܰܥ ܐ̱ܢܳܐ ܠܟܽܘܢ (ܡܬܝ ܟܗ: ܡܐ). ܐܶܠܐܴ ܟܰܕ ܗܳܠܶܝܢ ܒܳܠܥܺܝܢ ܐܰܝܟ ܕܰܐܣܟܶܠܘ܆ ܓܥܳܬܳܐ ܕܙܰܕܺܝ̈ܩܶܐ ܫܳܡܰܥ ܘܥܳܢܶܐ ܠܗܽܘܢ. ܘܠܰܘ ܐܰܝܟ ܕܓܳܥܶܝܢ ܥܰܘܴ̈ܠܐ ܘܠܐܴ ܡܶܫܬܰܒܩܺܝܢ: ܘܠܐܴ ܡܶܬܩܰܒܠܺܝܢ. ܐܷܠܐ ܟܰܕ ܓܥܳܬܳܐ ܡܶܢ ܬܪ̈ܰܝܗܽܘܢ ܓܰܒ̈ܐ ܕܳܡܝܳܐ ܕܗܳܘܝܳܐ ܩܕܳܡ ܕܰܝܳܢܳܐ. ܠܙܰܕܺܝ̈ܩܶܐ ܐܰܝܟ ܕܳܐܡܰܪ ܢܒܺܝܳܐ ܥܳܢܶܐ ܘܦܳܪܶܩ.
ܓܥܰܘ ܠܰܡ ܙܰܕܺܝ̈ܩܶܐ ܘܡܳܪܝܳܐ ܫܡܰܥ ܐܶܢܽܘܢ ܘܦܰܨܺܝ ܐܶܢܽܘܢ. ܠܰܘ ܓܶܝܪ ܗܳܪܟܳܐ ܒܰܠܚܽܘܕ܇ ܐܶܠܐ ܡܳܐ ܕܥܳܒܪܺܝܢ ܒܓܰܘ ܢܽܘܪܳܐ: ܗܳܝ ܕܒܳܗ̇ ܟܽܠܢܳܫ ܡܶܬܒܚܰܪ. ܟܰܕ ܡܣܰܪܶܕ ܠܗܽܘܢ ܪܰܬܚܳܗ̇. ܗܳܘܝܳܐ ܗܳܝ ܬܰܡܳܢ ܓܥܳܬܳܐ ܡܳܐ ܕܥܳܒܪܺܝܢ ܒܳܗ̇ ܟܶܢ̈ܫܶܐ ܕܙܰܕܺܝ̈ܩܶܐ. ܒܗܰܘ ܛܽܘܦܣܳܐ ܕܰܡܨܰܠܶܝܢ ܗܘܰܘ ܥܶܒܪ̈ܳܝܶܐ: ܟܰܕ ܥܳܒܪܺܝܢ ܗܘܰܘ ܒܓܰܘ ܝܰܡܳܐ ܕܣܽܘܦ. ܗܳܝܕܶܝܢ ܕܚܰܩ ܐܰܠܳܗܳܐ ܡܶܢ ܠܘܳܬܗܽܘܢ ܚܰܝܠܐܴ ܕܢܽܘܪܳܐ. ܐܰܝܟ ܕܰܕܚܰܩ ܡܶܢ ܥܶܒܪ̈ܳܝܶܐ ܒܰܥܪܺܝܪܳܝܽܘܬܳܐ ܕܓ̈ܠܠܐܷ ܕܝܰܡܳܐ ܣܽܘܡܳܩܳܐ. ܐܶܡܰܪ ܓܶܝܪ:
ܕܰܓܥܰܘ ܙܰܕܺܝ̈ܩܶܐ ܘܡܳܪܝܳܐ ܫܡܰܥ ܐܶܢܽܘܢ ܘܦܰܨܺܝ ܐܶܢܽܘܢ. ܘܩܰܪܺܝܒ ܗ̱ܘ ܡܳܪܝܳܐ ܠܰܬܒܺܝܪ̈ܰܝ ܠܶܒܳܐ܆ ܘܰܠܡܰܟܺܝ̈ܟܰܝ ܪܽܘܚܳܐ ܦܳܪܶܩ. ܗܳܝܕܶܝܢ ܡܳܐ ܓܶܝܪ ܕܰܡܢܰܣ̈ܝܳܢ ܢܰܦ̈ܫܳܬܳܐ ܠܡܶܥܒܰܪ ܒܰܝܢܳܬ ܓ̈ܠܠܐܷ܆ ܠܰܝܬ ܕܳܐܡܰܪ. ܕܙܰܕܺܝܩ ܐܰܢܬ ܠܶܒܝ. ܘܠܰܝܬ ܕܡܶܫܬܰܘܕܶܐ ܕܰܟܝܽܘܬܳܐ ܕܡܶܢ ܚܛܳܗ̈ܐ. ܘܰܟܡܳܐ ܐܶܢ ܢܶܗܘ̈ܝܳܢ ܟܽܘ̈ܬܡܳܬܳܐ ܕܰܗܘܱ̈ܝ ܕܠܐܴ ܡܶܢ ܨܶܒܝܳܢܳܐ܆ ܡܶܬܦܰܨܶܐ ܡܶܢܗܶܝܢ ܙܰܕܺܝܩܳܐ. ܐܶܡܰܪ ܓܶܝܪ.
ܕܣܰܓܝ̈ܐܢ ܐܶܢܶܝܢ ܒܺܝ̈ܫܳܬܶܗ ܕܙܰܕܺܝܩܳܐ܆ ܘܡܶܢ ܟܽܠܗܶܝܢ ܡܦܰܨܶܐ ܠܶܗ ܡܳܪܝܳܐ. ܘܢܳܛܰܪ ܠܟܽܠܗܽܘܢ ܓܰܪ̈ܡܰܘܗܝ܆ ܕܚܰܕ ܡܶܢܗܽܘܢ ܠܐܴ ܢܶܬܬܒܰܪ. ܟܡܳܐ ܓܶܝܪ ܐܶܢ ܣܰܓܺܝ ܥܽܘܙܗܽܘܢ ܕܚܰܝ̈ܠܰܘܳܬܳܐ ܕܕܰܠܩܽܘܒܠܐܴ ܥܰܡ ܙܰܕܺܝܩܳܐ: ܘܡܶܢ ܒܳܬܰܪ ܡܰܦܩܳܢܶܗ ܕܡܶܢ ܥܳܠܡܳܐ ܗܳܢܳܐ܇ ܟܳܡܢܺܝܢ ܕܶܝܢ ܠܢܰܦܫܶܗ܆ ܐܰܝܟܰܢ ܕܢܶܣܒܽܘܢܳܗ̇. ܐܶܠܐ ܡܶܢ ܟܽܠ ܢܶܣܝܽܘ̈ܢܺܝܢ ܡܦܰܨܶܐ ܠܶܗ ܡܳܪܝܳܐ. ܒܪܰܡ ܕܶܝܢ ܠܗܳܢܽܘܢ ܕܠܐܴ ܒܥܰܘ ܙܰܕܺܝܩܽܘܬܳܐ ܘܡܰܠܟܽܘܬܳܐ ܕܰܐܠܳܗܳܐ܆ ܠܐ ܡܥܰܕܰܪ ܠܗܽܘܢ ܡܰܠܟܳܐ ܒܕܺܝܢܳܐ. ܐܠܐ ܐܰܝܟ ܕܶܐܡܰܪ ܢܒܺܝܳܐ.
ܩܳܛܠܐܴ ܠܪ̈ܰܫܺܝܥܶܐ ܒܺܝܫܬܳܐ: ܘܣܳܢܰܐܘ̈ܗܝ ܕܙܰܕܺܝܩܳܐ ܢܣܽܘܦܽܘܢ. ܙܰܕܺܝܩܳܐ ܕܶܝܢ ܗܽܘܝܽܘ ܡܳܪܰܢ. ܐܳܦ ܣܳܢܰܐܘ̈ܗܝ ܨܳܠܽܘ̈ܒܶܐ ܐܶܢܽܘܢ ܘܚܰܝ̈ܠܰܘܳܬܳܐ ܕܕܰܠܩܽܘܒܠܐܴ. ܘܡܶܢ ܓܰܒܳܐ ܐܚܪܺܢܳܐ ܐܷܪ̈ܺܝܛܺܝܩܽܘ. ܒܳܬܰܪ ܗܳܠܶܝܢ ܡܰܘܕܰܥ ܥܰܠ ܦܽܘܪܩܳܢܳܐ ܕܗܳܘܶܐ ܠܥܰܒܕܰܘ̈ܗܝ ܕܰܐܠܗܳܐ ܒܕܺܝܢܳܐ. ܘܠܐܴ ܡܶܬܚܰܝܒܺܝܢ ܟܽܠ ܕܰܡܣܰܒܪܺܝܢ ܒܶܗ.
ܘܢܶܦܪܽܘܩ ܡܳܪܝܳܐ ܢܰܦ̈ܫܳܬܳܐ ܕܥܰܒܕܰܘ̈ܗܝ. ܒܡܰܘܬܳܐ ܡܰܢ ܐܳܦ ܗܳܪܟܳܐ: ܦܳܪܶܩ ܡܶܢ ܢܶܣܝܽܘ̈ܢܶܐ ܠܥܰܒܕܰܘ̈ܗܝ ܡܫܰܡܠܝܳܐܝܺܬ. ܒܗܰܘ ܝܰܘܡܳܐ ܕܕܺܝܢܳܐ ܐܚܪܳܝܳܐ: ܦܳܪܶܩ ܘܰܡܦܰܨܶܐ ܠܥܰܒܕܰܘ̈ܗܝ ܡܶܢ ܚܰܝܳܒܽܘܬܳܐ ܕܥܰܡ ܗܳܠܶܝܢ ܕܕܰܠܩܽܘܒܠܐܴ. ܘܡܰܘܕܶܝܢ ܘܰܡܫܰܒܚܺܝܢ ܕܦܰܨܺܝ ܐܶܢܽܘܢ ܘܰܐܢܺܝܚ ܐܶܢܽܘܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܠܬܝܢ ܘܚܡܫܐ
ܡܰܘܕܰܥ ܥܰܠ ܩܪܳܒܳܐ ܕܰܥܒܰܕ ܕܰܘܺܝܕ ܥܰܡ ܓܰܝ̈ܣܶܐ ܕܰܐܕܽܘ̈ܡܳܝܶܐ܆ ܕܡܶܬܬܨܺܝܪ ܗܘܳܐ ܒܶܗ ܗܰܘ ܕܰܥܒܰܕ ܦܳܪܽܘܩܰܢ ܥܰܠ ܚܰܝ̈ܠܰܘܳܬܳܐ ܕܕܰܠܩܽܘܒܠܳܐ. ܘܥܰܠ ܚܰܫܷ̈ܐ ܦܳܪ̈ܘܩܳܝܶܐ ܕܰܐܠܗܳܐ ܡܶܠܬܳܐ.
ܡܶܬܦܰܨܝܳܢܽܘܬܳܐ ܕܡ̣ܢ ܒܥܶܠܕܒܳܒܽܘܬܳܐ ܫܳܐܷܠ ܗܘܳܐ ܛܽܘܒܳܢܳܐ ܕܰܘܺܝܕ ܒܡܰܙܡܽܘܪܳܐ ܗܳܢܳܐ ܕܰܬܠܳܬܺܝܢ ܘܚܰܡܫܳܐ. ܘܰܕܢܶܗܘܶܐ ܐܠܰܗܳܐ ܒܬܰܟܬܽܘܫܳܐ ܚܠܳܦܰܘܗܝ. ܠܰܘ ܓܶܝܪ ܠܰܩܢܽܘܡܳܐ ܐܚܪܺܢܳܐ ܫܳܐܷܠ ܕܢܺܐܬܶܐ ܠܐܺܝܳܠܶܗ. ܡܰܩܪܶܒ ܕܶܝܢ ܠܽܘܩܒܰܠ ܣܳܢܰܐܘ̈ܗܝ. ܘܥܰܠܗܳܝ ܙܳܕܶܩ ܠܰܢ ܕܝܰܬܺܝܪܳܐܝܺܬ ܢܰܙܥܩܺܝܗ̇ ܕܶܝܢ ܠܡܶܠܬܳܐ ܕܰܥܠܰܘܗܝ ܘܢܶܚܙܶܐ: ܐܶܢ ܢܶܦܩܰܬ ܠܰܥܒܳܕܳܐ. ܗܳܝ ܕܫܶܐܠ ܗܘܳܐ ܕܰܘܺܝܕ. ܐܷܡܰܪ ܓܶܝܪ ܟܕ ܡܫܰܪܶܐ ܒܬܶܫܒܽܘܚܬܳܐ ܗܳܕܶܐ ܗܳܟܰܢܳܐ:
ܕܽܘܢ ܡܳܪܝܳܐ ܕܺܝܢܝ ܘܶܐܬܟܰܬܫ ܥܰܡ ܐܰܝܠܶܝܢ ܕܡܶܬܟܰܬܫܺܝܢ ܥܰܡܝ: ܐܰܚܽܘܕ ܙܰܝܢܳܐ ܘܣܰܟܪܳܐ ܘܩܽܘܡ ܒܥܽܘܕܪܳܢܝ. ܫܡܽܘܛ ܣܰܦܣܺܪܳܐ ܘܰܐܒܪܶܩ ܠܽܘܩܒܰܠ ܪ̈ܳܕܽܘܦܰܝ. ܗܳܠܶܝܢ ܩܴ̈ܠܐܷ ܕܡܶܬܕܰܡܶܝܢ ܒܫܶܡܥܗܽܘܢ ܒܰܪܳܝܳܐ: ܘܡܶܬܰܐܡܪܺܝܢ ܥܰܠ ܗܰܘ ܕܰܩܢܶܐ ܪ̈ܶܓܫܶܐ. ܘܰܡܩܰܝܰܡ ܒܪܽܘܟܳܒܳܐ ܕܗܰܕܳܡܷ̈ܐ ܕܦܰܓܪܳܐ. ܘܬܶܬܪܢܶܐ ܗܳܕܶܐ ܥܰܠ ܟܝܳܢܳܐ ܡܠܐܷ ܛܽܘܒ̈ܐ ܠܐ ܦܫܺܝܩܳܐ. ܡܳܢܳܐ ܗܳܟܝܠ܆ ܘܶܐܢ ܠܐ ܐܴܚܶܕ ܙܰܝܢܳܐ ܘܣܰܟܪܳܐ܆ ܠܐ ܡܥܰܕܰܪ. ܘܶܐܢ ܠܐ ܫܳܡܶܛ ܣܰܦܣܺܪܳܐ܆ ܠܐ ܡܰܪܗܶܒ ܠܰܒܥܶܠܕ̈ܒܳܒܶܐ. ܘܶܐܢ ܥܰܠ ܗܳܠܶܝܢ ܣܢܺܝܩ܆ ܡܚܺܝܠܽܘܬܳܐ ܢܰܩܺܝܦܳܐ ܠܶܗ. ܘܰܕܢܺܐܡܰܪ ܬܘܒ: ܕܠܐܴ ܐܷܬܚܰܫܰܚ ܐܰܝܟ ܕܶܐܡܰܪ ܢܒܺܝܳܐ܆ ܛܳܒ ܥܰܣܩܳܐ ܠܰܢ. ܐܠܐ ܡܳܢܰܘ ܩܪܳܒܳܐ ܕܡܶܢܶܗ ܕܰܘܺܝܕ ܗܳܟܰܢܳܐ ܡܶܬܪܗܶܒ ܗܘܳܐ. ܐܰܝܟܰܢܳܐ ܕܥܰܠ ܣܰܦܣܺܪܳܐ ܗܳܝ ܠܐ ܡܶܬܚܰܙܝܳܢܺܝܬܳܐ ܕܰܐܠܗܳܐ ܢܶܣܬܢܶܩ. ܐܱܕܽܘ̈ܡܳܝܶܐ ܒܢܰܝ̈ ܥܺܝܣܽܘ ܠܕܰܘܝܕ ܒܟܽܠܙܒܰܢ ܫܳܚܩܺܝܢ ܗܘܰܘ. ܒܗܳܝ ܕܠܐ ܒܶܛܠܰܬ ܡܶܢܗܽܘܢ ܒܥܶܠܕܒܳܒܽܘܬܳܐ ܗܳܝ ܕܰܗܘܳܬ ܠܥܺܝܣܽܘ ܥܰܡ ܝܰܥܩܽܘܒ. ܥܰܠ ܕܚܰܠܶܨ ܒܽܘܟܪܽܘܬܶܗ܆ ܘܰܫܩܰܠ ܒܽܘܪ̈ܟܬܶܗ. ܘܡܶܛܠܗܳܕܶܐ ܕܠܐ ܫܶܠܝܳܐ ܡܥܺܝܪܺܝܢ ܗܘܰܘ ܩܪ̈ܳܒܶܐ ܠܽܘܩܒܰܠ ܡܰܠܟܷ̈ܐ ܕܺܝܣܪܳܐܶܝܠ. ܕܰܘܝܕ ܕܶܝܢ ܗܳܢܳܐ ܣܰܓܺܝ ܢܶܨܚܴ̈ܢܶܐ܆ ܓܰܢ̱ܒܳܪܳܐܝܬ ܩܰܦܰܚ ܐܷܢܘܢ ܒܰܩܪ̈ܳܒܶܐ. ܕܥܺܝܣܽܘ ܕܶܝܢ ܒܕܽܘ̈ܟܝܳܬܳܐ ܣܰܓܺܝ̈ܐܬܳܐ܇ ܦܶܠܶܐܬܳܢܳܐܝܬ ܒܰܟܬܳܒ̈ܐ ܩܰܕܺܝ̈ܫܐ ܥܠ ܡܰܘܬܳܐ ܡܶܬܢܣܶܒ܆ ܠܰܝܬ ܐ̱ܢܳܫ ܕܡܶܬܚܪܶܐ ܡܶܢ ܐܰܝܠܶܝܢ ܕܰܒܥܰܡܠܐܴ ܪܽܘܚܳܢܳܝܳܐ ܩܪܰܘ ܒܣܶܦܪ̈ܶܐ ܐܱܠܳܗܳܝ̈ܐ. ܡܳܕܶܝܢ ܢܶܩܪܽܘܒ ܗܳܫܳܐ ܕܠܐ ܦܽܘܫܳܟܳܐ ܠܘܳܬ ܬܶܐܘܳܪܺܝܰܐ ܕܡܶܠܰܘ̈ܗܝ ܕܡܰܙܡܽܘܪܳܐ ܗܳܢܳܐ ܘܰܢܫܰܐܶܠ܆ ܕܡܶܛܠ ܡܳܢܳܐ ܒܥܳܐ ܕܰܘܝܕ ܡ̣ܢ ܡܳܪܝܳܐ: ܕܢܶܣܰܒ ܠܶܗ ܙܰܝܢܳܐ. ܘܟܶܢ ܡܰܩܪܶܒ ܥܰܡ ܒܥܶܠܕ̈ܒܳܒܶܐ ܕܚܰܝܰܝ̈ܢ. ܘܶܐܢ ܣܢܺܝܩ ܥܰܠ ܙܰܝܢܳܐ܆ ܘܶܐܡܰܬܝ ܗܳܕܶܐ ܗܘܳܬ. ܙܰܝܢܳܐ ܗܳܟܝܠ ܕܰܫܩܰܠ ܐܠܰܗܐ ܘܣܳܡ ܒܥܽܘܕܪܳܢܶܗ ܕܓܶܢܣܳܐ܇ ܐܻܝܬܰܘܗܝ ܦܰܓܪܳܐ ܚܳܫܽܘܫܳܐ ܘܡܳܝܽܘܬܳܐ: ܕܚܰܝܶܕ ܠܶܗ ܡܶܢ ܡܰܪܒܥܳܗ̇ ܕܰܒܬܽܘܠܬܳܐ. ܗܳܢܳܐ ܓܶܝܪ ܟܕ ܠܒܺܝܫ ܗܘܳܐ ܠܶܗ ܐܴܕܳܡ ܩܪܰܒܬܳܢܳܐ܆ ܚܰܝܳܒܳܐ ܐܷܬܚܙܺܝ ܒܶܗ. ܟܕ ܕܶܝܢ ܨܒܳܐ ܐܠܰܗܳܐ ܡܶܠܬܳܐ ܗܳܝ ܕܰܢܚܰܘܶܐ: ܕܠܰܝܬܰܘܗܝ ܦܰܓܪܳܐ ܥܶܠܰܬ ܪܰܦܝܽܘܬܳܐ ܘܡܶܙܕܰܟܝܳܢܽܘܬܳܐ܆ ܥܰܒܕܶܗ ܠܶܗ ܙܰܝܢܳܐ ܕܢܶܣܰܒ ܒܶܗ ܢܶܨܚܳܢܳܐ. ܘܢܶܩܛܽܘܪ ܒܶܗ ܟܠܺܝܠܐܴ ܥܰܠ ܣܳܛܳܢܳܐ ܘܥܰܠ ܡܰܘܬܳܐ. ܡܦܳܣ ܗܘܳܐ ܢܒܺܝܳܐ܇ ܕܰܕܠܐܴ ܩܰܪܺܝܒܽܘܬܳܐ ܕܡܶܠܬܳܐ ܠܐܴ ܢܶܬܓܰܡܪܽܘܢ ܚܰܫܷ̈ܐ ܦܳܪ̈ܽܘܩܳܝܶܐ. ܘܥܰܠ ܗܳܝ ܐܷܡܰܪ:
ܫܡܽܘܛ ܣܰܦܣܺܪܳܐ ܘܰܐܒܪܶܩ ܠܽܘܩܒܰܠ ܪ̈ܳܕܽܘܦܰܝ. ܣܰܦܣܺܪܳܐ ܗܽܘܝܽܘ ܡܶܠܬܳܐ ܐܠܰܗܳܐ. ܟܬܺܝܒ ܓܶܝܪ. ܕܚܰܝܳܐ ܗܝ ܡܶܠܬܳܐ ܕܰܐܠܗܳܐ ܘܟܽܠ ܣܳܥܪܳܐ. ܘܚܰܪܺܝܦܳܐ ܛܳܒ ܡܶܢ ܣܰܦܣܺܪܳܐ ܕܰܬܪܶܝܢ ܦܽܘ̈ܡܶܝܗ̇ (ܥܒܪ̈ܝܐ ܕ: ܝܒ). ܦܰܓܪܳܐ ܗܽܘܝܽܘ ܣܰܟܪܳܐ. ܒܣܰܟܪܳܐ ܓܶܝܪ ܥܳܐܠܺܝܢ ܐܷܢܽܘܢ ܓܶܐܪ̈ܶܐ. ܠܰܘ ܟܰܕ ܡܚܰܒܠܺܝܢ ܠܳܗ̇܆ ܐܷܠܐ ܟܕ ܡܶܬܕܰܥܟܺܝܢ ܡܶܢ ܚܺܐܦܗܽܘܢ ܩܳܛܽܘܠܐܴ. ܘܟܕ ܩܰܠܝ̣ܠ ܥܳܐܠܺܝܢ ܘܡܶܫܬܰܠܛܺܝܢ ܒܰܝܢܳܬ ܕܰܩܪ̈ܳܛܶܐ ܕܰܙܩܺܝܦܺܝܢ ܒܳܗ̇܆ ܠܐܴ ܡܶܬܢܰܟܝܳܐ ܡܶܢܗܽܘܢ ܣܰܟܪܳܐ. ܗܳܟܰܢܳܐ ܐܴܦ ܗܰܘ ܕܶܐܚܰܕ ܣܰܟܪܳܐ ܚܠܳܦܰܝܢ܆ ܫܒܰܩ ܗܘܳܐ ܠܚܰܫܷ̈ܐ ܠܐ ܥܕܺܝ̈ܠܐܷ ܕܢܶܪܗܛܽܘܢ ܒܚܺܐܦܷ̈ܐ ܟܝܳܢܳܝܷ̈ܐ ܥܰܠ ܒܶܣܪܶܗ. ܘܟܰܕ ܢܶܫܬܰܠܛܽܘܢ܆ ܡܰܗܡܶܐ ܗܘܳܐ: ܕܰܢܚܰܒܠܽܘܢ ܓܡܺܝܪܳܐܝܬ ܠܦܰܓܪܳܐ ܠܐܴ ܡܰܪܦܶܐ ܗܘܳܐ. ܐܷܠܐ ܕܰܠܩܽܘܒܠܐܴ ܦܳܓܰܥ ܗܘܳܐ ܒܗܽܘܢ ܒܚܰܫܷ̈ܐ. ܘܰܒܗܳܝ ܕܰܒܣܰܟܪܳܐ ܡܶܬܕܰܥܟܺܝܢ ܓܶܐܪ̈ܶܐ܆ ܗܳܟܰܢܳܐ ܡܳܝܬܺܝܢ ܗܘܰܘ ܚܰܫ̈ܶܐ ܒܚܰܫܰܘ̈ܗܝ ܕܗܰܘ ܕܰܗܘܳܐ ܣܰܟܪܳܐ: ܘܦܰܨܺܝ ܠܰܢ ܡܶܢ ܒܥܶܠܕ̈ܒܳܒܶܐ ܕܚܰܝܰܝ̈ܢ. ܟܰܕ ܓܶܝܪ ܓܶܐܪ̈ܶܐ ܕܟܰܦܢܳܐ ܫܕܳܐ ܗܰܘ ܕܡܶܬܟܰܬܰܫ ܒܒܶܣܪܶܗ ܕܡܳܪܰܢ. ܗܳܢܰܘ ܓܶܐܪ̈ܐ ܡܰܢ ܡܚܰܘ. ܐܴܦ ܦܰܓܪܳܐ ܓܶܝܪ ܐܱܝܟ ܣܰܟܪܳܐ ܡܩܰܒܶܠ ܗܘܳܐ ܟܝܳܢܳܐܝܬ. ܐܷܠܐ ܡܶܬܕܰܥܟܺܝܢ ܗܘܰܘ ܡܶܢܶܗ. ܘܡܶܫܬܰܗܶܐ ܚܺܐܦܗܽܘܢ ܡܚܰܒܠܳܢܳܐ. ܗܰܘ ܕܺܐܝܬܰܘܗܝ ܠܥܶܠ ܡ̣ܢ ܟܰܦ̈ܢܶܐ ܒܰܟܝܳܢܶܗ ܘܰܠܥܶܠ ܡ̣ܢ ܣܽܘ̈ܢܩܳܢܶܐ. ܗܳܟܰܢܳܐ ܐܴܦ ܚܰܫ̈ܐ ܗܳܠܶܝܢ ܕܡ̣ܢ ܒܺܝܫܽܘܬܳܐ ܕܥܰܢܴ̈ܬܶܐ ܝܽܘ̈ܕܳܝܶܐ ܡܶܬܩܰܪܒܺܝܢ ܗܘܰܘ ܠܶܗ ܒܰܨܠܺܝܒܳܐ. ܟܰܕ ܓܶܝܪ ܐܱܝܟ ܒܰܪܢܳܫܳܐ ܒܕܽܘܡܝܳܐ ܕܣܰܟܪܳܐ ܠܚܰܫ̈ܐ ܕܡ̣ܢ ܢܶܓ̈ܕܶܐ ܡܩܰܒܶܠ ܗܘܳܐ. ܘܒܽܘܙܳܥܳܐ ܕܺܐܝܕܰܝܴ̈ܐ ܘܰܕܪ̈ܶܓܠܐܷ ܕܰܓܕܰܫ ܡ̣ܢ ܣܽܘܟܳܟܳܐ ܕܨܶܨ̈ܐ ܣܳܒܶܠ ܗܘܳܐ ܐܢܳܫܳܐܝܬ. ܘܚܰܫ̈ܐ ܪ̈ܰܓܽܘܫܬܳܢܶܐ ܕܡ̣ܢ ܡܰܪܳܚܽܘܬܳܐ ܕܨܳܠܽܘ̈ܒܶܐ ܡܣܰܝܒܰܪ ܗܘܳܐ ܒܓܽܘܫܡܶܗ. ܘܰܠܡܰܘܬܳܐ ܗܰܘ ܕܺܐܝܬܰܘܗܝ ܗܘܳܐ ܓܶܐܪܳܐ ܐܚܪܳܝܳܐ ܩܰܒܠܶܗ ܒܣܰܟܪܳܐ ܕܒܶܣܪܳܐ ܗܳܝ ܕܰܠܒܰܫ. ܗܘܳܐ ܡܰܘܬܳܐ ܕܺܝܠܶܗ: ܡܰܘܬܳܐ ܠܡܰܘܬܰܢ. ܐܱܝܟܰܢܳܐ ܕܳܐܦ ܚܰܫܰܘ̈ܗܝ ܗܘܰܘ ܚܰܫ̈ܐ ܠܚܰܫܰܝ̈ܢ. ܡܶܛܠ ܕܶܝܢ ܕܢܰܗܺܝܪܳܐܝܬ ܢܶܬܝܰܕ̈ܥܳܢ ܠܰܢ ܗܳܠܶܝܢ ܕܶܐܡܰܪ ܡܙܰܡܪܳܢܳܐ܇ ܕܰܒܗܳܢܳܐ ܢܺܝܫܳܐ ܚܳܝܪ̈ܳܢ. ܕܥܰܠ ܦܳܪܽܘܩܰܢ ܐܷܬܢܰܒܺܝ ܘܶܐܡܰܪ ܗܳܠܶܝܢ:
ܐܷܡܰܪ ܠܰܡ ܠܢܰܦܫܝ ܕܶܐܢܰܐ ܗ̄ܘ ܦܳܪܽܘܩܶܟܝ. ܐܷܢ ܥܰܠ ܦܽܘܪܩܳܢܳܐ ܕܢܰܦܫܳܐ ܡܨܰܠܐܷ܆ ܠܰܘ ܥܰܠ ܩܪܳܒܳܐ ܕܦܰܓܪܳܐ ܒܛܺܝܠ ܠܶܗ. ܗܳܠܶܝܢ ܓܶܝܪ ܐܱܝܠܶܝܢ ܕܡܶܬܟܰܬܫܺܝܢ ܥܰܡ ܢܰܦܫܳܐ. ܠܰܘ ܒܙܰܝܢܳܐ ܡܶܬܚܰܙܝܳܢܳܐ ܡܰܩܪܒܺܝܢ. ܡܳܕܶܝܢ ܢܰܦܫܳܐ ܠܐܴܟܶܠܩܰܪܨܳܐ ܫܰܒܝܳܐ ܗ̱ܘܳܬ܆ ܘܡܶܢܶܗ ܡܨܰܠܐܷ ܕܰܘܝܕ ܕܢܶܗܘܶܐ ܠܳܗ̇ ܦܽܘܪܩܳܢܳܐ. ܘܥܰܠܗܳܕܶܐ ܐܷܡܰܪ:
ܢܶܒܗܬܽܘܢ ܘܢܰܚܦܪܽܘܢ ܐܱܝܠܶܝܢ ܕܒܳܥܶܝܢ ܠܢܰܦܫܝ. ܗܰܘ ܓܶܝܪ ܕܒܳܥܶܐ ܠܢܰܦܫܳܐ ܕܩܰܕܺܝ̈ܫܶܐ܆ ܐܷܠܐ ܗܰܘ ܛܪܽܘܢܳܐ ܩܰܕܡܳܝܳܐ ܕܰܐܦܩܶܗ ܠܐܴܕܳܡ ܡܶܢ ܦܰܪܕܰܝܣܳܐ. ܘܚܰܝ̈ܠܰܘܳܬܳܐ ܡܳܪ̈ܽܘܕܶܐ ܕܕܰܡܺܝܘ ܠܒܺܝܫܽܘܬܶܗ. ܕܰܥܠܰܝܗܽܘܢ ܐܷܡܰܪ ܬܢܳܢ.
ܢܶܗܦܟܽܘܢ ܠܒܶܣܬܰܪܗܽܘܢ ܘܢܰܚܦܪܽܘܢ ܐܰܝܠܶܝܢ ܕܶܐܬܚܰܫܰܒܘ ܥܠܰܝ ܒܺܝܫܬܳܐ. ܘܰܟܡܶܢܘ ܠܝ̣ ܚܶܘܝܳܐ ܨܢܺܝܥܳܐ. ܘܫܰܠܰܚ ܘܰܫܩܰܠ ܡܶܢܝ ܢܰܚ̈ܬܶܐ ܕܡܶܫܬܽܘܬܳܐ ܐܱܝܠܶܝܢ ܕܰܡܥܰܛܰܦ ܗܘܺܝܬ.
ܡܶܛܽܠܗܳܢܳܐ ܢܶܗܘܽܘܢ ܐܱܝܟ ܕܰܚܺܝܚܳܐ ܩܕܳܡ ܪܽܘܚܳܐ. ܘܬܶܣܰܒ ܐܷܢܽܘܢ ܪܽܘܚܳܐ ܬܰܩܺܝܦܬܳܐ. ܗܳܝ ܕܫܶܩܠܰܬ ܥܽܘܪܳܐ ܕܗܰܘ ܨܰܠܡܳܐ ܒܳܒܠܳܝܳܐ. ܘܠܐܴ ܢܶܫܬܟܰܚ ܠܗܽܘܢ ܐܱܬܪܳܐ ܒܡܰܠܟܽܘܬܶܗ ܕܦܳܪܽܘܩܰܢ.
ܘܡܰܠܐܟܶܗ ܕܡܳܪܝܳܐ ܢܶܪܕܽܘܦ ܐܷܢܽܘܢ. ܘܬܶܚܫܰܟ ܐܽܘܪܚܗܽܘܢ. ܘܢܶܗܘ̈ܝܳܢ ܒܳܗ̇ ܡܰܫܪ̈ܽܘܥܝܳܬܳܐ. ܕܥܰܠ ܒܢܰܝ̈ܢܳܫܳܐ ܢܰܣܒܰܪ ܐ̱ܢܳܫ ܕܰܓܙܰܪ ܗܘܳܐ ܪܽܘܚܳܐ ܒܰܢܒܺܝܳܐ ܠܰܘ̈ܛܳܬܳܐ ܕܰܐܝܟ ܗܳܠܶܝܢ܆ ܠܐܴ ܦܫܺܝܩܳܐ. ܐܷܠܐ ܠܡܳܪ̈ܽܘܕܶܐ ܠܳܐܛ ܒܗܳܠܶܝܢ ܩܴ̈ܠܐ. ܡܶܛܠܗܳܕܶܐ ܓܶܝܪ ܐܷܡܰܪ ܬܰܪܬܶܝܢ ܙܰܒܢ̈ܝ̣ܢ: ܕܡܰܠܐܟܶܗ ܕܰܐܠܗܳܐ ܢܶܪܕܽܘܦ ܐܷܢܘܢ. ܚܕܳܐ ܡܰܢ ܕܳܡܝܳܐ: ܥܰܠ ܕܰܒܗܳܢܳܐ ܥܳܠܡܳܐ ܪܕܰܦ ܐܷܢܘܢ ܦܳܪܽܘܩܰܢ. ܗܰܘ ܕܶܐܬܩܪܺܝ ܡܰܠܐܟܳܐ ܕܡܰܠܟܳܐ ܪܰܒܳܐ. ܬܰܪܬܶܝܢ ܙܰܒܢ̈ܝ̣ܢ ܕܶܝܢ: ܡܳܐ ܕܪܳܕܶܦ ܠܗܽܘܢ ܡܰܠܝܳܐܝܬ ܘܚܳܒܶܫ ܠܗܽܘܢ ܒܰܬܗܽܘܡܳܐ ܕܢܽܘܪܳܐ. ܥܰܠܗܳܕܶܐ ܓܶܝܪ ܐܰܘܣܶܦ:
ܡܰܠܐܟܶܗ ܕܰܐܠܗܳܐ ܢܶܪܕܽܘܦ ܐܷܢܘܢ. ܒܗܳܝ ܩܰܕܡܳܝܬܳܐ ܐܷܬܩܪܺܝ ܡܰܠܐܟܶܗ ܕܡܳܪܝܳܐ: ܥܰܠ ܕܒܰܡܢܳܬܳܐ ܪܕܰܦ ܐܷܢܘܢ ܠܡܳܪ̈ܽܘܕܶܐ ܡܶܢ ܒܢܰܝ̈ܢܳܫܳܐ. ܟܰܕ ܐܷܡܰܪ ܠܠܶܓܝܽܘܢ. ܕܦܽܘܩ ܡ̣ܢ ܒܰܪܢܳܫܳܐ ܗܳܢܳܐ. ܘܟܰܕ ܩܳܪܒܺܝܢ ܗܘܰܘ ܠܘܳܬܗ ܐܰܝܠܶܝܢ ܕܺܐܝܬ ܗܘܰܘ ܠܗܽܘܢ ܕܰܝ̈ܘܶܐ ܣܰܗܪ̈ܳܝܶܐ܇ ܗܳܢܰܘ ܒܢܰܝ̈ ܐܷܓܳܪ̈ܶܐ. ܙܒܰܢ̱ܬܳܐ ܕܬܰܪܬܶܝܢ ܕܶܐܡܰܪ ܡܰܠܐܟܶܗ ܕܰܐܠܳܗܳܐ. ܥܰܠ ܕܰܐܝܟ ܚܳܙܶܐ ܟܽܠ ܡܒܰܨܶܐ ܠܗܽܘܢ ܡ̣ܢ ܟܽܠܗܘܢ ܣܰܘ̈ܦܶܐ. ܘܳܐܣܰܪ ܘܟܳܕܶܢ ܠܗܽܘܢ ܠܓܰܘ ܡ̣ܢ ܫܽܘܪܳܐ ܕܢܽܘܪܳܐ ܒܬܰܫܢܺܝܩܳܐ ܕܠܐܴ ܓܳܡܰܪ. ܘܗܳܠܶܝܢ ܐܴܡܰܪ ܢܒܺܝܳܐ:
ܥܰܠ ܕܰܛܡܰܪܘ ܠܝ̣ ܦܰܚܷ̈ܐ. ܘܰܡܨܺܝܕܬܳܐ ܦܪܰܣܘ ܠܢܰܦܫܝ. ܚܙܰܝܬ ܐܱܝܟܰܢܳܐ ܡܶܬܝܰܕ̈ܥܳܢ ܗܳܠܶܝܢ ܥܰܠ ܗܳܢܽܘܢ ܨܰܝܳܕ̈ܐ ܢܟܺܝ̈ܠܐܷ: ܕܨܳܠܶܝܢ ܒܛܽܘܫܝܳܐ ܠܬܰܡܺܝ̈ܡܶܐ ܐܱܡܺܝܪ̈ܳܢ. ܡܶܛܠ ܗܳܢܳܐ ܐܴܡܰܪ:
ܬܺܐܬܶܐ ܥܠܰܝܗܽܘܢ ܒܺܝܫܬܳܐ ܡ̣ܢ ܫܶܠܝܳܐ. ܘܰܡܨܺܝܕܬܳܐ ܕܰܦܪܰܣܘ܆ ܬܶܐܚܽܘܕ ܐܷܢܽܘܢ. ܘܓܽܘܡܳܨܳܐ ܕܰܚܦܰܪܘ ܢܶܦܠܽܘܢ ܒܶܗ. ܟܺܐܢܳܐ ܗ̱ܝ ܓܶܝܪ ܕܰܒܗܰܘ ܡܶܕܶܡ ܕܚܰܝܶܒܘ ܠܙܰܕܺܝ̈ܩܶܐ܆ ܢܶܬܚܰܝܒܽܘܢ ܒܶܗ. ܘܙܰܕܺܝ̈ܩܶܐ ܢܶܚܕܽܘܢ ܒܡܰܦܽܘܠܬܗܽܘܢ. ܐܷܡܰܪ ܓܶܝܪ:
ܢܰܦܫܝ ܕܶܝܢ ܬܶܪܘܰܙ ܒܰܐܠܗܳܐ: ܘܬܶܬܒܰܣܰܡ ܒܦܽܘܪܩܳܢܶܗ. ܘܟܽܠܗܽܘܢ ܓܰܪ̈ܡܰܝ ܢܺܐܡܪܽܘܢ. ܡܳܪܝܳܐ ܡܰܢܽܘ ܐܱܟܘܳܬܳܟ. ܕܰܡܦܰܨܶܐ ܐܱܢܬ ܠܒܳܝܫܳܐ ܡ̣ܢ ܒܥܶܠܕܒܳܒܶܗ: ܘܰܠܡܶܣܟܺܢܳܐ ܘܰܠܒܳܝܫܳܐ ܡ̣ܢ ܡܰܢ ܕܚܳܛܶܦ ܠܶܗ ܒܰܩܛܺܝܪܳܐ. ܗܳܪܟܳܐ ܠܰܝܬ ܠܐܷܪ̈ܺܝܛܺܝܩܳܝܶܐ ܕܢܺܐܡܪܽܘܢ܆ ܕܠܰܘ ܡܳܪܝܳܐ ܦܰܪܩܶܗ ܠܐܴܕܳܡ ܡ̣ܢ ܐܴܟܶܠܩܰܪܨܳܐ ܥܰܫܺܝܢܳܐ܇ ܗܰܘ ܕܚܰܛܦܶܗ ܒܰܩܛܺܝܪܳܐ. ܘܶܐܬܥܰܫܰܢ ܥܠܰܘܗܝ ܥܕܰܡܳܐ ܕܶܐܬܳܐ ܡܳܪܝܳܐ ܒܰܒܣܰܪ. ܘܦܰܨܝܶܗ ܠܒܳܝܫܳܐ ܘܰܠܡܶܣܟܺܢܳܐ ܡ̣ܢ ܡ̇ܢ ܕܚܳܛܶܦ ܠܶܗ ܒܰܩܛܺܝܪܳܐ. ܘܟܕ ܦܰܨܺܝ ܐܷܢܽܘܢ ܠܐܱܝܠܶܝܢ ܕܶܐܬܕܒܰܪܘ ܒܰܩܛܺܝܪܳܐ ܕܡܳܪܽܘܕܳܐ. ܘܠܽܘܩܕܰܡ ܡܫܰܪܶܐ ܡ̣ܢ ܐܱܝܠܶܝܢ ܕܰܐܣܗܶܕܘ ܥܰܘܠܐܴ ܥܰܠ ܡܶܠܬܶܗ ܕܰܐܠܗܳܐ ܘܳܐܡܰܪ:
ܩܳܡܘ ܣܳܗ̈ܕܶܐ ܕܥܰܘܠܐܴ: ܘܡܶܕܶܡ ܕܠܐܴ ܝܳܕܰܥ ܗܘܺܝܬ ܫܰܐܠܽܘܢܝ. ܗܳܝ ܕܶܐܡܰܪ ܕܠܐ ܝܳܕܰܥ ܗܘܺܝܬ܆ ܕܠܐܴ ܝܳܕܰܥ ܢܒܺܝܳܐ ܡܳܢܳܐ ܐܷܢܽܘܢ ܫܽܘ̈ܐܴܠܐ ܡܚܰܘܝܳܐ. ܡܰܢ ܓܶܝܪ ܡ̣ܢ ܥܒܺܝ̈ܕܶܐ ܩܳܡ ܒܐܪܳܙܶܗ ܕܡܳܪܝܳܐ. ܘܺܝܕܰܥ ܡܫܰܡܠܝܳܐܝܬ ܡܕܰܒܪܳܢܽܘܬܶܗ ܕܦܳܪܽܘܩܰܢ. ܘܗܳܝܕܶܝܢ ܕܶܝܢ ܕܶܐܡܰܪ.
ܕܦܰܪܥܽܘܢܝ ܒܺܝܫܬܳܐ ܚܠܳܦ ܛܳܒܬܳܐ. ܕܰܚܠܳܦ ܕܰܐܚܠܶܡ ܟܺܐܒܰܝ̈ܗܽܘܢ܆ ܐܷܬܚܰܫܰܒܘ ܥܠܰܘܗܝ ܒܺܝܫܬܳܐ. ܘܦܰܪܥܽܘܗܝ ܨܰܥܪ̈ܶܐ ܘܨܽܘ̈ܚܝܳܬܳܐ: ܘܰܟܠܺܝܠܐܴ ܕܟܽܘ̈ܒܶܐ.
ܘܰܐܘܒܶܕܘ ܢܰܦܫܝ ܡ̣ܢ ܒܢܰܝ̈ܢܳܫܳܐ. ܗܶܢܽܘܢ ܓܶܝܪ ܐܱܝܟ ܕܡ̣ܢ ܠܘܳܬܗܽܘܢ ܡܰܘܒܳܕܽܘ ܐܰܘܒܕܽܘܗܝ ܒܰܨܠܺܝܒܳܐ ܠܗܰܘ ܡܶܫܟܚܳܢܳܐ ܕܰܐܒܺܝ̈ܕܶܐ. ܐܷܠܐ ܚܙܺܝ ܡܳܢܳܐ ܐܷܡܰܪ ܢܒܺܝܳܐ.
ܘܶܐܢܳܐ ܒܰܟܪܺܝܗܽܘܬܗܽܘܢ ܠܶܒܫܶܬ ܣܰܩܳܐ. ܐܰܝܢܳܐ ܣܰܩܳܐ ܢܰܣܒܰܪ ܕܰܠܒܶܫ: ܗܰܘ ܕܶܐܬܳܐ ܡ̣ܢ ܫܡܰܝܳܐ ܒܰܡܕܰܒܪܳܢܽܘܬܶܗ. ܠܐ ܐ̱ܢܳܫ ܐܳܡܰܪ ܕܶܐܬܚܰܫܰܚ ܥܰܡܰܢܽܘܐܝܠ ܒܬܰܠܒܶܫܬܳܐ ܕܰܐܝܟ ܗܳܕܶܐ. ܐܠܐ ܣܰܩܳܐ ܐܷܡܰܪ. ܥܰܠ ܕܰܠܒܶܫ ܒܶܣܪܳܐ ܐ̱ܢܳܫܳܝܳܐ. ܣܰܓܺܝ ܚܰܫܷ̈ܐ ܘܣܰܓܺܝ ܟܽܘܪ̈ܗܳܢܶܐ ܡ̣ܢ ܠܒܽܘ̈ܫܶܐ ܗܳܢܽܘܢ ܡܰܦܪ̈ܓܰܝ ܒܓܰܐܝܽܘܬܳܐ ܫܶܡܫܳܢܳܝܬܳܐ ܕܠܐ ܡܶܬܚܰܒܠܳܢܽܘܬܳܐ ܗܳܝ ܕܒܰܥܕܶܢ. ܘܶܐܬܢܰܚܰܬ ܠܡܽܘܟܳܟܳܐ ܕܡܰܘܬܳܐ ܘܕܰܚܒܳܠܐܴ. ܐܰܝܟܰܢܳܐ ܕܰܚܠܳܦ ܐܷܣܛܠܐܴ ܪܺܝܫܳܝܬܳܐ ܘܰܕܠܐܴ ܚܳܫܽܘܫܽܘܬܳܐ ܬܶܗܘܶܐ ܡܰܦܽܘܠܬܶܗ ܣܰܩܳܐ܇ ܟܕ ܡܰܘܟܶܡ ܒܟܺܐܒ̈ܐ ܘܰܒܟܽܘܪ̈ܗܳܢܶܐ ܕܡ̣ܢ ܥܶܠܰܬ ܚܛܺܝܬܳܐ ܐܷܬܰܘ ܥܠܰܘܗܝ. ܘܡܶܟܺܝܠ ܠܘܳܬ ܫܽܘܘܕܳܥܳܐ ܕܥܶܪܒܳܐ ܡܚܰܘܶܐ ܗܘܳܐ ܠܚܰܙܳܝ̈ܐ. ܐܠܐ ܕܡܽܘܬܳܐ ܕܓܰܕܝܳܐ ܡܥܰܛܰܦ ܗܘܳܐ. ܓܰܠܝܳܐ ܗ̄ܝ ܓܶܝܪ ܕܣܰܩܳܐ ܡ̣ܢ ܣܰܥܪܳܐ ܕܥܶܙ̈ܐ ܡܶܙܕܩܰܪ. ܠܗܳܢܳܐ ܠܒܽܘܫܳܐ ܡܶܬܚܰܒܠܳܢܳܐ ܕܰܐܘܟܶܡ ܒܟܽܘ̈ܬܡܳܬܳܐ ܕܥܰܬܕܰܬ ܘܙܶܩܪܰܬ ܚܛܺܝܬܳܐ ܠܒܰܪܢܳܫܳܐ ܩܰܕܡܳܝܳܐ܆ ܠܶܗ ܠܒܶܫ ܐܠܰܗܐ ܡܶܠܬܳܐ. ܐܷܡܰܪ ܓܶܝܪ ܛܽܘܒܳܢܳܐ ܦܰܘܠܽܘܣ. ܕܗܰܘ ܕܠܐܴ ܝܳܕܰܥ ܗܘܳܐ ܚܛܺܝܬܳܐ܆ ܡܶܛܽܠܳܬܟܽܘܢ ܚܛܺܝܬܳܐ ܥܰܒܕܶܗ. ܕܰܚܢܰܢ ܢܶܗܘܶܐ ܒܶܗ ܙܰܕܺܝܩܽܘܬܳܐ ܕܰܐܠܗܳܐ (ܒ ܩܘܪ̈ܢܬܝܐ ܗ: ܟܐ). ܐܰܝܟܰܢܳܐ ܕܒܰܟܪܺܝܗܽܘܬܶܗ ܢܰܥܛܶܦ ܚܠܺܝܡܽܘܬܳܐ ܠܓܶܢܣܳܐ ܐܢܳܫܳܝܳܐ. ܡܶܛܽܠܗܳܢܳܐ ܓܶܝܪ ܡܰܥܶܠ ܘܳܐܡܰܪ:
ܡܰܟܟܶܬ ܢܰܦܫܝ ܒܨܰܘܡܳܐ܇ ܘܰܨܠܽܘܬܝ ܠܥܽܘܒܝ ܗܶܦܟܰܬ. ܪܺܝܫܳܐ ܓܝܪ ܕܡܶܬܒܰܪܢܫܳܢܽܘܬܳܐ܆ ܨܰܘܡܳܐ ܗܘܳܐ ܠܶܗ ܠܦܳܪܽܘܩܰܢ. ܘܡܶܛܽܠ ܕܣܰܓܺܝ ܐܷܬܡܰܟܰܟ ܒܗܳܢܳܐ. ܚܕܳܐ: ܒܗܳܝ ܕܰܟܦܶܢ ܟܰܕ ܨܳܡ. ܕܬܰܪܬܶܝܢ: ܒܗܳܝ ܕܡܶܢ ܥܰܒܕܳܐ ܡܳܪܽܘܕܳܐ ܩܰܒܶܠ ܕܢܶܬܢܰܣܶܐ. ܐܷܡܰܪ ܕܢܰܦܫܝ ܡܰܟܟܶܬ ܒܨܰܘܡܳܐ. ܐܰܝܢܳܐ ܡܽܘܟܳܟܳܐ ܕܪܰܒ ܡ̣ܢ ܗܳܢܳܐ ܠܐܱܠܳܗܳܐ. ܕܢܶܬܶܠ ܕܢܶܬܚܰܙ̈ܝܳܢ ܒܶܗ ܐܴܬܘ̈ܬܳܐ ܕܟܰܦܢܳܐ܇ ܒܗܰܘ ܕܺܐܝܬܰܘܗܝ ܡܬܰܪܣܝܳܢܳܐ ܕܟܽܠ ܘܚܰܝ̈ܐ ܕܟܽܠ. ܡܶܛܽܠܗܳܢܳܐ ܚܰܘܺܝ ܠܰܢ ܕܡܰܠܝܳܐܝܬ ܐܷܫܬܰܘܬܰܦ ܠܚܰܫܰܘ̈ܗܝ ܕܳܐܕܳܡ. ܠܰܘ ܕܠܐ ܥܰܡ̈ܠܐܷ ܫܚܺܝ̈ܩܶܐ ܬܽܘܪ̈ܳܨܰܘܗܝ ܕܗܰܘ ܕܰܢܦܰܠ ܥܳܒܶܕ ܗܘܳܐ. ܐܷܡܰܪܘ ܓܶܝܪ ܐܷܘܰܢܓܶܠܺܝ̈ܣܛܶܐ ܥܰܠ ܡܽܘܟܳܟܶܗ ܕܠܽܘܩܒܰܠ ܪܳܡܽܘܬܶܗ ܕܳܐܟܶܠܩܰܪܨܳܐ. ܘܶܐܬܕܒܰܪ ܝܶܫܽܘܥ ܠܡܰܕܒܪܳܐ܆ ܕܢܶܬܢܰܣܶܐ ܡ̣ܢ ܐܳܟܶܠܩܰܪܨܳܐ. ܘܨܳܡ ܐܰܪܒܥܺܝܢ ܐܻܝ̈ܡܳܡܺܝܢ ܘܰܐܪܒܥܺܝܢ ܠܰܝ̈ܠܰܘܳܬܳܐ. ܘܰܐܚܪܳܝܰܬ ܕܶܝܢ ܟܦܶܢ. ܘܰܩܪܶܒ ܗܰܘ ܕܰܡܢܰܣܶܐ ܘܶܐܡܰܪ ܠܶܗ. ܐܢ ܒܪܶܗ ܐܱܢܬ ܕܰܐܠܗܐ܆ ܐܡܰܪ ܕܗܳܠܶܝܢ ܟܺܐܦ̈ܐ ܢܶܗܘ̈ܝܳܢ ܠܰܚܡܳܐ (ܡܬܝ ܕ: ܐ-ܓ). ܡܳܢܳܐ ܕܶܝܢ ܡܦܰܢܶܐ ܗܘܳܐ ܦܶܬܓܳܡܳܐ ܠܽܘܩܒܰܠ ܗܳܢܳܐ ܢܶܣܝܽܘܢܳܐ. ܠܐ ܐܶܬܪܰܘܪܰܒ ܠܽܘܩܒܰܠ ܗܰܘ ܕܡܶܫܬܰܩܰܠ ܗܘܳܐ ܒܨܰܘܪܳܐ ܪܳܡܳܐ. ܘܠܰܘ ܐܰܝܟ ܚܰܝܠܶܗ ܥܰܢܝܶܗ. ܘܠܐܴ ܓܥܰܪ ܒܶܗ. ܗܰܘ ܕܡܶܫܟܰܚ ܗܘܳܐ ܕܰܐܠܗܰܐ ܗ̄ܘ܇ ܕܰܒܪܽܘܚܳܐ ܕܦܽܘܡܶܗ ܢܣܺܝܦܺܝܘܗܝ. ܐܷܠܐ ܡܶܠܬܳܐ ܕܰܐܡܺܝܪܳܐ ܠܡܽܘܫܶܐ ܦܰܢܺܝ ܠܶܗ. ܕܠܐ ܗܘܳܐ ܒܠܰܚܡܳܐ ܚܳܝܶܐ ܒܰܪܢܳܫܳܐ ܐܠܐ ܒܟܽܠ ܡܶܠܐܴ ܕܢܳܦܩܳܐ ܡ̣ܢ ܦܽܘܡܶܗ ܕܰܐܠܗܳܐ (ܡܬܝ ܕ: ܕ ܬܢܝܢ ܢܡܘܣܐ ܚ: ܓ). ܠܰܘ ܐܰܝܟ ܕܰܐܛܥܺܝܬ̇ ܠܰܕܒܶܝܬ ܐܴܕܳܡ ܒܡܶܐܟܽܘܠܬܳܐ܆ ܘܫܰܠܰܚܬ ܬܶܫܒܽܘܚܬܳܐ ܕܰܠܒܺܝܫܺܝܢ ܗܘܰܘ܇ ܡܰܛܥܶܐ ܐܰܢܬ ܒܺܝ. ܗܰܘ ܡܽܘܟܳܟܳܐ ܪܰܒܳܐ ܕܠܐ ܡܶܬܡܰܠܰܠ܆ ܕܡܰܟܶܟ ܥܰܡܰܢܽܘܐܷܝܠ ܢܰܦܫܶܗ ܒܨܰܘܡܳܐ. ܘܠܰܘ ܗܳܕܶܐ ܒܰܠܚܽܘܕ܇ ܐܠܐ ܩܪ̈ܳܒܶܐ ܣܰܓܺܝ̈ܐܐ ܥܰܬܶܕ ܠܩܽܘܒܠܶܗ ܒܡܰܕܒܪܳܐ: ܗܳܠܶܝܢ ܕܠܐ ܟܬܺܝܒܺܝܢ. ܐܷܠܽܘ ܡܰܗܡܶܐ ܬܽܘܒ ܒܳܬܰܪ ܨܰܘܡܳܐ܆ ܠܰܘ ܠܰܨܠܽܘܬܳܐ ܩܳܪܶܒ ܗܘܳܐ. ܗܳܝ ܕܶܐܡܰܪ ܡܙܰܡܪܳܢܳܐ ܐܰܝܟ ܕܡ̣ܢ ܦܰܪܨܽܘܦܶܗ ܕܥܰܡܰܢܽܘܐܷܝܠ. ܘܰܨܠܽܘܬܝ ܠܥܽܘܒܝ ܗܶܦܟܰܬ. ܨܠܽܘܬܶܗ ܕܶܝܢ ܕܗܰܘ ܕܰܗܘܳܐ ܪܰܒ ܟܽܘܡܪ̈ܶܐ ܚܠܳܦܰܝܢ܇ ܕܶܐܬܢܰܒܺܝ ܡܙܰܡܪܳܢܳܐ ܕܗܶܦܟܰܬ ܠܥܽܘܒܶܗ܆ ܥܰܠ ܕܰܐܦܺܝܣ ܠܐܱܒܳܐ ܡܶܛܽܠ ܫܠܺܝܚ̈ܐ ܩܰܕܺܝ̈ܫܶܐ. ܐܰܒܳܐ ܠܰܡ ܩܰܕܺܝܫܳܐ܇ ܛܰܪ ܐܷܢܽܘܢ ܒܰܫܡܳܟ ܩܰܕܺܝܫܳܐ ܗܰܘ ܕܝܰܗܒܬ ܠܺܝ (ܝܘܚܢܢ ܝܙ: ܝܐ). ܘܬܽܘܒ ܐܷܡܰܪ ܠܘܳܬ ܐܰܒܳܐ. ܕܠܐ ܗܘܳܐ ܥܰܠ ܐܰܦܰܝ̈ ܗܳܠܶܝܢ ܒܳܥܶܐ ܐܢܳܐ ܒܰܠܚܽܘܕ܆ ܐܷܠܐ ܐܴܦ ܥܰܠ ܟܽܠܗܽܘܢ ܐܱܝܠܶܝܢ ܕܰܡܗܰܝܡܢܺܝܢ ܒܺܝ ܒܡܶܠܰܬܗܽܘܢ. … ܕܢܶܗܘܽܘܢ ܚܰܕ: ܐܰܝܟܰܢܳܐ ܕܰܚܢܰܢ ܚܰܕ ܐܻܝܬܰܝܢ (ܝܘܚܢܢ ܝܙ: ܟ-ܟܒ). ܗܳܕܳܐ ܗܝ ܨܠܽܘܬܳܐ ܠܚܽܘܕܳܝܬܳܐ ܘܺܝܚܺܝܕܳܝܬܳܐ܆ ܗܳܝ ܕܗܶܦܟܰܬ ܠܥܽܘܒܶܗ ܕܗܰܘ ܕܨܰܠܺܝ ܚܠܳܦܰܝܢ. ܟܰܕ ܥܶܠܳܝ ܡ̣ܢ ܟ̇ܠ ܣܽܘ̈ܢܩܳܢܺܝܢ. ܕܰܐܥܛܶܦ ܓܶܢܣܳܐ ܐܢܳܫܳܝܳܐ ܠܥܽܘ̈ܒܶܐ ܕܡܰܠܟܽܘܬܶܗ ܒܺܐܝܕܶܗ ܕܥܰܡܰܢܽܘܐܷܝܠ. ܡܰܘܕܰܥ ܒܳܬܰܪ ܗܳܠܶܝܢ ܕܰܠܘܳܬ ܚܰܫ̈ܐ ܩܪܶܒ ܗܘܳܐ܆
ܐܰܝܟ ܪܳܚܡܳܐ ܘܰܐܝܟ ܐܰܚܳܐ ܡܗܰܠܶܟ ܗܘܺܝܬ܆ ܘܰܐܝܟ ܗܰܘ ܕܝܳܬܶܒ ܒܶܐܒܠܐܴ ܐܷܬܕܘܺܝܬ. ܘܰܒܚܰܫܝ ܐܷܬܟܰܢܰܫܘ ܘܰܚܕܺܝܘ ܠܺܝ. ܐܶܬܟܰܢܰܫܘ ܥܠܰܝ ܢܽܘܓܪܳܐ ܘܠܐ ܝܶܕܥܶܬ: ܒܫܽܘܒܗܳܪܗܽܘܢ ܘܰܒܒܽܘܙܳܚܗܽܘܢ ܚܰܪܶܩܘ ܥܠܰܝ ܫܶܢܰܝ̈ܗܽܘܢ. ܡܳܪܝ ܟܰܕܽܘ ܚܙܰܝܬ܆ ܐܱܗܦܶܟ ܢܰܦܫܝ ܡ̣ܢ ܫܓܽܘܫܺܝܗܽܘܢ. ܗܳܠܶܝܢ ܩܴ̈ܠܐ ܠܐܴ ܣܢܺܝܩܺܝܢ ܥܰܠ ܢܽܘܗܳܪܳܐ ܣܰܓܺܝܐܳܐ. ܡܶܛܠ ܕܺܝܕܺܝܥܺܝܢ ܐܷܢܘܢ܆ ܕܥܰܠ ܒܶܙܚܳܐ ܕܨܳܠܽܘ̈ܒܶܐ ܐܰܡܺܝܪܺܝܢ. ܒܪܰܡ ܕܶܝܢ ܡܶܛܠ ܕܶܐܡܰܪ. ܕܶܐܬܟܰܢܰܫܘ ܥܠܰܝ ܢܽܘܓܪܳܐ ܘܠܐܴ ܝܶܕܥܶܬ: ܗܳܕܶܐ ܠܰܘ ܥܠܰܘܗܝ ܕܡܶܠܬܳܐ ܡܶܬܢܣܶܒ ܩܳܠܐܴ ܗܳܢܳܐ. ܐܷܠܐ ܥܰܠ ܢܒܺܝܳܐ ܗܰܘ ܕܰܐܡܪܳܗ̇. ܗܰܘ ܕܩܰܕܶܡ ܓܶܝܪ ܐܷܡܰܪ ܠܬܰܠܡܺܝ̈ܕܶܐ ܩܰܕܺܝ̈ܫܶܐ ܕܺܝܠܶܗ. ܕܗܳܐ ܣܳܠܩܺܝܢܰܢ ܠܐܘܪܺܫܠܶܡ܆ ܘܡܶܫܬܰܠܡܴ̈ܢ ܟܽܠܗܶܝܢ ܕܰܐܡܺܝܪ̈ܳܢ ܒܰܢܒܺܝ̈ܐ ܘܰܒܡܰܙܡܽܘܪ̈ܶܐ ܥܠܰܝ (ܠܘܩܐ ܝܚ: ܠܐ). ܘܬܽܘܒ ܐܷܡܰܪ. ܕܰܥܬܺܝܕ ܗܘ̣ ܒܪܶܗ ܕܐܢܳܫܳܐ ܕܢܶܫܬܠܶܡ ܒܺܐܝ̈ܕܰܝ ܒܢܰܝ̈ܢܳܫܳܐ. ܘܢܰܫܠܡܽܘܢܳܝܗܝ ܠܥܰܡ̈ܡܶܐ. ܘܰܢܒܰܙܚܽܘܢ ܒܶܗ ܘܰܢܢܰܓܕܽܘܢܳܝܗܝ ܘܢܶܩܛܠܽܘܢܳܝܗܝ. ܘܰܠܝܰܘܡܳܐ ܕܰܬܠܳܬܳܐ ܢܩܽܘܡ (ܡܬܝ ܟ: ܝܚ ܡܪܩܘܣ ܝ: ܠܓ). ܗܰܘ ܡܳܕܶܝܢ ܕܩܰܕܶܡ ܐܷܡܰܪ܇ ܕܟܽܠ ܡܶܕܶܡ ܕܶܐܬܳܐ ܥܠܰܘܗܝ܆ ܠܐ ܠܳܚܶܡ ܠܶܗ ܩܳܠܐܴ ܗܰܘ: ܕܠܐܴ ܝܶܕܥܶܬ. ܐܰܝܟܰܢܳܐ ܐܻܝܬܰܘܗܝ ܠܐܴ ܝܳܕܽܘܥܳܐ ܗܰܘ ܒܳܚܽܘܪܳܐ ܕܠܶܒܰܘܴ̈ܬܳܐ. ܐܷܡܰܪ ܢܒܺܝܳܐ ܥܰܠ ܐܻܝܪܳܘܕܺܝܣ ܘܦܺܝܠܰܛܽܘܣ ܪ̈ܺܝܫܳܢܶܐ ܕܡܶܢ ܥܰܡ̈ܡܶܐ܆ ܟܰܕ ܫܳܐܷܠ ܡܶܬܦܰܨܝܳܢܽܘܬܳܐ ܕܡܶܢܗܽܘܢ.
ܘܡܶܢ ܐܰܪ̈ܝܰܘܳܬܳܐ ܝܺܚܺܝܕܽܘܬܝ. ܐܰܪ̈ܝܰܘܳܬܳܐ ܠܰܡ ܩܳܪܶܐ ܠܗܽܘܢ ܢܒܺܝܳܐ܇ ܡܶܛܠ ܕܺܐܝܬ ܗܘܳܐ ܠܗܽܘܢ ܫܽܘܠܛܳܢܳܐ ܐܰܝܟ ܐܰܪ̈ܝܰܘܳܬܳܐ. ܐܷܠܐ ܒܳܬܰܪ ܗܳܠܶܝܢ:
ܐܱܘܕܶܐ ܠܳܟ ܒܥܺܕܬܳܐ ܪܰܒܬܳܐ. ܘܰܒܥܰܡ̈ܡܶܐ ܣܰܓܺܝ̈ܐܐ ܐܷܙܰܡܰܪ ܠܳܟ. ܗܳܢܳܐ ܩܳܠܐܴ ܡܰܣܠܐܷ ܠܳܗ̇ ܠܰܟܢܽܘܫܬܳܐ܆ ܘܥܺܕܬܳܐ ܪܰܒܬܳܐ ܡܰܬܩܶܢ ܒܟܽܠܶܗ ܥܳܠܡܳܐ. ܗܳܝ ܕܠܰܘ ܡ̣ܢ ܚܰܕ ܥܰܡܳܐ ܟܢܺܝܫܳܐ. ܐܰܝܟ ܐܽܘܪܺܫܠܶܡ ܗܳܝ ܩܳܛܠܰܬ ܢܒܺܝ̈ܐ܆ ܐܠܐ ܒܥܰܡ̈ܡܶܐ ܣܰܓܺܝ̈ܐܐ. ܘܫܶܐܠ ܕܰܘܝܕ ܢܶܦܽܘܩ ܒܳܬܰܪ ܨܠܺܝܒܳܐ ܢܙܰܡܰܪ ܠܐܱܒܳܐ. ܘܗܳܕܶܐ ܠܰܛܢܳܢܳܐ ܕܡܰܪ̈ܳܚܶܐ ܕܰܨܠܰܒܘ ܠܡܳܪܗܽܘܢ:
ܕܠܐܴ ܠܰܡ ܢܶܚܕܽܘܢ ܠܝ̣ ܒܥܶܠܕ̈ܒܳܒܰܝ ܫܰܩܳܪ̈ܶܐ ܕܣܳܢܶܝܢ ܠܝ̣ ܡܰܓܳܢ. ܕܰܡܪܰܡܙܺܝܢ ܒܥܰܝ̈ܢܰܝܗܽܘܢ: ܘܰܫܠܳܡܳܐ ܠܐܴ ܐܴܡܪܺܝܢ܆ ܘܥܰܠ ܡܰܟܺܝܟܳܐ ܕܰܐܪܥܳܐ ܢܶܟܠܐܴ ܠܰܡ ܡܶܬܚܰܫܒܺܝܢ: ܦܬܰܚܘ ܥܠܰܝ ܦܽܘܡܗܽܘܢ ܘܶܐܡܰܪܘ. ܐܷܗܶܐ ܐܷܗܶܐ ܚܙܳܬ ܒܶܗ ܥܰܝܢܰܢ. ܘܗܳܠܶܝܢ ܬܽܘܒ ܟܽܠܗܶܝܢ ܥܰܠ ܫܓܽܘܫܝܳܐ ܘܪܰܘܒܳܐ ܘܨܰܥܪܳܐ ܕܰܗܘܳܐ ܡ̣ܢ ܝܽܘ̈ܕܳܝܶܐ ܥܰܠ ܥܰܡܰܢܽܘܐܝܠ ܡܩܰܕ̈ܡܳܢ ܗܘܱ̈ܝ ܡܰܘ̈ܕܥܳܢ. ܘܠܐܴ ܣܢܺܝ̈ܩܳܢ ܕܰܚܕܳܐ ܚܕܳܐ ܡܶܢܗܶܝܢ ܢܢܰܗܰܪ ܐܷܢܶܝܢ. ܘܒܳܬܰܪܟܶܢ ܡܰܘܕܰܥ ܩܳܠܶܗ ܕܰܐܒܳܐ ܨܶܝܕ ܒܪܳܐ܇ ܗܳܝ ܕܶܐܡܰܪ. ܐܝ̣ܠ ܐܝ̣ܠ ܠܡܳܢܳܐ ܫܒܰܩܬܳܢܝ (ܡܪܩܘܣ ܝܗ: ܠܕ). ܡܰܝܬܶܐ ܟܕ ܠܰܘ ܣܰܓܺܝ ܡܫܰܚܠܶܦ ܠܶܗ ܠܩܳܠܐܴ.
ܚܙܰܝܬ ܐܠܰܗܳܐ ܠܐ ܬܶܫܬܽܘܩ. ܡܳܪܝ ܘܠܐ ܬܰܪܚܶܩ ܡܶܢܝ. ܙܳܕܶܩ ܗܘܳܐ ܒܕܰܐܝܟ ܗܳܠܶܝܢ ܢܶܬܚܰܫܰܚ܆ ܡܶܛܠ ܕܰܢܫܰܪܰܪ ܠܗܳܝ ܕܰܗܘܳܐ ܒܰܪܢܳܫܳܐ. ܐܷܠܐ ܗܳܪܟܳܐ ܬܰܟܫܶܦܬܳܐ ܕܩܰܕܺܝ̈ܫܶܐ ܥܳܐܠܐܴ܆ ܕܠܐܴ ܢܶܫܬܰܒܩܽܘܢ ܡ̣ܢ ܬܶܫܒܽܘܚܬܳܐ ܘܥܽܘܕܪܳܢܶܗ ܕܰܐܠܗܳܐ. ܟܕ ܕܳܝܢܺܝܢ ܒܥܰܝܢܳܐ ܣܡܺܝܬܳܐ ܝܺܗܽܘܕܳܐܝܬ. ܐܷܠܐ ܟܕ ܡܰܘܕܶܝܢ ܠܗܰܘ ܕܗܳܠܶܝܢ ܣܰܝܒܰܪ ܐܠܰܗܐ. ܘܰܐܝܟ ܕܰܠܕܰܡܟܳܐ ܡ̣ܢ ܫܶܢܬܳܐ ܕܡܰܘܬܳܐ ܡܥܺܝܪܺܝܢ ܠܶܗ ܘܳܐܡܪܺܝܢ܆
ܐܷܬܬܥܺܝܪ ܠܕܺܝܢܝ ܐܠܰܗܝ ܘܡܳܪܝ. ܘܰܚܙܺܝ ܥܽܘܠܒܳܢܝ: ܕܽܘܢܰܝܢܝ ܐܱܝܟ ܙܰܕܺܝܩܽܘܬܳܟ ܡܳܪܝܳܐ. ܐܱܝܟ ܕܠܐܴ ܡܶܟܺܝܠ ܩܳܐܷܡ ܗܘܳܐ ܡ̣ܢ ܩܰܒܪܳܐ. ܗܰܘ ܚܰܝܳܐ ܕܰܛܥܶܡ ܡܰܘܬܳܐ ܨܶܒܝܳܢܳܐܝܬ. ܥܶܠܰܬ ܟܰܪܝܽܘܬܳܐ ܒܪܶܥܝܳܢܳܐ ܕܩܰܕܺܝ̈ܫܶܐ. ܘܝܰܬܺܝܪܳܐܝܬ ܒܗܳܠܶܝܢ ܕܒܶܝܬ ܩܠܶܝܽܘܦܰܐ. ܡܶܛܠ ܕܪܽܘܚܳܐ ܕܰܢܒܺܝܽܘܬܳܐ ܡܩܰܕܡܳܐ ܗܘܳܬ ܡܶܬܢܰܒܝܳܐ ܠܶܗ ܠܐܴܕܳܡ ܥܰܠ ܩܝܳܡܬܳܐ ܕܡ̣ܢ ܒܶܝܬ ܡܺܝ̈ܬܶܐ. ܒܗܰܘ ܙܰܒܢܳܐ ܕܰܗܘܳܐ ܡܰܘܬܳܐ ܦܳܪܽܘܩܳܝܳܐ. ܟܕ ܠܘܳܬ ܦܣܳܩ ܣܰܒܪܳܐ ܝܳܨܶܦ ܗܘܳܐ ܗܰܘ ܕܰܐܠܶܦ ܚܛܺܝܬܳܐ. ܡܶܛܠ ܕܰܐܝܟ ܕܰܡܟܳܐ ܘܠܰܘ ܐܱܝܟ ܡܺܝܬܳܐ ܡܶܬܒܰܩܶܐ ܗܘܳܐ ܒܶܗ ܢܒܺܝܳܐ. ܘܰܡܦܺܝܣ ܠܶܗ ܕܢܶܬܬܥܺܝܪ ܡ̣ܢ ܡܰܘܬܳܐ ܘܢܶܚܙܶܐ ܥܽܘܠܒܳܢܶܗ ܕܰܟܝܳܢܳܐ ܐܢܳܫܳܝܳܐ ܡ̣ܢ ܒܥܶܠܕܰܪܳܐ. ܘܥܰܠܗܳܝ ܐܴܡܰܪ ܗܘܳܐ ܒܢܺܝܫܳܐ ܕܰܥܠܺܝ̈ܒܶܐ. ܐܷܬܬܥܺܝܪ ܠܕܺܝܢܝ ܐܠܰܗܝ ܘܡܳܪܝ. ܘܰܚܙܺܝ ܥܽܘܠܒܳܢܝ. ܚܙܺܝ ܠܰܡ ܐܱܝܟܳܐ ܣܰܚܦܰܢܝ ܒܥܶܠܕܒܳܒܝ. ܘܠܐܴ ܬܶܛܥܶܐ ܠܥܰܒܕܳܟ ܒܩܰܒܪܳܐ ܕܰܚܒܳܠܐܴ. ܐܷܠܐ ܐܰܢܬ ܩܽܘܡ ܠܳܟ ܡ̣ܢ ܡܰܘܬܳܐ܇ ܡܶܛܠ ܕܠܐܴ ܫܳܒܶܩ ܠܳܟ ܟܝܳܢܳܐ ܕܺܝܠܳܟ ܠܐܴ ܡܳܝܽܘܬܳܐ܆ ܕܰܬܩܰܘܶܐ ܒܰܐܬܪܳܐ ܕܡܰܦܽܘܠܬܰܢ.
ܐܷܠܐ ܕܽܘܢܰܝܢܝ ܐܱܝܟ ܙܰܕܺܝܩܽܘܬܳܟ ܡܳܪܝܳܐ. ܕܠܐܴ ܢܶܚܕܽܘܢ ܠܝ̣ ܘܠܐܴ ܢܺܐܡܪܽܘܢ ܒܠܶܒܗܽܘܢ. ܕܶܐܬܬܢܺܝܚܰܬ ܢܰܦܫܰܢ ܘܛܰܒܰܥܢܳܝܗܝ. ܚܙܺܝ ܡܳܢܳܐ ܐܴܡܪܺܝܢ ܥܰܠ ܨܳܡܰܪܬܳܐ ܕܰܚܛܺܝܬܳܐ. ܕܛܰܒܥܽܘܢܝ ܒܳܗ̇ ܡܳܪ̈ܽܘܕܶܐ. ܘܕܰܠܳܢܝ ܡ̣ܢ ܓܽܘܡܳܨܳܐ ܕܰܫܕܰܐܘܽܢܝ ܒܶܗ.
ܘܢܶܒܗܬܽܘܢ ܘܢܰܚܦܪܽܘܢ ܐܱܟܚܕܳܐ܇ ܐܱܝܠܶܝܢ ܕܨܳܒܶܝܢ ܠܒܺܝܫܬܝ. ܡܶܛܠ ܕܠܰܘ ܡ̣ܢ ܨܶܒܝܳܢܝ ܕܶܝܢ ܐܷܫܟܰܚܬܳܗ̇ ܠܰܚܛܺܝܬܳܐ. ܐܷܠܐ ܛܪ̈ܽܘܢܶܐ ܘܓܰܝ̈ܣܶܐ ܫܒܰܘ ܠܐܷܡܳܐ ܕܟܽܠ ܕܚܰܝ܇ ܘܰܐܦܩܽܘܗ̇ ܠܡܰܕܘܰܝܬܳܐ ܒܬܰܘܫܳܐ ܕܬܽܘ̈ܩܠܳܬܳܐ. ܡ̣ܢ ܗܳܝܕܶܝܢ܆ ܐܴܦ ܥܕܰܡܳܐ ܠܗܳܫܳܐ ܐܷܬܪܰܘܪܰܒ ܥܰܠ ܓܶܢܣܳܐ ܕܰܒܢܰܝ̈ܢܳܫܳܐ ܘܫܰܦܠܽܘܗܝ. ܡܶܛܠ ܐܰܝܠܶܝܢ ܕܶܐܬܬܪܺܝܡܘ ܥܰܠ ܐܴܕܳܡ܇ ܐܷܡܰܪ ܕܰܘܝܕ ܗܳܠܶܝܢ ܒܐܪܳܙܳܐ: ܘܡܰܥܶܠ ܡܶܠܬܳܐ ܕܡܰܘܕܥܳܐ ܣܽܘܥܪܳܢܳܐ ܘܳܐܡܰܪ:
ܘܰܐܝܠܶܝܢ ܕܡܶܬܪܰܘܪܒܺܝܢ ܥܠܰܝ ܢܶܠܒܫܽܘܢ ܒܶܗܬܬܳܐ. ܡܳܐ ܕܚܳܙܶܝܢ ܕܰܒܚܰܫܶܗ ܕܰܡܫܺܝܚܳܐ ܡܳܪܰܢ ܐܷܬܦܪܶܩܘ ܥܰܒ̈ܕܶܐ. ܘܰܐܦܢܺܝ ܠܰܛܪ̈ܝ̣ܕܶܐ ܐܷܣܛܠܐܴ ܕܰܫܠܰܚܘ ܟܰܕ ܚܛܰܘ. ܘܡܶܟܺܝܠ ܡܫܰܒܚܺܝܢ ܡܰܠܐܟ̈ܐ: ܡܳܐ ܕܚܳܙܶܝܢ ܦܽܘܢܳܝܳܐ ܕܰܛܪ̈ܺܝܕܶܐ ܘܪܳܘܙܺܝܢ ܟܶܢ̈ܫܶܐ ܕܥܶܠܳܝ̈ܐ ܒܙܳܟܽܘܬܳܐ ܕܚܰܛܳܝ̈ܐ. ܐܷܡܰܪ ܓܶܝܪ ܡܙܰܡܪܳܢܳܐ:
ܢܫܰܒܚܽܘܢ ܘܢܶܚܕܽܘܢ ܐܱܝܠܶܝܢ ܕܨܳܒܶܝܢ ܠܙܳܟܽܘܬܝ. ܥܰܠ ܗܳܠܶܝܢ ܐܷܡܰܪ ܡܳܪܰܢ. ܕܚܰܕܽܘܬܳܐ ܬܶܗܘܶܐ ܒܰܝܢܳܬܗܽܘܢ ܥܰܠ ܚܰܕ ܚܰܛܳܝܳܐ ܕܬܳܐܷܒ (ܠܘܩܐ ܝܗ: ܙ ܝܗ: ܝ). ܡܶܛܽܠ ܗܳܕܶܐ ܙܳܟܽܘܬܳܐ ܕܰܗܘܳܬ ܠܚܰܛܳܝ̈ܐ ܒܚܰܫܶܗ ܕܰܐܠܳܗܳܐ܆
ܢܺܐܡܪܽܘܢ ܒܟܽܠܙܒܰܢ ܕܪܰܒ ܗܘ ܐܠܰܗܐ܆ ܕܰܨܒܳܐ ܒܰܫܠܳܡܳܐ ܕܥܰܒܕܶܗ. ܥܰܒܕܶܗ ܕܶܝܢ: ܠܟܽܠܶܗ ܟܝܳܢܳܐ ܐܢܳܫܳܝܳܐ ܡܫܰܡܰܗ. ܘܥܰܠܗܳܕܶܐ ܐܴܦ ܡܰܠܐܟ̈ܐ ܩܳܥܶܝܢ ܗܘܰܘ ܟܕ ܐܷܬܚܙܺܝ ܒܰܒܣܰܪ. ܫܽܘܒܚܳܐ ܠܐܱܠܳܗܳܐ ܒܰܡܪ̈ܰܘܡܶܐ܇ ܘܥܰܠ ܐܱܪܥܳܐ ܫܠܳܡܳܐ܆ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ (ܠܘܩܐ ܒ: ܝܕ). ܒܗܳܢܳܐ ܫܠܳܡܳܐ ܕܥܰܒܕܶܗ ܐܷܡܰܪ܇ ܕܰܨܒܳܐ ܡܳܪܝܳܐ. ܗܰܘ ܕܰܐܝܟ ܒܳܬܰܪ ܚܰܕ ܢܦܰܩ ܒܰܒܥܳܬܳܐ ܕܟܽܠܗܽܘܢ ܥܰܡ̈ܡܶܐ. ܟܰܕ ܚܠܳܦ ܗܳܠܶܝܢ ܐܷܡܰܪ ܢܒܺܝܳܐ.
ܠܶܫܳܢܝ ܢܰܘܕܶܐ ܒܙܰܕܺܝܩܽܘܬܳܟ. ܘܟܽܠܶܗ ܝܰܘܡܳܐ ܬܶܫܒ̈ܚܳܬܳܟ. ܟܰܕ ܐܻܝܬܰܝܟ ܚܰܝܳܐ ܘܠܐܴ ܡܳܝܽܘܬܳܐ܆ ܨܒܰܝܬ ܕܰܒܚܰܫܷ̈ܐ ܕܰܩܢܽܘܡܳܟ ܠܟܽܠ ܬܰܚܶܐ ܘܬܶܦܪܽܘܩ. ܡܶܛܠܗܳܢܳܐ ܟܽܠܶܗ ܝܰܘܡܳܐ ܢܰܣܶܩ ܫܽܘܒܚܳܐ. ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܺܝܢ. ܐܱܡܺܝܢ܀
ܡܙܡܘܪܐ ܕܬܠܬܝܢ ܘܫܬܐ
ܠܽܘܩܒܰܠ ܚܽܘ̈ܫܳܒܶܐ ܕܥܳܒ̈ܕܰܝ ܥܰܘܠܐܴ: ܘܥܰܠ ܪ̈ܰܚܡܶܐ ܕܰܐܠܗܳܐ ܕܰܐܚܺܝܕܺܝܢ ܡܕܰܒܪܳܢܽܘܬܶܗ ܕܗܳܢܳܐ ܥܳܠܡܳܐ: ܘܥܰܠ ܪܰܘܡܳܐ ܕܗܰܝܡܳܢܽܘܬܳܐ ܕܰܒܟܽܠ ܥܳܠܡ̈ܝ̣ܢ ܪ̈ܽܘܚܳܢܶܐ ܘܦܰܓܪ̈ܳܢܶܐ.
ܡܰܟܣܳܢܽܘܬܳܐ ܕܥܰܘܴ̈ܠܐ ܘܦܽܘܪܣܳܝܳܐ ܕܡܰܚܫ̈ܒܳܬܳܐ ܕܰܐܝܠܶܝܢ ܕܣܳܥܪܺܝܢ ܒܺܝ̈ܫܳܬܳܐ ܥܰܠ ܡܰܫܟܰܒܗܽܘܢ܆ ܠܓܶܠܝܳܐ ܡܰܝܬܶܐ ܛܽܘܒܳܢܳܐ ܕܰܘܝܕ ܒܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܫܶܬ. ܟܕ ܡܩܰܕܶܡ ܗܘܳܐ ܘܢܳܣܶܒ ܥܶܠܬܳܐ: ܘܟܶܢ ܡܶܬܢܰܒܶܐ܇ ܐܱܝܠܶܝܢ ܕܒܳܗ̇ ܐܷܡܰܪ ܡ̣ܢ ܡܰܪܳܚܽܘܬܶܗ ܕܫܳܐܘܳܠ ܗܰܘ ܕܶܐܣܬܠܺܝ ܡ̣ܢ ܐܠܳܗܳܐ. ܟܰܕ ܓܶܝܪ ܥܰܪܺܝܩ ܘܰܪܕܺܝܦ ܘܡܶܬܛܰܫܶܐ ܡ̣ܢ ܩܕܳܡܰܘܗܝ. ܘܗܽܘ ܫܳܐܘܳܠ ܡܶܬܚܰܫܰܒ ܗܘܳܐ ܥܠܰܘܗܝ ܒܺܝܫܬܳܐ. ܟܰܕ ܐܳܡܰܪ ܠܥܰܒ̈ܕܰܘܗܝ ܘܠܰܒ̈ܢܰܝ ܒܶܢܝܳܡܶܝܢ. ܗܳܐ ܠܟܽܠܟܽܘܢ ܐܴܡܰܪ ܐܢܳܐ: ܪܰܘܪ̈ܒܳܢܰܝ ܐܱܠܦܷ̈ܐ ܘܡܰܐܘܴ̈ܬܳܐ. ܡܶܛܠ ܕܰܡܪܰܕܬܽܘܢ ܟܽܠܟܽܘܢ ܥܠܰܝ. ܘܠܰܝܬ ܕܓܳܠܐܷ ܠܝ̣ ܒܰܩܝܳܡܳܐ ܕܒܶܪܝ ܕܥܰܡ ܒܰܪ ܐܻܝܫܰܝ. ܘܠܰܝܬ ܕܟܳܐܷܒ ܠܶܗ ܡܶܢܟܽܘܢ ܥܠܰܝ ܘܓܳܠܐܷ ܠܝ̣. ܡܶܛܠ ܕܰܐܩܺܝܡ ܒܶܪܝ ܠܥܰܒܕܝ ܥܠܝ ܟܡܺܐܢܳܐ ܐܱܝܟ ܕܝܰܘܡܳܢܳܐ (ܐ ܫܡܘܐܝܠ ܟܒ: ܙ-ܚ). ܠܽܘܩܒܰܠ ܗܳܠܶܝܢ ܡܰܚܫ̈ܒܳܬܳܐ ܥܰܢܴ̈ܬܳܬܳܐ ܘܪ̈ܰܚܺܝܩܳܢ ܡ̣ܢ ܐܠܰܗܐ. ܘܟܰܕ ܝ̣ܠܶܦ ܕܰܘܝܕ܆ ܡܶܬܢܰܒܶܐ ܗܘܳܐ ܘܡܶܬܬܙܺܝܥ ܒܪܽܘܚܳܐ: ܘܰܡܙܰܡܰܪ ܘܳܐܡܰܪ:
ܡܶܬܚܰܫܰܒ ܥܰܘܳܠܐܴ ܪܽܘܫܥܳܐ ܒܠܶܒܶܗ. ܡܶܛܠ ܕܠܰܝܬ ܕܶܚܠܬܶܗ ܕܰܐܠܗܐ ܠܽܘܩܒܰܠ ܥܰܝ̈ܢܰܘܗܝ: ܡܶܛܠ ܕܣܰܢܝܳܐ ܗ̱ܝ ܒܥܰܝ̈ܢܰܘܗܝ܇ ܕܢܶܫܒܽܘܩ ܚܛܳܗܰܘ̈ܗܝ ܘܢܶܣܢܶܐ ܐܷܢܽܘܢ. ܦܶܬܓܳܡܳܐ ܕܦܽܘܡܶܗ ܟܺܐܒܳܐ ܘܢܶܟܠܐܴ: ܘܠܐ ܨܳܒܶܐ ܠܡܶܥܒܰܕ ܛܳܒܬܳܐ. ܟܺܐܒܳܐ ܡܶܬܚܰܫܒ ܥܰܠ ܡܰܫܟܒܶܗ. ܘܰܡܗܰܠܶܟ ܒܽܐܘܪܚܳܐ ܐܱܝܕܳܐ ܕܠܐܴ ܫܰܦܺܝܪܳܐ ܕܢܰܒܶܐܫ. ܗܳܠܶܝܢ ܗܳܟܺܝܠ ܡܙܺܝܥ ܗܘܳܐ ܗܰܘ ܟܶܢܳܪܳܐ ܫܰܦܺܝܪ ܩܴ̈ܠܐ ܕܰܢܒܺܝܘܽܬܳܐ ܠܽܘܩܒܰܠ ܡܰܚܫ̈ܒܳܬܶܗ ܕܗܰܘ ܕܰܢܦܰܠ ܡ̣ܢ ܐܠܰܗܐ. ܘܟܰܕ ܡܶܬܦܢܶܝܢܰܢ܆ ܢܚܽܘܪ ܗܳܫܳܐ ܒܨܰܠܡ̈ܐ ܪ̈ܽܘܚܳܢܶܐ: ܘܰܠܗܰܘ ܢܶܕܰܥ ܕܡܶܬܪܕܶܦ ܒܕܰܘܝܕ ܗܰܘ ܙܰܕܺܝܩܳܐ ܘܰܢܒܺܝܳܐ. ܘܢܶܚܙܶܐ ܠܗܰܘ ܕܪܳܕܶܦ ܗܘܳܐ ܒܫܳܐܘܳܠ ܗܰܘ ܥܰܘܳܠܐܴ܆ ܕܡܶܬܬܰܥܒܰܕ ܗܘܳܐ ܡ̣ܢ ܪܽܘܚܳܐ ܒܺܝܫܬܳܐ. ܘܰܚܙܺܝ ܐܰܝܟܰܢܳܐ ܐܴܡܰܪ. ܡܶܬܚܰܫܰܒ ܥܰܘܠܐܴ ܘܪܽܘܫܥܳܐ ܒܠܶܒܶܗ. ܗܳܢܰܘ ܓܶܝܪ ܥܒܳܕܶܗ܆ ܕܳܐܦܠܐܴ ܒܓܰܘ ܠܶܒܶܗ ܢܶܬܶܠ ܐܱܬܪܳܐ ܠܛܳܒܬܳܐ. ܐܷܠܐ ܐܱܝܟ ܪܶܕܝܳܐ ܕܡܰܝܴ̈ܐ ܚܳܫܶܠ ܒܺܝ̈ܫܳܬܳܐ. ܡܶܛܠ ܕܡܰܘܬܳܐ ܡܶܢܶܗ ܗ̱ܘ܆ ܐܱܝܟ ܕܺܐܝܬ ܥܰܡ ܐܠܰܗܳܐ ܡܰܒܽܘܥܳܐ ܕܚܰܝ̈ܐ. ܡܶܛܠ ܕܠܰܝܬ ܕܶܚܠܬܶܗ ܕܰܐܠܗܳܐ ܠܽܘܩܒܰܠ ܥܰܝ̈ܢܰܘܗܝ. ܐܷܠܐ ܠܰܡ ܨܳܒܶܐ ܚܳܐܱܪ ܒܢܽܘܗܪܳܐ ܐܱܝܟ ܕܶܢܚܳܐ܇ ܘܠܐ ܡܶܬܦܢܶܐ ܠܰܦܢܺܝܬܳܐ ܡܰܕܢܚܳܝܬܳܐ: ܕܡܶܢܳܗ̇ ܕܳܢܰܚ ܗܰܘ ܫܶܡܫܳܐ ܕܙܰܕܺܝܩܽܘܬܳܐ. ܐܷܠܐ ܒܡܰܥܪܒܳܐ ܡܰܩܶܬ ܚܝܳܪܶܗ. ܟܕ ܡܰܚܶܒ ܠܥܰܡܛܳܢܳܐ ܕܰܚܛܺܝܬܳܐ. ܘܰܒܪܶܚܡܬܳܐ ܦܳܠܰܚ ܒܺܝ̈ܫܳܬܳܐ. ܘܣܰܢܝܳܐ ܗ̄ܝ ܒܥܰܝ̈ܢܰܘܗܝ܆ ܕܢܶܫܒܽܘܩ ܚܛܳܗܰܘ̈ܗܝ ܘܢܶܣܢܶܐ ܐܷܢܽܘܢ. ܘܚܽܘܣܪܳܢܳܐ ܪܰܒܳܐ ܚܫܺܝܒܳܐ ܠܶܗ ܕܡ̣ܢ ܒܺܝ̈ܫܳܬܶܗ ܕܶܝܢ ܢܶܬܪܰܚܰܩ ܘܢܶܬܓܠܶܙ. ܘܰܡܗܰܠܶܟ ܒܽܐܘܪܚܳܐ܇ ܠܰܘ ܗܳܝ ܕܟܺܐܢܽܘܬܳܐ ܘܰܬܪܺܝܨܽܘܬܳܐ: ܐܷܠܐ ܒܰܐܝܕܳܐ ܕܠܐܴ ܫܰܦܺܝܪܳܐ܆ ܕܢܶܬܡܠܐܷ ܡ̣ܢ ܒܺܝ̈ܫܳܬܳܐ ܕܶܐܬܶܐܣܰܪ ܒܗܶܝܢ ܘܰܐܚܶܒ ܥܶܢܝܳܢܗܶܝܢ. ܐܷܠܐ ܡܳܢܳܐ ܐܴܡܰܪ ܗܘܳܐ ܕܰܘܝܕ܆ ܕܰܐܝܟ ܗܳܠܶܝܢ ܚܳܙܶܐ ܗܘܳܐ ܡ̣ܢ ܒܥܶܠܕܒܳܒܶܗ. ܠܐܴ ܓܶܝܪ ܐܱܥܺܝܪ ܠܟܺܐܢܽܘܬܳܐ܆ ܕܰܒܪܽܘܓܙܳܐ ܬܶܥܒܶܕ ܡܶܢܶܗ ܬܒܰܥܬܳܐ. ܘܠܐܴ ܕܰܠܚܶܗ ܠܗܰܘ ܟܝܳܢܳܐ ܫܰܦܝܳܐ. ܐܷܠܐ ܟܰܕ ܚܳܙܶܐ ܗܘܳܐ ܕܡ̣ܢ ܪܽܘܚܳܐ ܕܰܠܩܽܘܒܠܐܴ ܡܶܬܢܫܶܒ ܠܶܒܶܗ ܕܥܰܘܳܠܐܴ. ܒܡܰܫ̈ܒܶܐ ܕܪܽܘܚܳܐ ܘܰܕܒܺܝܫܬܳܐ܆ ܫܶܐܠ ܗܘܳܐ ܕܪ̈ܰܚܡܶܐ ܢܶܗܘܽܘܢ ܡ̣ܢ ܐܠܰܗܐ. ܘܗܳܕܶܐ ܐܴܡܰܪ ܗܘܳܐ:
ܡܳܪܝܳܐ ܒܰܫܡܰܝܳܐ ܪ̈ܰܚܡܰܝܟ. ܠܘܳܬܳܟ ܠܰܡ ܠܰܝܬ ܪܽܘܓܙܳܐ. ܘܒܶܝܬ ܡܰܥܡܪܳܟ ܠܰܝܬ ܐܰܬܪܳܐ ܕܬܶܥܽܘܠ ܒܺܝܫܬܳܐ. ܘܗܰܘ ܕܡܶܬܚܰܫܰܒ ܥܠܰܝ ܒܺܝ̈ܫܳܬܳܐ܆ ܠܝ̣ ܘܠܶܗ ܫܳܐܷܠ ܐ̱ܢܳܐ ܪ̈ܰܚܡܶܐ. ܘܡܶܛܽܠܗܳܢܳܐ ܠܐܴ ܒܳܥܶܐ ܐ̱ܢܳܐ ܠܒܰܣܺܝܡܳܐ ܡܪܳܪ̈ܶܐ. ܘܠܐܴ ܠܚܰܠܝܳܐ ܡܫܰܚܠܶܦ ܐ̱ܢܳܐ ܡ̣ܢ ܛܥܳܡܬܶܗ. ܘܠܐܴ ܠܢܽܘܗܪܳܐ ܡܚܰܒܶܠ ܐ̱ܢܳܐ ܒܚܶܫܽܘܟܳܐ. ܐܷܠܐ ܚܳܐܱܪ ܐ̱ܢܳܐ ܠܘܳܬܳܟ ܘܳܐܡܰܪ ܐ̱ܢܳܐ.
ܡܳܪܝܳܐ ܒܰܫܡܰܝܳܐ ܪ̈ܰܚܡܰܝܟ: ܘܗܰܝܡܳܢܽܘܬܳܟ ܥܕܰܡܳܐ ܠܰܫܡܰܝ̈ ܫܡܰܝܴ̈ܐ. ܠܡܳܢܳܐ ܟܰܝ ܬܰܚܬܺܝ ܠܪ̈ܰܚܡܶܐ ܘܳܐܦ ܥܰܠܺܝ ܠܗܰܝܡܳܢܽܘܬܳܐ. ܫܡܰܝܳܐ ܓܶܝܪ ܒܥܽܘܡܩܳܐ ܬܰܚܬܳܝܳܐ ܣܺܝܡܳܐ ܡ̣ܢ ܠܘܳܬ ܪܰܘܡܳܐ ܕܰܫܡܱ̈ܝ ܫܡܰܝܴ̈ܐ. ܫܡܱ̈ܝ ܫܡܰܝܴ̈ܐ ܓܶܝܪ ܠܥܶܠ ܡ̣ܢ ܟܽܠ ܪ̈ܰܘܡܺܝܢ ܣܺܝܡܳܐ. ܘܰܒܪ̈ܰܚܡܶܐ ܗܳܢܽܘܢ ܕܶܐܡܰܪ ܢܒܺܝܳܐ܇ ܕܡܳܪܝܳܐ ܒܰܫܡܰܝܳܐ ܪ̈ܰܚܡܰܝܟ. ܡܰܕܢܰܚ ܫܶܡܫܶܗ ܥܰܠ ܛܳܒ̈ܐ ܘܥܰܠ ܒܺܝ̈ܫܶܐ: ܘܡܰܚܶܬ ܡܶܛܪܶܗ ܥܰܠ ܟܺܐܢ̈ܐ ܘܥܰܠ ܥܰܘܴ̈ܠܐܷ (ܡܬܝ ܗ: ܡܗ). ܐܷܡܰܪ ܓܶܝܪ ܡܙܰܡܪܳܢܳܐ. ܐܴܦ ܗܰܝܡܳܢܽܘܬܳܟ ܥܕܰܡܳܐ ܠܰܫ̈ܡܰܝ ܫܡܰܝܴ̈ܐ. ܐܱܝܟܳܐ ܕܥܳܐܠܐܴ ܗܰܝܡܳܢܽܘܬܳܐ܆ ܟܺܐܢܽܘܬܳܐ ܦܳܩܕܳܐ܇ ܘܠܰܘ ܛܰܝܒܽܘܬܳܐ. ܘܰܐܝܟܳܐ ܕܥܳܐܠܺܝܢ ܐܱܝܠܶܝܢ ܕܶܐܬܪܕܶܦܘ ܡܶܛܠ ܟܺܐܢܽܘܬܳܐ ܕܢܺܐܪܬܽܘܢ ܡܰܠܟܽܘܬܳܐ ܕܰܫܡܰܝܳܐ܇ ܠܰܘ ܒܪ̈ܰܚܡܶܐ ܡܩܰܒܠܺܝܢ ܐܱܝܠܶܝܢ ܕܡܶܬܬܚܺܝܒܺܝܢ ܠܗܽܘܢ܆ ܐܷܠܐ ܒܟܺܐܢܽܘܬܳܐ. ܟܕ ܚܳܙܶܝܢ ܠܙܰܕܺܝܩܽܘܬܶܗ ܕܰܐܠܗܳܐ ܒܰܕܡܽܘܬ ܛܽܘܪ̈ܶܐ ܡܥܰܠܰܝܴ̈ܐ. ܘܰܕܠܐܴ ܡܶܬܪܰܟܢܺܝܢ ܨܶܝܕ ܥܽܘ̈ܡܩܶܐ ܬܰܚܬܳܝ̈ܐ ܕܰܐܪܥܳܐ. ܐܷܡܰܪ ܓܶܝܪ ܢܒܺܝܳܐ܆
ܘܙܰܕܺܝܩܽܘܬܳܟ ܐܱܝܟ ܛܽܘܪ̈ܐ ܐܠܰܗܳܐ. ܟܰܕ ܚܳܐܱܪ ܒܗܳܠܶܝܢ ܛܽܘܪ̈ܐ ܕܰܠܥܶܠ ܡ̣ܢ ܗܳܝ ܐܱܪܥܳܐ ܕܝܳܪܬܺܝܢ ܙܰܕܺܝ̈ܩܶܐ ܒܥܳܠܡܳܐ ܚܰܕܬܳܐ. ܡܰܥܶܠ ܕܶܝܢ ܒܳܬܰܪܟܶܢ ܙܰܕܺܝܩܽܘܬܳܐ ܕܰܐܠܗܳܐ ܐܴܦ ܕܺܝܢܰܘ̈ܗܝ ܠܐܴ ܡܶܬܕܰܪ̈ܟܳܢܶܐ.
ܘܕܺܝ̈ܢܰܝܟ ܐܱܝܟ ܬܗܽܘܡܳܐ ܪܰܒܳܐ. ܡܶܛܠ ܕܕܺܝܢܷ̈ܐ ܗܳܠܶܝܢ ܠܐܴ ܡܶܬܕܰܪ̈ܟܳܢܶܐ ܐܷܢܽܘܢ ܘܠܐܴ ܡܶܬܦܰܫ̈ܩܳܢܶܐ. ܐܱܝܟ ܕܶܐܡܰܪ ܦܰܘܠܽܘܣ ܟܰܕ ܡܰܠܶܦ ܒܰܟܬܺܝ̈ܒܳܬܳܐ ܠܘܳܬ ܪ̈ܽܘܡܳܝܶܐ ܘܳܐܡܰܪ. ܐܴܘ ܥܽܘܡܩܳܐ ܘܥܽܘܬܪܳܐ ܘܚܶܟܡܬܳܐ ܘܡܰܕܥܳܐ ܕܰܐܠܗܳܐ. ܕܐܢܳܫ ܠܐܴ ܡܳܫ ܕܺܝܢܰܘ̈ܗܝ: ܘܽܐܘܪ̈ܚܳܬܶܗ ܠܐ ܡܶܬܥܰܩ̈ܒܳܢ (ܪ̈ܗܘܡܝܐ ܝܐ: ܠܓ). ܐܢ ܡܳܕܶܝܢ ܕܰܘܝܕ ܐܴܡܰܪ. ܕܕܺܝ̈ܢܰܝܟ ܐܱܝܟ ܬܗܽܘܡܳܐ ܪܰܒܳܐ. ܘܦܰܘܠܽܘܣ ܡܰܣܗܶܕ. ܕܐܢܳܫ ܠܐ ܡܳܫ ܐܢܘܢ. ܘܶܐܢܳܐ ܥܰܡܗܽܘܢ ܚܳܐܱܪ ܐ̱ܢܳܐ. ܕܺܐܝܬܰܝܗܽܘܢ ܬܗܽܘ̈ܡܶܐ ܕܠܐܴ ܡܶܬܬܡܺܝܫܺܝܢ. ܘܒܳܥܶܐ ܐ̱ܢܳܐ ܥܰܡ ܕܰܘܝܕ.
ܕܰܒܢܰܝ̈ܢܳܫܳܐ ܘܰܒܥܺܝܪܳܐ ܦܳܪܶܩ ܐܱܢܬ ܡܳܪܝܳܐ. ܛܽܘܒܳܢܳܐ ܠܟܺܐܢ̈ܐ ܥܰܡ ܥܰܘܴ̈ܠܐܷ܆ ܠܛܳܒ̈ܐ ܥܰܡ ܒܺܝ̈ܫܶܐ. ܒܗܳܝ ܓܶܝܪ ܕܰܒܢܰܝ̈ܢܳܫܳܐ ܣܳܡ܆ ܠܟܽܠܗܽܘܢ ܗܳܢܽܘܢ ܕܰܒܨܰܠܡܳܐ ܕܰܐܠܗܳܐ ܙܗܺܝܪܺܝܢ ܒܕܽܘܒܳܪ̈ܶܐ ܕܰܡܝܰܬܪܽܘܬܳܐ. ܘܠܐܴ ܫܳܒܩܺܝܢ ܠܶܗ ܕܢܶܬܚܰܒܰܠ ܒܰܪ̈ܓܺܝܓܳܬܳܐ ܕܛܽܘܥܝܰܝ. ܗܳܢܽܘܢ ܕܰܩܪܳܐ ܐܷܢܽܘܢ ܒܥܺܝܪܳܐ܆ ܠܗܳܢܽܘܢ ܕܶܐܬܗܰܦܰܟܘ ܒܚܰܝ̈ܐ ܕܰܒܥܺܝܪܳܐ܆ ܘܠܐܴ ܨܒܰܘ ܕܰܒܢܰܟܦܽܘܬܳܐ ܢܺܚܽܘܢ ܒܕܶܚܠܰܬ ܐܠܰܗܳܐ. ܠܐ ܓܠܰܙ ܐܷܢܽܘܢ ܐܠܰܗܳܐ ܡ̣ܢ ܦܽܘܪܩܳܢܶܗ ܟܰܕ ܐܷܬܓܠܺܝ ܒܰܒܣܰܪ. ܐܷܠܐ ܟܰܕ ܝ̣ܕܰܥ ܕܠܐ ܢܳܛܪܺܝܢ ܡܰܘܗܰܒܬܳܐ ܕܣܺܝܡܰܬ ܒܢܱ̈ܝܳܐ܇ ܗܳܝ ܕܰܡܩܰܒܠܺܝܢ ܒܰܥܡܳܕܳܐ ܩܰܕܺܝܫܳܐ܆ ܦܪܰܩ ܐܷܢܘܢ ܡܶܛܠ ܬܰܪܬܶܝܢ. ܕܠܐܴ ܟܰܕ ܡܶܬܟܠܶܝܢ ܡ̣ܢ ܗܳܝ ܕܢܶܬܦܰܪܩܽܘܢ ܢܺܐܡܪܽܘܢ. ܕܶܐܠܽܘ ܐܷܬܦܪܶܩܢܰܢ܆ ܢܳܛܪܺܝܢ ܗܘܰܝܢ ܦܽܘ̈ܩܕܳܢܶܐ ܕܰܒܢܰܝܴ̈ܐ. ܘܰܕܠܐܴ ܢܶܬܚܰܫܰܒ ܦܽܘܪܩܳܢܶܗ ܒܡܰܣܰܒ ܐܱܦܷ̈ܐ ܗ̱ܘ. ܘܡܶܛܠ ܕܰܢܦܰܫܶܩ ܢܒܺܝܳܐ ܣܽܘܥܪܳܢܳܐ ܕܰܡܕܰܒܪܳܢܽܘܬܳܐ ܕܒܰܒܣܰܪ. ܕܰܐܫܘܺܝ ܐܠܰܗܳܐ ܘܰܐܥܶܠ ܒܶܗ ܚܰܝ̈ܐ ܠܟܽܠ ܕܰܨܒܳܐ ܕܰܢܗܰܝܡܶܢ ܘܢܶܥܡܰܕ. ܐܴܦ ܝܰܗܒ ܣܺܝܡܰܬ ܒܢܰܝܴ̈ܐ ܒܛܰܝܒܽܘܬܳܐ ܐܴܦ ܒܪ̈ܰܚܡܶܐ܇ ܠܰܕܫܳܘܶܐ ܘܠܰܕܠܐܴ ܫܳܘܶܐ. ܐܷܬܬܦܺܝܣ ܠܰܫܠܺܝ̈ܚܶܐ ܟܳܪ̈ܽܘܙܶܐ ܕܰܡܦܰܪܶܫ ܘܡܰܥܶܠ ܠܚܰܝ̈ܐ ܒܕܺܝܢܳܐ. ܠܐܱܝܠܶܝܢ ܕܰܢܛܰܪܘ ܡܰܘܗܰܒܬܳܐ ܕܣܺܝܡܰܬ ܒܢܰܝ̈ܐ ܗܳܝ ܕܩܰܒܶܠܘ. ܘܕܳܚܶܩ ܘܡܰܪܚܶܩ ܡ̣ܢ ܬܰܪ̈ܥܶܐ ܕܡܰܠܟܽܘܬܶܗ ܠܐܱܝܠܶܝܢ ܕܰܛܡܰܪܘ ܟܶܣܦܳܐ ܒܣܶܕܽܘܢܳܐ ܘܠܐܴ ܐܷܬܬܰܓܰܪܘ ܒܶܗ.
ܡܳܐ ܣܰܓܺܝ̈ܐܝ̣ܢ ܪ̈ܰܚܡܰܝܟ ܐܠܰܗܳܐ. ܕܗܳܟܰܢܳܐ ܥܬܰܪܘ ܘܺܝܪܶܒܘ ܘܰܣܓܺܝܘ܆ ܐܱܝܟܰܢܳܐ ܕܢܶܫܬܰܦܥܽܘܢ ܒܥܳܠܡܳܐ ܒܛܰܝܒܽܘܬܳܟ܇ ܥܰܠ ܐܱܝܠܶܝܢ ܕܫܳܘܶܝܢ ܘܥܰܠ ܐܱܝܠܶܝܢ ܕܠܐܴ ܫܳܘܶܝܢ. ܕܝܰܗܒܬ ܫܠܺܝܚܽܘܬܳܐ ܘܟܽܘܪܣܝܳܐ ܠܫܶܡܥܽܘܢ ܕܶܐܙܕܩܶܦ ܒܳܬܰܪ ܪܺܝܫܶܗ ܡܶܛܽܠܳܬܳܟ. ܘܠܺܝܗܽܘܕܳܐ ܕܰܐܫܠܡܳܟ ܠܐܴ ܟܠܰܝܬܳܝܗܝ ܕܢܶܗܘܶܐ ܪܰܒ ܒܰܝܬܳܐ ܥܰܠ ܓܠܽܘܣܩܡܳܐ. ܟܰܕ ܦܽܘܪ̈ܢܳܣܶܐ ܠܐܴ ܥܕܺܝ̈ܠܐܷ ܕܰܣܒܰܪܬܳܐ ܐܱܘܕܰܥ. ܘܕܰܐܝܟܰܢܳܐ ܦܪܰܩ ܥܰܡܰܢܽܘܐܷܝܠ ܠܰܒܢܰܝ̈ܢܳܫܳܐ ܗܳܢܽܘܢ ܕܺܐܝܬܰܝܗܽܘܢ ܡܗܰܝܡ̈ܢܶܐ: ܘܠܰܒܥܺܝܪܳܐ ܕܺܐܝܬܰܝܗܽܘܢ ܐܷܪ̈ܺܝܛܺܝܩܽܘ. ܒܦܽܘܪܫܳܢܳܐ ܕܓܰܒ̈ܐ ܐܷܬܢܰܒܺܝ ܘܶܐܡܰܪ:
ܘܰܒܢܰܝ̈ܢܳܫܳܐ ܒܛܶܠܳܠܐܴ ܕܟܶܢ̈ܦܰܝܟ ܢܶܬܟܰܣܽܘܢ. ܗܳܪܟܳܐ ܠܐܴ ܐܷܡܰܪ ܕܰܒܥܺܝܪܳܐ ܕܶܝܢ ܬܶܬܟܰܣܶܐ ܗܳܠܶܝܢ ܕܩܰܕܶܡ ܐܷܬܢܰܗܰܪ. ܠܦܽܘܪܩܳܢܳܐ ܠܰܡ ܐܱܫܘܝܳܗ̇ ܠܰܒܥܺܝܪܳܐ. ܡܶܛܠ ܕܪ̈ܰܚܡܶܐ ܕܣܰܓܺܝ̈ܐܝ̣ܢ ܠܶܗ. ܒܛܶܠܳܠܐܴ ܕܶܝܢ ܕܟܶܢܦ̈ܐ ܠܐܴ ܡܟܰܣܶܐ ܠܗ̇. ܠܐ ܓܶܝܪ ܩܳܪܶܐ ܠܰܓܕܰܝܴ̈ܐ ܕܢܶܥܠܽܘܢ ܬܚܶܝܬ ܡܰܩܥܳܠܶܗ ܡܣܰܬܪܳܢܳܐ. ܐܱܟܡܳܐ ܕܩܳܪܶܐ ܕܶܝܢ ܠܐܷܡܪ̈ܶܐ ܘܟܰܣܺܝ ܐܷܢܘܢ ܒܛܶܠܳܠܐܴ ܕܟܶܢ̈ܦܰܘܗܝ. ܘܠܐܴ ܠܗܳܠܶܝܢ ܒܬܽܘ̈ܠܳܬܳܐ ܕܠܐܴ ܢܣܰܒ̈ܝ ܡܶܫܚܳܐ ܒܠܰܡܦܺܝܕܰܝ̈ܗܶܝܢ ܡܩܰܒܶܠ ܘܰܡܒܰܣܶܡ ܒܰܓܢܽܘܢܶܗ ܥܰܡ ܚܰܟܺܝ̈ܡܳܬܳܐ. ܘܠܐܴ ܥܰܬܺܝܪܳܐ ܡܶܬܕܒܰܪ ܒܟܰܬܦܳܐ ܕܪ̈ܽܘܚܶܐ ܡܰܠܐܟܳܝܴ̈ܬܳܐ ܠܥܽܘܒܶܗ ܕܰܐܒܪܳܗܳܡ. ܘܒܳܬܰܪ ܗܳܠܶܝܢ ܓܶܝܪ ܦܳܝܫܳܐ ܒܥܺܝܪܳܐ ܠܒܰܪ ܡ̣ܢ ܬܰܪܥܳܐ ܕܡܰܠܟܽܘܬܳܐ. ܘܛܳܪܕܺܝܢ ܠܳܗ̇ ܡܰܠܐܟܷ̈ܐ ܕܠܐܴ ܬܚܽܘܪ ܒܪܳܥܝܳܐ ܢܽܘܪܳܢܳܝܳܐ: ܕܺܐܝܬ ܠܥܶܠ ܡ̣ܢ ܗܳܠܶܝܢ ܛܽܘܪ̈ܐ ܕܙܰܕܺܝܩܽܘܬܶܗ ܕܰܐܠܗܳܐ. ܐܱܟܡܳܐ ܕܳܐܦ ܣܳܐܷܡ ܢܳܡܽܘܣܳܐ ܡܽܘܫܶܐ ܡܶܬܦܩܶܕ ܗܘܳܐ. ܕܳܐܦܠܐܴ ܥܳܢܴ̈ܐ ܘܬܰܘܪ̈ܶܐ ܢܶܪܥܽܘܢ ܠܽܘܩܒܰܠ ܛܽܘܪܳܐ: ܗܰܘ ܕܰܢܚܶܬ ܥܠܰܘܗܝ ܐܠܰܗܐ ܒܢܽܘܪܳܐ. ܗܳܠܶܝܢ ܕܶܝܢ ܕܰܒܟܶܢ̈ܦܶܐ ܐܠܰܗܳܝܴ̈ܬܳܐ ܡܶܬܟܰܣܶܝܢ܆ ܐܷܡܰܪ.
ܕܢܶܪܘܽܘܢ ܡ̣ܢ ܫܽܘܡܢܶܗ ܕܒܰܝܬܳܟ. ܪܰܘܳܝܽܘܬܳܐ ܕܒܽܘܣܳܡܳܐ ܕܡܰܠܟܽܘܬܳܐ ܡܫܰܘܕܥܳܐ.
ܘܡܶܢ ܢܰܚܠܳܟ ܒܰܣܺܝܡܳܐ ܬܰܫܩܶܐ ܐܷܢܽܘܢ. ܚܠܳܦ ܕܢܰܚ̈ܠܐܷ ܕܡܰܘܬܳܐ ܟܳܣܳܐ ܡܰܪܺܝܪܳܐ ܐܷܫܬܺܝܘ ܕܚܰܫ̈ܐ ܕܡܰܘܬܳܐ܆ ܐܢܬ ܡ̣ܢ ܢܰܚܠܳܟ ܚܰܝ̈ܐ ܬܰܫܩܶܐ ܐܢܘܢ. ܟܕ ܕܶܝܢ ܡܶܬܥܰܩܡܳܐ ܡܶܠܬܳܐ ܕܡܶܛܠ ܢܰܚܠܐܴ ܐܚܪܳܢܝܳܐܝܬ܆ ܡܶܫܟܚܺܝܢܰܢ ܕܡܰܘܬܳܐ ܡܫܰܡܰܗ ܠܢܰܚܠܐܴ. ܟܕ ܡܰܘܕܰܥ ܕܡ̣ܢ ܡܰܘܬܶܗ ܕܗܰܘ ܠܐ ܡܳܝܽܘܬܳܐ܆ ܐܷܫܬܺܝ ܚܰܝ̈ܐ ܟܝܳܢܳܐ ܐܢܳܫܳܝܳܐ. ܡܶܛܠ ܕܠܰܘ ܐܱܝܟ ܕܰܢܚܶܬ ܐܴܕܳܡ ܠܡܰܘܬܳܐ܇ ܟܕ ܡܫܰܠܰܚ ܡ̣ܢ ܚܰܝ̈ܐ ܘܰܛܒܰܥ ܒܢܰܚܠܐܴ ܕܰܚܒܳܠܐܴ. ܗܳܟܰܢܳܐ ܐܴܦ ܐܠܰܗܳܐ ܡܶܠܬܳܐ ܢܚܶܬ ܠܢܰܚܠܐܴ ܕܰܩܛܝ̈ܠܐ. ܐܷܠܐ ܟܕ ܛܡܺܝܪܺܝܢ ܒܶܗ ܒܦܰܓܪܶܗ ܚܰܝ̈ܐ ܕܰܟܝܳܢܶܗ܆ ܢܚܶܬ ܗܰܠܶܟ ܒܢܰܚܠܐܴ ܕܡܺܝ̈ܬܶܐ ܘܥܰܒܕܶܗ ܒܰܣܺܝܡܳܐ. ܐܷܡܰܪ ܓܶܝܪ ܢܒܺܝܳܐ ܡܶܛܽܠܳܬܶܗ܆ ܕܥܰܡܶܗ ܢܚܶܬܘ ܚܰܝ̈ܐ ܕܰܟܝܳܢܶܗ ܠܩܰܒܪܳܐ ܥܰܡ ܦܰܓܪܶܗ. ܘܠܰܫܝܽܘܠ ܥܰܡ ܢܰܦܫܶܗ.
ܡܶܛܠ ܕܠܰܡ ܡܰܒܽܘܥܳܐ ܕܚܰܝ̈ܐ ܥܰܡܳܟ ܗ̄ܘ. ܘܠܰܘ ܠܒܰܪ ܡ̣ܢ ܩܰܒܪܳܐ ܦܳܫܘ ܡܶܢܳܟ ܚܰܝ̈ܐ ܐܱܝܟ ܡܳܝܽܘ̈ܬܶܐ. ܐܷܠܐ ܥܰܡܳܟ ܢܚܶܬ ܡܰܒܽܘܥܳܐ ܕܚܰܝ̈ܐ ܠܰܫܝܽܘܠ. ܘܰܐܪܕܺܝ ܫܳܩܽܘܬܳܐ ܕܚܰܝ̈ܐ ܠܡܳܝܽܘ̈ܬܶܐ. ܘܥܰܡܳܟ ܐܷܬܦܪܶܣܘ ܙܰܠܺܝ̈ܩܰܝ ܢܽܘܗܪܳܟ ܥܰܠ ܚܒܺܝ̈ܫܰܝ ܫܝܽܘܠ.
ܘܰܒܢܽܘܗܪܳܟ ܗ̄ܘ ܚܳܙܶܝܢܰܢ ܢܽܘܗܪܳܐ. ܗܳܠܶܝܢ ܐܷܡܰܪ ܢܒܺܝܳܐ.
ܘܛܰܪ ܪ̈ܰܚܡܰܝܟ ܠܩܰܪ̈ܺܝܒܰܝܟ: ܘܙܰܕܺܝܩܽܘܬܳܟ ܠܰܬܪ̈ܺܝܨܰܝ ܠܶܒܳܐ. ܠܡܳܢܳܐ ܗܳܕܶܐ. ܠܐܴ ܠܰܡ ܦܳܝܫܺܝܢ ܪ̈ܰܚܡܶܐ ܨܶܝܕ ܐܱܝܠܶܝܢ ܕܠܐܴ ܢܛܰܪܘ ܡܰܘܗ̈ܒܳܬܳܐ ܕܩܰܒܶܠܘ. ܐܱܟܡܳܐ ܕܠܐܴ ܟܶܣܦܳܐ ܦܳܫ ܠܘܳܬ ܗܰܘ ܕܩܰܛܪܶܗ ܒܣܶܕܽܘܢܳܐ. ܒܳܬܰܪ ܗܳܠܶܝܢ ܬܽܘܒ ܡܨܰܠܐܷ ܕܠܐܴ ܢܺܐܬܶܐ ܠܰܡܣܳܡ ܒܪܺܝܫܳܐ ܥܰܡ ܥܰܘܴ̈ܠܐܷ ܐܴܡܰܪ:
ܕܠܐܴ ܬܰܝܬܶܐ ܥܠܰܝܢ ܪܶܓܠܐܴ ܥܰܫܺܝܢܬܳܐ: ܘܺܐܝܕܗܽܘܢ ܕܪ̈ܰܫܺܝܥܶܐ ܠܐܴ ܬܙܺܝܥܰܢܝ: ܡܶܛܠ ܕܬܰܡܳܢ ܢܳܦܠܺܝܢ ܟܠ ܥܳܒ̈ܕܰܝ ܫܽܘܩܪܳܐ. ܘܡܶܣܬܰܚܦܺܝܢ ܘܠܐܴ ܡܶܫܟܚܺܝܢ ܠܰܡܩܳܡ. ܒܗܳܠܶܝܢ ܦܰܫܶܩ ܥܰܠ ܕܺܝܢܳܐ ܘܥܰܠ ܬܰܫܢܺܝܩܳܐ. ܘܚܰܘܺܝ ܕܠܰܝܬ ܠܡܶܦܰܩ ܡܶܢܶܗ ܠܐܱܝܠܶܝܢ ܕܡܶܣܬܰܚܦܺܝܢ ܒܶܗ. ܘܰܚܢܰܢ ܢܨܰܠܐܷ ܕܥܰܡ ܢܒܺܝܳܐ ܢܶܬܦܰܨܶܐ ܡ̣ܢ ܕܺܝܢܳܐ. ܘܢܰܘܕܶܐ ܠܶܗ ܠܦܳܪܽܘܩܰܢ ܠܥܳܠܰܡ ܥܳܠܡܺܝܢ ܐܡܺܝܢ܀
ܡܙܡܘܪܐ ܕܬܠܬܝܢ ܘܫܒܥܐ
ܠܽܘܩܒܰܠ ܗܳܢܘܢ ܕܛܳܢܺܝܢ ܒܰܐܝܠܶܝܢ ܕܥܳܒܕܺܝܢ ܒܺܝ̈ܫܳܬܳܐ: ܘܟܰܗܺܝܢܺܝܢ ܒܥܽܘܬܪܳܐ ܘܰܒܩܶܢܝܳܢܷ̈ܐ ܘܰܒܚܽܘܠܡܳܢܳܐ ܕܦܰܓܪ̈ܝܗܽܘܢ.
ܡܰܠܦܳܢܽܘܬܳܐ ܐܠܰܗܳܝܬܳܐ ܘܰܕܡܰܠܝܳܐ ܥܨܳܒ̈ܐ ܪ̈ܽܘܚܳܢܶܐ ܠܢܰܦ̈ܫܳܬܳܐ ܕܰܪ̈ܓܺܝܓܳܢ ܠܡܶܦܢܳܐ ܨܶܝܕ ܚܽܘܠܡܳܢܳܐ܆ ܡܩܰܪܶܒ ܛܽܘܒܳܢܳܐ ܕܰܘܝܕ ܒܡܰܙܡܽܘܪܳܐ ܗܳܢܳܐ ܕܰܬܠܳܬܺܝܢ ܘܫܰܒܥܳܐ. ܘܝܰܬܺܝܪܳܐܝܬ ܒܗܳܢܽܘܢ ܕܡܶܬܥܰܕܠܺܝܢ ܒܡܰܓܪܰܬ ܪܽܘܚܶܗ ܕܰܐܠܗܳܐ ܕܥܰܠ ܪ̈ܰܫܺܝܥܶܐ. ܘܟܰܕ ܠܐ ܡܶܬܒܰܝܢܺܝܢ܇ ܡܳܢܰܘ ܢܺܝܫܳܐ ܕܰܡܕܰܒܪܳܢܽܘܬܶܗ ܕܥܳܒܽܘܕܳܐ܆ ܫܚܺܝܩܺܝܢ ܟܰܕ ܚܳܙܶܝܢ ܟܰܗܺܝܢܽܘܬܳܐ ܕܥܰܘܴ̈ܠܐܷ. ܘܡܶܛܠ ܥܘܺܝܪܽܘܬ ܥܰܝܢܳܐ ܕܢܰܦܫܗܽܘܢ: ܕܣܰܡܝܳܐ ܡ̣ܢ ܝܺܕܰܥܬܳܐ ܕܩܽܘܫܬܳܐ܇ ܘܣܳܒܪܺܝܢ ܥܰܠ ܐܱܝܠܶܝܢ ܕܦܳܓ̈ܥܳܢ ܒܗܽܘܢ ܒܥܳܠܡܳܐ: ܕܰܒܠܺܝܠܘ̣ܬܳܐ ܐܷܢܶܝܢ ܘܫܶܓܡܳܐ. ܘܡܶܢܗܽܘܢ ܐܴܡܪܺܝܢ܇ ܥܰܠ ܕܚܳܙܶܝܢ ܥܽܘܬܪܳܐ ܘܪܰܒܽܘܬܳܐ ܕܪ̈ܰܫܺܝܥܶܐ: ܕܠܰܘ ܡ̣ܢ ܐܠܰܗܐ ܡܶܬܕܰܒܪ̈ܳܢ ܨܶܒܘܴ̈ܬܶܗ ܕܥܳܠܡܳܐ. ܘܡܶܢܗܽܘܢ ܐܴܡܪܺܝܢ. ܕܰܕܠܐܴ ܒܛܺܝܠܽܘܬܳܐ ܕܰܐܠܗܐ ܩܳܝܡܳܐ ܡܕܰܒܪܳܢܽܘܬܳܐ ܕܚܰܝܰܝ̈ܗܽܘܢ ܕܰܒܢܰܝ̈ܢܳܫܳܐ. ܕܶܐܢ ܠܰܡ ܗ̣ܽܘ ܡܕܰܒܰܪ ܠܶܗ ܠܥܳܠܡܳܐ܆ ܘܰܐܝܟ ܕܰܓܙܰܡ ܒܰܢܒܺܝ̈ܐ: ܣܳܢܶܐ ܒܺܝ̈ܫܳܬܳܐ ܐܝ̣ܬܰܘܗܝ. ܠܡܳܢܳܐ ܠܗܳܠܶܝܢ ܕܝܳܕܰܥ ܕܟܽܠܝܽܘܡ ܒܺܝ̈ܫܳܬܳܐ ܣܳܥܪܺܝܢ܆ ܡܰܣܓܶܐ ܥܽܘܬܪܳܐ ܘܩܶܢܝܳܢܳܐ. ܘܡܶܢ ܥܶܠܬܳܐ ܕܰܐܝܟ ܗܳܕܶܐ܆ ܝܰܬܝ̣ܪܳܐ ܦܳܠܚܺܝܢ ܒܺܝ̈ܫܳܬܳܐ. ܘܶܐܢܗܽܘ ܕܦܳܪܰܥ ܒܺܝ̈ܫܳܬܳܐ ܠܥܳܒ̈ܕܰܝ ܒܺܝ̈ܫܳܬܳܐ܇ ܠܡܳܢܳܐ ܠܐ ܩܳܕܶܡ ܫܳܩܶܠ ܡܶܢܗܽܘܢ ܗܰܘ ܡܶܕܶܡ ܕܗܳܘܶܐ ܠܗܽܘܢ ܡܠܽܘܐܳܐ ܠܡܶܦܠܰܚ ܒܺܝ̈ܫܳܬܳܐ. ܠܡܳܢܳܐ ܐܴܠܶܨ ܠܙܰܕܺܝ̈ܩܶܐ ܒܚܰܣܺܝܪܽܘܬܳܐ. ܟܰܕ ܝܳܕܰܥ ܕܠܐܴ ܚܳܛܶܝܢ. ܘܰܠܪ̈ܰܫܺܝܥܶܐ ܡܰܪܘܰܚ ܘܡܰܦܬܶܐ. ܘܡܰܗܡܶܐ ܠܗܽܘܢ܆ ܕܰܒܚܰܝ̈ܐ ܫܪ̈ܰܝܳܐ ܘܰܪ̈ܦܰܝܳܐ ܢܺܚܽܘܢ. ܘܰܠܡܳܢܳܐ ܠܰܘ ܒܶܗ ܒܥܶܕܳܢܳܐ ܕܡܰܣܟܠܺܝܢ ܡܰܪ̈ܳܚܶܐ܆ ܡܶܬܢܰܩܰܡ ܡܶܢܗܽܘܢ ܒܰܥܓܰܠ. ܐܱܟܡܳܐ ܕܰܐܝܬܺܝ ܡܣܳܡܒܪܺܝܫܳܐ ܥܰܠ ܗܳܢܽܘܢ ܕܒܶܝܬ ܩܽܘܪܰܚ ܕܳܬ̣ܳܢ ܘܰܐܒܺܝܪܰܡ܆ ܠܽܘܩܒܰܠ ܗܳܢܽܘܢ ܕܗܳܠܶܝܢ ܐܴܡܪܺܝܢ ܗܘܰܘ܆ ܒܝܰܘ̈ܡܳܬܶܗ ܕܛܽܘܒܳܢܳܐ ܕܰܘܝܕ. ܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܰܫܒܰܥ ܐܷܬܢܰܒܺܝ ܘܙܰܡܰܪ܇ ܟܰܕ ܐܱܝܟ ܐܴܣܝܳܐ ܚܰܟܺܝܡܳܐ ܡܶܬܦܰܪܰܣ ܗܘܳܐ܆ ܕܰܕܠܐܴ ܟܺܐܒܳܐ ܢܰܚܠܶܡ ܢܰܦ̈ܫܳܬܗܘܢ ܢܰܣܺܝ̈ܣܳܬܳܐ. ܒܳܗ̇ ܒܬܶܫܒܽܘܚܬܳܐ ܗܳܕܶܐ ܡܰܣܠܐܷ ܘܫܳܐܷܛ ܠܟܽܠܗܽܘܢ ܪ̈ܰܫܺܝܥܶܐ ܥܰܡ ܪܰܒܽܘܬܗܽܘܢ. ܘܰܡܚܰܘܶܐ ܕܰܐܝܟ ܠܐ ܡܶܕܶܡ ܚܫܺܝ̈ܒܳܢ ܒܥܰܝ̈ܢܰܝ ܐܠܰܗܐ ܗܳܠܶܝܢ ܕܰܕܗܳܢܳܐ ܥܳܠܡܳܐ ܐܷܢܶܝܢ. ܘܰܕܠܐܴ ܘܠܰܘ ܡܶܕܶܡ ܐܝ̣ܬܰܘܗܝ ܫܽܘܒܗܳܪܳܐ ܕܪ̈ܰܫܺܝܥܶܐ ܒܚܰܝ̈ܐ ܗܳܠܶܝܢ. ܘܰܕܩܰܠܝ̣ܠܳܐܝ̣ܬ ܡܣܰܪܗܒܺܝܢ ܠܡܶܥܒܰܪ ܘܠܡܶܚܡܳܐ ܥܰܡ ܐܱܝܠܶܝܢ ܕܰܣܒܺܝܪ̈ܳܢ ܡܶܢ ܫܰܒܪ̈ܶܐ ܛܳܒ̈ܬܗܘܢ. ܘܰܕܠܰܝܬ ܠܗܽܘܢ ܥܶܩܳܪܳܐ ܡܩܰܘܝܳܢܳܐ ܒܰܐܝܠܶܝܢ ܕܩܳܝܡܺܝܢ ܒܗܶܝܢ. ܘܕܰܐܝܟ ܠܰܗܓܳܐ ܡܶܣܬܰܪܗܒܺܝܢ ܪ̈ܰܫܺܝܥܶܐ ܠܡܶܥܒܰܪ܇ ܘܰܐܝܟ ܝܽܘܪܳܩܳܐ ܕܥܶܣܒܳܐ ܚܳܡܶܝܢ. ܘܰܕܩܰܠܺܝܠܺܝܢ ܠܡܰܘܦܳܝܽܘ ܒܽܘ̈ܓܒܳܓܶܐ ܕܰܡܫܰܩܠܽܘܬܗܽܘܢ. ܝܰܬܺܝܪ ܡܶܢ ܕܩܰܠܺܝ̈ܠܳܢ ܒܰܓܒܽܘ̈ܓܝܳܬܳܐ ܕܗܳܘ̈ܝܳܢ ܡܶܢ ܡܶܛܪܳܐ. ܕܡܶܬܢܣܶܒ ܒܝܰܘܡܳܐ ܕܣܰܓܪܳܐ ܡܶܢ ܪܽܘܚܳܐ ܥܶܠܳܝܬܳܐ ܕܰܥܢܳܢ̈ܐ. ܕܰܐܝܟܰܢܳܐ ܕܗܳܠܶܝܢ ܟܳܠܝܴ̈ܬܳܐ ܘܗܰܒܒܰܬ ܡܰܝܴ̈ܐ ܥܰܡ ܫܽܘܪܳܝܗܶܝܢ܆ ܗܳܘܶܐ ܐܴܦ ܫܽܘܠܳܡܗܶܝܢ. ܘܰܐܝܟ ܐܱܝܠܶܝܢ ܕܠܐܴ ܗ̣ܘܳܐ ܕܽܘܟܪܳܢܗܶܝܢ ܒܩܶܒܝܷ̈ܐ ܕܡܰܝ̈ܐ ܡܰܘܦ̈ܝܳܢ. ܗܳܟܰܢܳܐ ܩܰܠܝ̣ܠܝ̣ܢ ܥܰܬܺܝܪ̈ܶܐ ܠܡܶܚܡܳܐ ܒܗܽܘ̈ܦܳܟܰܝܗܽܘܢ. ܘܥܰܠܗܳܕܶܐ ܡܙܺܝܥ ܗܘܳܐ ܛܽܘܒܳܢܳܐ ܕܰܘܝܕ ܡܰܠܦܳܢܽܘܬܳܐ ܨܶܝܕ ܐܱܝܠܶܝܢ ܕܚܳܣܡܺܝܢ ܒܪ̈ܰܫܺܝܥܶܐ ܘܰܒܫܰܒܰܗܪ̈ܳܢܶܐ ܘܳܐܡܰܪ:
ܠܐ ܬܶܚܣܰܡ ܒܪ̈ܰܫܺܝܥܶܐ ܘܠܐܴ ܬܶܛܰܢ ܒܥܳܒ̈ܕܰܝ ܥܰܘܠܐܴ. ܚܣܳܡܳܐ ܠܡ ܠܐܴ ܫܰܦܺܝܪ. ܘܠܐܴ ܟܰܕ ܟܺܐܢܳܐܝ̣ܬ ܗ̣ܘܳܐ. ܘܠܐܴ ܒܛܳܒܬܳܐ ܙܳܕܶܩ ܓܶܝܪ ܠܡܶܚܣܰܡ. ܡܶܛܠ ܕܢܶܥܒܶܕ ܐܰܟܘܳܬܶܗ. ܘܠܳܐ ܬܽܘܒ ܛܢܳܢܳܐ ܙܳܕܶܩ ܕܢܶܫܒܽܘܩ ܕܢܶܥܽܘܠ ܠܓܰܘ ܢܰܦܫܳܐ. ܚܣܳܡܳܐ ܓܶܝܪ ܘܰܛܢܳܢܳܐ ܠܢܰܦܫܳܐ܆ ܐܰܝܟ ܝܰܪܩܳܢܳܐ ܠܚܷ̈ܛܶܐ. ܘܰܐܝܟ ܫܰܘܒܳܐ ܠܰܥܒܽܘܪܳܐ. . ܘܰܐܝܟ ܕܗܳܘܶܐ ܝܰܪܩܳܢܳܐ ܡܚܽܘܬܳܐ ܠܫܶܒܠܳܐ ܕܚܷ̈ܛܶܐ: ܘܥܳܒܶܕ ܠܳܗ̇ ܕܠܳܐ ܦܺܐܪ̈ܶܐ: ܘܰܡܓܰܙܶܐ ܠܰܐܟܳܪܳܗ̇ ܡ̣ܢ ܥܠܰܠܬܳܐ ܕܥܳܒܕܳܐ ܠܰܚܡܳܐ. ܠܡܳܢܳܐ ܕܶܝܢ ܠܳܐ ܐܶܡܰܪ. ܕܠܳܐ ܬܶܚܣܰܡ ܒܙܰܕܺܝ̈ܩܶܐ. ܗܳܫܳܐ ܓܶܝܪ ܥܰܠ ܗܳܕܶܐ ܒܛܺܝܠ ܗܘܳܐ ܠܶܗ܇ ܕܡܶܢ ܚܣܳܡܳܐ ܢܶܟܠܐܷ ܐܶܢܽܘܢ. ܘܡܳܐ ܕܦܳܫܘ ܕܰܒܪ̈ܰܫܺܝܥܶܐ ܠܳܐ ܢܶܚܣܡܽܘܢ. ܒܳܬܰܪ ܗܳܕܶܐ ܡܝܰܒܶܠ ܡܰܣܶܩ ܗܘܳܐ ܠܗܽܘܢ ܠܗܳܝ ܕܡܶܢ ܗܳܕܶܐ ܡܥܰܠܝܳܐ. ܘܰܕܡܶܛܽܠܡܳܢܳܐ ܠܳܐ ܢܶܚܣܰܡ ܐ̱ܢܳܫ ܒܪ̈ܰܫܺܝܥܶܐ. ܟܽܠܡܶܕܶܡ ܠܰܡ ܕܺܝܠܗܽܘܢ ܥܰܡܗܽܘܢ ܥܳܒܰܪ. ܘܠܳܐ ܡܶܕܶܡ ܡܶܫܬܒܶܩ ܠܗܽܘܢ. ܘܠܰܝܬ ܠܗܽܘܢ ܥܶܩܳܪܐ: ܘܰܐܪܥܳܐ: ܘܰܡܩܰܘܝܳܢܽܘܬܳܐ܆ ܘܫܶܬܶܐܣܬܳܐ.
ܐܶܠܳܐ ܐܰܝܟ ܓ̈ܠܐܷ ܝܳܒܫܺܝܢ. ܘܰܐܝܟ ܝܽܘܪܳܩܳܐ ܕܥܶܣܒܳܐ ܚܳܡܶܝܢ. ܓ̈ܠܐܷ ܓܶܝܪ ܐܺܝܬܰܝܗܽܘܢ ܡܢܳܬܳܐ ܕܢܽܘܪܳܐ. ܘܠܰܘ ܐܰܝܟ ܚܷ̈ܛܶܐ ܕܡܶܬܟܰܢܫܺܝܢ ܠܰܐܘܨܪ̈ܰܝ ܡܰܠܟܽܘܬܳܐ ܕܒܶܝܬ ܐܠܗܐ. ܐܶܠܳܐ ܒܢܽܘܪܳܐ ܕܠܳܐ ܕܳܥܟܳܐ ܝܳܩܕܺܝܢ ܐܰܝܟ ܬܶܒܢܳܐ. ܠܰܝܬ ܡܶܟܺܝܠ ܥܰܠ ܥܶܣܒܳܐ ܕܽܘܟܪܳܢܶܗ. ܘܠܳܐ ܡܶܬܚܰܙܝܳܐ ܥܰܠ ܪ̈ܺܝܫܰܝ ܛܽܘܪ̈ܶܐ ܒܥܶܩܳܪ̈ܶܐ ܘܒܰܣܥܳܪ̈ܶܐ. ܒܕܰܐܝܟ ܗܳܠܶܝܢ ܠܰܡ ܠܳܐ ܬܶܚܣܰܡ.
ܐܶܠܳܐ ܣܰܒܰܪ ܒܰܐܠܗܳܐ ܘܰܥܒܶܕ ܛܳܒܬܳܐ. ܘܠܳܐ ܟܕ ܡܦܰܫܶܟ ܠܳܟ ܪܶܢܝܳܐ ܕܒܺܝ̈ܫܳܬܳܐ ܕܰܐܚܪ̈ܳܢܶܐ܆ ܬܶܦܗܶܐ ܘܬܶܛܥܶܐ ܡܶܢ ܫܒܺܝܠܳܐ ܕܰܫܪܳܪܳܐ.
ܐܶܠܐ ܥܡܰܪ ܒܰܐܪܥܳܐ ܘܰܒܥܺܝ ܗܰܝܡܳܢܽܘܬܳܐ. ܡ̣ܢ ܗܳܕܶܐ ܓܶܝܪ ܡܶܫܟܰܚ ܐܰܢܬ ܫܰܝܢܳܐ ܠܢܰܦܫܳܟ. ܘܨܶܝܕ ܣܰܒܪܳܐ ܕܦܽܘܠܚܳܢܳܐ ܕܛܳܒܴ̈ܬܳܐ ܩܰܘܳܐ. ܘܡܶܢܶܗ ܥܽܘܬܪܳܐ ܪܰܒܳܐ ܠܢܰܦܫܳܟ.
ܘܣܰܒܰܪ ܒܡܳܪܝܳܐ ܘܢܶܬܶܠ ܠܳܟ ܫܶܐܠܶܬܶܗ ܕܠܶܒܳܟ. ܬܪܽܘܨ ܩܕܳܡ ܡܳܪܝܳܐ ܐܽܘܪܚܳܟ܆ ܘܣܰܒܰܪ ܒܶܗ. ܟܡܳܐ ܠܰܡ ܕܰܚܣܳܡܳܐ ܠܒܺܝܟ ܠܳܟ܆ ܒܽܐܘܪܚܳܐ ܦܬܺܝܠܬܳܐ ܡܗܰܠܶܟ ܐܰܢܬ. ܗܳܢܰܘ ܓܶܝܪ ܥܒܳܕܶܗ. ܕܰܠܥܰܝ̈ܢܶܐ ܬܪ̈ܺܝܨܳܬܳܐ ܢܚܰܒܶܠ. ܘܶܐܢ ܕܶܝܢ ܠܘܳܬ ܡܳܪܝܳܐ ܚܳܐܱܪ ܐܰܢܬ.
ܗܽܘ ܥܳܒܶܕ ܘܡܰܦܶܩ ܐܰܝܟ ܢܽܘܗܪܳܐ ܙܰܕܺܝܩܽܘܬܳܟ. ܘܕܺܝ̈ܢܰܝܟ ܐܰܝܟ ܛܰܗܪܳܐ. ܘܰܐܝܟܰܢܳܐ ܕܠܰܝܬ ܠܚܶܫܽܘܟܳܐ ܡܢܳܬܳܐ ܥܰܡ ܢܰܗܺܝܪܳܐ: ܘܠܳܐ ܠܺܠܝܳܐ ܡܶܫܬܰܘܬܰܦ ܥܰܡ ܛܰܗܪܳܐ܆ ܗܳܟܰܢܳܐ ܠܳܐ ܩܳܪܒܺܝܢ ܪ̈ܰܫܺܝܥܶܐ ܠܘܳܬܳܟ܇ ܐܶܢܗܽܘ ܕܰܠܘܳܬ ܐܠܰܗܳܐ ܡܶܬܦܢܶܐ ܐܰܢܬ. ܘܟܰܕ ܡܶܢ ܚܶܫܽܘܟܳܐ ܕܪ̈ܰܫܺܝܥܶܐ ܘܰܚܣܳܡܳܐ ܕܥܳܒ̈ܕܰܝ ܥܰܘܠܳܐ ܡܰܪܚܶܩ ܐܰܢܬ܆
ܒܥܺܝ ܡܶܢ ܡܳܪܝܳܐ ܘܨܰܠܳܐ ܩܕܳܡܰܘܗܝ. ܗܰܘ ܓܶܝܪ ܕܰܡܨܰܠܶܐ ܩܕܳܡ ܐܠܰܗܳܐ܆ ܡܶܢܶܗ ܝܳܠܶܦ: ܕܠܳܐ ܡܰܘܬܰܪ ܠܶܗ ܛܢܳܢܳܐ ܕܥܳܒ̈ܕܰܝ ܥܰܘܠܳܐ. ܡܶܛܠܗܳܢܳܐ
ܠܐ ܬܶܚܣܰܡ ܒܓܰܒܪܳܐ ܕܥܳܒܶܕ ܥܰܘܠܳܐ܆ ܘܡܰܨܠܚܳܐ ܐܽܘܪܚܶܗ. ܘܶܐܬܬܢܺܝܚ ܡܶܢ ܚܶܡܬܳܐ: ܘܶܐܬܬܢܺܝܚ ܡܶܢ ܪܽܘܓܙܳܐ. ܘܠܳܐ ܬܶܚܣܰܡ ܠܡܶܥܒܰܕ ܒܺܝܫܬܳܐ. ܡܶܛܠ ܕܒܺܝ̈ܫܶܐ ܣܳܝܦܺܝܢ. ܒܣܰܢ̈ܝܳܬܳܐ ܣܰܓܺܝ̈ܐܳܬܳܐ ܡܩܰܛܪܶܓ ܠܶܗ ܡܙܰܡܪܳܢܳܐ ܠܚܰܫܳܐ ܗܳܢܳܐ ܕܰܚܣܳܡܳܐ. ܘܒܶܗ ܡܚܰܘܶܐ ܕܰܡܛܰܫܰܝ ܒܶܗ ܚܰܫܳܐ ܕܪܽܘܓܙܳܐ ܘܰܕܚܶܡܬܳܐ. ܘܕܺܐܝܬܰܘܗܝ ܒܺܝܫܬܳܐ ܓܡܺܝܪܬܳܐ: ܕܠܳܐ ܫܟܺܝܚܳܐ ܒܳܗ̇ ܛܳܒܬܳܐ. ܚܰܫܳܐ ܓܶܝܪ ܕܰܚܣܳܡܳܐ܆ ܬܡܳܢܝܳܐ ܚܰܫ̈ܐ ܡܰܘܠܶܕ. ܩܰܕܡܳܝܳܐ ܒܺܝܫܽܘܬܳܐ: ܬܪܰܝܳܢܳܐ ܣܶܢܐܬܳܐ: ܬܠܺܝܬܳܝܳܐ ܛܢܳܢܳܐ ܡܰܘܒܕܳܢܳܐ: ܪܒܺܝܥܳܝܳܐ ܐܰܟܬܳܐ: ܚܡܺܝܫܳܝܳܐ ܟܺܐܒܳܐ ܕܰܒܥܶܠܕܒܳܒܽܘܬܳܐ: ܫܬܺܝܬܳܝܳܐ ܚܶܡܬܳܐ: ܫܒܺܝܥܳܝܳܐ ܪܽܘܓܙܳܐ܆ ܬܡܺܝܢܳܝܳܐ ܡܰܪܳܚܽܘܬܳܐ. ܘܰܐܚܪ̈ܳܢܝܳܬܳܐ ܒܺܝ̈ܫܳܬܳܐ ܡܰܘܠܶܕ. ܗܳܠܶܝܢ ܕܠܰܘ ܚܰܫ̈ܐ ܡܶܬܩܪܶܝܢ܆ ܐܶܠܐ ܒܢܰܝ̈ܳܐ ܕܚܰܫ̈ܐ. ܡܶܛܽܠܗܳܢܳܐ ܒܺܝ̈ܫܶܐ ܩܳܪܶܐ ܠܗܽܘܢ ܠܚܰܣܳܡ̈ܐ ܘܳܐܡܰܪ. ܕܠܳܐ ܠܡ ܬܶܚܣܰܡ ܠܡܶܥܒܰܕ ܒܺܝܫܬܳܐ܆ ܡܶܛܠ ܕܒܺܝ̈ܫܶܐ ܣܳܝܦܺܝܢ.
ܘܰܐܝܠܶܝܢ ܕܰܡܣܰܒܪܺܝܢ ܒܡܳܪܝܳܐ ܝܳܪܬܺܝܢ ܐܰܪܥܳܐ. ܠܡܳܢܳܐ݀ ܕܶܝܢ ܐܶܡܰܪ: ܕܰܐܪܥܳܐ ܝܳܪܬܺܝܢ ܘܠܰܘ ܫܡܰܝܳܐ. ܠܰܘ ܠܰܢܒܺܝܳܐ ܛܥܶܐ ܣܽܘܥܪܳܢܳܐ. ܝܽܘ̈ܕܳܝܶܐ ܒܗܰܘ ܙܰܒܢܳܐ ܡܰܣܒܪܺܝܢ ܗܘܰܘ܇ ܘܗܺܝ ܗܳܕܶܐ ܬܰܪܥܺܝܬܳܐ ܥܕܰܡܳܐ ܠܗܳܫܳܐ ܐܰܚܺܝܕܳܐ ܠܘܳܬܗܽܘܢ: ܕܡܳܐ ܕܰܗܘܳܐ ܢܽܘܚܳܡܳܐ ܒܰܐܪܥܳܐ ܕܦܰܠܶܣܛܺܝܢܺܝ܆ ܡܶܫܬܰܒܩܺܝܢ ܐܰܝܠܶܝܢ ܕܡܶܢ ܙܰܪܥܶܗ ܕܰܐܒܽܘܢ ܐܰܒܪܳܗܳܡ. ܘܬܰܡܳܢ ܡܩܰܘܶܝܢ ܒܚܰܝ̈ܐ ܕܠܳܐ ܫܽܘܠܳܡܳܐ. ܘܬܰܚܘܺܝܬܳܐ ܡܰܝܬܶܝܢ ܠܗܳܕܶܐ܇ ܡܶܢ ܗܳܝ ܕܶܐܡܰܪ ܐܠܰܗܳܐ ܠܰܐܒܳܗܴ̈ܬܳܐ. ܕܢܶܬܶܠ ܠܗܽܘܢ ܐܰܪܥܳܐ ܕܰܟܢܰܥܢܳܝ̈ܐ ܠܗܽܘܢ ܘܰܠܙܰܪܥܗܽܘܢ. ܘܶܐܢܗܽܘ ܕܗܳܟܰܢ ܠܳܐ ܗܳܘܝܳܐ ܗܘܳܬ܆ ܨܶܝܕ ܚܽܘ̈ܫܳܒܶܐ ܕܰܡܚܺܝܠܺܝܢ ܒܕܰܐܝܟ ܗܳܠܶܝܢ ܡܰܪ̈ܢܝܳܬܳܐ. ܐܶܡܰܪ ܕܰܘܝܕ. ܕܰܐܝܠܶܝܢ ܕܰܡܣܰܒܪܺܝܢ ܒܡܳܪܝܳܐ ܝܳܪܬܺܝܢ ܐܰܪܥܳܐ. ܟܰܕ ܠܰܘ ܗܳܝ ܐܰܪܥܳܐ ܕܦܰܠܶܣܛܺܝܢܺܝ ܐܶܡܰܪ ܢܒܺܝܳܐ. ܐܶܠܳܐ ܡܶܛܠ ܗܳܝ ܐܰܪܥܳܐ ܕܰܠܥܶܠ ܡܶܢ ܫܡܰܝܳܐ. ܕܶܐܡܰܪ ܥܠܶܝܗ̇ ܡܳܪܰܢ. ܕܛܽܘܒܰܝܗܽܘܢ ܠܡܰܟܺܝ̈ܟܶܐ ܕܗܶܢܽܘܢ ܢܺܐܪܬܽܘܢ ܐܰܪܥܳܐ (ܡܬܝ ܗ: ܗ). ܕܰܒܗܰܘ ܙܰܒܢܳܐ ܕܗܳܘܝܳܐ ܗܳܕܶܐ܆ ܠܰܝܬ ܐܶܢܽܘܢ ܗܳܠܶܝܢ ܪ̈ܰܫܺܝܥܶܐ܇ ܗܳܢܽܘܢ ܕܡܶܬܚܰܣܡܺܝܢ ܗܘܰܘ ܡܶܛܠ ܥܽܘܬܪܳܐ ܕܙܰܒܢܳܐ.
ܒܙܰܒܢܳܐ ܙܥܽܘܪܳܐ ܒܳܥܶܐ ܐܰܢܬ ܠܪܰܫܺܝܥܳܐ ܘܠܰܝܬܰܘܗܝ. ܘܚܳܐܱܪ ܐܰܢܬ ܒܕܽܘܟܬܶܗ܆ ܘܠܳܐ ܡܶܫܬܟܰܚ. ܙܰܒܢܳܐ ܙܥܽܘܪܳܐ ܩܳܪܶܐ ܠܶܗ ܠܡܶܬܚܳܐ ܕܚܰܝ̈ܐ ܟܪ̈ܰܝܳܐ ܕܰܒܗܳܢܳܐ ܥܳܠܡܳܐ܆ ܕܩܰܠܺܝܠܳܐܝ̣ܬ ܡܶܬܦܰܣܩܺܝܢ ܡܶܢܶܗ ܐܰܝܠܶܝܢ ܕܰܢܨܺܝܒܺܝܢ ܥܰܠ ܥܽܘܬܪܶܗ. ܐܰܝܟ ܗܰܒܳܒܷ̈ܐ ܕܰܡܣܰܪܗܒܺܝܢ ܠܡܶܚܡܳܐ. ܡܶܢ ܪܽܘܚܳܐ ܚܰܡܺܝܡܬܳܐ ܕܩܰܝܛܳܐ. ܙܰܕܺܝ̈ܩܶܐ ܕܶܝܢ ܘܡܰܟܺܝ̈ܟܶܐ
ܘܡܶܣܟܻ̈ܢܶܐ ܝܳܪܬܺܝܢ ܐܰܪܥܳܐ. ܗܳܝ ܕܶܐܡܰܪ ܢܒܺܝܳܐ.
ܘܡܶܬܒܰܣܡܺܝܢ ܒܰܫܠܳܡܳܐ ܣܰܓܺܝܐܳܐ. ܡܶܛܠܗܳܢܳܐ ܐܶܡܰܪ ܢܒܺܝܳܐ. ܕܡܶܣܟܺܢ̈ܐ ܝܳܪܬܺܝܢ ܐܰܪܥܳܐ. ܐܰܝܟ ܓܰܒܪܳܐ ܕܺܐܝܬܰܘܗܝ ܡܶܢ ܐܰܪܥܳܐ. ܐܶܬܳܐ ܕܶܝܢ ܒܳܬܪܶܗ ܗܰܘ ܡܳܪܳܐ ܕܰܫܡܰܝܳܐ. ܘܰܕܡܶܢ ܫܡܰܝܰܐ ܗ̄ܘ. ܘܰܡܠܰܟ ܐܰܟܘܳܬܶܗ ܘܶܐܡܰܪ. ܛܽܘܒܰܝܗܽܘܢ ܠܡܶܣܟܻ̈ܢܶܐ ܒܪܽܘܚ. ܕܕܺܝܠܗܽܘܢ ܗ̱ܺܝ ܡܰܠܟܽܘܬܳܐ ܕܰܫܡܰܝܳܐ (ܡܬܝ ܗ: ܓ). ܗܳܢܰܘ ܕܶܝܢ܇ ܡܽܘܠܟܳܢܳܐ ܕܰܡܛܰܫܰܝ ܗܘܳܐ ܒܡܶܠܬܳܐ ܕܰܢܒܺܝܽܘܬܳܐ. ܘܶܐܬܳܐ ܡܳܪܳܗ̇ ܘܝܳܗܽܘܒܳܐ ܕܰܢܒܺܝܽܘܬܳܐ܆ ܐܰܕܢܚܳܗ̇ ܒܓܶܠܝܳܐ. ܟܰܕ ܕܶܝܢ ܥܰܠ ܐܰܝܠܶܝܢ ܕܰܒܒܺܝܫܽܘܬܳܐ ܕܰܚܣܳܡܳܐ ܒܳܠܥܺܝܢ ܘܡܶܫܬܰܠܗܒܺܝܢ܇ ܥܳܛܶܦ ܢܒܺܝܳܐ ܘܳܐܡܰܪ.
ܡܶܬܚܰܡܰܬ ܪܰܫܺܝܥܳܐ ܥܰܠ ܙܰܕܺܝܩܳܐ. ܘܒܳܥܶܐ ܠܡܶܩܛܠܶܗ. ܘܰܡܚܰܪܶܩ ܫܶܢܰܘ̈ܗܝ ܥܠܰܘܗܝ. ܗܳܢܰܘ ܥܒܳܕܳܐ ܕܚܰܣܳܡ̈ܐ. ܒܚܶܡܬܳܐ ܓܶܝܪ ܘܰܒܪܽܘܓܙܳܐ ܡܶܙܕܰܝܢܺܝܢ. ܘܥܶܠܬܳܐ ܡܶܛܠ ܟܰܗܺܝܢܽܘܬܳܐ ܕܦܳܓܥܳܐ ܒܐܢܳܫܺܝ̈ܢ ܒܥܳܠܡܳܐ ܗܳܢܳܐ ܫܳܩܠܝܢ. ܘܡܶܢ ܚܣܳܡܳܐ ܒܺܝܫܳܐ ܥܕܰܡܳܐ ܠܩܶܛܠܳܐ ܡܶܬܡܰܛܶܝܢ. ܕܥܰܠ ܗܳܠܶܝܢ ܣܦܺܝ̈ܩܰܝ ܡܶܢ ܒܽܘܝܳܢܳܐ ܓܳܚܶܟ ܘܰܡܡܰܝܶܩ܇ ܠܰܘ ܒܰܪܢܳܫܳܐ ܐܶܠܳܐ ܐܠܰܗܳܐ.
ܘܡܳܪܝܳܐ ܠܰܡ ܢܶܓܚܰܟ ܥܠܰܘܗܝ. ܡܶܛܠ ܕܺܝܕܰܥ ܕܰܡܛܳܐ ܝܰܘܡܶܗ. ܘܥܰܠ ܪܰܫܺܝܥܳܐ ܓܶܝܪ ܕܠܳܐ ܣܒܰܥ ܒܺܝ̈ܫܳܬܶܗ. ܘܬܳܒ ܠܘܳܬ ܐܠܰܗܳܐ. ܘܥܰܠ ܗܰܘ ܕܡܶܬܠܒܶܟ ܒܒܺܝܫܽܘܬܶܗ ܕܰܚܣܳܡܳܐ. ܡܶܓܚܰܟ ܓܳܚܶܟ ܐܠܰܗܐ ܥܰܠ ܗܰܘ ܕܠܳܐ ܟܰܪܝܳܐ ܠܶܗ ܥܰܠ ܦܽܘܪܩܳܢܳܐ ܕܢܰܦܫܶܗ. ܥܰܠ ܗܰܘ ܕܚܳܣܶܡ ܗܘܳܐ ܒܪܰܫܺܝܥܳܐ ܥܰܠ ܕܠܳܐ ܝܺܠܶܦ. ܕܠܳܐ ܡܶܬܩܰܒܰܠ ܛܢܳܢܶܗ ܠܬܰܪܥܽܘܬܳܐ ܕܰܐܠܗܳܐ. ܢܒܺܝܳܐ ܕܶܝܢ ܟܰܕ ܡܰܠܶܦ ܕܠܳܐ ܢܶܚܣܰܡ ܒܪ̈ܰܫܺܝܥܶܐ. ܗܰܘ ܕܰܐܚܺܝܕ ܠܶܗ ܛܢܳܢܳܐ ܠܽܘܩܒܰܠܗܽܘܢ܆ ܬܽܘܒ ܬܳܢܶܐ ܒܺܝ̈ܫܳܬܳܐ ܕܪ̈ܰܫܺܝܥܶܐ ܘܳܐܡܰܪ:
ܣܰܝܦܳܐ ܫܡܰܛܘ ܪ̈ܰܫܺܝܥܶܐ ܘܰܡܬܰܚܘ ܩܶܫܬܳܐ܆ ܕܢܶܩܛܠܽܘܢ ܠܡܶܣܟܺܢ̈ܐ ܘܰܠܒܳܝ̈ܫܶܐ. ܘܠܰܐܝܠܶܝܢ ܕܰܬܪ̈ܺܝܨܳܢ ܐܽܘܪ̈ܚܳܬܗܽܘܢ. ܐܶܢ ܒܥܽܘܬܪܳܐ ܚܳܣܶܡ ܐܰܢܬ. ܕܥܰܬܺܝܪܺܝܢ ܪ̈ܰܫܺܝܥܶܐ ܒܥܳܠܡܳܐ ܘܟܰܗܺܝܢܺܝܢ ܒܥܽܘܬܪܳܐ. ܡܶܛܠ ܕܰܫܡܰܛܘ ܣܰܝܦܳܐ ܘܰܡܬܰܚܘ ܩܶܫܬܳܐ ܘܓܶܐܪܳܐ ܥܰܠ ܡܶܣܟܻ̈ܢܶܐ ܘܰܬܪ̈ܺܝܨܶܐ܆ ܦܽܘܫ ܡܶܢ ܗܳܝ ܕܬܶܒܥܶܐ ܕܢܶܗܘܶܐ ܠܳܟ ܐܰܟܘܳܬܗܽܘܢ. ܝܰܬܺܝܪܳܐܝ̣ܬ ܕܪܽܘܚܳܐ ܕܰܐܠܗܳܐ ܦܣܰܩ ܥܠܰܝܗܽܘܢ.
ܕܣܰܝܦܗܽܘܢ ܢܶܥܽܘܠ ܒܠܶܒܗܽܘܢ: ܘܩܶܫ̈ܬܳܬܗܽܘܢ ܢܶܬܬܰܒܪ̈ܳܢ. ܕܰܐܝܟ ܗܳܢܳܐ ܓܶܝܪ ܐܺܝܬܰܝܗܽܘܢ ܦܣܴ̈ܩܶܐ ܕܟܺܐܢܽܘܬܳܐ ܥܰܠ ܪ̈ܰܫܺܝܥܶܐ. ܕܰܒܗܰܘ ܡܶܕܶܡ ܕܡܰܪܫܥܺܝܢ܆ ܢܶܬܚܰܝܒܽܘܢ. ܘܰܒܗܳܠܶܝܢ ܙܰܕܺܝܩܳܐ ܠܳܐ ܢܶܕܡܶܐ ܘܠܳܐ ܢܶܚܣܰܡ ܘܠܳܐ ܒܥܽܘܬܪܗܽܘܢ ܢܶܛܰܢ. ܛܳܒܳܐ ܗ̄ܝ ܓܶܝܪ ܡܶܣܟܺܢܽܘܬܳܐ ܕܬܰܡܺܝ̈ܡܶܐ. ܡܶܢ ܥܽܘܬܪܳܐ ܕܥܰܘܴ̈ܠܶܐ.
ܦܰܩܳܚ ܩܰܠܺܝܠ ܠܙܰܕܺܝܩܳܐ܆ ܡܶܢ ܩܶܢܝܳܢܳܐ ܣܰܓܺܝܳܐܐ ܕܪ̈ܰܫܺܝܥܶܐ. ܗܰܘ ܓܶܝܪ ܕܚܰܣܺܝܪܽܘܬܳܐ ܕܩܶܢܝܳܢܷ̈ܐ ܗ̣ܘܳܬ ܠܶܗ ܥܶܠܬܳܐ ܛܳܒܬܳܐ܆ ܘܶܐܫܟܰܚ ܒܩܶܢܝܳܢܳܐ ܙܥܽܘܪܳܐ ܡܰܠܟܽܘܬܳܐ ܕܰܫܡܰܝܳܐ. ܗܰܘ ܕܶܝܢ ܒܩܶܢܝܳܢܶܗ ܣܰܓܺܝܳܐܐ ܐܰܒܕܳܢܳܐ ܟܰܢܶܫ ܠܰܩܢܽܘܡܶܗ.
ܡܶܛܽܠܗܳܢܳܐ ܕܪ̈ܳܥܰܝܗܽܘܢ ܕܪ̈ܰܫܺܝܥܶܐ ܢܶܬܬܰܒܪܽܘܢ. ܕܪ̈ܳܥܰܝܗܽܘܢ ܕܪ̈ܰܫܺܝܥܶܐ܆ ܩܶܢܝܳܢܗܽܘܢ ܐܺܝܬܰܘܗܝ. ܕܰܒܚܰܕ ܥܶܕܳܢܳܐ ܡܶܬܬܰܒܪܺܝܢ ܘܢܳܦܠܺܝܢ ܡܶܢܗܽܘܢ. ܘܰܕܠܳܐ ܕܪ̈ܳܥܶܐ ܢܳܬܥܺܝܢ ܘܢܳܚܬܺܝܢ ܠܰܫܝܽܘܠ. ܠܰܘ ܕܶܝܢ ܗܳܟܰܢܳܐ ܙܰܕܺܝ̈ܩܶܐ. ܐܶܠܐ ܟܰܕ ܡܫܰܪܪܺܝܢ ܥܰܠ ܣܰܒܪܳܐ ܕܰܐܠܗܳܐ: ܡܶܢ ܗܳܢܳܐ ܥܳܠܡܳܐ ܢܳܦܩܺܝܢ. ܐܳܦ ܡܶܛܽܠܗܳܢܳܐ
ܡܣܰܡܶܟ ܠܙܰܕܺܝ̈ܩܶܐ ܡܳܪܝܳܐ. ܘܝܳܕܰܥ ܡܳܪܝܳܐ ܝܰܘ̈ܡܳܬܗܽܘܢ ܕܬܰܡܺܝ̈ܡܶܐ: ܘܝܳܪܬܽܘܬܗܽܘܢ ܠܥܳܠܰܡ ܬܶܗܘܶܐ. ܠܳܐ ܢܶܒܗܬܽܘܢ ܒܫܳܥܬܳܐ ܒܺܝܫܬܳܐ: ܘܰܒܝܰܘ̈ܡܳܬܳܐ ܕܟܰܦܢܳܐ ܢܶܣܒܥܽܘܢ. ܡܳܢܳܐ ܐܶܢܽܘܢ ܩܴ̈ܠܐ ܗܳܠܶܝܢ. ܫܒܰܥ ܠܰܡ ܙܰܒܢܺܝ̈ܢ ܢܳܦܶܠ ܙܰܕܺܝܩܳܐ ܘܩܳܐܷܡ. ܘܡܳܐ ܕܡܺܝܬ ܙܰܕܺܝܩܳܐ ܘܰܢܦܰܠ ܒܰܚܒܳܠܳܐ܆ ܬܽܘܒ ܡܣܰܡܶܟ ܠܶܗ ܘܰܡܩܺܝܡ ܕܪܳܥܶܗ ܕܡܳܪܝܳܐ. ܘܠܳܐ ܛܳܥܶܐ ܦܽܘܠܚܳܢܳܐ ܕܬܰܡܺܝ̈ܡܶܐ. ܐܶܠܳܐ ܝܳܗܶܒ ܠܗܽܘܢ ܚܠܳܦ ܬܰܡܺܝܡܽܘܬܳܐ ܕܠܶܒܗܽܘܢ ܝܳܪܬܽܘܬܳܐ ܕܰܫܡܰܝܳܐ: ܗܳܝ ܕܰܡܩܰܘܝܳܐ ܠܥܳܠܰܡ. ܘܠܳܐ ܒܳܗܬܺܝܢ ܒܫܳܥܬܳܐ ܕܗܳܘܝܳܐ ܒܺܝܫܬܳܐ. ܘܰܒܝܰܘ̈ܡܳܬܳܐ ܕܟܰܦܢܳܐ ܢܶܣܒܥܽܘܢ. ܟܰܕ ܡܓܰܪܶܓ ܠܛܳܒ̈ܐ ܘܰܠܡܰܟܺܝ̈ܟܶܐ ܨܶܝܕ ܫܽܘܦܪܳܐ ܕܦܽܘܪ̈ܥܳܢܶܐ ܐܠܰܗܝ̈ܐ. ܘܡܰܝܬܶܐ ܠܦܽܘܫܳܩܳܐ ܕܠܳܐ ܡܚܰܦܰܝ ܒܥܰܣ̈ܩܳܬܳܐ. ܫܽܘܘܕܳܥܳܐ ܕܰܟܢܽܘܫܝܳܐ ܕܟܽܠܗܽܘܢ ܥܰܡ̈ܡܶܐ ܩܕܳܡ ܗܰܘ ܪܳܥܝܳܐ ܫܰܪܺܝܪܳܐ܇ ܒܳܬܰܪ ܕܰܡܣܰܒܰܥ ܠܩܰܕܺܝ̈ܫܶܐ ܕܰܟܦܶܢܘ܆ ܒܫܳܪܽܘܬܳܐ ܕܦܳܬܽܘܪܶܗ ܕܡܰܠܟܳܐ ܪܰܒܳܐ. ܡܶܬܦܢܶܐ ܥܰܠ ܡܣܳܡ ܒܪܺܝܫܳܐ ܕܪ̈ܰܫܺܝܥܶܐ. ܗܽܘ ܡܙܰܡܪܳܢܳܐ ܒܝܰܕ ܪܽܘܚܳܐ: ܠܺܝ̈ܛܶܐ ܩܪܳܐ ܐܶܢܽܘܢ. ܐܰܟܡܳܐ ܕܳܐܦ ܥܰܡܰܢܽܘܐܶܝܠ.
ܡܶܛܠ ܕܪ̈ܰܫܺܝܥܶܐ ܐܳܒܕܺܝܢ: ܘܰܒܥܶܠܕ̈ܒܳܒܰܘܗܝ ܕܡܳܪܝܳܐ ܡܦܰܛܡܷ̈ܐ ܓܳܡܪܺܝܢ. ܘܰܐܝܟ ܬܶܢܳܢܳܐ ܣܳܝܦܺܝܢ. ܝܳܙܶܦ ܪܰܫܺܝܥܳܐ ܘܠܳܐ ܦܳܪܰܥ. ܘܙܰܕܺܝܩܳܐ ܡܪܰܚܶܡ ܘܝܳܗܶܒ. ܗܳܠܶܝܢ ܐܶܬܢܰܗܰܪ̈ܝ ܠܗܶܝܢ ܡܶܢܟܰܕܽܘ. ܗܳܝ ܕܶܝܢ ܕܝܳܙܶܦ ܪܰܫܺܝܥܳܐ ܘܠܳܐ ܦܳܪܰܥ: ܕܳܡܝܳܐ ܕܗܰܘ ܕܰܫܩܰܠ ܟܶܣܦܳܐ ܡܶܢ ܡܳܪܰܢ: ܘܨܰܪܶܗ ܒܣܶܕܽܘܢܳܐ ܐܰܡܺܝܪܳܐ. ܘܙܰܕܺܝܩܳܐ ܕܶܝܢ ܕܰܡܪܰܚܶܡ ܘܝܳܗܶܒ. ܗܰܘ ܕܰܫܩܰܠ ܟܰܟܪ̈ܶܐ ܚܰܡܶܫ. ܘܰܐܘܙܶܦ ܠܚܰܛܳܝܷ̈ܐ. ܘܬܳܒܘ ܡܶܢ ܚܛܳܗܰܝ̈ܗܽܘܢ. ܘܰܐܝܬܺܝ ܥܣܰܪ ܟܰܟܪ̈ܺܝܢ ܚܠܳܦ ܚܰܡܶܫ. ܘܡܶܢ ܒܳܬܰܪ ܗܳܠܶܝܢ܆ ܩܳܠܶܗ ܕܪܳܥܝܳܐ ܗܰܘ ܕܳܐܡܰܪ. ܬܰܘ ܒܪ̈ܺܝܟܰܘܗܝ ܕܳܐܒܝ ܝܺܪܰܬܘ ܡܰܠܟܽܘܬܳܐ܇ ܗܳܝ ܕܰܡܛܰܝܒܳܐ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܘܩܳܠܐܴ ܐܚܪܺܢܳܐ ܕܰܠܩܽܘܒܠܶܗ ܨܳܐܰܪ ܒܰܢܒܺܝܽܘܬܶܗ. ܡܰܣܶܩ ܠܶܗ ܠܨܰܠܡܳܐ.
ܡܶܛܽܠ ܕܰܒܪ̈ܺܝܟܰܘܗܝ ܕܡܳܪܝܳܐ ܝܳܪܬܺܝܢ ܐܰܪܥܳܐ. ܗܳܪܟܳܐ ܘܠܰܘ ܩܰܠܺܝܠ ܪܰܚܺܝܩ ܐܪܳܙܳܐ ܡܶܢ ܓܶܠܝܳܢܳܐ. ܐܳܦ ܥܰܡܰܢܽܘܐܶܝܠ ܓܶܝܪ: ܟܰܕ ܡܰܝܬܶܐ ܠܦܽܘܫܳܩܳܐ ܠܓܶܠܝܳܢܳܐ ܕܡܶܐܬܝ̣ܬܶܗ ܐܚܪܳܝܬܳܐ ܐܳܡܰܪ. ܕܶܐܡܰܬܝ ܕܳܐܬܶܐ ܒܪܶܗ ܕܐܢܳܫܳܐ ܒܫܽܘܒܚܶܗ܆ ܘܟܽܠܗܽܘܢ ܡܰܠܐܟܰܘ̈ܗܝ ܩܰܕܺܝ̈ܫܶܐ ܥܰܡܶܗ܆ ܗܳܝܕܶܝܢ ܢܶܬܶܒ ܥܰܠ ܬܪܳܘܢܽܘܣ ܕܫܽܘܒܚܶܗ. ܘܢܶܬܟܰܢܫܽܘܢ ܩܕܳܡܰܘܗܝ ܟܽܠܗܽܘܢ ܥܰܡ̈ܡܶܐ. ܘܰܢܦܰܪܶܫ ܐܶܢܽܘܢ ܚܰܕ ܡܶܢ ܚܰܕ. ܐܰܝܟ ܪܳܥܝܳܐ ܕܰܡܦܰܪܶܫ ܥܶܪ̈ܒܶܐ ܡܶܢ ܓܕܰܝܴ̈ܐ. ܘܰܢܩܺܝܡ ܥܶܪ̈ܒܶܐ ܡܶܢ ܝܰܡܺܝܢܶܗ. ܘܰܓܕܰܝܴ̈ܐ ܡܶܢ ܣܶܡܳܠܶܗ. ܗܳܝܕܶܝܢ ܢܺܐܡܰܪ ܡܰܠܟܳܐ ܠܗܳܢܽܘܢ ܕܡܶܢ ܝܰܡܺܝܢܶܗ. ܬܰܘ ܒܪ̈ܺܝܟܰܘܗܝ ܕܳܐܒܝ ܝܺܪܰܬܘ ܡܰܠܟܽܘܬܳܐ (ܡܬܝ ܟܗ: ܠܐ-ܠܕ). ܘܗܳܐ ܠܳܐ ܪܰܚܺܝܩܺܝܢ ܩܴ̈ܠܐ ܗܳܠܶܝܢ ܡܶܢ ܚܕܳܕ̈ܐ܆ ܐܰܝܟܰܢܳܐ ܕܶܐܡܪܶܬ. ܘܕܰܘܺܝܕ ܠܰܒܪ̈ܺܝܟܶܐ ܐܶܡܰܪ ܕܶܝܢ ܝܳܪܬܺܝܢ ܐܰܪܥܳܐ. ܘܡܳܪܰܢ ܠܰܒܪ̈ܺܝܟܶܐ ܩܪܳܐ ܕܢܶܥܠܽܘܢ ܠܝܳܪܬܽܘܬܶܗ. ܐܶܢܕܶܝܢ ܐܳܡܰܪ ܐܢܳܫ܆ ܕܠܰܘ ܗܽܘܝܽܘ ܟܰܕ ܗܽܘ ܣܽܘܥܪܳܢܳܐ. ܡܶܛܠ ܕܕܰܘܺܝܕ ܐܶܡܰܪ ܐܰܪܥܳܐ. ܘܡܳܪܰܢ ܐܶܡܰܪ ܡܰܠܟܽܘܬܳܐ܆ ܩܰܕܡܶܬ ܐܶܡܪܶܬ ܡܶܢ ܠܥܶܠ܆ ܕܰܠܡܳܪܰܢ ܐܶܬܢܛܰܪ ܫܡܶܗ ܫܰܪܺܝܪܳܐ ܕܝܳܪܬܽܘܬܳܐ ܕܩܰܕܺܝ̈ܫܶܐ. ܡܶܛܠ ܕܒܺܐܝ̈ܕܰܘܗܝ ܢܶܬܦܰܫܰܩ ܠܥܳܠܡܳܐ ܫܪܳܪܳܐ ܘܚܰܝ̈ܐ. ܘܡܰܘܕܰܥ ܡܙܰܡܪܳܢܳܐ ܠܗܳܝ ܕܓܳܕܫܳܐ ܠܗܳܢܽܘܢ ܕܕܰܠܩܽܘܒܠܳܐ ܘܳܐܡܰܪ.
ܘܠܺܝ̈ܛܰܘܗܝ ܢܣܽܘܦܽܘܢ. ܘܗܳܕܳܐ ܗ̄ܝ ܗܳܝ ܕܶܐܡܰܪ ܡܰܠܟܳܐ ܠܗܳܢܽܘܢ ܕܫܰܡܰܗ ܓܕܰܝܴ̈ܐ. ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ܇ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܐܱܟܰܘ̈ܗܝ (ܡܬܝ ܟܗ: ܡܐ). ܢܶܥܒܰܪ ܡܶܟܺܝܠ ܠܘܳܬ ܙܰܕܺܝ̈ܩܶܐ ܘܰܬܪ̈ܺܝܨܶܐ. ܗܳܢܰܘ ܡܶܛܠ ܗܰܘ ܙܰܕܺܝܩܳܐ ܕܰܗܘܳܐ ܓܰܒܪܳܐ ܘܶܐܬܚܙܺܝ ܒܥܳܠܡܳܐ.
ܕܡܶܢ ܩܕܳܡ ܡܳܪܝܳܐ ܡܰܬܩ̈ܢܳܢ ܗܰܠܟܴ̈ܬܶܗ ܕܓܰܒܪܳܐ. ܘܽܐܘܪܚܶܗ ܗ̣ܽܘ ܡܰܬܩܶܢ: ܡܶܛܠ ܕܶܐܢ ܢܳܦܶܠ ܠܳܐ ܡܰܗܰܪ: ܕܡܳܪܝܳܐ ܐܰܚܺܝܕ ܒܺܐܝܕܶܗ. ܛܠܐܷ ܗܘܺܝܬ ܘܣܶܐܒܶܬ܆ ܘܠܐ ܚܙܺܝܬ ܙܰܕܺܝܩܳܐ ܕܶܐܫܬܒܶܩ: ܘܳܐܦܠܳܐ ܙܰܪܥܶܗ ܕܰܒܥܳܐ ܠܰܚܡܳܐ. ܐܶܠܐ ܟܽܠܶܗ ܝܰܘܡܳܐ ܡܪܰܚܶܡ ܘܡܰܘܙܶܦ܆ ܘܙܰܪܥܶܗ ܡܶܬܒܰܪܰܟ. ܗܳܠܶܝܢ ܩܴ̈ܠܐ ܥܰܠ ܡܶܠܬܶܗ ܕܰܐܒܳܐ ܐܰܡܺܝܪ̈ܳܢ ܡܶܢ ܢܒܺܝܳܐ. ܗܽܘܝܽܘ ܗܰܘ ܕܡܰܬܩ̈ܢܳܢ ܗܰܠܟܴ̈ܬܶܗ ܡܶܢ ܐܰܒܳܐ ܒܰܢܒܺܝܷ̈ܐ. ܕܶܐܡܰܬܝ ܢܺܐܬܶܐ ܘܒܰܐܝܢܳܐ ܙܰܒܢܳܐ ܢܶܬܓܠܶܐ. ܘܝܰܬܺܝܪܳܐܝܬ ܬܽܘܒ ܡܰܢ ܝܺܕܺܝܥܳܐ ܡܶܢ ܗܳܝ ܕܶܐܡܰܪ. ܕܽܐܘܪܚܶܗ ܗ̣ܽܘ ܡܰܬܩܶܢ. ܡܰܢܽܘ ܓܰܒܪܳܐ ܗܰܘ ܕܡܶܫܟܰܚ ܕܢܰܬܩܶܢ ܐܽܘܪܚܳܐ ܕܢܰܦܫܶܗ: ܘܢܶܪܕܶܐ ܒܥܳܠܡܳܐ ܕܠܳܐ ܬܽܘܩܠܳܐ ܕܰܚܛܺܝܬܳܐ. ܐܶܠܳܐ ܡܳܪܝܳܐ ܗܰܘ ܕܶܐܬܓܠܺܝ ܒܰܒܣܰܪ ܘܠܳܐ ܥܒܰܕ ܚܛܺܝܬܳܐ. ܐܶܠܳܐ ܕܠܳܐ ܚܛܳܗܳܐ ܬܪܰܨ ܐܽܘܪܚܳܐ ܕܰܡܕܰܒܪܳܢܽܘܬܶܗ. ܘܠܳܐ ܥܒܰܕ ܥܰܘܠܳܐ. ܘܗܽܘ ܬܽܘܒ ܐܰܬܩܶܢ ܐܽܘܪܚܶܗ. ܟܰܕ ܢܚܶܬ ܠܡܰܘܬܳܐ ܨܶܒܝܳܢܳܝܳܐ. ܐܰܝܟ ܕܶܐܡܰܪ ܗܳܝ. ܕܢܰܦܫܝ ܣܳܐܷܡ ܐܢܳܐ ܚܠܳܦ ܥܳܢܴ̈ܐ (ܝܘܚܢܢ ܝ: ܝܗ). ܘܫܰܠܺܝܛ ܐܢܳܐ ܕܶܐܣܺܝܡܺܝܗ̇: ܘܫܰܠܺܝܛ ܐܢܳܐ ܕܬܽܘܒ ܐܶܣܒܺܝܗ̇. ܕܦܽܘܩܕܳܢܳܐ ܗܳܢܳܐ ܩܰܒܠܶܬ ܡܶܢ ܐܰܒܳܐ ܕܺܝܠܝ (ܝܘܚܢܢ ܝ: ܝܚ). ܡܶܛܠܗܳܢܳܐ ܐܳܡܰܪ
ܥܒܰܪ ܡܶܢ ܒܺܝܫܬܳܐ ܘܰܥܒܶܕ ܛܳܒܬܳܐ: ܘܶܐܬܬܢܺܝܚ ܠܥܳܠܰܡ. ܡܶܛܠ ܕܡܳܪܝܳܐ ܕܺܝܢܳܐ ܪܳܚܶܡ. ܡܳܢܰܘ ܕܺܝܢܳܐ ܗܰܘ ܕܪܳܚܶܡ ܡܳܪܝܳܐ. ܗܰܘ ܕܥܳܒܶܕ ܙܰܕܺܝܩܳܐ ܠܽܘܩܒܰܠ ܒܺܝܫܬܳܐ. ܡܳܐ ܕܩܳܡܰܬ ܢܰܦܫܳܐ ܒܕܺܝܢܳܐ ܥܰܡ ܒܥܶܠܕ̈ܒܳܒܶܐ ܕܚܰܝܶܝ̈ܗ̇: ܘܛܶܪܕܰܬ ܡܶܢ ܡܕܺܝܢܬܶܗ ܕܡܳܪܝܳܐ ܠܥܳܒ̈ܕܰܝ ܥܰܘܠܳܐ ܘܠܰܒܢܰܝ̈ ܚܶܫܽܘܟܳܐ: ܘܰܩܪܳܬ ܠܡܰܠܟܳܐ ܕܢܽܘܗܪܳܐ ܢܶܥܽܘܠ ܘܢܶܫܪܶܐ ܒܳܗ̇. ܠܗܳܢܳܐ ܕܺܝܢܳܐ ܪܳܚܶܡ ܡܳܪܝܳܐ. ܐܰܝܟ ܕܳܐܦ ܒܡܰܙܡܽܘܪܳܐ ܐܚܪܺܢܳܐ ܐܳܡܰܪ ܢܒܺܝܳܐ. ܕܪܳܚܶܡ ܙܰܕܺܝܩܽܘܬܳܐ ܘܕܺܝܢܳܐ (ܡܙܡܘܪܐ ܠܓ: ܗ). ܘܰܐܝܠܶܝܢ ܕܰܠܗܳܢܳܐ ܕܺܝܢܳܐ ܕܠܽܘܩܒܰܠ ܒܺܝܫܬܳܐ ܪܳܚܡܺܝܢ܆ ܠܳܐ ܫܳܒܶܩ ܠܗܽܘܢ ܡܳܪܝܳܐ. ܐܶܠܳܐ ܐܰܝܟ ܡܶܠܬܶܗ ܕܰܢܒܺܝܳܐ.
ܘܠܳܐ ܫܳܒܶܩ ܠܙܰܕܺܝ̈ܩܰܘܗܝ: ܐܶܠܳܐ ܠܥܳܠܰܡ ܡܢܰܛܰܪ ܠܗܽܘܢ. ܠܗܳܢܽܘܢ ܕܰܐܚܺܝܕܺܝܢ ܩܪܳܒܳܐ ܠܽܘܩܒܰܠ ܒܥܶܠܕܒܳܒܳܐ ܕܟܺܐܢܽܘܬܳܐ܇ ܡܢܰܛܰܪ ܠܗܽܘܢ ܡܳܪܝܳܐ ܘܰܡܦܰܨܶܐ ܠܗܽܘܢ܆ ܕܠܳܐ ܢܶܬܢܰܟܽܘܢ ܡܶܢܶܗ. ܟܰܕ ܡܓܰܡܰܪ ܠܙܰܪ̈ܥܶܝܗ̇ ܕܒܺܝܫܬܳܐ܆ ܕܠܳܐ ܢܶܡܚܽܘܢ ܩܪܳܒܳܐ ܘܢܰܘܥܽܘܢ ܥܶܩܳܪܳܐ ܒܢܰܦܫܗܽܘܢ. ܐܳܡܰܪ ܓܶܝܪ ܢܒܺܝܳܐ. ܐܶܠܳܐ
ܘܙܰܪܥܗܽܘܢ ܕܪ̈ܰܫܺܝܥܶܐ ܡܰܘܒܶܕ. ܟܽܠܡܶܕܶܡ ܓܶܝܪ ܕܙܳܪܥܺܝܢ ܕܰܝ̈ܘܶܐ ܒܢܰܦܫܳܐ܆ ܡܰܘܒܶܕ ܘܰܡܓܰܡܰܪ ܡܳܪܝܳܐ ܡܶܢܳܗ̇. ܐܶܢܗܽܘ ܕܚܳܙܶܐ ܠܳܗ̇܇ ܕܰܒܕܺܝ̈ܢܶܐ ܬܪ̈ܺܝܨܶܐ ܪܳܕܝܳܐ. ܘܳܐܡܰܪ.
ܘܙܰܕܺܝ̈ܩܶܐ ܝܳܪܬܺܝܢ ܐܰܪܥܳܐ. ܘܫܳܪܶܝܢ ܥܠܶܝܗ̇ ܠܥܳܠܰܡ. ܠܗܳܕܶܐ ܡܶܠܬܳܐ ܐܰܪܒܰܥ ܙܰܒ̈ܢܺܝܢ ܐܰܡܪܳܗ̇ ܢܒܺܝܳܐ. ܠܽܘܩܕܰܡ ܡܰܢ ܐܶܡܰܪ. ܕܰܐܝܠܶܝܢ ܕܶܝܢ ܕܰܡܣܰܒܪܺܝܢ ܒܡܳܪܝܳܐ ܝܳܪܬܺܝܢ ܐܰܪܥܳܐ. ܘܒܳܬܰܪ ܗܳܠܶܝܢ ܐܶܡܰܪ. ܡܶܣܟܻ̈ܢܶܐ ܝܳܪܬܺܝܢ ܐܰܪܥܳܐ. ܘܬܽܘܒ ܐܶܡܰܪ. ܡܶܛܠ ܕܰܒܪ̈ܺܝܟܰܘܗܝ ܕܡܳܪܝܳܐ ܝܳܪܬܺܝܢ ܐܰܪܥܳܐ. ܟܰܕ ܕܶܝܢ ܩܪܶܒ ܠܘܳܬ ܫܽܘܠܳܡܳܐ ܦܰܫܶܩ܆ ܡܶܠܬܶܗ ܕܰܠܡܳܢܳܐ ܩܪܳܐ ܡܶܣܟܻ̈ܢܶܐ ܘܰܒܪ̈ܺܝܟܶܐ. ܘܳܐܡܰܪ. ܙܰܕܺܝ̈ܩܶܐ ܝܳܪܬܺܝܢ ܐܰܪܥܳܐ ܘܫܳܪܶܝܢ ܥܠܶܝܗ̇ ܠܥܳܠܰܡ. ܡܶܛܽܠܗܳܢܳܐ ܐܶܬܩܰܪܝܰܬ ܡܰܠܟܽܘܬܳܐ ܕܰܫܡܰܝܳܐ: ܐܰܪܥܳܐ ܕܰܥܠܶܝܗ̇ ܩܳܝܡܺܝܢ ܙܰܕܺܝ̈ܩܶܐ ܘܒܳܗ̇ ܡܕܰܝܪܺܝܢ. ܚܳܪܰܬ ܘܰܚܙܳܬܳܗ̇ ܒܥܰܝܢܳܐ ܕܪܽܘܚܳܐ. ܘܰܪܢܳܬ ܥܠܶܝܗ̇ ܘܡܰܠܠܰܬ ܡܶܛܽܠܳܬܳܗ̇܆ ܐܰܝܟ ܕܶܐܡܰܪ ܢܒܺܝܳܐ.
ܚܶܟܡܬܳܐ ܪܳܢܶܐ ܦܽܘܡܶܗ ܕܙܰܕܺܝܩܳܐ. ܘܠܶܫܳܢܶܗ ܡܡܰܠܶܠ ܕܺܝܢܳܐ: ܢܳܡܽܘܣܶܗ ܕܰܐܠܗܐ ܒܠܶܒܶܗ܆ ܘܠܳܐ ܙܳܝ̈ܥܳܢ ܕܽܘܪ̈ܟܳܬܶܗ. ܕܡܰܢܽܘ ܕܺܝܢܳܐ ܕܙܰܕܺܝ̈ܩܶܐ܆ ܐܶܬܰܐܡܪܰܬ ܠܳܗ̇. ܗܽܘ ܓܶܝܪ ܕܺܝܢܳܐ ܢܳܦܶܩ ܐܰܝܟ ܡܶܠܬܳܐ ܢܒܺܝܳܝܬܳܐ ܡܶܢ ܡܳܪܝܳܐ ܐܳܦ ܡܶܢ ܢܳܡܽܘ̈ܣܰܘܗܝ. ܗܰܘ ܕܣܺܝܡ ܠܙܰܕܺܝܩܳܐ ܒܠܶܒܶܗ. ܡܳܐ ܓܶܝܪ ܕܣܺܝܡ ܢܳܡܽܘܣܳܐ ܒܠܶܒܳܐ܆ ܠܰܝܬ ܠܳܗ̇ ܠܪܶܓܠܳܐ ܕܢܰܦܫܳܐ ܬܶܡܪܰܓ ܘܬܶܦܶܠ ܒܦܰܚܳܐ. ܘܠܳܐ ܠܩܳܐܝܶܢ ܡܶܬܕܰܡܝܳܐ܇ ܗܰܘ ܕܠܰܝܬ ܗܘܳܐ ܢܳܡܽܘܣܳܐ ܕܰܐܠܗܳܐ ܒܠܶܒܶܗ. ܙܳܐܰܥ ܘܢܳܐܷܕ ܗܘܳܐ ܒܰܐܪܥܳܐ. ܘܰܟܡܳܐ ܐܶܢ:
ܡܣܰܟܶܐ ܪܰܫܺܝܥܳܐ ܠܙܰܕܺܝܩܳܐ܆ ܘܒܳܥܶܐ ܠܡܶܩܛܠܶܗ. ܐܳܡܰܪ ܡܙܰܡܪܳܢܳܐ:
ܘܡܳܪܝܳܐ ܠܳܐ ܢܶܫܒܩܺܝܘܗܝ ܒܺܐܝ̈ܕܰܘܗܝ. ܐܶܠܳܐ ܢܚܰܝܒܺܝܘܗܝ ܒܕܺܝܢܳܐ. ܠܙܰܕܺܝܩܳܐ ܓܶܝܪ ܡܦܰܨܶܐ ܡܶܛܠ ܙܰܕܺܝܩܽܘܬܶܗ. ܡܚܰܘܶܐ ܠܶܗ ܕܠܳܐ ܐܶܫܬܒܶܩ ܡܶܢܶܗ. ܘܰܐܢܬ ܠܰܡ ܗܰܘ ܕܚܳܙܶܐ ܐܰܢܬ ܟܰܗܺܝܢܽܘܬܳܐ ܕܪ̈ܰܫܺܝܥܶܐ ܠܳܐ ܬܶܚܣܰܡ ܒܗܽܘܢ. ܡܶܛܠ ܕܰܒܡܰܓܪܰܬ ܪܽܘܚܶܗ ܕܰܐܠܗܐ ܐܶܫܬܒܶܩܘ ܗܳܟܰܢܳܐ.
ܐܶܠܳܐ ܣܰܒܰܪ ܒܡܳܪܝܳܐ ܘܛܰܪ ܐܽܘܪܚܶܗ܆ ܘܰܢܪܺܝܡܳܟ ܠܡܺܐܪܰܬ ܐܰܪܥܳܐ. ܣܰܓܺܝ ܡܶܬܕܟܰܪ ܫܡܳܗ̇ ܕܰܐܪܥܳܐ ܥܰܠ ܝܳܪܬܽܘܬܳܐ܇ ܘܠܰܘ ܣܪܺܝܩܳܐܝ̣ܬ. ܐܶܢ ܡܶܫܬܶܐܠ ܐܰܢܬ ܡܶܢ ܚܣܳܡܳܐ ܘܰܡܣܰܒܰܪ ܐܰܢܬ ܒܡܳܪܝܳܐ.
ܡܳܐ ܕܣܳܝܦܺܝܢ ܪ̈ܰܫܺܝܥܶܐ ܬܶܚܙܶܐ. ܘܠܳܐ ܠܰܡ ܒܰܐܪܥܳܐ ܡܶܫܬܰܒܩܺܝܢ܆ ܐܶܠܳܐ ܡܣܳܦ ܣܳܝܦܺܝܢ.
ܡܶܛܠ ܕܰܚܙܺܝܬ ܪ̈ܰܫܺܝܥܶܐ ܠܰܡ ܕܡܶܫܬܰܒܗܪܺܝܢ܆ ܘܡܶܬܬܪܺܝܡܺܝܢ ܐܰܝܟ ܐܺܝܠܳܢ̈ܐ ܕܥܳܒܳܐ. ܕܠܳܐ ܦܺܐܪ̈ܶܐ ܬܠܰܘ ܩܰܘ̈ܡܳܬܗܽܘܢ ܐܰܝܟ ܐܺܝܠܳܢ̈ܐ ܥܒܰܝܴ̈ܐ. ܕܰܐܝܟ ܗܳܟܰܢܳܐ ܓܶܝܪ ܐܺܝܬܰܝܗܽܘܢ ܐܺܝܠܳܢ̈ܐ ܕܥܳܒܳܐ. ܗܳܢܽܘܢ ܕܰܒܡܰܙܡܽܘܪܳܐ ܕܥܶܣܪܺܝܢ ܘܬܶܫܥܳܐ ܐܰܡܺܝܪ ܥܠܰܝܗܽܘܢ ܡܶܢ ܢܒܺܝܳܐ܇ ܕܡܶܬܥܰܩܪܺܝܢ ܒܩܳܠܶܗ ܕܡܳܪܝܳܐ. ܡܶܛܠ ܕܰܕܠܳܐ ܦܺܐܪ̈ܶܐ ܐܶܬܚܙܺܝܘ܆ ܥܳܩܰܪ ܠܗܽܘܢ ܡܳܪܝܳܐ ܒܩܳܠܶܗ: ܘܝܳܗܶܒ ܠܗܽܘܢ ܝܰܩܕܳܢܳܐ ܠܢܽܘܪܳܐ: ܘܡܶܬܛܰܠܩܺܝܢ ܒܬܶܢܳܢܳܐ ܘܣܳܝܦܺܝܢ. ܘܶܐܡܪ ܓܶܝܪ ܢܒܺܝܳܐ.
ܕܟܰܕ ܥܶܒܪܶܬ ܠܰܝܬܰܘܗܝ. ܘܰܒܥܺܝܬܶܗ܆ ܘܠܳܐ ܐܶܫܟܰܚܬܶܗ. ܡܶܛܠ ܕܠܳܐ ܩܪܳܢܝ ܕܢܰܘܟܠܰܢܝ ܡܶܢ ܦܺܐܪ̈ܰܘܗܝ. ܐܰܝܟ ܬܺܬܳܐ ܘܙܰܝܬܳܐ ܘܺܐܝ̈ܠܳܢܝ ܡܰܠܟܳܐ ܢܶܗܘܶܐ.
ܛܰܪ ܬܰܡܺܝܡܽܘܬܳܐ ܘܰܓܒܺܝ ܬܪܺܝܨܽܘܬܳܐ. ܡܶܛܠ ܕܺܐܝܬ ܚܰܪܬܳܐ ܛܳܒܬܳܐ ܠܓܰܒܪ̈ܶܐ ܕܰܫܠܳܡܳܐ. ܘܠܰܘ ܐܰܝܟ ܚܰܘܪܳܐ ܕܶܐܢ ܡܶܬܦܣܶܩ ܠܳܐ ܡܰܚܠܶܦ. ܐܺܝܬܰܘܗܝ ܐܺܝܠܳܢܳܐ ܕܬܺܬܳܐ ܘܰܓܦܶܬܳܐ. ܘܶܐܠܳܐ ܘܶܐܢ ܡܶܬܦܰܣܩܺܝܢ ܒܡܰܘܬܳܐ ܘܒܰܚܒܳܠܳܐ. ܬܽܘܒ ܡܰܚܠܦܺܝܢ ܘܡܶܬܚܰܕܬܺܝܢ ܒܰܩܝܳܡܬܳܐ. ܘܠܰܘ ܒܢܽܘܪܳܐ ܡܰܘܦܶܐ ܙܰܪܥܳܐ ܕܙܰܕܺܝ̈ܩܶܐ. ܒܗܳܝ ܓܶܝܪ ܕܶܐܡܰܪ:
ܕܚܰܛܳܝ̈ܐ ܢܳܦܠܺܝܢ ܘܰܢܣܽܘܦܽܘܢ ܐܰܟܚܕܳܐ܆ ܘܚܰܪܬܳܐ ܕܪ̈ܰܫܺܝܥܶܐ ܠܰܐܒܕܳܢܳܐ. ܠܰܘ ܕܶܝܢ ܗܳܟܰܢܳܐ ܙܰܕܺܝ̈ܩܶܐ. ܐܶܠܳܐ ܟܰܕ ܡܶܬܦܰܨܶܝܢ ܡܶܢ ܗܰܘ ܢܳܨܽܘܒܶܗ ܕܦܰܪܕܰܝܣܳܐ܆ ܬܰܡܳܢ ܦܳܢܶܝܢ ܠܚܰܝܷ̈ܐ ܘܡܶܬܚܰܕܬܺܝܢ. ܡܶܛܠ
ܕܦܳܪܽܘܩܳܐ ܕܙܰܕܺܝ̈ܩܶܐ ܡܳܪܝܳܐ. ܘܰܡܥܰܕܰܪ ܠܗܽܘܢ ܒܙܰܒ̈ܢܶܐ ܕܥܳܩܬܳܐ. ܙܰܒܢ̈ܐ ܕܥܳܩܬܳܐ ܠܗܳܠܶܝܢ ܕܰܢܛܺܝܪܺܝܢ ܠܕܺܝܢܳܐ ܘܠܰܬܒܰܥܬܳܐ ܡܫܰܡܰܗ. ܬܰܡܳܢ ܠܰܝܬ ܚܰܕܽܘܬܳܐ ܠܪ̈ܰܫܺܝܥܶܐ܆ ܐܶܠܳܐ ܟܰܪܝܽܘܬܳܐ ܘܰܟܡܺܝܪܽܘܬܳܐ: ܘܒܶܟܝܳܐ܆ ܘܚܽܘܪܳܩ ܫܶܢ̈ܐ. ܘܡܶܬܬܘܶܝܢ ܥܰܠ ܒܺܝ̈ܫܳܬܳܐ ܕܰܥܒܰܕܘ. ܘܠܳܐ ܡܰܘܬܪܺܝܢ ܡܶܕܶܡ. ܘܗܳܪܟܳܐ ܐܳܡܰܪ ܕܰܡܥܰܕܰܪ ܠܙܰܕܺܝ̈ܩܶܐ.
ܘܰܡܥܰܕܰܪ ܠܗܽܘܢ ܡܳܪܝܳܐ ܘܰܡܦܰܨܶܐ ܠܗܽܘܢ. ܘܟܰܕ ܐܰܘܕܰܥ ܢܒܺܝܳܐ ܕܡܶܢ ܡܰܢ ܡܶܬܦܰܨܶܝܢ܆ ܐܶܡܰܪ.
ܕܰܡܦܰܨܶܐ ܠܗܽܘܢ ܡܶܢ ܪ̈ܰܫܺܝܥܶܐ: ܘܦܳܪܶܩ ܠܗܽܘܢ. ܡܶܛܠ ܕܣܰܒܰܪܘ ܒܶܗ. ܐܰܝܟ ܠܰܡ ܕܰܣܢܰܘ ܠܗܽܘܢ ܦܽܘܠܚܳܢܳܐ ܕܪ̈ܰܫܺܝܥܶܐ. ܘܠܳܐ ܒܕܺܝܢܳܐ ܡܰܫܠܶܡ ܠܗܽܘܢ. ܬܰܡܳܢ ܓܶܝܪ ܒܺܐܝܕܳܐ ܕܚܰܝ̈ܠܰܘܳܬܳܐ ܕܕܰܠܩܽܘܒܠܳܐ ܡܶܫܬܰܠܡܺܝܢ ܪ̈ܰܫܺܝܥܶܐ. ܘܥܰܠܗܳܕܶܐ ܐܶܡܰܪ. ܕܡܶܢ ܪ̈ܰܫܺܝܥܶܐ ܡܦܰܨܶܐ ܠܙܰܕܺܝ̈ܩܶܐ. ܘܡܰܣܩܺܝܢ ܫܽܘܒܚܳܐ ܠܗܰܘ ܕܦܰܨܺܝ ܐܶܢܽܘܢ. ܘܠܰܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܠܬܝܢ ܘܬܡܢܝܐ
ܕܡܰܘܕܰܥ ܒܶܗ ܛܽܘܒܳܢܳܐ ܕܰܘܺܝܕ ܥܰܠ ܕܶܚܠܬܳܐ ܕܺܐܝܬ ܗܘܳܐ ܠܶܗ ܡܶܢ ܕܺܝܢܳܐ ܕܰܐܠܗܳܐ ܕܗܳܘܶܐ ܠܫܽܘܠܳܡܳܐ. ܘܕܰܐܝܟܰܢܳܐ ܩܳܐܶܡ ܗܘܳܐ ܩܕܳܡ ܥܰܝ̈ܢܰܘܗܝ ܣܽܘܪܳܕܳܐ ܕܬܰܫܢܺܝܩܳܐ ܘܰܕܢܽܘܪܳܐ ܕܠܳܐ ܕܳܥܟܳܐ ܕܰܢܛܺܝܪܳܐ ܠܪ̈ܰܫܺܝܥܶܐ.
ܟܰܕ ܒܬܶܫܒ̈ܚܳܬܳܐ ܣܰܓܺܝ̈ܐܳܬܳܐ܆ ܐܳܦ ܡܰܬܕܟܰܪ ܛܽܘܒܳܢܳܐ ܕܰܘܝܕ ܠܕܺܝܢܳܐ ܘܰܠܬܰܫܢܺܝܩܳܐ ܘܡܶܣܬܰܪܰܕ ܡܶܢ ܢܽܘܪܳܐ ܕܠܳܐ ܕܳܥܟܳܐ. ܘܫܶܐܠ ܘܰܒܥܳܐ ܡܶܬܦܰܨܝܳܢܽܘܬܳܐ ܡܶܢ ܠܽܘܚܳܡܳܐ ܕܕܺܝܢܳܐ. ܠܳܐ ܡܶܫܟܚܺܝܢܰܢ ܕܰܬܪܶܝܢ ܡܰܙܡܽܘܪ̈ܶܐ ܡܫܰܡܠܝܳܐܝ̣ܬ ܥܰܠ ܐܽܘܠܨܳܢܳܐ ܕܗܳܘܶܐ ܒܕܺܝܢܳܐ ܐܚܪܳܝܳܐ. ܐܶܬܢܰܒܺܝ ܘܰܐܟܬܶܒ ܐܶܢܽܘܢ. ܘܠܰܘ ܕܶܝܢ ܫܚܺܝ̈ܡܶܐ ܐܶܢܽܘܢ ܩܴ̈ܠܶܐ ܕܒܶܟܝܳܐ ܘܰܕܬܶܢܚܴ̈ܬܳܐ ܕܰܡܚܰܘܶܐ ܒܗܽܘܢ. ܘܠܰܘ ܡܶܢ ܪ̈ܰܚܡܶܐ ܚܳܙܶܐ ܠܗܰܘ ܒܰܣܺܝܡܳܐ ܘܰܡܪܰܚܡܳܢܳܐ ܡܳܪܝܳܐ ܟܰܕ ܡܙܰܡܰܪ܆ ܐܶܠܳܐ ܚܳܐܱܪ ܒܶܗ ܟܰܕ ܪܳܓܶܙ ܘܚܰܡܺܝܬ ܘܡܰܠܝܳܐ ܩܶܫܬܶܗ ܘܫܳܕܶܐ ܓܶܐܪ̈ܶܐ ܕܪܽܘܓܙܳܐ ܘܰܕܚܶܡܬܳܐ ܥܰܠ ܥܳܒ̈ܕܰܝ ܥܰܘܠܳܐ ܘܥܰܠ ܡܰܪ̈ܳܚܶܐ. ܘܡܰܘܕܰܥ ܒܶܗ ܐܳܦ ܥܰܠ ܟܪܺܝܗܽܘܬܶܗ ܒܗܰܘ ܩܰܕܡܳܝܳܐ: ܘܰܒܗܳܢܳܐ ܐܚܪܳܝܳܐ. ܒܗܰܘ ܡܰܢ ܩܰܕܡܳܝܳܐ ܕܺܐܝܬܰܘܗܝ ܡܰܙܡܽܘܪܳܐ ܕܶܫܬܳܐ ܐܶܡܰܪ: ܐܰܝܟ ܕܳܐܦ ܐܶܡܰܪ ܗܳܪܟܳܐ. ܡܶܢ ܗܳܝ ܓܶܝܪ ܕܚܰܕ ܫܽܘܪܳܝܳܐ ܥܒܰܕ ܠܰܬܪ̈ܰܝܗܽܘܢ܆ ܐܰܕܪܶܟܢܰܢ ܕܥܰܠ ܚܰܕ ܣܽܘܥܪܳܢܳܐ ܐܰܡܺܝܪܺܝܢ. ܗܳܢܰܘ ܥܰܠ ܝܰܘܡܳܐ ܕܰܬܡܳܢܝܳܐ ܐܰܡܺܝܪܺܝܢ܇ ܕܥܳܐܶܠ ܢܰܩܺܝܦܳܐܝ̣ܬ ܒܳܬܰܪ ܝܰܘܡܳܐ ܕܫܰܒܥܳܐ. ܡܶܛܠ ܕܝܰܘܡܳܐ ܕܫܰܒܥܳܐ ܥܰܠ ܢܝܳܚܬܳܐ ܕܩܰܕܺܝ̈ܫܶܐ ܡܰܘܕܰܥ܆ ܕܒܳܛܠܺܝܢ ܡܶܢ ܦܽܘܠܚܳܢܳܐ ܕܰܐܪܥܳܐ. ܘܡܶܬܬܢܺܝܚܺܝܢ ܥܰܠ ܒܽܘܣܳܡܳܐ ܕܡܰܠܟܽܘܬܳܐ ܕܰܫܡܰܝܳܐ: ܟܰܕ ܐܳܟܠܺܝܢ ܘܫܳܬܶܝܢ: ܘܗܰܘ ܡܶܕܶܡ ܕܶܝܢ ܕܟܰܢܶܫܘ ܠܗܽܘܢ ܒܝܰܘܡܳܐ ܕܶܫܬܳܐ. ܘܥܰܠܗܳܝ ܠܳܐ ܢܳܦܩܺܝܢ ܐܢܳܫ ܡܶܢ ܒܰܝܬܶܗ ܒܝܰܘܡܳܐ ܕܫܰܒܬܳܐ܆ ܐܰܝܟ ܕܰܠܡܰܝܬܳܝܽܘ ܡܰܢܢܳܐ ܘܩܰܝ̈ܣܶܐ ܒܝܰܘܡܳܐ ܕܫܰܒܬܳܐ. ܥܰܠ ܗܳܢܽܘܢ ܕܒܳܥܶܝܢ ܡܰܢܢܳܐ܆ ܪܓܶܙ ܡܽܘܫܶܐ ܘܶܐܬܚܰܡܰܬ. ܗܰܘ ܕܶܝܢ ܕܠܳܩܶܛ ܩܰܝ̈ܣܶܐ ܡܶܬܚܒܶܫ ܒܶܝܬ ܢܛܽܘܪܬܳܐ ܥܕܰܡܳܐ ܠܝܰܘܡܳܐ ܕܰܬܡܳܢܝܳܐ. ܕܒܶܗ ܡܶܬܦܰܫܰܩ ܡܶܢ ܦܽܘܡܶܗ ܕܡܳܪܝܳܐ. ܕܢܰܦܩܽܘܢܳܝܗܝ ܠܒܰܪ ܡܶܢ ܡܰܫܪܺܝܬܳܐ. ܘܢܶܬܪܓܶܡ ܒܟܺܐܦ̈ܐ ܘܰܢܡܽܘܬ. ܟܰܕ ܗܳܟܺܝܠ ܛܽܘܒܳܢܳܐ ܕܰܘܺܝܕ܇ ܐܰܝܟ ܕܶܐܡܰܪ ܥܠܰܘܗܝ ܟܬܳܒܳܐ ܩܰܕܺܝܫܳܐ: ܒܟܽܠܗܶܝܢ ܐܽܘܪ̈ܚܳܬܶܗ ܣܰܟܽܘܠܬܳܢ ܗܘܳܐ: ܘܰܒܝܰܘܡܳܐ ܕܶܫܬܳܐ ܛܰܝܶܒ ܠܶܗ ܠܰܚܡܳܐ ܘܬܰܪܣܺܝܬܳܐ ܠܝܰܘܡܳܐ ܕܫܰܒܥܳܐ: ܕܠܰܝܬ ܠܡܶܦܠܰܚ ܒܶܗ: ܘܰܠܫܰܒܬܳܐ ܠܳܐ ܐܰܚܶܠ. ܩܰܝ̈ܣܶܐ ܒܗܳܕܶܐ ܠܳܐ ܠܰܩܶܛ. ܘܰܡܫܰܪܶܐ ܒܡܰܙܡܽܘܪܳܐ ܕܶܫܬܳܐ: ܘܰܒܗܳܢܳܐ ܡܰܙܡܽܘܪܳܐ ܕܰܬܠܳܬܺܝܢ ܘܰܬܡܳܢܝܳܐ. ܘܰܒܗܰܘ ܕܶܫܬܳܐ ܐܳܡܰܪ:
ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ. ܘܳܐܦܠܳܐ ܒܚܶܡܬܳܟ ܬܶܪܕܶܝܢܝ: ܪܰܚܶܡܥܠܰܝ ܡܳܪܝܳܐ ܡܶܛܠ ܕܰܟܪܺܝܗ ܐܢܳܐ. ܘܰܒܗܳܢܳܐ ܕܰܬܠܳܬܺܝܢ ܘܰܬܡܳܢܝܳܐ܆ ܠܶܗ ܟܰܕ ܠܶܗ ܠܫܽܘܪܳܝܳܐ ܡܚܰܘܶܐ ܕܡܰܥܶܠ. ܠܗܰܘ ܕܶܝܢ ܦܶܬܓܳܡܳܐ ܕܰܬܠܳܬܳܐ ܡܫܰܚܠܶܦ ܠܶܗ. ܟܰܕ ܚܠܳܦ ܗܳܝ: ܕܪܰܚܶܡ ܥܠܰܝ ܡܳܪܝܳܐ܆ ܣܳܐܷܡ:
ܡܶܛܠ ܕܓܶܐܪ̈ܰܝܟ ܐܶܬܩܰܒܰܥܘ ܒܺܝ. ܘܶܐܬܬܢܺܝܚܰܬ ܐܺܝܕܳܟ ܥܠܰܝ. ܠܡܳܢܳܐ ܕܶܝܢ: ܕܠܳܐ ܬܰܟܣܰܢܝ ܡܳܪܝܳܐ ܒܪܽܘܓܙܳܟ. ܠܰܘ ܥܰܠ ܕܚܳܙܶܐ ܗܘܳܐ ܒܥܰܝܢܳܐ ܕܪܽܘܚܳܐ ܢܒܺܝܳܐ ܟܰܣ̈ܝܳܬܳܐ܆ ܕܦܰܪܨܽܘܦܳܐ ܕܪܽܘܓܙܳܐ ܘܰܕܚܶܡܬܳܐ ܡܚܰܘܶܐ ܕܺܝܢܳܐ ܒܫܽܘܠܳܡܳܐ. ܕܰܒܦܰܪܨܽܘܦܳܐ ܕܰܡܠܶܐ ܪܽܘܓܙܳܐ ܡܶܬܚܙܶܐ ܒܕܺܝܢܳܐ ܗܰܘ ܬܳܒܽܘܥܳܐ ܕܟܰܣ̈ܝܳܬܳܐ ܕܰܒܢܰܝ̈ܢܳܫܳܐ. ܟܰܕ ܓܶܝܪ ܦܶܛܪܽܘܣ ܗܰܘ ܪܰܒܳܐ ܕܰܫܠܺܝ̈ܚܶܐ܇ ܒܥܳܐ ܕܢܺܐܠܰܦ ܕܰܥܕܰܡܳܐ ܕܠܰܐܝܟܳܐ ܢܶܪܕܶܐ ܒܽܐܘܪܚܳܐ ܕܰܐܝܠܶܝܢ ܕܡܰܣܟܠܺܝܢ܇ ܡܫܰܐܷܠ ܗܘܳܐ ܠܰܡܺܫܝܚܳܐ. ܕܰܟܡܳܐ ܙܰܒܢܺܝ̈ܢ ܐܶܢ ܢܰܣܟܶܠ ܒܺܝ ܐܳܚܝ܆ ܐܶܫܒܽܘܩ ܠܶܗ. ܥܕܰܡܳܐ ܠܰܫܒܰܥ ܙܰܒܢܻ̈ܝܢ܆ ܐܳܡܰܪ ܠܶܗ ܝܶܫܽܘܥ. ܠܳܐ ܐܳܡܰܪ ܐܢܳܐ ܠܳܟ ܥܕܰܡܳܐ ܠܰܫܒܰܥ ܙܰܒ̈ܢܺܝܢ܇ ܐܶܠܳܐ ܥܕܰܡܳܐ ܠܫܰܒܥܺܝܢ ܙܰܒܢܺܝ̈ܢ ܫܒܰܥ ܫܒܰܥ (ܡܬܝ ܝܚ: ܟܐ-ܟܒ). ܡܳܕܶܝܢ ܗܳܪܟܳܐ ܓܠܳܐ: ܕܰܐܝܟܰܢܳܐ ܗܳܘܶܐ ܕܺܝܢܳܐ ܕܠܳܐ ܪ̈ܰܚܡܶܐ ܥܰܠ ܕܠܳܐ ܚܰܢ ܘܠܳܐ ܪܰܚܶܡ ܠܰܟܢܳܬܶܗ. ܐܶܡܰܪ ܦܳܪܽܘܩܰܢ ܗܳܟܰܢܳܐ. ܡܶܛܠܗܳܢܳܐ ܐܶܬܕܰܡܝܰܬ ܡܰܠܟܽܘܬܳܐ ܕܰܫܡܰܝܳܐ ܠܓܰܒܪܳܐ ܡܰܠܟܳܐ܇ ܕܰܨܒܳܐ ܕܢܶܣܰܒ ܚܽܘܫܒܳܢܳܐ ܡܶܢ ܥܰܒ̈ܕܰܘܗܝ. ܘܟܰܕ ܫܰܪܺܝ ܠܡܶܣܰܒ܆ ܩܰܪܶܒܘ ܠܶܗ ܚܰܕ ܕܚܰܝܳܒ ܪܶܒܽܘ ܟܰܟܪ̈ܺܝܢ. ܘܠܰܝܬ ܠܶܗ ܠܡܶܦܪܰܥ܆ ܦܩܰܕ ܡܳܪܶܗ ܕܢܶܙܕܰܒܰܢ ܗܽܘ ܘܰܐܢܬܬܶܗ ܘܰܒܢܰܘ̈ܗܝ ܘܟܽܠܡܶܕܶܡ ܕܺܐܝܬ ܠܶܗ܆ ܘܢܶܦܪܽܘܥ. ܘܰܢܦܰܠ ܗܰܘ ܥܰܒܕܳܐ ܣܓܶܕ ܠܶܗ ܘܶܐܡܰܪ. ܡܳܪܝ܆ ܐܰܓܰܪ ܥܠܰܝ ܪܽܘܚܳܐ: ܘܟܽܠܡܶܕܶܡ ܦܳܪܰܥ ܐܢܳܐ ܠܳܟ. ܘܶܐܬܪܰܚܰܡ ܡܳܪܶܗ ܕܥܰܒܕܳܐ ܗܰܘ ܘܰܫܪܳܝܗܝ. ܘܚܰܘܒܬܶܗ ܫܒܰܩ ܠܶܗ. ܐܶܠܳܐ ܟܰܕ ܢܦܰܩ ܗܳܢܳܐ ܘܶܐܫܟܰܚ ܠܚܰܕ ܡܶܢ ܟܢܱ̈ܘܳܬܶܗ܆ ܕܚܰܝܳܒ ܠܶܗ ܕܺܝܢܳܪ̈ܶܐ ܡܳܐܐ. ܘܰܐܚܕܶܗ ܘܚܳܢܶܩ ܗܘܳܐ ܠܶܗ. ܘܶܐܡܰܪ ܠܶܗ. ܕܗܰܒܠܺܝ ܡܶܕܶܡ ܕܚܰܝܳܒ ܐܰܢܬ ܠܺܝ. ܘܟܰܕ ܣܓܶܕ ܠܶܗ܆ ܠܳܐ ܨܒܳܐ ܕܰܢܪܰܚܶܡ ܥܠܰܘܗܝ. ܘܰܒܝܰܕ ܟܢܱ̈ܘܳܬܗܽܘܢ ܕܥܰܒ̈ܕܶܐ܇ ܝܺܠܶܦ ܡܳܪܗܽܘܢ ܥܰܠ ܣܽܘܥܪܳܢܳܐ. ܡܳܢܳܐ ܐܰܘܕܰܥ ܟܬܳܒܳܐ ܕܰܥܒܰܕ ܡܳܪܗܽܘܢ. ܡܶܢ ܗܰܘ ܕܠܳܐ ܪܰܚܶܡ ܥܰܠ ܟܢܳܬܶܗ. ܘܰܪܓܶܙ ܡܳܪܶܗ ܘܰܐܫܠܡܶܗ ܠܰܡܢܰܓ̈ܕܳܢܶܐ. ܥܕܰܡܳܐ ܕܢܶܦܪܽܘܥ ܟܽܠܡܶܕܶܡ ܕܚܰܝܳܒ ܗܘܳܐ (ܡܬܝ ܝܚ: ܟܓ-ܠܕ). ܗܳܐ ܡܳܕܶܝܢ ܐܰܝܟ ܕܡܶܢ ܦܶܠܶܐܬܳܐ ܗܳܕܶܐ܆ ܒܪܽܘܓܙܳܐ ܡܶܬܚܙܶܐ ܒܕܺܝܢܳܐ. ܗܰܘ ܕܢܽܘܟܪܳܝ ܪܽܘܓܙܳܐ ܠܰܟܝܳܢܶܗ. ܘܰܚܙܺܝ ܡܳܢܳܐ ܐܶܡܰܪ ܢܒܺܝܳܐ. ܡܶܛܠ ܕܓܶܐܪ̈ܰܝܟ ܐܶܬܩܰܒܰܥܘ ܒܺܝ: ܘܶܐܬܬܢܺܝܚܰܬ ܐܺܝܕܳܟ ܥܠܰܝ. ܥܝܳܕܳܐ ܐܺܝܬ ܠܰܐܝܠܶܝܢ ܕܫܳܕܶܝܢ ܠܚܰܫ̈ܐ܇ ܕܡܳܐ ܕܡܶܬܩܰܒܥܺܝܢ ܓܶܐܪ̈ܶܐ ܐܰܝܟ ܨܶܒܝܳܢܗܽܘܢ: ܘܢܳܝܚܳܐ ܐܺܝܕܗܽܘܢ ܒܳܬܰܪ ܫܪܳܝܳܐ: ܘܡܰܪܓܶܫ ܚܰܝܠܳܐ ܕܰܕܪܳܥܶܗ ܕܗܰܘ ܕܫܳܕܶܐ ܓܶܐܪܳܐ: ܕܶܐܬܬܢܺܝܚܰܬ ܐܺܝܕܶܗ ܒܰܡܚܽܘܬܳܐ ܕܓܶܐܪܳܐ. ܐܳܦ ܗܳܪܟܳܐ ܕܰܐܝܟ ܗܳܕܶܐ ܐܳܡܰܪ ܢܒܺܝܳܐ. ܕܓܶܐܪ̈ܶܐ ܕܫܳܕܶܐ ܥܰܡܰܢܽܘܐܶܝܠ ܒܒܰܪܢܳܫܳܐ. ܠܽܘܩܕܰܡ ܕܶܝܢ ܚܶܘܳܪ̈ܳܬܳܐ ܩܳܒܰܥ ܒܶܗ: ܒܳܬܰܪܟܶܢ ܢܳܬܰܪ ܥܰܪ̈ܫܰܘܗܝ ܘܫܶܢܴ̈ܬܶܗ: ܘܒܳܬܰܪܟܶܢ ܡܰܚܫܶܟ ܢܽܘܗܪܶܗ܆ ܘܡܰܪܦܶܐ ܠܚܰܝܠܶܗ ܡܶܢ ܣܰܝܒܽܘܬܳܐ. ܘܥܰܠܗܳܕܶܐ ܛܽܘܒܳܢܳܐ ܕܰܘܺܝܕ ܐܶܡܰܪ. ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ. ܡܶܛܠ ܕܓܶܐܪ̈ܰܝܟ ܐܶܬܩܰܒܰܥܘ ܒܺܝ. ܘܶܐܬܬܢܺܝܚܰܬ ܐܺܝܕܳܟ ܥܠܰܝ. ܥܰܠ ܕܰܣܐܷܒ ܗܘܳܐ ܘܥ̣ܰܠ ܒܰܫܢܱ̈ܝܳܐ܆ ܘܳܐܬܶܐ ܗܘܳܐ ܥܰܠ ܒܳܠܶܗ ܫܽܘܢܳܩܳܐ ܕܪ̈ܰܫܺܝܥܶܐ. ܘܗܳܢܽܘܢ ܕܰܡܩܰܒܠܺܝܢ ܡܚܽܘܬܳܐ ܡܶܢ ܐܺܝܕܳܐ ܐܠܰܗܳܝܬܳܐ ܒܬܰܫܢܺܝܩܳܐ ܕܰܠܥܳܠܰܡ. ܥܕܰܡܳܐ ܠܓܰܘܳܝܽܘܬܳܐ ܕܢܰܦܫܗܽܘܢ ܡܳܛܝܳܐ ܡܚܽܘܬܳܐ ܕܓܶܐܪ̈ܰܘܗܝ ܕܕܰܝܳܢܳܐ. ܘܗܽܘ ܬܽܘܒ ܢܳܐܱܚ ܥܠܰܝܗܽܘܢ ܟܰܕ ܡܳܚܶܐ. ܒܗܳܝ ܕܡܶܬܢܰܩܰܡ ܡܶܢ ܡܰܪ̈ܳܚܶܐ ܒܥܽܘܙܳܐ ܕܬܰܫܢܺܝܩܳܐ. ܘܠܰܘ ܡܶܬܬܘܶܐ ܥܰܠ ܕܡܳܚܶܐ. ܐܶܠܳܐ ܗܳܝ ܕܶܐܬܬܢܺܝܚܰܬ ܐܺܝܕܳܟ܆ ܕܰܒܨܶܒܝܳܢܶܗ ܡܰܦܶܩ ܕܺܝܢܳܐ. ܥܰܠ ܗܳܢܽܘܢ ܕܢܳܦܠܺܝܢ ܒܬܰܫܢܺܝܩܳܐ ܕܪܽܘܓܙܳܐ ܕܰܡܢܰܓ̈ܕܳܢܶܐ. ܡܰܝܬܶܐ ܘܳܐܡܰܪ:
ܠܰܝܬ ܫܠܳܡܳܐ ܠܒܶܣܪܝ ܡܶܢ ܩܕܳܡ ܚܶܡܬܳܟ܆ ܘܠܰܝܬ ܫܠܳܡܳܐ ܠܓܰܪ̈ܡܰܝ ܡܶܢ ܩܕܳܡ ܚܛܳܗܱ̈ܝ. ܚܛܳܗܱ̈ܝ ܠܰܡ ܗ̣ܘܰܘ ܠܺܝ ܥܶܠܬܳܐ ܕܶܐܦܶܠ ܬܚܶܝܬ ܪܽܘܓܙܳܟ. ܕܶܐܠܽܘܠܳܐ ܚܛܺܝܬ܆ ܠܳܐ ܡܶܬܚܰܡܰܬ ܗܘܳܐ ܥܠܰܝ ܗܰܘ ܒܰܣܺܝܡܳܐ.
ܡܶܛܠ ܕܣܰܟܠܘܴ̈ܬܝ ܥܒܰܪ̈ܝ ܠܪܺܝܫܝ. ܘܰܐܝܟ ܡܰܘܒܠܳܐ ܝܰܩܺܝܪܬܳܐ ܝܺܩܰܪ̈ܝ ܠܺܝ. ܪܺܝܫܳܐ ܗܳܪܟܳܐ ܠܗܰܘܢܳܐ ܩܳܪܶܐ. ܐܰܟܙܢܳܐ ܓܶܝܪ ܕܗܳܢܽܘܢ ܕܡܶܫܬܘܶܝܢ ܠܡܰܠܟܽܘܬܳܐ܆ ܕܳܢܚܳܐ ܛܰܝܒܽܘܬܳܐ ܕܪܽܘܚܳܐ ܕܩܽܘܕܫܳܐ ܘܡܰܛܠܠܳܐ ܥܰܠ ܪ̈ܺܝܫܰܝܗܽܘܢ. ܐܰܝܟ ܕܶܐܡܰܪ ܐܶܫܰܥܝܳܐ. ܕܠܳܐ ܢܰܟܶܐ ܐܶܢܽܘܢ ܫܰܘܒܳܐ ܕܫܶܡܫܳܐ (ܐܫܥܝܐ ܡܛ: ܝ). ܡܶܛܠ ܗܳܝ ܕܥܰܠ ܦܶܪ̈ܝܰܘܳܬܳܐ ܡܶܬܪܰܒܶܝܢ. ܦܶܪ̈ܝܰܘܳܬܳܐ ܕܶܝܢ ܐܺܝܬܰܝܗܽܘܢ ܕܡܽܘܬܳܐ ܕܩܽܘ̈ܒܥܶܐ ܕܢܽܘܗܪܳܐ. ܕܒܰܕܡܽܘܬܳܐ ܕܡܱ̈ܛܠ̱ܠܶܐ ܥܰܠ ܪ̈ܺܝܫܶܐ ܕܰܦܪ̈ܺܝܩܶܐ ܡܶܬܚܰܙ̈ܝܳܢ. ܘܡܶܢ ܗܰܘ ܓܰܒܳܐ ܕܰܠܩܽܘܒܠܳܐ ܡܶܬܚܙܶܐ ܡܣܳܡ ܒܪܺܝܫܳܐ ܥܰܠ ܗܳܢܽܘܢ ܕܡܶܬܬܕܺܝܢܺܝܢ. ܘܡܶܫܬܰܩܠܳܐ ܡܶܢܗܽܘܢ ܪܺܝܫܳܢܽܘܬ ܡܰܕܥܗܽܘܢ. ܕܠܳܐ ܢܶܣܰܩ ܥܰܠ ܒܳܠܗܽܘܢ ܥܽܘܗܕܳܢܳܐ ܕܰܐܝܠܶܝܢ ܕܕܳܝܨܺܝܢ ܘܡܶܬܒܰܣܡܺܝܢ. ܟܰܕ ܦܳܐܱܚ ܡܶܢܗܽܘܢ ܪܺܝܚܳܐ ܣܰܪܝܳܐ ܕܰܚܛܳܗܰܝ̈ܗܽܘܢ.
ܣܪ̈ܺܝ ܘܶܐܬܡ̈ܣܺܝ ܚܒܳܪ̈ܳܬܝ. ܘܡܶܢ ܩܕܳܡ ܣܰܟܠܘܴ̈ܬܝ ܙܳܥܶܬ ܛܳܒ. ܒܗܳܝ ܓܶܝܪ ܕܢܳܕܺܝܢ ܡܰܠܐܟ̈ܐ ܩܰܕܺܝ̈ܫܶܐ ܡܶܢ ܪܺܝܚܳܐ ܕܚܰܛܳܝ̈ܐ: ܘܥܳܪܩܺܝܢ ܡܶܢ ܟܽܠ ܕܠܰܝܬ ܒܶܗ ܪܺܝܚܳܐ ܒܰܣܺܝܡܳܐ ܕܡܽܘܪܽܘܢ ܩܰܕܺܝܫܳܐ܆ ܬܽܘܒ ܡܰܘܕܰܥ ܡܶܢ ܗܳܝ ܕܶܐܡܰܪ:
ܕܟܽܠܶܗ ܝܰܘܡܳܐ ܒܰܟܡܺܝܪܽܘܬܳܐ ܗܰܠܟܶܬ. ܠܰܝܬ ܓܶܝܪ ܠܺܠܝܳܐ ܡܶܢ ܒܳܬܰܪ ܕܡܶܬܚܙܶܐ ܗܰܘ ܝܰܘܡܳܐ ܬܡܺܝܢܳܝܳܐ. ܘܥܰܠܗܳܝ ܠܰܝܬ ܣܳܟܳܐ ܠܛܳܒܴ̈ܬܳܐ ܕܡܶܬܝܰܗ̈ܒܳܢ ܒܶܗ. ܘܠܰܝܬ ܫܽܘܠܳܡܳܐ ܠܒܺܝ̈ܫܳܬܳܐ ܕܡܶܬܦܰܣ̈ܩܳܢ ܒܶܗ ܥܰܠ ܡܰܪ̈ܳܚܶܐ. ܐܶܡܰܪ:
ܕܟܽܠܶܗ ܝܰܘܡܳܐ ܒܰܟܡܺܝܪܽܘܬܳܐ ܗܰܠܟܶܬ. ܡܶܛܠ ܕܩܽܘܪ̈ܨܠܰܝ ܐܶܬܡܠܺܝܘ ܙܰܘܥܬܳܐ: ܘܠܰܝܬ ܫܠܳܡܳܐ ܠܒܶܣܪܝ. ܙܳܥܶܬ ܘܶܐܬܕܘܺܝܬ ܛܳܒ. ܗܳܠܶܝܢ ܢܒܺܝܳܐ ܠܰܘ ܡܶܢ ܩܢܽܘܡܶܗ ܐܶܡܰܪ܆ ܐܶܠܳܐ ܒܰܫܪܳܪܳܐ ܕܳܡܝܳܐ ܕܡܶܢ ܟܺܐܒ̈ܐ ܕܰܐܚܪ̈ܳܢܶܐ ܡܒܰܓܶܢ. ܡܶܛܠܗܳܢܳܐ ܐܳܡܰܪ:
ܢܳܗܶܓ ܗܘܺܝܬ ܡܶܢ ܢܶܗܡܬܶܗ ܕܠܶܒܝ. ܚܙܰܝܬ ܕܠܽܘܩܒܰܠ ܚܛܺܝܬܳܐ ܕܰܐܚܪ̈ܳܢܶܐ ܡܶܬܡܰܪܡܰܪ ܗܘܳܐ. ܛܽܘܓܳܢܳܐ ܐܺܝܬܶܝܗ̇ ܗܳܝ ܕܢܳܗܶܓ ܗܘܺܝܬ. ܐܶܠܳܐ ܚܙܺܝ ܕܗܽܘ ܢܒܺܝܳܐ ܡܶܢ ܦܰܪܨܽܘܦܳܐ ܕܰܐܚܪ̈ܳܢܶܐ ܡܰܛܶܢ ܘܰܡܪܰܛܶܢ. ܡܶܢ ܗܳܝ ܕܡܰܝܬܶܐ ܘܳܐܡܰܪ:
ܡܳܪܝܳܐ ܩܕܳܡܰܝܟ ܗ̱ܝ ܟܽܠܳܗ̇ ܪܶܓܰܬܝ. ܡܳܢܳܐ ܕܶܝܢ ܪܳܐܶܓ ܗܘܳܐ܇ ܐܶܠܳܐ ܢܝܳܚܳܐ ܕܡܶܢ ܕܺܝܢܳܐ: ܘܒܽܘܣܳܡܳܐ ܕܰܒܡܰܠܟܽܘܬܳܐ ܕܰܐܠܗܳܐ. ܘܬܽܘܒ ܡܰܘܕܰܥ ܚܰܫ̈ܐ ܘܬܶܢܚܴ̈ܬܳܐ ܕܢܰܦܫܶܗ.
ܬܶܢܚ̈ܬܝ ܡܶܢܳܟ ܠܳܐ ܡܛܰܫ̈ܝܳܢ. ܠܶܒܝ ܐܶܬܗܦܶܟ ܘܚܰܝܠܝ ܫܰܒܩܰܢܝ: ܘܢܽܘܗܪܳܐ ܕܥܰܝ̈ܢܰܝ ܠܳܐ ܗ̣ܘܳܐ ܠܘܳܬܝ. ܠܳܐ ܓܶܝܪ ܡܶܫܬܰܒܩܺܝܢ ܐܺܝܩܳܪ̈ܶܐ ܘܪܰܒܽܘܬ ܚܰܝܠܳܐ ܥܰܠ ܚܰܝܴ̈ܒܶܐ ܒܕܺܝܢܳܐ. ܐܶܡܰܪ ܓܶܝܪ:
ܕܪ̈ܳܚܡܰܝ ܘܚܰܒܪ̈ܰܝ ܠܽܘܩܒܰܠ ܟܺܐܒܝ ܩܳܡܘ: ܘܩܰܪ̈ܺܝܒܰܝ ܒܪܽܘܚܩܳܐ ܩܳܝܡܺܝܢ ܗܘܰܘ. ܠܰܝܬ ܓܶܝܪ ܡܶܢ ܝܳܪ̈ܬܰܝ ܡܰܠܟܽܘܬܳܐ ܕܡܶܫܟܰܚ ܕܢܰܘܕܶܐ ܒܓܶܢܣܶܗ܆ ܕܰܡܫܰܦܰܠ ܘܰܣܚܺܝܦ ܒܓܰܘ ܚܶܫܽܘܟܳܐ. ܐܶܠܳܐ ܗܰܘ ܕܢܳܦܶܠ ܐܳܦ ܡܶܫܬܠܶܡ ܐܰܝܠܶܝܢ ܕܣܳܢܶܝܢ ܠܶܗ:
ܘܰܐܚܕܽܘܢܝ ܐܰܝܠܶܝܢ ܕܒܳܥܶܝܢ ܠܢܰܦܫܝ ܘܨܳܒܶܝܢ ܠܒܺܝܫܬܝ: ܘܡܰܠܶܠܘ ܫܽܘܩܪܳܐ. ܘܢܶܟܠܳܐ ܝܰܘܡܳܐ ܟܽܠܶܗ ܪܳܢܶܝܢ ܗܘܰܘ. ܗܳܝܕܶܝܢ ܓܶܝܪ ܡܶܢ ܕܰܝ̈ܘܶܐ ܡܶܫܬܰܠܡܺܝܢ ܐܰܝܠܶܝܢ ܕܢܳܚܬܺܝܢ ܠܚܶܦܪܳܐ ܚܶܫܽܘܟܳܐ. ܘܡܶܢ ܪ̈ܽܘܚܶܐ ܛܰܢ̈ܦܳܬܳܐ ܡܶܬܬܰܚ̈ܕܳܢ.
ܐܶܢܳܐ ܕܶܝܢ܇ ܐܳܡܰܪ ܢܒܺܝܳܐ: ܐܰܝܟ ܚܰܪܫܳܐ ܠܳܐ ܫܳܡܰܥ ܗܘܺܝܬ. ܘܰܐܝܟ ܕܽܘܓܳܐ ܠܳܐ ܦܶܬܚܶܬ ܦܽܘܡܝ: ܘܰܗܘܺܝܬ ܐܰܝܟ ܓܰܒܪܳܐ ܕܠܳܐ ܫܳܡܰܥ. ܘܠܰܝܬ ܡܰܟܣܳܢܽܘܬܳܐ ܒܦܽܘܡܶܗ. ܠܰܝܬ ܬܰܡܳܢ ܓܶܝܪ ܠܡܶܫܡܰܥ܆ ܘܠܳܐ ܠܡܰܟܳܣܽܘ. ܡܶܛܠ ܕܗܳܕܶܐ ܒܰܠܚܽܘܕ ܐܶܚܕܶܐ ܬܰܡܳܢ. ܗܳܝ ܕܢܶܬܕܰܢܩܽܘܢ ܒܽܐܘ̈ܠܨܳܢܶܐ. ܐܶܠܳܐ ܚܙܺܝ ܐܰܝܟܰܢܳܐ ܢܒܺܝܳܐ ܡܚܰܘܶܐ܆ ܕܗܽܘ ܥܰܡ ܗܳܠܶܝܢ ܚܒܺܝܫ ܒܕܺܝܢܳܐ.
ܡܶܛܠ ܠܰܡ ܕܠܳܟ ܣܰܟܺܝܬ ܡܳܪܝܳܐ. ܘܰܥܢܰܝܬܳܢܝ ܡܳܪܝܳܐ ܐܠܰܗܝ: ܡܶܛܠ ܕܶܐܡܪܶܬ ܕܠܳܐ ܢܶܚܕܽܘܢ ܠܺܝ. ܘܠܳܐ ܢܶܬܬܪܺܝܡܽܘܢ ܥܠܰܝ ܒܙܰܘܥܬܳܐ ܕܪ̈ܶܓܠܰܝ. ܗܳܠܶܝܢ ܡܚܰܘܶܝܢ ܡܶܬܦܰܢܝܳܢܽܘܬܳܐ ܕܺܝܠܶܗ ܕܕܰܘܺܝܕ. ܘܰܕܥܰܠ ܐܚܪ̈ܳܢܶܐ ܐܶܬܢܰܒܺܝ. ܘܰܚܙܺܝ ܐܰܝܠܶܝܢ ܕܰܡܒܰܓܢܺܝܢ ܡܶܢ ܬܰܫܢܺܝܩܳܐ ܒܡܰܙܡܽܘܪܳܐ ܗܳܢܳܐ. ܒܳܬܰܪܟܶܢ ܢܺܝܫܳܐ ܐܚܪܺܢܳܐ ܕܦܳܪܽܘܩܰܢ ܡܰܥܶܠ ܟܰܕ ܐܳܡܰܪ:
ܡܶܛܠ ܕܶܐܢܳܐ ܠܚܰܫܳܐ ܡܛܰܝܰܒ ܐܢܳܐ. ܗܳܢܳܐ ܩܳܠܳܐ ܥܰܠ ܦܳܪܽܘܩܰܢ ܐܰܡܪܶܗ ܢܒܺܝܳܐ. ܗܽܘ ܓܶܝܪ ܒܰܠܚܽܘܕ ܐܰܘܕܰܥ ܕܰܡܛܰܝܰܒ ܠܚܰܫܳܐ ܡܶܢ ܩܕܳܡ ܕܢܺܐܬܶܐ ܠܰܨܠܺܝܒܳܐ. ܟܰܕ ܡܰܘܕܰܥ ܘܳܐܡܰܪ:
ܘܟܺܐܒܝ ܠܽܘܩܒܰܠܝ ܗ̱ܽܘ ܒܟܽܠܙܒܰܢ. ܡܳܕܶܝܢ ܠܰܝܬ ܠܡܺܐܡܰܪ. ܕܠܳܐ ܡܰܪܓܶܫ ܗܘܳܐ ܥܰܡܰܢܽܘܐܶܝܠ ܒܟܺܐܒ̈ܐ ܕܡܶܢ ܡܰܚ̈ܘܳܬܳܐ ܕܰܣܒܰܠ ܡܶܢ ܨܳܠܽܘ̈ܒܶܐ. ܠܡܶܬܕܰܡܳܪܽܘ ܕܶܝܢ ܙܳܕܶܩ܇ ܐܰܝܟܰܢܳܐ ܗܽܘ ܢܒܺܝܳܐ ܡܶܢܗܶܝܢ ܥܰܠ ܢܰܦܫܶܗ ܐܳܡܰܪ: ܘܡܶܢܗܶܝܢ ܥܰܠ ܡܰܪ̈ܳܚܶܐ ܐܳܡܰܪ: ܘܡܶܢܗܶܝܢ ܥܰܠ ܥܰܡܰܢܽܘܐܶܝܠ ܡܶܬܢܰܒܶܐ. ܗܳܪܟܳܐ ܡܶܢ ܒܳܬܰܪ ܕܶܐܡܰܪ ܥܰܠ ܦܳܪܽܘܩܰܢ. ܐܰܝܠܶܝܢ ܕܰܡܚܰܘ̈ܝܳܢ ܥܰܠ ܨܶܒܝܳܢܶܗ ܡܛܰܝܒܳܐ ܕܨܶܝܕ ܚܰܫܳܐ܆ ܥܛܰܦ ܠܶܗ ܬܽܘܒ ܕܥܰܠ ܩܢܽܘܡܶܗ ܢܺܐܡܰܪ:
ܡܶܛܠ ܕܶܐܚܰܘܶܝܟ ܣܰܟ̈ܠܘܳܬܝ. ܘܶܐܬܕܰܟܶܐ ܡܶܢ ܚܛܳܗܱ̈ܝ. ܗܳܢܰܘ: ܐܰܝܟܳܐ ܕܗܳܘܝܳܐ ܓܙܽܘܪܬܳܐ ܕܠܳܐ ܒܺܐܝ̈ܕܰܝܢ ܒܰܫܠܳܚ ܒܶܣܪܳܐ ܕܰܚܛܳܗ̈ܐ. ܐܰܝܟܳܐ ܕܡܶܬܚܙܶܐ ܕܰܨܠܺܝܒ ܡܫܺܝܚܳܐ܆ ܡܰܘܕܶܝܢ ܐܰܝܠܶܝܢ ܕܥܳܡܕܺܝܢ ܒܣܰܟ̈ܠܘܳܬܗܽܘܢ. ܘܫܳܠܚܺܝܢ ܒܰܪܢܳܫܳܐ ܥܰܬܺܝܩܳܐ. ܘܡܶܬܕܰܟܶܝܢ ܡܶܢ ܚܛܳܗܰܝ̈ܗܽܘܢ. ܘܡܶܢ ܒܳܬܰܪ ܕܶܐܡܰܪ ܡܚܰܘܝܳܢܽܘܬܳܐ ܕܣܰܟ̈ܠܘܳܬܳܐ ܕܰܚܛܳܗ̈ܐ܆ ܥܳܛܶܦ ܠܶܗ ܬܽܘܒ ܠܡܰܘܕܳܥܽܘ ܥܰܠ ܒܥܶܠܕܒܳܒܽܘܬܳܐ ܘܰܡܥܰܫܢܽܘܬܳܐ ܕܝܽܘ̈ܕܳܝܶܐ ܕܥܰܠ ܡܫܺܝܚܳܐ.
ܒܥܶܠܕ̈ܒܳܒܰܝ ܠܰܡ ܐܶܬܥܰܫܰܢܘ ܘܰܚܙܰܘ. ܘܰܣܓܺܝܘ ܣܳܢܱ̈ܐܝ ܕܫܽܘܩܪܳܐ. ܟܰܕ ܛܳܒ ܕܶܝܢ ܘܳܐܦ ܠܶܗ ܠܰܢܒܺܝܳܐ ܗܘܱ̈ܝ ܗܳܠܶܝܢ. ܐܶܠܳܐ ܡܫܰܡܠܝܳܐܝ̣ܬ ܠܘܳܬ ܦܳܪܽܘܩܰܢ ܐܶܣܬܥܰܪ̈ܝ. ܗܽܘܝܽܘ ܗܰܘ ܕܶܐܬܦܪܰܥ ܒܺܝܫܬܳܐ ܚܠܳܦ ܛܳܒܬܳܐ. ܗܳܢܰܘ ܕܰܚܠܳܦ ܕܪܰܩ ܒܰܐܪܥܳܐ ܘܰܓܒܰܠ ܛܺܝܢܳܐ ܡܶܢ ܪܽܘܩܶܗ. ܘܰܦܬܰܚ ܥܰܝ̈ܢܰܘܗܝ ܕܣܰܡܝܳܐ܆ ܪܽܘܩܳܐ ܛܰܡܳܐܐ ܒܒܶܙܚܳܐ ܩܰܒܶܠ ܡܶܢ ܝܽܘ̈ܕܳܝܶܐ. ܡܶܛܠܡܳܢܳܐ ܐܶܡܰܪ:
ܕܦܰܪܥܽܘܢܝ ܒܺܝܫܬܳܐ ܚܠܳܦ ܛܳܒܬܳܐ. ܘܣܰܩܪܽܘܢܝ ܥܰܠ ܕܰܒܥܺܝܬ ܛܳܒܬܳܐ. ܛܳܒܬܳܐ ܓܶܝܪ ܕܰܒܥܳܐ ܗܳܕܳܐ ܗ̱ܝ. ܕܢܶܬܦܢܽܘܢ ܠܘܳܬ ܐܠܰܗܳܐ ܒܰܬܝܳܒܽܘܬܳܐ ܘܢܺܚܽܘܢ ܟܽܠܗܽܘܢ ܒܢܰܝ̈ܢܳܫܳܐ. ܡܰܝܬܶܐ ܕܶܝܢ ܒܳܬܰܪ ܗܳܠܶܝܢ ܩܴ̈ܠܶܐ ܐܢܳܫܴ̈ܝܶܐ ܕܡܶܬܢܰܚܬܳܢܽܘܬܳܐ ܕܰܒܗܽܘܢ ܐܶܬܚܰܫܰܚ. ܟܰܕ ܨܒܳܐ ܘܰܗܘܳܐ ܒܰܪܢܳܫܳܐ.
ܠܳܐ ܬܶܫܒܰܩܢܝ ܡܳܪܝܳܐ ܐܠܰܗܝ: ܘܠܳܐ ܬܰܪܚܶܩ ܡܶܢܝ. ܐܶܠܳܐ ܟܰܬܰܪ ܠܥܽܘܕܪܳܢܝ ܘܰܦܪܽܘܩܰܝܢܝ. ܐܶܢܓܶܝܪ ܫܰܪܺܝܪܳܐܝ̣ܬ ܡܶܠܬܶܗ ܕܰܐܒܳܐ ܗ̣ܘܳܐ ܒܰܪܢܳܫܳܐ. ܠܰܘ ܓܶܝܪ ܕܡܰܙܥܪܳܢܽܘܬܶܗ ܐܺܝܬܰܝܗܽܘܢ ܩܴ̈ܠܐ ܗܳܠܶܝܢ ܕܶܐܬܚܰܫܰܚ ܒܗܽܘܢ ܟܰܕ ܐܶܬܓܠܺܝ ܒܰܒܣܰܪ܆ ܐܶܠܳܐ ܡܫܰܘ̈ܕܥܶܐ ܐܶܢܽܘܢ ܕܣܽܘܪܳܩܶܗ ܨܶܒܝܳܢܳܝܳܐ ܕܰܚܠܳܦܰܝܢ. ܠܳܐ ܓܶܝܪ ܡܬܰܚܬܺܝܢ ܠܶܗ ܩܴ̈ܠܐ ܐܢܳܫܳܝܷ̈ܐ ܡܶܢ ܗܳܝ ܕܺܐܝܬܰܘܗܝ ܐܠܰܗܐ ܡܒܰܪܟܳܐ ܥܰܡ ܐܰܒܽܘܗܝ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܠܬܝܢ ܘܬܫܥܐ
ܥܰܠ ܡܰܟܺܝܟܽܘܬܳܐ ܕܩܰܕܺܝ̈ܫܶܐ܇ ܕܨܳܝܪܳܐ ܗܘܳܬ ܠܗܳܝ ܕܰܡܫܺܝܚܳܐ. ܘܥܰܠܗܳܝ ܕܫܳܛܝܽܘܬܶܗ ܕܰܐܠܗܳܐ ܚܰܟܺܝܡܳܐ ܗ̱ܝ ܡܶܢ ܒܢܰܝ̈ܢܳܫܳܐ
ܫܽܘܦܪܳܐ ܘܨܶܒܬܳܐ ܕܦܺܝܠܳܣܽܘܦܽܘܬܳܐ ܕܒܰܡܫܺܝܚܳܐ ܗܳܢܰܘ܆ ܡܳܐ ܕܐ̱ܢܳܫ ܚܳܫܶܒ ܢܰܦܫܶܗ ܚܰܣܺܝܪ ܪܶܥܝܳܢܳܐ ܘܫܺܝܛܳܐ܆ ܡܶܛܠ ܕܰܢܟܰܣܶܐ ܚܶܟܡܬܶܗ ܕܒܰܐܠܗܳܐ ܡܶܢ ܫܰܠܺܝ̈ܛܳܢܰܘܗܝ ܕܥܳܠܡܳܐ ܗܳܢܳܐ ܒܺܝܫܳܐ. ܒܕܰܐܝܟ ܗܳܕܶܐ ܡܶܬܚܰܫܚܺܝܢ ܗܘܰܘ ܫܠܺܝ̈ܚܶܐ ܛܽܘ̈ܒܳܢܶܐ܇ ܘܝܰܬܺܝܪܳܐܝ̣ܬ ܦܰܘܠܽܘܣ ܗܰܘ ܪܰܒܳܐ ܟܳܬܶܒ ܗܘܳܐ. ܕܗܳܐ ܠܰܡ ܗܘܺܝܬ ܚܰܣܺܝܪ ܪܶܥܝܳܢܳܐ ܒܫܽܘܒܗܳܪܝ܆ ܕܰܐܢܬܽܘܢ ܐܶܠܰܨܬܽܘܢܳܢܝ (ܒ ܩܘܪ̈ܢܬܝܐ ܝܒ: ܝܐ). ܡܥܳܕܺܝܢ ܐܶܢܽܘܢ ܓܶܝܪ ܐܽܘ̈ܠܨܳܢܶܐ ܕܥܳܪܨܺܝܢ ܥܰܠ ܩܰܕܺܝ̈ܫܶܐ ܕܢܶܬܚܰܫܚܽܘܢ ܒܰܐܝܠܶܝܢ ܕܡܶܣܬܰܒܪ̈ܳܢ ܒܥܳܠܡܳܐ ܕܫܳܢܝܽܘܬܳܐ. ܟܰܕ ܠܳܐ ܫܳܒܩܺܝܢ ܕܢܶܥܽܘܠ ܡܚܰܠܨܳܢܳܐ ܥܰܠ ܗܳܝ ܚܶܟܡܬܳܐ ܓܰܘܳܝܬܳܐ ܕܰܩܢܶܝܢ ܒܰܡܫܺܝܚܳܐ. ܘܗܳܠܶܝܢ ܐܳܡܰܪ ܐܢܳܐ. ܟܰܕ ܐܶܫܟܰܚܢܰܢ܇ ܕܛܽܘܒܳܢܳܐ ܕܰܘܺܝܕ ܟܰܕ ܙܰܡܰܪ ܬܶܫܒܽܘܚܬܳܐ ܗܳܕܶܐ ܕܰܬܠܳܬܺܝܢ ܘܰܬܫܰܥ܆ ܒܰܐܝܠܶܝܢ ܕܡܶܣܬܰܒܪ̈ܳܢ ܕܺܐܝܬܰܝܗܶܝܢ ܫܳܛܝܽܘܬܳܐ ܘܫܳܢܝܽܘܬܳܐ ܒܥܳܠܡܳܐ ܐܶܬܚܰܫܰܚ. ܒܗܰܘ ܓܶܝܪ ܙܰܒܢܳܐ ܕܰܥܪܰܩ ܡܶܢ ܩܕܳܡ ܫܳܐܘܳܠ ܚܡܽܘܗܝ ܠܰܐܪܥܳܐ ܕܰܦܠܶܫܬܳܝܷ̈ܐ܆ ܐܶܬܢܰܒܺܝ ܗܳܠܶܝܢ: ܟܰܕ ܥ̣ܰܠ ܠܰܐܪܥܳܐ ܕܥܽܘܪ̈ܠܶܐ ܨܳܒܘ ܗܘܰܘ ܦܠܶܫܬܳܝܷ̈ܐ ܕܢܶܚܕܽܘܢܶܗ: ܘܢܰܥܠܽܘܢܶܗ ܩܕܳܡ ܐܰܟܺܝܫ ܡܰܠܟܳܐ ܕܓܳܬ. ܘܡܶܛܠ ܕܡܶܢܗܽܘܢ ܒܨܶܒܝܳܢܳܐ ܛܳܒܳܐ ܩܰܒܠܽܘܗܝ܇ ܒܕܰܣܒܰܪܘ ܗܘܰܘ ܕܡܶܢܗܽܘܢ ܗܳܘܶܐ. ܐܚܪ̈ܳܢܶܐ ܓܶܝܪ ܟܰܕ ܡܪܰܛܢܺܝܢ ܡܶܛܠ ܩܶܛܠܶܗ ܕܓܽܘܠܝܰܕ܇ ܐܳܡܪܺܝܢ ܗܘܰܘ ܠܰܐܟܺܝܫ. ܗܳܢܰܘ ܡܰܠܟܳܐ ܕܺܝܣܪܳܐܶܝܠ. ܠܗܳܢܳܐ ܡܣܰܓ̈ܝܳܢ ܗܘܱ̈ܝ ܒܢܴ̈ܬ ܝܺܣܪܳܐܶܝܠ ܘܳܐܡܪ̈ܳܢ. ܩܛܰܠ ܫܳܐܘܳܠ ܒܰܐܠܦܷ̈ܐ܆ ܘܕܰܘܺܝܕ ܒܪ̈ܶܒܘܳܬܳܐ (ܐ ܫܡܘܐܝܠ ܟܐ: ܝܒ). ܘܟܰܕ ܡܶܢ ܢܶܟܠܳܐ ܕܰܡܛܰܫܰܝ ܗܘܳܐ ܒܡܷ̈ܠܐ ܗܳܠܶܝܢ ܕܪ̈ܰܫܺܝܥܶܐ ܕܚܶܠ ܕܰܘܺܝܕ܆ ܐܶܠܳܐ ܣܽܘܥܪܳܢܳܐ ܕܦܺܝܠܳܣܽܘܦܽܘܬܳܐ ܕܰܡܛܰܫܰܝ ܒܦܰܪܨܽܘܦܳܐ ܕܫܳܛܝܽܘܬܳܐ ܥܒܰܕ ܚܰܟܺܝܡܳܐܝ̣ܬ. ܘܺܝܬܶܒ ܥܰܠ ܬܰܪܥܳܐ ܕܡܰܠܟܳܐ܆ ܘܰܢܣܰܒ ܠܰܚܡܳܐ ܘܶܐܟܰܠ ܒܫܽܘܩܳܐ. ܘܰܐܪܡܺܝ ܪܺܝܪܶܗ ܥܰܠ ܕܰܩܢܶܗ. ܘܰܒܗܳܕܶܐ ܫܳܛܝܽܘܬܳܐ܇ ܕܚܰܟܺܝܡ ܣܰܓܺܝ ܡܶܢ ܦܠܶܫܬܳܝܷ̈ܐ ܐܶܫܬܟܰܚ. ܘܗܳܪܟܳܐ ܕܳܐܡܰܪ ܡܫܰܪܶܐ ܗܘܳܐ ܘܰܡܙܰܡܰܪ:
ܐܶܡܪܶܬ ܕܶܐܛܰܪ ܐܽܘܪܚܝ: ܘܠܳܐ ܐܶܚܛܶܐ ܒܠܶܫܳܢܝ. ܐܶܛܰܪ ܦܽܘܡܝ ܡܶܢ ܥܰܘܠܳܐ: ܡܶܛܠ ܪ̈ܰܫܺܝܥܶܐ ܕܠܽܘܩܒܰܠܝ. ܚܶܪܫܶܬ ܘܶܐܬܟܰܡܪܶܬ ܘܐܶܬܕܘܺܝܬ ܡܶܢ ܛܳܒܬܳܐ܆ ܘܟܺܐܒܝ ܐܶܬܕܰܠܰܚ. ܒܗܳܠܶܝܢ ܚܰܘܺܝ ܐܰܝܟܰܢܳܐ ܢܳܛܰܪ ܐܽܘܪܚܶܗ ܕܠܳܐ ܢܶܟܝܳܢܳܐ܆ ܕܠܳܐ ܢܶܕܥܽܘܢܶܗ ܦܠܶܫܬܳܝܷ̈ܐ. ܘܰܡܚܰܦܶܐ ܗܘܳܐ ܚܶܟܡܬܳܐ ܗܳܝ ܕܺܐܝܬ ܗܘܳܐ ܠܶܗ ܡܶܢ ܛܰܝܒܽܘܬܳܐ ܕܪܽܘܚܳܐ ܕܩܽܘܕܫܳܐ ܕܫܰܪܝܳܐ ܗܘܳܬ ܒܶܗ. ܡܚܰܘܶܐ ܗܘܳܐ ܫܳܛܝܽܘܬܳܐ. ܗܳܝ ܕܳܐܦܠܳܐ ܠܰܓܡܳܪ ܫܟܺܝܚܳܐ ܗܘܳܬ. ܘܠܳܐ ܡܚܰܘܶܐ ܗܘܳܐ ܢܰܦܫܶܗ ܚܰܟܺܝܡܳܐ܇ ܕܕܰܠܡܳܐ ܟܰܕ ܗܳܕܶܐ ܡܶܬܚܰܙܝܳܐ ܗܘܳܬ ܒܶܗ܆ ܢܶܬܶܐܠܶܨ ܡܶܢ ܦܠܶܫܬܳܝܷ̈ܐ ܪ̈ܰܫܺܝܥܶܐ. ܕܡܶܕܶܡ ܕܠܳܚܶܡ ܠܨܶܒܝܳܢܗܽܘܢ ܢܡܰܠܶܠ. ܗܳܝ ܕܢܽܘܟܪܳܝܳܐ ܗܘܳܬ ܠܓܰܒܪܳܐ ܢܒܺܝܳܐ. ܘܰܚܪܶܫ ܘܠܳܐ ܡܰܠܶܠ. ܘܶܐܬܟܡܰܪ ܘܰܕܘܳܐ ܡܶܢ ܛܳܒܬܳܐ. ܕܠܳܐ ܒܝܰܕ ܡܠܺܝܠܽܘܬܳܐ: ܘܰܡܠܺܝܠܽܘܬܳܐ ܕܡܰܕܥܶܗ ܢܶܬܠܒܶܟ ܡܶܢ ܡܰܪ̈ܳܚܶܐ. ܘܰܒܗܳܠܶܝܢ ܡܰܣܶܩ ܗܘܳܐ ܨܰܠܡܳܐ ܫܰܦܺܝܪܳܐ ܠܗܰܘ ܚܰܟܺܝܡܳܐ ܘܡܳܪܳܐ ܕܚܰܟܺܝ̈ܡܶܐ. ܕܟܰܕ ܐܶܬܳܐ ܠܥܳܠܡܳܐ ܘܶܐܬܓܠܺܝ ܒܰܒܣܰܪ. ܢܛܰܪ ܐܽܘܪܚܳܐ ܕܰܡܕܰܒܪܳܢܽܘܬܶܗ ܡܶܢ ܫܰܠܺܝ̈ܛܳܢܶܐ ܕܥܳܠܡܳܐ ܗܳܢܳܐ ܚܶܫܽܘܟܳܐ܆ ܕܠܳܐ ܢܶܕܥܽܘܢܳܝܗܝ ܕܡܰܢܽܘ ܘܒܰܪ ܡܰܢܽܘ. ܘܠܰܘ ܪܺܝܪܳܐ ܒܰܠܚܽܘܕ ܕܰܐܝܬܺܝ ܒܺܝܠܺܝܕܽܘܬܶܗ ܘܰܒܬܶܫܒܽܘܚܬܶܗ ܘܰܒܫܰܒܪܽܘܬܶܗ܇ ܗܳܝ ܕܰܡܥܳܕܺܝܢ ܝܰܠܽܘ̈ܕܶܐ ܒܡܰܘܥܺܝܬܳܐ ܕܛܰܚܴ̈ܢܳܬܳܐ܆ ܐܶܠܳܐ ܘܥܰܙܪܽܘܪ̈ܶܐ ܐܶܬܟܰܣܺܝ. ܘܠܰܓܠܶܓ ܒܶܝܬ ܫܰܒܪ̈ܶܐ ܘܫܰܦܶܦ. ܗܳܝ ܕܰܓܡܺܝܪܳܐܝ̣ܬ ܢܳܛܪ̈ܳܢ ܗܘܱ̈ܝ ܠܳܗ̇ ܠܐܽܘܪܚܳܐ ܕܰܡܕܰܒܪܳܢܽܘܬܶܗ܆ ܕܠܳܐ ܢܶܫܬܰܘܕܥܽܘܢܳܝܗܝ ܦܠܶܫܬܳܝܷ̈ܐ ܡܶܬܝܰܕܥܳܢ̈ܐ. ܠܰܘ ܗܳܠܶܝܢ ܒܰܠܚܽܘܕ: ܘܶܐܠܳܐ ܘܚܰܫ̈ܐ ܘܰܟܡܺܝܪܽܘܬܳܐ ܗܳܝ ܕܚܰܘܺܝ ܒܥܶܕܳܢܳܐ ܕܚܰܫܶܗ. ܘܕܰܚܪܶܫ ܗܘܳܐ ܘܠܳܐ ܦܰܢܺܝ ܦܶܬܓܳܡܳܐ. ܟܰܕ ܡܶܫܬܰܐܰܠ ܡܶܢ ܦܺܝܠܰܛܽܘܣ. ܘܰܕܚܰܡ ܠܶܒܶܗ ܒܓܰܘܶܗ ܘܰܕܚܰܘܺܝ ܕܽܘܥܬܳܐ ܐܰܝܟ ܫܷ̈ܠܬܶܐ ܕܰܕܡܳܐ܇ ܗܳܝ ܕܡܶܢ ܣܰܓܺܝܐܽܘܬ ܢܽܘܪܳܐ ܕܽܐܘ̈ܠܨܳܢܶܐ ܕܶܠܩܰܬ ܘܫܶܓܪܰܬ ܠܦܰܓܪܶܗ ܩܰܕܺܝܫܳܐ. ܗܳܠܶܝܢ ܟܽܠܗܶܝܢ ܡܚܰܦܝܴ̈ܢܝܳܬܳܐ ܥܒܰܕ ܐܶܢܶܝܢ ܠܐܽܘܪܚܶܗ ܕܦܳܪܽܘܩܰܢ܆ ܥܕܰܡܳܐ ܕܡܰܠܺܝ ܘܰܓܡܰܪ ܐܰܝܠܶܝܢ ܕܚܳܝܪ̈ܳܢ ܒܡܽܘܟܳܟܶܗ ܕܰܐܠܗܳܐ. ܗܳܢܰܘ ܒܫܳܛܝܽܘܬܶܗ ܗܳܝ ܕܚܰܟܺܝܡܳܐ ܗܘܳܬ ܡܶܢ ܒܢܰܝ̈ܢܳܫܳܐ. ܘܒܳܬܰܪܟܶܢ ܐܳܡܰܪ ܗܳܠܶܝܢ ܥܰܠ ܢܰܦܫܶܗ܇ ܟܰܕ ܡܒܰܓܶܢ ܡܶܢ ܐܽܘܠܨܳܢܳܗ̇ ܕܺܝܠܳܗ̇ ܕܽܐܘܪܚܳܐ ܕܰܪܕܽܘܦܝܶܗ:
ܪܢܺܝܬ ܒܠܶܫܳܢܝ ܘܚܰܘܝܰܢܝ ܡܳܪܝܳܐ ܚܰܪܬܝ. ܘܰܡܫܽܘܚܬܳܐ ܕܝܰܘ̈ܡܰܝ ܡܳܢܳܐ ܗ̄ܝ. ܘܡܳܢܰܘ ܠܰܡ ܡܶܬܚܳܐ ܕܚܰܝܰܘ̈ܗܝ ܕܒܰܪܢܳܫܳܐ܇ ܕܡܶܢ ܫܽܘܪܳܝܳܐ ܕܡܶܬܚܙܶܐ ܒܥܳܠܡܳܐ܆ ܒܺܝ̈ܫܳܬܳܐ ܣܳܒܶܠ. ܘܰܐܝܕܳܐ ܗ̄ܝ ܗܳܝ ܕܠܳܗ̇ ܡܣܰܟܶܐ ܐܢܳܐ܇ ܕܟܰܕ ܐܰܝܟ ܗܳܠܶܝܢ ܟܽܠܗܶܝܢ ܒܺܝ̈ܫܳܬܳܐ ܐܶܬܢܰܘܰܠ. ܘܡܳܢܳܐ ܗ̄ܝ ܡܫܽܘܚܬܳܐ ܕܝܰܘ̈ܡܰܝ: ܕܰܐܝܟ ܗܰܘ ܕܺܐܝܬ ܠܺܝ ܕܺܐܚܶܐ ܕܠܳܐ ܫܽܘܠܳܡܳܐ ܡܶܬܩܰܦܰܚ ܐܢܳܐ ܕܶܝܢ ܒܒܺܝ̈ܫܳܬܳܐ. ܘܨܳܒܶܐ ܗܘܺܝܬ ܐܶܠܽܘ ܡܶܫܟܚܳܐ.
ܕܶܐܕܰܥ܇ ܠܡܳܢܳܐ ܦܳܐܷܫ ܐܢܳܐ. ܕܡܶܢ ܥܰܡܝ ܛܪܺܝܕ ܐܢܳܐ ܘܥܰܪܺܝܩ ܐܢܳܐ. ܘܰܐܝܟܳܐ ܕܶܐܬܺܝܬ ܘܶܐܣܬܰܬܰܪ܆ ܢܒܰܥܘ ܠܺܝ ܐܽܘ̈ܠܨܳܢܶܐ ܘܰܫܦܰܝܴ̈ܐ ܩܫܰܝܴ̈ܐ. ܘܗܳܠܶܝܢ ܓܶܝܪ ܠܓܰܒܪܳܐ ܕܒܰܡܫܽܘܚܬܳܐ ܝܰܗܒܬ ܝܰܘ̈ܡܰܘܗܝ.
ܘܦܰܘܫܝ ܐܰܝܟ ܠܳܐ ܡܶܕܶܡ ܗ̱ܽܘ ܩܕܳܡܰܝܟ. ܠܗܰܘ ܓܶܝܪ ܕܟܰܪ̈ܝܳܢ ܡܽܘ̈ܫܚܳܬܶܗ ܒܚܰܝ̈ܐ. ܘܰܐܝܟ ܠܳܐ ܡܶܕܶܡ ܐܺܝܬܶܝܗ̇ ܬܰܘܚܰܪܬܶܗ ܒܚܰܝ̈ܐ ܫܚܺܝ̈ܩܶܐ. ܘܥܰܣ̈ܩܳܢ ܗܳܠܶܝܢ ܠܗܰܘ ܕܡܶܬܚܰܙ̈ܝܳܢ ܕܚܳܐܱܪ ܠܘܳܬܳܟ ܘܰܡܣܰܒܰܪ ܒܳܟ. ܘܟܽܠܢܳܫ ܐܽܘܪܚܳܐ ܩܰܠܺܝܠܬܳܐ ܠܒܺܝܟܺܝܢ ܨܶܝܕ ܫܽܘܠܳܡܳܐ. ܘܠܰܝܬ ܕܰܡܩܰܘܶܐ ܨܶܝܕ ܐܰܝܠܶܝܢ ܕܰܪ̈ܚܺܝܡܳܢ ܘܚܰܒܺܝ̈ܒܳܢ ܠܶܗ ܒܥܳܠܡܳܐ ܗܳܢܳܐ.
ܡܶܛܠ ܕܟܽܠܗܽܘܢ ܒܢܰܝ̈ܢܳܫܳܐ ܐܰܝܟ ܠܰܗܓܳܐ ܐܶܢܽܘܢ ܩܳܝܡܺܝܢ. ܘܟܰܕ ܚܳܐܱܪ ܟܽܠܢܳܫ ܒܚܰܒܪܶܗ܆ ܘܡܶܬܛܰܠܰܩ ܘܥܳܒܰܪ ܐܰܝܟ ܠܰܗܓܳܐ ܕܡܶܢ ܫܽܘܪܳܝܳܐ ܣܡܰܟ ܠܫܽܘܠܳܡܳܐ. ܘܠܳܐ ܫܳܒܶܩ ܥܶܩܳܪܳܐ ܘܥܰܘܦܳܐ ܒܰܐܪܥܳܐ. ܗܳܟܰܢܳܐ ܐܳܦ ܗܶܢܽܘܢ ܡܰܘܦܶܝܢ ܘܒܳܛܠܺܝܢ. ܡܶܢ ܐܰܝܠܶܝܢ ܕܰܒܗܶܝܢ ܩܳܝܡܺܝܢ. ܘܠܳܐ ܓܶܝܪ ܠܠܰܗܓܳܐ ܩܰܘܡܳܐ܆ ܘܠܳܐ ܠܰܒܢܰܝ̈ܢܳܫܳܐ ܩܰܘܡܳܐ: ܡܶܢ ܒܳܬܰܪ ܕܫܳܪܶܐ ܠܗܽܘܢ ܝܰܘܡܳܐ ܕܥܽܘܢܕܳܢܳܐ. ܕܬܽܘܒ ܢܶܥܛܦܽܘܢ ܠܚܰܝ̈ܐ ܗܳܠܶܝܢ. ܘܶܐܢ ܨܰܠܡܳܐ ܕܶܐܬܬܨܺܝܪ ܥܰܠ ܕܰܦܳܐ ܒܽܐܘܡܳܢܽܘܬܳܐ ܕܨܰܝܳܪܳܐ. ܘܟܰܕ ܩܰܠܺܝܠ ܐܶܫܬܚܶܡ ܘܶܐܬܚܰܒܠܰܬ ܕܡܽܘܬܶܗ. ܘܡܶܢ ܒܳܬܰܪ ܩܰܠܺܝܠ ܐܶܬܠܚܺܝ ܡܶܢ ܕܰܦܳܐ. ܘܰܣܠܶܩ ܨܰܠܡܳܐ ܠܰܐܚܪܺܢܳܐ ܚܠܳܦ ܩܰܕܡܳܝܳܐ܆ ܗܳܟܰܢܳܐ ܐܳܦ ܒܰܪܢܳܫܳܐ ܚܳܡܶܐ ܘܳܐܒܶܕ ܒܗܽܘ̈ܦܳܟܰܘܗܝ.
ܡܶܛܠ ܕܰܒܨܰܠܡܳܐ ܡܗܰܠܶܟ ܓܰܒܪܳܐ. ܘܰܐܝܟ ܠܰܗܓܳܐ ܚܳܡܶܐ. ܟܡܳܐ ܠܰܡ ܗܕܺܝܪ ܘܫܰܦܺܝܪ܇ ܡܶܛܠ ܕܺܐܝܬܰܘܗܝ ܨܰܠܡܳܐ ܕܥܳܒܽܘܕܶܗ. ܐܶܠܐ ܦܣܳܩܳܐ ܕܰܡܣܳܡ ܒܪܺܝܫܳܐ ܕܡܶܛܠ ܣܰܟܠܽܘܬܶܗ ܩܰܕܡܳܝܬܳܐ. ܕܢܶܚܡܶܐ ܒܝܰܕ ܡܰܘܬܳܐ. ܘܥܰܠܗܳܝ:
ܣܳܐܷܡ ܣܺܝ̈ܡܳܬܳܐ ܘܠܳܐ ܝܳܕܰܥ ܠܡܰܢܽܘ ܚܳܡܶܠ ܠܗܶܝܢ. ܠܕܰܐܝܟ ܗܳܢܳܐ ܗܶܒܠܳܐ ܘܟܰܪܝܽܘܬܳܐ ܐܶܬܰܝܢܰܢ. ܗܳܢܳܐ ܓܶܝܪ ܟܰܕ ܣܺܝ̈ܡܳܬܳܐ ܣܳܡ ܘܟܰܢܶܫ ܟܬܳܒ̈ܐ ܩܰܕܺܝ̈ܫܶܐ ܕܰܢܒܺܝ̈ܐ ܛܽܘ̈ܒܳܢܶܐ ܕܰܗܘܰܘ ܒܶܗ. ܠܳܐ ܝ̣ܕܰܥ ܠܡܰܢܽܘ ܚܡܰܠ ܐܶܢܶܝܢ. ܘܠܳܐ ܐܶܫܟܰܚ ܕܢܰܕܪܶܟ܇ ܕܰܠܥܰܡܳܐ ܩܰܕܺܝܫܳܐ ܘܰܡܗܰܝܡܢܳܐ: ܗܳܢܳܐ ܕܶܐܬܚܙܺܝ ܒܝܰܕ ܡܳܪܰܢ܆ ܚܡܰܠ ܐܶܢܶܝܢ. ܡܶܛܠ ܕܡܶܢ ܒܳܬܰܪ ܡܰܦܩܳܢܳܐ ܕܡܶܟܳܐ܆ ܠܰܝܬ ܠܶܗ ܠܒܰܪܢܳܫܳܐ ܘܠܳܐ ܚܰܕ ܣܰܒܪܳܐ ܥܰܠ ܐܰܝܠܶܝܢ ܕܰܒܗܳܢܳܐ ܥܳܠܡܳܐ. ܘܠܳܐ ܡܶܢ ܟܽܘܘܳܢܶܗ ܡܶܬܗܢܶܐ ܡܶܕܶܡ. ܘܠܳܐ ܡܶܢ ܣܺܝ̈ܡܳܬܶܗ ܕܚܳܡܶܠ ܠܗܶܝܢ ܘܰܗܘܱ̈ܝ ܕܰܐܚܪ̈ܳܢܶܐ܆ ܡܶܬܥܰܕܰܪ. ܐܶܠܳܐ ܟܡܳܐ ܙܰܒܢܺܝ̈ܢ ܐܳܦ ܣܰܓܺܝܐܳܝ̣ܬ ܚܰܝܳܒ ܡܰܘܬܳܐ ܚܠܳܦܰܝܗܶܝܢ. ܡܶܬܬܰܢܰܚ ܢܒܺܝܳܐ ܥܰܠ ܡܰܦܩܳܢܳܐ ܥܠܺܝܒܳܐ ܕܳܐܡܰܪ:
ܡܶܟܺܝܠ ܡܰܢܽܘ ܣܰܒܪܝ ܐܶܠܳܐ ܐܶܢ ܐܰܢܬ ܡܳܪܝܳܐ. ܕܣܳܡܶܬ ܠܰܡ ܣܺܝ̈ܡܳܬܳܐ܆ ܘܰܗܘܱ̈ܝ ܕܰܐܚܪ̈ܳܢܶܐ. ܘܟܰܢܫܶܬ ܥܽܘܬܪܳܐ ܘܢܶܟ̈ܣܶܐ ܕܠܳܐ ܒܽܘܝܳܢܳܐ. ܘܟܰܕ ܕܰܐܚܪ̈ܳܢܶܐ ܗܘܱ̈ܝ ܟܽܘ̈ܢܳܫܰܝ ܣܺܝ̈ܡܳܬܝ. ܘܗܳܐ ܟܪܺܝܟܳܐ ܠܺܝ ܡܰܘܒܠܳܐ ܝܰܩܺܝܪܬܳܐ ܕܰܚܛܳܗ̈ܐ ܕܰܩܢܺܝܬ. ܟܰܕ ܡܟܰܢܶܫ ܐܢܳܐ ܡܰܪ̈ܗܳܛܶܐ ܕܰܗܘܰܘ ܠܰܐܚܪ̈ܳܢܶܐ. ܠܰܘ ܥܰܠ ܕܶܐܬܓܰܙܺܝܬ ܡܶܢ ܐܰܝܠܶܝܢ ܕܟܰܢܫܶܬ ܟܳܪܝܳܐ ܠܺܝ܆ ܐܶܠܳܐ ܡܶܢ ܡܣܳܡ ܒܪܺܝܫܳܐ ܕܒܺܝ̈ܫܳܬܳܐ ܕܰܩܢܺܝܬ. ܟܰܕ ܢܳܣܶܒ ܐܢܳܐ ܕܰܐܚܪ̈ܳܢܶܐ ܘܰܡܟܰܢܶܫ ܐܢܳܐ ܠܰܐܚܪ̈ܳܢܶܐ. ܐܶܠܳܐ ܒܚܰܕ ܥܶܕܳܢܳܐ ܡܰܕܪܟܺܝܢ ܠܶܗ ܠܒܰܪܢܳܫܳܐ ܬܪܶܝܢ ܟܺܐܒ̈ܐ ܡܰܪܺܝܪ̈ܶܐ. ܕܡܶܢ ܐܰܝܠܶܝܢ ܕܟܰܢܶܫ܆ ܡܶܬܓܠܶܙ ܒܡܰܘܬܳܐ. ܘܡܰܪ̈ܢܝܳܬܳܐ ܫܚܺܝ̈ܩܳܬܳܐ ܡܶܛܠ ܕܺܝܢܳܐ ܕܰܢܛܺܝܪ ܠܶܗ. ܗܳܝ ܕܠܰܘ ܕܠܺܝܠܳܐܝ̣ܬ ܐܺܝܬ ܠܡܰܡܳܕܘ ܡܶܢܶܗ. ܒܳܬܰܪ ܓܶܝܪ ܕܟܽܠܡܶܕܶܡ ܫܳܪܶܟ ܠܰܐܒܕܳܢܳܐ. ܘܣܰܒܪܳܐ ܒܰܠܚܽܘܕ ܕܡܳܪܝܳܐ ܒܳܥܝܳܐ ܢܰܦܫܳܐ ܟܰܕ ܐܳܡܪܳܐ:
ܕܡܶܢ ܟܽܠܗܶܝܢ ܣܰܟܠܘܴ̈ܬܝ ܦܰܨܳܢܝ: ܘܚܶܣܕܳܐ ܠܥܰܘܴ̈ܠܶܐ ܠܳܐ ܬܶܥܒܕܰܢܝ. ܘܳܐܦܶܢ ܠܰܓܡܺܝܪܽܘܬܳܐ ܠܳܐ ܐܶܬܡܰܛܺܝܬ: ܐܶܠܳܐ ܡܶܛܽܠ ܕܕܶܚܠܶܬ ܡܶܢ ܕܺܝܢܳܟ܆ ܠܳܐ ܐܶܬܚܰܣܰܕ ܡܶܢ ܥܰܘܴ̈ܠܶܐ ܒܢܰܝ̈ ܚܶܫܽܘܟܳܐ. ܘܠܳܐ ܢܶܚܙܽܘܢܳܢܝ ܥܰܡܗܽܘܢ ܒܶܝܬ ܕܺܝܢܳܐ ܘܢܰܗܠܽܘܢ ܠܺܝ: ܕܠܰܘ ܡܶܕܶܡ ܡܝܰܬܰܪ ܐܢܳܐ ܡܶܢܗܽܘܢ. ܗܳܫܳܐ ܒܳܬܰܪ ܗܳܠܶܝܢ܆ ܡܰܝܬܶܐ ܠܥܽܘܗܕܳܢܳܐ ܕܰܐܝܟܰܢܳܐ ܡܶܫܬܰܩܠܳܐ ܡܶܢܗܽܘܢ ܦܰܗܪܶܣܺܝܰܐ ܘܠܶܫܳܢܳܐ ܕܟܽܠܗܽܘܢ ܒܢܰܝ̈ܢܳܫܳܐ ܩܕܳܡ ܕܰܝܳܢܳܐ. ܘܗܳܘܶܝܢ ܕܠܳܐ ܡܰܦܰܩ ܒܪܽܘܚܳܐ ܥܰܠ ܣܰܟܠܘܴ̈ܬܗܽܘܢ:
ܚܶܪܫܶܬ ܘܠܳܐ ܦܶܬܚܶܬ ܦܽܘܡܝ ܡܶܛܠ ܕܰܐܢܬ ܥܒܰܕܬ. ܐܰܥܒܰܪ ܡܶܢܝ ܢܶܓܕܳܟ܇ ܘܡܶܢܝ ܡܚܽܘܬܳܐ ܕܺܐܝ̈ܕܰܝܟ. ܓܶܡܪܶܬ ܒܡܰܟܣܳܢܽܘܬܳܐ ܕܥܰܠ ܐܰܦܰܝ̈ ܚ̈ܛܳܗܰܝ. ܐܰܝܟ ܚܰܪ̈ܫܶܐ ܕܠܳܐ ܡܡܰܠܠܺܝܢ܆ ܩܳܝܡܺܝܢ ܩܕܳܡ ܕܰܝܳܢܳܐ ܟܽܠܗܽܘܢ ܒܢܰܝ̈ܢܳܫܳܐ. ܡܶܛܠ ܕܡܶܬܦܰܪܣܶܝܢ ܡܽܘ̈ܡܶܐ ܕܡܰܣܟ̈ܠܳܢܶܐ: ܘܡܶܬܓܰܠܝܴ̈ܢ ܚܒܳܪ̈ܳܬܳܐ ܕܥܳܒ̈ܕܰܝ ܥܰܘܠܳܐ. ܗܽܘ ܓܶܝܪ ܥܒܰܕ ܗܳܕܶܐ: ܕܠܳܐ ܢܶܬܛܰܡܪ̈ܳܢ ܟܰܣ̈ܝܳܬܳܐ ܒܛܽܘܫܝܳܐ. ܥܰܠܗܳܝ ܚܳܪܫܺܝܢ ܘܠܳܐ ܦܳܬܚܺܝܢ ܦܽܘܡܳܐ ܩܕܳܡ ܕܰܝܳܢܳܐ. ܐܶܠܳܐ ܡܳܢܳܐ ܡܨܰܠܶܐ ܢܒܺܝܳܐ ܩܕܳܡ ܐܠܰܗܳܐ. ܕܰܐܥܒܰܪ ܡܶܢܝ ܢܶܓܕܳܟ ܘܰܡܚܽܘܬܳܐ ܕܺܐܝ̈ܕܰܝܟ. ܡܶܛܠ ܕܰܒܗܳܢܳܐ ܥܳܠܡܳܐ ܓܶܡܪܶܬ ܘܰܐܘܦܺܝܬ ܘܡܶܬܟܣܶܣ ܐܢܳܐ ܥܰܠ ܐܰܦܰܝ̈ ܚܛܳܗܱ̈ܝ. ܘܠܳܐ ܟܺܐܢܳܐ ܕܗܳܪܟܳܐ ܓܶܡܪܶܬ ܒܝܰܕ ܡܰܟܣܳܢܘܬܐ ܕܥܰܠ ܐܰܦܰܝ̈ ܚܛܳܗܱ̈ܝ. ܘܢܶܬܢܰܛܪ̈ܳܢ ܠܺܝ ܒܕܺܝܢܳܐ ܡܰܚ̈ܘܳܬܳܐ ܕܡܶܛܽܠܳܬܗܽܘܢ. ܘܶܐܠܐ ܚܙܺܝ ܟܡܳܐ ܘܒܶܠܥܶܬ ܐܦ ܐܱܩܶܠ ܥܠܰܝ ܢܶܓܕܳܟ.
ܘܚܽܘܪ ܕܰܪܕܰܝܬ ܓܰܒܪܳܐ ܘܰܐܥܒܰܪܬ ܐܰܝܟ ܚܰܒܬܳܐ ܪ̈ܓܺܝܓܳܬܶܗ. ܘܰܐܝܟ ܠܰܗܓܳܐ ܐܷܢܽܘܢ ܟܽܠܗܽܘܢ ܒܢܰܝ̈ܢܳܫܳܐ. ܬܠܳܬ ܙܰܒܢܺܝ̈ܢ ܕܰܡܺܝ ܒܰܪܢܳܫܳܐ ܠܠܰܗܓܳܐ ܒܡܰܙܡܽܘܪܳܐ ܗܳܢܳܐ. ܟܰܕ ܡܫܰܪܶܐ ܘܰܡܡܰܨܰܥ ܘܰܡܫܰܠܶܡ. ܘܰܡܚܰܘܶܐ ܕܡܶܢ ܠܰܗܓܳܐ ܫܰܪܺܝܘ܆ ܘܰܐܝܟ ܠܰܗܓܳܐ ܡܫܰܠܡܺܝܢ. ܡܶܛܠ ܕܟܽܠܗܘܢ ܒܢܰܝ̈ܢܳܫܳܐ ܐܱܝܟ ܠܰܗܓܳܐ ܐܷܢܽܘܢ ܩܳܝܡܺܝܢ. ܡܶܛܠ ܕܰܒܨܰܠܡܳܐ ܡܗܰܠܶܟ ܓܰܒܪܳܐ ܘܰܐܝܟ ܠܰܗܓܳܐ ܚܳܡܶܐ.
ܘܰܐܝܟ ܠܰܗܓܳܐ ܐܷܢܽܘܢ ܟܽܠܗܽܘܢ ܒܢܰܝ̈ܢܳܫܳܐ. ܒܝܰܠܕܳܐ ܘܰܒܬܰܪܒܺܝܬܐ ܘܰܒܡܰܘܬܳܐ܆ ܕܡܽܘܬܳܐ ܗܳܕܶܐ ܓܶܝܪ ܡܶܬܚܰܙܝܳܐ ܒܗܽܘܢ. ܟܰܕ ܡܣܰܪܗܒܺܝܢ ܕܢܶܥܒܪܽܘܢ ܩܰܠܺܝܠܐܝ̣ܬ ܒܰܕܡܽܘܬܳܐ ܕܠܰܗܓܳܐ. ܡܶܛܠܗܳܢܳܐ ܟܰܕ ܡܨܰܠܐܷ ܢܒܺܝܳܐ܆ ܕܠܐ ܗܳܟܰܢܳܐ ܢܰܘܦܶܐ. ܐܷܠܐ ܡܦܺܝܣ ܘܳܐܡܰܪ:
ܫܡܰܥ ܡܳܪܝܳܐ ܨܠܽܘܬܝ ܐܦ ܒܳܥܽܘܬܝ. ܘܨܽܘܬܝ ܠܕܶܡܥܰܬܝ܆ ܘܠܐ ܬܷܫܬܽܘܩ ܡܶܛܽܠ ܕܥܳܡܽܘܪܳܐ ܐ̱ܢܳܐ ܥܰܡܳܟ: ܘܬܰܘܬܳܒܳܐ ܐܰܝܟ ܟܽܠܗܘܢ ܐܰܒܴ̈ܗܰܝ. ܗܰܘ ܓܶܝܪ ܕܥܳܡܰܪ ܥܰܡܳܟ܆ ܐܳܦ ܐܶܬܬܰܘܬܰܒ ܒܒܰܝܬܳܟ܆ ܠܐ ܢܶܬܥܛܶܐ ܐܰܝܟ ܠܰܗܓܳܐ: ܐܶܠܐ ܒܥܺܝܘܗܝ܆ ܘܢܶܚܙܶܐ ܦܽܘܪܩܳܢܳܟ. ܘܠܐ ܢܰܕܪܟܰܢܝ ܝܰܘܡܳܐ ܕܥܽܘܢܕܳܢܳܐ. ܟܰܕ ܠܐ ܦܪܺܝܩ ܐ̱ܢܳܐ ܐܳܦ ܡܚܰܪܰܪ ܐܢܳܐ ܡܶܢ ܒܺܝܫܬܳܐ.
ܐܶܠܐ ܦܪܽܘܩܰܝܢܝ܆ ܘܶܐܬܬܢܺܝܚ. ܘܡܳܐ ܕܶܝܢ ܕܶܐܬܚܙܺܝ ܦܽܘܪܩܳܢܳܟ ܘܦܰܨܝܰܢܝ: ܦܩܽܘܕ ܠܩܶܨܳܐ܆ ܘܕܳܒܰܪ ܠܺܝ ܐܰܝܟ ܕܰܠܟܽܠܢܳܫ. ܦܪܽܘܩܰܝܢܝ.
ܥܰܕܠܳܐ ܐܳܙܶܠ ܐܢ̣ܳܐ ܘܬܽܘܒ ܠܐ ܐܺܝܬܰܝ. ܡܶܢ ܩܕܳܡ ܕܺܐܝܬܰܝ ܐܰܝܟ ܠܐ ܡܶܕܶܡ܆ ܐܶܫܬܘܶܐ ܠܦܽܘܪܩܳܢܳܟ: ܘܰܐܘܕܶܐ ܠܳܟ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ
ܕܡܰܘܕܰܥ ܥܰܠ ܦܽܘܪܩܳܢܳܐ ܕܰܗܘܳܐ ܠܗܽܘܢ ܠܰܒܢܰܝ̈ܢܳܫܳܐ ܡܶܢ ܡܰܘܬܳܐ ܘܰܚܒܳܠܳܐ ܒܝܰܕ ܓܶܠܝܳܢܶܗ ܕܥܰܡܰܢܽܘܐܝܠ: ܘܥܰܠ ܡܶܐܬܺܝܬܶܗ ܕܒܰܒܣܰܪ ܕܰܐܠܳܗܳܐ: ܘܥܰܠ ܕܶܒܚܷ̈ܐ ܢܳܡܽܘ̈ܣܳܝܶܐ ܕܠܳܐ ܣܳܠܩܺܝܢ ܗܘܰܘ ܠܨܶܒܝܳܢܳܐ ܕܰܐܠܳܗܳܐ.
ܪܶܓܬܳܐ ܕܣܰܒܪܳܐ ܫܡܰܝܳܢܳܐ ܘܚܽܘܒܳܐ ܕܡܶܬܦܰܢܝܳܢܽܘܬܳܐ ܕܰܠܘܳܬ ܐܠܰܗܳܐ܆ ܣܳܐܷܡ ܛܽܘܒܳܢܳܐ ܕܰܘܝܕ ܩܕܳܡ ܐܰܝܠܝܢ ܕܰܡܣܰܒܪܺܝܢ ܒܡܳܪܝܳܐ܆ ܠܳܐ ܢܳܦܠܺܝܢ ܡܶܢ ܣܰܒܪܗܽܘܢ܆ ܘܰܟܡܳܐ ܐܶܢ ܢܶܗܘܽܘܢ ܕܰܚܒܺܝܫܺܝܢ ܒܓܰܘ ܓܽܘܒܳܐ ܕܕܽܘܘܳܢܳܐ. ܦܫܺܝܛܳܐ ܗܺܝ ܠܘܳܬܗܽܘܢ ܐܺܝܕܳܐ ܕܰܐܠܳܗܳܐ ܕܰܬܕܰܠܶܐ ܐܶܢܘܢ ܘܬܰܣܶܩ ܐܶܢܘܢ ܡܶܛܠ ܣܰܒܪܗܽܘܢ ܕܒܰܐܠܳܗܳܐ. ܚܢܰܢ ܕܶܝܢ ܟܰܕ ܠܳܐ ܫܳܕܺܝܢܰܢ ܠܪܽܘܚܩܳܐ ܡܶܢ ܢܺܝܫܳܐ ܕܣܺܝܡ ܠܰܢ. ܠܦܽܘܫܳܩܳܗ̇ ܕܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܩܳܪܒܺܝܢܰܢ. ܟܰܕ ܗܳܟܺܝܠ ܡܰܘܕܶܐ ܛܽܘܒܳܢܳܐ ܥܰܠ ܢܰܦܫܶܗ. ܕܰܐܚܺܝܕ ܒܣܰܒܪܳܐ ܕܰܐܠܳܗܳܐ. ܘܰܡܚܰܘܶܐ ܕܣܰܒܰܪ ܒܡܳܪܝܳܐ ܘܫܰܡܥܶܗ. ܐܳܡܰܪ
ܡܣܰܒܳܪܽܘ ܣܰܒܪܶܬ ܒܡܳܪܝܳܐ. ܡܳܢܰܘ ܕܶܝܢ ܣܰܒܪܳܐ ܕܳܐܡܰܪ ܥܠܰܘܗܝ. ܘܡܶܛܽܠܡܳܢܳܐ ܡܣܰܒܰܪ ܗܘܳܐ. ܘܡܳܢܳܐ ܒܳܥܶܐ ܕܢܶܫܟܰܚ ܒܣܰܒܪܶܗ ܠܘܳܬ ܐܰܠܗܳܐ. ܣܰܒܪܳܐ ܓܶܝܪ ܡܶܕܶܡ ܒܳܥܶܐ ܕܢܶܫܟܰܚ ܡܶܢ ܠܘܳܬ ܗܰܘ ܕܚܳܐܱܪ ܨܶܐܕܰܘܗܝ ܗܰܘ ܕܰܡܣܰܒܰܪ܆ ܐܺܝܬ ܓܶܝܪ ܕܒܳܥܶܐ ܕܢܺܐܬܶܐ ܠܘܳܬ ܪܺܝܫܳܢܽܘܬܳܐ. ܥܰܠ ܣܰܒܪܳܐ ܕܰܐܝܟ ܗܳܢܳܐ. ܝܳܬܶܒ ܒܬܰܪܥܳܐ ܕܡܰܠܟܽܘܬܳܐ܆ ܘܰܡܝܰܩܰܪ ܠܡܰܠܟܳܐ ܘܦܳܠܰܚ܆ ܟܰܕ ܡܣܰܒܰܪ ܕܦܳܓܥܺܝܢ ܒܶܗ ܕܰܪ̈ܓܶܐ ܕܪܺܝܫܳܢܽܘܬܳܐ. ܘܡܳܐ ܕܶܐܫܟܰܚ ܪܶܓܬܶܗ ܕܢܶܦܩܰܬ ܠܰܥܒܳܕܳܐ܆ ܡܶܬܬܢܺܝܚ ܘܚܳܕܶܐ ܕܠܳܐ ܢܳܦܶܠ ܡܶܢ ܣܰܒܪܶܗ ܘܣܽܘܟܳܝܶܗ. ܥܰܠ ܣܰܒܪܳܐ ܬܽܘܒ ܣܳܝܡܺܝܢ ܬܰܓܳܪ̈ܶܐ ܡܰܘܒܠܰܝ̈ܗܽܘܢ ܒܶܐܠܦܷ̈ܐ ܘܪܳܕܶܝܢ ܒܓܰܘ ܝܰܡܳܐ. ܘܪܳܗܛܺܝܢ ܒܳܬܰܪ ܥܽܘܬܪܳܐ ܥܰܠ ܣܰܒܪܳܐ. ܥܕܰܡܳܐ ܕܡܶܫܟܚܺܝܢ ܗܰܘ ܡܶܕܶܡ ܕܰܡܣܰܒܪܺܝܢ. ܥܰܠ ܣܰܒܪܳܐ ܬܽܘܒ ܙܳܪܥܺܝܢ ܐܰܟܳܪ̈ܶܐ ܙܰܪ̈ܥܰܝܗܽܘܢ ܒܰܚܛܽܘ̈ܛܶܐ ܘܛܳܡܪܺܝܢ ܦܶܪ̈ܕܰܝܗܽܘܢ ܒܓܰܘ ܥܰܦܪܳܐ ܘܰܡܣܰܟܶܝܢ ܠܝܰܘܡܳܐ ܕܰܥܠܰܠܬܳܐ ܕܒܶܗ ܢܶܬܦܰܪܥܽܘܢ ܓܽܘ̈ܥܠܳܢܰܝܗܽܘܢ ܘܶܐܫܛܳܪ̈ܰܝܗܽܘܢ ܡܳܕܶܝܢ ܛܽܘܒܳܢܳܐ ܕܰܘܝܕ ܡܚܰܘܶܐ ܕܣܰܒܰܪ ܒܡܳܪܝܳܐ. ܘܶܐܫܟܰܚ ܗܰܘ ܡܶܕܶܡ ܕܰܡܣܰܒܰܪ ܗܘܳܐ. ܡܣܰܒܰܪ ܗܘܳܐ ܘܰܡܩܰܪܶܒ ܒܳܥܽܘܬܳܐ ܩܕܳܡ ܐܰܠܗܳܐ. ܕܢܶܣܰܩ ܡܶܢ ܓܽܘܒܳܐ ܕܕܽܘܘܳܢܳܐ. ܗܰܘ ܕܺܐܝܬܰܘܗܝ ܡܰܘܬܳܐ ܬܶܢܝܳܢܳܐ. ܡܨܰܠܶܐ ܘܒܳܥܶܐ ܘܡܶܬܟܰܫܰܦ ܕܢܶܬܕܰܠܶܐ ܡܶܢ ܣܝܳܢܳܐ ܕܰܚܒܳܠܳܐ ܗܰܘ ܕܺܐܝܬܰܘܗܝ ܦܽܘܠܦܳܠܳܐ ܕܰܚܛܺܝܬܳܐ. ܘܠܳܐ ܬܺܐܡܰܪ ܕܗܳܠܶܝܢ ܠܰܘ ܗܳܟܰܢܳܐ ܐܶܢܶܝܢ܆ ܐܳܦ ܓܶܝܪ ܡܚܰܪܰܪ ܗܘܳܐ ܕܰܘܝܕ ܡܶܢ ܨܳܐܬܳܐ ܕܰܚܛܺܝܬܳܐ. ܐܶܠܳܐ ܟܺܐܒ̈ܐ ܗܳܢܽܘܢ ܕܰܡܫܰܥܒܕܺܝܢ ܗܘܰܘ ܠܒܺܝ̈ܫܳܬܳܐ. ܡܶܛܠ ܕܒܳܥܽܘܬܳܐ ܚܠܳܦ ܕܰܟܝܽܘܬܶܗ ܕܰܟܝܳܢܳܐ ܐܢܳܫܳܝܳܐ ܡܩܰܪܶܒ ܗܘܳܐ܆ ܟܺܐܢܳܐܝܬ ܡܰܘܕܶܐ ܕܶܐܫܬܡܰܥ ܘܡܶܢ ܡܰܘܕܝܳܢܽܘܬܳܐ ܕܰܥܒܰܕ ܚܠܳܦ ܡܶܬܩܰܒܠܳܢܽܘܬܳܐ ܕܒܳܥܽܘܬܶܗ. ܝܳܠܦܺܝܢܰܢ ܗܳܠܶܝܢ ܕܶܐܬܶܐܡܰܪ̈ܝ. ܕܰܒܗܳܢܳܐ ܢܺܝܫܳܐ ܨܰܠܺܝ ܘܰܒܥܳܐ ܡܶܢ ܡܳܪܝܳܐ ܐܶܡܰܪ ܓܶܝܪ:
ܡܣܰܒܳܪܽܘ ܣܰܒܪܶܬ ܒܡܳܪܝܳܐ. ܡܳܢܳܐ ܕܶܝܢ ܡܶܬܦܰܫܰܩ ܕܒܳܥܶܐ ܗܘܳܐ. ܓܰܠܝܳܐ ܗ̱ܝ ܕܗܰܘ ܡܶܕܶܡ ܕܡܰܝܬܶܐ ܒܣܶܕܪܳܐ ܕܙܽܘܡܳܪܶܗ.
ܕܶܐܬܦܢܺܝ ܠܘܳܬܝ ܘܰܫܡܰܥ ܒܳܥܽܘܬܝ: ܐܳܦ ܐܰܣܩܰܢܝ ܡܶܢ ܓܽܘܒܳܐ ܕܕܽܘܘܳܢܳܐ. ܘܡܶܢ ܣܝܳܢܳܐ ܕܰܚܒܳܠܳܐ. ܚܙܰܝܬ ܕܡܶܛܽܠ ܗܳܠܶܝܢ ܡܨܰܠܶܐ ܗܘܳܐ. ܫܡܰܥ ܠܗܳܝ ܕܶܐܡܰܪ: ܐܶܬܦܢܺܝ ܠܘܳܬܝ ܘܰܫܡܰܥ ܒܳܥܽܘܬܝ. ܡܳܕܶܝܢ ܗܘܳܬ ܒܳܥܽܘܬܶܗ ܕܢܶܣܰܩ ܟܝܳܢܳܐ ܐܢܳܫܳܝܳܐ ܡܶܢ ܗܰܘ ܓܽܘܒܳܐ ܕܰܐܒܕܳܢܳܐ. ܕܰܚܦܰܪ ܠܶܗ ܚܶܘܝܳܐ ܡܶܬܝܰܕܥܳܢܳܐ. ܘܰܕܢܶܬܕܰܠܶܐ ܡܶܢ ܣܝܳܢܳܐ ܕܰܚܒܳܠܳܐ. ܘܡܶܛܠ ܕܰܘܝܕ ܓܶܠܝܳܢܳܐ ܩܰܒܶܠ ܢܒܺܝܳܐ. ܕܰܐܝܟ ܕܶܐܬܟܰܫܰܦ ܘܰܒܥܳܐ ܡܶܢ ܐܰܠܳܗܳܐ ܗܳܟܰܢܳܐ ܡܶܫܬܡܰܥ. ܡܶܟܺܝܠ ܐܰܝܟ ܗܰܘ ܕܰܗܘܳܬ ܠܶܗ ܡܶܢܟܰܕܽܘ ܝܰܠܦܶܗ ܝܕܰܥ ܗܘܳܐ ܓܶܝܪ ܢܒܺܝܳܐ. ܕܟܽܠܡܶܕܶܡ ܕܡܶܬܪܰܥܶܐ ܐܰܠܗܳܐ ܕܢܶܥܒܶܕ܆ ܠܳܐ ܡܶܫܟܚܳܐ ܕܠܳܐ ܢܺܐܬܶܐ ܠܰܥܒܳܕܳܐ. ܡܶܛܠ ܕܚܳܙܶܐ ܗܰܝܡܳܢܽܘܬܳܐ ܕܥܰܡ̈ܡܶܐ ܕܣܺܝܡܳܐ ܥܰܠ ܗܰܘ ܫܽܘܥܳܐ ܕܒܶܝܬ ܦܶܛܪܽܘܣ ܡܰܥܶܠ ܒܳܬܪܶܗ ܦܽܘܪܩܳܢܳܐ ܘܡܰܣܩܬܳܐ ܕܡܶܢ ܓܽܘܒܳܐ ܕܕܽܘܘܳܢܳܐ ܘܳܐܡܰܪ:
ܐܰܩܺܝܡ ܥܰܠ ܫܽܘܥܳܐ ܪ̈ܶܓܠܰܝ: ܘܰܐܬܩܶܢ ܗܰܠܟܴ̈ܬܝ. ܝܰܗܒ ܒܦܽܘܡܝ ܬܶܫܒܽܘܚܬܳܐ ܚܕܰܬܳܐ ܬܶܫܒܽܘܚܬܳܐ ܠܰܐܠܳܗܳܐ. ܬܶܫܒܽܘܚܬܳܐ ܕܶܝܢ ܚܕܰܬܳܐ ܡܳܢܳܐ ܘܠܳܐ ܕܢܶܪܢܶܐ ܕܺܐܝܬܶܝܗ̇. ܐܶܠܳܐ ܬܰܘܕܺܝܬܳܐ ܕܥܺܕܬܳܐ ܘܟܳܪܽܘܙܽܘܬܳܐ ܕܰܫܠܺܝ̈ܚܶܐ ܕܰܒܟܽܠܶܗ ܥܳܠܡܳܐ. ܗܳܝ ܕܡܶܛܠ ܕܰܚܙܳܐ ܢܒܺܝܳܐ ܪܰܒܽܘܬܳܗ̇ ܘܦܰܬܝܽܘܬܳܗ̇. ܘܰܕܠܰܘ ܚܰܕ ܥܰܡܳܐ ܒܰܠܚܽܘܕ ܕܺܐܝܬܶܝܗ̇. ܐܶܠܳܐ ܕܥܰܡ̈ܡܶܐ ܣܰܓܺܝ̈ܐܐ. ܓܰܠܝܳܐܝ̣ܬ ܙܰܡܰܪ ܘܶܐܡܰܪ:
ܕܢܶܚܙܽܘܢ ܣܰܓܺܝ̈ܐܐ ܘܢܶܚܕܽܘܢ. ܘܰܢܣܰܒܪܽܘܢ ܒܡܳܪܝܳܐ. ܘܗܳܠܶܝܢ ܐܰܝܟ ܕܣܳܒܰܪ ܐܢܳܐ ܐܳܡܪܺܝܢ:
ܛܽܘܒܰܘܗܝ ܠܒܰܪܢܳܫܳܐ ܕܥܰܠ ܫܡܶܗ ܕܡܳܪܝܳܐ ܬܟܺܝܠ. ܘܠܳܐ ܦܳܢܶܐ ܠܰܣܪܺܝܩܽܘܬܳܐ: ܘܳܐܦܠܳܐ ܠܡܰܡܠܠܳܐ ܕܰܓܳܠܐ. ܠܗܰܘ ܦܽܘܠܚܳܢܳܐ ܣܪܺܝܩܳܐ ܘܰܕܠܳܐ ܝܽܘܬܪܳܢ. ܕܰܦܠܰܚܘ ܥܰܡ̈ܡܶܐ ܩܕܳܡ ܦܬܰܟܪ̈ܶܐ ܚܰܪ̈ܒܶܐ ܡܫܰܡܰܗ܆ ܐܳܦ ܡܰܡܠܠܳܐ ܕܰܓܳܠܐ. ܠܛܳܥܝܽܘܬܳܐ ܕܟܽܘܡܪ̈ܶܐ ܕܳܘܰܝܴ̈ܐ. ܕܡܶܢ ܠܶܒܗܽܘܢ ܡܡܰܠܠܺܝܢ ܗܘܰܘ ܕܰܓܳܠܽܘܬܳܐ. ܕܰܐܝܠܶܝܢ ܕܰܡܝܰܩܪܺܝܢ ܗܘܰܘ ܠܰܢܣܺܝ̈ܟܶܐ ܘܩܶܨ̈ܡܶܐ ܕܛܳܥܝܽܘܬܳܐ ܩܳܨܡܺܝܢ ܗܘܰܘ ܠܗܽܘܢ ܐܰܝܟ ܕܡܶܢ ܦܽܘܡܳܐ ܕܰܐܠܳܗ̈ܐ ܕܰܓܳܠܰܝ̈ ܫܡܳܐ. ܡܶܢ ܒܳܬܰܪ ܕܰܣܚܰܘ ܘܶܐܬܚܰܠܰܠܘ ܡܶܢ ܣܝܳܢܳܐ ܗܰܘ ܕܶܐܡܰܪ ܢܒܺܝܳܐ. ܘܩܳܡܘ ܥܰܠ ܫܽܘܥܳܐ ܫܰܪܺܝܪܳܐ ܕܗܰܝܡܳܢܽܘܬܳܐ. ܘܝܰܗܒ ܬܶܫܒܽܘܚܬܳܐ ܚܕܰܬܳܐ ܠܰܐܠܗܳܐ. ܗܳܝܕܶܝܢ ܐܶܬܢܰܗܰܪ̈ܝ ܥܰܝ̈ܢܶܐ ܕܠܶܒܗܽܘܢ ܕܳܐܡܪܺܝܢ܆ ܛܽܘܒܰܘܗܝ ܠܒܰܪܢܳܫܳܐ ܕܥܰܠ ܫܡܶܗ ܕܡܳܪܝܳܐ ܬܟܺܝܠ܆ ܘܠܳܐ ܦܳܢܶܐ ܠܰܣܪܺܝܩܽܘܬܳܐ ܘܳܐܦܠܳܐ ܠܡܰܡܠܠܳܐ ܕܰܓܳܠܐ. ܡܰܘܕܶܐ ܢܒܺܝܳܐ ܡܶܛܠ ܪܰܒܽܘܬܶܗ ܕܣܽܘܥܪܳܢܳܐ. ܘܰܐܝܟ ܗܰܘ ܕܰܥܒܰܪ ܠܚܰܝܠܳܐ ܕܡܶܫܬܰܥ̈ܝܳܢܶܐ܆ ܡܰܟܪܶܙ ܥܠܰܘܗܝ. ܘܳܐܡܰܪ ܕܣܰܓܺܝ̈ܐܢ ܐܶܢܶܝܢ ܕܰܥܒܰܕܬ ܡܳܪܝܳܐ ܐܰܠܗܳܐ. ܠܳܐ ܠܰܡ ܡܶܫܟܰܚ ܐܢܳܐ ܕܶܐܡܰܠܶܠ ܐܶܢܶܝܢ ܩܕܳܡ ܙܰܒܢܗܶܝܢ. ܠܰܘ ܡܶܛܠ ܬܽܘ̈ܩܳܢܶܐ ܕܰܟܝܴ̈ܢܶܐ ܕܠܳܐ ܡܶܠܬܳܐ ܗܳܕܶܐ ܐܶܡܰܪ: ܐܶܠܳܐ ܡܶܛܠ ܡܕܰܒܪܳܢܽܘܬܳܐ ܕܒܰܒܣܰܪ ܐܶܡܰܪ: ܗܳܝ ܡܰܢ ܕܣܰܓܺܝ̈ܐܢ ܐܶܢܝܢ.
ܬܶܕܡܪ̈ܳܬܳܟ ܘܡܰܚܫ̈ܒܳܬܳܟ ܥܠܰܝܢ ܘܠܰܝܬ ܐܰܟܘܳܬܳܟ. ܐܳܦ ܚܰܘܺܝܬ ܘܶܐܡܰܪܬ ܕܣܰܓܺܝ̈ܐܳܢ ܐܶܢܶܝܢ ܡܶܢ ܡܶܢܝܳܢܳܐ. ܘܡܳܢܳܐ ܐܰܪܰܐ ܚܰܘܺܝ ܠܶܗ܆ ܘܡܳܢܳܐ ܬܽܘܒ ܐܶܡܰܪ ܠܶܗ܆ ܐܶܠܳܐ ܓܰܠܝܳܐ ܗ̱ܺܝ ܕܡܶܛܠ ܣܽܘܪܳܩܳܐ ܕܡܶܬܒܰܪܢܫܳܢܽܘܬܳܐ ܐܶܬܓܠܺܝ ܠܶܗ܆ ܘܰܠܗܳܝ ܕܰܢܚܶܬ ܐܰܠܗܳܐ ܡܶܢ ܫܡܰܝܳܐ܆ ܘܶܐܬܚܒܶܫ ܒܡܰܪܒܥܳܐ. ܗܰܘ ܠܳܐ ܡܶܣܬܰܝܟܳܢܳܐ܆ ܘܰܗܘܳܐ ܥܽܘܠܳܐ ܗܰܘ ܨܳܐܰܪ ܥܽܘ̈ܠܶܐ ܒܟܰܪ̈ܣܳܬܳܐ ܕܰܒܥܺܝ̈ܠܳܬܳܐ. ܘܶܐܬܳܐ ܠܝܰܠܕܳܐ ܗܰܘ ܩܰܫܺܝܫ ܡܶܢܟܽܠ. ܘܶܐܬܬܣܺܝܡ ܒܽܐܘܪܝܳܐ ܕܚܰܝ̈ܘܳܬܳܐ ܗܰܘ ܕܰܟܕܺܝܢܳܐ ܠܐܺܝܩܳܪܶܗ ܡܰܪܟܰܒܬܳܐ ܕܰܟܪ̈ܽܘܒܶܐ ܘܶܐܬܳܐ ܠܡܽܘ̈ܫܚܳܬܳܐ ܐܢܳܫܳܝܴ̈ܬܳܐ ܗܰܘ ܠܳܐ ܡܶܬܡܰܫܚܳܢܳܐ. ܘܶܐܬܩܰܪܰܒ ܠܡܰܘܬܳܐ ܗܰܘ ܠܳܐ ܡܳܝܽܘܬܳܐ. ܘܰܢܚܶܬ ܠܓܰܘ ܩܰܒܪܳܐ ܘܥܰܠ ܠܰܫܝܽܘܠ. ܘܩܳܡ ܕܠܳܐ ܚܒܳܠܳܐ ܡܶܢ ܩܰܒܪܳܐ ܘܶܐܬܥܰܠܺܝ ܠܘܳܬ ܐܰܒܽܘܗܝ ܒܫܽܘܒܚܳܐ ܕܠܳܐ ܡܶܬܡܰܠܰܠ. ܘܥܰܠܺܝ ܘܰܐܘܬܒܰܢ ܥܰܡܶܗ ܒܫܽܘܒܚܳܐ. ܥܰܠ ܗܳܠܶܝܢ ܐܶܡܰܪ ܗܘܳܐ ܕܰܘܺܝܕ ܢܒܺܝܳܐ. ܕܚܰܘܺܝܬ ܘܶܐܡܰܪܬ. ܕܣܰܓܺܝ̈ܐܳܢ ܐܶܢܶܝܢ ܡܶܢ ܡܶܢܝܳܢܳܐ. ܘܥܰܠܗܳܝ ܕܠܳܐ ܨܒܳܐ ܕܰܒܕܶܒ̈ܚܶܐ ܘܰܒܩܽܘܪ̈ܒܳܢܶܐ ܕܰܡܩܰܪܶܒ ܗܘܳܐ ܗܰܘ ܥܰܡܳܐ ܕܢܶܥܒܶܕ ܦܽܘܪܩܳܢܳܐ ܠܥܳܠܡܳܐ. ܐܶܠܳܐ ܗܽܘ ܡܳܪܝܳܐ ܕܶܐܬܳܐ ܡܶܢ ܫܡܰܝܳܐ. ܘܰܗܘܳܐ ܕܶܒܚܳܐ ܚܠܳܦ ܚܰܛܳܝ̈ܐ. ܘܒܰܛܠܶܗ ܠܢܳܡܽܘܣܳܐ ܡܶܢ ܗܳܝ ܕܰܢܩܰܪܶܒ ܕܶܒܚܷ̈ܐ ܕܚܰܝ̈ܘܳܬܳܐ. ܡܶܛܠ ܕܠܳܐ ܐܶܫܟܰܚܘ ܠܰܡܕܰܟܳܝܽܘ ܚܛܳܗ̈ܐ ܕܗܰܘ ܥܰܡܳܐ. ܘܠܳܐ ܠܥܳܠܡܳܐ ܐܰܘܬܰܪܘ ܟܰܕ ܡܶܬܕܰܒܚܺܝܢ. ܐܳܦ ܥܰܠ ܗܳܕܶܐ ܐܰܝܟ ܕܡܶܢ ܦܽܘܡܶܗ ܕܰܒܪܳܐ ܠܘܳܬ ܐܰܒܳܐ܆ ܡܫܰܪܶܐ ܢܒܺܝܳܐ ܕܰܢܡܰܠܶܠ ܗܳܪܟܳܐ:
ܒܕܶܒ̈ܚܶܐ ܘܩܽܘܪ̈ܒܳܢܶܐ ܠܳܐ ܨܒܰܝܬ. ܐܶܕܢܷ̈ܐ ܕܶܝܢ ܢܰܩܶܒܬ ܠܺܝ: ܘܝܰܩ̈ܕܶܐ ܫܰܠܡܷ̈ܐ ܕܰܚܠܳܦ ܚܛܳܗ̈ܐ ܠܐ ܫܶܐܠܬ. ܘܗܳܝܕܶܝܢ ܐܶܡܪܶܬ ܕܗܳܐ ܐܶܬܝ̣ܬ܆ ܕܰܒܪܺܝܫ ܟܬܳܒ̈ܐ ܟܬܺܝܒ ܥܠܰܝ. ܠܡܶܥܒܰܕ ܨܶܒܝܳܢܳܟ ܐܠܰܗܳܐ ܨܒܺܝܬ. ܗܳܠܶܝܢ ܟܽܠܗܶܝܢ ܦܰܘܠܽܘܣ ܗܰܘ ܪܰܒܳܐ ܦܰܫܶܩ ܐܶܢܶܝܢ ܟܰܕ ܡܰܠܶܦ ܠܥܶܒܪ̈ܳܝܶܐ: ܕܰܐܝܕܳܐ ܗ̱ܺܝ ܥܶܠܬܳܐ ܕܠܳܐ ܐܶܫܟܰܚܘ ܕܶܒܚܷ̈ܐ ܕܟܽܘܡܪ̈ܶܐ ܠܰܡܕܰܟܳܝܽܘ ܚܛܳܗ̈ܐ. ܘܰܠܗܳܝ ܕܶܐܡܰܪ ܬܢܳܢ ܢܒܺܝܳܐ. ܐܶܕ̈ܢܶܐ ܕܶܝܢ ܢܰܩܶܒܬ ܠܺܝ܆ ܦܰܫܶܩ ܗܽܘ ܕܠܰܘ ܥܰܠ ܐܶܕ̈ܢܶܐ ܐܰܡܺܝܪܳܐ. ܐܶܠܳܐ ܕܦܰܓܪܳܐ ܕܶܝܢ ܐܰܠܒܶܫܬܳܢܝ. ܐܶܡܰܪ ܓܶܝܪ ܦܰܘܠܽܘܣ ܟܰܕ ܟܳܬܶܒ ܗܘܳܐ ܠܘܳܬ ܥܶܒܪ̈ܳܝܶܐ ܗܳܟܰܢܳܐ: ܠܳܐ ܓܶܝܪ ܡܶܫܟܰܚ ܕܡܳܐ ܕܬܰܘܪ̈ܶܐ ܘܰܕܨܺܝܦܪ̈ܳܝܶܐ ܠܰܡܕܰܟܳܝܽܘ ܚܛܳܗ̈ܐ. ܡܶܛܠ ܕܟܰܕ ܥܳܐܷܠ ܠܥܳܠܡܳܐ ܐܶܡܰܪ: ܒܕܶܒ̈ܚܶܐ ܘܰܒܩܽܘܪ̈ܒܳܢܶܐ ܠܳܐ ܨܒܰܝܬ. ܦܰܓܪܳܐ ܕܶܝܢ ܐܰܠܒܶܫܬܳܢܝ. ܘܝܰܩ̈ܕܶܐ ܫܰܠܡܷ̈ܐ ܕܰܚܠܳܦ ܚܛܳܗ̈ܐ ܠܳܐ ܫܶܐܠܬ. ܗܳܝܕܶܝܢ ܐܶܡܪܶܬ ܕܗܳܐ ܐܶܢܳܐ ܐܳܬܶܐ ܐܢܳܐ ܕܰܒܪܺܝܫ ܟܬܳܒ̈ܐ ܟܬܺܝܒ ܥܠܰܝ. ܕܶܐܥܒܶܕ ܨܶܒܝܳܢܳܟ ܐܰܠܳܗܳܐ (ܥܶܒܪ̈ܳܝܶܐ ܝ: ܕ-ܙ). ܗܳܐ ܓܰܠܝܳܐܝ̣ܬ ܦܰܫܶܩ ܪܽܘܚܳܐ ܐܰܠܳܗܳܝܳܐ ܒܝܰܕ ܛܽܘܒܳܢܳܐ ܦܰܘܠܽܘܣ܆ ܕܗܳܠܶܝܢ ܥܰܠ ܥܰܡܰܢܽܘܐܝܠ ܐܰܡܺܝܪ̈ܳܢ ܒܰܢܒܺܝܽܘܬܳܐ. ܘܰܕܡܶܛܠܗܳܕܶܐ ܐܶܫܬܠܰܚ ܡܶܢ ܐܰܒܳܐ. ܥܰܠ ܕܢܳܦܶܩ ܠܰܥܒܳܕܳܐ ܒܳܥܽܘܬܶܗ ܕܰܢܒܺܝܳܐ: ܗܳܝ ܕܢܶܣܰܩ ܡܶܢ ܓܽܘܒܳܐ ܕܕܽܘܘܳܢܳܐ. ܘܡܶܢ ܣܝܳܢܳܐ ܕܰܚܒܳܠܳܐ. ܠܗܳܠܶܝܢ ܕܶܝܢ ܢܳܡܽܘܣܳܐܝ̣ܬ ܒܓܰܘ ܠܶܒܶܗ ܛܰܫܺܝ ܐܶܢܽܘܢ ܢܒܺܝܳܐ ܟܰܕ ܐܳܡܰܪ:
ܘܢܳܡܽܘܣܳܟ ܒܓܰܘ ܟܰܪܣܝ. ܗܳܕܶܐ ܕܶܝܢ ܘܠܳܐ ܢܺܐܡܰܪ܆ ܗܰܘ ܕܠܳܐ ܡܰܪܚܶܩ ܡܶܢ ܥܽܘܗܕܳܢܶܗ. ܘܰܠܗܳܢܳܐ ܦܫܺܝܩ ܠܶܗ ܕܰܒܓܰܘ ܥܺܕܬܳܐ ܪܰܒܬܳܐ ܕܰܐܠܳܗܳܐ ܢܚܰܘܶܐ ܟܳܪܽܘܙܽܘܬܶܗ ܕܶܐܘܰܢܓܶܠܝܽܘܢ ܐܰܝܟ ܕܶܐܡܰܪ.
ܣܰܒܪܶܬ ܙܰܕܺܝܩܽܘܬܳܟ ܒܥܺܕܬܳܐ ܪܰܒܬܳܐ: ܘܣܶܦ̈ܘܳܬܝ ܠܳܐ ܟܠܺܝܬ. ܡܳܪܝܳܐ ܐܰܢܬ ܝܳܕܰܥ ܐܰܢܬ ܕܠܳܐ ܛܰܫܺܝܬ ܙܰܕܺܝܩܽܘܬܳܟ ܒܓܰܘ ܠܶܒܝ: ܐܶܠܳܐ ܦܽܘܪܩܳܢܳܟ ܐܶܡܪܶܬ. ܘܠܳܐ ܛܰܫܺܝܬ ܛܰܝܒܽܘܬܳܟ ܘܗܰܝܡܳܢܽܘܬܳܟ ܡܶܢ ܥܺܕܬܳܐ ܪܰܒܬܳܐ: ܘܳܐܦ ܐܰܢܬ ܡܳܪܝܳܐ ܠܳܐ ܬܶܟܠܶܐ ܡܶܢܝ ܪ̈ܰܚܡܰܝܟ. ܗܳܠܶܝܢ ܡܚܰܘܶܐ ܢܒܺܝܳܐ ܕܰܐܝܬܺܝ ܠܡܰܟܬܒܳܢܽܘܬܳܐ ܕܓܶܠܝܴ̈ܢܶܐ ܕܩܰܒܶܠ. ܘܰܕܠܳܐ ܟܰܣܺܝ ܒܓܰܘ ܠܶܒܶܗ ܐܪ̈ܳܙܶܐ ܕܶܐܬܦܰܫܰܩܘ ܠܶܗ. ܘܰܕܠܰܘ ܕܗܳܝ ܟܢܽܘܫܬܳܐ ܐܺܝܬܰܝܗܶܝܢ ܗܳܠܶܝܢ ܡܰܘܕܰܥ ܗܘܳܐ ܘܳܐܡܰܪ: ܕܣܰܒܪܶܬ ܙܰܕܺܝܩܽܘܬܳܟ ܒܥܺܕܬܳܐ ܪܰܒܬܳܐ܆ ܘܡܶܛܠ ܗܳܠܶܝܢ ܒܳܥܶܐ ܐ̱ܢܳܐ ܕܠܳܐ ܬܶܟܠܶܐ ܡܶܢܝ ܪ̈ܰܚܡܰܝܟ. ܐܶܠܳܐ ܐܰܓܪܳܐ ܕܰܚܠܳܦ ܗܳܝ ܕܰܐܟܪܙܶܬ ܛܰܝܒܽܘܬܳܟ ܘܗܰܝܡܶܢܽܘܬܳܟ ܠܥܰܡ̈ܡܶܐ.
ܐܶܠܳܐ ܪ̈ܰܚܡܰܝܟ ܘܗܰܝܡܳܢܽܘܬܳܟ ܒܟܽܠܙܒܰܢ ܢܢܰܛܪܽܘܢܳܢܝ. ܡܰܘܕܰܥ ܒܝܰܕ ܗܳܠܶܝܢ܆ ܦܰܪܶܗܣܺܝܰܐ ܕܺܐܝܬ ܠܰܐܝܠܶܝܢ ܕܡܰܠܦܺܝܢ ܡܶܠܬܳܐ ܕܰܐܠܳܗܳܐ ܒܥܺܕܬܶܗ܆ ܕܢܶܒܥܽܘܢ ܡܶܢܶܗ ܐܰܓܪܳܐ ܡܶܢ ܠܘܳܬܶܗ܆ ܕܰܚܠܳܦ ܗܳܕܶܐ. ܕܠܳܐ ܗܘܳܐ ܒܶܠܥܳܕ ܥܰܡ̈ܠܶܐ ܘܽܐܘ̈ܠܨܳܢܶܐ ܡܰܟܪܶܙ. ܗܰܘ ܕܡܰܟܪܶܙ ܐܶܡܰܪ ܓܶܝܪ ܗܳܠܶܝܢ
ܡܶܛܠ ܕܚܰܕܪ̈ܳܢܝ ܒܺܝ̈ܫܳܬܳܐ ܕܠܳܐ ܡܶܢܝܳܢ ܘܰܐܕܪܟܽܘܢܝ ܚܛܳܗܱ̈ܝ ܘܠܳܐ ܐܶܫܟܚܶܬ ܠܡܶܚܙܳܐ: ܘܰܥܫܶܢܘ ܡܶܢ ܣܰܥܪܳܐ ܕܪܺܝܫܝ ܘܠܶܒܝ ܫܰܒܩܰܢܝ. ܒܕܰܐܝܟ ܗܳܠܶܝܢ ܐܽܘ̈ܠܨܳܢܶܐ ܩܳܝܡܺܝܢ ܐܰܝܠܶܝܢ ܕܰܡܡܰܠܠܺܝܢ ܡܶܠܬܳܐ ܕܰܐܠܳܗܳܐ. ܥܕܰܡܳܐ ܕܰܢܣܰܒܪܽܘܢ ܕܡܶܛܠ ܚܛܳܗ̈ܐ ܡܣܰܝܒܪܺܝܢ ܐܽܘ̈ܠܨܳܢܶܐ. ܐܶܠܳܐ ܦܫܺܝܩܳܐܝ̣ܬ ܐܶܡܰܪ ܢܒܺܝܳܐ ܕܰܢܨܰܠܽܘܢ ܟܰܕ ܐܳܡܪܺܝܢ:
ܨܒܺܝ ܡܳܪܝܳܐ ܠܰܡܦܰܨܳܝܽܘܬܝ: ܡܳܪܝܳܐ ܠܥܽܘܕܪܳܢܝ ܟܰܬܰܪ܆ ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܒܳܥܶܝܢ ܠܡܶܩܛܰܠ ܠܢܰܦܫܝ: ܢܶܗܦܟܽܘܢ ܠܒܶܣܬܰܪܗܽܘܢ ܘܢܰܚܦܪܽܘܢ. ܐܰܝܠܶܝܢ ܕܨܳܒܶܝܢ ܠܒܺܝܫܬܝ: ܘܢܶܬܡܗܽܘܢ ܒܬܶܢܝܳܐ ܕܒܶܗܬܰܬܗܽܘܢ. ܐܰܝܠܶܝܢ ܕܶܐܡܰܪܘ ܥܠܰܝ ܐܶܗܶܐ ܐܶܗܶܐ. ܗܳܠܶܝܢ ܟܽܠܗܶܝܢ ܥܰܠ ܒܥܶܠܕ̈ܒܳܒܶܐ ܕܚܰܝܰܝ̈ܢ ܡܨܰܠܶܐ ܢܒܺܝܳܐ ܕܢܶܣܒܠܽܘܢ. ܘܠܰܘ ܡܶܛܠ ܒܢܰܝ̈ܢܳܫܳܐ ܐܳܡܰܪ: ܐܰܝܠܶܝܢ ܓܶܝܪ ܕܒܳܥܶܝܢ ܠܡܶܩܛܰܠ ܠܢܰܦܫܝ ܓܳܠܝܳܐ ܗܝ ܗܳܕܶܐ ܕܫܺܐܕ̈ܐ ܐܶܢܽܘܢ. ܘܗܶܢܽܘܢ ܐܶܡܰܪܘ ܐܶܗܶܐ ܐܶܗܶܐ ܥܰܠ ܡܰܦܽܘܠܬܳܐ ܕܳܐܕܳܡ ܕܰܗܘܳܬ ܒܦܰܪܕܰܝܣܳܐ. ܘܟܰܕ ܗܳܠܶܝܢ ܐܶܡܰܪ ܢܒܺܝܳܐ. ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܨܳܒܶܝܢ ܠܒܺܝܫܬܰܢ ܕܢܶܚܕܽܘܢ ܡܰܠܐܟ̈ܐ ܩܰܕܺܝ̈ܫܶܐ ܡܙܰܡܰܪ ܟܰܕ ܚܳܙܶܝܢ ܡܰܢ ܩܝܳܡܬܰܢ.
ܢܶܚܕܽܘܢ ܒܳܟ ܐܰܝܠܶܝܢ ܕܒܳܥܶܝܢ ܠܳܟ. ܘܢܺܐܡܪܽܘܢ ܒܟܽܠܙܒܰܢ ܕܪܰܒ ܗܽܘ ܡܳܪܝܳܐ: ܐܰܝܠܶܝܢ ܕܪܳܚܡܺܝܢ ܦܽܘܪܩܳܢܳܟ. ܐܳܦ ܓܶܝܪ ܗܳܢܽܘܢ ܕܡܶܬܦܰܪܩܺܝܢ ܡܶܬܕܟܰܪ ܢܒܺܝܳܐ. ܒܰܕܪܳܚܡܺܝܢ ܠܶܗ ܠܦܽܘܪܩܳܢܳܐ ܚܳܕܶܝܢ. ܘܚܳܕܶܝܢ ܡܰܠܐܟ̈ܐ ܟܰܕ ܚܳܙܶܝܢ ܟܶܢ̈ܫܶܐ ܕܚܰܛܳܝ̈ܐ ܕܡܶܬܦܰܪܩܺܝܢ. ܒܗܳܝ ܕܟܽܠܗܽܘܢ ܟܺܐܢ̈ܐ ܡܣܰܟܶܝܢ ܗܘܰܘ ܕܢܺܐܬܶܐ ܦܳܪܽܘܩܳܐ ܠܚܰܛܳܝ̈ܐ. ܘܳܐܡܰܪ ܢܒܺܝܳܐ:
ܘܶܐܢܳܐ ܡܶܣܟܺܢܳܐ ܐܢܳܐ ܘܒܳܝܫܳܐ: ܡܳܪܝ ܐܶܬܚܰܫܒܘ ܥܠܰܝ. ܗܳܕܶܐ ܥܰܠ ܡܰܚܫܰܒܬܳܐ ܕܗܳܢܽܘܢ ܕܰܠܩܽܘܒܠܳܐ ܐܳܡܰܪ: ܕܠܳܐ ܫܳܠܶܝܢ ܡܶܢ ܗܳܝ ܕܢܶܬܚܰܫܒܽܘܢ ܠܡܶܛܡܰܪ ܦܰܚ̈ܐ ܠܙܰܕܺܝ̈ܩܶܐ. ܐܶܠܳܐ ܟܰܕ ܡܶܬܓܰܘܣܺܝܢ ܒܚܰܝܠܳܐ ܕܰܐܠܳܗܳܐ ܐܳܡܪܺܝܢ.
ܡܥܰܕܪܳܢܝ ܐܰܢܬ ܘܰܡܦܰܨܝܳܢܝ ܐܰܠܳܗܝ ܠܳܐ ܬܰܘܚܰܪ. ܕܗܽܘܝܽܘ ܡܥܰܕܪܳܢܳܐ ܘܰܡܦܰܨܝܳܢܳܐ ܕܶܐܬܳܐ ܘܰܦܪܰܩ ܠܥܳܠܡܳܐ. ܕܠܶܗ ܫܽܘܒܚܶܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܚܕ
ܗܰܘ ܕܡܰܘܕܰܥ ܡܰܪܬܝܳܢܽܘܬܳܐ ܠܘܳܬ ܪ̈ܳܚܡܰܝ ܡܶܣܟ̈ܢܶܐ: ܘܡܰܘܕܰܥ ܥܰܠ ܓܶܠܝܳܢܶܗ ܕܥܰܡܰܢܽܘܐܝܠ: ܘܥܰܠ ܝܺܗܽܘܕܳܐ ܡܰܫܠܡܳܢܳܐ.
ܡܰܠܦܳܢܽܘܬܳܐ ܡܥܰܠܰܝܬܳܐ ܘܡܰܪܬܝܳܢܽܘܬܳܐ ܐܰܠܳܗܳܝܬܳܐ ܡܩܰܪܶܒ ܛܽܘܒܳܢܳܐ ܕܰܘܝܕ ܠܰܐܝܠܶܝܢ ܕܰܪܓܺܝܓܺܝܢ ܠܛܽܘ̈ܒܶܐ ܐܠܗܝ̈ܐ. ܟܰܕ ܡܚܰܦܶܛ ܐܰܝܟ ܕܡܶܢ ܫܽܘܪܳܝܳܐ ܕܫܶܡܥܳܐ. ܕܒܰܐܝܠܶܝܢ ܐܢܳܫ ܗܳܘܶܐ ܛܽܘܒܳܢܳܐ. ܘܟܰܕ ܣܰܓܺܝ̈ܐܐ ܦܽܘ̈ܩܕܳܢܶܐ ܣܳܡ ܗܰܘ ܥܰܡܳܐ ܣܳܐܶܡ ܢܳܡܽܘܣܳܐ ܡܽܘܫܶܐ܇ ܗܳܠܝܢ ܕܰܒܗܽܘܢ ܡܶܫܬܰܪܰܪ ܗܘܳܐ ܐܢܳܫ. ܟܰܕ ܢܳܛܰܪ ܠܗܽܘܢ ܒܚܽܘܒܳܐ ܕܰܠܘܳܬ ܐܠܰܗܳܐ. ܘܰܕܠܳܐ ܕܚܰܕ ܡܶܢܗܽܘܢ ܐܰܝܬܺܝ ܛܽܘܒܳܢܳܐ ܕܰܘܝܕ ܥܽܘܗܕܳܢܳܐ ܒܡܰܙܡܽܘܪܳܐ ܗܳܢܳܐ. ܐܶܠܐ ܫܩܰܠ ܕܢܶܬܶܠ ܛܽܘܒܳܐ ܠܡܰܢ ܕܚܳܐܱܪ ܒܶܗ ܒܡܶܣܟܺܢܳܐ. ܘܗܳܕܶܐ ܠܰܘ ܕܠܳܐ ܥܶܠܬܳܐ. ܐܶܫܟܰܚܢܰܢ ܓܶܝܪ ܕܰܒܗܰܘ ܙܰܒܢܳܐ ܕܰܐܩܺܝܡ ܡܦܰܪ̈ܢܣܳܢܶܐ ܥܰܠ ܡܶܣܟܻ̈ܢܶܐ. ܐܶܬܢܰܒܺܝ ܘܡܰܠܶܠ ܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܘܰܚܕܳܐ. ܐܳܡܰܪ ܐ̱ܢܳܐ ܕܶܝܢ܆ ܕܟܰܕ ܩܪܶܒܘ ܝܰܘ̈ܡܰܘܗܝ ܕܛܽܘܒܳܢܳܐ ܕܰܘܝܕ ܠܰܡܡܳܬ܆ ܡܶܛܠ ܕܒܳܥܶܐ ܗܘܳܐ ܕܛܳܒܴ̈ܬܶܗ ܢܺܐܙ̈ܠ̱ܢ ܩܕܳܡܰܘܗܝ ܘܢܺܐܬܝܴ̈ܢ ܒܳܬܪܶܗ. ܓܒܳܐ ܡܶܢ ܠܶܘܳܝ̈ܐ ܐܰܝܠܶܝܢ ܕܺܐܝܬ ܗܘܳܐ ܥܠܰܝܗܽܘܢ ܣܳܗܕܽܘܬܳܐ ܕܟܺܐܢ̈ܐ ܐܶܢܽܘܢ ܘܪ̈ܳܚܡܰܝ ܡܶܣܟܺܢ̈ܐ ܘܰܥܒܰܕ ܐܶܢܘܢ ܡܦܰܪ̈ܢܣܳܢܶܐ ܥܰܠ ܡܶܣܟܺܢ̈ܐ. ܥܰܠ ܥܶܣܪܳܐ ܡܶܣܟܺܢ̈ܐ ܚܰܕ ܣܳܡ ܡܦܰܪܢܣܳܢܳܐ. ܕܡܶܢܗܽܘܢ ܕܗܳܠܶܝܢ ܐܺܝܬܰܝܗܽܘܢ ܗܘܰܘ. ܒܢܰܝ̈ ܠܰܥܕܳܢ ܒܰܪ ܓܶܪܫܽܘܢ ܒܰܪ ܠܶܘܺܝ. ܩܰܫܺܝܫܶܗ ܕܠܰܥܕܳܢ ܢܰܚܠܳܐܝܶܠ. ܘܝܽܘܬܳܡ ܘܝܽܘܐܶܝܠ ܘܰܐܚܪ̈ܳܢܶܐ ܕܶܝܢ ܥܰܡܗܽܘܢ. ܠܗܳܠܶܝܢ ܟܰܕ ܐܰܩܺܝܡ ܕܰܘܺܝܕ ܥܰܠ ܦܽܘܪܢܳܣܳܐ ܕܡܶܣܟܺܢ̈ܐ. ܒܩܰܪܺܝܒܽܘܬܳܐ ܕܣܳܒ̈ܐ ܕܺܝܣܪܳܐܝܠ܆ ܡܰܠܶܠ ܬܶܫܒܽܘܚܬܳܐ ܗܳܕܶܐ ܠܥܺܝ̈ܢܰܝܗܽܘܢ܆ ܟܰܕ ܩܳܝܡܺܝܢ ܟܳܗܢ̈ܐ ܘܠܶܘܳܝ̈ܐ ܘܡܰܪܬܶܐ ܗܘܳܐ ܠܗܽܘܢ܆ ܕܟܽܠܢܳܫ ܢܶܫܬܰܘܬܰܦ ܒܛܳܒܴ̈ܬܳܐ ܕܪܶܚܡܰܬ ܡܶܣܟܺܢ̈ܐ ܘܥܰܠܗܳܕܶܐ ܐܳܡܰܪ ܗܘܳܐ:
ܛܽܘܒܰܘܗܝ ܠܡܰܢ ܕܚܳܐܱܪ ܒܡܶܣܟܺܢܳܐ. ܒܛܽܘܒܳܐ ܕܶܝܢ ܠܰܝܬ ܡܶܕܶܡ ܕܰܠܩܽܘܒܠܳܐ. ܐܶܠܳܐ ܗܰܘ ܕܩܳܡ ܒܛܽܘܒܳܐ. ܦܰܫܶܩ ܕܶܐܡܰܬܝ ܐܢܳܫ ܢܳܣܶܒ ܐܰܓܪܳܐ ܕܰܚܠܳܦ ܛܽܘܒܳܐ ܗܳܢܳܐ.
ܒܝܰܘܡܳܐ ܕܒܺܝܫܬܳܐ ܢܦܰܠܛܺܝܘܗܝ ܡܳܪܝܳܐ. ܐܰܝܢܳܐ ܐܺܝܬܰܘܗܝ ܝܰܘܡܳܐ ܕܒܺܝܫܬܳܐ. ܒܗܳܢܳܐ ܥܳܠܡܳܐ ܣܰܓܺܝܰܐܬ ܢܺܝ̈ܫܶܐ ܡܶܬܐܰܡܪܳܐ ܒܺܝܫܬܳܐ. ܕܢܶܫܬܰܥܒܰܕ ܐܢܳܫ ܠܰܒܥܶܠܕ̈ܒܳܒܶܐ. ܕܢܶܗܘܶܐ ܒܟܽܘܪܗܳܢܳܐ. ܕܢܶܦܶܠ ܒܺܐܝ̈ܕܰܝ ܓܰܝܴ̈ܣܶܐ. ܕܢܶܬܢܰܣܶܐ ܒܚܰܣܺܝܪܽܘܬܳܐ. ܒܪܰܡ ܕܶܝܢ ܐܳܦ ܗܽܘ ܡܙܰܡܪܳܢܳܐ. ܩܰܪܶܒ ܐܶܢܶܝܢ ܠܗܳܠܶܝܢ ܠܥܽܘܗܕܳܢܳܐ ܕܡܶܠܬܳܐ. ܠܽܘܩܕܰܡ ܝܰܗܒܠܶܗ ܗܳܝ ܕܢܶܬܢܛܰܪ ܘܗܳܝ ܕܢܺܚܶܐ.
ܡܳܪܝܳܐ ܢܢܰܛܪܺܝܘܗܝ ܘܢܰܐܚܶܝܘܗܝ ܘܢܰܐܛܶܒ ܠܶܗ ܒܰܐܪܥܳܐ. ܘܪܺܝܫܺܝܬܳܐ ܕܛܳܒܴ̈ܬܳܐ ܐܳܦ ܕܛܽܘܒܳܐ ܗܳܕܳܐ ܗܝ܆ ܕܢܺܚܶܐ ܐܢܳܫ ܟܰܕ ܢܶܬܢܛܰܪ ܡܶܢ ܡܳܪܝܳܐ. ܝܰܬܺܝܪܳܐܝܬ ܕܰܒܗܳܝ ܐܰܪܥܳܐ ܡܟܰܬܪܳܢܺܝܬܳܐ ܕܳܡܝܳܐ ܕܡܰܚܶܐ ܠܶܗ ܡܳܪܝܳܐ.
ܘܠܳܐ ܢܰܫܠܡܺܝܘܗܝ ܠܰܒܥܶܠܕ̈ܒܳܒܰܘܗܝ. ܘܰܒܗܳܢܳܐ ܥܳܠܡܳܐ ܛܳܒ ܣܰܓܺܝ ܢܰܩܺܝܦ ܚܰܝܠܳܐ ܕܰܐܠܳܗܳܐ ܠܰܐܝܠܶܝܢ ܕܥܳܒܕܺܝܢ ܛܳܒܴ̈ܬܳܐ ܘܰܡܬܰܪܣܶܝܢ ܠܚܰܣܺܝܪ̈ܶܐ ܘܠܰܣܢܺܝ̈ܩܶܐ. ܕܰܢܦܰܨܶܐ ܐܶܢܽܘܢ ܡܶܢ ܒܶܥܠܕ̈ܒܳܒܰܝܗܽܘܢ. ܒܥܶܠܕ̈ܒܳܒܶܐ ܓܶܝܪ ܕܓܶܢܣܰܢ ܡܰܘܬܳܐ ܘܣܳܛܳܢܳܐ ܐܶܢܽܘܢ. ܡܶܛܠ ܕܒܺܐܝ̈ܕܰܝܗܽܘܢ ܢܳܦܠܺܝܢ ܒܡܰܘܬܳܐ ܟܽܠܗܽܘܢ ܥܳܒ̈ܕܰܝ ܒܺܝ̈ܫܳܬܳܐ. ܡܶܢ ܗܳܠܶܝܢ ܕܶܝܢ ܒܥܶܠܕ̈ܒܳܒܶܐ ܐܶܫܬܰܘܕܺܝ ܐܰܠܳܗܳܐ ܕܰܡܦܰܨܶܐ ܠܰܐܝܠܶܝܢ ܕܰܒܥܰܝܢܳܐ ܛܳܒܬܳܐ ܚܳܝܪܺܝܢ ܒܡܶܣܟܺܢܳܐ. ܐܳܠܨܳܐ ܓܶܝܪ ܕܒܺܐܝ̈ܕܰܝ ܒܥܶܠܕ̈ܒܳܒܶܐ. ܠܳܐ ܢܶܫܬܰܠܡܽܘܢ ܡܪ̈ܰܚܡܳܢܶܐ ܘܥܳܒ̈ܕܰܝ ܛܳܒܴ̈ܬܳܐ. ܬܽܘܒ ܓܶܝܪ ܡܳܐ ܕܡܶܬܚܰܙܝܳܐ ܬܒܰܥܬܳܐ ܡܶܢ ܥܳܒ̈ܕܰܝ ܒܺܝ̈ܫܳܬܳܐ. ܡܶܬܓܰܠܝܳܐ ܛܰܝܒܽܘܬܳܐ ܠܥܳܒ̈ܕܰܝ ܛܳܒܴ̈ܬܳܐ. ܘܥܰܠ ܗܳܕܶܐ ܬܽܘܒ ܡܰܘܣܶܦ ܕܳܐܦ ܡܶܢ ܟܺܐܒ̈ܐ ܘܡܶܢ ܟܽܘܪ̈ܗܳܢܶܐ ܦܳܪܶܩ ܠܰܐܝܠܶܝܢ ܕܡܶܫܬܰܘܬܦܺܝܢ ܒܛܽܘܒܳܐ ܗܳܢܳܐ ܕܪܶܚܡܰܬ ܡܶܣܟܻ̈ܢܶܐ.
ܘܡܳܪܝܳܐ ܢܣܰܡܟܺܝܘܗܝ ܥܰܠ ܥܰܪܣܳܐ ܕܟܺܐܒܰܘ̈ܗܝ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ: ܕܠܰܘ ܡܶܛܠ ܗܳܠܶܝܢ ܕܰܬܢܳܢ ܐܶܡܰܪ ܢܒܺܝܳܐ. ܟܺܐܒ̈ܐ ܓܶܝܪ ܕܒܺܝܫܺܝܢ ܡܶܢ ܕܬܰܘܠܥܳܐ ܕܠܳܐ ܡܳܝܬܳܐ܆ ܘܡܶܢ ܢܽܘܪܳܐ ܕܠܳܐ ܕܳܥܟܳܐ ܠܰܝܬ. ܗܳܠܶܝܢ ܢܰܫܰܪ ܕܶܐܡܰܪ ܢܒܺܝܳܐ. ܕܚܳܐܱܪ ܘܡܰܣܡܶܟ ܠܶܗ ܡܳܪܝܳܐ ܠܗܰܘ ܕܚܳܐܱܪ ܒܡܶܣܟܺܢܳܐ. ܘܡܰܗܦܶܟ ܠܶܗ ܡܶܢ ܟܽܘܪܗܳܢܳܐ ܠܚܽܘܠܡܳܢܳܐ. ܘܡܰܦܢܶܐ ܠܶܗ ܡܶܢ ܡܰܘܬܳܐ ܕܰܠܥܳܠܰܡ ܠܚܰܝ̈ܐ ܕܠܳܐ ܥܳܒܪܺܝܢ. ܘܡܰܦܶܩ ܠܶܗ ܡܶܢ ܚܶܫܽܘܟܳܐ ܠܘܳܬ ܢܽܘܗܪܳܐ ܕܚܰܝ̈ܐ. ܘܰܡܩܰܒܶܠ ܗܳܝ ܐܳܣܝܽܘܬܳܐ ܡܫܰܡܠܰܝܬܳܐ ܕܰܡܚܰܪܪܳܐ ܡܶܢ ܟܺܐܒ̈ܐ. ܐܰܝܟ ܡܶܠܬܳܐ ܢܒܺܝܳܝܬܳܐ ܕܶܐܡܪܰܬ
ܕܟܽܠܶܗ ܡܰܫܟܒܶܗ ܗܦܰܟ ܒܟܽܘܪܗܳܢܳܐ. ܘܒܳܬܰܪ ܗܳܠܶܝܢ ܥܰܠ ܩܢܽܘܡܶܗ ܡܨܰܠܶܐ ܢܒܺܝܳܐ ܘܳܐܡܰܪ:
ܐܶܢܳܐ ܐܶܡܪܬ ܕܰܐܢܬ ܗܽܘ ܡܳܪܝ ܪܰܚܶܡܥܠܰܝ ܘܰܐܣܳܗ̇ ܠܢܰܦܫܝ ܡܶܛܠ ܕܰܚܛܺܝܬ ܠܳܟ. ܚܙܰܝܬ ܐܰܝܟܰܢܳܐ ܦܰܫܶܩ ܢܒܺܝܳܐ ܕܳܐܣܝܽܘܬܳܐ ܕܢܰܦܫܳܐ ܫܶܐܠ ܢܒܺܝܳܐ. ܗܳܝܕܶܝܢ ܓܶܝܪ ܡܶܬܐܰܣܝܳܐ ܢܰܦܫܳܐ. ܡܳܐ ܕܠܳܐ ܗܳܘܝܳܐ ܡܰܥܠܳܢܽܘܬܳܐ ܠܟܽܘܪܗܳܢܳܐ ܕܰܚܛܺܝܬܳܐ ܥܠܶܝܗ̇. ܡܳܕܶܝܢ ܡܶܢ ܒܳܬܰܪ ܚܰܝ̈ܐ ܗܳܠܶܝܢ ܢܳܣܒܳܐ ܐܳܣܝܽܘܬܳܐ. ܐܶܢܗܽܘ ܕܠܳܐ ܐܶܬܛܰܢܦܰܬ ܒܰܥ̈ܒܳܕܶܐ ܕܒܶܣܪܳܐ. ܕܶܐܢ ܡܰܢ ܒܩܰܕܺܝܫܽܘܬܳܐ ܡܶܬܗܰܦܟܳܐ ܗܘܳܬ ܒܚܰܝ̈ܐ ܕܰܬܢܳܢ. ܡܩܰܒܠܺܝܢ ܠܳܗ̇ ܠܰܐܬܪ̈ܰܘܳܬܳܐ ܗܳܢܽܘܢ ܕܢܽܘܗܪܳܐ. ܘܡܶܬܕܰܒܪܳܐ ܡܶܢ ܡܰܠܐܟ̈ܐ ܩܰܕܺܝ̈ܫܶܐ ܥܕܰܡܳܐ ܕܗܳܘܶܐ ܫܽܘܠܳܡܳܐ ܘܡܳܐ ܕܰܗܘܳܐ ܫܽܘܠܳܡܳܐ. ܢܳܣܒܳܐ ܗܺܝ ܢܰܦܫܳܐ ܫܽܘܡܠܳܝܳܐ. ܗܳܢܰܘ ܠܰܘ ܡܶܟܺܝܠ ܡܶܢ ܐܚܪ̈ܳܢܶܐ ܡܶܬܕܰܒܪܳܐ ܘܡܶܫܬܰܡܫܳܐ. ܐܶܠܳܐ ܗܺܝ ܡܶܢܳܗ̇ ܠܘܳܬ ܪܶܗܛܳܐ ܕܰܡܥܰܠܝܴ̈ܬܳܐ ܡܶܫܬܰܘܫܛܳܐ ܘܡܶܬܩܰܪܒܳܐ. ܗܳܕܶܐ ܗ̱ܺܝ ܓܶܝܪ ܡܰܠܟܽܘܬܳܐ ܕܰܫܡܰܝܳܐ ܕܡܶܬܝܰܗܒܳܐ ܠܩܰܕܺܝ̈ܫܶܐ ܒܥܳܠܡܳܐ ܚܰܕܬܳܐ. ܘܠܰܘ ܕܠܳܐ ܢܳܛܽܘܪ̈ܶܐ ܐܺܝܬܰܝܗܶܝܢ ܢܰܦ̈ܫܳܬܳܐ ܡܶܢ ܒܳܬܰܪ ܡܰܦܩܳܢܗܶܝܢ ܕܡܶܟܳܐ. ܐܶܠܳܐ ܡܶܢ ܡܰܠܐܟ̈ܐ ܡܶܬܢܰܛܪ̈ܳܢ ܒܥܳܠܡܗܶܝܢ. ܡܶܛܠ ܬܰܪܬܶܝܢ܆ ܕܶܐܢ ܡܰܢ ܕܩܰܕܺܝ̈ܫܶܐ ܐܺܝܬܰܝܗܽܘܢ ܕܠܳܐ ܢܶܫܬܰܒܩܽܘܢ ܕܰܝ̈ܘܶܐ ܢܶܣܥܽܘܢ ܥܠܰܝܗܶܝܢ. ܘܬܽܘܒ ܕܠܳܐ ܢܶܪܗܛܽܘܢ ܠܰܐܬܪ̈ܰܘܳܬܳܐ ܥܶܠܳܝܷ̈ܐ ܩܕܳܡ ܕܢܶܗܘܶܐ ܕܺܝܢܳܐ. ܘܡܶܛܠ ܕܢܶܫܬܘܶܐ ܢܒܺܝܳܐ ܛܽܘܒܳܢܳܐ ܠܚܽܘܠܡܳܢܳܐ ܕܢܰܦܫܳܐ ܡܨܰܠܶܐ ܗܘܳܐ. ܥܰܠ ܕܡܳܐ ܕܰܢܦܰܩ ܡܶܢ ܥܳܠܡܳܐ ܗܳܢܳܐ. ܢܶܗܘܶܐ ܡܕܰܝܰܪ ܥܰܡ ܚܰܝ̈ܠܰܘܳܬܳܐ ܩܰܕܺܝ̈ܫܶܐ ܒܰܐܬܪ̈ܰܘܳܬܳܐ ܢܰܗܺܝܪ̈ܶܐ. ܘܢܶܬܦܢܶܐ ܠܘܳܬ ܛܽܘܒܳܐ ܕܰܒܪܺܝܫ ܗܳܢܳܐ ܡܰܙܡܽܘܪܳܐ. ܘܚܰܬܺܝܬܳܐܝ̣ܬ ܢܥܰܩܒܺܝܘܗܝ ܘܰܢܫܰܐܷܠ ܕܶܐܢ ܒܰܫܪܳܪܳܐ ܐܺܝܬ ܛܽܘܒܳܐ ܠܟܽܠܡܰܢ ܕܚܳܐܱܪ ܒܡܶܣܟܺܢܳܐ. ܛܽܘܒܳܐ ܐܰܝܢܳܐ ܕܡܶܢ ܪܽܘܚܳܐ ܐܶܬܝ̣ܗܶܒ. ܡܳܕܶܝܢ ܘܚܰܢܦ̈ܐ ܘܺܐܝܪ̈ܺܝܛܺܝܩܘ ܡܶܫܬܰܟܚܺܝܢ ܒܗܽܘܢ ܡܪ̈ܰܚܡܳܢܶܐ ܕܰܡܬܰܪܣܺܝܢ ܠܡܶܣܟܺܢ̈ܐ. ܐܰܪܰܐ ܐܳܦ ܗܳܠܶܝܢ ܠܛܽܘܒܳܐ ܫܳܘܶܝܢ. ܠܳܐ ܐܺܝܬܶܝܗ̇ ܗܳܕܶܐ܆ ܠܳܐ ܓܶܝܪ ܡܶܬܩܰܒ̈ܠܳܢ ܩܕܳܡ ܐܰܠܳܗܳܐ ܡܰܘ̈ܗܒܳܬܳܐ ܕܶܐܝܪ̈ܺܝܛܺܝܩܽܘ ܘܠܳܐ ܒܩܽܘܪ̈ܒܳܢܶܐ ܕܚܰܢܦ̈ܐ ܘܠܳܐ ܒܙܶܕ̈ܩܳܬܗܽܘܢ ܡܶܬܪܰܥܶܐ. ܘܢܶܫܡܰܥ ܠܶܐܫܰܥܝܳܐ ܐܰܝܟܳܐ ܡܰܣܠܶܐ ܘܰܡܛܰܡܰܐ ܠܕܶܒܚܰܝ̈ܗܽܘܢ ܕܰܐܝܠܶܝܢ ܕܳܐܙܺܠ̱ܝܢ ܒܳܬܰܪ ܬܰܪ̈ܥܝܳܬܗܽܘܢ. ܕܢܳܟܶܣ ܠܰܡ ܬܰܘܪܳܐ ܐܰܝܟ ܗܰܘ ܕܩܳܛܶܠ ܓܰܒܪܳܐ. ܕܕܳܒܰܚ ܐܶܡܪܳܐ ܩܕܳܡ ܦܬܰܟܪܳܐ ܐܰܝܟ ܗܰܘ ܕܩܳܛܶܠ ܟܰܠܒܳܐ. ܕܰܡܩܰܪܶܒ ܣܡܺܝܕܳܐ ܐܰܝܟ ܕܡܳܐ ܕܰܚܙܺܝܪܳܐ܆ ܘܕܰܡܩܰܪܶܒ ܠܒܽܘܢܬܳܐ ܐܰܝܟ ܗܰܘ ܕܰܡܒܰܪܶܟ ܠܰܦܬܰܟܪܐ. ܐܳܦ ܐܰܝܠܶܝܢ ܕܶܐܬܪܰܥܺܝܘ ܒܽܐܘܪ̈ܚܳܬܗܽܘܢ ܐܳܦ ܨܒܳܬ ܢܰܦܫܗܽܘܢ ܒܰܦܬܰܟܪ̈ܰܝܗܽܘܢ. ܐܳܦ ܐܶܢܳܐ ܐܶܨܒܶܐ ܒܒܽܘܙܳܚܗܽܘܢ (ܐܫܥܝܐ ܣܘ: ܓ-ܕ). ܠܰܝܬ ܡܳܕܶܝܢ ܛܽܘܒܳܐ ܠܡܰܢ ܕܚܳܐܱܪ ܒܡܶܣܟܺܢܳܐ ܡܳܐ ܕܰܒܨܺܝܪ ܒܗܰܝܡܳܢܽܘܬܳܐ. ܡܶܛܠ ܗܳܢܳܐ ܐܳܠܨܳܐ ܠܰܢ ܕܰܠܘܳܬ ܬܶܐܘܳܪܺܝܰܐ ܪܽܘܚܳܢܳܝܬܳܐ ܢܶܥܛܽܘܦ ܚܰܘܪܳܐ ܕܢܰܦܫܰܢ ܘܢܶܚܙܶܐ ܕܰܐܝܢܰܘ ܡܶܣܟܺܢܳܐ ܗܳܢܳܐ. ܕܶܐܬܺܝܗܶܒ ܛܽܘܒܳܐ ܠܡܰܢ ܕܚܳܐܰܪ ܒܶܗ܆ ܠܐ ܓܶܝܪ ܘܠܳܐ ܕܢܶܚܫܽܘܒ ܠܰܡܙܰܡܪܳܢܳܐ ܕܠܳܐ ܫܰܪܺܝܪ. ܐܶܡܰܪ ܓܶܝܪ ܕܛܽܘܒܰܘܗܝ ܠܡܰܢ ܕܚܳܐܱܪ ܒܡܶܣܟܺܢܳܐ. ܘܰܒܨܰܝܢܰܢ ܘܶܐܫܟܰܚܢܰܢ ܕܰܠܗܰܘ ܕܙܳܐܱܥ ܡܶܢ ܗܰܝܡܳܢܽܘܬܳܐ ܠܰܝܬ ܠܶܗ ܛܽܘܒܳܐ. ܐܳܠܨܳܐ ܠܰܢ ܡܳܕܶܝܢ ܕܢܶܫܟܰܚ ܡܶܣܟܺܢܳܐ. ܗܰܘ ܕܰܡܕܰܟܶܐ ܚܰܘܪܳܐ ܕܰܠܘܳܬܶܗ ܡܶܢܟܽܠ ܢܶܩܦܳܐ ܡܰܚܛܝܳܢܳܐ. ܐܶܢܳܐ ܐܳܡܰܪ ܐ̱ܢܳܐ ܕܠܰܝܬ ܛܽܘܒܳܐ ܒܰܠܚܽܘܕ ܐܶܠܐ ܒܚܰܘܪܳܐ ܕܰܠܘܳܬ ܐܠܰܗܳܐ. ܘܟܽܠ ܚܰܘܪ̈ܺܝܢ ܕܡܶܢ ܗܳܕܶܐ ܚܙܳܬܳܐ ܡܫܰܠܚܺܝܢ. ܠܰܝܬ ܠܗܽܘܢ ܛܽܘܒܳܐ ܪܽܘܚܳܢܳܐ. ܡܳܕܶܝܢ ܛܽܘܒܳܢܳܐ ܕܰܘܝܕ ܠܗܰܘ ܥܰܬܺܝܪܳܐ ܕܶܐܬܡܰܣܟܰܢ ܡܶܛܠܳܬܰܢ ܩܳܪܶܐ ܡܶܣܟܺܢܳܐ ܒܡܰܙܡܽܘܪܳܐ ܗܳܢܳܐ. ܒܗܰܘ ܪܰܒܳܐ ܕܰܙܥܰܪ ܟܰܕ ܠܳܐ ܐܰܘܒܶܕ ܪܰܒܽܘܬܶܗ. ܡܶܬܒܰܩܶܐ ܗܘܳܐ ܟܰܕ ܐܶܬܢܰܒܺܝ ܗܳܠܶܝܢ. ܥܠܰܘܗܝ ܓܶܝܪ ܐܰܡܺܝܪܳܐ ܪܽܘܚܳܢܳܐܝ̣ܬ ܟܽܠܳܗ̇ ܬܶܫܒܽܘܚܬܳܐ ܗܳܕܶܐ. ܣܛܰܪ ܡܶܢ ܦܶܬܓܳܡ̈ܐ ܘܰܒܗܳܕܶܐ ܒܦܰܘܠܽܘܣ ܗܰܘ ܪܰܒܳܐ ܡܕܰܡܶܐ ܗܘܳܐ ܡܙܰܡܪܳܢܳܐ܆ ܐܳܦ ܗܰܘ ܓܶܝܪ ܩܰܕܺܝܫܳܐ ܟܰܕ ܟܳܬܶܒ ܗܘܳܐ ܠܘܳܬ ܩܽܘܪ̈ܺܝܢܬܳܝܶܐ܆ ܒܗܳܝ ܕܬܰܪܬܶܝܢ ܕܰܠܘܳܬܗܽܘܢ ܡܶܣܟܺܢܳܐ ܩܳܪܶܐ ܗܘܳܐ ܠܶܗ ܠܥܰܡܰܢܽܘܐܝܠ. ܝܳܕܥܺܝܬܽܘܢ ܠܰܡ ܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܕܡܶܛܽܠܳܬܟܽܘܢ ܐܶܬܡܰܣܟܰܢ. ܟܰܕ ܐܺܝܬܰܘܗܝ ܥܰܬܺܝܪܳܐ. ܕܰܐܢܬܘܢ ܒܡܶܣܟܺܢܽܘܬܶܗ ܬܶܥܬܪܽܘܢ (ܒ ܩܘܪ̈ܢܬܝܐ ܚ: ܛ). ܗܳܢܰܘ ܡܶܣܟܺܢܳܐ ܕܶܐܡܰܪ ܢܒܺܝܳܐ ܕܰܘܝܕ܆ ܕܛܽܘܒܰܘܗܝ ܠܡܰܢ ܕܚܳܐܱܪ ܒܶܗ. ܒܚܰܘܪܳܐ ܕܰܠܘܳܬܶܗ ܠܳܐ ܚܒܺܝܟܳܐ ܐܶܪ̈ܶܣܺܝܣ ܘܠܳܐ ܠܚܰܢܦܽܘܬܳܐ ܐܺܝܬ ܚܽܘܠܛܳܢܳܐ. ܘܠܐ ܠܰܚܛܺܝܬܳܐ ܐܺܝܬ ܡܥܰܠܝܽܘܬܳܐ. ܘܥܰܝ̈ܢܶܐ ܕܥܰܘܴ̈ܠܶܐ ܒܙܰܕܺܝܩܽܘܬܶܗ ܕܰܡܫܺܝܚܳܐ ܠܳܐ ܡܰܡܪ̈ܚܳܢ ܕܢܺܐܨ̈ܕܳܢ. ܘܰܐܝܠܶܝܢ ܕܒܶܗ ܠܐ ܚܳܝܪܺܝܢ ܒܟܽܠܙܒܰܢ. ܣܡܰܝܴ̈ܐ ܐܶܢܘܢ ܕܠܳܐ ܢܽܘܗܪܳܐ. ܘܡܶܢ ܛܳܒܬܳܐ ܠܘܳܬ ܒܺܝܫܬܳܐ ܡܶܫܬܰܪܓܠܺܝܢ. ܥܰܠ ܗܳܕܶܐ ܐܶܡܰܪ ܢܒܺܝܳܐ ܚܠܳܦܰܘܗܝ ܕܥܰܡܰܢܽܘܐܝܠ.
ܒܥܶܠܕ̈ܒܳܒܰܝ ܐܶܡܰܪܘ ܥܠܰܝ ܒܺܝܫܬܳܐ. ܡܳܢܳܐ ܗ̱ܺܝ ܕܶܝܢ ܒܺܝܫܬܳܐ.
ܐܶܡܰܬܝ ܕܶܝܢ ܡܺܝܬ ܘܶܐܒܰܕ ܫܡܶܗ. ܐܶܠܐ ܗܳܕܶܐ ܠܘܳܬ ܒܰܪܢܳܫܳܐ ܠܰܘ ܒܺܝܫܬܳܐ ܗ̱ܝ. ܟܽܠ ܒܰܪܢܳܫܳܐ ܓܶܝܪ ܕܡܳܐܷܬ. ܡܶܢ ܗܽܘܦܳܟܳܐ ܕܚܰܝ̈ܐ ܗܳܠܶܝܢ ܥܳܒܰܪ ܠܶܗ ܫܡܶܗ. ܡܳܕܶܝܢ ܗܳܕܶܐ ܗ̱ܺܝ ܒܺܝܫܬܳܐ. ܕܟܰܕ ܡܺܝܬ ܗܰܘ ܠܳܐ ܡܳܝܽܘܬܳܐ ܘܶܐܬܬܣܺܝܡ ܒܩܰܒܪܳܐ ܗܰܘ ܙܰܪܥܳܐ ܕܚܰܝ̈ܐ. ܐܳܡܪܺܝܢ ܗܘܰܘ ܪ̈ܰܒܰܝ ܟܳܗ̈ܢܶܐ ܠܦܺܝܠܰܛܽܘܣ. ܡܳܪܰܢ ܐܶܬܕܟܰܪܢ ܕܗܰܘ ܡܰܛܥܝܳܢܳܐ ܐܶܡܰܪ ܗܘܳܐ ܟܰܕ ܚܰܝ܆ ܕܡܶܢ ܒܳܬܰܪ ܬܠܳܬܳܐ ܝܰܘ̈ܡܺܝܢ ܩܳܐܷܡ ܐܢܳܐ. ܦܩܽܘܕ ܗܳܟܺܝܠ ܡܶܙܕܰܗܪܺܝܢ ܒܩܰܒܪܳܐ ܥܕܰܡܳܐ ܠܰܬܠܳܬܳܐ ܝܰܘ̈ܡܺܝܢ. ܕܰܠܡܳܐ ܢܺܐܬܽܘܢ ܬܰܠܡܺܝ̈ܕܰܘܗܝ ܢܶܓܢܒܽܘܢܳܝܗܝ ܒܠܺܠܝܳܐ. ܘܢܺܐܡܪܽܘܢ ܠܥܰܡܳܐ ܕܡܶܢ ܒܶܝܬ ܡܺܝ̈ܬܶܐ ܩܳܡ܇ ܘܬܶܗܘܶܐ ܛܽܘܥܝܰܝ ܐ̱ܚܪܳܝܬܳܐ ܒܺܝܫܳܐ ܡܶܢ ܩܰܕܡܳܝܬܳܐ (ܡܬܝ ܟܙ: ܣܓ-ܣܕ). ܚܙܰܝܬ ܐܰܝܟܰܢܳܐ ܐܰܝܟ ܕܡܶܢ ܠܘܳܬܗܽܘܢ܆ ܕܗܳܠܶܝܢ ܐܶܒܰܕ ܗܘܳܐ ܗܰܘ ܚܰܝܳܐ ܒܡܰܘܬܳܐ ܗܳܠܶܝܢ ܓܶܝܪ ܒܟܽܠܙܒܰܢ ܕܰܓܳܠܽܘܬܳܐ ܡܡܰܠܠܺܝܢ ܗܘܰܘ ܐܰܝܟ ܕܶܐܡܰܪ ܢܒܺܝܳܐ.
ܕܶܐܡܰܬܝ ܠܰܡ ܕܳܐܬܶܝܢ ܗܘܰܘ ܠܡܶܚܙܝܰܢܝ: ܕܰܓܳܠܽܘܬܳܐ ܡܡܰܠܠܺܝܢ ܗܘܰܘ: ܘܰܒܠܶܒܗܽܘܢ ܚܳܫܠܺܝܢ ܗܘܰܘ ܒܺܝܫܬܳܐ. ܢܳܦܩܺܝܢ ܗܘܰܘ ܠܫܽܘܩܳܐ ܘܰܡܡܰܠܠܺܝܢ: ܐܶܬܠܰܚܰܫܘ ܥܠܰܝ ܐܰܟܚܕܳܐ ܟܽܠܗܽܘܢ ܣܳܢܱ̈ܐܝ. ܘܶܐܬܚܰܫܰܒܘ ܥܠܰܝ ܒܺܝܫܬܳܐ: ܒܡܶܠܬܳܐ ܕܥܰܘܠܳܐ ܪܳܢܶܝܢ ܗܘܰܘ. ܡܶܟܺܝܠ ܕܰܫܟܶܒ ܠܳܐ ܡܰܘܣܶܦ ܠܰܡܩܳܡ. ܐܰܪܰܐ ܕܰܠܡܳܐ ܡܶܫܟܚܳܐ ܕܗܳܠܶܝܢ ܩܴ̈ܠܐ ܥܰܠ ܢܒܺܝܳܐ ܢܶܬܢܰܣ̈ܒܳܢ. ܠܰܘ ܢܰܗܺܝܪܳܐܝ̣ܬ ܡܰܘܕ̈ܥܳܢ ܥܰܠ ܣܶܢܐܬܳܐ ܘܪܰܘܒܳܐ ܕܝܽܘ̈ܕܳܝܶܐ ܕܥܰܠ ܡܫܺܝܚܳܐ. ܘܠܰܘ ܕܺܝܠܗܽܘܢ ܗܳܝ ܕܰܐܣܒܰܪܘ ܥܰܠ ܦܳܪܽܘܩܰܢ. ܕܡܶܢ ܒܳܬܰܪ ܕܢܳܚܶܬ ܠܰܫܝܽܘܠ ܠܳܐ ܣܳܠܶܩ ܗܳܕܶܐ ܓܶܝܪ ܕܒܶܝܬ ܩܠܶܝܽܘܦܰܐ ܐܰܣܒܰܪܘ ܗܘܰܘ ܥܠܰܘܗܝ ܕܠܳܐ ܩܳܐܷܡ. ܘܒܳܬܰܪ ܗܳܠܶܝܢ ܡܰܝܬܶܐ ܓܶܝܪ ܢܒܺܝܳܐ. ܕܰܐܝܟܰܢܳܐ ܚܰܕ ܡܶܢ ܬܰܠܡܺܝ̈ܕܶܐ ܗܳܘܶܐ ܡܰܫܠܡܳܢܳܐ ܠܦܳܪܽܘܩܰܢ.
ܐܳܦ ܓܰܒܪܳܐ ܠܰܡ ܫܳܐܷܠ ܫܠܳܡܝ ܕܰܬܟܺܝܠ ܐܢܳܐ ܥܠܰܘܗܝ. ܗܳܕܳܐ ܗ̱ܝ ܗܳܝ ܕܶܐܡܰܪ ܝܗܽܘܕܳܐ ܣܟܰܪܝܽܘܛܳܐ ܠܥܰܡܰܢܽܘܐܝܠ. ܫܠܳܡ ܪܰܒܺܝ ܘܢܰܫܩܶܗ (ܡܬܝ ܟܘ: ܡܛ).
ܐܳܟܶܠ ܠܰܚܡܝ ܕܰܬܟܺܝܠ ܐܢܳܐ ܥܠܰܘܗܝ: ܣܰܓܺܝ ܐܶܬܢܟܶܠ ܥܠܰܝ. ܗܰܘ ܕܨܳܒܰܥ ܐܺܝܕܶܗ ܥܰܡܝ ܒܠܰܓܬܳܐ ܗܽܘ ܢܰܫܠܡܰܢܝ (ܡܬܝ ܟܘ: ܟܓ). ܗܳܫܳܐ ܕܶܝܢ ܩܴ̈ܠܐ ܡܶܨ̈ܥܳܝܶܐ ܐܢܳܫܳܝ̈ܐ ܐܳܡܰܪ ܢܒܺܝܳܐ.
ܘܰܐܢܬ ܡܳܪܝܳܐ ܠܰܡ ܪܰܚܶܡܥܠܰܝ: ܐܰܩܺܝܡܰܝܢܝ ܕܶܐܦܪܽܘܥ ܐܶܢܽܘܢ. ܕܳܡܶܝܢ ܗܳܠܶܝܢ ܐܰܝܟ ܗܰܘ ܕܰܡܨܰܠܳܝܽܘ ܨܰܠܺܝ ܒܪܳܐ ܠܘܳܬ ܐܰܒܽܘܗܝ. ܥܰܠ ܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ. ܐܶܠܳܐ ܗܳܠܶܝܢ ܪܽܘܚܳܐ ܕܰܢܒܺܝܽܘܬܳܐ ܡܨܰܠܝܳܐ ܗܘܳܬ. ܕܬܶܗܘܶܐ ܩܝܳܡܬܳܐ ܒܝܰܕ ܥܰܡܰܢܽܘܐܝܠ ܠܰܟܝܳܢܳܐ ܡܶܬܚܰܒܠܳܢܳܐ ܡܶܢ ܡܰܘܬܳܐ. ܩܽܘܒܳܠܛܰܝܒܽܘܬܳܐ ܡܩܰܪܒܳܐ ܘܳܐܡܪܳܐ.
ܒܗܳܕܶܐ ܝܶܕܥܶܬ ܕܨܳܒܶܐ ܐܰܢܬ ܒܺܝ: ܡܶܛܠ ܕܠܳܐ ܡܰܒܶܐܫ ܠܺܝ ܒܥܶܠܕܒܳܒܝ. ܠܳܐ ܠܰܡ ܡܶܫܬܰܠܰܛ ܥܠܰܝܢ ܡܰܘܬܳܐ. ܡܶܟܺܝܠ ܕܰܩܢܰܝܢܰܢ ܪܺܝܫܺܝܬܳܐ ܨܶܝܕ ܚܰܝ̈ܐ. ܒܗܰܘ ܚܰܝܳܐ ܕܡܺܝܬ ܘܰܐܚܺܝ ܠܰܢ. ܘܗܳܕܶܐ ܠܬܰܡܺܝ̈ܡܶܐ ܡܣܰܡܟܳܐ ܘܰܡܩܺܝܡܳܐ ܩܕܳܡ ܐܰܠܳܗܳܐ.
ܠܺܝ ܕܶܝܢ ܒܬܰܡܺܝܡܽܘܬܝ ܣܰܡܶܟܬܳܢܝ: ܘܰܐܩܺܝܡܬܳܢܝ ܩܕܳܡܰܝܟ ܠܥܳܠܰܡ. ܡܶܛܠܗܳܕܶܐ ܟܽܠܶܗ ܟܝܳܢܳܐ ܢܺܐܡܰܪ ܠܘܳܬ ܐܰܠܳܗܳܐ ܕܦܰܪܩܶܗ.
ܒܪܺܝܟ ܗܽܘ ܡܳܪܝܳܐ ܐܰܠܳܗܳܐ ܕܺܝܣܪܳܐܝܠ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܬܪܝܢ
ܥܰܠ ܪܶܓܬܳܐ ܕܟܺܐܢܷ̈ܐ ܕܰܡܣܰܟܶܝܢ ܗܘܰܘ ܕܢܶܦܢܽܘܢ ܠܐܽܘܪܶܫܠܶܡ ܗܳܝ ܕܒܰܫܡܰܝܳܐ: ܘܥܰܠ ܕܡܶܢ ܥܡܳܕܳܐ ܩܰܕܺܝܫܳܐ ܫܩܰܠܘ ܒܢܰܝ̈ܢܳܫܳܐ ܫܽܘܪܳܝܳܐ ܕܢܶܦܢܽܘܢ ܠܰܡܕܺܝܢܬܳܐ ܕܰܠܥܶܠ.
ܫܠܶܝܡܽܘܢ ܗܰܘ ܚܰܟܺܝܡ ܒܡܱ̈ܬܠܶܐ ܐܶܡܰܪ ܗܘܳܐ܆ ܕܪܶܓܬܳܐ ܕܙܰܕܺܝ̈ܩܶܐ ܒܛܳܒ̈ܬܳܐ܆ ܘܣܰܒܪܳܐ ܕܥܰܘܴ̈ܠܶܐ ܒܪܽܘܓܙܳܐ (ܡ̈ܬܠܐ ܝܐ: ܟܓ). ܘܰܒܗܳܠܶܝܢ ܡܰܘܕܰܥ ܗܘܳܐ ܕܟܽܠܳܗ̇ ܪܶܓܬܗܽܘܢ ܕܩܰܕܺܝ̈ܫܶܐ ܒܰܐܠܳܗܳܐ ܕܺܐܝܬܰܘܗܝ ܡܰܒܽܘܥܳܐ ܕܛܳܒܴ̈ܬܳܐ ܐܺܝܬܶܝܗ̇. ܘܰܠܘܳܬܶܗ ܚܳܝܪܺܝܢ ܕܢܺܐܬܽܘܢ ܘܒܶܗ ܢܶܬܒܰܣܡܽܘܢ. ܘܡܶܛܠܗܳܢܳܐ ܐܳܦ ܗܳܠܶܝܢ ܕܒܶܝܬ ܐܰܒܪܳܗܳܡ܆ ܪ̈ܺܝܫܰܝ ܐܰܒܳܗܴ̈ܬܳܐ ܟܺܐܢ̈ܐ ܒܡܰܫܟ̈ܢܶܐ ܥܳܡܪܺܝܢ ܗܘܰܘ. ܥܰܡ ܐܺܝܣܚܳܩ ܘܝܰܥܩܽܘܒ ܒܢܱ̈ܝ ܝܳܪܬܽܘܬܳܐ ܕܡܽܘܠܟܳܢܳܐ. ܓܰܠܝܳܐ ܡܳܕܶܝܢ ܟܰܕ ܡܚܰܘܶܝܢ ܕܠܰܡܕܺܝܢܬܗܽܘܢ ܗܳܝ ܕܺܐܝܬܶܝܗ̇ ܒܰܫܡܰܝܳܐ ܪܳܓܺܝܢ ܗܘܰܘ. ܐܰܝܟ ܕܣܳܗܶܕ ܥܠܰܝܗܽܘܢ ܦܰܘܠܽܘܣ ܗܰܘ ܪܰܒܳܐ. ܕܰܐܝܠܶܝܢ ܠܰܡ ܕܗܳܠܶܝܢ ܐܳܡܪܺܝܢ: ܡܚܰܘܶܝܢ ܕܒܳܥܶܝܢ ܡܕܺܝܢܬܗܽܘܢ. ܘܶܐܠܽܘ ܠܰܡܕܺܝܢܬܳܐ ܗܳܝ ܕܰܢܦܰܩܘ ܡܶܢܳܗ̇ ܒܳܥܶܝܢ ܗܘܰܘ. ܐܺܝܬ ܗܘܳܐ ܠܗܘܢ ܙܰܒܢܳܐ ܕܬܽܘܒ ܢܶܗܦܟܽܘܢ ܢܺܐܙܽܠ̱ܘܢ ܠܳܗ̇. ܡܳܐܐ ܫܢܺܝ̈ܢ ܓܶܝܪ ܚܝܳܐ ܐܰܒܪܳܗܳܡ ܡܶܢ ܕܰܢܦܰܩ ܡܶܢ ܚܳܪܳܢ. ܘܰܒܗܳܠܶܝܢ ܟܽܠܗܶܝܢ ܠܳܐ ܒܥܳܐ ܕܢܶܥܛܽܘܦ ܠܶܗ ܠܬܰܡܳܢ. ܐܶܠܳܐ ܐܳܦ ܫܰܕܰܪ ܠܶܐܠܝ̣ܥܳܙܳܪ ܥܰܒܕܶܗ ܘܰܡܟܰܪ ܐܰܢܬܬܳܐ ܠܐܺܝܣܚܳܩ ܒܪܶܗ. ܘܰܡܦܰܩܶܕ ܗܘܳܐ ܠܶܗ: ܕܒܰܠܚܽܘܕ ܠܰܡ ܐܶܙܕܰܗܪ ܕܰܠܡܳܐ ܬܰܗܦܶܟ ܠܒܶܪܝ ܠܬܰܡܳܢ (ܒܪܝܬܐ ܟܕ: ܘ). ܡܳܕܶܝܢ ܠܰܕܛܳܒܳܐ ܡܶܢܳܗ̇ ܪܳܓܺܝܢ ܗܘܰܘ. ܠܗܳܝ ܕܺܐܝܬܶܝܗ̇ ܒܰܫܡܰܝܳܐ. ܡܶܛܠܗܳܢܳܐ ܠܳܐ ܢܳܟܶܦ ܐܰܠܗܳܐ ܕܰܐܠܳܗܗܽܘܢ ܢܶܬܩܪܶܐ. ܛܰܝܶܒ ܠܗܽܘܢ ܓܶܝܪ ܡܕܺܝܢܬܳܐ. ܐܳܦ ܛܽܘܒܳܢܳܐ ܕܰܘܝܕ ܒܪܶܗ ܕܰܐܒܪܳܗܳܡ ܒܕܰܐܝܟ ܗܳܕܶܐ ܪܶܓܬܳܐ ܐܳܦ ܗܽܘ ܒܥܳܐ ܗܘܳܐ܆ ܡܕܺܝܢܬܳܐ ܗܳܝ ܕܡܶܬܪܰܓܪܓܺܝܢ ܗܘܰܘ ܠܳܗ̇ ܐܰܒܳܗܴ̈ܬܳܐ. ܘܡܶܛܠ ܕܩܰܠܝ̣ܠ ܡܶܢ ܣܰܓܺܝ. ܫܰܪܺܝ ܗܘܳܐ ܠܶܗ ܐܪܳܙܳܐ ܕܗܳܝ ܐܽܘܪܺܫܠܶܡ ܥܶܠܳܝܬܳܐ ܕܢܶܬܓܠܶܐ. ܘܣܳܐܷܡ ܚܠܳܦܶܝܗ̇ ܗܳܝ ܕܒܰܐܪܥܳܐ. ܟܰܕ ܠܗܳܝ ܕܰܐܪܥܳܐ ܡܣܰܘܚܳܐ ܗܘܳܬ ܘܚܳܝܪܳܐ ܢܰܦܫܶܗ. ܡܶܛܠܗܳܢܳܐ ܟܰܕ ܐܶܬܛܪܶܕ ܡܶܢ ܡܰܠܟܽܘܬܶܗ܆ ܘܰܢܦܰܩ ܡܶܢ ܐܽܘܪܺܫܠܶܡ ܗܳܝ ܕܙܰܒܢܳܐ. ܘܰܥܪܰܩ ܘܰܥܒܰܪ ܗܘܳܐ ܒܝܽܘܪܕܢܳܢ ܘܺܐܝܬܰܘܗܝ ܗܘܳܐ ܒܰܐܪܥܳܐ ܕܰܒܢܰܝ̈ ܪܽܘܒܺܝܠ ܘܕܰܒܢܰܝ̈ ܓܳܕ܆ ܒܶܝܬ ܛܽܘܪܳܐ ܕܚܶܪܡܽܘܢ ܠܛܽܘܪܳܐ ܕܬܳܒܽܘܪ. ܐܰܠܺܝܨ ܗܘܳܐ ܘܓܳܥܶܐ ܠܘܳܬ ܐܰܠܗܳܐ ܕܢܶܦܢܶܐ ܠܐܽܘܪܺܫܠܶܡ. ܘܰܕܢܶܣܓܽܘܕ ܩܕܳܡ ܐܳܪܽܘܢܶܗ ܕܰܐܕܽܘܢܰܝ. ܒܗܳܢܳܐ ܙܰܒܢܳܐ ܡܰܙܡܽܘܪܳܐ ܗܳܢܳܐ ܕܰܐܪܒܥܺܝܢ ܘܰܬܪܶܝܢ ܙܰܡܰܪ ܗܘܳܐ.
ܐܰܝܟ ܐܰܝܠܳܐ ܕܓܳܥܶܐ ܥܰܠ ܦܨܺܝܕܳܐ ܕܡܰܝܴ̈ܐ܆ ܗܳܟܰܢܳܐ ܐܳܦ ܢܰܦܫܝ ܓܳܥܝܳܐ ܠܘܳܬܳܟ ܡܳܪܝܳܐ. ܨܰܗܝܳܐ ܗܝ ܠܳܟ ܢܰܦܫܝ ܐܰܠܳܗܳܐ ܚܰܝܳܐ: ܕܶܐܡܰܬܝ ܐܺܬܳܐ ܐܶܚܙܶܐ ܐܰܦܰܝ̈ܟ: ܐܰܠܗܳܐ. ܗܘܳܬ ܠܺܝ ܕܶܡܥܰܬܝ ܡܶܐܟܽܘܠܬܳܐ. ܒܺܐܝܡܳܡܳܐ ܘܰܒܠܺܠܝܳܐ: ܟܰܕ ܐܳܡܪܺܝܢ ܗܘܰܘ ܠܺܝ ܟܽܠܝܽܘܡ ܐܰܝܟܰܘ ܐܰܠܳܗܳܟ. ܗܳܠܶܝܢ ܐܶܬܕܰܟܪܶܬ ܘܶܐܬܛܰܪܦܰܬ ܢܰܦܫܝ: ܡܶܛܠ ܕܶܐܥܒܰܪ ܒܣܶܬܳܪܳܟ ܥܰܫܺܝܢܳܐ. ܥܕܰܡܳܐ ܠܒܰܝܬܶܗ ܕܰܐܠܳܗܳܐ. ܚܙܰܝܬ ܒܰܐܝܠܰܝܢ ܚܰܫ̈ܐ ܡܰܪܺܝܪ̈ܶܐ ܘܰܩܫܱ̈ܝܳܐ ܡܶܬܛܰܪܦܳܐ ܗܘܳܬ ܢܰܦܫܶܗ ܕܰܢܒܺܝܳܐ܆ ܘܰܐܠܺܝܨ ܗܘܳܐ ܘܒܳܥܶܐ ܗܘܳܐ ܕܢܶܚܙܶܐ ܠܰܐܦܰܘ̈ܗܝ ܕܰܐܠܳܗܳܐ. ܘܰܐܝܟܰܢ ܐܰܪܰܐ ܒܳܥܶܐ ܕܢܶܚܙܶܐ ܠܗܰܘ ܠܳܐ ܡܶܬܚܰܙܝܳܢܳܐ؟ ܘܰܐܝܟܰܢ ܒܳܥܶܐ ܗܘܳܐ ܕܰܐܦ̈ܐ ܢܩܰܒܶܠ܆ ܕܗܰܘ ܕܶܐܡܰܪ ܠܡܽܘܫܳܐ: ܕܠܳܐ ܚܳܙܶܐ ܠܺܝ ܒܰܪܢܳܫܳܐ ܘܚܳܝܶܐ (ܡܦܩܢܐ ܠܓ: ܟ). ܝܳܕܰܥ ܗܘܳܐ ܓܶܝܪ ܕܢܺܐܬܶܐ ܐܰܠܳܗܳܐ ܠܰܐܪܥܳܐ ܡܛܰܝܰܒ ܗܘܳܐ. ܡܶܛܠܗܳܕܶܐ ܓܳܥܶܐ ܗܘܳܐ ܢܒܺܝܳܐ ܐܰܝܟ ܐܰܝܠܳܐ. ܕܡܶܢ ܗܳܕܶܐ ܚܙܳܬܳܐ ܠܳܐ ܢܶܬܓܠܶܙ. ܡܳܢܳܐ ܕܶܝܢ ܐܺܝܬܶܝܗ̇ ܬܰܚܘܺܝܬܳܐ ܕܰܐܝܠܳܐ ܣܽܘܥܪܳܢܳܐܝ̣ܬ. ܗܳܕܶܐ ܚܰܝܽܘܬܳܐ ܒܥܶܠܕܒܳܒܽܘܬܳܐ ܐܺܝܬ ܠܶܗ ܠܽܘܩܒܰܠ ܚܶܘܝܳܐ. ܘܒܰܫܩܳܠܛܰܥܢܳܐ ܡܒܰܥܪܳܐ ܒܳܬܰܪ ܐܰܪܥܶܗ. ܘܟܽܠ ܐܰܝܟܳܐ ܕܡܶܫܟܰܚ ܚܶܘܝܳܐ ܠܰܐܝܠܳܐ ܥܳܪܶܩ ܡܶܢ ܩܕܳܡ ܐܰܝܠܳܐ. ܘܰܐܝܠܳܐ ܒܟܰܚܬܳܐ ܕܦܽܘܡܶܗ ܡܫܰܗܶܐ ܠܶܗ. ܘܒܳܬܰܪܟܶܢ ܡܕܰܝܶܫ ܠܶܗ ܘܩܳܛܶܠ. ܐܶܢܕܶܝܢ ܡܶܫܟܰܚ ܚܶܘܝܳܐ ܨܶܪܝܳܐ ܕܰܐܪܥܳܐ ܕܢܶܚܠܰܕ ܒܶܗ܆ ܡܳܢܳܐ ܥܳܒܶܕ ܐܰܝܠܳܐ؟ ܪܳܗܶܛ ܠܘܳܬ ܦܨܺܝܕܳܐ ܕܡܰܝܴ̈ܐ ܘܡܳܠܶܐ ܓܽܘ̈ܡܳܨܰܘܗܝ ܡܰܝܴ̈ܐ ܕܰܫܡܰܝܳܐ܆ ܘܳܐܬܶܐ ܘܪܳܡܶܐ ܒܓܰܘ ܨܶܪܝܳܐ. ܘܡܶܢ ܒܳܬܰܪ ܕܡܰܕܪܟܺܝܢ ܠܶܗ ܠܚܶܘܝܳܐ ܣܳܠܶܩ ܡܶܢ ܐܰܪܥܳܐ. ܘܟܰܕ ܦܳܓܰܥ ܒܶܗ ܐܰܝܠܳܐ ܫܳܘܰܪ ܐܰܝܠܳܐ ܘܰܡܩܰܛܶܠ ܠܶܗ. ܘܶܐܢܕܶܝܢ ܢܶܥܪܽܘܩ ܚܶܘܝܳܐ ܠܘܳܬ ܨܶܪܝܳܐ ܕܰܐܪܥܳܐ. ܘܳܐܙܶܠ ܐܰܝܠܳܐ ܠܰܦܨܺܝ̈ܕܶܐ ܬܶܢܝܳܢܽܘܬ ܘܢܶܒܥܶܐ ܡܰܝܴ̈ܐ ܘܠܳܐ ܢܶܫܟܰܚ܆ ܗܳܪܟܳܐ ܒܰܓܥܳܬܳܐ ܡܰܪܺܝܪܬܳܐ ܓܳܥܶܐ. ܡܶܛܠ ܕܺܝܕܰܥ ܕܠܳܐ ܡܶܬܬܨܺܝܕ ܒܥܶܠܕܒܳܒܶܗ. ܒܕܰܐܝܟ ܗܳܕܶܐ ܓܥܳܬܳܐ ܢܒܺܝܳܐ ܡܶܬܚܰܫܰܚ ܗܘܳܐ ܢܒܺܝܳܐ. ܥܰܠ ܕܠܳܐ ܥܕܰܟܺܝܠ ܢܚܶܬܘ ܗܘܰܘ ܡܰܝܴ̈ܐ ܡܶܢ ܗܳܠܶܝܢ ܥܢܳܢ̈ܐ ܥܶܠܳܝܴ̈ܬܳܐ ܠܰܦܨܺܝ̈ܕܰܘܗܝ ܚܰܪ̈ܒܶܐ ܕܥܳܠܡܳܐ. ܘܶܐܢܗܽܘ ܕܠܳܐ ܡܰܪܳܚܽܘܬܳܐ ܗ̄ܝ ܕܢܶܓܠܶܐ ܐܪܳܙܳܐ ܗܳܢܳܐ ܕܰܐܝܠܳܐ ܘܕܰܦܨܺܝܕܳܐ. ܐܳܦ ܗܳܟܰܢܳܐ ܡܰܝܬܶܝܢܰܢ ܠܓܶܠܝܳܐ ܦܽܘܫܳܩܳܐ ܗܳܢܳܐ. ܗܳܢܳܐ ܐܰܝܠܳܐ ܐܺܝܬܰܘܗܝ ܗܰܘ ܐܰܝܠܳܐ ܩܰܕܺܝܫܳܐ. ܕܕܳܫ ܥܰܠ ܐܰܪܝܳܐ ܘܬܰܢܺܝܢܳܐ ܕܰܥܠܰܘܗܝ ܐܰܟܬܶܒ ܗܘܳܐ ܒܬܶܫܒ̈ܚܳܬ ܬܶܫܒ̈ܚܳܬܳܐ ܫܠܶܝܡܽܘܢ ܗܰܘ ܚܰܟܺܝܡܳܐ ܒܦܰܪܨܽܘܦܳܐ ܕܟܰܠܬܳܐ ܕܳܐܡܪܳܐ ܠܘܳܬ ܚܰܬܢܳܐ. ܥܪܽܘܩ ܠܰܡ ܕܳܕܝ ܘܶܐܬܕܰܡܳܐ ܠܛܰܒܝܳܐ ܐܰܘ ܠܥܽܘܙܰܝܠܳܐ ܕܰܐܝܠܳܐ ܥܰܠ ܛܽܘܪܳܐ ܕܒܶܝܬ ܐܺܝܠ (ܬܫܒ̈ܚܬ ܬܫܒ̈ܚܬܐ ܒ: ܝܙ ܚ: ܝܕ). ܗܳܢܳܐ ܐܰܝܠܳܐ ܩܰܕܺܝܫܳܐ ܟܰܕ ܐܶܬܳܐ ܠܘܳܬܰܢ ܡܶܢ ܫܡܰܝܳܐ܆ ܘܰܡܫܰܘܰܪ ܗܘܳܐ ܥܰܠ ܛܽܘܪ̈ܶܐ ܘܥܰܠ ܪ̈ܳܡܳܬܳܐ ܡܩܰܝܶܙ ܗܘܳܐ. ܐܰܝܬܺܝ ܥܰܡܶܗ ܡܶܢ ܫܡܰܝܳܐ. ܡܰܝܴ̈ܐ ܚܰܝ̈ܐ ܘܰܐܪܡܺܝ ܒܨܶܪ̈ܝܶܐ ܕܰܐܪܥܳܐ. ܐܰܝܟܳܐ ܕܶܝܢ ܕܟܳܡܶܝܢ ܗܘܳܐ ܗܰܘ ܚܶܘܝܳܐ ܡܶܬܝܰܕܥܳܢܳܐ. ܘܗܳܠܶܝܢ ܡܰܝܴ̈ܐ ܟܰܕ ܐܰܕܪܟܽܘܗܝ ܒܠܶܒܰܘܴ̈ܬܳܐ ܕܥܰܡ̈ܡܶܐ ܚܰܛܳܝ̈ܐ. ܠܚܶܘܝܳܐ ܡܰܢ ܩܰܛܠܶܗ. ܠܗܳܠܶܝܢ ܕܶܝܢ ܕܡܳܝܬܺܝܢ ܗܘܰܘ ܒܢܽܘܟ̈ܬܳܬܶܗ ܐܰܚܺܝܘ. ܫܰܦܺܝܪ ܡܳܕܶܝܢ ܛܽܘܒܳܢܳܐ ܕܰܘܝܕ ܠܗܳܕܶܐ ܚܰܝܽܘܬܳܐ ܣܳܡ ܬܰܚܘܺܝܬܳܐ. ܥܰܠ ܪܶܓܬܳܐ ܐܰܠܳܗܳܝܬܳܐ ܕܩܰܕܺܝ̈ܫܶܐ ܟܰܕ ܡܰܘܕܰܥ. ܕܰܒܗܳܢܳܐ ܐܰܝܠܳܐ ܙܳܕܶܩ ܕܢܶܬܕܰܡܽܘܢ ܠܟܺܐܢ̈ܐ ܕܰܗܘܰܘ ܢܶܬܕܰܡܽܘܢ. ܐܳܦ ܗܽܘ ܓܶܝܪ ܡܚܰܘܶܐ ܕܰܚܠܳܦ ܡܶܐܟܽܘܠܬܳܐ ܒܕܶܡܰܥܬܳܐ ܡܶܬܬܰܪܣܶܐ ܗܘܳܐ. ܥܰܠ ܕܡܶܬܚܰܣܰܕ ܗܘܳܐ ܡܶܢ ܥܰܘܴ̈ܠܶܐ ܕܰܐܝܟܰܘ ܐܰܠܳܗܳܟ. ܗܳܠܶܝܢ ܡܛܰܪ̈ܦܳܢ ܗܘܰܝ̈ ܠܳܗ̇ ܠܢܰܦܫܶܗ ܕܰܢܒܺܝܳܐ. ܘܡܶܛܠ ܗܳܕܶܐ ܫܶܐܠ ܗܘܳܐ ܘܰܒܥܳܐ ܡܶܢ ܐܰܠܳܗܳܐ ܕܰܒܣܶܬܪܶܗ ܢܶܥܒܰܪ܆ ܥܕܰܡܳܐ ܕܥܳܐܷܠ ܢܶܣܬܰܬܰܪ ܒܡܰܛܠܠܶܗ ܩܰܕܺܝܫܳܐ ܕܰܐܠܳܗܳܐ. ܘܝܰܗܒ ܩܕܳܡܰܘܗܝ ܩܴ̈ܠܶܐ ܕܬܶܫܒܽܘܚܬܳܐ. ܗܳܠܶܝܢ ܕܰܩܪܳܐ ܐܶܢܘܢ ܡܚܰܕ̈ܝܳܢܶܐ.
ܒܩܳܠܳܐ ܠܰܡ ܕܬܶܫܒܽܘܚܬܳܐ ܘܰܕܬܰܘܕܺܝܬܳܐ ܣܰܓܺܝ̈ܐܐ ܚܳܕܶܝܢ. ܠܡܳܢܳܐ ܡܶܬܛܰܪܦܰܬܝ ܢܰܦܫܝ ܘܰܠܡܳܢܳܐ ܬܰܡܺܝܗܰܬܝ. ܠܡܳܢܳܐ ܡܶܬܬܙܺܝܥܰܬܝ ܠܡܳܢܳܐ ܡܶܬܕܰܘܕܰܬܝ. ܠܡܳܢܳܐ ܫܚܺܝܩܰܬܝ ܥܰܠ ܬܰܘܚܰܪܬܶܟܝ ܕܡܶܢ ܥܳܠܡܳܐ ܕܙܰܕܺܝ̈ܩܶܐ. ܥܰܠܡܳܢܳܐ ܡܶܬܐܰܠܨܰܬܝ ܥܰܠ ܦܰܘܫܶܟܝ ܕܰܬܢܳܢ. ܠܳܐ ܡܰܗܡܶܐ ܡܶܢ ܒܥܳܬܶܟܝ ܕܨܰܒܬܶܟܝ ܘܨܳܪܶܟܝ ܒܨܰܠܡܶܗ.
ܣܰܟܳܝ ܠܰܐܠܳܗܳܐ ܡܶܛܠ ܕܬܽܘܒ ܐܰܘܕܶܐ ܠܶܗ ܠܦܳܪܽܘܩܳܐ ܕܰܐܦܰܝ̈ ܘܰܐܠܳܗܝ. ܘܬܽܘܒ ܥܳܛܦܰܬܝ ܠܘܳܬܶܗ ܘܰܠܕܰܝܪܶܗ ܘܰܠܒܰܝܬܶܗ. ܘܬܽܘܒ ܦܳܢܝܰܬܝ ܠܡܰܫܟܢܶܗ ܗܰܘ ܕܡܶܢ ܩܕܺܝܡ. ܒܣܽܘܟܳܝܶܗ ܚܰܡܣܶܢܝ ܘܡܶܬܒܰܝܰܐܬܝ ܘܦܳܪܶܩ ܠܶܟܝ ܡܶܢ ܐܽܘ̈ܠܨܳܢܶܐ ܕܶܐܬܥܰܬܰܕܘ ܥܠܰܝܟܝ ܡܶܢ ܚܶܘܝܳܐ ܒܥܶܠܕܒܳܒܶܟܝ. ܬܽܘܒ ܕܶܝܢ ܡܰܘܕܰܥ ܢܒܺܝܳܐ ܥܰܠ ܛܽܘܪ̈ܳܦܶܐ ܕܢܰܦܫܶܗ ܘܳܐܡܰܪ:
ܥܠܰܝ ܢܰܦܫܝ ܐܶܬܛܰܪܦܰܬ. ܡܶܛܠܗܳܢܳܐ ܐܶܬܕܟܰܪܬܳܟ ܡܶܢ ܐܰܪܥܳܐ ܕܝܽܘܪܕܢܳܢ: ܘܡܶܢ ܚܶܪܡܽܘܢ ܘܡܶܢ ܛܽܘܪܳܐ ܙܥܽܘܪܳܐ. ܚܶܪܡܽܘܢ ܐܺܝܬܰܘܗܝ ܛܽܘܪܳܐ ܕܣܺܝܡ ܒܡܰܕܒܪܳܐ ܒܶܝܬ ܣܺܝܢܰܝ ܠܰܐܪܥܳܐ ܕܰܐܕܽܘܡ. ܕܗܽܘ ܗܳܢܳܐ ܐܺܝܬܰܘܗܝ ܛܽܘܪܳܐ ܪܰܒܳܐ ܘܪܳܡܳܐ. ܛܽܘܪܳܐ ܕܶܝܢ ܙܥܽܘܪܳܐ ܐܺܝܬܰܘܗܝ ܬܳܒܽܘܪ. ܐܳܡܪܺܝܢ ܕܶܝܢ ܠܘܳܬ ܗܳܢܽܘܢ ܛܽܘܪ̈ܶܐ ܥܪܰܩ ܗܘܳܐ ܕܰܘܝܕ ܡܶܢ ܩܕܳܡ ܒܪܶܗ ܐܰܒܺܝܫܳܠܽܘܡ. ܘܨܶܝܕ ܝܽܘܪܕܢܳܢ ܐܺܝܬܰܘܗܝ ܗܘܳܐ. ܚܢܰܢ ܕܶܝܢ ܠܰܫ̈ܡܳܗܶܐ ܕܗܳܠܶܝܢ ܛܽܘܪ̈ܶܐ ܠܬܶܐܘܳܪܺܝܰܐ ܪܽܘܚܳܢܳܝܬܳܐ ܡܰܣܩܺܝܢܰܢ ܠܗܽܘܢ. ܚܶܪܡܽܘܢ ܕܶܝܢ ܫܡܰܐ ܗ̱ܘ ܕܰܫܡܰܝܳܐ. ܐܰܝܟ ܕܰܡܚܰܘܶܐ ܟܬܳܒܳܐ. ܐܳܦ ܗܽܘ ܡܙܰܡܪܳܢܳܐ ܝܰܬܺܝܪܳܐܝ̣ܬ܆ ܐܰܝܟ ܛܰܐܠܳܐ ܕܚܶܪܡܽܘܢ ܕܢܳܚܶܬ ܥܰܠ ܛܽܘܪܳܐ ܕܨܶܗܝܽܘܢ (ܡܙܡܘܪܐ ܩܠܓ: ܓ). ܡܳܕܶܝܢ ܚܶܪܡܽܘܢ ܫܡܰܐ ܗ̱ܘ ܕܰܫܡܰܝܳܐ. ܛܰܐܠܳܐ ܓܶܝܪ ܡܶܢ ܠܥܶܠ ܢܳܚܶܬ ܡܶܢ ܫܡܰܝܳܐ. ܡܶܛܠ ܗܳܢܳܐ ܥܰܠ ܝܽܘܪܕܢܳܢ ܗܘܳܐ ܕܽܘܟܪܳܢܳܐ ܗܳܢܳܐ ܕܢܶܦܢܶܐ ܟܝܳܢܳܐ ܐܢܳܫܳܝܳܐ ܠܒܰܝܬܳܐ ܕܰܐܠܳܗܳܐ. ܟܰܕ ܩܥܳܐ ܐܰܒܳܐ ܡܶܢ ܫܡܰܝܳܐ ܒܥܶܕܳܢܳܐ ܕܰܥܡܳܕܶܗ ܩܰܕܺܝܫܳܐ ܕܰܒܪܳܐ ܒܝܽܘܪܕܢܳܢ. ܘܶܐܬܕܟܰܪ ܗܘܳܐ ܬܰܡܳܢ ܓܶܢܣܳܐ ܕܰܒܢܰܝ̈ܢܳܫܳܐ ܕܢܶܥܛܽܘܦ ܠܐܽܘܪܺܫܠܶܡ ܗܳܝ ܕܰܠܥܶܠ. ܒܗܳܢܳܐ ܓܶܝܪ ܢܰܗܪܳܐ ܥܒܰܪ ܕܰܘܝܕ ܟܰܕ ܥܛܰܦ ܠܰܡܕܺܝܢܬܶܗ ܘܰܦܢܳܐ ܠܡܰܠܟܽܘܬܶܗ. ܘܡܶܛܠ ܕܶܝܢ ܕܶܐܡܰܪ ܘܡܶܢ ܛܽܘܪܳܐ ܙܥܽܘܪܳܐ. ܘܰܠܗܳܢܳܐ ܛܽܘܪܳܐ ܕܒܰܪ ܝܶܫܽܘܥ ܠܫܶܡܥܽܘܢ ܘܰܠܝܰܥܩܽܘܒ ܘܰܠܝܽܘܚܰܢܳܢ. ܟܰܕ ܐܰܣܶܩ ܐܶܢܽܘܢ ܘܚܰܘܺܝ ܐܶܢܘܢ ܕܰܐܝܟܰܢܳܐ ܐܳܬܶܐ ܒܡܰܠܟܽܘܬܶܗ ܘܰܠܫܽܘܠܳܡܶܗ ܕܥܳܠܡܳܐ. ܘܥܰܠܗܳܢܳܐ ܛܽܘܪܳܐ ܙܥܽܘܪܳܐ ܥܛܰܦ ܐܰܒܳܐ ܐܰܫܡܰܥ ܩܳܠܶܗ ܬܶܢܝܳܢܽܘܬ. ܡܶܢ ܥܢܳܢܳܐ ܢܰܗܺܝܪܬܳܐ ܕܗܳܢܰܘ ܒܶܪܝ ܚܰܒܺܝܒܳܐ ܕܒܶܗ ܐܶܨܛܒܺܝܬ (ܡܬܝ ܓ: ܝܙ). ܟܰܕ ܡܳܕܶܝܢ ܣܺܝܡ ܝܽܘܪܕܢܳܢ ܒܰܡܨܰܥܬܳܐ ܕܗܳܠܶܝܢ ܬܪܶܝܢ ܛܽܘܪ̈ܶܐ. ܒܰܝܢܳܬ ܚܶܪܡܽܘܢ ܠܬܳܒܽܘܪ. ܡܶܢ ܬܪ̈ܰܝܗܽܘܢ ܛܽܘܪ̈ܶܐ ܝܰܗܒ ܐܰܒܳܐ ܩܳܠܳܐ. ܘܰܐܣܗܶܕ ܥܰܠ ܒܪܶܗ ܕܰܒܪܶܗ ܗܽܘ ܚܰܒܺܝܒܳܐ ܒܰܫܪܳܪܳܐ. ܕܡܶܢ ܗܳܪܟܳܐ ܡܶܬܕܰܟܪܳܐ ܢܰܦܫܳܐ ܠܡܳܪܝܳܐ. ܦܳܢܝܳܐ ܠܗܰܘ ܒܰܝܬܳܗ̇ ܠܰܫܡܰܝܳܐ. ܘܗܳܪܟܳܐ ܥܰܠ ܝܽܘܪܕܢܳܢ ܫܳܡܥܳܐ ܩܳܠܐ ܕܰܬܗܽܘ̈ܡܶܐ ܥܰܡܺܝ̈ܩܶܐ ܕܚܶܟܡܬܶܗ ܕܰܐܠܳܗܳܐ. ܟܰܕ ܦܳܓܥܳܐ ܢܒܺܝܽܘܬܳܐ ܒܰܫܠܺܝܚܽܘܬܳܐ ܬܰܡܳܢ ܥܰܠ ܢܰܗܪܳܐ. ܘܰܩܥܳܐ ܝܽܘܚܰܢܳܢ: ܕܗܳܐ ܒܳܬܰܪܝ ܐܳܬܶܐ ܗܰܘ ܕܠܳܐ ܫܳܘܶܐ ܐܢܳܐ ܕܶܐܫܪܶܐ ܥܰܪ̈ܩܶܐ ܕܰܡܣܴ̈ܐܢܰܘܗܝ (ܝܘܚܢܢ ܐ: ܟܙ). ܘܰܡܚܰܘܶܐ ܠܶܗ ܐܰܝܟ ܕܰܒܨܶܒܥܳܐ ܠܐܷܡܪܶܗ ܕܰܐܠܳܗܳܐ. ܐܰܝܟ ܕܰܒܨܶܒܥܳܐ ܘܩܳܠܐܴ ܠܩܳܠܐܴ ܝܳܗܒܺܝܢ ܗܰܘ ܐܰܝܟ ܕܶܐܡܰܪ ܢܒܺܝܳܐ:
ܘܩܳܠܐܴ ܠܩܳܠܐܴ ܕܡܰܝܴ̈ܐ ܕܢܳܣܟܰܝ̈ܟ. ܒܗܳܠܶܝܢ ܟܰܕ ܐܶܙܕܰܪܒܰܬ ܢܰܦܫܶܗ ܕܰܢܒܺܝܳܐ܆ ܥܒܰܪܘ ܫܶܦ̈ܥܶܐ ܡܶܢܳܗ̇. ܘܥܰܠܗܳܝ ܕܰܡܝܰܬ ܐܶܢܘܢ ܠܢܳܣ̈ܟܶܐ. ܘܒܰܫܪܳܪܳܐ ܕܢܶܣ̈ܟܶܐ ܗܘܰܘ ܕܶܐܬܬܪܰܥܘ ܡܶܢ ܫܡܰܝܳܐ ܐܰܝܟ ܗܳܠܶܝܢ ܕܰܒܝܰܘ̈ܡܰܝ ܢܽܘܚ. ܗܳܝܕܶܝܢ ܥܳܒܕܺܝܢ ܗܘܰܘ ܛܰܘܦܳܢܳܐ܆ ܢܶܬܚܰܢܩܽܘܢ ܥܰܘܴ̈ܠܶܐ ܒܡܰܝܴ̈ܐ ܘܰܒܪܽܘܓܙܳܐ. ܐܳܦ ܗܳܪܟܳܐ ܥܰܠ ܝܽܘܪܕܢܳܢ ܐܰܝܟܳܐ ܕܰܚܙܳܝܗܝ ܢܒܺܝܳܐ ܠܐܪܳܙܳܐ ܕܚܽܘܕܳܬܰܢ. ܢܶܣ̈ܟܶܐ ܕܪ̈ܰܚܡܶܐ ܐܶܬܦܬܰܚܘ ܡܶܢ ܫܡܰܝܳܐ. ܘܡܰܝܴ̈ܐ ܡܶܬܝܰܕ̈ܥܳܢܶܐ ܢܚܶܬܘ ܥܰܡ ܡܶܠܬܳܐ ܡܶܢ ܗܰܘ ܝܰܡܳܐ ܕܪ̈ܰܚܡܶܐ. ܕܢܶܬܬܫܺܝܓ ܐܳܕܳܡ ܡܶܢ ܨܳܐܬܶܗ. ܘܟܰܕ ܠܚܰܛܳܝ̈ܐ ܡܚܰܠܠܺܝܢ ܘܰܡܕܰܟܶܝܢ. ܡܶܢ ܦܽܘ̈ܠܦܳܠܶܐ ܣܰܓܺܝܱ̈ܐܝ ܚܰܫ̈ܐ ܕܟܰܬܡܰܬ ܐܶܢܘܢ ܚܛܺܝܬܳܐ. ܢܶܚܢܩܽܘܢ ܘܰܢܛܰܒܥܽܘܢ ܠܫܺܐܕ̈ܐ ܘܰܠܕܰܝ̈ܘܶܐ ܡܳܪ̈ܽܘܕܶܐ ܘܡܶܢ ܒܳܬܰܪ ܡܰܣܚܽܘܬܳܐ ܕܰܗܘܳܬ ܒܗܳܠܶܝܢ ܬܗܽܘ̈ܡܶܐ ܐܰܠܳܗܳܝ̈ܐ ܘܰܒܢܳܣ̈ܟܶܐ ܫܡܰܝܴ̈ܢܶܐ ܡܰܠܠ ܬܽܘܒ܆ ܥܰܠ ܐܽܘ̈ܠܨܳܢܶܐ ܕܩܳܝܡܺܝܢ ܥܰܠ ܥܡܺܝ̈ܕܶܐ ܡܶܢ ܚܰܢ̈ܦܶܐ ܒܳܬܰܪ ܥܡܳܕܳܐ. ܐܰܝܟ ܕܳܐܦ ܥܰܡܰܢܽܘܐܝܠ ܒܳܬܰܪ ܥܡܳܕܶܗ܆ ܠܡܰܕܒܪܳܐ ܐܶܬܕܒܰܪ ܡܶܢ ܐܳܟܶܠܩܰܪܨܳܐ. ܘܥܰܠܗܳܕܶܐ ܐܳܡܰܪ ܢܒܺܝܳܐ:
ܟܽܠܗܽܘܢ ܡܰܚܫܽܘ̈ܠܰܝܟ ܘܓܰܠܠܰܝ̈ܟ ܥܠܰܝ ܥܒܰܪܘ. ܐܰܝܟ ܢܽܘܘܳܓܳܐ ܒܰܝܢܳܬ ܓ̈ܠܠܐ ܕܝܰܡܳܐ. ܗܳܟܰܢܳܐ ܩܳܝܡܳܐ ܢܰܦܫܳܐ ܒܰܝܢܳܬ ܡܰܚܫܽܘ̈ܠܐ ܕܳܐܟܶܠܩܰܪܨܳܐ. ܡܶܢ ܒܳܬܰܪ ܕܰܡܩܰܒܠܳܐ ܛܰܝܒܽܘܬܳܐ ܕܪܽܘܚܳܐ. ܗܳܟܰܢܳܐ ܥܰܙܺܝܙ ܐܰܓܽܘܢܳܐ ܕܰܡܣܰܝܒܪܳܐ. ܐܰܝܟ ܦܰܪܙܠܳܐ ܕܳܐܬܶܐ ܠܢܽܘܪܳܐ ܘܣܳܒܶܠ ܡܰܚ̈ܘܳܬܳܐ ܣܰܓܺܝ̈ܐܬܳܐ ܡܶܢ ܐܽܘܡܳܢܳܐ. ܘܢܳܦܶܩ ܕܰܟܝܳܐ ܡܶܢ ܬܚܶܝܬ ܐܺܝ̈ܕܰܝ ܐܽܘܡܳܢܳܐ. ܐܳܡܰܪ ܓܶܝܪ ܢܒܺܝܳܐ ܡܶܛܠܳܬܶܗ
ܒܺܐܝܡܳܡܳܐ ܢܶܦܩܽܘܕ ܡܳܪܝܳܐ ܪ̈ܰܚܡܰܘܗܝ: ܘܰܒܠܺܠܝܳܐ ܬܶܫܒ̈ܚܳܬܶܗ. ܡܳܐ ܕܰܒܝܰܕ ܡܳܪܰܢ ܕܺܐܝܬܰܘܗܝ ܐܺܝܡܳܡܳܐ ܢܰܗܺܝܪܳܐ ܡܶܬܦܰܩܕܺܝܢ ܪ̈ܰܚܡܶܐ ܥܰܠ ܗܰܘ ܕܩܳܐܷܡ ܒܰܐܓܽܘܢܳܐ. ܗܳܝܕܶܝܢ ܚܰܝܳܒ ܗܰܘ ܕܰܡܬܰܚܢܰܢ ܕܡܳܐ ܕܦܳܓܰܥ ܒܶܗ ܠܺܠܝܳܐ ܕܢܶܣܝܽܘ̈ܢܶܐ. ܢܶܬܥܢܶܐ ܒܬܶܫܡܶܫܬܳܐ ܕܰܠܘܳܬ ܐܰܠܳܗܳܐ. ܩܳܠܐ ܓܶܝܪ ܕܙܽܘܡܳܪܳܐ. ܢܳܛܶܦ ܠܗܰܘ ܕܰܡܫܰܒܰܚ ܠܰܐܠܳܗܳܐ ܘܰܠܠܶܓܝܽܘ̈ܢܶܐ ܕܕܰܝ̈ܘܶܐ ܛܳܪܶܕ. ܐܰܝܟܰܢܳܐ ܕܗܰܘ ܕܡܰܘܕܶܐ ܡܶܛܠ ܨܠܽܘܬܳܐ ܗܳܕܶܐ. ܢܶܬܚܫܶܒ ܐܰܝܟ ܕܶܐܡܰܪ ܢܒܺܝܳܐ.
ܕܥܰܡܝ ܨܠܽܘܬܳܐ ܗܽܘ ܠܰܐܠܳܗܳܐ ܚܰܝܳܐ. ܟܰܕ ܡܫܰܘܕܰܥ ܒܺܝ̈ܫܳܬܳܐ ܣܰܓܺܝ̈ܐܬܳܐ ܕܣܳܒܠܺܝܢ ܩܰܕܺܝ̈ܫܶܐ ܡܶܢ ܚܰܢ̈ܦܶܐ ܘܡܶܢ ܕܰܝ̈ܘܶܐ.
ܐܶܡܪܶܬ ܠܰܐܠܳܗܳܐ ܕܰܠܡܳܢܳܐ ܛܥܰܝܬܳܢܝ. ܡܥܳܕܺܝܢ ܐܶܢܘܢ ܛܽܘ̈ܒܳܢܶܐ ܡܳܐ ܕܥܳܫܢܺܝܢ ܥܠܰܝܗܽܘܢ ܐܽܘ̈ܠܨܳܢܶܐ ܢܶܬܚܰܫܚܽܘܢ ܒܗܳܕܶܐ ܒܰܪܬ ܩܳܠܐ. ܟܰܕ ܡܗܰܠܟܺܝܢ ܒܰܟܡܺܝܪܽܘܬܳܐ ܘܒܶܐܒܠܳܐ.
ܘܰܠܡܳܢܳܐ ܡܗܰܠܶܟ ܐܢܳܐ ܟܡܺܝܪܳܐܝܬ ܒܽܐܘܠܨܳܢܳܐ ܕܰܒܥܶܠܕ̈ܒܳܒܰܝ: ܘܳܐܡܪܺܝܢ ܗܘܰܘ ܠܺܝ ܟܽܠܝܽܘܡ ܐܰܝܟܰܘ ܐܰܠܳܗܳܟ. ܘܰܡܥܳܕܺܝܢ ܓܶܝܪ ܒܥܶܠܕ̈ܒܳܒܶܐ ܕܰܢܫܰܡܪܽܘܢ ܩܴ̈ܠܐ ܕܒܶܙܚܳܐ ܘܰܕܒܽܘܝܳܐܳܐ. ܥܰܠ ܐܰܝܠܶܝܢ ܕܡܶܛܠ ܐܰܠܳܗܳܐ ܡܣܰܝܒܪܺܝܢ ܒܺܝ̈ܫܳܬܳܐ. ܕܳܐܬܶܝ̈ܢ ܥܠܰܝܗܽܘܢ ܒܥܰܘܠܳܐ. ܘܰܡܒܰܝܰܐ ܗܘܳܐ ܠܢܰܦܫܶܗ ܒܣܰܒܪܳܐ ܘܰܒܣܽܘܟܳܝܳܐ ܟܰܕ ܡܰܬܟܶܠ ܠܗ̇ ܕܥܳܛܦܳܐ ܘܩܳܝܡܳܐ ܩܕܳܡܰܘܗܝ ܘܡܰܘܕܝܳܐ ܠܶܗ.
ܠܡܳܢܳܐ ܠܰܡ ܡܶܬܛܰܪܦܰܬܝ ܢܰܦܫܝ ܘܰܠܡܳܢܳܐ ܬܰܡܺܝܗܰܬܝ. ܣܰܟܳܝ ܠܰܐܠܗܐ ܕܬܽܘܒ ܐܰܘܕܶܐ ܠܶܗ: ܠܦܳܪܽܘܩܳܐ ܕܰܐܦܰܝ̈ ܘܰܐܠܳܗܝ. ܠܗܳܠܶܝܢ ܦܶܬܓܳܡ̈ܐ ܬܰܪܬܶܝܢ ܙܰܒܢܺܝ̈ܢ ܐܶܡܰܪ ܐܶܢܘܢ ܢܒܺܝܳܐ. ܘܠܳܐ ܢܰܣܒܰܪ ܕܒܰܛܺܝܠܳܐܝ̣ܬ ܐܶܬܶܐܡܰܪܘ. ܗܳܕܶܐ ܐܺܝܬܶܝܗ̇ ܕܡܶܢ ܩܕܳܡ ܥܡܳܕܳܐ ܩܰܕܺܝܫܳܐ. ܡܣܰܟܝܳܐ ܗܘܳܬ ܢܰܦܫܳܐ ܕܩܰܕܺܝ̈ܫܶܐ ܠܚܽܘܕܳܬܳܐ ܕܰܒܝܰܕ ܡܳܪܰܢ. ܟܰܕ ܕܶܝܢ ܐܶܬܦܰܪܩܰܬ ܒܰܣܚܳܬܳܐ ܘܡܰܘܠܳܕܳܐ ܕܡܶܢ ܕܪܺܝܫ. ܬܽܘܒ ܒܝܰܕ ܐܽܘ̈ܠܨܳܢܶܐ ܕܰܦܓܰܥܘ ܒܩܰܕܺܝ̈ܫܶܐ ܒܳܬܰܪ ܥܡܳܕܳܐ. ܬܽܘܒ ܠܘܳܬ ܛܽܘܪ̈ܳܦܶܐ ܗܳܢܘ̇ܢ ܕܰܒܗܘ̇ܢ ܐܶܬܰܘ ܥܕܰܡܳܐ ܠܰܕܡܳܐ ܘܰܠܬܽܘܒܳܪ̈ܶܐ ܕܓܰܪ̈ܡܳܐ. ܗܳܢܘ̇ܢ ܕܶܐܡܰܪ ܢܒܺܝܳܐ
ܕܒܰܬܒܳܪܳܐ ܕܓܰܪ̈ܡܰܝ܆ ܚܰܣܕܽܘܢܝ ܒܥܶܠܕ̈ܒܳܒܰܝ. ܬܽܘܒ ܗܳܪܟܳܐ ܡܰܣܡܶܟ ܠܗܽܘܢ ܥܰܠ ܣܰܒܪܳܐ ܕܰܐܠܗܐ ܘܳܐܡܰܪ ܗܰܘ ܕܶܐܬܓܠܺܝ ܘܰܦܪܰܩ ܠܰܢ. ܬܽܘܒ ܐܳܬܶܐ ܘܰܡܚܰܕܶܬ ܠܰܢ. ܘܒܳܢܶܐ ܘܰܡܩܺܝܡ ܠܰܢ ܘܩܳܪܶܐ ܠܰܢ ܠܘܳܬ ܚܰܝ̈ܐ ܫܰܪܺܝܪ̈ܶܐ ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܬܠܬܐ
ܕܡܰܘܕܰܥ ܕܰܒܚܰܫܳܐ ܪܰܒܳܐ ܡܨܰܠܶܝܢ ܗܘܰܘ ܢܒܺܝܷ̈ܐ ܩܰܕܺܝ̈ܫܶܐ: ܕܢܶܫܬܘܽܘܢ ܠܓܶܠܝܳܢܶܗ ܕܰܡܫܺܝܚܳܐ ܘܰܠܗܰܝܡܳܢܽܘܬܳܐ ܕܒܶܗ.
ܩܴ̈ܠܐ ܕܒܳܥܽܘܬܳܐ ܘܰܕܡܰܠܝܴ̈ܢ ܟܰܪܝܽܘܬܳܐ ܡܰܘܕܰܥ ܛܽܘܒܳܢܳܐ ܕܰܘܝܕ ܕܰܡܩܰܪܶܒ ܩܕܳܡ ܐܰܠܳܗܳܐ ܒܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܘܰܬܠܳܬ. ܟܰܕ ܡܚܰܘܶܐ ܗܘܳܐ ܕܰܐܠܺܝܨ. ܡܶܢ ܥܽܘ̈ܬܳܕܶܐ ܕܒܺܝ̈ܫܳܬܳܐ ܕܚܳܫܶܠ ܗܘܳܐ ܥܠܰܘܗܝ ܫܳܐܘܳܠ ܪܳܕܽܘܦܶܗ. ܟܰܕ ܢܰܩܺܝܦܺܝܢ ܗܘܰܘ ܠܨܶܒܝܳܢܶܗ ܡܰܒܶܐܫܳܢܳܐ ܕܫܳܐܘܳܠ܆ ܙܥܽܘܪ̈ܶܐ ܩܰܠܺܝ̈ܠܐ ܡܶܢ ܐܰܝܠܶܝܢ ܕܩܳܝܡܺܝܢ ܗܘܰܘ ܩܕܳܡ ܡܰܠܟܳܐ. ܓܰܒܪܳܐ ܙܰܕܺܝܩܳܐ ܗܰܘ ܝܽܘܢܳܬܰܢ ܪܳܚܡܶܗ ܟܺܐܢܳܐ ܕܕܰܘܝܕ. ܝܰܩܰܪ ܠܟܺܐܢܽܘܬܳܐ ܘܠܳܐ ܨܒܳܐ ܕܢܶܗܘܶܐ ܫܰܘܬܳܦܳܐ ܠܨܶܒܝܳܢܶܗ ܒܺܝܫܳܐ ܕܰܐܒܽܘܗܝ. ܘܥܰܠܗܳܕܶܐ ܐܳܦ ܐܪܳܙܶܗ ܕܡܰܠܟܳܐ ܓܳܠܶܐ ܗܘܳܐ ܠܕܰܘܝܕ. ܐܳܦ ܝܰܬܺܝܪܳܐ ܐܳܡܰܪ ܗܘܳܐ: ܕܒܳܥܶܐ ܫܳܐܘܳܠ ܐܳܒܝ ܠܡܶܩܛܠܳܟ (ܐ ܫܡܘܐܝܠ ܝܛ: ܒ). ܒܙܰܒܢܳܐ ܓܶܝܪ ܗܳܢܳܐ ܟܰܕ ܐܶܬܒܰܕܰܩ ܠܶܗ ܠܕܰܘܝܕ ܐܳܦܰܪܣܳܢܳܐ ܗܳܢܳܐ܆ ܡܰܙܡܽܘܪܳܐ ܗܳܢܳܐ ܐܶܬܢܰܒܺܝ. ܠܰܘ ܟܰܕ ܡܰܥܶܠ ܫܡܳܐ ܕܪܳܕܽܘܦܶܗ ܒܙܽܘܡܳܪܶܗ. ܐܶܠܐ ܠܘܳܬ ܐܰܠܳܗܳܐ ܚܳܐܱܪ ܗܘܳܐ ܘܳܐܡܰܪ:
ܕܽܘܢ ܐܰܠܳܗܳܐ ܕܺܝܢܝ ܘܰܬܒܰܥ ܬܒܰܥܬܝ: ܡܶܢ ܥܰܡܳܐ ܕܠܳܐ ܡܪܰܚܡܳܢ. ܘܡܶܢ ܓܰܒܪ̈ܶܐ ܥܰܘܴ̈ܠܶܐ ܘܢܰܟܽܘ̈ܠܬܳܢܶܐ ܦܰܨܳܢܝ. ܐܶܠܳܐ ܚܙܺܝ ܐܰܝܟܰܢܳܐ ܟܰܕ ܕܒܺܝܪ ܒܰܩܛܺܝܪܳܐ ܘܠܳܐ ܡܨܰܚܶܐ ܗܘܳܐ ܐܰܘ ܡܶܬܩܰܫܶܐ ܗܘܳܐ ܥܰܠ ܐܳܠܽܘ̈ܨܰܘܗܝ. ܐܶܠܐ ܒܰܠܚܽܘܕܰܘܗܝ ܕܢܶܬܦܰܨܶܐ ܡܶܢܗܽܘܢ ܫܳܐܠ ܗܘܳܐ ܡܶܢ ܐܰܠܗܳܐ܆ ܠܟܺܐܢܽܘܬܳܐ ܕܶܝܢ ܠܳܐ ܡܥܺܝܪ ܗܘܳܐ ܒܝܰܕ ܦܰܩܳܩܽܘܬܳܐ ܗܳܝ ܕܰܠܚܰܢ̈ܦܶܐ ܒܰܠܚܽܘܕ ܠܳܚܡܳܐ. ܐܶܠܐ ܥܰܠ ܕܡܶܢ ܥܰܡܳܐ ܕܡܶܣܬܒܰܪ ܕܺܐܝܬܰܘܗܝ ܕܰܐܠܳܗܳܐ ܡܶܬܪܕܶܦ ܗܘܳܐ. ܡܰܘܣܶܦ ܗܘܳܐ܆
ܡܶܛܠ ܕܰܐܢܬ ܗܽܘ ܐܰܠܳܗܳܐ ܕܚܰܝܠܝ ܘܰܠܡܳܢܳܐ ܛܥܰܝܬܳܢܝ. ܘܰܠܡܳܢܳܐ ܡܗܰܠܶܟ ܐܢܳܐ ܟܡܺܝܪܳܐܝ̣ܬ ܒܽܐܘܠܨܳܢܳܐ ܕܰܒܥܶܠܕ̈ܒܳܒܰܝ. ܗܳܝ ܕܶܐܡܰܪ ܠܡܳܢܳܐ ܬܰܪܬܶܝܢ ܙܰܒܢܺܝ̈ܢ ܕܰܠܡܳܢܳܐ ܛܥܰܝܬܳܢܝ ܘܰܠܡܳܢܳܐ ܡܗܰܠܶܟ ܐܢܳܐ ܟܡܺܝܪܳܐܝ̣ܬ܆ ܠܰܘ ܐܰܝܟ ܐܰܝܢܳܐ ܕܡܶܬܥܰܝܰܛ ܘܪܳܫܶܐ ܠܟܺܐܢܽܘܬܳܐ. ܠܳܐ ܓܶܝܪ ܡܶܫܟܰܚ ܗܘܳܐ܆ ܕܰܐܚܪܳܢܝܳܐܝܰܬ ܢܰܝܠܶܠ ܡܶܢ ܟܺܐܒܶܗ. ܐܶܠܐ ܥܶܠܬܳܐ ܗܘܳܬ ܡܶܠܬܳܐ ܗܳܕܶܐ. ܕܰܡܚܰܘܶܐ ܒܳܗ̇ ܟܺܐܒܶܗ ܠܳܐܣܝܳܐ. ܘܰܐܝܟ ܐܳܣܝܳܐ ܚܰܟܺܝܡܳܐ ܩܰܪܶܒ ܦܝܳܣܳܐ ܐܰܝܟ ܕܡܶܢܶܗ. ܥܰܠܗܳܝ ܡܨܰܠܶܐ ܗܘܳܐ ܘܳܐܡܰܪ:
ܫܰܕܰܪ ܢܽܘܗܪܳܟ ܘܗܰܝܡܳܢܽܘܬܳܟ ܘܰܢܒܰܝܽܐܘܢܳܢܝ: ܘܢܰܝܬܽܘܢܳܢܝ ܠܛܽܘܪܳܟ ܩܰܕܺܝܫܳܐ ܘܰܠܡܰܫܟܢܳܟ. ܘܺܐܬܶܐ ܠܘܳܬ ܡܰܕܒܚܶܗ ܕܰܐܠܳܗܳܐ܆ ܘܰܠܘܳܬ ܐܰܠܗܳܐ ܕܰܡܚܰܕܶܐ ܛܰܠܝܽܘܬܝ. ܡܳܢܳܐ ܐܺܝܬܰܘܗܝ ܢܽܘܗܪܳܐ ܗܰܘ ܕܰܡܦܺܝܣ ܗܘܳܐ ܢܒܺܝܳܐ. ܕܰܢܫܰܕܰܪ ܠܶܗ ܐܰܒܳܐ ܠܳܐ ܓܰܠܝܳܐ ܗ̱ܝ ܕܥܰܠ ܒܪܳܐ ܕܰܟܝܳܢܳܐ ܘܰܡܬܽܘܡܳܝܳܐ ܘܰܡܦܺܝܣ ܗܘܳܐ. ܕܢܶܫܬܰܕܰܪ ܡܶܢ ܐܰܒܳܐ ܫܡܰܝܳܐ ܠܰܐܪܥܳܐ ܕܢܺܐܬܶܐ ܘܢܰܢܗܰܪ ܠܥܳܠܡܳܐ ܕܰܥܡܰܛ ܒܚܶܫܽܘܟܳܐ ܘܢܰܥܒܰܪ ܐܶܒܠܳܗ̇ ܕܐ̱ܢܳܫܽܘܬܳܐ: ܘܰܚܙܺܝ ܐܰܝܟܰܢܳܐ ܡܠܰܚܡܳܐܝ̣ܬ. ܐܰܩܶܦ ܠܗܳܢܳܐ ܫܡܳܐ ܕܢܽܘܗܪܳܐ ܗܰܘ ܕܗܰܝܡܳܢܽܘܬܳܐ. ܫܰܕܰܪ ܠܰܡ ܢܽܘܗܪܳܟ ܘܗܰܝܡܳܢܽܘܬܳܟ. ܒܗܳܕܶܐ ܡܰܘܕܰܥ܆ ܒܗܰܝܡܳܢܽܘܬܳܐ ܡܶܫܬܰܕܰܪ ܗܘܳܐ. ܗܰܘ ܢܽܘܗܪܳܐ ܕܰܐܒܳܐ ܕܡܶܢ ܫܡܰܝܳܐ ܗܰܘ ܨܶܡܚܳܐ ܕܺܐܝܬܽܘܬܶܗ ܡܬܽܘܡܳܝܬܳܐ. ܗܰܘ ܕܶܐܡܰܪ ܗܘܳܐ ܝܽܘܚܰܢܳܢ ܟܳܪܽܘܙܶܗ: ܕܺܐܝܬܰܘܗܝ ܗܘܳܐ ܢܽܘܗܪܳܐ ܕܰܫܪܳܪܳܐ (ܝܘܚܢܢ ܐ: ܛ). ܘܟܰܕ ܨܒܳܐ ܘܰܕܢܰܚ ܒܝܰܕ ܒܶܣܪܳܐ. ܢܒܺܝܳܐ ܡܦܺܝܣ ܗܘܳܐ. ܕܗܰܝܡܳܢܽܘܬܳܐ ܥܰܡ ܢܽܘܗܪܳܐ ܢܫܰܕܰܪ ܐܰܒܳܐ.
ܘܢܰܝܬܽܘܢܳܢܝ ܠܰܡ ܠܛܽܘܪܳܟ ܩܰܕܺܝܫܳܐ ܘܰܠܡܰܫܟܢܳܟ. ܠܰܐܝܢܳܐ ܛܽܘܪܳܐ ܩܳܪܶܐ ܩܰܕܺܝܫܳܐ ܠܛܽܘܪܳܐ ܕܨܶܗܝܽܘܢ. ܒܗܰܘ ܙܰܒܢܳܐ ܝܳܒܽܘ̈ܣܳܝܶܐ ܝܳܬܒܺܝܢ ܗܘܰܘ. ܘܶܐܠܳܐ ܕܛܽܘܪܳܐ ܕܣܺܝܢܰܝ. ܠܳܐ ܡܶܬܚܙܶܐ ܕܒܳܥܶܐ ܢܺܐܙܰܠ ܠܶܗ. ܐܶܠܐ ܛܽܘܪܳܐ ܐܺܝܬܰܘܗܝ. ܪܳܡܳܐ ܘܰܡܥܰܠܝܳܐ ܕܥܰܠ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܗܰܘ ܕܶܐܡܰܪ ܥܰܡܰܢܽܘܐܝܠ ܠܘܳܬ ܬܰܠܡܺܝ̈ܕܰܘܗܝ ܕܠܳܐ ܡܶܫܟܚܳܐ ܕܬܶܛܫܶܐ ܡܕܺܝܢܬܳܐ ܕܥܰܠ ܛܽܘܪܳܐ ܒܰܢܝܳܐ (ܡܬܝ ܗ: ܝܕ). ܘܗܰܘ ܕܒܰܢܝܳܐ ܥܠܰܘܗܝ ܨܶܗܝܽܘܢ ܗܳܝ ܡܶܬܝܰܕܥܳܢܺܝܬܳܐ. ܗܰܘ ܕܦܰܫܶܩ ܫܡܶܗ ܦܰܘܠܽܘܣ ܗܰܘ ܪܰܒܳܐ ܠܘܳܬ ܥܶܒܪ̈ܳܝܶܐ ܘܶܐܡܰܪ: ܕܰܐܢܬܽܘܢ ܐܶܬܩܰܪܰܒܬܽܘܢ ܠܛܽܘܪܳܐ ܕܨܶܗܝܽܘܢ ܠܰܡܕܺܝܢܬܳܐ ܕܰܐܠܗܳܐ ܚܰܝܳܐ. ܠܐܽܘܪܺܫܠܶܡ ܕܒܰܫܡܰܝܳܐ. ܕܒܳܗ̇ ܐܺܝܬ ܡܰܕܒܚܳܐ ܕܰܐܠܳܗܳܐ ܕܠܳܐ ܥܳܒܰܪ ܘܠܳܐ ܡܶܬܚܰܒܰܠ (ܥܒܪ̈ܝܐ ܝܒ: ܟܒ).
ܘܺܐܬܶܐ ܠܘܳܬ ܡܰܕܒܚܶܗ ܕܰܐܠܗܳܐ. ܘܰܠܘܳܬ ܐܰܠܗܳܐ ܕܰܡܚܰܕܶܐ ܛܰܠܝܽܘܬܝ. ܠܡܳܢܳܐ ܐܰܝܬܺܝ ܫܡܳܐ ܕܛܰܠܝܽܘܬܳܐ܆ ܗܰܘ ܕܥܳܡܰܪ ܗܘܳܐ ܒܛܰܥܡܶܗ ܠܣܳܒ̈ܐ ܘܰܠܩܰܫܺܝ̈ܫܶܐ ܕܥܰܡܳܐ. ܠܘܳܬ ܕܺܝܢܰܘ̈ܗܝ ܕܰܐܠܳܗܳܐ. ܛܰܠܝܳܐ ܡܰܢ ܡܚܰܘܶܐ ܗܘܳܐ ܢܰܦܫܶܗ ܗܰܘ ܩܰܕܺܝܫܳܐ. ܒܗܳܝ ܕܰܐܝܟ ܫܰܒܪܳܐ ܪܳܗܶܛ ܗܘܳܐ ܒܽܐܘܪܚܳܐ ܕܰܐܠܳܗܳܐ. ܨܳܒܶܐ ܗܘܳܐ ܕܢܰܪܡܶܐ. ܒܗܰܘ ܦܽܘܩܕܳܢܳܐ ܕܰܠܘܳܬ ܬܰܠܡܺܝ̈ܕܶܐ. ܕܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܐ ܠܳܐ ܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ (ܡܬܝ ܝܚ: ܓ). ܡܳܐ ܕܩܳܡܶܬ ܩܕܳܡ ܡܰܕܒܚܳܟ ܕܠܳܐ ܡܶܫܬܪܶܐ.
ܐܰܘܕܶܐ ܠܳܟ ܒܟܶܢܳܪܳܐ ܐܰܠܳܗܳܐ ܐܰܠܳܗܝ. ܗܳܢܰܘ ܓܶܝܪ ܥܒܳܕܳܐ ܕܩܰܕܺܝ̈ܫܶܐ ܒܥܳܠܡܳܐ ܕܢܽܘܗܪܳܐ. ܗܳܝ ܕܢܶܚܕܽܘܢ ܘܰܢܫܰܒܚܽܘܢ ܠܰܐܠܳܗܳܐ. ܥܰܠ ܛܳܒܴ̈ܬܳܐ ܕܰܡܩܰܒܠܺܝܢ ܒܗܰܘ ܡܰܫܟܢܳܐ ܩܰܕܺܝܫܳܐ. ܐܶܬܦܢܺܝ ܢܒܺܝܳܐ ܗܳܝܕܶܝܢ ܐܰܝܟ ܕܰܢܡܰܠܶܠ ܥܰܠ ܢܰܦܫܶܗ. ܘܰܢܒܰܝܰܐܝܶܗ̇ ܡܶܢ ܟܰܪܝܽܘܬܳܐ ܕܩܳܐܷܡ ܗܘܳܐ ܒܳܗ̇. ܘܰܡܙܰܡܰܪ ܗܘܳܐ ܟܰܕ ܡܠܶܐ ܚܰܫܳܐ ܕܡܶܢ ܐܽܘܠܨܳܢܳܐ ܕܰܟܪܺܝܟ ܗܘܳܐ ܠܶܗ ܘܳܐܡܰܪ:
ܠܡܳܢܳܐ ܡܶܬܛܰܪܦܰܬܝ ܢܰܦܫܝ ܘܰܠܡܳܢܳܐ ܟܰܪܝܳܐ ܗ̄ܝ ܠܶܟܝ. ܠܡܳܢܳܐ ܡܥܺܝ̈ܩܳܢ ܠܶܟܝ ܒܺܝ̈ܫܳܬܳܐ. ܠܡܳܢܳܐ ܟܰܪܝܳܐ ܗ̱ܝ ܠܶܟܝ ܒܽܐܘ̈ܠܨܳܢܶܐ ܒܙܰܒܢܳܐ ܙܥܽܘܪܳܐ. ܠܰܘ ܠܥܳܠܰܡ ܡܩܰܘܶܐ ܗܰܘ ܕܳܐܠܶܨ ܠܶܟܝ. ܠܰܘ ܡܶܢ ܐܰܠܳܗܳܐ ܓܰܠܙܶܟܝ ܕܬܶܬܟܰܡܪܺܝܢ. ܠܰܘ ܡܶܢ ܥܳܒܽܘܕܶܟܝ ܢܰܟܪܶܝܟܝ ܕܬܶܬܥܰܡܛܺܝܢ. ܣܰܟܳܝ ܠܰܐܠܳܗܳܐ ܘܗܳܐ ܡܶܬܦܰܪܩܰܬܝ. ܐܶܬܦܢܳܝ ܠܘܳܬ ܒܽܘܝܳܐܐ ܘܠܳܐ ܡܶܬܟܰܡܪܰܬܝ. ܨܶܝܕ ܡܰܒܽܘܥܳܐ ܕܡܰܝܴ̈ܐ ܚܰܝܴ̈ܐ ܗܰܪܛܝ. ܘܗܳܐ ܐܶܬܦܰܝܓܰܬ ܨܰܗܝܽܘܬܶܟܝ. ܠܘܳܬ ܐܳܣܝܳܐ ܩܪܽܘܒܝ ܘܗܳܐ ܐܶܬܥܨܶܒ̈ܝ ܚܒܳܪ̈ܳܬܶܟܝ. ܠܘܳܬ ܡܢܰܚܡܳܢܳܐ ܥܪܽܘܩܝ ܡܶܢ ܡܰܘܬܳܐ. ܒܢܽܘܗܪܳܐ ܐܶܣܬܰܬܰܪܝ ܡܶܢ ܚܶܫܽܘܟܳܐ.
ܣܰܟܳܝ ܠܰܐܠܳܗܳܐ ܡܶܛܠ ܕܬܽܘܒ ܐܰܘܕܶܐ ܠܶܗ: ܠܦܳܪܽܘܩܳܐ ܕܰܐܦܰܝ̈ ܘܰܐܠܳܗܝ. ܘܬܽܘܒ ܡܰܥܛܶܦ ܠܶܟܝ ܢܽܘܗܪܳܐ ܐܰܠܳܗܳܝܳܐ. ܘܫܽܘܦܪܳܐ ܕܰܟܝܳܢܶܟܝ ܗܰܘ ܦܰܐܝܳܐ ܘܩܰܕܡܳܝܳܐ܆ ܘܶܐܢ ܐܶܒܰܕܬܝ ܩܰܠܺܝܠ ܙܰܒܢܳܐ܆ ܢܳܦܶܩ ܒܰܒ̈ܥܳܬܶܟܝ ܗܰܘ ܢܽܘܗܪܳܐ ܕܚܰܝ̈ܐ. ܘܡܰܢܗܰܪ ܩܕܳܡܰܝܟܝ ܙܰܠܺܝ̈ܩܶܐ ܕܰܐܦܰܘ̈ܗܝ. ܘܰܡܚܰܘܶܐ ܠܶܟܝ ܐܽܘܪܚܳܐ ܕܰܠܘܳܬ ܪܰܘܡܳܐ. ܣܰܟܳܝ ܠܰܐܠܗܐ ܘܚܽܘܪܝ ܠܦܳܪܽܘܩܳܐ ܕܰܐܦܰܝ̈ ܘܰܐܠܳܗܝ. ܗܰܘ ܕܶܐܫܟܰܚ ܐܰܒܺܝܕܽܘܬܢ. ܘܰܢܦܰܩ ܒܰܒܥܳܬܰܢ܆ ܘܗܽܘ ܡܰܥܛܶܦ ܠܰܢ ܠܡܰܫܟܢܶܗ. ܘܡܰܦܢܶܐ ܠܰܢ ܠܕܰܝܪܶܗ. ܘܰܡܒܰܝܶܐܐ ܠܰܢ ܒܢܽܘܗܪܶܗ. ܘܗܽܘ ܡܢܺܝܚ ܠܰܢ ܥܰܠ ܦܳܬܽܘܪܶܗ. ܘܠܶܗ ܢܰܘܕܶܐ ܘܰܢܫܰܒܰܚ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܐܪܒܥܐ
ܥܰܠ ܟܳܪܽܘܙܽܘܬܳܐ ܕܰܫܠܺܝ̈ܚܶܐ: ܘܰܐܝܟ ܗܳܝ ܕܰܐܝܟ ܐܶܡܪ̈ܶܐ ܠܢܶܟܣܬܳܐ ܡܶܬܕܰܒܪܺܝܢ ܗܘܰܘ ܡܶܢ ܥܰܡ̈ܡܶܐ ܛܪ̈ܽܘܢܶܐ ܠܩܶܛܠܳܐ.
ܡܶܫܬܰܡܥܳܢܽܘܬܳܐ ܕܩܴ̈ܠܐ ܐܰܠܳܗܳܝ̈ܐ ܡܶܫܬܰܥܶܐ ܒܪܺܝܫ ܡܰܙܡܽܘܪܳܐ ܕܰܐܪܒܥܺܝܢ ܘܰܐܪܒܥܳܐ ܕܰܘܝܕ ܢܒܺܝܳܐ ܛܽܘܒܳܢܳܐ ܘܕܰܫܡܰܥ ܩܳܠܶܗ ܕܗܰܘ ܕܰܡܥܰܠܰܝ ܡܶܢܟܽܠ ܛܶܟ̈ܣܺܝܢ܆ ܘܡܶܢܟܽܠ ܩܳܠܺܝ̈ܢ. ܐܶܫܬܰܘܕܺܝ ܬܢܳܢ ܡܙܰܡܪܳܢܳܐ܆ ܘܶܐܡܰܪ ܕܙܳܕܶܩ ܕܢܶܣܬܰܟܰܠ. ܕܠܰܘ ܒܙܰܒܢܳܐ ܗܰܘ ܕܰܢܒܺܝ̈ܐ ܢܶܦܩܰܬ ܠܰܥܒܳܕܳܐ. ܐܶܡܰܪ ܓܶܝܪ:
ܕܰܐܠܳܗܳܐ ܫܡܰܥܢܰܢ ܒܶܐܕ̈ܢܰܝܢ: ܐܳܦ ܐܰܒܳܗܰܝ̈ܢ ܐܶܫܬܰܥܺܝܘ ܠܰܢ. ܥܰܠ ܗܰܘ ܥܰܡܳܐ ܟܰܕ ܢܦܰܩ ܡܶܢ ܡܶܨܪܶܝܢ. ܡܶܫܬܰܘܕܶܐ ܗܘܳܐ ܛܽܘܒܳܢܳܐ ܡܽܘܫܶܐ܆ ܕܰܫܡܰܥ ܥܰܡܳܐ ܩܳܠܶܗ ܡܶܢ ܓܰܘ ܢܽܘܪܳܐ. ܐܰܝܟܳܐ ܓܶܝܪ ܕܠܰܝܬ ܓܽܘܫܡܳܐ ܘܠܳܐ ܪܽܘܟܳܒܳܐ. ܘܠܳܐ ܦܽܘܡܳܐ ܕܰܡܪܰܟܰܒ. ܘܠܳܐ ܓܰܓܰܪܬܳܐ ܒܰܝܬܳܐ ܕܩܴ̈ܠܐ ܘܠܳܐ ܐܰܬܪܳܐ ܠܪܽܘܚܳܐ ܕܬܰܘܪܶܟܝ. ܥܰܣ̈ܩܳܢ ܕܢܶܬܪ̈ܰܢܝܳܢ ܗܳܠܶܝܢ ܕܩܳܠܐ. ܐܺܝܬܽܘܬܳܐ ܓܶܝܪ ܕܰܐܠܳܗܳܐ ܡܥܰܠܝܳܐ ܡܶܢ ܗܳܠܶܝܢ. ܡܳܕܶܝܢ ܠܗܳܕܶܐ ܕܰܐܠܳܗܳܐ ܫܡܰܥܢܰܢ ܒܶܐܕ̈ܢܰܝܢ ܥܰܠ ܓܶܠܝܳܢܶܗ ܕܰܐܠܳܗܳܐ ܙܳܕܶܩ ܕܬܶܬܢܣܶܒ. ܒܗܰܘ ܓܶܝܪ ܙܰܒܢܳܐ ܕܶܐܬܳܐ ܐܰܠܳܗܳܐ ܡܶܢ ܫܡܰܝܳܐ ܠܰܐܪܥܳܐ ܘܰܗܘܳܐ ܥܽܘܠܳܐ ܘܰܗܘܳܐ ܬܚܶܝܬ ܪܽܘܟܳܒܳܐ. ܗܰܘ ܦܫܺܝܛܳܐ ܘܕܰܠܥܶܠ ܡܶܢ ܓܽܘܫܡܳܐ. ܩܢܳܐ ܥܰܡ ܪܽܘܟܳܒܳܐ ܕܓܰܪ̈ܡܶܐ ܘܰܕܒܶܣܪܳܐ ܕܰܠܒܶܫ ܡܶܢ ܡܰܪܒܥܳܐ ܕܰܒܬܽܘܠܬܳܐ ܐܳܦ ܩܴ̈ܠܐ ܐܢܳܫܳܝ̈ܐ. ܡܳܕܶܝܢ ܠܳܐ ܕܰܓܶܠ ܢܒܺܝܳܐ ܕܰܫܡܰܥ ܠܰܐܠܳܗܳܐ ܒܶܐܕ̈ܢܶܐ ܐܢܳܫܳܝܴ̈ܬܳܐ. ܠܘܳܬ ܫܠܺܝ̈ܚܶܐ ܓܶܝܪ ܐܶܫܬܰܕܰܪ ܩܳܠܐ ܗܳܢܳܐ. ܘܰܚܠܳܦ ܫܠܺܝ̈ܚܶܐ ܐܰܡܪܶܗ ܪܽܘܚܳܐ ܕܩܽܘܕܫܳܐ ܒܝܰܕ ܢܒܺܝܳܐ. ܐܰܝܟܰܢܳܐ ܩܳܝܡܳܐ ܗܳܝ ܕܶܐܡܰܪ:
ܕܒܰܕܰܪܬܳܢ ܒܶܝܬ ܥܰܡ̈ܡܶܐ ܘܗܳܝ ܕܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ. ܘܟܰܕ ܐܶܡܰܪ ܢܒܺܝܳܐ ܗܳܠܶܝܢ. ܘܠܳܐ ܒܶܝܬ ܥܰܡ̈ܡܶܐ ܡܒܰܕܰܪ ܗܘܳܐ ܥܰܡܳܐ. ܘܠܳܐ ܐܰܝܟ ܐܶܡܪ̈ܶܐ ܡܰܢ ܠܢܶܟܣܬܳܐ ܐܶܬܚܰܫܒܰܬ ܚܕܳܐ ܡܶܢ ܫܰܪ̈ܒܳܬܳܐ ܘܚܰܕ ܡܶܢ ܫܰܒ̈ܛܶܐ. ܡܳܕܶܝܢ ܕܶܝܢ ܢܫܰܪܶܐ ܠܰܡܦܰܫܳܩܽܘ ܡܷ̈ܠܐ ܕܬܶܫܒܽܘܚܬܳܐ ܗܳܕܶܐ. ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܘܥܰܠ ܟܳܪܽܘܙܽܘܬܗܽܘܢ ܕܰܒܗܳܢܳܐ ܥܳܠܡܳܐ ܟܽܠܶܗ. ܡܳܢܳܐ ܗ̄ܝ:
ܕܳܐܦ ܐܰܒܳܗܰܝ̈ܢ ܐܶܫܬܰܥܺܝܘ ܠܰܢ܆ ܡܶܕܶܡ ܕܰܥܒܰܕ ܒܝܰܘ̈ܡܰܝܗܽܘܢ: ܒܝܰܘ̈ܡܳܬܳܐ ܩܰܕ̈ܡܳܝܶܐ. ܐܰܒܳܗ̈ܐ ܢܒܺܝ̈ܐ ܗܘܰܘ. ܕܰܒܝܰܕ ܟܬܺܝ̈ܒܳܬܳܐ ܕܣܶܦܪ̈ܰܝܗܽܘܢ. ܡܶܫܬܰܥܶܝܢ ܗܘܰܘ ܫܠܺܝ̈ܚܶܐ ܩܰܕܺܝ̈ܫܶܐ ܒܶܝܬ ܥܰܡ̈ܡܶܐ. ܡܶܕܶܡ ܕܰܥܒܰܕ ܐܰܠܳܗܳܐ. ܟܰܕ ܓܒܳܐ ܠܙܰܪܥܶܗ ܕܰܐܒܪܳܗܳܡ ܘܰܐܦܩܶܗ ܡܶܢ ܡܶܨܪܶܝܢ.
ܐܺܝܕܳܟ ܐܰܘܒܕܰܬ ܠܥܰܡ̈ܡܶܐ ܘܰܢܨܰܒܬ ܐܶܢܽܘܢ: ܐܰܒܶܐܫܬ ܠܡܰܠܟ̈ܘܳܬܳܐ ܘܫܰܪܰܪܬ ܐܶܢܘܢ. ܗܳܝܕܶܝܢ ܟܰܕ ܥܰܠ ܥܰܡܳܐ ܕܢܺܐܪܰܬ ܐܰܪܥܳܐ ܕܰܡܠܰܟ ܠܶܗ ܐܰܠܳܗܳܐ. ܗܓܰܡ ܫܰܒܥܳܐ ܫܽܘܪ̈ܺܝܢ ܒܫܰܒܥܳܐ ܥܰܡ̈ܡܺܝܢ ܒܰܐܪܥܳܐ ܕܰܟܢܰܥܰܢ. ܘܝܰܗܒ ܠܗܽܘܢ ܐܰܪܥܳܐ ܕܺܝܠܗܽܘܢ ܝܽܘܪܬܳܢܳܐ. ܐܰܒܶܐܫ ܠܰܬܠܳܬܺܝܢ ܘܚܰܕ ܡܰܠܟ̈ܐ ܩܕܳܡܰܝܗܽܘܢ ܕܰܩܛܰܠ ܐܶܢܘܢ ܝܶܫܽܘܥ ܒܰܪܢܽܘܢ. ܘܫܰܕܰܪ ܐܶܢܘܢ ܠܥܶܒܪ̈ܳܝܶܐ ܒܰܡܕܺܝ̈ܢܳܬܗܽܘܢ ܘܰܒܫܽܘ̈ܠܛܳܢܰܝܗܽܘܢ. ܗܳܫܳܐ ܕܶܝܢ ܨܶܝܕ ܫܠܺܝ̈ܚܶܐ ܡܶܬܦܰܢܝܳܐ ܡܶܠܬܳܐ. ܐܺܝܕܳܐ ܕܰܐܠܳܗܳܐ ܐܰܘܒܕܰܬ ܩܕܳܡܰܝܗܽܘܢ ܠܚܰܝ̈ܠܰܘܳܬܳܐ ܡܶܬܝܰܕ̈ܥܳܢܶܐ܆ ܕܗܳܢܽܘܢ ܕܰܐܚܺܝܕܺܝܢ ܗܘܰܘ ܐܰܪ̈ܥܳܬܳܐ ܕܠܶܒܰܘܴ̈ܬܳܐ ܕܟܽܠܶܗ ܥܳܠܡܳܐ. ܘܰܫܟܺܝܢܺܝܢ ܗܘܰܘ ܥܰܠ ܗܰܘ̈ܢܶܐ ܕܡܰܠܟ̈ܐ ܪ̈ܺܝܫܳܢܰܝܗܽܘܢ ܕܕܰܝ̈ܘܶܐ. ܟܰܕ ܐܰܒܶܐܫ ܠܗܳܠܶܝܢ ܗܽܘ ܙܩܺܝܦܳܐ ܘܚܰܝܠܶܗ. ܫܰܕܰܪ ܙܰܪܥܳܐ ܕܰܫܠܺܝ̈ܚܶܐ ܘܡܰܠܦܳܢܽܘܬܗܽܘܢ. ܘܰܙܪܰܥܘ ܒܰܐܪ̈ܥܳܬܳܐ ܛܳܒܴ̈ܬܳܐ. ܘܗܳܪܟܳܐ ܢܶܦܩܰܬ ܠܰܥܒܳܕܳܐ ܡܫܰܡܠܝܳܐ. ܗܳܝ ܕܰܐܒܶܐܫܬ ܠܡܰܠܟ̈ܘܳܬܳܐ ܘܫܰܪܰܪܬ ܐܶܢܽܘܢ. ܡܳܢܳܐ ܓܶܝܪ ܘܰܐܝܟ ܡܰܠܟ̈ܐ ܐܰܚܺܝܕܺܝܢ ܗܘܰܘ ܕܰܝ̈ܘܶܐ ܡܕܰܒܪܳܢܽܘܬܶܗ ܕܗܳܢܳܐ ܥܳܠܡܳܐ. ܘܰܠܗܳܠܶܝܢ ܦܰܚܬܰܬ ܚܽܘܛܪܶܗ ܕܰܙܩܺܝܦܳܐ. ܪܺܝܫܳܐ ܕܫܰܠܺܝ̈ܛܳܢܰܘܗܝ (ܚܒܩܘܩ ܓ: ܝܓ). ܐܰܝܟ ܕܶܐܡܰܪ ܛܽܘܒܳܢܳܐ ܢܒܺܝܳܐ ܚܰܒܩܽܘܩ. ܠܰܘ ܟܰܕ ܐܰܣܢܶܩ ܐܶܢܘܢ ܠܰܐܝܠܶܝܢ ܕܰܥܒܺܝܕܺܝܢ ܪ̈ܰܒܰܝ ܚܰܝ̈ܠܐ ܠܟܳܪܽܘܙܽܘܬܶܗ. ܕܗܶܢܽܘܢ ܢܶܥܒܕܽܘܢ ܕܰܪܳܐ ܥܰܡ ܪ̈ܽܘܚܶܐ ܒܺܝ̈ܫܳܬܳܐ. ܐܶܠܳܐ ܗܽܘ ܙܩܺܝܦܳܐ ܡܰܩܪܶܒ ܚܠܳܦܰܝܗܽܘܢ. ܐܶܡܰܪ ܓܶܝܪ ܢܒܺܝܳܐ:
ܡܶܛܠ ܕܠܳܐ ܗܘܳܐ ܒܚܰܪܒܗܽܘܢ ܝܪܶܬܘ ܐܰܪܥܳܐ܆ ܐܳܦܠܳܐ ܕܪܳܥܗܽܘܢ ܦܪܰܩ ܐܶܢܘܢ. ܕܠܰܘ ܥܰܠ ܥܰܡܳܐ ܫܳܠܡܴ̈ܢ ܗܳܠܶܝܢ. ܣܳܗܶܕ ܝܶܫܽܘܥ ܒܰܪܢܽܘܢ ܕܰܚܪܶܒ ܗܘܳܐ ܬܠܳܬܺܝܢ ܘܚܰܕ ܡܰܠܟ̈ܐ ܩܕܳܡܰܝܗܽܘܢ. ܥܰܡ ܐܽܘ̈ܚܕܳܢܰܝܗܽܘܢ. ܠܘܳܬ ܫܠܺܝ̈ܚܶܐ ܕܶܝܢ ܢܒܺܝܽܘܬܳܐ ܗܳܕܶܐ ܫܶܩܠܰܬ ܣܳܟܳܐ. ܟܰܕ ܠܳܐ ܒܣܰܝܦܳܐ ܓܳܥܪܺܝܢ ܗܘܰܘ ܒܫܺܐܕ̈ܐ ܘܰܡܫܰܢܶܝܢ. ܘܰܒܕܰܝ̈ܘܶܐ ܘܥܳܪܩܺܝܢ. ܟܰܕ ܐܺܝܬ ܗܘܳܐ ܥܰܡܗܽܘܢ ܚܰܝܠܳܐ ܕܰܐܠܳܗܳܐ ܘܰܕܪܳܥܶܗ.
ܐܶܠܳܐ ܝܰܡܺܝܢܳܟ ܘܰܕܪܳܥܳܟ. ܡܳܢܰܘ ܝܰܡܺܝܢܶܗ ܕܰܐܠܳܗܳܐ ܐܶܠܳܐ ܗܰܘ ܒܰܪ ܡܰܘܬܒܶܗ ܕܝܰܡܺܝܢܳܐ ܕܫܽܘܒܚܶܗ. ܘܡܰܢܽܘ ܕܪܳܥܶܗ ܕܰܐܠܳܗܳܐ ܠܳܐ ܗܘܳܐ ܗܰܘ ܕܶܐܡܰܪ ܐܶܫܰܥܝܳܐ: ܘܰܕܪܳܥܶܗ ܕܡܳܪܝܳܐ ܠܡܰܢ ܐܶܬܓܠܺܝ (ܐܫܥܝܐ ܢܓ: ܐ).
ܘܢܽܘܗܪܳܐ ܕܰܐܦܰܝ̈ܟ ܕܰܨܒܰܝܬ ܒܗܽܘܢ. ܫܰܦܺܝܪ ܡܩܰܠܶܣ ܘܰܡܫܰܒܰܚ ܠܳܗ̇ ܠܗܰܝܡܳܢܽܘܬܳܐ ܕܰܫܠܺܝ̈ܚܶܐ ܒܗܳܠܶܝܢ ܩܴ̈ܠܐ ܠܰܝܬ ܚܽܘܠܛܳܢܳܐ ܠܶܐܪ̈ܶܣܺܝܣ. ܩܪܳܝܗܝ ܠܗܰܘ ܕܰܡܥܰܕܰܪ ܘܦܳܪܶܩ ܗܘܳܐ ܠܰܫܠܺܝ̈ܚܶܐ. ܝܰܡܺܝܢܶܗ ܘܰܕܪܳܥܶܗ ܕܰܐܠܗܐ ܐܰܒܳܐ. ܘܰܕܠܳܐ ܢܶܗܘܶܐ ܚܰܣܺܝܪ ܛܰܒܥܳܐ ܕܡܶܠܬܳܐ ܢܒܺܝܳܝܬܳܐ ܡܶܢ ܫܠܺܝܚܳܝܬܳܐ. ܬܽܘܒ ܩܪܳܝܗܝ ܗܘܳܐ ܢܽܘܗܪܳܐ ܕܰܐܒܳܐ.
ܢܽܘܗܪܳܐ ܠܰܡ ܕܰܐܦܰܝ̈ܟ ܕܰܨܒܰܝܬ ܒܗܽܘܢ. ܘܦܰܘܠܽܘܣ ܫܩܰܠ ܕܢܺܐܡܰܪ ܠܥܶܒܪ̈ܳܝܶܐ. ܕܗܽܘܝܽܘ ܨܶܡܚܳܐ ܕܫܽܘܒܚܶܗ܆ ܘܨܰܠܡܳܐ ܦܰܐܝܳܐ ܕܺܐܝܬܽܘܬܶܗ (ܥܒܪ̈ܝܐ ܐ: ܓ). ܐܰܝܟ ܦܶܛܪܽܘܣ ܗܰܘ ܪܰܒܳܐ ܕܡܰܘܕܶܐ ܠܶܗ ܘܳܐܡܰܪ: ܕܰܐܢܬ ܗܽܘ ܐܰܠܳܗܳܐ ܡܰܠܟܝ: ܕܰܦܩܰܕܬ ܥܰܠ ܦܽܘܪܩܳܢܶܗ ܕܝܰܥܩܽܘܒ. ܗܳܠܶܝܢ ܩܴ̈ܠܐ ܕܰܫܠܺܝ̈ܚܶܐ ܐܶܢܘܢ. ܕܰܐܝܟ ܗܳܟܰܢܳܐ ܐܳܡܰܪ ܗܘܳܐ ܢܰܬܰܢܰܐܶܝܠ ܠܘܳܬ ܡܳܪܰܢ܆ ܟܰܕ ܐܶܬܳܐ ܠܘܳܬܶܗ ܡܶܢ ܬܚܶܝܬ ܬܺܬܳܐ ܕܢܳܡܽܘܣܳܐ. ܪܰܒܺܝ܆ ܐܰܢܬ ܗܽܘ ܒܪܶܗ ܕܰܐܠܳܗܳܐ. ܐܰܢܬ ܗܽܘ ܡܰܠܟܶܗ ܕܺܝܣܪܳܐܝܠ (ܝܘܚܢܢ ܐ: ܡܛ).
ܒܳܟ ܢܕܰܩܰܪ ܠܰܒܥܶܠܕ̈ܒܳܒܰܝܢ: ܘܡܶܛܠ ܫܡܳܟ ܢܕܽܘܫ ܠܣܳܐܢܰܝ̈ܢ. ܡܶܛܠ ܕܠܳܐ ܗܘܳܐ ܥܰܠ ܩܶܫ̈ܬܳܬܰܢ ܬܟܺܝܠܺܝܢܰܢ: ܘܳܐܦܠܳܐ ܥܰܠ ܙܰܝܢܰܢ ܕܢܶܦܪܩܰܢ. ܗܳܠܶܝܢ ܩܴ̈ܠܐ ܩܽܘܒܳܠܛܰܝܒܽܘܬܳܐ ܕܰܫܠܺܝ̈ܚܶܐ ܐܶܢܽܘܢ. ܕܡܰܘܕܶܝܢ ܗܘܰܘ ܒܟܽܠܕܽܘܟ. ܕܰܒܚܰܝܠܶܗ ܘܒܰܫܡܶܗ ܕܰܡܫܺܝܚܳܐ ܪ̈ܳܗܛܳܢ ܗܘܱ̈ܝ ܐܳܬܘܴ̈ܬܳܐ ܘܚܰܝ̈ܠܶܐ ܠܘܳܬ ܟܪ̈ܺܝܗܶܐ. ܘܰܫܠܺܝܚܳܐ ܛܽܘܒܳܢܳܐ ܟܬܰܒ ܗܘܳܐ: ܕܗܳܕܶܐ ܠܳܐ ܗܘܳܬ ܡܶܢܟܽܘܢ܆ ܐܶܠܐ ܡܰܘܗܰܒܬܳܐ ܗܝ ܕܰܐܠܳܗܳܐ. ܠܐ ܡܶܢ ܥܒܴ̈ܕܶܐ܆ ܕܠܳܐ ܐܢܳܫ ܢܶܫܬܰܒܗܰܪ. ܕܰܒܪܺܝܬܳܐ ܓܶܝܪ ܚܢܰܢ ܕܺܝܠܶܗ ܕܶܐܬܒܪܺܝܢ ܓܶܝܪ ܒܝܶܫܽܘܥ ܡܫܺܝܚܳܐ ܠܰܥܒܴ̈ܕܶܐ ܛܳܒ̈ܐ (ܐܦܣ̈ܝܐ ܒ: ܚ-ܝ). ܘܥܰܠ ܗܳܕܶܐ ܢܺܐܡܰܪ: ܠܘܳܬ ܗܰܘ ܕܪܳܥܶܗ ܓܰܢ̱ܒܳܪܳܐ ܕܰܐܠܗܐ ܐܰܒܳܐ. ܕܶܐܬܓܠܺܝ ܒܰܒܣܰܪ ܘܰܦܪܰܩ ܠܰܢ.
ܕܰܐܢܬ ܗܽܘ ܦܪܰܩܬܳܢ ܡܶܢ ܣܳܐܢܰܝ̈ܢ. ܘܰܐܒܗܶܬܬ ܠܰܒܥܶܠܕ̈ܒܳܒܰܝܢ. ܫܰܒܰܚܢܳܟ ܐܰܠܳܗܳܐ ܟܽܠܶܗ ܝܰܘܡܳܐ. ܚܙܰܝܬ ܐܰܝܟܰܢܳܐ ܒܟܽܠܕܽܘܟ ܐܰܠܳܗܳܐ ܝܳܕܰܥ ܠܶܗ ܠܰܢܒܺܝܳܐ. ܠܗܰܘ ܕܡܶܬܟܪܶܙ ܗܘܳܐ ܒܰܫܠܺܝ̈ܚܶܐ. ܠܡܳܢܳܐ ܕܶܝܢ ܐܶܡܰܪ ܟܽܠܶܗ ܝܰܘܡܳܐ. ܘܠܰܘ ܟܽܠܝܽܘܡ܆ ܠܟܽܠܶܗ ܡܶܬܚܳܐ ܕܟܳܪܽܘܙܽܘܬܳܐ ܕܶܐܘܰܢܓܶܠܝܽܘܢ. ܝܰܘܡܳܐ ܡܫܰܡܰܗ ܠܳܗ̇ ܢܒܺܝܳܐ. ܐܰܟܡܰܢ ܕܟܽܠܳܗ̇ ܐܺܝܡܳܡܳܐ ܐܰܣܺܝ. ܘܠܰܝܬ ܒܳܗ̇ ܒܰܡܕܰܒܪܳܢܽܘܬܳܐ ܠܺܠܝܳܐ ܕܰܚܛܺܝܬܳܐ. ܐܶܡܰܪ ܓܶܝܪ ܚܰܟܺܝܡ ܒܟܽܠ ܦܰܘܠܽܘܣ܆ ܕܠܺܠܝܳܐ ܡܶܟܺܝܠ ܥܒܰܪ ܠܶܗ. ܘܺܐܝܡܳܡܳܐ ܩܪܶܒ. ܢܢܺܝܚ ܡܶܢܰܢ ܗܳܟܺܝܠ ܥܒܴ̈ܕܶܐ ܕܚܶܫܽܘܟܳܐ ܘܢܶܠܒܰܫ ܙܰܝܢܶܗ ܕܢܽܘܗܪܳܐ (ܪ̈ܗܘܡܝܐ ܝܓ: ܝܒ). ܫܰܦܺܝܪ ܡܳܕܶܝܢ ܐܶܬܢܰܗܰܪ ܦܽܘܫܳܩܳܗ̇ ܕܗܳܝ ܕܫܰܒܰܚܢܳܟ ܐܰܠܗܐ ܟܽܠܶܗ ܝܰܘܡܳܐ. ܥܰܠ ܟܽܠܶܗ ܙܰܒܢܳܐ ܕܠܶܒܳܐ ܟܳܪܽܘܙܽܘܬܳܐ ܐܰܡܺܝܪ. ܐܰܝܟܰܢܳܐ ܕܢܶܗܘܶܐ ܙܰܒܢܳܐ ܕܢܳܡܽܘܣܳܐ ܠܺܠܝܳܐ. ܘܙܰܒܢܳܐ ܕܰܣܒܰܪܬܳܐ ܡܰܢ ܐܺܝܡܳܡܳܐ. ܗܳܕܳܐ ܗ̄ܝ ܕܠܺܠܝܳܐ ܡܶܟܺܝܠ ܥܒܰܪ ܘܺܐܝܡܳܡܳܐ ܩܪܶܒ ܙܰܒܢܳܐ ܕܰܟܪܽܘܟܝܳܐ ܕܰܫܠܺܝܚܽܘܬܳܐ. ܕܫܰܕܰܪ ܐܰܒܳܐ ܡܶܢ ܫܡܰܝܳܐ ܒܪܶܗ ܚܰܒܺܝܒܳܐ ܘܒܰܛܶܠ ܕܶܒܚ̈ܐ ܕܚܰܝ̈ܘܳܬܳܐ. ܘܗܳܫܳܐ ܢܺܐܡܪܽܘܢ ܡܩܰܪ̈ܒܳܢܶܝܗ̇ ܕܕܶܒܚܬܳܐ. ܕܕܶܒܚܬܳܐ ܕܬܰܘܕܺܝܬܳܐ.
ܕܠܰܫܡܳܟ ܠܥܳܠܰܡ ܢܰܘܕܶܐ. ܬܰܘܕܺܝܬܳܐ ܓܶܝܪ ܕܰܠܥܳܠܰܡ ܡܰܘܕܥܳܐ܆ ܕܠܳܐ ܬܽܘܒ ܡܩܰܒܠܳܐ ܫܽܘܚܠܳܦܳܐ. ܘܠܳܐ ܥܳܒܪܳܐ ܕܬܶܗܘܶܐ ܐܚܪܺܬܳܐ ܕܰܡܫܰܡܠܝܳܐ ܡܶܢܳܗ̇. ܐܶܠܳܐ ܗܺܝ ܡܩܰܘܝܳܐ ܐܰܝܟ ܓܡܺܝܪܬܳܐ ܕܠܳܐ ܚܰܣܺܝܪܳܐ. ܒܳܬܰܪ ܗܳܠܶܝܢ ܩܴ̈ܠܐ ܟܰܗܺܝ̈ܢܶܐ ܕܰܡܣܰܒܪ̈ܳܢܶܐ. ܕܒܰܕܡܽܘܬ ܫܶܡܫܳܐ ܪܕܰܦܘ ܠܺܠܝܳܐ ܕܰܚܛܺܝܬܳܐ ܡܶܢ ܥܳܠܡܳܐ. ܘܰܐܬܩܶܢܘ ܗܘܰܘ ܟܽܘܪܣܝܶܗ ܕܰܙܩܺܝܦܳܐ ܘܡܰܠܟܽܘܬܶܗ ܒܟܽܠܗܽܘܢ ܥܰܡ̈ܡܶܐ. ܘܳܐܦ ܫܠܺܝ̈ܚܶܐ ܝܬܶܒܘ ܐܰܝܟ ܪ̈ܺܝܫܰܝ ܫܰܒ̈ܛܶܐ ܒܟܽܠܗܶܝܢ ܐܶܡ̈ܘܳܬܳܐ. ܘܶܐܬܚܪܶܒܘ ܒܣܰܝܦܳܐ ܕܪܽܘܚܳܐ ܐܰܪ̈ܟܽܘܢܺܝܛܶܐ ܕܥܰܘܠܳܐ ܡܶܢ ܬܺܒܶܝܠ. ܘܰܢܩܰܫܘ ܟܰܦܳܐ ܟܽܠ ܡܰܠܟܽܘ ܠܰܡܫܰܒܳܚܽܘ ܠܡܰܠܟܳܐ ܕܶܐܙܕܩܶܦ. ܘܒܰܛܶܠܘ ܚܱ̈ܓܶܐ ܕܰܚܛܺܝܬܳܐ. ܘܶܐܣܬܰܚܰܦܘ ܡܰܓ̈ܕܠܶܐ ܕܰܦܬܰܟܪܽܘܬܳܐ ܕܰܒܢܳܬ ܛܽܘܥܝܰܝ ܥܰܠ ܪ̈ܺܝܫܰܝ ܛܽܘܪ̈ܶܐ. ܘܰܡܫܰܪܶܐ ܡܳܕܶܝܢ ܪܽܘܚܳܐ ܕܰܢܬܰܢܶܐ ܡܶܟܺܝܠ ܚܠܳܦܰܝܗܽܘܢ ܒܺܝ̈ܫܳܬܳܐ ܕܰܣܒܰܠܘ ܒܳܬܰܪ ܟܳܪܽܘܙܽܘܬܗܽܘܢ ܟܰܕ ܐܳܡܰܪ:
ܘܗܳܫܳܐ ܛܥܰܝܬܳܢ ܘܰܐܒܗܶܬܬܳܢ ܘܠܳܐ ܢܳܦܶܩ ܐܰܢܬ ܒܚܰܝܠܰܢ. ܟܰܕ ܓܶܝܪ ܡܰܟܪܶܙ ܗܘܳܐ ܦܰܘܠܽܘܣ. ܥܰܠ ܕܰܒܥܳܐ ܒܰܪ ܫܽܘܡܳܐ ܕܢܰܣܓܶܦ ܠܟܳܪܽܘܙܽܘܬܶܗ܆ ܫܡܰܥ ܗܳܝܕܶܝܢ ܡܶܢ ܫܠܺܝܚܳܐ ܕܳܐܡܰܪ: ܗܳܫܳܐ ܐܺܝܕܶܗ ܕܡܳܪܝܳܐ ܥܠܰܝܟ ܬܶܗܘܶܐ ܣܡܶܐ ܘܠܳܐ ܬܶܚܙܶܐ ܫܶܡܫܳܐ ܥܕܰܡܳܐ ܠܙܰܒܢܳܐ (ܦܪܟܣܝܣ ܝܓ: ܝܐ). ܗܳܝ ܕܳܐܦ ܗܘܳܬ ܟܰܕ ܕܶܝܢ ܫܰܡܠܺܝ ܟܳܪܽܘܙܽܘܬܶܗ. ܐܳܦ ܐܶܬܦܣܶܩ ܪܺܝܫܶܗ ܡܶܢ ܢܺܝܪܽܘܢ ܥܰܘܳܠܳܐ܆ ܐܳܦ ܦܶܛܪܽܘܣ ܬܠܰܐܘܽܗܝ ܒܳܬܰܪ ܪܺܝܫܶܗ. ܘܩܳܥܶܝܢ ܗܘܰܘ ܘܳܐܡܪܺܝܢ:
ܐܶܠܐ ܐܰܗܦܶܟܬܳܢ ܠܒܶܣܬܪܰܢ ܘܒܰܙܽܘܢ ܒܥܶܠܕ̈ܒܳܒܰܝܢ. ܡܳܐ ܓܶܝܪ ܕܡܶܬܩܰܛܠܺܝܢ ܗܘܰܘ ܫܠܺܝ̈ܚܶܐ. ܗܳܘܶܐ ܗܘܳܐ ܐܰܬܪܳܐ ܠܚܰܢ̈ܦܶܐ ܐܳܦ ܠܝܽܘ̈ܕܳܝܶܐ ܟܡܳܐ ܙܰܒ̈ܢܺܝܢ ܡܰܗܦܟܺܝܢ ܗܘܰܘ ܢܰܦ̈ܫܳܬܳܐ ܕܬܰܠܡܺܝ̈ܕܶܐ ܕܢܺܐܙܽܠ̱ܘܢ ܒܳܬܰܪܗܽܘܢ. ܘܗܺܝ ܗܳܕܶܐ ܒܶܙܬܳܐ ܗܘܳܬ ܕܰܓܙܳܪܳܐ ܕܒܶܝܬ ܐܰܠܗܐ. ܗܶܢܽܘܢ ܕܶܝܢ ܡܰܘܕܶܝܢ ܘܳܐܡܪܺܝܢ:
ܝܰܗܒܬܳܢ ܐܰܝܟ ܥܳܢܴ̈ܐ ܠܡܶܐܟܽܘܠܬܳܐ. ܠܰܝܬ ܗܘܳܐ ܒܗܽܘܢ ܓܶܝܪ ܕܩܳܐܷܡ ܠܽܘܩܒܰܠ ܩܳܛܽܘ̈ܠܰܘܗܝ. ܐܶܠܐ ܐܰܝܟ ܕܰܐܠܶܦ ܐܶܢܘܢ ܪܳܥܝܳܐ ܗܰܘ ܕܫܰܕܰܪ ܐܶܢܘܢ. ܘܳܐܦ ܗܶܢܽܘܢ ܒܰܕܡܽܘܬܶܗ ܐܰܝܟ ܢܶܩܝܳܐ ܩܕܳܡ ܓܳܙܽܘܙܳܐ ܫܰܬܺܝܩܺܝܢ ܗܘܰܘ. ܘܳܐܡܪܺܝܢ ܗܘܰܘ ܗܳܝ:
ܕܒܰܕܰܪܬܳܢ ܒܶܝܬ ܥܰܡ̈ܡܶܐ. ܘܙܰܒܶܢܬ ܠܥܰܡܳܟ ܕܠܳܐ ܕܡܰܝܴ̈ܐ. ܟܺܐܢܳܐ ܗܘܳܬ ܓܶܝܪ܆ ܕܰܠܥܰܒܕܳܐ ܐܶܬܕܰܡܺܝ ܡܳܪܳܐ. ܐܳܦ ܥܰܠܠܳܢܰܘ̈ܗܝ ܕܠܳܐ ܛܺܝ̈ܡܶܐ ܢܶܙܕܰܒܢܽܘܢ. ܟܰܕ ܠܳܐ ܡܶܬܺܝܗܶܒ ܬܰܚܠܽܘܦܗܽܘܢ.
ܘܠܳܐ ܠܰܡ ܐܰܣܓܺܝܬ ܚܽܘܠܳܦܗܽܘܢ: ܥܒܰܕܬܳܢ ܚܶܣܕܳܐ ܠܰܫܒܳܒܰܝ̈ܢ. ܘܡܽܘܝܳܩܳܐ ܘܒܽܘܙܳܚܳܐ ܠܰܐܝܠܶܝܢ ܕܰܚܕܳܪ̈ܰܝܢ ܐܶܢܘܢ. ܥܒܰܕܬܳܢ ܠܡܰܬܠܳܐ ܒܶܝܬ ܥܰܡ̈ܡܶܐ: ܘܰܢܝܳܕܳܐ ܕܪܺܝܫܳܐ ܒܶܐܡ̈ܘܳܬܳܐ. ܗܳܟܰܢܳܐ ܥܒܺܝܕܺܝܢ ܗܘܰܘ ܫܠܺܝ̈ܚܶܐ ܒܶܝܬ ܥܰܡ̈ܡܶܐ ܒܰܪܒܪ̈ܳܝܶܐ ܟܰܕ ܡܶܬܚܰܣܕܺܝܢ ܒܡܰܘܬܰܝ̈ܗܽܘܢ. ܟܰܕ ܡܶܬܡܰܝܩܺܝܢ ܟܰܕ ܡܢܺܝܕܺܝܢ ܥܠܰܝܗܽܘܢ ܪܺܝܫܳܐ. ܘܽܐܘ̈ܠܨܳܢܶܐ ܣܳܒܠܺܝܢ ܗܘܰܘ. ܘܝܰܬܺܝܪܳܐܝܬ ܠܦܰܘܠܽܘܣ ܗܰܘ ܪܰܒܳܐ. ܟܰܕ ܥܒܺܝܕ ܬܶܘܰܐܛܪܽܘܢ ܕܒܶܙܚܳܐ ܠܡܰܠܐܟ̈ܐ ܘܠܰܒܢܰܝ̈ܢܳܫܳܐ. ܟܰܕ ܐܰܣܺܝܪ ܒܫܺܫ̈ܠܳܬܳܐ ܘܰܪܡܶܐ ܒܶܝܬ ܐܰܣܺܝܪ̈ܶܐ. ܟܰܕ ܫܕܶܐ ܠܚܰܝ̈ܘܳܬܳܐ ܒܶܐܦܶܣܽܘܣ. ܟܰܕ ܡܶܬܢܰܓܰܕ ܒܫܰܒ̈ܛܶܐ ܡܶܢ ܝܽܘ̈ܕܳܝܶܐ ܕܠܳܐ ܚܰܘܣܳܢ. ܟܰܕ ܥܒܺܝܕ ܢܽܘܘܳܓܳܐ ܒܓܰܘ ܝܰܡܳܐ. ܟܰܕ ܡܬܺܝܚ ܒܥܰܪ̈ܩܶܐ ܡܶܢ ܟܺܝܠܺܝܰܪ̈ܟܶܐ. ܟܰܕ ܡܶܬܪܓܶܡ ܒܟܺܐܦ̈ܐ ܘܡܶܬܓܰܪܰܪ ܠܒܰܪ ܡܶܢ ܡܕܺܝܢܬܳܐ. ܥܰܡ ܐܚܪ̈ܳܢܝܳܬܳܐ ܕܰܣܒܰܠ ܕܠܳܐ ܡܶܢܝܳܢܳܐ. ܘܰܒܗܳܠܶܝܢ ܥܒܺܝܕ ܗܘܳܐ ܡܰܬܠܳܐ ܘܬܽܘܢܳܝܳܐ. ܟܰܕ ܠܳܐ ܝܳܕܥܺܝܢ ܗܘܰܘ ܥܶܠܬܳܐ ܕܡܶܛܠܳܬܳܗ̇ ܡܣܰܝܒܰܪ ܗܘܳܐ ܒܺܝ̈ܫܳܬܳܐ. ܘܠܰܘ ܗܳܕܶܐ ܒܰܠܚܽܘܕ ܐܶܠܳܐ ܟܳܬܶܒ ܗܘܳܐ ܠܘܳܬ ܛܺܝܡܳܬܶܐܘܳܣ ܬܰܠܡܺܝܕܶܗ. ܕܳܐܦ ܕܒܶܗ ܢܶܬܕܰܡܶܐ. ܟܰܕ ܡܣܰܝܒܰܪ ܘܣܳܒܶܠ ܚܠܳܦ ܐܶܘܰܢܓܶܠܝܽܘܢ. ܘܣܰܝܒܰܪ ܒܺܝ̈ܫܳܬܳܐ ܘܰܥܒܳܕܳܐ ܥܒܶܕ ܕܰܡܣܰܒܪܳܢܳܐ. ܘܬܶܫܡܶܫܬܳܟ ܫܰܠܶܡ. ܐܶܢܳܐ ܓܶܝܪ ܡܶܟܺܝܠ ܡܶܬܢܰܩܶܐ ܐ̱ܢܳܐ. ܘܙܰܒܢܳܐ ܕܶܐܫܬܪܶܐ ܡܛܳܐ (ܒ ܛܝܡܬܐܘܣ ܕ: ܗ-ܘ). ܚܙܰܝܬ ܐܰܝܟܰܢܳܐ ܚܳܫܶܒ ܢܽܘܩܳܝܳܐ ܠܡܰܘܬܶܗ. ܐܰܝܟ ܢܽܘܩܳܝܳܐ ܥܰܠ ܡܰܕܒܚܳܐ ܗܳܟܰܢܳܐ ܡܚܰܘܶܐ ܕܡܶܬܪܣܶܣ. ܐܶܠܳܐ ܗܳܢܽܘܢ ܕܩܳܛܠܺܝܢ ܗܘܰܘ ܠܶܗ ܣܳܒܪܺܝܢ ܗܘܰܘ ܕܡܰܒܗܬܺܝܢ ܠܶܗ ܡܶܢ ܣܰܒܪܶܗ. ܡܶܛܠ ܗܳܢܳܐ ܒܩܴ̈ܠܐ ܕܰܐܝܟ ܗܳܠܶܝܢ ܙܰܡܰܪ ܢܒܺܝܳܐ. ܥܰܠ ܡܰܘ̈ܬܶܐ ܘܨܰܥܪ̈ܶܐ ܕܰܫܠܺܝ̈ܚܶܐ.
ܕܟܽܠܶܗ ܝܰܘܡܳܐ ܒܶܗܬܰܬܝ ܩܕܳܡܰܝ ܗܺܝ: ܘܒܶܗܬܬܳܐ ܕܰܐܦܰܝ̈ ܟܰܣܝܰܬ̣ܰܢܝ. ܒܗܳܕܶܐ ܡܰܘܕܰܥ ܕܠܳܐ ܫܳܠܶܝܢ ܚܰܫ̈ܐ ܡܶܢ ܥܺܕܬܳܐ ܟܽܠܶܗ ܙܰܒܢܳܐ ܕܩܳܐܷܡ ܥܳܠܡܳܐ. ܒܰܙܒܰܢ ܡܶܢ ܚܰܢܦ̈ܐ܆ ܒܰܙܒܰܢ ܡܶܢ ܐܶܪ̈ܺܝܛܺܝܩܽܘ. ܒܫܽܘܠܳܡܳܐ ܕܶܝܢ ܡܶܢ ܗܰܘ ܕܰܐܥܒܶܕ ܒܗ̇ܠܝܢ ܪܺܝܫ ܛܽܘܥܝܰܝ. ܘܰܒܗܳܢܳܐ ܥܳܠܡܳܐ ܒܶܗܬܬܳܐ ܡܶܬܪܰܢܝܳܐ ܣܳܗܕܽܘܬܳܐ ܕܰܚܠܳܦ ܡܫܺܝܚܳܐ. ܥܰܠܗܳܕܶܐ ܐܳܦ ܢܒܺܝܳܐ ܐܶܡܰܪ: ܕܰܐܦܰܝ̈ ܠܳܐ ܐܰܦܢܺܝܬ ܡܶܢ ܒܶܗܬܬܳܐ ܘܡܶܢ ܪܽܘܩܳܐ (ܐܫܥܝܐ ܢܢ: ܘ). ܘܗܳܕܶܐ ܐܰܡܺܝܪܳܐ ܡܶܢ ܐܶܫܰܥܝܳܐ ܢܒܺܝܳܐ ܥܰܠ ܥܰܡܰܢܽܘܐܝܠ. ܐܶܠܐ ܡܳܢܳܐ ܐܳܡܰܪ: ܠܰܘ ܡܶܢ ܫܰܪܺܝܪ̈ܶܐ ܣܥܳܬ ܥܰܠ ܫܠܺܝ̈ܚܶܐ ܒܶܗܬܬܳܐ. ܐܶܠܳܐ ܡܶܢ ܕܰܓ̈ܠܶܐ ܘܡܶܢ ܡܓܰܕ̈ܦܳܢܶܐ.
ܡܶܢ ܩܳܠܐ ܠܰܡ ܕܰܡܚܰܣܶܕ ܘܰܡܓܰܕܶܦ. ܘܡܶܢ ܩܕܳܡ ܒܥܶܠܕܒܳܒܳܐ ܕܡܶܬܢܰܩܰܡ. ܚܙܰܝܬ ܐܰܝܟܰܢܳܐ ܐܶܡܰܪ: ܕܡܶܢ ܪ̈ܰܘܒܶܐ ܘܩܴ̈ܠܐ ܕܰܐܝܠܶܝܢ ܕܚܰܣܶܕܘ ܠܟܳܪ̈ܽܘܙܶܐ ܘܠܳܐ ܩܰܒܶܠܘ ܟܳܪܽܘܙܽܘܬܗܽܘܢ. ܕܟܰܕ ܡܡܰܠܶܠ ܗܘܳܐ ܦܰܘܠܽܘܣ. ܩܳܝܡܺܝܢ ܗܘܰܘ ܠܽܘܩܒܰܠ ܡܷ̈ܠܐ ܕܳܐܡܰܪ ܘܰܡܓܰܕܦܺܝܢ ܗܘܰܘ (ܦܪܟܣܝܣ ܝܓ: ܡܗ). ܘܰܡܩܺܝܡܺܝܢ ܗܘܰܘ ܥܠܰܘܗܝ ܪܕܽܘܦܝܳܐ ܡܶܢ ܥܰܡ̈ܡܶܐ. ܡܶܛܠ ܕܰܒܥܶܠܕܒܳܒܳܐ ܨܢܺܝܥܳܐ ܗܰܘ ܕܣܳܢܶܐ ܗܘܳܐ ܠܟܳܪܽܘܙܽܘܬܳܐ ܕܶܐܘܰܢܓܶܠܝܽܘܢ. ܡܰܥܒܶܕ ܗܘܳܐ ܒܗܽܘܢ ܟܰܣܝܳܐܝ̣ܬ ܕܢܶܬܢܰܩܡܽܘܢ ܡܶܢ ܡܣܰܒܪ̈ܳܢܶܐ. ܡܰܝܬܶܐ ܕܶܝܢ ܒܳܬܰܪ ܗܳܠܶܝܢ ܢܒܺܝܳܐ܆ ܫܪܳܪܳܐ ܠܐ ܡܶܫܬܰܚܠܦܳܢܳܐ ܕܰܩܢܰܘ ܫܠܺܝ̈ܚܶܐ ܒܟܳܪܽܘܙܽܘܬܳܐ ܕܰܙܩܺܝܦܳܐ. ܘܰܚܠܳܦܰܝܗܽܘܢ ܡܙܰܡܰܪ ܐܰܝܟ ܕܡܶܢ ܒܶܝܬ ܓ̈ܠܠܶܐ ܕܚܰܫ̈ܐ ܘܳܐܡܰܪ:
ܗܳܠܶܝܢ ܟܽܠܗܶܝܢ ܓܕܰܫ̈ܝ ܠܰܢ ܘܠܳܐ ܛܥܰܝܢܳܟ: ܘܠܳܐ ܕܰܓܶܠܢܰܢ ܒܰܩܝܳܡܳܟ: ܘܠܳܐ ܗܦܰܟܢ ܠܒܶܣܬܪܰܢ: ܘܠܳܐ ܐܰܗܦܶܟܢ ܫܒܺܝ̈ܠܰܝܢ ܡ̣ܢ ܐܽܘܪܚܳܟ. ܚܙܰܝܬ ܪܰܒܽܘܬ ܠܶܒܳܐ ܕܟܳܪ̈ܽܘܙܶܐ. ܗܳܠܶܝܢ ܓܶܝܪ ܩܴ̈ܠܐ ܠܳܐ ܚܳܫܚܺܝܢ ܕܰܠܘܳܬ ܥܰܡܳܐ ܢܚܽܘܪ ܣܽܘܟܳܠܗܽܘܢ. ܐܶܠܳܐ ܠܘܳܬ ܗܳܢܽܘܢ ܕܰܒܟܽܠ ܫܽܘܚ̈ܠܳܦܺܝܢ ܣܰܝܒܰܪܘ ܗܘܰܘ ܐܽܘ̈ܠܨܳܢܶܐ ܐܰܝܟ ܦܰܘܠܽܘܣ ܫܠܺܝܚܳܐ ܟܰܕ ܐܳܡܰܪ: ܕܡܰܢܽܘ ܢܶܦܪܩܰܢܝ ܡܶܢ ܚܽܘܒܶܗ ܕܰܡܫܺܝܚܳܐ ܐܽܘܠܨܳܢܳܐ܆ ܐܰܘ ܪܕܽܘܦܝܳܐ܆ ܐܰܘ ܚܒܽܘܫܝܳܐ܆ ܐܰܘ ܟܰܦܢܳܐ܆ ܐܰܘ ܥܰܪܛܶܠܳܝܽܘܬܳܐ܆ ܐܰܘ ܣܰܝܦܳܐ (ܪ̈ܗܘܡܝܐ ܚ: ܠܗ). ܐܶܠܳܐ ܡܳܢܳܐ ܬܽܘܒ ܐܶܡܰܪ ܢܒܺܝܳܐ.
ܡܶܛܠ ܕܡܰܟܶܟܬܳܢ ܒܰܐܬܪܳܐ ܬܶܢܝܳܢܳܐ. ܘܟܰܣܺܝܬܳܢܝ ܒܛܶܠܳܠܰܝ̈ ܡܰܘܬܳܐ. ܡܳܢܰܘ ܐܰܬܪܳܐ ܬܶܢܝܳܢܳܐ. ܐܶܠܳܐ ܗܳܝ ܕܰܢܦܰܩܘ ܫܠܺܝ̈ܚܶܐ ܬܶܢܝܳܢܽܘܬ ܠܘܳܬ ܥܰܡ̈ܡܶܐ: ܘܰܣܒܰܠܘ ܡܽܘܟܳܟܳܐ ܣܰܓܺܝܳܐܐ ܡ̣ܢ ܥܰܡ̈ܡܶܐ ܥܕܰܡܳܐ ܠܡܰܘܬܳܐ. ܐܶܠܐ ܐܳܦ ܗܳܫܳܐ ܩܳܥܶܐ ܢܒܺܝܳܐ ܚܠܳܦܰܝܗܽܘܢ.
ܠܳܐ ܛܥܰܝܢ ܫܡܶܗ ܕܰܐܠܳܗܰܢ: ܘܠܳܐ ܦܫܰܛܢ ܐܺܝ̈ܕܰܝܢ ܠܘܳܬ ܐܰܠܗ̈ܐ ܢܽܘܟܪ̈ܳܝܶܐ. ܐܰܠܳܗܰܐ ܗܘ ܒܳܨܶܐ ܠܳܗ̇ ܠܗܳܕܶܐ. ܡܶܛܠ ܕܗܽܘ ܝܳܕܰܥ ܡܰܚܫ̈ܒܳܬܶܗ ܕܠܶܒܳܐ. ܡܶܛܠܳܬܳܟ ܐܶܬܩܰܛܠܢ ܟܽܠܝܽܘܡ: ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ. ܡܰܢܽܘ ܕܗܳܟܰܢܳܐ ܩܢܶܐ ܦܰܪܶܗܣܺܝܰܐ ܠܕܰܐܝܟ ܗܳܠܶܝܢ ܒܢܴ̈ܬ ܩܴ̈ܠܐ ܢܺܐܡܰܪ: ܐܶܠܳܐ ܗܰܘ ܡܰܠܦܳܢܳܐ ܕܥܰܡ̈ܡܶܐ ܘܰܫܠܺܝܚܳܐ ܐܰܟܚܕܳܐ. ܕܟܳܬܶܒ ܗܘܳܐ ܠܘܳܬ ܬܰܠܡܺܝ̈ܕܶܐ ܪ̈ܽܘܡܳܝܶܐ ܐܳܡܰܪ ܗܘܳܐ: ܡܶܛܠܳܬܳܟ ܟܽܠܝܽܘܡ ܡܳܝܬܺܝܢܰܢ܇ ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ. ܘܰܒܗܳܠܶܝܢ ܟܽܠܗܶܝܢ ܙܰܟܳܝܺܝܢܰܢ ܒܝܰܕ ܡܰܢ ܕܰܐܚܒܰܢ (ܪ̈ܗܘܡܝܐ ܚ: ܠܘ-ܠܙ). ܡܳܪܰܢ ܝܶܫܽܘܥ ܡܫܺܝܚܳܐ (ܪ̈ܗܘܡܝܐ ܚ: ܠܛ). ܠܘܳܬ ܗܳܕܶܐ ܪܰܒܽܘܬ ܠܶܒܳܐ ܚܳܐܱܪ ܗܘܳܐ ܢܒܺܝܳܐ ܟܰܕ ܐܶܬܢܰܒܺܝ ܗܳܠܶܝܢ. ܘܰܒܗܳܢܳܐ ܚܽܘܒܳܐ ܕܶܐܬܥܰܠܺܝ ܠܥܶܠ ܡܶܢ ܡܰܠܐܟ̈ܐ. ܡܶܬܒܰܩܝܳܐ ܗܘܳܬ ܥܰܝܢܳܐ ܢܰܗܺܝܪܬܳܐ ܕܳܝܩܰܬ ܟܰܣ̈ܝܳܬܳܐ ܕܰܢܒܺܝܽܘܬܳܐ. ܘܒܳܬܰܪ ܗܳܠܶܝܢ ܠܘܳܬ ܨܠܽܘܬܳܐ ܩܳܪܶܒ ܢܒܺܝܳܐ. ܐܳܦ ܡܰܘܕܰܥ ܒܳܥܽܘܬܳܐ ܕܬܰܠܡܺܝ̈ܕܶܐ ܟܰܕ ܐܳܡܰܪ:
ܐܶܬܬܥܺܝܪ ܘܠܳܐ ܬܶܕܡܰܟ ܡܳܪܝܳܐ. ܘܶܥܗܰܕܰܝܢ ܠܳܐ ܬܶܛܥܶܝܢ: ܠܳܐ ܬܰܗܦܶܟ ܐܰܦܰܝ̈ܟ ܡܶܢܰܢ: ܘܠܳܐ ܬܶܛܥܶܐ ܡܽܘܟܳܟܰܢ ܘܽܐܘܠܨܳܢܰܢ: ܡܶܛܠ ܕܡܶܟܰܬ ܥܰܠ ܥܰܦܪܳܐ ܢܰܦܫܰܢ. ܘܕܶܒܩܰܬ ܟܰܪܣܰܢ ܠܰܐܪܥܳܐ. ܩܽܘܡ ܥܰܕܰܪܰܝܢ ܘܰܦܪܽܘܩܰܝܢ ܡܶܛܠ ܪ̈ܰܚܡܰܝܟ. ܠܰܘ ܕܰܡܟܳܐ ܚܰܫܒܽܘܗܝ ܠܗܰܘ ܕܒܰܟܝܳܢܶܗ ܡܥܱ̇ܠ̣ܰܝ ܡܶܢ ܫܶܢܬܳܐ. ܐܶܠܐ ܥܰܠ ܕܰܐܗܡܺܝ ܕܢܶܣܒܽܘܢ ܟܠܺܝ̈ܠܶܐ ܕܣܳܗܕܽܘܬܳܐ. ܐܰܝܟ ܕܰܠܘܳܬ ܕܰܡܟܳܐ ܡܰܠܶܠ ܢܒܺܝܳܐ. ܘܠܰܘ ܡܶܛܥܳܐ ܛܥܳܐ ܐܶܢܘܢ. ܡܶܟܺܝܠ ܠܰܡ ܡܳܪܝܳܐ ܩܽܘܡ ܥܰܕܰܪܰܝܢ ܘܰܦܪܽܘܩܰܝܢ ܒܰܩܝܳܡܬܳܐ ܘܰܒܠܳܐ ܡܶܬܚܰܒܠܳܢܽܘܬܳܐ ܡܶܛܠ ܪ̈ܰܚܡܰܝܟ. ܘܠܳܐ ܡܶܛܠ ܥܒܳܕܰܝ̈ܢ. ܐܳܘ ܠܡܽܘܟܳܟܳܐ ܕܩܰܕܺܝ̈ܫܶܐ. ܕܰܒܟܽܠܗܽܘܢ ܗܳܠܶܝܢ ܥܰܡ̈ܠܶܐ ܠܳܐ ܒܥܰܘ ܟܠܺܝ̈ܠܶܐ. ܐܰܝܟ ܐܰܝܠܶܝܢ ܕܡܶܬܬܚܺܝܒ ܠܗܽܘܢ. ܐܶܠܳܐ ܐܰܝܟ ܪ̈ܰܚܡܰܝܟ ܦܪܽܘܩ ܠܰܢ. ܕܢܰܘܕܶܐ ܠܳܟ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܝܢ܀
ܡܙܡܘܪܐ ܕܐܪܒܥܝܢ ܘܚܡܫܐ
ܡܰܘܕܰܥ ܥܰܠ ܡܬܽܘܡܳܝܽܘܬܶܗ ܕܥܰܡܰܢܽܘܐܝܠ܆ ܘܰܕܡܶܢ ܥܳܠܰܡ ܐܺܝܬܰܘܗܝ: ܘܥܰܠ ܡܕܰܒܪܳܢܽܘܬܶܗ ܕܒܰܒܣܰܪ: ܘܥܰܠ ܩܪܳܝܬܳܐ ܘܓܰܒܝܽܘܬܳܐ ܕܥܺܕܬܳܐ.
ܠܘܳܬ ܡܥܺܝܢܳܐ ܣܰܓܺܝܰܐܬ ܫܶܦ̈ܥܶܐ ܘܥܰܬܺܝܪܰܬ ܡܰܪܕܺܝܬܳܐ ܦܩܰܕ ܠܰܢ ܝܰܘܡܳܢܳܐ ܪܽܘܚܳܐ ܩܰܕܺܝܫܳܐ ܕܢܶܬܩܰܪܰܒ. ܟܰܕ ܒܫܶܡܥܳܐ ܪܽܘܚܳܢܳܐ ܕܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܘܚܰܡܶܫ. ܘܰܠܘܳܬ ܬܽܘܩܳܢܳܐ ܕܪܳܡ ܘܰܡܥܰܠܰܝ ܒܛܶܟܣܶܗ ܡܶܢܟܽܠ ܬܽܘ̈ܩܳܢܺܝܢ. ܡܙܰܡܶܢ ܠܰܢ ܗܽܘ ܡܙܰܡܪܳܢܳܐ ܒܫܽܘܪܳܝܳܐ ܕܰܙܡܺܝܪܬܶܗ. ܘܨܶܝܕ ܡܰܡܠ̱ܠܳܐ ܡܛܰܝܒܳܐ ܘܛܳܒܳܐ ܕܰܡܚܰܪܰܪ ܡܶܢܟܽܠ ܒܺܝ̈ܫܳܬܳܐ. ܪܡܰܙ ܠܰܢ ܒܩܰܢܝܳܐ ܕܰܟܬܺܝܒܬܶܗ ܕܢܶܫܬܰܘܫܰܛ. ܗܳܢܳܐ ܣܳܦܪܳܐ ܪܰܒܳܐ ܘܡܰܠܦܳܢܳܐ ܡܗܺܝܪܳܐ. ܕܰܗܘܳܐ ܠܶܫܳܢܶܗ ܩܰܢܝܳܐ. ܠܗܰܘ ܕܰܐܨܰܚ ܡܶܢ ܒܪܺܝܫܺܝܬ ܣܶܦܪ̈ܶܐ ܠܡܰܠܦܳܢ̈ܐ ܘܚܶܟܡܬܳܐ ܠܝܰܕܽܘ̈ܥܬܳܢܶܐ. ܘܰܚܙܺܝ ܡܶܛܠܡܳܢܳܐ ܡܫܰܪܶܐ ܕܢܺܐܡܰܪ:
ܐܰܒܰܥ ܠܶܒܝ ܦܶܬܓܳܡ̈ܐ ܛܳܒ̈ܐ܆ ܘܺܐܡܰܪ ܥܒܴ̈ܕܰܝ ܠܡܰܠܟܳܐ. ܡܳܢܰܘ ܓܶܝܪ ܫܽܘܪܳܝܳܐ ܗܳܢܳܐ܆ ܥܕܰܡܳܐ ܠܗܳܫܳܐ ܒܟܽܠܗܽܘܢ ܡܰܙܡܽܘܪ̈ܶܐ ܕܰܐܒܰܥ ܠܶܒܳܟ܆ ܠܰܘ ܦܶܬܓܳܡ̈ܐ ܛܳܒ̈ܐ ܐܰܒܰܥ ܠܶܒܳܟ. ܘܡܶܛܠ ܗܳܢܳܐ ܒܒܰܪܬ ܩܳܠܐ ܗܳܕܶܐ܆ ܫܽܘܪܳܝܳܐ ܥܳܒܶܕ ܐܰܢܬ. ܐܰܝܟ ܗܰܘ ܕܰܒܐܪܳܙܳܐ ܡܡܰܠܶܠ ܗܘܳܐ. ܗܳܪܟܳܐ ܕܶܝܢ ܓܠܳܝܗܝ ܠܐܪܳܙܳܐ ܘܰܕܠܳܐ ܬܰܚܦܺܝܬܳܐ ܦܰܫܶܩ ܓܶܠܝܳܢܶܗ ܕܡܰܠܟܳܐ. ܡܶܛܠܗܳܕܶܐ ܓܶܝܪ ܠܰܘ ܒܛܶܟܣܳܐ ܕܡܰܟܣܳܢܽܘܬܳܐ ܩܳܪܶܒ ܠܬܰܫܥܺܝܬܳܐ ܕܰܥܠܰܘܗܝ. ܐܶܠܐ ܦܩܰܕ ܠܠܶܒܶܗ ܕܡܰܒܽܘܥܳܐ ܢܶܗܘܶܐ. ܘܰܬܗܽܘܡܳܐ ܕܓܳܣܶܐ ܢܰܗܪ̈ܰܘܳܬܳܐ ܣܰܓܺܝ̈ܐܐ. ܘܒܰܫܪܳܪܳܐ ܕܟܰܪܣܶܗ ܕܛܽܘܒܳܢܳܐ ܕܰܘܝܕ ܐܶܡܳܐ ܗܘܳܬ ܕܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝܴ̈ܐ. ܘܰܒܗܳܢܳܐ ܐܶܬܡܠܺܝ ܡܶܢ ܐܪ̈ܳܙܶܐ ܕܰܙܩܺܝܦܳܐ. ܘܫܰܦܺܝܪ ܩܳܪܶܐ ܢܒܺܝܳܐ ܠܠܶܒܶܗ. ܕܰܐܝܟ ܡܰܒܽܘܥܳܐ ܕܡܷ̈ܠܶܐ ܘܦܶܬܓܳܡ̈ܐ ܐܺܝܬܰܘܗܝ ܠܶܒܳܐ. ܘܰܒܗܳܢܳܐ ܟܰܕ ܫܳܩ̈ܠܳܢ ܡܰܚܫ̈ܒܳܬܳܐ ܫܽܘܪܳܝܳܐ. ܒܰܕܡܽܘܬ ܡܰܪܕܺܝܬܳܐ ܕܡܰܝܴ̈ܐ ܕܠܳܐ ܦܳܣܩܺܝܢ. ܚܕܳܐ ܠܰܚܕܳܐ ܡܰܘ̈ܠܕܳܢ. ܒܪܰܡ ܕܶܝܢ ܗܳܕܶܐ ܒܰܠܚܽܘܕ ܚܕܳܐ ܝܳܕܥܺܝܢܰܢ ܕܰܢܕܰܡܶܐ. ܕܰܐܟܙܢܳܐ ܕܠܳܐ ܐܢܳܫ ܡܶܫܟܰܚ ܠܰܡܩܳܡ ܥܰܠ ܡܰܒܽܘܥܳܐ ܕܡܰܝܴ̈ܐ ܕܡܶܢ ܐܰܝܟܳܐ ܐܳܬܶܝܢ. ܕܰܟܡܳܐ ܐܺܝܬ ܕܩܳܐܷܡ ܫܽܘܪܳܝܳܐ ܕܡܰܪܕܺܝܬܗܽܘܢ. ܗܳܟܰܢܳܐ ܠܰܝܬ ܠܡܶܕܰܥ. ܕܡܶܢ ܐܰܝܟܳܐ ܫܳܩܠܳܐ ܡܶܠܬܳܐ ܕܰܬܫܰܪܶܐ. ܡܳܢܳܐ ܕܶܝܢ ܐܳܡܰܪ ܐܢܳܐ ܗܳܕܶܐ. ܐܰܝܟܳܐ ܕܺܐܝܬ ܠܡܶܚܙܳܐ. ܕܳܐܦܠܳܐ ܒܶܗ ܒܠܶܒܳܐ ܚܒܺܝ̈ܫܳܢ ܡܷ̈ܠܐ. ܐܶܠܳܐ ܡܶܢ ܐܚܪ̈ܳܢܶܐ ܡܩܰܒܶܠ ܐܰܝܠܶܝܢ ܕܳܐܡܰܪ: ܠܶܒܳܐ ܓܶܝܪ ܠܬܰܪܬܶܝܢ ܡܷ̈ܠܐ ܐܰܟܚܕܳܐ ܕܢܶܠܒܽܘܟ ܠܳܐ ܣܳܦܶܩ. ܘܠܳܐ ܠܪܽܘܓܙܳܐ ܘܰܠܫܰܝܢܳܐ ܐܳܚܶܕ ܐܰܟܚܕܳܐ. ܘܠܳܐ ܡܶܢ ܐܰܝܟܳܐ ܫܳܩܠܳܐ ܫܽܘܪܳܝܳܐ ܡܶܠܬܳܐ ܡܳܐ ܕܡܶܬܬܙܺܝܥܳܐ. ܘܗܳܫܳܐ ܕܶܐܡܰܪ ܛܽܘܒܳܢܳܐ ܕܰܘܝܕ܆ ܠܘܳܬ ܠܶܒܶܗ܆ ܕܢܶܗܘܶܐ ܠܶܗ ܡܰܒܽܘܥܳܐ ܠܦܶܬܓܳܡܶܐ ܛܳܒ̈ܐ. ܚܠܳܦ ܪܶܥܝܳܢܳܐ ܣܳܡ ܠܶܒܳܐ. ܘܰܚܟܺܝܡܳܐ ܩܽܘܗܠܰܬ ܡܚܰܘܶܐ܆ ܚܙܺܝ ܠܰܡ ܗܳܢܳܐ ܕܶܐܫܟܚܶܬ ܠܡܺܐܡܰܪ܆ ܐܶܢܳܐ ܩܽܘܗܠܰܬ ܚܕܳܐ ܠܰܚܕܳܐ ܠܡܶܫܟܳܚܽܘ ܡܰܚܫ̈ܒܳܬܳܐ (ܩܘܗܠܬ ܙ: ܟܚ). ܡܳܕܶܝܢ ܟܰܕ ܚܽܘ̈ܫܳܒܶܐ ܡܶܢ ܣܽܘܥܪ̈ܳܢܶܐ ܕܓܳܕܫܺܝܢ. ܘܠܰܘ ܗܳܟܰܢܳܐ ܐܶܢܘܢ ܓܶܠܝܴ̈ܢܶܐ ܪ̈ܽܘܚܳܢܶܐ. ܐܶܠܐ ܠܘܳܬ ܠܶܒܳܐ ܕܙܰܕܺܝ̈ܩܶܐ ܪܽܘܚܳܐ ܩܰܕܺܝܫܳܐ ܩܳܐܷܡ ܐܰܝܟ ܣܳܦܪܳܐ ܘܗܽܘ ܡܰܨܰܚ ܘܟܳܬܶܒ ܥܰܠ ܠܽܘ̈ܚܶܐ. ܙܰܟܳܝ̈ܐ ܕܠܶܒܗܽܘܢ. ܐܰܝܠܶܝܢ ܕܚܳܫ̈ܚܳܢ ܠܬܰܫܥܺܝܬܳܐ ܕܓܶܠܝܴ̈ܢܶܐ. ܡܳܕܶܝܢ ܕܰܘܝܕ ܒܰܙܡܺܝܪܬܳܐ ܗܳܕܶܐ. ܡܶܢ ܕܰܕܢܰܚ ܓܶܠܝܳܢܳܐ ܒܪܶܥܝܳܢܶܗ ܗܳܝܕܶܝܢ ܦܩܰܕ ܠܶܗ ܠܠܶܒܶܗ. ܕܒܰܕܡܽܘܬ ܡܰܒܽܘܥܳܐ ܢܳܒܥܺܝܢ ܦܶܬܓܳܡ̈ܐ ܛܳܒ̈ܐ ܡܶܢܶܗ.
ܐܶܡܰܪ ܠܰܡ ܥܒܴ̈ܕܰܝ ܡܰܠܟܳܐ. ܡܳܢܳܐ ܐܶܢܘܢ ܥܒܳܕܰܘ̈ܗܝ ܕܡܰܠܟܳܐ. ܘܕܰܐܝܢܳܐ ܡܰܠܟܳܐ ܐܶܡܰܪ܆ ܥܰܠ ܬܽܘܩܳܢܳܐ ܕܰܫܡܰܝܳܐ ܨܳܒܶܐ ܐܪܳܙܳܐ ܕܰܢܬܰܢܶܐ. ܘܠܳܐ ܒܪܺܝܬܳܐ ܡܥܰܠܰܝܬܳܐ ܕܡܰܠܐܟ̈ܐ. ܘܠܳܐ ܥܰܠ ܬܽܘܩܳܢܳܐ ܕܶܐܣܛܽܘ̈ܟܣܶܐ. ܘܗܳܠܶܝܢ ܐܶܢܘܢ ܥܒܳܕܰܘ̈ܗܝ ܕܡܰܠܟܳܐ. ܒܪܰܡ ܠܰܘ ܡܶܛܠ ܗܳܠܶܝܢ ܣܺܝܡܳܐ ܠܶܗ ܠܰܢܒܺܝܳܐ ܕܢܶܫܬܰܥܶܐ. ܐܶܠܐ ܐܚܪܺܢܳܐ ܣܳܦܪܳܐ ܩܳܐܷܡ ܘܡܰܨܰܚ ܐܰܝܠܶܝܢ ܕܶܐܡܰܪ:
ܠܶܫܳܢܝ ܩܰܢܝܶܗ ܕܣܳܦܪܳܐ ܡܗܺܝܪܳܐ. ܣܳܦܪܳܐ ܗܳܪܟܳܐ ܠܪܽܘܚܳܐ ܩܰܕܺܝܫܳܐ ܩܳܪܶܐ. ܗܽܘ ܓܶܝܪ ܩܳܐܷܡ ܨܶܝܕ ܠܶܫܳܢܶܗ ܕܰܢܒܺܝܳܐ. ܐܰܝܟ ܕܶܐܡܰܪ ܡܶܢ ܠܥܶܠ. ܘܟܰܕ ܡܛܰܦܣܺܝܢ ܣܳܡ ܐܶܢܘܢ ܠܦܶܬܓܳܡ̈ܐ ܛܳܒ̈ܐ. ܘܡܳܢܳܐ ܐܺܝܬܰܘܗܝ ܫܽܘܪܳܝܳܐ ܕܦܶܬܓܳܡ̈ܐ ܛܳܒ̈ܐ.
ܫܰܦܺܝܪ ܠܰܡ ܒܚܶܙܘܶܗ ܡܶܢ ܒܢܰܝ̈ܢܳܫܳܐ. ܐܶܠܐ ܗܳܕܶܐ ܠܰܘ ܥܒܴ̈ܕܶܐ ܕܡܰܠܟܳܐ ܐܶܢܘ̇ܢ. ܘܗܽܘ ܡܰܠܟܳܐ ܓܶܝܪ ܠܰܝܬ ܕܰܡܦܰܚܶܡ ܠܶܗ ܒܰܥܒܺܝ̈ܕܶܐ. ܘܳܐܦܶܢ ܨܒܳܐ ܘܰܗܘܳܐ ܒܰܪܢܳܫܳܐ. ܐܶܠܐ ܒܗܳܝ ܕܠܰܘ ܡܶܢ ܪܶܓܬܳܐ ܫܰܪܺܝ ܟܰܕ ܗܘܳܐ. ܘܠܳܐ ܬܽܘܒ ܫܽܘܠܳܡܳܐ ܕܡܰܘܬܶܗ ܠܰܚܒܳܠܳܐ ܫܪܶܟ. ܫܰܦܺܝܪ ܗܽܘ ܒܚܶܙܘܶܗ ܡܶܢ ܒܢܰܝ̈ܢܳܫܳܐ. ܒܗܳܝ ܬܽܘܒ ܕܰܚܛܺܝܬܳܐ ܠܳܐ ܥܒܰܕ. ܘܗܳܟܳܢܰܐ ܫܰܦܺܝܪ ܗܽܘ ܒܚܶܙܘܶܗ ܡܶܢ ܒܢܰܝ̈ܢܳܫܳܐ. ܡܳܢܳܐ ܒܳܬܰܪ ܗܳܠܶܝܢ ܨܳܒܶܐ ܕܢܺܐܡܰܪ؟
ܐܶܬܢܣܶܟܘ ܪ̈ܰܚܡܶܐ ܥܰܠ ܣܶܦ̈ܘܳܬܳܟ. ܡܶܛܠܗܳܢܳܐ ܒܰܪܟܳܟ ܐܰܠܳܗܳܐ ܠܥܳܠܰܡ. ܗܳܢܳܐ ܣܽܘܥܪܳܢܳܐ ܐܰܠܗܳܝܰܐ ܗ̱ܘ ܒܗܳܠܶܝܢ ܒܶܪ̈ܝܳܬܳܐ ܠܰܗܘܳܝܳܐ ܐܶܬܰܝ̈܆ ܒܪ̈ܰܚܡܶܐ ܐܶܬܒܪ̈ܺܝ ܒܶܪ̈ܝܳܬܳܐ ܒܝܰܕ ܡܰܠܟܳܐ ܡܳܪܝܳܐ. ܐܶܠܽܘ ܓܶܝܪ ܪ̈ܰܚܡܶܐ ܠܳܐ ܢܣܺܝܟܺܝܢ ܗܘܰܘ ܥܰܠ ܣܶܦ̈ܘܳܬܶܗ. ܘܠܳܐ ܠܡܰܪ̈ܓܙܳܢܶܐ ܡܩܰܕܶܡ ܗܘܳܐ ܒܳܪܶܐ. ܕܶܐܡܰܪ ܓܶܝܪ ܢܒܺܝܳܐ. ܕܶܐܬܢܣܶܟܘ ܪ̈ܰܚܡܶܐ ܥܰܠ ܣܶܦ̈ܘܳܬܳܟ. ܠܰܘ ܕܡܶܢ ܐܚܪܺܢܳܐ ܩܰܒܶܠ ܐܶܢܘܢ ܠܪ̈ܰܚܡܶܐ. ܐܰܝܟ ܗܰܘ ܕܠܰܝܬ ܗܘܰܘ ܠܶܗ܆ ܐܶܠܳܐ ܗܳܕܶܐ ܡܰܘܕܰܥ܆ ܐܶܠܘ ܐܺܝܬ ܗܘܳܐ ܪܽܘܓܙܳܐ ܒܗܰܘ ܟܝܳܢܳܐ ܡܠܶܐ ܛܽܘ̈ܒܶܐ. ܘܠܳܐ ܠܒܰܪܢܳܫܳܐ ܒܳܪܶܐ ܗܘܳܐ. ܘܗܳܕܳܐ ܗܝ ܡܶܠܬܳܐ. ܕܰܐܢܬ ܠܰܡ ܪ̈ܰܚܡܶܐ ܡܠܶܝܬ܆ ܘܠܰܝܬ ܒܳܟ ܐܰܬܪܳܐ ܠܪܽܘܓܙܳܐ ܕܰܢܫܰܚܠܶܦ ܟܝܳܢܳܟ ܛܳܒܳܐ ܠܒܺܝܫܳܐ. ܘܒܰܡܕܰܒܪܳܢܽܘܬܶܗ ܬܽܘܒ ܕܒܰܒܣܰܪ ܪ̈ܰܚܡܶܐ ܠܒܶܫ ܥܰܠ ܣܶܦ̈ܘܳܬܶܗ ܘܰܢܦܰܩ ܠܥܳܠܡܳܐ. ܟܰܕ ܐܶܡܰܪ ܠܓܰܒܪܳܐ ܓܰܪܒܳܐ. ܨܳܒܶܐ ܐܢܳܐ ܒܳܟ ܐܶܬܕܰܟܳܐ (ܡܬܝ ܚ: ܓ ܡܪܩܘܣ ܐ: ܡܐ ܠܘܩܐ ܗ: ܝܓ). ܘܰܒܪ̈ܰܚܡܶܐ ܕܣܶܦ̈ܘܳܬܶܗ ܐܶܬܚܰܫܰܚ ܠܘܳܬܶܗ. ܕܰܛܪܰܕ ܡܶܢ ܓܽܘܫܡܶܗ ܟܽܘܬܺܝܢܳܐ ܕܟܽܘ̈ܬܡܳܬܳܐ. ܒܪ̈ܰܚܡܶܐ ܕܰܢܣܺܝܟܺܝܢ ܥܰܠ ܣܶܦ̈ܘܳܬܶܗ܆ ܦܳܩܶܕ ܗܘܳܐ ܠܰܟܪ̈ܺܝܗܶܐ ܘܡܶܬܚܰܠܡܺܝܢ: ܘܠܰܚܓܺܝܪ̈ܶܐ ܘܰܡܗܰܠܟܺܝܢ: ܘܠܰܣܡܰܝܴ̈ܐ ܘܚܳܙܶܝܢ: ܘܰܠܕܰܝ̈ܘܶܐ ܡܶܫܬܰܢܶܝܢ: ܘܰܠܚܰܛܳܝܷ̈ܐ ܘܡܶܙܕܰܕܩܺܝܢ: ܘܰܠܡܺܝ̈ܬܶܐ ܘܩܳܝܡܺܝܢ: ܘܰܠܡܳܟ̈ܣܶܐ ܘܰܠܙܳܢ̈ܝܳܬܳܐ ܘܡܶܬܩܰܕܫܺܝܢ: ܘܰܠܓܰܝܳܣܳܐ ܘܥܳܐܷܠ ܠܦܰܪܕܰܝܣܳܐ. ܘܗܳܕܳܐ ܗ̄ܝ ܒܽܘܪܟܬܳܐ ܕܰܠܥܳܠܰܡ ܕܶܐܬܒܰܪܰܟ ܡܶܢ ܐܰܒܳܐ. ܥܰܠ ܕܠܰܝܬ ܒܶܗ ܚܕܳܐ ܡܶܢ ܐܰܝܠܶܝܢ ܕܥܶܠܰܬ ܠܥܳܠܡܳܐ ܡܶܢ ܥܶܠܰܬ ܚܛܺܝܬܳܐ. ܐܶܠܳܐ ܚܙܺܝ ܡܳܢܳܐ ܐܶܡܰܪ ܠܶܗ. ܢܒܺܝܳܐ ܘܰܡܦܺܝܣ ܠܶܗ ܟܰܕ ܐܳܡܰܪ:
ܐܰܪܡܳܐ ܣܰܝܦܳܐ ܒܚܰܨܰܝ̈ܟ ܓܰܢ̱ܒܳܪܳܐ. ܗܶܕܪܳܟ ܘܫܽܘܒܚܳܟ: ܘܫܽܘܒܚܳܟ ܙܳܟܶܐ. ܡܳܢܳܐ ܣܢܺܝܩ ܥܰܠ ܣܰܝܦܳܐ. ܐܶܢ ܒܗܶܕܪܳܐ ܘܰܒܫܽܘܒܚܳܐ ܙܳܟܶܐ. ܚܰܙܩܺܝܶܐܝܠ ܢܒܺܝܳܐ ܐܳܡܰܪ ܗܘܳܐ ܟܰܕ ܚܙܳܐ ܫܽܘܒܚܶܗ ܕܥܰܡܰܢܽܘܐܝܠ܆ ܥܰܠ ܡܰܪܟܰܒܬܳܐ ܕܚܰܝ̈ܘܳܬܳܐ. ܕܡܶܢ ܚܶܙܘܳܐ ܕܚܰܨܰܘ̈ܗܝ ܘܰܠܥܶܠ: ܘܰܠܬܰܚܬ ܡܶܢ ܚܶܙܘܳܐ ܕܚܰܨܰܘ̈ܗܝ: ܚܙܺܝܬ ܚܶܙܘܳܐ ܕܢܽܘܪܳܐ ܘܙܰܗܪܳܐ ܟܳܪܶܟ ܠܶܗ (ܚܙܩܐܝܠ ܐ: ܟܙ). ܗܳܪܟܳܐ ܕܶܝܢ ܒܝܰܕ ܡܙܰܡܪܳܢܳܐ. ܐܶܠܳܐ ܐܰܝܬܺܝ ܚܕܳܐ ܡܶܢ ܗܳܠܶܝܢ. ܐܶܠܳܐ ܡܦܺܝܣ ܠܶܗ ܕܣܰܝܦܳܐ ܢܶܐܣܽܘܪ ܥܰܠ ܚܰܨܰܘ̈ܗܝ. ܘܰܐܝܟܰܢܳܐ ܐܳܦ ܗܽܘ ܐܶܣܰܪ ܠܣܰܝܦܳܐ. ܠܫܶܡܥܽܘܢ ܕܶܝܢ ܦܩܰܕ ܕܰܐܗܦܶܟ ܣܰܦܣܺܪܳܟ ܠܬܺܝܩܶܗ (ܝܘܚܢܢ ܝܚ: ܝܐ). ܐܶܠܳܐ ܠܫܽܘܠܛܳܢܶܗ ܕܡܶܠܬܳܐ ܩܳܪܶܐ ܣܰܝܦܳܐ. ܡܶܛܠܗܳܢܳܐ ܠܳܐ ܐܶܡܰܪ ܢܒܺܝܳܐ: ܕܰܒܣܰܝܦܳܐ ܗܳܘܝܳܐ ܙܳܟܽܘܬܳܐ. ܐܶܠܐ ܒܗܶܕܪܳܐ ܘܰܒܙܰܘܚܳܐ ܘܰܒܫܽܘܒܚܳܐ. ܗܶܕܪܳܐ ܗܳܟܺܝܠ ܐܺܝܬܰܘܗܝ. ܗܰܘ ܕܢܳܡܽܘܣܳܐܝ̣ܬ ܐܶܬܟܰܬܰܫ ܥܰܡ ܚܰܫ̈ܐ ܘܠܰܘ ܛܪܽܘܢܳܐܝ̣ܬ ܘܰܩܛܺܝܪܳܐܝ̣ܬ. ܐܶܠܐ ܟܰܕ ܠܒܶܫ ܦܰܓܪܳܐ ܚܳܫܽܘܫܳܐ ܘܡܳܝܽܘܬܳܐ. ܘܰܙܟܳܐ ܘܫܰܥܒܶܕ ܠܚܰܫ̈ܐ ܘܥܰܠܗܳܝ ܐܶܡܰܪ ܢܒܺܝܳܐ. ܗܶܕܪܳܟ ܫܽܘܒܚܶܗ ܓܶܝܪ ܩܳܪܶܐ ܠܰܙܩܺܝܦܶܗ ܦܳܪܽܘܩܳܝܳܐ. ܗܳܕܶܐ ܩܰܕܶܡ ܐܶܡܰܪ. ܠܳܐ ܓܶܝܪ ܐܶܬܝܰܗܒܰܬ ܗܘܳܬ ܪܽܘܚܳܐ. ܡܶܛܠ ܕܠܳܐ ܥܕܰܟܺܝܠ ܐܶܫܬܰܒܰܚ ܗܘܳܐ ܝܶܫܽܘܥ (ܝܘܚܢܢ ܙ: ܠܛ). ܘܰܕܢܰܘܕܰܥ ܕܗܰܘ ܨܠܺܝܒܳܐ ܫܪܳܪܳܐ ܐܺܝܬܰܘܗܝ ܘܠܰܘ ܦܰܢܛܰܣܺܝܰܐ. ܡܰܥܶܠ ܒܳܬܰܪ ܗܳܠܶܝܢ ܐܳܡܰܪ:
ܪܟܶܒ ܥܰܠ ܡܶܠܬܳܐ ܕܩܽܘܫܬܳܐ ܘܡܽܘܟܳܟܳܐ ܕܙܰܕܺܝܩܽܘܬܳܐ. ܙܩܺܝܦܳܐ ܓܶܝܪ ܩܽܘܫܬܰܐ ܗ̄ܘ ܘܰܫܪܳܪܳܐ ܕܰܒܡܽܘܟܳܟܶܗ ܪܟܶܒ ܠܥܶܠ ܡܶܢܶܗ ܗܰܘ ܙܰܕܺܝܩܳܐ ܘܡܰܟܺܝܟܳܐ. ܘܰܕܗܳܢܳܐ ܕܶܚܠܬܳܐ ܠܥܰܡ̈ܡܶܐ ܡܗܰܝܡ̈ܢܶܐ. ܕܢܶܬܦܢܽܘܢ ܒܶܗ ܠܘܳܬ ܐܰܠܗܳܐ.
ܘܢܳܡܽܘܣܳܟ ܠܰܡ ܒܕܶܚܠܬܳܐ ܡܶܬܩܰܝܰܡ. ܥܰܠ ܚܰܝ̈ܠܰܘܳܬܳܐ ܡܫܰܥܒ̈ܕܶܐ ܕܰܬܚܶܝܬ ܫܽܘ̈ܠܛܳܢܰܝܗܽܘܢ. ܗܳܟܰܢܳܐ ܗܳܪܟܳܐ ܩܰܕܶܡ ܐܰܘܕܰܥ܆ ܪܽܘܚܳܐ ܒܝܰܕ ܢܒܺܝܳܐ. ܕܰܫܪܳܪܶܗ ܕܰܙܩܺܝܦܳܐ ܗܘܳܐ ܕܶܚܠܬܳܐ ܠܥܰܡ̈ܡܶܐ ܡܗܰܝܡ̈ܢܶܐ. ܟܰܕ ܠܡܶܢܗܽܘܢ ܗܳܘܶܐ ܢܳܡܽܘܣܳܐ ܘܕܶܚܠܬܳܐ. ܠܡܶܢܗܽܘܢ ܕܶܝܢ ܡܰܘܒܶܕ ܒܚܰܪܒܳܐ ܐܰܝܟ ܕܠܰܒܥܶܠܕ̈ܒܳܒܶܐ.
ܓܶܐܪ̈ܰܝܟ ܫܢܺܝܢܺܝܢ ܘܥܰܡ̈ܡܶܐ ܢܶܦܠܽܘܢ ܬܚܽܘܬܰܝܟ. ܒܠܶܒܳܐ ܕܰܒܥܶܠܕ̈ܒܳܒܰܘܗܝ ܕܡܰܠܟܳܐ. ܠܰܘ ܓܶܐܪ̈ܶܐ ܪ̈ܰܓܽܘܙܬܳܢܶܐ ܐܺܝܬ ܒܩܶܫܬܶܗ ܕܗܰܘ ܕܶܐܬܢܣܶܟܘ ܪ̈ܰܚܡܶܐ ܥܰܠ ܣܶܦ̈ܘܳܬܶܗ. ܐܳܡܰܪ ܢܒܺܝܳܐ܆ ܐܶܢ ܒܪܽܘܓܙܳܐ ܩܳܛܶܠ ܠܰܝܬ ܪ̈ܰܚܡܶܐ ܥܠ ܣܶܦ̈ܘܳܬܗ. ܐܶܢܕܶܝܢ ܪܰܒܽܘܬܳܐ ܕܪ̈ܰܚܡܶܐ ܡܶܫܬܰܘܕܶܐ ܗܘܳܐ ܥܠܰܘܗܝ ܢܒܺܝܳܐ. ܘܠܳܐ ܪܽܘܓܙܳܐ ܡܗܰܠܶܟ ܥܰܡܶܗ. ܐܶܠܳܐ ܗܺܝ ܛܳܒܽܘܬܶܗ ܠܙܰܕܺܝ̈ܩܶܐ ܒܰܣܺܝܡܳܐ. ܐܳܦ ܩܰܫ̈ܝܳܬܳܐ ܡܚܰܘܶܐ ܥܰܠ ܒܺܝ̈ܫܶܐ. ܘܟܰܕ ܠܟܽܠ ܕܗܰܝܡܶܢ ܦܪܰܩ ܘܰܐܚܺܝ ܙܩܺܝܦܳܐ. ܠܡܳܪ̈ܽܘܕܶܐ ܘܰܠܠܳܐ ܡܗܰܝܡ̈ܢܶܐ ܩܳܛܽܘܠܳܐ ܗܘܳܐ ܙܩܺܝܦܳܐ. ܐܰܝܟ ܥܰܡܽܘܕܳܐ ܕܳܐܙܶܠ ܗܘܳܐ ܩܕܳܡ ܡܰܫܪܺܝܬܳܐ ܕܺܝܣܪܳܐܝܠ. ܠܰܘ ܓܶܝܪ ܒܰܟܝܳܢܶܗ ܚܶܫܽܘܟ ܗܘܳܐ. ܐܶܠܳܐ ܟܰܕ ܠܥܶܒܪ̈ܳܝܶܐ ܡܰܢܗܰܪ ܗܘܳܐ ܡܶܛܠ ܗܰܝܡܳܢܽܘܬܶܗ ܕܡܽܘܫܶܐ. ܠܡܶܨܪ̈ܳܝܶܐ ܡܶܛܠ ܛܳܠܽܘܡܽܘܬܶܗ ܕܦܶܪܥܽܘܢ ܡܰܚܫܶܟ ܗܘܳܐ. ܘܗܳܠܶܝܢ ܥܽܘܕܪ̈ܳܢܶܐ ܕܰܦܪܰܩܘ ܠܥܶܒܪ̈ܳܝܶܐ. ܗܘܰܘ ܓܶܐܪ̈ܶܐ ܫܢܺܝ̈ܢܶܐ ܠܡܶܨܪ̈ܳܝܶܐ. ܘܗܳܟܰܢܳܐ ܥܽܘܕܪ̈ܳܢܰܘܗܝ ܕܰܨܠܺܝܒܳܐ ܦܳܪܽܘܩܳܝܳܐ. ܟܰܕ ܠܰܡܗܰܝܡ̈ܢܶܐ ܨܶܝܕ ܦܽܘܪܩܳܢܳܐ ܘܢܽܘܗܪܳܐ ܡܩܰܪܒܺܝܢ. ܘܠܰܛܪ̈ܽܘܢܶܐ ܘܰܠܚܰܢ̈ܦܶܐ ܘܰܠܝܽܘ̈ܕܳܝܶܐ ܓܶܐܪ̈ܶܐ ܫܢܺܝ̈ܢܶܐ ܡܶܬܚܰܫܒܺܝܢ. ܕܰܐܝܟ ܗܳܢܳܐ ܣܽܘܟܳܠܳܐ ܡܰܠܶܦ ܠܰܢ ܦܰܘܠܽܘܣ ܐܰܠܳܗܳܝܳܐ. ܐܶܡܰܪ ܓܶܝܪ ܠܘܳܬ ܩܽܘܪ̈ܺܝܢܬܳܝܶܐ: ܕܪܺܝܚܳܐ ܚܢܰܢ ܒܰܣܺܝܡܳܐ ܒܰܡܫܺܝܚܳܐ ܠܰܐܠܗܳܐ ܒܰܐܝܠܶܝܢ ܕܳܐܒܕܺܝܢ܇ ܘܒܰܐܝܠܶܝܢ ܕܚܳܐܶܝܢ. ܠܰܐܝܠܶܝܢ ܕܪܺܝܚܳܐ ܕܡܰܘܬܳܐ ܠܡܰܘܬܳܐ. ܘܠܰܐܝܠܶܝܢ ܕܪܺܝܚܳܐ ܕܚܰܝ̈ܐ ܠܚܰܝ̈ܐ (ܒ ܩܘܪ̈ܢܬܝܐ ܒ: ܝܗ). ܗܳܠܶܝܢ ܐܶܢܘܢ ܩܴ̈ܠܐ ܬܪ̈ܺܝܨܶܐ ܕܰܫܠܺܝܚܳܐ ܐܰܠܳܗܳܝܳܐ. ܕܡܶܢ ܩܶܫܬܳܐ ܕܶܐܘܰܢܓܶܠܝܽܘܢ ܢܳܦܩܺܝܢ ܗܘܰܘ ܒܢܽܘܗܪܳܐ. ܘܟܰܕ ܠܒܺܝ̈ܫܳܬܳܐ ܒܺܐܝܕܳܐ ܡܪܰܡܝܳܢܺܝܬܳܐ ܩܳܛܠܺܝܢ ܗܘܰܘ܆ ܘܒܳܬܰܪ ܗܳܠܶܝܢ ܡܶܬܦܢܶܐ ܢܒܺܝܳܐ ܥܰܠ ܫܽܘܠܛܳܢܶܗ ܕܡܶܠܬܳܐ ܕܰܠܥܳܠܰܡ ܢܺܐܡܰܪ ܘܥܰܠ ܡܬܽܘܡܳܝܽܘܬܶܗ ܘܰܟܝܳܢܶܗ ܠܳܐ ܡܶܬܬܰܚܕܳܢܳܐ.
ܟܽܘܪܣܝܳܟ ܠܰܡ ܐܰܠܳܗܳܐ ܠܥܳܠܰܡ ܥܳܠܡܺܝܢ. ܫܰܒܛܳܐ ܦܫܺܝܛܳܐ ܫܰܒܛܳܐ ܕܡܰܠܟܽܘܬܳܟ. ܠܡܳܢܳܐ ܗܳܠܶܝܢ ܩܴ̈ܠܐ ܡܥܰܠܰܝܴ̈ܐ ܘܕܰܫܘܶܝܢ ܠܳܗ̇ ܠܰܐܠܳܗܽܘܬܳܐ ܐܰܚܺܝܕܰܬ. ܫܰܦܺܝܪ ܐܶܡܰܪ ܗܘܳܐ ܡܶܢ ܫܽܘܪܳܝܳܐ. ܕܰܐܒܰܥ ܠܶܒܝ ܦܶܬܓܳܡ̈ܐ ܛܳܒ̈ܐ. ܘܗܰܘ ܪܚܺܝܡܳܐ ܕܬܰܠܡܺܝ̈ܕܶܐ ܐܰܟܬܶܒ ܥܰܠ ܡܶܠܬܶܗ ܕܰܐܒܳܐ: ܕܰܒܪܺܝܫܺܝܬ ܐܺܝܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܺܝܬܰܘܗܝ ܗܘܳܐ ܠܘܳܬ ܐܰܠܳܗܳܐ. ܘܰܐܠܳܗܳܐ ܐܺܝܬܰܘܗܝ ܗܘܳܐ ܗܽܘ ܡܶܠܬܳܐ. ܗܳܢܳܐ ܐܺܝܬܰܘܗܝ ܗܘܳܐ ܒܪܺܝܫܺܝܬ ܠܘܳܬ ܐܰܠܳܗܳܐ (ܝܘܚܢܢ ܐ: ܐ-ܒ). ܘܡܶܢ ܕܶܐܫܬܰܥܺܝ ܥܠܰܘܗܝ ܗܳܠܶܝܢ ܕܰܐܠܳܗܽܘܬܳܐ ܘܕܰܡܬܽܘܡܳܝܽܘܬܳܐ. ܦܢܳܐ ܘܶܐܡܰܪ ܥܰܠ ܚܰܫܶܗ. ܗܳܟܰܢܳܐ ܐܳܦ ܢܒܺܝܳܐ ܡܙܰܡܪܳܢܳܐ ܫܩܺܝܠ ܕܢܶܫܬܰܥܶܐ ܥܰܠ ܪܰܒܽܘܬܳܐ ܕܺܐܝܬܽܘܬܶܗ ܘܰܡܬܽܘܡܳܝܽܘܬܶܗ ܕܡܶܠܬܳܐ. ܘܒܳܬܰܪ ܢܰܥܶܠ ܬܰܫܥܺܝܬܳܐ ܕܡܰܘܬܶܗ ܘܰܩܝܳܡܬܶܗ. ܟܽܘܪܣܝܳܟ ܐܰܠܳܗܳܐ ܠܥܳܠܰܡ ܥܳܠܡܺܝܢ. ܘܠܰܝܬ ܠܶܗ ܫܽܘܪܳܝܳܐ ܠܐܺܝܩܳܪ ܡܰܘܬܒܳܟ. ܘܠܳܐ ܡܩܰܒܶܠ ܫܽܘܠܳܡܳܐ ܟܽܘܪܣܝܳܟ. ܗܰܘ ܓܶܝܪ ܡܶܕܶܡ ܕܠܳܐ ܕܣܳܡܶܟ ܥܰܠ ܫܽܘܠܳܡܳܐ ܐܺܝܬܰܘܗܝ ܡܬܽܘܡܳܝܳܐ. ܘܬܽܘܒ ܫܰܒܛܳܐ ܦܫܺܝܛܳܐ ܫܰܒܛܳܐ ܕܡܰܠܟܽܘܬܳܟ. ܡܶܕܶܡ ܓܶܝܪ ܕܰܦܫܺܝܛܳܐ ܐܺܝܬܰܘܗܝ. ܠܐ ܡܶܬܦܰܣܩܳܢܰܐ ܗ̇ܘ. ܘܠܐ ܥܰܡ ܡܪ̈ܰܟܒܶܐ ܘܰܥܒܰܝܴ̈ܐ ܡܶܬܠܒܶܟ. ܘܠܳܐ ܥܰܡ ܝܰܩܺܝܪ̈ܶܐ ܢܳܬܰܥ ܠܥܽܘܡܩܳܐ. ܘܠܳܐ ܥܰܡ ܩܰܠܺܝ̈ܠܶܐ ܦܳܪܰܚ ܠܰܐܦܰܝ̈ ܠܥܶܠ. ܟܝܳܢܳܐ ܦܫܺܝܛܳܐ ܡܥܰܠܰܝ ܗܽܘ ܡܶܢ ܫܽܘܪܳܝܳܐ ܘܡܶܢ ܫܽܘܠܳܡܳܐ. ܫܰܦܺܝܪ ܡܳܕܶܝܢ ܐܶܡܰܪ ܡܙܰܡܪܳܢܳܐ: ܕܰܐܒܰܥ ܠܶܒܝ ܦܶܬܓܳܡ̈ܐ ܛܳܒ̈ܐ ܘܒܳܬܰܪ ܕܶܝܢ ܩܪܳܝܗܝ ܦܫܺܝܛܳܐ ܘܠܳܐ ܡܪܰܟܒܳܐ ܐܳܡܰܪ:
ܪܚܶܡܬ ܙܰܕܺܝܩܽܘܬܳܐ ܘܰܣܢܰܝܬ ܥܰܘܠܳܐ. ܡܶܛܠ ܗܳܢܳܐ ܡܰܫܚܳܟ ܐܰܠܳܗܳܐ ܐܰܠܳܗܳܟ: ܡܶܫܚܳܐ ܕܚܰܕܽܘܬܳܐ ܝܰܬܺܝܪ ܡܶܢ ܚܰܒܪ̈ܰܝܟ. ܕܢܶܪܚܰܡ ܗܽܘ ܙܰܕܺܝܩܽܘܬܳܐ ܘܢܶܣܢܶܐ ܥܰܘܠܳܐ. ܐܳܦ ܗܳܕܶܐ ܕܺܝܠܳܝܬܳܐ ܗܝ ܕܰܐܠܳܗܽܘܬܳܐ. ܐܳܦ ܡܚܰܘܶܐ ܟܰܕ ܗܘܳܐ ܒܰܪܢܳܫܳܐ ܥܰܡܰܢܽܘܐܝܠ܆ ܡܶܢܶܗ ܕܫܽܘܪܳܝܳܐ ܕܥܰܙܪܽܘܪ̈ܶܐ܆ ܡܰܣܠܶܐ ܗܘܳܐ ܒܺܝܫܬܳܐ ܘܓܳܒܶܐ ܛܳܒܬܳܐ. ܐܰܝܟ ܕܶܐܬܢܰܒܺܝ ܥܠܰܘܗܝ ܐܶܫܰܥܝܳܐ ܢܒܺܝܳܐ. ܗܳܝ ܕܡܰܫܚܳܟ ܐܰܠܳܗܳܐ ܐܰܠܳܗܳܟ: ܡܶܫܚܳܐ ܕܚܰܕܽܘܬܳܐ ܝܰܬܺܝܪ ܡܶܢ ܚܰܒܪ̈ܰܝܟ (ܐܫܥܝܐ ܣܐ: ܐ ܥܒܪ̈ܝܐ ܐ: ܛ). ܡܶܫܚܳܐ ܕܚܰܕܽܘܬܳܐ ܥܰܠ ܪܽܘܚܳܐ ܩܰܕܺܝܫܳܐ ܡܫܰܘܕܰܥ. ܐܳܦ ܚܰܒܪ̈ܰܘܗܝ ܐܺܝܬܰܝܗܽܘܢ ܗܳܢܽܘܢ ܕܰܒܛܰܝܒܽܘܬܳܐ ܗܘܳܐ ܠܗܽܘܢ. ܐܰܚܳܐ ܒܰܒܣܰܪ. ܢܒܺܝ̈ܐ ܗܘܰܘ ܓܶܝܪ ܒܰܙܒܰܢ ܡܽܘܫܶܐ ܘܰܐܗܪܽܘܢ ܐܰܚܽܘܗܝ. ܘܛܽܘܒܳܢܳܐ ܝܶܫܽܘܥ ܒܰܪܢܽܘܢ܆ ܘܛܽܘܒܳܢܳܐ ܫܡܽܘܐܶܝܠ. ܘܶܐܫܰܥܝܳܐ ܘܶܐܪܰܡܝܳܐ ܘܚܰܙܩܺܝܐܝܠ ܘܕܳܢܺܝܐܝܠ ܠܗܳܠܶܝܢ ܩܳܪܶܐ ܚܰܒܪ̈ܰܘܗܝ. ܕܝܰܬܺܝܪ ܡܶܢ ܗܳܠܶܝܢ ܐܶܬܡܫܰܚ ܐܳܦ ܗܽܘ. ܡܶܛܠ ܕܗܽܘ ܠܰܘ ܐܰܝܟ ܣܢܺܝܩܳܐ܆ ܘܠܰܘ ܒܛܰܝܒܽܘܬܳܐ ܩܰܒܶܠ ܡܫܺܝܚܽܘܬܳܐ ܕܪܽܘܚܳܐ ܩܰܕܺܝܫܳܐ. ܐܶܠܳܐ ܗܳܠܶܝܢ ܟܽܠܗܽܘܢ ܒܛܰܝܒܽܘܬܳܐ ܗܘܰܘ ܡܫܺܝ̈ܚܶܐ ܐܰܘ ܟܽܘܡܪ̈ܶܐ ܘܰܢܒܺܝ̈ܐ. ܐܶܠܳܐ ܗܽܘ ܡܶܢ ܚܰܕ ܗܽܘ. ܘܗܽܘ ܕܡܳܫܰܚ ܐܰܝܟ ܪܽܘܚܳܐ. ܘܶܐܬܡܫܰܚ ܐܰܝܟ ܒܰܪܢܳܫܳܐ. ܘܠܳܐ ܪܽܘܚܳܐ ܐܰܝܟ ܝܳܗܽܘܒܳܐ ܐܶܬܳܐ ܥܠܰܘܗܝ ܟܰܕ ܩܰܒܶܠ ܪܽܘܚܳܐ ܥܰܠ ܝܽܘܪܕܢܳܢ ܒܳܬܰܪ ܕܰܥܡܰܕ. ܘܠܳܐ ܬܽܘܒ ܐܰܝܟ ܣܢܺܝܩܳܐ ܩܪܶܒ ܢܣܰܒ ܡܫܺܝܚܽܘܬܳܐ ܡܶܢ ܪܽܘܚܳܐ. ܡܶܛܠ ܕܥܰܠ ܝܽܘܪܕܢܳܢ ܐܶܬܚܙܺܝ ܪܽܘܚܳܐ ܕܰܡܫܺܝܚܽܘܬܳܐ. ܘܩܳܠܶܗ ܕܰܐܒܳܐ ܡܶܢ ܫܡܰܝܳܐ ܐܰܙܥܶܩ: ܕܗܳܢܰܘ ܒܶܪܝ ܚܰܒܺܝܒܳܐ ܕܒܶܗ ܐܶܨܛܒܺܝܬ (ܡܬܝ ܓ: ܝܙ). ܐܶܠܳܐ ܡܶܕܶܡ ܐܚܪܺܝܢ ܡܰܘܕܰܥ ܢܒܺܝܳܐ ܡܳܢܳܐ ܗܝ ܡܫܺܝܚܽܘܬܳܐ.
ܘܡܽܘܪܳܐ ܘܩܰܣܝܳܐ ܘܶܐܣܛܰܩ̈ܛܶܐ ܡܒܰܣܡܺܝܢ ܟܽܠܗܽܘܢ ܠܒܽܘ̈ܫܰܝܟ. ܘܗܳܠܶܝܢ ܡܶܢ ܥܶܩܳܪ̈ܶܐ ܡܶܬܚܰܠܛܺܝܢ ܗܘܰܘ ܐܰܡܺܝܢܳܐܝ̣ܬ ܥܕܰܡܳܐ ܠܶܐܣܛܰܩ̈ܛܶܐ ܒܡܶܫܚܳܐ ܗܰܘ ܕܡܶܬܡܰܫܚܺܝܢ ܗܘܰܘ ܡܶܢܶܗ ܟܽܘܡܪ̈ܶܐ ܘܡܰܠܟ̈ܐ. ܐܶܣܛܰܩ̈ܛܶܐ ܓܶܝܪ ܠܳܐ ܡܶܕܶܡ ܡܫܰܘܕܰܥ ܛܽܘܒܳܢܳܐ ܡܽܘܫܶܐ ܕܚܰܠܛܶܗ ܒܗܳܠܶܝܢ ܥܶܩܳܪ̈ܶܐ ܕܒܰܣܶܡ ܒܗܽܘܢ ܡܶܫܚܳܐ ܕܰܡܫܺܝܚܽܘܬܳܐ. ܡܳܕܶܝܢ ܗܳܢܰܘ ܥܶܩܳܪܳܐ ܕܶܐܬܬܰܘܣܰܦ ܦܶܠܐܷܬܳܢܳܐܝ̣ܬ ܠܰܡܕܰܒܪܳܢܽܘܬܶܗ ܕܥܰܡܰܢܽܘܐܝܠ. ܐܳܦ ܗܽܘ ܓܶܝܪ ܒܰܣܺܝܡ ܪܺܝܚܳܐ ܛܳܒ ܐܺܝܬܰܘܗܝ ܝܰܬܺܝܪ ܡܶܢ ܐܚܪ̈ܳܢܶܐ ܗܳܠܶܝܢ ܐܰܪܒܥܳܐ. ܒܪܰܡ ܡܽܘܪܳܐ ܡܰܘܕܰܥ ܗܘܳܐ ܕܰܠܡܰܘܬܳܐ ܩܰܒܶܠ ܡܫܺܝܚܽܘܬܳܐ. ܐܳܦ ܩܰܣܝܳܐ ܕܶܝܢ ܠܰܩܒܽܘܪܬܳܐ. ܐܶܣܛܰܩ̈ܛܶܐ ܕܶܝܢ ܥܰܠ ܩܝܳܡܬܳܐ ܕܰܗܘܳܬ ܡܶܢ ܡܰܘܬܳܐ ܠܠܳܐ ܡܶܬܚܰܒܠܳܢܽܘܬܳܐ ܡܒܰܕܩܳܐ ܘܰܐܝܟ ܕܰܒܦܳܣܺܝ̈ܩܳܬܳܐ ܠܡܺܐܡܰܪ܆ ܝܰܬܺܝܪܽܘܬܳܐ ܡܫܺܝܚܽܘܬܳܐ ܡܰܘܕܥܳܐ. ܗܳܝ ܕܠܰܘ ܒܡܰܘܬܳܐ ܘܒܰܚܒܳܠܳܐ ܐܰܝܟ ܗܳܢܽܘܢ ܡܫܺܝ̈ܚܶܐ ܕܛܰܝܒܽܘܬܳܐ ܩܰܘܺܝ. ܘܶܐܠܳܐ ܕܰܕܢܰܚ ܒܚܰܝ̈ܐ ܘܠܳܐ ܡܳܝܽܘܬܽܘܬܳܐ ܡܶܢ ܩܝܳܡܬܳܐ ܕܡܺܝ̈ܬܶܐ. ܘܰܡܒܰܣܡܺܝܢ ܗܘܰܘ ܠܒܽܘ̈ܫܰܘܗܝ ܒܪܺܝܚܳܐ ܕܠܳܐ ܡܶܬܚܰܒܠܳܢܽܘܬܳܐ. ܩܰܣܝܳܐ ܐܺܝܬܰܘܗܝ ܡܫܰܠܚܴ̈ܬܳܐ ܐܰܘܟܺܝܬ ܩܠܳܦܴ̈ܬܳܐ ܕܡܰܚܠܰܒ. ܘܶܐܣܛܰܩ̈ܛܶܐ ܡܶܢ ܫܽܘܡܢܶܗ ܕܡܽܘܪܳܐ. ܗܳܢܰܘ ܐܶܣܛܽܘܪܟܳܐ ܐܶܡܰܪ ܓܶܝܪ ܢܒܺܝܳܐ. ܐܰܝܟ ܕܡܶܢ ܦܰܪܨܽܘܦܳܐ ܕܰܐܒܳܐ.
ܕܡܶܢ ܗܰܝܟܠܳܟ ܪܺܝܫܳܝܳܐ ܘܡܶܢ ܠܘܳܬ ܚܰܕܝܽܘܟ. ܗܳܢܰܘ ܕܡܶܢ ܟܝܳܢܳܐ ܕܰܐܒܳܐ ܘܡܶܢ ܐܺܝܬܽܘܬܶܗ. ܐܺܝܬ ܗܘܳܐ ܠܶܗ ܠܰܒܪܳܐ ܟܝܳܢܳܐܝ̣ܬ ܠܳܐ ܡܶܬܚܰܒܠܳܢܽܘܬܳܐ. ܘܡܶܛܠ ܗܳܕܶܐ ܘܠܳܐ ܒܩܰܒܪܳܐ ܐܶܫܬܰܥܒܰܕ ܒܶܣܪܶܗ ܠܰܚܒܳܠܳܐ. ܘܒܳܬܰܪ ܗܳܠܶܝܢ ܠܥܺܕܬܳܐ ܩܳܪܶܐ ܢܒܺܝܳܐ ܠܰܘ ܡܶܢ ܡܶܣܟܺܢܽܘܬܳܐ ܥܳܒܶܕ ܥܽܘܗܕܳܢܳܗ̇. ܘܠܳܐ ܡܶܬܕܟܰܪ ܫܶܦܠܳܐ ܗܳܢܽܘܢ ܕܰܚܛܳܗܶܝ̈ܗ̇. ܐܶܠܳܐ ܡܡܰܠܶܠ ܛܰܝܒܽܘܬܳܐ ܗܳܝ ܕܰܗܘܳܬ ܒܳܗ̇ ܘܰܐܘܪܶܒܬܳܗ̇.
ܒܰܪܬ ܡܰܠܟܳܐ ܒܫܽܘܒܚܳܐ ܩܳܡܰܬ. ܘܡܰܠܟܬܳܐ ܡܶܢ ܝܰܡܺܝܢܳܟ. ܠܡܳܢܳܐ ܡܰܠܟܬܳܐ ܘܒܰܪܬ ܡܰܠܟܳܐ ܡܰܕܟܰܪ ܢܒܺܝܳܐ. ܒܰܪܬ ܡܰܠܟܳܐ ܩܳܪܶܐ ܠܥܺܕܬܳܐ ܗܳܕܶܐ ܕܰܐܩܺܝܡܳܗ̇. ܙܩܺܝܦܳܐ ܕܺܐܝܬܰܘܗܝ ܫܽܘܒܚܶܗ ܕܚܰܬܢܳܐ.
ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ. ܥܰܠ ܪܺܝܫܳܢܽܘܬ ܕܰܗܒܳܐ ܡܰܘܕܰܥ ܕܡܶܢ ܗܰܘ ܐܰܬܪܳܐ ܐܳܡܪܺܝܢ ܕܳܐܬܶܐ ܕܰܗܒܳܐ ܛܳܒܳܐ. ܕܰܗܒܳܐ ܥܰܠ ܕܰܡܝܽܘܬܳܐ ܚܰܬܺܝܬܬܳܐ ܕܒܰܐܠܳܗܳܐ ܡܒܰܕܶܩ. ܐܶܠܳܐ ܡܳܢܳܐ ܐܳܡܰܪ ܢܒܺܝܳܐ:
ܫܡܰܥܝ ܒܪܰܬܝ ܘܰܚܙܳܝ ܘܰܨܠܳܝ ܐܶܕܢܶܟܝ: ܘܰܛܥܳܝ ܥܰܡܶܟܝ ܘܒܶܝܬ ܐܰܒܽܘܟܝ. ܕܢܶܬܪܰܓܪܰܓ ܡܰܠܟܳܐ ܠܫܽܘܦܪܶܟܝ: ܡܶܛܠ ܕܗܽܘܝܽܘ ܡܳܪܶܟܝ ܣܓܽܘܕܝ ܠܶܗ. ܘܒܰܪܬ ܨܽܘܪ ܬܶܣܓܽܘܕ ܠܶܗ. ܕܬܶܫܡܰܥ ܟܰܕ ܡܰܠܶܦ ܠܳܗ̇ ܢܒܺܝܳܐ ܠܥܺܕܬܳܐ. ܕܠܳܐ ܟܰܕ ܡܶܬܢܰܣܝܳܐ ܒܝܰܕ ܚܰܫܳܐ ܕܠܳܐ ܡܶܫܬܰܡܥܳܢܽܘܬܳܐ ܐܰܝܟ ܚܰܘܳܐ܆ ܘܬܶܫܠܰܚ ܠܒܽܘܫܳܐ ܕܠܳܐ ܡܶܬܚܰܒܠܳܢܽܘܬܳܐ. ܐܰܟܡܳܐ ܕܳܐܦ ܗܳܝ ܫܶܠܚܰܬ ܒܝܰܕ ܡܶܠܟܶܗ ܕܚܶܘܝܳܐ ܚܰܪܡܳܢܳܐ. ܕܬܶܛܥܶܐ ܕܶܝܢ ܠܥܰܡܳܗ̇ ܘܰܠܒܶܝܬ ܐܰܒܽܘܗ̇ ܡܰܪܬܶܐ ܠܳܗ̇. ܕܬܶܥܒܰܪ ܡܶܢ ܠܶܒܳܗ̇ ܦܳܠܚܽܘܬܳܐ ܕܣܶܓܕܰܬ ܦܬܰܟܪ̈ܶܐ. ܘܰܕܠܳܐ ܢܶܣܰܩ ܥܰܠ ܪܶܥܝܳܢܳܗ̇ ܦܽܘܠܚܳܢܳܐ ܕܫܺܐܕ̈ܐ. ܕܶܐܢ ܗܳܕܶܐ ܗܳܘܝܳܐ܆ ܕܪܶܓܬܳܐ ܗܳܘܶܐ ܫܽܘܦܪܶܗ ܠܡܰܠܟܳܐ. ܘܰܕܠܰܘ ܡܶܛܠ ܕܫܰܡܰܗ ܢܰܦܫܶܗ ܚܰܬܢܳܐ ܘܠܶܟܝ ܩܪܳܐ ܟܰܠܬܳܐ ܬܶܪܢܶܝܢ ܕܰܚܕܳܐ ܫܰܘܝܽܘܬܳܐ ܩܢܶܐ ܥܰܡܶܟܝ. ܐܶܠܳܐ ܗܽܘ ܡܳܪܰܐ ܗ̇ܘ ܟܡܳܐ ܐܶܬܢܰܚܰܬ. ܐܰܢܬܝ ܕܶܝܢ ܐܰܡܬܳܐ ܐܺܝܬܰܝܟܝ. ܟܡܳܐ ܐܶܢ ܐܶܬܪܰܡܪܰܡܬܝ. ܡܳܕܶܝܢ ܣܓܽܘܕܝ ܠܶܗ ܐܰܝܟ ܕܰܠܡܳܪܳܐ. ܐܳܦ ܓܶܝܪ ܨܽܘܪ ܗܳܝ ܡܰܠܟܬܳܐ ܣܳܓܕܳܐ ܠܶܗ. ܗܳܕܶܐ ܕܶܝܢ ܥܰܠ ܡܰܠܟܬܳܐ ܕܥܰܡ̈ܡܶܐ ܕܣܳܓܕܳܐ ܠܡܰܠܟܳܐ ܡܳܪܝܳܐ ܡܰܘܕܰܥ. ܘܶܐܢ ܠܰܡ ܒܣܶܓܕܬܶܗ ܡܩܰܘܝܰܬ. ܣܳܓܕܺܝܢ ܠܶܟܝ ܐܳܦ ܠܶܟܝ ܪܰܘܪ̈ܒܳܢܶܐ ܕܰܐܪܥܳܐ ܒܩܽܘܪ̈ܒܳܢܰܝܗܽܘܢ.
ܒܩܽܘܪ̈ܒܳܢܶܐ ܠܰܡ ܐܰܦܰܝ̈ܟܝ ܢܶܒܥܽܘܢ ܥܰܬܺܝܪ̈ܰܘܗܝ ܕܥܰܡܳܐ. ܡܰܠܟ̈ܐ ܕܰܐܪܥܳܐ ܘܪ̈ܺܝܫܳܢܶܐ ܕܬܺܒܶܝܠ. ܒܩܽܘܪ̈ܒܳܢܶܐ ܕܳܝܫܺܝܢ ܐܶܣܟ̈ܦܳܬܳܐ ܕܬܰܪ̈ܥܶܐ ܩܰܕܺܝ̈ܫܶܐ ܕܥܺܕܬܶܗ ܕܰܐܠܳܗܳܐ.
ܟܽܠܶܗ ܠܰܡ ܫܽܘܒܚܳܗ̇ ܕܒܰܪܬ ܡܰܠܟܳܐ ܡܶܢ ܠܓܰܘ: ܘܰܡܨܰܒܰܬ ܠܒܽܘܫܳܗ̇ ܒܕܰܗܒܳܐ ܛܳܒܳܐ. ܘܡܰܣܗܶܕ ܥܠܶܝܗ̇ ܡܙܰܡܪܳܢܳܐ. ܕܪܰܒ ܗܽܘ ܫܽܘܒܚܳܗ̇ ܠܳܐ ܡܶܬܚܰܙܝܳܢܳܐ. ܡܶܢ ܗܰܘ ܕܡܶܬܚܙܶܐ ܘܡܶܬܪܓܶܫ. ܡܶܛܠ ܕܰܠܓܰܘ ܒܓܰܘ ܠܶܒܳܗ̇ ܗܽܘ ܡܫܺܝܚܳܐ ܥܳܡܰܪ. ܐܰܝܟ ܕܰܐܠܦܳܗ̇ ܦܰܘܠܽܘܣ ܫܠܺܝܚܳܐ ܕܰܒܒܰܪܢܳܫܟܽܘܢ ܕܰܠܓܰܘ ܢܶܥܡܰܪ ܡܫܺܝܚܳܐ ܒܗܰܝܡܳܢܽܘܬܳܐ ܘܰܒܠܶܒܰܘܴ̈ܬܟܽܘܢ ܒܚܽܘܒܳܐ (ܐܦܣܝ̈ܐ ܓ: ܝܘ-ܝܙ). ܘܶܐܡܰܪ:
ܒܩܽܘܪ̈ܒܳܢܶܐ ܬܺܐܙܰܠ ܠܡܰܠܟܳܐ. ܘܢܰܘ̈ܒܠܳܢ ܒܬܽܘ̈ܠܳܬܳܐ ܚܰܒܪ̈ܳܬܳܗ̇ ܒܳܬܪܳܗ̇: ܘܢܺܐܙ̈ܠ̱ܢ ܒܚܰܕܽܘܬܳܐ ܘܰܒܒܰܣܺܝܡܽܘܬܳܐ. ܘܢܶܥ̈ܠܳܢ ܠܗܰܝܟܠܶܗ ܕܡܰܠܟܳܐ. ܡܶܟܺܝܠ ܠܰܘ ܐܚܪ̈ܳܢܶܐ ܡܩܰܪܒܺܝܢ ܩܽܘܪ̈ܒܳܢܶܐ ܚܠܳܦ ܢܰܦܫܳܐ ܗܳܕܶܐ ܡܰܠܟܬܳܐ. ܗܳܘܶܝܢ ܠܳܗ̇ ܦܶܕܰܓܽܘ̈ܓܶܐ ܘܰܡܩܰܪ̈ܒܳܢܶܐ ܠܚܰܬܢܳܐ. ܐܶܠܳܐ ܗܺܝ ܒܰܐܝܠܶܝܢ ܕܰܡܩܰܪܒܳܐ ܡܶܬܩܰܒܠܳܐ ܡܶܢ ܡܰܠܟܳܐ ܡܳܪܳܗ̇ ܘܗܳܠܶܝܢ ܕܰܡܕܰܡܺܝܢ ܒܳܗ̇ ܐܰܝܠܶܝܢ ܕܳܐܙܺܠ̱ܝܢ ܒܳܬܪܳܗ̇. ܗܳܝ ܓܶܝܪ ܩܰܕܡܳܝܬܳܐ ܠܗܳܢܽܘܢ ܕܒܶܝܬ ܫܶܡܥܽܘܢ ܘܝܽܘܚܰܢܳܢ ܘܦܰܘܠܽܘܣ ܕܳܡܝܳܐ ܕܣܳܐܷܡ ܢܒܺܝܳܐ. ܘܗܳܠܶܝܢ ܕܒܳܬܪܳܗ̇ ܒܬܽܘ̈ܠܳܬܳܐ ܐܚܪ̈ܳܢܝܳܬܳܐ. ܗܳܠܶܝܢ ܕܶܐܡܰܪ ܦܰܘܠܽܘܣ: ܐܰܡܟܰܪܬܟܽܘܢ ܓܶܝܪ ܠܓܰܒܪܳܐ ܚܰܕ ܒܬܽܘܠܬܳܐ ܕܟܺܝܬܳܐ ܕܶܐܩܰܪܶܒ ܠܰܡܫܺܝܚܳܐ (ܒ ܩܘܪ̈ܢܬܝܐ ܝܐ: ܒ). ܕܗܳܠܶܝܢ ܒܚܰܕܽܘܬܳܐ ܘܰܒܪܺܝܚܳܐ ܒܰܣܺܝܡܳܐ ܥܳܐܠܺܝܢ ܠܗܰܘ ܗܰܝܟܠܳܐ ܕܡܰܠܟܽܘܬܳܐ ܕܰܠܥܶܠ. ܠܗܰܘ ܓܢܽܘܢܳܐ ܕܥܶܠܳܝܳܐ ܬܶܫܥܺܝܬܶܗ ܡܶܢ ܚܰܫ̈ܐ ܡܫܰܟܪ̈ܶܐ ܕܰܚܒܳܠܳܐ. ܕܺܐܝܬܰܘܗܝ ܕܰܟܝܽܘܬܳܐ ܘܩܰܕܺܝܫܽܘܬܳܐ ܘܪܺܝܚܳܐ ܒܰܣܺܝܡܳܐ. ܐܳܦ ܡܰܘܕܰܥ ܢܒܺܝܳܐ. ܕܰܐܝܟܰܢܳܐ ܕܡܶܢ ܒܢܶܝ̈ܗ̇ ܕܥܺܕܬܳܐ ܩܳܝܡܺܝܢ ܒܳܗ̇ ܟܳܗ̈ܢܶܐ ܘܟܽܘܡܪ̈ܶܐ ܚܠܳܦ ܫܠܺܝܚ̈ܐ ܐܰܒܳܗܶܝ̈ܗ̇܆
ܚܠܳܦ ܐܰܒܳܗܰܝ̈ܟܝ ܢܶܗܘܽܘܢ ܒܢܰܝ̈ܟܝ: ܘܰܥܒܰܕ ܐܶܢܘܢ ܫܰܠܺܝ̈ܛܶܐ ܒܟܽܠܳܗ̇ ܐܰܪܥܳܐ. ܗܳܐ ܓܶܝܪ ܚܳܙܶܝܢܰܢ ܕܫܰܠܺܝܛܺܝܢ ܗܘܰܘ ܫܠܺܝ̈ܚܶܐ ܥܰܠ ܥܰܡ̈ܡܶܐ ܕܰܐܪܥܳܐ ܒܦܳܩܽܘܕܽܘܬܳܐ. ܐܰܟܡܳܐ ܕܶܐܫܬܰܠܰܛܘ ܗܳܢܽܘܢ ܕܡܶܢ ܒܳܬܰܪܗܽܘܢ. ܘܗܳܫܳܐ ܢܶܦܩܰܬ ܠܰܥܒܳܕܳܐ. ܗܳܝ ܕܢܶܬܕܟܰܪ ܫܡܶܗ ܡܶܢ ܕܳܪ ܠܕܳܪ ܕܥܰܡܰܢܽܘܐܝܠ. ܡܶܛܠ ܕܕܳܪܳܐ ܠܕܳܪܳܐ ܡܝܰܒܶܠ ܬܽܘܒ ܗܰܝܡܳܢܽܘܬܶܗ ܗܳܝܕܶܝܢ:
ܢܰܘܕܽܘܢ ܠܳܟ ܥܰܡ̈ܡܶܐ ܠܥܳܠܰܡ ܥܳܠܡܺܝܢ. ܗܳܪܟܳܐ ܗܳܘܝܳܐ ܓܶܝܪ ܒܰܡܢܳܬܳܐ ܡܫܰܡܠܝܳܐܝ̣ܬ ܕܶܝܢ ܡܳܐ ܕܡܶܬܚܙܶܐ ܡܫܺܝܚܳܐ ܡܰܠܟܳܐ ܕܥܰܠ ܟܽܠ܆ ܘܣܳܓܕܺܝܢ ܠܶܗ ܟܽܠܗܽܘܢ ܥܰܡ̈ܡܶܐ ܘܡܰܘܕܶܝܢ ܠܶܗ ܠܥܳܠܰܡ ܥܳܠܡܺܝܢ܀
ܡܙܡܘܪܐ ܕܐܪܒܥܝܢ ܘܫܬܐ
ܡܰܘܕܰܥ ܥܰܠ ܙܰܘܥܳܐ ܕܰܗܘܳܐ ܒܰܨܠܺܝܒܳܐ: ܘܥܰܠ ܣܰܓܺܝܐܘܬ ܝܽܘܠܦܳܢܳܐ ܥܺܕܬܳܢܳܝܳܐ: ܘܥܰܠ ܡܰܦܽܘܠܬܳܐ ܕܚܰܝ̈ܠܰܘܳܬܳܐ ܕܕܰܠܩܽܘܒܠܳܐ.
ܢܰܦܫܳܐ ܕܰܐܚܺܝܕܳܐ ܒܰܐܠܳܗܳܐ ܓܰܘܣܳܐ܆ ܠܰܝܬ ܡܶܕܶܡ ܒܡܶܬܚܰܙܝܳܢ̈ܝܳܬܳܐ ܕܡܶܫܟܰܚ ܡܙܺܝܥ ܠܳܗ̇. ܘܡܰܪܦܶܐ ܠܳܗ̇ ܡܶܢ ܒܶܢܝܳܢܳܐ ܕܰܐܠܳܗܳܐ. ܘܰܟܡܳܐ ܐܶܢ ܦܳܓܥܺܝܢ ܒܳܗ̇ ܙܰܘ̈ܥܶܐ ܕܶܐܣܛܽܘ̈ܟܣܶܐ ܡܶܬܚܰܙܝܳܢ̈ܐ. ܗܺܝ ܕܠܳܐ ܙܰܘܥܳܐ ܡܩܰܘܝܳܐ. ܘܢܶܫܡܰܥ ܠܛܽܘܒܳܢܳܐ ܕܰܘܝܕ ܕܰܚܠܳܦ ܦܰܪ̈ܨܽܘܦܶܐ ܕܟܺܐܢ̈ܐ. ܐܰܝܟܰܢܳܐ ܡܚܰܘܶܐ ܕܠܳܐ ܕܳܚܶܠ ܗܘܳܐ ܡܶܢ ܦܰܪ̈ܨܽܘܦܶܐ ܡܶܬܚܰܙܝܴ̈ܢܶܐ. ܘܙܰܘ̈ܥܶܐ ܣܰܩܽܘ̈ܒܠܳܝܶܐ ܥܰܠ ܕܰܡܫܰܪܰܪ ܗܘܳܐ ܠܶܒܶܗ ܒܣܰܒܪܳܐ ܕܰܐܠܳܗܳܐ. ܟܰܕ ܓܶܝܪ ܗܘܳܐ ܐܽܘܠܨܳܢܳܐ ܪܰܒܳܐ ܒܥܰܡܳܐ ܒܝܰܘ̈ܡܳܬܶܗ. ܙܰܡܰܪ ܗܘܳܐ ܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܘܫܶܬ܆ ܟܰܕ ܡܰܠܶܦ ܠܗܽܘܢ ܕܠܳܐ ܢܶܬܪܰܦܽܘܢ ܡܶܢ ܐܽܘܠܨܳܢܳܐ. ܝܰܬܺܝܪܳܐܝ̣ܬ ܠܰܡ ܕܺܐܝܬ ܠܰܢ ܒܶܝܬ ܓܰܘܣܳܐ ܪܰܒܳܐ ܕܒܰܐܠܳܗܳܐ. ܘܥܰܠܗܳܕܶܐ ܡܙܰܡܰܪ ܗܘܳܐ ܘܳܐܡܰܪ:
ܐܰܠܳܗܰܢ ܒܶܝܬ ܓܰܘܣܰܢ ܥܰܫܺܝܢܳܐ܆ ܘܰܡܥܰܕܪܳܢܰܢ ܒܙܰܒܢ̈ܐ ܕܽܐܘܠܨܳܢܳܐ. ܐܶܫܬܟܰܚܬ ܠܰܢ ܒܟܽܠܙܒܰܢ: ܡܶܛܠ ܗܳܢܳܐ ܠܳܐ ܕܳܚܠܺܝܢܰܢ ܡܳܐ ܕܙܳܝܥܳܐ ܐܰܪܥܳܐ: ܘܡܳܐ ܘܙܳܝܥܺܝܢ ܛܽܘܪ̈ܶܐ ܒܠܶܒܳܐ ܕܝܰܡ̈ܡܶܐ. ܢܶܬܕܰܠܚܽܘܢ ܡܰܝ̈ܗܽܘܢ ܘܢܶܬܗܰܦܟܽܘܢ ܘܰܢܙܽܘܥܽܘܢ ܛܽܘܪ̈ܶܐ ܒܥܽܘܫܢܶܗ. ܚܙܰܝܬ ܐܰܝܟܰܢܳܐ ܐܳܡܰܪ ܕܰܐܢܬ ܠܰܡ ܐܰܠܳܗܳܐ ܗܘܺܝ ܠܺܝ ܒܶܝܬܓܰܘܣܳܐ ܥܰܫܺܝܢܳܐ. ܘܰܡܥܰܕܪܳܢܳܐ ܒܙܰܒܢܳܐ ܕܽܐܘܠܨܳܢܳܐ. ܗܳܫܳܐ ܫܰܪܺܝܢܰܢ ܒܢܰܘܚܳܐ ܕܠܳܐ ܫܓܽܘܫܝܳܐ. ܗܰܘ ܠܰܡ ܕܺܐܝܬ ܠܶܗ ܣܶܬܳܪܳܐ ܕܺܝܠܳܟ. ܒܰܠܡܺܐܢܳܐ ܪܰܒܳܐ ܘܕܰܡܠܶܐ ܢܰܘܚܳܐ ܫܪܶܐ. ܟܡܳܐ ܐܶܢ ܫܳܓܶܫ ܙܰܘܥܳܐ ܠܶܐܣܛܽܘܟ̈ܣܶܐ ܡܶܛܠܗܳܢܳܐ ܠܳܐ ܕܳܚܠܺܝܢܰܢ. ܥܰܠ ܕܶܐܫܟܰܚܢܰܢ ܒܶܝܬ ܓܰܘܣܳܐ. ܘܠܳܐ ܝܰܡܳܐ ܡܙܺܝܥ ܠܰܢ ܒܰܫܓܽܘܫܝܳܐ ܘܰܕܠܽܘܚܝܳܐ ܕܓܰܠܠܰܘ̈ܗܝ. ܘܠܳܐ ܛܽܘܪ̈ܶܐ ܕܡܶܬܬܙܺܝܥܺܝܢ ܒܓܰܘ ܠܶܒܳܐ ܕܝܰܡ̈ܡܶܐ ܡܰܪܗܒܺܝܢ ܠܰܢ. ܗܳܠܶܝܢ ܗܳܟܺܝܠ ܐܳܡܰܪ ܐܢܳܐ. ܟܰܕ ܒܟܰܪܝܽܘܬܳܐ ܕܡܶܠܬܳܐ ܡܶܬܒܰܩܶܐ ܐܢܳܐ. ܐܶܠܳܐ ܡܶܛܠ ܕܰܠܘܳܬ ܢܺܝܫܳܐ ܓܰܘܳܝܳܐ ܕܣܽܘ̈ܟܳܠܶܐ ܕܦܶܬܓܳܡ̈ܐ ܗܳܠܶܝܢ ܩܰܕܺܝ̈ܫܶܐ. ܦܳܩܶܕ ܠܰܢ ܚܽܘܒܳܐ ܠܡܶܥܰܠ܆ ܢܶܚܒܽܘܨ ܒܬܶܐܘܳܪܺܝܰܐ ܪܽܘܚܳܢܳܝܬܳܐ. ܛܽܘܒܳܢܳܐ ܗܳܟܺܝܠ ܕܰܘܝܕ ܥܰܠ ܗܳܠܶܝܢ ܙܰܘ̈ܥܶܐ ܕܰܗܘܰܘ ܒܰܨܠܺܝܒܳܐ ܦܳܪܽܘܩܳܝܳܐ ܐܶܬܢܰܒܺܝ ܗܳܠܶܝܢ܆ ܟܰܕ ܚܳܐܰܪ ܗܘܳܐ ܒܰܐܪܥܳܐ ܕܙܳܥܰܬ ܟܰܕ ܙܩܺܝܦ ܡܳܪܳܗ̇. ܘܰܒܝܰܡ̈ܡܶܐ ܕܶܐܫܬܓܶܫܘ ܘܶܐܬܕܰܠܰܚܘ. ܘܰܒܛܽܘܪ̈ܶܐ ܕܙܳܥܘ܆ ܡܶܬܠܰܒܰܒ ܗܘܳܐ ܗܽܘ ܒܒܶܝܬ ܓܰܘܣܳܐ ܪܰܒܳܐ ܕܶܐܫܟܰܚ ܙܰܘ̈ܥܶܐ ܘܳܐܡܰܪ: ܗܳܐ ܠܰܡ ܐܰܠܳܗܰܢ ܒܶܬܓܰܘܣܰܢ ܥܰܫܺܝܢܳܐ. ܗܳܐ ܒܰܨܠܺܝܒܳܐ ܬܠܶܐ ܡܥܰܕܪܳܢܰܢ ܠܳܐ ܢܶܬܪܗܶܒ. ܢܒܺܝܳܐ ܩܳܥܶܐ ܗܘܳܐ ܕܰܚܢܰܢ ܠܳܐ ܕܳܚܠܺܝܢܰܢ. ܟܰܕ ܡܶܬܪܗܶܒ ܝܰܡܳܐ ܘܢܳܝܕܺܝܢ ܛܽܘܪ̈ܶܐ ܥܰܠ ܕܡܳܪܳܐ ܕܺܝܠܗܽܘܢ ܡܦܰܪܣܰܝ ܗܘܳܐ ܥܰܠ ܓܳܓܽܘܠܬܳܐ. ܗܰܘ ܕܰܬܩܰܠ ܛܽܘܪ̈ܶܐ ܘܟܰܢܶܫ ܝܰܡ̈ܡܶܐ. ܠܰܡܙܰܡܪܳܢܳܐ ܙܳܕܶܩ ܕܢܰܫܰܪ ܕܶܐܡܰܪ:
ܬܰܦ̈ܐ ܕܢܰܗܪ̈ܳܘܳܬܳܐ ܢܚܰܕܽܘܢ ܒܰܡܕܺܝܢܬܶܗ ܕܰܐܠܳܗܰܢ. ܗܳܠܶܝܢ ܐܶܢܽܘܢ ܢܰܗܪ̈ܰܘܳܬܳܐ ܕܶܐܡܰܪ ܡܳܪܰܢ ܕܪܳܕܶܝܢ ܡܶܢ ܟܰܪܣܶܗ ܕܗܰܘ ܕܰܡܗܰܝܡܶܢ ܒܰܨܠܺܝܒܳܐ. ܠܳܐ ܕܶܝܢ ܟܳܠܝܳܐ ܐܰܝܟ ܕܶܐܬܐܰܡܪܰܬ ܡܶܢ ܥܰܡܰܢܽܘܐܝܠ ܢܣܺܝܡܺܝܗ̇ ܬܢܳܢ. ܒܝܰܘܡܳܐ ܠܰܡ ܪܰܒܳܐ ܕܺܐܝܬܰܘܗܝ ܐܚܪܳܝܳܐ ܕܥܰܕܥܺܐܕܳܐ. ܩܳܐܷܡ ܗܘܳܐ ܝܶܫܽܘܥ ܘܩܳܥܶܐ ܘܳܐܡܰܪ: ܐܶܢ ܐܢܳܫ ܨܗܶܐ ܢܺܐܬܶܐ ܠܘܳܬܝ ܘܢܶܫܬܶܐ. ܟܽܠܡܰܢ ܕܰܡܗܰܝܡܶܢ ܒܺܝ. ܐܰܝܟܰܢܳܐ ܕܶܐܡܰܪ ܟܬܳܒܳܐ ܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝܷ̈ܐ ܢܶܪܕܽܘܢ ܡܶܢ ܟܰܪܣܶܗ. ܗܳܕܶܐ ܕܶܝܢ ܐܶܡܰܪ܆ ܥܰܠ ܪܽܘܚܳܐ ܕܰܥܬܺܝܕܺܝܢ ܗܘܰܘ ܠܰܡܩܰܒܳܠܽܘ ܐܰܝܠܶܝܢ ܕܰܡܗܰܝܡܢܺܝܢ ܒܶܗ. ܠܳܐ ܓܶܝܪ ܥܕܰܟܺܝܠ ܐܶܬܝܰܗܒܰܬ ܗܘܳܬ ܪܽܘܚܳܐ. ܡܶܛܽܠ ܕܠܳܐ ܥܕܰܟܺܝܠ ܐܶܫܬܰܒܰܚ ܗܘܳܐ ܝܶܫܽܘܥ (ܝܘܚܢܢ ܙ: ܠܙ-ܠܛ). ܗܳܢܰܘ ܠܳܐ ܥܕܰܟܺܝܠ ܐܶܙܕܩܶܦ ܗܘܳܐ.
ܚܙܰܝܬ ܐܰܝܟܳܢܳܐ ܡܰܟܺܝܟܳܐܝ̣ܬ ܫܳܠܶܡ ܐܪܳܙܳܐ ܗܳܢܳܐ ܠܦܽܘܫܳܩܶܗ ܕܗܰܘ ܝܰܡܳܐ ܪܰܒܳܐ ܘܰܪܚܺܝܡܳܐ ܒܬܰܠܡܺܝ̈ܕܶܐ ܝܽܘܚܰܢܳܢ. ܠܳܐ ܓܶܝܪ ܐܰܣܛܺܝ ܢܒܺܝܳܐ ܘܠܳܐ ܩܰܠܺܝܠ ܡ̣ܢ ܢܺܝܫܳܐ. ܐܶܠܐ ܡ̣ܢ ܒܳܬܰܪ ܕܶܐܬܢܰܒܺܝ ܥܰܠ ܙܰܘ̈ܥܶܐ ܕܰܗܘܰܘ ܒܰܨܠܺܝܒܳܐ. ܗܰܘ ܕܶܐܫܬܰܒܰܚ ܥܠܰܘܗܝ ܝܶܫܘܥ. ܐܰܥ̣ܶܠ ܐܰܝܟ ܕܦܰܫܶܩ ܐܶܘܰܢܓܶܠܺܝܣܛܳܐ. ܕܫܰܪܺܝܘ ܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝܷ̈ܐ ܕܢܶܪܕܽܘܢ ܒܰܡܕܺܝܢܬܶܗ ܕܡܰܠܟܳܐ ܪܰܒܳܐ. ܘܰܟܒܰܪ ܐܳܡܰܪ ܐܰܢܬ܆ ܕܰܢܒܺܝܳܐ ܬܰܦܷ̈ܐ ܐܶܡܰܪ. ܘܠܰܘ ܢܰܗܪ̈ܰܘܳܬܳܐ. ܐܰܪܰܐ ܐܶܠܐ ܘܳܠܶܐ ܕܬܶܗܘܶܐ ܡܰܘܗܰܒܬܶܗ ܕܡܰܠܟܳܐ ܪܰܒܳܐ܆ ܝܰܬܺܝܪ ܡܶܢ ܕܥܰܒܕܳܐ. ܢܒܺܝܳܐ ܠܦܽܘܬ ܚܰܝܠܶܗ ܐܶܡܰܪ ܬܰܦܷ̈ܐ. ܐܶܠܳܐ ܡܳܪܶܗ ܕܰܢܒܺܝܳܐ܆ ܐܰܘܪܶܒ ܐܶܢܘܢ ܠܬܰܦܷ̈ܐ ܒܓܶܠܝܳܢܶܗ܆ ܘܢܰܗܪ̈ܰܘܳܬܳܐ ܥܒܰܕ ܐܶܢܘܢ. ܒܪܰܡ ܕܶܝܢ ܘܬܰܦܷ̈ܐ ܠܳܐ ܪܰܚܺܝܩܺܝܢ ܡܶܢ ܢܰܗܪ̈ܰܘܳܬܳܐ. ܘܬܰܦܷ̈ܐ ܓܶܝܪ ܡܶܢ ܢܰܗܪ̈ܰܘܳܬܳܐ ܗܳܐ ܢܳܦܩܺܝܢ܆ ܘܰܡܚܰܝܕܺܝܢ ܒܓܰܘ ܡܕܺܝܢܬܳܐ ܕܶܐܝܬܶܝܗ̇ ܥܺܕܬܳܐ. ܢܰܗܪ̈ܰܘܳܬܳܐ ܓܶܝܬ ܠܰܫܠܺܝ̈ܚܶܐ ܩܳܪܶܐ ܢܒܺܝܳܐ. ܬܰܦ̈ܐ ܕܶܝܢ ܠܝܽܘܠܦܳܢܗܘ̇ܢ. ܕܰܐܝܟ ܗܳܠܶܝܢ ܗܘܰܘ ܓܶܝܪ ܢܰܗܪ̈ܰܘܳܬܳܐ. ܗܳܠܶܝܢ ܐܰܪܒܥܳܐ ܕܩܰܕܶܡܘ ܫܩܰܠܘ܆ ܡ̣ܢ ܪܺܝܫ ܡܰܒܽܘܥܳܐ ܕܰܨܠܺܝܒܳܐ ܘܬܰܦܶܦܘ ܒܰܡܕܺܝܢܬܳܐ ܥܺܕܬܳܐ ܩܰܕܺܝܫܬܳܐ. ܡܰܝܴ̈ܐ ܚܰܝܷ̈ܐ ܘܩܰܕܺܝ̈ܫܶܐ. ܘܟܰܕ ܚܳܕܶܝܢ ܦܳܓܥܺܝܢ ܒܰܚ̈ܕܳܕܶܐ. ܘܡܰܫܩܶܝܢ ܠܓܰܢܰܬ ܡܰܠܟܳܐ. ܚܳܕܶܐ ܓܶܝܪ ܢܰܗܪܳܐ ܕܩܰܕܺܝܫܳܐ ܡܰܬܰܝ܆ ܡܳܐ ܕܰܡܫܰܡܰܪ ܬܰܦ̈ܐ ܕܝܽܘܠܦܳܢܶܗ ܡ̣ܢ ܪܰܘܡܳܐ ܕܒܺܐܡܰܐ ܐܰܠܳܗܳܝܬܳܐ܆ ܘܩܳܥܶܐ ܟܬܳܒܳܐ ܕܺܝܠܺܝܕܽܘܬܶܗ ܕܝܶܫܘܥ ܡܫܺܝܚܳܐ܆ ܒܪܶܗ ܕܕܰܘܝܕ ܒܪܶܗ ܕܰܐܒܪܳܗܳܡ (ܡܬܝ ܐ: ܐ). ܘܡܶܢ ܒܳܬܰܪ ܕܡܰܥܒܰܪ ܠܶܗ ܠܗܰܘ ܕܡܶܬܺܝܠܶܕ ܒܫܰܪ̈ܒܳܬܳܐ ܕܒܶܣܪܳܐ ܡܰܥܒܰܪ ܡܰܘܣܶܦ ܐܳܡܰܪ: ܕܗܰܘ ܕܶܐܬܺܝܠܶܕ ܒܡܰܪܝܰܡ ܒܬܽܘܠܬܳܐ ܡܶܢ ܪܽܘܚܰܐ ܗܘ ܕܩܽܘܕܫܳܐ (ܡܬܝ ܐ: ܟ).
ܘܦܳܓܰܥ ܒܶܗ ܒܢܰܗܪܳܐ ܕܡܰܬܰܝ܆ ܢܰܗܪܳܐ ܐܚܪܺܢܳܐ ܕܒܶܝܬ ܝܽܘܚܰܢܳܢ܆ ܘܫܳܦܰܥ ܥܰܬܺܝܪܳܐܝ̣ܬ ܒܓܰܘ ܫܶܩܝܳܗ̇ ܕܰܡܕܺܝܢܬܳܐ ܥܺܕܬܳܐ܆ ܘܩܳܥܶܐ ܘܡܰܟܪܶܙ: ܕܰܒܪܺܝܫܺܝܬ ܐܺܝܬܰܘܗܝ ܗ̱ܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܺܝܬܰܘܗܝ ܗ̱ܘܳܐ ܠܘܳܬ ܐܰܠܳܗܳܐ. ܘܰܐܠܳܗܳܐ ܐܺܝܬܰܘܗܝ ܗ̱ܘܳܐ ܗܽܘ ܡܶܠܬܳܐ (ܝܘܚܢܢ ܐ: ܐ) ܘܡܶܠܬܳܐ ܒܶܣܪܳܐ ܗܘܳܐ ܘܰܐܓܶܢ ܒܰܢ (ܝܘܚܢ ܐ: ܝܕ).
ܚܳܕܶܐ ܬܽܘܒ ܡܰܪܩܽܘܣ ܢܰܗܪܳܐ ܡܣܰܒܪܳܢܳܐ ܕܰܡܠܶܐ ܡܰܝܴ̈ܐ ܚܰܝܷ̈ܐ ܡܳܐ ܕܩܳܐܷܡ ܒܪܰܘܡܳܗ̇ ܕܰܡܕܺܝܢܬܳܐ ܕܰܐܠܳܗܳܐ ܗܳܝ ܕܰܒܢܳܐ ܒܡܶܨܪܶܝܢ܆ ܘܒܺܐܝܓܽܘܦܛܳܘܣ ܘܡܰܟܪܶܙ ܘܰܡܣܰܒܰܪ: ܪܺܝܫܳܐ ܕܶܐܘܰܢܓܶܠܝܽܘܢ ܕܝܶܫܘܥ ܡܫܺܝܚܳܐ ܒܪܶܗ ܕܰܐܠܳܗܳܐ (ܡܪܩܘܣ ܐ: ܐ).
ܘܦܳܓܰܥ ܒܶܗ ܢܰܗܪܳܐ ܕܡܰܪ̈ܓܳܢܝܳܬܳܐ ܠܽܘܩܳܐ ܓܺܝܚܽܘܢ ܡܣܰܒܪܳܢܳܐ ܚܰܒܪܶܗ܆ ܘܡܶܬܬܪܺܝܡ ܒܫܶܦܥܰܘ̈ܗܝ ܒܓܰܘ ܡܕܺܝܢܬܳܐ ܪܰܒܬܳܐ ܐܰܠܶܟܣܰܢܕܪܺܝܰܐ܆ ܘܰܡܣܰܒܰܪ ܒܢܴ̈ܬ ܩܳܠܰܘ̈ܗܝ ܕܡܰܠܐܱܟܳܐ ܕܰܠܘܳܬ ܒܬܽܘܠܬܳܐ. ܕܪܽܘܚܳܐ ܕܩܽܘܕܫܳܐ ܐܳܬܶܐ ܠܘܳܬ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰܠܳܗܳܐ. ܘܚܰܝܠܶܗ ܕܥܶܠܳܝܳܐ ܐܰܓܶܢ ܥܠܶܝܗ̇. ܘܡܶܛܠܗܳܢܳܐ ܗܰܘ ܕܶܐܬܺܝܠܶܕ ܒܳܗ̇. ܒܪܶܗ ܕܰܐܠܳܗܳܐ ܢܶܬܩܪܶܐ (ܠܘܩܐ ܐ: ܠܗ). ܗܳܠܶܝܢ ܐܶܢܘܢ ܢܰܗܪ̈ܰܘܳܬܳܐ ܕܶܐܡܰܪ ܕܰܘܝܕ ܟܰܕ ܡܙܰܡܰܪ܆ ܕܰܡܚܰܕܶܝܢ ܠܰܡܕܺܝܢܬܶܗ ܕܡܰܠܟܳܐ ܐܰܠܳܗܰܢ. ܢܒܺܝܳܐ ܕܶܝܢ ܠܰܘ ܡܕܺܝܢܬܳܐ ܒܰܠܚܽܘܕ ܩܳܪܶܐ ܠܳܗ̇ ܠܥܺܕܬܳܐ. ܐܶܠܐ:
ܒܶܝܬ ܡܰܫܪܝܶܗ ܕܰܡܪܰܝܡܳܐ: ܐܰܠܗܳܐ ܒܓܰܘܳܗ̇ ܠܳܐ ܬܙܽܘܥ. ܢܥܰܕܪܺܝܗ̇ ܐܠܰܗܳܐ ܒܥܶܕܳܢ ܨܰܦܪܳܐ. ܨܰܦܪܳܐ ܕܶܝܢ ܩܳܪܶܐ ܠܰܡ ܠܰܡܕܰܒܪܳܢܽܘܬܶܗ ܕܥܰܡܰܢܽܘܐܝܠ.
ܐܶܫܬܓܶܫܘ ܥܰܡ̈ܡܶܐ ܘܙܳܥܝ̈ ܡܰܠܟ̈ܘܳܬܳܐ. ܐܰܪܺܝܡ ܩܳܠܶܗ ܘܙܳܥܰܬ ܐܰܪܥܳܐ. ܐܳܦ ܗܳܫܳܐ ܥܰܠ ܪܰܒܽܘܬ ܚܰܝܠܶܗ ܕܰܨܠܺܝܒܳܐ ܥܳܛܶܦ ܕܢܶܫܬܰܥܶܐ. ܠܰܐܦܰܝ̈ ܬܫܰܥܫܳܥܺܝ̈ܢ ܩܥܳܐ ܝܶܫܘܥ ܒܩܳܠܐܴ ܪܰܒܳܐ: ܐܰܠܳܗܝ ܐܰܠܳܗܝ ܠܡܳܢܳܐ ܫܒܰܩܬܳܢܝ (ܡܬܝ ܟܙ: ܡܘ). ܘܡܶܚܕܳܐ ܐܰܦܰܝ̈ ܬܰܪܥܳܐ ܕܗܰܝܟܠܳܐ ܐܶܨܛܰܪܺܝ ܠܰܬܪܶܝܢ. ܡܶܢ ܠܥܶܠ ܥܕܰܡܳܐ ܠܬܰܚܬ. ܘܰܐܪܥܳܐ ܐܶܬܬܙܺܝܥܰܬ܆ ܘܒܶܝܬ ܩܒܽܘܪ̈ܶܐ ܐܶܬܦܰܬܰܚܘ (ܡܬܝ ܟܙ: ܢܐ-ܢܒ). ܘܗܳܠܶܝܢ ܡܰܢ ܡܰܘܕ̈ܥܳܢ ܠܗܰܘ ܕܰܐܪܺܝܡ ܩܳܠܶܗ܆ ܘܙܳܥܰܬ ܐܰܪܥܳܐ. ܕܰܗܘܳܐ ܫܓܽܘܫܝܳܐ ܡܶܛܠ ܙܰܘܥܳܐ ܗܳܢܳܐ ܒܥܰܡ̈ܡܶܐ ܘܡܰܠܟܘܴ̈ܬܳܐ. ܠܰܝܬ ܐ̱ܢܳܫ ܕܰܡܦܳܣ ܒܬܰܫܥܝܴ̈ܬܳܐ ܘܰܒܡܰܟ̈ܬܒܳܢܘܳܬܳܐ ܕܰܗ̈ܘܰܝ ܒܶܝܬ ܚܰܟܺܝ̈ܡܶܐ ܝܰܘ̈ܢܳܝܶܐ. ܡܶܛܠܗܳܕܶܐ ܘܡܶܬܚܪܶܐ܆ ܐܶܠܳܐ ܨܳܒܶܐ ܢܒܺܝܳܐ ܕܰܢܦܰܫܶܩ ܡܰܢܽܘ ܗܳܢܳܐ ܕܰܩܥܳܐ ܗܳܠܶܝܢ ܥܰܠ ܨܠܺܝܒܳܐ.
ܡܳܪܝܳܐ ܠܰܡ ܚܰܝܠܬܳܢܳܐ ܥܰܡܰܢ. ܘܰܡܥܰܕܪܳܢܰܢ ܐܰܠܳܗܶܗ ܕܝܰܥܩܽܘܒ: ܬܰܘ ܚܙܰܘ ܥܒܳܕܰܘ̈ܗܝ ܕܰܐܠܳܗܳܐ. ܕܥܳܒܶܕ ܬܶܕܡܪ̈ܳܬܳܐ ܒܰܐܪܥܳܐ: ܘܰܡܒܰܛܶܠ ܩܪ̈ܳܒܶܐ ܡܶܢ ܣܰܘܦܶܝܗ̇ ܕܰܐܪܥܳܐ. ܘܩܶܫ̈ܬܳܬܳܐ ܡܬܰܒܰܪ ܘܰܡܬܰܒܰܪ ܢܰܝ̈ܙܟܶܐ: ܘܡܰܪ̈ܟܒܳܬܳܐ ܡܰܘܩܶܕ ܒܢܽܘܪܳܐ. ܕܡܶܬܥܰܒ̈ܕܳܢ ܗܳܠܶܝܢ ܒܓܶܠܝܳܢܶܗ ܕܒܰܪ ܐܰܠܳܗܳܐ ܥܰܡܰܢܽܘܐܝܠ. ܘܰܕܫܽܘܪܳܝܳܐ ܫܳܩ̈ܠܳܢ ܡܶܢ ܨܠܺܝܒܳܐ. ܘܶܐܫܰܥܝܳܐ ܩܰܕܶܡ ܐܶܬܢܰܒܺܝ. ܡܳܐ ܕܶܐܬܚܙܺܝ ܒܪܺܝܫ ܛܽܘܪܳܐ ܒܰܝܬܶܗ ܕܡܳܪܝܳܐ. ܕܡܰܬܩܰܢ ܒܪܺܝܫ ܛܽܘܪ̈ܶܐ ܘܪܳܡ ܡܶܢ ܪ̈ܳܡܳܬܳܐ (ܐܫܥܝܐ ܒ: ܒ). ܕܗܳܕܶܐ ܐܺܝܬܶܝܗ̇ ܡܥܰܠܝܽܘܬܳܐ ܕܟܳܪܽܘܙܽܘܬܳܐ ܕܶܐܘܰܢܓܶܠܝܽܘܢ. ܢܶܪܥܽܘܢ ܠܰܡ ܣܰܝܦܰܝ̈ܗܘ̇ܢ ܠܣܶܟܰܝ̈ ܦܰܕܳܢܳܐ. ܘܪ̈ܽܘܡܚܰܝܗܘ̇ܢ ܠܡܰܓ̈ܠܶܐ. ܘܠܳܐ ܢܶܫܩܽܘܠ ܥܰܡܳܐ ܥܰܠ ܥܰܡܳܐ ܣܰܝܦܳܐ. ܘܬܽܘܒ ܠܳܐ ܢܺܐܠܦܽܘܢ ܩܪܳܒܳܐ (ܐܫܥܝܐ ܒ: ܕ). ܗܳܠܶܝܢ ܐܶܢܘ̇ܢ ܥܒܴ̈ܕܶܐ ܕܰܐܠܳܗܳܐ. ܕܰܥܒܰܕ ܒܰܨܠܺܝܒܳܐ ܕܰܩܥܳܐ ܢܒܺܝܳܐ ܕܬܰܘ ܘܰܚܙܰܘ ܐܶܢܘ̇ܢ. ܡܶܬܝܰܕܥܳܢܳܐܝ̣ܬ ܕܶܝܢ܆ ܠܰܩܪܳܒܳܐ ܕܡܳܪܽܘܕܳܐ ܒܰܛܶܠ ܡܶܢ ܐܰܪܥܳܐ. ܘܩܶܫ̈ܬܳܬܳܐ ܕܶܝܢ ܕܚܰܝܠܰܘܴ̈ܬܳܐ ܕܕܰܠܩܽܘܒܠܳܐ ܬܰܒܰܪ܆ ܘܢܰܝ̈ܙܟܶܐ ܕܪ̈ܽܘܚܶܐ ܒܺܝ̈ܫܳܬܳܐ ܐܰܩܗܺܝ. ܐܳܦ ܡܰܪ̈ܟܒܳܬܳܐ ܕܕܰܝ̈ܘܶܐ ܐܰܘܩܶܕ ܒܢܽܘܪܳܐ ܗܳܝ ܕܰܐܝܬܺܝ ܥܰܡܶܗ ܡܶܢ ܫܡܰܝܳܐ ܘܰܐܪܡܺܝ ܒܰܐܪܥܳܐ. ܘܡܶܛܠ ܕܰܢܚܰܘܶܐ ܒܳܬܰܪ ܗܳܢܳܐ ܥܒܳܕܳܐ ܕܰܥܒܰܕ ܒܡܰܫܪ̈ܝܳܬܶܗ ܕܳܐܟܶܠܩܰܪܨܳܐ. ܕܠܳܐ ܗܘܳܐ ܒܰܪܢܳܫܰܐ ܗ̄ܘ ܕܗܳܠܶܝܢ ܥܒܴ̈ܕܶܐ ܥܒܰܕ ܒܣܶܕܪ̈ܶܐ ܟܬܺܝ̈ܫܰܝ ܠܒܺܝܫܬܳܐ. ܩܪܳܐ ܒܰܢܒܺܝܳܐ ܠܰܐܝܠܶܝܢ ܕܶܐܬܦܪܶܩܘ ܡܶܢ ܡܳܪܽܘܕܽܘܬܶܗ ܕܰܛܪܽܘܢܳܐ ܘܳܐܡܰܪ:
ܐܶܬܦܢܰܘ ܘܕܰܥܘ ܕܶܐܢܳܐ ܐ̱ܢܳܐ ܐܰܠܳܗܳܐ܆ ܐܶܬܬܪܺܝܡܶܬ ܒܥܰܡ̈ܡܶܐ ܘܶܐܬܬܪܺܝܡܶܬ ܒܰܐܪܥܳܐ. ܐܶܢܳܐ ܠܰܡ ܐܰܪܺܝܡܶܬ ܐܺܝ̈ܕܰܝ ܥܰܠ ܚܰܝ̈ܠܰܘܳܬܳܐ ܕܰܠܩܽܘܒܠܳܐ ܘܶܐܢܳܐ ܥܶܒܕܶܬ ܬܶܕܡܪ̈ܳܬܳܐ ܕܥܰܒ̈ܕܰܝ ܡܶܢ ܡܳܪܽܘܕܳܐ. ܘܬܽܘܒ ܐܶܬܪܺܝܡܶܬ ܒܥܰܡ̈ܡܶܐ. ܘܠܺܝ ܟܳܦܺܝܢ ܒܽܘܪܟܳܐ ܘܣܳܓܕܺܝܢ ܟܽܠܗܽܘܢ ܥܰܡ̈ܡܶܐ ܘܟܽܠܗܽܘܢ ܡܰܠܟ̈ܐ ܕܰܐܪܥܳܐ. ܘܡܶܛܠ ܕܶܐܬܬܪܺܝܡܶܬ ܥܰܠ ܩܰܝܣܳܐ ܕܰܨܠܺܝܒܳܐ. ܕܶܐܡܰܟܰܟ ܚܬܺܝܪܽܘܬܶܗ ܕܳܐܟܶܠܩܰܪܨܳܐ. ܒܳܬܰܪ ܗܳܠܶܝܢ ܡܰܘܕܶܐ ܢܒܺܝܳܐ: ܕܡܳܪܝܳܐ ܚܰܝܠܬܳܢܳܐ ܘܰܐܠܳܗܶܗ ܕܝܰܥܩܽܘܒ ܐܺܝܬܰܘܗܝ ܗܰܘ ܡܰܢ ܕܶܐܬܬܪܺܝܡ ܥܰܠ ܙܩܺܝܦܳܐ.
ܡܳܪܝܳܐ ܚܰܝܠܬܳܢܳܐ ܥܰܡܰܢ. ܘܰܡܥܰܕܪܳܢܰܢ ܐܰܠܳܗܶܗ ܕܝܰܥܩܽܘܒ. ܕܗܽܘ ܬܪܰܥ ܠܣܶܕܪ̈ܰܘܗܝ ܕܰܒܥܶܠܕܒܳܒܳܐ. ܘܦܰܨܺܝ ܠܰܢ ܡܶܢ ܫܽܘܥܒܳܕܶܗ ܕܰܛܪܽܘܢܳܐ. ܘܠܶܗ ܡܫܰܒܚܺܝܢܰܢ ܘܡܰܘܕܶܝܢܰܢ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܫܒܥܐ
ܡܰܘܕܰܥ ܥܰܠ ܣܽܘܠܳܩܶܗ ܕܥܰܡܰܢܽܘܐܝܠ ܠܰܫܡܰܝܳܐ: ܘܥܰܠ ܡܰܘܬܒܶܗ ܒܫܽܘܒܚܳܐ: ܘܥܰܠ ܫܽܘܠܛܳܢܶܗ ܡܬܺܝܚܳܐ ܕܥܰܠ ܟ̇ܠ.
ܣܳܦܪ̈ܶܐ ܕܥܶܒܪ̈ܳܝܶܐ ܘܡܰܠܦܳܢ̈ܐ ܕܝܽܘ̈ܕܳܝܶܐ ܡܫܰܐܠܺܝܢ ܗܘܰܘ ܠܕܰܘܝܕ ܢܒܺܝܶܐ܆ ܕܡܶܢ ܐܰܝܟܳܐ ܫܳܩܶܠ ܗܘܳܐ ܥܶܠܬܳܐ ܡܳܐ ܕܡܶܬܬܙܺܝܥ ܗܘܳܐ ܒܰܢܒܺܝܽܘܬܳܐ. ܡܶܛܠ ܕܠܳܐ ܢܟܰܣܶܐ ܥܷ̈ܠܠܳܬܳܐ ܕܩܳܪ̈ܶܝܢ ܗܘܰܝ̈ ܠܶܗ ܕܢܶܬܢܰܒܶܐ܆ ܐܰܝܟ ܡܰܫܠܡܳܢܽܘܬܳܐ ܡܶܕܶܡ ܡܶܕܶܡ ܚܰܕ ܠܚܰܕ ܡܰܓܥܠܺܝܢ ܗܘܰܘ. ܐܳܡܪܺܝܢ ܓܶܝܪ ܥܰܠ ܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܘܰܫܒܰܥ ܕܡܶܛܠ ܗܳܝ ܡܰܚܰܬܬܳܐ ܕܚܰܘܺܝ ܐܰܕܽܘܢܰܝ ܒܛܽܘܪܳܐ. ܒܰܕ ܡܶܬܓܰܘܙܠܳܐ ܒܶܗ ܢܽܘܪܳܐ ܒܣܰܢܝܳܐ ܠܥܺܝܢ ܟܽܠܶܗ ܥܰܡܳܐ ܐܰܡܪܳܗ̇. ܘܳܐܦ ܩܳܠܳܐ ܠܗܰܠ ܕܩܰܪܢܳܐ ܡܶܫܬܡܰܥ ܗܘܳܐ ܥܰܠ ܛܽܘܪܳܐ. ܘܬܶܢܳܢܳܐ ܘܢܽܘܪܳܐ ܐܰܠܳܗܳܝܬܳܐ ܡܶܬܚܙܶܐ ܗܘܳܐ. ܐܶܠܳܐ ܠܳܐ ܐܶܫܟܰܚܢܰܢ ܕܶܐܬܡܰܠܺܝ ܬܰܡܳܢ ܐܰܝܠܶܝܢ ܕܰܐܡܺܝܪ̈ܳܢ ܒܗܳܢܳܐ ܡܰܙܡܽܘܪܳܐ. ܕܰܢܚܶܬ ܡܳܪܝܳܐ ܒܢܽܘܪܳܐ ܥܰܠ ܛܽܘܪܳܐ ܐܰܟܬܶܒ ܡܽܘܫܶܐ. ܕܰܣܠܶܦ ܕܶܝܢ ܠܳܐ ܐܰܟܬܶܒ ܟܬܳܒܳܐ. ܗܳܪܟܳܐ ܕܶܝܢ ܒܡܰܙܡܽܘܪܳܐ ܗܳܢܳܐ ܠܰܝܬ ܒܶܗ ܗܳܝ ܕܰܢܚܶܬ ܐܶܠܳܐ ܕܰܣܠܶܩ ܒܰܠܚܽܘܕ ܐܶܡܰܪ. ܡܳܕܶܝܢ ܥܰܠ ܣܽܘܠܳܩܳܐ ܡܳܪܳܢܳܝܳܐ ܡܰܘܕܰܥ. ܘܠܰܘ ܥܰܠ ܡܰܚܰܬܬܳܐ. ܘܠܳܐ ܓܶܝܪ ܫܰܪܒܳܐ ܕܚܰܕ ܥܰܡܳܐ ܡܰܘܕܰܥ ܒܶܗ܆ ܐܶܠܳܐ ܥܰܠ ܣܽܘܓܳܐܐ ܕܥܰܡ̈ܡܶܐ ܡܫܰܪܶܐ ܓܶܝܪ ܘܳܐܡܰܪ:
ܟܽܠܟܽܘܢ ܥܰܡ̈ܡܶܐ ܩܽܘܫܘ ܟܰܦܳܐ ܘܫܰܒܰܚܘ ܠܰܐܠܗܳܐ ܒܩܳܠܳܐ ܕܫܽܘܒܚܳܐ: ܡܶܛܠ ܕܡܳܪܝܳܐ ܡܪܰܝܡܳܐ ܘܰܕܚܺܝܠܳܐ܆ ܗܽܘܝܽܘ ܡܰܠܟܳܐ ܪܰܒܳܐ ܥܰܠ ܟܽܠܳܗ̇ ܐܰܪܥܳܐ. ܕܫܰܥܒܶܕ ܠܰܢ ܥܰܡ̈ܡܶܐ ܬܚܽܘܬܰܝܢ: ܘܶܐܡܘܴ̈ܬܳܐ ܬܚܶܝܬ ܪ̈ܶܓܠܰܝܢ. ܐܰܓܒܝܰܢ ܝܳܪܬܽܘܬܶܗ ܘܺܐܝܩܳܪܶܗ ܕܝܰܥܩܽܘܒ ܕܰܪܚܶܡ. ܡܰܢܽܘ ܫܽܘܪܳܝܳܐ ܗܳܢܳܐ ܬܡܺܝܗܳܐ. ܘܡܰܢ ܬܽܘܒ ܢܣܰܒܰܪ ܕܳܐܡܰܪ ܠܡܰܙܡܽܘܪܳܐ ܗܳܢܳܐ. ܘܰܐܝܢܰܘ ܬܽܘܒ ܙܰܒܢܶܗ ܕܒܶܗ ܚܳܐܱܪ ܕܢܶܬܡܰܠܰܠ܆ ܕܰܫܠܺܝ̈ܚܶܐ ܐܶܢܶܝܢ ܗܳܠܶܝܢ ܒܢܴ̈ܬ ܩܴ̈ܠܐ. ܒܗܰܘ ܓܶܝܪ ܙܰܒܢܳܐ ܕܦܶܪܚܰܬ ܣܒܰܪܬܶܗ ܕܦܳܪܽܘܩܰܢ ܒܥܳܠܡܳܐ ܕܶܐܚܰܕܘ ܥܰܡ̈ܡܶܐ ܒܺܐܝܕܳܐ ܕܰܚ̈ܕܳܕܶܐ ܘܰܢܩܰܫܘ ܟܰܦܳܐ ܕܬܶܫܒܽܘܚܬܳܐ ܒܰܚܕܳܐ ܬܰܘܕܺܝܬܳܐ܆ ܩܽܘܫܘ ܟܰܦܳܐ ܓܶܝܪ ܗܳܕܶܐ ܡܶܬܦܰܫܰܩ. ܐܰܚܽܘܕ ܐܺܝܕܳܐ. ܘܩܽܘܫܘ ܥܺܕܬܳܐ܆ ܠܩܰܛܘ ܡܒܰܕܪ̈ܶܐ. ܬܽܘܒ ܩܪܽܘܒܘ ܚܰܕ ܠܘܳܬ ܚܰܕ. ܡܳܕܶܝܢ ܟܢܽܘܫܬܳܐ ܕܥܰܡ̈ܡܶܐ ܠܰܚܕܳܐ ܐܰܘܝܽܘܬܳܐ ܡܰܠܦܳܐ ܠܰܢ. ܗܳܝ ܕܩܽܘܫܘ ܟܰܦܳܐ. ܩܳܠܳܐ ܫܰܘܝܳܐ ܕܫܽܘܒܚܳܐ ܚܰܕܬܳܐ ܕܠܳܐ ܦܠܺܝܓ ܥܰܠ ܢܰܦܫܶܗ. ܡܰܘܕܥܳܐ ܗܳܝ ܕܫܰܒܰܚܘ ܠܰܐܠܳܗܳܐ ܒܩܳܠܳܐ ܕܫܽܘܒܚܳܐ. ܡܶܛܠ ܗܳܢܳܐ ܟܰܕ ܣܳܠܶܩ ܗܘܳܐ ܗܰܘ ܡܪܰܝܡܳܐ ܠܰܐܬܪܶܗ܆ ܠܳܐ ܚܰܦܺܝ ܣܽܘܠܳܩܶܗ. ܐܰܟܡܳܐ ܕܚܰܦܺܝ ܡܰܚܰܬܬܶܗ. ܠܰܢܒܺܝ̈ܐ ܓܶܝܪ ܓܠܳܐ ܗܘܳܐ ܡܰܚܰܬܬܶܗ. ܘܡܰܣܩܶܗ ܕܶܝܢ ܡܟܰܣܶܐ ܗܘܳܐ ܡܶܢ ܥܰܡܳܐ. ܡܶܛܠܗܳܢܳܐ ܚܰܘܺܝ ܠܰܟܢܽܘܫܬܳܐ ܕܺܝܣܪܳܐܝܠ ܟܰܕ ܢܶܦܩܰܬ ܡܶܢ ܡܶܨܪܶܝܢ. ܕܰܢܚܶܬ ܐܰܠܗܳܐ ܥܰܠ ܛܽܘܪܳܐ ܒܢܽܘܪܳܐ. ܘܰܣܠܶܩ ܕܶܝܢ ܠܳܐ ܚܙܰܘ. ܠܰܫܠܺܝ̈ܚܶܐ ܕܶܝܢ ܚܰܘܺܝ ܢܰܦܫܶܗ ܟܰܕ ܣܠܶܩ. ܕܰܢܚܶܬ ܕܶܝܢ ܘܰܫܪܳܐ ܒܓܰܘ ܡܰܪܒܥܳܐ ܠܳܐ ܚܙܰܘ. ܫܰܦܺܝܪ ܡܳܕܶܝܢ ܦܠܰܓ ܐܽܘܪܚܳܐ ܕܰܡܕܰܒܪܳܢܽܘܬܶܗ ܠܰܒܢܰܝ̈ܢܳܫܳܐ. ܗܳܢܰܘ ܠܩܰܕܡܳܝ̈ܐ ܢܒܺܝ̈ܐ܆ ܘܰܠܬܰܠܡܺܝ̈ܕܶܐ ܒܚܰܪܬܳܐ. ܘܝܰܗܒ ܗܘܳܐ ܠܡܽܘܫܶܐ ܕܢܰܟܬܶܒ܆ ܕܰܢܚܶܬ ܡܳܪܝܳܐ ܒܢܽܘܪܳܐ ܠܛܽܘܪܳܐ (ܡܦܩܢܐ ܝܛ: ܝܚ). ܕܰܣܠܶܩ ܕܶܝܢ ܠܳܐ ܟܬܰܒ. ܫܠܺܝܚ̈ܐ ܕܶܝܢ ܟܰܕ ܡܶܣܬܰܠܰܩ ܗܘܳܐ ܡܳܪܝܳܐ ܠܰܫܡܰܝܳܐ. ܐܰܦܶܩ ܐܶܢܽܘܢ ܠܒܶܝܬ ܥܰܢܝܳܐ. ܘܰܐܪܺܝܡ ܐܺܝ̈ܕܰܘܗܝ ܘܒܰܪܶܟ ܐܶܢܘܢ. ܘܟܰܕ ܚܳܙܶܝܢ ܠܶܗ ܐܶܣܬܰܠܰܩ. ܡܳܕܶܝܢ ܛܽܘܒܳܢܳܐ ܕܰܘܺܝܕ. ܥܰܠܗܳܕܶܐ ܙܰܡܰܪ ܬܶܫܒܽܘܚܬܳܐ ܕܰܐܪܒܥܺܝܢ ܘܰܫܒܰܥ܆ ܡܰܘܕܰܥ ܕܶܝܢ ܥܰܠ ܥܰܡܰܢܽܘܐܝܠ ܕܡܳܪܝܳܐ ܡܪܰܝܡܳܐ ܘܰܕܚܺܝܠܳܐ ܐܺܝܬܰܘܗܝ. ܘܰܕܗܽܘܝܽܘ ܡܰܠܟܳܐ ܪܰܒܳܐ ܥܰܠ ܟܽܠܳܗ̇ ܐܰܪܥܳܐ. ܗܳܠܶܝܢ ܓܶܝܪ ܐܶܡܰܪ܆ ܕܰܢܫܰܬܶܩ ܩܴ̈ܠܐ ܕܗܳܠܶܝܢ ܕܠܳܐ ܡܰܘܕܶܝܢ ܒܶܗ ܕܰܐܠܗܰܐ ܗ̄ܘ ܡܪܰܝܡܳܐ ܘܡܰܠܟܰܐ ܗ̄ܘ ܕܟܽܠܳܗ̇ ܐܰܪܥܳܐ. ܘܰܕܗܽܘ ܫܰܥܒܶܕ ܠܥܰܡ̈ܡܶܐ ܠܗܰܝܡܳܢܽܘܬܳܐ ܕܰܫܠܺܝ̈ܚܶܐ ܐܳܦ ܐܰܘܕܰܥ ܡܙܰܡܪܳܢܳܐ ܒܗܳܝ ܕܶܐܡܰܪ ܕܰܐܓܒܝܰܢ ܝܳܪܬܽܘܬܶܗ ܕܝܰܥܩܽܘܒ ܕܰܪܚܶܝܡ. ܡܰܝܬܶܐ ܒܳܬܰܪ ܗܳܠܶܝܢ܆
ܕܰܣܠܶܩ ܐܰܠܳܗܳܐ ܒܫܽܘܒܚܳܐ ܘܡܳܪܝܳܐ ܒܩܳܠܳܐ ܕܩܰܪܢܳܐ: ܙܡܰܪܘ ܠܰܐܠܳܗܳܐ ܒܫܽܘܒܚܳܐ ܙܡܰܪܘ ܠܡܰܠܟܰܢ. ܡܶܛܠ ܕܡܰܠܟܳܐ ܕܟܽܠܗ̇ ܐܰܪܥܳܐ. ܐܰܠܳܗܰܐ ܗ̄ܘ ܙܡܰܪܘ ܠܶܗ ܫܽܘܒܚܳܐ. ܠܗܳܠܶܝܢ ܡܦܰܫܶܩ ܦܰܘܠܽܘܣ ܐܰܠܳܗܳܝܳܐ ܟܰܕ ܐܳܡܰܪ: ܕܫܰܪܺܝܪܳܐܝ̣ܬ ܪܰܒ ܗܘܳܐ ܐܪܳܙܳܐ ܗܳܢܳܐ ܕܟܺܐܢܽܘܬܳܐ ܕܶܐܬܓܠܺܝ ܒܰܒܣܰܪ. ܘܶܐܙܕܰܕܰܩ ܒܪܽܘܚ. ܘܶܐܬܚܙܺܝ ܠܡܰܠܐܟ̈ܐ. ܘܶܐܬܟܪܶܙ ܒܶܝܬ ܥܰܡ̈ܡܶܐ. ܘܶܐܬܗܰܝܡܰܢ ܒܥܳܠܡܳܐ. ܕܶܐܣܬܰܠܰܩ ܒܫܽܘܒܚܳܐ (ܐ ܛܝܡܬܐܘܣ ܓ: ܝܘ). ܕܳܡܝܳܐ ܕܶܝܢ ܗܳܝ ܕܶܐܡܰܪ ܕܰܣܠܶܩ ܐܰܠܳܗܳܐ ܒܫܽܘܒܚܳܐ ܘܡܳܪܝܳܐ ܒܩܳܠܳܐ ܕܪܰܩܢܳܐ. ܡܶܛܠ ܕܟܰܕ ܣܠܶܩ ܠܳܐ ܗܘܳܬ ܩܥܳܬܳܐ ܥܰܠ ܐܰܪܥܳܐ. ܕܒܰܐܬܪ̈ܰܘܳܬܳܐ ܕܩܳܝܡܺܝܢ ܒܗܽܘܢ ܚܰܝ̈ܠܰܘܳܬܳܐ ܐܳܦ ܬܶܓܡ̈ܐ ܗܘܳܬ ܩܥܳܬܳܐ ܟܰܕ ܣܠܶܩ ܡܶܢ ܐܰܪܥܳܐ. ܐܶܡܰܪ ܓܶܝܪ ܐܶܫܰܥܝܳܐ. ܕܡܰܢܽܘ ܗܳܢܳܐ ܕܶܐܬܳܐ ܡܶܢ ܐܰܕܽܘܡ܆ ܘܣܽܘܡܳܩܺܝܢ ܢܰܚ̈ܬܰܘܗܝ ܡܶܢ ܒܽܘܨܪ (ܐܫܥܝܐ ܣܓ: ܐ). ܗܳܕܶܐ ܒܰܪܬ ܩܳܠܐ ܕܚܰܝ̈ܠܰܘܳܬܳܐ ܗܘܳܬ ܕܰܡܫܰܐܠܺܝܢ ܗܽܘ ܚܰܕ ܠܚܰܕ܆ ܕܡܰܢܽܘ ܗܳܢܳܐ ܕܳܐܬܶܐ ܡܶܢ ܐܰܪܥܳܐ ܕܰܐܕܽܘܡ. ܡܰܘܕܰܥ ܬܽܘܒ ܐܳܦ ܙܟܰܪܝܳܐ ܟܰܕ ܐܳܡܪܺܝܢ ܠܶܗ: ܢܳܛܪ̈ܰܝ ܬܰܪ̈ܥܶܐ ܥܶܠܳܝ̈ܐ. ܘܪ̈ܽܘܚܶܐ ܝܰܕܽܘܥܬܳܢܝܴ̈ܬܳܐ ܕܰܫܡܰܝܳܢ̈ܐ. ܕܡܳܢܳܐ ܐܶܢܶܝܢ ܡܰܚ̈ܘܳܬܳܐ ܗܳܢܶܝܢ ܕܒܺܐܝ̈ܕܰܝܟ. ܘܗܽܘ ܦܰܢܺܝ ܗܘܳܐ ܘܶܐܡܰܪ ܠܗܽܘܢ܆ ܗܳܠܶܝܢ ܡܰܚ̈ܘܳܬܳܐ ܕܒܶܠܥܶܬ ܒܶܝܬ ܪ̈ܳܚܡܰܝ (ܙܟܪܝܐ ܝܓ: ܘ). ܡܳܕܶܝܢ ܫܰܪܺܝܪܳܐ ܗ̄ܝ܆ ܕܰܒܩܳܠܐ ܕܩܰܪܢܳܐ ܗܳܝ ܥܶܠܳܝܬܳܐ ܕܡܰܠܐܟ̈ܐ ܣܠܶܩ ܘܶܐܬܥܰܠܺܝ ܠܰܐܬܪܶܗ. ܒܳܬܰܪ ܗܳܠܶܝܢ ܡܰܘܕܰܥ ܢܒܺܝܳܐ ܫܽܘܠܛܳܢܳܐ ܕܶܐܘܰܢܓܶܠܝܽܘܢ ܕܶܐܚܰܕ ܠܥܰܡ̈ܡܶܐ ܡܰܠܟܳܐܝ̣ܬ ܘܰܐܠܳܗܳܐܝ̣ܬ.
ܐܰܡܠܶܟ ܐܰܠܳܗܳܐ ܥܰܠ ܥܰܡ̈ܡܶܐ. ܐܰܠܗܳܐ ܝܬܶܒ ܥܰܠ ܟܽܘܪܣܝܶܗ ܩܰܕܺܝܫܳܐ. ܟܽܘܪܣܝܳܐ ܩܰܕܺܝܫܳܐ ܡܫܰܡܰܗ. ܠܰܘ ܗܰܘ ܕܰܚܙܳܐ ܢܒܺܝܳܐ ܥܰܠ ܚܰܨܳܐ ܕܚܰܝ̈ܘܳܬܳܐ. ܐܶܠܐ ܡܶܛܠ ܕܥܺܕܬܳܐ ܕܥܰܡ̈ܡܶܐ ܟܽܘܪܣܝܶܗ ܕܡܰܠܟܳܐ ܡܶܫܬܰܡܗܳܐ. ܠܳܗ̇ ܩܳܪܶܐ ܟܽܘܪܣܝܳܐ ܩܰܕܺܝܫܳܐ. ܗܳܟܰܢܳܐ ܓܶܝܪ ܡܟܰܢܶܐ ܠܳܗ̇ ܫܠܶܝܡܽܘܢ ܚܰܟܺܝܡܳܐ ܒܰܟܬܳܒܳܐ ܕܬܶܫܒܚܴ̈ܬ ܬܶܫܒܚܴ̈ܬܳܐ. ܟܽܘܪܣܝܳܐ ܥܒܰܕ ܠܶܗ ܥܰܡ ܫܠܶܝܡܽܘܢ ܡܰܠܟܳܐ ܡܶܢ ܩܰܝ̈ܣܶܐ ܕܠܶܒܢܳܢ (ܬܫܒ̈ܚܬ ܬܫܒ̈ܚܬܐ ܓ: ܛ). ܡܳܕܶܝܢ ܠܗܳܢܳܐ ܟܽܘܪܣܝܳܐ ܩܳܪܶܐ ܟܽܘܪܣܝܳܐ ܩܰܕܺܝܫܳܐ. ܘܥܰܠܗܳܝ ܡܠܰܚܶܡ ܒܰܪܬ ܩܳܠܐ ܕܡܰܚܝܳܢܳܐ ܠܣܽܘܥܪܳܢܳܐ ܘܳܐܡܰܪ:
ܫܰܠܺܝܛܳܢ̈ܐ ܕܥܰܡ̈ܡܶܐ ܐܶܬܦܢܰܘ ܠܘܳܬ ܐܰܠܳܗܶܗ ܕܰܐܒܪܳܗܳܡ. ܡܶܛܠ ܕܕܰܐܠܳܗܳܐ ܐܶܢܽܘܢ ܐܽܘ̈ܚܕܳܢܶܝܗ̇ ܕܰܐܪܥܳܐ ܘܛܳܒ ܐܶܬܬܪܺܝܡ. ܒܗܳܠܶܝܢ ܩܴ̈ܠܐ ܠܰܝܬ ܥܽܘܗܕܳܢܳܐ ܕܡܽܘܟܳܟܳܐ ܘܠܳܐ ܒܨܺܝܪܽܘܬܳܐ ܕܰܕܡܽܘܬܳܐ ܕܥܰܒܕܳܐ. ܐܶܠܐ ܐܰܠܳܗܳܐ ܣܠܶܩ ܒܫܽܘܒܚܳܐ. ܐܰܠܳܗܳܐ ܝܬܶܒ ܥܰܠ ܟܽܘܪܣܝܶܗ ܩܰܕܺܝܫܳܐ ܕܕܰܐܠܗܳܐ ܐܶܢܽܘܢ ܐܽܘܚܕܳܢܶܝ̈ܗ̇ ܕܰܐܪܥܳܐ. ܐܶܬܦܢܰܘ ܠܘܳܬ ܐܰܠܳܗܶܗ ܕܰܐܒܪܳܗܳܡ. ܒܪܰܡ ܕܶܝܢ ܡܶܛܽܠ ܕܶܐܡܰܪ ܢܒܺܝܳܐ. ܟܽܠܟܽܘܢ ܥܰܡ̈ܡܶܐ ܩܽܘܫܘ ܟܰܦܳܐ ܘܗܳܕܶܐ ܠܳܐ ܕܳܡܝܳܐ ܕܰܒܗܳܢܳܐ ܥܳܠܡܳܐ ܢܳܦܩܳܐ ܠܫܽܘܠܳܡܳܐ. ܩܰܠܺܝܠ ܬܽܘܒ ܕܡܽܘܬܳܐ ܡܚܰܘܶܐ ܐܢܳܐ ܥܠܶܝܗ̇ ܕܡܶܠܬܳܐ. ܕܠܳܐ ܢܶܫܒܩܺܝܗ̇ ܟܰܕ ܠܳܐ ܡܢܰܗܪܳܐ. ܡܚܰܘܶܐ ܢܒܺܝܳܐ ܒܗܳܕܶܐ ܩܳܠܐ. ܕܡܳܐ ܕܶܐܫܬܰܥܒܰܕܘ ܠܶܗ ܠܰܒܪܳܐ ܟܽܠ ܪܺܝܫ ܘܟܽܠ ܫܽܘܠܛܳܢ ܘܟܽܠ ܚܰܝ̈ܠܺܝܢ. ܘܒܶܛܠܰܬ ܒܺܝܫܬܳܐ ܘܠܐ ܬܘܒ ܡܶܬܦܰܠܚܳܐ. ܗܳܝܕܶܝܢ ܢܳܦܩܳܐ ܒܰܪܬ ܩܳܠܐ ܗܳܕܶܐ ܠܰܥܒܳܕܳܐ. ܬܰܡܳܢ ܓܶܝܪ ܟܽܠܗܽܘܢ ܫܰܠܺܝܛܳܢ̈ܐ ܕܥܳܠܡܳܐ ܘܰܕܥܰܡ̈ܡܶܐ ܡܶܬܦܢܶܝܢ ܘܝܳܕܥܺܝܢ ܕܠܰܝܬ ܐܶܠܐ ܐܶܢ ܚܕܳܐ ܪܺܝܫܳܢܽܘܬܐ ܘܠܳܗ̇ ܡܩܰܪܒܺܝܢ ܡܰܕܰܐܬܳܐ ܕܣܶܓܕܬܳܐ ܘܰܕܫܽܘܒܚܳܐ. ܘܳܐܦܶܢ ܠܰܘ ܒܡܰܠܟܽܘܬܳܐ ܡܶܬܒܰܣܡܺܝܢ ܫܰܠܺܝܛܳܢ̈ܐ ܕܥܰܡ̈ܡܶܐ. ܒܗܳܝ ܕܰܒܓܰܘ ܬܰܫܢܺܝܩܳܐ ܡܶܬܚܰܒܫܺܝܢ ܗܶܢܽܘܢ ܘܟ̇ܠ ܡܰܢ ܕܶܐܫܬܡܰܥܘ ܠܗܽܘܢ. ܐܶܠܐ ܡܶܬܦܰܢܝܳܢܽܘܬܳܐ ܕܰܠܘܳܬ ܚܕܳܐ ܐܰܠܳܗܽܘܬܳܐ ܗܳܘܝܳܐ. ܠܟܽܠ ܢܦܶܫ ܘܰܠܟܽܠ ܫܽܘܠܛܳܢ. ܘܗܳܝܕܶܝܢ ܗܳܘܶܐ ܐܰܠܳܗܳܐ ܟܽܠ ܒܟܽܠ. ܒܕܶܚܠܬܳܐ ܘܰܒܡܶܫܬܰܘܕܥܳܢܽܘܬܳܐ ܘܰܒܣܶܓܕܬܳܐ. ܠܰܘ ܟܽܠ ܡܒܰܣܶܡ ܗܽܘ ܕܡܶܫܬܰܘܕܰܥ ܠܶܗ ܕܺܐܝܬܰܘܗܝ. ܐܶܠܐ ܟܰܕ ܡܶܬܺܝܕܰܥ ܠܰܐܝܠܶܝܢ ܕܠܳܐ ܝܰܕܥܽܘܗܝ. ܘܰܡܒܰܣܶܡ ܠܰܐܝܠܶܝܢ ܕܦܰܠܚܽܘܗܝ. ܘܰܡܫܰܢܶܩ ܠܰܐܝܠܶܝܢ ܕܰܐܪܓܙܽܘܗܝ. ܘܠܳܐ ܢܛܰܪ ܦܽܘ̈ܩܕܳܢܰܘܗܝ. ܘܠܳܐ ܓܰܢܴ̈ܒܶܐ ܡܶܢ ܗܳܝ ܕܝܳܕܥܺܝܢ ܠܕܰܝܳܢܳܐ. ܩܳܢܶܝܢ ܚܪܽܘܪܳܐ ܕܡܶܢ ܒܺܝܫܬܳܐ ܒܕܺܝܢܳܐ. ܘܠܳܐ ܬܽܘܒ ܡܶܢ ܗܳܝ ܕܡܶܬܺܝܕܰܥ ܐܰܠܳܗܳܐ ܠܟܽܠ ܒܶܝܬ ܕܺܝܢܳܐ. ܡܰܚܶܐ ܠܟܽܠ ܘܰܡܒܰܣܶܡ. ܐܶܠܳܐ ܠܩܰܕܺܝ̈ܫܶܐ ܒܰܠܚܽܘܕ ܘܠܰܕ̈ܟܰܝܳܐ ܡܰܘܪܶܒ ܒܡܰܠܟܽܘܬܶܗ. ܘܗܶܢܽܘܢ ܡܰܘܕܶܝܢ ܠܶܗ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܬܡܢܝܐ
ܡܰܘܕܰܥ ܥܠ ܪܰܒܽܘܬܶܗ ܕܰܐܠܳܗܳܐ ܕܰܠܥܶܠ ܡܶܢܟܽܠ ܐܰܠܳܗܺܝ̈ܢ: ܘܥܰܠ ܥܺܕܬܳܐ ܕܣܺܝܡܳܐ ܒܢܽܘܪܳܐ: ܘܥܰܠ ܛܽܘܪܳܐ ܕܒܰܢܝܳܐ ܥܠܰܘܗܝ ܥܺܕܬܳܐ ܕܰܐܠܗܳܐ.
ܪܰܒܽܘܬܶܗ ܕܰܐܠܳܗܳܐ ܕܰܠܥܶܠ ܡܶܢ ܟܽܠܗܽܘܢ ܐܰܠܳܗܷ̈ܐ ܕܥܰܡ̈ܡܶܐ܆ ܫܩܰܠ ܛܽܘܒܳܢܳܐ ܕܰܘܝܕ ܕܢܶܫܬܰܥܶܐ ܒܡܰܙܡܽܘܪܳܐ ܗܳܢܳܐ ܕܰܐܪܒܥܺܝܢ ܘܰܬܡܳܢܝܳܐ܆ ܠܽܘܩܒܰܠ ܗܳܢܽܘܢ ܕܰܐܚܺܝܕܺܝܢ ܗܘܰܘ ܠܰܐܠܳܗ̈ܐ ܚܰܪ̈ܒܶܐ ܘܕܰܓܳܠܰܝ̈ ܫܡܳܐ ܒܬܶܫܒܽܘܚܬܳܐ ܘܒܺܐܝܩܳܪܳܐ ܙܰܡܰܪ ܟܰܕ ܐܳܡܰܪ:
ܪܰܒ ܗܽܘ ܡܳܪܰܢ ܘܰܡܫܰܒܰܚ ܪܰܘܪܒܳܐܝ̣ܬ. ܥܶܠܬܳܐ ܕܶܝܢ ܫܩܰܠ ܕܢܶܫܬܰܥܶܐ ܐܰܝܟ ܕܕܳܡܝܳܐ. ܒܰܩܪܳܒܳܐ ܗܰܘ ܕܰܥܒܰܕ ܥܰܠ ܐܽܘܪܺܫܠܶܡ. ܟܰܕ ܝܳܬܒܺܝܢ ܗܘܰܘ ܒܳܗ̇ ܝܳܒܽܘ̈ܣܳܝܶܐ ܠܗܰܠ ܓܶܝܪ ܟܰܕ ܟܢܺܝܫܺܝܢ ܥܰܡܶܗ ܚܰܝ̈ܠܰܘܳܬܳܐ ܢܦܰܠܘ ܝܳܒܽܘ̈ܣܳܝܶܐ ܠܰܩܪܳܒܳܐ. ܘܰܡܚܰܣܕܺܝܢ ܗܘܰܘ ܠܶܗ ܠܕܰܘܝܕ. ܥܰܠ ܕܺܐܝܬ ܗܘܳܐ ܥܰܡܶܗ ܥܘܺܝܪ̈ܶܐ ܘܰܚܓܺܝܪ̈ܶܐ. ܗܳܢܳܐ ܓܶܝܪ ܢܳܡܽܘܣܳܐ ܐܺܝܬ ܗܘܳܐ ܠܶܗ܆ ܕܠܳܐ ܢܳܦܶܩ ܗܘܳܐ ܠܰܩܪܳܒܳܐ܆ ܕܠܳܐ ܕܳܒܰܪ ܗܘܳܐ ܥܰܡܶܗ ܥܘܺܝܪ̈ܶܐ ܘܰܚܓܺܝܪ̈ܶܐ ܠܗܳܠܶܝܢ ܕܳܒܰܪ ܗܘܳܐ ܡܶܛܠ ܕܰܢܨܰܠܽܘܢ ܥܰܡܶܗ. ܡܒܰܙܚܺܝܢ ܗܘܰܘ ܒܶܗ ܡܳܕܶܝܢ ܝܳܒܽܘ̈ܣܳܝܶܐ. ܕܠܳܐ ܠܰܡ ܬܶܥܽܘܠ ܠܗܳܪܟܳܐ. ܥܕܰܡܳܐ ܕܰܡܩܰܛܶܠ ܐܰܢܬ ܥܘܺܝܪ̈ܶܐ ܘܰܚܓܺܝܪ̈ܶܐ ܕܺܐܝܬ ܥܰܡܳܟ. ܗܽܘ ܕܶܝܢ ܕܰܘܝܕ ܟܰܕ ܫܡܰܥ ܗܳܠܶܝܢ ܐܶܡܰܪ: ܟܽܠ ܕܢܶܡܚܶܐ ܠܝܳܒܽܘ̈ܣܳܝܶܐ ܟܽܠ ܠܰܡ ܕܡܶܬܟܰܬܰܫ ܠܗܳܠܶܝܢ ܢܶܩܛܽܘܠ. ܗܰܘ ܕܶܝܢ ܕܩܳܪܶܒ ܒܣܰܟܪܳܐ ܠܰܥܘܺܝܪ̈ܶܐ ܘܠܰܚܓܺܝܪ̈ܶܐ ܣܳܢܶܐ ܢܰܦܫܶܗ ܗܽܘ ܕܕܰܘܝܕ (ܒ ܫܡܘܐܝܠ ܗ: ܘ-ܚ). ܒܗܳܢܳܐ ܩܪܳܒܳܐ ܡܰܙܡܽܘܪܳܐ ܗܳܢܳܐ ܐܶܬܢܰܒܺܝ. ܡܶܛܠ ܕܗܳܫܳܐ ܫܳܡܥܺܝܢܰܢ ܕܳܐܡܰܪ: ܣܺܝܡܘ ܠܶܒܟܽܘܢ ܥܰܠ ܚܰܝܠܳܗ̇ ܘܰܥܩܽܘܪܘ ܣܳܚܪ̈ܳܬܳܗ̇. ܚܢܰܢ ܕܶܝܢ ܒܳܬܰܪ ܗܳܠܶܝܢ ܠܦܽܘܫܳܩܶܗ ܕܶܝܢ ܕܡܰܙܡܽܘܪܳܐ ܗܳܢܳܐ ܢܶܬܩܰܪܰܒ:
ܪܰܒ ܗܽܘ ܡܳܪܰܢ ܘܰܡܫܰܒܰܚ ܪܰܘܪܒܳܐܝ̣ܬ. ܒܰܩܪܺܝܬܶܗ ܕܰܐܠܳܗܰܢ: ܘܰܒܛܽܘܪܶܗ ܩܰܕܺܝܫܳܐ ܘܰܡܫܰܒܚܳܐ. ܠܰܘ ܗܳܢܳܐ ܛܽܘܪܳܐ. ܗܰܘ ܕܪܰܒ ܒܶܗ ܐܰܠܳܗܳܐ. ܘܠܰܘ ܗܳܕܶܐ ܩܪܺܝܬܳܐ ܗܳܝ ܕܒܳܗ̇ ܡܶܫܬܰܒܰܚ ܐܰܠܳܗܳܐܝ̣ܬ. ܐܶܠܳܐ ܡܶܬܪܰܓܫܳܢܳܐܝ̣ܬ ܥܰܠ ܥܺܕܬܳܐ ܗܳܕܶܐ ܕܰܗܘܳܬ ܩܪܺܝܬܳܐ ܠܥܰܡܶܗ ܕܰܐܠܳܗܳܐ ܐܳܡܰܪ. ܡܶܬܝܰܕܥܳܢܳܐܝ̣ܬ ܕܶܝܢ ܥܰܠܗܳܝ ܩܪܺܝܬܳܐ ܕܰܠܥܶܠ ܡܶܢ ܫܡܰܝܳܐ. ܕܩܳܝ̈ܡܳܢ ܒܳܗ̇ ܪ̈ܽܘܚܳܬܳܐ ܕܩܰܕܺܝ̈ܫܶܐ. ܗܳܝ ܕܒܰܢܝܳܐ ܥܰܠ ܛܽܘܪܳܐ ܡܶܣܬܰܟܠܳܢܳܐ ܒܪ̈ܰܘܡܶܐ ܥܶܠܳܝ̈ܐ.
ܚܰܕܽܘܬܳܐ ܒܟܽܠܳܗ̇ ܐܰܪܥܳܐ. ܥܰܠ ܣܒܰܪܬܳܐ ܕܕܶܢܚܰܬ ܡܚܰܕܝܳܢܳܐܝ̣ܬ ܒܟܽܠܶܗ ܥܳܠܡܳܐ ܐܳܡܰܪ ܢܒܺܝܳܐ:
ܛܽܘܪܳܐ ܕܨܶܗܝܽܘܢ ܕܒܰܫܦܽܘ̈ܠܰܝ ܓܰܪܒܝܳܐ. ܩܪܺܝܬܶܗ ܗܺܝ ܕܡܰܠܟܳܐ ܪܰܒܳܐ. ܡܳܢܳܐ ܨܳܒܶܐ ܢܒܺܝܳܐ ܢܺܐܡܰܪ܆ ܛܽܘܪܳܐ ܩܰܕܺܝܫܳܐ ܠܪܰܘܡܳܐ ܗܰܘ ܥܶܠܳܝܳܐ ܩܳܪܶܐ. ܠܗܰܘ ܠܳܐ ܡܶܬܡܰܫܚܳܢܳܐ ܩܳܪܶܐ ܕܒܰܢܝܳܐ ܥܠܰܘܗܝ ܥܺܕܬܳܐ ܕܰܐܠܳܗܳܐ. ܗܳܝ ܕܰܒܓܶܠܝܳܢܶܗ ܕܥܰܡܰܢܽܘܐܝܠ. ܠܰܘ ܩܪܺܝܬܳܐ ܩܪܳܗ̇. ܐܶܠܐ ܡܕܺܝܢ̱ܬܳܐ. ܫܰܦܺܝܪ ܠܰܡ ܢܒܺܝܳܐ ܩܪܺܝܬܳܐ ܩܳܪܶܐ ܠܳܗ̇ ܠܥܺܕܬܳܐ. ܐܰܠܳܗܳܐ ܕܶܝܢ ܡܕܺܝܢ̱ܬܳܐ. ܥܕܰܡܳܐ ܕܶܐܬܓܠܺܝ ܐܰܠܳܗܳܐ ܒܰܒܣܰܪ. ܠܰܝܬ ܗܘܳܐ ܠܳܗ̇ ܫܽܘܪܳܐ ܠܢܰܦܫܳܐ ܥܺܕܬܳܐ. ܐܶܠܐ ܩܪܺܝܬܳܐ ܗܘܳܬ ܕܠܳܐ ܫܽܘܪܳܐ. ܟܰܕ ܕܶܝܢ ܐܶܬܳܐ ܐܰܠܗܳܐ ܠܰܐܪܥܳܐ ܒܰܒܣܰܪ. ܐܰܟܪܶܟ ܠܳܗ̇ ܫܽܘܪܳܐ ܕܦܽܘܪܩܳܢܳܐ. ܠܰܩܪܺܝܬܳܐ ܢܰܦܫܳܐ ܘܥܰܒܕܳܗ̇ ܡܕܺܝܢ̱ܬܳܐ. ܡܶܛܠܗܳܕܶܐ ܡܰܠܶܦ ܗܘܳܐ ܘܳܐܡܰܪ: ܕܠܐ ܡܶܫܟܚܳܐ ܕܬܶܛܫܶܐ ܡܕܺܝܢ̱ܬܳܐ ܕܥܰܠ ܛܽܘܪܳܐ ܒܰܢܝܳܐ (ܡܬܝ ܗ: ܝܕ). ܡܳܕܶܝܢ ܗܰܘ ܕܶܝܢ ܛܽܘܪܳܐ ܕܨܶܗܝܽܘܢ ܕܒܰܫܦܽܘ̈ܠܰܝ ܓܰܪܒܝܳܐ. ܓܰܪܒܝܳܐ ܕܶܝܢ ܐܺܝܬܶܝܗ̇ ܪܽܘܚܳܐ ܒܺܝܫܬܳܐ ܕܰܠܩܽܘܒܠܳܐ. ܕܰܡܟܰܢܶܝܢ ܠܳܗ̇ ܟܬܳܒ̈ܐ ܩܰܕܺܝ̈ܫܶܐ. ܡܶܛܠܗܳܝ ܕܡܶܬܩܰܫܝܳܐ ܒܡܰܫ̈ܒܶܝܗ̇ ܘܒܳܛܢܳܐ ܡܶܛܪܳܐ ܗܰܘ ܕܰܠܩܽܘܒܠܳܐ. ܘܡܰܬܪܳܐ ܦܺܐܪ̈ܶܐ ܕܺܐܝܠܳܢ̈ܐ. ܘܡܰܚܡܳܐ ܛܰܪ̈ܦܶܐ ܕܓܽܘ̈ܦܢܶܐ. ܘܺܐܝܬܶܝܗ̇ ܡܥܰܘܟܳܢܺܝܬܳܐ ܕܙܰܪ̈ܥܶܐ. ܘܰܡܣܰܓܦܳܢܺܝܬܳܐ ܕܰܐܟܳܪ̈ܶܐ. ܠܗܳܕܶܐ ܕܳܡܝܳܐ ܪܽܘܚܳܐ ܒܺܝܫܬܳܐ ܕܳܐܟܶܠܩܰܪܨܳܐ܆ ܕܟܰܕ ܡܶܬܩܰܫܝܳܐ ܕܠܳܐ ܢܳܡܽܘܣ ܠܽܘܩܒܰܠ ܐܰܟܳܪ̈ܶܐ ܕܙܰܕܺܝܩܽܘܬܳܐ. ܘܰܡܒܰܛܠܳܐ ܠܗܽܘܢ ܡܶܢ ܦܽܘܠܚܳܢܳܐ ܕܰܡܝܰܬܪܽܘܬܳܐ. ܘܒܳܛܢܳܐ ܡܶܛܪ̈ܶܐ ܕܽܐܘ̈ܠܨܳܢܶܐ. ܒܰܥܢܴ̈ܢܶܐ ܐܶܪ̈ܺܝܛܺܝܩܳܝܳܬܳܐ. ܘܥܳܒܕܳܐ ܕܢܶܡܠܽܘܢ ܢܰܗܪ̈ܰܘܳܬܳܐ ܒܺܝܫܬܳܐ. ܒܰܫܦܽܘ̈ܠܰܝ ܗܳܕܶܐ ܓܰܪܒܝܳܐ ܡܶܬܝܰܕܥܳܢܺܝܬܳܐ. ܣܺܝܡ ܗܰܘ ܛܽܘܪܳܐ ܡܶܣܬܰܟܠܳܢܳܐ ܕܨܶܗܝܽܘܢ. ܒܰܬܚܽܘܡܳܐ ܗܳܟܺܝܠ ܕܗܳܕܶܐ ܪܽܘܚܳܐ ܗܳܝ ܒܺܝܫܬܳܐ ܕܰܠܩܽܘܒܠܳܐ. ܣܺܝܡܳܐ ܥܺܕܬܳܐ ܩܰܕܺܝܫܬܳܐ. ܗܳܝ ܕܠܰܘ ܡܶܢ ܪܽܘܚܳܐ ܗܳܕܶܐ ܡܶܬܢܰܫܒܳܐ. ܐܶܠܐ ܠܽܘܩܒܰܠ ܗܳܕܶܐ ܩܳܝܡܳܐ. ܘܬܳܟܣܳܐ ܠܡܰܫ̈ܒܶܝܗ̇ ܥܰܙܺܝ̈ܙܶܐ ܘܰܩܫܱ̈ܝܳܐ. ܟܰܕ ܢܳܫܒܳܐ ܒܳܗ̇ ܘܡܰܢܗܪܳܐ ܠܰܥܢܴ̈ܢܶܐ ܕܰܒܓܰܘܳܗ̇ ܪܽܘܚܳܐ ܬܰܝܡܢܳܝܬܳܐ ܘܢܰܗܺܝܪܬܳܐ܆ ܗܳܝ ܕܫܰܚܺܝܢܳܐ ܘܢܰܗܺܝܪܬܳܐ ܟܽܠܳܗ̇. ܗܳܝ ܕܰܒܝܰܕ ܫܠܶܝܡܽܘܢ ܝܳܠܦܺܝܢܰܢ ܥܠܶܝܗ̇. ܠܬܰܪܬܶܝܢ ܪ̈ܽܘܚܶܐ ܗܳܠܶܝܢ ܕܰܠܩܽܘܒܠܳܐ ܡܰܢ ܕܰܚ̈ܕܳܕܶܐ ܣܳܡ ܐܶܢܶܝܢ. ܘܟܰܕ ܠܥܺܕܬܳܐ ܟܰܠܬܳܐ ܨܳܐܰܪ ܗܘܳܐ ܘܰܡܚܰܘܶܐ. ܕܙܳܟܝܳܐ ܠܰܚܕܳܐ ܘܛܳܪܕܳܐ ܡܶܢ ܠܘܳܬܳܗ̇ ܕܠܳܐ ܬܰܐܟܶܐ ܘܰܬܚܰܒܶܠ ܢܶܨܒܴ̈ܬܳܗ̇. ܘܩܳܪܝܳܐ ܠܰܐܚܪܺܬܳܐ ܕܬܺܐܬܶܐ ܘܬܰܐܫܶܒ ܒܓܰܢܬܳܗ̇. ܐܳܡܪܳܐ ܗܘܺܝܬ ܗܳܟܰܢܳܐ܆ ܐܶܬܬܥܺܝܪܝ ܓܰܪܒܝܳܐ ܘܬܳܝ ܬܰܝܡܢܳܐ. ܫܰܒܝ ܒܓܰܢܰܝ̈ ܘܢܶܪܕܽܘܢ ܒܶܣܡܴ̈ܢܝ ܘܢܺܐܬܶܐ ܕܳܕܝ ܠܓܰܢܬܶܗ. ܘܢܶܐܟܽܘܠ ܡܶܢ ܦܺܐܪ̈ܶܐ ܕܶܐܒܒܳܢܰܘ̈ܗܝ (ܬܫܒ̈ܚܬ ܬܫܒ̈ܚܬܐ ܕ: ܝܘ). ܡܶܛܠܗܳܕܶܐ ܣܺܝܡ ܛܽܘܪܳܐ ܕܨܶܗܝܽܘܢ ܕܒܰܫܦܽܘ̈ܠܰܝ ܓܰܪܒܝܳܐ. ܕܰܐܝܠܶܝܢ ܕܩܳܝܡܺܝܢ ܒܶܗ ܘܰܡܣܰܒܪܺܝܢ ܒܡܳܪܝܳܐ. ܢܶܩܥܽܘܢ ܒܓܰܪܒܝܳܐ ܕܠܳܐ ܬܰܐܫܶܒ. ܡܶܛܠ ܕܺܐܝܬܶܝܗ̇ ܡܚܰܒܠܳܢܺܝܬܳܐ ܕܦܺܐܪ̈ܶܐ ܕܩܰܕܺܝܫܽܘܬܳܐ. ܘܢܶܩܪܽܘܢ ܠܬܰܝܡܢܳܐ ܘܬܺܐܬܶܐ ܘܬܰܐܫܶܒܝ ܒܓܰܢܰܝ̈ܗܽܘܢ ܕܙܰܪܥܳܐ ܕܢܰܟܦܽܘܬܳܐ ܐܺܝܬܶܝܗ̇. ܘܰܡܫܰܝܢܳܐ ܠܳܗ̇ ܠܰܩܪܺܝܬܶܗ ܕܰܐܠܳܗܰܢ. ܪܽܘܚܳܐ ܗܳܕܶܐ. ܐܶܡܰܪ ܓܶܝܪ ܢܒܺܝܳܐ ܥܠܶܝܗ̇ ܩܪܺܝܬܶܗ ܗܺܝ ܕܡܰܠܟܳܐ ܪܰܒܳܐ܆
ܐܰܠܳܗܳܐ ܒܣܳܚܪ̈ܳܬܳܗ̇ ܡܰܘܕܰܥ ܥܽܘܫܢܶܗ. ܡܳܢܳܐ ܐܺܝܬܰܝܗܶܝܢ ܣܳܚܪ̈ܳܬܳܐ ܕܥܺܕܬܳܐ. ܕܰܝܪ̈ܳܬܳܐ ܩܰܕܺܝ̈ܫܳܬܳܐ ܕܡܶܬܦܰܠܚܳܐ ܒܗܶܝܢ ܙܰܕܺܝܩܽܘܬܳܐ. ܘܒܳܬܰܪ ܗܳܠܶܝܢ ܡܳܢܳܐ ܨܳܒܶܐ ܢܒܺܝܳܐ ܕܢܺܐܡܰܪ:
ܕܗܳܐ ܡܰܠܟ̈ܐ ܐܶܬܛܰܝܰܒܘ ܘܰܥܒܰܪܘ ܐܰܟܚܕܳܐ: ܘܗܶܢܽܘܢ ܚܙܰܘ ܘܰܬܡܰܗܘ ܘܙܳܥܘ. ܘܰܪܬܺܝܬܳܐ ܐܶܚܕܰܬ ܐܶܢܽܘܢ. ܘܚܶܒ̈ܠܶܐ ܐܰܝܟ ܕܝܳܠܶܕܬܳܐ. ܘܰܒܛܳܥܝܽܘܬܳܐ ܕܡܰܠܟ̈ܐ ܡܫܰܘܕܥܳܐ. ܥܰܠ ܩܛܺܝܪܳܐ ܕܰܐܩܺܝܡܘ ܥܰܠ ܥܺܕܬܳܐ ܒܙܰܒܢܰܝ̈ܗܽܘܢ. ܕܟܽܠ ܡܰܠܟܳܐ ܕܠܳܐ ܫܳܠܶܡ ܠܰܫܪܳܪܳܗ̇ ܕܥܺܕܬܳܐ ܪ̈ܕܽܘܦܝܶܐ ܘܒܺܝ̈ܫܳܬܳܐ ܐܰܩܺܝܡ ܥܠܶܝܗ̇. ܐܶܠܐ ܠܰܡ ܟܽܠܗܽܘܢ ܥܒܰܪܘ. ܘܗܺܝ ܕܶܝܢ ܩܰܘܝܰܬ ܟܰܕ ܡܩܰܒܰܥ ܒܶܢܝܳܢܳܗ̇ ܘܰܡܫܰܪܰܪ ܘܡܶܬܬܪܺܝܡ ܘܡܶܬܥܰܠܶܐ ܠܰܫܡܰܝܳܐ. ܘܰܒܟܽܠܙܒܰܢ ܡܙܺܝܥܳܐ ܠܰܒܥܶܠܕ̈ܒܳܒܶܝܗ̇ ܒܪܰܒܽܘܬܳܐ ܕܒܶܢܝܳܢܳܗ̇. ܡܶܛܠ ܗܳܕܶܐ ܙܳܥܘ ܘܰܬܡܰܗܘ ܡܰܠܟ̈ܐ ܕܰܐܪܥܳܐ ܕܰܚܙܰܘ ܪܰܒܽܘܬܳܗ̇. ܘܚܶܒ̈ܠܶܐ ܕܝܳܠܶܕܬܳܐ ܐܶܚܰܕ ܐܶܢܽܘܢ ܘܟܰܕ ܓܳܙܡܺܝܢ ܥܠܶܝܗ̇ ܡܺܝܬܘ ܘܶܐܬܚܰܒܰܠܘ. ܗܺܝ ܕܶܝܢ ܠܥܽܘܫܢܳܐ ܕܡܰܠܟ̈ܘܳܬܳܐ ܫܳܛܰܬ ܒܰܡܚܺܝܠܽܘܬܳܐ. ܘܩܰܦܚܰܬ ܠܪܳܡܽܘܬܳܐ ܕܫܰܠܺܝܛܳܢ̈ܐ ܒܡܽܘܟܳܟܳܐ. ܘܬܰܒܪܰܬ ܐܶܠܦ̈ܐ ܕܰܚܛܺܝܬܳܐ ܒܪܽܘܚܳܐ ܒܰܣܺܝܡܬܳܐ ܕܢܶܫܒܰܬ ܠܳܗ̇ ܡܶܢ ܡܽܘܟܳܟܶܗ ܕܰܨܠܺܝܒܳܐ. ܐܰܝܟܰܢܳܐ ܕܶܐܡܰܪ ܢܒܺܝܳܐ.
ܒܪܽܘܚܳܐ ܥܰܫܺܝܢܬܳܐ ܢܶܬܬܰܒܪ̈ܳܢ ܐܶܠܦ̈ܐ ܕܬܰܪܫܺܝܫ. ܬܰܪܫܺܝܫ ܕܶܝܢ ܗܳܪܟܳܐ ܠܰܚܛܺܝܬܳܐ ܩܳܪܶܐ. ܐܶܠܦ̈ܐ ܠܡܽܘܟ̈ܠܐ ܡܫܰܡܰܗ. ܕܰܐܝܟ ܐܰܝܟܰܢܳܐ ܐܳܡܰܪ ܐܢܳܐ. ܚܙܰܝܬ ܕܶܝܢ ܠܰܦܬܰܟܪܽܘܬܳܐ ܗܳܢܰܘ ܐܶܠܦܳܐ ܕܰܚܛܺܝܬܳܐ. ܐܶܪܺܝܛܺܝܩܳܝܽܘܬܳܐ܆ ܘܝܽܘܕܳܝܽܘܬܳܐ. ܘܬܽܘܒ ܛܽܘܥܝܰܝ. ܗܳܠܶܝܢ ܐܶܢܶܝܢ ܐܶܠܦ̈ܐ ܕܥܰܬܕܰܬ ܒܗܶܝܢ ܚܛܺܝܬܳܐ ܡܰܘܬܳܐ. ܘܣܶܚܦܰܬ ܠܗܶܝܢ ܠܗܳܠܶܝܢ ܐܶܠܦ̈ܐ ܕܰܚܛܺܝܬܳܐ. ܪܽܘܚܳܐ ܗܳܝ ܥܰܫܺܝܢܬܳܐ ܕܢܶܫܒܰܬ ܒܥܶܠܺܝܬܳܐ ܥܰܠ ܬܰܠܡܺܝ̈ܕܶܐ. ܗܳܝ ܕܢܶܚܬܰܬ ܡܶܢ ܐܰܬܪ̈ܰܘܳܬܳܐ ܥܶܠܳܝ̈ܐ ܒܠܶܫܳܢ̈ܐ ܕܢܽܘܪܳܐ . ܘܰܫܪܳܬ ܥܰܠ ܬܰܠܡܺܝ̈ܕܶܐ ܘܝܶܗܒܳܬ ܩܳܠܐ ܟܰܕ ܢܳܚܬܳܐ ܐܰܝܟ ܩܳܠܐ ܕܪܽܘܚܳܐ ܥܰܙܺܝܙܬܳܐ. ܘܗܳܕܶܐ ܟܰܕ ܐܶܬܩܰܒܠܰܬ ܘܰܫܪܳܬ ܥܰܠ ܕܒܶܝܬ ܦܶܛܪܽܘܣ. ܘܬܽܘܒܳܪܳܐ ܕܶܐܠܦ̈ܐ ܕܰܚܛܺܝܬܳܐ ܥܶܒܕܰܬ. ܘܡܶܟܺܝܠ ܗܽܘ ܢܒܺܝܳܐ. ܗܰܘ ܕܰܫܡܰܥ ܡܶܢ ܐܰܒܳܐ ܥܰܠ ܗܳܠܶܝܢ܆ ܡܶܫܬܰܘܕܶܐ ܥܰܠ ܓܡܺܝܪܽܘܬܶܗ ܕܣܽܘܥܪܳܢܳܐ ܘܳܐܡܰܪ:
ܐܰܝܟ ܕܰܫܡܰܥܢ ܗܳܟܰܢ ܚܙܰܝܢ: ܒܰܩܪܺܝܬܶܗ ܕܡܳܪܝܳܐ ܚܰܝܠܬܳܢܳܐ: ܒܰܩܪܺܝܬܶܗ ܕܰܐܠܳܗܰܢ. ܠܐ ܓܶܝܪ ܡܶܙܕܰܟܝܳܐ ܚܛܺܝܬܳܐ. ܠܒܰܪ ܡܶܢ ܚܰܝܠܳܐ ܕܪܽܘܚܳܐ ܩܰܕܺܝܫܳܐ. ܗܰܘ ܕܰܡܕܰܒܰܪ ܠܳܗ̇ ܠܥܺܕܬܳܐ. ܘܡܶܛܠ ܗܳܕܶܐ ܒܥܺܕܬܶܗ ܕܡܳܪܝܳܐ ܚܰܝܠܬܳܢܳܐ ܘܰܒܥܺܕܬܶܗ ܕܰܐܠܳܗܳܐ. ܗܘܳܐ ܚܽܘܝܳܒܳܐ ܕܗܳܠܶܝܢ ܐܶܠܦ̈ܐ ܕܰܚܛܺܝܬܳܐ. ܘܟܰܕ ܕܶܝܢ ܠܗܳܠܶܝܢ ܡܬܰܒܰܪ ܙܩܺܝܦܳܐ. ܥܰܠ ܥܺܕܬܳܐ ܡܶܬܦܢܶܐ ܘܒܳܢܶܐ ܘܡܰܬܩܶܢ ܠܳܗ̇. ܘܰܡܫܰܝܶܢ ܥܠܶܝܗ̇ ܩܳܠܰܘ̈ܗܝ ܕܝܰܡܳܐ. ܘܥܳܒܶܕ ܠܳܗ̇ ܓܶܠܝܳܢܳܐ ܥܰܬܺܝܪܳܐܝܬ ܒܢܰܘܚܳܐ.
ܐܰܠܳܗܳܐ ܢܰܬܩܢܶܝܗ̇ ܥܕܰܡܳܐ ܠܥܳܠܰܡ. ܣܰܒܰܪܢ ܐܰܠܗܳܐ ܠܛܰܝܒܽܘܬܳܟ ܒܓܰܘܶܗ ܕܗܰܝܟܠܳܟ. ܚܙܰܝܬ ܕܥܰܠ ܥܺܕܬܳܐ ܐܳܡܰܪ ܗܘܳܐ ܢܒܺܝܳܐ. ܗܳܫܳܐ ܥܳܒܰܪ ܠܶܗ ܡܶܢ ܗܳܝ ܕܰܩܪܺܝܬܳܐ ܢܺܐܡܰܪ: ܘܗܰܝܟܠܳܐ ܥܳܒܶܕ ܠܳܗ̇ ܒܡܶܠܬܶܗ. ܘܡܶܫܬܰܘܕܶܐ ܕܰܡܣܰܒܰܪ ܠܛܰܝܒܽܘܬܶܗ ܒܓܰܘ ܗܰܝܟܠܳܐ. ܠܰܘ ܡܳܕܶܝܢ ܕܰܢܒܺܝܳܐ ܐܺܝܬܰܘܗܝ ܩܳܠܐ ܗܳܢܳܐ. ܐܶܠܐ ܕܰܫܠܺܝ̈ܚܶܐ. ܢܒܺܝ̈ܐ ܟܳܪ̈ܽܘܙܶܐ ܗܘܰܘ ܠܡܶܠܬܳܐ. ܫܠܺܝ̈ܚܶܐ ܡܣܰܒܪ̈ܳܢܶܐ. ܢܒܺܝ̈ܐ ܓܶܝܪ ܟܺܐܢܽܘܬܳܐ ܡܰܠܶܠܘ ܠܥܰܡܳܐ. ܫܠܺܝ̈ܚܶܐ ܕܶܝܢ ܛܰܝܒܽܘܬܳܐ ܘܪ̈ܰܚܡܶܐ ܣܰܒܰܪܘ. ܘܒܳܬܰܪ ܗܳܠܶܝܢ ܡܰܝܬܶܐ ܢܒܺܝܳܐ ܘܳܐܡܰܪ:
ܐܰܝܟ ܫܡܳܟ ܐܰܠܳܗܳܐ ܗܳܟܰܢ ܬܶܫܒ̈ܚܳܬܳܟ. ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ ܙܰܕܺܝܩܽܘܬܳܐ ܡܰܠܝܳܐ ܝܰܡܺܝܢܳܟ. ܬܶܗܪܳܐ ܐܶܬܚܙܺܝ ܠܶܗ ܟܰܕ ܚܙܳܐ ܒܓܶܠܝܳܢܳܐ ܣܰܓܺܝܐܘܬ ܬܶܫܒܽܘܚܬܳܗ̇ ܕܥܺܕܬܳܐ. ܘܰܠܪ̈ܶܒܘܳܬܳܐ ܕܥܰܡ̈ܡܶܐ ܡܗܰܝ̈ܡܢܶܐ ܕܟܳܢܶܫ ܨܠܺܝܒܳܐ. ܕܕܰܐܠܳܗܳܐ ܐܺܝܬܰܘܗܝ ܥܒܳܕܳܐ. ܠܚܰܕ ܥܰܡܳܐ ܕܝܳܬܶܒ ܒܓܽܘܢܝܳܗ̇ ܕܰܐܪܥܳܐ. ܐܰܝܟ ܕܒܺܐܝ̈ܕܰܝ ܡܽܘܫܶܐ ܘܰܢܒܺܝ̈ܐ. ܐܶܠܐ ܠܟܽܠܗܽܘܢ ܥܰܡ̈ܡܶܐ ܠܟܽܠ ܕܰܨܒܳܐ ܕܢܰܚܶܐ ܗܘܳܐ ܦܽܘܪܩܳܢܳܐ. ܒܗܳܝ ܕܰܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ ܡܰܠܝܳܐ ܝܰܡܺܝܢܳܟ. ܙܰܕܺܝܩܽܘܬܳܐ ܠܟܽܠܢܳܫ ܩܪܰܝܬ ܨܶܝܕ ܚܰܝ̈ܐ. ܡܶܛܠܗܳܢܳܐ ܐܳܡܰܪ:
ܢܶܚܕܶܐ ܛܽܘܪܳܐ ܕܨܶܗܝܽܘܢ ܘܰܢܕܽܘ̈ܨܳܢ ܒܢܴ̈ܬ ܝ̣ܗܽܘܕܳܐ. ܡܶܛܠ ܕܺܝ̈ܢܰܝܟ ܡܳܪܝܳܐ. ܡܰܢܽܘ ܛܽܘܪܳܐ ܕܨܶܗܝܽܘܢ. ܠܗܰܘ ܫܽܘܥܳܐ ܕܒܰܢܝܳܐ ܥܠܰܘܗܝ ܥܺܕܬܳܐ. ܡܫܰܡܰܗ ܛܽܘܪܳܐ. ܒܢܴ̈ܬ ܝ̣ܗܽܘܕܳܐ ܕܶܝܢ ܠܢܰܦ̈ܫܳܬܳܐ ܕܩܰܕܺܝ̈ܫܶܐ ܩܳܪܶܐ. ܚܳܕ̈ܝܳܢ ܘܕܳܝ̈ܨܳܢ ܕܶܝܢ ܢܰܦ̈ܫܳܬܳܐ ܕܩܰܕܺܝ̈ܫܶܐ ܡܳܐ ܕܚܳܙ̈ܝܳܢ ܟܰܗܺܝܢܽܘܬܳܐ ܕܥܺܕܬܳܐ. ܘܡܶܕܶܡ ܐ̱ܚܪܺܢܳܐ ܒܳܥܶܐ ܕܢܰܘܕܰܥ ܠܰܢ ܢܒܺܝܳܐ ܒܰܫܡܳܐ ܕܨܶܗܝܽܘܢ. ܗܳܝ ܕܣܰܓܺܝ ܐܰܘܪܒܳܗ̇. ܥܕܰܡܳܐ ܠܗܳܫܳܐ ܓܶܝܪ. ܡܒܰܢܶܐ ܗܘܳܐ ܠܳܗ̇. ܗܳܫܳܐ ܕܶܝܢ ܥܰܠ ܥܩܽܘܪܝܳܐ ܕܣܳܚܪ̈ܳܬܳܗ̇ ܡܚܰܦܶܛ.
ܐܶܬܟܰܪܟܽܘܗ̇ ܠܨܶܗܝܽܘܢ ܘܚܽܘܕܪܽܘܗ̇ ܘܰܡܢܰܘ ܡܰܓܕ̈ܠܶܝܗ̇. ܣܺܝܡܘ ܠܶܒܟܽܘܢ ܥܰܠ ܚܰܝܠܳܗ̇ ܘܰܥܩܽܘܪܘ ܣܳܚܪ̈ܳܬܳܗ̇. ܕܳܡܝܳܐ ܗܳܕܶܐ ܕܠܰܘ ܥܰܠ ܥܺܕܬܳܐ ܐܶܡܰܪ ܒܢܴ̈ܬ ܩܴ̈ܠܐ ܗܳܠܶܝܢ. ܐܶܠܐ ܥܰܠ ܐܽܘܪܺܫܠܶܡ. ܕܥܰܬܕܰܬ ܙܩܺܝܦܳܐ ܠܡܳܪܳܗ̇ ܕܬܶܫܒܽܘܚܬܳܐ. ܘܺܐܝܬܶܝܗ̇ ܗܳܕܶܐ. ܗܳܝ ܕܶܐܡܰܪ ܗܽܘ ܥܰܡܰܢܽܘܐܝܠ ܠܬܰܠܡܺܝ̈ܕܰܘܗܝ ܡܶܛܠ ܗܰܝܟܠܳܐ ܕܝܽܘ̈ܕܳܝܶܐ. ܕܰܐܡܺܝܢ ܐܳܡܰܪ ܐܢܳܐ ܠܟܽܘܢ. ܕܠܳܐ ܬܶܫܬܒܶܩ ܗܳܪܟܳܐ ܟܺܐܦ ܥܰܠ ܟܺܐܦ ܕܠܳܐ ܬܶܣܬܬܪ (ܡܬܝ ܟܕ: ܒ ܡܪܩܘܣ ܝܓ: ܒ ܠܘܩܐ ܟܐ: ܘ). ܐܰܝܠܶܝܢ ܐܶܢܶܝܢ ܣܳܚܪ̈ܳܬܳܐ ܕܨܶܗܝܽܘܢ ܨܳܠܽܘܒܬܳܐ ܟܢܽܘ̈ܫܳܬܳܐ ܕܪ̈ܰܒܰܝ ܟܳܗܢ̈ܐ ܕܝܽܘ̈ܕܳܝܶܐ ܘܰܕܣܳܦܪ̈ܶܐ. ܕܺܐܝܬ ܗܘܳܐ ܠܳܗ̇ ܒܩܽܘܪ̈ܝܳܐ ܘܰܒܟܰܦܪ̈ܽܘܢܶܐ. ܘܰܕܗܰܘ ܕܰܦܩܰܕ ܥܰܠ ܗܳܠܶܝܢ ܐܰܠܳܗܰܐ ܗ̄ܘ.
ܕܬܶܫܬܰܥܽܘܢ ܠܕܳܪܳܐ ܐ̱ܚܪܳܝܳܐ. ܕܗܳܢܰܘ ܐܰܠܳܗܳܐ ܐܰܠܳܗܰܢ ܠܥܳܠܰܡ ܘܰܠܥܳܠܰܡ ܥܳܠܡܺܝܢ ܗܽܘ ܢܕܰܒܪܰܢ ܠܥܶܠ ܡܶܢ ܡܰܘܬܳܐ. ܫܰܦܺܝܪ ܐܶܡܰܪ ܢܒܺܝܳܐ ܥܰܠ ܗܰܘ ܕܶܐܡܰܪ܆ ܕܡܶܬܥܩܰܪ ܗܰܝܟܠܳܐ ܕܝܽܘ̈ܕܳܝܶܐ ܕܰܐܠܳܗܰܐ ܗ̄ܘ. ܘܰܕܗܽܘ ܡܕܰܒܰܪ ܠܳܗ̇ ܠܥܺܕܬܳܐ ܠܥܶܠ ܡܶܢ ܡܰܘܬܳܐ. ܡܶܛܠ ܕܗܽܘ ܢܚܶܬ ܕܳܫ ܥܰܠ ܨܰܘܪܶܗ ܕܡܰܘܬܳܐ. ܒܚܰܝ̈ܐ ܕܠܳܐ ܐܶܫܬܰܠܰܛ ܥܠܰܝܗܽܘܢ. ܚܒܳܠܳܐ ܕܠܶܗ ܗܽܘ ܢܰܘܕܶܐ ܘܢܶܣܓܽܘܕ. ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܐܰܡܺܝܢ܀
ܡܙܡܘܪܐ ܕܐܪܒܥܝܢ ܘܬܫܥܐ
ܕܡܰܘܕܰܥ ܕܠܰܝܬ ܡܶܕܶܡ ܥܽܘܬܪܳܐ ܡܶܬܚܰܙܝܳܢܳܐ ܕܡܶܬܠܰܘܶܐ ܠܶܗ ܠܒܰܪܢܳܫܳܐ ܒܡܰܦܩܳܢܶܗ ܕܡܶܢ ܥܳܠܡܳܐ ܗܳܢܳܐ: ܘܥܰܠ ܣܰܟܠܽܘܬܳܐ ܕܒܰܪܢܳܫܳܐ ܩܰܕܡܳܝܳܐ ܕܰܐܚܬܰܬܶܗ ܡܶܢ ܚܰܝ̈ܐ ܡܰܠܐܱܟܳܝ̈ܐ ܠܚܰܝܷ̈ܐ ܒܠܺܝ̈ܠܐ ܕܚܰܝ̈ܘܳܬܐ ܕܠܳܐ ܡܶܠܬܳܐ.
ܡܰܠܦܳܢܽܘܬܳܐ ܗܳܝ ܕܡܰܠܝܳܐ ܡܰܪܬܝܳܢܽܘܬܳܐ ܘܩܳܪܝܳܐ ܠܳܗ̇ ܠܢܰܦܫܳܐ ܠܘܳܬ ܒܽܘܝܳܢܳܐ ܐܰܠܳܗܳܝܳܐ. ܡܩܰܪܶܒ ܛܽܘܒܳܢܳܐ ܕܰܘܺܝܕ ܫܰܘܝܳܐܝ̣ܬ ܠܟܽܠܶܗ ܥܳܠܡܳܐ. ܒܬܶܫܒܽܘܚܬܳܐ ܗܳܕܶܐ ܕܰܐܪܒܥܺܝܢ ܘܰܬܫܰܥ܆ ܘܗܳܪܟܳܐ ܠܰܘ ܐܰܝܟ ܕܰܒܗܳܠܶܝܢ ܡܰܙܡܽܘܪ̈ܶܐ ܐܚܪ̈ܳܢܶܐ. ܕܰܡܚܰܘܶܐ ܒܗܽܘܢ ܒܛܺܝܠܽܘܬܳܐ ܕܥܰܠ ܚܰܕ ܥܰܡܳܐ. ܘܠܰܘ ܐܰܝܟ ܗܳܝ ܕܰܦܪܽܘܩ ܠܥܰܡܳܟ ܘܒܰܪܶܟ ܠܝܳܪܬܽܘܬܳܟ܆ ܕܡܶܣܬܰܒܪܳܐ ܥܰܠ ܝ̣ܣܪܳܐܝ̣ܠ. ܒܰܠܚܽܘܕ ܡܚܰܘܶܐ ܐܽܘܟܦܳܢܳܗ̇. ܐܶܠܐ ܡܰܪܬܝܳܢܽܘܬܳܐ ܡܰܠܝܰܬ ܝܽܘܬܪ̈ܳܢܶܐ ܠܟܽܠܗܽܘܢ ܥܰܡ̈ܡܶܐ ܡܰܘܫܶܛ. ܟܰܕ ܩܳܪܶܐ ܠܗܽܘܢ ܠܡܶܫܡܰܥ ܡܰܠܦܳܢܽܘܬܶܗ. ܘܩܳܪܶܐ ܒܳܗ̇ ܠܥܰܬܺܝܪ̈ܶܐ ܘܰܠܡܶܣܟܺܢ̈ܐ ܘܰܠܪܰܘܪ̈ܒܶܐ ܘܠܰܙܥܽܘܪ̈ܶܐ܆ ܠܚܰܟܺܝ̈ܡܶܐ ܘܰܠܣܰܟ̈ܠܶܐ܆ ܠܡܰܠܟ̈ܐ ܘܡܳܟ̈ܐ. ܩܳܪܶܐ ܘܰܡܟܰܢܶܫ ܨܶܝܕ ܒܺܐܡܰܐ ܕܝܽܘܠܦܳܢܶܗ ܐܰܠܳܗܳܝܳܐ. ܟܰܕ ܡܙܰܡܰܪ ܘܳܐܡܰܪ:
ܫܡܰܥܘ ܗܳܕܶܐ ܟܽܠܟܽܘܢ ܥܰܡ̈ܡܶܐ. ܘܨܽܘܬܘ ܟܽܠ ܝܳܬܒܰܝ̈ ܐܰܪܥܳܐ: ܒܢܰܝ̈ ܐܰܪܥܳܐ ܘܰܒܢܰܝ̈ܢܳܫܳܐ. ܐܰܟܚܕܳܐ ܥܰܬܺܝܪ̈ܶܐ ܘܡܶܣܟܺܢ̈ܐ. ܟܽܠܢܳܫ ܠܰܡ ܢܶܫܡܰܥ ܘܟܽܠܢܳܫ ܢܶܬܶܠ ܐܶܕܢܶܗ ܠܨܰܘܬܳܐ ܕܦܶܬܓܳܡܰܝ̈. ܢܶܫܡܥܽܘܢ ܠܰܡ ܗܳܢܳܐ ܡܶܕܶܡ ܕܳܐܡܰܪ ܐܢܳܐ. ܟܽܠܗܽܘܢ ܥܰܡ̈ܡܶܐ ܘܠܶܫܳܢ̈ܐ. ܚܰܟܺܝ̈ܡܶܐ ܘܣܰܟ̈ܠܶܐ. ܝܰܘܢܳܝ̈ܐ ܘܒܰܪܒܪ̈ܳܝܶܐ. ܠܳܐ ܠܰܡ ܨܳܒܶܐ ܐܢܳܐ ܕܚܰܕ ܥܰܡܳܐ ܒܰܠܚܽܘܕ ܢܶܗܘܶܐ ܠܺܝ ܫܳܡܽܘܥܳܐ. ܠܰܝܬ ܚܣܳܡܳܐ ܡܰܘܗܰܒܬܶܗ ܕܪܽܘܚܳܐ ܟܽܠܢܳܫ ܢܺܐܠܰܦ ܘܟܽܠܢܳܫ ܢܶܬܒܰܝܰܐ. ܢܶܨܠܽܘܢ ܐܶܕܢܰܝ̈ܗܽܘܢ ܠܡܶܕܶܡ ܕܳܐܡܰܪ ܐܢܳܐ. ܡܰܠܟ̈ܐ ܕܰܐܪܥܳܐ ܘܫܰܠܺܝܛܳܢ̈ܐ ܕܬܺܒܶܝܠ. ܢܶܬܠܽܘܢ ܠܺܝ ܨܰܘܬܳܐ ܒܫܶܡܥܳܐ ܡܰܘܬܪܳܢܳܐ. ܡܳܪ̈ܰܘܳܬܳܐ ܕܟܰܪ̈ܟܶܐ ܕܰܐܪܥܳܐ ܘܥܰܬܺܝܪ̈ܶܐ ܡܰܢ ܢܶܒܣܪܽܘܢ ܥܰܠ ܥܽܘܬܪܳܐ. ܘܢܰܒܣܽܘܢ ܥܰܠ ܩܶܢܝܳܢ̈ܐ ܘܢܶܗܘܽܘܢ ܡܩܰܒܠܳܢ̈ܐ ܠܚܶܟܡܬܳܐ ܗܳܕܶܐ ܕܰܡܡܰܠܶܠ ܪܽܘܚܳܐ:
ܦܽܘܡܝ ܢܡܰܠܶܠ ܚܶܟܡܬܳܐ. ܘܪܶܢܝܶܗ ܕܠܶܒܝ ܣܽܘܟܳܠܳܐ܆ ܐܶܨܠܶܐ ܐܶܕܢܰܝ̈ ܠܡܱ̈ܬܠܶܐ. ܘܶܐܡܰܠܶܠ ܒܟܶܢܳܪܳܐ ܐܽܘܚ̈ܕܳܬܝ. ܙܳܕܶܩ ܓܶܝܪ ܕܳܐܦ ܚܢܰܢ ܢܶܗܘܶܐ ܫܳܡܽܘ̈ܥܶܐ ܠܡܶܕܶܡ ܕܳܐܡܰܪ ܢܒܺܝܳܐ. ܠܳܐ ܗܘܳܐ ܓܶܝܪ ܡܰܡܠܠܳܐ ܕܰܥܝܳܕܳܐ ܐܳܡܰܪ ܕܢܰܗܡܶܐ. ܡܶܫܬܰܘܕܶܐ ܬܽܘܒ ܚܶܟܡܬܳܐ ܘܣܽܘܟܳܠܳܐ܆ ܘܡܱ̈ܬܠܶܐ ܘܽܐܘܚ̈ܕܳܬܳܐ. ܡܶܛܠ ܕܗܽܘ ܢܒܺܝܳܐ ܚܶܟܡܬܳܐ ܘܡܱ̈ܬܠܶܐ ܩܳܪܶܐ ܠܗܶܝܢ ܠܡܶܠܰܘ̈ܗܝ ܕܰܒܗܳܕܶܐ ܬܶܫܒܽܘܚܬܳܐ. ܗܳܕܶܐ ܕܶܝܢ ܐܶܢܳܐ ܣܳܒܰܪ ܐܢܳܐ ܕܠܽܘܩܒܰܠ ܚܬܺܝܪܽܘܬܳܐ ܘܫܰܒܰܗܪܳܢܽܘܬܳܐ ܕܥܰܡ̈ܡܶܐ ܐܳܦ ܪܶܚܡܰܬ ܚܶܟܡܬܳܐ ܐܶܡܰܪ. ܘܥܰܠܗܳܝ ܣܳܒܰܪ ܐܢܳܐ. ܕܰܒܬܰܚܘ̈ܝܳܬܳܐ ܐܰܝܠܶܝܢ ܕܠܳܐ ܥܰܣ̈ܩܳܢ ܪܰܟܶܒ ܡܰܬܠܰܘ̈ܗܝ ܘܦܷ̈ܠܳܐܬܶܗ ܘܽܐܘܚ̈ܕܳܬܶܗ ܘܰܒܡܷ̈ܠܐ ܦܫܺܝ̈ܛܳܬܳܐ ܘܓܰܠܝܴ̈ܬܳܐ ܐܰܨܰܚ ܘܰܟܬܰܒ. ܠܚܶܟܡܬܶܗ ܘܣܽܘܟܳܠܶܗ. ܠܰܘ ܓܶܝܪ ܒܡܷ̈ܠܐ ܡܩܰܛܪ̈ܳܬܳܐ ܕܰܓܪܰܡܰܛܺܝܩܽܘܬܳܐ. ܘܳܐܦܠܳܐ ܬܽܘܒ ܒܗܰܦܟܴ̈ܬܳܐ ܡܰܢ ܡܥܰܪ̈ܙܠܳܬܳܐ ܕܒܶܝܬ ܬܰܠܡܺܝ̈ܕܰܘܗܝ ܕܰܐܪܺܝܣܛܰܛܠܺܝܣ. ܘܠܳܐ ܒܥܰܡܺܝܩܽܘܬ ܪܽܘܟܳܒܳܐ ܕܒܶܝܬ ܦܺܝܬܳܐܓܽܘܪܳܘܣ ܕܪܰܘܪ̈ܒܳܬܳܐ ܠܳܥܙܺܝܢ. ܝܳܕܰܥ ܗܘܳܐ ܓܶܝܪ ܕܶܐܢ ܟܽܠܗܽܘܢ ܥܰܡ̈ܡܶܐ ܫܳܡܥܺܝܢ ܠܰܐܝܠܶܝܢ ܕܝܳܕܥܺܝܢ. ܘܰܙܥܽܘܪ̈ܺܝܢ ܚܰܟܺܝ̈ܡܶܐ ܘܕܳܪ̈ܽܘܫܶܐ ܘܰܕܠܳܐ ܡܶܢܝܳܢ ܐܶܢܽܘܢ ܦܫܺܝ̈ܛܶܐ ܘܬܰܡܺܝ̈ܡܶܐ. ܡܳܕܶܝܢ ܕܓܰܠܝܴ̈ܢ ܐܶܢܶܝܢ ܠܰܦܫܺܝ̈ܛܶܐ ܡܡܰܠܶܠ ܢܒܺܝܳܐ. ܢܶܚܙܶܐ ܗܳܟܺܝܠ ܡܶܢ ܐܰܝܟܳܐ ܡܫܰܪܶܐ ܒܽܐܘܚ̈ܕܳܬܶܗ.
ܠܳܐ ܠܰܡ ܕܳܚܶܠ ܐܢܳܐ ܒܝܰܘ̈ܡܳܬܳܐ ܒܺܝ̈ܫܶܐ. ܐܰܝܠܶܝܢ ܐܶܢܽܘܢ ܐܰܪܰܐ ܝܰܘ̈ܡܳܬܳܐ ܒܺܝ̈ܫܶܐ. ܠܟܽܠܗܽܘܢ ܝܰܘ̈ܡܳܬܶܗ ܕܥܳܠܡܳܐ ܗܳܢܳܐ ܒܺܝ̈ܫܶܐ ܩܳܪܶܐ ܠܗܽܘܢ. ܒܒܺܝ̈ܫܶܐ ܓܶܝܪ ܛܳܒܬܳܐ ܠܰܝܬ. ܗܳܕܶܐ ܦܶܠܶܐܬܳܐ ܚܕܳܐ ܡܶܢ ܗܳܠܶܝܢ ܕܶܐܡܰܪ. ܗܰܘ ܓܶܝܪ ܕܫܳܡܰܥ ܡܱ̈ܬܠܐ ܘܽܐܘܚ̈ܕܳܬܳܐ܆ ܢܒܰܚܶܢ ܗܳܕܶܐ ܩܰܕܡܳܝܬܳܐ ܕܥܰܠ ܝܰܘ̈ܡܳܬܳܐ ܒܺܝ̈ܫܶܐ. ܝܰܘ̈ܡܳܬܳܐ ܒܺܝ̈ܫܶܐ ܩܳܪܶܐ ܐܰܢܬ܆ ܐܺܝܢ ܠܰܡ ܟܽܠܡܶܕܶܡ ܕܰܒܥܶܠܕܒܳܒܳܐ ܥܳܒܶܕ ܠܺܝ ܠܰܐܠܗܳܐ ܒܺܝܫܳܐ ܐܺܝܬܰܘܗܝ ܘܛܳܒܬܳܐ ܒܶܗ ܠܳܐ ܫܟܺܝܚܳܐ. ܐܶܢ ܓܶܝܪ ܪܶܚܡܬܶܗ ܕܗܳܢܳܐ ܥܳܠܡܳܐ ܒܥܶܠܕܒܳܒܽܘܬܳܐ ܗܝ ܠܘܳܬ ܐܰܠܳܗܳܐ܆ ܘܟܽܠ ܕܨܳܒܶܐ ܕܢܶܗܘܶܐ ܪܳܚܡܳܐ ܠܗܳܢܳܐ ܥܳܠܡܳܐ ܒܥܶܠܕܒܳܒܳܐ ܗܳܘܶܐ ܠܰܐܠܳܗܳܐ. ܐܰܝܟ ܕܡܰܠܦܳܐ ܡܶܠܬܳܐ ܫܠܺܝܚܳܝܬܳܐ. ܡܳܕܶܝܢ ܐܰܝܟܰܢܳܐ ܠܰܘ ܓܰܠܝܳܐܝ̣ܬ ܐܶܬܢܰܗܪܰܬ ܗܳܝ ܕܶܐܡܰܪ ܢܒܺܝܳܐ. ܕܠܳܐ ܕܳܚܶܠ ܐܢܳܐ ܒܝܰܘ̈ܡܳܬܳܐ ܒܺܝ̈ܫܶܐ. ܘܰܚܙܺܝ ܡܶܛܠܡܳܢܳܐ ܩܳܪܶܐ ܝܰܘ̈ܡܳܬܳܐ ܒܺܝ̈ܫܶܐ ܠܚܰܝܰܘ̈ܗܝ ܕܥܳܠܡܳܐ ܗܳܢܳܐ. ܚܙܰܝܬ ܡܶܐܟܠܳܐ ܘܡܰܫܬܝܳܐ ܕܒܶܣܪܳܐ ܘܰܕܚܰܡܪ̈ܳܢܶܐ. ܘܰܚܠܳܦ ܡܶܐܟ̈ܠܳܬܳܐ ܣܒܺܝ̈ܣܳܬܳܐ. ܐܶܬܒܰܩܳܐ ܠܺܝ ܘܰܚܙܺܝ ܕܰܠܘܳܬ ܐܰܝܢܳܐ ܚܰܫܳܐ ܒܺܝܫܳܐ ܡܩܰܒ̈ܠܳܢ ܘܪܳܕܶܐ ܕܡܳܐ ܚܰܡܺܝܡܳܐ ܒܫܶܪ̈ܝܳܢܶܐ ܟܽܠܗܽܘܢ ܘܶܐܫܬܓܰܪ ܠܶܒܳܐ ܐܰܝܟ ܢܽܘܪܳܐ ܘܡܶܢ ܝܰܩܕܳܢܶܗ ܕܚܰܡܪܳܐ. ܘܰܪܬܰܚ ܘܶܐܬܓܰܘܙܰܠ ܕܡܳܐ ܒܓܰܘܶܗ. ܘܪܶܗܛܰܬ ܪܽܘܚܳܐ ܕܚܰܡܺܝܡܽܘܬܳܐ ܒܗܰܕܳܡ̈ܐ. ܗܳܝܕܶܝܢ ܚܰܫܳܐ ܒܰܥܪܺܝܪܳܝܳܐ ܕܪܶܓܬܳܐ ܡܶܬܬܥܺܝܪ. ܘܡܶܬܬܥܺܝܪ ܘܢܶܬܓܰܘܙܰܠ ܒܠܶܒܳܐ ܘܢܳܫܶܒ ܒܚܰܕܝܳܐ. ܘܪܳܦܶܬ ܒܟܽܘ̈ܠܝܳܬܳܐ. ܘܡܶܙܕܩܶܦ ܘܡܶܬܩܰܫܶܐ ܒܗܰܕܳܡ̈ܐ ܟܽܠܗܽܘܢ ܕܦܰܓܪܳܐ. ܘܰܐܝܟ ܓܽܘܕܳܐ ܕܓܰܝ̈ܣܶܐ ܕܳܒܰܪ ܒܰܚܛܽܘܦܝܳܐ ܠܟܽܠܗܽܘܢ ܗܰܕܳܡ̈ܐ. ܘܒܰܕܡܽܘܬ ܒܥܺܝܪܳܐ ܣܳܥܶܐ ܥܰܠ ܬܶܫܡܶܫܬܳܐ ܡܶܬܚܰܒܠܳܢܺܝܬܳܐ. ܟܰܕ ܠܳܐ ܝܳܕܰܥ ܕܢܶܬܡܰܠܶܐ. ܘܕܳܒܰܪ ܡܰܦܶܩ ܠܳܗ̇ ܠܢܰܦܫܳܐ ܡܶܢ ܟܢܺܝܟܽܘܬܳܐ ܘܢܰܟܦܽܘܬܳܐ ܠܦܽܘܠܚܳܢܳܐ ܙܰܠܺܝܠܳܐ ܕܦܰܚܙܽܘܬܳܐ. ܘܠܳܐ ܫܳܒܶܩ ܠܳܗ̇ ܕܰܢܩܰܘܶܐ ܒܳܗ̇. ܚܰܕ ܥܽܘܗܕܳܢܳܐ ܕܕܰܟܝܽܘܬܳܐ ܘܩܳܕܺܝܫܽܘܬܳܐ ܘܠܳܐ ܓܶܝܪ ܫܳܠܝܳܐ ܢܰܦܫܗܽܘܢ ܕܪ̈ܳܚܡܰܝ ܪ̈ܓܺܝܓܳܬܳܐ ܡܶܢ ܗܶܪ̈ܓܶܐ ܐܰܡܺܝ̈ܢܶܐ ܕܰܫܟܺܝܪ̈ܳܬܳܐ. ܫܰܦܺܝܪ ܩܪܳܐ ܐܶܢܽܘܢ ܠܫܽܘܪ̈ܬܳܚܶܐ ܕܥܳܠܡܳܐ ܛܽܘܒܬܳܢܳܐ ܕܰܘܝ̣ܕ ܝܰܘ̈ܡܳܬܳܐ ܒܺܝ̈ܫܶܐ. ܗܳܠܶܝܢ ܕܗܽܘ ܠܳܐ ܕܳܚܶܠ ܗܽܘ ܡܶܢܗܽܘܢ. ܡܶܛܠ ܕܟܰܕ ܐܰܣܺܝܪ ܗܘܳܐ ܚܙܳܩܳܐ ܕܡܰܠܟܽܘܬܳܐ ܘܫܽܘܠܛܳܢܳܐ ܕܰܡܕܰܒܪܳܢܽܘܬܳܐ ܘܰܩܛܺܝܪ ܬܳܓܳܐ ܒܪܺܝܫܶܗ ܡܝܰܩܪܳܐ ܕܪܺܝܫܳܢܽܘܬܳܐ ܘܥܰܒܺܝܛ ܒܶܝܬܓܰܙܶܗ ܒܕܰܗܒܳܐ ܘܣܺܐܡܳܐ ܘܡܰܪ̈ܓܳܢܝܳܬܳܐ. ܠܳܐ ܛܳܥܶܐ ܗܘܳܐ ܢܰܦܫܶܗ ܡܫܰܡܶܫ ܗܘܳܐ ܪ̈ܓܺܝܓܳܬܳܐ. ܐܶܠܐ ܡܩܰܛܶܢ ܗܘܳܐ ܘܰܡܥܰܨܰܪ ܠܓܽܘܫܡܶܗ ܒܨܰܘ̈ܡܶܐ ܐܰܡܺܝ̈ܢܶܐ. ܒܒܶܟܝܳܐ ܚܢܺܝܓܳܐ ܘܰܒܫܰܗܪܳܐ. ܟܰܕ ܡܰܘܟܶܡ ܠܓܰܐܝܽܘܬܳܐ ܕܦܰܓܪܶܗ ܒܰܕܡܽܘܬ ܫܽܘܚܳܪ̈ܶܐ. ܘܢܶܫܡܰܥ ܠܩܳܠܶܗ ܟܰܕ ܡܒܰܟܶܐ ܢܰܦܫܶܗ ܒܡܰܙܡܽܘܪܳܐ ܕܡܳܐܐ ܘܰܬܪܶܝܢ. ܟܰܕ ܥܳܪܶܩ ܕܠܳܐ ܢܶܥܒܕܽܘܢܳܝܗܝ ܢܝܴ̈ܚܶܐ ܡܰܠܟܳܝ̈ܐ ܢܶܬܟܪܶܐ ܠܚܽܘܒܶܗ ܕܰܐܠܳܗܳܐ. ܘܢܶܫܡܰܥ ܠܩܳܠܶܗ ܟܰܕ ܡܒܰܟܶܐ ܘܳܐܡܰܪ:
ܡܶܛܠ ܕܰܓܡܰܪܘ ܒܬܽܘܢܳܢܳܐ ܝܰܘ̈ܡܰܝ: ܘܓܰܪ̈ܡܰܝ ܚܘܰܪܘ ܐܰܝܟ ܡܰܘܩ̈ܕܶܐ. ܚܡܳܐ ܠܶܒܝ ܐܰܝܟ ܥܶܣܒܳܐ ܘܺܝܒܶܫ: ܡܶܛܠ ܕܰܛܥܺܝܬ ܡܶܐܟܽܘܠܬܶܗ ܕܠܰܚܡܝ. ܘܡܶܢ ܩܳܠܐ ܕܬܶܢܚܴ̈ܬܝ ܕܒܶܩ ܒܶܣܪܝ ܠܓܰܪ̈ܡܰܝ: ܘܶܐܬܕܰܡܺܝܬ ܠܩܳܩܳܐ ܕܰܒܡܰܕܒܪܳܐ: ܘܰܗܘܺܝܬ ܐܰܝܟ ܥܽܘܕܳܐ ܒܚܰܪܒܬܳܐ. ܘܣܶܪܕܶܬ ܘܰܗܘܰܝܬ ܒܰܠܚܽܘܕܰܝ: ܐܰܝܟ ܨܶܦܪܳܐ ܕܰܡܦܰܪܚܳܐ ܥܰܠ ܐܶܓܳܪ̈ܶܐ. ܡܶܛܠ ܕܩܶܛܡܳܐ ܐܰܝܟ ܠܰܚܡܳܐ ܠܶܥܣܶܬ: ܘܡܰܫܬܰܝ ܒܰܒܟܳܬܳܐ ܡܶܙܓܶܬ (ܡܙܡܘܪܐ ܩܒ: ܓ-ܛ). ܫܡܰܥܬ ܐܰܪܰܐ ܗܳܠܶܝܢ ܩܴ̈ܠܐ ܕܬܶܢܚܴ̈ܬܳܐ. ܡܶܢ ܗܳܢܳܐ ܡܰܠܟܳܐ ܟܺܐܢܳܐ ܕܺܝܣܪܳܐܝܠ ܫܡܰܥܬ ܐܰܝܟܰܢܳܐ ܐܶܡܰܪ. ܕܰܥܕܰܡܳܐ ܕܺܝܒܶܫ ܒܶܣܪܶܗ ܐܰܝܟ ܥܶܣܒܳܐ. ܘܰܒܬܶܢܚܴ̈ܬܳܐ ܕܒܶܩ ܠܓܰܪ̈ܡܰܘܗܝ ܘܰܥܒܰܕ ܬܽܘܪܣܳܝܶܗ ܩܶܛܡܳܐ. ܘܫܳܩܽܘܬܶܗ ܡܶܢ ܕܶܡܥ̈ܐ. ܗܳܐ ܡܶܛܠ ܗܳܠܶܝܢ ܥܰܡ̈ܠܐ ܫܰܦܺܝܪ ܐܶܡܰܪ ܕܠܳܐ ܕܳܚܶܠ ܐܢܳܐ ܒܝܰܘ̈ܡܳܬܳܐ ܒܺܝ̈ܫܶܐ. ܠܳܐ ܓܶܝܪ ܫܳܒܶܩ ܗܘܳܐ ܠܫܽܘܒܗܳܪܳܐ ܕܢܶܙܟܶܝܘܗܝ ܒܫܽܘܠܛܳܢܳܐ ܕܪܳܡܽܘܬܳܐ. ܘܠܳܐ ܠܥܽܘܬܪܳܐ ܕܢܰܣܪܚܶܝܘܗܝ ܒܚܽܘܬܪܳܐ. ܘܠܳܐ ܠܰܡܕܰܒܪܳܢܽܘܬܳܐ ܕܬܰܣܶܩ ܥܠܰܘܗܝ ܪܽܘܚܳܐ ܕܰܢܦܺܝܚܽܘܬܳܐ. ܘܠܐ ܠܒܽܘ̈ܣܳܡܶܐ ܕܢܶܥܒܕܽܘܢܳܝܗܝ ܠܰܥܒܳܐ ܒܡܶܐܟ̈ܠܳܬܳܐ ܘܠܳܐ ܠܡܶܫܬܝܳܐ ܕܚܰܡܪܳܐ ܕܢܶܥܒܕܺܝܘܗܝ ܦܰܚܙܳܐ ܘܙܰܠܺܝܠܳܐ ܒܪܶܓܬܳܐ. ܐܶܠܐ ܠܽܘܩܒܰܠ ܗܳܠܶܝܢ ܡܶܙܕܰܝܰܢ ܗܘܳܐ܆ ܒܨܰܘܡܳܐ ܘܰܒܥܶܢܘܳܝܽܘܬܳܐ. ܘܕܳܚܶܠ ܗܘܳܐ ܡܶܢ ܢܝܴ̈ܚܶܐ ܦܰܓܪ̈ܳܢܳܝܶܐ ܐܰܝܟ ܕܡܶܢ ܒܥܶܠܕ̈ܒܳܒܶܐ ܒܰܥܪܺܝܪ̈ܳܝܶܐ. ܐܶܡܰܪ ܓܶܝܪ
ܕܥܰܘܠܳܐ ܕܰܒܥܶܠܕ̈ܒܳܒܰܝ ܟܰܪܟܰܢܝ. ܡܶܛܠ ܕܰܒܟܽܠܝܽܘܡ ܡܫܰܪܬܰܚ ܗܘܳܐ ܒܡܰܠܟܽܘܬܶܗ. ܘܰܚܙܺܝ ܐܰܝܟܰܢܳܐ ܡܰܪܬܶܐ ܕܥܰܠ ܥܽܘܬܪܳܐ ܐܢܳܫ ܠܐ ܢܶܬܬܟܶܠ. ܘܰܒܚܰܝܠܳܐ ܐܢܳܫ ܠܳܐ ܢܶܫܬܰܒܗܰܪ.
ܟܽܠ ܕܰܬܟܺܝܠܺܝܢ ܥܰܠ ܚܰܝܠܗܽܘܢ ܘܡܶܫܬܰܒܗܪܺܝܢ ܒܣܽܘܓܳܐܐ ܕܥܽܘܬܪܗܽܘܢ. ܐܰܚܳܐ ܠܳܐ ܦܳܪܶܩ ܘܓܰܒܪܳܐ ܠܐ ܝܳܗܶܒ ܠܰܐܠܳܗܳܐ ܦܽܘܪܩܳܢܶܗ. ܠܡܳܢܳܐ ܡܶܬܬܟܶܠ ܐܰܢܬ ܥܰܠ ܚܰܝܠܳܐ ܕܡܶܬܡܚܶܠ ܩܕܳܡ ܡܰܘܬܳܐ ܘܬܳܚܶܒ ܒܰܡܚܺܝܠܽܘܬܳܐ. ܘܠܰܝܬ ܓܰܢ̱ܒܳܪܽܘܬܳܐ ܡܳܐ ܕܩܶܪܒܰܬ ܠܓܽܘܫܡܳܐ ܣܰܦܣܺܪܶܗ ܕܚܺܝܠܬܳܐ ܕܡܰܘܬܳܐ. ܘܠܳܐ ܒܪ̈ܶܓܠܶܐ ܩܰܠܺܝ̈ܠܳܬܳܐ ܕܰܢܫܰܘܪ̈ܳܢ ܣܝܳܓܶܗ ܚܰܣܺܝܢܳܐ ܕܡܰܘܬܳܐ. ܐܶܠܐ ܒܥܶܕܳܢܳܐ ܙܥܽܘܪܳܐ ܕܩܳܪܶܒ ܐܺܝܙܓܰܕܳܐ ܩܰܫܝܳܐ ܕܡܰܘܬܳܐ ܡܶܫܬܰܪܝܳܐ ܠܳܗ̇ ܓܰܢ̱ܒܳܪܽܘܬܳܐ: ܘܒܳܛܠܳܐ ܚܠܺܝܡܽܘܬܳܐ: ܘܢܳܐܷܫ ܟܽܠܶܗ ܚܰܝܠܳܐ ܕܗܰܕܳܡ̈ܐ: ܘܙܳܥܰܪ ܢܽܘܗܪܳܐ ܒܚܳܙ̈ܝܳܬܳܐ: ܘܡܶܬܒܰܛܠ ܚܰܝܠܐ ܕܛܰܚܳܢܴ̈ܬܳܐ: ܘܡܶܬܬܙܺܝܥܺܝܢ ܢܳܛܽܘܪ̈ܰܝ ܒܰܝܬܳܐ: ܘܡܶܬܪ̈ܰܦܝܳܢ ܒܽܘܪ̈ܟܶܐ: ܘܛܳܥܶܫ ܚܰܝܠܐ ܕܩܽܘܪ̈ܨܠܶܐ ܡܶܢ ܫܶܬܶܐܣ̈ܐ ܕܡܰܓܕܰܠ ܒܶܣܪܳܐ: ܘܥܳܡ̈ܛܳܢ ܥܰܝ̈ܢܶܐ ܒܟܰܘܰܝ̈ܗܶܝܢ: ܘܚܳܡܶܐ ܓܰܘܢܳܐ ܣܽܘܡܳܩܳܐ ܡܶܢ ܚܰܙܽܘܪ ܦܰܟ̈ܐ: ܘܠܳܒܫܺܝܢ ܢܰܚ̈ܬܶܐ ܩܽܘ̈ܢܥܶܐ: ܘܩܳܛܥܳܐ ܡܰܥܰܠܬܳܐ ܕܩܴ̈ܠܐ ܡܶܢ ܐܽܘܪܚܳܐ ܕܡܰܫܡܰܥܬܳܐ: ܘܝܳܗܶܒ ܐܺܝ̈ܕܰܘܗܝ ܠܰܦܟܳܪ̈ܶܐ ܟܰܕ ܠܳܐ ܪܓܺܝܫ: ܘܦܳܫܶܛ ܪ̈ܶܓܠܰܘܗܝ ܠܰܐܣܽܘܪ̈ܶܐ ܟܰܕ ܠܳܐ ܝܳܕܰܥ: ܘܰܡܫܰܪܶܐ ܕܢܺܐܬܶܐ ܡܶܢܶܗ ܪܺܝܚܳܐ ܕܣܰܪܝܽܘܬܳܐ ܘܰܡܫܰܟܪܳܐ ܕܪܶܗܠܳܐ ܕܡܶܬܚܰܒܠܳܢܽܘܬܳܐ: ܘܠܰܝܬ ܬܰܡܳܢ ܫܽܘܒܗܳܪܳܐ ܕܥܽܘܬܪܳܐ: ܘܠܳܐ ܪܰܒܽܘܬܳܐ ܕܚܺܝܠܬܳܐ: ܘܠܳܐ ܐܺܝܩܳܪܳܐ ܕܡܶܢ ܡܫܰܥ̈ܒܕܶܐ: ܡܰܘܬܳܐ ܓܶܝܪ ܕܥܰܠ ܘܰܒܫܽܘܚܕܳܐ ܠܳܐ ܡܶܬܪܰܥܶܐ ܘܰܠܥܽܘܬܪܳܐ ܠܳܐ ܡܶܬܬܦܺܝܣ ܘܒܺܐܝܩܳܪܳܐ ܠܳܐ ܚܳܐܱܪ ܘܥܰܠ ܒܢܰܝܴ̈ܐ ܠܐ ܚܳܐܷܣ ܘܠܐ ܥܰܠ ܒܶܟܝܳܐ ܕܰܒܢܴ̈ܬܳܐ ܕܫܰܒܪ̈ܳܢ ܡܶܬܪܰܚܰܡ. ܘܰܒܬܶܢܚ̈ܬܳܐ ܠܐ ܡܶܬܬܘܶܐ: ܘܠܰܦܝܳܣܳܐ ܠܐ ܥܳܢܶܐ: ܘܡܶܢ ܠܰܘ̈ܛܳܬܳܐ ܠܐ ܕܳܚܶܠ: ܡܶܛܠ ܕܶܐܡܰܪ ܢܒܺܝܳܐ ܕܰܐܚܳܐ ܠܳܐ ܦܳܪܶܩ ܘܓܶܢܣܳܐ ܠܐ ܡܰܘܬܰܪ. ܘܥܽܘܬܪܳܐ ܠܐ ܡܫܰܘܙܶܒ ܠܡܳܪܶܗ. ܘܪ̈ܳܚܡܶܐ ܕܰܓ̈ܠܐܷ ܟܡܳܐ ܙܰܒ̈ܢܺܝܢ ܠܳܐ ܡܠܰܘ̈ܝܳܢܶܐ ܗܳܘܶܝܢ ܠܶܗ. ܠܗܰܘ ܕܶܐܫܬܰܘܚܰܕ ܡܶܢ ܟܽܠ ܐܺܝܳܠܺܝ̈ܢ. ܘܗܳܠܶܝܢ ܥܰܠ ܕܠܳܐ ܝܰܗܒ ܠܰܐܠܗܐ ܦܽܘܪܩܳܢܶܗ ܡܶܢ ܫܽܘܪܳܝܳܐ. ܗܰܘ ܓܶܝܪ ܕܡܰܓܥܶܠ ܦܽܘܪܩܳܢܳܐ ܕܢܰܦܫܶܗ ܠܰܐܠܗܐ. ܠܳܐ ܣܢܺܝܩ ܕܡܶܢ ܐܚܪ̈ܳܢܶܐ ܢܶܬܥܰܕܰܪ. ܐܶܠܐ ܣܳܦܶܩ ܗܽܘ ܠܶܗ ܦܽܘܪܩܳܢܳܐ ܕܡܶܢ ܐܰܠܗܐ. ܐܰܝܠܶܝܢ ܕܥܳܒܕܺܝܢ ܗܳܕܶܐ. ܠܳܐ ܡܰܘܩܪܺܝܢ ܓܶܝܪ ܦܽܘܪܩܳܢܗܽܘܢ. ܐܰܝܟ ܗܳܠܶܝܢ ܕܶܐܡܰܪ ܢܒܺܝܳܐ.
ܕܝܰܩܺܝܪ ܗܽܘ ܦܽܘܪܩܳܢܳܐ ܕܢܰܦܫܗܽܘܢ. ܡܰܢ ܐܶܢܽܘܢ ܗܳܢܽܘܢ ܕܝܰܩܺܝܪ ܥܠܰܝܗܽܘܢ ܦܽܘܪܩܳܢܳܐ ܕܢܰܦܫܗܽܘܢ. ܐܶܠܐ ܐܰܝܠܶܝܢ ܕܶܐܬܶܐܣܰܪܘ ܒܚܽܘܒܳܐ ܕܰܪ̈ܓܺܝܓܳܬܳܐ. ܘܰܐܛܥܢܽܘܗܝ ܠܦܰܓܪܳܐ ܡܰܘܒ̈ܠܐ ܝܰܩܺܝܪ̈ܳܬܳܐ ܕܓܰܘܪܳܐ ܐܳܡܰܪ ܐܢܳܐ: ܘܰܕܙܳܢܝܽܘܬܳܐ. ܘܝܶܩܪܰܬ ܥܠܰܝܗܽܘܢ ܐܽܘܪܚܳܐ ܕܟܺܐܢܽܘܬܳܐ ܠܰܡܗܰܠܳܟܽܘ ܒܳܗ̇ ܘܰܐܢܺܝܚܘ ܠܚܰܫܰܘ̈ܗܝ ܫܟܺܝܪ̈ܶܐ ܕܒܶܣܪܳܐ. ܘܠܐ ܫܰܡܥܽܘܗܝ ܠܰܢܒܺܝܳܐ ܕܶܐܡܰܪ:
ܕܰܠܐܝ̣ ܠܥܳܠܰܡ ܕܬܺܚܶܐ ܠܥܳܠܰܡ ܥܳܠܡܺܝܢ: ܘܠܐ ܬܶܚܙܶܐ ܚܒܳܠܳܐ ܟܰܕ ܬܶܚܙܶܐ ܚܰܟܺܝ̈ܡܶܐ ܕܡܳܝܬܺܝܢ. ܐܰܟܚܕܳܐ ܣܰܟ̈ܠܐ ܘܚܰܣܺܝܪ̈ܰܝ ܪܶܥܝܳܢܳܐ ܕܳܐܒܕܺܝܢ. ܘܫܳܒܩܺܝܢ ܩܶܢܝܳܢܗܽܘܢ ܠܰܐܚܪ̈ܳܢܶܐ. ܘܟܰܕ ܗܰܘ ܕܦܳܠܰܚ ܟܺܐܢܽܘܬܳܐ ܟܡܳܐ ܐܶܢ ܢܶܗܘܶܐ ܪܰܒ ܥܰܡ ܪ̈ܰܫܺܝܥܶܐ ܘܚܰܛܳܝ̈ܐ ܡܶܬܚܰܒܰܠ ܒܩܰܒܪܳܐ ܐܳܦ ܗܽܘ. ܐܰܪܰܐ ܗܳܠܶܝܢ ܠܰܘ ܡܱ̈ܬܠܐ ܐܶܢܽܘܢ؟
ܟܡܳܐ ܓܶܝܪ ܐܶܢ ܢܶܗܘܶܐ ܕܰܡܠܺܝܟ ܢܽܘܚܳܡܳܐ. ܐܶܠܐ ܠܰܘ ܕܠܳܐ ܡܱ̈ܬܠܐ ܩܰܒܶܠܢܳܝܗܝ ܠܗܳܢܳܐ. ܡܱ̈ܬܠܐ ܐܶܢܘܢ ܓܶܝܪ ܟܽܠܗܽܘܢ ܐܪ̈ܳܙܶܐ ܕܰܡܠܺܝܟܺܝܢ ܥܰܠ ܢܽܘܚܳܡܳܐ. ܘܗܳܝ ܕܠܐ ܚܳܙܶܐ ܚܒܳܠܳܐ ܗܰܘ ܕܥܳܡܶܠ ܘܡܶܬܟܰܫܰܪ ܒܕܽܘܒܳܪ̈ܶܐ ܟܺܐܢ̈ܐ ܕܙܰܕܺܝܩܽܘܬܳܐ. ܓܰܠܝܳܐܗܝ ܕܥܰܠ ܗܰܘ ܚܒܳܠܳܐ ܕܰܗܘܳܐ ܒܬܰܫܢܺܝܩܳܐ ܠܥܳܒ̈ܕܰܝ ܒܺܝ̈ܫܳܬܳܐ ܡܶܫܬܰܘܙܰܒ. ܘܶܐܢ ܨܳܒܶܐ ܐܰܢܬ ܠܡܶܕܰܥ ܕܰܒܡܱ̈ܬܠܐ ܐܰܡܬܶܠ ܣܰܒܪܳܐ ܕܢܽܘܚܳܡܳܐ. ܢܶܫܡܰܥ ܠܦܰܘܠܽܘܣ ܗܰܘ ܪܰܒܳܐ ܒܰܫܠܺܝ̈ܚܶܐ ܡܳܢܳܐ ܐܶܡܰܪ: ܡܶܛܠ ܐܰܒܪܳܗܳܡ ܗܰܘ ܕܗܰܝܡܶܢ ܒܚܰܝܰܬ ܡܺܝ̈ܬܶܐ. ܒܗܰܝܡܳܢܽܘܬܳܐ ܠܡ ܩܰܪܶܒ ܐܰܒܪܳܗܳܡ ܠܐܺܝܣܚܳܩ ܒܢܶܣܝܽܘܢܶܗ. ܘܠܺܝܚܺܝܕܶܗ ܐܰܣܶܩ ܠܡܰܕܒܚܳܐ. ܠܗܰܘ ܕܩܰܒܶܠ ܗ̱ܘܳܐ ܒܡܽܘܠܟܳܢܳܐ. ܐܶܬܶܐܡܰܪ ܗܘܳܐ ܠܶܗ ܓܶܝܪ ܕܒܺܐܝܣܚܳܩ ܢܶܬܩܪܶܐ ܠܳܟ ܙܰܪܥܳܐ. ܐܳܦ ܐܶܬܪܰܥܺܝ ܗ̱ܘܳܐ ܒܢܰܦܫܶܗ܆ ܕܡܳܛܝܳܐ ܒܺܐܝ̈ܕܰܘܗܝ ܕܰܐܠܳܗܳܐ. ܐܳܦ ܡܶܢ ܡܺܝ̈ܬܶܐ ܠܰܡܩܳܡܽܘ. ܘܡܶܛܠ ܗܳܢܳܐ ܒܡܰܬܠܐܴ ܐܶܬܺܝܗܶܒ ܠܶܗ (ܥܶܒܪ̈ܝܐ ܝܐ: ܝܙ-ܝܛ). ܚܙܰܝܬ ܐܰܝܟܰܢܳܐ ܠܗܳܝ ܕܠܐ ܢܶܚܙܶܐ ܚܒܳܠܐ ܒܳܬܰܪ ܩܝܳܡܬܳܐ܆ ܡܰܬܠܐܴ ܐܰܡܪܶܗ ܢܒܺܝܳܐ. ܗܳܝܕܶܝܢ ܓܶܝܪ ܡܳܐ ܕܶܐܬܒܰܛܰܠ ܚܒܳܠܐ ܕܥܰܠ ܒܰܥܒܳܪ ܦܽܘܩܕܳܢܳܐ ܒܠܳܐ ܡܶܬܚܰܒܠܳܢܽܘܬܳܐ. ܘܶܐܫܬܪܺܝ ܡܰܘܬܳܐ ܒܠܳܐ ܡܳܝܽܘܬܽܘܬܳܐ ܡܫܰܪܶܐ ܡܶܟܺܝܠ ܚܒܳܠܐܴ ܠܡܶܣܥܳܐ ܥܰܠ ܗܳܢܽܘܢ ܕܡܶܬܚܰܝܒܺܝܢ ܒܕܺܝܢܳܐ. ܬܰܡܳܢ ܓܶܝܪ ܡܶܬܡܰܠܝܳܐ ܗܳܝ ܕܡܳܝܬܺܝܢ ܚܰܟܺܝ̈ܡܶܐ. ܗܳܢܽܘܢ ܕܠܳܐ ܝܕܰܥܘ ܒܚܶܟܡܰܬܗܽܘܢ ܠܰܐܠܗܳܐ. ܘܬܰܡܳܢ ܐܳܒܕܺܝܢ ܣܰܟ̈ܠܐ ܘܚܰܣܺܝܪ̈ܰܝ ܪܶܥܝܳܢܳܐ. ܗܳܢܽܘܢ ܕܰܚܣܰܟܘ ܥܽܘܬܪܗܽܘܢ ܘܝܰܗܒܽܘܗܝ ܠܰܕܠܳܐ ܫܳܘܶܝܢ. ܘܰܫܒܰܩܘ ܩܶܢܝܳܢܗܽܘܢ ܘܡܰܪ̈ܗܳܛܰܝܗܽܘܢ ܠܰܐܚܪ̈ܳܢܶܐ. ܘܗܳܘܶܝܢ ܠܗܽܘܢ:
ܩܰܒܪ̈ܰܝܗܽܘܢ ܒܳܬܰܝ̈ܗܽܘܢ ܠܥܳܠܰܡ. ܘܡܰܥܡܰܪܗܽܘܢ ܠܕܳܪܕܳܪ̈ܺܝܢ. ܐܶܠܐ ܚܛܳܗܰܝ̈ܗܽܘܢ ܕܰܒܗܽܘܢ ܡܶܣܬܰܚܦܺܝܢ ܒܚܶܫܽܘܟܳܐ. ܩܰܒܪ̈ܰܝܗܽܘܢ ܩܪܳܐ ܐܶܢܽܘܢ ܢܒܺܝܳܐ. ܟܺܐܢܳܐ ܗܝ ܓܶܝܪ ܕܰܒܗܳܠܶܝܢ ܚܰܫ̈ܐ ܕܰܐܚܶܒܘ ܥܰܘܴ̈ܠܐ. ܒܗܽܘܢ ܢܶܬܥܰܦܽܘܢ ܘܢܶܬܩܰܒܪܽܘܢ. ܘܠܰܘ ܕܶܝܢ ܕܰܐܚܶܒ ܥܽܘܬܪܳܐ ܒܥܽܘܬܪܶܗ ܡܶܬܩܒܰܪ. ܐܶܠܐ ܡܶܛܠ ܕܰܠܥܽܘܬܪܳܐ ܓܠܺܝܙܽܘܬ ܪ̈ܰܚܡܶܐ ܡܟܰܢܫܳܐ ܠܶܗ. ܠܫܺܐܕ̈ܐ ܓܠܺܝ̈ܙܰܝ ܡܶܢ ܪ̈ܰܚܡܶܐ ܡܶܫܬܰܠܡܺܝܢ ܥܰܬܺܝܪ̈ܶܐ ܒܬܰܫܢܺܝ̈ܩܶܐ. ܘܗܳܟܰܢܳܐ ܐܰܝܠܶܝܢ ܕܶܐܬܛܰܢܰܦܘ ܒܩܶܛܠܳܐ ܘܒܰܕܡܳܐ ܠܕܰܝ̈ܘܶܐ ܡܶܬܝܰܗܒܺܝܢ ܒܚܶܫܽܘܟܳܐ ܒܰܪܳܝܳܐ. ܘܗܳܢܽܘܢ ܕܰܐܚܶܒܘ ܓܽܘ̈ܕܳܦܶܐ ܘܡܰܡܠܠܳܐ ܛܰܢܦܳܐ. ܘܶܐܬܥܰܝܰܕܘ ܒܪܽܘܓܙܳܐ ܘܰܒܚܶܡܬܳܐ܆ ܠܪ̈ܽܘܚܶܐ ܛܰܢ̈ܦܳܬܳܐ ܘܰܕܡܰܠܝܴ̈ܢ ܪܽܘܓܙܳܐ ܐܳܦ ܚܶܡܬܳܐ ܡܶܫܬܰܠܡܴ̈ܢ. ܘܳܐܦ ܥܰܠ ܗܳܢܽܘܢ ܐܰܘܴ̈ܢܶܐ ܕܩܰܕܺܝ̈ܫܶܐ. ܕܟܽܠܢܳܫ ܠܗܰܘ ܥܶܢܝܳܢܳܐ ܕܰܐܚܶܒ ܗܳܪܟܳܐ ܒܕܽܘܒܳܪ̈ܰܘܗܝ ܟܺܐܢ̈ܐ. ܡܩܰܒܶܠ ܒܥܳܠܡܳܐ ܚܰܕܬܳܐ ܥܰܡ ܩܰܕܺܝ̈ܫܶܐ ܘܰܓܡܺܝܪ̈ܶܐ ܘܟܺܐܢ̈ܐ ܕܶܐܬܶܐܡܶܢܘ ܒܬܰܘܕܺܝܬܳܐ. ܘܗܳܢܽܘܢ ܕܶܐܬܚܰܦܰܛܘ ܕܠܐ ܢܶܩܪܽܘܢ ܠܗܽܘܢ ܫܡܳܗ̈ܐ ܒܰܐܪܥܳܐ. ܡܶܫܟܚܺܝܢܰܢ ܕܰܟܬܺܝܒܺܝܢ ܫܡܳܗܰܝ̈ܗܽܘܢ ܒܰܫܡܰܝܳܐ. ܘܠܐ ܡܚܰܣܶܕ ܠܗܽܘܢ ܢܒܺܝܳܐ ܐܰܝܟ ܗܳܢܽܘܢ ܕܶܐܬܕܰܡܺܝܘ ܠܰܒܥܺܝܪܳܐ ܘܰܟܬܰܒܘ ܫܡܳܗܰܝ̈ܗܽܘܢ ܒܣܽܘܥܪ̈ܳܢܶܐ ܕܰܐܪܥܳܐ ܗܳܕܶܐ ܕܠܰܘ̈ܛܳܬܳܐ. ܐܶܡܰܪ ܓܶܝܪ
ܘܩܳܪܶܝܢ ܫܡܳܗ̈ܐ ܒܰܐܪܥܳܐ. ܒܰܪܢܳܫܳܐ ܒܺܐܝܩܳܪܶܗ ܠܐ ܐܶܬܒܰܝܰܢ܆ ܐܶܠܐ ܐܶܫܬܠܶܡ ܠܰܒܥܺܝܪܳܐ ܘܶܐܬܕܰܡܺܝ ܠܳܗ̇. ܡܰܢܽܘ ܗܳܢܳܐ ܒܰܪܢܳܫܳܐ ܗܰܘ ܩܰܕܡܳܝܳܐ܆ ܕܶܐܬܥܒܶܕ ܒܨܰܠܡܳܐ ܘܒܰܕܡܽܘܬܳܐ ܠܐ ܡܶܬܚܰܒܠܳܢܺܝܬܳܐ ܕܰܐܠܳܗܳܐ܆ ܗܳܢܳܐ ܓܶܝܪ ܠܐ ܐܶܬܒܰܝܰܢ ܒܺܐܝܩܳܪܳܐ ܕܝܰܗܒ ܠܶܗ ܐܰܠܗܳܐ܆ ܒܗܳܝ ܕܟܰܕ ܟܝܳܢܳܐ ܡܳܝܽܘܬܳܐ ܘܡܶܬܚܰܒܠܳܢܳܐ ܐܺܝܬ ܗܘܳܐ ܠܶܗ. ܒܝܰܕ ܩܽܘܝܳܡܶܗ ܕܡܶܢ ܥܰܦܪܳܐ܆ ܫܰܟܶܢ ܠܶܗ ܐܰܠܳܗܳܐ ܥܳܒܽܘܕܶܗ ܘܒܳܪܽܘܝܳܐ ܕܟܽܠ܆ ܛܰܝܒܽܘܬܳܐ ܪܰܒܬܳܐ ܘܰܡܥܰܠܰܝܬܳܐ ܕܠܳܐ ܡܳܝܽܘܬܽܘܬܳܐ܆ ܘܥܰܠܝܶܗ ܘܣܳܡܶܗ ܡܰܠܟܳܐ ܥܰܠ ܟܽܠܗܽܘܢ ܗܳܢܽܘܢ ܕܠܐ ܡܶܠܬܳܐ. ܘܝܰܩܪܶܗ ܕܠܐ ܥܰܡܠܳܐ ܒܡܰܥܡܪܳܐ ܡܰܠܐܟܳܝܳܐ ܕܰܒܓܰܘ ܦܰܪܕܰܝܣܳܐ ܗܰܘ ܛܽܘܒܬܳܢܳܐ. ܘܰܐܠܒܫܶܗ ܐܶܣܛܠܐܴ ܪܺܝܫܳܝܬܳܐ ܕܰܡܫܰܘܕܥܳܐ ܗܘܳܬ ܠܒܽܘܫܳܐ ܕܠܐ ܡܶܬܚܰܒܠܳܢܽܘܬܳܐ. ܘܟܰܕ ܒܗܳܢܳܐ ܐܺܝܩܳܪܳܐ ܕܥܳܒܽܘܕܳܐ ܠܐ ܐܶܬܒܰܝܰܢ܆ ܐܶܨܛܠܺܝ ܒܺܝܫܳܐܝ̣ܬ ܠܘܳܬ ܪܶܓܬܳܐ ܗܳܝ ܕܰܠܒܰܪ ܡܶܢ ܟܝܳܢܶܗ. ܘܰܒܥܳܐ ܕܳܐܦ ܐܰܠܗܳܐ ܢܶܗܘܶܐ. ܐܶܫܬܠܶܡ ܗܳܝܕܶܝܢ ܠܰܒܥܺܝܪܳܐ ܘܶܐܬܕܰܡܺܝ ܠܳܗ̇. ܘܩܰܒܶܠ ܒܰܡܣܳܡ ܒܪܺܝܫܳܐ ܕܠܰܘܛܬܳܐ ܕܡܶܢ ܐܰܠܳܗܳܐ. ܐܰܝܟܰܢܳܐ ܕܥܶܣܒܳܐ ܐܰܝܟ ܬܰܘܪܳܐ ܢܶܐܟܽܘܠ. ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ. ܠܰܚܡܳܐ ܓܶܝܪ ܦܺܐܪܰܐ ܗ̄ܘ ܕܥܶܣܒܳܐ. ܘܥܰܡ ܒܥܺܝܪܳܐ ܢܳܦܶܩ ܒܰܪܢܳܫܳܐ ܠܡܶܪܥܳܐ ܘܰܠܡܶܥܡܰܪ ܒܰܐܬܪܳܐ ܕܰܥܪ̈ܳܕܶܐ. ܘܰܒܗܳܢܳܐ ܫܒܺܝܠܳܐ ܕܰܡܠܐܷ ܬܽܘܩ̈ܠܳܬܳܐ. ܢܦܰܩ ܒܰܪܢܳܫܳܐ ܩܰܕܡܳܝܳܐ ܡܶܢ ܥܕܶܢ. ܐܰܝܟ ܕܶܐܡܰܪ ܢܒܺܝܳܐ.
ܗܳܢܰܘ ܫܒܺܝܠܗܽܘܢ ܬܽܘܩܰܠܬܳܐ ܠܢܰܦܫܗܽܘܢ. ܒܗܳܕܶܐ ܓܶܝܪ ܩܰܕܡܳܐܝܰܬ ܐܶܬܬܩܶܠܘ. ܒܢܰܝ̈ܗܽܘܢ ܕܗܳܢܽܘܢ ܒܢܰܝ̈ܢܳܫܳܐ ܣܕܽܘ̈ܡܳܝܶܐ ܥܰܠ ܕܠܐ ܦܪܰܫܘ ܢܰܦܫܗܽܘܢ ܗܳܝ ܕܢܶܕܥܽܘܢ ܠܰܐܠܳܗܳܐ. ܘܡܶܢ ܗܳܪܟܳܐ ܠܘܳܬ ܥܰܒܝܽܘܬ ܠܶܒܳܐ ܐܶܬܕܒܰܪܘ. ܟܰܕ ܗܳܘܶܝܢ ܐܰܝܟ ܥܳܢܴ̈ܐ ܒܫܰܪ̈ܒܳܬܗܽܘܢ. ܘܰܕܠܳܐ ܒܽܘܝܳܢܳܐ ܡܶܬܕܰܒܪܺܝܢ
ܘܰܐܚܪܳܝܰܬ ܠܰܡ ܒܦܽܘܡܗܽܘܢ ܘܢܶܪܥܽܘܢ ܐܰܝܟ ܥܳܢ̈ܳܐ. ܘܡܶܢ ܒܳܬܰܪ ܕܰܐܫܠܶܡ ܐܶܢܽܘܢ ܪܳܥܝܳܐ ܠܡܰܘܬܳܐ ܘܰܗܘܳܐ ܠܗܽܘܢ ܕܺܐܒܳܐ ܚܳܛܽܘܦܳܐ. ܠܐ ܦܪܰܫܘ ܠܡܶܕܰܥ ܕܰܐܝܕܳܐ ܗ̄ܝ ܥܶܠܬܳܐ ܕܒܳܗ̇ ܡܶܬܚܰܛܦܺܝܢ ܡܶܢ ܚܰܝܽܘܬܳܐ ܒܺܝܫܬܳܐ ܗܢܘ ܡܰܘܬܳܐ. ܘܥܰܠܗܳܕܶܐ ܐܶܬܳܐ ܢܒܺܝܳܐ ܕܢܰܥܶܗܕ ܠܟܽܠܗܽܘܢ ܥܰܡ̈ܡܶܐ. ܕܠܐ ܠܰܡ ܐܰܝܟ ܥܳܢܴ̈ܐ ܬܶܗܘܽܘܢ. ܗܳܐ ܓܶܝܪ ܡܳܐ ܕܡܶܢ ܫܶܠܝܳܐ ܥܳܐܷܠ ܕܺܐܒܳܐ ܘܚܳܛܶܦ ܥܶܪܒܳܐ. ܒܥܶܕܳܢܳܐ ܕܥܳܐܠܳܐ ܓܶܝܪ ܚܰܝܽܘܬ ܫܶܢܳܐ ܠܰܓܙܳܪܳܐ ܕܥܳܢܴ̈ܐ. ܙܳܪܒܳܐ ܢܰܦܫܳܗ̇ ܡܰܪܥܺܝܬܳܐ ܘܩܳܝܡܳܐ ܒܕܶܚܠܬܳܐ ܘܰܒܙܰܘܥܬܳܐ ܘܡܶܬܬܙܺܝܥܳܐ ܘܡܶܬܪܰܗܒܳܐ ܕܰܗܘܳܬ ܗܳܕܶܐ. ܘܡܳܐ ܕܫܰܢܺܝ ܕܺܐܒܳܐ ܘܰܫܩܰܠ ܘܰܢܦܰܩ. ܫܬܶܩ ܠܗ ܡܶܢ ܡܰܫܡܰܥܬܳܗ̇ ܩܳܠܶܗ ܕܗܰܘ ܕܶܐܬܚܛܶܦ ܡܶܢ ܕܺܐܒܳܐ. ܘܒܶܗ ܒܥܶܕܳܢܳܐ ܫܰܡܪܰܬ ܦܽܘܡܳܗ̇ ܠܡܶܪܥܳܐ ܘܠܰܡܗܰܠܳܟܽܘ. ܘܰܐܝܟ ܗܰܘ ܕܡܶܕܶܡ ܠܳܐ ܗܘܳܐ ܠܳܗ̇. ܡܶܬܚܰܫܚܳܐ ܒܽܐܘܟܠܳܐ ܘܰܒܫܶܩܝܳܐ. ܒܗܳܠܶܝܢ ܓܶܝܪ ܡܶܬܕܰܡܶܝܢ ܐܰܝܠܶܝܢ ܕܰܐܣܺܝܪܺܝܢ ܒܚܽܘܒܳܐ ܕܚܰܝ̈ܐ ܗܳܠܶܝܢ. ܘܟܰܕ ܛܳܒ ܝܳܕܥܺܝܢ ܕܡܰܘܬܳܐ ܡܶܢ ܣܽܘܥܪܳܢܶܗ ܠܳܐ ܒܳܛܠ. ܒܗܰܘ ܒܰܠܚܽܘܕ ܥܶܕܳܢܳܐ ܕܥܳܐܷܠ ܡܰܘܬܳܐ ܘܚܳܛܶܦ ܢܰܦܫܳܐ ܘܢܳܦܶܩ. ܡܶܬܬܥܺܝܩܺܝܢ ܩܰܠܺܝܠ ܘܡܶܬܟܰܡܪܺܝܢ. ܘܒܳܬܰܪܟܶܢ ܐܰܝܟ ܥܳܢܴ̈ܐ ܥܰܠ ܪܶܥܝܳܐ ܕܰܪ̈ܓܺܝܓܳܬܳܐ ܥܳܛܦܺܝܢ. ܐܶܠܐ ܡܳܢܳܐ ܐܳܡܰܪ ܢܒܺܝܳܐ
ܠܰܫܝܽܘܠ ܢܶܫܬܰܠܡܽܘܢ ܘܡܰܘܬܳܐ ܢܶܪܥܶܐ ܐܶܢܽܘܢ. ܥܰܠ ܡܳܢܳܐ ܗܳܕܶܐ܆ ܥܰܠ ܕܠܳܐ ܢܩܶܦܘ ܠܪܳܥܝܳܐ. ܫܒܰܩ ܐܢܘܢ ܕܢܶܗܘܽܘܢ ܡܶܐܟܽܘܠܬܳܐ ܠܡܰܘܬܳܐ.
ܘܢܶܫܬܰܠܛܽܘܢ ܒܗܽܘܢ ܬܪ̈ܺܝܨܶܐ ܒܨܰܦܪܳܐ. ܘܨܽܘܪܰܬܗܽܘܢ ܬܒܰܠܐܷ ܫܝܽܘܠ. ܘܡܶܢ ܬܶܫܒ̈ܚܳܬܗܽܘܢ ܢܶܬܕܰܚܩܽܘܢ. ܕܰܒܨܰܦܪܳܐ ܕܶܝܢ ܡܶܫܬܰܠܛܺܝܢ ܒܗܽܘܢ ܬܪ̈ܺܝܨܶܐ ܒܨܰܦܪܳܐ. ܥܰܠ ܕܨܰܦܪܳܐ ܡܶܬܩܪܶܐ ܢܽܘܚܳܡܳܐ ܗܳܝܕܶܝܢ ܡܶܫܬܰܠܛܺܝܢ ܒܗܽܘܢ ܕܺܝ̈ܢܰܘܗܝ ܕܪܳܥܝܳܐ. ܘܠܰܘ ܡܚܰܦܝܳܐܝ̣ܬ ܗܳܘܶܐ ܕܺܝܢܳܐ. ܐܶܠܐ ܝܰܬܺܝܪ ܓܰܠܝܳܐܝ̣ܬ ܘܰܒܢܽܘܗܪܳܐ. ܘܕܰܡܒܰܠܝܳܐ ܨܽܘܪ̈ܳܬܗܽܘܢ ܫܝܽܘܠ. ܡܶܛܠ ܕܡܶܫܬܰܩܠܳܐ ܡܶܢ ܒܢܰܝ̈ܢܳܫܳܐ ܗܳܢܽܘܢ ܨܽܘܪܬܳܐ ܕܰܐܠܳܗܳܐ. ܘܰܕܡܽܘܬܳܐ ܕܥܳܒܽܘܕܳܐ ܕܶܐܬܬܰܩܰܢܘ ܒܳܗ̇. ܘܢܳܦܠܳܐ ܥܠܰܝܗܽܘܢ ܕܡܽܘܬܶܗ ܕܚܶܘܝܳܐ ܡܶܬܝܰܕܥܳܢܳܐ ܗܳܝ ܕܰܪܚܰܡܘ. ܠܐ ܓܶܝܪ ܡܶܫܟܚܳܐ ܕܢܶܫܬܰܠܛܽܘܢ ܥܠܰܝܗܽܘܢ ܛܪ̈ܽܘܢܶܐ. ܐܶܠܐ ܟܰܕ ܫܳܩܶܠ ܡܰܠܟܳܐ ܡܶܢܗܽܘܢ ܛܰܒܥܶܗ ܕܰܥܠܰܝܗܽܘܢ. ܐܰܝܟ ܗܳܝ ܕܣܰܒܘ ܠܰܡ ܟܰܟܪܳܐ ܡܶܢ ܥܰܒܕܳܐ ܒܺܝܫܳܐ ܘܰܚܒܰܢܳܢܳܐ ܘܰܐܦܶܩܽܘܢܳܝܗܝ ܠܚܶܫܽܘܟܳܐ ܒܰܪܳܝܳܐ (ܡܬܝ ܟܗ: ܟܚ ܠ). ܘܗܳܝܕܶܝܢ ܕܶܐܡܰܪ ܕܡܶܢ ܬܶܫܒ̈ܚܳܬܗܽܘܢ ܢܶܬܕܰܚܩܽܘܢ. ܕܠܰܝܬ ܡܶܟܺܝܠ ܐܺܝܩܳܪܳܐ ܠܡܰܠܟܳܐ ܕܪܽܘܫܥܳܐ ܘܰܠܕܰܝܳܢܳܐ ܕܥܰܘܠܳܐ. ܢܒܺܝܳܐ ܕܶܝܢ ܡܨܰܠܶܐ ܘܳܐܡܰܪ:
ܐܰܠܳܗܳܐ ܢܶܦܪܩܺܝܗ̇ ܠܢܰܦܫܝ: ܘܡܶܢ ܐܺܝܕܳܐ ܕܰܫܝܽܘܠ ܢܰܣܒܰܢܝ. ܬܰܪܬܶܝܢ ܨܳܒܶܐ ܢܒܺܝܳܐ ܕܢܰܐܠܶܦ ܒܗܳܕܶܐ܆ ܟܰܕ ܫܳܐܷܠ ܦܽܘܪܩܳܢܳܐ ܕܡܶܢ ܐܰܠܳܗܳܐ. ܐܳܦ ܡܰܣܰܩܬܳܐ ܠܢܰܦܫܶܗ ܡܶܢ ܫܝܽܘܠ.
ܘܠܳܐ ܠܰܡ ܬܶܕܚܰܠ ܡܳܐ ܕܥܳܬܰܪ ܓܰܒܪܳܐ ܘܣܳܓܶܐ ܐܺܝܩܳܪܳܐ ܕܒܰܝܬܶܗ. ܡܶܛܠ ܕܠܳܐ ܢܳܣܶܒ ܡܶܕܶܡ ܒܡܰܘܬܶܗ: ܘܳܐܦܠܳܐ ܢܳܚܶܬ ܒܳܬܪܶܗ ܫܽܘܒܚܶܗ. ܡܶܛܠ ܕܢܰܦܫܶܗ ܗܽܘ ܡܒܰܪܶܟ ܒܚܰܝܰܘ̈ܗܝ. ܗܳܢܳܐ ܐܺܝܬܰܘܗܝ ܗܰܘ ܥܰܬܺܝܪܳܐ ܕܶܐܡܰܪ ܡܳܪܰܢ܆ ܕܰܐܥܠܰܬ ܠܶܗ ܐܰܪܥܶܗ ܥܱ̈ܠܠܳܬܳܐ ܣܰܓܺܝ̈ܐܬܳܐ (ܠܘܩܐ ܝܒ: ܝܘ). ܡܶܛܠ ܗܳܕܶܐ ܐܶܡܰܪ: ܢܒܺܝܳܐ ܕܠܳܐ ܢܳܚܶܬ ܒܳܬܪܶܗ ܫܽܘܒܚܶܗ. ܐܶܠܐ ܡܶܬܒܰܣܰܡ ܗܳܪܟܳܐ ܒܚܰܝ̈ܐ ܕܙܰܒܢܳܐ ܐܰܝܟ ܕܶܐܡܰܪ ܡܳܪܰܢ. ܘܗܳܪܟܳܐ ܦܳܪ̈ܚܳܢ ܪ̈ܓܺܝܓܳܬܶܗ ܐܰܝܟ ܚܶܠܡܳܐ ܕܠܺܠܝܳܐ. ܐܶܬܶܐܡܰܪ ܓܶܝܪ ܠܘܳܬܶܗ ܡܶܢ ܡܳܪܝܳܐ܆ ܫܳܛܝܳܐ ܒܗܳܢܳܐ ܠܺܠܝܳܐ ܢܰܦܫܳܟ ܬܳܒܥܺܝܢ ܠܳܗ̇ ܡܶܢܳܟ. ܘܗܳܠܶܝܢ ܕܛܰܝܶܒܬ ܠܡܰܢ ܢܶܗܘ̈ܝܳܢ (ܠܘܩܐ ܝܒ: ܟ). ܘܰܒܕܰܐܝܟ ܗܳܢܳܐ ܡܰܗܶܠ ܢܒܺܝܳܐ ܘܳܐܡܰܪ:
ܘܢܰܘܕܶܐ ܠܳܟ ܟܰܕ ܬܰܛܶܒ ܠܶܗ. ܘܰܬܡܰܛܶܝܘܗܝ ܥܕܰܡܳܐ ܠܕܳܪܳܐ ܕܰܐܒܳܗܰܘ̈ܗܝ. ܟܡܳܐ ܠܰܡ ܕܢܳܣܶܒ ܡܶܢܳܟ ܡܰܘܕܶܐ ܠܳܟ. ܘܰܒܛܳܒܴ̈ܬܳܟ ܡܰܣܓܶܐ ܡܝܰܩܰܪ ܠܳܟ ܐܶܢܕܶܝܢ ܢܶܙܥܪ̈ܳܢ ܛܳܒܴ̈ܬܶܗ܆ ܒܳܛܠܳܐ ܬܰܘܕܺܝܬܶܗ. ܘܢܶܚܙܶܐ ܗܳܫܳܐ ܐܰܝܟܰܢܳܐ ܥܒܰܕ ܫܽܘܠܳܡܳܐ ܠܡܰܙܡܽܘܪܳܐ ܗܳܢܳܐ܆
ܘܰܥܕܰܡܳܐ ܠܥܳܠܰܡ ܠܳܐ ܢܶܚܙܶܐ ܢܽܘܗܪܳܐ. ܒܰܪܢܳܫܳܐ ܕܒܺܐܝܩܳܪܶܗ ܠܳܐ ܐܶܬܒܰܝܰܢ܆ ܐܶܠܐ ܐܶܫܬܠܶܡ ܠܚܰܝܽܘܬܳܐ ܘܶܐܬܕܰܡܺܝ ܠܳܗ̇. ܠܗܰܘ ܒܰܪܢܳܫܳܐ ܩܰܕܡܳܝܳܐ ܕܒܺܐܝܩܳܪܶܗ ܠܳܐ ܐܶܬܒܰܝܰܢ. ܕܰܡܝܶܗ ܠܗܳܢܳܐ ܠܚܰܝܽܘܬܳܐ. ܘܙܳܕܶܩ ܕܢܶܕܰܥ ܕܠܰܘ ܚܰܕ ܐܶܢܽܘܢ ܬܪ̈ܰܝܗܽܘܢ. ܐܚܪܺܬܳܐ ܗ̄ܝ ܚܰܝܽܘܬܳܐ. ܘܰܐܚܪܺܬܳܐ ܗ̄ܝ ܒܥܺܝܪܳܐ. ܒܥܺܝܪܳܐ ܡܶܬܩܰܛܠܳܢܺܝܬܳܐ ܗ̄ܝ. ܘܚܰܝܽܘܬܳܐ ܩܳܛܽܘܠܬܳܐ ܗ̄ܝ. ܥܰܡܳܐ ܗܰܘ ܩܳܛܽܘܠܐ ܘܡܰܪܳܚܳܐ ܕܨܳܠܽܘ̈ܒܶܐ. ܕܠܳܐ ܐܶܬܒܰܝܰܢ ܒܺܐܝܩܳܪܳܐ ܕܝܰܩܪܶܗ ܐܰܠܗܳܐ. ܐܶܠܐ ܐܰܡܪܰܚ ܗܘܳܐ ܥܰܠ ܥܳܒܽܘܕܶܗ ܘܨܰܠܒܶܗ. ܡܶܢ ܗܳܪܟܳܐ ܒܰܕܰܪ ܫܕܳܝܗܝ ܒܰܐܪ̈ܒܰܥܦܶܢܝܳܢ. ܘܰܚܠܳܦܰܘܗܝ ܡܟܰܪ ܠܶܗ ܥܰܡܳܐ ܕܡܶܢ ܥܰܡ̈ܡܶܐ. ܚܢܰܢ ܕܠܶܗ ܣܳܓܕܺܝܢܰܢ ܘܰܡܫܰܒܚܺܝܢܰܢ ܘܠܰܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܡܫܝܢ
ܥܰܠ ܡܶܐܬܺܝܬܶܗ ܕܬܰܪܬܶܝܢ ܕܥܰܡܰܢܽܘܐܝܠ ܕܡܶܢ ܫܡܰܝܳܐ: ܘܥܰܠ ܕܺܝܢܳܐ ܘܰܬܒܰܥܬܳܐ ܕܥܳܒ̈ܕܰܝ ܒܺܝ̈ܫܶܐ: ܘܥܰܠ ܡܰܟܣܳܢܽܘܬܳܐ ܕܥܰܡܳܐ ܝܺܣܪܳܐܝܠ.
ܒܐܪ̈ܳܙܶܐ ܪܰܘܪ̈ܒܶܐ ܘܰܒܦܷ̈ܠܳܐܬܳܐ ܡܥܰܠܝܴ̈ܬܳܐ ܐܶܬܡܰܠܠܰܬ ܒܰܢܒܺܝ̈ܐ ܩܰܕܺܝ̈ܫܐ ܡܶܐܬܝ̣ܬܶܗ ܕܥܰܡܰܢܽܘܐܝܠ ܡ̣ܢ ܫܡܰܝܳܐ܆ ܠܰܘ ܒܰܠܚܽܘܕ ܗܳܝ ܕܰܗܘܳܬ ܒܬܶܕܡܽܘܪܬܳܐ ܡ̣ܢ ܒܬܽܘܠܬܐ ܘܝܳܠܕܰܬ ܐܠܗܐ ܒܰܒܣܰܪ. ܐܶܠܐ ܗܳܝ ܡܫܰܒܰܚܬܳܐ ܡܥܰܠܝܰܬ ܡ̣ܢ ܟ̇ܠ܆ ܕܰܥܬܝ̣ܕܳܐ ܕܬܶܗܘܶܐ ܒܫܽܘܒܚܳܐ ܘܰܒܙܰܘܚܳܐ ܪܰܒܳܐ ܕܡܰܫܪ̈ܝܳܬܳܐ ܕܥܶܠܳܝ̈ܐ. ܡܳܐ ܕܡܶܬܓܠܶܐ ܕܢܶܥܒܶܕ ܬܒܰܥܬܳܐ ܒܓܽܘܘܙܳܠܳܐ ܕܢܽܘܪܳܐ. ܡ̣ܢ ܗܳܢܘ̇ܢ ܕܠܐ ܝ̣ܕܰܥܘ ܠܰܐܠܗܐ. ܘܡ̣ܢ ܗܳܢܘ̇ܢ ܕܠܐ ܐܫܶܬܰܘܕܰܥܘ ܠܰܣܒܰܪܬܳܐ: ܘܗܳܝܕܶܝܢ ܡ̣ܢ ܒܳܬܰܪ ܟܕ ܡܰܥܶܠ ܠܰܢܝܳܚܬܶܗ. ܠܗܳܢܘ̇ܢ ܕܰܦܠܰܚܘ ܟܺܐܢܽܘܬܳܐ ܘܰܢܛܰܪܘ ܗܘܰܘ ܦܽܘܩܕܳܢܰܘ̈ܗܝ. ܒܪܰܡ ܕܶܝܢ ܡܶܛܠ ܡܰܙܡܽܘܪܳܐ ܗܳܢܳܐ ܕܚܰܡܫܺܝܢ ܐܪܳܙܳܐ ܕܓܶܠܝܳܢܶܗ ܕܥܰܡܰܢܽܘܐܝܠ ܟܺܐܢܳܐ ܕܳܐܦ ܒܶܗ ܒܡܶܢܝܳܢܳܐ ܢܶܣܬܰܟܰܠ܆ ܕܡܶܛܠ ܡܳܢܳܐ ܒܡܶܢܝܳܢܳܐ ܗܳܢܳܐ ܐܪܳܙܳܐ ܗܳܢܳܐ ܐܶܬܟܬܶܒ. ܟܰܕ ܛܳܒ ܗܽܘ ܡܰܙܡܽܘܪܳܐ ܠܳܐ ܕܳܡܝܳܐ ܕܰܒܗܳܢܳܐ ܙܰܒܢܳܐ ܐܰܡܺܝܪ ܗܘܳܐ ܠܰܢܒܺܝܳܐ. ܐܶܠܐ ܐܰܝܟ ܗܰܘ ܕܒܳܬܰܪ ܗܰܘ ܕܶܫܬܺܝܢ ܐܰܡܺܝܪ܆ ܣܰܓܺܝ̈ܐܬܳܐ ܓܶܝܪ ܐܶܬܡܰܠܰܠܝ̈ ܡ̣ܢ ܢܒܺܝ̈ܐ ܩܰܕܡܳܝܴ̈ܬܳܐ: ܘܶܐܬܟ̈ܬܶܒܝ ܡܶܨܥܳܝܴ̈ܬܳܐ. ܐܳܦ ܣܰܓܺܝ̈ܐܬܳܐ ܐܶܬܶܐܡܰܪ̈ܝ ܐܚܪ̈ܳܢܝܳܬܳܐ: ܘܶܐܬܟܬܶܒ̈ܝ ܩܰܕܡܳܝ̈ܬܳܐ. ܘܗܳܕܶܐ ܦܰܪܢܶܣ ܪܽܘܚܳܐ ܕܰܐܠܗܐ. ܥܰܠ ܕܠܐ ܝ̣ܕܰܥ ܐܢܳܫ ܙܰܒܢ̈ܐ ܥܰܡܺܝ̈ܩܶܐ ܕܓܶܠܝܳܢܰܘ̈ܗܝ ܕܰܒܪܳܐ. ܐܰܟܡܰܢ ܕܚܳܣܶܡ ܐܰܠܗܐ ܒܗܳܕܶܐ ܚܳܣ. ܐܶܠܐ ܡܶܛܠ ܕܗܳܕܶܐ ܡܥܰܕܪܳܐ ܕܰܒܣܰܒܪܳܐ ܢܣܰܟܽܘܢ ܒܢܰܝ̈ܢܳܫܳܐ ܠܕܶܢܚܰܘ̈ܗܝ ܕܥܰܡܰܢܽܘܐܝܠ ܘܰܠܓܶܠܝܳܢܰܘ̈ܗܝ ܕܡ̣ܢ ܫܡܰܝܳܐ. ܩܰܕܡܳܝܳܐ ܡ̇ܢ ܛܽܘܒܳܢܳܐ ܡܽܘܫܶܐ܆ ܟܕ ܠܗܳܢܳܐ ܡܶܢܝܳܢܳܐ ܕܚܰܡܫܺܝܢ ܓܡܺܝܪܳܐ ܘܰܡܫܰܡܠܝܳܐ ܣܳܐܷܡ ܠܶܗ܆ ܘܰܕܠܰܝܬ ܒܳܬܰܪ ܦܰܢܛܺܝܩܽܘܣܛܺܝ ܩܰܕܺܝܫܬܳܐ ܘܰܡܫܰܡܠܳܝܬܳܐ ܠܳܐ ܥܰܒ̈ܕܶܐ ܡ̣ܢ ܓܒܰܝܴ̈ܐ ܘܠܐ ܬܰܘܬܳܒܽܘܬܳܐ ܕܥܰܡܳܐ ܩܰܕܺܝܫܳܐ. ܘܠܐ ܕܰܡܫܰܟܰܢ ܒܶܐܫܛܳܪ̈ܶܐ ܕܚܰܘܒܬܳܐ ܡܶܬܝܰܕܥܳܢܺܝܬܳܐ. ܐܶܢ ܡ̣ܢ ܝ̣ܣܪܳܐܝܠ ܕܰܐܠܗܐ ܐܺܝܬܰܘܗܝ. ܘܠܐ ܕܬܳܒܰܥ ܫܶܩ̈ܠܶܐ ܘܡܰܕ̈ܐܬܶܐ ܕܰܐܪ̈ܥܳܬܳܐ. ܐܶܠܐ ܟܽܠ ܬܳܒܽܘ̈ܥܺܝܢ ܒܳܛܠܺܝܢ. ܘܟܠ ܚܰܘ̈ܒܳܢ ܕܟܺܐܢ̈ܐ ܡܶܬܦܰܪ̈ܥܳܢ. ܘܰܐܝܟ ܕܰܒܐܪܳܙܳܐ ܥܰܡܺܝܩܳܐ ܡܦܰܩܶܕ ܗܘܳܐ. ܕܡܳܐ ܠܰܡ ܕܥܰܠܬܽܘܢ ܠܰܐܪܥܳܐ ܕܡܳܪܝܳܐ ܐܰܠܳܗܟܽܘܢ. ܝܳܗܶܒ ܠܟܽܘܢ ܝܽܘܪܬܳܢܳܐ (ܟܗ̈ܢܐ ܟܗ: ܒ). ܟܬܺܝܒ ܕܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܶܐܡܰܪ ܠܶܗ: ܡܰܠܶܠ ܥܰܡ ܒܢܰܝ̈ ܝ̣ܣܪܳܐܝܠ ܘܶܐܡܰܪ ܠܗܽܘܢ܆ ܡܳܐ ܕܥܰܠܬܽܘܢ ܠܰܐܪܥܳܐ ܕܝܳܗܶܒ ܠܟܽܘܢ ܝܽܘܪܬܳܢܳܐ܆ ܬܫܰܒܶܬ ܐܰܪܥܳܐ ܫܰܒܬܳܐ ܠܡܳܪܝܳܐ. ܫܶܬ ܫܢܺܝ̈ܢ ܬܶܙܪܥܽܘܢ ܚܰܩ̈ܠܳܬܟܽܘܢ. ܫܶܬ ܫܢܺܝ̈ܢ ܬܶܟܣܚܽܘܢ ܟܰܪ̈ܡܰܝܟܽܘܢ ܘܫܶܬ ܫܢܺܝ̈ܢ ܗܘܰܝܬܽܘܢ ܚܳܡܠܺܝܢ ܥܰܠܠܳܬܟܽܘ̈ܢ. ܘܫܰܢ̱ܬܳܐ ܕܰܫܒܰܥ ܫܰܒܰܬ ܫܰܒ̈ܐ ܬܶܗܘܶܐ ܠܰܐܪܥܳܐ. ܘܬܶܗܘܶܐ ܠܟܽܘܢ ܫܰܒܬܳܐ ܠܡܳܪܝܳܐ. ܚܰܩ̈ܠܳܬܟܽܘܢ ܠܳܐ ܬܶܚܨܕܽܘܢ. ܘܠܐ ܬܶܟܣܚܽܘܢ ܟܰܪ̈ܡܰܝܟܽܘܢ ܘܟܳܬܳܐ ܕܰܚܨܳܕܟܽܘܢ ܠܐ ܬܶܚܨܕܽܘܢ. ܘܥܶܢܒ̈ܐ ܕܰܫܒܺܝ̈ܫܳܬܟܽܘܢ ܠܐ ܬܶܩܛܦܽܘܢ. ܫܰܢ̱ܬܳܐ ܕܫܰܒܬܳܐ ܬܶܗܘܶܐ ܠܰܐܪܥܳܐ. ܘܬܶܗܘܶܐ ܠܟܽܘܢ ܫܰܒܬܳܐ ܕܰܐܪܥܳܐ ܠܡܶܐܟܽܘܠܬܳܐ܆ ܠܟܽܘܢ ܘܰܠܥܰܒ̈ܕܰܝܟܽܘܢ ܘܠܰܐܡܗܴ̈ܬܟܽܘܢ ܘܠܰܐܓܺܝܪ̈ܰܝܟܽܘܢ ܘܰܠܬܰܘ̈ܬܳܒܶܐ ܕܥܳܡܪܺܝܢ ܥܰܡܟܽܘܢ. ܘܠܰܒܥܺܝܪܟܽܘܢ ܘܰܠܚܰܝܽܘܬܳܐ ܕܒܰܐܪܥܟܽܘܢ. ܘܬܶܗܘܶܐ ܠܟܽܘܢ ܟܽܠܳܗ̇ ܥܠܰܠܬܳܐ ܠܡܶܐܟܽܘܠܬܳܐ. ܘܰܡܢܰܘ ܠܟܽܘܢ ܫܒܰܥ ܙܰܒܢܺܝ̈ܢ ܕܫܰܒ̈ܐ. ܫܒܰܥ ܫ̈ܢܺܝܢ ܥܰܠ ܫܒܰܥ ܙܰܒܢܺܝ̈ܢ. ܘܢܶܗܘܽܘܢ ܠܟܽܘܢ ܝܰܘ̈ܡܳܬܳܐ ܕܰܫܢܰܝܴ̈ܐ܆ ܐܰܪܒܥܺܝܢ ܘܰܬܫܰܥ ܫܢܺܝ̈ܢ. ܘܰܩܪܰܘ ܒܫܺܝܦܽܘܪܳܐ ܕܝܽܘܒܳܒܳܐ ܒܰܥܣܰܪܬܳܐ ܒܝܰܪܚܳܐ ܕܫܰܒܥܳܐ ܒܝܰܘܡܳܐ ܕܚܽܘܣܳܝܳܐ. ܘܰܩܪܰܘ ܒܫܺܝܦܽܘܪܳܐ ܒܟܽܠܳܗ̇ ܐܰܪܥܟܽܘܢ. ܘܩܰܕܫܽܘܗ̇ ܠܰܫܢܰܬ ܫܢܺܝ̈ܢ ܚܰܡܫܺܝܢ. ܘܰܩܪܰܘ ܚܺܐܪܽܘܬܳܐ ܒܰܐܪܥܳܐ ܠܟܽܠܗܘ̇ܢ ܥܳܡܽܘܪ̈ܶܝܗ̇. ܘܦܽܘܢܳܝܳܐ ܢܶܗܘܶܐ ܠܟܽܘܢ. ܘܢܶܗܦܽܘܟ ܐܢܳܫ ܠܝܳܪܬܽܘܬܶܗ. ܘܐܢܳܫ ܠܫܰܪܒܬܶܗ ܘܦܽܘܢܳܝܳܐ ܒܫܰܢܬܳܐ ܗܳܝ ܕܚܰܡܫܺܝܢ ܢܶܗܘܶܐ ܠܟܽܘܢ (ܟܗ̈ܢܐ ܟܗ: ܒ-ܝܐ). ܘܗܳܠܶܝܢ ܡܰܢ ܥܰܡܺܝܩܳܐܝ̣ܬ ܘܦܶܠܳܐܬܳܢܳܐܝ̣ܬ ܡܽܘܫܶܐ ܟܬܰܒ ܐܶܢܶܝܢ. ܠܘܳܬ ܥܰܡܳܐ ܗܰܘ ܕܰܐܣܺܝܪ ܗܘܳܐ ܒܪܶܚܡܰܬ ܐܰܪܥܳܐ ܕܦܶܠܶܣܛܺܝܢܺܝ. ܟܰܕ ܗܰܘ ܫܰܒܬܳܐ ܩܰܕܡܳܝܬܳܐ ܨܳܐܪ ܗܘܳܐ ܠܚܺܐܪܽܘܬܳܐ ܗܳܕܶܐ ܩܰܕܡܳܝܬܳܐ. ܕܰܥܒܰܕ ܐܰܠܳܗܳܐ ܒܓܶܠܝܳܢܶܗ. ܗܰܘ ܕܶܝܢ ܐܚܪܺܢܳܐ ܕܰܓܡܺܝܪ ܘܰܡܫܰܡܠܰܝ. ܗܳܘܶܐ ܗܘܳܐ ܓܶܝܪ ܒܦܰܢܛܺܝܩܽܘܣܛܺܝ ܕܰܫܢܰܝܴ̈ܐ ܚܰܡܫܺܝܢ. ܡܰܥܛܶܦ ܗܘܳܐ ܠܟܽܠ ܕܰܢܦܰܩ ܡܶܢ ܚܰܩܠܶܗ ܘܒܰܝܬܶܗ. ܘܗܳܕܶܐ ܗܳܘܝܳܐ ܗܘܳܬ ܡܶܢ ܒܳܬܰܪ ܕܩܳܪܶܐ ܪܰܒ ܟܽܘܡܪ̈ܶܐ ܒܫܺܝܦܽܘܪܳܐ. ܒܥܰܕܥܺܐܕܳܐ ܪܰܒܳܐ ܕܰܡ̈ܛܰܠܐ. ܘܡܶܢ ܒܳܬܰܪ ܗܳܢܳܐ ܩܳܠܐ. ܩܳܢܶܝܢ ܗܘܰܘ ܥܰܒ̈ܕܶܐ ܚܺܐܪܽܘܬܳܐ܆ ܘܚܰܝܳܒ̈ܐ ܡܶܬܚܰܪܪܺܝܢ ܗܘܰܘ ܡܶܢ ܚܰܘ̈ܒܳܬܳܐ܆ ܘܰܛܪ̈ܺܝܕܶܐ ܦܳܢܶܝܢ ܗܘܰܘ ܠܝܳܪܬܽܘܬܗܽܘܢ. ܘܡܳܐ ܕܶܐܬܡܰܠܝܰܬ ܦܰܢܛܺܝܩܽܘܣܛܺܝ ܕܥܳܠܡܳܐ ܗܳܢܳܐ. ܫܰܢ̱ܬܳܐ ܓܶܝܪ ܕܚܰܡܫܺܝܢ ܐܪܳܙ ܫܽܘܠܳܡܶܗ ܕܥܳܠܡܳܐ ܗܳܢܳܐ ܕܰܚܢܰܢ ܒܶܗ. ܗܳܝܕܶܝܢ ܡܫܰܪܶܐ ܓܶܠܝܳܢܶܗ ܕܥܰܡܰܢܽܘܐܝܠ ܠܡܶܬܚܙܳܝܽܘ ܘܰܚܠܳܦ ܪܰܒ ܟܽܘܡܪ̈ܶܐ܆ ܫܳܩܶܠ ܪܺܝܫ ܡܰܠܐܟ̈ܐ ܩܰܪܢܳܐ ܪܰܒܬܳܐ. ܘܩܳܥܶܐ ܩܕܳܡ ܙܰܘܚܶܗ ܕܡܶܠܬܳܐ ܐܰܠܗܳܐ. ܐܰܝܟ ܡܶܠܬܶܗ ܕܦܰܘܠܽܘܣ ܕܶܐܡܰܪ. ܡܶܛܠ ܕܗܽܘ ܡܳܪܰܢ ܒܦܽܘܩܕܳܢܳܐ. ܘܰܒܩܳܠܐ ܕܪܺܝܫ ܡܰܠܐܟ̈ܐ. ܘܰܒܩܰܪܢܳܐ ܕܰܐܠܗܳܐ܆ ܢܳܚܶܬ ܡܶܢ ܫܡܰܝܳܐ (ܐ ܬܣ̈ܠܘܢܝܩܝܐ ܕ: ܝܘ). ܗܳܝܕܶܝܢ ܡܳܐ ܕܰܐܙܥܶܩ ܪܺܝܫ ܡܰܠܐܟ̈ܐ ܒܫܺܝܦܽܘܪܳܐ ܪܰܒܳܐ. ܗܰܘ ܕܡܶܢ ܫܠܺܝܚܳܐ ܩܰܪܢܳܐ ܐܶܬܩܪܺܝ. ܢܳܚܶܬ ܦܽܘܩܕܳܢܳܐ ܡܳܪܳܢܳܝܳܐ ܒܳܬܰܪ ܡܒܰܕܪ̈ܶܐ ܕܺܝܣܪܳܐܝܠ. ܘܦܳܩܶܕ ܕܢܶܦܢܶܐ ܐܳܕܳܡ ܗܰܘ ܕܗܽܘ ܩܰܕܡܳܝܳܐ ܙܰܒܶܢ ܝܳܪܬܽܘܬܶܗ ܗܳܝ ܕܰܥܕܶܝܢ ܠܚܶܘܝܳܐ ܕܰܐܦܩܶܗ ܒܦܺܐܪܳܐ ܕܰܩܛܰܦ ܡܶܢ ܐܺܝܠܳܢܳܐ. ܘܥܰܡܶܗ ܟܽܠܗܽܘܢ ܩܰܕܺܝ̈ܫܶܐ. ܟܰܕ ܡܶܬܚܰܪܪܺܝܢ ܡܶܢ ܫܽܘܥܒܳܕܶܗ ܕܡܰܘܬܳܐ ܘܕܰܫܝܽܘܠ. ܟܰܕ ܡܩܰܒܠܺܝܢ ܝܳܪܬܽܘܬܳܐ ܗܳܝ ܕܰܡܣܰܟܶܝܢ ܗܘܰܘ ܠܳܗ̇ ܒܰܫܡܰܝܳܐ. ܘܬܽܘܒ ܠܳܐ ܗܳܘܶܝܢ ܥܰܒ̈ܕܶܐ ܠܰܚܛܺܝܬܳܐ. ܘܬܽܘܒ ܠܳܐ ܡܶܬܟܰܬܒܺܝܢ ܐܶܫܛܳܪ̈ܶܐ ܕܚܰܘ̈ܒܳܬܳܐ. ܕܚܺܐܪܽܘܬܳܐ ܡܰܢ ܡܶܬܝܰܗܒܳܐ ܠܟܽܠܗܽܘܢ ܩܰܕܺܝ̈ܫܶܐ. ܐܶܡܰܪ ܓܶܝܪ ܗܳܟܰܢܳܐ ܡܙܰܡܪܳܢܳܐ.
ܐܰܠܳܗ ܐܰܠܳܗܺܝ̈ܢ ܡܳܪܝܳܐ ܡܰܠܶܠ܆ ܘܰܩܪܳܗ̇ ܠܰܐܪܥܳܐ ܡܶܢ ܡܰܕܢܳܚܰܘ̈ܗܝ ܕܫܶܡܫܳܐ ܥܕܰܡܳܐ ܠܡܰܥܪ̈ܳܒܰܘܗܝ. ܡܶܢ ܨܶܗܝܽܘܢ ܟܠܺܝܠܳܐ ܡܫܰܒܚܳܐ ܐܰܠܳܗܳܐ ܚܰܘܺܝ. ܢܺܐܬܶܐ ܐܠܰܗܳܐ ܘܠܳܐ ܢܶܫܬܽܘܩ: ܢܽܘܪܳܐ ܬܶܐܟܽܘܠ ܩܕܳܡܰܘܗܝ: ܘܰܚܕܳܪ̈ܰܘܗܝ ܬܶܬܓܰܘܙܰܠ ܛܳܒ. ܢܶܩܪܶܐ ܠܰܫܡܰܝܳܐ ܡܶܢ ܠܥܶܠ ܘܰܐܪܥܳܐ ܠܰܡܕܳܢ ܥܰܡܶܗ. ܡܶܛܠܡܳܢܳܐ ܐܰܪܰܐ ܡܫܰܪܶܐ ܘܳܐܡܰܪ: ܐܰܠܳܗ ܐܰܠܳܗ̈ܝܢ ܡܳܪܝܳܐ ܡܰܠܶܠ܆ ܕܕܰܠܡܳܐ ܡܶܛܠ ܕܢܰܘܕܰܥ ܕܰܐܠܳܗܳܐ ܕܗܳܠܶܝܢ ܕܰܓܳܠܰܝ̈ ܫܡܳܐ ܐܺܝܬܰܘܗܝ. ܘܰܐܝܟܰܢ ܠܳܐ ܛܳܒ ܫܟܺܝܪܳܐ ܗܳܕܶܐ܆ ܗܳܢܽܘܢ ܕܺܐܝܬܰܝܗܽܘܢ ܕܰܝ̈ܘܶܐ ܡܰܛܥܝܳܢ̈ܐ ܪܽܘܚܳܐ ܕܰܐܠܳܗܳܐ ܠܳܐ ܩܳܪܶܐ ܗܘܳܐ ܠܗܽܘܢ ܐܰܠܳܗ̈ܐ. ܡܶܛܠ ܕܩܰܕܶܡ ܐܶܡܰܪ ܢܒܺܝܳܐ܆ ܕܰܐܠܳܗ̈ܐ ܕܰܫܡܰܝܳܐ ܘܰܐܪܥܳܐ ܠܳܐ ܥܒܰܕܘ܆ ܢܺܐܒܕܽܘܢ ܡܶܢ ܬܚܶܝܬ ܫܡܰܝܳܐ (ܐܪܡܝܐ ܝ: ܝܐ). ܘܰܡܙܰܡܪܳܢܳܐ ܬܽܘܒ ܐܶܡܰܪ܆ ܡܶܛܠ ܕܟܽܠܗܽܘܢ ܐܰܠܳܗ̈ܐ ܕܥܰܡ̈ܡܶܐ ܣܪܺܝܩܺܝܢ ܐܶܢܘ̇ܢ (ܡܙܡܘܪܐ ܨܘ: ܗ) ܗܳܢܰܘ ܕܕܰܝ̈ܘܶܐ ܐܶܢܘ̇ܢ ܐܰܠܳܗ̈ܐ ܕܥܰܡ̈ܡܶܐ. ܡܳܕܶܝܢ ܠܳܐ ܙܳܕܶܩ ܕܢܺܐܡܰܪ ܥܰܡܰܢܽܘܐܝܠ ܐܰܠܳܗܳܐ ܕܗܳܠܶܝܢ܆ ܐܰܠܳܗ ܐܰܠܳܗ̈ܝ̣ܢ ܡܳܐ ܕܡܰܘܕܰܥ ܟܬܳܒܳܐ܆ ܘܰܐܟܙܢܳܐ ܕܡܶܬܩܪܶܐ ܡܠܶܟ ܡܰܠܟ̈ܐ. ܪܺܝܫܳܐ ܕܡܰܠܟ̈ܐ ܡܶܬܺܝܕܰܥ ܒܗܳܕܶܐ. ܗܳܟܰܢܳܐ ܐܰܠܳܗ ܐܰܠܳܗ̈ܝ̣ܢ ܡܰܠܟܳܐ ܕܰܐܠܳܗ̈ܐ ܡܶܬܺܝܕܰܥ ܕܶܝܢ ܕܺܐܝܬܰܘܗܝ. ܡܳܕܶܝܢ ܐܺܝܬ ܗ̱ܘ ܐܰܠܳܗ̈ܐ ܗܳܠܶܝܢ ܕܰܐܘܕܰܥ ܡܙܰܡܪܳܢܳܐ ܙܳܕܶܩ ܕܢܶܕܰܥ ܕܰܐܝܠܶܝܢ ܐܶܢܘ̇ܢ ܐܰܠܳܗ ܐܰܠܳܗ̈ܝ̣ܢ. ܥܰܠ ܗܳܢܽܘܢ ܕܒܶܝܬ ܫܺܝܬ. ܕܩܰܕܶܡ ܙܰܡܰܪ ܪܽܘܚܳܐ ܥܠܰܝܗܽܘܢ. ܕܶܐܢܳܐ ܠܰܡ ܐܶܡܪܶܬ ܕܰܐܠܳܗܝ̈ܢ ܐܰܢܬܽܘܢ (ܡܙܡܘܪܐ ܦܒ: ܘ ܝܘܚܢܢ ܝ: ܠܕ). ܘܬܽܘܒ ܡܰܟܬܒܳܢܳܐ ܩܰܕܡܳܝܳܐ ܡܽܘܫܶܐ ܒܢܰܝ̈ ܐܰܠܳܗ̈ܐ ܩܪܳܐ ܐܶܢܘ̇ܢ. ܘܬܽܘܒ ܠܛܽܘܒܳܢܳܐ ܡܽܘܫܶܐ ܐܶܡܰܪ ܐܰܠܳܗܳܐ܆ ܚܙܺܝ ܕܝܰܗܒܬܳܟ ܐܰܠܳܗܳܐ ܠܦܶܪܥܽܘܢ (ܡܦܩܢܐ ܙ: ܐ). ܘܛܽܘܒܳܢܳܐ ܝܽܘܚܰܢܳܢ ܐܶܘܰܢܓܶܠܺܝܣܛܳܐ ܐܰܘܕܰܥ. ܚܰܒܺܝ̈ܒܰܝ܆ ܗܳܫܳܐ ܒܢܰܘ̈ܗܝ ܚܢܰܢ ܕܰܐܠܳܗܳܐ (ܐ ܝܘܚܢܢ ܓ: ܒ). ܘܰܒܢܰܘ̈ܗܝ ܕܰܐܠܳܗܳܐ ܡܶܬܩܪܶܝܢ ܐܰܠܳܗ̈ܐ ܒܛܰܝܒܽܘܬܳܐ. ܡܳܕܶܝܢ ܐܰܠܳܗ̈ܐ ܕܶܐܡܪ ܬܢܳܢ ܡܙܰܡܪܳܢܳܐ. ܠܟܽܠܗܽܘܢ ܩܰܕܺܝ̈ܫܶܐ ܗܳܠܶܝܢ ܕܰܩܢܶܝܢ ܪܺܝܫܳܝܽܘܬ ܩܝܳܡܬܳܐ ܫܰܡܰܗ. ܗܳܠܶܝܢ ܕܶܐܡܰܪ ܥܠܰܝܗܽܘܢ ܥܰܡܰܢܽܘܐܝܠ ܒܰܢܒܺܝܳܐ. ܕܶܐܣܰܒܰܪ ܫܡܳܟ ܠܰܐܚܰܝ̈ (ܡܙܡܘܪܐ ܟܒ: ܟܓ ܥܒܪ̈ܝܐ ܒ: ܝܒ) ܘܗܳܠܶܝܢ ܕܰܩܪܳܐ ܐܶܢܽܘܢ ܐܰܚܰܝ̈ ܙܥܽܘܪ̈ܶܐ. ܟܰܕ ܓܶܝܪ ܡܶܢ ܫܡܰܝܳܐ ܢܳܚܶܬ ܐܰܝܟ ܡܰܠܟܳܐ ܘܰܐܠܳܗܳܐ. ܥܰܡܶܗ ܡܚܰܘܶܐ ܠܗܽܘܢ ܠܩܰܕܺܝ̈ܫܶܐ. ܘܰܒܬܶܫܒܽܘܚܬܶܗ ܐܰܠܳܗܳܝܬܳܐ ܡܰܘܪܶܒ ܠܗܽܘܢ. ܘܰܫܡܶܗ ܣܳܐܷܡ ܥܠܰܝܗܽܘܢ ܘܰܡܨܰܒܶܬ ܠܗܽܘܢ. ܟܰܕ ܩܳܪܶܐ ܩܰܕܡܳܐܝܰܬ ܠܰܐܪܥܳܐ ܐܶܡܰܪ. ܘܰܩܪܳܗ̇ ܠܰܐܪܥܳܐ ܡܶܢ ܡܰܕܢܳܚܰܘ̈ܗܝ ܕܫܶܡܫܳܐ ܥܕܰܡܳܐ ܠܡܰܥܪ̈ܳܒܰܘܗܝ. ܡܰܕܢܚܳܐ ܡܫܰܘܕܥܳܐ ܥܰܠ ܗܳܢܽܘܢ ܒܢܽܘܗܪܳܐ ܕܺܝܕܰܥܬܳܐ ܓܡܺܝܪܬܳܐ ܕܰܐܠܳܗܳܐ. ܘܥܰܠ ܟܽܠܗܽܘܢ ܒܢܰܝ̈ ܢܽܘܗܪܳܐ. ܡܰܥܪܒܳܐ ܕܶܝܢ ܡܰܠܦܳܐ ܥܰܠ ܐܰܝܠܶܝܢ ܕܰܒܚܶܫܽܘܟܳܐ ܕܰܚܛܺܝܬܳܐ ܡܶܬܗܰܦܟܺܝܢ ܗܘܰܘ. ܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ ܕܰܒܥܳܠܡܳܐ ܗܳܢܳܐ. ܡܳܕܶܝܢ ܐܰܝܠܶܝܢ ܕܡܶܢ ܡܰܕܢܚܳܐ ܡܶܬܩܪܶܝܢ ܠܢܽܘܗܪܳܐ ܡܫܰܢܶܝܢ. ܘܰܐܝܠܶܝܢ ܕܡܶܢ ܡܰܥܪܒܳܐ ܬܽܘܒ ܡܶܬܩܪܶܝܢ. ܐܺܝܬܰܝܗܽܘܢ ܗܳܢܽܘܢ ܕܕܳܚܶܩ ܠܗܽܘܢ ܩܳܠܶܗ ܕܪܳܥܝܳܐ ܠܢܽܘܪܳܐ ܕܰܠܥܳܠܰܡ. ܘܒܳܬܰܪ ܗܳܠܶܝܢ ܐܳܡܰܪ: ܡܶܢ ܨܶܗܝܽܘܢ ܟܠܺܝܠܳܐ ܡܫܰܒܚܳܐ ܐܰܠܳܗܳܐ ܚܰܘܺܝ. ܐܺܝܬ ܕܥܰܠ ܗܳܢܳܐ ܟܠܺܝܠܳܐ. ܕܗܰܘ ܟܠܺܝܠܳܐ ܕܟܽܘ̈ܒܶܐ ܕܶܐܬܬܣܺܝܡ ܒܪܺܝܫܶܗ ܕܰܐܠܳܗܳܐ ܐܺܝܬܰܘܗܝ. ܒܪܰܡ ܕܶܝܢ ܠܳܐ ܕܳܡܝܳܐ ܕܗܳܕܶܐ ܐܺܝܬܶܝܗ̇. ܗܰܘ ܓܶܝܪ ܟܠܺܝܠܳܐ ܗܘܳܐ ܕܨܰܥܪܳܐ ܘܒܶܙܚܳܐ. ܘܠܳܐ ܗܘܳܐ ܕܫܽܘܒܚܳܐ. ܐܶܠܐ ܡܶܛܠ ܕܥܰܠ ܗܰܘ ܓܶܠܝܳܢܳܐ ܕܡܶܢ ܫܡܰܝܳܐ ܐܶܡܰܪ ܬܢܳܢ ܢܒܺܝܳܐ. ܕܥܰܠ ܗܰܘ ܬܳܓܳܐ ܘܰܕܬܶܫܒܽܘܚܬܳܐ ܘܰܕܠܐ ܡܶܬܚܰܒܠܳܢܽܘܬܳܐ. ܕܰܡܚܰܘܶܐ ܥܰܡܰܢܽܘܐܝܠ ܥܰܠ ܪܺܝܫܶܗ ܒܫܽܘܠܳܡܳܐ ܐܰܡܺܝܪܳܐ. ܡܶܢ ܨܶܗܝܽܘܢ ܐܶܡܰܪ ܕܚܰܘܺܝ܆ ܗܳܝܕܶܝܢ ܨܶܗܝܽܘܢ ܫܰܪܺܝܪܬܳܐ ܗܳܝ ܕܰܡܩܰܘܝܳܐ ܠܥܳܠܰܡ ܘܠܳܐ ܥܳܒܪܳܐ ܘܠܳܐ ܡܶܬܥܰܩܪܳܐ. ܗܳܝ ܡܕܺܝܢ̱ܬܳܐ ܕܡܰܡܠܶܟ ܒܳܗ̇ ܡܰܠܟܳܐ ܪܰܒܳܐ ܕܰܠܥܶܠ ܡܶܢ ܫܡܰܝܳܐ. ܘܩܳܝܡܺܝܢ ܒܳܗ̇ ܫܰܒ̈ܛܶܐ ܕܚܰܝ̈ܠܰܘܳܬܳܐ ܩܰܕܺܝ̈ܫܶܐ ܘܬܶܓܡ̈ܐ ܕܥܶܠܳܝ̈ܐ ܡܶܢ ܗܳܕܶܐ ܨܶܗܝܽܘܢ ܕܺܐܝܬܶܝܗ̇ ܡܕܺܝܢ̱ܬܳܐ ܕܠܳܐ ܡܶܬܚܰܒܠܳܢ̈ܐ. ܡܚܰܘܶܐ ܥܰܡܰܢܽܘܐܝܠ ܟܠܺܝܠܳܐ ܡܫܰܒܚܳܐ ܕܠܳܐ ܡܶܬܚܰܒܰܠ. ܡܳܐ ܕܰܒܬܶܫܒܽܘܚܬܳܐ ܡܚܰܘܶܐ ܙܰܘܚܳܐ ܕܡܶܐܬܺܝܬܶܗ. ܠܰܘ ܘܰܒܡܰܟܺܝܟܽܘܬܳܐ ܥܳܒܶܕ ܓܶܠܝܳܢܶܗ܆ ܐܶܠܐ ܒܪܰܒܽܘܬܳܐ ܘܰܒܩܳܠܳܐ ܕܩܰܪ̈ܢܳܬܳܐ ܕܚܰܝ̈ܠܰܘܳܬܳܐ ܥܶܠܳܝ̈ܐ. ܐܰܟܡܳܐ ܕܳܐܦ ܩܕܳܡ ܩܺܐܒܽܘܬܳܐ ܕܡܳܪܝܳܐ ܟܰܕ ܡܶܬܟܰܪܟܳܐ ܠܐܺܝܪܺܝܚܽܘ ܫܰܒܥܳܐ ܟܳܗܢ̈ܐ ܟܕ ܫܩܺܝܠܺܝܢ ܗܘܰܘ ܫܒܰܥ ܩܰܪ̈ܢܳܢ. ܘܩܳܪܶܝܢ ܗܘܰܘ ܒܗܶܝܢ ܩܕܳܡ ܩܺܐܒܽܘܬܳܐ ܘܒܳܬܰܪ ܗܳܠܶܝܢ ܫܒܰܥ ܩܰܪ̈ܢܳܢ ܥܶܠܳܝ̈ܬܳܐ ܕܪ̈ܺܝܫܰܝ ܬܶܓܡ̈ܐ. ܗܳܝܕܶܝܢ ܐܰܝܟ ܦܶܠܶܐܬܳܐ ܗܳܝ ܕܰܒܝܶܫܽܘܥ ܒܰܪܢܽܘܢ ܕܶܐܡܰܪ ܠܟܽܠܶܗ ܥܰܡܳܐ. ܘܰܩܥܰܘ ܩܥܳܬܳܐ ܪܰܒܬܳܐ ܘܰܢܦܰܠ ܫܽܘܪܳܐ ܕܰܡܕܺܝܢ̱ܬܳܐ ܐܺܝܪܺܝܚܽܘ ܥܰܠ ܕܽܘܟܬܶܗ (ܝܫܘܥ ܒܪܢܘܢ ܘ: ܝܛ). ܗܳܝ ܕܰܒܛܽܘܦܣܳܐ ܥܳܠܡܳܐ ܚܰܕܬܳܐ ܡܶܬܡܰܬܠܳܐ. ܦܳܩܶܕ ܝܶܫܘܥ ܡܫܺܝܚܐ ܗܰܘ ܕܡܶܢ ܫܡܰܝܳܐ ܒܫܽܘܠܳܡܳܐ ܠܟܽܠܗܽܘܢ ܚܰܝ̈ܠܰܘܳܬܳܐ ܥܶܠܳܝ̈ܐ. ܟܰܕ ܐܳܡܰܪ ܠܗܽܘܢ ܕܰܩܥܰܘ. ܘܰܒܗܳܕܶܐ ܩܥܳܬܳܐ ܪܰܒܬܳܐ ܘܰܕܚܺܝܠܬܳܐ ܕܠܰܝܬ ܠܡܺܐܡܰܪ ܥܠܶܝܗ̇ ܕܰܟܡܳܐ ܪܰܒ. ܢܳܦܶܠ ܥܳܠܡܳܐ ܟܳܠܶܗ ܡܶܢ ܣܳܟܶܗ ܘܫܳܡܥܺܝܢ ܠܗܳܢܳܐ ܩܳܠܐ ܡܠܶܐ ܕܽܘܡܳܪܳܐ. ܟܽܠܗܽܘܢ ܣܰܘ̈ܦܶܐ ܕܰܐܪܥܳܐ. ܘܗܳܓܶܡ ܫܳܕܶܐ ܒܶܢܝܴ̈ܢܶܐ ܪ̈ܳܡܶܐ ܕܫܽܘܪ̈ܰܝ ܬܺܒܶܝܠ. ܘܫܳܪܶܐ ܫܶܬܶܐܣܶܝ̈ܗ̇ ܕܬܺܒܶܝܠ. ܘܡܰܘܒܶܫ ܝܰܡ̈ܡܶܐ ܘܢܳܦܩܺܝܢ ܩܕܳܡܰܘܗܝ ܢܰܗܪ̈ܰܘܳܬܳܐ ܕܢܽܘܪܳܐ. ܘܠܶܫܳܢ̈ܐ ܕܫܰܠܗܶܒܺܝܬܳܐ ܕܩܰܠܺܝܠܺܝܢ ܡܶܢ ܒܰܪ̈ܩܶܐ ܠܰܡܚܰܒܳܠܽܘ ܐܰܪܥܳܐ. ܐܰܝܟ ܕܶܐܡܰܪ ܢܒܺܝܳܐ. ܘܢܽܘܪܳܐ ܬܶܐܟܽܘܠ ܩܕܳܡܰܘܗܝ ܘܰܚܕܳܪ̈ܰܘܗܝ ܬܶܬܓܰܘܙܰܠ ܛܳܒ. ܐܶܡܰܪ ܓܶܝܪ ܛܽܘܒܳܢܳܐ ܕܳܢܺܝܐܝܠ. ܟܰܕ ܚܙܳܐ ܚܶܙܘܳܐ ܕܕܰܝܳܢܳܐ: ܕܚܳܙܶܐ ܗܘܺܝܬ ܟܽܘܪ̈ܣܰܘܳܬܳܐ ܐܶܬܬܣܺܝܡܘ. ܘܥܰܬܺܝܩ ܝܰܘ̈ܡܳܬܳܐ ܝܬܶܒ܆ ܠܒܽܘܫܶܗ ܐܰܝܟ ܬܰܠܓܳܐ ܚܶܘܳܪܳܐ. ܘܣܰܥܪܳܐ ܕܪܺܝܫܶܗ ܐܰܝܟ ܥܰܡܪܳܐ ܕܰܟܝܳܐ. ܘܟܽܘܪܣܝܶܗ ܫܰܠܗܶܒܺܝܬܳܐ ܕܢܽܘܪܳܐ. ܘܢܰܗܪܳܐ ܕܢܽܘܪܳܐ ܪܳܕܶܐ ܘܢܳܦܶܩ ܡܶܢ ܩܕܰܡܰܘܗܝ (ܕܢܝܐܝܠ ܙ: ܛ-ܝ). ܕܒܰܚܙܳܬܳܐ ܡܥܰܠܰܝܬܳܐ ܘܡܶܬܚܙܶܐ ܗܳܝܕܶܝܢ ܥܰܡܰܢܽܘܐܝܠ. ܟܰܕ ܡܫܰܡܠܶܐ ܡܷ̈ܠܐ ܕܰܥܠܰܘܗܝ ܐܶܬܶܐܡܰܪ̈ܝ ܒܰܢܒܺܝܽܘܬܳܐ. ܘܰܒܢܽܘܪܳܐ ܒܳܚܰܪ ܠܟܽܠ ܒܣܰܪ. ܘܠܰܓܒܰܝܴ̈ܐ ܕܶܝܢ ܠܰܘ ܠܕܺܝܢܳܐ ܡܰܝܬܶܐ ܠܗܽܘܢ܆ ܐܶܠܐ ܠܘܳܬܶܗ ܡܩܰܪܶܒ ܘܰܡܟܰܢܶܫ ܠܗܽܘܢ܆ ܐܰܝܟܰܢܳܐ ܕܶܐܡܰܪ ܢܒܺܝܳܐ.
ܐܶܬܟܰܢܰܫܘ ܠܘܳܬܶܗ ܓܒܰܘ̈ܗܝ ܕܰܡܩܺܝܡܽܘܢ ܩܝܳܡܶܗ ܥܰܠ ܕܶܒܚܬܳܐ: ܢܚܰܘܽܘܢ ܫܡܰܝܳܐ ܙܰܕܺܝܩܽܘܬܶܗ. ܡܳܐ ܕܰܢܦܰܩܘ ܓܒܰܝܴ̈ܐ ܕܺܝܠܶܗ ܐܰܝܟ ܡܶܠܬܶܗ. ܕܰܢܫܰܕܰܪ ܠܰܡ ܡܰܠܐܟܰܘ̈ܗܝ ܥܰܡ ܫܺܝܦܽܘܪܳܐ ܪܰܒܳܐ܆ ܘܰܢܟܰܢܫܽܘܢ ܠܰܓܒܰܝܴ̈ܐ ܕܺܝܠܶܗ ܡܶܢ ܪܺܝܫܗܽܘܢ ܕܰܫܡܰܝܳܐ ܘܰܥܕܰܡܳܐ ܠܪܺܝܫܗܽܘܢ (ܡܬܝ ܟܕ: ܠܐ).
ܡܶܛܠ ܕܰܐܠܳܗܰܐ ܗ̄ܘ ܕܰܝܳܢܳܐ. ܐܰܝܟ ܕܶܐܡܰܪ ܢܒܺܝܳܐ ܕܢܶܫܡܰܥ ܥܰܡ ܡܰܢ ܕܳܐܶܢ. ܗܳܫܳܐ ܓܶܝܪ ܩܳܠܐ ܫܳܡܥܺܝܢܰܢ ܡܶܢ ܦܽܘܡܶܗ ܕܰܢܒܺܝܳܐ. ܟܰܕ ܕܳܐܶܢ ܥܰܡ ܝܺܣܪܳܐܝܠ ܘܰܠܕܺܝܢܳܐ ܡܩܰܪܶܒ ܠܫܰܪ̈ܒܳܬܳܐ ܕܰܒܢܰܝ̈ ܝܰܥܩܽܘܒ. ܟܰܕ ܠܰܘ ܡܶܛܠ ܕܰܒܢܰܝܴ̈ܐ ܪܳܫܶܐ. ܘܠܳܐ ܥܰܠ ܩܶܛܠܳܐ ܕܚܰܝ̈ܘܳܬܳܐ ܡܪܰܛܶܢ.
ܫܡܰܥ ܠܰܡ ܥܰܡܝ ܐܳܡܰܪ ܠܳܟ. ܘܺܝܣܪܳܐܝܠ ܐܰܣܗܕܳܟ: ܐܶܢܳܐ ܐܢܳܐ ܐܰܠܳܗܳܐ ܐܰܠܳܗܳܟ. ܡܳܐ ܕܫܳܡܥܺܝܢܰܢ ܠܶܗ ܡܶܢ ܟܽܘܪܣܝܳܐ ܕܰܡܡܰܠܶܠ ܐܰܝܟ ܐܰܠܳܗܳܐ܆ ܘܪܳܓܶܙ ܘܢܳܦܶܩ ܢܰܗܪܳܐ ܕܢܽܘܪܳܐ ܡܶܢ ܩܕܳܡܰܘܗܝ. ܘܙܳܡܪܺܝܢ ܒܢܰܦܫܗܽܘܢ ܟܰܕ ܬܳܘܶܝܢ. ܡܳܕܶܝܢ ܡܶܢ ܒܰܝܢܳܬ ܓܺܝ̈ܓܠܶܐ ܕܢܽܘܪܳܐ ܡܰܫܡܰܥ ܩܳܠܶܗ. ܟܰܕ ܐܳܡܰܪ ܕܺܝܢܳܐ ܥܰܡ ܥܰܡܳܐ.
ܕܠܳܐ ܗܘܳܐ ܥܰܠ ܕܶܒܚܰܝ̈ܟ ܐܰܟܣܳܟ: ܘܰܥܠܰܘܴ̈ܬܳܟ ܠܽܘܩܰܒܠܝ ܐܶܢܶܝܢ ܒܟܽܠܙܒܰܢ. ܥܰܠܗܳܕܶܐ ܠܳܐ ܠܰܡ ܪܳܫܶܐ ܐܢܳܐ. ܟܰܕ ܛܳܒ ܒܟܽܠܙܒܰܢ ܠܰܘ ܠܨܶܒܝܳܢܳܐ ܕܺܝܠܝ. ܡܕܰܒܰܚ ܗܘܰܝܬ. ܐܶܠܐ ܕܰܠܩܽܘܒܠܳܐ ܕܨܶܒܝܳܢܳܐ ܕܰܐܠܳܗܳܐ ܥܠܰܘܴ̈ܬܳܟ ܡܰܣܶܩ ܗܘܰܝܬ. ܘܠܰܘ ܩܕܳܡܝ ܡܕܰܒܰܚ ܗܘܰܝܬ܆ ܐܶܠܐ ܠܽܘܩܰܒܠܝ ܡܥܰܨܶܐ ܗܘܰܝܬ ܘܣܳܐܷܡ ܐܰܢܬ ܢܳܡܽܘܣܳܟ. ܘܥܰܠܗܳܕܶܐ ܐܳܡܰܪ ܢܒܺܝܳܐ.
ܠܐ ܐܶܣܰܒ ܡܶܢ ܒܰܝܬܳܟ ܬܰܘܪ̈ܶܐ: ܐܳܦܠܐ ܡܶܢ ܓܙܳܪܳܟ ܓܕܰܝܴ̈ܐ. ܡܶܛܠ ܕܕܺܝܠܝ ܗܺܝ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ. ܘܰܒܥܺܝܪ̈ܳܐ ܕܰܒܛܽܘܪ̈ܶܐ ܘܬܰܘܪ̈ܶܐ. ܝܳܕܰܥ ܐܢܳܐ ܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ. ܘܚܰܝܽܘܬܳܐ ܕܕܰܒܪܳܐ ܕܺܝܠܝ ܗܺܝ. ܒܗܳܠܶܝܢ ܡܚܰܘܶܐ ܕܰܝܳܢܳܐ ܕܠܰܘ ܐܰܝܟ ܣܢܺܝܩܳܐ ܦܳܩܶܕ ܥܰܠ ܕܶܒܚ̈ܐ ܒܺܐܝ̈ܕܰܝ ܡܽܘܫܶܐ. ܘܰܕܠܰܘ ܐܰܝܟ ܚܰܣܺܝܪܳܐ ܫܳܐܷܠ ܩܽܘܪ̈ܒܳܢܶܐ. ܘܠܳܐ ܬܽܘܒ ܡܰܣܠܐܷ ܠܩܽܘܪܒܳܢܳܐ ܕܰܟܝܳܐ ܘܰܠܨܶܒܝܳܢܳܐ ܚܘܺܝܚܳܐ. ܐܶܠܐ ܒܗܳܝ ܕܠܽܘܩܒܰܠ ܨܶܒܝܳܢܶܗ ܡܕܰܒܚܺܝܢ ܗܘܰܘ. ܥܰܠܗܳܝ ܐܰܣܠܺܝ ܐܶܢܘ̇ܢ. ܘܠܰܘ ܟܰܦܢܽܘܬܶܗ ܕܶܝܢ ܕܰܐܠܳܗܐ ܡܰܣܒܰܥ ܗܘܳܐ ܥܰܡܳܐ܆ ܒܗܳܝ ܕܰܡܩܰܪܶܒ ܗܘܳܐ ܠܶܗ ܬܰܘܪ̈ܶܐ ܘܳܐܡܰܪ:
ܐܶܢ ܟܳܦܶܢ ܐܢܳܐ ܠܳܐ ܐܳܡܰܪ ܠܳܟ: ܡܶܛܠ ܕܕܺܝܠܝ ܗܺܝ ܬܺܒܶܝܠ ܒܰܡܠܳܐܗ̇. ܠܐ ܐܳܟܶܠ ܐܢܳܐ ܒܶܣܪܳܐ ܕܰܐܪ̈ܘܳܢܶܐ: ܘܰܕܡܳܐ ܕܰܓܕܰܝܴ̈ܐ ܠܐ ܫܳܬܶܐ ܐܢܳܐ. ܗܳܠܶܝܢ ܠܰܡ ܠܰܘ ܕܶܝܢ ܡܶܛܠܳܬܝ ܦܶܩܕܶܬ ܕܢܶܬܩܰܪܒܽܘܢ. ܐܶܠܐ ܕܰܒܝܰܕ ܗܳܠܶܝܢ ܐܶܫܟܰܚ ܠܰܡܩܰܪ̈ܒܳܢܶܐ. ܐܶܢܳܐ ܓܶܝܪ ܡܶܕܶܡ ܠܐ ܫܳܐܷܠ ܐܢܳܐ. ܐܶܠܐ ܬܰܘܕܺܝܬܳܐ. ܡܶܛܠܗܳܢܳܐ ܐܶܡܰܪ
ܕܕܰܒܰܚ ܠܰܐܠܗܐ ܬܰܘܕܺܝܬܳܐ: ܘܫܰܠܶܡ ܠܰܡܪܰܝܡܳܐ ܢܶܕܪ̈ܰܝܟ. ܠܰܘ ܥܶܪ̈ܒܶܐ ܘܬܰܘܪ̈ܶܐ ܫܳܐܷܠ ܐܢܳܐ ܠܳܟ ܕܰܒܕܶܒܚ̈ܐ ܕܬܰܘܕܺܝܬܳܐ ܡܶܬܪܰܥܶܐ ܐܢܳܐ. ܐܶܡܰܪ ܓܶܝܪ ܢܒܺܝܳܐ: ܕܰܚܢܳܢܳܐ ܒܳܥܶܐ ܐܢܳܐ ܘܠܰܘ ܕܶܒܚܬܳܐ (ܗܘܫܥ ܘ: ܘ ܡܬܝ ܝܒ: ܙ). ܗܳܢܰܘ ܬܰܘܕܺܝܬܳܐ ܘܰܬܝܳܒܽܘܬܳܐ ܡܪܰܥܝܳܐ ܠܶܗ.
ܘܰܩܪܺܝܢܝ ܒܝܰܘܡܳܐ ܕܽܐܘܠܨܳܢܳܐ܆ ܐܶܥܰܫܢܳܟ ܘܰܬܫܰܒܚܰܢܝ. ܠܚܰܛܳܝܳܐ ܐܳܡܰܪ ܠܶܗ ܐܰܠܗܳܐ: ܡܳܐ ܠܳܟ ܘܠܰܟܬܳܒ̈ܐ ܕܦܽܘ̈ܩܕܳܢܰܝ. ܕܰܫܩܰܠܬ ܩܝܳܡܝ ܒܦܽܘܡܳܟ: ܐܰܢܬ ܕܶܝܢ ܣܢܰܝܬ ܡܰܪܕܽܘܬܝ. ܘܰܫܕܰܝܬ ܡܶܠܰܝ̈ ܠܒܶܣܬܪܳܟ. ܠܡܳܢܳܐ ܕܶܝܢ ܠܰܐܚܪ̈ܳܢܶܐ ܡܰܠܶܦ ܗܘܰܝܬ ܫܪܳܪܳܐ. ܘܰܐܢܬ ܡܶܢ ܕܰܓܳܠܽܘܬܳܐ ܠܐ ܐܰܪܚܶܩܬ. ܘܡܳܐ ܠܳܟ ܠܡܶܣܰܒ ܟܬܳܒܳܐ ܩܰܕܺܝܫܳܐ ܥܰܠ ܐܺܝ̈ܕܰܝܟ ܛܰܡܴ̈ܐܬܳܐ. ܘܰܩܝܳܡܝ ܢܡܰܠܶܠ ܦܽܘܡܳܟ ܠܰܐܚܪ̈ܳܢܶܐ. ܥܒܳܕܰܝ̈ܟ ܠܳܐ ܬܰܩܶܦܘ ܠܢܳܡܽܘ̈ܣܰܝ. ܘܰܐܝܟܰܢܳܐ ܟܰܕ ܦܽܘ̈ܩܕܳܢܰܝ ܒܢܽܘܗܪܳܐ ܕܶܝܢ ܡܗܰܠܟܺܝܢ. ܘܰܐܢܬ ܥܠܰܝܗܽܘܢ ܡܰܣܗܶܕ ܐܰܢܬ ܕܢܽܘܗܪܳܐ ܐܶܢܘ̇ܢ ܘܡܶܢ ܥܒܴ̈ܕܶܐ ܒܺܝ̈ܫܶܐ ܘܚܶܫܽܘܟ̈ܐ ܘܪ̈ܳܚܡܰܝ ܕܬܰܪܚܶܩ ܠܳܐ ܨܳܒܶܐ ܐܰܢܬ. ܘܰܐܢܬ ܕܡܰܠܶܦ ܐܰܢܬ ܢܳܡܽܘܣܳܐ ܠܰܐܚܪ̈ܳܢܶܐ. ܠܢܰܦܫܳܟ ܠܳܐ ܡܰܠܶܦ ܐܰܢܬ. ܘܡܰܣܗܶܕ ܐܰܢܬ ܥܰܠ ܓܰܘܪܳܐ ܕܠܐ ܫܰܦܺܝܪ. ܘܥܰܡ ܓܳܝܳܪ̈ܶܐ ܡܢܳܬܳܟ ܣܳܐܶܡ ܐܰܢܬ. ܟܰܕ ܠܓܰܢܳܒܳܐ ܕܶܝܢ ܡܰܣܠܶܐ ܐܰܢܬ ܟܰܕ ܡܚܰܘܶܐ ܐܰܢܬ. ܘܡܶܢ ܥܒܳܕܰܘ̈ܗܝ ܠܐ ܡܰܪܚܶܩ ܐܰܢܬ. ܟܰܕ ܕܶܝܢ ܠܽܘܩܒܰܠ ܗܳܢܳܐ ܡܰܝܬܶܐ ܢܒܺܝܳܐ ܘܳܐܡܰܪ:
ܐܶܢ ܚܳܙܶܐ ܗܘܰܝܬ ܓܰܢܳܒܳܐ ܪܳܗܶܛ ܗܘܰܝܬ ܥܰܡܶܗ܆ ܘܥܰܡ ܓܰܝܳܪܳܐ ܡܢܳܬܳܟ ܣܳܐܷܡ ܗܘܰܝܬ: ܦܽܘܡܳܟ ܡܡܰܠܶܠ ܗܘܳܐ ܒܺܝ̈ܫܳܬܳܐ. ܘܠܶܫܳܢܳܟ ܡܡܰܠܶܠ ܢܶܟܠܳܐ. ܚܙܰܝܬ ܐܰܝܟܰܢܳܐ ܡܰܟܶܣ ܒܕܺܝܢܶܗ ܠܗܳܠܶܝܢ ܕܟܰܕ ܡܰܠܦܺܝܢ ܗܘܰܘ ܢܳܡܽܘܣܳܐ ܕܰܐܠܳܗܳܐ ܠܥܰܡܳܐ. ܥܰܠ ܕܰܣܒܰܪܘ ܕܰܠܩܽܘܒܠܳܐ ܝܰܬܺܝܪܳܐ ܚܰܝܳܒ ܐܶܢܘ̇ܢ ܒܕܺܝܢܳܐ. ܟܰܕ ܡܶܕܶܡ ܠܐ ܡܶܬܛܰܫܶܐ ܡܶܢ ܗܰܘ ܕܰܠܟܽܠ ܚܳܙܶܐ. ܘܠܰܘ ܒܰܠܚܽܘܕ ܠܡܰܡ̈ܠܠܐܷ ܕܰܗܘܰܘ ܒܺܝܫܳܐܝ̣ܬ ܬܟܰܣ ܘܕܳܐܶܢ ܘܡܰܟܶܣ. ܐܶܠܐ ܘܰܥܕܰܡܳܐ ܠܡܰܚܫ̈ܒܳܬܳܐ ܡܶܬܓܰܘܶܐ ܘܥܳܐܷܠ ܒܕܺܝܢܳܐ. ܟܰܕ ܠܗܳܠܶܝܢ ܕܰܒܡܰܪ̈ܢܝܳܬܳܐ ܡܶܬܚܰܫܒܺܝܢ ܒܺܝ̈ܫܳܬܳܐ ܥܰܠ ܐܰܚܰܝ̈ܗܽܘܢ ܥܰܡ ܓܰܝܳܪ̈ܶܐ ܘܕܰܓ̈ܠܐ ܘܥܰܡ ܓܰܢܳܒ̈ܐ ܡܦܰܪܣܶܐ ܠܗܽܘܢ.
ܝܳܬܶܒ ܗܘܰܝܬ ܘܪܳܢܶܐ ܒܰܐܚܽܘܟ: ܘܰܒܒܰܪ ܐܶܡܳܟ ܡܡܰܝܶܩ ܗܘܰܝܬ. ܚܙܺܝ ܗܳܟܺܝܠ ܠܰܐܝܟܳܐ ܡܶܬܓܰܘܶܝܢ ܕܺܝܢ̈ܐ ܕܟܺܐܢܽܘܬܳܐ. ܐܶܢ ܓܶܝܪ ܥܕܰܡܳܐ ܠܡܰܚܫ̈ܒܳܬܳܐ ܒܺܝ̈ܫܳܬܳܐ ܡܳܬܰܚ ܫܰܒܛܶܗ ܕܰܝܳܢܳܐ. ܘܰܠܗܰܘ ܕܪܳܢܶܐ ܗܘܳܐ ܒܰܐܚܽܘܗܝ. ܘܰܡܡܝܶܩ ܒܒܰܪ ܐܶܡܶܗ ܠܐ ܐܰܗܡܺܝ ܘܠܐ ܥܒܰܪ ܒܕܺܝܢܳܐ. ܡܰܢܽܘ ܡܶܫܟܰܚ ܘܰܐܝܟܳܐ ܐܶܢܘ̇ܢ ܗܳܢܘ̇ܢ ܕܳܐܡܪܺܝܢ ܒܦܰܛܥܽܘܬܗܽܘܢ ܕܠܰܝܬ ܕܺܝܢܳܐ. ܘܰܐܝܟܰܢܳܐ ܢܶܬܦܰܠܰܛ ܒܰܪܢܳܫܳܐ ܡܶܢ ܗܳܕܶܐ ܕܶܚܠܬܳܐ ܕܕܰܝܳܢܳܐ. ܘܥܰܠ ܗܳܝ ܐܳܡܰܪ ܠܘܳܬ ܗܰܘ ܕܶܐܫܬܰܡܰܗ ܡܶܢ ܢܒܺܝܳܐ ܚܰܛܳܝܳܐ܆
ܗܳܠܶܝܢ ܟܽܠܗܶܝܢ ܥܒܰܕܬ ܘܫܶܬܩܶܬ ܠܳܟ. ܟܰܕ ܒܗܳܠܶܝܢ ܐܶܬܚܰܫܰܚܬ ܠܐ ܐܰܟܶܣܬܳܟ ܒܙܰܒܢܰܝ̈ܗܶܝܢ. ܒܗܳܝ ܕܚܳܐܱܪ ܗܘܺܝܬ ܕܕܰܠܡܳܐ ܒܰܬܝܳܒܽܘܬܳܐ ܬܶܬܚܰܪܰܪ ܡܶܢ ܣܰܟܠܘܴ̈ܬܳܐ. ܘܡܶܛܠ ܕܠܐ ܐܶܬܚܰܠܰܦܬ ܡܶܢ ܒܺܝ̈ܫܳܬܳܟ. ܨܳܒܶܐ ܐܰܢܬ ܕܳܐܦܠܺܝ ܬܶܥܒܶܕ ܫܰܘܬܳܦܳܐ ܒܰܥ̈ܒܳܕܰܝܟ. ܘܟܰܕ ܠܐ ܕܳܐܢ ܐܢܳܐ ܠܳܟ ܬܶܣܗܰܕ ܥܠܰܝ. ܕܰܒܒܺܝ̈ܫܳܬܳܟ ܚܳܕܶܐ ܐܢܳܐ.
ܐܰܟܣܳܟ ܕܶܝܢ ܘܶܐܣܕܽܘܪ ܐܶܢܶܝܢ ܠܥܺܝ̈ܢܰܝܟ. ܘܰܐܝܠܶܝܢ ܕܟܰܣܺܝܬ ܐܶܢܶܝܢ ܡܶܢ ܐܢܳܫ̈ܐ. ܘܶܐܦܰܪܣܶܐ ܐܶܢܶܝܢ ܩܕܳܡ ܡܰܠܐܟ̈ܐ ܘܰܐܦܶܩ ܠܓܶܠܝܳܐ ܒܺܝ̈ܫܳܬܳܟ. ܘܶܐܓܠܶܐ ܬܰܚܦܺܝܬܳܐ ܕܰܥܒܳܕܰܝ̈ܟ ܒܺܝ̈ܫܶܐ. ܕܡܶܛܠܗܳܕܶܐ ܢܶܕܚܠܽܘܢ ܘܢܶܣܬܰܪܕܽܘܢ ܟܽܠܗܽܘܢ ܐܰܝܠܶܝܢ ܕܰܛܥܰܘ ܠܰܐܠܳܗܳܐ ܟܰܕ ܚܳܙܶܝܢ ܕܺܝܢܳܟ. ܘܥܰܠܗܳܝ ܐܶܡܰܪ ܢܒܺܝܳܐ.
ܐܶܣܬܰܟܰܠܘ ܒܗܳܕܶܐ ܐܰܝܠܶܝܢ ܕܛܳܥܶܝܢ ܠܰܐܠܗܳܐ. ܘܡܶܢ ܗܳܕܶܐ ܡܰܟܣܳܢܽܘܬܳܐ ܕܚܰܠܘ ܕܠܰܝܬ ܕܡܶܫܟܰܚ. ܕܰܒܕܺܝܢܳܐ ܚܳܙܶܐ ܟܽܠ ܡܰܛܥܶܐ. ܘܠܐ ܡܟܰܣܶܝܢ ܡܶܢܶܗ ܚܛܳܗܰܝ̈ܟܽܘܢ. ܐܠܐ ܐܶܬܦܰܢܘ ܠܘܳܬܶܗ ܒܰܬܝܳܒܽܘܬܳܐ.
ܕܕܰܠܡܳܐ ܢܶܬܒܰܪܟܽܘܢ ܘܠܰܝܬ ܕܰܡܦܰܨܶܐ. ܒܕܺܝܢܶܗ ܠܰܡ ܠܰܝܬ ܕܰܡܥܰܕܰܪ ܘܠܐ ܕܡܶܫܟܰܚ ܕܶܝܢ ܠܰܡܦܰܨܳܝܽܘ. ܡܶܢ ܗܰܘ ܕܪܶܢܝܳܐ ܕܠܶܒܳܐ ܠܐ ܛܳܥܝܳܐ ܟܺܐܢܽܘܬܶܗ. ܐܶܡܰܪ ܓܶܝܪ ܢܒܺܝܳܐ ܕܰܠܡܳܐ ܢܶܬܒܰܪܟܽܘܢ ܘܠܰܝܬ ܕܰܡܦܰܨܶܐ. ܠܰܐܝܠܶܝܢ ܕܡܶܬܚܰܝܒܺܝܢ ܒܕܺܝܢܳܐ ܡܶܢ ܬܰܫܢܺܝܩܳܐ. ܠܐ ܐܳܡܰܪ ܗܘܳܐ ܢܒܺܝܳܐ ܕܠܰܝܬ ܕܰܡܦܰܨܶܐ. ܡܶܬܦܢܶܐ ܡܶܟܺܝܠ ܠܰܡܚܰܘܳܝܽܘ ܒܝܰܕ ܙܥܽܘܪ̈ܝܳܬܳܐ ܩܽܘܠܳܣܳܐ ܘܬܶܫܒܽܘܚܬܳܐ ܕܩܰܕܺܝ̈ܫܶܐ ܗܳܠܶܝܢ ܕܰܒܓܰܘ ܥܺܕܬܶܗ ܕܰܐܠܳܗܳܐ. ܩܰܪܶܒܘ ܠܶܗ ܕܶܒܚ̈ܐ ܡܩܰܒ̈ܠܐ ܕܬܶܫܒܽܘܚܬܳܐ ܘܰܕܬܰܘܕܺܝܬܳܐ ܠܥܰܡܰܢܽܘܐܝܠ. ܘܡܰܘܕܰܥ ܕܗܶܢܽܘܢ ܡܶܬܢܰܣܒܺܝܢ ܕܢܶܗܘܽܘܢ ܠܶܗ ܡܫܰܒܚܳܢ̈ܐ ܒܥܺܕ̈ܬܳܐ ܕܰܠܥܶܠ.
ܐܰܝܢܳܐ ܕܕܳܒܰܚ ܬܰܘܕܺܝܬܳܐ ܗܽܘ ܢܫܰܒܚܰܢܝ: ܘܬܰܡܳܢ ܐܶܚܰܘܶܝܘܗܝ ܐܽܘܪܚܳܐ ܕܦܽܘܪܩܳܢܶܗ ܕܰܐܠܳܗܰܢ. ܡܳܕܶܝܢ ܗܳܢܳܐ ܚܰܛܳܝܳܐ ܕܰܗܘܳܬ ܠܩܽܘܒܠܶܗ ܡܰܟܣܳܢܽܘܬܳܐ ܕܰܐܠܳܗܳܐ ܒܕܽܘܟܬܳܐ ܗܳܕܶܐ. ܘܰܐܣܗܶܕ ܥܠܰܘܗܝ ܡܙܰܡܪܳܢܳܐ. ܕܬܰܘܪ̈ܶܐ ܘܰܓܕܰܝܴ̈ܐ ܡܩܰܪܶܒ ܗܘܳܐ ܕܶܒܚ̈ܐ ܠܰܐܠܗܳܐ. ܥܰܡܳܐ ܗܰܘ ܝܺܣܰܪܠܳܝܳܐ ܕܠܐ ܡܩܰܪܶܒ ܗܘܳܐ ܕܶܒܚ̈ܐ ܠܰܐܠܗܳܐ ܕܚܰܝ̈ܘܳܬܳܐ. ܥܕܰܡܳܐ ܠܓܶܠܝܳܢܶܗ ܕܥܰܡܰܢܽܘܐܝܠ. ܗܰܘ ܕܰܗܘܳܐ ܒܢܽܘܪܳܐ ܕܡܶܬܓܰܘܙܠܳܐ ܘܡܰܙܗܪܳܐ ܚܕܳܪ̈ܰܘܗܝ. ܘܗܳܝ ܕܶܐܡܰܪ ܠܶܗ ܕܰܢܕܰܒܰܚ ܬܰܘܕܺܝܬܳܐ. ܥܰܠ ܕܶܐܢ ܡܰܘܕܶܐ ܒܶܗ ܕܰܐܡܪܰܚ ܘܰܥܒܰܪ ܡܶܢܶܗ. ܡܶܬܩܰܒܰܠ. ܘܰܡܩܰܒܶܠ ܡܶܢܶܗ ܣܺܝܡܰܬ ܒܢܰܝܴ̈ܐ ܒܰܥܡܳܕܳܐ ܩܰܕܺܝܫܳܐ ܒܗܰܝܡܳܢܽܘܬܳܐ. ܗܳܢܳܐ ܕܶܝܢ ܐ̱ܚܪܺܢܳܐ ܕܕܳܒܰܚ ܬܰܘܕܺܝܬܳܐ ܕܰܡܫܰܒܚ ܠܰܐܠܗܳܐ ܐܺܝܬܰܘܗܝ ܥܰܡܳܐ ܩܰܕܺܝܫܳܐ ܘܰܡܗܰܝܡܢܳܐ ܕܶܐܬܚܙܺܝ ܒܝܰܕ ܡܳܪܰܢ. ܕܗܽܘ ܡܶܬܓܒܶܐ ܕܢܶܥܽܘܠ ܒܚܰܪܬܳܐ ܕܢܶܬܒܰܣܰܡ ܒܰܓܢܽܘܢܳܐ ܕܓܶܐܘܴ̈ܬܳܐ. ܡܶܢ ܐܰܠܗܳܐ ܗܰܘ ܕܶܐܬܓܠܺܝ ܒܰܒܣܰܪ. ܘܗܽܘ ܡܶܬܓܠܐ ܠܚܰܪܬܳܐ ܒܢܽܘܪܳܐ ܕܢܶܒܚܽܘܪ ܘܰܢܕܰܟܶܐ ܒܳܗ̇ ܠܩܰܕܺܝ̈ܫܶܐ ܘܰܢܚܰܝܶܒ ܘܰܢܛܰܠܶܩ ܒܳܗ̇ ܠܥܳܒ̈ܕܰܝ ܒܺܝ̈ܫܳܬܳܐ. ܕܗܘ ܢܦܰܨܶܐ ܠܰܢ ܒܕܺܝܢܳܐ ܡܶܢ ܬܰܫܢܺܝܩܳܐ ܘܡܶܢ ܢܽܘܪܳܐ ܕܡܶܢ ܚܒܳܠܳܐ ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܠܬܐ ܕܡܠܦܢܘܬܐ
ܬܽܘܒ ܡܶܠܬܳܐ ܕܡܰܠܦܳܢܽܘܬܳܐ ܥܰܠ ܫܽܘܠܳܡܶܗ ܕܰܟܬܳܒܳܐ ܗܳܢܳܐ ܩܰܕܡܳܝܳܐ ܕܡܰܙܡܽܘܪ̈ܶܐ ܕܡܰܠܦܳܢܳܐ ܕܳܢܺܝܐܝܠ ܨܰܠܰܚܳܝܳܐ.
ܥܕܰܡܳܐ ܠܗܳܪܟܳܐ ܐܶܬܚܙܺܝ ܠܺܝ ܕܶܐܡܬܽܘܚ ܡܶܠܬܳܐ ܕܰܟܬܳܒܳܐ ܕܡܰܙܡܽܘܪ̈ܶܐ: ܕܦܰܫܶܩ ܩܰܕܡܳܝܳܐ. ܘܒܶܗ ܕܶܝܢ ܐܶܣܬܰܝܰܟܘ ܬܶܫܒ̈ܚܳܬܳܐ ܚܰܡܫܺܝܢ ܘܦܽܘ̈ܫܳܩܰܝܗܶܝܢ. ܟܰܕ ܟܡܳܐ ܕܶܐܫܟܚܶܬ ܐܰܟܪܺܝܬ ܠܡܶܠܬܳܐ. ܡܶܛܠ ܕܠܐ ܐܶܣܰܒ ܡܰܘܒܠܳܐ ܕܡܰܐܝ̣ܢܽܘܬܳܐ ܘܶܐܣܺܝܡ ܥܰܠ ܟܰܬܦܴ̈ܬܳܐ ܕܰܐܝܠܶܝܢ ܕܩܳܪܶܝܢ. ܘܥܰܠ ܕܚܳܐܱܪ ܐܢܳܐ ܕܰܒܙܰܒܢܳܐ ܗܳܢܳܐ ܚܽܘܒܳܗ̇ ܕܢܰܦܫܳܐ ܐܶܬܡܰܣܟܰܢ ܠܘܳܬ ܬܰܠܡܺܝ̈ܕܶܐ ܘܠܰܝܬ ܕܨܳܒܶܐ ܠܡܶܥܡܰܠ ܘܠܰܡܟܰܢܳܫܽܘ ܝܕܰܥܬܳܐ ܘܰܒܡܷ̈ܠܐ ܕܟܺܐܢܽܘܬܳܐ. ܘܗܳܕܶܐ ܓܶܕܫܰܬ ܠܐܢܳܫܺܝ̈ܢ ܡܶܛܠ ܕܠܐ ܡܶܣܬܰܟܠܺܝܢ ܒܩܳܠܐ ܗܰܘ ܐܰܠܳܗܳܝܳܐ ܕܳܐܡܰܪ: ܕܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ (ܒܪܝܬܐ ܓ: ܝܛ). ܡܚܰܘܶܐ ܠܰܢ ܩܳܠܐ ܗܳܢܳܐ ܕܰܟܡܳܐ ܐܶܢ ܢܶܗܘܶܐ ܐܢܳܫ ܡܰܣܒܰܪ ܥܰܠ ܢܰܦܫܶܗ ܕܝܳܕܰܥ܆ ܠܰܝܬ ܠܡܶܐܟܰܠ ܡܶܢ ܗܰܘ ܠܰܚܡܳܐ ܕܦܳܬܽܘܪܳܐ ܕܺܝܕܰܥܬܳܐ ܕܐܪ̈ܳܙܶܐ ܩܰܕܺܝ̈ܫܶܐ ܕܰܡܛܰܫܶܝܢ ܒܰܟܬܳܒ̈ܐ ܐܰܠܳܗܳܝ̈ܐ ܕܒܶܠܥܳܕ ܕܽܘܥܬܳܐ ܕܥܰܡ̈ܠܐ ܕܟܺܐܢ̈ܐ. ܘܶܐܢܳܐ ܘܰܐܒܳܐ ܡܝܰܬܪܳܐ ܘܪܺܝܫܳܐ ܩܰܕܺܝܫ ܒܟܽܠ ܡܳܪܝ ܝܽܘܚܰܢܳܢ܆ ܟܰܕ ܥܰܕܰܪܬܳܢ ܥܰܡܠܶܬ ܗܳܢܳܐ ܟܬܳܒܳܐ ܩܰܕܡܳܝܳܐ ܓܰܡܪܶܬ ܘܫܰܡܠܺܝܬ ܒܡܷ̈ܠܐ ܙܥܽܘܪ̈ܝܳܬܳܐ. ܘܟܰܕ ܩܰܠܺܝܠ ܐܰܝܟ ܕܰܒܪܺܝܫ ܚܶܨܪܳܐ ܡܰܢ ܕܰܠܺܝܬ ܡܶܢ ܝܰܡܳܐ ܕܦܽܘ̈ܫܳܩܶܐ ܕܛܽܘܒܳܢܳܐ ܕܰܘܝܕ. ܫܒܰܩܬܶܗ ܠܓܰܙܳܐ ܐܰܝܟ ܕܺܐܝܬܰܘܗܝ. ܘܟܰܕ ܡܛܰܝܰܒ ܕܬܽܘܒ ܐܶܬܶܠ ܢܰܦܫܝ ܠܥܰܡܠܳܐ ܬܪܰܝܳܢܳܐ. ܕܒܳܬܰܪ ܗܳܢܳܐ ܘܡܶܕܶܡ ܕܨܳܒܶܐ ܪܽܘܚܳܐ ܩܰܕܺܝܫܳܐ ܕܢܶܬܶܠ ܠܰܙܥܽܘܪܽܘܬܝ ܕܬܽܘܒ ܐܶܥܒܶܕ ܟܬܳܒܳܐ ܕܒܳܬܰܪ ܗܳܢܳܐ. ܟܰܕ ܡܗܰܝܡܶܢ ܐܢܳܐ ܘܡܰܫܰܪ ܐܢܳܐ ܕܬܽܘܒ ܡܥܰܕܪܳܐ ܠܺܝ ܨܠܽܘܬܳܟ. ܡܶܛܠ ܗܳܕܶܐ ܕܠܳܐ ܐܰܘܦܺܝܬ ܡܶܠܰܝ̈ ܠܦܽܘܬ ܚܰܝܠܐ ܕܰܟܣܶܐ ܒܡܰܙܡܽܘܪ̈ܶܐ ܗܳܠܶܝܢ. ܐܶܠܐ ܒܟܰܪ̈ܝܳܬܳܐ ܘܒܰܦܫܺܝ̈ܛܳܬܳܐ ܕܶܝܢ ܐܶܬܚܰܫܚܶܬ ܥܰܠ ܗܳܝ ܕܶܐܡܪܶܬ܆ ܕܡܶܫܟܰܚ ܐܢܳܐ ܠܐܢܳܫܺܝ̈ܢ ܕܰܒܙܰܒܢܳܐ ܗܳܢܳܐ ܕܨܳܒܶܝܢ ܗܘܰܘ ܕܬܶܗܘܶܐ ܟܰܪܝܳܐ ܡܶܠܬܳܐ ܕܦܽܘܫܳܩܳܐ. ܡܶܢܶܗ ܕܗܰܘ ܐܪܳܙܳܐ ܕܡܶܬܦܰܫܰܩ. ܗܳܕܶܐ ܕܛܳܒ ܥܰܣܩܳܐ ܠܡܶܗܘܳܐ. ܕܰܠܘܳܬ ܗܳܠܶܝܢ ܐܳܡܰܪ ܒܡܱ̈ܬܠܐ ܚܰܟܺܝܡܳܐ ܘܣܰܓܺܝ ܣܽܘ̈ܟܳܠܐ ܫܠܶܝܡܽܘܢ܆ ܕܰܐܝܟ ܬܰܪܥܳܐ ܕܡܶܬܟܪܶܟ ܥܰܠ ܨܝܳܪܬܶܗ܆ ܗܳܟܳܢܰܐ ܡܶܬܩܰܠܐܷ ܘܡܶܬܗܰܦܰܟ ܚܒܰܢܳܢܳܐ ܒܥܰܪܣܶܗ (ܡ̈ܬܠܐ ܟܘ: ܝܕ). ܘܠܳܐ ܓܶܝܪ ܬܰܪܥܳܐ ܟܰܕ ܡܶܬܬܚܶܕ ܘܡܶܬܦܬܰܚ ܠܶܫܳܢܳܐ ܐܰܘ ܡܰܪܚܶܩ ܡܶܢ ܕܽܘܟܬܶܗ. ܘܠܐ ܪܶܥܝܳܢܳܐ ܕܰܚܒܰܢܳܢ ܠܐ ܪܳܗܶܛ ܒܳܬܰܪ ܝܺܕܰܥܬܳܐ ܘܐܳܬܶܐ ܠܰܩܕܳܡܰܘܗܝ ܘܗܰܘ ܓܶܝܪ ܕܡܰܚܶܒ ܠܡܶܫܟܰܚ ܝܺܕܰܥܬܳܐ ܘܣܽܘ̈ܟܳܠܐ ܢܰܗܺܝܪ̈ܶܐ ܕܺܝܕܰܥܬܳܐ ܐܰܠܳܗܳܝܬܳܐ ܪܳܗܶܛ ܕܠܐ ܫܰܠܘܳܐ ܟܰܕ ܛܥܺܝܢ ܥܠܰܘܗܝ ܥܰܡ̈ܠܐ ܘܫܰܗܪ̈ܶܐ ܕܠܰܝ̈ܠܰܘܳܬܳܐ. ܘܠܐ ܢܳܣܶܒ ܡܶܠܟ̈ܐ ܥܰܠ ܐܽܘܪܚܳܐ ܕܺܝܕܰܥܬܳܐ. ܕܶܐܢ ܢܶܪܗܰܛ ܐܰܘ ܠܐ ܢܶܪܗܰܛ. ܐܶܠܐ ܐܰܝܟ ܕܶܐܡܰܪ ܗܘܳܐ ܫܠܶܝܡܽܘܢ ܡܶܛܠܳܬܶܗ܆ ܕܩܰܠܺܝܠܐܴ ܟܰܕ ܥܳܒܶܕ ܠܐ ܡܶܬܡܰܠܰܟ ܡܰܦܪܰܚ ܠܚܽܘ̈ܫܳܒܰܘܗܝ. ܒܳܬܰܪ ܒܥܳܬܳܐ ܕܚܶܟܡܬܳܐ ܥܕܰܡܳܐ ܕܡܰܕܪܶܟ ܗܰܘ ܡܶܕܶܡ ܕܡܶܛܠܬܶܗ ܐܰܚܺܝܕ ܪܶܗܛܳܐ ܕܟܺܐܢܽܘܬܳܐ. ܕܳܐܦ ܥܠܰܝܢ ܬܨܰܠܐܷ ܕܰܟܝܽܘܬܳܟ ܐܰܒܘܢ ܡܝܰܬܪܳܐ ܕܩܰܠܺܝܠܐܝ̣ܬ ܢܶܪܕܶܐ ܒܽܐܘܪܚܳܐ ܕܗܳܠܶܝܢ ܦܽܘ̈ܫܳܩܶܐ ܕܣܺܝܡܺܝܢ ܠܰܢ . ܘܢܶܥܦܶܐ ܠܶܫܳܢܰܢ ܡܶܢ ܚܰܩܠܐ ܗܳܕܶܐ ܐܰܠܳܗܳܝܬܳܐ ܕܡܰܙܡܽܘܪ̈ܶܐ ܩܰܕܺܝ̈ܫܶܐ ܗܰܒܴ̈ܒܶܐ ܫܰܦܺܝܪ̈ܳܬܳܐ ܕܘܰܪ̈ܕܶܐ ܪ̈ܽܘܚܳܢܶܐ ܘܫܽܘ̈ܫܰܢܐ ܕܰܟܝܴ̈ܬܳܐ ܘܢܰܗܺܝܪ̈ܳܬܳܐ ܕܫܳܝܴ̈ܢ ܠܰܟܠܺܝܠܐ ܕܩܽܘ̈ܠܳܣܶܐ ܡܝܰܬܪ̈ܶܐ. ܘܰܢܫܰܒܰܚ ܘܰܢܒܰܪܶܟ ܠܗܰܘ ܕܰܓܠܳܐ ܐܪ̈ܳܙܰܘܗܝ ܩܰܕܺܝ̈ܫܶܐ ܠܪ̈ܳܚܡܰܘܗܝ ܗܳܫܳܐ ܠܥܳܠܡܺܝܢ ܐܰܡܺܝܢ܀
ܬܘܒ ܟܬܒܝܢܢ ܦܠܓܘܬܐ ܕܬܪܬܝܢ ܕܦܘܫܩܐ ܕܡܙܡܘܪ̈ܐ ܕܛܘܒܢܐ ܕܘܝܕ ܕܦܫܩ ܕܢܝܐܝܠ ܨܠܚܝܐ.
ܡܙܡܘܪܐ ܕܚܡܫܝܢ ܘܚܕ
ܥܰܠ ܬܝܳܒܽܘܬܳܐ ܕܰܥܒܰܕ ܕܰܘܺܝܕ ܛܘܒܳܢܳܐ ܡܶܢ ܒܳܬܰܪ ܕܰܩܛܰܠ ܠܰܕܒܶܝܬ ܐܽܘܪܝܳܐ ܘܰܢܣܰܒ ܐܰܢܬܬܶܗ: ܘܥܰܠ ܪ̈ܰܚܡܰܘܗܝ ܕܰܐܠܳܗܳܐ ܕܣܰܓܺܝ̈ܐܝ̣ܢ ܕܗܳܘܶܝܢ ܥܰܠ ܐܰܝܠܶܝܢ ܕܬܳܝܒܺܝܢ ܒܰܫܪܳܪܳܐ ܠܘܳܬ ܐܰܠܳܗܳܐ.
ܫܰܦܺܝܪ ܠܐܝܠܶܝܢ ܕܡܶܬܩܰܕܡܺܝܢ ܒܡܶܬܥܰܒܪܳܢܽܘܬܳܐ ܕܰܚܛܳܗ̈ܐ ܕܰܠܘܳܬ ܐܰܠܳܗܳܐ ܢܶܬܦܢܽܘܢ ܒܰܬܝܳܒܽܘܬܳܐ. ܠܰܝܬ ܓܶܝܪ ܣܰܡܳܐ ܐ̱ܚܪܺܢܳܐ ܕܚܳܫܰܚ ܠܚܽܘܠܡܳܢܳܐ ܕܟܺܐܒ̈ܐ ܕܗܳܘܶܝܢ ܡܶܢ ܥܶܠܰܬ ܚܛܺܝܬܳܐ ܐܶܠܐ ܒܰܠܚܽܘܕ ܬܝܳܒܽܘܬܳܐ ܕܰܠܘܳܬ ܐܰܠܳܗܳܐ. ܘܰܐܝܟ ܙܢܳܐ ܕܰܡܥܰܕܰܪ ܠܰܟܪܺܝܗܳܐ ܚܽܘܒܳܐ ܕܳܐܣܝܳܐ. ܐܶܢܗܽܘ ܕܒܰܐܡܺܝܢܽܘܬܳܐ ܢܕܽܘܫܽܘܢ ܐܶܣܟܽܘܦܬܶܗ. ܗܳܟܰܢܳܐ ܡܥܰܕܪܳܐ ܠܳܗ̇ ܠܢܰܦܫܳܐ ܕܡܶܬܟܰܪܗܳܐ ܒܰܚܛܺܝܬܳܐ. ܐܰܡܺܝܢܽܘܬܳܗ̇ ܕܰܠܘܳܬ ܐܰܠܳܗܳܐ. ܝܰܬܺܝܪܳܐܝ̣ܬ ܡܳܐ ܕܚܳܙܶܝܢܰܢ. ܕܠܰܘ ܐܰܝܟ ܕܰܡܩܰܘܶܐ ܐܳܣܝܳܐ ܦܰܓܪܳܢܳܝܳܐ ܗܰܘ ܕܢܺܐܙܰܠ ܠܘܳܬܶܗ ܘܢܰܘܕܥܺܝܘܗܝ ܥܰܠ ܟܺܐܒܶܗ ܕܰܟܪܺܝܗܳܐ. ܘܡܶܢ ܒܳܬܰܪ ܢܩܰܪܶܒ ܠܶܗ ܐܶܣܦܰܠܢܝܳܐ ܕܚܳܫܚܳܐ ܠܫܽܘܚܢܶܗ. ܗܳܟܰܢܳܐ ܘܰܠܡܰܚܣܶܢ ܗܰܘ ܐܳܣܝܳܐ ܕܢܰܦ̈ܫܳܬܰܢ܆ ܢܺܐܙܰܠ ܢܚܰܘܶܐ ܠܶܗ ܟܺܐܒܰܝ̈ܢ. ܘܗܳܝܕܶܝܢ ܡܶܢ ܒܳܬܰܪ ܕܡܰܝܠܠܺܝܢܰܢ ܡܶܢ ܟܺܐܒ̈ܐ ܢܶܬܶܠ ܠܰܢ ܥܽܘܕܪ̈ܳܢܶܐ ܠܡܰܚ̈ܘܳܬܰܢ. ܐܶܠܐ ܗܽܘ ܐܰܝܟ ܐܰܒܳܐ ܣܰܓܺܝ ܪ̈ܰܚܡܶܐ. ܪܳܗܶܛ ܢܳܩܶܫ ܠܰܢ ܒܬܰܪܥܳܐ ܡܳܐ ܕܡܶܬܟܰܪܗܺܝܢܰܢ. ܕܩܰܠܺܝܠܳܐ ܢܶܪܗܰܛ ܢܶܬܓܰܘܰܣ ܒܳܐܣܝܽܘܬܶܗ. ܘܠܰܘ ܟܰܕ ܡܰܘܚܰܪ ܢܳܦܶܩ ܠܘܳܬܰܢ. ܡܳܐ ܕܚܳܙܶܐ ܕܒܰܫܪܳܪܳܐ ܒܳܥܶܝܢܰܢ ܚܽܘܠܡܳܢܳܐ ܕܡܶܢ ܟܺܐܒܰܝ̈ܢ܆ ܐܶܠܐ ܥܰܡ ܗܳܝ ܕܡܰܘܕܰܥ ܕܰܗܘܳܐ ܬܒܳܪܳܐ. ܡܫܰܕܰܪ ܥܰܡܶܗ ܐܳܣܝܽܘܬܳܐ ܗܢܘ ܕܶܐܢܗܽܘ ܕܗܰܘ ܕܡܶܪܓܰܬ ܪܶܓܠܳܐ ܘܶܐܬܬܒܰܪ ܒܦܰܚ̈ܐ ܕܨܰܝܳܕ̈ܐ ܡܶܬܝܰܕܥܳܢ̈ܐ. ܡܛܰܝܒ ܕܢܶܦܢܶܐ ܨܶܝܕ ܥܽܘܕܪ̈ܳܢܶܐ ܕܳܐܣܝܽܘܬܳܐ. ܠܰܘ ܗܳܕܶܐ ܒܰܠܚܽܘܕ ܐܶܠܐ ܕܰܢܚܰܘܶܐ ܗܰܘ ܐܳܣܝܳܐ ܕܰܚܒܳܪ̈ܳܬܰܢ. ܕܰܟܡܳܐ ܠܳܐ ܨܳܒܶܐ ܒܡܽܘ̈ܡܰܝܢ. ܘܳܐܦܠܳܐ ܡܶܢ ܗܳܝ ܕܢܰܘܕܰܥ ܥܷ̈ܠܠܳܬܳܐ ܕܡܶܢܗܶܝܢ ܓܳܕ̈ܫܳܢ ܟܺܐܒ̈ܐ ܡܰܗܡܶܐ. ܘܥܰܠ ܕܝܳܕܰܥ ܕܰܡܚܽܘܬܳܐ ܪܰܒܬܳܐ ܡܳܚܶܐ ܠܳܗ̇ ܓܰܘܪܳܐ ܠܢܰܦܫܳܐ. ܡܶܢ ܫܡܰܝܳܐ ܩܥܳܐ ܠܘܳܬ ܝܺܣܪܳܐܝܠ ܕܠܐ ܬܓܽܘܪ! (ܡܦܩܢܐ ܟ: ܝܕ ܬܢܝܢ ܢܡܘܣܐ ܗ: ܝܚ). ܘܥܰܠ ܕܰܡܦܳܣ ܬܽܘܒ ܕܰܡܛܰܡܰܐ ܩܶܛܠܳܐ ܠܠܶܒܳܐ. ܒܨܶܒܥܶܗ ܟܬܰܒ ܕܠܳܐ ܬܶܩܛܽܘܠ! (ܡܦܩܢܐ ܟ: ܝܓ). ܘܟܰܕ ܗܳܟܰܢܳܐ ܡܫܰܟܰܪ ܓܰܘܪܳܐ ܐܳܦ ܡܛܰܡܰܐ ܩܶܛܠܳܐ. ܡܦܰܩܶܕ ܘܣܳܐܷܡ ܢܳܡܽܘܣܳܐ: ܕܗܰܘ ܕܓܳܐܱܪ ܒܢܽܘܪܳܐ ܝܳܩܶܕ. ܘܗܰܘ ܕܩܳܛܶܠ ܠܰܐܚܽܘܗܝ ܢܶܬܩܛܶܠ. ܗܳܝ ܕܰܗܘܳܬ ܒܰܥܒܳܕܳܐ ܠܘܳܬ ܕܰܘܝܕ ܡܰܠܟܳܐ ܘܰܢܒܺܝܶܗ ܕܰܐܠܳܗܳܐ ܕܰܩܛܰܠ ܗܘܳܐ ܠܐܽܘܪܺܝܳܐ ܘܰܢܣܰܒ ܗܘܳܐ ܠܐܢܬܬܶܗ ܒܰܪܬܫܒܰܥ ܘܓܳܪ ܒܳܗ̇. ܗܳܝ ܕܦܳܩܶܕ ܗܘܳܐ ܐܰܠܳܗܳܐ ܒܢܳܡܽܘܣܳܐ ܥܰܠ ܗܳܠܶܝܢ ܬܪܶܝܢ ܚܛܳܗ̈ܐ. ܥܰܠ ܓܰܘܪܳܐ ܝܰܩܕܳܢܳܐ܆ ܘܥܰܠ ܩܶܛܠܳܐ ܪܓܽܘܡܝܳܐ. ܘܰܦܩܰܕ ܐܰܠܗܐ ܠܢܳܬܳܢ ܢܒܺܝܳܐ ܓܶܒܥܽܘܢܳܝܳܐ. ܗܰܘ ܕܠܐ ܨܳܒܶܐ ܒܡܰܘܬܳܐ ܕܚܰܛܳܝܳܐ܆ ܐܰܝܟ ܗܳܝ ܕܢܶܬܦܢܶܐ ܘܢܺܚܶܐ. ܘܒܰܪ ܫܳܥܬܶܗ ܐܰܟܣܶܗ ܠܕܰܘܺܝܕ ܒܰܐܦܰܘ̈ܗܝ ܟܰܕ ܐܶܬܳܐ ܡܶܢ ܩܪܺܝܬܶܗ ܕܰܚܕܳܪ̈ܰܝ ܐܽܘܪܺܫܠܶܡ ܘܠܐ ܢܣܰܒ ܒܰܐܦܰܘ̈ܗܝ ܕܡܰܠܟܶܗ ܕܺܝܣܪܳܐܝܠ ܘܠܐ ܐܶܬܟܰܚܰܕ ܡܶܢܶܗ. ܐܶܠܐ ܐܰܟܣܶܗ ܘܶܐܡܰܪ ܠܶܗ ܡܳܪܝ ܡܰܠܟܳܐ: ܡܳܢܳܐ ܦܳܩܶܕ ܢܳܡܽܘܣܳܐ ܕܰܐܠܳܗܳܐ؟ ܥܰܠ ܗܰܘ ܐܰܝܢܳܐ ܕܚܰܕ ܓܰܒܪܳܐ ܐܺܝܬ ܗܘܳܐ ܠܶܗ ܚܕܳܐ ܦܰܪܬܳܐ ܕܥܳܢܴ̈ܐ ܘܰܣܛܰܪ ܡܶܢܳܗ̇ ܠܰܝܬ ܗܘܳܐ ܠܶܗ: ܘܰܒܥܽܘܒܶܗ ܡܰܕܡܶܟ ܗܘܳܐ ܠܳܗ̇. ܘܡܶܢ ܠܰܚܡܳܐ ܕܳܐܟܶܠ ܗܘܳܐ ܡܰܘܟܶܠ ܠܳܗ̇ ܥܰܡܶܗ ܘܡܶܢ ܫܶܩܝܶܗ ܡܰܫܩܶܐ ܗܘܳܐ ܠܳܗ̇. ܡܶܢ ܡܳܐ ܕܝܰܬܺܝܪ ܪܳܚܶܡ ܗܘܳܐ ܠܳܗ̇. ܘܩܳܡ ܚܰܕ ܓܰܒܪܳܐ ܛܪܽܘܢܳܐ ܘܥܰܫܺܝܢ ܚܰܝܠܐ܆ ܠܗܰܘ ܐܰܝܢܳܐ ܕܺܐܝܬ ܗܘܳܐ ܠܶܗ ܡܳܐܐ ܦܰܐܪ̈ܺܝܢ ܕܥܳܢܴ̈ܐ ܕܛܳܒ ܫܰܡܺܝ̈ܢܳܢ ܡܶܢ ܗܳܝ܆ ܘܢܰܣܒܳܗ̇ ܠܗܳܝ ܦܰܪܬܳܐ ܡܶܢ ܗܰܘ ܡܶܣܟܺܢܳܐ ܘܰܐܟܠܳܗ̇ ܘܩܰܛܠܶܗ ܠܗܰܘ ܡܶܣܟܺܢܳܐ ܡܳܪܳܗ̇. ܡܳܢܳܐ ܦܳܩܶܕ ܢܳܡܽܘܣܳܐ ܕܰܐܠܳܗܳܐ ܩܕܳܡܰܝܟ ܥܰܠ ܗܰܘ ܛܪܽܘܢܳܐ ܕܰܥܒܰܕ ܗܳܕܶܐ. ܟܰܕ ܠܳܐ ܐܰܣܟܶܠ ܒܶܗ ܗܰܘ ܡܶܣܟܺܢܳܐ. ܘܶܐܡܰܪ ܡܰܠܟܳܐ ܕܰܘܝܕ ܠܘܳܬ ܢܳܬܳܢ ܢܒܺܝܶܗ ܕܰܐܠܳܗܳܐ ܕܡܶܢ ܓܶܒܥܽܘܢ. ܦܳܩܶܕ ܢܳܡܽܘܣܳܐ ܕܰܐܠܳܗܳܐ ܥܰܠ ܗܳܢܳܐ ܓܰܒܪܳܐ ܕܳܐܡܰܪ ܐܰܢܬ ܩܶܛܠܳܐ ܘܒܳܬܰܪܟܶܢ ܝܰܩܕܳܢܳܐ. ܘܶܐܡܰܪ ܢܒܺܝܳܐ ܗܳܟܰܢ ܙܳܕܶܩ ܕܢܶܗܘܶܐ. ܐܳܡܰܪ ܡܰܠܟܳܐ ܗܳܟܰܢ ܦܳܩܶܕ ܢܳܡܽܘܣܳܐ ܕܰܐܠܳܗܳܐ ܥܰܠ ܗܰܘ ܕܳܘܝܳܐ ܕܰܥܒܰܕ ܗܳܕܶܐ. ܐܳܡܰܪ ܡܰܠܟܳܐ ܡܰܢܽܘ ܐܺܝܬܰܘܗܝ ܗܳܢܳܐ ܐ̱ܡܰܪ ܠܺܝ ܢܒܺܝܶܗ ܕܰܐܠܳܗܳܐ. ܐܳܡܰܪ ܢܳܬܳܢ ܐܰܢܬ ܐܺܝܬܰܝܟ ܡܰܠܟܶܗ ܕܺܝܣܪܳܐܝܠ ܕܰܩܛܰܠܬ ܠܐܽܘܪܺܝܳܐ ܘܰܢܣܰܒܬܳܗ̇ ܠܰܐܢܬܬܶܗ. ܡܳܢܳܐ ܐܰܣܟܶܠ ܒܳܟ ܐܽܘܪܺܝܳܐ ܕܰܩܛܰܠܬܝܗܝ ܘܰܢܣܰܒܬ ܒܰܪܬ ܙܰܘܓܶܗ ܘܓܳܪܬ ܒܳܗ̇ ܘܠܳܐ ܕܚܶܠܬ ܘܠܐ ܙܳܥܬ ܡܶܢ ܐܰܠܳܗܳܐ ܕܝܳܬܶܒ ܥܰܠ ܟܽܘܪܣܝܶܗ ܒܰܫܡܰܝܳܐ. ܒܗܳܝ ܕܶܐܡܰܪܬ ܕܦܳܩܶܕ ܢܳܡܽܘܣܳܐ ܥܰܠ ܩܳܛܽܘ̈ܠܐܷ ܘܓܰܝܳܪ̈ܶܐ ܢܽܘܪܳܐ ܘܝܰܩܕܳܢܳܐ. ܠܳܐ ܕܚܶܠܬ ܒܗܳܝ ܕܡܶܢ ܦܽܘܡܳܟ ܢܶܣܰܒ ܐܰܠܗܳܐ ܘܢܰܘܩܕܳܟ. ܠܳܐ ܣܒܰܥܬ ܡܶܢ ܡܳܐܐ ܢܶܫܻ̈ܝܢ ܕܺܐܝܬ ܠܳܟ ܐܶܠܐ ܐܶܬܝܰܥܰܢܬ ܥܰܠ ܗܰܘ ܡܶܣܟܺܢܳܐ ܘܰܢܣܰܒܬ ܕܺܝܠܶܗ ܘܰܩܛܰܠܬܳܝܗܝ ܟܰܕ ܠܳܐ ܐܰܣܟܶܠ ܠܳܟ. ܗܳܫܳܐ ܐܰܢܬ ܬܶܕܰܥ ܡܰܠܟܶܗ ܕܺܝܣܪܳܐܝܠ ܐܶܢ ܠܳܐ ܬܶܥܽܘܠ ܬܚܶܝܬ ܢܺܝܪܳܐ ܕܰܬܝܳܒܽܘܬܳܐ ܘܬܰܘܕܶܐ ܒܰܚܛܳܗܰܝ̈ܟ. ܘܶܐܠܳܐ ܐܰܠܳܗܳܐ ܥܬܺܝܕ ܕܢܶܫܪܶܝܟ ܡܶܢ ܡܰܠܟܽܘܬܳܟ. ܘܢܶܦܩܽܘܕ ܥܠܰܝܟ ܓܙܳܪܕܺܝܢܳܐ ܐܰܟܡܳܐ ܕܫܳܘܶܐ ܐܰܢܬ. ܗܳܝܕܶܝܢ ܕܰܘܺܝܕ ܐܰܪܟܶܢ ܪܺܝܫܶܗ ܩܕܳܡ ܢܳܬܳܢ ܢܒܺܝܳܐ ܘܰܒܟܳܐ ܡܰܪܺܝܪܳܐܝ̣ܬ ܘܰܐܘܕܺܝ ܒܰܚ̈ܛܳܗܰܘܗܝ ܘܶܐܡܰܪ: ܚܛܺܝܬ ܘܰܐܣܟܠܶܬ ܩܕܳܡ ܐܰܠܳܗܳܐ ܘܰܩܕܳܡܰܝܟ ܢܒܺܝܶܗ ܕܰܐܠܳܗܳܐ. ܘܠܳܐ ܡܶܟܺܝܠ ܫܳܘܶܐ ܐܢܳܐ ܕܶܐܬܩܪܶܐ ܡܰܠܟܶܗ ܕܺܝܣܪܳܐܝܠ
ܐܰܪܰܐ ܚܙܰܝܬ ܠܗܳܝ ܬܝܳܒܽܘܬܳܐ ܕܩܰܪܶܒ܆ ܘܰܠܗܳܠܶܝܢ ܕܶܡܥ̈ܐ ܕܶܐܫܰܕ ܒܰܬܝܳܒܽܘܬܶܗ ܘܰܠܗܰܘ ܒܶܟܝܳܐ ܡܰܪܺܝܪܳܐ ܘܰܠܗܳܠܶܝܢ ܚܶܢ̈ܓܳܬܳܐ ܘܠܳܐ ܫܡܰܥܬ ܟܰܕ ܐܳܡܰܪ: ܕܩܶܛܡܳܐ ܐܰܝܟ ܠܰܚܡܳܐ ܠܶܥܣܶܬ: ܘܡܰܫܬܝ ܒܰܒܟܳܬܳܐ (ܡܙܡܘܪܐ ܩܒ: ܛ). ܘܨܰܒܥܶܬ ܒܟܽܠ ܠܰܝܠܐܷ ܥܰܪܣܝ. ܘܰܒܕܶܡܥܰܬܝ ܬܰܫܘܺܝܬܝ ܐܰܡܣܺܝܬ ܘܟܶܐܒܰܬ ܡܶܢ ܪܽܘܓܙܳܐ ܥܰܝܢܝ (ܡܙܡܘܪܐ ܘ: ܙ-ܚ).
ܘܰܒܗܳܝ ܬܝܳܒܽܘܬܶܗ ܠܐ ܐܶܬܩܰܫܺܝ ܡܣܳܡ ܒܪܺܝܫܳܐ ܕܰܦܩܺܝܕ ܗܘܳܐ ܥܠܰܘܗܝ. ܒܗܳܠܶܝܢ ܬܪܶܝܢ ܚܛܳܗ̈ܐ ܩܫܰܝܴ̈ܐ ܘܰܕܚܺܝ̈ܠܐܷ. ܒܚܰܕ ܣܽܘܥܪܳܢܳܐ ܐܶܬܬܚܶܕ ܕܰܘܝܕ ܘܰܢܦܰܠ ܗܰܘ ܟܺܐܢܳܐ ܘܙܰܕܺܝܩܳܐ. ܗܰܘ ܕܰܠܫܳܐܘܳܠ ܒܥܶܠܕܒܳܒܶܗ ܘܒܳܥܶܐ ܢܰܦܫܶܗ ܠܳܐ ܐܶܬܬܦܺܝܣ ܠܡܶܩܛܠܶܗ܆ ܐܶܠܐ ܡܦܰܨܶܐ ܗܘܳܐ ܠܶܗ ܡܶܢ ܐܰܒܺܝܫܰܝ ܕܠܳܐ ܢܚܰܒܠܺܝܘܗܝ. ܘܟܰܕ ܡܺܝܬ ܥܒܰܕ ܥܠܰܘܗܝ ܐܽܘܠܺܝܬܳܐ. ܐܰܝܟ ܕܥܰܠ ܓܰܒܪܳܐ ܟܺܐܢܳܐ. ܘܰܠܗܰܘ ܕܶܐܡܰܪ ܕܩܰܛܠܶܗ܆ ܣܒܰܪ ܕܰܡܚܰܕܳܝܽܘ ܡܚܰܕܶܐ ܠܶܗ. ܠܡܰܘܬܳܐ ܚܢܺܝܓܳܐ ܕܣܰܝܦܳܐ ܐܰܫܠܡܶܗ. ܠܗܳܢܳܐ ܕܗܳܟܰܢܳܐ ܟܺܐܝܢ ܗܘܳܐ ܘܙܰܕܺܝܩ ܘܳܐܡܰܪ ܗܘܳܐ ܠܘܳܬ ܐܰܠܳܗܳܐ. ܡܶܢ ܒܳܬܰܪ ܬܝܳܒܽܘܬܳܐ ܗܳܝ ܕܰܥܒܰܕ ܠܘܳܬ ܐܰܠܗܳܐ. ܒܳܬܰܪ ܩܶܛܠܳܐ ܗܰܘ ܕܰܥܒܰܕ. ܘܒܳܬܰܪ ܡܰܟܣܳܢܽܘܬܶܗ ܕܰܢܒܺܝܳܐ. ܕܶܐܢ ܐܺܝܬ ܥܰܘܠܳܐ ܒܺܐܝ̈ܕܰܝ. ܘܶܐܢ ܦܶܪܥܶܬ ܠܡܰܢ ܕܰܥܒܰܕ ܠܺܝ ܒܺܝܫܬܳܐ: ܘܶܐܢ ܐܰܠܨܶܬ ܠܰܒܥܶܠܕ̈ܒܳܒܰܝ ܣܪܺܝܩܳܐܝ̣ܬ. ܢܶܪܕܽܘܦ ܒܥܶܠܕܒܳܒܳܐ ܠܢܰܦܫܝ ܘܢܰܕܪܟܺܝܗ̇ (ܡܙܡܘܪܐ ܙ: ܗ-ܘ). ܟܰܡܺܝܢ ܗܰܘ ܒܥܶܠܕܒܳܒܳܐ ܕܚܰܝܰܝ̈ܢ ܒܶܐܠܥܳܐ ܪܦܺܝܬܳܐ ܕܦܰܚܳܐ ܨܢܺܝܥܳܐ. ܘܒܰܬܪܶܝܢ ܚܛܳܗ̈ܐ ܪܰܘܪ̈ܒܶܐ ܒܚܰܕ ܣܽܘܥܪܳܢܳܐ ܐܰܪܡܝܶܗ ܗܰܘ ܕܰܡܓܰܪܶܓ ܗܘܳܐ ܠܶܗ ܕܢܶܣܥܶܐ ܥܰܠ ܫܳܐܘܳܠ ܕܢܶܩܛܠܺܝܘܗܝ ܘܠܳܐ ܐܶܬܡܨܺܝ ܚܰܝܠܶܗ ܕܰܚܠܺܝܨܳܐ. ܒܗܳܝ ܕܠܳܐ ܡܚܰܦܰܝ ܗܘܳܐ ܦܰܚܳܐ ܕܨܳܠܐ ܗܘܳܐ. ܘܡܶܢ ܕܠܳܐ ܐܶܫܟܰܚ ܕܰܒܗܳܠܶܝܢ ܢܶܫܒ̈ܐ ܕܒܶܝܬ ܫܳܐܘܳܠ ܢܶܦܟܪܶܗ ܠܓܰܢ̱ܒܳܪܳܐ. ܐܶܬܦܰܪܰܣ ܨܢܺܝܥܳܐ ܒܽܐܘܡܳܢܽܘܬܳܐ ܠܰܚܠܺܝܨܳܐ. ܝܳܕܰܥ ܗܘܳܐ ܓܶܝܪ ܕܰܒܗܳܢܳܐ ܦܰܚܳܐ ܡܥܳܕ ܨܳܐܷܕ. ܘܰܡܫܰܦܶܠ ܠܓܰܢ̱ܒܳܪ̈ܐ. ܡܶܢ ܒܪܺܝܫܺܝܬ ܒܗܳܢܳܐ ܦܰܚܳܐ ܕܶܐܠܥܳܐ ܪܦܺܝܬܳܐ ܨܳܕܶܗ ܠܗܰܘ ܪܺܝܫ ܓܶܢܣܰܢ ܐܳܕܳܡ ܫܰܦܺܝܪܳܐ. ܘܰܒܗܳܢܳܐ ܦܰܚܳܐ ܠܐܻܝܽܘܒ ܡܓܰܪܶܓ ܗܘܳܐ ܕܢܶܫܪܰܥ. ܘܰܒܗܳܢܳܐ ܦܰܚܳܐ ܪܰܦܝܳܐ ܥܰܡܳܐ ܩܰܕܺܝܫܳܐ ܐܶܬܬܚܶܕ ܒܡܰܕܒܪܳܐ ܘܥܶܣܪܺܝܢ ܘܰܬܠܳܬܳܐ ܐܰܠܦܺܝ̈ܢ ܢܦܰܠܘ ܥܰܠ ܙܰܠܺܝ̈ܠܳܬܳܐ ܒܦܰܚܳܐ. ܗܳܢܽܘܢ ܕܡܶܛܠ ܗܳܕܶܐ ܒܡܰܘܬܳܢܳܐ ܕܡܶܢ ܫܶܠܝܳܐ ܡܺܝܬܘ. ܘܥܰܠܗܳܕܶܐ ܒܰܕܝܳܕܰܥ ܗܘܳܐ ܗܰܘ ܨܰܝܳܕܳܐ ܕܰܐܒܕܳܢܳܐ. ܕܡܶܛܠ ܗܰܢܺܝܽܘܬܳܐ ܕܰܫܟܺܝܚܳܐ ܟܝܳܢܳܐܝ̣ܬ ܓܰܘܪܳܐ ܠܗܳܢܳܐ ܦܰܚܳܐ ܨܠܳܐ ܩܕܳܡ ܬܰܡܺܝܡܳܐ ܒܽܐܘܪܚܳܐ. ܒܪܰܡ ܗ̱ܘܳܐ ܠܶܗ. ܐܰܬܪܳܐ ܠܰܒܥܶܠܕܒܳܒܶܗ ܥܠܰܘܗܝ. ܘܟܰܕ ܥܰܡܳܐ ܩܰܕܺܝܫܳܐ ܡܶܬܟܰܬܰܫ ܒܪܶܒܰܬ ܥܰܡ ܒܥܶܠܕ̈ܒܳܒܰܘܗܝ ܘܕܰܘܝܕ ܒܫܶܠܝܳܐ ܘܰܒܢܰܘܚܳܐ ܘܰܒܫܶܠܝܳܐ ܡܶܬܒܰܣܰܡ ܗܘܳܐ܆ ܟܡܶܢ ܗܘܳܐ ܢܟܺܝܠܳܐ ܠܡܰܠܟܳܐ ܒܚܰܡܪܳܐ ܘܰܒܒܶܣܡܳܐ. ܘܰܪܗܶܛ ܚܰܦܶܛ ܠܒܰܪܬܫܒܰܥ ܕܬܶܦܽܘܩ ܠܰܡ ܬܶܣܚܶܐ ܒܢܰܗܪܳܐ ܕܰܒܦܰܪܕܰܝܣܳܐ ܠܘܰܥܕܳܐ ܕܥܶܕܳܢ ܪܰܡܫܳܐ. ܟܰܕ ܠܰܘ ܒܥܰܦܪܳܐ ܛܰܡܪܶܗ ܠܦܰܚܳܐ. ܐܶܠܳܐ ܒܡܰܝܴ̈ܐ ܡܟܰܣܶܐ ܗܘܳܐ ܠܳܗ̇ ܠܶܐܠܥܳܐ ܪܦܺܝܬܳܐ. ܡܓܰܪܶܓ ܗܘܳܐ ܠܶܗ ܠܓܰܒܪܳܐ ܢܰܟܦܳܐ ܘܡܰܟܺܝܟܳܐ܆ ܕܢܶܬܢܰܚܰܬ ܚܰܘܪܶܗ ܠܥܽܘܡܩܳܐ ܨܶܝܕ ܗܰܢܺܝܽܘܬܳܐ ܕܡܶܬܚܰܙܝܳܐ ܠܥܶܠ ܡܶܢ ܨܝܰܪܬܳܐ ܕܠܳܐ ܡܚܰܦܝܳܐ. ܐܳܘ ܟܡܳܐ ܡܣܰܓܦܺܝܢ ܢܝܳܚ̈ܐ ܐܳܘ ܟܡܳܐ ܒܺܝܫ ܠܳܗ̇ ܠܢܰܦܫܳܐ ܕܬܶܫܠܐܷ ܡܶܢ ܩܪܳܒܳܐ. ܐܶܢܓܶܝܪ ܠܗܳܢܳܐ ܢܝܳܚܳܐ ܘܚܰܝܠܬܳܢܳܐ ܫܰܦܶܠ ܘܰܐܪܦܺܝ ܒܓܰܘܪܳܐ ܘܰܐܪܡܺܝ ܒܦܰܚܶܗ ܡܰܪܳܚܳܐ܆ ܡܳܢܳܐ ܢܶܗܘܶܐ ܡܶܢ ܡܚܺܝ̈ܠܐ ܕܰܨܠܶܝܢ ܠܘܳܬ ܒܽܘ̈ܣܳܡܶܐ܆ ܘܰܚܙܺܝ ܕܠܰܘ ܥܰܡ ܐܰܢܬܬܳܐ ܡܨܰܒܰܬܬܳܐ ܦܰܟܪܶܗ ܠܙܰܕܺܝܩܳܐ. ܐܶܠܐ ܡܶܢ ܛܰܡܽܐܘܬܳܐ ܕܟܶܦܣܳܗ̇ ܣܳܚܝܳܐ ܗܘܳܬ. ܕܠܺܝܠܳܐܝ̣ܬ ܓܶܝܪ ܡܥܳܕ ܨܳܐܷܕ ܒܰܐܝܠܶܝܢ ܕܠܳܐ ܡܨܰܒ̈ܬܳܢ. ܝܰܬܺܝܪ ܡܶܢ ܕܰܡܗܰܕܪ̈ܳܢ ܒܰܠܒܽܘ̈ܫܶܐ ܘܰܒܚܶܫ̈ܠܳܬܳܐ ܝܰܬܺܝܪܳܐܝ̣ܬ ܠܐܢܳܫܴ̈ܐ ܙܰܕܺܝ̈ܩܶܐ. ܟܰܕ ܕܶܝܢ ܡܶܪܓܰܬ ܪܶܓܠܶܗ ܕܙܰܕܺܝܩܳܐ ܕܰܘܝܕ. ܒܦܰܚܳܐ ܗܳܢܳܐ ܕܓܰܘܪܳܐ ܛܰܡܳܐܐ. ܒܳܗ̇ ܬܽܘܒ ܟܰܕ ܒܳܗ̇ ܒܫܽܘܪܰܥܬܳܐ. ܒܦܰܚܳܐ ܕܰܬܪܶܝܢ ܕܩܶܛܠܐ ܐܶܬܬܚܶܕ. ܟܰܕ ܐܶܡܪܰܬ ܠܶܗ ܗܳܝ ܡܰܪܳܚܬܳܐ܆ ܐܰܝܟ ܕܡܶܢ ܠܶܫܳܢܶܗ ܕܡܳܪܽܘܕܳܐ ܘܨܳܠܶܐ ܦܰܚ̈ܐ. ܕܶܐܢܗܽܘ ܕܒܳܥܶܝܬ ܕܬܶܗܘܶܐ ܐܺܝܬܰܝ ܕܺܝܠܳܟ܆ ܩܛܽܘܠ ܠܒܰܥܠܝ ܘܫܰܡܠܳܐ ܪܶܓܬܳܟ ܘܣܰܒܺܝܢܝ ܒܢܶܫܷ̈ܐ. ܘܫܰܕܰܪ ܥܰܬܶܕ ܢܶܟܠܳܐ ܥܰܠ ܙܰܕܺܝܩܳܐ ܘܬܰܡܺܝܡܳܐ ܐܽܘܪܺܝܳܐ ܓܰܢ̱ܒܳܪܳܐ ܕܺܝܣܪܳܐܝܠ. ܘܰܚܪܰܒ ܒܰܦܠܰܫܬܳܝ̈ܐ ܥܰܡܳܐ ܣܰܓܺܝܳܐܐ ܕܠܳܐ ܡܶܢܝܳܢܳܐ. ܘܶܐܬܩܛܶܠ ܒܰܟܡܺܐܢ̈ܐ ܕܢܶܟܠܳܐ ܕܥܰܬܶܕ ܠܶܗ ܕܰܘܝܕ. ܘܒܳܬܰܪ ܢܣܰܒ ܐܰܢܬܬܶܗ ܘܫܰܡܠܺܝ ܪܶܓܬܶܗ ܡܰܘܒܕܳܢܺܝܬܶܗ ܘܓܳܪ ܘܰܢܦܰܠ ܗܘܳܐ ܡܶܢ ܟܽܘܪܣܝܶܗ ܘܶܐܬܚܰܝܰܒ ܕܶܐܫܰܕ ܠܰܕܡܳܐ ܙܰܟܳܝܳܐ ܕܒܶܝܬ ܐܽܘܪܺܝܳܐ. ܘܰܥܒܰܕ ܓܰܘܪܳܐ ܘܙܳܢܝܽܘܬܳܐ ܩܕܳܡ ܐܰܠܳܗܳܐ. ܗܳܝܕܶܝܢ ܟܺܐܢܽܘܬܳܐ ܫܶܡܛܰܬ ܣܰܝܦܳܐ ܕܬܶܩܛܽܘܠ ܘܬܰܘܒܶܕ ܠܕܰܘܝܕ. ܘܛܰܝܒܽܘܬܳܐ ܦܶܪܣܰܬ ܟܶܢܦܶܝ̈ܗ̇ ܕܰܬܦܰܨܶܐ. ܘܶܐܙܰܠ̱ܬ ܠܶܚܫܰܬ ܠܰܢܒܺܝܳܐ ܢܳܬܳܢ ܓܶܒܥܽܘܢܳܝܳܐ. ܐܰܝܟ ܗܳܝ ܕܶܐܡܰܪܢܰܢ ܡܶܢ ܠܥܶܠ. ܫܰܕܰܪ ܗܰܘ ܢܶܒܥܳܐ ܐܰܡܺܝܢܳܐ ܕܪ̈ܰܚܡܶܐ܆ ܕܢܰܘܕܥܶܗ ܠܰܢܒܺܝܳܐ ܥܰܠ ܫܽܘ̈ܚܢܶܐ ܘܰܬܒܳܪܳܐ ܕܥܶܒܕܰܬ ܒܶܗ ܚܛܺܝܬܳܐ. ܘܟܰܕ ܝܠܶܦ ܒܝܰܕ ܢܳܬܳܢ ܢܒܺܝܳܐ. ܒܰܐܝܠܶܝܢ ܚܛܳܗ̈ܐ ܐܶܬܩܰܕܰܡ ܢܦܰܠ܆ ܡܶܛܠ ܕܥܰܡܶܗ ܕܳܐܣܝܳܐ ܗܰܘ ܕܰܛܥܺܝܢ ܗܘܳܐ ܦܰܪܙܠܳܐ ܠܰܓܙܳܪܳܐ. ܐܶܬܳܐ ܣܰܡܳܐ ܗܰܘ ܕܡܰܚܠܶܡ ܠܰܓܙܺܝܪܳܐ. ܟܰܕ ܠܨܶܒܝܳܢܳܐ ܕܰܟܪܺܝܗܳܐ ܒܰܠܚܽܘܕ ܚܙܳܬ ܛܰܝܒܽܘܬܳܐ. ܩܶܪܒܰܬ ܐܳܣܝܽܘܬܳܐ ܠܰܬܒܺܝܪܳܐ. ܡܶܢ ܒܳܬܰܪ ܓܶܝܪ ܕܺܝܠܶܦ ܕܰܘܝܕ ܡܳܢܳܐ ܣܥܰܪ܆ ܐܶܬܓܗܶܢ ܘܶܐܬܟܰܦܰܦ ܩܕܳܡ ܟܺܐܢܽܘܬܳܐ ܘܰܐܝܟ ܕܡܶܢ ܚܰܫܳܐ ܥܰܡܺܝܩܳܐ ܡܒܰܓܶܢ ܗܘܳܐ ܘܳܐܡܰܪ: ܘܰܚܛܺܝܬ ܘܰܐܣܟܠܶܬ ܩܕܳܡ ܐܰܠܳܗܳܐ ܕܺܝܣܪܳܐܝܠ. ܘܒܶܗ ܒܥܶܕܳܢܳܐ ܣܰܡܟܶܗ ܢܒܺܝܳܐ ܢܳܬܳܢ ܟܰܕ ܐܳܡܰܪ: ܐܳܦ ܡܳܪܝܳܐ ܐܰܥܒܰܪ ܣܰܟܠܽܘܬܳܟ ܠܳܐ ܬܡܽܘܬ ܡܰܠܟܶܗ ܕܺܝܣܪܳܐܝܠ (ܒ ܫܡܘܐܝܠ ܝܒ: ܝܓ). ܒܗܳܢܳܐ ܙܰܒܢܳܐ ܕܶܐܬܬܚܶܕ ܗܳܢܳܐ ܡܰܠܟܳܐ ܟܺܐܢܳܐ ܒܗܳܠܶܝܢ ܬܪܶܝܢ ܚܛܳܗ̈ܐ܆ ܕܓܰܘܪܳܐ ܕܰܐܢܬܰܬ ܓܰܒܪܳܐ ܘܰܒܩܶܛܠܳܐ ܕܗܰܘ ܓܰܒܪܳܐ ܟܺܐܢܳܐ. ܡܰܙܡܽܘܪܳܐ ܗܳܢܳܐ ܕܚܰܡܫܺܝܢ ܘܚܰܕ ܙܰܡܰܪ ܗܘܳܐ. ܟܰܕ ܒܶܗ ܡܚܰܘܶܐ. ܕܒܰܐܝܠܶܝܢ ܕܶܡܥ̈ܐ ܡܦܺܝܣ ܗܘܳܐ ܘܫܳܐܷܠ ܐܳܣܝܽܘܬܳܐ. ܠܰܘ ܓܶܝܪ ܠܘܳܬ ܢܰܘܚܳܐ ܕܡܶܢ ܬܝܳܒܽܘܬܳܐ ܥܛܰܦ܆ ܟܰܕ ܐܶܡܰܪ ܠܶܗ ܢܒܺܝܳܐ ܕܥܶܒܪܰܬ ܣܰܟܠܽܘܬܳܟ. ܐܶܠܐ ܟܰܕ ܝܳܨܶܦ ܟܺܐܒܶܗ ܕܫܽܘܚܢܳܐ ܡܥܰܣܶܩ ܗܘܳܐ ܠܢܰܦܫܶܗ ܩܰܫܝܳܐܝ̣ܬ ܘܡܰܝܠܶܠ ܡܶܢ ܥܰܙܺܝܙܽܘܬܳܐ ܕܰܢܩܳܫܳܐ ܕܰܬܒܳܪܶܗ܆ ܒܕܶܡܥ̈ܐ ܘܰܒܚܶܢ̈ܓܳܬܳܐ ܡܶܬܓܰܪܓܰܚ ܗܘܳܐ ܥܰܠ ܬܰܪܥܳܗ̇ ܕܟܺܐܢܽܘܬܳܐ. ܟܰܕ ܐܳܟܶܠ ܩܶܛܡܳܐ ܚܠܳܦ ܠܰܚܡܳܐ. ܟܰܕ ܫܳܬܶܐ ܕܶܡܥ̈ܐ ܚܠܳܦ ܡܰܝܴ̈ܐ. ܟܰܕ ܡܰܘܟܶܡ ܓܰܘܢܳܐ ܫܰܦܺܝܪܳܐ ܘܣܽܘܡܰܩܪܝܳܐ ܕܓܽܘܫܡܶܗ. ܠܗܶܢܕܘܳܝܳܐ ܘܒܰܕܡܽܘܬܳܐ ܕܫܽܘܚܳܪܳܐ ܟܰܕ ܕܒܶܩ ܒܶܣܪܶܗ ܠܓܰܪ̈ܡܰܘܗܝ ܡܶܢ ܩܳܠܐ ܕܬܶܢܚ̈ܬܳܐ. ܟܰܕ ܡܢܰܗܶܡ ܐܰܝܟ ܥܽܘܕܳܐ ܒܚܰܪܒܬܳܐ ܕܠܰܝ̈ܠܰܘܳܬܳܐ. ܥܰܠ ܡܰܘܬܒܳܐ ܕܰܡܛܳܝܗܝ ܒܰܚܛܺܝܬܳܐ. ܟܰܕ ܡܶܬܕܰܡܶܐ ܠܩܳܩܳܐ ܡܰܕܒܪܳܝܳܐ. ܡܶܛܠ ܚܶܫܽܘܟܳܐ ܕܰܣܥܳܐ ܥܠܰܘܗܝ ܒܥܰܘܠܳܐ ܕܒܶܝܬ ܐܽܘܪܺܝܳܐ. ܐܶܠܐ ܗܳܫܳܐ ܠܰܘ ܫܰܪܒܳܐ ܕܗܳܠܶܝܢ ܡܰܝܬܶܐ. ܡܛܰܝܰܒ ܓܶܝܪ ܕܡܳܐ ܕܫܶܐܠ ܪ̈ܰܚܡܶܐ ܘܰܫܩܰܠ. ܢܪܰܥܶܐ ܠܟܺܐܢܽܘܬܳܐ ܒܰܬܝܳܒܽܘܬܳܐ. ܘܰܚܙܺܝ ܠܗܳܠܶܝܢ ܡܰܙܡܽܘܪ̈ܶܐ ܚܰܡܫܺܝܢ ܕܶܐܬܢܰܗܰܪܘ ܒܰܟܬܳܒܳܐ ܒܦܽܘܫܳܩܳܐ ܩܰܕܡܳܝܳܐ. ܕܒܰܐܝܠܶܝܢ ܢܺܝ̈ܫܶܐ ܐܶܬܡܰܠܰܠܘ. ܘܚܽܘܪ ܬܽܘܒ ܒܗܳܠܶܝܢ ܕܰܟܬܳܒܳܐ ܕܰܬܪܶܝܢ. ܐܶܢ ܐܰܠܳܗܳܐ ܢܶܨܒܶܐ ܐܺܝܬ ܠܰܢ ܠܰܡܦܰܫܳܩܽܘ. ܕܒܰܐܝܕܳܐ ܦܳܪܽܘܫܽܘܬܳܐ ܕܰܡܝܰܬܪܳܐ ܡܶܬܦܰܫܩܺܝܢ. ܥܕܰܡܳܐ ܓܶܝܪ ܠܗܳܫܳܐ ܐܰܝܟ ܕܠܳܐ ܡܢܰܣܰܝ ܗܘܳܐ ܒܰܚܛܺܝܬܳܐ. ܡܡܰܠܶܠ ܗܘܳܐ. ܗܳܫܳܐ ܕܶܝܢ ܐܰܝܟ ܕܰܒܡܳܐܢܳܐ ܕܡܶܢ ܒܳܬܰܪ ܕܶܐܬܦܰܠܦܰܠ ܘܰܦܢܳܐ ܐܶܬܚܰܠܰܠ ܡܶܬܚܰܫܰܚ ܒܳܗ̇ ܒܡܶܠܬܶܗ. ܡܶܛܠܗܳܢܳܐ ܐܰܝܟ ܗܰܘ ܕܰܫܝܳܓܬܳܐ ܒܳܥܶܐ ܡܰܘܕܰܥ ܗܽܘ ܒܡܶܠܰܘ̈ܗܝ. ܘܥܰܠܗܳܝ ܚܢܺܝܓܳܐܝ̣ܬ ܡܙܰܡܰܪ ܗܘܳܐ ܘܳܐܡܰܪ:
ܪܰܚܶܡ ܥܰܠܝ ܐܰܠܳܗܳܐ ܐܰܝܟ ܛܰܝܒܽܘܬܳܟ: ܘܰܐܝܟ ܣܽܘܓܳܐܐ ܕܪ̈ܰܚܡܰܝܟ ܥܛܺܝ ܚܛܳܗܱ̈ܝ. ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ: ܘܡܶܢ ܚܛܰܗ̈ܝ ܕܰܟܳܢܝ. ܬܩܽܘܠ ܠܰܡ ܪ̈ܰܚܡܰܝܟ ܥܰܡ ܚܛܳܗ̈ܝ. ܘܶܐܬܬܫܺܝܓ ܡܶܢ ܣܝܳܢܳܐ ܕܦܰܠܦܶܠܬܰܢܝ ܚܛܺܝܬܳܐ ܒܩܳܒܺܝܬܳܐ ܕܕܰܟܝܰܬ ܠܰܐܢܬܬܳܐ ܡܶܢ ܛܰܡܽܐܘܬܳܐ ܕܟܶܦܣܳܗ̇. ܐܶܢܓܶܝܪ ܗܳܝ ܣܚܳܬ ܡܶܛܠ ܕܬܶܬܕܰܟܶܐ ܒܢܳܡܽܘܣܳܐ. ܟܡܳܐ ܠܺܝ ܢܰܫܺܝܓ ܝܰܡܳܐ ܕܰܡܪܰܚܡܳܢܽܘܬܳܟ. ܡܶܢ ܟܽܘ̈ܬܡܳܬܳܐ ܕܥܶܒܕܰܬ ܒܺܝ ܚܛܺܝܬܳܐ ܡܰܦܽܘܠܬܳܐ ܕܰܒܓܰܘ ܩܳܒܺܝܬܳܐ. ܚܙܺܝ ܗܳܟܺܝܠ ܐܰܝܟܰܢܳܐ ܠܳܚܶܡ ܙܽܘܡܳܪܶܗ ܠܒܳܥܽܘܬܶܗ. ܘܚܽܘܪ ܐܰܝܟܰܢܳܐ ܡܶܬܒܰܩܶܐ ܗܘܳܐ ܒܗܰܘܢܶܗ. ܘܚܳܐܱܪ ܒܢܰܦܫܶܗ ܐܰܝܟܰܢܳܐ ܐܶܬܦܰܠܦܠܰܬ ܒܡܰܝܴ̈ܐ ܡܟܰܪ̈ܗܶܐ ܕܰܚܛܺܝܬܳܐ. ܕܛܳܐܦ ܗܘܳܐ ܒܗܽܘܢ ܕܡܳܐ ܕܟܶܦܣܳܐ. ܘܥܰܠܗܳܝ ܠܘܳܬ ܢܶܒܥܳܐ ܩܰܕܺܝܫܳܐ ܕܰܡܪܰܚܡܳܢܽܘܬܶܗ ܕܰܐܠܳܗܳܐ ܩܳܪܶܒ ܗܘܳܐ. ܘܫܳܐܷܠ ܕܢܶܬܬܫܺܝܓ ܡܶܢ ܗܳܝ ܛܰܡܽܐܘܬܳܐ. ܕܣܰܝܒܰܬ ܠܡܳܐܢܳܐ ܩܰܕܺܝܫܳܐ ܕܢܰܦܫܶܗ. ܘܒܰܚܢܰܓܬܳܐ ܐܳܡܰܪ ܗܘܳܐ܆ ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ. ܬܶܗܘܶܐ ܠܳܟ ܠܰܡ ܒܛܺܝܠܽܘܬܳܐ ܥܰܠ ܡܳܐܢܳܐ ܓܰܒܝܳܐ ܕܰܢܒܺܝܽܘܬܳܐ. ܕܚܰܝܽܘܬܳܐ ܒܺܝܫܬܳܐ ܣܰܒܟܰܬ ܒܶܗ ܘܣܰܝܶܒܬܶܗ. ܘܢܳܡܽܘܣܳܐ ܕܒܶܝܬ ܡܽܘܫܶܐ ܐܶܢ ܕܳܐܢ ܠܶܗ ܬܳܒܰܪ ܠܶܗ. ܘܶܐܢ ܦܳܓܰܥ ܒܶܗ ܡܰܘܒܶܕ ܠܶܗ܆ ܘܶܐܢ ܩܳܪܶܒ ܠܘܳܬ ܟܳܗܢ̈ܐ ܘܠܶܘܳܝ̈ܐ ܡܚܰܒܠܺܝܢ ܠܶܗ. ܐܶܠܐ ܢܕܰܒܪܽܘܢ ܪ̈ܰܚܡܰܝܟ ܒܰܩܛܺܝܪܳܐ ܠܢܳܡܽܘܣܳܟ. ܘܠܐ ܢܶܩܛܽܘܠ ܠܩܳܛܽܘܠܳܐ. ܘܠܳܐ ܢܰܘܩܶܕ ܒܢܽܘܪܳܐ ܠܓܰܝܳܪܳܐ. ܝܳܕܰܥ ܐܢܳܐ ܓܶܝܪ ܕܡܶܢ ܢܳܡܽܘܣܳܐ ܟܺܐܢܳܐ ܬܪܶܝܢ ܡܰܘ̈ܬܺܝܢ ܚܰܝܳܒ ܐܢܳܐ܆ ܥܰܠ ܕܩܶܛܠܶܬ ܐܶܬܩܛܶܠ ܘܥܰܠ ܕܓܳܪܶܬ ܐܺܝܩܰܕ ܒܢܽܘܪܳܐ. ܐܶܠܐ ܠܘܳܬ ܪ̈ܰܚܡܰܝܟ ܠܰܝܬ ܢܳܡܽܘܣܳܐ. ܐܰܝܟܳܐ ܕܺܐܝܬ ܛܰܝܒܽܘܬܳܐ ܒܰܛܺܝܠ ܗܽܘ ܫܰܒܛܳܗ̇ ܕܟܺܐܢܽܘܬܳܐ. ܡܳܕܶܝܢ ܒܪ̈ܰܚܡܶܐ ܦܽܘܩ ܠܘܳܬܝ. ܕܡܶܢ ܟܺܐܢܽܘܬܳܐ ܠܳܐ ܚܳܝܶܐ ܐܢܳܐ. ܘܰܒܛܰܝܒܽܘܬܳܐ ܐܶܚܙܶܐ ܐܰܦܰܝ̈ܟ. ܕܶܐܢܗܽܘ ܕܢܳܡܽܘܣܳܐ ܐܶܬܳܐ ܥܰܡܳܟ. ܡܶܬܚܰܒܰܠ ܠܶܗ ܡܳܐܢܳܟ ܫܰܦܺܝܪܳܐ. ܐܶܠܐ ܐܰܣܓܳܐ ܐܰܫܺܝܓ ܡܳܐܢܳܟ. ܕܬܽܘܒ ܢܶܗܘܶܐ ܠܳܟ ܟܶܢܳܪܳܐ. ܠܳܐ ܬܶܥܒܕܰܢܝ ܬܰܡܣܽܘܬܳܐ ܕܰܚܒܳܠܳܐ ܕܰܚܛܺܝܬܳܐ. ܕܣܶܒܟܰܬ ܒܺܝ ܡܶܢ ܡܰܝܴ̈ܐ ܛܰܢܦ̈ܐ ܕܩܳܒܺܝܬܳܐ. ܕܢܶܣܪܶܐ ܪܺܝܚܝ ܗܰܘ ܒܰܣܺܝܡܳܐ ܘܰܪܓܺܝܓܳܐ. ܗܰܘ ܕܦܳܐܱܚ ܗܘܳܐ ܒܶܗ ܪܺܝܚܳܐ ܕܪܽܘܚܳܟ ܩܰܕܺܝܫܳܐ. ܘܕܰܟܳܢܝ ܡܶܢ ܦܽܘܠܦܳܠܳܐ ܕܰܕܡܳܐ ܙܰܟܳܝܳܐ ܕܚܳܒܶܬ ܠܟܺܐܢܽܘܬܳܐ. ܒܩܶܛܠܶܗ ܕܓܰܒܪܳܐ ܙܰܕܺܝܩܳܐ ܐܽܘܪܺܝܳܐ ܗܰܘ ܓܰܢ̱ܒܳܪ ܚܰܝܠܳܐ ܥܰܒܕܳܐ ܕܺܝܠܝ. ܕܰܩܛܰܠܬܶܗ ܒܢܶܟܠܳܐ. ܘܰܐܝܟ ܕܡܶܢ ܩܽܘܪܒܳܐ ܚܳܐܱܪ ܐܢܳܐ ܘܡܶܬܒܰܩܶܐ ܐܢܳܐ ܕܡܳܢܳܐ ܣܶܥܪܰܬ ܒܺܝ ܚܛܺܝܬܳܐ. ܘܰܡܦܳܣ ܐܢܳܐ ܒܣܰܟ̈ܠܘܳܬܝ ܘܝܳܕܰܥ ܐܢܳܐ ܚܛܺܝܬܝ.
ܡܶܛܠ ܕܣܰܟ̈ܠܘܳܬܝ ܝܳܕܰܥ ܐܢܳܐ: ܘܰܚ̈ܛܳܗܰܝ ܠܽܘܩܒܰܠܝ ܐܶܢܽܘܢ ܒܟܽܠܙܒܰܢ. ܥܕܰܡܳܐ ܠܗܳܫܳܐ ܠܳܟ ܣܳܡܶܬ ܠܽܘܩܒܰܠ ܥܰܝܢܝ. ܘܰܗܘܰܝܬ ܡܶܢ ܝܰܡܺܝܢܝ ܘܠܐ ܙܳܥܶܬ. ܗܳܫܳܐ ܟܰܕ ܡܶܢ ܠܘܳܬܳܟ ܐܰܦܢܺܝܬ ܚܰܘܪܳܐ ܕܥܰܝ̈ܢܰܝ. ܠܘܳܬ ܐܶܠܥܳܐ ܪܦܺܝܬܳܐ ܕܣܳܚܝܳܐ ܡܶܢ ܦܽܘܠܦܳܠܐ ܕܰܕܡܳܗ̇ ܒܩܳܒܺܝܬܳܐ. ܥܶܡܛܰܬ ܚܙܳܬܝ ܒܚܶܫܟܳܐ ܕܰܚܛܺܝܬܳܐ. ܘܰܚܠܳܦܰܝܟ ܗܳܐ ܚܛܳܗ̈ܝ ܗܘܰܘ ܫܽܘܪܳܐ ܠܽܘܩܒܰܠ ܥܰܝ̈ܢܰܝ. ܘܰܒܗܽܘܢ ܡܶܟܺܝܠ ܐܶܢܳܐ ܚܳܐܱܪ ܐܢܳܐ. ܥܕܰܡܳܐ ܕܰܡܪܺܝܡ ܠܗܽܘܢ ܚܢܳܢܳܟ ܡܶܢ ܩܕܳܡ ܥܰܝ̈ܢܰܝ ܒܫܽܘܒܩܳܢܳܐ ܘܡܶܬܩܰܦܠܳܐ ܥܢܳܢܳܐ ܕܰܚܛܺܝܬܳܐ ܕܶܐܬܚܰܦܝܰܬ ܥܰܠ ܚܙܳܬܳܐ ܕܥܰܝ̈ܢܰܝ. ܘܚܳܙܶܐ ܐܢܳܐ ܗܰܘ ܨܰܚܘܳܐ ܢܰܗܺܝܪܳܐ. ܕܡܰܦܨܰܚ ܗܘܳܐ ܠܺܝ ܒܕܶܢܚܳܐ ܕܓܶܠܝܳܢܰܝ̈ܟ ܐܰܠܳܗܳܝ̈ܐ. ܡܶܛܠ ܕܒܳܟ ܐܰܣܟܠܶܬ ܘܡܶܢܳܟ ܐܶܢܳܐ ܫܳܐܷܠ ܐܢܳܐ ܫܽܘܒܩܳܢܳܐ.
ܘܥܰܠ ܕܠܳܟ ܒܰܠܚܽܘܕܰܝܟ ܚܛܺܝܬ. ܠܳܐ ܩܳܪܶܒ ܐܢܳܐ ܕܡܶܢ ܐ̱ܚܪܺܢܳܐ ܐܶܬܬܕܺܝܢ. ܥܳܢܴ̈ܐ ܠܰܡ ܕܺܝܠܳܟ ܗܘܳܬ ܘܰܥܒܰܕܬܳܢܝ ܪܳܥܝܳܐ. ܘܟܰܕ ܢܳܛܽܘܪܳܐ ܐܶܬܬܣܺܝܡܶܬ ܠܰܓܙܳܪܳܐ ܕܒܶܝܬ ܝܺܣܪܳܐܝܠ. ܒܰܐܝܠܶܝܢ ܕܣܳܥܪܺܝܢ ܓܰܢܳܒ̈ܐ ܐܶܬܠܰܒܟܶܬ. ܘܰܐܝܟ ܐܰܝܢܳܐ ܕܠܳܐ ܣܳܒܰܪ ܕܚܽܘܫܒܳܢܳܐ ܥܳܒܶܕ ܠܡܳܪܳܗ̇ ܕܥܳܢܴ̈ܐ. ܚܰܒܠܶܬ ܢܶܩܝܳܐ ܘܩܶܛܠܶܬ ܠܗܳܝ ܕܫܰܡܺܝܢܳܐ. ܐܶܠܐ ܗܳܫܳܐ ܡܳܪܳܗ̇ ܕܥܳܢܴ̈ܐ ܢܶܬܒܰܥ ܡܶܢ ܪܳܥܝܳܐ ܕܡܳܗ̇ ܕܗܳܝ ܕܰܩܛܰܠ܆ ܡܶܛܠ ܕܠܶܗ ܚܛܳܐ. ܘܠܐ ܠܰܡ ܬܶܬܠܰܢܝ ܠܰܐܚܪܺܢܳܐ ܕܢܶܬܢܰܩܰܡ ܡܶܢܝ. ܐܶܠܐ ܐܰܝܟ ܕܠܳܟ ܚܛܺܝܬ ܘܒܺܝ̈ܫܳܬܳܐ ܩܕܳܡܰܝܟ ܥܶܒܕܶܬ. ܐܰܢܬ ܦܩܽܘܕ ܥܠܰܝ ܫܽܘܒܩܳܢܳܐ. ܠܰܘ ܟܰܕ ܫܳܪܶܐ ܐܰܢܬ ܡܶܛܠܳܬܝ ܢܳܡܽܘܣܳܐ. ܙܰܕܺܝܩܳܐ ܓܶܝܪ ܐܺܝܬܰܝܟ ܘܰܕܠܐ ܢܳܡܽܘܣܝ. ܕܚܳܒܶܬ ܠܟܺܐܢܽܘܬܳܟ ܡܶܛܠ ܫܳܐܘܳܠ ܒܥܶܠܕܒܳܒܝ. ܕܟܰܕ ܬܳܠܶܐ ܡܽܘܪܳܢܺܝܬܶܗ ܕܢܶܩܛܠܰܢܝ ܠܐ ܩܛܰܠܬܶܗ. ܘܟܰܕ ܢܦܰܩ ܒܳܬܰܪܝ ܕܰܢܚܰܒܠܰܢܝ ܠܐ ܚܰܒܶܠܬܶܗ. ܗܳܫܳܐ ܬܶܫܒܽܘܩ ܠܺܝ ܕܚܳܒܶܬ ܠܳܗ̇ ܕܝܰܬܺܝܪܳܐ ܬܶܬܩܰܠܰܣ܆ ܐܰܢܬ ܥܒܶܕ ܕܺܝܢܳܐ ܕܰܝܳܢܳܐ ܚܠܳܦܰܝ. ܘܰܥܪܽܘܒ ܐܳܒܝ ܕܦܳܪܰܥ ܐܢܳܐ ܬܝܳܒܽܘܬܳܐ. ܟܰܕ ܛܳܒ ܠܰܝܬ ܕܡܶܫܟܰܚ ܐܳܡܰܪ ܥܰܡܳܟ ܕܺܝܢܳܐ. ܒܟܽܠܡܶܕܶܡ ܓܶܝܪ ܐܰܢܬ ܐܺܝܬܰܝܟ ܙܰܟܳܝܳܐ.
ܡܶܛܠ ܕܬܶܙܕܰܕܰܩ ܒܡܶܠܬܳܟ ܘܬܶܙܟܶܐ ܒܕܺܝ̈ܢܰܝܟ. ܠܰܝܬ ܓܶܝܪ ܕܢܺܐܡܰܪ ܕܰܝܳܢܳܐ. ܘܠܐ ܕܡܶܛܠܡܳܢܳܐ ܐܰܢܬ ܫܒܰܩܬ ܠܰܟܝܳܢܳܐ ܕܢܶܗܘܶܐ ܠܽܘܩܒܰܠ ܢܰܦܫܶܗ. ܘܠܐ ܡܶܬܪܰܫܝܳܐ ܡܕܰܒܪܳܢܽܘܬܳܟ ܕܡܶܛܠ ܡܳܢܳܐ ܫܟܺܝܚܳܐ ܒܰܢ ܪܶܓܬܳܐ ܕܰܗܘܳܬ ܒܕܽܘܟ ܕܽܘܟ ܥܶܠܰܬ ܡܰܦܽܘܠܬܳܐ ܠܟܽܠܶܗ ܒܰܪܢܳܫܳܐ. ܒܗܳܝ ܓܶܝܪ ܕܟܰܕ ܡܣܰܝܒܪܺܝܢ ܘܰܡܚܰܡܣܢܺܝܢ ܩܰܕܺܝ̈ܫܶܐ ܐܰܓܽܘ̈ܢܶܐ ܕܡܶܢ ܗܳܕܶܐ ܓܳܕܫܺܝܢ. ܠܐ ܛܳܠܡܳܐ ܠܗܽܘܢ ܓܶܝܪ ܟܺܐܢܽܘܬܳܟ ܟܠܺܝ̈ܠܐ ܕܰܚܠܳܦ ܐܰܓܽܘ̈ܢܶܐ. ܙܳܟܽܘܬܳܟ ܘܰܬܪܺܝܨܽܘܬܳܟ ܡܰܟܪܙܺܝܢ ܒܰܡܣܰܝܒܪܳܢܽܘܬܗܽܘܢ. ܕܰܐܝܟ ܕܰܙܟܰܘ ܠܚܰܫܳܐ ܕܰܗܘܰܘ ܒܶܗ ܐ̱ܚܪ̈ܳܢܶܐ ܚܰܝܳܒ̈ܐ. ܗܳܟܰܢܳܐ ܙܳܟܶܝܢ ܗܘܰܘ ܚܰܝܴ̈ܒܰܝ ܡܶܢ ܪܶܓܬܳܐ. ܐܶܢܳܐ ܕܶܝܢ ܡܶܢ ܕܶܐܗܘܶܐ ܡܩܰܛܪܓܳܢܳܐ ܠܪܰܒܽܘܬܳܟ ܐܰܠܳܗܝ ܫܳܬܶܩ ܐܢܳܐ. ܘܰܐܝܟ ܚܰܝܳܒܳܐ ܫܳܬܶܩ ܐܢܳܐ ܘܩܳܥܶܐ ܐܢܳܐ.
ܡܶܛܠ ܕܰܒܥܰܘܠܐ ܡ̇ܢ ܐܶܬܒܰܛܢܶܬ ܘܒܰܚܛܳܗ̈ܐ ܒܛܶܢܬܰܢܝ ܐܶܡܝ. ܗܳܠܶܝܢ ܬܪܶܝܢ ܦܶܬܓܳܡ̈ܐ ܕܶܐܡܰܪ ܗܳܪܟܳܐ ܢܒܺܝܳܐ. ܥܶܠܬܳܐ ܡܶܢܗܽܘܢ ܢܣܰܒܘ ܐܶܪ̈ܺܝܛܺܝܩܽܘ ܕܰܢܣܰܒܪܽܘܢ ܕܒܰܟܝܳܢܳܐ ܐܺܝܬܶܝܗ̇ ܚܛܺܝܬܳܐ. ܘܡܶܛܠ ܗܳܕܶܐ ܡܰܣܒܪܳܢܽܘܬܳܐ ܕܰܓܳܠܬܳܐ ܐܶܡܰܪܘ ܥܰܠ ܚܛܳܗ̈ܐ. ܕܠܐ ܐܳܬܶܝܢ ܠܕܺܝܢܳܐ ܥܳܒܽܘ̈ܕܰܝܗܽܘܢ. ܚܢܰܢ ܕܶܝܢ ܟܰܕ ܠܬܰܪ̈ܥܝܳܬܳܐ ܗܰܓܳܓܳܝܴ̈ܬܳܐ ܕܡܰܢܺܝܢܳܝ̈ܐ ܬܳܟܣܺܝܢܰܢ ܕܠܰܝܬܶܝܗ̇ ܒܰܟܝܳܢܳܐ ܚܛܺܝܬܳܐ ܐܳܡܪܺܝܢܰܢ. ܘܗܰܘ ܕܰܨܒܳܐ ܘܰܚܛܳܐ ܟܰܕ ܐܶܬܕܒܰܪ ܡܶܢ ܚܺܐܦ̈ܐ ܕܪܶܓܬܳܐ܆ ܐܳܦ ܥܛܰܦ ܬܽܘܒ ܒܨܶܒܝܳܢܶܗ ܘܰܥܒܰܕ ܬܝܳܒܽܘܬܳܐ ܠܥܳܒܽܘܕܳܐ ܘܩܰܒܶܠ ܫܽܘܒܩܳܢܳܐ. ܘܗܽܘ ܗܘܳܐ ܟܳܪܽܘܙܳܐ ܠܥܳܒܽܘܕܳܐ. ܕܠܰܘ ܒܰܟܝܳܢܳܐ ܐܢܳܫܳܝܳܐ ܚܠܺܝܛܳܐ ܚܛܺܝܬܳܐ܇ ܐܶܠܐ ܨܶܒܝܳܢܳܐ ܐܺܝܬܰܘܗܝ ܡܰܘܠܕܳܢܳܗ̇. ܘܗܽܘ ܟܰܕ ܗܽܘ ܡܛܰܠܩܳܢܳܗ̇. ܘܕܶܐܡܰܪ ܢܒܺܝܳܐ ܕܗܳܝ ܕܰܒܥܰܘܠܐ ܐܶܬܒܰܛܢܶܬ ܘܒܰܚܛܳܗ̈ܐ ܒܛܶܢܬܶܗ ܐܶܡܶܗ܆ ܗܳܕܶܐ ܐܰܠܶܦ. ܕܰܥܕܰܡܳܐ ܠܰܡ ܕܰܚܛܳܬ ܠܐ ܒܶܛܢܰܬ. ܠܐ ܝܳܕܰܥ ܗܘܳܐ ܓܶܝܪ ܙܽܘܘܳܓܳܐ ܒܪܺܝܟܳܐ ܪܶܓܬܳܐ. ܥܕܰܡܳܐ ܕܥܶܠܰܬ ܚܛܺܝܬܳܐ ܕܰܠܚܰܬ ܫܰܦܝܽܘܬܶܗ ܕܰܟܝܳܢܳܐ. ܘܰܟܒܰܪ ܬܺܐܡܰܪ. ܕܟܰܕ ܒܰܪܶܟ ܐܶܢܘ̇ܢ ܐܰܠܳܗܳܐ ܡܶܢ ܚܛܺܝܬܳܐ܆ ܐܶܡܰܪ ܕܰܦܪܰܘ ܘܰܣܓܰܘ (ܒܪܝܬܐ ܐ: ܟܒ ܟܚ). ܗܳܕܶܐ ܓܶܝܪ ܡܰܘܕܥܳܐ܆ ܕܠܰܘ ܙܽܘܘܳܓܳܐ ܚܛܺܝܬܰܐ ܗ̱ܘ. ܐܶܠܐ ܝܳܕܥܺܝܢܰܢ ܕܦܰܪܕܰܝܣܳܐ ܠܰܘ ܠܡܰܘܠܕܳܢܽܘܬܳܐ ܕܰܒܢܰܝܴ̈ܐ ܐܶܬܺܝܗܶܒ ܗܳܝܕܶܝܢ. ܘܶܐܠܽܘܠܳܐ ܕܶܐܬܢܨܶܒ ܡܶܢ ܐܰܠܳܗܐ. ܒܶܗ ܦܳܝܫܺܝܢ ܗܘܰܘ ܡܶܢ ܒܳܬܰܪ ܕܰܚܛܰܘ. ܐܰܠܳܗܳܐ ܓܶܝܪ ܐܶܡܰܪ ܠܶܗ ܠܳܐܕܳܡ ܟܰܕ ܡܦܰܩܶܕ ܠܶܗ܆ ܕܠܰܘ ܒܝܰܘܡܳܐ ܕܬܶܐܟܽܘܠ ܡܶܢ ܐܺܝܠܳܢܳܐ. ܬܶܦܽܘܩ ܡܶܢ ܦܰܪܕܰܝܣܳܐ. ܐܶܠܐ ܕܰܒܝܰܘܡܳܐ ܗܰܘ ܕܬܶܐܟܽܘܠ ܡܶܢ ܐܺܝܠܳܢܳܐ ܕܛܳܒܬܳܐ ܘܰܕܒܺܝܫܬܳܐ ܡܰܘܬܳܐ ܬܡܽܘܬ (ܒܪܝܬܐ ܒ: ܝܙ). ܘܟܰܕ ܡܶܢ ܦܰܪܕܰܝܣܳܐ ܢܦܰܩܘ ܡܶܢ ܡܰܘܠܕܳܢܽܘܬܳܐ ܘܡܰܦܪܝܳܢܽܘܬܳܐ ܐܶܬܥܰܠܺܝܘ. ܡܳܕܶܝܢ ܙܳܕܶܩ ܕܢܶܕܰܥ ܕܰܐܝܟ ܕܰܗܘܳܐ ܫܽܘܚܠܳܦܳܐ ܒܰܐܪܥܳܐ ܡܨܰܒܰܬܬܳܐ ܡܶܢ ܠܰܘܛܬܳܐ. ܘܰܐܪܥܳܐ ܩܰܒܠܰܬ ܗܳܝ ܕܬܰܘܥܶܐ ܟܽܘ̈ܒܶܐ. ܐܺܝܠܳܢ̈ܐ ܘܢܶܨܒܴ̈ܬܳܐ ܕܢܶܬܚܙܽܘܢ ܒܗܽܘܢ ܗܱ̈ܛܛܶܐ. ܕܰܐܝܟ ܐܰܝܟܰܢܳܐ ܐܳܡܰܪ ܐܢܳܐ. ܙܽܘܘܳܓܳܐ ܗܳܘܶܐ ܗܘܳܐ ܐܶܠܽܘܠܳܐ ܚܛܰܘ. ܡܶܛܠ ܝܰܠܕܳܐ ܕܰܒܢܰܝܴ̈ܐ ܒܰܠܚܽܘܕ. ܟܰܕ ܕܶܝܢ ܚܛܰܘ܆ ܛܥܰܘ ܢܰܟܦܽܘܬܶܗ ܕܙܽܘܘܳܓܳܐ. ܘܡܶܟܺܝܠ ܠܰܘ ܡܶܛܠ ܒܢܰܝܴ̈ܐ ܡܶܙܕܰܘܓܺܝܢ ܣܰܓܺܝ̈ܐܐ. ܐܶܠܐ ܡܶܛܠ ܪܶܓܬܳܐ ܕܫܳܚܩܳܐ ܠܗܽܘܢ. ܡܶܛܠ ܕܰܠܘܳܬ ܪܶܓܬܳܐ ܢܬܺܝܦ ܗܰܘ ܕܡܶܙܕܰܘܰܓ܆ ܝܰܬܺܝܪ ܡܶܢ ܪܶܚܡܰܬ ܒܢܰܝܴ̈ܐ. ܗܰܘ ܕܡܶܬܒܛܶܢ ܠܳܐ ܡܚܰܪܰܪ ܡܶܢ ܚܛܺܝܬܳܐ. ܒܢܰܝܴ̈ܐ ܕܶܝܢ ܗܳܘܶܝܢ ܐܶܢܽܘܢ ܡܶܢ ܙܽܘ̈ܘܳܓܶܐ ܟܺܐܢ̈ܐ. ܘܡܳܐ ܓܶܝܪ ܕܡܶܬܪܰܓܪܰܓ ܥܠܰܝܡܳܐ ܕܢܶܕܡܰܟ ܥܰܡ ܒܬܽܘܠܬܳܐ܆ ܘܰܥܠܰܝܡܬܳܐ ܚܳܝܪܳܐ ܒܓܰܕܽܘܕܳܐ ܒܚܰܫܳܐ ܕܪܶܓܬܳܐ. ܠܰܘ ܚܽܘܒܳܐ ܕܰܒܢܰܝܴ̈ܐ ܣܺܝܡ ܩܕܳܡ ܥܰܝ̈ܢܰܝܗܽܘܢ. ܐܶܠܐ ܡܶܢ ܪܶܬܚܳܐ ܘܚܰܡܺܝܡܽܘܬܳܐ ܕܪܶܓܬܳܐ ܡܶܫܬܰܠܗܒܺܝܢ ܠܰܡܚܰܒܳܠܽܘ ܚܰܕ ܠܚܰܕ ܒܰܚܛܺܝܬܳܐ ܘܥܰܠ ܕܠܰܘ ܢܳܡܽܘܣܳܐܝ̣ܬ ܚܳܝܪܺܝܢ ܒܰܚ̈ܕܳܕܶܐ. ܘܠܰܘ ܡܶܟܺܝܠ ܒܒܽܘܪܟܬܳܐ ܕܶܝܢ ܡܶܫܬܰܘܬܦܺܝܢ. ܐܶܠܐ ܒܪܶܓܬܳܐ ܕܰܚܠܺܝܛܳܐ ܒܳܗ̇ ܚܛܺܝܬܳܐ. ܘܥܰܠ ܕܚܳܪ ܘܰܚܙܳܐ ܛܽܘܒܳܢܳܐ ܕܘܺܝܕ܆ ܕܠܰܝܬ ܙܽܘܘܳܓܳܐ ܕܰܡܚܰܪܰܪ ܡܶܢ ܚܛܺܝܬܳܐ ܒܫܰܘܬܳܦܽܘܬܳܗ̇܆ ܒܗܳܝ ܕܶܝܢ ܕܰܡܚܰܪܰܪ ܓܰܒܪܳܐ. ܟܡܳܐ ܙܰܒܢܺܝ̈ܢ ܡܚܰܝܒܳܐ ܐܰܢܬܬܳܐ. ܘܶܐܢܕܶܝܢ ܬܽܘܒ ܡܕܰܟܝܳܐ ܐܰܢܬܬܳܐ ܡܶܢ ܚܛܺܝܬܳܐ. ܓܰܒܪܳܐ ܝܳܬܶܒ ܠܘܳܬ ܪܶܓܬܳܐ. ܘܗܳܪܟܳܐ ܣܳܡܳܗ̇ ܠܰܒܛܺܝܢܽܘܬܳܐ ܕܗܳܘܝܳܐ ܒܙܽܘܘܳܓܳܐ. ܡܶܛܠ ܕܗܽܘ ܐܰܠܳܗܳܐ ܠܰܘ ܒܰܚܛܺܝܬܳܐ ܦܰܪܫܶܗ ܠܙܽܘܘܳܓܳܐ. ܐܶܠܐ ܕܰܟܝܳܐ ܘܰܡܝܰܩܪܳܐ ܝܰܗܒܶܗ. ܥܰܠܗܳܕܶܐ ܐܶܡܰܪ ܢܒܺܝܳܐ:
ܐܰܢܬ ܕܶܝܢ ܒܩܽܘܫܬܳܐ ܨܒܰܝܬ. ܘܟܰܣܝܴ̈ܬܳܐ ܕܚܶܟܡܬܳܟ ܐܰܘܕܰܥܬܳܢܝ. ܠܰܘ ܕܰܠܘܳܬ ܚܛܺܝܬܳܐ ܕܢܶܬܒܛܶܢ ܒܰܚܛܳܗ̈ܐ ܥܒܰܕܬ ܠܰܢ. ܐܶܠܐ ܕܡܶܢ ܙܽܘܘܳܓܳܐ ܕܰܟܝܳܐ ܘܰܡܝܰܩܪܳܐ ܢܰܘܠܶܕ ܒܢܰܝܴ̈ܐ. ܟܰܕ ܡܶܢ ܪܶܓܬܳܐ ܕܰܡܥܺܝܪܳܐ ܒܰܢ ܚܛܺܝܬܳܐ ܠܳܐ ܡܶܬܩܰܕܡܺܝܢܰܢ܆ ܐܶܠܐ ܒܰܪ ܐܪ̈ܳܙܰܝܟ ܥܒܰܕܬܳܢܝ. ܘܥܽܘܡܩܳܐ ܘܥܽܘܬܪܳܐ ܠܐ ܡܶܬܡܰܫܚܳܢܳܐ ܕܰܐܠܳܗܽܘܬܳܟ ܓܠܰܝܬ ܠܰܢ. ܘܥܰܠ ܕܰܒܓܰܘ ܡܳܐܢ̈ܐ ܡܝܰܩܪ̈ܶܐ ܕܒܰܝܬܳܟ ܐܶܬܡܢܺܝܬ. ܠܐ ܬܶܫܒܽܘܩ ܠܰܚܛܺܝܬܳܐ ܬܣܰܝܒܰܢܝ. ܐܶܠܐ
ܪܽܘܣ ܥܠܰܝ ܒܙܽܘܦܳܐ ܘܶܐܬܕܰܟܶܐ. ܚܰܠܶܠܰܝܢܝ ܒܶܗ ܡܶܢ ܬܰܠܓܳܐ ܐܶܚܘܰܪ. ܙܽܘܦܳܐ ܕܶܝܢ ܚܰܕ ܡܶܢ ܩܰܝ̈ܣܶܐ ܡܕܰܟܝܴ̈ܢܶܐ ܕܡܶܬܦܰܪܫܺܝܢ ܗܘܰܘ ܒܢܳܡܽܘܣܳܐ. ܕܢܳܣܶܒ ܟܳܗܢܳܐ ܡܳܐ ܕܰܡܕܰܟܶܐ ܠܶܗ ܠܗܰܘ ܕܡܶܬܛܰܡܶܐ ܐܺܝܬܰܘܗܝ ܗܘܳܐ. ܘܬܽܘܒ ܡܳܐ ܕܡܶܬܢܟܶܣ ܗܘܳܐ ܦܶܨܚܳܐ܆ ܦܳܩܶܕ ܗܘܳܐ ܣܳܐܷܡ ܢܳܡܽܘܣܳܐ. ܕܰܒܚܰܕ ܙܽܘܦܳܐ ܕܢܶܬܚܰܫܚܽܘܢ ܐܰܝܠܶܝܢ ܕܥܳܒܪܺܝܢ ܥܰܠ ܬܰܪ̈ܥܰܝܗܽܘܢ. ܢܶܣܒܽܘܢ ܠܰܡ ܩܰܝܣܳܐ ܕܙܽܘܦܳܐ ܘܢܶܨܒܥܽܘܢ ܒܰܕܡܳܐ ܕܶܐܡܪܳܐ ܗܰܘ܆ ܘܢܶܪܣܽܘܢ ܥܰܠ ܦܪ̈ܽܘܣܬܕܶܐ ܘܥܰܠ ܐܶܣܟ̈ܦܳܬܳܐ ܕܬܰܪ̈ܥܐ ܕܗܶܢܽܘܢ ܒܗܽܘܢ (ܡܦܩܢܐ ܝܒ:ܙ ܟܒ-ܟܓ). ܘܡܳܐ ܕܰܡܕܰܟܶܐ ܗܘܳܐ ܟܳܗܢܳܐ ܠܒܰܝܬܳܐ ܕܗܳܘܝܳܐ ܗܘܳܬ ܒܶܗ ܡܚܽܘܬܳܐ ܕܓܰܪܒܳܐ ܘܙܽܘܦܳܐ ܢܳܣܶܒ ܗܘܳܐ ܥܰܡ ܩܰܝܣܳܐ ܕܰܐܪܙܳܐ ܠܰܡܕܰܟܝܽܘܬܶܗ. ܒܰܟܝܳܢܶܗ ܕܶܝܢ ܗܽܘ ܙܽܘܦܳܐ ܚܰܡܺܝܡܰܐ ܗ̄ܘ ܘܰܡܕܰܟܝܳܢܳܐ. ܘܥܳܗܶܢ ܠܰܐܝܠܶܝܢ ܕܰܫܚܺܝܩܺܝܢ ܡܶܢ ܩܰܪܺܝܪܽܘܬܳܐ. ܘܡܶܢ ܪܺܝܪܳܐ ܚܶܘܳܪܳܐ. ܘܰܡܠܶܝܢ ܘܰܡܕܰܟܶܝܢ ܡܶܢ ܐܶܣܛܽܘܡܟܰܝ̈ܗܽܘܢ ܥܒܳܝܷ̈ܐ ܘܛܽܘ̈ܠܫܶܐ ܕܠܺܝܠܳܐܝ̣ܬ ܟܰܕ ܓܶܝܪ ܡܶܬܬܣܺܝܡ ܥܠܰܝܗܽܘܢ ܥܰܡ ܥܶܩܳܪ̈ܶܐ ܐ̱ܚܪ̈ܳܢܶܐ. ܫܳܪܶܐ ܠܳܗ̇ ܠܩܰܪܺܝܪܽܘܬܳܐ ܘܟܽܘ̈ܡܽܘ. ܘܰܡܕܰܟܶܐ ܐܶܣܛܽܘܡܟܳܐ. ܘܡܳܪܶܩ ܓܶܝܪ ܘܰܡܕܰܟܶܐ ܬܰܪ̈ܩܽܘܠܳܬܳܐ ܡܶܢ ܐܰܦ̈ܐ. ܟܰܕ ܡܶܬܚܒܶܟ ܒܰܫܝܳܓܬܳܐ ܕܚܳܫ̈ܚܳܢ ܠܘܳܬ ܗܳܕܶܐ. ܡܳܕܶܝܢ ܙܽܘܦܳܐ ܢܶܬܢܣܶܒ ܒܐܪܳܙܳܐ ܠܩܰܝܣܳܐ ܕܰܨܠܺܝܒܳܐ ܦܳܪܽܘܩܳܝܳܐ. ܗܳܢܳܐ ܓܶܝܪ ܒܰܕܡܳܐ ܟܰܕ ܐܶܨܛܒܰܥ ܕܗܰܘ ܐܶܡܪܳܐ ܕܡܽܘܡܳܐ ܘܛܽܘܠܫܳܐ ܠܰܝܬ ܗܘܳܐ ܒܶܗ. ܘܕܰܟܝܶܗ ܠܥܳܠܡܳܐ ܡܶܢ ܚܛܺܝܬܳܐ. ܘܰܡܪܰܩ ܠܟܽܘ̈ܬܡܳܬܳܐ ܕܶܐܬܟܰܬܰܡܷ̈ܝܢ ܒܗܶܝܢ ܐܰܦ̈ܐ ܕܚܰܛܳܝ̈ܐ. ܠܗܳܢܳܐ ܡܳܕܶܝܢ ܕܽܘܟܳܝܳܐ ܫܐܷܠ ܕܰܘܝܕ ܢܒܺܝܳܐ ܕܢܶܫܬܘܶܐ. ܒܰܕܝܳܕܰܥ ܗܘܳܐ ܕܠܐ ܡܶܫܟܚܺܝܢ ܗܘܰܘ ܕܶܒܚ̈ܐ ܕܚܰܝ̈ܘܳܬܳܐ ܕܡܶܢ ܚܛܺܝܬܶܗ ܢܕܰܟܽܘܢܳܝܗܝ. ܐܳܡܰܪ ܗܘܳܐ ܓܶܝܪ:
ܕܰܐܣܒܰܥܰܝܢܝ ܒܽܘܣܳܡܳܟ ܘܚܰܕܽܘܬܳܟ. ܘܢܶܚܕܽܘܢ ܓܰܪ̈ܡܰܝ ܡܰܟܺܝ̈ܟܶܐ. ܕܳܡܝܳܐ ܕܟܰܦܢܳܐ ܡܶܕܶܡ ܣܳܥܶܐ ܗܘܳܐ ܥܰܠ ܢܰܦܫܶܗ ܕܰܢܒܺܝܳܐ܆ ܘܫܰܢܺܝܘ ܡܶܢ ܠܘܳܬܶܗ ܕܰܢܒܺܝܳܐ ܓܶܠܝܴ̈ܢܶܐ ܐܰܠܳܗܳܝ̈ܐ. ܘܡܶܛܠܗܳܕܶܐ ܡܦܺܝܣ ܗܘܳܐ ܕܢܶܥܛܽܘܦ ܬܽܘܒ ܘܢܶܬܒܰܣܰܡ ܒܥܶܢܝܳܢܳܐ ܕܪܽܘܚܳܐ. ܘܰܕܢܶܚܕܽܘܢ ܓܰܪ̈ܡܰܝ ܡܰܟܺܝ̈ܟܶܐ ܒܶܗ ܒܒܽܘܣܳܡܳܐ ܛܽܘܒܬܳܢܳܐ. ܘܗܳܕܶܐ ܠܰܡ ܗܳܘܝܳܐ ܐܶܢܗܽܘ ܕܒܰܚ̈ܛܳܗܰܝ ܠܐ ܬܶܚܽܘܪ. ܘܥܰܠܗܳܝ ܒܳܥܶܐ ܟܰܕ ܐܳܡܰܪ:
ܐܰܗܦܶܟ ܐܰܦܰܝ̈ܟ ܡܶܢ ܚܛܳܗ̈ܝ ܘܟܽܠܗܶܝܢ ܣܰܟ̈ܠܘܳܬܝ ܥܛܺܝ. ܐܶܢܓܶܝܪ ܗܳܕܶܐ ܠܐ ܗܳܘܝܳܐ܆ ܩܰܝܳܡܳܐ ܗܳܝ ܚܛܺܝܬܳܐ. ܘܶܐܢ ܒܰܚܛܳܗ̈ܝ ܚܳܐܱܪ ܐܰܢܬ ܡܶܬܓܰܙܶܐ ܐܢܳܐ ܠܺܝ ܡܶܢ ܒܽܘܣܳܡܶܗ ܕܢܽܘܗܪܳܐ. ܐܶܠܐ ܚܙܺܝ ܐܰܝܟܰܢܳܐ ܡܦܺܝܣ܆
ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ. ܚܠܳܦ ܕܶܐܬܛܰܡܰܐ ܒܩܶܛܠܳܐ ܘܰܒܓܰܘܪܳܐ. ܘܶܐܬܛܰܢܰܦ ܒܚܽܘܠܛܳܢܳܐ ܕܰܚܛܺܝܬܳܐ ܘܶܐܬܟܰܬܰܡ ܒܥܰܘܠܳܐ. ܘܶܐܬܕܰܟܶܐ ܗܳܫܳܐ ܒܰܒܪܺܝܬܳܐ ܚܕܰܬܳܐ ܘܚܰܕܬܳܐܝ̣ܬ ܢܶܬܒܪܶܐ. ܕܶܐܚܙܶܐ ܪܽܘܚܳܟ ܘܥܳܐܷܠ ܘܫܳܪܶܐ ܒܶܗ.
ܘܪܽܘܚܳܟ ܬܩܰܢܬܳܐ ܚܰܕܶܬ ܒܓܰܘܝ. ܚܙܺܝ ܐܰܝܟܰܢܳܐ ܕܥܰܪ̈ܺܝܩܳܢ ܗܘܰܝ̈ ܡܶܢܶܗ ܛܳܒܴ̈ܬܳܐ ܡܰܘܕܰܥ. ܘܡܰܥܒ̈ܕܳܢܘܳܬܶܗ ܕܪܽܘܚܳܐ ܩܰܕܺܝܫܳܐ. ܘܟܰܕ ܐܶܬܠܒܶܟ ܒܣܽܘܥܪ̈ܳܢܶܐ ܒܺܝ̈ܫܶܐ܆ ܘܡܶܛܠ ܗܳܕܶܐ ܕܢܶܥܛܽܘܦ ܠܶܗ ܪܽܘܚܳܐ ܡܦܺܝܣ ܗܘܳܐ ܘܰܕܠܐ ܢܶܬܛܪܶܕ ܡܶܢ ܒܰܝܬܳܝܽܘܬܳܐ ܕܰܐܠܳܗܳܐ.
ܠܳܐ ܠܰܡ ܬܶܫܕܶܝܢܝ ܡܶܢ ܩܕܳܡܰܝܟ. ܘܪܽܘܚܳܟ ܩܰܕܺܝܫܳܐ ܠܳܐ ܬܶܣܰܒ ܡܶܢܝ. ܐܶܢܓܶܝܪ ܪܽܘܚܳܟ ܩܰܕܺܝܫܳܐ ܡܩܰܘܶܐ ܨܶܐܕܰܝ ܠܐ ܙܳܐܱܥ ܐܢܳܐ ܒܰܕܡܳܐ ܕܶܐܫܰܕܬ. ܐܰܝܟܳܐ ܓܶܝܪ ܕܺܐܝܬ ܪܽܘܚܳܟ ܩܰܕܺܝܫܳܐ ܠܰܝܬ ܚܛܺܝܬܳܐ.
ܐܶܠܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ. ܘܪܽܘܚܳܟ ܡܫܰܒܰܚܬܳܐ ܬܣܰܡܟܰܢܝ. ܕܳܡܝܳܐ ܗܳܝ ܕܰܡܫܰܢܳܝܽܘ ܫܰܢܺܝ ܪܽܘܚܳܐ ܩܰܕܺܝܫܳܐ ܡܶܢܶܗ ܟܰܕ ܚܛܳܐ. ܘܟܰܕ ܩܳܪܶܐ ܘܠܐ ܐܶܬܥܢܺܝ. ܘܰܒܥܳܐ ܕܢܶܬܢܰܒܶܐ ܘܠܐ ܐܶܫܟܰܚ. ܐܰܪܓܶܫ ܒܢܰܦܫܶܗ ܕܶܐܬܓܰܙܺܝ ܡܶܢ ܒܽܘܣܳܡܳܐ ܪܽܘܚܳܢܳܐ. ܘܡܶܛܠ ܗܳܕܶܐ ܫܳܐܷܠ ܗܘܳܐ ܟܰܕ ܐܳܡܰܪ: ܕܰܐܗܦܶܟ ܠܺܝ ܗܰܘ ܡܶܕܶܡ ܕܡܶܢܝ ܐܶܬܢܣܶܒ. ܐܰܝܟܰܢܳܐ ܕܟܰܕ ܗܳܕܶܐ ܬܶܗܘܶܐ ܢܶܚܙܽܘܢ ܘܢܶܫܡܥܽܘܢ ܚܰܛܳܝ̈ܐ ܕܥܰܠ ܕܬܳܒܶܬ ܠܺܝ ܦܢܳܬ ܠܺܝ ܡܰܘܗܰܒܬܳܐ ܕܪܽܘܚܳܟ ܩܰܕܺܝܫܳܐ. ܘܠܐ ܟܠܰܝܬ ܡܶܢܝ ܒܽܘܣܳܡܳܟ ܘܦܽܘܪܩܳܢܳܟ. ܡܶܢ ܒܳܬܰܪ ܕܰܒܥܺܝܬ ܫܽܘܒܩܳܢܳܐ. ܝܰܬܺܝܪܳܐ ܢܶܚܒܨܽܘܢ ܚܰܛܳܝ̈ܐ ܥܰܠ ܬܝܳܒܽܘܬܳܐ ܘܢܶܩܫܽܘܢ ܒܬܰܪܥܳܟ ܘܢܺܐܠܦܽܘܢ ܐܰܝܠܶܝܢ ܕܰܛܥܰܘ. ܐܳܦ ܢܶܬܦܢܽܘܢ ܠܘܳܬܳܟ ܐܰܝܠܶܝܢ ܕܰܚܛܰܘ. ܘܰܒܗܳܕܶܐ ܥܶܠܬܳܐ.
ܬܰܠܶܦ ܠܥܱ̈ܘܳܠܐ ܐܽܘܪܚܳܟ ܘܚܰܛܳܝ̈ܐ ܠܘܳܬܳܟ ܢܶܬܦܢܽܘܢ. ܡܳܐ ܓܶܝܪ ܕܒܰܣܺܝܡܳܐܝ̣ܬ ܡܩܰܒܶܠ ܠܗܽܘܢ ܚܢܳܢܳܟ܆ ܕܠܺܝܠܳܐܝ̣ܬ ܡܶܫܬܰܐܠܶܝܢ ܡܶܢ ܒܺܝ̈ܫܳܬܳܐ ܘܠܐ ܣܳܥܪܺܝܢ ܘܳܐܬܶܝܢ ܨܶܐܕܰܝܟ. ܠܰܝܬ ܓܶܝܪ ܕܥܳܒܕܺܝܢ ܠܗܽܘܢ ܠܚܰܛܳܝ̈ܐ ܕܢܶܚܒܨܽܘܢ ܥܰܠ ܬܝܳܒܽܘܬܳܐ. ܐܰܝܟ ܗܳܕܶܐ ܕܢܶܪܓܫܽܘܢ ܕܒܰܚܛܳܗܰܝ̈ܗܽܘܢ ܠܐ ܡܶܬܟܰܣܣܺܝܢ.
ܦܰܨܳܢܝ ܡܳܕܶܝܢ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ. ܐܰܝܟܰܢܳܐ ܕܳܐܦ ܐܳܫܕ̈ܝ ܕܡܳܐ ܢܶܬܪܰܓܪܓܽܘܢ ܠܫܽܘܒܩܳܢܳܟ. ܘܥܳܒܶܕ ܐܳܦ ܠܠܶܫܳܢܝ ܕܰܦܩܰܕ ܕܢܶܬܩܛܶܠ ܙܰܕܺܝܩܳܐ. ܕܬܽܘܒ ܢܶܗܘܶܐ ܟܶܢܳܪܳܐ ܡܫܰܒܚܳܢܳܐ ܠܙܰܕܺܝܩܽܘܬܳܟ. ܕܠܐ ܢܶܬܒܰܠܡܽܘܢ ܠܶܫܳܢ̈ܐ ܕܰܐܝܠܶܝܢ ܕܒܰܕܡܳܐ ܘܰܒܩܶܛܠܳܐ ܐܶܣܬܰܝܰܒܘ. ܡܶܢ ܗܳܝ ܕܰܡܫܰܒܚܴ̈ܢܶܐ ܢܶܗܘܽܘܢ ܠܳܟ.
ܘܰܢܫܰܒܰܚ ܠܶܫܳܢܝ ܙܰܕܺܝܩܽܘܬܳܟ: ܡܳܪܝܳܐ ܦܬܰܚ ܠܺܝ ܣܶܦܘܴ̈ܬܝ ܘܦܽܘܡܝ ܢܙܰܡܰܪ ܬܶܫܒ̈ܚܳܬܳܟ. ܕܰܐܝܟ ܗܳܟܰܢܳܐ ܡܒܰܓܶܢ ܡܶܢ ܟܺܐܒܳܐ. ܐܰܝܟ ܗܰܘ ܕܡܶܐܚܰܕ ܐܶܚܰܕ ܗܘܳܐ ܠܶܫܳܢܶܗ ܘܣܶܦ̈ܘܳܬܶܗ ܡܶܢ ܗܳܝ ܕܰܢܙܰܡܰܪ ܒܰܥܝܳܕܶܗ. ܘܚܽܘܪ ܒܦܳܪܽܘܫܽܘܬܶܗ ܕܓܰܒܪܳܐ ܟܺܐܢܳܐ. ܕܟܽܠܳܗ̇ ܒܳܥܽܘܬܶܗ ܗܳܕܶܐ ܗܘܳܬ܆ ܕܢܶܦܢܶܐ ܠܛܶܟܣܶܗ ܩܰܕܡܳܝܳܐ. ܘܠܐ ܐܰܡܣܰܪ ܐܰܘ ܐܰܒܣܺܝ ܘܠܐ ܒܶܣܡܰܬ ܠܳܗ̇ ܒܦܽܘܡܶܗ ܒܺܝܫܬܳܐ. ܐܶܠܐ ܝܰܬܺܝܪ ܡܶܢ ܕܗܰܢܺܝܳܐܐ ܗܘܳܬ ܠܶܗ ܪܶܓܬܳܐ ܟܰܕ ܣܳܥܰܪ ܠܳܗ̇. ܗܶܦܟܰܬ ܗܘܳܬ ܠܳܗ̇ ܡܪܳܪ̈ܶܐ ܩܫܱ̈ܝܳܐ ܒܰܩܕܳܠܶܗ. ܘܡܰܝܠܶܠ ܗܘܳܐ ܡܶܢ ܟܺܐܒܳܐ ܕܓܰܘܪܳܐ. ܐܰܝܟ ܗܰܘ ܕܰܟܢܺܝܫ ܐܶܣܛܽܘܡܟܶܗ ܟܽܠܶܗ ܡܰܪܺܝܪܽܘܬܳܐ ܡܶܢ ܟܺܐܒܳܐ ܕܟܽܘ̈ܡܽܘ ܐܳܦ ܕܪܺܝܪܶܗ. ܘܡܶܬܝܰܐܝܰܒ ܗܘܳܐ ܘܡܶܬܕܰܝܰܒ ܘܰܐܠܺܝܨ ܗܘܳܐ ܕܢܶܬܢܰܒܰܗ ܠܰܚܛܺܝܬܳܐ. ܘܟܰܕ ܒܳܥܶܐ ܗܘܳܐ ܕܰܢܩܰܪܶܒ ܚܠܳܦ ܚܛܳܗܶܗ ܕܶܒܚ̈ܐ ܕܚܰܝ̈ܘܳܬܳܐ. ܐܰܪܓܶܫ ܗܘܳܐ ܒܢܰܦܫܶܗ܆ ܕܠܐ ܡܕܰܟܶܝܢ ܕܶܒܚ̈ܐ ܕܚܰܝ̈ܘܳܬܳܐ ܚܛܳܗ̈ܐ. ܡܶܛܠܗܳܢܳܐ ܐܶܡܰܪ:
ܡܶܛܠ ܠܡ ܕܠܐ ܨܒܰܝܬ ܒܕܶܒܚ̈ܐ ܐܳܦܠܳܐ ܒܝܰܩܕ̈ܐ ܫܰܠܡ̈ܐ ܐܶܬܪܰܥܺܝܬ. ܐܶܠܽܘ ܓܶܝܪ ܡܶܨܛܒܶܐ ܗܘܰܝܬ ܒܕܶܒܚ̈ܐ ܕܚܰܝ̈ܘܳܬܳܐ܆ ܡܩܰܪܶܒ ܗܘܺܝܬ ܠܳܟ ܡܶܕܶܡ ܣܰܓܺܝ. ܘܪ̈ܶܒܘܳܬܳܐ ܕܬܰܘܪ̈ܐ ܘܰܕܥܶܪ̈ܒܶܐ ܡܢܰܟܶܣ ܗܘܺܝܬ ܕܶܐܫܬܘܶܐ ܠܫܽܘܒܩܳܢܳܐ. ܘܡܶܢ ܟܰܕܽܘ ܬܟܺܝܠ ܗܘܺܝܬ ܕܩܰܒܠܶܬ ܫܽܘܒܩܳܢܳܐ ܕܣܰܟܠܘ̈ܬܳܐ ܕܣܶܥܪܶܬ. ܐܶܠܐ ܒܗܳܠܶܝܢ ܠܐ ܡܶܨܛܒܶܐ ܐܰܢܬ. ܘܟܽܠܗܽܘܢ ܬܰܘܪ̈ܶܐ ܘܥܶܪ̈ܒܶܐ ܐܶܢ ܡܶܬܕܰܒܚܺܝܢ ܩܕܳܡܰܝܟ ܕܡܳܐ ܕܚܰܕ ܒܰܪܢܳܫܳܐ ܠܐ ܡܫܺܝܓܺܝܢ ܡܶܢ ܐܳܫܽܘܕܶܗ. ܐܶܠܐ ܢܰܦܫܳܐ ܡܡܰܟܰܟܬܳܐ ܟܰܕ ܩܳܪܒܳܐ ܠܳܟ ܒܬܰܘܕܺܝܬܳܐ. ܕܶܒܚ̈ܐ ܒܰܣܺܝ̈ܡܳܐ ܘܕܰܫܘܶܝܢ ܠܫܽܘܒܩܳܢܳܐ ܡܩܰܪܒܳܐ.
ܕܶܒܚܰܘ̈ܗܝ ܓܶܝܪ ܕܰܐܠܳܗܳܐ ܪܽܘܚܳܐ ܗ̄ܝ ܡܰܟܺܝܟܬܳܐ. ܘܠܶܒܳܐ ܫܚܺܝܩܳܐ ܐܠܰܗܳܐ ܠܐ ܡܰܣܠܶܐ. ܚܢܳܢܳܐ ܒܳܥܶܐ ܘܠܰܘ ܕܶܒܚ̈ܐ. ܒܰܬܝܳܒܽܘܬܳܐ ܡܶܬܪܰܥܶܐ ܘܠܰܘ ܒܩܽܘܪ̈ܒܳܢܶܐ ܕܠܐ ܡܶܠܬܳܐ. ܓܰܝܳܪ̈ܶܐ ܠܰܡ ܘܩܳܛܽܘ̈ܠܐ ܒܪܳܡܽܘܬܳܐ ܘܰܒܪܽܘܚܳܐ ܕܫܰܒܰܗܪܳܢܽܘܬܳܐ ܐܰܚܺܝܕܺܝܢ. ܐܶܢܳܐ ܓܶܝܪ ܡܚܰܪܪܳܐ ܐܺܝܬܰܝ ܡܶܢ ܗܳܠܶܝܢ. ܘܥܰܠܗܳܝ ܒܪܽܘܚܳܐ ܡܰܟܺܝܟܬܳܐ ܘܰܒܠܶܒܳܐ ܫܚܺܝܩܳܐ ܫܳܐܷܠ ܐܢܳܐ ܫܽܘܒܩܳܢܳܐ ܟܰܕ ܡܦܺܝܣ ܐܢܳܐ.
ܐܰܛܶܐܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܝܗ̇ ܕܽܐܘܪܺܫܠܶܡ. ܨܶܗܝܽܘܢ ܘܽܐܘܪܺܫܠܶܡ ܠܢܰܦܫܶܗ ܩܳܪܶܐ ܗܘܳܐ ܢܒܺܝܳܐ. ܡܶܛܠ ܕܰܐܝܟ ܡܕܺܝܢ̱ܬܳܐ ܡܚܰܣܰܢܬܳܐ ܗܘܳܬ ܢܰܦܫܶܗ. ܘܠܐ ܡܶܫܟܰܚ ܗܘܳܐ ܒܥܶܠܕܒܳܒܳܐ ܬܳܪܰܥ ܫܽܘܪ̈ܶܝܗ̇. ܘܟܰܕ ܕܶܝܢ ܣܚܰܦܘ ܓܰܘܪܳܐ ܘܩܶܛܠܳܐ ܠܬܰܪ̈ܥܶܝܗ̇ ܪ̈ܳܡܶܐ܆ ܡܦܺܝܣ ܗܘܳܐ ܬܽܘܒ ܢܰܛܶܐܒ ܠܳܗ̇ ܨܶܒܝܳܢܶܗ ܕܰܐܠܳܗܳܐ. ܟܰܕ ܢܩܺܝܡ ܒܙܰܕܺܝܩܽܘܬܳܐ ܬܰܪ̈ܥܶܝܗ̇. ܐܽܘܪܺܫܠܶܡ ܬܽܘܒ ܡܶܬܟܰܢܝܳܐ܆ ܐܰܝܟ ܚܳܙܝܰܬ ܫܠܳܡܳܐ܆ ܐܽܘܪܺܫܠܶܡ ܓܶܝܪ ܒܶܝܬ ܚܶܙܘ̈ܐ ܕܰܫܠܳܡܳܐ ܡܶܬܦܰܫܩܳܐ. ܘܡܶܛܠ ܗܳܕܶܐ ܐܶܡܰܪ: ܕܬܽܘܒ ܢܶܬܒܢܽܘܢ ܫܽܘܪ̈ܰܝ ܡܕܺܝܢܬܳܟ. ܕܰܒܚܶܙܘܳܐ ܕܰܫܠܳܡܳܐ ܬܶܬܩܰܝܰܡ. ܕܽܘܡܝܳܐ ܕܗܳܕܶܐ ܗܘܳܬ܆ ܐܳܦ ܕܶܒܚ̈ܐ ܕܨܶܒܝܳܢܳܐ ܡܩܰܪܶܒ ܐܢܳܐ
ܗܳܝܕܶܝܢ ܬܶܨܛܒܶܐ ܒܕܶܒܚ̈ܐ ܕܩܽܘܫܬܳܐ ܘܰܒܝܰܩ̈ܕܶܐ ܫܰܠܡ̈ܐ ܘܗܳܝܕܶܝܢ ܢܰܣܩܽܘܢ ܬܰܘܪ̈ܶܐ ܥܰܠ ܡܰܕܒܚܳܟ. ܕܶܒܚ̈ܐ ܕܩܽܘܫܬܳܐ ܐܶܡܰܪ܆ ܠܰܘ ܕܶܒܚ̈ܐ ܕܚܰܝ̈ܘܳܬܳܐ. ܕܶܒܚ̈ܐ ܓܶܝܪ ܕܩܽܘܫܬܳܐ. ܕܶܒܚ̈ܐ ܐܶܢܽܘܢ ܕܗܰܝܡܳܢܽܘܬܳܐ. ܕܢܰܣܩܽܘܢ ܬܰܘܪ̈ܶܐ ܥܰܠ ܡܰܕܒܚܳܟ. ܥܰܠ ܓܡܺܝܪܽܘܬܳܐ ܕܫܽܘܡܠܳܝܳܐ ܡܰܘܕܥܳܐ. ܕܒܳܗ̇ ܨܳܒܶܐ ܗܘܳܐ ܢܒܺܝܳܐ ܕܒܳܗ̇ ܢܰܣܶܩ ܕܶܒܚ̈ܐ ܠܰܐܠܳܗܳܐ. ܬܰܘܪ̈ܶܐ ܓܶܝܪ ܥܰܠ ܫܽܘܠܳܡܳܐ ܕܰܒܝܰܕ ܫܠܺܝܚ̈ܐ ܡܰܠܶܦ. ܢܶܫܬܩܽܘܢ ܐܳܦ ܗܳܫܳܐ ܐܰܝܠܶܝܢ ܕܥܳܕܠܺܝܢ ܠܟܺܐܢܽܘܬܳܐ. ܕܥܰܠ ܡܳܢܳܐ ܠܐ ܐܰܘܒܶܕܬܶܗ ܠܕܰܘܝܕ ܟܺܐܢܽܘܬܳܐ ܟܰܕ ܚܛܳܐ. ܘܡܶܢ ܕܰܥܒܰܕ ܢܺܐܠܦܽܘܢ ܕܫܰܦܺܝܪ ܐܶܬܩܰܒܰܠ ܒܳܬܰܪ ܕܶܐܬܦܢܺܝ ܠܘܳܬ ܐܰܠܳܗܳܐ. ܘܗܳܠܶܝܢ ܕܒܳܥܶܝܢ ܫܽܘܒܩܳܢܳܐ ܡܳܐ ܕܚܳܙܶܝܢ ܢܰܦܫܗܽܘܢ. ܕܰܒܚܰܕ ܡܶܢ ܚܛܳܗ̈ܐ ܕܰܚܛܳܐ ܕܰܘܝܕ ܡܚܰܝܒܺܝܢ܆ ܢܩܰܪܒܽܘܢ ܕܶܡܥ̈ܐ ܘܰܬܝܳܒܽܘܬܳܐ ܒܰܕܡܽܘܬܶܗ. ܕܗܳܟܰܢܳܐ ܢܶܫܬܘܽܘܢ ܠܫܽܘܒܩܳܢܳܐ ܘܡܳܐ ܕܫܳܡܥܺܝܢ ܕܶܐܡܰܪ ܫܳܐܘܳܠ ܠܰܫܡܽܘܐܝܠ܆ ܐܰܣܟܠܶܬ ܕܰܐܣܠܺܝܬ ܡܶܠܰܬ ܦܽܘܡܶܗ ܕܡܳܪܝܳܐ (ܐ ܫܡܘܐܝܠ ܝܗ: ܟܕ). ܘܰܫܡܰܥ ܗܘܳܐ ܡܶܢ ܢܒܺܝܳܐ ܕܳܐܦ ܡܳܪܝܳܐ ܐܰܣܠܝܳܟ ܡܶܢ ܡܰܠܟܽܘܬܳܐ (ܐ ܫܡܘܐܝܠ ܝܗ: ܟܕ ܟܘ). ܘܫܳܡܥܺܝܢ ܬܽܘܒ ܠܕܰܘܝܕ ܕܶܐܡܰܪ: ܕܰܐܣܟܠܶܬ ܘܰܚܛܺܝܬ. ܘܡܶܬܦܰܢܶܐ ܠܶܗ ܦܶܬܓܳܡܳܐ. ܕܳܐܦ ܡܳܪܝܳܐ ܐܰܥܒܰܪ ܣܰܟܠܽܘܬܳܟ (ܒ ܫܡܘܐܝܠ ܝܒ: ܝܓ). ܕܢܶܕܥܽܘܢ ܕܰܐܠܳܗܳܐ ܒܰܥ̈ܒܳܕܶܐ ܚܳܐܱܪ ܘܕܳܐܢ. ܘܰܫܒܰܩ ܠܕܰܘܝܕ ܥܰܠ ܕܶܐܬܦܢܺܝ ܠܘܳܬ ܡܳܪܝܳܐ ܒܰܬܝܳܒܽܘܬܳܐ. ܘܰܐܣܠܺܝ ܠܫܳܐܘܳܠ ܥܰܠ ܕܒܰܚܛܺܝܬܳܐ ܩܰܘܺܝ ܘܠܐ ܬܳܒ. ܐܰܠܳܗܳܐ ܓܶܝܪ ܕܠܐ ܡܰܣܠܶܐ ܠܰܐܝܢܳܐ ܕܬܳܐܷܒ ܠܘܳܬܶܗ ܡܶܢ ܠܶܒܳܐ. ܕܗܽܘ ܢܶܬܶܠ ܠܰܢ ܕܒܰܬܝܳܒܽܘܬܳܐ ܢܶܒܥܶܐ ܐܰܦܰܘ̈ܗܝ ܘܢܶܬܚܢܶܢ ܘܢܰܘܕܶܐ ܠܶܗ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܬܪܝܢ
ܡܰܘܕܰܥ ܥܰܠ ܐܰܝܠܶܝܢ ܕܡܶܬܚܙܶܝܢ ܒܒܺܝܫܬܳܐ ܕܰܒܟܽܠܡܶܕܶܡ ܨܰܠܡܶܗ ܕܳܐܟܶܠܩܰܪܨܳܐ ܡܶܬܚܙܶܐ ܒܗܽܘܢ.
ܐܰܝܠܶܝܢ ܕܰܒܗܰܢܺܝܐܽܘܬܳܐ ܪܳܗܛܺܝܢ ܒܳܬܰܪ ܦܽܘܠܚܳܢܳܐ ܕܒܺܝ̈ܫܳܬܳܐ ܘܡܳܐ ܕܦܳܓܥܺܝܢ ܒܗܽܘܢ ܣܽܘܥܪ̈ܳܢܶܐ ܕܥܳܗܢܶܝܢ ܠܘܳܬ ܡܰܦ̈ܩܳܢܶܐ ܕܨܶܒܝܳܢܰܝ̈ܗܘܢ ܒܺܝ̈ܫܶܐ. ܠܫܽܘܒܗܳܪܳܐ ܫܳܩܠܺܝܢ ܠܳܗ̇ ܒܢܰܦܫܗܽܘܢ. ܠܒܺܝܫܬܳܐ ܗܳܝ ܕܥܳܒܕܺܝܢ. ܘܰܚܠܳܦ ܕܥܰܬܺܝܪܳܐ ܡܶܫܬܰܒܗܰܪ ܒܥܽܘܬܪܶܗ. ܐܳܦ ܚܰܟܺܝܡܳܐ ܒܚܶܟܡܬܶܗ܆ ܘܚܰܝܠܬܳܢܳܐ ܒܓܰܢܒܳܪܽܘܬܶܗ ܘܒܰܚܬܺܝܪܽܘܬܗܽܘܢ ܒܒܺܝܫܬܳܐ ܡܶܫܬܰܒܗܪܺܝܢ. ܐܶܡܪܶܬ ܓܶܝܪ ܗܳܠܶܝܢ ܒܫܽܘܪܳܝܳܐ ܕܡܺܐܡܪܳܐ ܕܡܰܙܡܽܘܪܳܐ ܗܳܢܐ ܕܚܰܡܫܺܝܢ ܘܰܬܪܶܝܢ. ܡܶܛܠ ܕܡܶܬܚܰܙܝܳܐ ܠܰܢ ܒܶܗ ܡܰܟܣܳܢܽܘܬܳܐ ܕܗܳܢܽܘܢ ܕܠܽܘܩܒܰܠ ܕܰܒܒܺܝܫܬܳܐ ܡܶܫܬܰܒܗܪܺܝܢ ܡܰܙܡܽܘܪܳܐ ܓܶܝܪ ܗܳܢܐ ܠܽܘܩܒܰܠ ܗܰܘ ܕܡܶܬܚܪܶܐ ܗܘܳܐ ܒܒܺܝܫܬܳܐ ܐܰܡܪܶܗ ܡܙܰܡܪܳܢܳܐ ܕܡܰܢ ܐܺܝܬܰܘܗܝ ܗܘܳܐ ܣܽܘܥܪܳܢܳܐܝ̣ܬ ܒܥܰܝܢܰܢ ܒܰܟܬܳܒ̈ܐ ܘܶܐܫܟܰܚܢܰܢ܆ ܕܠܽܘܩܒܰܠ ܕܳܘܳܐܓ ܐܰܕܽܘܡܳܝܳܐ ܥܰܫܺܝܢܳܐ ܕܪ̈ܳܥܰܘܳܬܳܐ ܕܫܳܐܘܳܠ ܐܰܡܪܶܗ ܛܽܘܒܬܳܢܳܐ ܕܰܘܝܕ. ܢܺܐܡܰܪ ܐܳܦ ܥܶܠܬܳܐ ܗܳܕܶܐ ܕܣܽܘܥܪܳܢܳܐ. ܗܽܘ ܗܳܢܐ ܕܳܘܳܐܓ ܐܰܕܽܘܡܳܝܳܐ ܒܰܕܪܳܥܳܐ ܗܳܟܺܝܠ ܘܰܒܓܶܢܣܳܐ ܡܶܢ ܒܢܰܝ̈ ܥܺܝܣܽܘ ܐܰܚܽܘܗܝ ܕܝܰܥܩܽܘܒ ܒܢܰܝ̈ ܐܺܝܣܚܳܩ ܐܺܝܬܰܘܗܝ ܗܘܳܐ. ܘܶܐܬܳܐ ܗܘܳܐ ܒܙܰܒܢܶܗ ܕܫܳܐܘܳܠ ܡܰܠܟܳܐ ܕܺܝܣܪܳܐܝܠ܆ ܘܰܓܙܰܪ ܒܶܣܪܳܐ ܕܥܽܘܪܠܽܘܬܶܗ ܘܰܗܘܳܐ ܝܺܣܰܪܠܳܝܳܐ. ܘܰܠܗܳܢܐ ܥܰܒܕܶܗ ܫܳܐܘܳܠ ܪܰܒܳܐ ܥܰܠ ܟܽܠܗܽܘܢ ܪ̈ܳܥܰܘܳܬܳܐ. ܘܟܰܕ ܥܪܰܩ ܕܰܘܝܕ ܡܶܢ ܩܕܳܡ ܫܳܐܘܳܠ ܘܰܥܒܰܪ ܠܢܳܟܳܚ. ܘܥܰܠ ܠܘܳܬ ܐܰܚܺܝܡܰܠܰܟ ܟܳܗܢܳܐ܆ ܚܙܳܝܗܝ ܗܘܳܐ ܕܳܘܳܐܓ ܠܕܰܘܝܕ. ܘܶܐܙܰܠ ܘܚܰܘܺܝ ܠܡܰܠܟܳܐ ܫܳܐܘܳܠ. ܟܰܕ ܡܩܰܛܪܶܓ ܗܘܳܐ ܠܶܗ ܠܫܳܐܘܳܠ ܒܰܐܝܠܶܝܢ ܕܰܣܥܰܪ ܠܘܳܬ ܕܰܘܝܕ. ܟܰܕ ܕܶܝܢ ܐܶܬܕܰܠܰܚ ܫܳܐܘܳܠ ܡܶܛܠܗܳܕܐ܆ ܫܰܕܰܪ ܘܰܐܝܬܺܝ ܠܟܳܗܢܳܐ ܐܰܚܺܝܡܰܠܰܟ ܘܰܠܟܽܠܗܘܢ ܟܳܗ̈ܢܶܐ ܕܢܳܟܳܚ: ܕܗܳܘܶܝܢ ܗܘܰܘ ܒܡܶܢܝܳܢܳܐ ܬܡܳܢܺܝܢ ܘܚܰܡܫܳܐ ܓܰܒܪ̈ܺܝܢ. ܘܟܰܕ ܐܶܬܚܰܡܰܬ ܫܳܐܘܳܠ ܥܰܠ ܟܽܠܗܘܢ ܟܳܗ̈ܢܐ ܡܶܛܠ ܕܰܘܺܝܕ. ܘܰܦܩܰܕ ܠܥܰܒ̈ܕܰܘܗܝ ܐܰܝܠܶܝܢ ܕܩܳܝܡܺܝܢ ܗܘܰܘ ܠܥܶܠ ܡܶܢܶܗ. ܘܶܐܡܰܪ ܠܗܽܘܢ. ܐܶܬܟܰܪܟܘ ܘܩܰܛܶܠܘ ܠܟܳܗ̈ܢܶܐ ܕܰܐܠܗܐ. ܗܶܢܘܢ ܕܶܝܢ ܥܰܒ̈ܕܰܘܗܝ ܠܐ ܨܒܰܘ. ܡܶܛܠ ܕܝܰܩܰܪܘ ܠܰܐܠܗܐ ܝܰܬܝ̣ܪ ܡܶܢ ܦܽܘܩܕܳܢܳܐ ܕܡܰܠܟܳܐ. ܘܶܐܡܰܪ ܡܰܠܟܳܐ ܠܕܳܘܳܐܓ ܐܰܕܽܘܡܳܝܳܐ. ܐܶܬܟܰܪܟ ܐܰܢ̱ܬ ܘܰܦܓܰܥ ܒܟܳܗ̈ܢܐ. ܘܩܰܛܶܠ ܕܳܘܳܐܓ ܠܟܳܗ̈ܢܶܐ ܘܰܐܡܺܝܬ ܐܶܢܘܢ ܠܰܬܡܳܢܺܝܢ ܘܰܠܚܰܡܫܳܐ ܓܰܒܪ̈ܺܝܢ. ܕܰܫܩܺܝܠܺܝܢ ܗܘܰܘ ܦܶܕܬܳܐ ܕܒܽܘܨܳܐ (ܐ ܫܡܘܐܝܠ ܟܒ: ܝܙ-ܝܚ). ܘܒܳܬܰܪ ܗܳܠܶܝܢ: ܐܶܬܦܰܠܰܛ ܒܪܳܐ ܚܰܕ ܠܰܐܚܺܝܡܰܠܟ ܘܰܫܡܶܗ ܗܘܳܐ ܐܰܒܺܝܬܳܪ. ܗܳܢܐ ܥܪܰܩ ܠܘܳܬ ܕܰܘܝܕ ܘܶܐܫܬܰܥܺܝ ܠܶܗ ܥܰܠ ܚܰܪܒܳܐ ܕܰܥܒܰܕ ܕܳܘܳܐܓ ܒܟܳܗ̈ܢܐ (ܐ ܫܡܘܐܝܠ ܟܒ: ܟ-ܟܐ). ܘܕܰܩܛܰܠ ܐܶܢܘܢ ܘܰܢܣܰܒ ܩܪܺܝܬܗܘܢ. ܠܽܘܩܒܰܠ ܗܳܢܐ ܡܳܕܶܝܢ ܟܰܕ ܫܡܰܥ ܕܰܘܺܝܕ ܡܰܙܡܽܘܪܳܐ ܗܳܢܳܐ ܐܶܬܢܰܒܺܝ ܘܶܐܡܰܪ:
ܠܡܳܢܳܐ ܡܶܫܬܰܒܗܰܪ ܐܰܢܬ ܒܒܺܝܫܬܳܐ ܓܰܢ̱ܒܳܪܳܐ. ܘܥܰܠ ܡܚܰܣܝܳܐ ܟܽܠܝܽܘܡ ܥܰܘܠܳܐ ܡܶܬܚܰܫܰܒ ܠܶܫܳܢܳܟ. ܐܰܝܟ ܕܰܒܡܶܕܶܡ ܪܰܒܳܐ ܒܒܺܝܫܬܳܐ ܚܬܺܝܪ ܐܰܢܬ. ܘܗܳܕܶܐ ܥܰܠ ܠܳܐ ܡܟܰܬܡܳܐ ܘܛܽܘܒܳܢܳܐ. ܒܣܽܘܥܪ̈ܳܢܶܐ ܕܫܳܘܶܝܢ ܠܩܽܘܛܪܳܓܳܐ. ܥܰܘܠܳܐ ܡܶܬܚܰܫܰܒ ܐܰܢܬ.
ܘܰܐܝܟ ܡܕܰܟܝܳܐ ܕܰܠܛܺܝܫ ܥܒܰܕܬ ܢܶܟܠܐ. ܠܰܘ ܒܰܠܚܽܘܕ ܥܰܠ ܗܰܘ ܕܠܳܐ ܚܛܳܐ. ܐܶܠܐ ܐܳܦ ܥܰܠ ܟܳܗ̈ܢܐ ܩܰܕܺܝ̈ܫܶܐ ܕܠܐ ܐܰܣܟܶܠܘ ܒܳܟ.
ܪܚܶܡܬ ܒܺܝ̈ܫܳܬܳܐ ܡܶܢ ܛܳܒܴ̈ܬܳܐ. ܘܕܰܓܳܠܽܘܬܳܐ ܡܶܢ ܡܰܡܠܠܐܴ ܕܙܰܕܺܝܩܽܘܬܳܐ. ܪܚܶܡܬ ܠܟܽܠ ܕܰܡܡܰܠܠܺܝܢ ܥܰܘܠܳܐ܆ ܘܰܠܠܶܫܳܢ̈ܐ ܢܰܟܽܘ̈ܠܬܳܢܶܐ. ܕܳܡ̈ܝܳܢ ܗܳܠܝܢ ܕܥܰܠ ܫܳܐܘܳܠ ܐܰܡܺܝܪ̈ܳܢ. ܒܗܰܘ ܓܶܝܪ ܙܰܒܢܳܐ܆ ܒܳܬܰܪ ܐܰܝܠܶܝܢ ܕܡܰܠܶܠ ܕܳܘܳܐܓ܆ ܐܶܙܰܠ ܗܘܳܐ ܗܽܘ ܫܳܐܘܳܠ ܐܰܝܟܰܢܳܐ ܕܰܡܡܰܠܶܠ ܗܘܳܐ ܥܰܘܠܐ ܥܰܠ ܕܰܘܺܝܕ ܠܰܐܚܺܝܡܰܠܟ ܘܰܠܟܳܗ̈ܢܐ ܕܶܝܢ ܕܰܡܡܰܠܠܺܝܢ ܗܘܰܘ ܙܰܕܺܝܩܽܘܬܳܐ ܠܳܐ ܫܡܰܥ. ܡܶܛܠܗܳܢܐ ܟܰܕ ܡܶܬܬܙܺܝܥ ܒܪܽܘܚܳܐ ܠܽܘܩܒܰܠ ܕܳܘܳܐܓ ܗܰܘ ܡܰܪܳܚܳܐ ܐܳܡܰܪ ܗܘܳܐ:
ܡܶܛܠ ܗܳܢܳܐ ܐܰܠܗܳܐ ܢܶܥܩܪܳܟ ܘܢܶܣܚܦܳܟ ܠܥܳܠܰܡ ܡܶܢ ܡܰܫܟܢܳܟ ܘܥܶܩܳܪܳܟ ܡܶܢ ܐܰܪܥܳܐ ܕܚܰܝ̈ܐ. ܡܳܢܳܐ ܕܶܝܢ ܡܶܬܚܙܶܐ ܠܰܢ ܒܗܳܠܶܝܢ ܬܪܶܝܢ ܥܳܒ̈ܕܰܝ ܒܺܝ̈ܫܳܬܳܐ. ܗܳܐ ܓܶܝܪ ܚܰܕ ܩܰܛܶܠ ܘܰܐܚܪܺܢܳܐ ܦܳܩܶܕ ܕܬܶܗܘܶܐ. ܒܗܰܘ ܕܓܰܢ̱ܒܳܪ̈ܶܐ ܐܶܫܬܰܡܰܗܘ. ܡܳܢܳܐ ܐ̱ܚܪܺܢܳܐ ܚܳܙܶܝܢܰܢ܆ ܐܶܠܐ ܐܶܢ ܨܰܠܡܶܗ ܕܗܰܘ ܕܡܶܢ ܒܪܺܝܫܺܝܬ ܐܰܠܶܦ ܣܶܢܐܬܳܐ ܠܰܒܢܰܝ̈ܢܳܫܳܐ. ܘܟܰܕ ܕܶܝܢ ܕܰܘܺܝܕ ܒܐܪܳܙܳܐ ܕܦܰܪܨܽܘܦܶܗ ܕܥܰܡܰܢܘܐܝܠ ܡܶܬܢܣܶܒ. ܒܰܓܙܳܪ ܕܺܝܢܳܐ ܟܺܐܢܳܐ ܡܶܢ ܐܰܪܥܳܐ ܕܚܰܝ̈ܐ ܠܥܶܩܳܪܶܗ ܕܳܐܟܶܠܩܰܪܨܳܐ ܡܪܺܝܡ. ܘܡܶܢ ܡܰܫܟܢܶܗ ܕܰܐܠܗܐ ܣܳܚܶܦ ܠܶܗ. ܐܰܝܟܰܢܳܐ ܕܡܶܛܠ ܗܳܕܶܐ ܙܰܕܺܝ̈ܩܶܐ ܕܶܐܬܩܛܠܘ ܒܢܶܟܠܶܗ ܕܣܳܛܳܢܳܐ:
ܕܢܶܚܙܽܘܢ ܘܢܶܚܕܽܘܢ ܘܰܢܣܰܒܪܽܘܢ ܒܡܳܪܝܳܐ: ܘܢܺܐܡܪܽܘܢ ܕܗܳܢܰܘ ܓܰܒܪܳܐ ܕܠܳܐ ܥܒܰܕ ܠܰܐܠܗܐ ܬܽܘܟܠܳܢܶܗ܆ ܐܶܠܐ ܐܶܬܬܟܶܠ ܥܰܠ ܣܽܘܓܳܐܐ ܕܥܽܘܬܪܶܗ ܘܶܐܬܬܪܺܝܡ ܒܩܶܢܝܳܢܶܗ. ܠܰܘ ܓܶܝܪ ܒܰܠܚܽܘܕ ܗܳܪܟܳܐ ܚܳܙܶܝܢܰܢ ܠܗܳܝ ܕܚܳܕܶܝܢ ܙܰܕܺܝ̈ܩܶܐ ܡܳܐ ܕܢܳܦܶܩ ܦܣܳܩܳܐ ܥܰܠ ܐܳܟܶܠܩܰܪܨܳܐ. ܕܢܶܬܥܩܰܪ ܡܶܢ ܐܰܪܥܳܐ ܕܚܰܝ̈ܐ. ܐܳܦ ܒܰܢܒܺܝ̈ܐ ܟܽܠܗܘܢ ܥܰܠ ܥܩܽܘܪܝܶܗ ܘܒܽܘܛܳܠܶܗ ܡܰܠܦܺܝܢ. ܒܪܰܡ ܠܚܰܕ ܢܰܝܬܶܐ ܗܰܘ ܕܢܰܗܺܝܪܳܐܝܬ ܡܚܰܘܶܐ ܒܦܰܪܨܽܘܦܳܐ ܕܡܰܠܟܳܐ ܕܒܳܒܶܝܠ. ܐܰܝܠܶܝܢ ܕܣܳܒܶܠ ܠܚܰܪܬܳܐ ܗܰܘ ܡܰܠܦܳܢܳܐ ܕܒܺܝ̈ܫܳܬܳܐ ܒܥܶܠܕܒܳܒܳܐ ܕܩܰܕܺܝ̈ܫܐ. ܬܳܒܰܪ ܡܳܪܝܳܐ ܚܽܘܛܪܳܐ ܕܪܰܫܺܝܥܳܐ ܘܫܰܒܛܳܐ ܕܫܰܠܺܝܛܳܐ. ܕܡܳܚܶܐ ܗܘܳܐ ܥܰܡ̈ܡܶܐ ܒܰܟܐܳܬܳܐ ܡܚܽܘܬܳܐ ܕܠܐ ܡܰܪܕܽܘܬܳܐ. ܘܪܳܕܶܐ ܗܘܳܐ ܒܪܽܘܓܙܳܐ ܥܰܡ̈ܡܶܐ: ܘܪܳܕܶܦ ܗܘܳܐ ܠܗܽܘܢ ܕܠܐ ܚܰܘܣܳܢ. ܐܶܠܐ ܐܶܬܬܢܺܝܚܰܬ ܘܫܶܠܝܰܬ ܟܽܠܳܗ̇ ܐܰܪܥܳܐ. ܘܕܳܨܰܬ ܒܬܶܫܒܽܘܚܬܳܐ. ܐܳܦ ܒܪܽܘܬܳܐ ܘܰܐܪ̈ܙܶܐ ܕܠܶܒܢܳܢ ܚܕܺܝܘ ܠܳܟ. ܡܶܢ ܙܰܒܢܳܐ ܕܰܫܟܶܒܬ ܠܳܐ ܣܠܶܩܘ ܥܠܰܝܢ ܠܡܶܦܣܰܩ. ܫܝܽܘܠ ܡܶܢ ܠܬܰܚܬ ܐܶܬܡܰܪܡܪܰܬ ܠܽܘܩܒܰܠ ܡܰܥܠܳܟ. ܐܰܥܺܝܪܰܬ ܥܠܰܝܟ ܓܰܢ̱ܒܳܪ̈ܶܐ ܘܟܽܠܗܘܢ ܫܰܠܺܝ̈ܛܳܢܶܐ ܕܰܐܪܥܳܐ ܕܰܐܩܺܝܡܬ ܡܶܢ ܟܽܘܪ̈ܣܰܘܳܬܗܘܢ. ܘܟܽܠܗܘܢ ܡܰܠܟ̈ܐ ܕܰܐܪܥܳܐ ܢܥܰܢܽܘܢ ܘܢܺܐܡܪܽܘܢ ܠܳܟ: ܐܳܦ ܐܰܢܬ ܐܶܬܟܪܰܗܬ ܐܰܟܘܳܬܰܢ ܘܰܠܘܳܬܰܢ ܐܶܫܬܠܶܡܬ ܘܺܐܝܩܳܪܳܟ ܢܚܶܬ ܠܰܫܝܽܘܠ ܘܡܺܝܬ ܟܶܢܳܪܳܟ. ܬܚܽܘܬܰܝܟ ܬܶܬܡܰܟܰܟ ܪܶܡܬܳܐ ܘܰܬܟܰܣܶܝܟ ܬܰܘܠܥܳܐ. ܐܰܝܟܰܢܳܐ ܢܦܰܠܬ ܡܶܢ ܫܡܰܝܳܐ. ܢܦܰܠܬ ܒܰܐܪܥܳܐ ܡܨܰܥܪܳܢܳܐ ܕܥܰܡ̈ܡܶܐ܆ ܐܰܢܬ ܐܶܡܰܪܬ ܒܠܶܒܳܟ ܕܶܐܣܰܩ ܠܰܫܡܰܝܳܐ. ܘܰܠܥܶܠ ܡܶܢ ܟܰܘܟ̈ܒܰܘܗܝ ܕܺܐܝܠ ܐܰܪܺܝܡ ܟܽܘܪܣܰܝ ܘܶܐܬܶܒ ܒܛܽܘܪ̈ܶܐ ܪ̈ܳܡܶܐ ܕܒܰܫܦܽܘ̈ܠܰܝ ܓܰܪܒܝܳܐ. ܘܶܐܣܰܩ ܥܰܠ ܪܰܘܡܳܐ ܕܰܥ̈ܢܳܢܶܐ ܘܶܐܬܕܰܡܶܐ ܠܥܶܠܳܝܳܐ. ܡܶܟܺܝܠ ܠܰܫܝܽܘܠ ܬܶܚܽܘܬ ܘܠܶܐܫܬܶܗ ܕܓܽܘܒܳܐ. ܘܟܽܠ ܚܰܙܳܝܱ̈ܟ ܥܠܰܝܟ ܢܕܺܝܩܽܘܢ ܘܢܶܓܚܟܽܘܢ. ܘܒܳܟ ܢܶܣܬܰܟܠܽܘܢ ܘܢܺܐܡܪܽܘܢ. ܕܗܳܢܰܘ ܓܰܒܪܳܐ ܕܡܰܪܡܰܪ ܗܘܳܐ ܠܟܽܠܳܗ̇ ܐܢܳܫܽܘܬܳܐ. ܘܰܐܙܺܝܥ ܗܘܳܐ ܠܡܰܠܟ̈ܘܳܬܳܐ ܘܰܐܚܪܶܒ ܠܥܳܡܰܪܬܳܐ ܐܰܝܟ ܡܰܕܒܪܳܐ. ܘܩܽܘܪ̈ܝܳܐ ܣܰܚܶܦ ܘܰܐܣܺܝܪ̈ܰܘܗܝ ܠܳܐ ܫܪܳܐ. ܘܟܽܠܗܘܢ ܡܰܠܟ̈ܐ ܕܥܰܡ̈ܡܶܐ ܫܟܶܒܘ ܒܺܐܝܩܳܪܳܐ ܐܢܳܫ ܒܒܰܝܬܶܗ. ܘܰܐܢܬ ܐܶܫܬܕܺܝܬ ܡܶܢ ܩܰܒܪܳܐ ܐܰܝܟ ܢܽܘܪܒܳܐ ܡܰܣܠܝܳܐ. ܠܒܽܘܫܳܐ ܕܰܩܛܺܝ̈ܠܐ ܕܰܩܛܺܝܠܺܝܢ ܒܣܰܝܦܳܐ. ܕܢܳܚܬܺܝܢ ܒܡܰܚܰܬܬܶܗ ܕܓܽܘܒܳܐ. ܐܰܝܟ ܫܠܰܕ̈ܐ ܕܺܝ̈ܫܳܬܳܐ. ܘܠܐ ܬܶܚܕܶܐ ܥܰܡܗܘܢ ܒܩܰܒܪܳܐ. ܡܶܛܠ ܕܰܐܪܥܳܟ ܚܰܒܶܠܬ ܘܥܰܡܳܟ ܩܰܛܶܠܬ. ܘܠܐ ܢܩܽܘܡ ܠܥܳܠܰܡ ܙܰܪܥܳܐ ܒܺܝܫܳܐ. ܛܰܝܶܒ ܠܰܒܢܰܘ̈ܗܝ ܩܶܛܠܳܐ ܒܥܰܘܠܳܐ ܕܰܐܒܽܘܗܽܘܢ. ܕܠܐ ܢܩܽܘܡܽܘܢ ܘܢܺܐܪܬܽܘܢ ܐܰܪܥܳܐ. ܘܢܶܡܠܽܘܢ ܐܰܦܰܝ̈ ܡܶܬܥܰܡܪܳܢܺܝܬܳܐ ܩܪܳܒܳܐ (ܐܫܥܝܐ ܝܕ: ܗ-ܟܐ). ܗܳܠܶܝܢ ܟܽܠܗܶܝܢ ܥܰܠ ܐܳܟܶܠܩܰܪܨܳܐ ܐܰܡܺܝܪ̈ܳܢ. ܡܶܢ ܢܒܺܝܱ̈ܘܳܬܳܐ ܕܓܳܕ̈ܫܳܢ ܠܶܗ ܒܫܽܘܠܳܡܳܐ. ܗܰܘ ܕܒܶܐܫܰܥܝܳܐ ܡܰܠܟܳܐ ܕܒܳܒܶܝܠ ܐܶܬܡܬܶܠ. ܒܕܰܘܝܕ ܕܶܝܢ ܓܰܢ̱ܒܳܪܳܐ ܐܶܬܟܰܢܺܝ. ܘܰܚܠܳܦ ܣܰܓܺܝ̈ܐܬܳܐ ܕܶܐܡܰܪ ܥܠܰܘܗܝ ܐܶܫܰܥܝܳܐ܆ ܕܰܘܺܝܕ ܒܰܙܥܽܘܪ̈ܝܳܬܳܐ ܐܶܡܰܪ ܥܠܰܘܗܝ. ܕܗܳܠܶܝܢ ܣܰܓܺܝ̈ܐܬܳܐ ܡܚܰܘܶܝܢ. ܐܶܡܰܪ ܕܶܝܢ ܕܰܐܠܗܐ ܢܶܥܩܪܺܝܘܗܝ ܘܢܶܣܚܦܺܝܘܗܝ ܠܥܳܠܰܡ ܡܶܢ ܡܰܫܟܢܶܗ ܘܥܶܩܳܪܶܗ ܡܶܢ ܐܰܪܥܳܐ ܕܚܰܝ̈ܐ. ܘܰܒܗܳܠܶܝܢ ܬܠܳܬܳܐ ܦܶܬܓܳܡ̈ܐ܆ ܟܽܠܶܗ ܡܣܳܡ ܒܪܺܝܫܳܐ ܕܥܰܠ ܐܳܟܶܠܩܰܪܨܳܐ ܪܫܺܝܡ. ܡܳܕܶܝܢ ܐܶܢ ܠܥܳܠܰܡ ܡܶܣܬܚܶܦ ܡܶܢ ܡܰܫܟܢܳܐ ܕܰܐܠܗܐ. ܒܶܛܠܰܬ ܠܳܗ̇ ܡܶܠܬܳܐ ܕܗܳܢܽܘܢ ܕܳܐܡܪܺܝܢ ܕܗܳܘܶܐ ܫܽܘܠܳܡܳܐ ܠܕܺܝܢܳܐ. ܘܶܐܢ ܥܶܩܳܪܶܗ ܡܶܬܦܣܶܩ ܡܶܢ ܐܰܪܥܳܐ ܕܚܰܝ̈ܐ. ܘܰܥܢܳܩܰܘ̈ܗܝ ܡܝܰܒܫܳܐ ܫܰܠܗܶܒܺܝܬܳܐ. ܐܰܝܟ ܕܶܐܡܰܪ ܐܺܝܳܘܒ: ܠܰܝܬ ܣܰܒܪܳܐ ܕܡܰܚܠܶܦ ܥܶܩܳܪܳܐ ܕܶܐܟܠܰܬ ܢܽܘܪܳܐ ܘܰܪ̈ܺܝܕܰܘܗܝ. ܐܶܠܐ ܗܳܝܕܶܝܢ ܒܛܶܟܣܶܗ ܥܳܐܠܳܐ ܡܶܠܬܶܗ ܕܰܡܙܰܡܪܳܢܳܐ ܕܶܐܡܰܪ:
ܘܶܐܢܳܐ ܐܰܝܟ ܙܰܝܬܳܐ ܡܫܰܒܚܳܐ ܒܒܰܝܬܶܗ ܕܰܐܠܗܐ. ܠܥܳܠܰܡ ܘܰܠܥܳܠܰܡ ܥܳܠܡܺܝܢ. ܕܰܗܺܝܢܳܐ ܓܶܝܪ ܘܰܡܕܰܗܢܳܢܳܐ ܐܺܝܬܰܘܗܝ ܐܺܝܠܳܢܳܐ ܕܙܰܕܺܝ̈ܩܶܐ. ܘܢܰܗܺܝܪ̈ܶܐ ܘܡܰܢܗܪ̈ܳܢܶܐ ܐܺܝܬܰܝܗܽܘܢ ܦܺܐܪ̈ܰܝܗܽܘܢ. ܘܡܶܛܠ ܕܰܐܝܟ ܢܰܗܺܝܪ̈ܶܐ ܐܶܬܚܙܺܝܘ ܒܥܳܠܡܳܐ. ܒܺܐܝܠܳܢܳܐ ܗܳܢܳܐ ܡܕܰܡܶܐ ܠܗܽܘܢ ܢܒܺܝܳܐ ܛܽܘܒܬܳܢܳܐ. ܠܰܘ ܓܶܝܪ ܥܰܠ ܢܰܦܫܶܗ ܐܶܡܰܪ ܗܰܘ ܡܰܟܺܝܟܳܐ ܘܙܰܕܺܝܩܳܐ ܕܺܐܝܬܰܘܗܝ ܙܰܝܬܳܐ ܡܫܰܒܚܳܐ. ܫܡܰܥ ܠܰܢܒܺܝܳܐ ܕܳܐܡܰܪ: ܕܦܰܐܝܳܐܝ̣ܬ ܘܫܰܦܝܳܐܝ̣ܬ ܩܳܝܡܺܝܢ ܙܰܕܺܝ̈ܩܶܐ ܒܒܰܝܬܶܗ ܕܡܳܪܝܳܐ. ܘܰܒܢܽܘܗܪܳܐ ܕܠܰܡܦܺܐܕܰܝ̈ܗܘܢ ܕܰܛܥܺܝܢ ܡܶܫܚܳܐ܆ ܕܺܐܝܬܰܘܗܝ ܡܠܽܘܐܳܐ ܠܬܰܪܒܺܝܬܳܐ ܕܢܽܘܗܪܳܐ ܕܠܰܡܦ̈ܐܕܶܐ. ܘܥܰܠܗܳܝ ܐܶܡܰܪ ܠܥܳܠܰܡ ܘܰܠܥܳܠܰܡ ܥܳܠܡܺܝܢ. ܥܰܠ ܕܡܰܘܕܰܥ ܡܶܛܠ ܥܦܺܝܦܽܘܬ ܚܰܕ.
ܐܰܘܕܶܐ ܠܳܟ ܠܥܳܠܰܡ ܕܰܥܒܰܕܬ ܘܶܐܣܰܒܰܪ ܫܡܳܟ ܠܕܳܪܕܳܪ̈ܺܝܢ ܠܽܘܩܒܰܠ ܙܰܕܺܝ̈ܩܰܝܟ. ܐܰܝܟ ܗܰܘ ܕܡܶܢܟܰܕܽܘ ܗܘܳܐ ܠܶܗ ܦܽܘܪܥܳܢܳܐ ܡܡܰܠܶܠ ܥܠܰܘܗܝ ܡܙܰܡܪܳܢܳܐ. ܕܡܰܫܰܪ ܗܘܳܐ ܕܟܽܠ ܡܶܕܶܡ ܕܰܡܚܰܘܶܐ ܠܶܗ ܪܽܘܚܳܐ. ܐܳܦܶܢ ܡܰܘܚܰܪ ܐܶܠܐ ܥܬܺܝܕ ܕܢܶܗܘܶܐ ܒܰܫܪܳܪܳܐ ܐܺܝܬ ܠܶܗ. ܘܠܰܘ ܡܶܢ ܫܰܪܺܝܪܳܐ ܐܰܝܟ ܗܰܘ ܕܡܶܢ ܟܰܕ ܗܘܳܐ ܠܶܗ ܡܶܬܚܰܫܰܒ. ܡܶܛܠܗܳܕܶܐ ܓܶܝܪ ܠܳܐ ܐܶܡܰܪ ܢܒܺܝܳܐ ܕܰܐܘܕܶܐ ܠܳܟ ܠܥܳܠܡ ܕܥܳܒܶܕ ܐܰܢܬ. ܐܶܠܐ ܕܰܥܒܰܕܬ. ܘܶܐܣܰܒܰܪ ܫܡܳܟ ܠܕܳܪܕܳܪ̈ܺܝܢ ܥܰܠ ܕܰܢܦܰܫܶܩ ܕܗܳܢܐ ܥܳܠܡܳܐ ܕܳܪܳܐ ܡܶܬܢܣܶܒ. ܕܳܪ ܕܳܪ̈ܺܝܢ ܕܶܝܢ ܗܰܘ ܥܳܠܡܳܐ ܕܒܳܬܰܪ ܗܳܢܳܐ ܕܒܶܗ ܡܶܬܚܰܙܝܳܐ ܢܒܺܝܽܘܬܳܐ ܒܓܰܘ ܟܶܢ̈ܫܶܐ ܕܙܰܕܺܝ̈ܩܶܐ. ܟܰܕ ܡܣܰܒܪܳܐ ܚܰܕܽܘܬܳܐ ܘܡܰܟܪܙܳܐ ܥܰܠ ܫܡܶܗ ܕܰܐܠܗܐ ܡܶܠܬܳܐ ܠܽܘܩܒܰܠ ܙܰܕܺܝ̈ܩܰܘܗܝ ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܬܠܬܐ
ܕܡܰܘܕܰܥ ܒܐܪܳܙܳܐ ܥܰܠ ܡܳܪܽܘܕܽܘܬܶܗ ܕܥܰܡܳܐ ܕܥܰܠ ܡܫܺܝܚܳܐ: ܘܥܰܠ ܡܰܫܠܡܳܢܽܘܬܳܐ ܕܺܝܗܽܘܕܳܐ: ܘܥܰܠ ܡܰܚܢܽܘܩܺܝܬܳܐ ܕܺܝܪܶܬ ܡܰܫܠܡܳܢܳܐ.
ܡܳܐ ܕܡܶܫܟܚܺܝܢܰܢ ܠܪܽܘܚܳܐ ܕܰܐܠܗܐ ܕܰܡܕܰܡܶܐ ܐܰܝܠܶܝܢ ܕܳܐܡܰܪ ܚܕܳܐ ܠܰܚܕܳܐ܆ ܘܰܒܚܰܕ ܦܶܬܓܳܡܳܐ ܟܰܕ ܠܐ ܡܫܰܚܠܶܦ ܡܶܠܬܳܐ܆ ܥܳܒܶܕ ܫܽܘܪ̈ܳܝܶܐ ܠܗܳܝ ܕܶܐܡܰܪ܆ ܠܰܘ ܡܚܺܝܠܽܘܬܳܐ ܕܪܽܘܚܳܐ ܡܶܬܚܰܙܝܳܐ ܒܗܳܕܶܐ. ܘܠܰܘ ܬܽܘܒ ܡܶܚܣܰܪ ܚܰܣܺܝܪ ܠܶܗ ܠܪܽܘܚܳܐ ܕܰܐܠܗܐ ܕܢܶܥܒܶܕ ܫܽܘܪ̈ܳܝܶܐ ܣܰܓܺܝ̈ܐܐ ܥܰܠ ܚܰܕ ܣܽܘܥܪܳܢܳܐ. ܐܶܠܐ ܡܳܐ ܕܥܳܐܷܦ ܡܶܠܬܳܐ ܥܰܠܗܳܝ ܕܰܥܦܺܝܦ ܣܽܘܥܪܳܢܐ. ܐܰܘ ܒܛܳܒܬܳܐ ܐܰܘ ܒܒܺܝܫܬܳܐ ܡܰܘܕܰܥ. ܘܥܰܠܗܳܝ ܐܶܡܪܶܬ܆ ܕܛܽܘܒܬܳܢܳܐ ܕܰܘܝܕ ܬܰܪܬܶܝܢ ܙܰܒ̈ܢܺܝܢ ܫܰܪܺܝ ܕܳܡܝܳܐܝ̣ܬ ܟܰܕ ܠܳܐ ܚܰܠܶܦ ܚܰܝܠܳܐ ܐܰܘ ܟܽܘܢܳܝܳܐ ܐܰܝܟ ܕܰܒܡܰܙܡܘܪܳܐ ܗܳܢܐ. ܘܰܒܗܰܘ ܕܶܐܬܢܰܒܺܝ ܒܡܶܢܝܳܢܳܐ ܕܰܐܪܒܰܥܶܣܪ̈ܶܐ܆ ܐܰܝܟ ܗܳܢܐ ܕܚܰܡܫܺܝܢ ܘܰܬܠܳܬܳܐ. ܠܗܰܠ ܓܶܝܪ ܘܗܳܪܟܐ ܟܰܕ ܐܳܡܰܪ ܗܳܟܰܢܳܐ.
ܐܳܡܰܪ ܥܰܘܳܠܐ ܒܠܶܒܶܗ ܕܠܰܝܬ ܐܰܠܗܐ. ܘܒܰܬܪ̈ܰܝܗܘܢ ܡܰܙܡܘܪ̈ܶܐ܆ ܒܚܰܫܳܐ ܕܰܠܘܳܬ ܐܰܚܺܝܬܽܘܦܶܠ ܚܳܐܪ ܗܘܳܐ ܟܰܕ ܙܰܡܰܪ ܐܶܢܽܘܢ. ܘܕܳܡܝܳܐ ܕܡܶܛܠܗܳܕܐ ܐܶܡܰܪ ܬܪܶܝܢ ܥܠܰܘܗܝ ܕܗܰܘ ܒܰܪ ܡܢܳܬܶܗ ܕܺܝܗܽܘܕܳܐ ܡܰܫܠܡܳܢܳܐ. ܥܰܠ ܕܰܬܪܶܝܢ ܡܶܠܟ̈ܐ ܕܡܰܪܳܚܽܘܬܳܐ ܐܰܕܪܶܟܢܰܢ ܕܰܡܠܰܟ ܗܘܳܐ ܐܰܚܺܝܬܽܘܦܶܠ ܠܰܐܒܺܝܫܳܠܽܘܡ ܒܪܶܗ ܕܕܰܘܝܕ܆ ܩܰܕܡܳܝܳܐ ܗܳܟܺܝܠ ܗܰܘ ܕܰܡܠܰܟ ܕܢܶܥܽܘܠ ܥܰܠ ܢܶܫܰܘ̈ܗܝ ܘܰܕܪ̈ܽܘܟܳܬܶܗ ܕܰܐܒܽܘܗܝ܆ ܘܢܶܗܘܶܐ ܒܫܰܘܬܳܦܽܘܬܳܐ ܡܦܰܪܣܰܝܬܳܐ ܕܥܰܠ ܐܶܓܳܪܳܐ ܕܥܰܡ ܢܶܫ̈ܐ ܕܕܰܘܝܕ. ܐ̱ܚܪܺܢܳܐ ܕܶܝܢ ܡܶܠܟܳܐ ܗܰܘ ܕܰܡܠܰܟ ܕܢܶܕܒܽܘܪ ܚܰܝܠܳܐ ܘܢܶܪܕܽܘܦ ܒܳܬܰܪ ܐܰܒܽܘܗܝ ܘܢܶܩܛܠܶܗ. ܗܳܢܐ ܕܟܰܕ ܠܳܐ ܐܶܫܬܰܡܠܺܝ ܐܰܝܟ ܕܰܡܠܰܟ ܡܰܚܢܽܘܩܺܝܬܳܐ ܥܒܰܕ ܠܶܗ ܘܰܚܢܰܩ ܢܰܦܫܶܗ ܐܰܝܟ ܝܺܗܽܘܕܳܐ ܡܰܫܠܡܳܢܳܐ ܗܰܘ ܕܰܡܠܰܟ ܠܝܽܘܕܳܝ̈ܐ ܘܰܐܫܠܶܡ ܠܗܽܘܢ ܠܗܰܘ ܡܰܠܟܳܐ ܐܰܠܗܐ. ܘܟܰܕ ܚܙܳܐ ܕܶܐܬܢܰܚܰܡ ܘܩܳܡ ܒܚܰܝ̈ܐ ܕܠܳܐ ܚܒܳܠܐ. ܐܰܪܡܺܝ ܗܘܳܐ ܠܶܗ ܡܰܚܢܽܘܩܺܝܬܳܐ ܐܰܝܟ ܗܰܘ ܒܰܪ ܡܢܳܬܶܗ ܐܰܚܺܝܬܽܘܦܶܠ ܘܰܚܢܰܩ ܢܰܦܫܶܗ ܘܡܺܝܬ. ܘܟܰܕ ܩܳܡ ܡܪܳܕܳܐ ܥܰܠ ܕܰܘܝܕ ܗܰܘ ܙܰܕܺܝܩܳܐ. ܘܰܗܦܰܟܘ ܡܶܢܶܗ ܪ̈ܳܚܡܰܘܗܝ ܘܝܳܕܽܘ̈ܥܰܘܗܝ ܘܶܐܬܥܰܫܰܢ ܥܠܰܘܗܝ ܒܪܶܗ ܟܰܕ ܡܶܬܚܰܦܰܛ ܢܶܩܛܠܶܗ܆ ܘܟܽܠܶܗ ܥܰܡܳܐ ܡܪܰܕ ܥܰܡܶܗ ܘܥܰܒ̈ܕܰܘܗܝ ܥܰܠ ܗܰܘ ܕܦܰܨܺܝ ܐܶܢܽܘܢ ܡܶܢ ܩܪ̈ܳܒܶܐ ܕܥܰܡ̈ܡܐ ܒܰܪܒܪ̈ܳܝܶܐ. ܡܳܢܳܐ ܐܪܳܙܳܐ ܐ̱ܚܪܺܢܳܐ ܡܶܬܚܙܶܐ ܗܘܳܐ ܬܰܡܳܢ. ܐܶܠܐ ܡܪܳܕܶܗ ܕܥܰܡܳܐ ܕܥܰܠ ܥܰܡܰܢܘܐܝܠ. ܐܳܦ ܓܶܝܪ ܝܺܗܽܘܕܳܐ ܡܪܰܕ ܐܰܝܟ ܐܰܚܺܝܬܽܘܦܶܠ ܕܰܡܪܰܕ ܥܰܠ ܡܳܪܶܗ. ܒܰܪ ܡܶܠܟܳܐ ܗܘܳܐ ܘܬܰܠܡܺܝܕܳܐ ܕܦܳܪܽܘܩܰܢ. ܐܰܟܡܳܐ ܕܳܐܦ ܐܰܚܺܝܬܽܘܦܶܠ ܡܳܠܶܟ ܡܶܠܟ̈ܐ ܗܘܳܐ ܕܕܰܘܝܕ. ܡܰܙܡܽܘܪ̈ܶܐ ܬܪܶܝܢ ܕܡܶܬܕܰܡܶܝܢ ܒܰܚ̈ܕܳܕܶܐ ܛܽܘܒܬܳܢܳܐ ܕܰܘܝܕ ܙܰܡܰܪ ܘܶܐܡܰܪ:
ܐܳܡܰܪ ܥܰܘܳܠܳܐ ܒܠܶܒܶܗ ܕܠܰܝܬ ܐܰܠܗܐ: ܐܶܬܚܰܒܰܠܘ ܘܶܐܬܛܰܢܰܦܘ ܒܥܰܘܠܗܽܘܢ. ܒܰܐܝܠܶܝܢ ܕܶܐܬܚܰܫܰܒܘ ܥܰܠ ܕܰܘܝܕ܆ ܒܰܡܢܳܬܳܐ ܡܶܕܶܡ ܙܥܽܘܪܬܳܐ ܡܫܰܡܠܝܳܐܝ̣ܬ ܕܶܝܢ ܒܡܰܘܬܶܗ ܕܥܰܡܰܢܘܐܝܠ ܐܶܬܚܰܒܰܠܘ ܘܶܐܬܛܰܢܰܦܘ ܥܰܡܳܐ.
ܘܠܰܝܬ ܕܥܳܒܶܕ ܛܳܒܬܳܐ. ܗܳܝܕܶܝܢ ܓܶܝܪ ܐܺܝܬ ܗܘܳܐ ܐܰܠܦ̈ܐ ܘܪ̈ܶܒܘܳܬܳܐ ܥܰܡ ܕܰܘܝܕ܆ ܐܶܠܐ ܟܰܕ ܐܶܨܛܠܶܒ ܡܳܪܰܢ܆ ܘܠܐ ܚܰܕ ܐܶܫܬܟܰܚ ܕܰܥܒܰܕ ܛܳܒܬܳܐ.
ܐܰܠܗܐ ܐܰܕܺܝܩ ܡܶܢ ܫܡܰܝܳܐ ܥܰܠ ܒܢܰܝ̈ܢܳܫܳܐ܆ ܕܢܶܚܙܶܐ ܐܶܢ ܐܺܝܬ ܕܣܰܟܽܘܠܬܳܢ ܘܒܳܥܶܐ ܠܰܐܠܗܐ. ܟܽܠܗܽܘܢ ܣܛܰܘ ܐܰܟܚܕܳܐ ܘܶܐܬܛܰܢܰܦܘ ܘܠܰܝܬ ܕܥܳܒܶܕ ܛܳܒܬܳܐ ܐܳܦܠܳܐ ܚܰܕ܀ ܐܶܢ ܢܰܣܒܰܪ ܕܡܶܛܠ ܗܰܘ ܪܕܽܘܦܝܳܐ ܕܩܳܡ ܥܰܠ ܕܰܘܝܕ ܐܰܡܺܝܪ̈ܳܢ ܗܳܠܶܝܢ܆ ܣܰܓܺܝ̈ܐܐ ܓܶܝܪ ܥܳܒ̈ܕܰܝ ܛܳܒܴ̈ܬܳܐ ܢܰܩܦܽܘܗܝ ܘܰܥܪܰܩܘ ܥܰܡܶܗ. ܘܰܒܗܳܠܶܝܢ ܬܽܘܒ ܕܦܳܫܘ ܠܘܳܬ ܐܰܒܺܝܫܳܠܽܘܡ. ܐܺܝܬ ܗܘܳܐ ܚܽܘܫܺܝ ܐܰܪܟܳܝܳܐ. ܗܰܘ ܕܰܡܒܰܛܶܠ ܗܘܳܐ ܡܶܠܟܶܗ ܕܰܐܚܺܝܬܽܘܦܶܠ. ܘܨܳܕܽܘܩ ܘܰܐܒܺܝܬܳܪ ܟܳܗܢ̈ܐ ܕܠܰܡܪܳܕܶܗ ܕܶܝܢ ܕܰܐܒܺܝܫܳܠܽܘܡ ܠܳܐ ܫܳܠܡܺܝܢ ܗܘܰܘ. ܐܳܦ ܒܥܶܒܪܳܐ ܕܝܽܘܪܕܢܳܢ ܒܰܪܙܰܠܺܝ ܓܶܠܥܳܕܳܝܳܐ ܡܩܰܒܶܠ ܗܘܳܐ ܠܶܗ ܠܕܰܘܝܕ ܒܢܰܦ̈ܩܳܬܳܐ ܣܰܓܺܝ̈ܐܬܐ. ܪ̈ܶܒܘܳܬܳܐ ܕܓܰܒܪ̈ܶܐ ܥܳܒ̈ܕܰܝ ܩܪ̈ܳܒܶܐ ܕܰܐܩܺܝܡܘ ܩܪܳܒܳܐ܆ ܘܦܰܨܺܝܘ ܠܕܰܘܝܕ ܡܶܢ ܐܺܝ̈ܕܰܝ ܐܰܒܺܝܫܳܠܽܘܡ. ܐܶܠܐ ܫܽܘܠܳܡܳܐ ܕܰܢܒܺܝܽܘܬܳܐ. ܠܐ ܗܘܳܐ ܒܕܰܘܝܕ ܐܶܬܓܰܡܪܰܬ܆ ܟܰܕ ܓܶܝܪ ܐܶܬܚܙܺܝ ܡܳܪܳܗ̇ ܕܰܢܒܺܝܽܘܬܳܐ܆ ܒܶܗ ܐܶܫܬܰܠܡܰܬ ܘܩܳܡܰܬ ܥܰܠ ܣܳܟܳܐ ܕܠܐ ܚܰܣܺܝܪܽܘܬܳܐ. ܡܳܢܳܐ ܕܶܝܢ ܙܳܕܶܩ ܕܢܶܣܬܰܟܰܠ ܠܗܳܝ ܕܰܐܕܺܝܩ ܡܳܪܝܳܐ܆ ܘܰܠܗܳܝ ܕܰܐܕܺܝܩ ܐܰܠܗܐ. ܗܳܝ ܕܰܐܕܺܝܩ ܥܰܠܗܳܝ ܕܶܐܬܓܠܺܝ ܒܰܒܣܰܪ ܐܰܡܺܝܪܳܐ܆ ܘܫܰܦܺܝܪ ܒܗܰܘ ܩܰܕܡܳܝܳܐ ܐܰܡܺܝܪܳܐ ܕܡܳܪܝܳܐ ܐܰܕܺܝܩ. ܒܗܳܢܐ ܕܝܢ ܬܪܰܝܳܢܳܐ ܐܰܠܗܐ ܐܰܕܺܝܩ. ܐܶܡܰܪ ܓܶܝܪ ܡܙܰܡܪܳܢܳܐ:
ܘܠܐ ܝܕܰܥܘ ܟܽܠ ܥܳܒ̈ܕܰܝ ܥܰܘܠܳܐ. ܐܰܝܠܶܝܢ ܓܶܝܪ ܕܳܐܟܠܺܝܢ ܗܘܰܘ ܠܥܰܡܝ ܡܶܐܟܽܘܠܬܳܐ ܕܠܰܚܡܳܐ: ܘܠܰܐܠܗܐ ܠܳܐ ܩܪܰܘ. ܗܳܐ ܓܶܝܪ ܕܠܳܐ ܝܰܕܥܽܘܗܝ ܡܕܰܒܪ̈ܳܢܶܐ ܥܘܺܝܪ̈ܶܐ ܕܒܰܝܬܳܐ ܕܺܝܣܪܳܐܝܠ܆ ܘܰܫܠܺܝܚܳܐ ܛܽܘܒܳܢܳܐ ܦܰܘܠܽܘܣ ܟܰܕ ܟܳܬܶܒ ܠܩܽܘܪ̈ܺܝܢܬܳܝܶܐ ܐܰܣܗܶܕ ܘܶܐܡܰܪ: ܕܚܶܟܡܬܳܐ ܠܰܡ ܡܡܰܠܠܺܝܢܰܢ ܒܰܓܡܺܝܪ̈ܶܐ܆ ܚܶܟܡܬܳܐ ܠܳܐ ܕܗܳܢܐ ܥܳܠܡܳܐ܆ ܐܳܦܠܳܐ ܕܫܰܠܺܝ̈ܛܳܢܰܘܗ̄ܝ ܕܥܳܠܡܳܐ ܗܳܢܐ ܕܡܶܬܒܰܛܠܺܝܢ ܘܥܳܒܪܺܝܢ. ܐܶܠܐ ܡܡܰܠܠܺܝܢܰܢ ܚܶܟܡܬܳܐ ܕܰܐܠܗܐ ܒܐܪܳܙܳܐ. ܗܳܝ ܕܰܡܟܰܣܝܳܐ ܗܘܳܬ܆ ܘܩܰܕܶܡ ܦܰܪܫܳܗ̇ ܐܰܠܳܗܳܐ ܡܶܢ ܩܕܳܡ ܥܳܠܡ̈ܐ ܠܫܽܘܒܚܳܐ ܕܺܝܠܰܢ ܗܳܝ ܕܚܰܕ ܡܶܢ ܫܰܠܺܝܛܳܢܰܘ̈ܗ̱ܝ ܕܥܳܠܡܳܐ ܗܳܢܐ ܠܳܐ ܝܰܕܥܳܗ̇. ܐܶܠܽܘ ܓܶܝܪ ܝܰܕܥܽܘܗ̇ ܠܰܘ ܠܡܳܪܳܗ̇ ܕܬܶܫܒܽܘܚܬܳܐ ܙܳܩܦܺܝܢ ܗ̱ܘܰܘ (ܐ ܩܘܪ̈ܢܬܝܐ ܒ: ܘ-ܚ).
ܡܳܕܶܝܢ ܠܳܐ ܝܕܰܥܘ ܐܰܝܠܶܝܢ ܕܰܥܒܰܕܘ ܒܰܡܫܺܝܚܳܐ ܟܰܕ ܨܠܰܒܘ ܠܡܳܪܳܗ̇ ܕܬܶܫܒܽܘܚܬܳܐ. ܗܳܠܶܝܢ ܕܰܐܝܟ ܠܰܚܡܳܐ ܐܳܟܠܺܝܢ ܗܘܰܘ ܠܥܰܡܶܗ ܕܰܐܠܗܐ. ܟܰܕ ܡܚܰܘܶܝܢ ܢܰܦܫܗܘܢ ܣܳܦܪ̈ܶܐ. ܘܡܰܠܦܳܢ̈ܐ ܕܥܰܡܳܐ. ܒܗܳܝ ܕܶܐܡܰܪ ܥܠܰܝܗܽܘܢ ܥܰܡܰܢܘܐܝܠ ܟܰܕ ܡܰܠܶܦ܆ ܒܗܳܝ ܕܚܳܙܶܐ ܗܘܳܐ ܠܗܽܘܢ ܕܒܶܐܣܟܺܝܡܳܐ ܕܰܨܠܰܘ̈ܬܳܐ ܕܥܳܒܕܺܝܢ ܗܘܰܘ ܩܕܳܡ ܥܰܡܳܐ. ܐܳܟܠܺܝܢ ܗܘܰܘ ܒܴ̈ܬܶܐ ܕܰܐܪ̈ܡܠܳܬܳܐ ܒܥܶܠܬܳܐ ܕܡܰܘܪܟܺܝܢ ܗܘܰܘ ܨܠܰܘ̈ܬܗܽܘܢ ܡܶܛܠ ܗܳܕܐ: ܬܩܰܒܠܽܘܢ ܐܘ ܣܳܦܪ̈ܶܐ ܘܰܦܪ̈ܺܝܫܶܐ ܕܺܝܢܳܐ ܝܰܬܝܺܪܳܐ (ܡܬܝ ܟܓ: ܝܓ). ܡܰܝܬܶܐ ܕܶܝܢ ܒܳܬܰܪܟܶܢ܆ ܥܰܠ ܕܶܚܠܬܳܐ ܗܳܝ ܕܰܕܚܶܠܘ ܪ̈ܺܝܫܰܝ ܟܳܗܢ̈ܐ ܘܣܳܦܪ̈ܶܐ. ܟܰܕ ܐܶܫܬܰܐܠܘ ܡܶܢ ܦܳܪܽܘܩܰܢ ܥܰܠ ܝܽܘܚܰܢܢ. ܥܰܠ ܡܰܥܡܽܘܕܺܝܬܳܐ ܕܰܐܟܪܶܙ ܝܽܘܚܰܢܳܢ ܘܠܳܐ ܨܒܰܘ ܠܡܺܐܡܰܪ ܠܗܽܘܢ. ܕܶܐܢ ܠܰܡ ܡܶܢ ܫܡܰܝܳܐ ܐܳܡܰܪ ܠܰܢ ܘܡܶܛܠܡܳܢܳܐ ܠܳܐ ܗܰܝܡܶܢܬܽܘܢܳܝܗܝ ܘܰܕܢܺܐܡܰܪ ܡܶܢ ܒܢܰܝ̈ܢܳܫܳܐ ܕܳܚܠܺܝܢܰܢ ܡܶܢ ܥܰܡܳܐ (ܡܬܝ ܟܐ: ܟܗ-ܟܘ ܡܪܩܘܣ ܝܐ: ܠܐ-ܠܒ ܠܘܩܐ ܟ: ܗ-ܘ). ܗܳܪܟܳܐ ܡܳܕܶܝܢ ܠܰܝܬ ܗܘܳܐ ܕܶܚܠܬܳܐ. ܘܶܐܠܽܘ ܐܶܡܰܪܘ ܬܢܳܢ ܫܪܳܪܳܐ ܠܐ ܡܶܬܢܰܣܶܝܢ ܗܘܰܘ ܒܕܶܚܠܬܳܐ. ܥܰܠ ܗܳܠܶܝܢ ܐܶܡܰܪ ܢܒܺܝܳܐ. ܥܰܠ ܕܰܫܦܰܪܘ ܠܥܰܡܳܐ. ܘܠܐ ܗܘܳܐ ܠܰܐܠܗܐ.
ܡܶܛܠ ܗܳܢܐ ܐܰܠܗܐ ܢܒܰܕܰܪ ܓܰܪ̈ܡܰܝܗܘܢ: ܕܰܐܝܠܶܝܢ ܕܫܳܦܪܺܝܢ ܠܰܒܢܰܝ̈ܢܳܫܳܐ ܒܗܶܬܘ. ܡܶܛܠ ܕܰܐܠܗܐ ܐܰܣܠܺܝ ܐܶܢܘܢ. ܓܰܠܝܳܐܝ̣ܬ ܓܶܝܪ ܐܰܟܶܣ ܐܶܢܘܢ. ܘܰܐܠܗܐ ܐܰܣܠܺܝ ܐܶܢܽܘܢ. ܟܰܕ ܐܶܬܓܠܺܝ ܒܰܒܣܰܪ. ܒܶܐܕ̈ܢܰܝܗܘܢ ܠܥܺܝܢ ܟܽܠܶܗ ܥܰܡܳܐ ܐܶܡܰܪ ܠܗܽܘܢ. ܘܳܝ ܠܟܽܘܢ ܣܳܦܪ̈ܶܐ ܘܰܦܪ̈ܺܝܫܶܐ ܕܡܰܦܬܶܝܢ ܐܰܢܬܽܘܢ ܬܶܦܠܰܝ̈ܟܽܘܢ. ܘܡܰܘܪܟܺܝܢ ܐܰܢܬܽܘܢ ܬܶܟ̈ܠܳܬܳܐ ܕܡܰܪ̈ܛܽܘܛܰܝܟܽܘܢ. ܡܶܛܠ ܗܳܕܐ ܬܩܰܒܠܽܘܢ ܕܺܝܢܳܐ ܝܰܬܺܝܪܳܐ (ܡܬܝ ܟܓ: ܝܓ). ܒܳܬܰܪ ܗܳܠܶܝܢ ܡܰܥܶܠ ܢܒܺܝܳܐ ܚܰܟܺܝܡܳܐܝܬ. ܥܽܘܗܕܳܢܳܐ ܕܦܽܘܪܩܳܢܳܐ ܕܡܳܪܝܳܐ. ܗܰܘ ܕܶܐܬܺܝܗܶܒ ܡܶܢ ܨܶܗܝܽܘܢ ܠܟܽܠܶܗ ܥܳܠܡܳܐ. ܘܗܳܕܐ ܡܶܢ ܒܳܬܰܪ ܕܶܐܬܓܠܺܝ ܐܰܠܗܐ ܒܰܒܣܰܪ. ܥܰܠ ܐܰܪܥܳܐ. ܐܰܟܶܣ ܠܪ̈ܺܝܫܰܝ ܟܳܗܢ̈ܐ ܘܰܦܪ̈ܺܝܫܶܐ ܘܰܐܣܠܺܝ ܠܣܳܦܪ̈ܶܐ ܘܰܠܩܰܫܺܝ̈ܫܐ ܕܥܰܡܳܐ.
ܡܰܢ ܢܶܬܶܠ ܡܶܢ ܨܶܗܝܽܘܢ ܦܽܘܪܩܳܢܳܐ ܠܺܝܣܪܳܐܝܠ. ܡܶܢ ܒܢܰܝ̈ܢܳܫܳܐ ܘܠܳܐ ܚܰܕ. ܘܡܶܢ ܨܶܗܝܽܘܢ ܓܶܝܪ ܐܶܡܰܬܝ ܘܒܰܐܝܢܳܐ ܙܰܒܢܳܐ ܩܳܡ ܦܳܪܽܘܩܳܐ ܠܥܰܡܳܐ. ܘܰܕܢܺܐܡܰܪ ܕܰܘܝܕ ܦܳܪܶܩ ܠܺܝܣܪܳܐܝܠ܆ ܕܰܐܠܗܐ ܡܶܢ ܨܶܗܝܽܘܢ ܐܺܝܬܰܘܗܝ. ܘܗܰܘ ܕܝܰܗܒ ܦܽܘܪܩܳܢܳܐ ܡܶܢ ܨܶܗܝܽܘܢ ܠܺܝܣܪܳܐܝܠ ܕܰܐܠܗܐ. ܡܳܪܝܳܐ ܐܺܝܬܰܘܗܝ. ܘܗܰܘ ܕܟܰܕ ܐܰܗܦܶܟ ܫܒܺܝܬܳܐ ܕܥܰܡܶܗ ܡܶܢ ܕܒܳܪܬܶܗ ܕܳܐܟܶܠܩܰܪܨܳܐ. ܘܰܐܥܛܶܦ ܕܒܳܪܬܶܗ ܕܓܰܢ̱ܒܳܪܳܐ. ܗܰܘ ܕܫܰܥܒܶܕ ܠܥܰܡ̈ܡܶܐ ܠܰܩܛܺܝܪܳܐ ܕܡܳܪܽܘܕܽܘܬܶܗ. ܐܶܬܡܰܠܝܰܬ ܢܒܺܝܽܘܬܶܗ ܕܰܡܙܰܡܪܳܢܳܐ ܕܶܐܡܰܪ:
ܕܡܳܐ ܕܡܰܗܦܶܟ ܡܳܪܝܳܐ ܫܒܺܝܬܳܐ ܕܥܰܡܶܗ܆ ܢܕܽܘܨ ܝܰܥܩܽܘܒ ܘܢܶܚܕܶܐ ܝܺܣܪܳܐܝܠ. ܗܳܝܕܶܝܢ ܐܰܝܟ ܡܶܠܬܶܗ ܕܥܰܡܰܢܘܐܝܠ ܕܰܠܘܳܬ ܝܽܘ̈ܕܳܝܶܐ܆ ܟܕ ܢܦܰܩ ܒܳܬܰܪ ܫܒܺܝܬܶܗ ܕܚܰܣܺܝܢܳܐ܆ ܘܰܐܥܛܶܦ ܡܶܢܶܗ ܒܶܙܬܳܐ ܘܰܕܒܳܪܬܳܐ ܕܫܰܪ̈ܒܳܬܳܐ܆ ܚܙܳܝܗܝ ܐܰܒܪܳܗܳܡ ܘܰܚܕܺܝ. ܘܥܰܡܶܗ ܬܽܘܒ ܐܳܦ ܟܽܠܗܘܢ ܪ̈ܺܝܫܰܝ ܐܰܒܳܗ̈ܬܳܐ. ܕܳܝܨܺܝܢ ܗܘܰܘ ܒܦܽܘܪܩܳܢܳܐ ܕܰܥܒܰܕ ܠܗܽܘܢ. ܝܺܣܪܳܐܝܠ ܕܶܝܢ ܩܳܪܶܐ ܡܙܰܡܪܳܢܳܐ܆ ܠܗܰܘ ܕܡܶܢ ܒܳܬܰܪ ܨܠܺܝܒܳܐ ܡܶܬܩܰܝܰܡ܆ ܒܫܰܒ̈ܛܶܐ ܪ̈ܽܘܚܳܢܳܝܶܐ ܕܡܰܠܦܳܢܽܘܬܳܐ. ܕܰܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ. ܝܰܥܩܽܘܒ ܡܟܰܢܶܐ ܠܰܡܢܳܬܳܐ ܕܗܰܝܡܢܰܬ ܡܶܢ ܥܰܡܳܐ ܒܥܰܡܰܢܘܐܝܠ. ܕܕܰܐܝܟ ܗܳܟܰܢ ܙܥܽܘܪܝܳܐ ܡܶܢ ܥܰܡ̈ܡܶܐ ܕܗܰܝܡܶܢܘ ܒܰܨܠܺܝܒܳܐ. ܐܰܝܟ ܕܰܙܥܽܘܪ ܗܘܳܐ ܝܰܥܩܽܘܒ ܟܰܕ ܢܚܶܬ ܠܦܳܪܳܢ ܕܳܐܪܳܡ. ܡܶܢ ܙܰܒܢܳܐ ܕܶܐܬܩܪܺܝ ܒܶܗ ܝܺܣܪܳܐܝܠ ܡܶܢ ܡܰܠܐܟܳܐ ܗܰܘ ܕܰܦܓܰܥ ܒܶܗ܆ ܟܰܕ ܥܳܛܶܦ ܠܘܳܬ ܐܰܒܽܘܗܝ ܘܰܩܪܳܝܗܝ ܚܠܳܦ ܝܰܥܩܽܘܒ ܝܺܣܪܳܐܝܠ. ܒܗܳܠܶܝܢ ܐܪ̈ܳܙܶܐ ܡܰܙܡܘܪܳܐ ܗܳܢܐ ܙܥܽܘܪܳܐ ܒܛܰܝܒܽܘܬܳܐ ܐܰܕܪܶܟܢܰܢ ܕܥܰܬܺܝܪ ܘܰܣܒܺܝܣ. ܒܗܳܝ ܕܒܶܗ ܐܪ̈ܳܙܶܐ ܕܦܽܘܪܩܳܢܶܗ ܕܰܐܠܗܐ ܐܶܫܟܰܚܢܰܢ. ܘܠܶܗ ܡܰܘܕܶܝܢܰܢ ܘܣܳܓܕܺܝܢܰܢ ܘܠܰܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܐܪܒܥܐ
ܠܽܘܩܒܰܠ ܗܳܢܽܘܢ ܕܡܶܬܚܰܫܚܺܝܢ ܗܘܰܘ ܒܠܰܘ̈ܛܳܬܳܐ ܠܽܘܩܒܰܠ ܡܰܢ ܕܡܰܣܟܶܠ ܒܗܽܘܢ܆ ܘܳܐܡܪܺܝܢ ܕܠܰܝܬ ܠܰܢ ܥܶܕܠܳܝܳܐ ܐܶܢ ܠܳܝܛܺܝܢܰܢ: ܕܗܳܐ ܠܰܡ ܐܳܦ ܢܒܺܝܳܐ ܠܳܛ ܠܰܒܥܶܕ̈ܒܳܒܰܘܗܝ.
ܟܰܕ ܒܟܽܠܙܒܰܢ ܥܒܰܕ ܗܘܳܐ ܛܽܘܒܳܢܳܐ ܕܰܘܝܕ܆ ܐܰܓܽܘܢܳܐ ܠܽܘܩܒܰܠ ܒܥܶܠܕ̈ܒܳܒܶܐ ܕܺܝܣܪܳܐܝܠ܆ ܫܽܘܪܳܝܳܐ ܕܰܩܪܳܒܶܗ ܨܠܽܘܬܳܐ ܡܩܰܪܶܒ ܗܘܳܐ ܠܰܐܠܗܳܐ ܘܟܰܕ ܚܳܐܪ ܗܘܳܐ ܒܬܰܟܬܽܘܫܳܐ ܕܰܒܥܶܠܕ̈ܒܳܒܶܐ ܡܶܬܚܰܙ̈ܝܳܢܶܐ ܕܰܣܕܺܝܪܺܝܢ ܒܗܽܘܢ ܚܰܝ̈ܠܰܘܳܬܳܐ ܠܰܩܪܳܒܳܐ܆ ܗܽܘ ܡܶܛܠ ܕܪܽܘܚܳܢܳܐ ܗܘܳܐ܆ ܡܶܬܒܰܩܶܐ ܗܘܳܐ ܒܥܰܝܢܳܐ ܕܪܽܘܚܳܐ ܚܳܙܝܰܬ ܟܰܣܝ̈ܬܳܐ ܘܒܰܫܓܺܝܫܽܘܬܳܐ ܕܚܰܝ̈ܠܰܘܳܬܳܐ ܡܶܬܝܰܕ̈ܥܳܢܶܐ ܗܳܢܽܘܢ ܕܰܡܙܺܝܥܺܝܢ ܗܘܰܘ ܩܪܳܒܳܐ. ܠܽܘܩܒܰܠ ܢܒܺܝܳܐ ܟܰܣܝܳܐܝ̣ܬ ܒܗܳܢܽܘܢ ܕܡܶܬܟܰܬܫܺܝܢ ܗܘܰܘ ܥܰܡܶܗ ܓܰܠܝܳܐܝ̣ܬ. ܘܰܠܦܽܘܬ ܨܶܒܝܳܢܳܐ ܕܗܳܢܽܘܢ ܕܰܐܚܺܝܕܺܝܢ ܗܘܰܘ ܩܪܳܒܳܐ ܒܰܪܳܝܳܐ ܡܙܺܝܥ ܗܘܳܐ ܢܰܦܫܶܗ ܒܰܨܠܽܘܬܳܐ. ܘܩܳܪܶܐ ܗܘܳܐ ܕܰܘܝܕ ܩܰܕܺܝܫܳܐ ܠܰܐܠܗܐ ܕܟܰܕ ܥܳܢܶܐ ܠܶܗ ܘܰܡܦܰܨܶܐ ܠܥܰܡܳܐ. ܢܰܗܦܶܟ ܒܺܝܫܬܳܐ ܥܰܠ ܒܥܶܠܕ̈ܒܳܒܰܝܗܘܢ. ܘܡܶܛܠ ܕܩܳܡܘ ܥܰܡ̈ܡܶܐ ܢܽܘܟܪ̈ܳܝܶܐ ܘܦܳܠܚܰܝ̈ ܠܕܰܝ̈ܘܶܐ. ܥܰܠ ܥܰܡܳܐ ܕܰܐܠܗܐ. ܘܰܗܘܰܘ ܒܚܰܕ ܠܶܒܳܐ ܠܡܶܚܪܰܒ ܠܺܝܣܪܳܐܝܠ ܘܗܶܢܽܘܢ ܗܳܠܶܝܢ ܡܥܰܕܪܺܝܢ ܗܘܰܘ ܠܝܳܒܽܘ̈ܣܳܝܶܐ. ܟܰܕ ܥܕܰܟܺܝܠ ܠܳܐ ܟܒܺܝܫܳܐ ܗܘܳܬ ܒܗܰܘ ܙܰܒܢܳܐ ܐܽܘܪܺܫܠܶܡ ܡܶܢ ܕܰܘܝܕ. ܫܰܕܰܪ ܕܰܘܝܕ ܠܝܽܘܐܳܒ ܥܰܠ ܩܪܳܒܳܐ. ܘܦܳܫ ܗܽܘ ܟܰܕ ܡܨܰܠܶܐ ܥܰܠ ܙܳܟܽܘܬܳܐ ܕܬܶܗܘܶܐ ܠܥܰܡܶܗ ܕܡܳܪܝܳܐ. ܘܰܡܨܰܠܐ ܗܘܳܐ ܘܰܡܙܰܡܰܪ ܘܳܐܡܰܪ:
ܐܰܠܳܗܳܐ ܒܰܫܡܳܟ ܦܪܽܘܩܰܝܢܝ: ܘܰܒܓܰܢ̱ܒܳܪܽܘܬܳܟ ܕܽܘܢܰܝܢܝ. ܐܰܠܳܗܳܐ ܫܡܰܥ ܨܠܽܘܬܝ ܘܨܽܘܬ ܐܶܢܶܝܢ ܠܡܶܠܰܘ̈ܗܝ ܕܦܽܘܡܝ. ܘܰܒܗܳܕܐ ܡܰܘܕܰܥ ܕܠܰܘ ܠܒܰܪ ܡܶܢ ܨܶܒܝܳܢܶܐ ܕܰܐܠܗܳܐ ܡܨܰܠܳܐ ܗܘܳܐ܆ ܐܰܠܳܗܳܐ ܓܶܝܪ ܠܳܐ ܫܳܡܰܥ ܠܰܐܝܢܳܐ ܕܰܡܨܰܠܐ ܒܺܝܫܳܐܝ̣ܬ܆ ܘܠܐ ܡܶܬܪܡܶܐ ܕܢܶܦܽܘܩ ܥܰܡ ܡܰܢ ܕܒܳܥܶܐ ܡܶܕܶܡ ܕܠܳܐ ܡܩܰܒܶܠ ܥܠܰܘܗܝ. ܚܙܺܝ ܗܳܟܺܝܠ ܐܰܢܬ ܗܳܟܰܢܳܐ. ܩܰܕܡܳܐܝܬ ܠܰܘ ܠܪܽܘܓܙܳܐ ܡܙܰܡܶܢ ܠܶܗ ܠܰܐܠܗܐ. ܐܶܠܳܐ ܦܽܘܪܩܳܢܳܐ ܠܽܘܩܕܰܡ ܫܐܷܠ. ܘܗܳܝܕܶܝܢ ܡܶܢ ܒܳܬܰܪ ܦܽܘܪܩܳܢܳܐ. ܒܥܳܐ ܐܳܦ ܕܺܝܢܳܐ. ܘܶܐܢ ܕܺܝܢܳܐ ܘܦܽܘܪܩܳܢܳܐ ܒܳܥܶܐ ܗܘܳܐ. ܡܳܕܶܝܢ ܒܰܩܛܺܝܪܳܐ ܕܒܺܝܪ ܗܘܳܐ. ܠܰܘ ܡܶܢ ܥܰܡ̈ܡܶܐ ܒܰܪܒܪ̈ܳܝܶܐ ܒܰܠܚܽܘܕ܆ ܡܶܢ ܗܰܘ ܕܰܒܗܳܠܶܝܢ ܡܰܥܒܶܕ ܗܘܳܐ ܟܰܣܝܳܐܝ̣ܬ. ܡܶܛܠ ܗܳܕܶܐ ܓܶܝܪ ܝܳܕܰܥ ܠܥܶܠܬܳܐ ܐܳܡܰܪ:
ܡܶܛܠ ܕܢܽܘܟܪ̈ܳܝܶܐ ܩܳܡܘ ܥܠܰܝ: ܘܥܰܫܺܝ̈ܢܶܐ ܒܥܰܐܽܘܗ̇ ܠܢܰܦܫܝ. ܘܠܳܐ ܚܰܫܒܽܘܟ ܐܰܠܳܗܳܐ. ܢܽܘܟܪ̈ܳܝܶܐ ܕܶܝܢ ܓܰܠܝܳܐ ܗܝ. ܕܰܠܗܳܠܶܝܢ ܕܰܡܚܰܘܶܝܢ ܗܘܰܘ ܬܰܟܬܽܘ̈ܫܶܐ ܡܶܬܚܰܙ̈ܝܳܢܶܐ ܡܟܰܢܶܐ ܢܒܺܝܳܐ. ܐܶܠܳܐ ܗܳܠܶܝܢ ܠܳܐ ܡܶܫܟܚܺܝܢ ܗܘܰܘ ܕܢܶܥܒܕܽܘܢ ܩܪܳܒܳܐ ܠܽܘܩܒܰܠ ܢܰܦܫܳܐ. ܡܳܕܶܝܢ ܥܰܫܺܝ̈ܢܐ ܗܳܠܶܝܢ ܕܰܒܥܰܘ ܢܰܦܫܶܗ ܕܰܢܒܺܝܳܐ. ܚܰܝ̈ܠܰܘܳܬܳܐ ܐܶܢܘܢ ܡܶܬܝܰܕ̈ܥܳܢܶܐ. ܘܗܳܠܶܝܢ ܠܳܐ ܚܰܫܒܽܘܟ ܐܰܠܗܐ. ܒܟܽܠܙܒܰܢ ܓܶܝܪ ܠܩܽܘܒܠܳܟ ܩܳܝܡܺܝܢ ܥܰܡ ܗܰܘ ܪܺܝܫܳܐ ܕܡܳܪܽܘܕܽܘܬܳܐ. ܡܳܕܶܝܢ ܥܰܠ ܗܳܠܶܝܢ ܐܶܡܰܪ ܢܒܺܝܳܐ.
ܕܰܐܝܬܳܐ ܒܺܝܫܬܳܐ ܥܰܠ ܒܥܶܠܕ̈ܒܳܒܰܝ. ܘܠܳܐ ܙܳܕܶܩ ܕܢܶܬܥܕܶܠ ܥܰܠ ܕܰܠܕܰܝ̈ܘܶܐ ܠܳܛ ܢܒܺܝܳܐ. ܗܰܘ ܓܶܝܪ ܕܠܳܐ ܐܶܬܬܦܺܝܣ ܕܰܢܨܰܚܶܐ ܠܫܳܐܘܳܠ ܒܥܶܠܕܒܳܒܶܗ. ܘܠܳܐ ܢܶܫܡܰܥ ܨܰܥܪܳܐ ܥܠܰܘܗܝ ܡܶܢ ܐ̱ܚܪ̈ܳܢܶܐ. ܐܰܝܟܰܢ ܡܩܰܒܶܠ ܗܘܳܐ ܕܳܐܦܢ ܚܰܕ ܥܶܕܳܢܐ ܢܙܺܝܥ ܠܰܘܛܬܳܐ ܥܰܠ ܒܢܰܝ̈ܢܳܫܳܐ. ܡܳܕܶܝܢ ܒܰܛܳܠܳܐܝ̣ܬ ܥܳܕܠܺܝܢ ܐ̱ܢܴ̈ܫܳܐ ܪ̈ܳܚܡܰܝ ܠܰܘ̈ܛܳܬܳܐ ܠܕܰܘܝܕ. ܟܰܕ ܡܰܣܓܶܝܢ ܠܳܝܛܺܝܢ ܚܰܕ ܠܚܰܕ. ܘܰܡܕܰܡܶܝܢ ܢܰܦܫܗܽܘܢ ܠܰܢܒܺܝܳܐ ܙܰܕܺܝܩܳܐ ܘܳܐܡܪܺܝܢ: ܕܠܳܐ ܡܰܣܟܶܠ ܕܠܳܝܛܺܝܢܰܢ ܠܰܒܥܶܠܕ̈ܒܳܒܰܝܢ܆ ܕܗܳܐ ܢܒܺܝܳܐ ܐܶܬܚܰܫܰܚ ܒܠܰܘ̈ܛܳܬܳܐ ܠܽܘܩܒܰܠ ܒܥܶܠܕ̈ܒܳܒܰܘܗܝ. ܐܶܠܐ ܢܶܫܡܥܽܘܢ ܕܳܐܦܢ ܠܳܛ ܢܒܺܝܳܐ ܠܦܳܠܚܰܝ̈ ܕܰܝ̈ܘܶܐ. ܐܶܠܐ ܗܳܢܘܢ ܕܠܳܝܛܺܝܢ ܠܥܰܡܶܗ ܩܰܕܺܝܫܳܐ ܕܡܳܪܝܳܐ ܒܡܳܢܳܐ ܕܳܡܶܝܢ ܠܰܢܒܺܝܳܐ. ܗܳܢܽܘܢ ܕܰܟܡܳܐ ܙܰܒ̈ܢܺܝܢ ܥܰܠ ܕܶܐܬܛܠܶܡܘ ܐܺܝܩܳܪܳܐ ܕܡܶܢ ܐܢܳܫܺܝ̈ܢ܆ ܡܫܰܕܪܺܝܢ ܗܘܰܘ ܠܗܽܘܢ ܠܰܘ̈ܛܳܬܳܐ. ܐܶܠܐ ܡܰܢ ܢܶܫܠܽܘܢ ܐܳܦ ܗܳܫܳܐ ܡܶܢ ܙܰܘܥ̈ܐ ܕܠܰܘ̈ܛܳܬܳܐ ܝܰܬܺܝܪܳܐܝܬ ܕܶܐܬܝ̣ܕܰܥ ܕܰܢܒܺܝܳܐ ܠܗܳܢܘܢ ܕܟܳܡܢܺܝܢ ܗܘܰܘ ܠܢܰܦܫܶܗ. ܒܳܥܶܐ ܗܘܳܐ ܡܰܢ ܕܢܰܝܬܶܐ ܐܰܠܳܗܳܐ ܥܠܰܝܗܽܘܢ ܒܺܝܫܬܳܐ. ܒܗܳܝ ܕܶܐܡܰܪ.
ܘܰܒܩܽܘܫܬܳܟ ܫܰܬܶܩ ܐܶܢܽܘܢ. ܡܳܕܶܝܢ ܕܰܓ̈ܠܐ ܐܶܢܘܢ. ܘܥܰܠܗܳܝ ܡܶܫܬܰܬܩܺܝܢ ܡܶܢ ܫܪܳܪܳܐ ܕܰܐܠܗܐ.
ܘܶܐܢܳܐ ܒܦܽܘܪܫܳܢܳܐ ܐܶܕܰܒܰܚ ܠܳܟ: ܘܰܐܘܕܶܐ ܠܰܫܡܳܟ ܡܳܪܝܳܐ ܕܛܳܒ ܗܽܘ. ܕܡܶܢ ܟܽܠ ܥܳܩܴ̈ܢ ܦܰܨܺܝܬܳܢܝ: ܘܒܰܒܥܶܠܕ̈ܒܳܒܰܝ ܚܙܳܬ ܥܰܝܢܝ. ܕܶܒܚ̈ܐ ܕܦܽܘܪ̈ܫܳܢܶܐ ܠܰܘ ܕܢܳܡܽܘܣܳܐ ܐܶܢܘܢ ܘܠܰܘ ܕܚܰܘܒܬܳܐ. ܐܶܠܐ ܕܨܶܒܝܳܢܳܐ ܕܟܰܕ ܗܳܠܶܝܢ ܡܕܰܒܚܺܝܢ ܙܰܕܺܝ̈ܩܶܐ. ܥܰܡ ܢܒܺܝܳܐ ܚܳܕܶܝܢ ܒܚܰܝܳܒܽܘܬܗܽܘܢ ܕܡܳܪ̈ܽܘܕܶܐ. ܘܡܰܘܕܶܝܢ ܠܰܫܡܶܗ ܕܡܳܪܝܳܐ ܕܦܰܨܺܝ ܐܶܢܘܢ ܒܓܶܠܝܳܢܶܗ ܘܡܰܣܩܺܝܢ ܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܚܡܫܐ
ܥܰܠ ܕܠܳܐ ܨܒܳܐ ܐܰܠܗܐ ܒܡܰܦܽܘܠܬܶܗ ܕܳܐܟܶܠܩܰܪܨܳܐ: ܘܥܰܠ ܕܒܽܐܘ̈ܠܨܳܢܶܐ ܡܶܬܢܰܨܚܺܝܢ ܩܰܕܺܝ̈ܫܐ: ܘܥܰܠ ܕܠܳܐ ܡܥܰܕܪܺܝܢ ܢܝܳܚ̈ܐ ܠܢܰܦܫܳܐ ܐܰܝܟ ܕܰܡܥܰܕܪܺܝܢ ܠܳܗ̇ ܐܽܘ̈ܠܨܳܢܶܐ ܕܥܳܕܶܝܢ ܥܠܶܝܗ̇.
ܡܣܰܝܒܪܳܢܽܘܬܳܐ ܕܗܳܘܝܳܐ ܠܩܰܕܺܝ̈ܫܶܐ ܒܽܐܘ̈ܠܨܳܢܰܝܗܘܢ. ܒܰܝܬܳܝܽܘܬܳܐ ܕܰܐܠܗܐ ܡܫܰܪܪܳܐ ܠܘܳܬܗܽܘܢ. ܘܰܐܝܠܶܝܢ ܕܰܡܚܰܡܣܢܺܝܢ ܘܰܡܥܰܙܶܝܢ ܒܰܐܓܽܘ̈ܢܰܝܗܘܢ ܒܡܳܪܽܘܕܽܘܬܳܐ ܕܰܒܥܶܠܕܰܪܳܐ܆ ܟܠܺܝܠܳܐ ܕܙܳܟܽܘܬܳܐ ܡܛܰܝܶܒ ܠܗܽܘܢ. ܡܶܢ ܐܽܘܠܨܳܢ̈ܐ ܓܝܪ ܡܥܰܬܕܺܝܢ ܟܠܺܝ̈ܠܐ ܠܰܐܬܠܺܝ̈ܛܶܐ. ܡܶܢ ܢܝܳܚ̈ܐ ܠܰܝܬ ܟܠܺܝ̈ܠܐ ܠܡܶܫܟܳܚܽܘ. ܐܶܠܐ ܝܰܬܺܝܪܳܐܝܬ ܟܽܘܐܳܪܳܐ. ܐܶܢ ܓܝܪ ܕܰܘܺܝܕ ܐܶܬܥܰܕܰܪ ܒܰܢܝܳܚ̈ܐ܆ ܥܰܠ ܕܦܳܫ ܡܶܢ ܩܪܳܒܳܐ܆ ܢܦܰܠ ܒܦܰܚܳܐ ܕܰܐܢܬܬܶܗ ܕܽܐܘܪܺܝܳܐ. ܗܰܘ ܕܡܰܥܕܶܐ ܗܘܳܐ ܟܠܺܝ̈ܠܐ ܡܶܢ ܣܶܕܪ̈ܶܐ ܕܚܰܝ̈ܠܬܳܢܶܐ. ܚܳܒ ܘܶܐܫܬܰܦܰܠ ܡܶܢ ܐܶܠܥܳܐ ܪܦܺܝܬܳܐ. ܘܶܐܬܳܐ ܠܗܰܘ ܦܽܘܪܣܳܝܳܐ ܕܰܚܛܺܝܬܳܐ. ܘܰܢܦܰܠ ܡܶܢ ܪܺܝܫܶܗ ܟܠܺܝܠܳܐ ܕܩܰܕܺܝܫܽܘܬܳܐ. ܘܩܳܡ ܒܗܰܘ ܟܽܘܐܳܪܳܐ ܕܚܰܛܳܝ̈ܐ. ܘܡܰܢܽܘ ܕܠܳܐ ܢܶܕܚܰܠ ܡܶܢ ܢܝܳܚ̈ܐ ܕܡܰܘܠܕܺܝܢ ܬܽܘܟ̈ܐ. ܘܡܰܢܽܘ ܕܢܶܫܬܶܐܠ ܡܶܢ ܙܰܒܢ̈ܐ ܕܽܐܘ̈ܠܨܳܢܶܐ ܕܡܰܘܠܕܺܝܢ ܢܶܨܚܳܢ̈ܐ. ܐܶܢ ܠܰܟܠܺܝܠܳܐ ܡܶܬܪܰܓܪܰܓ ܢܶܩܪܽܘܒ ܘܢܶܫܡܰܥ ܩܳܠܶܗ ܕܰܢܒܺܝܳܐ ܐܰܝܟܰܢܳܐ ܓܳܥܶܐ ܒܚܰܫܳܐ ܘܰܡܨܰܠܶܐ ܒܢܰܦܫܳܐ ܡܰܟܺܝܟܬܳܐ ܕܡܰܠܝܳܐ ܦܳܪܽܘܫܽܘܬܳܐ. ܒܬܶܫܒܽܘܚܬܳܐ ܗܳܕܐ ܕܚܰܡܫܺܝܢ ܘܚܰܡܶܫ܆ ܒܗܰܘ ܓܶܝܪ ܙܰܒܢܳܐ ܕܰܐܡܪܶܗ ܠܡܰܙܡܽܘܪܳܐ ܗܳܢܐ܆ ܒܰܕܡܽܘܬ ܪܽܘܚܳܐ ܕܥܰܠܥܳܠܳܐ ܟܪܺܝܟܺܝܢ ܗܘܰܘ ܠܶܗ ܐܽܘܠܨܳܢ̈ܐ. ܚܕܳܐ ܡܰܢ ܒܡܳܪܽܘܕܽܘܬܶܗ ܕܥܰܡܳܐ ܕܥܰܡ ܐܰܒܺܝܫܳܠܽܘܡ. ܕܬܰܪܬܶܝܢ ܕܶܝܢ ܩܶܛܠܳܐ ܚܢܺܝܓܳܐ ܕܰܒܪܶܗ ܚܰܒܺܝܒܳܐ ܘܫܰܦܺܝܪܳܐ ܐܰܒܺܝܫܳܠܽܘܡ. ܗܰܘ ܕܰܟܡܳܐ ܐܶܢ ܐܶܬܠܰܥܰܒ ܡܶܢ ܣܳܛܳܢܳܐ ܘܶܐܬܥܠܶܒ ܘܰܐܩܺܝܡ ܥܰܠ ܐܰܒܽܘܗܝ ܐܽܘܠܨܳܢܳܐ ܪܰܒܳܐ ܕܰܪܕܽܘܦܝܳܐ. ܐܶܠܐ ܠܪ̈ܳܚܡܶܐ ܕܰܐܒܳܗܽܘܬܳܐ ܟܺܐܢܬܳܐ ܪܰܘܪܒܳܐܝ̣ܬ ܐܰܙܺܝܥ ܡܰܘܬܶܗ ܚܢܺܝܓܳܐ. ܘܡܶܛܠ ܗܳܕܶܐ ܟܰܕ ܝܠܶܦ ܕܰܘܝܕ ܕܡܺܝܬ ܐܰܒܺܝܫܳܠܽܘܡ܆ ܠܰܘ ܒܙܳܟܽܘܬܳܐ ܡܶܟܺܝܠ ܚܳܕܶܐ ܗܘܳܐ܆ ܐܶܠܐ ܟܰܕ ܝܨܶܦ ܗܘܳܐ ܘܰܡܩܺܝܡ ܠܽܘܚܳܡܳܐ ܕܰܟܝܳܢܳܐ ܡܰܘܬܶܗ. ܒܰܝ̈ܠܠܳܬܳܐ ܡܰܪܺܝܪ̈ܳܬܳܐ ܡܰܝܠܶܠ ܗܘܳܐ ܕܰܘܝܕ ܟܰܕ ܒܳܟܶܐ ܘܳܐܡܰܪ: ܒܶܪܝ ܐܰܒܺܝܫܳܠܽܘܡ ܡܰܢ ܕܶܝܢ ܐܰܡܺܝܬܰܢܝ ܚܠܳܦܰܝܟ ܐܰܒܺܝܫܳܠܽܘܡ ܒܶܪܝ (ܒ ܫܡܘܐܝܠ ܝܚ: ܠܓ). ܒܓܰܘ ܓܥܳܬܳܐ ܗܳܕܐ ܛܽܘܒܬܳܢܳܐ ܕܰܘܝܕ ܡܰܙܡܘܪܳܐ ܗܳܢܐ ܫܰܒܰܚ܆ ܘܠܰܘ ܒܰܒܪܶܗ ܡܶܬܒܰܩܶܐ ܗܘܳܐ ܢܒܺܝܳܐ ܘܳܐܡܰܪ ܗܘܳܐ ܗܳܠܶܝܢ: ܐܶܠܐ ܡܶܬܬܥܺܝܩ ܗܘܳܐ ܘܡܶܬܡܰܪܡܰܪ ܗܘܳܐ. ܥܰܠ ܕܒܰܒܪܶܗ ܐܶܬܚܙܺܝ ܨܰܠܡܶܗ ܕܳܐܟܶܠܩܰܪܨܳܐ ܗܰܘ ܕܰܡܪܰܕ ܥܰܠ ܐܰܒܳܐ ܕܟܽܠ. ܘܡܶܛܠ ܕܳܐܦܠܳܐ ܒܡܰܘܬܶܗ ܕܡܳܪܽܘܕܳܐ ܚܕܺܝ. ܐܰܝܟ ܗܳܝ ܕܡܶܬܚܪܶܐ ܗܘܳܐ ܒܰܬܝܳܒܽܘܬܳܐ. ܘܡܰܝܠܶܠ ܗܘܳܐ ܕܰܘܝܕ ܥܰܠ ܡܰܘܬܳܐ ܕܰܒܪܶܗ ܟܰܕ ܥܠܰܘܗܝ ܡܪܰܕ. ܐܰܟܡܳܐ ܕܶܐܬܬܘܺܝ ܐܰܠܗܐ ܥܰܠ ܡܰܦܽܘܠܬܶܗ ܕܳܐܟܶܠܩܰܪܨܳܐ ܘܰܚܙܺܝ ܠܺܝ ܐܰܢܬ ܗܳܫܐ ܐܰܝܟܰܢܳܐ ܠܕܳܡܝܽܘܬܳܐ ܕܳܐܟܶܠܩܰܪܨܳܐ ܡܶܬܢܣܶܒ ܐܰܒܺܝܫܳܠܘܡ ܒܰܡܪܳܕܶܗ. ܗܰܘ ܕܰܐܡܪܰܚ ܥܰܠ ܗܰܘ ܐܰܒܳܐ ܕܚܰܝ̈ܐ. ܘܰܒܥܳܐ ܕܰܚܠܳܦܰܘܗܝ ܢܶܣܬܓܶܕ ܡܶܢ ܒܢ̈ܝ ܐܽܘܪܺܫܠܶܡ ܥܶܠܳܝܬܳܐ. ܐܶܬܒܰܝܰܢ ܬܽܘܒ ܒܕܰܘܝܕ. ܐܰܝܟܰܢܳܐ ܡܫܰܡܠܶܐ ܠܨܰܠܡܶܗ ܕܰܐܒܳܐ ܘܰܡܚܰܡܣܶܢ ܘܰܡܣܰܝܒܰܪ ܡܪܳܕܳܐ ܕܰܒܪܶܗ܆ ܘܠܳܐ ܨܳܒܶܐ ܗܘܳܐ ܒܡܰܘܬܶܗ. ܘܡܶܛܠܗܳܕܐ ܕܶܝܢ ܡܦܰܩܶܕ ܗܘܳܐ ܠܪ̈ܰܒܰܝ ܐܰܠܦ̈ܐ ܕܺܝܠܶܗ ܕܟܰܕ ܢܦܰܩܘ ܠܰܩܪܳܒܳܐ܆ ܕܰܐܚܽܘܕܘ ܠܺܝ ܠܛܰܠܝܳܐ ܐܰܒܺܝܫܳܠܽܘܡ ܟܰܕ ܚܰܝ. ܐܳܘ ܟܡܳܐ ܡܰܘܕܥܳܐ ܗܘܳܬ ܗܳܕܐ ܐܰܒܳܗܽܘܬܳܐ. ܠܨܰܠܡܳܐ ܕܗܳܝ ܐܰܒܳܗܽܘܬܳܐ ܕܰܐܘܠܕܰܬ ܠܟܽܠ. ܘܰܕܟܰܕ ܡܣܰܝܒܪܳܐ ܒܺܝܫܽܘܬܶܗ ܘܰܡܪܳܕܶܗ ܕܳܐܟܶܠܩܰܪܨܳܐ. ܠܳܐ ܨܳܒܝܳܐ ܒܡܰܘܬܶܗ ܐܰܝܟ ܕܰܡܢܺܝܚܳܐ ܗܘܳܬ ܠܳܗ̇ ܬܝܳܒܽܘܬܶܗ. ܡܶܬܚܰܝܰܒ ܗܘܳܐ ܐܰܒܺܝܫܳܠܘܡ ܩܕܳܡ ܚܰܝ̈ܠܰܘܳܬܶܗ ܕܕܰܘܝܕ ܐܰܟܡܳܐ ܕܳܐܦ ܡܳܪܽܘܕܳܐ ܐܶܬܚܰܝܰܒ ܩܕܳܡ ܫܠܺܝ̈ܚܶܐ ܩܰܕܺܝ̈ܫܶܐ. ܫܰܒܩܶܗ ܟܽܘܕܰܢܝܳܐ ܕܰܬܚܽܘܬܰܘܗܝ ܘܰܥܒܰܪ. ܐܰܟܡܳܐ ܕܳܐܦ ܥܰܡ̈ܡܶܐ ܫܰܒܩܽܘܗܝ ܠܰܛܪܽܘܢܳܐ. ܐܶܬܬܠܺܝ ܒܣܰܥܪܶܗ ܒܺܐܝܠܬܳܐ ܪܰܒܬܳܐ܆ ܐܰܟܡܳܐ ܕܳܐܦ ܣܳܛܳܢܳܐ ܐܶܬܦܟܰܪ ܡܶܢ ܩܰܕܺܝ̈ܫܐ ܕܬܳܒܘ ܠܘܳܬ ܐܰܠܗܐ. ܣܰܥܪܶܗ ܓܶܝܪ ܥܰܡ̈ܡܶܐ ܗܘܰܘ. ܡܚܳܝܗܝ ܝܽܘܐܳܒ ܒܰܪ ܨܽܘܪܺܝܳܐ ܬܠܳܬܳܐ ܫܰܒ̈ܛܶܐ ܒܠܶܒܶܗ. ܟܰܕ ܬܠܶܐ ܘܩܰܛܠܶܗ. ܗܳܠܝܢ ܓܝܪ ܡܰܘܕܥܺܝܢ ܠܰܢ. ܠܐܪܳܙܳܐ ܪܰܒܳܐ ܕܕܶܚܠܰܬ ܐܰܠܗܐ. ܕܗܰܘ ܕܶܐܬܳܐ ܒܝܰܕ ܡܰܝܴ̈ܐ ܘܰܕܡܳܐ ܘܪܽܘܚܳܐ ܕܡܰܣܗܕܳܐ܆ ܘܰܠܬܰܘܕܺܝܬܳܐ ܕܠܳܐ ܡܽܘܡ ܕܰܬܠܺܝܬܳܝܽܘܬܳܐ ܕܒܳܗ̇ ܢܰܨܚܰܬ ܟܳܪܽܘܙܽܘܬܳܐ ܕܰܫܠܺܝ̈ܚܐ. ܡܶܛܠ ܗܳܠܝܢ ܕܶܡܘ̈ܬܳܐ ܕܶܐܨܛܰܠܰܡ ܒܗܶܝܢ ܐܰܒܺܝܫܳܠܽܘܡ. ܡܰܝܠܶܠ ܗܘܳܐ ܕܰܘܺܝܕ ܘܒܰܓܥܳܬܶܗ ܐܳܡܰܪ ܗܘܳܐ:
ܨܽܘܬ ܐܰܠܗܳܐ ܨܠܽܘܬܝ ܘܠܳܐ ܬܰܗܡܶܐ ܡܶܢ ܒܳܥܽܘܬܝ: ܫܡܰܥܰܝܢܝ ܘܰܥܢܺܝܢܝ ܘܶܐܬܦܰܢ ܠܰܓܥܳܬܝ ܘܰܫܡܰܥܰܝܢܝ. ܡܶܛܠ ܒܥܶܠܕ̈ܒܳܒܰܝ ܘܡܶܛܠ ܐܽܘܠܨܳܢܶܗ ܕܥܰܘܳܠܳܐ: ܡܶܛܠ ܕܰܨܠܰܘ ܥܠܰܝ ܥܰܘܴ̈ܠܶܐ ܘܣܰܩܪܽܘܢܝ. ܘܢܶܦܠܰܬ ܒܺܝ ܕܶܚܠܬܳܐ: ܘܟܰܣܝܽܘܢܝ ܛܶܠܳܠܰܝ̈ ܡܰܘܬܳܐ. ܫܡܰܥܬ ܗܳܫܐ ܩܴ̈ܠܐ ܕܦܳܪܽܘܫܽܘܬܶܗ ܕܰܢܒܺܝܳܐ܆ ܠܰܘ ܡܶܕܶܡ ܕܠܳܐ ܥܒܰܕ ܡܰܠܶܠ܆ ܐܶܠܳܐ ܒܰܓܥܳܬܳܐ ܨܠܽܘܬܶܗ ܥܳܒܶܕ ܗܘܳܐ ܘܗܳܠܝܢ ܕܶܡܥ̈ܐ ܡܥܰܕܪ̈ܳܢܝܳܬܳܐ ܠܳܐ ܡܶܫܟܰܚ ܗܘܳܐ ܠܡܶܐܫܰܕ ܟܰܕ ܡܶܬܒܰܣܰܡ ܗܘܳܐ ܒܰܢܝܳܚ̈ܐ ܡܰܠܟܳܝ̈ܐ. ܘܰܐܝܟ ܗܰܘ ܕܗܽܘ ܠܳܐ ܫܳܘܶܐ ܕܢܶܬܩܰܒܰܠ ܐܳܡܰܪ ܗܘܳܐ ܕܡܶܛܠ ܠܰܡ ܒܥܶܠܕ̈ܒܳܒܰܝ. ܘܡܶܛܠ ܐܽܘܠܨܳܢܶܗ ܕܥܰܘܳܠܳܐ. ܘܟܰܕ ܛܳܒ ܐܽܘܠܨܳܢܳܐ ܡܶܢ ܒܪܶܗ ܩܳܡ ܥܠܰܘܗܝ. ܠܐ ܝܰܩܰܪ ܠܩܰܪܺܝܒܽܘܬܶܗ ܘܥܰܒܕܶܗ ܒܺܐܝܩܳܪܳܐ. ܐܶܠܐ ܩܪܳܝܗܝ ܥܰܘܳܠܳܐ ܒܰܢܒܺܝܽܘܬܳܐ. ܥܰܠ ܕܒܰܡܢܳܬܳܐ ܕܥܰܘܳܠܳܐ ܐܶܬܠܒܶܟ. ܘܕܳܡܶܐ ܬܽܘܒ ܕܥܰܘܠܳܐ ܠܗܰܘ ܕܟܰܣܝܳܐܝ̣ܬ ܡܰܥܒܶܕ ܠܰܒܢܰܝ̈ܢܳܫܳܐ ܕܢܶܡܪܕܽܘܢ ܩܪܳܐ. ܡܶܛܠ ܕܰܨܠܰܘ ܥܠܰܝ ܒܺܝܫܬܳܐ ܘܣܰܩܪܽܘܢܝ. ܥܰܡ ܗܳܝ ܓܝܪ ܕܡܶܢ ܚܰܕ ܡܶܬܪܕܶܦ ܗܘܳܐ. ܐܳܦ ܡܶܢ ܣܰܓܺܝ̈ܐܐ ܡܶܟܺܝܠ ܩܳܡܘ ܥܠܰܘܗܝ ܐܽܘܠܨܳܢܳܐ. ܕܰܐܝܟ ܗܳܢܳܐ ܓܶܝܪ ܐܺܝܬܶܝܗ̇ ܒܺܝܫܬܳܐ. ܡܳܐ ܕܡܶܫܬܰܠܛܳܐ. ܕܟܰܕ ܡܶܢ ܚܰܕ ܢܳܣܒܳܐ ܫܽܘܪܳܝܳܐ. ܒܰܕܡܽܘܬ ܢܽܘܪܳܐ ܒܣܰܓܺܝ̈ܐܐ ܠܳܒܟܳܐ. ܐܶܠܐ ܒܗܳܢܳܐ ܢܶܣܝܽܘܢܳܐ. ܥܕܰܡܳܐ ܠܡܰܘܬܳܐ ܐܶܬܡܰܛܺܝ ܢܒܺܝܳܐ. ܘܢܶܦܠܰܬ ܠܰܡ ܒܺܝ ܕܶܚܠܬܳܐ ܘܟܰܣܝܽܘܢܝ ܛܶܠܳܠܰܝ̈ ܡܰܘܬܳܐ. ܘܡܰܘ̈ܕܥܳܢ ܠܰܢ ܗܳܠܝܢ ܕܠܐ ܒܽܘܨܳܪܳܐ܆ ܠܗܳܠܶܝܢ ܕܰܣܒܰܠ ܥܰܡܰܢܘܐܝܠ܆ ܡܶܢ ܡܳܪܽܘܕܽܘܬܶܗ ܕܥܰܡܳܐ. ܐܳܦ ܗܽܘ ܓܝܪ ܗܳܝܕܝܢ܆ ܒܳܬܰܪ ܨܠܽܘܬܶܗ ܗܘܳܐ ܒܕܶܚܠܬܳܐ ܕܡܰܘܬܳܐ. ܕܰܐܝܟ ܕܰܟܬܺܝܒ ܥܠܰܘܗܝ ܕܶܐܡܰܪ: ܕܟܰܪܝܳܐ ܗܳܝ ܠܢܰܦܫܝ ܥܕܰܡܳܐ ܠܡܰܘܬܳܐ (ܡܬܝ ܟܘ: ܠܚ ܡܪܩܘܣ ܝܕ: ܠܕ). ܘܬܽܘܒ ܐܰܡܺܝܪ ܥܠܰܘܗܝ. ܕܟܰܕ ܗܘܳܐ ܒܕܶܚܠܬܳܐ ܬܟܺܝܒܳܐܝ̣ܬ ܡܨܰܠܶܐ ܗܘܳܐ (ܠܘܩܐ ܟܒ: ܡܕ). ܘܡܶܛܠܗܳܕܐ ܗܳܠܝܢ ܨܳܐܱܪ ܗܘܳܐ ܢܒܺܝܳܐ. ܡܰܘܕܰܥ ܗܘܳܐ ܐܳܦ ܛܰܝܒܽܘܬܳܐ ܕܨܶܒܝܳܢܶܗ ܕܡܶܠܬܳܐ. ܕܰܠܘܳܬ ܥܰܡ̈ܡܶܐ ܣܺܝ̈ܡܳܢ ܗܘܱ̈ܝ ܐܰܦܰܘ̈ܗܝ ܠܡܶܦܰܩ ܠܘܳܬ ܚܰܫܳܐ. ܐܰܝܟ ܕܒܰܨܠܽܘܬܳܐ ܡܶܬܚܰܫܰܚ ܗܘܳܐ ܟܰܕ ܒܳܥܶܐ. ܕܳܐܦ ܗܽܘ ܢܶܬܡܰܛܶܐ ܠܐܪܳܙܳܐ.
ܘܶܐܡܪܶܬ ܡܰܢ ܕܶܝܢ ܝܰܗܒ ܠܺܝ ܓܶܦ̈ܐ ܐܰܝܟ ܕܝܰܘܢܳܐ: ܘܦܶܪܚܶܬ ܘܫܶܟܢܶܬ ܘܰܐܪܚܩܶܬ. ܘܟܰܬܪܶܬ ܠܡܰܢ ܕܰܡܦܰܨܶܐ ܠܺܝ. ܡܶܢ ܪܽܘܚܳܐ ܕܥܰܠܥܳܠܳܐ. ܓܶܦ̈ܐ ܕܝܰܘܢܳܐ ܒܳܥܶܐ ܗܘܳܐ. ܠܰܘ ܗܳܕܐ ܕܰܠܘܳܬܰܢ ܕܰܒܒܴ̈ܬܶܐ ܥܳܡܪܳܐ. ܐܶܠܐ ܠܗܳܠܝܢ ܓܶܦ̈ܐ ܕܗܳܝ ܝܰܘܢܳܐ ܕܶܐܬܚܰܙܝܰܬ ܥܰܠ ܝܽܘܕܪܢܳܢ. ܒܥܶܕܳܢܳܐ ܕܰܥܡܳܕܶܗ ܩܰܕܺܝܫܳܐ ܕܡܶܠܬܳܐ. ܕܗܺܝ ܐܰܦܪܚܰܬ ܠܰܡܚܺܝܠܽܘܬܳܐ ܥܰܠ ܡܰܕܒܪܳܐ ܠܥܰܡ̈ܡܶܐ ܚܰܛܳܝ̈ܐ. ܘܥܶܒܕܰܬ ܒܓܰܘ ܡܰܕܒܪܳܐ ܗܰܘ ܚܰܪܒܳܐ. ܕܰܡܓܰܙܰܝ ܗܘܳܐ ܡܶܢ ܨܠܽܘܬܳܐ ܕܩܰܕܺܝ̈ܫܶܐ. ܩܶܢܳܐ ܕܰܟܝܳܐ ܠܰܐܠܗܐ ܚܰܝܳܐ. ܐܶܡܰܪ ܐܶܫܰܥܝܳܐ ܛܽܘܒܬܳܢܳܐ: ܢܶܚܕܶܐ ܡܰܕܒܪܳܐ ܨܰܗܝܳܐ ܘܰܬܕܽܘܨ ܦܩܰܥܬܳܐ (ܐܫܥܝܐ ܠܗ: ܐ) ܕܳܐܦ ܗܽܘ ܗܳܢܐ ܡܰܕܒܪܳܐ ܠܗܰܘ ܕܶܐܡܰܪ ܡܙܰܡܪܳܢܳܐ ܡܰܘܕܰܥ܆ ܕܰܒܗܳܢܐ ܒܳܥܶܐ ܗܘܳܐ ܢܒܺܝܳܐ. ܢܶܦܽܘܩ ܘܢܶܬܒܰܣܰܡ ܥܰܡ ܡܶܠܬܳܐ܆ ܟܰܕ ܡܶܬܦܰܨܶܐ ܡܶܢ ܪܽܘܚܳܐ ܫܓܺܝܫܬܳܐ ܕܝܽܘܕܳܝܽܘܬܳܐ. ܐܶܡܰܪ ܓܝܪ ܕܡܳܐ ܕܰܩܢܺܝܬ ܓܶܦ̈ܐ ܕܪܽܘܚܳܐ ܩܰܕܺܝܫܳܐ. ܘܦܶܪܚܶܬ ܘܰܐܪܚܩܶܬ ܡܶܢ ܠܘܳܬ ܥܰܡܳܐ ܡܡܰܪܡܪܳܢܳܐ. ܘܰܫܪܺܝܬ ܠܘܳܬ ܦܬܳܝܳܐ ܪܰܒܳܐ ܒܡܰܕܒܪܳܐ ܪܽܘܚܳܢܳܐ ܕܥܰܡ̈ܡܶܐ ܡܗܰܝܡ̈ܢܶܐ. ܬܰܡܳܢ ܐܶܟܰܬܰܪ ܠܡܰܢ ܕܰܡܦܰܨܶܐ ܠܺܝ ܡܶܢ ܪܽܘܚܳܐ ܕܥܰܠܥܳܠܳܐ. ܗܳܝ ܕܫܶܚܩܰܬ ܘܕܰܘܕܰܬ ܠܰܢܒܺܝ̈ܐ ܘܰܠܚܰܙܳܝ̈ܐ ܒܟܽܠܙܒܰܢ. ܒܝܰܕ ܕܠܽܘܚܝܳܐ ܟܡܺܝܪܳܐ ܘܡܰܫܒ̈ܐ ܫܓܺܝ̈ܫܶܐ ܘܰܕܠܐ ܢܳܡܽܘܣ܆ ܕܒܰܕܡܽܘܬ ܥܰܪܦܶܠܳܐ ܕܠܺܝܚܬܳܐ ܡܶܬܥܰܪܦܠܳܐ ܗܘܳܬ ܘܰܡܗܰܦܟܳܐ. ܠܶܫܳܢܰܝ̈ܗܘܢ ܕܝܽܘ̈ܕܳܝܐ ܠܽܘܩܒܰܠ ܦܳܪܽܘܩܰܢ. ܘܥܰܠ ܗܳܝ ܐܶܡܰܪ ܢܒܺܝܳܐ:
ܛܰܒܰܥ ܡܳܪܝ ܗܽܘܦܳܟܳܐ ܕܠܶܫܳܢܰܝ̈ܗܘܢ: ܡܶܛܠ ܕܰܚܙܺܝܬ ܚܶܪܝܳܢܳܐ ܘܕܺܝܢܳܐ ܒܰܩܪܺܝܬܳܐ. ܒܺܐܝܡܳܡܳܐ ܘܰܒܠܺܠܝܳܐ ܟܪܺܝܟܺܝܢ ܠܫܽܘܪ̈ܶܝܗ̇. ܥܰܘܠܳܐ ܘܫܽܘܩܪܳܐ ܒܓܰܘܳܗ̇ ܘܥܶܬܳܐ. ܘܠܳܐ ܥܳܢܶܕ ܡܶܢ ܫܽܘ̈ܩܶܝܗ̇ ܬܽܘܟܳܐ ܘܢܶܟܠܳܐ. ܒܗܳܠܝܢ ܡܶܬܥܶܗܰܕ ܢܒܺܝܳܐ ܠܗܰܘ ܪܰܘܒܳܐ ܕܰܗܘܳܐ ܒܽܐܘܪܺܫܠܶܡ ܥܰܠ ܥܰܡܰܢܘܐܝܠ ܒܠܺܠܝܳܐ ܡܶܢ ܒܳܬܰܪ ܕܨܰܠܺܝ ܒܪܶܓܠܬܳܐ ܕܩܶܕܪܽܘܢ. ܟܰܕ ܟܪܺܝܟܺܝܢ ܠܶܗ ܪ̈ܺܝܫܰܝ ܟܳܗܢ̈ܐ ܘܣܳܦܪ̈ܐ ܕܥܰܡܳܐ ܘܩܰܫܺܝ̈ܫܐ. ܘܰܒܠܺܠܝܳܐ ܐܳܦ ܒܺܐܝܡܳܡܳܐ ܕܰܥܪܽܘܒܬܳܐ ܩܳܝܡܺܝܢ ܗܘܰܘ ܕܠܳܐ ܡܰܐܝܢܽܘܬܳܐ ܘܥܰܘܠܳܐ ܘܥܶܬܳܐ ܘܫܽܘܩܪܳܐ ܡܰܣܗܕܺܝܢ ܗܘܰܘ ܥܰܠ ܗܰܘ ܡܰܠܟܳܐ ܕܟܺܐܢܽܘܬܳܐ. ܐܰܟܡܳܐ ܕܳܐܦ ܠܕܰܘܝܕ ܣܶܥܪܰܬ ܟܢܽܘܫܬܳܐ ܟܰܕ ܫܶܠܡܰܬ ܠܰܡܪܳܕܶܗ ܕܰܐܒܺܝܫܳܠܽܘܡ. ܘܠܳܐ ܠܰܡ ܥܳܢܶܕ ܡܶܢ ܫܽܘܩܶܝ̈ܗ̇ ܬܽܘܟܳܐ ܘܢܶܟܠܳܐ. ܐܰܝܢܳܐ ܓܝܪ ܚܽܘܣܪܳܢܳܐ ܕܪܰܒ ܡܶܢ ܗܳܢܐ ܐܶܬܬܰܓܰܪܘ ܝܽܘܕܳܝ̈ܐ. ܕܰܚܣܰܪܘ ܠܗܰܘ ܥܰܬܺܝܪܳܐ ܕܶܐܬܡܰܣܟܰܢ ܕܰܠܟܽܠ ܢܰܥܬܰܪ ܒܡܶܣܟܺܢܽܘܬܶܗ. ܡܳܢܳܐ ܕܶܝܢ ܒܳܬܰܪܟܶܢ ܐܳܡܰܪ ܢܒܺܝܳܐ ܠܰܘ ܠܚܰܫܳܐ ܕܰܨܠܽܘܬܐ ܠܳܚ̈ܡܳܢ ܡܶܠܰܘ̈ܗܝ ܐܶܠܐ ܐܰܝܟ ܗܰܘ ܕܰܡܪܰܛܶܢ ܘܠܳܐ ܡܣܰܝܒܰܪ ܒܺܝܫܽܘܬܶܗ ܕܥܰܡܳܐ ܡܰܠܦ̈ܢ.
ܠܐ ܗܘܳܐ ܓܶܝܪ ܒܥܶܠܕܒܳܒܝ ܚܰܣܕܰܢܝ ܕܶܐܣܰܝܒܰܪ. ܐܳܦܠܐ ܣܳܢܐܝ ܐܶܬܬܪܺܝܡ ܥܠܰܝ ܕܶܐܛܫܶܐ ܡܶܢܶܗ. ܠܰܘ ܡܶܢ ܥܰܡ̈ܡܶܐ ܢܽܘܟܪ̈ܳܝܶܐ ܕܠܳܐ ܫܡܰܥܘ ܫܶܡܝ ܘܠܐ ܚܙܰܘ ܐܺܝܩܳܪܝ. ܚܰܫ̈ܐ ܘܰܨܠܺܝܒܳܐ ܣܰܝܒܪܶܬ. ܐܶܠܐ ܡܶܢ ܥܰܡܳܐ ܕܥܶܒܕܶܬ ܒܓܰܘܶܗ ܚܰܝ̈ܠܐ ܘܣܶܥܪܶܬ ܒܶܗ ܬܶܕܡܪ̈ܳܬܳܐ ܘܗܳܝܕܝܢ ܡܰܢ ܒܝܰܕ ܢܒܺܝ̈ܐ. ܦܽܘܪܩܳܢܳܐ ܡܶܢ ܡܶܨܪܶܝܢ ܒܝܰܕ ܡܽܘܫܶܐ܆ ܘܡܰܥܒܰܪܬܳܐ ܒܓܰܘ ܝܰܡܳܐ ܐܝܟ ܕܥܰܠ ܐܰܪܥܳܐ ܝܰܒܺܝܫܬܳܐ. ܐܳܦ ܬܽܘܪܣܳܝܳܐ ܕܠܰܚܡܳܐ ܕܡܰܠܐܟ̈ܐ ܐܰܪܒܥܺܝܢ ܫܢܺܝ̈ܢ ܒܡܰܕܒܪܳܐ. ܒܝܰܕ ܝܶܫܽܘܥ ܒܰܪܢܽܘܢ. ܡܰܥܒܰܪܬܳܐ ܡܶܢ ܪܓܶܠ ܘܝܽܘܪ̈ܬܳܢܶܐ ܕܰܐܪܥܳܐ ܕܫܰܒܥܳܐ ܥܰܡ̈ܡܺܝܢ ܘܰܐܚܪ̈ܳܢܝܳܬܳܐ ܕܰܗ̈ܘܰܝ ܒܝܰܕ ܐ̱ܚܪ̈ܳܢܶܐ ܢܒܺܝ̈ܐ. ܐܶܠܐ ܗܳܫܐ ܒܝܰܕ ܓܶܠܝܳܢܳܐ ܕܒܰܒܣܰܪ ܕܰܐܠܗܐ ܡܶܠܬܳܐ. ܕܰܗܘܳܐ ܡܶܢܗܘܢ ܒܰܪܢܳܫܳܐ. ܒܛܺܝܠܽܘܬܳܐ ܕܥܰܠ ܟܺܐܒܰܝ̈ܗܘܢ: ܪܶܗܛܳܐ ܕܳܐܬܘ̈ܬܳܐ: ܣܳܥܽܘܪܽܘܬܳܐ ܕܚܰܝ̈ܠܐ: ܫܽܘܚܠܳܦܳܐ ܕܡܰܝ̈ܐ ܠܚܰܡܪܳܐ: ܠܰܚ̈ܡܶܐ ܕܣܳܓܶܝܢ: ܣܡܰܝܴ̈ܐ ܕܡܶܬܦܰܬܚܺܝܢ: ܓܰܪ̈ܒܶܐ ܕܡܶܬܕܰܟܶܝܢ: ܕܰܝ̈ܘܶܐ ܕܡܶܫܬܰܝܢܺܝܢ: ܟܪ̈ܺܝܗܶܐ ܕܡܶܬܚܰܠܡܺܝܢ: ܚܰܪ̈ܫܶܐ ܕܰܡܡܰܠܠܺܝܢ: ܕܽܘܓ̈ܐ ܟܰܕ ܫܳܡܥܺܝܢ: ܟܦܺܝ̈ܦܶܐ ܕܡܶܬܦܰܫܛܺܝܢ: ܚܓܺܝܪ̈ܶܐ ܟܰܕ ܡܗܰܠܟܺܝܢ: ܟܺܐܒܬܳܢ̈ܐ ܕܡܶܬܐܰܣܶܝܢ: ܡܺܝ̈ܬܶܐ ܟܰܕ ܩܳܝܡܺܝܢ: ܡܳܟܣ̈ܐ ܘܚܰܛܳܝ̈ܐ ܟܰܕ ܡܶܙܕܰܕܩܺܝܢ: ܙܳܢܝ̈ܬܳܐ ܟܰܕ ܡܶܬܩܰܕ̈ܫܳܢ: ܙܰܠܺܝ̈ܠܳܬܳܐ ܟܰܕ ܡܶܬܢܰܟ̈ܦܳܢ: ܡܒܰܕܪ̈ܶܐ ܕܡܶܬܟܰܢܫܺܝܢ: ܚܶܫܽܘ̈ܟܐ ܟܰܕ ܡܶܬܢܰܗܪܺܝܢ: ܗܳܠܝܢ ܟܽܠܗܶܝܢ ܕܰܥܒܰܕ ܐܰܠܗܐ ܠܘܳܬ ܥܰܡܳܐ ܒܓܶܠܝܳܢܶܗ. ܩܰܪܺܝܒܽܘܬܳܐ ܘܪܳܚܡܽܘܬܳܐ ܡܰܣܗ̈ܕܳܢ ܥܠܰܘܗܝ. ܘܰܕܣܰܓܺܝ ܪܳܚܡܽܘܬܳܐ ܚܰܘܺܝ ܠܘܳܬܗ. ܒܚܰܪܬܳܐ ܝܰܬܺܝܪ ܡܶܢ ܩܰܕܡܳܝܬܳܐ. ܗܳܫܐ ܒܰܩܢܽܘܡܶܗ ܕܶܝܢ ܣܥܰܪ ܐܶܢܘܢ. ܗܳܝܕܶܝܢ ܒܚܶܙ̈ܘܶܐ ܘܰܒܚܶܠܡ̈ܐ ܡܰܠܶܠ ܥܰܡܗܘܢ. ܗܳܫܐ ܕܶܝܢ ܒܒܶܣܪܳܐ ܕܺܝܠܢ ܐܶܬܓܠܺܝ ܠܗܽܘܢ. ܡܳܕܶܝܢ ܫܰܦܺܝܪ ܐܳܡܰܪ: ܕܠܳܐ ܗܘܳܐ ܓܝܪ ܒܥܶܠܕܒܳܒܝ ܚܰܣܕܰܢܝ ܕܶܐܣܰܝܒܰܪ܆ ܐܳܦܠܳܐ ܣܳܢܐܝ ܥܠܰܝ ܐܶܬܬܪܺܝܡ ܕܶܐܛܫܶܐ ܡܶܢܶܗ܆ ܐܶܠܐ ܠܰܡ:
ܐܰܢܬ ܗܽܘ ܒܰܪܢܳܫܳܐ ܕܰܐܟܘܳܬܝ. ܗܳܐ ܢܒܺܝܳܐ ܡܶܫܬܰܘܕܶܐ ܘܡܶܬܢܰܒܶܐ ܕܰܐܟܘܳܬܰܢ ܗܽܘ ܐܰܠܗܐ ܕܶܐܬܒܰܪܢܰܫ. ܘܠܰܝܬ ܦܰܢܛܰܣܺܝܰܐ ܘܠܐ ܫܽܘܚܠܳܦܳܐ. ܘܰܐܚܽܘܬܳܐ ܘܰܐܚܝܳܢܽܘܬܳܐ ܩܢܳܐ ܥܰܡܰܢ. ܗܰܘ ܕܥܶܠܳܝ ܡܶܢܟܽܠ ܒܰܟܝܳܢܶܗ. ܘܠܳܐ ܐܶܡܰܪ ܕܗܽܘ ܕܳܡܶܐ ܠܰܢ. ܐܶܠܐ ܕܰܚܢܰܢ ܕܳܡܶܝܢܰܢ ܠܶܗ. ܒܗܳܝ ܓܝܪ ܕܶܐܡܰܪ ܕܰܐܟܘܳܬܝ. ܥܰܠ ܡܽܘܟܳܟܶܗ ܕܠܳܐ ܡܶܬܡܰܠܰܠ ܫܰܘܕܰܥ. ܘܥܰܠ ܕܠܰܘ ܐܝܟ ܡܳܪܳܐ ܘܪܺܝܫܳܐ ܘܡܰܠܟܳܐ ܘܰܡܕܰܒܪܳܢܳܐ ܚܰܘܺܝ ܢܰܦܫܶܗ ܟܰܕ ܐܶܬܓܠܺܝ ܒܥܳܠܡܳܐ ܐܰܠܶܦ. ܘܥܰܡ ܫܰܘܝܽܘܬܳܐ ܘܢܰܩܺܝܦܽܘܬܳܐ ܕܰܥܒܰܕ ܥܰܡ ܥܰܒܕܰܘ̈ܗܝ ܣܰܟܶܠ. ܘܠܰܘ ܗܳܕܶܐ ܒܰܠܚܽܘܕ. ܐܶܠܐ ܐܳܦ ܕܶܐܬܚܰܠܰܛ ܥܰܡ ܥܰܡܳܐ ܒܡܶܐܟܠܳܐ ܘܰܒܡܰܫܬܝܳܐ. ܘܰܒܕܶܒܚ̈ܐ ܘܰܒܩܽܘܪ̈ܒܳܢܶܐ. ܘܰܒܫܳܪ̈ܘܳܬܳܐ ܟܰܕ ܡܶܬܩܪܶܐ ܡܶܢܗܘܢ ܐܶܡܰܪ ܓܝܪ ܢܒܺܝܳܐ:
ܕܰܐܟܚܕܳܐ ܠܥܶܣܰܢ ܫܳܪܽܘܬܳܐ ܒܒܰܝܬܶܗ ܕܰܐܠܗܐ. ܟܰܕ ܡܗܰܠܟܺܝܢ ܗܘܰܝܢ ܒܰܐܘܝܽܘܬܳܐ. ܠܳܐ ܠܰܡ ܐܶܬܪܰܘܪܒܶܬ ܥܠܰܝܟ ܐܶܠܐ ܠܡܶܠܥܰܣ ܘܰܠܡܶܫܬܳܐ ܐܶܬܢܰܚܬܶܬ ܥܰܡ ܫܰܒܪܽܘܬܳܟ. ܕܠܳܐ ܬܶܬܪܗܶܒ ܒܚܶܙܘܳܐ ܕܪܰܒܽܘܬܳܐ ܘܬܶܡܪܰܕ ܐܝܟ ܕܰܒܙܰܒܢܳܐ ܩܰܕܡܳܝܳܐ. ܟܰܕ ܠܳܟ ܐܶܬܕܰܡܺܝܬ ܒܡܶܠܰܝ̈. ܒܪܳܡܽܘܬܳܐ ܩܰܘܺܝܬ ܘܠܳܐ ܨܒܰܝܬ ܕܬܶܬܪܡܶܐ. ܥܰܠ ܗܳܕܶܐ ܓܝܪ ܐܰܗܡܺܝ ܠܰܢܒܺܝܳܐ ܡܶܢ ܒܳܬܰܪ ܟܽܠܗܝܢ ܕܰܗܘܱ̈ܝ. ܘܠܐ ܐܰܦܢܺܝ ܒܗܶܝܢ ܥܰܡܳܐ. ܐܶܡܰܪ ܢܒܺܝܳܐ ܕܡܶܟܺܝܠ ܕܠܐ ܨܒܰܘ ܠܡܶܬܚܰܕܳܬܽܘ ܒܚܰܝ̈ܐ. ܘܠܐ ܐܶܬܬܥܺܝܪܘ ܡܶܢ ܫܶܢܬܳܐ ܕܰܚܛܺܝܬܳܐ ܘܩܰܒܶܠܘ ܠܰܡܢܺܝܚܳܢܳܐ.
ܕܢܰܝܬܶܐ ܥܠܰܝܗܘܢ ܡܰܘܬܳܢܳܐ. ܘܢܶܚܬܽܘܢ ܟܰܕ ܚܰܝܺܝ̈ܢ ܠܰܫܝܽܘܠ: ܡܶܛܠ ܕܒܺܝܫܬܳܐ ܐܺܝܬ ܒܓܰܘܗܘܢ. ܠܰܐܝܢܳܐ ܡܰܘܬܳܐ ܐܶܡܰܪ ܢܒܺܝܐ ܕܢܰܝܬܶܐ ܐܰܠܗܐ ܥܰܠ ܨܳܠܽܘܒ̈ܐ. ܠܗܳܢܐ ܥܝܳܕܳܐ ܘܗܳܐ ܠܰܘ ܒܚܰܝ̈ܐ ܢܳܚܶܬ ܐܰܢܬ ܠܰܫܝܽܘܠ. ܐܶܠܐ ܠܗܰܘ ܕܒܳܬܰܪ ܩܝܳܡܬܳܐ. ܡܳܐ ܕܫܳܡܥܺܝܢ ܗܳܝ ܒܰܪܬ ܩܳܠܐ ܟܡܺܝܪܬܳܐ: ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ (ܡܬܝ ܟܗ: ܡܐ). ܘܥܳܛܦܺܝܢ ܒܽܐܘܪܚܳܐ ܠܒܶܣܬܰܪܗܘܢ ܘܡܶܬܗܰܦܟܺܝܢ ܥܰܡ ܪ̈ܰܫܺܝܥܶܐ ܠܰܫܝܽܘܠ. ܘܥܰܡ ܟܽܠܗܘܢ ܥܰܡ̈ܡܶܐ ܕܛܳܥܶܝܢ ܠܰܐܠܗܐ. ܐܶܠܐ ܠܰܡ ܠܺܝ ܠܥܰܒܕܳܟ ܠܐ ܐܶܬܚܰܝܰܒ ܥܰܡ ܗܳܠܝܢ. ܘܠܐ ܢܺܐܬܶܐ ܥܠܰܝ ܡܣܳܡ ܒܪܺܝܫܳܐ ܥܰܡ ܗܳܢܘܢ ܕܰܡܪܰܕܘ ܥܰܠ ܒܪܳܟ ܚܰܒܺܝܒܳܐ. ܠܰܘ ܓܶܝܪ ܥܰܡܗܘܢ ܟܶܦܪܶܬ. ܕܥܰܡܗܘܢ ܡܶܛܠ ܕܶܐܢܳܐ ܠܳܟ ܩܳܪܶܐ ܐܢܳܐ.
ܐܶܢܳܐ ܕܶܝܢ ܠܰܐܠܗܐ ܐܶܩܪܶܐ: ܘܰܐܠܗܳܐ ܢܶܦܪܩܰܢܝ. ܒܪܰܡܫܳܐ ܘܰܒܨܰܦܪܳܐ ܘܰܒܛܰܗܪܳܐ. ܫܳܦܺܝܪ ܠܰܬܠܳܬܳܐ ܦܰܠܶܓ ܐܶܢܘܢ ܠܥܶܕܳܢ̈ܐ ܗܳܠܝܢ. ܕܰܒܗܘܢ ܣܢܺܝܩܳܐ ܢܰܦܫܳܐ ܥܰܠ ܦܽܘܪܩܳܢܳܐ ܕܰܐܠܗܐ. ܟܰܕ ܡܫܰܪܝܳܐ. ܟܰܕ ܡܡܰܨܥܳܐ. ܟܰܕ ܡܫܰܠܡܳܐ. ܐܶܠܐ ܢܒܺܝܳܐ ܪܰܡܫܳܐ ܣܳܡ ܩܕܳܡ ܨܰܦܪܳܐ. ܗܳܢܐ ܓܝܪ ܥܳܠܡܳܐ. ܒܪܰܡܫܳܐ ܡܶܬܡܬܶܠ ܡܶܛܠ ܕܗܽܘ ܩܳܕܶܡ ܗܘܳܐ. ܗܰܘ ܕܶܝܢ ܥܳܠܡܳܐ ܕܙܰܕܺܝ̈ܩܶܐ ܒܨܰܦܪܳܐ ܐܶܬܬܨܺܝܪ ܒܰܟܬܳܒ̈ܐ. ܡܳܕܝܢ ܥܰܠܗܳܝ ܐܶܡܰܪ ܢܒܺܝܳܐ. ܕܰܐܠܗܐ ܢܶܦܪܩܰܢ. ܒܪܰܡܫܳܐ ܐܰܝܟ ܕܰܒܗܳܢܐ ܥܳܠܡܳܐ. ܘܰܒܨܰܦܪܳܐ ܐܰܝܟ ܕܰܒܕܶܢܚܳܐ ܕܰܩܝܳܡܬܳܐ. ܘܰܒܛܰܗܪܳܐ ܡܶܛܠ ܕܰܒܗܰܘ ܨܰܦܪܳܐ ܛܰܗܪܳܐ ܩܰܫܝܳܐ ܘܰܕܚܺܝܠܳܐ ܗܳܘܶܐ. ܡܶܢ ܥܰܙܺܝܙܽܘܬܳܐ ܕܫܰܠܗܶܒܺܝܬܳܐ ܕܢܰܗܪܳܐ ܕܢܽܘܪܳܐ. ܗܰܘ ܕܢܳܦܶܩ ܡܶܢ ܬܚܶܝܬ ܟܽܘܪܣܝܶܗ ܕܕܰܝܳܢܳܐ. ܘܡܰܘܩܶܕ ܐܰܦ̈ܐ ܕܥܳܒܕܰܝ̈ ܥܰܘܠܳܐ. ܥܰܠܗܳܝ ܡܦܺܝܣ ܕܰܒܗܳܢܐ ܛܰܗܪܳܐ ܗܰܘ ܕܡܰܘܟܶܡ ܒܝܰܩܕܳܢܶܗ ܐܰܦ̈ܐ ܕܓܰܐܝܽܘ̈ܬܳܢܶܐ ܢܶܬܦܪܶܩ. ܘܥܰܠܗܳܝ ܐܶܡܰܪ:
ܐܶܪܢܶܐ ܘܺܐܡܰܪ ܘܰܐܫܡܰܥ ܩܳܠܝ. ܚܙܰܝܬ ܐܰܝܟܰܢܳܐ ܐܳܡܰܪ ܕܰܪܢܳܐ ܒܶܗ ܒܕܺܝܢܳܐ ܟܰܕ ܡܰܫܡܰܥ ܩܳܠܶܗ ܒܰܨܠܽܘܬܳܐ.
ܘܦܰܨܳܗ̇ ܠܢܰܦܫܝ ܡܶܢ ܐܰܝܠܶܝܢ ܕܚܳܟܡܺܝܢ ܠܺܝ: ܡܶܛܠ ܕܰܒܚܶܪܝܳܢܳܐ ܗܘܰܘ ܥܰܡܝ. ܢܶܫܡܰܥ ܐܰܠܗܐ ܘܰܢܡܰܟܶܟ ܐܶܢܘܢ: ܗܰܘ ܕܺܐܝܬܰܘܗܝ ܡܶܢ ܩܕܳܡ ܥܳܠܡ̈ܐ. ܘܰܠܡܳܢܳܐ ܕܶܝܢ ܐܶܡܰܪ ܕܰܢܡܰܟܶܟ ܐܶܢܘܢ. ܓܰܠܝܳܐ ܗܝ ܥܰܠ ܕܠܐ ܐܶܫܬܰܚܠܰܦܘ ܡܶܢ ܨܶܒܝܳܢܗܘܢ ܒܺܝܫܳܐ ܒܰܬܝܳܒܽܘܬܳܐ. ܐܠܐ ܕܳܡܝܳܐ ܕܠܰܘ ܥܰܠ ܡܳܪ̈ܽܘܕܶܐ ܐܳܡܰܪ ܠܗ̇ ܠܡܶܠܬܐ. ܗܳܠܝܢ ܓܝܪ ܡܶܫܬܰܩܠܺܝܢ ܗܘܰܘ ܒܙܰܒܢܳܐ ܗܰܘ ܥܰܠ ܒܢܰܝ̈ܢܳܫܳܐ ܒܪܳܡܽܘܬܳܐ. ܐܶܠܐ ܘܥܰܠ ܐܰܝܠܝܢ ܕܚܰܡܣܶܢܘ ܒܠܳܐ ܡܶܬܛܦܺܝܣܳܢܽܘܬܐ. ܕܦܳܫܘ ܒܝܽܘܕܳܝܽܘܬܐ ܘܰܒܚܰܢܦܽܘܬܐ.
ܠܰܝܬ ܠܗܽܘܢ ܬܰܚܠܽܘܦܳܐ. ܘܠܐ ܕܚܶܠܘ ܡܶܢ ܐܰܠܳܗܳܐ. ܬܰܚܠܽܘܦܳܐ ܕܶܝܢ ܩܳܪܶܐ. ܠܗܳܝ ܡܶܬܚܰܠܦܳܢܽܘܬܳܐ ܕܰܗܘܳܬ ܠܒܰܪܢܳܫܳܐ ܥܰܬܺܝܩܳܐ ܒܰܥܡܳܕܳܐ ܩܰܕܺܝܫܳܐ. ܟܰܕ ܫܠܰܚ ܘܰܫܕܳܐ ܥܳܠܡܳܐ ܟܽܘ̈ܬܡܳܬܳܐ ܕܰܚܛܳܗܰܘ̈ܗܝ ܒܰܣܚܳܬܳܐ ܩܰܕܺܝܫܬܳܐ ܘܶܐܬܚܰܠܰܦ ܘܰܐܘܥܺܝ ܓܶܦ̈ܐ ܐܰܝܟ ܕܝܰܘܢܳܐ. ܘܶܐܬܥܰܛܰܦ ܠܳܐ ܡܳܝܽܘܬܽܘܬܳܐ. ܒܡܰܘܠܳܕܳܐ ܕܡܶܢܕܪܺܝܫ. ܥܰܠܗܝ ܐܶܡܰܪ ܢܒܺܝܳܐ ܥܰܠ ܝܽܘܕܳܝ̈ܐ ܕܠܰܝܬ ܠܗܽܘܢ ܬܰܚܠܽܘܦܳܐ. ܘܠܐ ܕܚܶܠܘ ܡܶܢ ܐܰܠܗܰܐ ܗ̄ܘ ܠܰܝܬ ܠܗܽܘܢ ܡܰܥܡܽܘܕܺܝܬܳܐ ܘܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ. ܐܶܠܐ ܒܡܰܪܳܚܽܘܬܗܘܢ ܐܰܘܫܶܛܘ ܐܺܝܕܳܐ ܥܰܠ ܗܰܘ ܕܶܐܬܳܐ ܡܶܢ ܫܡܰܝܳܐ. ܘܰܗܘܳܐ ܩܰܪܺܝܒܳܐ ܠܗܰܘ ܕܰܢܦܰܠ ܒܺܐܝ̈ܕܰܝ ܓܰܝܳܣ̈ܐ. ܐܳܦ ܐܶܬܩܰܪܰܒ ܘܰܥܨܰܒ ܡܰܚ̈ܘܳܬܶܗ ܕܳܐܕܳܡ ܘܰܢܨܰܠ ܥܠܰܝܗܶܝܢ ܠܰܘ ܚܰܡܪܳܐ ܐܶܠܐ ܕܡܶܗ. ܘܰܐܢܺܝܚ ܟܺܐܒܰܘ̈ܗܝ ܠܰܘ ܒܡܶܫܚܳܐ ܕܙܰܝܬܳܐ. ܐܶܠܐ ܒܪܽܘܚܳܐ ܩܰܕܺܝܫܳܐ. ܗܰܘ ܕܰܐܝܬܺܝ ܥܰܡܶܗ ܡܶܢ ܫܡܰܝܳܐ. ܘܚܰܕܬܶܗ ܒܡܰܘܠܳܕܳܐ ܕܡܶܢ ܕܪܺܝܫ. ܘܥܰܒܕܶܗ ܝܰܠܽܘܕܳܐ ܘܫܰܒܪܳܐ. ܠܗܰܘ ܣܳܒܳܐ ܕܰܥܬܶܩ ܘܰܒܠܺܝ ܒܰܚܛܺܝܬܳܐ. ܘܥܰܠ ܗܳܢܳܐ ܕܰܗܘܳܐ ܠܰܢ ܩܰܪܺܝܒܳܐ. ܐܰܘܫܶܛ ܐܺܝܕܳܐ ܥܰܡܳܐ ܡܰܪܳܚܳܐ. ܐܶܡܰܪ ܢܒܺܝܳܐ.
ܐܰܘܫܶܛܘ ܐܺܝܕܳܐ ܥܰܠ ܩܰܪܺܝܒܗ ܘܛܰܘܰܫܘ ܩܝܳܡܶܗ. ܒܗܳܝ ܓܶܝܪ ܐܶܬܛܰܘܰܫ ܗܰܘ ܩܝܳܡܳܐ ܩܰܕܡܳܝܳܐ ܕܰܐܩܺܝܡ ܐܰܠܗܳܐ ܥܰܡ ܥܰܡܳܐ. ܘܰܗܘܰܘ ܛܰܡ̈ܐܐ ܘܰܡܛܰܢܦ̈ܐ ܒܰܕܡܳܐ ܕܶܐܫܰܕܘ. ܘܥܰܠ ܗܳܕܶܐ.
ܐܶܬܕܰܠܰܚܘ ܡܶܢ ܪܽܘܓܙܳܐ ܕܰܐܦܰܘ̈ܗܝ ܘܡܶܢ ܚܶܡܬܳܐ ܕܠܶܒܶܗ. ܘܡܶܟܺܝܠ ܠܰܝܬ ܠܗܽܘܢ ܡܰܢ ܕܡܰܥܒܶܕ ܒܗܽܘܢ ܫܰܝܢܳܐ. ܘܠܳܐ ܦܺܐܪ̈ܐ ܕܰܫܠܳܡܳܐ ܩܰܘܺܝܘ ܒܥܰܡܳܐ. ܡܶܢ ܒܳܬܰܪ ܕܰܨܠܰܒܘ ܠܩܰܪܺܝܒܶܗ. ܗܳܢܰܘ ܠܗܰܘ ܕܪܰܚܺܝܩ ܡܶܢܰܢ ܒܰܟܝܳܢܶܗ. ܘܩܰܪܺܝܒ ܠܘܳܬܰܢ ܒܰܚܢܳܢܶܗ. ܐܶܠܐ ܚܙܺܝ ܡܳܢܳܐ ܐܳܡܰܪ ܠܘܳܬܶܗ ܪܽܘܚܳܐ ܡܶܛܠ ܡܰܛܥܝܳܢܽܘܬܶܗ.
ܪ̈ܰܟܺܝܟܳܢ ܡܶܠܰܘ̈ܗܝ ܡܶܢ ܡܶܫܚܳܐ. ܘܗܶܢܶܝܢ ܠܽܘ̈ܠܝܳܬܳܐ. ܒܗܳܠܶܝܢ ܐܳܦ ܐܰܒܺܝܫܳܠܽܘܡ ܗܰܘ ܒܪܳܐ ܒܺܝܫܳܐ ܡܶܬܚܰܫܰܚ ܗܘܳܐ. ܘܰܒܡ̈ܠܐ ܒܰܣܺܝ̈ܡܳܬܳܐ ܘܪ̈ܰܟܺܝܟܳܬܳܐ ܠܥܰܡܳܐ ܡܰܛܥܶܐ ܗܘܳܐ. ܗܳܢܶܝܢ ܕܰܠܕܰܘܝܕ ܐܰܒܽܘܗܝ ܠܽܘܠܝ̈ܬܳܐ ܥܒܺܝ̈ܕܳܢ ܗܘ̈ܝ. ܟܰܕ ܓܶܝܪ ܫܰܪܺܝ ܕܢܰܪܡܶܐ ܙܰܪܥܳܐ ܠܺܝܛܳܐ ܒܠܶܒܶܗ ܕܥܰܡܳܐ. ܥܰܠ ܬܰܪܥܳܐ ܕܗܰܘ ܡܰܠܟܳܐ ܟܺܐܢܳܐ ܘܕܰܝܳܢܳܐ ܬܪܺܝܨܳܐ ܝܳܬܶܒ ܗܘܳܐ܆ ܘܰܠܗܳܠܶܝܢ ܕܰܠܕܺܝܢܳܐ ܐܳܬܶܝܢ ܡܩܰܒܶܠ ܗܘܳܐ. ܝܳܬܺܝܪܳܐܝܬ ܠܰܐܝܠܶܝܢ ܕܚܰܝܳܒܺܝܢ ܒܕܺܝܢܳܐ ܡܶܛܠ ܡܰܪܳܚܽܘܬܗܽܘܢ. ܘܟܰܕ ܡܫܰܐܠ ܗܘܳܐ ܥܰܠ ܣܽܘܥܪ̈ܳܢܰܝܗܽܘܢ. ܙܳܟܽܘܬܳܐ ܡܶܢ ܕܺܝܢܳܐ ܠܟܽܠܗܽܘܢ ܡܚܰܝ̈ܒܶܐ ܡܶܫܬܰܘܕܶܐ ܗܘܳܐ. ܘܥܰܡ ܡܰܣܟ̈ܠܳܢܶܐ ܓܶܝܪ ܩܳܛܰܪ ܗܘܳܐ ܐܪܳܙܳܐ. ܠܘܳܬ ܙܰܟܳܝ̈ܐ ܕܶܝܢ ܠܳܐ ܡܶܬܩܰܪܰܒ ܗܘܳܐ. ܐܶܠܐ ܥܰܡ ܓܽܘܡܕܳܢ̈ܐ ܘܥܳܒ̈ܕܰܝ ܒܺܝ̈ܫܳܬܳܐ ܕܡܰܗܦܶܟ ܗܘܳܐ ܕܰܘܝܕ ܥܠܰܝܗܽܘܢ ܡܣܳܡ ܒܪܺܝܫܳܐ ܟܺܐܢܳܐ ܒܰܬܪܺܝܨܽܘܬܳܐ. ܕܰܠܩܽܘܒܠܳܐ ܡܡܰܠܶܠ ܗܘܳܐ ܐܰܒܺܝܫܳܠܽܘܡ ܘܳܐܡܰܪ: ܡܰܢ ܕܶܝܢ ܥܰܒܕܰܢܝ ܒܰܐܪܥܳܐ ܕܰܝܳܢܳܐ. ܘܰܠܘܳܬܝ ܕܺܝܠܝ ܐܶܢ ܐܳܬܶܐ ܓܰܒܪܳܐ ܕܺܐܝܬ ܠܶܗ ܕܺܝܢܳܐ ܘܰܡܙܰܟܶܐ ܗܘܺܝܬ ܠܶܗ (ܒ ܫܡܘܐܝܠ ܝܗ: ܕ). ܘܟܰܕ ܒܳܥܶܐ ܗܰܘ ܕܫܳܡܰܥ ܗܘܳܐ ܚܳܕܶܐ ܗܘܳܐ ܘܣܳܓܶܕ ܠܶܗ. ܒܗܳܠܶܝܢ ܡܷ̈ܠܐ ܪ̈ܰܟܺܝܟܳܬܳܐ ܫܰܚܠܶܦ ܠܶܒܶܗ ܕܥܰܡܳܐ. ܐܰܝܟ ܕܰܥܒܰܕ ܚܶܘܝܳܐ ܠܚܰܘܳܐ ܒܡܶܠܟܶܗ ܩܳܛܽܘܠܐ. ܘܡ̈ܠܐ ܒܰܣܺܝ̈ܡܳܬܳܐ ܘܪ̈ܰܟܺܝܟܳܬܳܐ ܐܶܡܰܪ ܠܗ̇ ܡܶܛܠ ܐܺܝܠܳܢܳܐ ܕܠܳܐ ܠܰܡ ܡܡܳܬ ܬܡܽܘܬܽܘܢ. ܡܶܛܠ ܓܶܝܪ ܕܝܳܕܰܥ ܐܰܠܳܗܳܐ. ܕܰܒܝܰܘܡܳܐ ܕܳܐܟܠܺܝܬܽܘܢ ܡܶܢ ܐܺܝܠܳܢܳܐ ܡܶܬܦܰܬܚܴ̈ܢ ܥܰܝܢܰܝ̈ܟܽܘܢ ܘܗܳܘܶܝܬܽܘܢ ܐܰܠܳܗ̈ܐ ܝܳܕܥܰܝ̈ ܛܳܒܬܳܐ ܘܒܺܝܫܬܳܐ (ܒܪܝܬܐ ܓ: ܕ-ܗ). ܚܙܺܝ ܗܳܟܺܝܠ ܠܗܳܠܶܝܢ ܡ̈ܠܐ ܪ̈ܰܟܺܝܟܳܬܳܐ ܕܣܰܪ̈ܥܶܦܝ ܘܰܐܘ̈ܥܺܝ ܠܽܘܠܝ̈ܬܳܐ ܒܟܽܠܗ̇ ܐܰܪܥܳܐ ܘܰܐܦܩܰܬ ܟܽܘ̈ܒܶܐ ܘܩܽܘܪ̈ܛܒܶܐ ܠܪ̈ܶܓܠܐ ܕܪܳܗܛܺܝܢ ܘܩܳܛܦܺܝܢ ܦܺܐܪܳܐ ܕܰܥܒܳܪ ܦܽܘܩܕܳܢܳܐ. ܟܰܕ ܕܶܝܢ ܒܗܳܠܶܝܢ ܕܡܶܛܠ ܢܰܦܫܳܐ ܡܶܬܒܰܩܶܝܢܰܢ. ܠܰܘ ܠܽܘܠܝ̈ܬܳܐ ܙܳܕܶܩ ܕܢܶܚܫܽܘܒ ܡܶܠܰܘ̈ܗܝ ܕܰܒܥܶܠܕܰܪܳܐ. ܐܶܠܐ ܣܰܝܦܳܐ. ܗܳܐ ܓܶܝܪ ܠܦܰܪܕܰܝܣܳܐ ܪܽܘܡܚܳܐ ܘܰܫܢܳܢܳܐ ܥܒܰܕ ܕܬܶܗܘܶܐ ܡܶܬܟܰܪܟܳܐ. ܠܗܳܠܶܝܢ ܫܠܶܝܡܽܘܢ ܚܠܳܦ ܡܶܫܚܳܐ ܒܕܶܒܫܳܐ ܨܒܰܥ ܐܶܢܶܝܢ. ܐܶܡܰܪ ܓܶܝܪ: ܕܕܶܒܫܰܐ ܗ̄ܘ ܡܰܛܦܴ̈ܢ ܣܶܦܘ̈ܬܳܗ̇ ܕܢܽܘܟܪܳܝܬܳܐ. ܘܚܰܪܬܗܶܝܢ ܡܶܢ ܓܶܕ̈ܕܶܐ ܡܰܪܺܝܪ̈ܳܢ (ܡ̈ܬܠܐ ܗ: ܓ-ܕ). ܫܰܦܺܝܪ ܡܟܰܢܶܐ ܠܗ̇ ܢܽܘܟܪܳܝܬܳܐ ܠܰܚܛܺܝܬܳܐ. ܡܶܛܠ ܕܠܰܝܬ ܠܗ̇ ܚܽܘܠܛܳܢܳܐ ܟܝܳܢܳܝܳܐ ܒܰܐܝܠܶܝܢ ܕܶܐܬܒܪ̈ܺܝܝܢ ܡܶܢ ܐܰܠܗܳܐ ܫܰܦܺܝܪ. ܘܰܐܝܠܶܝܢ ܕܝܳܠܦܺܝܢ ܡܶܢ ܣܳܦܪܳܐ ܒܺܝܫܳܐ. ܕܰܐܝܟ ܗܳܟܰܢܳܐ ܐܶܢܶܝܢ ܡܶܠܰܝ̈ܗܽܘܢ. ܒܕܶܒܫܳܐ ܚܳܠܛܺܝܢ ܠܡܰܪܺܝܪܽܘܬܳܐ ܕܡܶܠܰܝ̈ܗܽܘܢ. ܘܰܒܗܳܢܳܐ ܐܶܣܟܺܝܡܳܐ ܕܰܓܳܠܳܐ. ܡܪܰܟܶܟ ܗܘܳܐ ܝܽܘܐܳܒ ܡܶܠܰܘ̈ܗܝ ܟܰܕ ܦܳܓܰܥ ܒܥܰܡܣܳܐ. ܟܰܕ ܫܳܡܰܥ ܗܘܳܐ ܫܡܳܐ ܕܰܐܚܽܘܬܳܐ. ܐܶܡܰܪ ܠܶܗ ܓܶܝܪ ܝܽܘܐܳܒ ܫܠܳܡ ܠܳܟ ܐܳܚܝ (ܒ ܫܡܘܐܝܠ ܟ: ܛ). ܐܶܠܐ ܠܓܰܘ ܡܶܢ ܗܳܢܳܐ ܫܠܳܡܳܐ. ܣܰܦܣܺܪܳܐ ܡܛܰܫܰܝ ܗܘܳܐ. ܗܰܘ ܕܒܶܗ ܡܺܝܬ ܥܰܡܣܳܐ. ܘܒܳܬܰܪܟܶܢ ܐܳܦ ܝܽܘܕܳܐ ܗܰܘ ܕܳܘܝܳܐ. ܠܓܰܘ ܡܶܢ ܡ̈ܠܐ ܪ̈ܰܟܺܝܟܳܬܳܐ ܛܰܫܺܝ ܡܰܫܠܡܳܢܽܘܬܶܗ. ܘܥܰܠܗܳܝ ܐܳܡܰܪ ܗܘܳܐ ܠܡܳܪܰܢ܆ ܫܠܳܡ ܪܰܒܺܝ ܘܢܰܫܩܶܗ (ܡܬܝ ܟܘ: ܡܛ ܡܪܩܘܣ ܝܕ: ܡܗ). ܘܣܰܓܺܝ̈ܐܳܢ ܐܶܢܶܝܢ ܡܶܠܰܘ̈ܗܝ ܕܰܡܪܰܡܝܳܢܳܐ. ܘܰܕܬܰܠܡܺܝ̈ܕܰܘܗܝ. ܗܳܠܶܝܢ ܕܰܠܒܺܝܫܺܝܢ ܐܶܣܟܺܝܡܳܐ ܕܡܰܛܥܝܳܢܽܘܬܳܐ. ܘܒܳܬܰܪ ܗܳܠܶܝܢ ܠܳܐ ܢܶܬܬܟܶܠ ܥܰܠ ܕܰܐܝܟ ܗܳܠܶܝܢ ܡܦܰܩܶܕ ܢܒܺܝܳܐ. ܘܰܕܠܐ ܢܬܰܪܣܶܐ ܠܢܰܦܫܰܢ ܒܝܽܘܠܦܳܢܳܐ ܕܰܓܳܠܐ ܘܩܳܛܽܘܠܳܐ. ܡܶܛܠܗܳܕܶܐ ܐܶܡܰܪ:
ܫܕܺܝ ܨܶܦܬܳܟ ܥܰܠ ܡܳܪܝܳܐ ܘܗܽܘ ܢܬܰܪܣܶܝܟ. ܘܠܳܐ ܢܶܬܶܠ ܠܥܳܠܰܡ ܙܰܘܥܬܳܐ ܠܙܰܕܺܝ̈ܩܰܘܗܝ. ܡܳܢܳܐ ܗܝ ܥܶܠܬܳܐ ܕܬܽܘܪܣܳܝܳܐ ܕܰܐܥܶܠ ܗܳܪܟܳܐ ܢܒܺܝܳܐ. ܠܐ ܓܶܝܪ ܩܕܳܡܶܝܗ̇ ܘܠܳܐ ܒܳܬܪܳܗ̇ ܕܡܶܠܬܳܐ. ܫܰܪܒܳܐ ܕܥܰܠ ܬܽܘܪܣܳܝܳܐ ܦܰܓܪܳܢܳܐ ܪܡܶܐ ܗܘܳܐ ܠܶܗ. ܐܶܠܐ ܕܰܡܥܳܕܳܐ ܗܝ ܢܰܦܫܳܐ ܡܶܬܬܰܪܣܝܳܐ ܡܶܢ ܡ̈ܠܐ ܒܰܣܺܝ̈ܡܳܬܳܐ ܘܡܶܢ ܫܽܘ̈ܥܝܳܬܳܐ ܕܗܰܘ ܕܰܡܪܰܟܶܟ ܘܰܡܕܰܗܰܢ ܡܶܠܰܘ̈ܗܝ ܒܛܳܥܝܽܘܬܳܐ. ܡܳܐ ܕܶܝܢ ܕܰܠܒܰܟܘ ܚܰܝܠܳܗ̇ ܕܢܰܦܫܳܐ ܗܳܘ̈ܝܳܢ ܠܽܘܠܝ̈ܬܳܐ ܘܰܡܒܰܙ̈ܥܳܢ ܩܪ̈ܳܡܶܐ ܕܠܶܒܳܐ. ܘܥܰܠܗܳܝ ܠܘܳܬ ܡܳܪܝܳܐ ܐܳܡܰܪ ܕܰܫܕܺܝ ܨܶܦܬܳܟ ܥܠܰܘܗܝ ܘܰܡܬܰܪܣܶܐ ܠܳܟ. ܡܶܛܠ ܕܶܝܢ ܕܠܰܝܬ ܠܽܘܠܝ̈ܬܳܐ ܒܡ̈ܠܐ ܕܚܰܝ̈ܐ ܠܐ ܓܶܝܪ ܡܶܬܬܙܺܝܥܳܐ ܢܰܦܫܳܐ ܕܙܰܕܺܝ̈ܩܶܐ ܘܰܒܡܶܐܟܠܳܐ ܘܰܒܡܰܫܬܝܳܐ. ܘܡܶܬܦܢܶܐ ܢܒܺܝܳܐ܆ ܠܘܳܬ ܐܰܝܠܶܝܢ ܕܰܒܢܶܟܠܳܐ ܟܳܡܢܺܝܢ ܠܰܕܡܳܐ ܕܙܰܕܺܝ̈ܩܶܐ. ܕܰܠܓܽܘܒܳܐ ܕܡܶܬܚܰܒܠܳܢܽܘܬܳܐ ܢܫܰܕܰܪ ܐܶܢܽܘܢ ܟܰܕ ܐܳܡܰܪ:
ܐܰܢܬ ܕܶܝܢ ܐܠܰܗܳܐ ܐܰܚܶܬ ܐܶܢܘܢ ܠܓܽܘܒܳܐ ܕܐܒܕܢܐ: ܠܓܰܒܪ̈ܶܐ ܐܳܫ̈ܕܰܝ ܕܡܳܐ ܘܢܳܟܠܰܝ̈ ܢܶܟܠܳܐ܆ ܘܠܳܐ ܢܫܰܠܡܽܘܢ ܝܰܘ̈ܡܳܬܗܽܘܢ. ܘܶܐܢܳܐ ܐܶܣܰܒܰܪ ܒܳܟ. ܓܽܘܒܳܐ ܕܰܐܒܕܳܢܳܐ ܓܽܘܒܳܐ ܕܕܽܘܘܳܢܳܐ. ܠܬܰܫܢܺܝܩܳܐ ܩܳܪܶܐ ܢܒܺܝܳܐ. ܘܗܽܘ ܟܰܕ ܗܽܘ ܐܺܝܬܰܘܗܝ ܚܶܫܽܘܟܳܐ ܒܰܪܳܝܳܐ. ܡܶܛܠ ܗܳܢܳܐ ܠܶܗ ܐܶܡܰܪ܆ ܕܢܰܚܶܬ ܐܶܢܽܘܢ ܐܰܠܳܗܳܐ ܠܥܰܘܴ̈ܠܶܐ ܘܰܠܡܳܪ̈ܽܘܕܶܐ ܥܰܡ ܗܰܘ ܕܰܐܠܶܦ ܐܶܢܽܘܢ. ܘܠܳܐ ܡܫܰܠܡܺܝܢ ܝܰܘ̈ܡܳܬܳܐ ܕܺܝܠܗܽܘܢ.ܐܶܠܐ ܡܳܢܳܐ ܐܶܡܰܪ܆ ܘܶܐܢܳܐ ܠܰܡ ܐܶܣܰܒܰܪ ܒܳܟ. ܘܰܐܘܕܶܐ ܠܰܫܡܳܟ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܫܬܐ
ܥܰܠ ܕܰܒܟܻ̈ܐܒܶܐ ܘܐܽܘܠܨܳܢ̈ܐ ܕܳܢܚܺܝܢ ܗܘܰܘ ܥܰܠ ܢܒܺܝܷ̈ܐ ܓܶܠܝܴ̈ܢܶܐ ܢܰܗܺܝܪ̈ܶܐ܆ ܘܝܰܬܺܝܪܳܐܝܬ ܐܶܡܰܬܝ ܕܠܳܐ ܡܪܰܛܢܺܝܢ ܗܘܰܘ ܡܳܐ ܕܡܶܬܰܐܠܨܺܝܢ ܗܘܰܘ.
ܐܰܝܠܶܝܢ ܕܶܝܢ ܕܢܰܗܺܝܪܳܐܝܬ ܡܶܬܒܰܩܶܝܢ ܒܩܶܪܝܳܢܳܐ ܕܰܟܬܳܒ̈ܐ ܩܰܕܺܝ̈ܫܶܐ܆ ܕܠܺܝܠܳܐܝܬ ܡܶܫܟܚܺܝܢ ܠܡܶܕܰܥ ܕܒܽܐܘܠܨܳܢ̈ܐ ܣܰܓܺܝ̈ܐܐ ܡܶܬܡܰܛܶܝܢ ܗܘܰܘ ܢܒܺܝ̈ܐ ܠܓܶܠܝܴ̈ܢܶܐ ܐܰܠܳܗܳܝ̈ܐ. ܘܰܒܗܳܝ ܡܫܽܘܚܬܳܐ ܕܡܶܬܐܰܠܨܺܝܢ ܗܘܰܘ܆ ܡܶܬܥܰܠܶܝܢ ܗܘܰܘ ܒܓܶܠܝ̈ܢܶܐ. ܐܶܠܐ ܘܩܰܕܡܳܝܳܐ ܢܦܺܝܣܳܟ ܥܰܠܗܳܕܶܐ܆ ܡܽܘܫܶܐ ܛܽܘܒܬܳܢܳܐ ܕܡܶܢ ܒܳܬܰܪ ܕܰܗܘܳܐ ܒܪܳܥܝܽܘܬܳܐ ܕܥܳܢܴ̈ܐ ܐܰܪܒܥܺܝܢ ܫܢܺܝ̈ܢ. ܘܰܛܥܳܐ ܡܰܕܡܟܳܐ ܕܰܢܝܳܚܳܐ ܒܓܽܘܪܓܳܚܶܗ ܕܥܰܠ ܐܰܪܥܳܐ. ܗܳܝܕܶܝܢ ܒܫܽܘܠܳܡܳܐ ܕܽܐܘܠܨܳܢܳܐ ܕܰܐܪܒܥܺܝܢ ܫܢܺܝ̈ܢ. ܩܰܒܶܠ ܗܘܳܐ ܓܶܠܝܳܢܳܐ ܥܰܠ ܪܺܝܫ ܛܽܘܪܳܐ. ܘܰܚܙܳܐ ܗܘܳܐ ܢܽܘܪܳܐ ܟܰܕ ܫܰܪܝܳܐ ܒܣܰܢܝܳܐ ܘܣܰܢܝܳܐ ܟܰܕ ܢܛܺܝܪܳܐ ܕܠܐ ܝܰܩܕܳܢܳܐ. ܒܩܰܪܺܝܒܽܘܬܳܐ ܘܰܒܢܶܩܦܳܐ ܕܢܽܘܪܳܐ ܐܰܠܳܗܳܝܬܳܐ. ܗܳܟܰܢܳܐ ܐܳܦ ܛܽܘܒܳܢܳܐ ܐܺܠܺܝܳܐ ܡܶܢ ܒܳܬܰܪ ܕܩܳܡ ܥܠܰܘܗܝ ܕܶܝܢ ܪܕܽܘܦܝܳܐ ܕܺܐܝܙܒܶܝܠ܆ ܘܰܥܪܰܩ ܘܶܐܙܰܠ ܠܡܰܕܒܪܳܐ. ܘܫܶܐܠ ܡܰܘܬܳܐ ܡܶܢ ܐܰܠܳܗܳܐ ܠܢܰܦܫܶܗ. ܡܶܢ ܐܽܘܠܨܳܢܳܐ ܕܩܳܡ ܥܠܰܘܗܝ܆ ܘܨܳܡ ܐܰܪܒܥܺܝܢ ܐܺܝ̈ܡܳܡܺܝܢ ܘܰܐܪܒܥܺܝܢ ܠܰܝ̈ܠܰܘܳܢ܆ ܘܰܗܘܳܐ ܒܽܐܘܠܨܳܢܳܐ ܪܰܒܳܐ. ܘܗܳܝܕܶܝܢ ܡܶܫܬܘܶܐ ܗܘܳܐ ܠܰܡܩܰܒܳܠܽܘ ܠܚܶܙܘܳܐ ܗܰܘ ܕܚܺܝܠܳܐ. ܗܰܘ ܕܳܐܬܝܳܐ ܗܘܳܬ ܩܕܳܡܰܘܗܝ. ܪܽܘܚܳܐ ܬܰܩܺܝܦܬܳܐ ܕܰܡܦܰܪܩܳܐ ܛܽܘܪ̈ܐ ܘܰܡܬܰܒܪܳܐ ܫܽܘ̈ܥܐ ܩܕܳܡ ܡܳܪܝܳܐ. ܘܰܐܚܪ̈ܳܢܝܳܬܳܐ ܐܳܡܰܪ ܐܢܳܐ ܕܺܐܝܬ ܗܘܳܐ ܒܶܗ ܒܚܶܙܘܳܐ. ܙܰܘܥܳܐ ܐܳܡܰܪ ܐܢܳܐ ܘܢܽܘܪܳܐ ܘܩܳܠܐ ܕܡܰܡܠܠܳܐ ܪܰܟܺܝܟܳܐ ܐܳܦ ܡܶܠܬܳܐ ܕܡܶܢ ܦܽܘܡ ܠܦܽܘܡ܆ ܕܰܡܡܰܠܶܠ ܥܰܡܶܗ ܐܰܠܗܐ. ܥܰܡ ܓܶܠܝ̈ܢܶܐ ܣܰܓܺܝ̈ܐܐ ܕܰܗܘܰܘ ܥܰܠ ܢܒܺܝ̈ܐ. ܗܳܠܶܝܢ ܕܶܝܢ ܐܶܡܪܶܬ ܒܫܽܘܪܳܝܶܗ ܕܡܺܐܡܪܳܐ ܗܳܢܳܐ. ܥܰܠ ܕܫܶܡܥܶܬ ܠܰܢܒܺܝܳܐ ܕܰܡܒܰܓܶܢ ܡܶܢ ܐܽܘܠܨܳܢܳܐ ܣܰܓܺܝܳܐܐ ܘܳܐܡܰܪ:
ܪܰܚܶܡ ܥܠܰܝ ܐܰܠܗܳܐ ܡܶܛܠ ܕܕܳܫܰܢܝ ܒܰܪܢܳܫܳܐ. ܘܝܰܘܡܳܐ ܟܽܠܶܗ ܩܪܰܒܬܳܢܳܐ ܐܰܠܨܰܢܝ: ܕܳܫܽܘܢܝ ܒܥܶܠܕ̈ܒܳܒܰܝ ܟܽܠܶܗ ܝܰܘܡܳܐ. ܡܶܛܠ ܕܣܽܘܓܳܐܐ ܕܰܩܪ̈ܰܒܬܳܢܶܐ. ܐܶܬܬܪܺܝܡܘ ܥܠܰܝ. ܚܙܰܝܬ ܐܰܝܟܰܢܳܐ ܡܰܝܠܶܠ ܡܶܢ ܐܽܘܠܨܳܢܳܐ ܕܰܐܩܺܝܡ ܥܠܰܘܗܝ ܫܳܐܘܳܠ ܪܳܕܽܘܦܶܗ. ܟܰܕ ܓܰܒܺܝ ܬܠܳܬܳܐ ܐܰܠܦܺܝ̈ܢ ܓܰܒܪ̈ܶܐ ܓܒܰܝܴ̈ܐ ܡܶܢ ܟܽܠܶܗ ܝܺܣܪܳܐܝܠ. ܘܰܢܦܰܩ ܒܳܬܰܪ ܕܰܘܝܕ ܙܰܕܺܝܩܳܐ ܘܡܰܟܺܝܟܳܐ. ܟܰܕ ܡܶܬܬܪܺܝܡܺܝܢ ܗܘܰܘ ܥܰܠ ܕܰܘܺܝܕ. ܘܡܶܫܬܰܘܕܶܝܢ ܩܶܛܠܶܗ ܠܫܳܐܘܳܠ. ܘܡܶܛܠ ܕܡܶܬܒܰܣܰܡ ܗܘܳܐ ܒܡܰܪܓܫܳܢܽܘܬܳܐ ܕܓܶܠܝ̈ܢܶܐ ܢܰܗܺܝܪ̈ܶܐ ܠܐ ܡܶܬܪܗܶܒ ܗܘܳܐ ܒܟܽܠܶܗ ܗܰܘ ܐܽܘܠܨܳܢܳܐ ܕܰܩܪ̈ܰܒܬܳܢܶܐ. ܐܶܠܐ ܡܙܰܡܰܪ ܗܘܳܐ ܘܚܳܕܶܐ. ܘܳܐܡܰܪ ܟܰܕ ܦܨܺܝܚ.
ܒܺܐܝܡܳܡܳܐ ܠܐ ܐܶܕܚܰܠ ܡܶܛܠ ܕܰܥܠܰܝܟ ܗܽܘ ܬܟܺܝܠ ܐܢܳܐ. ܐܺܝܡܳܡܳܐ ܕܶܝܢ ܩܪܳܐ ܠܕܶܢܚܳܐ ܕܛܰܝܒܽܘܬܳܐ ܕܰܨܡܰܚ ܥܠܰܘܗܝ ܘܥܰܠܗܳܝ ܡܫܰܒܰܚ ܗܘܳܐ ܘܳܐܡܰܪ:
ܒܰܐܠܳܗܳܐ ܐܶܫܬܰܒܰܚ ܒܰܐܠܗܳܐ ܣܰܒܪܶܬ ܠܳܐ ܐܶܕܚܰܠ: ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ. ܗܰܘ ܠܰܡ ܕܰܒܚܶܫܽܘܟܳܐ ܗܘܳܐ ܠܳܐ ܡܨܶܐ ܕܡܰܐܟܶܐ. ܠܗܰܘ ܕܰܒܢܽܘܗܪܰܐ ܗ̄ܘ܆ ܘܰܟܡܳܐ ܐܶܢ ܐܰܚܺܝܕܺܝܢ ܚܰܪܒܳܐ ܒܥܶܠܕ̈ܒܳܒܶܐ ܘܠܳܐ ܡܶܕܶܡ ܡܣܰܓܶܦ ܓܪܰܡܗܽܘܢ ܠܗܰܘ ܕܒܰܐܠܗܳܐ ܡܶܬܓܰܘܰܣ. ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ. ܐܰܘ ܡܳܢܳܐ ܡܰܚܣܰܪ ܠܰܗܓܳܐ ܠܛܽܘܪܳܐ. ܘܰܥܕܰܡܳܐ ܠܶܐܡܰܬܝ ܡܥܰܙܶܐ ܩܽܘܠܳܥܳܐ ܒܬܰܟܬܽܘܫܶܗ. ܠܽܘܩܒܰܠ ܓܰܠܠܰܘ̈ܗܝ ܕܝܰܡܳܐ. ܘܰܐܝܟܰܢ ܥܳܒܕܺܝܢ ܕܰܪ̈ܶܐ ܓܶܠܐܷ ܕܚܰܒܬܳܐ ܢܽܘܪܳܐ ܐܳܟܶܠܬܳܐ. ܘܶܐܢܳܐ ܠܰܡ ܒܢܽܘܪܳܐ ܐܶܚܕܶܬ ܓܰܘܣܳܐ. ܘܥܰܠܗܳܝ ܠܳܐ ܕܳܚܶܠ ܐܢܳܐ ܡܶܢ ܚܰܒܬܳܐ. ܘܥܰܡ ܫܰܠܗܶܒܺܝܬܳܐ ܡܗܰܠܶܟ ܐܢܳܐ. ܘܠܳܐ ܡܶܬܪܗܶܒ ܐܢܳܐ ܡܶܢ ܥܽܘܪܳܐ ܕܥܳܒܰܪ. ܘܥܰܠ ܗܳܝ ܐܳܡܰܪ ܗܘܳܐ ܢܒܺܝܳܐ: ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ. ܘܡܰܘܣܶܦ ܬܽܘܒ:
ܘܟܽܠܶܗ ܝܰܘܡܳܐ ܡܶܬܡܰܠܟܺܝܢ ܗܘܰܘ ܥܠܰܝ: ܘܡܶܬܚܰܫܒܺܝܢ ܗܘܰܘ ܥܠܰܝ ܒܺܝܫܬܳܐ. ܐܶܠܐ ܘܠܳܐ ܡܶܕܶܡ ܡܥܺܝܩܺܝܢ ܠܗܰܘ ܕܰܥܠܰܝܟ ܡܫܰܪܰܪ. ܘܰܟܡܳܐ ܐܶܢ ܥܳܒܕܺܝܢ ܟܡܺܐܢ̈ܐ: ܠܥܶܩ̈ܒܰܝ ܒܰܠܚܽܘܕ ܢܶܚܙܽܘܢ ܟܰܕ ܡܶܬܦܰܨܶܐ ܐܢܳܐ.
ܢܶܛܫܽܘܢ ܘܢܶܥܡܪܽܘܢ ܘܗܶܢܽܘܢ ܥܶܩ̈ܒܰܝ ܢܶܛܪܽܘܢ. ܗܳܠܶܝܢ ܕܶܝܢ ܕܢܳܛܪܺܝܢ ܥܶܩ̈ܒܶܐ. ܗܳܠܶܝܢ ܐܶܢܘܢ ܕܪܳܗܛܺܝܢ ܘܠܳܐ ܡܰܕܪܟܺܝܢ ܠܗܰܘ ܐܰܝܢܳܐ ܕܡܶܬܪܕܶܦ ܗܘܳܐ ܠܗܽܘܢ. ܕܳܡܝܳܐ ܕܠܰܒܥܶܠܕ̈ܒܳܒܶܐ ܡܶܬܝܰܕ̈ܥܳܢܶܐ ܡܰܘܕܰܥ܆ ܗܳܠܶܝܢ ܕܶܝܢ ܠܫܽܘܠܳܡܳܐ ܕܽܐܘܪܚܳܐ ܕܙܰܕܺܝ̈ܩܶܐ ܡܣܰܟܶܝܢ. ܒܗܳܝ ܕܠܰܝܬ ܠܗܽܘܢ ܠܡܶܚܕܳܐ. ܐܶܠܐ ܡܳܐ ܕܰܒܫܽܘܠܳܡܳܐ ܡܰܪܡܶܝܢ ܠܰܚܠܺܝ̈ܨܶܐ ܬܚܶܝܬ ܪ̈ܶܓܠܰܝܗܘܢ. ܘܕܰܐܝܟ ܗܳܟܰܢܐ ܡܶܬܥܰܫܢܺܝܢ ܒܽܐܘ̈ܠܨܳܢܰܝܗܘܢ ܥܰܠ ܢܰܦܫܳܐ ܡܳܐ ܕܰܡܩܺܝܡܺܝܢ ܥܠܶܝܗ̇ ܩܪܳܒܳܐ ܟܰܕ ܡܰܪܡܶܝܢ ܒܳܗ̇ ܙܰܪܥܳܐ ܕܓܽܘܕܳܦܳܐ ܘܰܕܗܳܟܰܢܳܐ ܐܺܝܬܶܝܗ̇ ܡܦܰܫܶܩ ܢܒܺܝܳܐ. ܕܥܰܡ ܢܰܦܫܶܗ ܡܶܬܟܰܬܫܺܝܢ ܗܘܰܘ. ܟܰܕ ܐܳܡܰܪ:
ܐܰܝܟ ܕܣܰܟܺܝܘ ܠܢܰܦܫܝ ܘܶܐܡܰܪܘ ܕܠܰܝܬ ܠܳܗ̇ ܡܦܰܨܝܳܢܳܐ. ܡܰܢ ܐܶܢܘܢ ܗܳܢܽܘܢ ܕܰܡܣܰܟܶܝܢ ܗܘܰܘ ܠܢܰܦܫܶܗ ܕܰܢܒܺܝܳܐ. ܕܢܰܪܡܽܘܢܳܗ̇ ܡܶܢ ܐܰܠܗܳܐ. ܐܶܠܐ ܗܳܢܽܘܢ ܨܰܝܳܕ̈ܐ ܡܶܬܝܰܕܥܳܢ̈ܐ ܕܛܳܡܪܺܝܢ ܕܠܳܐ ܫܶܠܝܳܐ ܦܰܚ̈ܐ ܠܬܰܡܺܝ̈ܡܶܐ. ܘܥܰܠ ܗܳܝ ܡܥܺܝܪ ܠܶܗ ܠܰܐܠܗܳܐ ܕܰܒܪܽܘܓܙܳܐ ܢܕܽܘܢ ܐܶܢܘܢ. ܐܰܠܗܳܐ ܒܪܽܘܓܙܳܐ ܕܥܰܡ̈ܡܶܐ ܕܽܘܢ ܐܶܢܘܢ. ܘܠܳܐ ܡܶܬܪܡܶܐ ܗܘܳܐ ܢܒܺܝܳܐ ܕܰܢܠܽܘܛܶܗ ܠܫܳܐܘܳܠ ܘܠܰܐܝܠܶܝܢ ܕܥܰܡܶܗ. ܡܦܺܝܣܺܝܢܰܢ ܡܶܢ ܗܳܠܶܝܢ ܛܳܒ̈ܬܳܐ ܐܚܪ̈ܳܢܝܳܬܳܐ ܕܥܳܒܶܕ ܗܘܳܐ ܠܶܗ܆ ܗܰܘ ܕܒܰܢܩܳܫܶܗ ܡܰܥܪܶܩ ܗܘܳܐ ܡܶܢܶܗ ܪܽܘܚܳܐ ܒܺܝܫܬܳܐ. ܠܳܐ ܡܰܫܠܶܡ ܗܘܳܐ ܠܶܗ ܠܪܽܘܓܙܳܐ. ܐܳܦ ܗܳܫܳܐ ܕܶܝܢ ܡܶܟܺܝܠ ܥܰܡ ܢܒܺܝܳܐ ܢܺܐܡܰܪ: ܗܰܘ ܕܒܳܬܰܪ ܕܰܥܛܰܦܘ ܡܶܢ ܒܳܬܰܪ ܢܰܦܫܶܗ܆ ܗܳܢܽܘܢ ܕܢܳܛܪܺܝܢ ܗܘܰܘ ܐܽܘܪܚܶܗ ܒܦܰܚ̈ܐ ܕܰܛܡܰܪܘ ܠܶܗ܆ ܫܰܒܰܚ ܘܶܐܡܰܪ:
ܐܰܠܗܳܐ ܬܰܘܕܺܝܬܝ ܚܰܘܺܝܬܳܟ܆ ܣܺܝܡ ܠܰܡ ܕܶܡ̈ܥܰܝ ܩܕܳܡܰܝܟ ܘܰܒܣܶܦܪܳܟ. ܚܽܘܪ ܗܳܟܺܝܠ ܐܰܝܟܰܢܳܐ ܡܰܘܕܶܐ ܘܰܡܚܰܘܶܐ ܕܰܒܕܶܡܥ̈ܐ ܫܳܐܷܠ ܗܘܳܐ ܦܽܘܪܩܳܢܳܐ ܡܶܢ ܒܥܶܠܕ̈ܒܳܒܶܐ ܕܢܰܦܫܳܐ. ܘܥܰܠ ܕܰܬܪܺܝܨܳܐܝܬ ܐܰܫܰܪ ܗܘܳܐ ܠܗܶܝܢ. ܟܰܕ ܒܥܳܐ ܙܳܟܽܘܬܳܐ ܕܡܶܢ ܪ̈ܽܘܚܶܐ ܒܺܝ̈ܫܳܬܳܐ. ܡܦܺܝܣ ܗܘܳܐ ܕܰܒܣܶܦܪܳܐ ܐܰܠܗܳܝܳܐ ܢܶܬܬܣܺܝ̈ܡܳܢ ܕܶܡܥܰܘ̈ܗܝ. ܣܺܝܡ ܕܶܡܥܰܝ̈ ܩܕܳܡܰܝܟ ܘܰܒܣܶܦܪܳܟ. ܡܳܕܶܝܢ ܕܶܡܥ̈ܐ ܕܩܰܕܺܝ̈ܫܶܐ ܡܶܬܟܰܬܒܺܝܢ ܒܣܶܦܪܳܐ ܐܰܠܗܳܝܳܐ. ܘܰܩܕܳܡ ܐܰܠܗܳܐ ܐܰܝܟ ܩܕܳܫ̈ܐ ܓܒܰܝܴ̈ܐ ܡܶܬܬܣܺܝ̈ܡܳܢ.
ܘܗܳܝܕܶܝܢ ܢܶܗܦܟܽܘܢ ܒܥܶܠܕ̈ܒܳܒܰܝ ܠܒܶܣܬܰܪܗܘܢ. ܡܳܐ ܕܰܗܦܰܟܘ ܒܥܶܠܕ̈ܒܳܒܰܝ ܠܒܶܣܬܰܪܗܘܢ. ܕܠܐ ܢܺܐܬܽܘܢ ܠܘܳܬܝ. ܘܥܳܛܶܦ ܝܰܡܳܐ ܕܢܽܘܪܳܐ. ܐܰܝܟ ܝܰܡܳܐ ܣܽܘܡܳܩܳܐ ܕܚܰܢܶܩ ܠܡܶܨܪ̈ܳܝܶܐ. ܘܛܰܪܶܦ ܠܦܶܪܥܽܘܢ ܘܶܐܣܬܰܚܰܦܘ ܒܓܽܘܡܳܨܳܐ ܗܳܢܽܘܢ ܕܰܚܦܰܪܘ ܠܢܰܦܫܝ.
ܐܶܕܰܥ ܕܰܐܠܗܳܐ ܐܺܝܬ ܠܺܝ. ܘܰܠܡܶܠܬܶܗ ܕܰܐܠܗܳܐ ܐܶܫܰܒܰܚ. ܘܗܳܝܕܶܝܢ ܝܳܕܰܥ ܐܢܳܐ ܠܶܗ ܐܰܟܡܳܐ ܕܠܺܝ ܝܕܰܥ. ܐܶܠܐ ܘܡܳܐ ܕܩܳܐܡ ܥܠܰܝ ܢܶܟܠܐ ܕܡܶܢ ܒܥܶܠܕ̈ܒܳܒܶܐ. ܗܳܝܕܶܝܢ ܕܬܶܕܰܥ ܢܰܦܫܳܐ ܘܬܶܬܥܢܶܐ ܒܬܶܫܒ̈ܚܳܬܶܗ. ܘܥܰܡ ܢܒܺܝܳܐ ܬܺܐܡܰܪ: ܠܡܶܠܬܶܗ ܕܰܐܠܳܗܳܐ ܐܶܫܰܒܰܚ܆ ܘܗܳܪܟܳܐ ܠܰܘ ܢܒܺܝܐ ܒܰܠܚܽܘܕ ܙܰܡܰܪ ܘܩܰܠܶܣ ܠܡܶܠܬܳܐ ܐܰܠܗܳܐ ܥܰܡܰܢܘܐܝܠ. ܐܶܠܐ ܘܰܫܠܺܝܚܳܐ ܪܚܺܝܡܳܐ. ܗܳܢܳܐ ܩܰܕܶܡ ܩܪܳܝܗܝ ܠܰܐܠܳܗܳܐ ܡܶܠܬܳܐ. ܡܶܢ ܩܕܳܡ ܕܢܰܟܬܶܒ ܥܠܰܘܗܝ ܝܽܘܚܰܢܳܢ. ܘܰܚܕܳܐ ܗܝ ܡܰܟܬܒܳܢܽܘܬܳܐ ܕܰܢܒܺܝܐ ܕܰܘܝܕ ܘܕܰܫܠܺܝܚܳܐ ܝܽܘܚܰܢܳܢ ܟܳܪܽܘܙܳܐ ܕܰܣܒܰܪܬܳܐ. ܐܶܡܰܪ ܬܢܳܢ ܢܒܺܝܐ. ܠܡܶܠܬܶܗ ܕܰܐܠܗܳܐ ܐܶܫܰܒܰܚ. ܘܝܽܘܚܰܢܳܢ ܐܰܟܬܶܒ. ܒܪܺܝܫܺܝܬ ܐܺܝܬܰܘܗ̄ܝ ܗ̱ܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰܠܗܳܐ. ܘܰܐܠܗܳܐ ܐܺܝܬܰܘܗܝ ܗ̱ܘܳܐ ܗܽܘ ܡܶܠܬܳܐ (ܝܘܚܢܢ ܐ: ܐ). ܘܗܳܠܶܝܢ ܒܢܴ̈ܬ ܩܴ̈ܠܐ ܘܠܐ ܒܡܶܕܶܡ ܪ̈ܰܚܺܝܩܳܢ ܡܶܢ ܚܕܳܕ̈ܐ. ܘܰܕܗܽܘܝܽܘ ܐܰܠܗܳܐ ܗܰܘ ܕܰܡܫܰܒܰܚ ܗܘܳܐ ܠܶܗ ܢܒܺܝܳܐ ܘܳܐܡܰܪ:
ܒܰܐܠܳܗܳܐ ܬܟܺܝܠ ܐܢܳܐ ܠܳܐ ܐܶܕܚܰܠ. ܘܡܶܛܠܗܳܕܶܐ ܥܛܰܦ ܥܰܠ ܦܶܬܓܳܡܳܐ ܕܶܐܡܰܪ ܡܶܢ ܫܽܘܪܳܝܳܐ.
ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ: ܠܳܟ ܐܰܠܗܳܐ ܐܶܫܰܠܶܡ ܢܶܕܪ̈ܰܝ. ܘܰܒܬܰܘܕܺܝܬܳܐ ܐܶܕܰܒܰܚ ܠܳܟ. ܡܳܢܳܐ ܐܶܢܘܢ ܕܶܒܚ̈ܐ ܕܬܰܘܕܺܝܬܳܐ܆ ܠܐ ܗܳܐ ܓܰܠܝܳܐ ܗܝ ܕܥܰܠ ܡܰܘܕܝܳܢܽܘܬܳܐ ܕܥܰܡ̈ܡܶܐ ܡܗܰܝܡܢ̈ܐ ܐܳܡܰܪ.
ܡܶܛܠ ܕܦܰܨܺܝ̣ܬ ܢܰܦܫܝ ܡܶܢ ܡܰܘܬܳܐ. ܘܪ̈ܶܓܠܰܝ ܡܶܢ ܫܳܪ̈ܥܳܬܳܐ. ܗܰܘ ܕܶܐܡܰܪ ܕܡܰܫܰܪ ܠܰܢܒܺܝܳܐ ܘܡܰܘܕܶܐ ܒܡܶܬܦܰܨܝܳܢܽܘܬܳܗ̇ ܕܢܰܦܫܳܐ ܡܶܢ ܡܰܘܬܳܐ. ܘܺܝܕܰܥ ܕܰܐܝܢܳܐ ܐܺܝܬܰܘܗܝ ܡܰܘܬܳܗ̇ ܕܢܰܦܫܳܐ ܗܰܘ ܕܶܐܡܰܪ ܢܒܺܝܳܐ ܕܦܰܨܝܶܗ ܐܰܠܗܳܐ. ܥܰܠ ܩܪܳܒܳܐ ܡܶܬܝܰܕܥܳܢܳܐ ܐܰܡܺܝܪ. ܘܥܰܠ ܙܳܟܽܘܬܳܐ ܡܶܣܬܰܟܠܳܢܺܝܬܳܐ ܡܰܢܗܰܪ ܠܰܢ. ܡܶܛܠܗܳܕܐ ܒܫܽܘܠܳܡܶܗ ܡܰܝܬܶܐ ܘܳܐܡܰܪ.
ܕܶܐܫܦܰܪ ܩܕܳܡܰܝܟ ܐܰܠܗܳܐ ܒܰܐܪܥܳܐ ܕܚܰܝ̈ܐ. ܐܰܪܰܐ ܒܗܳܢܳܐ ܥܳܠܡܳܐ ܡܶܬܪܰܢܝܳܐ ܐܰܪܥܳܐ ܕܚܰܝ̈ܐ. ܟܡܳܐ ܐܶܢ ܡܶܬܝܰܬܰܪ ܐܢܳܫ ܒܥܳܠܡܳܐ ܗܳܢܳܐ ܘܰܟܡܳܐ ܐܶܢ ܥܳܬܰܪ ܘܝܳܪܶܒ. ܥܕܰܡܳܐ ܕܰܒܬܳܓܳܐ ܕܡܰܠܟܽܘܬܳܐ ܡܶܬܝܰܩܰܪ. ܒܰܐܪܥܳܐ ܕܡܳܝܽܘ̈ܬܶܐ ܐܺܝܬܰܘܗܝ ܡܶܬܚܰܒܠܳܢܰܐ ܗ̄ܘ. ܠܐ ܡܳܕܶܝܢ ܫܶܐܠ ܕܰܘܝܕ ܕܒܰܐܪܥܳܐ ܗܳܕܶܐ ܢܶܫܦܰܪ ܠܰܐܠܗܳܐ. ܐܶܠܳܐ ܒܰܐܪܥܳܐ ܕܚܰܝ̈ܐ. ܒܗܳܝ ܕܠܰܝܬ ܐܰܬܪܳܐ ܠܡܰܘܬܳܐ ܕܰܢܗܰܠܶܟ ܒܳܗ̇. ܒܗܳܝ ܕܰܠܥܶܠ ܡܶܢ ܫܡܰܝܳܐ. ܒܗܳܝ ܕܩܳܝܡܺܝܢ ܒܳܗ̇ ܩܢܽܘܡ̈ܐ ܕܚܰܝ̈ܐ. ܕܥܳܠܡ̈ܐ ܕܠܐ ܡܳܝܬܺܝܢ ܘܠܐ ܡܶܬܚܰܒܠܺܝܢ܆ ܕܠܳܗ̇ ܢܶܫܬܘܶܐ ܐܳܦ ܚܢܰܢ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܫܒܥܐ
ܡܰܘܕܰܥ ܕܰܐܝܟܰܢܳܐ ܠܒܶܝܬ ܓܰܘܣܳܐ ܕܰܐܠܳܗܳܐ ܪܳܗܶܛ ܗܘܳܐ ܕܰܘܺܝܕ ܡܶܢܩܕܳܡ ܫܳܐܘܳܠ. ܘܥܰܠ ܛܰܝܒܽܘܬܳܐ ܕܰܡܕܰܒܪܳܐ ܠܶܗ ܠܥܳܠܡܳܐ ܗܳܢܳܐ܆ ܘܥܰܠ ܗܰܝܡܳܢܽܘܬܳܐ ܕܰܒܗܰܘ ܥܳܠܡܳܐ ܕܡܰܠܐܟܷ̈ܐ ܡܶܬܢܰܨܚܳܐ.
ܐܰܠܗܐ ܪܰܒܳܐ ܘܦܳܪܽܘܩܰܢ ܝܶܫܘܥ ܡܫܺܝܚܳܐ. ܗܰܘ ܕܰܕܢܰܚ ܡܶܢ ܐܺܝܬܽܘܬܶܗ ܕܰܐܒܳܐ ܩܕܳܡ ܥܳܠܡ̈ܐ ܘܰܩܕܳܡ ܒܶܪ̈ܝܳܬܳܐ. ܘܟܰܕ ܐܶܬܳܐ ܠܰܐܪܥܳܐ ܒܓܶܠܝܳܢܶܗ ܦܰܓܪܳܢܳܝܳܐ ܘܰܕܢܰܚ ܡܶܢ ܒܬܽܘܠܬܳܐ ܒܰܒܣܰܪ. ܕܠܳܐ ܙܰܪܥܳܐ ܐܢܳܫܳܝܳܐ. ܘܠܳܐ ܙܽܘܘܳܓܳܐ ܦܰܓܪܳܢܳܝܳܐ ܠܳܐ ܡܶܬܐܰܡܪܳܢܳܐܝ̣ܬ܆ ܟܰܕ ܡܰܠܶܦ ܗܘܳܐ ܠܝܽܘ̈ܕܳܝܐ. ܠܳܐ ܡܶܬܛܦܺܝ̈ܣܳܢܶܐ ܨܶܒܝܳܢܰܘ̈ܗܝ ܕܰܐܒܳܐ ܕܰܠܘܳܬܗܘܢ܆ ܘܕܰܐܝܟܰܢܳܐ ܒܟܽܠܙܒܰܢ ܡܚܰܘܶܐ ܗܘܳܐ ܠܗܘܢ ܒܛܺܝܠܽܘܬܳܐ ܕܺܐܝܬ ܠܗܰܘ ܟܝܳܢܳܐ ܡܠܶܐ ܛܽܘܒ̈ܐ ܥܰܠ ܟܶܢܫܗܽܘܢ. ܐܳܡܰܪ ܗܘܳܐ ܒܡܰܠܦܳܢܽܘܬܳܐ ܕܺܝܠܗ. ܐܽܘܪܺܫܠܶܡ ܐܽܘܪܺܫܠܶܡ܆ ܩܳܛܠܰܬ ܢܒܺܝ̈ܐ. ܘܪܳܓܡܰܬ ܠܰܐܝܠܶܝܢ ܕܶܐܫܬܰܕܰܪܘ ܠܘܳܬܳܗ̇. ܟܡܳܐ ܙܰܒܢܺܝ̈ܢ ܨܒܺܝܬ ܠܰܡܟܰܢܳܫܽܘ ܒܢܰܝ̈ܟܝ ܐܰܝܟ ܬܰܪܢܳܓܽܘܠܬܳܐ ܕܟܳܢܫܳܐ ܦܰܪ̈ܽܘܓܶܝܗ̇ ܬܚܶܝܬ ܓܶܦܶܝ̈ܗ̇ ܘܠܳܐ ܨܒܰܝܬܽܘܢ (ܠܘܩܐ ܝܓ: ܠܕ؛ ܡܬܝ ܟܓ: ܠܙ). ܘܰܒܗܳܠܶܝܢ ܐܰܠܶܦ. ܕܰܐܝܟܰܢܳܐ ܩܢܶܐ ܪ̈ܰܚܡܶܐ ܗܰܘ ܟܝܳܢܳܐ ܡܠܶܐ ܛܽܘܒ̈ܐ܆ ܕܰܬܚܶܝܬ ܓܶܦܰܘ̈ܗܝ ܢܟܰܢܶܫ ܠܰܒܢܰܝ̈ܢܳܫܳܐ ܒܟܽܠܙܒܰܢ ܕܺܐܝܬܰܝܗܘܢ ܒܢܰܝܴ̈ܐ ܕܺܝܠܶܗ. ܘܡܶܢ ܦܳܪܰܚܬܳܐ ܗܳܕܐ ܕܰܠܘܳܬܰܢ ܡܶܢ ܩܽܘܪܒܳܐ ܥܳܡܪܳܐ. ܢܶܣܰܒ ܛܽܘܦܣܳܐ ܠܰܡܕܰܡܳܝܽܘ ܠܗܳܝ ܐܶܡܳܐ ܕܚܰܝ̈ܐ ܕܰܐܘܠܕܰܬ ܠܟܽܠ. ܕܰܐܟܙܢܳܐ ܕܦܳܪܰܚܬܳܐ ܗܳܕܐ ܡܚܺܝܠܬܳܐ. ܡܳܐ ܕܰܛܠܶܝܢ ܦܰܪ̈ܽܘܓܶܝܗ̇ ܠܰܡܩܳܡ ܠܽܘܩܒܰܠ ܚܰܝܘܰܬ ܟܶܢܦܳܐ ܘܛܰܝܪܳܐ ܕܳܐܐܰܪ. ܡܳܐ ܕܰܠܥܶܠ ܡܶܢܗܘܢ ܡܰܛܠ̱ܠܳܐ ܕܰܝܬܳܐ܆ ܐܰܘ ܒܽܘܙܺܝ̈ܩܶܐ ܟܦܺܝ̈ܦܰܝ ܛܶܦܪ̈ܶܐ. ܩܳܠܐ ܕܕܶܚܠܬܳܐ ܩܳܥܝܳܐ ܘܝܳܗܒܳܐ ܥܰܠ ܦܰܪ̈ܽܘܓܶܝܗ̇. ܘܟܕ ܠܗܘܢ ܡܣܰܪܗܒܳܐ ܠܘܳܬܳܗ̇ ܠܡܶܥܛܰܦ ܩܰܠܺܝܠܳܐܝܬ ܦܳܪܚܰܬ ܓܶܦܶܝ̈ܗ̇ ܒܪ̈ܰܚܡܶܐ ܘܰܡܚܰܡܠܳܐ ܠܓܰܘ ܡܶܢܗܽܘܢ ܠܦܰܪ̈ܽܘܓܶܝܗ̇. ܘܗܳܕܐ ܥܳܒܕܳܐ ܒܫܽܘ̈ܕܳܥܶܐ ܡܦܰܪ̈ܫܶܐ ܕܩܳܠܶܝ̈ܗ̇. ܠܰܘ ܓܝܪ ܚܰܕ ܢܺܝܫܳܐ ܩܰܢܝܳܐ ܡܳܐ ܕܩܳܪܝܳܐ ܠܗܘܢ ܠܡܶܠܩܰܛ. ܘܗܽܘ ܟܕ ܗܽܘ ܡܳܐ ܕܰܡܣܰܪܗܒܳܐ ܠܗܘܢ ܠܡܶܥܪܰܩ܆ ܘܡܳܐ ܕܶܝܢ ܕܰܠܬܽܘܪܣܳܝܳܐ ܡܙܰܡܢܳܐ ܠܗܘܢ܆ ܩܰܛܺܝܢ ܩܳܠܳܗ̇ ܘܰܟܪܶܐ. ܘܡܳܐ ܕܶܝܢ ܕܰܡܚܰܦܛܳܐ ܠܗܘܢ ܠܡܶܥܪܰܩ ܡܶܢ ܕܰܝܬܳܐ܆ ܣܒܺܝܣ ܘܰܥܒܶܐ ܩܳܠܗ̇ ܘܰܐܪܺܝܟܳܐ ܘܦܰܬܝܳܐ ܢܶܥܡܬܳܗ̇. ܘܰܒܗܳܕܐ ܕܡܽܘܬܳܐ ܚܰܘܝܰܬ ܢܰܦܫܳܗ̇ ܐܰܠܗܽܘܬܐ ܒܟܽܠܙܰܒܢܺܝ̈ܢ. ܟܰܕ ܩܳܪܝܳܐ ܐܳܦ ܡܬܰܪܣܝܳܐ ܒܫܽܘ̈ܚܠܳܦܶܝܗ̇ ܠܰܢܒܺܝ̈ܐ ܕܩܳܢܰܬ. ܟܰܕ ܡܶܬܬܰܠܝܳܐ ܒܗܘܢ ܠܡܶܥܪܰܩ ܠܘܳܬܳܗ̇ ܡܶܢ ܦܳܪܰܚܬܳܐ ܟܦܺܝܦܰܬ ܛܶܦܪ̈ܶܐ. ܗܳܝ ܕܦܳܪܚܳܐ ܥܰܠ ܩܶܢ̈ܐ ܕܩܰܕܺܝ̈ܫܶܐ ܠܰܡܚܰܒܳܠܽܘ ܒܡܰܩܽܘܪܳܗ̇܆ ܐܰܘܟܺܝܬ ܒܡܰܩܽܘܙܳܗ̇ ܟܦܺܝܦܳܐ ܠܰܒܢܰܝܴ̈ܐ ܕܰܐܠܗܐ܆ ܕܰܘܝܕ ܡܳܕܶܝܢ ܗܰܘ ܕܰܒܟܽܠܙܒܰܢ ܬܚܶܝܬ ܓܶܦܶܝ̈ܗ̇ ܕܰܐܠܗܽܘܬܐ. ܐܝܟ ܦܰܪܽܘܓܳܐ ܕܡܶܣܬܰܬܰܪ ܒܶܐܒܪ̈ܶܝܗ̇ ܕܶܐܡܶܗ ܡܶܢ ܛܰܝܪܳܐ܆ ܡܚܰܡܶܠ ܗܘܳܐ ܘܰܡܛܰܫܶܐ ܢܰܦܫܶܗ ܡܶܢ ܒܺܝܫܬܶܗ ܕܒܽܘܙܺܝܩܳܐ ܫܳܐܘܳܠ. ܡܰܙܡܽܘܪܳܐ ܗܳܢܐ. ܕܚܰܡܫܺܝܢ ܘܫܰܒܥܳܐ ܙܰܡܰܪ ܟܰܕ ܥܰܪܺܝܩ ܡܶܢ ܪܳܕܽܘܦܶܗ ܩܰܫܝܳܐ. ܘܡܶܢ ܪ̈ܰܦܶܐ ܕܢܶܨ̈ܐ ܕܰܢܦܰܩܘ ܥܰܡܶܗ ܒܳܬܰܪ ܝܰܘܢܳܐ ܬܰܡܺܝܡܳܐ ܘܥܰܠ ܕܰܐܝܟ ܦܰܪܽܘܓܳܐ ܕܰܫܚܺܝܩ ܡܶܢ ܩܳܠ ܓܶܦܶܝ̈ܗ̇ ܕܛܰܝܪܳܐ ܟܦܺܝܦܰܬ ܛܶܦܪ̈ܶܐ. ܘܰܠܟܠ ܦܶܢ̈ܝܳܢ ܡܦܰܪܦܰܪ ܓܶܦܰܘ̈ܗܝ ܙܥܽܘܪ̈ܶܐ ܕܡܶܫܬܰܘܙܰܒ ܡܶܢ ܕܰܝܬܳܐ. ܘܝܰܬܺܝܪܳܐܝܬ ܡܶܬܐܶܠܶܨ ܡܳܐ ܕܕܳܡܶܝܢ ܠܰܕܗܰܘ ܝܳܗܶܒ ܗܘܳܐ܆ ܒܬܶܫܒܽܘܚܬܳܐ ܗܳܕܐ ܡܙܰܡܰܪ ܗܘܳܐ ܘܳܐܡܰܪ:
ܪܰܚܶܡ ܥܠܰܝ ܐܰܠܗܐ ܡܶܛܠ ܕܒܳܟ ܗܽܘ ܡܣܰܒܪܳܐ ܢܰܦܫܝ: ܘܰܒܛܶܠܳܠܳܐ ܕܟܶܢ̈ܦܰܝܟ ܐܶܣܬܰܬܰܪ. ܥܕܰܡܳܐ ܕܢܶܥܒܰܪ ܕܠܽܘܚܝܳܐ. ܚܙܰܝܬ ܐܰܝܟܰܢܳܐ ܡܶܬܓܰܘܰܣ ܗܘܳܐ ܒ̈ܛܶܠܳܠܶܐ ܕܓܶܦ̈ܐ ܕܰܐܠܗܽܘܬܐ. ܟܶܢܦ̈ܐ ܕܶܝܢ ܚܠܳܦ ܓܶܦ̈ܐ ܒܕܽܘ̈ܟܝܳܬܳܐ ܣܰܓܺܝ̈ܐܐܬܳܐ ܡܶܫܟܚܺܝܢܰܢ ܠܰܟܬܳܒ̈ܐ ܩܰܕܺܝ̈ܫܶܐ ܕܳܐܡܪܺܝܢ. ܘܡܶܛܠܗܳܕܐ ܛܽܘܒܬܳܢܐ ܕܰܘܝܕ ܟܕ ܚܳܐܪ ܗܘܳܐ ܒܪ̈ܰܦܶܐ ܕܢܷ̈ܨܶܐ ܘܰܒܢܶܫ̈ܒܶܐ ܡܰܒܶܐܫܳܢ̈ܐ ܕܢܰܩܺܝܦܺܝܢ ܗܘܰܘ ܠܫܳܐܘܳܠ. ܘܰܕܗܽܘ ܡܰܠܟܳܐ ܐܝܟ ܒܽܘܙܺܝܩܳܐ ܘܠܰܘ ܐܝܟ ܢܶܫܪܳܐ܆ ܥܰܡܗܘܢ ܪܳܕܶܦ ܗܘܳܐ ܠܗܰܘ ܝܰܘܢܳܐ ܬܰܡܺܝܡܳܐ ܕܰܘܝܕ. ܚܰܟܺܝܡܳܐܝܬ ܥܳܪܶܩ ܗܘܳܐ ܠܰܬܚܶܝܬ ܓܶܦ̈ܐ ܕܗܳܝ ܐܶܡܳܐ ܕܚܰܝ̈ܐ. ܝܳܕܰܥ ܗܘܳܐ ܓܝܪ ܕܠܰܝܬ ܕܰܡܨܶܐ ܕܡܶܢ ܬܚܶܝܬ ܟܶܢܦ̈ܐ ܗܳܠܝܢ ܠܡܶܚܛܰܦ. ܘܰܡܦܺܝܣ ܗܘܳܐ ܕܒܶܗ ܒܛܶܠܳܠܳܐ ܢܶܬܟܰܣܶܐ. ܥܕܰܡܳܐ ܕܢܶܥܒܰܪ ܕܠܽܘܚܝܳܐ ܕܡܰܒܶܐܫܳܢ̈ܐ. ܗܳܝܕܝܢ ܢܶܬܶܠ ܩܴ̈ܠܐ ܕܠܐ ܕܶܚܠܬܳܐ ܘܰܒܗܘܢ ܢܶܩܪܶܐ ܠܗܰܘ ܕܰܡܬܰܪܣܶܐ ܠܰܒܢܰܘ̈ܗܝ ܒܠܶܩܛܳܐ ܕܚܰܝ̈ܐ. ܕܳܐܦ ܢܶܬܶܠ ܠܡܶܣܬܰܬܳܪܽܘ ܡܶܢ ܕܠܽܘܚܝܳܐ ܕܰܥܒܰܪ.
ܗܳܝܕܶܝܢ: ܐܶܩܪܶܐ ܠܰܐܠܗܳܐ ܡܪܰܝܡܳܐ ܘܠܰܐܠܗܳܐ ܦܳܪܽܘܩܝ: ܕܫܰܕܰܪ ܡܶܢ ܫܡܰܝܳܐ ܘܦܰܪܩܰܢܝ: ܘܚܰܣܶܕ ܠܰܒܥܶܠܕ̈ܒܳܒܰܝ. ܘܫܰܕܰܪ ܐܰܠܳܗܳܐ ܛܰܝܒܽܘܬܶܗ ܘܩܽܘܫܬܶܗ: ܘܰܦܪܰܩ ܢܰܦܫܝ ܡܶܢ ܟܰܠܒ̈ܐ. ܐܶܢ ܟܽܠ ܚܛܺܝܬܳܐ ܗܳܝ ܕܡܶܬܥܰܒܕܳܐ ܡܶܢ ܗܰܘ ܡܰܠܦܳܢܳܐ ܒܺܝܫܳܐ. ܗܰܘ ܕܰܗܘܳܐ ܡܶܢ ܒܪܺܝܫܺܝܬ ܩܳܛܶܠ ܐܢܳܫܳܐ ܡܶܬܝܰܠܦܳܐ. ܡܳܕܝܢ ܟܽܠ ܐܰܝܟܳܐ ܕܪܳܗܶܛ ܚܰܣܳܡܳܐ ܬܰܡܳܢ ܐܶܢܘܢ ܡܫܰܡܫܳܢܰܘ̈ܗܝ ܕܰܒܥܶܠܕܰܪܳܐ. ܡܳܕܶܝܢ ܥܰܡ ܫܳܐܘܳܠ ܢܳܦܩܺܝܢ ܗܘܰܘ ܚܰܝ̈ܠܰܘܳܬܳܐ ܡܶܬܝܰܕܥܳܢ̈ܐ ܠܡܶܪܕܰܦ. ܠܕܰܘܝܕ ܟܰܣܝܳܐܝ̣ܬ. ܥܰܠܗܳܝ ܓܶܝܪ ܛܳܦܶܣ ܗܘܳܐ ܘܡܶܣܬܰܬܰܪ ܗܘܳܐ ܒܟܶܢ̈ܦܰܘܗܝ ܕܰܐܠܗܳܐ. ܙܳܕܶܩ ܠܰܢ ܡܳܕܶܝܢ ܕܰܠܘܳܬ ܣܽܘ̈ܟܳܠܐ ܕܬܶܐܘܳܪܺܝܰܐ ܡܶܬܝܰܕܥܳܢܺܝܬܳܐ ܢܶܬܦܢܶܐ. ܘܰܒܗܰܘ ܩܪܳܒܳܐ ܕܙܳܐܱܥ ܗܘܳܐ ܡܶܢܶܗ ܕܰܘܝܕ ܢܶܣܬܰܟܰܠ. ܘܠܳܐ ܢܰܣܒܰܪ ܕܰܥܕܰܡܳܐ ܠܫܶܡܥܳܐ ܒܰܪܳܝܳܐ. ܩ̈ܠܐ ܗܳܠܝܢ ܩܰܕܺܝ̈ܫܶܐ. ܐܰܡܺܝܪܺܝܢ. ܡܶܛܠܗܳܕܐ ܡܰܫܡܰܥ ܗܘܳܐ ܠܗܘܢ ܒܩܺܝܬܳܪܳܐ ܟܰܕ ܡܙܰܡܰܪ ܠܗܘܢ: ܕܢܶܪܕܽܘܦ ܒܗܽܘܢ ܠܚܰܝ̈ܠܰܘܳܬܳܐ ܕܣܳܥܶܝܢ ܗܘܰܘ ܥܰܠ ܢܰܦܫܶܗ ܠܰܡܚܰܒܳܠܽܘ. ܘܒܰܙܒܰܢ ܐܰܝܟ ܛܰܝܪܳܐ ܕܡܰܫܡܥܳܐ ܩܳܠܐ ܕܓܶܦܶܝ̈ܗ̇ ܒܳܐܐܱܪ. ܘܒܰܙܒܰܢ ܐܰܝܟ ܟܰܠܒ̈ܐ ܕܰܦܥܺܝܪ ܠܗܘܢ ܦܽܘܡܗܘܢ ܠܰܡܚܰܒܳܠܽܘ. ܘܥܰܠܗܳܝ ܐܳܡܰܪ ܕܫܰܕܰܪ ܐܰܠܗܐ ܡܶܢ ܫܡܰܝܳܐ ܘܦܰܪܩܰܢܝ. ܐܶܡܰܬܝ ܫܰܕܰܪ ܘܦܰܪܩܶܗ ܠܰܢܒܺܝܐ. ܡܳܢܳܐ ܫܰܕܰܪ ܟܕ ܦܰܪܩܶܗ ܠܰܡܙܰܡܪܳܢܳܐ. ܫܰܕܰܪ ܠܰܡ ܛܰܝܒܽܘܬܶܗ ܘܩܽܘܫܬܶܗ. ܠܰܘ ܟܺܐܢܽܘܬܳܐ ܫܰܕܰܪ. ܟܺܐܢܽܘܬܳܐ ܓܝܪ ܒܝܰܕ ܢܳܡܽܘܣܳܐ ܫܰܕܰܪ. ܛܰܝܒܽܘܬܳܐ ܒܝܰܕ ܝܶܫܘܥ ܡܫܺܝܚܳܐ ܐܶܫܬܰܕܪܰܬ ܠܶܗ ܠܥܳܠܡܳܐ. ܘܥܰܠܗܳܕܐ ܐܶܡܰܪ ܢܒܺܝܐ ܕܒܰܐܓܽܘܢܳܐ ܕܥܰܡܗܘܢ ܫܠܶܡ ܚܰܝܰܘ̈ܗܝ
ܘܕܶܡܟܶܬ ܟܰܕ ܠܰܡ ܕܠܺܝܚ ܐܢܳܐ. ܕܠܽܘܚܝܳܐ ܓܶܝܪ ܗܳܢܐ. ܫܰܝܢܳܐ ܪܰܒܳܐ ܗܘܳܐ ܠܢܰܦܫܶܗ ܕܰܢܒܺܝܐ. ܡܶܛܠ ܕܰܟܝܳܢܳܐ ܕܰܒܢܰܝ̈ܢܳܫܳܐ ܫܰܦܝܳܐ ܘܫܰܦܺܝܪܳܐ ܐܶܬܥܒܶܕ ܡܶܢ ܐܰܠܗܳܐ. ܘܡܳܐ ܕܡܶܕܶܡ ܝܰܬܺܝܪܳܐ ܡܶܬܚܙܶܐ ܒܶܗ ܡܶܢ ܗܰܘ ܕܰܠܩܽܘܒܠܳܐ܆ ܐܳܡܰܪ ܓܶܝܪ ܡܙܰܡܪܳܢܳܐ:
ܒܢܰܝ̈ܢܳܫܳܐ ܫܶܢܰܝ̈ܗܘܢ ܢܰܝ̈ܙܟܶܐ ܘܓܶܐܪ̈ܶܐ. ܘܠܶܫܳܢܗܽܘܢ ܐܰܝܟ ܣܰܝܦܳܐ ܚܰܪܺܝܦܳܐ. ܨܶܒܝܳܢܳܐ ܕܰܐܝܟ ܗܳܢܐ ܩܢܶܝܢ ܗܘܰܘ ܐܰܝܠܶܝܢ ܕܰܢܦܰܩܘ ܒܳܬܪܶܗ ܠܡܶܪܕܦܶܗ܆ ܗܳܟܰܢܳܐ ܓܝܪ ܒܰܫܪܳܪܳܐ ܡܶܫܟܰܚ ܡܫܰܚܠܶܦ ܠܳܗ̇ ܐܳܟܶܠܩܰܪܨܳܐ. ܠܢܰܦܫܳܐ ܨܶܝܕ ܩܶܛܠܳܐ ܕܒܺܝܫܬܳܐ ܡܳܐ ܕܡܶܬܠܰܒܟܳܐ ܒܚܶܡܬܳܐ. ܕܗܽܘ ܠܶܫܳܢܶܗ ܣܰܝܦܳܐ ܢܶܗܘܶܐ. ܘܰܒܫܶܢܰܘ̈ܗܝ ܢܰܝܙ̈ܟܶܐ ܘܓܶܐܪ̈ܶܐ ܢܶܬܚܙܽܘܢ. ܒܪܰܡ ܢܒܺܝܐ ܠܘܳܬ ܗܰܘ ܕܰܡܦܰܨܶܐ ܠܳܗ̇ ܡܙܰܡܰܪ ܠܗ̇ ܘܳܐܡܰܪ:
ܐܶܬܬܪܺܝܡ ܥܰܠ ܫܡܰܝܳܐ ܐܰܠܗܐ. ܘܥܰܠ ܟܽܠܳܗ̇ ܐܰܪܥܳܐ ܐܺܝܩܳܪܳܟ. ܐܰܢܬ ܗܽܘ ܕܡܶܢ ܗܳܠܝܢ ܡܪܺܝܡ ܐܰܢܬ ܠܗܰܘ ܕܳܐܚܶܕ ܒܳܟ ܓܰܘܣܳܐ. ܠܘܳܬܳܟ ܡܥܰܠܶܐ ܐܰܢܬ ܘܒܳܟ ܡܶܬܬܪܺܝܡ ܘܡܶܬܦܰܨܶܐ. ܘܚܳܛܶܦ ܠܗܽܘܢ ܠܦܰܚ̈ܐ ܘܥܰܡܶܗ ܫܳܩܶܠ ܠܗܘܢ ܐܰܝܟ ܦܳܪܰܚܬܳܐ ܕܨܳܦܰܚ ܦܰܚܳܐ ܒܳܬܪܳܗ̇ ܘܠܐ ܨܳܐܕ ܠܳܗ̇. ܟܰܕ ܠܳܐ ܐܰܚܕܳܗ̇ ܡܰܠܝܳܐܝ̣ܬ ܫܩܰܠܬܶܗ ܥܰܡܳܗ̇ ܘܦܶܪܚܰܬ. ܥܰܠܗܳܝ ܢܰܦܫܝ ܒܳܬܪܳܟ ܠܪܰܘܡܳܐ ܪܳܗܛܳܐ.
ܘܗܶܢܘܢ ܕܶܝܢ: ܡܨܺܝܕܬܳܐ ܬܰܩܶܢܘ ܠܪ̈ܶܓܠܰܝ. ܘܓܽܘܡܳܨܳܐ ܚܦܰܪܘ ܠܢܰܦܫܝ ܘܰܢܦܰܠܘ ܒܓܰܘܶܗ. ܒܕܽܘ̈ܟܝܳܬܳܐ ܣܰܓܺܝ̈ܐܬܳܐ ܫܳܡܥܺܝܢܰܢ ܕܰܡܒܰܕܩܳܐ ܥܰܠ ܡܳܪ̈ܽܘܕܶܐ ܢܒܺܝܽܘܬܳܐ. ܕܰܒܦܰܚܰܝ̈ܗܘܢ ܡܶܬܬܰܚܕܺܝܢ ܘܢܳܦܠܺܝܢ ܘܰܕܗܰܘ ܟܡܺܐܢܳܐ. ܕܛܰܝܶܒܘ ܠܒܰܪܢܳܫܳܐ ܩܰܕܡܳܝܳܐ ܥܠܰܝܗܘܢ ܥܳܛܶܦ ܢܶܟܠܐ ܕܒܶܗ. ܐܶܫܰܥܝܳܐ ܓܶܝܪ ܐܶܡܰܪ ܥܰܠ ܗܰܘ ܚܶܘܝܳܐ ܥܩܰܠܩܠܳܐ܆ ܕܰܒܡܰܣܰܐܬܳܐ ܠܰܡ ܕܰܐܟܺܝܠ ܠܶܗ ܢܶܬܬܟܺܝܠ (ܐܫܥܝܐ ܟܙ: ܚ). ܕܰܒܗܰܘ ܟܰܝܠܳܐ ܕܛܳܥܝܽܘܬܳܐ ܕܰܐܪܡܺܝ ܒܢܰܦܫܶܗ ܕܳܐܕܳܡ ܘܚܰܒܠܶܗ ܡܶܢ ܐܰܠܗܐ ܗܳܪܟܳܐ ܕܝܢ ܐܶܡܰܪ ܡܙܰܡܪܳܢܳܐ: ܕܰܒܗܰܘ ܓܽܘܡܳܨܳܐ ܕܰܚܦܰܪܘ ܠܢܰܦܫܝ ܕܒܶܗ ܬܶܦܶܠ܆ ܗܶܢܽܘܢ ܢܦܰܠܘ ܘܶܐܬܛܒܰܥܘ. ܘܡܶܛܠܗܳܕܐ ܟܰܕ ܡܰܘܕܶܐ ܡܙܰܡܰܪ ܗܘܳܐ ܥܰܠ ܦܽܘܨܳܝܶܗ ܐܳܡܰܪ:
ܡܰܬܩܰܢ ܗܽܘ ܠܶܒܝ ܐܰܠܗܳܐ ܡܰܬܩܰܢ ܗܽܘ ܠܶܒܝ. ܐܶܫܰܒܰܚ ܘܶܐܙܰܡܰܪ. ܠܳܐ ܠܰܡ ܡܒܰܛܠܺܝܢ ܨܰܝܳܕ̈ܐ ܢܰܟܽܘܠܬܳܢ̈ܐ ܡܶܢ ܗܳܝ ܕܰܐܬܩܶܢ ܠܶܒܝ ܘܶܐܫܰܒܰܚ ܘܶܐܙܰܡܰܪ ܩܕܳܡܰܝܟ. ܐܶܠܐ ܟܰܕ ܚܳܕܶܐ ܐܢܳܐ ܕܶܐܬܦܰܨܺܝܬ ܘܡܰܘܕܶܐ ܐܢܳܐ ܕܶܝܢ ܕܶܐܬܚܰܝܰܒܘ ܒܥܶܠܕ̈ܒܳܒܰܝ ܘܰܢܦܰܠܘ ܒܰܡܨܺܝܕܬܳܐ ܗܳܝ ܕܰܛܡܰܪܘ. ܡܪܰܡܪܰܡ ܐܢܳܐ ܘܰܡܫܰܒܰܚ ܐܢܳܐ. ܘܡܶܛܠ ܗܳܕܐ.
ܐܶܬܬܪܺܝܡ ܟܶܢܳܪܝ ܘܶܐܬܬܥܺܝܪ ܩܺܝܬܳܪܳܐ ܘܟܶܢܳܪܳܐ. ܘܶܐܢܳܐ ܐܶܬܬܥܺܝܪܶܬ ܒܨܰܦܪܳܐ. ܒܰܕܡܽܘܬܳܐ ܗܳܘܶܐ ܟܶܢܳܪܳܐ ܕܰܢܒܺܝܽܘܬܳܐ ܘܩܺܝܬܳܪܳܐ ܕܩܰܕܺܝ̈ܫܶܐ. ܥܕܰܡܳܐ ܕܰܫܕܳܐ ܐܶܢܘܢ ܥܰܡܰܢܘܐܝܠ. ܠܨܰܝܳܕ̈ܐ ܡܶܬܝܰܕ̈ܥܳܢܶܐ ܒܰܡܨܺܝܕܬܗܘܢ. ܟܕ ܢܦܰܠܘ ܗܘܰܘ ܒܓܽܘܡܳܨܳܐ ܕܰܚܦܰܪܘ. ܒܳܥܶܐ ܢܒܺܝܳܐ ܕܢܶܬܬܥܺܝܪ ܒܨܰܦܪܳܐ ܕܰܩܝܳܡܬܳܐ ܕܡܶܠܬܳܐ ܘܢܶܦܽܘܩ ܠܙܽܘܡܳܪܳܐ ܥܰܡܶܗ ܒܶܝܬ ܥܰܡ̈ܡܶܐ ܕܶܢܚܳܐ ܕܓܶܠܝܳܢܰܘ̈ܗܝ. ܥܰܠ ܗܳܕܐ ܡܰܝܬܶܐ ܘܳܐܡܰܪ:
ܐܰܘܕܶܐ ܠܳܟ ܒܥܰܡ̈ܡܶܐ ܐܰܠܗܳܐ. ܘܠܰܫܡܳܟ ܐܶܙܰܡܰܪ ܒܶܐܡ̈ܘܳܬܳܐ. ܗܰܘ ܕܶܐܡܰܪ ܕܶܐܢܳܐ ܐܶܬܬܥܺܝܪܶܬ ܒܨܰܦܪܳܐ. ܨܰܦܪܳܐ ܗܽܘܝܽܘ ܥܰܡܰܢܘܐܝܠ ܗܰܘ ܕܶܐܡܰܪ ܠܰܫܠܺܝ̈ܚܶܐ ܩܰܕܺܝ̈ܫܶܐ. ܕܠܰܬܠܳܬܳܐ ܝܰܘ̈ܡܺܝܢ ܩܳܐܡ ܐܢܳܐ (ܡܬܝ ܝܘ: ܟܐ، ܝܙ :ܟܓ، ܟ: ܝܛ ܡܪܩܘܣ ܚ: ܠܐ، ܛ: ܠܐ، ܝ: ܠܕ ܠܘܩܐ ܛ: ܟܒ، ܝܚ: ܠܓ، ܟܕ: ܙ، ܡܘ). ܗܽܘ ܢܦܰܩ ܐܰܠܶܦ ܠܥܰܡ̈ܡܶܐ ܘܶܐܡ̈ܘܳܬܳܐ ܕܢܰܘܕܘܢ ܠܰܐܒܳܐ. ܕܗܽܘ ܢܶܗܘܶܐ ܬܰܘܕܺܝܬܳܐ ܒܦܽܘܡܳܐ ܕܺܝܠܗܘܢ. ܒܳܬܰܪ ܗܳܠܝܢ ܡܦܰܫܶܩ ܢܒܺܝܳܐ ܟܡܳܐ ܝܶܪܒܰܬ ܛܰܝܒܽܘܬܳܐ ܕܦܽܘܪܩܳܢܳܐ. ܘܰܟܡܳܐ ܡܥܰܠܝܳܐ ܘܪܰܒܳܐ ܗܰܝܡܳܢܽܘܬܶܗ ܕܡܶܠܬܳܐ:
ܡܶܛܠ ܠܰܡ ܕܶܐܬܬܪܺܝܡܰܬ ܥܕܰܡܳܐ ܠܰܫܡܰܝܳܐ ܛܰܝܒܽܘܬܳܟ. ܘܰܥܕܰܡܳܐ ܠܰܫܡܱ̈ܝ ܫܡܰܝܳܐ ܗܰܝܡܳܢܽܘܬܳܟ. ܒܗܳܢܐ ܠܰܡ ܥܳܠܡܳܐ ܥܕܰܡܳܐ ܠܰܫܡܰܝܳܐ ܡܬܺܝܚܳܐ ܛܰܝܒܽܘܬܳܟ. ܘܠܰܝܬ ܕܳܐܚܶܕ ܬܰܪܥܳܐ ܒܰܐܦܰܝ̈ ܬܰܝܳܒ̈ܐ. ܘܥܰܠ ܒܺܝ̈ܫܶܐ ܘܥܰܠ ܛܳܒ̈ܐ ܕܳܢܚܺܝܢ ܪ̈ܰܚܡܶܐ ܕܰܡܕܰܒܪܳܢܽܘܬܶܗ ܕܰܐܠܗܐ. ܐܰܝܟ ܕܶܐܡܰܪ ܡܳܪܢ ܥܰܠ ܐܰܒܳܐ. ܕܡܰܕܢܰܚ ܫܶܡܫܶܗ ܥܰܠ ܛܳܒ̈ܐ ܘܥܰܠ ܒܺܝ̈ܫܶܐ. ܘܡܰܚܶܬ ܡܶܛܪܶܗ ܥܰܠ ܟܺܐܢ̈ܐ ܘܥܰܠ ܥܰܘܴ̈ܠܶܐ (ܡܬܝ ܗ: ܡܗ). ܒܗܳܢܐ ܥܳܠܡܳܐ ܡܳܕܶܝܢ. ܛܰܝܒܽܘܬܳܐ ܘܪ̈ܰܚܡܶܐ ܡܕܰܒܪܺܝܢ. ܗܳܢܘܢ ܕܝܢ ܕܶܐܬܢܰܨܰܚܘ ܒܗܰܝܡܳܢܽܘܬܳܐ ܘܡܰܘܕܶܐ ܒܗܘܢ ܩܕܳܡ ܐܰܒܳܐ ܘܰܩܕܳܡ ܡܰܠܰܐܟ̈ܐ ܘܗܳܢܘܢ ܕܝܢ ܕܟܰܕ ܡܕܰܒܪܳܐ ܠܗܘܢ ܛܰܝܒܽܘܬܳܐ ܒܥܳܠܡܳܐ ܗܳܢܐ: ܢܣܰܒܘ ܡܰܘ̈ܗܒܳܬܳܐ ܘܰܥܒܰܕܘ ܚܰܝ̈ܠܐ ܒܰܫܡܶܗ ܕܰܒܪܳܐ. ܘܶܐܬܢܰܒܺܝܘ ܒܰܫܡܶܗ ܐܰܝܟ ܕܶܐܡܰܪ: ܥܰܠ ܕܰܒܕܽܘܒܳܪ̈ܰܝܗܘܢ ܐܰܝܟ ܠܳܐ ܡܗܰܝܡ̈ܢܶܐ ܣܥܰܪܘ. ܐܳܡܰܪ ܠܗܘܢ ܟܰܕ ܩܳܝܡܺܝܢ ܠܒܰܪ ܡܶܢ ܬܰܪܥܳܐ ܐܰܡܺܝܢ ܐܳܡܰܪ ܐܢܳܐ ܠܟܘܢ ܐܰܪܚܶܩ. ܐܰܪܚܶܩܘ ܠܟܽܘܢ ܡܶܢܝ ܦܳܠܚܰܝ̈ ܫܽܘܩܪܳܐ (ܠܘܩܐ ܝܓ: ܟܙ). ܗܳܝܕܶܝܢ ܡܶܢ ܒܳܬܰܪ ܕܫܳܩܶܠ ܫܽܘܠܳܡܳܐ ܙܰܒܢܳܗ̇ ܕܛܰܝܒܽܘܬܳܐ ܒܰܡܕܰܒܪܳܢܽܘܬܳܐ ܕܥܳܠܡܳܐ ܗܳܢܐ ܘܡܶܬܓܠܶܐ ܘܡܶܬܢܰܨܰܚ ܒܥܳܠܡ̈ܐ ܥܶܠܳܝ̈ܐ ܙܰܒܢܳܗ̇ ܕܗܰܝܡܳܢܽܘܬܳܐ܆ ܘܦܳܝܫܳܐ ܛܰܝܒܽܘܬܳܐ ܡܶܢ ܡܕܰܒܪܳܢܽܘܬܳܐ ܘܠܳܒܟܳܐ ܗܰܝܡܳܢܽܘܬܳܐ ܘܟܺܐܢܽܘܬܳܐ ܡܕܰܒܪܳܢܽܘܬܳܐ ܕܟܽܠ ܥܳܠܡܺܝ̈ܢ. ܡܶܬܥܰܠܶܐ ܘܡܶܬܬܪܺܝܡ ܠܥܶܠ ܡܶܢܟܽܠ ܕܰܝܳܢܳܐ. ܐܰܝܟ ܕܳܐܦ ܐܶܡܰܪ ܢܒܺܝܳܐ:
ܐܶܬܬܪܺܝܡ ܥܰܠ ܫܡܰܝܳܐ ܐܰܠܗܳܐ ܘܥܰܠ ܟܽܠܳܗ̇ ܐܰܪܥܳܐ ܐܺܝܩܳܪܳܟ. ܡܳܐ ܓܝܪ ܕܶܐܬܚܙܺܝ ܕܰܝܳܢܳܐ ܕܦܳܣܺܝ̈ܩܳܬܳܐ ܘܰܐܢܺܝܚ ܒܰܓܢܽܘܢܶܗ ܠܩܰܕܺܝ̈ܫܶܐ. ܘܫܰܕܰܪ ܠܬܰܫܢܺܝܩܳܐ ܠܥܳܒ̈ܕܰܝ ܒܺܝ̈ܫܳܬܳܐ. ܠܳܐ ܡܶܟܺܝܠ ܩܳܥܶܐ ܕܰܗܘܳܐ ܡܶܬܚܙܶܐ. ܘܠܳܐ ܡܶܢ ܐܰܪ̈ܥܳܢܶܐ ܕܡܶܬܥܰܠܶܝܢ ܠܒܽܘܣܳܡܶܗ. ܘܠܳܐ ܡܶܢ ܫܡܰܝܴ̈ܢܶܐ. ܒܪܰܡ ܕܝܢ ܗܳܝ ܕܡܶܬܬܪܺܝܡ ܥܰܠ ܫܡܰܝܳܐ. ܕܡܶܬܓܠܶܐ ܡܶܢ ܥܶܠܳܝ̈ܐ ܡܰܘܕܥܳܐ. ܗܳܝ ܕܥܰܠ ܟܽܠܳܗ̇ ܐܰܪܥܳܐ ܐܺܝܩܳܪܳܟ. ܕܳܐܦ ܗܳܢܘܢ ܕܦܳܝܫܺܝܢ ܒܰܐܪܥܳܐ ܘܰܒܥܽܘ̈ܡܩܶܝܗ̇ ܕܰܫܝܽܘܠ. ܠܳܐ ܬܽܘܒ ܡܓܰܕܦܺܝܢ ܥܠܰܘܗܝ ܒܰܥܝܳܕܗܽܘܢ. ܐܶܠܳܐ ܟܽܠ ܢܶܫܡܳܐ ܡܫܰܒܚܳܐ ܠܶܗ ܡܰܘܕܝܳܐ ܠܶܗ ܡܝܰܩܪܳܐ ܠܶܗ ܡܫܰܒܚܳܐ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܬܡܢܝܐ
ܠܘܩܒܰܠ ܕܰܓ̈ܠܐ: ܕܡܰܘܕܰܥ ܡܶܬܦܰܪܫܳܢܽܘܬܳܐ ܕܚܰܝ̈ܠܰܘܳܬܳܐ ܕܰܠܩܽܘܒܠܳܐ ܡܶܢ ܚܽܘܠܛܳܢܳܐ ܕܥܰܡ ܚܰܝ̈ܠܰܘܳܬܳܐ ܩܰܕܺܝ̈ܫܶܐ.
ܡܰܟܣܳܢܽܘܬܳܐ ܕܡܰܪ̈ܳܚܶܐ ܘܰܡܣܳܡ ܒܪܺܝܫܳܐ ܕܰܢܛܺܝܪ ܠܕܰܓ̈ܠܐ ܡܶܢ ܐܰܠܗܐ܆ ܡܶܫܬܰܥܶܐ ܪܽܘܚܳܐ ܩܰܕܺܝܫܳܐ ܒܛܽܘܒܬܳܢܳܐ ܕܰܘܝܕ ܒܬܶܫܒܽܘܚܬܳܐ ܗܳܕܐ ܕܚܰܡܫܺܝܢ ܘܰܬܡܳܢܶܐ. ܟܕ ܡܩܰܕܶܡ ܢܳܣܶܒ. ܥܶܠܬܳܐ ܠܰܢܒܺܝܽܘܬܳܐ ܗܳܕܐ. ܡܶܢ ܓܽܘܡܕܳܢܽܘܬܶܗ ܘܡܰܪܳܚܽܘܬܶܗ ܕܫܳܐܘܳܠ ܡܰܪܳܚܳܐ. ܗܰܘ ܕܡܶܛܠ ܚܛܺܝܬܶܗ ܡܶܬܬܰܥܒܰܕ ܗܘܳܐ ܡܶܢ ܪܽܘܚܳܐ ܒܺܝܫܬܳܐ. ܗܳܢܐ ܟܕ ܒܟܽܠ ܦܽܘܪ̈ܣܺܝܢ ܐܰܩܺܝܡ ܪܕܽܘܦܝܳܐ ܥܰܠ ܕܰܘܝܕ ܗܰܘ ܙܰܕܺܝܩܳܐ ܘܡܰܟܺܝܟܳܐ. ܘܟܰܕ ܠܳܐ ܫܶܒܩܰܬ ܡܕܰܒܪܳܢܽܘܬܳܐ ܕܰܐܠܗܐ ܕܢܶܦܶܠ ܒܺܐܝ̈ܕܰܘܗܝ. ܡܶܬܦܰܪܰܣ ܗܘܳܐ ܕܳܐܦ ܠܰܐܝܠܶܝܢ ܕܦܳܓܥܺܝܢ ܗܘܰܘ ܒܕܰܘܝܕ܆ ܢܶܦܪܽܘܥ ܐܶܢܘܢ ܒܺܝ̈ܫܳܬܳܐ. ܘܡܶܛܠܗܳܕܐ ܠܰܐܚܺܝܡܰܠܰܟ ܟܳܗܢܳܐ ܥܰܠ ܕܩܰܒܠܶܗ ܠܕܰܘܝܕ ܘܝܰܗܒܠܶܗ ܠܰܚܡܳܐ ܟܕ ܥܳܪܶܩ ܗܘܳܐ ܡܶܢ ܩܕܳܡܰܘܗܝ. ܦܽܘܪ̈ܥܳܢܶܐ ܕܩܶܛܠܳܐ ܐܰܗܦܶܟ ܥܠܰܘܗܝ. ܘܟܕ ܛܳܒ ܠܳܐ ܪܓܺܝܫ ܗܘܳܐ ܟܳܗܢܳܐ ܕܰܐܝܕܳܐ ܗܝ ܥܶܠܬܳܐ ܕܡܶܐܬܺܝܬܶܗ ܕܕܰܘܝܕ ܕܠܘܳܬܶܗ. ܠܩܽܘܒܠܶܗ ܕܗܳܢܐ ܟܳܗܢܐ ܘܰܕܚܰܒܪ̈ܰܘܗܝ ܟܳܗܢ̈ܐ. ܐܶܬܬܙܺܝܥ ܫܳܐܘܳܠ ܒܺܝܫܳܐܝ̣ܬ ܒܝܰܕ ܪܽܘܓܙܳܐ ܘܶܐܡܰܪ: ܫܡܰܥ ܐܰܚܺܝܡܰܠܰܟ ܒܰܪ ܐܰܚܺܝܛܽܘܒ܇ ܘܶܐܡܰܪ ܠܶܗ ܗܳܐ ܐܶܢܳܐ ܡܳܪܝ. ܘܶܐܡܰܪ ܠܶܗ ܫܳܐܘܳܠ. ܠܡܳܢܳܐ ܐܶܬܢܟܶܠܬܽܘܢ ܥܠܰܝ ܐܰܢܬ ܘܒܰܪ ܐܺܝܫܰܝ܇ ܟܕ ܝܰܗܒܬ ܠܶܗ ܠܰܚܡܳܐ ܘܣܰܝܦܳܐ܇ ܫܶܐܠܬ ܠܶܗ ܒܰܐܠܗܳܐ ܕܰܬܩܺܝܡ ܥܠܰܝ ܟܡܺܐܢܳܐ ܐܰܝܟ ܕܝܰܘܡܳܢܳܐ. ܘܰܥܢܳܐ ܐܰܚܺܝܡܰܠܰܟ ܘܶܐܡܰܪ ܠܡܰܠܟܳܐ. ܡܰܢܽܘ ܒܟܽܠܗܘܢ ܥܰܒ̈ܕܰܝܟ ܐܰܝܟ ܕܰܘܝܕ ܕܰܡܗܰܝܡܰܢ. ܘܚܰܬܢܳܐ ܕܡܰܠܟܳܐ: ܘܢܳܛܰܪ ܦܽܘ̈ܩܕܳܢܰܝܟ ܘܝܰܩܺܝܪ ܒܒܰܝܬܳܟ. ܘܝܰܘܡܳܢܳܐ ܫܰܪܺܝܬ ܠܡܶܫܰܐܠ ܠܶܗ ܒܰܐܠܗܳܐ ܚܳܣ ܠܺܝ. ܠܐ ܢܣܺܝܡ ܡܰܠܟܳܐ ܥܰܠ ܥܰܒܕܶܗ ܡܶܠܬܳܐ ܗܳܕܐ. ܡܶܛܠ ܕܠܳܐ ܝܳܕܰܥ ܥܰܒܕܳܟ ܒܗܳܢܐ ܦܶܬܓܳܡܳܐ ܟܽܠܶܗ ܪܰܒܳܐ ܘܰܙܥܽܘܪܳܐ. ܘܶܐܡܰܪ ܫܳܐܘܳܠ ܡܡܳܬ ܬܡܽܘܬ ܐܰܚܺܝܡܰܠܰܟ ܐܰܢܬ ܘܟܽܠܶܗ ܒܶܝܬ ܐܰܒܽܘܟ ܟܳܗܢ̈ܐ (ܐ ܫܡܘܐܝܠ ܟܒ: ܝܒ-ܝܘ).
ܠܽܘܩܒܰܠ ܗܳܕܐ ܕܰܓܳܠܽܘܬܐ ܕܡܰܠܝܳܐ ܥܽܘܬܳܕܳܐ ܕܩܶܛܠܳܐ ܥܰܠ ܟܳܗܢ̈ܐ ܩܰܕܺܝ̈ܫܶܐ. ܐܳܦ ܐܰܙܺܝܥ ܕܰܘܝܕ ܟܶܢܳܪܶܗ ܘܙܰܡܰܪ ܘܶܐܡܰܪ:
ܐܺܝܢ ܫܰܪܺܝܪܳܐܝ̣ܬ ܙܰܕܺܝܩܽܘܬܳܐ ܡܡܰܠܠܺܝܢ ܐܰܢܬܽܘܢ. ܘܰܬܪܺܝܨܽܘܬܳܐ ܕܳܝܢܺܝܢ ܐܰܢܬܽܘܢ ܒܢܰܝ̈ܢܳܫܳܐ: ܗܳܐ ܟܽܠܟܘܢ ܥܰܘܠܳܐ ܡܡܰܠܠܺܝܢ ܐܰܢܬܽܘܢ ܒܰܐܪܥܳܐ. ܘܰܒܥܰܘܠܳܐ ܡܥܰܪ̈ܙܠܳܢ ܐܺܝܕܰܝ̈ܟܘܢ. ܒܗܳܠܝܢ ܡܰܟܶܣ ܗܘܳܐ ܠܪܽܘܚܳܐ ܗܳܝ ܕܕܰܓܳܠܽܘܬܳܐ ܕܒܶܝܬ ܫܳܐܘܳܠ ܕܰܕܠܳܐ ܪ̈ܰܚܡܶܐ ܐܶܫܕܰܬ ܠܰܕܡܳܐ ܙܰܟܳܝܳܐ ܕܟܳܗ̈ܢܰܘܗܝ ܕܰܐܠܗܐ. ܘܡܶܛܠ ܗܳܕܐ ܐܳܡܰܪ ܗܘܳܐ ܐܰܪܰܐ܆ ܒܕܰܓ̈ܠܐ ܡܶܫܬܟܰܚ ܫܪܳܪܳܐ. ܘܒܰܐܝܠܶܝܢ ܕܰܡܠܶܝܢ ܚܣܳܡܳܐ ܐܺܝܬ ܦܽܘܪܣܳܐ ܕܢܶܗܘܽܘܢ ܒܗܽܘܢ ܬܪܺܝܨܽܘܬܳܐ. ܘܥܰܠܗܳܝ ܐܳܦ ܫܳܐܘܳܠ ܗܰܘ ܕܰܡܠܶܐ ܗܘܳܐ ܪܽܘܚܳܐ ܕܰܠܩܽܘܒܠܳܐ. ܒܚܺܐܦ̈ܐ ܒܺܝ̈ܫܶܐ ܕܢܳܫܒܺܝܢ ܗܘܰܘ ܒܢܰܦܫܶܗ. ܟܽܠ ܟܺܐܦܳܐ ܡܙܺܝܥ ܗܘܳܐ. ܕܰܠܗܰܘ ܕܡܶܬܚܣܶܡ ܗܘܳܐ ܡܶܢܶܗ. ܒܺܝܫܳܐܝܬ ܢܰܪܡܶܐ ܒܩܶܛܠܳܐ. ܗܰܘ ܓܶܝܪ ܕܚܳܣܶܡ ܠܳܐ ܦܫܺܝܩ ܠܶܗ ܓܰܠܝܳܐܝܬ ܕܰܢܚܰܘܶܐ ܢܰܦܫܶܗ. ܟܰܕ ܠܳܐ ܡܕܰܓܶܠ ܘܡܰܛܥܶܐ. ܘܡܶܛܠ ܕܗܳܟܰܢܳܐ ܐܺܝܬܶܝܗ̇. ܢܶܫܒܽܘܩ ܬܰܫܥܺܝܬܳܐ ܕܒܶܝܬ ܫܳܐܘܳܠ. ܗܰܘ ܡܳܐܢܳܐ ܕܪܽܘܚܳܐ ܒܺܝܫܬܳܐ. ܐܳܦ ܢܶܬܓܰܘܶܐ ܠܘܳܬ ܬܶܐܘܳܪܺܝܰܐ ܗܳܝ ܕܒܳܗ̇ ܚܳܐܪ ܗܘܳܐ ܪܽܘܚܳܐ ܟܕ ܒܰܕܶܩ ܗܳܠܝܢ. ܡܶܛܠ ܗܳܕܐ ܓܝܪ ܐܳܡܰܪ ܡܙܰܡܪܳܢܳܐ ܒܕܽܘܟܬܳܐ ܐ̱ܚܪܺܬܳܐ. ܕܢܶܣܬܟܰܪ ܦܽܘܡܗܘܢ ܕܕܰܓ̈ܠܐ (ܡܙܡܘܪܐ ܣܓ: ܝܒ). ܟܕ ܒܶܐܫܰܥܝܳܐ ܡܰܢ ܡܰܠܟܳܐ ܕܒܳܒܶܝܠ ܩܳܪܶܐ ܠܶܗ. ܘܬܽܘܒ ܒܦܶܪܥܽܘܢ ܡܰܠܟܳܐ ܕܡܶܨܪܶܝܢ ܨܳܐܪ ܠܶܗ. ܚܰܙܩܺܝܐܝܠ ܢܒܺܝܳܐ ܒܪܰܒܳܐ ܕܨܽܘܪ ܡܰܡܬܶܠ ܠܶܗ ܠܳܐܟܶܠܩܰܪܨܳܐ. ܡܳܕܝܢ ܗܳܪܟܐ ܟܕ ܣܽܘܥܪܳܢܳܐܝܬ. ܠܽܘܩܒܰܠ ܕܰܓܳܠܽܘܬܳܐ ܕܒܶܝܬ ܫܳܐܘܳܠ. ܡܰܙܡܽܘܪܳܐ ܗܳܢܐ ܙܰܡܰܪ ܡܙܰܡܪܳܢܳܐ. ܐܶܠܐ ܦܶܠܶܐܬܳܢܳܐܝܬ ܥܰܠ ܗܳܢܘܢ ܕܰܐܛܥܺܝܘ ܘܕܰܓܶܠܘ ܒܒܰܪܢܳܫܳܐ ܩܰܕܡܳܝܳܐ ܐܶܬܡܰܠܰܠ. ܕܗܺܝ ܕܰܓܳܠܽܘܬܳܐ ܐܰܝܟ ܕܡܶܢ ܠܥܶܠ ܐܶܡܪܶܬ ܕܡܶܢ ܚܣܳܡܳܐ ܫܶܩܠܰܬ ܫܽܘܪܳܝܳܐ. ܟܕ ܓܝܪ ܚܣܰܡ ܗܘܳܐ ܐܳܟܶܠܩܰܪܨܳܐ ܒܳܐܕܳܡ. ܒܗܳܝ ܕܰܚܙܳܐ ܕܶܐܬܥܒܶܕ ܒܨܰܠܡܳܐ ܕܰܐܠܗܳܐ. ܘܰܗܘܳܐ ܡܰܠܟܳܐ ܥܰܠ ܟܽܠܗܘܢ ܗܳܢܘܢ ܕܠܳܐ ܡܶܠܬܳܐ. ܘܶܐܬܗܰܝܡܰܢ ܡܰܥܡܪܳܐ ܘܢܳܛܽܘܪܽܘܬܳܐ ܕܦܰܪܕܰܝܣܳܐ. ܡܫܰܪܶܐ ܗܘܳܐ ܡܶܟܺܝܠ ܗܰܘ ܪܺܝܫܗܘܢ ܕܚܰܣܳܡ̈ܐ ܘܡܰܠܦܳܢܳܐ ܕܕܰܓܳܠܽܘܬܳܐ. ܟܕ ܫܳܩܶܠ ܠܶܗ ܡܶܨܥܳܝܳܐ ܠܚܶܘܝܳܐ ܩܰܕܡܳܝܳܐ. ܕܒܽܐܘܡܳܢܽܘܬܳܐ ܕܕܰܓܳܠܽܘܬܳܐ ܢܶܬܩܰܪܰܒ ܠܡܶܫܰܐܠܘ ܠܰܐܢܬܬܳܐ. ܕܫܰܪܺܝܪܳܐܝܬ ܐܶܡܰܪ ܐܰܠܗܐ ܕܠܳܐ ܬܶܐܟܠܽܘܢ ܡܶܢܟܽܠ ܐܺܝ̈ܠܳܢܰܝ ܦܰܪܕܰܝܣܳܐ. ܘܶܐܡܪܰܬ ܐܰܢܬܬܳܐ ܠܚܶܘܝܳܐ. ܕܡܶܢ ܟܽܠܗܘܢ ܐܺܝ̈ܠܳܢܰܝ ܦܰܪܕܰܝܣܳܐ ܡܶܐܟܰܠ ܢܶܐܟܽܘܠ. ܘܡܶܢ ܐܺܝܠܳܢܳܐ ܕܺܝܕܰܥܬܳܐ ܕܛܳܒܬܳܐ ܘܰܕܒܺܝܫܬܳܐ ܕܒܰܡܨܰܥܬܶܗ ܕܦܰܪܕܰܝܣܳܐ ܐܶܡܰܪ ܐܰܠܗܐ ܕܠܳܐ ܬܶܐܟܠܽܘܢ. ܡܶܛܠ ܕܰܒܝܰܘܡܳܐ ܕܳܐܟܠܺܝܬܽܘܢ ܡܶܢܶܗ ܒܡܰܘܬܳܐ ܬܡܽܘܬܽܘܢ (ܒܪܝܬܐ ܓ: ܐ-ܓ). ܡܳܢܳܐ ܐܶܡܰܪ ܗܰܘ ܕܰܡܕܰܓܶܠ ܠܘܳܬ ܗܳܠܝܢ. ܕܠܳܐ ܠܰܡ ܬܡܽܘܬܽܘܢ (ܒܪܝܬܐ ܓ: ܕ). ܚܙܺܝ ܗܳܟܺܝܠ ܠܰܚܣܳܡܶܗ ܕܳܐܟܶܠܩܰܪܨܳܐ. ܐܰܝܟܰܢܳܐ ܒܕܰܓܳܠܽܘܬܳܐ ܡܟܰܣܶܐ ܗܘܳܐ ܠܶܗ ܠܚܰܫܶܗ. ܐܳܡܰܪ ܗܘܳܐ ܚܶܘܝܳܐ ܠܚܰܘܳܐ. ܐܶܠܐ ܕܰܒܝܰܘܡܳܐ ܕܳܐܟܠܺܝܬܽܘܢ ܡܶܢ ܐܺܝܠܳܢܳܐ ܡܶܬܦܱ̈ܬܚܳܢ ܥܰܝ̈ܢܰܝܟܘܢ ܘܗܳܘܶܝܬܽܘܢ ܐܰܝܟ ܐܰܠܗܐ ܝܳܕ̈ܥܰܝ ܛܳܒܬܳܐ ܘܒܺܝܫܬܳܐ (ܒܪܝܬܐ ܓ: ܗ). ܚܙܰܝܬ ܐܰܝܟܰܢܳܐ ܐܳܟܶܠ ܩܰܪ̈ܨܰܘܗܝ ܕܰܐܠܗܐ. ܐܶܡܰܪ ܪܽܘܚܳܐ ܗܳܠܶܝܢ ܕܡܰܙܡܽܘܪܳܐ ܗܳܢܐ ܡܫܰܪܶܝܢ ܟܕ ܡܰܟܶܣ ܠܗܘܢ ܐܳܡܰܪ: ܐܺܝܢ ܫܰܪܺܝܪܳܐܝܬ ܙܰܕܺܝܩܽܘܬܳܐ ܡܡܰܠܠܺܝܢ ܐܰܢܬܽܘܢ ܠܳܐ ܠܰܡ ܒܟܽܘܢ ܫܪܳܪܳܐ ܠܰܝܬ. ܗܰܘ ܓܶܝܪ ܕܰܠܟܽܠܗܘܢ ܐܺܝܠܳܢ̈ܐ ܝܰܗܒ ܡܰܓܳܢ. ܘܠܳܐ ܡܶܢ ܗܰܘ ܟܳܠܐ ܗܘܳܐ܆ ܐܶܠܽܘ ܝܳܕܰܥ ܗܘܳܐ ܕܡܰܘܬܰܪ܆ ܘܠܳܐ ܒܰܚܣܳܡܳܐ ܬܳܟܶܣ ܗܘܳܐ ܡܶܢ ܡܶܐܟܽܘܠܬܶܗ ܕܺܐܝܠܳܢܳܐ. ܘܡܶܢ ܒܳܬܰܪ ܕܶܐܟܠܰܬ ܚܰܘܳܐ ܦܺܐܪܳܐ ܥܰܡ ܒܰܥܠܳܗ̇: ܐܶܬܥܰܠܺܝܘ ܘܰܗܘܰܘ ܐܰܝܟ ܐܰܠܗ̈ܐ. ܘܠܰܘ ܥܰܡ ܡܶܐܟܽܘܠܬܳܐ ܩܳܡܘ ܒܦܽܘܪܣܳܝܳܐ. ܠܰܘ ܕܰܓܳܠܽܘܬܳܐ ܡܡܰܠܠܺܝܢ ܗܘܰܘ ܡܰܠܦܳܢ̈ܐ ܒܺܝ̈ܫܶܐ. ܐܶܢܕܶܝܢ ܟܕ ܩܛܰܦܘ ܦܺܐܪܳܐ ܩܳܡܘ ܒܦܽܘܪܣܳܝܳܐ. ܓܰܠܝܳܐܝܬ ܐܶܬܦܰܪܣܝܰܬ ܗܳܝ ܕܶܐܬܐܰܡܪܰܬ ܡܶܢ ܚܰܣܳܡܳܐ ܕܕܰܓܳܠܽܘܬܳܐ ܗܳܝ. ܘܰܕܠܰܘ ܐܰܝܟ ܕܡܶܢ ܛܳܒ̈ܬܳܐ ܟܠܳܐ ܐܶܢܘܢ ܐܰܠܗܳܐ. ܡܦܰܢܶܐ ܦܶܬܓܳܡܳܐ ܪܽܘܚܳܐ ܘܳܐܡܰܪ: ܘܰܬܪܺܝܨܽܘܬܳܐ ܕܳܝܢܺܝܬܽܘܢ ܒܢܰܝ̈ܢܳܫܳܐ. ܒܕܺܝ̈ܢܶܐ ܠܰܡ ܬܪ̈ܺܝܨܶܐ ܐܰܢܬܘܢ ܐܶܬܚܰܫܰܚܬܽܘܢ. ܕܰܠܒܰܪܬ ܩܳܠܐ ܕܥܳܒܽܘܕܳܐ ܠܳܐ ܫܡܰܥܬܘܢ. ܗܳܐ ܟܽܠܟܘܢ ܥܰܘܠܐ ܡܡܰܠܠܺܝܬܽܘܢ ܒܰܐܪܥܳܐ. ܘܰܒܥܰܘܠܳܐ ܡܥܰܪ̈ܙܠܳܢ ܐܺܝ̈ܕܰܝܟܘܢ.
ܐܶܬܦܪܶܫܘ ܥܰܘ̈ܠܶܐ ܡܶܢ ܟܰܪܣܳܐ. ܘܰܛܥܰܘ ܡܶܢ ܡܰܪܒܥܳܐ ܕܰܡܡܰܠܠܺܝܢ ܕܰܓܳܠܽܘܬܳܐ. ܥܰܘܴ̈ܠܶܐ ܠܚܰܝ̈ܠܰܘܳܬܳܐ ܕܰܠܩܽܘܒܠܳܐ ܩܳܪܶܐ ܢܒܺܝܳܐ. ܕܗܶܢܘܢ ܐܶܫܟܰܚܘ ܠܰܩܢܽܘܡܗܘܢ ܚܰܝܳܒܽܘܬܳܐ. ܘܰܫܒܰܩܘ ܫܪܳܪܳܐ ܘܡܰܠܶܠܘ ܕܰܓܳܠܽܘܬܳܐ ܥܰܠ ܡܪܰܝܡܳܐ. ܘܥܰܠ ܒܰܪܢܳܫܳܐ. ܘܰܠܗܳܕܐ ܒܺܝܫܬܳܐ܆ ܐܰܠܗܐ ܥܶܠܬܳܐ ܠܳܐ ܗܘܳܐ. ܐܶܠܐ ܟܕ ܨܒܳܐ ܘܰܒܪܳܐ ܡܠܺܝ̈ܠܐ. ܒܰܕܡܽܘܬ ܪܰܦܩܰܐ ܗܳܝ ܕܰܒܚܰܕ ܡܰܪܒܥܳܐ ܛܥܺܝܢܳܐ ܗܘܳܬ ܠܥܺܝܣܽܘ ܛܳܠܽܘܡܳܐ ܘܰܠܝܰܥܩܽܘܒ ܗܰܘ ܬܰܡܺܝܡܳܐ. ܘܟܕ ܕܝܢ ܐܶܬܺܝܠܶܕܘ ܘܰܢܦܰܩܘ ܡܶܢ ܡܰܪܒܥܳܐ. ܐܰܚܶܒ ܥܺܝܣܽܘ ܕܰܠܥܽܘܪܠܽܘܬܳܐ ܢܶܥܛܽܘܦ. ܝܰܥܩܽܘܒ ܕܝܢ ܢܛܰܪ ܢܳܡܽܘܣܳܐ ܕܰܓܙܽܘܪܬܳܐ ܕܰܐܒܳܗ̈ܬܳܐ. ܘܰܦܪܰܫ ܥܺܝܣܽܘ ܡܶܢ ܕܽܘܒܳܪ̈ܐ ܟܺܐܢ̈ܐ ܕܙܰܕܺܝ̈ܩܶܐ. ܠܰܘ ܒܨܶܒܝܳܢܳܐ ܕܰܐܒܳܗܰܘ̈ܗܝ. ܐܶܠܐ ܗܽܘ ܡܶܢ ܢܰܦܫܶܗ ܐܰܚܶܒ ܘܶܐܬܢܰܩܰܦ ܠܕܽܘܒܳܪ̈ܶܐ ܙܰܠܺܝ̈ܠܐ ܕܥܰܡ̈ܡܶܐ ܚܰܛܳܝ̈ܐ. ܗܳܟܰܢܳܐ ܒܗܳܢܐ ܛܽܘܦܣܳܐ ܓܶܒܠܰܬ ܐܰܠܗܽܘܬܐ ܒܡܰܪܒܥܳܗ̇ ܢܰܗܺܝܪܳܐ ܘܡܰܘܠܕܳܢܳܐ ܕܰܒ̈ܢܰܝ ܢܽܘܗܪܳܐ ܒܨܶܒܝܳܢܳܗ̇ ܛܳܒܳܐ ܘܰܒܪ̈ܰܚܡܶܐ ܕܺܝܠܳܗ̇ ܡܬܽܘܡܳܝ̈ܐ. ܡܳܕܶܝܢ ܒܨܶܒܝܳܢܳܐ ܐܰܝܟ ܕܡܶܢ ܟܰܪܣܳܐ ܘܡܰܪܒܥܳܐ ܝܳܠܕܰܬ ܟܽܠܗܘܢ ܬܶܓܡ̈ܐ ܥܶܠܳܝ̈ܐ. ܘܰܐܩܺܝܡܰܬ ܐܶܢܘܢ ܒܡܶܕܝܳܪ̈ܶܐ ܕܰܡܕܺܝܢܬܳܐ ܗܳܝ ܕܰܠܥܶܠ. ܘܒܰܝܢܳܬ ܕܗܳܠܝܢ ܕܠܳܐ ܡܰܐܣܰܒ ܒܰܐܦ̈ܐ ܐܰܘܠܕܰܬ ܠܳܐܟܶܠܩܰܪܨܳܐ. ܘܰܒܥܰܙܪܽܘܪ̈ܶܐ ܕܢܽܘܗܪܳܐ ܘܰܕܢܽܘܪܳܐ ܟܰܣܝܰܬܶܗ ܥܰܡ ܡܰܠܐܟ̈ܐ ܘܰܠܟܽܠܗܘܢ ܝܶܗܒܰܬ ܚܺܐܪܽܘܬܳܐ ܘܫܰܠܺܝܛܽܘܬ ܒܝܳܬܳܐ. ܐܳܦ ܠܗܳܠܶܝܢ ܕܰܡܪܰܕܘ ܥܠܶܝܗ̇ ܟܕ ܡܳܕܶܝܢ ܫܰܪܺܝܘ ܚܰܝ̈ܐ ܡܠܺܝ̈ܠܐ ܠܰܡܫܰܒܳܚܽܘ ܠܗܳܝ ܐܶܡܳܐ ܕܚܰܝ̈ܐ ܕܰܐܘܠܕܰܬ ܐܶܢܘܢ. ܘܫܰܪܺܝܘ ܣܪ̈ܳܦܶܐ ܠܰܡܩܰܕܳܫܽܘ ܠܐܺܝܬܽܘܬܳܐ. ܘܰܟܪ̈ܽܘܒܶܐ ܠܡܳܪܽܘܬܳܐ ܘܚܰܝ̈ܠܰܘܳܬܳܐ ܘܪ̈ܺܝܫܰܝ ܡܰܠܐܟ̈ܐ ܠܰܡܫܰܒܳܚܽܘ ܠܰܐܠܗܽܘܬܳܐ. ܐܰܣܛܺܝ ܚܝܳܪܶܗ ܐܳܟܶܠܩܰܪܨܳܐ ܡܶܢ ܬܶܐܘܳܪܺܝܰܐ ܕܰܐܠܳܗܽܘܬܳܐ. ܘܰܦܪܰܫ ܢܰܦܫܶܗ ܡܶܢ ܟܰܪܣܳܐ ܕܢܽܘܗܪܳܐ. ܘܥܰܡܶܗ ܐܶܨܛܠܺܝܘ ܚܰܝ̈ܠܰܘܳܬܳܐ ܡܳܪ̈ܽܘܕܶܐ ܕܕܰܡܺܝܘ ܒܶܗ. ܘܰܛܥܰܘ ܡܶܢ ܡܰܪܒܥܳܐ ܕܩܰܕܺܝܫܽܘܬܳܐ ܕܰܐܘܠܕܰܬ ܐܶܢܘܢ ܕܠܳܐ ܚܒܳܠܳܐ. ܘܰܓܒܰܘ ܠܗܘܢ ܕܢܶܗܘܘܢ ܡܡܰܠܠܺܝܢ ܕܰܓܳܠܽܘܬܳܐ. ܘܚܰܛܦܽܘܗܝ ܠܚܶܘܝܳܐ ܕܢܶܗܘܶܐ ܡܬܰܪܓܡܳܢܳܐ ܠܕܰܓܳܠܽܘܬܗܘܢ. ܘܡܶܛܠ ܗܳܢܐ ܓܝܪ ܐܳܡܰܪ ܪܽܘܚܳܐ ܒܳܗ̇ ܒܰܕܡܽܘܬܳܐ.
ܚܶܡܬܗܽܘܢ ܐܰܝܟ ܕܚܶܘܝܳܐ ܚܰܪܡܳܢܳܐ. ܘܰܐܝܟ ܕܶܐܣܦܶܣ ܚܰܪܳܫܬܳܐ: ܕܰܡܣܰܟܪܳܐ ܐܶܕܢܶܝ̈ܗ̇ ܕܠܳܐ ܬܶܫܡܰܥ ܩܳܠܳܐ ܕܠܳܚܽܘܫܳܐ ܘܰܕܚܰܒܳܪܳܐ ܘܰܕܚܰܟܺܝܡܳܐ. ܫܰܦܺܝܪ ܠܰܘ ܠܟܽܠ ܚܶܘܝܳܐ ܕܰܡܺܝ ܐܶܢܘܢ ܪܽܘܚܳܐ. ܐܶܠܐ ܠܗܳܢܐ ܕܡܶܢ ܟܽܠܗܘܢ ܚܘܰܘܴ̈ܬܳܐ ܡܰܪܺܝܪ ܘܒܺܝܫ. ܐܶܠܐ ܠܰܘ ܥܰܠ ܐܰܪܥܳܐ ܪܳܫܶܦ ܡܳܐ ܕܡܳܚܶܐ. ܐܶܠܐ ܕܽܘܡܝܳܐ ܡܶܕܶܡ ܙܥܽܘܪܳܐ ܕܓܶܦ̈ܐ ܐܺܝܬ ܠܶܗ ܕܦܳܪܰܚܬܳܐ ܠܓܰܘ ܡܶܢ ܩܕܳܠܶܗ ܩܳܠܺܝܠ. ܘܟܕ ܪܳܗܶܛ ܠܡܶܡܚܳܐ ܬܳܠܶܐ ܓܽܘܫܡܶܗ ܒܳܐܐܰܪ. ܘܟܕ ܠܐ ܡܶܬܚܙܶܐ ܠܗܰܘ ܕܡܶܬܢܰܟܶܬ ܡܶܢܶܗ܆ ܘܟܕ ܢܳܟܶܬ ܠܶܗ ܠܗܰܘ ܕܒܳܠܰܥ܆ ܠܘܳܬ ܡܰܘܬܶܗ ܡܫܰܕܰܪ ܠܶܗ. ܠܗܳܢܐ ܓܶܢܣܳܐ ܫܰܕܰܪ ܗܘܳܐ ܐܰܠܗܐ ܥܰܠ ܥܰܡܳܐ ܒܡܰܕܒܪܳܐ. ܘܰܐܝܟ ܕܡܶܢ ܫܡܰܝܳܐ ܢܳܚܬܺܝܢ ܗܘܰܘ ܥܠܰܝܗܘܢ ܡܶܢ ܐܳܐܱܪ. ܥܕܰܡܳܐ ܕܶܐܬܶܐܡܰܪ ܠܡܽܘܫܶܐ ܘܰܥܒܰܕ ܗܘܳܐ ܒܰܕܡܽܘܬܳܐ ܕܰܡܡܺܝܬܳܢܳܐ. ܚܶܘܝܳܐ ܕܰܢܚܳܫܳܐ ܕܝܳܗܶܒ ܗܘܳܐ ܚܰܝ̈ܐ ܒܰܚܙܳܬܶܗ. ܗܰܘ ܕܡܶܛܠ ܐܪܳܙܳܐ ܕܰܨܠܺܝܒܳܐ ܕܡܶܬܦܪܶܣ ܒܓܶܦܰܘ̈ܗܝ ܡܶܬܚܙܶܐ ܗܘܳܐ. ܠܢܽܘܟ̈ܬܳܬܳܐ ܕܰܚܘܰܘܴ̈ܬܳܐ ܡܰܚܠܶܡ ܗܘܳܐ. ܘܬܘܒ ܡܕܰܡܶܐ ܠܳܗ̇ ܠܶܐܣܦܶܣ ܠܰܚܘܰܘ̈ܬܳܐ ܡܶܬܝܰܕ̈ܥܳܢܶܐ. ܕܳܐܦ ܗܳܕܐ ܨܢܺܝܥܳܐܝ̣ܬ ܥܳܪܩܳܐ ܡܶܢ ܠܳܚܽܘܫܳܐ ܘܡܶܢ ܚܰܟܺܝܡܳܐ. ܘܠܐ ܠܚܰܒܳܪܳܐ ܡܶܬܬܦܺܝܣܳܐ. ܐܶܠܐ ܪܳܡܝܳܐ ܗܺܝ ܠܳܗ̇ ܥܰܠ ܐܰܪܥܳܐ ܟܳܦܳܐ ܕܽܘܢܒܳܗ̇ ܘܣܳܝܡܳܐ ܕܽܘܢܒܳܗ̇ ܒܶܐܕܢܳܗ̇ ܥܶܠܳܝܬܳܐ. ܠܗܳܝ ܕܶܝܢ ܐ̱ܚܪܺܬܳܐ ܣܳܟܪܳܐ ܠܳܗ̇ ܒܥܰܦܪܳܐ. ܘܰܒܗܳܠܝܢ ܡܶܬܕܰܡܶܝܢ ܟܽܠܗܘܢ ܐܰܝܠܶܝܢ ܕܗܳܘܝܢ ܠܗܘܢ ܬܰܠܡܺܝ̈ܕܶܐ. ܘܝܳܗܒܺܝܢ ܡܰܫܡܰܥ ܐܶܕܢܳܐ. ܘܠܳܐ ܐܶܣܦܶܣ ܘܠܳܐ ܚܰܪ̈ܡܳܢܶܐ ܡܶܬܬܦܺܝܣܺܝܢ ܠܠܳܚܽܘܫܳܐ ܘܠܳܐ ܐܳܫܽܘܦܳܐ. ܘܠܐ ܐܰܝܠܶܝܢ ܕܶܐܬܠܒܶܟܘ ܒܩܽܘܕܡܳܐ ܕܒܺܝ̈ܫܳܬܳܐ. ܡܶܫܬܰܡܥܺܝܢ ܠܡܶܠܟܷ̈ܐ ܘܰܠܡܷ̈ܠܐ ܕܡܰܪܬܝܳܢܽܘܬܳܐ ܘܰܕܟܺܐܢܽܘܬܳܐ. ܘܡܶܛܠ ܗܳܕܐ ܩܳܥܶܐ ܥܠܰܝܗܘܢ ܪܽܘܚܳܐ ܕܰܐܠܗܐ ܘܳܐܡܰܪ:
ܐܰܠܳܗܳܐ ܢܬܰܒܰܪ ܫܶܢܰܝ̈ܗܽܘܢ ܒܦܽܘܡܗܽܘܢ. ܐܳܦ ܢܺܝ̈ܒܰܝܗܽܘܢ ܕܰܐܪ̈ܝܰܘܳܬܳܐ ܥܳܩܰܪ ܡܳܪܝܳܐ. ܐܰܝܟ ܕܶܐܡܰܪ ܐܺܝܽܘܒ ܒܡܰܬܠܰܘ̈ܗܝ ܥܰܠ ܡܶܠܬܶܗ ܕܰܐܠܗܐ. ܕܬܰܒܪܶܬ ܢܺܝܒܰܘ̈ܗܝ ܕܥܰܘܳܠܳܐ. ܘܰܚܛܽܘܦܝܳܐ ܐܰܦܩܶܬ ܡܶܢ ܒܶܝܬ ܫܶܢܰܘ̈ܗܝ. ܘܶܐܡܪܶܬ ܠܥܰܡܳܐ ܡܶܣܟܺܢܳܐ ܐܶܦܪܽܘܩ (ܐܝܘܒ ܟܛ: ܝܙ-ܝܚ). ܘܳܐܦ ܗܳܪܟܐ ܥܳܢܶܐ ܒܰܪܬ ܩܳܠܐ ܕܠܳܚܡܳܐ. ܠܗܳܝ ܕܶܐܡܰܪ ܐܺܝܽܘܒ܆ ܘܢܺܝ̈ܒܰܝܗܘܢ ܕܰܐܪ̈ܝܰܘܳܬܳܐ ܥܳܩܰܪ ܡܳܪܝܳܐ. ܪܰܘܪܒܳܐܝܬ ܡܶܬܠܰܚܰܡ ܡܳܪܝܐ ܥܰܠ ܓܡܽܘܪܝܳܗ̇ ܕܒܺܝܫܬܳܐ ܘܰܒܡܰܙܡܽܘܪܳܐ ܐ̱ܚܪܺܢܳܐ ܥܰܠ ܓܳܪܣܳܐ ܘܥܰܠ ܚܰܪܡܳܢܳܐ ܬܶܕܪܽܘܟ. ܘܰܬܕܽܘܫ ܐܰܪܝܳܐ ܘܬܰܢܺܝܢܳܐ (ܡܙܡܘܪܐ ܨܐ: ܝܓ). ܗܳܪܟܐ ܕܝܢ ܥܰܠ ܚܰܪܡܳܢܳܐ ܘܥܰܠ ܐܶܣܦܶܣ ܡܶܬܓܰܢ̱ܒܰܪ ܚܰܝܠܶܗ ܕܰܨܠܺܝܒܳܐ. ܘܠܰܐܒܕܳܢܳܐ ܓܡܺܝܪܳܐ ܡܰܫܠܶܡ ܠܗܘܢ.
ܘܢܶܣܬܠܽܘܢ ܐܰܝܟ ܡܰܝܴ̈ܐ ܕܡܶܬܐܰܫܕܺܝܢ. ܘܠܳܐ ܓܝܪ ܠܡܰܝܴ̈ܐ ܕܡܶܬܐܰܫܕܺܝܢ ܐܺܝܬ ܣܰܒܪܳܐ ܕܬܘܒ ܡܶܬܟܰܢܫܺܝܢ. ܒܗܳܝ ܕܰܡܓܰܡܪܳܐ ܠܗܘܢ ܐܰܪܥܳܐ. ܘܠܐ ܠܚܰܝ̈ܠܰܘܳܬܳܐ ܡܳܪ̈ܽܘܕܶܐ ܡܶܫܬܒܶܩ ܥܶܩܳܪܳܐ. ܘܰܡܣܺܝܦ ܠܗܘܢ ܐܰܝܟ ܕܶܐܡܰܪ ܪܽܘܚܳܐ ܢܒܺܝܳܝܳܐ.
ܘܢܶܫܕܶܐ ܠܰܡ ܓܶܐܪ̈ܰܘܗܝ ܥܕܰܡܳܐ ܕܰܢܣܽܘܦܽܘܢ: ܐܰܝܟ ܫܥܽܘܬܳܐ ܕܡܶܬܦܰܫܪܳܐ ܘܢܳܦܠܳܐ. ܡܶܢ ܩܕܳܡ ܢܽܘܪܳܐ ܢܶܬܚܰܪܒܽܘܢ. ܫܰܦܺܝܪ ܒܰܕܶܩ ܪܽܘܚܳܐ ܕܰܐܝܟܰܢܳܐ ܓܡܺܝܪܳܐܝܬ ܛܳܠܩܳܐ ܒܺܝܫܬܳܐ ܥܰܡ ܡܰܠܦܳܢܶܝ̈ܗ̇. ܡܳܐ ܓܝܪ ܕܰܕܠܐ ܡܶܨܥܳܝܽܘܬܳܐ ܦܳܓܥܳܐ ܢܽܘܪܳܐ ܒܰܫܥܽܘܬܳܐ. ܐܰܘ ܒܩܺܐܪܽܘܬܳܐ. ܐܶܠܐ ܡܶܐܟܽܘܠܬܳܐ ܠܢܽܘܪܳܐ ܗܳܘܝܳܐ ܩܺܐܪܽܘܬܳܐ ܡܰܠܝܳܐܝܬ. ܡܳܐ ܕܡܶܫܬܰܕܝܳܐ ܒܓܰܘܳܗ̇. ܐܰܝܟ ܗܳܟܰܢܐ ܡܰܘܦܝܳܐ ܚܛܺܝܬܳܐ ܘܡܶܬܛܰܠܩܳܐ. ܘܰܒܗܳܢܐ ܛܽܘܦܣܳܐ ܣܳܝܦܺܝܢ ܚܰܛܳܝ̈ܐ ܡܶܢ ܐܰܪܥܳܐ ܒܕܺܝܢܳܐ. ܥܰܠ ܕܠܳܐ ܨܒܰܘ ܕܢܶܬܗܰܕܘܢ ܒܙܰܗܪܳܐ ܕܢܽܘܪܳܐ ܐܰܠܗܳܝܬܳܐ. ܗܳܝ ܕܢܶܦܠܰܬ ܡܶܢ ܫܡܰܝܳܐ ܘܰܐܢܗܪܰܬ ܠܚܶܫܽܘ̈ܟܶܐ.
ܢܶܦܠܰܬ ܠܰܡ ܢܽܘܪܳܐ ܘܠܳܐ ܚܙܰܘ. ܘܫܶܡܫܳܐ ܘܠܳܐ ܐܶܣܬܰܟܰܠܘ. ܟܕ ܓܝܪ ܢܶܦܠܰܬ ܢܽܘܪܳܐ ܐܳܟܶܠܬܳܐ ܗܳܝ ܕܡܶܢ ܐܰܒܳܐ ܘܶܐܫܬܰܕܪܰܬ ܠܰܐܪܥܳܐ. ܘܰܗܘܳܬ ܠܳܗ̇ ܡܩܰܒܠܳܢܺܝܬܳܐ ܟܰܪܣܳܐ ܕܰܒܬܽܘܠܬܳܐ ܡܰܪܝܰܡ. ܠܳܐ ܚܙܰܘ ܒܢܰܝ̈ ܚܶܫܽܘܟܳܐ ܘܠܳܐ ܐܰܪܓܶܫܘ ܐܰܪ̈ܟܽܘܢܛܶܐ ܥܰܘܴ̈ܠܶܐ ܟܕ ܢܶܚܬܰܬ ܢܽܘܪܳܐ ܫܡܰܝܳܢܺܝܬܳܐ ܘܠܶܒܫܰܬ ܒܶܣܪܳܐ ܡܶܢ ܡܰܪܒܥܳܐ. ܐܶܠܐ ܟܰܕ ܚܰܟܺܝܡܳܐܝܬ ܦܰܪܢܶܣ ܐܽܘܪܚܶܗ. ܗܰܘ ܕܶܐܬܳܐ ܕܰܢܥܰܩܰܪ ܢܺܝ̈ܒܰܝܗܘܢ ܕܰܐܪ̈ܝܰܘܳܬܳܐ ܟܰܣܺܝ ܓܰܘܢܳܐ ܢܰܗܺܝܪܳܐ ܕܰܟܝܳܢܶܗ ܒܰܠܒܽܘܫܳܐ ܕܒܶܣܪܳܐ ܥܰܒܝܳܐ. ܘܰܛܡܰܪ ܙܰܗܪܳܐ ܕܰܐܠܗܽܘܬܶܗ ܒܦܰܓܪܳܐ ܡܳܝܽܘܬܳܐ ܘܚܳܫܽܘܫܳܐ. ܘܶܐܬܟܰܣܺܝ ܠܒܽܘܫܳܐ ܕܒܶܣܪܳܐ ܡܶܬܚܰܒܠܳܢܳܐ. ܘܰܢܦܰܩ ܡܶܢ ܡܰܪܒܥܳܐ ܒܽܐܘܪܚܳܐ ܕܺܝܠܺܝ̈ܕܶܐ ܠܥܳܠܡܳܐ. ܘܥܰܠܗܳܕܐ ܠܐ ܐܶܫܟܰܚܘ ܚܰܪܡܳܢܳܐ ܘܶܐܣܦܶܣ ܕܢܶܕܥܽܘܢܳܝܗܝ. ܘܠܳܐ ܐܰܪ̈ܝܰܘܳܬܳܐ ܡܶܬܝܰܕ̈ܥܳܢܶܐ ܐܶܫܬܰܘܕܥܽܘܗܝ ܠܓܽܘܪܝܳܐ ܕܰܐܪܝܳܐ. ܥܰܠ ܕܰܛܥܺܝܢܳܐ ܗܘܳܬ ܠܶܗ ܢܶܩܝܳܐ ܡܶܢ ܓܙܳܪܳܐ ܕܺܝܣܪܳܐܝܠ ܚܠܳܦ ܐܰܪܝܽܘܬܳܐ. ܟܕ ܢܦܰܩ ܡܶܢ ܐܳܦܰܪܬܳܐ ܡܰܕܢܚܳܐ ܫܰܪܺܝܪܬܳܐ. ܟܰܕ ܡܟܰܣܰܝ ܥܰܪܦܶܠܳܐ ܟܣܺܝܬܳܐ ܘܰܥܒܺܝܬܳܐ. ܕܗܰܕܳܡ̈ܐ. ܘܠܳܐ ܐܶܣܬܰܟܠܽܘܗܝ ܢܳܛܪ̈ܰܝ ܐܽܘܪ̈ܚܳܬܳܐ ܚܶܫܽܘ̈ܟܳܬܳܐ ܕܥܳܠܡܳܐ. ܘܚܽܘܪ ܠܺܝ ܐܰܝܟܰܢܳܐ ܚܰܟܺܝܡܳܐܝܬ ܐܳܡܰܪ ܪܽܘܚܳܐ ܬܶܐܘܳܪܺܝܰܐ ܗܳܕܐ ܥܰܠ ܢܽܘܪܳܐ ܘܥܰܠ ܫܶܡܫܳܐ. ܠܐ ܐܶܡܰܪ ܬܘܒ ܕܢܶܚܬܰܬ ܢܽܘܪܳܐ ܘܠܐ ܬܘܒ ܕܶܠܩܰܬ. ܐܶܠܐ ܐܶܡܰܪ: ܕܢܶܦܠܰܬ ܢܽܘܪܳܐ. ܕܰܐܝܟ ܗܳܟܰܢܳܐ ܓܝܪ ܐܺܝܬܰܘܗܝ ܟܝܳܢܳܗ̇ ܕܢܽܘܪܳܐ. ܡܶܢ ܥܽܘܡܩܳܐ ܐܳܚܕܳܐ. ܐܳܦ ܠܳܒܟܳܐ ܐܽܘܪܚܳܐ ܠܘܳܬ ܪܰܘܡܳܐ. ܗܳܪܟܐ ܕܝܢ ܡܶܛܠ ܕܽܐܘܪܚܳܐ ܗܘܳܬ ܡܰܠܝܰܬ ܕܽܘܡܳܪܳܐ. ܐܽܘܪܚܳܐ ܕܡܶܐܬܺܝܬܳܐ ܕܡܶܠܬܳܐ ܠܥܳܠܡܳܐ ܐܶܡܰܪ ܢܒܺܝܳܐ ܢܶܦܠܰܬ ܢܽܘܪܳܐ. ܘܰܒܗܳܕܐ ܡܰܘܕܰܥ ܥܰܠ ܡܰܚܶܬܬܶܗ ܡܶܢ ܫܡܰܝܳܐ. ܕܗܰܘ ܕܰܩܪܳܝܗܝ ܐܶܫܰܥܝܳܐ ܢܽܘܪܳܐ ܐܳܟܶܠܬܳܐ (ܐܫܥܝܐ ܠܓ: ܝܕ). ܗܳܟܰܢܐ ܢܦܰܠ ܥܰܠ ܡܰܫܪ̈ܝܳܬܳܐ ܕܰܒܥܶܠܕ̈ܒܳܒܶܐ ܘܰܐܘܩܶܕ ܐܶܢܘܢ ܗܽܘ ܢܽܘܪܳܐ ܐܳܟܶܠܬܳܐ. ܘܰܐܥܕܺܝ ܡܶܢܗܘܢ ܫܒܺܝܬܳܐ ܕܰܫܒܰܘ ܘܗܳܝ ܕܡܶܢ ܠܥܶܠ ܢܶܦܠܰܬ ܢܽܘܪܳܐ ܘܠܰܘ ܡܶܢ ܠܬܰܚܬ ܣܶܠܩܰܬ ܡܰܠܦܳܐ ܐܽܘܪܚܶܗ ܕܰܐܠܗܐ ܒܓܶܠܝܳܢܶܗ ܢܶܩܪܽܘܒ ܡܶܟܺܝܠ ܠܘܳܬ ܐܰܝܠܶܝܢ ܕܶܐܡܰܪ ܪܽܘܚܳܐ ܥܰܠ ܕܺܝܢܳܐ ܕܡܶܫܬܠܶܡ ܠܗܘܢ ܓܶܢܣܳܐ ܕܡܳܪ̈ܽܘܕܶܐ ܘܰܐܝܠܝܢ ܕܡܶܫܬܰܡܥܺܝܢ ܗܘܰܘ ܠܗܘܢ.
ܢܶܗܘܘܢ ܠܰܡ ܟܽܘ̈ܒܰܝܗܽܘܢ ܗܱ̈ܛܛܶܐ. ܘܪܽܘܓܙܳܐ ܢܕܰܠܰܚ ܐܶܢܘܢ. ܕܰܐܝܟ ܗܳܟܰܢܳܐ ܒܺܝܫܺܝܢ ܟܽܘܒ̈ܐ ܕܗܱ̈ܛܛܶܐ. ܡܶܛܠ ܕܡܶܢ ܓܰܘܗܘܢ ܪܽܘܚܳܐ ܢܳܦܩܳܐ ܘܢܳܦܚܳܐ ܒܗܘܢ ܡܳܐ ܕܝܳܩܕܺܝܢ. ܘܬܘܒ ܗܳܢܐ ܐܺܝܠܳܢܳܐ ܟܽܠܶܗ ܒܟܽܠܶܗ ܟܽܘܒ̈ܐ ܐܺܝܬܰܘܗܝ. ܘܠܳܐ ܚܰܕ ܦܺܐܪܳܐ ܐܺܝܬ ܒܶܗ ܠܡܶܐܟܽܘܠܬܳܐ. ܘܰܬܚܽܘܬܰܘܗܝ ܕܝܢ ܘܠܳܐ ܡܶܕܶܡ ܡܶܫܬܟܰܚ ܕܥܽܘܕܪܳܢܳܐ. ܐܶܠܐ ܘܠܳܐ ܠܩܶܢܳܐ ܕܦܳܪܰܚܬܳܐ ܚܳܫܰܚ. ܒܗܳܢܐ ܐܶܬܟܰܢܺܝ ܐܰܒܺܝܡܰܠܰܟ ܗܰܘ ܒܪܳܐ ܒܺܝܫܳܐ ܕܰܗܘܳܐ ܠܦܶܪܥܽܘܢ ܡܶܢ ܕܳܪܽܘܟܬܳܐ. ܟܕ ܐܰܡܪܰܚ ܥܰܠ ܩܶܛܠܳܐ ܕܫܰܒܥܺܝܢ ܐܰܚܰܘ̈ܗܝ ܘܣܰܓܺܝ̈ܐܬܳܐ ܕܳܡܝܳܝ̈ܘܳܬܳܐ ܒܺܝ̈ܫܳܬܳܐ ܡܶܫܬܰܟ̈ܚܳܢ ܕܰܠܗܳܢܐ ܐܺܝܠܳܢܳܐ ܟܽܘܒܳܢܳܐ ܠܳܚ̈ܡܳܢ. ܐܳܦ ܡܶܬܕܰܠܚܺܝܢ ܒܪܽܘܓܙܳܐ ܐ̱ܚܪ̈ܳܢܶܐ. ܡܳܐ ܕܡܶܬܬܥܺܝܪܳܐ ܟܺܐܢܽܘܬܳܐ ܕܬܶܥܒܶܕ ܡܶܢܗܘܢ ܕܺܝܢܳܐ܆ ܡܶܢ ܗܳܢܐ ܪܽܘܓܙܳܐ ܕܰܡܕܰܠܰܚ ܗܘܳܐ ܠܥܳܒ̈ܕܰܝ ܥܰܘܠܳܐ ܒܚܰܪܬܳܐ. ܥܪܰܩ ܗܘܳܐ ܡܙܰܡܪܳܢܳܐ ܟܕ ܡܦܺܝܣ ܠܡܳܪܝܳܐ ܘܳܐܡܰܪ: ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ (ܡܙܡܘܪܐ ܠܚ: ܐ). ܡܳܐ ܕܝܢ ܕܥܰܠ ܪ̈ܰܫܺܝܥܶܐ ܗܳܘܶܐ ܪܽܘܓܙܳܐ ܕܰܐܝܟ ܗܳܢܐ܆ ܗܳܝܕܝܢ ܙܰܕܺܝ̈ܩܶܐ ܚܳܕܝܢ ܕܚܳܙܶܝܢ ܦܽܘܪ̈ܥܳܢܰܝܗܘܢ. ܐܰܝܟ ܕܦܰܫܶܩ ܪܽܘܚܳܐ ܘܶܐܡܰܪ:
ܢܶܚܕܶܐ ܙܰܕܺܝܩܳܐ ܕܚܳܙܶܐ ܦܽܘܪܥܳܢܳܐ. ܘܺܐܝ̈ܕܰܘܗܝ ܢܫܺܝܓ ܒܰܕܡܶܗ ܕܪܰܫܺܝܥܳܐ. ܕܳܡܝܳܐ ܗܳܕܐ ܕܥܰܠ ܕܚܳܙܶܝܢ ܠܶܗ ܙܰܕܺܝ̈ܩܶܐ ܠܡܳܪܽܘܕܳܐ ܕܡܶܬܚܰܝܰܒ ܚܳܕܝܢ. ܟܕ ܩܶܛܠܶܗ ܕܗܰܘ ܕܽܘܟܳܝܳܐ ܚܫܺܝܒ ܠܗܽܘܢ.
ܘܢܺܐܡܰܪ ܒܰܪܢܳܫܳܐ ܐܺܝܬ ܟܰܝ ܦܺܐܪܐ ܠܙܰܕܺܝܩܳܐ. ܗܳܢܘܢ ܓܝܪ ܕܰܐܣܒܰܪܘ ܕܠܰܝܬ ܦܽܘܪܥܳܢܳܐ ܠܰܥ̈ܒܳܕܶܐ ܟܺܐܢ̈ܐ. ܡܶܬܕܰܡܪܺܝܢ ܡܳܐ ܕܚܳܙܝܢ ܕܰܐܝܠܝܢ ܦܺܐܪ̈ܐ ܩܳܛܦܺܝܢ. ܚܠܳܦ ܥܰܡ̈ܠܐ ܕܰܡܣܰܝܒܪܳܢܽܘܬܗܘܢ. ܘܚܳܙܝܢ ܠܰܐܠܗܳܐ ܟܕ ܕܳܐܷܢ ܠܥܰܘ̈ܠܐ ܘܰܠܡܳܪ̈ܽܘܕܶܐ. ܐܰܝܟ ܡܶܠܬܶܗ ܕܰܢܒܺܝܳܐ.
ܐܺܝܬ ܐܰܠܗܐ ܕܰܢܕܽܘܢ ܐܶܢܘܢ ܒܰܐܪܥܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܚܡܫܝܢ ܘܬܫܥܐ
ܡܰܘܕܰܥ ܕܠܰܘ ܡܶܢ ܚܛܳܗܷ̈ܐ ܫܳܩܠܺܝܢ ܕܰܝ̈ܘܶܐ ܥܶܠܬܳܐ ܘܡܶܬܟܰܬܫܺܝܢ ܥܰܡ ܩܰܕܺܝ̈ܫܶܐ: ܘܠܳܐ ܬܘܒ ܗܳܘܶܐ ܫܘܠܳܡܳܐ ܠܕܺܝܢܳܐ ܕܥܰܠ ܥܳܒ̈ܕܰܝ ܥܰܘܠܳܐ܆ ܘܠܰܝܬ ܚܰܕ ܢܦܺܐܫܳܐ ܒܓܘ ܬܰܫܢܺܝܩܳܐ ܠܡܰܪ̈ܳܚܶܐ: ܘܒܰܨܠܰܘ̈ܬܳܐ ܡܶܬܦܰܨܶܝܢ ܒܢܰܝ̈ܢܳܫܳܐ ܡܶܢ ܒܥܶܠܕ̈ܒܳܒܶܐ ܘܡܶܢ ܕܺܝܢܳܐ.
ܐܰܝܠܶܝܢ ܕܰܒܪܶܥܝܳܢܳܐ ܕܰܡܫܰܠܰܚ ܡܶܢ ܬܰܚܦܺܝܬܳܐ ܕܒܶܣܪܳܐ. ܡܶܬܒܰܩܶܝܢ ܒܩܶܪܝܳܢܳܐ ܕܣܶܦܪܳܐ ܗܳܢܐ ܕܡܰܙܡܽܘܪ̈ܐ. ܘܰܐܝܟ ܕܰܒܓܰܙܳܐ ܕܠܳܐ ܚܳܣܰܪ ܦܳܓܥܺܝܢ܆ ܒܣܽܘ̈ܟܳܠܐ ܢܰܗܺܝܪ̈ܐ ܕܰܡܛܰܫܶܝܢ ܒܬܶܫܒ̈ܚܳܬܶܗ ܕܕܰܘܝܕ ܐܰܠܗܝܳܐ܆ ܘܡܶܬܒܰܝܢܺܝܢ ܕܰܐܝܠܝܢ ܐܰܘܕܰܥ ܒܺܐܝ̈ܕܰܘܗܝ ܪܽܘܚܳܐ. ܕܰܠܥܶܠ ܡܶܢ ܚܰܝܠܳܐ ܕܦܽܘ̈ܫܳܩܶܐ ܕܚܽܘܫܳܒ̈ܐ ܐ̱ܢܳܫܳܝ̈ܐ ܪܳܕܶܝܢ܆ ܐܶܠܐ ܗܰܘ ܕܺܐܝܬ ܠܶܗ ܐܶܕܢ̈ܐ ܕܢܰܦܫܳܐ ܐܰܝܟ ܕܶܐܡܰܪ ܡܳܪܢ ܟܕ ܡܰܠܶܦ܆ ܕܡܰܢ ܕܺܐܝܬ ܠܶܗ ܐܶܕܢ̈ܐ ܕܢܶܫܡܰܥ ܢܶܫܡܰܥ (ܡܬܝ ܝܐ: ܝܗ ܡܪܩܘܣ ܕ: ܟܓ ܠܘܩܐ ܚ: ܚ). ܡܶܬܓܰܘܶܐ ܠܘܳܬ ܨܰܘܬܳܐ ܪܽܘܚܳܢܳܐ ܘܫܳܡܰܥ ܗܳܠܝܢ ܩܴ̈ܠܐ ܩܰܕܺܝ̈ܫܶܐ ܕܢܳܩܫܺܝܢ ܗܘܰܘ ܒܬܰܪ̈ܥܶܐ ܓܰܘܳܝ̈ܐ ܕܶܐܕܢܰܘ̈ܗܝ ܕܰܢܒܺܝܐ. ܘܗܳܫܐ ܡܳܠܶܟ ܐܢܳܐ ܕܠܰܘ ܒܢܰܦܫܳܐ ܟܪܺܝܗܬܳܐ ܠܦܽܘ̈ܫܳܩܶܐ ܗܳܠܝܢ ܚܠܺܝ̈ܡܶܐ ܢܶܬܩܰܪܰܒ܆ ܐܶܠܐ ܟܕ ܫܳܠܚܺܝܢܰܢ ܘܫܳܕܶܝܢܰܢ ܠܟܽܠܳܗ̇ ܟܪܺܝܗܽܘܬܳܐ ܘܢܰܣܺܝܣܽܘܬ ܪܶܥܝܳܢܳܐ. ܐܰܝܟܰܢܳܐ ܕܰܒܪܶܥܝܳܢܳܐ ܚܠܺܝܡܳܐ ܢܩܰܒܶܠ ܬܶܐܘܳܪ̈ܺܝܰܐܣ ܗܳܠܝܢ ܩܰܕܺܝ̈ܫܳܬܳܐ. ܫܡܰܥܬܘܢ ܡܶܕܶܡ ܕܶܐܬܡܰܠܰܠ ܥܰܠ ܡܰܙܡܽܘܪ̈ܶܐ ܕܰܩܕܳܡ ܗܳܢܐ. ܘܶܐܣܬܰܟܰܠܬܘܢ ܪ̈ܶܥܝܳܢܶܐ ܩܰܛܺܝ̈ܢܶܐ ܕܰܐܘܕܰܥ ܪܽܘܚܳܐ ܩܰܕܺܝܫܳܐ ܒܗܰܘ ܕܰܩܕܳܡ ܗܳܢܐ. ܢܶܩܪܽܘܒ ܗܳܫܐ ܬܘܒ ܠܡܶܫܡܰܥ ܠܰܡܙܰܡܪܳܢܳܐ ܐܰܝܟܰܢܳܐ ܒܳܥܶܐ ܘܰܡܨܰܠܶܐ ܕܠܳܐ ܢܶܫܬܠܶܡ ܒܺܐܝ̈ܕܰܝ ܒܥܶܠܕ̈ܒܳܒܰܘܗܝ. ܘܶܐܢ ܬܺܐܡܰܪ ܕܡܶܛܠ ܒܥܶܠܕܒܳܒ̈ܐ ܦܰܓܪ̈ܳܢܶܐ ܐܳܡܰܪ ܗܘܳܐ ܐܰܝܠܝܢ ܕܶܐܡܰܪ܆ ܡܳܕܝܢ ܠܐ ܙܳܕܶܩ ܕܢܺܐܡܰܪ ܥܰܠ ܢܰܦܫܳܐ ܐܠܐ ܥܰܠ ܦܰܓܪܳܐ. ܗܳܢܘܢ ܓܝܪ ܕܟܳܡܢܺܝܢ ܠܢܰܦܫܳܐ ܠܐ ܐܺܝܬܰܝܗܘܢ ܐܰܝܠܶܝܢ ܕܰܒܣܰܝ̈ܦܶܐ ܘܰܒܢܰܝ̈ܙܟܶܐ ܡܶܙܕܰܝܢܺܝܢ. ܐܠܐ ܐܰܝܠܝܢ ܕܰܒܕܰܐܝܟ ܗܳܢܐ ܙܰܝܢܳܐ ܡܚܰܘܶܝܢ. ܬܰܟܬܽܘܫܳܐ ܠܦܰܓܪܳܐ ܟܳܡܢܺܝܢ ܘܠܰܘ ܠܢܰܦܫܳܐ. ܐܰܝܟ ܡܰܠܦܳܢܽܘܬܶܗ ܕܥܰܡܰܢܘܐܝܠ ܕܰܠܘܳܬ ܬܰܠܡܺܝ̈ܕܰܘܗܝ. ܕܠܐ ܠܰܡ ܬܶܕܚܠܽܘܢ ܡܶܢ ܐܰܝܠܝܢ ܕܩܳܛܠܺܝܢ ܦܰܓܪܳܐ܆ ܢܰܦܫܳܐ ܕܝܢ ܠܐ ܡܶܫܟܚܺܝܢ ܠܡܶܩܛܰܠ (ܡܬܝ ܝ: ܟܚ). ܐܰܝܟ ܕܶܐܡܰܪ ܢܒܺܝܳܐ ܒܬܶܫܒܽܘܚܬܳܐ ܗܳܕܐ ܕܚܰܡܫܺܝܢ ܘܰܬܫܰܥ. ܡܨܰܠܐ ܗܘܳܐ ܓܝܪ ܠܘܳܬ ܐܰܠܗܐ ܘܳܐܡܰܪ:
ܦܰܨܳܢܝ ܡܶܢ ܒܥܶܠܕ̈ܒܳܒܰܝ ܐܰܠܗܳܐ. ܘܡܶܢ ܐܰܝܠܶܝܢ ܕܩܳܝܡܺܝܢ ܥܠܰܝ ܐܰܪܺܝܡܰܝܢܝ: ܦܰܨܳܢܝ ܡܶܢ ܥܳܒ̈ܕܰܝ ܫܽܘܩܪܳܐ. ܘܡܶܢ ܓܰܒܪ̈ܶܐ ܐܳܫ̈ܕܰܝ ܕܡܳܐ ܦܪܽܘܩܰܝܢܝ. ܕܳܡܶܝܢ ܗܳܠܝܢ ܕܡܶܛܠ ܫܳܐܘܳܠ ܟܕ ܩܰܛܶܠ ܒܺܐܝ̈ܕܰܝ ܕܳܘܳܐܓ ܐܰܕܽܘܡܳܝܳܐ ܬܡܳܢܺܝܢ ܘܚܰܡܫܳܐ ܟܳܗܢ̈ܐ ܩܰܕܺܝ̈ܫܶܐ. ܡܨܰܠܶܐ ܗܘܳܐ ܕܰܘܝܕ ܕܢܶܬܦܰܨܶܐ ܡܶܢ ܗܳܠܝܢ ܕܗܳܟܰܢܐ ܕܠܐ ܪ̈ܰܚܡܳܐ ܐܳܫܕܺܝܢ ܕܡܳܐ ܕܰܓܒܰܝܴ̈ܐ. ܠܰܝܬ ܒܰܟܝܳܢܳܐ ܐܢܳܫܳܝܳܐ ܕܗܽܘ ܡܶܢܶܗ ܢܥܰܬܶܕ ܩܶܛܠܳܐ ܒܢܶܟܠܳܐ ܥܰܠ ܚܰܕ ܡܶܢ ܩܰܕܺܝ̈ܫܶܐ. ܟܕ ܡܶܢ ܗܰܘ ܛܰܪܟܳܢܳܐ ܠܐ ܢܶܬܬܰܥܒܰܕ. ܡܳܕܶܝܢ ܘܫܰܪܺܝܪܳܐ ܫܳܐܷܠ ܕܰܘܝܕ ܡܶܢ ܐܰܠܗܐ ܕܰܢܦܰܨܝܶܗ ܡܶܢ ܫܳܐܘܳܠ ܒܥܶܠܕܒܳܒܶܗ ܗܰܘ ܕܰܨܗܶܐ ܗܘܳܐ ܠܰܕܡܶܗ. ܗܳܠܝܢ ܕܝܢ ܕܰܒܫܳܐܘܳܠ ܡܰܥܒܕܺܝܢ ܗܘܰܘ ܘܰܡܥܰܬܕܺܝܢ ܩܶܛܠܐ. ܒܳܥܶܝܢ ܗܘܰܘ ܕܰܠܢܰܦܫܶܗ ܕܰܢܒܺܝܐ ܢܶܩܛܠܽܘܢ. ܨܰܠܺܝ ܩܰܕܡܳܐܝ̣ܬ ܕܡܶܢ ܐܳܫ̈ܕܰܝ ܕܡܳܐ ܢܶܬܦܰܨܶܐ. ܘܒܳܬܰܪ ܗܳܠܝܢ ܕܢܶܫܬܰܘܙܰܒ ܡܶܢ ܒܥܶܠܕ̈ܒܳܒܐ ܡܶܬܝܰܕ̈ܥܳܢܐ ܡܶܬܟܰܫܰܦ. ܟܕ ܥܠ ܢܰܦܫܳܐ ܒܰܟܡܺܐܢ̈ܐ ܡܶܬܦܰܪܣܶܝܢ. ܒܰܙܒܰܢ ܡܰܢ ܒܰܚܣܳܡܳܐ ܟܳܡܢܺܝܢ: ܒܰܙܒܰܢ ܒܥܶܠܕܒܳܒܽܘܬܳܐ: ܘܺܐܝܬ ܐܶܡܰܬܝ ܕܰܒܝܰܕ ܪ̈ܓܺܝܓܳܬܳܐ ܕܡܶܣܬܰܒܪ̈ܳܢ ܕܰܐܠܺܝܨܳܐ ܥܠܰܝܗܝܢ. ܘܡܶܢ ܟܡܺܐܢܳܐ ܠܰܟܡܺܐܢܳܐ ܡܫܰܢܶܝܢ.
ܘܡܶܛܠ ܕܗܶܢܽܘܢ ܟܡܶܢܘ ܠܢܰܦܫܝ. ܘܰܐܥܫܶܢܘ ܥܠܰܝ ܒܺܝܫܽܘܬܗܽܘܢ. ܐܺܝܬ ܓܝܪ ܕܰܟܡܶܢܘ ܠܶܗ ܒܪܶܓܰܬ ܪܺܝܫܳܢܽܘܬܳܐ. ܘܟܕ ܒܦܰܚܳܐ ܗܳܢܐ ܠܐ ܨܳܕܽܘܗܝ. ܥܰܪܩܠܽܘܗܝ ܒܦܰܚܳܐ ܕܪܳܡܽܘܬܳܐ. ܘܺܐܝܬ ܕܰܛܡܰܪܘ ܠܶܗ ܦܰܚ̈ܐ ܕܪܶܚܡܰܬ ܟܶܣܦܳܐ. ܘܟܕ ܡܶܢ ܗܳܢܐ ܐܶܫܬܰܘܙܰܒ܆ ܐܰܚܕܽܘܗܝ ܒܦܰܚܳܐ ܕܰܓܠܺܝܙܽܘܬ ܪ̈ܰܚܡܶܐ. ܘܰܨܠܰܘ ܠܶܗ ܦܰܚܳܐ ܕܙܳܢܝܽܘܬܳܐ. ܘܟܕ ܐܶܬܢܰܨܰܚ ܒܰܒܬܽܘܠܽܘܬܳܐ ܘܰܙܟܳܐ ܠܛܰܡܽܐܘܬܳܐ ܕܓܰܘܪܳܐ. ܐܰܚܕܽܘܗܝ ܒܪܶܚܡܰܬ ܫܽܘܒܚܳܐ. ܡܶܛܠ ܕܠܰܢܒܺܝܐ ܒܣܰܓܺܝ̈ܐܬܳܐ ܟܡܶܢܘ ܠܢܰܦܫܶܗ. ܥܰܠܗܳܝ ܐܶܡܰܪ܆ ܕܗܶܢܘܢ ܟܡܶܢܘ ܠܢܰܦܫܝ. ܐܶܠܘ ܓܶܝܪ ܣܰܟܠܽܘܬܝ ܗܘܳܬ ܥܶܠܬܳܐ ܠܰܟܡܺܐܢܗܘܢ. ܘܶܐܠܘ ܡܶܕܡ ܒܺܝܫܳܐ ܥܶܒܕܶܬ ܠܗܘܢ. ܒܟܺܐܢܽܘܬܳܐ ܪܳܗܛܺܝܢ ܗܘܰܘ ܒܳܬܰܪ ܢܰܦܫܝ ܠܡܶܩܛܠܳܗ̇. ܐܠܐ ܟܕ ܠܐ ܚܛܺܝܬ ܠܗܘܢ ܡܶܬܡܰܠܟܺܝܢ ܥܠܰܝ ܩܶܛܠܳܐ. ܠܰܘ ܓܝܪ ܡܶܢ ܥܶܠܬܳܐ ܕܰܚܛܳܗ̈ܐ ܩܳܝܡܺܝܢ ܩܪ̈ܳܒܶܐ ܥܠ ܙܰܕܺܝ̈ܩܶܐ. ܘܥܰܠܗܳܝ ܡܙܰܡܰܪ ܕܰܘܝܕ ܘܳܐܡܰܪ:
ܠܳܐ ܒܣܰܟܠܘܴ̈ܬܝ ܘܠܳܐ ܒܰܚܛܳܗܱ̈ܝ ܡܳܪܝ. ܕܠܳܐ ܒܣܰܟܠܽܘܬܳܐ ܪܗܶܛܘ ܥܠܰܝ ܘܶܐܬܛܰܝܰܒܘ ܥܠܰܝ. ܟܕ ܐܶܡܰܪ ܡܙܰܡܪܳܢܳܐ ܗܳܠܝܢ܆ ܡܚܰܘܶܐ ܕܠܐ ܥܕܰܟܺܝܠ ܐܶܬܬܚܶܕ ܗܘܳܐ ܠܶܗ ܒܦܰܚܳܐ ܕܒܶܝܬ ܐܽܘܪܺܝܳܐ. ܒܪܰܡ ܕܝܢ ܡܛܠ ܕܶܐܡܰܪ ܢܒܺܝܐ ܕܠܐ ܒܣܰܟ̈ܠܘܳܬܝ ܘܠܐ ܒܰܚ̈ܛܳܗܰܝ ܡܳܪܝ. ܘܰܕܠܳܐ ܒܣܰܟܠܽܘܬܳܐ ܪܗܶܛܘ ܥܠܰܝ ܘܶܐܬܛܰܝܰܒܘ ܥܠܰܝ. ܘܳܐܠܨܳܐ ܕܰܠܚܰܬܺܝܬܽܘܬܶܗ ܕܦܶܬܓܳܡܳܐ ܢܰܝܬܶܐ ܠܦܽܘܫܳܩܳܐ. ܘܫܳܡܥܺܝܢܰܢ ܕܳܐܡܰܪ ܚܰܟܺܝܡܳܐ. ܕܠܰܝܬ ܙܰܕܺܝܩ ܒܰܐܪܥܳܐ ܕܢܶܥܒܶܕ ܛܳܒܬܳܐ ܘܠܐ ܢܶܚܛܶܐ (ܩܘܗܠܬ ܙ: ܟܐ). ܡܶܫܟܚܺܝܢܰܢ ܕܪܶܗܛܳܐ ܩܰܕܡܳܝܳܐ ܕܰܠܒܰܟܘ ܚܰܝ̈ܠܰܘܳܬܳܐ ܕܕܰܠܩܽܘܒܠܳܐ ܥܰܠ ܒܰܪܢܳܫܳܐ. ܟܕ ܠܐ ܥܕܰܟܺܝܠ ܚܛܳܐ ܗܘܳܐ ܠܶܗ ܪܗܶܛܘ ܥܠܰܘܗܝ. ܘܰܕܠܐ ܣܰܟܠܽܘܬܳܐ ܗܘܳܐ. ܟܕ ܥܒܰܕܘ ܥܠܰܘܗܝ ܓܰܝ̈ܣܶܐ ܟܡܺܐܢ̈ܐ ܘܫܰܠܰܚܘ ܢܰܚ̈ܬܰܘܗܝ. ܡܳܕܝܢ ܫܰܪܺܝܪܳܐ ܗܳܝ ܕܠܰܘ ܡܶܢ ܚܛܺܝܬܳܐ ܢܳܣܒܺܝܢ ܩܰܕܺܝ̈ܫܶܐ ܥܶܠܬܳܐ ܠܡܰܩܪܳܒܽܘ ܥܰܡܗܘܢ ܕܰܝ̈ܘܶܐ. ܐܠܐ ܡܶܛܠ ܦܶܬܓܳܡ̈ܐ ܗܳܠܝܢ ܕܰܒܥܰܡܰܢܘܐܝܠ ܚܳܐܱܪ ܚܰܝܠܳܐ ܕܦܽܘܫܳܩܗܽܘܢ. ܐܳܡܰܪ ܐܢܳܐ ܕܒܶܗ ܐܳܬܶܝܢ ܠܦܽܘܫܳܩܳܐ ܓܡܺܝܪܳܐ. ܗܽܘܝܽܘ ܒܰܠܚܽܘܕ ܕܠܳܐ ܥܒܰܕ ܚܛܺܝܬܳܐ. ܘܗܽܘܝܽܘ ܗܰܘ ܕܶܐܬܳܐ ܐܰܪܟܽܘܢܳܐ ܕܰܚܛܺܝܬܳܐ ܘܠܐ ܐܶܫܟܰܚܘ ܒܶܗ ܡܶܕܶܡ ܡܶܢ ܕܺܝܠܶܗ. ܘܡܶܛܠ ܗܳܕܐ ܠܘܳܬܶܗ ܡܨܰܠܶܐ ܢܒܺܝܐ. ܕܢܶܬܬܥܺܝܪ ܘܢܶܥܒܶܕ ܠܶܗ ܢܩܰܡܬܳܐ ܡܶܢ ܒܥܶܠܕ̈ܒܳܒܶܐ ܕܢܰܦܫܶܗ.
ܐܶܬܬܥܺܝܪ ܠܰܡ ܘܰܚܙܺܝ ܐܰܢܬ ܡܳܪܝܳܐ ܐܠܰܗܐ ܚܰܝܠܬܳܢܳܐ. ܐܰܠܳܗܶܗ ܕܺܝܣܪܳܐܝܠ ܐܶܬܬܥܺܝܪ. ܠܡܳܢܳܐ ܬܰܪܬܶܝܢ ܙܰܒܢܺܝ̈ܢ ܐܳܡܰܪ ܠܶܗ ܐܶܬܬܥܺܝܪ. ܘܡܶܛܠܡܳܢܐ ܐܰܝܟ ܕܥܰܡ ܕܰܡܟܳܐ ܡܡܰܠܶܠ. ܥܰܡ ܗܰܘ ܕܠܳܐ ܢܳܐܷܡ ܘܠܳܐ ܕܳܡܶܟ. ܒܗܳܝ ܡܰܢ ܩܰܕܡܳܝܬܳܐ ܕܢܺܐܬܶܐ. ܘܢܶܬܓܠܶܐ ܒܰܒܣܰܪ ܡܥܺܝܪ ܠܶܗ. ܘܰܒܗܳܝ ܕܬܰܪܬܶܝܢ. ܕܢܶܩܽܘܡ ܡܶܢ ܒܶܝܬ ܡܺܝ̈ܬܶܐ ܡܦܺܝܣ ܠܶܗ. ܡܶܛܠ ܗܳܕܐ ܒܗܳܝ ܩܰܕܡܳܝܬܳܐ ܐܶܡܰܪ ܕܶܐܬܬܥܺܝܪ ܘܰܚܙܺܝ. ܒܗܳܝ ܕܬܰܪܬܶܝܢ ܡܶܢ ܒܳܬܰܪ ܕܰܐܥܺܝܪܶܗ ܪܽܘܚܳܐ ܠܰܐܠܗܶܗ ܕܺܝܣܪܳܐܠ ܐܶܡܰܪ ܠܶܗ.
ܘܰܦܩܽܘܕ ܠܟܽܠܗܽܘܢ ܥܰܡ̈ܡܶܐ. ܡܶܢ ܒܳܬܰܪ ܕܩܳܡ ܡܶܢ ܩܰܒܪܳܐ ܡܳܪܝܳܐ ܐܰܠܗܳܐ ܚܰܝܠܬܳܢܳܐ ܘܶܐܬܬܥܺܝܪ ܡܶܢ ܫܶܢܬܳܐ ܕܡܰܘܬܳܐ. ܥܒܰܕ ܐܰܝܟ ܕܰܐܦܺܝܣܶܗ ܪܽܘܚܳܐ. ܘܰܦܩܰܕ ܠܟܽܠܗܘܢ ܥܰܡ̈ܡܶܐ ܟܕ ܐܳܡܰܪ ܠܬܰܠܡܺܝ̈ܕܶܐ ܕܺܝܠܶܗ ܩܰܕܺܝ̈ܫܶܐ. ܕܙܶܠܘ ܬܰܠܡܶܕܘ ܘܰܐܥܡܶܕܘ ܠܟܽܠܗܘܢ ܥܰܡ̈ܡܶܐ܆ ܒܰܫܡܳܐ ܕܰܐܒܳܐ ܘܕܰܒܪܳܐ ܘܪܽܘܚܳܐ ܩܰܕܺܝܫܳܐ (ܡܬܝ ܟܚ: ܝܛ). ܘܠܐ ܬܘܒ ܐܰܗܡܺܝ ܘܠܐ ܡܶܢ ܬܒܰܥܬܳܐ ܕܥܰܘܴ̈ܠܶܐ. ܒܗܳܝ ܕܝܰܗܒ ܠܰܫܠܺܝ̈ܚܰܘܗܝ ܚܰܝܠܳܐ ܘܫܽܘܠܛܳܢܳܐ ܕܰܢܕܽܘܫܘܢ ܚܘܱ̈ܘܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܳܐ ܕܰܒܥܶܠܕܒܳܒܳܐ. ܐܰܝܟ ܕܶܐܡܰܪ ܢܒܺܝܐ.
ܘܠܐ ܬܶܫܒܽܘܩ ܠܟܽܠܗܘܢ ܥܰܘܴ̈ܠܶܐ: ܢܶܗܦܟܽܘܢ ܒܪܰܡܫܳܐ ܘܰܢܥܰܘܽܘܢ ܐܰܝܟ ܟܰܠܒ̈ܐ. ܘܢܶܬܟܰܪܟܽܘܢ ܡܕܺܝܢܬܳܐ. ܡܶܢ ܒܳܬܰܪ ܕܶܐܬܒܰܢܝܰܬ ܡܕܺܝܢܬܳܐ ܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ. ܘܰܗܘܳܐ ܠܳܗ̇ ܫܶܬܶܐܣܬܳܐ ܕܗܰܝܡܳܢܽܘܬܳܐ. ܘܩܳܡ ܠܳܗ̇ ܫܽܘܪܳܐ ܐܶܘܰܢܓܶܠܝܽܘܢ ܕܰܐܠܗܐ. ܘܰܐܝܟ ܕܰܒܦܽܘܪ̈ܩܳܣܶܐ ܘܡܰܓ̈ܕܠܶܐ ܪ̈ܳܡܶܐ ܐܶܬܚܰܣܢܰܬ. ܒܝܰܕ ܫܽܘܪܳܪܳܐ ܕܦܽܘ̈ܩܕܳܢܶܐ ܘܢܳܡܽܘ̈ܣܶܐ ܕܣܳܡ ܠܳܗ̇. ܗܰܘ ܕܰܒܢܳܗ̇ ܒܡܶܠܬܶܗ. ܘܰܩܢܳܗ̇ ܒܰܕܡܶܗ. ܘܰܦܝܳܣܳܐ ܡܩܰܪܒܳܐ ܪܽܘܚܳܐ ܒܝܰܕ ܢܒܺܝܐ. ܕܠܐ ܢܶܫܒܽܘܩ ܐܶܢܘܢ ܥܰܡܰܢܘܐܝܠ ܠܰܒܥܶܠܕ̈ܒܳܒܰܘܗܝ ܕܰܨܠܺܝܒܳܐ. ܕܢܶܥܠܽܘܢ ܠܰܡܕܺܝܢܬܳܐ ܥܺܕܬܳܐ. ܐܠܐ ܠܰܡ ܒܚܶܫܽܘܟܳܐ ܕܛܳܥܝܽܘܬܳܐ. ܐܰܝܟ ܕܰܒܪܰܡܫܳܐ ܢܶܫܬܰܩܦܘܢ. ܘܰܠܒܰܪ ܡܶܢ ܡܕܺܝܢܬܳܐ ܢܶܗܘܘܢ ܡܶܬܟܰܪܟܺܝܢ. ܘܰܠܓܰܘܳܗ̇ ܠܳܐ ܢܶܥܠܽܘܢ. ܘܠܐ ܠܘܳܬ ܬܰܪܥܳܗ̇ ܢܶܬܩܰܪܒܽܘܢ. ܘܠܳܐ ܢܶܬܦܣܶܣ ܠܗܘܢ ܕܢܶܫܡܛܽܘܢ ܣܰܦܣܺܪܳܐ ܕܠܶܫܳܢܰܝ̈ܗܘܢ ܥܰܠ ܒܢܶܝ̈ܗ̇ ܕܥܺܕܬܳܐ. ܐܰܝܟ ܕܰܠܛܰܫܘ ܠܶܫܳܢܗܘܢ ܥܰܠ ܚܰܘܳܐ ܘܰܐܦܩܽܘܗ̇ ܡܶܢ ܦܰܪܕܰܝܣܳܐ. ܡܶܠܬܗܘܢ ܕܗܳܢܘܢ ܣܰܝܦܳܐ ܚܰܪܺܝܦܳܐ.
ܘܡܺܐܡܪܳܐ ܕܦܽܘܡܗܘܢ ܣܰܦܣܺܪܳܐ ܕܣܶܦ̈ܘܳܬܗܘܢ. ܘܳܐܡܪܺܝܢ ܡܰܢܽܘ ܫܳܡܰܥ. ܡܳܐ ܓܝܪ ܕܥܳܐܠܺܝܢ ܚܽܘ̈ܫܳܒܐ ܕܡܶܢ ܫܺܐܕ̈ܐ ܠܢܰܦܫܳܐ. ܗܳܢܘܢ ܕܰܢܒܺܝܐ ܣܰܦܣܺܪܳܐ ܩܪܳܐ ܐܶܢܘܢ. ܠܰܝܬ ܓܝܪ ܕܫܳܡܰܥ ܡܶܕܶܡ ܕܡܳܠܟܺܝܢ ܠܳܗ̇ ܠܢܰܦܫܳܐ. ܘܠܐ ܐ̱ܢܳܫ ܝܳܕܰܥ ܒܰܐܝܕܳܐ ܐܽܘܪܚܳܐ ܥܳܐܷܠ ܗܰܘ ܐܰܟܳܪܳܐ ܒܺܝܫܳܐ ܘܫܳܕܶܐ ܒܰܐܪܥܳܐ ܕܠܶܒܳܐ ܙܰܪܥܳܐ ܕܰܚܒܳܠܳܐ ܘܕܰܐܒܕܳܢܳܐ. ܐܶܡܰܪ ܓܝܪ ܢܒܺܝܐ.
ܘܰܐܢܬ ܡܳܪܝܳܐ ܓܚܰܟ ܥܠܰܝܗܘܢ. ܘܡܰܝܶܩ ܥܰܠ ܟܽܠܗܘܢ ܥܰܡ̈ܡܶܐ. ܡܶܢܳܟ ܡܳܪܝܳܐ ܠܳܐ ܡܶܬܟܰܣܶܐ ܙܰܪܥܳܐ ܡܰܘܒܕܳܢܳܐ ܕܪ̈ܰܫܺܝܥܶܐ. ܘܩܳܕ̈ܡܳܢ ܫܳܡܥܴ̈ܢ ܐܶܕܢܰܝ̈ܟ ܠܟܽܠܳܗ̇ ܛܰܪܟܳܢܽܘܬܳܐ ܕܡܰܥܒܕܺܝܢ ܠܶܫܳܢܰܝ̈ܗܘܢ. ܐܶܢܳܐ ܕܶܝܢ ܠܳܟ ܡܰܘܕܶܐ ܐܢܳܐ. ܘܰܒܡܰܡܠܠܳܐ ܕܰܐܒܕܳܢܳܐ ܢܰܦܫܝ ܠܳܐ ܡܛܰܢܶܦ ܐܢܳܐ.
ܐܰܠܗܳܐ ܠܳܟ ܐܶܫܰܒܰܚ. ܡܶܛܠ ܕܰܐܢܬ ܗܽܘ ܒܶܝܬ ܓܰܘܣܝ: ܐܰܠܗܳܐ ܛܰܝܒܽܘܬܳܟ ܬܩܰܕܡܰܢܝ. ܐܰܠܗܳܐ ܚܰܘܳܢܝ ܒܰܒܥܶܠܕ̈ܒܳܒܰܝ. ܫܰܦܺܝܪ ܚܳܬܡܳܐ ܘܙܰܝܢܳܐ ܕܰܬܠܬܳܐ ܩܢܽܘ̈ܡܶܐ. ܫܩܰܠ ܠܶܗ ܢܒܺܝܐ ܥܽܘܕܪܳܢܳܐ ܠܽܘܩܒܰܠ ܚܰܝ̈ܠܰܘܳܬܳܐ ܡܳܪ̈ܽܘܕܶܐ. ܗܳܕܐ ܓܝܪ ܡܒܰܕܩܳܐ ܝܰܬܺܝܪܳܐܝܬ ܠܗܳܠܝܢ ܕܶܐܬܢܰܗܰܪ. ܐܶܠܘ ܠܐ ܓܝܪ ܠܰܬܠܺܝܬܳܝܽܘܬܐ ܩܰܕܺܝܫܬܳܐ ܐܶܬܥܶܗܰܕ. ܘܶܐܫܬܰܘܕܰܥ ܠܰܐܠܗܐ ܐܰܒܳܐ. ܘܶܐܡܰܪ ܐܰܠܗܐ ܠܳܟ ܐܶܫܰܒܰܚ ܘܶܐܣܬܰܟܰܠ ܠܰܐܠܗܐ ܡܶܠܬܳܐ ܗܰܘ ܕܰܥܒܰܕ ܛܰܝܒܽܘܬܳܐ ܠܘܳܬ ܓܶܢܣܳܐ ܕܰܒܢܰܝ̈ܢܳܫܳܐ ܘܶܐܡܰܪ ܐܠܰܗܐ ܛܰܝܒܽܘܬܳܟ ܬܩܰܕܡܰܢܝ. ܘܶܐܬܓܠܺܝ ܠܶܗ ܩܢܽܘܡܳܐ ܕܪܽܘܚܳܐ ܩܰܕܺܝܫܳܐ. ܘܡܛܠ ܗܳܢܐ ܐܰܘܕܺܝ ܘܰܒܥܳܐ ܡܶܢܶܗ ܟܕ ܐܳܡܰܪ. ܐܰܠܗܐ ܚܰܘܳܢܝ ܒܰܒܥܶܠܕ̈ܒܳܒܰܝ. ܘܡܶܟܺܝܠ ܡܶܠܬܶܗ ܠܘܳܬ ܥܰܡܳܐ ܡܦܰܢܶܐ ܠܳܗ̇. ܟܕ ܡܶܬܚܰܡܰܬ ܥܰܠ ܠܳܐ ܡܶܬܛܦܺܝܣܳܢܽܘܬܗܘܢ. ܡܶܢ ܒܳܬܰܪ ܓܝܪ ܕܶܐܬܟܰܪܙܰܬ ܘܶܐܬܒܰܕܩܰܬ ܬܠܺܝܬܳܝܽܘܬܐ ܩܰܕܺܝܫܬܳܐ ܡܶܢ ܒܳܬܰܪ ܩܝܳܡܬܶܗ ܕܡܳܪܢ ܘܰܐܠܳܗܢ ܕܡܶܢ ܫܶܢܬܳܐ ܕܡܰܘܬܳܐ. ܦܪܰܫ ܢܰܦܫܶܗ ܥܰܡܳܐ ܣܰܟܠܳܐ ܡܶܢ ܬܰܘܕܺܝܬܳܐ ܕܥܰܡ̈ܡܶܐ ܡܗܰܝܡ̈ܢܶܐ. ܘܰܢܦܰܩ ܡܶܢ ܒܰܝܬܳܝܽܘܬܐ ܕܰܐܠܗܐ. ܘܥܰܠܗܳܕܐ ܐܶܡܰܪ ܢܒܺܝܐ ܠܰܐܠܗܐ. ܕܠܳܐ ܬܶܩܛܽܘܠ ܐܶܢܘܢ. ܐܰܝܟ ܗܳܝ ܕܨܰܠܺܝ ܒܪܳܐ ܠܘܳܬ ܐܰܒܽܘܗܝ ܘܶܐܡܰܪ: ܕܳܐܒܝ ܫܒܽܘܩ ܠܗܘܢ (ܠܘܩܐ ܟܓ: ܠܕ).
ܠܳܐ ܠܰܡ ܬܶܩܛܽܘܠ ܐܶܢܘܢ ܕܠܳܐ ܢܰܛܥܽܘܢ ܠܥܰܡܝ. ܐܠܐ ܐܰܙܺܝܥ ܐܶܢܘܢ ܒܚܰܝܠܳܟ. ܘܰܐܢܺܝܕ ܐܶܢܘܢ ܡܳܪܝܳܐ ܬܽܘܟܠܳܢܝ. ܕܳܡܝܳܐ ܗܳܕܐ ܕܒܰܫܪܳܪܳܐ. ܠܰܘܛܬܳܐ ܗܳܝ ܕܢܶܦܩܰܬ ܡܶܢ ܐܰܠܗܐ ܥܰܠ ܥܰܡܳܐ ܕܶܐܫܰܕ ܕܡܳܐ ܕܰܒܪܶܗ ܚܰܒܺܝܒܳܐ. ܘܰܐܟܙܢܳܐ ܕܰܠܩܳܐܻܝܢ ܐܶܡܰܪ ܐܰܠܗܐ. ܡܶܢ ܒܳܬܰܪ ܕܰܩܛܰܠ ܠܰܐܚܽܘܗܝ ܗܳܟܺܝܠ. ܙܳܐܱܥ ܘܢܳܐܷܕ ܬܶܗܘܶܐ ܒܰܐܪܥܳܐ (ܒܪܝܬܐ ܕ: ܝܒ). ܗܳܟܰܢܐ ܐܳܦ ܗܳܪܟܐ ܫܳܡܥܺܝܢܰܢ ܠܪܽܘܚܳܐ ܕܰܐܠܗܐ ܕܰܡܙܺܝܥ ܠܗܘܢ ܠܰܒܢܰܝ̈ ܨܳܠܽܘܒ̈ܐ ܘܰܡܢܺܝܕ ܠܗܘܢ ܥܰܠ ܐܰܪܥܳܐ. ܐܰܟܡܳܐ ܕܳܐܦ ܠܰܐܒܽܘܗܘܢ ܩܳܐܻܝܢ ܗܰܘ ܕܰܐܠܶܦ ܐܶܢܘܢ. ܐܰܙܺܝܥ ܐܶܢܘܢ ܒܚܰܝܠܳܟ ܘܰܐܢܺܝܕ ܐܶܢܘܢ ܡܳܪܝܳܐ ܬܽܘܟܠܳܢܝ.
ܐܶܠܐ ܚܛܺܝܬܳܐ ܕܦܽܘܡܗܘܢ. ܡܰܠܶܠܘ ܣܶܦ̈ܘܳܬܗܘܢ. ܡܶܛܠܗܳܕܐ ܐܶܡܰܪ ܥܠܰܝܗܘܢ ܢܒܺܝܐ:
ܢܶܬܬܰܚܕܘܢ ܒܫܽܘܒܗܳܪܗܘܢ: ܡܶܛܠ ܕܠܰܘܛܬܳܐ ܘܕܰܓܳܠܽܘܬܳܐ ܡܶܫܬܰܥܶܝܢ. ܦܰܚܳܐ ܓܝܪ ܕܪܰܒ ܡܶܢ ܗܳܢܐ ܠܰܝܬ ܗܘܳܐ ܠܶܗ ܠܳܐܟܶܠܩܰܪܨܳܐ ܕܢܶܨܠܐܷ ܩܕܳܡ ܥܰܡܳܐ. ܕܰܢܨܰܥܪܽܘܢ ܘܰܢܩܰܛܠܽܘܢ ܠܰܐܠܗܐ. ܘܰܒܗܳܢܐ ܐܶܡܰܪ ܪܽܘܚܳܐ ܢܶܬܬܰܚܕܽܘܢ. ܘܡܶܢ ܗܳܢܐ ܐܶܡܰܪ ܕܰܒܕܺܝܢܳܐ ܢܶܬܬܰܚܕܽܘܢ܆ ܡܶܛܠ ܕܰܫܒܰܩܘ ܫܪܳܪܳܐ ܕܺܝܠܶܦܘ ܡܶܢ ܢܒܺܝ̈ܐ. ܘܗܳܐ ܡܫܰܬܠܺܝܢ ܦܺܐܪ̈ܐ ܘܡܶܫܬܰܥܶܝܢ ܡܰܛܥܝܳܢܽܘܬܐ ܘܠܰܘܛܬܳܐ ܘܕܰܓܳܠܽܘܬܐ ܒܰܝܢܳܬ ܥܰܡ̈ܡܶܐ. ܘܥܰܠܗܳܝ ܐܶܡܰܪ ܢܒܺܝܐ.
ܐܰܘܒܶܕ ܐܶܢܽܘܢ ܒܪܽܘܓܙܳܟ ܐܰܘܒܶܕ ܐܶܢܘܢ ܘܠܐ ܢܶܫܬܰܟܚܽܘܢ: ܕܢܶܕܥܽܘܢ ܕܰܐܠܗܐ ܫܰܠܺܝܛ ܥܰܠ ܝܰܥܩܽܘܒ ܘܥܰܠ ܥܶܒܪ̈ܶܝܗ̇ ܕܰܐܪܥܳܐ. ܡܶܛܠ ܡܳܢܐ ܬܰܪܬܶܝܢ ܙܰܒܢܺܝ̈ܢ ܥܳܐܷܦ ܠܳܗ̇ ܠܡܶܠܬܶܗ ܢܒܺܝܐ. ܘܳܐܡܰܪ ܕܰܐܘܒܶܕ ܐܶܢܘܢ. ܠܳܐ ܣܳܦܩܳܐ ܗܘܳܬ ܐܰܪܰܐ ܚܕܳܐ ܙܒܰܢܬܳܐ ܕܢܰܘܒܶܕ ܐܶܢܘܢ. ܒܪܰܡ ܟܕ ܠܘܳܬ ܝܽܘ̈ܕܳܝܐ ܘܨܳܠܽܘܒ̈ܐ ܡܰܪ̈ܳܚܐ ܡܶܬܦܰܢܝܳܐ ܡܶܠܬܳܐ. ܘܠܗ̇ ܟܕ ܠܗ̇ ܠܡܶܠܬܳܐ ܐܶܡܰܪ ܕܰܐܘܒܶܕ ܐܶܢܘܢ ܒܪܽܘܓܙܳܟ ܩܰܕܡܳܐܝ̣ܬ. ܗܳܝ ܕܰܒܝܰܕ ܛܺܝܛܽܘܣ ܒܰܪ ܐܶܣܦܺܝܣܝܰܐܢܽܘܣ ܕܥܰܩܪܳܗ̇ ܠܐܽܘܪܺܫܠܶܡ ܒܳܬܰܪ ܐܰܪܒܥܺܝܢ ܫܢܻ̈ܝܢ ܕܰܨܠܺܝܒܳܐ. ܘܰܒܪܽܘܓܙܳܐ ܪܰܒܳܐ ܒܰܕܰܪ ܐܶܢܘܢ ܒܶܝܬ ܥܰܡ̈ܡܶܐ܆ ܗܳܝܕܝܢ ܐܶܡܰܪ ܕܬܰܪܬܶܝܢ ܙܰܒܢܻ̈ܝܢ ܐܰܘܒܶܕ ܐܶܢܘܢ ܘܠܐ ܢܶܫܬܰܟܚܽܘܢ. ܡܳܐ ܕܕܳܐܷܢ ܠܗܘܢ ܠܚܰܪܬܳܐ ܒܝܰܕ ܫܠܺܝܚ̈ܐ. ܘܰܡܚܰܝܶܒ ܠܗܘܢ ܒܕܺܝܢܳܐ ܘܰܒܬܰܫܢܺܝܩܳܐ ܕܢܽܘܪܳܐ. ܐܳܦ ܠܐ ܡܶܫܬܰܟܚܺܝܢ ܠܚܰܝ̈ܐ.
ܘܢܶܗܦܟܽܘܢ ܒܪܰܡܫܳܐ ܘܰܢܥܰܘܽܘܢ ܐܰܝܟ ܟܰܠܒ̈ܐ: ܐܳܦ ܢܶܬܟܰܪܟܽܘܢ ܡܕܺܝܢ̱ܬܳܐ. ܐܳܦ ܠܗܳܢܐ ܦܶܬܓܳܡܳܐ ܬܰܪܬܶܝܢ ܙܰܒܢ̈ܝܢ ܐܶܡܰܪ ܢܒܺܝܐ. ܒܪܰܡ ܠܰܘ ܚܰܕ ܢܺܝܫܳܐ ܡܰܘܕܰܥ ܢܒܺܝܐ܆ ܒܗܰܘ ܩܰܕܡܳܝܳܐ ܐܶܡܰܪ ܡܺܐܡܪܳܐ ܕܦܽܘܡܗܘܢ ܣܰܦܣܺܪܳܐ ܕܣܶܦ̈ܘܳܬܗܘܢ. ܘܳܐܡܪܺܝܢ ܡܰܢܽܘ ܫܳܡܰܥ. ܒܗܳܢܐ ܦܶܬܓܳܡܳܐ ܬܪܰܝܳܢܐ ܐܰܠܶܦ ܢܶܬܟܰܪܟܘܢ ܡܕܺܝܢ̱ܬܳܐ ܟܕ ܥܳܘܶܝܢ ܐܰܝܟ ܟܰܠܒ̈ܐ. ܘܠܐ ܢܶܣܒܥܽܘܢ ܘܠܳܐ ܢܒܽܘܬܽܘܢ. ܚܙܰܝܬ ܐܰܝܟܰܢܳܐ ܠܰܘ ܚܰܕ ܣܽܘܟܳܠܐ ܩܢܶܝܢ ܦܶܬܓܳܡ̈ܐ ܗܳܠܝܢ. ܡܳܐ ܕܝܢ ܕܶܐܬܚܰܙܝܰܬ ܗܳܝ ܡܕܺܝܢ̱ܬܳܐ ܐܽܘܪܺܫܠܶܡ ܥܶܠܳܝܬܳܐ. ܘܬܳܩܶܢ ܒܳܗ̇ ܦܳܬܽܘܪܳܐ ܕܚܰܝ̈ܐ ܠܩܰܕܺܝ̈ܫܶܐ ܘܩܳܡ ܚܰܬܢܳܐ ܡܶܢ ܡܰܘܬܒܶܗ ܕܒܰܟܪ̈ܽܘܒܶܐ. ܘܶܐܣܰܪ ܚܰܨܰܘ̈ܗܝ ܘܰܐܣܡܶܟ ܠܰܓܒܰܝ̈ܐ ܕܺܝܠܶܗ ܥܰܠ ܣܡܳܟܳܐ ܕܒܽܘ̈ܣܳܡܐ. ܘܰܡܫܰܡܶܫ ܠܗܘܢ ܐܰܝܟ ܫܽܘܘܕܳܝܶܗ ܒܰܛܥܽܘܡ̈ܐ ܕܠܐ ܡܶܬܚܰܒܠܺܝܢ. ܟܕ ܡܶܬܚܙܶܐ ܠܳܥܳܙܳܪ ܕܰܣܡܺܝܟ ܒܥܽܘܒܶܗ ܕܰܐܒܪܳܗܳܡ. ܒܗܳܢܐ ܙܰܒܢܳܐ ܠܰܘ ܟܕ ܡܶܙܕܰܝܢܺܝܢ ܚܰܝ̈ܠܰܘܳܬܐ ܕܰܠܩܽܘܒܠܐ ܡܶܬܟܰܪܟܺܝܢ ܠܰܡܕܺܝܢܬܳܐ ܕܚܰܝ̈ܐ. ܐܠܐ ܟܕ ܡܶܬܛܰܓܢܺܝܢ ܒܰܕܡܘܬܐ ܕܟܰܠܒ̈ܐ ܕܰܐܠܺܝܨܝܢ. ܡܐ ܕܚܳܙܝܢ ܡܶܐܟ̈ܠܳܬܳܐ ܥܠ ܦܳܬܽܘܪ̈ܐ. ܘܥܰܡ ܥܰܬܺܝܪ̈ܐ ܚܰܒܪܗܘܢ ܓܳܥܝܢ ܡܶܢ ܝܰܩܕܳܢܐ ܘܫܳܐܠܝܢ ܛܽܘܦܬܐ ܕܡܰܝ̈ܐ ܘܠܰܝܬ ܕܡܰܪܘܰܚ. ܡܐ ܓܝܪ ܕܚܳܙܝܢ ܠܰܐܒܽܘܢ ܐܰܒܪܳܗܡ ܘܠܐܻܝܣܚܳܩ ܘܰܠܝܰܥܩܘܒ ܘܰܠܟܽܠܗܘܢ ܢܒܺܝ̈ܐ ܒܡܰܠܟܽܘܬܐ ܕܰܐܠܗܐ. ܘܰܡܫܺܝܚܐ ܟܕ ܐܰܣܺܝܪ ܬܳܓܶܗ ܘܰܡܫܰܡܶܫ ܠܗܘܢ܆ ܘܡܰܠܐܟ̈ܐ ܩܰܕܺܝ̈ܫܐ ܕܰܡܫܰܡܫܝܢ ܠܰܚܠܽܘܠܐ. ܓܥܳܬܳܐ ܕܰܬܒܳܪܳܐ ܥܳܒܕܝܢ ܐܝܟ ܕܶܐܡܰܪ ܢܒܺܝܐ. ܕܰܠܗܕܐ ܫܰܡܰܗ ܢܒܺܝܐ ܓܥܽܘܬܳܐ ܘܥܰܘܬܳܐ ܟܰܠܒܳܢܳܝܬܳܐ ܘܠܘ ܒܺܐܝܡܳܡܐ ܗܳܘܝܳܐ ܐܠܐ ܒܪܰܡܫܐ. ܟܕ ܩܳܪܶܐ ܠܪܰܡܫܐ ܠܫܽܘܠܡܶܗ ܕܥܳܠܡܐ ܗܳܢܐ. ܪܰܡܫܐ ܓܝܪ ܚܶܫܽܘܟܐ ܗܰܘ. ܘܠܰܐܝܠܝܢ ܕܒܳܟܶܝܢ ܘܰܡܚܰܪܩܺܝܢ ܫܶܢܰܝ̈ܗܘܢ ܒܚܶܫܟܳܐ ܒܰܪܳܝܳܐ. ܐܢܳܫ ܠܐ ܫܳܡܰܥ ܩܳܠܗܘܢ. ܐܶܡܰܪ
ܢܶܒܥܘܢ ܠܡܶܐܟܠ ܘܠܐ ܢܶܣܒܥܘܢ ܘܠܐ ܢܒܽܘܬܘܢ. ܡܶܬܝܰܐܝܒܺܝܢ ܘܡܶܬܪܰܓܪܓܺܝܢ ܠܚܰܝ̈ܐ ܛܽܘܒܬܳܢ̈ܐ ܕܰܡܩܰܒܠܝܢ ܩܰܕܝ̈ܫܐ ܒܡܰܠܟܘܬܐ. ܐܰܟܡܐ ܕܥܰܬܺܝܪܐ ܒܥܳܐ ܡܶܢ ܥܰܬܺܝܪܐ ܕܢܶܬܪܰܚܰܡ ܥܠܰܘܗܝ. ܡܶܛܠ ܕܰܠܠܐܴ ܡܶܕܡ ܫܳܪܟܳܐ ܡܰܚܫܰܒܬܗܘܢ. ܡܶܛܠ ܕܥܰܬܺܝܪܐ ܐܰܒܪܳܗܡ ܠܐ ܥܢܳܝܗܝ ܘܠܐ ܪܰܚܶܡ ܥܠܰܘܗܝ. ܘܠܐ ܫܰܕܰܪ ܠܶܗ ܠܳܥܳܙܳܪ ܕܰܢܪܰܛܶܒ ܠܶܗ ܠܶܫܳܢܶܗ ܟܕ ܡܶܫܬܰܢܰܩ. ܘܰܢܒܺܝܐ ܬܘܒ ܐܶܡܰܪ܆ ܕܠܐ ܢܶܣܒܥܘܢ ܘܠܐ ܢܒܽܘܬܘܢ. ܐܰܝܟܳܐ ܐܶܢܘܢ ܦܽܘܫ̈ܩܐ ܕܰܓ̈ܠܐ ܕܪ̈ܳܚܡܰܝ ܪ̈ܓܺܝܓܳܬܳܐ ܕܳܐܡܪܺܝܢ܆ ܕܐܠܗܰܐ ܗ̄ܘ ܡܪܰܚܡܳܢܰܐ ܗ̄ܘ܆ ܕܠܐ ܐܳܠܶܡ ܠܥܳܠܰܡ ܘܠܐ ܠܥܳܠܰܡ ܢܳܛܰܪ ܪܽܘܓܙܶܗ. ܕܠܐ ܡܶܫܬܒܶܩ ܡܶܢ ܪ̈ܰܚܡܰܘܗܝ ܕܰܠܥܳܠܡ ܢܰܘܒܶܕ ܠܰܒܢܰܝ̈ܢܫܐ ܒܬܰܫܢܺܝܩܳܐ. ܘܒܳܬܰܪ ܗܳܠܝܢ ܡܰܥܶܠ ܢܒܺܝܐ܆ ܩܳܠܐ ܕܬܶܫܒܽܘܚܬܐ ܕܰܒܢ̈ܝ ܓܢܽܘܢܳܐ. ܘܰܐܝܟ ܗܰܘ ܕܰܒܟܶܢܳܪܶܗ ܕܕܰܘܝܕ ܡܙܰܡܪܝܢ ܩܰܕܝ̈ܫܐ ܒܗܰܘ ܨܰܦܪܳܐ ܕܫܽܘܠܳܡܳܐ ܡܚܰܘܐ.
ܘܶܐܢܳܐ ܠܰܡ ܐܶܫܰܒܰܚ ܠܚܰܝܠܳܟ. ܘܶܐܫܰܒܰܚ ܠܳܟ ܒܨܰܦܪܳܐ ܘܰܠܛܰܝܒܽܘܬܳܟ: ܡܶܛܠ ܕܰܗܘܰܝܬ ܠܝ̣ ܒܶܝܬ ܓܰܘܣܳܐ. ܘܰܡܦܰܨܝܳܢܳܐ ܒܝܰܘܡܳܐ ܕܽܐܘܠܨܳܢܳܐ: ܐܰܠܗܐ ܠܳܟ ܐܶܙܰܡܰܪ. ܡܶܛܠ ܕܰܐܢܬ ܗܽܘ ܐܰܠܗܐ ܕܒܶܝܬ ܓܰܘܣܝ ܘܰܐܠܗܐ ܕܛܰܝܒܽܘܬܝ. ܒܨܰܦܪܳܐ ܐܳܡܰܪ ܢܒܺܝܐ ܕܶܐܫܰܒܚ܆ ܡܶܛܠ ܕܡܶܬܦܰܠܰܓ ܠܶܗ ܝܰܘܡܳܐ ܠܰܬܪܶܝܢ ܦܽܘܪ̈ܫܳܢܺܝܢ. ܘܡܶܢܶܗ ܗܳܘܶܐ ܨܰܦܪܳܐ. ܘܡܶܢܶܗ ܗܳܘܶܐ ܪܰܡܫܳܐ. ܟܰܕ ܨܰܦܪܳܐ ܫܳܩܠܺܝܢ ܒܢܱ̈ܝ ܡܰܠܟܽܘܬܳܐ. ܘܪܰܡܫܳܐ ܡܦܰܪܫܺܝܢ ܠܗܳܢܽܘܢ ܕܰܒܬܰܫܢܺܝܩܳܐ. ܘܗܳܢܽܘܢ ܕܩܳܝܡܺܝܢ ܒܓܰܘ ܪܰܡܫܳܐ ܐܰܝܟ ܟܰܠܒ̈ܐ ܡܥܰܘܶܝܢ ܐܰܝܟ ܕܶܐܡܰܪ ܢܒܺܝܐ. ܘܗܳܢܽܘܢ ܕܡܶܬܒܰܣܡܺܝܢ ܒܢܽܘܗܪܶܗ ܕܨܰܦܪܳܐ ܒܡܰܠܟܽܘܬܶܗ ܡܫܰܒܚܺܝܢ. ܥܰܠ ܗܳܝ ܐܶܡܰܪ ܢܒܺܝܳܐ. ܕܶܐܫܰܒܰܚ ܒܨܰܦܪܳܐ ܠܛܰܝܒܽܘܬܳܟ. ܡܶܛܠ ܕܰܗܘܰܝܬ ܠܺܝ ܒܶܝܬ ܓܰܘܣܳܐ. ܘܰܡܦܰܨܝܳܢܳܐ ܒܝܰܘܡܳܐ ܕܽܐܘܠܨܳܢܳܐ ܕܬܰܫܢܺܝܩܳܐ. ܥܰܠ ܗܳܕܶܐ ܠܐ ܩܛܰܥ ܡܰܘܬܳܐ ܡܶܢ̈ܐ ܕܟܶܢܳܪܝ. ܡܶܢ ܕܰܡܙܰܡܰܪ ܐܢܳܐ ܠܳܟ. ܡܶܛܠ ܕܰܗܘܰܝܬ ܠܺܝ ܒܶܝܬ ܓܰܘܣܳܐ. ܘܰܒܟܶܢ̈ܦܰܝܟ ܐܰܥܕܺܝܬܳܢܝ ܡܶܢ ܫܝܽܘܠ ܬܰܚܬܳܝܬܳܐ. ܡܶܛܠ ܕܰܐܢܬ ܗܽܘ ܐܰܠܗܐ ܕܒܶܝܬ ܓܰܘܣܝ ܘܰܐܠܗܳܐ ܕܛܰܝܒܽܘܬܝ. ܘܠܳܟ ܡܶܬܬܚܺܝܒ ܫܽܘܒܚܳܐ ܘܺܐܝܩܳܪܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ܀
ܡܙܡܘܪܐ ܕܫܬܝܢ
ܕܡܰܘܕܰܥ ܥܰܠ ܐܪܳܙܶܗ ܕܥܰܡܰܢܘܐܝܠ ܕܡܶܬܚܙܶܐ ܗܘܳܐ ܒܰܢܒܺܝ̈ܐ: ܕܥܰܠ ܡܰܚܰܬܬܶܗ ܕܠܰܐܬܪܳܐ ܕܡܺܝ̈ܬܶܐ ܕܰܫܝܽܘܠ: ܘܥܰܠ ܕܗܽܘ ܒܨܶܒܝܳܢܶܗ ܐܶܬܕܒܰܪ ܠܡܰܘܬܳܐ ܘܠܰܘ ܩܛܺܝܪܳܐܝ̣ܬ.
ܐܽܘܠܨܳܢ̈ܐ ܕܩܳܝܡܺܝܢ ܗܘܰܘ ܥܰܠ ܩܰܕܝ̈ܫܐ ܡܶܢ ܒܥܶܠܕ̈ܒܳܒܰܝܗܘܢ. ܥܶܠܬܳܐ ܛܳܒܬܳܐ ܗܳܘܝܢ ܗܘܰܘ ܠܰܒܢܶܝ̈ܗ̇ ܕܥܺܕܬܳܐ. ܒܗܳܝ ܕܰܒܝܰܕ ܐܽܘܠܨܳܢ̈ܐ ܩܫܰܝܴ̈ܐ ܡܩܰܒܠܺܝܢ ܗܘܰܘ ܢܒܺܝ̈ܐ ܓܶܠܝ̈ܢܶܐ ܢܰܗܺܝܪ̈ܐ. ܠܰܘ ܐܰܝܟ ܡܰܢ ܕܰܐܠܗܐ ܐܽܘܠܨܳܢܳܐ ܓܒܶܝܢ ܠܶܗ. ܘܥܰܠ ܗܳܝ ܕܢܶܥܪܨܽܘܢ ܢܶܣܝܽܘܢ̈ܐ ܥܰܠ ܩܰܕܺܝ̈ܫܰܘܗܝ. ܐܠܐ ܡܶܛܠ ܕܰܟܝܳܢܳܐ ܐ̱ܢܳܫܳܝܳܐ ܩܢܶܐ ܪܶܟܢܳܐ ܠܘܳܬ ܢܝܳܚ̈ܐ. ܘܠܰܘ ܕܠܺܝܠܐܝ̣ܬ ܡܶܫܟܰܚ ܡܕܰܟܶܐ ܗܽܘ ܠܶܗ. ܡܳܐ ܕܰܒܡܶܕܶܡ ܠܰܝܬ ܠܶܗ ܐܽܘܠܨܳܢ̈ܐ ܕܫܳܚܩܺܝܢ ܠܶܗ܆ ܘܥܰܠܗܳܕܐ ܫܒܰܩ ܐܰܠܗܳܐ ܕܰܢܩܽܘܡܽܘܢ ܪ̈ܕܽܘܦܝܶܐ ܥܰܠ ܓܒܰܝ̈ܐ ܕܺܝܠܗ. ܟܕ ܫܳܐܠܺܝܢ ܒܰܨܠܽܘܬܳܐ ܡܰܦܩܳܢܳܐ ܕܡܶܢܗܘܢ. ܡܶܛܠ ܗܳܕܐ ܥܰܠ ܛܽܘܒܬܳܢܳܐ ܕܰܘܝܕ ܢܶܣܝܽܘ̈ܢܐ ܘܽܐܘܠܨܳܢ̈ܐ ܡܶܢ ܫܳܐܘܳܠ ܥܠܰܘܗܝ ܩܳܝܡܺܝܢ ܗܘܰܘ. ܐܰܝܟܰܢܳܐ ܕܡܶܢ ܩܰܫܝ̈ܬܳܐ ܢܶܬܝܰܬܰܪ ܕܰܘܝܕ ܒܰܡܣܰܝܒܪܳܢܽܘܬܳܐ. ܘܢܶܬܕܟܶܐ ܠܰܡܩܰܒܳܠܽܘ ܚܙܳܬܳܐ ܕܬܶܐܘܳܪܺܝܰܐ ܐܰܠܳܗܳܝܬܳܐ. ܟܕ ܣܰܓܝ ܩܳܡ ܥܠܰܘܗܝ ܐܰܓܽܘܢܳܐ ܡܶܢ ܡܰܠܟܳܐ ܫܳܐܘܳܠ ܗܰܘ ܕܰܗܘܳܐ ܡܳܐܢܳܐ ܠܪܽܘܚܳܐ ܒܺܝܫܬܳܐ. ܒܗܳܝ ܕܰܠܟܽܠ ܦܢܺܝܬܳܐ ܕܫܳܡܰܥ ܗܘܳܐ ܫܳܐܘܳܠ ܕܺܐܝܬܰܘܗܝ ܕܰܘܝܕ. ܩܰܠܺܝܠܐܝ̣ܬ ܢܳܦܶܩ ܗܘܳܐ ܒܳܬܪܶܗ ܠܡܶܪܕܦܶܗ. ܟܬܺܝܒ ܕܶܐܡܰܪ ܕܰܘܝܕ ܒܠܶܒܶܗ. ܕܶܐܢ ܢܳܦܶܠ ܐܢܳܐ ܝܰܘܡܳܐ ܚܰܕ ܒܺܐܝ̈ܕܰܘܗܝ ܕܫܳܐܘܳܠ ܠܰܝܬ ܠܺܝ ܛܳܒܬܳܐ. ܐܠܐ ܐܶܬܦܰܠܰܛ ܠܺܝ ܠܰܐܪܥܳܐ ܕܰܦܠܶܫܬܳܝ̈ܐ (ܐ ܫܡܘܐܝܠ ܟܙ: ܐ). ܘܩܳܡ ܕܰܘܝܕ ܗܽܘ ܘܫܶܬ ܡܳܐܐ ܓܰܒܪ̈ܺܝܢ ܕܥܰܡܶܗ ܘܰܥܒܰܪ ܠܘܳܬ ܐܰܟܺܝܫ ܒܰܪ ܡܰܥܟܳܐ ܡܰܠܟܳܐ ܕܓܳܬ. ܘܺܝܬܶܒ ܕܰܘܝܕ ܠܘܳܬ ܐܰܟܺܝܫ ܒܓܳܬ. ܗܽܘ ܘܥܰܒ̈ܕܰܘܗܝ ܟܽܠܗܘܢ. ܘܟܕ ܝܠܶܦ ܫܳܐܘܳܠ ܠܐ ܐܰܘܣܶܦ ܠܡܶܪܕܦܶܗ. ܒܗܳܕܐ ܡܰܚܰܬܬܳܐ ܕܡܰܠܝܳܐ ܗܘܳܬ ܒܶܟܝܳܐ ܘܚܰܫܳܐ ܘܡܽܘܟܳܟܳܐ ܣܰܓܺܝܐܳܐ ܟܰܕ ܒܳܟܶܐ ܘܡܶܬܬܰܢܰܚ ܗܽܘ ܘܰܕܥܰܡܶܗ. ܕܰܘܝܕ ܬܶܫܒܽܘܚܬܳܐ ܗܳܕܐ ܕܶܫܬܺܝܢ ܙܰܡܰܪ ܘܰܐܟܡܳܐ ܕܡܶܢ ܟܰܕܽܘ ܠܰܫܝܽܘܠ ܢܳܚܶܬ ܗܘܳܐ. ܗܳܟܰܢܳܐ ܚܳܐܱܪ ܗܘܳܐ ܒܢܰܦܫܶܗ. ܕܰܠܘܳܬ ܡܺܝ̈ܬܶܐ ܕܰܒܩܰܒܪ̈ܶܐ ܥܳܐܷܠ ܗܘܳܐ. ܕܰܐܝܟ ܗܳܟܰܢܐ ܓܝܪ ܡܶܬܡܰܬܠܐ ܐܰܪܥܳܐ ܕܰܦܠܶܫܬܳܝ̈ܐ ܒܰܢܒܺܝܽܘܬܐ. ܡܶܛܠ ܕܡܺܝ̈ܬܶܐ ܚܫܺܝܒܺܝܢ ܗܘܰܘ ܦܠܶܫܬܳܝ̈ܐ ܒܰܥܒܳܕܰܝ̈ܗܘܢ ܠܰܢܒܺܝܐ. ܥܰܠܗܳܝ ܐܳܦ ܐܪܳܙܳܐ ܕܡܰܥܰܠܬܶܗ ܕܰܐܠܗܳܐ ܠܓܰܘ ܩܰܒܪܳܐ. ܐܶܬܒܰܕܰܩ ܠܶܗ ܒܽܐܘܪܚܳܐ ܗܳܕܐ ܕܢܶܫܡܰܥ ܐܰܝܟܰܢܳܐ ܐܰܝܟ ܕܡܶܢ ܦܰܪܨܽܘܦܳܐ ܕܣܰܓܺܝ̈ܐܐ ܐܳܡܰܪ:
ܐܰܠܗܳܐ ܛܥܰܝܬܳܢ ܘܰܕܚܰܩܬܳܢ ܘܰܪܓܶܙܬ ܥܠܰܝܢ. ܐܰܙܺܝܥܬܳܗ̇ ܠܰܐܪܥܳܐ ܘܰܦܬܰܚܬܳܗ̇. ܗܳܟܰܢܐ ܡܶܙܕܰܥܙܥܺܝܢ ܗܘܰܘ ܐܰܝܠܶܝܢ ܕܥܰܡܶܗ. ܐܰܝܟ ܗܳܝ ܕܰܐܪܥܳܐ ܐܶܬܬܙܺܝܥܰܬ ܬܚܽܘܬܰܝܗܘܢ ܒܰܥܪܽܘܩܝܳܐ. ܒܪܰܡ ܕܶܝܢ ܐܰܪܥܳܐ ܠܐ ܙܳܥܰܬ ܘܒܰܫܪܳܪܳܐ ܐܶܬܦܰܬܚܰܬ. ܐܠܐ ܟܕ ܛܥܳܐ ܐܰܠܗܳܐ ܠܥܰܡܳܐ ܕܺܝܣܪܳܐܝܠ ܟܕ ܨܰܠܒܶܗ. ܘܶܐܬܦܬܰܚܘ ܩܰܒܪ̈ܶܐ ܕܒܰܚܕܳܪ̈ܰܝ ܐܽܘܪܺܫܠܶܡ. ܘܩܳܡܘ ܒܚܰܝ̈ܐ ܦܰܓܪ̈ܶܐ ܣܰܓܺܝ̈ܐܐ ܕܩܰܕܺܝ̈ܫܐ. ܘܥܰܠܘ ܒܳܬܰܪ ܩܝܳܡܬܶܗ ܕܥܰܡܰܢܘܐܝܠ ܠܰܡܕܺܝܢ̱ܬܳܐ ܩܰܕܺܝܫܬܳܐ ܐܽܘܪܺܫܠܶܡ. ܘܶܐܬܚܙܺܝܘ ܠܣܰܓܺܝ̈ܐܐ. ܘܡܶܛܠ ܕܗܳܢܐ ܙܰܘܥܳܐ ܥܶܠܰܬ ܦܽܘܪܩܳܢܳܐ ܗܘܳܐ ܕܡܶܬܥܰܡܪܳܢܺܝܬܳܐ ܘܬܶܩܢܰܬ ܒܶܗ ܐܰܪܥܳܐ ܒܩܶܛܠܶܗ ܕܡܳܪܶܗ ܘܰܡܦܺܝܣ ܢܒܺܝܐ ܘܳܐܡܰܪ:
ܥܨܽܘܒ ܬܒܳܪܳܗ̇ ܡܶܛܠ ܕܶܐܬܟܰܪܗܰܬ. ܕܰܒܡܰܘܬܳܟ ܠܰܡ ܙܳܥܰܬ ܘܶܐܬܟܰܪܗܰܬ ܒܰܩܝܳܡܬܳܟ ܬܶܬܚܠܶܡ ܘܬܶܬܥܨܶܒ ܡܰܚܘ̈ܬܳܗ̇. ܘܟܰܕ ܡܶܬܒܰܩܶܐ ܗܘܳܐ ܗܽܘ ܢܒܺܝܐ ܒܬܶܕܡܪ̈ܳܬܳܐ ܕܰܗܘ̈ܝ ܒܰܨܠܺܝܒܳܐ ܙܰܘܥܳܐ ܗܰܘ ܕܥܰܠ ܐܰܪܥܳܐ. ܚܶܫܽܘܟܳܐ ܕܶܐܬܦܪܶܣ ܥܰܠ ܡܶܬܥܰܡܪܳܢܺܝܬܳܐ ܘܟܺܐܦ̈ܐ ܕܶܐܨܛܰܪ̈ܶܝܢ ܘܰܐܦܰܝ̈ ܬܰܪܥܳܐ ܕܶܐܣܬܕܶܩ. ܘܰܐܚܪ̈ܳܢܝܳܬܳܐ ܕܰܓܕܰܫ̈ܝ ܗܘܰܝ̈ ܒܰܨܠܺܝܒܳܐ. ܒܝܽܘܡ ܥܪܽܘܒܬܳܐ ܕܒܳܗ̇ ܚܰܫ ܦܳܪܽܘܩܰܢ. ܙܰܡܰܪ ܢܒܺܝܐ ܒܚܰܫܳܐ ܘܶܐܡܰܪ:
ܚܰܘܺܝܬ ܐܶܢܘܢ ܠܥܰܡܳܟ ܩܰܫܝ̈ܬܳܐ: ܘܶܐܫܩܺܝܬ ܐܶܢܘܢ ܚܰܡܪܳܐ ܬܛܺܝܪܳܐ. ܚܙܰܝܬ ܐܰܝܟܰܢܐ ܚܰܟܺܝܡܳܐܝ̣ܬ ܩܳܪܶܐ ܠܗܶܝܢ ܠܗܳܠܶܝܢ ܕܰܗܘ̈ܝ ܒܰܨܠܺܝܒܳܐ ܩܰܫܝ̈ܬܳܐ. ܘܰܕܚܰܡܪܳܐ ܕܠܺܝܚܳܐ ܡܙܰܓܶܝ̈ܢ ܠܥܰܡܳܐ ܨܳܠܽܘܒܳܐ. ܩܳܪܶܐ ܠܗܶܝܢ ܩܰܫܝ̈ܬܳܐ. ܡܶܛܠ ܕܗܶܢܶܝܢ ܐܰܦܶܩܶܝ̈ܢ ܠܥܰܡܳܐ ܡܰܪܳܚܳܐ ܡܶܢ ܒܰܝܬܳܝܽܘܬܳܐ ܕܰܐܠܗܳܐ. ܚܰܡܪܳܐ ܕܶܝܢ ܕܠܺܝܚܳܐ ܐܰܫܩܺܝ ܐܶܢܘܢ. ܡܶܛܠ ܕܡܶܢܩܕܺܝܡ ܐܰܫܩܺܝ ܐܶܢܘܢ ܚܰܡܪܳܐ ܡܨܰܠܠܳܐ ܒܝܰܕ ܓܶܠܝ̈ܢܐ ܕܰܢܒܺܝ̈ܐ. ܥܰܠ ܕܰܗܦܰܟܘ ܣܽܘ̈ܟܳܠܰܝܗܘܢ ܘܶܐܬܚܰܫܰܒܘ ܕܰܠܩܽܘܒܠܳܐ ܕܡܳܪܶܐ ܟܰܪܡܳܐ ܘܰܚܠܳܦ ܓܶܝܪ ܥܶܢܒ̈ܐ ܝܰܗܒ ܟܰܪܡܗܘܢ ܚܰܪ̈ܽܘܒܶܐ. ܘܰܚܠܳܦ ܚܰܠܝܽܘܬܳܐ ܕܡܰܢܢܳܐ ܡܪܳܪܳܐ ܡܙܰܓܘ ܠܶܗ ܠܗܰܘ ܡܰܒܽܘܥܳܐ ܕܚܰܝ̈ܐ. ܘܡܶܬܥܶܗܰܕ ܡܶܢ ܒܳܬܰܪܟܶܢ ܐܳܦ ܛܰܝܒܽܘܬܳܐ ܕܝܰܗܒ ܠܰܡܗܰܝܡ̈ܢܶܐ ܒܳܐܬܳܐ ܕܰܨܠܺܝܒܳܐ.
ܝܰܗܒܬ ܠܕܳܚܠܰܝ̈ܟ ܐܳܬܳܐ: ܕܠܐ ܢܶܥܪܩܽܘܢ ܡܶܢ ܩܕܳܡ ܩܶܫܬܳܐ. ܡܶܛܠ ܕܢܶܙܕܰܝܢܽܘܢ ܚܰܒܺܝ̈ܒܰܝܟ. ܐܳܬܳܐ ܩܰܕܡܳܝܬܳܐ ܕܝܰܗܒ ܐܰܠܗܳܐ ܠܕܳܚܠܰܘ̈ܗܝ ܐܺܝܬܶܝܗ̇. ܩܶܫܬܳܐ ܗܳܝ ܕܰܬܠܳܐ ܒܰܥܢ̈ܢܶܐ ܒܳܬܰܪ ܛܰܘܦܳܢܳܐ. ܟܰܕ ܐܶܡܰܪ ܠܢܽܘܚ: ܕܩܶܫܬܝ ܝܶܗܒܶܬ ܒܰܥ̈ܢܳܢܶܐ. ܘܬܶܗܘܶܐ ܐܳܬܳܐ ܕܰܩܝܳܡܳܐ ܒܰܝܢܰܝ ܠܰܐܪܥܳܐ. ܘܡܳܐ ܕܡܰܣܶܩ ܐܢܳܐ ܥܢܴ̈ܢܶܐ ܥܰܠ ܐܰܪܥܳܐ ܘܬܶܬܚܙܶܐ ܩܶܫܬܳܐ ܒܰܥܢܳܢ̈ܐ. ܐܶܬܕܰܟܪ ܩܝܳܡܝ ܕܒܰܝܢܰܝ ܘܰܠܟܽܘܢ. ܘܒܶܝܬ ܟܽܠ ܢܰܦܫܳܐ ܚܰܝܬܳܐ ܕܥܰܡܟܽܘܢ ܘܒܶܝܬ ܟܽܠ ܒܣܰܪ. ܘܠܐ ܬܘܒ ܢܶܗܘܽܘܢ ܡܰܝܴ̈ܐ ܕܛܰܘܦܳܢܳܐ܇ ܠܰܡܚܰܒܳܠܽܘ ܟܽܠ ܒܣܰܪ. ܘܬܶܗܘܶܐ ܩܶܫܬܳܐ ܒܰܥܢ̈ܢܶܐ. ܘܶܐܚܙܶܝܗ̇ ܠܕܽܘܟܪܳܢܳܐ ܕܰܩܝܳܡܳܐ ܕܰܠܥܳܠܰܡ. ܒܶܝܬ ܐܰܠܗܳܐ ܠܒܶܝܬ ܟܽܠ ܢܰܦܫܳܐ ܚܰܝܬܳܐ ܕܟܽܠ ܒܣܰܪ ܕܥܰܠ ܐܰܪܥܳܐ (ܒܪܝܬܐ ܛ: ܝܓ-ܝܘ). ܐܶܢ ܟܽܠ ܥܢܳܢܳܐ ܡܶܬܚܰܙܝܳܐ ܒܳܗ̇ ܩܶܫܬܳܐ ܐܰܝܟ ܡܶܠܬܶܗ ܕܰܐܠܗܳܐ ܕܫܰܝܢܳܐ ܡܰܠܝܳܐ ܘܡܶܛܪܳܐ ܕܦܽܘܪܩܳܢܳܐ ܥܢܳܢ̈ܐ ܕܶܝܢ ܕܠܐ ܡܶܬܚܰܙܝܳܐ ܒܗܶܝܢ ܩܶܫܬܳܐ ܐܳܬܳܐ ܕܦܽܘܪܩܳܢܳܐ. ܕܰܠܩܽܘܒܠܐ ܐܶܢܝܢ ܐܰܝܟ ܗܳܠܶܝܢ ܕܥܰܬܶܕܘ ܘܰܐܚܶܬܘ ܡܰܝܴ̈ܐ ܕܛܰܘܦܳܢܳܐ. ܡܳܕܶܝܢ ܟܰܕ ܥܢܳܢ̈ܐ ܠܛܽܘܦ̈ܣܶܐ ܪ̈ܳܡܶܐ ܕܰܢܒܺܝ̈ܐ ܡܶܬܢܰܣ̈ܒܳܢ. ܫܰܦܺܝܪ ܘܟܺܐܢܳܐܝ̣ܬ ܡܶܬܢܰܣܒܳܐ ܠܛܽܘܦܣܶܗ ܕܥܰܡܰܢܘܐܝܠ. ܗܽܘܝܽܘ ܓܶܝܪ ܐܳܬܳܐ ܕܫܰܝܢܳܐ ܘܰܩܝܳܡܳܐ ܒܶܝܬ ܐܰܠܗܳܐ ܐܰܒܳܐ ܠܰܐܪܥܳܐ. ܘܰܒܗܳܠܶܝܢ ܥܢܳܢ̈ܐ ܡܶܬܚܰܙܝܳܐ. ܒܰܐܝܠܶܝܢ ܕܡܶܬܡܰܠܝܴ̈ܢ ܡܶܛܪ̈ܶܐ ܕܐܪ̈ܳܙܶܐ ܩܰܕܺܝ̈ܫܐ. ܡܶܢ ܗܰܘ ܝܰܡܳܐ ܪܰܒܳܐ ܕܰܐܠܳܗܽܘܬܳܐ. ܫܰܦܺܝܪ ܡܳܕܶܝܢ ܩܶܫܬܳܐ ܗܳܕܶܐ ܐܶܬܚܰܙܝܰܬ ܒܰܥ̈ܢܳܢܶܐ ܫܠܺܝܚܳܝ̈ܬܳܐ. ܟܰܕ ܡܬܺܝܚܳܐ ܠܽܘܩܒܰܠ ܣܶܕܪ̈ܰܘܗܝ ܕܳܐܟܶܠܩܰܪܨܳܐ. ܠܕܳܚ̈ܠܰܘܗܝ ܕܶܝܢ ܕܰܐܒܳܐ ܡܦܰܩܶܕ ܡܙܰܡܪܳܢܳܐ. ܕܠܐ ܢܶܥܪܩܽܘܢ ܡܶܢ ܩܕܳܡ ܩܶܫܬܳܐ. ܐܶܠܐ ܕܢܶܙܕܰܝܢܽܘܢ ܚܰܒܺܝܒܰܘ̈ܗܝ ܕܰܐܒܳܐ ܕܥܰܡ ܢܒܺܝܐ ܡܨܰܠܶܝܢ ܘܳܐܡܪܺܝܢ:
ܦܪܽܘܩܰܝܢܝ ܒܝܰܡܺܝܢܳܟ ܘܰܥܢܺܝܢܝ. ܐܶܢܓܶܝܪ ܝܰܡܺܝܢܶܗ ܕܰܐܒܳܐ ܒܪܶܗ ܗܽܘ܆ ܫܰܦܺܝܪ ܒܰܒܪܳܐ ܫܳܐܠܺܝܢ ܦܽܘܪܩܳܢܳܐ ܢܒܺܝ̈ܐ ܩܰܕܺܝ̈ܫܐ.
ܐܰܠܗܳܐ ܡܰܠܶܠ ܒܩܽܘܕܫܶܗ. ܠܚܰܫܶܗ ܕܶܝܢ ܩܳܪܶܐ. ܘܬܽܘܒ ܠܗܳܝ ܕܰܐܝܟ ܕܶܐܡܰܪ ܐܶܬܬܠܺܝ ܒܰܙܩܺܝܦܳܐ. ܩܽܘܕܫܳܐ ܕܶܝܢ ܡܶܬܩܰܪܝܳܐ ܕܶܒܚܬܶܗ ܕܰܐܠܗܳܐ. ܐܰܝܟ ܕܶܒܚ̈ܬܳܐ ܕܰܒܢܳܡܽܘܣܳܐ ܕܰܚܛܳܗ̈ܐ ܫܳܒܩܺܝܢ ܗܘܰܘ. ܩܽܘܕܫܳܐ ܡܶܬܩܪܶܝܢ ܗܘܰܘ ܡܶܢ ܣܳܐܷܡ ܢܳܡܽܘܣܳܐ ܡܽܘܫܶܐ. ܐܳܦ ܗܽܘ ܥܰܡܰܢܘܐܝܠ ܟܰܕ ܩܰܪܺܝܒ ܗܘܳܐ ܥܶܕܳܢܳܐ ܕܢܶܬܶܠ ܢܰܦܫܶܗ ܠܕܶܒܚܬܳܐ ܡܩܰܕܫܳܢܺܝܬܳܐ. ܟܰܕ ܡܰܓܥܶܠ ܗܘܐ ܒܺܐܝ̈ܕܰܝ ܐܰܒܳܐ ܠܬܰܠܡܺܝ̈ܕܰܘܗܝ. ܐܶܡܰܪ ܠܘܳܬ ܐܰܒܳܐ: ܕܥܰܠ ܐܰܦܰܝ̈ܗܽܘܢ ܐܶܢܳܐ ܡܩܰܕܶܫ ܐܢܳܐ ܢܰܦܫܝ (ܝܘܚܢܢ ܝܙ: ܝܛ). ܘܡܶܛܠܗܳܕܐ ܡܰܠܶܠ ܒܩܽܘܕܫܶܗ ܥܰܡ ܓܰܝܳܣܳܐ ܟܰܕ ܐܶܡܰܪ ܠܶܗ: ܕܰܐܡܺܝܢ ܐܳܡܰܪ ܐܢܳܐ ܠܳܟ ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ (ܠܘܩܐ ܟܓ: ܡܓ). ܘܰܩܥܳܐ ܠܘܳܬ ܐܰܒܽܘܗܝ ܬܰܪܬܶܝܢ ܙܰܒܢܻ̈ܝܢ ܡܶܢ ܨܠܺܝܒܳܐ ܚܕܳܐ ܗܳܝ ܕܶܐܡܰܪ: ܐܺܝܠ ܐܺܝܠ ܠܡܳܢܳܐ ܫܒܰܩܬܳܢܝ (ܡܬܝ ܟܙ: ܡܘ). ܘܰܐܚܪܺܬܳܐ ܗܳܝ ܕܶܐܡܰܪ ܐܳܒܝ ܒܺܐܝ̈ܕܰܝܟ ܣܳܐܷܡ ܐܢܳܐ ܠܪܽܘܚܝ (ܠܘܩܐ ܟܓ: ܡܘ). ܘܰܠܘܳܬ ܝܽܘܚܳܢܳܢ ܗܰܘ ܟܳܪܽܘܙܳܐ ܕܶܐܘܰܢܓܶܠܝܽܘܢ ܐܶܡܰܪ: ܕܛܰܠܝܳܐ ܗܳܐ ܐܶܡܳܟ. ܘܰܠܘܳܬ ܝܳܠܕܰܬ ܐܰܠܗܳܐ ܡܰܠܶܠ ܘܶܐܡܰܪ ܠܳܗ̇: ܐܰܢܬܬܳܐ ܗܳܐ ܒܪܳܐ ܕܺܝܠܶܟܝ (ܝܘܚܢܢ ܝܛ: ܟܘ-ܟܙ). ܘܬܽܘܒ ܠܘܳܬ ܨܳܠܽܘܒ̈ܐ ܐܶܡܰܪ: ܨܗܶܐ ܐܢܳܐ (ܝܘܚܢܢ ܝܛ: ܟܚ). ܗܳܠܶܝܢ ܐܶܢܽܘܢ ܩܴ̈ܠܐ ܕܡܰܠܶܠ ܐܰܠܗܳܐ ܒܩܽܘܕܫܶܗ. ܥܰܠ ܕܰܒܗܳܕܐ ܢܰܠܰܦ ܕܚܰܫܰܘ̈ܗܝ ܡܠܺܝ̈ܠܐ ܐܶܢܘܢ ܘܰܣܢܺܐܓܪ̈ܶܐ ܕܚܰܛܳܝ̈ܐ. ܘܒܳܬܰܪ ܗܳܠܝܢ ܐܳܡܰܪ ܡܙܰܡܪܳܢܳܐ܆
ܐܶܬܚܰܝܰܠ ܐܶܢܳܐ ܘܶܐܦܰܠܶܓ ܠܰܫܟܺܝܡ܆ ܘܰܠܥܽܘܡܩܳܐ ܕܣܳܟܽܘܬ ܐܶܡܫܽܘܚ. ܡܳܐ ܠܰܡ ܕܰܥܒܰܪ ܙܰܒܢܳܐ ܩܰܠܺܝܠ ܬܘܒ ܡܶܬܚܰܝܰܠ ܐܢܳܐ܆ ܐܰܝܟܰܢܳܐ ܕܠܰܩܪܺܝܬܶܗ ܕܝܰܘܣܶܦ ܐܶܦܰܠܶܓ. ܥܽܘܡܩܳܐ ܕܶܝܢ ܕܣܳܟܽܘܬ ܒܫܽܘܠܳܡܳܐ ܣܺܝܡ ܕܰܐܪܥܳܐ ܕܡܽܘܠܟܳܢܳܐ. ܡܳܕܶܝܢ ܗܳܢܳܐ ܐܰܬܪܶܗ ܕܡܰܘܬܳܐ ܡܶܬܡܬܶܠ ܕܺܐܝܬܰܘܗܝ. ܕܟܰܕ ܗܰܠܶܟ ܗܰܘ ܡܰܠܟܳܐ ܕܚܰܝ̈ܐ ܒܓܰܘܶܗ ܟܰܕ ܥܳܒܰܪ. ܠܰܘ ܒܣܽܘܪܳܕܳܐ ܦܣܰܥ ܒܳܗ̇ ܐܰܝܟ ܡܺܝ̈ܬܶܐ. ܐܶܠܐ ܟܰܕ ܡܡܰܫܰܚ ܘܒܰܬܠܳܬܳܐ ܝܰܘ̈ܡܺܝܢ ܡܰܠܺܝ ܠܶܗ ܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ. ܘܗܳܫܳܐ ܐܳܡܰܪ ܡܙܰܡܪܳܢܳܐ:
ܕܺܝܠܝ ܗܽܘ ܓܶܠܥܳܕ ܘܕܺܝܠܝ ܗܽܘ ܡܢܰܫܶܐ. ܘܰܐܦܪܶܝܡ ܡܥܰܫܢܳܢܶܗ ܕܪܺܝܫܝ: ܝܺܗܽܘܕܳܐ ܡܰܠܟܝ ܡܽܘܐܳܒ ܫܝܳܓܬܳܐ ܕܪ̈ܶܓܠܰܝ. ܗܳܪܟܳܐ ܡܠܰܒܶܒ ܗܘܳܐ ܢܒܺܝܳܐ ܢܰܦܫܶܗ ܘܡܶܬܒܰܝܰܐ. ܟܰܕ ܡܰܘܕܰܥ ܕܬܽܘܒ ܗܳܘܶܝܢ ܫܰܒ̈ܛܰܘܗܝ ܡܝܰܩܪ̈ܳܢܰܘܗܝ. ܡܳܐ ܕܳܐܡܰܪ ܪܽܘܚܳܐ ܐܰܝܟ ܕܡܶܢ ܦܰܪܨܽܘܦܳܐ ܕܺܝܠܶܗ ܕܥܰܡܰܢܘܐܝܠ ܕܺܝܠܝ ܗܽܘ ܓܶܠܥܳܕ ܘܕܺܝܠܝ ܗܽܘ ܡܢܰܫܶܐ. ܘܰܐܦܪܶܝܡ ܡܥܰܫܢܳܢܶܗ ܕܪܺܝܫ ܘܺܝܗܽܘܕܳܐ ܡܰܠܟܝ ܘܡܽܘܐܳܒ ܫܝܳܓܬܳܐ ܕܪ̈ܶܓܠܰܝ. ܥܰܠ ܡܗܰܝܡ̈ܢܶܐ ܕܡܶܢ ܥܰܡܳܐ ܡܰܠܶܦ ܒܗܳܠܶܝܢ ܕܡܶܢ ܥܰܡܳܐ ܕܺܐܝܬܰܝܗܘܢ ܓܶܠܥܳܕ ܘܰܡܢܰܫܶܐ. ܐܳܦ ܐܰܦܪܶܝܡ ܘܺܝܗܽܘܕܳܐ. ܒܡܽܘܐܳܒ ܕܶܝܢ܆ ܥܰܠ ܓܒܺܝܬܳܐ ܕܡܶܢ ܥܰܡ̈ܡܶܐ ܗܰܝܡܢܰܬ ܒܡܳܪܰܢ ܡܫܰܘܕܰܥ. ܘܒܳܬܰܪ ܗܳܠܶܝܢ ܐܳܡܰܪ ܢܒܺܝܳܐ:
ܥܰܠ ܐܰܕܽܘܡ ܐܶܫܪܶܐ ܡܣܳܐܢܱ̈ܝ ܘܥܰܠ ܦܠܶܫܬ ܐܶܩܥܶܐ. ܕܰܩܥܳܐ ܥܰܠ ܦܠܶܫܬ ܟܰܕ ܥܰܠ ܠܓܳܬ ܠܘܳܬ ܐܰܟܺܝܫ ܡܰܠܟܳܐ ܕܰܦܠܶܫܬܳܝ̈ܐ. ܕܳܡܝܳܐ ܗܳܝ ܓܶܝܪ ܩܰܠܺܝܠ ܗܳܝ ܕܥܰܠ ܐܰܕܽܘܡ ܠܐ ܗܘܳܬ ܒܗܰܘ ܙܰܒܢܳܐ. ܣܰܓܺܝ ܓܶܝܪ ܡܶܬܚܳܐ ܐܺܝܬ ܒܰܝܢܳܬ ܐܰܪܥܳܐ ܕܰܐܕܽܘܡ ܠܰܬܚܽܘܡܳܐ ܕܰܦܠܶܫܬܳܝ̈ܐ. ܐܶܠܐ ܗܳܪܟܳܐ ܒܐܪܳܙܳܐ ܚܳܐܱܪ ܡܙܰܡܪܳܢܳܐ. ܘܡܶܛܠ ܕܒܰܐܕܽܘܡ ܡܰܘܬܳܐ ܡܶܬܡܬܶܠ ܒܰܟܬܳܒ̈ܐ ܩܰܕܺܝ̈ܫܐ. ܫܝܽܘܠ ܕܶܝܢ ܦܠܶܫܬ ܡܶܬܦܰܚܡܳܐ. ܥܰܠܗܳܕܐ ܟܰܕ ܐܶܬܳܐ ܥܰܡܰܢܘܐܝܠ ܒܽܐܘܪܚܳܐ ܕܚܰܫ̈ܐ ܐܶܬܪܡܺܝ ܕܰܢܩܰܒܶܠ ܫܪܳܝܳܐ ܕܰܒܝܰܕ ܡܰܘܬܳܐ܆ ܗܳܢܰܘ ܕܶܝܢ ܦܽܘܪܫܳܢܳܐ ܕܢܰܦܫܳܐ ܡܶܢ ܦܰܓܪܳܐ. ܟܰܕ ܡܳܕܶܝܢ ܠܰܬܪܶܝܢ ܦܰܠܶܓ ܡܰܘܬܳܐ ܠܐܢܳܫܽܘܬܶܗ ܒܨܶܒܝܳܢܶܗ ܕܗܰܘ ܕܡܺܝܬ ܒܛܽܘܦܣܳܐ ܕܰܬܪܶܝܢ ܡܣܳܐܢ̈ܐ. ܫܪܳܐ ܠܢܰܦܫܶܗ ܡܶܢ ܦܰܓܪܶܗ. ܘܣܳܐܷܡ ܐܰܝܟ ܕܠܰܡܣܳܐܢ̈ܐ ܚܰܕ ܒܩܰܒܪܳܐ ܥܰܠ ܡܰܘܬܳܐ. ܘܠܰܡܣܳܐܢܳܐ ܐ̱ܚܪܺܢܳܐ ܥܰܠ ܫܝܽܘܠ. ܗܳܢܰܘ ܕܶܝܢ ܥܰܠ ܡܰܘܬܳܐ ܦܰܓܪܶܗ. ܘܥܰܠ ܫܝܽܘܠ ܢܰܦܫܶܗ. ܘܡܶܛܠ ܕܰܐܠܳܗܽܘܬܶܗ ܠܰܡܣ̈ܐܢܶܝܗ̇ ܠܳܐ ܫܶܡܛܰܬ. ܒܗܳܝ ܕܠܐ ܐܶܬܦܰܪܫܰܬ ܡܶܢ ܡܶܬܦܰܪ̈ܫܳܢܶܐ. ܐܠܐ ܒܦܰܓܪܳܐ ܚܠܺܝܛܳܐ ܗܘܳܬ ܟܰܕ ܣܺܝܡ ܥܠܶܝܗ̇ ܡܰܘܬܳܐ. ܐܠܐ ܒܢܰܦܫܳܐ ܡܙܺܝܓܳܐ ܗܘܳܬ ܟܕ ܡܗܰܠܟܳܐ ܒܰܫܝܽܘܠ. ܟܕ ܩܰܪܒܰܬ ܐܶܢܘܢ ܠܰܡܣܳܐܢܷ̈ܝܗ̇ ܚܰܕ ܠܘܳܬ ܚܰܕ ܢܰܩܺܝܦܳܐܝ̣ܬ. ܐܰܝܟܰܢܳܐ ܕܬܶܬܶܠ ܚܽܘܕܳܬܳܐ ܘܰܩܝܳܡܬܳܐ ܠܗܰܘ ܕܶܐܫܬܪܺܝ ܒܝܰܕ ܡܰܘܬܳܐ. ܘܗܰܘ ܕܡܺܝܬ ܢܩܽܘܡ ܒܠܳܐ ܡܳܝܽܘܬܽܘܬܳܐ. ܘܗܰܘ ܕܚܰܫ ܢܶܠܒܰܫ ܠܐ ܡܶܬܚܰܒܠܳܢܽܘܬܳܐ. ܡܶܛܠ ܕܠܐ ܡܶܫܟܚܳܐ ܗܘܳܬ ܕܒܶܣܪܳܐ ܗܰܘ ܕܰܗܘܳܐ ܒܛܽܘܦܣܳܐ ܕܰܡܣܳܐܢ̈ܐ ܠܰܐܠܗܽܘܬܳܐ. ܕܢܶܬܠܒܶܟ ܒܡܰܘܬܳܐ ܘܒܰܚܒܳܠܐ ܓܡܺܝܪܳܐܝܬ. ܒܗܳܝ ܕܳܐܦܠܳܐ ܗܽܘ ܡܰܘܬܳܐ ܩܢܶܐ ܗܘܳܐ ܫܽܘܠܛܳܢܳܐ ܥܰܠ ܦܰܓܪܳܐ ܗܰܘ ܕܶܐܬܚܰܝܰܕ ܠܡܶܠܬܳܐ. ܘܥܰܠ ܢܰܦܫܳܐ ܗܳܝ ܕܶܐܬܚܰܠܛܰܬ ܒܚܰܝ̈ܐ. ܐܶܠܘ ܗܽܘ ܡܶܠܬܳܐ ܡܶܢ ܨܶܒܝܳܢܶܗ ܠܐ ܐܶܬܳܐ ܨܶܝܕ ܡܰܘܬܳܐ. ܐܶܡܰܪ ܓܶܝܪ ܢܒܺܝܳܐ ܡܶܢ ܦܰܪܨܽܘܦܶܗ ܕܡܶܠܬܳܐ:
ܡܰܢܽܘ ܢܕܰܒܪܰܢܝ ܥܕܰܡܳܐ ܠܰܐܕܽܘܡ. ܘܡܰܢܽܘ ܢܰܘܒܠܰܢܝ ܠܰܩܪܺܝܬܳܐ ܥܰܫܺܝܢܬܳܐ. ܡܶܢ ܥܒܺܝ̈ܕܶܐ ܘܠܐ ܚܰܕ. ܡܰܢ ܓܶܝܪ ܡܰܡܪܰܚ ܕܥܰܠ ܥܳܒܽܘܕܶܗ ܢܶܣܥܶܐ. ܘܰܐܝܟܰܢܳܐ ܡܶܫܟܰܚ ܡܰܘܬܳܐ ܘܢܰܡܪܰܚ ܗܘܳܐ ܥܰܠ ܡܳܪܶܗ ܕܡܰܘܬܳܐ ܡܰܦܩܳܢܳܐ. ܐܶܠܐ ܗܽܘ ܡܶܠܬܳܐ ܐܶܙܰܠ ܠܘܳܬ ܡܰܘܬܳܐ ܡܶܢ ܨܶܒܝܳܢܶܗ. ܐܰܝܟܰܢܳܐ ܕܟܰܠܬܳܐ ܡܦܺܝܣܳܐ ܠܶܗ. ܗܳܝ ܕܰܒܬܶܫܒܚܴ̈ܬ ܬܶܫܒܚܴ̈ܬܳܐ ܐܳܡܪܳܐ. ܕܙܶܠ ܠܛܽܘܪ̈ܶܐ ܕܡܽܘܪܳܐ ܘܰܠܪ̈ܳܡܳܬܳܐ ܕܰܠܒܽܘܢܬܳܐ (ܬܫܒ̈ܚܬ ܬܫܒܚ̈ܚܬܐ ܕ: ܘ). ܘܰܐܝܟܰܢܳܐ ܕܳܐܦ ܗܽܘ ܡܶܠܬܳܐ ܐܶܡܰܪ ܥܰܠ ܢܰܦܫܶܗ. ܕܠܳܐ ܗܘܳܐ ܐ̱ܢܳܫ ܫܳܩܶܠ ܠܳܗ̇ ܡܶܢܝ. ܐܠܐ ܐܶܢܳܐ ܣܳܐܷܡ ܐ̱ܢܳܐ ܠܳܗ̇ ܡܶܢ ܨܶܒܝܳܢܝ. ܘܫܰܠܺܝܛ ܐ̱ܢܳܐ ܕܶܐܣܺܝܡܺܝܗ̇ ܘܫܰܠܺܝܛ ܐ̱ܢܳܐ ܕܶܐܣܒܺܝܗ̇. ܕܗܳܢܳܐ ܦܽܘܩܕܳܢܳܐ ܩܰܒܠܶܬ ܡܶܢ ܐܳܒܝ (ܝܘܚܢܢ ܝ: ܝܚ). ܡܳܕܶܝܢ ܗܽܘ ܐܶܙܰܠ ܥܕܰܡܳܐ ܠܰܐܕܽܘܡ. ܘܗܽܘ ܢܚܶܬ ܠܰܫܝܽܘܠ ܩܪܺܝܬܳܐ ܥܰܫܺܝܢܬܳܐ. ܘܰܐܝܟܰܢܐ ܕܗܽܘ ܡܶܢ ܢܰܦܫܶܗ ܐܶܬܳܐ ܨܶܝܕ ܚܰܫ̈ܐ ܘܡܰܘܬܳܐ. ܗܽܘ ܩܳܡ ܡܶܢ ܩܰܒܪܳܐ ܒܠܳܐ ܡܳܝܽܘܬܽܘܬܳܐ. ܘܒܳܬܰܪ ܗܳܠܶܝܢ ܡܳܢܳܐ ܨܳܒܶܐ ܢܒܺܝܐ ܢܺܐܡܰܪ.
ܕܗܳܐ ܠܰܡ ܐܰܢܬ ܐܰܠܗܳܐ ܛܥܰܝܬܳܢܝ ܘܠܐ ܢܳܦܶܩ ܐܰܢܬ ܒܚܰܝܠܰܢ. ܗܳܕܶܐ ܥܰܠ ܗܰܘ ܥܰܡܳܐ ܡܶܬܢܰܣܒܳܐ. ܕܡܶܢ ܒܳܬܰܪ ܕܰܨܠܰܒ ܠܡܳܪܳܗ̇ ܕܬܶܫܒܽܘܚܬܳܐ. ܬܽܘܒ ܠܐ ܢܦܰܩ ܐܠܗܳܐ ܒܚܰܝܠܶܗ. ܘܠܐ ܗܘܳܐ ܥܰܡܶܗ ܒܰܩܪܳܒܳܐ ܕܠܽܘܩܒܰܠ ܣܳܢܰܐܘ̈ܗܝ.
ܗܰܒ ܠܰܢ ܚܰܝܠܳܐ ܥܰܠ ܒܥܶܠܕ̈ܒܳܒܰܝܢ: ܡܶܛܠ ܕܕܰܓܳܠ ܗܽܘ ܦܽܘܪܩܳܢܶܗ ܕܒܰܪܢܳܫܳܐ. ܫܰܦܺܝܪܺܝܢ ܩܴ̈ܠܐ ܗܳܠܝܢ ܠܰܡܗܰܝܡ̈ܢܶܐ ܠܡܰܘܕܳܝܽܘ ܘܰܠܡܺܐܡܰܪ. ܕܰܐܠܗܳܐ ܝܰܗܒܠܰܢ ܚܰܝܠܐ ܥܰܠ ܣܳܛܳܢܳܐ ܘܥܰܠ ܡܰܘܬܳܐ. ܦܽܘܪܩܳܢܶܗ ܓܶܝܪ ܕܒܰܪܢܳܫܳܐ ܕܰܓܳܠܐ ܗܰܘ ܐܰܟܘܳܬܶܗ. ܐܰܠܗܳܐ ܕܶܝܢ ܫܰܪܺܝܪ ܗܽܘ ܦܽܘܪܩܳܢܶܗ ܠܐܪ̈ܳܙܶܐ ܕܶܝܢ ܕܰܐܝܟ ܗܳܠܝܢ ܨܳܪ ܠܰܢ ܪܽܘܚܳܐ ܕܰܐܠܗܳܐ. ܒܕܰܘܝܕ ܡܰܟܺܝܟܳܐ ܘܙܰܕܺܝܩܳܐ ܒܙܰܒܢܳܐ ܗܰܘ ܕܰܥܪܰܩ ܡܶܢ ܩܕܳܡ ܫܳܐܘܳܠ ܠܰܐܪܥܳܐ ܕܰܦܠܶܫ̈ܬܳܝܶܐ. ܕܰܡܚܰܘܶܝܢ ܕܠܳܐ ܚܶܪܝܳܢܳܐ ܕܒܽܐܘܠܨܳܢ̈ܐ ܡܶܫܟܚܺܝܢ ܩܰܕܺܝ̈ܫܐ ܡܰܠܟܽܘܬܳܐ ܘܓܶܠܝ̈ܢܶܐ ܐܰܠܗܳܝ̈ܐ. ܡܢܳܬܳܐ ܓܶܝܪ ܐܶܢܘܢ ܡܶܢ ܡܰܠܟܽܘܬܳܐ ܕܰܐܠܗܳܐ. ܗܰܘ ܕܨܳܒܶܐ ܒܡܰܠܟܽܘܬܳܐ ܢܶܨܒܶܐ ܐܳܦ ܕܶܝܢ ܒܽܐܘܠܨܳܢ̈ܐ ܕܰܚܠܳܦܶܝܗ̇. ܘܗܰܘ ܕܒܳܥܶܐ ܕܢܰܡܠܶܟ ܥܰܡ ܡܫܺܝܚܳܐ ܡܰܚܶܒ ܐܳܦ ܚܰܫ̈ܐ ܕܡܶܛܠܳܬܶܗ ܐܶܡܰܪ ܓܶܝܪ ܕܗܰܘ ܕܢܶܚܰܫ ܥܰܡܶܗ ܐܳܦ ܥܰܡܶܗ ܢܶܫܬܰܒܰܚ. ܘܶܐܢ ܢܣܰܝܒܰܪ ܐܳܦ ܥܰܡܶܗ ܢܰܡܠܶܟ. ܕܠܶܗ ܬܰܘܕܺܝܬܳܐ ܘܣܶܓܕܬܳܐ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܬܝܢ ܘܚܕ
ܥܰܠ ܫܪܳܪܳܐ ܕܩܰܕܺܝ̈ܫܶܐ ܕܶܐܬܬܪܺܝܡ ܥܰܠ ܟܺܐܦܳܐ ܡܫܺܝܚܳܐ܆ ܘܥܰܠ ܚܰܝ̈ܠܶܐ ܕܶܐܬܬܰܘܣܰܦܘ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ ܠܰܡܗܰܝܡ̈ܢܶܐ.
ܒܩܴ̈ܠܐ ܣܰܓܺܝܱ̈ܐܝ ܦܽܘܪ̈ܫܳܢܶܐ ܕܚܰܕ ܠܚܰܕ ܠܐ ܕܳܡܶܝܢ܆ ܙܶܡܪܰܬ ܩܰܪܢܳܐ ܕܰܢܒܺܝܽܘܬܳܐ ܓܶܠܝܳܢܰܘ̈ܗܝ ܕܡܶܠܬܳܐ. ܟܰܕ ܚܰܕ ܗܽܘ ܫܪܳܪܳܐ ܕܗܰܝܡܳܢܽܘܬܶܗ܆ ܒܥܽܘܬܪ̈ܶܐ ܡܫܰܚ̈ܠܦܶܐ ܡܰܠܠܽܘܗܝ ܢܒܺܝ̈ܐ ܘܰܐܟܪܙܽܘܗܝ ܕܰܘ̈ܩܶܐ ܘܰܐܫܡܥܽܘܗܝ ܚܰܙܳܝ̈ܐ. ܘܝܰܬܺܝܪܳܐܝܬ ܥܰܠ ܫܽܘܡܳܗ̈ܐ ܕܟܺܐܦܳܐ ܪܽܘܚܳܢܳܝܬܳܐ. ܡܶܛܠ ܕܰܒܟܺܐܦܳܐ ܨܒܳܐ ܘܶܐܬܟܰܢܺܝ ܗܰܘ ܟܺܐܦܳܐ ܕܚܰܝ̈ܐ ܕܰܐܣܠܺܝܘ ܒܰܢܳܝ̈ܐ ܥܘܺܝܪ̈ܶܐ ܘܩܰܕܡܳܝܳܐ ܗܰܘ ܪܺܝܫܳܐ ܕܰܐܒܳܗ̈ܬܳܐ ܝܰܥܩܽܘܒ ܟܰܕ ܠܟܺܐܦܳܐ ܡܫܺܝܚܳܐ ܡܶܬܪܰܓܪܰܓ ܗܘܳܐ܆ ܕܰܥܠܰܘܗܝ ܢܶܬܬܪܺܝܡ ܘܢܶܬܒܢܶܐ. ܟܰܕ ܢܦܰܩ ܕܢܺܐܙܰܠ ܠܦܳܕܳܢ ܕܳܐܪܳܡ. ܘܰܦܓܰܥ ܒܰܐܬܪܳܐ ܘܒܳܬ ܬܰܡܳܢ ܒܶܝܬ ܐܺܝܠ. ܠܗܳܕܐ ܟܺܐܦܳܐ ܐܶܣܳܕܰܘ̈ܗܝ ܣܳܐܷܡ ܗܘܳܐ. ܟܰܕ ܥܪܰܩ ܡܶܢܩܕܳܡ ܚܶܡܬܳܐ ܕܰܐܚܽܘܗܝ ܛܳܠܽܘܡܳܐ ܥܺܝܣܽܘ. ܝܶܗܒܰܬ ܠܶܗ ܐܶܡܶܗ ܩܰܠܺܝܠ ܡܶܫܚܳܐ ܕܙܰܝܬܳܐ ܒܩܰܪܢܳܐ ܘܰܣܡܺܝܕܳܐ ܒܩܽܘܠܬܳܐ ܕܢܶܐܟܽܘܠ ܒܰܥܪܽܘܩܝܳܐ ܕܺܝܠܶܗ ܘܢܶܬܬܰܪܣܶܐ. ܘܟܰܕ ܡܛܳܐ ܠܗܳܕܐ ܕܽܘܟܬܳܐ ܕܶܐܡܰܪܢܰܢ܆ ܒܳܬ ܬܰܡܢ ܘܚܶܙܘܳܐ ܐܶܬܚܙܺܝ ܠܶܗ܆ ܘܰܐܩܺܝܡ ܬܠܳܬ ܟܺܐܦ̈ܐ ܘܰܐ̱ܚܪܺܬܳܐ ܠܥܶܠ ܡܶܢܗܘܢ ܘܰܢܣܰܟ ܥܰܠܗܳܝ ܟܺܐܦܳܐ ܡܶܢ ܡܶܫܚܳܐ ܕܥܰܡܶܗ ܘܶܐܬܢܰܒܺܝ ܘܶܐܡܰܪ: ܕܗܳܢܳܐ ܒܰܝܬܳܐ ܕܰܐܠܗܳܐ ܢܶܬܩܪܶܐ (ܒܪܝܬܐ ܟܚ: ܝܛ). ܘܟܺܐܦܳܐ ܐܪܳܙܶܗ ܕܰܡܫܺܝܚܳܐ. ܘܡܶܛܠܬܳܗ̇ ܐܶܡܰܪ ܐܶܫܰܥܝܳܐ܆ ܕܗܳܐ ܣܳܐܷܡ ܐܢܳܐ ܒܨܶܗܝܽܘܢ ܟܺܐܦܳܐ ܕܬܽܘܩܰܠܬܳܐ ܟܺܐܦܳܐ ܕܠܐ ܡܰܟܫܽܘܠܳܐ. ܪܺܝܫ ܐܶܣܬܳܐ ܕܫܶܬܶܐܣܬܳܐ (ܐܫܥܝܐ ܟܚ: ܝܘ). ܠܗܳܕܶܐ ܟܺܐܦܳܐ ܐܳܦ ܕܳܢܺܝܐܝܠ ܗܰܘ ܫܰܦܺܝܪ ܫܡܳܐ ܘܓܰܒܪܳܐ ܕܪܶܓܬܳܐ ܚܙܳܐ ܒܓܶܠܝܳܢܳܐ܆ ܟܰܕ ܐܶܬܓܰܙܪܰܬ ܕܠܐ ܒܺܐܝ̈ܕܰܝܢ ܘܰܡܚܳܬ ܠܨܰܠܡܳܐ ܕܰܩܶܩܬܶܗ ܗܘܳܬ (ܕܢܝܐܝܠ ܓ: ܠܕ). ܥܰܠ ܗܳܕܐ ܟܺܐܦܳܐ ܐܶܡܰܪ ܙܟܰܪܝܳܐ܆ ܕܡܶܬܦܰܬܚܴ̈ܢ ܫܒܰܥ ܥܰܝ̈ܢܺܝܢ ܡܶܬܝܰܕܥܳܢ̈ܝܳܬܳܐ (ܙܟܪܝܐ ܓ: ܛ). ܗܳܠܶܝܢ ܕܺܐܝܬܰܝܗܶܝܢ ܫܒܰܥ ܡܰܘܗ̈ܒܳܬܳܐ ܕܪܽܘܚܳܐ. ܕܫܰܟܶܢ ܡܫܺܝܚܳܐ ܠܥܺܕܬܶܗ ܒܰܡܕܰܒܪܳܢܽܘܬܳܐ ܕܟܳܪܽܘܙܽܘܬܳܐ ܕܶܐܘܰܢܓܶܠܝܽܘܢ. ܡܶܛܠ ܐܪܳܙܳܐ ܗܳܢܐ ܕܟܺܐܦܳܐ ܡܨܰܠܐ ܡܙܰܡܪܳܢܳܐ ܒܬܶܫܒܽܘܚܬܳܐ ܗܳܕܐ ܕܶܫܬܺܝܢ ܘܰܚܕܳܐ ܕܥܰܡ ܟܽܠܗܘܢ ܢܒܺܝ̈ܐ ܢܶܬܬܪܺܝܡ ܘܢܶܬܥܰܠܐܷ. ܫܪܳܪܳܐ ܕܰܢܒܺܝܽܘܬܶܗ ܘܥܰܠ ܟܺܐܦܳܐ ܡܫܺܝܚܳܐ. ܘܠܰܘ ܕܠܐ ܚܰܫܳܐ ܡܨܰܠܐܷ. ܐܠܐ ܒܛܽܘܪܳܦܳܐ ܕܠܶܒܶܗ ܩܳܪܶܐ ܠܐܠܗܳܐ ܘܳܐܡܰܪ:
ܫܡܰܥ ܐܰܠܗܳܐ ܨܠܽܘܬܝ ܘܨܽܘܬ ܠܒܳܥܽܘܬܝ: ܡܶܢ ܣܰܘ̈ܦܶܝܗ̇ ܕܰܐܪܥܳܐ ܠܳܟ ܗܽܘ ܩܳܪܶܐ ܐܢܳܐ ܒܛܽܘܪܳܦܶܗ ܕܠܶܒܝ. ܡܳܢܳܐ ܗܝ̇ ܗܳܝ ܕܰܡܨܰܠܐ ܘܒܳܥܶܐ܆ ܕܡܶܢ ܣܰܘܦܶܝ̈ܗ̇ ܕܰܐܪܥܳܐ ܘܰܐܝܠܶܝܢ ܐܶܢܘܢ ܣܰܘܦܶܝ̈ܗ̇ ܕܰܐܪܥܳܐ ܡܫܰܡܰܗ. ܠܰܘ ܠܥܽܘܡ̈ܩܶܐ ܬܰܚܬܳܝ̈ܐ ܕܫܶܬܶܐܣܶܝ̈ܗ̇ ܕܰܐܪܥܳܐ. ܐܶܠܐ ܟܰܕ ܠܰܐܠܗܳܐ ܠܥܶܠ ܡܶܢ ܟܽܠܗܘܢ ܟܝܴ̈ܢܶܐ ܡܶܬܚܰܙܝ̈ܢܶܐ ܘܡܶܬܝܰܕ̈ܥܢܶܐ. ܡܪܺܝܡ ܘܰܡܥܰܠܐܷ ܠܶܗ܆ ܟܰܕ ܒܛܽܘܪܳܦܳܐ ܣܰܓܺܝܳܐܐ ܡܶܫܬܰܩܰܦ ܐ̱ܢܳܐ ܒܥܽܘܡ̈ܩܶܐ ܬܰܚܬܳܝ̈ܐ ܘܰܒܣܰܘܦܶܝ̈ܗ̇ ܕܰܐܪܥܳܐ. ܐܰܪܟܶܢܬ ܠܘܳܬܝ ܒܝܰܕ ܒܪܳܟ ܚܰܒܺܝܒܳܐ. ܘܰܢܚܶܬ ܗܘܳܐ ܟܺܐܦܳܐ ܒܣܰܘ̈ܦܶܝܗ̇ ܕܰܐܪܥܳܐ ܕܥܳܡܰܪ ܐ̱ܢܳܐ ܒܳܗ̇. ܘܥܰܠܺܝ ܘܪܰܡܪܡܰܢܝ ܘܣܳܡܰܢܝ ܥܠܰܘܗܝ ܐܰܝܟ ܪܳܥܝܳܐ ܕܰܡܙܰܝܰܚ ܥܶܪܒܳܐ ܕܰܛܥܳܐ ܥܰܠ ܟܰܬܦ̈ܬܶܗ ܡܳܐ ܕܡܶܫܟܰܚ ܠܶܗ. ܘܟܕ ܗܽܘ ܡܶܛܠ ܕܶܐܬܓܰܫܰܡ ܟܺܐܦܳܐ ܗܘܳܐ. ܠܺܝ ܣܰܓܺܝ ܪܡܶܐ ܗܘܺܝܬ ܥܰܠ ܐܰܪܥܳܐ ܡܰܠܟܝ ܡܶܬܛܰܪܰܦ ܐ̱ܢܳܐ.
ܥܰܠ ܟܺܐܦܳܐ ܐܰܪܺܝܡܬܳܢܝ ܘܒܰܝܰܐܬܳܢܝ. ܕܡܶܛܠ ܡܳܢܳܐ ܩܳܪܶܝܢ ܠܶܗ ܢܒܺܝ̈ܐ ܠܰܡܫܺܝܚܳܐ ܟܺܐܦܳܐ. ܘܗܳܕܐ ܙܳܕܶܩ ܕܢܶܒܥܶܝܗ̇. ܐܳܕܳܡ ܕܶܝܢ ܟܕ ܐܶܬܓܒܶܠ ܡܶܢ ܐܰܠܗܳܐ ܡܶܢ ܟܝܳܢܳܐ ܕܳܐܕܳܡܬܳܐ܆ ܒܛܰܝܒܽܘܬܳܐ ܩܰܒܶܠ ܡܶܢ ܐܰܠܗܳܐ. ܕܰܕܠܐ ܚܒܳܠܐ ܢܶܬܬܣܺܝܡ ܒܓܰܘ ܦܰܪܕܰܝܣܳܐ. ܟܰܕ ܐܰܘܣܶܦ ܠܶܗ ܒܡܰܘܡܬܳܐ ܕܠܐ ܡܶܬܚܰܒܠܳܢܽܘܬܳܐ ܘܠܐ ܡܳܝܽܘܬܽܘܬܳܐ. ܐܶܠܘ ܢܛܰܪ ܦܽܘܩܕܳܢܳܐ ܕܶܐܬܬܣܺܝܡ ܠܶܗ ܡܶܢ ܥܳܒܽܘܕܳܐ. ܒܝܰܕ ܠܐ ܡܶܬܚܰܒܠܳܢܽܘܬܳܐ ܕܩܰܒܶܠ ܡܶܢ ܛܰܝܒܽܘܬܳܐ܆ ܐܳܦ ܐܶܬܥܰܠܺܝ ܗܘܳܐ ܡܶܢ ܟܝܳܢܳܐ ܕܥܰܦܪܳܐ. ܘܰܗܘܳܐ ܟܺܐܦܳܐ ܕܠܰܝܬ ܒܳܗ̇ ܚܒܳܠܐ܆ ܟܕ ܕܝܢ ܦܽܘܩܕܳܢܳܐ ܠܐ ܢܛܰܪ܆ ܥܛܰܦ ܠܘܳܬ ܐܳܕܳܡܬܳܐ ܕܶܐܬܩܺܝܡ ܗܘܳܐ ܡܶܢܳܗ̇ ܟܝܳܢܳܐܝܬ ܘܰܗܘܳܐ ܡܳܝܽܘܬܳܐ ܘܡܶܬܚܰܒܠܳܢܳܐ. ܡܶܢ ܗܳܢܐ ܡܳܕܶܝܢ ܕܰܒܣܰܘܦ̈ܐ ܕܰܐܪܥܳܐ. ܕܠܐ ܒܽܘܝܳܐܳܐ ܡܶܬܛܰܪܰܦ ܐ̱ܢܳܐ ܘܡܶܬܬܰܢܰܚ ܐ̱ܢܳܐ ܒܠܶܒܳܗ̇ ܥܰܠ ܚܒܳܠܳܗ̇. ܐܶܬܳܐ ܡܶܢ ܫܡܰܝܳܐ ܗܰܘ ܕܒܰܟܝܳܢܶܗ ܠܐ ܡܳܝܽܘܬܳܐ ܘܠܐ ܡܶܬܚܰܒܠܳܢܳܐ. ܘܡܶܢܝܳܢܳܐ ܕܥܰܦܪܳܐ ܚܰܘܺܝ ܢܰܦܫܶܗ ܟܺܐܦܳܐ ܚܰܝܳܐ. ܡܶܛܠ ܕܢܶܫܬܰܚܠܰܦ ܟܝܳܢܳܐ ܕܰܥܛܰܦ ܠܥܰܦܪܳܐ ܠܰܕܡܽܘܬܳܐ ܕܟܺܐܦܳܐ. ܘܢܶܗܘܶܐ ܒܶܗ ܒܥܳܒܽܘܕܶܗ ܟܺܐܦܳܐ ܕܠܐ ܡܳܝܬܳܐ ܘܠܐ ܡܶܬܚܰܒܠܐ ܘܢܶܗܘܶܐ ܪܺܝܫܺܝܬܳܐ ܕܚܰܝ̈ܐ. ܗܰܘ ܠܐ ܡܳܝܽܘܬܳܐ. ܘܥܰܠܗܳܕܐ ܐܶܡܰܪ ܢܒܺܝܐ܆
ܕܥܰܠ ܟܺܐܦܳܐ ܐܰܪܺܝܡܬܳܢܝ ܘܒܰܝܰܐܬܳܢܝ. ܠܰܘ ܓܶܝܪ ܗܳܝ ܕܡܶܬܬܪܺܝܡܺܝܢ ܩܰܕܺܝ̈ܫܐ ܒܰܠܚܽܘܕ ܗܳܘܝܳܐ ܠܗܽܘܢ ܒܝܰܕ ܡܫܺܝܚܳܐ. ܐܠܐ ܒܽܘܝܳܐܳܐ ܘܣܶܬܳܪܳܐ ܘܒܶܝܬܓܰܘܣܳܐ ܐܰܝܟ ܕܶܐܡܰܪ ܢܒܺܝܐ.
ܡܶܛܠ ܕܰܗܘܰܝܬ ܠܺܝ ܒܶܝܬܓܰܘܣܳܐ ܘܡܰܓܕܠܳܐ ܪܳܡܳܐ ܡܶܢ ܩܕܳܡ ܒܥܶܠܕ̈ܒܳܒܰܝ. ܠܰܘ ܡܫܺܝܚܳܐ ܟܺܐܦܳܐ ܒܰܠܚܽܘܕ ܐܝܬܰܘܗܝ ܠܥܺܕܬܶܗ ܐܠܐ ܐܳܦ ܚܶܣܢܳܐ. ܡܶܢ ܗܳܠܝܢ ܓܶܝܪ ܐܶܡܰܪ ܡܳܪܰܢ ܕܠܐ ܬܶܕܚܠܽܘܢ ܡܶܢ ܐܰܝܠܝܢ ܕܩܳܛܠܺܝܢ ܦܰܓܪܳܐ. ܢܰܦܫܳܐ ܕܶܝܢ ܠܐ ܡܶܫܟܚܺܝܢ ܠܡܶܩܛܰܠ (ܡܬܝ ܝ: ܟܚ ܠܘܩܐ ܝܒ: ܕ). ܡܳܕܶܝܢ ܡܶܢ ܗܳܠܝܢ ܡܦܰܨܶܐ ܒܒܶܝܬ ܓܰܘܣܶܗ ܘܰܡܣܰܬܰܪ ܠܓܰܘ ܡܰܓܕܠܶܗ ܡܶܢ ܒܥܶܠܕ̈ܒܳܒܶܐ. ܕܟܳܡܢܺܝܢ ܠܚܰܝܰܝ̈ܢ. ܡܳܕܝܢ ܫܰܦܺܝܪ ܕܠܰܘ ܒܡܰܓܕܠܐ ܕܶܐܡܰܪ ܒܢܳܡܽܘܣܳܐ. ܘܳܐܡܪܺܝܢ ܒܝܰܕ ܡܙܰܡܪܳܢܳܐ:
ܕܶܐܥܡܰܪ ܒܡܰܫܟܢܳܟ ܠܥܳܠܡܺܝܢ. ܘܶܐܣܬܰܬܰܪ ܒܛܶܠܳܠܐܴ ܕܟܶܢܦܰܝ̈ܟ. ܕܰܠܡܳܢܳܐ ܐܰܪܳܐ ܡܰܫܟܢܳܐ ܕܰܠܥܳܠܡܺܝܢ ܒܗܳܢܐ ܥܳܠܡܳܐ ܡܶܬܚܙܶܐ. ܐܶܠܳܐ ܒܗܰܘ ܥܳܠܡܳܐ ܠܐ ܥܒܺܝܕ ܒܺܐܝܕܰܝ̈ܐ. ܐܶܥܡܰܪ ܘܶܐܬܒܰܣܰܡ. ܟܕ ܡܟܰܣܶܐ ܐܰܢܬ ܠܺܝ ܒܛܶܠܳܠܐ ܕܟܶܢܦܰܝ̈ܟ. ܚܙܺܝ ܐܰܝܟܰܢܳܐ ܠܐ ܒܳܥܶܐ ܗܘܳܐ ܢܒܺܝܳܐ ܡܶܢ ܐܰܠܗܳܐ. ܐܰܝܠܶܝܢ ܕܥܳܠܡܳܐ ܗܳܢܐ. ܐܠܐ ܡܩܰܕܶܡ ܗܘܳܐ ܘܡܰܠܶܦ ܗܘܳܐ ܠܗܽܘܢ ܪܽܘܚܳܐ. ܕܢܶܒܥܽܘܢ ܡܰܠܟܽܘܬܶܗ ܕܰܐܠܗܳܐ ܘܙܰܕܺܝܩܽܘܬܶܗ. ܥܰܠ ܗܳܝ ܐܶܡܰܪ ܕܠܰܘ ܡܰܥܡܪܳܐ ܕܙܰܒܢܳܐ ܢܶܬܶܠ ܠܶܗ. ܐܶܠܐ ܕܰܒܡܰܫܟܢܶܗ ܠܥܳܠܡܺܝܢ ܢܶܥܡܰܪ ܥܰܡܶܗ. ܘܡܶܛܠ ܕܗܳܕܐ ܐܰܪܓܶܫ ܗܘܳܐ ܒܢܰܦܫܶܗ ܢܒܺܝܐ ܕܡܶܬܝܰܗܒܳܐ ܠܶܗ ܡܶܢ ܐܰܠܗܳܐ. ܐܰܝܟ ܗܰܘ ܕܡܶܢ ܟܰܕܽܘ ܢܰܣܒܳܗ̇ ܡܰܘܕܶܐ ܚܠܳܦܶܝܗ̇ ܘܳܐܡܰܪ:
ܡܶܛܠ ܕܰܐܢܬ ܐܰܠܗܳܐ ܫܡܰܥܬ ܢܶܕܪ̈ܰܝ. ܘܝܰܗܒܬ ܝܽܘܪܬܳܢܳܐ ܠܕܳܚ̈ܠܰܝ ܫܡܳܟ. ܡܶܛܠܡܳܢܐ ܐܶܡܰܪ ܕܰܫܡܰܥܬ ܢܶܕܪ̈ܰܝ. ܢܶܕܪ̈ܶܐ ܓܶܝܪ ܡܶܬܩܰܒܳܠܽܘ ܡܶܬܩܰܒܠܺܝܢ. ܘܠܰܘ ܡܶܫܬܰܡܥܺܝܢ. ܒܪܰܡ ܠܰܬܪܶܝܢ ܦܽܘܪ̈ܫܳܢܺܝܢ ܡܶܬܦܰܠܓܺܝܢ ܢܶܕܪ̈ܶܐ. ܐܺܝܬ ܓܶܝܪ ܕܢܳܕܪܺܝܢ ܕܡܶܢ ܩܶܢܝܳܢ̈ܐ ܢܩܰܪܒܽܘܢ ܢܶܕܪ̈ܶܐ ܠܐܠܗܳܐ. ܘܗܳܠܶܝܢ ܕܶܝܢ ܐܺܝܬܰܝܗܘܢ ܦܰܓܪ̈ܳܢܳܝܶܐ. ܢܶܕܪ̈ܶܐ ܕܶܝܢ ܐ̱ܚܪ̈ܳܢܶܐ ܡܳܐ ܕܢܳܕܰܪ ܐܢܳܫ܆ ܕܰܢܩܺܝܡ ܢܰܦܫܶܗ ܢܶܕܪܳܐ ܩܕܳܡ ܐܰܠܗܳܐ ܒܰܨܠܽܘܬܳܐ. ܥܕܰܡܳܐ ܠܙܰܒܢܳܐ ܕܦܳܪܶܫ ܢܰܦܫܶܗ ܡܶܢܶܗ܆ ܡܳܕܶܝܢ ܕܰܘܝܕ ܗܳܠܶܝܢ ܗܘܰܘ ܢܶܕܪ̈ܰܘܗܝ ܕܰܨܠܽܘܬܶܗ ܬܶܫܬܡܰܥ. ܗܳܝ ܕܝܰܗܒܬ ܝܽܘܪܬܳܢܳܐ ܠܕܳܚ̈ܠܰܝ ܫܡܳܟ. ܘܬܽܘܒ ܐܶܡܰܪ:
ܐܰܘܣܶܦܬ ܝܰܘ̈ܡܳܬܳܐ ܥܰܠ ܝܰܘ̈ܡܳܬܶܗ ܕܡܰܠܟܳܐ. ܟܕ ܐܶܬܢܰܒܺܝ ܡܰܙܡܽܘܪܳܐ ܗܳܢܐ. ܠܐ ܥܕܰܟܺܝܠ ܐܶܬܩܰܝܰܡ ܗܘܳܐ ܡܰܠܟܳܐ ܥܰܠ ܥܰܡܳܐ. ܡܫܺܝܚܽܘܬܳܐ ܕܶܝܢ ܕܡܰܠܟܽܘܬܳܐ ܩܰܒܶܠ ܗܘܳܐ ܡܶܢ ܐܰܠܗܳܐ. ܬܰܘܣܶܦܬܳܐ ܕܶܝܢ ܕܚܰܝ̈ܐ ܕܶܐܬܬܰܘܣܦܰܬ ܠܶܗ ܗܳܕܳܐ ܗ̄ܝ. ܒܽܘܣܳܡܳܐ ܕܚܰܝ̈ܐ ܕܥܳܠܡܳܐ ܚܰܕܬܳܐ. ܘܝܽܘܬܪܳܢܳܐ ܕܩܰܕܺܝ̈ܫܶܐ. ܗܰܘ ܕܝܰܗܒܠܗܽܘܢ ܐܰܠܗܳܐ ܡܶܢ ܡܰܦܩܳܢܗܘܢ ܕܡܶܟܳܐ.
ܘܰܫ̈ܢܰܘܗܝ ܠܕܳܪܕܳܪ̈ܺܝܢ: ܕܢܶܬܩܰܝܰܡ ܠܥܳܠܰܡ ܩܕܳܡ ܐܠܗܳܐ. ܠܰܘ ܕܰܘܝܕ ܐܺܝܬܰܘܗܝ ܗܰܘ ܡܰܠܟܳܐ ܕܚܰܝ ܘܩܰܝܳܡ ܠܥܳܠܰܡ ܘܠܐ ܥܳܒܰܪ ܘܠܐ ܡܶܫܬܰܚܠܰܦ. ܡܫܺܝܚܳܐ ܗܰܘ ܡܰܠܟܳܐ ܕܠܐ ܥܳܒܰܪ. ܕܰܨܒܳܐ ܘܰܕܢܰܚ ܒܰܒܣܰܪ ܡܶܢ ܙܰܪܥܳܐ ܕܒܶܝܬ ܕܰܘܝܕ. ܘܰܛܥܶܡ ܡܰܘܬܳܐ ܘܰܢܚܶܬ ܠܰܫܝܽܘܠ. ܘܬܽܘܒ ܦܢܳܐ ܡܶܢ ܒܳܬܰܪ ܡܰܘܬܳܐ ܠܚܰܝ̈ܐ ܕܠܐ ܫܽܘܠܳܡܳܐ. ܘܰܐܝܟ ܗܰܘ ܕܬܰܘܣܶܦܬܳܐ ܡܶܬܚܰܫܒܺܝܢ ܠܶܗ ܚܰܝ̈ܐ ܒܳܬܰܪ ܩܝܳܡܬܳܐ. ܘܗܽܘܝܽܘ ܛܰܝܒܽܘܬܳܐ ܘܩܽܘܫܬܳܐ.
ܛܰܝܒܽܘܬܳܐ ܘܩܽܘܫܬܳܐ ܡܰܢܽܘ ܢܶܛܪܺܝܗ̇. ܗܳܟܰܢ ܐܶܙܰܡܰܪ ܠܰܫܡܳܟ ܠܥܳܠܰܡ ܥܳܠܡܺܝܢ܆ ܟܰܕ ܐܶܫܰܠܶܡ ܢܶܕܪ̈ܰܝ ܝܽܘܡ ܡܶܢ ܝܽܘܡ. ܗܳܪܟܳܐ ܠܰܡ ܒܥܳܠܡܳܐ ܗܳܢܐ ܘܰܒܥܳܠܡܳܐ ܗܰܘ ܕܳܐܬܶܐ ܐܶܙܰܡܰܪ ܠܳܟ. ܟܰܕ ܫܳܐܷܠ ܐܢܳܐ. ܗܳܢܰܘ ܓܶܝܪ ܥܒܳܕܳܐ ܕܰܡܠܺܝ̈ܠܐ ܕܰܢܙܰܡܪܽܘܢ ܠܳܟ ܘܰܢܫܰܒܚܽܘܢ ܠܰܫܡܳܟ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܬܝܢ ܘܬܪܝܢ
ܕܰܠܦܽܘܪܩܳܢܳܐ ܕܰܗܘܳܐ ܒܥܰܡܰܢܽܘܐܝܠ ܡܣܰܟܶܝܢ ܗܘܰܘ ܢܒܺܝ̈ܐ: ܘܥܰܠ ܡܰܪܳܚܽܘܬܳܐ ܕܝܽܘ̈ܕܳܝܶܐ.
ܒܣܰܒܪܳܐ ܘܰܒܣܽܘܟܳܝܳܐ ܕܰܐܠܗܳܐ ܝܳܬܒܺܝܢ ܗܘܰܘ ܟܶܢ̈ܫܶܐ ܕܰܢܒܺܝ̈ܐ ܟܰܕ ܡܣܰܟܶܝܢ ܘܚܳܝܪܺܝܢ ܕܶܐܡܰܬܝ ܢܶܬܓܠܐܷ ܘܢܶܦܪܽܘܩ ܠܥܳܠܡܳܐ. ܘܟܰܕ ܣܰܓܺܝ̈ܐܐ ܢܒܺܝ̈ܐ ܐܺܝܬ ܗܘܳܐ. ܕܰܪܓܺܝܫܺܝܢ ܗܘܰܘ ܒܛܽܘܝܳܒܳܐ ܕܥܰܬܶܕ ܐܰܠܗܳܐ. ܕܒܶܗ ܢܚܰܘܶܐ ܛܰܝܒܽܘܬܶܗ ܠܓܶܢܣܳܐ ܕܰܒܢܰܝ̈ܢܳܫܳܐ. ܐܠܐ ܙܥܽܘܪ̈ܐ ܒܰܠܚܽܘܕ ܡܶܬܗܰܝܡܢܺܝܢ ܗܘܰܘ ܩܕܳܡ ܥܰܡܳܐ. ܘܗܰܘ ܡܶܕܶܡ ܕܰܡܩܰܒܠܺܝܢ ܒܝܰܕ ܓܶܠܝ̈ܢܶܐ. ܐܰܝܟܰܢܳܐ ܕܳܐܦ ܠܘܳܬ ܫܠܺܝܚ̈ܐ. ܣܥܰܪ ܪܽܘܚܳܐ ܒܣܽܘܒܳܪܳܐ. ܘܟܰܕ ܛܳܒ ܫܠܺܝܚ̈ܐ ܫܰܒܥܺܝܢ ܗܳܘܶܝܢ ܗܘܰܘ. ܐܦ ܬܰܠܡܺܝ̈ܕܶܐ ܬܪܶܥܣܰܪ. ܥܰܡ ܗܳܠܶܝܢ ܕܶܝܢ ܝܰܬܺܝܪ ܡܶܢ ܚܰܡܶܫܡܳܐܐ ܐܰܚܻ̈ܝܢ. ܐܠܐ ܙܥܽܘܪ̈ܶܐ ܒܰܠܚܽܘܕ ܕܶܐܬܗܰܝܡܰܢܘ. ܒܡܰܟܬܒܳܢܽܘܬܳܐ ܕܰܐܝܠܶܝܢ ܕܰܚܙܰܘ. ܘܗܳܟܰܢܳܐ ܓܶܕܫܰܬ ܒܙܰܒܢܳܐ ܕܰܢܒܺܝ̈ܐ. ܘܟܕ ܢܒܺܝ̈ܐ ܣܰܓܺܝ̈ܐܐ ܐܺܝܬ ܗܘܰܘ ܒܝܰܘ̈ܡܰܝ ܕܰܘܝܕ. ܗܽܘ ܒܰܠܚܽܘܕ ܐܶܬܗܰܝܡܰܢ ܡܶܕܶܡ ܕܶܐܬܓܠܺܝ ܠܶܗ ܡܶܢ ܪܽܘܚܳܐ ܩܰܕܺܝܫܳܐ. ܐܶܡܰܪ ܓܝܪ ܒܬܶܫܒܽܘܚܬܳܐ ܗܳܕܐ ܕܶܫܬܺܝܢ ܘܬܰܪܬܶܝܢ܆ ܟܕ ܡܒܰܕܶܩ ܣܽܘܟܳܝܳܗ̇ ܕܰܢܒܺܝܽܘܬܳܐ ܠܦܳܪܽܘܩܳܐ ܕܟܽܠ.
ܠܰܐܠܗܳܐ ܡܣܰܟܝܳܐ ܢܰܦܫܝ ܕܡܶܢܶܗ ܗܽܘ ܦܽܘܪܩܳܢܝ. ܘܗܽܘܝܽܘ ܐܰܠܳܗܝ ܘܦܳܪܽܘܩܝ: ܘܒܶܝܬ ܓܰܘܣܝ ܪܰܒܳܐ ܕܠܐ ܐܶܙܽܘܥ. ܗܳܠܶܝܢ ܡܚܰܘ̈ܝܳܢ ܕܠܽܘܩܒܰܠ ܗܳܢܘܢ ܕܠܐ ܡܰܘܕܶܝܢ ܕܰܐܠܗܳܐ ܐܺܝܬܰܘܗܝ ܒܰܫܪܳܪܳܐ ܥܰܡܰܢܘܐܝܠ. ܐܶܡܰܪ ܐܶܢܝܢ ܢܒܺܝܳܐ: ܘܰܕܠܰܝܬ ܦܽܘܪܩܳܢܳܐ ܒܒܰܪܢܳܫܳܐ. ܩܰܕܶܡ ܐܶܡܰܪ ܒܡܰܙܡܽܘܪܳܐ ܐ̱ܚܪܺܢܳܐ. ܕܕܰܓܳܠ ܗܽܘ ܦܽܘܪܩܳܢܶܗ ܕܒܰܪܢܳܫܳܐ (ܡܙܡܘܪܐ ܣ: ܝܓ). ܘܦܶܛܪܽܘܣ ܗܰܘ ܪܰܒܳܐ ܕܰܫܠܺܝܚ̈ܐ ܟܰܕ ܡܰܠܶܦ ܐܶܡܰܪ ܗܘܳܐ. ܕܠܰܝܬ ܒܐ̱ܢܳܫ ܐ̱ܚܪܺܝܢ ܦܽܘܪܩܳܢܳܐ (ܦܪܟܣܝܣ ܕ: ܝܒ). ܡܶܢ ܒܳܬܰܪ ܕܰܐܘܕܰܥ ܕܠܰܐܠܗܳܐ ܡܣܰܟܶܐ ܕܢܺܐܬܶܐ ܢܶܦܪܩܶܗ ܠܥܳܠܡܳܐ. ܘܗܽܘܝܽܘ ܐܰܠܗܳܐ ܦܳܪܽܘܩܳܐ. ܐܶܬܦܢܺܝ ܘܰܐܟܶܣ ܠܗܳܢܘܢ ܕܶܐܬܪܰܓܪܰܓܘ ܘܩܰܛܠܽܘܗܝ ܠܦܳܪܽܘܩܳܐ ܕܟܽܠ. ܘܰܐܙܺܝܥ ܢܒܺܝܽܘܬܶܗ ܠܽܘܩܒܰܠ ܝܺܗܽܘܕܳܐ ܘܥܰܡܳܐ ܕܨܳܠܽܘܒ̈ܐ ܘܶܐܡܰܪ:
ܥܕܰܡܳܐ ܠܶܐܡܰܬܝ ܡܶܬܓܰܪܓܺܝܢ ܐܰܢܬܽܘܢ ܥܰܠ ܓܰܒܪܳܐ ܕܬܶܩܛܠܽܘܢ܆ ܐܰܝܟ ܐܶܣܬܳܐ ܕܡܳܛܰܬ ܘܰܐܝܟ ܣܝܳܓܳܐ ܕܰܕܚܺܝܩ. ܠܡܳܢܳܐ ܠܰܡ ܐܰܣܒܰܪܬܘܢ ܥܠܰܘܗܝ ܒܗܳܝ ܕܰܗܘܳܐ ܒܰܪܢܳܫܳܐ. ܐܰܝܟ ܐܶܣܬܳܐ ܡܳܐܷܛ ܘܢܳܦܶܠ. ܘܰܐܝܟ ܣܝܳܓܳܐ ܡܶܬܕܚܶܩ ܘܡܶܬܕܢܶܐ ܡܶܢ ܐܺܝܩܳܪܶܗ. ܠܰܘ ܓܝܪ ܕܰܐܝܟ ܗܳܢܳܐ ܐܺܝܬܰܘܗܝ. ܐܳܦܶܢ ܓܝܪ ܕܰܗܘܳܐ ܒܰܪܢܳܫܳܐ ܡܶܛܠ ܕܢܶܦܪܽܘܩ. ܐܠܐ ܐܰܠܗܰܐ ܗ̄ܘ ܟܝܳܢܳܐܝ̣ܬ. ܘܠܰܘ ܥܕܰܡܳܐ ܠܗܳܕܐ ܕܡܶܬܚܰܙܝܳܐ ܕܰܒܨܺܝܪܳܐ ܐܺܝܬܰܘܗܝ. ܥܰܡ ܗܳܝܕܶܝܢ ܕܩܶܛܠܳܐ.
ܘܳܐܦ ܡܶܢ ܐܺܝܩܳܪܶܗ ܐܶܬܪܰܥܺܝܘ ܠܡܶܕܚܝܶܗ ܘܰܪܗܶܛܘ ܒܕܰܓܳܠܽܘܬܳܐ. ܕܶܐܬܪܰܥܺܝܘ ܨܳܠܽܘܒ̈ܐ ܥܰܠ ܡܶܠܬܳܐ. ܕܳܐܦ ܡܶܢ ܐܺܝܩܳܪܳܐ ܕܪܰܒܽܘܬܶܗ ܢܫܰܠܚܺܝܘܗܝ. ܒܝܰܕ ܡܰܬܠܐ ܗܰܘ ܕܡܶܛܠ ܓܰܒܪܳܐ ܗܰܘ ܕܰܢܨܰܒ ܟܰܪܡܳܐ ܐܰܘܕܰܥ܆ ܕܟܰܕ ܠܰܡ ܒܚܰܪܬܳܐ ܒܳܬܰܪ ܥܰܒ̈ܕܶܐ ܐܶܫܬܰܕܰܪ ܝܳܪܬܳܐ. ܟܰܕ ܚܙܰܐܘܽܗܝ ܦܰܠܳܚ̈ܐ ܐܶܡܰܪܘ ܒܰܝܢܳܬܗܘܢ ܗܳܢܰܘ ܝܳܪܬܳܐ ܬܰܘ ܢܶܩܛܠܺܝܘܗܝ ܘܢܶܐܚܽܘܕ ܝܳܪܬܽܘܬܶܗ. ܘܶܐܚܰܕܘ ܐܰܦܩܽܘܗܝ ܠܒܰܪ ܡܶܢ ܟܰܪܡܳܐ ܘܩܰܛܠܽܘܗܝ (ܡܬܝ ܟܐ: ܠܚ-ܠܛ). ܚܙܰܝܬ ܠܐ ܪܰܚܺܝܩܺܝܢ ܗܳܠܶܝܢ ܒܢܴ̈ܬ ܩܴ̈ܠܐ ܡܶܢ ܚܕܳܕ̈ܐ. ܢܒܺܝܳܐ ܐܶܡܰܪ ܕܶܐܬܪܰܥܺܝܘ ܐܳܦ ܡܶܢ ܐܺܝܩܳܪܶܗ ܐܰܝܟܰܢܳܐ ܕܢܶܕܚܽܘܢܳܝܗܝ. ܡܳܪܰܢ ܐܶܡܰܪ: ܕܶܐܡܰܪܘ ܦܰܠܳܚ̈ܐ ܒܰܝܢܳܬܗܘܢ ܟܰܕ ܚܙܰܐܘܽܗܝ ܠܝܳܪܬܳܐ ܬܰܘ ܢܶܩܛܠܺܝܘܗܝ (ܡܬܝ ܟܐ: ܠܚ ܡܪܩܘܣ ܝܒ: ܙ ܠܘܩܐ ܟ: ܝܕ). ܗܳܝ ܓܶܝܪ ܕܒܰܝܢܳܬܗܘܢ ܡܦܰܫܩܳܢܺܝܬܳܐ ܗ̱ܝ ܕܗܳܝ ܕܶܐܬܪܰܥܺܝܘ ܩܰܕܡܳܐܝ̣ܬ ܓܶܝܪ ܒܰܝܢܳܬܗܘܢ ܡܶܬܪܰܥܶܝܢ ܗܘܰܘ ܠܡܶܩܛܠܶܗ ܠܰܒܪܳܐ. ܘܒܳܬܰܪ ܕܰܢܦܰܩ ܠܓܶܠܝܳܐ ܕܰܒܪܽܘܗܝ ܘܰܐܘܒܠܽܘܗܝ ܠܘܳܬ ܦܺܝܠܰܛܽܘܣ ܐܺܝܓܡܽܘܢܳܐ ܘܰܐܫܠܡܽܘܗܝ ܘܰܥܒܰܕܘ ܪܰܘܒܳܐ ܘܒܰܩܥܳܬܳܐ ܡܶܬܚܰܫܚܺܝܢ ܗܘܰܘ. ܕܰܨܠܽܘܒܳܝܗܝ ܨܠܽܘܒܳܝܗܝ (ܝܘܚܢܢ ܝܛ: ܘ ܝܗ). ܘܟܰܕ ܕܶܝܢ ܠܪܶܗܛܗܘܢ ܘܰܠܕܰܓܳܠܽܘܬܗܘܢ. ܡܦܰܪܣܶܐ ܪܽܘܚܳܐ ܘܳܐܡܰܪ: ܘܰܪܗܶܛܘ ܒܕܰܓܳܠܽܘܬܐ ܘܰܐܩܺܝܡܘ ܣܳܗ̈ܕܶܐ ܕܰܓ̈ܠܐ ܕܳܐܡܪܺܝܢ: ܕܰܚܢܰܢ ܫܡܰܥܢܳܝܗܝ ܕܳܐܡܰܪ: ܕܡܶܫܟܰܚ ܐ̱ܢܳܐ ܕܶܐܫܪܶܐ ܗܰܝܟܠܳܐ ܗܳܢܐ ܕܰܐܠܗܐ ܘܒܰܬܠܳܬܳܐ ܝܰܘ̈ܡܺܝܢ ܐܶܒܢܶܝܘܗ̱ܝ (ܡܬܝ ܟܘ: ܣܐ ܡܪܩܘܣ ܝܕ: ܢܚ). ܘܗܳܝ ܐ̱ܚܪܺܬܳܐ ܕܟܳܠܐܷ ܕܰܟܣܶܦ ܪܺܝܫܳܐ ܠܩܶܣܰܪ ܠܐ ܢܶܬܶܠ (ܠܘܩܐ ܟܓ: ܒ). ܘܥܰܠܗܳܝ ܐܶܡܰܪ ܡܙܰܡܪܳܢܳܐ
ܒܦܽܘܡܗܽܘܢ ܡܒܰܪܟܺܝܢ ܘܰܒܠܶܒܗܽܘܢ ܠܳܝܛܺܝܢ. ܟܰܕ ܒܗܰܘ ܙܰܒܢܳܐ ܩܕܳܡ ܥܰܡ̈ܡܶܐ ܐܶܣܬܰܒܰܪܘ ܐܶܠܐ ܒܰܒܨܳܬܳܐ. ܓܰܘܳܝܬܳܐ ܠܰܘ̈ܛܳܬܳܐ ܐܺܝܬܰܘܗܝ ܗܘܳܐ ܥܒܳܕܗܽܘܢ. ܒܳܬܰܪ ܕܶܐܬܺܝܕܰܥ ܗܰܘ ܕܶܐܨܛܠܶܒ ܡܶܢܗܘܢ ܕܰܐܠܗܰܐ ܗܘ. ܗܳܠܝܢ ܕܦܽܘܡܳܐ ܘܗܳܠܝܢ ܕܠܶܒܳܐ ܠܰܘ̈ܛܳܬܳܐ ܐܶܫܬܟܰܚܷ̈ܝܢ. ܐܠܐ ܒܰܝܢܳܬ ܗܳܠܝܢ ܪܰܘܒܳܐ ܘܰܫܓܽܘܫܝ̈ܐ ܘܩܴ̈ܠܐ ܕܰܓ̈ܠܐ ܥܰܠ ܦܳܪܽܘܩܰܢ. ܩܳܥܶܐ ܢܒܺܝܐ ܘܳܐܡܰܪ: ܕܰܐܢܬܝ ܢܰܦܫܝ ܠܳܐ ܬܶܬܪܰܗܒܺܝܢ ܘܥܰܡ ܨܰܠܡ̈ܐ ܐܪܳܙܳܐ ܠܐ ܬܶܩܛܪܺܝܢ. ܐܠܐ ܐܰܫܰܪܝ ܕܡܶܬܓܰܕܰܦ ܒܕܰܓܳܠܽܘܬܐ ܡܶܢ ܗܳܢܘܢ ܐܰܠܗܰܐ ܗܘ. ܘܥܰܠܗܳܕܐ ܐܶܡܰܪ:
ܠܰܐܠܗܳܐ ܣܰܟܳܝ ܢܰܦܫܝ ܕܡܶܢܶܗ ܗܽܘ ܦܽܘܪܩܳܢܝ: ܘܗܽܘܝܽܘ ܐܳܠܳܗܝ ܘܦܳܪܽܘܩܝ: ܘܒܶܝܬܓܰܘܣܝ ܕܠܐ ܐܶܙܽܘܥ. ܒܰܐܠܗܰܐ ܗ̄ܘ ܦܽܘܪܩܳܢܝ ܘܺܐܝܩܳܪܝ ܬܽܘܩܦܝ ܘܥܳܕܽܘܪܝ ܘܣܰܒܪܝ ܐܰܠܗܰܐ ܗ̄ܘ. ܪܰܘܪܒܳܐܝܬ ܡܩܰܠܶܣ ܠܶܗ ܢܒܺܝܳܐ ܠܦܽܘܪܩܳܢܳܐ ܕܰܐܠܗܳܐ. ܘܟܰܕ ܛܳܒ ܒܗܳܕܐ ܡܰܪܳܚܽܘܬܳܐ ܐܶܬܩܰܕܰܡ ܥܰܡܳܐ ܘܶܐܬܬܚܶܕ ܘܥܰܠ ܥܳܒܽܘܕܳܐ ܕܟܽܠ ܐܰܣܗܶܕܘ ܕܰܓܳܠܽܘܬܳܐ. ܘܥܰܬܶܕܘ ܨܠܺܝܒܳܐ ܠܗܰܘ ܪܺܝܫܳܐ ܕܚܰܝ̈ܐ. ܟܰܕ ܩܳܪܶܐ ܠܗܽܘܢ ܠܘܳܬܶܗ. ܕܒܰܬܝܳܒܽܘܬܳܐ ܢܶܬܦܢܽܘܢ ܘܢܺܚܽܘܢ. ܘܡܰܪܬܶܐ ܠܗܽܘܢ ܒܰܢܒܺܝܐ ܘܳܐܡܰܪ:
ܣܰܒܰܪܘ ܒܶܗ ܒܟܽܠ ܫܳܥܳܐ ܥܰܡܳܐ: ܘܰܐܫܽܘܕܘ ܩܕܳܡܰܘܗܝ ܠܶܒܟܽܘܢ. ܘܰܟܡܳܐ ܠܰܡ ܐܶܢ ܪܰܒܳܐ ܚܛܺܝܬܟܽܘܢ. ܡܶܛܠ ܕܥܰܠ ܐܰܠܗܳܐ ܐܰܡܪܰܚܬܽܘܢ. ܘܰܠܪܺܝܫܳܐ ܕܚܰܝ̈ܐ ܩܛܰܠܬܽܘܢ. ܐܠܐ ܬܽܘܒܘ ܘܰܥܡܰܕܘ ܒܰܫܡܶܗ ܕܰܡܫܺܝܚܳܐ. ܐܰܝܟܰܢܳܐ ܕܰܬܩܰܒܠܘܢ ܫܽܘܒܩܳܢܳܐ ܕܰܚܛܳܗ̈ܐ. ܘܣܰܒܰܪܘ ܒܶܗ ܘܗܽܘ ܡܦܰܨܶܐ ܠܟܽܘܢ ܡܶܢ ܬܒܰܥܬܳܐ ܕܰܕܡܶܗ ܡܶܛܠ ܕܠܰܘ ܐܰܝܟ ܒܰܪܢܳܫܳܐ ܬܳܒܰܥ ܥܝܳܪܬܳܐ ܘܠܰܘ ܐܰܝܟ ܓܰܒܪܳܐ ܡܳܝܽܘܬܳܐ ܡܥܰܪܩܶܠ ܕܺܝܢܳܐ.
ܡܶܛܠ ܕܰܐܠܗܰܐ ܗܘ ܣܶܬܳܪܳܐ ܕܺܝܠܰܢ. ܐܰܠܗܳܐ ܫܽܘܒܚܳܐ ܠܛܰܝܒܽܘܬܶܗ ܠܐ ܡܶܬܕܟܰܪ ܠܶܗ ܠܚܰܛܳܝܳܐ ܚܛܺܝܬܶܗ ܒܝܰܘܡܳܐ ܕܡܶܬܦܢܶܐ ܡܶܢ ܥܰܘܠܶܗ. ܘܰܒܗܰܝܡܳܢܽܘܬܐ ܕܰܕܡܶܗ ܡܚܰܣܶܐ ܠܗܽܘܢ ܠܳܐܫܽܘ̈ܕܰܘܗܝ. ܒܰܪܢܳܫܳܐ ܓܶܝܪ ܕܰܐܝܟ ܠܰܗܓܰܐ ܗ̄ܘ ܢܳܛܰܪ ܪܽܘܓܙܶܗ. ܘܥܰܠ ܕܰܒܡܰܘܬܶܗ ܡܰܘܒܶܕ ܚܰܝܰܘ̈ܗܝ ܠܐ ܛܳܥܶܐ ܐܰܟܬܶܗ. ܘܥܰܠܗܳܝ ܠܐ ܡܟܰܬܰܪ ܥܰܠ ܕܠܐ ܡܶܫܟܰܚ ܠܰܡܣܰܝܒܳܪܽܘ ܠܰܐܝܠܶܝܢ ܕܡܶܬܚܰܫܒܺܝܢ ܥܠܰܘܗܝ ܒܺܝܫܬܳܐ.
ܘܰܐܝܟ ܠܰܗܓܳܐ ܐܶܢܘܢ ܟܽܠܗܽܘܢ ܒܢܰܝ̈ܢܳܫܳܐ ܕܰܓ̈ܠܐ. ܝܰܬܺܝܪܳܐܝ̣ܬ ܨܳܠܽܘܒ̈ܐ ܘܰܐܝܠܶܝܢ ܕܰܐܣܗܶܕܘ ܗܘܰܘ ܕܰܓܳܠܽܘܬܐ ܠܗܰܘ ܪܺܝܫܳܐ ܕܚܰܝ̈ܐ.
ܕܰܒܡܰܣܰܐܬܳܐ ܡܰܥܠܶܝܢ ܘܰܣܪܺܝܩܺܝܢ ܐܰܟܚܕܳܐ. ܥܰܠ ܒܺܝܠܛܰܫܨܰܪ ܟܶܬܒܰܬ ܐܺܝܕܳܐ ܕܰܐܠܗܳܐ. ܬܩܰܠ ܘܦܳܪܣܺܝܢ (ܕܢܝܐܝܠ ܗ: ܟܘ). ܟܰܕ ܕܶܝܢ ܡܦܰܫܶܩ ܗܘܳܐ ܠܶܗ ܕܳܢܺܝܐܝܠ ܕܡܳܢܳܐ ܗܝ ܗܳܝ ܕܰܚܙܳܐ ܘܶܐܡܰܪ ܠܶܗ: ܕܗܳܝ ܕܟܶܬܒܰܬ ܥܠܰܝܟ. ܬܩܰܠ ܐܺܝܬܶܝܗ̇. ܕܶܐܬܬܩܶܠܬ ܒܡܰܣܰܐܬܳܐ ܘܶܐܫܬܟܰܚܬ ܚܰܣܺܝܪ (ܕܢܝܐܝܠ ܗ: ܟܙ). ܘܠܐ ܠܰܡ ܫܳܘܶܐ ܐܰܢܬ ܠܰܡܕܰܒܳܪܽܘ ܡܰܠܟܽܘܬܳܐ. ܗܳܪܟܳܐ ܕܶܝܢ ܐܶܡܰܪ ܢܒܺܝܳܐ ܥܰܠ ܥܰܡܳܐ. ܕܟܰܕ ܬܩܰܠ ܐܶܢܘܢ ܨܠܺܝܒܳܐ ܒܟܰܦܬܳܐ ܗܳܝ ܕܡܰܬܩܳܠܐ. ܘܣܳܡ ܐܶܢܘܢ ܠܽܘܩܒܰܠ ܥܰܡ̈ܡܶܐ ܡܗܰܝܡ̈ܢܶܐ. ܢܬܰܥ ܡܰܬܩܳܠܐ ܕܟܰܦܬܳܐ ܕܥܰܡ̈ܡܶܐ ܒܗܰܝܡܳܢܽܘܬܳܐ ܕܰܫܪܳܪܳܐ. ܘܙܳܥܰܬ ܗܰܝܡܳܢܽܘܬܶܗ ܕܥܰܡܳܐ ܘܰܐܝܟ ܟܰܦܬܳܐ ܕܡܰܣܰܐܬܳܐ ܕܠܰܝܬ ܒܳܗ̇ ܡܶܕܶܡ. ܘܡܶܛܠܗܳܕܶܐ ܟܰܕ ܡܶܬܬܣܺܝܡܳܐ ܠܽܘܩܒܰܠ ܗܳܝ ܕܡܰܠܝܳܐ. ܡܶܬܥܰܠܝܳܐ ܠܘܳܬ ܐܳܐܱܪ ܘܡܶܬܚܰܙܝܳܐ ܣܪܺܝܩܳܐ ܘܰܣܦܺܝܩܳܐ. ܗܳܟܰܢܐ ܐܶܡܰܪ ܢܒܺܝܐ ܥܰܠ ܨܳܠܽܘܒ̈ܐ ܕܰܓ̈ܠܐ. ܘܕܰܡܺܝ ܐܶܢܘܢ ܠܠܰܗܓܳܐ. ܥܰܠ ܕܠܰܗܓܳܐ ܘܳܐܦܠܳܐ ܠܡܰܬܩܳܠܐ ܐܳܬܶܐ ܟܝܳܢܶܗ. ܘܥܰܠܗܳܝ ܐܶܡܰܪ ܢܒܺܝܐ.
ܠܐ ܬܶܬܰܟܠܽܘܢ ܥܰܠ ܛܠܽܘܡܝܳܐ. ܘܰܚܛܽܘܦܝܳܐ ܠܐ ܬܶܪܚܡܽܘܢ. ܘܡܶܢ ܒܳܬܰܪ ܕܶܐܬܚܙܺܝ ܨܠܺܝܒܳܐ. ܒܰܛܠܽܘܡܝܳܐ ܘܰܒܣܳܪܽܘܒܽܘܬܳܐ ܩܳܐܷܡ ܥܰܡܳܐ. ܟܳܗ̈ܢܰܘܗܝ ܒܰܚܛܽܘܦܝܳܐ ܬܳܒܥܺܝܢ ܡܶܢܶܗ ܕܶܒܚ̈ܐ. ܐܠܐ ܐܶܡܰܪ ܢܒܺܝܐ. ܕܰܒܩܶܢܝܳܢܳܐ ܕܡܶܬܟܰܢܰܫ ܡܶܢ ܩܽܘܪ̈ܒܳܢܶܐ ܠܐ ܢܶܬܚܰܬܪܘܢ.
ܘܩܶܢܝܳܢܳܐ ܡܳܐ ܕܣܳܓܶܐ ܠܐ ܢܶܚܕܶܐ ܒܶܗ ܠܶܒܟܽܘܢ. ܕܰܐܝܟ ܗܳܟܰܢܐ ܗܘܰܘ ܪ̈ܺܝܫܰܝ ܟܳܗܢ̈ܐ ܒܗܰܘ ܙܰܒܢܳܐ ܕܶܐܨܛܠܶܒ ܒܶܗ ܡܶܠܬܳܐ. ܡܶܛܠ ܕܥܰܬܺܝܪ ܗܘܳܐ ܗܰܝܟܠܐܴ ܗܰܘ ܕܰܒܢܳܐ ܙܽܘܪܒܳܒܶܝܠ ܒܕܰܗܒܳܐ ܘܣܺܐܡܳܐ. ܘܥܰܠܗܳܕܐ ܝܰܬܺܝܪܳܐ ܛܳܥܶܝܢ ܗܘܰܘ ܝܽܘܕܳܝ̈ܐ ܒܳܬܰܪ ܨܶܒܬܶܗ. ܘܳܐܡܪܺܝܢ ܗܘܰܘ ܠܰܡܫܺܝܚܳܐ: ܗܳܐ ܚܙܺܝ ܐܰܝܠܶܝܢ ܟܺܐܦ̈ܐ ܘܰܐܝܠܶܝܢ ܒܶܢܝ̈ܢܶܐ. ܕܠܽܘܩܒܰܠ ܗܳܠܶܝܢ ܐܶܡܰܪ ܡܳܪܰܢ܆ ܕܠܳܐ ܗܘܳܐ ܚܳܙܶܝܢ ܐܰܢܬܘܢ ܕܗܳܠܶܝܢ ܟܽܠܗܶܝܢ܆ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ. ܕܠܐ ܬܶܫܬܒܶܩ ܗܳܪܟܳܐ ܟܺܐܦܳܐ ܥܰܠ ܟܺܐܦܳܐ ܕܠܳܐ ܬܶܣܬܰܬܰܪܝ (ܡܬܝ ܟܕ: ܒ ܡܪܩܘܣ ܝܓ: ܒ ܠܘܩܐ ܟܐ: ܘ). ܡܳܕܶܝܢ ܗܳܝ ܕܶܐܡܰܪ ܕܡܶܬܥܩܰܪ ܠܶܗ ܗܰܝܟܠܐܴ ܗܳܢܐ ܘܠܐ ܡܶܫܬܰܒܩܳܐ ܒܶܗ ܟܺܐܦܳܐ ܥܰܠ ܚܒܰܪܬܳܗ̇. ܘܒܳܬܰܪ ܗܳܠܶܝܢ ܐܶܡܰܪ ܢܒܺܝܐ.
ܚܕܳܐ ܗܝ ܕܶܐܡܰܪ ܐܰܠܗܳܐ: ܘܰܕܬܰܪܬܶܝܢ ܗܳܠܶܝܢ ܫܶܡܥܶܬ. ܒܝܰܘ̈ܡܰܝ ܙܽܘܪܒܳܒܶܝܠ ܐܶܡܰܪ ܐܰܠܗܳܐ: ܕܰܒܝܰܕ ܢܒܺܝܐ ܕܢܶܬܒܢܶܐ ܒܰܝܬܳܐ. ܘܢܶܗܘܶܐ ܪܰܒ ܫܽܘܒܚܶܗ ܐ̱ܚܪܳܝܳܐ ܡܶܢ ܩܰܕܡܳܝܳܐ (ܚܓܝ ܒ: ܛ). ܗܳܫܳܐ ܕܶܝܢ ܟܰܕ ܐܶܬܳܐ ܐܰܠܗܳܐ ܒܰܒܣܰܪ. ܟܰܕ ܐܶܫܬܰܐܱܠ ܡܶܛܠܳܬܶܗ. ܐܶܡܰܪ ܐܰܠܗܳܐ܆ ܘܰܕܬܰܪܬܶܝܢ ܫܡܰܥ ܢܒܺܝܐ ܕܳܐܡܰܪ ܥܰܠ ܒܰܝܬܳܐ. ܕܰܐܡܺܝܢ ܐܳܡܰܪ ܐ̱ܢܳܐ ܠܟܘܢ܆ ܕܠܳܐ ܡܶܫܬܰܒܩܳܐ ܗܳܪܟܐ ܟܺܐܦܳܐ ܥܰܠ ܟܺܐܦܳܐ ܕܠܐ ܬܶܣܬܰܬܰܪܝ (ܡܬܝ ܟܕ: ܒ ܡܪܩܘܣ ܝܓ: ܒ ܠܘ ܟܐ: ܘ) ܘܗܽܘ ܦܩܰܕ ܥܰܠ ܒܶܢܝܳܢܶܗ ܘܥܰܠ ܥܽܘܬܪܶܗ ܘܰܗܘܳܐ ܐܰܝܟ ܕܰܦܩܰܕ. ܘܗܽܘ ܓܙܰܪ ܕܺܝܢܳܐ ܥܰܠ ܥܩܽܘܪܝܶܗ ܘܥܰܠ ܣܬܽܘܪܝܶܗ܆ ܘܶܐܬܡܰܠܝܰܬ ܐܰܝܟ ܕܰܦܣܰܩ.
ܡܶܛܠ ܕܥܽܘܫܢܳܐ ܕܰܐܠܳܗܰܐ ܗܘ. ܘܗܽܘ ܫܰܠܺܝܛ ܥܰܠ ܟܠ ܘܰܐܝܟ ܕܨܳܒܶܐ ܥܳܒܶܕ.
ܘܠܳܟ ܡܳܪܝܳܐ ܛܰܝܒܽܘܬܳܐ. ܡܶܛܠ ܕܰܐܢܬ ܦܳܪܰܥ ܐܰܢܬ ܠܓܰܒܪܳܐ ܐܰܝܟ ܥܒܳܕܰܘ̈ܗܝ. ܓܰܒܪܳܐ ܗܳܪܟܳܐ ܠܥܰܡܳܐ ܩܳܪܶܐ. ܘܦܳܪܰܥ ܠܶܗ ܡܳܪܝܳܐ ܕܺܝܢܳܐ ܘܰܡܣܳܡ ܒܪܺܝܫܳܐ ܚܠܳܦ ܥܒܳܕܰܘ̈ܗܝ ܒܺܝ̈ܫܶܐ. ܕܰܚܢܰܢ ܢܨܰܠܐܷ܆ ܕܡܶܢ ܡܣܳܡ ܒܪܺܝܫܳܐ ܕܰܢܛܺܝܪ ܠܡܰܪ̈ܳܚܶܐ ܢܶܬܦܰܨܶܐ. ܘܢܰܘܕܶܐ ܠܰܡܦܰܨܝܳܢܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܬܝܢ ܘܬܠܬܐ
ܡܰܘܕܰܥ ܥܰܠ ܚܽܘܒܳܐ ܕܩܰܕܺܝ̈ܫܐ ܕܰܠܘܳܬ ܐܰܠܗܳܐ܆ ܘܥܰܠ ܡܣܳܡ ܒܪܺܝܫܳܐ ܕܳܐܬܶܐ ܥܰܠ ܝܽܘܕܳܝ̈ܐ ܒܳܬܰܪ ܨܠܺܝܒܳܐ.
ܐܰܝܠܶܝܢ ܕܒܳܬܰܪ ܪܶܚܡܬܳܐ ܕܕܰܗܒܳܐ ܡܶܬܚܰܙܝܳܢܳܐ ܪܳܕܦܺܝܢ܆ ܕܠܐ ܡܰܐܝ̣ܢܽܘܬܳܐ ܪܳܗܛܺܝܢ ܒܳܬܰܪ ܒܥܳܬܶܗ ܥܕܰܡܳܐ ܕܡܶܫܟܚܺܝܢ ܗܰܘ ܡܶܕܶܡ ܕܡܶܛܠܳܬܶܗ ܥܳܡܠܺܝܢ. ܘܰܒܟܽܠ ܐܽܘܪܚܳܐ ܕܪܳܕܶܝܢ ܘܰܒܟܽܠ ܫܒܺܝܠܳܐ ܕܰܡܗܰܠܟܺܝܢ ܠܗܰܘ ܕܡܶܛܠܳܬܶܗ ܫܚܺܝܩܺܝܢ ܡܣܰܟܶܝܢ ܠܡܶܫܟܳܚܘ. ܘܥܰܠ ܗܳܕܶܐ ܒܡܰܘܒ̈ܠܐܷ ܝܰܩܺܝܪ̈ܳܬܳܐ ܟܳܕܢܺܝܢ ܢܰܦܫܗܽܘܢ. ܟܰܕ ܛܳܥܢܺܝܢ ܠܬܶܐܓܽܘܪܬܳܐ ܟܽܠ ܨܶܒܘ̈ܢ. ܘܡܶܢ ܗܳܢܐ ܐܰܬܪܳܐ ܠܗܰܘ ܡܰܘܒܠܺܝܢ. ܐܰܝܟܰܢܳܐ ܕܰܒܝܰܕ ܗܳܠܝܢ ܪܶܓܰܬܗܽܘܢ ܒܰܫܟܳܚ̈ܬܳܐ ܕܗܰܘ ܕܡܶܬܪܚܶܡ ܡܶܢܗܘܢ. ܬܶܬܢܺܝܚ ܐܳܦ ܬܶܬܒܰܣܰܡ. ܘܥܰܠ ܐܽܘܠܨܳܢ̈ܐ ܕܝܰܡܳܐ ܘܝܰܒܫܳܐ ܡܰܡܪܚܺܝܢ. ܕܕܰܗܒܳܐ ܗܰܘ ܕܪܳܚܶܡ ܠܶܒܗܘܢ ܢܶܫܬܟܰܚ ܩܕܳܡܰܝܗܘܢ. ܘܰܒܚܶܠܡܰܝ̈ܗܘܢ ܡܳܐ ܕܕܳܡܟܺܝܢ ܟܺܝ̈ܣܶܐ ܕܕܰܗܒܳܐ ܡܗܰܦܟܺܝܢ. ܕܶܡܘ̈ܬܳܐ ܕܚܽܘܒܳܗ̇ ܕܢܰܦܫܳܐ ܩܕܳܡ ܚܙܳܬܳܐ ܚܶܠܡܳܢܳܝܬܳܐ ܦܳܪܣܳܐ ܘܣܳܝܡܳܐ. ܕܰܐܝܟ ܗܳܟܰܢܳܐ ܗܘܳܐ ܐܳܦ ܕܰܘܝܕ ܐܰܠܗܝܳܐ. ܘܡܶܛܠ ܕܒܳܬܰܪ ܗܰܘ ܕܰܗܒܳܐ ܐܰܠܗܝܳܐ ܘܫܰܪܺܝܪܳܐ ܕܚܽܘܒܶܗ ܕܰܐܠܗܳܐ ܢܰܦܺܝܩܳܐ ܗܘܳܬ ܢܰܦܫܶܗ. ܘܠܶܗ ܡܣܰܟܶܐ ܗܘܳܐ ܕܢܶܫܟܰܚ. ܒܟܽܠܗܽܘܢ ܡܰܙܡܽܘܪ̈ܶܐ ܕܙܰܡܰܪ ܘܰܒܟܽܠܗܘܢ ܬܶܫܒܚ̈ܬܳܐ ܕܫܰܒܰܚ ܚܰܫܳܐ ܕܪܶܓܬܶܗ ܕܠܐ ܬܰܚܦܺܝܬܳܐ ܓܳܠܐ ܗܘܳܐ ܘܰܡܚܰܘܶܐ. ܐܰܝܟܰܢܳܐ ܕܗܰܘ ܕܚܳܐܱܪ ܒܰܙܡܺܝܪ̈ܳܬܶܗ ܒܥܰܝܢܳܐ ܪܽܘܚܳܢܳܝܬܳܐ ܢܶܕܰܥ. ܕܠܰܝܬ ܗܘܳܐ ܩܕܳܡ ܥܰܝ̈ܢܰܘܗܝ ܕܰܢܒܺܝܐ ܡܶܕܶܡ ܕܪܰܒ ܐܰܝܟ ܫܟܳܚܬܳܐ ܕܰܐܠܗܳܐ. ܘܰܚܠܳܦ ܕܰܐܚܪ̈ܳܢܶܐ ܡܶܬܐܰܣܪܺܝܢ ܒܚܱ̈ܫܶܐ ܒܺܝ̈ܫܶܐ ܕܪܶܓܬܳܐ ܡܰܣܠܰܝܬܳܐ. ܗܳܢܐ ܩܰܕܺܝܫܐ ܒܚܰܫ̈ܐ ܛܳܒ̈ܐ ܕܪܶܓܬܳܐ ܛܳܒܬܳܐ ܐܰܣܺܝܪܳܐ ܗܘܳܬ ܢܰܦܫܶܗ ܩܰܕܺܝܫܬܳܐ ܟܰܕ ܡܣܰܟܶܐ ܘܚܳܐܱܪ ܠܰܐܠܗܳܐ. ܘܡܶܛܠ ܗܳܕܐ ܒܡܰܙܡܽܘܪܳܐ ܗܰܘ ܕܰܩܕܳܡ ܗܳܢܐ ܙܰܡܰܪ ܘܶܐܡܰܪ: ܕܠܰܐܠܗܳܐ ܡܣܰܟܝܳܐ ܢܰܦܫܝ ܕܡܶܢܶܗ ܗܽܘ ܦܽܘܪܩܳܢܝ (ܡܙܡܘܪܐ ܣܒ: ܐ). ܘܰܒܗܳܢܐ ܕܒܳܬܪܶܗ ܕܺܐܝܬܰܘܗܝ ܕܶܐܫܬܺܝܢ ܘܰܬܠܳܬܳܐ ܠܶܗ ܟܰܕ ܠܶܗ ܠܚܰܫܳܐ ܕܣܽܘܟܳܝܶܗ ܡܚܰܘܶܐ ܘܳܐܡܰܪ:
ܐܰܠܳܗܝ ܐܰܠܳܗܝ ܐܰܢܬ ܐܶܣܰܟܶܐ ܠܳܟ. ܘܨܰܗܝܳܐ ܗܝ ܠܳܟ ܢܰܦܫܝ ܘܰܡܣܰܟܶܐ ܠܳܟ ܒܶܣܪܝ: ܐܰܝܟ ܐܰܪܥܳܐ ܨܗܺܝܬܳܐ ܘܰܡܛܰܪܰܦܬܳܐ ܕܒܳܥܝܳܐ ܡܰܝ̈ܐ. ܗܳܟܰܢ ܚܳܪܬܳܟ ܒܩܽܘܫܬܳܐ: ܕܶܐܚܙܶܐ ܥܽܘܫܢܳܟ ܘܺܐܝܩܳܪܳܟ. ܥܦܺܝܦܳܐܝ̣ܬ ܣܳܐܷܡ ܒܪܺܝܫܳܗ̇ ܕܬܶܫܒܽܘܚܬܳܐ ܗܳܕܐ. ܫܽܘܡܳܗܳܐ ܕܗܰܘ ܕܡܶܬܪܚܶܡ ܡܶܢܶܗ. ܘܰܐܝܟ ܗܰܘ ܕܕܺܝܠܶܗ ܗܰܘ ܐܰܠܗܳܐ ܒܰܠܚܽܘܕ ܡܙܰܡܰܪ. ܠܳܐ ܓܝܪ ܩܪܳܝܗܝ ܐܰܠܗܳܐ ܕܰܟܝ̈ܢܶܐ ܐ̱ܚܪ̈ܳܢܶܐ. ܐܰܘ ܕܡܶܬܚܰܙܝ̈ܢܶܐ ܐܰܘ ܡܶܬܝܰܕܥ̈ܢܶܐ. ܐܠܐ ܐܰܠܗܳܐ ܕܕܺܝܠܶܗ ܠܚܽܘܕܳܐܝ̣ܬ. ܘܟܰܕ ܒܝܰܕ ܗܳܕܐ ܡܒܰܕܶܩ ܗܘܳܐ ܥܰܠ ܪܶܚܡܬܳܐ ܣܰܓܺܝܐܬܳܐ ܕܰܩܢܶܐ ܗܘܳܐ ܠܘܳܬܶܗ. ܠܶܗ ܕܶܝܢ ܠܡܰܙܡܽܘܪܳܐ ܗܳܢܐ ܐܰܡܪܶܗ ܛܽܘܒܬܳܢܳܐ ܠܰܘ ܕܠܐ ܥܶܠܬܳܐ. ܐܶܠܐ ܟܰܕ ܐܶܬܚܰܫܰܒ ܗܘܳܐ ܫܳܐܘܳܠ ܕܳܐܦ ܠܰܐܒܽܘܗܝ ܕܕܰܘܝܕ ܘܠܶܐܡܶܗ ܘܠܰܐܚܰܘ̈ܗܝ ܢܩܰܛܶܠ ܡܶܛܠܳܬܶܗ. ܥܰܠ ܕܰܥܪܰܩܘ ܗܘܰܘ ܒܳܬܰܪ ܕܰܘܝܕ. ܘܰܕܠܐ ܟܰܝܠܳܐ ܡܫܰܦܥܺܝܢ ܗܘܰܘ ܕܶܡ̈ܥܶܐ. ܥܰܠ ܐܽܘܠܨܳܢܳܐ ܕܰܚܕܺܝܪ ܗܘܳܐ ܠܗܘܢ ܡܶܢ ܫܳܐܘܳܠ ܪܳܕܽܘܦܶܗ ܕܕܰܘܝܕ. ܕܟܰܕ ܕܒܰܪ ܐܶܢܘܢ ܕܰܘܝܕ ܘܶܐܙܰܠ ܠܰܐܪܥܳܐ ܕܡܽܘܐܳܒܳܝ̈ܐ. ܘܶܐܡܰܪ ܠܡܰܠܟܳܐ ܕܡܽܘܐܳܒ: ܢܶܬܶܒ ܐܳܒܝ ܘܶܐܡܝ ܥܰܡܟܽܘܢ ܘܰܬܚܶܝܬ ܚܝܳܪܟܽܘܢ. ܥܕܰܡܳܐ ܕܢܶܚܙܶܐ ܡܳܢܳܐ ܥܳܒܶܕ ܠܺܝ ܐܰܠܗܳܐ (ܐ ܫܡܘܐܝܠ ܟܒ: ܓ). ܘܰܒܟܽܠܶܗ ܗܳܢܐ ܐܽܘܠܨܳܢܳܐ ܕܰܥܪܰܨ ܥܰܠ ܕܰܘܝܕ. ܕܠܐ ܩܽܘܛܳܥ ܪܶܥܝܳܢܳܐ ܕܒܰܐܠܗܳܐ ܐܶܣܰܪ ܗܘܳܐ ܢܰܦܫܶܗ ܟܰܕ ܐܳܡܰܪ: ܕܠܳܟ ܐܰܠܗܳܐ ܡܣܰܟܳܐ ܐ̱ܢܳܐ ܘܚܳܐܱܪ ܐ̱ܢܳܐ. ܘܰܒܢܰܦܫܝ ܐܳܦ ܒܦܰܓܪܝ ܨܗܶܐ ܐ̱ܢܳܐ ܘܠܳܟ ܝܰܐܝ̣ܒ ܐ̱ܢܳܐ. ܘܨܰܗܝܳܐ ܗܝ ܠܳܟ ܢܰܦܫܝ ܘܰܡܣܰܟܳܐ ܠܳܟ ܒܶܣܪܝ. ܐܰܝܟ ܐܰܪܥܳܐ ܨܗܺܝܬܳܐ ܘܰܡܛܰܪܰܦܬܳܐ ܕܚܳܝܪܳܐ ܠܰܪܒܺܝܥܳܐ ܕܰܢܢܰܚܶܡ ܡܺܝܬܽܘܬܳܐ ܕܙܰܪ̈ܥܶܝܗ̇. ܗܳܟܰܢܳܐ ܐܳܦ ܢܰܦܫܝ ܕܺܐܝܬܶܝܗ̇ ܐܰܪܥܳܐ ܕܝܽܘܠܦܳܢܳܟ ܘܰܡܣܰܟܝܳܐ ܠܡܶܛܪܳܟ ܟܰܣܝܳܐ ܕܢܶܚܽܘܬ ܥܠܶܝܗ̇ ܘܰܢܢܰܚܡܺܝܗ̇ ܡܶܢ ܡܺܝܬܽܘܬܳܐ ܕܰܐܩܺܝܡܘ ܥܠܰܝ ܐܰܝܠܶܝܢ ܕܪܳܕܦܺܝܢ ܠܺܝ. ܘܰܒܩܽܘܫܬܳܐ ܠܳܟ ܚܳܐܪ ܐ̱ܢܳܐ ܕܶܐܚܙܶܐ ܥܽܘܫܢܳܟ ܘܺܐܝܩܳܪܳܟ.
ܡܶܛܠ ܕܛܳܒܺܝܢ ܪ̈ܰܚܡܰܝܟ ܡܶܢ ܚܰܝ̈ܐ: ܘܣܶܦܘܴ̈ܬܝ ܢܫܰܒܚܴ̈ܢܳܟ. ܥܒܳܕܳܐ ܕܺܝܠܝ ܗܳܢܐ ܐܺܝܬܰܘܗܝ ܕܰܒܟܽܠܗܘܢ ܝܰܘ̈ܡܰܝ ܐܰܘܕܶܐ ܠܳܟ. ܘܰܕܠܐ ܫܶܠܝܳܐ ܢܫܰܒܚܽܘܢܳܟ ܥܰܒ̈ܕܰܝܟ ܘܰܕܠܐ ܦܣܳܩܳܐ ܢܒܰܪܟܽܘܢܳܟ.
ܐܳܦ ܐܶܢܳܐ ܗܳܟܰܢ ܐܶܒܰܪܟܳܟ ܒܚܰܝܱ̈ܝ: ܘܒܰܫܡܳܟ ܐܰܪܺܝܡ ܐܺܝ̈ܕܰܝ. ܘܰܐܝܟ ܫܽܘܡܢܳܐ ܘܰܐܝܟ ܬܰܪܒܳܐ ܬܶܕܗܰܢ ܢܰܦܫܝ. ܠܡܳܢܳܐ ܐܰܝܟ ܫܽܘܡܢܳܐ ܘܰܐܝܟ ܬܰܪܒܳܐ ܒܳܥܶܐ ܗܘܳܐ ܢܒܺܝܐ ܕܬܶܗܘܶܐ ܢܰܦܫܶܗ܆ ܡܶܬܝܰܐܝܰܒ ܗܘܳܐ ܓܶܝܪ ܕܩܽܘܪܒܳܢܳܐ ܬܶܗܘܶܐ ܢܰܦܫܶܗ ܠܐܠܗܳܐ. ܬܰܪܒܳܐ ܘܫܽܘܡܢܳܐ ܩܽܘܪ̈ܒܳܢܶܐ ܗܘܰܘ ܕܡܶܬܦܰܪܫܺܝܢ ܗܘܰܘ ܡܶܢ ܚܰܝ̈ܘܳܬܳܐ ܒܺܐܝ̈ܕܰܝ ܟܳܗܢ̈ܐ ܕܢܳܡܽܘܣܳܐ. ܡܶܛܠܗܳܕܐ ܐܳܡܰܪ ܗܘܳܐ ܕܰܘܝܕ܆ ܕܰܐܝܟ ܫܽܘܡܢܳܐ ܘܰܐܝܟ ܬܰܪܒܳܐ ܬܶܕܗܰܢ ܢܰܦܫܝ. ܗܳܢܰܘ ܕܬܶܗܘܶܐ ܩܽܘܪܒܳܢܳܐ ܠܐܠܗܳܐ.
ܘܰܒܣܶܦ̈ܘܳܬܳܐ ܕܫܽܘܒܚܳܐ ܢܫܰܒܚܳܟ ܦܽܘܡܝ. ܘܶܐܬܕܟܰܪܬܳܟ ܥܰܠ ܬܰܫܘܺܝܬܝ ܘܰܒܠܰܝ̈ܠܰܘܳܬܳܐ ܪܢܺܝܬ ܒܳܟ. ܡܰܢ ܕܠܐ ܥܳܢܶܕ ܐܰܠܗܳܐ ܡܶܢ ܓܰܘ ܠܶܒܶܗ ܒܶܝܬ ܟܢܽܘܫܝܰܐ ܗܘ ܕܩܰܕܺܝܫܽܘܬܳܐ. ܘܥܰܠܗܳܕܐ ܒܠܺܠܝܳܐ ܠܶܗ ܢܽܘܗܪܳܐ ܡܒܰܣܶܡ. ܢܒܺܝܐ ܐܰܘܕܰܥ ܕܳܐܦܠܐ ܒܠܺܠܝܳܐ ܦܳܫܶܬ ܠܘܳܬ ܢܰܘܚܳܐ ܕܫܶܢܬܳܐ ܡܶܢ ܡܰܪܢܺܝܬܳܐ ܕܒܰܐܠܗܳܐ. ܘܶܐܠܐ ܥܰܠ ܬܰܫܘܺܝܬܝ ܕܽܘܟܪܳܢܳܐ ܕܰܐܠܗܳܐ ܚܠܳܦ ܥܶܛܪܳܐ ܕܒܶܣܡ̈ܐ ܡܶܬܕܟܰܪ ܗܘܺܝܬ.
ܡܶܛܠ ܕܰܗܘܰܝܬ ܠܺܝ ܡܥܰܕܪܳܢܳܐ: ܘܰܒܛܶܠܳܠܐ ܕܟܶܢ̈ܦܰܝܟ ܐܶܫܬܰܒܰܚ. ܚܙܺܝ ܐܰܝܟܰܢܳܐ ܡܰܘܕܶܐ ܡܶܢ ܥܽܘܕܪܳܢܳܐ ܕܰܐܠܗܳܐ. ܘܟܰܕ ܛܳܒ ܠܰܝܬ ܗܘܳܐ ܒܗܰܘ ܙܰܒܢܳܐ ܡܶܕܶܡ ܕܕܳܡܶܐ ܠܥܽܘܕܪܳܢܳܐ ܐܶܠܐ ܒܰܠܚܽܘܕ ܕܰܒܝܰܕ ܥܪܽܘܩܝܳܐ ܡܫܰܘܙܰܒ ܗܘܳܐ ܒܚܰܝ̈ܐ ܡܶܢ ܒܥܶܠܕܒܳܒܶܗ. ܘܠܳܗ̇ ܠܗܳܕܐ ܥܽܘܕܪܳܢܳܐ ܪܰܒܳܐ ܡܳܢܳܐ ܗܘܳܐ. ܘܠܐ ܚܳܫܶܒ ܗܘܳܐ ܠܗܳܝ ܕܟܽܠܡܶܕܶܡ ܕܰܩܢܶܐ ܗܘܳܐ ܥܰܡ ܐܰܚܰܘ̈ܗܝ ܘܒܶܝܬ ܐܰܒܽܘܗܝ ܐܶܬܚܛܶܦ ܡܶܢܗܽܘܢ ܘܰܗܘܰܘ ܠܶܗ ܝܰܬܺܝܪ̈ܶܐ ܘܶܐܠܐ ܐܰܟܡܳܐ ܕܣܳܟ ܒܺܝܫܬܳܐ ܠܳܐ ܦܶܓܥܰܬ ܒܶܗ. ܗܳܟܰܢܐ ܡܰܘܕܶܐ ܗܘܳܐ ܥܰܠ ܥܽܘܕܪܳܢܶܗ ܕܰܐܠܗܳܐ. ܚܳܙܶܐ ܗܘܳܐ ܓܶܝܪ ܠܢܰܦܫܶܗ. ܕܰܐܝܟ ܦܰܪܽܘܓܳܐ ܡܳܐ ܕܪܳܕܶܦ ܠܗ ܩܳܠ ܓܶܦܳܐ ܕܕܰܝܬܳܐ ܚܳܛܽܘܦܬܳܐ ܐܰܘ ܕܒܽܘܙܺܝܩܳܐ ܡܰܒܶܐܫܳܢܳܐ܆ ܝܰܬܺܝܪܳܐܝܬ ܚܳܡܶܠ ܘܛܳܦܶܣ ܬܚܶܝܬ ܓܶܦ̈ܐ ܕܶܐܡܶܗ܆ ܗܳܟܰܢܳܐ ܐܰܠܨܶܗ ܪܕܽܘܦܝܳܐ ܕܰܒܥܶܠܕܒܳܒܶܗ ܕܢܶܚܡܽܘܠ ܢܰܦܫܶܗ ܘܢܶܬܓܰܘܶܐ ܬܚܶܝܬ ܓܶܦ̈ܐ ܕܗܳܝ ܐܶܡܳܐ ܕܚܰܝ̈ܐ. ܘܥܰܠܗܳܝ ܟܰܕ ܡܶܬܪܕܶܦ ܐܳܡܰܪ ܗܘܳܐ: ܕܠܰܘ ܡܶܢ ܒܰܪܢܳܫܳܐ ܥܳܪܶܩ ܐ̱ܢܳܐ. ܐܶܠܐ ܒܳܬܪܳܟ ܪܳܗܶܛ ܐ̱ܢܳܐ. ܕܶܐܡܰܢܰܥ ܠܘܳܬܳܟ ܦܳܣܰܥ ܐ̱ܢܳܐ.
ܢܶܦܩܰܬ ܢܰܦܫܝ ܒܳܬܪܳܟ: ܘܰܥܠܰܝ ܣܶܡܟܰܬ ܝܰܡܺܝܢܳܟ. ܐܰܝܟܰܢܳܐ ܡܶܫܬܰܘܕܶܐ ܕܒܳܬܰܪ ܪܶܚܡܬܳܐ ܕܰܐܠܗܳܐ ܢܰܦܺܝܩܳܐ ܗܘܳܬ ܢܰܦܫܶܗ܆ ܘܰܐܝܟ ܗܳܢܘܢ ܕܪܳܗܛܺܝܢ ܒܳܬܰܪ ܕܰܗܒܳܐ. ܪܳܗܶܛ ܗܘܳܐ ܕܢܶܫܟܰܚ ܠܥܽܘܬܪܳܐ ܕܰܐܠܗܳܐ. ܘܟܰܕ ܠܰܡ ܒܥܶܠܕ̈ܒܳܒܰܝ ܠܡܰܘܒܳܕܽܘ ܢܰܦܫܝ ܒܳܥܶܝܢ. ܐܶܠܐ ܠܺܝ ܣܳܦܶܩ ܠܺܝ ܛܶܠܳܠܐܴ ܕܝܰܡܺܝܢܳܟ ܕܣܶܡܟܰܬ ܥܠܰܝ.
ܗܶܢܘܢ ܠܰܡ ܒܥܰܘ ܕܢܰܘܒܕܽܘܢ ܠܢܰܦܫܝ: ܘܢܶܥܠܽܘܢ ܒܬܰܚܬܳܝ̈ܬܳܗ̇ ܕܰܐܪܥܳܐ. ܘܢܶܫܬܰܠܡܽܘܢ ܠܚܰܪܒܳܐ ܘܡܶܐܟܽܘܠܬܳܐ ܠܬܰܥ̈ܠܐ ܢܶܗܘܽܘܢ. ܒܠܰܝ̈ܠܰܘܳܬܐ ܗܳܠܝܢ ܕܶܐܡܰܪ ܕܪܳܢܶܐ ܗܘܳܐ ܒܰܐܠܳܗܶܗ. ܐܪܳܙܳܐ ܗܰܘ ܢܰܗܺܝܪܳܐ ܕܢܰܚ ܥܠܰܘܗܝ ܘܰܐܦܨܚܶܗ. ܗܳܠܶܝܢ ܓܶܝܪ ܠܰܘ ܒܶܗ ܚܳܝܪ̈ܳܢ ܐܶܠܐ ܒܥܰܡܰܢܘܐܝܠ. ܠܶܗ ܓܶܝܪ ܒܥܰܘ ܡܕܰܒܪ̈ܳܢܶܐ ܕܥܰܡܳܐ ܕܢܰܘܒܕܽܘܢ. ܘܰܥܠܰܝܗܽܘܢ ܢܦܰܩ ܦܽܘܩܕܳܢܳܐ ܡܶܢ ܐܰܠܗܳܐ ܕܢܶܚܬܘܢ ܠܬܰܚܬܳܝ̈ܬܳܗ̇ ܕܰܐܪܥܳܐ ܐܰܝܟ ܗܳܠܝܢ ܕܰܐܡܪܰܚܘ ܥܰܠ ܡܽܘܫܶܐ. ܥܰܡ ܩܽܘܪܰܚ ܘܕܳܐܬܳܢ ܘܰܐܒܺܝܪܰܐܡ. ܘܡܶܛܠ ܕܰܨܠܰܒܘ ܝܽܘܕܳܝ̈ܐ ܠܡܳܪܳܗ̇ ܕܬܶܫܒܽܘܚܬܳܐ܆ ܐܰܫܠܶܡ ܐܶܢܘܢ ܠܚܰܪܒܳܐ ܕܥܰܡ̈ܡܶܐ ܘܰܕܡܰܠܟ̈ܐ. ܗܳܢܘܢ ܕܰܒܬܰܥ̈ܠܐ ܟܰܢܺܝ ܐܶܢܘܢ ܘܒܳܬܰܪܟܶܢ ܢܛܺܝܪܳ ܠܗܽܘܢ ܦܶܚܬܳܐ ܕܚܶܫܽܘܟܳܐ ܐ̱ܚܪܳܝܳܐ. ܡܶܫܬܰܠܡܺܝܢ ܒܬܰܫܢܺܝܩܳܐ ܠܬܰܥܠܳܐ ܡܶܬܝܰܕܥܳܢܳܐ. ܐܠܐ ܗܰܘ ܕܠܐ ܐܶܬܠܒܶܟ ܒܰܚܒܳܠܳܐ. ܘܠܐ ܐܶܬܬܚܶܕ ܒܬܰܚ̈ܬܳܝܳܬܳܗ̇. ܕܰܐܪܥܳܐ. ܚܳܕܶܐ ܘܡܶܬܦܨܰܚ ܒܰܩܝܳܡܬܳܐ ܟܰܕ ܚܳܙܶܐ ܠܶܗ ܠܰܟܝܳܢܳܐ ܐ̱ܢܳܫܳܝܳܐ ܗܰܘ ܕܒܰܩܢܽܘܡܶܗ ܡܶܬܚܰܕܰܬ ܠܠܐܴ ܡܳܝܽܘܬܽܘܬܳܐ ܘܰܠܠܐܴ ܡܶܬܚܰܒܠܢܽܘܬܐ. ܘܟܰܕ ܒܶܗ ܚܳܐܱܪ ܗܘܳܐ ܡܙܰܡܪܳܢܳܐ ܐܳܡܰܪ:
ܘܡܰܠܟܳܐ ܢܶܚܕܶܐ ܒܰܐܠܗܳܐ. ܘܢܶܫܬܰܒܗܰܪ ܟܽܠ ܕܝܳܡܶܐ ܒܶܗ܆ ܡܶܛܠ ܕܢܶܣܬܟܰܪ ܦܽܘܡܗܽܘܢ ܕܕܰܓ̈ܠܐܷ. ܗܳܠܶܝܢ ܕܡܶܫܬܰܒܗܪܺܝܢ ܕܝܳܡܶܝܢ ܒܶܗ܆ ܒܗܰܘ ܡܰܠܟܳܐ ܥܶܠܳܝܳܐ ܕܡܰܠܟܽܘܬܶܗ ܕܶܝܢ ܕܡܰܘܬܳܐ ܡܰܟܶܟ ܘܒܰܛܶܠ. ܗܳܠܝܢ ܐܶܢܘܢ ܕܡܰܘܕܶܝܢ ܒܶܗ. ܘܰܫܪܳܪܳܐ ܚܫܺܝܒܳܐ ܠܗܽܘܢ ܗܰܝܡܳܢܽܘܬܳܐ ܕܒܶܗ. ܕܰܓ̈ܠܐ ܐܶܢܘܢ ܗܳܠܶܝܢ ܕܠܐ ܗܰܝܡܶܢܘ ܒܶܗ. ܘܥܰܠ ܗܳܝ ܡܶܣܬܟܰܪ ܦܽܘܡܗܽܘܢ ܒܕܺܝܢܳܐ. ܡܳܐ ܕܡܰܘܕܶܝܢ ܘܰܡܫܰܒܚܺܝܢ ܩܰܕܺܝ̈ܫܐ ܠܡܰܠܟܳܐ ܕܚܰܝ̈ܐ ܠܥܳܠܰܡ ܥܳܠܡܺܝܢ ܐܰܡܺܝܢ.
ܡܙܡܘܪܐ ܕܫܬܝܢ ܘܐܪܒܥܐ
ܥܰܠ ܩܪܳܒܳܐ ܕܩܳܐܶܡ ܥܰܠ ܩܰܕܝ̈ܫܐܶ ܡܶܢ ܚܰܝܠܰܘ̈ܬܳܐ ܡܶܬܝܰܕܥܳܢ̈ܐ ܕܰܠܩܽܘܒܠܳܐ.
ܟܰܕ ܢܳܡܽܘܣܳܐ ܕܰܨܠܽܘܬܳܐ ܡܰܠܶܦ ܗܘܳܐ ܥܰܡܰܢܽܘܐܝܠ ܠܬܰܠܡܝ̈ܕܰܘܗܝ ܩܰܕܺܝ̈ܫܶܐ ܐܳܦ ܒܫܽܘܠܳܡܳܐ ܕܰܨܠܽܘܬܳܐ ܦܰܩܶܕ ܐܶܢܽܘܢ. ܕܰܐܝܟ ܚܳܬܡܳܐ ܘܰܟܠܺܝܠܳܐ ܕܙܳܟܽܘܬܳܐ ܢܶܗܘܘܢ ܒܳܥܶܝܢ ܒܰܨܠܽܘܬܳܐ. ܡܶܬܦܰܨܝܳܢܽܘܬܳܐ ܕܡܶܢ ܒܺܝܫܳܐ. ܗܳܕܶܐ ܓܶܝܪ ܐܶܢ ܗܳܘܝܳܐ. ܡܰܢܰܥܘ ܠܗܽܘܢ ܡܶܢܟܰܕܽܘ ܠܒܶܝܬ ܡܰܥܡܪܳܐ ܕܛܳܒܳܐ. ܡܶܬܪܰܚܩܳܢܽܘܬܳܐ ܓܶܝܪ ܕܡܶܢ ܚܶܫܽܘܟܳܐ. ܚܽܘܠܛܳܢ̈ܐ ܥܳܒܕܳܐ ܥܰܡ ܢܽܘܗܪܳܐ. ܘܗܳܟܰܢܐ ܐܰܝܠܶܝܢ ܕܡܶܬܦܰܨܶܝܢ ܡܶܢ ܒܺܝܫܳܐ. ܡܰܢܰܥܘ ܠܗܽܘܢ ܠܰܐܬܪܶܗ ܕܛܳܒܳܐ. ܘܰܒܗܳܕܐ ܐܰܩܺܝܡ ܒܺܝܫܳܐ ܓܰܒܶܗ ܠܽܘܩܒܰܠ ܐܰܠܗܳܐ. ܐܰܪܓܶܫܘ ܕܶܝܢ ܒܗܳܕܐ ܡܳܪܽܘܕܽܘܬܳܐ ܟܽܠܗܘܢ ܡܠܺܝ̈ܠܐܷ. ܡܶܟܺܝܠ ܗܰܘ ܕܒܰܨܠܽܘܬܳܐ ܡܶܬܦܰܨܶܐ ܡܶܢ ܒܺܝܫܽܘܬ ܝܽܘܠܦܳܢܶܗ ܕܗܰܘ܆ ܗܳܘܶܐ ܠܶܗ ܡܶܟܺܝܠ ܥܰܡ ܛܳܒܳܐ. ܘܥܰܠܗܳܕܐ ܦܰܩܶܕ ܐܶܢܘܢ ܡܳܪܰܢ ܠܬܰܠܡܺܝ̈ܕܰܘܗܝ ܕܰܡܨܰܠܶܝܢ ܠܘܳܬ ܐܰܒܳܐ. ܕܠܳܐ ܬܰܥܶܠ ܠܰܢ ܠܢܶܣܝܽܘܢܳܐ. ܐܶܠܐ ܦܰܨܳܐ ܠܰܢ ܡܶܢ ܒܺܝܫܳܐ (ܡܬܝ ܘ: ܝܓ). ܟܰܕ ܕܶܝܢ ܒܗܳܢܐ ܢܳܡܽܘܣܳܐ ܩܰܕܶܡ ܕܰܡܺܝ ܛܽܘܒܬܳܢܳܐ ܕܰܘܝܕ ܡܙܰܡܪܳܢܳܐ. ܡܫܰܪܶܐ ܗܘܳܐ ܒܬܶܫܒܽܘܚܬܳܐ ܕܶܫܬܺܝܢ ܘܰܐܪܒܰܥ ܘܳܐܡܰܪ:
ܫܡܰܥ ܐܰܠܗܳܐ ܩܳܠܝ ܟܰܕ ܐܶܬܟܰܫܰܦ ܠܳܟ: ܘܡܶܢ ܕܶܚܠܬܳܐ ܕܰܒܥܶܠܕ̈ܒܳܒܰܝ ܢܰܛܰܪܰܝܢܝ. ܣܰܬܰܪܰܝܢܝ ܡܶܢ ܥܰܘܠܶܗ ܕܒܺܝܫܳܐ: ܘܡܶܢ ܗܽܘܦܳܟܳܐ ܕܥܳܒ̈ܕܰܝ ܥܰܘܠܐܴ. ܚܙܰܝܬ ܐܰܝܟܰܢܳܐ ܠܳܚܡܺܝܢ ܦܶܬܓܳܡ̈ܐ ܗܳܠܝܢ ܠܰܨܠܽܘܬܳܐ ܗܳܝ ܕܰܐܠܶܦ ܡܳܪܰܢ ܠܬܰܠܡܺܝ̈ܕܰܘܗܝ. ܗܳܝ ܓܶܝܪ ܕܢܰܛܰܪܰܝܢܝ ܚܠܳܦ ܗܳܝ ܕܦܰܨܳܢܝ ܣܺܝܡܳܐ. ܠܰܝܬ ܓܶܝܪ ܫܽܘܚܠܳܦܳܐ ܒܚܰܝܠܐܴ ܡܶܛܠ ܫܽܘܓܢܳܝܳܐ ܕܰܒܢܴ̈ܬ ܩܴ̈ܠܐ. ܕܢܺܐܡܰܪ ܐ̱ܢܳܫ ܦܰܨܳܢܝ܆ ܘܰܕܢܺܐܡܰܪ ܢܰܛܰܪܰܝܢܝ ܚܰܕ ܗܽܘ ܚܰܝܠܐ. ܗܰܘ ܓܶܝܪ ܕܰܡܦܰܨܶܐ ܠܡܰܢ ܕܡܶܬܓܰܘܰܣ ܒܶܗ ܡܢܰܛܳܪܽܘ ܡܢܰܛܰܪ ܠܶܗ. ܘܗܳܟܰܢܳܐ ܐܳܦ ܗܰܘ ܕܰܡܢܰܛܰܪ ܡܦܰܨܝܳܢܳܐ ܡܶܬܶܐܡܰܪ. ܒܶܝܬ ܫܡܳܐ ܕܰܡܢܰܛܪܳܢܳܐ ܠܗܰܘ ܠܰܝܬ ܡܶܕܶܡ. ܫܳܡܥܺܝܢܰܢ ܠܶܗ ܠܗܰܘ ܕܰܐܠܶܦ ܐܶܢܘܢ ܕܰܢܨܰܠܽܘܢ ܕܰܒܠܺܠܝܳܐ ܗܰܘ ܕܰܐܓܥܶܠ ܠܰܐܒܽܘܗܝ. ܕܳܐܡܰܪ ܗܘܳܐ ܠܘܳܬܶܗ ܡܶܛܠܳܬܗܘܢ. ܠܐ ܗܘܳܐ ܕܬܶܫܩܽܘܠ ܐܶܢܘܢ ܡܶܢ ܥܳܠܡܳܐ ܒܳܥܶܐ ܐ̱ܢܳܐ. ܐܶܠܐ ܕܬܶܛܰܪ ܐܶܢܘܢ ܡܶܢ ܒܺܝܫܳܐ (ܝܘܚܢܢ ܝܙ: ܝܗ). ܚܙܰܝܬ ܗܳܝ ܐܰܝܟܰܢܳܐ ܕܰܢܦܰܨܶܐ ܡܶܢ ܒܺܝܫܳܐ܆ ܡܦܺܝܣ ܡܙܰܡܪܳܢܳܐ ܕܢܶܫܬܡܰܥ ܩܳܠܐ ܕܟܽܘܫܳܦܶܗ. ܕܡܶܛܠ ܕܙܳܕܶܩ ܕܰܒܬܶܐܘܳܪܺܝܰܐ ܓܰܘܳܝܬܳܐ ܢܶܬܒܰܩܶܐ ܒܰܐܝܠܶܝܢ ܕܶܐܡܰܪ ܒܬܶܫܒܽܘܚܬܳܐ ܗܳܕܐ. ܡܶܢ ܒܳܬܰܪ ܕܶܐܡܰܪ ܗܳܠܝܢ ܩܰܕܡܳܝ̈ܬܳܐ. ܥܰܠ ܕܰܢܚܰܘܶܐ ܕܡܶܢ ܩܪ̈ܳܒܶܐ ܡܶܬܝܰܕܥ̈ܢܶܐ ܥܳܪܶܩ ܗܘܳܐ.
ܕܰܠܛܰܫܘ ܠܶܫܳܢܗܽܘܢ ܐܰܝܟ ܣܰܝܦܳܐ ܘܡܶܠܰܬܗܽܘܢ ܐܰܝܟ ܓܶܐܪܳܐ. ܫܳܐܘܳܠ ܓܶܝܪ ܠܰܘ ܠܳܛܶܫ ܗܘܳܐ ܠܶܫܳܢܶܗ ܒܳܬܰܪ ܢܒܺܝܐ܆ ܐܠܐ ܣܰܝܦܳܐ. ܒܗܰܘ ܓܶܝܪ ܙܰܒܢܳܐ ܕܶܐܬܢܰܒܺܝ ܗܳܠܝܢ܆ ܒܡܰܨܰܦܝܳܐ ܕܶܝܢ ܕܡܽܘܐܳܒ ܝܳܬܶܒ ܗܘܳܐ. ܘܶܐܫܬܰܕܰܪ ܠܘܳܬܶܗ ܓܳܕ ܢܒܺܝܐ ܡܶܢ ܐܰܠܗܳܐ ܘܶܐܡܰܪ ܠܶܗ܆ ܠܐ ܬܶܬܶܒ ܒܡܰܨܰܦܝܳܐ ܕܡܽܘܐܳܒ. ܐܶܠܐ ܙܶܠ ܥܽܘܠ ܠܳܟ ܠܰܐܪܥܳܐ ܕܺܝܗܽܘܕܳܐ (ܐ ܫܡܘܐܝܠ ܟܢ: ܗ). ܘܡܶܬܚܰܙܝܳܐ ܕܡܶܛܠ ܬܰܪܬܶܝܢ ܐܶܡܰܪ ܐܰܠܗܳܐ ܒܝܰܕ ܢܒܺܝܐ ܗܳܠܝܢ܆ ܚܕܳܐ ܡܰܢ ܕܠܐ ܢܶܬܶܒ ܒܰܐܪܥܳܐ ܕܥܰܡܳܐ ܗܰܘ ܙܰܠܺܝܠܐܴ ܘܰܢܟܺܝܠܐܴ ܕܰܡܦܰܩܶܕ ܗܘܳܐ ܡܶܛܠܳܬܶܗ ܕܳܐܦܠܐ ܠܕܳܪܳܐ ܥܣܺܝܪܳܝܳܐ ܢܶܥܠܽܘܢ ܠܰܟܢܽܘܫܬܶܗ ܕܡܳܪܝܳܐ. ܕܕܰܠܡܳܐ ܟܰܕ ܝܳܬܶܒ ܠܘܳܬܗܽܘܢ ܒܢܶܩܦܳܐ ܕܥܰܡܳܐ ܚܰܛܳܝܳܐ܆ ܐܰܘ ܕܰܠܡܳܐ ܡܶܛܠܗܳܕܐ ܪܳܚܡܽܘܬܳܐ ܬܶܗܘܶܐ ܠܶܗ ܥܰܡܗܽܘܢ ܕܡܽܘܐܳܒܳܝ̈ܐ. ܘܗܳܝ ܕܣܰܓܺܝ ܫܰܪܺܝܪܳܐ ܢܺܐܡܰܪ܆ ܕܠܐ ܟܕ ܡܰܓܗܶܐ ܢܒܺܝܐ ܡܶܢ ܕܶܚܠܬܳܐ ܕܰܒܥܶܠܕ̈ܒܳܒܶܐ. ܢܶܥܒܶܕ ܠܶܗ ܢܝܳܚܳܐ ܡܶܢ ܪܶܗܛܳܐ ܕܰܡܝܰܬܪܽܘܬܳܐ. ܡܶܛܠܗܳܕܐ ܡܶܬܦܩܶܕ ܗܘܳܐ ܕܢܺܐܙܰܠ ܠܰܐܪܥܳܐ ܕܰܐܒܳܗܰܘ̈ܗܝ. ܘܡܶܛܠ ܕܗܰܘ ܕܡܰܥܒܶܕ ܗܘܳܐ ܚܣܳܡܳܐ ܒܫܳܐܘܳܠ ܠܐ ܫܳܠܐܷ ܠܶܗ ܡܶܢ ܩܪܳܒܳܐ. ܘܗܽܘ ܢܒܺܝܐ ܟܰܕ ܡܙܰܡܰܪ: ܕܰܠܛܰܫܘ ܠܶܫܳܢܗܽܘܢ ܐܰܝܟ ܣܰܝܦܳܐ ܘܡܶܠܰܬܗܽܘܢ ܐܰܝܟ ܓܶܐܪܳܐ. ܫܽܘܦܺܝܢܳܐ ܠܰܡ ܘܦܳܣܺܝܢܳܐ ܥܒܰܕ ܒܺܝܫܳܐ ܟܰܣܝܳܐܝ̣ܬ ܠܠܶܫܳܢܶܗ ܕܫܳܐܘܳܠ ܘܩܶܫܬܳܐ ܡܬܺܝܚܳܐ ܠܶܗ ܒܦܽܘܡܶܗ ܕܢܶܫܕܶܐ ܒܺܝ ܓܶܐܪܳܐ. ܘܫܳܐܘܳܠ ܒܓܰܠܝ̈ܬܳܐ ܩܪܶܒ ܘܒܺܝܫܳܐ ܒܟܰܣܝ̈ܬܳܐ. ܘܚܽܘܪ ܐܰܝܟܰܢܐ ܕܳܚܶܠ ܘܡܶܣܬܰܪܰܕ ܗܘܳܐ ܕܰܘܝܕ ܡܶܢ ܩܪܳܒܳܐ ܕܺܝܠܗܽܘܢ. ܠܡܶܫܕܳܐ ܒܛܽܘܫܝܳܐ ܒܬܰܡܺܝܡܳܐ ܐܳܘ ܠܥܰܝ̈ܢܶܐ ܢܰܗܺܝܪ̈ܳܬܳܐ ܕܰܢܒܺܝܽܘܬܳܐ.
ܕܰܒܛܽܘܫܝܳܐ ܠܰܡ ܫܳܕܶܝܢ ܒܬܰܡܺܝܡܳܐ: ܘܡܶܢ ܫܶܠܝܳܐ ܢܶܫܕܽܘܢ ܒܶܗ ܘܠܐ ܢܶܬܚܙܽܘܢ. ܡܰܢ ܓܶܝܪ ܡܶܫܟܰܚ ܕܢܶܕܰܥ ܒܰܐܝܠܶܝܢ ܕܽܘܟܝ̈ܬܳܐ ܛܳܡܪܺܝܢ ܦܰܚܰܝ̈ܗܽܘܢ ܨܰܝܴ̈ܕܶܐ ܡܶܬܝܰܕܥ̈ܢܶܐ. ܘܰܐܝܕܳܐ ܥܰܝܢܳܐ ܡܰܨܝܳܐ ܕܕܳܝܩܳܐ ܡܳܐ ܕܙܳܐܷܡ ܝܰܬܪܳܐ ܕܩܶܫܬܗܽܘܢ. ܘܢܳܦܩܺܝܢ ܡܶܢܳܗ̇ ܓܶܐܪ̈ܶܐ ܡܫܰܦܕܳܢ̈ܐ. ܕܡܶܢܗܽܘܢ ܐܺܝܬܰܝܗܽܘܢ ܚܣܳܡܳܐ: ܡܶܢܗܽܘܢ ܕܶܝܢ ܩܶܛܠܐܴ: ܡܶܢܗܘܢ ܒܓܰܘܪܳܐ ܟܳܡܢܺܝܢ: ܡܶܢܗܘܢ ܒܪܶܚܡܰܬ ܟܶܣܦܳܐ: ܡܶܢܗܘܢ ܒܕܰܓܳܠܽܘܬܳܐ ܡܚܰܦܶܝܢ: ܡܶܢܗܘܢ ܒܰܓܠܺܝܙܽܘܬ ܪ̈ܰܚܡܶܐ ܡܣܰܬܪܺܝܢ: ܡܶܢܗܘܢ ܒܡܰܣܰܒ ܒܰܐܦ̈ܐ: ܡܶܢܗܘܢ ܒܣܳܗܕܽܘܬ ܫܽܘܩܪܳܐ ܡܙܺܝܓܺܝܢ: ܡܶܢܗܘܢ ܒܓܽܘܕܳܦܳܐ ܘܰܒܡܰܡܠ̱ܠܐܴ ܛܰܢܦܳܐ ܚܠܺܝܛܺܝܢ: ܡܶܢܗܘܢ ܒܦܽܘܠܚܳܢܳܐ ܕܰܦܬܰܟܪ̈ܶܐ ܚܒܺܝܟܺܝܢ. ܥܰܡ ܫܰܪܟܳܐ ܕܓܶܐܪ̈ܶܐ ܕܰܩܕ̈ܩܶܐ ܕܰܡܚܰܦܶܝܢ ܒܰܪ̈ܓܺܝܓܳܬܳܐ ܕܰܠܡܰܘܬܳܐ ܡܙܰܡ̈ܢܳܢ ܗܳܢܶܝܢ ܡܰܚ̈ܘܳܬܳܐ ܕܡܶܢܗܶܝܢ. ܕܗܳܝ ܓܶܝܪ ܡܶܣܬܒܰܪ ܗܘܳܐ ܓܶܐܪܳܐ ܕܰܫܕܳܐ ܒܗܳܢܐ ܢܰܚܫܺܝܪܬܳܢܳܐ ܟܰܕ ܡܛܰܫܰܝ ܒܦܰܚܳܐ ܕܒܰܪܬܫܒܰܥ. ܡܶܛܠ ܕܶܐܫܟܰܚ ܠܶܗ ܐܰܬܪܳܐ ܒܡܰܗܡܝܳܢܽܘܬܳܐ. ܘܡܶܢ ܫܶܠܝܳܐ ܫܕܳܐ ܘܰܡܚܳܝܗܝ ܠܰܢܒܺܝܐ ܘܠܐ ܐܶܬܚܙܺܝ. ܘܣܰܓܺܝ̈ܐܐ ܐܶܢܘܢ ܦܰܚ̈ܐ ܕܓܰܝ̈ܣܶܐ ܕܰܚܛܺܝܬܳܐ ܕܰܡܥܰܬܕܺܝܢ ܠܰܢ. ܡܶܛܠ ܕܰܒܗܳܕܐ ܥܰܫܺܝܢܺܝܢ ܥܠܰܝܢ ܐܰܝܟ ܕܶܐܡܰܪ ܢܒܺܝܐ.
ܕܰܐܥܫܶܢܘ ܡܶܠܰܬܗܽܘܢ ܒܺܝܫܬܳܐ: ܘܶܐܬܚܰܫܰܒܘ ܠܡܶܛܡܰܪ ܦܰܚܷ̈ܐ. ܘܶܐܡܰܪܘ ܕܡܰܢܽܘ ܚܳܙܶܐ ܠܰܢ. ܐܶܣܬܰܬܰܪܘ ܒܽܐܘܡܳܢܽܘܬܐ ܡܰܛܥܝܳܢܺܝܬܳܐ. ܕܦܰܚ̈ܐ ܠܐ ܡܶܬܚܰܙܝܳܢ̈ܐ ܢܶܛܡܪܽܘܢ ܩܕܳܡ ܫܰܒܪ̈ܶܐ ܬܰܡܺܝ̈ܡܶܐ ܟܰܕ ܡܛܰܫܶܝܢ ܦܰܚܰܝ̈ܗܽܘܢ ܒܰܪ̈ܓܺܝܓܳܬܳܐ. ܘܰܢܫܰܦܕܽܘܢ ܒܓܶܐܪ̈ܶܐ ܠܗܰܘ ܕܢܳܦܶܠ ܒܗܽܘܢ. ܕܰܐܝܟ ܗܳܟܰܢܳܐ ܓܶܝܪ ܓܳܕܶܫ ܠܦܳܪܰܚܬܳܐ ܕܓܶܦܳܐ ܕܟܰܕ ܒܪܰܘܡܳܐ ܡܕܰܝܪܳܐ ܥܰܠ ܥܽܘܫܢܳܐ ܕܓܰܢ̱ܒܳܪ̈ܰܝ ܚܰܝܠܐ. ܒܝܰܕ ܠܶܩܛܳܐ ܕܰܡܛܰܫܶܝܢ ܒܽܐܘܡܳܢܽܘܬܐ ܬܚܶܝܬ ܟܽܠ ܦܢܺܝܬܳܐ ܕܦܰܚܳܐ ܕܰܛܡܺܝܪ ܒܥܰܦܪܳܐ. ܕܠܺܝܠܐܴܝ̣ܬ ܡܶܬܬܰܚܕܳܐ ܒܺܐܝ̈ܕܰܝ ܨܰܝܳܕܳܐ ܡܚܺܝܠܐ. ܘܰܐܝܟ ܨܰܝܳܕܳܐ ܕܰܡܛܰܫܶܐ ܢܰܦܫܶܗ ܒܬܰܛܠܺܝܠܐܴ ܕܚܽܘܠܳܢ̈ܐ. ܕܠܐ ܢܶܬܚܙܶܐ ܠܦܳܪܰܚܬܳܐ. ܗܳܟܰܢܐ ܥܳܒܕܺܝܢ ܐܳܦ ܨܰܝܴ̈ܕܶܐ ܡܶܬܝܰܕܥ̈ܢܶܐ ܕܢܰܦ̈ܫܳܬܳܐ ܘܟܳܡܢܺܝܢ ܒܠܶܩܛܳܐ ܡܬܰܪܣܝܳܢܳܐ. ܘܟܰܕ ܚܳܙܶܝܢ ܠܗܶܝܢ ܠܪܰܦܳܐ ܕܢܰܦ̈ܫܳܬܳܐ ܕܩܳܪ̈ܒܳܢ ܡܰܢ ܨܶܝܕ ܠܶܩܛܳܐ ܕܰܪ̈ܓܺܝܓܳܬܳܐ. ܩܰܠܺܝܠܐܴܝ̣ܬ ܡܶܬܬܰܚ̈ܕܳܢ ܒܦܰܚ̈ܐ ܛܡܺܝܪ̈ܰܝ ܒܗܰܢܺܝܐܘܬܳܐ. ܘܥܰܠܗܳܝ ܐܳܡܪܺܝܢ ܡܰܢܽܘ ܚܳܙܶܐ ܠܰܢ. ܡܶܢ ܗܳܠܝܢ ܕܰܪܘܶܝܢ ܒܚܱ̈ܫܶܐ ܘܠܐ ܐ̱ܢܳܫ. ܡܶܢ ܗܳܢܘܢ ܕܶܝܢ ܕܰܐܝܟ ܢܒܺܝܐ ܚܰܝܠܬܳܢܺܝܢ. ܠܐ ܡܶܬܛܰܫܶܐ ܢܶܟܠܗܘܢ. ܩܳܕܡܺܝܢ ܓܶܝܪ ܩܰܕܺܝ̈ܫܐ ܚܳܙܶܝܢ ܥܽܘܬܳܕܗܘܢ ܕܨܰܝܴ̈ܕܶܐ ܗܳܠܝܢ ܡܰܛܥܝ̈ܢܶܐ. ܡܶܛܠܗܳܢܐ ܡܶܙܕܰܝܢܺܝܢ ܠܽܘܩܒܰܠ ܐܽܘܡܳܢܽܘܬܗܘܢ ܟܰܕ ܙܳܟܶܝܢ ܠܪܶܓܬܳܐ ܒܩܰܕܺܝܫܽܘܬܐ: ܘܰܠܙܰܠܺܝܠܽܘܬܐ ܒܢܰܟܦܽܘܬܳܐ: ܘܰܠܠܰܥܒܽܘܬܐ ܒܰܢܙܺܝܪܽܘܬܳܐ: ܘܰܠܝܰܥܢܽܘܬܐ ܒܨܰܘܡܳܐ: ܘܰܠܪܰܘܳܝܽܘܬܐ ܒܰܓܠܺܝܙܽܘܬܐ ܕܚܰܡܪ̈ܳܢܶܐ: ܘܰܠܒܺܝܫܽܘܬܐ ܒܛܳܒܽܘܬܳܐ: ܘܠܰܓܠܺܝܙܽܘܬ ܪ̈ܰܚܡܶܐ ܒܰܡܪܰܚܡܳܢܽܘܬܐ: ܘܠܰܚܣܳܡܳܐ ܒܚܽܘܒܳܐ: ܘܰܠܓܰܘܪܳܐ ܒܰܡܚܰܡܣܢܳܢܽܘܬܳܐ: ܘܰܠܕܰܓܳܠܽܘܬܳܐ ܒܰܫܪܳܪܳܐ: ܘܰܠܛܰܢܦܽܘܬܳܐ ܒܙܰܗܝܽܘܬܐ: ܘܰܠܕܰܡܟܽܘܬܐ ܒܫܰܗܪܳܐ: ܘܰܠܛܳܥܝܽܘܬܐ ܒܗܰܝܡܳܢܽܘܬܐ: ܘܠܰܚܛܺܝܬܳܐ ܒܙܰܕܺܝܩܽܘܬܳܐ: ܘܰܠܪܶܚܡܰܬ ܟܶܣܦܳܐ ܒܰܡܣܰܪܩܽܘܬܐ: ܘܰܠܪܳܡܽܘܬܳܐ ܒܡܰܟܺܝܟܽܘܬܐ: ܘܰܠܪܶܚܡܰܬ ܥܳܠܡܳܐ ܒܪܶܚܡܰܬ ܐܰܠܗܳܐ. ܘܰܐܝܟ ܕܰܒܟܰܪ̈ܝܳܬܳܐ ܠܡܺܐܡܰܪ: ܟܽܠ ܦܰܚܳܐ ܕܨܳܠܶܝܢ ܐܽܘܡܳܢ̈ܐ ܡܶܬܝܰܕܥ̈ܢܶܐ ܡܩܰܕܡܺܝܢ ܚܳܙܶܝܢ ܠܶܗ ܐܰܬܠܺܝ̈ܛܶܐ ܕܟܺܐܢܽܘܬܐ. ܡܶܢ ܩܕܳܡ ܕܠܐܴ ܡܶܨܛܠܐܷ. ܘܡܳܐ ܕܳܐܬܶܝܢ ܗܳܠܝܢ ܕܰܡܒܰܨܶܝܢ ܠܳܗ̇ ܠܢܰܦܫܳܐ. ܘܶܐܢ ܡܶܫܟܚܺܝܢ ܠܳܗ̇ ܕܺܐܝܬ ܒܳܗ̇ ܥܰܘܠܐܴ. ܫܳܩܠܺܝܢ ܠܳܗ̇ ܠܰܡܢܳܬܗܽܘܢ. ܗܳܘܶܐ ܚܽܘܫܒܳܢܗܽܘܢ. ܕܰܠܩܽܘܒܠܐܴ ܕܨܶܒܝܳܢܳܐ ܕܺܝܠܗܽܘܢ. ܘܰܚܙܺܝ ܐܰܝܟܰܢܳܐ ܐܶܡܰܪ ܢܒܺܝܐ܆ ܕܳܐܬܶܝܢ ܠܡܶܒܨܳܐ ܘܰܠܡܶܚܙܳܐ. ܕܕܰܠܡܳܐ ܐܺܝܬ ܡܶܕܶܡ ܡܶܢ ܕܺܝܠܗܘܢ. ܡܶܛܠ ܕܰܐܝܟܳܐ ܕܺܐܝܬ ܩܰܠܺܝܠ ܡܶܢ ܡܢܳܬܗܽܘܢ. ܦܫܺܝܩܳܐܝ̣ܬ ܛܳܡܪܺܝܢ ܦܰܚܰܝ̈ܗܽܘܢ. ܘܥܰܠ ܣܰܒܪܳܐ ܩܰܕܡܳܝܳܐ ܛܳܡܪܺܝܢ ܦܰܚ̈ܐ ܬܪ̈ܰܝܳܢܶܐ ܘܰܬܠܺܝܬܳܝ̈ܐ. ܐܰܝܟܳܐ ܓܶܝܪ ܕܰܨܠܰܘ ܦܰܚ̈ܐ ܕܰܚܣܳܡܳܐ ܘܶܐܚܰܕܘ. ܕܠܺܝܠܐܴܝ̣ܬ ܐܳܬܶܝܢ ܐܰܝܠܶܝܢ ܕܛܳܡܪܺܝܢ ܦܰܚ̈ܐ ܕܩܶܛܠܐܴ. ܘܰܐܝܟܳܐ ܕܰܛܡܰܪܘ ܦܰܚ̈ܐ ܕܪܶܚܡܰܬ ܟܰܪܣܳܐ ܘܰܠܒܰܟܘ. ܒܶܗ ܒܥܶܕܳܢܳܐ ܐܳܬܶܝܢ ܨܰܝܴ̈ܕܶܐ ܐ̱ܚܪ̈ܳܢܶܐ ܕܪܶܚܡܰܬ ܠܰܥܒܽܘܬܳܐ. ܘܡܳܐ ܕܨܳܕܘ ܐܳܦ ܗܳܢܘܢ. ܥܳܐܷܠ ܒܳܬܰܪܗܘܢ ܐܳܦ ܗܰܘ ܕܛܳܡܰܪ ܦܰܚܳܐ ܕܓܰܘܪܳܐ. ܘܡܳܐ ܕܶܐܬܬܨܺܝܕ ܩܰܕܺܝܫܳܐ ܒܓܰܘܪܳܐ܆ ܠܐܴ ܡܰܗܡܶܐ ܕܢܺܐܬܶܐ ܨܰܝܳܕܳܐ ܕܡܶܬܪܰܥܶܐ ܕܡܳܐ ܙܰܟܳܝܳܐ. ܘܡܶܛܠ ܗܳܢܐ ܗܰܘ ܕܰܡܚܰܬܚܶܬ ܠܘܳܬ ܠܶܩܛܳܐ ܕܚܶܡܬܳܐ܆ ܐܶܢ ܨܳܐܷܕ ܩܰܠܺܝܠܐܝ̣ܬ ܥܳܐܷܠ ܒܳܬܪܶܗ ܗܰܘ ܕܦܳܪܶܣ ܡܨܺܝܕܬܳܐ ܕܪܽܘܓܙܳܐ.
ܗܳܠܝܢ ܠܰܡ ܐܶܬܚܰܫܰܒܘ ܘܣܳܦܘ. ܠܡܶܒܨܳܐ ܥܰܘܠܳܐ ܡܢ ܓܰܘܶܗ ܕܒܰܪܢܳܫܳܐ: ܘܡܶܢ ܠܶܒܶܗ ܥܰܡܺܝܩܳܐ. ܗܳܠܝܢ ܓܶܝܪ ܣܳܒܰܪ ܐ̱ܢܳܐ ܕܡܶܢ ܟܰܕܽܘ ܐܶܬܢܰܗܰܪ̈ܶܝܢ ܠܗܶܝܢ. ܒܰܐܝܠܶܝܢ ܕܰܥܕܰܡܳܐ ܠܗܳܫܳܐ ܐܶܬܡܰܠܰܠܶܝ̈ܢ. ܐܶܠܐ ܡܶܛܠ ܕܗܺܝ ܡܶܠܬܳܐ ܥܰܣܩܰܬ ܠܫܶܡܥܳܗ̇ ܐܺܝܬܶܝܗ̇. ܒܗܳܝ ܕܠܰܘ ܕܠܺܝܠܐܝ̣ܬ ܡܶܫܟܰܚ ܩܳܐܷܡ ܐ̱ܢܳܫ ܥܰܠ ܪܽܘܟܳܒܳܗ̇. ܗܳܟܰܢܐ ܐܳܦ ܗܳܠܝܢ ܦܳܠܚܱ̈ܝ ܥܰܘܠܐܴ ܘܬܰܠܡܺܝ̈ܕܶܐ ܕܕܰܓܳܠܽܘܬܐ. ܡܶܬܟܰܢܫܺܝܢ ܥܰܡ ܚܽܘ̈ܫܳܒܶܐ ܘܩܳܝܡܺܝܢ ܠܡܶܒܨܳܐ ܥܰܘܠܐܴ ܡܶܢ ܓܰܘܶܗ ܕܒܰܪܢܳܫܳܐ. ܗܳܢܰܘ ܗܰܘ ܕܶܐܬܚܰܫܰܒ ܒܠܶܒܶܗ ܥܰܘܠܐܴ ܥܰܡܺܝܩܳܐ ܢܺܐܬܶܐ ܡܶܟܺܝܠ ܠܰܥܒܳܕܳܐ. ܘܟܰܕ ܩܰܠܺܝܠ ܡܶܕܶܡ ܢܳܣܒܺܝܢ ܥܶܠܬܳܐ. ܐܰܘ ܡܶܢ ܡܶܠܬܳܐ. ܐܰܘ ܡܶܢ ܚܙܳܬܳܐ܆ ܡܰܕܪܟܺܝܢ ܕܰܠܘܳܬ ܐܰܝܢܳܐ ܚܰܫܳܐ ܨܰܠܝܳܐ ܢܰܦܫܳܐ. ܘܡܶܟܺܝܠ ܒܰܐܝܠܝܢ ܕܰܪܢܳܬ ܕܫܰܦܺܝܪ̈ܳܢ ܩܳܪ̈ܒܳܢ ܨܶܝܕܶܝܗ̇ ܠܡܶܥܒܰܕ ܥܰܡܳܗ̇ ܩܪܳܒܳܐ. ܐܶܠܐ ܡܰܪܦܶܝܢ ܠܳܗ̇ ܦܳܠܚܳܐ ܐܰܝܠܝܢ ܕܣܰܒܪܳܐ ܕܡܰܠܟܽܘܬܳܐ ܝܳܪܬܳܐ ܒܗܽܘܢ. ܘܰܡܚܰܠܦܺܝܢ ܠܳܗ̇ ܦܰܚ̈ܐ ܒܰܐܝܠܝܢ ܕܠܐ ܚܫܺܝ̈ܒܳܢ ܠܳܗ̇ ܚܛܺܝܬܳܐ܆ ܘܠܐܴ ܟܰܕ ܡܶܬܠܰܒܟܳܐ ܒܗܶܝܢ. ܕܰܐܝܟ ܐܰܝܟܰܢܳܐ ܐܳܡܰܪ ܐ̱ܢܳܐ. ܐܰܝܟ ܙܢܳܐ ܕܶܐܢ ܢܶܗܘܶܐ ܐܺܝܬܰܘܗܝ ܐ̱ܢܳܫ ܒܦܰܐܝܽܘܬܳܐ ܕܰܒܬܽܘܠܽܘܬܳܐ ܘܟܰܕ ܦܽܘܠܚܳܢܳܐ ܗܳܢܐ ܛܳܒ ܫܰܦܺܝܪ ܠܡܰܢ ܕܰܡܚܰܡܣܶܢ ܒܶܗ܆ ܘܫܳܒܩܺܝܢ ܠܶܗ ܠܗܰܘ ܕܗܳܕܐ ܡܰܚܶܒ܆ ܘܨܳܠܶܝܢ ܠܶܗ ܦܰܚ̈ܐ ܕܪܳܡܽܘܬܳܐ. ܗܰܘ ܕܰܢܕܺܝܕ ܩܕܳܡ ܐܰܠܗܳܐ. ܡܳܕܶܝܢ ܟܰܕ ܣܳܥܶܝܢ ܠܡܶܒܨܳܐ ܥܰܘܠܐܴ ܗܳܠܝܢ ܕܶܐܬܶܐܡܰܪܘ ܠܰܘ ܢܶܣܒܽܘܢ ܗܰܘ ܕܺܝܠܗܽܘܢ ܒܳܥܶܝܢ ܘܰܢܫܰܢܽܘܢ. ܐܶܠܐ ܢܰܘܣܦܽܘܢ ܥܠܰܘܗܝ ܡܶܬܚܰܦܛܺܝܢ. ܐܶܢܓܶܝܪ ܒܳܨܶܝܢ ܘܡܶܫܟܚܺܝܢ ܪܶܓܬܳܐ ܡܰܘܣܦܺܝܢ ܥܰܠܗܳܕܐ ܙܳܢܝܽܘܬܳܐ: ܘܶܐܢ ܒܨܰܘ ܘܶܐܫܟܰܚܘ ܚܣܳܡܳܐ ܐܰܘܣܶܦܘ ܥܠܰܘܗܝ ܣܶܢܐܬܳܐ: ܘܥܰܠ ܣܶܢܐܬܳܐ ܐܰܘܣܶܦܘ ܩܶܛܠܐܴ: ܘܶܐܢ ܒܨܰܘ ܘܶܐܫܟܰܚܘ ܪܶܚܡܰܬ ܟܶܣܦܳܐ ܐܰܘܣܶܦܘ ܥܰܠ ܗܳܢܐ ܚܰܫܳܐ ܓܠܺܝܙܽܘܬ ܪ̈ܰܚܡܶܐ. ܘܰܕܠܳܐ ܢܰܘܪܶܟ ܡܶܠܬܳܐ. ܘܡܰܘܥܺܝܬܳܐ ܐܺܝܬ ܠܚܱ̈ܫܶܐ ܘܚܰܕ ܡܶܢ ܚܰܕ ܡܶܬܝܰܠܕܺܝܢ. ܘܰܐܟܙܢܳܐ ܕܡܶܢ ܚܶܡܬܳܐ ܡܶܬܺܝܠܶܕ ܪܽܘܓܙܳܐ. ܘܡܶܢ ܚܶܪܝܳܢܳܐ ܡܶܬܝܰܠܕܳܐ ܡܰܨܽܘܬܳܐ. ܗܳܟܰܢܐ ܡܶܢ ܟܽܠ ܚܰܫܳܐ ܚܰܫܳܐ ܕܕܳܡܶܐ ܠܶܗ ܡܶܬܺܝܠܶܕ. ܡܶܛܠ ܒܺܝܫܽܘܬܳܐ ܕܗܳܢܘܢ ܕܡܶܬܚܰܫܒܺܝܢ ܠܡܶܒܨܳܐ ܥܰܘܠܐܴ ܡܶܢ ܓܰܘܶܗ ܕܒܰܪܢܳܫܳܐ ܘܡܶܢ ܥܽܘܡܩܳܐ ܕܠܶܒܶܗ. ܠܳܛ ܢܒܺܝܐ ܘܶܐܡܰܪ:
ܢܶܬܬܪܺܝܡ ܐܰܠܗܳܐ ܘܢܶܫܕܶܐ ܒܗܽܘܢ ܓܶܐܪܳܐ ܡܶܢ ܫܶܠܝܳܐ. ܐܰܝܟ ܠܰܡ ܕܗܶܢܘܢ ܡܶܢ ܫܶܠܝܳܐ ܫܳܕܶܝܢ. ܟܰܕ ܠܐܴ ܡܶܬܚܙܶܝܢ ܠܰܐܝܠܶܝܢ ܕܡܶܬܟܰܫܛܺܝܢ ܡܶܢܗܽܘܢ. ܗܳܟܰܢܐ ܬܶܙܕܰܝܰܢ ܠܽܘܩܒܰܠܗܘܢ ܗܳܝ ܐܺܝܕܳܐ ܣܳܥܪܰܬ ܬܶܕܡܪ̈ܳܬܳܐ. ܘܗܺܝ ܬܶܫܕܶܐ ܠܽܘܩܒܰܠ ܣܶܕܪ̈ܰܝܗܽܘܢ ܟܬܺܝ̈ܫܰܝ ܠܒܺܝܫܬܳܐ.
ܘܢܶܬܟܰܪܗܽܘܢ ܠܶܫܳܢܰܝ̈ܗܽܘܢ. ܠܰܘ ܒܓܶܐܪ̈ܶܐ ܡܶܬܚܰܙܝܴ̈ܢܶܐ ܥܳܒܕܺܝܢ ܩܪܳܒܳܐ. ܐܶܠܐܴ ܒܠܶܫܳܢܰܝ̈ܗܽܘܢ ܟܳܫܛܺܝܢ ܚܠܳܦ ܓܶܐܪ̈ܶܐ. ܡܶܛܠ ܕܠܰܘ ܟܽܠ ܐ̱ܢܳܫ ܡܶܫܟܰܚ ܠܡܶܕܰܥ ܐܶܡܰܬܝ ܡܳܚܶܝܢ ܒܳܠܥܺܝܢ ܒܗܽܘܢ ܣܰܓܺܝ̈ܐܐ. ܐܶܡܰܬܝ ܕܶܐܬܬܪܺܝܡ ܐܰܠܗܳܐ. ܘܰܫܕܳܐ ܒܗܽܘܢ ܓܶܐܪܳܐ ܡܶܢ ܫܶܠܝܳܐ ܒܣܶܕܪ̈ܰܘܗܝ ܕܰܒܥܶܠܕܰܪܳܐ. ܫܳܡܥܺܝܢܰܢ ܠܶܗ ܠܡܶܠܬܳܐ ܐܰܠܗܳܐ ܕܳܐܡܰܪ ܠܘܳܬ ܝܽܘܕܳܝ̈ܐ: ܕܶܐܡܰܬܝ ܕܰܬܪܺܝܡܽܘܢܶܗ ܠܰܒܪܶܗ ܕܐ̱ܢܳܫܳܐ. ܗܳܝܕܶܝܢ ܬܶܕܥܽܘܢ ܕܶܐܢܳܐ ܐܺܝܬܰܝ (ܝܘܚܢܢ ܚ: ܟܚ). ܟܰܕ ܓܶܝܪ ܐܰܪܺܝܡܽܘܗܝ ܠܰܐܠܗܳܐ ܥܰܠ ܨܠܺܝܒܳܐ. ܗܳܝܕܶܝܢ ܬܰܠܡܺܝ̈ܕܶܐ ܕܕܰܝ̈ܘܶܐ. ܗܳܪܟܳܐ ܐܶܡܰܪ ܢܒܺܝܳܐ ܕܡܶܬܬܪܺܝܡ ܐܰܠܗܳܐ ܘܢܶܫܕܶܐ ܒܗܽܘܢ ܡܶܢ ܨܠܺܝܒܳܐ ܓܶܐܪܳܐ ܡܶܢ ܫܶܠܝܳܐ. ܟܰܕ ܡܬܰܚ ܐܺܝܕܰܘ̈ܗܝ ܥܰܡܰܢܽܘܐܝܠ ܥܰܠ ܨܠܺܝܒܳܐ. ܗܳܝܕܶܝܢ ܢܦܰܩ ܓܶܐܪܳܐ ܡܶܢ ܩܶܫܬܶܗ ܕܰܨܠܺܝܒܳܐ. ܘܟܰܕ ܠܳܐ ܝܳܕܥܺܝܢ ܐܰܪ̈ܟܽܘܢܛܶܐ ܕܟܳܦܽܘܪ̈ܘܳܬܳܐ܆ ܫܕܳܐ ܒܗܽܘܢ ܓܶܐܪܳܐ ܘܒܰܕܰܪ ܐܶܢܘܢ. ܘܶܐܬܟܰܪܰܗܘ ܠܶܫܳܢܰܝ̈ܗܽܘܢ ܕܡܰܠܦܳܢܶܝ̈ܗ̇ ܕܕܰܓܳܠܽܘܬܳܐ. ܕܩܳܡ ܫܪܳܪܳܐ ܥܰܠ ܪܰܘܡܳܐ ܕܢܶܨܚ̈ܢܶܐ ܘܦܰܪܣܺܝ ܐܶܢܘܢ. ܘܶܐܬܰܐܣܺܝ ܟܝܳܢܳܐ ܐ̱ܢܳܫܳܝܳܐ ܘܶܐܬܚܠܶܡ ܕܰܟܪܺܝܗ ܗܘܳܐ ܒܰܚܒܳܠܐܴ. ܡܶܢ ܢܽܘܟ̈ܬܳܬܳܐ ܕܰܚܘܱ̈ܘܳܬܳܐ ܚܰܪ̈ܡܳܢܶܐ. ܘܡܶܛܠܗܳܢܐ ܗܘܰܘ ܠܕܶܚܠܬܳܐ ܘܰܠܣܽܘܪܳܕܳܐ. ܠܰܕܚܳܙܶܝܢ ܠܗܽܘܢ ܐܰܝܟ ܕܶܐܡܰܪ ܢܒܺܝܐ.
ܘܢܶܕܚܠܽܘܢ ܟܽܠ ܕܚܳܙܶܝܢ ܠܗܽܘܢ: ܘܢܶܕܚܠܽܘܢ ܟܽܠ ܒܢܰܝ̈ܢܳܫܳܐ. ܘܰܢܚܰܘܽܘܢ ܥܒܳܕܰܘ̈ܗܝ ܕܰܐܠܗܳܐ. ܐܰܝܠܶܝܢ ܐܶܢܘܢ ܥܒܳܕܰܘ̈ܗܝ ܕܰܐܠܗܳܐ؟ ܗܳܠܝܢ ܪܰܘܪ̈ܒܳܬܳܐ ܕܰܥܒܰܕ ܒܰܨܠܺܝܒܳܐ. ܫܶܡܫܳܐ ܕܰܚܫܶܟ: ܐܰܪܥܳܐ ܕܙܳܥܰܬ܆ ܒܶܝܬ ܩܒܽܘܪ̈ܶܐ ܕܶܐܬܦܰܬܰܚܘ܆ ܘܟܺܐܦ̈ܐ ܕܶܐܨܛܰܪ̈ܺܝܝܶܢ܆ ܦܰܓܪ̈ܐ ܕܩܰܕܺܝ̈ܫܶܐ ܕܩܳܡܘ ܒܩܳܠܶܗ: ܡܰܠܐܟ̈ܐ ܕܰܢܚܶܬܘ ܘܩܰܒܠܽܘܗܝ ܟܰܕ ܩܳܡ ܡܶܢ ܒܶܝܬ ܡܺܝ̈ܬܶܐ: ܩܶܪܝܳܢܳܐ ܕܥܰܡ̈ܡܶܐ ܙܽܘܕܳܩܳܐ ܕܚܰܛܳܝ̈ܐ: ܦܽܘܢܳܝܳܐ ܕܰܐܒܺܝ̈ܕܶܐ: ܟܽܘܢܳܫܳܐ ܕܰܡܒܰܕܪ̈ܶܐ: ܙܳܢܝܴ̈ܬܳܐ ܕܡܶܬܩܰܕ̈ܫܳܢ: ܙܰܠܺܝ̈ܠܳܬܳܐ ܕܡܶܬܢܰܟ̈ܦܳܢ: ܕܰܝ̈ܘܶܐ ܟܰܕ ܥܳܪܩܺܝܢ: ܟܪ̈ܺܝܗܶܐ ܕܡܶܬܚܰܠܡܺܝܢ: ܚܓܺܝܪ̈ܶܐ ܕܰܡܗܰܠܟܺܝܢ: ܓܰܪ̈ܒܳܢܶܐ ܕܡܶܬܕܰܟܶܝܢ: ܦܫܺܝ̈ܓܶܐ ܕܡܶܬܦܰܫܛܺܝܢ: ܡܶܣܟܻ̈ܢܶܐ ܕܥܳܬܪܺܝܢ: ܡܳܟ̈ܣܶܐ ܕܗܳܘܶܝܢ ܟܳܪ̈ܽܘܙܶܐ ܕܰܣܒܰܪܬܳܐ. ܘܡܶܛܠܗܳܕܐ ܐܰܘܣܶܦܘ.
ܘܒܰܥܒܳܕ ܐܺܝ̈ܕܰܘܗܝ ܢܚܽܘܪܽܘܢ. ܥܕܰܡܳܐ ܠܰܨܠܺܝܒܳܐ. ܒܰܫܡܰܝܳܐ ܘܒܰܐܪܥܳܐ ܘܰܒܟܽܠ ܕܰܒܗܽܘܢ. ܘܡܶܢ ܨܠܺܝܒܳܐ ܘܰܠܟܳܐ ܒܫܽܘܚܠܳܦܳܐ ܕܰܩܢܰܘ ܥܰܡ̈ܡܶܐ ܒܺܐܝ̈ܕܰܘܗܝ ܕܰܐܠܗܳܐ. ܗܰܘ ܕܰܦܪܰܩ ܐܶܢܘܢ. ܕܰܥܠܰܝܗܽܘܢ ܐܶܡܰܪ ܢܒܺܝܐ.
ܢܶܚܕܽܘܢ ܙܰܕܺܝ̈ܩܶܐ ܒܡܳܪܝܳܐ ܘܢܶܬܬܰܟܠܽܘܢ ܥܠܰܘܗܝ: ܘܰܢܫܰܒܚܽܘܢܳܝܗܝ ܟܽܠ ܬܪ̈ܺܝܨܰܝ ܠܶܒܳܐ. ܕܗܽܘ ܐܶܬܓܠܺܝ ܘܰܦܪܰܩ ܠܰܢ. ܘܗܽܘ ܡܺܝܬ ܘܰܐܚܺܝ ܠܰܢ ܕܠܶܗ ܫܽܘܒܚܳܐ ܠܥܳܠܡܺܝܢ. ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܶܫܬܺܝܢ ܘܰܐܪܒܥܳܐ
ܡܙܡܘܪܐ ܕܐܫܬܝܢ ܘܚܡܫܐ
ܡܰܘܕܰܥ ܥܰܠ ܫܽܘܒܚܳܗ̇ ܕܥܺܕܬܳܐ: ܘܥܰܠ ܟܳܪܽܘܙܽܘܬܳܐ ܕܰܫܠܺܝ̈ܚܶܐ: ܘܥܰܠ ܦܽܘܢܳܝܳܐ ܕܥܰܡ̈ܡܶܐ ܠܘܳܬ ܐܰܠܗܳܐ: ܘܥܰܠ ܐܪ̈ܳܙܶܐ ܩܰܕܺܝ̈ܫܶܐ.
ܒܚܰܘܪ̈ܶܐ ܡܥܰܠܰܝܴ̈ܐ ܕܥܰܝ̈ܢܶܐ ܪ̈ܽܘܚܳܢܳܝܳܬܳܐ ܕܠܶܒܳܐ܆ ܕܡܶܢ ܪܽܘܚܳܐ ܕܰܐܠܗܳܐ ܝܳܕܰܥ ܟܰܣܝ̈ܬܳܐ ܡܶܬܬܰܥܒܰܕ. ܡܶܬܬܙܺܝܥ ܗܘܳܐ ܕܰܘܝܕ ܐܰܠܗܝܳܐ ܘܰܡܙܰܡܰܪ ܬܶܫܒܚ̈ܬܳܐ ܗܳܠܝܢ ܩܰܕܺܝ̈ܫܳܬܳܐ ܘܟܰܕ ܛܳܒ ܡܶܢ ܣܽܘܥܪ̈ܳܢܶܐ ܕܓܳܕܫܺܝܢ ܒܝܰܘ̈ܡܬܶܗ ܢܳܣܶܒ ܗܘܳܐ ܥܶܠܬܳܐ܆ ܡܶܬܬܙܺܝܥ ܘܰܡܙܰܡܰܪ ܒܪܽܘܚܳܐ. ܐܶܠܐ ܫܳܒܶܩ ܗܘܳܐ ܠܗܳܝ ܕܡܶܬܚܰܙܝܳܐ. ܘܡܶܬܓܰܘܶܐ ܒܪܽܘܚܳܢܽܘܬܶܗ ܠܥܶܠ ܡܶܢ ܚܶܙܘ̈ܐ ܡܶܬܪ̈ܰܓܫܳܢܶܐ. ܘܡܶܬܝܰܕܥܳܢܳܐܝ̣ܬ ܡܙܰܡܰܪ ܗܘܳܐ ܬܶܫܒܚ̈ܬܶܗ. ܘܢܶܚܙܶܐ ܡܶܢ ܬܶܫܒܽܘܚܬܳܐ ܗܳܕܐ ܕܶܫܬܺܝܢ ܘܚܰܡܶܫ܆ ܐܰܝܟܰܢܳܐ ܟܰܕ ܡܶܢ ܣܽܘܥܪ̈ܳܢܶܐ ܡܶܬܚܰܙܝ̈ܢܶܐ ܢܣܰܒ ܥܶܠܬܳܐ܆ ܦܪܰܚ ܒܓܶܦ̈ܐ ܕܪܶܥܝܳܢܶܗ ܠܰܡܕܺܝܢ̱ܬܳܐ ܥܶܠܳܝܬܳܐ. ܘܰܚܠܰܛ ܬܶܫܒܽܘܚܬܳܐ ܡܶܬܚܰܙܝܳܢܺܝܬܳܐ ܒܡܶܬܝܰܕܥܳܢܺܝܬܳܐ. ܗܳܢܐ ܗܳܟܺܝܠ ܡܰܙܡܽܘܪܳܐ ܐܰܡܺܝܪ ܠܕܰܘܝܕ ܒܗܰܘ ܙܰܒܢܳܐ ܕܶܐܙܰܠ ܘܰܐܣܶܩ ܠܳܐܪܽܘܢܶܗ ܕܡܳܪܝܳܐ ܡܶܢ ܒܶܝܬ ܥܽܘܒܳܪ ܐܰܕܽܘܡ ܓܳܬܳܝܳܐ ܠܰܩܪܺܝܬܶܗ. ܟܰܕ ܓܶܝܪ ܠܒܰܝܬܶܗ ܕܗܳܢܐ ܡܶܢ ܩܕܳܡ ܝܰܪ̈ܚܶܐ ܬܠܳܬܳܐ ܐܰܣܛܝܶܗ ܗܘܳܐ ܕܰܘܝܕ ܠܳܐܪܽܘܢܳܐ. ܡܶܛܠ ܕܡܺܝܬ ܗܘܳܐ ܥܳܐܙܳܐ. ܟܰܕ ܐܰܘܫܶܛ ܐܺܝܕܶܗ ܘܰܣܡܰܟ ܠܳܐܪܽܘܢܳܐ ܕܚܶܠ ܗܘܳܐ ܕܰܘܝܕ. ܘܠܐ ܫܰܒܩܳܗ̇ ܠܩܺܐܒܽܘܬܳܐ ܕܬܶܣܰܩ ܒܗܰܘ ܙܰܒܢܳܐ ܠܨܶܗܝܘܢ ܩܪܺܝܬܶܗ ܕܡܰܠܟܳܐ. ܗܽܘ ܕܶܝܢ ܥܽܘܒܳܪ ܗܳܢܐ ܡܶܢ ܐܰܪܥܳܐ ܕܰܐܕܽܘܡ ܐܺܝܬܰܘܗܝ ܗܘܳܐ܆ ܘܠܽܘܩܕܰܡ ܥܪܰܩ ܗܘܳܐ ܡܶܢ ܐܰܪܥܶܗ ܘܝܬܶܒ ܒܓܳܬ ܕܰܦܠܶܫܬܳܝ̈ܐ. ܘܡܶܢ ܒܳܬܰܪܟܶܢ ܢܦܰܩ ܡܶܢ ܓܳܬ ܕܰܦܠܶܫܬܳܝ̈ܐ ܘܶܐܬܳܐ ܠܘܳܬ ܕܰܘܝܕ ܡܰܠܟܳܐ. ܘܰܓܙܰܪ ܘܰܗܘܳܐ ܥܶܒܪܳܝܳܐ. ܘܡܰܣܛܶܐ ܗܘܳܐ ܠܳܗ̇ ܡܳܕܶܝܢ ܠܩܺܐܒܽܘܬܶܗ ܕܡܳܪܝܳܐ ܠܒܰܝܬܶܗ ܕܗܳܢܐ. ܡܶܛܠ ܕܰܕܚܶܠ ܡܶܢ ܩܕܳܡܶܝܗ̇. ܘܟܰܕ ܠܗܳܢܐ ܒܰܪܶܟ ܚܰܝܠܳܐ ܕܐܪ̈ܳܙܶܐ ܩܰܕܺܝ̈ܫܶܐ ܗܰܘ ܕܰܒܓܰܘ ܐܳܪܽܘܢܳܐ. ܝܠܶܦ ܕܰܘܝܕ ܘܶܐܙܰܠ ܠܡܶܣܒܳܗ̇ ܠܩܺܐܒܽܘܬܳܐ ܡܶܢ ܬܰܡܳܢ. ܡܰܘܕܰܥ ܕܶܝܢ ܟܬܳܒܳܐ ܐܳܦ ܥܰܠ ܕܶܒܚ̈ܐ ܕܩܰܪܶܒ ܗܘܳܐ ܕܰܘܝܕ ܒܝܰܘܡܳܐ ܗܰܘ ܘܳܐܡܰܪ. ܘܰܗܘܳܐ ܟܰܕ ܗܰܠܶܟܘ ܫܩܺܝ̈ܠܰܝ ܐܳܪܽܘܢܳܐ ܫܶܬ ܦܣܴ̈ܥܳܢ ܕܒܰܚ ܕܰܘܝܕ ܬܰܘܪ̈ܶܐ ܡܦܰܛܡ̈ܐ. ܘܕܰܘܝܕ ܡܫܰܒܰܚ ܒܟܽܠ ܥܽܘܫܢܳܐ ܩܕܳܡ ܡܳܪܝܳܐ. ܘܕܰܘܝܕ ܠܒܺܝܫ ܗܘܳܐ ܦܶܕܬܳܐ ܕܒܽܘܨܳܐ. ܘܕܰܘܝܕ ܘܟܽܠܶܗ ܝܺܣܪܳܐܝܠ ܡܰܣܩܺܝܢ ܠܳܐܪܽܘܢܶܗ ܕܡܳܪܝܳܐ ܒܝܽܘܒܳܒܳܐ ܘܰܒܩܳܠܐ ܕܫܺܝܦܽܘܪܳܐ (ܒ ܫܡܘܐܝܠ ܘ: ܝܓ-ܝܗ). ܒܗܳܠܶܝܢ ܩܴ̈ܠܐ ܟܰܕ ܡܶܬܒܰܣܰܡ ܗܘܳܐ ܟܽܠܶܗ ܥܰܡܳܐ܆ ܐܰܘܣܶܦ ܕܰܘܝܕ ܟܰܕ ܐܳܡܰܪ:
ܠܳܟ ܝܳܐܝܳܐ ܬܶܫܒܽܘܚܬܳܐ ܐܰܠܗܳܐ ܒܨܶܗܝܽܘܢ܆ ܘܠܳܟ ܡܶܬܦܪܰܥ ܢܶܕܪܳܐ. ܫܳܡܰܥ ܨܠܽܘܬܝ ܠܘܳܬܳܟ ܟܽܠܒܣܰܪ ܢܺܐܬܶܐ. ܐܶܢܓܶܝܪ ܛܽܘܦܣܳܐ ܕܰܟܢܽܘܫܬܳܐ ܡܶܬܐܶܡܰܪ ܒܰܝܬܶܗ ܕܥܰܡܺܝܢܳܕܳܒ. ܥܳܐܙܳܐ ܗܰܘ ܕܰܐܘܫܶܛ ܐܺܝܕܶܗ ܘܶܐܚܰܕ ܒܳܐܪܽܘܢܶܗ ܕܡܳܪܝܳܐ ܠܛܽܘܦܣܳܐ ܕܪ̈ܺܝܫܰܝ ܟܳܗܢ̈ܐ ܗܳܢܘܢ ܕܰܐܘܫܶܛܘ ܐܺܝܕܳܐ ܒܡܳܪܳܗ̇ ܕܬܶܫܒܽܘܚܬܳܐ. ܒܰܝܬܶܗ ܕܥܽܘܒܳܪ ܐܰܕܽܘܡܳܝܳܐ ܗܰܘ ܕܡܶܢ ܥܰܡ̈ܡܶܐ. ܟܰܕ ܠܰܕܡܽܘܬܳܐ ܠܥܺܕܬܳܐ ܗܳܝ ܕܒܳܬܰܪ ܨܠܺܝܒܳܐ ܩܰܒܶܠܬܶܗ ܠܳܐܪܽܘܢܳܐ ܡܶܬܝܰܕܥܳܢܳܐ. ܡܳܕܶܝܢ ܨܶܗܝܽܘܢ ܩܪܺܝܬܶܗ ܕܡܰܠܟܳܐ. ܕܠܳܗ̇ ܐܶܬܥܰܠܺܝ ܐܳܪܽܘܢܳܐ ܡܶܢ ܒܳܬܰܪ ܕܰܢܦܰܩ ܡܶܢ ܟܢܽܘܫܬܳܐ ܘܡܶܢ ܒܶܝܬ ܥܰܡ̈ܡܶܐ. ܛܽܘܦܣܳܐ ܕܶܝܢ ܡܚܰܘܝܳܐ ܠܰܢ ܕܗܳܝ ܐܽܘܪܺܫܠܶܡ ܥܶܠܳܝܬܳܐ. ܡܶܛܠܗܳܢܐ ܟܰܕ ܡܶܬܟܰܪܟܺܝܢܰܢ ܒܗܳܕܶܐ ܚܰܩܠܐ ܩܰܕܺܝܫܬܳܐ. ܕܡܰܠܝܳܐ ܥܱ̈ܠܠܳܬܳܐ ܣܰܓܺܝ̈ܐܬܳܐ ܘܦܰܩ̈ܚܶܐ ܩܰܕܺܝ̈ܫܶܐ ܡܶܢ ܓܰܘܳܗ̇ ܟܳܣܚܺܝܢܰܢ. ܘܢܶܗܘܶܐ ܠܰܢ ܦܰܩܚܳܐ ܩܰܕܡܳܝܳܐ. ܫܽܘܪܳܝܳܐ ܕܗܳܕܶܐ ܬܶܫܒܽܘܚܬܳܐ. ܠܳܟ ܝܳܐܝܳܐ ܬܶܫܒܽܘܚܬܳܐ ܐܰܠܗܳܐ ܒܨܶܗܝܘܢ. ܝܰܬܺܝܪ ܡܶܢ ܒܰܝܬܳܐ ܕܚܰܕ ܓܰܒܪܳܐ ܡܶܣܟܺܢܳܐ. ܫܰܦܺܝܪ ܠܳܟ ܩܽܘܠܳܣܳܐ ܒܰܡܕܺܝܢܬܳܐ ܕܡܰܡܠܶܟ ܒܳܗ̇ ܥܰܒܕܳܟ. ܘܠܳܟ ܡܶܬܦܪܰܥ ܢܶܕܪܳܐ ܫܳܡܰܥ ܨܠܽܘܬܝ. ܠܘܳܬܳܟ ܟܽܠܒܣܰܪ ܢܺܐܬܶܐ. ܡܶܢ ܗܳܕܐ ܕܰܠܘܳܬܶܗ ܐܶܬܳܐ ܟܽܠܒܣܰܪ: ܗܳܝܕܶܝܢ ܟܳܦܳܐ ܘܣܳܓܕܳܐ ܠܶܗ ܟܽܠ ܒܽܘܪܟܳܐ ܕܰܫܡܰܝ̈ܢܶܐ ܘܕܰܐܪ̈ܥܳܢܳܝܶܐ. ܘܰܕܡܰܠܐܟ̈ܐ ܥܰܡ ܒܢܰܝ̈ܢܳܫܳܐ. ܐܰܝܟ ܕܶܐܡܰܪ ܦܰܘܠܽܘܣ ܐܰܠܗܳܝܳܐ܆ ܕܶܐܬܺܝܗܶܒ ܠܶܗ ܫܡܳܐ ܕܰܡܝܰܬܰܪ ܡܶܢ ܟܽܠ ܫܡܳܗܻ̈ܝܢ. ܕܒܰܫܡܶܗ ܕܝܶܫܽܘܥ ܟܽܠ ܒܽܘܪܟܳܐ ܬܶܟܽܘܦ ܕܒܰܫܡܰܝܳܐ ܘܒܰܐܪܥܳܐ ܘܕܰܠܬܰܚܬ ܡܶܢ ܐܰܪܥܳܐ. ܘܟܽܠ ܠܶܫܳܢܳܐ ܢܰܘܕܶܐ ܕܡܳܪܝܰܐ ܗ̄ܘ ܝܶܫܽܘܥ ܡܫܺܝܚܳܐ ܠܫܽܘܒܚܳܐ ܕܰܐܠܗܳܐ ܐܰܒܽܘܗܝ (ܦܝ̈ܠܝܦܣܝܐ ܒ: ܛ-ܝܐ). ܗܳܪܟܳܐ ܡܶܬܡܰܠܝܳܐ ܢܒܺܝܽܘܬܳܐ ܗܳܕܐ ܕܶܐܡܰܪ ܕܰܘܝܕ ܕܰܠܘܳܬܳܟ ܟܽܠܒܣܰܪ ܢܺܐܬܶܐ. ܡܳܐ ܕܶܐܫܬܰܥܒܰܕ ܠܶܗ ܟܽܠ ܪܺܝܫ ܘܟܽܠ ܫܽܘܠܛܳܢ ܘܟܽܠ ܚܰܝ̈ܠܺܝܢ ܐܰܝܟܰܢܳܐ ܕܦܰܫܶܩ ܡܳܪܰܢ ܢܰܗܺܝܪܳܐܝ̣ܬ ܡܶܠܬܳܐ ܕܥܰܠ ܕܺܝܢܳܐ ܘܳܐܡܰܪ ܟܰܕ ܡܰܠܶܦ ܕܳܐܬܝܳܐ ܠܰܡ ܫܳܥܬܳܐ ܕܶܐܡܰܬܝ ܕܡܺܝ̈ܬܶܐ ܢܶܫܡܥܽܘܢ ܩܳܠܶܗ ܕܰܒܪܶܗ ܕܰܐܠܗܳܐ ܢܺܚܽܘܢ (ܝܘܚܢܢ ܗ: ܟܗ). ܘܬܽܘܒ ܕܳܐܬܝܳܐ ܫܳܥܬܳܐ ܕܟܽܠܗܽܘܢ ܐܰܝܠܶܝܢ ܕܰܒܩܰܒܪ̈ܶܐ ܐܶܢܽܘܢ ܢܶܫܡܥܽܘܢ ܩܳܠܶܗ܆ ܐܰܝܠܶܝܢ ܕܰܥܒܰܕܘ ܛܳܒ̈ܬܳܐ ܠܰܩܝܳܡܬܳܐ ܕܚܰܝ̈ܐ ܘܰܐܝܠܶܝܢ ܕܰܥܒܰܕܘ ܒܺܝ̈ܫܳܬܳܐ ܠܰܩܝܳܡܬܳܐ ܕܕܺܝܢܳܐ (ܝܘܚܢܢ ܗ: ܟܚ-ܟܛ). ܕܠܽܘܩܒܰܠ ܐܰܝܠܶܝܢ ܕܰܒܬܰܪ̈ܥܝܳܬܳܐ ܦܰܚܺܝ̈ܚܳܬܳܐ ܟܪܺܝܗܺܝܢ. ܐܶܡܰܪ ܪܽܘܚܳܐ ܒܝܰܕ ܡܙܰܡܪܳܢܳܐ.
ܕܡܷ̈ܠܐ ܕܥܰܘܴ̈ܠܶܐ ܥܫܶܢܶܝ̈ܢ ܡܶܢܝ. ܡܷ̈ܠܐ ܕܥܰܘ̈ܠܶܐ ܩܳܪܶܐ ܠܗܶܝܢ. ܥܰܠ ܕܰܟܪܺܝܗܺܝܢ ܒܪܶܚܡܰܬ ܪ̈ܓܺܝܓܳܬܳܐ. ܘܰܕܢܶܬܩܰܪܒܽܘܢ ܠܕܽܘܒܳܪ̈ܶܐ ܟܺܐܢ̈ܐ ܥܰܣ̈ܩܶܐ ܠܗܽܘܢ. ܐܶܠܐ ܢܒܺܝܐ ܟܰܕ ܠܘܳܬ ܒܰܣܺܝܡܽܘܬܳܐ ܕܰܡܪܰܚܡܳܢܽܘܬܳܐ ܡܶܬܦܢܶܐ ܒܰܬܝܳܒܽܘܬܳܐ ܐܳܡܰܪ:
ܘܰܚܛܳܗܱ̈ܝ ܐܰܢܬ ܬܚܰܣܶܐ ܐܶܢܽܘܢ. ܡܰܢ ܕܒܳܟ ܠܰܡ ܠܳܐ ܡܶܬܚܰܣܶܐ܆ ܠܳܐ ܡܶܫܬܘܶܐ ܕܰܠܒܰܝܬܳܟ ܗܰܘ ܕܒܰܫܡܰܝܳܐ ܡܶܬܡܰܛܶܐ.
ܛܽܘܒܰܘܗܝ ܠܡܰܢ ܕܨܳܒܶܐ ܐܰܢܬ ܒܶܗ: ܘܰܡܩܰܪܶܒ ܐܰܢܬ ܠܶܗ ܕܢܶܥܡܰܪ ܒܕܰܝܪܳܟ. ܐܳܦ ܥܰܠ ܗܳܠܶܝܢ ܐܳܡܪܺܝܢ ܐ̱ܢܳܫܻ̈ܝܢ ܕܰܟܡܳܐ ܒܡܰܢ ܕܨܳܒܶܐ ܡܩܰܪܶܒ ܠܕܰܝܪܶܗ. ܘܰܠܡܰܢ ܕܠܳܐ ܨܳܒܶܐ ܕܳܚܶܩ ܡܶܢ ܬܰܪܥܶܗ. ܠܰܝܬ ܥܶܕܠܳܝܳܐ ܠܰܐܝܠܶܝܢ ܕܠܳܐ ܩܰܪܺܝܒܺܝܢ ܠܘܳܬܶܗ. ܗܽܘ ܠܰܡ ܨܳܒܶܐ ܘܩܳܪܶܐ ܠܰܐܝܠܶܝܢ ܕܡܰܚܶܒ. ܘܥܰܠ ܐܰܝܠܶܝܢ ܕܠܐ ܨܳܒܶܐ ܦܳܩܶܕ ܡܶܬܪܰܚܩܳܢܽܘܬܳܐ. ܐܳܦ ܒܗܳܕܐ ܐ̱ܢܳܫܺܝ̈ܢ ܣܰܓܺܝ ܛܥܰܘ ܕܳܐܡܪܺܝܢ ܕܰܐܠܗܳܐ ܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢܺܚܽܘܢ. ܐܰܟܡܳܐ ܕܡܶܠܬܳܐ ܫܠܺܝܚܳܝܬܳܐ ܐܰܠܦܰܬ܆ ܡܳܕܝܢ ܕܡܶܛܠ ܕܰܒܟܽܠܗܘܢ ܨܳܒܶܐ. ܘܠܰܝܬ ܘܠܐ ܚܰܕ ܘܠܐ ܨܳܒܶܐ ܒܶܗ. ܗܳܢܘܢ ܕܠܐ ܨܳܒܶܐ ܕܢܺܚܽܘܢ. ܠܰܘ ܗܽܘ ܕܚܰܩ ܐܶܢܘܢ ܡܶܢ ܬܰܪܥܶܗ ܐܶܠܐ ܗܶܢܘܢ ܐܰܪܚܶܩܘ ܡܶܢ ܠܘܳܬܶܗ܆ ܟܰܕ ܩܰܕܶܡܘ ܠܒܰܟܘ ܒܢܰܦܫܗܽܘܢ ܡܶܢ ܥܶܠܰܬ ܪܰܦܝܽܘܬܳܐ ܚܽܘܒܳܐ ܕܰܠܘܳܬ ܒܺܝ̈ܫܳܬܳܐ. ܡܳܕܝܢ ܗܳܠܝܢ ܕܨܳܒܶܐ ܒܗܽܘܢ ܘܰܡܩܰܪܶܒ ܠܗܽܘܢ ܠܕܰܝܪܶܗ. ܥܰܠ ܕܺܝܕܰܥܘ ܨܶܒܝܳܢܶܗ ܕܰܐܠܗܳܐ ܕܒܳܥܶܐ ܕܢܺܚܽܘܢ ܒܢܰܝ̈ܢܳܫܳܐ. ܘܡܶܛܠܗܳܢܐ ܐܺܝܬ ܠܗܽܘܢ ܡܽܘܠܟܳܢܳܐܝ̣ܬ ܣܰܒܥܽܘܬܳܐ ܕܡܶܢ ܒܽܘ̈ܣܳܡܶܐ ܪ̈ܽܘܚܳܢܳܝܶܐ ܕܛܰܝܶܒ ܐܰܠܗܳܐ ܠܰܓܒܰܘ̈ܗܝ. ܐܶܡܰܪ ܓܶܝܪ ܢܒܺܝܐ܆
ܘܢܶܣܒܰܥ ܡܶܢ ܛܳܒ̈ܬܶܗ ܕܒܰܝܬܳܟ: ܘܡܶܢ ܩܰܕܺܝܫܽܘܬܶܗ ܕܗܰܝܟܠܳܟ. ܘܡܶܢ ܙܰܕܺܝܩܽܘܬܳܟ ܕܚܺܝܠܬܳܐ. ܐܳܦ ܗܳܠܝܢ ܕܡܶܬܒܰܣܡܺܝܢ ܒܐܪ̈ܳܙܶܐ ܩܰܕܺܝ̈ܫܶܐ ܕܥܺܕܬܶܗ ܕܰܐܠܗܳܐ܆ ܫܽܘܪܳܝܳܐ ܓܶܝܪ ܕܛܳܒ̈ܬܳܐ ܐܰܠܗܳܝ̈ܬܳܐ. ܗܳܠܝܢ ܐܶܢܝܢ ܡܫܰܡܠܝܳܐܝ̣ܬ ܡܳܐ ܕܶܐܬܚܰܙܝܰܬ ܗܳܝ ܥܺܕܬܳܐ ܕܰܠܥܶܠ ܡܶܢ ܫܡܰܝܳܐ. ܘܡܳܐ ܕܶܐܬܚܙܺܝ ܗܰܘ ܒܰܝܬܳܐ ܠܐ ܥܒܺܝܕ ܒܺܐܝܕܰܝܴ̈ܐ. ܘܡܶܬܚܰܘܝܳܐ ܗܳܝ ܟܳܗܢܽܘܬܳܐ ܕܰܠܩܽܘܫܬܺܝܢ ܕܓܳܡܪܳܐ ܘܰܡܫܰܡܠܝܳܐ ܕܶܒܚܶܝܗ̇. ܕܠܐ ܡܶܨܥܳܝܽܘܬܳܐ ܕܕܶܒܚ̈ܐ ܕܚܰܝ̈ܘܳܬܳܐ. ܘܒܳܬܰܪ ܗܳܠܝܢ ܐܳܡܰܪ ܢܒܺܝܐ:
ܥܢܺܝܢܝ ܐܠܗܳܐ ܦܳܪܽܘܩܰܢ. ܣܰܒܪܳܐ ܕܟܽܠܗܽܘܢ ܣܰܘ̈ܦܶܝܗ̇ ܕܰܐܪܥܳܐ܆ ܘܰܕܥܰܡ̈ܡܶܐ ܪ̈ܰܚܺܝܩܶܐ. ܒܗܳܠܝܢ ܥܰܠ ܩܪܳܝܬܳܐ ܕܥܺܕܬܐ ܨܳܒܶܐ ܢܒܰܕܶܩ ܪܽܘܚܳܐ ܕܰܐܠܗܳܐ. ܟܰܕ ܡܰܘܕܰܥ ܥܰܠ ܣܰܒܪܳܐ ܘܥܰܠ ܦܽܘܢܳܝܳܐ ܕܥܰܡ̈ܡܶܐ ܪ̈ܰܚܺܝܩܶܐ ܠܘܳܬ ܐܰܠܗܳܐ. ܘܰܕܗܽܘ ܐܰܬܩܶܢ ܛܽܘܪ̈ܐ ܘܪ̈ܳܡܳܬܳܐ ܡܶܢ ܒܪܺܝܫܺܝܬ.
ܡܰܬܩܶܢ ܠܰܡ ܛܽܘܪ̈ܐ ܒܚܰܝܠܶܗ ܘܡܶܬܥܰܫܰܢ ܒܓܰܢ̱ܒܳܪܽܘܬܶܗ: ܘܰܡܫܰܬܶܩ ܡܰܚܫܽܘ̈ܠܐܷ ܕܝܰܡ̈ܡܶܐ ܘܩܳܠܐ ܕܓܰܠܠܰܝ̈ܗܽܘܢ. ܒܗܳܠܶܝܢ ܕܶܐܡܰܪ ܥܰܠ ܛܽܘܪ̈ܐ ܬܪܶܝܢ ܣܽܘ̈ܟܳܠܺܝܢ ܐܰܘܕܰܥ. ܚܰܕ ܕܰܐܠܗܳܐ ܗܰܘ ܕܶܐܬܓܠܺܝ ܒܰܒܣܰܪ. ܗܽܘ ܐܰܬܩܶܢ ܛܽܘܪ̈ܶܐ ܗܳܠܝܢ ܡܶܬܚܰܙܝ̈ܢܶܐ ܡܶܢ ܩܕܺܝܡ. ܘܗܽܘ ܐܰܬܩܶܢ ܐܦ ܛܽܘܪ̈ܶܐ ܡܶܬܝܰܕܥ̈ܢܶܐ. ܡܳܐ ܠܰܡ ܕܡܶܬܓܠܐܷ ܘܗܳܕܐ ܥܳܒܶܕ. ܕܰܡܫܰܬܶܩ ܡܰܚܫܽܘ̈ܠܐ ܘܝܰܡ̈ܡܶܐ ܘܩܳܠܐ ܕܓܰܠܠܰܝ̈ܗܽܘܢ ܒܣܰܓܺܝ̈ܐܬܳܐ ܡܶܬܦܰܚܡܺܝܢ ܗܳܢܘܢ ܕܡܶܢ ܒܪܺܝܫܺܝܬ ܫܳܓܫܺܝܢ ܠܥܳܠܡܳܐ ܒܰܚܛܺܝܬܳܐ. ܐܶܠܐ ܢܳܝܚܺܝܢ ܘܡܶܬܒܰܛܠܺܝܢ ܡܳܐ ܕܰܡܥܺܝܪܳܐ ܠܶܗ ܒܳܥܽܘܬܳܐ ܕܬܰܠܡܺܝ̈ܕܶܐ ܕܶܝܢ ܠܡܳܪܶܗ ܕܝܰܡܳܐ. ܘܰܠܗܰܘ ܕܫܰܠܺܝܛ ܐܳܦ ܥܰܠ ܡܰܫܒ̈ܐ ܕܪܽܘܚܳܐ. ܟܰܕ ܡܶܚܕܳܐ ܩܳܥܝܳܐ ܢܒܺܝܽܘܬܳܐ: ܥܢܺܝܢܝ ܐܰܠܗܳܐ ܦܳܪܽܘܩܰܢ. ܘܬܰܠܡܺܝ̈ܕܶܐ ܡܥܺܝܪܺܝܢ ܠܶܗ ܘܳܐܡܪܺܝܢ: ܡܳܪܰܢ ܦܰܨܳܢ ܐܳܒܕܺܝܢܰܢ (ܡܬܝ ܚ: ܟܗ ܡܪܩܘܣ ܕ: ܠܚ ܠܘܩܐ ܚ: ܟܕ). ܘܩܳܐܷܡ ܘܟܳܐܷܐ ܒܪ̈ܽܘܚܶܐ ܘܫܳܬܩܴ̈ܢ. ܘܰܠܝܰܡܳܐ ܐܳܡܰܪ: ܫܠܺܝ ܙܓܺܝܪ ܐܰܢܬ (ܡܪܩܘܣ ܕ: ܠܛ). ܘܢܳܝܚܺܝܢ ܘܗܳܘܶܐ ܫܶܠܝܳܐ ܪܰܒܳܐ. ܫܰܦܺܝܪ ܕܶܝܢ ܡܰܝܬܶܐ ܪܽܘܚܳܐ ܒܳܬܰܪ ܗܳܝ ܡܶܠܬܳܐ ܕܰܡܫܰܬܶܩ ܡܰܚ̈ܫܽܘܠܐ ܕܝܰܡܡ̈ܐ ܘܩܳܠܐ ܕܓܰܠܠܰܝ̈ܗܽܘܢ. ܐܳܦ ܒܳܥܽܘܬܳܐ ܘܕܶܡ̈ܥܶܐ ܕܗܳܘܶܝܢ ܒܰܝܢܳܬ ܥܰܡܡ̈ܐ ܚܰܛܳܝ̈ܐ ܡܶܛܠ ܥܒܳܕܰܝ̈ܗܘܢ ܩܰܕܡܳܝ̈ܐ.
ܢܶܬܕܰܠܚܽܘܢ ܥܰܡܡ̈ܐ: ܘܢܶܕܚܠܽܘܢ ܥܳܡܽܘܪ̈ܶܝܗ̇ ܕܰܐܪܥܳܐ. ܘܡܶܢ ܒܳܬܰܪ ܕܶܐܫܬܰܬܰܩܘ ܡܰܚܫܽܘ̈ܠܐ ܗܳܢܘܢ ܕܡܰܥܒܕܺܝܢ ܗܘܰܘ ܚܛܺܝܬܳܐ. ܢܶܦܩܰܬ ܣܒܰܪܬܳܐ ܒܝܰܕ ܫܠܺܝܚ̈ܐ ܠܥܳܠܡܳܐ ܘܗܰܠܶܟ ܝܽܘܠܦܳܢܳܐ ܕܚܰܝ̈ܐ ܒܰܝܢܳܬ ܫܰܪ̈ܒܳܬܳܐ ܕܰܐܪܥܳܐ. ܘܰܕܢܰܚ ܢܽܘܗܪܳܐ ܘܶܐܬܦܪܶܣ ܚܶܫܽܘܟܳܐ ܘܰܫܬܶܩܘ ܚܱ̈ܓܶܐ ܕܰܚܛܺܝܬܳܐ ܡܶܢ ܟܰܪ̈ܟܶܐ ܘܰܡܕܺܝ̈ܢܳܬܳܐ. ܘܰܒܛܶܠܘ ܡܶܫ̈ܬܘܳܬܳܐ ܕܕܰܝ̈ܘܶܐ ܡܶܢ ܒܽܘܣܳܡܳܐ ܕܰܒܢܴ̈ܬ ܛܽܘܥܝܰܝ ܘܶܐܬܦܢܺܝܘ ܠܘܳܬ ܐܰܠܗܳܐ ܘܰܕܚܶܠܘ ܡܶܢ ܕܺܝܢ̈ܐ ܕܰܐܠܗܳܐ. ܗܳܟܰܢܐ ܓܶܝܪ ܐܶܡܰܪ ܢܒܺܝܐ܆
ܢܶܬܕܰܠܚܽܘܢ ܥܰܡ̈ܡܶܐ ܘܢܶܕܚܠܽܘܢ ܥܳܡܽܘܪ̈ܶܝܗ̇ ܕܰܐܪܥܳܐ: ܡܶܢ ܐܳܬܘܴ̈ܬܳܟ ܘܡܶܢ ܡܰܦܴ̈ܩܰܝ ܨܰܦܪܳܐ ܘܪܰܡܫܳܐ. ܩܰܕܡܳܝܳܐܝ̣ܬ ܓܶܝܪ ܕܚܶܠܘ ܡܶܢ ܐܳܬܘ̈ܬܳܐ ܗܳܠܶܝܢ ܕܰܗ̈ܘܰܝ ܒܰܨܠܺܝܒܳܐ. ܘܡܶܢ ܗܘܱ̈ܝ ܕܰܗܘܱ̈ܝ ܒܝܰܕ ܫܠܺܝ̈ܚܶܐ. ܘܒܳܬܰܪܟܶܢ ܥܰܠ ܡܰܦܩܴ̈ܢܶܐ ܕܨܰܦܪܳܐ ܘܪܰܡܫܳܐ. ܠܰܘ ܡܶܢ ܗܳܠܝܢ ܡܰܦ̈ܩܳܢܶܐ ܕܨܰܦܪܳܐ ܘܪܰܡܫܳܐ ܕܰܒܗܳܢܐ ܥܳܠܡܳܐ. ܗܳܠܝܢ ܓܶܝܪ ܠܐ ܕܳܚܠܺܝܢ. ܘܠܐ ܕܳܠܚܺܝܢ ܘܠܐ ܡܕܰܘܕܺܝܢ. ܘܨܰܦܪܳܐ ܡܶܬܦܪܶܫ ܠܰܒܢܱ̈ܝ ܡܰܠܟܽܘܬܳܐ. ܘܠܐ ܬܘܒ ܦܳܓܰܥ ܒܶܗ ܪܰܡܫܳܐ ܕܰܚܛܺܝܬܳܐ ܘܰܡܫܰܚܠܶܦ ܠܶܗ ܒܚܶܫܽܘܟܳܐ. ܕܰܠܘܳܬ ܗܳܕܐ ܡܰܠܦܳܢܽܘܬܳܐ ܡܥܰܠܰܝܬܳܐ ܐܰܝܬܺܝ ܐܶܢܘܢ ܫܽܘܒܚܶܗ ܕܰܨܠܺܝܒܳܐ. ܗܰܘ ܕܒܳܗ̇ ܐܶܬܕܰܟܪܳܗ̇ ܐܠܗܳܐ ܐܰܝܟ ܠܰܐܪܥܳܐ ܐܰܝܟ ܕܶܐܡܰܪ ܢܒܺܝܐ:
ܕܰܒܫܽܘܒܚܳܐ ܐܶܬܕܟܰܪܬܳܗ̇ ܠܰܐܪܥܳܐ. ܗܳܢܰܘ ܒܰܨܠܺܝܒܳܐ ܠܰܡ ܐܶܬܕܟܰܪܬܳܗ̇ ܠܰܐܪܥܳܐ. ܨܠܺܝܒܳܐ ܓܶܝܪ ܫܽܘܒܚܰܐ ܗܘ ܕܰܐܠܗܳܐ. ܐܰܝܟ ܕܶܐܡܰܪ ܝܽܘܚܰܢܳܢ ܟܳܪܽܘܙܶܗ ܕܰܨܠܺܝܒܳܐ: ܕܠܐ ܠܰܡ ܥܕܰܟܺܝܠ ܐܶܬܝܰܗܒܰܬ ܗܘܳܬ ܪܽܘܚܳܐ ܡܶܛܠ ܕܠܐ ܥܕܰܟܺܝܠ ܐܶܫܬܰܒܰܚ ܗܘܳܐ ܝܶܫܽܘܥ (ܝܘܚܢܢ ܙ: ܠܛ). ܗܢܘ ܠܐ ܥܕܰܟܺܝܠ ܐܶܨܛܠܶܒ ܗܘܳܐ. ܟܰܕ ܕܶܝܢ ܐܶܨܛܠܶܒ ܝܰܗܒ ܪܽܘܚܳܐ ܩܰܕܺܝܫܳܐ ܘܰܪܕܰܘ ܕܶܝܢ ܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝ̈ܐ ܡܶܢ ܟܰܪܣܳܐ ܕܬܰܠܡܺܝ̈ܕܶܐ ܒܶܝܬ ܥܰܡ̈ܡܶܐ ܚܰܛܳܝ̈ܐ. ܐܰܝܟ ܕܙܰܡܰܪ ܕܰܘܝܕ ܘܶܐܡܰܪ:
ܕܰܐܫܠܺܝܬܳܗ̇. ܠܰܐܪܥܳܐ ܡܶܢ ܪ̈ܰܘܒܶܐ ܣܰܓܺܝ̈ܐܐ ܕܣܶܓܕܰܬ ܨܰܠܡ̈ܐ ܕܰܦܬܰܟܪܽܘܬܳܐ.
ܘܰܒܣܽܘܓܳܐܐ ܐܰܥܬܰܪܬܳܗ̇. ܬܰܦ̈ܐ ܕܰܐܠܗܳܐ ܡܠܶܝܢ ܡܰܝ̈ܐ. ܢܒܺܝܐ ܐܶܡܰܪ ܬܰܦ̈ܐ. ܡܳܪܰܢ ܕܶܝܢ ܐܰܘܣܶܦ ܥܰܠ ܬܰܦ̈ܐ ܕܰܢܒܺܝܽܘܬܳܐ. ܫܰܚܠܶܦ ܙܥܽܘܪܽܘܬ ܬܰܦ̈ܐ. ܘܰܥܒܰܕ ܢܰܗܪ̈ܰܘܳܬܳܐ ܠܰܫܠܺܝ̈ܚܰܘܗܝ ܩܰܕܺܝ̈ܫܶܐ. ܕܢܶܣܦܩܽܘܢ ܠܟܽܠܗܽܘܢ ܥܰܡ̈ܡܶܐ ܡܟܰܬܡܱ̈ܝ ܒܰܚܛܳܗ̈ܐ. ܠܰܘ ܕܠܐ ܐܽܘܟܠܐܴ ܥܒܰܕ ܐܶܢܘܢ ܗܰܘ ܕܰܩܪܳܐ ܐܶܢܘܢ ܠܒܽܘܣܳܡܶܗ. ܐܶܠܐ ܐܰܬܩܶܢ ܠܗܽܘܢ ܡܶܐܟܽܘܠܬܳܐ ܡܥܰܠܰܝܬܳܐ.
ܛܰܝܶܒܬ ܠܰܡ ܡܶܐܟܽܘܠܬܗܽܘܢ ܟܰܕ ܬܰܩܶܢܬܳܗ̇. ܡܳܢܳܐܗܝ ܕܶܝܢ ܡܶܐܟܽܘܠܬܳܐ. ܘܰܐܝܟܰܢܐ ܕܶܝܢ ܘܬܰܩܶܢܬܳܗ̇. ܟܰܕ ܓܶܝܪ ܫܩܰܠ ܐܰܠܗܳܐ ܡܶܢ ܒܬܽܘܠܬܳܐ ܦܰܓܪܳܐ ܚܳܫܽܘܫܳܐ ܘܡܳܝܽܘܬܳܐ. ܒܗܳܝ ܕܟܰܕ ܠܐ ܡܥܰܠܰܝ ܗܘܳܐ ܡܶܢ ܡܰܘܬܳܐ ܘܰܚܒܳܠܐ. ܒܳܬܰܪ ܕܩܰܒܶܠ ܚܰܫ̈ܐ ܢܳܡܽܘܣܳܝ̈ܐ ܘܡܰܘܬܳܐ ܨܒܶܝܢܳܝܳܐ. ܘܫܰܚܠܦܶܗ ܠܦܰܓܪܳܐ ܗܰܘ ܡܳܝܽܘܬܳܐ. ܡܶܢ ܒܳܬܰܪ ܕܩܰܒܶܠ ܢܶܣܝܳܢܶܗ ܕܗܳܢܐ ܬܠܳܬܳܐ ܝܰܘ̈ܡܺܝܢ. ܗܳܝܕܶܝܢ ܐܰܩܺܝܡܶܗ ܒܠܐܴ ܡܶܬܚܰܒܠܳܢܽܘܬܐ. ܘܬܰܩܢܶܗ ܘܥܰܒܕܶܗ ܠܐ ܡܳܝܽܘܬܳܐ. ܐܠܐ ܡܶܛܠܗܳܕܐ ܡܬܰܩܢܳܐܝ̣ܬ ܐܺܝܬܶܝܗ̇ ܠܰܢ ܡܶܐܟܽܘܠܬܳܐ ܕܦܰܓܪܳܐ ܡܳܪܳܢܳܝܳܐ ܘܰܕܡܳܐ ܩܰܕܺܝܫܳܐ. ܒܗܳܝ ܕܠܰܘ ܡܳܝܽܘܬܐ ܘܡܶܬܚܰܒܠܳܢܳܐ ܐܳܟܠܺܝܢܰܢ ܡܶܢ ܦܳܬܽܘܪܳܐ ܗܳܫܐ ܐܪܳܙܳܢܳܝܳܐ. ܐܶܠܐ ܦܰܓܪܳܐ ܕܶܐܬܬܰܩܰܢ ܒܰܩܝܳܡܬܳܐ ܠܠܐܴ ܡܶܬܚܰܒܠܳܢܽܘܬܐ. ܘܬܽܘܒ ܡܰܘܣܶܦ ܥܽܘܗܕܳܢܳܐ ܕܫܶܩܝܳܐ ܕܠܐ ܚܳܫܽܘܫܽܘܬܐ. ܗܰܘ ܕܰܐܪܘܺܝ ܠܢܰܦ̈ܫܳܬܳܐ ܕܰܬܪ̈ܺܝܨܰܝ ܫܽܘܒܚܳܐ.
ܟܪ̈ܳܒܶܝܗ̇ ܐܰܪܘܺܝܬ ܕܢܶܬܪܰܒܽܘܢ ܦܺܐܪ̈ܶܝܗ̇. ܟܰܕ ܚܠܳܦ ܥܺܕܬܳܐ ܐܰܪܥܳܐ ܡܫܰܡܰܗ. ܘܰܨܠܽܘܬܐ ܒܰܟܪ̈ܳܒܶܐ ܡܰܡܬܶܠ. ܗܳܢܘܢ ܕܡܶܢܩܕܺܝܡ ܐܺܝܬܰܝܗܽܘܢ ܗܘܰܘ ܩܫܰܝ̈ܐ ܘܛܰܪ̈ܳܢܶܐ. ܟܰܕ ܕܶܝܢ ܢܶܦܩܰܬ ܩܺܝܩܢܳܐ ܨܠܺܝܒܳܐ ܦܶܠܚܰܬ ܘܕܰܒܪܰܬ ܐܶܢܘܢ ܦܰܕܳܢܳܐ ܕܰܫܠܺܝܚܽܘܬܐ. ܘܰܐܝܟ ܕܠܰܟܪ̈ܳܒܶܐ ܨܪܰܘ ܐܶܢܘܢ ܒܝܰܕ ܝܽܘܠܦܳܢܳܐ ܕܶܐܘܰܢܓܶܠܝܽܘܢ. ܐܰܝܟ ܣܶܟܬܳܐ ܗܳܝ ܕܰܐܡܺܝܪܳܐ ܕܨܳܪܝܳܐ ܐܰܪܥܳܐ. ܢܒܰܓܘ ܢܽܘܪ̈ܒܶܐ ܕܣܰܒܪܳܐ ܘܗܰܝܡܳܢܽܘܬܐ ܒܓܶܠܝܳܢܳܐ ܕܚܰܢܦܽܘܬܳܐ. ܘܶܐܬܚܙܺܝܘ ܣܡܳܕܪ̈ܶܐ ܫܰܦܺܝܪ̈ܶܐ ܒܰܓܦܶܬܳܐ ܕܶܐܬܚܰܒܠܰܬ ܒܢܺܝܒܶܗ ܕܰܚܙܺܝܪܳܐ ܕܥܳܒܳܐ. ܘܣܰܓܺܝ ܫܘܰܚ̈ܝ ܐܰܝܟ ܦܰܩܚܱ̈ܝ ܢܺܝܣܳܢ ܥܺܕ̈ܬܳܐ ܘܕܰܝܪ̈ܳܬܳܐ ܒܪ̈ܺܝܫܰܝ ܛܽܘܪ̈ܐ ܘܚܰܘܝܰܬ ܬܺܬܳܐ ܕܐ̱ܢܳܫܽܘܬܐ ܐܶܒܒܳܢ̈ܐ ܕܦܺܐܪ̈ܶܐ ܚܠܰܝܴ̈ܐ. ܟܰܕ ܠܰܘ ܩܰܫܝܳܐܝ̣ܬ ܐܶܬܚܰܙܝܰܬ ܡܰܚܰܬܬܶܗ ܕܡܶܛܪܳܐ ܕܰܣܒܰܪܬܳܐ. ܐܶܠܐ ܒܰܕܡܽܘܬܳܐ ܕܰܪ̈ܣܺܝܣܶܐ ܕܰܗܺܝ̈ܢܶܐ ܘܫܰܚܺܝ̈ܢܶܐ ܐܰܝܟ ܕܶܐܡܰܪ:
ܒܰܪ̈ܣܺܝܣܶܐ ܬܶܬܪܰܒܶܐ ܘܡܰܘܥܺܝܬܳܗ̇ ܬܶܬܒܰܪܰܟ. ܕܰܐܝܟ ܗܳܟܰܢܐ ܗܘܰܘ ܝܽܘ̈ܠܦܳܢܶܐ ܒܰܣܺܝ̈ܡܶܐ ܕܶܐܘܰܢܓܶܠܝܽܘܢ. ܟܰܕ ܛܥܺܝܢܺܝܢ ܫܽܘܒܩܳܢܳܐ ܠܚܰܛܳܝ̈ܐ. ܟܰܕ ܡܰܣܚܶܝܢ ܘܰܡܕܰܗܢܺܝܢ ܢܰܦ̈ܫܳܬܳܐ ܕܰܒܠܺܝ̈ ܡܶܢ ܢܰܚܽܘܒܽܘܬܳܐ ܕܰܚܛܺܝܬܳܐ. ܟܰܕ ܒܽܘܪܟܬܳܐ ܕܪܽܘܚܳܐ ܩܰܕܺܝܫܳܐ ܫܳܦܥܳܐ ܗܘܳܐ ܒܰܨܠܽܘܬܳܐ ܥܰܠ ܐܰܝܠܝܢ ܕܥܳܡܕܺܝܢ. ܗܳܕܐ ܓܶܝܪ ܡܰܘܕܥܳܐ ܕܡܶܬܒܰܪܟܳܐ ܗܘܳܬ ܡܰܘܥܺܝܬܳܐ. ܘܠܐ ܦܳܣܩܺܝܢ ܢܶܒ̈ܓܶܐ ܕܡܰܦܪܰܥ ܥܶܩܳܪܳܐ ܕܰܢܨܺܝܒ ܥܰܠ ܡܰܝ̈ܐ ܕܰܥܡܳܕܳܐ ܩܰܕܺܝܫܳܐ. ܟܰܕ ܡܰܘܫܛܳܐ ܥܺܕܬܳܐ ܒܟܽܠ ܦܶܢ̈ܝܳܢ ܟܠܺܝ̈ܠܐ ܕܰܥܡܺܝ̈ܕܶܐ ܠܡܳܪܳܗ̇ ܕܰܥܠܰܠܬܳܐ.
ܒܰܪܶܟ ܠܰܡ ܟܠܺܝ̈ܠܐ ܕܫܰܢ̱ܬܳܐ ܒܛܰܝܒܽܘܬܳܟ. ܟܠܺܝܠܐܴ ܗܰܘ ܕܡܶܢ ܦܰܩܚ̈ܐ ܡܶܬܝܰܕܥ̈ܢܶܐ ܓܕܰܠܘ ܫܠܺܝܚ̈ܐ. ܘܩܰܪܶܒܘ ܠܰܡܫܺܝܚܳܐ. ܫܰܢ̱ܬܳܐ ܕܶܝܢ ܐܺܝܬܶܝܗ̇ ܣܒܰܪܬܳܐ ܗܳܝ ܕܦܶܪܚܰܬ ܥܰܠ ܐܰܪܥܳܐ ܒܰܬܪܰܥܣܰܪ ܬܰܠܡܺܝ̈ܕܶܐ ܐܰܝܟ ܕܒܰܬܪܰܥܣܰܪ ܝܰܪ̈ܚܶܐ. ܗܳܠܝܢ ܐܶܢܘܢ ܓܶܝܪ ܝܰܪ̈ܚܶܐ ܡܶܬܝܰܕܥ̈ܢܶܐ ܘܰܡܡܰܙ̈ܓܶܐ ܘܒܰܣܺܝ̈ܡܶܐ ܕܙܰܝܚܽܘܗ̇ ܠܫܰܢ̱ܬܳܐ ܐܳܦ ܠܰܣܒܰܪܬܳܐ ܒܟܽܠ ܦܶܢ̈ܝܳܢ. ܘܰܟܠܺܝܠܐ ܕܰܡܗܰܝܡܢ̈ܐ ܚܨܰܕܘ ܡܶܢ ܥܰܡ̈ܡܶܐ. ܘܩܰܪܶܒܘ ܠܗܰܘ ܐܰܟܳܪܳܐ ܕܚܰܝ̈ܐ ܗܳܠܝܢ ܕܰܐܝܟ ܬܰܘܪ̈ܶܐ ܡܶܬܚܙܶܝܢ ܗܘܰܘ. ܘܡܶܢ ܦܽܘܠܚܳܢܗܽܘܢ ܗܘܰܘ ܒܶܝܬ ܥܰܡ̈ܡܶܐ ܬܰܘܪ̈ܶܐ ܘܥܶܓ̈ܠܐ ܡܦܰܛܡ̈ܐ. ܗܳܠܝܢ ܕܶܐܡܰܪ ܪܽܘܚܳܐ ܥܠܰܝܗܽܘܢ.
ܘܥܶܓ̈ܠܰܝܟ ܢܶܣܒܥܽܘܢ ܬܰܕܐܳܐ. ܥܶܓ̈ܠܐܷ ܡܶܬܩܪܶܝܢ ܡܗܰܝܡܢ̈ܐ ܕܡܶܢ ܥܰܡ̈ܡܶܐ. ܒܗܳܝ ܕܠܐ ܐܶܫܬܰܥܒܰܕܘ ܬܚܶܝܬ ܢܺܝܪܳܐ ܕܢܳܡܽܘܣܳܐ.
ܘܢܶܣܒܥܽܘܢ ܡܶܢ ܕܰܝܪ̈ܶܐ ܕܰܒܡܰܕܒܪܳܐ. ܡܰܕܒܪܳܐ ܠܰܐܪܥܳܐ ܕܥܰܡ̈ܡܶܐ ܡܫܰܡܰܗ. ܕܚܰܪܺܝܒ ܗܘܳܐ ܡܶܢ ܦܽܘܠܚܳܢܳܐ ܕܛܳܒܴ̈ܬܳܐ. ܐܰܝܟ ܕܳܐܦ ܡܰܕܒܪܳܐ ܡܓܰܙܰܝ ܡܶܢ ܦܽܘܠܚܳܢܳܐ ܡܫܰܘܚܰܕ. ܘܥܰܠ ܗܳܕܶܐ ܠܰܝܬ ܒܶܗ ܦܺܐܪ̈ܶܐ. ܒܗܳܢܳܐ ܗܘܱ̈ܝ ܕܰܝܪ̈ܶܐ ܕܰܫܠܳܡܳܐ ܘܰܕܫܰܝܢܳܐ. ܗܳܢܰܘ ܥܺܕ̈ܬܳܐ ܘܕܰܝܪ̈ܳܬܳܐ ܘܰܟܢܽܘܫܬܳܐ ܕܩܰܕܺܝ̈ܫܶܐ ܗܳܠܝܢ ܕܰܒܗܶܝܢ ܫܘܰܚ ܬܰܕܐܳܐ ܡܶܣܬܰܟܠܳܢܳܐ. ܗܰܘ ܕܣܰܒܰܥ ܠܥܶܓܠܐܴ ܘܠܰܐܪ̈ܘܳܢܶܐ ܡܶܬܝܰܕܥ̈ܢܶܐ ܘܒܳܬܰܪ ܗܳܠܝܢ ܡܰܝܬܶܐ ܪܽܘܚܳܐ ܘܳܐܡܰܪ܆
ܒܫܽܘܒܚܳܐ ܪ̈ܳܡܳܬܳܐ ܢܶܬܚܱ̈ܙܩܳܢ. ܘܢܶܠܒܫܽܘܢ ܫܰܡܺܝ̈ܢܶܐ ܕܥܳܢܴ̈ܐ. ܪ̈ܳܡܳܬܳܐ ܩܳܪܶܐ ܠܰܡܕܺܝ̈ܢܳܬܳܐ ܐܰܝܠܝܢ ܕܶܐܬܚ̈ܙܶܩܝ ܒܗܰܝܡܳܢܽܘܬܳܐ ܫܰܪܺܝܪܬܳܐ. ܘܫܰܡܺܝ̈ܢܶܐ ܐܶܢ ܫܠܺܝܚ̈ܐ ܒܬܰܘܪ̈ܶܐ ܡܶܬܡܰܬܠܺܝܢ. ܘܥܶܓ̈ܠܐܷ ܠܬܰܠܡܺܝ̈ܕܶܐ ܕܰܗܘܰܘ ܠܰܫܠܺܝ̈ܚܶܐ. ܫܰܡܺܝ̈ܢܶܐ ܕܥܳܢܴ̈ܐ ܠܰܒܬܽܘ̈ܠܐ ܘܰܠܩܰܕܺܝ̈ܫܶܐ ܘܠܰܢܙܺܝܪ̈ܶܐ ܘܰܠܥܽܘ̈ܕܝܳܝܶܐ ܡܫܰܡܰܗ ܪܽܘܚܳܐ. ܗܳܠܝܢ ܕܟܰܕ ܡܶܬܚܙܶܝܢ ܕܰܟܪܺܝܗܺܝܢ ܒܦܰܓܪܳܐ. ܐܶܠܐ ܒܗܰܘ ܒܰܪܢܳܫܳܐ ܕܰܠܓܰܘ ܫܰܡܺܝܢܺܝܢ ܘܫܰܦܺܝܪܺܝܢ. ܡܳܕܝܢ ܫܰܦܺܝܪ ܡܫܰܡܰܗ ܪܽܘܚܳܐ ܫܰܡܺܝ̈ܢܶܐ ܕܥܳܢܴ̈ܐ. ܕܰܥܠܰܝܗܽܘܢ ܐܶܡܰܪ: ܗܳܝ ܕܪܳܘܙܺܝܢ ܘܰܡܫܰܒܚܺܝܢ.
ܘܥܽܘܡ̈ܩܶܐ ܢܶܬܡܠܽܘܢ ܥܒܽܘܪܳܐ. ܠܗܳܢܶܝܢ ܢܰܦ̈ܫܳܬܳܐ ܕܟܰܦ̈ܢܳܢ ܗܘܱ̈ܝ ܠܡܶܠܬܳܐ ܐܰܠܗܳܐ ܐܶܡܰܪ ܪܽܘܚܳܐ. ܗܳܠܝܢ ܕܰܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ ܠܰܚܡܳܐ ܡܣܰܒܥܳܢܳܐ ܐܶܟܰܠܘ. ܘܶܐܬܡܰܠܝܰܬ ܢܰܦܫܳܐ ܕܟܰܦܢܳܐ ܘܥܰܠܗܳܝ ܪܳܘܙܺܝܢ ܘܰܡܫܰܒܚܺܝܢ ܘܡܰܘܕܶܝܢ. ܠܗܰܘ ܕܚܰܠܶܦ ܥܳܒܽܘܪܳܐ. ܝܰܗܒ ܦܰܓܪܶܗ ܩܰܕܺܝܫܳܐ ܠܰܡܗܰܝܡܢ̈ܐ ܕܢܶܐܟܠܽܘܢ ܘܢܶܣܒܥܽܘܢ ܘܰܢܫܰܒܚܽܘܢ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ܀
ܡܙܡܘܪܐ ܕܫܬܝܢ ܘܫܬܐ
ܥܰܠ ܥܽܘܫܢܳܐ ܪܰܒܳܐ ܕܚܰܝܠܶܗ ܕܰܨܠܺܝܒܳܐ: ܘܥܰܠ ܩܰܕܺܝܡܽܘܬ ܝܺܕܰܥܬܳܐ ܕܰܢܒܺܝܽܘܬܳܐ ܕܺܝܕܺܝܥܳܐ ܗܘܳܬ ܕܰܒܟܽܠܳܗ̇ ܐܰܪܥܳܐ ܡܶܫܬܰܒܰܚ ܨܠܺܝܒܳܐ. ܘܥܰܠ ܬܶܕܡܪ̈ܬܶܗ ܕܰܐܠܗܳܐ.
ܣܳܐܷܡ ܢܳܡܽܘܣܳܐ ܕܥܶܒܪ̈ܳܝܶܐ ܡܦܰܩܶܕ ܗܘܳܐ ܠܺܝܣܪܳܐܝܠ ܕܡܳܐ ܕܰܡܩܰܪܒܺܝܢ ܩܽܘܪ̈ܒܳܢܶܐ ܠܡܳܪܝܳܐ܆ ܢܶܗܘܽܘܢ ܩܳܪܶܝܢ ܒܩܰܪ̈ܢܳܬܳܐ ܥܰܠ ܕܶܒܚܰܝ̈ܗܘܢ ܘܥܰܠ ܝܰܩܕܰܝ̈ܗܘܢ ܫܰܠܡ̈ܐ. ܘܟܰܕ ܒܢܳܡܽܘܣܳܐ ܡܶܬܝܰܒܰܠ ܗܘܳܐ ܦܽܘܩܕܳܢܳܐ ܗܳܢܳܐ܆ ܠܐ ܡܓܰܪܶܕ ܗܘܳܐ ܥܰܡܳܐ ܕܗܳܕܐ ܢܶܥܒܶܕ ܡܳܐ ܕܰܡܕܰܒܰܚ ܗܘܳܐ ܥܶܪ̈ܒܐ ܘܬܰܘܪ̈ܶܐ ܘܰܓܕܰܝܴ̈ܐ. ܘܟܰܕ ܐ̱ܚܪ̈ܳܢܶܐ ܒܕܶܒܚ̈ܐ ܡܶܬܥܢܶܝܢ ܗܘܰܘ܆ ܘܠܶܘܳܝ̈ܐ ܠܝܰܩ̈ܕܶܐ ܢܳܟܣܺܝܢ ܗܘܰܘ. ܪܰܒ ܟܽܘܡܪ̈ܶܐ ܠܥܶܠ ܡܶܢ ܕܶܒܚ̈ܐ ܒܩܳܠܐ ܕܫܺܝܦܽܘܪܳܐ ܡܰܙܥܶܩ ܗܘܳܐ. ܘܗܳܝܕܶܝܢ ܡܶܢ ܒܳܬܰܪܟܶܢ ܕܡܶܫܬܰܡܠܶܝܢ ܗܘܰܘ ܕܶܒܚ̈ܐ. ܗܳܢܘܢ ܕܰܒܥܰܝ̈ܢܶܐ ܒܰܪ̈ܳܝܳܬܳܐ ܒܩܽܘܪ̈ܒܳܢܶܐ ܗܳܠܝܢ ܚܳܝܪܺܝܢ ܗܘܰܘ. ܘܠܐ ܡܶܕܶܡ ܐ̱ܚܪܺܢܳܐ ܣܳܒܪܺܝܢ ܗܘܰܘ ܕܒܳܥܶܐ ܐܰܠܗܳܐ. ܐܶܠܐ ܫܽܘܦܳܥ ܕܡܳܐ ܕܚܰܝ̈ܘܳܬܳܐ. ܘܰܐܝܠܶܝܢ ܕܰܒܪܽܘܚܳܐ ܡܶܬܬܙܺܝܥܺܝܢ ܗܘܰܘ ܝܳܕܥܺܝܢ ܗܘܰܘ ܨܶܒܝܳܢܶܗ ܕܣܳܐܷܡ ܢܳܡܽܘܣܳܐ. ܕܠܰܘ ܥܰܠ ܕܶܒܚ̈ܐ ܒܛܺܝܠ ܗܘܳܐ ܠܶܗ. ܘܥܰܠ ܗܳܕܐ ܦܰܩܶܕ ܡܶܛܠܳܬܗܽܘܢ. ܟܰܕ ܡܳܕܶܝܢ ܒܙܰܒܢܳܐ ܕܰܣܠܶܩ ܐܳܪܽܘܢܶܗ ܕܰܐܠܗܳܐ ܠܨܶܗܝܽܘܢ ܘܶܐܬܬܣܺܝܡ ܒܳܗ̇܆ ܐܶܬܟܰܢܰܫܘ ܟܽܠܗܘܢ ܪ̈ܺܝܫܰܝ ܫܰܒ̈ܛܶܐ ܕܺܝܣܪܳܐܝܠ. ܟܰܕ ܣܠܶܩܘ ܠܐܽܘܪܺܫܠܶܡ ܠܰܡܩܰܪܳܒܽܘ ܕܶܒܚ̈ܐ ܫܰܠܡ̈ܐ ܩܕܳܡ ܐܰܠܗܳܐ ܘܒܰܝܢܳܬ ܗܳܠܝܢ ܩܳܐܷܡ ܗܘܳܐ ܐܳܦ ܕܰܘܝܕ ܐܰܠܗܳܝܐ ܟܰܕ ܦܨܺܝܚ. ܘܚܳܐܱܪ ܗܘܳܐ ܒܥܰܝܢܳܐ ܕܪܽܘܚܳܐ ܒܥܶܠܬܳܐ ܗܳܝ ܕܡܶܛܠܳܬܳܗ̇ ܗܘܳܐ ܦܽܘܩܕܳܢܳܐ ܡܶܢ ܐܰܠܗܳܐ ܕܢܶܬܩܰܪܒܽܘܢ ܠܶܗ ܩܽܘܪ̈ܒܳܢܶܐ ܕܶܒܚ̈ܐ ܕܰܣܘܳܬܳܐ܆ ܐܰܙܺܝܥ ܡܶܢ̈ܐ ܕܩܺܝܬܳܪܶܗ ܪܽܘܚܳܢܳܝܳܐ. ܘܡܶܢ ܒܳܬܰܪ ܕܰܫܬܶܩ ܫܺܝܦܽܘܪܳܐ. ܘܰܕܗܰܘ ܕܩܳܪܶܐ ܒܩܰܪܢܳܐ ܥܰܠ ܝܰܩ̈ܕܶܐ ܫܰܠܡ̈ܐ. ܫܰܪܺܝ ܗܘܳܐ ܕܰܢܙܰܡܰܪ ܒܩܳܠܐ ܕܩܰܪܢܳܐ ܢܒܺܝܳܝܬܳܐ ܘܳܐܡܰܪ:
ܫܰܒܰܚܘ ܠܰܐܠܗܳܐ ܟܽܠܳܗ̇ ܐܰܪܥܳܐ. ܙܡܰܪܘ ܠܐܺܝܩܳܪܳܐ ܕܰܫܡܶܗ ܙܡܰܪܘ ܠܐܺܝܩܳܪܳܐ ܕܬܶܫܒܽܘܚܬܶܗ: ܐܶܡܰܪܘ ܠܰܐܠܗܳܐ ܡܳܐ ܕܚܺܝܠܺܝܢ ܥܒܳܕܰܝ̈ܟ. ܡܳܢܳܐ ܒܳܥܶܝܢ ܩܴ̈ܠܐ ܗܳܠܝܢ ܠܘܳܬ ܥܰܡܳܐ. ܕܠܰܘ ܒܶܗ ܒܰܠܚܽܘܕ ܚܳܝܪܺܝܢ. ܐܶܢܓܶܝܪ ܟܽܠܳܗ̇ ܐܰܪܥܳܐ ܩܳܪܶܐ ܠܰܡܫܰܒܳܚܽܘ ܠܰܐܠܗܳܐ. ܢܒܺܝܽܘܬܳܐ ܓܶܝܪ ܐܰܝܠܶܝܢ ܕܪ̈ܰܚܺܝܩܳܢ ܡܒܰܕ̈ܩܳܢ ܡܰܘܕܥܳܐ ܗܘܳܬ܆ ܡܳܕܶܝܢ ܗܳܝ ܫܰܒܰܚܘ ܠܰܐܠܗܳܐ ܟܽܠܳܗ̇ ܐܰܪܥܳܐ. ܒܙܰܒܢܳܐ ܕܰܨܠܺܝܒܳܐ ܚܳܝܪܳܐ. ܒܶܗ ܓܶܝܪ ܝܶܠܦܰܬ ܐܰܪܥܳܐ ܕܺܐܝܬ ܠܳܗ̇ ܡܳܪܝܳܐ ܘܪܺܝܫܺܝܬܳܐ ܕܥܰܡ̈ܡܶܐ ܐܰܪܓܶܫܘ ܒܕܶܒܚܬܳܐ ܡܩܰܕܫܳܢܺܝܬܳܐ ܕܶܐܬܩܰܪܒܰܬ ܚܠܳܦܰܝܗܘܢ. ܘܰܒܟܽܠ ܥܰܡܳܐ ܡܰܠܟܽܘܬܳܐ ܩܰܪܶܒܘ ܫܽܘܒܚܳܐ ܠܰܐܠܗܳܐ ܕܡܺܝܬ ܡܶܛܠܳܬܗܘܢ. ܘܰܠܗܘܢ ܐܳܡܰܪ ܢܒܺܝܐ: ܢܺܐܡܪܽܘܢ ܠܰܐܠܗܳܐ ܡܳܐ ܕܚܺܝܠܺܝܢ ܥܒܳܕܰܝ̈ܟ. ܠܰܘ ܟܰܕ ܬܳܗܪܺܝܢ ܒܪ̈ܶܒܘܳܬܳܐ ܕܰܟܝܴ̈ܢܶܐ ܕܠܐ ܡܶܠܬܳܐ. ܘܠܐ ܟܕ ܡܶܬܒܰܩܶܝܢ ܒܚܰܡܺܝܡܽܘܬ ܫܶܡܫܳܐ. ܘܰܒܢܽܘܗܪܳܐ ܕܣܰܗܪܳܐ ܘܒܰܡܛܰܟܣܽܘܬܳܐ ܕܟܰܘܟ̈ܒܶܐ. ܘܳܐܦܠܐ ܟܰܕ ܬܳܗܪܺܝܢ ܒܪܶܗܛܳܐ ܕܢܰܗܪ̈ܰܘܳܬܳܐ ܘܰܒܡܰܪܕܺܝܬܳܐ ܕܡܰܒܽܘ̈ܥܐ. ܘܰܒܦܰܐܝܽܘܬܳܐ ܕܗܰܒܴ̈ܒܶܐ ܘܰܒܡܰܘܥܺܝܬܳܐ ܕܥܶܩܳܪ̈ܐ. ܘܰܒܫܽܘܚܠܳܦܳܐ ܕܶܐܒܒܴ̈ܢܶܐ. ܠܰܘ ܒܗܳܠܶܝܢ ܐܶܡܰܪ ܢܒܺܝܐ ܕܰܢܚܽܘܪܽܘܢ ܘܢܺܐܡܪܽܘܢ ܠܰܐܠܗܳܐ ܕܰܕܚܺܝܠܺܝܢ ܥܒܴ̈ܕܰܝܟ. ܐܠܐ ܟܰܕ ܒܗܳܠܝܢ ܬܳܗܪܺܝܢ ܘܡܶܬܕܰܡܪܺܝܢ܆ ܢܶܚܙܽܘܢ ܒܥܰܝܢܳܐ ܕܗܰܝܡܳܢܽܘܬܳܐ ܕܗܰܘ ܕܰܥܒܰܕ ܗܳܠܶܝܢ. ܒܰܪܢܳܫܳܐ ܡܳܝܽܘܬܳܐ ܗܘܳܐ ܘܒܶܣܪܳܐ ܚܳܫܽܘܫܳܐ ܠܒܶܫ: ܘܰܒܟܰܪܣܶܐ ܐܶܬܚܒܶܫ ܘܥܽܘܠܐܴ ܗܘܳܐ ܒܡܰܪܒܥܳܐ: ܘܝܰܠܽܘܕܳܐ ܐܶܬܚܙܺܝ: ܘܰܒܥܰܙܪܽܘܪ̈ܶܐ ܐܶܬܟܰܪܰܟ ܘܒܽܐܘܪܝܳܐ ܐܶܬܬܣܺܝܡ: ܘܚܰܠܒܳܐ ܝܢܶܩ ܘܥܰܠ ܒܽܘܪ̈ܟܶܐ ܐܶܬܛܥܶܢ ܘܒܰܕܪ̈ܳܥܶܐ ܐܶܫܬܩܶܠ: ܘܰܠܬܰܪܒܺܝܬܳܐ ܐܶܬܳܐ ܘܡܶܢ ܥܰܒܕܶܗ ܐܶܬܥܡܶܕ: ܘܡܶܢ ܥܰܡܳܐ ܐܶܬܒܰܙܰܚ ܘܒܰܨܠܺܝܒܳܐ ܐܶܬܡܬܰܚ: ܘܰܒܨܶܨ̈ܐ ܐܶܣܬܰܟܰܟ ܘܚܰܫ̈ܐ ܣܰܝܒܰܪ: ܘܡܰܘܬܳܐ ܛܥܶܡ ܘܰܒܩܰܒܪܳܐ ܐܶܬܬܣܺܝܡ: ܘܰܙܟܳܐ ܠܡܰܘܬܳܐ ܘܠܳܐܟܶܠܩܰܪܨܳܐ ܫܰܥܒܶܕ. ܗܳܠܶܝܢ ܐܶܢܘܢ ܥܒܴ̈ܕܶܐ ܕܰܕܚܺܝܠܺܝܢ ܠܘܳܬ ܐܰܠܗܳܐ. ܡܶܛܠܗܳܕܐ ܐܶܡܰܪ ܢܒܺܝܐ ܠܥܰܡ̈ܡܶܐ ܢܫܰܒܚܽܘܢ ܘܢܺܐܡܪܽܘܢ ܠܰܐܠܗܳܐ ܡܳܐ ܕܚܺܝܠܺܝܢ ܥܒܳܕܰܝ̈ܟ. ܘܥܰܠܗܳܝ ܡܰܝܬܶܐ ܒܳܬܪܳܗ̇.
ܘܰܒܣܽܘܓܳܐܐ ܕܥܽܘܫܢܳܟ ܢܶܬܟܰܕܒܽܘܢ ܠܳܟ ܒܥܶܠܕ̈ܒܳܒܰܝܟ. ܡܳܢܰܐ ܗܘ ܕܶܝܢ ܥܽܘܫܢܳܐ ܕܰܥܒܰܕ ܐܶܢܘܢ ܠܰܒܥܶܠܕ̈ܒܳܒܶܐ ܕܰܨܠܺܝܒܳܐ. ܕܠܰܘ ܟܰܕ ܕܺܝܠܶܗ ܐܶܢܘܢ ܕܓܰܠܝܳܐܝ̣ܬ ܢܶܬܩܪܽܘܢ ܒܰܫܡܶܗ. ܘܰܒܣܽܘܟܳܠܐ ܚܳܐܱܪ ܦܶܬܓܳܡܳܐ ܗܳܢܐ. ܕܒܰܫܡܶܗ ܢܶܬܟܰܢܽܘܢ ܟܰܕ ܐܺܝܬܰܝܗܘܢ ܕܰܠܩܽܘܒܠܐ ܕܫܽܘܒܚܶܗ. ܠܟܽܠ ܫܰܥܒܶܕ ܘܰܟܒܰܫ ܥܽܘܫܢܶܗ ܕܰܨܠܺܝܒܳܐ. ܘܙܳܥܘ ܡܶܢܶܗ ܐܳܦ ܚܰܝ̈ܠܰܘܳܬܐ ܕܰܠܩܽܘܒܠܐ. ܘܥܰܠܗܳܕܐ ܠܐ ܬܽܘܒ ܐܰܡܪܰܚܘ ܕܰܐܝܟ ܕܡܶܢܩܕܺܝܡ ܢܰܛܥܽܘܢ ܒܥܳܠܡܳܐ ܕܢܶܥܒܶܕ ܦܬܰܟܪ̈ܶܐ ܙܳܝܥܺܝܢ ܗܘܰܘ ܕܶܝܢ ܡܶܢ ܥܽܘܫܢܶܗ ܕܰܨܠܺܝܒܳܐ ܟܰܕ ܥܳܪܩܺܝܢ ܡܶܢ ܚܳܬܡܶܗ ܡܳܐ ܕܰܒܝܰܕ ܬܰܠܡܺܝ̈ܕܶܐ ܡܶܬܪܫܶܡ ܗܘܳܐ. ܥܰܠ ܐܰܝܠܶܝܢ ܕܡܶܬܢܰܣܶܝܢ ܡܶܢ ܪ̈ܽܘܚܶܐ ܛܰܢ̈ܦܳܬܳܐ. ܘܟܰܕ ܡܫܰܢܶܝܢ ܩܳܥܶܝܢ ܗܘܰܘ ܣܺܝܥܬܶܗ ܕܠܶܓܝܽܘܢ ܩܕܳܡܰܘܗܝ ܟܰܕ ܐܳܡܪܺܝܢ: ܕܡܳܐ ܠܰܢ ܘܠܳܟ ܝܶܫܘܥ ܢܳܨܪܳܝܳܐ. ܝܳܕܰܥ ܐ̱ܢܳܐ ܠܳܟ ܡܰܢ ܐܰܢܬ ܩܰܕܺܝܫܶܗ ܕܰܐܠܗܳܐ ( ܡܪܩܘܣ ܐ: ܟܕ ܠܘܩܐ ܕ: ܠܕ). ܒܳܥܶܐ ܐܢܳܐ ܡܶܢܳܟ ܠܐ ܬܫܰܢܩܰܢܝ (ܡܪܩܘܣ ܗ: ܙ ܠܘܩܐ ܚ: ܟܚ). ܒܳܬܰܪ ܕܶܝܢ ܓܶܢܣܳܐ ܗܰܘ ܕܡܳܪ̈ܽܘܕܶܐ܆ ܥܳܐܷܠ ܐܳܦ ܣܽܘܟܳܠܐܴ ܕܶܐܪ̈ܺܝܛܺܝܩܽܘ. ܐܺܝܬ ܓܶܝܪ ܠܡܶܚܙܳܐ ܕܟܰܕ ܚܽܘ̈ܫܳܒܶܐ ܡܢܰܚ̈ܬܶܐ ܥܰܠ ܨܠܺܝܒܳܐ ܩܢܰܘ. ܘܡܶܢܗܽܘܢ ܚܰܫܒܽܘܗܝ ܕܒܰܪܢܳܫܳܐ ܐܺܝܬܰܘܗܝ. ܘܡܶܢܗܽܘܢ ܕܶܝܢ ܐ̱ܚܪܳܢܝܳܐܝ̣ܬ ܐܰܣܒܰܪܘ ܥܠܰܘܗܝ. ܐܠܐ ܡܶܢ ܟܽܘܢܳܝܳܐ ܕܰܫܡܶܗ ܕܰܡܫܺܝܚܐ ܠܐ ܥܪܰܩܘ. ܘܦܳܫܘ ܟܰܕ ܡܶܬܩܪܶܝܢ ܒܰܫܡܶܗ ܒܕܰܓܳܠܽܘܬܳܐ. ܘܟܰܕ ܠܰܘ ܕܺܝܠܶܗ ܐܶܢܘܢ. ܘܟܰܕ ܣܳܢܶܝܢ ܠܶܗ ܕܒܶܝܬ ܐܰܪܺܝܽܘܣ ܠܰܡܫܺܝܚܳܐ. ܘܩܳܪܶܝܢ ܠܶܗ ܒܪܺܝܬܳܐ. ܘܡܰܩܪܒܺܝܢ ܥܰܡܶܗ ܕܒܶܝܬ ܢܰܣܛܽܘܪ ܘܚܳܫܒܺܝܢ ܠܶܗ ܒܰܪܢܳܫܳܐ ܫܚܺܝܡܳܐ. ܘܦܳܫܘ ܠܘܳܬܶܗ ܒܕܰܓܳܠܽܘܬܳܐ. ܐܶܠܐ ܣܳܓܕܺܝܢ ܠܶܗ ܟܰܕ ܠܐ ܨܳܒܶܝܢ. ܐܶܡܰܪ ܓܝܪ ܢܒܺܝܐ:
ܕܰܒܟܽܠܳܗ̇ ܐܰܪܥܳܐ ܢܶܣܓܕܽܘܢ ܠܳܟ ܘܰܢܙܰܡܪܽܘܢ ܠܳܟ ܘܰܢܫܰܒܚܽܘܢ ܠܰܫܡܳܟ ܠܥܳܠܡܺܝܢ: ܘܢܺܐܡܪܽܘܢ ܬܰܘ ܚܙܰܘ ܥܒܳܕܰܘ̈ܗܝ ܕܰܐܠܳܗܳܐ. ܕܣܰܓܺܝ̈ܐܳܢ ܬܶܕܡܪ̈ܳܬܶܗ ܥܰܠ ܒܢܰܝ̈ܢܳܫܳܐ. ܡܳܢܳܐ ܕܶܝܢ ܐܺܝܬܰܝܗܶܝܢ ܬܶܕܡܪ̈ܳܬܶܗ ܥܰܠ ܒܢܰܝ̈ܢܳܫܳܐ.
ܕܰܗܦܰܟ ܝܰܡܳܐ ܠܝܰܒܫܳܐ. ܘܰܠܢܰܗܪܳܐ ܥܰܒܪܽܘܗܝ ܡܶܢ ܪܓܶܠ. ܐܶܠܐ ܗܳܠܝܢ ܠܘܳܬ ܥܰܡܳܐ ܢܶܬܐܰܡܪ̈ܳܢ ܕܡܶܛܠܳܬܶܗ ܓܶܝܪ ܗܘܱ̈ܝ. ܒܗܳܝ ܕܟܰܕ ܢܦܰܩ ܡܶܢ ܡܶܨܪܶܝܢ. ܐܰܘܒܶܫ ܡܰܝܴ̈ܐ ܕܝܰܡܳܐ ܣܽܘܡܳܩܳܐ. ܘܰܐܥܒܰܪ ܠܺܝܣܪܳܐܝܠ ܒܓܰܘܶܗ. ܘܰܠܦܶܪܥܽܘܢ ܘܰܠܡܶܨܪ̈ܳܝܶܐ ܒܥܶܠܕ̈ܒܳܒܰܘܗܝ ܐܰܘܒܶܕ ܒܝܰܡܳܐ ܕܣܽܘܦ ܟܰܕ ܕܶܝܢ ܐܶܬܳܐ ܗܘܳܐ ܥܰܡܳܐ ܕܢܶܥܽܘܠ ܠܰܐܬܪܳܐ ܕܦܰܠܶܣܛܺܝܢܺܝ. ܘܰܒܡܽܘܠܟܳܢܳܐ ܐܶܫܬܰܘܕܺܝ ܐܰܠܗܳܐ ܕܢܶܬܶܠ ܠܰܐܒܳܗ̈ܬܳܐ. ܣܥܰܪ ܠܘܳܬܗܽܘܢ ܬܶܕܡܪ̈ܳܬܳܐ ܒܡܰܥܰܠܬܳܐ ܕܺܝܠܗܽܘܢ ܠܰܐܪܥܳܐ ܕܡܽܘܠܟܳܢܳܐ. ܐܰܝܟ ܕܰܒܡܰܦܰܩܬܗܽܘܢ ܡܶܢ ܡܶܨܪܶܝܢ. ܘܟܰܕ ܐܶܬܦܰܠܰܓܘ ܡܰܝܴ̈ܐ ܕܝܽܘܪܕܢܳܢ ܩܕܳܡ ܩܺܐܒܽܘܬܳܐ ܕܕܺܝܰܬܺܩܺܝ ܕܡܳܪܝܳܐ܆ ܘܰܥܒܰܪ ܥܰܡܳܐ ܒܝܰܒܫܳܐ ܒܓܰܘ ܢܰܗܪܳܐ ܡܶܢ ܪܓܶܠ ܐܰܝܟ ܕܶܐܡܰܪ ܢܒܺܝܐ ܡܳܢܳܐ ܕܶܝܢ ܥܒܰܕ ܥܰܡܰܢܘܐܝܠ ܠܘܳܬ ܥܰܡܳܐ ܕܺܝܠܶܗ. ܒܛܽܘܦܣܳܐ ܕܗܳܠܝܢ ܩܰܕܡܳܝ̈ܬܳܐ. ܙܳܕܶܩ ܕܳܐܦ ܗܽܘ ܕܰܡܥܱ̈ܠܝܳܢ ܡܶܢ ܗܳܠܝܢ ܢܶܥܒܶܕ. ܝܰܡܳܐ ܕܰܗܦܰܟ ܠܝܰܒܫܳܐ ܗܰܘ ܕܰܒܟܽܠܙܒܰܢ ܡܶܬܬܪܺܝܡ ܗܘܳܐ ܘܬܳܟܶܣ ܠܥܰܡ̈ܡܶܐ. ܕܠܐ ܢܶܫܬܰܘܕܥܽܘܢ ܠܦܳܪܽܘܩܳܐ ܕܟܽܠܐܴ. ܩܥܳܐ ܒܶܗ ܟܰܕ ܐܳܡܰܪ: ܫܠܺܝ ܙܓܺܝܪ ܐܰܢܬ ܘܰܠܩܰܫܝܽܘܬ ܓܰܠܠܰܘ̈ܗܝ ܡܰܟܶܟ (ܡܪܩܘܣ ܕ: ܠܛ). ܘܰܠܡܰܝ̈ܐ ܕܺܝܠܶܗ ܐܰܘܒܶܫ. ܕܠܐ ܡܶܟܺܝܠ ܢܒܰܛܠܽܘܢ ܕܶܝܢ ܐܽܘܪܚܳܐ ܕܥܰܡ̈ܡܶܐ ܡܗܰܝܡ̈ܢܶܐ. ܡܶܛܠ ܕܡܶܢ ܒܳܬܰܪ ܥܡܳܕܳܐ ܠܐ ܫܠܐܷ ܒܺܝܫܳܐ ܡܶܢ ܕܰܛܡܰܪ ܦܰܚܰܘ̈ܗܝ ܕܰܢܥܰܪܩܶܠ ܐܽܘܪܚܳܐ ܕܬܰܡܺܝ̈ܡܶܐ. ܟܰܕ ܐܰܪܺܝܡ ܥܠܰܘܗܝ ܐܺܝܕܳܐ ܒܽܐܘܚܕܳܢܳܐ ܕܪܽܘܚܳܐ ܐܰܝܟ ܕܶܐܡܰܪ ܢܒܺܝܐ. ܘܥܰܒܕܶܗ ܠܫܰܒܥܳܐ ܢܰܚ̈ܠܐܷ ܕܒܰܡܣܳܐܢ̈ܐ ܢܶܬܥܒܶܕ. ܘܟܰܕ ܗܳܕܐ ܗܘܳܬ. ܚܳܕܶܐ ܡܶܟܺܝܠ ܟܽܠܡܰܢ ܕܰܒܚܰܝܠܐ ܕܕܽܘܒܳܪ̈ܶܐ ܡܝܰܬܪ̈ܶܐ ܡܚܰܘܶܐ ܢܰܦܫܶܗ ܕܺܐܝܬܰܘܗܝ ܒܰܪ ܚܰܝܠܐ ܕܰܨܠܺܝܒܳܐ.
ܬܰܡܳܢ ܢܶܚܕܶܐ ܒܶܗ ܡܰܢ ܕܫܰܠܺܝܛ ܒܓܰܢ̱ܒܳܪܽܘܬܶܗ ܠܥܳܠܰܡ. ܥܰܝ̈ܢܰܘܗܝ ܒܥܰܡܡ̈ܐ ܚܳܝܪ̈ܳܢ. ܥܰܝ̈ܢܶܐ ܕܰܐܠܗܳܐ ܒܫܽܘܚܠܳܦܳܐ ܡܶܬܐܰܡܪ̈ܳܢ ܡܶܢ ܢܒܺܝ̈ܐ. ܘܶܐܢܗܽܘ ܕܰܐܠܗܳܐ ܢܽܘܗܪܰܐ ܗܘ. ܘܚܶܫܽܘܟܳܐ ܟܽܠ ܟܽܠܶܗ ܠܰܝܬ ܒܶܗ (ܐ ܝܘܚܢܢ ܐ: ܗ). ܐܰܟܡܳܐ ܕܡܶܠܬܳܐ ܫܠܺܝܚܳܝܬܳܐ ܡܰܠܦܳܐ. ܡܳܕܶܝܢ ܠܰܘ ܥܰܝ̈ܢܶܐ ܡܪ̈ܰܟܒܳܬܳܐ ܢܳܣܶܒ ܥܰܠ ܗܰܘ ܕܰܦܫܺܝܛ ܒܰܟܝܳܢܶܗ. ܥܰܡ ܗܳܕܐ ܢܶܕܰܥ܆ ܕܰܒܗܳܕܐ ܕܽܘܟܬܳܐ ܫܰܘܕܰܥ ܢܒܺܝܐ ܕܚܳܝܪ̈ܳܢ ܥܰܝ̈ܢܰܘܗܝ ܕܰܐܠܗܳܐ ܒܥܰܡ̈ܡܶܐ ܥܰܠ ܕܢܶܗܘܶܐ ܡܫܰܡܠܰܝ ܐܪܳܙܳܐ ܒܟܽܠܡܶܕܶܡ. ܗܳܪܟܳܐ ܓܶܝܪ ܐܰܥܶܠ ܫܰܪܒܳܐ ܕܰܥܡܳܕܳܐ ܩܰܕܺܝܫܳܐ. ܡܶܛܠ ܕܰܐܟܙܢܳܐ ܕܟܰܕ ܐܶܬܦܰܠܰܓ ܝܰܡܳܐ ܣܽܘܡܳܩܳܐ ܗܘܳܬ ܬܶܕܡܽܘܪܬܳܐ ܠܰܡܫܽܘܚܬܳܐ ܥܳܒܪܳܐ. ܘܗܳܝ ܬܽܘܒ ܡܰܥܒܰܪܬܳܐ ܥܡܳܕܳܐ ܐܶܬܚܰܫܒܰܬ ܠܥܰܡܳܐ. ܐܰܝܟ ܕܰܐܠܶܦ ܦܰܘܠܽܘܣ ܗܰܘ ܐܰܠܗܳܝܳܐ. ܕܟܽܠܗܽܘܢ ܠܰܡ ܒܝܰܕ ܡܽܘܫܶܐ ܥܡܰܕܘ ܘܒܰܥܢܳܢܳܐ ܘܰܒܝܰܡܳܐ (ܐ ܩܘܪ̈ܢܬܝܐ ܝ: ܒ). ܗܳܟܰܢܳܐ ܐܳܦ ܗܳܪܟܳܐ ܟܰܕ ܐܶܬܦܰܠܰܓ ܝܰܡܳܐ ܡܶܬܝܰܕܥܳܢܳܐ ܕܰܚܛܺܝܬܳܐ ܒܝܰܕ ܡܫܺܝܚܳܐ. ܬܰܡܳܢ ܐܶܬܦܢܺܝ ܐܰܠܗܳܐ ܘܚܳܪ ܒܥܰܡ̈ܡܶܐ. ܟܰܕ ܡܰܟܶܟ ܠܚܰܝܠܐܴ ܕܡܳܪ̈ܽܘܕܶܐ. ܡܶܛܠܗܳܕܐ ܦܰܫܶܩ ܪܽܘܚܳܐ ܘܶܐܡܰܪ:
ܡܳܪܽܘܪ̈ܶܐ ܠܳܐ ܢܶܬܬܪܺܝܡܽܘܢ ܠܥܳܠܰܡ. ܒܰܪܶܟܘ ܥܰܡ̈ܡܶܐ ܠܰܐܠܗܳܐ: ܘܰܐܫܡܰܥܘ ܩܳܠܐ ܕܫܽܘܒܚܶܗ. ܕܣܳܡ ܢܰܦܫܰܢ ܒܚܰܝ̈ܐ: ܘܠܐ ܝܰܗܒ ܪܶܓܠܰܢ ܠܙܰܘܥܬܳܐ. ܐܰܝܟܳܐ ܣܳܡ ܢܰܦܫܰܢ ܒܚܰܝ̈ܐ. ܐܶܠܐ ܒܰܥܡܳܕܳܐ ܩܰܕܺܝܫܳܐ. ܠܳܐ ܗܘܳܐ ܒܰܩܝܳܡܬܶܗ ܕܥܰܡܰܢܘܐܝܠ. ܥܡܳܕܳܐ ܓܶܝܪ ܗܽܘܝܽܘ ܚܰܝ̈ܐ. ܗܰܘ ܕܒܶܗ ܐܶܬܢܨܶܒܢ ܥܰܡܶܗ ܒܰܕܡܽܘܬܳܐ ܕܡܰܘܬܶܗ܆ ܕܰܐܝܟܰܢܳܐ ܕܩܳܡ ܝܶܫܘܥ ܡܫܺܝܚܳܐ ܡܶܢ ܒܶܝܬ ܡܺܝ̈ܬܶܐ ܒܬܶܫܒܽܘܚܬܳܐ ܕܰܐܒܽܘܗܝ ܗܳܟܰܢܳܐ ܐܳܦ ܚܢܰܢ ܒܚܰܝ̈ܐ ܚܰܕ̈ܬܶܐ ܢܗܰܠܶܟ (ܪ̈ܗܘܡܝܐ ܘ: ܕ). ܐܰܝܟ ܕܦܰܘܠܽܘܣ ܐܰܠܗܳܝܳܐ ܐܰܠܶܦ. ܘܠܳܐ ܬܽܘܒ ܬܶܬܙܺܝܥ ܪܶܓܠܰܢ ܡܶܢ ܚܛܺܝܬܳܐ. ܒܗܳܝ ܓܶܝܪ ܕܰܒܚܰܪ ܘܕܰܟܺܝ ܠܰܥܡܺܝ̈ܕܶܐ ܒܟܽܘܪܳܐ ܕܢܽܘܪܳܐ ܘܰܕܪܽܘܚܳܐ ܕܰܟܺܝ ܐܶܢܘܢ ܘܰܥܒܰܕ ܐܶܢܘܢ ܣܺܐܡܳܐ ܓܰܒܝܳܐ.
ܡܶܛܠ ܕܰܒܚܰܪܬܳܢ ܐܰܠܗܳܐ ܘܰܒܩܰܝܬܳܢ: ܐܰܝܟ ܕܒܳܩܶܝܢ ܠܣܺܐܡܳܐ. ܐܰܟܙܢܳܐ ܓܶܝܪ ܕܰܒܓܰܘ ܟܽܘܪܳܐ ܫܳܕܶܐ ܡܶܢܶܗ ܣܺܐܡܳܐ ܟܽܠܶܗ ܨܳܐܬܶܗ ܕܣܶܒܟܰܬ ܒܶܗ܆ ܗܳܟܰܢܐ ܒܓܰܘ ܢܽܘܪܳܐ ܘܪܽܘܚܳܐ ܕܰܥܡܳܕܳܐ ܩܰܕܺܝܫܳܐ. ܫܠܰܚ ܥܳܠܡܳܐ ܟܽܘ̈ܬܡܳܬܳܐ ܘܫܽܘ̈ܕܳܥܶܐ ܕܒܰܪܢܳܫܳܐ ܥܰܬܺܝܩܳܐ. ܘܒܳܬܰܪ ܗܳܠܝܢ ܡܰܝܬܶܐ ܢܶܣܝܽܘ̈ܢܐ ܕܓܳܕܫܺܝܢ ܡܶܢ ܗܰܘ ܕܰܠܩܽܘܒܠܐܴ ܒܳܬܰܪ ܥܡܳܕܳܐ. ܡܶܛܠ ܗܳܕܐ ܐܶܡܰܪ ܢܒܺܝܳܐ:
ܐܰܥܶܠܬܳܢ ܒܰܡܨܺܝܕܬܳܐ ܘܰܥܒܰܕܬ ܐܽܘܠܨܳܢܳܐ ܒܚܰܨܰܝ̈ܢ: ܐܰܪܟܶܒܬ ܒܰܪܢܳܫܳܐ ܥܰܠ ܪܺܝܫܰܢ. ܐܰܟܙܢܳܐ ܓܶܝܪ ܕܡܶܬܕܰܟܶܐ ܣܺܐܡܳܐ ܒܢܽܘܪܳܐ ܠܡܰܚ̈ܘܳܬܳܐ ܘܠܰܪܫܳܫܳܐ ܕܰܒܝܰܕ ܐܰܪܙܰܦܬܳܐ ܐܳܬܶܐ. ܐܰܝܟܰܢܐ ܕܰܢܩܰܒܶܠ ܒܶܗ ܕܶܡ̈ܘܳܬܳܐ ܦܰܐܝܴ̈ܬܳܐ ܘܨܽܘܪ̈ܳܬܳܐ. ܗܳܟܰܢܐ ܐܳܦ ܢܰܦ̈ܫܳܬܳܐ ܕܰܥܡܺܝ̈ܕܶܐ܆ ܩܳܢ̈ܝܳܢ ܕܽܘܟܳܝܳܐ ܒܢܽܘܪܳܐ ܘܰܒܪܽܘܚܳܐ ܘܰܒܟܽܘܪܳܐ ܕܰܥܡܳܕܳܐ ܩܰܕܺܝܫܳܐ. ܠܐܽܘܠܨܳܢ̈ܐ ܪܰܘܪ̈ܒܶܐ ܕܡܶܢ ܐܳܟܶܠܩܰܪܨܳܐ ܥܳܐܠܺܝܢ. ܡܳܕܶܝܢ ܛܳܒܳܐܝ̣ܬ ܐܶܡܰܪ ܢܒܺܝܐ. ܕܡܶܢ ܕܰܒܚܰܪ ܐܰܠܗܳܐ ܠܥܺܕܬܶܗ. ܫܰܒܩܳܗ̇ ܕܬܶܥܽܘܠ ܠܐܽܘܠܨܳܢ̈ܐ ܡܶܛܠܳܬܶܗ ܗܳܝ ܕܰܐܪܟܶܒܬ ܒܰܪܢܳܫܳܐ ܥܰܠ ܪܺܝܫܰܢ. ܠܰܒܥܶܠܕܒܳܒܳܐ ܕܚܰܝܰܝ̈ܢ ܡܫܰܡܰܗ ܢܒܺܝܐ. ܒܰܫܡܳܐ ܕܒܰܪܢܳܫܳܐ ܡܟܰܢܶܝܢ ܠܶܗ ܢܒܺܝ̈ܐ ܠܗܰܘ. ܗܳܝ ܕܰܒܚܱ̈ܨܶܐ ܢܶܗܘܶܐ ܐܽܘܠܨܳܢܳܐ ܥܰܠ ܥܽܘܫܢܳܐ ܕܬܰܟܬܽܘܫܳܐ ܡܒܰܕܩܳܐ. ܡܳܐ ܓܶܝܪ ܕܰܒܚܱ̈ܨܶܐ ܢܶܐܚܽܘܕ ܒܥܶܠܕܰܪܳܐ܆ ܥܕܰܡܳܐ ܠܓܰܘܳܝܽܘܬܳܐ ܕܢܰܦܫܳܐ ܡܶܬܡܰܛܶܐ. ܒܚܱ̈ܨܶܐ ܐܰܚܺܝܕ ܗܘܳܐ ܠܥܳܠܡܳܐ ܘܟܰܕ ܐܶܬܓܠܺܝ ܡܳܪܰܢ܆ ܘܡܶܢ ܚܰܨܰܘ̈ܗܝ ܐܰܦܶܕ ܐܰܠܗܳܐ ܐܺܝ̈ܕܰܘܗܝ ܕܡܳܪܽܘܕܳܐ. ܐܶܠܐ ܒܡܶܠܬܳܐ ܐܶܬܡܨܺܝ ܐܰܝܟ ܕܰܐܘܕܺܝ ܢܒܺܝܐ:
ܐܰܥܶܠܬܳܢ ܠܰܡ ܒܢܽܘܪܳܐ ܘܰܒܡܰܝܴ̈ܐ ܘܰܐܦܶܩܬܳܢ ܠܰܪܘܰܚܬܳܐ. ܢܽܘܪܳܐ ܡܫܰܡܰܗ ܠܚܰܡܺܝܡܽܘܬܳܐ ܘܰܠܝܰܩܕܳܢܳܐ ܕܡܶܢ ܚܛܺܝܬܳܐ. ܡܰܝܴ̈ܐ ܕܶܝܢ ܠܣܰܓܺܝܐܘܬܳܐ ܕܢܶܣܝܽܘ̈ܢܐ. ܟܰܕ ܕܶܝܢ ܒܰܪܘܰܚܬܳܐ ܩܳܡ ܒܰܥܡܳܕܳܐ ܩܰܕܺܝܫܳܐ ܒܝܰܕ ܡܳܪܰܢ. ܐܳܡܰܪ ܢܒܺܝܐ.
ܐܻܬܶܐ ܠܒܰܝܬܳܟ ܒܺܐܝܩܳܪܳܐ ܘܶܐܦܪܥܳܟ ܢܶܕܪ̈ܰܝ܀ ܗܳܝܕܶܝܢ ܡܶܢ ܬܰܘܪ̈ܶܐ ܘܥܶܪ̈ܒܶܐ. ܗܳܫܳܐ ܕܶܝܢ ܕܶܒܚ̈ܐ ܕܬܰܘܕܺܝܬܳܐ. ܗܳܝܕܶܝܢ ܡܰܢ ܒܬܳܓܳܐ ܕܺܐܝܩܳܪܳܐ ܕܡܰܠܟܽܘܬܳܐ ܐܶܙܰܠ ܕܰܘܝܕ ܠܒܰܝܬܶܗ ܕܰܐܕܽܘܢܰܝ. ܗܳܫܳܐ ܕܶܝܢ ܒܬܳܓܳܐ ܠܳܐ ܡܝܽܘܬܳܐ ܥܳܐܠܺܝܢ ܒܢܰܝ̈ ܡܰܠܟܘܬܐ ܠܒܶܝܬ ܐܰܒܳܐ ܡܰܠܟܳܐ ܕܰܠܥܳܠܰܡ.
ܡܶܕܶܡ ܕܰܦܬܰܚ̈ܝ ܣܶܦ̈ܘܳܬܝ ܒܡܰܡܠܠܶܗ ܕܦܽܘܡܝ ܒܽܐܘܠܨܳܢܳܐ. ܡܳܐ ܕܶܝܢ ܕܒܽܐܘܠܨܳܢܳܐ ܕܡܶܢ ܒܥܶܠܕܰܪܳܐ ܩܳܝܡܺܝܢ ܩܰܕܺܝ̈ܫܶܐ ܗܳܕܐ ܢܳܕܪܺܝܢ. ܕܡܳܐ ܕܢܶܦܩܽܘܢ ܡܶܢ ܒܰܝܬܳܐ ܗܳܢܳܐ ܕܒܰܐܪܥܳܐ ܕܺܐܝܬܰܘܗܝ ܦܰܓܪܳܐ ܢܶܦܪܥܽܘܢ ܢܶܕܪ̈ܶܐ ܕܩܽܘܒܳܠܛܰܝܒܽܘܬܳܐ ܠܰܐܠܗܳܐ ܕܦܰܨܺܝ ܐܶܢܘܢ ܡܶܢ ܩܪܳܒܶܗ ܕܰܒܥܶܠܕܰܪܳܐ ܐܰܝܟ ܕܶܐܡܰܪ ܢܒܺܝܐ.
ܕܝܰܩ̈ܕܶܐ ܫܰܡܺܝ̈ܢܶܐ ܐܰܣܶܩ ܠܳܟ ܥܰܡ ܣܘܳܬܳܐ ܕܕܶܟܪ̈ܶܐ: ܘܶܐܥܒܶܕ ܬܰܘܪ̈ܶܐ ܘܰܓܕܰܝܴ̈ܐ. ܒܗܳܠܶܝܢ ܡܦܰܫܶܩ ܥܰܠ ܓܡܺܝܪܽܘܬܳܐ ܕܕܶܒܚ̈ܐ ܪ̈ܽܘܚܳܢܶܐ. ܒܬܰܘܪ̈ܶܐ ܓܶܝܪ ܠܰܓܡܺܝ̈ܪ̈ܶܐ ܨܳܐܱܪ. ܒܫܰܡܺܝ̈ܢܶܐ ܘܰܒܕܶܟܪ̈ܶܐ ܠܗܳܠܝܢ ܕܒܳܬܰܪܗܽܘܢ. ܒܰܓܕܰܝܴ̈ܐ ܕܶܝܢ ܠܚܰܛܳܝ̈ܐ ܕܡܶܬܚܰܣܶܝܢ ܒܬܝܳܒܽܘܬܳܐ. ܕܟܰܕ ܚܳܙܶܐ ܗܘܳܐ ܒܥܰܝܢܳܐ ܕܪܽܘܚܳܐ ܩܳܪܶܐ ܗܘܳܐ ܠܩܰܕܺܝ̈ܫܶܐ ܕܢܺܐܬܽܘܢ ܢܶܚܙܽܘܢ ܬܶܕܡܽܘܪܬܳܐ ܕܫܽܘܒܩܳܢܳܐ ܕܰܚܛܳܗ̈ܐ.
ܬܰܘ ܫܡܰܥܘ ܠܰܡ ܘܶܐܫܬܰܥܶܐ ܠܟܽܘܢ: ܟܽܠܟܽܘܢ ܥܰܒ̈ܕܰܘܗܝ ܕܰܐܠܗܳܐ. ܡܶܕܶܡ ܕܰܥܒܰܕ ܠܢܰܦܫܝ: ܒܦܽܘܡܝ ܩܪܺܝܬܶܗ ܘܰܥܢܳܢܝ ܘܪܰܡܪܰܡܬܶܗ ܒܠܶܫܳܢܝ. ܥܰܠܗܳܝ ܕܰܩܪܳܐ ܠܰܐܠܗܳܐ. ܘܟܰܕ ܩܪܳܐ ܐܶܬܥܢܺܝ ܛܰܝܒܽܘܬܳܐ ܪܰܒܬܳܐ ܚܰܫܒܳܗ̇. ܘܡܳܢܳܐ ܐܳܡܰܪ ܢܒܺܝܐ.
ܥܰܘܠܐܴ ܠܰܡ ܐܶܢ ܚܙܰܝܬ ܒܠܶܒܝ ܠܳܐ ܬܶܦܪܽܘܩܰܝܢܝ ܡܳܪܝܳܐ: ܗܳܝܕܶܝܢ ܫܡܰܥ ܐܰܠܗܳܐ ܩܳܠܐ ܕܒܳܥܽܘܬܝ. ܒܪܺܝܟ ܗܽܘ ܡܳܪܝܳܐ: ܕܠܐܴ ܐܰܥܒܰܪ ܨܠܽܘܬܝ ܘܛܰܝܒܽܘܬܶܗ ܡܶܢܝ. ܪܰܒܳܐ ܗ̇ܝ ܦܰܪܶܗܣܺܝܰܐ ܕܰܩܢܶܐ ܗܘܳܐ ܢܒܺܝܳܐ ܒܢܰܦܫܶܗ܆ ܐܰܝܟ ܗܰܘ ܕܰܡܕܰܟܰܝ ܗܘܳܐ ܡܶܢ ܟܽܠ ܚܛܺܝܬܳܐ. ܩܳܥܶܐ ܗܘܳܐ ܠܘܳܬ ܐܰܠܗܳܐ܆ ܕܶܐܢ ܠܰܡ ܡܶܬܚܰܙܝܳܐ ܒܺܝ ܚܛܺܝܬܳܐ܆ ܐܱܘ ܥܰܘܠܐܴ ܒܠܶܒܝ ܠܐܴ ܠܰܡ ܬܶܦܪܽܘܩܰܝܢܝ ܡܳܪܝܳܐ. ܕܳܐܦܚܢܰܢ ܢܨܰܠܐܷ ܕܟܰܕ ܡܶܢ ܟܝܳܢܰܢ܆ ܒܟܰܣ̈ܝܳܬܰܢ ܘܰܒܓܰܠܝܴ̈ܬܰܢ܆ ܢܶܫܬܡܰܥ ܩܳܠܐ ܕܒܳܥܽܘܬܰܢ ܩܕܳܡ ܐܰܠܗܳܐ ܘܢܰܘܕܶܐ ܠܶܗ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܶܫܬܺܝܢ ܘܶܫܬܳܐ.
ܡܙܡܘܪܐ ܕܫܬܝܢ ܘܫܒܥܐ
ܟܕ ܡܰܘܕܰܥ ܕܡܶܢ ܒܳܬܰܪ ܕܗܳܘܶܐ ܐܢܳܫ ܒܽܐܘܠܨܳܢܳܐ: ܗܳܝܕܝܢ ܡܶܬܦܢܶܐ ܠܰܡܕܺܝܢܬܳܐ ܗܳܝ ܕܰܠܥܶܠ: ܘܡܶܢ ܒܳܬܰܪ ܕܺܝܢܳܐ ܟܽܠܢܶܫܡܳܐ ܐܺܝܬ ܠܶܗ ܕܰܬܫܰܒܰܚ ܠܡܳܪܝܳܐ. ܩܰܕܺܝ̈ܫܶܐ ܡܶܬܒܰܣܡܺܝܢ ܒܡܰܠܟܽܘܬܳܐ ܘܥܰܘܴ̈ܠܐ ܡܶܬܬܕܺܝܢܺܝܢ ܘܠܐܴ ܡܶܬܪܰܚܡܺܝܢ.
ܐܰܝܠܝܢ ܕܰܛܥܶܡܘ ܚܰܝܠܐ ܕܥܽܘܕܪ̈ܳܢܰܘܗܝ ܕܰܐܠܗܳܐ ܒܽܐܘ̈ܠܨܳܢܰܝܗܘܢ. ܘܰܚܙܰܘ ܢܰܦܫܗܽܘܢ ܟܰܕ ܩܳܝܡܳܐ ܒܽܐܘܠܨܳܢ̈ܐ ܩܫܰܝܴ̈ܐ ܥܕܰܡܳܐ ܠܡܰܘܬܳܐ. ܘܺܝܠܶܦܘ ܒܡܰܦܩܳܢܳܐ ܛܳܒܳܐ ܕܡܶܢܗܽܘܢ ܣܳܥܽܘܪܽܘܬܳܐ ܕܰܐܠܳܗܳܐ. ܘܟܰܕ ܐܺܝܬܰܝܗܘܢ ܒܽܐܘܠܨܳܢ̈ܐ ܠܐܴ ܫܠܰܘ ܡܶܢ ܡܰܘܕܝܳܢܽܘܬܳܐ. ܘܡܶܢ ܕܰܗܘܳܐ ܠܗܽܘܢ ܡܰܦܩܳܢܳܐ ܕܰܫܠܳܡܳܐ ܡܶܢ ܐܽܘܠܨܳܢ̈ܐ. ܬܽܘܒ ܣܰܓܺܝ ܐܰܘܕܺܝܘ ܠܗܰܘ ܕܦܰܨܺܝ ܐܶܢܘܢ. ܕܰܐܝܟ ܗܳܟܰܢܳܐ ܗܘܳܐ ܛܽܘܒܳܢܳܐ ܕܰܘܝܕ ܒܟܽܠ ܐܽܘ̈ܠܨܳܢܺܝܢ ܡܕܰܪܰܫ ܗܘܳܐ ܗܳܢܐ ܓܰܒܪܳܐ ܐܰܠܗܳܝܳܐ. ܘܠܰܘ ܒܰܠܚܽܘܕ ܒܰܪܕܽܘܦܝܳܐ ܕܩܳܡ ܥܠܰܘܗܝ ܡܶܢ ܫܳܐܘܳܠ. ܘܶܐܠܐ ܡܶܢ ܒܳܬܰܪ ܕܰܐܡܠܶܟ ܥܰܠ ܟܽܠܶܗ ܝܺܣܪܳܐܝܠ. ܣܒܰܪ ܕܠܰܝܬ ܡܶܟܺܝܠ ܣܳܛܳܢܳܐ ܐܳܦܠܐܴ ܦܶܓܥܳܐ ܒܺܝܫܳܐ. ܐܽܘܠܨܳܢܳܐ ܕܥܰܙܺܝܙ ܡܶܢ ܟܽܠܗܽܘܢ ܢܶܣܝܽܘ̈ܢܐ. ܩܳܡ ܥܠܰܘܗܝ ܡܶܢ ܡܪܳܕܳܐ ܕܰܐܒܺܝܫܳܠܽܘܡ ܒܪܶܗ. ܘܟܰܕ ܠܢܶܣܝܽܘ̈ܢܶܐ ܩܫܰܝܴ̈ܐ ܥܰܠ ܒܝܰܕ ܗܳܢܐ. ܬܶܫܒܚ̈ܬܳܐ ܣܰܓܺܝ̈ܐܬܳܐ ܙܰܡܰܪ. ܘܟܰܕ ܠܐ ܡܶܬܚܰܫܰܚ ܗܘܳܐ ܒܪܶܛܢܳܐ ܡܫܰܒܰܚ ܗܘܳܐ ܠܰܐܠܗܳܐ. ܘܡܶܢܒܳܬܰܪ ܕܰܗܘܳܐ ܠܶܗ ܢܰܘܚܳܐ ܘܶܐܬܩܛܶܠ ܐܰܒܺܝܫܳܠܽܘܡ ܒܦܺܐܪ̈ܶܐ ܕܩܽܘܒܳܠܛܰܝܒܽܘܬܐ ܡܰܘܕܶܐ ܗܘܳܐ ܠܰܐܠܗܳܐ. ܘܡܶܛܠ ܕܟܰܕ ܥܳܛܶܦ ܗܘܳܐ ܡܰܠܟܳܐ ܡܶܢ ܐܰܪܥܳܐ ܕܓܶܠܥܳܕ: ܘܰܥܒܰܪ ܝܽܘܪܕܢܳܢ ܢܰܗܪܳܐ ܕܢܺܐܬܶܐ ܠܰܡܕܺܝܢ̱ܬܶܗ ܘܰܦܢܰܘ ܠܘܳܬܶܗ ܟܽܠܗܽܘܢ ܕܰܡܪܰܕܘ ܥܠܰܘܗܝ ܥܰܡ ܐܰܒܺܝܫܳܠܽܘܡ ܒܪܶܗ. ܐܶܬܬܙܺܝܥ ܡܰܠܟܳܐ ܒܪܽܘܚܳܐ ܕܰܢܒܺܝܽܘܬܐ ܘܳܐܡܰܪ ܡܰܙܡܽܘܪܳܐ ܗܳܢܐ ܕܶܫܬܺܝܢ ܘܫܰܒܥܳܐ ܠܰܘ ܒܗܳܝ ܕܺܝܠܶܗ ܡܶܬܒܰܩܶܐ ܗܘܳܐ܆ ܐܶܠܐ ܒܗܳܝ ܕܰܗܘܱ̈ܝ ܠܚܰܪܬܳܐ ܠܘܳܬ ܗܰܘ ܡܰܠܟܳܐ ܕܰܫܪܳܪܳܐ. ܡܳܢܳܐ ܗܳܟܺܝܠ ܐܳܡܰܪ ܐ̱ܢܳܐ ܐܶܬܚܰܝܰܒ ܗܰܘ ܒܪܳܐ ܡܳܪܽܘܕܳܐ ܘܶܐܬܩܛܶܠ ܢܦܰܠ ܒܓܽܘܡܳܨܳܐ ܪܰܒܳܐ. ܐܶܬܟܰܫܺܝ ܥܠܰܘܗܝ ܝܰܓܪܳܐ ܕܟܺܐܦ̈ܐ ܪܰܘܪ̈ܒܳܬܳܐ. ܗܳܠܝܢ ܗܘܱ̈ܝ ܠܗܰܘ ܕܒܳܐܟܶܠܩܰܪܨܳܐ ܡܶܬܡܬܶܠ. ܐܶܬܚܰܝܰܒܘ ܘܰܢܦܰܠ ܒܰܩܪܳܒܳܐ ܡܳܪ̈ܽܘܕܶܐ ܕܥܰܡܶܗ. ܘܶܐܬܩܰܛܰܠܘ ܒܚܰܪܒܳܐ ܕܓܰܒܪ̈ܰܘܗܝ ܕܕܰܘܝܕ. ܘܶܐܟܠܰܬ ܐܶܢܘܢ ܚܰܝܘܰܬ ܥܳܒܳܐ. ܕܳܡ̈ܝܳܢ ܗܳܠܝܢ ܠܰܐܝܠܶܝܢ ܕܡܶܣܬܰܥܪ̈ܳܢ ܡܶܢ ܡܰܠܐܟ̈ܐ ܩܰܕܺܝ̈ܫܐ ܠܚܰܝ̈ܠܰܘܳܬܳܐ ܡܳܪ̈ܽܘܕܶܐ. ܟܰܕ ܦܢܳܐ ܕܰܘܝܕ ܡܰܠܟܳܐ ܡܶܢ ܒܳܬܰܪܟܶܢ ܕܢܶܥܽܘܠ ܠܐܘܪܺܫܠܶܡ܆ ܛܽܘܦܣܳܐ ܗ̇ܝ ܕܳܐܦ ܗܳܕܐ ܕܓܶܠܝܳܢܶܗ ܕܡܶܠܬܳܐ ܡܶܢ ܫܡܰܝܳܐ܆ ܡܳܐ ܕܳܐܬܶܐ ܠܕܺܝܢܳܐ ܘܦܳܢܶܐ ܕܢܶܥܽܘܠ ܠܰܡܕܺܝܢ̱ܬܳܐ ܕܰܠܥܶܠ܆ ܘܡܶܬܟܰܢܫܺܝܢ ܗܘܰܘ ܐܰܝܠܶܝܢ ܕܰܥܒܰܪܘ ܒܰܡܪܳܕܳܐ ܘܰܫܠܶܡܘ ܠܰܐܒܺܝܫܳܠܽܘܡ܆ ܘܡܶܫܬܰܥܒܕܺܝܢ ܠܕܰܘܝܕ. ܬܘܒ ܡܫܰܘܕܥܺܝܢ ܗܳܠܝܢ ܠܨܰܠܡܳܐ ܕܗܳܠܝܢ ܐܰܝܠܝܢ ܕܶܐܬܚܛܶܦܘ ܒܠܐܴ ܝܺܕܰܥܬܳܐ ܠܡܳܪܽܘܕܽܘܬܶܗ ܕܳܐܟܶܠܩܰܪܨܳܐ. ܘܡܶܛܠ ܕܗܳܝܕܶܝܢ ܡܳܐ ܕܶܐܬܚܙܺܝ ܡܰܠܟܳܐ ܒܙܳܟܽܘܬܳܐ ܘܕܳܫ ܥܰܠ ܨܰܘܪܶܗ ܕܰܛܪܽܘܢܳܐ. ܘܚܰܒܫܶܗ ܠܗܰܘ ܪܺܝܫܳܐ ܕܒܺܝܫܬܳܐ ܒܬܰܫܢܺܝܩܳܐ ܪܰܒܳܐ. ܐܰܟܡܳܐ ܕܳܐܦ ܗܰܘ ܒܪܳܐ ܡܳܪܽܘܕܳܐ ܫܕܳܝܗܝ ܝܽܘܐܳܒ ܒܰܪ ܨܽܘܪܺܝܳܐ ܒܓܽܘܡܳܨܳܐ ܪܰܒܳܐ. ܥܳܛܦܺܝܢ ܟܽܠܗܘܢ ܥܰܡ̈ܡܶܐ ܘܶܐܡ̈ܘܳܬܳܐ ܘܡܰܠܟ̈ܐ ܕܰܐܪܥܳܐ ܠܡܶܣܓܰܕܘ ܠܡܰܠܟܳܐ ܡܳܪܝܳܐ ܚܰܝܠܬܳܢܳܐ. ܐܰܟܡܳܐ ܕܳܐܦ ܫܰܒ̈ܛܶܐ ܕܺܝܣܪܳܐܝܠ ܗܳܝܕܝܢ ܠܡܰܠܟܳܐ ܕܰܘܝܕ. ܡܶܛܠ ܗܳܠܝܢ ܐܪ̈ܳܙܶܐ ܥܰܡܺܝ̈ܩܶܐ܆ ܕܰܘܝܕ ܐܰܠܗܳܝܐ ܬܶܫܒܽܘܚܬܳܐ ܗܳܕܐ ܡܙܰܡܰܪ ܗܘܳܐ ܘܳܐܡܰܪ:
ܐܠܰܗܰܢ ܢܪܰܚܶܡ ܥܠܰܝܢ܆ ܢܒܰܪܟܰܢ ܘܢܰܢܗܰܪ ܐܰܦܰܘ̈ܗܝ ܒܰܢ. ܕܢܶܕܰܥ ܒܰܐܪܥܳܐ ܐܽܘܪ̈ܚܳܬܶܗ: ܘܰܒܟܽܠܗܽܘܢ ܥܰܡ̈ܡܶܐ ܦܽܘܪܩܳܢܶܗ. ܒܳܗ̇ ܓܶܝܪ ܒܬܶܫܒܽܘܚܬܳܐ ܗܳܕܐ ܪ̈ܰܚܡܶܐ ܫܳܐܷܠ ܗܘܳܐ. ܠܰܘ ܠܶܗ ܒܰܠܚܽܘܕ ܐܶܠܐ ܠܟܽܠܗܘܢ ܫܰܒ̈ܛܶܐ ܕܺܝܣܪܳܐܝܠ ܒܳܥܶܐ ܗܘܳܐ ܪ̈ܰܚܡܶܐ. ܐܰܟܡܰܢ ܕܟܽܠܗܘܢ ܡܰܪܺܝܕܺܝܢ ܗܘܰܘ ܥܠܰܘܗܝ. ܘܰܒܗܳܠܝܢ ܩܴ̈ܠܐ ܡܚܰܣܳܝܽܘ ܡܚܰܣܶܐ ܗܘܳܐ ܠܗܽܘܢ ܚܛܺܝܬܶܗ ܕܰܡܪܳܕܳܐ. ܡܶܛܠ ܕܰܠܠܰܘܛܬܳܐ ܐܶܫܬܰܥܒܰܕܘ ܒܗܳܝ ܕܶܐܫܬܰܘܬܰܦܘ ܠܗܰܘ ܕܨܰܚܺܝ ܠܰܐܒܽܘܗܝ ܘܰܒܥܳܐ ܠܡܶܩܛܠܶܗ ܘܰܟܬܺܝܒ ܓܶܝܪ ܒܢܳܡܽܘܣܳܐ ܕܡܽܘܫܶܐ: ܕܠܺܝܛ ܗܽܘ ܟܽܠܡܰܢ ܕܰܡܨܰܚܶܐ ܠܰܐܒܽܘܗܝ ܘܠܶܐܡܶܗ (ܟܗܢ̈ܐ ܟ: ܛ). ܡܒܰܪܰܟ ܗܘܳܐ ܠܗܽܘܢ ܕܰܘܝܕ ܘܳܐܡܰܪ: ܢܒܰܪܟܰܢ ܠܰܡ ܘܢܰܢܗܰܪ ܐܰܦܰܘ̈ܗܝ ܒܰܢ. ܘܢܶܕܰܥ ܒܰܐܪܥܳܐ ܐܽܘܪ̈ܚܳܬܶܗ. ܡܰܐܠܽܘܢ ܓܶܝܪ ܡܰܠܝܳܐܝ̣ܬ ܛܥܳܐ ܗܘܳܐ ܥܰܡܳܐ ܐܽܘܪ̈ܚܳܬܶܗ. ܕܢܳܡܽܘܣܳܐ ܩܰܕܺܝܫܳܐ. ܐܰܝܟܰܢܳܐ ܓܶܝܪ ܠܐܴ ܛܥܰܘ. ܢܳܡܽܘܣܳܐ ܦܳܩܶܕ ܘܳܐܡܰܪ: ܕܠܺܝܛ ܗܽܘ ܟܽܠ ܕܢܶܕܡܰܟ ܥܰܡ ܐܰܢܬܰܬ ܐܰܒܽܘܗܝ (ܟܗ̈ܢܐ ܟ: ܝܐ). ܗܳܕܐ ܕܶܝܢ ܘܰܠܥܺܝܢ ܟܽܠܶܗ ܝܺܣܪܳܐܝܠ ܥܒܰܕ ܐܰܒܺܝܫܳܠܽܘܡ. ܟܰܕ ܢܩܰܫ ܠܶܗ ܡܰܫܟܢܳܐ ܥܰܠ ܐܶܓܳܪܳܐ ܘܰܕܡܶܟ ܥܰܡ ܢܶܫܰܘ̈ܗܝ ܕܰܐܒܽܘܗܝ. ܡܳܕܶܝܢ ܒܰܬܠܳܬ ܡܫܰܥܒܕܺܝܢ ܗܘܰܘ ܠܠܰܘܛܬܳܐ ܕܢܳܡܽܘܣܳܐ. ܐܰܝܠܶܝܢ ܕܶܐܫܬܰܥܒܰܕܘ ܘܰܡܪܰܕܘ ܥܰܡ ܐܰܒܺܝܫܳܠܽܘܡ. ܒܗܳܝ ܕܰܗܘܰܘ ܫܰܘܬܳܦ̈ܐ ܠܓܰܒܪܳܐ ܕܛܰܢܶܦ ܘܛܰܘܰܫ ܥܰܪܣܶܗ ܕܰܐܒܽܘܗܝ. ܘܰܕܬܰܪܬܶܝܢ ܒܗܳܝ ܕܰܒܥܳܐ ܕܢܶܩܛܽܘܠ ܠܰܐܒܽܘܗܝ. ܐܳܦ ܕܰܬܠܳܬ ܒܗܳܝ ܕܰܡܪܰܕ. ܙܳܕܶܩ ܗܘܳܐ ܡܳܕܶܝܢ ܕܰܢܚܰܣܶܐ ܡܰܠܟܳܐ ܥܰܠ ܥܰܡܳܐ. ܡܶܛܠ ܕܪܽܘܚܳܐ ܠܳܛ ܠܰܐܝܠܶܝܢ ܕܰܒܕܰܐܝܟ ܗܳܠܝܢ ܡܶܬܚܰܫܚܺܝܢ. ܘܬܘܒ ܗܽܘ ܪܽܘܚܳܐ ܢܶܥܛܽܘܦ ܢܪܰܚܶܡ ܘܰܢܚܰܣܶܐ ܘܰܢܒܰܪܶܟ. ܘܒܳܬܰܪ ܗܳܠܶܝܢ ܐܳܡܰܪ ܢܒܺܝܐ:
ܢܰܘܕܽܘܢ ܠܳܟ ܥܰܡ̈ܡܶܐ ܐܰܠܗܳܐ: ܢܰܘܕܽܘܢ ܠܳܟ ܥܰܡ̈ܡܶܐ ܟܽܠܗܽܘܢ. ܕܠܐܴ ܡܶܫܟܚܳܐ ܗܳܕܐ ܕܰܒܥܳܠܡܳܐ ܗܳܢܐ ܬܶܦܽܘܩ ܠܰܥܒܳܕܳܐ ܓܰܠܝܳܐܗܝ ܡܶܛܠ ܕܠܐ ܡܰܨܝܳܐ ܕܰܒܗܳܠܝܢ ܚܰܝ̈ܐ ܡܶܬܪ̈ܰܓܫܳܢܶܐ. ܢܶܫܬܰܥܒܕܽܘܢ ܟܽܠܗܘܢ ܥܰܡ̈ܡܶܐ ܠܬܰܘܕܺܝܬܶܗ ܕܰܨܠܺܝܒܳܐ. ܡܶܛܠ ܕܠܐܴ ܫܳܒܶܩ ܗܰܘ ܡܰܛܥܝܳܢܳܐ ܡܶܬܬܦܺܝܣ ܠܰܐܠܗܳܐ ܦܰܘܠܽܘܣ ܕܳܐܡܰܪ: ܟܰܕ ܡܦܰܫܶܩ ܫܽܘܥܒܳܕܳܐ ܕܥܰܡ̈ܡܶܐ ܠܰܚܕܳܐ ܣܶܓܕܬܳܐ ܕܰܐܠܗܽܘܬܳܐ. ܗܳܫܳܐ ܠܰܡ ܠܐܴ ܥܕܰܟܺܝܠ ܚܳܙܶܝܢܰܢ ܕܟܽܠܡܶܕܶܡ ܐܶܫܬܰܥܒܰܕ ܠܶܗ (ܥܒܪ̈ܝܐ ܒ: ܚ). ܡܳܕܶܝܢ ܒܗܰܘ ܥܳܠܡܳܐ ܕܒܳܬܰܪ ܗܳܢܐ. ܟܽܠܗܘܢ ܥܰܡ̈ܡܶܐ ܡܰܘܕܶܝܢ ܠܶܗ ܠܰܐܠܗܳܐ. ܡܶܛܠ ܗܳܕܐ ܡܳܐ ܕܶܐܬܚܙܺܝ ܗܰܘ ܕܰܝܳܢܳܐ ܟܺܐܢܳܐ. ܘܶܐܬܟܰܢܰܫܘ ܩܕܳܡܰܘܗܝ ܟܽܠܗܘܢ ܥܰܡܡ̈ܐ. ܘܰܦܬܰܚ ܣܶܦܪ̈ܶܐ ܕܕܺܝ̈ܢܰܘܗܝ ܬܪ̈ܺܝܨܶܐ. ܘܦܳܪܰܥ ܠܟܽܠ ܐ̱ܢܳܫ ܐܰܝܟ ܥܒܳܕܰܘ̈ܗܝ. ܡܰܠܟܽܘܬܳܐ ܠܩܰܕܺܝ̈ܫܶܐ ܘܬܰܫܢܺܝܩܳܐ ܠܡܰܪ̈ܳܚܶܐ. ܗܳܝܕܶܝܢ ܡܰܘܕܶܝܢ ܠܶܗ ܠܐܠܗܳܐ ܟܽܠܗܘܢ ܐܰܝܟ ܕܶܐܡܰܪ ܢܒܺܝܐ. ܘܗܳܠܝܢ ܕܥܳܐܠܺܝܢ ܠܰܓܢܽܘܢܳܐ ܘܡܶܬܒܰܣܡܺܝܢ ܒܚܰܝ̈ܐ ܡܶܛܠ ܕܚܳܙܶܝܢ ܕܥܳܒܶܕ ܦܽܘܪܥܳܢܳܐ ܠܦܽܘܠܚܳܢ ܥܒܳܕܰܝ̈ܗܘܢ. ܡܶܛܠ ܕܡܶܬܐܰܠܨܺܝܢ ܒܓܰܘ ܬܰܫܢܺܝܩܳܐ ܕܡܰܕܪܶܟ ܠܗܽܘܢ ܡܣܳܡ ܒܪܺܝܫܳܐ ܕܫܳܘܶܐ ܠܦܽܘܪܥܳܢ ܥܒܳܕܰܝ̈ܗܘܢ. ܘܚܳܕܶܝܢ ܘܰܡܫܰܒܚܺܝܢ ܒܢܱ̈ܝ ܡܰܠܟܽܘܬܳܐ ܐܰܝܟ ܕܶܐܡܰܪ ܢܒܺܝܐ:
ܢܶܚܕ̈ܝܳܢ ܘܰܢܫܰܒ̈ܚܳܢ ܡܰܠܟܘ̈ܬܳܐ. ܚܠܳܦ ܒܢܰܝ̈ܢܳܫܳܐ ܡܰܠܟ̈ܘܳܬܳܐ ܫܰܡܰܗ. ܡܶܛܠ ܕܠܐܴ ܫܘܶܝܢ ܕܰܪ̈ܓܶܐ ܕܝܳܪܬܺܝܢ ܒܢܱ̈ܝ ܢܽܘܗܪܳܐ. ܒܗܳܝ ܕܰܡܥܰܠܶܝܢ ܐܶܢܘܢ ܕܒܰܟܠܺܝ̈ܠܐ ܩܰܕܡܳܝ̈ܐ ܕܰܫܠܺܝܚܽܘܬܳܐ ܡܰܦܪܓܺܝܢ. ܘܰܠܬܰܚܬ ܡܶܢ ܗܳܠܝܢ ܩܳܝܡܺܝܢ ܢܒܺܝ̈ܐ ܒܡܰܠܟܽܘܬܳܐ. ܘܰܠܬܰܚܬ ܡܶܢ ܢܒܺܝ̈ܐ ܩܳܝܡܺܝܢ ܡܰܠܦ̈ܢܶܐ ܘܡܶܛܠ ܕܠܐܴ ܫܘܶܝܢ ܬܳܓܰܝ̈ܗܘܢ ܣܳܡ ܫܡܳܐ ܕܡܰܠܟ̈ܘܳܬܳܐ ܕܚܳܕ̈ܝܳܢ. ܐܶܡܰܪ ܓܶܝܪ ܢܒܺܝܐ:
ܕܕܳܐܷܢ ܐܰܢܬ ܠܥܰܡ̈ܡܶܐ ܬܪܺܝܨܳܐܝ̣ܬ. ܘܰܠܡܰܠܟ̈ܘܳܬܳܐ ܡܕܰܒܰܪ ܐܰܢܬ ܒܰܐܪܥܳܐ. ܠܥܰܡ̈ܡܶܐ ܕܶܝܢ ܕܳܐܢ ܐܰܢܬ. ܗܳܢܰܘ ܠܡܳܪ̈ܽܘܕܶܐ ܘܰܠܠܐܴ ܡܶܬܬܦܺܝ̈ܣܳܢܶܐ ܡܚܰܝܶܒ ܐܰܢܬ ܒܕܺܝܢܳܐ. ܬܘܒ ܕܶܝܢ ܡܶܢ ܒܳܬܰܪ ܥܳܐܷܦ ܡܶܠܬܶܗ ܘܳܐܡܰܪ:
ܢܰܘܕܽܘܢ ܠܳܟ ܥܰܡ̈ܡܶܐ ܐܰܠܗܳܐ: ܢܰܘܕܽܘܢ ܠܳܟ ܥܰܡ̈ܡܶܐ ܟܽܠܗܽܘܢ. ܗܳܕܶܐ ܡܫܰܘܕܥܳܐ ܥܰܠ ܬܰܘܕܺܝܬܳܐ ܕܠܐ ܫܶܠܝܳܐ. ܕܠܳܒܟܺܝܢ ܟܽܠܗܘܢ ܡܠܺܝ̈ܠܐ ܒܳܬܰܪ ܪܶܗܛܶܗ ܕܥܳܠܡܳܐ ܗܳܢܐ. ܟܰܕ ܕܶܝܢ ܒܰܚܙܳܬܳܐ ܕܛܳܒ ܚܰܬܺܝܬܳܐ ܢܶܬܒܰܩܶܐ ܒܦܶܬܓ̈ܡܶܐ ܗܳܠܶܝܢ. ܗܳܝ ܕܢܰܘܕܽܘܢ ܠܳܟ ܥܰܡܡ̈ܐ ܐܰܠܗܳܐ. ܕܠܐ ܐܶܡܰܪ ܟܽܠܗܘܢ ܒܶܗ ܒܦܶܬܓܳܡܳܐ ܗܳܢܐ܆ ܥܰܠ ܡܰܘܕܝܳܢܽܘܬܳܐ ܕܰܡܗܰܝܡ̈ܢܶܐ ܕܰܒܥܳܠܡܳܐ ܗܳܢܐ ܐܶܡܰܪ ܪܽܘܚܳܐ. ܗܳܝܕܶܝܢ ܕܢܰܘܕܽܘܢ ܠܳܟ ܥܰܡ̈ܡܶܐ ܟܽܠܗܘܢ. ܥܰܠ ܬܰܘܕܺܝܬܳܐ ܕܒܳܬܰܪ ܪܶܗܛܳܐ ܕܶܐܣܛܽܘ̈ܟܣܶܐ ܗܳܠܝܢ ܡܶܬܚܰܙܝ̈ܢܶܐ. ܡܳܐ ܕܰܡܫܰܪܝܳܐ ܐܰܪܥܳܐ ܕܬܰܦܪܶܐ ܚܠܳܦ ܥܶܩܳܪ̈ܐ ܝܰܒܺܝ̈ܫܶܐ ܓܽܘܫܡ̈ܐ ܫܰܪ̈ܒܳܬܳܐ. ܐܶܡܰܪ ܓܶܝܪ ܪܽܘܚܳܐ ܟܰܕ ܡܦܰܫܶܩ ܗܳܕܐ.
ܐܰܪܥܳܐ ܝܶܗܒܰܬ ܦܺܐܪ̈ܶܝܗ̇. ܝܳܗܒܳܐ ܐܰܪܥܳܐ ܦܺܐܪ̈ܶܐ ܘܙܰܪ̈ܥܶܐ ܡܠܺܝ̈ܠܐ ܕܰܛܡܺܝܪܺܝܢ ܒܳܗ̇. ܟܰܕ ܡܰܦܢܝܳܐ ܓܽܘܥܠܳܢܳܐ ܕܛܽܘ̈ܗܡܶܐ ܥܰܡ ܫܰܪ̈ܒܳܬܳܐ. ܕܶܐܬܛܡܰܪܘ ܒܥܽܘܒܳܗ̇. ܘܰܐܝܟ ܬܺܐܬܳܐ ܕܡܰܘܫܛܳܐ ܦܺܐܪ̈ܶܐ ܒܰܫܺܝ̈ܠܐ ܘܰܚܠܰܝܴ̈ܐ. ܡܰܦܪܥܳܐ ܡܶܢ ܓܰܘܳܗ̇ ܦܺܐܪ̈ܶܐ ܕܩܰܕܺܝ̈ܫܶܐ ܘܰܒܬܽܘ̈ܠܐ ܘܡܶܬܚܰܕܬܳܐ ܘܗܳܘܝܳܐ ܥܠܰܝܡܬܳܐ ܘܰܕܫܳܘܝܳܐ ܠܒܽܘܪܟܬܳܐ. ܘܰܚܠܳܦ ܗܳܝ ܕܡܶܢ ܒܪܺܝܫܺܝܬ ܝܶܗܒܰܬ ܦܺܐܪ̈ܶܐ ܕܶܐܫܬܰܥܒܰܕܘ ܠܡܰܘܬܳܐ ܘܠܰܚܒܳܠܐ. ܡܶܛܠ ܗܳܕܐ ܡܶܢ ܥܳܒܽܘܕܳܐ ܐܶܬܬܠܺܝܛܰܬ ܘܡܶܛܠܗܳܕܐ ܡܩܰܒܠܐܴ ܒܽܘܪܟܬܳܐ ܡܶܢ ܐܰܠܗܳܐ ܕܰܐܝܟ ܕܶܐܡܰܪ ܢܒܺܝܐ:
ܢܒܰܪܟܰܢ ܐܰܠܗܳܐ ܐܰܠܳܗܰܢ ܘܰܢܒܰܪܟܰܢ ܐܰܠܳܗܰܢ. ܗܳܢܰܘ ܠܳܗ̇ ܠܰܐܪܥܳܐ ܡܒܰܪܶܟ ܐܰܠܗܳܐ. ܘܰܠܦܺܐܪ̈ܶܐ ܕܡܰܦܩܳܐ ܕܺܐܝܬܰܝܗܘܢ ܩܰܕܺܝ̈ܫܐ. ܘܗܳܝܕܝܢ ܡܶܬܦܰܪܣܳܐ ܕܶܚܠܬܶܗ ܘܫܽܘܠܛܳܢܶܗ ܥܰܠ ܟܽܠܗܘܢ ܥܶܒܪ̈ܶܝܗ̇ ܕܰܐܪܥܳܐ ܕܚܰܝ̈ܐ.
ܘܢܶܕܚܠܽܘܢ ܡܶܢܶܗ ܟܽܠܗܽܘܢ ܥܶܒܪ̈ܶܝܗ̇ ܕܰܐܪܥܳܐ. ܘܟܽܠܗܽܘܢ ܐܰܝܠܶܝܢ ܕܡܶܬܒܰܣܡܺܝܢ ܒܝܳܪܬܽܘܬܳܐ ܗܳܝ ܕܰܐܪܥܳܐ ܕܚܰܝ̈ܐ. ܢܰܘܕܽܘܢ ܘܰܢܫܰܒܚܽܘܢ ܟܰܕ ܪܳܘܙܺܝܢ ܘܰܡܫܰܒܚܺܝܢ ܠܰܡܫܺܝܚܳܐ ܐܰܠܗܳܐ ܦܳܪܽܘܩܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܶܫܬܺܝܢ ܘܫܰܒܥܳܐ
ܡܙܡܘܪܐ ܕܫܬܝܢ ܘܬܡܢܝܐ
ܡܰܘܕܰܥ ܥܰܠ ܩܝܳܡܬܳܐ ܕܰܐܠܗܳܐ ܕܡܶܢ ܩܰܒܪܳܐ: ܘܥܰܠ ܡܶܙܕܰܟܝܳܢܽܘܬܳܐ ܕܰܒܥܶܠܕ̈ܒܳܒܶܐ ܕܚܰܝܱ̈ܝܢ: ܘܥܰܠ ܓܒܺܝܬܳܗ̇ ܕܥܺܕܬܳܐ: ܘܥܰܠ ܟܳܪܽܘܙܽܘܬܳܐ ܕܰܫܠܺܝ̈ܚܶܐ.
ܫܳܪܽܘܬܳܐ ܡܰܠܝܰܬ ܟܽܠ ܒܽܘ̈ܣܳܡܺܝܢ ܐܰܠܗܝ̈ܐ. ܘܰܚܫܳܡܺܝܬܳܐ ܥܰܬܺܝܪܰܬ ܒܟܽܠ ܛܥܽܘ̈ܡܺܝܢ ܪ̈ܽܘܚܳܢܶܐ. ܬܰܩܶܢ ܘܣܳܡ ܩܕܳܡܰܝܢ ܪܽܘܚܳܐ ܕܰܐܠܗܳܐ. ܒܬܶܫܒܽܘܚܬܳܐ ܗܳܕܐ ܕܶܫܬܺܝܢ ܘܰܬܡܳܢܶܐ. ܘܥܰܡ ܣܡܳܟܳܐ ܕܡܰܠܟܳܐ ܕܰܒܡܶܕܶܡ ܠܐ ܚܰܣܺܝܪ ܡܶܢ ܟܽܠ ܬܽܘ̈ܩܳܢܺܝܢ. ܗܳܟܰܢܳܐ ܐܳܦ ܪܽܘܚܳܐ ܕܰܐܠܗܳܐ ܒܡܰܙܡܽܘܪܳܐ ܗܳܢܐ. ܒܢܱ̈ܝ ܐܪ̈ܳܙܶܐ ܩܰܕܺܝ̈ܫܐ ܘܰܣܒܺܝ̈ܣܰܝ ܒܟܽܠ ܥܽܘܬܪ̈ܺܝܢ. ܘܰܛܡܰܪ ܘܣܳܡ ܩܕܳܡ ܥܺܕܬܶܗ ܒܰܙܡܺܝܪܬܳܐ ܗܳܕܐ. ܘܰܒܟܠ ܡܶܕܶܡ ܠܐ ܒܳܨܰܪ. ܒܪܰܡ ܕܶܝܢ ܗܰܘ ܕܳܐܡܰܪ܆ ܟܰܕ ܫܽܘܪܳܝܳܐ ܥܒܰܕ ܡܶܢ ܥܶܠܰܬ ܓܰܝ̈ܣܶܐ ܡܫܰܚܠܦ̈ܐ ܕܶܐܬܛܰܝܰܒܘ ܘܰܣܠܶܩܘ ܥܠܰܘܗܝ. ܐܶܠܐ ܪܶܥܝܳܢܳܐ ܕܪܽܘܚܳܐ ܠܘܳܬ ܥܽܘܬܪ̈ܶܐ ܟܣܰܝ̈ܐ ܘܥܰܡܺܝ̈ܩܶܐ ܚܰܛܦܶܗ ܘܗܰܘ ܡܰܢ ܡܰܠܟܳܐ ܕܰܘܝܕ ܡܶܬܬܙܺܝܥ ܗܘܳܐ ܡܶܢ ܩܪ̈ܳܒܶܐ ܕܥܰܡ̈ܡܶܐ ܒܰܪܒܪ̈ܳܝܶܐ. ܡܶܛܠ ܕܣܰܓܺܝ̈ܐܐ ܡܰܠܟ̈ܐ ܕܚܰܝ̈ܠܰܘܳܬܳܐ ܐܶܬܛܰܝܰܒܘ ܥܠܰܘܗܝ ܘܰܣܠܶܩ ܒܰܟܢܽܘܫܝܳܐ. ܘܥܰܠܗܳܝ ܥܪܰܩ ܠܒܶܝܬ ܓܰܘܣܳܐ ܕܰܐܠܗܳܐ. ܘܰܩܪܳܐ ܕܢܺܐܬܶܐ ܐܰܠܗܳܐ ܠܥܽܘܕܪܳܢܶܗ. ܘܡܶܛܠܗܳܕܐ ܫܒܰܩ ܝܰܨܺܝܦܽܘܬܳܐ ܕܥܰܠ ܬܰܟܬܽܘܫ̈ܐ ܘܰܩܪ̈ܳܒܶܐ. ܘܶܐܬܦܢܺܝ ܠܘܳܬ ܐܰܠܗܳܐ ܟܰܕ ܡܙܰܡܰܪ ܒܰܥܝܳܕܶܗ ܘܳܐܡܰܪ:
ܢܩܽܘܡ ܐܠܰܗܳܐ ܘܢܶܬܒܰܕܪܽܘܢ ܟܽܠܗܽܘܢ ܒܥܶܠܕ̈ܒܳܒܰܘܗܝ. ܘܢܶܥܪܩܽܘܢ ܣܳܢܰܐܘ̈ܗܝ ܡܶܢ ܩܕܳܡܰܘܗܝ: ܘܰܐܝܟ ܕܡܶܬܛܰܠܰܩ ܬܶܢܳܢܳܐ ܢܶܬܛܰܠܩܽܘܢ. ܘܰܐܝܟ ܕܡܶܬܦܰܫܪܳܐ ܫܥܽܘܬܳܐ ܡܶܢ ܩܕܳܡ ܢܽܘܪܳܐ܆ ܢܺܐܒܕܽܘܢ ܪ̈ܰܫܺܝܥܶܐ ܡܶܢ ܩܕܳܡ ܐܰܠܗܳܐ. ܗܳܠܝܢ ܐܶܡܰܪ ܕܰܘܝܕ ܢܒܺܝܐ ܩܕܳܡ ܥܰܡܳܐ. ܟܰܕ ܚܳܐܱܪ ܗܘܳܐ ܒܰܟܢܽܘܫܝܳܐ ܕܡܰܠܟ̈ܘܳܬܳܐ. ܘܰܕܪ̈ܰܒܰܝ ܚܰܝ̈ܠܰܘܳܬܳܐ ܕܶܐܬܛܰܝܰܒܘ ܥܠܰܘܗܝ ܠܰܩܪܳܒܳܐ. ܒܪܰܡ ܢܶܫܒܽܘܩ ܚܢܰܢ ܬܰܫܥܺܝܬܳܐ ܒܰܪܳܝܬܳܐ ܕܥܰܠ ܡܶܬܚܰܙܝ̈ܢܝܳܬܳܐ. ܘܟܰܕ ܩܳܪܶܝܢܰܢ ܠܐܠܗܳܐ ܠܥܽܘܕܪܳܢܰܢ ܢܶܪܕܶܐ ܒܳܬܰܪ ܬܰܪܥܺܝܬܳܐ ܕܪܽܘܚܳܐ ܠܒܶܝܬܓܰܙܳܐ ܕܐܪ̈ܳܙܶܐ ܥܰܬܺܝܪ̈ܶܐ. ܝܰܬܺܝܪ ܕܡܶܫܟܚܺܝܢܰܢ ܕܦܰܘܠܽܘܣ ܗܰܘ ܝܰܡܳܐ ܕܦܽܘܫܳܩ̈ܐ. ܟܰܕ ܐܰܝܬܺܝ ܣܳܗܕܽܘܬܳܐ ܥܰܠ ܗܳܕܐ ܬܶܫܒܽܘܚܬܳܐ ܒܶܐܓܰܪܬܳܐ ܕܶܐܦܶܣܳܝ̈ܐ. ܡܶܛܠ ܡܶܠܬܶܗ ܕܰܐܠܗܳܐ ܐܰܟܬܶܒ ܥܠܶܝܗ̇ ܕܶܐܬܡܪܰܬ. ܡܳܕܶܝܢ ܡܶܢ ܗܳܝ ܕܰܐܟܬܶܒ ܦܰܘܠܽܘܣ ܢܶܬܒܰܩܶܐ ܒܫܽܘܪܳܝܳܐ ܕܡܰܙܡܽܘܪܳܐ ܗܳܢܐ. ܠܡܳܢܳܐ ܐܶܡܰܪ ܢܩܽܘܡ ܐܰܠܗܳܐ. ܐܰܪܰܐ ܐܰܝܟ ܕܡܶܢ ܫܶܢܬܳܐ ܘܗܳܐ ܟܬܺܝܒ ܕܠܐܴ ܢܳܐܷܡ ܘܠܐ ܕܳܡܶܟ. ܢܳܛܽܘܪܶܗ ܕܺܝܣܪܳܐܝܠ. ܘܶܐܠܐ ܐܰܝܟ ܕܡܶܢ ܟܽܘܪܣܝܳܐ ܘܡܰܘܬܒܳܐ. ܘܗܳܐ ܠܐܴ ܣܢܺܝܩ ܗܰܘ ܕܒܰܟܝܳܢܶܗ ܐܺܝܬܰܘܗܝ ܦܫܺܝܛܳܐ. ܘܶܐܢ ܡܟܰܢܶܐ ܡܰܪܟܰܒܬܳܐ ܐܰܘ ܪܳܟܽܘܒܳܐ. ܐܰܝܟ ܗܳܝ: ܕܗܳܐ ܡܳܪܝܳܐ ܪܟܺܝܒ ܥܢܴ̈ܢܶܐ ܩܰܠܺܝ̈ܠܳܬܳܐ ܘܥܳܐܷܠ ܠܡܶܨܪܶܝܢ (ܐܫܥܝܐ ܝܛ: ܐ). ܘܰܐܝܟ ܗܳܝ ܕܰܚܙܳܐ ܢܒܺܝܐ ܠܡܳܪܝܳܐ ܕܝܳܬܶܒ ܥܰܠ ܟܽܘܪܣܝܳܐ ܪܳܡܳܐ. ܘܰܐܝܟ ܗܳܝ ܕܰܪܟܺܝܒ ܥܰܠ ܟܪ̈ܽܘܒܶܐ ܘܰܦܪܰܚ. ܘܗܳܕܐ ܕܶܐܡܰܪ ܪܽܘܚܳܐ ܢܩܽܘܡ ܐܰܠܗܳܐ ܡܶܢ ܡܕܰܒܪܳܢܽܘܬܳܐ ܕܰܐܠܗܳܐ ܕܒܰܒܣܰܪ ܢܶܣܒܰܬ ܥܶܠܬܳܐ ܘܠܰܘ ܡܶܢ ܟܝܳܢܳܐ ܡܬܽܘܡܳܝܳܐ. ܩܳܪܶܐ ܠܶܗ ܪܽܘܚܳܐ ܢܩܽܘܡ ܠܰܘ ܡܶܢ ܟܽܘܪܣܝܳܐ ܕܰܟܪ̈ܽܘܒܶܐ. ܐܶܠܐ ܡܶܢ ܫܶܢܬܳܐ ܕܡܰܘܬܳܐ. ܟܰܕ ܐܶܬܓܠܺܝ ܒܰܒܣܰܪ ܘܰܗܘܳܐ ܒܰܪܢܳܫܳܐ ܐܰܠܗܳܐ ܡܶܠܬܳܐ. ܘܶܐܬܢܰܣܺܝ ܒܚܰܫ̈ܐ ܠܐܴ ܥܕܺܝ̈ܠܐ ܘܰܛܥܶܡ ܡܰܘܬܳܐ ܘܥ̣ܰܠ ܕܡܶܟ ܥܰܠ ܬܰܫܘܺܝܬܳܐ ܕܥܰܢܺܝ̈ܕܶܐ ܒܰܫܪܳܪܳܐ ܘܠܰܘ ܒܦܰܢܛܰܣܺܝܰܐ. ܐܶܠܐ ܒܰܫܪܳܪܳܐ ܐܰܠܗܳܐ ܛܥܶܡ ܡܰܘܬܳܐ. ܟܰܕ ܐܺܝܬ ܠܶܗ ܦܰܓܪܳܐ ܚܳܫܽܘܫܳܐ ܘܡܳܝܽܘܬܳܐ. ܫܩܰܠ ܚܰܫܱ̈ܝܢ ܘܰܛܥܶܡ ܟܺܐܒܱ̈ܝܢ ܘܰܛܥܶܡ ܡܰܘܬܳܐ ܘܶܐܬܺܝܕܰܥ ܕܰܒܪܶܗ ܗܽܘ ܕܰܐܠܗܳܐ ܕܩܳܡ ܡܶܢ ܩܰܒܪܳܐ ܘܰܐܠܗܳܐ ܫܰܪܺܝܪܳܐܝ̣ܬ. ܐܰܟܡܳܐ ܕܰܐܠܶܦ ܚܰܟܺܝܡܳܐ ܒܟܽܠ ܦܰܘܠܽܘܣ ܟܰܕ ܟܳܬܶܒ ܠܘܳܬ ܪ̈ܽܘܡܳܝ̈ܐ. ܕܶܐܬܺܝܕܰܥ ܒܪܳܐ ܕܰܐܠܗܳܐ܇ ܒܪܽܘܚ ܩܕܽܘܫ ܘܰܒܚܺܝܠ. ܕܩܳܡ ܡܶܢ ܒܶܝܬ ܡܺܝ̈ܬܶܐ ܝܶܫܽܘܥ ܡܫܺܝܚܳܐ ܡܳܪܰܢ (ܪ̈ܗܘܡܝܐ ܐ: ܕ). ܡܳܕܶܝܢ ܠܰܘ ܗܳܕܐ ܩܝܳܡܬܳܐ ܕܰܗܘܳܬ ܠܰܐܠܗܳܐ ܒܠܐܴ ܡܶܬܚܰܒܠܳܢܽܘܬܳܐ ܡܶܢ ܡܰܘܬܳܐ ܐܳܡܰܪ ܪܽܘܚܳܐ܆ ܢܩܽܘܡ ܐܰܠܗܳܐ ܘܢܶܬܒܰܕܪܽܘܢ ܟܽܠܗܘܢ ܒܥܶܠܕ̈ܒܳܒܰܘܗܝ. ܟܰܕ ܒܥܶܠܕ̈ܒܳܒܶܐ ܠܨܰܠܡ̈ܐ ܩܳܪܶܐ. ܘܰܠܗܘܢ ܬܘܒ ܡܫܰܡܰܗ ܣܳܢܰܐܘ̈ܗܝ. ܐܰܝܟܰܢܳܐ ܕܬܶܬܡܰܠܐܷ ܗܳܝ ܕܰܣܢܰܐܘܽܢܝ ܡܰܓܳܢ. ܘܒܰܕܰܪ ܐܶܢܘܢ ܐܰܝܟ ܕܶܐܡܰܪ ܪܽܘܚܳܐ. ܘܰܡܛܰܠܶܩ ܠܗܽܘܢ ܐܰܝܟ ܬܶܢܳܢܳܐ ܘܰܡܦܰܫܰܪ ܠܗܽܘܢ ܐܰܝܟ ܕܠܰܫܥܽܘܬܳܐ. ܒܗܳܝ ܒܰܪܬ ܩܳܠܐ ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ. ܗܳܝ ܕܰܡܛܰܝܒܳܐ ܠܐܴܟܶܠܩܰܪܨܳܐ ܘܰܠܡܰܠܐܟܰܘ̈ܗܝ (ܡܬܝ ܟܗ: ܡܐ). ܡܶܛܠܗܳܢܐ ܡܰܘܣܶܦ ܢܺܐܒܕܽܘܢ ܪ̈ܰܫܺܝܥܶܐ ܡܶܢ ܩܕܳܡ ܐܰܠܗܳܐ.
ܘܙܰܕܺܝ̈ܩܶܐ ܢܶܚܕܽܘܢ ܘܢܶܬܥܰܫܢܽܘܢ ܩܕܳܡ ܐܰܠܗܳܐ: ܘܢܶܚܕܽܘܢ ܒܒܽܘܣܳܡܶܗ. ܙܰܕܺܝ̈ܩܶܐ ܗܳܪܟܳܐ ܠܰܫܠܺܝܚ̈ܐ ܩܳܪܶܐ. ܗܳܠܝܢ ܓܶܝܪ ܚܕܰܘ ܐܳܦ ܐܶܬܦܨܰܚܘ ܟܰܕ ܩܳܡ ܐܰܠܗܳܐ. ܘܒܰܕܰܪ ܠܩܶܣܛܽܘܢܳܪ̈ܶܐ ܡܶܢ ܬܰܪܥܳܐ ܕܩܰܒܪܶܗ. ܐܶܡܰܪ ܩܰܕܺܝܫܳܐ ܫܠܺܝܚܳܐ ܝܽܘܚܰܢܳܢ. ܟܳܪܽܘܙܶܗ ܕܰܨܠܺܝܒܳܐ. ܕܟܰܕ ܗܘܳܐ ܪܰܡܫܳܐ ܕܝܰܘܡܳܐ ܗܰܘ ܕܚܰܕ ܒܫܰܒܳܐ: ܘܬܰܪ̈ܥܶܐ ܐܰܚܺܝܕܺܝܢ ܗ̱ܘܰܘ ܕܰܐܝܟܳܐ ܕܺܐܝܬܰܝܗܽܘܢ ܗ̱ܘܰܘ ܬܰܠܡܺܝ̈ܕܶܐ: ܡܶܛܠ ܕܶܚܠܬܳܐ ܕܝܗܽܘ̈ܕܳܝܶܐ. ܐܶܬܳܐ ܝܶܫܽܘܥ ܟܰܕ ܐܰܚܺܝܕܺܝܢ ܬܰܪ̈ܥܶܐ ܩܳܡ ܒܰܝܢܳܬܗܘܢ. ܘܶܐܡܰܪ ܠܗܽܘܢ: ܫܠܳܡܳܐ ܥܰܡܟܽܘܢ. ܗܳܕܐ ܐܶܡܰܪ܆ ܘܚܰܘܺܝ ܐܶܢܽܘܢ ܐܺܝ̈ܕܰܘܗ̱ܝ ܘܣܶܛܪܶܗ. ܘܰܚܕܺܝܘ ܬܰܠܡܺܝ̈ܕܶܐ ܕܰܚܙܰܘ ܠܡܳܪܰܢ (ܝܘܚܢܢ ܟ: ܝܛ-ܟ). ܥܰܠܗܳܕܐ ܚܰܕܽܘܬܳܐ ܕܰܗܘܳܬ ܒܥܶܠܺܝܬܳܐ ܠܬܰܠܡܺܝ̈ܕܶܐ ܩܰܕܶܡ ܙܰܡܰܪ ܪܽܘܚܳܐ ܥܰܠ ܩܝܳܡܬܳܐ ܕܰܡܫܺܝܚܳܐ. ܙܰܕܺܝ̈ܩܶܐ ܢܶܚܕܽܘܢ ܘܢܶܬܥܰܫܢܽܘܢ ܩܕܳܡ ܐܠܰܗܳܐ. ܥܳܐܷܦ ܡܶܠܬܶܗ ܘܳܐܡܰܪ ܘܢܶܚܕܽܘܢ ܒܒܽܘܣܳܡܶܗ. ܡܳܢܰܐ ܗ̄ܘ ܒܽܘܣܳܡܳܐ؟ ܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ. ܘܒܳܬܰܪ ܕܰܚܙܰܘ ܘܰܚܕܺܝܘ ܒܰܚܙܳܬܶܗ. ܬܘܒ ܢܦܰܚ ܒܗܽܘܢ. ܘܶܐܡܰܪ ܠܗܽܘܢ: ܩܰܒܶܠܘ ܪܽܘܚܳܐ ܩܰܕܺܝܫܳܐ. ܐܶܢ ܬܶܫܒܩܽܘܢ ܚܛܳܗ̈ܐ ܠܐ̱ܢܳܫ ܢܶܫܬܒܩܽܘܢ ܠܶܗ. ܘܶܐܢ ܬܶܚܕܽܘܢ ܕܐ̱ܢܳܫ ܐܰܚܺܝܕܺܝܢ (ܝܘܚܢܢ ܟ: ܟܒ-ܟܓ). ܐܰܝܢܳܐ ܒܽܘܣܳܡܳܐ ܕܪܰܒ ܡܶܢ ܗܳܢܐ ܢܶܗܘܶܐ ܠܰܒܢܰܝ̈ܢܳܫܳܐ. ܕܩܰܒܶܠܘ ܡܰܘܗܰܒܬܳܐ ܕܰܐܝܟ ܐܰܠܗܳܐ ܢܶܫܒܩܽܘܢ ܚܛܳܗ̈ܐ ܠܰܒܢܰܝ̈ܢܳܫܳܐ. ܕܰܠܘܳܬܗܘܢ ܕܗܳܢܘܢ ܕܗܳܟܰܢܳܐ ܝܪܶܒܘ ܘܶܐܬܥܰܠܺܝܘ. ܘܩܰܒܶܠܘ ܒܝܰܕ ܡܰܦܽܘܚܺܝܬܳܐ ܪܽܘܚܳܐ ܩܰܕܺܝܫܳܐ ܘܒܽܘܣܳܡܳܐ. ܐܳܡܰܪ ܢܒܺܝܐ:
ܙܡܰܪܘ ܠܐܱܠܗܳܐ ܘܫܰܒܰܚܘ ܠܰܫܡܶܗ: ܫܰܒܰܚܘ ܠܕܰܪܟܺܝܒ ܠܡܰܥܪܒܳܐ ܡܳܪܝܳܐ ܫܡܶܗ. ܡܰܥܪܒܳܐ ܒܟܽܠ ܕܽܘܟܳܐ ܥܰܠ ܫܽܘܠܳܡܳܐ ܡܡܰܬܠܺܝܢ ܠܳܗ̇ ܟܬܳܒ̈ܐ ܩܰܕܺܝ̈ܫܶܐ. ܐܰܘ ܒܚܶܫܽܘܟܳܐ ܡܟܰܢܶܝܢ ܠܳܗ̇. ܒܳܗ̇ ܓܶܝܪ ܡܶܬܚܰܢܩܺܝܢ ܢܰܗܺܝܪ̈ܶܐ ܒܡܰܥܪ̈ܳܒܰܝܗܘܢ. ܘܒܳܗ̇ ܕܳܥܶܟ ܢܽܘܗܪܶܗ ܕܫܶܡܫܳܐ. ܘܒܳܗ̇ ܓܶܝܪ ܡܶܬܥܰܦܶܐ ܣܰܗܪܳܐ. ܟܰܕ ܒܳܛܶܠ ܡܶܢ ܢܽܘܗܪܶܗ. ܛܽܘܦܣܳܐ ܡܳܕܶܝܢ ܕܡܰܘܬܳܐ ܘܕܰܚܛܺܝܬܳܐ ܡܶܬܪܰܫܡܺܝܢ ܒܳܗ̇. ܘܥܰܠܗܳܝ ܟܰܕ ܐܶܬܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ. ܥܰܠ ܚܛܺܝܬܳܐ ܘܥܰܠ ܡܰܘܬܳܐ ܪܟܶܒ. ܡܶܛܠܗܳܕܐ ܐܶܡܰܪ ܝܽܘܚܰܢܳܢ ܟܳܪܽܘܙܳܐ ܘܰܫܠܺܝܚܳܐ: ܕܗܰܘ ܕܰܪܟܶܒ ܥܰܠ ܡܰܥܪܒܳܐ ܡܶܬܝܰܕܥܳܢܺܝܬܳܐ ܕܺܐܝܬܶܝܗ̇ ܡܰܪܝܰܡ: ܕܗܽܘ ܠܰܡ ܢܽܘܗܪܳܐ ܒܚܶܫܽܘܟܳܐ ܡܰܢܗܰܪ. ܘܚܶܫܽܘܟܳܐ ܠܐܴ ܐܰܕܪܟܶܗ (ܝܘܚܢܢ ܐ: ܗ).
ܘܫܰܦܺܝܪ ܐܶܡܰܪ ܢܒܺܝܐ ܕܥܰܠ ܡܰܥܪܒܳܐ ܪܟܺܝܒ. ܡܶܛܠ ܕܰܐܝܟ ܡܰܠܟܳܐ ܕܣܳܐܷܡ ܒܥܶܠܕ̈ܒܳܒܰܘܗܝ ܬܚܶܝܬ ܪ̈ܶܓܠܰܘܗܝ ܡܳܐ ܕܚܳܝܒܺܝܢ ܡܶܢܶܗ ܒܬܰܟܬܽܘܫܳܐ ܕܰܩܪܳܒܳܐ. ܗܳܟܰܢܐ ܣܳܡܶܗ ܠܚܶܫܽܘܟܳܐ ܕܰܚܛܺܝܬܳܐ. ܘܰܠܗܰܘ ܕܡܰܥܒܶܕ ܚܛܺܝܬܳܐ ܬܚܶܝܬ ܪ̈ܶܓܠܰܘܗܝ. ܡܶܟܺܝܠ ܠܰܝܬ ܕܶܚܠܬܳܐ ܡܶܢ ܗܰܘ ܕܒܰܚܛܺܝܬܳܐ ܡܰܡܠܶܟ ܗܘܳܐ. ܡܶܛܠ ܕܶܐܬܒܰܛܠܰܬ ܠܳܗ̇ ܡܰܠܟܽܘܬܶܗ. ܘܥܰܠܗܳܝ ܡܠܰܒܶܒ ܠܗܽܘܢ ܠܰܦܪ̈ܺܝܩܶܐ ܡܙܰܡܪܳܢܳܐ ܕܰܕܠܐ ܕܶܚܠܬܳܐ ܢܶܬܓܰܢ̱ܒܪܽܘܢ ܟܰܕ ܡܰܗܠܶܝܢ ܒܗܰܘ ܕܰܡܡܰܟܶܟ ܪ̈ܳܡܶܐ ܒܬܰܪ̈ܥܶܐ ܟܡܺܝܪ̈ܶܐ ܕܰܫܝܽܘܠ ܘܶܐܡܰܪ:
ܐܶܬܥܰܫܰܢܘ ܩܕܳܡܰܘܗܝ ܕܰܐܒܳܐ ܕܝܰܬܡ̈ܐ ܘܕܰܝܳܢܳܐ ܕܰܐܪ̈ܡܠܳܬܳܐ. ܝܰܬܡ̈ܐ ܗܳܘܶܝܢ ܕܠܐ ܐܰܒܳܐ. ܐܰܝܟ ܕܶܐܡܰܪ ܐܶܪܰܡܝܳܐ ܢܒܺܝܳܐ. ܘܶܐܡܗܴ̈ܬܰܢ ܐܰܝܟ ܐܰܪ̈ܡܠܳܬܳܐ ܗܰܠܶܟܶܝ̈ܢ (ܐܘ̈ܠܝܬܗ ܕܐܪܡܝܐ ܗ: ܓ). ܡܶܢ ܒܳܬܰܪ ܕܰܢܦܰܩ ܒܰܪܢܳܫܳܐ ܩܰܕܡܳܝܳܐ ܡܶܢ ܬܚܶܝܬ ܓܶܦܶܝ̈ܗ̇ ܕܗܳܝ ܐܶܡܳܐ ܕܚܰܝ̈ܐ. ܝܰܬܡܳܐ ܡܶܟܺܝܠ ܐܺܝܬܰܘܗܝ ܗܘܳܐ܆ ܘܟܽܠܗܘܢ ܝܰܠܕܰܘ̈ܗܝ. ܟܰܕ ܕܶܝܢ ܐܶܬܳܐ ܐܰܠܗܳܐ ܒܰܒܣܰܪ ܠܰܐܪܥܳܐ. ܘܟܰܢܶܫܘ ܠܶܗ ܬܰܠܡܺܝ̈ܕܶܐ ܩܰܕܺܝ̈ܫܶܐ. ܘܡܰܠܶܦ ܗܘܳܐ ܠܗܽܘܢ ܕܰܢܨܰܠܽܘܢ ܟܰܕ ܩܳܪܶܝܢ ܠܶܗ ܐܰܒܳܐ. ܠܗܰܘ ܕܗܽܘ ܐܰܘܠܕܶܗ ܠܥܳܠܡܳܐ ܡܶܢ ܒܪܺܝܫܺܝܬ. ܘܬܘܒ ܡܦܰܩܶܕ ܗܘܳܐ ܠܗܽܘܢ ܕܠܐ ܢܫܰܡܗܽܘܢ ܠܗܽܘܢ ܐܰܒܳܐ ܡܶܢ ܐܰܪܥܳܐ. ܡܶܛܠ ܕܚܰܕ ܗܽܘ ܐܰܒܽܘܟܽܘܢ ܕܒܰܫܡܰܝܳܐ (ܡܬܝ ܟܓ: ܛ). ܒܗܳܠܶܝܢ ܚܳܐܱܪ ܗܘܳܐ ܡܙܰܡܪܳܢܳܐ. ܘܳܐܡܰܪ ܗܘܳܐ ܠܝܰܬܡ̈ܐ ܕܢܶܬܥܰܫܢܽܘܢ ܩܕܳܡ ܐܰܒܽܘܗܽܘܢ. ܘܠܰܐܪ̈ܡܠܳܬܳܐ ܡܠܰܒܶܒ ܗܘܳܐ ܕܢܰܘܕ̈ܝܳܢ ܩܕܳܡ ܕܰܝܳܢܗܶܝܢ. ܡܶܛܠ ܕܰܠܐܪ̈ܳܙܶܐ ܕܰܐܝܟ ܗܳܠܝܢ ܫܰܚܠܶܦ ܐܶܢܝܢ. ܘܠܰܘ ܒܢܳܡܽܘ̈ܣܶܐ ܒܰܥܪܺܝܪ̈ܳܝܶܐ. ܘܰܒܚܰܝ̈ܐ ܚܰܝܽܘܬܳܢ̈ܐ ܗܘܳܐ ܕܰܝܳܢܳܐ ܠܝܰܬܡ̈ܐ ܘܠܰܐܪ̈ܡܠܳܬܳܐ. ܐܶܠܐ ܒܫܰܘܬܳܦܽܘܬܳܐ ܕܕܰܟܝܽܘܬܳܐ ܘܩܰܕܺܝܫܽܘܬܳܐ. ܘܰܠܓܰܘ ܒܶܝܬ ܩܽܘܕܫܳܐ ܩܪܳܐ ܐܰܠܗܳܐ. ܠܢܰܦ̈ܫܳܬܳܐ ܕܰܗܘܱ̈ܝ ܟܱ̈ܠܠܳܬܳܐ ܠܰܒܪܶܗ.
ܐܰܠܗܳܐ ܒܡܰܥܡܪܶܗ ܩܰܕܺܝܫܳܐ. ܒܕܰܐܝܟ ܗܳܢܐ ܐܺܝܩܳܪܳܐ ܡܰܥܡܰܪ ܠܗܶܝܢ ܐܰܠܗܳܐ ܠܢܰܦ̈ܫܳܬܳܐ ܕܡܰܪ̈ܡܠܳܢ ܗܘܱ̈ܝ ܡܶܢܶܗ. ܡܶܢ ܒܳܬܰܪ ܕܕܳܢ ܥܰܡ ܚܰܣܺܝܢܳܐ ܘܦܰܨܺܝ ܐܶܢܝܢ ܡܶܢܶܗ܆
ܐܰܠܗܳܐ ܡܰܘܬܶܒ ܝ̣ܚܺܝܕܳܝܳܐ ܒܒܰܝܬܳܐ. ܝ̣ܚܺܝܕܳܝܳܐ ܡܫܰܡܰܗ ܠܗܰܘ ܕܕܰܟܺܝ ܢܰܦܫܶܗ ܡܶܢ ܟܽܠܗ̇ ܚܛܺܝܬܳܐ. ܘܠܰܝܬ ܒܶܗ ܬܪܰܝܳܢܽܘܬܳܐ ܕܡܰܪ̈ܢܝܳܬܳܐ. ܘܠܐ ܡܶܬܦܢܶܐ ܠܒܶܣܬܪܶܗ ܡܶܢ ܐܽܘܪܚܳܐ ܕܟܺܐܢܽܘܬܳܐ. ܐܰܝܟ ܦܰܘܠܽܘܣ ܗܰܘ ܐܰܠܗܝܳܐ. ܕܰܗܘܳܐ ܝ̣ܚܺܝܕܳܝܳܐ ܒܕܽܘܒܳܪܶܗ ܬܪܺܝܨܳܐ. ܘܥܰܠܗܳܕܐ ܐܳܡܰܪ ܗܘܳܐ. ܕܒܶܣܬܰܪܝ ܛܳܥܶܐ ܐ̱ܢܳܐ ܐܴܦ ܠܰܩܕܳܡܰܝ ܡܶܫܬܰܘܫܰܛ ܐ̱ܢܳܐ. ܘܪܳܗܶܛ ܐ̱ܢܳܐ ܠܘܳܬ ܢܺܝܫܳܐ ܕܶܐܣܰܒ ܙܳܟܽܘܬܳܐ ܕܩܶܪܝܳܢܳܐ ܕܰܠܥܶܠ (ܦܝ̈ܠܝܦܣܝܐ ܓ: ܝܓ). ܐܱܝܟ ܕܶܐܡܰܪ ܪܽܘܚܳܐ ܐܰܠܗܳܐ ܡܰܘܬܶܒ ܝ̣ܚܺܝܕܳܝܳܐ ܒܒܰܝܬܳܐ. ܠܰܘ ܒܗܳܢܐ ܒܰܝܬܳܐ ܥܒܺܝܕ ܒܺܐܝܕܰܝ̈ܐ. ܐܶܠܐ ܒܗܰܘ ܒܰܝܬܳܐ ܠܐܴ ܥܒܺܝܕ ܒܺܐܝܕ̈ܝܳܐ܆ ܘܺܐܝܬܰܘܗܝ ܒܰܫܡܰܝܳܐ ܠܥܳܠܰܡ. ܘܠܰܘ ܚܰܕ ܐܺܝܬܰܘܗܝ ܗܰܘ ܕܠܶܗ ܡܶܫܬܘܶܐ ܐܠܐ ܣܰܓܺܝ̈ܐܐ ܐܝܟ ܕܶܐܡܰܪ ܪܽܘܚܳܐ.
ܘܡܰܦܶܩ ܠܰܡ ܐܰܣܺܝܪ̈ܶܐ ܒܟܰܫܺܝܪܽܘܬܳܐ. ܐܳܦ ܟܰܫܺܝܪܽܘܬܳܐ ܕܰܐܠܗܳܐ ܐܻܝܬܶܝܗ̇ ܐܽܘܪܚܳܐ ܕܰܡܕܰܒܪܳܢܽܘܬܶܗ ܕܒܰܒܣܰܪ. ܟܰܕ ܡܶܫܟܰܚ ܗܘܳܐ ܕܰܕܠܐ ܥܰܡܠܐܴ ܘܰܕܠܐ ܫܚܳܩܳܐ ܢܶܫܪܶܐ ܠܐܱܝܠܝܢ ܕܶܐܬܶܐܣܰܪܘ ܒܰܚܛܺܝܬܳܐ ܘܰܒܡܰܘܬܳܐ ܒܰܚܣܳܡܶܗ ܕܳܐܟܶܠܩܰܪܨܳܐ ܗܰܘ ܕܶܐܣܰܪ ܐܶܢܘܢ. ܠܐ ܨܒܳܐ ܕܰܒܚܰܝܠܐܴ ܘܫܽܘܠܛܳܢܳܐ ܕܰܐܠܗܽܘܬܶܗ ܢܰܦܶܩ ܠܰܐܣܺܝܪ̈ܶܐ. ܐܠܐ ܗܳܕܐ ܫܶܦܪܰܬ ܠܶܗ ܕܢܺܐܬܶܐ ܠܘܳܬ ܟܰܪܣܳܐ ܘܢܶܫܪܶܐ ܒܡܰܪܒܥܳܐ ܕܰܒܬܽܘܠܬܳܐ ܘܢܶܣܰܒ ܒܶܣܪܳܐ ܚܳܫܽܘܫܳܐ ܘܡܳܝܽܘܬܳܐ. ܘܢܶܥܽܘܠ ܠܓܰܘ ܩܰܒܪܳܐ: ܘܢܶܚܽܘܬ ܠܰܫܝܽܘܠ ܘܰܢܕܰܝܰܪ ܒܰܐܘܴ̈ܢܶܝܗ̇ ܘܰܠܟܽܠܗܘܢ ܟܶܢ̈ܫܶܐ ܕܟܽܠܕܳܪ̈ܺܝܢ ܘܢܰܦ̈ܫܳܬܳܐ ܕܩܰܕܺܝ̈ܫܶܐ ܡܶܢ ܕܶܐܬܒܪܺܝ ܥܳܠܡܳܐ ܥܕܰܡܳܐ ܠܗܳܝܕܝܢ ܘܢܰܦܶܩ ܐܶܢܘܢ ܠܐܱܣܺܝܪ̈ܶܐ ܕܒܶܝܬ ܐܳܕܳܡ. ܡܶܢ ܚܒܽܘ̈ܫܝܶܐ ܕܬܰܚܬܳܝܴ̈ܬܳܗ̇ ܕܰܫܝܽܘܠ. ܘܰܦܬܰܚ ܬܰܪܥܳܐ ܗܰܘ ܕܶܐܚܰܕ ܐܳܕܳܡ ܟܰܕ ܥܒܰܪ ܦܽܘܩܕܳܢܳܐ ܘܰܢܦܰܩ. ܘܰܐܥܶܠ ܢܰܦܫܶܗ ܕܓܰܝܳܣܳܐ ܠܦܰܪܕܰܝܣܳܐ. ܘܥܰܡܳܗ̇ ܢܰܦ̈ܫܳܬܳܐ ܕܟܽܠܗܘܢ ܩܰܕܺܝ̈ܫܶܐ. ܘܰܐܦܶܣ ܠܗܶܝܢ ܕܬܰܡܳܢ ܢܩܰܘ̈ܝܳܢ ܥܕܰܡܳܐ ܕܫܳܠܶܡ ܪܶܗܛܶܗ ܕܥܳܠܡܳܐ ܗܳܢܐ. ܗܳܕܐ ܗ̱̇ܝ ܒܰܫܪܳܪܳܐ ܟܰܫܺܝܪܽܘܬܳܐ ܕܰܐܠܗܳܐ ܕܰܒܡܰܘܬܶܗ ܢܒܰܛܠ ܠܡܰܘܬܳܐ ܕܶܐܬܥܰܫܰܢ ܥܠܰܝܢ. ܘܰܒܚܰܫܰܘ̈ܗܝ ܘܰܒܡܰܘܬܶܗ ܦܰܪܩܳܗ̇ ܠܥܺܕܬܶܗ. ܘܰܒܡܽܘܟܳܟܶܗ ܪܰܡܪܶܡ ܠܰܦܪ̈ܺܝܩܰܘܗܝ. ܐܱܝܟ ܕܳܐܦ ܝܰܥܩܽܘܒ ܒܟܰܫܺܝܪܽܘܬܶܗ ܘܰܐܓܪܳܐ ܕܠܐܷܘܬܶܗ ܟܽܠܳܗ̇ ܥܳܢܴ̈ܐ ܕܠܳܒܳܢ ܚܡܽܘܗܝ ܕܒܰܪ ܘܰܫܩܰܠ. ܘܠܰܘ ܒܥܽܘܬܪܳܐ ܕܰܐܒܽܘܗܝ ܥܬܰܪ ܘܺܝܪܶܒ ܐܠܐ ܒܥܰܡܠܶܗ. ܘܳܐܦ ܥܰܡܰܢܘܐܝܠ ܥܰܠܗܳܝ ܫܒܰܩ ܫܒܺܝ̈ܚܳܬܳܐ ܕܰܟܝܳܢܶܗ. ܘܰܐܦܶܩ ܐܰܣܺܝܪ̈ܶܐ ܒܫܺܝ̈ܛܳܬܳܐ ܕܰܡܕܰܒܪܳܢܽܘܬܶܗ܆ ܚܙܺܝ ܐܰܝܟܰܢܳܐ ܒܕܽܘܟܬܳܐ ܡܰܘܕܰܥ ܪܽܘܚܳܐ. ܘܡܰܦܶܩ ܐܰܣܺܝܪ̈ܶܐ ܒܟܰܫܺܝܪܽܘܬܳܐ ܕܰܐܠܗܳܐ. ܘܰܕܦܳܫܘ ܗܘܰܘ ܚܰܝ̈ܠܰܘܳܬܳܐ ܕܡܳܪ̈ܽܘܕܶܐ ܒܒܶܝܬ ܩܒܽܘܪ̈ܶܐ.
ܐܳܦ ܡܳܪ̈ܽܘܕܶܐ ܢܶܫܪܽܘܢ ܒܶܝܬ ܩܒܽܘܪ̈ܶܐ. ܕܳܡܝܳܐ ܡܶܠܬܳܐ ܗܳܕܐ ܕܠܐܴ ܚܶܪܝܳܢܳܐ ܕܰܥܕܰܡܳܐ ܠܝܰܘܡܳܐ ܕܕܺܝܢܳܐ. ܒܰܫܝܽܘܠ ܬܰܚܬܳܝܬܳܐ ܫܳܪܶܝܢ ܕܰܝ̈ܘܶܐ ܡܳܪ̈ܽܘܕܶܐ. ܠܘܳܬ ܗܳܢܘܢ ܕܺܝܠܶܦܘ ܡܶܢܗܘܢ ܡܳܪܽܘܕܽܘܬܳܐ. ܡܶܛܠ ܕܠܐ ܠܟܽܠܗܝܢ ܢܰܦ̈ܫܳܬܳܐ ܫܪܳܐ ܡܰܠܟܳܐ ܡܶܢ ܒܶܝܬ ܐܰܣܺܝܪ̈ܶܐ ܕܰܫܝܽܘܠ. ܐܠܐ ܠܢܰܦ̈ܫܳܬܳܐ ܕܠܐ ܦܠܰܚܘ ܒܺܝ̈ܫܳܬܳܐ ܘܠܐ ܕܶܝܢ ܚܰܠܶܦܘ ܣܶܓܕܬܶܗ ܕܰܐܠܳܗܳܐ ܥܳܒܽܘܕܳܐ. ܠܗܶܝܢ ܐܰܦܶܩ ܡܶܢ ܒܶܝܬ ܚܒܽܘܫܝܳܐ ܕܰܐܒܕܳܢܳܐ. ܠܗܳܢܝܢ ܕܰܦܠܰܚܶܝ̈ܢ ܨܶܒܝܳܢܳܐ ܕܕܰܝ̈ܘܶܐ ܒܶܗ ܒܰܐܬܪܳܐ ܐܰܪܦܺܝ ܐܶܢܝܢ. ܘܠܐ ܐܰܦܶܩ ܐܶܢܝܢ ܡܶܢ ܬܰܡܳܢ. ܐܠܐ ܥܰܡ ܓܰܝܳܣܳܐ ܝܰܡܺܝܢܳܝܳܐ ܥܰܠܶܝ̈ܢ ܢܰܦ̈ܫܳܬܳܐ ܐܰܝܠܝܢ ܕܰܐܘܕܺܝܘ ܒܶܗ ܥܰܠܶܝ̈ܢ ܠܦܰܪܕܰܝܣܳܐ ܡܠܐܷ ܛܽܘܒ̈ܐ. ܘܒܳܬܰܪ ܗܳܠܝܢ ܡܫܰܪܶܐ ܢܒܺܝܐ ܡܬܰܢܶܐ ܥܒܳܕܰܘ̈ܗܝ ܕܰܐܠܗܳܐ ܕܰܠܘܳܬ ܥܰܡܳܐ. ܘܰܕܒܰܐܝܠܶܝܢ ܚܰܝ̈ܠܐ ܢܶܦܩܰܬ ܠܳܗ̇ ܟܢܽܘܫܬܳܐ ܡܶܢ ܫܽܘܥܒܳܕܳܐ ܕܡܶܨܪ̈ܳܝܶܐ.
ܐܰܠܗܳܐ ܟܰܕ ܢܦܰܩܬ ܩܕܳܡ ܥܰܡܳܟ: ܘܟܰܕ ܥܒܰܪܬ ܒܰܐܫܺܝܡܽܘܢ ܐܰܪܥܳܐ ܙܳܥܰܬ. ܐܳܦ ܫܡܰܝܴ̈ܐ ܢܰܛܶܦܘ. ܕܳܡ̈ܝܳܢ ܗܳܠܶܝܢ ܕܡܶܛܠ ܟܢܽܘܫܬܳܐ ܐܰܡܺܝܪ̈ܳܢ. ܒܪܰܡ ܠܰܝܬ ܒܰܟܬܳܒܳܐ ܕܙܳܥܰܬ ܐܰܪܥܳܐ ܒܡܰܕܒܪܳܐ. ܘܟܰܕ ܥܒܰܪ ܒܳܗ̇ ܐܰܠܗܳܐ. ܐܠܐ ܐܳܡܰܪ ܐ̱ܢܳܐ. ܕܗܳܝ ܕܰܢܦܰܩ ܐܰܠܗܳܐ ܩܕܳܡ ܥܰܡܶܗ. ܗܳܕܳܐ ܗ̄ܝ ܕܶܐܬܓܠܺܝ ܒܰܒܣܰܪ. ܒܰܫܪܳܪܳܐ ܢܦܰܩ ܐܰܠܗܳܐ ܩܕܳܡ ܥܰܡܶܗ ܟܰܕ ܫܩܺܝܠ ܨܠܺܝܒܶܗ ܥܰܠ ܟܰܬܦܶܗ ܕܢܶܙܕܩܶܦ. ܘܥܰܠܗܳܕܐ ܚܙܳܬ ܐܰܪܥܳܐ ܘܙܳܥܰܬ ܥܰܠ ܡܶܕܶܡ ܕܰܥܒܰܕܘ ܝܽܘܕܳܝ̈ܐ ܒܰܡܫܺܝܚܳܐ ܥܒܘܕܗ̇.
ܡܶܢ ܩܕܳܡ ܐܰܠܗܳܐ ܗܳܢܐ ܛܽܘܪܳܐ ܕܣܺܝܢܰܝ. ܡܶܢ ܩܕܳܡ ܐܰܠܗܳܐ ܐܰܠܗܶܗ ܕܺܝܣܪܳܐܝܠ. ܟܰܕ ܓܶܝܪ ܠܗܰܘ ܕܰܢܦܰܩ ܟܰܕ ܫܩܺܝܠ ܨܠܺܝܒܶܗ ܕܢܶܨܛܠܶܒ ܩܪܳܝܗܝ ܐܰܠܗܳܐ ܕܡܶܢܶܗ ܙܳܥܰܬ ܐܰܪܥܳܐ. ܘܡܶܢܶܗ ܙܳܥ ܛܽܘܪܳܐ ܕܣܺܝܢܰܝ. ܠܛܽܘܪܳܐ ܕܨܶܗܝܽܘܢ ܒܛܽܘܪܳܐ ܕܣܺܝܢܰܝ ܐܰܣܪܶܗ. ܐܝܟ ܕܰܐܟܬܶܒ ܚܰܟܺܝܡ ܒܰܐܠܗܳܝ̈ܬܳܐ ܦܰܘܠܽܘܣ܆ ܘܶܐܡܰܪ ܠܘܳܬ ܓܰܠܛܳܝ̈ܐ: ܗܳܓܳܪ ܓܶܝܪ ܛܽܘܪܰܐ ܗ̄ܘ ܕܣܺܝܢܰܝ܇ ܕܒܰܐܪܰܒܺܝܰܐ܆ ܘܫܳܠܡܳܐ ܠܗܳܕܐ ܐܽܘܪܺܫܠܶܡ. ܘܦܳܠܚܳܐ ܥܰܒܕܽܘܬܳܐ ܗܺܝ ܘܰܒܢܶܝ̈ܗ̇. ܘܗܳܝ ܕܶܝܢ ܐܽܘܪܺܫܠܶܡ ܥܶܠܳܝܬܳܐ ܚܺܐܪܬܳܐ ܗ̄ܝ ܕܺܐܝܬܶܝܗ̇ ܐܶܡܰܢ (ܓܠܛܝ̈ܐ ܕ: ܟܗ-ܟܘ). ܗܳܐ ܡܳܕܶܝܢ ܗܳܝ ܐܽܘܪܺܫܠܶܡ ܕܙܶܩܦܰܬ ܠܰܐܠܗܳܐ ܗܰܘ ܕܰܢܦܰܩ ܡܶܢܳܗ̇ ܩܕܳܡ ܥܰܡܶܗ. ܛܽܘܪܳܐ ܕܣܺܝܢܰܝ ܩܪܳܗ̇ ܕܰܘܝܕ. ܐܰܝܟܰܢܳܐ ܕܦܰܫܩܳܗ̇ ܛܽܘܒܳܢܳܐ ܦܰܘܠܽܘܣ. ܘܰܫܡܰܝܴ̈ܐ ܕܶܝܢ ܢܰܛܶܦܘ ܠܰܘ ܡܶܛܪܳܐ ܗܳܢܐ ܕܰܥܝܳܕܳܐ. ܐܶܠܐ ܪܽܘܚܳܐ ܩܰܕܺܝܫܳܐ ܢܳܛܦܺܝܢ ܫܡܰܝܴ̈ܐ. ܘܠܶܫܳܢ̈ܐ ܕܢܽܘܪܳܐ ܡܫܰܕܪܺܝܢ ܠܬܰܠܡܺܝ̈ܕܶܐ. ܥܢܳܐ ܪܽܘܚܳܐ ܩܰܕܺܝܫܳܐ ܘܶܐܡܰܪ:
ܡܶܛܪܳܐ ܕܨܶܒܝܳܢܳܐ ܝܰܗܒܬ ܐܰܠܗܳܐ ܠܝܳܪܬܽܘܬܳܟ. ܒܗܰܘ ܙܰܒܢܳܐ ܕܶܐܬܺܝܠܶܕ ܡܶܠܬܳܐ ܒܰܒܣܰܪ ܡܶܢ ܒܬܽܘܠܬܳܐ ܢܚܶܬܘ ܗܘܰܘ ܚܰܝ̈ܠܰܘܳܬܳܐ ܫܡܰܝܳܢ̈ܐ ܠܰܡܫܰܒܳܚܽܘ ܟܰܕ ܐܳܡܪܺܝܢ: ܬܶܫܒܽܘܚܬܳܐ ܠܰܐܠܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ (ܠܘܩܐ ܒ: ܝܕ). ܗܳܝ ܕܶܐܡܰܪ ܡܰܟܬܒܳܢܳܐ ܒܠܶܫܳܢܳܐ ܣܽܘܪܝܳܝܳܐ ܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܆ ܒܠܶܫܳܢܳܐ ܝܰܘܢܳܝܳܐ ܘܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ ܣܺܝܡܳܐ. ܗܳܢܰܘ ܡܳܕܶܝܢ ܡܶܛܪܳܐ ܕܨܶܒܝܳܢܳܐ ܕܝܰܗܒ ܐܰܠܗܳܐ ܠܝܳܪܬܽܘܬܶܗ. ܣܒܰܪܬܳܐ ܕܚܰܝ̈ܐ ܒܥܺܕܬܳܐ ܩܰܕܺܝܫܬܳܐ ܕܩܰܒܠܰܬ ܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܒܠܶܫܳܢ̈ܐ ܕܢܽܘܪܳܐ ܕܰܢܚܶܬܘ ܒܥܶܠܺܝܬܳܐ ܡܶܢ ܫܡܰܝܳܐ. ܡܰܝܬܶܐ ܕܶܝܢ ܪܽܘܚܳܐ ܘܰܡܚܰܘܶܐ. ܕܡܶܢ ܒܳܬܰܪ ܕܶܐܬܟܰܪܗܰܬ ܢܰܦܫܳܐ ܕܰܒܢܰܝ̈ܢܳܫܳܐ ܒܡܰܚ̈ܘܳܬܳܐ ܕܡܶܢ ܚܛܺܝܬܳܐ. ܬܘܒ ܥܶܛܦܰܬ ܠܚܽܘܠܡܳܢܳܐ ܒܝܰܕ ܟܳܪܽܘܙܽܘܬܳܐ ܕܶܐܘܰܢܓܶܠܝܽܘܢ. ܒܝܰܕ ܐܳܣܝܳܐ ܫܡܰܝܳܢܳܐ ܝܶܫܘܥ ܡܫܺܝܚܐ ܒܨܶܒܝܳܢܶܗ ܕܰܐܒܳܐ ܢܚܶܬ ܡܶܢ ܫܡܰܝܳܐ ܐܰܬܪܶܗ ܥܶܠܳܝܳܐ ܠܘܳܬ ܗܳܝ ܕܣܰܓܺܝ ܟܪܺܝܗܳܐ ܗܘܳܬ ܒܥܰܘܠܐܴ. ܘܡܶܢܳܗ̇ ܕܗܳܝ ܕܶܐܬܟܰܪܗܰܬ ܒܰܚܛܺܝܬܳܐ. ܚܰܝܶܕ ܠܶܗ ܒܶܣܪܳܐ ܡܕܰܡܶܐ ܒܚܰܫܱ̈ܝܢ. ܘܠܰܘ ܥܰܡ ܒܶܣܪܳܐ ܫܩܰܠ ܐܳܦ ܟܽܘܪܗܳܢܳܐ. ܟܽܘܪܗܳܢܳܐ ܓܶܝܪ ܚܛܺܝܬܐ ܗܘ. ܐܠܐ ܡܶܢ ܗܳܝ ܕܰܟܪܺܝܗܳܐ ܗܘܳܬ ܐܶܬܓܰܫܰܡ. ܘܟܽܠܗܘܢ ܟܺܐܒ̈ܐ ܕܰܗܘܰܘ ܡܶܢ ܥܶܠܰܬ ܚܛܺܝܬܳܐ ܐܶܬܚܠܶܡܘ. ܒܗܳܠܝܢ ܚܽܘܠܡܳܢ̈ܐ ܬܶܩܦܰܬ ܐ̱ܢܳܫܽܘܬܳܐ ܗܳܝ ܕܰܟܪܺܝܗܳܐ ܗܘܳܬ. ܡܦܰܫܶܩ ܪܽܘܚܳܐ ܐܳܦ ܥܰܠ ܦܽܘܢܳܝܳܐ ܕܚܰܝ̈ܠܰܘܳܬܐ ܩܰܕܺܝ̈ܫܐ ܕܰܥܛܰܦܘ ܠܡܶܥܡܰܪ ܒܐ̱ܢܳܫܽܘܬܳܐ ܡܶܢ ܒܳܬܰܪ ܕܶܐܬܚܰܠܡܰܬ ܡܶܢ ܢܽܘܟ̈ܬܳܬܶܗ ܕܚܶܘܝܳܐ.
ܘܚܰܝ̈ܘܳܬܳܟ ܠܰܡ ܥܡܰܪ̈ܶܝܢ ܒܳܗ̇. ܐܷܠܐ ܡܳܢܳܐ ܢܶܪܢܶܐ ܥܰܠ ܚܰܝ̈ܘܳܬܶܗ ܕܰܐܠܗܳܐ ܕܺܐܝܬܰܝܗܶܝܢ. ܡܶܢ ܗܳܠܝܢ ܕܠܐ ܡܶܠܬܳܐ. ܐܱܝܟܰܢܐ ܠܐ ܛܳܒ ܫܟܺܝܪܳܐ ܗܳܕܐ. ܐܠܐ ܚܰܝ̈ܘܳܬܳܐ ܕܰܐܠܗܳܐ ܗܳܠܝܢ ܐܝ̣ܬܰܝܗܶܝܢ. ܐܰܝܠܶܝܢ ܕܰܚܙܳܐ ܚܰܙܩܺܝܐܝܠ ܢܒܺܝܐ ܥܰܠ ܢܗܰܪ ܟܳܒܳܪ. ܕܺܐܝܬ ܗܘܳܐ ܠܗܶܝܢ ܐܰܪܒܰܥ ܐܱܦ̈ܐ ܗܳܠܝܢ ܕܰܠܥܶܠ ܡܶܢ ܡܰܛܠܳܢܳܐ ܕܰܠܥܶܠ ܡܶܢ ܪ̈ܺܝܫܰܝܗܶܝܢ. ܡܶܬܚܰܙܝܳܐ ܗܘܳܬ ܟܰܕ ܣܺܝܡܳܐ ܟܺܐܦܳܐ ܕܣܰܦܺܝܠܐܴ ܗܳܝ ܕܺܐܝܬܶܝܗ̇ ܐܪܳܙܳܐ ܕܥܺܕܬܳܐ. ܘܰܠܥܶܠ ܡܶܢ ܗܳܝ ܡܰܬܩܰܢ ܗܘܳܐ ܟܽܘܪܣܝܳܐ. ܗܰܘ ܕܰܥܠܰܘܗܝ ܝܳܬܶܒ ܗܘܳܐ ܥܰܡܰܢܘܐܝܠ. ܗܳܠܝܢ ܚܰܝ̈ܘܳܬܳܐ ܐܷܡܰܪ ܢܒܺܝܐ. ܕܥܳܡܪܺܝܢ ܒܥܺܕܬܳܐ ܕܶܐܬܟܰܪܗܰܬ ܘܶܐܬܬܰܩܦܰܬ. ܘܠܐ ܬܺܐܡܰܪ ܠܺܝ ܕܰܐܝܟܰܢܐ ܡܰܨܝܳܐ ܕܚܰܝ̈ܘܳܬܳܐ ܗܳܠܝܢ ܕܰܬܚܶܝܬ ܡܰܪܟܰܒܬܳܐ ܕܰܐܠܗܽܘܬܳܐ ܢܶܥܡܪ̈ܳܢ ܒܥܺܕܬܳܐ. ܐܷܢܶܐ ܓܶܝܪ ܐܴܡܰܪ ܐ̱ܢܳܐ. ܕܳܐܦ ܣܪ̈ܳܦܶܐ ܕܰܡܥܰܠܶܝܢ ܡܶܢ ܗܳܠܝܢ. ܒܥܺܕܬܳܐ ܕܰܐܠܗܳܐ ܥܳܡܪܺܝܢ. ܐܷܢܓܶܝܪ ܫܰܪܺܝܪܳܐ ܠܰܢ ܕܰܒܥܺܕܬܳܐ ܐܱܠܗܳܐ ܥܳܡܰܪ܆ ܡܳܕܶܝܢ ܘܠܐ ܚܰܝ̈ܘܳܬܳܐ ܗܳܠܝܢ ܕܶܐܬܐܰܡܪ̈ܺܝܢ ܡܶܨܛܰܥܪ̈ܳܢ ܠܡܶܥܡܰܪ ܐܰܝܟܳܐ ܕܥܳܡܰܪ ܐܱܠܗܳܐ. ܘܗܳܕܐ ܠܰܘ ܕܺܝܠܢ ܐܻܝܬܝܗ̇ ܡܶܠܬܳܐ. ܐܝ̣ܬ ܠܰܢ ܣܳܗ̈ܕܶܐ. ܦܶܛܪܽܘܣ ܗܰܘ ܪܰܒܳܐ ܕܰܫܠܺܝܚ̈ܐ. ܘܦܰܘܠܽܘܣ ܗܰܘ ܡܰܠܦܳܢܳܐ ܕܥܰܡ̈ܡܶܐ. ܦܶܛܪܽܘܣ ܡܰܢ ܟܳܬܶܒ ܗܘܳܐ ܠܐܱܬܪ̈ܰܘܳܬܳܐ ܕܦܶܢܛܽܘܣ ܘܰܕܓܰܠܐܱܛܺܝܰܐ܆ ܘܕܰܐܣܝܰܐ ܘܰܕܩܰܦܰܕܽܘܩܺܝܰܐ ܘܰܕܒܰܝܬܽܘܢܝܰܐ ܘܳܐܡܰܪ ܗܘܳܐ: ܕܰܒܗܶܝܢ ܠܰܡ ܡܶܬܪܰܓܪܓܺܝܢ ܐܴܦ ܡܰܠܐܟ̈ܐ ܕܰܢܕܺܝܩܽܘܢ (ܐ ܦܛܪܘܣ ܐ: ܝܒ). ܦܰܘܠܽܘܣ ܠܰܘ ܒܰܠܚܽܘܕ ܗܳܕܐ ܐܷܡܰܪ܆ ܐܠܐ ܡܦܰܫܶܩ. ܕܰܒܝܰܕ ܥܺܕܬܳܐ ܝܠܶܦܘ ܚܰܝ̈ܠܰܘܳܬܳܐ ܘܫܽܘܠܛܳܢ̈ܐ ܕܒܰܫܡܰܝܳܐ. ܚܶܟܡܬܳܐ ܕܰܐܠܗܳܐ ܗܳܝ ܕܰܡܟܰܣܝܳܐ ܗܘܳܬ ܐܶܡܰܪ ܓܶܝܪ ܟܰܕ ܠܘܳܬ ܐܶܦܶܣܳܝ̈ܐ ܟܬܰܒ. ܠܺܝ ܠܰܡ ܕܰܙܥܽܘܪܳܐ ܐ̱ܢܳܐ ܕܟܽܠܗܘܢ ܩܰܕܺܝ̈ܫܐ܇ ܐܷܬܝܰܗܒܰܬ ܛܰܝܒܽܘܬܳܐ ܗܳܕܐ ܕܶܐܣܰܒܰܪ ܒܥܰܡ̈ܡܶܐ ܥܽܘܬܪܶܗ ܕܰܡܫܺܝܚܐ܇ ܗܰܘ ܕܠܐ ܡܶܬܥܰܩܰܒ ܘܶܐܢܰܗܰܪ ܠܟܽܠܢܳܫ (ܐܦܣ̈ܝܐ ܓ: ܚ-ܛ). ܡܶܛܠ ܡܶܠܬܳܐ ܕܶܝܢ ܗܳܕܐ ܕܥܰܠ ܚܰܝ̈ܘܳܬܳܐ ܛܳܒ ܢܰܗܪܽܘܗ̇ ܠܰܢ ܪ̈ܺܝܫܳܢܰܝܗܽܘܢ ܕܰܫܠܺܝ̈ܚܐ. ܢܥܰܩܶܒ ܘܢܶܒܥܶܐ ܗܳܠܝܢ ܕܡܶܢ ܒܳܬܰܪܟܶܢ ܕܶܐܡܰܪ: ܕܶܐܬܟܰܪܗܰܬ ܐܱܢܬ ܬܰܩܶܢܬܳܗ̇. ܘܰܐܘܕܰܥ ܒܗܳܕܐ ܕܗܳܕܳܐ ܗ̱ܝ ܥܺܕܬܳܐ ܗܳܝ ܕܶܐܬܚܰܠܡܰܬ ܒܝܰܕ ܡܳܪܰܢ ܡܶܢ ܟܽܘܪܗܳܢܳܗ̇.
ܬܰܩܶܦܬ ܒܛܰܝܒܽܘܬܳܟ ܠܒܳܝ̈ܫܶܐ ܐܰܠܗܳܐ. ܐܷܢܕܶܝܢ ܠܐ ܡܶܬܥܰܕܠܺܝܢܰܢ ܡܶܢ ܐܢܳܫܺܝ̈ܢ ܕܩܳܪܶܝܢܰܢ ܒܳܝ̈ܫܶܐ ܠܰܫܠܺܝ̈ܚܶܐ. ܘܰܠܗܘܢ ܠܰܫܠܺܝ̈ܚܶܐ ܐܱܘܪܶܒ ܡܳܪܰܢ ܝܰܬܺܝܪ ܡܶܢ ܟܽܠܢܳܫ. ܐܴܦ ܥܰܠܺܝ ܐܷܢܘܢ ܡܶܢ ܥܰܡ̈ܡܶܐ ܠܛܽܘܪ̈ܶܐ ܪ̈ܳܡܶܐ ܕܣܽܘ̈ܟܳܠܐ. ܘܡܶܣܟܺܢ̈ܐ ܩܪܳܐ ܐܶܢܘܢ ܟܰܕ ܐܴܡܰܪ ܠܗܽܘܢ ܕܛܽܘܒܰܝܗܘܢ ܠܡܶܣ̈ܟܺܢܶܐ ܒܪܽܘܚ ܕܕܺܝܠܗܘܢ ܗܺܝ ܡܰܠܟܽܘܬܳܐ ܕܰܫܡܰܝܳܐ (ܡܬܝ ܗ: ܓ). ܡܶܣܟܺܢ̈ܐ ܗܘܰܘ ܓܶܝܪ ܒܰܫܪܳܪܳܐ ܘܒܳܝ̈ܫܶܐ. ܒܪܰܡ ܡܰܢ ܐܝ̣ܬ ܕܘܳܠܐܷ ܕܰܩܪܳܝܗܝ ܡܳܪܰܢ ܒܳܝܫܳܐ. ܝܰܬܺܝܪ ܡܶܢ ܗܰܘ ܕܟܰܕ ܫܠܺܝܚ ܘܥܰܪܛܶܠܳܝ. ܩܳܐܷܡ ܥܰܠ ܣܦܳܪ̈ܰܝ ܝܰܡܬܳܐ ܕܡܰܝܴ̈ܐ. ܘܪܰܡܝܳܐ ܠܶܗ ܨܶܢܳܪܬܳܐ ܒܓܰܘ ܥܽܘܡܩܳܐ. ܘܚܳܐܱܪ ܘܰܡܣܰܟܶܐ ܕܡܶܢ ܐܽܘܡܳܢܽܘܬܳܐ ܕܰܨܪܺܝܟܽܘܬܳܐ ܢܟܰܢܶܫ ܠܶܗ ܣܰܝܒܳܪܬܳܐ ܕܝܰܘܡܳܐ. ܐܴܦܶܢ ܐܝ̣ܬܰܝܗܘܢ ܝܰܘܡܳܢ ܡܰܠܟ̈ܐ ܥܰܠ ܟܽܠܗ̇ ܐܰܪܥܳܐ܆ ܡܶܛܠ ܕܰܡܚܺܝ̈ܠܐ ܗܘܰܘ܆ ܠܚܰܝܠܐܴ ܗܰܘ ܕܰܗܘܰܘ ܠܶܗ ܟܳܪ̈ܽܘܙܶܐ.
ܡܳܪܝܳܐ ܠܰܡ ܢܶܬܶܠ ܡܶܠܬܳܐ ܕܰܣܒܰܪܬܳܐ ܒܚܰܝܠܐ ܪܰܒܐ. ܟܰܕ ܫܰܕܰܪ ܐܷܢܘܢ ܠܒܳܝ̈ܫܶܐ ܐܰܠܗܳܐ ܗܰܘ ܕܰܐܬܩܶܦ ܐܷܢܘܢ ܐܶܡܰܪ ܠܘܳܬܗܘܢ܆ ܕܗܳܐ ܝܳܗܶܒ ܐ̱ܢܳܐ ܠܟܽܘܢ ܚܰܝܠܐ ܕܰܬܕܽܘܫܽܘܢ ܚܘܱ̈ܘܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ (ܠܘܩܐ ܝ: ܝܛ). ܘܬܘܒ ܐܶܡܰܪ ܠܗܽܘܢ ܟܰܕ ܫܰܕܰܪ ܐܶܢܘܢ܆ ܟܪ̈ܺܝܗܶܐ ܐܰܣܰܘ. ܘܓܰܪ̈ܒܶܐ ܕܰܟܰܘ. ܕܰܝ̈ܘܶܐ ܐܰܦܶܩܘ (ܡܬܝ ܝ: ܚ). ܘܬܘܒ ܐܶܡܰܪ: ܐܳܬܘܴ̈ܬܳܐ ܕܶܝܢ ܠܐܱܝܠܶܝܢ ܕܰܡܗܰܝܡܢܺܝܢ ܒܺܝ ܗܳܠܝܢ ܢܶܩ̈ܦܳܢ. ܒܰܫܡܳܐ ܕܺܝܠܝ ܫܺܐܕ̈ܐ ܢܰܦܩܽܘܢ ܘܰܒܠܶܫ̈ܢܶܐ ܚܰܕ̈ܬܳܐ ܢܡܰܠܠܽܘܢ. ܘܺܐܝ̈ܕܰܝܗܘܢ ܢܣܺܝܡܽܘܢ ܥܰܠ ܟܪ̈ܺܝܗܶܐ ܐܳܦ ܢܶܬܚܰܠܡܽܘܢ (ܡܪܩܘܣ ܝܘ: ܝܙ-ܝܚ). ܗܳܢܳܐ ܡܰܠܽܘܢ ܚܰܝܠܐ ܪܰܒܐ ܝܰܗܒ ܐܰܠܗܳܐ ܠܰܡܣܰܒܪ̈ܳܢܶܐ. ܟܰܕ ܡܶܬܟܰܢܫܺܝܢ ܗܘܰܘ ܥܰܡ̈ܡܶܐ ܘܰܡܕܰܒܪ̈ܳܢܶܐ ܘܡܰܠܟ̈ܐ ܕܰܐܪܥܳܐ ܠܡܶܚܙܳܐ ܘܰܠܡܶܬܗܰܪ. ܒܫܶܡܥܽܘܢ ܗܰܘ ܒܳܝܫܳܐ ܘܨܰܝܳܕܳܐ. ܟܰܕ ܩܳܐܷܡ ܗܘܳܐ ܒܪܽܗܘܡܺܝ ܐܶܡܳܐ ܘܡܰܠܟܬܳܐ ܕܰܡܕܺܝ̈ܢܳܬܳܐ. ܘܡܰܒܰܥ ܫܶܦ̈ܥܶܐ ܕܝܽܘܠܦܳܢ̈ܐ ܘܚܽܘܠܡܳܢ̈ܐ ܡܶܢ ܦܽܘܡܶܗ ܥܰܠ ܟܶܢܫܳܐ ܕܰܟܪ̈ܺܝܗܶܐ.
ܡܰܠܟ̈ܐ ܠܰܡ ܕܚܰܝ̈ܠܰܘܳܬܐ ܢܶܬܟܰܢܫܽܘܢ. ܠܰܘ ܒܪܽܗܘܡܺܝ ܒܰܠܚܽܘܕ ܐܠܐ ܘܒܶܐܦܶܣܽܘܣ ܘܰܒܟܽܠܗܘܢ ܡܕܺܝ̈ܢܳܬܳܐ ܢܶܬܟܰܢܫܽܘܢ. ܘܢܶܚܙܽܘܢ ܠܦܰܘܠܽܘܣ ܟܰܕ ܛܳܪܶܕ ܠܚܰܝ̈ܠܰܘܳܬܐ ܕܕܰܝ̈ܘܶܐ ܡܶܢ ܐܰܬܪܳܐ ܕܶܐܦܶܣܳܝ̈ܐ. ܘܡܶܫܬܰܕܪܺܝܢ ܣܽܘܪ̈ܳܕܶܐ ܡܶܢ ܪ̈ܽܘܩܥܶܐ ܕܥܰܠ ܓܽܘܫܡܶܗ. ܘܦܳܪܩܺܝܢ ܫܺܐܕ̈ܐ ܘܟܽܘܪ̈ܗܳܢܶܐ ܡܶܢ ܐܰܝܠܝܢ ܕܰܥܠܰܝܗܘܢ ܡܶܬܬܣܺܝܡܺܝܢ. ܘܶܐܡܰܪ ܓܶܝܪ ܪܽܘܚܳܐ.
ܘܫܽܘܦܪܶܗ ܕܒܰܝܬܳܟ ܢܦܰܠܶܓ ܒܶܙܬܳܐ. ܦܬܰܚ ܒܶܝܬܓܰܙܶܗ ܩܕܳܡ ܒܳܝ̈ܫܶܐ ܘܰܡܥܰܝ̈ܕܰܝ ܒܡܶܣܟܺܢܽܘܬܳܐ. ܒܟܽܠܕܽܘܟ ܣܰܢܝܳܐ ܘܰܫܟܺܝܪܳܐ ܝܰܥܢܽܘܬܳܐ ܗܳܪܟܳܐ ܕܶܝܢ ܫܰܘܝܳܐ ܘܰܠܫܽܘܒܚܳܐ ܪܰܒܐ ܡܳܛܝܳܐ. ܠܗܳܢܐ ܒܰܝܬܳܐ ܕܪܰܒܽܘܬܳܐ ܣܠܶܩ ܗܘܳܐ ܦܰܘܠܽܘܣ ܒܳܝܫܳܐ ܘܡܶܣܟܺܢܳܐ. ܘܶܐܬܡܰܛܺܝ ܗܘܳܐ ܥܕܰܡܳܐ ܠܰܫܡܰܝܳܐ ܕܰܬܠܳܬܳܐ. ܒܰܙ ܘܰܫܩܰܠ ܥܽܘܬܪ̈ܶܐ ܠܐ ܡܶܬܡܰܠܠܳܢ̈ܐ ܘܰܢܚܶܬ ܘܦܰܠܶܓ ܠܗܽܘܢ ܠܬܰܠܡܺܝ̈ܕܶܐ ܕܰܒܟܽܠܗܘܢ ܥܰܡ̈ܡܶܐ. ܡܶܟܺܝܠ ܠܰܝܬ ܠܗܘܢ ܩܶܢܛܳܐ ܐܱܘ ܕܶܚܠܬܳܐ. ܡܶܢ ܦܰܚ̈ܐ ܕܨܳܠܐܷ ܗܰܘ ܒܥܶܠܕܒܳܒܳܐ ܕܚܰܝܰܝ̈ܢ. ܐܶܡܰܪ ܓܶܝܪ ܢܒܺܝܐ.
ܘܶܐܢ ܬܶܕܡܟܽܘܢ ܒܶܝܬ ܫܦܴ̈ܝܶܐ. ܡܶܟܺܝܠ ܠܰܝܬ ܠܟܽܘܢ ܩܶܢܛܳܐ. ܚܠܳܦ ܓܶܝܪ ܣܰܝ̈ܦܶܐ ܕܠܳܛܫܺܝܢ ܗܘܰܘ ܚܰܝܠܰܘ̈ܬܳܐ ܕܕܰܠܩܽܘܒܠܳܐ. ܘܰܚܠܳܦ ܓܶܐܪ̈ܶܐ ܕܫܳܕܶܝܢ ܗܘܰܘ ܒܬܰܡܺܝ̈ܡܶܐ. ܟܰܕ ܡܛܰܘ ܨܶܝܕ ܫܠܺܝ̈ܚܶܐ ܗܘܰܘ ܠܗܽܘܢ ܫܦܳܝܷ̈ܐ ܡܚܺܝ̈ܠܐܷ. ܗܳܫܐ ܕܶܝܢ ܥܺܕܬܳܐ ܠܰܘ ܥܰܦܪܳܐ ܗ̄ܝ. ܐܠܐ ܣܺܐܡܳܐ ܗ̄ܝ ܘܕܰܗܒܳܐ ܐܰܝܟ ܕܶܐܡܰܪ ܪܽܘܚܳܐ.
ܓܶܦ̈ܐ ܕܝܰܘܢܳܐ ܕܰܩܪܺܝܡܺܝܢ ܒܣܺܐܡܳܐ ܘܶܐܒܪ̈ܶܝܗ̇ ܒܕܰܗܒܳܐ ܣܢܺܝܢܳܐ. ܫܰܦܺܝܪ̈ܳܢ ܢܽܘܨܪ̈ܳܬܶܗ ܕܪܽܘܚܳܐ ܐܰܝܟ ܗܰܘ ܕܦܰܪܽܘܓܬܳܐ ܗܳܝ ܫܰܪܘܳܝܬܳܐ ܐܰܚܺܝܕ ܒܺܐܝܕܶܗ. ܘܰܐܝܟ ܕܰܠܒܰܪܬܳܐ ܡܢܰܨܰܪ ܠܳܗ̇ ܘܰܡܚܰܒܶܒ ܠܳܗ̇. ܟܰܕ ܚܳܙܶܐ ܠܳܗ̇ ܠܥܺܕܬܳܐ ܕܦܶܠܛܰܬ ܡܶܢ ܒܶܝܬ ܫܦܳܝܷ̈ܐ ܘܦܰܚ̈ܐ ܒܺܝ̈ܫܶܐ. ܟܰܕ ܥܒܺܝܕܺܝܢ ܠܳܗ̇ ܢܒܺܝ̈ܐ ܓܶܦ̈ܐ ܕܣܺܐܡܳܐ. ܘܰܫܠܺܝ̈ܚܶܐ ܩܰܕܺܝ̈ܫܶܐ ܐܶܒܪ̈ܶܐ ܕܕܰܗܒܳܐ. ܘܰܒܗܳܠܝܢ ܦܳܪܚܳܐ ܘܡܶܬܥܰܠܝܳܐ ܠܰܐܬܪ̈ܰܘܳܬܳܐ ܥܶܠܳܝ̈ܐ ܕܰܫܡܰܝܳܐ ܠܘܳܬ ܡܰܠܟܳܐ ܡܳܪܳܗ̇. ܗܰܘ ܕܦܰܪܫܳܗ̇ ܡܶܢ ܝܽܘܪܕܢܳܢ ܘܚܰܘܝܳܗ̇ ܟܰܕ ܢܳܚܬܳܐ ܝܰܘܢܳܐ ܡܶܢ ܫܡܰܝܳܐ ܕܡܳܐ ܕܢܶܚܬܰܬ ܘܰܫܪܳܬ ܥܰܠ ܐܢܳܫܽܘܬܳܐ ܟܪܺܝܗܬܳܐ ܒܓܰܘ ܢܰܗܪܳܐ ܕܰܥܡܳܕܳܐ ܩܰܕܺܝܫܳܐ. ܡܪܰܚܦܳܐ ܥܠܶܝܗ̇ ܒܩܶܢܳܐ ܕܩܰܕܺܝܫܽܘܬܳܐ. ܘܥܳܒܕܳܐ ܠܳܗ̇ ܝܰܘܢܳܐ ܐܰܟܘܳܬܳܗ̇ ܘܰܡܚܰܘܪܳܐ ܠܳܗ̇ ܝܰܘܢܳܐ ܡܬܰܠܰܓܬܳܐ ܘܰܓܐܝ̣ܬܳܐ ܐܰܝܟ ܕܶܐܡܰܪ ܪܽܘܚܳܐ.
ܟܰܕ ܠܰܡ ܦܪܰܫ ܐܠܗܳܐ ܡܰܠܟܳܐ ܒܶܗ ܐܰܬܠܓܰܬ. ܐܶܡܰܬܝ ܦܪܰܫ ܐܰܠܗܳܐ ܡܰܠܟܳܐ. ܥܕܰܡܳܐ ܕܶܐܬܳܐ ܥܰܡܰܢܘܐܝܠ ܠܰܥܡܳܕܳܐ ܠܐ ܦܪܰܫ ܗܘܳܐ ܡܶܢ ܥܰܡܳܐ. ܟܰܕ ܕܶܝܢ ܡܰܠܺܝ ܬܰܪܒܺܝܬܳܐ ܕܢܳܡܽܘܣܳܐ ܒܰܬܠܳܬܺܝܢ ܫܢܺܝ̈ܢ ܐܶܬܳܐ ܠܝܰܠܕܳܐ ܕܡܰܥܡܽܘܕܺܝܬܳܐ. ܘܟܰܕ ܨܒܳܐ ܕܢܶܬܶܠ ܠܰܢ ܐܷܡܳܐ ܕܡܰܘܠܕܳܐ ܡܚܰܘܪ̈ܶܐ ܘܰܡܬܰܠܓ̈ܐ ܗܢܘ ܢܰܗܺܝܪ̈ܶܐ ܘܰܒ̈ܢܰܝ ܢܽܘܗܪܳܐ. ܘܡܶܢ ܒܳܬܰܪ ܕܰܥܡܰܕ ܘܰܣܠܶܩ ܡܶܢ ܡܰܝܴ̈ܐ. ܝܰܗܒ ܐܰܒܳܐ ܩܳܠܐ ܡܶܢ ܫܡܰܝܳܐ. ܘܰܦܫܰܛ ܨܶܒܥܳܐ ܕܰܟܝܳܢܶܗ ܒܰܕܡܽܘܬܳܐ ܕܝܰܘܢܳܐ ܘܣܳܡܳܗ̇ ܥܰܠ ܪܺܝܫܶܗ ܕܡܳܪܰܢ. ܘܰܩܥܳܐ ܥܠܰܘܗܝ ܘܶܐܡܰܪ: ܗܳܢܰܘ ܒܶܪܝ ܚܰܒܺܝܒܳܐ ܕܒܶܗ ܐܶܨܛܒܺܝܬ (ܡܬܝ ܓ: ܝܙ). ܘܦܰܪܫܶܗ ܒܝܰܕ ܗܳܕܐ ܡܶܢ ܟܶܢ̈ܫܶܐ ܕܩܳܝܡܺܝܢ ܗܘܰܘ ܥܠ ܝܽܘܪܕܢܳܢ܆ ܘܚܰܘܺܝ ܕܗܳܢܰܘ ܡܰܠܟܳܐ ܕܶܐܬܦܪܶܫ ܕܰܝܳܢܳܐ ܕܚܰܝ̈ܐ ܘܰܕܡܺܝ̈ܬܶܐ. ܒܶܗ ܐܰܬܠܓܰܬ ܘܶܐܬܚܰܘܪܰܬ ܝܰܘܢܳܐ ܗܳܝ ܐܰܠܗܳܝܬܳܐ. ܘܰܗܘܰܘ ܠܳܗ̇ ܓܶܦ̈ܐ ܕܣܺܐܡܳܐ: ܢܒܺܝ̈ܐ: ܘܰܫܠܺܝ̈ܚܶܐ ܐܷܒܪ̈ܶܐ ܕܕܰܗܒܳܐ. ܘܶܐܬܩܰܕܫܰܬ ܟܰܠܬܳܐ ܥܺܕܬܳܐ.
ܒܨܰܠܡܽܘܢ ܛܽܘܪܶܗ ܕܰܐܠܗܳܐ: ܛܽܘܪ̈ܶܐ ܕܒܰܝܫܳܢ ܛܽܘܪ̈ܶܐ ܕܰܓܒܶܢܝܰܡ. ܣܽܘܥܪܢܳܐܝ̣ܬ ܛܽܘܪܳܐ ܕܨܰܠܡܽܘܢ ܘܛܽܘܪܳܐ ܕܒܰܝܫܳܢ. ܥܰܠ ܝܽܘܪܕܢܳܢ ܣܳܡܟܺܝܢ ܬܪ̈ܰܝܗܽܘܢ. ܛܽܘܪܳܐ ܕܨܰܠܡܽܘܢ ܡܶܢ ܡܰܕܢܰܚ ܝܽܘܪܕܢܳܢ ܘܛܽܘܪܳܐ ܕܒܰܝܫܳܢ ܡܶܢ ܡܰܥܪ̈ܳܒܰܘܗܝ ܒܰܝܢܳܬ ܗܳܠܝܢ ܬܪܶܝܢ ܛܽܘܪ̈ܶܐ ܕܚܰܕ ܡܶܬܡܬܶܠ ܒܢܽܘܗܪܳܐ ܕܺܐܝܬܰܘܗܝ ܒܰܦܢܺܝܬܳܐ ܡܰܕܢܚܳܝܬܳܐ ܘܡܶܬܩܪܶܐ ܛܽܘܪܶܗ ܕܰܐܠܗܳܐ. ܘܰܐܚܪܺܢܳܐ ܡܶܬܟܰܢܶܐ ܒܚܶܫܽܘܟܳܐ. ܥܺܕܬܳܐ ܐܶܬܦܰܪܫܰܬ ܕܬܶܗܘܶܐ ܟܰܠܬܳܐ ܠܚܰܬܢܳܐ ܠܐ ܡܶܬܚܰܒܠܳܢܳܐ. ܡܶܟܺܝܠ ܚܢܰܢ ܢܫܰܢܶܐ ܠܰܢ ܡܶܢ ܣܽܘܟܳܠܐ ܕܦܰܓܪ̈ܳܢܝܳܬܳܐ ܘܢܶܬܦܢܶܐ ܠܰܡܚܳܪ ܒܬܶܐܘܳܪ̈ܺܝܰܐܣ ܩܰܛܺܝ̈ܢܳܬܳܐ ܘܪ̈ܽܘܚܳܢܝܳܬܳܐ. ܛܽܘܪ̈ܶܐ ܓܶܝܪ ܕܰܓܒܶܢܝܰܡ ܠܗܳܢܽܘܢ ܕܶܐܬܦܪܶܫܘ ܡܶܢ ܛܽܘܪܳܐ ܚܶܫܽܘܟܳܐ. ܡܳܕܶܝܢ ܡܰܘܣܶܦ ܢܒܺܝܐ ܘܳܐܡܰܪ܆ ܛܽܘܪ̈ܶܐ ܕܒܰܝܫܳܢ ܘܛܽܘܪ̈ܶܐ ܕܰܓܒܶܢܝܰܡ.
ܛܽܘܪ̈ܶܐ ܕܒܰܝܫܳܢ ܡܳܢܳܐ ܨܳܒܶܝܢ ܐܢܬܽܘܢ ܛܽܘܪ̈ܶܐ ܕܰܓܒܶܢܝܰܡ: ܛܽܘܪܳܐ ܕܰܓܒܳܐ ܠܶܗ ܐܰܠܗܳܐ ܠܡܶܬܰܒ ܒܶܗ. ܡܳܪܝܳܐ ܢܶܫܪܶܐ ܒܶܗ ܠܥܳܠܰܡ. ܠܗܳܠܶܝܢ ܛܽܘܪ̈ܶܐ ܕܥܰܡ̈ܡܶܐ ܚܰܛܳܝ̈ܐ ܘܥܳܡܪ̈ܰܝ ܒܚܶܫܽܘܟܳܐ. ܟܰܕ ܐܶܫܟܰܚ ܐܶܢܘܢ ܦܰܘܠܽܘܣ ܒܩܽܘܪܺܢܬܳܘܣ ܕܰܥܕܰܟܺܝܠ ܫܰܒܪ̈ܶܐ ܐܶܢܘܢ. ܘܠܐ ܡܶܫܟܚܺܝܢ ܠܰܡܩܰܒܳܠܽܘ ܡܶܐܟܽܘܠܬܳܐ ܫܰܪܺܝܪܬܳܐ ܕܰܓܡܺܝܪ̈ܶܐ. ܟܳܬܶܒ ܗܘܳܐ ܠܗܽܘܢ ܟܰܕ ܐܳܡܰܪ: ܕܶܐܢܳܐ ܐܱܚܰܝ̈ ܟܰܕ ܐܶܬܺܝܬ ܠܘܳܬܟܽܘܢ ܠܐ ܐܶܫܟܚܶܬ ܕܶܐܡܰܠܶܠ ܥܰܡܟܽܘܢ ܐܰܝܟ ܕܥܰܡ ܪ̈ܽܘܚܳܢܶܐ܆ ܐܶܠܐ ܐܰܝܟ ܕܥܰܡ ܦܰܓܪ̈ܳܢܶܐ܇ ܘܰܐܝܟ ܕܰܠܝܰܠܽܘܕ̈ܐ ܒܰܡܫܺܝܚܳܐ. ܚܰܠܒܳܐ ܐܰܫܩܺܝܬܟܽܘܢ (ܐ ܩܘܪ̈ܢܬܝܐ ܓ: ܐ-ܒ). ܗܳܠܝܢ ܓܶܝܪ ܟܰܕ ܒܫܽܘܪܳܝܳܐ ܚܰܠܒܳܐ ܕܰܣܒܰܪܬܳܐ ܫܳܬܶܝܢ ܗܘܰܘ ܒܟܳܪܽܘܙܽܘܬܳܐ ܕܰܫܠܺܝܚ̈ܐ. ܘܒܳܬܰܪܟܶܢ ܡܶܬܚܰܝܰܨ ܗܘܳܐ ܗܽܘ ܚܰܠܒܳܐ ܒܡܶܠܬܳܐ ܕܰܐܠܗܳܐ ܗܰܘ ܕܰܗܘܳܐ ܡܰܣܬܳܐ ܠܪ̈ܶܥܝܳܢܶܐ ܫܰܒܪ̈ܳܝܶܐ ܘܰܐܫܺܝ̈ܕܶܐ ܘܰܥܒܰܕ ܐܶܢܘܢ ܛܽܘܪ̈ܶܐ ܕܰܓܒܶܢܝܰܡ. ܕܡܶܬܬܰܪܓܡܺܝܢ ܛܽܘܪ̈ܶܐ ܕܰܓܒܶܬܳܐ. ܟܰܕ ܡܚܰܘܶܐ ܥܠܰܘܗܝ ܕܛܽܘܪܳܐ. ܙܰܘܚܳܐ ܘܫܽܘܒܚܳܐ ܕܪܰܒܽܘܬܳܐ ܕܡܰܠܟܽܘܬܶܗ. ܟܰܕ ܪܟܺܝܒ ܒܰܐܠܦ̈ܐ ܘܰܒܪ̈ܶܒܘܳܬܳܐ ܘܰܡܟܰܠܶܠ ܠܶܗ ܠܛܽܘܪܳܐ ܗܳܢܐ.
ܪܟܶܒ ܠܰܡ ܐܰܠܗܳܐ ܒܪ̈ܶܒܘܳܬܳܐ ܘܒܰܐܠܦ̈ܐ ܕܚܰܝܠܐܴ. ܒܪ̈ܶܒܘܳܬܳܐ ܡܟܰܢܶܐ ܠܗܽܘܢ ܠܰܫܠܺܝ̈ܚܶܐ ܡܶܛܠ ܡܰܘܗܰܒܬܳܐ ܕܫܰܟܶܢ ܠܗܽܘܢ. ܘܡܶܛܠ ܣܽܘܓܳܐܐ ܕܥܰܡ̈ܡܶܐ ܕܰܦܢܰܘ ܒܺܐܝ̈ܕܰܝܗܘܢ ܠܗܰܝܡܳܢܽܘܬܳܐ ܕܰܫܪܳܪܳܐ. ܘܰܐܠܦ̈ܐ ܡܫܰܡܰܗ ܠܰܢܒܺܝ̈ܐ ܘܰܠܡܰܠܦ̈ܢܶܐ. ܡܶܛܠ ܕܰܬܪ̈ܰܝܳܢܶܐ ܕܶܝܢ ܣܺܝܡܺܝܢ ܒܥܺܕܬܶܗ ܕܰܐܠܗܳܐ. ܒܗܳܠܶܝܢ ܕܶܝܢ ܘܰܒܗܳܠܝܢ ܐܰܝܟ ܕܰܒܛܽܘܪܳܐ ܩܰܕܺܝܫܳܐ ܫܪܳܐ ܐܰܠܗܳܐ. ܐܰܝܟ ܣܺܝܢܰܝ ܛܽܘܪܳܐ ܩܰܕܺܝܫܳܐ ܓܒܳܐ ܟܢܽܘܫܬܳܐ ܕܰܓܒܰܝܴ̈ܐ.
ܘܡܳܪܝܳܐ ܒܗܽܘܢ ܣܺܝܢܰܝ ܒܩܽܘܕܫܶܗ. ܕܰܐܠܗܳܐ ܠܰܡ ܐܝ̣ܬ ܒܗܽܘܢ ܡܶܢ ܟܰܕܽܘ ܣܺܝܢܰܝ ܐܝ̣ܬܰܝܗܽܘܢ ܗܰܘ ܕܰܢܚܶܬ ܐܰܠܗܳܐ ܥܠܰܘܗܝ ܒܢܽܘܪܳܐ. ܒܳܬܰܪ ܗܳܠܝܢ ܕܰܗ̈ܘܰܝ ܒܝܰܕ ܟܳܪܽܘܙܽܘܬܳܐ ܕܰܫܠܺܝܚ̈ܐ ܩܰܕܺܝ̈ܫܶܐ. ܬܘܒ ܥܰܡܶܗ ܕܰܐܠܗܳܐ ܡܰܠܶܠ ܢܒܺܝܐ. ܟܰܕ ܡܰܘܕܰܥ ܕܗܳܠܝܢ ܟܽܠܗܽܘܢ ܥܽܘܕܪ̈ܳܢܶܐ ܒܝܰܕ ܡܰܚܰܬܬܳܐ ܕܰܐܠܗܳܐ ܕܡܶܢ ܫܡܰܝܳܐ ܐܶܣܬܥܰܪܘ. ܟܰܕ ܠܰܘ ܫܰܪܒܳܐ ܕܡܰܚܰܬܬܳܐ ܡܰܕܟܰܪ. ܐܷܠܐ ܥܰܠ ܣܽܘܠܳܩܳܐ ܡܰܟܪܶܙ.
ܣܠܶܩܬ ܠܰܡܪ̈ܰܘܡܶܐ ܘܰܫܒܰܝܬ ܫܒܺܝܬܳܐ. ܘܝܰܗܒܬ ܡܰܘܗ̈ܒܳܬܳܐ ܠܰܒܢܰܝ̈ܢܳܫܳܐ. ܡܶܛܠ ܡܳܢܳܐ ܐܷܡܰܪ ܕܰܣܠܶܩ. ܠܐ ܐܷܡܰܪ ܕܰܢܚܶܬ܆ ܘܗܳܝ ܕܰܒܪܺܝܫܳܗ̇ ܕܬܶܫܒܽܘܚܬܳܐ ܐܷܡܰܪ ܪܽܘܚܳܐ ܢܩܽܘܡ ܐܰܠܗܳܐ ܥܰܠ ܥܽܘܡܩܳܐ ܕܬܰܚܬܳܝ̈ܬܳܗ̇ ܕܰܐܪܥܳܐ ܗܰܘ ܕܰܢܚܶܬ ܠܳܗ̇ ܒܝܰܕ ܡܰܘܬܳܐ ܬܘܒ ܡܫܰܘܕܰܥ. ܘܰܡܫܰܪܶܐ ܡܙܰܡܪܳܢܳܐ ܘܳܐܡܰܪ ܢܩܽܘܡ ܐܰܘܟܺܝܬ ܢܶܣܰܩ ܐܠܗܳܐ ܡܶܢ ܥܽܘܡ̈ܩܶܐ ܬܰܚܬܳܝ̈ܐ ܕܰܫܝܽܘܠ. ܟܰܕ ܡܡܰܨܰܥ ܡܙܰܡܰܪ ܠܘܳܬܶܗ ܡܶܢ ܗܳܝ ܕܰܣܠܶܩ ܘܶܐܡܰܪ: ܣܠܶܩܬ ܠܰܡܪܰܘܡܳܐ ܘܰܫܒܰܝܬ ܫܒܺܝܬܳܐ. ܠܗܳܢܳܐ ܦܶܬܓܳܡܳܐ ܦܰܘܠܽܘܣ ܚܰܟܺܝܡܳܐ ܦܽܘܫܳܩܳܐ ܕܡܰܚܰܬܬܳܐ ܐܰܠܘܶܬ ܠܗ̇ ܟܰܕ ܟܳܬܶܒ ܗܘܳܐ ܠܘܳܬ ܐܶܦܶܣܳܝ̈ܐ ܡܶܛܠ ܗܳܢܐ ܕܶܝܢ ܐܰܡܺܝܪ܆ ܕܰܣܠܶܩ ܠܰܡܪܰܘܡܳܐ ܘܰܫܒܳܐ ܫܒܺܝܬܳܐ܆ ܘܝܰܗܒ ܡܰܘܗ̈ܒܳܬܳܐ ܠܰܒܢܰܝ̈ܢܳܫܳܐ. ܕܰܣܠܶܩ ܕܶܝܢ ܡܳܢܳܐ ܗܝ܆ ܐܷܠܐ ܕܰܢܚܶܬ ܠܽܘܩܕܰܡ ܠܬܰܚܬܳܝ̈ܬܳܗ̇ ܕܰܐܪܥܳܐ. ܗܰܘ ܕܰܢܚܶܬ܆ ܗܽܘܝܽܘ ܗܰܘ ܕܰܣܠܶܩ܇ ܠܥܶܠ ܡܶܢ ܟܽܠܗܘܢ ܫܡܰܝܴ̈ܐ ܕܰܢܡܰܠܐܷ ܟܽܠ. ܘܗܽܘ ܝܰܗܒ: ܐܝ̣ܬ ܕܰܫܠܺܝܚ̈ܐ. ܘܺܐܝܬ ܕܰܢܒܺܝ̈ܐ. ܘܺܐܝܬ ܕܰܡܣܰܒܪ̈ܳܢܶܐ. ܘܺܐܝܬ ܕܡܰܠܦܳܢ̈ܐ (ܐܦܣ̈ܝܐ ܕ: ܚ-ܝܐ). ܗܳܠܝܢ ܪ̈ܰܒܰܝ ܚܰܝ̈ܠܰܘܳܬܳܐ ܐܶܢܘܢ ܕܗܰܘ ܕܰܣܠܶܩ ܘܶܐܫܬܰܕܰܪܘ ܡܶܢܶܗ ܒܳܬܰܪ ܓܙܳܪܳܐ ܕܥܳܢܴ̈ܐ. ܕܢܰܗܦܟܽܘܢ ܐܶܢܘܢ ܡܶܢ ܕܒܳܪܬܶܗ ܕܣܳܛܳܢܳܐ. ܠܘܳܬ ܡܰܠܟܳܐ ܕܰܫܒܳܐ ܫܒܺܝܬܶܗ ܘܶܐܬܥܰܠܺܝ ܘܰܫܪܳܐ ܐܰܣܺܝܪ̈ܐ ܘܰܫܪܳܐ ܡܶܢ ܪ̈ܶܓܠܰܝܗܘܢ ܩܘܳܕ̈ܐ ܕܰܚܛܺܝܬܳܐ. ܘܡܶܢ ܩܕܳܠܗܘܢ ܢܺܝܪܳܐ ܕܳܐܟܶܠܩܰܪܨܳܐ. ܘܰܩܛܰܥ ܡܶܢ ܐܻܝ̈ܕܰܝܗܘܢ ܟܶܒ̈ܠܐܷ ܕܥܰܒܕܽܘܬܳܐ. ܘܰܥܒܰܕ ܐܶܢܘܢ ܒܢܱ̈ܝ ܚܺܐܪ̈ܶܐ ܒܡܰܘܠܳܕܳܐ ܕܡܶܢܕܪܺܝܫ. ܗܳܠܝܢ ܐܶܢܝܢ ܡܰܘܗ̈ܒܳܬܳܐ ܕܝܰܗܒ ܡܳܪܰܢ ܐܰܝܟ ܕܶܐܡܰܪ ܢܒܺܝܐ ܣܠܶܩ ܕܶܝܢ ܠܰܡܪܰܘܡܳܐ ܘܰܫܒܳܐ ܫܒܺܝܬܳܐ ܘܝܰܗܒ ܡܰܘܗ̈ܒܳܬܳܐ ܠܰܒܢܰܝ̈ܢܳܫܳܐ. ܘܦܰܘܠܽܘܣ ܪܰܒ ܚܰܝܠܐܴ ܕܰܨܠܺܝܒܳܐ ܐܶܡܰܪ܆ ܕܫܳܒܶܝܢܰܢ ܟܽܠ ܬܰܪ̈ܥܝܳܢ ܠܫܶܡܥܶܗ ܕܰܡܫܺܝܚܳܐ (ܒ ܩܘܪ̈ܢܬܝܐ ܝ: ܗ). ܐܳܦ ܕܥܳܒܕܺܝܢ ܗܘܰܘ ܬܒܰܥܬܳܐ ܡܶܢ ܡܳܪ̈ܽܘܕܶܐ. ܘܥܰܠܗܳܕܐ ܐܶܡܰܪ ܢܒܺܝܐ.
ܘܳܐܦ ܡܳܪ̈ܽܘܕܶܐ ܠܐ ܢܶܥܡܪܽܘܢ ܩܕܳܡ ܐܰܠܗܳܐ܀ ܚܶܫܽܘܟܳܐ ܠܢܽܘܗܪܳܐ ܠܐ ܡܣܰܝܒܰܪ. ܡܶܛܠܗܳܢܐ ܡܰܪܚܶܩ ܠܗܽܘܢ ܡܶܢ ܒܶܝܬ ܡܰܥܡܪܶܗ. ܕܠܐ ܬܘܒ ܢܕܰܘܕܽܘܢ ܐܽܘܪܚܳܐ ܕܩܰܕܺܝ̈ܫܶܐ.
ܒܪܺܝܟ ܗܽܘ ܡܳܪܝܳܐ ܒܟܽܠ ܝܽܘܡ ܕܰܐܓܒܝܰܢ ܝܳܪܬܽܘܬܶܗ: ܐܠܗܳܐ ܦܳܪܽܘܩܰܢ ܐܠܗܳܐ ܡܦܰܨܝܳܢܰܢ. ܫܰܦܺܝܪ ܡܰܘܕܶܝܢ ܩܰܕܺܝ̈ܫܐ ܕܰܐܠܗܳܐ ܢܚܶܬ ܡܶܢ ܫܡܰܝܳܐ. ܘܦܰܪܩܳܗ̇ ܠܰܫܒܺܝܬܳܐ ܡܶܢ ܫܽܘܠܛܳܢܶܗ ܕܰܛܪܽܘܢܳܐ. ܚܙܰܘ ܐܰܝܟܰܢܳܐ ܡܥܰܠܰܝ ܡܶܢ ܙܽܘܡܳܪܳܐ ܫܡܳܐ ܗܳܢܐ ܕܰܡܚܺܝܠܽܘܬܳܐ. ܘܟܽܠܗܝܢ ܕܰܐܠܗܳܐ ܚܳܫܶܒ ܠܗܶܝܢ. ܘܠܰܝܬ ܡܰܥܰܠܬܳܐ ܒܺܝܫܬܳܐ ܕܬܰܘܕܺܝܬܳܐ ܪܰܫܺܝܥܬܳܐ ܕܰܬܪܰܝܳܢܽܘܬ ܟܝܴ̈ܢܶܐ. ܘܠܰܝܬ ܥܽܘܗܕܳܢܳܐ ܕܰܓܳܠܐ ܕܒܰܪܢܳܫܳܐ ܕܶܐܬܢܣܶܒ ܐܠܐ ܒܟܽܠ ܕܽܘܟܳܐ ܡܳܪܝܳܐ ܐܠܗܳܐ ܡܶܬܬܰܘܕܶܐ. ܗܰܘ ܕܰܢܚܶܬ ܘܰܦܪܰܩ ܠܰܢ.
ܡܳܪܝܳܐ ܐܠܗܳܐ ܡܳܪܶܗ ܕܡܰܘܬܳܐ ܘܡܰܦܩܳܢܳܐ: ܒܪܰܡ ܐܠܗܳܐ ܢܶܦܣܽܘܩ ܪܺܝܫܳܐ ܕܰܒܥܶܠܕ̈ܒܳܒܰܘܗܝ. ܕܳܡܝܳܐ ܒܰܪܬ ܩܳܠܐ ܗܳܕܐ ܕܰܒܪܺܝܫܗܘܢ ܒܠܰܥܘ ܥܰܒ̈ܕܶܐ ܡܳܪ̈ܽܘܕܶܐ ܕܰܚܛܺܝܬܳܐ. ܘܰܠܘܳܬ ܡܰܥܒܕܳܢ̈ܘܳܬܳܐ ܥܶܠܳܝ̈ܬܳܐ ܕܗܰܘ̈ܢܰܝܗܘܢ. ܡܰܛܺܝ ܟܺܐܒܳܐ ܕܰܡܚܳܐ ܐܶܢܘܢ ܨܠܺܝܒܳܐ. ܘܡܶܛܠܗܳܕܶܐ ܐܶܡܰܪ ܢܒܺܝܐ:
ܒܺܥܴ̈ܬܳܐ ܕܣܰܥܪܳܐ ܕܰܐܝܠܶܝܢ ܕܰܡܗܰܠܟܺܝܢ ܒܰܚܛܳܗܰܝ̈ܗܘܢ. ܒܺܥܴ̈ܬܳܐ ܕܶܝܢ ܐܝ̣ܬܰܝܗܶܝܢ ܐܶܣܦܳܪ̈ܶܐ ܕܣܺܝ̈ܡܳܢ ܒܰܡܨܰܥܬܳܐ ܕܪܺܝܫܳܐ ܕܟܽܠܢܳܫ ܗܳܠܝܢ ܕܰܒܗܶܝܢ ܐܱܝܟ ܕܰܒܕܽܘܟܬܳܐ ܪܳܡܬܳܐ ܥܳܡܪܳܐ ܪܺܝܫܳܢܽܘܬܳܐ ܕܢܰܦܫܳܐ. ܘܡܶܢ ܬܰܡܳܢ ܒܰܕܡܽܘܬܳܐ ܕܫܶܡܫܳܐ ܡܫܰܡܪܳܐ ܙܰܠܺܝ̈ܩܶܐ ܕܚܰܝ̈ܐ ܕܡܰܥܒܕܳܢܽܘܬܳܗ̇ ܥܰܠ ܟܽܠܗ ܓܽܘܫܡܳܐ. ܟܰܕ ܬܰܡܳܢ ܐܳܡܪܺܝܢ ܐܢܳܫܺܝ̈ܢ ܕܡܶܬܝܰܕܥܳܐ ܡܢܳܬܳܐ ܪܺܝܫܳܝܬܳܐ ܕܗܰܘܢܳܐ. ܘܪܽܘܚܳܐ ܩܰܕܺܝܫܳܐ ܐܶܡܰܪ:
ܕܶܐܡܰܪ ܡܳܪܝܳܐ ܕܡܶܢ ܒܶܝܬ ܫܶܢ̈ܐ ܐܰܗܦܶܟ. ܘܰܐܦܶܩ ܡܶܢ ܥܽܘ̈ܡܩܰܘܗܝ ܕܝܰܡܳܐ. ܠܰܬܪܶܝܢ ܡܦܰܠܶܓ ܠܗܽܘܢ ܠܗܳܢܘܢ ܕܰܫܒܶܝܢ ܗܘܰܘ. ܗܳܠܝܢ ܕܰܒܒܶܝܬ ܫܶܢ̈ܐ ܗܘܰܘ ܘܰܐܗܦܶܟ ܐܶܢܘܢ. ܐܝ̣ܬܰܝܗܘܢ ܐܰܝܠܝܢ ܕܰܠܓܰܘ ܡܶܢ ܦܽܘܡܗܽܘܢ ܕܫܺܐܕ̈ܐ ܣܺܝܡܺܝܢ ܗܘܰܘ. ܟܰܕ ܡܦܰܟܪܺܝܢ ܒܰܥ̈ܒܳܕܶܐ ܕܒܶܣܪܳܐ. ܗܳܠܝܢ ܕܶܐܡܪ ܒܥܽܘ̈ܡܩܰܘܗܝ ܕܝܰܡܳܐ. ܥܰܠ ܢܰܦ̈ܫܳܬܳܐ ܕܰܚܒܺܝ̈ܫܳܢ ܗܘܱ̈ܝ ܒܰܫܝܽܘܠ ܡܶܢ ܟܰܕ ܐܶܬܒܪܺܝ ܥܳܠܡܳܐ. ܘܰܥܕܰܡܳܐ ܕܶܐܬܚܙܺܝ ܨܠܺܝܒܳܐ ܡܰܠܦܴ̈ܢ. ܥܒܰܕ ܕܶܝܢ ܗܳܠܝܢ ܟܰܕ ܐܶܨܛܰܒܥܰܬ ܪܶܓܠܶܗ ܒܰܕܡܳܐ ܕܰܫܠܰܕ̈ܐ ܡܶܬܝܰܕܥܳܢܝ̈ܬܳܐ. ܐܶܡܰܪ ܓܶܝܪ ܢܒܺܝܐ ܠܘܳܬܶܗ ܕܡܳܪܝܳܐ:
ܡܶܛܠ ܕܬܶܨܛܒܰܥ ܪܶܓܠܳܟ ܒܰܕܡܳܐ. ܘܠܶܫܳܢܳܐ ܕܟܰܠܒܰܝ̈ܟ ܡܶܢ ܒܥܶܠܕ̈ܒܳܒܰܝܟ. ܗܳܪܟܳܐ ܢܒܺܝܐ ܡܕܰܡܶܐ ܠܶܗ ܠܦܳܪܽܘܩܰܢ ܐܰܝܟ ܗܰܘ ܕܰܒܡܰܥܨܰܪܬܳܐ ܩܳܐܷܡ ܘܕܳܐܷܫ ܫܠܰܕ̈ܐ ܕܰܒܥܶܠܕ̈ܒܳܒܰܘܗܝ ܚܠܳܦ ܥܶܢܒ̈ܐ. ܒܰܫܪܳܪܳܐ ܗܳܢܐ ܥܒܰܕ ܨܠܺܝܒܳܐ ܠܚܰܝ̈ܠܰܘܳܬܳܐ ܕܡܰܪܺܝܕܺܝܢ ܗܘܰܘ ܥܠܰܘܗܝ. ܘܢܶܫܡܰܥ ܠܛܽܘܒܬܳܢܳܐ ܐܶܫܰܥܝܳܐ ܟܰܕ ܡܫܰܐܷܠ ܗܘܳܐ ܠܶܗ ܠܥܰܡܰܢܽܘܐܝܠ ܟܰܕ ܐܶܬܳܐ ܗܘܳܐ ܡܶܢ ܐܰܕܽܘܡ ܕܡܶܬܦܰܫܰܩ ܡܰܘܬܳܐ. ܠܡܳܢܳܐ ܣܽܘ̈ܡܳܩܺܝܢ ܢܰܚܬܰܝ̈ܟ ܘܰܠܒܽܘ̈ܫܰܝܟ. ܐܰܝܟ ܗܰܘ ܕܰܥܨܰܪ ܡܰܥܨܰܪܬܳܐ؟ ܘܰܡܦܰܢܶܐ ܠܰܢܒܺܝܐ ܘܳܐܡܰܪ: ܡܰܥܨܰܪܬܳܐ ܕܳܫܶܬ ܒܰܠܚܽܘܕܰܝ܆ ܘܐܢܳܫ ܡܶܢ ܥܰܡ̈ܡܶܐ ܠܰܝܬ ܗܘܳܐ ܥܰܡܝ. ܥܶܨܪܶܬ ܐܶܢܘܢ ܒܪܽܘܓܙܝ܆ ܘܕܳܫܶܬ ܐܶܢܘܢ ܒܚܶܡܬܝ. ܘܰܢܕܳܐ ܕܶܡܗܽܘܢ ܥܰܠ ܠܒܽܘ̈ܫܰܝ܆ ܘܟܽܠܗܽܘܢ ܢܰܚ̈ܬܰܝ ܦܰܠܦܠܶܬ (ܐܫܥܝܐ ܣܓ: ܒ-ܓ). ܡܙܰܡܪܳܢܐ ܐܳܡܰܪ: ܡܶܛܠ ܕܬܶܨܛܒܰܥ ܪܶܓܠܳܟ ܒܰܕܡܳܐ. ܐܶܢ ܐܢܳܫ ܒܳܥܶܐ ܕܢܶܕܰܥ ܥܰܠ ܓܰܘܢ̈ܐ ܕܶܝܢ ܕܰܫܠܰܕ̈ܐ ܕܚܰܝܠܰܘ̈ܬܳܐ ܡܶܬܝܰܕܥܳܢ̈ܐ. ܐܰܘ ܥܰܠ ܕܡܽܘܬܳܐ ܕܰܕܡܳܐ ܐܰܘ ܡܶܕܶܡ ܪܽܘܚܳܢܳܐ. ܟܰܕ ܒܥܰܝܢܳܐ ܕܪܽܘܚܳܐ ܠܰܝܬ ܕܡܳܐ. ܡܶܛܠ ܕܠܰܝܬ ܠܗܽܘܢ ܓܽܘ̈ܫܡܐ ܕܰܡܠܶܝܢ ܕܡܳܐ. ܥܰܠ ܕܰܡܩܰܛܳܠܽܘ ܩܰܛܶܠ ܐܶܢܘܢ ܨܠܺܝܒܳܐ. ܘܠܶܫܳܢܳܐ ܠܰܡ ܕܟܰܠܒܱ̈ܝܟ ܡܶܢ ܒܥܶܠܕ̈ܒܳܒܰܝܟ ܗܳܟܰܢܐ ܐܺܝܬܰܘܗܝ ܥܒܳܕܳܐ ܕܰܟܬܳܒ̈ܐ. ܕܡܳܐ ܕܢܳܦܩܺܝܢ ܠܡܶܪܕܰܦ ܕܺܐܒ̈ܐ ܡܶܢ ܠܘܳܬܳܗ̇. ܡܢܰܟܬܺܝܢ ܠܳܗ̇ ܠܚܰܝܘܰܬ ܫܶܢܳܐ ܘܠܳܟܚܺܝܢ ܕܡܳܗ̇. ܘܰܒܟܰܠܒ̈ܐ ܡܟܰܢܶܐ ܠܗܽܘܢ ܠܰܫܠܺܝ̈ܚܶܐ ܥܰܠ ܕܰܒܩܳܠܰܝ̈ܗܘܢ ܡܶܬܢܰܛܪܳܐ ܥܳܢܶܗ ܕܰܨܠܺܝܒܳܐ. ܘܥܰܠܗܳܝ ܩܰܒܶܠܘ ܥܠܰܝܗܽܘܢ ܕܒܰܢܛܽܘܪܽܘܬܳܗ̇ ܕܡܰܪܥܺܝܬܳܐ ܢܡܽܘܬܽܘܢ. ܘܡܶܢ ܠܘܳܬܳܗ̇ ܠܐ ܢܰܪܚܩܽܘܢ. ܘܥܰܠ ܕܬܶܐܘܳܪܺܝܰܐ ܕܟܰܠܒ̈ܐ ܣܰܓܺܝ ܡܰܘܕܥܳܐ ܚܽܘܒܳܐ ܕܰܠܘܳܬ ܡܳܪܗܽܘܢ. ܘܰܡܩܰܒܠܺܝܢ ܟܠ ܡܰܚ̈ܘܳܢ. ܘܡܶܢ ܠܘܳܬ ܡܳܪܗܽܘܢ ܠܐ ܡܰܪܚܩܺܝܢ. ܡܳܐ ܕܚܳܙܶܝܢ ܕܣܳܥܶܝܢ ܥܠܰܝܗܘܢ ܒܥܶܠܕ̈ܒܳܒܶܐ. ܝܰܬܺܝܪ ܡܶܢ ܚܰܝܠܳܗ̇ ܕܶܝܢ ܡܶܬܟܰܬܫܳܐ ܠܽܘܩܒܰܠ ܗܳܢܘܢ ܕܡܰܡܪܚܺܝܢ ܥܰܠ ܡܳܪܳܗ̇ ܘܠܐ ܟܰܕ ܒܳܠܥܳܐ ܡܫܰܢܝܳܐ. ܐܶܠܐ ܐܳܦ ܡܳܐ ܕܕܳܡܶܟ ܡܚܰܘܝܳܐ ܕܚܽܘܒܳܗ̇ ܕܰܠܘܳܬܶܗ. ܟܰܕ ܝܳܗܒܳܐ ܩܳܠܳܗ̇ ܘܩܳܥܝܳܐ ܠܽܘܩܒܰܠ ܐܰܝܠܶܝܢ ܕܥܳܒܪܺܝܢ ܒܚܶܫܽܘܟܳܐ. ܥܰܠ ܚܕܳܪ̈ܰܝ ܡܳܪܳܗ̇. ܐܶܢܓܶܝܪ ܡܳܪܶܗ ܕܟܰܠܒܳܐ ܐܷܬܡܬܶܠ ܒܬܰܘܠܥܳܐ. ܘܶܐܬܟܰܢܺܝ ܐܱܪܝܳܐ܆ ܘܶܐܬܬܨܺܝܪ ܒܚܶܘܝܳܐ. ܠܐ ܡܬܰܚܬܝܳܐ ܠܥܰܒ̈ܕܰܘܗܝ ܢܳܛܽܘܪ̈ܶܝܗ̇ ܕܥܳܢܴ̈ܐ ܐܶܢ ܦܶܠܐܷܬܳܢܳܐܝ̣ܬ ܡܶܬܩܪܶܝܢ ܡܶܛܠ ܢܛܽܘܪܬܳܐ ܕܟܰܠܒ̈ܐ ܗܳܠܝܢ ܕܟܰܕ ܒܠܶܫܳܢܗܘܢ ܝܳܗܒܺܝܢ ܗܘܰܘ ܩܳܠܐ ܒܓܰܘ ܡܰܪܥܺܝܬܳܐ. ܚܰܝܠܬܳܢܳܐܝ̣ܬ ܢܳܦܩܺܝܢ ܗܘܰܘ ܒܳܬܰܪ ܕܺܐܒ̈ܐ. ܟܰܕ ܡܰܘܓܶܝܢ ܠܗܽܘܢ ܡܶܢ ܓܙܳܪ̈ܶܐ ܕܥܳܢܴ̈ܐ ܕܰܨܠܺܝܒܳܐ. ܡܶܨܛܰܒܥܺܝܢ ܗܘܰܘ ܠܶܫܳܢܰܝ̈ܗܘܢ ܟܰܕ ܩܳܛܠܺܝܢ ܠܚܰܝܘܰܬ ܫܶܢܳܐ ܘܠܳܥܶܝܢ ܕܡܳܗ̇. ܕܰܐܝܟ ܗܳܟܰܢܳܐ ܐܝ̣ܬܰܘܗܝ ܥܒܳܕܳܐ ܕܟܰܠܒ̈ܐ ܕܥܳܢܴ̈ܐ ܕܡܳܐ ܕܢܳܦܩܺܝܢ ܠܡܶܪܕܰܦ ܕܺܐܒ̈ܐ ܡܶܢ ܠܘܳܬܳܗ̇. ܕܰܐܝܟ ܗܳܟܰܢܳܐ ܗܳܘܶܝ̈ܢ ܗܘܱ̈ܝ ܢܽܘܟ̈ܬܳܬܳܐ ܡܶܢ ܫܠܺܝ̈ܚܶܐ ܒܕܺܐܒ̈ܐ ܡܶܬܝܰܕܥܳܢ̈ܐ. ܐܰܝܟܰܢܳܐ ܕܪܽܘܚܳܐ ܢܺܐܡܰܪ: ܘܠܶܫܳܢܳܐ ܕܟܰܠܒܰܝ̈ܟ ܡܶܢ ܒܥܶܠܕ̈ܒܳܒܰܝܟ. ܡܳܢܳܐ ܕܶܝܢ ܒܳܬܰܪ ܗܳܠܝܢ.
ܚܙܰܘ ܗܰܠܟ̈ܬܳܟ ܐܰܠܗܳܐ. ܗܰܠܟ̈ܬܶܗ ܕܰܐܠܳܗܝ ܘܰܕܡܰܠܟܝ ܩܰܕܺܝܫܳܐ. ܡܰܢ ܐܶܢܘܢ ܗܳܠܝܢ ܕܰܚܙܰܘ ܟܰܕ ܡܗܰܠܶܟ ܐܰܠܗܳܐ ܒܪ̈ܶܓܠܐ ܕܒܶܣܪܳܐ ܥܰܠ ܐܰܪܥܳܐ. ܢܺܐܡܰܪ ܕܚܰܝ̈ܠܰܘܳܬܳܐ. ܕܕܰܠܩܽܘܒܠܳܐ ܠܐ ܟܬܺܝܒ ܕܰܐܪܓܶܫܘ ܒܶܗ ܗܳܠܝܢ. ܐܷܠܐ ܗܳܢܘܢ ܕܰܚܙܰܘ ܗܰܠܟ̈ܬܶܗ. ܗܳܠܝܢ ܐܶܢܘܢ ܕܰܫܘܰܘ ܕܢܶܗܘܘܢ ܠܶܗ ܬܰܠܡܺܝ̈ܕܶܐ ܘܢܶܚܙܽܘܢ ܕܰܡܗܰܠܶܟ ܐܰܠܗܳܐ ܥܰܠ ܐܰܪܥܳܐ ܒܪ̈ܶܓܠܐ ܕܒܶܣܪܳܐ. ܡܶܛܠ ܗܳܢܳܐ ܩܪܳܝܗܝ ܢܒܺܝܐ ܐܰܠܗܳܐ. ܐܰܘܣܶܦ ܬܽܘܒ ܘܰܐܠܳܗܝ ܘܡܰܠܟܝ ܩܰܕܺܝܫܳܐ. ܘܡܰܝܬܶܐ ܒܳܬܰܪ ܗܳܕܐ ܐܳܦ ܥܽܘܗܕܳܢܳܐ ܕܪܰܘܪ̈ܒܳܢܶܐ ܕܰܪܗܶܛܘ ܠܣܶܓܕܬܶܗ ܒܟܳܪܽܘܙܽܘܬܳܐ ܕܰܡܣܰܒܪ̈ܳܢܶܐ.
ܩܰܕܶܡܘ ܪܰܘܪ̈ܒܳܢܶܐ ܒܳܬܰܪ ܡܫܰܒܚܳܢ̈ܐ. ܒܰܝܢܳܬ ܥܠܰܝ̈ܡܳܬܳܐ ܕܢܳܩ̈ܫܳܢ ܒܰܦܠܰܓ̈ܐ ܘܒܰܟܢܽܘ̈ܫܳܬܳܐ. ܪܰܘܪ̈ܒܳܢܶܐ ܡܫܰܡܰܗ ܠܩܰܕܺܝ̈ܫܐ ܘܰܒܬܽܘ̈ܠܳܬܳܐ ܐܳܦ ܠܪ̈ܺܝܫܳܢܶܐ ܕܥܰܡ̈ܡܶܐ ܕܗܰܝܡܶܢܘ. ܥܠܰܝ̈ܡܳܬܳܐ ܠܥܺܕ̈ܬܳܐ ܕܥܰܡ̈ܡܶܐ. ܡܶܛܠ ܕܥܶܒܪܰܬ ܡܶܢܗܶܝܢ ܕܡܽܘܬܳܐ ܡܫܰܟܪܬܳܐ ܕܒܰܪܢܳܫܳܐ ܥܰܬܺܝܩܳܐ ܕܰܠܗܶܝܢ ܦܳܩܶܕ ܪ̈ܽܘܚܶܐ ܘܳܐܡܰܪ:
ܒܰܪܶܟܘ ܠܡܳܪܝܳܐ ܐܠܰܗܳܐ ܡܶܢ ܡܰܒܽܘ̈ܥܶܐ ܕܺܝܣܪܳܐܝܠ. ܡܰܒܽܘܥܳܐ ܕܺܝܣܪܳܐܝܠ ܐܺܝܬܰܘܗܝ ܢܶܒܥܳܐ ܕܰܢܒܺܝܽܘܬܳܐ ܐܰܡܺܝܢܳܐ ܕܪܳܕܶܐ ܗܘܳܐ ܪܽܘܚܳܢܳܐܝ̣ܬ ܡܰܝܴ̈ܐ ܚܰܝ̈ܐ. ܗܳܢܐ ܐܺܝܬܰܘܗܝ ܗܰܘ ܕܶܐܬܦܪܶܫ ܘܰܗܘܳܐ ܠܐܱܪ̈ܥܳܬܳܐ ܢܰܗܪ̈ܰܘܳܬܳܐ ܕܚܰܝ̈ܐ. ܗܳܠܝܢ ܕܰܠܦܰܪܕܰܝܣܳܐ ܕܥܺܕܬܳܐ ܡܰܫܩܶܝܢ܇ ܡܶܛܠܗܳܕܐ.
ܬܰܡܳܢ ܒܶܢܝܳܡܶܝܢ ܙܥܽܘܪܳܐ ܒܫܶܠܝܳܐ. ܒܫܶܠܝܳܐ ܓܶܝܪ ܗܘܳܐ ܦܰܘܠܽܘܣ ܗܰܘ ܕܡܶܢ ܫܰܒܛܳܐ ܕܒܶܢܝܳܡܶܝܢ. ܟܰܕ ܗܘܳܐ ܩܳܠܐ ܥܠܰܘܗܝ ܡܶܢ ܫܡܰܝܳܐ ܘܶܐܡܰܪ ܠܶܗ ܫܳܐܘܳܠ ܫܳܐܘܳܠ܆ ܠܡܳܢܳܐ ܪܳܕܶܦ ܐܰܢܬ ܠܺܝ (ܦܪܟܣܝܣ ܛ: ܕ). ܠܐܴ ܓܶܝܪ ܡܰܡܪܰܚ ܗܘܳܐ ܬܘܒ ܠܡܶܪܕܰܦ ܠܥܺܕܬܶܗ ܕܰܐܠܗܳܐ. ܐܰܝܟ ܕܡܶܢ ܩܕܺܝܡ. ܐܶܠܐ ܩܳܥܶܐ ܗܘܳܐ ܕܶܐܢܳܐ ܐܺܝܬܰܝ ܙܥܽܘܪܗܽܘܢ ܕܰܫܠܺܝ̈ܚܶܐ (ܐܦܣ̈ܝܐ ܓ: ܚ). ܥܰܡ ܗܳܢܳܐ.
ܪܰܘܪ̈ܒܳܢܶܐ ܕܺܝܗܽܘܕܳܐ ܘܫܰܠܺܝܛܳܢܰܝܗܘܢ. ܡܶܢ ܫܰܒܛܳܐ ܕܺܝܗܽܘܕܳܐ ܐܝ̣ܬܰܘܗܝ ܗܘܳܐ ܝܰܥܩܽܘܒ ܐܰܚܽܘܗܝ ܕܡܳܪܰܢ. ܗܰܘ ܕܺܐܝܬܰܘܗܝ ܗܘܳܐ ܚܰܕ ܡܶܢ ܬܠܳܬܳܐ ܥܰܡܽܘ̈ܕܶܐ ܕܥܺܕܬܳܐ. ܘܬܘܒ ܡܶܢ ܫܰܒܛܳܐ ܕܺܝܗܽܘܕܳܐ: ܐܝ̣ܬܰܘܗܝ ܗܘܳܐ ܩܠܶܝܽܘܦܰܐ ܐܰܚܽܘܗܝ ܕܝܰܘܣܶܦ. ܘܺܐܝܬ ܣܰܓܺܝ̈ܐܐ ܐܚܪ̈ܳܢܶܐ ܐܶܠܐ ܫܳܬܶܩ ܐܢܳܐ ܕܶܐܟܬܽܘܒ ܫܡܳܗܰܝ̈ܗܘܢ. ܕܠܐ ܢܰܘܪܶܟ ܡܶܠܬܳܐ.
ܪ̈ܰܘܪܒܳܢܶܐ ܕܰܙܒܳܘܠܽܘܢ ܘܪ̈ܰܘܪܒܳܢܶܐ ܕܢܰܦܬܳܠܺܝ. ܟܰܕ ܡܶܢ ܫܰܒܛܳܐ ܕܰܙܒܳܘܠܽܘܢ ܐܝ̣ܬܰܝܗܘܢ ܗܘܰܘ ܦܶܛܪܽܘܣ ܘܰܐܢܕܪܰܐܘܳܣ. ܘܝܰܥܩܽܘܒ ܘܝܽܘܚܰܢܳܢ ܒܢܰܝ̈ ܙܰܒܕܰܝ. ܘܦܺܝܠܺܝܦܳܘܣ ܗܰܘ ܕܡܶܢ ܒܶܝܬ ܨܰܝܕܳܐ ܕܰܓܠܺܝܠܐܴ ܡܶܢ ܫܰܒܛܳܐ ܕܢܰܦܬܳܠܺܝ ܘܢܰܬܰܢܰܐܝܠ ܗܰܘ ܕܡܶܢ ܩܳܛܢܶܐ ܕܰܓܠܺܝܠܳܐ. ܗܳܠܶܝܢ ܟܽܠܗܘܢ ܬܰܡܳܢ ܗܘܰܘ ܒܚܰܝܠܐ ܕܰܡܣܰܒܪ̈ܳܢܶܐ. ܐܰܝܟ ܪ̈ܰܒܰܝ ܚܰܝ̈ܠܰܘܳܬܳܐ ܩܪ̈ܰܒܬܳܢܶܐ. ܒܰܝܢܳܬ ܗܳܠܝܢ ܡܨܰܠܐܷ ܢܒܺܝܐ ܘܳܐܡܰܪ.
ܦܩܽܘܕ ܐܠܰܗܳܐ ܥܽܘܫܢܳܟ. ܘܰܐܥܫܶܢ ܐܠܰܗܳܐ ܠܗܳܕܐ ܕܥܰܬܶܕܬ ܠܰܢ. ܡܳܢܳܐ ܗ̄ܝ ܗܳܝ ܕܥܰܬܶܕ ܐܠܰܗܳܐ. ܐܶܠܐ ܕܶܒܚܬܳܐ ܕܦܰܓܪܳܐ ܡܳܪܳܢܳܝܳܐ ܡܥܰܫܶܢ ܗܘܳܐ ܠܳܗ̇ ܒܗܳܝ ܕܰܐܩܺܝܡܶܗ ܡܶܢ ܡܰܘܬܳܐ ܒܠܐܴ ܡܶܬܚܰܒܠܳܢܽܘܬܳܐ. ܘܒܳܬܰܪ ܗܳܕܐ ܡܚܰܘܶܐ ܥܰܠ ܫܽܘܥܒܳܕܳܐ ܕܡܰܠܟ̈ܐ ܕܰܐܪܥܳܐ ܕܰܡܩܰܪܒܺܝܢ ܕܶܒܚ̈ܐ ܘܩܽܘܪ̈ܒܳܢܶܐ ܠܰܨܠܺܝܒܳܐ.
ܡܶܢ ܗܰܝܟܠܳܟ ܠܐ̮ܘܪܺܫܠܶܡ ܠܳܟ ܢܰܝܬܽܘܢ ܡܰܠܟ̈ܐ ܩܽܘܪ̈ܒܳܢܶܐ. ܡܶܢ ܟܽܠܗܝܢ ܥܺܕ̈ܬܳܐ. ܠܰܘ ܒܰܠܚܽܘܕ ܡܶܢ ܪ̈ܳܥܰܘܳܬܳܐ ܘܟܳܗ̈ܢܶܐ ܒܰܠܚܽܘܕ. ܐܶܠܐ ܘܡܶܢ ܟܽܠܗܘܢ ܡܰܠܟ̈ܐ ܕܰܐܪܥܳܐ. ܘܡܶܢ ܒܳܬܰܪ ܕܰܚܙܳܐ ܥܽܘܬܪܳܗ̇ ܪܰܒܳܐ ܕܰܣܒܰܪܬܳܐ ܛܽܘܒܳܢܳܐ ܕܰܘܝܕ. ܡܦܺܝܣ ܠܶܗ ܠܡܰܠܟܳܐ ܡܳܪܝܳܐ ܕܢܶܟܐܷܐ ܒܚܰܝܽܘܬܳܐ ܗܳܝ ܒܺܝܫܬܳܐ ܕܥܳܡܪܳܐ ܒܛܶܠܳܠܐ ܕܩܰܢܝܳܐ ܕܡܶܬܬܙܺܝܥ ܠܟܽܠ ܪܽܘܚ.
ܘܰܟܐܻܝ ܒܚܰܝܽܘܬܳܐ ܕܩܰܢܝܳܐ. ܚܰܝܽܘܬܳܐ ܕܩܰܢܝܳܐ ܩܳܪܶܐ ܠܶܗ ܠܚܶܘܝܳܐ ܩܰܕܡܳܝܳܐ. ܡܶܛܠ ܕܰܒܚܶܘܝܳܐ ܡܶܬܕܰܡܶܝܢ ܐܰܝܠܝܢ ܕܰܩܝܳܡܳܐ ܠܰܝܬ ܠܗܽܘܢ. ܒܗܳܢܳܐ ܡܶܬܡܰܬܠܺܝܢ ܟܽܠܗܘܢ ܥܳܒܕܰܝ̈ ܥܰܘܠܐܴ. ܐܳܦ ܦܶܪܥܽܘܢ ܕܩܰܢܝܳܐ ܪܥܺܝܥܳܐ ܡܶܬܩܪܶܐ ܗܘܳܐ ܒܰܟܬܳܒ̈ܐ ܩܰܕܺܝ̈ܫܶܐ ܘܒܳܬܰܪ ܗܳܢܐ ܡܰܝܬܶܐ.
ܟܢܽܘܫܬܳܐ ܕܰܐܪ̈ܘܳܢܶܐ: ܥܶܓ̈ܠܐ ܕܥܰܡ̈ܡܶܐ ܕܰܩܪܺܝܡܺܝܢ ܒܣܺܐܡܳܐ. ܒܰܕܰܪ ܥܰܡ̈ܡܶܐ ܕܨܳܒܶܝܢ ܩܪ̈ܳܒܶܐ. ܗܳܠܝܢ ܟܽܠܗܝܢ ܫܽܘ̈ܚܠܳܦܶܐ ܕܚܰܝ̈ܠܰܘܳܬܳܐ ܚܰܝܽܘܬܳܐ ܕܥܳܡܪܳܐ ܒܩܰܢܝܳܐ ܐܝ̣ܬܰܝܗܘܢ. ܕܡܶܬܩܪܶܝܢ ܐܰܪ̈ܘܳܢܶܐ ܕܡܰܪܺܝܕܺܝܢ ܥܰܠ ܢܺܝܪܳܐ ܘܥܶܓ̈ܠܐ ܕܰܩܪܺܝܡܺܝܢ ܒܣܺܐܡܳܐ. ܥܰܠ ܕܰܒܪܶܥܝܳܢܳܐ ܕܚܰܝܽܘܬܳܐ ܕܠܐ ܕܡܶܠܬܳܐ ܐܰܚܺܝܕܺܝܢ ܗܘܰܘ ܒܛܳܥܝܽܘܬܳܐ. ܘܥܰܡ̈ܡܶܐ ܕܨܳܒܶܝܢ ܩܪ̈ܳܒܶܐ ܚܰܝ̈ܠܰܘܳܬܳܐ ܕܰܠܩܽܘܒܠܳܐ ܕܠܐܴ ܫܳܠܶܝܢ ܕܰܡܙܺܝܥܺܝܢ ܩܪܳܒܳܐ ܥܰܠ ܥܺܕܬܶܗ ܕܰܐܠܗܳܐ. ܘܰܡܙܰܡܰܪ ܢܒܺܝܐ ܘܳܐܡܰܪ ܗܳܝܕܶܝܢ:
ܢܺܐܬܽܘܢ ܐܻܝܙ̈ܓܰܕܶܐ ܡܶܢ ܡܶܨܪܶܝܢ. ܟܶܢܫ̈ܐ ܕܺܝܚܺܝ̈ܕܳܝܶܐ ܩܰܕܺܝ̈ܫܐ ܘܕܰܒܬܽܘ̈ܠܐ ܘܰܕܥܶܢܘ̈ܝܶܐ ܕܡܶܢ ܡܰܪܩܽܘܣ ܡܣܰܒܪܳܢܳܐ. ܘܰܐܝܬܺܝ ܕܢܶܥܒܕܽܘܢ ܫܰܝܢܳܐ ܥܰܡ ܡܰܠܟܳܐ ܙܩܺܝܦܳܐ ܕܰܐܡܠܶܟ ܥܰܠ ܟܽܠܗܽܘܢ ܥܰܡ̈ܡܶܐ.
ܘܟܽܘܫ ܬܰܫܠܶܡ ܐܝ̣ܕܳܐ ܠܰܐܠܗܳܐ. ܐܳܦ ܗܳܕܐ ܦܢܺܝܬܳܐ ܕܡܰܘܟܡܳܐ ܗܘܳܬ ܒܰܚܛܺܝܬܳܐ. ܝܶܗܒܰܬ ܐܺܝܕܳܐ ܠܰܫܠܺܝܚܳܐ ܬܳܐܘܡܰܐ ܘܗܰܝܡܢܰܬ ܘܫܶܠܡܰܬ ܠܡܰܠܟܳܐ ܙܩܺܝܦܳܐ ܐܰܠܗܳܐ. ܘܠܰܘ ܗܳܕܐ ܒܰܠܚܽܘܕ ܐܶܠܐ ܐܳܦ ܟܽܠܗܘܢ ܥܰܡ̈ܡܶܐ ܘܡܰܠܟ̈ܐ ܕܰܐܪܥܳܐ. ܐܰܝܟ ܥܳܢܴ̈ܐ ܬܚܶܝܬ ܡܰܩܠܳܥܶܗ ܕܪܳܥܝܳܐ. ܕܺܐܝܬܰܘܗܝ ܛܝܳܪܶܗ ܕܰܨܠܺܝܒܳܐ.
ܡܰܠܟܘ̈ܬܳܐ ܕܰܐܪܥܳܐ ܫܰܒܰܚܷ̈ܝܢ ܠܰܐܠܗܳܐ. ܙܡܰܪܘ ܠܡܳܪܝܳܐ ܕܰܪܟܺܝܒ ܒܰܫܡܰܝ̈ ܫܡܰܝܴ̈ܐ: ܡܶܢ ܡܰܕܢܚܳܐ ܝܰܗܒ ܩܳܠܶܗ. ܩܳܠܐ ܥܰܫܺܝܢܳܐ. ܡܶܢ ܡܰܕܢܚܳܐ ܐܶܡܰܪ ܕܝܰܗܒ ܩܳܠܶܗ ܐܰܝܟܰܢܳܐ ܕܰܢܦܰܫܶܩ ܕܥܺܕܬܳܐ ܒܢܽܘܗܪܳܐ ܥܳܡܪܳܐ. ܘܥܰܠܗܳܝ ܡܰܠܶܦ ܠܗܶܝܢ ܢܒܺܝܐ ܠܢܰܦ̈ܫܳܬܳܐ ܫܰܒܝܴ̈ܬܳܐ ܘܳܐܡܰܪ:
ܗܰܒܘ ܬܶܫܒܽܘܚܬܳܐ ܠܰܐܠܗܳܐ ܦܳܪܽܘܩܟܶܝܢ: ܐܳܦ ܝܺܣܪܳܐܝܠ ܪܰܒܽܘܬ ܝܳܐܝܽܘܬܳܐ. ܒܰܫܡܳܐ ܕܺܝܣܪܳܐܝܠ ܠܟܽܠܗܽܘܢ ܫܰܒ̈ܛܶܐ ܕܡܰܠܟܽܘܬܳܐ ܕܰܠܥܶܠ ܚܒܰܫ. ܕܥܽܘܫܢܶܗ ܒܰܫܡ̈ܝ ܫܡܱ̈ܝܳܐ. ܡܶܛܠ ܗܳܕܐ ܐܳܡܰܪ:
ܕܚܺܝܠ ܐܰܢܬ ܐܰܠܗܳܐ ܡܶܢ ܡܰܩܕܫܳܟ. ܐܰܠܳܗܶܗ ܕܺܝܣܪܳܐܠ: ܗܽܘ ܢܶܬܶܠ ܚܰܝܠܐܴ ܘܥܽܘܫܢܳܐ ܠܥܰܡܶܗ. ܒܪܺܝܟ ܗܽܘ ܐܰܠܗܳܐ. ܗܳܠܶܝܢ ܩܴ̈ܠܐ ܕܶܐܬܶܐܡܰܪ̈ܝ ܡܶܢ ܡܙܰܡܪܳܢܳܐ. ܒܫܽܘܠܳܡܳܐ ܕܬܶܫܒܽܘܚܬܳܐ ܗܳܕܐ. ܦܺܐܪ̈ܶܐ ܐܶܢܘܢ ܕܩܽܘܒܳܠܛܰܝܒܽܘܬܳܐ ܘܰܕܒܽܘܪ̈ܟܳܬܳܐ ܘܰܕܬܶܫܒܚ̈ܬܳܐ ܕܡܰܘܕܝܳܐ ܘܰܡܫܰܒܚܳܐ ܫܒܺܝܬܳܐ ܗܳܝ ܕܣܶܠܩܰܬ ܡܶܢ ܥܽܘܡܩܳܐ ܠܪܰܘܡܳܐ ܒܰܠܘܺܝܬܶܗ ܕܰܐܠܗܳܐ ܗܰܘ ܕܰܢܚܶܬ ܫܒܳܗ̇ ܘܰܣܠܶܩ. ܕܠܶܗ ܫܽܘܒܚܳܐ ܠܥܳܠܡܰܝ̈ ܥܳܠܡ̈ܐ ܐܰܡܺܝܢ܀
ܡܙܡܘܪܐ ܕܫܬܝܢ ܘܬܫܥܐ
ܡܰܘܕܰܥ ܥܰܠ ܐܽܘܠܨܳܢ̈ܐ ܕܩܳܡܘ ܥܰܠ ܕܰܘܺܝܕ: ܘܥܰܠ ܡܳܪܽܘܕܽܘܬܗܽܘܢ ܕܝܽܘ̈ܕܳܝܶܐ ܕܥܰܠ ܡܫܺܝܚܳܐ: ܘܥܰܠ ܚ̈ܫܶܐ ܠܳܐ ܥܕܺܝܷ̈ܠܐ ܕܣܰܝܒܰܪ ܥܰܡܰܢܽܘܐܺܝܠ ܨܶܒܝܳܢܳܐܝܬ ܡܶܢ ܥܰܡܳܐ.
ܐܰܝܠܶܝܢ ܕܡܶܢ ܟܺܝܡܽܘܢܳܐ ܕܩܳܐܷܡ ܥܠܰܝܗܘܢ ܗܳܘܝܢ ܒܓܰܘ ܝܰܡܳܐ ܢܽܘ̈ܘܳܓܶܐ܆ ܡܥܳܕܺܝܢ ܐܢܘܢ ܕܢܶܓܥܽܘܢ ܠܘܳܬ ܐܠܗܳܐ ܡܶܢ ܟܽܠܶܗ ܠܶܒܗܘܢ. ܕܡܶܢ ܫܓܺܝܫܽܘܬܐ ܕܝܰܡܳܐ ܢܫܰܘܙܶܒ ܐܢܘܢ. ܘܝܰܬܺܝܪܳܐܝܬ ܡܳܐ ܕܚܳܙܶܝܢ ܕܝܽܘܬܪܳܢܳܐ ܐܰܘ ܥܽܘܕܪܳܢܳܐ ܡܶܢ ܕܽܘܟ ܐܚܪܺܝܢ ܠܰܝܬ ܠܗܘܢ. ܕܰܠܘܳܬܶܗ ܢܶܪܗܛܽܘܢ ܒܒܳܥܽܘܬܗܽܘܢ. ܒܕܰܐܝܟ ܗܳܠܝܢ ܩܴ̈ܠܐ ܟܡܺܝܪ̈ܶܐ ܕܕܰܘܝܕ ܐܠܗܳܝܳܐ ܒܬܶܫܒܽܘܚܬܳܐ ܗܳܕܐ ܕܶܫܬܺܝܢ ܘܰܬܫܰܥ ܡܫܰܪܶܐ. ܘܰܐܝܟ ܗܰܘ ܕܰܢܦܰܠ ܒܗܰܘܬܳܐ ܥܰܡܺܝܩܬܳܐ. ܘܥܰܣܩܰܬ ܠܕܽܘܠܳܝܳܐ܆ ܘܶܐܬܛܒܰܥ ܒܥܽܘܡܩܳܐ ܘܰܒܡܰܝܴ̈ܐ ܣܰܓܺܝ̈ܐܐ. ܗܳܟܰܢܐ ܕܳܡܶܐ ܩܳܠܐ ܗܳܢܐ ܕܝܰܗܒ ܒܡܰܙܡܽܘܪܳܐ ܗܳܢܐ. ܘܗܳܪܟܳܐ ܠܐ ܕܳܡܶܐ ܐܰܝܟ ܗܰܘ ܕܰܡܙܰܡܳܪܽܘ ܡܙܰܡܪ: ܐܶܠܐ ܐܰܝܟ ܗܰܘ ܕܡܰܝܠܶܠ ܘܓܳܥܶܐ ܡܶܢ ܚܰܫܳܐ ܥܰܡܺܝܩܳܐ. ܒܪܰܡ ܕܶܝܢ ܠܐ ܕܳܡܝܳܐ ܕܡܶܢ ܐܽܘܠܨܳܢܳܐ ܗܰܘ ܕܰܚܕܺܝܪ ܗܘܳܐ ܠܶܗ܆ ܩܴ̈ܠܐ ܕܰܐܝܟ ܗܳܠܝܢ ܝܳܗܶܒ ܗܘܳܐ. ܒܗܰܘ ܙܰܒܢܳܐ ܓܶܝܪ ܕܰܥܛܰܦ ܗܘܳܐ ܕܰܘܝܕ ܡܶܢ ܐܰܪܥܳܐ ܕܰܒܢ̈ܝ ܪܽܘܒܺܝܠ ܠܐܽܘܪܺܫܠܶܡ. ܘܟܰܕ ܥܒܰܪ ܝܽܘܪܕܢܳܢ ܒܳܬܰܪ ܕܶܐܬܩܛܶܠ ܐܰܒܺܝܫܳܠܽܘܡ܆ ܚܶܪܝܳܢܳܐ ܗܘܳܐ ܗܘܳܐ ܠܫܰܒ̈ܛܶܐ ܕܺܝܣܪܳܐܝܠ ܥܰܠ ܚܕܳܕ̈ܐ. ܡܶܛܠ ܐܺܝܩܳܪܶܗ ܕܡܰܠܟܳܐ܆ ܫܰܒܛܳܐ ܓܶܝܪ ܕܰܒܢ̈ܝ ܝܺܗܽܘܕܳܐ ܠܰܘ ܟܽܠܶܗ ܡܪܰܕ ܗܘܳܐ ܥܰܡ ܐܰܒܺܝܫܳܠܽܘܡ. ܡܣܰܝܰܥ ܗܘܳܐ ܕܶܝܢ ܥܰܡ ܐܰܒܺܝܫܳܠܽܘܡ ܫܰܒܛܳܐ ܕܒܶܢܝܳܡܺܝܢ. ܘܰܐܟܘܳܬܶܗ ܫܰܒܛܳܐ ܕܰܒܢ̈ܝ ܐܰܦܪܶܝܡ. ܩܰܕܶܡܘ ܗܘܰܘ ܓܶܝܪ ܒܢܱ̈ܝ ܝܗܽܘܕܳܐ ܟܰܕ ܥܛܰܦ ܡܰܠܟܳܐ ܕܰܘܝܕ ܕܢܺܐܬܶܐ ܠܒܰܝܬܶܗ. ܘܩܰܒܠܽܘܗܝ ܒܢ̈ܝ ܝܗܽܘܕܳܐ. ܗܳܢܘܢ ܕܩܰܪܺܝܒܺܝܢ ܝܰܬܺܝܪܳܐܝܬ ܠܡܰܠܟܳܐ ܒܓܶܢܣܳܐ. ܗܶܢܘܢ ܕܶܝܢ ܩܰܕܡܳܝ̈ܐ ܐܰܡܠܟܽܘܗܝ ܠܕܰܘܝܕ ܥܠܰܝܗܘܢ ܒܳܬܰܪ ܡܰܘܬܶܗ ܕܫܳܐܘܳܠ. ܒܢܱ̈ܝ ܝܗܽܘܕܳܐ ܟܰܕ ܒܳܥܶܝܢ ܠܰܡܚܰܘܳܝܽܘ ܡܶܢ ܚܽܘܒܳܐ ܥܒܰܕܘ. ܘܠܰܘ ܡܶܛܠ ܕܳܫ̈ܢܶܐ ܦܰܓܪ̈ܳܢܳܝܶܐ. ܘܰܐܝܟ ܝܰܡܳܐ ܕܩܳܡ ܟܺܝܡܽܘ̈ܢܰܘܗܝ ܘܰܙܩܰܦܘ ܓܰܠܠܰܘ̈ܗܝ ܕܳܡܶܐ ܗܘܳܐ ܥܰܡܳܐ. ܘܒܰܝܢܳܬ ܗܳܠܝܢ ܪ̈ܰܘܒܶܐ ܕܡܰܨܽܘܬܳܐ. ܕܛܳܒ ܥܰܙܺܝܙܺܝܢ ܗܘܰܘ. ܫܰܘܪܺܝ ܬܰܡܳܢ ܓܰܒܪܳܐ ܚܰܕ ܥܰܘܳܠܐܴ ܕܰܫܡܶܗ ܗܘܳܐ ܫܳܡܽܘܥ ܒܰܪ ܒܰܟܪܺܝ ܡܶܢ ܫܰܒܛܳܐ ܕܒܶܢܝܳܡܺܝܢ. ܘܰܩܪܳܐ ܒܫܺܝܦܽܘܪܳܐ ܘܶܐܡܰܪ. ܠܰܝܬ ܠܰܢ ܦܶܠܓܽܘܬܳܐ ܥܰܡ ܕܰܘܝܕ. ܘܠܐ ܝܳܪܬܽܘܬܳܐ ܥܰܡ ܒܪܶܗ ܕܺܐܝܫܰܝ. ܙܶܠܘ ܟܽܠܢܳܫ ܠܡܰܫܟܢܶܗ (ܒ ܫܡܘܐܝܠ ܟ: ܐ). ܘܰܦܪܰܫܘ ܟܽܠܗܘܢ ܒܢܱ̈ܝ ܝܺܣܪܳܐܝܠ ܡܶܢ ܒܳܬܰܪ ܕܰܘܝܕ. ܘܶܐܙܰܠܘ ܒܳܬܰܪ ܫܳܡܽܘܥ ܒܰܪ ܒܰܟܪܺܝ. ܒܗܳܢܳܐ ܐܽܘܠܨܳܢܳܐ ܕܩܳܡ ܥܠܰܘܗܝ ܡܶܢ ܒܳܬܰܪ ܗܰܘ ܕܰܥܒܰܪ. ܓܳܥܶܐ ܗܘܳܐ ܠܘܳܬ ܐܰܠܗܳܐ ܟܰܕ ܡܙܰܡܰܪ ܘܳܐܡܰܪ:
ܦܪܽܘܩܰܝܢܝ ܐܰܠܗܳܐ ܡܶܛܠ ܕܰܡܛܰܘ ܡܰܝܴ̈ܐ ܥܕܰܡܳܐ ܠܢܰܦܫܳܐ: ܘܛܶܒܥܶܬ ܒܗܰܘܬܳܐ ܥܰܡܺܝܩܬܳܐ. ܘܠܰܝܬ ܒܳܗ̇ ܒܶܝܬ ܩܝܳܡܳܐ: ܘܥܶܠܶܬ ܠܥܽܘܡܩܳܐ ܕܡܰܝܴ̈ܐ ܘܨܳܡܰܪܬܳܐ ܛܰܒܰܥܬܰܢܝ. ܠܐܻܝܬ ܒܰܩܪܳܝܝ ܘܚܶܪܰܬ ܓܰܓܰܪܬܝ: ܘܓܳܙ̈ܝ ܥܰܝ̈ܢܰܝ ܟܰܕ ܡܣܰܟܶܐ ܐܢܳܐ ܠܰܐܠܳܗܝ. ܗܳܠܶܝܢ ܩܴ̈ܠܐ ܐܰܝܟ ܕܶܐܡܪܶܬ ܡܶܢ ܐܽܘܠܨܳܢܳܐ ܗܰܘ ܕܶܐܬܐܶܡܰܪ ܢܳܣܒܺܝܢ ܗܘܰܘ ܥܶܠܬܳܐ. ܒܰܚܙܳܬܳܐ ܕܶܝܢ ܪܽܘܚܳܢܳܝܬܳܐ ܚܠܳܦ ܪܺܝܫ ܓܶܢܣܰܢ ܙܳܕܶܩ ܕܢܰܫܰܪ ܕܶܐܡܰܪ ܐܶܢܘܢ ܢܒܺܝܐ. ܗܰܘ ܓܶܝܪ ܕܟܰܕ ܐܶܟܰܠ ܡܶܢ ܐܺܝܠܳܢܳܐ ܐܳܦ ܣܠܶܩܘ ܡܰܝܴ̈ܐ ܕܰܚܛܺܝܬܳܐ ܘܰܡܛܰܘ ܥܕܰܡܳܐ ܠܢܰܦܫܶܗ ܘܰܛܒܰܥ ܒܥܽܘܡܩܳܐ ܕܡܰܝܴ̈ܐ ܡܟܰܪ̈ܗܶܐ ܘܕܰܪ̈ܓܺܝܓܳܬܳܐ ܕܟܽܠ ܓܢܶܣ. ܘܠܐ ܡܶܫܟܰܚ ܗܘܳܐ ܕܢܶܬܕܢܶܐ. ܘܰܠܗܳܢܳܐ ܠܐܻܝ ܟܰܕ ܩܳܪܶܐ. ܘܠܰܝܬ ܗܘܳܐ ܕܥܳܢܶܐ ܠܶܗ. ܘܓܳܙ̈ܝ ܥܰܝ̈ܢܰܘܗܝ ܟܰܕ ܡܣܰܟܶܐ ܘܚܳܐܱܪ ܠܐܠܗܳܐ ܕܢܺܐܬܶܐ ܘܢܶܦܪܩܶܗ. ܐܠܐ ܡܶܛܠ ܕܰܢܒܺܝܐ ܡܶܢܗܶܝܢ ܕܡܶܠܰܘ̈ܗܝ ܕܡܰܙܡܽܘܪܳܐ ܗܳܢܐ ܥܰܠ ܢܰܦܫܶܗ ܐܳܡܰܪ. ܘܡܶܢܗܶܝܢ ܬܘܒ ܐܰܝܟ ܕܡܶܢ ܦܰܪܨܽܘܦܳܐ ܕܥܰܡܰܢܘܐܝܠ ܐܳܦ ܡܶܢܗܶܝܢ ܥܰܠ ܥܰܡܳܐ ܡܳܪܽܘܕܳܐ. ܘܟܰܕ ܪܳܕܶܝܢܰܢ ܒܦܽܘܫܳܩܶܗ ܡܦܰܪܫܺܝܢܰܢ ܩܴ̈ܠܐ ܗܳܠܝܢ ܒܰܡܫܰܘܕܥܽܘܬܳܐ. ܕܰܐܝܠܶܝܢ ܠܳܚܡܺܝܢ ܠܰܢܒܺܝܐ. ܘܰܐܝܠܶܝܢ ܠܳܚܡܺܝܢ ܡܰܢ ܠܦܰܪܨܽܘܦܳܐ ܕܥܰܡܰܢܘܐܝܠ ܘܕܳܐܕܳܡ. ܗܳܠܝܢ ܡܶܟܺܝܠ ܕܰܥܕܰܡܐ ܠܗܳܫܐ. ܟܰܕ ܒܕܰܘܝܕ ܚܳܝܪܺܝܢ. ܡܶܛܠ ܐܽܘܠܨܳܢܳܐ ܪܰܒܳܐ ܕܩܳܡ ܥܠܰܘܗܝ. ܘܠܳܐܕܳܡ ܦܰܐܝܴ̈ܢ ܕܰܢܩܰܪܶܒ ܐܶܢܘܢ ܒܒܳܥܽܘܬܳܐ ܠܘܳܬ ܐܰܠܗܳܐ. ܕܢܰܘܫܶܛ ܠܶܗ ܐܺܝܕܳܐ ܘܢܰܣܩܶܗ ܡܶܢ ܗܰܘܬܳܐ ܕܰܚܛܺܝܬܳܐ ܕܰܫܕܳܝܗܝ ܒܳܗ̇ ܚܶܘܝܳܐ. ܘܒܳܬܰܪ ܗܳܠܶܝܢ ܡܳܢܳܐ ܡܰܝܬܶܐ ܢܒܺܝܳܐ.
ܘܰܣܓܺܝܘ ܡܶܢ ܣܰܥܪܳܐ ܕܪܺܝܫܝ ܒܥܶܠܕ̈ܒܳܒܰܝ ܕܡܰܓܳܢ: ܘܰܥܫܶܢܘ ܡܶܢ ܓܰܪ̈ܡܰܝ ܒܥܶܠܕ̈ܒܳܒܰܝ ܕܫܽܘܩܪܳܐ. ܒܥܶܠܕ̈ܒܳܒܶܐ ܕܡܰܓܳܢ ܗܳܠܝܢ ܐܶܢܘܢ ܕܰܗܘܰܘ ܠܳܐܕܳܡ. ܘܰܨܠܰܘ ܠܶܗ ܦܰܚܳܐ ܒܡܶܐܟܽܘܠܬܳܐ ܕܦܺܐܪܳܐ ܟܰܕ ܠܐ ܐܰܣܟܶܠ ܒܗܽܘܢ. ܘܰܠܕܰܘܝܕ ܗܳܟܰܢܐ ܥܒܰܕ ܥܰܡܳܐ. ܒܪܰܡ ܗܳܢܘܢ ܠܐ ܡܶܬܚܰܙܝܳܢܳܐܝ̣ܬ ܨܠܰܘ ܠܳܐܕܳܡ. ܘܗܶܢܘܢ ܐܰܥܒܶܕܘ ܟܰܣܝܳܐܝܬ. ܕܰܠܕܰܘܝܕ ܢܶܣܢܽܘܢ. ܐܳܦ ܠܡܳܪܶܗ ܕܕܰܘܝܕ. ܒܶܗ ܓܶܝܪ ܫܶܩܠܰܬ ܫܽܘܠܳܡܳܐ ܣܶܢܐܬܳܐ ܕܥܰܡܳܐ. ܘܟܰܕ ܡܰܓܳܢ ܘܰܒܫܽܘܩܪܳܐ ܐܶܣܬܢܺܝ. ܐܳܡܰܪ ܪܽܘܚܳܐ ܡܶܛܠܬܶܗ:
ܕܡܶܕܶܡ ܕܠܐ ܛܶܠܡܶܬ ܡܦܰܢܶܐ ܗܘܺܝܬ. ܡܰܢܽܘ ܕܠܐ ܛܠܰܡ ܠܰܐܠܗܳܐ. ܘܠܐ ܐܰܦܢܺܝ ܠܗܽܘܢ ܠܰܛܠܺܝ̈ܡܶܐ. ܟܰܕ ܡܶܢ ܒܪܺܫܺܝܬ ܐܶܬܥܒܶܕ ܒܰܪܢܳܫܳܐ. ܘܠܐ ܡܶܕܶܡ ܛܰܠܡܶܗ ܐܠܗܳܐ ܒܰܒܪܺܝܬܶܗ. ܘܟܰܕ ܡܶܢ ܟܝܴ̈ܢܶܐ ܕܠܐ ܕܳܡܶܝܢ ܚܰܕ ܠܚܰܕ ܩܰܝܡܶܗ. ܘܫܰܟܶܢ ܠܶܗ ܒܛܰܝܒܽܘܬܳܐ ܠܐ ܡܳܝܽܘܬܽܘܬܳܐ. ܘܥܰܒܕܶܗ ܒܨܰܠܡܶܗ ܘܒܰܕܡܽܘܬܶܗ. ܘܣܳܡܶܗ ܒܦܰܪܕܰܝܣܳܐ ܕܰܥܕܶܝܢ ܕܰܒܚܰܝ̈ܐ ܕܠܐ ܥܰܡܠܐܴ ܘܰܕܠܐ ܫܚܳܩܳܐ ܐܰܝܟ ܡܰܠܐܟ̈ܐ ܢܺܚܶܐ. ܡܳܕܶܝܢ ܘܠܐ ܡܶܕܶܡ ܐܶܬܛܠܶܡ ܡܶܢ ܒܳܪܽܘܝܳܐ. ܘܕܰܢܦܰܠ ܡܶܢ ܫܽܘܦܪܳܐ ܕܛܳܒ̈ܬܳܐ ܐܰܠܗܳܝ̈ܬܳܐ. ܒܺܝܫܳܐ ܟܡܶܢ ܠܶܗ ܘܛܰܠܡܶܗ ܘܠܰܘ ܥܳܒܽܘܕܳܐ. ܘܟܰܕ ܐܶܬܳܐ ܐܰܠܗܳܐ ܡܶܠܬܳܐ ܒܰܒܣܰܪ. ܘܦܰܢܺܝ ܠܶܗ ܠܒܰܪܢܳܫܳܐ ܩܰܕܡܳܝܳܐ ܗܰܘ ܡܶܕܶܡ ܕܶܐܬܛܠܶܡ ܡܶܢܶܗ ܒܰܒܪܺܝܬܶܗ. ܘܒܳܬܰܪ ܗܳܠܝܢ ܐܶܡܰܪ ܡܙܰܡܪܳܢܳܐ:
ܐܰܠܗܳܐ ܐܰܢܬ ܝܳܕܰܥ ܐܰܢܬ ܣܰܟܠܘ̈ܬܝ ܘܰܚܛܳܗ̈ܝ ܡܶܢܳܟ ܠܐ ܐܶܬܟܰܣܺܝܘ: ܠܐ ܢܶܒܗܬܽܘܢ ܒܺܝ ܐܰܝܠܶܝܢ ܕܰܡܣܰܒܪܺܝܢ ܒܳܟ. ܡܳܪܝܳܐ ܐܰܠܗܳܐ ܚܰܝܠܬܳܢܳܐ: ܘܠܐ ܢܰܚܦܪܽܘܢ ܒܺܝ ܐܰܝܠܶܝܢ ܕܒܳܥܶܝܢ ܠܳܟ ܐܰܠܳܗܶܗ ܕܺܝܣܪܳܐܝܠ. ܗܳܠܶܝܢ ܦܶܬܓܳܡ̈ܐ ܠܰܝܬ ܐܰܬܪܳܐ ܕܥܰܠ ܡܶܠܬܳܐ ܐܰܠܗܳܐ ܢܶܬܐܰܡܪܽܘܢ. ܡܫܺܝܚܳܐ ܓܶܝܪ ܠܐ ܥܒܰܕ ܚܛܺܝܬܳܐ. ܐܳܦܠܳܐ ܢܶܟܠܐܴ ܐܶܫܬܟܰܚ ܒܦܽܘܡܶܗ. ܘܗܽܘ ܬܘܒ ܥܰܡܰܢܽܘܐܝܠ ܐܶܡܰܪ ܠܘܳܬ ܝܽܘܕܳܝ̈ܐ. ܡܰܢܽܘ ܡܶܢܟܽܘܢ ܡܰܟܶܣ ܠܺܝ ܥܰܠ ܚܛܺܝܬܳܐ (ܝܘܚܢܢ ܚ: ܡܘ). ܡܳܕܶܝܢ ܫܰܦܺܝܪ ܕܢܺܐܡܰܪ ܐܶܢܝܢ ܠܗܳܠܝܢ. ܕܡܶܛܠܳܬܳܟ ܩܰܒܠܶܬ ܚܶܣܕܳܐ. ܠܰܘ ܡܶܛܠ ܐܰܒܳܐ ܐܠܐ ܡܶܛܠ ܐܳܕܳܡ. ܐܶܠܽܘܠܐ ܓܶܝܪ ܡܶܛܠ ܦܽܘܢܳܝܶܗ ܕܗܰܘ ܕܶܐܬܛܪܶܕ ܡܶܢ ܦܰܪܕܰܝܣܳܐ ܐܶܬܳܐ ܡܶܢ ܫܡܰܝܳܐ ܠܰܐܪܥܳܐ. ܡܰܢ ܡܰܡܪܰܚ ܗܘܳܐ ܕܰܢܩܰܪܶܒ ܠܶܗ ܚܶܣܕܳܐ. ܡܳܕܶܝܢ ܠܘܳܬ ܗܰܘ ܕܨܰܠܺܝ ܒܫܽܘܪܳܝܶܗ ܕܡܰܙܡܽܘܪܳܐ ܘܶܐܡܰܪ ܦܪܽܘܩܰܝܢܝ ܐܰܠܗܳܐ ܡܶܛܠ ܕܰܡܛܰܘ ܡܰܝܴ̈ܐ ܥܕܰܡܳܐ ܠܢܰܦܫܳܐ. ܫܰܪܺܝ ܐܰܠܗܳܐ ܡܶܠܬܳܐ ܕܢܶܥܢܶܝܘܗܝ ܘܰܢܦܰܢܶܐ ܠܶܗ ܦܶܬܓܳܡܳܐ ܘܢܺܐܡܰܪ. ܕܡܶܛܠܳܬܳܟ ܐܳܕܳܡ ܢܳܚܶܬ ܐܢܳܐ ܡܶܢ ܫܡܰܝܳܐ. ܘܳܐܬܶܐ ܐܢܳܐ ܠܰܐܪܥܳܐ. ܘܥܳܡܶܕ ܐܢܳܐ ܒܓܰܘ ܗܰܘܬܳܐ ܕܛܰܒܰܥܬܳܟ. ܘܡܰܣܶܩ ܐܢܳܐ ܠܳܟ ܡܶܢ ܨܳܡܰܪܬܳܐ. ܘܡܶܬܓܰܡܪܳܐ ܗܳܝ ܕܶܐܡܰܪ ܪܽܘܚܳܐ.
ܕܡܶܛܠܳܬܳܟ ܩܰܒܠܶܬ ܚܶܣܕܳܐ: ܘܟܰܣܝܰܬ ܒܶܗܬܬܳܐ ܠܐܱܦܰܝ̈. ܚܠܳܦܰܝܟ ܕܶܐܬܟܰܣܺܝܬ ܒܶܗܬܬܳܐ ܕܰܥܒܳܪ ܦܽܘܩܕܳܢܳܐ܆ ܐܰܦܰܝ̈ ܠܪܽܘܩܳܐ ܝܳܗܶܒ ܐܢܳܐ. ܕܰܐܢܬ ܡܶܢ ܒܶܗܬܬܳܐ ܬܶܬܚܰܪܰܪ ܘܟܽܠܗܝܢ ܗܳܠܝܢ ܕܰܣܒܰܠ ܡܶܠܬܳܐ ܐܰܠܗܳܐ ܚܠܳܦ ܐܳܕܳܡ ܣܒܰܠ ܐܶܢܝܢ. ܘܟܰܕ ܛܳܒ ܒܢܳܡܽܘܣܳܐ ܡܶܕܶܡ ܠܳܐ ܐܰܣܟܶܠ. ܐܰܝܟ ܥܳܒܰܪ ܥܰܠ ܢܳܡܽܘܣܳܐ ܦܣܰܩܘ ܥܠܰܘܗܝ ܕܺܝܢܳܐ ܡܰܪ̈ܳܚܶܐ. ܘܰܐܝܟ ܕܰܠܢܽܘܟܪܳܝܳܐ ܛܰܪܕܽܘܗܝ ܘܰܐܦܩܽܘܗܝ ܡܶܢ ܒܰܝܬܳܐ ܕܰܐܒܽܘܗܝ. ܡܶܛܠ ܗܳܢܐ ܐܰܝܟ ܕܡܶܢ ܦܰܪܨܽܘܦܶܗ. ܡܰܝܬܶܐ ܪܽܘܚܳܐ ܘܳܐܡܰܪ:
ܘܢܽܘܟܪܳܝܳܐ ܗܘܺܝܬ ܠܰܐܚ̈ܝ: ܘܰܐܟܣܢܳܝܳܐ ܠܰܒܢ̈ܝ ܐܶܡܝ. ܡܶܛܠ ܕܰܛܢܳܢܶܗ ܕܒܰܝܬܳܟ ܐܰܟܠܰܢܝ: ܘܚܶܣܕܳܐ ܕܰܡܚܰܣ̈ܕܳܢܰܝܟ ܢܦܰܠ ܥܠܰܝ. ܗܳܢܘܢ ܕܚܰܣܶܕܘ ܠܰܐܒܳܐ ܒܡܰܕܒܪܳܐ ܘܪܰܛܶܢܘ ܥܰܠ ܐܠܗܳܐ ܘܥܰܠ ܡܽܘܫܶܐ. ܗܳܫܳܐ ܟܰܕ ܐܶܬܓܠܺܝ ܒܪܶܗ ܒܰܒܣܰܪ. ܐܳܦ ܠܶܗ ܚܰܣܶܕܘ ܐܰܝܟ ܕܰܒܙܰܒܢ̈ܐ ܩܰܕܡ̈ܐ. ܐܶܠܐ ܗܽܘ ܡܶܢ ܐܽܘܪܚܶܗ ܠܐ ܐܰܗܡܺܝ ܘܡܶܛܠܗܳܢܐ ܟܰܕ ܪܳܕܶܐ ܢܳܡܽܘܣܳܐܝܬ ܒܰܫܒܺܝ̈ܠܐ ܕܙܰܕܺܝܩܽܘܬܳܐ ܟܰܕ ܠܰܡܚܺܝ̈ܠܳܬܳܗ̇ ܕܢܳܡܽܘܣܳܐ ܡܶܬܩܰܪܰܒ ܗܘܳܐ. ܘܡܶܢ ܒܳܬܰܪ ܥܡܳܕܳܐ ܩܰܕܡܳܝܳܐ ܐܳܦ ܨܰܘܡܳܐ ܡܩܰܒܶܠ ܗܘܳܐ. ܐܰܝܟ ܕܦܰܫܶܩ ܪܽܘܚܳܐ ܒܦܽܘܡܶܗ ܕܕܰܘܝܕ.
ܕܡܰܟܟܶܬ ܢܰܦܫܝ ܒܨܰܘܡܳܐ ܘܰܗܘܺܝܬ ܠܗܽܘܢ ܠܚܶܣܕܳܐ. ܘܰܐܝܟ ܕܰܒܚܶܣܕܳܐ ܩܪܶܒ ܗܘܳܐ ܡܪܰܡܝܳܢܳܐ ܟܰܕ ܐܳܡܰܪ ܘܰܡܢܰܣܶܐ ܠܶܗ ܕܶܐܢ ܒܪܶܗ ܐܰܢܬ ܕܰܐܠܗܳܐ ܐܶܡܰܪ ܕܗܳܠܝܢ ܟܺܐܦ̈ܐ ܢܶܗܘ̈ܝܢ ܠܰܚܡܳܐ (ܡܬܝ ܕ: ܓ). ܐܳܦ ܓܶܝܪ ܡܶܢ ܐܶܪ̈ܺܝܛܺܝܩܽܘ ܐܰܚܰܝ̈ܗܘܢ ܕܨܳܠܽܘܒ̈ܐ ܘܰܒܟܽܠܙܒܰܢ ܡܶܬܚܰܣܰܕ ܗܰܘ ܨܰܘܡܳܐ ܕܰܗܘܳܬ ܠܰܢ ܒܶܗ ܙܳܟܽܘܬܳܐ. ܡܶܛܠ ܕܰܒܫܽܘܠܳܡܶܗ ܕܨܰܘܡܳܐ ܫܒܰܩ ܗܘܳܐ ܕܢܶܥܽܘܠ ܐܳܦ ܟܰܦܢܳܐ ܢܳܡܽܘܣܳܐܝܬ ܕܰܢܚܰܘܶܐ ܕܒܰܫܪܳܪܳܐ ܗܘܳܐ ܒܰܪܢܳܫܳܐ. ܘܟܰܕ ܨܳܐܷܡ ܟܳܦܶܢ ܗܘܳܐ. ܘܠܰܘ ܒܦܰܢܛܰܣܺܝܰܐ ܗܳܕܐ ܣܥܰܪ. ܥܰܠܗܳܝ ܕܰܟܦܶܢ ܫܰܩܠܽܘܗܝ ܝܽܘܕܳܝ̈ܐ ܚܰܕ̈ܬܶܐ ܬܰܠܡܺܝ̈ܕܰܘܗܝ ܕܢܰܣܛܽܘܪܝܽܘܣ ܘܳܐܡܪܺܝܢ܆ ܕܗܰܘ ܠܰܡ ܕܰܟܦܶܢ ܗܘܳܐ ܠܰܘ ܐܠܰܗܳܐ ܗܘܳܐ: ܐܠܐ ܒܰܪܢܳܫܳܐ ܕܢܰܩܺܝܦ ܗܘܳܐ ܠܶܗ. ܐܳܦ ܗܳܕܐ ܬܰܪܥܺܝܬܳܐ ܨܰܥܪܳܐ ܗ̄ܝ ܠܰܐܠܗܳܐ. ܡܰܥܶܠ ܒܳܬܰܪ ܗܳܕܐ ܘܳܐܡܰܪ:
ܥܶܒܕܶܬ ܠܒܽܘܫܝ ܣܰܩܳܐ ܘܰܗܘܺܝܬ ܠܗܽܘܢ ܠܡܰܬܠܐܴ. ܘܶܐܢ ܠܒܶܫ ܢܒܺܝܐ ܣܰܩܳܐ܆ ܡܶܛܠ ܚܛܳܗܳܐ ܗܰܘ ܕܒܶܝܬ ܐܽܘܪܺܝܳܐ. ܟܡܳܐ ܙܰܒܢܺܝ̈ܢ ܐܳܡܰܪ ܗܘܳܐ܆ ܐܳܦ ܗܳܕܐ ܥܰܠ ܕܶܐܬܬܚܶܕ ܡܶܛܠܳܬܶܗ. ܒܪܰܡ ܕܶܝܢ ܥܰܡܰܢܘܐܝܠ ܠܐ ܡܰܘܕܰܥ ܟܬܳܒܳܐ ܕܶܐܬܚܰܫܰܚ ܦܰܓܪܳܢܳܐܝ̣ܬ ܒܰܠܒܽܘܫܳܐ ܕܰܐܝܟ ܗܳܢܐ. ܡܶܛܠ ܕܰܠܒܽܘܫܳܐ ܕܣܰܩܳܐ ܡܶܢ ܟܝܳܢܳܐ ܕܥܶܙ̈ܐ ܡܶܬܢܣܶܒ. ܓܶܢܣܳܐ ܕܐܢܴ̈ܫܳܐ ܒܥܶܙ̈ܐ ܡܶܬܡܬܶܠ. ܒܰܠܒܽܘܫܳܐ ܕܶܝܢ ܕܰܚܛܺܝܬܳܐ ܡܟܰܣܰܝ ܗܘܳܐ ܟܝܳܢܳܐ ܐܢܳܫܳܝܳܐ. ܐܶܠܐ ܐܰܝܟ ܕܰܐܟܬܶܒ ܦܰܘܠܽܘܣ ܫܠܺܝܚܳܐ ܠܘܳܬ ܪ̈ܗܽܘܡܳܝܶܐ. ܕܫܰܕܰܪ ܐܰܠܗܳܐ ܠܰܒܪܶܗ ܒܰܕܡܽܘܬܳܐ ܕܒܶܣܪܳܐ ܕܰܚܛܺܝܬܳܐ܆ ܡܶܛܠܳܬܳܗ̇ ܕܰܚܛܺܝܬܳܐ ܕܰܢܚܰܝܒܺܝܗ̇ ܠܰܚܛܺܝܬܳܐ ܒܒܶܣܪܶܗ (ܪ̈ܗܘܡܝܐ ܚ: ܓ). ܡܳܕܶܝܢ ܒܰܫܡܳܐ ܘܰܒܟܽܘܢܳܝܳܐ ܕܣܰܩܳܐ ܥܳܐܷܠ ܫܽܘܘܕܳܥܳܐ ܕܒܶܣܪܳܐ ܐܢܳܫܳܝܳܐ. ܘܡܳܪܳܢܳܝܳܐ ܗܰܘ ܕܡܶܛܠ ܕܰܥܬܺܝܕ ܗܘܳܐ. ܕܡܶܢ ܟܝܳܢܳܐ ܕܶܐܬܚܰܝܰܒ ܒܰܚܛܺܝܬܳܐ ܢܶܚܽܘܬ ܢܶܬܒܰܣܰܪ. ܩܰܕܶܡ ܩܪܳܝܗܝ ܗܘܳܐ ܠܒܶܣܪܳܐ ܗܰܘ ܕܰܠܒܶܫ ܣܰܩܳܐ. ܘܥܰܠܗܳܝ ܐܶܡܰܪ ܕܰܗܘܺܝܬ ܠܗܽܘܢ ܠܡܰܬܠܐܴ. ܕܰܒܡܱ̈ܬܠܐܷ ܘܰܒܦ̈ܠܳܐܬܳܐ ܢܡܰܠܠܽܘܢ ܫܰܪܒܶܗ ܘܗܳܢܐ ܣܽܘܥܪܳܢܳܐ ܕܬܶܕܡܽܘܪܬܳܐ ܐܰܗܡܺܝ ܕܢܶܪܢܽܘܢ ܒܶܗ. ܐܰܝܠܶܝܢ ܕܝܳܬܒܺܝܢ ܗܘܰܘ ܒܬܰܪܥܳܐ ܕܒܶܝܬ ܐܰܕܽܘܢܰܝ܆ ܐܶܡܰܪ ܓܶܝܪ:
ܘܰܪܢܰܘ ܒܺܝ ܐܰܝܠܶܝܢ ܕܝܳܬܒܺܝܢ ܒܬܰܪܥܳܐ: ܘܰܪܢܰܘ ܒܺܝ ܐܰܝܠܶܝܢ ܕܫܳܬܶܝܢ ܫܰܟܪܳܐ. ܗܳܠܶܝܢ ܕܝܳܬܒܺܝܢ ܒܬܰܪܥܳܐ ܐܺܝܬܰܝܗܘܢ܆ ܗܳܠܝܢ ܕܰܐܚܺܝܕܺܝܢ ܗܘܰܘ ܩܠܺܝ̈ܕܶܐ ܕܪܰܒܽܘܬ ܟܽܘܡܪܽܘܬܳܐ ܗܳܝ ܢܳܡܽܘܣܳܝܬܳܐ. ܟܰܕ ܐܶܬܓܠܺܝ ܐܰܠܗܳܐ ܥܰܠ ܐܰܪܥܳܐ ܘܣܳܦܪ̈ܶܐ ܘܰܦܪ̈ܺܝܫܶܐ ܗܳܠܝܢ ܐܶܡܰܪ ܠܗܽܘܢ ܡܳܪܰܢ܆ ܘܳܝ ܠܟܽܘܢ ܣܳܦܪ̈ܶܐ ܘܰܦܪ̈ܺܝܫܶܐ ܢܳܣ̈ܒܰܝ ܒܰܐܦ̈ܐ. ܕܰܐܚܺܝܕܺܝܢ ܐܰܢܬܽܘܢ ܡܰܠܟܽܘܬܳܐ ܕܰܫܡܰܝܳܐ ܩܕܳܡ ܒܢܰܝܢ̈ܫܳܐ. ܐܰܢܬܽܘܢ ܓܶܝܪ ܠܳܐ ܥܳܐܠܺܝܢ ܐܰܢܬܽܘܢ܆ ܘܠܰܐܝܠܶܝܢ ܕܥܳܐܠܺܝܢ ܟܳܠܶܝܬܽܘܢ (ܡܬܝ ܟܓ: ܝܕ). ܘܗܶܢܘܢ ܬܘܒ ܐܺܝܬܰܝܗܘܢ ܗܳܢܘܢ ܕܫܳܬܶܝܢ ܗܘܰܘ ܫܰܟܪܳܐ ܫܰܟܪܳܐ ܕܶܝܢ ܐܺܝܬܰܘܗܝ ܚܰܡܪܳܐ ܕܬܶܡܪ̈ܶܐ. ܗܳܢܐ ܕܶܝܢ ܟܰܕ ܡܶܬܥܨܰܪ܆ ܚܰܠܝܽܘܬܳܐ ܣܰܓܺܝܐܬܳܐ ܐܺܝܬ ܒܶܗ. ܡܕܰܟܶܐ ܕܶܝܢ ܝܰܬܺܝܪܳܐܝ̣ܬ ܠܟܽܠܗܽܘܢ ܡܳܐܢܱ̈ܝ ܓܰܘܳܐ. ܘܰܡܩܰܛܶܢ ܒܰܪܬ ܩܳܠܐ ܘܡܳܪܶܩ ܐܳܦ ܚܪ̈ܽܘܪܶܐ ܕܪܳܐܬܳܐ. ܘܰܡܕܰܟܶܐ ܟܰܒܕܳܐ ܡܶܢ ܝܰܬܺܝܪܽܘܬܳܐ ܕܰܕܡܳܐ ܥܰܒܝܳܐ. ܘܡܰܚܶܬ ܡܶܪܬܳܐ ܘܦܶܠܓܡܳܐ ܡܶܢ ܐܶܣܛܽܘܡܟܳܐ. ܘܰܡܢܺܝܚ ܠܰܡܢܱ̈ܘܳܬܳܐ ܥܶܠܳܝ̈ܬܳܐ ܕܪܺܝܫܳܐ. ܘܰܡܫܰܝܶܢ ܡܽܘܚܳܐ ܒܨܶܕ̈ܥܶܐ. ܡܶܛܠ ܕܕܶܩ̈ܠܐܷ ܕܶܝܢ ܒܰܢܒܺܝ̈ܐ ܡܶܬܡܰܬܠܺܝܢ. ܟܬܺܝܒ ܓܶܝܪ ܕܶܐܡܰܪ ܕܙܰܕܺܝܩܳܐ ܐܰܝܟ ܕܶܩܠܐܴ ܢܶܦܪܰܥ. ܙܰܕܺܝ̈ܩܶܐ ܕܶܝܢ ܢܒܺܝ̈ܐ ܗܘܰܘ. ܘܪ̈ܺܝܫܰܝ ܟܳܗܢ̈ܐ ܐܳܦ ܩܰܫܺܝ̈ܫܶܐ ܕܥܰܡܳܐ. ܗܳܠܶܝܢ ܕܪܳܢܶܝܢ ܗܘܰܘ ܒܥܰܡܰܢܘܐܝܠ ܟܰܕ ܚܙܰܐܘܽܗܝ ܘܡܶܬܚܰܫܒܺܝܢ ܗܘܰܘ ܠܡܶܩܛܠܶܗ. ܗܽܘ ܕܶܝܢ ܚܠܳܦ ܗܳܕܐ ܡܨܰܠܐܷ ܗܘܳܐ ܥܠܰܝܗܽܘܢ ܩܕܳܡ ܐܰܒܳܐ. ܟܰܕ ܐܳܡܰܪ: ܫܒܽܘܩ ܠܗܽܘܢ (ܠܘܩܐ ܟܓ: ܠܕ). ܠܰܘ ܚܠܳܦܰܝܗܽܘܢ ܒܰܠܚܽܘܕ ܐܶܠܐ ܘܰܚܠܳܦ ܟܽܠܶܗ ܥܳܠܡܳܐ. ܩܰܪܶܒ ܨܠܽܘܬܳܐ ܠܰܐܒܳܐ ܕܢܶܬܪܰܥܶܐ ܠܳܐܕܳܡ. ܐܶܡܰܪ ܓܶܝܪ ܪܽܘܚܳܐ ܐܰܝܟ ܕܡܶܢܶܗ ܕܡܶܠܬܳܐ.
ܘܶܐܢܳܐ ܨܰܠܺܝܬ ܩܕܳܡܰܝܟ ܡܳܪܝܳܐ ܒܙܰܒܢܳܐ ܡܩܰܒܠܐܴ: ܐܰܠܗܳܐ ܒܣܽܘܓܳܐܐ ܕܛܰܝܒܽܘܬܳܟ ܥܢܺܝܢܝ. ܘܰܒܣܽܘܓܳܐܐ ܕܦܽܘܪܩܳܢܳܟ ܦܰܨܳܢܝ. ܙܰܒܢܳܐ ܕܶܝܢ ܡܩܰܒܠܐ ܙܰܒܢܳܐ ܐܺܝܬܰܘܗܝ ܕܰܨܠܺܝܒܳܐ. ܗܳܟܰܢܐ ܦܰܫܶܩ ܦܰܘܠܽܘܣ ܗܰܘ ܪܰܒܳܐ ܟܰܕ ܐܳܡܰܪ܆ ܗܳܐ ܗܳܫܐ ܙܰܒܢܳܐ ܡܩܰܒܠܐ. ܘܗܳܐ ܗܳܫܐ ܝܰܘܡܳܐ ܕܚܰܝ̈ܐ (ܒ ܩܘܪ̈ܢܬܝܐ ܘ: ܒ). ܘܗܳܝܕܶܝܢ ܐܶܬܓܰܡܪܰܬ ܗܳܝ ܕܶܐܡܰܪ ܢܒܺܝܳܐ܆ ܘܶܐܢܳܐ ܨܰܠܺܝܬ ܩܕܳܡܰܝܟ ܡܳܪܝܳܐ ܒܙܰܒܢܳܐ ܡܩܰܒܠܐ. ܘܗܰܘ ܕܶܝܢ ܕܥܳܐܷܠ ܒܳܬܪܶܗ ܘܳܐܡܰܪ:
ܐܰܠܗܳܐ ܒܣܽܘܓܳܐܐ ܕܛܰܝܒܽܘܬܳܟ ܥܢܺܝܢܝ. ܘܰܒܣܽܘܓܳܐܐ ܕܦܽܘܪܩܳܢܳܟ ܦܰܨܳܢܝ: ܘܡܶܢ ܣܝܳܢܳܐ ܕܠܐ ܐܶܛܒܰܥ. ܘܶܐܬܦܰܨܶܐ ܡܶܢ ܣܳܢܱ̈ܐܝ ܘܡܶܢ ܥܽܘܡܩܳܐ ܕܡܰܝܴ̈ܐ. ܕܠܳܐ ܬܛܰܒܥܰܢܝ ܨܳܡܰܪܬܳܐ ܕܡܰܝܴ̈ܐ: ܘܠܳܐ ܬܶܒܠܥܰܢܝ ܗܰܘܬܳܐ: ܘܠܳܐ ܬܶܐܚܽܘܕ ܥܠܰܝ ܒܺܐܪܳܐ ܦܽܘܡܳܗ̇. ܘܡܶܢ ܒܳܬܰܪ ܕܚܰܘܺܝ ܒܪܳܐ ܕܰܐܠܗܳܐ ܦܰܪܨܽܘܦܳܐ ܕܪܰܒܽܘܬ ܟܽܘܡܪܽܘܬܳܐ ܘܰܚܠܳܦ ܡܰܣܟܠܳܢ̈ܐ ܡܶܬܕܒܰܚ ܗܘܳܐ. ܘܰܚܠܳܦ ܡܰܢ ܚܰܛܳܝ̈ܐ ܡܶܬܩܰܪܰܒ ܗܘܳܐ ܠܡܰܘܬܳܐ. ܐܶܠܐ ܗܳܫܳܐ ܢܒܺܝܐ ܢܶܒܥܶܐ ܘܢܺܐܡܰܪ܆
ܥܢܺܝܢܝ ܡܳܪܝܳܐ ܡܶܛܠ ܕܛܳܒܳܐ ܗܝ ܛܰܝܒܽܘܬܳܟ: ܘܰܒܣܽܘܓܳܐܐ ܕܪ̈ܰܚܡܰܝܟ ܐܶܬܦܰܢ ܥܠܰܝ. ܘܠܳܐ ܬܰܗܦܶܟ ܐܰܦܰܝ̈ܟ ܡܶܢ ܥܰܒܕܳܟ: ܡܶܛܠ ܕܥܳܩܰܬ ܠܺܝ ܒܰܥܓܰܠ ܥܢܺܝܢܝ. ܩܰܪܶܒ ܢܰܦܫܝ ܠܦܽܘܪܩܳܢܳܟ: ܡܶܛܠ ܒܥܶܠܕ̈ܒܳܒܰܝ ܦܪܽܘܩܰܝܢܝ. ܟܰܕ ܒܳܥܶܐ ܗܘܳܐ ܢܒܺܝܐ ܒܰܨܠܽܘܬܳܐ ܕܠܳܐ ܬܶܗܘܶܐ ܢܰܦܫܶܗ ܪܰܚܺܝܩܳܐ ܡܶܢ ܦܽܘܪܩܳܢܳܐ ܕܰܐܠܗܳܐ. ܗܰܘ ܕܶܐܬܓܠܺܝ ܠܶܗ ܕܗܳܘܶܐ ܐܢܳܫܳܐ ܥܰܠ ܐܰܪܥܳܐ ܘܡܳܐ ܕܶܐܬܚܙܺܝ. ܘܗܳܕܐ ܬܶܗܘܶܐ ܡܶܛܠ ܛܰܝܒܽܘܬܳܐ ܕܪܰܒܳܐ. ܘܡܶܛܠ ܒܥܶܠܕ̈ܒܳܒܰܝ ܕܰܟܡܶܢܘ ܥܠܰܝ ܕܠܳܐ ܣܰܟܠܽܘܬܳܐ. ܘܫܰܠܰܚܘ ܢܰܚ̈ܬܰܝ ܘܰܗܘܺܝܬ ܠܗܽܘܢ ܠܚܶܣܕܳܐ. ܟܽܠܝܽܘܡ ܡܽܘܝܳܩܳܐ ܘܓܽܘܚܟܳܐ ܪܰܒܳܐ.
ܐܶܠܐ ܐܰܢܬ ܝܳܕܰܥ ܐܰܢܬ ܚܶܣܕܝ. ܢܒܺܝܳܐ ܡܚܰܘܶܐ ܡܶܛܠ ܕܰܡܚܰܡܣܶܢ ܗܘܳܐ ܒܰܐܠܗܳܐ ܡܶܬܚܰܣܰܕ ܗܘܳܐ. ܘܬܘܒ ܡܰܘܣܶܦ.
ܘܒܶܗܬܰܬܝ ܠܽܘܩܒܰܠ ܟܽܠܗܽܘܢ ܒܥܶܠܕ̈ܒܳܒܰܝ. ܣܺܝܡܳܐ ܠܰܡ ܒܶܗܬܰܬܝ ܒܓܶܠܝܳܐ. ܘܠܰܝܬ ܥܠܶܝܗ̇ ܬܰܚܦܺܝܬܳܐ. ܘܰܡܦܰܪܣܰܝ ܟܝܳܢܳܐ ܐܢܳܫܳܝܳܐ ܘܒܶܗܬܬܳܐ ܩܕܳܡ ܟܽܠܶܗ ܓܰܒܳܐ ܕܰܒܥܶܠܕ̈ܒܳܒܰܘܗܝ ܐܶܠܐ ܐܰܢܬ ܐܰܝܟ ܐܳܣܝܳܐ ܛܳܒܳܐ.
ܐܰܣܳܐ ܬܒܳܪܶܗ ܕܠܶܒܝ ܘܰܥܨܽܘܒ. ܕܠܳܟ ܓܳܠܐܷ ܟܺܐܒܳܐ ܕܡܰܚ̈ܘܳܬܳܐ ܘܰܕܢܽܘܟ̈ܬܳܬܳܐ ܕܰܥܒܰܕ ܒܰܢ ܚܶܘܝܳܐ. ܘܒܳܟ ܢܶܬܚܱ̈ܠܡܳܢ ܚܒܳܪ̈ܳܬܳܐ ܕܰܡܚܳܐ ܒܢܰܦܫܰܢ ܠܣܰܓܺܝ̈ܐܐ. ܘܚܳܪܢܰܢ ܘܠܰܝܬ ܕܦܳܪܶܩ ܠܰܢ.
ܘܣܰܟܺܝܬ ܠܡܰܢ ܕܬܶܟܪܶܐ ܠܶܗ ܘܠܰܝܬ. ܘܠܰܡܒܰܝܳܐܢܳܐ ܘܠܳܐ ܐܶܫܟܚܶܬ. ܗܳܠܝܢ ܩܴ̈ܠܐ ܕܒܽܘܓܳܢܶܗ ܕܳܐܕܳܡ ܐܢܘܢ ܘܕܺܝܠܗ ܗܺܝ ܕܢܺܐܡܰܪ ܕܣܰܟܳܝ ܠܦܽܘܪܩܳܢܳܐ ܘܡܶܢܗ ܐܶܬܪܰܚܰܩ. ܐܶܠܐ ܚܙܺܝ ܐܰܝܟܰܢܐ ܥܳܢܶܐ ܠܶܗ ܡܳܪܶܗ ܘܳܐܡܰܪ. ܕܟܰܕ ܠܰܡ ܐܶܬܺܝܬ ܐܶܦܪܩܳܟ. ܡܪܳܪܳܐ ܘܚܰܠܐ ܝܰܗܒܘ ܠܺܝ ܒܢܱ̈ܝܟ.
ܘܝܰܗܒܘ ܒܡܶܐܟܽܘܠܬܝ ܡܪܳܪ̈ܶܐ: ܘܰܠܨܰܗܺܝܝ ܚܰܠܐ ܐܰܫܩܝܽܘܢܝ. ܗܳܠܝܢ ܠܰܡ ܣܶܒܠܶܬ ܟܰܕ ܦܳܪܶܩ ܐܢܳܐ ܠܟ. ܐܠܐ ܡܶܛܠ ܕܳܐܕܳܡ ܡܶܣܟܺܢܳܐ ܠܐ ܫܳܠܶܡ ܗܘܳܐ ܠܨܶܒܝܳܢܗܘܢ ܕܨܳܠܽܘ̈ܒܐ. ܘܠܐ ܢܒܺܝ̈ܐ ܘܠܐ ܙܰܕܺܝ̈ܩܐ ܡܫܰܘܬܦܺܝܢ ܒܩܶܛܠܐ ܕܡܳܪܗܘܢ. ܘܒܶܗ ܒܥܶܕܳܢܳܐ ܕܫܶܡܥܰܬ ܢܒܺܝܽܘܬܐ ܕܳܐܡܰܪ: ܗܰܘ ܕܫܰܕܰܪ ܢܒܺܝ̈ܐ ܗܳܟܰܢܐ ܡܶܬܦܰܢܝܳܐ ܘܠܳܝܛܳܐ ܠܗܘܢ. ܠܗܳܢܘܢ ܕܩܰܪܶܒܘ ܚܰܠܐ ܠܗܰܘ ܢܶܒܥܳܐ ܚܰܠܝܳܐ ܘܳܐܡܪܳܐ:
ܕܢܶܗܘܶܐ ܦܳܬܽܘܪܗܘܢ ܩܕܳܡܰܝܗܘܢ ܦܰܚܳܐ. ܘܦܽܘܪܥܳܢܗܘܢ ܠܬܽܘܩܰܠܬܳܐ: ܘܢܶܚܫ̈ܟܳܢ ܥܰܝ̈ܢܰܝܗܘܢ ܘܠܐ ܢܶܚܙܽܘܢ. ܘܚܰܨܗܘܢ ܒܟܽܠܙܒܰܢ ܢܶܗܘܶܐ ܟܦܺܝܦ: ܐܰܫܽܘܕ ܥܠܰܝܗܘܢ ܪܽܘܓܙܳܟ: ܘܚܶܡܬܳܐ ܕܪܽܘܓܙܳܟ ܬܰܕܪܶܟ ܐܶܢܘܢ: ܢܶܗܘܶܐ ܒܶܝܬ ܡܰܥܡܰܪܗܘܢ ܚܪܶܒ. ܘܰܒܡܰܫܟ̈ܢܰܝܗܘܢ ܠܳܐ ܢܶܗܘܶܐ ܕܥܳܡܰܪ. ܗܳܠܝܢ ܟܽܠܗܝܢ ܥܰܠ ܝܽܘܕܳܝ̈ܐ ܐܶܬܰܝ̈ ܒܳܬܰܪ ܨܠܺܝܒܳܐ. ܐܰܝܟ ܕܶܐܡܰܪ ܪܽܘܚܳܐ. ܗܘܳܐ ܓܶܝܪ ܦܳܬܽܘܪܗܘܢ ܦܰܚܳܐ ܩܕܳܡܰܝܗܘܢ. ܡܶܛܠ ܕܠܐ ܡܶܟܺܝܠ ܡܶܬܩܰܪܒܺܝܢ ܥܠܰܘܗܝ ܩܽܘܪ̈ܒܳܢܶܐ ܡܰܘܬܪ̈ܳܢܶܐ. ܐܶܠܐ ܡܣܰܓܦ̈ܢܶܐ. ܘܦܽܘܪܥܳܢܗܘܢ ܠܬܽܘܩܰܠܬܳܐ. ܡܶܛܠ ܕܰܠܫܺܐܕ̈ܐ ܡܶܬܚܰܫܒܺܝܢ ܕܶܒܚ̈ܐ ܕܰܡܩܰܪܶܒ ܥܰܡܳܐ. ܘܰܐܚܫܶܟ ܥܰܝ̈ܢܰܝܗܘܢ ܕܠܐ ܢܶܚܙܽܘܢ. ܘܠܐ ܬܘܒ ܩܳܝܡܺܝܢ ܒܥܰܡܳܐ ܚܰܙܳܝ̈ܐ ܘܰܢܒܺܝ̈ܐ. ܕܗܶܢܘܢ ܚܳܙܶܝܢ ܗܘܰܘ ܟܰܣܝ̈ܬܳܐ ܕܰܐܠܗܽܘܬܳܐ ܘܡܶܬܢܰܒܶܝܢ ܗܘܰܘ ܐܰܝܠܝܢ ܕܰܥܬܺܝ̈ܕܳܢ. ܘܰܗܘܳܐ ܚܰܨܗܘܢ ܟܦܺܝܦܳܐ ܒܟܽܠܙܒܰܢ. ܘܠܐ ܬܘܒ ܡܗܰܠܟܺܝܢ ܒܩܰܘܡܬܳܐ ܦܫܺܝܛܬܳܐ. ܘܶܐܫܰܕܘ ܥܠܰܝܗܘܢ ܪܽܘܓܙܶܗ ܕܰܐܠܗܐ. ܘܰܐܕܪܟܰܬ ܐܶܢܘܢ ܚܶܡܬܳܐ ܕܪܽܘܓܙܶܗ. ܡܶܛܠ ܕܰܐܫܠܶܡ ܐܶܢܘܢ ܠܚܰܪܒܳܐ ܒܺܐܝ̈ܕܰܝ ܐܶܣܦܺܝܣܝܰܐܢܽܘܣ ܘܛܺܝܛܽܘܣ ܒܪܶܗ ܪ̈ܗܽܘܡܳܝܶܐ. ܘܰܗܘܳܐ ܡܰܥܡܰܪܗܘܢ ܚܰܪܒܳܐ ܡܶܛܠ ܕܫܰܢܝܰܬ ܫܟܺܝܢܬܳܐ ܕܚܰܝ̈ܠܰܘܳܬܳܐ ܩܰܕܺܝ̈ܫܐ ܕܢܳܛܪܳܐ ܗܘܳܬ ܠܒܶܝܬ ܩܽܘܕܫܳܐ ܐܰܝܟ ܕܶܐܡܰܪ ܠܗܽܘܢ ܡܳܪܰܢ. ܕܗܳܐ ܡܶܫܬܒܶܩ ܠܟܽܘܢ ܒܰܝܬܟܽܘܢ ܚܰܪܒܳܐ (ܡܬܝ ܟܓ: ܠܚ). ܘܰܒܡܰܫܟܢܰܝ̈ܗܘܢ ܠܐ ܗܘܳܐ ܕܥܳܡܰܪ. ܡܶܛܠ ܕܶܐܬܥܩܰܪܘ ܡܰܫܟܢ̈ܐ ܕܡܰܓܺܝܪ̈ܣܶܐ ܗܳܢܘܢ ܕܕܳܒܚܺܝܢ ܗܘܰܘ ܕܶܒܚ̈ܐ ܬܰܘܪ̈ܶܐ ܘܥܶܪ̈ܒܶܐ ܘܰܓܕܰܝ̈ܐ ܕܰܡܩܰܪܶܒ ܗܘܳܐ ܥܰܡܳܐ ܠܐܠܗܐ. ܘܗܳܠܝܢ ܠܐ ܒܛܶܠܘ ܣܪܺܝܩܳܐܝ̣ܬ. ܐܠܐ ܥܰܠ ܕܰܐܥܘܶܠܘ ܒܡܳܪܳܗ̇ ܕܬܶܫܒܽܘܚܬܳܐ. ܐܳܡܰܪ ܓܶܝܪ ܢܒܺܝܐ ܗܘܱ̈ܝ ܠܗܶܝܢ ܗܳܠܝܢ.
ܡܶܛܠ ܕܰܠܡܰܢ ܕܰܐܢܬ ܡܚܰܝܬ ܪܕܰܦܘ. ܘܰܐܘܣܶܦܘ ܥܰܠ ܟܺܐܒܶܗ ܕܰܩܛܺܝܠܐ. ܘܰܟܒܰܪ ܬܺܐܡܰܪ ܕܶܐܢ ܐܰܒܳܐ ܡܚܳܝܗܝ ܠܰܒܪܳܐ܆ ܝܽܘܕܳܝ̈ܐ ܡܳܢܳܐ ܐܰܣܟܶܠܘ. ܐܠܐ ܠܰܘ ܐܝܟ ܕܶܐܣܬܰܟܰܠ ܗܰܘ ܕܰܠܩܽܘܒܠܐ. ܗܳܝ ܕܰܐܢܬ ܡܚܰܝܬ ܠܰܘ ܐܝܟ ܕܰܠܡܰܣܟܠܳܢܳܐ ܐܶܠܐ ܗܳܝ ܕܰܡܚܳܐ ܣܺܝܡܳܐ ܚܠܳܦ ܗܳܝ ܕܝܰܗܒ ܝܺܚܺܝܕܳܝܶܗ ܚܠܳܦ ܥܳܠܡܳܐ. ܗܳܟܰܢܐ ܠܰܡ ܐܰܚܶܒ ܐܰܠܗܳܐ ܠܥܳܠܡܳܐ ܐܰܝܟܰܢܳܐ ܕܠܰܒܪܶܗ ܝܺܚܺܝܕܳܝܳܐ ܢܶܬܶܠ ܚܠܳܦܰܘܗܝ (ܝܘܚܢܢ ܓ: ܝܘ). ܘܶܐܫܰܥܝܳܐ ܬܘܒ ܐܶܡܰܪ ܘܡܳܪܝܳܐ ܠܰܡ ܨܒܳܐ ܕܰܢܡܰܟܟܺܝܘܗܝ ܘܢܰܚܫܺܝܘܗܝ (ܐܫܥܝܐ ܢܓ: ܝ). ܘܬܘܒ ܐܶܡܰܪ ܕܡܳܪܝܳܐ ܐܰܦܓܰܥ ܒܶܗ ܚܛܳܗ̈ܐ ܕܟܽܠܢ (ܐܫܥܝܐ ܢܓ: ܘ). ܐܳܦܶܢ ܓܶܝܪ ܐܰܒܳܐ ܐܶܬܪܰܥܺܝ ܗܳܟܰܢܐ. ܕܰܒܰܝܕ ܨܠܺܝܒܳܐ ܕܰܒܪܶܗ ܢܶܦܪܽܘܩ ܠܥܳܠܡܳܐ. ܐܶܠܐ ܗܶܢܘܢ ܪܰܕܦܽܘܗܝ ܐܳܦ ܨܰܠܒܽܘܗܝ. ܘܶܐܬܰܘ ܠܰܡ ܠܕܽܘܟܬܳܐ ܕܡܶܬܩܰܪܝܳܐ ܓܳܓܽܘܠܬܳܐ. ܗܳܝ ܕܡܶܬܦܰܫܩܳܐ ܩܰܪܩܰܦܬܳܐ. ܘܝܰܗܒ ܠܶܗ ܕܢܶܫܬܶܐ ܚܰܠܐܴ ܕܰܚܠܺܝܛ ܒܰܡܪܳܪܬܳܐ. ܘܰܛܥܶܡ ܘܠܐ ܨܒܳܐ ܕܢܶܫܬܶܐ (ܡܬܝ ܟܙ: ܠܓ-ܠܕ). ܗܳܕܳܐ ܗܝ ܕܰܐܘܣܶܦܘ ܝܽܘܕܳܝ̈ܐ ܥܰܠ ܟܺܐܒܶܗ ܕܰܩܛܺܝܠܐ. ܡܶܛܠ ܗܳܢܐ ܐܳܡܰܪ ܪܽܘܚܳܐ ܗܶܢܘܢ ܢܶܬܬܠܺܝܛܽܘܢ.
ܗܰܒ ܠܰܡ ܥܰܘܠܐܴ ܥܰܠ ܥܰܘܠܗܘܢ. ܘܠܐ ܢܶܥܠܽܘܢ ܒܙܰܕܺܝܩܽܘܬܳܟ: ܢܶܬܥܛܽܘܢ ܡܶܢ ܣܶܦܪܳܟ ܕܚܰܝ̈ܐ. ܘܥܰܡ ܙܰܕܺܝ̈ܩܰܝܟ ܠܐ ܢܶܬܟܰܬܒܘܢ. ܬܰܘܣܶܦܬܳܐ ܕܦܽܘܪ̈ܥܳܢܶܐ ܒܺܝ̈ܫܶܐ ܠܗܘܢ. ܒܗܳܝ ܕܰܗܘܰܘ ܥܰܒ̈ܕܶܐ ܠܛܳܥܝܽܘܬܳܐ ܒܢܱ̈ܝ ܨܳܠܽܘܒ̈ܐ. ܘܰܐܝܟ ܗܰܘ ܕܰܒܗܰܘ ܡܶܕܶܡ ܕܰܐܚܶܒܘ ܥܒܰܕ ܕܺܝܢܗܘܢ. ܘܰܦܪܰܥ ܠܗܽܘܢ ܚܛܳܗܰܝ̈ܗܘܢ. ܥܰܠ ܗܳܝ ܠܐ ܥܳܐܠܺܝܢ ܙܳܩܽܘܦ̈ܐ ܒܬܰܪܥܳܐ ܕܚܰܝ̈ܐ ܒܰܕܠܐ ܗܰܝܡܶܢܘ. ܘܡܶܬܥܛܶܝܢ ܡܶܢ ܣܶܦܪ̈ܶܐ ܕܚܰܝ̈ܐ. ܘܠܐ ܡܶܟܺܝܠ ܡܶܬܟܰܬܒܺܝܢ ܥܰܡ ܐܰܒܳܗ̈ܬܳܐ ܙܰܕܺܝ̈ܩܶܐ ܒܡܰܠܟܽܘܬܶܗ ܕܰܐܠܗܐ. ܘܳܐܕܳܡ ܡܰܘܕܶܐ ܡܶܣܟܺܢܽܘܬܶܗ ܩܕܳܡ ܡܰܠܟܳܐ ܙܩܺܝܦܳܐ ܘܳܐܡܰܪ:
ܘܶܐܢܳܐ ܠܡ ܡܶܣܟܺܢܳܐ ܐܢܳܐ ܘܡܰܟܰܐܒܳܐ. ܦܽܘܪܩܳܢܳܟ ܐܰܠܗܳܐ ܥܰܕܪܰܢܝ. ܫܰܦܺܝܪ ܡܰܘܕܶܐ ܦܽܘܪܩܳܢܶܗ ܕܰܨܠܺܝܒܳܐ ܕܕܰܐܠܗܐ ܐܺܝܬܰܘܗܝ. ܘܠܐ ܕܒܰܪܢܳܫܳܐ. ܘܒܶܗ ܗܘܳܐ ܥܽܘܕܪܳܢܳܐ ܠܩܰܕܺܝ̈ܫܶܐ. ܘܥܰܠܗܳܕܐ ܡܫܰܒܰܚ ܠܶܗ ܢܒܺܝܐ ܘܳܐܡܰܪ:
ܐܶܫܰܒܰܚ ܫܡܶܗ ܕܰܐܠܗܳܐ ܒܬܶܫܒܽܘܚܬܳܐ. ܘܰܐܘܪܒܺܝܘܗܝ ܒܬܰܘܕܺܝܬܳܐ. ܠܗܰܘ ܕܶܐܟܰܠ ܗܘܳܐ ܡܪܳܪܳܐ ܘܦܰܪܥܰܢܝ ܚܰܠܝܽܘܬܳܐ. ܠܗܰܘ ܕܶܐܫܬܺܝ ܚܰܠܐ ܒܶܐܣܦܽܘܓܳܐ ܘܰܬܪܰܥ ܠܺܝ ܣܶܛܪܶܗ ܕܶܐܬܒܰܣܰܡ ܡܶܢ ܡܰܒܽܘܥܳܐ ܕܚܰܝ̈ܐ. ܒܳܬܰܪ ܗܳܠܝܢ ܣܳܐܷܡ ܕܶܒܚܳܐ ܕܰܩܢܽܘܡܶܗ ܩܕܳܡ ܐܰܒܳܐ. ܟܰܕ ܡܰܪܚܶܩ ܡܶܢ ܡܰܕܒܚܳܐ. ܕܶܒܚ̈ܐ ܡܦܰܛܡ̈ܐ ܕܰܡܩܰܪܶܒ ܗܘܳܐ ܥܰܡܳܐ ܘܳܐܡܰܪ:
ܐܶܫܦܰܪ ܠܡܳܪܝܳܐ ܡܶܢ ܬܰܘܪ̈ܶܐ ܡܦܰܛܡ̈ܐ. ܩܰܪ̈ܢܳܢܶܐ ܦܰܪ̈ܣܳܢܶܐ. ܬܰܘܪ̈ܶܐ ܡܥܳܕ ܗܘܳܐ ܥܰܡܳܐ ܠܰܡܫܰܡܳܫܽܘ ܩܕܳܡ ܡܳܪܝܳܐ ܘܢܳܛܰܪ ܠܝܰܘܡܳܐ ܕܥܰܕܥܺܐܕܳܐ. ܣܳܒܰܪ ܗܘܳܐ ܓܶܝܪ ܕܰܐܝܟ ܕܫܰܡܺܝܢܺܝܢ ܘܰܡܬܰܪܣܶܝܢ ܕܶܒܚ̈ܐ. ܗܳܟܰܢܐ ܡܶܬܩܰܒܠܺܝܢ ܩܕܳܡ ܐܠܗܐ. ܐܠܐ ܡܶܛܠ ܕܗܳܠܝܢ ܠܰܚ̈ܛܳܗܶܐ ܠܐ ܡܚܰܣܶܝܢ ܗܘܰܘ. ܘܟܰܕ ܐܶܬܳܐ ܗܰܘ ܬܰܘܪܳܐ ܡܶܬܝܰܕܥܳܢܳܐ ܡܶܢ ܫܡܰܝܳܐ܆ ܩܰܪܶܒ ܗܽܘ ܠܶܗ ܠܕܶܒܚܬܳܐ ܡܩܰܕܫܳܢܺܝܬܳܐ. ܘܰܗܘܳܐ ܒܝܰܕ ܡܰܘܬܶܗ ܠܪܺܝܚܳܐ ܒܰܣܺܝܡܳܐ ܠܐܠܗܐ ܐܰܒܳܐ. ܘܡܶܛܠ ܕܠܐܒܐ ܗܳܕܐ ܫܳܦܪܳܐ ܗܘܳܬ ܕܢܶܬܚܰܣܶܐ ܥܰܘܠܶܗ ܕܳܐܕܳܡ. ܬܰܘܪ̈ܶܐ ܘܥܶܪ̈ܒܶܐ ܠܐ ܡܶܫܟܚܺܝܢ ܗܘܰܘ ܠܰܡܚܰܣܳܝܽܘ ܚܛܳܗ̈ܐ. ܐܠܐ ܟܰܕ ܐܶܬܩܰܪܰܒ ܠܕܶܒܚܳܐ ܗܰܘ ܡܳܪܳܐ ܕܚܰܝ̈ܘܳܬܳܐ. ܐܳܡܰܪ ܪܽܘܚܳܐ ܒܰܢܒܺܝܐ ܚܠܳܦܰܘܗܝ. ܐܶܫܦܰܪ ܠܡܳܪܝܳܐ ܡܶܢ ܬܰܘܪ̈ܶܐ ܡܦܰܛܡ̈ܐ. ܘܡܶܢ ܕܶܒܚ̈ܐ ܕܩܰܪ̈ܢܳܢܶܐ ܘܦܰܪ̈ܣܳܢܶܐ. ܘܡܶܟܺܝܠ ܩܳܪܶܐ ܡܶܢ ܓܰܘ ܕܶܒܚܶܗ ܕܰܢܡܰܠܶܠ. ܥܰܡ ܗܳܢܘܢ ܕܠܰܝܬ ܗܘܳܐ ܠܗܘܢ ܠܰܡܩܰܪܳܒܽܘ ܕܶܒܚܬܳܐ ܚܠܳܦ ܚܛܳܗܰܝ̈ܗܘܢ.
ܘܰܚܙܰܘ ܡܶܣܟܺܢ̈ܐ ܘܰܚܕܰܘ ܘܢܺܚܶܐ ܠܶܒܟܘܢ. ܡܶܛܠ ܕܫܳܡܰܥ ܡܳܪܝܳܐ ܠܡܶܣܟܺܢ̈ܐ. ܠܥܰܡ̈ܡܶܐ ܚܰܛܳܝ̈ܐ ܡܫܰܡܰܗ ܡܶܣܟܺܢ̈ܐ.
ܘܠܰܐܣܺܝܪ̈ܰܘܗܝ ܠܳܐ ܫܳܐܷܛ. ܫܰܦܺܝܪ ܒܳܬܰܪ ܕܶܐܬܓܡܰܪ ܚܰܫܳܐ. ܢܚܶܬ ܒܳܬܰܪ ܐܰܣܺܝܪ̈ܰܘܗܝ ܠܰܡܕܺܝܢܬܶܗ ܬܰܚܬܳܝܬܳܐ ܕܡܰܘܬܳܐ. ܗܳܢܰܘ ܠܰܫܝܽܘܠ ܡܕܺܝܢܰܬ ܓܰܢ̱ܒܳܪ̈ܶܐ. ܬܰܡܳܢ ܓܶܝܪ ܐܰܣܺܝܪܺܝܢ ܗܘܰܘ ܐܰܣܺܝܪ̈ܰܘܗܝ ܕܡܰܠܟܳܐ. ܘܫܶܩܝܳܐ ܘܢܰܚܬܽܘܡܳܐ ܕܡܰܠܟܳܐ. ܘܡܶܢ ܬܰܡܳܢ ܫܪܳܐ ܘܫܰܡܰܪ ܐܶܢܘܢ ܟܰܕ ܦܺܝܠ ܗܘܳܐ ܒܰܕܡܳܐ ܕܡܶܢ ܕܰܦܢܶܗ. ܟܰܕ ܢܳܛܦ̈ܢ ܨܶܒܥ̈ܬܶܗ ܡܶܢ ܕܡܳܐ ܗܳܢܶܝܢ ܕܶܐܬܒܰܙܰܥܝ̈ ܒܨܶܨ̈ܐ. ܡܶܛܠܗܳܢܐ. ܢܫܰܒܚܽܘܢܳܝܗܝ ܫܡܰܝܳܐ ܘܰܐܪܥܳܐ. ܗܳܢܰܘ ܡܰܠܐܟ̈ܐ ܘܰܒܢܰܝ̈ܢܳܫܳܐ.
ܘܝܰܡ̈ܡܶܐ ܘܟܽܠ ܕܪܳܚܶܫ ܒܗܽܘܢ. ܘܰܐܝܟ ܕܶܐܡܰܪ ܦܰܘܠܽܘܣ ܟܳܪܽܘܙܶܗ ܕܰܨܠܺܝܒܳܐ ܕܒܰܫܡܶܗ ܕܝܶܫܽܘܥ ܟܽܠ ܒܽܘܪܟܳܐ ܬܶܟܽܘܦ ܕܒܰܫܡܰܝܳܐ. ܘܒܰܐܪܥܳܐ. ܘܕܰܠܬܰܚܬ ܡܶܢ ܐܰܪܥܳܐ܇ ܘܟܽܠ ܠܶܫܳܢܳܐ ܢܰܘܕܶܐ. ܕܡܳܪܝܰܐ ܗܘ ܝܶܫܘܥ ܡܫܺܝܚܳܐ ܠܫܽܘܒܚܳܐ ܕܰܐܠܗܳܐ ܐܰܒܽܘܗܝ (ܦܝ̈ܠܝܦܣܝܐ ܒ: ܝ-ܝܐ).
ܘܡܶܛܠ ܕܰܐܠܗܳܐ ܦܳܪܶܩ ܠܨܶܗܝܽܘܢ: ܘܰܡܒܰܢܶܐ ܠܩܽܘܪ̈ܝܳܐ ܕܺܝܗܽܘܕܳܐ. ܕܢܶܬܒܽܘܢ ܒܳܗ̇ ܥܰܒ̈ܕܰܘܗܝ ܘܢܺܐܪܬܽܘܢܳܗ̇: ܘܪ̈ܳܚܡܰܝ ܫܡܶܗ ܢܶܫܪܽܘܢ ܒܳܗ̇. ܒܗܳܕܶܐ ܡܰܘܕܰܥ ܥܰܠ ܨܶܗܝܘܢ ܗܳܝ ܕܶܐܬܒܰܢܝܰܬ. ܒܳܬܰܪ ܐܽܘܪܺܫܠܶܡ ܗܳܝ ܕܶܐܬܥܰܩܪܰܬ ܗܳܢܰܘ ܥܺܕܬܳܐ. ܗܳܝ ܕܰܩܢܳܐ ܒܰܕܡܶܗ. ܩܽܘܪ̈ܝܳܐ ܕܶܝܢ ܕܺܝܗܽܘܕܳܐ ܡܫܰܡܰܗ܆ ܠܣܰܓܺܝܐܘܬ ܡܶܢܝ̈ܢܶܐ ܕܥܺܕ̈ܬܳܐ ܕܰܒܟܽܠܗ̇ ܐܰܪܥܳܐ. ܕܢܶܬܒܘܢ ܒܗ̇ ܥܰܒ̈ܕܰܘܗܝ ܘܢܺܐܪܬܽܘܢܳܗ̇. ܥܰܠܗܳܝ ܨܶܗܝܘܢ ܡܶܬܝܰܕܥܳܢܺܝܬܳܐ ܕܰܠܥܶܠ ܡܶܢ ܫܡܰܝܳܐ. ܗܳܝ ܕܟܰܗܺܝܢܳܐ ܒܚܰܝ̈ܠܰܘܳܬܐ ܩܰܕܺܝ̈ܫܶܐ. ܘܺܐܝܬ ܒܰܚܕܳܪ̈ܶܝܗ̇ ܩܽܘܪ̈ܝܳܐ ܕܺܝܗܽܘܕܳܐ. ܕܗܰܘ ܕܰܗܘܳܐ ܓܽܘܪܝܳܐ ܕܰܐܪܝܳܐ. ܗܳܢܰܘ ܠܰܘ ܩܽܘܪ̈ܝܳܐ ܐܠܐ ܐܰܘܴ̈ܢܶܐ ܗܳܢܘܢ ܕܶܐܙܰܠ ܕܰܢܛܰܝܶܒ ܠܰܫܠܺܝ̈ܚܶܐ ܕܺܝܠܶܗ. ܬܰܡܳܢ ܓܶܝܪ ܫܳܪܶܐ ܘܡܶܬܒܰܣܰܡ ܥܰܡܳܐ ܕܙܰܕܺܝ̈ܩܶܐ ܘܪ̈ܳܚܡܰܝ ܫܡܶܗ ܕܰܙܩܺܝܦܳܐ ܫܳܪܶܝܢ ܒܶܗ. ܟܰܕ ܡܒܰܪܟܺܝܢ ܘܰܡܫܰܒܚܺܝܢ ܠܐܒܐ ܘܠܰܒܪܐ ܘܰܠܪܽܘܚܐ ܩܰܕܺܝܫܐ ܐܰܡܺܝܢ܀
ܡܙܡܘܪܐ ܕܫܒܥܝܢ
ܕܡܰܘܕܰܥ ܕܰܒܟܽܠܗܘܢ ܩܪ̈ܳܒܶܐ ܕܩܳܡܘ ܥܰܠ ܕܰܘܝܕ ܒܰܐܠܗܳܐ ܕܳܚܶܠ ܗܘܳܐ: ܕܠܳܐ ܢܶܬܬܚܶܕ ܗܘܳܐ ܡܶܢ ܒܥܶܠܕ̈ܒܳܒܶܐ ܟܣܰܝ̈ܐ ܡܨܰܠܶܐ ܗܘܳܐ.
ܐܶܢ ܒܰܚܣܳܡܶܗ ܕܳܐܟܶܠܩܰܪܨܳܐ ܡܶܬܐܶܡܰܪ܆ ܕܥܰܠ ܡܰܘܬܳܐ ܠܥܳܠܡܳܐ. ܡܳܕܝܢ ܟܽܠ ܒܺܝܫܬܳܐ ܕܡܶܬܥܰܒܕܳܐ. ܟܽܠ ܡܪܳܪܳܐ ܘܰܩܪܳܒܳܐ ܕܩܳܐܷܡ ܥܰܠ ܩܰܕܺܝ̈ܫܶܐ. ܠܰܘ ܕܠܐ ܡܶܬܚܰܦܛܳܢܽܘܬܶܗ ܩܳܐܡ. ܘܳܐܦܶܢ ܫܳܡܥܺܝܢܰܢ ܕܰܡܨܰܠܶܝܢ ܩܰܕܺܝ̈ܫܐ ܕܢܶܬܦܰܨܽܘܢ ܡܶܢ ܒܥܶܠܕ̈ܒܳܒܶܐ. ܐܰܟܡܳܐ ܕܳܐܡܰܪ ܗܘܳܐ ܒܰܙܒܰܢ ܛܽܘܒܬܳܢܳܐ ܕܰܘܝܕ ܟܰܕ ܢܦܰܩ ܕܢܶܬܟܰܬܰܫ ܥܰܡ ܓܽܘܠܝܰܕ ܓܰܢ̱ܒܳܪܳܐ. ܡܳܪܝܳܐ ܕܦܰܨܝܰܢܝ ܡܶܢ ܐܺܝܕܳܐ ܕܰܐܪܝܳܐ. ܘܡܶܢ ܐܺܝܕܳܐ ܕܕܺܐܒܳܐ܆ ܗܽܘ ܢܦܰܨܶܝܢܝ ܡܶܢ ܐܺܝܕܰܘ̈ܗܝ ܕܰܦܠܶܫܬܳܝܳܐ ܗܳܢܐ (ܐ ܫܡܘܐܝܠ ܝܙ: ܠܙ). ܐܶܠܐ ܒܡܶܬܦܰܨܝܳܢܽܘܬܳܐ ܕܡܶܢ ܩܪ̈ܳܒܶܐ ܡܶܬܚܰܙܝ̈ܢܶܐ ܘܡܶܢ ܗܳܠܝܢ ܬܘܒ ܡܶܬܝܰܕܥ̈ܢܶܐ ܡܶܬܟܰܫܦܺܝܢ ܕܢܶܬܦܰܨܽܘܢ. ܟܰܕ ܡܳܕܶܝܢ ܡܶܬܥܰܫܰܢ ܗܘܳܐ ܡܪܳܕܳܐ ܕܫܳܡܽܘܥ ܒܰܪ ܒܰܟܪܺܝ ܥܰܠ ܕܰܘܝܕ. ܒܗܳܝ ܕܟܽܠܗܘܢ ܒܢܱ̈ܝ ܝܺܣܪܳܐܝܠ ܣܛܰܪ ܡܶܢ ܒܢ̈ܝ ܝܺܗܽܘܕܳܐ ܐܶܙܰܠܘ ܒܳܬܰܪ ܫܳܡܽܘܥ. ܘܡܶܢ ܒܳܬܰܪ ܕܥܰܠ ܡܰܠܟܳܐ ܠܐܽܘܪܺܫܠܶܡ. ܫܰܕܰܪ ܠܝܽܘܐܳܒ ܒܰܪ ܨܽܘܪܺܝܳܐ ܘܶܐܡܰܪ ܠܶܗ: ܩܽܘܡ ܕܒܽܘܪ ܥܰܡܳܟ ܠܥܰܒ̈ܕܶܐ ܕܡܳܪܳܟ. ܘܰܪܕܽܘܦ ܒܳܬܰܪ ܫܳܡܽܘܥ! ܕܰܠܡܳܐ ܓܶܝܪ ܢܶܫܟܰܚ ܠܶܗ ܩܽܘܪ̈ܝܳܐ ܕܥܰܫܺܝ̈ܢܳܢ. ܘܰܢܩܽܘܡ ܒܗܶܝܢ ܘܰܢܚܰܛܶܛ ܥܰܝ̈ܢܰܝܢ (ܒ ܫܡܘܐܝܠ ܟ: ܘ). ܘܟܰܕ ܝܽܘܐܳܒ ܥܰܡ ܟܽܠܶܗ ܚܰܝܠܶܗ ܢܦܰܩ ܠܰܩܪܳܒܳܐ. ܕܰܘܝܕ ܒܰܥܝܳܕܶܗ ܠܒܶܝܬ ܓܰܘܣܳܐ ܕܰܐܠܳܗܳܐ ܪܗܶܛ. ܘܰܡܨܰܠܐ ܘܰܡܙܰܡܰܪ ܗܘܳܐ ܘܳܐܡܰܪ:
ܐܰܠܗܳܐ ܦܰܨܳܢܝ ܘܡܳܪܝܳܐ ܠܥܽܘܕܪܳܢܝ ܟܰܬܰܪ. ܚܙܺܝ ܗܳܟܺܝܠ ܐܰܝܟܰܢܳܐ ܠܳܐ ܡܶܬܪܗܶܒ. ܐܶܠܐ ܡܨܰܠܐܷ ܘܰܡܦܺܝܣ ܠܰܐܠܗܳܐ ܘܳܐܡܰܪ܆ ܕܠܐ ܕܳܚܠܺܝܢܰܢ ܡܶܢ ܒܥܶܠܕ̈ܒܳܒܶܐ. ܟܰܕ ܠܘܳܬܰܢ ܡܟܰܬܰܪ ܐܰܢܬ. ܬܟܺܝܠܐܴܝ̣ܬ ܐܳܡܰܪ ܐܢܳܐ.
ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܒܳܥܶܝܢ ܠܢܰܦܫܝ. ܟܺܐܢܳܐܝ̣ܬ ܐܶܬܐܰܡܪܰܬ ܡܶܢ ܠܥܶܠ܆ ܕܡܶܢ ܗܰܘ ܕܡܰܩܪܶܒ ܗܘܳܐ ܟܰܣܝܳܐ̣ܝܬ ܕܳܚܶܠ ܗܘܳܐ ܕܰܘܝܕ. ܘܡܶܢ ܗܳܢܘܢ ܚܰܝ̈ܠܰܘܳܬܳܐ ܕܡܶܬܟܰܬܫܺܝܢ ܗܘܰܘ ܠܰܡܨܳܕ ܢܰܦܫܶܗ ܕܰܢܒܺܝܐ ܡܶܬܩܰܢܰܛ ܗܘܳܐ. ܘܥܰܠ ܗܳܝ ܡܰܘܕܶܐ ܗܘܳܐ ܘܓܳܠܐܷ ܗܘܳܐ ܟܰܣܝܽܘܬܶܗ ܕܰܩܪܳܒܳܐ. ܗܳܢܐ ܐܰܓܽܘܢܳܐ ܕܰܒܥܶܠܕ̈ܒܳܒܶܝܗ̇ ܕܢܰܦܫܝ. ܥܰܠ ܣܽܘܝܳܥܳܐ ܕܰܚܢܳܢܳܟ ܣܢܺܝܩ. ܐܶܠܐ ܟܰܬܰܪ ܠܺܝ ܘܩܰܘܳܐ ܨܶܐܕܝ. ܕܟܰܕ ܚܳܙܶܝܢ ܒܥܶܠܕ̈ܒܳܒܰܝ ܕܩܳܐܷܡ ܐܰܢܬ ܒܓܰܒܝ ܠܽܘܩܒܰܠܗܘܢ ܥܰܡܝ. ܒܳܗܬܺܝܢ ܘܡܰܚܦܪܺܝܢ ܘܠܐ ܡܰܡܪܚܺܝܢ ܕܢܶܣܥܽܘܢ ܥܠܰܝ. ܐܶܢܕܶܝܢ ܐܰܢܬ ܡܰܪܚܶܩ ܐܰܢܬ܆ ܐܶܢܳܐ ܒܰܠܚܽܘܕ ܠܐ ܣܳܦܶܩ ܐܢܳܐ ܠܰܩܪܳܒܳܐ ܕܠܽܘܩܒܰܠܗܘܢ. ܟܰܕ ܡܶܢܳܟ ܠܐ ܡܶܬܓܰܙܶܐ ܐܢܳܐ ܘܡܶܢ ܥܽܘܕܪܳܢܳܟ ܠܐ ܡܶܫܬܰܘܚܰܕ ܐܢܳܐ. ܩܳܥܶܐ ܐܢܳܐ ܥܠܰܝܗܘܢ ܠܒܺܝܒܳܐܝ̣ܬ.
ܢܶܗܦܟܽܘܢ ܠܒܶܣܬܰܪܗܽܘܢ ܘܢܰܚܦܪܽܘܢ܆ ܐܰܝܠܶܝܢ ܕܨܳܒܶܝܢ ܠܒܺܝܫܬܝ. ܢܺܐܡܰܪ ܕܥܰܠ ܫܳܡܽܘܥ ܗܳܠܝܢ ܐܳܡܰܪ ܗܘܳܐ. ܐܶܠܐ ܚܳܙܶܝܢܰܢ ܕܫܳܡܽܘܥ ܢܰܦܫܶܗ ܕܰܢܒܺܝܐ ܠܐ ܒܳܥܶܐ ܗܘܳܐ. ܘܠܳܐ ܬܰܟܬܽܘܫܳܐ ܕܥܰܡܶܗ ܓܳܒܶܐ ܗܘܳܐ. ܘܠܰܘ ܐܰܝܟ ܐܰܒܺܝܫܳܠܽܘܡ ܪܳܕܶܦ ܗܘܳܐ ܒܳܬܰܪ ܕܰܘܝܕ. ܐܶܠܐ ܠܥܰܡܳܐ ܒܰܠܚܽܘܕ ܕܒܰܪ ܘܶܐܙܰܠ. ܒܪܰܡ ܒܗܳܠܝܢ ܓ̈ܠܠܐܷ ܕܰܫܓܺܝܫܺܝܢ ܒܰܕܡܽܘܬ ܝܰܡܳܐ. ܡܥܺܝܪܺܝܢ ܗܘܰܘ ܫܺܐܕ̈ܐ ܥܰܠ ܢܒܺܝܐ. ܘܳܐܦ ܥܰܠܗܳܝ ܐܶܡܰܪ:
ܢܶܬܡܗܽܘܢ ܒܬܶܢܝܳܐ ܕܒܶܗܬܰܬܗܘܢ: ܐܰܝܠܶܝܢ ܕܶܐܡܰܪܘ ܥܠܰܝ ܐܶܗܶܐ ܐܶܗܶܐ. ܡܶܛܠ ܕܡܶܬܐܰܠܨܺܝܢ ܗܘܰܘ ܕܰܝ̈ܘܶܐ ܘܡܶܫܬܰܢܩܺܝܢ ܡܶܢ ܕܽܘܒܳܪ̈ܰܘܗܝ ܟܺܐܢ̈ܐ ܕܰܢܒܺܝܐ. ܟܰܕ ܚܙܰܘ ܕܩܳܡܘ ܥܠܰܘܗܝ ܡܪܳܕܳܐ ܕܰܐܒܺܝܫܳܠܘܡ. ܘܒܳܬܰܪ ܗܳܢܐ ܫܘܰܪ ܥܠܰܘܗܝ ܫܳܡܽܘܥ ܒܰܪ ܒܰܟܪܺܝ. ܡܶܬܩܰܬܩ̈ܬܳܢ ܗܘܱ̈ܝ ܠܶܓܝܽܘ̈ܢܶܐ ܕܡܳܪ̈ܽܘܕܶܐ. ܘܚܳܝܪܺܝܢ ܠܶܗ ܠܙܰܕܺܝܩܳܐ. ܟܰܕ ܐܶܗܶܐ ܐܶܗܶܐ ܐܳܡܪܺܝܢ ܗܘܰܘ ܒܰܝܢܳܬܗܽܘܢ. ܐܶܠܐ ܡܶܟܺܝܠ ܐܰܪܓܶܫ ܗܘܳܐ ܒܠܶܒܶܗ. ܐܳܦ ܒܙܳܟܽܘܬܳܐ ܕܗܳܘܝܳܐ ܘܥܰܠܗܳܝ ܐܶܬܢܰܒܺܝ ܘܶܐܡܰܪ:
ܢܶܚܕܽܘܢ ܒܳܟ ܟܠ ܕܒܳܥܶܝܢ ܠܳܟ: ܘܢܺܐܡܪܽܘܢ ܒܟܽܠܙܒܰܢ ܕܪܰܒ ܗܽܘ ܐܰܠܗܳܐ. ܐܰܝܠܶܝܢ ܕܪܳܚܡܺܝܢ ܦܽܘܪܩܳܢܳܟ. ܟܽܠ ܠܰܡ ܕܒܳܥܶܝܢ ܠܟ ܚܳܕܝܢ ܒܟ. ܟܕ ܚܳܙܝܢ ܕܒܳܟ ܡܶܬܓܰܡܪܳܐ ܙܳܟܽܘܬܗܘܢ. ܘܰܐܝܠܝܢ ܕܪܳܚܡܺܝܢ ܦܽܘܪܩܳܢܳܟ ܝܳܕܥܺܝܢ ܕܠܰܘ ܒܙܰܝܢܳܐ ܘܰܒܢܰܝܙܟܳܐ ܦܰܪܩܰܬ ܐܶܢܘܢ ܝܰܡܺܝܢܳܟ.
ܘܶܐܢܳܐ ܠܰܡ ܡܶܣܟܺܢܳܐ ܐܢܳܐ ܘܒܳܝܫܳܐ ܐܰܠܗܐ ܟܰܬܰܪ ܠܺܝ: ܘܰܡܥܰܕܪܳܢܝ ܐܰܢܬ ܘܰܡܦܰܨܝܳܢܝ ܐܰܠܳܗܝ ܠܐ ܬܰܘܚܰܪ. ܒܽܐܘܠܨܳܢܳܐ ܪܰܒܳܐ ܐܺܝܬܰܘܗܝ ܗܘܳܐ ܢܒܺܝܐ. ܕܕܰܠܡܳܐ ܥܰܠ ܕܰܚܙܳܐ ܕܰܐܘܚܰܪ ܢܶܣܝܽܘܢܳܐ ܫܰܢܺܝ ܠܶܗ ܐܠܗܳܐ ܡܶܢ ܥܽܘܕܪܳܢܶܗ. ܘܥܰܠܗܳܕܐ ܡܰܘܕܶܐ ܒܢܰܦܫܶܗ ܕܡܶܣܟܺܢܳܐ ܐܺܝܬܰܘܗܝ ܘܒܳܝܫܳܐ. ܘܰܒܫܽܘܪܳܝܳܐ ܘܰܒܫܽܘܠܳܡܳܐ ܕܬܶܫܒܽܘܚܬܳܐ ܗܳܕܐ ܕܫܰܒܥܺܝܢ܆ ܕܰܢܟܰܬܰܪ ܠܶܗ ܐܠܗܳܐ ܢܦܺܝܣ. ܘܰܕܠܐ ܢܰܘܚܰܪ ܡܶܢ ܦܽܘܪܩܳܢܶܗ ܡܶܬܟܰܫܰܦ ܗܘܳܐ. ܒܗܳܝ ܕܶܐܡܰܪ ܕܰܒܟܽܠܙܒܰܢ ܡܶܢܳܟ ܡܶܬܥܰܕܰܪ ܐܢܳܐ. ܘܰܒܚܰܝܠܳܟ ܡܶܬܦܰܨܶܐ ܐܢܳܐ. ܐܠܐ ܐܳܦ ܗܳܫܳܐ ܢܣܰܪܗܶܒ ܥܠܰܝ ܐܻܝܳܠܳܟ. ܘܢܺܐܬܶܐ ܩܰܠܺܝܠܐܝ̣ܬ ܥܽܘܕܪܳܢܳܟ. ܕܳܐܦܚܢܰܢ ܢܰܘܕܶܐ ܥܰܡ ܢܒܺܝܐ܆ ܠܗܰܘ ܕܰܒܟܽܠܙܒܰܢ ܡܦܰܨܶܐ ܠܥܰܒ̈ܕܰܘܗܝ ܡܶܢ ܒܺܝܫܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܝܢ܀
ܡܙܡܘܪܐ ܕܫܒܥܝܢ ܘܚܕ
ܕܡܰܘܕܰܥ ܕܡܶܢ ܒܳܬܰܪ ܐܘ̈ܠܨܳܢܶܐ ܕܩܳܝܡܺܝܢ ܥܰܠ ܩܰܕܝ̈ܫܶܐ ܡܰܦܩܳܢܳܐ ܠܘܳܬ ܐܽܘܪ̈ܚܳܬܳܐ ܕܠܳܐ ܣܳܟܳܐ ܗܳܘܶܐ ܠܗܽܘܢ.
ܐܰܝܠܶܝܢ ܕܰܡܣܰܒܪܺܝܢ ܒܡܳܪܝܳܐ ܡܣܰܝܒܪܺܝܢ ܘܽܐܘܠܨܳܢ̈ܐ܆ ܕܠܺܝܠܐܝ̣ܬ ܡܰܓܗܶܝܢ ܡܶܢ ܒܺܝ̈ܫܳܬܳܐ ܕܦܳܓ̈ܥܳܢ ܒܗܽܘܢ. ܣܰܒܪܳܐ ܓܶܝܪ ܕܒܰܐܠܗܳܐ ܐܰܣܺܝܪ ܫܽܘܠܡܳܐ ܕܚܰܕܽܘܬܐ ܐܝ̣ܬ ܠܶܗ. ܐܰܟܡܳܐ ܕܰܐܟܬܶܒ ܫܠܺܝܚܳܐ ܦܰܘܠܽܘܣ. ܗܳܝ ܕܣܰܒܪܳܐ ܠܐ ܡܰܒܗܶܬ܆ ܡܶܛܠ ܕܚܽܘܒܶܗ ܕܰܐܠܗܳܐ ܡܫܰܦܰܥ ܥܰܠ ܠܶܒܰܘ̈ܬܰܢ. ܒܪܽܘܚܳܐ ܕܩܽܘܕܫܳܐ ܕܶܐܬܝܰܗܒܰܬ ܠܰܢ (ܪ̈ܗܘܡܝܐ ܗ: ܗ). ܒܗܳܢܐ ܣܰܒܪܳܐ ܕܰܡܚܰܪܰܪ ܡܶܢ ܚܰܫ̈ܐ ܡܰܒܗ̈ܬܳܢܶܐ ܐܰܣܺܝܪܳܐ ܗܘܳܬ ܢܰܦܫܶܗ ܕܕܰܘܝܕ ܐܰܠܗܳܝܳܐ ܘܡܶܛܠܗܳܢܐ ܒܟܽܠ ܢܶܣܝܽܘܢ̈ܐ ܕܰܦܓܰܥܘ ܒܶܗ ܒܰܐܠܗܐ ܡܣܰܒܰܪ ܗܘܳܐ. ܘܡܶܢ ܣܰܒܪܶܗ ܠܐ ܒܳܗܶܬ ܗܘܳܐ. ܘܟܰܕ ܗܘܳܐ ܩܳܪܒܳܐ ܒܶܝܬ ܕܰܘܝܕ ܠܒܶܝܬ ܫܳܐܘܳܠ܆ ܒܝܰܘ̈ܡܰܝ ܐܰܫܒܽܘܥ ܒܰܪ ܫܳܐܘܳܠ ܗܰܘ ܕܰܐܡܠܶܟ ܒܳܬܰܪ ܐܰܒܽܘܗܝ܆ ܒܗܰܘ ܓܶܝܪ ܙܰܒܢܳܐ ܐܶܡܰܪ ܕܰܘܝܕ ܗܳܢܐ ܡܰܙܡܽܘܪܳܐ: ܘܡܰܗܡܶܐ ܗܘܳܐ ܕܰܘܝܕ ܡܶܢ ܗܳܝ ܕܢܶܐܣܽܘܪ ܒܓܰܒܪ̈ܶܐ ܥܒܳܕܰܝ̈ ܕܢܰܩܺܝܦܺܝܢ ܗܘܰܘ ܠܶܗ ܡܶܢ ܫܰܒܛܳܐ ܕܺܝܗܽܘܕܳܐ. ܘܒܰܐܠܗܳܐ ܐܰܚܺܝܕ ܗܘܳܐ ܓܰܘܣܳܐ ܒܰܩܪ̈ܳܒܶܐ ܘܟܰܕ ܡܶܬܕܟܰܪ ܕܡܶܢ ܐܰܝܠܶܝܢ ܒܺܝ̈ܫܳܬܳܐ ܦܰܨܝܶܗ. ܘܒܰܩܪܳܒܳܐ ܗܳܢܐ ܕܶܐܬܐܶܡܰܪ ܡܙܰܡܰܪ ܗܘܳܐ ܘܳܐܡܰܪ:
ܒܳܟ ܡܳܪܝܳܐ ܣܰܒܪܶܬ ܘܠܳܐ ܐܶܒܗܰܬ ܠܥܳܠܰܡ. ܘܰܒܙܰܕܺܝܩܽܘܬܳܟ ܦܰܨܳܢܝ: ܨܠܺܝ ܠܺܝ ܐܶܕܢܳܟ ܘܰܦܪܽܘܩܰܝܢܝ. ܗܘܺܝ ܠܺܝ ܒܶܝܬ ܡܰܥܡܪܳܐ ܕܶܐܥܽܘܠ ܠܶܗ ܒܟܽܠܙܒܰܢ: ܘܰܦܩܽܘܕ ܠܡܶܦܪܩܰܢܝ. ܡܶܛܠ ܕܰܐܢܬ ܗܽܘ ܒܶܝܬ ܓܰܘܣܝ ܘܒܶܝܬ ܡܶܪܕܝ. ܫܡܰܥܬ ܐܰܝܟܰܢܳܐ ܡܨܰܠܐܷ܆ ܠܐ ܗܘܳܐ ܥܰܠ ܡܶܬܦܰܨܝܳܢܽܘܬܳܐ ܕܚܰܕ ܥܶܕܳܢܳܐ ܨܰܠܺܝ܆ ܐܶܠܐ ܕܠܐܴ ܢܶܒܗܰܬ ܠܥܳܠܰܡ ܡܶܬܟܰܫܰܦ ܗܘܳܐ. ܡܶܛܠ ܗܳܢܐ ܠܰܘ ܠܙܳܟܽܘܬܳܐ ܕܙܰܒܢܳܐ ܫܳܐܷܠ ܐܢܳܐ ܡܶܢܶܗ ܒܰܠܚܽܘܕ. ܐܠܐ ܕܠܐ ܐܶܒܗܰܬ ܠܥܳܠܰܡ ܒܳܥܶܐ. ܐܶܠܐ ܠܶܗ ܘܠܰܘ ܒܰܚܛܽܘܦܝܳܐ ܐܰܦܺܝܣ ܕܶܝܢ ܕܬܶܗܘܶܐ ܙܳܟܽܘܬܳܐ. ܗܰܘ ܕܶܝܢ ܕܰܒܙܰܕܺܝܩܽܘܬܶܗ ܕܡܳܪܝܳܐ ܡܶܬܟܰܫܰܦ ܠܡܶܬܦܰܨܳܝܽܘ. ܐܠܗܳܐ ܓܶܝܪ ܠܐ ܡܦܰܨܶܐ ܕܠܐܴ ܟܺܐܢܽܘܬܳܐ. ܘܡܶܛܠܗܳܢܐ ܗܰܘ ܕܡܶܢܶܗ ܫܳܐܷܠ ܦܽܘܨܳܝܳܐ ܕܟܺܐܢܳܐܝ̣ܬ ܒܳܥܶܐ ܡܶܬܚܙܶܐ. ܥܰܠܗܕܐ ܒܥܳܐ ܢܒܺܝܐ ܡܳܐ ܕܶܐܬܦܰܨܺܝ ܢܰܓܗܶܐ ܡܶܢ ܩܪܳܒܳܐ ܘܬܰܟܬܽܘܫܳܐ܆ ܘܢܶܥܽܘܠ ܠܒܶܝܬ ܡܰܥܡܪܳܐ ܕܰܐܠܗܐ. ܘܠܰܘ ܠܗܰܝܟܠܐܴ ܫܳܐܷܠ ܕܢܶܥܽܘܠ. ܐܶܠܐ ܠܶܗ ܠܥܽܘܒܳܐ ܪܰܒܳܐ ܕܰܐܠܗܐ. ܗܘܺܝ ܠܺܝ ܒܶܝܬ ܡܰܥܡܪܳܐ ܕܶܐܥܽܘܠ ܠܶܗ ܒܟܽܠܙܒܰܢ. ܠܳܐ ܒܥܳܐ ܕܠܰܫܡܰܝܳܐ ܢܶܣܰܩ܆ ܘܠܐ ܫܶܐܠ ܗܘܳܐ ܕܰܠܦܰܪܕܰܝܣܳܐ ܢܶܥܽܘܠ܆ ܘܠܐ ܐܶܬܪܰܓܪܰܓ ܕܒܰܝܢܳܬ ܚܰܝ̈ܠܰܘܳܬܐ ܫܡܰܝ̈ܢܶܐ ܢܶܣܬܰܬܰܪ. ܐܶܠܐ ܠܗܰܘ ܥܽܘܒܳܐ ܡܠܐܷ ܛܽܘܒ̈ܐ ܕܰܐܠܗܳܐ ܡܶܬܝܰܐܝܰܒ ܗܘܳܐ. ܐܝܟ ܦܰܪܽܘܓܳܐ ܕܦܳܪܰܚܬܳܐ ܕܛܳܦܶܣ ܬܚܶܝܬ ܓܶܦ̈ܐ ܕܶܐܡܶܗ. ܡܳܐ ܕܫܳܡܰܥ ܩܳܠ ܓܶܦ̈ܐ ܕܛܰܝܪܳܐ܆ ܕܝܳܗܒܺܝܢ ܩܳܠܐ ܠܥܶܠ ܡܶܢܶܗ. ܘܡܳܐ ܠܰܡ ܕܰܗܘܳܬ ܗܳܕܐ. ܘܰܦܩܽܘܕ ܠܡܶܦܪܩܰܢܝ ܡܶܛܠ ܕܰܐܢܬ ܗܽܘ ܒܶܝܬ ܓܰܘܣܝ ܘܒܶܝܬ ܡܶܪܕܝ. ܡܶܢ ܒܳܬܰܪ ܕܥܳܐܠܷ ܐܢܳܐ ܠܒܶܝܬ ܡܰܥܡܪܳܐ ܘܰܠܒܶܝܬ ܓܰܘܣܳܐ ܗܳܢܐ܆ ܗܘܺܝܬ ܠܺܝ ܠܓܰܘ ܡܶܢ ܡܪܳܕܳܐ ܠܐܴ ܡܶܬܚܰܣܢܳܢܳܐ. ܘܗܳܫܐ ܐܳܡܰܪ ܐܢܳܐ ܬܟܺܝܠܐܝ̣ܬ.
ܐܰܠܗܳܐ ܦܰܨܳܢܝ ܡܶܢ ܐܺܝܕܶܗ ܕܪܰܫܺܝܥܳܐ. ܘܡܶܢ ܐܺܝܕܶܗ ܕܥܰܘܳܠܐܴ ܒܺܝܫܳܐ. ܚܙܰܝܬ ܐܰܝܟܰܢܐ ܡܶܢ ܒܳܬܰܪ ܕܥܰܠ ܠܒܶܝܬ ܡܰܥܡܪܳܐ ܘܰܠܒܶܝܬ ܡܶܪܕܳܐ ܕܰܐܠܗܽܘܬܐ܆ ܠܰܘ ܠܪܽܘܓܙܳܐ ܡܥܺܝܪ ܠܶܗ ܠܐܠܗܳܐ܆ ܐܶܠܐ ܬܘܒ ܕܢܶܬܦܰܨܶܐ ܫܳܐܷܠ.
ܡܶܛܠ ܠܰܡ ܕܰܐܢܬ ܗܽܘ ܣܰܒܪܝ ܡܳܪܝܳܐ. ܐܰܠܗܳܐ ܬܽܘܟܠܳܢܝ ܕܡܶܢ ܛܰܠܝܽܘܬܝ. ܠܰܘ ܠܰܡ ܗܳܫܐ ܝܶܠܦܶܬ ܕܶܐܬܬܟܶܠ ܥܠܰܝܟ. ܡܶܛܠ ܕܰܡܛܳܢܝ ܐܽܘܠܨܳܢܳܐ ܕܰܩܪܳܒܳܐ. ܗܰܘ ܓܶܝܪ ܕܒܽܐܘܠܨܳܢܳܐ ܒܳܥܶܐ ܠܳܟ܆ ܘܒܰܢܝܳܚܳܐ ܡܰܗܡܶܐ ܡܶܢ ܒܳܥܽܘܬܳܟ܆ ܟܺܐܢܳܐܝ̣ܬ ܠܐܴ ܫܳܡܥܳܐ ܠܶܗ ܐܶܕܢܳܟ. ܐܶܢܳܐ ܓܶܝܪ ܡܶܢ ܛܰܠܝܽܘܬܝ. ܟܰܕ ܠܰܝܬ ܗܘܳܐ ܠܺܝ ܐܽܘܠܨܳܢ̈ܐ ܥܠܰܝܟ ܬܟܺܝܠ ܗܘܺܝܬ ܘܠܳܟ ܩܳܪܶܐ ܗܘܺܝܬ. ܘܰܐܢܬ ܝܳܕܰܥ ܐܰܢܬ.
ܕܰܥܠܰܝܟ ܐܶܣܬܰܡܟܶܬ ܡܶܢ ܡܰܪܒܥܳܐ. ܟܰܕ ܠܰܡ ܢܶܦܩܶܬ ܡܶܢ ܟܰܪܣܳܐ ܕܶܐܡܝ. ܐܺܝܕܳܟ ܩܰܒܶܠܬܰܢܝ. ܡܰܢ ܓܶܝܪ ܡܶܫܟܰܚ ܗܘܳܐ ܕܰܒܥܶܕܳܢܐ ܗܰܘ ܕܠܐ ܣܳܦܩܳܐ ܗܘܳܬ ܥܰܘܳܠܽܘܬܝ ܠܡܶܕܰܥ ܐܳܦܠܐܴ ܕܡܳܢܳܐ ܐܺܝܬܶܝܗ̇ ܕܰܢܣܰܡܟܰܢܝ܆ ܘܰܢܠܰܒܢܝ ܒܚܰܝ̈ܐ.
ܘܡܶܢ ܡܥܶܝ̈ܗ̇ ܕܶܐܡܝ ܐܰܢܬ ܗܽܘ ܬܽܘܟܠܳܢܝ. ܕܡܰܘܕܶܐ ܐܢܳܐ ܠܳܟ ܘܰܡܫܰܒܰܚ ܐܢܳܐ.
ܘܠܳܟ ܫܰܒܚܶܬ ܒܟܽܠܙܒܰܢ. ܕܽܘܡܳܪܳܐ ܗܘܺܝܬ ܠܣܰܓܺܝ̈ܐܐ. ܦܶܬܓܳܡܳܐ ܗܳܢܐ ܠܰܘ ܥܰܠ ܢܒܺܝܐ ܐܺܝܬܰܘܗܝ. ܘܠܳܐ ܠܳܚܶܡ ܕܢܶܬܶܐܡܰܪ ܥܠܰܘܗܝ. ܕܽܘܡܳܪܳܐ ܓܶܝܪ ܚܰܕ ܗܽܘ: ܗܰܘ ܕܶܐܫܰܥܝܳܐ ܐܰܟܪܶܙ ܥܠܰܘܗܝ ܕܰܐܠܗܳܐ ܐܶܬܟܰܢܺܝ ܒܶܗ ܟܰܕ ܨܒܳܐ ܘܰܗܘܳܐ ܒܰܪܢܳܫܳܐ. ܘܗܳܕܶܐ ܕܥܰܡܰܢܽܘܐܝܠ ܐܺܝܬܶܝܗ̇. ܕܽܘܡܳܪܳܐ ܗܘܺܝܬ ܠܣܰܓܺܝ̈ܐܐ. ܕܰܢܒܺܝܐ ܕܶܝܢ ܕܢܶܥܒܰܪ ܡܶܢ ܦܶܬܓܳܡܳܐ ܗܳܢܐ. ܟܰܕ ܫܳܒܶܩ ܠܶܗ ܠܗܰܘ ܕܰܥܠܰܘܗܝ ܐܰܡܪܶܗ ܪܽܘܚܳܐ. ܢܺܐܡܰܪ ܗܽܘ.
ܕܰܐܢܬ ܗܽܘ ܬܽܘܟܠܳܢܝ ܥܰܫܺܝܢܳܐ. ܢܶܬܡܠܐܷ ܦܽܘܡܝ ܬܶܫܒܽܘܚܬܳܟ ܟܽܠܗ ܝܰܘܡܳܐ ܪܰܒܽܘܬܳܟ. ܟܽܠܗ̇ ܨܠܽܘܬܶܗ ܕܰܢܒܺܝܐ ܒܟܽܠܕܽܘܟ ܗܳܕܳܐ ܗܝ. ܕܦܽܘܡܶܗ ܢܶܗܘܶܐ ܡܠܐܷ ܬܶܫܒܽܘܚܬܳܐ ܕܰܐܠܗܐ. ܘܰܒܟܽܠܶܗ ܝܰܘܡܳܐ ܢܶܗܘܶܐ ܡܰܘܪܶܒ ܠܐܠܗܐ. ܘܰܕܠܐܴ ܢܰܚܓܰܪ ܘܢܶܬܡܚܶܠ ܡܶܢ ܬܶܫܒܽܘܚܬܳܐ ܕܰܐܠܗܐ. ܘܰܡܦܺܝܣ ܗܘܳܐ ܘܳܐܡܰܪ:
ܠܐܴ ܬܶܫܕܶܝܢܝ ܡܳܪܝ ܒܙܰܒܢܳܐ ܕܣܰܝܒܽܘܬܳܐ. ܘܶܐܬܚܰܒܢ ܡܶܢ ܦܽܘܠܚܳܢܳܐ ܕܙܰܕܺܝܩܽܘܬܳܐ. ܘܠܐܴ ܬܰܕܪܟܰܢܝ ܣܰܝܒܽܘܬܳܐ ܥܡܺܝܠܰܬ ܒܰܚܛܳܗ̈ܐ. ܘܶܐܬܦܟܰܪ ܘܶܐܬܟܪܰܗ ܒܰܦܣܳܩ ܣܰܒܪܳܐ. ܐܶܠܐ ܒܢܰܦܫܳܐ ܥܡܺܝܠܬܳܐ ܐܶܩܽܘܡ ܩܕܳܡܰܝܟ. ܟܰܕ ܠܐ ܫܳܐܷܠ ܐܢܳܐ ܢܰܘܚܳܐ ܕܫܳܠܐܷ ܡܶܢ ܬܶܫܒܽܘܚܬܳܟ. ܘܠܐܴ ܢܶܓܡܰܪ ܚܰܝܠܝ ܒܰܣܪܺܝܩܽܘܬܳܐ.
ܘܡܳܐ ܕܰܓܡܰܪ ܚܰܝܠܝ ܠܐܴ ܬܶܫܒܩܰܢܝ. ܟܡܳܐ ܓܶܝܪ ܕܠܳܟ ܒܳܥܝܳܐ ܢܰܦܫܝ ܠܰܘ ܕܠܐ ܚܰܝܠܳܐ ܗܝ. ܐܶܢܕܶܝܢ ܦܳܐܷܫ ܐܢܳܐ ܡܶܢ ܪܶܗܛܳܐ ܕܨܶܐܕܰܝܟ. ܗܳܝܕܶܝܢ ܐܳܦ ܚܰܝܠܝ ܓܳܡܰܪ ܘܡܰܘܦܶܐ. ܘܠܐܴ ܬܶܫܒܽܘܩ ܠܰܒܥܶܠܕ̈ܒܳܒܰܝ ܕܰܢܡܰܠܠܽܘܢ ܒܺܝ ܘܢܺܐܡܪܽܘܢ. ܕܦܳܫܶܬ ܡܶܢ ܩܪܳܒܗܽܘܢ.
ܡܶܛܠ ܕܶܐܡܰܪܘ ܥܠܰܝ ܒܥܶܠܕ̈ܒܳܒܰܝ: ܘܰܐܝܠܶܝܢ ܕܢܳܛܪܺܝܢ ܠܢܰܦܫܝ. ܐܶܬܡܰܠܰܟܘ ܐܰܟܚܕܳܐ ܘܶܐܡܰܪܘ: ܐܠܗܳܐ ܫܰܒܩܶܗ ܪܽܘܕܦܽܘܗܝ ܘܽܐܘܚܕܽܘܗܝ. ܡܰܠܶܦ ܗܳܪܟܳܐ ܡܙܰܡܪܳܢܳܐ܆ ܕܠܐܴ ܫܳܠܶܝܢ ܒܥܶܠܕ̈ܒܳܒܶܐ ܕܚܰܝܱ̈ܝܢ. ܡܶܢ ܕܰܡܡܰܠܠܺܝܢ ܥܠܰܝܢ ܒܰܝܢܳܬܗܘܢ. ܕܰܐܝܟ ܗܳܟܰܢܐ ܡܡܰܠܠܺܝܢ ܗܘܰܘ ܒܺܐܝܽܘܒ ܗܰܘ ܙܰܕܺܝܩܳܐ. ܟܰܕ ܐܳܟܠܺܝܢ ܩܰܪ̈ܨܰܘܗܝ ܩܕܳܡ ܐܰܠܗܳܐ. ܗܳܟܰܢܐ ܦܰܫܶܩ ܬܢܳܢ ܡܙܰܡܪܳܢܳܐ ܕܰܐܝܠܶܝܢ ܕܢܳܛܪܺܝܢ ܗܘܰܘ ܐܽܘܪ̈ܚܳܬܳܐ ܡܶܬܝܰܕܥܳܢ̈ܝܳܬܳܐ ܕܢܰܦܫܶܗ. ܡܡܰܠܠܺܝܢ ܗܘܰܘ ܥܠܰܘܗܝ ܚܰܕ ܥܰܡ ܚܰܕ ܘܳܐܡܪܺܝܢ ܕܡܶܢ ܐܠܗܳܐ ܐܶܫܬܒܶܩ. ܐܶܠܘ ܓܶܝܪ ܐܰܠܗܳܐ ܠܐ ܐܰܪܚܶܩ ܡܶܢܶܗ. ܠܐ ܡܰܗܡܶܐ ܗܘܳܐ ܕܰܢܩܽܘܡܽܘܢ ܥܠܰܘܗܝ ܩܪ̈ܳܒܶܐ. ܕܰܐܝܟ ܗܳܟܰܢܐ ܐܶܢܘܢ ܗܳܢܘܢ ܕܢܳܛܪܺܝܢ ܠܢܰܦ̈ܫܳܬܳܐ ܕܩܰܕܺܝ̈ܫܐ. ܘܡܳܐ ܕܚܳܙܶܝܢ ܠܢܶܣܝܽܘܢ̈ܐ ܕܡܶܬܥܰܫܢܺܝܢ ܥܰܠ ܩܰܕܺܝ̈ܫܐ ܡܰܣܒܪܺܝܢ ܕܡܶܫܬܰܒܩܳܢܽܘܬܳܐ ܕܡܶܢ ܐܠܗܳܐ ܐܰܕܪܟܰܬ ܐܶܢܘܢ. ܘܥܰܠ ܗܳܕܐ ܐܳܦ ܝܰܬܺܝܪܳܐ ܡܥܺܝܪܺܝܢ ܪܕܽܘܦܝܳܐ ܘܒܺܝ̈ܫܳܬܳܐ. ܘܥܳܒܕܺܝܢ ܗܳܕܐ ܡܶܛܠ ܬܰܪܬܶܝܢ܆ ܚܕܳܐ ܕܶܝܢ ܕܠܐܴ ܡܶܫܟܚܺܝܢ ܠܡܰܕܪܳܟܽܘ ܕܺܝܢܰܘ̈ܗܝ ܕܰܐܠܗܐ. ܕܬܰܪܬܶܝܢ ܕܶܝܢ ܕܳܐܦܠܐܴ ܗܶܢܘܢ ܕܰܝ̈ܘܶܐ ܓܳܠܶܝܢ ܚܰܕ ܠܚܰܕ. ܕܒܰܐܝܠܶܝܢ ܚܰܫ̈ܐ ܟܳܡܢܺܝܢ. ܡܳܐ ܕܒܳܥܶܝܢ ܠܡܰܛܥܳܝܽܘ ܒܰܓܒ̈ܝܳܐ. ܘܩܳܥܶܝܢ ܕܠܰܝܬ ܠܶܗ ܡܦܰܨܝܳܢܳܐ. ܢܒܺܝܳܐ ܕܶܝܢ ܕܠܐ ܫܶܠܝܳܐ ܩܳܥܶܐ ܗܘܳܐ ܘܳܐܡܰܪ:
ܐܰܠܗܳܐ ܠܳܐ ܬܰܪܚܶܩ ܡܶܢܝ. ܐܰܠܗܳܐ ܠܥܽܘܕܪܳܢܝ ܟܰܬܰܪ. ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܣܳܩܪܺܝܢ ܠܢܰܦܫܝ. ܘܢܶܬܥܰܛܦܽܘܢ ܒܶܗܬܬܳܐ ܐܰܝܠܶܝܢ ܕܨܳܒܶܝܢ ܠܒܺܝܫܬܝ. ܐܴܘ ܟܡܳܐ ܢܰܗܺܝܪ ܘܰܓܠܐܷ ܚܽܘܒܶܗ ܕܓܰܒܪܳܐ ܗܳܢܐ ܙܰܕܺܝܩܳܐ. ܠܐܴ ܠܳܛ ܠܰܒܢܰܝ̈ܢܳܫܳܐ ܘܠܐܴ ܐܰܥܺܝܪ ܪܽܘܓܙܳܗ̇ ܕܟܺܐܢܽܘܬܳܐ ܥܰܠ ܐܰܝܠܶܝܢ ܕܰܡܙܺܝܥܺܝܢ ܗܘܰܘ ܥܠܰܘܗܝ ܩܪܳܒܳܐ. ܐܶܠܐ ܠܗܳܢܽܘܢ ܕܣܳܩܪܺܝܢ ܠܢܰܦܫܶܗ ܐܶܡܰܪ ܕܢܶܒܗܬܽܘܢ. ܘܡܶܛܠܗܳܕܐ ܡܳܐ ܕܰܫܠܰܘ ܡܶܢ ܬܰܟܬܽܘܫܳܐ. ܬܟܺܝܠܐܝ̣ܬ ܩܳܪܒܺܝܢ ܙܰܕܺܝ̈ܩܶܐ ܠܡܰܘܕܳܝܽܘ ܠܐܐܠܗܳܐ. ܐܝܟ ܕܶܐܡܰܪ ܢܒܺܝܐ.
ܐܶܢܳܐ ܕܶܝܢ ܒܟܽܠܙܒܰܢ ܐܶܨܰܠܐܷ ܘܰܐܘܣܶܦ ܥܰܠ ܬܶܫܒܚ̈ܬܳܟ. ܘܦܽܘܡܝ ܢܣܰܒܰܪ ܙܰܕܺܝܩܽܘܬܳܟ ܘܟܽܠܶܗ ܝܰܘܡܳܐ ܬܶܫܒܚ̈ܬܳܟ. ܡܳܐ ܠܰܡ ܕܰܢܦܰܠܘ ܒܥܶܠܕ̈ܒܳܒܰܝ܆ ܬܟܺܝܠܐܝ̣ܬ ܩܳܐܷܡ ܐܢܳܐ ܘܰܡܨܰܠܐ ܐܢܳܐ. ܐܳܦ ܡܰܘܦܶܣ ܐܢܳܐ ܥܰܠ ܬܶܫܒܚ̈ܬܳܟ. ܘܰܡܣܰܒܰܪ ܐܢܳܐ ܕܳܐܦ ܐܚܪ̈ܳܢܶܐ ܢܰܟܪܙܽܘܢ ܙܰܕܺܝܩܽܘܬܳܟ. ܘܳܐܦܠܐܴ ܐܶܢܳܐ ܒܺܝܕܰܥܬܳܐ ܕܣܳܦܪ̈ܶܐ ܙܟܺܝܬ ܠܰܒܥܶܠܕ̈ܒܳܒܰܝ ܐܶܠܐ ܒܓܰܢܒܳܪܽܘܬܳܟ.
ܡܶܛܠ ܕܠܐܴ ܝܶܕܥܶܬ ܣܳܦܪܽܘܬܳܐ: ܕܶܐܥܽܘܠ ܒܓܰܢܒܳܪܽܘܬܶܗ ܕܡܳܪܝܳܐ. ܘܶܐܥܗܰܕ ܒܰܠܚܽܘܕܰܝ ܙܰܕܺܝܩܽܘܬܳܟ. ܐܠܗܳܐ ܝܽܘܠܦܳܢܝ ܕܡܶܢ ܛܰܠܝܽܘܬܝ ܘܰܥܕܰܡܳܐ ܠܗܳܫܳܐ ܕܶܐܚܰܘܶܐ ܬܶܕܡܪ̈ܳܬܳܟ. ܕܠܐ ܠܰܡ ܝܶܕܥܶܬ ܣܳܦܪܽܘܬܳܐ ܘܰܕܪܳܫܳܐ ܘܰܗܦܳܟ̈ܬܳܐ ܕܚܰܟܺܝ̈ܡܶܐ. ܐܠܗܳܐ ܐܰܢܬ ܗܘܰܝܬ ܠܺܝ ܡܰܠܦܳܢܳܐ ܘܝܽܘܠܦܳܢܳܐ. ܘܢܶܛܪܶܬ ܦܽܘ̈ܩܕܳܢܰܝܟ ܘܶܐܬܚܰܟܡܶܬ ܘܥܶܠܶܬ ܒܓܰܢܒܳܪܽܘܬܳܐ ܕܙܰܕܺܝܩܽܘܬܳܟ. ܡܶܛܠܗܳܢܐ ܠܥܶܠ ܡܶܢ ܣܳܦܪ̈ܶܐ ܘܚܰܟܺܝ̈ܡܶܐ ܣܳܡܬܰܢܝ ܟܺܐܢܽܘܬܳܟ. ܡܳܢܳܐ ܓܶܝܪ ܐܺܝܬ ܗܘܳܐ ܠܺܝ ܠܡܺܐܠܰܦ. ܒܶܣܬܰܪ ܓܙܳܪܳܐ ܕܥܶܪ̈ܒܶܐ ܕܠܐܴ ܡܶܠܬܳܐ. ܘܡܶܢ ܬܰܡܳܢ ܓܶܝܪ ܨܒܰܝܬ ܘܰܕܒܰܪܬܳܢܝ. ܕܶܐܥܽܘܠ ܒܓܰܢܒܳܪܽܘܬܳܟ ܘܶܐܚܰܘܶܐ ܬܶܕܡܪ̈ܳܬܳܟ. ܘܶܐܬܕܟܰܪ ܙܰܕܺܝܩܽܘܬܳܟ. ܕܠܐ ܡܰܥܒܕܳܢܽܘܬܳܐ ܕܝܽܘܠܦ̈ܢܶܐ ܕܣܳܦܪ̈ܶܐ. ܟܰܕ ܒܢܰܦܫܳܐ ܥܠܰܝܡܬܳܐ ܕܡܶܬܚܰܝܠܐ ܘܡܶܬܓܰܒܪܳܐ ܒܺܝ܆ ܓܳܡܰܪ ܐܢܳܐ ܕܺܝ̈ܢܰܝܟ ܘܬܶܕܡܪ̈ܳܬܳܟ. ܟܰܕ ܠܐ ܡܶܫܬܰܒܩܳܐ ܢܰܦܫܝ ܕܬܶܥܡܰܠ ܒܰܡܚܺܝܠܽܘܬܳܐ ܕܡܶܢ ܒܺܝ̈ܫܳܬܳܐ.
ܘܰܥܕܰܡܳܐ ܠܣܰܝܒܽܘܬܳܐ ܘܰܠܩܰܫܺܝܫܽܘܬܳܐ ܠܐ ܬܶܫܒܩܰܢܝ. ܥܕܰܡܳܐ ܕܶܐܚܰܘܶܐ ܕܪܳܥܳܟ ܐܳܦ ܓܰܢܒܳܪܽܘܬܳܟ ܠܕܳܪܳܐ ܕܳܐܬܶܐ: ܘܙܰܕܺܝܩܽܘܬܳܟ ܐܰܠܗܳܐ ܥܕܰܡܳܐ ܠܰܡܪܰܘܡܳܐ. ܠܰܘ ܕܠܐܴ ܢܶܗܘܶܐ ܣܳܒܳܐ ܘܩܰܫܺܝܫ ܝܰܘ̈ܡܬܳܐ. ܐܰܟܡܳܐ ܕܳܐܦ ܐܰܒܪܰܡ ܘܰܐܒܳܗ̈ܬܳܐ ܡܨܰܠܐ ܢܒܺܝܐ܆ ܐܠܐ ܕܠܳܐ ܬܰܕܪܶܟ ܠܶܗ ܡܶܢ ܣܰܝܒܽܘܬܳܐ ܕܒܰܪܢܳܫܳܐ ܥܰܬܺܝܩܳܐ ܡܦܺܝܣ ܘܕܠܐ ܢܶܬܡܰܛܶܐ ܠܩܰܫܺܝܫܽܘܬܳܐ ܕܰܥܡܺܝܠܐ ܒܒܺܝ̈ܫܳܬܳܐ ܡܨܰܠܐ܆ ܡܶܛܠ ܕܡܶܣܬܰܪܰܕ ܗܘܳܐ. ܡܶܢ ܩܶܡ̈ܛܶܐ ܘܒܺܝ̈ܫܳܬܳܐ ܘܟܽܘ̈ܬܡܬܳܐ ܕܥܶܒܕܰܬ ܚܛܺܝܬܳܐ ܒܒܰܪܢܳܫܳܐ ܕܰܣܐܷܒ ܒܰܥ̈ܒܳܕܶܐ ܒܺܝ̈ܫܶܐ. ܥܰܠܗܝ ܒܳܥܶܐ ܗܘܳܐ܆ ܕܠܐ ܢܶܫܬܒܶܩ ܥܕܰܡܳܐ ܠܣܰܝܒܽܘܬܳܐ ܕܰܐܝܟ ܗܳܕܐ. ܠܐ ܬܶܫܒܩܰܢܝ. ܐܠܐ ܗܳܐ ܚܰܘܺܝܬ ܕܪܳܥܳܟ ܘܓܰܢ̱ܒܳܪܽܘܬܳܟ ܠܕܳܪܳܐ ܕܳܐܬܶܐ. ܘܚܰܘܺܝܬ ܙܰܕܺܝܩܽܘܬܳܟ ܥܕܰܡܳܐ ܠܰܡܪ̈ܰܘܡܶܐ.
ܘܪܰܘܪ̈ܒܳܬܳܐ ܕܰܥܒܰܕܬ ܐܰܠܗܳܐ ܡܰܢܽܘ ܐܰܟܘܳܬܳܟ: ܕܚܰܘܺܝܬܳܢܝ ܐܽܘܠܨܳܢܳܐ ܣܰܓܺܝܐܐ ܘܒܺܝܫܬܳܐ. ܘܰܗܦܰܟܬ ܘܰܐܚܺܝܬܳܢܝ ܘܳܐܦ ܡܶܢ ܬܗܽܘ̈ܡܐ ܕܰܐܪܥܳܐ ܬܰܗܦܶܟ ܬܰܣܩܰܢܝ. ܪܰܘܪܒܳܐܝ̣ܬ ܡܶܫܬܰܥܶܐ ܗܳܪܟܳܐ ܥܰܠ ܡܽܘܟܳܟܳܐ ܕܰܗܘܳܐ ܠܓܶܢܣܳܐ ܐܢܳܫܳܝܳܐ. ܘܥܰܠ ܪܽܘܡܪܳܡܳܐ ܕܶܐܬܺܝܗܶܒ ܠܶܗ ܒܝܰܕ ܡܳܪܰܢ. ܡܶܢ ܕܚܰܘܺܝܬܳܢܝ ܐܽܘܠܨܳܢܳܐ ܣܰܓܺܝܐܐ ܘܒܺܝܫܬܳܐ. ܘܢܶܚܬܶܬ ܥܕܰܡܳܐ ܠܬܰܚܬܳܝ̈ܬܳܗ̇ ܕܰܐܪܥܳܐ ܢܚܶܬܬ ܒܳܬܰܪܝ ܘܰܐܣܶܩܬܳܢܝ: ܘܢܶܦܠܶܬ ܘܰܐܩܺܝܡܬܳܢܝ: ܘܫܰܠܚܽܘܢܝ ܓܰܝܴ̈ܣܶܐ ܕܰܚܛܺܝܬܳܐ ܟܰܕ ܐܶܟܰܠܘ ܐܰܒܳܗ̈ܝ ܡܶܢ ܐܺܝܠܳܢܳܐ ܕܰܥܒܳܪ ܦܽܘܩܕܳܢܳܐ ܘܰܐܦܶܩܬ ܐܶܣܛܠܐܴ ܘܰܐܠܒܶܫܬܳܢܝ: ܘܶܐܬܟܰܡܪܶܬ ܘܰܐܦܨܰܚܬܳܢܝ ܘܒܰܝܰܐܬܳܢܝ: ܘܶܐܬܡܰܣܟܢܶܬ ܘܰܐܥܬܰܪܬܳܢܝ: ܘܰܗܘܰܝܬ ܠܰܚܡܳܐ ܕܚܰܝ̈ܐ ܘܣܰܒܰܥܬܳܢܝ: ܘܢܶܦܠܶܬ ܡܶܢ ܫܡܰܝܳܐ ܘܒܰܠܥܽܘܢܝ ܬܗܽܘ̈ܡܐ ܬܰܚܬܳܝ̈ܐ ܘܶܐܬܓܗܶܢܬ ܘܕܰܠܺܝܬܳܢܝ ܘܰܠܪܰܘܡܳܐ ܩܰܕܡܳܝܳܐ ܐܰܣܶܩܬܳܢܝ: ܘܒܰܠܥܰܢܝ ܦܽܘܡܶܗ ܕܡܰܘܬܳܐ ܘܥܰܠܬ ܠܰܐܝܟܳܐ ܕܰܫܕܶܐ ܗܘܺܝܬ ܘܰܙܠܰܚܬ ܒܰܐܦ̈ܝ ܚܰܝ̈ܐ ܘܦܰܨܺܝܬܳܢܝ ܡܶܢ ܦܽܘܡܶܗ ܕܰܐܪܝܳܐ ܘܡܶܢ ܫܝܽܘܠ ܟܡܺܝܪܬܳܐ ܠܡܰܠܟܽܘܬܳܟ ܦܨܺܝܚܬܳܐ ܫܰܢܺܝܬܳܢܝ.
ܘܰܐܣܓܺܝܬ ܪܰܒܽܘܬܝ ܘܰܐܗܦܶܟܬ ܘܒܰܝܰܐܬܳܢܝ. ܘܰܚܠܳܦ ܐܶܒܠܳܐ ܫܽܘܒܚܳܐ ܐܰܠܒܶܫܬܳܢܝ. ܘܰܚܠܳܦ ܒܶܟܝܳܐ ܠܚܰܕܽܘܬܳܐ ܐܰܥܶܠܬܳܢܝ. ܘܰܚܠܳܦ ܩܰܒܪܳܐ ܓܢܽܘܢܳܐ ܦܬܰܚܬ ܠܺܝ. ܘܰܚܠܳܦ ܗܳܠܶܝܢ.
ܐܳܦ ܐܶܢܳܐ ܐܰܘܕܶܐ ܠܳܟ ܒܟܶܢܳܪܳܐ. ܘܰܠܩܽܘܫܬܳܟ ܐܶܙܡܰܪ. ܐܰܠܗܳܐ ܐܶܙܡܰܪ ܠܳܟ ܒܟܶܢܳܪܳܐ ܩܰܕܺܝܫܳܐ ܕܺܝܣܪܳܐܝܠ. ܡܰܢ ܓܶܝܪ ܡܰܘܦܶܐ ܕܟܰܕ ܚܳܙܶܐ ܕܡܶܢ ܐܰܝܠܶܝܢ ܒܺܝ̈ܫܳܬܳܐ ܐܰܓܗܺܝ. ܘܰܠܘܳܬ ܐܰܝܕܳܐ ܪܰܒܽܘܬܳܐ ܐܶܬܥܰܠܺܝ܆ ܕܰܢܙܰܡܰܪ ܒܟܶܢܳܪܶܗ ܘܢܰܘܕܶܐ ܒܠܶܫܳܢܶܗ. ܡܶܛܠ ܠܰܘ ܒܟܶܢܳܪܝ ܒܰܠܚܽܘܕ ܐܶܙܡܰܪ ܠܳܟ: ܐܠܐ ܘܰܒܟܶܢܳܪܳܐ ܩܰܕܺܝܫܳܐ ܕܺܝܣܪܳܐܝܠ. ܒܗܳܝ ܠܰܡ ܩܰܪܢܳܐ ܡܰܠܐܟܳܝܬܳܐ ܐܰܘܕܶܐ ܠܳܟ. ܘܰܒܟܶܢܳܪܳܐ ܕܬܰܩܶܢܬ ܡܶܢ ܒܪܺܝܫܺܝܬ ܘܝܰܗܒܬ ܠܰܡܠܺܝ̈ܠܐ. ܐܰܙܺܝܥ ܩܳܠܰܝ̈ ܘܰܐܘܕܶܐ. ܟܶܢܳܪܳܐ ܓܶܝܪ ܕܺܝܣܪܳܐܝܠ ܗܳܢܰܘ܆ ܕܡܳܐ ܕܡܶܬܚܙܶܐ ܗܰܘ ܡܰܫܟܢܳܐ ܕܩܰܕܺܝ̈ܫܐ ܕܠܐ ܥܒܺܝܕ ܒܺܐܝܕܰܝ̈ܐ. ܘܩܳܝܡܺܝܢ ܬܪܶܥܣܰܪ ܫܺܝܦܽܘܪ̈ܶܐ܆ ܘܰܡܝܰܒ̈ܒܳܢ ܐܳܦ ܬܰܪܬܰܥܶܣܪ̈ܶܐ ܩܰܪ̈ܢܳܬܳܐ܆ ܘܒܳܛܠܐܴ ܒܺܝܫܬܳܐ ܘܠܐ ܡܶܬܦܰܠܚܳܐ. ܐܳܦ ܡܶܫܬܰܬܩܺܝܢ ܪ̈ܰܘܒܶܐ ܕܰܥܒܰܕܘ ܠܶܓܝܽܘ̈ܢܐ ܕܕܰܝ̈ܘܶܐ܆ ܒܗܳܢܳܐ ܟܶܢܳܪܳܐ ܫܐܷܠ ܕܰܘܝܕ ܕܰܢܙܰܡܰܪ ܟܰܕ ܐܳܡܰܪ:
ܘܰܢܫܰܒ̈ܚܳܢ ܣܶܦ̈ܘܳܬܝ ܟܰܕ ܐܶܙܡܰܪ ܠܳܟ. ܘܢܰܦܫܝ ܕܰܦܪܰܩܬ. ܦܽܘܪܩܳܢܳܐ ܕܢܰܦܫܳܐ. ܠܰܘ ܒܗܳܢܳܐ ܥܳܠܡܳܐ ܡܶܬܺܝܕܰܥ. ܐܳܦܶܢ ܓܶܝܪ ܘܡܶܬܦܰܪܩܳܐ. ܘܰܥܕܰܡܳܐ ܕܢܳܦܩܳܐ ܡܶܢ ܥܰܒܝܽܘܬܶܗ ܕܦܰܓܪܳܐ܆ ܘܰܡܩܰܒܠܺܝܢ ܠܳܗ̇ ܐܰܬܪ̈ܰܘܳܬܳܐ ܢܰܗܺܝܪ̈ܶܐ ܕܠܳܚܡܺܝܢ ܠܰܟܝܳܢܳܗ̇. ܘܡܳܐ ܕܰܚܙܳܬ ܗܺܝ ܠܳܗ̇ ܡܶܣܬܰܟܠܐ ܘܝܳܕܥܳܐ ܐܶܢ ܦܪܺܝܩܳܐ ܡܰܠܝܳܐܝ̣ܬ. ܘܶܐܢ ܡܫܰܥܒܕܳܐ ܠܗܰܘ ܕܰܠܩܽܘܒܠܐܴ܆ ܘܒܳܬܰܪ ܗܳܕܐ ܐܳܡܰܪ:
ܘܠܶܫܳܢܝ ܟܽܠܶܗ ܝܰܘܡܳܐ ܢܰܘܕܶܐ ܒܙܰܕܺܝܩܽܘܬܳܟ: ܡܶܛܠ ܕܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܨܳܒܶܝܢ ܠܒܺܝܫܬܝ. ܗܰܘ ܕܡܰܘܕܶܐ ܠܶܫܳܢܶܗ ܟܽܠܶܗ ܝܰܘܡܳܐ ܙܰܕܺܝܩܽܘܬܶܗ ܕܡܳܪܝܳܐ. ܠܐ ܡܚܰܘܶܐ ܕܶܐܫܬܰܠܰܛ ܠܺܠܝܳܐ ܒܢܰܦܫܶܗ. ܟܽܠ ܟܡܳܐ ܕܰܒܬܰܘܕܺܝܬܳܐ ܕܰܐܠܗܳܐ ܐܺܝܬܶܝܗ̇ ܢܰܦܫܳܐ. ܠܰܘ ܠܺܠܝܳܐ ܗܝ. ܐܳܦܢ ܢܶܗܘܶܐ ܕܰܒܠܺܠܝܳܐ ܩܳܡܰܬ ܠܰܡܙܰܡܳܪܽܘ. ܡܶܛܠ ܗܳܢܐ ܩܳܝܡܺܝܢ ܒܺܐܝܡܳܡܳܐ ܐܰܝܠܝܢ ܕܡܰܘܕܶܝܢ ܠܡܳܪܝܳܐ ܐܳܦ ܒܢܽܘܗܪܳܐ. ܘܰܐܝܠܶܝܢ ܕܶܝܢ ܕܠܐܴ ܡܰܘܕܶܝܢ܆ ܒܳܗܬܺܝܢ ܘܡܰܚܦܪܺܝܢ ܐܰܝܟ ܕܶܐܡܰܪ ܢܒܺܝܐ. ܡܶܛܠ ܕܡܶܬܢܰܣܶܝܢ ܒܰܚܛܺܝܬܳܐ. ܘܨܳܒܶܝܢ ܠܒܺܝܫܬܳܐ ܕܩܰܕܺܝ̈ܫܶܐ. ܚܢܰܢ ܕܶܝܢ ܥܰܡ ܢܒܺܝܐ ܢܰܘܕܶܐ ܠܰܡܫܺܝܚܳܐ ܦܳܪܽܘܩܰܢ. ܠܥܳܠܡܱ̈ܝ ܥܳܠܡ̈ܐ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܫܰܒܥܺܝܢ ܘܚܰܕ
ܡܙܡܘܪܐ ܕܫܒܥܝܢ ܘܬܪܝܢ
ܡܰܘܕܰܥ ܥܰܠ ܐܪ̈ܳܙܰܘܗܝ ܕܥܰܡܰܢܽܘܐܝܠ ܕܶܐܬܬܨܺܝܪܘ ܒܰܫܠܶܝܡܽܘܢ: ܘܥܰܠ ܡܬܽܘܡܳܝܽܘܬܶܗ ܕܡܳܪܰܢ ܕܡܶܢ ܐܰܒܳܐ: ܘܥܰܠ ܝܰܠܕܶܗ ܕܡܶܢ ܒܬܽܘܠܬܳܐ: ܘܥܰܠ ܐܽܘܚܕܳܢܶܗ ܕܥܰܠ ܟܽܠ: ܘܥܰܠ ܦܽܘܢܳܝܳܐ ܕܟܽܠܗܽܘܢ ܥܰܡ̈ܡܶܐ.
ܟܽܠܗܘܢ ܡܰܠܟ̈ܐ ܐܰܝܠܶܝܢ ܕܰܒܙܰܕܺܝܩܽܘܬܐ ܡܶܬܕܰܒܪܺܝܢ܆ ܨܰܠܡܳܐ ܘܝܽܘܩܢܳܐ ܡܶܬܚܙܶܐ ܒܬܳܓܰܝ̈ܗܘܢ ܕܗܰܘ ܡܰܠܟܳܐ ܫܪܺܝܪܳܐ ܕܡܶܢ ܥܳܠܰܡ. ܕܝܰܩܰܪ ܐܶܢܘܢ ܫܡܳܐ ܕܡܰܠܟܽܘܬܐ. ܘܰܐܘܪܶܒ ܐܶܢܘܢ ܒܬܳܓܳܐ ܘܰܒܫܽܘܠܛܳܢܳܐ. ܡܶܛܠ ܗܳܢܐ ܡܳܐ ܕܡܰܨܡܚܳܐ ܟܺܐܢܽܘܬܳܐ ܒܰܡܕܰܒܪܳܢܽܘܬܐ ܕܡܰܠܟ̈ܐ ܙܰܕܺܝ̈ܩܶܐ ܠܐ ܡܰܣܟܶܠ ܐܢܳܫ܆ ܘܠܐ ܐܶܢ ܡܟܰܢܶܐ ܠܗܘܢ ܐܱܠܗ̈ܐ ܕܒܶܣܪܳܐ. ܘܥܰܠܗܳܝ ܫܒܰܩ ܒܕܽܘܟܳܐ ܕܽܘܟܳܐ ܟܰܕ ܒܥܳܐ ܕܰܢܩܰܠܶܣ ܠܥܰܒܕܰܘ̈ܗܝ. ܕܰܐܝܠܶܝܢ ܕܒܰܠܚܽܘܕ ܠܰܟܝܳܢܳܐ ܕܰܐܠܗܽܘܬܳܐ ܠܳܚ̈ܡܳܢ. ܢܶܬܐܰܡܪ̈ܳܢ ܐܳܦ ܥܰܠ ܐܰܝܠܶܝܢ ܕܶܐܬܩܰܝܰܡܘ ܡܶܢܶܗ ܒܰܡܕܰܒܪܳܢܽܘܬܐ. ܥܰܠ ܕܰܡܚܰܘܶܐ ܕܰܡܩܰܠܶܣ ܟܺܐܢܽܘܬܗܘܢ ܒܰܫܡܳܗܰܘ̈ܗܝ ܡܫܰܒ̈ܚܶܐ. ܘܰܐܝܟ ܕܰܩܪܳܐ ܒܢ̈ܝ ܐܱܠܗ̈ܐ ܠܰܒ̈ܢܰܝ ܫܺܝܬ. ܥܰܠ ܕܰܒܗܰܘ ܙܰܒܢܳܐ ܦܳܠܚܺܝܢ ܗܘܰܘ ܟܺܐܢܽܘܬܳܐ. ܘܟܰܕ ܐܶܬܢܰܚܰܬܘ ܘܰܗܘܰܘ ܠܘܳܬ ܫܶܦܠܐܴ ܕܚܰܫ̈ܐ ܫܟܺܝܪ̈ܶܐ ܕܥܰܡ ܒܢܴ̈ܬ ܩܳܐܷܝܢ܆ ܐܶܬܢܣܶܒ ܡܶܢܗܽܘܢ ܫܡܳܐ ܘܟܽܘܢܳܝܳܐ ܕܰܐܠܗ̈ܐ܆ ܘܰܓܙܰܪ ܥܠܰܝܗܽܘܢ ܕܰܐܝܟ ܒܢܰܝ̈ܢܳܫܳܐ ܢܡܽܘܬܽܘܢ. ܗܳܠܶܝܢ ܕܶܝܢ ܐܶܡܰܪܢܰܢ ܒܫܽܘܪܳܝܳܗ̇ ܕܬܶܫܒܽܘܚܬܳܐ ܗܳܕܐ. ܡܶܛܠ ܕܶܐܬܶܐܡܰܪ ܡܶܢ ܕܰܘܝܕ ܥܰܠ ܫܠܶܝܡܽܘܢ ܒܪܶܗ ܟܰܕ ܐܰܡܠܶܟ. ܘܬܽܘܒ ܐܳܦ ܗܽܘ ܫܠܶܝܡܽܘܢ ܒܣܰܓܺܝ̈ܐܬܳܐ ܐܶܬܕܰܡܺܝ ܒܗܰܘ ܡܰܠܟܳܐ ܕܰܫܪܳܪܳܐ ܡܫܺܝܚܳܐ. ܘܗܳܠܝܢ ܕܶܡܘ̈ܬܳܐ ܡܶܬܚܰܙ̈ܝܳܢ ܗܘܱ̈ܝ ܒܶܗ ܡܶܢ ܩܕܳܡ ܕܢܶܚܛܶܐ. ܡܶܬܩܪܶܐ ܗܘܳܐ ܗܳܟܺܝܠ ܫܡܶܗ܆ ܫܠܶܝܡܽܘܢ ܕܡܶܬܦܰܫܰܩ ܕܶܝܢ ܫܠܳܡܳܐ ܕܰܠܥܳܠܡܺܝܢ. ܘܟܰܕ ܐܰܡܠܶܟ ܐܶܬܳܬ ܠܘܳܬܶܗ ܡܰܠܟܰܬ ܫܰܒܰܐ ܡܶܢ ܐܰܬܪܳܐ ܕܽܐܘܟܳܡ̈ܐ. ܕܡܰܣܩܳܐ ܗܘܳܬ ܨܰܠܡܳܐ ܘܨܽܘܪܬܳܐ ܠܦܽܘܢܳܝܳܗ̇ ܕܥܺܕܬܳܐ. ܗܳܝ ܕܡܰܘܟܡܳܐ ܗܘܳܬ ܒܰܚܛܺܝܬܳܐ ܘܰܦܢܳܬ ܘܶܐܬܳܬ ܠܘܳܬ ܡܰܠܟܳܐ ܡܫܺܝܚܳܐ ܒܪܺܝܚܳܐ ܒܰܣܺܝܡܳܐ ܕܰܬܝܳܒܽܘܬܳܐ. ܐܰܟܡܳܐ ܕܳܐܦ ܗܳܝ ܐܰܝܬܝܰܬ ܠܰܫܠܶܝܡܽܘܢ ܒܶܣܡ̈ܐ ܛܳܒ̈ܐ ܘܪ̈ܺܝܫܳܝܶܐ. ܡܶܫܬܰܠܰܛ ܗܘܳܐ ܫܠܶܝܡܽܘܢ ܟܰܕ ܐܰܡܠܶܟ. ܡܶܢ ܢܰܗܪܳܐ ܕܡܶܨܪܶܝܢ ܥܕܰܡܳܐ ܠܢܰܗܪܳܐ ܦܪܳܬ. ܐܳܦ ܟܽܠܗܘܢ ܡܰܠܟ̈ܐ ܕܰܐܪܥܳܐ ܐܰܝܬܺܝܘ ܠܶܗ ܩܽܘܪ̈ܒܳܢܶܐ. ܐܰܟܡܳܐ ܕܳܐܦ ܡܳܪܰܢ ܐܶܬܚܙܺܝ ܢܽܘܗܪܳܐ ܕܟܳܪܽܘܙܽܘܬܶܗ ܒܟܽܠܶܗ ܥܳܠܡܳܐ. ܘܟܽܠܗܘܢ ܡܰܠܟ̈ܐ ܕܰܐܪܥܳܐ ܩܰܪܶܒܘ ܠܶܗ ܣܶܓܕܬܳܐ. ܘܺܐܝܬ ܠܺܝ ܣܰܓܺܝ̈ܐܬܳܐ ܠܡܶܫܟܳܚܽܘ ܕܨܳܪ ܒܗܶܝܢ ܫܠܶܝܡܽܘܢ ܨܰܠܡ̈ܐ ܠܗܰܘ ܡܰܠܟܳܐ ܕܰܫܪܳܪܳܐ. ܘܡܶܛܠ ܕܗܳܢܐ ܐܪܳܙܳܐ ܪܰܒܳܐ ܡܶܢ ܕܰܘܝܕ ܠܐ ܡܛܰܫܰܝ ܗܘܳܐ. ܟܰܕ ܝܬܶܒ ܫܠܶܝܡܽܘܢ ܥܰܠ ܟܽܘܪܣܝܳܐ ܕܡܰܠܟܽܘܬܳܐ ܕܺܝܣܪܳܐܝܠ܆ ܐܳܦ ܐܶܬܡܠܺܝ ܕܰܘܝܕ ܒܪܽܘܚܳܐ ܩܰܕܺܝܫܳܐ. ܘܟܰܕ ܚܳܐܱܪ ܒܗܰܘ ܡܰܠܟܳܐ ܕܰܠܥܳܠܰܡ܆ ܐܶܬܢܰܒܺܝ ܘܶܐܡܰܪ:
ܐܰܠܗܳܐ ܗܰܒ ܕܺܝܢܳܟ ܠܡܰܠܟܳܐ܆ ܘܙܰܕܺܝܩܽܘܬܳܟ ܠܒܰܪ ܡܰܠܟܳܐ. ܗܳܠܶܝܢ ܒܰܨܠܽܘܬܳܐ ܡܶܬܟܰܫܰܦ ܗܘܳܐ ܚܠܳܦ ܒܪܶܗ. ܕܰܒܙܰܕܺܝܩܽܘܬܳܐ ܢܥܰܩܶܒ ܕܺܝܢܶܗ. ܐܪܳܙܳܢܳܐܝ̣ܬ ܕܶܝܢ ܟܰܕ ܠܘܳܬ ܥܰܡܰܢܘܐܝܠ ܡܶܬܦܰܢ̈ܝܳܢ. ܘܰܕܠܐ ܒܽܘܨܳܪܳܐ ܢܳܦ̈ܩܳܢ ܠܰܥܒܳܕܳܐ. ܒܗܳܝ ܒܰܪܬ ܩܳܠܐ ܕܶܐܡܰܪ ܥܰܡܰܢܘܐܝܠ ܟܰܕ ܡܰܠܶܦ܆ ܕܰܐܒܳܐ ܠܐܴ ܕܳܐܷܢ ܠܐܢܳܫ܆ ܐܶܠܐ ܟܽܠܶܗ ܕܺܝܢܳܐ ܝܰܗܒܶܗ ܠܰܒܪܳܐ. ܕܟܽܠܢܳܫ ܢܝܰܩܰܪ ܠܰܒܪܳܐ ܐܰܝܟ ܕܰܡܝܰܩܰܪ ܠܐܱܒܳܐ (ܝܘܚܢܢ ܗ: ܟܒ-ܟܓ). ܘܰܒܗܳܠܶܝܢ ܚܳܝܪ̈ܳܢ ܗܳܠܝܢ ܕܡܶܢ ܒܳܬܰܪܟܶܢ.
ܕܰܢܕܽܘܢ ܠܥܰܡܳܟ ܒܙܰܕܺܝܩܽܘܬܳܐ. ܘܰܠܡܶܣܟ̈ܢܶܐ ܒܕܺܝܢܳܐ. ܘܰܠܡܳܢܳܐ ܡܶܬܦܰܠܰܓ ܠܰܬܪܶܝܢ ܣܽܘ̈ܟܳܠܐ ܕܺܝܢܳܐ ܕܗܳܘܶܐ. ܥܰܡܶܗ ܕܰܐܠܗܳܐ ܒܙܰܕܺܝܩܽܘܬܳܐ ܡܶܬܦܰܨܶܐ. ܡܶܣ̈ܟܺܢܶܐ ܕܶܝܢ ܕܺܐܝܬܰܝܗܘܢ ܥܰܡ̈ܡܶܐ ܚܰܛܳܝ̈ܐ. ܒܕܺܝܢܳܐ ܕܰܥܒܰܕ ܥܰܡ ܐܰܪܟܽܘܢܶܗ ܕܥܳܠܡܳܐ ܫܰܘܙܶܒ ܐܶܢܘܢ ܡܶܢܶܗ. ܘܒܳܬܰܪ ܗܳܠܶܝܢ ܐܶܡܰܪ ܢܒܺܝܐ.
ܢܶܫܩܠܽܘܢ ܛܽܘܪ̈ܶܐ ܫܠܳܡܳܐ ܠܥܰܡܳܟ. ܘܪ̈ܳܡܳܬܳܐ ܙܰܕܺܝܩܽܘܬܳܟ. ܛܽܘܪ̈ܶܐ ܩܳܪܶܐ ܠܟܶܢ̈ܫܶܐ ܕܰܫܡܰܝ̈ܢܶܐ ܕܫܳܩܠܺܝܢ ܫܠܳܡܳܐ ܡܶܢ ܪ̈ܰܘܡܶܐ ܥܶܠܳܝ̈ܐ ܘܡܰܝܬܶܝܢ ܠܥܺܕܬܶܗ ܕܰܐܠܗܳܐ. ܐܶܡܰܪ ܓܶܝܪ ܚܰܕ ܡܶܢ ܗܳܠܝܢ ܛܽܘܪ̈ܶܐ ܕܺܐܝܬܰܘܗܝ ܓܰܒܪܺܐܝܠ ܡܰܠܐܱܟܳܐ܆ ܕܰܫܩܰܠ ܘܰܐܝܬܺܝ ܫܠܳܡܳܐ ܠܡܰܪܝܰܡ ܝܳܠܕܰܬ ܐܠܗܳܐ. ܘܶܐܡܰܪ ܠܳܗ̇: ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ ܡܳܪܰܢ ܥܰܡܶܟܝ ܒܪܺܝܟܰܬ ܒܢܷ̈ܫܶܐ (ܠܘܩܐ ܐ: ܟܚ). ܘܟܰܕ ܬܘܒ ܐܶܬܳܐ ܠܝܰܠܕܳܐ ܕܒܰܒܣܰܪ ܡܳܪܗܽܘܢ ܕܛܽܘܪ̈ܶܐ܆ ܡܫܰܒܚܺܝܢ ܗܘܰܘ ܚܰܝ̈ܠܰܘܳܬܐ ܕܰܫܡܰܝܳܐ ܟܰܕ ܫܩܺܝܠܺܝܢ ܫܠܳܡܳܐ ܠܥܰܡܶܗ ܕܰܐܠܗܳܐ ܘܳܐܡܪܺܝܢ: ܫܽܘܒܚܳܐ ܠܰܐܠܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ (ܠܘܩܐ ܒ: ܝܕ). ܘܰܐܚܪ̈ܳܢܝܳܬܳܐ ܣܰܓܺܝ̈ܐܬܳܐ ܕܰܠܗܳܠܶܝܢ ܕܳܡ̈ܝܳܢ܆ ܪ̈ܳܡܳܬܳܐ ܕܶܝܢ ܕܫܳܩ̈ܠܳܢ ܙܰܕܺܝܩܽܘܬܳܐ ܒܳܬܰܪ ܓܽܘ̈ܕܶܐ ܕܰܫܠܺܝ̈ܚܶܐ ܘܕܰܡܣܰܒܪ̈ܳܢܶܐ. ܕܰܢܦܰܩܘ ܐܰܟܪܶܙܘ ܣܒܰܪܬܶܗ ܕܰܨܠܺܝܒܳܐ ܒܥܳܠܡܳܐ. ܡܶܬܩܪܶܝܢ ܕܶܝܢ ܛܽܘܪ̈ܐ ܐܳܦ ܪ̈ܳܡܳܬܳܐ ܥܰܠ ܡܥܰܠܝܽܘܬܳܐ ܕܚܰܝ̈ܐ ܕܰܩܢܶܝܢ ܒܰܐܠܗܳܐ. ܒܰܝܢܳܬ ܗܳܠܝܢ ܡܚܰܘܶܐ ܡܰܠܟܳܐ ܕܰܡܪܰܚܡܳܢܽܘܬܶܗ.
ܕܰܢܕܽܘܢ ܠܡܶܣܟܺܢ̈ܐ ܕܥܰܡܳܐ. ܘܢܶܦܪܽܘܩ ܠܰܒܢܱ̈ܝ ܒܳܝ̈ܫܶܐ. ܡܶܣܟܺܢ̈ܐ ܘܒܳܝ̈ܫܶܐ ܗܳܠܝܢ ܐܶܢܘܢ܆ ܕܶܐܡܰܪ ܐܶܫܰܥܝܳܐ܆ ܕܒܳܝ̈ܫܶܐ ܘܡܶܣܟ̈ܢܶܐ ܒܳܥܶܝܢ ܐܶܢܘܢ ܡܰܝܴ̈ܐ ܘܠܰܝܬ. ܘܰܟܬܺܝܒ ܕܶܐܢܳܐ ܡܳܪܝܳܐ ܐܶܥܢܶܐ ܐܶܢܽܘܢ. ܐܰܠܗܶܗ ܕܺܝܣܪܳܐܝܠ ܘܠܐ ܐܶܫܒܽܘܩ ܐܶܢܘܢ (ܐܫܥܝܐ ܡܐ: ܝܙ). ܡܶܣܟܺܢܺܝܢ ܗܘܰܘ ܓܶܝܪ ܟܽܠܗܘܢ ܥܰܡ̈ܡܶܐ ܡܶܢ ܡܰܘܕܰܥܬܶܗ ܕܰܐܠܗܐ ܥܕܰܡܳܐ ܕܶܐܬܳܐ ܒܰܒܣܰܪ ܐܠܗܐ ܕܺܝܣܪܳܐܝܠ. ܘܰܥܢܳܐ ܐܶܢܘܢ ܘܰܦܪܰܩ ܐܶܢܘܢ ܘܬܰܪܣܺܝ ܐܶܢܘܢ ܒܦܰܓܪܶܗ ܚܠܳܦ ܠܰܚܡܳܐ܆ ܘܰܚܠܳܦ ܡܰܝܴ̈ܐ ܒܰܕܡܶܗ ܚܰܝܳܐ. ܘܰܦܬܰܚ ܡܰܒܽܘܥ̈ܐ ܒܓܰܘ ܦܰܩܥ̈ܬܳܐ. ܘܟܰܕ ܠܰܒܢܶܝ̈ܗ̇ ܕܥܺܕܬܳܐ ܡܬܰܪܣܶܐ. ܠܛܳܠܽܘܡ̈ܐ ܡܫܰܢܶܩ ܘܰܡܡܰܟܶܟ. ܐܰܝܟ ܕܶܐܡܰܪ ܪܽܘܚܳܐ ܢܒܺܝܳܝܳܐ.
ܘܰܢܡܰܟܶܟ ܠܛܳܠܽܘܡ̈ܐ܀ ܠܰܘ ܒܰܠܚܽܘܕ ܠܨܳܠܽܘܒ̈ܐ ܕܰܛܠܰܡܘ ܡܕܰܒܪܳܢܽܘܬܶܗ ܕܒܰܒܣܰܪ. ܐܶܠܐ ܘܰܠܗܳܢܘܢ ܡܶܬܝܰܕ̈ܥܳܢܶܐ ܕܛܰܠܡܽܘܗܝ ܠܒܰܪܢܳܫܳܐ ܩܰܕܡܳܝܳܐ ܡܶܢ ܫܽܘܪܳܝܳܐ. ܘܰܥܕܰܡܳܐ ܠܰܨܠܺܝܒܳܐ. ܗܰܘ ܕܦܰܨܺܝ ܠܰܛܠܺܝ̈ܡܶܐ ܡܶܢ ܛܳܠܽܘܡ̈ܐ ܘܡܶܟܺܝܠ ܡܳܢܳܐ ܡܦܰܫܶܩ ܪܽܘܚܳܐ.
ܢܶܕܚܠܽܘܢ ܠܳܟ ܥܰܡ ܫܶܡܫܳܐ: ܘܰܩܕܳܡ ܣܰܗܪܳܐ ܠܕܳܪܕܳܪ̈ܺܝܢ. ܗܰܘ ܕܡܶܣܬܓܶܕ ܡܶܢ ܩܕܳܡ ܢܰܗܺܝܪ̈ܐ. ܐܦ ܡܶܬܝܰܩܰܪ ܒܕܶܚܠܬܳܐ ܡܶܢ ܩܕܳܡ ܕܢܶܬܒܪܶܐ ܫܶܡܫܳܐ ܘܣܰܗܪܳܐ. ܕܰܠܡܳܐ ܕܶܝܢ ܐܳܡܪܺܝܢ ܝܽܘܕܳܝ̈ܐ ܕܰܫܠܶܝܡܽܘܢ ܗܰܘ ܒܪܳܗ̇ ܕܒܰܪܬܫܒܰܥ ܐܺܝܬܰܘܗܝ. ܒܳܬܰܪ ܕܶܝܢ ܗܳܠܶܝܢ ܕܶܐܡܰܪ ܢܒܺܝܐ ܥܰܠ ܥܰܡܰܢܘܐܝܠ܆ ܕܰܩܕܳܡ ܒܶܪ̈ܝܳܬܳܐ ܘܢܰܗܺܝܪ̈ܶܐ ܡܶܣܬܰܓܕܳܢܳܐ ܐܺܝܬܰܘܗܝ ܗܘܳܐ. ܡܰܥܶܠ ܕܶܝܢ ܚܰܟܺܝܡܳܐܝ̣ܬ ܐܳܦ ܡܰܚܰܬܬܳܐ ܠܐ ܡܶܬܕܰܪܟܳܢܺܝܬܳܐ ܕܰܗܘܳܬ ܠܶܗ ܠܡܶܠܬܳܐ ܐܰܠܗܳܐ. ܠܥܽܘܒܳܗ̇ ܕܰܒܬܽܘܠܬܳܐ ܡܰܪܝܰܡ ܝܳܠܕܰܬ ܐܠܗܳܐ.
ܕܢܶܚܽܘܬ ܠܰܡ ܐܰܝܟ ܡܶܛܪܳܐ ܥܰܠ ܓܶܙܬܳܐ: ܘܰܐܝܟ ܪ̈ܣܺܝܣܶܐ ܕܢܳܚܬܺܝܢ ܥܰܠ ܐܰܪܥܳܐ. ܫܰܦܺܝܪ ܕܰܠܡܶܛܪܳܐ ܕܰܡܺܝ ܠܡܰܚܰܬܬܶܗ ܕܰܐܠܗܳܐ ܠܰܒܬܽܘܠܬܳܐ. ܘܟܰܕ ܕܶܝܢ ܢܚܶܬ ܐܰܝܟ ܡܶܛܪܳܐ ܥܰܠ ܓܶܙܬܳܐ ܡܶܢ ܫܡܰܝܳܐ܆ ܠܐܴ ܦܬܰܚ ܬܰܪܥܳܐ ܘܥܰܠ ܫܪܳܐ ܒܳܗ̇ ܐܶܠܐ ܡܶܢ ܟܽܠܳܗ̇ ܥܰܠ. ܐܶܠܐ ܘܠܰܘ ܡܶܢ ܚܰܕ ܓܰܒܳܐ ܥܰܠ ܟܰܕ ܡܶܬܚܰܠܰܛ ܒܳܗ̇. ܘܠܐ ܬܽܘܒ ܟܰܕ ܢܦܰܩ ܒܙܺܝܥ ܘܰܬܪܰܥ ܠܶܗ ܘܰܢܦܰܩ. ܘܠܐ ܡܚܰܒܶܠ ܬܰܪܥܳܐ ܕܡܰܥ̈ܠܳܢܰܘܗܝ. ܘܡܳܐ ܕܰܫܒܰܩ ܠܳܗ̇ ܘܰܢܦܰܩ ܡܶܢܳܗ̇. ܡܶܢ ܨܳܐܬܳܐ ܕܶܝܢ ܡܫܺܝܓ ܠܳܗ̇. ܐܴܘ ܠܐܪܳܙܳܐ ܪܰܒܳܐ ܘܰܠܚܶܟܡܬܶܗ ܕܗܰܘ ܕܶܐܡܰܪ ܕܠܐ ܝܶܕܥܶܬ ܣܳܦܪܽܘܬܳܐ. ܐܴܘ ܠܓܶܙܬܳܐ ܡܰܠܝܰܬ ܦܷ̈ܠܳܐܬܳܐ ܒܬܽܘܠܬܳܐ ܡܰܪܝܰܡ ܕܒܶܛܢܰܬ ܒܬܶܕܡܽܘܪܬܳܐ ܟܰܕ ܢܛܺܝܪܺܝܢ ܛܰܒܥ̈ܐ ܕܰܒܬܽܘܠܽܘܬܳܗ̇. ܘܝܶܠܕܰܬ ܒܕܽܘܡܳܪܳܐ ܘܩܰܘܝܰܬ ܕܠܐ ܚܒܳܠܐ. ܘܒܳܬܰܪ ܕܶܝܢ ܕܰܢܦܰܩ ܡܶܢ ܒܬܽܘܠܬܳܐ ܝܰܠܦܶܗ ܠܛܶܟܣܳܐ. ܘܠܰܘ ܐܰܝܟ ܕܥܰܠ ܓܶܙܬܳܐ ܢܚܶܬ ܥܰܠ ܐܰܪܥܳܐ. ܐܶܠܐ ܐܰܝܟ ܪ̈ܣܺܝܣܶܐ. ܘܰܦܠܰܓ ܓܶܝܪ ܢܰܦܫܶܗ ܒܰܥܢܴ̈ܢܶܐ ܕܰܫܠܺܝܚܽܘܬܳܐ. ܘܰܢܦܰܩ ܢܰܫܩܶܐ ܠܰܐܪܥܳܐ ܕܶܐܡܘ̈ܬܳܐ ܒܰܪ̈ܣܺܝܣܶܐ ܕܡܰܠܦܳܢܽܘܬܳܐ. ܚܰܕ ܕܶܝܢ ܡܶܢ ܗܳܠܝܢ ܪ̈ܣܺܝܣܶܐ ܐܺܝܬܰܘܗܝ ܗܘܳܐ ܦܰܘܠܽܘܣ ܗܰܘ ܡܶܛܪܳܐ ܡܕܰܗܢܳܢܳܐ ܕܙܰܪܥܳܐ ܕܥܺܕܬܳܐ. ܟܰܕ ܡܰܪܣܶܣ ܘܡܰܫܩܶܐ ܠܰܐܬܪ̈ܰܘܳܬܳܐ ܕܰܐܬܺܝܢܳܝ̈ܐ ܘܰܕܩܽܘܪ̈ܺܝܢܬܳܝܶܐ. ܪܣܺܝܣܰܐ ܗ̄ܘ ܬܽܘܒ ܐܳܦ ܛܽܘܒܬܳܢܳܐ ܡܰܬܰܝ ܗܰܘ ܟܳܪܽܘܙܳܐ ܕܶܐܘܰܢܓܶܠܝܽܘܢ ܟܰܕ ܠܰܐܬܪ̈ܰܘܳܬܳܐ ܕܦܰܠܶܣܛܺܝܢܺܝ ܘܕܰܩܪܺܝܛܺܝ ܡܰܫܩܶܐ ܗܘܳܐ ܘܡܰܕܗܰܢ ܒܝܰܕ ܟܳܪܽܘܙܽܘܬܶܗ. ܪܣܺܝܣܰܐ ܗ̄ܘ ܬܘܒ ܐܳܦ ܡܰܪܩܽܘܣ ܛܽܘܒܳܢܳܐ ܒܰܐܪܥܳܐ ܕܡܶܨܪܶܝܢ. ܗܳܝ ܕܟܰܕ ܐܶܫܬܝܰܬ ܡܶܢ ܡܶܛܪܶܗ ܫܘܰܚ ܒܳܗ̇ ܚܠܳܦ ܙܰܪ̈ܥܶܐ. ܟܶܢ̈ܫܶܐ ܕܰܒܬܽܘ̈ܠܳܬܳܐ ܘܩܰܕܺܝ̈ܫܶܐ ܘܺܝܚܺܝܕܳܝ̈ܐ ܘܥܶܢܘܳܝ̈ܐ. ܘܗܳܟܰܢܳܐ ܐܳܦ ܛܽܘܒܳܢܳܐ ܠܽܘܩܳܐ܆ ܕܰܐܝܟ ܪܣܺܝܣܳܐ ܛܥܶܢ ܡܶܛܪܳܐ ܕܰܣܒܰܪܬܳܐ ܡܶܢ ܝܰܡܳܐ ܕܓܳܓܽܘܠܬܳܐ ܘܰܢܚܶܬ ܐܰܫܩܺܝ ܡܕܺܝܢܬܳܐ ܪܰܒܬܳܐ ܐܰܠܶܟܣܰܢܕܪܺܝܰܐ. ܒܰܐܬܪ̈ܰܘܳܬܳܐ ܕܶܐܦܶܣܳܝ̈ܐ. ܝܽܘܚܰܢܳܢ ܗܰܘ ܪܚܺܝܡܳܐ ܪܣܺܝܣܳܐ ܕܡܶܛܪܳܐ ܐܰܠܗܳܝܳܐ ܥܒܺܝܕ ܗܘܳܐ. ܘܡܳܢܳܐ ܠܳܐܐܷ ܐܢܳܐ ܠܡܶܡܢܳܐ ܫܡܳܗ̈ܐ ܕܟܽܠܗܘܢ ܫܠܺܝܚ̈ܐ܆ ܕܟܽܠܗܘܢ ܒܰܕܡܽܘܬܳܐ ܕܰܪ̈ܣܺܝܣܶܐ ܐܰܫܩܺܝܘ ܠܰܐܪܥܳܐ ܕܶܐܡܘ̈ܬܳܐ ܡܰܝܴ̈ܐ ܚܰܝ̈ܐ܆ ܗܰܘ ܕܡܶܢ ܒܳܬܰܪ ܕܰܢܚܶܬ ܡܶܢ ܫܡܰܝܳܐ ܘܰܥܒܰܪ ܒܓܶܙܬܳܐ ܩܢܳܐ ܓܽܘܫܡܳܐ ܘܶܐܬܪܰܟܰܒ ܗܰܕܳܡ̈ܐ. ܘܰܦܠܰܓ ܢܰܦܫܶܗ ܒܰܥܢ̈ܢܶܐ ܕܰܫܠܺܝܚܽܘܬܳܐ ܠܟܽܠܗ̇ ܐܰܪܥܳܐ ܕܚܰܪܺܝܒܳܐ ܗܘܳܬ ܡܶܢ ܒܨܺܝܪܽܘܬ ܡܶܛܪܳܐ. ܘܝܰܗܒ ܒܳܗ̇ ܡܰܦܪܝܳܢܽܘܬܳܐ ܘܚܰܝܠܐܴ. ܕܰܐܝܟ ܕܶܐܡܰܪ ܪܽܘܚܳܐ.
ܕܢܶܫܘܰܚ ܒܝܰܘ̈ܡܳܬܶܗ ܙܶܕܩܳܐ. ܙܶܕܩܳܐ ܕܶܝܢ ܟܺܐܢܽܘܬܳܐ ܡܶܬܦܰܫܰܩ. ܘܣܽܘܓܳܐܐ ܠܰܡ ܕܰܫܠܳܡܳܐ ܥܕܰܡܳܐ ܕܢܶܥܒܰܪ ܣܰܗܪܳܐ. ܣܰܗܪܳܐ ܕܶܝܢ ܗܳܪܟܳܐ ܠܥܳܠܡܳܐ ܩܳܪܶܐ. ܡܶܛܠ ܕܰܐܟܙܢܳܐ ܕܣܰܗܪܳܐ ܩܳܐܷܡ ܠܶܗ ܒܫܽܘܚ̈ܠܳܦܶܐ. ܕܒܰܙܒܰܢ ܡܳܠܐܷ ܘܒܰܙܒܰܢ ܚܳܣܰܪ. ܗܳܟܰܢܳܐ ܐܳܦ ܥܳܠܡܳܐ ܒܰܙܒܰܢ ܡܠܐܷ ܫܰܝܢܳܐ. ܘܒܰܙܒܰܢ ܚܰܣܺܝܪ ܡܶܢ ܫܰܝܢܳܐ. ܡܶܬܩܪܶܐ ܕܶܝܢ ܣܰܗܪܳܐ. ܘܒܳܬܰܪܟܶܢ ܐܶܡܰܪ ܪܽܘܚܳܐ.
ܢܶܐܚܽܘܕ ܡܶܢ ܝܰܡܳܐ ܠܝܰܡܳܐ: ܘܡܶܢ ܢܰܗܪ̈ܰܘܳܬܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ܒܗܳܕܶܐ ܠܐܘܚܕܳܢܶܗ ܠܐ ܡܶܬܡܰܫܚܳܢܳܐ ܐܶܡܰܪ ܪܽܘܚܳܐ܆ ܘܰܕܡܶܢ ܫܽܘܪܳܝܳܐ ܠܫܽܘܠܳܡܳܐ. ܘܰܩܕܳܡܰܘܗܝ ܠܰܡ ܢܶܒܪ̈ܟܳܢ ܓܳܙܪ̈ܳܬܳܐ: ܘܰܒܥܶܠܕ̈ܒܳܒܰܘܗܝ ܥܰܦܪܳܐ ܢܶܠܚܟܽܘܢ. ܘܬܽܘܒ ܠܐܴ ܢܶܟܡܢܽܘܢ ܒܠܶܒܰܘ̈ܬܳܐ ܕܥܰܡ̈ܡܶܐ. ܚܘܱ̈ܘܳܬܳܐ ܐܶܢܘܢ ܓܶܝܪ ܒܥܶܠܕ̈ܒܳܒܰܘܗܝ ܕܰܐܠܗܳܐ. ܘܠܰܚܡܳܐ ܕܗܳܠܶܝܢ ܥܰܦܪܳܐ ܐܺܝܬܰܘܗܝ. ܡܳܐ ܕܶܝܢ ܕܶܐܬܚܰܝܰܒܘ ܡܳܪ̈ܽܘܕܶܐ ܘܶܐܟܰܠܘ ܥܰܦܪܳܐ. ܗܳܝܕܝܢ ܢܺܐܬܽܘܢ ܐܰܝܠܶܝܢ ܕܰܐܓܗܺܝܘ ܘܰܦܠܰܛܘ ܡܶܢ ܢܽܘܟ̈ܬܳܬܳܐ ܕܚܰܪ̈ܡܳܢܶܐ. ܘܰܢܩܰܪܒܽܘܢ ܣܶܓܕܬܳܐ. ܠܗܰܘ ܕܰܐܓܗܺܝ ܘܦܰܨܺܝ ܐܶܢܘܢ. ܗܳܠܝܢ ܕܒܰܫܡܳܗܰܝ̈ܗܘܢ ܐܳܡܰܪ ܠܗܽܘܢ ܪܽܘܚܳܐ.
ܕܡܰܠܟ̈ܐ ܠܰܡ ܕܬܰܪܫܺܝܫ ܘܰܕܓܳܙܪ̈ܳܬܳܐ ܩܽܘܪ̈ܒܳܢܶܐ ܢܰܝܬܽܘܢ ܠܶܗ. ܡܰܠܟ̈ܐ ܕܫܰܒܰܐ ܘܰܕܣܰܐܒܰܐ ܩܽܘܪ̈ܒܳܢܶܐ ܢܩܰܪܒܽܘܢ ܠܶܗ. ܢܶܣܓܕܽܘܢ ܠܶܗ ܟܽܠܗܘܢ ܡܰܠܟ̈ܐ: ܘܟܽܠܗܘܢ ܥܰܡ̈ܡܶܐ ܢܶܦܠܚܽܘܢܳܝܗܝ. ܐܳܦܶܢ ܚܫܰܒ ܕܬܰܪܫܺܝܫ ܘܰܕܫܰܒܰܐ ܘܰܕܣܰܐܒܰܐ܆ ܐܶܠܐ ܒܗܳܝ ܕܶܐܡܰܪ ܕܢܶܣܓܕܽܘܢ ܠܶܗ ܟܽܠܗܘܢ ܥܰܡ̈ܡܶܐ܆ ܠܐܴ ܫܒܰܩ ܚܰܕ ܕܠܐܴ ܣܓܶܕ ܒܗܳܝ ܕܟܽܠܗܘܢ ܚܒܰܫ ܘܰܡܣܰܝܶܟ ܐܽܘܚܕܳܢܳܐ ܕܟܽܠܗܽܘܢ ܡܰܠܟ̈ܐ. ܘܕܳܡܝܳܐ ܡܶܠܬܳܐ ܗܳܕܐ܆ ܕܠܰܘ ܥܰܠ ܣܶܓܕܬܶܗ ܕܰܒܗܳܢܳܐ ܥܳܠܡܳܐ ܚܳܝܪܳܐ. ܗܳܪܟܐ ܓܶܝܪ ܠܐ ܚܳܙܶܝܢܰܢ ܕܡܶܢ ܟܽܠܗܘܢ ܡܰܠܟ̈ܐ ܕܰܐܪܥܳܐ ܐܶܣܬܓܶܕ ܥܕܰܡܳܐ ܠܗܳܫܳܐ. ܡܳܐ ܕܶܐܬܒܰܛܰܠ ܟܽܠ ܪܺܝܫ ܘܟܽܠ ܫܽܘܠܛܳܢ ܘܟܽܠ ܚܰܝ̈ܠܺܝܢ. ܘܶܐܚܕܰܬ ܪܺܝܫܳܢܽܘܬܶܗ ܒܰܠܚܽܘܕ܆ ܘܗܶܢܘܢ ܠܰܡ ܗܳܠܶܝܢ ܣܳܓܕܺܝܢ ܠܶܗ. ܠܰܘ ܣܪܺܝܩܳܐܝ̣ܬ.
ܐܶܠܐ ܡܶܛܠ ܕܰܡܦܰܨܶܐ ܠܒܳܝܫܳܐ ܡܶܢ ܡܰܢ ܕܥܰܫܺܝܢ ܡܶܢܶܗ: ܘܰܠܡܶܣܟܺܢܳܐ ܕܠܰܝܬ ܠܶܗ ܡܥܰܕܪܳܢܳܐ. ܡܳܐ ܕܚܰܕ ܡܶܣܟܺܢܳܐ ܐܳܡܰܪ ܪܽܘܚܳܐ. ܐܰܝܟ ܕܰܠܟܽܠܶܗ ܟܝܳܢܳܐ ܚܒܰܫ. ܕܗܽܘ ܦܰܨܝܶܗ ܒܓܶܠܝܳܢܶܗ ܡܶܢ ܒܺܝܫܳܐ ܕܰܥܫܶܢ ܗܘܳܐ ܡܶܢܶܗ. ܘܰܠܡܶܣܟܺܢܳܐ ܬܘܒ ܗܽܘ ܟܰܕ ܗܽܘ ܢܺܝܫܳܐ ܡܰܘܕܰܥ. ܘܠܐ ܓܶܝܪ ܡܦܰܨܶܐ ܠܰܟܝܳܢܳܐ ܐܢܳܫܳܝܳܐ ܡܶܢ ܣܳܛܳܢܳܐ ܥܰܫܺܝܢܳܐ. ܘܠܐ ܬܘܒ ܕܰܡܥܰܕܰܪ ܫܟܺܝܚ ܗܘܳܐ. ܥܕܰܡܳܐ ܕܰܢܚܶܬ ܐܠܗܐ ܐܰܝܟ ܡܶܛܪܳܐ ܡܶܢ ܥܢܳܢܳܐ ܥܰܠ ܓܶܙܬܳܐ ܒܬܽܘܠܬܳܐ ܘܚܳܣ ܥܰܠ ܥܰܡ̈ܡܶܐ ܡܶܣܟܻ̈ܢܶܐ܆
ܘܢܰܦ̈ܫܳܬܳܐ ܕܒܳܝ̈ܫܶܐ ܦܳܪܶܩ. ܘܡܶܢ ܬܽܘܟܳܐ ܘܡܶܢ ܥܰܘܠܐܴ ܦܳܪܶܩ ܢܰܦ̈ܫܳܬܗܘܢ. ܢܰܗܺܝܪܳܐܝ̣ܬ ܐܶܬܦܰܫܰܩ ܕܡܰܢܽܘ ܦܳܪܽܘܩܳܐ ܕܡܶܢ ܦܽܘܪܩܳܢܶܗ. ܗܰܘ ܓܶܝܪ ܕܰܦܪܰܩ ܐܶܢܘܢ ܡܶܢ ܬܽܘܟܳܐ ܘܡܶܢ ܥܰܘܠܐܴ. ܘܰܒܕܽܘܟܬܳܐ ܐܚܪܺܬܳܐ ܐܶܡܰܪ ܡܙܰܡܪܳܢܳܐ. ܕܝܰܩܺܝܪ ܗܽܘ ܒܥܰܝ̈ܢܰܘܗܝ ܕܡܳܪܝܳܐ ܡܰܘܬܳܐ ܕܙܰܕܺܝ̈ܩܶܐ ܕܺܝܠܶܗ (ܡܙܡܘܪܐ ܩܝܗ: ܝܗ).
ܘܝܰܩܺܝܪ ܗܽܘ ܠܡ ܕܶܡܗܘܢ ܒܥܰܝ̈ܢܰܘܗܝ. ܘܢܺܚܶܐ ܘܢܶܬܺܝܗܶܒ ܠܶܗ ܡܶܢ ܕܰܗܒܳܐ ܕܫܰܒܰܐ: ܘܰܢܨܰܠܐ ܥܠܰܘܗܝ ܒܟܽܠܙܒܰܢ. ܘܟܽܠܶܗ ܝܰܘܡܳܐ ܢܒܰܪܟܺܝܘܗܝ. ܕܰܗܒܳܐ ܕܫܰܒܰܐ ܥܰܠ ܪܺܝܫܺܝܬܳܐ ܕܥܰܡܳܐ ܕܟܽܘ̈ܫܳܝܶܐ ܡܣܰܟܶܠ. ܐܰܟܙܢܳܐ ܕܕܰܗܒܳܐ ܕܫܰܒܰܐ ܕܰܗܒܰܐ ܗ̄ܘ ܫܰܦܺܝܪܳܐ ܘܕܰܟܝܳܐ. ܗܳܟܰܢܳܐ ܗܰܝܡܳܢܽܘܬܳܐ ܕܟܽܘ̈ܫܳܝܶܐ ܝܰܬܺܝܪ ܡܶܢ ܕܟܽܠ ܥܰܡ̈ܡܺܝܢ ܡܶܬܩܰܠܣܳܐ. ܘܟܽܠܶܗ ܝܰܘܡܳܐ ܡܒܰܪܟܺܝܢ ܠܶܗ. ܠܰܘ ܟܽܘ̈ܫܳܝܶܐ ܕܶܝܢ ܒܰܠܚܽܘܕ ܒܢܱ̈ܝ ܫܰܒܰܐ܆ ܐܶܠܐ ܟܽܠܗܘܢ ܦܪ̈ܺܝܩܶܐ ܒܢܱ̈ܝ ܡܰܥܡܽܘܕܺܝܬܳܐ ܙܒܺܝ̈ܢܰܝ ܒܰܕܡܶܗ. ܟܰܕ ܡܶܬܬܰܪܣܶܝܢ ܡܶܢ ܠܰܚܡܳܐ ܕܚܰܝ̈ܐ ܗܰܘ ܕܰܢܚܶܬ ܡܶܢ ܫܡܰܝܳܐ.
ܘܢܶܗܘܶܐ ܐܰܝܟ ܣܽܘܓܳܐܐ ܕܰܥܒܽܘܪܳܐ ܒܰܐܪܥܳܐ. ܘܡܶܢܶܗ ܡܶܬܬܰܪܣܶܐ ܘܚܳܝܶܐ ܟܽܠܗ ܥܰܡܳܐ ܕܙܰܕܺܝ̈ܩܶܐ ܡܶܢ ܦܰܓܪܶܗ ܚܰܝܳܐ. ܐܰܝܟ ܥܒܽܘܪܳܐ ܕܶܝܢ ܐܳܡܰܪ ܪܽܘܚܳܐ܆ ܡܶܛܠ ܕܰܒܠܰܚܡܳܐ ܡܶܬܐܶܟܶܠ ܘܠܰܘ ܠܰܚܒܳܠܐܴ ܫܳܪܶܟ. ܐܠܐ ܦܺܐܪ̈ܶܐ ܥܳܒܶܕ. ܘܰܒܪܺܝܫ ܛܽܘܪ̈ܶܐ ܡܚܰܘܶܐ ܡܰܘܥܺܝܬܶܗ.
ܘܰܒܪܺܝܫܳܐ ܠܰܡ ܕܛܽܘܪ̈ܶܐ ܢܰܫܘܰܚ ܦܺܐܪ̈ܰܘܗܝ ܐܰܝܟ ܕܠܶܒܢܳܢ. ܘܡܶܛܠ ܗܳܕܐ ܝܺܕܺܝܥܳܐ ܕܰܒܗܳܠܝܢ ܛܽܘܪ̈ܐ ܪ̈ܳܡܶܐ ܕܰܠܥܶܠ ܡܶܢ ܫܡܰܝܳܐ ܫܳܘܚܺܝܢ ܦܺܐܪ̈ܰܘܗܝ ܕܰܥܒܽܘܪܳܐ ܗܳܢܐ. ܒܗܳܝ ܕܟܰܕ ܒܰܐܪܥܳܐ ܐܶܬܬܣܺܝܡ ܦܰܓܪܳܢܳܝܳܐ ܡܳܪܳܢܳܝܳܐ܆ ܘܰܐܝܟ ܟܽܠܗܘܢ ܦܰܓܪ̈ܶܐ ܐܶܬܛܡܰܪ ܒܓܰܘ ܩܰܒܪܳܐ. ܐܶܠܐ ܫܘܰܚ ܒܠܐܴ ܡܳܝܽܘܬܽܘܬܳܐ ܘܠܐ ܡܶܬܚܰܒܠܳܢܽܘܬܳܐ ܡܶܢ ܩܝܳܡܬܳܐ. ܘܶܐܬܚܙܺܝܘ ܦܺܐܪ̈ܐ ܕܰܩܝܳܡܬܶܗ ܒܪܺܝܫ ܗܳܠܝܢ ܛܽܘܪ̈ܐ ܡܟܰܬܪ̈ܳܢܶܐ ܕܰܠܥܶܠ ܡܶܢ ܫܡܰܝܳܐ. ܐܰܝܟ ܐܰܪ̈ܙܶܐ ܕܠܶܒܢܳܢ ܕܪܳܡܺܝܢ ܡܶܢ ܟܽܠܗܘܢ ܐܺܝܠܳܢ̈ܐ. ܘܬܘܒ ܥܰܠ ܬܰܫܥܺܝܬܳܐ ܪܽܘܚܳܢܳܝܬܳܐ ܥܳܛܶܦ ܪܽܘܚܳܐ. ܕܶܐܡܰܪ ܕܢܶܚܽܘܬ ܐܰܝܟ ܡܶܛܪܳܐ ܥܰܠ ܓܶܙܬܳܐ. ܘܰܕܢܶܣܓܕܽܘܢ ܠܶܗ ܟܽܠܗܘܢ ܥܰܡ̈ܡܶܐ. ܘܡܶܢ ܕܶܐܬܰܘ ܠܗܰܝܡܳܢܽܘܬܶܗ ܡܰܠܟ̈ܐ ܕܫܰܒܰܐ ܘܰܕܣܰܐܒܰܐ ܡܰܝܬܶܐ ܪܽܘܚܳܐ ܘܳܐܡܰܪ:
ܘܢܰܘܥܶܐ ܡܶܢ ܡܕܺܝܢܬܶܗ ܐܰܝܟ ܥܶܣܒܳܐ ܕܰܐܪܥܳܐ. ܐܰܝܟ ܕܡܶܢ ܦܽܘܫܳܩܳܐ ܕܒܰܪܬ ܩܳܠܐ ܗܳܕܐ܆ ܗܳܫܐ ܥܰܠ ܬܰܫܥܺܝܬܳܐ ܕܝܰܠܕܳܐ ܦܳܩܶܕ ܠܰܢ ܪܽܘܚܳܐ ܠܡܶܥܛܰܦ܆ ܘܗܳܕܳܐ ܗ̄ܝ ܥܶܠܬܳܐ ܕܰܡܣܰܪܕܳܐ ܠܺܝ ܠܡܶܩܪܰܒ ܠܦܽܘܫܳܩܳܐ ܕܡܰܙܡܽܘܪ̈ܶܐ. ܡܶܛܠ ܕܠܐ ܝܳܗܒܺܝܢ ܐܻܝܕܳܐ ܠܰܡܦܰܫܩܳܢܳܐ ܕܰܒܛܶܟܣܳܐ ܚܰܕ ܒܳܬܰܪ ܚܰܕ ܥܰܠ ܬܰܫܥܺܝܬܳܐ ܕܡܶܠܬܳܐ. ܘܡܳܢܳܐ ܗܝ ܕܶܝܢ ܡܶܠܬܳܐ ܗܳܕܐ܆ ܢܰܘܥܶܐ ܡܶܢ ܡܕܺܝܢܬܶܗ ܐܰܝܟ ܥܶܣܒܳܐ ܕܰܐܪܥܳܐ. ܘܟܽܠܡܶܕܶܡ ܟܺܐܢܳܐܝ̣ܬ ܐܶܡܰܪ ܪܽܘܚܳܐ. ܘܰܩܕܳܡ ܫܶܡܫܳܐ ܢܶܕܚܠܽܘܢ ܠܳܟ ܘܬܘܒ ܕܢܶܚܽܘܬ ܐܰܝܟ ܡܶܛܪܳܐ ܥܰܠ ܓܶܙܬܳܐ. ܦܢܳܐ ܘܶܐܡܰܪ ܕܢܰܘܥܶܐ ܡܶܢ ܡܕܺܝܢܬܶܗ ܐܰܝܟ ܥܶܣܒܳܐ ܕܰܐܪܥܳܐ. ܘܰܡܚܰܘ̈ܝܳܢ ܥܰܠ ܕܶܢܚܶܗ ܕܡܶܢ ܪܰܘܡܳܐ ܘܰܡܫܰܘ̈ܕܥܳܢ ܕܡܶܢ ܠܥܶܠ ܐܺܝܬܰܘܗܝ ܡܶܢ ܐܰܒܳܐ. ܘܡܶܢ ܫܡܰܝܳܐ ܐܶܬܳܐ. ܐܰܝܟ ܡܶܛܪܳܐ ܕܢܳܚܶܬ ܡܶܢ ܫܡܰܝܳܐ܆ ܐܶܠܐ ܠܰܘ ܠܰܫܡܰܝ̈ܢܶܐ ܐܶܬܕܰܡܺܝ ܟܰܕ ܗܘܳܐ ܒܰܪܢܳܫܳܐ. ܐܶܠܐ ܠܰܟܝܳܢܳܐ ܗܰܘ ܕܡܶܬܡܬܶܠ ܡܶܢ ܪܽܘܚܳܐ ܒܰܥܡܺܝܪܳܐ. ܐܶܡܰܪ ܢܒܺܝܳܐ ܕܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘ̈ܡܰܘܗܝ ܘܰܐܝܟ ܥܽܘܦܝܳܐ ܕܚܰܩܠܐܴ ܗܳܟܰܢ ܝܳܥܶܐ (ܡܙܡܘܪܐ ܩܓ: ܝܗ). ܘܶܐܡܰܪ ܡܶܢ ܡܕܺܝܢܬܳܐ ܢܰܘܥܶܐ. ܠܰܘ ܡܶܢ ܩܪܺܝܬܳܐ. ܥܶܣܒܳܐ ܓܶܝܪ ܕܰܩܪܺܝܬܳܐ ܡܶܢ ܦܽܘܠܚܳܢܳܐ ܕܰܐܟܳܪܳܐ ܢܳܣܒܳܐ ܥܶܠܬܳܐ ܡܰܘܥܺܝܬܶܗ ܘܡܶܙܕܪܳܥܽܘ ܡܶܙܕܪܰܥ ܘܟܶܢ ܝܳܥܶܐ. ܘܰܐܪܥܳܐ ܗܳܝ ܕܡܰܘܥܝܳܐ ܠܶܗ ܡܶܨܛܰܪܝܳܐ ܒܣܰܟܬܳܐ ܩܕܳܡܰܘܗܝ ܘܟܶܢ ܡܩܰܒܠܐܴ ܠܶܗ ܒܥܽܘܒܳܗ̇. ܒܰܡܕܺܝܢܬܳܐ ܕܶܝܢ ܐܰܟܳܪܳܐ ܠܐܴ ܕܳܒܰܪ ܦܰܕܳܢܳܐ. ܘܠܐܴ ܣܶܟܬܳܐ ܦܳܠܚܳܐ. ܨܳܪܝܳܐ ܐܰܪܥܳܐ ܠܓܰܘ ܡܶܢ ܫܽܘܪܳܐ. ܐܰܝܟܳܐ ܕܗܳܘܝܳܐ ܓܶܝܪ ܗܳܕܐ ܡܕܺܝܢܬܳܐ. ܕܺܐܝܬܶܝܗ̇ ܚܰܪܒܬܳܐ ܡܒܰܕܩܳܐ ܥܠܶܝܗ̇. ܡܳܕܶܝܢ ܥܶܣܒܳܐ ܕܝܳܥܶܐ ܒܓܰܘ ܡܕܺܝܢܬܳܐ ܡܶܢ ܢܰܦܫܶܗ ܝܳܥܶܐ. ܕܠܐ ܙܰܪܥܳܐ ܘܰܕܠܐ ܦܽܘܠܚܳܢܳܐ ܕܰܐܟܳܪܳܐ ܕܰܐܝܟ ܗܳܢܐ ܗܘܳܐ ܡܶܛܪܳܐ ܗܰܘ ܕܰܢܚܶܬ ܡܶܢ ܫܡܰܝܳܐ. ܘܰܫܪܳܐ ܒܓܶܙܬܳܐ ܡܰܪܝܰܡ. ܘܟܰܕ ܐܶܬܓܰܫܰܡ ܡܶܢ ܟܝܳܢܳܐ ܐܢܳܫܳܝܳܐ. ܐܶܬܕܰܡܺܝ ܠܥܶܣܒܳܐ. ܒܬܽܘܠܬܳܐ ܕܶܝܢ ܚܠܳܦ ܓܶܙܬܳܐ ܗܘܳܬ ܡܕܺܝܢܬܳܐ. ܘܡܶܛܠܡܳܢܐ ܡܕܺܝܢܬܳܐ ܩܪܳܗ̇ ܪܽܘܚܳܐ. ܡܶܛܠ ܫܽܘܪܳܐ ܕܰܒܬܽܘܠܽܘܬܳܐ ܘܰܕܢܰܟܦܽܘܬܳܐ ܕܰܟܪܺܝܟ ܗܘܳܐ ܠܳܗ̇. ܐܰܟܡܳܐ ܕܰܡܕܺܝܢܬܳܐ ܢܳܛܰܪ ܠܳܗ̇ ܫܽܘܪܳܐ ܡܶܢ ܓܰܝܴ̈ܣܶܐ. ܟܰܕ ܕܶܝܢ ܥܰܡܰܢܘܐܝܠ ܠܰܕܡܽܘܬܳܐ ܕܥܶܣܒܳܐ ܚܰܝܶܕ ܠܰܟܝܳܢܶܗ ܫܒܺܝܚܳܐ. ܒܚܰܫ̈ܐ ܪܰܘܪ̈ܒܶܐ ܕܠܳܚܡܺܝܢ ܠܰܡܕܰܒܪܳܢܽܘܬܶܗ ܗܳܕܐ ܥܒܰܕ. ܘܡܶܢ ܒܳܬܰܪ ܕܶܝܢ ܕܰܒܟܽܘܢܳܝܳܐ ܗܳܢܐ ܟܰܢܝܶܗ ܪܽܘܚܳܐ ܠܥܰܡܰܢܘܐܝܠ܆ ܘܰܩܪܳܝܗܝ ܒܰܫܡܳܐ ܕܥܶܣܒܳܐ ܐܰܟܡܳܐ ܕܰܒܢܰܝ̈ܢܳܫܳܐ ܡܶܬܟܰܢܶܝܢ ܒܟܽܘܢܳܝܳܐ ܗܳܢܐ. ܥܛܰܦ ܠܶܗ ܥܰܠ ܡܬܽܘܡܳܝܽܘܬܶܗ. ܘܥܰܠ ܗܳܝ ܕܰܕܠܐ ܫܽܘܪܳܝܳܐ ܐܺܝܬܰܘܗܝ ܟܰܕ ܐܳܡܰܪ:
ܘܢܶܗܘܶܐ ܫܡܶܗ ܠܥܳܠܰܡ܆ ܘܰܩܕܳܡ ܫܶܡܫܳܐ ܐܺܝܬܰܘܗܝ ܫܡܶܗ. ܠܐ ܠܰܡ ܬܶܬܟܫܶܠ ܒܰܚܙܳܬܳܐ ܬܡܺܝܗܬܳܐ ܐܳܦ ܡܚܺܝܠܬܳܐ ܕܥܶܣܒܳܐ. ܗܳܕܐ ܓܶܝܪ ܕܨܶܒܝܳܢܳܐ ܗܝ ܘܠܰܘ ܕܰܟܝܳܢܳܐ ܡܬܽܘܡܳܝܳܐ. ܐܶܠܐ ܒܗܳܝ ܚܽܘܪ ܕܩܰܕܺܝܡ ܗܽܘ ܫܡܶܗ ܠܫܶܡܫܳܐ܆ ܘܰܠܟܽܠ ܕܢܳܣܶܒ ܫܽܘܪܳܝܳܐ ܕܢܺܐܬܶܐ ܠܰܗܘܳܝܳܐ. ܘܠܰܘ ܡܶܢ ܡܕܺܝܢܬܳܐ ܐܺܝܬ ܠܶܗ ܫܽܘܪܳܝܳܐ ܐܺܝܬܝܳܝܳܐ. ܐܶܠܐ ܡܶܢ ܩܕܳܡ ܟܽܠ ܒܶܢܝܴ̈ܢܺܝܢ ܘܟܠ ܬܽܘ̈ܩܳܢܺܝܢ. ܡܰܝܬܶܐ ܕܶܝܢ ܒܳܬܰܪ ܗܳܠܶܝܢ. ܐܳܦ ܗܳܝ ܕܡܶܬܒܰܪܟܺܝܢ ܒܶܗ ܟܠ ܥܰܡ̈ܡܺܝܢ. ܡܗܰܝܡ̈ܢܶܐ ܗܳܝ ܕܰܡܫܰܘܕܥܳܐ ܒܽܘܪܟܬܳܐ ܗܳܝ ܕܰܒܡܽܘܠܟܳܢܳܐ ܩܰܒܶܠ ܐܰܒܪܳܗܳܡ ܡܶܢ ܐܠܗܐ. ܟܰܕ ܐܳܡܰܪ ܠܶܗ: ܕܰܒܙܰܪܥܳܟ ܢܶܬܒܰܪܟܽܘܢ ܟܽܠܗܘܢ ܥܰܡ̈ܡܶܐ ܕܰܐܪܥܳܐ (ܒܪܝܬܐ ܝܒ: ܝܚ). ܡܶܛܠ ܕܰܒܝܰܕ ܐܢܳܫܴ̈ܐ ܩܰܕܡܳܝ̈ܐ ܥܶܠܰܬ ܠܰܘܛܬܳܐ܆ ܘܶܐܬܬܠܺܝܛܘ ܟܽܠܗܘܢ ܥܰܡ̈ܡܶܐ. ܟܰܕ ܐܶܫܬܰܘܬܰܦܘ ܗܘܰܘ ܠܰܚܛܺܝܬܶܗ ܕܳܐܕܳܡ. ܐܳܦ ܢܶܬܒܰܪܟܽܘܢ ܠܰܡ ܒܰܡܫܺܝܚܳܐ ܟܽܠܗܘܢ ܥܰܡ̈ܡܶܐ ܗܰܘ ܕܰܫܩܰܠ ܠܰܘܛܬܳܐ ܡܶܢ ܐܰܪܥܳܐ. ܘܩܰܒܥܳܗ̇ ܒܰܨܠܺܝܒܶܗ. ܘܰܐܝܟܰܢܳܐ ܠܰܡ ܕܒܳܐܕܳܡ ܟܽܠܗܘܢ ܒܢܰܝܢ̈ܫܳܐ ܡܳܝܬܺܝܢ. ܗܳܟܰܢܳܐ ܐܳܦ ܒܰܡܫܺܝܚܳܐ ܟܽܠܗܘܢ ܚܳܝܶܢ (ܐ ܩܘܪ̈ܢܬܝܐ ܝܗ: ܟܒ). ܗܳܕܳܐ ܗܝ ܡܳܕܶܝܢ ܒܽܘܪܟܬܳܐ ܕܰܒܝܰܕ ܡܫܺܝܚܳܐ ܘܡܰܘܗܰܒܬܳܐ ܕܚܰܝ̈ܐ ܚܰܕ̈ܬܶܐ. ܗܳܢܘܢ ܕܶܝܢ ܕܡܶܬܒܰܪܟܺܝܢ ܒܗ. ܘܰܡܫܰܒܚܺܝܢ ܠܶܗ ܐܰܝܟ ܕܶܐܡܰܪ ܪܽܘܚܳܐ.
ܘܟܽܠܗܽܘܢ ܠܰܡ ܢܫܰܒܚܽܘܢܳܝܗܝ. ܠܰܘ ܐܰܝܟ ܕܰܠܒܰܪܢܳܫܳܐ ܩܰܕܡܳܝܳܐ܆ ܐܶܠܐ ܐܰܝܟ ܕܠܐܠܗܳܐ ܚܰܝܳܐ. ܒܗܳܝ ܓܶܝܪ ܕܰܐܝܬܺܝ ܘܶܐܡܰܪ: ܒܪܺܝܟ ܗܽܘ ܡܳܪܝܳܐ ܐܠܗܶܗ ܕܺܝܣܪܳܐܝܠ܆ ܕܰܥܒܰܕ ܬܶܕܡܪ̈ܳܬܳܐ ܪܰܘܪ̈ܒܳܬܳܐ ܒܰܠܚܽܘܕܰܘܗܝ. ܘܰܒܪܺܝܟ ܗܽܘ ܫܡܳܐ ܕܺܐܝܩܳܪܶܗ ܠܥܳܠܰܡ: ܬܶܬܡܠܐܷ ܐܻܝܩܳܪܶܗ ܟܽܠܗ̇ ܐܰܪܥܳܐ ܐܰܡܺܝܢ ܘܰܐܡܺܝܢ. ܫܡܳܐ ܕܺܐܝܩܳܪܶܗ ܟܽܘܢܳܝܳܐ ܕܰܫܩܰܠ ܡܶܢ ܐܢܳܫܽܘܬܰܢ. ܟܰܕ ܡܒܰܪܟܳܐ ܘܰܡܫܰܒܚܳܐ ܠܰܫܡܶܗ. ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܒܥܝܢ ܘܬܠܬܐ
ܠܽܘܩܒܰܠ ܫܰܒܗܪ̈ܳܢܶܐ: ܘܥܰܠ ܙܰܕܺܝ̈ܩܶܐ ܕܠܳܐ ܙܳܕܶܩ ܕܢܶܛܢܽܘܢ ܒܥܰܘܴ̈ܠܶܐ.
ܡܰܠܦܳܢܽܘܬܳܐ ܠܦܳܪ̈ܽܘܫܶܐ ܘܡܰܟܣܳܢܽܘܬܐ ܕܶܝܢ ܠܫܰܒܗܪ̈ܳܢܶܐ ܡܚܰܘܶܐ ܛܽܘܒܬܳܢܳܐ ܕܰܘܝܕ. ܒܡܰܙܡܽܘܪܳܐ ܗܳܢܐ ܕܫܰܒܥܺܝܢ ܘܰܬܠܳܬܳܐ ܡܰܠܦܳܢܽܘܬܐ ܕܠܐ ܐܢܳܫ ܢܶܛܰܢ ܒܥܰܘܴ̈ܠܐܷ܆ ܟܰܕ ܗܽܘ ܒܰܡܝܰܬܪܽܘܬܐ ܡܶܬܕܰܒܰܪ. ܗܳܕܐ ܓܶܝܪ ܕܟܰܕ ܐܢܳܫ ܢܶܛܰܢ ܒܒܺܝ̈ܫܶܐ. ܘܟܰܕ ܠܐ ܢܶܥܒܶܕ ܗܽܘ ܐܰܟܘܳܬܗܘܢ܆ ܡܶܬܕܰܡܝܳܢܽܘܬܐ ܡܶܕܶܡ ܩܳܢܶܐ ܐܰܟܘܳܬܗܘܢ. ܘܶܐܢ ܒܣܽܘܥܪ̈ܳܢܶܐ ܠܐ ܡܶܬܢܰܚܰܬ. ܐܠܐ ܪ̈ܶܓܠܐ ܕܢܰܦܫܶܗ ܡܳܪ̈ܓܳܢ ܠܗܶܝܢ. ܠܘܳܬ ܡܶܨܛܰܠܝܳܢܽܘܬܐ ܕܡܶܢ ܩܰܘܡܳܐ ܬܪܺܝܨܳܐ. ܬܘܒ ܕܶܝܢ ܡܰܟܣܳܢܽܘܬܐ ܡܰܦܶܩ ܠܽܘܩܒܰܠ ܫܰܒܗܪ̈ܳܢܶܐ. ܟܰܕ ܡܚܰܘܶܐ ܠܗܘܢ ܕܡܰܕܪܟܳܐ ܠܗܽܘܢ ܡܚܽܘܬܳܐ ܕܰܐܠܗܐ. ܘܰܕܠܐ ܬܰܚܦܺܝܬܳܐ ܡܶܬܓܰܠܝܴ̈ܢ ܒܺܝ̈ܫܳܬܗܘܢ ܒܰܝܢܳܬ ܗܳܠܝܢ ܡܚܰܘܶܐ ܕܰܐܠܗܐ ܛܳܒܽܘܬܶܗ. ܠܘܳܬ ܐܰܝܠܶܝܢ ܕܰܒܪܺܝܪܺܝܢ ܒܠܶܒܗܘܢ ܡܦܰܢܶܐ ܠܳܗ̇ ܟܰܕ ܐܳܡܰܪ.
ܐܰܠܗܳܐ ܛܳܒ ܠܺܝܣܪܳܐܝܠ ܘܠܰܒܪܺܝܪ̈ܰܝ ܠܶܒܳܐ. ܠܗܳܢܘܢ ܕܶܝܢ ܕܒܰܒܪܺܝܪܽܘܬܳܐ ܘܒܰܦܫܺܝܛܽܘܬܳܐ ܕܠܶܒܗܘܢ ܡܫܰܒܚܺܝܢ ܠܐܠܗܳܐ܆ ܛܳܒ ܐܰܠܗܳܐ ܘܰܡܪܰܚܡܳܢ. ܐܶܢܕܶܝܢ ܡܶܢ ܒܪܺܝܪܽܘܬܳܐ ܢܶܣܛܶܐ ܒܰܪܢܳܫܳܐ ܘܠܐ ܐܰܠܗܳܐ ܐܺܝܬܰܘܗܝ ܠܶܗ ܛܳܒܳܐ. ܒܗܳܝ ܕܡܰܣܒܰܪ ܒܰܪܢܳܫܳܐ ܡܳܐ ܕܚܳܙܶܐ ܟܰܗܺܝܢܽܘܬܐ ܕܐܢܳܫܴ̈ܐ ܪ̈ܰܫܺܝܥܶܐ. ܥܰܠ ܕܡܰܨܠܚܺܝܢ ܒܩܶܢܝ̈ܢܶܐ ܘܒܰܡܫܰܠܛܽܘܬܐ ܕܥܰܠ ܣܰܓܺܝ̈ܐܐ. ܕܶܐܠܘ ܣܢܶܝܢ ܗܘܰܘ ܥܒܳܕܰܝ̈ܗܘܢ ܒܥܰܝ̈ܢܰܝ ܐܰܠܗܐ܆ ܠܐ ܡܰܗܡܶܐ ܗܘܳܐ ܠܟܰܗܺܝܢܽܘܬܗܘܢ. ܘܡܳܐ ܕܗܳܕܐ ܐܴܡܰܪ ܐܢܳܫ܆ ܠܐ ܡܚܰܪܰܪ ܠܶܗ ܠܐܠܗܳܐ ܡܶܢ ܫܰܘܬܳܦܽܘܬܐ ܕܥܰܡ ܪ̈ܰܫܺܝܥܶܐ. ܘܛܽܘܒܬܳܢܳܐ ܕܰܘܝܕ ܟܰܕ ܠܗܳܠܶܝܢ ܡܙܰܗܰܪ ܐܳܦ ܡܰܠܶܦ ܘܳܐܡܰܪ:
ܘܶܐܢܳܐ ܥܰܕ ܩܰܠܺܝܠ ܡܶܨܛܰܠܝܴ̈ܢ ܗܘܱ̈ܝ ܪ̈ܶܓܠܰܝ: ܘܰܐܝܟ ܠܐ ܡܶܕܶܡ ܡܶܬܐܰܫ̈ܕܳܢ ܗܘܱ̈ܝ ܗܰܠܟܴ̈ܬܝ. ܘܗܳܠܝܢ ܠܡܳܢܳܐ ܟܰܕ ܠܐ ܣܛܺܝܬ ܡܶܢ ܦܫܺܝܛܽܘܬܐ ܘܰܒܪܺܝܪܽܘܬܳܐ. ܘܩܳܡܶܬ ܒܰܡܢܳܬܳܐ ܕܗܳܢܘܢ ܕܛܳܢܺܝܢ ܒܥܰܘܴ̈ܠܐܷ. ܘܰܒܗܳܕܐ ܩܰܪܺܝܒ ܗܘܺܝܬ ܠܡܶܦܰܠ ܡܶܢ ܪܰܘܡܳܐ ܕܙܰܕܺܝܩܽܘܬܳܐ܆ ܕܝܶܗܒܶܬ ܢܰܦܫܝ ܕܠܐ ܐܶܬܗܰܦܰܟ ܒܰܒܪܺܝܪܽܘܬܳܐ. ܘܶܐܙܰܕܶܩ ܠܗܰܘ ܕܟܽܠ ܡܶܕܶܡ ܚܰܟܺܝܡܳܐܝ̣ܬ ܗܽܘ ܡܕܰܒܰܪ. ܘܰܕܠܐ ܥܶܕܠܳܝ ܡܦܰܪܢܶܣ.
ܡܶܛܠ ܕܛܶܢܶܬ ܒܥܰܘܴ̈ܠܐܷ: ܟܰܕ ܚܳܙܶܐ ܗܘܺܝܬ ܫܠܳܡܳܐ ܕܪ̈ܰܫܺܝܥܶܐ. ܗܺܝ ܠܰܡ ܗܳܕܐ ܥܳܒܕܳܐ ܗܘܳܬ ܠܺܝ ܕܢܶܨܛܰܠܝ̈ܢ ܗܘ̈ܝ ܪ̈ܶܓܠܰܝ. ܡܶܢ ܪܰܘܡܳܐ ܕܽܐܘܪܚܳܐ ܕܟܺܐܢܽܘܬܐ. ܘܟܰܕ ܛܳܒ ܠܰܘ ܠܰܥܒܳܕܳܐ ܒܺܝܫܳܐ ܐܶܫܬܰܘܬܦܶܬ. ܐܶܠܐ ܒܰܠܚܽܘܕ ܟܰܕ ܛܢܳܢܳܐ ܕܰܒܗܳܠܝܢ ܐܶܬܬܙܺܝܥ ܒܢܰܦܫܝ. ܘܡܶܢ ܥܒܳܕܰܝ̈ܗܘܢ ܣܰܓܺܝ ܪܰܚܺܝܩ ܐܢܳܐ.
ܡܶܛܠ ܕܠܰܝܬ ܣܳܟܳܐ ܠܡܰܘܬܗܘܢ: ܘܣܰܓܺܝܳܐܐ ܗܝ ܫܳܛܝܽܘܬܗܘܢ. ܘܰܒܥܰܡܠܳܐ ܕܐܢܳܫܴ̈ܐ ܠܰܝܬ ܐܶܢܽܘܢ: ܘܥܰܡ ܒܢܰܝ̈ܢܳܫܳܐ ܠܐܴ ܡܶܬܢܰܓܕܺܝܢ. ܡܰܘܬܗܽܘܢ ܠܰܡ ܠܳܐ ܫܳܩܶܠ ܫܽܘܠܳܡܳܐ ܒܚܰܝ̈ܐ. ܘܫܳܛܝܽܘܬܗܘܢ ܥܠܰܝܗܘܢ ܡܶܬܥܰܫܢܳܐ.
ܡܶܛܠ ܗܳܢܳܐ ܐܶܚܕܰܬ ܐܶܢܘܢ ܡܒܰܣܪܳܢܽܘܬܳܐ: ܘܶܐܬܟܰܣܺܝ ܥܰܘܠܗܽܘܢ ܘܪܽܘܫܥܗܽܘܢ. ܘܰܢܦܰܩ ܐܰܝܟ ܬܰܪܒܳܐ ܥܰܘܠܗܽܘܢ. ܒܥܰܡܠܐܴ ܠܰܡ ܕܐܢܳܫܴ̈ܐ ܠܰܝܬ ܐܶܢܘܢ. ܥܰܠ ܕܠܐܴ ܡܶܫܬܰܘܬܦܺܝܢ ܠܚܽܘܠܛܳܢܳܐ ܕܥܰܡ ܙܰܕܺܝ̈ܩܶܐ ܘܠܐ ܠܦܽܘܠܚܳܢܳܐ ܕܟܺܐܢ̈ܐ. ܘܠܐ ܒܡܰܪܕܽܘܬܳܐ ܡܶܬܟܰܘܢܺܝܢ. ܘܡܶܢ ܟܺܐܢܽܘܬܐ ܡܶܬܢܰܓܕܺܝܢ. ܡܶܛܠ ܕܠܰܝܬ ܐܰܬܪܳܐ ܒܢܰܦܫܗܽܘܢ ܠܰܬܝܳܒܽܘܬܐ. ܐܳܦ ܥܰܠܗܳܕܐ ܟܺܐܢܽܘܬܐ ܐܰܗܡܝܰܬ ܡܶܢܗܽܘܢ. ܕܰܐܝܟ ܒܥܺܝܪܳܐ ܘܰܐܝܟ ܥܳܢܴ̈ܐ ܢܶܗܘܽܘܢ ܒܫܰܪ̈ܒܳܬܗܘܢ. ܘܟܰܣܝܰܬ ܗܳܪܟܳܐ ܥܰܠ ܪܽܘܫܥܗܽܘܢ ܐܰܝܟ ܕܶܐܡܰܪ ܢܒܺܝܐ.
ܘܰܥܒܰܕܘ ܐܰܝܟ ܬܰܪܥܺܝܬܳܐ ܕܠܶܒܳܐ܆ ܘܶܐܬܚܰܫܰܒܘ ܘܡܰܠܶܠܘ ܒܺܝܫܬܳܐ. ܟܰܕ ܓܶܝܪ ܡܶܢ ܢܺܝܪܳܐ ܦܠܰܥܘ ܨܰܘܪܗܽܘܢ. ܘܠܐ ܥܡܰܠ ܥܰܡܗܘܢ ܣܳܐܷܡ ܢܳܡܽܘܣܳܐ. ܐܠܐ ܫܒܰܩ ܐܶܢܘܢ ܕܡܶܢ ܬܰܪܥܺܝܬܳܐ ܕܺܝܠܗܘܢ ܢܶܬܕܰܒܪܽܘܢ. ܐܰܝܟ ܛܽܘܗܡܳܐ ܕܰܥܪ̈ܳܕܶܐ ܒܰܥܪ̈ܺܝܪܳܝܶܐ. ܕܡܰܪܺܝܕܺܝܢ ܥܰܠ ܢܳܡܽܘܣܳܐ ܕܦܓܽܘܕ̈ܐ. ܟܰܕ ܡܶܬܚܰܫܒܺܝܢ ܘܰܡܡܰܠܠܺܝܢ ܒܺܝ̈ܫܳܬܳܐ.
ܘܰܛܠܽܘܡܝܳܐ ܥܰܠ ܡܪܰܝܡܳܐ ܡܰܠܶܠܘ. ܘܣܳܡܘ ܦܽܘܡܗܽܘܢ ܒܰܫܡܰܝܳܐ ܘܠܶܫܳܢܗܘܢ ܡܗܰܠܶܟ ܒܰܐܪܥܳܐ. ܒܗܳܝ ܓܶܝܪ ܕܠܰܘ ܡܶܢ ܨܶܒܝܳܢܳܐ ܕܪܽܘܚܳܐ ܝܳܠܦܺܝܢ ܚܰܟܺܝ̈ܡܶܐ ܕܥܳܠܡܳܐ ܗܳܢܐ. ܘܣܰܓܺܝ̈ܐܬܳܐ ܡܡܰܠܠܺܝܢ ܥܠܰܘܗܝ ܕܠܐ ܥܒܰܕ ܐܶܢܶܝܢ. ܘܠܐܴ ܐܶܬܪܰܥܺܝ ܠܡܶܣܥܰܪ ܐܶܢܶܝܢ. ܦܽܘܡܗܽܘܢ ܡܶܢ ܠܘܳܬܗܽܘܢ ܒܰܫܡܰܝܳܐ ܣܳܡܘ. ܡܶܛܠܗܳܢܐ ܢܶܬܡܰܟܟܽܘܢ ܡܶܢ ܬܰܪ̈ܥܝܳܬܗܘܢ. ܘܢܶܗܦܟܽܘܢ ܡܶܢ ܡܰܚܫ̈ܒܳܬܗܘܢ. ܐܰܝܟ ܕܶܐܡܰܪ ܪܽܘܚܳܐ.
ܡܶܛܠ ܗܳܢܐ ܢܶܗܦܽܘܟ ܥܰܡܝ ܠܗܳܪܟܳܐ: ܘܡܰܠܝܳܐܝ̣ܬ ܢܶܫܟܚܽܘܢ ܠܗܽܘܢ ܘܢܺܐܡܪܽܘܢ ܐܰܝܟܰܢ ܝܳܕܰܥ ܐܠܗܳܐ: ܘܺܐܝܬ ܝܺܕܰܥܬܳܐ ܒܰܡܪܰܝܡܳܐ. ܕܗܳܐ ܗܳܠܶܝܢ ܪ̈ܰܫܺܝܥܶܐ ܟܰܗܺܝܢܺܝܢ ܒܥܳܠܡܳܐ ܘܥܰܫܺܝܢܺܝܢ ܒܚܰܝܠܐܴ. ܗܳܠܝܢ ܐܰܝܠܶܝܢ ܕܡܶܢ ܠܥܶܠ ܐܶܬܐܡܰܪ̈ܶܝܢ. ܠܘܳܬ ܢܺܝܫܳܐ ܗܳܢܐ ܐܶܬܡܰܠܰܠܶܝ̈ܢ. ܕܠܰܝܬ ܠܶܗ ܠܐܢܳܫ ܕܰܡܚܰܪܪܳܐ ܢܶܗܘܶܐ ܡܶܢ ܒܺܝܫܬܳܐ. ܡܳܐ ܕܰܐܚܺܝܕ ܛܢܳܢܳܐ ܠܽܘܩܒܰܠ ܗܰܘ ܕܥܳܒܶܕ ܠܳܗ̇. ܡܶܢ ܗܳܕܐ ܓܶܝܪ ܕܢܶܛܰܢ ܒܥܰܘ̈ܠܐܷ ܐܢܳܫ. ܢܳܦܶܩ ܠܗܳܝ ܕܢܺܐܡܰܪ ܕܰܐܝܟܰܢ ܝܳܕܰܥ ܐܰܠܗܳܐ. ܘܰܐܣܒܰܪܘ ܒܛܳܥܝܽܘܬܗܘܢ ܕܰܡܢܳܬܳܐ ܡܶܢ ܐܠܗܳܐ ܐܺܝܬܶܝܗ̇ ܝܺܕܰܥܬܗܘܢ. ܘܡܶܢ ܗܳܠܝܢ ܬܰܪ̈ܥܝܳܬܳܐ ܕܡܰܠܝܴ̈ܢ ܦܣܳܩ ܣܰܒܪܳܐ. ܘܡܰܒ̈ܥܕܳܢ ܡܶܢ ܐܠܗܳܐ. ܕܰܘܝܕ ܗܰܘ ܙܰܕܺܝܩܳܐ ܕܰܡܚܰܪܰܪ ܗܘܳܐ ܢܰܦܫܶܗ ܐܳܡܰܪ:
ܘܶܐܢܳܐ ܒܰܠܚܽܘܕܰܝ ܕܰܟܺܝܬ ܠܶܒܝ: ܘܰܐܫܺܝܓܶܬ ܐܺܝ̈ܕܰܝ ܒܕܰܟܝܽܘܬܳܐ. ܒܡܰܚ̈ܫܒܳܬܳܐ ܕܰܐܝܟ ܗܳܠܝܢ ܠܐ ܫܶܒܩܶܬ ܕܢܶܬܛܰܡܶܐ ܠܶܒܝ ܘܠܐܴ ܝܶܗܒܶܬ ܠܡܰܪ̈ܢܝܳܬܳܐ ܡܥܰܩ̈ܡܳܬܳܐ ܕܰܢܛܰܢ̈ܦܳܢ ܕܰܟܝܽܘܬܳܐ ܕܢܰܦܫܝ. ܘܠܐ ܚܶܫܒܶܬ ܠܐ ܝܳܕܽܘܥܳܐ ܠܗܰܘ ܕܠܐ ܛܥܶܝܢ ܠܶܗ ܚܰܘܪ̈ܶܐ ܕܚܽܘ̈ܫܳܒܰܝܢ. ܐܶܠܐ ܚܠܳܦ ܐܺܝ̈ܕܰܝ ܚܽܘ̈ܫܳܒܰܝ ܐܰܫܺܝܓܶܬ ܘܡܰܪܩܶܬ ܡܶܢ ܨܳܐܬܳܐ. ܟܰܕ ܐܶܢܳܐ ܠܢܰܦܫܝ ܡܟܰܘܶܢ ܐܢܳܐ ܘܡܰܠܶܦ ܐܢܳܐ. ܘܰܐܝܟ ܢܶܓ̈ܕܶܐ ܒܡܰܚܘ̈ܬܳܐ ܕܡܰܪ̈ܢܝܳܬܳܐ ܡܫܰܢܶܩ ܗܘܺܝܬ ܠܺܝ ܐܶܢܳܐ.
ܘܰܗܘܺܝܬ ܠܰܡܚܽܘܬܳܐ ܟܽܠܶܗ ܝܰܘܡܳܐ. ܟܰܕ ܠܐ ܫܳܒܶܩ ܐܢܳܐ ܠܰܙܢܰܝ̈ܐ ܡܰܚܣܪ̈ܳܢܶܐ ܕܢܰܡܪܚܽܘܢ ܥܰܠ ܐܠܗܳܐ܆ ܕܢܶܥܠܽܘܢ ܢܰܪܡܽܘܢ ܙܰܪܥܳܐ ܕܰܐܒܕܳܢܳܐ ܒܢܰܦܫܝ. ܘܰܒܥܳܒܽܘܕܳܐ ܠܐܴ ܐܶܗܕܽܘܣ܆ ܘܰܒܢܽܘܗܪܳܐ ܐܰܩܺܝܡܬܳܗ̇ ܠܢܰܦܫܝ.
ܘܡܰܟܣܳܢܽܘܬܝ ܒܨܰܦܪܳܐ. ܥܶܒܕܶܬ. ܘܟܰܕ ܒܗܳܢܘܢ ܕܡܰܡܪܚܺܝܢ ܡܶܬܥܰܕܰܠ ܐܢܳܐ.
ܘܶܐܢ ܐܶܡܪܶܬ ܕܶܐܥܒܶܕ ܐܰܟܘܳܬܗܘܢ ܥܰܘܠܐܱ ܗܘ ܒܥܰܝ̈ܢܰܝ. ܐܶܢ ܓܶܝܪ ܥܰܠ ܕܛܳܢܶܬ ܒܥܰܘ̈ܠܐ ܩܰܪ̈ܺܝܒܳܢ ܗܘܱ̈ܝ ܪ̈ܶܓܠܰܝ ܠܡܶܨܛܠܳܝܽܘ. ܐܰܝܟܰܢܐ ܠܰܘ ܥܰܘܠܰܐ ܗ̄ܘ ܟܰܕ ܥܳܒܶܕ ܐܢܳܐ ܐܰܟܘܳܬܗܘܢ.
ܥܕܰܡܳܐ ܕܶܐܥܽܘܠ ܠܡܰܩܕܫܶܗ ܕܰܐܠܗܳܐ. ܘܶܐܬܒܰܝܰܢ ܒܚܰܪܬܗܽܘܢ. ܡܳܐ ܠܰܡ ܕܥܶܠܶܬ ܐܶܢܳܐ ܠܡܰܩܕܫܶܗ ܕܰܐܠܗܐ ܘܶܐܬܡܰܛܺܝܬ ܠܗܰܘ ܒܽܘܣܳܡܳܐ ܕܰܠܥܳܠܰܡ. ܘܰܚܙܺܝܬ ܕܟܰܕ ܡܶܬܝܰܗܒܺܝܢ ܗܳܢܘܢ ܕܡܰܠܶܠܘ ܥܰܠ ܡܪܰܝܡܳܐ ܠܬܰܫܢܺܝܩܳܐ ܕܰܠܥܳܠܰܡ. ܘܶܐܬܒܰܝܢܶܬ ܒܚܰܪܬܗܘܢ ܕܰܗܘܳܬ ܠܐܱܒܕܳܢܳܐ. ܠܐ ܡܶܟܺܝܠ ܡܶܬܬܥܺܝܪ ܒܺܝ ܛܢܳܢܳܐ. ܒܗܳܝ ܕܒܰܥܒܳܕܳܐ ܚܳܙܶܐ ܐܢܳܐ. ܕܰܐܝܟ ܢܶܟܠܗܽܘܢ ܦܶܪܥܰܬ ܐܶܢܘܢ ܟܺܐܢܽܘܬܐ ܡܶܛܠܗܳܢܐ ܐܶܡܰܪ.
ܕܰܐܝܟ ܢܶܟܠܗܽܘܢ ܬܣܺܝܡ ܠܗܽܘܢ. ܘܬܰܪܡܶܐ ܐܶܢܘܢ ܟܰܕ ܢܶܬܬܪܺܝܡܽܘܢ. ܘܟܽܠܡܰܢ ܕܢܰܡܶܟ ܢܰܦܫܶܗ ܢܶܬܬܪܺܝܡ܆ ܘܟܽܠ ܕܰܢܪܺܝܡ ܠܳܗ̇ ܠܢܰܦܫܶܗ ܢܶܬܡܰܟܰܟ. ܡܳܕܶܝܢ ܥܰܠܗܳܝ ܕܶܐܬܬܪܺܝܡܘ ܘܶܐܫܬܰܩܰܠܘ ܘܰܐܝܟ ܢܶܟܠܗܘܢ ܣܳܐܷܡ ܠܗܽܘܢ. ܐܰܝܟ ܡܶܠܬܳܐ ܫܠܺܝܚܳܝܬܳܐ ܕܡܰܠܦܳܐ ܕܟܽܠܰܢ ܕܶܝܢ ܥܬܺܝܕܺܝܢܰܢ ܠܰܡܩܳܡ ܩܕܳܡ ܒܺܝܡ ܕܰܡܫܺܝܚܳܐ ܕܢܶܬܦܪܰܥ ܐܢܳܫ ܐܢܳܫ ܒܦܰܓܪܶܗ ܡܶܕܶܡ ܕܰܣܥܺܝܪ ܠܶܗ܇ ܐܶܢ ܕܛܳܒ ܘܶܐܢ ܕܒܺܝܫ (ܒ ܩܘܪ̈ܢܬܝܐ ܗ: ܝ). ܘܰܡܫܰܪܶܐ ܢܒܺܝܐ ܡܰܗܶܠ ܒܰܡܫܰܩܠܽܘܬܗܘܢ ܗܳܝ ܕܥܶܒܪܰܬ ܩܰܠܺܝܠܐܝ̣ܬ ܐܰܝܟ ܚܶܠܡܳܐ ܕܠܺܠܝܳܐ܆
ܐܰܝܟܰܢ ܠܰܡ ܗܘܰܘ ܠܬܶܡܗܳܐ ܡܶܢ ܫܶܠܝܳܐ. ܘܣܳܦܘ ܘܰܓܡܰܪܘ ܡܶܢ ܕܠܽܘܚܝܳܐ: ܘܰܐܝܟ ܗܰܘ ܕܡܶܬܬܥܺܝܪ ܡܳܐ ܕܰܚܙܳܐ ܚܶܠܡܳܐ. ܐܰܝܟܰܢ ܠܰܡ ܐܶܬܡܰܟܰܟܘ ܪ̈ܳܡܶܐ ܘܶܐܫܬܰܦܰܠܘ ܥܰܬܺܝܪ̈ܶܐ. ܐܰܝܟܰܢ ܐܶܬܡܰܣܟܰܢܘ ܫܰܒܗܪ̈ܳܢܶܐ. ܐܰܝܟܰܢ ܐܶܒܕܰܬ ܚܶܟܡܬܳܐ ܕܚܰܟܺܝ̈ܡܶܐ. ܘܰܐܘܦܝܰܬ ܣܰܟܽܘܠܬܳܢܽܘܬܐ ܕܝܰܕܽܘܥ̈ܬܳܢܶܐ. ܐܰܝܟܰܢ ܐܶܬܚܰܒܰܠܘ ܫܽܘܦܪܳܐ ܕܫܰܦܺܝܪ̈ܶܐ. ܘܰܐܘܟܶܡ ܓܰܘܢܳܐ ܕܓܰܐܝܴ̈ܬܳܐ. ܐܰܝܟܰܢ ܢܦܰܠܘ ܬܳܓ̈ܐ ܕܡܰܠܟ̈ܐ ܡܶܢ ܪ̈ܺܝܫܰܝܗܘܢ܆ ܘܩܳܡܘ ܫܰܠܺܝ̈ܛܳܢܶܐ ܥܰܪܛܳܠܐܝ̣ܬ ܒܰܓܠܐܷ ܨܰܘܪܳܐ ܩܕܳܡ ܕܰܝܳܢܳܐ. ܐܰܝܟܰܢ ܐܶܫܬܰܬܰܩ ܪܰܘܒܳܐ ܕܰܪܗܺܝܛܪ̈ܶܐ ܘܢܳܚܰܬ ܒܥܳܬܳܐ ܕܕܳܪ̈ܽܘܫܶܐ. ܐܰܝܟܰܢ ܥܳܒܪܺܝܢ ܚܰܕܘ̈ܬܳܐ ܐܰܝܟ ܚܶܠܡܳܐ ܕܠܺܠܝܳܐ. ܘܰܥܒܰܪܘ ܐܰܝܟ ܛܶܠܳܠܐܴ ܦܽܘܪܓܳܝܳܐ ܕܰܡܦܰܢ̈ܩܳܬܳܐ. ܘܠܐ ܣܶܦܩܰܬ ܗܳܕܐ ܕܡܶܢ ܛܳܒ̈ܬܳܐ ܐܶܬܓܠܶܙܘ ܕܰܬܢܳܢ. ܐܠܐ ܒܥܶܠܕܒܳܒܳܐ ܡܶܟܺܝܠ ܐܝ̣ܬ ܠܗܽܘܢ. ܗܰܘ ܕܫܰܠܺܝܛ ܥܰܠ ܟܽܠ ܘܡܶܬܒܣܶܝܢ ܡܶܢܶܗ.
ܡܳܪܝܳܐ ܠܰܡ ܒܰܩܪܳܝܬܳܐ ܨܰܠܡܗܽܘܢ ܬܫܽܘܛ. ܡܳܐ ܕܶܐܬܚܰܝܰܒܘ ܡܶܢ ܬܺܐܪܬܗܽܘܢ ܘܶܐܬܡܣܰܪܘ ܡܶܢ ܟܺܐܢܽܘܬܳܐ. ܗܳܝܕܝܢ ܡܰܫܠܶܡ ܠܗܽܘܢ ܠܐܱܪܟܽܘܢܳܐ ܕܚܶܫܽܘܟܳܐ. ܟܰܕ ܠܰܝܬ ܥܠܰܝܗܘܢ ܕܡܽܘܬܳܐ ܕܰܐܠܗܳܐ. ܡܶܛܠܗܳܕܐ ܡܶܬܬܫܺܝܛ ܨܰܠܡܗܽܘܢ ܡܶܢ ܚܰܝ̈ܠܰܘܳܬܐ ܕܰܠܩܽܘܒܠܳܐ. ܠܐܴ ܓܶܝܪ ܡܰܡܪܚܺܝܢ ܕܰܝ̈ܘܶܐ ܥܰܠ ܐܰܝܠܝܢ ܕܰܒܨܰܠܡܳܐ ܕܰܐܠܗܳܐ ܐܶܬܥܒܶܕܘ ܥܕܰܡܳܐ ܕܫܳܩܶܠ ܡܰܠܟܳܐ ܡܶܢܗܽܘܢ ܨܰܠܡܳܐ ܕܺܝܠܶܗ ܐܰܝܟ ܕܰܥܒܰܕ ܠܘܳܬ ܥܰܒܕܳܐ ܚܒܰܢܳܢܳܐ. ܘܶܐܡܰܪ ܡܰܠܟܳܐ ܘܰܠܥܰܒܕܳܐ ܒܰܛܺܝܠܳܐ܆ ܐܰܦܩܽܘܗܝ ܠܚܶܫܽܘܟܳܐ ܒܰܪܳܝܳܐ (ܡܬܝ ܟܒ: ܝܓ). ܒܗܳܕܶܐ ܐܶܡܰܪ ܢܒܺܝܐ܆ ܕܫܳܐܷܛ ܐܠܗܳܐ ܨܰܠܡܳܐ ܕܰܚܬܺܝܪ̈ܶܐ ܒܰܩܪܳܝܬܳܐ. ܗܢܘ ܒܰܟܢܽܘܫܝܳܐ ܪܰܒܳܐ ܕܰܩܕܳܡ ܒܺܐܡܰܐ ܕܺܝܠܶܗ. ܘܰܡܫܰܠܰܚ ܠܗܽܘܢ ܘܰܡܫܰܕܰܪ ܠܬܰܫܢܺܝܩܳܐ ܕܢܽܘܪܳܐ ܘܡܶܬܕܰܠܰܚ ܘܙܳܐܱܥ ܘܳܐܡܰܪ܆
ܘܶܐܢܳܐ ܐܶܬܕܰܠܰܚ ܠܶܒܝ ܘܟܽܘ̈ܠܝܳܬܝ ܐܶܫ̈ܬܰܢܺܝ. ܡܶܢ ܚܙܳܬܳܐ ܡܰܠܝܰܬ ܣܽܘܪܳܕܳܐ.
ܘܶܐܢܳܐ ܠܰܡ ܒܪܺܝܪ ܗܘܺܝܬ ܘܠܐܴ ܝܳܕܰܥ. ܘܠܐܴ ܐܳܡܰܪ ܗܘܺܝܬ ܕܢܳܦܶܩ ܕܺܝܢܳܐ ܥܰܠ ܡܰܪ̈ܳܚܶܐ. ܘܟܰܕ ܐܰܝܟ ܒܪܺܝܪܳܐ ܥܶܒܕܶܬ ܢܰܦܫܝ ܘܚܳܪܶܬ ܠܘܳܬܳܟ.
ܘܰܒܥܺܝܪܳܐ ܗܘܺܝܬ ܥܰܡܳܟ. ܘܠܐܴ ܐܶܬܬܙܺܝܥܶܬ ܒܰܕܪܳܫܳܐ ܠܽܘܩܒܰܠ ܚܰܝܠܐܴ ܕܰܡܕܰܒܪܳܢܽܘܬܳܟ. ܒܗܰܘ ܛܽܘܦܣܳܐ ܕܰܡܬܰܚܬܝܳܐ ܒܥܺܝܪܳܐ ܕܬܰܕܪܶܟ ܠܕܳܒܽܘܪܳܗ̇. ܘܰܟܡܳܐ ܐܶܢ ܡܝܰܩܪܺܝܢ ܡܠܺܝ̈ܠܐܷ ܒܡܶܠܬܳܐ. ܐܰܘ ܒܰܫܒܺܝܚܽܘܬ ܟܝܳܢܳܐ ܒܛܽܘܦܣܳܐ ܕܚܰܝܽܘܬܳܐ ܕܠܐܴ ܡܶܠܬܳܐ. ܘܡܶܛܠ ܗܳܢܐ ܟܰܕ ܫܠܰܚ ܘܰܫܕܳܐ ܡܶܢܶܗ ܢܒܺܝܐ ܟܽܠܳܗ̇ ܫܰܒܗܪܳܢܽܘܬܳܐ. ܣܳܡ ܢܰܦܫܶܗ ܒܬܶܓܡܳܐ ܕܰܒܥܺܝܪܳܐ. ܘܰܐܠܶܦ ܒܗܳܕܐ ܠܟܽܠܗܘܢ ܡܠܺܝ̈ܠܐ. ܕܡܶܢܶܗ ܢܶܬܒܰܝܰܐ ܟܰܕ ܐܳܡܰܪ:
ܒܬܰܪܥܺܝܬܳܟ ܒܰܝܰܐܝܰܢܝ: ܘܒܳܬܰܪ ܐܺܝܩܳܪܳܟ ܕܰܒܰܪܰܝܢܝ. ܕܺܝܠܳܟ ܗܽܘ ܓܶܝܪ ܟܽܠ ܐܺܝܩܳܪܳܐ ܘܪܰܒܽܘܬܳܐ. ܣܳܦܶܩ ܠܺܝ ܕܡܳܐ ܕܝܰܩܰܪܬܳܟ ܐܶܬܝܰܩܰܪ. ܘܠܐ ܐܶܗܘܶܐ ܐܶܢܳܐ ܩܰܕܡܳܐ ܒܺܐܝܩܳܪܳܐ.
ܘܡܳܢܳܐ ܐܺܝܬ ܠܺܝ ܒܰܫܡܰܝܳܐ ܥܰܡܳܟ: ܘܡܳܢܳܐ ܨܒܺܝܬ ܒܰܐܪܥܳܐ. ܘܠܐ ܓܶܝܪ ܒܰܫܡܰܝܳܐ ܝܳܕܰܥ ܐܢܳܐ ܡܳܢܳܐ ܐܺܝܬ ܥܰܡܳܟ ܕܰܐܡܪܰܚ ܘܶܐܒܨܶܐ. ܘܠܐ ܬܘܒ ܡܳܢܰܐ ܗ̄ܘ ܨܶܒܝܳܢܳܟ ܒܰܐܪܥܳܐ ܘܠܐ ܝܳܕܰܥ ܐܢܳܐ. ܗܳܟܰܢܐ ܗܰܘ ܕܒܳܥܶܐ ܕܠܳܟ ܢܶܒܨܶܐ. ܡܰܝܬܶܐ ܕܶܝܢ ܘܳܐܡܰܪ:
ܕܶܐܚܕܰܬ ܐܺܝܕܝ ܕܝܰܡܺܝܢܳܐ: ܘܰܓܡܰܪ ܠܶܒܝ ܘܒܶܣܪܝ ܘܥܽܘܫܢܶܗ ܕܠܶܒܝ. ܟܰܕ ܠܰܡ ܚܳܪܶܬ ܠܘܳܬ ܠܐ ܡܶܬܥܰܩܒܳܢܽܘܬܐ ܕܰܟܝܳܢܳܟ. ܐܺܝܕܝ ܕܝܰܡܺܝܢܳܐ ܐܶܚܕܰܬ. ܗܳܢܰܘ ܕܠܐ ܐܶܫܟܰܚ ܗܰܘܢܳܐ ܠܡܶܬܗܰܦܳܟܽܘ ܒܽܐܘܪܚܳܐ ܕܰܒܥܳܬܳܟ. ܘܰܚܠܳܦ ܗܳܠܶܝܢ ܕܶܝܢ ܐܳܡܰܪ ܐܢܳܐ.
ܡܢܳܬܝ ܒܰܐܠܗܳܐ ܗܝ ܠܥܳܠܰܡ. ܗܳܕܐ ܓܶܝܪ ܣܳܦܩܳܐ ܠܺܝ ܠܚܰܝ̈ܐ ܕܰܐܢܬ ܬܶܗܘܶܐ ܠܺܝ ܡܢܳܬܳܐ ܘܝܳܪܬܽܘܬܳܐ. ܘܡܶܢ ܒܰܝܬܳܟ ܠܐ ܐܶܬܪܰܚܰܩ ܘܠܐ ܐܺܒܰܕ.
ܡܶܛܠ ܗܳܕܐ ܪ̈ܰܚܺܝܩܰܝܟ ܢܺܐܒܕܽܘܢ: ܘܬܰܘܒܶܕ ܠܟܽܠ ܕܛܳܥܺܝܢ ܡܶܢܳܟ ܠܥܳܠܰܡ. ܘܟܽܠܡܰܢ ܕܟܳܦܰܪ ܒܳܟ ܐܶܬܪܰܚܰܩ ܠܶܗ ܡܶܢܳܟ ܘܶܐܒܰܕ ܘܥܰܠܗܳܕܐ ܡܰܝܬܶܐ ܘܳܐܡܰܪ:
ܐܶܢܳܐ ܨܒܺܝܬ ܕܶܐܬܩܰܪܰܒ ܠܐܱܠܗܳܐ. ܘܛܶܐܒ ܠܺܝ ܫܡܳܟ ܡܳܪܝܳܐ ܬܽܘܟܠܳܢܝ: ܘܶܐܫܬܰܥܶܐ ܟܽܠܗܶܝܢ ܬܶܕܡܪ̈ܳܬܳܟ. ܘܰܐܟܪܶܙ ܟܽܠܗܝܢ ܛܰܝ̈ܒܘܳܬܳܟ. ܘܶܐܡܰܠܶܠ ܟܽܠܗܘܢ ܥܽܘܕܪ̈ܳܢܰܝܟ ܘܰܓܒܰܪ̈ܘܳܬܳܟ. ܘܰܐܘܕܶܐ ܠܳܟ ܠܥܳܠܰܡ ܥܳܠܡܺܝܢ܀
ܡܙܡܘܪܐ ܕܫܒܥܝܢ ܘܐܪܒܥܐ
ܡܰܘܕܰܥ ܒܶܗ ܕܡܶܢܩܕܺܝܡ ܐܰܝܟ ܕܰܠܥܺܕܬܳܐ ܩܪܳܝܗܝ ܐܰܠܳܗܳܐ ܠܒܰܪܢܳܫܳܐ: ܘܥܰܠ ܩܪ̈ܳܒܶܐ ܚܰܣܺܝ̈ܢܶܐ ܕܰܥܒܰܕ ܣܳܛܳܢܳܐ ܥܰܡ ܓܶܢܣܳܐ ܕܰܒܢܰܝ̈ܢܳܫܳܐ. ܡܶܢ ܚܰܝܠܐܴ ܕܰܐܠܗܐ ܚܳܝܒܺܝܢ ܚܰܝ̈ܠܰܘܳܬܐ ܕܚܶܫܽܘܟܐ.
ܒܫܽܘܦܪܳܐ ܕܛܳܒ̈ܬܳܐ ܐܠܗܝ̈ܬܳܐ ܡܶܬܒܰܣܰܡ ܗܘܳܐ ܡܶܢܩܕܺܝܡ ܟܝܳܢܳܐ ܐܢܳܫܳܝܳܐ. ܘܰܕܢܶܗܘܶܐ ܒܚܰܝ̈ܐ ܕܰܠܥܳܠܰܡ ܣܳܡܶܗ ܥܳܒܽܘܕܳܐ ܒܦܰܪܕܰܝܣܳܐ ܡܠܐܷ ܛܽܘܒ̈ܐ ܘܥܰܒܕܶܗ ܡܰܠܟܳܐ ܘܫܰܠܺܝܛܳܐ ܥܰܠ ܟܽܠܗܘܢ ܗܳܢܘܢ ܕܠܐ ܡܶܠܬܳܐ. ܘܣܳܡ ܠܶܗ ܬܚܽܘܡܳܐ ܕܠܐ ܢܶܐܟܽܘܠ ܡܶܢ ܐܺܝܠܳܢܳܐ ܗܰܘ ܕܰܐܘܠܶܕ ܒܝܰܕ ܐܽܘܟܠܶܗ ܡܰܘܬܳܐ ܠܰܕܒܶܝܬ ܐܳܕܳܡ. ܠܰܘ ܚܣܳܡܳܐ ܐܺܝܬ ܗܘܳܐ ܠܶܗ ܨܶܝܕ ܒܰܪܢܳܫܳܐ. ܐܰܝܟ ܦܰܩܪܽܘܬܳܐ ܕܡܰܢܺܝܢܳܝ̈ܐ ܐܠܐ ܒܗܳܕܶܐ ܡܶܬܟܪܶܙ ܘܡܶܬܺܝܕܰܥ ܐܠܗܳܐ ܕܺܐܝܬܰܘܗܝ ܡܰܠܝܳܐܝ̣ܬ ܛܳܒܳܐ. ܟܰܕ ܕܶܝܢ ܗܘܳܐ ܬܰܠܡܺܝܕܳܐ ܠܚܰܘܳܐ ܘܰܠܚܶܘܝܳܐ. ܐܶܫܬܰܠܰܚ ܡܶܢ ܛܰܝܒܽܘܬܳܐ ܕܠܐܴ ܡܳܝܽܘܬܽܘܬܳܐ ܕܶܐܬܝܰܗܒܰܬ ܠܶܗ ܡܶܢ ܥܳܒܽܘܕܳܐ ܘܶܐܬܬܠܺܝܛ ܥܰܠ ܕܰܐܥܘܶܠ ܒܢܳܡܽܘܣܳܐ ܕܰܐܠܗܳܐ. ܘܰܢܦܰܩ ܘܰܗܘܳܐ ܥܳܡܽܘܪܳܐ ܒܰܐܪܥܳܐ ܕܡܰܠܝܳܐ ܟܽܘܒ̈ܐ. ܡܶܟܺܝܠ ܟܽܠܗܘܢ ܟܺܐܢ̈ܐ ܐܰܝܠܶܝܢ ܕܰܐܪܓܶܫܘ ܒܡܰܦܽܘܠܬܶܗ ܕܳܐܕܳܡ ܐܰܒܺܝܠܺܝܢ ܗܘܰܘ ܘܒܳܟܶܝܢ. ܟܕ ܡܶܬܬܰܢܚܺܝܢ ܥܰܠ ܬܰܘܚܰܪܬܗܘܢ ܕܰܒܓܰܘ ܐܰܪܥܳܐ ܕܟܽܘܒ̈ܐ ܘܝܰܬܺܝܪܳܐܝܬ ܛܽܘܒܳܢܳܐ ܕܰܘܝܕ ܕܰܒܝܰܕ ܩܺܝܬܳܪܶܗ ܡܰܥܪܶܩ ܗܘܳܐ ܡܶܢܶܗ ܪܽܘܚܳܐ ܒܺܝܫܬܳܐ. ܘܰܒܟܽܠܙܒܰܢ ܟܺܐܒܳܐ ܗܳܢܐ ܫܳܚܶܩ ܗܘܳܐ ܠܶܗ. ܘܡܶܛܠ ܥܳܩܬܳܐ ܗܳܕܐ ܐܳܦ ܡܰܙܡܽܘܪܳܐ ܗܳܢܳܐ ܕܫܰܒܥܺܝܢ ܘܰܐܪܒܥܳܐ ܘܰܐܝܟ ܕܰܒܩܳܠܐ ܕܠܐ ܪܰܚܺܝܩ ܡܶܢ ܒܟܳܬܳܐ ܡܙܰܡܰܪ ܘܳܐܡܰܪ:
ܐܰܠܗܳܐ ܠܡܳܢܳܐ ܛܥܰܝܬܳܢ ܠܥܳܠܰܡ: ܘܰܐܥܫܶܢܬ ܪܽܘܓܙܳܟ ܒܥܳܢܴ̈ܐ ܕܡܰܪܥܺܝܬܳܟ. ܥܶܠܬܳܐ ܕܶܝܢ ܢܣܰܒ ܟܰܕ ܙܰܡܰܪ ܙܡܺܝܪܬܳܐ ܗܳܕܐ܆ ܡܶܢ ܗܳܝ ܕܰܢܦܰܩ ܗܘܳܐ ܡܰܠܐܟܳܐ ܟܰܕ ܡܢܳܐ ܠܥܰܡܳܐ܆ ܘܰܚܪܰܒ ܘܩܰܛܶܠ ܡܶܢ ܕܳܢ ܘܰܥܕܰܡܳܐ ܠܒܺܪ ܫܒܰܥ ܫܰܒܥܺܝܢ ܐܰܠܦܺܝ̈ܢ (ܒ ܫܡܘܐܝܠ ܟܕ: ܝܗ). ܘܗܳܕܶܐ ܡܰܢ ܐܺܝܬܶܝܗ̇ ܥܶܠܬܳܐ ܐܰܝܟ ܕܶܐܡܪܶܬ. ܗܳܝ ܓܶܝܪ ܕܰܛܥܰܝܬܳܢܝ ܠܥܳܠܰܡ. ܥܰܠܗܳܕܐ ܡܰܠܦܳܐ܆ ܘܪܽܘܓܙܳܐ ܬܘܒ ܕܰܥܫܶܢ. ܥܰܠ ܗܰܘ ܕܡܰܥܒܶܕ ܕܬܶܗܘܶܐ ܚܛܺܝܬܳܐ ܥܳܗ̈ܢܳܢ. ܗܳܠܝܢ ܕܶܝܢ ܕܰܐܝܟ ܥܳܢܴ̈ܐ ܛܥܰܘ ܡܶܢ ܛܝܳܪܳܐ ܒܒܺܝ̈ܫܳܬܳܐ ܡܫܰܩܦܺܝܢ. ܟܰܕ ܕܺܐܒ̈ܐ ܐܝܟ ܨܶܒܝܳܢܗܘܢ ܡܚܰܒܠܺܝܢ ܘܣܳܪܚܺܝܢ ܒܥܳܢܴ̈ܐ. ܠܰܝܬ ܪܳܥܝܳܐ ܠܡܶܦܪܰܩ ܠܥܳܢܶܗ. ܠܕܺܐܒ̈ܐ ܠܡܰܥܪܳܩܽܘ ܡܶܢܳܗ̇. ܡܶܛܠ ܗܳܕܐ ܡܦܺܝܣ ܢܒܺܝܐ ܘܳܐܡܰܪ:
ܕܶܐܬܕܰܟܪ ܠܥܺܕܬܳܟ ܕܰܩܢܰܝܬ ܡܶܢ ܩܕܺܝܡ. ܬܰܪܥܺܝܬܳܐ ܠܰܡ ܕܰܗܘܳܬ ܠܳܟ ܥܰܠ ܢܰܦܫܳܐ ܟܰܕ ܡܶܬܩܰܪܝܳܐ ܡܶܢܳܟ܆ ܗܳܕܐ ܗܘܳܬ ܕܰܠܥܳܠܡܺܝܢ ܬܶܗܘܶܐ ܠܳܟ ܡܰܥܡܪܳܐ. ܘܠܰܘ ܕܬܶܗܘܶܐ ܒܶܝܬ ܟܢܽܘܫܝܳܐ ܠܪ̈ܽܘܚܶܐ ܒܺܝ̈ܫܳܬܳܐ. ܘܰܠܗܳܕܐ ܬܘܒ ܡܰܩܶܦ ܠܳܗ̇ ܥܰܡܳܐ ܘܫܰܒܛܳܐ ܩܳܪܶܐ ܠܳܗ̇.
ܘܰܦܪܰܩܬ ܒܫܰܒܛܳܐ ܕܝܳܪܬܽܘܬܳܟ. ܟܡܳܐ ܠܰܡ ܐܶܢ ܚܰܒܺܝܒ ܘܰܪܚܺܝܡ ܠܳܟ ܥܰܡܳܐ. ܡܶܛܠ ܕܙܰܪܥܰܐ ܗ̄ܘ ܟܺܐܢܳܐ ܕܰܐܒܳܗ̈ܬܳܐ. ܐܶܠܐ ܡܢܳܬܰܐ ܗ̄ܘ ܙܥܽܘܪܬܳܐ ܒܦܽܘܚܳܡܳܐ ܕܥܰܡܳܐ ܩܰܕܺܝܫܳܐ ܕܰܒܓܶܠܝܳܢܳܟ ܗܽܘ ܡܶܬܚܙܶܐ. ܡܰܝܬܶܐ ܒܳܬܰܪ ܗܳܕܐ ܘܳܐܡܰܪ܆
ܛܽܘܪܳܐ ܕܨܶܗܝܽܘܢ ܗܳܢܐ ܕܰܫܪܰܝܬ ܒܶܗ. ܡܳܢܰܐ ܗ̄ܘ ܛܽܘܪܳܐ ܕܨܶܗܝܽܘܢ ܕܒܶܗ ܐܳܡܰܪ ܕܰܫܪܳܐ ܐܰܠܗܳܐ؟ ܨܶܗܝܽܘܢ ܐܺܝܬܶܝܗ̇ ܢܰܦܫܳܐ ܩܰܕܺܝܫܬܳܐ ܕܠܐܴ ܬܶܚܛܶܐ. ܘܰܒܪ̈ܰܘܡܶܐ ܥܶܠܳܝ̈ܐ ܥܳܡܪܳܐ ܗܘܳܬ ܥܰܡ ܡܰܠܐܟ̈ܐ. ܘܰܥܒܺܝܕܳܐ ܗܘܳܬ ܒܶܝܬ ܡܰܫܪܝܳܐ ܕܰܐܠܗܳܐ. ܘܡܶܛܠܗܳܢܐ ܡܦܺܝܣ ܢܒܺܝܐ. ܕܬܘܒ ܢܶܥܛܽܘܦ ܐܠܗܳܐ ܘܢܶܬܕܰܟܪܶܗ ܐܰܝܟ ܕܡܶܢܩܕܺܝܡ ܘܢܶܫܪܶܐ ܒܶܗ. ܘܰܢܪܺܝܡ ܪܺܝܫܳܐ ܕܥܰܒ̈ܕܰܘܗܝ ܥܰܠ ܚܰܝ̈ܠܰܘܳܬܐ ܕܡܶܫܬܰܩܠܺܝܢ ܒܥܽܘܫܢܳܐ ܥܰܠ ܥܰܒܕܰܝ̈ܟ.
ܐܰܪܺܝܡ ܠܰܡ ܥܰܒܕܰܝ̈ܟ ܥܰܠ ܐܰܝܠܶܝܢ ܕܡܶܫܬܰܩܠܺܝܢ ܥܠܰܝܢ ܒܥܽܘܫܢܳܟ. ܘܟܽܠ ܕܡܰܒܶܐܫ ܒܥܶܠܕܒܳܒܳܐ ܠܩܽܘܕܫܳܟ: ܐܶܫܬܰܒܗܰܪܘ ܒܥܶܠܕ̈ܒܳܒܰܝܟ ܒܓܰܘ ܥܺܐܕܳܟ. ܩܽܘܕܫܶܗ ܕܰܐܠܗܳܐ ܐܺܝܬܶܝܗ̇ ܗܘܳܬ ܢܰܦܫܳܐ ܡܶܢ ܩܕܳܡ ܕܬܶܚܛܶܐ ܡܶܛܠ ܕܒܳܗ̇ ܥܳܡܰܪ ܗܘܳܐ ܐܰܠܗܳܐ. ܘܰܐܒܶܐܫ ܠܳܗ̇ ܒܥܶܠܕܒܳܒܳܐ ܥܰܒܕܳܗ̇ ܕܬܰܫܰܪ ܠܡܶܠܟܶܗ ܕܚܶܘܝܳܐ ܡܰܛܥܝܳܢܳܐ. ܫܰܢܺܝ ܡܶܢܳܗ̇ ܐܠܗܳܐ ܘܰܗܘܳܐ ܡܰܩܕܫܶܗ ܚܰܪܒܳܐ. ܘܗܳܕܳܐ ܗܝ ܒܺܝܫܬܳܐ ܩܰܕܡܳܝܬܳܐ ܕܰܐܒܶܐܫ ܒܥܶܠܕܒܳܒܳܐ ܠܗܳܝ ܕܰܥܒܺܝܕܳܐ ܗܘܳܬ ܒܶܝܬ ܡܰܩܕܫܳܐ ܠܐܠܗܐ. ܗܳܠܝܢ ܕܶܝܢ ܐܚܪ̈ܳܢܶܐ ܡܰܛܥܝ̈ܢܶܐ ܒܥܶܠܕ̈ܒܳܒܰܘܗܝ ܕܰܐܠܗܳܐ ܘܰܕܒܰܪܢܳܫܳܐ. ܘܳܐܦ ܓܶܝܪ ܗܳܢܘܢ ܕܡܶܫܬܰܒܗܪܺܝܢ ܗܘܰܘ ܒܥܺܐܕܳܐ ܩܰܕܡܳܝܳܐ ܕܰܥܒܰܕ ܐܠܗܳܐ ܠܒܰܪܢܳܫܳܐ. ܟܰܕ ܥܰܠ ܠܓܰܢܬܳܐ ܐܳܕܳܡ ܚܠܽܘܠܐܴ ܗܘܳܐ ܘܰܓܢܽܘܢܳܐ ܕܥܺܐܕܳܐ ܦܰܪܕܰܝܣܳܐ ܥܒܺܝܕ ܗܘܳܐ ܠܗܽܘܢ. ܘܟܰܕ ܨܠܰܘ ܦܰܚ̈ܐ ܒܥܶܠܕ̈ܒܳܒܶܐ ܘܨܳܕܽܘܗܝ ܠܫܰܦܺܝܪܳܐ. ܐܶܫܬܰܒܗܰܪܘ ܒܥܶܠܕ̈ܒܳܒܶܐ ܒܓܰܘ ܗܰܘ ܥܺܐܕܳܐ ܩܰܕܺܝܫܳܐ. ܘܥܰܡܰܢܘܐܝܠ ܟܰܕ ܚܰܫ ܒܰܙܩܺܝܦܳܐ ܘܫܰܡܠܺܝ ܡܕܰܒܪܳܢܽܘܬܶܗ ܥܺܐܕܳܐ ܗܘܳܐ ܪܰܒܳܐ ܠܡܳܪܰܢ܆ ܘܰܠܝܽܘ̈ܕܳܝܶܐ ܥܺܐܕܳܐ ܪܰܒܳܐ ܗܘܳܐ ܕܦܶܨܚܳܐ. ܘܰܩܕܳܡ ܕܢܶܐܟܠܽܘܢ ܦܶܨܚܳܐ ܐܳܦ ܐܶܫܬܰܒܗܰܪܘ ܒܓܰܘ ܥܺܐܕܳܐ ܒܥܶܠܕ̈ܒܳܒܶܐ ܕܦܳܪܽܘܩܰܢ ܘܨܰܠܒܽܘܗܝ ܥܰܠ ܩܰܝܣܳܐ. ܘܶܐܫܬܰܡܠܝܰܬ ܗܳܝ ܕܶܐܡܰܪ ܢܒܺܝܐ:
ܕܶܐܫܬܰܒܗܰܪܘ ܒܥܶܠܕ̈ܒܳܒܰܝܟ ܒܓܰܘ ܥܺܐܕܳܟ. ܘܰܥܒܰܕܘ ܐܳܬܘ̈ܬܗܽܘܢ ܐܳܬܘ̈ܬܳܐ: ܘܺܝܕܰܥܬ ܐܰܝܟ ܡܥܰܠܝܳܐ ܕܰܠܥܶܠ. ܒܳܐܬܘ̈ܬܳܐ ܕܰܓ̈ܠܳܬܳܐ ܘܰܒܦܰܢܛܰܣܻ̈ܝܰܐܣ ܡܶܬܚܙܶܝܢ ܕܰܝ̈ܘܶܐ ܠܰܕܒܶܝܬ ܐܳܕܳܡ ܒܟܽܠ ܙܒܰܢ. ܫܰܒܪ̈ܶܐ ܕܶܝܢ ܠܐ ܡܶܫܟܚܺܝܢ ܠܰܡܦܰܪܳܫܽܘ ܘܰܠܡܶܕܰܥ ܕܰܐܝܠܶܝܢ ܐܶܢܝܢ ܐܳܬܘ̈ܬܳܐ ܕܗܳܠܶܝܢ ܐܶܠܐ ܐܰܠܗܳܐ ܕܶܝܢ ܠܐܴ ܛܰܥܝܴ̈ܢ ܠܶܗ. ܘܰܫܒܰܩ ܕܢܶܗܘ̈ܝܳܢ. ܠܰܘ ܡܶܢ ܐܱܝܟ ܕܰܓܒܱ̈ܝܢ ܠܶܗ. ܐܠܐ ܡܳܐ ܕܚܳܙܶܐ ܠܳܗ̇ ܠܢܰܦܫܳܐ ܕܨܳܠܝܳܐ ܨܶܝܕ ܒܺܝ̈ܫܳܬܳܐ. ܟܰܕ ܠܐ ܨܳܒܶܐ ܕܢܶܥܨܶܐ ܠܚܺܐܪܽܘܬܳܐ. ܡܰܗܡܶܐ ܠܶܗ ܠܒܰܪܢܳܫܳܐ ܕܢܶܬܒܰܣܰܡ ܒܰܐܝܠܶܝܢ ܕܰܩܢܶܐ ܠܗܶܝܢ ܗܰܢܺܝܐܘܬܳܐ. ܘܟܰܕ ܒܽܐܘܡܳܢܽܘܬܳܐ ܣܳܥܶܝܢ ܐܰܝܟ ܕܰܒܫܽܘܪܳܝܳܐ. ܐܠܐ ܒܪܽܘܓܙܳܐ ܘܰܒܚܶܡܬܳܐ ܓܳܡܪܺܝܢ ܠܳܗ̇ ܠܒܺܝܫܬܳܐ. ܐܰܝܟܰܢܐ ܕܶܐܡܰܪ ܢܒܺܝܐ:
ܐܰܝܟ ܥܳܒܳܐ ܠܰܡ ܕܩܰܝ̈ܣܶܐ ܒܢܳܪ̈ܓܶܐ ܨܰܠܰܚܘ ܬܰܪ̈ܥܶܐ: ܐܰܟܚܕܳܐ ܒܦܶܠܩܷ̈ܐ ܘܰܒܟܽܘܠܒ̈ܐ. ܠܕܶܡܘ̈ܬܳܐ ܗܳܠܝܢ ܕܡܶܣܬܰܒܪ̈ܳܢ ܩܰܫܝ̈ܬܳܐ ܡܫܰܢܶܝܢ ܒܥܶܠܕ̈ܒܳܒܶܐ ܕܚܰܝܱ̈ܝܢ ܡܳܐ ܕܡܶܫܬܰܠܛܺܝܢ ܥܰܠ ܢܰܦܫܳܐ. ܘܡܶܛܠܗܳܕܐ ܒܰܩܪܳܒܳܐ ܗܰܘ ܩܰܕܡܳܝܳܐ ܗܳܢܰܘ ܒܢܶܟܠܐ ܨܰܠܰܚܘ ܗܘܰܘ ܬܰܪ̈ܥܶܐ ܘܚܰܒܶܠܘ. ܕܩܰܢܝܳܐ ܗܘܳܬ ܢܰܦܫܳܐ ܗܳܢܰܘ ܪ̈ܶܓܫܶܐ ܕܒܰܢ܆ ܫܶܡܥܳܐ ܓܶܝܪ ܘܰܚܙܳܬܳܐ: ܘܣܰܘܩܳܐ: ܘܛܰܥܡܳܐ: ܘܓܶܫܬܳܐ: ܬܰܪ̈ܥܶܐ ܐܶܢܘܢ ܘܡܰܥ̈ܠܳܢܶܐ ܕܒܰܝܬܰܢ ܗܳܢܐ ܕܒܰܐܪܥܳܐ. ܗܳܠܝܢ ܟܰܕ ܩܢܰܘ ܒܥܶܠܕ̈ܒܳܒܶܐ ܒܝܰܕ ܡܰܗܡܝܳܢܽܘܬܳܐ܆ ܐܰܝܟ ܕܰܒܢܳܪ̈ܓܶܐ ܨܰܠܰܚܘ ܐܶܢܘܢ. ܐܰܢܬ ܕܶܝܢ ܠܐܴ ܬܶܬܦܢܶܐ ܡܳܐ ܕܫܳܡܰܥ ܐܰܢܬ ܫܡܳܐ ܕܢܳܪ̈ܓܶܐ ܘܰܕܦܶܠܩ̈ܐ ܘܰܕܟܽܘܠܒ̈ܐ܆ ܘܰܬܚܽܘܪ ܠܘܳܬ ܚܶܙ̈ܘܶܐ ܦܰܓܪ̈ܳܢܳܝܶܐ. ܟܰܕ ܓܶܝܪ ܚܕܳܐ ܗܝ ܒܺܝܫܬܳܐ ܠܫܽܘܚܠܳܦ̈ܐ ܣܰܓܺܝ̈ܐܐ ܡܶܬܦܰܠܓܳܐ. ܘܺܐܝܬ ܡܶܢ ܗܳܢܘܢ ܡܰܪ̈ܳܚܶܐ ܕܰܒܢܳܪ̈ܓܶܐ ܡܶܬܕܰܡܶܝܢ ܦܳܣܩܺܝܢ. ܐܚܪ̈ܳܢܶܐ ܛܥܺܝܢܺܝܢ ܦܶܠܩ̈ܐ ܘܰܡܚܰܘܶܝܢ܆ ܘܰܐܚܪ̈ܳܢܶܐ ܡܕܰܡܶܝܢ ܕܡܶܚܨܳܐ ܚܳܨܶܝܢ ܐܰܝܟ ܗܳܢܘܢ ܕܰܫܩܺܝܠܺܝܢ ܟܽܘܠܒ̈ܐ ܩܰܛܺܝ̈ܢܰܝ ܪܺܝܫܳܐ. ܘܺܐܝܬ ܬܘܒ ܕܰܐܝܟ ܗܰܘ ܕܢܽܘܪܳܐ ܡܣܺܝܦܺܝܢ ܡܳܐ ܕܰܡܫܰܪܶܝܢ ܠܡܶܥܰܠ ܠܒܰܝܬܳܗ̇ ܕܢܰܦܫܳܐ.
ܘܰܐܪܡܺܝܘ ܘܰܐܘܩܶܕ ܒܢܽܘܪܳܐ ܡܰܩܕܫܳܟ: ܘܛܰܘܶܫܘ ܒܰܐܪܥܳܐ ܡܰܫܟܢܳܐ ܕܰܫܡܳܟ. ܘܶܐܡܰܪܘ ܒܠܶܒܗܽܘܢ ܕܢܰܘܒܶܕ ܐܶܢܘܢ ܐܰܟܚܕܳܐ: ܘܢܰܘܒܶܕ ܟܽܠܗܘܢ ܥܰܕܥܺܐܕܰܘ̈ܗܝ ܕܰܐܠܗܳܐ ܡܶܢ ܐܰܪܥܳܐ. ܘܳܐܬܘ̈ܬܗܽܘܢ ܠܐܴ ܚܙܰܘ. ܘܡܶܢ ܒܳܬܰܪ ܕܶܐܨܛܰܠܰܚܘ ܒܢܳܪ̈ܓܶܐ ܬܰܪ̈ܥܶܐ ܘܰܒܦܶܠܩ̈ܐ ܡܶܬܝܰܕܥܳܢ̈ܐ ܐܶܬܦܣܶܩܘ ܐܺܝ̈ܠܳܢܶܐ ܡܠܺܝ̈ܠܐ ܡܶܢ ܗܰܘ ܦܰܪܕܰܝܣܳܐ ܪܽܘܚܳܢܳܐ. ܘܡܶܟܺܝܠ ܡܳܢܳܐ ܡܶܬܪܰܥܶܝܢ ܗܘܰܘ ܥܰܠ ܗܰܘ ܕܰܗܘܳܐ ܬܚܶܝܬ ܡܰܦܽܘܠܬܳܐ. ܐܶܠܐ ܕܰܠܟܽܠܗܘܢ ܒܢܰܝܢ̈ܫܳܐ ܢܰܘܒܕܽܘܢ. ܗܳܢܘܢ ܕܶܐܬܒܠܰܥܘ ܒܛܳܥܝܽܘܬܳܐ ܘܰܒܠܐܴ ܝܺܕܰܥܬܳܐ. ܥܰܠܗܳܝ ܓܶܝܪ ܐܶܡܰܪ ܢܒܺܝܳܐ܆ ܐܳܬܘ̈ܬܗܽܘܢ ܠܐ ܚܙܰܘ. ܠܳܐ ܠܰܡ ܥܰܩܶܒܘ ܘܠܐ ܕܰܪܶܫܘ. ܘܰܐܝܟܳܐ ܕܙܳܕܶܩ ܗܘܳܐ ܕܢܶܒܨܽܘܢ. ܠܐ ܐܶܬܦܰܫܰܚܘ ܒܰܒܨܳܬܳܐ ܠܡܰܦܽܘܠܬܳܐ ܓܶܝܪ ܕܰܒܛܳܥܝܽܘܬܳܐ ܚܦܺܝ̈ܛܶܐ ܘܟܰܫܺܝܪ̈ܶܐ ܥܒܰܕܘ ܐܶܢܘܢ ܠܗܳܢܘܢ ܕܛܳܥܶܝܢ ܗܘܰܘ ܒܳܬܰܪܗܘܢ. ܠܰܒܨܳܬܳܐ ܕܶܝܢ ܕܳܐܬܘ̈ܬܳܐ ܕܰܓ̈ܠܳܬܳܐ ܘܰܠܚܶܙ̈ܘܶܐ ܕܡܰܛܥܝܳܢܽܘܬܳܐ ܚܒܰܢ̈ܢܶܐ ܘܡܰܐܝ̈ܢܶܐ: ܡܶܛܠ ܕܫܰܢܺܝ ܗܘܳܐ ܠܶܗ ܪܽܘܚܳܐ ܕܰܐܠܗܳܐ ܡܶܢ ܒܢܰܝܢ̈ܫܳܐ. ܐܶܡܰܪ ܪܽܘܚܳܐ:
ܕܠܰܝܬ ܢܒܺܝܳܐ. ܘܠܐܴ ܟܺܐܢܳܐ ܕܫܳܘܶܐ ܐܷܫܪܶܐ ܒܶܗ. ܘܢܰܘܕܰܥ ܠܰܒܢܰܝ̈ܢܳܫܳܐ ܥܒܳܕܰܝ̈ܗܘܢ.
ܘܳܐܦܠܐܴ ܐܺܝܬ ܥܰܡܰܢ ܚܰܟܺܝܡܳܐ. ܡܶܛܠܗܳܕܐ ܓܶܝܪ ܥܶܫܢܰܬ ܛܳܥܝܽܘܬܳܐ ܐܳܦ ܐܰܨܠܚܰܬ ܒܺܝܫܬܳܐ. ܥܰܠ ܕܠܰܝܬ ܢܒܺܝܐ ܕܥܳܒܶܕ ܫܠܳܡܳܐ ܘܡܶܬܢܰܒܶܐ. ܘܡܰܟܶܣ ܠܥܳܒ̈ܕܰܝ ܒܺܝ̈ܫܳܬܳܐ. ܘܠܐ ܚܰܟܺܝܡܳܐ ܕܰܡܚܰܘܶܐ ܐܽܘܪܚܳܐ ܘܰܡܣܰܟܶܠ ܥܰܠ ܫܒܺܝ̈ܠܐ. ܠܽܘܩܒܰܠ ܗܳܠܝܢ ܒܺܝ̈ܫܳܬܳܐ ܕܰܥܒܰܕܘ ܒܥܶܠܕ̈ܒܳܒܶܐ ܒܰܡܕܺܝܢܬܶܗ ܕܡܰܠܟܳܐ ܪܰܒܳܐ. ܘܡܶܛܠ ܚܰܪܒܳܐ ܘܫܶܒܝܳܐ ܘܝܰܩܕܳܢܳܐ ܕܰܐܪܡܺܝ ܚܰܣܺܝܢܳܐ ܒܗܰܝܟܠܐܴ ܡܶܬܝܰܕܥܳܢܳܐ ܕܰܐܠܳܗܽܘܬܳܐ. ܡܰܠܶܠ ܢܒܺܝܐ ܠܘܳܬ ܐܰܠܗܳܐ ܘܳܐܡܰܪ:
ܥܕܰܡܳܐ ܠܐܷܡܰܬܝ ܐܰܠܗܳܐ ܡܚܰܣܶܕ ܒܥܶܠܕܒܳܒܳܐ ܘܡܰܪܓܶܙ ܠܰܫܡܳܟ ܠܥܳܠܰܡ. ܗܳܪܟܳܐ ܡܰܘܕܰܥ ܢܒܺܝܐ. ܘܡܶܢ ܒܳܬܰܪ ܕܰܥܒܰܕ ܒܥܶܠܕܒܳܒܳܐ ܠܢܰܦܫܳܐ ܡܶܕܶܡ ܕܰܨܒܳܐ. ܘܰܚܙܳܐ ܕܰܐܘܚܰܪ ܦܳܪܽܘܩܳܐ. ܗܳܝܕܶܝܢ ܒܓܽܘܡܕܳܢܽܘܬܶܗ ܐܳܦ ܠܗܰܘ ܫܡܳܐ ܩܰܕܺܝܫܳܐ ܕܰܐܠܗܳܐ ܡܚܰܣܶܕ ܗܘܳܐ ܩܕܳܡܶܝܗ̇ ܘܰܕܠܐ ܡܶܫܟܰܚ ܚܰܝܠܐ ܕܰܐܠܗܳܐ ܕܢܶܗܘܶܐ ܡܦܰܨܝܳܢܳܐ ܠܰܒܢܰܝ̈ܢܳܫܳܐ. ܥܰܠ ܕܰܡܛܰܫܰܝ ܗܘܳܐ ܥܽܘܕܪܳܢܳܐ ܘܠܰܝܬ ܐܳܬܳܐ ܕܦܽܘܪܩܳܢܳܐ ܕܡܶܬܚܰܙܝܳܐ. ܐܳܡܰܪ ܢܒܺܝܐ:
ܠܡܳܢܳܐ ܐܰܗܦܶܟܬ ܐܺܝܕܳܟ ܘܝܰܡܺܝܢܳܟ ܡܶܢ ܓܰܘ ܥܺܐܕܳܟ. ܥܺܐܕܳܐ ܠܦܽܘܪܩܳܢܳܐ ܕܰܐܠܗܳܐ ܡܫܰܡܰܗ ܢܒܺܝܐ. ܡܶܛܠ ܗܳܢܐ ܠܙܰܒܢܳܐ ܗܰܘ ܕܶܐܬܦܪܶܩ ܒܶܗ ܝܺܣܪܳܐܝܠ ܡܶܢ ܦܶܪܥܽܘܢ. ܠܰܘ ܒܰܠܚܽܘܕ ܥܺܐܕܳܐ ܡܫܰܡܰܗ ܗܘܳܐ ܠܶܗ. ܐܷܠܐ ܥܰܕܥܺܐܕܳܐ ܕܦܶܨܚܳܐ ܡܟܰܢܶܐ ܠܶܗ ܣܳܐܷܡ ܢܳܡܽܘܣܳܐ. ܡܳܕܶܝܢ ܡܫܰܐܷܠ ܢܒܺܝܐ. ܠܡܳܢܳܐ ܥܶܛܦܰܬ ܝܰܡܺܝܢܳܟ ܡܶܢ ܦܽܘܪܩܳܢܳܟ؟ ܘܥܰܠܗܳܕܶܐ ܟܰܕ ܡܶܫܬܰܘܕܰܥ ܠܶܗ ܐܳܡܰܪ:
ܐܰܠܗܰܢ ܡܰܠܟܰܐ ܗܘ: ܕܰܦܩܰܕܬ ܡܶܢ ܩܕܺܝܡ ܥܰܠ ܦܽܘܪܩܳܢܶܗ ܕܝܰܥܩܽܘܒ. ܡܰܠܟܳܐ ܩܳܪܶܐ ܠܶܗ ܠܥܰܡܰܢܘܐܝܠ ܥܰܠ ܕܚܳܙܶܐ ܗܘܳܐ ܠܰܒܥܶܠܕ̈ܒܳܒܶܐ ܕܒܰܕܡܽܘܬ ܓܰܝܴ̈ܣܶܐ ܫܳܒܶܝܢ ܗܘܰܘ ܠܰܓܙܳܪ̈ܰܘܗܝ ܕܰܐܠܗܳܐ. ܘܡܶܛܠܗܳܕܐ ܐܳܡܰܪ ܗܘܳܐ. ܕܥܰܡ ܡܰܠܟܳܐ ܘܰܐܠܗܳܐ ܐܺܝܬ ܠܟܽܘܢ ܐܰܓܽܘܢܳܐ. ܘܗܽܘ ܓܶܝܪ ܦܩܰܕ ܘܶܐܬܦܪܶܩ ܝܰܥܩܽܘܒ ܡܶܢ ܦܶܪܥܽܘܢ ܛܳܠܽܘܡܳܐ.
ܐܰܢܬ ܠܰܡ ܒܥܽܘܫܢܳܟ ܦܪܰܫܬ ܝܰܡ̈ܡܶܐ. ܗܳܕܶܐ ܕܶܝܢ ܠܝܰܡܳܐ ܣܽܘܡܳܩܳܐ ܣܕܰܩܬ ܩܕܳܡ ܡܽܘܫܶܐ. ܗܳܫܐ ܕܶܝܢ ܠܝܰܡܳܐ ܡܶܬܝܰܕܥܳܢܳܐ ܦܪܰܫܬ ܘܰܥܒܰܕܬ ܒܶܗ ܐܽܘܪܚܳܐ ܕܢܶܥܒܰܪ ܥܰܡܳܐ ܕܺܝܠܳܟ.
ܘܬܰܒܰܪܬ ܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܒܡܰܝܴ̈ܐ. ܗܳܝܕܶܝܢ ܓܶܝܪ ܠܡܶܨܪ̈ܳܝܶܐ ܒܝܰܡܳܐ ܕܣܽܘܦ ܛܪܰܦ ܘܰܚܢܰܩ ܐܶܢܘܢ. ܘܰܠܥܺܕܬܳܐ ܦܪܰܩ ܡܶܢ ܚܶܘܝܳܐ ܩܰܕܡܳܝܳܐ. ܘܬܽܘܒ ܒܝܰܡܳܐ ܕܰܥܡܳܕܳܐ ܩܰܕܺܝܫܳܐ. ܗܰܘ ܕܰܡܣܰܡܰܩ ܡܶܢ ܕܡܶܗ ܕܚܰܬܢܳܐ ܡܦܰܨܝܳܢܳܐ. ܘܰܠܪ̈ܽܘܚܶܐ ܗܳܢܝܢ ܡܰܛܥ̈ܝܳܢܝܳܬܳܐ. ܛܰܪܶܦ ܘܰܚܢܰܩ ܒܡܰܝܴ̈ܐ ܚܰܝ̈ܐ ܘܰܠܪܰܒܗܽܘܢ ܕܰܚܘ̈ܘܳܬܳܐ ܣܰܓܺܝ ܪ̈ܺܝܫܶܐ ܘܣܰܓܺܝ ܕܶܡܘ̈ܬܳܐ. ܘܪܰܨܶܨ ܐܰܝܟ ܕܶܐܡܰܪ ܪܽܘܚܳܐ.
ܐܰܢܬ ܪܰܨܶܨܬ ܪ̈ܺܝܫܰܘܗܝ ܕܠܶܘܝܳܬܳܢ: ܘܝܰܗܒܬܳܝܗܝ ܡܶܐܟܽܘܠܬܳܐ ܠܥܰܡܳܐ ܥܰܫܺܝܢܳܐ. ܟܰܕ ܕܶܝܢ ܠܐܴܟܶܠܩܰܪܨܳܐ ܒܠܶܘܝܳܬܳܢ ܡܟܰܢܶܐ ܪܽܘܚܳܐ. ܡܫܰܐܷܠ ܐܢܳܫ ܕܰܐܝܟܰܢܳܐ ܡܶܠܬܳܐ ܕܰܥܠܰܘܗܝ ܡܶܫܬܰܡܥܳܐ. ܕܶܐܬܺܝܗܶܒ ܡܶܐܟܽܘܠܬܳܐ ܠܥܰܡܳܐ ܥܰܫܺܝܢܳܐ. ܒܪܰܡ ܠܗܳܕܐ ܡܥܰܩܶܒ ܐܢܳܐ. ܟܽܠ ܐܰܝܟܳܐ ܕܗܳܘܶܐ ܬܰܟܬܽܘܫܳܐ ܕܰܩܪܳܒܳܐ ܗܰܘ ܕܡܶܙܕܟܶܐ. ܡܶܐܟܽܘܠܬܳܐ ܡܶܬܐܶܡܰܪ ܕܗܰܘ ܕܙܳܟܶܐ. ܘܡܶܛܠܗܳܢܐ ܟܰܕ ܢܦܰܩ ܥܰܡܳܐ ܡܶܢ ܡܶܨܪܶܝܢ. ܘܶܐܬܚܰܝܰܒ ܦܶܪܥܽܘܢ ܘܡܺܝܬ ܒܓܰܘ ܝܰܡܳܐ. ܡܶܐܟܽܘܠܬܳܐ ܗܘܳܐ ܠܥܰܡܳܐ ܕܺܝܣܪܳܐܝܠ. ܒܗܳܝ ܕܟܰܕ ܕܚܳܙܶܝܢ ܗܘܰܘ ܠܦܶܪܥܽܘܢ ܘܰܠܡܶܨܪ̈ܳܝܶܐ. ܕܡܰܝܺܝܬܺܝܢ ܗܘܰܘ ܥܰܠ ܣܶܦܬܶܗ ܕܝܰܡܳܐ ܣܽܘܡܳܩܳܐ܆ ܟܰܕ ܠܗܳܢܐ ܡܰܘܕܰܥ ܗܘܳܐ ܣܳܐܷܡ ܢܳܡܽܘܣܳܐ. ܟܰܕ ܗܦܰܟܘ ܡܶܢ ܓܶܫܬܳܐ ܕܰܐܪܥܳܐ ܓܳܫܽܘ̈ܫܶܐ ܕܫܰܕܰܪ ܡܽܘܫܶܐ. ܟܰܕ ܥܶܣܪܳܐ ܕܰܠܩܽܘܒܠܐܴ ܕܨܶܒܝܳܢܳܐ ܕܰܐܠܗܳܐ ܣܥܰܪܘ. ܟܰܕ ܥܰܒܕܽܘܗܝ ܠܥܰܡܳܐ ܕܢܶܡܪܰܕ ܥܰܠ ܡܽܘܫܶܐ ܘܥܰܠ ܐܰܠܗܳܐ. ܘܝܶܫܽܘܥ ܘܟܳܠܳܒ ܫܰܡܠܺܝܘ ܒܳܬܰܪ ܡܳܪܝܳܐ. ܒܗܳܢܳܐ ܡܳܕܶܝܢ ܢܺܝܫܳܐ܆ ܟܰܕ ܥܰܡܳܐ ܩܰܕܺܝܫܳܐ ܕܰܫܠܺܝܚ̈ܐ ܫܩܰܠܘ ܙܰܝܢܳܐ ܘܰܢܦܰܩܘ ܥܰܠ ܠܶܘܝܳܬܳܢ ܚܶܘܝܳܐ ܚܰܪܡܳܢܳܐ. ܘܥܰܠ ܠܶܘܝܳܬܳܢ ܚܶܘܝܳܐ ܥܩܰܠܩܠܐܴ. ܘܥܰܠ ܬܰܢܺܝܢܳܐ ܗܰܘ ܕܰܒܝܰܡܳܐ. ܡܛܺܝܦ ܗܘܳܐ ܡܰܠܟܳܐ ܡܳܪܝܳܐ. ܡܰܝܴ̈ܐ ܕܝܰܡܳܐ ܣܽܘܡܳܩܳܐ ܥܰܠ ܐܰܦܰܝ̈ܗܽܘܢ ܕܬܰܢܺܝ̈ܢܶܐ ܐܳܦ ܕܚܶܘܝܳܐ ܪܰܒܗܽܘܢ. ܘܡܰܫܠܶܡ ܗܘܳܐ ܠܶܗ ܠܚܶܘܝܳܐ ܠܰܡܣܰܒܪ̈ܳܢܶܐ ܠܗܰܘ ܕܢܶܐܟܠܽܘܢ ܠܗܰܘ ܕܠܐܴ ܡܶܬܒܠܰܥ܆ ܐܶܠܐ ܟܰܕ ܕܳܝܫܺܝܢ ܥܠܰܘܗܝ ܘܥܰܠ ܟܽܠܶܗ ܚܰܝܠܶܗ. ܐܶܡܰܪ ܓܶܝܪ ܪܽܘܚܳܐ.
ܕܰܐܢܬ ܒܰܙܰܥܬ ܡܰܒܽܘܥ̈ܐ ܒܢܰܚ̈ܠܐܷ. ܟܰܕ ܠܰܫܠܺܝܚ̈ܐ ܩܳܪܶܐ ܡܰܒܽܘܥ̈ܐ ܕܡܰܝܴ̈ܐ. ܠܢܰܚ̈ܠܐܷ ܕܶܝܢ ܠܚܰܛܳܝ̈ܐ ܡܟܰܢܶܐ. ܡܶܛܠ ܚܛܳܗܰܝ̈ܗܘܢ ܒܥܽܘܡ̈ܩܶܐ ܗܘܰܘ ܘܢܰܚ̈ܠܐܷ. ܘܰܡܓܰܙܶܝܢ ܗܘܰܘ ܡܶܢ ܡܰܝܴ̈ܐ ܕܡܰܒܽܘܥ̈ܐ ܢܳܒܥܱ̈ܝ ܐܰܡܺܝܢܳܐܝ̣ܬ. ܡܶܛܠܗܳܕܐ ܐܠܗܳܐ ܗܰܘ ܕܶܐܬܓܠܺܝ ܒܰܒܣܰܪ. ܣܥܰܪ ܬܶܕܡܪ̈ܳܬܳܐ ܗܳܠܝܢ. ܘܕܳܫ ܠܬܰܢܺܝܢܐ ܘܩܰܛܠܶܗ ܠܚܶܘܝܐ. ܘܬܰܒܰܪ ܒܰܨܠܺܝܒܶܗ ܪ̈ܺܝܫܰܝܗܘܢ ܕܬܰܢܺܝ̈ܢܶܐ ܒܡܰܝܴ̈ܐ ܕܰܥܡܳܕܳܐ ܩܰܕܺܝܫܳܐ. ܘܰܒܡܰܝܴ̈ܐ ܕܰܪܕܰܘ ܡܶܢ ܣܶܛܪܶܗ. ܐܰܘܒܶܫ ܢܰܗܪ̈ܰܘܳܬܳܐ ܕܝܽܘܠܦܳܢ̈ܐ ܡܰܛܥܝ̈ܢܶܐ. ܘܒܰܙܰܥ ܡܰܒܽܘܥ̈ܐ ܒܢܰܚ̈ܠܐܷ ܕܰܚܛܺܝܬܳܐ. ܕܟܰܕ ܢܰܗܪ̈ܰܘܳܬܳܐ ܝܳܒܫܺܝܢ. ܢܰܚ̈ܠܐ ܡܶܢ ܓܪܽܘܦܝܳܐ ܢܶܬܡܠܽܘܢ. ܐܶܠܐ ܡܳܪܰܢ ܠܰܘ ܡܰܒܽܘܥ̈ܐ ܒܰܙܰܥ܆ ܐܶܠܐ ܐܳܦ ܗܽܘ ܢܰܗܪ̈ܰܘܳܬܳܐ. ܐܶܡܰܪ ܓܶܝܪ ܕܟܽܠ ܡܰܢ ܕܰܡܗܰܝܡܶܢ ܒܺܝ ܐܰܝܟ ܕܶܐܡܰܪ ܟܬܳܒܳܐ܆ ܢܰܗܪ̈ܰܘܳܬܳܐ ܕܡܰܝ̈ܐ ܚܰܝ̈ܐ ܢܶܪܕܽܘܢ ܡܶܢ ܟܰܪܣܶܗ (ܝܘܚܢܢ ܙ: ܠܚ). ܐܶܠܐ ܡܶܛܠܗܳܕܐ ܐܶܡܰܪ ܢܒܺܝܳܐ ܡܰܒܽܘܥ̈ܐ. ܡܶܛܠ ܕܬܶܬܢܛܰܪ ܡܶܠܬܳܐ ܠܗܰܘ ܕܒܶܗ ܐܰܣܺܝܪ ܘܩܳܐܷܡ ܣܳܟܳܐ ܕܰܓܡܺܝܪܽܘܬܳܐ. ܕܗܽܘ ܫܰܠܺܝܛ ܥܰܠ ܕܽܘܒܳܪܳܐ ܕܺܐܝܡܳܡܳܐ ܘܰܕܠܺܠܝܳܐ. ܐܰܝܟ ܕܶܐܡܰܪ ܪܽܘܚܳܐ:
ܕܺܝܠܳܟ ܗܽܘ ܐܺܝܡܳܡܳܐ ܘܕܺܝܠܳܟ ܗܽܘ ܠܺܠܝܳܐ. ܘܗܽܘ ܓܶܝܪ ܝܰܗܒ ܢܳܡܽܘܣܳܐ ܠܰܢܒܺܝ̈ܐ. ܐܰܝܟ ܠܺܠܝܳܐ. ܘܰܦܪܰܫ ܠܰܫܠܺܝ̈ܚܶܐ ܐܰܝܟ ܐܺܝܡܳܡܳܐ. ܗܰܘ ܕܒܶܗ ܚܰܘܺܝ ܕܶܢܚܳܐ ܦܨܺܝܚܳܐ ܕܡܶܐܬܺܝܬܶܗ.
ܘܰܐܢܬ ܠܰܡ ܬܰܩܶܢܬ ܢܽܘܗܪܳܐ ܘܫܶܡܫܳܐ. ܡܶܢ ܩܕܳܡ ܕܠܐܴ ܢܺܐܬܶܐ ܐܰܠܗܳܐ ܡܰܢ ܠܐܱܪܥܳܐ ܒܝܰܕ ܒܶܣܪܳܐ. ܢܽܘܗܪܳܐ ܡܶܬܩܪܶܐ ܗܘܳܐ ܠܚܽܘܕܳܐܝ̣ܬ. ܡܶܛܠ ܕܶܝܢ ܕܰܡܥܰܠܰܝ ܗܘܳܐ ܡܶܢ ܪܽܘܟܳܒܳܐ ܒܰܦܫܺܝܛܽܘܬܳܐ ܕܰܟܝܳܢܶܗ. ܟܰܕ ܕܶܝܢ ܕܢܰܚ ܡܶܢ ܒܬܽܘܠܬܳܐ ܦܰܓܪܳܢܳܐܝ̣ܬ. ܒܫܶܡܫܳܐ ܡܶܬܬܨܺܝܪ ܦܶܠܐܷܬܳܢܳܐܝ̣ܬ. ܡܳܕܶܝܢ ܗܽܘܝܽܘ ܢܽܘܗܪܳܐ ܡܶܢ ܩܕܳܡ ܦܰܓܪܳܢܽܘܬܶܗ. ܘܗܽܘܝܽܘ ܫܶܡܫܳܐ ܡܶܢ ܒܳܬܰܪ ܡܶܬܒܰܪܢܫܽܘܬܶܗ. ܘܳܐܦ ܗܰܘ ܢܽܘܗܪܳܐ ܕܰܗܘܳܐ ܒܪܺܝܫܺܝܬ. ܬܠܳܬܳܐ ܝܰܘ̈ܡܳܬܳܐ. ܦܫܺܝܛܳܐ ܘܠܐܴ ܡܪܰܟܒܳܐ ܐܺܝܬܰܘܗܝ ܗܘܳܐ. ܟܰܕ ܕܶܝܢ ܦܩܰܕ ܐܠܗܳܐ ܘܰܗܘܳܐ ܫܶܡܫܳܐ ܒܝܰܘܡܳܐ ܕܰܐܪܒܥܳܐ. ܐܶܬܟܰܢܰܫ ܢܽܘܗܪܳܐ ܗܰܘ ܦܫܺܝܛܳܐ ܘܰܐܫܺܝܕܳܐ ܠܘܳܬ ܐܶܣܦܺܝܪܳܐ. ܣܳܡ ܒܰܡܪܰܟܒܳܐ ܗܰܘ ܕܥܶܠܳܝ ܗܘܳܐ ܡܶܢ ܪܽܘܟܳܒܳܐ. ܘܠܰܘ ܡܶܫܬܰܚܠܳܦܽܘ ܐܶܫܬܰܚܠܰܦ ܒܗܳܝ ܕܶܐܬܪܰܟܰܒ. ܐܶܠܐ ܩܢܽܘܡܳܐ ܝܺܕܺܝܥܳܐ ܩܢܳܐ. ܫܰܦܺܝܪ ܡܳܕܶܝܢ ܐܶܡܰܪ ܪܽܘܚܳܐ ܒܚܰܕ ܦܶܬܓܳܡܳܐ. ܕܰܐܢܬ ܬܰܩܶܢܬ ܢܽܘܗܪܳܐ ܘܫܶܡܫܳܐ. ܕܰܢܒܰܕܶܩ ܡܬܽܘܡܳܝܽܘܬܶܗ ܕܰܒܪܳܐ ܡܫܺܝܚܳܐ ܕܡܶܢ ܩܕܳܡ ܟܽܠ ܐܻܝܬܰܘܗܝ ܗܘܳܐ ܐܰܝܟ ܢܽܘܗܪܳܐ. ܘܒܳܬܰܪ ܐܶܬܒܰܣܰܪ ܐܰܝܟ ܫܶܡܫܳܐ. ܘܗܽܘ ܣܳܡ ܬܚܽܘܡ̈ܐ ܕܰܐܪܥܳܐ. ܘܰܐܘܬܶܒ ܥܰܡ̈ܡܶܐ ܥܰܠ ܐܰܦܶܝ̈ܗ̇.
ܘܰܐܢܬ ܠܰܡ ܐܰܩܺܝܡܬ ܟܽܠܗܽܘܢ ܬܚܽܘܡ̈ܐ ܕܰܐܪܥܳܐ: ܩܰܝܛܳܐ ܐܳܦ ܣܰܬܘܳܐ ܐܰܢܬ ܒܪܰܝܬ ܐܶܢܘܢ. ܒܩܰܝܛܳܐ ܡܰܡܬܠܐܴ ܠܶܗ ܢܒܺܝܽܘܬܳܐ ܠܙܰܒܢܶܗ ܕܡܳܪܰܢ. ܒܣܰܬܘܳܐ ܬܽܘܒ ܡܶܬܬܨܺܝܪ܆ ܙܰܒܢܳܐ ܕܥܳܠܡܳܐ ܕܰܩܕܳܡ ܨܠܺܝܒܳܐ. ܗܰܘ ܕܡܶܛܠ ܥܰܪܝܳܐ ܘܰܓܠܺܝܕܳܐ ܕܚܰܢܦܽܘܬܳܐ ܕܣܰܓܺܝ ܗܘܳܐ ܒܗܽܘܢ. ܥܒܰܕ ܐܶܢܝܢ ܠܰܐܪ̈ܥܳܬܳܐ ܕܥܰܡܡ̈ܐ ܕܠܐܴ ܦܺܐܪ̈ܶܐ ܕܙܰܕܺܝܩܽܘܬܳܐ. ܥܰܠ ܕܚܳܙܶܐ ܗܘܳܐ ܪܽܘܚܳܐ ܕܒܰܕܡܽܘܬ ܣܰܬܘܳܐ ܡܶܬܩܰܫܶܐ ܗܘܳܐ. ܐܰܠܶܦ ܠܰܢܒܺܝܐ ܕܰܢܨܰܠܐ ܠܘܳܬ ܐܰܠܗܳܐ ܘܢܺܐܡܰܪ:
ܐܶܬܕܰܟܪ ܡܳܪܝܳܐ ܚܶܣܕܶܗ ܕܰܒܥܶܠܕܒܳܒܳܐ: ܥܰܡܳܐ ܣܰܟܠܐܴ ܐܰܪܓܶܙ ܠܰܫܡܳܟ. ܒܥܶܠܕܒܳܒܳܐ ܩܳܪܶܐ ܠܗܰܘ ܕܡܶܢ ܢܰܦܫܶܗ ܦܪܰܫ ܕܢܶܗܘܶܐ ܒܥܶܠܕܒܳܒܳܐ ܠܰܐܠܗܳܐ ܘܰܠܒܰܪܢܳܫܳܐ. ܥܰܡܳܐ ܣܰܟܠܐ ܐܳܦ ܠܗܰܘ ܕܶܐܬܩܰܕܰܡ ܒܣܰܟܠܽܘܬܳܐ ܘܶܐܬܬܚܶܕ ܒܡܰܪܳܚܽܘܬܳܐ. ܘܰܨܠܰܒ ܠܡܳܪܳܗ̇ ܕܬܶܫܒܽܘܚܬܳܐ ܥܰܠܗܳܝ ܩܳܪܶܐ ܠܶܗ ܥܰܡܳܐ ܣܰܟܠܐ ܪܽܘܚܳܐ ܕܰܐܠܗܳܐ ܡܶܟܺܝܠ ܒܳܬܰܪ ܗܳܢܳܐ. ܒܐܪܳܙܳܐ ܕܰܚܙܳܐ ܢܰܦܫܳܐ. ܥܳܐܷܠ ܟܽܘܢܳܝܳܐ ܪܚܺܝܡܳܐ ܕܥܺܕܬܳܐ ܘܳܐܡܰܪ:
ܠܐܴ ܬܶܬܶܠ ܠܰܬܒܳܪܳܐ ܢܰܦܫܳܐ ܕܡܰܘܕܝܳܐ ܠܳܟ: ܘܢܰܦ̈ܫܳܬܳܐ ܟܽܠܗܶܝܢ ܕܡܶܣܟܺܢܰܝ̈ܟ ܠܐܴ ܬܶܛܥܶܐ. ܗܳܫܐ ܓܶܝܪ ܗܘܱ̈ܝ ܠܗܶܝܢ ܥܺܕ̈ܬܳܐ ܣܰܓܺܝ̈ܐܬܳܐ. ܗܳܠܝܢ ܕܰܒܗܶܝܢ ܫܠܺܝ̈ܚܶܐ ܚܠܳܦ ܫܡܳܐ ܕܡܶܣܟܻ̈ܢܶܐ ܡܰܥܶܠ ܪܽܘܚܳܐ. ܘܡܰܥܗܶܕ ܠܶܗ ܠܡܳܪܝܳܐ ܕܢܶܚܙܶܐ ܩܝܳܡܳܐ ܕܰܐܚܺܝܕ ܠܥܺܕܬܶܗ. ܗܰܘ ܕܶܐܡܰܪ: ܕܥܰܠ ܦܰܣ̈ܐ ܕܺܐܝ̈ܕܰܝ ܪܫܰܡܬܶܟܝ (ܐܫܥܝܐ ܡܛ: ܝܘ).
ܚܽܘܪ ܠܰܡ ܡܳܪܝܳܐ ܒܰܩܝܳܡܳܟ: ܡܶܛܠ ܕܶܐܬܡܠܺܝ ܕܰܝܪ̈ܶܐ ܕܰܐܪܥܳܐ ܚܶܫܽܘܟܳܐ ܘܥܰܘܠܐܴ. ܠܰܟܢܽܘ̈ܫܳܬܳܐ ܕܰܦܬܰܟܪ̈ܶܐ ܘܰܠܟܶܢ̈ܫܶܐ ܕܚܰܢܦ̈ܐ ܘܰܕܝܰܘ̈ܢܳܝܶܐ ܩܳܪܶܐ ܕܰܝܪ̈ܶܐ. ܗܳܠܝܢ ܓܶܝܪ ܣܢܺܐܓܪ̈ܶܐ ܥܒܺܝܕܺܝܢ ܗܘܰܘ ܠܰܚܛܺܝܬܳܐ. ܘܟܰܗܺܝܢ ܗܘܳܐ ܥܰܘܳܠܐܴ ܘܦܳܩܶܕ ܫܽܘܩܪܳܐ. ܘܒܰܝܢܳܬ ܗܳܠܝܢ ܡܶܬܩܰܦܰܚ ܗܘܳܐ ܫܪܳܪܳܐ ܡܰܠܝܳܐܝ̣ܬ ܐܰܝܟ ܓܰܒܪܳܐ ܡܶܣܟܺܢܳܐ. ܡܦܺܝܣ ܢܒܺܝܳܐ:
ܕܠܐܴ ܠܰܡ ܢܶܬܶܒ ܡܶܣܟܺܢܳܐ ܟܰܕ ܒܰܗܺܝܬ: ܒܳܝ̈ܫܶܐ ܘܡܶܣܟܺܢ̈ܐ ܢܫܰܒܚܽܘܢ ܠܰܫܡܳܟ. ܗܳܠܶܝܢ ܕܰܠܩܽܘܒܠܐܴ ܒܡܰܠܟ̈ܐ ܘܰܒܪ̈ܺܝܫܳܢܶܐ ܦܳܩܕܺܝܢ. ܘܒܰܡܕܰܒܪ̈ܳܢܶܐ ܘܰܒܪܰܘܪ̈ܒܳܢܶܐ ܡܶܫܬܰܒܗܪܺܝܢ. ܐܰܝܠܶܝܢ ܓܶܝܪ ܕܰܫܪܳܪܳܟ ܡܰܟܪܙܺܝܢ. ܒܳܝ̈ܫܶܐ ܐܶܢܘܢ ܘܡܶܣܟ̈ܢܶܐ. ܡܶܛܠ ܗܳܠܶܝܢ ܕܒܰܩܛܺܝܪܳܐ ܡܶܬܓܰܪܦܺܝܢ.
ܩܽܘܡ ܐܰܠܗܳܐ ܘܕܽܘܢ ܕܺܝ̈ܢܰܝܟ: ܘܶܐܬܕܰܟܪ ܚܶܣܕܳܟ ܕܡܶܢ ܣܰܟ̈ܠܐܷ ܕܟܽܠܝܽܘܡ. ܘܠܐܴ ܬܶܛܥܶܐ ܩܳܠܐ ܕܰܒܥܶܠܕ̈ܒܳܒܰܝܟ ܘܰܕܠܽܘܚܝܳܐ ܕܰܐܝܠܶܝܢ ܕܩܳܝܡܺܝܢ ܥܠܰܝܟ ܕܣܳܠܶܩ ܒܟܽܠܙܒܰܢ. ܕܺܝܢܰܘ̈ܗܝ ܕܰܐܠܗܳܐ ܗܳܠܝܢ ܐܶܢܘܢ. ܕܒܰܪܢܳܫܳܐ ܢܶܬܦܪܶܩ ܘܢܶܬܦܰܨܽܘܢ ܟܽܠܗܘܢ ܥܰܡ̈ܡܶܐ ܡܶܢ ܛܪܽܘܢܽܘܬܶܗ ܕܡܳܪܽܘܕܳܐ. ܘܡܶܛܠ ܗܳܕܐ ܗܘܳܬ ܠܳܗ̇ ܐܳܡܰܪ ܗܘܳܐ ܡܳܪܰܢ. ܕܰܐܪܟܽܘܢܶܗ ܕܥܳܠܡܳܐ ܕܺܝܢ ܗܽܘ (ܝܘܚܢܢ ܝܘ: ܝܐ). ܣܰܟ̈ܠܐܷ ܕܶܝܢ ܠܰܒܢܱ̈ܝ ܚܰܝܠܶܗ ܕܗܰܘ ܡܫܰܡܰܗ. ܘܗܶܢܘܢ ܐܶܢܘܢ ܒܥܶܠܕ̈ܒܳܒܶܐ. ܘܗܶܢܘܢ ܩܳܡܘ ܘܚܰܦܶܛܘ ܠܥܰܡܳܐ ܣܰܟܠܐܴ. ܘܩܳܡܘ ܥܰܠ ܐܠܗܳܐ ܘܪܰܟܶܒܘ ܠܶܗ ܨܠܺܝܒܳܐ. ܕܗܽܘ ܢܶܬܒܰܥ ܬܒܰܥܬܰܢ ܘܢܶܥܒܶܕ ܕܺܝܢܰܢ ܘܰܢܚܰܝܶܒ ܠܰܒܥܶܠܕ̈ܒܳܒܰܝܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܒܥܝܢ ܘܚܡܫܐ
ܡܰܘܕܰܥ ܥܰܠ ܐܰܠܳܗܳܐ ܕܶܐܬܬܕܺܝܢ܆ ܘܥܰܠ ܬܒܰܥܬܳܐ ܕܥܳܒ̈ܕܰܝ ܥܰܘܠܳܐ ܘܰܐܚܪ̈ܳܢܝܳܬܳܐ ܘܥܰܠ ܐܪܳܙܳܐ ܕܥܰܡܰܢܽܘܐܝܠ.
ܥܦܺܝܦܽܘܬ ܩܴ̈ܠܐ ܕܬܰܘܕܺܝܬܳܐ ܡܰܫܡܰܥ ܠܰܢ ܟܶܢܳܪܶܗ ܕܩܺܝܬܳܪܽܘܕܳܐ ܐܰܠܗܳܝܳܐ ܒܬܶܫܒܽܘܚܬܳܐ ܗܳܕܐ ܕܫܰܒܥܺܝܢ ܘܚܰܡܶܫ. ܘܕܳܡܝܳܐ ܡܶܠܬܳܐ ܕܡܰܘܕܥܳܐ ܠܫܳܡܽܘܥ̈ܐ ܕܛܰܝܒܽܘܬܳܐ ܡܶܕܶܡ ܥܦܺܝܦܬܳܐ ܗܘܳܬ ܒܙܰܒܢܳܐ ܗܰܘ ܡܶܢ ܐܰܠܗܳܐ. ܒܥܰܡܳܐ ܕܰܡܕܰܒܰܪ ܗܘܳܐ ܢܒܺܝܳܐ. ܡܶܛܠ ܗܳܕܐ ܓܶܝܪ ܬܰܪܬܶܝܢ ܙܰܒܢܻ̈ܝܢ ܙܰܡܰܪ ܩܴ̈ܠܐ ܕܡܰܘܕܶܝܢ ܠܐܠܗܳܐ ܒܳܬܰܪ ܚ̈ܕܳܕܶܐ. ܥܰܠ ܕܰܢܚܰܘܶܐ ܕܰܥܦܺܝܦܳܐܝ̣ܬ ܚܰܝܳܒ ܕܰܢܩܰܒܶܠ ܛܰܝܒܽܘܬܳܐ ܠܗܰܘ ܕܦܰܨܺܝ ܗܘܳܐ ܠܥܰܡܶܗ ܡܶܢ ܪܽܘܓܙܳܐ. ܘܕܳܡܝܳܐ ܕܗܳܠܶܝܢ ܩܴ̈ܠܐ ܙܰܡܰܪ ܐܶܢܘܢ ܕܰܘܝܕ. ܒܗܰܘ ܙܰܒܢܳܐ ܕܠܶܒܟܰܬ ܐܺܝܕܳܐ ܕܰܐܠܗܳܐ ܟܳܣܳܐ ܕܡܰܘܬܳܐ. ܘܒܳܥܝܳܐ ܗܘܳܬ ܠܡܰܫܩܳܝܽܘ ܠܫܰܒ̈ܛܶܐ ܕܰܒܢ̈ܝ ܥܰܡܳܐ. ܟܰܕ ܓܶܝܪ ܦܣܰܩ ܗܰܘ ܟܺܐܢܳܐ ܬܠܳܬ ܡܰܚ̈ܘܳܬܳܐ. ܥܰܠ ܕܰܘܝܕ ܘܥܰܠ ܝܺܣܪܳܐܝܠ܆ ܡܶܛܠ ܕܰܦܩܰܕ ܕܰܘܝܕ ܘܶܐܬܡܢܺܝ ܥܰܡܳܐ. ܗܽܘ ܕܰܘܝܕ ܒܥܳܐ ܗܘܳܐ ܡܶܢ ܐܠܗܳܐ ܕܠܐܴ ܒܟܰܦܢܳܐ ܢܶܒܠܰܥ ܘܠܐ ܬܘܒ ܒܺܐܝ̈ܕܰܝ ܒܥܶܠܕ̈ܒܳܒܶܐ ܢܶܬܡܣܰܪ. ܐܶܠܐ ܐܰܦܺܝܣ ܕܒܺܐܝ̈ܕܰܝ ܐܠܗܳܐ ܢܩܰܒܶܠ ܡܣܳܡ ܒܪܺܝܫܳܐ. ܟܰܕ ܓܶܝܪ ܬܠܳܬܳܐ ܝܰܘ̈ܡܳܬܳܐ ܦܣܰܩ ܐܠܗܳܐ ܕܢܶܫܬܰܠܰܛ ܡܰܘܬܳܢܳܐ ܒܥܰܡܳܐ. ܘܟܰܕ ܫܰܪܺܝ ܡܰܘܬܳܢܳܐ ܒܥܰܡܳܐ܆ ܡܶܢ ܨܰܦܪܳܐ ܘܰܥܕܰܡܳܐ ܠܫܶܬ ܫܳܥܻ̈ܝܢ܆ ܡܺܝܬܘ ܕܶܝܢ ܡܶܢ ܕܳܢ ܘܰܥܕܰܡܳܐ ܠܒܺܪ ܫܒܰܥ܆ ܫܰܒܥܺܝܢ ܐܰܠܦܻ̈ܝܢ ܡܶܢ ܥܰܡܳܐ (ܒ ܫܡܘܐܝܠ ܟܕ: ܝܗ). ܘܟܰܕ ܚܙܳܐ ܕܰܘܝܕ ܕܚܰܣܺܝܢ ܪܽܘܓܙܳܐ. ܪܗܶܛ ܠܒܳܥܽܘܬܳܐ. ܘܟܰܕ ܚܳܐܱܪ ܗܘܳܐ ܒܡܰܠܐܟܳܐ ܗܰܘ ܡܚܰܒܠܳܢܳܐ܆ ܕܰܬܠܐܷ ܒܶܝܬ ܫܡܰܝܳܐ ܠܐܱܪܥܳܐ܆ ܘܰܫܡܺܝܛ ܣܰܝܦܶܗ ܕܰܢܚܰܒܶܠ ܠܐܽܘܪܺܫܠܶܡ. ܦܫܰܛ ܐܠܗܳܐ ܐܺܝܕܶܗ ܡܶܛܠ ܕܰܘܝܕ. ܘܬܰܟܣܶܗ ܘܰܟܠܳܝܗܝ ܠܡܰܠܐܟܳܐ ܕܡܰܘܬܳܐ. ܘܗܳܕܶܐ ܟܰܕ ܩܪܶܒ ܕܰܘܝܕ ܘܰܢܦܰܠ ܥܰܠ ܐܰܦܰܘ̈ܗܝ ܘܡܶܬܟܰܫܰܦ ܗܘܳܐ ܘܳܐܡܰܪ: ܐܶܢ ܐܶܢܳܐ ܚܛܺܝܬ ܘܰܐܣܟܠܶܬ܆ ܗܳܠܶܝܢ ܥܳܢܴ̈ܐ ܬܰܡܺܝ̈ܡܳܬܳܐ ܡܳܢܳܐ ܥܒܰܕ̈ܝ. ܬܶܗܘܶܐ ܠܳܗ̇ ܐܺܝܕܳܟ ܒܺܝ ܘܰܒܒܶܝܬ ܐܳܒܝ (ܒ ܫܡܘܐܝܠ ܟܕ: ܝܙ). ܘܟܰܕ ܠܗܳܕܐ ܢܰܦܫܳܐ ܡܰܠܝܰܬ ܡܰܟܺܝܟܽܘܬܳܐ ܨܳܬ ܘܰܫܡܰܥ ܐܠܗܳܐ܆ ܡܶܢ ܒܳܬܰܪ ܕܩܰܪܶܒ ܕܰܘܝܕ ܕܶܒܚ̈ܐ ܠܐܱܠܗܳܐ܆ ܥܰܠ ܥܠܳܬܳܐ ܒܶܐܕܪܶܗ ܕܳܐܪܳܢ ܝܳܒܽܘܣܳܝܳܐ܆ ܗܳܢܐ ܕܶܝܢ ܠܰܘ ܡܶܢ ܗܰܘ ܥܰܡܳܐ ܗܘܳܐ ܐܶܠܐ ܡܶܢ ܝܳܒܽܘܣܳܝ̈ܐ. ܗܳܢܰܘ ܕܶܝܢ ܡܶܢ ܥܰܡ̈ܡܶܐ. ܡܶܛܠ ܐܪܳܙܳܐ ܕܥܺܕܬܳܐ ܕܒܳܗ̇ ܐܶܬܩܰܪܒܰܬ ܕܶܒܚܬܳܐ. ܕܬܶܟܣܰܬ ܠܡܰܘܬܳܐ ܘܠܰܡܚܰܒܠܳܢܳܐ ܡܶܢ ܥܳܠܡܳܐ ܟܽܠܶܗ. ܐܶܬܓܠܺܝ ܐܠܗܳܐ ܥܰܠ ܐܰܪܥܳܐ ܘܶܐܬܟܠܺܝ ܡܰܘܬܳܢܳܐ ܡܶܢ ܝܺܣܪܳܐܝܠ. ܒܗܳܢܳܐ ܙܰܒܢܳܐ ܗܢܘ ܥܰܠ ܗܳܠܶܝܢ ܕܶܒܚ̈ܐ ܕܰܣܠܶܩܘ ܒܶܐܕܪܳܐ ܡܙܰܡܰܪ ܗܘܳܐ ܕܰܘܝܕ ܘܰܡܫܰܒܰܚ ܘܳܐܡܰܪ:
ܐܰܘܕܺܝܢܰܢ ܠܳܟ ܐܰܠܗܳܐ. ܐܰܘܕܺܝܢܰܢ ܠܳܟ ܘܰܩܪܰܝܢ ܫܡܳܟ. ܠܡܳܢܳܐ ܥܳܐܷܦ ܠܳܗ̇ ܠܬܰܘܕܺܝܬܶܗ ܘܰܠܡܳܢܳܐ ܬܘܒ ܒܗܳܝ ܬܰܘܕܺܝܬܳܐ ܩܳܪܶܐ ܫܡܶܗ ܕܰܐܠܗܳܐ. ܒܗܳܝ ܩܰܕܡܳܝܬܳܐ. ܗܳܠܝܢ ܓܶܝܪ ܩܰܕܡܳܝ̈ܐ ܡܰܘܕܶܝܢ ܗܘܰܘ ܠܐܱܠܗܳܐ ܘܠܐ ܝܳܕܥܺܝܢ ܗܘܰܘ ܕܰܐܝܢܰܘ ܫܡܶܗ ܕܢܶܩܪܽܘܢܳܝܗܝ. ܐܶܡܰܪ ܓܶܝܪ ܐܰܠܗܳܐ ܠܡܽܘܫܶܐ: ܕܶܐܢܳܐ ܐܺܝܬܰܝ ܡܳܪܝܳܐ ܕܶܐܬܓܠܺܝܬ ܠܰܐܒܪܳܗܳܡ ܘܠܐܺܝܣܚܳܩ ܘܰܠܝܰܥܩܽܘܒ ܒܶܐܠܺܫܰܕܰܝ ܐܰܠܗܳܐ. ܘܫܶܡ ܡܳܪܝܳܐ ܠܐܴ ܚܰܘܺܝܬ ܐܶܢܘܢ (ܡܦܩܢܐ ܘ: ܒ-ܓ). ܘܰܒܗܳܕܶܐ ܡܰܘܕܰܥ ܗܘܳܐ܆ ܕܟܰܕ ܒܰܡܢ̈ܘܳܬܳܐ ܣܰܓܺܝ̈ܐܬܳܐ ܘܰܒܕܶܡ̈ܘܳܬܳܐ ܐܶܬܚܙܺܝ ܘܡܰܠܶܠ ܥܰܡ ܢܒܺܝ̈ܐ ܘܥܰܡ ܐܰܒܗ̈ܬܳܐ. ܐܶܠܐ ܠܐܴ ܫܰܘܕܰܥ ܐܶܢܘܢ ܕܰܐܝܢܰܘ ܫܡܶܗ ܫܰܪܺܝܪܳܐ ܕܰܐܕܽܘܢܰܝ. ܘܰܫܠܶܝܡܽܘܢ ܬܘܒ ܒܡܱ̈ܬܠܐܷ ܪ̈ܽܘܚܳܢܶܐ ܐܳܡܰܪ ܗܘܳܐ܆ ܕܰܐܝܢܰܘ ܫܡܶܗ ܘܰܫܡܳܐ ܕܰܒܪܶܗ ܐܶܢ ܝܳܕܰܥ ܐܰܢܬ (ܡ̈ܬܠܐ ܠ: ܕ)؟ ܠܰܢܒܺܝ̈ܐ ܡܳܕܶܝܢ ܠܳܚܶܡ ܩܳܠܐ ܩܰܕܡܳܝܳܐ. ܗܰܘ ܕܳܐܡܰܪ ܕܰܐܘܕܺܝܢܰܢ ܐܠܗܐ܆ ܠܰܫܠܺܝ̈ܚܶܐ ܕܶܝܢ ܗܰܘ ܕܒܳܬܰܪ ܗܳܢܐ. ܐܰܘܕܺܝܢܰܢ ܠܳܟ ܘܰܩܪܰܝܢ ܫܡܳܟ. ܥܺܕܬܳܐ ܓܶܝܪ ܒܰܫܪܳܪܳܐ ܡܰܘܕܝܳܐ. ܘܒܰܫܪܳܪܳܐ ܩܳܪܝܳܐ ܫܡܶܗ ܕܰܐܠܗܳܐ ܒܬܰܘܕܺܝܬܳܐ ܐܰܝܟ ܕܶܐܡܰܪ. ܐܰܝܟ ܕܶܐܡܰܪ ܗܘܳܐ ܚܰܢܰܢܝܳܐ ܠܦܰܘܠܽܘܣ. ܟܰܕ ܡܰܥܡܶܕ ܠܶܗ. ܕܫܳܐܘܳܠ ܐܳܚܝ ܡܳܪܰܢ ܝܶܫܽܘܥ ܫܰܕܪܰܢܝ܇ ܗܰܘ ܕܶܐܬܚܙܺܝ ܠܳܟ ܒܽܐܘܪܚܳܐ ܟܰܕ ܐܳܬܶܐ ܐܰܢܬ܇ ܐܰܝܟ ܕܢܶܬܦܰܬܚ̈ܢ ܥܰܝ̈ܢܰܝܟ ܘܬܶܬܡܠܐܷ ܪܽܘܚܳܐ ܩܰܕܺܝܫܳܐ (ܦܪܟܣܝܣ ܛ: ܝܙ). ܘܗܳܫܳܐ ܩܽܘܡ ܥܡܰܕ ܟܰܕ ܩܳܪܶܐ ܐܰܢܬ ܫܡܶܗ. ܫܡܶܗ ܗܰܘ ܕܩܳܪܶܝܢܰܢ ܠܐܠܗܳܐ. ܟܰܕ ܡܰܘܕܶܝܢܰܢ ܕܝܶܫܽܘܥ ܗܽܘ. ܘܙܳܕܶܩ ܗܳܟܺܝܠ ܕܢܰܝܬܶܐ ܠܒܽܘܚܳܢܳܐ ܗܳܠܶܝܢ ܕܫܰܪܟܳܐ.
ܘܶܐܫܬܰܥܺܝܢ ܟܽܠܗܶܝܢ ܬܶܕܡܪ̈ܳܬܳܟ. ܐܶܡܰܬܝ ܓܶܝܪ ܐܶܬܦܰܫܰܩ ܠܰܟܝܳܢܳܐ ܐܢܳܫܳܝܳܐ ܠܡܶܫܬܰܥܳܝܽܘ ܬܶܕܡܪ̈ܳܬܳܐ ܕܰܐܠܗܳܐ. ܐܶܠܐ ܟܰܕ ܫܩܰܠܘ ܕܺܝܰܬܺܝܩܺܝ ܕܡܳܪܝܳܐ. ܘܰܢܦܰܩܘ ܐܶܫܬܰܥܺܝܘ ܒܥܰܡ̈ܡܶܐ ܬܶܕܡܪ̈ܳܬܳܐ ܕܰܐܠܗܳܐ ܕܰܥܒܰܕ ܒܓܶܠܝܳܢܶܗ ܕܒܰܒܣܰܪ. ܣܡܰܝܴ̈ܐ ܕܰܚܙܰܘ ܢܽܘܗܪܳܐ: ܕܽܘܓ̈ܐ ܕܰܫܡܰܥܘ: ܚܓܺܝܪ̈ܶܐ ܕܗܰܠܶܟܘ: ܓܰܪ̈ܒܳܢܶܐ ܕܶܐܬܕܰܟܺܝܘ: ܡܺܝ̈ܬܶܐ ܕܶܐܬܢܰܚܰܡܘ: ܘܓܰܝܳܣܳܐ ܕܶܐܬܚܢܶܢ: ܚܰܛܳܝܬܳܐ ܕܶܐܙܕܰܕܩܰܬ: ܗܳܠܝܢ ܗܘܱ̈ܝ ܬܶܕܡܪ̈ܳܬܳܐ ܕܶܐܡܰܪ ܕܰܘܝܕ ܕܶܐܫܬܰܥܺܝܘ ܠܶܗ ܢܒܺܝ̈ܐ. ܐܶܠܐ ܬܰܠܡܺܝ̈ܕܶܐ. ܘܡܶܛܠܗܳܢܐ ܟܰܕ ܚܙܳܐ ܢܒܺܝܐ ܠܓܶܠܝܳܢܳܐ ܢܰܗܺܝܪܳܐ ܕܐܪ̈ܳܙܶܐ ܕܰܐܝܟ ܗܳܠܝܢ ܡܛܰܫܶܝܢ ܒܶܗ. ܝܕܰܥ ܕܠܐܴ ܝܰܗܒ ܠܶܗ ܐܺܝܕܳܐ ܕܰܢܦܰܫܶܩ ܡܶܕܶܡ ܕܰܚܙܳܐ. ܘܡܶܛܠܗܳܕܐ ܐܳܡܰܪ ܪܽܘܚܳܐ. ܐܰܝܟ ܗܰܘ ܕܰܡܚܰܦܝܳܐܝ̣ܬ ܡܰܠܶܠ ܢܒܺܝܳܐ.
ܡܶܛܠ ܠܰܡ ܕܶܐܣܰܒ ܙܰܒܢܳܐ ܘܶܐܢܳܐ ܒܰܬܪܺܝܨܽܘܬܳܐ ܐܶܕܽܘܢ. ܢܶܗܘܶܐ ܠܰܡ ܙܰܒܢܳܐ ܕܠܐ ܢܶܬܝܱ̈ܗܒܳܢ ܠܫܶܬܩܳܐ ܐܰܝܠܶܝܢ ܕܰܒܓܶܠܝܳܢܳܐ ܩܰܒܶܠܘ ܢܒܺܝ̈ܐ. ܐܶܠܐ ܒܰܬܪܺܝܨܽܘܬܳܐ ܢܶܬܡܱ̈ܠܠܳܢ ܐܰܝܠܝܢ ܕܡܰܘ̈ܕܥܳܢ ܦܽܘܪܩܳܢܳܐ. ܬܪܺܝܨܽܘܬܳܐ ܕܶܝܢ ܗܽܘܝܽܘ ܡܳܪܰܢ. ܘܒܳܬܰܪ ܗܳܠܝܢ ܡܰܝܬܶܐ ܘܳܐܡܰܪ.
ܬܶܬܡܰܟܰܟ ܐܰܪܥܳܐ ܘܟܽܠܗܘܢ ܥܳܡܽܘܪ̈ܶܝܗ̇. ܐܰܢܬ ܬܰܩܶܢܬ ܠܥܳܡܽܘܪ̈ܶܝܗ̇. ܒܓܶܠܝܳܢܶܗ ܕܗܰܘ ܕܺܐܝܬܰܘܗܝ ܬܪܺܝܨܽܘܬܳܐ. ܘܶܐܫܬܰܚܠܰܦܘ ܪ̈ܳܡܶܐ ܠܡܰܟܺܝܟܽܘܬܳܐ ܘܰܚܬܺܝܪ̈ܶܐ ܠܒܶܫܘ ܢܰܟܦܽܘܬܳܐ. ܘܒܰܥܪܺܝܪ̈ܳܝܶܐ ܘܩܰܬܳܪ̈ܶܐ ܘܥܰܣ̈ܩܰܝ ܠܰܦܝܳܣܳܐ ܠܒܶܫܘ ܡܫܰܝܢܽܘܬܳܐ. ܘܰܪܥܰܘ ܠܒܺܝ̈ܫܰܝ ܙܰܝܢܳܐ ܣܰܝ̈ܦܰܝܗܘܢ ܠܣܷ̈ܟܰܝ ܦܰܕܳܢܳܐ. ܐܳܦ ܪ̈ܽܘܡܚܰܝܗܘܢ ܠܡܱ̈ܓܠܐܷ. ܘܰܡܥܰܝ̈ܕܰܝ ܠܰܩܪܳܒܳܐ ܐܶܫܬܰܚܠܰܦܘ ܠܚܽܘܒܳܐ ܘܰܠܫܰܝܢܳܐ. ܡܶܛܠ ܕܢܶܦܩܰܬ ܠܰܥܒܳܕܳܐ ܗܳܝ ܕܠܐܴ ܢܶܫܩܽܘܠ ܥܰܡܳܐ ܥܰܠ ܥܰܡܳܐ ܣܰܝܦܳܐ. ܘܬܽܘܒ ܠܐ ܢܺܐܠܦܽܘܢ ܩܪܳܒܳܐ (ܐܫܥܝܐ ܒ: ܕ). ܡܶܛܠ ܕܟܽܠܗܘܢ ܥܰܡ̈ܡܶܐ ܕܰܨܗܶܝܢ ܗܘܰܘ ܠܰܕܡܳܐ ܕܰܚ̈ܕܳܕܶܐ܆ ܠܒܶܫܘ ܬܰܩܢܽܘܬܳܐ ܘܪܳܚܡܽܘܬܳܐ. ܒܗܳܝ ܕܰܐܬܩܶܢ ܐܶܢܘܢ ܨܠܺܝܒܳܐ. ܐܰܝܟ ܕܶܐܡܰܪ ܪܽܘܚܳܐ. ܕܰܐܢܬ ܬܰܩܶܢܬ ܠܥܳܡܽܘܪ̈ܶܝܗ̇.
ܘܰܐܢܬ ܐܶܡܰܪܬ ܠܫܳܛܰܝܴ̈ܐ ܕܠܐܴ ܬܶܫܛܽܘܢ. ܘܰܠܪ̈ܰܫܺܝܥܶܐ ܕܠܐ ܬܪܺܝܡܽܘܢ ܩܰܪܢܳܐ. ܡܶܛܠ ܕܡܰܟܶܟ ܨܠܺܝܒܳܐ ܫܽܘܒܗܳܪܳܐ ܪܳܡܳܐ ܕܰܚܬܺܝܪ̈ܶܐ. ܘܒܰܛܠܰܬ ܡܶܐܬܺܝܬܳܟ ܫܳܛܝܽܘܬܳܐ ܕܥܰܡ̈ܡܶܐ ܕܙܰܢܺܝܘ ܒܰܐܠܗ̈ܐ ܕܰܓܳܠܰܝ̈ ܫܡܳܐ. ܘܛܰܟܣܰܬ ܢܰܟܦܽܘܬܳܟ ܐܶܣܟܺܝ̈ܡܶܐ ܦܰܚ̈ܙܶܐ ܕܙܰܠܺܝܠܽܘܬܳܐ. ܘܡܰܟܶܟܬ ܩܰܪ̈ܢܳܬܳܐ ܕܪ̈ܰܫܺܝܥܶܐ ܕܬܽܘܒ ܠܐܴ ܢܶܕܩܪ̈ܳܢ ܠܙܰܕܺܝܩܽܘܬܳܐ. ܘܰܫܕܰܝܬ ܡܶܢ ܪܰܘܡܳܐ ܠܦܳܠܚܱ̈ܝ ܡܶܢ ܪܽܘܫܥܳܐ. ܕܰܡܪܺܝܡܺܝܢ ܗܘܰܘ ܠܰܡܪܰܘܡܳܐ ܩܰܪܢܗܽܘܢ. ܘܰܠܗܳܠܝܢ ܕܰܒܨܰܘܪܳܐ ܡܗܰܠܟܺܝܢ ܗܘܰܘ. ܐܰܠܶܦ ܐܶܢܘܢ ܨܠܺܝܒܳܐ ܕܠܐ ܢܗܰܠܟܽܘܢ ܒܨܰܘܪܳܐ ܪܳܡܳܐ.
ܡܶܛܠ ܠܰܡ ܕܠܐܴ ܡܰܦܩܳܐ ܡܶܢ ܡܰܥܪܒܳܐ ܘܳܐܦܠܐܴ ܡܶܢ ܡܰܕܒܪܳܐ ܕܛܽܘܪ̈ܶܐ. ܡܳܢܳܐ ܗܝ ܡܶܠܬܳܐ ܗܳܕܶܐ ܕܟܰܣܺܝ ܢܒܺܝܐ ܥܠܶܝܗ̇. ܐܳܦܠܳܐ ܓܶܝܪ ܣܽܘܥܪܳܢܳܐܝ̣ܬ ܕܰܠܺܝܠܰܬ ܠܣܽܘܟܳܠܐ ܡܶܫܬܰܟܚܳܐ. ܒܪܰܡ ܕܶܝܢ ܠܦܽܘܫܳܩܳܗ̇ ܕܠܐ ܕܶܚܠܬܳܐ ܡܶܬܩܰܪܒܺܝܢܰܢ. ܡܰܥܪܒܳܐ ܐܺܝܬܶܝܗ̇ ܦܢܺܝܬܳܐ ܕܰܡܥܳܕܳܐ ܟܬܳܒܳܐ ܟܰܕ ܡܰܡܬܶܠ ܠܳܗ̇ ܒܰܚܛܺܝܬܳܐ. ܘܡܰܦܩܳܢܳܐ ܡܶܡܬܽܘܡ ܠܢܰܗܺܝܪ̈ܶܐ ܡܶܢܳܗ̇ ܠܐ ܗܘܳܬ. ܐܠܐ ܗܳܠܝܢ ܕܡܶܬܝܰܠܕܺܝܢ ܡܶܢ ܓܽܘܕܳܐ ܕܢܽܘܗܪܳܐ. ܒܗܳܕܐ ܡܶܬܚܰܢܩܺܝܢ ܘܒܳܛܠܺܝܢ ܡܶܢ ܢܽܘܗܪܳܐ. ܡܶܛܠ ܡܳܕܶܝܢ ܕܰܒܡܰܥܪܒܳܐ ܡܶܬܝܰܕܥܳܢܺܝܬܳܐ ܥܳܡܰܪ ܗܰܘ ܡܰܠܟܳܐ ܕܚܶܫܽܘܟܳܐ. ܡܰܘܕܰܥ ܢܒܺܝܐ. ܕܠܰܘ ܡܶܢ ܚܶܫܽܘܟܳܐ ܕܳܢܰܚ ܢܽܘܗܪܳܐ. ܘܠܰܘ ܡܶܢ ܚܛܺܝܬܳܐ ܫܳܘܚܳܐ ܙܰܕܺܝܩܽܘܬܳܐ. ܘܒܰܐܬܪܳܐ ܕܥܳܡܪܺܝܢ ܒܶܗ ܡܰܪ̈ܓܙܳܢܶܐ ܡܶܫܬܟܰܚ ܫܰܝܢܳܐ. ܘܕܰܓܳܠ ܗܽܘ ܦܽܘܪܩܳܢܳܐ. ܕܗܰܘ ܕܰܒܡܰܛܥܝܳܢܽܘܬܳܐ ܥܺܝܪ ܡܶܢ ܒܪܺܝܫܺܝܬ. ܘܰܒܡܰܪܺܝܪܳܐ ܚܰܠܝܽܘܬܳܐ ܠܐ ܢܳܒܥܶܐ. ܘܟܽܠܗܘܢ ܫܽܘܘ̈ܕܳܝܰܘܗܝ ܕܗܰܘ ܕܰܓܴ̈ܠܶܐ ܐܶܢܘܢ ܐܰܟܘܳܬܶܗ ܡܰܠܶܦ ܢܒܺܝܐ. ܘܠܐ ܡܶܢ ܡܰܥܪܒܳܐ ܗܘܳܐ ܡܰܦܩܳܐ ܠܢܽܘܗܪܳܐ. ܐܠܐ ܡܶܢ ܡܰܕܢܚܳܐ ܐܶܡܳܐ ܕܢܰܗܺܝܪ̈ܶܐ. ܗܘܳܐ ܡܰܦܩܳܐ ܠܐܠܗܳܐ ܟܰܕ ܐܶܬܳܐ ܠܰܐܪܥܳܐ. ܘܡܶܢ ܬܰܡܳܢ ܝܰܗܒ ܩܳܠܶܗ ܩܳܠܐ ܥܰܫܺܝܢܳܐ. ܘܠܐ ܬܽܘܒ ܡܶܢ ܡܰܕܒܪܳܐ ܕܛܽܘܪ̈ܶܐ. ܢܚܶܬ ܠܰܢ ܗܰܘ ܕܰܦܪܰܩ ܠܰܢ܆ ܐܠܐ ܡܶܢ ܪܰܘܡܳܐ ܕܓܳܓܽܘܠܬܳܐ. ܘܡܶܢ ܛܽܘܪܳܐ ܙܥܽܘܪܳܐ ܗܰܘ ܕܺܐܝܬܰܘܗܝ ܥܰܠ ܓܶܢܒ ܐܽܘܪܺܫܠܶܡ. ܘܡܶܢ ܬܰܡܳܢ ܢܦܰܩ ܐܰܝܟ ܕܰܝܳܢܳܐ ܐܰܠܗܳܐ ܥܰܠ ܟܽܠܗ̇ ܐܰܪܥܳܐ. ܕܰܢܫܰܦܶܠ ܠܪ̈ܳܡܶܐ ܘܰܢܪܺܝܡ ܠܡܰܟܺܝ̈ܟܶܐ. ܘܰܢܩܰܦܰܚ ܠܰܚܬܺܝܪ̈ܶܐ. ܘܰܢܕܽܘܢ ܥܰܡ ܐܰܪܟܽܘܢܶܗ ܕܥܳܠܡܳܐ. ܗܰܘ ܕܡܰܡܠܶܟ ܗܘܳܐ ܒܰܚܛܺܝܬܳܐ. ܘܥܳܡܰܪ ܗܘܳܐ ܒܡܰܥܪܒܳܐ ܡܶܬܝܰܕܥܳܢܺܝܬܳܐ. ܥܰܠܗܳܝ ܐܶܡܰܪ ܢܒܺܝܐ܆
ܡܶܛܠ ܕܰܐܠܗܰܐ ܗܘ ܕܰܝܳܢܳܐ. ܘܰܠܗܳܢܳܐ ܡܫܰܦܶܠ ܘܰܠܗܳܢܳܐ ܡܪܺܝܡ. ܗܳܕܳܐ ܗܝ ܕܶܚܠܰܬ ܐܰܠܗܳܐ ܕܒܳܟ ܩܰܕܡܶܬ ܐܶܡܪܶܬ. ܕܥܰܣܩܰܬ ܠܦܽܘܫܳܩܳܐ ܐܺܝܬܶܝܗ̇ ܡܶܠܬܳܐ ܕܡܰܙܡܽܘܪ̈ܶܐ ܡܶܛܠ ܕܣܰܓܺܝ̈ܐܬܳܐ ܐܶܡܰܪ ܡܙܰܡܪܳܢܳܐ. ܗܳܐ ܐܶܡܰܪ ܕܰܠܗܳܢܳܐ ܡܫܰܦܶܠ ܘܰܠܗܳܢܳܐ ܡܪܺܝܡ. ܘܗܳܢܳܐ ܘܗܳܢܐ ܐܳܡܰܪ. ܘܡܰܢ ܐܶܢܘܢ ܠܐܴ ܨܒܳܐ ܕܰܢܦܰܫܶܩ. ܘܡܶܟܺܝܠ ܡܶܛܠ ܕܰܐܠܗܳܐ ܐܺܝܬܰܘܗܝ ܗܰܘ ܕܕܳܐܷܢ. ܘܡܶܢܶܗ ܕܺܝܢܳܐ ܡܶܣܬܰܟܠܺܝܢܰܢ ܡܳܐ ܕܡܶܬܡܰܟܰܟ ܡܰܠܟܳܐ ܕܚܶܫܽܘܟܳܐ ܘܝܳܩܶܕ ܒܢܽܘܪܳܐ. ܘܡܶܬܬܪܺܝܡ ܐܳܕܳܡ ܒܢܽܘܗܪܳܐ ܓܰܐܝܳܐ ܘܡܶܬܒܰܣܰܡ ܒܡܰܠܟܽܘܬܳܐ ܕܰܫܡܰܝܳܐ. ܢܶܩܪܽܘܒ ܗܳܫܐ ܥܰܡ ܢܒܺܝܐ. ܘܢܶܬܒܰܩܶܐ ܒܗܳܠܝܢ ܕܶܐܡܰܪ ܪܽܘܚܳܐ.
ܡܶܛܠ ܕܟܳܣܳܐ ܒܺܐܝܕܶܗ ܕܡܳܪܝܳܐ܆ ܘܰܡܠܐܷ ܡܙܳܓܳܐ ܕܚܰܡܪܳܐ ܬܛܺܝܪܳܐ: ܐܰܪܟܶܢ ܡܶܢ ܗܳܢܐ ܠܗܳܢܳܐ. ܬܺܛܪܶܗ ܢܰܡܨܽܘܢ ܘܢܶܫܬܽܘܢ ܟܽܠܗܘܢ ܪ̈ܰܫܺܝܥܶܐ ܕܰܐܪܥܳܐ. ܡܳܢܰܐ ܗܘ ܟܳܣܳܐ ܕܒܺܐܝܕܶܗ ܕܡܳܪܝܳܐ. ܗܢܘ ܦܣܳܩܳܐ ܕܰܡܣܳܡ ܒܪܺܝܫܳܐ ܕܡܰܘܬܳܐ ܕܥ̣ܰܠ ܥܰܠ ܥܳܠܡܳܐ ܒܰܚܣܳܡܶܗ ܕܳܐܟܶܠܩܰܪܨܳܐ. ܚܳܙܶܐ ܗܘܳܐ ܡܳܕܶܝܢ ܕܰܘܝܕ ܕܟܰܕ ܢܶܦܩܰܬ ܐܺܝܕܳܐ ܕܰܐܠܗܽܘܬܳܐ ܕܬܶܡܙܽܘܓ ܟܳܣܳܐ ܕܡܰܘܬܳܐ ܬܠܳܬܳܐ ܝܰܘ̈ܡܺܝܢ ܒܫܰܒ̈ܛܶܐ. ܗܳܢܐ ܟܳܣܳܐ ܥܕܰܡܳܐ ܠܰܨܠܺܝܒܳܐ ܐܶܬܡܰܛܺܝ. ܟܰܕ ܒܰܡܨܰܥܬܳܐ ܩܳܐܷܡ ܗܘܳܐ ܒܶܝܬ ܐܰܠܗܳܐ ܘܰܠܐܢܳܫ̈ܐ܆ ܥܕܰܡܳܐ ܠܰܨܠܺܝܒܳܐ ܬܶܛܪܳܐ ܡܠܐܷ ܗܘܳܐ. ܡܶܢ ܕܶܝܢ ܕܶܐܬܚܙܺܝ ܐܰܠܗܳܐ ܡܶܠܬܳܐ ܒܰܒܣܰܪ. ܟܰܕ ܕܶܝܢ ܩܪܶܒ ܕܢܶܗܘܶܐ ܕܶܒܚܶܐ ܗܰܘ ܡܳܪܳܐ ܕܕܶܒܚ̈ܐ. ܥܰܠ ܕܰܢܚܰܘܶܐ ܕܒܰܫܪܳܪܳܐ ܗܘܳܐ ܒܰܪܢܳܫܳܐ. ܡܨܰܠܐܷ ܗܘܳܐ ܐܰܝܟ ܒܰܪܢܳܫܳܐ. ܩܕܳܡ ܐܰܒܽܘܗܝ. ܐܳܒܝ ܐܶܢ ܡܶܫܟܚܳܐ ܢܶܥܒܪܰܢܝ ܟܳܣܳܐ ܗܳܢܐ. ܒܪܰܡ ܠܐܴ ܨܶܒܝܳܢܝ ܕܺܝܠܝ܆ ܐܶܠܐ ܕܺܝܠܳܟ ܢܶܗܘܶܐ (ܡܬܝ ܟܘ: ܠܛ ܘܡܪܩܘܣ ܝܕ: ܠܘ ܘܠܘܩܐ ܟܒ: ܡܒ). ܘܟܰܕ ܛܳܒ ܥܰܡܰܢܘܐܝܠ ܠܰܘ ܬܶܛܪܳܐ ܫܳܬܶܐ ܗܘܳܐ ܡܶܢ ܟܳܣܳܐ. ܐܶܠܐ ܚܰܡܪܳܐ. ܐܳܡܰܪ ܓܶܝܪ ܢܒܺܝܳܐ ܕܰܐܪܟܶܢ ܡܶܢ ܗܳܢܐ ܠܗܳܢܳܐ ܬܶܛܪܶܗ. ܡܳܐ ܓܶܝܪ ܕܶܐܫܬܺܝܘ ܟܽܠܗܘܢ ܐܰܝܠܶܝܢ ܕܡܶܛܠ ܐܳܕܳܡ ܐܶܬܚܰܝܰܒܘ ܒܰܦܣܳܩܳܐ ܗܳܢܐ܆ ܘܰܫܩܰܠ ܫܽܘܠܳܡܳܐ ܪܶܗܛܳܐ ܕܫܰܪ̈ܒܳܬܳܐ. ܘܦܳܫܰܬ ܫܰܪܒܬܳܐ ܕܐܢܳܫܽܘܬܳܐ ܡܶܢ ܬܰܘܠܕ̈ܬܳܐ. ܘܶܐܬܩܰܛܰܥܘ ܛܽܘܗܡ̈ܐ ܘܫܰܪ̈ܒܳܬܳܐ ܡܶܢ ܡܰܦܪܝܳܢܽܘܬܳܐ ܕܰܒܢܰܝܴ̈ܐ܆ ܘܶܐܬܟܰܢܰܫܘ ܕܶܝܢ ܟܽܠܗܘܢ ܝܰܗ̈ܠܐܷ ܩܕܳܡ ܒܺܐܝܡ ܕܕܰܝܳܢܳܐ. ܡܶܢ ܒܳܬܰܪ ܕܰܡܙܰܟܶܐ ܠܙܰܕܺܝ̈ܩܶܐ ܘܰܡܚܰܝܰܒ ܠܪ̈ܰܫܺܝܥܶܐ. ܗܳܝܕܶܝܢ ܡܰܪܟܶܢ ܠܶܗ ܠܟܳܣܳܐ ܕܡܰܘܬܳܐ ܡܶܢ ܐܳܕܳܡ ܕܛܰܥܡܶܗ ܒܰܡܣܳܡ ܒܪܺܝܫܳܐ. ܘܣܳܐܷܡ ܠܶܗ ܥܰܠ ܚܰܝ̈ܠܰܘܳܬܳܐ ܡܳܪ̈ܽܘܕܶܐ ܘܬܶܛܪܶܗ ܢܰܡܨܽܘܢ ܘܢܶܫܬܽܘܢ ܟܽܠܗܘܢ ܪ̈ܰܫܺܝܥܶܐ ܕܰܐܪܥܳܐ. ܘܡܶܢ ܒܳܬܰܪܟܶܢ ܥܳܐܷܠ ܢܒܺܝܐ ܠܒܽܘܣܳܡܳܐ ܕܚܰܝ̈ܐ ܕܠܰܝܬ ܠܗܽܘܢ ܫܽܘܠܳܡܳܐ ܐܰܝܟ ܕܶܐܡܰܪ.
ܘܶܐܢܳܐ ܐܺܚܶܐ ܠܥܳܠܰܡ. ܘܶܐܙܡܰܪ ܠܐܱܠܳܗܶܗ ܕܝܰܥܩܽܘܒ. ܚܙܰܝܬ ܐܰܝܟܰܢܳܐ ܢܰܗܺܝܪܳܐܝ̣ܬ ܢܶܦܩܰܬ ܠܦܽܘܫܳܩܳܐ ܐܰܝܟܰܢܳܐ ܐܶܡܰܪ ܢܒܺܝܐ ܕܰܐܪܟܶܢ ܡܶܢ ܗܳܢܐ ܠܗܳܢܳܐ. ܕܡܰܘܬܳܐ ܗܰܘ ܕܩܳܛܶܠ ܗܘܳܐ ܠܰܕܒܶܝܬ ܐܳܕܳܡ. ܥܛܰܦ ܠܶܗ ܒܰܡܣܳܡ ܒܪܺܝܫܳܐ ܐܚܪܳܝܳܐ. ܥܰܠ ܡܰܠܟܳܐ ܐܰܪܺܫܟܳܝܳܐ ܕܢܶܫܬܶܐ ܒܳܬܰܪܗܽܘܢ. ܡܰܠܟܳܐ ܕܶܝܢ ܐܰܪܺܫܟܳܝܳܐ ܠܐܴܟܶܠܩܰܪܨܳܐ ܩܳܪܶܐ. ܘܡܶܢ ܒܳܬܰܪ ܕܡܶܬܢܣܶܒ ܟܳܣܳܐ ܘܡܶܬܬܣܺܝܡ ܒܺܐܝ̈ܕܰܝ ܐܰܝܠܝܢ ܕܡܰܟܟܽܘܗܝ ܠܒܰܪܢܳܫܳܐ. ܘܰܗܦܰܝܟ ܥܰܠ ܪ̈ܰܫܺܝܥܶܐ ܪܽܘܫܥܗܽܘܢ. ܡܫܰܪܶܝܢ ܠܡܶܬܚܙܳܝܽܘ ܚܰܝ̈ܐ ܕܠܐܴ ܚܒܳܠܐܴ. ܗܳܠܝܢ ܕܦܰܫܶܩ ܐܶܢܘܢ ܢܒܺܝܐ. ܒܗܳܝ ܕܶܐܡܰܪ ܘܶܐܢܳܐ ܐܺܚܶܐ ܠܥܳܠܰܡ. ܗܰܘ ܕܚܳܝܶܐ ܠܥܳܠܰܡ ܠܐ ܬܘܒ ܦܳܓܰܥ ܒܶܗ ܡܰܘܬܳܐ. ܐܶܠܐ ܐܰܓܗܺܝ ܠܶܗ ܡܶܢ ܩܶܢܛܳܐ. ܘܠܰܝܬ ܣܽܘܪܳܕܳܐ ܕܰܚܒܳܠܐܴ ܩܕܳܡ ܥܰܝ̈ܢܰܘܗܝ. ܐܶܠܐ ܡܶܬܟܰܢܶܐ ܒܚܰܕܽܘܬܳܐ ܕܰܒܢܱ̈ܝ ܓܢܽܘܢܳܐ. ܘܰܒܙܽܘܡܳܪܳܐ ܕܰܢܒܺܝ̈ܐ ܐܰܝܟ ܕܶܐܡܰܪ ܪܽܘܚܳܐ. ܘܶܐܙܡܰܪ ܠܶܗ ܠܐܱܠܳܗܶܗ ܕܝܰܥܩܽܘܒ. ܫܰܦܺܝܪ ܥܝܳܕܶܗ ܕܰܢܒܺܝܐ ܡܙܰܡܪܳܢܳܐ. ܥܰܝܶܕ ܠܶܗ ܒܙܽܘܡܳܪܳܐ ܪܽܘܚܳܢܳܐ. ܘܡܳܐ ܕܥܰܠ ܠܚܰܝ̈ܐ ܕܰܠܥܳܠܰܡ ܗܽܘ ܡܶܢ ܙܽܘܡܳܪܳܐ ܠܐ ܨܳܒܶܐ ܢܶܫܠܐܷ. ܥܒܳܕܳܐ ܕܺܝܠܝ ܠܰܡ ܗܳܢܰܘ܆ ܐܰܝܟ ܕܙܶܡܪܶܬ ܗܳܪܟܳܐ ܒܚܰܝ̈ܐ ܕܙܰܒܢܳܐ. ܘܶܐܡܰܬܝ ܕܶܐܥܽܘܠ ܠܚܰܝ̈ܐ ܕܰܠܥܳܠܰܡ. ܐܶܙܡܰܪ ܠܰܐܠܳܗܶܗ ܕܝܰܥܩܽܘܒ.
ܘܟܽܠܗܘܢ ܩܰܪ̈ܢܳܬܳܐ ܕܪ̈ܰܫܺܝܥܶܐ ܐܶܓܰܕܶܡ ܘܢܶܬܬܪ̈ܺܝܡܳܢ ܟܽܠܗܝܢ ܩܰܪ̈ܢܳܬܳܐ ܕܙܰܕܺܝ̈ܩܶܐ. ܗܳܕܐ ܠܰܘ ܕܰܢܒܺܝܳܐ ܗܝ ܕܢܶܥܒܶܕ. ܠܰܘ ܓܶܝܪ ܕܺܝܠܶܗ ܗܺܝ ܕܰܢܒܰܛܶܠ ܟܽܠ ܪܺܝܫ ܘܟܽܠ ܫܽܘܠܛܳܢ ܘܥܰܠ ܚܰܝ̈ܠܺܝܢ. ܐܶܠܐ ܗܳܕܐ ܕܗܰܘ ܓܶܝܪ ܕܰܡܡܰܠܶܠ ܒܰܢܒܺܝܳܐ ܐܺܝܬܶܝܗ̇ ܕܡܶܠܬܳܐ ܐܠܗܳܐ. ܕܰܢܓܰܕܶܡ ܪܺܝܫܳܢܽܘܬܳܐ ܕܪܽܘܫܥܳܐ. ܘܰܢܡܰܟܶܟ ܐܰܪ̈ܟܽܘܢܶܐ ܕܥܰܘܠܐܴ. ܘܰܢܒܰܛܶܠ ܪܺܝܫܳܢܽܘܬܳܐ ܕܡܶܪܕܰܬ ܥܠܰܘܗܝ ܘܢܳܣܶܒ ܬܳܓ̈ܐ ܕܡܰܠܟܘ̈ܬܳܐ. ܘܰܟܠܺܝ̈ܠܐ ܕܫܰܠܺܝܛܳܢ̈ܐ. ܘܚܰܕ ܡܰܠܟܳܐ ܗܰܘ ܕܰܫܪܳܪܳܐ ܢܶܬܚܙܶܐ ܘܢܶܬܶܠ ܡܰܠܟܽܘܬܳܐ ܕܪܽܘܡܪܳܡܳܐ ܠܟܶܢ̈ܫܶܐ ܕܩܰܕܺܝ̈ܫܶܐ. ܘܰܢܪܺܝܡ ܠܥܶܠ ܡܶܢ ܩܕܳܠܐܴ ܕܡܳܪ̈ܽܘܕܶܐ ܩܰܪ̈ܢܳܬܳܐ ܕܙܰܕܺܝ̈ܩܶܐ. ܘܰܢܙܺܝܥ ܒܗܶܝܢ ܪܽܘܚܳܐ ܩܴ̈ܠܐ ܚܠܰܝܴ̈ܐ ܕܙܽܘܡܳܪ̈ܶܐ ܐܰܠܳܗܳܝ̈ܐ. ܕܚܳܫܚܺܝܢ ܠܰܒ̈ܢܰܝ ܡܰܠܟܽܘܬܳܐ. ܘܢܰܘܕܽܘܢ ܘܢܶܣܓܕܽܘܢ ܘܰܢܫܰܒܚܽܘܢ ܒܩܰܪ̈ܢܳܬܗܽܘܢ ܩܰܕܺܝ̈ܫܳܬܳܐ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܒܚܰܝ̈ܐ ܕܠܐ ܡܶܬܚܰܒܠܳܢܽܘܬܳܐ. ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܒܥܝܢ ܘܫܬܐ
ܥܰܠ ܐܪܳܙܳܐ ܕܥܰܡܰܢܽܘܐܝܠ ܕܩܰܕܶܡ ܐܰܘܕܰܥ ܪܽܘܚܳܐ ܕܡܶܢ ܝܺܗܽܘܕܳܐ ܕܳܢܰܚ ܘܒܽܐܘܪܺܫܠܶܡ ܡܶܨܛܠܶܒ.
ܐܪ̈ܳܙܶܐ ܪܰܘܪ̈ܒܶܐ ܘܰܐܠܳܗܳܝ̈ܐ ܘܥܰܡܺܝ̈ܩܰܝ ܣܽܘܟܳܠܐ܆ ܡܶܫܬܰܥܶܐ ܠܰܢ ܪܽܘܚܳܐ ܕܰܐܠܗܳܐ ܒܝܰܕ ܡܙܰܡܪܳܢܳܐ ܕܰܘܝܕ. ܒܬܶܫܒܽܘܚܬܳܐ ܗܳܕܐ ܕܫܰܒܥܺܝܢ ܘܫܶܬ. ܘܟܰܕ ܒܟܽܠܕܽܘܟ ܡܰܘܕܰܥ ܗܘܳܐ܆ ܥܰܠ ܝܰܠܕܶܗ ܕܒܰܒܣܰܪ ܕܰܐܠܗܳܐ ܡܶܠܬܳܐ. ܘܥܰܠ ܚܰܫܰܘ̈ܗܝ ܦܳܪ̈ܽܘܩܳܝܶܐ. ܐܠܐ ܗܳܫܐ ܨܳܒܶܐ ܪܽܘܚܳܐ ܕܢܰܗܺܝܪܳܐܝ̣ܬ ܢܶܓܠܐܷ ܘܰܢܚܰܘܶܐ. ܘܰܕܡܶܢ ܐܰܝܟܳܐ ܘܡܶܢ ܐܰܝܢܳܐ ܫܰܒܛܳܐ ܡܚܰܘܶܐ ܡܰܘܕܰܥܬܳܐ ܡܰܢ ܕܕܶܢܚܶܗ. ܡܳܐ ܕܡܶܬܓܠܐܷ ܒܰܒܣܰܪ. ܘܒܰܐܝܕܳܐ ܡܕܺܝܢܬܳܐ ܡܶܬܩܒܰܥ ܠܶܗ ܨܠܺܝܒܳܐ. ܟܰܕ ܕܶܝܢ ܥܰܠ ܝܰܠܕܳܐ ܡܰܘܕܰܥ܆ ܐܶܡܰܪ ܒܛܶܟܣܳܐ ܟܺܐܢܳܐ. ܝܺܕܺܝܥ ܒܺܝܗܽܘܕܳܐ ܐܰܠܗܳܐ. ܡܳܢܳܐ ܗܝ ܝܺܕܰܥܬܳܐ ܠܗܰܘ ܟܝܳܢܳܐ ܡܥܰܠܰܝ ܡܶܢܟܽܠ. ܐܰܝܟܰܢܳܐ ܡܶܫܟܚܳܐ ܗܘܳܐ ܕܰܐܠܗܳܐ ܢܺܐܬܶܐ ܠܡܰܘܕܰܥܬܳܐ. ܐܶܠܐ ܒܗܳܝ ܕܰܗܘܳܐ ܒܰܪܢܳܫܳܐ. ܟܰܕ ܡܒܰܪܶܟ ܗܘܳܐ ܠܶܗ ܠܺܝܗܽܘܕܳܐ ܐܳܡܰܪ: ܕܠܐܴ ܢܶܥܢܰܕ ܫܰܒܛܳܐ ܡܶܢ ܝܺܗܽܘܕܳܐ ܘܰܡܒܰܕܩܳܢܳܐ ܡܶܢ ܒܶܝܬ ܪ̈ܶܓܠܰܘܗܝ: ܥܕܰܡܳܐ ܕܢܺܐܬܶܐ ܡܰܢ ܕܕܺܝܠܶܗ ܗܺܝ ܡܰܠܟܽܘܬܳܐ ܘܠܶܗ ܢܣܰܟܽܘܢ ܟܽܠܗܘܢ ܥܰܡ̈ܡܶܐ (ܒܪܝܬܐ ܡܛ: ܝ). ܕܰܘܝܕ ܕܶܝܢ ܗܳܕܐ ܠܐ ܐܶܡܰܪ: ܐܶܠܐ ܟܰܕ ܡܦܰܫܶܩ ܠܰܐܝܠܶܝܢ ܕܰܒܐܪܳܙܳܐ ܐܶܬܡܰܠܰܠܶܝ̈ܢ. ܒܫܽܘܪܳܝܳܐ ܐܶܡܰܪ:
ܕܺܝܕܺܝܥ ܒܺܝܗܽܘܕܳܐ ܐܰܠܗܳܐ. ܘܒܺܝܣܪܳܐܝܠ ܪܰܒ ܫܡܶܗ. ܐܶܢܳܐ ܕܶܝܢ ܐܳܡܰܪ ܐܢܳܐ ܕܠܰܘ ܥܰܠ ܝܺܣܪܳܐܝܠ ܗܳܢܐ ܡܶܬܪܰܓܫܳܢܳܐ ܡܶܬܢܰܣܒܳܐ ܐܠܐ ܥܰܠ ܝܺܣܪܳܐܝܠ ܡܶܬܝܰܕܥܳܢܳܐ ܕܰܐܠܗܳܐ. ܒܗܰܘ ܓܶܝܪ ܪܰܒ ܫܡܶܗ ܕܰܐܠܗܳܐ ܗܰܘ ܕܶܐܬܺܝܕܰܥ ܡܶܢ ܐܠܗܳܐ ܕܢܰܚ ܦܰܓܪܳܢܳܐܝ̣ܬ ܡܶܢ ܒܬܽܘܠܬܳܐ. ܘܠܰܘ ܒܗܳܝ ܕܥܰܬܶܕ ܘܪܰܟܶܒ ܠܶܗ ܨܠܺܝܒܳܐ. ܒܳܬܰܪ ܗܳܕܐ ܢܶܩܪܽܘܒ ܠܘܳܬ ܐܪܳܙܳܐ ܕܡܰܘܕܰܥ ܕܰܐܠܗܳܐ ܐܶܨܛܠܶܒ. ܗܰܘ ܠܰܡ ܕܺܝܕܺܝܥ ܒܺܝܗܽܘܕܳܐ ܐܺܝܬܰܘܗܝ ܐܰܠܗܳܐ.
ܢܶܗܘܶܐ ܒܫܳܠܺܝܡ ܡܰܛܠܠܶܗ. ܐܳܦ ܡܰܥܡܪܶܗ ܒܨܶܗܝܽܘܢ. ܡܳܢܰܐ ܗܘ ܕܶܝܢ ܡܰܛܠܠܐܴ ܡܳܐ ܕܚܳܙܶܝܢܰܢ ܒܥܰܝܢܳܐ ܕܗܰܝܡܳܢܽܘܬܳܐ. ܕܰܐܝܟ ܢܶܫܪܳܐ ܕܛܳܐܷܣ ܥܰܠ ܩܶܢܶܗ܆ ܘܥܰܠ ܦܰܪ̈ܽܘܓܰܘܗܝ ܡܪܰܚܶܦ. ܘܦܳܪܶܣ ܓܶܦܰܘ̈ܗܝ ܘܰܡܩܰܒܶܠ ܠܗܽܘܢ ܥܰܠ ܥܽܘܫܢܳܐ ܕܶܐܒܪ̈ܰܘܗܝ.
ܗܳܟܰܢܳܐ ܐܶܡܰܪ ܪܽܘܚܳܐ. ܡܰܛܶܠ ܗܘܳܐ ܒܰܦܫܳܛ ܐܺܝ̈ܕܰܘܗܝ ܥܰܡܰܢܘܐܝܠ. ܟܰܕ ܬܠܐܷ ܒܰܨܠܺܝܒܳܐ ܒܫܳܠܺܝܡ. ܕܗܺܝ ܗܺܝ ܐܽܘܪܺܫܠܶܡ. ܕܠܐܴ ܚܶܪܝܳܢܳܐ ܓܶܝܪ ܐܶܬܦܰܫܩܰܬ ܕܗܳܝ ܕܢܶܗܘܶܐ ܒܫܳܠܺܝܡ ܡܰܛܠܠܶܗ. ܕܢܶܗܘܶܐ ܓܶܝܪ ܨܠܺܝܒܶܗ ܒܽܐܘܪܺܫܠܶܡ ܐܺܝܬܶܝܗ̇. ܘܡܶܬܩܪܶܐ ܨܠܺܝܒܳܐ ܡܰܛܠܠܐܴ. ܫܡܰܥ ܠܰܢܒܺܝܐ ܙܟܰܪܝܳܐ ܕܰܩܪܳܐ ܠܓܰܝܴ̈ܣܶܐ ܗܳܢܘܢ ܕܶܐܙܕܩܶܦܘ ܥܰܡ ܥܰܡܰܢܘܐܝܠ܆ ܐܺܝܠܳܢ̈ܐ ܕܡܰܛܠܠܺܝܢ. ܟܰܕ ܓܶܝܪ ܠܐܪܳܙܳܐ ܕܰܨܠܺܝܒܳܐ ܚܙܳܐ ܗܳܢܐ ܢܒܺܝܐ ܐܳܡܰܪ ܗܘܳܐ: ܚܙܺܝܬ ܒܠܺܠܝܳܐ ܓܰܒܪܳܐ ܕܰܪܟܺܝܒ ܥܰܠ ܣܽܘܣܝܳܐ ܣܽܘܡܳܩܳܐ ܘܩܳܐܷܡ ܒܰܝܢܳܬ ܐܝܠܳܢ̈ܐ ܕܡܰܛܠܠܺܝܢ (ܙܟܪܝܐ ܐ: ܚ). ܐܺܝܠܳܢ̈ܐ ܕܡܰܛܠܠܺܝܢ ܐܺܝܬܰܝܗܘܢ ܓܰܝܴ̈ܣܶܐ܆ ܕܰܙܩܺܝܦܺܝܢ ܗܘܰܘ ܥܰܡ ܡܶܠܬܳܐ. ܓܰܒܪܳܐ ܕܰܪܟܺܝܒ ܥܰܠ ܣܽܘܣܝܳܐ ܚܙܳܝܗܝ ܢܒܺܝܐ܆ ܚܕܳܐ ܡܰܢ ܡܶܛܠ ܕܠܽܘܩܒܰܠ ܚܰܝ̈ܠܰܘܳܬܳܐ ܡܶܬܟܰܬܫܺܝܢ. ܪܳܟܒܳܐ ܙܳܕܶܩ ܗܘܳܐ ܕܢܶܬܚܙܶܐ ܒܥܰܝܢܳܐ ܕܪܽܘܚܳܐ. ܐܳܦ ܬܘܒ ܡܶܛܠ ܕܰܪܟܽܘܒܰܐ ܗ̄ܘ ܨܠܺܝܒܳܐ ܠܩܰܕܺܝ̈ܫܶܐ. ܘܶܐܠܽܘ ܠܐ ܕܕܳܚܠܺܝܢܰܢ ܕܠܐ ܬܺܐܪܰܟ ܡܶܠܬܳܐ. ܐܚܪ̈ܳܢܝܳܬܳܐ ܐܺܝܬ ܗܘܳܐ ܠܰܢ ܠܡܰܝܬܳܝܽܘ ܡܶܢ ܢܒܺܝ̈ܐ. ܕܰܡܫܰܘܕ̈ܥܳܢ ܕܡܶܬܩܪܶܐ ܨܠܺܝܒܳܐ ܡܰܛܠܠܐܴ. ܘܡܰܥܶܠ ܒܳܬܰܪ ܨܠܺܝܒܳܐ ܐܳܦ ܟܽܘܢܳܝܳܐ ܫܰܦܺܝܪܳܐ ܕܥܺܕܬܳܐ. ܘܰܒܗܳܕܐ ܥܡܰܪ ܐܠܗܳܐ ܗܰܘ ܕܶܐܨܛܠܶܒ. ܘܡܰܥܡܪܶܗ ܠܰܡ ܒܨܶܗܝܽܘܢ. ܠܰܘ ܒܗܳܝ ܕܟܰܕ ܚܙܳܬܶܗ ܥܰܬܕܰܬ ܠܶܗ ܨܠܺܝܒܳܐ. ܐܠܐ ܒܗܳܝ ܕܰܐܠܶܦ ܚܰܟܺܝܡܳܐ ܦܰܘܠܽܘܣ. ܟܰܕ ܟܬܰܒ ܠܥܶܒܪ̈ܳܝܶܐ. ܕܰܐܢܬܽܘܢ ܠܰܡ ܕܶܐܬܩܰܪܰܒܬܽܘܢ ܠܛܽܘܪܳܐ ܕܨܶܗܝܽܘܢ ܘܠܰܡܕܺܝܢܬܶܗ ܕܰܐܠܗܳܐ ܚܰܝܳܐ (ܥܒܪ̈ܝܐ ܝܒ: ܟܒ). ܘܢܶܥܽܘܠ ܢܶܒܥܶܐ ܚܰܬܺܝܬܳܐܝ̣ܬ ܕܰܐܝܠܶܝܢ ܕܪ̈ܳܥܶܐ ܕܩܶܫ̈ܬܳܬܳܐ ܐܶܡܰܪ ܢܒܺܝܳܐ ܕܬܰܒܰܪ. ܥܕܰܡܳܐ ܕܚܰܘܺܝ ܐܠܗܳܐ ܢܰܦܫܶܗ ܥܰܠ ܨܠܺܝܒܳܐ. ܚܰܝܠܬܢܳܐܝ̣ܬ ܐܰܚܺܝܕܺܝܢ ܗܘܰܘ ܚܰܝ̈ܠܰܘܳܬܳܐ ܕܕܰܠܩܽܘܒܠܐܴ ܩܪܳܒܳܐ ܥܰܡ ܩܰܕܺܝ̈ܫܶܐ. ܘܩܶܫ̈ܬܳܬܳܐ ܬܰܩܺܝ̈ܦܳܬܳܐ ܕܡܰܠܝܴ̈ܢ ܓܶܐܪ̈ܶܐ ܛܥܺܝܢܺܝܢ ܗܘܰܘ ܘܟܳܫܛܺܝܢ ܒܬܰܡܺܝ̈ܡܶܐ ܘܒܰܬܪ̈ܺܝܨܰܝ ܠܶܒܳܐ. ܘܟܰܕ ܐܶܬܩܒܰܥ ܨܠܺܝܳܒܐ ܨܳܒܘ ܘܶܐܬܰܘ ܡܶܢܟܽܠ ܕܽܘܟ ܪ̈ܰܒܰܝ ܚܰܝ̈ܠܰܘܳܬܳܐ ܗܳܢܘܢ ܕܒܺܝ̈ܫܳܬܳܐ. ܟܰܕ ܐܺܝܬ ܥܰܡܗܘܢ ܗܰܘ ܕܡܶܢ ܒܪܺܝܫܺܝܬ ܐܰܠܶܦ ܕܬܶܗܘܶܐ ܚܛܺܝܬܳܐ. ܡܬܰܚܘ ܗܘܰܘ ܠܽܘܩܒܰܠ ܨܠܺܝܒܳܐ ܩܶܫ̈ܬܳܬܗܘܢ ܠܡܶܫܕܳܐ. ܐܠܐ ܐܶܬܬܰܒܰܪܘ ܘܰܒܗܶܬܘ. ܘܗܳܪܟܳܐ ܢܦܰܩ ܚܰܝܠܐܴ ܕܰܐܠܗܳܐ ܡܶܢ ܩܶܫܬܳܐ ܕܰܨܠܺܝܒܳܐ. ܘܬܰܒܰܪ ܕܪ̈ܳܥܶܐ ܕܩܶܫ̈ܬܳܬܗܽܘܢ ܕܡܳܪ̈ܽܘܕܶܐ. ܐܳܦ ܢܶܦܠܰܬ ܚܰܪܒܳܐ ܒܡܰܫܪ̈ܝܳܬܶܗ ܕܳܐܟܶܠܩܰܪܨܳܐ. ܘܦܰܕ̈ܝ ܐܺܝܕܰܝ̈ܗܘܢ ܡܶܢ ܣܰܝ̈ܦܰܝܗܘܢ. ܒܗܳܝ ܕܰܠܙܰܝܢܳܐ ܘܰܠܣܰܝ̈ܦܳܐ ܬܰܒܰܪ ܐܰܝܟ ܕܶܐܡܰܪ ܪܽܘܚܳܐ.
ܙܰܝܢܳܐ ܘܣܰܝܦܳܐ ܒܰܩܪܳܒܳܐ. ܢܰܗܺܝܪ ܐܰܢܬ ܘܰܡܫܺܝܚ ܡܶܢ ܛܽܘܪܳܟ ܥܰܫܺܝܢܳܐ. ܒܗܳܕܐ ܐܰܘܕܰܥ ܕܠܰܘ ܬܚܶܝܬ ܬܰܚܦܺܝܬܳܐ ܡܶܬܟܰܣܶܐ ܚܰܝܠܶܗ ܕܰܨܠܺܝܒܳܐ. ܐܠܐ ܒܢܽܘܗܪܳܐ ܡܶܬܓܠܐܷ ܘܡܶܬܟܪܶܙ ܢܽܘܗܪܶܗ ܠܥܺܝܢ ܟܽܠܗܘܢ ܥܰܡ̈ܡܶܐ ܕܰܐܪܥܳܐ. ܒܗܳܢܐ ܩܪܳܒܳܐ ܕܰܗܘܳܐ ܒܰܨܠܺܝܒܳܐ ܟܰܕ ܝܳܕܥܺܝܢ ܗܘܰܘ ܛܪ̈ܽܘܢܶܐ ܕܰܚܛܺܝܬܳܐ. ܕܰܥܠܰܝܗܘܢ ܡܶܬܗܰܦ̈ܟܳܢ ܡܰܚ̈ܘܳܬܳܐ ܕܓܶܐܪ̈ܰܝܗܘܢ܆ ܕܠܽܘܚܝܳܐ ܣܰܓܺܝܐܐ ܗܘܳܐ ܒܰܝܢܳܬܗܘܢ ܐܰܝܟ ܕܶܐܡܰܪ ܪܽܘܚܳܐ:
ܘܶܐܬܕܰܠܰܚܘ ܟܽܠܗܽܘܢ ܣܰܟ̈ܠܰܝ ܠܶܒܳܐ܆ ܘܰܕܡܶܟܘ ܫܶܢܰܬܗܽܘܢ ܓܰܒܪ̈ܶܐ ܚܰܝܠܬܳܢ̈ܐ. ܘܠܐܴ ܐܶܫܟܰܚܘ ܐܻܝ̈ܕܰܝܗܘܢ ܡܶܢ ܟܐܳܬܳܟ ܐܰܠܳܗܶܗ ܕܝܰܥܩܽܘܒ: ܢܳܡܘ ܪ̈ܳܟܒܰܝ ܪ̈ܰܟܫܳܐ ܘܰܐܢܬ ܕܚܺܝܠ ܐܰܢܬ. ܒܟܽܠ ܐܶܣܟܺܝ̈ܡܺܝܢ ܥܰܬܶܕܘ ܗܘܰܘ ܛܪ̈ܽܘܢܶܐ ܬܰܟܬܽܘܫܳܐ ܠܽܘܩܒܰܠ ܨܠܺܝܒܳܐ. ܒܪܰܡ ܠܐܴ ܝܳܕܥܺܝܢ ܗܘܰܘ ܕܗܰܘ ܕܰܡܬܰܚ ܒܰܨܠܺܝܒܳܐ ܘܫܳܕܶܐ ܒܗܽܘܢ. ܐܰܠܳܗܶܗ ܗܽܘ ܕܝܰܥܩܽܘܒ. ܘܡܶܛܠܗܳܢܐ ܟܰܕ ܚܙܰܘ ܕܚܰܝܠܬܳܢ ܗܽܘ ܗܰܘ ܕܰܫܕܳܐ ܒܗܽܘܢ ܓܶܐܪ̈ܶܐ ܡܶܢ ܙܰܝܢܳܐ ܕܽܐܘܡܳܢܽܘܬܗܽܘܢ. ܠܐܴ ܡܶܟܺܝܠ ܡܶܫܟ̈ܚܳܢ ܐܻܝ̈ܕܰܝܗܘܢ ܠܰܡܩܳܡ. ܘܰܐܝܟ ܪ̈ܳܟܒܶܐ ܕܡܳܐ ܕܰܐܠܺܝܨ ܠܗܽܘܢ ܬܰܟܬܽܘܫܳܐ ܕܰܩܪܳܒܳܐ܆ ܥܰܠ ܪ̈ܰܟܫܰܝܗܘܢ ܢܳܝܡܺܝܢ ܐܳܦ ܕܳܡܟܺܝܢ ܗܳܟܰܢܳܐ ܐܶܬܩܰܫܺܝ ܩܪܳܒܳܐ ܡܶܢ ܗܳܢܘܢ ܕܡܶܬܟܰܬܫܺܝܢ ܗܘܰܘ ܥܰܡ ܩܰܕܺܝ̈ܫܶܐ. ܒܰܕܠܐܴ ܐܶܬܡܚܶܠ ܕܪܳܥܗܽܘܢ ܓܰܢ̱ܒܳܪܳܐ ܕܰܨܠܺܝܒܳܐ. ܡܶܢ ܗܳܢܘܢ ܕܰܡܛܰܝܒܺܝܢ ܗܘܰܘ ܠܰܩܪܳܒܳܐ. ܘܡܶܟܺܝܠ ܡܳܢܳܐ ܨܳܒܶܐ ܪܽܘܚܳܐ ܠܡܺܐܡܰܪ. ܟܰܕ ܚܙܳܐ ܢܒܺܝܐ ܕܛܳܒ ܚܰܝܠܬܳܢ ܐܰܓܽܘܢܳܐ. ܡܩܰܠܶܣ ܗܘܳܐ ܠܐܠܗܳܐ ܘܳܐܡܰܪ:
ܡܰܢܽܘ ܢܩܽܘܡ ܩܕܳܡܰܝܟ ܒܗܳܢܳܐ ܪܽܘܓܙܳܐ. ܡܶܢ ܩܰܕܺܝ̈ܫܶܐ ܠܰܝܬ ܕܡܶܫܟܰܚ ܓܳܡܰܪ ܠܶܗ ܠܰܐܓܽܘܢܶܗ ܐܶܢ ܩܰܠܺܝܠ ܒܰܠܚܽܘܕ ܡܰܗܡܶܐ ܚܝܳܪܳܟ. ܐܶܠܐ ܡܶܢ ܫܡܰܝܳܐ ܨܳܬܬ ܘܰܥܢܰܝܬ ܐܶܢܘܢ.
ܘܡܶܢ ܫܡܰܝܳܐ ܫܡܰܥܬ ܕܺܝܢܳܐ. ܘܥܰܠܗܳܕܐ ܠܳܐ ܝܰܗܒܬ ܕܰܐܚܪܺܢܳܐ ܢܶܬܟܰܬܰܫ ܗܘܳܐ ܒܰܩܪܳܒܳܐ ܗܳܢܐ ܠܽܘܩܒܰܠ ܡܳܪ̈ܽܘܕܶܐ. ܢܰܣܺܝܬ ܓܶܝܪ ܕܰܡܚܺܝܠ ܗܽܘ ܟܽܠ ܒܰܪܢܳܫܳܐ ܠܕܰܪܳܐ ܗܳܢܐ. ܘܥܰܠܗܳܝ ܟܰܕ ܢܦܰܩܬ ܠܡܶܦܪܰܩ ܠܥܰܡܳܟ.
ܐܰܪܥܳܐ ܚܙܳܬ ܘܕܶܚܠܰܬ. ܟܰܕ ܓܶܝܪ ܐܶܬܩܒܰܥ ܨܠܺܝܒܳܐ ܘܶܐܬܛܰܝܰܒܘ ܡܳܐܢܱ̈ܝ ܩܪܳܒܳܐ. ܫܰܪܺܝ ܢܶܬܟܰܬܰܫ ܒܰܡܚܺܝܠܽܘܬܳܐ ܥܰܡ ܚܰܝ̈ܠܬܳܢܶܐ. ܐܶܬܬܙܺܝܥܰܬ ܐܰܪܥܳܐ ܟܰܕ ܚܙܳܬ ܠܡܳܪܳܗ̇ ܕܰܨܠܺܝܒ ܥܰܠ ܚܕܳܐ ܡܶܢ ܪ̈ܳܡܳܬܳܗ̇. ܘܶܐܡܰܬܝ ܠܰܡ ܗܳܕܐ ܗܳܘܝܳܐ. ܡܰܝܬܶܐ ܪܽܘܚܳܐ ܘܳܐܡܰܪ:
ܡܳܐ ܕܩܳܐܷܡ ܐܰܠܗܳܐ ܠܰܡܕܳܢ܆ ܘܰܠܡܶܦܪܰܩ ܠܟܽܠܗܽܘܢ ܡܶܣܟܺܢ̈ܐ ܕܰܐܪܥܳܐ. ܚܳܙܶܝܬ ܐܰܝܟܰܢܳܐ ܕܠܐܴ ܚܶܪܝܳܢܳܐ ܦܰܫܶܩ ܢܒܺܝܐ. ܕܰܒܗܳܢܐ ܩܪܳܒܳܐ ܥܰܠ ܗܰܘ ܕܰܨܠܺܝܒܳܐ ܦܰܫܶܩ. ܐܰܠܗܳܐ ܓܶܝܪ ܠܰܡܕܳܢ ܘܰܠܡܶܦܪܰܩ ܟܽܠܗܽܘܢ ܡܶܣܟ̈ܢܶܐ ܕܰܐܪܥܳܐ܆
ܡܶܛܠ ܕܬܰܪܥܺܝܬܶܗ ܕܒܰܪܢܳܫܳܐ ܬܰܘܕܶܐ ܠܳܟ. ܘܫܰܪܟܳܐ ܕܚܶܡܬܶܗ ܬܰܦܪܶܩ ܪܽܘܓܙܳܐ. ܚܶܡܬܳܐ ܕܡܰܦܪܩܳܐ ܪܽܘܓܙܳܐ ܐܺܝܬܶܝܗ̇. ܡܳܐ ܕܠܽܘܩܒܰܠ ܗܰܘ ܕܡܰܠܶܦ ܕܬܶܗܘܶܐ ܚܛܺܝܬܳܐ ܡܙܺܝܥܺܝܢܰܢ ܠܳܗ̇. ܡܶܛܠܗܳܢܐ ܟܰܕ ܬܰܪܥܺܝܬܳܐ ܡܰܘܕܝܳܐ ܠܐܱܠܗܳܐ. ܗܳܝܕܶܝܢ ܚܶܡܬܳܐ ܐܰܝܟ ܐܰܓܪܳܐ ܠܽܘܩܒܰܠ ܛܪܽܘܢܳܐ ܢܶܫܕܶܐ. ܗܳܕܐ ܓܶܝܪ ܡܰܦܪܩܳܐ ܪܽܘܓܙܳܐ ܕܰܚܛܺܝܬܳܐ. ܘܡܳܐ ܕܰܗܘܳܬ ܗܳܕܐ. ܟܺܐܢܳܐܝ̣ܬ ܡܩܰܪܒܺܝܢܰܢ ܠܐܠܗܳܐ. ܕܶܐܬܟܰܬܰܫ ܚܠܳܦܰܝܢ ܘܙܰܟܺܝ ܠܰܢ. ܢܶܕܪ̈ܶܐ ܡܶܫܬܰܡܥ̈ܢܶܐ ܕܰܨܠܰܘ̈ܬܳܐ ܐܰܝܟ ܕܰܐܠܶܦ ܗܘܳܐ ܪܽܘܚܳܐ.
ܕܽܘܪܘ ܘܫܰܠܶܡܘ ܠܡܳܪܝܳܐ ܐܰܠܳܗܟܽܘܢ. ܡܶܛܠ ܕܶܐܬܩܛܶܠ ܠܶܗ ܗܰܘ ܕܩܳܐܷܡ ܗܘܳܐ ܠܽܘܩܒܰܠ ܢܶܕܪ̈ܰܝܟܽܘܢ.
ܟܽܠ ܕܰܚܕܺܝܪܺܝܢ ܠܶܗ ܢܰܘܒܠܽܘܢ ܩܽܘܪ̈ܒܳܢܶܐ ܠܰܕܚܺܝܠܐܴ: ܕܰܡܡܰܟܶܟ ܪܽܘܚܳܐ ܕܫܰܠܺܝ̈ܛܳܢܶܐ. ܘܰܕܚܺܝܠ ܥܰܠ ܡܰܠܟ̈ܐ ܕܰܐܪܥܳܐ. ܡܰܢ ܐܶܢܘܢ ܗܳܢܘܢ ܕܰܚܕܺܝܪܺܝܢ ܠܶܗ. ܗܳܢܘܢ ܕܶܐܬܟܰܢܰܫܘ ܠܘܳܬܶܗ ܘܗܰܝܡܶܢܘ ܒܶܗ. ܘܡܰܢ ܐܶܢܘܢ ܫܰܠܺܝ̈ܛܳܢܶܐ ܕܡܰܟܶܟ ܨܠܺܝܒܳܐ ܪܽܘܚܳܐ ܕܺܝܠܗܽܘܢ. ܠܐ ܗܘܳܐ ܗܳܢܘܢ ܕܰܐܚܺܝܕܺܝܢ ܗܘܰܘ ܫܽܘܠܛܳܢܳܐ ܕܳܐܐܱܪ ܘܰܕܪܽܘܚܳܐ. ܗܳܕܐ ܕܰܒܟܠܙܒܰܢ ܡܶܬܚܰܦܛܳܐ ܒܰܢܒܺܝ̈ܐ ܕܠܐܴ ܡܶܬܬܦܺܝܣܳܢܽܘܬܳܐ. ܘܡܶܟܺܝܠ ܨܠܺܝܒܳܐ ܗܰܘ ܕܰܕܚܺܝܠ ܥܰܠ ܡܰܠܟ̈ܐ ܕܰܐܪܥܳܐ܆ ܘܠܶܗ ܟܳܦܺܝܢ ܘܣܳܓܕܺܝܢ ܡܕܰܒܪ̈ܳܢܶܐ ܕܡܶܬܥܰܡܪܳܢܺܝܬܳܐ ܘܠܶܗ ܡܫܰܒܚܺܝܢ ܘܡܰܘܕܶܝܢ ܠܥܳܠܰܡ ܐܰܡܺܝܢ܀
ܡܙܡܘܪܐ ܕܫܒܥܝܢ ܘܫܒܥܐ
ܥܰܠ ܡܳܢܳܐ ܡܶܬܕܰܠܚܳܐ ܢܰܦܫܳܐ ܠܽܘܩܒܰܠ ܒܺܝ̈ܫܳܬܳܐ: ܘܰܠܘܳܬ ܒܘܣܳܡ̈ܐ ܐܰܠܳܗܷܝ̈ܐ ܡܶܬܩܰܪܒܳܐ: ܘܥܰܠ ܐܪ̈ܳܙܶܐ ܕܰܥܡܳܕܳܐ ܩܰܕܺܝܫܳܐ.
ܛܽܘܒܬܢܳܐ ܡܽܘܫܶܐ ܗܰܘ ܕܶܐܬܗܰܝܡܰܢ ܡܶܢ ܐܠܗܐ ܕܢܶܗܘܶܐ ܡܰܟܬܒܳܢܳܐ ܥܰܠ ܥܒܴ̈ܕܶܐ ܕܰܗܘܰܘ ܒܺܐܝ̈ܕܰܝ ܐܠܗܐ. ܫܳܡܥܺܝܢܰܢ ܠܶܗ ܕܳܐܡܰܪ܇ ܕܰܚܙܳܐ ܐܠܗܐ ܟܠ ܕܰܥܒܰܕ. ܘܗܳܐ ܛܳܒ ܫܰܦܺܝܪ (ܒܪܝܬܐ ܐ: ܠܐ). ܚܰܕ ܡܶܢ ܗܳܠܝܢ ܥܒܴ̈ܕܶܐ ܕܰܥܒܰܕ. ܐܳܦ ܩܳܠܐ ܕܰܥܒܰܕ ܒܒܰܪܢܳܫܳܐ ܐܺܝܬܰܘܗܝ. ܟܰܕ ܛܳܒ ܠܣܰܓܺܝ̈ܐܬܳܐ ܡܶܢ ܚܰܝ̈ܘܳܬܳܐ ܘܡܶܢ ܦܳܪ̈ܚܳܬܳܐ ܐܝ̣ܬ ܩܳܠܐ. ܕܰܡܦܰܪܫܺܝܢ ܒܡܶܠܬܳܐ ܘܰܒܢܶܥܡܬܳܐ. ܓܶܢ̈ܣܶܐ ܕܰܒܥܺܝܪܳܐ ܘܛܽܘܗܡ̈ܐ ܕܦܳܪ̈ܚܳܬܳܐ ܘܰܕܚܰܝܽܘܬܳܐ܆ ܩܳܐܷܡ ܗܰܘ ܩܳܠܐ ܒܰܠܚܽܘܕ ܐܢܳܫܳܝܳܐ. ܕܰܥܦܺܝܦ ܟܰܕ ܡܶܫܬܡܰܥ. ܡܶܛܠ ܕܠܰܘ ܒܰܠܚܽܘܕܰܘܗܝ ܐܝ̣ܬܰܘܗܝ ܩܳܠܐ ܕܒܰܪܢܳܫܳܐ. ܒܶܗ ܓܶܝܪ ܡܶܫܬܰܡܥܳܐ ܡܶܠܬܳܐ ܗܳܝ ܕܢܳܦܩܳܐ ܡܶܢ ܐܽܘܣܺܝܰܐ ܕܢܰܦܫܳܐ. ܡܶܛܠ ܕܰܥܦܺܝܦܰܐ ܗ̇ܘ ܒܰܪܢܳܫܳܐ ܒܪܽܘܟܳܒܶܗ. ܥܦܺܝܦܳܐ ܐܝ̣ܬܰܘܗܝ ܐܳܦ ܩܳܠܶܗ. ܒܥܺܝܪܳܐ ܕܶܝܢ ܘܦܳܪܰܚܬܳܐ ܘܚܰܝܽܘܬܳܐ. ܟܕ ܩܳܠܐ ܐܝ̣ܬ ܠܗܘܢ܆ ܡܶܠܬܳܐ ܠܰܝܬ ܠܗܽܘܢ ܒܩܳܠܗܘܢ. ܘܰܒܗܳܕܐ ܡܶܬܝܰܕܥܺܝܢ ܕܠܰܝܬ ܒܗܘܢ ܢܰܦܫܳܐ. ܟܰܕ ܕܶܝܢ ܥܰܠ ܫܽܘܦܪܶܗ ܕܩܳܠܐ ܕܶܐܬܺܝܗܶܒ ܠܒܰܪܢܳܫܳܐ ܡܶܫܬܰܥܶܐ ܡܙܰܡܪܳܢܳܐ ܡܶܢܶܗ ܥܒܰܕ ܫܽܘܪܳܝܳܐ ܠܡܰܙܡܽܘܪܳܐ ܗܳܢܐ ܕܫܰܒܥܺܝܢ ܘܫܰܒܥܳܐ. ܟܕ ܒܶܗ ܡܶܬܚܰܫܰܚ ܩܕܳܡ ܝܳܗܽܘܒܶܗ. ܡܙܰܡܰܪ ܘܳܐܡܰܪ:
ܒܩܳܠܝ ܠܘܳܬ ܐܠܗܐ ܩܪܺܝܬ ܘܫܰܡܥܰܢܝ. ܘܰܐܪܺܝܡܶܬ ܩܳܠܝ ܠܘܳܬܶܗ ܘܰܥܢܳܢܝ: ܒܝܰܘܡܳܐ ܕܽܐܘܠܨܳܢܳܐ ܠܡܳܪܝܳܐ ܒܥܺܝܬ. ܡܶܛܠܡܳܢܐ ܐܳܡܰܪ ܕܰܒܩܳܠܝ ܩܪܺܝܬ ܠܐܠܗܐ. ܐܰܪܰܐ ܥܰܠ ܩܳܠܐ ܘܰܩܥܳܬܳܐ ܣܢܺܝܩ ܗܰܘ ܕܕܳܐܷܢ ܡܰܚܫܒ̈ܬܳܐ ܘܬܰܪ̈ܥܝܳܬܳܐ ܕܠܶܒܳܐ. ܕܰܒܗܳܠܝܢ ܢܶܬܚܰܫܰܚ ܠܘܳܬܶܗ ܡܳܐ ܕܩܳܪܶܝܢܰܢ ܠܶܗ. ܡܳܢܐ ܕܶܝܢ ܢܶܗܘܶܐ ܡܶܢ ܣܽܘܟܳܠܐ ܕܥܰܠ ܚܰܝ̈ܠܰܘܳܬܳܐ ܩܰܕܺܝ̈ܫܶܐ. ܐܰܝܟܰܢ ܡܳܕܶܝܢ ܡܶܫܬܰܡܥܺܝܢ ܟܰܕ ܠܰܝܬ ܠܗܽܘܢ ܩܴ̈ܠܐ. ܐܶܢ ܡܳܕܶܝܢ ܣܢܺܝܩ ܕܒܰܩܥܳܬܳܐ ܢܶܬܚܰܫܰܚ. ܘܟܶܢ ܫܳܡܰܥ. ܒܳܛܠܐܴ ܠܳܗ̇ ܐܰܝܟ ܕܡܶܢ ܗܳܕܐ ܬܶܫܒܽܘܚܬܳܐ ܕܗܳܢܘܢ ܕܠܐ ܓܽܘܫܡ̈ܐ ܘܠܐ ܩ̈ܠܐ. ܐܰܝܟܳܐ ܓܶܝܪ ܕܠܰܝܬ ܠܗܘܢ ܓܽܘܫܡ̈ܐ ܘܠܐܴ ܩܴ̈ܠܐ ܡܶܫܬܰܡܥܺܝܢ. ܗܳܕܐ ܕܶܝܢ ܕܶܐܡܰܪ ܢܒܺܝܳܐ ܡܚܰܘܝܳܐ ܕܰܐܡܺܝܢܳܐܝ̣ܬ ܚܰܝܳܒܺܝܢܰܢ ܢܶܬܚܰܫܰܚ ܒܩܳܠܐ܆ ܡܳܐ ܕܰܡܙܰܡܪܺܝܢܰܢ ܘܡܳܐ ܕܰܡܫܰܒܚܺܝܢܰܢ ܠܐܠܗܐ. ܟܽܠ ܟܡܳܐ ܕܰܒܥܳܠܡܳܐ ܗܳܢܐ ܚܢܰܢ. ܠܰܘ ܡܶܛܠ ܕܗܽܘ ܣܢܺܝܩ ܕܰܒܩܳܠܐ ܢܶܩܥܶܐ ܟܶܢ ܫܳܡܰܥ. ܐܠܐ ܡܶܛܠ ܕܰܒܝܰܕ ܩܳܠܐ ܕܒܳܥܽܘܬܳܐ ܕܩܰܕܺܝ̈ܫܶܐ ܡܰܠܝܳܐܝ̣ܬ ܡܶܫܬܰܬܰܩ. ܘܡܶܬܛܰܠܰܩ ܩܳܠܐ ܕܚܰܝ̈ܠܰܘܳܬܳܐ ܕܰܠܩܽܘܒܠܐܴ. ܐܰܟܡܳܐ ܕܒܰܢܩܳܫ ܡܶܢ̈ܐ ܕܟܶܢܳܪܶܗ ܕܕܰܘܝܕ. ܥܳܪܩܳܐ ܗܘܳܬ ܘܰܡܫܰܢܝܳܐ ܪܽܘܚܳܐ ܒܺܝܫܬܳܐ ܡܶܢ ܫܳܐܘܳܠ. ܗܳܟܰܢܐ ܒܩܳܠܐ ܕܰܕܟܶܐ ܡܶܢ ܒܺܝܫܽܘܬܳܐ. ܡܳܐ ܕܰܕܟܶܐ ܢܶܟܠܐܴ ܡܶܬܬܪܺܝܡ ܠܘܳܬ ܐܠܗܐ ܒܰܨܠܽܘܬܳܐ܆ ܡܰܪܟܶܢ ܐܠܗܐ ܐܶܕܢܶܗ ܘܫܳܡܰܥ ܠܳܗ̇. ܘܡܶܬܪܗܶܒ ܗܰܘ ܕܰܠܩܽܘܒܠܐܴ ܘܰܡܫܰܢܶܐ ܠܶܗ. ܟܰܕ ܡܰܠܶܦ ܛܽܘܒܬܳܢܳܐ ܕܰܘܝܕ. ܕܰܐܡܺܝܢܳܐܝ̣ܬ ܢܶܬܚܰܫܰܚ ܒܩܳܠܐ ܡܳܐ ܕܰܡܙܰܡܪܺܝܢܰܢ. ܢܶܓ̈ܕܶܐ ܕܺܐܝܕܳܐ ܗܳܝ ܐܰܠܗܳܝܬܳܐ ܡܳܢܳܐ ܗܳܘܶܐ ܠܗܽܘܢ ܟܰܕ ܡܰܠܶܦ܆ ܕܳܐܦ ܡܳܐ ܕܡܰܒܶܐܫ ܒܥܶܠܕܒܳܒܳܐ. ܡܶܢ ܐܠܗܐ ܫܩܰܠ ܚܰܝܠܐܴ ܕܰܢܢܰܓܶܕ ܠܡܰܣܟܠܳܢ̈ܐ. ܘܥܰܠܗܳܝ ܐܳܡܰܪ ܢܒܺܝܐ:
ܐܺܝܕܶܗ ܒܠܺܠܝܳܐ ܢܰܓܶܕܬ̣ܰܢܝ ܘܠܐܴ ܫܠܺܝܬ: ܘܠܰܝܬ ܡܒܰܝܳܐܢܳܐ ܠܢܰܦܫܝ. ܠܺܠܝܳܐ ܡܫܰܡܰܗ ܠܐܽܘܠܨܳܢܳܐ ܕܰܒܥܶܠܕ̈ܒܳܒܶܐ. ܘܠܐ ܠܰܡ ܟܰܕ ܡܶܬܩܰܦܰܚ ܐܢܳܐ ܐܰܗܡܺܝܬ ܡܶܢ ܕܩܳܪܶܐ ܐܢܳܐ ܠܶܗ. ܘܠܐ ܕܶܝܢ ܒܽܘܝܳܐܐ ܩܰܒܠܰܬ ܢܰܦܫܝ. ܡܶܢ ܒܳܬܰܪ ܕܰܥܒܰܪ ܢܶܓܕܳܐ ܘܰܗܘܳܬ ܙܳܟܽܘܬܳܐ. ܐܶܬܒܰܣܰܡ ܒܒܶܙܬܳܐ ܘܶܐܫܬܰܒܗܰܪ ܒܰܟܠܺܝܠܐܴ. ܐܰܝܟܰܢ ܓܶܝܪ ܐܶܬܒܰܝܰܐ܆ ܐܶܠܐ ܐܶܡܰܬܝ ܕܚܳܙܶܐ ܐܢܳܐ. ܠܗܰܘ ܕܪܳܚܶܡ ܐܢܳܐ. ܡܶܛܠ ܡܳܢܳܐ ܡܰܝܬܶܐ ܘܳܐܡܰܪ:
ܐܶܬܕܰܟܪܶܬ ܐܰܠܳܗܳܐ ܘܶܐܬܕܰܠܚܶܬ: ܘܰܪܢܺܝܬ ܘܶܐܬܛܰܪܦܰܬ ܪܽܘܚܝ. ܐܰܝܟܰܢܐ ܐܰܪܰܐ ܫܰܡܥܳܗ̇ ܠܗܳܝ ܕܶܐܬܕܟܰܪ ܠܐܠܗܳܐ ܘܶܐܬܕܰܠܰܚ. ܘܗܳܐ ܟܠ ܕܡܶܬܕܟܰܪ ܠܐܠܗܐ ܠܰܘ ܡܶܬܕܰܠܳܚܽܘ ܡܶܬܕܰܠܰܚ. ܐܶܠܐ ܡܶܬܒܰܣܳܡܽܘ ܡܶܬܒܰܣܰܡ. ܘܥܰܠ ܕܰܕܠܽܘܚܝܳܐ ܡܒܰܣܡܳܢܳܐ ܐܶܬܕܰܠܰܚ ܢܒܺܝܳܐ ܐܳܡܰܪ: ܘܰܪܢܺܝܬ ܘܶܐܬܛܰܪܦܰܬ ܪܽܘܚܝ.
ܘܰܐܚܕܽܘܢܝ ܨܰܘܪ̈ܳܢܶܐ ܒܥܰܝ̈ܢܰܝ: ܘܚܶܪܫܶܬ ܘܠܐܴ ܡܰܠܠܶܬ. ܗܳܠܝܢ ܟܽܠܗܝܢ ܒܗܰܘ ܦܽܘܫܳܩܳܐ ܕܶܐܬܡܰܠܰܠ ܐܶܬܢܰܗܰܪ. ܥܕܰܡܳܐ ܕܡܰܪܓܫܳܐ ܢܰܦܫܳܐ ܒܛܳܒ̈ܬܳܐ ܕܰܐܠܗܳܐ. ܘܚܳܝܪܳܐ ܕܰܟܡܳܐ ܒܥܳܠܡܳܐ ܗܳܢܐ ܐܺܝܬܶܝܗ̇. ܓܠܺܝܙܳܐ ܗܝ ܘܪܰܚܺܝܩܳܐ ܡܶܢܗܝܢ. ܘܠܐܴ ܒܪܽܘܚܶܗ ܡܶܬܛܰܪܦܳܐ ܘܠܐܴ ܨܰܘܪ̈ܳܢܶܐ ܐܳܚܕܺܝܢ ܠܳܗ̇. ܡܳܐ ܕܶܝܢ ܕܰܒܗܳܠܝܢ ܡܰܪ̈ܢܝܳܬܳܐ ܡܶܬܗܰܦܟܳܐ. ܐܳܦ ܥܰܠ ܝܰܘ̈ܡܳܬܳܐ ܕܺܐܝܬ ܗܘܳܐ ܠܳܗ̇ ܡܶܢ ܩܕܳܡ ܚܛܺܝܬܳܐ ܪܳܗܛܳܐ ܠܡܶܚܙܳܐ. ܘܕܰܐܝܟܰܢܳܐ ܡܶܬܒܰܣܰܡ ܗܘܳܐ ܒܰܪܢܳܫܳܐ ܩܰܕܡܳܝܳܐ ܒܦܰܪܕܰܝܣܳܐ ܡܶܬܚܰܫܒܳܐ. ܡܶܛܠ ܡܳܢܳܐ ܡܰܝܬܶܐ ܢܒܺܝܐ ܘܳܐܡܰܪ:
ܘܚܶܫܒܶܬ ܝܰܘ̈ܡܰܝ ܕܡܶܢ ܩܕܺܝܡ: ܘܰܫܢܰܝܴ̈ܐ ܕܡܶܢ ܥܳܠܡܺܝܢ ܐܶܬܕܰܟܪܶܬ. ܪܢܺܝܬ ܒܠܺܠܝܳܐ ܘܰܒܠܶܒܝ ܪܢܺܝܬ: ܘܰܒܨܺܝܬ ܪܽܘܚܝ ܘܶܐܡܪܶܬ. ܕܰܠܥܳܠܰܡ ܛܥܳܢܝ ܡܳܪܝܳܐ܆ ܘܠܐܴ ܡܰܘܣܶܦ ܬܘܒ ܠܡܶܨܛܒܳܝܽܘ ܒܺܝ. ܡܶܛܠ ܬܰܘܚܰܪܬܳܐ ܕܰܗܘܳܬ ܠܒܰܪܢܳܫܳܐ ܒܰܐܪܥܳܐ ܗܳܕܐ ܕܠܰܘ̈ܛܳܬܳܐ ܐܳܡܰܪ ܢܒܺܝܐ. ܕܰܐܝܟ ܗܰܘ ܕܰܒܡܶܫܬܰܒܩܳܢܽܘܬܳܐ ܦܳܐܷܫ ܒܰܪܢܳܫܳܐ ܠܥܳܠܰܡ ܕܳܡܝܳܐ ܠܐܢܳܫܺܝ̈ܢ. ܘܰܒܗܳܕܐ ܡܰܚܫܰܒܬܳܐ ܣܰܓܺܝ̈ܐܐ ܡܶܬܦܰܫܚܺܝܢ. ܟܰܕ ܣܳܒܪܺܝܢ ܕܰܠܥܳܠܰܡ ܛܥܳܐ ܐܶܢܘܢ ܡܳܪܝܳܐ. ܐܶܠܐ ܗܳܕܐ ܐܶܢܳܐ ܠܐܴ ܐܳܡܰܪ ܐܢܳܐ. ܘܠܐ ܡܶܬܠܒܶܟ ܐܢܳܐ ܒܰܦܣܳܩ ܣܰܒܪܳܐ ܗܳܢܐ. ܘܠܰܘ ܕܺܝܠܝ ܐܺܝܬܶܝܗ̇ ܗܳܕܐ ܕܳܐܡܰܪ ܐܢܳܐ.
ܐܰܘ ܕܰܠܡܳܐ ܠܥܳܠܰܡ ܡܰܥܒܰܪ ܛܰܝܒܽܘܬܶܗ ܡܶܢܝ: ܐܰܘ ܡܫܰܠܶܡ ܡܶܠܬܶܗ ܠܕܳܪܕܳܪ̈ܺܝܢ. ܐܰܘ ܛܳܥܶܐ ܐܰܠܗܳܐ ܠܰܡܪܰܚܳܡܽܘ: ܐܰܘ ܚܳܡܶܠ ܪ̈ܰܚܡܰܘܗܝ ܒܪܽܘܓܙܶܗ. ܘܠܐܴ ܗܳܠܝܢ ܩܴ̈ܠܐ ܪܰܚܺܝܩܺܝܢ ܡܶܢ ܗܰܘ ܕܡܶܬܕܰܠܰܚ ܠܽܘܩܒܰܠ ܒܺܝ̈ܫܳܬܳܐ. ܒܗܳܠܶܝܢ ܓܶܝܪ ܡܶܬܚܙܶܐ ܬܶܓܡܳܐ ܕܰܐܒܺܝ̈ܠܐ ܕܶܐܡܰܪ ܡܳܪܰܢ. ܕܝܰܗܒ ܠܗܽܘܢ ܛܽܘܒܳܐ ܒܡܰܠܦܳܢܽܘܬܶܗ ܟܰܕ ܐܳܡܰܪ: ܛܽܘܒܰܝܗܽܘܢ ܠܐܱܒܺܝ̈ܠܐ܆ ܕܗܶܢܘܢ ܢܶܬܒܰܝܐܘܽܢ (ܡܬܝ ܗ: ܕ). ܘܗܳܠܝܢ ܡܶܫܟܚܺܝܢ ܠܡܺܐܡܰܪ܆ ܕܠܐܴ ܠܥܳܠܰܡ ܛܳܥܶܐ ܠܰܢ ܡܳܪܝܳܐ. ܘܳܐܦܶܢ ܫܳܒܶܩ ܠܰܢ ܬܢܳܢ. ܐܰܝܟܰܢܐ ܕܢܶܬܬܘܶܐ ܘܢܶܬܐܶܒܶܠ ܥܰܠ ܒܺܝ̈ܫܳܬܰܢ. ܐܠܐ ܠܐܴ ܡܶܫܟܰܚ ܗܰܘ ܕܟܽܠܶܗ ܪ̈ܰܚܡܶܐ ܡܠܐܷ ܕܰܢܚܰܦܶܐ ܒܪܽܘܓܙܳܐ ܘܰܢܣܰܬܰܪ ܠܓܰܘ ܡܶܢܶܗ ܪ̈ܰܚܡܶܐ ܕܰܟܝܳܢܶܗ. ܘܰܟܪܺܝܗܽܘܬܶܗ ܕܒܰܪܢܳܫܳܐ ܥܒܰܕܬܶܗ ܪܰܡܝܳܐ ܩܕܳܡ ܒܥܶܠܕܰܪܳܐ.
ܘܶܐܡܪܶܬ ܕܰܟܪܺܝܗܽܘܬܝ ܗܺܝ: ܘܬܶܢܝܳܐ ܐܶܢܶܝܢ ܕܝܰܡܺܝܢܶܗ ܕܥܶܠܳܝܳܐ. ܘܡܶܢ ܥܶܠܬܳܐ ܕܬܰܘܣܶܦܬܳܐ ܕܰܚܛܺܝܬܳܐ ܢܶܣܒܰܬ ܥܶܠܬܳܐ ܐܳܦ ܡܰܪܕܽܘܬܳܐ. ܘܶܐܠܽܘ ܠܰܡ ܠܐܴ ܚܛܺܝܬ. ܐܰܝܟ ܚܰܛܳܝܳܐ ܠܐ ܡܶܬܪܕܶܐ ܗܘܺܝܬ. ܥܰܠ ܕܠܐ ܐܶܬܚܰܪܪܶܬ ܡܶܢ ܚܛܺܝܬܳܐ ܘܰܐܚܒܶܬ ܟܽܘܪܗܳܢܳܐ. ܬܶܢܝܳܢܽܘܬ ܡܣܳܡ ܒܪܺܝܫܳܐ ܐܶܬܦܣܶܩ ܥܠܰܝ.
ܡܶܛܠ ܕܶܐܬܕܰܟܪܶܬ ܡܶܢ ܩܕܺܝܡ ܬܶܕܡܪ̈ܳܬܳܟ: ܘܰܪܢܺܝܬ ܒܟܽܠܗܘܢ ܥܒܳܕܰܝ̈ܟ. ܘܶܐܣܬܰܟܠܶܬ ܒܨܶܒܝܳܢܳܟ ܛܳܒܳܐ. ܕܶܐܠܽܘ ܠܐܴ ܕܓܰܒܝܳܐ ܠܳܟ ܡܪܰܚܡܳܢܽܘܬܳܐ ܝܰܬܺܝܪ ܡܶܢ ܢܶܓ̈ܕܶܐ ܕܒܳܐܬܘ̈ܬܳܐ ܘܰܒܬܶܕܡܪ̈ܳܬܳܐ ܡܚܰܘܶܐ ܗܘܰܝܬ ܦܽܘܪܩܳܢܳܐ ܠܥܰܡܳܐ ܩܰܕܡܳܝܳܐ. ܝܳܕܰܥ ܐܢܳܐ ܓܶܝܪ ܕܒܰܐܝܠܝܢ ܚܰܝ̈ܠܐ ܗܘܳܐ ܦܽܘܪܩܳܢܳܐ ܠܥܰܡܳܐ ܡܶܢ ܡܶܨܪܶܝܢ. ܘܕܰܟܡܳܐ ܬܶܕܡܪ̈ܳܬܳܐ ܥܒܰܕܬ ܩܕܳܡ ܥܰܡܳܐ ܕܺܝܠܳܟ. ܘܰܒܟܽܠܗܘܢ ܥܒܳܕܰܝ̈ܟ ܡܶܬܒܰܩܝܳܐ ܢܰܦܫܝ. ܘܒܰܒܛܺܝܠܺܘܬܳܟ ܚܳܐܱܪ ܐܢܳܐ. ܕܠܰܝܬ ܥܰܘܠܐܴ ܒܽܐܘܪܚܳܟ. ܘܰܕܠܐ ܥܶܕܠܳܝ ܐܺܝܬܶܝܗ̇ ܡܕܰܒܪܳܢܽܘܬܳܟ. ܐܰܠܗܳܐ ܐܽܘܪܚܳܟ ܩܰܕܺܝܫܳܐ ܗܝ ܘܠܰܝܬ ܒܳܗ̇ ܥܰܘܠܐܴ ܘܰܚܛܺܝܬܳܐ. ܠܡܳܢܳܐ ܐܰܡܪܳܗ̇ ܢܒܺܝܐ ܠܗܳܕܐ. ܡܳܢܐ ܐܢܝܢ ܬܘܒ ܨܶܢܥ̈ܬܶܗ ܕܰܐܠܗܳܐ ܕܶܐܡܰܪ ܢܒܺܝܐ ܕܪܳܢܶܐ ܒܗܶܝܢ. ܘܬܘܒ ܡܰܚ̈ܘܳܬܳܐ ܥܣܰܪ ܕܰܒܗܶܝܢ ܐܶܫܬܰܩܦܰܬ ܡܶܨܪܶܝܢ. ܒܪܰܡ ܨܶܢܥ̈ܬܳܐ ܕܪܳܢܶܐ ܒܗܶܝܢ ܢܒܺܝܐ. ܐܺܝܬܰܝܗܶܝܢ ܗܳܠܝܢ ܕܰܒܝܰܕ ܡܶܐܬܺܝܬܶܗ ܕܰܐܠܗܳܐ ܠܐܱܪܥܳܐ ܐܶܬܚܰܫܰܚ ܒܗܶܝܢ. ܗܳܪܟܳܐ ܓܶܝܪ ܒܰܫܪܳܪܳܐ ܡܶܬܩܰܪ̈ܝܳܢ ܨܶܢܥ̈ܬܳܐ. ܨܢܺܝܥܳܐܝ̣ܬ ܓܶܝܪ ܨܒܳܐ ܘܶܐܬܚܰܫܰܚ ܟܰܕ ܟܰܣܺܝ ܐܽܘܪܚܳܐ ܕܰܡܕܰܒܪܳܢܽܘܬܶܗ ܡܶܢ ܗܰܘ ܐܰܪܟܽܘܢܳܐ ܕܰܚܛܺܝܬܳܐ. ܘܰܠܡܳܢܳܐ ܒܨܶܢܥ̈ܬܳܐ ܐܶܬܳܐ ܐܰܠܗܳܐ ܠܐܱܪܥܳܐ. ܐܶܠܽܘ ܓܶܝܪ ܠܐܴ ܛܰܫܺܝ ܢܰܦܫܶܗ ܒܒܶܣܪܳܐ ܕܰܠܒܶܫ. ܐܰܝܟ ܕܰܡܛܰܫܶܐ ܨܰܝܳܕܳܐ ܚܰܟܺܝܡܳܐ ܨܶܢܳܪܬܳܐ ܕܦܰܪܙܠܐܴ ܠܓܰܘ ܡܶܢ ܐܽܘܟܠܐܴ. ܘܫܳܕܶܐ ܩܕܳܡ ܨܰܝܕܳܐ. ܠܐܴ ܡܥܰܬܶܕ ܗܘܳܐ ܒܥܶܠܕܒܳܒܳܐ ܩܪܳܒܳܐ ܠܩܽܘܒܠܶܗ. ܡܳܕܶܝܢ ܗܰܘ ܕܛܰܫܺܝ ܐܽܘܪܚܶܗ ܡܶܢ ܚܙܳܬܳܐ ܕܰܡܕܰܒܪ̈ܳܢܶܐ ܥܘܺܝܪ̈ܶܐ ܘܠܐܴ ܝܰܕܥܽܘܗܝ. ܗܳܠܝܢ ܐܶܢܶܝܢ ܨܶܢܥ̈ܬܳܐ ܕܰܐܠܗܳܐ ܕܪܳܢܶܐ ܒܗܶܝܢ ܢܒܺܝܐ. ܘܰܠܗܳܠܝܢ ܩܪܳܐ ܐܶܢܝܢ ܘܪܽܘܚܳܐ ܩܰܕܺܝܫܳܐ ܟܰܕ ܐܳܡܰܪ:
ܐܰܠܗܳܐ ܐܽܘܪܚܳܟ ܩܰܕܺܝܫܳܐ ܗܝ. ܘܠܰܝܬ ܕܪܰܒ ܐܰܝܟ ܐܰܠܳܗܰܢ. ܠܡܳܢܳܐ ܒܰܪܬ ܩܳܠܐ ܗܳܕܐ. ܡܶܛܠ ܕܰܚܙܳܝܗܝ ܕܰܗܘܳܐ ܒܰܪܢܳܫܳܐ ܥܰܠܗܳܕܶܐ ܩܥܳܐ ܗܘܳܐ. ܕܠܰܝܬ ܕܪܰܒ ܐܰܟܘܳܬܶܗ. ܘܠܶܗ ܐܶܡܰܪ ܕܰܥܒܰܕ ܬܶܕܡܪ̈ܳܬܳܐ ܡܶܢܩܕܺܝܡ.
ܐܰܢܬ ܗܽܘ ܠܡ ܐܰܠܗܳܐ ܕܰܥܒܰܕܬ ܬܶܕܡܪ̈ܳܬܳܐ. ܘܚܰܘܺܝܬ ܒܥܰܡ̈ܡܶܐ ܥܽܘܫܢܳܟ: ܘܰܦܪܰܩܬ ܒܰܕܪܳܥܳܟ ܠܥܰܡܳܟ. ܠܰܒܢܱ̈ܝ ܝܰܥܩܽܘܒ ܘܝܰܘܣܶܦ. ܥܝܳܕܳܐ ܐܺܝܬ ܗܘܳܐ ܠܰܢܒܺܝ̈ܐ ܕܰܗܘܰܘ ܡܶܬܕܰܟܪܺܝܢ ܦܽܘܪܩܳܢܳܐ ܕܰܥܒܰܕ ܐܠܗܐ ܠܐܱܒܳܗܰܝ̈ܗܘܢ ܡܶܢ ܡܶܨܪܶܝܢ ܘܡܶܛܠ ܗܳܕܐ ܐܳܦ ܡܙܰܡܪܳܢܳܐ ܒܗܳܠܶܝܢ ܡܕܰܡܶܐ ܐܳܦ ܗܽܘ. ܟܰܕ ܡܩܰܪܶܒ ܩܽܘܒܳܠܛܰܝܒܽܘܬܳܐ ܠܐܠܗܐ. ܘܰܡܫܰܪܶܐ ܠܡܶܬܠܐܴ ܥܰܠ ܡܰܝܴ̈ܐ ܕܣܽܘܦ. ܕܰܥܪܰܩܘ ܡܶܢ ܪܶܡܙܳܐ ܕܰܐܠܗܳܐ. ܟܰܕ ܡܶܬܦܰܠܓܺܝܢ ܘܩܳܝܡܺܝܢ ܒܕܽܘܡܝܳܐ ܕܰܐܝܠܶܝܢ ܕܰܟܢܺܝܫܺܝܢ ܒܙܶܩ̈ܐ. ܘܰܗܘܳܐ ܐܰܬܪܳܐ ܒܰܝܢܳܬܗܘܢ ܘܰܥܒܰܪ ܥܰܡܳܐ.
ܚܙܰܐܘܽܟ ܠܰܡ ܡܰܝܴ̈ܐ ܐܰܠܗܳܐ. ܚܙܰܐܘܽܟ ܡܳܪܝ ܡܰܝܴ̈ܐ ܘܰܕܚܶܠܘ: ܐܳܦ ܬܗܽܘܡ̈ܐ ܙܳܥܘ ܘܰܥ̈ܢܳܢܶܐ ܪ̈ܙܰܦܝ ܡܰܝܴ̈ܐ. ܕܢܺܐܡܰܪ ܕܡܰܝܴ̈ܐ ܚܙܰܘ ܠܐܠܗܐ. ܡܰܝܴ̈ܐ ܓܶܝܪ ܠܰܝܬ ܠܗܽܘܢ ܒܽܘܝܳܢܳܐ ܕܢܶܚܙܽܘܢ ܠܐܠܗܐ. ܒܪܰܡ ܕܶܝܢ ܙܳܕܶܩ ܕܰܐܝܠܶܝܢ ܡܰܝܴ̈ܐ ܚܙܰܘ ܠܐܠܗܐ ܘܙܳܥܘ ܡܶܢܶܗ. ܡܰܝ̈ܳܐ ܕܶܝܢ ܗܳܢܘܢ ܕܡܶܬܩܰܫܶܝܢ ܗܘܰܘ ܠܽܘܩܒܰܠ ܟܝܳܢܳܐ ܐܢܳܫܳܝܳܐ. ܚܰܝ̈ܠܰܘܳܬܳܐ ܕܰܠܩܽܘܒܠܳܐ ܐܺܝܬܰܝܗܘܢ. ܗܳܠܝܢ ܐܰܝܟ ܝܰܡܳܐ ܩܕܳܡ ܥܶܒܪ̈ܳܝܶܐ. ܡܶܬܩܰܫܶܝܢ ܗܘܰܘ ܠܽܘܩܒܰܠ ܥܰܡܳܐ ܩܰܕܺܝܫܳܐ ܕܶܐܬܦܪܶܩ ܗܘܳܐ ܒܰܨܠܺܝܒܳܐ. ܟܰܕ ܕܶܝܢ ܦܠܰܓ ܡܽܘܫܶܐ ܠܝܰܡܳܐ ܕܣܽܘܦ ܩܕܳܡ ܒܢܱ̈ܝ ܝܺܣܪܳܐܝܠ܆ ܠܚܰܝ̈ܠܘܳܬܳܐ ܡܳܪ̈ܽܘܕܶܐ ܬܪܰܥ ܨܠܺܝܒܳܐ. ܡܶܛܠܗܳܢܳܐ ܐܳܡܰܪ ܢܒܺܝܐ܆ ܚܙܰܐܘܽܟ ܡܰܝܴ̈ܐ ܐܠܗܐ. ܘܟܰܕ ܐܶܬܦܬܰܚ ܬܰܪܥܳܐ ܕܡܰܥܡܽܘܕܺܝܬܳܐ. ܕܢܶܬܶܠ ܚܽܘܕܳܬܳܐ ܠܒܰܪܢܳܫܳܐ ܕܰܣܐܷܒ ܒܰܚܛܺܝܬܳܐ. ܘܬܘܒ ܐܶܡܰܪ܆ ܕܰܚܙܰܐܘܽܟ ܡܳܪܝ ܡܰܝܴ̈ܐ ܘܰܕܚܶܠܘ. ܒܥܶܕܳܢܳܐ ܕܰܨܠܺܝܒܽܘܬܶܗ ܕܰܚܙܰܘ ܚܰܝܠܐܴ ܕܓܰܢܒܳܪܽܘܬܶܗ ܕܚܰܘܺܝ ܒܰܡܚܺܝܠܽܘܬܳܐ. ܘܰܣܬܰܪ ܒܶܢܝܴ̈ܢܶܐ ܪ̈ܳܡܶܐ ܕܰܒܢܳܬ ܚܛܺܝܬܳܐ. ܚܳܒܘ ܡܶܢ ܚܙܳܬܶܗ ܘܰܕܚܶܠܘ ܡܶܢ ܥܽܘܫܢܶܗ. ܘܒܳܬܰܪ ܗܳܠܝܢ ܐܶܡܰܪ.
ܕܝܰܗܒܘ ܩܳܠܐ ܫܡܱ̈ܝ ܫܡܰܝܳܐ. ܝܰܗܒܘ ܩܴ̈ܠܐ ܕܬܶܫܒܽܘܚܬܳܐ ܚܰܝ̈ܠܘܬܳܐ ܩܰܕܺܝܫ̈ܐ ܕܥܳܡܪܺܝܢ ܒܰܫܡܱ̈ܝ ܫܡܰܝܴ̈ܐ. ܥܰܠ ܙܳܟܽܘܬܳܐ ܕܰܗܘܳܬ ܠܒܰܪܢܳܫܳܐ ܒܰܨܠܺܝܒܳܐ ܕܰܐܠܗܳܐ. ܘܡܶܟܺܝܠ ܡܫܰܪܶܐ ܡܰܠܟܳܐ ܕܢܶܫܕܶܐ ܓܶܐܪ̈ܶܐ ܒܣܶܕܪܳܐ ܕܰܒܥܶܠܕܰܪܳܐ ܐܰܝܟ ܕܶܐܡܰܪ ܪܽܘܚܳܐ:
ܘܳܐܦ ܓܶܐܪ̈ܰܝܟ ܠܰܡ ܦܳܪܚܺܝܢ. ܩܴ̈ܠܐ ܕܰܡܣܰܒܪ̈ܳܢܶܐ ܕܰܒܢܽܘܗܪܳܐ ܦܳܪܚܺܝܢ ܗܘܰܘ ܘܰܡܬܰܠܡܕܺܝܢ ܗܘܰܘ ܘܡܰܥܡܕܺܝܢ. ܘܫܳܕܶܝܢ ܓܶܐܪ̈ܶܐ ܒܳܐܟܶܠܩܰܪܨܳܐ.
ܐܳܦ ܩܳܠܐ ܕܪ̈ܰܥܡܰܝܟ ܒܓܺܝ̈ܓܠܐܷ. ܓܺܝ̈ܓܠܐܷ ܐܺܝܬܰܝܗܶܝܢ ܬܰܪܬܶܝܢ ܕܺܝܰܬܺܝ̈ܩܰܐܣ ܕܰܚܙܳܐ ܢܒܺܝܐ ܕܩܳܝ̈ܡܳܢ ܥܰܠ ܢܰܗܪܳܐ ܕܰܥܡܳܕܳܐ. ܘܟܰܕ ܫܠܺܝܚ̈ܐ ܘܡܰܠܦܳܢ̈ܐ ܒܪ̈ܰܥܡܶܐ ܡܶܬܕܰܡܶܝܢ. ܘܡܰܫܡܥܺܝܢ ܩܳܠܰܝ̈ܗܘܢ ܒܓܰܘ ܓܺܝ̈ܓܠܐܷ ܗܳܠܝܢ ܕܰܢܦܺܝܚܳܐ ܒܗܶܝܢ ܪܽܘܚܳܐ ܩܰܕܺܝܫܳܐ ܘܡܰܠܦܺܝܢ. ܠܰܒܢܰܝܢ̈ܫܳܐ ܡܳܢܰܐ ܗ̇ܘ ܨܶܒܝܳܢܳܐ ܕܰܐܠܗܳܐ. ܕܡܶܬܩܪܶܝܢ ܫܠܺܝ̈ܚܶܐ ܪ̈ܰܥܡܶܐ. ܣܳܗܶܕ ܡܰܪܩܽܘܣ ܡܣܰܒܪܳܢܳܐ. ܕܶܐܡܰܪ ܡܶܛܠ ܒܢܱ̈ܝ ܙܰܒܕܰܝ. ܕܣܳܡ ܠܗܽܘܢ ܡܳܪܰܢ ܫܡܳܗ̈ܐ ܒܢܱ̈ܝ ܪܓܶܫ: ܕܺܐܝܬܰܘܗܝ ܒܢܰܝ̈ ܪܰܥܡܳܐ (ܡܪܩܘܣ ܓ: ܝܙ). ܗܳܠܶܝܢ ܐܱܝܟ ܕܶܐܡܰܪ ܢܒܺܝܐ܆ ܕܡܰܪܥܡܺܝܢ ܗܘܰܘ ܩܳܠܰܝ̈ܗܘܢ ܒܰܕܡܽܘܬܳܐ ܕܓܺܝ̈ܓܠܐ ܒܰܢܒܺܝ̈ܐ ܘܒܰܫܠܺܝ̈ܚܶܐ. ܟܰܕ ܒܢܽܘܗܪܳܐ ܕܒܰܪ̈ܩܶܐ ܢܽܘܗܪ̈ܢܳܝܶܐ ܛܳܝܣܺܝܢ ܗܘܰܘ ܩܰܠܺܝܠܐܝ̣ܬ ܥܰܠ ܐܰܪܥܳܐ. ܐܰܝܟ ܕܶܐܡܰܪ ܢܒܺܝܳܐ.
ܐܰܢܗܰܪܘ ܒܰܪ̈ܩܰܝܟ ܠܡܶܬܥܰܡܪܳܢܺܝܬܳܐ. ܡܶܢ ܒܳܬܰܪ ܕܩܰܒܶܠܘ ܫܠܺܝ̈ܚܶܐ ܪܽܘܚܳܐ ܕܩܽܘܕܫܳܐ. ܘܰܐܝܟ ܒܰܪ̈ܩܶܐ ܕܫܰܒ̈ܛܶܐ ܢܽܘܪ̈ܳܢܳܝܶܐ ܦܳܪܣܺܝܢ ܗܘܰܘ ܠܳܗ̇ ܠܰܣܒܰܪܬܳܐ ܥܰܠ ܣܰܘܦ̈ܐ ܕܡܶܬܥܰܡܪܳܢܺܝܬܳܐ. ܟܰܕ ܠܗܳܠܝܢ ܚܙܳܬ ܗܘܳܬ ܐܶܬܪܰܗܒܰܬ ܐܰܪܥܳܐ. ܘܪܶܥܠܰܬ ܘܶܐܬܕܰܠܚܰܬ. ܘܶܐܬܕܰܠܰܚܘ ܣܰܟ̈ܠܰܝ ܠܶܒܳܐ. ܘܰܥܛܰܦܘ ܡܶܢ ܐܽܘܪ̈ܚܳܬܳܐ ܒܺܝ̈ܫܳܬܳܐ. ܢܒܺܝܐ ܬܘܒ ܠܘܳܬܶܗ ܕܦܳܪܽܘܩܳܐ ܐܶܡܰܪ.
ܒܝܰܡܳܐ ܐܽܘܪܚܳܟ ܘܰܫܒܺܝ̈ܠܰܝܟ ܒܡܰܝܴ̈ܐ ܣܰܓܺܝ̈ܐܐ. ܘܥܶܩ̈ܒܳܬܳܟ ܠܐ ܐܶܬܺܝ̈ܕܰܥܝ. ܠܥܳܠܡܳܐ ܠܰܡ ܟܰܕ ܥܰܠܬ ܘܗܰܘܝܬ ܒܰܪܢܳܫܳܐ. ܘܰܫܒܺܝ̈ܠܰܝܟ ܒܰܝܢܳܬ ܚܰܝ̈ܠܰܘܳܬܳܐ ܡܶܬܝܰܕܥ̈ܢܶܐ ܥܒܰܪܘ. ܘܠܐ ܕܶܝܢ ܥܳܠܡܳܐ ܝܰܕܥܳܟ ܕܡܰܢ ܐܰܢܬ ܟܰܕ ܐܶܬܓܠܺܝܬ ܒܶܗ. ܘܠܐ ܚܰܝ̈ܠܘܬܳܐ ܫܰܠܺܝ̈ܛܳܢܶܐ ܕܳܐܐܱܪ. ܐܰܕܪܶܟܘ ܘܣܳܡܘ ܥܰܠ ܥܶܩ̈ܒܳܬܳܟ. ܘܒܳܬܰܪ ܗܳܠܶܝܢ ܐܶܡܰܪ:
ܕܒܰܪܬ ܠܥܰܡܳܟ ܐܰܝܟ ܥܳܢܴ̈ܐ ܒܺܐܝܕܳܐ ܕܡܽܘܫܶܐ ܘܰܐܗܪܽܘܢ. ܒܰܬܪ̈ܰܝܗܘܢ ܗܳܠܝܢ ܡܶܬܡܬܶܠ ܥܰܡܰܢܘܐܝܠ. ܒܗܰܘ ܡܰܢ ܚܰܕ ܟܽܘܡܪܳܐ. ܒܰܐܚܪܺܢܳܐ ܕܶܝܢ ܢܒܺܝܐ. ܘܡܶܛܠ ܗܳܢܐ ܒܺܐܝܕܳܐ ܐܶܡܰܪ ܕܰܕܒܰܪ ܠܥܰܡܶܗ ܘܠܰܘ ܒܺܐܝ̈ܕܰܝܳܐ. ܕܥܰܡܰܢܘܐܝܠ ܐܺܝܬܰܘܗܝ ܐܺܝܕܶܗ ܘܝܰܡܺܝܢܶܗ ܕܰܡܕܰܒܰܪ ܠܥܺܕܬܶܗ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܫܒܥܝܢ ܘܬܡܢܝܐ
ܡܰܘܕܰܥ ܥܰܠ ܥܽܘܗܕܳܢܳܐ ܕܰܥܒܰܕ ܐܠܗܐ ܠܘܳܬ ܥܰܡܳܐ ܘܡܰܠܦܳܢܽܘܬܳܐ ܘܡܰܪܬܝܳܢܽܘܬܳܐ: ܘܥܰܠ ܐܪ̈ܳܙܶܐ ܘܦܷ̈ܠܐܴܬܳܐ ܕܨܳܪܰܬ ܢܒܺܝܽܘܬܳܐ ܒܰܡܕܰܒܪܳܢܽܘܬܳܐ ܕܥܰܠ ܡܳܪܰܢ ܥܰܡܰܢܘܐܝܠ.
ܠܒܺܐܡܰܐ ܕܡܰܠܦܳܢܽܘܬܶܗ ܩܪܳܐ ܠܶܗ ܠܥܰܡܳܐ ܕܰܒܢܱ̈ܝ ܝܺܣܪܳܐܝܠ܆ ܛܽܘܒܬܳܢܳܐ ܕܰܘܝܕ ܒܝܰܕ ܡܰܙܡܽܘܪܳܐ ܗܳܢܐ ܕܫܰܒܥܺܝܢ ܘܰܬܡܳܢܝܳܐ. ܕܢܺܐܬܽܘܢ ܢܶܫܡܥܽܘܢ ܡܶܢܶܗ ܢܳܡܽܘܣܳܐ ܕܰܐܠܗܳܐ. ܡܦܺܝܣ ܠܗܘܢ܆ ܠܰܘ ܓܶܝܪ ܐܝܟ ܕܰܒܟܽܠܗܝܢ ܬܶܫܒܚ̈ܬܳܐ ܡܫܰܪܶܐ ܒܬܶܫܒܽܘܚܬܳܐ ܗܳܕܐ. ܐܶܠܐ ܡܶܢܶܗ ܕܫܽܘܪܳܝܳܐ ܠܘܳܬ ܡܶܬܬܦܺܝܣܳܢܽܘܬܳܐ ܡܰܫܡܰܥ܆ ܟܰܕ ܡܰܪܬܶܐ ܠܗܽܘܢ ܕܠܐ ܢܶܬܕܰܡܽܘܢ܆ ܠܗܽܘܢ ܠܐܱܒܳܗܰܝ̈ܗܘܢ ܩܰܕܡܳܝ̈ܐ܆ ܕܬܶܡܪ̈ܳܬܳܐ ܕܰܐܠܗܳܐ ܥܺܝܢ ܒܥܺܝܢ ܚܳܙܶܝܢ ܗܘܰܘ. ܡܰܡܪܡܪ̈ܳܢܶܐ ܗܘܰܘ ܘܠܐ ܡܶܬܛܦܺܝ̈ܣܳܢܶܐ. ܡܶܛܠ ܗܳܕܶܐ ܛܽܘܒܬܳܢܳܐ ܕܰܘܝܕ ܡܙܰܗܰܪ ܗܘܳܐ ܕܒܰܚܕܳܐ ܡܶܢ ܒܺܝ̈ܫܳܬܳܐ ܩܰܕܡܳܝ̈ܬܳܐ ܢܶܬܬܚܶܕ ܥܰܡܳܐ ܒܙܰܒܢܳܐ ܕܰܡܕܰܒܪܳܢܽܘܬܳܐ. ܟܰܕ ܩܳܝܡܺܝܢ ܟܳܗ̈ܢܶܐ ܒܡܰܫܟܢܳܐ ܩܕܳܡ ܩܺܒܽܘܬܳܐ ܕܕܺܝܰܬܺܩܺܝ. ܘܪ̈ܺܝܫܰܝ ܫܰܒ̈ܛܶܐ ܕܺܝܣܪܳܐܝܠ ܚܕܳܪ̈ܰܝ ܒܰܝܬܳܐ ܕܰܐܠܗܳܐ. ܘܥܰܡܳܐ ܣܰܓܺܝܳܐܐ ܡܶܢ ܣܳܟܶܗ ܒܙܰܒܢܳܐ ܕܥܰܕܥܺܐܕܳܐ ܗܰܘ ܕܰܡ̈ܛܰܠܠܐܷ. ܐܰܙܺܝܥ ܕܰܘܝܕ ܩܺܝܬܳܪܶܗ ܡܰܠܦܳܢܳܐܝ̣ܬ. ܒܩܳܠܐ ܒܰܣܺܝܡܳܐ ܘܳܐܡܰܪ:
ܥܰܡܝ ܨܽܘܬ ܢܳܡܽܘܣܝ ܘܶܐܬܛܦܺܝܣ. ܘܰܨܠܰܘ ܐܶܕܢܰܝ̈ܟܽܘܢ ܠܡܶܠܰܘ̈ܗܝ ܕܦܽܘܡܝ: ܗܳܐ ܓܶܝܪ ܐܶܦܬܰܚ ܦܽܘܡܝ ܒܡܱ̈ܬܠܐܷ. ܘܺܐܡܰܪ ܦܷ̈ܠܳܐܬܳܐ ܕܡܶܢ ܩܕܺܝܡ. ܐܰܝܟܰܢܳܐ ܕܩܰܕܡܶܬ ܐܶܡܪܶܬ ܡܶܢ ܠܥܶܠ. ܕܢܶܨܠܽܘܢ ܐܶܕ̈ܢܰܝܗܽܘܢ ܠܡܶܠܰܘ̈ܗܝ. ܡܶܛܠ ܕܪܳܚܡܺܝܢ ܗܘܰܘ ܠܡܶܫܡܰܥ ܡܱ̈ܬܠܐܷ ܘܦܷ̈ܠܐܬܳܐ. ܡܶܫܬܰܘܕܶܐ ܕܶܝܢ ܕܗܽܘ ܝܳܕܰܥ ܡܶܕܶܡ ܕܳܐܡܰܪ. ܘܰܡܦܳܣ ܗܽܘ ܬܽܘܒ ܒܰܐܝܠܶܝܢ ܕܰܫܡܰܥ܆
ܐܰܝܠܶܝܢ ܕܰܫܡܰܥܢ ܝܺܕܰܥܢ ܐܶܢܶܝܢ. ܘܳܐܦ ܐܰܝܠܶܝܢ ܕܰܐܒܳܗܰܝ̈ܢ ܐܶܫܬܰܥܺܝܘ ܠܰܢ. ܘܰܒܡܰܫܠܡܳܢܽܘܬܳܐ ܩܰܒܶܠܢܰܢ ܡܷ̈ܠܐ ܐܳܦ ܡܰܠܦܳܢܽܘܬܳܐ ܕܩܰܕܡܳܝ̈ܐ. ܘܡܶܕܶܡ ܕܚܰܘܺܝܘ ܠܰܢ.
ܕܠܐ ܢܟܰܣܶܐ ܡܶܢ ܒܢܰܝ̈ܗܘܢ. ܕܠܐ ܒܽܘܨܳܪܳܐ ܡܶܫܬܰܥܶܐ ܐܢܳܐ ܩܕܳܡܰܝܟܽܘܢ. ܘܠܰܘ ܠܟܽܘܢ ܒܰܠܚܽܘܕ ܐܳܡܰܪ ܐܢܳܐ.
ܐܶܠܐ ܘܰܠܕܳܪܳܐ ܐܚܪܳܝܳܐ ܐܶܫܬܰܥܶܐ. ܕܳܐܦ ܗܶܢܘܢ ܢܺܐܠܦܽܘܢ. ܡܶܢ ܐܰܝܠܶܝܢ ܕܫܳܡܥܺܝܢ ܡܶܢܰܢ ܘܰܡܩܰܒܠܺܝܢ. ܐܰܝܟܰܢܳܐ ܕܳܐܦ ܚܢܰܢ ܩܰܒܶܠܢܰܢ ܡܶܢ ܗܳܢܘܢ ܕܩܰܕܶܡܘ ܝܠܶܦܘ ܢܳܡܽܘܣܶܗ ܕܰܐܠܗܳܐ.
ܐܳܦ ܬܶܫܒܚ̈ܬܶܗ ܕܡܳܪܝܳܐ ܘܚܰܝܠܶܗ. ܘܬܶܕܡܪ̈ܳܬܶܗ ܕܰܥܒܰܕ: ܕܰܐܩܺܝܡ ܣܳܗܕܽܘܬܶܗ ܒܝܰܥܩܽܘܒ. ܘܢܳܡܽܘܣܶܗ ܣܳܡ ܒܺܝܣܪܳܐܝܠ: ܐܰܝܟ ܕܦܰܩܶܕ ܠܰܐܒܳܗܰܝ̈ܢ ܕܢܰܘܕܥܽܘܢ ܠܰܒܢܰܝ̈ܗܘܢ: ܘܢܶܕܥܽܘܢ ܠܕܳܪܳܐ ܐܚܪܳܝܳܐ. ܒܢܰܝܴ̈ܐ ܕܡܶܬܝܰܠܕܺܝܢ ܘܩܳܝܡܺܝܢ: ܕܢܶܫܬܰܥܽܘܢ ܠܰܒܢܰܝ̈ܗܘܢ. ܗܳܠܝܢ ܡܰܢ ܒܡܰܫܠܡܳܢܽܘܬܳܐ ܕܰܐܒܳܗ̈ܝܢ ܩܰܒܶܠܢ ܐܶܢܝܢ ܡܶܢ ܐܰܒܳܗ̈ܝܢ ܩܰܕܡܳܝ̈ܐ. ܘܰܒܝܽܘܒܳܠܐ ܚܰܕ ܠܚܰܕ ܐܰܫܠܶܡܘ. ܐܰܝܟܰܢܳܐ ܕܶܝܢ ܕܗܳܠܶܝܢ ܕܒܳܬܪܰܢ ܐܳܬܶܝܢ. ܠܐ ܢܶܛܥܽܘܢ ܢܳܡܽܘܣܶܗ ܕܰܐܠܗܳܐ.
ܕܢܶܗܘܶܐ ܣܰܒܪܳܐ ܕܺܝܠܗܽܘܢ ܒܰܐܠܗܳܐ: ܘܠܐ ܢܶܛܥܽܘܢ ܥܒܳܕܰܘ̈ܗܝ ܕܰܐܠܗܳܐ. ܘܟܰܕ ܒܢܳܡܽܘܣܶܗ ܕܰܐܠܗܳܐ ܡܶܙܕܰܗܪܺܝܢ.
ܘܦܽܘܩܕܳܢܰܘ̈ܗܝ ܢܶܛܪܽܘܢ: ܘܠܐ ܢܶܗܘܘܢ ܐܝܟ ܐܰܒܳܗܰܝ̈ܗܘܢ. ܕܳܪܳܐ ܒܺܝܫܳܐ ܘܰܡܡܰܪܡܪܳܢܳܐ: ܕܳܪܳܐ ܕܠܐ ܐܰܬܩܶܢ ܠܶܒܶܗ ܘܠܐ ܗܰܝܡܶܢܘ ܒܰܐܠܗܳܐ ܕܪܽܘܚܶܗ. ܒܗܳܠܝܢ ܡܶܫܬܰܥܶܐ ܢܒܺܝܐ. ܕܰܐܝܟܰܢܳܐ ܒܡܰܕܒܪܳܐ ܡܰܪܡܰܪܘ ܠܪܽܘܚܶܗ ܕܰܐܠܗܳܐ. ܟܰܕ ܢܦܰܩܘ ܡܶܢ ܡܶܨܪܶܝܢ. ܘܥܰܠܗܳܕܐ ܝܰܗܒܠܗܽܘܢ ܠܐ ܕܢܶܥܠܘܢ ܕܶܝܢ ܠܐܱܪܥܳܐ ܗܳܢܰܘ ܕܡܽܘܠܟܳܢܳܐ. ܟܰܕ ܡܰܪܬܶܐ ܕܕܰܠܡܳܐ ܐܰܢܬܽܘܢ ܐܳܦ ܡܶܢ ܗܳܢܘܢ ܬܶܗܘܽܘܢ. ܒܝܰܕ ܓܶܠܝܳܢܳܐ ܕܶܝܢ ܡܦܰܫܶܩ ܐܳܦ ܫܰܒܛܳܐ ܗܰܘ ܕܫܰܪܝܰܬ ܡܶܢܶܗ ܡܳܪܽܘܕܽܘܬܳܐ ܠܽܘܩܒܰܠ ܡܽܘܫܶܐ. ܘܰܐܝܠܶܝܢ ܐܶܢܘܢ ܕܰܗܦܰܟܘ ܡܶܢ ܩܪܳܒܳܐ. ܘܠܐ ܨܒܰܘ ܕܶܝܢ ܕܢܶܣܩܽܘܢ ܠܰܩܪܳܒܳܐ ܩܕܳܡ ܡܳܪܝܳܐ.
ܒܢܰܘ̈ܗܝ ܠܰܡ ܕܰܐܦܪܶܝܡ ܕܰܡܬܰܚܘ ܝܰܬܪܳܐ ܘܰܫܕܰܘ ܒܩܶܫܬܳܐ ܘܰܗܦܰܟܘ ܒܝܰܘܡܳܐ ܕܰܩܪܳܒܳܐ. ܗܳܠܝܢ ܠܽܘܩܒܠ ܡܽܘܫܶܐ ܢܒܺܝܐ ܐܶܙܕܰܝܰܢܘ ܒܡܰܕܒܪܳܐ ܟܰܕ ܐܳܡܪܺܝܢ: ܕܬܰܘ ܢܶܥܒܶܕ ܠܰܢ ܪܺܝܫܳܐ. ܘܢܶܗܦܽܘܟ ܠܰܢ ܠܡܶܨܪܶܝܢ (ܡܢܝܢܐ ܝܕ: ܕ). ܗܳܠܝܢ ܥܳܒܕܺܝܢ ܗܘܰܘ ܒܪܶܥܝܳܢܳܐ ܡܳܪܽܘܕܳܐ. ܡܶܛܠ ܕܶܐܡܗܽܘܢ ܡܶܢ ܡܶܨܪܶܝܢ ܗܘܳܬ. ܘܣܰܓܺܝ ܢܶܫ̈ܐ ܢܣܺܝܒܴ̈ܢ ܗܘܱ̈ܝ ܡܶܢ ܡܶܨܪܶܝܢ. ܗܳܠܝܢ ܕܰܒܟܠܙܒܰܢ ܪ̈ܳܓܳܢ ܗܘ̈ܝ ܕܰܠܡܶܨܪܶܝܢ ܥܳܛܦܴ̈ܢ ܗܘܱ̈ܝ.
ܘܥܰܠ ܗܳܕܐ ܕܠܐܴ ܢܛܰܪܘ ܩܝܳܡܶܗ ܕܰܐܠܗܳܐ. ܘܰܒܢܳܡܽܘܣܶܗ ܠܐܴ ܨܒܰܘ ܠܰܡܗܰܠܳܟܽܘ: ܘܰܛܥܰܘ ܥܒܳܕܰܘ̈ܗܝ ܐܳܦ ܬܶܕܡܪ̈ܳܬܶܗ. ܕܚܰܘܺܝ ܐܶܢܘܢ ܩܕܳܡ ܐܰܒܳܗܰܝ̈ܗܘܢ. ܡܶܬܕܰܘܰܕ ܗܘܳܐ ܗܳܢܐ ܫܰܒܛܳܐ ܕܰܐܦܪܶܝܡ ܒܟܽܠܙܒܰܢ ܠܘܳܬ ܢܛܽܘܪܽܘܬ ܦܽܘ̈ܩܕܳܢܶܐ. ܘܰܐܝܟ ܝܽܘܠܦܳܢܳܐ ܡܶܕܶܡ ܒܡܰܫܠܡܳܢܽܘܬܳܐ ܩܳܝܡܺܝܢ ܗܘܰܘ ܠܽܘܩܒܰܠ ܡܕܰܒܪ̈ܳܢܶܐ. ܘܠܰܘ ܒܰܠܚܽܘܕ ܠܽܘܩܒܰܠ ܡܽܘܫܶܐ. ܘܟܰܕ ܦܰܠܶܓ ܝܶܫܘܥ ܒܰܪܢܽܘܢ ܐܰܪܥܳܐ ܠܫܰܒ̈ܛܶܐ. ܗܶܢܘܢ ܒܰܠܚܽܘܕ ܒܳܥܶܝܢ ܗܘܰܘ ܕܬܽܘܒ ܢܰܘܣܶܦ ܠܗܽܘܢ ܗܰܘ ܕܰܡܦܰܠܶܓ. ܘܳܐܡܪܺܝܢ ܗܘܰܘ ܠܝܶܫܽܘܥ: ܥܕܰܡܳܐ ܠܰܡ ܠܗܳܪܟܳܐ ܒܰܪܟܰܢ ܡܳܪܝܳܐ (ܝܫܘܥ ܒܪܢܘܢ ܝܙ: ܝܕ). ܘܥܰܡ ܓܶܕܥܽܘܢ ܬܘܒ ܟܕ ܐܶܙܰܠܘ ܠܰܩܪܳܒܳܐ ܥܰܠ ܡܶܕܝܰܢܳܝ̈ܐ ܢܳܨܶܝܢ ܗܘܰܘ ܩܰܫܝܳܐܝ̣ܬ ܕܰܠܡܳܢܳܐ ܠܰܡ ܠܐ ܩܪܰܝܬܳܢ ܟܰܕ ܐܶܙܰܠܬ ܠܰܩܪܳܒܳܐ ܥܰܠ ܡܶܕܝܰܢ (ܕܝܳܢ̈ܐ ܚ: ܐ)؟ ܠܢܰܦܬܰܚ ܬܘܒ ܟܰܕ ܐܶܙܰܠ ܠܰܩܪܳܒܳܐ ܥܰܠ ܒܢܱ̈ܝ ܥܰܡܽܘܢ ܐܳܡܪܺܝܢ ܗܘܰܘ: ܕܰܠܡܳܢܳܐ ܐܶܙܰܠܬ ܠܰܩܪܳܒܳܐ ܥܡ ܒܢܱ̈ܝ ܥܰܡܽܘܢ܆ ܘܠܰܢ ܠܐ ܩܪܰܝܬ ܠܡܺܐܙܰܠ ܥܰܡܳܟ. ܡܰܘܩܕܺܝܢܰܢ ܒܰܝܬܳܟ ܒܢܽܘܪܳܐ ܘܠܳܟ ܒܶܗ (ܕܝܳܢ̈ܐ ܝܒ: ܐ). ܡܶܢ ܗܳܢܐ ܫܰܒܛܳܐ ܐܺܝܬܰܘܗܝ ܐܳܦ ܝܽܘܪܰܒܥܰܡ ܒܰܪ ܢܳܒܳܛ ܗܰܘ ܡܳܪܽܘܕܳܐ ܘܣܳܓܽܘܕܳܐ ܕܥܶܓ̈ܠܐܷ. ܡܶܢ ܗܳܢܳܐ ܫܰܒܛܳܐ ܐܺܝܬܰܘܗܝ ܗܘܳܐ ܐܳܦ ܐܳܚܳܒ ܗܰܘ ܣܳܓܽܘܕܳܐ ܕܫܺܐܕ̈ܐ. ܠܗܳܢܳܐ ܫܰܒܛܳܐ ܬܽܘܒ ܡܨܰܚܶܐ ܗܘܳܐ ܘܰܡܩܰܛܪܶܓ. ܐܳܦ ܗܽܘܫܳܥ ܢܒܺܝܳܐ܆ ܗܳܠܝܢ ܓܶܝܪ ܡܶܢ ܫܽܘܪܳܝܳܐ܆ ܠܐ ܗܰܝܡܶܢܘ ܒܰܐܝܠܶܝܢ ܕܰܚܙܰܘ ܕܰܥܒܰܕ ܐܠܗܳܐ ܒܰܐܪܥܳܐ ܕܡܶܨܪܶܝܢ. ܟܰܕ ܦܪܰܩ ܠܐܒܳܗܰܝ̈ܗܘܢ ܐܝܟ ܕܶܐܡܰܪ ܢܒܺܝܳܐ.
ܕܚܰܘܺܝ ܐܶܢܘܢ ܩܕܳܡ ܐܒܳܗܰܝ̈ܗܘܢ: ܕܰܥܒܰܕ ܬܶܕܡܪ̈ܳܬܶܗ ܒܰܐܪܥܳܐ ܕܡܶܨܪܶܝܢ. ܘܰܒܚܰܩ̈ܠܬܳܐ ܕܨܳܥܳܢ. ܒܗܳܠܶܝܢ ܠܰܡ ܠܐ ܗܰܝܡܶܢܘ܆ ܡܶܛܠ ܕܰܐܚܺܝܕܺܝܢ ܗܘܰܘ ܒܩܽܘܕܡܳܐ ܨܶܝܕ ܚܽܘܒܳܐ ܕܒܺܝ̈ܫܳܬܳܐ. ܘܠܐ ܝܰܡܳܐ ܕܶܐܣܬܕܶܩ ܘܩܳܡܘ ܡܰܝܴ̈ܐ ܐܝܟ ܕܰܒܙܶܩ̈ܐ ܐܰܠܶܦ ܐܢܘܢ
ܬܪܰܥ ܝܰܡܳܐ ܘܰܐܥܒܰܪ ܐܢܘܢ܆ ܘܰܐܩܺܝܡ ܡܰܝܴ̈ܐ ܐܝܟ ܕܰܒܙܶܩ̈ܐ. ܗܳܠܶܝܢ ܦܷ̈ܠܐܬܳܐ ܐܰܝܠܶܝܢ ܕܶܐܫܬܰܘܕܺܝ ܕܳܐܡܰܪ. ܘܟܰܕ ܛܳܒ ܒܰܫܪܳܪܳܐ ܐܶܬܦܰܠܰܓ ܝܰܡܳܐ. ܐܠܐ ܦܶܠܐܷܬܳܐ ܕܰܥܡܳܕܳܐ ܩܰܕܺܝܫܳܐ. ܨܳܐܪ ܗܘܳܐ ܒܰܣܕܳܩܶܗ. ܘܟܰܕ ܡܰܝܴ̈ܐ ܕܝܰܡܳܐ ܐܝܟ ܕܰܒܙܶܩ̈ܐ ܐܶܬܟܰܢܰܫܘ ܘܳܐܦ ܩܳܡܘ. ܐܠܐ ܦܷ̈ܠܳܐܬܳܐ ܡܫܰܘܕܥܺܝܢ ܗܘܰܘ. ܕܠܐ ܢܰܡܪܚܽܘܢ ܠܰܡܚܰܒܳܠܽܘ ܠܰܥܡܺܝ̈ܕܶܐ. ܘܒܳܬܰܪ ܗܳܕܶܐ ܐܳܡܰܪ ܢܒܺܝܳܐ:
ܕܰܒܰܪ ܐܶܢܘܢ ܒܺܐܝܡܳܡܳܐ ܒܰܥܢܳܢܳܐ ܘܟܽܠܶܗ ܠܺܠܝܳܐ ܒܙܰܗܪܳܐ ܕܢܽܘܪܳܐ. ܐܳܦ ܥܢܳܢܳܐ ܬܽܘܒ ܦܶܠܐܷܬܳܐ ܡܚܰܘܶܐ ܠܰܢ܆ ܕܛܰܝܒܽܘܬܳܐ ܗܝ ܕܰܒܝܰܕ ܪܽܘܚܳܐ ܡܰܛܠܐܴ ܡܶܬܝܰܕܥܳܢܳܐܝܬ ܥܰܠ ܥܡܳܕܳܐ ܩܰܕܺܝܫܳܐ ܕܩܰܒܶܠܢ ܣܺܝܡܰܬ ܒܢܰܝܴ̈ܐ. ܘܢܽܘܪܳܐ ܗܳܝ ܕܡܰܢܗܪܳܐ ܗܘܳܬ ܠܗܘܢ ܒܠܺܠܝܳܐ. ܠܡܰܘܗܰܒܬܳܐ ܗܳܝ ܕܶܐܬܚܰܙܝܰܬ ܒܠܶܫܳܢ̈ܐ ܕܢܽܘܪܳܐ. ܕܫܶܟܢܰܬ ܥܰܠ ܬܰܠܡܺܝ̈ܕܶܐ ܒܥܶܠܺܝܬܳܐ ܡܣܰܟܠܐܴ. ܒܳܬܰܪ ܗܳܠܶܝܢ ܡܰܝܬܶܐ ܘܳܐܡܰܪ:
ܬܪܰܥ ܛܰܪܳܢܳܐ ܒܡܰܕܒܪܳܐ ܘܰܐܫܩܺܝ ܐܶܢܽܘܢ ܐܝܟ ܕܡܶܢ ܬܗܽܘܡܳܐ ܪܰܒܳܐ. ܡܳܢܳܐ ܕܶܝܢ ܦܶܠܐܷܬܳܐ ܒܛܰܪܳܢܳܐ ܦܰܫܶܩ ܠܰܢ. ܥܰܡܰܢܘܐܝܠ ܓܶܝܪ ܒܗܳܢܳܐ ܡܶܬܺܝܕܰܥ. ܟܕ ܒܰܨܠܺܝܒܳܐ ܩܰܒܶܠ ܡܚܽܘܬܳܐ ܕܶܐܣܛܪ̈ܰܛܺܝܽܘܛܶܐ ܒܗܳܝ ܪܽܘܡܚܳܐ. ܘܟܕ ܐܶܬܬܪܰܥ ܣܶܛܪܶܗ܆ ܐܝܟ ܕܡܶܢ ܬܗܽܘܡܳܐ ܕܠܐ ܓܳܐܷܙ܆ ܘܡܰܫܩܶܐ ܠܥܺܕܬܶܗ ܡܰܝܴ̈ܐ ܚܰܝ̈ܐ. ܕܰܡܡܰܙܓܺܝܢ ܒܰܕܡܳܐ ܦܳܪܽܘܩܳܝܳܐ. ܘܡܶܛܠܗܳܢܐ ܐܶܡܰܪ ܐܝܟ ܕܡܶܢ ܬܗܽܘܡܳܐ ܪܰܒܳܐ. ܘܗܳܢܳܐ ܡܰܢ ܛܰܪܳܢܳܐ ܐܝ̣ܬܰܘܗܝ. ܗܰܘ ܩܰܕܡܳܝܳܐ ܕܬܰܪܥܶܗ ܚܽܘܛܪܳܐ. ܒܚܽܘܪܺܝܒ. ܐܠܐ ܒܳܬܰܪ ܗܳܢܐ ܐܳܦ ܟܺܐܦܳܐ ܡܰܥܶܠ ܟܕ ܐܳܡܰܪ.
ܐܰܦܶܩ ܪ̈ܳܕܰܝܳܐ ܡܶܢ ܟܺܐܦܳܐ. ܘܰܪܕܰܘ ܡܰܝܴ̈ܐ ܐܱܝܟ ܢܰܗܪ̈ܰܘܳܬܳܐ. ܥܰܠ ܟܺܐܦܳܐ ܗܳܕܐ ܚܢܰܢ ܠܐ ܢܶܣܬܢܶܩ ܠܡܰܘܪܳܟܽܘ ܡܶܠܬܳܐ. ܐܰܝܟ ܡܰܢ ܕܰܣܢܺܝܩܳܐ ܥܰܠ ܦܽܘܫܳܩܳܐ ܣܰܓܺܝܐܐ ܕܡܶܢܰܢ ܕܺܝܠܰܢ. ܠܗܳܕܐ ܓܶܝܪ ܡܦܰܫܶܩ ܠܳܗ̇ ܛܳܒ ܢܰܗܺܝܪܳܐܝܬ ܦܰܘܠܽܘܣ ܐܠܗܳܝܳܐ. ܐܶܡܰܪ ܓܶܝܪ ܟܕ ܠܘܳܬ ܩܽܘܪ̈ܺܝܢܬܳܝܶܐ ܟܬܰܒ: ܕܫܳܬܶܝܢ ܗܘܰܘ ܡܶܢ ܟܺܐܦܳܐ ܕܪܽܘܚܳܐ ܕܳܐܬܝܳܐ ܗܘܳܬ ܥܰܡܗܽܘܢ: ܟܺܐܦܳܐ ܕܶܝܢ ܗܳܝ ܗܽܘ ܗܘܳܐ ܡܫܺܝܚܳܐ (ܐ ܩܘܪ̈ܢܬܝܐ ܝ: ܕ). ܥܳܕܶܠ ܠܗܽܘܢ ܕܶܝܢ ܪܽܘܚܳܐ ܠܗܳܠܶܝܢ ܕܰܠܒܽܘ̈ܣܳܡܶܐ ܗܳܠܶܝܢ ܐܪ̈ܳܙܳܢܳܝܶܐ ܫܘܰܘ ܐܳܡܰܪ:
ܘܰܐܘܣܶܦܘ ܬܽܘܒ ܥܰܡܳܐ ܠܡܶܚܛܳܐ ܘܠܰܡܡܰܪܡܳܪܽܘ ܠܰܡܪܰܝܡܳܐ ܒܨܶܗܝܳܐ. ܘܟܕ ܣܰܓܺܝ ܠܰܡ ܬܳܟ̈ܒܳܢ ܗܘܱ̈ܝ ܐܴܬܘ̈ܬܳܐ ܚܕܳܐ ܠܰܚܕܳܐ. ܗܶܢܘܢ ܠܰܡܗܰܝܡܳܢܽܘ ܠܐ ܡܶܬܬܦܺܝܣܺܝܢ ܗܘܰܘ . ܘܟܰܕ ܒܛܳܒ̈ܬܳܐ ܡܶܬܒܰܣܡܺܝܢ ܗܘܰܘ. ܡܶܢ ܕܢܶܗܘܘܢ ܡܢܰܣܝ̈ܢܶܐ ܠܐ ܫܳܠܶܝܢ ܗܘܰܘ.
ܘܢܰܣܺܝܘ ܠܰܡ ܠܐܱܠܗܳܐ ܒܠܶܒܗܘܢ. ܘܰܠܡܶܫܰܐܠ ܡܶܐܟܽܘܠܬܳܐ ܠܢܰܦܫܗܘܢ: ܘܪܰܛܶܢܘ ܥܰܠ ܐܠܗܐ ܘܶܐܡܰܪܘ. ܕܰܠܡܳܐ ܡܶܫܟܰܚ ܐܠܗܐ ܠܡܶܣܕܰܪ ܠܰܢ ܦܳܬܽܘܪܳܐ ܒܡܰܕܒܪܳܐ: ܐܢ ܡܚܳܐ ܠܛܰܪܳܢܳܐ ܘܰܪܕܰܘ ܡܰܝܴ̈ܐ ܘܪ̈ܶܓܠܳܬܳܐ ܐܱܪ̈ܕܺܝ. ܕܰܠܡܳܐ ܐܴܦ ܠܰܚܡܳܐ ܡܶܫܟܰܚ ܠܡܶܬܰܠ ܠܰܢ: ܐܱܘ ܡܛܰܝܶܒ ܡܶܐܟܽܘܠܬܳܐ ܠܥܰܡܶܗ. ܠܬܶܕܡܽܘܪܬܳܐ ܗܳܝ ܕܝܶܗܒܰܬ ܠܗܘܢ ܡܰܝܴ̈ܐ ܡܶܢ ܛܰܪܳܢܳܐ. ܐܝܟ ܠܐ ܡܶܕܶܡ ܡܚܰܘܶܐ ܢܒܺܝܳܐ ܕܚܰܫܒܽܘܗ̇. ܘܥܰܠ ܕܡܶܢ ܛܰܪܳܢܳܐ ܘܡܶܢ ܕܽܘ̈ܟܝܳܬܳܐ ܕܺܐܝܬ ܒܗܶܝܢ ܫܽܘ̈ܥܶܐ. ܡܥܳܕܺܝܢ ܕܰܠܡܶܪܕܳܐ ܡܰܝܴ̈ܐ ܕܡܰܒܽܘ̈ܥܶܐ. ܕܠܐ ܫܰܘܝܳܐ ܗܳܝ ܕܰܗܘܳܬ ܠܬܶܗܪܳܐ ܛܠܰܡܘ ܥܶܒܪ̈ܳܝܶܐ. ܘܶܐܢ ܡܳܕܶܝܢ ܠܰܘ ܬܶܕܡܽܘܪܬܳܐ ܗܝ܆ ܢܶܥܒܶܕ ܠܰܚܡܳܐ ܕܠܰܘ ܡܶܢ ܚܷ̈ܛܶܐ ܘܰܥܒܽܘܪܳܐ. ܘܢܶܣܕܽܘܪ ܠܰܢ ܦܳܬܽܘܪܳܐ ܒܓܰܘ ܡܰܕܒܪܳܐ. ܢܚܰܘܶܐ ܠܰܢ ܣܰܒܥܳܐ ܒܰܐܪܥܳܐ ܕܰܡܓܰܙܝܳܐ ܡܶܢ ܥܱ̈ܠܠܳܬܳܐ ܕܰܥܒܽܘܪܳܐ. ܠܬܶܕܡܽܘܪܬܳܐ ܗܳܕܐ ܫܰܘܝܳܐ܆ ܕܢܶܬܶܠ ܠܰܢ ܡܶܐܟܽܘܠܬܳܐ ܕܠܰܚܡܳܐ. ܐܝܟ ܕܰܐܫܩܺܝ ܠܰܢ ܡܶܢ ܛܰܪܳܢܳܐ ܡܰܝܴ̈ܐ ܒܰܣܺܝ̈ܡܶܐ. ܠܽܘܩܒܰܠ ܗܳܠܶܝܢ ܚܽܘ̈ܫܳܒܶܐ ܒܺܝ̈ܫܶܐ ܘܡܰܪ̈ܓܙܳܢܶܐ. ܕܰܣܓܺܝܘ ܒܥܰܡܳܐ ܡܶܢ ܥܶܠܰܬ ܚܰܣܺܝܪܽܘܬ ܗܰܝܡܳܢܽܘܬܳܐ ܐܴܡܰܪ ܢܒܺܝܳܐ:
ܡܶܛܠ ܗܳܢܳܐ ܫܡܰܥ ܡܳܪܝܳܐ ܘܰܪܓܶܙ: ܘܢܽܘܪܳܐ ܐܶܚܕܰܬ ܒܝܰܥܩܽܘܒ ܐܴܦ ܪܽܘܓܙܳܐ ܣܠܶܩ ܒܺܝܣܪܳܐܝܠ: ܥܰܠ ܕܠܐ ܗܰܝܡܶܢܘ ܒܰܐܠܗܐ ܘܠܐ ܣܰܒܰܪܘ ܠܦܽܘܪܩܳܢܶܗ. ܠܡܳܢܳܐ ܕܶܝܢ ܐܶܡܰܪ ܕܰܪܓܶܙ ܡܳܪܝܳܐ. ܥܰܠܗܳܝ ܕܡܶܕܶܡ ܠܐ ܡܰܘܬܪ̈ܳܢ ܗܘܱ̈ܝ ܠܗܽܘܢ ܐܳܬܘ̈ܬܳܐ ܕܗܳܘ̈ܝܳܢ ܩܕܳܡܰܝܗܘܢ. ܐܴܦܠܐܴ ܓܶܝܪ ܥܶܕܳܢܳܐ ܙܥܽܘܪܳܐ ܬܳܗܪܺܝܢ ܗܘܰܘ ܒܗܶܝܢ. ܘܗܳܕܶܐ ܡܰܪܓܙܳܐ ܗܘܳܬ ܠܐܠܗܐ. ܥܰܠ ܕܰܛܥܳܐ ܗܘܳܐ ܬܰܠܡܺܝܕܳܐ ܐܱܝܠܶܝܢ ܕܺܝܠܶܦ ܩܕܳܡ ܥܶܕܳܢܳܐ. ܘܟܰܕ ܣܰܓܺܝ ܪܰܘܪ̈ܒܳܢ ܗܘܱ̈ܝ ܐܳܬܘ̈ܬܳܐ ܕܡܶܬܟܰܬܒܴ̈ܢ ܗܘܱ̈ܝ ܡܶܢ ܐܻܝܕܳܐ ܕܰܐܠܗܐ܆ ܥܰܡܳܐ ܐܝܟ ܣܳܒܳܐ ܓܳܗܪܳܐ ܒܰܗܽܘܪܳܐܝܬ ܚܳܐܱܪ ܗܘܳܐ ܒܗܶܝܢ. ܘܰܚܠܳܦ ܩܽܘܒܳܠܛܰܝܒܽܘܬܳܐ ܪܶܛܢܳܐ ܦܳܪܰܥ ܗܘܳܐ.
ܘܰܦܩܰܕ ܠܰܥ̈ܢܳܢܶܐ ܡܶܢ ܠܥܶܠ. ܘܬܰܪ̈ܥܶܐ ܕܰܫܡܰܝܳܐ ܐܷܬܦܬܰܚܘ: ܘܰܐܚܶܬ ܠܗܽܘܢ ܡܰܢܢܳܐ ܠܡܶܐܟܰܠ. ܘܠܰܚܡܳܐ ܕܰܫܡܰܝܳܐ ܝܰܗܒ ܠܗܽܘܢ: ܠܰܚܡܳܐ ܕܡܰܠܐܱܟ̈ܐ ܐܷܟܰܠ ܒܰܪܢܳܫܳܐ. ܗܳܠܶܝܢ ܓܶܝܪ ܠܘܳܬ ܥܶܒܪ̈ܳܝܶܐ ܒܰܫܪܳܪܳܐ ܗܳܘ̈ܝܳܢ ܗܘܱ̈ܝ. ܐܠܐ ܢܒܺܝܳܐ ܦܷ̈ܠܐܬܳܐ ܩܰܕܶܡ ܩܪܳܐ ܐܶܢܶܝܢ. ܐܷܡܰܪ ܓܶܝܪ ܘܰܦܩܰܕ ܠܰܥ̈ܢܳܢܶܐ ܡܶܢ ܠܥܶܠ܆ ܘܬܰܪ̈ܥܶܐ ܕܰܫܡܰܝܳܐ ܐܶܬܦܰܬܰܚܘ. ܥܢܳܢ̈ܐ ܕܶܝܢ ܣܽܘܥܪܳܢܳܐܝܬ ܠܰܘ ܒܰܫܡܰܝܴ̈ܐ ܥܶܠܳܝ̈ܐ ܣܺܝ̈ܡܳܢ. ܐܴܡܰܪ ܓܶܝܪ ܢܒܺܝܳܐ ܒܕܽܘܟܬܳܐ ܐܚܪܺܬܳܐ. ܡܰܣܶܩ ܥܢܳܢ̈ܐ ܡܶܢ ܣܰܘ̈ܦܶܝܗ̇ ܕܰܐܪܥܳܐ. ܘܡܶܛܠ ܕܰܠܥܶܠ ܡܶܢ ܥܰܡܳܐ ܡܰܛܠܠܳܐ ܗܘܳܬ ܥܢܳܢܳܐ. ܐܝܟ ܗܰܘ ܕܡܶܢ ܫܡܰܝܳܐ ܢܳܚܶܬ ܡܶܬܐܷܡܰܪ ܗܘܳܐ. ܘܟܕ ܛܳܒ ܐܝܟ ܕܶܐܡܪܶܬ. ܛܰܠܐܴ ܕܡܶܫܬܰܚܠܰܦ ܠܡܰܢܢܳܐ. ܐܴܦ ܓܶܝܪ ܛܰܠܐܴ ܠܫܽܘ̈ܚܠܳܦܶܐ ܣܰܓܺܝ̈ܐܐ ܡܶܫܬܰܚܠܰܦ ܒܕܽܘܟ ܕܽܘܟ. ܐܝ̣ܬ ܓܶܝܪ ܐܰܬܪܳܐ ܕܰܠܕܶܒܫܳܐ ܡܶܬܥܒܶܐ ܘܡܶܫܬܰܚܠܰܦ: ܘܒܰܐܬܪ̈ܰܘܳܬܳܐ ܐܚܪ̈ܳܢܶܐ ܥܰܪܥܽܘܪܳܐ ܗܳܘܶܐ ܚܠܳܦ ܕܶܒܫܳܐ: ܘܒܰܐܬܪ̈ܰܘܳܬܳܐ ܐܚܪ̈ܳܢܶܐ ܐܶܣܛܽܘܪܟܳܐ ܗܳܘܶܐ: ܘܒܰܐܬܪ̈ܰܘܳܬܳܐ ܐܚܪ̈ܳܢܶܐ ܥܰܠ ܐܻܝܠܳܢ̈ܐ ܩܳܛܰܪ ܘܡܶܬܕܰܡܶܐ ܠܕܽܘܥܬܳܐ: ܘܒܰܐܬܪ̈ܰܘܳܬܳܐ ܐܚܪ̈ܳܢܶܐ ܒܰܕܡܽܘܬܳܐ ܕܒܽܘܨܳܐ ܡܶܫܬܰܚܠܰܦ ܟܰܕ ܗܳܘܶܐ ܐܱܝܟ ܕܶܡ̈ܘܳܬܳܐ ܕܬܽܘ̈ܓܶܐ ܕܥܰܡܪܳܐ: ܐܴܦ ܒܰܐܬܪ̈ܰܘܳܬܳܐ ܕܺܐܝܬ ܒܗܽܘܢ ܙܰܝ̈ܬܶܐ ܕܡܽܘܬܳܐ ܕܦܰܪ̈ܨܝܳܬܳܐ ܓܰܐܝ̈ܬܳܐ ܩܳܢܶܐ ܘܢܳܚܶܬ ܥܠܰܝܗܘܢ. ܟܕ ܒܛܰܥܡܶܗ ܕܶܒܫܳܢ ܘܗܰܢܺܝ ܠܚܶܟܳܐ. ܡܳܕܶܝܢ ܠܰܘ ܡܶܢ ܫܡܰܝܳܐ ܥܶܠܳܝ̈ܐ ܢܶܪܢܶܐ ܕܢܳܚܶܬ ܗܘܳܐ ܡܰܢܢܳܐ ܗܰܘ. ܐܠܐ ܟܕ ܡܶܢ ܝܰܡܳܐ ܘܡܶܢ ܬܗܽܘܡܳܐ ܒܰܥܢܳܢܳܐ ܬܰܚܬܳܝܬܳܐ ܗܳܝ ܕܰܕܝܰܡܬܳܐ ܕܛܰܠܐܴ ܐܰܡܪܳܗ̇ ܣܳܐܷܡ ܢܳܡܽܘܣܳܐ ܡܶܣܬܰܠܰܩ ܗܘܳܐ. ܠܰܚܡܳܐ ܕܰܫܡܰܝܳܐ ܡܶܬܩܪܶܐ ܗܘܳܐ. ܥܰܠ ܕܰܕܠܐ ܥܰܡܠܐܴ ܘܰܕܠܳܐ ܠܐܷܘܬܳܐ ܡܬܰܪܣܶܐ ܗܘܳܐ ܠܥܶܒܪ̈ܳܝܶܐ. ܘܥܰܠ ܕܫܰܘܝܳܐܝܬ ܡܶܬܦܰܠܰܓ ܗܘܳܐ ܕܠܐ ܡܰܣܰܒ ܒܰܐܦ̈ܐ. ܕܰܐܝܟ ܗܳܟܰܢܳܐ ܐܶܢܘܢ ܚܰܝ̈ܐ ܫܡܰܝܴ̈ܢܶܐ. ܡܶܛܠ ܕܦܷ̈ܠܐܴܬܳܐ ܐܶܫܬܰܘܕܺܝ ܕܺܐܝܬܰܝܗܶܝܢ ܢܒܺܝܳܐ ܗܳܠܶܝܢ. ܢܶܥܽܘܠ ܚܢܰܢ ܗܳܫܳܐ ܒܳܬܰܪ ܒܥܳܬܳܐ ܕܦܷ̈ܠܐܬܳܐ ܗܳܠܝܢ ܩܰܕܺܝ̈ܫܳܬܳܐ. ܡܰܢܢܳܐ ܗܳܟܺܝܠ ܡܶܬܝܰܕܥܳܢܳܐ ܐܺܝܬܰܘܗܝ ܥܰܡܰܢܘܐܝܠ. ܗܽܘܝܽܘ ܒܰܫܪܳܪܳܐ ܠܰܚܡܳܐ ܕܰܫܪܳܪܳܐ. ܘܗܽܘܝܽܘ ܠܰܚܡܳܐ ܕܡܰܠܐܟ̈ܐ ܕܶܐܬܺܝܗܶܒ ܠܡܶܐܟܰܠ. ܢܰܫܰܪ ܓܶܝܪ ܠܡܶܠܬܳܐ ܐܠܗܐ ܟܕ ܗܽܘ ܠܶܗ ܡܦܰܫܶܩ ܗܘܳܐ. ܐܷܡܰܪ ܟܰܕ ܠܝܽܘ̈ܕܳܝܶܐ ܡܰܠܶܦ ܗܘܳܐ. ܕܠܐ ܗܘܳܐ ܡܽܘܫܶܐ ܝܰܗܒ ܠܟܽܘܢ ܠܰܚܡܳܐ ܡܶܢ ܫܡܰܝܳܐ. ܐܷܠܐ ܐܳܒܝ ܝܳܗܶܒ ܠܟܽܘܢ ܠܰܚܡܳܐ ܕܩܽܘܫܬܳܐ ܡܶܢ ܫܡܰܝܳܐ. ܠܰܚܡܶܗ ܓܶܝܪ ܕܰܐܠܗܳܐ ܐܺܝܬܰܘܗܝ ܗܰܘ ܕܰܢܚܶܬ ܡܶܢ ܫܡܰܝܳܐ. ܘܝܳܗܶܒ ܚܰܝ̈ܐ ܠܥܳܠܡܳܐ (ܝܘܚܢܢ ܘ: ܠܒ-ܠܓ). ܡܳܕܶܝܢ ܡܳܐ ܕܫܳܡܥܺܝܢܰܢ ܡܶܛܠ ܡܰܢܢܳܐ ܕܰܢܚܶܬ ܡܶܢ ܫܡܰܝܳܐ܆ ܘܡܶܛܠ ܠܰܚܡܳܐ ܕܰܫܡܰܝܳܐ ܕܝܰܗܒ ܐܠܗܐ ܠܰܒܢ̈ܝ ܝܰܥܩܘܒ ܘܗܳܝ ܕܠܰܚܡܳܐ ܕܡܰܠܐܟ̈ܐ ܐܷܟܰܠ ܒܰܪܢܳܫܳܐ. ܠܰܘ ܡܶܕܶܡ ܐܚܪܺܝܢ ܡܶܣܬܰܟܠܺܝܢܰܢ. ܐܠܐ ܗܳܝ ܕܰܢܚܶܬ ܡܶܠܬܳܐ ܐܠܗܳܐ ܡܶܢ ܫܡܰܝܳܐ. ܗܳܝ ܕܝܰܗܒܶܗ ܐܱܒܳܐ ܕܢܶܗܘܶܐ ܡܶܐܟܽܘܠܬܳܐ ܠܰܒܢܰܝ̈ܢܳܫܳܐ. ܘܗܳܝ ܕܡܶܢܩܕܺܝܡ ܠܡܰܠܐܟ̈ܐ ܡܬܰܪܣܶܐ ܗܘܳܐ ܘܰܡܒܰܣܶܡ. ܗܳܫܳܐ ܕܶܝܢ ܠܒܰܪܢܳܫܳܐ ܝܰܗܒܶܗ ܠܡܶܐܟܰܠ. ܘܒܳܬܰܪ ܗܳܠܝܢ ܡܶܫܬܰܥܶܐ ܥܰܠ ܒܶܣܪܳܐ. ܗܰܘ ܕܝܰܗܒ ܠܗܽܘܢ ܠܡܶܐܟܰܠ ܒܪܰܡܫܳܐ.
ܘܨܰܝܕܳܐ ܫܰܕܰܪ ܠܗܽܘܢ ܠܡܶܣܒܰܥ: ܐܱܫܶܒ ܪ̈ܽܘܚܶܐ ܒܰܫܡܰܝܳܐ. ܘܰܕܒܰܪ ܒܥܽܘܫܢܶܗ ܠܬܰܝܡܢܳܐ: ܐܱܚܶܬ ܠܗܽܘܢ ܒܶܣܪܳܐ ܐܱܝܟ ܥܰܦܪܳܐ. ܘܰܐܝܟ ܚܶܠܐܴ ܕܝܰܡ̈ܡܶܐ ܦܳܪܰܚܬܳܐ ܕܓܶܦܳܐ: ܘܰܢܦܰܠ ܒܡܰܫܪ̈ܝܳܬܗܘܢ ܚܕܳܪ̈ܰܝ ܡܰܫܟܢܰܝ̈ܗܘܢ. ܘܶܐܟܰܠܘ ܘܰܣܒܰܥܘ ܛܳܒ: ܘܰܪ̈ܓܺܝܓܳܬܗܘܢ ܝܰܗܒ ܠܗܽܘܢ. ܘܠܐܴ ܦܪܰܩܘ ܡܶܢ ܪ̈ܓܺܝܓܳܬܗܘܢ: ܘܥܰܕ ܡܶܐܟܽܘܠܬܗܘܢ ܒܦܽܘܡܗܽܘܢ. ܪܽܘܓܙܶܗ ܕܰܐܠܗܳܐ ܣܠܶܩ ܒܗܽܘܢ. ܥܰܠ ܡܶܐܟܽܘܠܬܳܐ ܕܒܶܣܪܳܐ ܗܰܘ ܕܳܐܟܠܺܝܢ ܗܘܰܘ ܥܶܒܪ̈ܳܝܶܐ ܡܶܫܬܰܥܝܳܐ ܠܰܢ ܡܶܠܬܳܐ ܕܰܢܒܺܝܽܘܬܳܐ ܡܶܛܠܬܶܗ. ܠܐ ܓܶܝܪ ܕܳܡܝܳܐ ܕܒܰܐܡܺܝܢܽܘ ܫܟܺܝܚ ܗܘܳܐ. ܒܗܰܘ ܕܶܝܢ ܙܰܒܢܳܐ ܕܰܣܠܶܩܘ ܡܶܢ ܡܶܨܪܶܝܢ. ܟܽܠܝܽܘܡ ܣܳܠܩܳܐ ܗܘܳܬ ܣܰܠܘܰܝ. ܘܗܺܝ ܗܳܕܶܐ ܒܪܰܡܫܳܐ ܘܰܒܓܰܘ ܡܰܫܪܺܝܬܳܐ ܫܳܟܢܳܐ ܗܘܳܬ. ܘܠܐܴ ܬܽܘܒ ܐܱܝܟܳܐ ܕܣܳܠܩܳܐ ܗܘܳܬ ܣܰܠܘܰܝ܆ ܢܳܚܶܬ ܗܘܳܐ ܡܰܢܢܳܐ. ܗܳܝ ܡܰܢ ܣܳܠܩܳܐ ܗܘܳܬ ܨܳܝܪܳܐ ܗܘܳܬ ܠܕܶܒܚ̈ܐ ܕܺܝܣܰܪ̈ܠܳܝܶܐ ܕܡܶܢ ܐܰܪܥܳܐ ܣܳܠܩܺܝܢ. ܡܰܢܢܳܐ ܕܶܝܢ ܨܳܐܱܪ ܗܘܳܐ ܠܡܶܠܬܳܐ ܐܠܗܐ ܕܰܢܚܶܬ ܡܶܢ ܫܡܰܝܳܐ. ܘܰܐܟܡܳܐ ܕܳܐܦ ܡܰܢܢܳܐ ܟܽܠܝܽܘܡ ܢܳܚܶܬ ܗܘܳܐ ܡܶܢ ܫܡܰܝܳܐ. ܘܠܐ ܪܳܓܶܙ ܗܘܳܐ ܥܠܰܝܗܘܢ ܐܠܗܐ. ܘܡܰܣܶܦ ܒܗܽܘܢ ܢܽܘܪܳܐ. ܡܰܢܢܳܐ ܕܶܝܢ ܟܽܠܝܽܘܡ ܢܳܚܶܬ ܗܘܳܐ ܡܰܠܶܦ ܕܕܶܒܚܬܳܐ ܥܺܕܬܳܢܳܝܬܳܐ ܐܝ̣ܬ ܠܳܗ̇ ܠܥܳܠܰܡ ܕܰܬܩܰܘܶܐ ܘܠܐܴ ܥܳܒܪܳܐ. ܘܟܰܕ ܡܶܐܟܽܘܠܬܳܐ ܕܣܰܠܘܰܝ ܒܦܽܘܡܗܽܘܢ. ܪܽܘܓܙܶܗ ܕܰܐܠܗܐ ܣܠܶܩ ܒܗܽܘܢ܆ ܨܳܝܪܳܐ ܕܶܝܢ ܠܡܶܐܬܺܝܬܶܗ ܕܡܶܠܬܳܐ ܐܠܗܐ ܒܫܽܘܠܳܡܳܐ. ܘܡܶܫܟܰܚ ܠܗܘܢ ܕܕܶܒܚܬܳܐ ܕܒܶܣܪܳܐ ܒܶܝܬ ܫܶܢܰܝ̈ܗܘܢ. ܠܢܽܘܪܳܐ ܘܰܠܬܰܫܢܺܝܩܳܐ ܡܰܫܠܶܡ ܠܗܽܘܢ. ܐܝܟ ܕܶܐܡܰܪ ܢܒܺܝܐ:
ܕܩܰܛܶܠ ܡܶܢ ܥܰܬܺܝܪ̈ܰܝܗܘܢ ܘܠܰܓܒܰܝܴ̈ܐ ܕܺܝܣܪܳܐܝܠ ܐܱܒܪܶܟ: ܒܗܳܠܝܢ ܠܰܡ ܟܽܠܗܝܢ ܚܛܰܘ. ܘܠܐܴ ܗܰܝܡܶܢܘ ܒܬܶܕܡܪ̈ܳܬܶܗ: ܓܰܡܰܪܘ ܒܰܣܪܺܝܩܽܘܬܳܐ ܝܰܘ̈ܡܰܝܗܘܢ. ܘܰܫܢܰܝ̈ܗܘܢ ܡܣܰܪܗܒܳܐܝ̣ܬ. ܗܰܘ ܓܶܝܪ ܦܣܳܩܳܐ ܕܶܐܬܦܣܶܩ ܗܘܳܐ ܥܠܰܝܗܘܢ. ܕܠܐ ܢܶܚܙܽܘܢ ܐܱܪܥܳܐ ܗܳܝ ܕܡܶܛܠܳܬܳܗ̇ ܐܱܦܶܩ ܐܷܢܘܢ ܐܠܗܐ ܡܶܢ ܡܶܨܪܶܝܢ܆ ܘܡܺܝܬܘ ܒܡܰܕܒܪܳܐ ܒܰܕܠܐܴ ܐܷܫܬܘܺܝܘ ܕܢܶܥܠܽܘܢ ܠܐܱܪܥܳܐ ܗܳܝ ܕܡܶܬܡܰܬܠܐܴ ܗܘܳܬ ܒܡܰܠܟܽܘܬܳܐ ܕܰܫܡܰܝܳܐ. ܘܠܐܴ ܣܳܠܶܩ ܗܘܳܐ ܥܰܠ ܗܳܠܝܢ ܥܽܘܗܕܳܢܳܐ ܕܰܐܠܗܐ. ܐܠܐ ܡܳܐ ܕܥܳܫܢܺܝܢ ܗܘܰܘ ܥܠܰܝܗܘܢ ܐܽܘܠܨܳܢ̈ܐ. ܐܷܡܰܪ ܓܶܝܪ ܢܒܺܝܳܐ.
ܡܳܐ ܕܩܳܛܶܠ ܗܘܳܐ ܠܗܽܘܢ ܒܳܥܶܝܢ ܗܘܰܘ ܠܶܗ. ܘܗܳܦܟܺܝܢ ܗܘܰܘ ܘܰܡܩܰܕܡܺܝܢ ܠܘܳܬܶܗ. ܘܡܰܚ̈ܘܳܬܳܐ ܕܡܰܘܬܳܐ ܡܰܠܦ̈ܢ ܗܘܱ̈ܝ ܠܗܘܢ ܕܰܢܩܰܕܡܽܘܢ ܠܬܰܪܥܶܗ ܕܰܐܠܗܐ. ܥܽܘܕܪܳܢܳܐ ܕܶܝܢ ܗܳܘܶܐ ܗܘܳܐ ܠܗܽܘܢ. ܒܽܐܘ̈ܠܨܳܢܰܝܗܘܢ ܡܶܢ ܐܠܗܐ.
ܘܥܶܗܰܕܘ ܕܰܐܠܗܰܐ ܗܘ ܥܳܕܽܘܪܗܘܢ ܘܰܐܠܗܳܐ ܡܪܰܝܡܳܐ ܦܳܪܽܘܩܗܽܘܢ. ܪܰܚܡܽܘܗܝ ܒܦܽܘܡܗܽܘܢ ܘܰܒܠܶܫܳܢܗܽܘܢ ܟܰܕܶܒܘ ܒܶܗ. ܘܠܶܒܗܽܘܢ ܠܐ ܐܰܬܩܶܢܘ ܥܰܡܶܗ. ܘܠܐ ܗܰܝܡܶܢܘ ܒܰܩܝܳܡܶܗ. ܐܷܠܐ ܘܠܐܴ ܠܐܠܗܐ ܗܰܘ ܕܥܰܕܰܪ ܐܶܢܘܢ ܘܰܦܪܰܩ ܐܶܢܘܢ ܡܶܬܕܰܟܪܺܝܢ. ܘܒܰܥܒܳܕܰܘ̈ܗܝ ܠܐ ܡܗܰܝܡܢܺܝܢ. ܘܰܒܦܽܘܡܳܐ ܡܰܘܕܶܝܢ ܒܶܗ. ܕܠܐܴ ܢܶܬܚܰܣܕܽܘܢ ܡܶܢ ܥܰܡܡ̈ܐ. ܒܠܶܒܗܽܘܢ ܕܶܝܢ ܡܕܰܓܠܺܝܢ ܒܶܗ. ܘܒܰܩܝܳܡܶܗ ܟܳܦܪܺܝܢ. ܘܗܳܟܰܢܳܐ ܐܶܢܘܢ ܝܽܘ̈ܠܦܳܢܶܐ ܡܰܛܥ̈ܝܳܢܶܐ ܕܶܐܪ̈ܺܝܛܺܝܩܽܘ. ܕܟܰܕ ܒܦܽܘܡܳܐ ܡܰܘܕܶܝܢ ܩܕܳܡ ܥܰܡ̈ܡܶܐ ܒܰܥܒܳܕ̈ܐ ܕܶܝܢ ܘܰܒܠܶܒܳܐ ܟܳܦܪܺܝܢ ܒܰܫܪܳܪܳܐ. ܘܡܶܢ ܬܰܪܥܺܝܬܳܐ ܠܺܝܛܬܳܐ ܘܡܰܣܠܰܝܬܳܐ ܕܝܽܘ̈ܕܳܝܶܐ. ܫܶܩܠܰܬ ܫܽܘܪܳܝܳܐ ܬܰܪܥܺܝܬܳܐ ܕܢܶܣܛܽܘܪ̈ܝܰܢܶܐ. ܕܟܰܕ ܚܰܕ ܒܪܳܐ ܡܰܘܕܶܝܢ ܒܶܐܣܟܺܡܳܐ. ܠܰܬܪܶܝܢ ܟܝܳܢ̈ܐ ܘܠܰܬܪܶܝܢ ܩܢܽܘ̈ܡܶܐ ܡܦܰܠܓܺܝܢ ܠܶܗ ܠܺܝܚܺܝܕܳܝܳܐ ܒܪܳܐ ܕܰܐܠܗܳܐ. ܘܗܳܠܶܝܢ ܐܶܢܘܢ ܒܢܱ̈ܝ ܬܶܓܡ̈ܐ ܕܗܳܢܘܢ ܕܶܐܡܰܪ ܢܒܺܝܳܐ: ܕܪܳܚܡܺܝܢ ܗܘܰܘ ܠܐܠܗܐ ܒܦܽܘܡܗܘܢ. ܘܰܒܠܶܫܳܢܗܘܢ ܡܕܰܓܠܺܝܢ ܒܶܗ. ܐܶܠܐ ܗܰܘ ܕܡܺܝܬ ܚܠܳܦ ܚܛܳܗ̈ܐ ܕܡܰܣܟ̈ܠܳܢܶܐ ܚܳܐܱܪ ܠܰܬܝܳܒܽܘܬܳܐ ܕܬܰܝܳܒ̈ܐ ܐܝܟ ܕܶܐܡܰܪ ܪܽܘܚܳܐ܆
ܗܽܘ ܡܪܰܚܡܳܢ ܘܫܳܒܶܩ ܚܛܳܗ̈ܐ ܘܠܐܴ ܡܚܰܒܶܠ. ܘܡܰܣܓܶܐ ܠܡܰܗܦܳܟܽܘ ܪܽܘܓܙܶܗ ܘܠܐܴ ܡܥܺܝܪ ܟܽܠܳܗ̇ ܚܶܡܬܶܗ: ܘܶܐܬܕܟܰܪ ܕܒܶܣܪܳܐ ܐܶܢܘܢ ܘܪܽܘܚܳܐ ܕܳܐܙܳܠܐ ܘܠܐ ܗܳܦܟܳܐ. ܒܗܳܠܶܝܢ ܥܰܠ ܢܰܓܺܝܪܽܘܬ ܪܽܘܚܶܗ ܕܰܐܠܗܳܐ ܡܶܫܬܰܥܶܐ ܢܒܺܝܳܐ. ܘܰܕܠܰܘ ܒܥܶܕܳܢܳܐ ܬܳܒܰܥ ܡܶܢ ܡܰܣܟ̈ܠܳܢܶܐ. ܘܥܰܠܗܳܝ ܕܝܰܬܺܝܪ ܡܶܢ ܪܽܘܓܙܳܐ ܠܪ̈ܰܚܡܶܐ ܡܶܬܬܦܺܝܣ. ܘܥܰܠ ܕܚܳܙܶܐ ܠܰܘ ܐܰܝܟ ܬܰܪܥܺܝܬܗܘܢ ܕܰܒܢܰܝ̈ܢܳܫܳܐ ܣܽܘܥܪ̈ܳܢܶܐ ܕܺܝܠܗܽܘܢ. ܟܰܕ ܓܶܝܪ ܪܰܘܪ̈ܒܳܬܳܐ ܡܶܬܪܰܥܶܝܢ ܙܥܽܘܪ̈ܝܳܬܳܐ ܣܳܥܪܺܝܢ. ܡܰܝܬܶܐ ܕܶܝܢ ܒܳܬܰܪܟܶܢ ܢܒܺܝܳܐ܆ ܥܰܠ ܡܡܰܪܡܪܳܢܽܘܬܶܗ ܕܥܰܡܳܐ.
ܗܶܢܽܘܢ ܠܰܡ ܡܡܰܪܡܪܽܘܗܝ ܒܡܰܕܒܪܳܐ. ܘܰܐܪܓܙܽܘܗܝ ܒܰܐܫܺܝܡܽܘܢ: ܘܰܗܦܰܟܘ ܘܢܰܣܺܝܘ ܠܐܠܗܐ ܘܰܠܩܰܕܺܝܫܳܐ ܕܺܝܣܪܳܐܝܠ ܓܰܪܶܓܘ. ܘܥܰܠ ܗܳܠܶܝܢ ܓܶܝܪ ܐܴܡܰܪ.
ܘܠܐܴ ܐܶܬܕܟܰܪ ܐܺܝܕܶܗ ܝܰܘܡܳܐ ܕܰܦܪܰܩ ܐܶܢܘܢ ܡܶܢ ܐܻܝܕܳܐ ܕܳܐܠܽܘܨܳܐ. ܘܰܛܥܰܐܘܽܗܝ ܠܦܽܘܪܩܳܢܳܐ ܗܰܘ ܕܰܗܘܳܐ ܠܗܽܘܢ ܒܰܐܠܗܳܐ ܡܶܢ ܡܶܨܪܶܝܢ ܡܶܢ ܐܻܝܕܶܗ ܕܦܶܪܥܽܘܢ ܗܰܘ ܛܳܠܽܘܡܳܐ. ܘܰܥܒܰܪ ܡܶܢ ܩܕܳܡ ܥܰܝ̈ܢܰܝܗܘܢ.
ܕܰܥܒܰܕ ܐܱܠܗܳܐ ܬܶܕܡܪ̈ܳܬܶܗ ܒܡܶܨܪܶܝܢ: ܘܳܐܬܘ̈ܬܶܗ ܒܚܰܩ̈ܠܳܬܳܐ ܕܨܳܥܳܢ. ܕܰܗܦܰܟ ܢܰܗܪ̈ܰܘܳܬܗܘܢ ܠܰܕܡܳܐ: ܘܪ̈ܳܕܰܝܗܽܘܢ ܠܐܴ ܢܶܫܬܽܘܢ ܡܰܝܴ̈ܐ. ܫܰܕܰܪ ܗܘܳܐ ܥܠܰܝܗܽܘܢ ܚܰܠܽܘܛܳܐ ܘܶܐܟܰܠ ܐܷܢܘܢ: ܘܽܐܘܪ̈ܕܥܶܐ ܚܰܒܶܠܝ̈ ܐܷܢܘܢ. ܘܝܰܗܒ ܠܩܰܡܨܳܐ ܥܰܠܠܳܬܗ̈ܘܢ: ܘܠܐܷܘܰܬܗܽܘܢ ܠܙܳܚܠܐܴ. ܬܰܒܰܪ ܒܒܰܪܕܳܐ ܓܽܘ̈ܦܢܰܝܗܘܢ ܘܬܺܐܢܰܝ̈ܗܘܢ ܒܰܓܠܺܝܕܳܐ. ܐܱܫܠܶܡ ܠܒܰܪܕܳܐ ܒܥܺܝܪܗܽܘܢ: ܘܩܶܢܝܳܢܗܘܢ ܠܝܰܩܕܳܢܳܐ. ܫܰܕܰܪ ܥܠܰܝܗܘܢ ܚܶܡܬܳܐ ܕܪܽܘܓܙܶܗ: ܚܶܡܬܳܐ ܘܪܽܘܓܙܳܐ: ܘܽܐܘܠܨܳܢܳܐ: ܫܰܕܰܪ ܒܝܰܕ ܡܰܠܐܟܳܐ ܒܺܝܫܳܐ: ܘܰܬܪܰܥ ܫܒܺܝ̈ܠܐ ܒܺܝ̈ܫܶܐ. ܘܠܐܴ ܚܣܰܟ ܡܶܢ ܡܰܘܬܳܐ ܢܰܦ̈ܫܳܬܗܘܢ: ܘܚܰܝ̈ܘܳܬܗܘܢ ܠܡܰܘܬܳܐ ܐܱܫܠܶܡ: ܘܩܰܛܶܠ ܟܽܠ ܒܽܘܟܪ̈ܶܐ ܕܡܶܨܪܶܝܢ: ܪܺܝܫ ܟܽܠܶܗ ܝܰܠܕܗܽܘܢ ܒܡܰܫܟܢܳܐ ܕܚܰܡ. ܡܫܰܡܠܝܳܐܝ̣ܬ ܘܰܕܠܐ ܒܽܘܨܳܪܳܐ ܐܱܝܬܺܝ ܪܽܘܚܳܐ ܒܣܶܕܪܳܐ ܕܬܰܫܥܺܝܬܳܐ܆ ܐܝܠܶܝܢ ܕܰܥܒܰܕ ܐܠܗܐ ܒܓܰܘ ܡܶܨܪܶܝܢ ܟܰܕ ܦܪܰܩ ܠܥܰܡܳܐ ܡܶܢ ܫܽܘܥܒܳܕܳܐ ܕܦܶܪܥܽܘܢ. ܘܫܰܪܺܝ ܡܶܢ ܕܡܳܐ ܗܰܘ ܕܶܐܬܳܐ ܒܰܡܣܳܡ ܒܪܺܝܫܳܐ ܥܰܠ ܡܶܨܪ̈ܳܝܶܐ. ܗܳܕܶܐ ܗܘܳܬ ܓܶܝܪ ܡܚܽܘܬܳܐ ܩܰܕܡܳܝܬܳܐ. ܘܗܳܟܰܢܳܐ ܒܺܐܝܕܳܐ ܒܺܐܝܕܳܐ ܟܽܠܗܶܝܢ ܡܰܚܘ̈ܬܳܐ ܚܫܰܒ. ܕܶܐܠܐܴ ܐܱܝܬܶܐ ܐܢܶܝܢ ܗܳܫܳܐ ܠܦܽܘܫܳܩܳܐ ܒܰܟܬܳܒܳܐ ܗܳܢܐ ܠܐ ܐܷܬܚܰܙܝܰܬ ܠܺܝ. ܡܶܛܠ ܕܗܳܠܶܝܢ ܒܰܠܚܽܘܕܰܝܗܶܝܢ ܠܦܽܘܫܳܩܳܐ ܟܬܳܒܳܐ ܡܫܰܡܠܝܳܐ ܬܳܒ̈ܥܳܢ. ܘܥܰܠܗܳܕܐ ܫܳܒܶܩ ܐܢܳܐ ܠܗܶܝܢ ܕܠܐ ܦܽܘܫܳܩܳܐ. ܕܠܐ ܟܰܕ ܒܰܙܥܽܘܪ̈ܝܳܬܳܐ ܡܢܰܗܰܪ ܐܢܳܐ ܠܗܶܝܢ. ܫܚܺܝ̈ܡܳܬܳܐ ܢܶܣܬܰܒܪ̈ܳܢ ܠܐܢܴ̈ܫܺܝܢ. ܗܳܫܐ ܕܶܝܢ ܒܳܬܰܪ ܣܶܕܪܳܐ ܕܡܰܙܡܽܘܪ̈ܶܐ ܪܳܕܶܐ ܐܢܳܐ. ܟܰܕ ܡܶܫܬܰܘܕܶܐ ܕܰܠܫܰܪܟܳܐ ܗܰܘ ܕܡܰܚ̈ܘܳܬܳܐ ܠܐܴ ܩܶܪܒܶܬ. ܘܥܰܡ ܡܙܰܡܪܳܢܳܐ ܐܴܡܰܪ ܐܢܳܐ.
ܐܱܫܩܶܠ ܠܥܰܡܶܗ ܐܰܝܟ ܥܳܢܴ̈ܐ. ܘܕܰܒܰܪ ܐܢܽܘܢ ܐܱܝܟ ܓܙܳܪܳܐ ܒܡܰܕܒܪܳܐ: ܘܰܐܫܪܺܝ ܐܢܽܘܢ ܒܣܰܒܪܳܐ ܘܠܐܴ ܕܚܶܠܘ. ܟܰܕ ܓܶܝܪ ܐܠܗܐ ܐܱܝܟ ܪܳܥܝܳܐ ܡܕܰܒܰܪ ܗܘܳܐ ܠܳܗ̇ ܠܡܰܪܥܺܝܬܳܐ ܕܺܝܠܶܗ. ܒܽܐܘܪܚܳܐ ܕܡܰܕܒܪܳܐ. ܗܳܝܕܶܝܢ ܓܶܝܪ ܠܰܝܬ ܗܘܳܐ ܕܺܐܒ̈ܐ ܕܰܡܚܰܒܠܺܝܢ ܘܠܐ ܕܽܘܟܪܳܢܳܐ ܕܰܦܬܰܟܪ̈ܶܐ ܫܳܚܶܩ ܗܘܳܐ ܠܥܰܡܳܐ. ܡܶܛܠܗܳܢܐ ܐܷܡܰܪ ܕܰܒܣܰܒܪܳܐ ܐܱܫܪܺܝ ܐܷܢܘܢ.
ܘܠܰܒܥܶܠܕ̈ܒܳܒܰܘܗܝ ܟܰܣܺܝ ܝܰܡܳܐ. ܘܡܶܢ ܒܳܬܰܪ ܕܰܥܒܰܪܘ ܒܓܰܘ ܝܰܡܳܐ ܟܰܣܝܶܗ ܠܦܶܪܥܽܘܢ ܒܡܰܝܴ̈ܐ ܕܝܰܡܳܐ ܘܶܐܬܚܢܶܩ. ܕܠܐ ܢܰܣܒܰܪ ܥܰܡܳܐ ܥܰܠ ܦܶܪܥܽܘܢ ܡܰܢ ܕܰܒܚܰܝ̈ܐ ܐܷܫܬܒܶܩ.
ܘܰܐܝܬܺܝ ܐܷܢܘܢ ܠܰܬܚܽܘܡܳܐ ܕܩܽܘܕܫܶܗ. ܠܗܳܢܳܐ ܛܽܘܪܳܐ ܕܰܩܢܳܬ ܝܰܡܺܝܢܶܗ. ܗܳܫܐ ܠܡ ܥܰܠ ܓܶܢ̱ܒ ܛܽܘܪܳܐ ܕܨܶܗܝܽܘܢ ܩܳܝܡܺܝܢܰܢ.
ܘܰܐܘܒܶܕ ܡܶܢ ܩܕܳܡܰܝܗܘܢ ܥܰܡ̈ܡܶܐ. ܘܰܐܪܡܺܝ ܐܷܢܘܢ ܒܚܰܒܠܐܴ ܕܝܳܪܬܽܘܬܶܗ: ܘܰܫܪܰܘ ܒܡܰܫܟ̈ܢܰܝܗܘܢ ܫܰܒ̈ܛܶܐ ܕܺܝܣܪܳܐܝܠ. ܗܳܠܶܝܢ ܕܶܝܢ ܐܝܟ ܕܶܐܡܰܪ ܡܙܰܡܪܳܢܳܐ܆ ܐܱܘܒܶܕ ܠܰܟܢܰܥܢܳܝ̈ܐ ܘܝܰܗܒ ܠܗܘܢ ܐܱܪܥܗܽܘܢ ܝܽܘܪܬܳܢܳܐ. ܒܪܰܡ ܟܰܕ ܡܶܬܥܰܩܒܳܐ ܗܳܝ ܡܶܠܬܳܐ ܦܳܢܶܝܢܰܢ ܠܰܡܚܳܪ ܒܥܰܡ̈ܡܶܐ ܡܶܬܝܰܕܥܳܢ̈ܐ ܕܰܐܘܒܶܕ ܨܠܺܝܒܳܐ ܡܶܢ ܩܕܳܡ ܥܺܕܬܶܗ. ܘܝܰܗܒ ܠܰܒܢܶܝ̈ܗ̇ ܝܳܪܬܽܘܬܳܐ ܗܳܝ ܕܰܢܦܰܠܘ ܡܶܢܳܗ̇. ܬܘܒ ܕܶܝܢ ܥܰܠ ܗܳܢܘܢ ܕܥܰܠܘ ܠܐܱܪܥܳܐ ܕܦܰܠܶܣܛܺܝܢܺܝ ܡܶܫܬܰܥܶܐ ܐܱܝܠܶܝܢ ܕܰܐܡܪܰܚܘ.
ܢܰܣܺܝܘ ܘܡܰܪܡܰܪܘ ܠܐܱܠܗܐ ܡܪܰܝܡܳܐ: ܘܣܳܗܕܘ̈ܬܶܗ ܠܐ ܢܛܰܪܘ. ܘܰܗܦܰܟܘ ܐܴܦ ܘܕܰܓܶܠܘ ܐܱܝܟ ܐܱܒܳܗܰܝ̈ܗܘܢ: ܘܶܐܬܗܦܶܟܘ ܐܱܝܟ ܩܶܫܬܳܐ ܢܟܺܝܠܬܳܐ. ܘܰܐܪܓܙܽܘܗܝ ܒܰܥ̈ܠܰܘܳܬܗܘܢ ܘܒܰܦܬܰܟܪ̈ܰܝܗܘܢ ܐܱܛܢܽܘܗܝ. ܕܰܐܝܟ ܗܳܟܰܢܳܐ ܥܒܰܕܘ ܒܢܱ̈ܝ ܝܣܪܳܐܝܠ ܡܶܢ ܒܳܬܰܪ ܕܡܺܝܬ ܝܶܫܽܘܥ ܒܰܪܢܽܘܢ ܕܰܐܘܪܶܬ ܐܷܢܽܘܢ ܐܱܪܥܳܐ ܕܡܽܘܠܟܳܢܳܐ. ܘܰܒܥܺܕܬܳܐ ܗܳܕܐ ܩܳܡܘ ܒܰܙܒܰܢ ܐܷܪ̈ܺܝܛܺܝܩܽܘ ܘܰܐܦܢܺܝܘ ܠܣܰܓܺܝ̈ܐܐ ܡܶܢ ܐܘܪܚܳܐ ܗܳܝ ܕܰܐܠܶܦܘ ܫܠܺܝ̈ܚܶܐ. ܪܽܘܚܳܐ ܓܶܝܪ ܗܳܝ ܕܡܰܠܦܳܐ ܗܘܳܬ ܗܳܝܕܶܝܢ ܢܶܣܬܓܕܽܘܢ ܦܬܰܟܪ̈ܶܐ. ܗܳܫܐ ܒܶܐܪ̈ܺܝܛܺܝܩܽܘ ܡܰܥܒܕܳܐ. ܘܡܶܛܠ ܗܳܠܶܝܢ ܐܷܡܪ ܪܽܘܚܳܐ:
ܘܰܫܡܰܥ ܐܱܠܗܐ ܘܶܐܬܚܰܡܰܬ: ܘܰܪܓܶܙ ܛܳܒ ܥܰܠ ܝܣܪܳܐܝܠ ܘܰܛܥܳܐ ܠܡܰܫܟܢܳܐ ܕܫܺܝܠܽܘ: ܡܰܫܟܢܳܐ ܕܰܫܪܳܐ ܒܶܝܬ ܒܢܰܝܢ̈ܫܳܐ. ܘܰܐܚܪܒܳܗ̇ ܗܘܳܐ ܕܶܝܢ ܠܫܺܝܠܽܘ ܡܶܛܠ ܥܰܘܠܐܴ ܕܰܒܢܱ̈ܝ ܥܺܝܠܺܝ. ܘܫܰܒܩܶܗ ܠܡܰܫܟܢܳܐ ܘܫܰܢܺܝ ܡܶܢܶܗ ܒܚܶܡܬܳܐ ܪܽܘܚܳܐ ܩܰܕܺܝܫܳܐ. ܐܠܐ ܘܠܐ ܒܥܺܕ̈ܬܳܐ ܕܰܡܫܰܡܫܺܝܢ ܐܷܪ̈ܺܝܛܺܝܩܘ ܗܳܫܐ ܡܩܰܘܶܐ. ܡܶܛܠ ܕܰܡܫܰܢܶܐ ܘܠܐ ܦܳܐܷܫ ܠܘܳܬ ܡܰܪ̈ܓܙܳܢܶܐ.
ܘܝܰܗܒ ܠܰܡ ܠܰܫܒܺܝܬܳܐ ܥܰܡܶܗ ܘܬܶܫܒܽܘܚܬܶܗ ܒܺܐܝܕܳܐ ܕܳܐܠܽܘܨܳܐ. ܐܱܫܠܶܡ ܥܰܡܶܗ ܠܚܰܪܒܳܐ ܘܰܐܗܡܺܝ ܡܶܢ ܝܳܪܬܽܘܬܶܗ. ܟܰܕ ܚܛܰܘ ܒܢܱ̈ܝ ܥܺܝܠܺܝ ܘܰܢܦܰܩܘ ܠܰܩܪܳܒܳܐ ܥܰܠ ܦܠܶܫܬܳܝ̈ܐ. ܐܱܫܠܶܡ ܐܱܠܗܐ ܠܺܝܣܪܳܐܝܠ ܒܺܐܝܕܳܐ ܕܰܦܠܶܫܬܳܝ̈ܐ. ܘܰܢܦܰܠܘ ܒܚܰܪܒܳܐ ܕܡܶܢ ܥܽܘܪ̈ܠܐܷ. ܘܟܰܕ ܣܳܒܪܺܝܢ ܗܘܰܘ ܕܰܡܥܰܕܰܪ ܠܗܽܘܢ ܐܠܗܐ ܐܱܝܟ ܥܝܳܕܶܗ. ܠܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ ܫܰܕܰܪ ܐܱܝܬܺܝܘ ܡܶܢ ܫܺܝܠܽܘ. ܘܟܰܕ ܥܰܡ ܗܳܕܐ ܐܝ̣ܬ ܗܘܰܘ ܬܪܶܝܢ ܒܢܰܘ̈ܗܝ ܕܥܺܝܠܺܝ ܚܰܦܢܺܝ ܘܦܺܝܢܚܶܣ ܟܳܗܢ̈ܐ. ܘܟܰܕ ܒܥܳܐ ܕܢܰܝܬܶܐ ܐܱܠܗܐ ܥܰܠ ܗܳܢܘܢ ܪܽܘܓܙܶܗ܆ ܝܰܗܒ ܗܘܳܐ ܗܳܝܕܶܝܢ ܠܰܫܒܺܝܬܳܐ ܥܰܡܶܗ. ܘܬܶܫܒܽܘܚܬܶܗ ܐܻܝܬܶܝܗ̇ ܩܺܐܒܽܘܬܳܐ ܐܱܫܠܡܳܗ̇ ܠܐܻܝܕܳܐ ܕܰܦܠܶܫܬܳܝ̈ܐ. ܘܰܐܫܠܶܡ ܥܰܡܶܗ ܠܚܰܪܒܳܐ ܘܰܐܗܡܺܝ ܡܶܢ ܝܳܪܬܽܘܬܶܗ.
ܘܰܠܓܰܕܽܘ̈ܕܰܝܗܘܢ ܐܷܟܠܰܬ ܢܽܘܪܳܐ: ܘܰܒܬܽܘ̈ܠܳܬܗܽܘܢ ܐܷܬܛܰܪ̈ܰܦܝ: ܘܟܳܗܢܰܝ̈ܗܘܢ ܢܦܰܠܘ ܒܚܰܪܒܳܐ: ܘܰܐܪ̈ܡܠܳܬܗܘܢ ܠܐܴ ܐܷܬܒܰܟܻ̈ܝ. ܟܽܠܗܶܝܢ ܗܳܠܝܢ ܒܺܝ̈ܫܳܬܳܐ ܐܱܝܬܺܝ ܐܱܠܗܐ ܥܰܠ ܥܰܡܳܐ ܗܳܝܕܶܝܢ ܡܶܛܠ ܡܰܪܳܚܽܘܬܳܐ ܕܰܒܢܱ̈ܝ ܥܺܝܠܺܝ ܕܰܥܒܰܕܘ ܒܫܺܝܠܽܘ ܒܡܰܫܟܰܢ ܙܰܒܢܳܐ ܕܺܝܠܗܽܘܢ ܗܘܱ̈ܝ ܐܱܪ̈ܡܠܳܬܳܐ ܕܠܐ ܐܷܬܒܰܟܻ̈ܝ. ܘܟܳܗ̈ܢܶܐ ܕܰܢܦܰܠܘ ܒܚܰܪܒܳܐ ܗܶܢܘܢ ܗܘܰܘ ܘܗܳܠܝܢ ܡܶܛܠ ܥܰܘܠܐܴ ܕܰܗܘܳܐ ܒܕܶܒܚ̈ܐ ܕܒܶܝܬ ܐܱܕܽܘܢܰܝ. ܘܥܰܠ ܕܰܡܨܰܥܪܺܝܢ ܗܘܰܘ ܢܶܫ̈ܐ ܒܓܰܘܪܳܐ. ܡܳܐ ܕܳܐܬܝܴ̈ܢ ܗܘܱ̈ܝ ܠܰܡܨܰܠܳܝܽܘ ܒܡܰܫܟܰܢ ܙܰܒܢܳܐ. ܡܶܬܛܰܢܦܺܝܢ ܗܘܰܘ ܥܰܡܗܶܝܢ. ܡܶܛܠ ܗܳܠܶܝܢ:
ܐܷܬܬܥܺܝܪ ܡܳܪܝܳܐ ܐܱܝܟ ܕܰܡܟܳܐ: ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ. ܡܚܳܐ ܠܰܒܥܶܠܕ̈ܒܳܒܰܘܗܝ ܠܒܶܣܬܪܶܗ. ܒܪܰܡ ܕܶܝܢ ܢܶܬܬܥܺܝܪ ܐܱܝܟ ܕܰܡܟܳܐ ܡܳܪܝܳܐ. ܒܢܺܝܫܳܐ ܐܚܪܺܢܳܐ ܡܶܫܬܰܡܥܳܐ. ܟܰܕ ܐܷܬܢܰܣܺܝ ܡܳܪܝܳܐ ܒܝܰܕ ܫܶܢܬܳܐ ܕܡܰܘܬܳܐ ܨܶܒܝܳܢܳܝܳܐ ܡܦܺܝܣܳܐ ܗܘܳܬ ܠܶܗ ܢܒܺܝܽܘܬܳܐ ܐܱܝܟܰܢܳܐ ܕܢܶܬܬܥܺܝܪ ܐܱܝܟ ܕܰܡܟܳܐ. ܘܢܶܬܓܰܢܒܰܪ ܥܰܠ ܩܕܳܠܐܴ ܕܰܒܥܶܠܕ̈ܒܳܒܰܘܗܝ. ܕܰܐܝܟ ܗܳܟܰܢܐ ܗܘܳܐ ܓܶܝܪ ܡܰܘܬܶܗ ܕܡܳܪܝܳܐ. ܕܰܐܟܙܢܳܐ ܕܰܒܕܶܡܟܳܐ ܫܟܺܝܚܳܐ ܚܰܝܽܘܬܳܐ ܡܳܐ ܕܕܳܡܶܟ. ܗܳܟܰܢܳܐ ܐܴܦ ܡܳܪܝܳܐ ܕܺܝܠܰܢ ܟܰܕ ܕܡܶܟ ܫܶܢܬܳܐ ܕܡܰܘܬܳܐ ܨܶܒܝܳܢܳܝܳܐ܆ ܠܐܴ ܫܰܢܝܰܬ ܚܰܝܽܘܬܳܐ ܕܰܐܠܗܽܘܬܶܗ ܡܶܢ ܦܰܓܪܶܗ ܟܰܕ ܗܽܘ ܒܩܰܒܪܳܐ. ܘܡܶܛܠ ܗܳܢܳܐ ܠܰܘ ܐܱܝܟ ܒܰܪܢܳܫܳܐ ܗܰܘ ܕܡܰܘܒܶܕ ܚܰܝܰܘ̈ܗܝ ܡܳܐ ܕܕܳܡܶܟ ܒܩܰܒܪܳܐ. ܐܷܠܐ ܐܱܝܟ ܕܰܡܟܳܐ ܕܡܶܫܬܰܬܰܩ ܡܶܢ ܫܳܩܽܘܬܳܐ ܕܚܰܡܪܳܐ. ܥܶܕܳܢܳܐ ܙܥܽܘܪܳܐ ܘܡܶܬܬܥܺܝܪ. ܐܴܦ ܓܶܝܪ ܡܳܪܝܳܐ ܕܺܝܠܰܢ ܡܶܢ ܠܐܷܘܬܳܐ ܕܚܰܫ̈ܐ ܪܘܶܐ ܗܘܳܐ. ܟܰܕ ܕܡܶܟ ܒܩܰܒܪܳܐ. ܘܟܰܕ ܩܳܡ ܡܚܳܐ ܠܰܒܥܶܠܕ̈ܒܳܒܰܘܗܝ ܠܒܶܣܬܪܶܗ.
ܘܚܶܣܕܳܐ ܕܥܳܠܡܳܐ ܝܰܗܒ ܠܗܽܘܢ. ܘܡܶܢ ܒܳܬܰܪܟܶܢ ܥܴ̈ܐܠܳܢ ܗܳܠܶܝܢ ܕܡܶܛܠ ܥܰܡܳܐ.
ܘܰܐܣܠܺܝ ܠܰܡ ܠܡܰܫܟܢܳܐ ܕܝܰܘܣܶܦ: ܘܰܒܫܰܒܛܳܐ ܕܰܐܦܪܶܝܡ ܠܐܴ ܐܷܬܪܰܥܺܝ. ܒܗܳܠܶܝܢ ܡܰܘܕ̈ܥܳܢ ܥܰܠ ܡܶܫܬܰܒܩܳܢܽܘܬܶܗ ܕܥܰܡܳܐ ܕܡܶܢ ܒܳܬܰܪ ܨܠܺܝܒܳܐ. ܡܶܛܠ ܕܠܰܘ ܠܟܽܠܶܗ ܥܳܠܡܳܐ ܡܰܣܠܐܷ. ܐܷܠܐ ܠܗܳܢܘܢ ܕܬܳܝܒܺܝܢ ܒܚܽܘܒܳܐ ܪܰܒܳܐ ܡܩܰܒܶܠ ܠܗܽܘܢ. ܘܬܽܘܒ ܡܶܢܶܗ ܡܶܢ ܥܰܡܳܐ ܓܒܳܐ ܫܠܺܝܚ̈ܐ. ܘܡܶܢܗܘܢ ܬܽܘܒ ܐܷܬܚܙܺܝ ܒܰܒܣܰܪ ܡܶܠܬܳܐ ܐܱܠܗܳܐ. ܡܰܝܬܶܐ ܢܒܺܝܳܐ ܘܳܐܡܰܪ:
ܓܒܳܐ ܠܫܰܪܒܬܳܐ ܕܺܝܗܽܘܕܳܐ. ܒܗܳܢܐ ܫܰܒܛܳܐ ܡܫܰܒܰܚ ܠܟܽܠܳܗ̇ ܡܢܳܬܳܐ ܕܰܐܝܠܶܝܢ ܕܗܰܝܡܶܢܘ ܡܶܢ ܥܰܡܳܐ. ܡܰܥܶܠ ܕܶܝܢ ܐܴܦ ܫܰܪܒܳܐ ܕܛܽܘܪܳܐ ܡܶܬܝܰܕܥܳܢܳܐ ܕܨܶܗܝܽܘܢ ܪܳܡܰܬ ܕܰܘ̈ܩܶܐ.
ܠܛܽܘܪܳܐ ܠܰܡ ܕܨܶܗܝܽܘܢ ܕܰܪܚܶܡ. ܒܢܳܐ ܥܰܠ ܪܰܘܡܳܐ ܡܰܩܕܫܶܗ: ܘܒܰܐܪܥܳܐ ܐܱܬܩܢܶܗ ܠܥܳܠܰܡ. ܡܰܩܕܫܶܗ ܕܰܐܠܗܐ ܕܶܐܬܒܢܺܝ ܥܰܠ ܪܰܘܡܳܐ܆ ܡܳܢܳܐ ܢܰܣܒܰܪ ܕܺܐܝܬܰܘܗܝ ܐܷܠܐ ܐܷܢ ܨܠܺܝܒܳܐ ܕܶܐܬܩܒܰܥ ܥܰܠ ܓܳܓܽܘܠܬܳܐ. ܘܡܶܛܠܗܳܢܐ ܐܴܡܰܪ ܡܙܰܡܪܳܢܳܐ: ܘܒܰܐܪܥܳܐ ܐܱܬܩܢܶܗ ܠܥܳܠܰܡ. ܗܳܐ ܓܶܝܪ ܡܚܰܘܝܳܐ ܥܰܠܗܳܝ ܕܒܰܐܪܥܳܐ ܡܣܰܬܶܬ ܠܶܗ ܠܰܫܪܳܪܳܐ ܕܗܰܝܡܳܢܽܘܬܳܗ̇ ܕܥܺܕܬܳܐ ܥܕܰܡܳܐ ܠܫܽܘܠܳܡܳܐ. ܘܒܳܬܰܪ ܗܳܠܝܢ ܐܴܡܰܪ:
ܓܒܳܐ ܠܕܰܘܺܝܕ ܥܰܒܕܶܗ ܘܕܰܒܪܶܗ ܡܶܢ ܓܙܳܪܳܐ ܕܥܳܢܴ̈ܐ. ܘܡܶܢ ܒܶܣܬܰܪ ܥܳܢܴ̈ܐ ܕܡܰܝܢܩܳܐ: ܠܡܶܪܥܳܐ ܠܝܰܥܩܽܘܒ ܥܰܡܶܗ ܘܠܺܝܣܪܳܐܝܠ ܝܳܪܬܽܘܬܶܗ. ܟܰܕ ܒܚܰܘܪ̈ܶܐ ܪ̈ܳܡܶܐ ܘܰܡܥܰܠܰܝܴ̈ܐ ܡܶܬܒܰܩܶܝܢܰܢ ܒܬܶܐܘܳܪܺܝܰܐ ܕܡܶܛܠ ܕܰܘܺܝܕ. ܘܥܰܠ ܦܶܠܐܷܬܳܐ ܕܥܳܢܴ̈ܐ ܬܘܒ ܪܽܘܚܳܢܳܐܝ̣ܬ ܡܶܬܚܰܫܒܺܝܢܰܢ. ܡܳܕܶܝܢ ܗܰܘ ܕܰܨܒܳܐ ܒܕܰܘܺܝܕ ܕܢܶܬܡܬܶܠ. ܠܥܳܢܴ̈ܐ ܗܳܝ ܡܰܝܢܰܩܬܳܐ ܫܒܰܩ. ܠܗܳܝ ܕܰܒܟܽܠܙܒܰܢ ܡܰܠܦܳܐ ܐ̮ܘܪܚܳܐ ܠܚܰܛܳܝ̈ܐ. ܘܬܶܫܥܺܝܢ ܘܬܶܫܥܳܐ ܥܶܪ̈ܒܶܐ ܕܠܐܴ ܡܶܡܬܽܘܡ ܛܥܰܘ܆ ܫܒܰܩ ܒܛܽܘܪܳܐ ܡܶܣܬܰܟܠܳܢܳܐ ܘܥܶܠܳܝܳܐ. ܘܰܢܦܰܩ ܒܳܬܰܪ ܥܶܪ̈ܒܶܐ ܕܰܛܥܰܘ ܡܶܢ ܒܶܝܬ ܝܣܪܳܐܝܠ. ܘܟܰܕ ܐܷܫܟܚܶܗ ܠܗܰܘ ܕܰܐܒܺܝܕ ܗܘܳܐ. ܘܣܳܡܶܗ ܥܰܠ ܟܰܬܦܴ̈ܬܶܗ. ܘܡܶܟܺܝܠ ܠܶܗ ܫܰܦܺܝܪ ܕܢܶܥܒܶܕ ܫܽܘܠܳܡܳܐ ܠܪܳܥܝܽܘܬܳܗ̇ ܕܕܰܘܺܝܕ. ܘܬܶܬܡܰܠܐܷ ܗܳܝ ܕܶܐܡܰܪ ܡܙܰܡܪܳܢܳܐ.
ܘܰܪܥܳܐ ܐܷܢܘܢ ܒܬܰܡܺܝܡܽܘܬܳܐ ܕܠܶܒܶܗ: ܘܰܒܣܽܘܟܳܠܐܴ ܕܺܐܝ̈ܕܰܘܗܝ ܕܰܒܰܪ ܐܷܢܘܢ. ܘܰܐܝܟ ܕܰܒܬܰܪܬܶܝܢ ܐܻܝ̈ܕܰܘܗܝ ܡܕܰܒܰܪ ܠܳܗ̇ ܠܥܳܢܶܗ ܥܰܡܰܢܽܘܐܝܠ ܠܥܰܬܺܝܩܬܳܐ ܘܠܰܚܕܰܬܳܐ ܡܕܰܒܰܪ ܘܡܰܢܗܰܪ ܠܗܶܝܢ. ܘܰܠܥܺܕܬܳܐ ܡܚܰܘܶܐ ܠܳܗ̇ ܐ̮ܘܪܚܳܐ ܕܚܰܝ̈ܐ. ܘܣܳܐܷܡ ܕܶܝܢ ܩܕܳܡܶܝܗ̇ ܬܽܘܪܣܳܝܳܐ ܪܽܘܚܳܢܳܐ ܕܠܶܗ ܫܽܘܒܚܳܐ ܘܬܰܘܕܺܝܬܳܐ ܠܥܳܠܰܡ ܥܳܠܡܺܝܢ ܐܱܡܺܝܢ܀
ܡܙܡܘܪܐ ܕܫܒܥܝܢ ܘܬܫܥܐ
ܥܰܠ ܚܰܪܒܳܐ ܕܓܰܝܣܳܐ ܕܰܥܒܰܕܘ ܗܘܰܘ ܥܰܡ̈ܡܶܐ ܒܐܽܘܪܶܫܠܶܡ: ܘܥܰܠ ܩܪܳܒܳܐ ܕܚܰܝ̈ܠܰܘܳܬܳܐ ܕܰܠܩܽܘܒܠܳܐ ܥܰܡ ܢܰܦܫܳܐ: ܘܥܰܠ ܕܰܒܥܰܡܢܘܐܝܠ ܐܶܫܬܪܝ ܫܽܘܠܛܳܢ ܡܰܘܬܳܐ ܘܰܚܛܺܝܬܳܐ ܡܶܢ ܓܶܢܣܳܐ ܕܰܒܢܰܝ̈ܢܳܫܳܐ.
ܐܷܢ ܟܽܠ ܡܶܕܶܡ ܕܶܐܣܬܥܰܪܘ ܠܘܳܬ ܥܰܡܳܐ ܕܺܝܣܪܳܐܝܠ ܒܙܰܒܢܳܐ ܕܰܢܒܺܝ̈ܐ܆ ܠܛܽܘܦܣܳܐ ܕܺܝܠܰܢ ܗܳܘܶܐ ܗܘܳܐ܆ ܡܶܛܠ ܡܰܪܕܽܘܬܰܢ ܐܷܬܟܬܶܒ (ܐ ܩܘܪ̈ܢܬܝܐ ܝ: ܝܐ). ܐܱܝܟ ܕܰܐܠܶܦ ܦܰܘܠܽܘܣ ܗܰܘ ܚܰܟܺܝܡ ܒܟܽܠ: ܢܥܰܩܶܒ ܡܳܕܶܝܢ ܒܚܰܬܺܝܬܽܘܬܳܐ ܥܰܠ ܟܽܠܡܶܕܶܡ ܕܰܓܕܰܫ ܗܘܳܐ ܠܗܽܘܢ܆ ܘܠܐ ܢܶܫܒܽܘܩ ܕܠܐ ܒܽܘܚܳܢܳܐ ܐܱܝܠܶܝܢ ܕܡܶܣܬܰܥܪ̈ܳܢ ܗܘܱ̈ܝ ܠܘܳܬܗܽܘܢ. ܡܳܢܳܐ ܕܶܝܢ ܛܽܘܦܣܳܐ ܡܚܰܘܝܳܐ ܠܰܢ ܐ̮ܘܪܺܫܠܶܡ ܡܕܺܝܢܬܳܐ ܕܡܰܠܟܽܘܬܳܐ ܐܱܝܟ ܕܡܶܫܬܰܒܝܳܐ ܗܘܳܬ. ܘܡܳܢܳܐ ܬܘܒ ܡܫܰܘܕܰܥ ܗܘܳܐ ܗܰܝܟܠܐܴ ܕܒܳܗ̇ ܕܰܚܪܶܒ ܗܘܳܐ. ܘܗܳܫܳܐ ܡܳܢܳܐ ܐܴܠܨܳܐ ܕܢܰܝܬܶܐ ܠܒܽܘܚܳܢܳܐ ܗܰܘ ܚܽܘܪܒܳܗ̇ ܕܽܐܘܪܺܫܠܶܡ ܘܨܰܕܝܽܘܬܳܗ̇ ܘܚܽܘܪܒܳܐ ܕܗܰܝܟܠܐܴ ܕܒܳܗ̇ ܡܶܛܠ ܗܳܠܝܢ ܡܙܰܡܰܪ ܢܒܺܝܳܐ ܕܰܘܝܕ ܬܶܫܒܽܘܚܬܳܐ ܗܳܕܐ ܕܫܰܒܥܺܝܢ ܘܰܬܫܰܥ ܟܰܕ ܐܴܡܰܪ:
ܐܱܠܗܳܐ ܥܰܠܘ ܥܰܡ̈ܡܶܐ ܠܝܳܪܬܽܘܬܳܟ ܘܛܰܡܽܐܘܗܝ ܠܗܰܝܟܠܳܟ ܩܰܕܺܝܫܳܐ. ܘܥܰܒܕܽܘܗ̇ ܠܐܘܪܺܫܠܶܡ ܚܰܪܒܬܳܐ: ܝܰܗܒܘ ܫܠܰܕ̈ܐ ܕܥܰܒ̈ܕܰܝܟ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ. ܘܒܶܣܪܳܐ ܕܙܰܕܺܝ̈ܩܰܝܟ ܠܚܰܝܽܘܬܳܐ ܕܰܐܪܥܳܐ: ܘܶܐܫܰܕܘ ܕܶܡܗܽܘܢ ܐܱܝܟ ܡܰܝܴ̈ܐ ܚܕܳܪ̈ܶܝܗ̇ ܕܽܐܘܪܺܫܠܶܡ ܘܠܰܝܬ ܕܩܳܒܰܪ. ܗܳܠܶܝܢ ܐܷܡܰܪ ܛܽܘܒܬܳܢܳܐ ܕܰܘܝܕ ܒܓܶܠܝܳܢܳܐ ܕܪܽܘܚܳܐ ܕܓܳܕ̈ܫܳܢ ܠܐ̮ܘܪܺܫܠܶܡ. ܡܶܢ ܩܕܳܡ ܕܰܗ̈ܘܰܝ ܒܙܰܒܢ̈ܐ ܣܰܓܺܝ̈ܐܐ. ܘܚܶܪܒܰܬ ܡܕܺܝܢܬܳܐ ܐܱܝܟ ܕܶܐܡܰܪ ܕܰܘܝܕ ܒܝܰܘ̈ܡܰܝ ܡܢܰܫܶܐ ܒܰܪ ܚܶܙܰܩܝܳܐ ܫܰܪܝܰܬ ܡܶܬܚܰܒܠܐ. ܘܰܒܝܰܘ̈ܡܰܝ ܝܽܘܝܳܩܺܝܡ ܒܰܪ ܝܽܘܫܺܝܳܐ ܚܶܪܒܰܬ ܒܰܡܢܳܬܳܐ ܩܰܠܺܝܠ. ܘܰܒܝܰܘ̈ܡܰܝ ܨܶܕܰܩܝܳܐ ܡܰܠܝܳܐܝ̣ܬ ܚܶܪܒܰܬ ܘܝܶܬܒܰܬ ܒܨܰܕܝܽܘܬܳܐ ܘܡܶܬܩܪܶܐ ܗܘܳܐ ܒܰܬܪܶܝܢ ܫܡܳܗ̈ܐ ܐܚܪ̈ܳܢܶܐ ܗܳܢܐ ܨܶܕܰܩܝܳܐ. ܡܰܬܢܝܳܐ ܘܝܽܘܟܺܝܢܳܐ. ܘܰܒܝܰܘ̈ܡܳܬܶܗ ܕܗܳܢܳܐ ܡܰܠܟܳܐ ܥܰܠܘ ܠܳܗ̇ ܓܰܝ̈ܣܶܐ ܟܰܠܕܳܝ̈ܐ ܘܰܥܩܰܪܘ ܗܰܝܟܠܳܗ̇ ܘܫܽܘܪܳܗ̇. ܘܶܐܫܰܕܘ ܕܡܳܐ ܕܥܳܡܽܘܪ̈ܶܝܗ̇ ܒܓܰܘܳܗ̇ ܐܴܦ ܒܰܚܕܳܪ̈ܶܝܗ̇. ܘܰܗ̈ܘܰܝ ܫܠܰܕܰܝ̈ܗܘܢ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ. ܘܒܶܣܪܳܐ ܕܙܰܕܺܝ̈ܩܶܝܗ̇ ܠܚܰܝܽܘܬܳܐ ܕܰܐܪܥܳܐ ܐܷܬܺܝܗܶܒ. ܘܶܐܬܶܐܫܶܕ ܕܡܳܐ ܕܪܰܘܪ̈ܒܳܢܶܝܗ̇ ܘܕܰܒܢܱ̈ܝ ܡܰܠܟ̈ܐ ܐܱܝܟ ܡܰܝܴ̈ܐ ܚܕܳܪ̈ܶܝܗ̇. ܘܠܰܝܬ ܗܘܳܐ ܕܩܳܒܰܪ. ܘܝܶܬܒܰܬ ܫܢܰܝܴ̈ܐ ܫܰܒܥܺܝܢ ܒܨܰܕܝܽܘܬܳܐ. ܟܰܕ ܡܶܬܚܰܣܕܳܐ ܘܰܥܒܺܝܕܳܐ ܡܰܬܠܐܴ ܘܡܽܘܝܳܩܳܐ ܠܰܫܒܳܒܶܝ̈ܗ̇ ܘܠܐܱܝܠܶܝܢ ܕܰܚܕܺܝܪܺܝܢ ܠܳܗ̇. ܗܳܠܝܢ ܐܷܡܰܪ ܪܽܘܚܳܐ ܩܰܕܺܝܫܳܐ ܒܰܢܒܺܝܐ. ܕܗܳܘ̈ܝܳܢ ܠܐ̮ܘܪܺܫܠܶܡ. ܡܶܢ ܩܕܳܡ ܙܰܒܢܳܐ ܕܓܳܕ̈ܫܳܢ ܠܳܗ. ܢܶܒܥܶܐ ܕܶܝܢ ܚܢܰܢ ܗܳܫܳܐ. ܡܳܢܳܐ ܨܰܠܡܳܐ ܫܰܘܕܰܥ ܠܰܢ ܒܗܳܠܶܝܢ ܢܒܺܝܳܐ. ܒܽܐܘܪܺܫܠܶܡ ܥܶܠܳܝܬܳܐ ܐܝ̣ܬܰܘܗܝ ܗܘܳܐ ܒܰܪܢܳܫܳܐ ܩܰܕܡܳܝܳܐ. ܘܒܰܡܕܺܝܢܰܬ ܡܰܠܟܽܘܬܳܐ ܡܶܬܒܰܣܰܡ ܗܘܳܐ ܐܴܕܳܡ ܡܶܢ ܩܕܳܡ ܕܠܐ ܢܶܚܛܶܐ. ܘܡܶܢ ܐܻܝ̈ܠܳܢܶܐ ܦܺܐܪ̈ܳܝܶܐ ܡܶܬܬܰܪܣܶܐ ܗܘܳܐ ܒܦܰܪܕܰܝܣܳܐ ܛܽܘܒܬܳܢܳܐ. ܟܰܕ ܐܱܪܓܶܫܘ ܒܶܗ ܒܥܶܠܕ̈ܒܳܒܶܐ ܒܳܒܠܳܝ̈ܐ ܘܡܶܬܝܰܕ̈ܥܳܢܶܐ. ܘܰܚܙܰܘ ܫܽܘܦܪܳܐ ܕܰܡܕܺܝܢܬܶܗ ܗܳܢܘܢ ܒܰܪܒܪ̈ܳܝܶܐ ܘܰܒܥܶܠܕ̈ܒܳܒܶܝܗ̇ ܕܽܐܘܪܺܫܠܶܡ. ܡܶܛܠ ܕܠܐ ܡܶܫܟܚܺܝܢ ܗܘܰܘ ܕܰܓܳܠܐܴܝ̣ܬ ܢܶܣܕܪܽܘܢ ܩܪܳܒܳܐ ܥܰܠ ܡܕܺܝܢܬܳܐ ܩܰܕܺܝܫܬܳܐ. ܟܡܶܢܘ ܒܚܶܘܝܳܐ ܪܺܝܫ ܒܺܝܫܬܳܐ܆ ܘܰܒܢܰܘ ܩܰܠܩܽܘ̈ܡܶܐ ܕܡܰܛܥܝܳܢܽܘܬܳܐ ܠܒܰܪ ܡܶܢ ܫܽܘܪܳܐ. ܘܰܒܫܽܘܕܳܠܐܴ ܩܪܶܒܘ ܠܘܳܬ ܚܰܘܳܐ ܘܶܐܡܰܪܘ ܠܳܗ̇܆ ܘܶܐܫܬܰܡܥܰܬ ܠܗܽܘܢ. ܘܥܰܠܘ ܒܥܶܠܕ̈ܒܳܒܶܐ ܠܰܡܕܺܝܢܬܶܗ ܕܡܰܠܟܳܐ ܪܰܒܳܐ. ܘܰܐܪܡܺܝܘ ܛܰܡܽܐܘܬܳܐ ܒܗܰܝܟܠܐܴ ܕܰܐܠܗܳܐ. ܒܰܪܢܳܫܳܐ ܗܘܳܐ ܡܶܢ ܩܕܳܡ ܕܢܶܚܛܶܐ. ܟܰܕ ܕܶܝܢ ܚܛܳܐ. ܫܰܢܝܰܬ ܡܶܢ ܠܘܳܬܶܗ ܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܕܥܳܡܪܳܐ ܗܘܳܬ ܒܶܗ ܐܱܝܟ ܕܰܒܗܰܝܟܠܐܴ. ܘܰܗܘܳܐ ܛܰܡܳܐܐ. ܘܡܶܢ ܗܳܝܕܶܝܢ ܟܰܕ ܐܷܬܛܰܢܰܦ ܗܰܝܟܠܶܗ ܒܫܰܘܬܳܦܽܘܬܳܐ ܕܪ̈ܽܘܚܶܐ ܗܳܢܶܝܢ ܛܰܡ̈ܐܬܳܐ. ܢܦܰܩ ܣܰܝܦܳܐ ܕܰܚܛܺܝܬܳܐ ܥܰܠ ܒܢܱ̈ܝ ܡܰܠܟܽܘܬܳܐ ܙܰܕܺܝ̈ܩܶܐ ܘܩܰܕܺܝ̈ܫܶܐ. ܘܶܐܬܚܰܪܒܰܬ ܐܢܳܫܽܘܬܳܐ ܠܒܰܪ ܡܶܢ ܡܕܺܝܢܬܳܐ ܩܰܕܺܝܫܬܳܐ. ܠܰܘ ܓܶܝܪ ܒܓܰܘ ܡܕܺܝܢܬܳܐ ܐܷܡܰܪ ܡܶܬܩܰܛܠܺܝܢ ܗܘܰܘ܆ ܕܰܒܗܳܕܶܐ ܢܰܗܺܝܪܳܐܝ̣ܬ ܢܚܰܘܶܐ ܠܐ ܓܶܝܪ ܡܶܫܟܚܺܝܢ ܗܘܰܘ ܒܥܶܠܕ̈ܒܳܒܶܐ ܕܰܒܓܰܘ ܦܰܪܕܰܝܣܳܐ ܢܰܪܡܽܘܢ ܫܠܰܕ̈ܐ. ܐܠܐ ܡܶܢ ܒܳܬܰܪ ܕܰܚܛܳܐ ܐܴܕܳܡ. ܢܦܰܩܘ ܡܶܢ ܐܘܪܺܫܠܶܡ ܒܰܡܣܳܡ ܒܪܺܝܫܳܐ. ܡܶܟܺܝܠ ܫܠܰܕ̈ܐ ܕܥܰܒ̈ܕܰܘܗܝ ܕܰܐܠܗܐ ܡܶܬܐܱܟ̈ܠܳܢ ܗܘܱ̈ܝ ܡܶܢ ܦܳܪ̈ܚܳܬܳܐ ܕܡܶܬܝܰܕܥܳܢܳܐܝ̣ܬ ܦܳܪ̈ܚܳܢ ܒܰܫܡܰܝܳܐ. ܘܒܶܣܪܳܐ ܕܙܰܕܺܝ̈ܩܰܘܗܝ ܕܰܐܠܗܐ. ܡܰܘܬܳܐ ܘܰܚܒܳܠܐ ܚܰܝܽܘܬܳܐ ܕܰܐܪܥܳܐ ܡܚܰܒܠܺܝܢ ܗܘܰܘ ܠܳܗ̇. ܘܰܕܡܳܐ ܕܶܝܢ ܕܟܺܐܢ̈ܐ ܘܙܰܕܺܝ̈ܩܶܐ ܚܕܳܪ̈ܰܝ ܐܘܪܺܫܠܶܡ ܡܶܬܶܐܫܶܕ ܗܘܳܐ. ܘܠܰܝܬ ܕܩܳܒܰܪ ܗܘܳܐ ܘܰܡܥܰܦܶܐ. ܡܶܛܠ ܕܰܡܚܰܦܰܝ ܗܘܳܐ ܦܽܘܪܩܳܢܳܐ ܡܶܢܰܢ. ܘܰܥܒܺܝܕܺܝܢ ܗܘܰܝܢ ܚܶܣܕܳܐ ܠܰܫܒܳܒܰܝ̈ܢ ܐܱܝܟ ܕܶܐܡܰܪ ܢܒܺܝܳܐ:
ܗܘܰܝܢ ܚܶܣܕܳܐ ܠܰܫܒܳܒܱ̈ܝܢ: ܘܡܽܘܝܳܩܳܐ ܘܒܽܘܙܳܚܳܐ ܠܐܱܝܠܶܝܢ ܕܰܚܕܳܪ̈ܰܝܢ ܐܷܢܽܘܢ. ܡܶܢ ܕܰܢܦܰܩܘ ܕܒܶܝܬ ܐܴܕܳܡ ܡܶܢ ܦܰܪܕܰܝܣܳܐ. ܚܶܣܕܳܐ ܘܡܽܘܝܳܩܳܐ ܗܘܳܐ ܐܴܕܳܡ ܠܰܫܒܳܒܰܘ̈ܗܝ. ܗܳܢܰܘ ܠܫܺܐܕ̈ܐ ܘܰܠܪ̈ܽܘܚܶܐ ܒܺܝ̈ܫܳܬܳܐ. ܕܡܶܛܠ ܗܳܠܝܢ ܫܒܳܒ̈ܐ ܒܺܝ̈ܫܶܐ ܘܟܳܡ̈ܢܰܝ ܠܰܬܒܳܪܳܐ ܡܨܰܠܐܷ ܢܒܺܝܳܐ ܠܘܳܬ ܐܠܗܐ ܘܳܐܡܰܪ:
ܥܕܰܡܳܐ ܠܐܷܡܰܬܝ ܪܳܓܶܙ ܐܱܢܬ ܡܳܪܝܳܐ ܠܥܳܠܰܡ ܘܝܳܩܶܕ ܐܱܝܟ ܢܽܘܪܳܐ ܪܽܘܓܙܳܟ. ܥܕܰܡܳܐ ܠܐܷܡܰܬܝ ܗܰܘ ܕܡܶܢ ܓܰܝ̈ܣܶܐ ܐܷܫܬܒܺܝ ܡܶܫܬܒܶܩ ܡܶܢܳܟ ܕܠܐܴ ܒܛܺܝܠܽܘܬܳܐ ܡܳܪܝܳܐ. ܟܰܕ ܫܰܒܳܝܷ̈ܐ ܡܶܬܢܰܓܕܺܝܢ ܒܶܗ. ܘܰܥܕܰܡܳܐ ܠܐܡܰܬܝ ܡܶܬܓܰܘܙܠܐ ܢܽܘܪܳܐ ܒܰܒܢܰܝܴ̈ܐ ܗܳܢܘܢ ܕܰܚܛܰܘ ܟܕ ܠܐ ܝܳܕܥܺܝܢ. ܗܰܘ ܕܶܝܢ ܕܰܐܠܶܦ ܐܷܢܽܘܢ ܚܛܺܝܬܳܐ ܡܶܬܥܰܫܰܢ ܘܠܐ ܡܶܬܩܰܦܰܚ ܒܢܶܓ̈ܕܶܐ ܕܟܺܐܢܽܘܬܳܐ.
ܐܱܫܽܘܕ ܪܽܘܓܙܳܟ ܥܰܠ ܥܰܡ̈ܡܶܐ ܐܱܝܠܶܝܢ ܕܠܐܴ ܝܰܕܥܽܘܟ܆ ܘܥܰܠ ܡܰܠܟ̈ܘܳܬܳܐ ܐܱܝܠܶܝܢ ܕܒܰܫܡܳܟ ܠܐ ܩܪ̈ܰܝ. ܗܰܘ ܕܶܝܢ ܕܰܐܠܶܦ ܚܛܺܝܬܳܐ ܗܽܘ ܢܶܬܪܕܶܐ. ܘܗܰܘ ܕܰܐܘܚܶܕ ܢܽܘܪܳܐ ܗܽܘ ܢܺܐܩܰܕ ܒܳܗ̇. ܣܰܒ ܡܰܪܕܽܘܬܳܐ ܡܶܢ ܒܢܰܝܴ̈ܐ ܟܰܕܽܘ ܒܠܰܥܘ. ܘܗܰܘ ܕܚܰܘܺܝ ܠܗܽܘܢ ܐܱܝܟ ܕܰܢܨܰܥܪܽܘܢ ܠܐܱܒܽܘܗܽܘܢ. ܢܶܬܺܝܗܶܒ ܠܰܡܢܰܓܕܳܢ̈ܐ. ܗܰܘ ܕܚܰܠܶܨ ܒܶܝܬ ܡܰܩܕܫܳܟ ܗܽܘ ܢܺܐܙܰܠ ܠܒܶܝܬ ܚܒܽܘܫܝܳܐ. ܗܰܘ ܕܰܚܦܰܪ ܓܽܘܡܳܨܳܐ܆ ܗܽܘ ܢܩܰܕܶܐ ܡܰܦܽܘܠܬܳܐ ܗܳܠܝܢ ܕܥܰܠܘ ܠܝܳܪܬܽܘܬܳܐ ܩܰܕܺܝܫܬܳܐ ܗܶܢܘܢ ܚܰܠܶܨܘ ܒܶܝܬ ܡܰܩܕܫܳܟ.
ܡܶܛܠ ܕܰܐܟܠܽܘܗܝ ܠܝܰܥܩܽܘܒ ܘܰܠܕܰܝܪܶܗ ܚܪܰܒܘ. ܠܝܳܪܬܽܘܬܳܐ ܗܳܝ ܕܝܰܗܒܬ ܠܬܰܡܺܝܡܳܐ܆ ܛܰܪܕܽܘܗܝ ܡܶܢܳܗ̇ ܒܢܱ̈ܝ ܥܺܝܣܽܘ ܘܒܰܙܘ ܠܡܰܟܺܝܟܳܐ ܘܡܰܣܟܢܽܘܗܝ ܠܥܰܬܺܝܪܳܐ. ܐܠܐ ܒܢܱ̈ܝ ܐܷܡܰܢ ܐܷܬܟܰܬܰܫܘ ܒܰܢ (ܬܫܒ̈ܚܬ ܬܫܒ̈ܚܬܐ ܐ: ܗ) ܘܰܐܠܶܦܘ ܠܰܢ ܠܡܰܡܪܳܕܽܘ ܥܠܰܝܟ.
ܠܐܴ ܬܶܬܕܟܰܪ ܠܰܢ ܚܛܳܗܱ̈ܝܢ ܩܰܕܡܳܝ̈ܐ. ܘܒܰܥܓܰܠ ܢܩܰܕܡܽܘܢܳܢ ܪ̈ܰܚܡܰܝܟ. ܒܰܚܛܳܗ̈ܐ ܠܰܡ ܕܩܰܕܡܳܝ̈ܐ ܠܐ ܢܶܬܪܕܽܘܢ ܐܚܪ̈ܳܝܶܐ. ܘܟܰܕ ܛܳܒ ܠܰܡ ܘܰܚܢܰܢ ܠܰܘ ܡܶܢ ܚܛܳܗ̈ܐ ܡܚܰܪܪܺܝܢܰܢ. ܘܠܐܴ ܬܰܝܬܶܐ ܥܠܰܝܢ ܡܣܳܡ ܒܪܺܝܫܳܐ ܚܛܳܗ̈ܐ ܕܛܰܠܝܽܘܬܳܐ.
ܡܶܛܠ ܕܶܐܬܡܰܟܰܟܢ ܛܳܒ. ܥܰܕܰܪܰܝܢ ܐܠܗܳܐ ܦܳܪܽܘܩܰܢ: ܡܶܛܠ ܐܝ̣ܩܳܪܳܐ ܕܰܫܡܳܟ. ܠܰܘ ܡܶܛܠܳܬܰܢ ܢܶܗܘܶܐ ܥܽܘܕܪܳܢܳܟ. ܡܶܛܠ ܕܰܒܢܰܝܴ̈ܐ ܕܺܝܠܳܟ ܡܶܬܚܰܫܒܺܝܢܰܢ ܦܪܽܘܩ ܠܰܢ ܡܶܢ ܥܒܴ̈ܕܶܐ ܚܶܫܽܘܟ̈ܐ ܕܶܐܫܬܰܠܰܛܘ ܥܠܰܝܢ. ܕܠܐ ܟܕ ܒܳܠܥܺܝܢ ܒܢܰܝܴ̈ܐ ܢܶܬܡܰܟܰܟ ܐܻܝܩܳܪܳܐ ܕܰܐܒܽܘܗܽܘܢ.
ܘܚܰܣܳܢ ܘܦܰܨܳܢ ܡܶܢ ܚܛܳܗܱ̈ܝܢ ܡܶܛܠ ܐܻܝܩܳܪܳܐ ܕܰܫܡܳܟ. ܟܽܠܗܶܝܢ ܡܶܛܠܬܳܟ ܢܶܗܘ̈ܝܳܢ. ܘܰܒܟܽܠܗܶܝܢ ܫܡܳܟ ܢܶܫܬܰܒܰܚ ܘܢܶܬܝܰܩܰܪ. ܘܡܶܛܠ ܕܒܰܫܡܳܟ ܡܶܬܝܰܩܪܺܝܢ ܥܰܒ̈ܕܰܝܟ. ܐܱܙܥܰܪܘ ܢܶܓ̈ܕܶܐ ܘܰܩܦܰܣ ܡܰܪܕܽܘܬܳܐ. ܕܟܰܕ ܚܳܙܶܝܢ ܒܥܶܠܕ̈ܒܳܒܰܝܢ ܕܡܰܓܳܢ ܗܘܳܐ ܫܽܘܒܩܳܢܰܢ. ܢܫܰܢܶܩ ܐܷܢܽܘܢ ܚܣܳܡܳܐ. ܘܠܐ ܟܕ ܚܳܙܶܝܢ ܡܳܪ̈ܽܘܕܶܐ ܕܰܒܢܰܝܴ̈ܐ ܡܶܫܬܰܩܦܺܝܢ ܒܓ̈ܠܠܐܷ ܫܓܺܝ̈ܫܶܐ ܕܢܰܗܪ̈ܰܘܳܬܳܐ ܕܒܳܒܶܝܠ.
ܢܺܐܡܪܽܘܢ ܥܰܡ̈ܡܶܐ ܐܱܝܟܰܘ ܐܠܳܗܟܽܘܢ. ܒܗܳܠܶܝܢ ܓܶܝܪ ܕܠܐ ܬܚܽܘܡܳܐ ܡܶܬܓܰܕܰܦ ܫܡܳܟ ܩܰܕܺܝܫܳܐ. ܟܕ ܚܳܙܶܝܢ ܕܣܰܟܝܰܬ ܢܰܦܫܳܐ ܘܠܐ ܐܷܬܦܰܪܩܰܬ. ܐܠܐ ܐܰܥܛܶܦ ܥܠܰܝܗܽܘܢ ܡܣܳܡ ܒܪܺܝܫܳܐ ܥܰܠ ܒܥܶܠܕ̈ܒܳܒܰܝܢ. ܘܰܬܒܰܥ ܕܡܳܐ ܕܙܰܕܺܝ̈ܩܰܝܟ ܡܶܢ ܠܺܝ̈ܛܶܐ ܕܰܐܫܕܽܘܗܝ.
ܘܬܶܬܺܝܕܰܥ ܒܥܰܡ̈ܡܶܐ ܠܥܺܢܰܝ̈ܢ ܬܒܰܥܬܳܐ ܕܰܕܡܳܐ ܕܥܰܒܕܰܝ̈ܟ ܕܶܐܬܶܐܫܶܕ. ܚܙܺܝ ܗܳܟܺܝܠ ܡܳܢܳܐ ܡܡܰܠܶܠ ܢܒܺܝܳܐ ܒܪܽܘܚܳܐ ܠܘܳܬ ܐܠܗܳܐ. ܡܶܛܠ ܐܱܝܠܶܝܢ ܕܰܟܡܶܢܘ ܠܒܰܪܢܳܫܳܐ ܩܰܕܡܳܝܳܐ. ܘܚܽܘܪ ܐܱܝܟܰܢܳܐ ܒܰܫܪܳܪܳܐ ܡܨܰܠܐܷ. ܕܓܰܠܝܳܐܝ̣ܬ ܘܰܩܕܳܡ ܥܰܝ̈ܢܶܐ ܕܩܰܕܺܝ̈ܫܶܐ ܢܶܥܒܶܕ ܐܠܗܐ ܢܩܰܡܬܳܐ ܘܰܬܒܰܥܬܳܐ ܡܶܢ ܒܺܝܫܳܐ ܕܰܐܛܥܺܝ ܒܶܗ. ܘܰܡܦܺܝܣ ܕܠܰܘ ܓܶܝܪ ܒܒܰܪܢܳܫܳܐ ܢܶܗܘܶܐ ܦܽܘܪܩܳܢܳܐ. ܝܳܕܰܥ ܗܘܳܐ ܓܶܝܪ ܕܰܡܚܺܝܠ ܗܽܘ ܕܪܳܥܶܗ ܕܡܳܝܽܘܬܳܐ ܕܢܶܡܬܽܘܚ ܩܶܫܬܳܐ ܠܽܘܩܒܰܠ ܒܥܶܠܕ̈ܒܳܒܶܐ ܕܰܐܝܟ ܗܳܠܝܢ. ܐܠܐ ܐܢ ܕܪܳܥܶܗ ܕܗܰܘ ܠܐ ܡܳܝܽܘܬܳܐ. ܘܠܐ ܡܶܬܚܰܒܠܳܢܳܐ ܡܶܛܠܗܳܢܐ ܐܴܡܰܪ:
ܬܶܥܽܘܠ ܩܕܳܡܰܝܟ ܐܷܢܰܩܬܶܗ ܕܰܐܣܺܝܪܳܐ: ܒܪܰܒܽܘܬܳܐ ܕܰܕܪܳܥܳܟ ܫܪܺܝ ܒܢܰܝܴ̈ܐ ܡܶܢ ܡܰܘܬܳܐ. ܘܰܦܪܽܘܥ ܠܰܫ̈ܒܳܒܰܝܢ ܚܰܕ ܒܫܰܒܥܳܐ ܒܥܽܘܒܗܽܘܢ: ܚܶܣܕܳܐ ܕܚܰܣܕܽܘܟ ܡܳܪܝܳܐ. ܘܰܚܢܰܢ ܥܰܡܳܟ ܘܥܳܢ̈ܐ ܕܡܰܪܥܺܝܬܳܟ ܢܰܘܕܶܐ ܠܳܟ ܠܥܳܠܰܡ. ܘܰܠܕܳܪܕܳܪ̈ܺܝܢ ܢܶܫܬܰܥܶܐ ܬܶܕܡܪ̈ܳܬܳܟ. ܠܡܰܢ ܩܳܪܶܐ ܢܒܺܝܳܐ ܕܪܳܥܶܗ ܕܡܳܪܝܳܐ. ܘܡܰܢܽܘ ܕܰܫܪܳܐ ܒܢܰܝܴ̈ܐ ܡܶܢ ܡܰܘܬܳܐ. ܐܠܐ ܗܰܘ ܕܰܩܥܳܐ ܠܶܗ ܠܐܷܫܰܥܝܳܐ ܘܶܐܡܰܪ: ܐܷܬܬܥܺܝܪܝ ܐܷܬܬܥܺܝܪܝ ܘܰܠܒܰܫܝ ܥܽܘܫܢܳܐ ܕܰܕܪܳܥܶܗ ܕܡܳܪܝܳܐ ܐܷܬܬܥܺܝܪܝ ܐܱܝܟ ܕܰܒܝܰܘ̈ܡܳܬܳܐ ܩܰܕܡܳܝ̈ܐ (ܐܫܥܝܐ ܢܐ: ܛ). ܐܷܠܐ ܕܪܳܥܶܗ ܕܰܐܒܳܐ ܡܶܬܶܐܡܰܪ ܥܰܡܰܢܽܘܐܝܠ. ܥܰܠ ܕܰܢܚܰܘܶܐ ܢܒܺܝܳܐ. ܕܰܐܝܟܰܢܳܐ ܕܰܕܪܳܥܳܐ ܒܰܪ ܟܝܳܢܳܐ ܗܘ ܕܓܽܘܫܡܳܐ ܕܰܡܪܰܟܰܒ ܘܰܩܒܺܝܥ ܒܶܗ. ܗܳܟܰܢܳܐ ܒܪܳܐ ܒܰܪ ܟܝܳܢܰܐ ܗ̄ܘ ܕܰܐܒܳܐ. ܘܡܶܛܠ ܗܳܢܐ ܒܶܗ ܡܦܺܝܣ ܗܘܳܐ ܕܢܶܗܘܶܐ ܫܪܳܝܳܐ ܡܶܢ ܐܱܣܽܘܪ̈ܰܘܗܝ ܕܡܰܘܬܳܐ ܠܰܒܢܰܝ̈ܢܳܫܳܐ. ܗܳܢܘܢ ܕܰܒܢܰܝܴ̈ܐ ܕܰܐܠܗܐ ܒܛܰܝܒܽܘܬܳܐ ܡܶܬܩܪܶܝܢ. ܘܗܳܕܶܐ ܠܰܡ ܕܬܶܗܘܶܐ. ܡܳܐ ܕܥܶܠܰܬ ܩܕܳܡܰܝܟ ܐܷܢܰܩܬܶܗ ܕܰܐܣܺܝܪܳܐ ܐܱܒܽܘܗܽܘܢ. ܟܕ ܓܶܝܪ ܠܗܰܘ ܪܺܝܫ ܓܶܢ̈ܣܶܐ ܐܴܕܳܡ ܩܪܳܐ ܐܰܣܺܝܪܳܐ ܠܰܒܢܰܘ̈ܗܝ ܕܢܶܫܬܪܽܘܢ ܡܦܺܝܣ. ܘܡܳܐ ܠܰܡ ܕܰܫܪܰܝܬ ܒܢܰܝܴ̈ܐ ܡܶܢ ܬܚܶܝܬ ܐܻܝܕܶܗ ܕܡܰܘܬܳܐ ܝܰܥܢܳܐ. ܢܶܬܦܰܪܥܽܘܢ ܫܒܴ̈ܒܰܝܢ ܚܰܕ ܒܫܰܒܥܳܐ ܒܥܽܘܒܗܽܘܢ ܒܢܽܘܪܳܐ ܕܠܐ ܕܳܥܟܳܐ. ܫܺܐܕ̈ܐ ܡܩܰܒܠܺܝܢ ܦܽܘܪܥܳܢܳܐ ܕܫܳܘܶܐ ܠܡܰܪܳܚܽܘܬܗܽܘܢ. ܘܰܡܩܰܒܠܺܝܢ ܚܠܳܦ ܡܽܘܝܳܩܳܐ ܘܚܶܣܕܳܐ ܗܰܘ ܕܚܰܣܶܕܘ ܠܡܳܪܝܳܐ. ܬܰܫܢܺܝܩܳܐ ܕܰܠܥܳܠܰܡ. ܘܗܳܠܝܢ ܕܺܐܝܬܰܝܗܘܢ ܥܳܢܴ̈ܐ ܕܡܰܪܥܺܝܬܶܗ ܕܰܐܠܗܳܐ. ܡܰܘܕܶܝܢ ܠܶܗ ܠܥܳܠܰܡ ܘܰܠܕܳܪܕܳܪ̈ܺܝܢ ܡܶܫܬܰܥܶܝܢ ܬܶܕܡܪ̈ܳܬܶܗ ܡܳܐ ܕܰܡܦܰܪܶܫ ܠܗܽܘܢ ܡܶܢ ܓܕܰܝܴ̈ܐ ܫܒܳܒܰܝ̈ܗܘܢ ܐܱܝܟ ܕܰܠܥܶܪ̈ܒܶܐ ܘܳܐܡܰܪ ܠܗܽܘܢ܆ ܬܰܘ ܒܪ̈ܺܝܟܰܘܗܝ ܕܳܐܒܝ ܝܪܰܬܘ ܡܰܠܟܽܘܬܳܐ܇ ܕܰܥܬܺܝܕܳܐ ܗܘܳܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܘܚܳܙܶܝܢ ܠܶܗ ܠܰܕܪܳܥܶܗ ܕܡܳܪܝܳܐ ܩܰܕܺܝ̈ܫܶܐ ܕܰܒܪܰܒܽܘܬܳܐ ܘܰܒܫܽܘܠܛܳܢܳܐ ܡܰܠܟܳܝܳܐ ܥܳܐܷܠ ܒܳܬܰܪܗܽܘܢ ܠܒܶܝܬ ܐܱܣܺܝܪ̈ܶܐ. ܘܫܳܪܶܐ ܡܶܢܗܽܘܢ ܦܟܳܪ̈ܰܘܗܝ ܕܡܰܘܬܳܐ. ܘܡܰܡܠܶܟ ܠܗܽܘܢ ܒܚܰܝ̈ܐ ܕܠܐ ܚܒܳܠܐܴ. ܘܡܰܣܩܺܝܢ ܠܶܗ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܺܝܢ ܐܱܡܺܝܢ܀
ܡܙܡܘܪܐ ܕܬܡܢܝܢ
ܡܦܺܝܣܳܢܽܘܬܳܐ ܡܶܢ ܢܒ̈ܝܶܐ ܠܘܳܬ ܐܰܠܳܗܳܐ ܡܶܠܬܳܐ ܕܢܶܬܓܠܶܐ: ܘܥܰܠ ܦܽܘܪܩܳܢܳܐ ܕܰܗܘܳܐ ܠܐܢܳܫܽܘܬܳܐ ܒܓܶܠܝܳܢܶܗ ܕܡܶܢ ܫܡܰܝܳܐ ܕܰܐܠܳܗܳܐ: ܘܥܰܠ ܚܽܘܕܳܬܳܐ ܕܡܶܢ ܚܛܺܝܬܳܐ.
ܡܳܪܢ ܘܦܳܪܽܘܩܢ ܝܶܫܘܥ ܡܫܺܝܚܐ ܟܰܕ ܡܰܠܶܦ ܠܬܰܠܡܺܝ̈ܕܶܐ ܕܺܝܠܶܗ ܒܐܪ̈ܳܙܶܐ ܘܰܒܦܷ̈ܠܐܬܳܐ ܡܶܕܶܡ ܡܶܕܶܡ ܐܴܡܰܪ ܗܘܳܐ: ܐܱܝܟܰܢܳܐ ܕܢܶܦܢܽܘܢ ܐܴܦ ܢܶܣܬܰܟܠܽܘܢ ܡܶܠܰܘ̈ܗܝ ܩܰܕܺܝ̈ܫܳܬܳܐ. ܡܶܢ ܒܳܬܰܪ ܡܩܰܒܠܺܝܢ ܪܽܘܚܳܐ ܦܰܪܶܩܠܺܝܛܳܐ. ܕܰܐܝܢܳܐ ܚܰܝܠܐܴ ܡܛܰܫܰܝ ܒܗܶܝܢ. ܘܡܶܛܠ ܟܰܕ ܩܪܶܒ ܗܘܳܐ ܘܡܰܢܰܥ ܠܘܳܬ ܚܰܫܳܐ ܦܳܪܽܘܩܳܝܳܐ. ܡܰܠܶܦ ܗܘܳܐ ܠܗܽܘܢ ܘܳܐܡܰܪ:
ܕܶܐܢܳܐ ܐܻܝܬܰܝ ܓܦܶܬܳܐ ܕܰܫܪܳܪܳܐ ܘܳܐܒܝ ܦܰܠܳܚܳܐ. ܘܟܽܠ ܫܒܺܫܬܳܐ ܕܒܺܝ ܦܺܐܪ̈ܶܐ ܠܐ ܡܰܝܬܝܳܐ ܫܳܩܶܠ ܠܳܗ̇. ܘܰܐܝܕܳܐ ܕܝܳܗܒܳܐ ܦܺܐܪ̈ܶܐ ܡܕܰܟܶܐ ܠܳܗ̇: ܕܦܺܐܪ̈ܶܐ ܣܰܓܺܝ̈ܐܐ ܬܰܝܬܶܐ (ܝܘܚܢܢ ܝܗ: ܐ-ܒ). ܘܬܽܘܒ ܐܷܡܰܪ: ܕܶܐܢܳܐ ܐܻܝܬܰܝ ܓܦܶܬܳܐ ܘܰܐܢܬܘܢ ܫܒܺܫ̈ܬܶܐ (ܝܘܚܢܢ ܝܗ: ܗ). ܕܡܶܛܠܡܳܢܐ ܫܽܘܪܳܝܳܐ ܠܡܺܐܡܪܳܐ ܗܳܢܳܐ ܥܶܒܕܶܬ ܐܴܡܰܪ ܐܢܳܐ؟ ܓܦܶܬܳܐ ܗܘܳܬ ܡܶܢܩܕܺܝܡ ܢܰܦܫܳܐ ܕܐܢܴ̈ܫܳܐ ܒܦܰܪܕܰܝܣܳܐ ܕܰܐܠܗܐ ܡܶܢ ܩܕܳܡ ܕܠܐ ܢܶܚܛܶܐ. ܟܰܕ ܕܶܝܢ ܚܛܳܐ ܐܴܕܳܡ. ܐܶܬܥܩܰܪ ܡܶܢ ܦܰܪܕܰܝܣܳܐ ܕܰܐܠܗܐ. ܘܰܢܦܰܩ ܢܳܪܓܳܐ ܕܟܺܐܢܽܘܬܳܐ ܘܦܰܣܩܳܗ̇ ܠܣܰܬܳܐ ܕܐܢܳܫܽܘܬܳܐ ܡܶܢ ܟܰܪܡܳܐ ܛܽܘܒܬܳܢܳܐ ܗܰܘ ܕܰܢܨܺܝܒ ܗܘܳܐ ܒܰܥܕܶܝܢ. ܘܰܫܕܳܗ̇ ܠܒܰܪ ܡܶܢ ܣܝܳܓܳܐ ܘܝܶܒܫܰܬ ܒܰܓܠܺܝܕܳܐ ܕܛܳܥܝܽܘܬܳܐ. ܘܥܶܒܕܰܬ ܚܠܳܦ ܚܰܡܪܳܐ ܚܰܪ̈ܽܘܒܶܐ. ܟܰܕ ܗܳܟܰܢܳܐ ܗܘܳܬ ܓܦܶܬܳܐ ܕܰܓܳܠܬܳܐ. ܕܟܰܕ ܫܒܺܫ̈ܬܶܐ ܘܛܰܪ̈ܦܶܐ ܚܰܘܝܰܬ ܣܰܬܳܐ܆ ܦܺܐܪ̈ܶܐ ܚܰܪ̈ܽܘܩܶܐ ܘܚܰܪ̈ܽܘܒܶܐ ܥܶܒܕܰܬ. ܡܦܺܝܣ ܠܶܗ ܪܽܘܚܳܐ ܠܡܳܪܶܗ ܕܟܰܪܡܳܐ. ܕܡܶܟܺܝܠ ܢܶܚܽܘܬ ܗܽܘ ܢܶܗܘܶܐ ܓܦܶܬܳܐ ܕܰܫܪܳܪܳܐ ܒܟܰܪܡܳܐ ܕܰܚܪܶܒ ܡܶܢ ܥܶܢܒ̈ܐ. ܘܗܽܘ ܢܺܐܬܶܐ ܘܢܶܬܛܥܶܡ ܢܰܦܫܶܗ ܒܣܰܬܳܐ ܕܶܐܬܚܰܒܠܰܬ ܒܢܺܝܒܶܗ ܕܰܚܙܺܝܪܳܐ ܕܥܳܒܳܐ. ܘܡܶܢܶܗ ܢܳܦ̈ܩܳܢ ܫܒܺܫ̈ܬܶܐ ܐܱܝܠܶܝܢ ܕܰܡܚܱ̈ܕܬܳܢ ܠܳܗ̇ ܠܰܓܦܶܬܳܐ ܕܶܐܬܚܰܒܠܰܬ ܡܶܢ ܚܰܝܽܘܬܳܐ ܡܶܛܠ ܚܰܫ̈ܐ ܗܳܠܶܝܢ ܕܶܐܡܪܶܬ. ܡܰܙܡܽܘܪܳܐ ܗܳܢܐ ܕܰܬܡܳܢܺܝܢ ܢܒܺܝܐ ܡܙܰܡܰܪ ܗܘܳܐ ܩܕܳܡ ܐܠܗܳܐ ܘܳܐܡܰܪ:
ܪܳܥܝܶܗ ܕܺܝܣܪܳܐܝܠ ܨܽܘܬ ܘܰܕܒܰܪ ܐܱܝܟ ܥܳܢܴ̈ܐ ܠܝܰܘܣܶܦ: ܝܳܬܶܒ ܥܰܠ ܟܪ̈ܽܘܒܶܐ ܐܷܬܓܠܰܝ. ܩܕܳܡ ܐܱܦܪܶܝܡ ܘܒܶܢܝܳܡܶܝܢ ܘܰܡܢܰܫܶܐ: ܚܰܘܳܐ ܓܰܢܒܳܪܽܘܬܳܟ ܘܬܳܐ ܠܦܽܘܪܩܳܢܰܢ. ܐܠܗܳܐ ܚܰܝܠܬܳܢܳܐ ܐܱܦܢܳܢ: ܘܰܐܢܗܰܪ ܐܱܦܰܝ̈ܟ ܘܢܶܬܦܪܶܩ. ܡܳܢܰܐ ܗ̄ܘ ܫܽܘܪܳܝܳܐ ܗܳܢܐ. ܕܰܐܝܟ ܕܰܠܪܳܥܝܳܐ ܩܳܪܶܐ ܠܶܗ ܠܐܠܗܐ ܕܺܝܣܪܳܐܝܠ. ܘܰܠܡܳܢܐ ܬܽܘܒ ܠܗܰܘ ܕܩܳܪܶܐ ܪܳܥܝܳܐ. ܥܛܰܦ ܘܰܩܪܳܐ ܝܳܬܶܒ ܥܰܠ ܟܪ̈ܽܘܒܶܐ. ܕܟܰܕ ܡܶܬܓܠܐ ܠܰܘ ܐܱܝܟ ܪܳܥܝܳܐ ܕܰܒܡܰܟܺܝܟܽܘܬܳܐ ܪܳܥܶܐ ܥܳܢܶܗ܆ ܐܠܐ ܐܴܡܰܪ ܕܚܰܘܳܐ ܓܰܢ̱ܒܳܪܽܘܬܳܟ. ܘܬܽܘܒ ܩܳܪܶܐ ܠܶܗ ܐܠܗܳܐ ܚܰܝܠܬܳܢܳܐ. ܘܰܐܝܟܰܢܳܐ ܠܚܰܕ ܠܶܗ ܩܳܪܶܐ ܪܳܥܝܳܐ ܘܝܳܬܶܒ ܥܰܠ ܟܪ̈ܽܘܒܶܐ ܘܓܰܢ̱ܒܳܪܳܐ ܘܰܐܠܗܳܐ ܘܚܰܝܠܬܳܢܳܐ. ܘܰܐܝܟܰܢܳܐ ܠܳܚܶܡ ܫܡܳܐ ܕܪܳܥܝܳܐ. ܠܝܳܬܶܒ ܥܰܠ ܟܪ̈ܽܘܒܶܐ ܘܰܠܓܰܢ̱ܒܳܪܳܐ ܘܠܐܠܗܐ ܚܰܝܠܬܳܢܳܐ. ܘܟܽܠܗܶܝܢ ܫܰܪܺܝܪ̈ܳܢ ܘܟܽܠܗܝܢ ܠܳܚ̈ܡܳܢ ܠܗܰܘ ܕܡܶܛܠ ܚܽܘܒܶܗ ܩܰܒܶܠ ܥܠܰܘܗܝ ܕܟܰܕ ܐܝ̣ܬܘܗܝ ܐܠܗܐ ܝܳܬܶܒ ܥܰܠ ܟܪ̈ܽܘܒܶܐ. ܢܣܰܒ ܥܠܰܘܗܝ ܡܽܘܟܳܟܳܐ ܕܡܶܬܒܰܪܢܫܳܢܽܘܬܶܗ ܕܡܽܘܬܳܐ ܡܶܣܟܺܢܬܳܐ ܕܪܳܥܝܳܐ. ܘܡܳܢܳܐ ܐܴܡܰܪ ܐܢܳܐ ܪܳܥܝܳܐ. ܠܰܘ ܓܶܝܪ ܒܰܠܚܽܘܕ ܪܳܥܝܳܐ ܗܘܳܐ܆ ܐܠܐ ܐܴܦ ܐܷܡܪܳܐ ܐܷܬܚܙܺܝ ܒܰܓܙܳܪܳܐ ܕܺܝܣܪܳܐܝܠ ܡܶܢ ܢܶܩܝܳܐ ܒܬܽܘܠܬܳܐ. ܗܳܠܝܢ ܕܶܝܢ ܟܽܠܗܝܢ ܡܶܛܠ ܡܰܪܥܺܝܬܶܗ ܕܶܐܫܬܰܒܝܰܬ ܡܶܢ ܓܰܝܴ̈ܣܶܐ ܕܰܚܛܺܝܬܳܐ. ܘܡܶܛܠ ܫܒܺܝܬܳܐ ܒܰܪ ܚܺܐܪ̈ܶܐ ܐܷܫܬܰܥܒܰܕ. ܡܶܛܠ ܣܰܬܳܐ ܕܶܐܬܚܰܒܠܰܬ ܒܢܺܝܒܶܗ ܕܰܚܙܺܝܪܳܐ ܕܥܳܒܳܐ. ܣܰܬܳܐ ܘܰܓܦܶܬܳܐ ܗܘܳܐ. ܕܒܰܫܒܺܫ̈ܬܶܐ ܕܰܓܦܶܬܳܗ̇. ܓܦܶܬܳܐ ܕܶܐܬܪܰܥܝܰܬ ܡܶܢ ܚܰܝܽܘܬܳܐ ܕܥܳܒܳܐ ܕܬܶܬܚܰܕܰܬ. ܘܰܕܥܰܠ ܒܽܘܪ̈ܟܶܐ ܢܶܬܛܥܶܢ ܝܳܬܶܒ ܥܰܠ ܟܪ̈ܽܘܒܶܐ. ܡܶܛܠ ܗܳܕܐ ܢܒܺܝܐ ܒܩܴ̈ܠܐܷ ܪ̈ܰܥܽܘܡܶܐ ܐܴܡܰܪ ܗܘܳܐ:
ܡܳܪܝܳܐ ܐܠܗܐ ܚܰܝܠܬܳܢܳܐ: ܥܕܰܡܳܐ ܠܐܷܡܰܬܝ ܪܳܓܶܙ ܐܱܢܬ ܥܰܠ ܨܠܽܘܬܶܗ ܕܥܰܒܕܳܟ. ܥܕܰܡܳܐ ܠܐܷܡܰܬܝ ܐܢܬ ܡܰܘܚܰܪ ܐܱܢܬ ܡܶܢ ܦܽܘܪܩܳܢܳܐ. ܘܡܶܛܠܡܳܢܳܐ ܟܰܕ ܠܓܶܠܝܳܢܳܐ ܣܺܝ̈ܡܳܢ ܐܱܦܰܝ̈ܟ؟ ܓܳܠܶܙ ܐܱܢܬ ܠܺܝ ܡܶܢ ܚܙܳܬܳܐ ܕܕܶܢܚܳܟ. ܘܡܳܢܳܐ ܗܝ ܥܶܠܬܳܐ ܕܬܰܘܚܰܪܬܳܐ ܕܠܐܴ ܡܩܰܒܠܺܝܢܰܢ ܡܶܐܬܺܝܬܳܟ ܕܒܰܒܣܰܪ. ܘܰܐܪܓܶܫܢܰܢ ܒܳܗ̇ ܕܰܡܛܰܝܒܳܐ ܕܬܶܗܘܶܐ ܥܰܠ ܐܱܪܥܳܐ. ܚܽܘܪ ܒܗܳܠܝܢ ܕܰܒܕܶܡܥ̈ܐ ܫܳܐܠܺܝܢ ܦܽܘܪܩܳܢܳܟ. ܘܳܐܟܠܺܝܢ ܒܕܶܡܥܬܳܐ ܘܫܳܬܶܝܢ ܒܕܶܡܥܬܳܐ ܘܒܰܒܟܳܬܳܐ. ܡܶܛܠ ܕܰܐܘܚܰܪ ܡܶܢܗܽܘܢ ܕܶܢܚܳܐ ܕܓܶܠܝܳܢܳܟ.
ܐܱܘܟܶܠܬ ܐܷܢܽܘܢ ܠܰܡ ܠܰܚܡܳܐ ܒܕܶܡܥܬܳܐ: ܘܰܐܫܩܺܝܬ ܐܷܢܽܘܢ ܒܕܶܡܥܬܳܐ. ܟܽܠܗܘܢ ܢܒܺܝ̈ܐ ܕܰܐܪܓܶܫܘ ܕܰܡܛܰܝܰܒ ܗܘܳܐ ܐܠܗܳܐ ܕܢܺܐܬܶܐ ܠܐܱܪܥܳܐ ܡܩܰܒܠܺܝܢ ܗܘܰܘ ܒܰܫܪܳܪܳܐ ܕܶܢܚܶܗ ܕܢܽܘܗܪܳܐ ܐܠܗܳܝܳܐ. ܡܶܛܠܗܳܢܐ ܥܦܺܝܦܳܐܝ̣ܬ ܡܶܫܬܰܚܩܺܝܢ ܗܘܰܘ. ܥܰܠ ܕܰܓܠܺܝܙܺܝܢ ܗܘܰܘ ܡܶܢ ܒܽܘܣܳܡܳܐ ܕܗܰܘ ܡܽܘܠܟܳܢܳܐ ܕܰܡܛܰܝܰܒ ܕܢܺܐܬܶܐ ܥܰܡܶܗ ܠܐܱܪܥܳܐ ܒܓܶܠܝܳܢܶܗ. ܘܰܐܚܪܺܬܳܐ ܥܰܠ ܕܡܶܬܡܰܝܩܺܝܢ ܗܘܰܘ ܐܴܦ ܡܶܬܚܰܣܕܺܝܢ ܡܶܢ ܫܒܳܒ̈ܐ ܒܺܝ̈ܫܶܐ ܕܰܗܘܰܘ ܠܗܽܘܢ ܒܬܰܘܬܳܒܽܘܬܗܽܘܢ. ܘܥܰܠܗܳܝ ܡܰܝܬܶܐ ܢܒܺܝܐ ܘܳܐܡܰܪ:
ܥܒܰܕܬܳܢ ܪܶܢܝܳܐ ܠܰܫ̈ܒܳܒܰܝܢ: ܘܰܒܥܶܠܕ̈ܒܳܒܰܝܢ ܡܰܝܶܩܘ ܒܰܢ. ܟܰܕ ܓܶܝܪ ܥܰܡܳܐ ܕܺܝܣܪܳܐܝܠ ܗܳܠܝܢ ܣܳܒܶܠ ܗܘܳܐ ܡܶܢ ܒܥܶܠܕ̈ܒܳܒܶܐ ܫܺܐܕ̈ܐ ܛܪ̈ܽܘܢܶܐ. ܘܡܶܢ ܥܰܡܡ̈ܐ ܕܰܚܕܳܪ̈ܰܘܗܝ ܡܶܬܡܰܝܰܩ ܗܘܳܐ. ܡܶܛܠ ܗܳܠܝܢ ܡܦܺܝܣ ܢܒܺܝܐ܆ ܕܠܐ ܡܶܟܺܝܠ ܢܶܫܬܰܕܪܽܘܢ ܦܳܪ̈ܽܘܩܶܐ ܒܳܬܰܪ ܫܒܺܝܬܳܐ. ܘܠܐ ܢܶܥܡܠܽܘܢ ܕܰܘܩ̈ܐ ܒܣܽܘܥܪܳܢܳܐ ܕܥܳܒܰܪ ܚܰܝܠܶܗ ܠܒܰܪܢܳܫܳܐ. ܐܠܐ ܠܶܗ ܠܐܠܗܳܐ ܡܨܰܠܐܷ ܕܚܰܝܠܬܳܢܳܐܝ̣ܬ ܢܶܦܽܘܩ ܒܳܬܰܪ ܓܳܠܽܘܬܳܐ.
ܐܱܠܗܳܐ ܚܰܝܠܬܳܢܳܐ ܐܱܦܢܳܢ: ܘܰܐܢܗܰܪ ܐܱܦܰܝ̈ܟ ܘܢܶܬܦܪܶܩ. ܗܳܢܰܘ ܕܶܝܢ ܓܠܺܝ ܐܱܦܰܝ̈ܟ ܘܢܶܥܪܩܽܘܢ ܓܽܘ̈ܡܕܳܢܶܐ ܡܶܢ ܥܰܡܳܟ. ܪܳܥܝܳܐ ܚܰܘܳܐ ܚܽܘܛܪܳܟ. ܘܢܶܥܪܩܽܘܢ ܕܺܐܒ̈ܐ ܡܶܢ ܓܙܳܪܳܟ. ܘܰܐܒܪܶܩ ܫܽܘܦܪܶܗ ܕܬܳܓܳܟ ܡܶܢ ܡܰܪܟܰܒܬܳܟ ܕܢܶܕܥܳܟ ܓܰܘܢܳܐ ܟܡܺܝܪܳܐ ܕܰܒܢܱ̈ܝ ܠܺܠܝܳܐ ܕܰܣܥܰܘ ܥܰܠ ܥܳܢܴ̈ܟ. ܒܳܬܰܪܟܶܢ ܡܰܥܶܠ ܚܠܳܦ ܐܢܳܫܽܘܬܳܐ ܫܡܳܐ ܕܰܓܦܶܬܳܐ ܝ̣ܣܰܪܠܳܝܬܳܐ ܗܳܝ ܕܰܐܦܶܩ ܐܠܗܳܐ ܡܶܢ ܡܶܨܪܶܝܢ. ܒܝܰܕ ܡܽܘܫܶܐ ܘܳܐܡܰܪ:
ܓܦܶܬܳܐ ܐܱܦܶܩܬ ܡܶܢ ܡܶܨܪܶܝܢ: ܘܰܐܘܒܶܕܬ ܥܰܡ̈ܡܶܐ ܘܰܢܨܰܒܬܳܗ̇. ܚܳܪܬ ܒܳܗ̇ ܘܰܢܨܰܒܬ ܥܶܩܳܪܳܗ̇: ܘܰܡܠܳܬ ܐܱܪܥܳܐ ܡܶܢܳܗ̇. ܘܶܐܬܟܰܣܺܝܘ ܛܽܘܪ̈ܶܐ ܡܶܢ ܛܶܠܳܠܳܗ̇: ܘܥܰܘܦܶܝܗ̇ ܥܰܠ ܐܱܪ̈ܙܰܘܗܝ ܕܰܐܠܗܳܐ. ܫܕܳܬ ܓܝܳܕܶܝ̈ܗ̇ ܥܕܰܡܳܐ ܠܝܰܡܳܐ: ܘܥܰܠ ܢܰܗܪ̈ܰܘܳܬܳܐ ܥܢܳܩܶܝ̈ܗ̇. ܒܰܓܦܶܬܳܐ ܗܳܟܺܝܠ ܡܰܡܬܶܠ ܠܳܗ̇ ܠܰܟܢܽܘܫܬܳܐ ܝ̣ܣܰܪܠܳܝܬܳܐ. ܘܰܡܚܰܘܶܐ ܕܕܰܐܝܟ ܗܳܟܰܢܐ ܐܱܚܒܳܗ̇ ܐܠܗܐ. ܕܰܐܘܒܶܕ ܥܰܡ̈ܡܶܐ ܟܰܕ ܢܳܨܶܒ ܠܳܗ̇. ܕܢܰܨܒܶܗ ܠܥܶܩܳܪܳܗ̇ ܟܰܕ ܢܳܨܶܒ ܠܳܗ̇. ܥܰܠ ܡܰܝܴ̈ܐ ܒܰܣܺܝ̈ܡܶܐ ܕܢܳܡܽܘܣܳܐ ܕܡܽܘܫܶܐ. ܘܶܐܬܟܰܣܺܝܘ ܛܽܘܪ̈ܶܐ ܡܶܢ ܛܶܠܳܠܳܗ̇. ܠܥܶܠ ܡܶܢ ܛܽܘܪ̈ܶܐ ܡܟܰܬܪ̈ܳܢܶܐ. ܐܪ̈ܳܙܶܐ ܕܒܶܝܬ ܐܠܗܐ. ܘܥܰܠ ܡܽܘܫܶܐ ܘܰܐܗܪܽܘܢ ܘܥܰܠ ܟܽܠܗܘܢ ܢܒܺܝ̈ܐ ܐܱܟܪܶܟܬ ܥܰܘ̈ܦܶܝܗ̇. ܘܰܫܕܳܬ ܘܰܪ̈ܺܝܕܶܐ ܕܥܶܩܳܪܳܗ̇ ܥܕܰܡܳܐ ܠܝܰܡܳܐ ܕܡܰܥܡܽܘܕܺܝܬܳܐ. ܘܡܶܢ ܒܳܬܰܪܟܶܢ ܟܡܶܢ ܠܳܗ̇ ܚܙܺܝܪܳܐ ܕܥܳܒܳܐ ܘܰܐܟܠܳܗ̇ ܘܚܰܒܠܳܗ̇. ܘܶܐܬܬܪܰܥ ܣܝܳܓܳܗ̇ ܫܰܦܺܝܪܳܐ ܐܝܟ ܕܫܰܐܷܠ ܢܒܺܝܐ.
ܕܰܠܡܳܢܳܐ ܟܰܝ ܬܪܰܥܬ ܣܝܳܓܳܗ̇: ܘܕܳܫܽܘܗ̇ ܟܽܠ ܥܳܒܪ̈ܰܝ ܐܘܪܚܳܐ. ܘܰܐܟܠܳܗ̇ ܚܙܺܝܪܳܐ ܕܥܳܒܳܐ: ܘܚܰܝ̈ܘܳܬܳܐ ܕܒܰܪܳܐ ܪ̈ܥܰܝܳܗ̇. ܠܗܳܝ ܓܦܶܬܳܐ ܢܰܒܽܘܟܰܕܢܰܨܰܪ ܗܘܳܐ ܠܳܗ̇ ܚܙܺܝܪܳܐ. ܐܴܦ ܡܰܠܟ̈ܐ ܒܰܪܒܪ̈ܳܝܶܐ ܕܰܣܠܶܩܘ ܥܰܡܶܗ. ܒܰܕܡܽܘܬܳܐ ܕܚܰܝ̈ܘܳܬܳܐ ܕܒܰܪܳܐ ܪܥܰܝܳܗ̇. ܘܥܰܠ ܗܳܠܶܝܢ ܐܪ̈ܳܙܶܐ ܡܶܬܝܰܕܥ̈ܢܶܐ ܕܓܰܢܬܳܐ ܕܒܽܘ̈ܣܳܡܶܐ ܡܰܟܪ̈ܟܳܢ ܗܘܱ̈ܝ ܕܰܠܝ̈ܬܳܗ̇. ܡܰܢ ܐܝ̣ܬܰܘܗܝ ܗܰܘ ܕܰܠܗܳܕܐ ܟܡܶܢ ܡܶܢ ܫܽܘܪܳܝܳܐ. ܠܰܘ ܗܰܘ ܚܙܺܝܪܳܐ ܕܰܡܛܰܫܰܝ ܗܘܳܐ ܥܰܠ ܥܳܠܡܳܐ. ܗܰܘ ܕܰܒܢܺܝܒܳܐ ܕܰܚܣܳܡܶܗ ܚܠܰܕ ܐܱܪܥܳܐ ܕܠܐܴ ܡܳܝܽܘܬܽܘܬܳܐ ܘܰܕܠܐܴ ܪ̈ܰܚܡܶܐ ܚܰܒܠܳܗ̇ ܘܰܪܥܳܗ̇ ܠܰܓܦܶܬܳܐ. ܒܪܶܓܬܳܐ ܕܡܶܐܟܽܘܠܬܳܐ ܘܪܶܓܬܳܐ ܕܙܳܢܝܽܘܬܳܐ. ܗܳܕܐ ܗܳܝ ܚܰܝܽܘܬܳܐ ܛܰܡܰܐܬܳܐ ܕܠܐ ܡܶܬܟܰܚܕܳܐ. ܕܡܶܢܳܗ̇ ܫܳܩܶܠ ܚܙܺܝܪܳܐ ܕܥܳܒܳܐ ܘܡܶܬܚܰܝܰܠ ܥܰܠ ܥܶܩܳܪܳܗ̇ ܕܢܰܦܫܳܐ. ܘܚܳܠܶܕ ܒܓܰܘ ܥܽܘܡܩܳܐ ܕܠܶܒܳܐ. ܘܥܰܠ ܕܡܶܢ ܗܳܠܝܢ ܚܰܝ̈ܘܳܬܳܐ ܒܺܝ̈ܫܳܬܳܐ ܘܰܕܠܐ ܪ̈ܰܚܡܶܐ. ܕܰܡܚܰܒ̈ܠܳܢ ܗܘܱ̈ܝ ܠܰܓܦܶܬܶܗ ܕܰܐܠܗܳܐ. ܐܱܠܺܝܨ ܗܘܳܐ ܢܒܺܝܐ ܕܢܶܚܙܶܝܗ̇ ܟܰܕ ܡܶܬܦܰܨܝܳܐ. ܚܳܐܱܪ ܗܘܳܐ ܘܚܳܙܶܐ. ܕܠܰܝܬ ܥܰܠ ܐܱܪܥܳܐ ܕܣܳܦܶܩ ܕܰܢܦܰܨܶܝܗ̇ ܠܰܓܦܶܬܳܐ ܐܢܳܫܳܝܬܳܐ ܡܶܢ ܝܰܥܢܽܘܬܳܐ ܕܚܰܝ̈ܘܳܬܳܐ ܩܳܛܽܘ̈ܠܳܬܳܐ ܐܠܐ ܐܷܢ ܚܰܕ ܒܰܠܚܽܘܕܰܘܗܝ. ܘܥܰܠ ܗܳܝ ܫܒܰܩ ܟܽܠ ܚܰܘܪ̈ܺܝܢ ܦܰܓܪ̈ܳܢܳܝܶܐ. ܘܶܐܬܦܢܺܝ ܠܘܳܬ ܐܠܗܳܐ ܘܰܩܕܳܡܰܘܗܝ ܡܨܰܠܐܷ ܗܘܳܐ ܘܳܐܡܰܪ:
ܐܱܠܗܳܐ ܚܰܝܠܬܳܢܳܐ ܐܷܬܦܰܢ: ܘܚܽܘܪ ܡܶܢ ܫܡܰܝܳܐ ܘܰܚܙܺܝ. ܘܰܦܩܽܘܕܶܝܗ̇ ܠܰܓܦܶܬܳܐ ܗܳܕܶܐ: ܘܰܠܣܰܬܳܐ ܕܢܶܨܒܰܬ ܝܰܡܺܝܢܳܟ. ܘܰܠܒܰܪܢܳܫܳܐ ܕܚܰܝܶܠܬ ܠܳܟ. ܘܗܳܪܟܳܐ ܬܽܘܒ ܐܱܝܟ ܕܡܶܢ ܫܽܘܪܳܝܳܐ ܩܳܪܶܐ. ܗܳܕܐ ܓܶܝܪ ܕܰܬܠܳܬ ܙܰܒܢܻ̈ܝܢ ܕܩܳܪܶܐ ܠܐܠܗܳܐ ܕܢܶܬܦܢܶܐ. ܡܛܰܝܰܒ ܓܶܝܪ ܐܴܦ ܙܒܰܢܬܳܐ ܐܚܪܺܬܳܐ ܢܶܩܪܶܐ. ܘܰܚܕܳܐ ܡܶܢ ܗܳܠܝܢ ܠܰܘ ܒܰܛܺܝܠܐܴܝ̣ܬ ܐܷܬܚܰܫܰܚ ܒܳܗ̇ ܒܒܰܪܬ ܩܳܠܐܴ. ܘܰܒܟܽܠܗܘܢ ܩܴ̈ܠܐ ܐܠܗܐ ܚܰܝܠܬܳܢܳܐ ܡܫܰܡܰܗ ܠܶܗ. ܘܒܰܙܒܰܢ ܐܴܡܰܪ܆ ܓܦܶܬܳܐ ܐܱܦܶܩܬ ܡܶܢ ܡܶܨܪܶܝܢ. ܗܳܫܐ ܕܶܝܢ ܕܰܢܦܰܩܕܺܝܗ̇ ܠܰܓܦܶܬܳܐ ܡܦܺܝܣ. ܘܢܶܨܒܬܳܐ ܕܝܰܡܺܝܢܶܗ ܐܴܡܰܪ ܕܺܐܝܬܶܝܗ̇. ܒܗܳܕܶܐ ܓܶܝܪ ܡܰܠܶܦ. ܕܠܰܘ ܨܶܝܕ ܡܶܕܶܡ ܕܢܽܘܟܪܳܝ ܠܶܗ ܡܶܬܢܰܚܰܬ. ܡܶܛܠܗܳܢܐ ܠܗܰܘ ܕܡܶܢ ܒܪܺܝܫܺܝܬ ܢܰܨܒܳܗ̇ ܠܣܰܬܳܐ ܕܐܢܳܫܽܘܬܳܐ ܒܦܰܪܕܰܝܣܳܐ ܕܒܽܘ̈ܣܳܡܶܐ ܕܗܽܘ ܢܺܐܬܶܐ ܐܱܝܟ ܡܳܪܳܐ ܛܳܒܳܐ ܕܚܳܐܷܣ ܥܰܠ ܟܰܪܡܶܗ. ܘܟܰܕ ܩܳܛܶܠ ܠܗܰܘ ܕܒܰܕܡܽܘܬܳܐ ܕܬܰܘܠܥܳܐ ܟܰܡܺܝܢ ܨܶܝܕ ܥܶܩܳܪܳܗ̇ ܘܚܳܪܶܒ ܠܳܗ̇ ܘܢܶܩܥܶܐ ܒܗܶܝܢ ܒܚܰܝ̈ܘܳܬܳܐ ܡܫܰܟܪ̈ܳܬܳܐ ܘܢܶܥܪ̈ܩܳܢ ܡܶܢ ܚܕܳܪ̈ܶܝܗ̇ ܕܰܓܦܶܬܳܐ. ܟܰܕ ܡܚܰܘܶܐ ܢܰܦܫܶܗ ܓܦܶܬܐ ܫܰܡܺܝܢܬܳܐ ܘܰܫܡܰܝܳܢܺܝܬܳܐ. ܘܢܶܬܶܠ ܚܰܝܠܐܴ ܒܰܐܝܠܶܝܢ ܕܡܶܬܢܰܨܒܺܝܢ ܒܶܗ ܘܗܳܘܶܝܢ ܒܶܗ ܫܒܺܫ̈ܬܶܐ. ܕܟܰܕ ܕܡܽܘܬܳܐ ܕܗܳܝ ܓܦܶܬܳܐ ܩܰܕܡܳܝܬܳܐ ܫܳܠܚܺܝܢ. ܢܶܠܒܫܽܘܢ ܕܡܽܘܬܳܐ ܕܗܳܕܶܐ ܓܦܶܬܐ ܬܪܰܝܳܢܺܝܬܳܐ. ܟܰܕ ܡܢܰܦܨܺܝܢ ܡܶܢܗܽܘܢ ܟܽܠܳܗ̇ ܐܱܪܥܳܢܳܝܽܘܬܳܐ ܒܰܣܚܳܬܳܐ ܕܡܰܘܠܳܕܳܐ ܕܡܶܢܕܪܺܝܫ. ܐܱܝܟ ܕܰܐܠܶܦ ܦܰܘܠܽܘܣ ܐܠܗܝܳܐ. ܕܰܐܝܟ ܕܰܠܒܶܫܢ ܕܡܽܘܬܳܐ ܕܗܰܘ ܕܡܶܢ ܥܰܦܪܳܐ (ܐ ܩܘܪ̈ܢܬܝܐ ܝܗ: ܡܛ) ܕܰܐܝܟ ܕܰܗܘܰܝܢܰܢ ܒܗܳܝ ܓܦܶܬܳܐ ܕܰܐܟܠܳܗ̇ ܚܙܺܝܪܳܐ ܕܥܳܒܳܐ ܫܒܺܫ̈ܬܶܐ ܕܠܐ ܥܳܒ̈ܕܳܢ ܦܺܐܪ̈ܶܐ. ܗܳܟܰܢܳܐ ܢܶܠܒܰܫ ܕܡܽܘܬܳܐ ܕܗܰܘ ܕܡܶܢ ܫܡܰܝܳܐ (ܐ ܩܘܪ̈ܢܬܝܐ ܝܗ: ܡܛ). ܕܡܶܛܠܗܳܕܐ ܒܩܳܠܐܴ ܕܰܬܠܳܬܳܐ ܩܳܥܶܐ ܢܒܺܝܐ ܘܳܐܡܰܪ: ܐܱܠܗܳܐ ܚܰܝܠܬܳܢܳܐ ܐܷܬܦܰܢ ܘܚܽܘܪ ܡܶܢ ܫܡܰܝܳܐ ܘܰܚܙܺܝ. ܠܡܳܢܳܐ ܐܴܡܰܪ ܐܷܬܦܰܢ؟ ܕܳܡܝܳܐ ܒܰܪܬ ܩܳܠܐܴ ܕܰܡܫܰܘܕܥܳܐ. ܕܠܰܘ ܒܰܢ ܚܳܐܱܪ ܗܘܳܐ ܐܠܗܐ ܒܗܰܘ ܙܰܒܢܳܐ. ܐܷܠܐ ܡܰܦܢܰܝ ܗܘܳܐ ܠܶܗ ܚܝܳܪܶܗ ܡܶܢ ܠܘܳܬܰܢ. ܐܱܝܟ ܕܡܶܢ ܟܝܳܢܳܐ ܕܶܐܬܛܰܡܺܐܝ ܠܶܗ ܒܰܚܛܺܝܬܳܐ. ܘܡܰܗܡܰܝ ܗܘܳܐ ܠܶܗ ܡܶܢ ܣܰܬܳܐ ܐܢܳܫܳܝܬܳܐ ܕܠܐܴ ܢܚܽܘܪ ܒܳܗ̇. ܟܰܕ ܚܳܙܶܐ ܠܳܗ̇ ܕܰܐܓܰܪ̈ܶܝܢ ܥܠܶܝܗ̇ ܚܰܝ̈ܘܳܬܳܐ ܘܪ̈ܰܥܝܳܗ̇ ܪܺܝܫܳܐ ܪܺܝܫܳܐ. ܟܰܕ ܠܐܴ ܫܳܒܩܺܝܢ ܒܳܗ̇ ܐܴܦܠܐܴ ܚܰܕ ܪܺܝܫ ܠܶܒܳܐ. ܘܠܰܝܬ ܗܘܳܐ ܒܳܗ̇ ܥܶܢܒ̈ܐ ܠܡܶܐܟܰܠ. ܐܠܐ ܚܠܳܦ ܥܶܢܒ̈ܐ ܚܰܪ̈ܽܘܒܶܐ ܛܶܥܢܰܬ. ܘܰܢܒܺܝ̈ܐ ܡܪܰܛܢܺܝܢ ܘܒܳܟܶܝܢ. ܚܰܕ ܐܴܡܰܪ: ܕܠܰܝܬ ܣܓܽܘܠܐܴ ܠܡܶܐܟܰܠ. ܘܰܠܒܰܟܳܪܬܳܐ ܪܶܓܰܬ ܢܰܦܫܝ. ܐܷܒܰܕ ܚܰܣܝܳܐ ܡܶܢ ܐܱܪܥܳܐ: ܘܠܰܝܬ ܕܰܬܪܺܝܨ ܒܰܒܢܰܝ̈ܢܳܫܳܐ (ܡܝܟܐ ܙ: ܐ-ܒ). ܐܚܪܺܢܳܐ ܐܴܡܰܪ: ܟܰܕܶܒ ܐܷܒܶܗ ܕܙܰܝܬܳܐ. ܘܶܐܕܪ̈ܶܐ ܠܐܴ ܥܒܰܕܘ ܥܒܽܘܪܳܐ (ܚܒܩܘܩ ܓ: ܝܘ). ܐܚܪܺܢܳܐ ܡܪܰܛܶܢ: ܥܰܠ ܟܰܪܡܳܐ ܕܒܶܝܬ ܝ̣ܣܪܳܐܝܠ. ܣܰܟܺܝܬ ܠܥܶܢܒ̈ܐ ܘܰܥܒܰܕ ܚܰܪ̈ܽܘܒܶܐ (ܐܫܥܝܐ ܗ: ܕ). ܐܠܐ ܡܙܰܡܪܳܢܳܐ ܒܗܳܠܶܝܢ ܠܐ ܕܰܡܺܝ. ܘܟܰܕ ܗܳܟܰܢܐ ܚܳܐܱܪ ܐܢܳܐ ܘܰܡܦܺܝܣ ܕܰܐܠܗܐ ܚܰܝܠܬܢܳܐ ܠܐ ܬܰܗܦܶܟ ܐܱܦܰܝ̈ܟ ܡܶܢ ܣܰܬܳܐ ܕܢܶܨܒܰܬ ܝܰܡܺܝܢܳܟ. ܐܠܐ ܐܷܬܦܰܢ ܥܠܶܝܗ̇ ܘܚܽܘܪ ܠܘܳܬܳܗ̇. ܘܫܰܡܰܪ ܡܰܝܴ̈ܐ ܚܰܝ̈ܐ ܥܰܠ ܥܶܩܳܪܳܗ̇. ܟܡܳܐ ܓܶܝܪ ܐܷܢ ܣܰܓܺܝ̈ܐܢ ܚܰܝ̈ܘܳܬܳܐ ܕܒܰܪܳܐ ܒܟܰܪܡܳܟ. ܠܐ ܡܰܡܪ̈ܚܳܢ ܕܰܢܩܰܘ̈ܝܳܢ ܒܶܗ ܟܡܳܐ ܕܶܐܬܚܙܺܝ ܙܺܝܘܳܟ ܒܰܓܦܶܬܳܟ. ܐܠܐ ܦܩܽܘܕܶܝܗ̇ ܘܺܝܨܰܦ ܕܺܝܠܳܗ̇. ܝܰܡܺܝܢܳܟ ܢܨܰܒܬܳܗ̇ ܠܣܰܬܳܐ. ܘܰܠܒܰܪܢܳܫܳܐ ܐܱܢܬ ܚܰܝܶܠܬ ܡܶܢ ܒܪܺܝܫܺܝܬ. ܕܢܶܗܘܶܐ ܒܨܰܠܡܳܟ ܘܒܰܕܡܽܘܬܳܟ. ܘܟܰܕ ܚܛܳܐ ܘܰܥܒܰܪ ܥܰܠ ܦܽܘܩܕܳܢܳܟ. ܐܠܐ ܒܳܬܰܪܟܶܢ ܝ̣ܕܰܥ ܣܰܟܠܽܘܬܶܗ ܘܩܰܪܶܒ ܦܝܳܣܳܐ. ܘܶܐܬܟܰܦܰܦ ܘܰܒܟܳܐ ܘܶܐܬܟܰܫܰܦ ܒܝܰܕ ܩܰܕܺܝ̈ܫܶܐ ܕܰܗܘܰܘ ܡܶܢ ܙܰܪܥܶܗ. ܕܢܶܥܒܰܪ ܡܶܢܶܗ ܡܣܳܡ ܒܪܺܝܫܳܐ. ܐܠܐ ܐܴܦ ܐܱܢܬ ܗܳܫܳܐ ܐܱܝܟ ܟܰܪܡܳܐ ܚܰܟܺܝܡܳܐ ܐܷܬܓܠܺܝ ܡܶܛܠ ܣܰܬܳܐ ܕܰܢܨܰܒܬ. ܘܰܐܥܪܶܩ ܡܶܢ ܠܘܳܬܳܗ̇ ܐ̮ܘ̈ܕܶܐ ܡܚܰܪ̈ܟܶܐ. ܘܢܶܬܛܰܠܩܽܘܢ ܡܶܢ ܟܐܳܬܳܐ ܕܰܐܦܰܝ̈ܟ.
ܘܬܶܗܘܶܐ ܐܻܝܕܳܟ ܕܝܰܡܺܝܢܳܐ ܥܰܠ ܓܰܒܪܳܐ: ܘܥܰܠ ܒܰܪܢܳܫܳܐ ܕܚܰܝܶܠܬ ܠܳܟ. ܐܴܦ ܗܳܕܶܐ ܬܰܪܬܶܝܢ ܙܰܒܢܻ̈ܝܢ ܐܱܡܪܳܗ̇ ܢܒܺܝܳܐ. ܬܰܪܬܶܝܢ ܓܶܝܪ ܙܰܒܢܻ̈ܝܢ ܝܰܗܒ ܐܱܠܗܳܐ ܚܰܝܠܐܴ ܒܒܰܪܢܳܫܳܐ. ܒܗܳܝ ܩܰܕܡܳܝܬܳܐ ܚܰܝܠܶܗ ܘܰܐܩܺܝܡܶܗ ܡܶܢ ܥܰܦܪܳܐ. ܘܥܰܒܕܶܗ ܒܨܰܠܡܶܗ ܘܒܰܕܡܽܘܬܶܗ. ܘܰܚܛܳܐ ܘܶܐܬܛܪܶܕ ܠܐܱܪܥܳܐ ܕܟܽܘ̈ܒܶܐ. ܘܬܽܘܒ ܦܢܳܐ ܥܠܰܘܗܝ ܗܰܘ ܕܥܰܒܕܶܗ ܡܶܢ ܒܪܺܝܫܺܝܬ. ܘܚܰܕܬܶܗ ܠܨܰܠܡܳܐ ܥܳܒܽܘܕܳܐ. ܘܰܐܝܬܝܶܗ ܠܬܽܘܩܳܢܳܐ ܩܰܕܡܳܝܳܐ. ܡܶܛܠ ܗܳܢܐ ܐܴܡܰܪ ܢܒܺܝܳܐ܆ ܕܠܐ ܠܰܡ ܢܶܗܦܽܘܟ ܡܶܢܳܟ ܐܱܝܟ ܕܰܒܩܰܕܡܳܝܬܳܐ. ܐܠܐ ܐܱܚܳܢ ܘܒܰܫܡܳܟ ܢܶܩܪܶܐ. ܡܶܛܠ ܕܰܟܬܺܝܒ܆ ܕܟܽܠ ܕܢܶܩܪܶܐ ܫܡܶܗ ܕܡܳܪܝܳܐ ܢܺܚܶܐ (ܝܘܐܝܠ ܒ: ܠܒ ܦܪܟܣܝܣ ܒ: ܟܐ ܪ̈ܗܘܡܝܐ ܝ: ܝܓ).
ܡܳܪܝܳܐ ܐܱܠܗܳܐ ܚܰܝܠܬܳܢܳܐ ܐܱܦܢܳܢ ܘܰܐܢܗܰܪ ܐܱܦܰܝ̈ܟ ܘܢܶܬܦܪܶܩ. ܗܳܕܶܐ ܒܰܪܬ ܩܳܠܐܴ ܕܰܐܪܒܰܥ ܙܰܒܢܻ̈ܝܢ ܕܰܩܪܳܐ ܐܠܗܐ ܚܰܝܠܬܳܢܳܐ. ܐܴܦ ܓܶܝܪ ܦܳܥ̈ܠܐܷ ܕܰܐܓܰܪ ܡܳܪܰܢ ܠܟܰܪܡܳܐ ܕܰܐܒܽܘܗܝ ܥܕܰܡܳܐ ܠܘܳܬܶܗ ܐܰܪܒܰܥ ܙܰܒܢܻ̈ܝܢ ܐܷܬܶܐܓܰܪܘ ܡܶܢ ܕܶܝܢ ܕܶܐܬܳܐ ܡܳܪܰܢ. ܐܷܬܚܙܺܝ ܙܰܒܢܳܐ ܕܚܰܡܫܳܐ. ܗܳܟܰܢܳܐ ܓܶܝܪ ܦܰܠܓܶܗ ܠܝܰܘܡܳܐ ܕܦܽܘܠܚܳܢܳܐ ܕܩܰܕܺܝ̈ܫܶܐ. ܠܨܰܦܪܳܐ ܘܠܰܬܠܳܬ ܫܳܥܺܝ̈ܢ. ܘܰܠܫܶܬ ܘܠܰܬܫܰܥ. ܗܳܠܶܝܢ ܙܰܒ̈ܢܶܐ ܗܘܰܘ. ܕܶܐܚܰܕ ܨܰܦܪܳܐ ܥܕܰܡܳܐ ܠܛܰܘܦܳܢܳܐ ܩܰܒܶܠܘ ܒܰܬܠܳܬܫܴ̈ܥܺܝܢ. ܗܳܠܶܝܢ ܕܒܶܝܬ ܐܱܒܪܳܗܳܡ ܒܫܶܬ ܕܶܝܢ ܫܳܥܻ̈ܝܢ ܩܰܒܶܠ ܡܽܘܫܶܐ ܘܰܡܕܰܒܪ̈ܳܢܶܐ. ܒܰܬܫܰܥܫܴ̈ܥܺܝܢ ܕܶܝܢ ܩܰܒܠܽܘܗܝ ܠܟܰܪܡܳܐ ܢܒܺܝ̈ܐ. ܘܡܶܛܠܗܳܢܐ ܛܽܘܒܬܳܢܳܐ ܕܰܘܝܕ ܐܱܪܒܰܥ ܙܰܒܢܻ̈ܝܢ ܦܩܰܕ ܠܶܗ ܪܽܘܚܳܐ ܩܰܕܺܝܫܳܐ. ܕܢܶܩܪܶܐ ܠܐܠܗܐ ܕܢܺܐܬܶܐ ܘܢܶܬܓܠܐܷ ܘܰܕܚܰܡܶܫ ܕܺܝܠܶܗ ܗܺܝ ܕܥܰܡܰܢܽܘܐܝܠ. ܕܶܐܬܳܐ ܒܰܚܕܰܥܶܣܪ̈ܶܐ ܫܳܥܻ̈ܝܢ ܕܗܽܘ ܢܶܦܪܩܰܢܝ ܐܱܝܟ ܪ̈ܰܚܡܰܘܗܝ ܣܰܓܺܝ̈ܐܐ. ܠܥܳܠܰܡ ܥܳܠܡܺܝܢ ܐܱܡܝܢ܀
ܡܙܡܘܪܐ ܕܬܡܢܝܢ ܘܚܕ
ܥܰܠ ܐܪܳܙܳܐ ܕܨܳܪ ܝܰܘܣܶܦ ܠܥܰܡܰܢܽܘܐܝܠ: ܘܥܰܠ ܬܘܪܣܳܝܳܐ ܕܪܽܘܚܳܐ ܕܰܒܝܰܕ ܝܽܘܠܦܳܢܶܗ ܕܰܡܫܺܝܚܳܐ ܕܶܐܬܝܗܶܒ ܗܘܳܐ ܠܩܰܕܡܳܝ̈ܐ ܒܐܪܳܙܳܐ ܘܠܐܚܪ̈ܳܝܶܐ ܒܰܫܪܳܪܳܐ.
ܡܰܠܦܳܢܳܐ ܡܽܘܫܶܐ ܪܰܒܳܐ ܘܩܰܕܡܳܝܳܐ ܒܰܢܒܺܝ̈ܐ. ܢܳܡܽܘܣܳܐ ܣܳܡ ܠܟܳܗ̈ܢܶܐ ܕܰܒܟܽܠ ܫܰܒܷ̈ܐ ܘܰܒܪܺܝܫ ܝܰܪ̈ܚܶܐ ܢܶܗܘܘܢ ܥܳܒܕܺܝܢ ܟܢܽܘ̈ܫܝܶܐ ܒܟܽܠ ܩܽܘܪ̈ܝܳܐ ܘܰܡܕܺܝ̈ܢܳܬܳܐ. ܟܰܕ ܒܩܰܪ̈ܢܳܬܳܐ ܟܦܺܝ̈ܦܳܬܳܐ ܐܴܦ ܦܫܺܝ̈ܛܳܬܳܐ ܩܳܪܶܝܢ ܗܘܰܘ ܩܕܳܡ ܥܰܡܳܐ. ܘܠܰܘ ܡܶܕܶܡ ܐܚܪܺܢܳܐ ܐܝ̣ܬܶܝܗ̇ ܗܘܳܬ ܬܶܫܡܶܫܬܳܐ ܕܢܳܡܽܘܣܳܐ. ܥܕܰܡܳܐ ܠܝܰܘ̈ܡܳܬܶܗ ܕܕܰܘܝܕ. ܐܠܐ ܒܰܠܚܽܘܕ ܗܳܝ ܕܰܒܫܺܝܦܽܘܪ̈ܶܐ ܘܰܒܩܰܪ̈ܢܳܬܳܐ ܡܝܰܒܒܺܝܢ ܗܘܰܘ. ܘܩܳܪܶܝܢ ܩܕܳܡ ܥܰܡܳܐ ܐܦ ܡܶܬܟܰܢܰܫ ܗܘܳܐ ܠܡܶܫܡܰܥ ܬܶܫܡܶܫܬܳܐ ܕܟܳܗܢ̈ܐ ܘܰܕܠܶܘܳܝ̈ܐ. ܘܦܽܘܩܕܳܢܳܐ ܗܳܢܳܐ ܡܶܬܢܛܰܪ ܗܘܳܐ. ܘܢܳܡܽܘܣܳܐ ܕܰܐܠܶܦ ܡܽܘܫܶܐ ܡܶܫܬܰܡܠܐܷ ܗܘܳܐ. ܘܡܰܒܣܶܝܢ ܗܘܰܘ ܐܦ ܒܗܳܕܶܐ. ܟܕ ܚܙܳܐ ܛܽܘܒܳܢܳܐ ܕܰܘܝܕ ܕܳܐܦ ܡܶܢ ܗܳܕܐ ܒܛܶܠܘ ܗܘܰܘ ܟܳܗܢ̈ܐ ܘܠܐ ܩܳܪܶܝܢ ܗܘܰܘ ܒܩܰܪ̈ܢܳܬܳܐ ܩܕܳܡ ܥܰܡܳܐ. ܫܩܰܠ ܛܢܳܢܳܐ ܪܽܘܚܳܢܳܐ ܘܫܰܪܺܝ ܕܢܰܥܗܶܕ ܐܢܘܢ. ܥܰܠ ܢܛܽܘܪ̈ܘܳܬܶܗ ܘܥܰܠ ܦܽܘ̈ܩܕܳܢܰܘܗܝ ܕܣܳܐܡ ܢܳܡܽܘܣܳܐ ܡܽܘܫܶܐ. ܘܰܡܙܰܡܰܪ ܗܘܳܐ ܘܰܡܫܰܒܰܚ ܘܳܐܡܰܪ:
ܫܰܒܰܚܘ ܠܐܠܗܳܐ ܡܥܰܫܢܳܢܰܢ. ܘܰܩܥܰܘ ܠܐܠܳܗܗ ܕܝܰܥܩܽܘܒ. ܩܰܕܡܳܐܝ̣ܬ ܗܳܟܺܝܠ ܗܳܝ ܕܰܢܫܰܒܚܽܘܢ ܐܱܠܶܦ ܐܢܘܢ. ܘܟܰܕ ܡܫܰܒܚܺܝܢ ܢܶܩܥܽܘܢ. ܘܠܰܘ ܒܩܳܠܐܴ ܒܰܠܚܽܘܕ ܕܡܶܢ ܦܽܘܡܳܐ ܡܶܫܬܡܰܥ. ܐܠܐ ܟܰܕ ܫܩܺܝܠܺܝܢ ܦܠܰܓ̈ܐ ܘܟܶܢܳܪ̈ܶܐ.
ܫܩܽܘܠܘ ܠܰܡ ܦܠܰܓ̈ܐ ܘܟܶܢܳܪ̈ܶܐ. ܒܰܣܺܝ̈ܡܶܐ ܥܰܡ ܩܺܝܬܳܪ̈ܶܐ. ܐܴܦ ܓܶܝܪ ܟܰܕ ܢܦܰܩ ܥܰܡܳܐ ܡܶܢ ܡܶܨܪܶܝܢ ܒܝܰܕ ܡܽܘܫܶܐ. ܘܰܥܒܰܪ ܒܓܰܘ ܝܰܡܳܐ ܐܱܝܟ ܕܰܒܝܰܒܫܳܐ. ܘܦܽܘܪܩܳܢܳܐ ܗܘܳܐ ܠܺܝܣܪܳܐܝܠ. ܘܡܺܝܬܘ ܦܶܪܥܽܘܢ ܘܡܶܨܪ̈ܳܝܶܐ ܒܝܰܡܳܐ ܣܽܘܡܳܩܳܐ. ܢܶܣܒܰܬ ܗܘܳܬ ܡܰܪܝܰܡ ܚܳܬܶܗ ܕܰܐܗܪܽܘܢ ܦܠܰܓܳܐ ܒܺܐܝܕܳܗ̇. ܘܒܳܬܪܳܗ̇ ܕܗܳܕܶܐ ܢܦܰܩ̈ܝ ܗܘܱ̈ܝ ܥܠܰܝ̈ܡܳܬܳܐ ܘܣܳܒܴ̈ܬܳܐ. ܟܰܕ ܦܠܰܓ̈ܐ ܘܰܪ̈ܒܺܝܥܶܐ ܛܥܺܝ̈ܢܳܢ ܗܘܱ̈ܝ. ܘܢܳܩ̈ܫܳܢ ܗܘܱ̈ܝ ܘܰܡܥܰܢ̈ܝܳܢ ܒܬܶܫܒܽܘܚܬܳܐ ܪܽܘܚܳܢܳܝܬܳܐ. ܘܗܳܟܰܢܳܐ ܟܽܠܶܗ ܥܰܡܳܐ ܪܳܦܶܣ ܗܘܳܐ ܘܕܳܐܷܨ ܘܰܡܫܰܒܰܚ ܠܡܳܪܝܳܐ ܓܰܐܝܳܐ. ܗܰܘ ܕܶܐܬܓܰܐܻܝ ܥܰܠ ܪ̈ܰܟܫܶܐ ܘܪ̈ܳܟܒܰܝܗܘܢ ܐܱܪܡܺܝ ܒܝܰܡܳܐ. ܘܡܶܢ ܗܳܝܕܶܝܢ ܫܩܰܠܘ ܗܘܰܘ ܥܝܳܕܳܐ ܥܰܡܳܐ. ܕܢܶܗܘܶܐ ܢܳܩܶܫ ܒܰܦܠܰܓ̈ܐ ܘܒܰܪ̈ܒܺܝܥܶܐ ܘܰܒܟܶܢܳܪ̈ܶܐ. ܟܰܕ ܡܶܬܕܟܰܪ ܒܝܰܕ ܗܳܠܝܢ ܦܽܘܪܩܳܢܶܗ ܕܥܰܡܳܐ ܡܶܢ ܡܶܨܪܶܝܢ. ܘܶܐܢ ܐܢܳܫ ܡܫܰܐܷܠ ܗܘܳܐ ܥܰܠ ܩܳܠܐ ܕܰܦܠܰܓ̈ܐ ܘܰܕܩܰܪ̈ܢܳܬܳܐ ܗܳܝ ܕܡܳܢܳܐ ܐܢܶܝܢ ܗܳܠܝܢ܆ ܡܶܬܶܐܡܰܪ ܗܘܳܐ ܠܶܗ܆ ܕܥܽܘܗܕܳܢܳܐ ܐܢܶܝܢ ܕܦܽܘܪܩܳܢܳܐ ܕܥܰܡܳܐ ܡܶܢ ܡܶܨܪܶܝܢ. ܘܗܳܟܰܢܳܐ ܢܳܩܫܳܐ ܗܘܳܬ ܟܢܽܘܫܬܳܐ ܒܰܦܠܰܓ̈ܐ ܘܒܰܪ̈ܒܺܝܥܶܐ ܥܰܠ ܝܰܡܳܐ ܣܽܘܡܳܩܳܐ. ܪ̈ܒܺܝܥܶܐ ܐܝ̣ܬܰܝܗܘܢ ܒܰܣܺܝ̈ܡܶܐ. ܒܳܬܰܪ ܒܰܣܺܝ̈ܡܶܐ ܕܶܝܢ ܝܽܘܒܳܒܳܐ ܕܩܰܪ̈ܢܳܬܳܐ ܡܶܫܬܡܰܥ ܗܘܳܐ:
ܩܪܰܘ ܠܰܡ ܒܩܰܪ̈ܢܳܬܳܐ ܒܪܺܝܫ ܝܰܪ̈ܚܶܐ. ܐܴܦ ܒܟܶܣܷ̈ܐܐ ܒܝܰܘ̈ܡܳܬܳܐ ܕܥܰܕܥܺܐܕ̈ܐ. ܕܠܐܴ ܠܰܡ ܢܶܥܒܰܪ ܢܳܡܽܘܣܳܐ ܕܰܐܠܶܦ ܡܽܘܫܶܐ. ܘܠܐܴ ܬܶܒܛܰܠ ܕܺܝܰܬܺܩܺܝ ܕܡܳܪܝܳܐ.
ܡܶܛܠ ܕܢܳܡܽܘܣܰܐ ܗ̄ܘ ܠܺܝܣܪܳܐܝܠ ܐܴܦ ܕܺܝܢܳܐ ܠܐܱܠܳܗܶܗ ܕܝܰܥܩܽܘܒ. ܗܳܠܶܝܢ ܐܝܟ ܕܶܐܡܪܶܬ ܘܥܰܠ ܐܱܝܠܶܝܢ ܕܰܦܩܺܝ̈ܕܳܢ ܡܰܠܶܦ ܗܘܳܐ ܛܽܘܒܳܢܳܐ ܕܰܘܝܕ. ܟܰܕ ܕܶܝܢ ܠܰܕܡܽܘܬܳܐ ܪܽܘܚܳܢܳܝܬܳܐ ܡܶܫܬܰܚܠܦܴ̈ܢ ܗܳܠܝܢ. ܡܳܐܢܳܐ ܐܚܪܺܢܳܐ ܡܰܠܦܴ̈ܢ ܠܰܢ. ܥܰܠ ܩܴ̈ܠܐ ܕܩܰܕܺܝ̈ܫܶܐ ܕܰܫܠܺܝ̈ܚܶܐ ܘܕܰܢܒܺܝ̈ܐ. ܕܰܒ̈ܩܳܠܐ ܪ̈ܽܘܚܳܢܳܝܶܐ ܡܫܰܡܠܶܝܢ ܟܳܪܽܘܙܽܘܬܗܽܘܢ. ܕܶܐܘܰܢܓܶܠܝܘܢ ܒܥܺܕܬܳܐ ܕܰܐܠܗܳܐ. ܘܡܶܛܠܗܳܕܐ ܚܠܳܦ ܩܰܪ̈ܢܳܬܳܐ ܣܰܡܝܴ̈ܬܳܐ. ܬܰܪܬܶܝܢ ܕܺܝܰܬܺܝ̈ܩܰܐܣ ܩܳܪܶܝܢ ܒܥܺܕܬܶܗ ܥܰܠ ܒܺܐܡܰܐ ܕܰܐܠܗܳܐ ܒܟܠܗ̇ ܡܶܬܥܰܡܪܳܢܺܝܬܳܐ. ܘܡܶܛܠ ܕܗܳܢܐ ܐܪܳܙܳܐ ܬܘܒ ܒܗܳܠܝܢ ܩܴ̈ܠܐ ܩܰܕܺܝ̈ܫܶܐ. ܡܰܥܶܠ ܕܶܝܢ ܡܙܰܡܪܳܢܐ ܥܽܘܗܕܳܢܳܐ ܕܓܰܒܪܳܐ ܟܺܐܢܳܐ. ܗܰܘ ܕܰܒܐܪ̈ܳܙܶܐ ܕܥܰܠ ܡܫܺܝܚܳܐ ܣܰܓܺܝ ܡܨܰܒܰܬ ܗܘܳܐ.
ܘܣܳܗܕܽܘܬܳܐ ܒܝܰܘܣܶܦ ܣܳܡܳܗ̇. ܟܰܕ ܢܦܰܩ ܠܐܱܪܥܳܐ ܕܡܶܨܪܶܝܢ: ܘܠܶܫܳܢܳܐ ܕܠܐܴ ܝܳܕܰܥ ܗܘܳܐ ܫܡܰܥ. ܐܱܥܒܪܶܬ ܢܺܝܪܳܐ ܡܶܢ ܟܰܬܦܶܗ: ܘܺܐܝܕܰܘ̈ܗܝ ܡܶܢ ܐܱܣܽܘܪܝܳܐ ܫܪܺܝܬ. ܒܽܐܘܠܨܳܢܳܐ ܩܪܳܢܝ ܘܦܰܨܺܝܬܶܗ: ܘܟܰܣܺܝܬܶܗ ܒܣܶܬܪܳܐ ܕܺܝܠܝ ܡܫܰܒܚܳܐ. ܘܰܒܚܰܪܬܶܗ ܒܡܰܝܴ̈ܐ ܕܚܶܪܝܳܢܳܐ. ܡܶܛܠ ܡܳܢܳܐ ܐܷܡܰܪ ܡܙܰܡܪܳܢܳܐ܆ ܕܣܳܗܕܽܘܬܳܐ ܣܳܡ ܐܠܗܳܐ ܒܝܰܘܣܶܦ. ܘܡܳܢܳܐ ܗܝ ܬܽܘܒ ܣܳܗܕܽܘܬܳܐ. ܡܶܬܪܰܫܡܳܐ ܗܘܳܬ ܒܶܗ ܣܳܗܕܽܘܬܳܐ ܠܰܡܫܺܝܚܳܐ. ܟܕ ܡܶܙܕܰܒܰܢ ܗܘܳܐ ܒܰܚܣܳܡܳܐ ܡܶܢ ܐܱܚܰܘ̈ܗܝ. ܐܱܟܡܳܐ ܕܳܐܦ ܥܰܡܰܢܽܘܐܝܠ ܡܶܢ ܬܰܠܡܺܝܕܶܗ. ܪܳܡܶܝܢ ܗܘܰܘ ܠܶܗ ܬܘܒ ܒܓܽܘܒܳܐ ܕܰܣܦܺܝܩ ܡܶܢ ܡܰܝܴ̈ܐ. ܐܱܟܡܳܐ ܕܳܐܦ ܡܫܺܝܚܳܐ ܡܶܬܬܣܺܝܡ ܗܘܳܐ ܒܩܰܒܪܳܐ ܕܠܰܝܬ ܒܶܗ ܚܰܝ̈ܐ. ܗܘܳܐ ܗܘܳܐ ܥܰܒܕܳܐ ܒܡܶܨܪܶܝܢ ܟܰܕ ܐܻܝܬܰܘܗܝ ܒܰܪ ܚܺܐܪ̈ܶܐ. ܐܴܦ ܐܠܗܐ ܡܶܠܬܳܐ ܐܷܬܩܪܺܝ ܥܰܒܕܳܐ ܟܰܕ ܐܻܝܬܰܘܗܝ ܚܺܐܪܳܐ. ܡܶܬܒܚܰܪ ܗܘܳܐ ܝܰܘܣܶܦ ܒܡܰܝܴ̈ܐ ܕܚܶܪܝܳܢܳܐ ܟܰܕ ܡܰܩܪܒܳܐ ܗܘܳܬ ܥܰܡܶܗ ܪܶܓܬܳܐ ܡܰܣܠܰܝܬܳܐ ܕܡܳܪܬܶܗ. ܐܠܐ ܫܡܰܥ ܒܩܳܠܳܗ̇ ܕܰܚܛܺܝܬܳܐ. ܡܰܣܗܶܕ ܕܶܝܢ ܟܬܳܒܳܐ ܥܰܠ ܥܰܡܰܢܽܘܐܝܠ ܕܠܐܴ ܥܒܰܕ ܚܛܺܝܬܳܐ. ܡܶܨܛܰܚܶܐ ܗܘܳܐ ܡܶܢ ܗܳܝ ܫܳܛܺܝܬܳܐ ܘܒܰܝܬܳܐ ܕܰܚܛܺܝܬܳܐ. ܐܱܝܟܰܢܳܐ ܕܳܐܦ ܡܶܠܬܶܗ ܕܰܐܒܳܐ ܡܶܨܛܰܥܰܪ ܗܘܳܐ ܡܶܢ ܟܢܽܘܫܬܳܐ. ܢܦܰܠ ܗܘܳܐ ܒܶܝܬ ܐܱܣܺܝܪ̈ܶܐ ܒܰܩܛܺܝܓܪܳܢܽܘܬܳܐ ܕܰܓܳܠܬܳܐ ܕܡܶܨܪܳܝܬܳܐ. ܐܴܦ ܟܢܽܘܫܬܳܐ ܗܳܝ ܕܰܒܡܶܨܪܶܝܢ ܐܷܬܝܰܠܕܰܬ ܩܳܥܝܳܐ ܗܘܳܬ ܩܕܳܡ ܦܺܝܠܰܛܽܘܣ ܨܠܽܘܒܳܝܗܝ ܨܠܽܘܒܳܝܗܝ (ܠܘܩܐ ܟܓ: ܟܐ ܝܘܚܢܢ ܝܛ: ܘ). ܘܟܰܕ ܒܶܝܬ ܐܱܣܺܝܪ̈ܶܐ ܢܦܰܠ ܝܰܘܣܶܦ. ܠܰܬܪܶܝܢ ܥܰܒ̈ܕܰܝ ܡܰܠܟܳܐ ܩܳܛܶܠ ܗܘܳܐ ܠܚܰܕ ܘܡܰܚܶܐ ܠܚܰܕ. ܐܱܝܟܰܢܳܐ ܕܳܐܦ ܥܰܡܰܢܽܘܐܝܠ ܟܰܕ ܬܠܐܷ ܥܰܠ ܨܠܺܝܒܳܐ ܘܰܡܣܰܟܰܟ ܒܨܶܨ̈ܐ. ܠܓܰܝܳܣܳܐ ܚܰܕ ܩܰܛܶܠ ܗܘܳܐ. ܥܰܠ ܕܠܐܴ ܗܰܝܡܶܢ. ܠܗܰܘ ܕܶܝܢ ܕܰܐܘܕܺܝ ܒܶܗ ܦܬܰܚ ܗܘܳܐ ܬܰܪܥܳܐ ܕܓܰܢܬܳܐ ܕܰܥܕܶܝܢ. ܘܥܳܐܷܠ ܐܴܕܳܡ ܘܩܳܐܷܡ ܥܰܠ ܫܶܕܬܳܐ ܕܡܰܠܟܽܘܬܳܐ ܡܶܬܝܰܕܥܳܢܺܝܬܳܐ. ܕܰܒܢܳܡܽܘܣܶܗ ܩܰܕܡܳܝܳܐ ܢܶܬܚܙܶܐ ܕܒܰܝܢܳܬ ܡܫܰܡܫܳܢ̈ܐ ܕܡܰܠܟ̈ܐ. ܦܢܳܐ ܗܘܳܐ ܘܰܗܘܳܐ ܒܳܗ̇ ܡܰܠܟܳܐ ܠܡܶܨܪܶܝܢ ܗܳܝ ܕܰܗܘܳܐ ܒܳܗ̇ ܥܰܒܕܳܐ. ܘܨܳܐܱܪ ܗܘܳܐ ܨܰܠܡܳܐ ܠܗܰܘ ܕܡܶܢ ܒܳܬܰܪ ܕܰܛܥܶܡ ܡܰܘܬܳܐ ܩܳܐܷܡ ܡܶܢ ܩܰܒܪܳܐ. ܘܶܐܬܟܰܪܙܰܬ ܡܰܠܟܽܘܬܶܗ ܥܰܠ ܟܽܠ. ܡܬܰܪܣܶܐ ܗܘܳܐ ܝܰܘܣܶܦ ܠܡܶܨܪܶܝܢ ܒܰܥܒܽܘܪܳܐ. ܐܴܦ ܥܰܡܰܢܽܘܐܝܠ ܡܬܰܪܣܶܐ ܒܠܰܚܡܳܐ ܕܚܰܝ̈ܐ ܠܟܽܠܗܽܘܢ ܡܗܰܝܡ̈ܢܶܐ. ܘܡܶܢ ܒܳܬܰܪ ܗܳܠܝܢ ܬܘܒ. ܠܘܳܬ ܥܰܡܳܐ ܡܶܬܦܢܶܐ ܘܡܰܠܶܦ ܠܗܽܘܢ ܟܰܕ ܐܴܡܰܪ:
ܫܡܰܥ ܥܰܡܝ ܘܶܐܡܰܠܶܠ. ܘܺܝܣܪܳܐܝܠ ܐܱܣܗܶܕ ܒܳܟ. ܡܳܢܳܐ ܕܶܝܢ ܒܳܥܶܐ ܕܢܰܠܶܦ ܐܷܢܘܢ. ܕܠܐܴ ܐܱܝܟ ܐܱܒܳܗܰܝ̈ܗܘܢ ܢܶܕܒܚܽܘܢ ܠܫܺܐܕ̈ܐ. ܘܠܐ ܢܶܦܠܚܽܘܢ ܠܐܱܠܳܗ̈ܐ ܢܽܘܟܪ̈ܳܝܶܐ.
ܐܷܢ ܠܰܡ ܬܶܫܡܥܰܢܝ ܠܐ ܢܶܗܘܶܐ ܠܳܟ ܐܱܠܳܗܐ ܢܽܘܟܪܳܝ. ܘܠܐܴ ܬܶܣܓܽܘܕ ܠܕܶܚܠܐܴ ܐܚܪܳܢܝܳܐ. ܗܳܠܝܢ ܐܷܢܶܝܢ ܐܱܝܠܶܝܢ ܕܶܐܡܰܪ ܠܶܗ ܕܢܶܫܡܰܥ. ܒܟܽܠܙܒܰܢ ܓܶܝܪ ܡܶܢ ܒܳܬܰܪ ܦܬܰܟܪ̈ܶܐ ܡܰܥܛܶܦ ܗܘܳܐ ܠܶܗ ܪܽܘܚܳܐ ܕܰܐܠܗܳܐ ܠܥܰܡܳܐ. ܘܡܶܬܢܰܚܰܬ ܗܘܳܐ ܡܶܛܠܬܶܗ ܕܰܢܩܰܒܶܠ ܡܶܢܶܗ ܒܨܺܝܪ̈ܳܬܳܐ. ܘܰܫܒܰܩ ܗܘܳܐ ܐܱܝܟ ܕܰܠܫܰܒܪܳܐ. ܘܒܰܦܠܰܓ̈ܐ ܘܒܰܪ̈ܒܺܝܥܶܐ ܘܩܰܪ̈ܢܳܬܳܐ ܢܶܬܚܰܫܰܚ ܒܥܰܕܥܺܐܕ̈ܐ. ܣܽܘܥܪܳܢܳܐ ܕܠܰܓܡܺܝܪ̈ܶܐ ܠܐܴ ܚܳܫܰܚ. ܡܶܛܠ ܕܰܩܕܳܡ ܦܬܰܟܪ̈ܶܐ ܒܨܺܝ̈ܨܠܐܷ ܘܰܒ̈ܩܳܠܐ ܕܰܙܡܳܪܳܐ ܡܶܫܬܥܶܝܢ ܗܘܰܘ ܟܽܘܡܪ̈ܶܐ ܕܰܚܛܺܝܬܳܐ. ܦܩܰܕ ܠܰܢܒܺܝ̈ܐ ܕܠܐܴ ܢܰܟܠܽܘܢ ܠܥܰܡܳܐ ܡܶܢ ܗܳܠܶܝܢ. ܕܕܰܠܡܳܐ ܟܰܕ ܡܶܬܟܰܢܫܺܝܢ ܠܥܺܐܕ̈ܐ ܐܱܠܗܳܝ̈ܐ. ܘܠܐܴ ܫܳܡܥܺܝܢ ܒܗܽܘܢ ܩܴ̈ܠܐ ܕܰܡܚܰܕܶܝܢ. ܢܶܬܦܢܽܘܢ ܒܳܬܰܪ ܓܠܺܝ̈ܦܶܐ ܡܶܛܠ ܩܴ̈ܠܐ ܕܡܶܙܕܰܡܪܺܝܢ ܗܘܰܘ ܩܕܳܡܰܝܗܽܘܢ. ܕܢܺܐܡܰܪ ܚܢܰܢ ܕܰܒܕܰܐܝܟ ܗܳܠܝܢ ܩܴ̈ܠܐ ܨܳܒܶܐ ܗܘܳܐ ܐܠܗܳܐ ܒܨܺܝܪܽܘܬܳܐ ܗܝ. ܝܰܬܺܝܪܳܐܝ̣ܬ ܟܽܠ ܟܡܳܐ ܕܰܚܢܰܢ ܫܳܡܥܺܝܢܰܢ ܠܗܰܘ ܕܰܒܟܽܠ ܛܳܒܳܐ ܐܝ̣ܬܰܘܗܝ ܟܰܕ ܡܰܠܶܦ ܥܰܡܰܢܘܐܝܠ. ܕܡܳܐ ܕܰܡܨܰܠܶܝܢ ܐܱܢܬܽܘܢ ܠܐܴ ܬܶܗܘܽܘܢ ܡܦܰܩܩܺܝܢ ܐܱܝܟ ܚܰܢܦ̈ܐ. ܣܳܒܪܺܝܢ ܓܶܝܪ ܕܰܒܡܰܡܠܠܐܴ ܣܰܓܺܝܐܴܐ ܡܶܫܬܰܡܥܺܝܢ (ܡܬܝ ܘ: ܙ). ܐܴܦ ܕܰܘܝܕ ܡܦܰܩܶܕ ܠܗܽܘܢ ܕܡܶܢ ܣܰܓܝ̣ܐܘ̣ܬ ܐܠܗ̈ܐ ܢܶܙܕܰܗܪܽܘܢ ܘܳܐܡܰܪ:
ܐܷܢܳܐ ܐܻܝܬܰܝ ܡܳܪܝܳܐ ܐܱܠܳܗܳܟ. ܕܰܐܣܶܩܬܳܟ ܡܶܢ ܐܱܪܥܳܐ ܕܡܶܨܪܶܝܢ. ܒܗܳܠܶܝܢ ܕܶܝܢ ܡܰܕܟܰܪ ܠܶܗ ܢܒܺܝܳܐ. ܥܰܠ ܕܡܰܝܬܶܐ ܥܰܠ ܒܳܠܗ. ܕܡܶܢ ܗܰܘ ܟܽܘܪܳܐ ܕܦܰܪܙܠܐܴ ܐܱܦܩܶܗ ܚܰܝܠܐܴ ܕܰܐܠܗܳܐ. ܢܶܦܠܽܘܚ ܥܰܡ ܐܠܗܳܐ ܟܰܕ ܚܳܕܶܐ. ܟܰܕ ܚܙܳܐ ܕܠܰܝܬ ܐܱܝܟ ܐܱܠܗܶܗ ܕܺܝܣܪܳܐܝܠ. ܐܠܐ ܗܳܫܳܐ ܟܰܕ ܗܳܕܶܐ ܢܳܛܰܪ ܐܡ̇ܪ ܠܗ:
ܕܰܦܬܰܚ ܦܽܘܡܳܟ ܘܶܐܡܠܶܝܘܗܝ. ܡܳܕܶܝܢ ܗܰܘ ܕܝܳܗܶܒ ܚܶܟܡܬܳܐ ܘܡܶܠܬܳܐ ܘܬܰܪܥܺܝܬܳܐ. ܠܘܳܬܳܗ̇ ܕܢܰܦܫܳܐ ܩܳܐܡ ܐܱܝܟ ܡܰܝܴ̈ܐ ܥܠܰܘܗܝ ܕܢܶܒܥܶܐ. ܘܰܐܟܙܢܳܐ ܕܡܰܝܴ̈ܐ ܕܡܰܒܽܘܥܳܐ ܐܷܢ ܣܳܟܰܪ ܐܢܳܫ ܡܶܬܟܠܐܷ ܡܰܦܩܳܢܗܘܢ. ܐܷܢܕܶܝܢ ܦܳܬܰܚ ܒܰܐܦܰܝ̈ܗܘܢ ܕܠܺܝܠܐܴܝ̣ܬ ܪܳܕܶܝܢ. ܟܰܕ ܠܐܴ ܡܶܣܬܰܝܟܺܝܢ. ܗܳܟܰܢܳܐ ܟܰܕ ܠܢܽܘܗܪܳܐ ܕܡܶܠܬܳܐ ܕܰܐܠܗܳܐ ܦܳܬܚܺܝܢܰܢ܇ ܦܽܘܡܳܐ ܫܦܺܝܥܳܐܝ̣ܬ ܡܶܬܡܠܐܷ. ܗܽܘ ܠܡܰܠܦܳܢܳܗ̇ ܛܳܒܳܐ ܠܐ ܡܶܬܛܦܺܝܣ ܗܘܳܐ ܐܱܝܟ ܕܶܐܡܰܪ ܢܒܺܝܳܐ:
ܘܥܰܡܝ ܠܐܴ ܫܡܰܥ ܒܩܳܠܝ. ܘܺܝܣܪܳܐܝܠ ܠܐܴ ܐܶܬܛܦܺܝܣ ܡܶܢܝ. ܘܗܰܠܶܟܘ ܒܨܶܒܝܳܢܳܐ ܕܠܶܒܗܽܘܢ. ܘܰܒܬܰܪܥܺܝܬܳܐ ܕܢܰܦܫܗܽܘܢ. ܨܳܒܶܐ ܗܘܳܐ ܐܱܠܗܳܐ ܒܥܰܡܳܐ ܗܰܘ. ܐܷܠܽܘ ܐܷܬܬܦܺܝܣ ܕܰܢܩܰܒܶܠ ܫܶܦ̈ܥܶܐ ܕܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝ̈ܐ. ܕܗܽܘ ܢܶܗܘܶܐ ܓܰܘܳܝܳܐ ܘܒܰܝܬܳܝܳܐ ܠܐܪ̈ܳܙܶܐ ܐܱܝܠܶܝܢ ܕܰܡܛܰܝܶܒ ܗܘܳܐ ܐܠܗܐ ܕܢܶܓܠܐܷ. ܐܷܠܐ ܠܐܴ ܫܡܰܥ ܘܠܐ ܐܷܬܬܦܺܝܣ. ܘܥܰܠܗܳܝ ܦܳܫܰܬ ܡܶܢܗܽܘܢ ܛܰܝܒܽܘܬܳܐ ܘܶܐܬܟܰܠܝܰܬ ܡܶܢܗܽܘܢ ܡܰܘܗܰܒܬܳܐ ܘܥܰܠ ܗܳܕܶܐ ܠܐܴ ܓܡܰܪܘ ܒܥܶܠܕ̈ܒܳܒܰܝܗܘܢ ܡܶܬܝܰܕ̈ܥܳܢܶܐ. ܐܡ̣ܪ ܓܶܝܪ:
ܐܷܠܽܘ ܥܰܡܝ ܫܰܡܥܰܢܝ ܘܺܝܣܪܳܐܝܠ ܒܽܐܘܪ̈ܚܳܬܝ ܗܰܠܶܟ. ܥܰܕ ܩܰܠܺܝܠ ܡܰܘܒܶܕ ܗܘܺܝܬ ܠܰܒܥܶܠܕ̈ܒܳܒܰܝܗܘܢ. ܘܥܰܠ ܣܳܢܱ̈ܐܝܗܘܢ ܡܰܗܦܶܟ ܗܘܺܝܬ ܐܻܝܕܝ. ܡܳܢܳܐ ܗܘܳܬ ܗܳܝ ܕܢܶܫܡܰܥ ܝܺܣܪܳܐܝܠ ܒܩܳܠܶܗ ܕܰܐܠܗܳܐ. ܗܳܝ ܕܢܶܗܘܶܐ ܟܳܪܽܘܙܳܐ ܠܡܶܠܰܘ̈ܗܝ. ܠܰܝܬ ܓܶܝܪ ܙܰܝܢܳܐ ܕܰܩܫܶܐ ܥܰܠ ܒܥܶܠܕ̈ܒܳܒܶܐ ܕܚܰܝܱ̈ܝܢ. ܐܝܟ ܙܰܝܢܳܐ ܕܡܶܠܬܳܐ ܐܠܗܳܐ. ܡܶܢ ܗܳܕܶܐ ܚܳܐܷܒ ܚܰܝܠܐܴ ܕܡܳܪܽܘܕܳܐ. ܐܡ̇ܪ ܢܒܺܝܳܐ ܒܳܬܰܪܟܶܢ.
ܘܣܳܢܱ̈ܐܘܗܝ ܕܡܳܪܝܳܐ ܟܰܕܶܒܘ ܒܶܗ. ܘܰܗܘܳܐ ܙܰܘܥܗܽܘܢ ܠܥܳܠܰܡ. ܥܕܰܡܳܐ ܠܰܡ ܕܶܐܬܚܙܺܝ ܐܠܗܐ ܥܰܠ ܐܱܪܥܳܐ ܒܰܒܣܰܪ. ܒܰܦܬܰܟܪ̈ܶܐ ܘܰܒܕܶܚ̈ܠܳܬܳܐ ܡܚܰܠܦܺܝܢ ܗܘܰܘ ܠܶܗ. ܟܰܕ ܕܶܝܢ ܐܷܬܳܐ ܨܶܐܕܰܝܗܽܘܢ ܡ̇ܢ ܒܰܚܙܳܬܳܐ ܙܥܽܘܪܬܳܐ ܕܰܕܡܽܘܬܳܐ ܕܥܰܒܕܳܐ ܕܰܢܣܰܒ. ܗܳܝܕܶܝܢ ܢܶܦܩܰܬ ܗܘܳܬ ܠܫܽܘܡܠܳܝܳܐ ܕܰܓܳܠܽܘܬܗܽܘܢ. ܘܥܰܠ ܗܳܝ ܐܡ̇ܪ ܢܒܺܝܐ. ܘܰܗܘܳܐ ܙܰܘܥܗܽܘܢ ܠܥܳܠܰܡ.
ܘܰܐܘܟܠܶܗ ܡܶܢ ܫܽܘܡܢܳܐ ܕܚܶܛܬܳܐ. ܘܡܶܢ ܟܺܐܦܳܐ ܕܶܒܫܳܐ ܣܰܒܥܶܗ. ܗܳܕܶܐ ܠܰܘ ܠܺܝܣܪܳܐܝܠ ܕܥܰܬܶܕ ܠܶܗ ܨܠܺܝܒܳܐ ܠܡܳܪܳܗ̇ ܕܬܶܫܒܽܘܚܬܳܐ ܗܘܳܬ. ܐܠܐ ܠܥܰܡܳܐ ܩܰܕܺܝܫܳܐ ܗܰܘ ܕܶܐܬܩܪܺܝ ܝܺܣܪܳܐܝܠ ܕܰܐܠܗܳܐ. ܚܶܛܬܳܐ ܓܝܪ ܘܟܺܐܦܳܐ ܗܽܘܝܽܘ ܡܳܪܰܢ ܘܚܶܛܬܳܐ ܡ̣ܢ ܗܳܝ ܕܶܐܡܰܪ: ܕܰܦܪܶܕܬܳܐ ܕܚܶܛܬܳܐ ܐܷܠܐ ܢܳܦܠܐܴ ܐܴܦ ܡܳܝܬܳܐ ܒܰܐܪܥܳܐ: ܒܰܠܚܽܘܕܶܝܗ̇ ܦܳܝܫܳܐ. ܐܷܢܕܶܝܢ ܡܳܝܬܳܐ ܦܺܐܪ̈ܶܐ ܣܰܓܺܝ̈ܐܐ ܡܰܝܬܝܳܐ (ܝܘܚܢܢ ܝܒ: ܟܕ). ܟܺܐܦܳܐ ܗܳܝ ܕܰܐܣܠܺܝܘ ܒܰܢܳܝ̈ܐ ܕܡܰܫܩܝܳܐ ܠܚܰܛܳܝ̈ܐ ܚܰܠܝܽܘܬܳܐ ܕܫܽܘܒܩܳܢ ܚܛܳܗ̈ܐ. ܫܽܘܡܢܳܐ ܕܶܝܢ ܚܶܛܬܳܐ ܐܻܝܬܰܘܗܝ. ܫܽܘܚܠܳܦܳܐ ܕܗܳܘܶܐ ܠܦܰܓܪܳܐ ܒܰܩܝܳܡܬܳܐ. ܡܶܢ ܚܒܳܠܐܴ ܠܠܐܴ ܡܶܬܚܰܒܠܳܢܽܘܬܳܐ ܕܗܽܘ ܗܳܢܳܐ ܟܰܕ ܡܕܰܟܰܝ ܡܶܢ ܚܰܫܳܐ ܘܡܶܢ ܡܰܘܬܳܐ. ܡܶܬܬܣܺܝܡ ܥܰܠ ܦܳܬܽܘܪܳܗ̇ ܕܥܺܕܬܳܐ. ܘܳܐܟܰܠ ܡܶܢܶܗ ܝܺܣܪܳܐܝܠ ܕܰܐܠܗܳܐ. ܘܡܰܘܕܶܐ ܘܰܡܫܰܒܰܚ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܐܡܝ̣ܢ.
ܡܙܡܘܪܐ ܕܬܡܢܝܢ ܘܬܪܝܢ
ܡܰܘܕܰܥ ܥܰܠ ܓܶܠܝܳܢܶܗ ܕܥܰܡܰܢܽܘܐܝܠ. ܘܥܰܠ ܕܺܝ̈ܢܶܐ ܐܰܠܳܗܳܝܷ̈ܐ ܕܒܺܐܝ̈ܕܰܝ ܐܠܳܗܳܐ. ܘܥܰܠ ܟܳܗܢ̈ܐ ܒܢܰܝ̈ ܠܶܘܺܝ ܕܰܐܣܠܺܝ ܐܶܢܽܘܢ ܐܠܗܳܐ ܡܶܢ ܒܳܬܰܪ ܕܨܰܠܒܽܘܗܝ.
ܒܕܶܡ̈ܘܳܬܳܐ ܪܰܘܪ̈ܒܳܬܳܐ ܘܒܰܫܡܳܗ̈ܐ ܡܫܰܒܚ̈ܐ ܝܰܩܪܶܗ ܐܱܠܗܳܐ ܠܒܰܪܢܳܫܳܐ. ܘܒܺܐܝܩܳܪ̈ܶܐ ܐܱܠܗܳܝ̈ܐ ܐܱܥܬܪܶܗ ܠܰܟܝܳܢܳܐ ܡܶܬܚܰܒܠܳܢܳܐ. ܡܶܢ ܫܽܘܪܳܝܳܐ ܕܰܓܒܺܝܠܬܶܗ. ܟܕ ܓܶܝܪ ܓܰܒܠܶܗ ܡܶܢ ܥܰܦܪܳܐ ܝܰܗܒ ܩܳܠܐܴ ܠܥܶܠ ܡܶܢ ܬܽܘܩܳܢܶܗ ܫܒܺܝܚܳܐܝ̣ܬ. ܕܢܶܥܒܶܕ ܐܢܳܫܴ̈ܐ ܒܨܰܠܡܰܢ ܐܱܝܟ ܕܡܽܘܬܰܢ (ܒܪܝܬܐ ܐ: ܟܘ). ܘܡܰܣܗܶܕ ܥܠܰܘܗܝ ܛܽܘܒܬܳܢܳܐ ܦܰܘܠܽܘܣ. ܕܒܰܕܡܽܘܬܳܐ ܘܰܒܨܽܘܪܬܳܐ ܕܰܒܪܶܗ (ܪ̈ܗܘܡܝܐ ܚ: ܟܛ) ܥܰܒܕܶܗ ܠܒܰܪܢܳܫܳܐ. ܟܰܕ ܚܛܳܐ ܕܺܝܢ ܒܰܪܢܳܫܳܐ. ܢܦܰܠ ܡܶܢ ܒܰܝܬܳܝܽܘܬܳܐ ܕܰܐܠܗܳܐ. ܘܠܰܘ ܡܶܟܺܝܠ ܨܰܠܡܳܐ ܗܘܳܐ ܕܰܐܠܗܳܐ. ܐܷܠܐ ܠܰܕܡܽܘܬܳܐ ܕܚܶܘܝܳܐ ܫܰܚܠܶܦ ܢܰܦܫܶܗ. ܘܰܗܘܳܐ ܒܰܕܡܽܘܬܳܐ ܕܰܒܥܺܝܪܳܐ ܘܰܕܚܰܝܽܘܬܳܐ. ܥܰܠ ܕܝܰܩܰܪ ܘܰܣܓܶܕ ܠܕܶܚ̈ܠܳܬܳܐ ܣܪ̈ܺܝܩܳܬܳܐ. ܚܠܳܦ ܐܱܠܗܳܐ ܗܰܘ ܕܥܰܒܕܶܗ ܡܳܪܳܐ ܥܠܰܝܗܶܝܢ. ܘܡܶܟܺܝܠ ܢܦܰܠܘ ܠܗܽܘܢ ܒܢܰܝ̈ܢܳܫܳܐ ܡܶܢ ܗܳܝ ܕܢܶܬܩܪܽܘܢ ܐܱܠܗ̈ܐ ܘܰܒܢܰܘ̈ܗܝ ܕܰܡܪܰܝܡܳܐ. ܐܝܟ ܘܰܒܢܰܝ̈ܢܳܫܳܐ ܡܳܝܬܺܝܢ ܗܘܰܘ. ܟܰܕ ܕܶܝܢ ܪܰܚܶܡ ܐܱܠܗܐ ܥܰܠ ܒܰܪܢܳܫܳܐ. ܫܰܪܺܝ ܕܢܶܓܒܶܐ ܡܶܢ ܥܰܡ̈ܡܶܐ ܥܰܡܳܐ ܠܰܫܡܶܗ. ܘܩܰܕܡܳܝܳܐ ܩܪܳܐ ܠܺܝܣܪܳܐܝ̣ܠ ܘܰܩܪܳܝܗܝ ܟܰܕ ܦܳܪܶܩ ܠܶܗ ܒܪܳܐ ܐܝܟ ܕܶܐܡܰܪ. ܒܶܪܝ ܒܽܘܟܪܝ ܝܺܣܪܳܐܝܠ (ܡܦܩܢܐ ܕ: ܟܒ). ܘܡܶܢ ܒܳܬܰܪ ܕܰܢܦܰܩ ܥܰܡܳܐ ܕܺܝܣܪܳܐܝܠ ܠܡܰܕܒܪܳܐ ܡܰܘܪܶܒ ܗܘܳܐ ܠܗܽܘܢ ܡܽܘܫܶܐ ܘܳܐܡܰܪ: ܒܢܰܝܴ̈ܐ ܐܰܢܬܽܘܢ ܕܡܳܪܝܳܐ ܐܱܠܳܗܟܽܘܢ (ܬܢܝܢ ܢܡܘܣܐ ܝܕ: ܐ). ܟܰܕ ܕܶܝܢ ܒܰܪܬ ܩܳܠܐ ܗܳܕܶܐ ܝܰܩܺܝܪܳܐ ܗܘܳܬ ܒܥܰܝ̈ܢܰܝܗܽܘܢ. ܐܱܘܣܶܦ ܬܘܒ ܘܫܰܡܰܗ ܡܰܠܐܱܟ̈ܐ. ܘܟܰܕ ܠܗܳܕܶܐ ܗܰܝܡܶܢܘ ܘܰܩܪܳܐ ܠܟܳܗ̈ܢܶܐ ܒܢܱ̈ܝ ܠܶܘܺܝ ܡܰܠܐܱܟ̈ܐ. ܘܟܰܢܺܝ ܐܢܘܢ ܒܢܱ̈ܝ ܐܠܗ̈ܐ. ܘܡܶܛܠܗܳܕܐ ܒܝܰܕ ܡܰܠܐܱܟܺܝ ܐܡ̣ܪ: ܟܰܕ ܡܦܺܝܣ ܠܥܰܡܳܐ ܕܰܢܝܰܩܰܪ ܠܟܳܗܢ̈ܐ ܐܡ̇ܪ ܗܘܳܐ. ܡܶܛܠ ܕܟܳܗܢܳܐ ܠܰܡ ܡܰܠܐܱܟܶܗ ܗܽܘ ܕܰܐܠܗܳܐ. ܘܦܶܬܓܳܡ̈ܐ ܕܡܳܪܝܳܐ ܠܐ ܫܳܐܠܶܝܢ ܡܶܢ ܦܽܘܡܶܗ (ܡܠܐܟܝ ܒ: ܙ). ܘܗܳܢܳܐ ܫܡܳܐ ܝܰܩܺܝܪܳܐ ܕܡܰܠܐܱܟ̈ܐ ܩܰܕܺܝ̈ܫܶܐ ܣܺܝܡ ܗܘܳܐ ܥܰܠ ܟܳܗܢ̈ܐ ܘܡܶܬܝܰܩܪܺܝܢ ܗܘܰܘ ܒܶܗ. ܟܕ ܕܶܝܢ ܨܒܳܐ ܪܽܘܚܳܐ ܕܢܶܓܠܐܷ ܥܰܠ ܕܶܢܚܶܗ ܕܰܐܠܗܳܐ. ܘܰܢܚܰܘܶܐ ܢܰܦܫܶܗ ܒܰܝܢܳܬ ܟܳܗ̈ܢܶܐ ܗܳܢܘܢ ܕܡܶܬܩܪܶܝܢ ܡܰܠܐܱܟ̈ܐ. ܚܰܘܺܝ ܢܰܦܫܶܗ ܡܶܠܬܳܐ ܐܠܗܳܐ ܒܒܰܝܬܶܗ ܕܰܐܕܽܘܢܰܝ. ܦܩܰܕ ܠܰܢܒܺܝܳܐ ܡܙܰܡܪܳܢܳܐ ܘܶܐܬܢܰܒܺܝ ܘܶܐܡܰܪ:
ܐܱܠܗܳܐ ܩܳܡ ܒܟܶܢܫܳܐ ܕܡܰܠܐܱܟ̈ܐ. ܘܰܒܓܰܘ ܡܰܠܐܱܟ̈ܐ ܢܕܽܘܢ. ܡܳܢܳܐ ܗܝ ܗܳܕܐ ܒܰܪܬ ܩܳܠܐ ܕܶܐܬܰܐܡܪܰܬ ܒܰܝܢܳܬ ܟܳܗܢ̈ܐ ܕܝܽܘܕܳܝ̈ܐ ܢܚܶܬ ܩܳܡ ܐܱܠܗܳܐ ܟܰܕ ܗܘܳܐ ܒܰܪܢܳܫܳܐ. ܘܰܗܘܳܬ ܒܰܪܬ ܩܳܠܐ ܗܳܕܐ ܕܽܘܡܳܪܳܐ ܚܫܺܝܒܳܐ ܗܘܳܬ ܠܰܢܒܺܝܳܐ ܕܢܺܐܡ̣ܪ. ܕܰܐܠܗܳܐ ܩܳܡ ܒܟܶܢܫܳܐ ܕܡܰܠܐܱܟ̈ܐ. ܡܶܛܠ ܗܳܢܐ ܠܰܘ ܡܰܘܪܳܒܽܘ ܐܱܘܪܒܶܗ ܢܒܺܝܳܐ ܒܗܳܕܶܐ. ܐܠܐ ܥܰܠܗܳܝ ܕܣܰܓܺܝ ܐܷܬܡܰܟܰܟ ܐܱܠܶܦ. ܡܶܛܠ ܕܰܨܒܳܐ ܕܰܢܩܽܘܡ ܒܟܶܢܫܳܐ ܕܟܳܗܢ̈ܐ ܕܶܐܬܩܪܺܝܘ ܡܰܠܐܱܟ̈ܐ ܟܕ ܗܘܳܐ ܒܰܪܢܳܫܳܐ. ܠܰܘ ܟܰܕ ܫܬܶܩ ܡܶܢ ܕܺܝܢܳܐ. ܐܠܐ ܡܰܟܶܣ ܗܘܳܐ ܠܗܽܘܢ. ܘܰܡܟܰܘܶܢ ܗܘܳܐ ܠܗܽܘܢ. ܘܳܐܡ̇ܪ ܗܘܳܐ ܠܗܽܘܢ: ܐܱܝܟ ܕܰܒܕܺܝܢܳܐ ܕܒܰܛܶܠܬܽܘܢ ܡܶܠܬܳܐ ܕܰܐܠܗܳܐ ܡܶܛܠ ܡܰܫܠܡܳܢܽܘܬܟܽܘܢ (ܡܬܝ ܝܗ: ܘ). ܘܬܘܒ ܕܘܳܝ ܠܟܽܘܢ ܣܳܦܪ̈ܶܐ ܘܰܦܪ̈ܺܝܫܶܐ ܢܳܣܒܱ̈ܝ ܒܰܐܦ̈ܐ: ܕܰܡܕܰܟܶܝܢ ܐܢܬܽܘܢ ܒܰܪܶܗ ܕܟܳܣܳܐ ܘܰܕܙܳܒܽܘܪܳܐ ܠܓܰܘ ܕܶܝܢ ܡܠܶܝܢ ܐܢܬܽܘܢ ܚܛܽܘܦܝܳܐ ܘܥܰܘܠܐܴ ܘܡܰܣܰܒ ܒܰܐܦ̈ܐ. ܥܘܺܝܪ̈ܶܐ ܕܰܟܰܘ ܠܽܘܩܕܰܡ ܓܰܘܶܗ ܕܟܳܣܳܐ ܘܰܕܙܳܒܽܘܪܳܐ ܕܢܶܗܘܶܐ ܐܴܦ ܒܰܪܗܽܘܢ ܕܟܶܐ (ܡܬܝ ܟܓ: ܟܗ-ܟܘ). ܘܡܶܢܶܗ ܕܶܝܢ ܡܶܬܐܰܡܪܳܐ ܠܘܳܬ ܪ̈ܰܒܰܝ ܟܳܗܢ̈ܐ ܒܰܪܬ ܩܳܠܐ ܗܳܕܐ ܕܡܶܢ ܒܳܬܰܪܟܶܢ.
ܥܕܰܡܳܐ ܠܐܷܡܰܬܝ ܕܳܝܢܺܝܢ ܐܢܬܽܘܢ ܥܰܘܠܐܴ. ܘܒܰܐܦ̈ܐ ܕܪ̈ܰܫܺܝܥܶܐ ܢܳܣܒܺܝܢ ܐܢܬܽܘܢ. ܕܰܐܝܟ ܗܳܟܰܢܳܐ ܗܘܰܘ ܥܒܳܕܰܝ̈ܗܘܢ ܕܟܳܗܢ̈ܐ ܗܳܢܘܢ ܒܙܰܒܢܳܐ ܗܰܘ ܕܶܐܬܚܙܺܝ ܐܠܗܐ ܥܰܠ ܐܱܪܥܳܐ. ܘܥܰܠ ܗܳܕܐ ܩܰܕܶܡ ܪܽܘܚܳܐ ܐܱܘܕܰܥ܇ ܡܶܕܶܡ ܕܰܡܛܰܝܰܒ ܗܘܳܐ ܪܽܘܚܳܐ ܕܢܺܐܡܰܪ ܟܕ ܡܰܟܶܣ ܠܗܽܘܢ. ܐܷܢܕܶܝܢ ܠܘ ܗܳܟܰܢܳܐ ܐܝ̣ܬܶܝܗ̇ ܗܳܕܐ. ܒܰܝܢܳܬ ܡܰܠܐܱܟ̈ܐ ܐܷܡܰܬܝ ܩܳܡ ܐܱܠܗܳܐ ܘܕܳܢ. ܘܡܳܢܳܐ ܣܢܺܝܩܺܝܢ ܡܰܠܐܱܟ̈ܐ ܥܰܠ ܕܺܝܢܳܐ. ܐܠܐ ܢܰܫܰܪ ܗܳܕܐ ܕܰܐܝܟ ܕܶܐܬܦܰܫܩܰܬ ܡܶܠܬܳܐ ܡܶܛܠ ܗܳܢܘܢ ܡܰܠܐܟ̈ܐ ܢܳܣ̈ܒܰܝ ܒܰܐܦ̈ܐ ܐܱܡܺܝܪ̈ܳܢ ܗܳܠܶܝܢ ܡܰܝܬܶܐ ܐܴܦ ܗܳܪܟܳܐ ܪܽܘܚܳܐ ܘܳܐܡܰܪ:
ܕܽܘܢܘ ܠܝܰܬܡ̈ܐ ܘܰܠܒܳܝ̈ܫܶܐ. ܘܰܠܡܶܣ̈ܟܺܢܶܐ ܘܰܠܡܰܟܺܝ̈ܟܶܐ ܙܰܟܰܘ: ܘܦܰܨܰܘ ܠܡܶܣ̈ܟܺܢܶܐ ܘܰܠܒܳܝ̈ܫܶܐ ܡܶܢ ܐܻܝܕܳܐ ܕܪ̈ܰܫܺܝܥܶܐ. ܐܠܐ ܚܕܳܐ ܡܶܢ ܗܳܠܶܝܢ ܠܐ ܥܳܒܕܺܝܢ ܗܘܰܘ. ܘܗܳܠܶܝܢ ܡܶܛܠ ܕܠܐ ܝܕܰܥܘ ܕܺܝܢܰܘ̈ܗܝ ܕܡܳܪܝܳܐ: ܘܠܐ ܐܷܣܬܰܟܰܠܘ ܬܰܪܥܺܝܬܶܗ ܕܰܐܠܗܐ:
ܕܠܐ ܝܕܰܥܘ ܘܠܐ ܐܷܣܬܰܟܰܠܘ: ܕܰܒܚܶܫܽܘܟܳܐ ܡܗܰܠܟܺܝܢ ܗܘܰܘ. ܡܶܛܠ ܕܶܐܬܠܒܶܟܘ ܒܩܽܘܕܡܳܐ ܕܒܺܝ̈ܫܳܬܳܐ. ܘܠܐ ܝܕܰܥܘ ܠܢܽܘܗܪܳܐ ܕܰܫܪܳܪܳܐ. ܘܥܰܠܗܳܕܶܐ ܟܰܕ ܩܳܐܷܡ ܒܰܝܢܳܬܗܽܘܢ ܕܠܰܘ ܢܽܘܗܪܰܐ ܗ̄ܘ ܐܱܣܒܰܪܘ ܕܺܐܝܬܰܘܗܝ. ܘܰܐܝܟ ܣܡܰܝܴ̈ܐ ܕܠܐܴ ܥܰܝ̈ܢܶܐ ܫܰܟܰܪܘ ܠܕܶܢܚܶܗ ܦܨܺܝܚܳܐ. ܡܶܛܠ ܕܗܶܢܘܢ ܠܐ ܐܷܬܪܗܶܒܘ ܘܠܐܴ ܙܳܥܘ. ܙܳܥܰܬ ܐܱܪܥܳܐ ܚܠܳܦܰܝܗܽܘܢ. ܐܝܟ ܕܐܡ̣ܪ ܪܽܘܚܳܐ:
ܘܙܳܥܝ̈ ܠܰܡ ܟܽܠܗܶܝܢ ܫܶܬܶܐܣܶܝ̈ܗ̇ ܕܰܐܪܥܳܐ. ܗܳܕܐ ܓܶܝܪ ܡܰܘܕܥܳܐ ܠܗܰܘ ܙܰܘܥܳܐ ܕܰܐܪܥܳܐ ܕܰܗܘܳܐ ܟܰܕ ܗܽܘ ܥܰܠ ܨܠܺܝܒܳܐ. ܗܰܘ ܕܶܐܬܳܐ ܘܩܳܡ ܒܰܒܣܰܪ ܒܟܶܢ̈ܫܶܐ ܕܡܰܠܐܱܟ̈ܐ ܒܶܣܪ̈ܳܢܶܐ܆ ܐܠܐ ܢܶܫܡܰܥ ܐܱܝܟܰܢܳܐ ܫܳܪܶܐ ܠܗܽܘܢ ܡܶܢ ܟܳܗܢܽܘܬܳܐ. ܘܠܰܘ ܗܳܕܶܐ ܒܰܠܚܽܘܕ. ܐܠܐ ܐܴܦ ܡܰܫܘܶܐ ܠܗܽܘܢ ܒܡܰܘܬܳܐ ܥܰܡ ܟܽܠܢܳܫ.
ܐܷܢܳܐ ܐܡ̇ܪܶܬ ܕܰܐܠܳܗܻ̈ܝܢ ܐܢܬܽܘܢ. ܘܰܒܢܰܘ̈ܗܝ ܕܰܡܪܰܝܡܳܐ ܟܽܠܟܽܘܢ. ܠܰܘ ܓܶܝܪ ܡܰܠܐܱܟ̈ܐ ܒܰܠܚܽܘܕ ܨܳܒܶܐ ܗܘܳܐ ܕܢܶܗܘܽܘܢ ܟܳܗܢ̈ܐ ܕܗܰܘ ܥܰܡܳܐ. ܐܠܐ ܕܳܐܦ ܒܰܫܡܳܐ ܕܰܐܠܗ̈ܐ ܨܳܒܶܐ ܗܘܳܐ ܕܰܢܝܰܩܰܪ ܐܷܢܘܢ.
ܘܡܶܟܺܝܠ ܠܰܡ ܠܐ ܨܒܰܝܬܽܘܢ. ܐܝܟ ܒܢܰܝ̈ܢܳܫܳܐ ܬܡܽܘܬܽܘܢ. ܘܰܐܝܟ ܚܰܕ ܡܶܢ ܪܰܘܪ̈ܒܳܢܶܐ ܬܶܦܠܽܘܢ. ܗܳܢܰܘ ܒܰܚܛܺܝܬܳܐ ܬܶܬܚܰܒܠܘܢ. ܘܬܶܙܥܪܽܘܢ ܒܡܰܘܬܳܐ ܨܶܒܝܳܢܳܝܐ. ܕܚܰܝܶܒܘ ܒܶܗ ܗܶܢܘܢ ܠܗܽܘܢ. ܘܒܳܬܰܪ ܗܳܠܝܢ ܡܦܺܝܣ ܠܶܗ ܢܒܺܝܳܐ ܠܡܶܠܬܳܐ ܐܱܠܗܳܐ ܕܗܽܘ ܢܩܽܘܡ ܘܰܢܕܽܘܢܳܗ̇ ܠܐܱܪܥܳܐ.
ܩܽܘܡ ܠܰܡ ܐܠܗܳܐ ܘܕܽܘܢܶܝܗ̇ ܠܐܱܪܥܳܐ. ܡܶܛܠ ܕܰܐܢܬ ܬܺܐܪܰܬ ܠܟܽܠܗܽܘܢ ܥܰܡ̈ܡܶܐ. ܡܶܛܠ ܕܗܳܠܝܢ ܠܐ ܣܳܦܩܺܝܢ ܠܡܶܗܘܳܐ ܕܰܝܳܢ̈ܐ ܠܝܰܬܡ̈ܐ ܘܰܠܡܶܣ̈ܟܺܢܶܐ ܘܰܠܒܳܝ̈ܫܶܐ ܘܰܠܡܰܟܺܝ̈ܟܶܐ. ܘܠܐ ܡܶܫܟܚܺܝܢ ܠܰܡܦܰܨܳܝܽܘ ܡܶܢ ܐܻܝܕܳܐ ܕܡܳܪ̈ܽܘܕܶܐ ܘܰܕܓܰܝܴ̈ܣܶܐ ܠܰܟܝܳܢܳܐ ܐܢܳܫܳܝܳܐ. ܐܢܬ ܡܳܪܝܳܐ ܩܽܘܡ ܡܶܛܠ ܕܺܝܠܳܟ. ܘܦܰܨܳܐ ܠܝܳܪܬܽܘܬܳܟ ܡܶܢ ܝܳܪ̈ܽܘܬܶܐ ܕܰܓ̈ܠܐܷ. ܡܶܛܠ ܕܕܺܝܠܳܟ ܐܷܢܘܢ ܟܽܠܗܽܘܢ ܥܰܡ̈ܡܶܐ. ܘܰܐܢܬ ܬܺܐܪܰܬ ܐܷܢܘܢ. ܗܳܕܐ ܒܰܪܬ ܩܳܠܐ ܐܷܣܬܰܒܪܰܬ ܗܘܳܬ ܠܐܢܳܫܺܝ̈ܢ ܪ̈ܦܰܝܳܐ. ܘܓܰܠܝܳܐ ܗܝ ܗܳܕܐ ܕܝܳܪܬܽܘܬܶܗ ܕܡܳܪܝܳܐ ܒܢܰܝܴ̈ܐ ܐܷܢܘܢ. ܘܶܐܢ ܒܢܰܝܴ̈ܐ ܚܢܰܢ ܐܱܝܟ ܕܰܐܠܶܦ ܦܰܘܠܽܘܣ. ܐܴܦ ܝܳܪ̈ܬܶܐ ܕܰܐܠܗܐ ܒܝܰܕ ܝܶܫܘܥ ܡܫܺܝܚܳܐ (ܓܠܛܝ̈ܐ ܕ: ܙ). ܛܥܳܬ ܐܷܢܘܢ ܠܗܳܠܶܝܢ܆ ܕܠܰܘ ܠܘܳܬ ܢܺܝܫܳܐ ܗܳܢܐ ܚܳܐܱܪ ܣܽܘܟܳܠܶܗ ܕܦܶܬܓܳܡܳܐ. ܡܳܐ ܓܶܝܪ ܕܰܒܛܶܠ ܟܽܠ ܪܺܝܫ ܘܟܽܠ ܫܽܘܠܛܳܢ ܘܟܽܠ ܚܺܝܠ܆ ܘܠܰܝܬ ܡܶܣܬܰܓܕܳܢܳܐ ܐܠܐ ܐܷܢ ܚܰܕ. ܡܶܟܺܝܠ ܠܶܗ ܦܳܠܚܺܝܢ ܘܣܳܓܕܺܝܢ ܟܽܠܗܽܘܢ ܡܠܺܝ̈ܠܐܷ. ܘܠܰܘ ܥܰܠ ܕܟܽܠ ܣܳܓܕܺܝܢ ܟܽܠܗܽܘܢ ܚܳܝܺܝܢ܆ ܐܠܐ ܒܢܱ̈ܝ ܓܢܽܘܢܳܐ ܗܳܘܶܝܢ ܒܢܱ̈ܝ ܝܳܪܬܽܘܬܶܗ ܟܕ ܡܶܬܒܰܣܡܺܝܢ. ܘܗܳܠܶܝܢ ܕܶܝܢ ܐܚܪ̈ܳܢܶܐ ܡܰܘܕܶܝܢ ܘܣܳܓܕܺܝܢ ܠܶܗ ܡܶܢ ܕܶܚܠܬܳܐ. ܒܗܳܝ ܕܚܰܕ ܗܽܘ ܫܽܘܠܛܳܢܳܐ ܘܰܚܕܳܐ ܪܺܝܫܳܢܽܘܬܳܐ ܡܶܫܬܰܠܛܳܐ ܥܰܠ ܟܽܠ ܕܠܶܗ ܫܽܘܒܚܳܐ ܐܰܡܺܝܢ܀
ܡܙܡܘܪܐ ܕܬܡܢܝܢ ܘܬܠܬܐ
ܥܰܠ ܩܪܳܒܳܐ ܕܰܗܘܳܐ ܠܥܰܡ̈ܡܶܐ ܥܰܡ ܕܰܘܺܝܕ. ܘܥܰܠ ܩܪܳܒܳܐ ܕܗܳܘܶܐ ܠܚܰܝ̈ܠܰܘܳܬܳܐ ܕܕܰܠܩܽܘܒܠܐܴ ܥܰܡ ܩܰܕܺܝ̈ܫܐ ܒܟܽܠܙܒܰܢ.
ܟܰܕ ܒܟܽܠܙܒܰܢ ܩܳܪܶܐ ܠܐܱܠܗܳܐ ܛܽܘܒܬܳܢܳܐ ܕܰܘܝܕ ܕܢܺܐܬܶܐ ܠܥܽܘܕܪܳܢܶܗ: ܬܽܘܒ ܐܴܦ ܡܽܘܫܶܐ ܒܰܥܝܳܕܶܗ ܠܬܰܟܬܽܘܫܳܐ ܪܰܒܳܐ ܕܰܩܪ̈ܳܒܶܐ ܡܙܰܡܶܢ ܠܶܗ. ܠܰܘ ܓܶܝܪ ܚܰܕ ܥܰܡܳܐ ܐܷܬܬܙܺܝܥ ܥܠܰܘܗܝ ܠܰܩܪܳܒܳܐ: ܐܠܐ ܟܽܠܗܽܘܢ ܥܰܡ̈ܡܶܐ ܥܽܘܪ̈ܠܐܷ ܗܳܢܘܢ ܕܰܚܕܺܝܪܺܝܢ ܗܘܰܘ ܠܐܱܪܥܳܐ ܩܰܕܺܝܫܬܳܐ܆ ܝܰܗܒ ܝܰܡܺܝܢܳܐ ܕܫܰܘܬܳܦܽܘܬܳܐ ܠܰܚ̈ܕܳܕܶܐ. ܘܶܐܬܛܰܝܰܒܘ ܠܒܶܝܬ ܟܢܽܘܫܝܳܐ ܕܢܶܥܒܕܽܘܢ ܩܪܳܒܳܐ ܥܰܠ ܐܘܪܺܫܠܶܡ. ܘܰܩܪܰܘ ܠܰܚ̈ܕܳܕܶܐ ܒܚܰܕ ܨܶܒܝܳܢܳܐ ܒܺܝܫܳܐ: ܐܱܕܽܘܡܳܝ̈ܐ ܘܥܰܪ̈ܰܒܳܝܶܐ ܘܡܽܘ̈ܐܴܒܳܝܶܐ ܘܓܳܕܪ̈ܳܝܶܐ ܘܥܰܡܽܘܢܳܝ̈ܐ ܘܥܰܡܠܺܝܩܳܝ̈ܐ ܘܰܦܠܶܫܬܳܝ̈ܐ ܘܰܒܢܱ̈ܝ ܨܽܘܪ ܟܰܕ ܐܴܦ ܠܐܴܬܽܘܪ̈ܳܝܶܐ ܕܥܳܡܪܺܝܢ ܒܣܽܘܪܺܝܰܐ ܩܪܰܘ ܠܰܡܥܰܕܳܪܽܘ ܐܷܢܘܢ. ܟܽܠܗܘܢ ܗܳܠܝܢ ܣܳܢܶܝܢ ܗܘܰܘ ܠܗ ܠܥܰܡܳܐ ܩܰܕܺܝܫܳܐ. ܠܰܘ ܒܰܠܚܽܘܕ ܡܛܠ ܕܺܝܪܶܬ ܠܐܱܪܥܳܐ ܕܛܳܒܳܐ ܡܶܢ ܕܺܝܠܗܽܘܢ܆ ܐܠܐ ܥܰܠ ܕܠܐ ܣܳܓܶܕ ܗܘܳܐ ܐܱܟܘܳܬܗܘܢ ܠܰܦܬܰܟܪ̈ܶܐ ܘܰܠܕܶܚ̈ܠܳܬܳܐ ܣܪ̈ܺܝܩܳܬܳܐ. ܘܟܕ ܛܽܘܒܳܢܳܐ ܕܰܘܝܕ ܒܛܽܘܝܳܒܳܐ ܕܗܳܠܝܢ ܚܳܐܱܪ ܗܘܳܐ ܕܥܰܫܺܝܢ ܗܽܘ ܡܶܢܶܗ: ܠܘܳܬ ܐܱܝܢܳܐ ܕܰܐܠܗܳܐ ܐܷܬܦܢܺܝ ܘܶܐܡܰܪ:
ܐܱܠܗܳܐ ܡܰܢܽܘ ܕܕܳܡܶܐ ܠܳܟ. ܠܐܴ ܬܶܫܬܽܘܩ ܘܠܐܴ ܬܶܫܠܐܷ ܐܱܠܳܗܳܐ: ܡܶܛܠ ܕܗܳܐ ܒܥܶܠܕ̈ܒܳܒܰܝܟ ܡܶܬܪܰܓܫܺܝܢ. ܘܣܳܢܱ̈ܐܝܟ ܐܱܪܺܝܡܘ ܪܺܝܫܳܐ ܥܰܠ ܥܰܡܳܟ: ܒܚܳܪܥܽܘܬܗܽܘܢ ܚܫܰܠܘ ܐܪܳܙܳܐ. ܘܶܐܬܡܰܠܰܟܘ ܥܰܠ ܩܰܕܺܝ̈ܫܰܝܟ ܘܶܐܡܰܪܘ܆ ܕܬܰܘ ܢܰܘܒܶܕ ܐܷܢܘܢ ܡܶܢ ܥܰܡܳܐ. ܘܠܐ ܢܶܬܕܟܰܪ ܬܘܒ ܫܡܶܗ ܕܺܝܣܪܳܐܝܠ. ܠܗܳܢܳܐ ܩܪܳܒܳܐ ܠܰܝܬ ܕܕܳܡܶܐ ܠܳܟ ܒܚܰܝܠܐܴ ܕܢܶܦܽܘܩ ܠܬܰܟܬܽܘܫܳܐ. ܡܶܛܠ ܕܠܰܘ ܥܠܰܝܢ ܒܰܠܚܽܘܕ ܓܳܙܡܺܝܢ ܒܥܶܠܕ̈ܒܳܒܶܐ. ܘܶܐܠܐ ܘܰܥܠܰܝܟ ܣܺܝ̈ܡܳܢ ܐܱܦܰܝ̈ܗܽܘܢ ܠܡܰܡܪܳܚܽܘ. ܘܳܐܦ ܬܠܰܘ ܪܺܝܫܗܽܘܢ ܠܡܰܐܒܳܫܽܘ ܠܥܰܡܳܟ. ܟܰܕ ܫܩܺܝܠܺܝܢ ܦܬܰܟܪ̈ܰܝܗܘܢ ܘܰܬܟܺܝܠܺܝܢ ܥܰܠ ܓܠܺܝ̈ܦܰܝܗܽܘܢ. ܐܷܠܐ ܠܽܘܩܒܰܠ ܗܳܠܝܢ܆ ܐܱܢܬ ܦܽܘܩ ܒܚܰܝܠܐܴ ܘܶܐܬܟܰܬܫ ܥܰܡܗܘܢ. ܡܶܛܠ ܕܰܢܒܺܝܐ ܐܡ̣ܪ: ܕܥܰܠ ܩܰܕܺܝ̈ܫܶܐ ܐܷܬܡܰܠܰܟܘ. ܕܥܰܠ ܥܺܕܬܶܗ ܕܰܐܠܗܳܐ ܡܳܚܶܝܢ ܚܰܝ̈ܠܰܘܳܬܳܐ ܕܕܰܠܩܽܘܒܠܐܴ ܠܡܶܬܟܰܬܳܫܽܘ. ܐܱܟܙܢܳܐ ܕܗܳܝܕܶܝܢ ܟܢܺܝܫܺܝܢ ܗܘܰܘ ܥܽܘܪ̈ܠܐܷ ܠܡܶܚܪܰܒ ܘܰܠܡܰܘܒܳܕܽܘ ܠܰܓܙܺܝܪ̈ܶܐ. ܗܳܟܰܢܳܐ ܐܴܦ ܚܰܝܠܰܘ̈ܬܳܐ ܡܶܬܝܰܕܥ̈ܢܶܐ ܟܪܺܝܟܺܝܢ ܐܝ̣ܕܳܐ ܘܡܶܬܡܰܠܟܺܝܢ ܥܰܠ ܩܰܕܺܝ̈ܫܶܐ ܠܡܰܘܒܳܕܽܘ ܐܷܢܘܢ ܡܶܢ ܝܳܪܬܽܘܬܳܐ ܩܰܕܺܝܫܬܳܐ ܕܩܰܒܶܠܘ ܒܝܰܕ ܥܡܳܕܳܐ ܘܒܰܙܒܰܢ ܡܰܢ ܒܚܰܢ̈ܦܶܐ ܟܳܡܢܺܝܢ. ܘܰܡܙܺܝܥܺܝܢ ܩܪ̈ܳܒܶܐ ܥܰܠ ܝܺܣܪܳܐܝܠ ܕܰܐܠܗܳܐ. ܘܒܰܙܒܰܢ ܟܡܶܢܘ ܒܝܽܘܕܳܝܽܘܬܳܐ܆ ܘܰܐܩܺܝܡ ܐܘܠܨܳܢ̈ܐ ܥܰܠ ܫܠܺܝ̈ܚܶܐ ܒܳܬܰܪ ܕܶܝܢ ܝܽܘܕܳܝ̈ܐ ܘܚܰܢ̈ܦܶܐ. ܟܡܶܢܘ ܘܰܚܫܰܠܘ ܐܪܳܙܳܐ ܥܰܡ ܐܱܪܺܝܽܘܣ ܘܥܰܡ ܒܢܱ̈ܝ ܓܰܒܶܗ. ܘܬܘܒ ܘܰܒܦܰܘܠܐܷ ܘܰܫܡܺܝܫܛܳܝܳܐ ܘܒܰܐܪܛܺܝܡܽܘܢ ܘܰܒܒܰܪܕܰܝܨܳܢ ܘܰܒܡܰܐܢܺܝ ܘܰܒܦܽܘܛܺܝܡܽܘܢ ܘܰܣܒܺܝܠܺܝܳܘܣ ܠܽܘܒܳܝܳܐ ܘܒܽܘܠܛܺܝܢܳܘܣ ܘܰܒܡܰܪܩܺܝܳܘܢ ܘܝܽܘܠܺܝܢܳܘܣ ܘܒܶܐܘܛܽܘܟܶܐ ܗܳܠܝܢ ܟܽܠܗܘܢ ܥܰܡ̈ܡܶܐ ܒܰܪܒܪ̈ܳܝܶܐ ܕܡܶܬܬܰܥܒܕܺܝܢ ܒܟܽܠܙܒܰܢ ܡܶܢ ܪ̈ܽܘܚܶܐ ܕܕܰܠܩܽܘܒܠܐܴ. ܘܗܳܠܶܝܢ ܩܳܝܡܺܝܢ ܠܽܘܩܒܰܠ ܥܺܕܬܶܗ ܕܰܐܠܗܳܐ ܒܥܰܡܳܐ ܩܰܕܺܝܫܳܐ ܘܚܳܫܠܺܝܢ ܐܪܳܙܳܐ ܘܳܐܡܪܺܝܢ: ܕܬܰܘ ܢܰܘܒܶܕ ܐܷܢܘܢ ܡܶܢ ܥܰܡܳܐ. ܘܠܐܴ ܢܶܬܕܟܰܪ ܬܘܒ ܫܡܶܗ ܕܺܝܣܪܳܐܝܠ. ܐܡ̣ܪ ܓܶܝܪ ܢܒܺܝܳܐ
ܡܶܛܠ ܕܶܐܬܪܰܥܺܝܘ ܒܠܶܒܗܘܢ ܐܱܟܚܕܳܐ. ܘܰܥܠܰܝܟ ܐܱܩܺܝܡܘ ܩܝܳܡܳܐ: ܡܰܫܟܢܳܐ ܕܰܐܕܽܘܡ ܘܰܕܥܰܪ̈ܰܒܳܝܶܐ. ܗܳܠܶܝܢ ܓܶܝܪ ܡܶܢܩܕܺܝܡ ܐܱܚ̈ܐ ܗܘܰܘ ܕܰܒܢܱ̈ܝ ܝܺܣܪܳܐܝܠ. ܥܺܝܣܽܘ ܓܶܝܪ ܕܺܐܝܬܰܘܗܝ ܐܱܕܽܘܡ ܒܝܰܕ ܡܰܪܒܥܳܐ ܐܷܬܒܛܶܢ ܘܶܐܬܺܝܠܶܕ ܥܰܡ ܝܰܥܩܽܘܒ. ܕܰܐܝܟ ܗܳܟܰܢܳܐ ܗܘܰܘ ܐܷܪ̈ܺܝܛܺܝܩܽܘ. ܥܰܡܰܢ ܩܰܒܶܠܘ ܪܽܘܫܡܳܐ ܕܡܰܥܡܽܘܕܺܝܬܳܐ ܪ̈ܺܝܫܳܢܰܝܗܘܢ ܡܰܘܠܳܕܳܐ ܕܣܺܝܡܰܬ ܒܢܰܝܴ̈ܐ. ܐܠܐ ܕܥܺܝܣܽܘ ܐܱܣܠܺܝ ܠܰܓܙܽܘܪܬܳܐ ܘܰܐܩܶܦ ܠܶܗ ܠܥܽܘܪܠܽܘܬܳܐ. ܗܳܟܰܢܳܐ ܐܳܦ ܗܶܪ̈ܺܝܛܺܝܩܽܘ ܫܠܰܚܘ ܠܛܰܝܒܽܘܬܳܐ ܕܣܺܝܡܰܬ ܒܢܰܝܴ̈ܐ ܗܳܝ ܕܰܠܒܶܫܘ ܒܰܥܡܳܕܳܐ. ܘܗܳܠܶܝܢ ܒܟܽܠܙܒܰܢ ܐܴܡܪܺܝܢ ܬܘ ܢܰܘܒܶܕ ܐܷܢܘܢ ܡܶܢ ܥܰܡܳܐ. ܕܰܐܝܟ ܗܳܟܰܢܳܐ ܩܳܡܘ ܐܱܪ̈ܝܰܐܢܽܘ ܐܱܪܒܥܺܝܢ ܘܬܰܪܬܶܝܢ ܫܢܻ̈ܝܢ ܒܬܰܟܬܽܘܫ̈ܐ ܕܩܷ̈ܛܠܐܷ ܘܕܰܕܡܳܐ ܘܒܰܐܟܣܽܘܪ̈ܝܰܐܣ ܠܽܘܩܒܰܠ ܝܺܣܪܳܐܝܠ ܕܰܐܠܗܳܐ. ܟܰܕ ܝܳܨܦܺܝܢ ܗܘܰܘ ܠܡܰܘܒܳܕܽܘ ܠܰܬܪ̈ܺܝܨܰܝ ܫܽܘܒܚܳܐ. ܘܗܳܟܰܢܳܐ ܩܳܡܘ ܒܰܐܓܽܘܢܳܐ ܕܰܕܡܳܐ ܢܶܣܛܽܘܪ̈ܝܰܢܽܘ ܘܰܚܫܰܠܘ ܐܪܳܙܳܐ ܡܶܢ ܫܢܰܬ ܬܠܳܬܺܝܢ ܕܡܰܠܟܽܘܬܶܗ ܕܡܰܠܟܳܐ ܬܶܐܘܳܕܳܘܣܺܝܳܘܣ ܘܰܥܕܰܡܳܐ ܠܫܰܢܬܳܐ ܗܳܕܐ ܕܺܐܝܬܶܝܗ̇ ܫܢܰܬ ܬܡܳܢܶܡܳܐܐ ܘܚܰܡܫܺܝܢ ܘܰܬܠܳܬ. ܟܰܕ ܐܴܦ ܗܶܢܘܢ ܐܴܡܪܺܝܢ܇ ܘܒܳܬܰܪ ܕܶܝܢ ܒܢܱ̈ܝ ܥܺܝܣܽܘ ܡܰܝܬܶܐ ܫܡܳܐ ܕܥܰܡ̈ܡܶܐ ܐܚܪ̈ܳܢܶܐ. ܘܳܐܡܪܺܝܢ:
ܘܰܕܡܽܘܐܳܒ ܘܰܕܓܳܕܪ̈ܳܝܶܐ: ܬܚܽܘܡܳܐ ܕܥܰܡܽܘܢ ܘܰܕܥܰܡܠܺܝܩ. ܘܕܰܦܠܶܫܬ ܥܰܡ ܝܳܬܒܱ̈ܝ ܨܽܘܪ: ܐܴܦ ܐܴܬܽܘܪܳܝܳܐ ܐܷܫܬܘܺܝ ܥܰܡܗܘܢ. ܘܰܗܘܰܘ ܥܽܘܕܪܳܢܳܐ ܠܰܒܢܱ̈ܝ ܠܽܘܛ. ܗܳܠܶܝܢ ܓܶܝܪ ܐܴܦܶܢ ܡܫܰܚܠܦܺܝܢ ܒܰܫܡܳܗܰܝ̈ܗܘܢ ܐܷܠܐ ܚܰܕ ܨܶܒܝܳܢܳܐ ܒܺܝܫܳܐ ܩܢܶܝܢ ܗܘܰܘ ܠܡܰܘܒܳܕܽܘ ܠܺܝܣܪܳܐܝܠ. ܘܡܶܛܠܗܳܕܐ ܠܽܘܩܒܰܠܗܘܢ ܡܶܙܕܰܝܰܢ ܢܒܺܝܳܐ ܟܰܕ ܡܶܢ ܪܽܘܚܳܐ ܡܩܰܒܶܠ ܚܰܝܠܐܴ ܘܳܐܡܰܪ: ܕܢܶܠܽܘܛ ܐܢܘܢ ܘܢܰܘܒܶܕ ܐܢܽܘܢ ܟܰܕ ܐܡ̇ܪ:
ܥܒܶܕ ܠܗܽܘܢ ܐܱܝܟ ܕܰܠܡܶܕܝܰܢ ܘܰܐܝܟ ܕܰܠܣܺܝܣܪܳܐ. ܘܰܐܝܟ ܕܰܠܢܳܒܝܰܢ ܒܢܰܚܠܐܴ ܕܩܺܝܫܽܘܢ. ܒܐܪ̈ܳܙܶܐ ܥܺܕܬܳܢܳܝ̈ܐ ܗܳܠܝܢ ܡܶܬܪܰܕܦܺܝܢ ܗܘܰܘ ܡܶܢ ܥܺܕܬܶܗ ܕܰܐܠܗܳܐ. ܘܰܠܗܳܠܶܝܢ ܪܕܰܦܘ ܐܷܢܘܢ ܡܕܰܒܪ̈ܳܢܶܐ ܕܥܰܡܳܐ. ܠܣܺܝܣܪܳܐ ܡܰܢ ܪܳܕܦܳܐ ܗܘܳܬ ܒܰܨܠܽܘܬܳܐ ܕܶܒܽܘܪܰܐ ܢܒܺܝܬܳܐ. ܗܳܝ ܕܰܬܚܶܝܬ ܕܶܩܠܐܴ ܝܳܬܒܳܐ ܗܘܳܬ. ܐܱܟܡܳܐ ܕܳܐܦ ܥܺܕܬܳܐ ܒܛܶܠܳܠܶܗ ܕܰܡܫܺܝܚܳܐ ܝܳܬܒܳܐ. ܡܶܛܠ ܕܰܒܗܳܢܳܐ ܐܪܳܙܳܐ ܢܶܦܩܰܬ. ܘܕܶܒܽܘܪܰܐ ܘܒܳܪܳܩ ܥܰܠ ܣܺܝܣܪܳܐ ܪܰܒܚܰܝܠܐܴ ܕܢܳܒܺܝܢ. ܘܰܠܡܰܪ̈ܟܒܳܬܶܗ ܕܦܰܪܙܠܐܴ ܫܚܰܩ ܚܰܝܠܐܴ ܕܰܐܠܗܳܐ. ܕܰܢܦܰܩ ܥܰܡܶܗ ܠܰܩܪܳܒܳܐ. ܠܣܺܝܣܪܳܐ ܕܶܝܢ ܐܱܫܠܶܡ ܒܺܐܝ̈ܕܰܝ ܥܢܳܐܝ̣ܠ܆ ܘܰܠܡܰܫܪܺܝܬܳܐ ܚܪܰܒ ܒܺܐܝ̈ܕܰܝ ܓܶܕܥܽܘܢ ܓܰܢ̱ܒܳܪܳܐ ܕܺܝܣܪܳܐܝܠ. ܘܠܰܘ ܒܥܽܘܫܢܳܐ ܕܙܰܝܢܳܐ ܐܷܬܟܰܬܰܫ ܥܰܡܗܽܘܢ. ܐܠܐ ܒܢܽܘܗܪܳܐ ܕܠܰܡܦܺܐܕ̈ܐ. ܘܰܒܩܳܠܐ ܕܩܰܪ̈ܢܳܬܳܐ: ܡܰܫܪܺܝܬܳܐ ܡܬܺܝܠܰܬ ܒܙܳܢܝܽܘܬܳܐ ܡܶܬܚܰܪܒܳܐ ܗܘܳܬ ܘܡܶܬܡܰܟܟܳܐ. ܕܗܶܢܘܢ ܗܳܠܶܝܢ ܬܪܶܝܢ ܥܰܡ̈ܡܶܐ ܒܢܰܚܠܐܴ ܕܩܺܝܫܽܘܢ. ܟܢܰܥܢܳܝ̈ܐ ܘܒܰܐܪܥܳܐ ܕܥܺܝܢܕܽܘܪ ܡܶܕܝܰܢܳܝ̈ܐ: ܐܷܬܚܪܶܒܘ ܘܶܐܒܰܕܘ ܐܱܝܟ ܕܶܐܡܰܪ ܢܒܺܝܐ:
ܕܶܐܬܚܪܶܒܘ ܒܥܺܝܢܕܽܘܪ ܘܰܗܘܰܘ ܙܶܒܠܐܴ ܒܰܐܪܥܳܐ. ܗܳܕܶܐ ܓܶܝܪ ܡܶܬܡܰܬܠܐܴ ܒܰܐܪܥܳܐ ܕܰܚܛܺܝܬܳܐ ܘܰܐܪܥܳܐ ܕܙܶܒܠܐܴ ܡܶܬܦܰܫܩܳܐ. ܒܰܫܪܳܪܳܐ ܓܶܝܪ ܕܰܠܙܶܒܠܐܴ ܘܠܰܣܝܳܢܳܐ ܫܳܪܟܺܝܢ ܥܽܘܬܳܕܶܝܗ̇ ܕܰܚܛܺܝܬܳܐ. ܘܡܶܛܠܗܳܕܐ ܒܰܐܬܪܳܐ ܗܰܘ ܕܡܶܬܦܰܠܚܺܝܢ ܒܶܗ ܚܛܳܗ̈ܐ ܡܶܬܬܕܺܝܢܺܝܢ ܒܶܗ ܚܰܛܳܝ̈ܐ. ܘܬܽܘܒ ܥܳܐܷܦ ܡܶܠܬܶܗ ܢܒܺܝܐ ܘܳܐܡܰܪ܆
ܚܪܽܘܒ ܐܷܢܘܢ ܘܰܐܘܒܶܕ ܐܷܢܘܢ: ܐܝܟ ܕܰܠܥܽܘܪܺܝܒ ܘܰܐܝܟ ܙܺܝܒ ܘܰܐܝܟ ܙܳܒܳܚ ܘܰܐܝܟ ܨܰܠܡܢܰܥ. ܗܳܠܝܢ ܓܶܝܪ ܐܱܪܒܥܳܐ ܡܰܠܟ̈ܐ ܗܘܰܘ ܕܡܶܕܝܰܢ܆ ܕܰܒܗܰܘ ܙܰܒܢܳܐ ܕܶܐܬܚܰܪܒܰܬ ܡܰܫܪܺܝܬܳܐ ܕܡܶܕܝܰܢ ܐܴܦ ܗܶܢܘܢ ܢܦܰܠܘ ܗܘܰܘ ܒܚܰܪܒܳܐ. ܕܰܒܝܰܕ ܗܳܠܝܢ ܝܳܠܦܺܝܢܰܢ ܕܺܐܝܬܰܝܗܘܢ ܐܪܒܥܳܐ ܚܰܫ̈ܐ. ܗܳܠܝܢ ܕܰܒܗܘܢ ܡܶܬܓܰܢ̱ܒܪܳܐ ܙܳܢܝܽܘܬܳܐ ܥܰܠ ܦܰܓܪܳܐ. ܚܰܫܳܐ ܓܶܝܪ ܩܰܕܡܳܝܳܐ ܚܰܫܳܐ ܠܰܥܒܽܘܬܳܐ ܕܡܶܐܟ̈ܠܳܬܳܐ: ܐܚܪܺܢܳܐ ܕܶܝܢ ܚܰܫܳܐ ܕܪܰܘܳܝܽܘܬܳܐ: ܘܰܐܚܪܺܢܳܐ ܫܶܢܬܳܐ: ܘܰܐܚܪܺܢܳܐ ܙܰܠܺܝܠܽܘܬܳܐ ܘܥܶܢܝܳܢܳܐ ܕܥܰܡ ܢܶܫ̈ܐ. ܠܗܳܠܶܝܢ ܐܱܪܒܥܳܐ ܚܰܫ̈ܐ ܡܶܫܟܰܚ ܐܢܳܫ ܠܡܶܙܟܳܐ. ܐܝܟ ܕܳܐܦ ܓܶܕܥܽܘܢ ܙܟܳܐ ܠܡܰܠܟ̈ܐ ܕܡܶܕܝܰܢ. ܐܷܡܰܬܝ ܕܒܰܓܪܺܝܨܬܳܐ ܕܰܣܥܳܪ̈ܶܐ ܢܶܗܘܶܐ ܡܬܰܪܣܶܐ ܢܰܦܫܶܗ. ܗܳܢܐ ܓܶܝܪ ܒܰܙܢܳܐ ܕܠܰܚܡܳܐ ܚܙܳܐ ܗܰܘ ܓܰܢ̱ܒܳܪܳܐ ܕܡܶܬܗܰܦܰܟ ܡܶܢ ܡܳܪܝܳܐ ܒܡܰܫܪܺܝܬܳܐ ܕܡܶܕܝܰܢ: ܘܰܠܗܳܠܶܝܢ ܚܰܫ̈ܐ ܟܰܕ ܙܳܟܶܐ ܐܢܳܫ܆ ܐܴܦ ܠܐܱܚܪ̈ܳܢܶܐ ܒܳܬܰܪܗܘܢ ܡܫܰܦܶܠ ܘܚܳܪܶܒ.
ܘܟܽܠܗܘܢ ܫܰܠܺܝܛܳܢܰܝ̈ܗܘܢ ܕܶܐܡܰܪܘ: ܕܢܺܐܪܰܬ ܠܰܢ ܩܪܺܝܬܶܗ ܕܰܐܠܳܗܰܐ. ܗܳܠܝܢ ܓܶܝܪ ܥܰܠ ܐܘܪܺܫܠܶܡ ܡܶܬܡܰܠܟܺܝܢ ܗܘܰܘ ܗܳܟܰܢܳܐ. ܥܰܠ ܕܒܳܗ̇ ܡܰܡܠܶܟ ܗܘܳܐ ܕܰܘܝܕ. ܐܷܠܐ ܒܥܶܠܕ̈ܒܳܒܶܐ ܡܶܬܝܰܕܥ̈ܢܶܐ ܥܰܠ ܢܰܦܫܳܐ ܗܳܝ ܕܺܐܝܬܶܝܗ̇ ܨܽܘܪܬܳܐ ܕܡܰܠܟܳܐ ܪܰܒܳܐ ܗܳܟܰܢܳܐ ܡܶܬܚܰܫܒܺܝܢ. ܘܰܒܟܽܠܙܒܰܢ ܒܳܥܶܝܢ ܠܡܺܐܪܰܬ ܩܪܺܝܬܶܗ ܕܰܐܠܗܳܐ. ܥܰܠܗܳܝ ܡܶܬܚܰܡܰܬ ܢܒܺܝܐ ܘܠܐܴܛ ܠܗܽܘܢ ܘܳܐܡܰܪ܆
ܐܱܠܗܳܐ ܥܒܶܕ ܐܷܢܘܢ ܐܱܝܟ ܓܺܝܓܠܐܴ ܘܰܐܝܟ ܓܶܠܐܴ ܩܕܳܡ ܪܽܘܚܳܐ. ܓܺܝܓܠܐܴ ܐܝ̣ܬܶܝܗ̇ ܗܳܝ ܕܰܒܪܺܝܫ ܟܽܘܒܳܐ. ܕܗܺܝ ܗܳܕܶܐ ܡܳܐ ܕܫܳܡܶܢ ܙܰܪܥܶܗ ܕܟܽܘܒܳܐ. ܫܳܩܠܐܴ ܠܶܗ ܪܽܘܚܳܐ ܘܠܐ ܫܳܒܩܳܐ ܠܶܗ ܠܡܶܫܟܰܢ. ܗܳܝ ܕܰܒܪܺܝܫ ܟܽܘܒܳܐ ܕܥܽܘܙܢܝ̈ܐ ܡܥܳܕ ܠܡܺܐܥܳܐ. ܐܠܐ ܘܡܳܐ ܕܫܳܟܢܳܐ ܒܓܽܘܢܝܳܐ ܡܶܕܶܡ ܫܳܪܟܳܐ. ܘܶܐܢ ܗܽܘ ܕܡܶܫܬܟܰܚ ܡܶܕܶܡ ܕܠܳܒܶܟ ܠܗ̇܆ ܗܺܝ ܓܶܝܪ ܡܶܢܳܗ̇ ܘܠܗ̇ ܠܐ ܡܶܫܟܚܳܐ ܕܶܝܢ ܠܡܶܫܟܰܬ ܘܰܠܡܶܫܠܐܴ. ܕܰܐܝܟ ܗܳܟܰܢܳܐ ܓܶܝܪ ܐܝ̣ܬܶܝܗ̇ ܚܛܺܝܬܳܐ. ܕܰܟܡܳܐ ܐܢ ܡܶܬܚܰܦܰܛ ܗܰܘ ܕܰܠܩܽܘܒܠܐܴ ܡܰܠܶܦ ܕܬܶܗܘܶܐ. ܐܠܐ ܩܰܠܺܝܠܬܳܐ ܗ̄ܝ ܘܰܕܠܐ ܥܶܩܳܪܳܐ ܗ̄ܝ ܘܰܕܠܐ ܚܰܝܠܐ ܗ̄ܝ ܘܟܰܕ ܗܺܝ ܡܰܚܫܰܒܬܳܐ ܕܰܚܛܺܝܬܳܐ ܒܰܕܡܽܘܬܳܐ ܕܓܺܝܓܠܐܴ ܩܰܠܺܝܠܬܳܐ ܩܳܛܝܳܐ ܘܡܶܬܟܰܪܟܳܐ ܥܰܠ ܬܰܪܥܺܝܬܳܐ ܙܰܪܥܳܐ ܕܰܐܒܕܳܢܳܐ ܥܰܡܳܗ̇ ܛܥܺܝܢܳܐ. ܒܰܕܡܽܘܬܳܐ ܕܓܺܝܓܠܐܴ ܕܰܡܡܰܨܰܥ ܘܣܺܝܡ ܒܰܝܢܳܬ ܨܶܪ̈ܢܶܝܗ̇ ܡܚܺܝ̈ܠܐ. ܙܰܪܥܳܐ ܐ̮ܘܟܳܡܳܐ ܗܰܘ ܕܥܽܘܙܰܢܝ̈ܐ. ܘܰܐܝܟܰܢܳܐ ܕܗܰܘ ܟܽܠ ܐܱܝܟܳܐ ܕܢܳܦܶܠ ܟܽܘ̈ܒܶܐ ܝܳܥܶܝܢ. ܗܳܟܰܢܳܐ ܟܽܠ ܐܱܝܟܳܐ ܕܡܶܬܟܰܪܟܳܐ ܓܺܝܓܠܐܴ ܘܡܶܬܬܰܥܒܕܳܐ ܡܶܢ ܪ̈ܽܘܚܶܐ ܒܺܝ̈ܫܳܬܳܐ܆ ܕܰܠܩܽܘܒܠܐܴ ܐܝ̣ܬ ܥܰܡܳܗ̇ ܙܰܪܥܳܐ ܕܡܰܘܥܶܐ ܚܛܺܝܬܳܐ. ܘܳܐܦ ܓܶܠܐܴ ܬܘܒ ܒܳܬܰܪ ܗܳܕܶܐ ܡܚܺܝܠ ܩܕܳܡ ܪܽܘܚܳܐ. ܕܒܰܬܪ̈ܰܝܗܽܘܢ ܗܳܠܶܝܢ ܚܰܘܪ̈ܶܐ ܚܛܺܝܬܳܐ ܡܶܬܦܰܚܡܳܐ. ܡܳܐ ܕܢܳܦܶܩ ܠܩܽܘܒܠܳܗ̇ ܡܰܫܒܳܐ ܕܪܽܘܚܳܐ ܐܱܠܳܗܳܝܬܳܐ. ܘܬܘܒ ܡܰܘܣܶܦ ܡܶܬܠܰܚܰܡ ܠܗܽܘܢ ܠܶܫܳܢܳܐ ܕܰܢܒܺܝܽܘܬܳܐ ܘܳܐܡܰܪ:
ܘܰܐܝܟ ܢܽܘܪܳܐ ܕܡܶܫܬܰܒܩܳܐ ܒܥܳܒܳܐ. ܘܰܐܝܟ ܫܰܠܗܶܒܺܝܬܳܐ ܕܡܰܘܩܕܳܐ ܛܽܘܪ̈ܶܐ. ܗܳܟܰܢܳܐ ܪܕܽܘܦ ܐܢܽܘܢ ܒܥܰܠܥܴ̈ܠܰܝܟ. ܢܽܘܪܳܐ ܕܡܶܫܬܰܒܩܳܐ ܒܥܳܒܳܐ܆ ܠܰܘ ܠܗܽܘܢ ܩܳܪܶܐ ܪܽܘܚܳܐ. ܐܠܐ ܗܶܢܘܢ ܐܝܟ ܥܳܒܳܐ ܣܳܡ ܐܢܘܢ. ܕܰܐܝܟܰܢܳܐ ܕܰܡܓܰܡܪܳܐ ܢܽܘܪܳܐ ܠܥܳܒܳܐ ܕܩܰܝ̈ܣܐ ܕܠܐ ܦܺܐܪ̈ܐ. ܘܫܰܠܗܶܒܺܝܬܳܐ ܐܴܟܠܐܴ ܚܰܒܬܳܐ ܥܰܠ ܛܽܘܪ̈ܐ ܡܳܐ ܕܡܶܫܬܰܒܩܳܐ. ܗܳܟܰܢܳܐ ܠܗܳܠܝܢ ܒܥܶܠܕ̈ܒܳܒܶܐ ܕܚܰܝܱ̈ܝܢ. ܡܣܺܝܦܳܐ ܘܰܡܓܰܡܪܳܐ ܢܽܘܪܳܐ ܕܪܽܘܓܙܳܐ. ܠܰܘ ܒܢܽܘܪܳܐ ܕܡܶܢ ܐܱܪܥܳܐ. ܐܠܐ ܒܥܰܠܥܴ̈ܠܰܝܟ.
ܘܰܒܩܰܪ̈ܚܰܝܟ ܕܰܠܰܚ ܐܢܘܢ. ܩܰܪ̈ܚܶܐ ܕܶܝܢ ܐܝ̣ܬܝܗܽܘܢ ܒܝܰܡܳܐ ܘܰܒܝܰܒܫܳܐ. ܗܳܠܝܢ ܕܶܝܢ ܕܗܳܘܶܝܢ ܒܝܰܡܳܐ. ܡܳܐ ܕܫܳܬܩܳܐ ܕܶܝܢ ܪܽܘܚܳܐ ܘܠܐ ܢܳܫܒܳܐ ܒܶܐܠܦ̈ܐ ܒܝܰܘ̈ܡܳܬܳܐ ܚܰܡܺܝ̈ܡܳܬܳܐ ܕܩܰܝܛܳܐ. ܫܳܩܠܺܝܢ ܕܽܘܡܝܳܐ ܡܶܢ ܩܰܪ̈ܚܶܐ ܕܝܰܒܫܳܐ. ܘܡܶܢ ܚܰܝܠܐܴ ܕܢܽܘܪܳܐ ܥܳܛܪܺܝܢ. ܘܒܰܕܡܽܘܬ ܝܰܚܒܽܘܪܳܐ ܕܣܳܠܶܩ ܡܶܢ ܐܬܽܘܢܳܐ ܕܡܶܫܬܓܰܪ ܡܰܣܩܺܝܢ ܡܰܝܴ̈ܐ ܘܙܳܩܦܺܝܢ ܠܗܽܘܢ ܒܳܐܐܱܪ. ܘܰܡܕܰܒܪܳܐ ܠܗܽܘܢ ܪܽܘܚܳܐ ܕܰܡܙܺܝܓܳܐ ܒܢܽܘܪܳܐ ܘܦܳܪܚܺܝܢ ܠܥܶܠ ܡܶܢ ܡܰܝܴ̈ܐ ܕܝܰܡܳܐ. ܘܗܶܢܘܢ ܗܳܠܝܢ ܡܩܺܝܡܺܝܢ ܩܺܝܢܕܽܘܣ ܪܰܒܳܐ ܥܰܠ ܐܷܠܦ̈ܐ ܕܦܳܓܥܺܝܢ. ܐܦ ܗܳܠܝܢ ܬܘܒ ܕܰܒܓܰܘ ܝܰܒܫܳܐ. ܩܰܪ̈ܚܶܐ ܕܶܝܢ ܕܰܐܠܗܳܐ ܡܶܕܶܡ ܐܢܽܘܢ ܕܥܰܣܩܺܝܢ ܒܗܶܝܢ ܠܰܡܦܰܫܳܩܽܘ ܡܶܛܠ ܡܚܺܝܠܽܘܬܳܐ ܕܫܳܡܽܘ̈ܥܶܐ. ܒܗܳܝ ܕܠܰܘ ܟܽܠܢܳܫ ܣܳܦܶܩ ܠܰܡܩܰܒܳܠܽܘ ܣܽܘ̈ܟܳܠܐ ܟܽܠܗܽܘܢ ܕܥܰܠ ܕܺܝܢܳܐ. ܡܶܛܠ ܕܡܳܐ ܕܰܡܫܰܪܶܐ ܕܢܶܬܚܙܶܐ ܕܺܝܢܳܐ ܕܰܐܠܗܳܐ. ܐܝ̣ܬ ܗܘ ܡܶܕܶܡ ܕܠܰܕܡܽܘܬܳܐ ܕܩܰܪ̈ܚܶܐ ܡܶܬܢܣܶܒ. ܘܗܳܟܰܢܳܐ ܒܥܽܘܙܳܐ ܕܢܽܘܪܳܐ ܕܰܫܩܺܝܠ ܠܗ̇ ܚܺܐܦܳܐ ܩܰܠܺܝܠܐܴ ܕܪܽܘܚܳܐ ܕܠܐ ܗܳܦܟܳܐ. ܢܳܦܶܩ ܡܶܢ ܩܕܳܡ ܟܽܘܪܣܝܳܐ ܕܕܰܝܳܢܳܐ ܠܽܘܩܒܰܠ ܪ̈ܰܫܺܝܥܶܐ. ܘܠܽܘܩܒܰܠ ܥܳܒ̈ܕܰܝ ܥܰܘܠܐܴ. ܗܳܠܝܢ ܕܟܰܕ ܢܳܫܒܺܝܢ ܠܽܘܩܒܰܠ ܓܽܘܡܕܳܢܽܘܬܳܐ ܕܗܳܢܘܢ ܕܰܐܡܪܰܚܘ ܥܰܠ ܢܰܦܫܳܐ ܩܪܺܝܬܶܗ ܕܡܰܠܟܳܐ ܪܰܒܳܐ. ܐܱܦ̈ܐ ܠܐ ܡܶܬܟܰܚܕܳܢܝ̈ܬܳܐ ܢܳܦ̈ܩܳܢ ܠܽܘܩܰܒܠܗܽܘܢ ܡܶܢ ܩܕܳܡ ܬܪܽܘܢܽܘܣ ܘܥܰܙܺܝܙܳܐܝ̣ܬ ܘܰܕܠܐ ܡܶܬܗܰܦܟܳܢܽܘܬܳܐ ܡܳܠܶܝܢ ܐܱܦܰܝ̈ܗܘܢ. ܨܰܥܪܳܐ ܐܱܝܟ ܕܶܐܡܰܪ ܪܽܘܚܳܐ.
ܡܠܺܝ ܐܱܦܰܝ̈ܗܘܢ ܨܰܥܪܳܐ. ܕܢܶܒܥܽܘܢ ܠܰܫܡܳܟ ܡܳܪܝܳܐ. ܘܟܰܕ ܗܳܟܰܢܳܐ ܒܺܝܫܺܝܢ ܘܡܰܪܳܚܺܝܢ ܒܒܶܥܠܕ̈ܒܳܒܰܘܗܝ ܕܰܫܪܳܪܳܐ. ܠܐ ܫܳܪܶܐ ܠܗܽܘܢ ܪܽܘܚܳܐ ܓܡܺܝܪܳܐܝ̣ܬ. ܐܠܐ ܨܳܒܶܐ ܘܚܳܐܱܪ ܘܰܡܣܰܟܶܐ ܕܠܐ ܕܰܢܩܰܘܽܘܢ ܒܒܺܝܫܽܘܬܗܘܢ ܐܠܐ ܕܚܰܢܦ̈ܐ ܢܶܫܒܩܽܘܢ ܦܬܰܟܪ̈ܶܐ. ܘܝܽܘ̈ܕܳܝܶܐ ܢܶܫܕܽܘܢ ܪܶܥܝܳܢܳܐ ܡܰܪܳܚܳܐ ܕܰܐܒܳܗܰܝ̈ܗܘܢ. ܨܳܠܽܘ̈ܒܶܐ ܘܺܐܝܪ̈ܺܝܛܺܝܩܽܘ ܢܶܒܥܽܘܢ ܪ̈ܰܚܡܶܐ ܒܰܬܝܳܒܽܘܬܳܐ. ܘܢܶܒܥܽܘܢ ܠܰܫܡܳܟ ܡܳܪܝܳܐ. ܡܶܛܠ ܕܟܽܠ ܕܒܳܥܶܐ ܠܰܫܡܶܗ ܕܡܳܪܝܳܐ ܒܗܰܝܡܳܢܽܘܬܳܐ ܚܳܝܶܐ. ܐܷܢܕܶܝܢ ܡܩܰܘܶܝܢ ܒܠܐܴ ܡܶܬܬܦܺܝܣܽܘܬܳܐ. ܬܘܒ ܥܳܛܶܦ ܢܒܺܝܐ ܘܰܒܝܰܕ ܪܽܘܚܳܐ ܦܣܰܩ ܥܠܰܝܗܽܘܢ ܡܣܳܡ ܒܪܺܝܫܳܐ ܘܳܐܡܰܪ:
ܢܶܒܗܬܽܘܢ ܘܢܶܬܕܰܠܚܽܘܢ ܠܥܳܠܰܡ ܥܳܠܡܺܝܢ. ܢܰܚܦܪܽܘܢ ܘܢܺܐܒܕܽܘܢ. ܗܳܠܶܝܢ ܕܒܳܗܬܺܝܢ ܡܶܬܕܰܠܚܺܝܢ ܠܥܳܠܰܡܥܳܠܡܺܝܢ. ܠܰܘ ܥܰܠ ܗܳܢܳܐ ܙܰܒܢܳܐ ܐܱܡܺܝܪܳܐ ܕܗܳܘܝܳܐ ܠܗܽܘܢ. ܐܷܠܐ ܥܰܠ ܬܰܫܢܺܝܩܳܐ ܕܰܠܥܳܠܰܡ. ܘܥܰܠ ܢܽܘܪܳܐ ܕܠܐ ܕܳܥܟܳܐ ܗܳܕܐ ܡܶܬܢܰܣܒܳܐ. ܡܳܐ ܓܶܝܪ ܕܶܐܬܦܪܶܫ ܘܶܐܬܺܝܕܰܥ ܐܱܝܢܰܘ ܐܱܬܪܳܐ ܘܢܰܚ̈ܠܐܷ ܘܣܽܘܦܳܢܶܗ ܕܰܐܓܽܘܓ. ܠܬܰܡܳܢ ܢܳܦܩܺܝܢ ܩܰܪ̈ܚܶܐ ܕܰܐܠܗܳܐ ܒܢܶܫ̈ܒܶܐ ܢܽܘܪ̈ܳܢܳܝܶܐ ܕܓܳܪܦܺܝܢ ܘܫܳܕܶܝܢ ܬܡ̇ܢ ܟܽܠܗܘܢ ܓܰܪ̈ܡܶܐ ܕܡܶܫܬܰܟܚܺܝܢ ܬܚܶܝܬ ܨܘܰܝܴ̈ܐ ܗܳܠܝܢ ܕܰܒܢܰܘ ܩܒܽܘܪ̈ܰܘܗܝ. ܘܡܰܚܦܪܺܝܢ ܘܳܐܒܕܺܝܢ. ܘܠܐ ܓܶܝܪ ܐܢ ܒܳܥܶܝܢ ܥܽܘܕܪܳܢܳܐ ܡܶܫܬܟܰܚ. ܐܠܐ ܘܳܐܦܶܢ ܒܳܥܶܝܢ ܠܫܡܺܝܢ ܕܡܳܪܝܳܐ. ܡܶܢ ܗܳܕܐ ܘܠܐ ܡܶܕܶܡ ܡܶܬܗܢܶܝܢ ܒܕܺܝܢܳܐ. ܟܽܠܗܘܢ ܓܶܝܪ ܐܱܝܠܶܝܢ ܕܠܐ ܝܕܰܥܘ ܠܡܳܪܝܳܐ ܝܳܠܦܺܝܢ ܠܶܗ. ܐܠܐ ܘܠܐ ܩܰܠܺܝܠ ܡܶܬܥܰܕܪ̈ܳܢ ܒܬܽܘ̈ܠܳܬܳܐ ܕܳܐܬܝܴ̈ܢ ܢܳܩ̈ܫܳܢ ܒܬܰܪܥܳܐ ܡܶܢ ܒܳܬܰܪ ܡܶܬܬܚܶܕ.
ܘܢܶܕܥܽܘܢ ܠܰܡ ܕܰܫܡܳܟ ܗܽܘ ܡܳܪܝܳܐ ܒܰܠܚܽܘܕܰܝܟ. ܪܳܡ ܒܟܽܠܗ̇ ܐܱܪܥܳܐ. ܗܳܝܕܶܝܢ ܓܶܝܪ ܬܽܘܒ ܠܐ ܡܶܬܚܙܶܝܢ ܬܰܡܳܢ ܡܳܪ̈ܰܘܳܬܳܐ ܕܰܓܳܠܰܝ̈ ܫܡܳܐ. ܘܠܐ ܡܶܫܬܰܟܚܺܝܢ ܬܰܡܳܢ ܐܠܗ̈ܐ ܐܚܪ̈ܳܢܶܐ. ܐܠܐ ܚܕܳܐ ܡܳܪܽܘܬܳܐ ܠܚܽܘܕܳܐܝ̣ܬ ܐܴܚܕܳܐ. ܘܰܚܕܳܐ ܪܺܝܫܳܢܽܘܬܳܐ ܐܱܚܺܝܕܳܐܝ̣ܬ ܠܳܒܟܳܐ ܫܽܘܠܛܳܢܳܐ ܕܥܰܠ ܟܽܠ. ܘܚܰܕ ܫܡܳܐ ܕܡܳܪܝܳܐ ܡܶܬܬܪܺܝܡ ܘܡܶܬܝܰܩܰܪ ܐܦ ܡܶܣܬܓܶܕ ܘܡܶܫܬܰܒܰܚ ܠܥܳܠܡܱ̈ܝ ܥܳܠܡܺܝܢ ܐܱܡܺܝܢ܀
ܡܙܡܘܪܐ ܕܬܡܢܝܢ ܘܐܪܒܥܐ
ܥܰܠ ܐܰܘܳܢ̈ܐ ܫܡܰܝ̈ܢܳܐ ܘܥܰܠ ܬܰܪܒܺܝܬܳܐ ܕܰܒܢܰܝܴ̈ܐ ܕܪܽܘܚܳܐ ܐܰܝܠܶܝܢ ܕܩܰܒܶܠܘ ܣܺܝܡܰܬ ܒܢܰܝܴ̈ܐ ܘܥܰܠ ܓܶܠܝܳܢܶܗ ܕܰܐܠܳܗܳܐ ܕܶܐܬܚܙܺܝ ܒܨܶܗܝܽܘܢ.
ܐܱܝܠܶܝܢ ܕܡܶܬܪܰܒܶܝܢ ܒܺܝܕܰܥܬܳܐ ܕܰܐܠܗܳܐ ܒܪܽܘܚܳܐ. ܐܝܟ ܕܰܐܠܶܦ ܗܰܘ ܚܰܟܺܝܡ ܒܰܐܠܗܳܝ̈ܬܳܐ ܦܰܘܠܽܘܣ. ܒܟܽܠܙܒܰܢ ܡܩܰܒܠܺܝܢ ܬܰܪܒܺܝܬܳܐ ܒܩܰܘܡܬܳܐ ܕܗܰܘ ܒܰܪܢܳܫܳܐ ܓܰܘܳܝܳܐ. ܘܗܳܠܶܝܢ ܡܳܐ ܕܰܐܪܓܶܫܘ ܒܬܰܪܒܺܝܬܗܘܢ. ܘܕܰܐܝܟܰܢܳܐ ܕܠܐ ܫܰܠܘܳܐ ܐܴܬܶܝܢ ܠܰܩܕܳܡܰܝܗܘܢ. ܘܡܶܫܬܰܘܕܥܺܝܢ ܒܝܰܕ ܩܳܠܐܴ ܘܡܶܠܬܳܐ. ܐܦ ܪܶܓܬܳܐ ܕܺܐܝܬ ܠܗܽܘܢ ܒܪܶܗܛܳܐ ܕܡܰܣܩܳܢ̈ܐ ܐܠܗܳܝ̈ܐ. ܚܰܕ ܡܶܢ ܗܳܠܝܢ ܕܶܝܢ ܘܣܰܓܺܝ ܘܰܕܠܐ ܡܰܗܡܝܳܢܽܘܬܳܐ ܡܶܬܪܰܒܶܐ ܗܘܳܐ ܒܺܝܕܰܥܬܳܐ ܕܪܽܘܚܳܐ܆ ܐܝ̣ܬܰܘܗܝ ܗܘܳܐ ܛܽܘܒܬܳܢܳܐ ܕܰܘܝܕ ܐܠܗܳܝܳܐ. ܘܠܗ̇ ܠܬܰܪܒܺܝܬܳܐ ܡܰܘܕܰܥ ܠܳܗ̇ ܝܰܘܡܳܢܳܐ. ܒܬܶܫܒܽܘܚܬܳܐ ܗܳܕܐ ܕܰܬܡܳܢܺܝܢ ܘܰܐܪܒܰܥ. ܟܰܕ ܓܶܝܪ ܒܟܽܠܙܒܰܢ ܡܶܢ ܩܕܳܡ ܐܠܗܳܐ ܠܐ ܡܰܪܚܶܩ ܗܘܳܐ. ܐܠܐ ܡܰܙܡܽܘܪܳܐ ܗܳܢܐ ܟܰܕ ܩܳܐܷܡ ܒܒܰܝܬܳܐ ܕܺܐܝܬ ܗܘܳܐ ܩܕܳܡ ܡܰܫܟܢܶܗ ܕܰܐܠܗܳܐ ܙܰܡܪܶܗ܆ ܕܳܐܦ ܗܽܘ ܗܰܘ ܡܰܫܟܢܳܐ ܐܝ̣ܬܰܘܗܝ ܗܘܳܐ܆ ܠܐ ܓܶܝܪ ܥܕܰܟܺܝܠ ܐܷܬܒܢܺܝ ܗܘܳܐ ܒܰܝܬܳܐ ܠܰܫܡܶܗ ܕܡܳܪܝܳܐ. ܐܠܐ ܒܗܰܘ ܡܰܫܟܢܳܐ ܡܽܘܫܶܐ ܒܓܰܘ ܡܰܕܒܪܳܐ. ܕܰܘܺܝܕ ܡܙܰܡܰܪ ܗܘܳܐ ܘܳܐܡܰܪ:
ܡܳܐ ܚܰܒܺܝܒܺܝܢ ܡܰܫܟ̈ܢܰܝܟ ܡܳܪܝܳܐ ܚܰܝܠܬܳܢܳܐ. ܣܰܟܝܰܬ ܢܰܦܫܝ ܘܶܐܬܪܰܓܪܓܰܬ ܠܕܳܪ̈ܰܘܗܝ ܕܡܳܪܝܳܐ: ܠܶܒܝ ܘܒܶܣܪܝ ܫܰܒܰܚܘ ܠܐܠܗܳܐ ܚܰܝܳܐ. ܡܳܢܳܐ ܐܢܽܘܢ ܩܴ̈ܠܐ ܩܰܕܺܝ̈ܫܶܐ ܗܳܠܝܢ ܕܗܳܫܳܐ ܡܰܘܕܰܥ ܢܒܺܝܳܐ. ܡܶܛܠܡܳܢܐ ܐܡ̇ܪ ܡܰܫܟ̈ܢܶܐ ܣܰܓܺܝ̈ܐܐ. ܕܗܳܐ ܡܽܘܫܶܐ ܚܰܕ ܒܰܠܚܽܘܕ ܡܰܫܟܢܳܐ ܐܷܬܦܩܶܕ ܡܶܢ ܐܠܗܳܐ ܕܢܶܥܒܶܕ. ܕܗܽܘ ܗܳܢܐ ܡܶܬܝܰܒܰܠ ܗܘܳܐ ܘܳܐܬܶܐ ܥܕܰܡܳܐ ܠܝܰܘ̈ܡܳܬܶܗ ܕܕܰܘܝܕ. ܘܗܽܘ ܗܳܢܐ ܓܰܒܪܳܐ ܙܰܕܺܝܩܳܐ ܒܥܳܐ ܕܢܶܒܢܶܐ ܒܰܝܬܳܐ ܠܐܠܗܳܐ. ܘܢܰܣܒܶܗ ܠܐܴܪܽܘܢܳܐ ܡܶܢ ܬܚܶܝܬ ܝܳܪ̈ܺܝܥܳܬܳܐ ܕܣܰܥܪܳܐ. ܘܰܒܓܰܘ ܒܰܝܬܳܐ ܕܰܒܢܳܐ ܒܰܦܣܺܝ̈ܠܳܬܳܐ. ܘܡܶܛܠ ܕܰܒܐܪ̈ܳܙܶܐ ܢܶܬܬܣܺܝܡ ܐܴܪܽܘܢܳܐ. ܘܡܶܛܠܗܳܕܐ ܥܰܠ ܕܠܰܘ ܙܰܒܢܰܐ ܗ̄ܘ ܕܢܶܬܒܢܶܐ ܒܰܝܬܳܐ ܠܐܠܗܳܐ. ܫܠܰܚ ܒܝܰܕ ܢܒܺܝܳܐ ܠܡܰܠܟܳܐ ܘܶܐܡܰܪ ܠܶܗ: ܐܱܢܬ ܠܐ ܬܶܒܢܶܐ ܠܺܝ ܒܰܝܬܳܐ. ܐܠܐ ܒܪܳܟ ܕܢܳܦܶܩ ܡܶܢ ܚܰܨܳܟ. ܗܽܘ ܢܶܒܢܶܐ ܒܰܝܬܳܐ ܠܫܶܡܝ. ܒܙܰܒܢܳܐ ܗܰܘ ܐܷܬܳܐ ܕܰܘܝܕ ܠܒܰܝܬܶܗ ܕܰܐܠܗܳܐ. ܘܫܰܒܰܚ ܬܶܫܒܽܘܚܬܳܐ ܗܳܕܐ. ܘܡܶܟܺܝܠ ܡܶܢ ܩܳܠܶܗ ܝܳܕܥܺܝܢܰܢ ܐܦ ܬܰܪܒܺܝܬܳܐ ܕܶܐܬܥܰܠܺܝ ܠܗ̇.
ܡܳܐ ܠܰܡ ܚܰܒܺܝܒܺܝܢ ܡܰܫܟ̈ܢܰܝܟ ܡܳܪܝܳܐ ܚܰܝܠܬܳܢܳܐ. ܠܰܘ ܠܰܡ ܚܰܕ ܗܽܘ ܡܰܫܟܢܳܟ. ܣܰܓܺܝ̈ܐܝ̣ܢ ܐܢܽܘܢ ܓܶܝܪ ܡܰܫܟ̈ܢܰܝܟ. ܘܡܶܢܝܳܢܳܐ ܠܰܝܬ ܠܗܽܘܢ. ܘܠܰܘ ܚܰܕ ܗܽܘ ܐܱܬܪܳܟ. ܕܟܽܠ ܐܱܬܪ̈ܰܘܳܢ ܕܺܝܠܳܟ ܐܢܽܘܢ. ܘܠܰܘ ܚܰܕ ܗܽܘ ܐܱܘܳܢܳܟ. ܣܰܓܺܝ̈ܐܝ̣ܢ ܐܢܽܘܢ ܐܱܘ̈ܢܰܝܟ. ܠܦܽܘܬ ܡܫܽܘܚܬܳܐ ܕܰܓܒܰܝ̈ܟ. ܚܙܰܝܬ ܟܡܳܐ ܐܷܬܥܰܠܺܝ܆ ܕܟܰܕ ܡܽܘܫܶܐ ܚܰܕ ܡܰܫܟܢܳܐ ܚܙܳܐ ܘܰܥܒܰܕ. ܐܠܐ ܡܙܰܡܪܳܢܳܐ ܡܰܫܟܢ̈ܐ ܐܡ̇ܪ. ܕܗܳܘܶܝܢ ܣܰܓܺܝ̈ܐܐ. ܘܗܳܠܝܢ ܡܰܫܟ̈ܢܶܐ ܐܝ̣ܬܰܝܗܘܢ ܗܳܠܝܢ ܕܶܐܡܰܪ ܥܰܡܰܢܽܘܐܝܠ ܠܬܰܠܡܺܝ̈ܕܰܘܗܝ. ܕܣܰܓܺܝ̈ܐܝ̣ܢ ܐܢܘܢ ܐܱܘܳܢ̈ܐ ܕܒܶܝܬ ܐܴܒܝ (ܝܘܚܢܢ ܝܕ: ܒ). ܕܰܠܗܽܘܢ ܠܗܳܠܝܢ ܡܰܫܟ̈ܢܶܐ. ܒܰܫܡܳܗ̈ܐ ܡܫܰܚ̈ܠܦܶܐ ܘܟܽܘܢܳܝ̈ܐ ܕܠܐ ܕܳܡܶܝܢ ܠܰܚܕܳܕ̈ܐ ܐܱܟܬܶܒܘ ܐܢܽܘܢ ܢܒܺܝ̈ܐ ܘܚܰܙܳܝ̈ܐ. ܘܩܰܕܡܳܝܳܐ ܢܽܘܚ ܡܶܬܦܩܶܕ ܗܘܳܐ. ܕܰܙܘܺܝ̈ܕܢܶܐ ܢܶܥܒܶܕ ܠܩܺܐܒܽܘܬܶܗ. ܡܽܘܫܶܐ ܕܶܝܢ ܚܠܳܦ ܙܘܺܝ̈ܕܢܶܐ ܝܳܪ̈ܺܝܥܳܬܳܐ ܥܒܰܕ ܘܥܰܡܽܘܕ̈ܐ ܘܣܳܡ̈ܟܶܐ. ܐܷܫܰܥܝܳܐ ܕܶܝܢ ܟܰܘ̈ܐ ܚܙܳܐ ܚܠܳܦ ܡܰܫܟ̈ܢܶܐ. ܘܶܐܡܰܪ ܘܫܰܐܷܠ ܕܡܰܢ ܐܢܽܘܢ ܗܳܠܝܢ ܕܰܐܝܟ ܥܢܴ̈ܢܶܐ ܦܳܪܚܺܝܢ܇ ܘܰܐܝܟ ܝܰܘܢ̈ܐ ܠܟܰܘܰܝ̈ܗܶܝܢ (ܐܫܥܝܐ ܣ: ܚ). ܚܰܙܩܺܝܐܝܠ ܬܘܒ ܕܳܪ̈ܶܐ ܕܰܩܕ̈ܩܳܬܳܐ ܚܙܳܐ ܕܰܪܫܰܡ ܗܘܳܐ ܒܒܰܝܬܳܐ ܪܽܘܚܳܢܳܐ. ܗܰܘ ܕܚܰܘܺܝ ܠܗ̇ ܡܽܘ̈ܫܚܳܬܳܐ. ܕܗܰܘ ܒܰܝܬܳܐ ܥܶܠܳܝܳܐ. ܡܳܪܰܢ ܕܶܝܢ ܒܳܬܰܪ ܥܒܳܕܰܘ̈ܗܝ. ܐܱܘܳܢ̈ܐ ܩܪܳܐ ܐܢܽܘܢ ܠܒܶܝܬ ܡܰܥܡܪ̈ܶܐ ܐܠܗܳܝ̈ܐ. ܘܗܳܕܳܐ ܗ̄ܝ ܬܰܪܒܺܝܬܳܐ ܕܢܰܦܫܶܗ ܕܰܢܒܺܝܐ. ܕܡܰܫܟ̈ܢܶܐ ܘܕܰܝܪ̈ܶܐ ܫܰܡܰܗ. ܟܰܕ ܐܦ ܡܰܘܕܰܥ ܗܘܳܐ ܐܪܳܙܳܐ ܕܓܶܠܝܳܢܳܗ̇ ܕܥܺܕܬܳܐ. ܕܠܰܘ ܡܶܟܺܝܠ ܚܰܕ ܡܰܫܟܢܳܐ ܡܶܬܒܥܶܐ ܠܐܠܗܳܐ. ܗܰܘ ܕܰܡܛܰܝܰܒ ܕܢܺܐܬܶܐ ܠܐܱܪܥܳܐ ܘܢܶܬܚܙܶܐ. ܐܠܐ ܡܰܫܟ̈ܢܶܐ ܣܰܓܺܝ̈ܐܐ ܘܥܺܕ̈ܬܳܐ ܣܰܓܺܝ̈ܐܬܳܐ ܘܕܳܪ̈ܶܐ ܩܰܕܺܝ̈ܫܳܬܳܐ. ܡܚܰܘܶܐ ܕܶܢܚܶܗ ܥܰܠ ܐܱܪܥܳܐ. ܘܡܶܛܠ ܗܳܕܐ ܐܡ̇ܪ ܗܘܳܐ.
ܕܠܶܒܝ ܘܒܶܣܪܝ ܫܰܒܰܚܘ ܠܐܠܗܳܐ ܚܰܝܳܐ. ܘܳܐܦ ܨܶܦܪܳܐ ܐܷܫܟܚܰܬ ܠܗ̇ ܒܰܝܬܳܐ ܘܫܽܘܦܢܺܝܢܳܐ ܩܶܢܳܐ. ܪܰܒܺܝܘ ܦܰܪ̈ܽܘܓܶܐ ܥܰܠ ܓܶܢܒ ܡܰܕܒܚܳܟ ܡܳܪܝܳܐ ܚܰܝܠܬܳܢܳܐ. ܨܶܦܪܳܐ ܘܫܽܘ̈ܦܢܺܝܢܶܐ ܦܳܪ̈ܚܳܬܳܐ ܐܷܢܶܝܢ ܕܰܟܝ̈ܬܳܐ ܒܢܳܡܽܘܣܳܐ. ܕܰܒܨܶܦܪܳܐ ܡܰܢ ܡܳܐ ܕܡܶܬܕܰܟܶܐ ܗܘܳܐ ܓܰܪܒܳܐ. ܒܰܕܡܶܗ ܡܚܰܣܶܝܢ ܗܘܰܘ ܥܰܠ ܗܰܘ ܕܡܶܬܕܰܟܶܐ ܡܶܢ ܡܚܽܘܬܶܗ. ܒܫܽܘܦܢܺܝܢܳܐ ܕܶܝܢ ܥܰܠ ܐܝܠܝܢ ܕܠܰܘ ܒܡܰܚ̈ܘܳܬܳܐ ܕܓܰܪܒܳܐ ܡܶܬܢܰܣܶܝܢ ܡܶܬܚܰܣܶܐ ܗܘܳܐ. ܡܩܰܪܶܒ ܗܘܳܐ ܠܶܗ ܕܶܝܢ ܟܳܗܢܳܐ ܐܦ ܠܡܰܕܒܚܳܐ ܕܰܐܠܗܳܐ ܕܬܶܗܘܶܐ ܩܽܘܪܒܳܢܳܐ. ܘܬܰܪܬܶܝܢ ܗܳܠܝܢ ܡܶܬܒܰܥ̈ܝܳܢ ܗܘܱ̈ܝ ܠܡܶܬܩܰܪܳܒܽܘ ܠܐܠܗܳܐ. ܐܱܘ ܟܰܕ ܡܶܬܚܰܣܶܐ ܒܗܶܝܢ ܥܰܠ ܐܱܝܠܶܝܢ ܕܡܶܬܛܰܐܡܶܝܢ ܗܘܰܘ. ܐܱܘ ܟܰܕ ܡܶܢ ܫܽܘܦܢܺܝ̈ܢܶܐ ܡܶܬܩܰܪܰܒ ܩܽܘܪܒܳܢܳܐ ܠܐܠܗܳܐ. ܐܠܐ ܗܳܪܟܳܐ ܐܡ̇ܪ ܢܒܺܝܳܐ܆ ܕܠܰܘ ܠܕܶܒܚ̈ܐ ܐܷܬܰܝ̈. ܐܠܐ ܩܶܢܳܐ ܘܒܰܝܬܳܐ ܐܷܫ̈ܟܰܚܶܝܢ ܠܗܶܝܢ ܥܰܠ ܓܶܢܒ ܡܰܕܒܚܶܗ ܕܡܳܪܝܳܐ ܚܰܝܠܬܳܢܳܐ. ܠܡܶܥܒܰܕ ܒܢܰܝܴ̈ܐ ܘܠܰܡܪܰܒܳܝܽܘ ܦܰܪ̈ܽܘܓܶܐ. ܘܙܳܕܶܩ ܕܢܶܒܥܶܐ ܐܢ ܗܘܳܬ ܗܳܕܶܐ. ܒܡܰܫܟܢܳܐ ܕܣܳܗܕܽܘܬܳܐ. ܐܷܢܕܶܝܢ ܠܐ ܗܘܳܬ. ܡܳܕܶܝܢ ܐܷܫܬܰܚܠܰܦܘ ܠܗܽܘܢ ܕܶܒܚ̈ܐ ܢܳܡܽܘܣܳܝ̈ܐ ܠܪܽܘܚܳܢܽܘܬܳܐ. ܘܟܰܕ ܡܰܕܒܚܶܗ ܕܡܳܪܝܳܐ ܠܥܺܕܬܶܗ ܡܶܫܬܰܘܕܥܺܝܢܰܢ ܨܶܦܪܳܐ ܘܫܽܘܦܢܺܝܢܳܐ ܠܰܢܒܺܝܽܘܬܳܐ ܘܠܰܫܠܺܝܚܽܘܬܳܐ ܝܳܕܥܺܝܢܰܢ. ܗܳܠܶܝܢ ܓܶܝܪ ܟܰܕ ܐܝ̣ܬ ܥܰܡܗܶܝܢ ܪܽܘܚܳܐ ܩܰܕܺܝܫܳܐ ܐܝܟ ܝܰܘܢܳܐ. ܡܰܠܦܴ̈ܢ ܘܰܡܣܰܟ̈ܠܳܢ ܐܘܪܚܳܐ ܕܚܰܝ̈ܐ. ܘܰܐܝܟ ܐܷܡܗܴ̈ܬܳܐ ܒܓܶܦ̈ܐ ܩܰܕܺܝ̈ܫܶܐ ܡܪ̈ܰܚܦܳܢ ܥܰܠ ܡܰܒܽܘ̈ܥܶܐ ܕܡܰܝܴ̈ܐ ܚܰܝ̈ܐ ܕܺܐܝܬ ܒܰܣܛܰܪ ܗܰܝܟܠܶܗ ܕܡܳܪܝܳܐ ܚܰܝܠܬܳܢܳܐ ܘܡܰܘ̈ܠܕܳܢ ܦܰܪ̈ܽܘܓܶܐ ܡܠܺܝ̈ܠܐܷ ܘܩܰܕܺܝ̈ܫܶܐ ܗܳܠܝܢ ܕܳܐܦ ܗܶܢܘܢ ܒܡܰܘܗ̈ܒܳܬܳܐ ܕܣܺܝܡܰܬ ܒܢܰܝܴ̈ܐ ܡܩܰܒܠܺܝܢ. ܘܡܶܬܕܰܟܶܝܢ ܘܗܳܘܶܝܢ ܨܶܦܪ̈ܶܐ ܩܰܕܺܝ̈ܫܳܬܳܐ ܘܫܽܘܦܢܺܝ̈ܢܶܐ ܢܰܟ̈ܦܶܐ. ܘܒܶܗ ܟܰܕ ܒܶܗ ܒܩܶܢܳܐ ܡܩܰܘܶܝܢ ܨܶܝܕ ܪܽܘܚܳܐ ܗܰܘ ܕܰܐܘܠܶܕ ܐܢܽܘܢ ܐܴܦ ܒܓܶܢܣܳܐ ܕܦܳܪܰܚܬܳܐ ܡܶܫܬܰܟܚܳܢܺܝܬܳܐ ܐܝ̣ܬܶܝܗ̇ ܫܽܘܦܢܺܝܢܳܐ ܒܗܳܝ ܕܠܐ ܠܰܡ ܡܩܰܒܠܐܴ ܐܱܝܕܳܐ ܕܢܶܩܒܬܳܐ. ܗܳܝ ܕܶܐܢ ܡܳܐܷܬ ܗܰܘ ܕܶܟܪܳܐ ܕܰܡܫܰܘܬܰܦ ܗܘܳܐ ܠܗ̇. ܠܐܴ ܬܩܰܒܶܠ ܫܰܘܬܳܦܽܘܬܳܐ ܕܰܐܚܪܺܢܳܐ. ܐܦ ܕܶܟܪܳܐ ܗܺܝ ܟܰܕ ܗܺܝ ܕܰܟܝܽܘܬܳܐ ܢܳܛܰܪ ܐܢ ܡܳܝܬܳܐ ܢܶܩܒܬܶܗ. ܢܳܩܶܦ ܗܳܢܐ ܐܷܣܟܺܝܡܳܐ ܕܰܟܝܳܐ ܠܢܰܟܦܽܘܬܳܐ ܕܰܫܠܺܝ̈ܚܶܐ. ܘܡܳܐ ܕܶܝܢ ܕܳܐܬܶܝܢ ܡܶܢ ܐܱܬܪܗܽܘܢ. ܡܶܛܠ ܕܒܰܐܬܪܳܐ ܕܪ̈ܽܘܡܳܝܶܐ ܡܶܬܰܐܡܢܺܝܢ ܒܣܰܬܘܳܐ ܕܪܺܝܚܳܐ ܒܰܣܺܝܡܳܐ ܡܳܠܶܝܢ ܓܶܦܰܝ̈ܗܘܢ. ܐܴܬܶܝܢ ܕܶܝܢ ܡܳܐ ܕܰܥܒܰܪ ܣܰܬܘܳܐ ܒܙܰܒܢܳܐ ܕܬܰܕܐܳܐ. ܒܗܳܢܳܐ ܓܶܝܪ ܙܰܒܢܳܐ ܕܰܡܡܰܨܰܥ ܒܰܝܢܳܬ ܣܰܬܘܳܐ ܠܩܰܝܛܳܐ ܡܥܳܕܺܝܢ ܠܡܶܐܬܳܐ ܘܰܠܡܶܥܒܰܕ ܦܰܪ̈ܽܘܓܶܐ. ܕܳܐܦ ܗܽܘ ܙܰܒܢܳܐ ܡܰܟܪܶܙ ܥܰܠ ܦܽܘܪܩܳܢܰܢ. ܘܡܶܛܠ ܕܰܢܫܰܘܕܰܥ ܢܒܺܝܳܐ ܕܥܰܠ ܫܽܘ̈ܦܢܺܝܢܶܐ ܡܠܺܝ̈ܠܐܷ ܘܥܰܠ ܨܶܦܪ̈ܶܐ ܢܰܦܫܴ̈ܢܶܐ ܐܡ̣ܪ ܗܳܠܝܢ ܘܰܡܙܰܡܰܪ ܬܘܒ ܘܳܐܡܰܪ:
ܡܰܠܟܝ ܘܰܐܠܳܗܝ. ܛܽܘܒܰܝܗܽܘܢ ܠܰܕܥܳܡܪܺܝܢ ܒܒܰܝܬܳܟ. ܘܰܢܫܰܒܚܽܘܢܳܟ ܠܥܳܠܰܡ. ܗܳܠܶܝܢ ܩܴ̈ܠܐ ܠܥܰܡܳܐ ܕܩܰܒܶܠ ܣܺܝܡܰܬ ܒܢܰܝܴ̈ܐ ܢܳܩܦܺܝܢ. ܘܰܐܝܟ ܗܰܘ ܕܰܠܘܳܬ ܟܰܪܣܳܐ ܕܰܥܡܳܕܳܐ ܩܰܕܺܝܫܳܐ ܩܳܐܷܡ. ܘܰܡܩܰܒܶܠ ܒܺܐܝܕܳܐ ܒܺܐܝܕܳܐ ܠܗܳܢܘܢ ܕܡܶܬܝܰܠܕܺܝܢ ܡܶܢ ܡܰܝܴ̈ܐ ܘܪܽܘܚܳܐ. ܥܰܠ ܕܰܫܘܰܘ ܕܰܒܒܰܝܬܳܐ ܕܰܐܠܗܳܐ ܢܶܥܡܪܽܘܢ. ܘܰܢܫܰܒܚܽܘܢܳܟ ܠܥܳܠܰܡ. ܠܗܳܢܽܘܢ ܕܰܒܒܰܝܬܳܐ ܡܩܰܘܶܝܢ ܘܒܶܗ ܥܳܡܪܺܝܢ ܡܶܟܺܝܠ ܠܐ ܦܳܣܩܺܝܢ ܬܶܫܒ̈ܚܳܬܳܐ ܡܶܢ ܦܽܘܡܗܽܘܢ. ܡܶܛܠ ܕܶܐܣܬܰܝܰܥܘ ܡܶܢ ܐܠܗܳܐ ܟܰܕ ܐܴܡܪܺܝܢ:
ܛܽܘܒܰܘܗܝ ܠܒܰܪܢܳܫܳܐ ܕܰܐܢܬ ܗܽܘ ܡܣܰܝܥܳܢܶܗ. ܘܰܫܒܺܝ̈ܠܰܝܟ ܒܠܶܒܶܗ. ܐܱܝܢܳܐ ܓܶܝܪ ܣܽܘܝܳܥܳܐ ܕܗܳܟܰܢܳܐ ܪܰܒ. ܕܡܶܢ ܫܶܠܝܳܐ ܒܚܰܕ ܥܶܕܳܢܳܐ ܟܰܕ ܡܶܬܩܰܪܰܒ ܒܰܪܢܳܫܳܐ ܠܰܥܡܳܕܳܐ ܩܰܕܺܝܫܳܐ. ܘܢܶܫܠܰܚ ܟܽܠܗܽܘܢ ܡܽܘܡ̈ܐ ܥܰܬܺܝ̈ܩܶܐ ܕܰܚܛܺܝܬܳܐ. ܘܢܶܠܒܰܫ ܠܒܽܘܫܳܐ ܕܢܽܘܗܪܳܐ ܘܰܦܪܺܝܣܳܐ ܕܬܶܫܒܽܘܚܬܳܐ. ܘܢܶܗܘܶܐ ܒܰܪܢܳܫܳܐ ܚܰܕܬܳܐ ܘܰܢܩܰܒܶܠ ܣܺܝܡܰܬ ܒܢܰܝܴ̈ܐ ܡܰܓܳܢ. ܘܢܶܗܘܽܘܢ ܒܓܰܘ ܠܶܒܶܗ ܫܒܺܝ̈ܠܐܷ ܠܐܠܗܳܐ. ܫܒܺܝ̈ܠܐ ܐܠܗܳܝ̈ܐ ܗܳܠܝܢ ܐܝ̣ܬܰܝܗܘܢ. ܫܒܺܝܠܐܴ ܩܰܕܡܳܝܳܐ ܗܰܝܡܳܢܽܘܬܳܐ: ܬܪܰܝܳܢܳܐ ܣܰܒܪܳܐ: ܗܰܘ ܕܒܳܬܪܶܗ ܚܽܘܒܳܐ ܡܪܰܚܡܳܢܽܘܬܳܐ ܒܰܣܺܝܡܽܘܬܳܐ ܛܳܒܽܘܬܳܐ ܢܰܓܺܝܪܽܘܬ ܪܽܘܚܳܐ ܚܰܕܽܘܬܳܐ ܫܠܳܡܳܐ ܢܰܟܦܽܘܬܳܐ ܕܰܟܝܽܘܬܳܐ ܩܰܕܺܝܫܽܘܬܳܐ ܒܬܽܘܠܽܘܬܳܐ ܙܰܗܝܽܘܬܳܐ ܡܣܰܝܒܪܳܢܽܘܬܳܐ. ܗܳܠܝܢ ܐܢܽܘܢ ܫܒܺܝ̈ܠܐܷ ܐܠܗܳܝ̈ܐ. ܘܰܒܗܳܠܝܢ ܥܳܐܷܠ ܡܰܠܟܳܐ ܡܳܪܝܳܐ ܐܠܗܳܐ ܘܰܡܗܰܠܶܟ ܒܠܶܒܳܐ. ܘܡܰܢ ܕܠܰܝܬ ܒܢܰܦܫܶܗ ܗܳܠܝܢ. ܘܠܐ ܥܳܐܷܠ ܐܠܗܳܐ ܠܠܶܒܶܗ. ܘܠܐ ܡܗܰܠܶܟ ܒܶܗ ܘܠܐ ܥܳܡܰܪ ܒܶܗ. ܐܷܢܕܶܝܢ ܒܗܳܠܶܝܢ ܢܶܨܛܰܒܰܬ. ܩܳܥܶܐ ܠܰܢ ܢܒܺܝܳܐ ܘܳܐܡܰܪ:
ܕܶܐܥܡܰܪ ܒܗܽܘܢ ܘܶܐܗܰܠܶܟ ܒܗܽܘܢ ܘܶܐܗܘܶܐ ܠܗܽܘܢ ܐܠܗܐ ܘܗܢܘܢ ܢܗܘܘܢ ܠܺܝ ܥܰܡܳܐ. ܗܳܠܶܝܢ ܐܢܽܘܢ ܡܰܣ̈ܩܳܢܶܐ ܕܶܐܬܟܬܶܒܘ. ܘܟܰܕ ܛܳܒ ܗܳܝ ܕܰܢܗܰܠܶܟ ܒܰܢ ܐܠܗܳܐ. ܡܰܣܩ̈ܢܶܐ ܐܠܗܳܝ̈ܐ ܡܩܰܢܝܳܐ ܠܰܢ. ܒܪܰܡ ܗܳܠܶܝܢ ܫܒܺܝ̈ܠܐܷ ܐܝܟ ܕܶܐܡܰܪ ܢܒܺܝܐ.
ܥܒܰܪܘ ܒܥܽܘܡܩܳܐ ܕܰܒܟܳܬܳܐ ܘܥܰܒܕܽܘܗܝ ܒܶܝܬ ܡܰܥܡܪܳܐ. ܚܙܺܝ ܡܳܢܳܐ ܐܡ̇ܪ: ܐܷܡܰܬܝ ܓܶܝܪ ܕܥܳܐܠܺܝܢ ܫܒܺܝ̈ܠܐܷ ܗܳܠܝܢ ܠܠܶܒܳܐ. ܘܡܶܫܟܚܺܝܢ ܠܳܗ̇ ܠܢܰܦܫܳܐ ܕܰܡܒܰܟܝܳܐ ܥܰܠ ܒܺܝ̈ܫܳܬܳܐ ܕܥܶܒܕܰܬ ܒܶܝܬ ܡܰܥܡܪܳܐ ܕܰܐܠܗܳܐ ܥܳܒܕܺܝܢ ܠܳܗ̇. ܘܰܡܩܰܘܶܐ ܠܘܳܬܳܗ̇ ܗܰܘ ܕܺܐܝܬܰܘܗܝ ܟܽܠܶܗ ܚܰܕܽܘܬܳܐ. ܘܡܰܥܒܰܪ ܐܷܒܠܳܗ̇ ܘܰܒܟܳܬܳܗ̇. ܘܡܰܥܛܶܦ ܠܳܗ̇ ܒܽܘܪܟܬܳܐ ܐܝܟ ܕܶܐܡܰܪ ܪܽܘܚܳܐ.
ܐܦ ܒܽܘܪܟܬܳܐ ܢܶܬܥܰܛܰܦ ܣܳܐܷܡ ܢܳܡܽܘܣܳܐ. ܣܳܐܷܡ ܢܳܡܽܘܣܳܐ ܗܽܘܝܽܘ ܡܳܪܰܢ. ܐܱܟܙܢܳܐ ܓܶܝܪ ܕܳܐܕܳܡ ܗܰܘ ܕܣܳܡ ܢܳܡܽܘܣܳܐ ܕܰܚܛܺܝܬܳܐ ܟܰܕ ܥܒܰܪ ܥܰܠ ܦܽܘܩܕܳܢܳܐ. ܘܰܐܠܶܦ ܠܰܒܢܰܘ̈ܗܝ ܕܳܐܦ ܗܶܢܘܢ ܢܶܚܛܽܘܢ. ܘܡܶܛܠܗܳܢܐ ܐܷܬܥܰܛܰܦ ܠܰܘ̈ܛܳܬܳܐ ܘܰܢܦܰܩ ܠܐܱܪܥܳܐ ܕܟܽܘ̈ܒܶܐ. ܗܳܟܰܢܳܐ ܐܦ ܡܫܺܝܚܳܐ ܗܰܘ ܕܰܐܠܶܦ ܦܽܘܩܕ̈ܢܶܐ ܩܰܕܺܝ̈ܫܶܐ. ܐܷܬܥܰܛܰܦ ܒܽܘܪܟܬܳܐ ܘܰܢܦܰܩ ܐܷܬܚܙܺܝ ܒܥܳܠܡܳܐ. ܕܢܶܥܒܰܪ ܡܶܢ ܠܰܘܛܬܳܐ ܗܳܝ ܕܩܰܒܠܰܬ ܐܱܪܥܳܐ ܡܶܛܠ ܐܴܕܳܡ. ܘܡܶܟܺܝܠ ܐܱܝܠܶܝܢ ܕܰܡܩܰܒܠܺܝܢ ܢܳܡܽܘܣܶܗ. ܡܳܠܶܟ ܠܗܽܘܢ.
ܕܢܺܐܙܽܠ̱ܘܢ ܡܶܢ ܚܰܝܠܐܴ ܠܚܰܝܠܐܴ. ܟܰܕ ܫܳܒܩܺܝܢ ܠܚܰܝܠܐܴ ܡܶܙܕܰܟܝܳܢܳܐ ܕܳܐܕܳܡ. ܘܢܺܐܙܽܠ̱ܘܢ ܠܚܰܝܠܐܴ ܕܡܳܪܰܢ ܗܰܘ ܕܝܳܗܶܒ ܙܳܟܽܘܬܳܐ ܘܡܶܬܚܰܪܪܺܝܢ ܡܶܢ ܛܪܽܘܢܽܘܬܶܗ ܕܡܳܪܽܘܕܳܐ ܗܰܘ ܕܰܐܠܶܦ ܚܛܺܝܬܳܐ. ܘܒܳܬܰܪ ܗܳܕܐ ܐܡ̇ܪ ܢܒܺܝܐ:
ܘܢܶܬܚܙܶܐ ܐܱܠܳܗ ܐܱܠܳܗܻ̈ܝܢ ܒܨܶܗܝܽܘܢ. ܕܗܳܕܐ ܥܰܠ ܗܰܘ ܓܶܠܝܳܢܳܐ ܕܰܗܘܐ ܠܐܠܗܳܐ ܒܰܒܣܰܪ ܡܶܢ ܥܽܘܒܳܐ ܕܰܒܬܽܘܠܬܳܐ ܐܰܡܪܶܗ. ܠܰܝܬ ܐܢܳܫ ܕܡܶܬܚܙܶܐ ܐܝܟ ܕܣܳܒܰܪ ܐܢܳܐ. ܐܱܠܗܳܐ ܓܶܝܪ ܠܘܳܬ ܚܙܳܬܳܐ ܠܐ ܐܷܬܩܰܪܰܒ. ܐܠܐ ܟܰܕ ܢܚܶܬ ܡܶܢ ܫܡܰܝܳܐ ܘܶܐܬܺܝܠܶܕ ܡܶܢ ܒܬܽܘܠܬܳܐ ܘܰܗܘܳܐ ܒܰܪܢܳܫܳܐ ܡܳܕܶܝܢ ܓܰܠܝܳܐܗܝ ܕܥܰܠ ܡܶܬܚܰܙܝܳܢܽܘܬܶܗ ܕܒܰܒܣܰܪ ܐܡ̣ܪ ܢܒܺܝܐ ܗܳܕܐ. ܘܥܰܠ ܗܳܝ ܕܩܳܡ ܒܰܨܠܺܝܒܳܐ ܘܶܐܬܚܙܺܝ ܥܰܪܛܶܠ ܥܠ ܓܳܓܽܘܠܬܳܐ ܕܬܶܢܚܴ̈ܬܳܐ ܐܷܬܢܰܒܺܝ ܗܳܠܶܝܢ ܡܙܰܡܪܳܢܳܐ. ܘܡܶܛܠ ܕܰܢܒܺܝܳܐ ܡܶܢ ܕܳܪ̈ܽܘܫܶܐ ܠܐ ܕܳܚܶܠ ܗܘܳܐ. ܠܐ ܣܳܡ ܠܶܗ ܫܡܳܐ ܕܰܡܚܺܝܠܽܘܬܳܐ. ܘܠܐ ܩܪܳܝܗܝ ܒܰܪܢܳܫܳܐ ܡܶܢ ܗܳܝ ܕܰܗܘܳܐ. ܐܠܐ ܐܱܟܪܙܶܗ ܐܱܠܳܗ ܐܱܠܳܗ̈ܝ̣ܢ ܡܶܢ ܗܳܝ ܕܺܐܝܬܰܘܗܝ ܗܘܳܐ ܡܳܪܝܳܐ. ܘܟܰܕ ܛܳܒ ܥܰܠ ܨܠܺܝܒܳܐ ܚܙܳܝܗܝ ܒܓܶܠܝܳܢܳܐ ܪܽܘܚܳܢܳܐ ܘܟܳܦ ܗܘܳܐ ܢܰܦܫܶܗ ܩܕܳܡܰܘܗܝ. ܘܩܰܪܶܒ ܠܶܗ ܨܠܽܘܬܳܐ ܟܰܕ ܐܡ̇ܪ.
ܡܳܪܝܳܐ ܐܠܗܳܐ ܚܰܝܠܬܳܢܳܐ ܫܡܰܥ ܨܠܽܘܬܝ. ܘܨܽܘܬ ܐܱܠܳܗܶܗ ܕܝܰܥܩܽܘܒ. ܘܰܚܙܺܝ ܐܱܢܬ ܐܱܠܳܗܳܐ ܡܣܰܝܥܳܢܰܢ. ܘܚܽܘܪ ܒܰܐܦܱ̈ܝ ܡܫܺܝܚܳܟ. ܠܘܳܬܶܗ ܗܳܟܺܝܠ ܕܡܶܠܬܳܐ ܐܠܗܳܐ ܩܴ̈ܠܐ ܗܳܠܝܢ ܩܰܪܶܒ ܢܒܺܝܐ. ܘܰܥܠܰܘܗܝ ܕܰܐܠܳܗ ܐܠܗ̈ܝ̣ܢ ܐܡ̣ܪ ܕܶܐܬܚܙܺܝ ܒܨܶܗܝܽܘܢ. ܘܠܶܗ ܩܪܳܐ ܡܳܪܝܳܐ ܐܠܗܳܐ ܚܰܝܠܬܳܢܳܐ ܫܡܰܥ ܨܠܽܘܬܝ ܘܠܶܗ ܟܰܕ ܠܶܗ ܐܡ̇ܪ: ܘܨܽܘܬ ܐܠܗܶܗ ܕܝܰܥܩܽܘܒ. ܘܰܚܙܺܝ ܐܱܢܬ ܐܠܗܳܐ ܡܣܰܝܥܳܢܰܢ. ܡܳܕܶܝܢ ܠܰܝܬ ܒܥܰܡܰܢܽܘܐܝܠ ܬܪܶܝܢ. ܐܷܠܐ ܚܰܕ ܗܽܘ ܐܝܟ ܕܩܰܕܶܡ ܐܱܘܕܰܥ ܪܽܘܚܳܐ. ܘܗܽܘܝܽܘ ܐܱܠܗܶܗ ܕܝܰܥܩܽܘܒ ܐܱܝܟܰܢܳܐ ܕܶܐܡܰܪ ܡܙܰܡܪܳܢܐ. ܘܰܕܥܰܡܶܗ ܒܳܥܶܐ ܢܶܥܡܰܪ ܡܚܰܘܶܐ ܟܰܕ ܐܡ̇ܪ:
ܡܶܛܠ ܕܛܳܒ ܗܽܘ ܚܰܕ ܝܽܘܡ ܒܕܰܝܪܳܟ ܡܶܢ ܐܴܠܶܦ. ܝܰܘܡܳܐ ܕܕܰܝܪܶܗ ܕܰܐܠܗܳܐ ܠܥܳܠܰܡ ܥܳܠܡܺܝܢ ܠܳܒܶܟ. ܒܗܳܝ ܕܠܐ ܫܳܩܶܠ ܫܽܘܠܳܡܳܐ ܒܪܰܡܫܳܐ ܕܰܢܫܰܪܶܐ ܐܚܪܺܢܳܐ ܒܳܬܪܶܗ. ܘܥܰܠܗܳܝ ܐܡ̇ܪ ܕܡܶܢ ܐܴܠܶܦ ܛܳܒ. ܠܰܘ ܡܶܢ ܝܰܘ̈ܡܳܬܳܐ ܐܠܐ ܡܶܢ ܐܱܠܦ̈ܐ ܕܥܳܠܡ̈ܐ. ܡܶܛܠ ܗܳܢܐ ܡܰܘܣܶܦ ܘܳܐܡܰܪ:
ܨܒܺܝܬ ܠܡܶܥܡܰܪ ܒܒܰܝܬܶܗ ܕܰܐܠܗܳܐ ܛܳܒ ܡܶܢ ܕܰܠܡܶܥܡܰܪ ܒܡܰܫܟܢܳܐ ܕܪ̈ܰܫܺܝܥܶܐ. ܒܗܰܘ ܕܰܠܥܳܠܰܡ ܡܶܛܠ ܕܒܰܝܬܰܐ ܗ̄ܘ. ܘܰܡܩܰܘܶܐ ܘܠܐ ܡܶܬܥܩܰܪ. ܒܰܢܝܰܐ ܗ̄ܘ ܓܶܝܪ ܘܰܡܣܰܬܬܳܐ. ܗܳܢܐ ܕܶܝܢ ܥܳܠܡܳܐ ܡܰܫܟܢܰܐ ܗ̄ܘ ܕܰܢܩܺܝܫ. ܘܪ̈ܰܫܺܝܥܶܐ ܥܳܡܪܺܝܢ ܒܶܗ. ܘܰܦܣܺܝܩ ܥܠܰܘܗܝ ܫܪܳܝܳܐ ܘܰܩܦܳܠܐܴ. ܘܰܐܝܟ ܕܳܐܦ ܡܰܫܟܢܳܐ ܗܳܕܐ ܡܰܠܶܦ܆ ܘܰܒܒܰܝܬܳܐ ܐܝ̣ܬ ܐܷܣܢܳܐ ܘܬܽܘܪܣܳܝܳܐ ܕܡܳܪܝܳܐ.
ܡܶܛܠ ܕܰܡܬܰܪܣܝܳܢܰܢ ܘܥܳܕܽܘܪܰܢ ܡܳܪܝܰܐ ܗܘ ܐܱܠܗܰܢ. ܘܗܳܠܶܝܢ ܠܐ ܫܟܺܝ̈ܚܳܢ ܒܡܰܫܟܢܳܐ ܕܥܰܘ̈ܠܐܷ. ܐܠܗܳܐ ܕܶܝܢ ܐܝܟ ܡܳܪܶܐ ܒܰܝܬܳܐ ܡܬܰܪܣܶܐ ܘܰܡܥܰܕܰܪ. ܒܪ̈ܰܚܡܶܐ ܘܺܐܝܩܳܪܳܐ.
ܪ̈ܰܚܡܶܐ ܠܰܡ ܘܺܐܝܩܳܪܳܐ ܢܶܬܶܠ ܡܳܪܝܳܐ. ܘܠܐܴ ܢܶܟܠܐܷ ܛܳܒܴ̈ܬܶܗ ܡܶܢ ܐܱܝܠܶܝܢ ܕܰܡܗܰܠܟܺܝܢ ܒܬܰܡܺܝܡܽܘܬܳܐ. ܘܥܰܡ ܪ̈ܰܚܡܶܐ ܠܰܡ ܝܳܗܶܒ ܐܝ̣ܩܳܪܳܐ. ܘܫܽܘܒܩܳܢܳܐ ܕܰܚܛܳܗ̈ܐ. ܘܠܐܱܝܠܶܝܢ ܕܰܫܘܰܘ ܠܪ̈ܰܚܡܶܐ ܐܝ̣ܩܳܪܳܐ ܕܪܰܒܽܘܬܳܐ ܐܱܠܳܗܳܝܬܳܐ ܕܩܰܒܶܠܘ ܡܶܢ ܥܡܳܕܳܐ ܗܳܠܝܢ ܕܛܳܒ̈ܬܳܐ ܫܰܡܰܗ ܐܢܶܝܢ ܢܒܺܝܳܐ ܕܰܐܠܗܳܐ. ܘܠܐܴ ܠܰܡ ܢܶܟܠܐܷ ܛܳܒ̈ܬܶܗ ܡܶܢ ܐܱܝܠܶܝܢ ܕܰܒܬܰܡܺܝܡܽܘܬܳܐ ܘܰܕܠܐ ܒܨܳܬܳܐ ܘܰܕܠܐ ܚܶܪܝܳܢܳܐ ܡܩܰܒܠܺܝܢ ܠܶܗ. ܗܳܟܰܢܳܐ ܓܶܝܪ ܟܬܺܝܒ. ܕܠܐܱܝܠܶܝܢ ܕܩܰܒܠܽܘܗܝ ܝܰܗܒ ܠܗܽܘܢ ܫܽܘܠܛܳܢܳܐ ܕܰܒܢܰܝܴ̈ܐ ܕܰܐܠܗܳܐ ܢܶܗܘܽܘܢ. ܠܐܱܝܠܶܝܢ ܕܰܡܗܰܝܡܢܺܝܢ ܒܰܫܡܶܗ (ܝܘܚܢܢ ܐ: ܝܒ). ܗܳܠܝܢ ܩܳܥܶܝܢ ܥܰܡ ܢܒܺܝܐ ܠܘܳܬܶܗ.
ܡܳܪܝܳܐ ܐܠܗܳܐ ܚܰܝܠܬܳܢܳܐ. ܛܽܘܒܰܘܗܝ ܠܒܰܪܢܳܫܳܐ ܕܰܡܣܰܒܰܪ ܒܳܟ. ܕܗܽܘ ܐܷܬܳܐ ܐܦ ܐܷܬܚܙܺܝ ܒܰܒܣܰܪ ܒܨܶܗܝܽܘܢ ܘܰܦܪܰܩ ܠܰܢ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܱܡܺܝܢ܀
ܡܙܡܘܪܐ ܕܬܡܢܝܢ ܘܚܡܫܐ
ܥܰܠ ܐܪܳܙ ܫܒܺܝܬܳܐ ܕܫܰܒܝܳܐ ܗܘܳܬ ܠܣܳܛܳܢܳܐ܆ ܘܐܶܬܳܐ ܐܰܠܳܗܳܐ ܐܰܥܛܦܳܗ̇. ܘܰܒܝܰܕ ܫܽܘܒܩܳܢܳܐ ܕܰܚܛܳܗ̈ܐ ܦܢܰܘ ܫܒܰܝܴ̈ܐ ܠܐܱܬܪܳܐ ܗܰܘ ܕܰܫܒܶܝܢ ܗܘܰܘ ܡܶܢܶܗ.
ܨܶܒܝܳܢܳܐ ܕܰܗܘܳܐ ܠܐܠܗܳܐ ܥܰܠ ܥܳܠܡܳܐ ܕܢܶܦܪܩܺܝܘܗܝ ܡܶܢ ܚܰܣܺܝܢܳܐ ܕܰܫܒܳܝܗܝ ܒܰܩܛܺܝܪܳܐ܆ ܨܳܒܶܐ ܪܽܘܚܳܐ ܩܰܕܺܝܫܳܐ ܢܰܘܕܰܥ ܒܝܰܕ ܛܽܘܒܬܳܢܳܐ ܕܰܘܝܕ܆ ܒܬܶܫܒܽܘܚܬܳܐ ܗܳܕܐ ܕܰܬܡܳܢܺܝܢ ܘܚܰܡܶܫ. ܘܗܰܘ ܡܶܕܶܡ ܕܩܰܕܶܡ ܐܠܗܳܐ ܐܷܬܪܰܥܺܝ. ܒܪ̈ܰܚܡܶܐ ܥܰܠ ܥܳܠܡܳܐ. ܡܦܰܫܶܩ ܠܰܢ ܡܙܰܡܪܳܢܳܐ ܝܰܘܡܳܢܳܐ ܒܡܰܙܡܽܘܪܳܐ ܗܳܢܳܐ. ܡܰܢ ܓܶܝܪ ܡܶܫܟܰܚ ܗܘܳܐ ܕܥܰܡܺܝ̈ܩܳܬܳܐ ܗܳܠܝܢ ܢܶܓܠܐܷ ܘܰܢܚܰܘܶܐ ܠܰܒܢܰܝ̈ܢܳܫܳܐ. ܐܠܐ ܐܱܝܠܶܝܢ ܕܰܢܣܰܒܘ ܪܽܘܚܳܐ ܩܰܕܺܝܫܳܐ. ܘܡܶܛܠ ܕܰܒܗܰܘ ܙܰܒܢܳܐ. ܠܐ ܦܫܺܝܩ ܗܘܳܐ ܕܰܢܡܰܠܶܠ ܪܽܘܚܳܐ ܕܰܐܠܗܳܐ ܐܚܪܳܢܝܳܐܝ̣ܬ. ܐܠܐ ܟܰܕ ܫܳܩܶܠ ܫܡܳܐ ܕܥܰܡܳܐ ܕܡܶܣܬܰܒܰܪ ܕܒܰܫܡܳܐ ܕܰܐܠܗܳܐ ܝܳܬܶܒ. ܫܩܰܠ ܢܒܺܝܳܐ ܕܢܺܐܡܰܪ:
ܨܒܰܝܬ ܡܳܪܝܳܐ ܒܰܐܪܥܳܟ. ܘܰܐܦܢܺܝܬ ܫܒܺܝܬܶܗ ܕܝܰܥܩܽܘܒ. ܘܰܫܒܰܩܬ ܠܶܗ ܥܰܘܠܶܗ ܠܥܰܡܳܟ. ܘܟܰܣܺܝܬ ܟܽܠܗܽܘܢ ܚܛܳܗܰܝ̈ܗܘܢ. ܐܢ ܠܘܳܬ ܥܰܡܳܐ ܕܺܝܣܪܳܐܝܠ ܡܶܬܦܢܺܝܢܰܢ ܒܰܫܡܳܥܳܐ ܕܦܶܬܓܳܡ̈ܐ ܗܳܠܝܢ ܐܷܡܰܬܝ ܓܶܝܪ ܗܘܳܬ ܗܳܕܐ ܠܺܝܣܪܳܐܝܠ. ܢܺܐܡܰܪ ܕܟܰܕ ܢܦܰܩ ܡܶܢ ܡܶܨܪܶܝܢ. ܗܳܐ ܠܐ ܫܒܰܩ ܚܛܳܗܰܝ̈ܗܘܢ. ܗܳܝܕܶܝܢ ܡܦܰܩܶܕ ܗܘܳܐ ܓܶܝܪ ܠܡܽܘܫܶܐ. ܕܰܢܩܰܪܶܒ ܥܰܡܳܐ ܕܶܒܚ̈ܐ ܚܠܳܦ ܚܛܳܗ̈ܐ ܕܰܚܛܳܐ. ܘܗܳܠܝܢ ܬܘܒ ܕܰܢܦܰܩܘ ܒܝܰܕ ܡܽܘܫܶܐ ܡܶܢ ܡܶܨܪܶܝܢ܆ ܠܐ ܡܶܬܚܰܙܝܳܐ ܕܩܰܒܶܠܘ ܫܽܘܒܩܳܢܳܐ ܕܰܚܛܳܗ̈ܐ. ܡܶܛܠ ܕܟܽܠܗܘܢ ܡܺܝܬܘ ܒܡܰܕܒܪܳܐ. ܥܰܠ ܕܡܰܪܡܰܪܘ ܡܶܠܬܶܗ ܕܰܐܠܗܳܐ. ܘܥܰܠ ܕܠܐ ܗܰܝܡܶܢܘ ܕܡܶܫܟܰܚ ܐܠܗܳܐ ܕܢܰܥܶܠ ܐܢܽܘܢ ܠܐܱܪܥܳܐ ܕܺܝܡܳܐ ܠܐܱܒܳܗܰܝ̈ܗܘܢ ܘܰܕܢܺܐܡܰܪ ܕܟܰܕ ܣܶܠܩܰܬ ܟܢܽܘܫܬܳܐ ܡܶܢ ܒܳܒܶܝܠ ܒܝܰܕ ܥܰܙܪܳܐ ܣܳܦܪܳܐ ܒܝܰܘ̈ܡܰܝ ܙܽܘܪܒܳܒܶܠ ܒܰܪ ܫܶܠܰܐܬܺܝ̣ܠ ܘܰܙܟܰܪܝܳܐ ܢܒܺܝܳܐ܆ ܘܠܐ ܬܽܘܒ ܬܰܡܳܢ ܐܷܫܟܰܚܢܰܢ ܕܰܫܒܰܩ ܐܠܗܳܐ ܥܰܘܠܶܗ ܕܥܰܡܳܐ ܘܟܰܣܺܝ ܚܛܳܗܰܝ̈ܗܘܢ. ܘܙܳܕܶܩ ܡܶܟܺܝܠ ܢܶܒܥܶܐ܆ ܕܒܰܐܝܢܳܐ ܙܰܒܢܳܐ ܗܳܠܝܢ ܚܳܝܪ̈ܳܢ. ܘܡܳܢܰܐ ܗ̄ܘ ܦܶܬܓܳܡܳܐ ܗܳܢܐ ܕܪܺܝܫ ܡܰܙܡܽܘܪܳܐ ܐܢ ܕܶܝܢ ܠܰܝܬ ܚܪܺܝܢܳܐ ܠܫܳܡܽܘ̈ܥܶܐ ܠܽܘܩܒܰܠ ܫܪܳܪܳܐ. ܠܗܳܢܐ ܡܢ ܕܽܘܟ ܐܚܪܺܝܢ ܠܰܝܬ ܠܡܶܫܡܥܶܗ ܚܰܬܺܝܬܳܐܝ̣ܬ ܐܠܐ ܡܶܢ ܩܳܠܐܴ ܕܚܰܝ̈ܠܰܘܳܬܳܐ ܩܰܕܺܝ̈ܫܶܐ ܕܶܐܬܚܙܺܝܘ ܒܰܐܪܥܳܐ ܕܺܝܗܽܘܕ. ܒܠܺܠܝܳܐ ܗܰܘ ܕܒܶܗ ܐܷܬܳܐ ܐܠܗܳܐ ܠܝܰܠܕܳܐ. ܘܶܐܬܟܰܪܰܟ ܒܥܰܙܪܽܘܪ̈ܶܐ ܡܳܪܝܳܐ ܕܚܰܝ̈ܠܰܘܳܬܳܐ. ܗܳܝܕܶܝܢ ܨܒܳܐ ܡܳܪܝܳܐ ܒܰܐܪܥܶܗ. ܘܡܶܢ ܬܰܡܳܢ ܫܰܪܺܝ ܕܢܰܦܢܶܐ ܫܒܺܝܬܳܐ. ܠܰܘ ܠܝܰܥܩܽܘܒ ܒܰܠܚܽܘܕ܆ ܐܠܐ ܠܐܴܕܳܡ ܗܰܘ ܕܶܐܫܬܒܺܝ ܡܶܢ ܣܳܛܳܢܳܐ ܘܬܰܡܳܢ ܫܳܡܥܺܝܢܰܢ ܟܰܕ ܩܳܥܶܝܢ ܚܰܝ̈ܠܰܘܳܬܳܐ ܘܰܡܫܰܒܚܺܝܢ ܠܡܳܪܝܳܐ ܗܰܘ ܕܶܐܬܺܝܠܶܕ. ܘܰܡܫܰܕܪܺܝܢ ܕܶܝܢ ܩܳܠܰܝ̈ܗܘܢ ܠܰܫܡܰܝܳܐ ܟܰܕ ܐܴܡܪܺܝܢ: ܬܶܫܒܽܘܚܬܳܐ ܠܐܱܠܗܳܐ ܒܰܡܪ̈ܰܘܡܶܐ. ܘܥܰܠ ܐܱܪܥܳܐ ܫܠܳܡܳܐ ܘܨܶܒܝܳܢܳܐ ܛܳܒܳܐ ܠܰܒܢܰܝ̈ܢܳܫܳܐ (ܠܘܩܐ ܒ: ܝܕ). ܗܳܢܳܐ ܩܳܠܐ ܐܝ̣ܬܰܘܗܝ ܦܽܘܫܳܩܶܗ ܪܺܝܫܶܗ ܕܡܰܙܡܽܘܪܳܐ ܗܳܢܐ. ܕܰܨܒܳܐ ܡܳܪܝܳܐ ܒܰܐܪܥܳܐ ܕܢܶܬܶܠ ܡܳܪܝܳܐ ܫܽܘܒܩܳܢ ܚܛܳܗ̈ܐ ܠܺܝܣܪܳܐܝܠ. ܘܰܒܗܰܘ ܙܰܒܢܳܐ ܕܶܐܬܚܙܺܝ ܪܰܒܳܐ ܒܰܙܥܽܘܪܽܘܬܳܐ. ܘܥܰܬܺܝܪܳܐ ܕܢܰܚ ܒܡܶܣܟܺܢܽܘܬܳܐ. ܘܚܰܝܳܐ ܡܙܰܓ ܢܰܦܫܶܗ ܒܡܳܝܽܘ̈ܬܶܐ. ܢܦܰܩ ܡܶܢ ܟܰܣܝܽܘܬܳܐ ܡܳܪܝܳܐ ܠܓܶܠܝܳܢܳܐ ܦܰܓܪܳܢܳܝܳܐ. ܘܰܐܦܢܺܝ ܫܒܺܝܬܶܗ ܕܥܳܠܡܳܐ ܡܶܢ ܐܝ̣̈ܕܰܝ ܛܪܽܘܢܳܐ. ܘܩܰܕܡܳܝ̈ܐ ܐܷܬܰܘ ܪ̈ܳܥܰܘܳܬܳܐ ܕܩܰܪܺܝܒܺܝܢ ܗܘܰܘ ܠܰܡܥܰܪܬܳܐ. ܘܒܳܬܰܪ ܗܳܠܝܢ ܡܓܽܘ̈ܫܶܐ ܕܰܫܒܶܝܢ ܗܘܰܘ ܠܫܺܐܕ̈ܐ ܦܳܪ̈ܣܳܝܶܐ. ܘܒܳܬܰܪ ܗܳܠܶܝܢ ܡܶܨܪ̈ܳܝܶܐ ܕܰܡܦܰܟܪܺܝܢ ܗܘܰܘ ܠܕܰܝ̈ܘܶܐ. ܘܰܒܡܰܥܡܽܘܕܺܝܬܳܐ ܦܢܰܘ. ܐܱܢܕܪܰܐܘܳܣ ܘܫܶܡܥܽܘܢ. ܘܒܳܬܰܪ ܗܳܠܶܝܢ ܦܺܝܠܺܝܦܽܘܣ ܘܢܰܬܰܢܰܐܝ̣ܠ ܘܰܒܢܱ̈ܝ ܙܰܒܕܰܝ ܘܰܫܠܺܝܚ̈ܐ ܟܽܠܗܘܢ. ܘܒܳܬܰܪܗܘܢ ܡܳܟ̈ܣܶܐ ܘܙܳܢܝܴ̈ܬܳܐ ܘܒܳܬܰܪ ܗܳܠܶܝܢ ܚܰܛܳܝܬܳܐ ܘܫܶܡܥܽܘܢ ܦܪܺܝܫܳܝܳܐ. ܘܒܳܬܰܪ ܗܳܠܝܢ ܝܽܘܚܰܢ ܘܫܽܘܫܰܢ ܘܫܳܠܽܘܡ. ܘܒܳܬܰܪ ܗܳܠܝܢ ܣܡܰܝܴ̈ܐ ܕܰܚܙܰܘ ܢܽܘܗܪܳܐ. ܘܰܚܓܺܝܪ̈ܶܐ ܕܰܩܢܰܘ ܪܶܗܛܳܐ. ܕܽܘܓ̈ܐ ܕܶܐܫܬܰܘܬܰܦܘ ܗܘܰܘ ܠܫܶܡܥܳܐ. ܡܫܰܪ̈ܰܝܳܐ ܕܰܩܢܰܘ ܗܶܠܟܬܳܐ. ܡܺܝ̈ܬܶܐ ܕܰܥܛܰܦܘ ܒܶܗ ܠܒܶܝܬ ܚܰܝ̈ܐ. ܟܪ̈ܺܝܗܶܐ ܕܶܐܬܚܠܶܡܘ. ܓܰܪ̈ܒܳܢܶܐ ܕܶܐܬܕܰܟܺܝܘ. ܛܰܡܷ̈ܐܐ ܕܶܐܬܩܰܕܰܫܘ. ܥܰܡ̈ܡܶܐ ܚܰܛܳܝ̈ܐ ܕܰܥܡܰܕܘ ܘܶܐܬܚܰܣܺܝܘ ܡܶܢ ܚܰܘܒܰܝ̈ܗܘܢ. ܘܗܳܠܝܢ ܥܰܠ ܕܗܰܝܡܶܢܘ ܗܘܰܘ ܥܰܡܶܗ ܕܡܳܪܝܳܐ܆ ܘܚܰܣܺܝ ܐܢܽܘܢ ܡܶܢ ܥܰܘܠܰܝ̈ܗܘܢ ܒܡܰܝܴ̈ܐ ܕܰܥܡܳܕܳܐ ܩܰܕܺܝܫܳܐ. ܘܟܰܣܺܝ ܟܽܠܗܘܢ ܚܛܳܗܰܝ̈ܗܘܢ ܐܱܝܟ ܕܶܐܡܰܪ ܢܒܺܝܐ. ܘܠܰܝܬ ܡܶܟܺܝܠ ܬܒܰܥܬܳܐ ܕܒܺܝ̈ܫܳܬܗܽܘܢ. ܘܰܛܥܳܐ ܕܰܝܳܢܳܐ ܟܽܠܗܘܢ ܥܒܳܕܰܝ̈ܗܘܢ ܒܺܝ̈ܫܶܐ. ܘܩܰܒܠܶܗ ܠܓܰܝܳܣܳܐ ܪܺܝܫܳܐ ܕܟܽܠܗܘܢ ܚܰܛܳܝ̈ܐ ܡܶܢ ܨܠܺܝܒܳܐ ܘܶܐܡܰܪ ܠܶܗ܆ ܕܰܐܡܺܝܢ ܐܡ̇ܪ ܐܢ̣ܐ ܠܳܟ܆ ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ (ܠܘܩܐ ܟܓ: ܡܓ). ܘܠܐܴ ܣܳܡ ܠܶܗ ܩܳܢܽܘܢܳܐ ܕܰܬܝܳܒܽܘܬܳܐ ܕܢܶܒܥܶܐ ܪ̈ܰܚܡܶܐ ܘܟܶܢ ܦܳܬܰܚ ܠܶܗ ܬܰܪܥܳܐ. ܘܠܐ ܠܚܰܛܳܝܬܳܐ ܟܰܕ ܡܶܫܚܰܬ ܪ̈ܶܓܠܰܘܗܝ ܠܐ ܬܠܳܗ̇ ܒܣܰܒܪܳܐ ܕܒܳܬܰܪ ܙܰܒܢܳܐ ܫܳܒܶܩ ܠܳܗ̇ ܚܛܳܗܶܝ̈ܗ̇. ܒܳܬܰܪ ܫܒܺܝܬܳܐ ܢܰܦܺܝܩ ܗܘܳܐ܆ ܠܐ ܓܶܝܪ ܡܶܬܪ̈ܰܫܝܳܢ ܒܬܽܘ̈ܠܳܬܳܐ ܕܡܶܬܚܰܒ̈ܠܳܢ ܡܶܢ ܫܰܒܳܝܷ̈ܐ ܥܰܠ ܫܽܘܚܳܛܳܐ ܕܰܒܬܽܘܠܰܝ̈ܗܶܝܢ. ܘܠܐ ܟܱ̈ܠܠܳܬܳܐ ܕܡܶܫܬܰܒ̈ܝܳܢ ܡܶܢ ܥܰܣܟܶܪ̈ܳܬܳܐ ܠܐܴ ܡܶܬܩܰܪ̈ܝܳܢ ܓܰܝܳܪ̈ܳܬܳܐ ܡܶܢ ܚܰܬܢܰܝ̈ܗܶܝܢ. ܡܳܐ ܕܦܳܢܶܝܢ ܡܶܢ ܫܒܺܝܬܳܐ. ܫܰܦܺܝܪ ܡܳܕܶܝܢ ܥܒܰܕ ܡܳܪܝܳܐ ܟܰܕ ܐܱܦܢܺܝ ܠܰܫܒܺܝܬܶܗ ܡܶܢ ܣܳܛܳܢܳܐ. ܕܩܰܕܶܫ ܠܙܳܢܝܴ̈ܬܳܐ ܘܰܥܒܰܕ ܐܷܢܶܝܢ ܒܬܽܘ̈ܠܳܬܳܐ. ܘܩܰܒܠܳܗ̇ ܠܡܰܪܝܰܡ ܡܰܓܕܠܳܝܬܳܐ ܟܰܕ ܩܳܡ ܡܶܢ ܩܰܒܪܳܐ. ܒܢܶܩܦܳܐ ܕܰܟܝܳܐ ܕܝܳܠܕܰܬ ܐܠܗܳܐ ܡܰܪܝܰܡ ܘܥܰܡܳܗ̇ ܐܷܙܰܠ̱ܬ ܗܘܳܬ ܠܩܰܒܪܳܐ. ܘܡܶܛܠܗܳܢܐ ܒܪ̈ܰܚܡܶܐ ܩܰܒܠܳܗ̇ ܠܰܫܒܺܝܬܳܐ ܘܠܰܘ ܟܰܕ ܥܳܕܶܠ ܠܳܗ̇ ܥܰܠ ܐܱܝܠܶܝܢ ܕܶܐܫܬܰܢܰܕܘ ܒܳܗ̇ ܫܰܒܳܝܷ̈ܐ ܘܚܰܒܠܽܘܗ̇. ܐܠܐ ܟܰܕ ܟܳܪܝܳܐ ܠܶܗ ܥܠܶܝܗ̇ ܘܥܰܠ ܒܺܝ̈ܫܳܬܳܐ ܕܣܶܒܠܰܬ ܘܡܶܛܠ ܗܳܢܐ ܒܢܰܗܪܳܐ ܩܰܕܺܝܫܳܐ ܕܰܥܡܳܕܳܐ ܐܱܣܚܝܳܗ̇ ܘܩܰܕܫܳܗ̇. ܘܡܶܛܠ ܕܟܰܕ ܫܠܺܝܚܳܐ ܘܥܰܪܛܶܠܝܳܐ ܢܶܦܩܰܬ ܡܶܢ ܦܰܪܕܰܝܣܳܐ. ܟܰܕ ܫܠܺܝܚܳܐ ܩܰܒܠܳܗ̇ ܠܰܫܒܺܝܬܳܐ ܘܰܐܦܶܩ ܢܰܚ̈ܬܶܐ ܪ̈ܺܝܫܳܝܶܐ ܡܶܢ ܒܰܝܬܶܗ ܘܰܐܠܒܫܳܗ̇ ܘܟܰܣܺܝ ܦܽܘܪܣܳܝܳܗ̇. ܘܰܦܪܰܣ ܐܷܣܛܠܐܴ ܕܢܽܘܗܪܳܐ ܘܣܰܬܰܪ ܗܰܕܳܡܶܝ̈ܗ̇. ܘܰܢܦܰܚ ܒܰܐܦܶܝ̈ܗ̇ ܪܽܘܚܳܐ ܩܰܕܺܝܫܳܐ. ܘܨܰܒܬܳܗ̇ ܒܪܺܝܚܳܐ ܒܰܣܺܝܡܳܐ. ܘܥܰܒܕܳܗ̇ ܟܰܠܬܳܐ ܡܨܰܒܰܬܬܳܐ ܘܰܒܬܽܘܠܬܳܐ. ܘܰܦܬܰܚ ܓܢܽܘܢܶܗ ܘܩܰܒܠܳܗ̇ ܘܟܰܕ ܒܗܳܢܳܐ ܛܽܘܝܳܒܳܐ ܪܰܒܳܐ ܚܳܐܱܪ ܗܘܳܐ ܢܒܺܝܐ܆ ܐܱܘܣܶܦ ܘܶܐܡܰܪ ܠܘܳܬ ܐܱܠܳܗܳܐ ܟܰܕ ܚܙܳܐ ܕܒܰܐܝܢܳܐ ܨܶܒܝܳܢܳܐ ܛܳܒܳܐ ܫܒܰܩ ܠܗ̇ ܚܛܺܝܬܳܗ̇ ܠܐܢܳܫܽܘܬܳܐ.
ܘܰܐܥܒܰܪܬ ܟܽܠܗ̇ ܚܶܡܬܳܟ ܘܪܽܘܓܙܳܟ. ܘܰܐܗܦܶܟܬ ܚܶܡܬܳܐ ܕܪܽܘܓܙܳܟ. ܗܳܟܰܢܳܐ ܩܰܒܶܠܬ ܐܢܽܘܢ ܠܐܱܝܠܶܝܢ ܕܰܐܣܟܶܠܘ. ܐܝܟ ܠܐ ܡܰܣܟ̈ܠܳܢܶܐ.
ܐܱܦܢܳܢ ܐܱܠܗܳܐ ܦܳܪܽܘܩܰܢ. ܘܒܰܛܶܠ ܪܽܘܓܙܳܟ ܡܶܢܰܢ. ܒܝܰܕ ܫܶܦ̈ܥܶܐ ܕܪ̈ܰܚܡܶܐ ܕܰܐܝܬܺܝ ܠܐܱܪܥܳܐ ܕܚܰܛܳܝ̈ܐ ܫܡܳܐ ܕܓܶܠܝܳܢܳܟ.
ܘܠܐܴ ܬܶܛܰܪ ܪܽܘܓܙܳܟ ܠܕܳܪܕܳܪ̈ܺܝܢ. ܕܳܡܝܳܐ ܕܗܳܠܶܝܢ ܩܴ̈ܠܐܷ ܐܢܽܘܢ ܕܒܳܥܽܘܬܳܐ ܕܰܡܩܰܪܶܒ ܚܠܳܦ ܥܰܡܳܐ ܕܶܐܬܚܒܶܫ ܒܠܐܴ ܡܦܺܝܣܳܢܽܘܬܳܐ. ܐܷܢܓܶܝܪ ܚܙܳܗ̇ ܠܰܫܒܺܝܬܳܐ ܗܳܝ ܕܥܰܡ̈ܡܶܐ ܟܰܕ ܐܱܦܢܝܳܗ̇ ܨܠܺܝܒܳܐ ܓܰܠܝܳܐ ܗ̄ܝ ܕܗܳܠܶܝܢ ܕܠܐܴ ܐܷܬܛܦܺܝܣܘ ܒܝܰܕ ܓܶܠܝܳܢܳܐ ܪܽܘܚܳܢܳܐ܆ ܘܶܐܠܐܴ ܐܱܝܕܳܐ ܗ̄ܝ ܥܶܠܬܳܐ ܕܡܶܢ ܒܳܬܰܪ ܕܶܐܡܰܪ؟
ܕܰܫܒܰܩܬ ܥܰܘܠܶܗ ܠܥܰܡܳܟ ܘܟܰܣܺܝܬ ܟܽܠܗܽܘܢ ܚܛܳܗܰܝ̈ܗܘܢ. ܘܰܐܥܒܰܪܬ ܟܽܠܗ̇ ܚܶܡܬܳܟ. ܢܶܥܛܽܘܦ ܬܽܘܒ ܢܶܒܥܶܐ ܫܽܘܒܩܳܢܳܐ. ܐܱܝܟ ܡܰܢ ܕܠܐ ܗܘܱ̈ܝ ܗܳܠܝܢ ܩܰܕܡܳܝܴ̈ܬܳܐ ܕܶܐܬܢܰܒܺܝ. ܒܰܫܪܳܪܳܐ ܓܶܝܪ ܥܰܡܳܐ ܘܠܐ ܕܢܰܪܓܶܫ ܒܗܶܝܢ ܨܒܳܐ. ܐܠܐ ܒܕܰܠܩܽܘܒܠܐܴ ܐܷܬܚܰܫܰܚ. ܘܥܰܠܗܳܝ ܐܡ̣ܪ ܢܒܺܝܐ:
ܐܷܠܐ ܐܱܢܬ ܐܱܦܢܳܢ ܘܰܐܚܳܢ ܘܥܰܡܳܟ ܢܶܚܕܽܘܢ ܒܳܟ. ܚܰܘܳܢ ܡܳܪܝܳܐ ܛܰܝܒܽܘܬܳܟ ܘܦܽܘܪܩܳܢܳܟ ܗܰܒܠܰܢ. ܕܢܶܫܡܰܥ ܡܳܢܳܐ ܡܡܰܠܶܠ ܡܳܪܝܳܐ ܐܱܠܳܗܰܢ. ܗܳܠܝܢ ܟܽܠܗܘܢ ܩܴ̈ܠܐܷ ܣܰܓܺܝ ܕܳܡܶܝܢ ܐܱܝܟ ܗܰܘ ܕܒܳܥܽܘܬܳܐ ܡܩܰܪܶܒ ܢܒܺܝܐ. ܚܠܳܦ ܐܱܝܠܶܝܢ ܕܶܐܬܠܒܶܟܘ ܒܩܽܘܕܡܳܐ ܕܒܺܝ̈ܫܳܬܳܐ. ܘܡܳܢܳܐ ܐܴܡܰܪ ܐܢܳܐ ܗܳܠܝܢ. ܦܰܘܠܽܘܣ ܓܶܝܪ ܗܰܘ ܚܰܟܺܝܡ ܒܰܐܠܳܗܳܝ̈ܬܳܐ܆ ܠܐ ܗܘܳܐ ܕܶܝܢ ܓܰܠܝܳܐܝ̣ܬ ܐܡ̇ܪ. ܡܶܛܠ ܐܱܝܠܶܝܢ ܕܠܐ ܐܷܬܛܦܺܝܣܘ. ܕܰܐܚܱ̈ܝ ܨܶܒܝܳܢܳܐ ܕܠܶܒܝ ܘܰܒܥܳܬܝ ܕܠܐܱܠܗܳܐ ܚܠܳܦܰܝܗܘܢ ܕܢܺܚܽܘܢ (ܪ̈ܗܘܡܝܐ ܝ: ܐ). ܡܳܕܶܝܢ ܡܶܛܠ ܕܚܰܕ ܗܽܘ ܪܽܘܚܳܐ. ܕܡܰܠܶܠ ܒܩܰܕܡܳܝ̈ܐ ܘܒܰܐܚܪ̈ܳܝܶܐ. ܬܰܟܫܶܦܬܳܐ ܘܰܦܝܳܣܳܐ ܡܩܰܪܶܒ ܗܘܳܐ ܚܠܳܦ ܗܳܠܝܢ ܕܠܐ ܐܷܬܬܦܺܝܣܘ ܠܰܣܒܰܪܬܳܐ. ܘܫܰܦܺܝܪ ܐܡ̣ܪ ܡܙܰܡܪܳܢܳܐ: ܕܗܳܐ ܠܰܡ ܛܰܝܒܽܘܬܳܐ ܘܦܽܘܪܩܳܢܳܐ ܗܰܒܠܰܢ. ܕܢܶܫܡܰܥ ܡܳܢܳܐ ܡܡܰܠܶܠ ܡܳܪܝܳܐ ܐܱܠܗܳܐ.
ܕܰܡܡܰܠܶܠ ܫܠܳܡܳܐ ܥܰܡ ܥܰܡܶܗ ܘܥܰܡ ܙܰܕܺܝ̈ܩܰܘܗܝ. ܗܳܟܰܢܳܐ ܓܶܝܪ ܟܰܕ ܡܫܰܡܠܐܷ ܢܒܺܝܽܘܬܳܐ܆ ܐܡ̣ܪ ܠܬܰܠܡܺܝ̈ܕܶܐ ܒܥܶܠܺܝܬܳܐ. ܡܶܢ ܒܳܬܰܪ ܕܩܳܡ ܡܶܢ ܒܶܝܬ ܡܺܝ̈ܬܶܐ. ܫܠܳܡܳܐ ܥܰܡܟܽܘܢ (ܠܘܩܐ ܟܕ: ܠܘ ܝܘܚܢܢ ܟ: ܝܛ). ܘܬܽܘܒ ܡܶܢ ܩܕܳܡ ܕܢܶܚܰܫ ܐܡ̇ܪ ܗܘܳܐ. ܫܠܳܡܳܐ ܫܳܒܶܩ ܐܢܳܐ ܠܟܽܘܢ. ܫܠܳܡܳܐ ܕܺܝܠܝ ܝܳܗܶܒ ܐܢܳܐ ܠܟܽܘܢ (ܝܘܚܢܢ ܝܕ: ܟܙ). ܕܗܶܢܽܘܢ ܩܴ̈ܠܐ ܩܰܕܺܝ̈ܫܶܐ ܕܰܫܠܳܡܳܐ ܢܛܺܝܪܺܝܢ ܗܘܰܘ ܠܬܰܠܡܺܝ̈ܕܶܐ ܒܳܬܰܪ ܩܝܳܡܬܳܐ. ܕܰܢܩܰܘܽܘܢ ܒܗܰܝܡܳܢܽܘܬܳܐ ܘܠܐ ܢܰܥܛܦܽܘܢ ܡܶܢ ܐ̮ܘܪܚܳܐ ܕܰܡܣܰܒܪܳܢܽܘܬܳܐ. ܐܝܟ ܕܶܐܡܰܪ ܪܽܘܚܳܐ ܥܠܰܝܗܘܢ.
ܕܠܐ ܢܶܗܦܟܽܘܢ ܠܒܶܣܬܰܪܗܽܘܢ. ܩܰܪܺܝܒ ܗܽܘ ܦܽܘܪܩܳܢܶܗ ܠܕܳܚ̈ܠܰܘܗܝ. ܢܶܫܪܶܐ ܐܝ̣ܩܳܪܶܗ ܒܰܐܪܥܰܢ. ܒܗܳܠܶܝܢ ܡܰܘܕܰܥ. ܕܰܠܗܰܘ ܕܶܐܡܰܪ ܗܳܠܶܝܢ. ܠܰܘ ܐܝܟ ܕܰܒܪܽܘܚܩܳܐ ܣܺܝܡ ܠܶܗ ܦܽܘܪܩܳܢܳܐ. ܐܠܐ ܘܳܐܦܶܢ ܪܰܚܺܝܩ. ܐܝܟ ܩܰܪܺܝܒܳܐ ܡܶܬܚܰܫܰܒ. ܡܶܛܠ ܕܟܽܠܡܶܕܶܡ ܕܡܶܢ ܐܠܗܳܐ ܡܶܬܦܣܶܩ ܕܢܶܗܘܐ. ܡܶܢ ܟܰܕܽܘ ܗܘܳܐ ܠܶܗ. ܐܡ̇ܪ ܓܶܝܪ ܘܥܠ ܦܶܓ̈ܥܶܐ ܕܡܰܘܗ̈ܒܳܬܶܗ ܕܰܐܠܗܳܐ ܕܰܕܢܰܚܘ ܥܠ ܥܳܠܡܳܐ ܒܓܶܠܝܳܢܶܗ.
ܛܰܝܒܽܘܬܳܐ ܘܩܽܘܫܬܳܐ ܐܱܪܥܽܘܢ. ܛܰܝܒܽܘܬܳܐ ܫܰܪܺܝܪܬܳܐ ܕܦܶܓܥܰܬ ܒܥܳܠܡܳܐ. ܗܳܝ ܕܚܰܝܳܐ ܘܡܰܐܚܝܳܐ. ܗܳܕܐ ܒܙܰܒܢܳܐ ܕܰܫܠܺܝ̈ܚܶܐ ܦܶܓܥܰܬ ܒܰܢ ܡܶܛܠ ܕܢܳܡܽܘܣܳܐ ܒܟܺܐܢܽܘܬܳܐ ܡܰܚܶܐ ܗܘܳܐ. ܒܝܰܕ ܡܳܪܢ ܕܶܝܢ ܛܰܝܒܽܘܬܳܐ ܙܰܕܩܰܬ ܠܰܒܢܰܝ̈ܢܳܫܳܐ. ܘܝܶܗܒܰܬ ܫܽܘܒܩܳܢ ܚܛܳܗ̈ܐ. ܘܗܳܕܐ ܠܐ ܗܘܳܬ ܡܶܢܟܽܘܢ. ܐܠܐ ܡܶܢ ܐܠܗܳܐ. ܒܪܺܝܬܳܐ ܚܢܰܢ ܓܶܝܪ ܕܺܝܠܶܗ ܕܶܐܬܒܪܺܝܢܰܢ ܒܝܶܫܽܘܥ ܡܫܺܝܚܳܐ ܠܰܥܒܳܕ̈ܐ ܛܳܒ̈ܐ܇ ܕܰܚܢܰܢ ܢܗܰܠܶܟ ܒܗܽܘܢ (ܐܦܣ̈ܝܐ ܒ: ܝ). ܘܗܳܝ ܕܶܐܡܰܪ:
ܙܰܕܺܝܩܽܘܬܳܐ ܘܰܫܠܳܡܳܐ ܢܢܰܫܩܽܘܢ. ܙܰܕܺܝܩܽܘܬܳܐ ܘܰܫܠܳܡܳܐ ܗܽܘܝܽܘ ܡܳܪܢ. ܘܠܶܗ ܗܽܘ ܡܢܰܫܩܺܝܢ ܗܘܰܘ ܚܰܛܳܝ̈ܐ. ܐܱܟܡܳܐ ܕܳܐܦ ܡܰܪܝܰܡ ܗܳܝ ܚܰܛܳܝܬܳܐ. ܕܰܡܢܰܫܩܳܐ ܗܘܳܬ ܪ̈ܶܓܠܶܝܗ̇ ܕܙܰܕܺܝܩܽܘܬܳܐ. ܘܡܰܝܬܶܐ ܒܳܬܰܪ ܗܳܠܶܝܢ ܥܠ ܗܰܝܡܳܢܽܘܬܳܐ ܕܺܐܝܬܶܝܗ̇ ܡܰܘܥܺܝܬܳܐ ܛܳܒܬܳܐ.
ܗܰܝܡܳܢܽܘܬܳܐ ܠܰܡ ܬܺܐܥܶܐ ܡܶܢ ܐܱܪܥܳܐ: ܘܙܰܕܺܝܩܽܘܬܳܐ ܐܱܕܺܝܩܰܬ ܡܶܢ ܫܡܰܝܳܐ. ܡܶܛܠܗܳܢܐ ܐܡ̣ܪ ܕܗܰܝܡܳܢܽܘܬܳܐ. ܠܽܘܩܕܰܡ ܬܺܐܥܶܐ ܡܶܢ ܐܪܥܳܐ. ܘܒܳܬܰܪܟܶܢ ܙܰܕܺܝܩܽܘܬܳܐ ܐܰܕܝ̣ܩܰܬ ܡܶܢ ܫܡܰܝܳܐ. ܫܰܦܺܝܪ ܡܰܠܶܦ ܗܳܪܟܳܐ. ܘܰܠܕܽܘܡܳܪܳܐ ܫܳܘܶܐ ܝܽܘܠܦܳܢܶܗ ܕܪܽܘܚܳܐ. ܙܰܪ̈ܥܶܐ ܦܰܓܪ̈ܳܢܳܝܶܐ ܡܳܐ ܕܩܰܒܶܠܘ ܡܶܛܪܳܐ ܡܶܢ ܫܡܰܝܳܐ܆ ܗܳܝܕܶܝܢ ܡܶܢ ܒܳܬܰܪܟܢ ܡܒܰܠܨܺܝܢ. ܠܐ ܓܶܝܪ ܡܶܫܟܚܳܐ ܕܙܰܪ̈ܥܶܐ ܘܥܶܩܳܪ̈ܶܐ ܢܶܫܘܚܽܘܢ ܒܰܚܛܽܘ̈ܛܶܐ. ܘܰܥܕܰܡܳܐ ܕܢܳܚܶܬ ܡܶܛܪܳܐ ܡܶܢ ܥܢܳܢܷ̈ܐ ܘܡܰܫܩܶܐ ܠܗܘܢ. ܗܳܪܟܳܐ ܕܶܝܢ ܠܘܳܬ ܢܰܦܫܳܐ ܡܰܠܶܦ. ܕܡܳܐ ܠܰܡ ܕܰܫܘܰܚܘ ܒܳܗ̇ ܢܽܘܪ̈ܒܶܐ ܕܗܰܝܡܳܢܽܘܬܐ. ܗܳܝܕܶܝܢ ܡܰܕܺܝܩ ܡܫܺܝܚܳܐ ܕܺܐܝܬܰܘܗܝ ܙܰܕܺܝܩܽܘܬܐ ܡܶܢ ܫܡܰܝܳܐ. ܘܗܳܘܶܐ ܠܳܗ̇ ܐܝܟ ܡܶܛܪܳܐ. ܐܝܟ ܣܽܘܟܳܠܐܴ ܕܙܰܪ̈ܥܶܐ ܕܠܐ ܢܰܦܫܳܐ. ܐܝ̣ܬܰܘܗܝ ܣܽܘܟܳܠܐܴ ܕܙܰܪ̈ܥܶܐ ܡܠܺܝ̈ܠܐܷ. ܘܡܶܛܠܗܳܕܐ ܡܳܐ ܕܩܰܠܺܝܠ ܝܶܗܒܰܬ ܐܝ̣ܕܳܐ ܒܗܰܝܡܳܢܽܘܬܐ ܐܱܪܥܳܐ ܕܢܰܦܫܳܐ. ܩܰܠܺܝܠܐܴܝ̣ܬ ܡܩܰܒܠܐܴ ܛܳܒܴ̈ܬܳܐ ܐܠܗܳܝܴ̈ܬܳܐ ܐܝܟ ܕܶܐܡܰܪ ܪܽܘܚܳܐ.
ܐܴܦ ܡܳܪܝܳܐ ܠܰܡ ܢܶܬܶܠ ܛܳܒܴ̈ܬܶܗ. ܗܳܢܰܘ ܫܽܘܒܩܳܢܳܐ ܕܰܚܛܳܗ̈ܐ. ܪܽܘܚܳܐ ܩܰܕܺܝܫܳܐ ܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ. ܘܒܳܬܰܪܟܢ ܚܰܝܷ̈ܐ ܕܠܐ ܡܳܝܽܘܬܽܘܬܳܐ. ܩܝܳܡܬܳܐ ܕܠܐ ܡܶܬܚܰܒܠܳܢܽܘܬܳܐ. ܫܽܘܘ̈ܕܳܝܶܐ ܕܥܳܠܡܳܐ ܕܰܥܬܺܝܕ. ܘܒܳܬܰܪ ܗܳܠܶܝܢ.
ܐܱܪܥܳܐ ܬܶܬܶܠ ܥܱ̈ܠܠܳܬܳܗ̇. ܦܺܐܪ̈ܶܐ ܕܠܐ ܡܳܝܽܘܬܽܘܬܳܐ ܦܽܘܠܚܳܢܳܐ ܕܙܰܕܺܝܩܽܘܬܳܐ. ܫܰܗܪܳܐ ܨܰܘܡܳܐ ܘܰܨܠܽܘܬܳܐ. ܡܪܰܚܡܳܢܽܘܬܳܐ. ܘܟܠ ܕܰܠܗܳܠܝܢ ܕܳܡܶܝܢ.
ܘܙܰܕܺܝܩܳܐ ܩܕܳܡܰܘܗܝ ܢܗܰܠܶܟ. ܘܰܢܣܺܝܡ ܒܰܐܪܥܳܐ ܗܰܠܟܴ̈ܬܶܗ. ܡܫܺܝܚܳܐ ܕܶܝܢ ܗܽܘܝܽܘ ܙܰܕܺܝܩܳܐ. ܘܗܽܘ ܩܳܐܷܡ ܒܪܰܒܽܘܬ ܟܽܘܡܪܽܘܬܳܐ ܩܕܳܡ ܐܱܒܽܘܗܝ ܚܠܳܦܰܝܢ. ܘܥܰܠ ܗܳܕܐ ܒܰܐܪܥܳܐ ܣܺܝ̈ܡܳܢ ܗܰܠܟܴ̈ܬܶܗ ܗܳܢܰܘ ܦܽܘ̈ܩܕܳܢܰܘܗܝ. ܒܓܰܘ ܢܰܦܫܳܐ ܕܰܗܘܳܬ ܠܶܗ ܐܱܪܥܳܐ ܘܩܰܒܶܠܬܶܗ ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܱܡܺܝܢ܀
ܡܙܡܘܪܐ ܕܬܡܢܝܢ ܘܫܬܐ
ܕܡܰܘܕܰܥ ܥܰܠ ܨܠܽܘܬܳܐ ܘܥܰܠ ܬܰܟܫܶܦܬܳܐ ܘܥܰܠ ܐܪ̈ܳܙܶܐ ܕܥܰܡܰܢܽܘܐܝܠ. ܘܥܰܠ ܩܪܳܝܬܳܐ ܕܥܰܡ̈ܡܶܐ ܠܘܳܬ ܣܶܓܕܬܳܐ ܕܰܐܠܳܗܳܐ ܒܳܪܽܘܝܳܐ.
ܢܳܡܽܘܣܳܐ ܕܰܨܠܽܘܬܳܐ ܡܰܠܶܦ ܠܰܢ ܛܽܘܒܳܢܳܐ ܕܰܘܝܕ ܡܙܰܡܪܳܢܳܐ܆ ܒܬܶܫܒܽܘܚܬܳܐ ܗܳܕܐ ܕܰܬܡܳܢܺܝܢ ܘܫܶܬ. ܟܰܕ ܡܚܰܘܶܐ ܕܠܳܐ ܬܰܚܦܺܝܬܳܐ ܕܒܰܐܝܠܶܝܢ ܩܴ̈ܠܐܷ ܢܶܬܚܰܫܰܚ ܩܕܳܡ ܐܠܗܳܐ. ܗܰܘ ܕܰܩܪܶܒ ܩܕܳܡܰܘܗܝ ܠܰܡܨܰܠܳܝܽܘ ܟܰܕ ܡܨܰܠܐܷ. ܠܰܘ ܒܰܠܚܽܘܕ ܥܰܠ ܢܰܦܫܶܗ܆ ܐܠܐ ܘܥܠ ܟܽܠܗܘܢ ܒܢܰܝ̈ܢܳܫܳܐ ܢܩܰܪܶܒ ܒܳܥܽܘܬܳܐ. ܕܳܐܦ ܗܶܢܘܢ ܢܶܬܦܢܽܘܢ ܠܘܳܬ ܐܠܗܳܐ. ܟܰܕ ܡܫܰܠܰܚ ܢܰܦܫܶܗ ܗܰܘ ܕܰܡܨܰܠܐܷ ܡܶܢ ܐܝ̣ܩܳܪܳܐ ܘܪܰܒܽܘܬܳܐ. ܘܠܐ ܢܶܬܚܫܶܒ ܕܰܡܝܰܩܪܰܐ ܗ̄ܘ ܐܱܘ ܥܰܬܺܝܪܳܐ. ܐܠܐ ܡܶܣܟܺܢܳܐ ܘܒܳܝܫܳܐ ܘܒܰܪ ܐܱܡܬܶܗ ܕܰܐܠܗܳܐ. ܐܝܟ ܕܳܐܦ ܗܳܢܐ ܓܰܒܪܳܐ ܙܰܕܺܝܩܳܐ ܒܢܰܦܫܳܐ ܕܡܰܠܝܳܐ ܡܽܘܟܳܟܳܐ ܩܳܐܷܡ ܗܘܳܐ ܩܕܳܡ ܐܠܗܳܐ ܘܰܡܨܰܠܐܷ ܘܳܐܡܰܪ:
ܨܠܺܝ ܡܳܪܝܳܐ ܐܷܕܢܳܟ ܘܰܥܢܺܝܢܝ. ܡܶܛܠ ܕܡܶܣܟܺܢܳܐ ܐܢܳܐ ܘܒܳܝܫܳܐ. ܘܢܰܛܰܪ ܠܢܰܦܫܝ ܡܶܛܠ ܕܛܳܒ ܐܱܢܬ. ܦܪܽܘܩ ܠܥܰܒܕܳܟ ܐܱܢܬ ܐܠܗܳܐ ܕܰܡܣܰܒܰܪ ܒܳܟ. ܫܡܰܥܬ ܐܱܝܟܰܢܳܐ ܡܨܰܠܐܷ܆ ܠܡܳܢܳܐ ܐܡ̇ܪ ܠܘܳܬ ܐܠܗܳܐ ܕܢܶܨܠܐܷ ܐܷܕܢܶܗ ܘܢܶܥܢܺܝܘܗܝ. ܘܰܐܝܕܳܐ ܗܝ ܥܶܠܬܳܐ ܕܰܡܦܺܝܣ ܠܡܳܪܝܳܐ ܕܥܳܢܶܐ ܠܶܗ ܢܶܨܠܐܷ ܐܷܕܢܶܗ. ܘܶܐܠܐܴ ܨܳܠܐܷ ܐܷܕܢܶܗ ܕܗܰܘ ܕܺܐܝܬܰܘܗܝ ܒܟܽܠܕܽܘܟ ܠܐ ܥܳܢܶܐ. ܡܳܕܶܝܢ ܗܳܝ ܕܶܐܡܰܪ ܢܒܺܝܳܐ ܕܰܨܠܺܝ ܐܷܕܢܳܟ ܡܶܛܠ ܕܢܰܘܕܰܥ ܡܶܬܢܰܚܬܳܢܽܘܬܳܐ ܗ̇ܝ ܠܰܟܝܳܢܳܐ ܡܳܪܳܢܳܝܳܐ. ܕܰܢܩܰܒܶܠ ܨܠܽܘܬܳܐ ܕܰܒܢܰܝ̈ܢܳܫܳܐ. ܐܷܢܓܶܝܪ ܠܐ ܡܶܬܪܟܶܢ ܨܶܝܕ ܪ̈ܳܚܡܶܐ. ܘܠܐܴ ܡܶܫܡܰܥ ܫܳܡܰܥ܆ ܘܠܐܴ ܗܳܕܐ ܒܰܠܚܽܘܕ. ܘܶܐܠܐ ܠܐܴ ܡܶܒܪܳܐ ܒܳܪܶܐ ܗܘܳܐ. ܐܷܠܽܘܠܐܴ ܐܷܬܪܟܶܢ܆ ܠܰܘ ܡܶܐܪܰܒ ܝ̣ܪܶܒ ܟܰܕ ܒܳܪܶܐ. ܡܶܛܠ ܕܶܐܠܽܘ ܠܐ ܕܰܙܥܰܪ ܐܦ ܐܷܬܡܰܟܰܟ. ܠܐ ܒܳܪܶܐ ܗܘܳܐ ܒܶܪ̈ܝܳܬܳܐ. ܐܱܝܟܰܢܳܐ ܡܶܫܟ̈ܚܳܢ ܗܘܱ̈ܝ ܕܰܢܣܰܝܒܪ̈ܳܢ ܒܶܪ̈ܝܳܬܳܐ ܥܽܘܙܳܐ ܕܚܰܝܠܐܴ ܕܰܟܝܳܢܶܗ ܕܒܳܪܽܘܝܳܐ. ܐܠܐ ܘܟܰܕ ܙܳܥܰܪ ܘܡܶܫܬܰܝܰܢ ܥܰܡܗܘܢ. ܡܳܕܶܝܢ ܒܗܳܕܐ ܕܨܳܠܐܷ ܐܷܕܢܶܗ ܘܫܳܡܰܥ ܨܠܽܘܬܳܐ ܕܩܰܕܺܝ̈ܫܶܐ. ܡܶܛܠ ܕܗܰܘ ܕܶܐܡܰܪ ܟܰܕ ܡܨܰܠܐܷ ܨܠܺܝ ܡܳܪܝܳܐ ܐܷܕܢܳܟ ܘܰܥܢܺܝܢܝ. ܠܰܘ ܒܩܳܠܐܴ ܕܰܦܐܷܐ ܠܰܟܝܳܢܳܐ ܕܰܐܠܳܗܽܘܬܳܐ ܐܷܬܚܰܫܰܚ. ܐܠܐ ܒܕܺܝܠܶܗ ܐܷܬܚܰܫܰܚ ܟܕ ܡܨܰܠܐܷ. ܘܡܶܢܶܗ ܢܣܰܒ ܕܡܽܘܬܳܐ ܘܩܰܪܶܒ ܒܳܥܽܘܬܳܐ. ܐܷܕܢܳܐ ܓܶܝܪ ܕܡܶܨܛܰܠܝܳܐ ܡ̣ܢ ܫܶܡܥܳܐ. ܠܰܘ ܕܰܐܠܗܳܐ ܗܝ ܐܠܐ ܕܒܰܪܢܳܫܳܐ ܕܣܰܓܺܝ ܒܨܺܝܪ. ܡܶܛܠ ܕܢܰܠܶܦ ܢܒܺܝܳܐ ܥܠ ܗܳܠܝܢ ܕܶܐܡܪܶܬ ܕܗܳܟܰܢܳܐ ܐܷܢܶܝܢ. ܡܶܫܬܰܘܕܶܐ ܬܰܚܽܘܒܽܘܬܳܐ ܕܰܟܝܳܢܶܗ ܒܗܳܝ ܕܶܐܡܰܪ:
ܡܶܛܠ ܕܡܶܣܟܺܢܳܐ ܐܢܳܐ ܘܒܳܝܫܳܐ. ܟܽܠܗܘܢ ܡܠܺܝ̈ܠܐܷ ܓܶܝܪ ܡܶܣܟܺܢ̈ܐ ܘܒܳܝ̈ܫܶܐ ܐܢܘܢ. ܘܠܰܝܬ ܥܰܬܺܝܪܳܐ ܐܠܐ ܐܢ ܐܢܬ ܒܰܠܚܽܘܕܰܝܟ. ܘܰܟܡܳܐ ܐܢ ܝܳܪܶܒ ܘܡܶܬܥܰܠܐܷ ܥܠ ܬܶܫܒܽܘܚܬܳܐ ܘܪܰܒܽܘܬܳܐ ܕܥܳܒܽܘܕܶܗ ܡܰܟܪܶܙ. ܘܠܰܘ ܩܽܘܠܳܣܳܐ ܕܰܟܝܳܢܶܗ ܡܶܫܬܰܥܶܐ. ܘܛܰܝܒܽܘܬܳܟ ܡܰܟܪܙܺܝܢ ܥܒܺܝ̈ܕܶܐ. ܟܡܳܐ ܐܢ ܡܶܛܠ ܪ̈ܰܚܡܶܐ ܕܰܫܟܺܝܚܺܝܢ ܒܳܟ ܡܶܬܥܰܠܶܝܢ. ܡܶܛܠܗܳܢܐ ܐܡ̇ܪ ܐܢ̣ܐ.
ܕܢܰܛܰܪ ܠܢܰܦܫܝ ܡܶܛܠ ܕܛܳܒ ܐܢܬ. ܘܥܰܠܗܳܝ ܐܡ̇ܪ ܐܢܳܐ ܘܰܦܪܽܘܩ ܠܥܰܒܕܳܟ ܐܢܬ ܐܠܗܳܐ ܕܰܡܣܰܒܰܪ ܒܳܟ. ܐܴܘ ܠܢܰܦܫܳܐ ܕܡܰܠܝܳܐ ܡܰܟܺܝܟܽܘܬܳܐ. ܐܴܘ ܠܪܶܥܝܳܢܳܐ ܠܐ ܡܶܨܛܰܠܝܳܢܳܐ ܘܰܠܗܰܘܢܳܐ ܕܚܳܐܱܪ ܒܰܐܠܗܳܐ. ܠܰܝܬ ܥܽܘܗܕܳܢܳܐ ܕܡܰܠܟܽܘܬܶܗ ܗܳܪܟܳܐ. ܘܠܐܴ ܕܽܘܟܪܳܢܳܐ ܕܓܰܢ̱ܒܳܪܽܘܬܳܐ ܘܰܕܚܰܝܠܐܴ. ܐܠܐ ܡܦܺܝܣ ܥܠ ܦܽܘܪܩܳܢܳܐ. ܐܝܟ ܓܰܒܪܳܐ ܕܳܐܦܠܐܴ ܢܰܣܺܝ ܠܡܶܛܥܰܢ ܙܰܝܢܳܐ. ܘܒܳܥܶܐ ܥܰܡ ܦܽܘܪܩܳܢܳܐ ܐܴܦ ܪ̈ܰܚܡܶܐ.
ܪܰܚܶܡܥܠܰܝ ܡܳܪܝܳܐ. ܡܶܛܠ ܕܰܠܘܳܬܳܟ ܐܷܩܪܶܐ ܒܟܽܠܝܽܘܡ. ܕܳܡܝܳܐ ܗܳܕܶܐ ܕܥܰܡ ܩܪܳܒܳܐ ܡܶܬܚܰܙܝܳܢܳܐ ܐܴܦ ܡܶܢ ܡܶܬܝܰܕܥܳܢܳܐ ܕܳܚܶܠ ܗܘܳܐ. ܠܰܘ ܡܶܢ ܐܱܝܠܶܝܢ ܕܰܛܥܺܝܢܺܝܢ ܙܰܝܢܳܐ ܡܨܰܠܐܷ ܗܘܳܐ ܕܰܘܝܕ ܕܢܶܬܦܪܶܩ. ܐܠܐ ܡܶܢ ܗܳܢܘܢ ܕܰܡܫܰܦܠܺܝܢ ܠܰܢ ܒܙܰܝܢܳܐ ܕܡܶܢܰܢ ܫܳܩܠܺܝܢ. ܘܥܰܡ ܢܰܦܫܳܐ ܡܶܬܟܰܬܫܺܝܢ. ܘܥܰܠܗܳܝ ܐܡ̣ܪ ܕܰܠܘܳܬܳܟ ܐܷܩܪܶܐ ܒܟܽܠܝܽܘܡ. ܘܬܘܒ ܫܶܐܠ ܙܳܟܽܘܬܳܐ ܕܢܶܬܶܠ ܠܶܗ ܐܠܗܳܐ ܡܶܢ ܩܪ̈ܳܒܶܐ ܕܰܒܥܶܠܕ̈ܒܳܒܶܐ ܓܠܰܝܴ̈ܐ ܘܰܟܣܰܝܴ̈ܐ.
ܚܰܕܳܐ ܢܰܦܫܶܗ ܕܥܰܒܕܳܟ. ܡܶܛܠ ܕܰܠܘܳܬܳܟ ܡܳܪܝܳܐ ܐܱܪܺܝܡܶܬ ܢܰܦܫܝ. ܡܶܛܠ ܗܳܢܳܐ ܠܘܳܬܳܟ ܡܳܪܝܳܐ ܐܷܢܳܐ ܨܒܺܝܬ ܘܶܐܬܩܰܪܒܶܬ. ܘܰܐܪܺܝܡܶܬ ܢܰܦܫܝ ܡܶܢ ܥܰܦܪܳܐ ܕܰܚܛܳܗ̈ܐ. ܘܶܐܬܥܰܠܺܝܬ ܒܰܨܠܽܘܬܳܐ ܠܬܰܪܥܳܐ ܕܪܰܒܽܘܬܳܟ. ܒܗܳܝ ܕܝܶܕܥܶܬ ܕܨܶܒܝܳܢܳܟ ܗܳܢܰܘ ܕܢܺܚܽܘܢ ܒܢܰܝ̈ܢܳܫܳܐ. ܐܷܠܐ ܠܐ ܕܒܰܪܬ ܒܰܩܛܺܝܪܳܐ. ܘܰܡܩܰܪܶܒܬ ܠܘܳܬܳܟ. ܠܐܱܝܢܳܐ ܕܗܽܘ ܠܐ ܡܪܺܝܡ ܢܰܦܫܶܗ ܡܶܢ ܦܽܘܠܚܳܢܳܐ ܡܡܰܟܟܳܐ ܕܰܚܛܺܝܬܳܐ. ܡܶܛܠ ܕܰܒܛܰܝܒܽܘܬܳܟ ܝܰܗܒܬ ܠܶܗ ܚܺܐܪܽܘܬܳܐ. ܘܰܕܬܶܥܨܶܝܗ̇ ܠܐ ܨܳܒܶܐ ܐܱܢܬ.
ܡܶܛܠ ܕܰܐܢܬ ܡܳܪܝܳܐ ܛܳܒ ܐܱܢܬ. ܘܣܰܓܺܝܳܐܐ ܛܰܝܒܽܘܬܳܟ ܠܟܽܠ ܕܩܳܪܶܝܢ ܠܳܟ. ܥܶܠܬܳܐ ܗ̄ܝ ܠܰܡ ܒܳܥܝܳܐ ܛܰܝܒܽܘܬܳܟ ܠܰܢ ܠܡܰܚܳܝܽܘ. ܐܷܠܐ ܘܒܰܨܠܽܘܬܳܐ ܙܥܽܘܪܬܳܐ ܡܰܘܗܰܒܬܳܐ ܪܰܒܬܳܐ ܡܰܘܫܛܳܐ. ܕܠܐ ܬܰܟܫܶܦܬܳܐ ܘܰܕܠܐ ܒܳܥܽܘܬܳܐ ܠܐ ܡܶܬܚܰܙܝܳܐ ܡܶܛܠ ܗܳܢܐ ܟܕ ܠܰܨܠܽܘܬܳܐ ܡܰܘܪܶܒ ܘܰܡܩܰܠܶܣ ܒܶܐܕ̈ܢܶܐ ܕܫܳܡܽܘ̈ܥܶܐ ܐܡ̇ܪ.
ܨܽܘܬ ܡܳܪܝܳܐ ܨܠܽܘܬܝ. ܘܰܫܡܰܥ ܒܩܳܠܐܴ ܕܰܓܥܳܬܝ. ܐܴܦ ܗܳܪܟܳܐ ܬܘܒ ܕܰܐܝܟ ܕܰܒܫܽܘܪܳܝܳܐ ܡܰܠܶܠ. ܘܰܢܨܽܘܬ ܐܦ ܢܶܫܡܰܥ ܐܡ̇ܪ ܠܗ ܠܐܠܗܳܐ. ܘܟܰܕ ܛܳܒ ܫܳܡܰܥ ܗܘܳܐ ܐܠܗܳܐ ܩܳܠܐܴ ܕܰܨܠܽܘܬܳܐ. ܡܳܢܳܐ ܕܶܝܢ ܐܡ̇ܪ ܐܢܳܐ ܒܰܠܚܽܘܕ. ܘܠܐ ܓܝܪ ܙܰܘܥ̈ܐ ܕܰܨܠܽܘܬܳܐ ܗܳܘܶܝܢ ܒܠܶܒܳܐ. ܟܰܕ ܪܰܚܺܝܩ ܪܽܘܚܳܐ ܕܰܐܠܗܳܐ. ܐܡ̣ܪ ܓܝܪ ܦܰܘܠܽܘܣ ܐܠܗܳܝܳܐ܆ ܕܗܽܘ ܠܰܡ ܪܽܘܚܳܐ ܡܨܰܠܝܳܐ ܚܠܳܦܰܝܢ ܒܬܶܢܚܴ̈ܬܳܐ ܕܠܐܴ ܡܶܬܡܱ̈ܠܠܳܢ (ܪ̈ܗܘܡܝܐ ܚ: ܟܘ). ܡܳܕܶܝܢ ܗܳܝ ܕܶܐܡܰܪ ܢܒܺܝܐ ܨܽܘܬ ܡܳܪܝܳܐ ܨܠܽܘܬܝ ܘܰܫܡܰܥ ܒܩܳܠܐܴ ܕܰܓܥܳܬܝ ܗܳܕܐ ܐܝ̣ܬܶܝܗ̇܆ ܗܳܝ ܕܢܶܦܽܘܩ ܠܰܥܒܳܕܳܐ ܗܰܘ ܡܶܕܶܡ ܕܡܶܬܟܰܫܰܦ ܐܢܳܐ. ܡܶܛܠ ܕܟܠ ܨܠܽܘܬܳܐ ܫܳܡܰܥ ܐܠܗܳܐ. ܠܰܘ ܕܶܝܢ ܠܟܽܠܗܶܝܢ ܡܶܬܛܦܺܝܣ. ܒܗܳܝ ܕܰܨܠܽܘܬܳܐ ܕܠܐ ܩܰܕܶܡ ܩܰܪܶܒ ܗܰܘ ܕܰܡܨܰܠܐܷ ܩܕܳܡ ܐܠܗܳܐ ܡܶܕܶܡ ܕܰܡܢܺܝܚ ܠܶܗ. ܘܠܐܴ ܗܽܘ ܥܳܢܶܐ ܠܶܗ ܘܥܳܒܶܕ ܡܶܕܶܡ ܕܡܶܬܟܰܫܰܦ ܥܠܰܘܗܝ. ܢܒܺܝܐ ܕܶܝܢ ܥܰܡ ܨܠܽܘܬܳܐ ܐܦ ܩܽܘܒܳܠܛܰܝܒܽܘܬܳܐ ܡܩܰܪܶܒ ܗܘܳܐ. ܘܡܰܘܕܶܐ ܘܳܐܡܰܪ: ܕܠܰܘ ܠܰܡ ܗܳܫܳܐ ܫܡܰܥܬܳܢܝ. ܐܷܠܐܴ ܡܰܘܕܶܐ ܐܢܳܐ ܕܰܒܟܽܠܙܒܰܢ ܫܳܡܰܥ ܐܱܢܬ ܠܺܝ.
ܘܰܒܝܰܘܡܳܐ ܕܽܐܘܠܨܳܢܝ ܩܪܺܝܬܳܟ ܘܰܥܢܰܝܬܳܢܝ. ܠܰܝܬ ܐܱܟܘܳܬܳܟ ܡܳܪܝܳܐ ܐܱܠܳܗܰܢ ܘܠܰܝܬ ܐܝܟ ܥܒܳܕܰܝ̈ܟ. ܘܟܽܠܗܽܘܢ ܥܰܡ̈ܡܶܐ ܕܰܥܒܰܕܬ. ܢܺܐܬܽܘܢ ܘܢܶܣܓܕܽܘܢ ܠܳܟ ܡܳܪܝܳܐ. ܘܰܢܫܰܒܚܽܘܢ ܠܰܫܡܳܟ ܡܶܛܠ ܕܪܰܒ ܐܱܢܬ. ܫܰܦܺܝܪ ܓܶܠܝܳܢܳܐ ܕܩܰܒܶܠ ܢܒܺܝܐ ܒܰܨܠܽܘܬܶܗ. ܥܕܰܡܳܐ ܠܗܳܫܳܐ ܕܢܶܫܬܡܰܥ ܡܦܺܝܣ ܗܘܳܐ ܒܰܨܠܽܘܬܶܗ ܐܷܫܬܰܡܥܰܬ. ܠܰܘ ܒܰܠܚܽܘܕ ܥܠ ܢܰܦܫܶܗ ܡܨܰܠܐܷ ܐܝܟ ܕܰܐܘܕܰܥ ܓܶܠܝܳܢܳܐ. ܐܷܠܽܘ ܓܝܪ ܗܳܕܐ ܡܦܺܝܣ ܗܘܳܐ ܡܶܬܥܢܶܐ ܗܘܳܐ. ܘܥܰܠܗܳܕܐ ܐܡ̣ܪ ܕܰܒܟܽܠܗܘܢ ܥܰܡ̈ܡܶܐ ܨܳܒܝܳܐ ܛܰܝܒܽܘܬܳܟ ܕܢܺܚܽܘܢ. ܘܢܶܥܛܦܽܘܢ ܡܶܢ ܫܒܺܝ̈ܠܐܷ ܡܰܠܝܱ̈ܝ ܬܽܘܩ̈ܠܳܬܳܐ ܕܰܦܬܰܟܪ̈ܶܐ ܘܝܳܗܶܒ ܩܳܠܐܴ ܘܳܐܡܰܪ: ܟܽܠܗܽܘܢ ܥܰܡ̈ܡܶܐ ܕܰܥܒܰܕܬ. ܢܺܐܬܽܘܢ ܘܢܶܣܓܕܽܘܢ ܘܰܢܫܰܒܚܽܘܢ ܠܰܫܡܳܟ ܕܪܰܒ ܐܱܢܬ ܘܰܫܒܺܝܚ ܐܱܢܬ ܘܠܰܝܬ ܐܱܟܘܳܬܳܟ. ܘܟܽܠܗܘܢ ܕܺܝܠܳܟ ܐܢܽܘܢ. ܘܰܐܢܬ ܥܒܰܕܬ ܐܢܽܘܢ. ܘܠܰܘ ܟܰܕ ܣܳܢܶܐ ܐܱܢܬ ܠܗܘܢ ܓܒܰܝܬ ܠܺܝܣܪܳܐܝܠ. ܡܶܛܠ ܕܰܠܥܰܡ̈ܡܶܐ ܚܰܘܺܝܬ ܚܽܘܒܳܐ ܕܪܰܒ ܡܶܢ ܕܰܠܘܳܬ ܥܰܡܳܐ. ܠܺܝܣܪܳܐܝܠ ܓܶܝܪ ܒܰܥܒܴ̈ܕܶܐ ܦܪܰܩܬ. ܠܥܰܡ̈ܡܶܐ ܒܰܩܢܽܘܡܳܟ ܦܪܰܩܬ. ܘܠܰܝܬ ܕܦܳܚܶܡ ܠܳܟ ܦܳܪܽܘܩܰܢ. ܘܠܰܝܬ ܕܕܳܡܶܐ ܠܳܟ ܒܰܡܦܰܨ̈ܝܳܢܶܐ. ܘܣܳܦ̈ܩܳܢ ܓܝܪ ܬܶܕܡܪ̈ܳܬܳܐ ܕܥܳܒܶܕ ܐܢܬ ܡܳܐ ܕܡܶܬܓܠܶܝܬ. ܡܶܛܠ ܕܟܽܠܗܘܢ ܥܰܡ̈ܡܶܐ ܡܽܘܟܳܟܳܟ ܦܳܪܶܩ ܠܗܘܢ. ܟܕ ܓܝܪ ܡܶܬܪܰܓܪܰܓ ܗܘܳܐ ܠܰܡܩܰܒܳܠܽܘ ܠܓܶܠܝܳܢܶܗ ܕܡܶܠܬܳܐ ܐܠܗܳܐ. ܗܰܘ ܕܰܡܛܰܝܰܒ ܗܘܳܐ ܕܢܶܗܘܶܐ ܥܠ ܐܱܪܥܳܐ. ܬܽܘܒ ܡܨܰܠܐܷ ܘܳܐܡܰܪ:
ܚܰܘܳܢܝ ܡܳܪܝܳܐ ܐ̮ܘܪܚܳܟ ܘܶܐܗܰܠܶܟ ܒܩܽܘܫܬܳܐ. ܐ̮ܘܪܚܳܐ ܕܶܝܢ ܕܰܠܘܳܬ ܐܱܒܳܐ ܗܽܘܝܽܘ ܡܳܪܢ. ܐܡ̣ܪ ܓܝܪ ܠܬܰܠܡܺܝ̈ܕܰܘܗܝ ܟܕ ܨܳܒܶܝܢ ܗܘܰܘ ܠܡܺܐܠܰܦ ܡܶܢܶܗ. ܕܰܐܝܟܰܢܳܐ ܢܺܐܬܽܘܢ ܠܘܳܬ ܐܱܒܽܘܗܝ. ܕܶܐܢܳܐ ܐܝ̣ܬܰܝ ܐܘܪܚܳܐ ܘܚܰܝܷ̈ܐ ܘܰܫܪܳܪܳܐ. ܘܠܐܴ ܡܶܫܟܰܚ ܐܢܳܫ ܢܺܐܬܶܐ ܠܘܳܬ ܐܱܒܳܐ ܐܷܠܐ ܐܢ ܒܺܝ (ܝܘܚܢܢ ܝܕ: ܘ). ܡܳܕܶܝܢ ܓܰܠܝܳܐ ܗ̄ܝ ܕܳܐܦ ܕܰܘܝܕ ܐܱܠܗܳܝܳܐ ܠܗ ܠܥܰܡܰܢܽܘܐܝܠ ܒܳܥܶܐ ܗܘܳܐ ܕܢܶܚܙܶܐ. ܒܗܳܝ ܒܰܪܬ ܩܳܠܐܴ ܕܨܰܠܺܝ ܠܘܳܬ ܐܱܒܳܐ. ܕܚܰܘܳܢܝ ܡܳܪܝܳܐ ܐ̮ܘܪܚܳܟ ܘܶܐܗܰܠܶܟ ܒܩܽܘܫܬܳܐ. ܘܟܕ ܡܰܘܕܰܥ ܕܥܰܡܳܗ̇ ܕܗܳܕܐ ܐ̮ܘܪܚܳܐ܆ ܡܶܬܓܠܐܷ ܐܦ ܩܽܘܫܬܳܐ. ܩܽܘܫܬܳܐ ܕܶܝܢ ܗܽܘܝܽܘ ܫܪܳܪܳܐ. ܫܪܳܪܳܐ ܕܝܢ ܠܰܝܬ ܒܶܗ ܕܰܓܳܠܽܘܬܳܐ ܘܠܐ ܛܶܐܠܳܢܺܝܬܳܐ. ܒܡܳܪܢ ܕܝܢ ܫܪܳܪܳܐ ܘܩܽܘܫܬܳܐ ܐܷܬܚܙܺܝ. ܘܠܰܘ ܛܶܐܠܳܢܺܝܬܳܐ. ܒܗܳܠܝܢ ܡܳܕܶܝܢ ܕܶܐܬܚܙܺܝ ܒܓܶܠܝܳܢܶܗ ܕܰܐܠܗܳܐ ܒܳܥܶܐ ܗܘܳܐ ܢܒܺܝܐ ܢܗܰܠܶܟ ܘܢܶܚܙܶܐ ܘܢܶܚܕܶܐ ܗܘܳܐ ܐܝܟ ܕܶܐܡܰܪ܆
ܢܶܚܕܶܐ ܠܶܒܝ ܒܰܐܝܠܶܝܢ ܕܕܳܚܠܺܝܢ ܠܰܫܡܳܟ ܡܳܪܝܳܐ. ܗܳܠܶܝܢ ܕܝܢ ܕܺܐܝܬܰܝܗܘܢ ܥܰܡ̈ܡܶܐ ܕܰܦܢܰܘ ܠܘܳܬ ܐܠܗܳܐ ܒܝܰܕ ܟܳܪܽܘܙܽܘܬܳܐ ܕܰܫܠܺܝ̈ܚܶܐ. ܕܰܠܗܳܠܝܢ ܡܨܰܠܐܷ ܗܘܳܐ ܡܙܰܡܪܳܢܳܐ ܕܢܶܬܦܨܰܚ ܒܰܚܙܳܬܳܐ ܕܺܝܠܗܘܢ. ܘܒܰܝܢܳܬܗܘܢ ܢܩܽܘܡ ܘܢܶܩܥܶܐ:
ܐܱܘܕܶܐ ܠܳܟ ܡܳܪܝܳܐ ܐܱܠܳܗܝ ܡܶܢ ܟܽܠܶܗ ܠܶܒܝ. ܘܶܐܫܰܒܰܚ ܫܡܳܟ ܠܥܳܠܰܡ. ܕܰܐܝܟ ܗܳܟܰܢܳܐ ܠܰܡ ܡܶܬܚܰܙܝܳܐ ܬܰܘܕܺܝܬܳܐ ܕܥܰܡ̈ܡܶܐ ܡܗܰܝܡ̈ܢܶܐ. ܕܡܰܦܢܶܐ ܓܶܠܝܳܢܳܟ ܠܘܳܬ ܫܪܳܪܳܐ. ܘܠܰܘ ܐܱܝܟ ܥܰܡܳܐ ܡܚܰܠܦܺܝܢ ܠܳܟ ܒܥܶܓ̈ܠܐܷ. ܐܠܐ ܠܥܳܠܰܡ ܡܫܰܒܚܺܝܢ ܠܰܫܡܳܟ ܘܳܐܡܪܺܝܢ.
ܡܶܛܠ ܕܛܰܝܒܽܘܬܳܟ ܣܶܓܝܰܬ ܥܠܰܝ. ܘܦܰܨܺܝܬ ܢܰܦܫܝ ܡܶܢ ܫܝܽܘܠ ܬܰܚܬܳܝܬܳܐ. ܡܰܢܽܘ ܓܝܪ ܗܰܘ ܕܰܢܚܶܬ ܒܳܬܰܪ ܟܝܳܢܳܐ ܐܢܳܫܳܝܳܐ ܠܰܫܝܽܘܠ ܬܰܚܬܳܝܬܳܐ. ܘܰܐܣܶܩ ܡܶܢܳܗ̇ ܠܢܰܦ̈ܫܳܬܳܐ ܕܩܰܕܺܝ̈ܫܶܐ. ܐܠܐ ܡܳܪܝܳܐ ܗܰܘ ܕܰܢܚܶܬ ܒܢܰܦܫܶܗ. ܘܰܐܟܪܶܙ ܚܰܝ̈ܐ ܕܠܐ ܡܶܬܚܰܒܠܳܢܽܘܬܳܐ. ܐܝܟ ܕܶܐܡܰܪ ܗܰܘ ܪܰܒܳܐ ܕܰܫܠܺܝܚ̈ܐ ܦܶܛܪܽܘܣ. ܕܰܐܟܪܶܙ ܠܢܰܦ̈ܫܳܬܳܐ ܐܱܝܠܶܝܢ ܕܰܐܚܺܝ̈ܕܳܢ ܗܘܱ̈ܝ ܒܰܫܝܽܘܠ. ܗܳܠܶܝܢ ܕܡܶܢ ܩܕܺܝܡ ܠܐܴ ܐܷܬܬܦܺܝ̈ܣ ܗܘܱ̈ܝ ܒܝܰܘ̈ܡܰܝ ܢܽܘܚ (ܦܛܪܘܣ ܓ: ܝܛ-ܟ). ܘܡܶܛܠ ܗܳܕܐ ܠܡ ܐܷܣܬܰܒܰܪ ܠܡܺܝ̈ܬܶܐ܆ ܕܢܶܬܬܕܺܝܢܽܘܢ ܐܝܟ ܒܢܰܝ̈ܢܳܫܳܐ ܒܰܦܓܰܪ. ܘܢܺܚܽܘܢ ܒܰܐܠܗܳܐ ܒܪܽܘܚ. ܟܰܕ ܓܝܪ ܗܽܘ ܡܶܠܬܳܐ ܢܚܶܬ ܠܰܫܝܽܘܠ. ܡܶܛܠ ܕܠܐ ܐܷܫܟܰܚܘ ܬܰܪ̈ܥܶܐ ܕܰܫܝܽܘܠ ܕܢܶܟܠܽܘܢ ܠܓܰܘ ܡܶܢܗܘܢ ܠܢܰܦܫܳܐ ܗܳܝ ܐܱܠܗܳܝܬܳܐ. ܒܶܗ ܡܦܰܨܶܐ ܗܘܳܐ ܐܠܗܳܐ ܡܶܠܬܳܐ ܠܟܽܠܗܶܝܢ ܢܰܦ̈ܫܳܬܳܐ ܕܩܰܕܺܝ̈ܫܶܐ. ܘܡܶܬܕܟܰܪ ܕܶܝܢ ܗܳܪܟܳܐ ܢܒܺܝܐ. ܠܰܩܪܳܒܳܐ ܕܰܥܒܰܕܘ ܥܰܘ̈ܠܐܷ ܒܬܰܪ̈ܥܶܐ ܕܰܫܝܽܘܠ ܬܰܚܬܳܝܬܳܐ ܕܠܐ ܢܳܦ̈ܩܳܢ ܢܰܦ̈ܫܳܬܳܐ ܥܰܡܶܗ ܕܡܶܠܬܳܐ. ܘܥܰܠܗܳܝ ܐܡ̇ܪ ܢܒܺܝܐ.
ܐܱܠܳܗܳܐ ܥܰܘܴ̈ܠܐܷ ܩܳܡܘ ܥܠܰܝ. ܘܰܟܢܽܘܫܬܳܐ ܕܥܰܫܺܝ̈ܢܶܐ ܒܥܰܐ̮ܘܗ̇ ܠܢܰܦܫܝ. ܘܠܐ ܐܰܬܕܰܟܪܽܘܟ. ܒܗܳܕܐ ܡܦܰܫܶܩ ܢܒܺܝܐ. ܕܠܰܘ ܕܠܐ ܬܰܟܬܽܘܫܳܐ ܗܘܳܬ ܡܰܦܰܩܬܳܐ ܡܶܢ ܫܝܽܘܠ ܠܢܰܦ̈ܫܳܬܳܐ ܕܙܰܕܺܝ̈ܩܶܐ. ܐܠܐ ܟܕ ܥܳܒܕܺܝܢ ܐܱܓܽܘܢܳܐ ܚܰܝ̈ܠܰܘܳܬܳܐ ܥܰܘܴ̈ܠܐܷ. ܘܰܟܢܽܘܫܬܳܐ ܕܥܰܫܺܝ̈ܢܶܐ ܡܶܬܬܠܶܝܢ ܒܰܦܟܳܪ̈ܶܐ ܕܶܐܣܰܪ ܡܰܘܬܳܐ ܘܰܫܝܽܘܠ ܕܠܐ ܢܶܫܬܰܪ̈ܝܳܢ ܡܶܢܗܘܢ ܢܰܦ̈ܫܳܬܳܐ. ܟܕ ܕܝܢ ܘܗܽܘ ܗܳܢܐ ܦܽܘܪܩܳܢܳܐ ܕܛܰܝܒܽܘܬܶܗ ܚܳܫܶܒ ܗܘܳܐ ܠܗ ܢܒܺܝܐ ܐܡ̣ܪ:
ܘܰܐܢܬ ܡܳܪܝܳܐ ܐܱܠܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ. ܢܰܓܺܝܪ ܪܽܘܚܳܐ ܘܣܰܓܺܝ ܛܰܝܒܽܘܬܳܐ ܘܩܽܘܫܬܳܐ. ܐܷܬܦܰܢ ܥܠܰܝ ܘܪܰܚܶܡܥܠܰܝ. ܘܗܰܒ ܚܰܝܠܐܴ ܠܥܰܒܕܳܟ ܘܰܦܪܽܘܩ ܠܒܰܪ ܐܱܡܬܳܟ. ܩܽܘܠܳܣܳܐ ܕܛܰܝܒܽܘܬܶܗ ܕܰܐܠܗܳܐ ܫܩܰܠ ܘܩܰܪܶܒ ܠܗ ܢܒܺܝܐ. ܘܡܶܢ ܪ̈ܰܚܡܶܐ ܘܡܶܢ ܛܰܝܒܽܘܬܳܐ ܫܩܰܠ ܥܶܠܬܳܐ ܕܰܢܨܰܠܐܷ ܠܶܗ ܟܕ ܡܰܘܕܶܐ. ܕܗܽܘ ܡܶܢ ܛܽܘܗܡܳܐ ܕܥܰܒ̈ܕܶܐ ܐܝ̣ܬܰܘܗܝ. ܘܶܐܡܶܗ ܡܶܢ ܓܶܢܣܳܐ ܕܶܐܡܗܴ̈ܬܳܐ. ܘܟܰܕ ܒܪ̈ܰܚܡܶܐ ܡܶܬܓܰܘܰܣ ܡܦܺܝܣ. ܕܳܐܬܳܐ ܕܶܝܢ ܕܦܽܘܪܩܳܢܳܐ ܘܰܕܛܰܝܒܽܘܬܳܐ ܢܶܚܙܶܐ.
ܘܰܥܒܶܕ ܥܰܡܝ ܐܴܬܳܐ ܛܳܒܬܳܐ. ܐܴܬܳܐ ܛܳܒܬܳܐ ܗܽܘܝܽܘ ܡܳܪܰܢ. ܐܱܝܟܰܢܳܐ ܠܡ ܕܰܗܘܳܐ ܝܰܘܢܳܢ ܐܴܬܳܐ ܠܢܺܝܢ̈ܘܳܝܶܐ. ܗܳܟܰܢܳܐ ܒܪܶܗ ܕܐܢܳܫܳܐ ܢܶܗܘܶܐ ܠܫܰܪܒܬܳܐ ܗܳܕܐ. ܘܶܐܢ ܠܡ ܗܳܕܐ ܗܳܘܝܳܐ. ܦܫܺܝܩܳܐܝ̣ܬ ܐܡ̇ܪ ܐܢ̣ܐ.
ܕܢܶܚܙܽܘܢ ܣܳܢܱ̈ܐܝ ܘܢܶܒܗܬܽܘܢ܇ ܕܰܐܢܬ ܡܳܪܝܳܐ ܥܰܕܰܪܬܳܢܝ ܘܒܰܝܰܐܬܳܢܝ. ܗܳܝܕܶܝܢ ܒܗܳܕܐ ܐܴܬܳܐ ܕܦܽܘܪܩܳܢܳܐ ܐܷܬܚܰܙܝܰܬ ܥܠ ܪܰܘܡܳܐ ܕܓܳܓܽܘܠܬܳܐ. ܘܰܒܗܶܬܘ ܣܳܢܱ̈ܐܘܗܝ ܕܰܟܝܳܢܳܐ ܐܢܳܫܳܝܳܐ. ܡܶܛܠ ܕܰܚܙܰܘ ܘܺܝܕܰܥܘ. ܕܡܶܢ ܡܳܪܝܳܐ ܐܷܬܥܰܕܰܪ ܘܶܐܬܒܰܝܰܐ ܓܶܢܣܳܐ ܕܡܳܝܽܘ̈ܬܶܐ. ܕܠܶܗ ܠܐܱܠܗܳܐ ܡܳܪܶܐ ܟܽܠ ܝܳܐܷܐ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܱ̈ܝ ܥܳܠܡ̈ܐ ܐܡܝ̣ܢ܀
ܡܙܡܘܪܐ ܕܬܡܢܝܢ ܘܫܒܥܐ
ܕܡܰܘܕܰܥ ܐܪܳܙܳܐ ܕܒܰܝܬܰܢ ܕܒܰܫܡܰܝܳܐ ܘܥܰܠ ܡܕܺܝܢܬܳܐ ܥܶܠܳܝܬܳܐ. ܘܥܰܠ ܝܰܠܕܳܐ ܘܡܶܬܒܰܪܢܫܳܢܽܘܬܶܗ ܕܦܳܪܽܘܩܰܢ ܘܥܰܠ ܟܽܘܢܳܫܳܗ̇ ܕܥܺܕܬܳܐ ܘܰܩܪܳܝܬܳܐ ܕܥܰܡ̈ܡܶܐ.
ܚܰܙܩܺܝܐܷܝܠ ܢܒܺܝܳܐ ܐܱܠܳܗܳܝܳܐ܆ ܗܰܘ ܪܳܡ ܒܓܶܠܝܴ̈ܢܶܐ ܐܱܠܳܗܳܝ̈ܐ. ܗܰܘ ܕܰܚܙܳܐ ܬܶܫܒܽܘܚܬܳܐ ܕܚܰܝ̈ܘܳܬܳܐ ܡܠܺܝ̈ܠܳܬܳܐ ܕܰܟܕܺܝ̈ܢܳܢ ܬܚܶܝܬ ܡܰܪܟܰܒܬܳܐ ܕܰܐܠܗܳܐ. ܘܰܫܡܰܥ ܒܶܐܕ̈ܢܶܐ ܕܢܰܦܫܶܗ ܩܴ̈ܠܐܷ ܪܰܘܪ̈ܒܶܐ ܕܒܽܘܪ̈ܟܳܬܗܘܢ ܕܰܟܪ̈ܽܘܒܶܐ. ܟܕ ܒܥܰܝܢܳܐ ܕܪܽܘܚܳܐ ܐܷܬܚܙܺܝ ܠܗ ܒܶܢܝܳܢܳܐ ܕܒܰܝܬܳܐ ܡܶܬܝܰܕܥܳܢܳܐ. ܗܰܘ ܕܰܒܢܶܐ ܘܰܡܫܰܬܰܐܣ ܥܰܠ ܛܽܘܪܳܐ ܡܶܣܬܰܟܠܳܢܳܐ ܕܪ̈ܰܘܡܶܐ ܥܶܠܳܝ̈ܐ ܕܰܫܡܰܝܳܐ. ܡܰܟܬܶܒ ܡܶܛܠܳܬܶܗ ܪܽܘܚܳܢܳܐܝ̣ܬ ܘܳܐܡܰܪ: ܒܰܫܢܰܬ ܥܶܣܪܺܝܢ ܘܚܰܡܶܫ ܗܳܝ ܕܰܫܒܺܝܬܰܢ ܒܪܺܝܫ ܫܰܢܬܳܐ ܒܰܥܣܰܪܬܳܐ ܒܝܰܪܚܳܐ. ܒܰܫܢܰܬ ܐܱܪܒܰܥܶܣܪ̈ܶܐ ܒܳܬܰܪ ܕܶܐܬܚܰܪܒܰܬ ܡܕܺܝܢܬܳܐ ܒܶܗ ܒܝܰܘܡܳܐ ܗܳܢܐ ܗܘܳܬ ܥܠܰܝ ܐܝ̣ܕܶܗ ܕܡܳܪܝܳܐ. ܘܰܐܝܬܝܰܬܰܢܝ ܠܬܰܡܳܢ ܒܚܶܙܘܳܐ ܕܰܐܠܗܳܐ. ܘܰܐܝܬܝܰܢܝ ܠܬܰܪܥܳܐ ܕܗܰܝܟܠܐܴ ܠܐܱܪܥܳܐ ܕܺܝܣܪܳܐܝܠ. ܘܰܐܫܪܝܰܢܝ ܥܰܠ ܛܽܘܪܳܐ ܕܛܳܒ ܪܳܡ. ܘܺܐܝܬ ܗܘܳܐ ܥܠܰܘܗܝ ܒܬܰܝܡܢܶܗ ܐܱܝܟ ܒܶܢܝܳܢܳܐ ܕܰܡܕܺܝܢܬܳܐ. ܘܒܶܗ ܒܝܰܘܡܳܐ ܐܱܝܬܝܰܢܝ ܠܬܰܡܳܢ ܘܰܚܙܺܝܬ ܓܰܒܪܳܐ. ܐܴܦ ܚܶܙܘܶܗ ܐܱܝܟ ܚܶܙܘܳܐ ܕܰܢܚܳܫܳܐ. ܘܰܫܘܳܝܬܳܐ ܕܟܶܬܳܢ̈ܐ ܒܺܐܝܕܶܗ. ܘܩܰܢܝܳܐ ܕܰܡܫܽܘܚܬܳܐ (ܚܙܩܐܝܠ ܡ: ܐ-ܓ). ܗܳܠܝܢ ܐܱܟܬܶܒ ܒܪܺܝܫ ܬܰܫܥܺܝܬܳܐ ܕܒܰܝܬܳܐ ܘܰܕܒܶܢܝܳܢܳܐ ܪܽܘܚܳܢܳܐ. ܛܽܘܒܬܳܢܳܐ ܢܒܺܝܐ ܚܰܙܩܺܝܐܝܠ. ܘܡܶܢ ܒܳܬܰܪܟܶܢ ܪ̈ܰܘܡܶܐ ܘܪ̈ܽܘܫܡܶܐ ܘܕܶܡ̈ܘܳܬܳܐ ܕܬܰܪ̈ܥܶܐ ܐܴܦ ܕܰܦܪ̈ܽܘܣܬܳܕܶܐ ܘܕܶܐܣܟ̈ܦܳܬܳܐ ܘܕܰܪ̈ܓܶܐ ܘܚܳܕܪ̈ܳܬܳܐ ܘܶܐܣܛܘ̈ܐ ܘܟܰܘ̈ܐ ܕܰܡܩܰܒ̈ܠܳܢ ܚܕܳܐ ܠܰܚܕܳܐ. ܘܚܶܢܘܴ̈ܬܳܐ ܕܪܰܘܪ̈ܒܳܢܶܐ ܘܒܶܝܬ ܩܽܘܕܫܳܐ ܓܰܘܳܝܳܐ. ܘܬܰܪܥܳܐ ܕܰܐܚܺܝܕ ܘܺܐܝܬ ܥܠܰܘܗܝ ܕܠܐ ܢܶܬܦܬܰܚ. ܥܰܡ ܗܳܠܝܢ ܐܦ ܐܚܪ̈ܳܢܝܳܬܳܐ ܣܰܓܺܝ̈ܐܬܳܐ ܐܱܟܬܶܒ ܘܰܕܠܰܘ ܙܰܒܢܰܐ ܗܘ ܠܺܝ ܗܳܫܐ ܕܶܝܢ ܕܶܐܬܢܶܐ ܐܷܢܶܝܢ. ܥܰܠ ܨܰܠܡ̈ܐ ܐܱܠܗܳܝ̈ܐ ܘܥܰܠ ܐܪ̈ܳܙܶܐ ܟܣܰܝܴ̈ܐ ܕܶܐܬܪܫܶܡܘ ܒܗܶܝܢ. ܡܶܛܠ ܕܠܰܘ ܒܶܢܝܳܢܳܐ ܕܒܰܝܬܶܗ ܕܚܰܙܩܺܝܐܝܠ ܐܷܬܒܥܺܝ ܠܡܶܟܬܰܒ. ܘܰܟܒܰܪ ܐܴܦ ܗܳܫܐ ܐܡ̇ܪ ܐܢܳܫ. ܐܱܝܕܳܐ ܗ̄ܝ ܥܶܠܬܳܐ ܕܫܽܘܪܳܝܳܐ ܐܷܥܒܶܕ ܠܡܰܙܡܽܘܪܳܐ ܗܳܢܐ ܕܰܬܡܳܢܺܝܢ ܘܫܰܒܥܳܐ. ܡܶܬܚܰܙܝܳܐ ܕܶܝܢ ܕܰܒܛܶܟܣܳܐ ܡܰܟܝܳܢܳܐ ܠܰܚܶܡܢܰܢ ܗܳܠܝܢ ܠܐܱܝܠܶܝܢ ܕܡܶܢ ܡܙܰܡܪܳܢܳܐ ܐܷܬܶܐܡܰܪ̈ܶܝܢ. ܒܗܳܝ ܕܰܬܪܰܝܗܘܢ ܢܒܺܝ̈ܐ ܗܳܠܝܢ. ܥܰܠ ܒܶܢܝܳܢܳܐ ܕܗܰܘ ܒܰܝܬܳܐ ܕܒܰܫܡܰܝܳܐ ܐܷܬܢܰܒܺܝܘ. ܕܰܘܝܕ ܡܰܢ ܐܝܟ ܕܩܰܕܺܝܡ ܗܘܳܐ ܠܐ ܐܱܘܕܰܥ ܫܡܳܐ ܕܒܰܝܬܳܐ. ܐܠܐ ܐܝܟ ܕܰܒܦܶܠܐܷܬܳܐ ܪܫܰܡ ܥܠܰܘܗܝ ܦܶܬܓܳܡ̈ܐ ܙܥܽܘܪ̈ܶܐ ܘܫܰܢܺܝ. ܘܒܳܬܪ ܕܝܢ ܕܳܪ̈ܶܐ ܐܱܪܒܳܬܰܥܣܰܪ ܐܷܬܳܐ ܒܳܬܪܶܗ ܚܰܙܩܺܝܐܝܠ ܘܦܰܫܶܩ ܗܽܘ ܒܓܰܠܝܴ̈ܬܳܐ ܗܰܘ ܡܶܕܶܡ ܕܶܐܬܢܰܒܺܝ ܕܰܘܝܕ ܒܪܶܡܙܳܐ. ܘܡܶܛܠܗܳܕܐ ܐܦ ܐܷܢܳܐ ܢܶܣܒܶܬ ܠܬܰܚܘ̈ܝܳܬܳܐ. ܐܱܝܠܶܝܢ ܕܡܶܢ ܢܒܺܝܳܐ ܚܰܙܩܺܝܐܝܠ ܐܷܬܟܬܰܒܶܝ̈ܢ. ܗܳܕܐ ܕܳܐܦܷܢ ܡܶܣܬܰܒܪܳܐ ܕܰܙܥܽܘܪܝܳܐ ܒܦܶܬܓܳܡܷ̈ܝܗ̇. ܐܠܐ ܚܰܝܠܐܴ ܣܰܓܺܝܐܴܐ ܐܝ̣ܬ ܒܗ̇. ܘܰܚܙܺܝ ܡܳܢܳܐ ܐܡ̇ܪ:
ܫܶܬܶܐܣܰܘ̈ܗܝ ܒܛܽܘܪܶܗ ܩܰܕܺܝܫܳܐ. ܡܶܛܠ ܗܳܢܐ ܫܽܘܪܳܝܳܐ ܕܡܰܙܡܽܘܪܳܐ ܗܳܢܐ. ܣܳܗܕ̈ܘܳܬܳܐ ܗܳܢܶܝܢ ܕܡܶܢ ܚܰܙܩܺܝܐܝܠ ܐܱܝܬܺܝܬ. ܐܡ̣ܪ ܓܝܪ ܡܙܰܡܪܳܢܳܐ ܕܫܶܬܶܐܣܰܘܗܝ ܒܛܽܘܪܶܗ ܩܰܕܺܝܫܳܐ. ܠܐ ܕܶܝܢ ܐܡ̣ܪ ܕܡܳܢܳܐ ܐܝ̣ܬܰܘܗܝ ܗܰܘ ܕܡܶܬܒܢܶܐ. ܘܰܕܥܰܠ ܐܱܠܗܳܐ ܬܶܬܢܣܶܒ ܗܳܝ ܕܡܶܬܐܱܡܪܳܐ. ܐܠܗܳܐ ܓܝܪ ܠܘ ܥܠ ܒܶܢܝܴ̈ܢܶܐ ܡܶܬܩܪܶܐ. ܡܶܛܠ ܕܗܽܘܝܽܘ ܐܱܪܕܺܝܟܠܐܴ ܕܟܽܠܡܶܕܶܡ. ܕܶܐܬܒܢܺܝ ܘܶܐܬܬܰܩܰܢ ܒܪ̈ܰܘܡܶܐ ܥܶܠܳܝ̈ܐ. ܘܰܒܥܽܘܡ̈ܩܶܐ ܕܰܐܪܥܳܐ. ܫܶܬܶܐܣ̈ܐ ܗܳܠܝܢ ܕܶܐܬܬܣܺܝܡܘ ܥܰܠ ܛܽܘܪܳܐ ܩܰܕܺܝܫܳܐ. ܗܰܘ ܒܶܢܝܳܢܳܐ ܪܽܘܚܳܢܳܐ ܘܰܐܠܗܳܝܳܐ. ܕܶܐܬܳܐ ܐܠܗܳܐ ܠܐܱܪܥܳܐ ܒܓܶܠܝܳܢܶܗ. ܘܛܽܘܪܳܐ ܩܰܕܺܝܫܳܐ ܐܝ̣ܬܰܘܗܝ ܦܰܣܷ̈ܐ ܕܺܐܝ̈ܕܰܘܗܝ ܕܰܐܠܗܳܐ. ܐܝܟ ܕܶܐܡܰܪ ܠܘܳܬ ܥܺܕܬܳܐ ܒܝܰܕ ܐܷܫܰܥܝܳܐ. ܕܥܰܠ ܦܰܣܷ̈ܐ ܕܺܐܝ̈ܕܰܝ ܪܫܰܡܬܶܟܝ. ܘܫܽܘܪ̈ܰܝܟܝ ܠܽܘܩܒܰܠ ܐܷܢܽܘܢ ܒܟܽܠܙܒܰܢ (ܐܫܥܝܐ ܡܛ: ܝܘ). ܗܳܢܰܘ ܒܶܢܝܳܢܳܐ ܗܰܘ ܕܰܗܘܱ̈ܝ ܠܶܗ ܫܶܬܶܐܣܰܘ̈ܗܝ ܒܛܽܘܪܶܗ ܩܰܕܺܝܫܳܐ. ܕܡܶܛܠ ܒܶܢܝܳܢܳܗ̇ ܕܥܺܕܬܳܐ ܕܶܐܫܬܰܬܐܣܰܬ ܒܝܰܕ ܡܳܪܢ ܐܡ̇ܪ ܛܽܘܒܬܳܢܳܐ ܕܰܘܝܕ.
ܫܶܬܶܐܣܰܘ̈ܗܝ ܒܛܽܘܪܶܗ ܩܰܕܺܝܫܳܐ. ܘܰܪܚܶܡ ܡܳܪܝܳܐ ܠܬܰܪ̈ܥܶܝܗ̇ ܕܨܶܗܝܽܘܢ. ܛܳܒ ܡܶܢ ܟܽܠܗܘܢ ܡܰܫܟ̈ܢܰܘܗܝ ܕܝܰܥܩܽܘܒ. ܚܙܰܝܬ ܐܱܝܟܰܢܳܐ ܩܰܪܺܝܒܳܐܝ̣ܬ ܦܰܫܩܳܗ̇ ܠܡܶܠܬܳܐ. ܝܰܥܩܽܘܒ ܕܶܝܢ ܠܐܱܝܠܶܝܢ ܕܶܐܬܠܒܶܟܘ ܒܩܽܘܕܡܳܐ ܕܠܐ ܡܶܬܛܦܺܝܣܳܢܽܘܬܳܐ ܩܳܪܶܐ. ܨܶܗܝܽܘܢ ܕܝܢ ܠܥܺܕܬܳܐ ܡܫܰܡܰܗ. ܘܗܳܕܶܐ ܥܰܠ ܕܠܐ ܡܶܫܟܰܚ ܗܘܳܐ ܕܢܶܓܠܐܷ ܨܶܒܝܳܢܶܗ ܕܰܐܠܳܗܳܐ ܕܡܶܛܠ ܥܺܕܬܶܗ. ܠܰܘ ܕܠܐܴ ܕܶܚܠܬܳܐ ܡܡܰܠܠܺܝܢ ܗܘܰܘ ܢܒܺܝ̈ܐ ܡܶܛܠ ܛܢܳܢܶܗ ܕܥܰܡܳܐ. ܡܶܛܠ ܕܰܒܟܽܠܙܒܰܢ ܒܺܝ̈ܫܳܬܳܐ ܣܳܒܠܺܝܢ ܗܘܰܘ ܡܶܢܶܗ. ܘܶܐܢ ܐܴܡܪܺܝܢ ܗܘܰܘ ܓܰܠܝܳܐܝ̣ܬ ܕܡܶܣܬܠܐܷ ܥܰܡܳܐ ܘܡܶܬܓܒܶܝܢ ܥܰܡ̈ܡܶܐ. ܐܴܦ ܡܶܬܥܰܩܪܳܐ ܐܘܪܺܫܠܶܡ ܘܡܶܬܒܰܢܝܳܐ ܥܺܕܬܳܐ ܡܶܬܪܰܓܡܺܝܢ ܗܘܰܘ ܡܶܢܶܗ. ܘܡܶܟܺܝܠ ܚܠܳܦ ܫܡܳܐ ܕܥܺܕܬܳܐ. ܫܡܳܐ ܕܨܶܗܝܽܘܢ ܐܱܟܬܶܒ ܡܙܰܡܪܳܢܳܐ. ܐܴܦ ܨܶܗܝܽܘܢ ܕܝܢ ܗܳܕܐ ܐܝ̣ܬܶܝܗ̇ ܗܳܝ ܕܰܐܟܬܶܒ ܦܰܘܠܽܘܣ ܠܘܳܬ ܥܶܒܪ̈ܳܝܶܐ. ܕܰܐܢܬܽܘܢ ܠܰܡ ܐܷܬܩܰܪܰܒܬܽܘܢ ܠܛܽܘܪܳܐ ܕܨܶܗܝܽܘܢ. ܘܠܰܡܕܺܝܢܬܳܐ ܩܰܕܺܝܫܬܳܐ ܕܰܐܠܗܳܐ ܚܰܝܳܐ. ܠܐܘܪܺܫܠܶܡ ܕܒܰܫܡܰܝܳܐ (ܥܒܪ̈ܝܐ ܝܒ: ܟܒ). ܬܰܪ̈ܥܶܐ ܕܨܶܗܝܽܘܢ ܕܰܪܚܶܡ ܡܳܪܝܳܐ ܕܺܐܝܬܰܝܗܘܢ ܗܳܠܝܢ܆ ܕܶܐܡܰܪ ܠܗܘܢ ܥܰܡܰܢܽܘܐܝܠ܆ ܠܐ ܡܶܟܺܝܠ ܩܳܪܶܐ ܐܢܳܐ ܠܟܽܘܢ ܥܰܒ̈ܕܶܐ. ܡܶܛܠ ܕܥܰܒܕܳܐ ܠܐܴ ܝܳܕܰܥ ܡܳܢܐ ܥܳܒܶܕ ܡܳܪܶܗ. ܐܠܐ ܩܪܺܝܬܟܽܘܢ ܪ̈ܳܚܡܰܝ. ܡܶܛܠ ܕܟܽܠܡܶܕܶܡ ܕܫܶܡܥܶܬ ܡܶܢ ܐܴܒܝ. ܐܱܘܕܰܥܬܟܽܘܢ (ܝܘܚܢܢ ܝܗ: ܝܗ). ܗܳܠܝܢ ܐܢܘܢ ܬܰܪ̈ܥܶܐ ܕܰܗܘܰܘ ܠܥܺܕܬܳܐ ܨܶܗܝܽܘܢ ܡܕܺܝܢܬܳܐ ܕܰܐܠܗܳܐ. ܐܦ ܩܰܕܡܳܝܳܐ ܕܬܰܪ̈ܥܶܐ ܕܰܗܘܰܘ ܠܥܺܕܬܳܐ. ܕܗܽܘ ܛܽܘܒܬܳܢܳܐ ܦܶܛܪܽܘܣ ܫܠܺܝܚܳܐ. ܘܒܶܗ ܥܰܠܘ ܠܓܰܘ ܡܕܺܝܢܬܳܐ ܩܰܕܺܝܫܬܳܐ ܒܢܱ̈ܝ ܦܶܢܛܽܘܣ ܘܰܐܬܪ̈ܰܘܳܬܳܐ ܕܓܰܠܰܛܳܝ̈ܐ ܘܩܰܦܰܕܽܘܩܺܝܰܐ ܘܰܕܒܰܝܬܽܘܢܝܰܐ ܘܰܐܣܝܰܐ ܘܰܒܢܱ̈ܝ ܪܗܽܘܡܺܝ ܘܺܐܝܛܰܐܠܺܝܰܐ. ܐܦ ܬܰܪܥܳܐ ܐܚܪܺܢܳܐ ܕܰܗܘܳܐ ܠܥܺܕܬܳܐ ܕܰܐܠܗܳܐ ܝܽܘܚܰܢܳܢ ܫܠܺܝܚܳܐ. ܘܒܶܗ ܥܰܠܘ ܠܰܛܝܳܪܳܐ ܕܰܨܠܺܝܒܳܐ. ܐܷܦܶܣܳܝ̈ܐ ܘܰܐܬܪ̈ܰܘܳܬܳܐ ܕܰܚܕܳܪ̈ܰܝܗܽܘܢ. ܬܰܪܥܳܐ ܪܚܺܝܡܳܐ ܘܚܰܒܺܝܒܳܐ ܗܘܳܐ ܡܰܬܰܝ ܫܠܺܝܚܳܐ ܠܨܶܗܝܽܘܢ ܡܶܬܝܰܕܥܳܢܺܝܬܳܐ ܘܰܩܪܳܐ ܘܰܐܥܶܠ ܠܕܳܪ̈ܳܬܳܗ̇ ܕܥܺܕܬܳܐ ܠܰܒܢܱ̈ܝ ܦܰܠܶܣܛܺܝܢܺܝ ܘܰܠܫܰܪܟܳܐ ܕܰܒܢܱ̈ܝ ܩܪܺܝܛܺܝ. ܘܡܳܢܳܐ ܠܐܴܐܷ ܐܢܳܐ ܠܡܶܟܬܰܒ ܥܰܠ ܟܽܠܗܘܢ ܬܰܪ̈ܥܶܝܗ̇ ܕܥܺܕܬܳܐ. ܬܪܶܥܣܰܪ ܓܶܝܪ ܬܰܪ̈ܥܶܐ ܐܝ̣ܬ ܠܗ̇. ܐܱܝܟܰܢܳܐ ܕܳܐܦ ܛܽܘܒܬܳܢܳܐ ܚܰܙܩܺܝܐܝܠ ܬܪܶܥܣܰܪ ܬܰܪ̈ܥܶܐ ܐܡ̇ܪ ܕܺܐܝܬ ܗܘܳܐ. ܠܒܰܝܬܳܐ ܕܶܐܬܚܙܺܝ ܠܶܗ ܒܐܪܳܙܳܗ̇ ܕܥܺܕܬܳܐ. ܘܰܕܡܶܬܩܪܶܝܢ ܫܠܺܝ̈ܚܶܐ ܬܰܪ̈ܥܶܐ ܡܰܠܶܦ ܠܰܢ ܦܳܪܽܘܩܰܢ ܕܶܐܡܰܪ: ܕܶܐܢܳܐ ܐܝ̣ܬܰܝ ܬܰܪܥܳܐ. ܘܒܺܝ ܐܢ ܐܢܳܫ ܢܶܥܽܘܠ ܢܺܚܶܐ. ܘܢܶܥܽܘܠ ܘܢܶܦܽܘܩ ܘܪܶܥܝܳܐ ܢܶܫܟܰܚ (ܝܘܚܢܢ ܝ: ܛ). ܐܱܝܟܰܢܳܐ ܕܗܽܘ ܗܘܳܐ ܬܰܪܥܳܐ ܠܰܫܠܺܝ̈ܚܶܐ ܘܥܰܠܘ ܒܶܗ ܫܠܺܝ̈ܚܶܐ ܩܰܕܡܳܐܝܰܬ. ܐܝܟ ܒܽܘܟܪ̈ܶܐ. ܗܳܟܰܢܳܐ ܗܘܰܘ ܫܠܺܝ̈ܚܶܐ ܬܰܪ̈ܥܶܐ ܠܥܰܡ̈ܡܶܐ ܚܰܛܳܝ̈ܐ. ܘܥܰܠܘ ܒܗܽܘܢ ܠܒܶܝܬ ܚܰܝ̈ܐ ܠܘܳܬ ܡܫܺܝܚܳܐ. ܬܰܪܥܳܐ ܗܘܳܐ ܛܽܘܒܬܳܢܳܐ ܬܽܐܘܡܰܐ ܫܠܺܝܚܳܐ ܠܟܽܘܫ ܐܘ̣ܟܳܡܬܳܐ ܘܰܠܗܶܢܕܽܘ ܫܽܘܚܳܪܬܳܐ ܘܰܣ̈ܚܰܝ ܒܶܗ ܘܶܐܬܚܰܘܰܪ̈ܶܝܢ ܘܥܰܠܶܝ̈ܢ ܘܩܳܡܶܝ̈ܢ ܒܰܓܢܽܘܢܳܐ ܕܢܽܘܗܪܳܐ. ܬܰܪܥܳܐ ܗܘܳܐ ܡܰܪܩܽܘܣ ܠܡܶܨܪܶܝܢ܆ ܘܠܽܘܩܽܘܣ ܠܐܱܠܶܟܣܰܢܕܪܺܝܰܐ܆ ܘܶܐܬܟܰܢܱ̈ܫܶܝܢ ܡܶܢ ܒܶܝܬ ܥܠܰܘܴ̈ܬܳܐ ܘܥܰܠܶܝ̈ܢ ܩܳܡܶܝ̈ܢ ܠܗܶܝܢ ܒܰܡܕܺܝܢܬܳܐ ܕܡܰܠܝܳܐ ܕܶܒܚ̈ܐ ܕܫܽܘܒܚܳܐ. ܬܰܪܥܳܐ ܗܘܳܐ ܒܰܪ ܬܽܘܠܡܰܝ ܠܦܳܪܶܣ ܘܰܠܡܳܕܰܝ ܘܠܐܱܪܙܽܘܢ. ܘܰܐܪܡܶܢܝܰܐ ܕܰܩܪܺܝܛܺܝ. ܘܠܐܱܬܪ̈ܰܘܳܬܳܐ ܕܗܽܘܙܳܝܷ̈ܐ. ܟܰܕ ܫܒܰܩܘ ܕܶܚ̈ܠܳܬܳܐ ܣܪ̈ܺܝܩܳܬܳܐ ܘܣܶܓܕ̈ܬܳܐ ܕܫܶܡܫܷ̈ܐ ܘܰܕܢܰܗܺܝܪ̈ܶܐ. ܘܥܰܠܘ ܘܰܣܓܶܕܘ ܠܫܶܡܫܳܐ ܕܙܰܕܺܝܩܽܘܬܳܐ. ܕܡܰܢܗܰܪ ܒܓܰܘ ܥܺܕܬܳܐ ܕܰܐܠܗܳܐ. ܡܳܢܳܐ ܕܶܝܢ ܢܺܐܡܰܪ ܥܰܠ ܦܰܘܠܽܘܣ ܗܰܘ ܪܰܒܳܐ. ܗܰܘ ܕܠܰܘ ܚܰܕ ܬܰܪܥܳܐ ܐܝ̣ܬܰܘܗܝ ܗܘܳܐ ܒܰܠܚܽܘܕ܆ ܐܠܐ ܬܰܪ̈ܥܶܐ ܣܰܓܺܝ̈ܐܐ ܘܡܰܪ̈ܒܳܒܶܐ ܣܰܓܺܝ̈ܐܐ ܕܰܒܟܽܠ ܦܶܢ̈ܝܳܢ ܬܰܪ̈ܥܶܐ ܦܬܺܝܚ ܗܘܳܐ ܠܨܶܗܝܽܘܢ. ܗܳܢܐ ܕܰܐܝܟ ܡܶܠܬܶܗ ܝܰܬܺܝܪ ܡܶܢ ܟܽܠܗܘܢ ܬܰܪ̈ܥܶܐ ܕܶܐܬܶܐܡܰܪܘ. ܘܰܥܡܰܠ ܘܰܫܚܰܩ ܒܚܰܛܳܝ̈ܐ ܕܢܶܬܦܬܰܚ ܠܗܘܢ ܬܰܪܥܳܐ ܕܰܬܝܳܒܽܘܬܳܐ ܠܘܳܬ ܐܠܗܳܐ. ܠܗܳܠܶܝܢ ܬܰܪ̈ܥܶܐ ܪܚܶܡ ܡܳܪܝܳܐ. ܛܳܒ ܡܶܢ ܟܽܠܗܽܘܢ ܡܰܫܟ̈ܢܰܘܗܝ ܕܝܰܥܩܽܘܒ. ܘܡܶܟܺܝܠ ܐܷܬܦܰܫܩܰܬ ܠܗ̇ ܬܶܐܘܳܪܺܝܰܐ ܕܥܰܠ ܬܰܪ̈ܥܶܐ. ܢܶܥܽܘܠ ܐܴܦܚܢܰܢ ܢܶܫܡܰܥ ܩܴ̈ܠܐܷ ܕܡܶܬܡܰܠܠܺܝܢ ܒܰܡܕܺܝܢܬܳܐ ܡܰܠܝܰܬ ܚܰܝ̈ܐ. ܒܗܳܝ ܕܰܢܒܺܝܐ ܡܶܛܠ ܡܶܣܟܺܢܽܘܬܶܗ. ܠܘ ܡܕܺܝܢܬܳܐ ܫܰܡܗܳܗ̇ ܐܠܐ ܩܪܺܝܬܳܐ.
ܝܰܩܺܝܪ̈ܳܬܳܐ ܠܰܡ ܐܷܬܡܰܠܰܠܝ̈ ܒܶܟܝ ܩܪܺܝܬܶܗ ܕܰܐܠܗܰܢ. ܡܳܢܳܐ ܐܷܢܶܝܢ ܝܰܩܺܝܪ̈ܳܬܳܐ ܕܶܐܡܰܪ ܢܒܺܝܐ. ܠܘ ܐܢ̇ܐ ܐܡ̇ܪ ܐܢ̣ܐ. ܫܰܦܺܝܪ ܓܶܝܪ ܕܬܰܪ̈ܥܶܐ ܢܡܰܠܠܽܘܢ. ܡܳܢܳܐ ܡܶܬܡܰܠܰܠ ܒܥܺܕܬܶܗ ܕܰܐܠܳܗܰܢ ܗܳܝ ܕܰܢܒܺܝܐ ܩܪܺܝܬܳܐ ܩܳܪܶܐ ܠܗ̇. ܢܺܐܡܰܪ ܦܶܛܪܽܘܣ ܗܰܘ ܬܰܪܥܳܐ ܪܰܒܳܐ. ܢܦܰܫܶܩ ܝܽܘܚܰܢܳܢ ܬܰܪܥܳܐ ܕܶܐܦܶܣܳܝ̈ܐ. ܢܰܟܪܶܙ ܦܰܘܠܽܘܣ ܗܰܘ ܡܳܐܢܳܐ ܓܰܒܝܳܐ. ܢܰܟܬܶܒ ܠܽܘܩܳܐ ܘܰܢܣܰܒܰܪ ܡܰܪܩܽܘܣ ܢܫܰܪܶܐ ܒܰܐܝܠܶܝܢ ܕܰܡܡܰܠܠܺܝܢ ܝܰܩܺܝܪ̈ܳܬܳܐ. ܡܰܬܰܝ ܐܱܠܳܗܳܝܳܐ ܡܳܢܳܐ ܐܡ̇ܪ: ܟܬܳܒܳܐ ܕܺܝܠܺܝܕܽܘܬܶܗ ܕܝܶܫܽܘܥ ܡܫܺܝܚܳܐ. ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ (ܡܬܝ ܐ: ܐ). ܘܡܳܢܳܐ ܗܘܳܐ ܡܳܪܳܐ ܠܥܰܒ̈ܕܶܐ. ܘܰܒܡܳܢܳܐ ܡܶܬܦܰܚܰܡ ܦܳܪܽܘܩܳܐ ܠܰܦܪ̈ܺܝܩܶܐ. ܐܦ ܒܰܐܝܕܳܐ ܡܢܳܬܳܐ ܡܶܬܬܣܺܝܡ ܐܱܠܗܳܐ ܥܰܡ ܒܢܰܝ̈ܢܳܫܳܐ. ܐܠܐ ܗܳܠܝܢ ܠܡ ܕܰܡܪܰܚܡܳܢܽܘܬܳܐ ܐܷܢܶܝܢ. ܗܳܕܳܐ ܗܝ ܪܺܝܫܺܝܬܳܐ ܕܝܰܩܺܝܪ̈ܳܬܳܐ ܕܰܐܠܗܳܐ ܗܰܘ ܕܰܥܒܰܕ ܠܥܳܠܡܳܐ. ܢܶܬܡܢܶܐ ܒܪܶܗ ܕܰܘܝܕ. ܘܰܒܪܶܗ ܕܰܐܒܪܳܗܳܡ. ܢܡܰܠܶܠ ܫܶܡܥܽܘܢ ܣܳܒܳܐ ܟܰܕ ܐܷܫܬܐܷܠ܆ ܒܰܪ ܡܰܢܽܘ ܘܢܺܐܡܰܪ ܝܰܩܺܝܪ̈ܳܬܳܐ ܕܩܰܒܶܠ ܒܓܶܠܝܳܢܶܗ ܕܰܐܒܳܐ. ܢܶܥܢܶܐ ܐܦ ܠܽܘܩܳܐ ܒܳܬܪܶܗ ܘܢܺܐܡܰܪ܆ ܘܰܢܡܰܠܶܠ ܝܰܩܺܝܪ̈ܳܬܳܐ ܕܫܶܡܥܰܬ ܒܬܽܘܠܬܳܐ ܡܶܢ ܡܰܠܐܱܟܳܐ. ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ ܡܳܪܰܢ ܥܰܡܶܟܝ ܒܪܺܝܟܰܬ ܒܢܶܫܷ̈ܐ (ܠܘܩܐ ܐ: ܟܚ). ܠܪ̈ܳܥܰܘܳܬܳܐ ܬܘܒ ܐܡ̣ܪ ܡܰܠܐܱܟܳܐ܆ ܗܳܐ ܓܝܪ ܡܣܰܒܰܪ ܐܢܳܐ ܠܟܽܘܢ ܚܰܕܽܘܬܳܐ ܪܰܒܬܳܐ. ܕܬܶܗܘܶܐ ܠܟܽܠܶܗ ܥܳܠܡܳܐ. ܐܷܬܺܝܠܶܕ ܠܟܽܘܢ ܓܶܝܪ ܝܰܘܡܳܢܳܐ ܦܳܪܽܘܩܳܐ ܕܺܐܝܬܰܘܗܝ ܡܳܪܝܳܐ ܡܫܺܝܚܳܐ ܒܰܡܕܺܝܢܬܶܗ ܕܕܰܘܝܕ. ܘܗܳܕܐ ܠܟܘܢ ܐܴܬܳܐ. ܡܶܫܟܚܺܝܢ ܐܱܢܬܽܘܢ ܥܽܘܠܐܴ ܕܰܟܪܺܝܟ ܥܰܙܪܽܘܪ̈ܶܐ ܘܣܺܝܡ ܒܽܐܘܪܝܳܐ (ܠܘܩܐ ܒ: ܝ-ܝܒ). ܢܶܬܶܠ ܩܴ̈ܠܐ ܪ̈ܳܡܶܐ ܝܽܘܚܰܢܳܢ ܟܰܕ ܡܡܰܠܶܠ ܝܰܩܺܝܪ̈ܳܬܳܐ ܒܰܩܪܺܝܬܶܗ ܕܰܐܠܳܗܰܢ. ܒܪܺܝܫܺܝܬ ܐܝ̣ܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܝ̣ܬܰܘܗܝ ܗܘܳܐ ܠܘܳܬ ܐܱܠܳܗܳܐ. ܘܰܐܠܳܗܳܐ ܐܝ̣ܬܰܘܗܝ ܗܘܳܐ ܗܽܘ ܡܶܠܬܳܐ. ܘܗܳܢܳܐ ܐܝ̣ܬܰܘܗܝ ܗܘܳܐ ܒܪܺܝܫܺܝܬ ܠܘܳܬ ܐܱܠܳܗܳܐ (ܝܘܚܢܢ ܐ: ܐ-ܒ).
ܘܝܽܘܚܰܢܳܢ ܫܠܺܝܚܳܐ ܩܳܥܶܐ ܘܳܐܡܰܪ: ܡܣܰܒܪܺܝܢܰܢ ܠܟܽܘܢ ܠܗܰܘ ܕܺܐܝܬܰܘܗܝ ܗܘܳܐ ܡܶܢ ܒܪܺܝܫܺܝܬ܇ ܗܰܘ ܕܰܫܡܰܥܢ ܘܰܚܙܰܝܢܳܝܗܝ ܒܥܰܝ̈ܢܰܝܢ. ܚܙܰܝܢ ܘܓܰܫܢ ܒܺܐܝ̈ܕܰܝܢ (ܐ ܝܘܚܢܢ ܐ: ܐ). ܘܶܐܬܡܰܠܰܠ ܡܶܛܠܳܬܶܗ ܕܰܢܚܶܬ ܡܶܢ ܫܡܰܝܳܐ ܘܶܐܬܳܐ ܠܥܳܠܡܳܐ. ܘܰܗܘܳܐ ܒܶܣܪܳܐ ܘܰܐܓܶܢ ܒܰܢ (ܝܘܚܢܢ ܐ: ܝܕ). ܢܡܰܠܶܠ ܕܶܝܢ ܝܰܩܺܝܪ̈ܳܬܳܐ ܐܴܦ ܦܰܘܠܽܘܣ ܛܽܘܒܬܳܢܳܐ. ܠܶܗ ܓܶܝܪ ܝܰܬܺܝܪܳܐ ܫܰܦܺܝܪ ܕܰܢܡܰܠܶܠ܆ ܡܶܛܠ ܕܶܐܬܪܕܺܝ ܓܡܺܝܪܳܐܝ̣ܬ ܒܡܰܠܦܳܢܽܘܬܳܐ ܕܢܳܡܽܘܣܳܐ ܕܰܐܒܳܗ̈ܬܳܐ. ܕܺܝܠܗܘܢ ܗܘܳܬ ܠܰܡ ܣܺܝܡܰܬ ܒܢܰܝܴ̈ܐ ܘܡܽܘ̈ܠܟܳܢܶܐ ܕܰܐܒܳܗ̈ܬܳܐ. ܘܡܶܢܗܘܢ ܐܷܬܚܙܺܝ ܓܝܪ ܡܫܺܝܚܳܐ ܒܰܒܣܰܪ. ܕܰܐܠܗܰܐ ܗ̄ܘ ܕܥܰܠ ܟܽܠ ܘܶܐܡܰܪ: ܕܫܰܕܰܪ ܐܱܠܳܗܳܐ ܠܰܒܪܶܗ܇ ܘܰܗܘܳܐ ܡܶܢ ܐܱܢܬܬܳܐ܇ ܘܰܗܘܳܐ ܬܚܶܝܬ ܢܳܡܽܘܣܳܐ (ܓܠܛܝ̈ܐ ܕ: ܕ) ܗܰܘ ܣܳܐܷܡ ܢܳܡܽܘܣܳܐ. ܡܶܛܠ ܗܳܢܐ ܐܦ ܐܠܗܳܐ ܐܱܣܓܺܝ ܪܰܡܪܡܶܗ. ܘܝܰܗܒ ܠܶܗ ܫܡܳܐ ܕܰܡܝܰܬܰܪ ܡܶܢ ܟܽܠ ܫܡܳܗܺܝ̈ܢ. ܕܒܰܫܡܶܗ ܕܝܶܫܘܥ ܟܠ ܒܪܽܘܟ ܬܷܟܽܘܦ ܟܽܠ ܕܒܰܫܡܰܝܳܐ. ܐܴܦ ܒܰܐܪܥܳܐ. ܘܕܰܠܬܰܚܬ ܡܶܢ ܐܱܪܥܳܐ܇ ܘܟܠ ܠܶܫܳܢ ܢܰܘܕܶܐ ܕܡܳܪܝܰܐ ܗ̄ܘ ܝܶܫܘܥ ܡܫܺܝܚܳܐ ܠܫܽܘܒܚܳܐ ܕܰܐܠܗܳܐ ܐܱܒܽܘܗܝ (ܦܝ̈ܠܝܦܣܝܐ ܒ: ܛ-ܝܐ).
ܘܰܠܘܳܬ ܥܶܒܪ̈ܳܝܶܐ ܬܽܘܒ ܡܰܠܶܠ ܝܰܩܺܝܪ̈ܳܬܳܐ. ܘܡܰܫܡܰܥ ܬܘܒ ܩܳܠܰܘ̈ܗܝ ܡܶܢ ܐܱܬܪܳܐ ܕܟܽܘܫ ܘܰܕܫܰܒܰܐ ܛܽܘܒܬܳܢܳܐ ܫܠܺܝܚܳܐ ܬܽܐܘܡܰܐ. ܘܰܡܡܰܠܶܠ ܝܰܩܺܝܪ̈ܳܬܳܐ ܒܰܩܪܺܝܬܳܐ ܗܳܝ ܕܙܰܡܰܪ ܕܰܘܝܕ. ܕܗܰܘ ܕܰܚܙܺܝܬ ܒܺܐܝ̈ܕܰܘܗܝ ܕܽܘ̈ܟܝܳܬܳܐ ܕܨܶܨ̈ܐ ܡܶܢ ܒܳܬܰܪ ܩܝܳܡܬܳܐ ܕܡܶܢ ܩܰܒܪܳܐ. ܘܰܐܪܡܺܝܬ ܒܗܶܝܢ ܨܳܒ̈ܥܳܬܝ ܘܰܐܘܫܛܶܬ ܐܝ̣̈ܕܰܝ ܒܰܡܚܽܘܬܳܐ ܕܣܶܛܪܶܗ ܘܰܡܗܰܝܡܶܢ ܐܢܳܐ ܕܡܳܪܝ ܘܰܐܠܳܗܝ ܐܝ̣ܬܰܘܗܝ܀
ܐܴܦ ܡܰܪܩܽܘܣ ܡܣܰܒܰܪ ܒܡܶܨܪܶܝܢ ܘܰܒܬܶܒܰܐܝܣ. ܪܺܝܫܳܐ ܕܶܐܘܰܢܓܶܠܝܽܘܢ ܕܫܶܝܘܥ ܡܫܺܝܚܳܐ ܒܪܶܗ ܕܰܐܠܳܗܳܐ (ܡܪܩܘܣ ܐ: ܐ). ܗܳܕܳܐ ܗܝ ܩܪܺܝܬܶܗ ܕܰܐܠܳܗܰܢ܇ ܘܗܳܠܶܝܢ ܐܷܢܶܝܢ ܝܰܩܺܝܪ̈ܳܬܳܐ ܐܱܝܠܶܝܢ ܕܶܐܬܡܰܠܰܠܶܝ̈ܢ ܒܗ̇. ܘܠܰܘ ܗܳܠܝܢ ܒܰܠܚܽܘܕ. ܐܠܐ ܟܽܠܗܘܢ ܩܴ̈ܠܐ ܕܰܫܠܺܝܚܽܘܬܳܐ ܘܟܽܠܗܘܢ ܟܬܳܒ̈ܐ ܕܕܺܝܰܬܺܩܺܝ ܚܕܰܬܳܐ. ܘܡܶܟܺܝܠ ܕܩܰܠܺܝܠ ܡܶܢ ܣܰܓܺܝ ܐܷܡܰܪܢܰܢ ܥܠܰܘܗܝ. ܢܶܥܒܰܪ ܠܦܶܬܓܳܡܳܐ ܗܰܘ ܕܡܶܢ ܒܳܬܪܶܗ. ܕܳܐܦ ܡܶܢ ܝܰܩܺܝܪ̈ܳܬܳܐ ܡܶܫܬܟܰܚ ܕܺܐܝܬܰܘܗܝ:
ܐܷܬܕܟܰܪ ܠܪܳܚܳܒ ܘܰܠܒܳܒܶܝܠ ܝܳܕ̈ܥܳܬܝ. ܗܳܐ ܦܠܶܫܬܳܝ̈ܐ ܘܨܽܘܪ ܘܥܰܡܳܐ ܕܟܽܘܫܳܝ̈ܐ. ܗܳܠܝܢ ܥܰܡ̈ܡܶܐ ܗܘܰܘ ܕܠܐ ܡܩܰܒܶܠ ܗܘܳܐ ܠܗܘܢ ܢܳܡܽܘܣܳܐ ܕܢܶܥܠܽܘܢ ܠܰܟܢܽܘܫܬܳܐ ܕܡܳܪܝܳܐ. ܗܳܫܳܐ ܕܝܢ ܕܽܘܟܪܳܢܳܐ ܒܥܺܕܬܳܐ ܗܘܳܐ ܠܗܽܘܢ. ܒܩܶܪܝܳܢܳܐ ܕܰܬܝܳܒܽܘܬܳܐ. ܘܡܶܢ ܕܶܐܡܰܪ ܪܽܘܚܳܐ ܕܶܐܬܕܟܰܪ ܠܪܳܚܳܒ ܙܳܢܺܝܬܳܐ ܗܳܝ ܕܩܰܒܠܰܬ ܠܓܳܫܽܘ̈ܫܶܐ ܒܺܐܝܪܺܝܚܽܘ ܕܗܺܝ ܗܳܕܐ ܡܶܢ ܛܽܘܗܡܳܐ ܕܥܰܡ̈ܡܶܐ ܚܰܛܳܝ̈ܐ. ܐܝ̣ܬܶܝܗ̇ ܗܘܳܬ ܒܓܶܢܣܳܐ. ܐܦ ܒܳܒܶܝܠ ܗܳܝ ܕܰܠܢܰܗܺܝܪ̈ܶܐ ܣܳܓܕܳܐ ܗܘܳܬ. ܐܱܪܺܝܡ ܥܰܝ̈ܢܰܘܗܝ ܒܓܶܠܝܳܢܳܐ ܘܰܚܙܳܐ ܟܶܢ̈ܫܶܐ ܕܥܰܡ̈ܡܶܐ ܚܰܛܳܝ̈ܐ ܕܰܐܫܩܶܠܘ ܡܶܢ ܚܰܓܳܐ ܕܰܦܬܰܟܪ̈ܶܐ. ܘܫܰܪܺܝܘ ܕܶܝܢ ܠܡܶܬܟܰܢܳܫܽܘ ܒܩܴ̈ܠܐ ܕܰܡܣܰܒܪ̈ܳܢܶܐ ܠܰܩܪܺܝܬܶܗ ܕܰܐܠܳܗܰܢ. ܘܰܠܡܶܫܡܰܥ ܝܰܩܺܝܪ̈ܳܬܳܐ ܕܶܐܬܡܰܠܰܠܝ̈ ܒܗ̇ ܘܡܶܛܠܗܳܢܐ ܐܝܟ ܕܰܘܩܳܐ ܩܳܐܷܡ ܗܘܳܐ ܘܩܳܥܶܐ ܐܦ ܡܚܰܘܶܐ ܒܨܶܒܥܳܐ ܕܪܽܘܚܳܐ. ܗܳܐ ܦܠܶܫܬܳܝ̈ܐ ܐܴܬܶܝܢ ܠܥܺܕܬܳܐ ܕܰܐܠܗܳܐ. ܘܗܳܐ ܨܽܘܪ ܣܳܓܕܰܬ ܠܰܦܬܰܟܪ̈ܶܐ. ܫܕܳܬ ܓܠܺܝܦܶܝ̈ܗ̇ ܘܰܦܢܳܬ ܡܶܢ ܛܳܥܝܽܘܬܳܐ. ܗܳܐ ܥܰܡܳܐ ܐ̮ܘܟܳܡܳܐ ܕܟܽܘ̈ܫܳܝܶܐ ܐܷܬܳܐ ܕܢܶܬܚܰܘܰܪ ܒܰܥܡܳܕܳܐ. ܘܰܐܝܕܳܐ ܗ̄ܝ ܥܶܠܬܳܐ ܕܰܩܪܳܬ ܠܟܽܠܗܘܢ ܥܰܡ̈ܡܶܐ ܕܠܐ ܩܛܺܝܪܳܐ ܠܡܶܣܓܰܕ ܠܡܰܠܟܳܐ ܚܰܕ ܐܠܗܳܐ ܙܩܺܝܦܳܐ.
ܗܳܢܳܐ ܠܰܡ ܐܷܬܝ̣ܠܶܕ ܬܰܡܳܢ. ܘܰܠܨܶܗܝܽܘܢ ܐܷܬܶܐܡܰܪ. ܡܰܢܽܘ ܗܳܢܐ ܕܶܐܬܝ̣ܠܶܕ ܬܰܡܳܢ܇ ܕܢܺܐܡܰܪ ܫܡܶܗ ܠܐ ܨܳܒܶܐ. ܘܡܶܢ ܟܝܳܢܳܐ ܠܰܡ ܡܥܰܠܝܳܐ ܡܫܰܪܶܐ.
ܕܓܰܒܪܳܐ ܓܰܢܒܳܪܳܐ ܐܷܬܝ̣ܠܶܕ ܒܳܗ̇ ܘܗܽܘ ܐܱܬܩܢܳܗ̇. ܗܳܪܟܳܐ ܚܠܳܦ ܫܡܳܐ ܕܰܐܠܗܳܐ ܓܰܢܒܳܪܳܐ ܩܪܳܝܗܝ ܠܥܰܡܰܢܽܘܐܝܠ. ܐܷܡܰܪ ܓܝܪ ܐܷܫܰܥܝܳܐ ܥܠܰܘܗܝ ܟܕ ܚܙܳܐ ܐܪܳܙܳܐ ܕܡܰܘܠܳܕܶܗ. ܐܱܠܳܗܳܐ ܓܰܢ̱ܒܳܪܳܐ ܕܥܳܠܡ̈ܐ. ܘܬܽܘܒ ܡܳܪܝܳܐ ܓܰܢ̱ܒܳܪܳܐ ܩܪܰܒܬܳܢܳܐ (ܐܫܥܝܐ ܓ: ܒ ܡܒ: ܝܓ). ܘܰܢܒܺܝܳܐ ܐܚܪܺܢܳܐ ܐܡ̣ܪ. ܡܳܪܝܳܐ ܥܰܡܝ ܐܱܝܟ ܓܰܢ̱ܒܳܪܳܐ ܥܰܫܺܝܢܳܐ (ܐܪܡܝܐ ܟ: ܝܐ). ܘܕܰܘܝܕ ܡܳܪܝܳܐ ܩܪܳܝܗܝ ܘܶܐܡܰܪ.
ܡܳܪܝܳܐ ܢܶܡܢܶܐ ܒܰܟܬܳܒܳܐ ܠܥܰܡ̈ܡܶܐ. ܘܳܐܦܶܢ ܓܝܪ ܩܪܳܝܗܝ ܒܰܪܢܳܫܳܐ. ܐܠܐ ܗܳܐ ܡܳܪܝܳܐ ܩܪܳܝܗܝ. ܕܗܽܘ ܡܳܢܶܐ ܠܥܰܡ̈ܡܶܐ ܒܰܟܬܳܒܳܐ ܕܚܰܝ̈ܐ. ܡܽܘܫܶܐ ܐܡ̇ܪ ܗܘܳܐ ܡܶܛܠ ܥܰܡܳܐ. ܕܶܐܢ ܠܐ ܫܳܒܶܩ ܐܱܢܬ ܠܗܽܘܢ ܥܛܺܝܢܝ ܡܶܢ ܣܶܦܪܟ ܕܚܝ̈ܐ (ܡܦܩܢܐ ܠܒ: ܠܒ). ܗܳܪܟܳܐ ܓܝܪ ܥܰܡ̈ܡܶܐ ܣܰܓܺܝ̈ܐܐ ܟܬܰܒ ܐܠܗܳܐ ܥܰܡ ܡܽܘܫܶܐ ܒܥܺܕܬܳܐ ܕܒܽܘܟܪ̈ܶܐ. ܘܬܽܘܒ ܥܳܐܷܦ ܡܶܠܬܶܗ ܘܳܐܡܰܪ:
ܗܳܢܳܐ ܐܷܬܺܝܠܶܕ ܬܰܡܳܢ. ܕܰܢܦܰܫܶܩ ܫܡܶܗ ܕܡܶܠܬܳܐ ܘܢܺܐܡܰܪ ܕܰܐܠܳܗܳܐ ܐܷܬܝ̣ܠܶܕ ܬܰܡܳܢ. ܕܰܢܦܰܫܶܩ ܬܪܶܝܢ ܡܰܘ̈ܠܳܕܺܝܢ ܕܰܗܘܰܘ ܠܚܰܕ ܝܰܠܕܳܐ. ܥܰܠ ܗܰܘ ܕܡܶܢ ܐܱܒܳܐ. ܘܥܰܠ ܗܳܢܐ ܐܚܪܺܢܳܐ ܕܡܶܢ ܒܬܽܘܠܬܳܐ. ܘܚܰܕ ܩܪܳܝܗܝ ܘܠܰܘ ܬܪܶܝܢ. ܕܢܰܠܶܦ ܕܥܰܡܶܗ ܠܰܝܬ ܐܚܪܺܢܳܐ. ܐܠܐ ܚܰܕ ܗܽܘ ܘܰܠܚܽܘܕܳܐܝ̣ܬ ܡܰܢ ܐܷܬܝ̣ܠܶܕ ܡܶܢ ܐܱܒܳܐ ܐܱܠܳܗܳܐܝ̣ܬ. ܘܡܶܢ ܒܬܽܘܠܬܳܐ ܦܰܓܪܳܢܳܐܝ̣ܬ. ܡܰܝܬܶܐ ܕܶܝܢ ܒܳܬܰܪܟܶܢ ܘܳܐܡܰܪ:
ܪܰܘܪ̈ܒܳܢܶܐ ܕܥܳܡܪܺܝܢ ܒܶܟܝ ܢܶܚܕܽܘܢ. ܘܟܠ ܕܶܐܬܡܰܟܰܟܘ ܒܶܟܝ. ܗܳܠܶܝܢ ܫܠܺܝܚ̈ܐ ܐܷܢܽܘܢ ܘܰܢܒܺܝ̈ܐ ܘܡܰܠܦܴ̈ܢܶܐ ܘܰܐܒܳܗܴ̈ܬܳܐ. ܗܶܢܽܘܢ ܐܷܢܽܘܢ ܓܝܪ ܪܰܘܪ̈ܒܳܢܶܐ ܕܥܺܕܬܳܐ. ܡܶܛܠ ܕܶܐܬܡܰܟܰܟܘ ܒܗ̇. ܟܕ ܡܰܟܪܙܺܝܢ ܡܶܠܬܳܐ ܕܰܐܠܗܳܐ. ܘܣܰܝܒܰܪܘ ܐܘ̣̈ܠܨܳܢܶܐ. ܚܳܕܶܝܢ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ. ܘܡܰܘܕܶܝܢ ܘܰܡܫܰܒܚܺܝܢ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܠܥܳܠܰܡ ܥܳܠܡܺܝܢ ܐܱܡܺܝܢ܀
ܡܙܡܘܪܐ ܕܬܡܢܝܢ ܘܬܡܢܝܐ
ܡܰܘܕܰܥ ܥܰܠ ܡܰܦܽܘܠܬܶܗ ܕܳܐܕܳܡ. ܘܥܰܠ ܡܰܘܬܶܗ ܕܥܰܡܰܢܽܘܐܝܠ ܘܥܰܠ ܐܰܓܽܘܢܳܐ ܕܰܣܒܰܠ ܒܰܩܪܳܒܳܐ ܟܰܕ ܦܪܰܩ ܗܘܳܐ ܫܒܺܝܬܶܗ ܡܶܢ ܡܰܘܬܳܐ ܘܰܫܝܽܘܠ ܘܣܳܛܳܢܳܐ.
ܟܽܠܗܘܢ ܟܺܐܢ̈ܐ ܘܙܰܕܺܝ̈ܩܶܐ. ܐܱܝܠܶܝܢ ܕܰܐܪܓܶܫܘ ܒܓܶܠܝܳܢܳܐ ܕܪܽܘܚܳܐ܆ ܕܡܶܢ ܐܱܝܢܳܐ ܪܰܘܡܳܐ ܪܳܡܳܐ ܕܚܰܝ̈ܐ ܛܽܘܒܬܳܢ̈ܐ ܢܦܰܠ ܒܰܪܢܳܫܳܐ ܩܰܕܡܳܝܳܐ. ܠܐ ܫܳܠܶܝܢ ܗܘܰܘ ܡܶܢ ܕܰܡܩܰܪܒܺܝܢ ܗܘܰܘ ܒܳܥܽܘܬܳܐ ܐܦ ܨܠܽܘܬܳܐ ܩܕܳܡ ܐܱܠܗܳܐ ܕܬܶܥܒܰܪ ܡܶܢ ܐܴܕܳܡ ܐܱܦܽܘܦܰܐܣܺܝܣ ܕܕܰܝܳܢܳܐ. ܗܳܝ ܕܶܐܬܦܰܣܩܰܬ ܥܠܰܘܗܝ ܒܰܥܒܳܪ ܦܽܘܩܕܳܢܳܐ. ܘܰܟܡܳܐ ܐܢ ܡܒܰܝܰܐ ܗܘܳܐ ܠܗܽܘܢ ܓܶܠܝܳܢܳܐ ܕܛܰܝܒܽܘܬܳܐ ܕܕܳܢܰܚ ܗܘܳܐ ܥܠܰܝܗܘܢ. ܘܡܰܢܗܰܪ ܗܘܳܐ ܢܰܦ̈ܫܳܬܗܘܢ. ܟܕ ܗܶܢܘܢ ܒܚܶܫܽܘܟܳܐ ܟܡܺܝܪܳܐ ܕܰܒܓܽܘܒܳܐ ܬܰܚܬܳܝܳܐ ܡܶܫܬܰܩܦܺܝܢ ܗܘܰܘ ܒܽܐܘ̈ܠܨܳܢܶܐ. ܘܠܰܝܬ ܗܘܳܐ ܬܰܚܘܺܝܬܳܐ ܡܶܬܚܰܙܝܳܢܺܝܬܳܐ ܕܣܳܦܩܳܐ ܠܰܡܫܰܬܳܩܽܘ ܒܶܟܝܳܐ ܕܫܰܪ̈ܒܳܬܳܐ. ܥܠ ܚܒܳܠܐܴ ܕܰܫܪܶܟܘ ܠܫܰܦܺܝܪ̈ܶܐ ܒܓܰܘ ܩܰܒܪ̈ܶܐ. ܟܕ ܕܝܢ ܡܙܰܡܪܳܢܳܐ ܕܰܘܝܕ ܡܶܢ ܓܽܘܒܳܐ ܗܰܘ ܩܳܢܶܛ ܗܘܳܐ. ܘܒܳܥܽܘܬܳܐ ܡܩܰܪܶܒ ܗܘܳܐ ܠܐܱܠܗܳܐ ܦܳܪܽܘܩܶܗ. ܕܰܒܓܽܘܒܳܐ ܗܰܘ ܕܕܽܘܘܳܢܳܐ ܠܐ ܢܶܫܬܒܶܩ. ܐܠܐ ܢܶܬܦܰܨܶܐ ܡܶܢ ܚܒܽܘܫܝܳܐ ܗܰܘ ܟܡܺܝܪܳܐ. ܘܡܶܛܠ ܗܳܕܐ ܗܳܢܐ ܡܰܙܡܽܘܪܳܐ ܕܰܬܡܳܢܺܝܢ ܘܰܬܡܳܢܝܳܐ ܙܰܡܰܪ ܘܶܐܡܰܪ:
ܡܳܪܝܳܐ ܐܱܠܳܗܳܐ ܕܦܽܘܪܩܳܢܝ. ܒܺܐܝܡܳܡܳܐ ܓܥܺܝܬ ܘܰܒܠܺܠܝܳܐ ܩܕܳܡܰܝܟ. ܬܶܥܽܘܠ ܩܕܳܡܰܝܟ ܨܠܽܘܬܝ. ܘܰܐܪܟܶܢ ܐܷܕܢܳܟ ܠܒܳܥܽܘܬܝ. ܡܶܛܠ ܕܣܶܒܥܰܬ ܢܰܦܫܝ ܒܺܝ̈ܫܳܬܳܐ ܘܚܰܝܱ̈ܝ ܠܰܫܝܽܘܠ ܡܰܛܺܝܘ. ܥܕܰܡܳܐ ܠܗܳܪܟܳܐ ܡܰܬܚܳܗ̇ ܠܒܳܥܽܘܬܶܗ. ܘܰܒܗܳܢܐ ܦܶܬܓܳܡܳܐ ܦܓܰܥܘ ܒܶܗ ܚܰܝܷ̈ܐ ܘܫܰܠܶܡ ܨܠܽܘܬܶܗ܇ ܐܱܢܬ ܕܶܝܢ ܐܴܘ ܐܱܒܳܐ ܛܽܘܒܬܳܢܳܐ. ܠܐܴ ܬܶܒܥܶܐ ܡܶܢܝ ܕܟܽܠܗܝܢ ܡܷ̈ܠܐܷ ܕܰܐܡܺܝܪ̈ܳܢ ܒܡܰܙܡܽܘܪܳܐ ܗܳܢܐ. ܕܒܳܬܰܪ ܢܒܺܝܐ ܢܣܺܝܡ ܐܷܢܶܝܢ. ܐܠܐ ܒܪ̈ܶܥܝܳܢܶܐ ܩܰܛܺܝ̈ܢܶܐ ܡܦܰܪܫܺܝܢܰܢ ܠܗܶܝܢ. ܕܰܢܒܺܝܳܐ ܠܰܢܒܺܝܳܐ ܢܶܬܶܠ. ܘܰܐܝܠܶܝܢ ܕܰܐܡܺܝܪ̈ܳܢ ܥܠ ܗܰܘ ܚܰܝܳܐ ܕܰܛܥܶܡ ܡܰܘܬܳܐ. ܘܥܠ ܗܰܘ ܒܰܪ ܚܺܐܪ̈ܶܐ ܕܟܕ ܠܐ ܡܫܰܥܒܰܕ ܗܘܳܐ ܠܡܰܘܬܳܐ܆ ܩܰܒܶܠ ܕܢܶܗܘܶܐ ܡܫܰܥܒܕܳܐ ܬܚܶܝܬ ܫܽܘܠܛܳܢܶܗ ܕܡܰܘܬܳܐ ܒܨܶܒܝܳܢܶܗ. ܡܳܕܶܝܢ ܗܳܝ ܕܡܳܪܝܳܐ ܐܠܗܳܐ ܕܦܽܘܪܩܳܢܝ ܘܗܳܝ ܕܒܺܐܝܡܳܡܳܐ ܘܰܒܠܺܠܝܳܐ ܓܳܥܶܐ ܗܘܳܐ܆ ܘܰܡܨܰܠܐܷ ܩܕܳܡ ܐܠܗܳܐ. ܘܗܳܝ ܕܰܡܦܺܝܣ ܕܬܶܥܽܘܠ ܨܠܽܘܬܶܗ ܩܕܳܡܰܘܗܝ. ܘܗܳܝ ܕܡܶܬܟܰܫܰܦ ܕܢܰܪܟܶܢ ܐܠܗܳܐ ܐܷܕܢܶܗ ܠܒܳܥܽܘܬܶܗ. ܘܗܳܝ ܕܣܶܒܥܰܬ ܢܰܦܫܶܗ ܒܺܝ̈ܫܳܬܳܐ. ܡܶܢ ܫܽܘ̈ܩܳܦܶܐ ܕܒܰܐܪܥܳܐ ܕܟܽܘ̈ܒܶܐ. ܬܰܟܫܶܦܬܳܐ ܐܷܢܶܝܢ ܗܳܠܝܢ ܐܱܝܟ ܕܠܺܝ ܡܶܬܚܰܙܝܳܐ. ܕܟܽܠܗ ܟܝܳܢܳܐ ܐܢܳܫܳܝܳܐ. ܘܰܐܟܙܢܳܐ ܕܟܽܠܗܘܢ ܗܰܕܳܡ̈ܐ ܕܰܣܪܺܝܓܺܝܢ ܒܦܰܓܪܳܐ. ܒܦܽܘܡܳܐ ܡܡܰܠܠܺܝܢ. ܘܡܶܛܠ ܕܰܢܒܺܝܳܐ ܒܥܰܝܢܳܐ ܕܪܽܘܚܳܐ ܟܽܠܡܶܕܶܡ ܚܳܙܶܐ ܗܘܳܐ. ܐܱܪܓܶܫ ܒܢܰܦܫܶܗ ܕܶܐܫܬܰܡܥܰܬ ܨܠܽܘܬܶܗ܆ ܘܰܐܝܟ ܗܰܘ ܕܥܠ ܢܰܦܫܶܗ ܐܡ̣ܪ. ܘܠܘ ܕܺܝܠܶܗ ܗܽܘ ܦܶܬܓܳܡܳܐ. ܡܰܥܶܠ ܓܝܪ ܘܳܐܡܰܪ:
ܘܚܰܝܱ̈ܝ ܠܰܫܝܽܘܠ ܡܰܛܺܝܘ. ܐܶܬܚܰܫܒܶܬ ܥܰܡ ܢܳܚ̈ܬܰܝ ܓܽܘܒܳܐ. ܘܰܗܘܺܝܬ ܐܱܝܟ ܓܰܒܪܳܐ ܕܠܰܝܬ ܠܶܗ ܐܻܝܳܠܐܴ. ܒܶܝܬ ܡܺܝ̈ܬܶܐ ܒܰܪ ܚܺܐܪ̈ܶܐ. ܐܱܝܟ ܩܛܺܝ̈ܠܐܷ ܕܰܫܟܺܝܒܺܝܢ ܒܩܰܒܪ̈ܶܐ. ܗܳܠܶܝܢ ܐܡ̣ܪ ܠܘ ܥܠ ܢܰܦܫܶܗ. ܠܐ ܓܝܪ ܠܳܚ̈ܡܳܢ ܐܝܟ ܕܢܶܬܐܱܡܪ̈ܳܢ ܥܠ ܒܰܪܢܳܫܳܐ. ܐܠܐ ܡܶܛܠ ܕܥܰܡܰܢܽܘܐܝܠ ܗܽܘܝܽܘ ܚܰܝܷ̈ܐ ܕܟܠ܆ ܟܕ ܢܚܶܬ ܗܘܳܐ ܠܰܫܝܽܘܠ ܘܰܣܥܰܪ ܠܢܰܦ̈ܫܳܬܳܐ ܕܬܰܡܳܢ. ܠܰܘ ܒܶܠܥܳܕ ܚܰܝ̈ܐ ܕܰܟܝܳܢܶܗ ܡܰܛܺܝ ܠܬܰܡܳܢ. ܘܟܕ ܐܝܟ ܡܳܝܽܘܬܳܐ ܥܳܒܪܳܐ ܗܘܳܬ ܢܰܦܫܶܗ ܒܰܫܝܽܘܠ. ܘܰܒܢܰܦܫܳܐ ܗܳܝ ܐܱܠܳܗܳܝܬܳܐ ܛܡܺܝܪܳܐ ܗܘܳܬ ܢܽܘܪܳܢܳܝܽܘܬܳܐ ܘܚܰܝ̈ܐ ܠܐ ܡܳܝܽܘ̈ܬܶܐ. ܘܡܶܛܠܗܳܕܐ ܐܡ̣ܪ ܢܒܺܝܐ ܕܚܰܝܱ̈ܝ ܠܰܫܝܽܘܠ ܡܰܛܺܝܘ. ܥܠ ܕܢܰܠܶܦ ܕܰܐܠܗܳܐ ܐܺܝܬܰܘܗܝ ܚܰܝ̈ܐ ܕܩܰܕܺܝ̈ܫܶܐ. ܥܕܰܡܳܐ ܠܰܫܝܽܘܠ ܬܰܚܬܳܝܬܳܐ ܐܷܬܡܰܛܺܝ ܒܡܰܘܬܶܗ. ܘܥܰܡ ܢܳܚ̈ܬܰܝ ܓܽܘܒܳܐ ܐܷܬܚܫܶܒ ܒܡܰܘܬܶܗ. ܐܠܐ ܐܝܟ ܓܰܒܪܳܐ ܕܠܰܝܬ ܠܗ ܐܺܝܳܠܐܴ ܗܘܳܐ. ܘܟܕ ܡܶܬܒܰܙܰܚ ܛܰܥܡܶܗ ܠܡܰܘܬܳܐ. ܘܰܒܨܰܥܪܳܐ ܐܱܥܒܪܰܬܶܗ ܐ̮ܘܪܺܫܠܶܡ ܠܰܨܠܺܝܒܳܐ. ܘܠܘ ܐܝܟ ܕܰܠܡܰܠܟܳܐ ܘܡܳܪܳܐ. ܘܳܐܦܠܐܴ ܚܕ ܡܶܢ ܬܰܠܡܺܝ̈ܕܰܘܗܝ ܟܰܬܰܪ ܨܶܐܕܰܘܗܝ ܟܰܕ ܥܠ ܠܩܰܒܪܳܐ. ܡܶܬܕܰܡܰܪ ܒܶܗ ܢܒܺܝܳܐ ܘܳܐܡܰܪ: ܒܶܝܬ ܡܺܝ̈ܬܶܐ ܒܰܪ ܚܺܐܪ̈ܶܐ. ܐܝܟ ܩܛܺܝ̈ܠܐܷ ܕܡܶܬܚܰܫܒܺܝܢ ܒܰܡܣܳܡ ܒܪܺܝܫܳܐ ܘܰܫܟܺܝܒܺܝܢ ܒܩܰܒܪ̈ܶܐ. ܚܙܺܝ ܗܳܕܐ ܕܠܘ ܥܠ ܕܰܘܝܕ ܐܱܡܺܝܪܳܐ. ܕܰܘܝܕ ܓܝܪ ܒܡܰܘܬܳܐ ܐܝܟ ܐܱܝܢܳܐ ܕܰܡܫܰܥܒܰܕ ܠܐܱܦܽܘܦܰܐܣܺܝܣ ܢܦܰܠ. ܐܠܐ ܘܠܐ ܡܶܬܩܛܳܠܽܘ ܐܷܬܩܛܶܠ. ܟܕ ܫܰܠܶܡ ܝܰܘ̈ܡܰܘܗܝ. ܡܳܕܝܢ ܒܰܪ ܚܺܐܪ̈ܶܐ ܚܰܕ ܗܽܘ. ܗܰܘ ܕܩܰܒܶܠ ܥܠܰܘܗܝ ܕܟܰܕ ܐܝ̣ܬܰܘܗܝ ܠܥܶܠ ܡܶܢ ܡܰܘܬܳܐ ܐܝܟ ܚܰܝܳܐ. ܢܶܬܢܰܣܶܐ ܒܶܗ ܒܗܳܢܳܐ ܒܶܣܪܳܐ ܐܝܟ ܒܰܪܢܳܫܳܐ. ܘܰܒܨܶܒܝܳܢܶܗ ܐܷܬܕܰܡܺܝ ܠܗܳܢܘܢ ܐܝܟ ܕܶܐܡܰܪ ܢܒܺܝܳܐ.
ܐܰܝܠܶܝܢ ܠܰܡ ܕܬܽܘܒ ܠܐܴ ܐܷܬܕܟܰܪܬ ܐܷܢܽܘܢ. ܘܗܶܢܽܘܢ ܡܶܢ ܐܻܝ̈ܕܰܝܟ ܐܷܒܰܕܘ. ܠܰܘ ܓܝܪ ܨܳܠܽܘ̈ܒܶܐ ܐܱܣܒܰܪܘ ܗܘܰܘ ܥܠܰܘܗܝ ܕܠܐ ܩܳܐܷܡ ܡܶܢ ܡܰܘܬܳܐ. ܐܠܐ ܐܦ ܬܰܠܡܺܝ̈ܕܶܐ. ܠܐܴ ܡܰܫܪܺܝܢ ܗܘܰܘ ܡܰܢ ܕܩܳܐܷܡ ܡܶܢ ܒܶܝܬ ܡܺܝ̈ܬܶܐ. ܠܐ ܠܡ ܓܝܪ ܝܳܕܥܺܝܢ ܗܘܰܘ ܡܶܢ ܟܬܳܒ̈ܐ܆ ܕܰܥܬܺܝܕ ܗܽܘ ܠܰܡܩܳܡ ܡܶܢ ܡܺܝ̈ܬܶܐ. ܟܕ ܗܳܠܝܢ ܬܘܒ ܕܒܶܝܬ ܩܠܶܝܽܘܦܰܐ. ܟܕ ܡܰܛܺܝ ܐܷܢܘܢ ܝܶܫܽܘܥ ܒܳܬܰܪ ܩܝܳܡܬܳܐ ܒܽܐܘܪܚܳܐ ܕܥܶܡܰܐܘܳܣ ܘܫܰܐܷܠ ܐܷܢܘܢ ܝܶܫܽܘܥ. ܘܗܳܕܐ ܐܡ̣ܪ ܩܠܶܝܽܘܦܰܐ. ܚܢܰܢ ܠܡ ܣܳܒܪܺܝܢ ܗܘܰܝܢ ܕܗܽܘܝܽܘ ܥܬܺܝܕ ܗܘܳܐ ܕܢܶܦܪܩܺܝܘܗܝ ܠܺܝܣܪܳܐܝܠ (ܠܘܩܐ ܟܕ: ܟܐ). ܐܠܐ ܠܡ ܗܳܫܳܐ ܒܛܶܠ ܠܶܗ ܦܽܘܪܩܳܢܳܐ ܡܶܛܠ ܕܰܐܫܠܡܽܘܗܝ ܪ̈ܰܒܰܝ ܟܳܗܢ̈ܐ ܠܡܰܘܬܳܐ ܘܩܰܛܠܽܘܗܝ (ܠܘܩܐ ܟܕ: ܟ). ܗܳܠܝܢ ܠܐ ܗܳܐ ܓܰܠܝܳܐܝ̣ܬ ܡܰܘܕ̈ܥܳܢ ܕܥܰܡ ܫܡܳܐ ܕܟܽܠܗܘܢ ܡܺܝ̈ܬܶܐ ܕܦܳܫܘ ܒܩܰܒܪ̈ܶܐ ܗܳܐ ܡܢ ܥܳܠܰܡ ܚܳܫܒܺܝܢ ܗܘܰܘ ܠܶܗ. ܘܥܰܠܗܳܝ ܐܡ̇ܪ ܢܒܺܝܳܐ:
ܐܱܚܶܬܬܳܢܝ ܠܓܽܘܒܳܐ ܬܰܚܬܳܝܳܐ. ܠܚܶܫܽܘܟܳܐ ܘܰܠܛܶܠܳܠܰܝ̈ ܡܰܘܬܳܐ. ܓܽܘܒܳܐ ܗܳܟܺܝܠ ܬܰܚܬܳܝܳܐ ܐܝ̣ܬܰܘܗܝ. ܗܰܘ ܕܰܐܣܺܝܪ̈ܳܢ ܗܘܱ̈ܝ ܒܶܗ ܢܰܦ̈ܫܳܬܳܐ ܘܪ̈ܽܘܚܳܬܳܐ ܕܟܽܠܗܘܢ ܡܺܝ̈ܬܶܐ. ܘܬܰܫܢܺܝܩܳܐ ܘܛܺܝܓܢܳܐ ܕܡܶܫ̈ܬܰܩܦܳܢ ܗܘܱ̈ܝ ܒܶܗ ܢܰܦ̈ܫܳܬܳܐ ܬܰܡܳܢ. ܘܰܡܣܰܟ̈ܝܳܢ ܗܘܱ̈ܝ ܕܢܶܚܙ̈ܝܳܢ ܐܴܬܳܐ ܕܩܳܪܝܳܐ ܠܗܶܝܢ ܡܰܣܰܩܬܳܐ. ܘܡܶܛܠ ܗܳܕܐ ܟܕ ܐܷܬܪܰܚܰܡ ܥܠܰܝܗܶܝܢ ܗܰܘ ܕܰܢܚܶܬ ܠܰܫܝܽܘܠ ܡܶܛܠܬܳܗܶܝܢ ܫܪܳܐ ܐܷܢܶܝܢ. ܡܶܢ ܓܽܘܒܳܐ ܬܰܚܬܳܝܳܐ ܘܡܶܢ ܚܶܫܽܘܟܳܐ ܟܡܺܝܪܳܐ ܕܬܰܡܳܢ. ܐܝܟ ܕܶܐܡܰܪ ܠܘܳܬܶܗ ܙܟܰܪܝܳܐ. ܕܰܐܢܬ ܒܰܕܡܳܐ ܕܕܺܝܰܬܺܝܩܺܝ ܕܺܝܠܳܟ ܫܪܰܝܬ ܐܱܣܺܝܪ̈ܶܐ ܡܶܢ ܓܽܘܒܳܐ ܕܠܰܝܬ ܒܶܗ ܡܰܝܴ̈ܐ (ܙܟܪܝܐ ܛ: ܝܐ). ܘܕܰܘܝܕ ܐܡ̣ܪ ܥܠܰܘܗܝ:
ܕܰܥܠܰܝ ܣܡܰܟ ܪܽܘܓܙܳܟ. ܘܟܽܠܗܘܢ ܡܰܚܫܽܘ̈ܠܰܝܟ ܐܱܝܬܺܝܬ ܥܠܰܝ. ܐܱܪܚܶܩܬ ܡܶܢܝ ܝܳܕ̈ܥܰܝ ܘܰܥܒܰܕܬܳܢܝ ܠܗܽܘܢ ܛܰܡܳܐܐ. ܘܶܐܬܟܠܺܝܬ ܕܠܐܴ ܐܷܦܽܘܩ. ܘܥܰܝܢܝ ܕܳܒܰܬ ܡܶܢ ܡܽܘܟܳܟܝ. ܟܡܳܐ ܐܷܢ ܡܶܣܬܰܒܪܺܝܢ ܦܶܬܓܳܡ̈ܐ ܗܳܠܝܢ ܕܰܡܚܺܝܠܺܝܢ܆ ܥܠܰܘܗܝ ܐܷܡܪܰܬ ܐܷܢܽܘܢ ܢܒܺܝܽܘܬܳܐ. ܗܽܘ ܓܝܪ ܩܳܡ ܚܠܳܦܰܝܢ ܩܕܳܡ ܟܺܐܢܽܘܬܳܐ. ܘܩܰܒܶܠ ܪܽܘܓܙܳܐ ܗܰܘ ܕܰܥܠܰܝܢ ܛܥܺܝܢܳܐ ܗܘܳܬ. ܠܐ ܓܝܪ ܡܶܬܪܰܥܝܳܐ ܗܘܳܬ. ܐܷܠܽܘ ܠܐ ܕܩܰܒܶܠ ܥܠܰܘܗܝ ܕܢܶܬܡܬܰܚ ܠܢܶܓ̈ܕܶܐ ܐܝܟ ܡܰܣܟܠܳܢܳܐ. ܟܕ ܓܝܪ ܚܛܳܐ ܐܴܕܳܡ ܒܰܥܕܶܝܢ ܟܽܠܗܘܢ ܡܰܠܐܱܟ̈ܐ ܩܰܕܺܝ̈ܫܶܐ. ܝܳܕܽܘܥܰܘ̈ܗܝ ܐܝܟ ܛܰܡܳܐܐ ܚܰܫܒܽܘܗܝ ܒܥܰܝ̈ܢܰܝܗܘܢ ܘܰܐܪܚܶܩ ܐܷܢܘܢ ܡܶܢ ܠܘܳܬܶܗ. ܘܟܕ ܠܐ ܡܶܛܠ ܥܰܘܠܰܢ. ܟܺܐܢܽܘܬܳܐ ܟܳܠܝܳܐ ܗܘܳܬ ܠܒܰܣܺܝܡܳܐ ܘܪ̈ܳܚܡܰܘܗܝ ܟܰܪܝܽܘܬܳܐ ܡܰܘܠܕܺܝܢ ܗܘܰܘ ܒܶܗ. ܘܡܶܛܠܗܳܢܐ ܓܶܝܪ ܦܶܬܓܳܡܳܐ ܕܰܦܐܷܐ ܠܛܰܝܒܽܘܬܶܗ ܕܰܐܠܗܳܐ. ܡܶܟܺܝܠ ܢܒܺܝܳܐ ܡܦܺܝܣ ܘܳܐܡܰܪ:
ܩܪܺܝܬܳܟ ܡܳܪܝܳܐ ܒܟܽܠܝܽܘܡ. ܘܦܶܫܛܶܬ ܐܻܝ̈ܕܰܝ ܠܘܳܬܳܟ. ܗܳܐ ܠܡܺܝ̈ܬܶܐ ܥܳܒܶܕ ܐܱܢܬ ܬܶܕܡܪ̈ܳܬܳܐ. ܘܓܰܢ̱ܒܳܪ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ. ܘܢܶܫܬܰܥܽܘܢ ܕܰܒܩܰܒܪ̈ܶܐ ܛܰܝܒܽܘܬܳܟ. ܡܳܢܳܐ ܐܷܢܶܝܢ ܬܶܕܡܪ̈ܳܬܳܐ ܕܰܥܒܰܕ ܠܡܺܝ̈ܬܶܐ. ܘܡܰܢ ܐܢܘܢ ܓܰܢ̱ܒܳܪ̈ܶܐ ܕܩܳܝܡܺܝܢ ܘܡܰܘܕܶܝܢ ܠܶܗ. ܥܰܠ ܗܳܢܘܢ ܕܰܗܘܰܘ ܓܰܢܒܳܪ̈ܶܐ ܕܰܫܡܳܗܴ̈ܬܳܐ ܐܡ̇ܪ ܟܰܝ ܗܳܠܝܢ ܕܰܥܕܰܟܺܝܠ ܕܛܽܘܪ̈ܶܐ ܟܫܶܝܢ ܓܰܪ̈ܡܰܝܗܘܢ ܒܰܐܪܥܳܐ ܗܳܝ ܕܣܺܝܡܺܝܢ ܒܳܗ̇ ܠܣܳܗܕܽܘܬܳܐ. ܐܰܘ ܥܠ ܗܳܢܘܢ ܕܒܶܝܬ ܢܰܡܪܽܘܕ ܐܰܘ ܥܠ ܫܺܝܫܰܝ ܐܴܦ ܐܱܚܺܝܡܰܢ ܘܬܽܘܠܡܰܝ ܒܢܱ̈ܝ ܓܰܢܒܳܪ̈ܶܐ. ܐܰܘ ܥܠ ܓܽܘܠܝܰܕ ܦܠܶܫܬܳܝܳܐ. ܠܘ ܠܗܳܠܝܢ ܩܳܪܶܐ ܚܳܣ. ܓܰܢܒܳܪ̈ܶܐ ܩܳܪܶܐ ܠܗܳܢܘܢ ܕܰܥܒܰܕܘ ܐܰܓܽܘܢܳܐ ܥܡ ܪ̈ܽܘܚܶܐ ܒܺܝ̈ܫܳܬܳܐ ܕܰܬܚܶܝܬ ܫܡܰܝܳܐ. ܘܒܰܩܪܳܒܗܘܢ ܐܱܥܕܺܝܘ ܟܠܺܝܠܐܴ ܕܙܳܟܽܘܬܳܐ. ܠܡܽܘܫܶܐ ܘܰܠܝܶܫܘܥ ܒܰܪܢܽܘܢ ܡܟܰܢܶܐ ܓܰܢܒܳܪ̈ܶܐ ܘܰܠܓܶܕܥܽܘܢ ܘܰܠܢܰܦܬܰܚ. ܘܰܠܫܶܡܫܽܘܢ ܘܠܰܫܡܽܘܐܝܠ. ܐܴܦ ܡܶܢܗܘܢ ܗܽܘ ܕܗܳܠܝܢ ܓܰܢܒܳܪ̈ܶܐ ܕܩܳܝܡܺܝܢ ܡܶܢ ܒܶܝܬ ܡܺܝ̈ܬܶܐ ܘܡܰܘܕܶܝܢ ܠܶܗ ܠܰܡܢܰܚܡܳܢܳܐ ܥܰܡ ܫܰܪܟܳܐ ܕܟܽܠܗܘܢ ܟܺܐܢ̈ܐ ܘܙܰܕܺܝ̈ܩܶܐ ܘܰܐܒܳܗ̈ܬܳܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܡܰܘܕ̈ܝܳܢܶܐ ܗܳܠܝܢ ܓܶܝܪ ܩܳܝܡܺܝܢ ܒܠܐܴ ܡܶܬܚܰܒܠܳܢܽܘܬܳܐ. ܘܩܰܛܠܶܗ ܠܡܰܘܬܳܐ ܒܝܰܕ ܩܝܳܡܬܶܗ ܠܗܳܢܳܐ ܡܰܘܕܶܝܢ. ܘܰܐܝܟ ܕܶܐܡܰܪ ܪܽܘܚܳܐ ܒܰܢܒܺܝܐ.
ܘܗܰܝܡܳܢܽܘܬܳܟ ܠܰܡ ܒܰܐܒܕܳܢܳܐ. ܬܶܬܺܝܕܰܥ ܒܚܶܫܽܘܟܳܐ ܬܶܕܡܽܘܪܬܳܟ. ܘܙܰܕܺܝܩܽܘܬܳܟ ܒܰܐܪܥܳܐ ܕܶܐܬܛܰܥܝܰܬ. ܟܕ ܢܚܶܬ ܕܶܝܢ ܡܶܠܬܶܗ ܕܰܐܒܳܐ ܠܩܰܒܪܳܐ ܗܘܳܬ ܬܰܡܳܢ ܟܳܪܽܘܙܽܘܬܳܐ ܕܚܰܝܰܬ ܡܺܝ̈ܬܶܐ ܒܰܐܬܪܳܐ ܕܰܐܒܕܳܢܳܐ. ܘܡܶܢ ܒܳܬܰܪ ܕܰܐܣܒܰܪܘ ܐܱܝܠܶܝܢ ܕܰܒܩܰܒܪ̈ܶܐ ܐܷܢܽܘܢ ܕܟܳܡ ܥܠܰܝܗܘܢ. ܡܰܘܬܳܐ ܘܬܽܘܒ ܠܐܴ ܡܰܪܦܶܐ ܠܗܽܘܢ ܕܢܶܦܩܽܘܢ. ܕܶܢܚܰܬ ܥܠܰܝܗܘܢ ܗܰܝܡܳܢܽܘܬܳܐ ܒܰܐܒܕܳܢܳܐ ܘܰܐܢܗܪܰܬ ܐܷܢܘܢ. ܡܶܛܠ ܕܥܰܡܶܗ ܢܶܚܬܰܬ ܗܰܝܡܳܢܽܘܬܳܐ ܠܐܱܬܪܳܐ ܗܰܘ ܕܰܐܒܕܳܢܳܐ. ܐܡ̇ܪ ܐܢܳܫ ܐܱܝܟܰܢܳܐ ܡܶܫܬܰܥܶܝܢ ܐܱܝܠܶܝܢ ܕܰܒܩܰܒܪ̈ܶܐ ܛܰܝܒܽܘܬܶܗ ܐܦ ܗܰܝܡܳܢܽܘܬܶܗ. ܫܰܦܺܝܪ ܓܶܝܪ ܡܡܱ̈ܠܠܳܢ ܟܶܢ̈ܫܶܐ ܕܰܥܠܰܝ̈ܡܳܬܳܐ ܢܰܦ̈ܫܳܬܳܐ ܕܶܐܬܦܪ̈ܶܩܝ ܒܗܰܝܡܳܢܽܘܬܶܗ. ܢܚܶܬ ܓܶܝܪ ܨܶܐܕܰܝܗܶܝܢ ܠܐܱܬܪܳܐ ܬܰܚܬܳܝܳܐ. ܘܰܫܪܳܐ ܐܷܢܝܢ ܡܶܢ ܐܱܣܽܘܪ̈ܶܐ ܕܚܰܝ̈ܠܰܘܳܬܳܐ ܕܰܠܩܽܘܒܠܐܴ. ܘܰܐܫܠܶܡ ܐܷܢܝܢ ܠܡܰܠܰܐܟ̈ܐ ܩܰܕܺܝ̈ܫܶܐ ܕܢܶܛܪܽܘܢ ܐܷܢܶܝܢ ܥܰܡ ܢܰܦܫܶܗ ܕܓܰܝܳܣܳܐ ܒܓܰܘ ܦܰܪܕܰܝܣܳܐ. ܡܶܛܠ ܕܠܰܘ ܠܰܓܡܺܝܪܽܘܬܳܐ ܕܡܽܘܠܟܳܢܳܐ ܩܰܒܶܠܶܝ̈ܢ. ܐܠܐ ܒܰܠܚܽܘܕ ܒܚܰܝ̈ܐ ܘܰܒܢܽܘܗܪܳܐ ܐܱܫܪܺܝ ܐܢܝܢ. ܘܰܣܢܺܝ̈ܩܳܢ ܐܷܢܝܢ ܬܰܡܳܢ ܥܠ ܗܰܝܡܳܢܽܘܬܳܐ ܕܒܗ̇ ܢܶܫܪ̈ܳܢ ܕܡܶܬܓܡܰܪ ܠܘܳܬܗܶܝܢ. ܗܰܘ ܡܶܕܶܡ ܕܰܥܕܰܟܺܝܠ ܫܽܘܪܳܝܳܐ ܫܩܰܠ ܨܶܐܕܰܝܗܶܝܢ. ܬܰܡܳܢ ܓܶܝܪ ܒܗܰܘ ܚܶܫܽܘܟܳܐ ܣܚܺܝ̈ܦܳܢ ܗܘܱ̈ܝ. ܐܷܬܝܰܕܥܰܬ ܗܘܳܬ ܗܳܪܟܳܐ ܬܶܕܡܽܘܪܬܶܗ ܕܦܳܪܽܘܩܳܐ. ܟܰܕ ܕܶܢܚܰܬ ܥܠܰܝܗܶܝܢ ܢܰܦܫܳܐ ܗܳܝ ܐܱܠܳܗܳܝܬܳܐ ܕܡܳܪܢ ܒܰܕܡܽܘܬܳܐ ܕܫܶܡܫܳܐ ܘܰܐܢܗܪܰܬ ܥܠܰܝܗܶܝܢ. ܠܐ ܓܶܝܪ ܐܱܬܪܳܐ ܒܠܶܒܳܐ. ܕܰܢܣܰܝܒܰܪ ܚܽܘ̈ܫܳܒܶܐ ܕܡܶܬܪܢܶܝܢ ܥܠ ܐܱܪܥܳܐ ܘܰܐܬܪܳܐ ܕܰܫܝܽܘܠ. ܕܒܶܗ ܚܒܺܝ̈ܫܳܢ ܗܘܱ̈ܝ ܢܰܦ̈ܫܳܬܳܐ ܥܕܰܡܳܐ ܕܰܢܚܶܬ ܡܶܠܬܶܗ ܕܰܐܠܗܳܐ ܘܰܐܕܢܰܚ ܙܰܕܺܝܩܽܘܬܶܗ ܒܰܐܪܥܳܐ ܕܶܐܬܛܰܥܝܰܬ. ܘܰܐܦܶܩ ܡܶܢܳܗ̇ ܐܱܣܺܝܪ̈ܶܐ ܘܫܰܡܰܪ ܡܶܢܳܗ̇ ܠܒܺܝ̈ܫܶܐ. ܘܒܳܬܰܪ ܗܳܠܝܢ ܡܨܰܠܐܷ ܢܒܺܝܳܐ ܘܳܐܡܰܪ:
ܘܶܐܢܳܐ ܠܘܳܬܳܟ ܡܳܪܝܳܐ ܓܥܺܝܬ܆ ܘܰܒܨܰܦܪܳܐ ܨܠܽܘܬܝ ܬܩܰܕܶܡ ܠܘܳܬܳܟ. ܘܗܺܝ ܠܡ ܨܠܽܘܬܝ ܗܳܕܳܐ ܗܝ.
ܕܠܐ ܬܶܛܥܶܐ ܠܢܰܦܫܝ ܡܳܪܝܳܐ. ܬܰܡܳܢ ܓܶܝܪ ܒܶܗ ܒܗܰܘ ܨܰܦܪܳܐ. ܟܠ ܢܰܦܫܳܐ ܕܛܳܥܶܐ ܠܗ̇ ܩܳܠܳܟ. ܘܠܐ ܩܳܪܶܐ ܠܗ̇ ܠܚܰܝܷ̈ܐ. ܥܳܛܦܳܐ ܠܗ̇ ܠܕܺܝܢܳܐ ܘܰܠܬܰܫܢܺܝܩܳܐ. ܡܶܛܠ ܗܳܕܐ.
ܘܠܐܴ ܬܰܗܦܶܟ ܐܱܦܰܝ̈ܟ ܡܶܢܝ. ܗܰܘ ܓܝܪ ܕܠܐ ܡܶܬܦܢܶܐ ܐܱܢܬ ܥܠܰܘܗܝ ܒܢܽܘܗܪܳܐ ܕܦܰܪܨܽܘܦܳܟ ܗܰܘ ܕܰܡܠܐܷ ܚܰܝܷ̈ܐ ܘܢܽܘܗܪܳܐ܆ ܩܰܠܺܝܠܐܝ̣ܬ ܚܳܛܶܦ ܠܶܗ ܗܰܘ ܚܶܫܽܘܟܳܐ ܒܰܪܳܝܳܐ. ܡܰܘܕܶܐ ܒܡܶܣܟܺܢܽܘܬܶܗ ܕܰܒܦܽܘܚܳܡܳܐ ܕܗܰܘ ܥܽܘܬܪܳܐ ܪܰܒܳܐ ܕܰܐܠܗܳܐ ܘܳܐܡܰܪ:
ܒܳܝܫܳܐ ܐܢܳܐ ܘܠܐܱܝܳܐ ܡܶܢ ܛܰܠܝܽܘܬܝ. ܘܰܚܙܺܝ ܐܱܝܟܰܢܳܐ ܗܳܕܐ ܒܳܥܶܐ ܕܢܺܐܡܰܪ ܒܰܪܢܳܫܳܐ.
ܐܷܬܬܪܺܝܡܶܬ ܠܡ ܐܷܬܡܰܟܟܶܬ ܘܬܶܘܪܶܬ. ܐܷܬܥܰܠܺܝ ܓܝܪ ܟܝܳܢܳܐ ܡܳܝܽܘܬܳܐ ܠܘܳܬ ܚܰܝܷ̈ܐ ܕܰܠܥܶܠ ܡܶܢ ܟܝܳܢܶܗ. ܘܰܠܒܶܫ ܡܶܬܚܰܒܠܳܢܳܐ ܐܷܣܛܠܳܐ ܪܺܝܫܳܝܬܳܐ ܕܠܐ ܡܶܬܚܰܒܠܳܢܽܘܬܳܐ. ܘܥܰܠ ܗܳܕܐ ܟܰܕ ܝܳܨܶܦ ܠܶܗ ܟܺܐܒܳܐ ܕܒܺܝ̈ܫܳܬܶܗ܇ ܐܡ̇ܪ:
ܘܰܥܠܰܝ ܥܒܰܪ ܪܽܘܓܙܳܟ. ܘܰܕܠܽܘܚܝܳܟ ܫܰܬܩܰܢܝ. ܐܷܬܟܰܪܟܽܘܢܝ ܐܱܝܟ ܡܰܝܴ̈ܐ ܟܽܠܶܗ ܝܰܘܡܳܐ. ܘܣܳܡܘ ܥܠܰܝ ܐܱܟܚܕܳܐ. ܡܶܢ ܗܳܝܕܶܝܢ ܓܝܪ ܒܰܕܡܽܘܬܳܐ ܕܢܰܗܪ̈ܰܘܳܬܳܐ ܕܶܐܬܟܰܢܰܫ ܡܶܢ ܡܶܛܪܳܐ ܕܚܰܝ̈ܠܰܘܳܬܳܐ ܕܕܰܠܩܽܘܒܠܐܴ ܟܰܪܟܽܘܗܝ ܠܒܰܪܢܳܫܳܐ ܛܪ̈ܽܘܢܶܐ ܟܽܠܶܗ ܙܰܒܢܳܐ ܕܚܰܝܰܘ̈ܗܝ. ܒܕܰܚܙܰܘ ܪܽܘܓܙܳܐ ܟܺܐܢܳܐ ܕܰܠܚܺܝܡ ܥܠܰܘܗܝ ܥܠ ܕܰܚܛܳܐ ܘܡܶܢ ܐܱܢܰܢܩܺܝ ܩܥܳܐ.
ܐܱܪܚܶܩܬ ܡܶܢܝ ܪ̈ܳܚܡܰܝ ܘܚܰܒܪ̈ܰܝ ܘܝܳܕ̈ܥܰܝ ܐܰܦܪܶܩܬ ܡܶܢܝ. ܪ̈ܳܚܡܰܘܗܝ ܘܚܰܒܪ̈ܰܘܗܝ ܕܒܰܪܢܳܫܳܐ ܐܝ̣ܬܰܝܗܽܘܢ ܗܘܰܘ ܡܶܢ ܩܕܳܡ ܕܢܶܚܛܶܐ ܟܽܠܗܘܢ ܚܰܝ̈ܠܘܳܬܳܐ ܩܰܕܺܝ̈ܫܶܐ. ܟܕ ܚܛܳܐ ܕܶܝܢ ܘܰܥܒܰܪ ܦܽܘܩܕܳܢܳܐ. ܐܱܪܚܶܩ ܐܷܢܘܢ ܐܱܠܗܳܐ ܡܶܢܶܗ. ܕܗܽܘ ܢܶܦܩܽܘܕ ܕܰܠܘܳܬܰܢ ܢܶܥܛܦܽܘܢ ܘܰܢܩܰܘܽܘܢ ܨܶܐܕܰܝܢ. ܘܢܰܘܕܶܐ ܠܰܡܫܺܝܚܳܐ ܦܳܪܽܘܩܰܢ. ܠܥܳܠܰܡ ܥܳܠܡܺܝܢ ܐܡܺܝܢ܀
ܡܙܡܘܪܐ ܕܬܡܢܝܢ ܘܬܫܥܐ
ܡܰܘܕܰܥ ܥܰܠ ܡܫܺܝܚܽܘܬܶܗ ܕܕܰܘܺܝܕ. ܘܥܰܠ ܐܪܳܙܳܐ ܕܶܐܬܬܨܺܝܪ ܒܰܡܫܺܝܚܽܘܬܶܗ ܠܥܰܡܰܢܽܘܐܝܠ ܘܥܰܠ ܟܽܘܪܣܝܶܗ ܕܰܡܫܺܝܚܳܐ ܕܠܳܐ ܥܳܒܰܪ.
ܐܱܝܠܶܝܢ ܕܰܐܪܓܶܫܘ ܒܬܽܘܩܳܢܶܗ ܕܥܳܠܡܳܐ ܗܳܢܐ. ܕܰܒܛܰܝܒܽܘܬܳܐ ܐܷܬܒܪܺܝ ܡܶܢ ܐܱܠܗܳܐ. ܒܟܽܠܙܒܰܢ ܕܠܐܴ ܫܰܠܘܳܐ ܩܽܘܠܳܣܳܐ ܘܩܽܘܒܳܠܛܰܝܒܽܘܬܳܐ ܡܩܰܪܒܺܝܢ ܠܥܳܒܽܘܕܳܐ. ܕܡܶܢ ܠܐ ܡܶܕܶܡ ܐܱܝܬܺܝ ܐܷܢܘܢ ܠܘܳܬ ܗܳܝ ܕܶܢܗܘܽܘܢ ܕܡܶܢ ܗܳܠܝܢ ܕܣܰܓܺܝ ܝܳܕܥܺܝܢ ܗܘܰܘ ܛܰܝܒܽܘܬܶܗ ܕܰܐܠܗܳܐ ܘܚܽܘܒܶܗ. ܐܝ̣ܬܰܘܗܝ ܗܘܳܐ ܐܦ ܛܽܘܒܬܳܢܳܐ ܕܰܘܝܕ. ܟܕ ܒܗܳܢܐ ܢܺܝܫܳܐ ܕܶܐܡܪܶܬ ܚܳܐܱܪ ܗܘܳܐ ܒܟܽܠܙܒܰܢ ܡܩܰܪܶܒ ܗܘܳܐ ܩܽܘܒܳܠܛܰܝܒܽܘܬܳܐ ܠܐܱܠܗܳܐ. ܒܗܳܝ ܕܡܰܘܕܶܐ ܗܘܳܐ ܕܟܽܠܗܶܝܢ ܡܰܘ̈ܗܒܳܬܳܐ ܛܳܒܴ̈ܬܳܐ ܛܰܝܒܽܘܬܳܐ ܝܳܗܒܳܐ ܠܰܒܢܰܝ̈ܢܳܫܳܐ. ܘܡܶܛܠ ܐܱܝܠܝܢ ܕܣܳܥܰܪ ܒܰܪܢܳܫܳܐ ܘܣܳܒܰܪ ܕܶܝܢ ܕܰܠܦܽܘܪܥܳܢܳܐ ܫܳܘ̈ܝܳܢ. ܠܐ ܢܶܪܢܶܐ ܕܰܢܣܰܒ ܡܶܕܶܡ. ܟܡܳܐ ܐܢ ܢܶܬܝܰܬܰܪ ܒܕܽܘܒܳܪ̈ܶܐ ܡܝܰܬܪ̈ܶܐ. ܡܶܛܠܗܳܢܐ ܟܽܠܗܘܢ ܐܱܝܠܝܢ ܕܡܶܢ ܐܠܗܳܐ ܐܷܢܘܢ ܘܡܶܬܝܰܗ̈ܒܳܢ ܕܛܰܝܒܽܘܬܶܗ ܐܷܢܝܢ ܘܠܰܘ ܡܶܛܠ ܚܛܳܗܰܝ̈ܢ ܘܠܐ ܡܶܛܠ ܥܒܳܕܰܝ̈ܢ. ܘܥܰܠܗܳܝ ܐܦ ܕܰܘܝܕ ܡܰܠܟܳܐ ܘܰܢܒܺܝܳܐ. ܟܰܕ ܚܳܙܶܐ ܗܘܳܐ ܪܰܘܪ̈ܒܳܬܳܐ. ܐܱܝܠܝܢ ܕܶܐܫܬܘܺܝ ܡܶܢ ܐܱܠܗܳܐ ܕܰܢܩܰܒܶܠ ܫܬܶܩ ܡܶܢ ܕܽܘܒܳܪ̈ܶܐ ܡܝܰܬܪ̈ܶܐ ܕܦܳܠܰܚ ܗܘܳܐ ܘܫܰܪܺܝ ܕܢܰܟܪܶܙ ܘܰܢܙܰܡܰܪ ܛܰܝܒܽܘܬܶܗ ܕܰܐܠܗܳܐ ܘܢܺܐܡܰܪ:
ܛܰܝܒܽܘܬܶܗ ܕܡܳܪܝܳܐ ܠܥܳܠܰܡ ܐܷܙܡܰܪ. ܘܰܠܕܳܪܕܳܪ̈ܺܝܢ ܐܱܘܕܰܥ ܗܰܝܡܳܢܽܘܬܶܗ ܒܦܽܘܡܝ. ܡܶܛܠ ܕܶܐܡܰܪܬ ܕܥܳܠܡܳܐ ܒܛܰܝܒܽܘܬܳܐ ܢܶܬܒܢܶܐ. ܘܰܫܡܰܝܳܐ ܬܰܬܩܶܢ ܗܰܝܡܳܢܽܘܬܳܟ. ܛܰܝܒܽܘܬܶܗ ܕܡܳܪܝܳܐ ܠܥܳܠܰܡ ܐܷܙܡܰܪ. ܡܶܛܠ ܗܳܠܝܢ ܕܩܰܕܶܡ ܐܷܬܡܰܠܰܠܶܝ̈ܢ. ܕܶܐܢܳܐ ܠܰܡ ܝܳܕܰܥ ܐܢܳܐ. ܕܺܐܝܬ ܡܶܕܶܡ ܒܰܕܡܶܬܚܰܙ̈ܝܳܢ ܕܰܗܘܳܐ ܐܠܐ ܡܶܢ ܛܰܝܒܽܘܬܳܐ. ܘܟܽܠܗܝܢ ܐܰܝܠܝܢ ܕܰܢܣܰܒܢܰܢ ܘܕܺܐܝܬ ܠܢ ܠܡܶܣܰܒ. ܡܶܢ ܛܰܝܒܽܘܬܳܐ ܕܰܐܠܗܳܐ ܢܣܺܝ̈ܒܳܢ ܥܶܠܬܳܐ. ܘܠܰܘ ܡܶܢ ܕܽܘܒܳܪ̈ܰܝܢ ܟܺܐܢ̈ܐ. ܐܠܐ ܡܳܕܶܝܢ ܛܰܝܒܽܘܬܶܗ ܢܙܰܡܰܪ. ܘܢܰܘܕܶܐ ܕܡܰܓܳܢ ܟܽܠܡܶܕܶܡ ܢܣܰܒܢܰܢ ܡܶܢ ܐܠܗܳܐ. ܘܡܶܕܶܡ ܠܐ ܦܪܰܥܢܰܢ. ܗܳܝܕܝܢ ܕܶܐܡܰܪ ܠܥܳܠܰܡ. ܥܰܠ ܟܽܠܶܗ ܡܶܬܚܳܐ ܕܚܰܝܱ̈ܝܢ. ܘܗܳܝ ܕܰܠܕܳܪܕܳܪ̈ܺܝܢ ܐܱܘܕܰܥ ܗܰܝܡܳܢܽܘܬܶܗ ܒܦܽܘܡܝ. ܡܰܠܶܦ ܕܰܒܥܳܠܡܳܐ ܕܒܳܬܰܪ ܗܳܢܐ ܠܰܝܬ ܐܱܬܪܳܐ ܠܛܰܝܒܽܘܬܳܐ ܬܰܡܳܢ. ܐܷܠܐ ܗܰܝܡܳܢܽܘܬܳܐ ܘܰܫܪܳܪܳܐ ܕܩܰܕܺܝ̈ܫܶܐ ܡܶܬܢܰܨܰܚ ܒܶܗ. ܘܗܰܘ ܡܶܕܶܡ ܕܗܰܝܡܶܢܘ ܟܰܕ ܠܐ ܚܙܰܐܘܗܝ. ܚܳܙܶܝܢ ܘܝܳܕܥܺܝܢ ܠܶܗ ܘܒܶܗ ܡܶܬܒܰܣܡܺܝܢ. ܒܗܳܢܐ ܕܶܝܢ ܥܳܠܡܳܐ ܡܶܛܠ ܕܰܒܛܰܝܒܽܘܬܳܐ ܐܷܬܩܰܝܰܡ ܡܶܢ ܐܠܗܳܐ. ܘܥܰܡ ܠܐ ܡܗܰܝ̈ܡܢܶܐ ܚܳܐܝܢ ܐܦ ܡܗܰܝ̈ܡܢܶܐ. ܘܥܰܡ ܡܗܰܝ̈ܡܢܶܐ ܕܦܳܠܚܺܝܢ ܟܺܐܢܽܘܬܳܐ. ܐܴܦܠܳܐ ܡܗܰܝܡ̈ܢܶܐ ܢܳܣܒܺܝܢ ܡܰܘܗܰܒܬܳܐ. ܥܳܠܡܳܐ ܕܶܝܢ ܐܚܪܺܢܳܐ ܠܰܘ ܒܛܰܝܒܽܘܬܳܐ ܡܶܬܦܰܪܢܶܣ ܙܰܒܢܶܗ ܘܟܽܠܗܘܢ ܚܰܝܷ̈ܐ ܘܛܳܒܬܳܐ ܕܒܶܗ܆ ܐܱܓܪܳܐ ܘܦܽܘܪܥܳܢܳܐ ܐܷܢܘܢ ܕܰܡܗܰܝܡ̈ܢܶܐ. ܘܠܰܘ ܐܱܪܥܳܐ ܡܶܬܩܪܶܐ ܐܝܟ ܗܳܢܐ. ܐܠܐ ܐܝܟ ܡܶܠܬܳܐ ܕܰܢܒܺܝܽܘܬܳܐ ܫܡܰܝܳܐ ܡܶܫܬܰܡܰܗ. ܘܰܫܡܰܝܳܐ ܡܰܢ ܬܰܬܩܶܢ ܗܰܝܡܳܢܽܘܬܳܟ. ܗܳܢܐ ܠܰܡ ܥܳܠܡܳܐ ܕܺܐܝܬܰܘܗܝ ܐܱܪܥܳܐ ܐܱܬܩܶܢ ܛܰܝܒܽܘܬܳܟ. ܗܰܘ ܕܶܝܢ ܥܳܠܡܳܐ ܐܚܪܺܢܳܐ ܕܺܐܝܬܰܘܗܝ ܫܡܰܝܳܐ. ܡܰܬܩܢ ܗܰܝܡܳܢܽܘܬܳܟ. ܘܒܳܬܰܪ ܗܳܠܝܢ ܡܫܰܪܶܐ ܕܰܢܙܰܡܰܪ ܥܠ ܐܰܝܠܝܢ ܕܣܶܥܪܰܬ ܨܶܐܕܰܘܗܝ. ܛܰܝܒܽܘܬܳܐ ܝܰܬܺܝܪ ܡܶܢ ܟܽܠܢܳܫ. ܘܡܰܘܕܶܐ ܡܶܛܠ ܡܫܺܝܚܽܘܬܳܐ ܩܰܕܺܝܫܬܳܐ ܕܩܰܒܶܠ. ܡܰܙܡܽܘܪܳܐ ܓܝܪ ܕܰܬܡܳܢܺܝܢ ܘܬܶܫܥܳܐ ܡܶܛܠ ܡܫܺܝܚܽܘܬܶܗ ܐܷܙܕܰܡܰܪ. ܟܰܕ ܒܶܗ ܒܥܶܠܬܳܐ ܗܳܕܐ ܡܰܠܶܠ ܗܘܳܐ ܐܪܳܙܳܢܳܐܝ̣ܬ. ܡܶܛܠ ܗܰܘ ܡܰܠܟܳܐ ܕܡܰܡܠܶܟ ܡܶܢ ܥܳܠܰܡ. ܘܰܕܠܐܴ ܡܫܺܝܚܽܘܬܳܐ ܕܡܶܢ ܐܚܪ̈ܳܢܶܐ ܘܰܡܕܰܡܶܐ ܡܙܰܡܪܳܢܳܐ ܐܝܟ ܗܰܘ ܕܥܰܠ ܢܰܦܫܶܗ ܐܡ̣ܪ ܠܰܢܒܺܝܽܘܬܳܐ. ܗܳܫܐ ܕܶܝܢ ܥܠ ܐܰܝܠܝܢ ܕܶܐܫܬܰܘܕܺܝ ܠܶܗ ܐܱܠܗܳܐ ܐܡ̇ܪ:
ܩܝܳܡܳܐ ܠܰܡ ܐܱܩܺܝܡܶܬ ܠܓܰܒܝܝ ܘܺܝܡܺܝܬ ܠܕܰܘܝܕ ܥܰܒܕܝ. ܕܰܥܕܰܡܳܐ ܠܥܳܠܡ ܐܰܬܩܶܢ ܙܰܪܥܳܟ. ܘܶܐܒܢܶܐ ܠܕܳܪܕܳܪ̈ܺܝܢ ܟܽܘܪܣܝܳܟ. ܗܳܠܝܢ ܐܢ ܢܶܬܐܱܡܪ̈ܳܢ ܥܠ ܒܰܪܢܳܫܳܐ ܥܰܣ̈ܩܳܢ. ܘܠܐ ܓܶܝܪ ܡܶܫܟܚܳܐ ܕܰܢܩܰܘܶܐ ܒܥܳܠܡܳܐ ܗܳܢܐ ܒܰܪܢܳܫܳܐ ܡܳܝܽܘܬܳܐ. ܘܠܐ ܟܽܘܪܣܝܳܐ ܕܡܶܬܚܰܒܰܠ܆ ܐܳܚܶܕ ܘܠܳܒܶܟ ܫܽܘܠܛܳܢܳܐ ܠܕܳܪܕܳܪ̈ܺܝܢ. ܡܳܕܶܝܢ ܓܰܠܝܳܐ ܗܝ ܕܗܳܠܝܢ ܕܗܰܘ ܕܰܢܚܶܬ ܡܶܢ ܫܡܰܝܳܐ ܐܶܢܶܝܢ ܟܕ ܐܝ̣ܬܰܘܗܝ ܐܠܗܐ ܒܰܟܝܳܢܶܗ ܩܰܒܶܠ ܥܠܰܘܗܝ ܒܛܰܝܒܽܘܬܶܗ. ܕܡܶܢ ܒܬܽܘܠܬܳܐ ܕܺܐܝܬܶܝܗ̇ ܡܶܢ ܙܰܪܥܳܐ ܕܕܰܘܝܕ ܢܶܬܓܰܫܰܡ. ܘܢܶܗܘܶܐ ܒܰܪܢܳܫܳܐ. ܘܡܶܟܺܝܠ ܕܫܰܢܺܝ ܠܶܗ ܙܰܪܥܳܐ ܐܝܟ ܕܰܒܝܽܘܒܳܠܐܴ ܘܰܡܛܳܐ ܠܰܡܫܺܝܚܳܐ. ܐܶܬܚܰܠܰܦ ܠܶܗ ܘܰܗܘܳܐ ܪܽܘܚܳܢܳܐ. ܘܰܥܕܰܡܳܐ ܠܥܳܠܰܡ ܬܩܶܢ ܐܝܟ ܩܝܳܡܳܐ ܕܰܐܩܺܝܡ ܠܶܗ ܐܠܗܐ. ܘܗܳܟܰܢܳܐ ܐܦ ܟܽܘܪܣܝܳܐ ܕܡܰܠܟܽܘܬܶܗ ܕܕܰܘܝܕ. ܡܶܛܠ ܕܗܰܘ ܕܰܕܢܰܚ ܡܶܢܶܗ ܒܰܒܣܰܪ܆ ܠܥܳܠܰܡ ܥܳܠܡܺܝܢ ܐܰܡܠܶܟ ܥܰܠ ܝ̣ܣܪܳܐܝܠ ܕܰܐܠܗܳܐ. ܠܕܳܪܕܳܪ̈ܺܝܢ ܐܶܬܒܢܺܝ ܟܽܘܪܣܝܳܐ. ܡܶܛܠ ܕܗܰܘ ܕܝܳܬܶܒ ܥܰܠ ܝܰܡܺܝܢܳܐ ܕܰܐܒܳܐ ܘܠܐ ܬܽܘܒ ܡܫܰܢܶܐ ܡܶܢ ܡܰܘܬܒܶܗ. ܘܗܳܕܳܐ ܗ̄ܝ ܒܐܪ̈ܳܙܶܐ ܪ̈ܽܘܚܳܢܶܐ. ܗܳܝ ܕܶܐܬܐܱܡܪܰܬ ܒܰܩܝܳܡܳܐ ܠܕܰܘܝܕ. ܕܰܠܕܳܪܕܳܪ̈ܺܝܢ ܡܰܢ ܡܶܬܒܢܶܐ ܟܽܘܪܣܝܶܗ. ܘܡܶܛܠ ܗܰܘ ܕܝܳܬܶܒ ܥܠ ܟܽܘܪܣܝܳܐ ܗܳܢܐ ܒܰܫܡܰܝܳܐ ܡܰܡܠܶܟ. ܡܰܘܕܰܥ ܢܒܺܝܐ. ܕܡܳܐ ܕܶܐܬܥܰܠܺܝ ܙܰܪܥܶܗ ܒܰܩܢܽܘܡܶܗ ܕܡܶܠܬܳܐ ܐܠܗܐ. ܘܶܐܫܬܰܚܠܰܦ ܙܰܪܥܳܐ ܘܟܽܘܪܣܝܳܐ ܠܪܽܘܚܳܢܽܘܬܳܐ. ܗܳܝܕܝܢ ܫܡܰܝܳܐ ܡܰܘܕܝܳܐ ܠܡܳܪܶܗ ܘܠܐܱܠܳܗܶܗ ܕܕܰܘܝܕ.
ܢܰܘܕܽܘܢ ܫܡܰܝܴ̈ܐ ܠܰܡ ܬܶܕܡܪ̈ܳܬܳܟ ܡܳܪܝܳܐ. ܘܗܶܢܘܢ ܢܶܫܬܰܥܽܘܢ ܪܰܒܽܘܬܳܐ ܕܰܥܒܳܕܰܝ̈ܟ. ܘܢܰܟܪܙܽܘܢ ܡܽܘܟܳܟܳܟ ܨܶܒܝܢܳܝܳܐ. ܟܕ ܢܚܶܬܬ ܠܘܳܬ ܛܽܘܗܡܳܐ ܕܥܰܒ̈ܕܶܐ. ܟܕ ܢܚܶܬ ܡܰܠܰܐܟܳܐ ܘܣܰܒܰܪ ܠܪ̈ܳܥܰܘܳܬܳܐ ܥܰܠ ܡܰܘܠܳܕܳܟ ܡܳܪܝܳܐ. ܘܶܐܡܰܪ ܠܗܽܘܢ: ܗܳܐ ܓܝܪ ܡܣܰܒܰܪ ܐܢܳܐ ܠܟܽܘܢ ܚܰܕܽܘܬܳܐ ܪܰܒܬܳܐ. ܕܬܶܗܘܶܐ ܠܟܽܠܗ ܥܳܠܡܳܐ. ܐܶܬܝ̣ܠܶܕ ܠܟܽܘܢ ܓܝܪ ܝܰܘܡܳܢܳܐ ܦܳܪܽܘܩܳܐ ܕܺܐܝܬܰܘܗܝ ܡܳܪܝܳܐ ܡܫܺܝܚܳܐ ܒܰܡܕܺܝܢܬܶܗ ܕܕܰܘܝܕ (ܠܘܩܐ ܒ: ܝ-ܝܐ) ܘܬܽܘܒ ܡܰܘܕܶܝܢ ܫܡܰܝܴ̈ܐ ܬܶܕܡܪ̈ܳܬܳܟ. ܘܰܡܫܰܒܚܺܝܢ ܘܳܐܡܪܺܝܢ: ܬܶܫܒܽܘܚܬܳܐ ܠܐܱܠܗܳܐ ܒܰܡܪ̈ܰܘܡܶܐ. ܘܥܰܠ ܐܱܪܥܳܐ ܫܠܳܡܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ (ܠܘܩܐ ܒ: ܝܕ). ܘܗܺܝ ܗܳܕܐ ܬܰܘܕܺܝܬܳܐ ܕܗܰܝܡܳܢܽܘܬܳܐ ܐܡ̇ܪ ܢܒܺܝܐ܆ ܕܺܐܝܬܶܝܗ̇ ܒܥܺܕܬܳܐ ܕܩܰܕܺܝ̈ܫܶܐ. ܘܰܡܫܰܐܷܠ ܕܶܝܢ ܢܒܺܝܐ ܒܳܬܰܪ ܗܳܠܝܢ:
ܡܰܢܽܘ ܕܦܳܚܶܡ ܠܡܳܪܝܳܐ ܒܰܫ̈ܡܰܝ ܫܡܰܝܳܐ ܘܰܕܕܳܡܶܐ ܠܡܳܪܝܳܐ ܒܰܒܢܱ̈ܝ ܡܰܠܰܐܟ̈ܐ. ܡܶܛܠ ܡܳܢܐ ܗܘܳܐ ܫܽܘܐܠܐܴ ܗܳܢܐ. ܕܰܢܚܰܘܶܐ ܕܠܰܝܬ ܠܶܗ ܕܦܳܚܶܡ ܒܰܫܡܱ̈ܝ ܫܡܰܝܳܐ ܠܗܰܘ ܕܰܨܒܳܐ ܘܶܐܬܳܐ ܠܘܳܬ ܙܰܪܥܶܗ ܕܕܰܘܝܕ ܘܶܐܬܓܰܫܰܡ ܡܶܢܶܗ ܡܰܠܐܱܟ̈ܐ ܕܶܝܢ ܠܐܱܒܳܗ̈ܬܳܐ ܩ̇ܪܐ. ܠܗ̇ܢܘܢ ܕܡܶܢܗܘܢ ܐܷܬܚܙܺܝ ܡܫܺܝܚܳܐ ܒܰܒܣܰܪ. ܟܰܕ ܕܶܝܢ ܡܦܰܫܶܩ ܕܡܰܢܽܘ ܗܰܘ ܕܫܰܐܷܠ ܡܶܛܠܳܬܶܗ. ܕܰܠܥܶܠ ܒܰܫܡܰܝܳܐ ܘܠܐ ܡܶܬܦܰܚܡܳܢܳܐ ܐܝ̣ܬܰܘܗܝ.
ܐܰܠܳܗܳܐ ܩܳܡ ܒܥܺܕܬܳܐ ܕܩܰܕܺܝ̈ܫܶܐ. ܪܰܒ ܘܰܕܚܺܝܠ ܥܰܠ ܟܽܠܗܘܢ ܕܰܚܕܳܪ̈ܰܘܗܝ. ܠܰܫܠܺܝ̈ܚܶܐ ܩ̇ܪܐ ܩܰܕܺܝ̈ܫܳܐ. ܗ̣ܢܘܢ ܓܝܪ ܗܘܰܘ ܠܗ ܥܺܕܬܳܐ. ܕܟܕ ܐܶܬܚܙܺܝ ܥܠ ܐܰܪܥܳܐ. ܘܰܒܥܰܝ̈ܢܰܝ ܗܳܠܝܢ ܪܰܒ ܗܘܳܐ ܘܰܕܚܺܝܠ. ܘܳܐܦܶܢ ܥܰܡܳܐ ܒܰܕܠܐ ܗܰܝܡܶܢܘ ܠܐ ܚܰܫܒܽܘܗܝ ܪܰܒܳܐ ܘܰܕܚܺܝܠܐܴ. ܘܰܒܗܰܘ ܙܰܒܢܳܐ ܡܫܰܪܶܝܢ ܩܰܕܺܝ̈ܫܐ ܕܰܢܫܰܒܚܽܘܢ ܘܢܺܐܡܪܽܘܢ ܠܘܳܬ ܥܰܡܰܢܘܐܝܠ:
ܡܳܪܝܳܐ ܐܰܠܗܳܐ ܚܰܝܠܬܳܢܳܐ. ܡܰܢܽܘ ܐܰܟܘܳܬܳܟ ܥܰܫܺܝܢܳܐ. ܘܗܰܝܡܳܢܽܘܬܳܟ ܚܕܳܪ̈ܰܝܟ. ܡܳܐ ܓܶܝܪ ܕܶܐܬܚܙܺܝ ܕܰܐܚܺܝܕ ܟܠ ܐܝܟ ܐܠܗܳܐ ܚܰܝܠܬܳܢܳܐ. ܘܟܽܠܗܘܢ ܡܗܰܝܡ̈ܢܐ ܩܳܝܡܺܝܢ ܚܕܳܪ̈ܰܘܗܝ. ܘܡܳܐ ܕܩܳܥܶܝܢ ܩܕܳܡܰܘܗܝ ܒܰܫܡܰܝܳܐ ܘܠܰܝܬ ܕܬܳܟܶܣ.
ܕܰܐܢܬ ܫܰܠܺܝܛ ܐܰܢܬ ܒܓܰܐܝܽܘܬܶܗ ܕܝܰܡܳܐ. ܘܰܕܠܽܘܚܝܳܐ ܕܓܰܠܠܰܘ̈ܗܝ ܐܰܢܬ ܡܫܰܬܶܩ. ܗܳܠܝܢ ܩܴ̈ܠܐ ܐܶܢܽܘܢ ܕܗܰܝܡܳܢܽܘܬܳܐ ܕܡܰܘܕܝܳܐ ܠܗ ܘܰܡܫܰܒܚܳܐ. ܟܕ ܚܳܙܝܳܐ ܕܶܝܢ ܗܰܝܡܳܢܽܘܬܳܐ ܡܳܐ ܕܩܳܡܰܬ ܚܕܳܪ̈ܰܘܗܝ ܐܴܦ ܚܰܝܠܶܗ ܘܫܽܘܠܛܳܢܶܗ. ܘܕܰܐܝܟܰܢ ܡܩܰܦܰܚ ܠܡܳܪ̈ܽܘܕܶܐ. ܘܠܰܐܝܠܶܝܢ ܕܰܒܫܽܘܒܗܳܪܳܐ ܬܠܰܘ ܨܰܘܪܗܽܘܢ ܥܠ ܩܰܕܝ̈ܫܶܐ. ܘܥܰܠܗܳܝ ܐܡ̇ܪ ܢܒܺܝܐ.
ܕܰܐܢܬ ܡܡܰܟܶܟ ܐܰܢܬ ܠܫܰܒܰܗܪ̈ܳܢܶܐ ܐܰܝܟ ܕܠܰܩܛܺܝ̈ܠܐܷ. ܒܰܕܪܳܥܳܟ ܥܰܫܺܝܢܳܐ ܒܰܕܰܪܬ ܠܰܒܥܶܠܕ̈ܒܳܒܰܝܟ. ܫܰܒܰܗܪ̈ܳܢܶܐ ܕܶܝܢ ܐܝ̣ܬܰܝܗܘܢ ܚܰܝ̈ܠܰܘܳܬܳܐ ܡܳܪ̈ܽܘܕܶܐ܆ ܕܰܐܩܺܝܡܘ ܟܺܐܡܽܘ̈ܢܐ ܥܠ ܩܰܕܝ̈ܫܶܐ ܘܩܰܛܶܠܘ ܐܶܢܘܢ ܒܟܽܠ ܐܽܘ̈ܠܨܳܢܺܝܢ. ܕܰܐܩܺܝܡܘ ܥܠܰܝܗܘܢ ܒܰܪ̈ܕܽܘܦܝܶܐ. ܘܡܶܛܠܗܳܕܐ ܐܡ̣ܪ ܪܽܘܚܳܐ܆ ܕܰܐܝܟ ܕܰܡܡܰܟܰܟܘ ܠܩܰܕܝ̈ܫܶܐ ܩܛܺܝܠܰܝ̈ܗܘܢ܆ ܢܶܬܡܰܟܟܘܢ ܐܦ ܗ̣ܢܘܢ ܒܬܰܫܢܺܝܩܳܐ ܘܰܒܢܽܘܪܳܐ ܕܰܠܥܳܠܡ. ܘܒܳܬܰܪܟܶܢ ܡܶܫܬܰܥܶܐ ܘܳܐܡܰܪ:
ܕܺܝܠܳܟ ܐܶܢܘܢ ܫܡܰܝܴ̈ܐ܆ ܘܕܺܝܠܳܟ ܗܺܝ ܐܰܪܥܳܐ. ܬܺܒܶܝܠ ܒܰܡܠܳܐܗ̇ ܐܰܢܬ ܬܰܩܶܢܬ. ܠܓܰܪܒܝܳܐ ܘܰܠܬܰܝܡܢܳܐ ܐܰܢܬ ܒܪܰܝܬ. ܬܳܒܽܘܪ ܘܚܶܪܡܽܘܢ ܠܰܫܡܳܟ ܗܽܘ ܡܫܰܒܚܺܝܢ. ܕܺܝܠܳܟ ܗܽܘ ܕܪܳܥܳܐ ܘܕܺܝܠܳܟ ܗܺܝ ܓܰܢܒܳܪܽܘܬܳܐ. ܒܕܰܐܝܟ ܗܳܠܶܝܢ ܩܴ̈ܠܐ ܐܰܠܳܗܳܝ̈ܐ ܡܰܘܕܝܳܐ ܥܺܕܬܳܐ ܒܗܰܝܡܳܢܽܘܬܳܐ ܠܰܡܫܺܝܚܳܐ. ܡܳܐ ܕܩܳܝܡܳܐ ܚܕܳܪܰܘܗܝ ܘܡܰܟܪܙܳܐ ܫܽܘܠܛܳܢܶܗ ܕܥܰܠ ܟܠ. ܘܠܶܗ ܗܽܘ ܡܫܰܒܚܺܝܢ ܥܳܡܽܘܪ̈ܶܐ ܕܬܳܒܽܘܪ ܐܦ ܕܚܶܪܡܽܘܢ. ܘܠܶܗ ܝܳܕܥܳܐ ܒܓܰܢܒܳܪܽܘܬܳܐ. ܘܒܰܕܪܳܥܶܗ ܠܐ ܡܶܙܕܰܟܝܳܢܳܐ ܟܕ ܐܴܡܪܳܐ:
ܬܶܥܫܰܢ ܐܺܝܕܳܟ ܘܬܶܬܪܺܝܡ ܝܰܡܺܝܢܳܟ. ܒܙܰܕܺܝܩܽܘܬܳܐ ܘܰܒܕܺܝܢܳܐ ܡܰܬܩܰܢ ܟܽܘܪܣܝܳܟ. ܒܛܰܝܒܽܘܬܳܐ ܘܰܒܩܽܘܫܬܳܐ ܡܩܰܕܡܺܝܢ ܐܰܦܰܝ̈ܟ. ܠܰܝܬ ܠܰܡ ܩܕܳܡ ܟܽܘܪܣܝܳܟ ܡܰܣܰܒ ܒܰܐܦ̈ܐ. ܘܠܐ ܡܶܬܚܰܝܰܒ ܒܕܺܝܢܳܟ ܙܰܟܳܝܳܐ. ܙܰܕܺܝܩܽܘܬܳܐ ܘܟܺܐܢܽܘܬܳܐ ܡܫܰܡܫܺܝܢ ܩܕܳܡ ܐܰܦܰܝ̈ܟ.
ܒܪܰܡ ܠܰܡ: ܛܽܘܒܰܘܗܝ ܠܥܰܡܳܐ ܕܝܳܕܰܥ ܬܶܫܒ̈ܚܳܬܳܟ. ܡܳܪܝܳܐ ܒܢܽܘܗܪܳܐ ܕܰܐܦܰܝ̈ܟ ܢܗܰܠܟܽܘܢ. ܐܰܝܠܶܝܢ ܕܝܳܕܥܺܝܢ ܬܶܫܒ̈ܚܳܬܳܟ. ܘܰܒܢܽܘܗܪܳܐ ܕܗܰܝܡܳܢܽܘܬܳܟ ܗܰܠܶܟܘ. ܐܺܝܬ ܠܗܽܘܢ ܡܶܛܠ ܗܳܕܐ ܐܱܓܪܳܐ ܘܦܽܘܪܥܳܢܳܐ.
ܗܝ ܕܒܰܫܡܳܟ ܢܕܽܘܨܽܘܢ ܟܽܠܝܽܘܡ. ܘܰܒܙܰܕܺܝܩܽܘܬܳܟ ܢܶܬܬܪܺܝܡܽܘܢ. ܟܕ ܓܝܪ ܢܳܦܶܩ ܢܽܘܗܪܳܟ ܘܡܰܦܨܰܚ ܠܰܓܒܰܝܴ̈ܐ ܕܺܝܠܳܟ. ܒܰܫܡܳܟ ܕܳܝܨܺܝܢ ܘܚܳܕܶܝܢ.
ܡܶܛܠ ܕܬܶܫܒܽܘܚܬܳܐ ܕܥܽܘܫܢܰܢ ܐܰܢܬ ܗܽܘ. ܘܰܒܨܶܒܝܳܢܳܟ ܬܶܬܪܺܝܡ ܩܰܪܢܰܢ. ܗܳܝܕܶܝܢ ܡܳܐ ܕܶܐܬܥܰܛܰܦܘ ܓܒܰܝܴ̈ܐ ܫܽܘܒܚܳܐ. ܡܦܺܝܣܺܝܢ ܕܨܶܒܝܳܢܶܗ ܕܡܰܠܟܳܐ ܢܶܬܬܪܺܝܡ ܩܳܠܐܴ ܕܩܰܪܢܳܐ ܕܙܰܕܺܝ̈ܩܶܐ. ܘܟܕ ܠܐ ܡܶܬܬܰܟܣܺܝܢ ܩܴ̈ܠܐ ܕܗܰܝܡܳܢܽܘܬܳܐ ܢܙܰܡܪܽܘܢ. ܘܰܢܝܰܒܒܽܘܢ ܥܡ ܡܰܠܐܱܟ̈ܐ.
ܡܶܛܠ ܠܡ ܕܡܳܪܝܰܐ ܗܘ ܬܽܘܟܠܳܢܰܢ. ܘܩܰܕܺܝܫܳܐ ܕܺܝܣܪܳܐܝܠ ܡܰܠܟܰܢ. ܫܰܦܺܝܪܺܝܢ ܩܴ̈ܠܐ ܗܳܠܝܢ ܠܓܰܒܪܳܐ ܕܩܰܒܶܠ ܡܫܺܝܚܽܘܬܳܐ ܕܢܶܗܘܶܐ ܡܰܠܟܳܐ. ܒܡܽܘܟܳܟܶܗ ܓܝܪ ܫܠܰܚ ܢܰܦܫܶܗ ܡܶܢ ܡܰܠܟܽܘܬܳܐ ܘܡܶܢ ܡܳܪܽܘܬܳܐ. ܟܕ ܡܚܰܘܶܐ ܕܚܰܕ ܗܽܘ ܡܳܪܳܐ ܘܚܰܕ ܗܽܘ ܡܰܠܟܳܐ. ܠܘ ܠܡ ܐܶܢܳܐ ܐܝ̣ܬܰܝ ܡܳܪܳܐ ܡܰܠܟܳܐ. ܐܠܐ ܩܰܕܺܝܫܳܐ ܕܺܝܣܪܳܐܝܠ ܐܝ̣ܬܰܘܗܝ ܡܰܠܟܰܢ. ܘܳܐܦܶܢ ܐܶܬܡܰܫܚܶܬ ܕܶܐܗܘܶܐ ܡܰܠܟܳܐ. ܐܠܐ ܡܰܠܟܰܢ ܩܰܕܺܝܫܰܐ ܗ̄ܘ ܕܺܝܣܪܳܐܝܠ. ܘܶܐܢ ܣܳܥܰܪ ܨܶܐܕܰܝ ܗܳܕܐ ܐܝܟ ܕܰܠܘܳܬ ܥܰܒܕܶܗ ܣܳܥܰܪ. ܘܒܳܬܰܪܟܶܢ ܐܡ̇ܪ:
ܗܳܝܕܶܝܢ ܡܡܰܠܶܠ ܒܚܶܙܘܴ̈ܢܶܐ ܥܰܡ ܙܰܕܺܝܩܰܘ̈ܗܝ. ܘܶܐܡܰܪ ܕܣܳܡܶܬ ܥܽܘܕܪܳܢܳܐ ܠܓܰܒܪܳܐ. ܘܰܐܪܺܝܡܶܬ ܓܰܒܝܳܐ ܡܶܢ ܥܰܡܳܐ. ܐܦ ܐܶܫܟܚܶܬ ܠܕܰܘܺܝܕ ܥܰܒܕܝ. ܡܶܫܚܳܐ ܕܩܽܘܕܫܝ ܡܫܰܚܬܶܗ ܐܝ̣ܕܝ ܥܰܕܰܪܬܶܗ ܐܦ ܕܪܳܥܝ ܚܰܝܠܶܗ. ܘܠܐܴ ܐܱܗܢܺܝ ܡܶܕܶܡ ܒܥܶܠܕܒܳܒܶܗ. ܘܰܒܪܶܗ ܕܥܰܘ̇ܠܐܴ ܠܐܴ ܡܰܟܟܶܗ. ܗܳܠܝܢ ܩܴ̈ܠܐ ܡܕܰܡܶܐ ܕܰܘܝܕ܆ ܕܥܠ ܢܰܦܫܶܗ ܐܡ̇ܪ ܠܗܘܽܢ. ܐܠܐ ܪܶܡܙܳܢܳܐܝ̣ܬ ܥܠ ܥܰܡܰܢܽܘܐܝܠ ܐܰܡܺܝܪܺܝܢ. ܡܰܠܶܠ ܥܰܡ ܙܰܕܺܝ̈ܩܶܐ ܒܚܶܙܘܳܢ̈ܐ ܘܰܠܗܽܘܢ ܒܰܕܶܩ ܒܚܶܙܘ̈ܢܶܐ ܕܰܡܪܺܝܡ ܓܰܒܝܳܐ ܡܶܢ ܥܰܡܳܐ. ܓܰܒܝܳܐ ܕܶܝܢ ܠܰܝܬ ܐܠܐ ܐܠܗܐ. ܘܠܐ ܕܰܡܫܺܝܚ ܡܶܫܚܳܐ ܩܰܕܺܝܫܳܐ ܕܠܐ ܡܳܝܽܘܬܽܘܬܳܐ. ܐܠܐ ܗܰܘ ܕܟܕ ܗܘܳܐ ܒܰܪܢܳܫܳܐ ܠܐ ܦܳܫ ܒܡܰܘܬܳܐ ܘܒܰܚܒܳܠܳܐ. ܐܝܟ ܗܰܘ ܕܶܐܡܰܪ ܕܳܐܬܶܐ ܐܰܪܟܽܘܢܶܗ ܕܥܳܠܡܳܐ ܘܒܺܝ ܠܰܝܬ ܠܗ ܡܶܕܶܡ. ܠܗܳܕܐ ܕܒܰܫܪܳܪܳܐ ܐܝ̣ܬܰܘܗܝ ܡܰܠܟܳܐ ܒܰܟܝܳܢܳܐ. ܘܡܶܢ ܥܳܠܰܡ ܠܐ ܡܰܟܟܶܗ ܒܪܶܗ ܕܥܰܘ̇ܠܳܐ. ܘܙܰܪܥܶܗ ܕܡܳܪܽܘܕܳܐ. ܒܪܶܗ ܓܝܪ ܕܥܰܘܳܠܳܐ ܩܳܪܶܐ. ܠܗܳܢܘܢ ܕܰܬܪܰܝܳܢܺܝܢ ܒܰܛܪܽܘܢܽܘܬܳܐ. ܒܗܳܝ ܕܠܰܘ ܐܳܟܶܠܩܰܪܨܳܐ ܒܰܠܚܽܘܕ ܐܰܩܪܶܒ ܥܡ ܡܳܪܢ. ܐܠܐ ܘܣܰܓܺܝ̈ܐܐ ܡܳܪ̈ܽܘܕܶܐ ܡܰܢ ܐܶܬܟܰܬܰܫܘ ܥܰܡܶܗ ܥܡ ܡܳܪܢ. ܘܟܕ ܒܗܳܢܳܐ ܩܪܳܒܳܐ ܩܰܫܝܳܐ ܢܒܺܝܳܐ ܚܳܐܱܪ ܗܘܳܐ. ܘܶܐܬܢܰܒܺܝ ܘܳܐܡܰܪ:
ܕܠܐܴ ܐܰܗܢܺܝ ܡܶܕܶܡ ܒܥܶܠܕܒܳܒܶܗ. ܘܰܒܪܶܗ ܕܥܰܘ̇ܠܐܴ ܠܐܴ ܡܰܟܟܶܗ. ܡܶܛܠܗܳܢܐ ܐܶܡܰܪ ܪܽܘܚܳܐ.
ܐܱܘܒܶܕ ܡܶܢ ܩܕܳܡܰܘܗܝ ܠܰܒܥܶܠܕ̈ܒܳܒܰܘܗܝ. ܘܰܠܣܳܢܰܐܘ̈ܗܝ ܐܶܬܰܒܰܪ. ܠܐ ܓܝܪ ܡܶܫܟܚܺܝܢ ܠܰܡܩܳܡ ܠܽܘܩܒܰܠ ܓܰܢܒܳܪܽܘܬܶܗ ܕܡܰܠܟܳܐ ܡܳܪܝܳܐ. ܟܕ ܛܳܒ ܗܽܘ ܠܶܗ ܒܫܽܘܠܛܳܢܳܐ ܦ̇ܐ̣ܶܐ ܠܐܠܗܳܐ ܠܐ ܐܰܩܺܝܡ ܕܰܐܪܳܐ ܠܽܘܩܒܰܠ ܪ̈ܽܘܚܶܐ ܒܺܝ̈ܫܳܬܳܐ. ܐܠܐ ܒܰܡܚܺܝܠܽܘܬܳܐ ܕܐܢܳܫܽܘܬܳܐ ܚܰܝܶܒ ܐܶܢܽܘܢ ܠܫܰܒܰܗܪ̈ܳܢܶܐ. ܟܰܕ ܠܒܺܝܫ ܦܰܓܪܳܐ ܚܳܫܽܘܫܳܐ ܘܡܳܝܽܘܬܳܐ ܘܕܰܡܫܰܥܒܰܕ ܠܟܰܦܢܳܐ. ܘܡܶܛܠܗܳܢܐ ܡܶܬܬܰܒܪܺܝܢ ܗܘܰܘ ܒܥܶܠܕ̈ܒܳܒܶܐ ܘܣܳܐܢ̈ܐ ܒܰܐܓܽܘܢܳܐ ܗܰܘ ܢܳܡܽܘܣܳܝܳܐ. ܘܡܰܝܬܶܐ ܢܒܺܝܳܐ ܒܳܬܰܪ ܗܳܠܝܢ ܕܰܐܝܟܰܢܳܐ ܐܶܬܳܬ ܥܰܡܶܗ ܠܥܳܠܡܳܐ ܛܰܝܒܽܘܬܳܐ ܘܗܰܝܡܳܢܽܘܬܳܐ.
ܗܰܝܡܳܢܽܘܬܝ ܠܡ ܘܛܰܝܒܽܘܬܝ ܥܰܡܶܗ. ܘܰܒܫܶܡܝ ܬܶܬܪܺܝܡ ܩܰܪܢܶܗ. ܫܰܦܺܝܪ ܣܳܡ ܗܰܝܡܳܢܽܘܬܳܐ ܩܕܳܡ ܛܰܝܒܽܘܬܳܐ. ܠܐ ܓܝܪ ܬܳܒܰܥ ܡܶܢ ܐܰܝܠܝܢ ܕܡܶܬܐܰܣܺܝܢ ܐܠܐ ܒܰܠܚܽܘܕ ܗܰܝܡܳܢܽܘܬܳܐ. ܘܟܕ ܗܰܝܡܳܢܽܘܬܳܐ ܕܠܐ ܥܒܳܕ̈ܐ ܡܩܰܪܒܺܝܢ. ܛܰܝܒܽܘܬܳܐ ܡܰܘܫܛܳܐ ܗܘܳܬ ܘܝܳܗܒܳܐ ܐܳܣܝܽܘܬܳܐ. ܗܳܕܐ ܓܝܪ ܐܡ̇ܪ ܗܘܳܐ ܒܰܠܚܽܘܕ ܠܰܣܡܰܝܴ̈ܐ ܕܰܩܪܶܒܘ ܠܶܗ. ܡܗܰܝܡܢܺܝܢ ܐܰܢܬܽܘܢ ܕܡܶܫܟܰܚ ܐܢܳܐ ܗܳܕܶܐ ܠܡܶܥܒܰܕ (ܡܬܝ ܛ: ܟܚ). ܘܟܕ ܐܷܡܰܪܘ. ܐܡ̣ܪ ܡܳܪܢ ܐܱܝܟ ܗܰܝܡܳܢܽܘܬܟܘܢ ܢܶܗܘܶܐ ܠܟܽܘܢ (ܡܬܝ ܛ: ܟܛ). ܘܒܰܪ ܫܳܥܬܶܗ ܝܰܗܒ ܛܰܝܒܽܘܬܳܐ ܠܗܰܝܡܳܢܽܘܬܳܐ ܘܶܐܬܦܰܬܰܚ̈ܝ ܥܰܝ̈ܢܰܝܗܘܢ ܘܶܐܙܰܠܘ ܒܳܬܪܶܗ. ܘܒܳܬܰܪ ܗܳܠܝܢ ܥܠ ܪܰܒܽܘܬܳܐ ܕܟܳܪܽܘܙܽܘܬܶܗ ܡܶܬܢܰܒܶܐ ܘܳܐܡܰܪ:
ܐܷܣܺܝܡ ܠܡ ܐܝ̣ܕܶܗ ܒܝܰܡܳܐ ܘܰܒܢܰܗܪ̈ܰܘܳܬܳܐ ܝܰܡܺܝܢܶܗ. ܠܥܳܠܡܳܐ ܩܳܪܶܐ ܝܰܡܳܐ. ܠܰܫܠܺܝ̈ܚܶܐ ܕܶܝܢ ܢܰܗܪ̈ܰܘܳܬܳܐ. ܠܗܰܘ ܡܰܢ ܡܶܛܠ ܡܰܪܺܝܪܽܘܬܳܐ ܕܰܚܠܺܝܛܳܐ ܒܡܰܝܴ̈ܐ ܕܥܳܠܡܳܐ. ܠܰܫܠܺܝ̈ܚܶܐ ܕܶܝܢ ܢܰܗܪ̈ܰܘܳܬܳܐ. ܡܶܛܠ ܕܰܒܡܰܝܴ̈ܐ ܒܰܣܺܝ̈ܡܶܐ ܚܠܺܝܛܺܝܢ. ܘܰܡܡܰܙܓܺܝܢ ܠܗ̇ ܠܡܰܪܺܝܪܽܘܬܶܗ ܕܝܰܡܳܐ. ܐܦ ܫܠܺܝ̈ܚܶܐ ܓܝܪ ܡܶܛܠ ܗܳܕܐ ܩܰܒܶܠܘ ܝܰܡܺܝܢܳܐ ܕܥܰܠ ܥܳܠܡܳܐ ܢܶܦܫܛܽܘܢܳܗ̇. ܒܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝ̈ܐ ܕܪܳܕܶܝܢ ܡܶܢ ܟܰܪܣܗܽܘܢ. ܡܰܘܣܶܦ ܘܳܐܡܰܪ:
ܗܽܘ ܢܶܩܪܶܝܢܝ ܐܴܒܝ ܐܰܢܬ. ܐܰܠܳܗܝ ܦܳܪܽܘܩܝ ܬܰܩܺܝܦܳܐ. ܐܳܦ ܐܶܢܳܐ ܒܽܘܟܪܳܐ ܐܶܥܒܕܺܝܘܗܝ. ܘܰܐܪܺܝܡܺܝܘܗܝ ܥܰܠ ܡܰܠܟ̈ܐ ܕܰܐܪܥܳܐ. ܘܰܠܥܳܠܰܡ ܐܶܛܰܪ ܠܶܗ ܛܰܝܒܽܘܬܝ. ܘܰܩܝܳܡܝ ܢܶܬܗܰܝܡܰܢ ܒܶܗ. ܕܢܶܩܪܶܐ ܐܢܳܫ ܠܐܠܗܐ ܐܰܒܳܐ܆ ܒܛܰܝܒܽܘܬܳܐ ܐܶܬܝܰܗܒܰܬ ܠܣܰܓܺܝ̈ܐܐ. ܒܰܟܝܳܢܳܐ ܕܶܝܢ ܚܰܕ ܗܽܘ ܕܡܶܫܟܰܚ ܕܢܶܩܪܶܐ ܠܰܐܠܗܳܐ ܐܰܒܳܐ. ܗܰܘ ܕܡܶܛܠ ܕܰܗܘܳܐ ܒܰܪܢܳܫܳܐ. ܩܪܳܝ ܠܰܐܒܳܐ ܗܰܘ ܕܒܰܟܝܳܢܳܐ ܐܰܒܳܐ. ܐܰܝܟ ܗܳܢܘܢ ܕܰܒܡܰܘܗܰܒܬܳܐ ܢܣܰܒܘ ܗܳܕܐ ܒܡܰܘܠܳܕܳܐ ܕܡܶܢܕܪܺܝܫ. ܘܠܰܘ ܥܰܠ ܕܰܘܝܕ ܐܰܡܺܝܪ̈ܳܢ ܗܳܠܝܢ. ܒܗܳܝ ܕܶܐܡܰܪ ܕܳܐܦ ܐܶܢܳܐ ܒܽܘܟܪܳܐ ܐܶܥܒܕܺܝܘܗܝ. ܕܰܘܝܕ ܓܶܝܪ ܠܰܘ ܒܽܘܟܪܳܐ ܗܘܳܐ. ܡܶܛܠ ܕܒܳܬܰܪ ܫܰܒܥܳܐ ܒܢܰܝܴ̈ܐ ܐܶܬܝ̣ܠܶܕ ܠܐܝ̣ܫܰܝ. ܡܳܕܶܝܢ ܚܰܕ ܗܽܘ ܝܺܚܺܝܕܳܝܳܐ. ܘܡܶܛܠܳܬܰܢ ܗܘܳܐ ܒܽܘܟܪܳܐ ܒܰܐܚ̈ܐ ܣܰܓܺܝ̈ܐܐ. ܗܳܠܝܢ ܕܰܗܘܰܘ ܠܶܗ ܒܛܰܝܒܽܘܬܳܐ. ܐܡ̣ܪ ܓܝܪ ܘܰܠܥܳܠܰܡ ܐܶܛܰܪ ܠܶܗ ܛܰܝܒܽܘܬܝ. ܠܐ ܓܝܪ ܥܳܒܪܳܐ ܛܰܝܒܽܘܬܳܐ ܕܝܰܗܒ ܐܰܒܳܐ ܒܺܐܝ̈ܕܰܘܗܝ ܠܥܳܠܡܳܐ. ܘܠܐ ܩܝܳܡܶܗ ܡܶܬܕܰܓܰܠ܆ ܕܰܐܩܺܝܡ ܡܶܢ ܡܰܝ̈ܳܐ ܘܪܽܘܚܳܐ ܠܰܒܢܰܝܴ̈ܐ ܚܰܕ̈ܬܶܐ. ܘܒܳܬܰܪ ܗܳܠܶܝܢ ܐܡ̇ܪ:
ܐܶܣܺܝܡ ܠܥܳܠܰܡ ܙܰܪܥܶܗ. ܘܟܽܘܪܣܝܶܗ ܐܰܝܟ ܝܰܘ̈ܡܳܬܳܐ ܕܰܫܡܰܝܳܐ. ܐܶܢܓܶܝܪ ܐܰܝܠܝܢ ܕܶܐܬܝ̣ܠܶܕܘ ܡܶܢ ܙܰܪܥܳܐ ܕܕܰܘܝܕ܆ ܒܢܰܝܴ̈ܐ ܕܺܝܠܶܗ ܡܶܬܩܪܶܝܢ܆ ܡܳܕܶܝܢ ܐܰܝܠܶܝܢ ܕܰܒܪܽܘܚܳܐ ܐܶܬܝ̣ܠܶܕܘ ܡܶܢ ܙܰܪܥܳܐ ܕܪܽܘܚܳܐ܆ ܙܰܪܥܳܐ ܢܶܬܚܰܫܒܽܘܢ ܕܰܡܫܺܝܚܳܐ. ܡܶܛܠ ܕܶܐܬܝ̣ܠܶܕܘ ܡܶܢ ܐܴܕܳܡ ܫܡܰܝܳܢܳܐ. ܡܶܬܦܢܶܐ ܕܶܝܢ ܗܳܫܐ. ܕܡܶܕܶܡ ܣܽܘܥܪܳܢܳܐ ܢܺܐܡܰܪ ܪܽܘܚܳܐ. ܡܶܛܠ ܒܢܰܘ̈ܗܝ ܕܕܰܘܝܕ.
ܐܶܢ ܠܰܡ ܢܶܫܒܩܽܘܢ ܒܢܰܘ̈ܗܝ ܢܳܡܽܘܣܝ. ܘܰܒܦܽܘ̈ܩܕܳܢܰܝ ܠܐ ܢܗܰܠܟܽܘܢ. ܐܶܦܩܽܘܕ ܒܫܰܒܛܳܐ ܥܰܘܠܗܽܘܢ. ܘܒܰܡܚܽܘܬܳܐ ܚܛܳܗܰܝ̈ܗܘܢ. ܗܳܠܝܢ ܡܰܘܕܰܥ ܕܺܐܝܬ ܗܽܘ ܠܗܽܘܢ ܠܡܰܠܟ̈ܐ ܕܰܗܘܰܘ ܡܶܢ ܕܰܘܝܕ ܐܰܝܟܰܢܳܐ ܕܢܶܫܒܩܽܘܢ ܢܳܡܽܘܣܶܗ ܕܰܐܠܗܳܐ. ܘܰܕܠܐ ܢܗܰܠܟܘܢ ܒܦܽܘ̈ܩܕܳܢܰܘܗܝ. ܘܰܕܢܺܐܙܽܠ̱ܘܢ ܒܳܬܰܪ ܕܶܚ̈ܠܳܬܳܐ ܣܪ̈ܺܝܩܳܬܳܐ ܕܰܦܬܰܟܪ̈ܶܐ. ܐܶܠܐ ܘܟܰܕ ܡܩܰܦܰܚ ܫܰܒܛܳܐ ܕܟܺܐܢܽܘܬܳܐ.
ܛܰܝܒܽܘܬܝ ܠܐܴ ܐܰܥܒܰܪ ܡܶܢܶܗ. ܘܠܐܴ ܐܶܕܰܓܶܠ ܒܗܰܝܡܳܢܽܘܬܝ. ܘܠܐܴ ܐܰܣܠܐܷ ܩܝܳܡܝ. ܒܪܰܡ ܡܶܕܶܡ ܕܰܢܦܰܩ ܡܶܢ ܣܶܦ̈ܘܳܬܝ ܠܐܴ ܐܶܫܰܚܠܶܦ. ܒܗܳܠܶܝܢ ܡܚܰܘܶܐ ܕܰܟܡܳܐ ܐܶܢ ܡܰܪܳܚܺܝܢ ܗܘܰܘ ܘܥܰܘܳܠܺܝܢ ܡܰܠܟ̈ܐ ܕܰܗܘܰܘ ܡܶܢ ܒܳܬܰܪ ܕܰܘܝܕ ܒܺܝܣܪܳܐܝܠ܆ ܠܐ ܣܰܓܶܦܘ ܡܶܕܶܡ ܠܡܽܘܠܟܳܢܳܐ ܘܰܠܫܽܘܘܕܳܝܳܐ ܕܶܐܫܬܰܘܕܺܝ ܐܰܠܗܳܐ ܠܕܰܘܝܕ. ܕܡܶܢܶܗ ܢܫܰܕܰܪ ܠܰܒܪܶܗ ܘܢܶܬܚܙܶܐ ܒܰܒܣܰܪ. ܘܥܰܠܗܳܝ ܐܡ̇ܪ:
ܚܕܳܐ ܝܺܡܺܝܬ ܒܩܽܘܕܫܝ ܠܕܰܘܝܕ ܘܠܐܴ ܐܶܟܰܕܶܒ܆ ܕܙܰܪܥܶܗ ܠܥܳܠܰܡ ܢܶܗܘܶܐ. ܘܟܽܘܪܣܝܶܗ ܐܰܝܟ ܫܶܡܫܳܐ ܠܽܘܩܒܰܠܝ. ܘܰܐܝܟ ܣܰܗܪܳܐ ܢܶܬܩܰܢ ܠܥܳܠܰܡ. ܣܳܗܕܳܐ ܒܰܫܡܰܝܳܐ ܡܗܰܝܡܰܢ. ܬܠܳܬ ܙܰܒܢܻ̈ܝܢ ܡܰܠܶܠ ܫܡܳܐ ܕܡܶܛܠ ܕܙܰܪܥܶܗ ܕܕܰܘܝܕ ܒܡܰܙܡܽܘܪܳܐ ܗܳܢܐ. ܘܟܕ ܡܫܰܪܶܐ ܐܡ̇ܪ ܘܝܳܡܶܐ܆ ܕܺܝܡܺܝܬ ܠܕܰܘܝܕ ܥܰܒܕܝ. ܕܰܥܕܰܡܳܐ ܠܥܳܠܰܡ ܐܰܬܩܶܢ ܙܰܪܥܳܟ. ܘܟܕ ܡܰܨܰܥ ܐܡ̇ܪ: ܬܽܘܒ ܐܡ̇ܪ܆ ܘܶܐܣܺܝܡ ܠܥܳܠܰܡ ܙܰܪܥܶܗ. ܘܰܒܗܳܝ ܕܰܬܠܳܬ ܐܡ̇ܪ: ܚܕܳܐ ܝܺܡܺܝܬ ܒܩܽܘܕܫܝ ܠܕܰܘܝܕ ܘܠܐܴ ܐܶܟܰܕܶܒ܆ ܕܙܰܪܥܶܗ ܠܥܳܠܰܡ ܢܶܗܘܶܐ. ܘܟܰܕ ܥܰܡ ܗܳܝ ܕܡܶܫܬܰܘܕܶܐ ܡܶܛܠ ܙܰܪܥܳܐ. ܘܳܐܦ ܥܠ ܟܽܘܪܣܝܳܐ ܐܡ̇ܪ ܗܘܳܐ: ܕܳܡܝܳܐ ܗܳܕܐ ܕܰܬܠܳܬ ܙܰܒܢ̈ܝ̣ܢ. ܠܗܳܝ ܕܰܐܟܬܶܒ ܚܰܟܺܝܡܳܐ ܦܰܘܠܽܘܣ ܐܰܠܗܳܝܳܐ ܠܘܳܬ ܥܰܡܳܐ ܕܥܶܒܪ̈ܳܝܶܐ. ܕܝܶܫܘܥ ܡܫܺܝܚܳܐ ܐܶܬܡܳܠܝ ܘܝܰܘܡܳܢܳܐ ܗܽܘܝܽܘ ܘܰܠܥܳܠܰܡ (ܥܒܪ̈ܝܐ ܝܓ: ܚ). ܐܰܝܟܰܢܳܐ ܕܰܒܝܰܕ ܗܳܠܝܢ ܢܰܠܶܦ. ܕܗܰܘ ܕܗܳܠܝܢ ܡܶܬܶܐܡܰܪ ܥܠܰܘܗܝ. ܠܰܘ ܡܶܢ ܕܰܘܝܕ ܢܣܰܒ ܪܺܝܫܺܝܬܳܐ ܕܢܶܗܘܶܐ. ܐܠܐ ܩܰܕܺܝܡ ܗܽܘ ܠܗ. ܐܰܝܟܰܢܳܐ ܕܳܐܦ ܫܶܡܫܳܐ ܘܒܳܬܰܪ ܬܽܘܒ ܡܩܰܘܶܐ ܘܡܳܐ ܕܰܗܘܳܐ ܒܰܕܡܽܘܬ ܢܽܘܗܪܳܐ. ܘܥܰܠܗܳܝ ܐܡ̇ܪ ܕܟܽܘܪܣܝܶܗ ܐܰܝܟ ܫܶܡܫܳܐ ܘܰܐܝܟ ܣܰܗܪܳܐ. ܗܳܟܰܢܳܐ ܐܳܦ ܡܫܺܝܚܳܐ ܗܰܘ ܕܶܐܫܬܰܡܰܗ ܒܰܚܢܳܢܶܗ ܙܰܪܥܶܗ ܕܕܰܘܝܕ. ܐܝܟ ܕܶܢܚܳܐ ܕܫܶܡܫܳܐ ܠܟܽܠ ܐܰܚܺܝܕ. ܘܠܰܐܪ̈ܥܳܢܶܐ ܐܳܦ ܠܰܫܡܰܝܴ̈ܢܶܐ ܡܕܰܒܰܪ. ܘܥܰܠ ܫܡܰܝܴ̈ܢܶܐ ܘܰܐܪ̈ܥܳܢܳܝܶܐ ܡܰܬܩܰܢ ܟܽܘܪܣܝܳܐ ܕܡܰܠܟܽܘܬܶܗ ܘܠܐ ܙܳܐܱܥ. ܘܒܰܫܡܰܝܳܐ ܐܝ̣ܬܰܘܗܝ ܐܰܝܟ ܕܰܠܣܳܗܕܽܘܬܳܐ ܕܠܐ ܡܶܬܕܰܓܠܐܴ. ܣܳܗܕܳܐ ܠܰܡ ܒܰܫܡܰܝܳܐ ܡܗܰܝܡܰܢ. ܐܰܟܡܰܢ ܕܗܰܘ ܕܺܐܝܬ ܠܶܗ ܒܰܫܡܰܝܳܐ ܟܽܘܪܣܝܳܐ ܘܡܰܘܬܒܳܐ܆ ܫܪܳܪܰܐ ܗ̄ܘ ܫܽܘܠܛܳܢܶܗ. ܘܰܫܪܳܪܰܐ ܗ̄ܘ ܟܽܘܪܣܝܶܗ. ܘܡܶܢ ܬܚܽܘ̈ܡܶܐ ܕܣܳܡ ܠܗܶܝܢ ܥܳܒܽܘܕܳܐ ܠܒܶܪ̈ܝܳܬܳܐ. ܐܠܐ ܘܰܒܠܐܴ ܡܶܫܬܰܚܠܦܳܢܽܘܬܳܐ ܢܛܺܝܪܺܝܢ ܙܰܒܢ̈ܐ ܙܰܒܢ̈ܐ ܕܩܰܝܛܳܐ ܘܣܰܬܘܳܐ. ܘܠܰܘ ܒܰܠܚܽܘܕ ܫܶܡܫܳܐ ܘܣܰܗܪܳܐ. ܐܠܐ ܟܺܝܡܳܐ ܘܥܺܝܽܘܬܳܐ ܘܓܰܢ̱ܒܳܪܳܐ. ܟܰܕ ܪܳܕܶܝܢ ܒܰܐܡܺܝܢܽܘܬܳܐ ܒܚܽܘܕܪܶܗ ܕܰܪܩܺܝܥܳܐ ܘܰܡܫܰܪܶܝܢ ܒܫܰܢܬܳܐ ܘܰܡܫܰܠܡܺܝܢ ܕܠܐ ܛܥܽܘܝ. ܘܥܰܠ ܗܳܝ ܫܡܰܝܳܐ ܝܰܗܒ ܣܳܗܕܽܘܬܳܐ ܫܰܪܺܝܪܬܳܐ ܐܠܗܳܐ ܠܛܽܘܒܬܳܢܳܐ ܕܰܘܝܕ. ܕܰܐܟܙܢܳܐ ܕܰܩܒܺܝܥܺܝܢ ܒܰܫܡܰܝܳܐ. ܫܶܡܫܳܐ ܘܣܰܗܪܳܐ ܠܐ ܥܒܰܪܘ. ܗܳܟܰܢܳܐ ܠܡ ܐܦ ܗܰܘ ܕܡܶܢܳܟ ܕܢܰܚ ܒܰܒܣܰܪ ܐܦ ܡܶܫܬܰܡܰܗ ܙܰܪܥܳܟ ܘܠܐ ܥܳܒܰܪ. ܘܡܶܟܺܝܠ ܢܶܫܡܰܥ ܠܕܰܘܝܕ ܗܳܫܐ ܟܰܕ ܡܒܰܟܶܐ ܥܠ ܒܺܝ̈ܫܳܬܳܐ ܕܰܚܙܳܐ ܒܓܶܠܝܳܢܳܐ ܕܪܽܘܚܳܐ ܕܗܳܘ̈ܝܳܢ ܠܰܒܢܰܘ̈ܗܝ.
ܘܰܐܢܬ ܠܰܡ ܛܥܰܝܬܳܢܝ ܘܰܐܣܠܺܝܬܳܢܝ ܘܰܐܗܦܶܟܬ ܐܰܦܰܘ̈ܗܝ ܕܰܡܫܺܝܚܳܟ. ܘܰܐܣܠܺܝܬ ܩܝܳܡܶܗ ܕܥܰܒܕܳܟ. ܘܰܐܪܡܺܝܬ ܒܰܐܪܥܳܐ ܟܠܺܝܠܶܗ. ܫܽܘܪܳܝܳܐ ܕܗܳܠܝܢ ܡܰܚ̈ܘܳܬܳܐ ܒܝܰܘ̈ܡܰܝ ܒܪܳܐ ܣܰܟܠܐܴ ܪܚܰܒܥܰܡ ܒܰܪ ܫܠܶܝܡܽܘܢ ܗܘܳܐ. ܗܳܝܕܶܝܢ ܟܰܕ ܩܳܡ ܗܳܢܐ ܒܡܰܠܟܽܘܬܳܐ. ܫܰܪܺܝ ܪܽܘܓܙܳܐ ܕܰܐܠܗܳܐ ܢܚܰܘܶܐ ܢܩܰܡܬܳܐ ܡܶܢ ܒܢܰܝܴ̈ܐ ܠܐ ܟܺܐܢ̈ܐ. ܘܡܶܛܠܗܳܢܐ ܠܰܥܣܰܪ ܡܢܰܘܴ̈ܬܳܐ ܕܡܰܠܟܽܘܬܳܐ ܫܩܰܠ ܡܶܢ ܒܢܰܘ̈ܗܝ ܕܕܰܘܝܕ ܟܺܐܢܳܐ. ܘܰܢܦܰܠ ܟܠܺܝܠܶܗ ܒܰܐܪܥܳܐ ܘܶܐܬܡܰܟܰܟ. ܘܰܒܛܶܠ ܩܝܳܡܳܐ ܒܰܡܢܳܬܳܐ ܡܶܕܶܡ ܗܰܘ ܕܶܐܡܰܪ ܗܘܳܐ ܠܶܗ. ܘܰܐܬܩܶܢ ܟܽܘܪܣܝܳܐ ܕܡܰܠܟܽܘܬܳܟ ܥܰܠ ܝܺܣܪܳܐܝܠ ܠܥܳܠܰܡ. ܘܟܕ ܠܐ ܒܗܳܠܝܢ ܬܳܒܘ ܡܶܢ ܒܺܝ̈ܫܳܬܗܘܢ ܡܰܠܟ̈ܐ ܕܺܝܣܪܳܐܝܠ ܐܦ ܕܺܝܗܽܘܕܳܐ. ܐܠܐ ܘܰܐܘܣܶܦܘ ܝܰܬܺܝܪ ܥܰܠ ܚܛܳܗܰܝ̈ܗܘܢ܆ ܬܽܘܒ ܡܰܪ̈ܕܘܳܬܳܐ ܕܒܺܝ̈ܫܳܢ ܡܶܢ ܩܰܕ̈ܡܳܝܳܬܳܐ. ܫܰܕܰܪ ܗܘܳܐ ܥܠܰܝܗܘܢ ܪܽܘܓܙܳܐ ܟܺܐܢܳܐ. ܕܰܠܗܶܝܢ ܬܘܒ ܡܶܬܥܗܰܕ ܡܙܰܡܪܳܢܳܐ ܘܳܐܡܰܪ:
ܗܳܝ ܕܰܗܓܰܡܬ ܣܝܳܓܰܘ̈ܗܝ ܘܣܰܚܶܦܬ ܚܶܣܢܰܘ̈ܗܝ. ܘܕܳܫܽܘܗܝ ܟܽܠ ܥܳܒܪ̈ܰܝ ܐܽܘܪܚܳܐ. ܘܰܗܘܳܐ ܚܶܣܕܳܐ ܠܰܫܒܳܒܰܘ̈ܗܝ. ܘܰܐܪܺܝܡܬ ܝܰܡܺܝܢܳܐ ܕܰܒܥܶܠܕ̈ܒܳܒܰܘܗܝ. ܘܚܰܕܺܝܬ ܠܟܽܠܗܘܢ ܣܳܢܱ̈ܐܘܗܝ. ܘܰܐܗܦܶܟܬ ܥܽܘܕܪܳܢܳܐ ܕܣܰܦܣܺܪܶܗ. ܘܠܐܴ ܣܰܝܰܥܬܳܝܗܝ ܒܰܩܪܳܒܳܐ. ܘܒܰܛܶܠܬ ܡܙܰܟܝܳܢܰܘ̈ܗܝ. ܘܟܽܘܪܣܝܶܗ ܠܰܐܪܥܳܐ ܣܚܰܦܬ. ܘܒܰܨܰܪܬ ܝܰܘ̈ܡܳܬܳܐ ܕܛܰܠܝܽܘܬܶܗ. ܘܰܐܥܛܶܦܬܳܝܗܝ ܒܶܗܬܬܳܐ. ܐܰܝܠܶܝܢ ܕܩܳܪܶܝܢ ܠܡܰܘ̈ܡܳܬܳܐ ܘܠܰܒܢܴ̈ܬ ܩܴ̈ܠܐ ܗܳܠܝܢ ܡܶܬܚܪܶܝܢ. ܘܰܩܝܴ̈ܡܶܐ ܕܰܐܩܺܝܡ ܐܠܗܳܐ ܥܰܡ ܛܽܘܒܬܳܢܳܐ ܕܰܘܝܕ ܐܶܬܒܰܛܰܠܘ. ܒܗܳܝ ܠܰܡ ܕܶܐܬܗܓܶܡ ܟܽܘܪܣܝܳܐ ܘܶܐܣܬܚܶܦ. ܘܠܐ ܩܳܡܰܬ ܗܳܝ ܕܰܐܝܟ ܫܶܡܫܳܐ ܢܶܬܩܰܢ܆ ܒܗܳܝ ܕܰܗܘܳܐ ܕܰܘܫܳܐ ܠܥܳܒܪ̈ܰܝ ܐܽܘܪܚܳܐ. ܘܚܶܣܕܳܐ ܘܡܽܘܝܳܩܳܐ ܠܰܫܒܳܒܰܘ̈ܗܝ ܘܠܐܴ ܡܶܠܬܳܐ ܕܥܰܠ ܙܰܪܥܳܐ ܐܶܫܬܰܡܠܝܰܬ. ܐܠܐ ܛܥܳܬ ܐܶܢܘܢ ܠܗܳܠܝܢ ܗܳܝ ܡܶܠܬܳܐ ܕܶܐܡܰܪ ܐܰܠܗܳܐ.
ܕܶܐܢ ܢܶܫܒܩܽܘܢ ܒܢܰܘ̈ܗܝ ܢܳܡܽܘܣܝ ܘܰܒܦܽܘ̈ܩܕܳܢܰܝ ܠܐ ܢܗܰܠܟܽܘܢ. ܐܶܦܩܽܘܕ ܒܫܰܒܛܳܐ ܥܰܘܠܗܽܘܢ. ܘܒܰܡܚܽܘܬܳܐ ܚܛܳܗܰܝ̈ܗܘܢ. ܘܟܰܕ ܠܗܳܠܝܢ ܥܰܠ ܕܰܚܛܰܘ ܫܳܒܶܩ ܐܢܳܐ. ܠܫܰܒܛܳܐ ܕܢܶܬܢܰܩܰܡ ܡܶܢܗܘܢ.
ܛܰܝܒܽܘܬܝ ܡܶܢܶܗ ܠܐ ܐܰܥܒܰܪ. ܘܠܐܴ ܐܶܕܰܓܶܠ ܒܗܰܝܡܳܢܽܘܬܝ ܘܠܐ ܐܱܣܠܐܷ ܩܝܳܡܝ. ܡܳܕܶܝܢ ܗܳܠܝܢ ܕܰܗ̈ܘܰܝ ܡܶܛܠ ܡܰܪ̈ܕܘܳܬܳܐ. ܠܘ ܠܕܰܘܝܕ ܣܰܓܶܦܶܝ̈ܢ ܐܠܐ ܠܰܒܢܰܝ̈ܳܐ ܡܳܪ̈ܽܘܕܶܐ ܣܚܰܦܷ̈ܝܢ. ܥܰܠ ܕܰܐܥܘܶܠܘ ܒܢܳܡܽܘܣܳܐ ܕܰܐܠܗܳܐ. ܘܥܰܠܗܳܕܶܐ ܒܝܰܘ̈ܡܰܝ ܢܰܒܽܘܟܰܕܢܳܨܳܪ ܐܶܬܗܓܶܡ ܚܶܣ̈ܢܰܘܗܝ. ܘܶܐܣܬܚܶܦ ܣܝܴ̈ܓܶܐ ܕܰܡܕܺܝ̈ܢܳܬܗܘܢ ܘܰܗܘܰܘ ܚܶܣܕܳܐ ܠܰܦܠܶܫܬܳܝ̈ܐ ܘܠܰܒܢܱ̈ܝ ܥܰܡܽܘܢ ܘܠܰܐܕܽܘܡܳܝ̈ܐ ܗܳܢܘܢ ܫܒܳܒܰܝ̈ܗܘܢ. ܘܶܐܬܬܪܺܝܡܰܬ ܥܠܰܝܗܽܘܢ ܝܰܡܺܝܢܳܐ ܕܳܐܬܽܘܪ̈ܳܝܶܐ ܘܡܳܕܳܝ̈ܐ. ܘܰܗܘܰܘ ܚܰܕܽܘܬܳܐ ܠܰܥܡܳܠܺܝ̈ܩܳܝܶܐ ܣܳܢܱ̈ܐܝܗܘܢ. ܘܠܐ ܐܶܣܬܰܝܰܥܘ ܡܶܢ ܐܠܗܳܐ ܒܰܩܪܳܒܳܐ. ܘܰܒܛܶܠܘ ܡܶܢܗܘܢ ܢܒܺܝ̈ܐ ܘܙܰܕܺܝ̈ܩܶܐ ܕܰܡܙܰܟܶܝܢ ܗܘܰܘ ܠܗܽܘܢ ܒܰܨܠܽܘܬܳܐ. ܘܶܐܬܒܰܨܰܪܘ ܝܰܘ̈ܡܳܬܳܐ ܕܡܰܠܟ̈ܐ ܘܰܙܥܰܪ̈ܝ ܫܢܰܝ̈ܗܘܢ. ܥܕܰܡܳܐ ܕܰܚܠܳܦ ܫܢܰܝܴ̈ܐ ܝܰܪ̈ܚܶܐ ܢܩܽܘܡܽܘܢ ܒܡܰܠܟܽܘܬܳܐ. ܡܶܟܺܝܠ ܡܳܢܳܐ ܐܡ̇ܪ ܗܰܘ ܕܡܶܬܢܰܒܶܐ ܐܝܟ ܗܰܘ ܕܡܶܢ ܟܰܕܽܘ ܒܰܩܪܳܒܳܐ ܐܶܢܘܢ ܡܶܬܐܷܒܶܠ ܥܠܰܝܗܘܢ.
ܥܕܰܡܳܐ ܠܶܐܡܰܬܝ ܪܳܓܶܙ ܐܰܢܬ ܡܳܪܝܳܐ ܠܥܳܠܰܡ. ܘܝܳܩܶܕ ܐܰܝܟ ܢܽܘܪܳܐ ܪܽܘܓܙܳܟ. ܐܶܬܕܰܟܪܰܝܢܝ ܡܶܢ ܚܶܦܪܳܐ. ܡܶܛܠ ܕܠܳܐ ܗܘܳܐ ܣܪܺܝܩܳܐܝ̣ܬ ܒܪܰܝܬ ܠܟܽܠܗܽܘܢ ܒܢܰܝ̈ܢܳܫܳܐ. ܗܳܫܳܐ ܠܰܘ ܥܰܠ ܒܺܝ̈ܫܳܬܳܐ ܕܡܶܬܚܰܙ̈ܝܳܢ ܡܨܰܠܐܷ ܢܒܺܝܳܐ ܕܢܶܥܒܪ̈ܳܢ. ܘܠܰܘ ܕܢܶܬܦܰܨܶܐ ܡܶܢ ܩܪܳܒܳܐ ܕܡܰܠܟ̈ܐ ܕܥܰܡ̈ܡܶܐ ܡܶܬܟܰܫܰܦ. ܐܶܠܐ ܕܢܶܗܘܶܐ ܫܽܘܠܳܡܳܐ ܠܪܶܗܛܶܗ ܕܥܳܠܡܳܐ ܡܦܺܝܣ. ܟܕ ܡܚܰܘܶܐ ܕܠܐܴ ܡܶܫܟܚܳܐ ܢܶܫܠܽܘܢ ܩܪ̈ܳܒܶܐ ܘܒܺܝ̈ܫܳܬܳܐ. ܟܡܳܐ ܕܰܒܥܳܠܡܳܐ ܗܳܢܐ ܐܝ̣ܬܰܝܗܘܢ ܒܢܰܝ̈ܢܳܫܳܐ. ܘܡܶܛܠܗܳܢܐ ܐܡ̇ܪ: ܥܕܰܡܳܐ ܠܶܐܡܰܬܝ ܪܳܓܶܙ ܐܰܢܬ ܡܳܪܝܳܐ ܠܥܳܠܰܡ. ܐܶܠܐ ܡܶܟܺܝܠ ܐܶܬܕܰܟܪܰܝܢܝ ܡܶܢ ܚܶܦܪܳܐ. ܚܶܦܪܳܐ ܩܳܪܶܐ ܠܗ̇ ܠܰܫܝܽܘܠ ܬܰܚܬܳܝܬܳܐ. ܡܶܛܠ ܢܽܘܟܪܳܝܽܘܬܶܗ ܕܡܶܢ ܚܰܝܷ̈ܐ. ܐܶܠܘ ܓܶܝܪ ܕܰܢܦܽܘܫܽܘܢ ܒܚܶܦܪܳܐ ܐܶܬܒܪܺܝܘ ܒܢܰܝ̈ܢܳܫܳܐ. ܣܪܺܝܩܳܐ ܗܘܳܬ ܩܪܳܝܬܗܽܘܢ. ܡܶܛܠ ܕܠܰܘ ܣܪܺܝܩܳܐܝ̣ܬ ܒܪܰܝܬ ܐܶܢܘܢ ܓܰܠܝܳܐ ܗܝ. ܕܠܰܘ ܐܰܢܬ ܐܶܬܪܰܥܺܝܬ ܥܠܰܝܗܘܢ ܡܰܘܬܳܐ. ܐܠܐ ܒܰܚܣܳܡܶܗ ܕܒܺܝܫܳܐ ܓܶܕܫܰܬ ܐܶܢܘܢ ܗܳܕܐ. ܘܡܶܟܺܝܠ ܟܽܠܗܘܢ ܡܺܝܬܘ ܒܰܥܒܳܪ ܦܽܘܩܕܳܢܳܐ ܕܚܰܕ. ܘܠܰܝܬ ܕܡܶܢ ܗܳܕܶܐ ܢܶܫܬܰܘܙܰܒ.
ܡܰܢܽܘ ܓܶܝܪ ܓܰܒܪܳܐ ܕܢܺܚܶܐ ܘܠܐܴ ܢܶܚܙܶܐ ܡܰܘܬܳܐ. ܘܰܢܦܰܨܶܐ ܢܰܦܫܶܗ ܡܶܢ ܐܝ̣ܕܳܐ ܕܰܫܝܽܘܠ. ܡܶܢ ܗܳܢܘܢ ܕܥܰܠܘ ܠܥܳܠܡܳܐ ܘܠܳܐ ܚܰܕ. ܐܶܠܐ ܡܰܢ ܟܽܠܗܘܢ ܚܰܝܳܒ̈ܐ ܐܶܢܘܢ ܠܡܰܘܬܳܐ. ܒܰܕܠܳܐ ܙܳܟܶܐ ܩܕܳܡܰܝܟ ܟܽܠ ܕܚܰܝ. ܡܶܛܠ ܗܳܢܐ ܐܰܝܟ ܕܡܶܢ ܦܰܪܨܽܘܦܳܐ ܕܗܳܢܘܢ ܕܪܳܢܶܝܢ ܗܘܰܘ ܗܳܕܐ ܐܶܡܰܪ:
ܐܰܝܟܳܐ ܐܶܢܶܝܢ ܛܰܝ̈ܒܘܳܬܳܟ ܡܳܪܝܳܐ ܩܰܕ̈ܡܳܝܳܬܳܐ. ܕܺܝܡܺܝܬ ܠܕܰܘܝܕ ܒܗܰܝܡܳܢܽܘܬܳܐ. ܐܶܬܕܟܰܪ ܡܳܪܝܳܐ ܚܶܣܕܶܗ ܕܥܰܒܕܳܟ. ܗܳܠܝܢ ܠܰܘ ܗܽܘ ܐܡ̣ܪ܆ ܐܠܐ ܐܝܟ ܕܡܶܢ ܥܶܠܰܬ ܐܽܘ̈ܠܨܳܢܶܐ ܕܩܳܡܘ ܥܠܰܝܗܘܢ ܐܡ̇ܪ.
ܕܫܶܩܠܶܬ ܒܚܰܝܱ̈ܝ ܟܽܠܶܗ ܪܶܢܝܗܽܘܢ ܕܥܰܡ̈ܡܶܐ. ܘܥܰܠܗܳܝ ܐܶܡܰܪܬ ܐܰܝܠܶܝܢ ܕܰܡܛܰܝܒܺܝܢ ܕܢܺܐܡܪܽܘܢ ܡܶܢ ܒܳܬܰܪ ܙܰܒܢܷ̈ܐ. ܗܳܢܘܢ ܕܡܶܛܠ ܠܐ ܟܰܪܝܽܘܬܗܘܢ ܡܶܬܪܕܶܝܢ. ܘܒܳܬܰܪܟܶܢ ܐܡ̇ܪ:
ܚܰܣܕܽܘܢܝ ܒܥܶܠܕ̈ܒܳܒܰܝܟ ܡܳܪܝܳܐ. ܘܚܰܣܶܕܘ ܥܶܩ̈ܒܰܘܗܝ ܕܰܡܫܺܝܚܳܟ. ܘܰܒܪܺܝܟ ܗܽܘ ܡܳܪܝܳܐ ܠܥܳܠܰܡ ܐܰܡܺܝܢ ܘܰܐܡܺܝܢ. ܡܶܢ ܒܳܬܰܪ ܕܰܐܝܟ ܡܰܪܳܚܽܘܬܗܽܘܢ ܪܕܳܐ ܐܶܢܽܘܢ ܫܰܒܛܳܐ ܕܟܺܐܢܽܘܬܳܐ. ܐܦ ܚܰܣܕܽܘܢܝ ܟܕ ܐܳܡܪܺܝܢ. ܕܰܐܝܟܳܐ ܐܶܢܘܢ ܫܽܘܘ̈ܕܳܝܶܐ ܘܰܐܝܟܳܐ ܐܶܢܘܢ ܩܝܴ̈ܡܶܐ. ܘܶܐܢ ܫܰܪܺܝܪܺܝܢ ܠܡܳܢܳܐ ܒܒܺܝ̈ܫܳܬܳܐ ܕܰܐܝܟ ܗܳܠܝܢ ܡܶܫܬܰܩܦܺܝܢܰܢ. ܐܶܠܐ ܐܶܢܳܐ ܒܗܳܠܶܝܢ ܐܳܡܰܪ ܐܢܳܐ. ܒܪܺܝܟ ܗܽܘ ܡܳܪܝܳܐ ܠܥܳܠܰܡ
ܡܙܡܘܪܐ ܕܬܫܥܝܢ
ܥܰܠ ܩܰܕܺܝܡܽܘܬ ܝ̣ܕܰܥܬܳܐ ܕܰܐܠܳܗܳܐ: ܘܥܰܠ ܫܽܘܚܠܳܦܳܐ ܕܰܗܘܳܐ ܠܰܟܝܳܢܳܐ ܐܢܳܫܳܝܳܐ ܒܓܶܠܝܳܢܳܐ ܕܥܰܡܰܢܽܘܐܝܠ: ܘܥܰܠ ܡܰܘܬܳܐ ܕܰܚܛܺܝܬܳܐ ܕܰܗܘܳܐ ܒܓܶܠܝܳܢܳܐ ܕܰܡܕܰܒܪܳܢܽܘܬܶܗ.
ܩܰܕܺܝܡܽܘܬ ܝܺܕܰܥܬܳܐ ܕܠܐ ܡܶܬܡܰܠܠܐܴ. ܡܶܫܬܰܥܶܐ ܛܽܘܒܬܢܳܐ ܕܰܘܝܕ ܥܠ ܐܠܗܐ ܒܬܶܫܒܽܘܚܬܳܐ ܗܳܕܐ ܕܬܶܫܥܺܝܢ. ܘܰܕܝܳܕܰܥ ܠܟܽܠܡܶܕܶܡ ܡܶܢ ܩܕܳܡ ܕܠܐ ܢܶܗܘܶܐ ܡܶܬܢܰܒܶܐ ܥܠܰܘܗܝ. ܘܕܳܡܝܳܐ ܕܳܐܡܰܪ ܗܳܠܝܢ ܠܽܘܩܒܰܠ ܐܝܠܝܢ ܕܰܒܠܐܴ ܝܺܕܰܥܬܳܐ ܥܳܕܠܺܝܢ ܠܰܡܕܰܒܪܳܢܽܘܬܳܐ ܕܰܐܠܗܳܐ. ܐܳܡܪܺܝܢ ܓܝܪ܆ ܕܶܐܢ ܝܳܕܰܥ ܗܘܳܐ ܐܠܗܳܐ ܕܒܰܚܛܳܗ̈ܐ ܡܶܬܬܰܚܕܺܝܢ ܒܢܰܝ̈ܢܳܫܳܐ. ܠܐ ܐܳܠܨܳܐ ܗܘܳܬ ܢܶܒܪܶܐ ܐܶܢܘܢ. ܐܶܢܕܶܝܢ ܠܐ ܝܳܕܰܥ ܗܘܳܐ ܘܰܒܪܳܐ. ܙܳܕܶܩ ܠܗ ܕܰܢܣܰܝܒܰܪ ܘܠܐ ܢܶܬܚܰܡܰܬ ܘܶܐܢ ܝܳܕܰܥ ܗܘܳܐ ܕܗܳܟܰܢܐ ܚܳܛܶܝܢ ܘܩܰܕܶܡ ܒܪܳܐ ܘܰܠܡܳܢܳܐ ܠܐ ܪܕܳܐ ܐܶܢܘܢ ܘܟܢ ܚܛܰܘ. ܐܰܘ ܠܡܳܢܳܐ ܡܚܰܘܶܐ ܪܽܘܓܙܶܗ ܡܶܢ ܒܳܬܰܪ ܕܗܳܘܝܳܐ ܚܛܺܝܬܳܐ. ܐܚܪ̈ܳܢܶܐ ܒܰܟܝܳܢܳܐ ܐܳܡܪܺܝܢ ܐܝ̣ܬܶܝܗ̇ ܚܛܺܝܬܳܐ. ܘܪܺܝܫܳܢܽܘܬܳܐ ܐܰܚܺܝܕܳܐ ܠܽܘܩܒܰܠ ܐܠܗܳܐ. ܘܰܐܝܟ ܕܰܐܠܗܳܐ ܐܝ̣ܬܰܘܗܝ ܛܳܒܳܐ. ܗܳܟܰܢܳܐ ܐܝ̣ܬ ܒܰܟܝܳܢܳܐ ܕܰܠܩܽܘܒܠܐܴ ܒܺܝܫܳܐ. ܠܽܘܩܒܰܠ ܕܶܝܢ ܚܽܘ̈ܫܳܒܶܐ ܠܐ ܟܺܐܢ̈ܐ. ܕܰܘܝܕ ܐܠܗܳܝܳܐ ܡܰܙܡܽܘܪܳܐ ܗܳܢܐ ܕܬܶܫܥܺܝܢ ܙܰܡܰܪ ܘܶܐܡܰܪ:
ܡܳܪܝܳܐ ܒܶܝܬ ܡܰܥܡܪܳܐ ܗܘܰܝܬ ܠܢ ܠܕܳܪܕܳܪ̈ܺܝܢ. ܟܰܕ ܡܰܘܕܰܥ ܒܗܳܕܶܐ ܕܛܳܒܳܐ ܠܐ ܗܘܳܐ ܥܽܘܡܪܳܐ ܠܒܺܝ̈ܫܶܐ. ܘܠܐ ܫܳܩܶܠ ܒܚܽܘܫܳܒܶܗ ܕܰܥܒܴ̈ܕܶܐ ܒܺܝ̈ܫܶܐ ܢܶܒܪܶܐ. ܘܰܒܗܳܕܐ ܐܰܠܶܦ ܕܶܐܢ ܐܠܗܳܐ ܛܳܒܰܐ ܗ̄ܘ. ܘܰܐܝܠܝܢ ܕܥܳܡܪܺܝܢ ܗܘܰܘ ܒܗ ܛܳܒ̈ܐ ܘܫܰܦܺܝܪ̈ܶܐ ܐܶܢܽܘܢ. ܘܡܶܕܶܡ ܕܰܣܢܶܐ ܠܰܝܬ ܒܗܽܘܢ. ܛܳܒܳܐ ܓܶܝܪ ܒܺܝܫܳܐ ܠܐ ܥܒܰܕ. ܘܠܐ ܫܰܦܺܝܪܳܐ ܗܳܘܶܐ ܐܰܒܳܐ ܠܰܣܢܰܝܴ̈ܐ. ܡܳܕܶܝܢ ܛܳܒܽܘܬܶܗ ܕܰܐܠܗܳܐ ܠܐ ܐܝ̣ܬܶܝܗ̇ ܐܶܡܳܐ ܕܒܺܝܫܽܘܬܶܗ ܕܒܰܪܢܳܫܳܐ. ܐܠܐ ܡܶܢ ܚܺܐܪܽܘܬܶܗ ܕܒܰܪܢܳܫܳܐ ܕܝܰܗܒܠܶܗ ܐܠܗܳܐ. ܘܥܰܠ ܕܢܰܟܶܣ ܪܽܘܚܳܐ ܕܰܐܠܗܳܐ ܠܬܰܪ̈ܥܝܳܬܳܐ ܕܡܰܪ̈ܳܚܶܐ. ܙܰܡܰܪ ܕܰܘܝܕ ܡܰܙܡܽܘܪܳܐ ܗܳܢܐ ܘܶܐܡܰܪ: ܕܰܒܬܰܪܥܺܝܬܶܗ ܕܰܐܠܗܳܐ ܣܺܝܡܳܐ ܗܘܳܬ ܕܢܶܥܒܕܶܗ ܠܒܰܪܢܳܫܳܐ. ܡܶܛܠ ܕܩܰܕܺܝܡ ܗܽܘ ܚܽܘܫܳܒܶܗ ܠܒܶܪ̈ܝܳܬܶܗ. ܘܥܰܠܗܳܕܐ ܠܗܰܠ ܡܶܢ ܥܳܠܡ̈ܐ ܘܰܠܗܰܠ ܡܶܢ ܒܶܪ̈ܝܳܬܳܐ ܕܡܰܠܐܟ̈ܐ. ܩܰܕܺܝܡܺܝܢ ܚܽܘ̈ܫܳܒܶܐ ܕܥܠ ܬܽܘܩܳܢܶܗ ܕܒܰܪܢܳܫܳܐ:
ܘܥܰܕܠܐܴ ܢܶܬܒܰܛܢܽܘܢ ܛܽܘܪ̈ܶܐ. ܘܥܰܕܠܐܴ ܬܚܰܒܶܠ ܐܰܪܥܳܐ܆ ܘܥܰܕܠܳܐ ܬܶܬܩܰܢ ܡܶܬܥܰܡܪܳܢܺܝܬܳܐ. ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܐܱܢܬ ܗܽܘ ܐܠܗܳܐ ܕܰܐܗܦܶܟܬܳܝܗܝ ܠܒܰܪܢܳܫܳܐ ܥܕܰܡܳܐ ܠܡܽܘܟܳܟܳܐ. ܡܶܢ ܐܰܝܟܳܐ ܐܰܗܦܟܶܗ ܠܒܰܪܢܳܫܳܐ ܘܰܐܝܟܳܐ ܗܘܳܐ ܡܶܢ ܩܕܺܝܡ ܕܠܐܴ ܢܶܗܦܽܘܟ؟ ܒܪܰܘܡܳܐ ܗܘܳܐ ܘܰܗܦܰܟ ܠܥܽܘܡܩܳܐ. ܘܒܰܫܡܰܝܳܐ ܗܘܳܐ ܘܥܰܠ ܕܰܚܛܳܐ ܬܰܡܳܢ ܐܰܗܦܟܶܗ ܐܰܠܗܳܐ ܠܐܱܪܥܳܐ ܕܡܶܢܳܗ̇ ܐܷܬܢܣܶܒ. ܒܦܰܪܕܰܝܣܳܐ ܡܠܐܷ ܛܽܘ̈ܒܶܐ ܥܳܡܰܪ ܗܘܳܐ. ܘܡܶܛܠ ܕܶܐܬܢܰܣܺܝ ܒܠܐܴ ܡܶܫܬܰܡܥܳܢܽܘܬܳܐ. ܡܶܚܕܳܐ ܐܱܗܦܟܶܗ ܐܠܗܳܐ ܕܢܶܗܘܶܐ ܦܰܠܳܚܳܐ ܕܟܽܘ̈ܒܶܐ ܘܕܰܪܕܪ̈ܶܐ ܕܰܐܘܥܝܰܬ ܐܱܪܥܳܐ ܒܰܥܒܳܪ ܦܽܘܩܕܳܢܳܐ. ܠܒܽܘ̈ܫܶܐ ܪ̈ܳܡܶܐ ܘܓܰܐܝ̈ܐ ܕܠܐ ܡܳܝܽܘܬܽܘܬܳܐ ܐܰܠܒܶܫܬܶܗ ܛܰܝܒܽܘܬܳܐ. ܘܡܶܢ ܕܰܚܛܳܐ. ܥܛܰܦ ܠܘܳܬ ܟܝܳܢܶܗ ܒܰܡܣܳܡ ܒܪܺܝܫܳܐ. ܐܦ ܐܠܗܳܐ ܐܰܗܦܟܶܗ ܥܕܰܡܳܐ ܠܡܽܘܟܳܟܳܐ ܘܡܰܘܬܳܐ ܘܰܚܒܳܠܐܴ. ܘܡܶܢ ܢܽܘܗܪܳܐ ܫܡܰܝܳܢܳܐ ܗܦܰܟ ܠܚܶܫܽܘܟܳܐ ܕܰܫܝܽܘܠ ܘܡܶܢ ܒܽܘܣܳܡܳܐ ܕܒܰܐܬܪܳܐ ܥܶܠܳܝܳܐ܆ ܠܚܽܘܠܛܳܢܳܐ ܕܥܰܡ ܚܰܝ̈ܘܳܬܳܐ ܘܥܰܡ ܪ̈ܽܘܚܶܐ ܒܺܝ̈ܫܳܬܳܐ. ܘܟܕ ܗܳܟܰܢܳܐ ܢܦܰܠ ܒܰܪܢܳܫܳܐ. ܠܐ ܐܱܗܡܺܝ ܡܶܢܶܗ ܥܳܒܽܘܕܳܐ. ܘܠܐ ܫܕܳܝܗܝ ܠܰܓܡܳܪ. ܐܠܐ ܒܪ̈ܰܚܡܶܐ ܐܶܬܚܰܫܰܚ ܥܰܡܶܗ. ܘܰܒܥܳܐ ܡܶܢܶܗ ܕܢܶܦܢܶܐ ܠܐܱܬܪܶܗ ܩܰܕܡܳܝܳܐ ܒܰܬܝܳܒܽܘܬܳܐ.
ܘܶܐܡܰܪܬ ܠܰܡ ܕܬܽܘܒܘ ܒܢܰܝ̈ܢܳܫܳܐ. ܘܶܐܬܦܰܢܘ ܠܘܳܬ ܐܠܗܳܐ. ܘܰܒܥܰܘ ܐܰܦܰܘ̈ܗܝ ܒܬܰܟܫܶܦܬܳܐ. ܘܗܳܐ ܒܝܕ ܪܽܘܚܳܐ ܩܳܪܶܐ ܠܗܽܘܢ ܕܬܽܘܒܘ ܒܢܰܝܴ̈ܐ ܬܰܝܳܒ̈ܐ ܘܰܐܣܶܐ ܟܺܐܒܰܝ̈ܟܘܢ ܒܰܬܝܳܒܽܘܬܳܐ. ܡܶܛܠ ܕܠܐ ܐܳܠܶܡ ܠܥܳܠܰܡ. ܘܠܐ ܠܥܳܠܰܡ ܢܳܛܰܪ ܪܽܘܓܙܶܗ. ܡܶܛܠ ܕܠܰܘ ܐܱܝܟ ܚܛܳܗܱ̈ܝܢ ܥܒܰܕ ܠܢ. ܘܳܐܦܠܐܴ ܐܝܟ ܥܰܘܠܰܢ ܦܰܪܥܰܢ.
ܡܶܛܠ ܕܳܐܠܶܦ ܫܢܻ̈ܝܢ ܒܥܰܝ̈ܢܰܝܟ ܐܰܝܟ ܝܰܘܡܳܐ ܕܶܐܬܡܳܠܝ ܕܰܥܒܰܪ. ܘܰܐܝܟ ܡܰܛܰܪܬܳܐ ܕܠܺܠܝܳܐ. ܗܳܟܰܢܳܐ ܠܰܡ ܢܰܓܺܝܪܳܐ ܪܽܘܚܳܟ. ܐܰܝܟܰܢܳܐ ܕܒܰܡܫܽܘܚܬܳܐ ܕܗܳܢܐ ܡܶܢܝܳܢܳܐ ܕܰܫܢܰܝܴ̈ܐ ܐܢ ܚܳܝܶܐ ܒܰܪܢܳܫܳܐ. ܠܐ ܡܰܡܶܐܢ ܐܰܢܬ ܕܰܬܟܰܣܶܐ ܠܰܬܝܳܒܽܘܬܶܗ. ܘܠܐܴ ܠܘܳܬ ܪܽܘܓܙܳܐ ܡܶܫܬܰܚܠܰܦ ܐܢܬ ܐܝܟ ܕܰܠܡܶܥܛܳܐ ܐܢܘܢ. ܡܶܛܠ ܕܒܰܪܢܳܫܳܐ ܠܐ ܐܶܫܟܰܚ ܠܡܶܕܰܥ ܡܰܠܝܳܐܝ̣ܬ ܕܰܐܝܢܰܘ ܨܶܒܝܳܢܳܟ. ܦܣܰܩܬ ܥܠܰܘܗܝ ܡܰܘܬܳܐ ܕܢܺܐܙܰܠ ܢܶܬܬܢܺܝܚ ܡܶܢ ܒܺܝܫܬܳܐ ܒܫܶܢܬܳܐ ܕܥܽܘܢܕܳܢܳܐ. ܟܰܕ ܡܣܰܟܶܐ ܕܒܳܬܰܪ ܠܺܠܝܳܐ ܦܳܓܰܥ ܒܶܗ ܨܰܦܪܳܐ ܕܡܰܘܥܶܐ ܠܗ̇ ܠܫܶܒܠܶܗ. ܘܥܳܒܕܳܐ ܠܰܚܡܳܐ ܕܚܰܝܷ̈ܐ ܚܰܕ̈ܬܶܐ.
ܫܰܪ̈ܒܳܬܗܽܘܢ ܠܰܡ ܫܶܢܬܳܐ ܢܶܗܘ̈ܝܳܢ. ܫܶܢܬܳܐ ܩܳܪܶܐ ܠܗܶܝܢ ܡܶܛܠ ܗܳܝ ܓܝܪ ܕܰܒܡܰܘܬܳܐ ܫܳܩ̈ܠܳܢ ܫܽܘܠܳܡܳܐ. ܘܰܠܫܶܢܬܳܐ ܕܥܽܘܢܕܳܢܳܐ ܫܳܪܟܺܝܢ ܒܰܚܒܳܠܐܴ ܕܰܒܩܰܒܪ̈ܶܐ. ܐܠܐ ܛܰܝܒܽܘܬܳܐ ܕܰܐܠܗܳܐ ܐܷܬܪܰܥܝܰܬ ܚܽܘܕܳܬܳܐ ܥܠ ܒܰܪܢܳܫܳܐ ܕܠܐ ܢܩܰܘܶܐ ܒܡܰܘܬܳܐ. ܘܡܶܠܟܰܬ ܠܶܗ ܨܰܦܪܳܐ ܕܚܽܘܕܳܬܳܐ ܐܝܟ ܕܶܐܡܰܪ ܪܽܘܚܳܐ.
ܘܰܒܨܰܦܪܳܐ ܐܰܝܟ ܥܽܘܦܝܳܐ ܬܰܚܠܶܦ. ܕܰܒܨܰܦܪܳܐ ܝܳܥܶܐ ܘܡܰܚܠܶܦ. ܘܰܒܪܰܡܫܳܐ ܚܳܡܶܐ ܘܝܳܒܶܫ. ܫܰܦܺܝܪ ܥܳܐܷܠ ܨܰܦܪܳܐ ܕܢܽܘܚܳܡܳܐ ܒܳܬܰܪ ܫܶܢܬܳܐ ܕܡܰܘܬܳܐ ܕܫܰܬܩܰܬ ܐܶܢܶܝܢ ܠܫܰܪ̈ܒܳܬܳܐ. ܘܬܽܘܒ ܣܳܐܷܡ ܨܰܦܪܳܐ ܐܚܪܺܢܳܐ ܘܪܰܡܫܳܐ ܡܶܢ ܒܳܬܰܪܟܶܢ. ܕܳܡܝܳܐ ܓܶܝܪ ܕܗܳܕܶܐ ܒܳܥܶܐ ܢܺܐܡܰܪ. ܕܰܐܝܠܶܝܢ ܕܡܰܦܪܥܺܝܢ ܒܨܰܦܪܳܐ ܕܰܩܝܳܡܬܳܐ. ܠܰܬܪܶܝܢ ܡܶܬܦܰܠܓܺܝܢ. ܗܳܠܝܢ ܕܡܰܘܥܶܝܢ ܒܨܰܦܪܳܐ ܗܳܠܝܢ ܐܶܢܘܢ. ܕܰܒܓܰܒܳܐ ܕܝܰܡܺܝܢܳܐ ܒܦܶܠܐܷܬܳܐ ܕܥܶܪ̈ܒܶܐ ܡܩܺܝܡ ܠܗܽܘܢ ܪܳܥܝܳܐ. ܗܳܠܝܢ ܕܰܒܪܰܡܫܳܐ ܕܶܝܢ ܕܚܳܡܶܐ ܘܝܳܒܶܫ ܥܽܘܦܳܝܗܘܢ ܘܠܐ ܥܳܒܕܳܐ ܫܶܒܰܠܗܽܘܢ ܚܶܛܬܳܐ ܕܟܳܢܫܳܐ ܠܐܱܘܨܰܪ ܚܰܝܷ̈ܐ. ܘܥܰܠܗܳܝ ܐܴܡܰܪ ܢܒܺܝܐ:
ܡܶܛܠ ܕܰܓܡܰܪܢ ܒܪܽܘܓܙܳܟ. ܘܰܒܚܶܡܬܳܟ ܐܷܬܕܰܠܰܚܢ. ܣܳܡܬ ܚܛܳܗܰܝ̈ܢ ܠܩܽܘܒܠܳܟ. ܗܳܝܕܶܝܢ ܕܒܰܚܛܳܗ̈ܐ ܕܰܒܢܰܝ̈ܢܳܫܳܐ ܚܳܐܱܪ ܐܠܗܳܐ ܘܡܶܬܒܰܩܶܐ ܒܗܽܘܢ. ܘܠܐ ܡܰܥܒܰܪ ܠܗܽܘܢ ܡܶܢ ܩܕܳܡ ܥܰܝ̈ܢܰܘܗܝ. ܡܶܛܠܗܳܕܐ ܟܕ ܡܶܬܝܰܐܝܰܒ ܛܽܘܒܬܳܢܳܐ ܕܰܘܝܕ. ܠܰܥܠܰܝܡܽܘܬܳܐ ܗܳܝ ܕܰܗܘܳܬ ܠܥܳܠܡܳܐ ܒܰܡܕܰܒܪܳܢܽܘܬܳܐ ܕܰܡܫܺܝܚܳܐ. ܘܚܳܐܱܪ ܗܘܳܐ ܗܳܕܐ ܒܪ̈ܰܚܡܶܐ ܚܳܢܰܬ ܘܰܐܚܝܰܬ ܡܰܓܳܢ ܠܚܰܛܳܝ̈ܐ. ܨܰܠܺܝ ܘܶܐܡܰܪ ܠܘܳܬ ܐܰܒܳܐ.
ܥܰܠܶܡܰܝܢܝ ܒܢܽܘܗܪܳܐ ܕܰܐܦܰܝ̈ܟ. ܟܕ ܢܽܘܗܪܳܐ ܕܰܐܦܰܘ̈ܗܝ ܕܰܐܒܳܐ܆ ܡܶܠܬܶܗ ܕܰܐܒܳܐ ܥܰܡܰܢܽܘܐܝܠ܆ ܗܰܘ ܕܰܒܝܰܕ ܥܡܳܕܳܐ ܩܰܕܺܝܫܳܐ ܥܰܠܡܳܗ̇ ܠܣܰܝܒܽܘܬܶܗ ܕܥܳܠܡܳܐ. ܘܰܐܥܒܰܪ ܥܽܘܬܳܩܳܗ̇ ܕܚܰܘܳܐ. ܘܥܰܒܕܶܗ ܠܐܴܕܳܡ ܥܠܰܝܡܳܐ ܡܶܢ ܒܳܬܰܪ ܕܰܣܐܷܒ ܒܥܰܘܠܐܴ. ܐܰܝܟܰܢܳܐ ܕܳܐܦ ܠܡܽܘܫܶܐ ܡܶܛܠ ܕܰܚܙܳܐ ܐܪܳܙܶܗ ܥܰܠ ܪܺܝܫ ܛܽܘܪܳܐ. ܢܽܘܗܪܳܐ ܢܣܰܟ ܥܠ ܦܰܪܨܽܘܦܶܗ ܘܥܰܠܡܳܗ̇ ܠܗܳܝ ܣܰܝܒܽܘܬܳܐ ܒܬܶܫܒܽܘܚܬܳܐ ܕܠܐ ܡܶܬܚܰܒܠܳܢܽܘܬܳܐ. ܘܒܳܬܰܪ ܗܳܠܝܢ ܡܒܰܓܶܢ ܥܰܠ ܝܰܘ̈ܡܳܬܳܐ ܩܰܕܡܳܝ̈ܐ ܕܰܥܒܰܪܘ ܒܒܺܝܫܬܳܐ ܐܡ̇ܪ:
ܡܶܛܠ ܕܟܽܠܗܘܢ ܝܰܘ̈ܡܰܝܢ ܓܡܰܪܘ ܒܪܽܘܓܙܳܟ. ܘܰܓܡܰܪܘ ܫܢܰܝ̈ܢ ܐܰܝܟ ܓܘܳܓܰܝ̈. ܝܰܘܡܰܝ̈ܢ ܫܢܰܝ̈ܢ ܒܗܽܘܢ ܫܰܒܥܺܝܢ ܫܢܺܝ̈ܢ. ܘܰܠܡܰܚܣܶܢ ܬܡܳܢܺܝܢ ܫܢܺܝ̈ܢ. ܘܣܽܘܓܐܗܶܝܢ ܥܰܡܠܳܐ ܘܟܺܐܒ̈ܐ. ܡܶܢ ܟܕ ܠܡ ܚܛܳܐ ܒܰܪܢܳܫܳܐ܆ ܠܪܽܘܓܙܳܐ ܟܺܐܢܳܐ ܗܘܳܐ ܥܰܒܕܳܐ. ܘܒܶܗ ܓܡܰܪܘ ܝܰܘ̈ܡܳܬܶܗ. ܟܕ ܡܶܬܕܰܡܶܐ ܒܚܰܝܰܘ̈ܗܝ ܡܚܺܝ̈ܠܐܷ ܠܰܓܘܳܓܰܝ̈. ܗܳܝ ܕܠܘ ܕܡܶܢ ܚܰܝܠܳܗ̇ ܢܳܣܶܒ ܢܰܘܠܳܗ̇ ܥܽܘܬܳܕܳܐ. ܐܠܐ ܡܶܢ ܪܰܚܫܳܐ ܡܚܺܝܠܐܴ ܘܬܰܚܽܘܒܳܐ ܕܟܕ ܒܥܰܡܠܐܴ ܡܶܙܕܩܰܪ ܡܶܢ ܡܰܨܝܰܬ ܕܠܺܝܠܐܴܝ̣ܬ ܒܳܠܶܐ ܘܠܐ ܡܶܬܬܚܺܝܛ. ܗܳܟܰܢܳܐ ܠܰܡ ܐܳܦ ܚܰܝܷ̈ܐ ܕܒܰܪܢܳܫܳܐ ܚܰܛܳܝܳܐ ܠܗܳܢܐ ܐܶܬܕܰܡܺܝܘ. ܒܗܳܝ ܕܶܐܡܰܪ ܬܽܘܒ ܒܰܟܬܳܒܳܐ ܕܶܐܫܰܥܝܳܐ ܘܢܰܘܠܐܴ ܕܰܓܘܳܓܰܝ̈ ܙܩܰܪܘ (ܐܫܥܝܐ ܢܛ: ܗ ܐܝܘܒ ܚ: ܝܕ). ܘܥܰܠ ܗܳܝ ܐܡ̣ܪ ܕܢܰܘܠܗ̣ܘܢ ܠܐ ܢܶܗܘܶܐ ܠܗܽܘܢ ܠܰܠܒܽܘܫܳܐ. ܡܚܺܝܠܐܴ ܗܝ ܓܝܪ ܚܛܺܝܬܳܐ ܘܠܰܝܬ ܒܰܠܒܽܘ̈ܫܶܝܗ̇ ܬܰܟܣܺܝܬܳܐ. ܐܠܐ ܟܽܠܶܗ ܥܽܘܬܳܕܳܗ̇ ܦܽܘܪܣܳܝܰܐ ܗ̄ܘ ܪܰܒܳܐ. ܘܗܺܝ ܐܱܠܒܶܫܬܶܗ ܠܒܰܪܢܳܫܳܐ ܟܽܘܬܺܝܢ̈ܝܳܬܳܐ ܕܡܶܫ̈ܟܶܐ ܡܺܝ̈ܬܶܐ. ܘܶܐܬܢܰܚܰܬ ܠܫܶܦܠܐܴ ܕܚܰܝܷ̈ܐ ܟܪ̈ܰܝܳܐ ܕܫܰܒܥܺܝܢ ܫܢܻ̈ܝܢ ܡܰܪܺܝܪ̈ܶܐ ܘܰܫܚܺܝ̈ܩܶܐ. ܡܶܛܠ ܕܰܗܘܰܘ ܕܥܰܡܠܐܴ ܘܟܺܐܒ̈ܐ. ܘܗܳܠܝܢ ܠܡ ܓܳܕ̈ܫܳܢ ܠܢ.
ܡܶܛܠ ܕܶܐܬܳܐ ܥܠܰܝܢ ܡܽܘܟܳܟܳܐ ܘܶܐܬܛܰܪܰܦܢ. ܡܽܘܟܳܟܳܐ ܗܰܘ ܕܡܶܢ ܥܒܳܪ ܦܽܘܩܕܳܢܳܐ. ܒܢܱ̈ܝ ܡܰܠܟܽܘܬܳܐ ܗܘܰܝܢ ܡܶܢ ܩܕܳܡ ܥܒܳܪ ܦܽܘܩܕܳܢܳܐ. ܘܚܰܝ̈ܐ ܕܠܐ ܥܰܡܠܐܴ ܐܝ̣ܬ ܗܘܳܐ ܠܢ ܒܦܰܪܕܰܝܣܳܐ. ܐܠܐ ܒܝܰܕ ܢܶܟܠܐܴ ܕܚܶܘܝܳܐ ܡܶܬܝܰܕܥܳܢܳܐ ܐܶܬܳܐ ܥܠܰܝܢ ܡܽܘܟܳܟܳܐ ܘܶܐܬܛܰܪܰܦܢ ܒܰܐܪܥܳܐ ܕܟܽܘ̈ܒܶܐ. ܡܶܛܠ ܕܰܚܛܺܝܬܳܐ ܐܝܟ ܙܰܪܥܳܐ ܢܶܦܠܰܬ ܒܰܐܪܥܳܐ. ܘܙܶܪܥܰܬ ܙܺܝ̈ܙܳܢܶܐ ܒܰܝܢܳܬ ܚܷ̈ܛܶܐ. ܘܥܰܠܗܳܝ ܟܕ ܚܳܐܱܪ ܢܒܺܝܳܐ ܒܗܳܠܶܝܢ ܐܡ̇ܪ:
ܡܰܢ ܝܳܕܰܥ ܥܽܘܫܢܳܐ ܕܪܽܘܓܙܳܟ ܘܕܶܚܠܬܳܐ ܕܪܽܘܓܙܳܟ. ܐܠܘ ܓܝܪ ܝܳܕܰܥ ܗܘܳܐ ܒܰܪܢܳܫܳܐ ܩܰܕܡܳܝܳܐ܆ ܕܰܥܕܰܡܳܐ ܠܗܳܕܐ ܡܶܬܥܰܫܰܢ ܪܽܘܓܙܳܐ܆ ܠܐ ܗܳܘܶܐ ܗܘܳܐ ܬܰܠܡܺܝܕܳܐ ܠܚܶܘܝܳܐ. ܘܡܶܟܺܝܠ ܕܠܐ ܡܶܫܬܰܒܩܺܝܢܰܢ ܗܳܪܟܳܐ ܢܽܘܓܪܳܐ ܕܙܰܒܢܳܐ. ܘܡܰܘܬܳܐ ܘܰܢܣܰܪܗܶܒ ܘܟܺܐܢܽܘܬܳܐ ܡܛܰܝܒܳܐ ܠܰܬܒܰܥܬܳܐ.
ܐܱܘܕܰܥܰܝܢ ܡܶܢܝܳܢܳܐ ܕܝܰܘ̈ܡܰܝܢ. ܕܢܶܥܽܘܠ ܠܠܶܒܳܐ ܕܚܟܡܬܐ. ܡܳܐ ܓܝܪ ܕܶܐܬܓܠܺܝ ܠܢ ܐܰܝܢܰܘ ܝܰܘܡܳܐ ܕܡܰܦܩܳܢܰܢ܆ ܥܠ ܕܠܐ ܡܶܬܟܰܣܶܐ ܡܶܢ ܩܕܳܡ ܥܰܝ̈ܢܰܝܢ. ܡܶܫܬܰܚܠܦܺܝܢܰܢ ܡܶܢ ܠܐ ܝܺܕܰܥܬܳܐ ܕܩܳܝܡܺܝܢܰܢ ܒܳܗ̇. ܘܰܡܒܰܛܠܺܝܢܰܢ ܡܶܢܰܢ ܥܒܴ̈ܕܶܐ ܒܺܝ̈ܫܶܐ ܘܕܽܘܒܳܪ̈ܶܐ ܕܛܰܠܝܽܘܬܳܐ. ܡܶܛܠ ܕܺܐܝܬ ܐܢܳܫ̈ܝ̣ܢ ܕܳܐܡܪܺܝܢ ܕܶܐܠܽܘ ܝܳܕܥܺܝܢ ܗܘܰܝܢ ܝܰܘܡܳܐ ܕܫܽܘܠܳܡܰܢ. ܡܩܰܕܡܺܝܢ ܗܘܰܝܢ ܘܬܳܝܒܺܝܢ ܡܶܢ ܒܺܝ̈ܫܳܬܰܢ. ܐܠܐ ܒܗܳܕܐ ܠܐ ܩܰܒܶܠ ܦܽܘܢܳܝ ܦܶܬܓܳܡܳܐ ܢܒܺܝܳܐ. ܗܰܘ ܓܝܪ ܕܢܶܚܛܶܐ ܠܐ ܓܰܒܝܳܐ ܠܗ ܘܠܐ ܡܶܢܝܳܢܳܐ ܕܝܰܘܡܰܘ̈ܗܝ ܒܳܥܶܐ ܕܢܶܕܰܥ. ܘܡܳܐ ܕܰܚܙܳܐ ܕܰܩܪܶܒ ܠܘܰܥܕܳܐ ܕܫܽܘܠܳܡܳܐ ܢܶܗܘܶܐ ܬܰܝܳܒܳܐ ܘܠܰܘ ܟܺܐܢܳܐ. ܫܰܦܺܝܪ ܡܳܕܶܝܢ ܟܰܣܺܝ ܐܠܗܳܐ ܗܳܕܐ ܡܶܢ ܒܰܪܢܳܫܳܐ. ܕܟܕ ܟܽܠܝܽܘܡ ܣܳܒܰܪ ܕܠܐ ܪܰܚܺܝܩ ܫܽܘܠܳܡܳܐ ܢܳܛܰܪ ܢܰܦܫܶܗ ܘܠܐ ܢܶܚܛܶܐ. ܐܠܐ ܫܽܘܦܪܳܐ ܕܠܐ ܡܽܘܡܳܐ ܗܳܢܰܘ. ܕܒܰܪܢܳܫܳܐ ܟܽܠ ܟܽܠܶܗ ܠܐ ܢܶܬܟܰܬܰܡ. ܘܒܳܬܰܪ ܗܳܠܝܢ ܡܨܰܠܐܷ ܢܒܺܝܐ ܘܳܐܡܰܪ:
ܐܶܬܦܰܢ ܡܳܪܝܳܐ ܥܕܰܡܳܐ ܠܐܷܡܰܬܝ. ܠܐܴ ܡܒܰܝܰܐ ܐܰܢܬ ܠܗܽܘܢ ܠܥܰܒ̈ܕܰܝܟ. ܣܰܒܰܥܰܝܢܝ ܒܨܰܦܪܳܐ ܛܰܝܒܽܘܬܳܟ. ܘܰܢܫܰܒܰܚ ܘܢܶܚܕܶܐ ܟܽܠܗܽܘܢ ܝܰܘ̈ܡܳܬܰܢ. ܨܰܦܪܳܐ ܠܥܰܡܰܢܽܘܐܝܠ ܩܳܪܶܐ. ܕܰܒܕܶܢܚܶܗ ܢܰܗܺܝܪܳܐ ܘܰܦܨܺܝܚܳܐ ܗܰܘ ܕܟܰܕ ܐܶܬܚܙܺܝ. ܒܰܛܶܠ ܡܶܢ ܐܰܪܥܳܐ ܠܺܠܝܳܐ ܕܰܚܛܺܝܬܳܐ. ܘܣܰܒܰܥ ܥܳܠܡܳܐ ܪ̈ܰܚܡܶܐ ܘܛܰܝܒܽܘܬܳܐ. ܘܶܐܬܡܠܺܝ ܦܽܘܡܳܐ ܕܥܰܡ̈ܡܶܐ ܚܰܛܳܝ̈ܐ ܫܽܘܒܚܳܐ ܘܚܰܕܽܘܬܳܐ. ܡܶܛܠ ܕܩܰܛܠܶܗ ܠܡܰܠܟܳܐ ܕܚܶܫܽܘܟܳܐ. ܘܰܐܡܺܝܬܳܗ̇ ܠܰܚܛܺܝܬܳܐ ܒܰܨܠܺܝܒܶܗ. ܘܡܺܝܬ ܥܰܘܠܐܴ ܘܰܚܝܳܐ ܒܰܪܢܳܫܳܐ. ܘܥܰܠܗܳܝ ܐܡ̇ܪ ܢܒܺܝܐ.
ܚܰܕܳܢ ܡܶܛܠ ܕܡܺܝܬ ܥܰܘܠܰܢ. ܘܰܫܢܰܝܴ̈ܐ ܕܰܚܙܰܝܢ ܒܗܶܝܢ ܒܺܝ̈ܫܳܬܳܐ. ܓܰܠܝܳܐ ܗܝ ܡܳܕܶܝܢ ܕܰܠܡܳܪܰܢ ܩܪܳܐ ܨܰܦܪܳܐ. ܗܰܘ ܕܦܰܪܣܝܳܗ̇ ܠܰܚܛܺܝܬܳܐ ܒܢܽܘܗܪܳܐ ܫܰܪܺܝܪܳܐ ܕܺܝܠܶܗ. ܘܰܐܡܺܝܬܶܗ ܠܥܰܘܠܰܢ ܒܡܰܝܴ̈ܐ ܩܰܕܺܝ̈ܫܶܐ ܕܰܥܡܳܕܳܐ. ܘܝܰܗܒ ܥܺܝܪܽܘܬܳܐ ܕܶܝܢ ܠܫܰܪ̈ܒܳܬܳܐ ܕܰܗܘܱ̈ܝ ܫܶܢܬܳܐ. ܘܰܐܥܺܝܪ ܐܶܢܶܝܢ ܡܶܢ ܕܰܡܟܽܘܬܳܐ ܕܰܚܛܺܝܬܳܐ. ܘܥܰܒ̈ܕܰܘܗܝ ܚܙܰܘ ܥܒܳܕܰܘ̈ܗܝ. ܘܰܦܢܰܘ ܚܰܛܳܝ̈ܐ ܘܩܳܡܘ ܢܳܦ̈ܠܐܷ ܡܶܢ ܡܰܦܽܘܠܬܳܐ. ܘܶܐܬܩܰܕܰܫܘ ܙܳܢܝܴ̈ܬܳܐ ܘܛܰܡܷ̈ܐܐ. ܘܶܐܬܚܰܘܰܪܘ ܡܟܰܬܡ̈ܐ. ܘܨܰܝܴ̈ܕܶܐ ܗܘܰܘ ܫܠܺܝ̈ܚܶܐ. ܘܗܶܕܝܽܘ̈ܛܶܐ ܗܘܰܘ ܚܰܟܺܝ̈ܡܶܐ. ܘܡܶܣܟܺܢ̈ܐ ܥܬܰܪܘ ܒܰܐܠܳܗܳܝܴ̈ܬܳܐ. ܘܪ̈ܳܕܽܘܦܶܐ ܗܘܰܘ ܟܳܪ̈ܽܘܙܶܐ ܕܰܫܪܳܪܳܐ. ܡܶܛܠ ܗܳܠܝܢ ܐܡ̇ܪ ܢܒܺܝܐ:
ܢܶܬܚܙܽܘܢ ܠܥܰܒܕܰܝ̈ܟ ܥܒܳܕܰܝ̈ܟ.ܘܗܶܕܪܳܟ ܥܰܠ ܒܢܰܝ̈ܗܘܢ. ܫܠܺܝ̈ܚܶܐ ܓܶܝܪ ܐܰܝܟ ܩܰܪ̈ܺܝܒܶܐ ܗܳܠܝܢ ܚܙܰܘ. ܒܢܰܝ̈ܗܘܢ ܓܝܪ ܐܰܝܠܶܝܢ ܕܰܗܘܰܘ ܠܗܘܢ ܬܰܠܡܺܝ̈ܕܶܐ ܚܙܰܘ ܫܽܘܒܚܶܗ ܘܗܶܕܪܶܗ ܕܡܰܠܟܳܐ. ܟܕ ܒܚܰܝܠܐܴ ܕܰܨܠܺܝܒܳܐ ܡܰܦܢܶܝܢ ܗܘܰܘ ܠܛܳܥܰܝܴ̈ܐ ܠܐ̮ܘܪܚܳܐ ܕܟܺܐܢܽܘܬܳܐ. ܒܳܬܰܪ ܗܳܠܝܢ ܡܨܰܠܐܷ ܘܳܐܡܰܪ:
ܬܶܗܘܶܐ ܒܰܣܺܝܡܽܘܬܶܗ ܕܡܳܪܝܳܐ ܐܰܠܳܗܰܢ ܥܠܰܝܢ. ܕܰܥܒܳܕ ܐܺܝ̈ܕܰܘܗܝ ܐܰܬܩܶܢ ܥܠܰܝܢ. ܘܒܰܥܒܳܕ ܐܺܝ̈ܕܰܘܗܝ ܬܰܩܢܰܢ. ܟܕ ܒܟܽܠܙܒܰܢ ܒܰܣܺܝܡܳܐ ܐܝ̣ܬܰܘܗܝ ܡܳܪܝܳܐ. ܘܠܰܝܬ ܐܶܡܰܬܝ ܕܶܐܬܝܰܕܥܰܬ ܒܰܣܺܝܡܽܘܬܶܗ. ܐܠܐ ܟܕ ܩܰܒܶܠ ܚܠܳܦ ܡܰܣܟ̈ܠܳܢܶܐ ܡܰܘܬܳܐ ܨܶܒܝܳܢܳܝܳܐ. ܗܳܕܐ ܓܝܪ ܟܕ ܗܘܳܬ ܥܰܠ ܒܰܪܢܳܫܳܐ ܐܰܬܩܢܰܬ ܥܠܰܘܗܝ ܥܒܳܕ ܐܻܝ̈ܕܰܘܗܝ ܕܰܐܠܗܳܐ. ܘܰܐܠܒܫܰܬܶܗ ܠܐ ܡܳܝܽܘܬܽܘܬܳܐ. ܘܒܰܥܒܳܕ ܐܻܝ̈ܕܰܘܗܝ ܬܰܩܶܢܬܶܗ ܕܥܰܛܦܬܶܗ ܠܐ ܡܶܬܚܰܒܠܳܢܽܘܬܳܐ ܒܰܩܝܳܡܬܳܐ. ܘܡܶܟܺܝܠ ܒܝܰܕ ܡܰܘܬܶܗ ܒܰܣܺܝܡܳܐ ܕܰܐܠܗܳܐ. ܐܶܬܬܰܩܰܢ ܒܰܪܢܳܫܳܐ ܕܠܐܱܠܳܗܳܐ ܫܽܘܒܚܳܐ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܚܕ
ܡܰܘܕܰܥ ܝܽܘܠܦܳܢܳܐ ܠܘܳܬ ܐܰܝܠܶܝܢ ܕܡܶܬܓܰܘܣܺܝܢ ܒܰܡܪܰܝܡܳܐ܆ ܘܰܡܠܰܒܶܒ ܠܰܐܝܠܶܝܢ ܕܰܬܟܺܝܠܺܝܢ ܥܰܠ ܐܰܠܳܗܳܐ. ܘܡܰܘܕܰܥ ܥܰܠ ܡܶܙܕܰܟܝܳܢܽܘܬܶܗ ܕܳܐܟܶܠܩܰܪܨܳܐ ܘܥܰܠ ܡܰܦܽܘܠܬܶܗ.
ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܐ ܩܥܳܐ ܗܘܳܐ ܒܰܢܒܺܝܽܘܬܶܗ: ܐܺܝܕܰܝܴ̈ܐ ܕܰܡܪ̈ܰܦܝܳܢ ܐܶܬܚܰܝ̈ܠܢ. ܘܒܽܘܪ̈ܟܶܐ ܕܪ̈ܳܥܠܳܢ ܐܶܫܬܰܪܰܪ̈ܶܝܢ ܐܶܡܰܪܘ ܠܰܙܥܽܘܪ̈ܰܝ ܠܶܒܳܐ ܐܷܬܚܰܝܠܘ ܘܠܐܴ ܬܶܕܚܠܽܘܢ. ܗܳܐ ܐܰܠܳܗܟܽܘܢ ܬܳܒܽܘܥܳܐ ܐܳܬܶܐ. ܐܰܠܗܳܐ ܦܳܪܽܘܩܳܐ ܐܳܬܶܐ ܘܦܳܪܶܩ ܠܟܽܘܢ. ܗܳܝܕܶܝܢ ܢܶܬܦܰܬܚܴ̈ܢ ܥܰܝ̈ܢܰܝܗܽܘܢ ܕܰܥܘܺܝܪ̈ܶܐ܆ ܘܶܐܕܢܰܝ̈ܗܘܢ ܕܚܰܪ̈ܫܶܐ ܢܶܫܡ̈ܥܳܢ (ܐܫܥܝܐ ܠܗ: ܓ-ܗ). ܗܳܠܝܢ ܐܶܡܰܪ ܛܽܘܒܬܳܢܳܐ ܐܶܫܰܥܝܳܐ. ܗܰܘ ܪܳܡ ܒܓܶܠܝܴ̈ܢܶܐ. ܐܚܝܳܢܽܘܬܳܐ ܡܶܕܶܡ ܕܠܐ ܪܰܚܺܝܩܳܐ ܩܢܶܝܢ. ܠܘܳܬ ܐܰܝܠܶܝܢ ܕܶܐܬܢܰܒܺܝ ܛܽܘܒܬܳܢܐ ܕܰܘܝܕ. ܝܰܘܡܳܢܳܐ ܒܡܰܙܡܽܘܪܳܐ ܗܳܢܐ ܕܬܶܫܥܺܝܢ ܘܚܰܕ܆ ܠܗܰܠ ܓܶܝܪ ܐܴܡܰܪ ܗܘܳܐ܆ ܕܢܶܬܚܰܝܠܽܘܢ ܐܰܝܠܶܝܢ ܕܰܡܣܰܒܪܺܝܢ ܒܡܳܪܝܳܐ. ܘܢܶܫܬܰܪܪܽܘܢ ܐܰܝܠܝܢ ܕܰܡܚܺܝܠܺܝܢ ܒܬܰܪ̈ܥܝܳܬܗܘܢ. ܘܢܶܕܥܽܘܢ ܕܳܐܬܶܐ ܐܰܠܗܳܐ ܘܡܶܬܓܠܐܷ ܘܗܳܘܶܐ ܢܽܘܗܪܳܐ ܠܰܣܡܰܝܴ̈ܐ. ܘܫܶܡܥܳܐ ܠܕܽܘ̈ܓܶܐ. ܘܗܰܠܟܬܳܐ ܠܰܚܓܺܝܪ̈ܶܐ. ܘܳܐܣܝܳܐ ܠܰܟܪ̈ܺܝܗܶܐ. ܕܰܘܝܕ ܐܰܠܗܳܝܳܐ ܕܕܳܡ̈ܝܳܢ ܠܗܳܠܝܢ ܡܶܬܢܰܒܶܐ ܘܳܐܡܰܪ:
ܝܳܬܶܒ ܒܣܶܬܳܪܶܗ ܕܰܡܪܰܝܡܳܐ ܘܰܒܛܶܠܳܠܶܗ ܕܰܐܠܳܗܳܐ ܡܶܫܬܰܒܰܚ. ܠܐ ܬܶܬܡܚܶܠ ܘܠܐ ܬܶܕܚܰܠ ܘܠܐ ܬܶܬܟܡܰܪ ܡܶܢ ܐܘ̈ܠܨܳܢܶܐ. ܒܣܶܬܪܳܐ ܕܰܐܠܳܗܳܐ ܝܳܬܶܒ ܐܰܢܬ. ܘܰܒܛܶܠܳܠܳܐ ܡܥܰܠܝܳܐ ܕܠܐ ܡܶܬܚܣܶܢ ܡܶܫܬܰܒܰܚ ܐܰܢܬ. ܘܠܐ ܢܙܺܝܥܽܘܢܳܟ ܩܴ̈ܠܐܷ ܕܗܰܓܳܓܽܘܬܳܐ ܕܡܰܫܡܰܥ ܐܳܟܶܠܩܰܪܨܳܐ. ܗܳܐ ܠܓܰܘ ܡܶܢ ܫܽܘܪܳܐ ܥܳܡܰܪ ܐܰܢܬ. ܘܒܶܝܬ ܓܰܘܣܳܐ ܪܰܒܳܐ ܟܪܺܝܟ ܠܳܟ. ܘܡܳܐ ܕܩܳܐܷܡ ܠܩܽܘܒܠܳܟ ܘܡܳܬܰܚ ܩܶܫܬܶܗ.
ܐܡ̣ܪ ܠܡܳܪܝܳܐ ܬܽܘܟܠܳܢܝ. ܘܒܶܝܬ ܓܰܘܣܝ ܐܰܠܳܗܝ ܕܰܬܟܺܝܠ ܐܢܳܐ ܥܠܰܘܗܝ. ܠܐ ܠܰܡ ܬܶܬܦܢܶܐ ܠܘܳܬ ܙܰܕܺܝܩܽܘܬܳܟ. ܘܠܐ ܬܶܒܥܶܐ ܕܡܶܢ ܚܶܟܡܬܳܟ ܬܶܣܕܽܘܪ ܥܰܡܶܗ ܩܪܳܒܳܐ. ܠܘܳܬ ܐܰܠܳܗܳܐ ܚܽܘܪ. ܥܠܰܘܗܝ ܐܶܣܬܡܰܟ. ܗܽܘ ܢܶܗܘܶܐ ܬܽܘܟܠܳܢܳܟ. ܗܽܘ ܢܶܗܘܶܐ ܒܶܝܬ ܓܰܘܣܳܟ.
ܗܽܘ ܢܦܰܨܶܝܟ ܡܶܢ ܦܰܚܳܐ ܕܬܽܘܩܰܠܬܳܐ. ܘܡܶܢ ܡܰܡܠܠܐܴ ܕܰܣܪܺܝܩܽܘܬܳܐ. ܘܡܶܢ ܪ̈ܽܘܚܶܐ ܕܰܓ̈ܠܳܬܳܐ. ܐܰܝܠܝܢ ܕܰܒܫܽܘ̈ܥܝܳܬܳܐ ܒܺܝ̈ܫܳܬܳܐ ܘܰܒܡܰܡܠܠܐܴ ܕܛܳܥܝܽܘܬܳܐ ܢܳܦ̈ܠܳܢ ܥܰܠ ܗܰܘܢܳܐ ܘܫܳܓ̈ܫܳܢ ܘܕܳܠܚܴ̈ܢ ܠܶܗ. ܘܠܐܴ ܢܶܫܒܽܘܩ ܠܦܰܚܳܐ ܕܰܛܡܺܝܪ ܒܚܶܫܽܘܟܳܐ ܕܰܢܨܽܘܕ ܠܪܶܓܠܳܟ ܒܰܡܨܺܝܕܬܳܐ ܕܰܐܒܕܳܢܳܐ. ܗܳܢܐ ܕܶܝܢ ܦܰܚܳܐ ܐܝ̣ܬܰܘܗܝ ܗܰܘ ܩܰܕܡܳܝܳܐ ܕܰܛܡܰܪ ܚܶܘܝܳܐ ܒܡܶܐܟܽܘܠܬܳܐ. ܘܰܗܘܳܐ ܬܽܘܩܰܠܬܳܐ ܠܰܕܒܶܝܬ ܐܳܕܳܡ ܒܦܰܪܕܰܝܣܳܐ. ܘܡܰܡܠܠܐܴ ܕܰܣܪܺܝܩܽܘܬܳܐ. ܡܰܣܒܪܳܢܽܘܬܳܐ ܕܰܓܳܠܬܳܐ ܕܰܐܣܒܰܪ ܠܚܰܘܳܐ ܘܠܐܴܕܳܡ ܡܶܛܠ ܐܺܝܠܳܢܳܐ. ܕܰܒܝܰܘܡܳܐ ܕܳܐܟܠܺܝܢ ܡܶܢܶܗ ܡܶܬܦܰܬܚܴ̈ܢ ܥܰܝ̈ܢܰܝܗܘܢ. ܘܗܳܘܶܝܢ ܐܝܟ ܐܰܠܗܳܐ ܝܳܕ̈ܥܰܝ ܛܳܒܬܳܐ ܘܒܺܝܫܬܳܐ. ܡܳܕܶܝܢ ܗܰܘ ܕܶܐܡܰܪ ܠܡܳܪܝܳܐ ܢܶܗܘܶܐ ܠܶܗ ܬܽܘܟܠܳܢܳܐ ܘܡܶܢ ܦܰܚܳܐ ܗܰܘ ܡܦܰܨܶܐ ܠܶܗ. ܘܡܶܢ ܡܰܡܠܠܐܴ ܕܰܣܪܺܝܩܽܘܬܳܐ ܡܫܰܘܙܶܒ ܠܶܗ. ܦܳܪܶܣ ܗܽܘ ܓܶܦܰܘ̈ܗܝ ܘܰܡܣܰܬܰܪ ܠܶܗ ܠܓܰܘ ܡܶܢܗܘܢ. ܐܰܝܟ ܕܶܐܡܰܪ ܪܽܘܚܳܐ.
ܕܒܶܐܒܪ̈ܰܘܗܝ ܢܦܰܨܶܝܟ ܘܰܬܚܶܝܬ ܟܶܢܦܰܘ̈ܗܝ ܬܶܣܬܰܬܰܪ. ܡܳܢܳܐ ܐܶܢܘܢ ܐܷܒܪ̈ܶܐ ܕܰܐܠܳܗܽܘܬܳܐ. ܘܡܳܢܳܐ ܐܶܢܘܢ ܟܶܢܦ̈ܐ܆ ܡܰܠܦܳܢܽܘܬܳܐ ܓܡܺܝܪܬܳܐ ܕܰܒܝܰܕ ܡܳܪܢ. ܐܶܒܪ̈ܶܐ ܗܘܳܬ ܠܥܰܡ̈ܡܶܐ ܕܗܰܝܡܶܢܘ ܒܰܣܒܰܪܬܳܐ. ܐܪ̈ܳܙܶܐ ܕܶܝܢ ܘܦܷ̈ܠܐܴܬܳܐ ܕܰܒܝܰܕ ܡܽܘܫܶܐ. ܘܒܰܢܒܺܝܷ̈ܐ ܘܰܒܢܳܡܽܘܣܳܐ. ܘܰܐܝܟ ܕܒܶܐܒܪ̈ܶܐ ܐܦ ܒܟܶܢ̈ܦܶܐ ܡܣܰܬܰܪ ܐܠܗܳܐ ܠܥܰܡܳܐ ܩܰܕܺܝܫܳܐ ܕܝܳܬܶܒ ܒܣܶܬܳܪܶܗ. ܕܺܐܝܬܶܝܗ̇ ܥܺܕܬܳܐ ܗܳܝ ܕܺܐܝܬܶܝܗ̇ ܒܰܕܡܽܘܬ ܢܶܫܪܳܐ ܕܛܳܐܷܣ ܥܠ ܩܶܢܶܗ ܘܥܠ ܦܰܪ̈ܽܘܓܰܘܗܝ ܡܪܰܚܶܦ. ܡܰܐܛܶܠ ܥܠܶܝܗ̇ ܘܥܠ ܒܢܶܝ̈ܗ̇. ܘܰܬܚܶܝܬ ܛܶܠܳܠܶܗ ܡܶܫܬܰܒܰܚ ܥܰܡܳܐ ܕܰܒܓܰܘܳܗ̇. ܟܕ ܚܰܕܰܪ ܠܶܗ ܙܰܝܢܳܐ ܐܰܠܗܳܝܳܐ ܫܪܳܪܳܐ ܕܗܰܝܡܳܢܽܘܬܳܐ. ܐܰܝܟ ܕܶܐܡܰܪ ܪܽܘܚܳܐ:
ܙܰܝܢܳܐ ܢܰܚܕܪܳܟ ܩܽܘܫܬܶܗ. ܗܳܢܰܘ ܙܰܝܢܳܐ ܕܰܡܙܰܟܶܐ ܠܩܰܕܺܝ̈ܫܶܐ ܫܪܳܪܳܐ. ܡܶܛܠ ܕܟܽܠܗܘܢ ܟܡܺܐܢܰܘ̈ܗܝ ܕܳܐܟܶܠܩܰܪܨܳܐ ܕܰܓܳܠܽܘܬܳܐ ܘܰܡܪܰܡܝܳܢܽܘܬܳܐ ܐܶܢܘܢ. ܘܕܰܓܳܠܽܘܬܳܐ ܡܡܰܠܶܠ. ܘܒܰܫܪܳܪܳܐ ܠܐܴ ܡܶܫܟܰܚ ܩܳܐܷܡ. ܙܰܝܢܳܐ ܕܠܽܘܩܒܰܠ ܗܳܢܐ ܫܪܳܪܰܐ ܗܘ. ܘܰܫܪܳܪܳܐ ܗܽܘܝܽܘ ܡܳܪܢ. ܐܡ̣ܪ ܓܝܪ ܐܶܢܳܐ ܐܝ̣ܬܰܝ ܐܽܘܪܚܳܐ ܘܚܰܝܷ̈ܐ ܘܰܫܪܳܪܳܐ (ܝܘܚܢܢ ܝܕ: ܘ). ܡܳܕܶܝܢ ܛܳܒܳܐܝ̣ܬ ܐܰܠܶܦ ܡܳܪܢ ܕܙܰܝܢܳܐ ܢܶܗܘܶܐ ܚܕܺܝܪ ܠܟ ܕܰܫܪܳܪܳܐ. ܐܶܢܕܶܝܢ ܫܪܳܪܳܐ ܢܶܗܘܶܐ ܚܳܕܰܪ ܠܢ. ܠܰܝܬ ܠܢ ܕܶܚܠܬܳܐ ܡܶܢ ܩܪ̈ܳܒܶܐ ܕܡܶܬܥܰܬܕܺܝܢ ܥܠܰܝܢ ܡܶܢ ܕܰܓܳܠܽܘܬܳܐ. ܐܡ̣ܪ ܓܝܪ ܪܽܘܚܳܐ:
ܠܐܴ ܬܶܕܚܰܠ ܡܶܢ ܕܶܚܠܬܶܗ ܕܠܺܠܝܳܐ. ܘܡܶܢ ܓܶܐܪܳܐ ܕܦܳܪܰܚ ܒܺܐܝܡܳܡܳܐ. ܘܡܶܢ ܡܶܠܬܳܐ ܕܰܡܗܰܠܟܳܐ ܒܚܶܫܽܘܟܳܐ. ܘܡܶܢ ܪܽܘܚܳܐ ܕܫܳܝܕܳܐ ܒܛܰܗܪܳܐ. ܕܶܚܠܬܳܐ ܕܠܺܠܝܳܐ ܩܳܪܶܐ ܠܰܩܪ̈ܳܒܶܐ ܕܰܡܙܺܝܥܺܝܢ ܕܰܝ̈ܘܶܐ ܠܽܘܩܒܰܠ ܩܰܕܺܝ̈ܫܶܐ. ܡܶܛܠ ܕܰܒܚܶܫܽܘܟܳܐ ܦܰܚ̈ܐ ܛܳܡܪܺܝܢ. ܘܠܰܝܬ ܠܗܽܘܢ ܦܰܪܶܗܣܺܝܰܐ ܕܓܰܠܝܳܐܝ̣ܬ ܢܚܰܘܽܘܢ ܒܺܝܫܽܘܬܗܘܢ. ܘܰܐܝܟ ܓܰܢܳܒ̈ܐ ܕܟܕ ܥܰܫܺܝܢܺܝܢ ܒܚܰܝܠܐܴ. ܠܐ ܓܒܶܐ ܠܗܽܘܢ ܙܰܒܢܳܐ ܕܺܐܝܡܳܡܳܐ ܐܝܟ ܥܶܕܳܢ̈ܐ ܚܶܫܽܘ̈ܟܶܐ ܕܠܰܝ̈ܠܰܘܳܬܳܐ. ܗܳܟܰܢܳܐ ܒܥܶܠܕ̈ܒܳܒܶܐ ܟܳܡ̈ܢܰܝ ܠܚܰܝܰܝ̈ܢ. ܘܰܒܓܰܢܳܒܽܘܬܳܐ ܛܳܡܪܺܝܢ ܦܰܚ̈ܐ ܠܬܰܡܺܝ̈ܡܶܐ ܗܳܢܰܘ ܒܓܰܘ ܥܰܡܛܳܢܳܐ ܕܰܪ̈ܓܺܝܓܳܬܳܐ ܐܝܟ ܕܰܒܠܺܠܝܳܐ ܡܚܰܦܶܝܢ ܨܶܢܥܴ̈ܬܗܘܢ. ܘܒܺܐܝܡܳܡܳܐ ܐܝܟ ܓܶܐܪܳܐ ܦܳܪܰܚ ܦܰܚܳܐ ܕܰܨܢܺܝܥܳܐ. ܘܩܰܠܺܝܠܳܐܝ̣ܬ ܡܢ ܬܰܪܥܳܐ ܕܰܚܙܳܬܳܐ ܥܳܐܷܠ ܟܳܡܶܢ ܒܓܰܘ ܠܶܒܳܐ. ܘܗܽܘ ܓܶܐܪܳܐ ܗܳܘܶܐ ܛܰܗܪܳܐ ܚܰܡܺܝܡܳܐ ܥܰܠ ܢܰܦܫܳܐ. ܘܡܳܐ ܕܫܰܓܪܳܗ̇ ܒܝܰܩܕܳܢܳܐ ܕܪܶܓܬܳܐ. ܡܶܬܚܰܠܰܦ ܠܪܽܘܚܳܐ ܕܙܳܢܝܽܘܬܳܐ. ܘܳܐܫܶܕ ܗܽܘ ܥܠܶܝܗ̇ ܪܶܬܚܳܐ ܕܫܽܘܠܗܳܒܳܐ ܘܟܕ ܐܰܠܦܷ̈ܐ ܘܪ̈ܶܒܘܳܬܳܐ ܕܚܰܝܠܰܘܴ̈ܬܳܐ ܗܳܢܘܢ ܕܕܰܠܩܽܘܒܠܳܐ ܟܪܺܝܟܺܝܢ ܠܰܡܕܺܝܢܬܶܗ ܘܒܳܢܶܝܢ ܩܰܠܩܽܘ̈ܡܶܐ ܕܕܰܓܳܠܽܘܬܳܐ. ܘܚܳܦܪܺܝܢ ܟܡܺܐܢ̈ܐ ܕܡܰܛܥܝܳܢܽܘܬܳܐ ܘܗܶܢܘܢ ܡܶܢܗܘܢ ܚܳܝܒܺܝܢ ܘܰܠܒܶܣܬܪܳܐ ܗܳܦܟܺܝܢ ܒܰܩܪܳܒܗܘܢ. ܘܢܳܦܠܺܝܢ ܡܶܢ ܣܶܛܪܶܗ ܐܱܠܦܷ̈ܐ ܕܰܣܠܶܩܘ ܒܙܰܝܢܳܐ ܕܰܚܫܰܝ̈ ܒܶܣܪܳܐ. ܘܪ̈ܶܒܘܳܬܳܐ ܕܶܐܬܥܰܠܺܝܘ ܒܛܳܥܝܽܘܬܳܐ ܕܶܐܪ̈ܺܝܛܺܝܩܽܘ ܘܰܕܚܰܢ̈ܦܶܐ. ܡܶܢ ܝܰܡܺܝܢܶܗ ܐܝܟ ܕܶܐܡܰܪ܆
ܢܶܦܠܽܘܢ ܡܶܢ ܣܶܛܪܳܟ ܐܱܠܦܷ̈ܐ. ܘܪ̈ܶܒܘܳܬܳܐ ܡܶܢ ܝܰܡܺܝܢܳܟ. ܘܰܠܘܳܬܳܟ ܠܐܴ ܢܶܬܩܰܪܒܽܘܢ. ܕܰܐܝܟ ܗܳܟܰܢܳܐ ܓܝܪ ܡܶܬܛܰܝܒܺܝܢ ܚܰܝܠܰܘܴ̈ܬܳܐ ܕܚܶܫܽܘܟܳܐ ܡܳܐ ܕܡܶܫܬܰܡܪܺܝܢ ܥܰܠ ܥܰܡܳܐ ܩܰܕܺܝܫܳܐ. ܘܡܶܢ ܝܰܡܺܝܢܳܐ ܘܡܶܢ ܣܶܡܳܠܐܴ ܡܙܺܝܥܺܝܢ ܩܪܳܒܳܐ. ܚܰܫ̈ܐ ܘܰܪ̈ܓܺܝܓܳܬܳܐ ܕܒܶܣܪܳܐ ܗܳܢܰܘ ܡܶܢ ܝܰܡܺܝܢܳܐ ܚܰܫܳܐ ܕܪܳܡܽܘܬܳܐ ܘܰܕܪܺܝܫܳܢܽܘܬܳܐ܆ ܘܟܕ ܕܶܝܢ ܡܶܫܬܰܪܰܪ ܠܗ ܪܶܥܝܳܢܳܐ ܡܶܢ ܟܽܠܗܘܢ ܟܡܺܐܢ̈ܐ ܗܳܠܝܢ ܡܶܬܦܰܨܶܐ. ܘܰܠܘܳܬ ܗܳܢܐ ܡܶܬܩܰܪܒܺܝܢ ܐܰܝܟܰܢܳܐ ܕܳܐܦ ܛܽܘܒܬܳܢܳܐ ܚܶܙܰܩܝܳܐ. ܚܙܳܐ ܗܘܳܐ ܠܙܳܟܽܘܬܳܐ ܗܳܝ ܕܰܗܘܳܬ ܠܗ ܡܶܢ ܡܰܠܟܳܐ ܕܳܐܬܽܘܪ ܘܡܶܢ ܡܰܫܪ̈ܝܳܬܶܗ. ܘܰܢܦܰܠܘ ܡܶܢ ܣܶܛܪܶܗ ܐܰܠܦ̈ܐ ܕܳܐܬܽܘܪ̈ܳܝܶܐ ܘܪ̈ܶܒܘܳܬܳܐ ܡܶܢ ܝܰܡܺܝܢܶܗ܆ ܘܰܠܘܳܬܶܗ ܠܐ ܐܷܬܩܰܪܰܒܘ ܗܘܰܘ. ܒܥܰܝ̈ܢܰܘܗܝ ܕܶܝܢ ܡܶܢ ܪܽܘܚܩܳܐ ܚܙܳܐ ܐܶܢܘܢ. ܟܕ ܒܪܽܘܡܚܳܐ ܕܠܳܐ ܡܶܬܚܰܙܝܳܐ ܕܡܰܠܰܐܟܳܐ ܚܰܪ̈ܺܝܒܳܢ ܗܘܱ̈ܝ ܘܫܰܕ̈ܝܳܢ ܫܠܰܕ̈ܐ ܕܳܐܬܽܘܪ̈ܳܝܶܐ ܕܰܚܢܺܝ̈ܩܶܐ. ܡܶܛܠܗܳܕܐ ܐܡ̇ܪ ܪܽܘܚܳܐ.
ܐܶܠܐ ܒܥܰܝ̈ܢܰܝܟ ܒܰܠܚܽܘܕ ܬܶܚܙܶܐ ܘܦܽܘܪܥܳܢܗܘܢ ܕܪ̈ܰܫܺܝܥܶܐ ܬܶܚܙܶܐ. ܕܰܒܗܳܢܐ ܥܳܠܡܳܐ ܢܶܚܙܶܐ ܐܢܳܫ ܒܥܰܝܢܳܐ ܕܪܽܘܚܳܐ. ܕܰܐܝܟܰܢ ܢܳܦܠܺܝܢ ܚܰܝܠܰܘܴ̈ܬܳܐ ܕܚܶܫܽܘܟܳܐ. ܘܦܽܘܪܥܳܢܗܘܢ ܕܪ̈ܰܫܺܝܥܶܐ ܗܳܦܶܟ ܥܠܰܝܗܘܢ. ܢܰܦܫܳܐ ܕܰܕܟܶܐ ܚܰܘܪܳܗ̇ ܡܶܢ ܚܰܫ̈ܐ ܕܰܪ̈ܓܺܝܓܳܬܳܐ. ܠܗ ܠܰܫ̈ܠܰܕܶܐ ܡܶܬܝܰܕܥܳܢܝܴ̈ܬܳܐ ܡܰܐܠܽܘܢ ܚܳܙܶܝܢ܆ ܐܶܠܐ ܒܰܩܢܽܘܡܗܽܘܢ ܡܰܪܓܫܺܝܢ ܒܙܳܟܽܘܬܳܐ. ܚܙܰܐܘܽܗܝ ܡܶܢ ܟܰܕܽܘ ܠܗܰܘ ܕܡܶܬܟܰܬܰܫ ܕܰܡܫܰܦܰܠ ܘܰܫܕܶܐ ܬܚܶܝܬ ܪ̈ܶܓܠܰܝܗܘܢ. ܬܰܡܳܢ ܓܶܝܪ ܚܳܙܶܐ ܥܰܡܳܐ ܕܰܐܠܗܳܐ ܦܽܘܪܥܳܢܳܐ ܕܪ̈ܰܫܺܝܥܶܐ. ܟܕ ܡܫܰܪܶܐ ܕܰܢܙܰܡܰܪ ܐܝܟ ܕܰܐܠܶܦ ܪܽܘܚܳܐ
ܡܶܛܠ ܕܰܐܢܬ ܗܽܘ ܡܳܪܝܳܐ ܬܽܘܟܠܳܢܝ܇ ܕܒܰܡܪ̈ܰܘܡܶܐ ܣܳܡܬ ܡܰܥܡܪܳܟ. ܚܳܙܶܝܢ ܠܶܗ ܠܰܡܥܰܕܪܳܢܗܽܘܢ ܟܽܠܗܘܢ ܩܰܕܺܝ̈ܫܶܐ. ܘܡܶܫܬܰܘܕܥܺܝܢ ܬܽܘܟܠܳܢܗܘܢ ܕܒܰܡܪ̈ܰܘܡܶܐ ܗܰܘ ܘܰܠܥܶܠ ܡܶܢܟܽܠ ܐܝ̣ܬܰܘܗܝ. ܘܬܽܘܒ ܠܐܴ ܩܳܪܒܳܐ ܠܗܽܘܢ ܒܺܝܫܬܳܐ. ܘܠܐ ܡܶܬܢܰܣܶܝܢ ܒܰܡܚܽܘܬܳܐ ܕܡܶܢ ܒܥܶܠܕ̈ܒܳܒܶܐ ܐܝܟ ܕܶܐܡܰܪ ܪܽܘܚܳܐ:
ܠܐܴ ܬܶܩܪܽܘܒ ܠܳܟ ܒܺܝܫܬܳܐ. ܘܰܡܚܽܘܬܳܐ ܠܐܴ ܬܶܬܩܰܪܰܒ ܠܡܰܫܟܢܳܟ. ܒܗܳܝ ܕܠܐ ܡܶܫܟܚܳܐ ܒܺܝܫܬܳܐ ܕܬܶܣܥܽܘܪ ܨܶܒܝܳܢܳܗ̇. ܡܳܢܳܐ ܕܶܝܢ ܐܡ̇ܪ ܐܢܳܐ ܗܳܕܐ܆ ܘܳܐܦܠܳܐ ܓܶܝܪ ܡܶܫܬܟܰܚ ܗܰܘ ܕܡܰܥܒܶܕ ܒܺܝܫܬܳܐ. ܒܪܰܡ ܕܶܝܢ ܫܪܳܪܳܐ ܢܺܐܡܰܪ܆ ܐܱܝܟܰܢܳܐ ܕܰܩܕܳܡ ܥܳܠܡܳܐ ܗܳܢܐ ܠܰܝܬ ܗܘܳܐ ܒܺܝܫܬܳܐ. ܗܳܟܰܢܳܐ ܐܳܦܠܳܐ ܒܳܬܪܶܗ ܬܶܗܘܶܐ ܐܝ̣ܬܶܝܗ̇. ܡܶܛܠ ܕܰܐܝܟܰܢܳܐ ܕܫܰܪܝܰܬ ܟܰܕ ܫܰܪܺܝ. ܗܳܟܰܢܳܐ ܒܳܛܠܳܐ ܡܳܐ ܕܰܡܫܰܠܶܡ. ܘܰܕܠܐܴ ܬܽܘܩ̈ܠܳܬܳܐ ܡܰܦܪܚܺܝܢ ܠܗܽܘܢ ܠܟܺܐܢ̈ܐ ܒܳܐܐܱܪ ܠܐܘܪܥܶܗ ܕܡܳܪܢ. ܐܝܟ ܕܦܰܫܶܩ ܪܽܘܚܳܐ ܘܐܡ̣ܪ:
ܡܶܛܠ ܠܰܡ ܕܰܠܡܰܠܰܐܟܰܘ̈ܗܝ ܢܦܰܩܶܕ ܥܠܰܝܟ܆ ܕܰܢܢܰܛܪܽܘܢܳܟ ܒܟܽܠܗܶܝܢ ܐܽܘܪ̈ܚܳܬܳܟ. ܘܥܰܠ ܕܪ̈ܳܥܰܝܗܽܘܢ ܢܶܩܫܠܽܘܢܳܟ. ܕܠܳܐ ܬܶܬܩܶܠ ܒܪܶܓܠܳܟ. ܗܳܠܶܝܢ ܓܶܝܪ ܦܶܬܓܳܡ̈ܐ ܬܳܢܶܐ ܗܘܳܐ ܐܳܟܶܠܩܰܪܨܳܐ ܠܥܰܡܰܢܽܘܐܝܠ. ܟܕ ܡܓܰܪܶܓ ܗܘܳܐ ܠܶܗ ܕܢܶܦܶܠ ܒܦܰܚܳܐ ܕܪܳܡܽܘܬܳܐ. ܘܰܐܝܟ ܐܰܝܢܳܐ ܕܰܬܟܺܝܠ ܥܰܠ ܢܰܦܫܶܗ ܡܶܢ ܟܶܢܦܳܐ ܕܗܰܝܟܠܳܐ ܠܥܽܘܡܩܳܐ. ܕܗܺܝ ܗܳܕܐ ܐܶܠܽܘ ܥܒܰܕ ܗܰܘ ܕܰܪܟܺܝܒ ܥܰܠ ܟܪ̈ܽܘܒܶܐ܆ ܐܝܟ ܕܶܐܡܰܪ ܢܒܺܝܳܐ:
ܕܛܳܣ ܥܰܠ ܟܶܢܦ̈ܐ ܕܪܽܘܚܳܐ. ܘܟܰܕ ܠܳܐ ܡܳܛܶܐ ܗܘܳܐ ܠܶܗ ܡܶܕܶܡ ܕܰܡܣܰܓܶܦ. ܐܶܠܐ ܓܳܚܶܟ ܗܘܳܐ ܡܳܪܽܘܕܳܐ ܒܕܳܐܚܶܕ ܠܶܗ ܒܦܰܚܳܐ ܕܪܳܡܽܘܬܳܐ܆ ܡܶܛܠܗܳܕܐ ܟܕ ܡܶܬܚܰܙܝܳܐ ܡܶܙܕܰܟܝܳܢܽܘܬܶܗ ܕܰܢܟܺܝܠܳܐ. ܦܰܢܺܝ ܠܶܗ ܡܳܪܢ ܦܶܬܓܳܡܳܐ: ܕܰܟܬܺܝܒ ܕܠܐܴ ܬܢܰܣܶܐ ܠܡܳܪܝܳܐ ܐܱܠܳܗܳܟ (ܡܬܝ ܕ: ܙ). ܘܗܺܝ ܠܰܡ ܗܳܕܐ ܕܢܶܒܥܶܐ ܐܢܳܫ ܕܢܶܦܣܰܥ ܥܰܠ ܐܰܝܠܶܝܢ ܕܪ̈ܳܡܳܢ ܡܶܢ ܟܝܳܢܳܐ. ܡܢܰܣܳܝܘ ܡܢܰܣܶܐ ܠܡܳܪܝܳܐ܆ ܘܒܳܗ̇ ܒܰܕܡܽܘܬܳܐ ܐܰܟܡܰܢ ܕܰܢܚܰܘܶܐ ܕܰܒܡܰܟܺܝܟܽܘܬܳܐ ܕܳܫܶܗ ܥܰܡܰܢܽܘܐܝܠ ܠܰܐܪܝܳܐ ܘܰܠܬܰܢܺܝܢܳܐ. ܡܰܝܬܶܐ ܪܽܘܚܳܐ ܘܳܐܡܰܪ:
ܥܰܠ ܓܳܪܣܳܐ ܘܥܰܠ ܚܰܪܡܳܢܳܐ ܬܶܕܪܽܘܟ܆ ܘܰܬܕܽܘܫ ܐܰܪܝܳܐ ܘܬܰܢܺܝܢܳܐ. ܡܶܢ ܗܳܠܝܢ ܕܥܰܫܺܝܢܺܝܢ ܒܒܺܝܫܬܳܐ ܐܝ̣ܬܰܝܗܘܢ ܚܘܱ̈ܘܳܬܳܐ ܗܳܠܝܢ܆ ܓܳܪܣܳܐ ܓܶܝܪ ܘܚܰܪܡܳܢܳܐ ܚܘܱ̈ܘܳܬܳܐ. ܕܠܐܴ ܡܶܫܬܰܥܒܕܺܝܢ ܠܠܽܘ̈ܚܳܫܳܬܳܐ ܕܳܐܫܽܘ̈ܦܶܐ. ܘܥܰܠܗܳܝ ܡܰܡܬܶܠ ܠܶܗ ܪܽܘܚܳܐ ܠܐܴܟܶܠܩܰܪܨܳܐ ܒܗܳܠܝܢ ܡܶܛܠ ܕܠܳܐ ܐܷܫܟܰܚܘ ܢܒܺܝ̈ܐ ܘܙܰܕܺܝ̈ܩܶܐ ܕܢܶܙܟܽܘܢܳܝܗܝ ܒܚܰܝܠܗܽܘܢ. ܐܶܠܐܴ ܥܰܡܰܢܽܘܐܝܠ ܥܰܠ ܗܳܠܝܢ ܕܪܰܟ ܡܶܛܠ ܕܠܳܐ ܡܶܫܟܚܺܝܢ ܗܘܰܘ ܕܢܶܡܚܽܘܢ ܒܥܶܩܒܶܗ. ܥܠ ܗܳܠܝܢ ܓܝܪ ܕܰܪܗܶܛܘ ܨܶܝܕ ܐܺܝܠܳܢܳܐ ܢܣܰܒ ܫܽܘܠܛܳܢܳܐ. ܐܰܪܝܳܐ ܕܶܝܢ ܠܡܰܘܬܳܐ ܡܫܰܡܰܗ. ܘܬܰܢܺܝܢܳܐ ܠܗܰܘ ܕܥܳܡܰܪ ܒܰܫܝܽܘܠ ܘܢܳܛܰܪ ܗܘܳܐ ܢܰܦܫܴ̈ܬܳܐ ܕܠܳܐ ܢܳܦ̈ܩܳܢ. ܥܰܠ ܗܳܠܝܢ ܐܰܪܒܥܳܐ ܪ̈ܰܒܰܝ ܚܰܝ̈ܠܐܷ ܝܰܗܒ ܫܽܘܠܛܳܢܳܐ ܠܰܫܠܺܝܚ̈ܐ ܕܰܢܕܽܘܫܽܘܢ. ܐܡ̣ܪ ܠܗܽܘܢ ܓܶܝܪ: ܕܗܳܐ ܝܳܗܶܒ ܐܢܳܐ ܠܟܽܘܢ ܚܰܝܠܐܴ ܕܰܬܕܽܘܫܽܘܢ ܚܘܱ̈ܘܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ (ܠܘܩܐ ܝ: ܝܛ). ܘܰܠܬܶܓܡܳܐ ܕܰܫܠܺܝ̈ܚܶܐ ܐܡ̇ܪ ܢܒܺܝܐ ܕܶܐܡܰܪ ܥܠܰܘܗܝ ܪܽܘܚܳܐ.
ܡܶܛܠ ܕܠܺܝ ܒܥܳܐ ܐܶܦܰܨܶܝܘܗܝ ܘܶܐܥܰܫܢܺܝܘܗܝ. ܡܶܛܠ ܕܺܝܕܰܥ ܫܶܡܝ ܢܶܩܪܶܝܢܝ ܘܶܐܥܢܶܝܘܗܝ. ܘܥܰܡܶܗ ܐܢܳܐ ܒܽܐܘܠܨܳܢܳܐ. ܐܶܥܰܫܢܺܝܘܗܝ ܘܶܐܝܰܩܪܺܝܘܗܝ. ܢܽܘܓܪܳܐ ܕܝܰܘ̈ܡܳܬܳܐ ܐܶܣܰܒܥܺܝܘܗܝ. ܘܶܐܚܰܘܶܝܘܗܝ ܦܽܘܪܩܳܢܝ. ܗܳܠܝܢ ܓܶܝܪ ܬܰܠܡܺܝ̈ܕܶܐ ܩܰܕܺܝ̈ܫܶܐ܆ ܐܶܬܦܰܩܰܕܘ ܡܶܢ ܗܰܘ ܕܕܳܫ ܐܰܪܝܳܐ ܘܬܰܢܺܝܢܳܐ܆ ܘܝܰܗܒܠܗܽܘܢ ܫܽܘܠܛܳܢܳܐ ܕܰܢܕܽܘܫܽܘܢ ܐܳܦ ܗܶܢܘܢ. ܕܠܶܗ ܢܶܒܥܽܘܢ ܕܰܢܦܰܨܶܐ ܐܶܢܘܢ ܟܕ ܐܡ̇ܪ ܠܗܽܘܢ. ܕܗܳܐ ܐܶܢܳܐ ܥܰܡܟܽܘܢ ܐܝ̣ܬܰܝ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ (ܡܬܝ ܟܚ: ܟ). ܘܟܰܕ ܩܳܝܡܺܝܢ ܗܘܰܘ ܩܕܳܡ ܕܰܝܴ̈ܢܶܐ ܥܰܘܴ̈ܠܶܐ ܒܽܐܘ̈ܠܨܳܢܶܐ ܥܰܡܗܘܢ ܥܳܐܷܠ ܗܘܳܐ ܘܰܡܥܰܕܰܪ ܠܗܽܘܢ ܐܝܟ ܕܶܐܡܰܪ ܠܗܽܘܢ. ܘܰܡܝܰܩܰܪ ܗܘܳܐ ܠܗܽܘܢ ܒܳܐܬܘܴ̈ܬܳܐ ܘܚܰܝ̈ܠܶܐ ܕܣܳܥܰܪ ܗܘܳܐ ܒܺܐܝ̈ܕܰܝܗܽܘܢ. ܘܰܠܗܽܘܢ ܡܣܰܒܰܥ ܢܽܘܓܪܳܐ ܕܝܰܘ̈ܡܳܬܳܐ ܘܚܰܝ̈ܐ ܕܠܐܴ ܫܽܘܠܳܡܳܐ ܕܥܳܠܡܳܐ ܕܰܥܬܺܝܕ. ܘܰܡܚܰܘܶܐ ܦܽܘܪܩܳܢܶܗ ܠܥܰܡܳܐ ܩܰܕܺܝܫܳܐ ܕܗܰܝܡܶܢ ܒܶܗ ܘܡܰܘܕܶܐ ܘܰܡܫܰܒܰܚ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܡܱ̈ܝ ܥܳܠܡܷ̈ܐ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܬܪܝܢ
ܡܰܘܕܰܥ ܕܡܶܢ ܐܰܡܺܝܢܘܬܳܐ ܕܬܶܫܡܶܫܬܳܐ ܕܰܒܡܳܪܰܢ܆ ܐܳܬܶܐ ܐܢܳܫ ܠܬܰܪܒܺܝܬܳܐ ܓܡܺܝܪܬܳܐ ܘܰܠܕܳܡܝܽܘܬܳܐ ܕܰܒܡܳܪܰܢ
ܡܰܠܦܳܢܽܘܬܳܐ ܘܡܰܪܬܝܳܢܽܘܬܳܐ ܡܩܰܪܶܒ ܛܽܘܒܳܢܳܐ ܕܰܘܝܕ܆ ܒܬܶܫܒܽܘܚܬܳܐ ܗܳܕܐ ܕܬܶܫܥܺܝܢ ܘܬܰܪܬܶܝܢ. ܠܰܐܝܠܶܝܢ ܕܰܩܢܶܝܢ ܬܰܪܒܺܝܬܳܐ ܕܙܰܕܺܝܩܽܘܬܳܐ. ܟܰܕ ܡܰܠܶܦ ܕܛܳܒܬܳܐ ܗܳܕܳܐ ܗ̄ܝ܆ ܠܰܐܝܠܝܢ ܕܩܳܝܡܺܝܢ ܒܒܰܝܬܶܗ ܕܡܳܪܝܳܐ. ܕܒܰܐܡܺܝܢܽܘܬܳܐ ܢܶܗܘܘܢ ܡܰܘܕܶܝܢ ܠܡܳܪܝܳܐ. ܘܟܕ ܛܳܒ ܡܰܠܟܳܐ ܗܘܳܐ ܠܐ ܫܳܠܐܷ ܗܘܳܐ ܡܶܢ ܚܠܺܝܛܽܘܬܳܐ ܕܥܰܡ ܟܳܗ̈ܢܶܐ ܒܬܶܫܡܶܫܬܳܐ ܐܰܠܳܗܳܝܬܳܐ. ܘܡܶܛܠܗܳܕܐ ܡܩܰܕܶܡ ܗܘܳܐ ܠܡܰܫܟܢܶܗ ܕܡܳܪܝܳܐ ܐܰܝܟܳܐ ܕܣܺܝܡ ܗܘܳܐ ܐܳܪܽܘܢܶܗ܆ ܘܩܳܐܷܡ ܗܘܳܐ ܩܕܳܡ ܩܺܐܒܽܘܬܶܗ ܕܡܳܪܝܳܐ. ܘܰܡܩܰܪܶܒ ܗܘܳܐ ܨܠܰܘܴ̈ܬܶܗ. ܒܚܰܕ ܡܶܢ ܝܰܘ̈ܡܺܝܢ ܕܶܝܢ ܒܡܰܛܰܪܬܳܐ ܪܒܺܝܥܳܝܬܳܐ ܕܠܺܠܝܳܐ. ܟܰܕ ܐܶܬܳܐ ܘܶܐܫܟܰܚ ܐܶܢܽܘܢ ܠܟܳܗ̈ܢܶܐ ܕܰܥܕܰܟܺܝܠ ܠܳܐ ܩܳܡܘ ܗܘܰܘ ܠܰܡܨܰܠܳܝܽܘ. ܐܰܥܺܝܪ ܐܶܢܘܢ ܚܦܺܝܛܳܐܝ̣ܬ ܥܠ ܬܶܫܡܶܫܬܳܐ ܕܰܐܕܽܘܢܰܝ. ܘܫܰܪܺܝ ܕܰܢܙܰܡܰܪ ܒܰܝܢܳܬܗܘܢ ܘܢܺܐܡܰܪ:
ܛܳܒ ܠܡܰܘܕܳܝܽܘ ܠܡܳܪܝܳܐ. ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ. ܘܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ. ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܳܐ. ܗܳܠܝܢ ܩܴ̈ܠܶܐ ܝܰܗܒ ܗܘܳܐ ܒܰܟܢܽܘܫܝܳܐ ܕܟܳܗ̈ܢܶܐ. ܟܕ ܡܰܪܬܶܐ ܘܡܰܠܶܦ ܕܙܳܕܶܩ ܘܛܳܒ ܝܳܐܷܐ ܠܡܰܘܕܳܝܽܘ ܘܠܰܡܫܰܒܳܚܽܘ ܠܡܳܪܝܳܐ. ܘܕܰܢܫܰܡܰܪ ܙܽܘܡܳܪ̈ܶܐ ܠܰܫܡܶܗ ܕܡܳܪܝܳܐ. ܗܳܕܳܐ ܗ̄ܝ ܓܝܪ ܬܶܫܡܶܫܬܳܐ ܕܚܰܝ̈ܠܰܘܳܬܳܐ ܩܰܕܺܝ̈ܫܶܐ ܕܡܰܘܕܶܝܢ ܘܰܡܫܰܒܚܺܝܢ ܕܠܐܴ ܫܰܠܘܳܐ. ܘܰܒܨܰܦܪܳܐ ܕܗܽܘܝܽܘ ܡܳܪܢ. ܐܶܬܩܪܺܝܘ ܥܰܡ̈ܡܶܐ ܒܛܰܝܒܽܘܬܳܐ ܠܘܳܬ ܚܰܝܷ̈ܐ ܘܰܫܪܳܪܳܐ. ܗܳܢܘܢ ܕܰܒܕܽܘܡܝܳܐ ܕܠܰܝ̈ܠܰܘܳܬܳܐ ܡܰܘܟܡܺܝܢ ܗܘܰܘ ܒܰܚܛܺܝܬܳܐ. ܘܰܒܗܘܢ ܐܶܬܚܰܘܝܰܬ ܗܰܝܡܳܢܽܘܬܳܐ ܘܰܠܗܘܢ ܐܶܬܓܠܺܝ ܫܪܳܪܳܐ. ܘܡܶܛܠܗܳܕܐ ܟܕ ܐܶܬܚܰܙܝܰܬ ܗܰܝܡܳܢܽܘܬܳܐ ܒܠܰܝ̈ܠܰܘܳܬܳܐ ܗܳܠܝܢ. ܡܦܺܝܣ ܛܽܘܒܬܳܢܳܐ ܕܰܘܝܕ ܘܳܐܡܰܪ:
ܐܶܢܳܐ ܐܶܩܽܘܫ ܒܟܶܢܳܪܳܐ ܕܰܥܣܰܪ. ܘܶܐܩܽܘܫ ܒܩܺܝܬܳܪܳܐ. ܥܕܰܡܳܐ ܓܝܪ ܕܶܐܬܚܰܙܝܰܬ ܗܰܝܡܳܢܽܘܬܳܐ ܒܥܰܡ̈ܡܶܐ ܕܚܶܫܽܘܟܺܝܢ ܗܘܰܘ܆ ܠܰܘ ܡܫܰܡܠܝܳܐ ܐܝ̣ܬܰܘܗܝ ܗܘܳܐ ܙܽܘܡܳܪܳܐ ܕܩܰܕܺܝ̈ܫܶܐ. ܒܡܳܪܢ ܕܶܝܢ ܐܶܬܚܰܝܰܨ ܙܽܘܡܳܪܳܐ ܘܟܶܢܳܪܳܐ ܕܙܰܕܺܝ̈ܩܶܐ. ܘܰܗܘܳܐ ܠܗܽܘܢ ܗܽܘ ܟܶܢܳܪܳܐ ܕܰܥܣܰܪ ܡܶܢܺܝ̈ܢ. ܘܝܰܗܒ ܗܳܕܐ ܕܰܒܪ̈ܶܓܫܶܐ ܥܦܺܝ̈ܦܶܐ ܢܙܰܡܰܪ ܠܡܳܪܝܳܐ. ܥܦܺܝܦܰܐ ܗ̄ܘ ܓܝܪ ܟܠ ܒܰܪܢܳܫܳܐ ܒܰܪܝܳܐ ܚܰܡܫܳܐ ܪ̈ܶܓܫܶܐ ܩܒܺܝܥܺܝܢ ܒܶܗ. ܒܗܰܘ ܒܰܪܢܳܫܳܐ ܬܽܘܒ ܕܰܠܓܰܘ. ܫܽܘܘ̈ܕܳܥܶܐ ܡܶܕܶܡ ܠܐ ܡܶܬܡܰܠܠܳܢ̈ܐ ܩܒܺܝܥܺܝܢ ܠܶܗ. ܕܰܡܣܰܟܠܺܝܢ ܥܠ ܕܳܡܝܽܘܬܳܐ ܕܗܰܘ ܕܰܠܒܰܪ. ܘܟܰܕ ܒܰܪܢܳܫܳܐ ܓܰܘܳܝܳܐ ܠܰܘ ܗܰܕܳܡ̈ܐ ܡܦܰܪ̈ܫܶܐ ܩܒܺܝܥܺܝܢ ܒܶܗ ܒܰܕܡܽܘܬܳܐ ܕܦܰܓܪܳܐ. ܐܶܠܐ ܐܝ̣ܬ ܗܽܘ ܠܶܗ ܦܳܪܽܘܫܽܘܬܳܐ ܡܦܰܫܩܳܢܺܝܬܳܐ. ܕܢܶܫܡܰܥ ܘܢܶܚܙܶܐ ܘܰܢܪܺܝܚ ܘܢܶܛܥܰܡ ܐܳܦ ܢܓܽܘܫ. ܡܳܕܶܝܢ ܐܰܝܟܰܢܳܐ ܕܰܒܙܰܘ̈ܥܶܐ ܐܰܪܓܶܫܢܰܢ. ܕܠܐܴ ܫܰܘܝܳܐ ܠܘܳܬ ܝܳܬܳܗ̇ ܗܺܝ ܢܰܦܫܳܐ. ܘܠܐ ܡܶܢ ܕܬܶܩܢܶܐ ܪ̈ܶܓܫܶܐ ܩܰܛܺܝ̈ܢܶܐ ܕܠܳܚܡܺܝܢ ܠܰܟܝܳܢܳܗ̇ ܓܠܺܝܙܳܐ. ܐܶܠܐ ܕܰܫܪܳܪܳܐ ܢܺܐܡܰܪ ܡܶܛܠ ܗܰܘ ܒܰܪܢܳܫܳܐ ܓܰܘܳܝܳܐ. ܐܶܬܪܰܟܰܒ ܗܳܢܐ ܒܰܪܳܝܳܐ ܒܪ̈ܶܓܫܶܐ. ܘܥܰܠ ܕܢܺܐܠܰܦ ܒܗܳܢܐ ܡܶܬܚܰܙܝܳܢܳܐ. ܥܰܠ ܗܰܘ ܡܶܬܝܰܕܥܳܢܳܐ ܐܶܬܩܰܝܰܡ. ܘܗܳܟܰܢܳܐ ܛܽܘܒܬܳܢܳܐ ܕܰܘܝܕ. ܒܰܕܝܳܕܰܥ ܗܘܳܐ ܣܽܘܟܳܠܐܴ ܕܥܰܠ ܬܪ̈ܰܝܗܽܘܢ ܡܰܢ ܢܰܗܺܝܪܳܐܝ̣ܬ. ܥܰܠܗܳܝ ܕܶܐܡܰܪ ܕܰܒܟܶܢܳܪܳܐ ܗܰܘ ܕܫܰܦܺܝܪ ܡܪܰܟܰܒ ܡܶܢ ܥܣܰܪ ܢܶܗܘܶܐ ܡܫܰܒܰܚ ܘܰܡܙܰܡܰܪ. ܐܰܝܟܰܢܳܐ ܕܢܶܚܙܶܐ ܠܚܽܘܠܡܳܢܳܗ̇ ܕܢܰܦܫܳܐ. ܕܒܰܚܕܳܐ ܐܱܪܛܳܐ ܕܠܐ ܦܠܺܝܓܳܐ ܩܳܝܡܳܐ. ܟܰܕ ܩܰܕܺܝܫܺܝܢ ܬܪ̈ܰܝܗܘܢ ܒܰܚܕܳܐ ܐܰܘܝܽܘܬܳܐ ܘܒܰܚܕܳܐ ܫܰܘܝܽܘܬܳܐ. ܒܶܬܒܥܶܐ ܠܰܢ ܓܶܝܪ ܕܠܰܘ ܦܰܓܪܳܐ ܕܟܶܐ ܘܩܰܕܺܝܫ ܒܰܠܚܽܘܕ. ܢܶܗܘܶܐ ܐܝ̣ܬ ܠܰܢ ܡܳܐ ܕܩܳܝܡܺܝܢܰܢ ܩܕܳܡ ܐܰܠܗܳܐ. ܐܶܠܐ ܕܳܐܦ ܢܰܦܫܳܐ ܬܶܗܘܶܐ ܡܰܢ ܕܰܟܝܳܐ܆ ܠܐ ܓܶܝܪ ܡܰܘܬܰܪ ܦܰܓܪܳܐ ܕܰܟܝܳܐ ܠܢܰܦܫܳܐ ܙܰܠܺܝܠܬܳܐ. ܘܠܳܐ ܢܰܦܫܳܐ ܕܟܺܝܬܳܐ ܡܶܫܬܰܟܚܳܐ ܒܦܰܓܪܳܐ ܫܪܺܝܚܳܐ. ܡܶܬܒܰܥܝܳܐ ܓܝܪ ܕܰܒܢܰܦܫܳܐ ܘܦܰܓܪܳܐ ܬܶܬܢܰܛܰܪܝ ܩܰܕܺܝܫܽܘܬܳܐ. ܐܝܟ ܕܰܐܠܶܦ ܛܽܘܒܳܢܳܐ ܦܰܘܠܽܘܣ ܕܰܐܝܕܳܐ ܠܰܡ ܕܰܠܓܰܒܪܳܐ ܠܐܴ ܗܘܳܬ. ܪܳܢܝܳܐ ܒܡܳܪܳܗ̇. ܕܶܐܡܰܪ ܕܬܶܗܘܶܐ ܩܰܕܺܝܫܳܐ ܒܦܰܓܪܳܗ̇ ܘܰܒܢܰܦܫܳܗ̇ (ܐ ܩܘܪ̈ܢܬܝܐ ܙ: ܠܕ). ܕܶܐܡܰܪ ܕܶܝܢ ܩܺܝܬܳܪܳܐ ܒܳܬܰܪ ܟܶܢܳܪܳܐ. ܩܺܝܬܳܪܳܐ ܠܗܰܘ ܡܳܐܢܳܐ ܕܰܫܩܺܝܠ ܗܘܳܐ ܥܰܠ ܐܺܝܕܰܘ̈ܗܝ ܟܕ ܢܳܩܶܫ ܩܳܪܶܐ. ܟܶܢܳܪܳܐ ܕܝܢ ܠܩܳܠܐܴ ܗܰܘ ܕܡܶܫܬܡܰܥ ܒܢܶܥܡܬܳܐ ܡܰܠܠܬܳܐ܆ ܐܰܝܟܳܢܳܐ ܕܰܒܟܶܢܳܪܳܐ ܡܰܢ ܢܶܬܝܰܕܥܽܘܢ ܙܰܘ̈ܥܶܐ ܦܳܪ̈ܽܘܫܶܐ ܕܢܰܦܫܳܐ ܒܰܢ. ܒܩܺܝܬܳܪܳܐ ܕܶܝܢ ܡܶܬܬܙܺܝܥܳܢܽܘܬܳܐ ܕܒܰܪܢܳܫܰܢ ܕܰܠܒܰܪ. ܕܡܳܐ ܕܗܳܕܐ ܫܰܦܺܝܪ ܗܳܘܝܳܐ ܗܳܝܕܶܝܢ ܥܰܡ ܢܒܺܝܳܐ ܐܳܡܪܺܝܢܰܢ:
ܡܶܛܠ ܕܚܰܕܺܝܬܳܢܝ ܡܳܪܝܳܐ ܒܰܥܒܳܕܰܝ̈ܟ. ܘܒܰܥܒܳܕ ܐܺܝܕܰܝ̈ܟ ܐܶܫܬܰܒܰܚ. ܢܰܘܣܶܦ ܟܰܕ ܡܶܫܬܰܒܰܚ ܒܕܰܟܝܽܘܬܗܽܘܢ ܘܢܺܐܡܰܪ:
ܡܳܐ ܪܰܘܪ̈ܒܺܝܢ ܥܒܳܕܰܝ̈ܟ ܡܳܪܝܳܐ. ܕܝܰܗܒܬ ܠܒܰܪܢܳܫܳܐ. ܕܟܰܕ ܗܽܘ ܡܕܰܟܰܝ ܘܰܡܨܰܠܰܠ ܗܽܘ ܠܶܗ ܡܫܰܦܶܐ ܡܶܢ ܬܶܐܛܪܳܐ ܕܰܚܛܳܗ̈ܐ. ܘܡܶܢܶܗ ܢܺܐܠܰܦ ܥܰܠ ܟܽܠ ܡܶܕܶܡ. ܡܳܐ ܕܶܐܫܬܰܘܕܰܥ ܗܽܘ ܠܶܗ ܘܬܳܗܰܪ ܒܰܩܢܽܘܡܶܗ ܒܛܶܟܣܳܐ ܟܺܐܢܳܐ ܢܳܦܶܩ ܠܡܶܬܒܰܩܳܝܽܘ ܒܗ ܒܫܽܘܦܪܳܐ ܕܰܟܝܳܢܳܐ. ܘܟܰܕ ܒܶܗ ܚܳܐܱܪ܆ ܐܝܟ ܕܰܒܨܰܠܡܳܐ ܕܰܐܠܳܗܳܐ. ܘܰܒܬܽܘ̈ܩܳܢܶܐ ܕܰܠܒܰܪ ܡܶܢܶܗ ܕܶܐܬܦܪܶܫܘ ܡܶܢ ܥܳܒܽܘܕܳܐ ܠܬܶܫܡܶܫܬܶܗ. ܦܳܪܽܘܫܳܐܝ̣ܬ ܐܳܡܰܪ ܥܰܡ ܢܒܺܝܐ:
ܡܳܐ ܪܰܘܪ̈ܒܺܝܢ ܥܒܳܕܰܝ̈ܟ ܡܳܪܝܳܐ. ܘܛܳܒ ܥܰܡܺܝ̈ܩܳܢ ܡܰܚܫ̈ܒܳܬܳܟ. ܘܓܰܒܪܳܐ ܫܳܛܝܳܐ ܠܐܴ ܝܳܕܰܥ. ܘܣܰܟܠܐܴ ܠܐܴ ܡܶܣܬܰܟܰܠ ܒܗܳܕܶܐ. ܠܐ ܓܝܪ ܡܶܫܟܰܚ ܗܰܘ ܕܰܒܫܳܛܝܽܘܬܳܐ ܘܰܒܣܰܟܠܽܘܬܳܐ ܡܶܬܥܰܝܰܕ. ܕܢܶܕܰܥ ܥܽܘܡܩܳܐ ܘܚܶܟܡܬܳܐ ܕܡܰܕܥܳܐ ܕܰܐܠܳܗܳܐ. ܕܡܶܛܠܡܳܢܐ ܟܕ ܠܐ ܣܢܺܝܩ ܡܚܰܦܶܛ ܥܠ ܦܽܘܠܚܳܢܳܐ ܕܰܡܝܰܬܪܽܘܬܳܐ. ܘܟܰܕ ܚܙܳܐ ܬܰܪܒܺܝܬܳܐ ܕܪ̈ܰܫܺܝܥܶܐ ܕܰܕܠܐ ܩܽܘ̈ܦܳܚܶܐ ܫܳܘܚܳܐ. ܣܳܒܰܪ ܕܠܰܝܬ ܦܽܘܪܫܳܢܳܐ ܒܶܝܬ ܟܺܐܢ̈ܐ ܠܥܰܘܴ̈ܠܐܷ. ܘܥܰܠܗܳܝ:
ܡܳܐ ܕܦܳܪܥܺܝܢ ܪ̈ܰܫܺܝܥܶܐ ܐܰܝܟ ܥܶܣܒܳܐ. ܘܫܳܘܚܺܝܢ ܟܽܠ ܥܳܒ̈ܕܰܝ ܥܰܘܠܐܴ. ܒܬܰܪܒܺܝܬܳܐ ܕܗܳܠܶܝܢ ܡܶܬܚܰܙܝܳܢܝܴ̈ܬܳܐ ܚܳܐܱܪ ܘܰܡܣܰܒܰܪ. ܕܠܐܴ ܡܥܺܝܩܺܝܢ ܠܐܱܠܗܳܐ ܥܒܳܕܰܝ̈ܗܘܢ. ܘܡܶܬܚܰܫܰܒ ܕܠܰܘ ܚܛܺܝܬܳܐ ܗ̄ܝ ܕܐܢܳܫ ܒܗܳܠܝܢ ܢܶܗܘܶܐ ܡܶܬܕܰܡܶܐ. ܠܪܽܘܚܳܐ ܕܶܝܢ ܠܐ ܨܳܒܶܐ ܢܶܫܡܰܥ ܕܶܐܡܰܪ:
ܕܢܺܐܒܕܽܘܢ ܠܥܳܠܰܡ ܥܳܠܡܺܝܢ. ܘܰܒܗܳܝ ܕܡܰܦܩܳܢܗܘܢ ܕܡܶܟܳܐ ܐܳܒܕܺܝܢ ܠܥܳܠܰܡ ܥܳܠܡܺܝܢ. ܠܐܴ ܚܳܐܱܪ ܐܠܐ ܢܶܫܡܰܥ ܣܰܟܠܐܴ ܡܳܢܳܐ ܐܡ̇ܪ ܪܽܘܚܳܐ:
ܘܰܐܢܬ ܠܰܡ ܡܳܪܝܳܐ ܡܪܰܝܡܳܐ ܠܥܳܠܰܡ. ܕܳܡܝܳܐ ܗܳܕܐ ܟܰܕ ܡܰܠܦܳܐ ܕܰܐܝܠܶܝܢ ܕܡܶܬܬܰܟܠܺܝܢ ܥܠܰܝܟ ܠܥܳܠܰܡ ܠܐ ܢܶܥܒܪܽܘܢ. ܘܪ̈ܰܫܺܝܥܶܐ ܐܳܒܕܺܝܢ ܠܥܳܠܰܡ ܥܳܠܡܺܝܢ. ܡܶܛܠ ܕܰܗܘܰܘ ܬܰܠܡܺܝ̈ܕܶܐ ܠܓܰܒܪܳܐ ܫܳܛܝܳܐ ܕܺܐܝܬܰܘܗܝ ܣܳܛܳܢܳܐ ܕܰܐܠܶܦ ܐܶܢܘܢ ܕܰܓܳܠܽܘܬܳܐ. ܗܳܟܰܢܳܐ ܙܰܕܺܝ̈ܩܶܐ ܢܶܫܬܰܟܚܽܘܢ ܠܥܳܠܰܡ ܥܳܠܡܺܝܢ. ܡܶܛܠ ܡܳܪܝܳܐ ܡܪܰܝܡܳܐ ܕܺܐܝܬܰܘܗܝ ܠܥܳܠܰܡ. ܗܰܘ ܕܗܰܝܡܶܢܘ ܒܶܗ ܘܶܐܬܚܰܪܰܪܘ ܡܶܢ ܫܽܘܥܒܳܕܶܗ ܕܗܰܘ ܣܰܟܠܳܐ ܘܫܳܛܝܳܐ. ܘܡܶܟܺܝܠ ܒܥܶܕܳܢܶܗ ܥܳܐܠܐܴ ܡܶܠܬܳܐ ܕܥܰܠ ܐܰܒܕܳܢܳܐ ܕܥܰܘܴ̈ܠܐܷ ܒܥܶܠܕ̈ܒܳܒܰܘܗܝ ܕܰܐܠܳܗܳܐ.
ܡܶܛܠ ܠܰܡ ܒܥܶܠܕ̈ܒܳܒܰܝܟ ܡܳܪܝܳܐ. ܡܶܛܠ ܕܗܳܐ ܒܥܶܠܕ̈ܒܳܒܰܝܟ ܢܺܐܒܕܽܘܢ. ܘܢܶܬܒܰܕܪܽܘܢ ܟܽܠ ܥܳܒ̈ܕܰܝ ܥܰܘܠܐܴ. ܒܩܴ̈ܠܐܷ ܕܙܽܘܡܳܪ̈ܶܐ ܩܰܕܺܝ̈ܫܶܐ ܕܗܳܘܶܝܢ ܒܦܳܪܽܘܫܽܘܬܳܐ ܩܕܳܡ ܐܰܠܗܳܐ. ܡܶܛܠܗܳܢܐ ܒܙܽܘܡܳܪܳܐ ܩܳܐܷܡ ܗܘܳܐ ܡܰܠܟܳܐ ܘܰܡܙܰܡܰܪ. ܐܰܪܺܝܡ ܥܰܝ̈ܢܶܐ ܕܠܶܒܶܗ ܘܰܚܙܳܐ ܡܰܫܪ̈ܝܳܬܳܐ ܕܰܒܥܶܠܕ̈ܒܳܒܶܐ ܡܶܬܝܰܕܥܴ̈ܢܶܐ ܕܶܐܬܟܰܢܰܫܘ ܥܠܰܘܗܝ ܠܰܡܒܰܛܳܠܽܘ ܬܶܫܒܽܘܚܬܶܗ ܘܥܰܠܗܳܝ ܐܡ̇ܪ: ܗܳܐ ܒܥܶܠܕ̈ܒܳܒܰܝܟ ܡܳܪܝܳܐ. ܐܳܬܶܝܢ ܠܡܶܦܣܰܩ ܬܶܫܒܽܘܚܬܳܐ ܡܶܢ ܦܽܘܡܝ. ܘܟܰܕ ܣܰܪܗܶܒ ܚܰܝܠܳܐ ܕܰܐܠܗܳܐ ܘܶܐܬܳܐ ܠܐܻܝܳܠܶܗ ܘܒܰܕܰܪ ܐܶܢܘܢ. ܫܰܚܠܶܦ ܩܳܠܶܗ ܠܚܰܕܽܘܬܳܐ ܘܶܐܡܰܪ: ܡܶܛܠ ܕܗܳܐ ܒܥܶܠܕ̈ܒܳܒܰܝܟ ܢܺܐܒܕܽܘܢ. ܘܢܶܬܒܰܕܪܽܘܢ ܟܽܠ ܥܳܒ̈ܕܰܝ ܥܰܘܠܐܴ. ܗܳܠܝܢ ܠܰܡ ܕܶܐܬܰܘ ܠܬܰܟܬܽܘܫܳܐ ܕܰܩܪܳܒܳܐ. ܒܰܕܰܪ ܐܶܢܘܢ ܥܽܘܫܢܳܐ ܕܰܕܪܳܥܳܟ ܘܰܐܘܒܶܕ ܐܶܢܘܢ ܚܰܝܠܳܟ. ܠܺܝ ܕܶܝܢ:
ܐܰܪܺܝܡܬ ܩܰܪ̈ܢܳܬܝ ܐܰܝܟ ܕܪܰܝܡܳܐ. ܘܨܰܒܰܥܬܳܢܝ ܒܡܶܫܚܳܐ ܡܒܰܣܡܳܐ. ܪܰܝܡܳܐ ܕܝܢ ܚܰܝܽܘܬܳܐ ܙܥܽܘܪܬܳܐ ܐܝ̣ܬܰܘܗܝ. ܘܰܚܕܳܐ ܩܰܪܢܳܐ ܒܰܠܚܽܘܕ ܐ̣ܝܬ ܠܶܗ. ܘܚܰܝܠܐܴ ܪܰܒܳܐ ܐܝ̣ܬ ܒܶܗ. ܘܠܐܴ ܡܰܡܪܚܺܝܢ ܨܰܝܴ̈ܕܶܐ ܠܡܶܬܩܰܪܳܒܽܘ ܠܗ ܡܶܛܠ ܚܰܝܠܶܗ. ܘܶܐܡܰܬܝ ܕܡܶܫܬܟܰܚ ܥܰܠ ܪܺܝܫ ܛܽܘܪܳܐ ܘܰܡܬܰܟܒܺܝܢ ܠܗ ܨܰܝܴ̈ܕܶܐ. ܫܳܕܶܐ ܗܽܘ ܠܶܗ ܠܥܽܘܡܩܳܐ ܥܰܠ ܩܰܪܢܶܗ. ܘܟܕ ܥܠܶܝܗ̇ ܡܶܣܬܡܶܟ ܩܳܐܷܡ ܟܰܕ ܠܐܴ ܡܶܬܬܙܺܝܥ ܡܶܛܠ ܕܠܰܚܙܳܬܳܗ̇ ܕܚܰܝܽܘܬܳܐ ܗܳܕܐ ܡܶܬܪܰܓܪܓܺܝܢ ܡܰܠܟ̈ܐ. ܐܠܐ ܦܽܘܪܣܳܐ ܡܶܕܶܡ ܐܶܫܟܰܚܘ ܨܰܝ̈ܳܕܶܐ. ܡܰܝܬܶܝܢ ܓܝܪ ܒܬܽܘܠܬܳܐ ܐܱܝܕܳܐ ܓܝܪ ܕܣܰܓܺܝ ܕܰܟܝܳܗ̇ ܒܢܰܦܫܳܗ̇ ܘܰܒܦܰܓܪܳܗ̇ ܘܰܒܚܽܘ̈ܫܳܒܶܝܗ̇. ܡܶܢ ܢܶܩܦܳܐ ܕܓܰܒܪܳܐ. ܘܰܡܨܰܒܬܺܝܢ ܠܗ̇ ܒܰܠܒܽܘ̈ܫܶܐ ܪ̈ܺܝܫܳܝܶܐ. ܘܡܳܫܚܺܝܢ ܠܗ̇ ܒܡܰܫܚܴ̈ܢܶܐ ܒܰܣܺܝ̈ܡܰܝ ܪܺܝܚܳܐ ܘܡܰܠܒܟܺܝܢ ܠܗ̇ ܒܺܐܝ̈ܕܶܝܗ̇ ܐܰܒܽܘ̈ܒܶܐ ܚܠܰܝܴ̈ܐ. ܘܰܙܡܳܪܳܐ ܩܴ̈ܠܐܷ ܗܰܢܺܝ̈ܐܐ ܙܳܡܪܳܐ ܚܰܠܝܳܐ ܘܒܰܣܺܝܡܳܐ. ܘܨܳܐܶܬ ܪܰܝܡܳܐ ܘܫܳܡܰܥ ܩܳܠܗ̇. ܘܰܡܪܺܝܚ ܕܶܝܢ ܡܶܢ ܪܽܘܚܩܳܐ ܒܡܰܫܚܴ̈ܢܶܐ ܗܳܠܝܢ ܒܰܣܺܝ̈ܡܶܐ. ܘܳܐܬܶܐ ܠܘܳܬܳܗ̇ ܘܪܳܒܰܥ ܒܥܽܘܒܗ̇. ܘܥܳܦܶܩ ܠܗ̇ ܚܰܒܺܝܒܳܐܝ̣ܬ. ܘܟܰܕ ܡܶܬܶܐܣܰܪ ܒܪܶܚܡܬܳܗ̇. ܡܰܝܬܝܳܐ ܠܗ ܠܒܶܝܬ ܡܰܠܟܽܘܬܳܐ. ܒܗܳܢܳܐ ܐܪܳܙܳܐ ܡܶܠܬܳܐ ܐܰܠܗܳܐ ܗܰܘ ܪܰܝܡܳܐ ܡܶܬܝܰܕܥܳܢܳܐ ܘܚܰܝܠܬܳܢܳܐ ܟܰܕ ܨܰܝܴ̈ܕܶܐ ܝܽܘ̈ܕܳܝܶܐ ܢܟܺܝ̈ܠܐܷ ܠܚܰܝܠܶܗ ܠܐ ܡܶܫܟܚܺܝܢ ܗܘܰܘ܆ ܒܬܽܘܠܬܳܐ ܡܰܪܝܰܡ ܒܰܠܒܽܘ̈ܫܶܐ ܕܢܰܟܦܽܘܬܳܐ ܘܰܒܬܽܘܠܽܘܬܳܐ ܨܰܒܬܰܬ ܠܗ̇ ܢܰܦܫܳܗ̇. ܘܪܺܝܚܳܐ ܒܰܣܺܝܡܳܐ ܕܕܰܟܝܽܘܬܳܐ ܘܕܰܡܨܰܠܠܽܘܬܳܐ ܐܶܬܒܰܣܡܰܬ. ܒܰܨܠܰܘܴ̈ܬܳܐ ܘܰܒ̈ܩܳܠܐ ܗܰܢܺܝ̈ܐܐ܆ ܫܶܦܪܰܬ ܠܶܗ ܠܡܶܠܬܳܐ ܐܠܗܳܐ. ܘܶܐܬܳܐ ܡܶܢ ܛܽܘܪܳܐ ܥܶܠܳܝܳܐ ܗܰܘ ܕܰܫܡܰܝܳܐ ܠܥܽܘܒܳܗ̇. ܘܟܕ ܡܶܢ ܗܳܕܐ ܐܶܬܺܝܠܶܕ. ܫܒܰܩ ܢܰܦܫܶܗ ܕܢܶܬܠܒܶܟ ܡܶܢ ܨܰܝܴ̈ܕܶܐ ܢܟܺܝ̈ܠܐܷ ܒܡܰܘܬܳܐ ܨܶܒܝܳܢܳܝܳܐ. ܘܗܺܝ ܐܰܝܬܝܰܬ ܠܢ ܠܚܰܝܽܘܬܳܐ ܗܳܝ ܩܰܕܺܝܫܬܳܐ ܠܗܰܘ ܪܰܝܡܳܐ ܡܶܬܝܰܕܥܳܢܳܐ. ܕܰܒܗܳܢܳܐ ܐܡ̇ܪ ܢܒܺܝܳܐ. ܡܶܬܕܰܡܝܳܐ ܢܰܦܫܳܐ ܕܩܰܕܺܝ̈ܫܶܐ ܡܳܐ ܕܰܐܡܺܝܢܳܐ ܒܙܽܘܡܳܪ̈ܶܐ ܪ̈ܽܘܚܳܢܶܐ. ܟܕ ܡܶܬܒܰܣܡܳܐ ܘܡܶܨܛܰܒܥܳܐ ܡܶܢ ܡܶܫܚܳܐ ܗܰܘ ܕܝܶܗܒܰܬ ܒܬܽܘܠܬܳܐ ܠܥܳܠܡܳܐ. ܘܩܳܢܝܳܐ ܒܰܨܠܽܘܬܳܐ ܩܰܪܢܳܐ ܠܐ ܡܶܬܬܰܒܪܳܢܺܝܬܳܐ. ܠܐ ܓܝܪ ܡܶܬܡܰܚܠܐܴ ܩܰܪܢܶܗ ܕܡܶܠܬܳܐ. ܘܚܳܙ̈ܝܳܢ ܥܰܝ̈ܢܶܝܗ̇ ܒܥܶܠܕ̈ܒܳܒܶܝܗ̇. ܡܳܐ ܕܡܶܬܡܰܟܟܺܝܢ ܘܢܳܦܠܺܝܢ ܬܚܶܝܬ ܪ̈ܶܓܠܶܝܗ̇ ܐܝܟ ܕܶܐܡܰܪ ܢܒܺܝܐ.
ܘܰܚ̈ܙܰܝ ܥܰܝ̈ܢܰܝ ܒܰܒܥܶܠܕ̈ܒܳܒܰܝ ܘܰܒܒܺܝ̈ܫܶܐ ܕܩܳܝܡܺܝܢ ܥܠܰܝ ܢܶܫ̈ܡܥܳܢ ܐܶܕ̈ܢܰܝ. ܠܬܰܪܒܺܝܬܳܐ ܕܰܐܝܟ ܗܳܕܐ ܕܰܢܙܰܡܰܪ ܠܡܳܪܝܳܐ ܐܶܬܰܝܢܰܢ. ܐܰܝܟܰܢܳܐ ܕܢܶܚܙܶܐ ܐܶܢܘܢ ܠܡܳܪ̈ܽܘܕܶܐ. ܟܰܕ ܪܡܶܝܢ ܘܰܫܕܶܝܢ ܠܬܰܚܬ ܡܶܢ ܪ̈ܶܓܠܰܝܢ. ܘܰܒܒܺܝ̈ܫܶܐ ܗܳܠܝܢ ܕܩܳܝܡܺܝܢ ܥܠܰܝܢ. ܫܳܡ̈ܥܳܢ ܐܶܕ̈ܢܶܐ ܕܢܰܦܫܰܢ. ܘܒܳܬܰܪܟܶܢ ܗܰܘ ܕܟܺܐܢܳܐܝ̣ܬ ܥܳܒܶܕ ܐܰܓܽܘܢܳܐ ܡܶܬܬܪܺܝܡ ܠܪܰܘܡܳܐ ܪܳܡܳܐ ܕܫܳܘܶܐ ܠܩܽܘ̈ܠܳܣܶܐ ܐܰܝܟ ܕܶܐܡܰܪ ܪܽܘܚܳܐ:
ܕܙܰܕܺܝܩܳܐ ܐܰܝܟ ܕܶܩܠܐܴ ܢܰܦܪܰܥ. ܘܰܐܝܟ ܐܱܪ̈ܙܶܐ ܕܠܶܒܢܳܢ ܢܰܫܘܰܚ. ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܘܰܒܕܳܪ̈ܰܘܗܝ ܕܰܐܠܳܗܰܢ. ܡܶܛܠܡܳܢܐ ܐܝܟ ܕܶܩܠܐܴ ܡܰܦܪܰܥ ܙܰܕܺܝܩܳܐ. ܗܳܢܐ ܓܝܪ ܐܺܝܠܳܢܳܐ ܒܪܰܘܡܳܐ ܡܥܰܠܐܷ ܘܣܳܐܷܡ ܠܶܗ ܠܦܺܐܪܶܗ ܘܡܰܡܪܶܕ ܘܡܰܪܚܶܩ ܠܶܗ ܡܶܢ ܐܺܝܕܳܐ ܕܓܰܢܳܒ̈ܐ ܘܠܐ ܡܳܛܶܝܢ ܠܗ. ܟܕ ܠܶܗ ܠܦܺܐܪܳܐ ܚܕܺܝܪܳܐ ܚܰܠܝܽܘܬܳܐ ܡܶܢ ܠܒܰܪ ܐܝܟ ܕܶܒܫܳܐ. ܘܡܶܢ ܠܓܰܘ ܡܶܫܬܟܰܚ ܓܪܽܘܡܳܐ ܫܰܪܺܝܪܳܐ ܘܰܣܛܺܝܡܳܐ. ܕܗܳܕܐ ܡܰܘܕܥܳܐ ܥܰܠ ܐܰܪܛܳܐ ܕܩܰܕܺܝ̈ܫܶܐ. ܕܰܒܪܰܘܡܳܐ ܡܥܰܠܶܝܢ ܘܣܳܝܡܺܝܢ ܣܺܝ̈ܡܳܬܳܐ ܕܺܝܠܗܘܢ ܐܝܟ ܕܰܐܠܶܦ ܡܳܪܢ. ܐܰܝܟܳܐ ܕܠܐܴ ܣܳܣܳܐ ܘܠܐܴ ܐܳܟܠܐܴ ܡܚܰܒܠܺܝܢ ܘܠܐܴ ܓܰܢܳܒ̈ܐ ܘܠܐ ܓܳܢܒܺܝܢ ܘܦܳܠܫܺܝܢ. ܗܰܘ ܦܽܘܠܚܳܢܳܐ ܕܰܡܝܰܬܪܽܘܬܳܐ ܚܰܠܝܽܘܬܳܐ ܘܗܰܢܺܝܐܘܬܳܐ ܡܶܢ ܠܒܰܪ ܡܚܰܘܶܐ. ܐܰܟܡܳܐ ܕܗܰܘ ܕܶܩܠܐܴ ܡܶܬܝܰܕܥܳܢܳܐ ܐܡ̇ܪ ܗܘܳܐ: ܕܢܺܝܪܝ ܒܰܣܺܝܡ ܗܘ܆ ܘܡܰܘܒܰܠܝ ܩܰܠܺܝܠܐܴ ܗ̄ܝ (ܡܬܝ ܝܐ: ܠ) ܡܶܛܠ ܗܳܝ ܕܰܒܛܽܘܪܳܐ ܪܳܡܳܐ ܡܥܰܠܶܝܢ ܩܰܘ̈ܡܳܬܳܐ ܦܫܺܝ̈ܛܳܬܳܐ ܩܢܶܝܢ ܕܠܐܴ ܪ̈ܳܟܢܳܢ ܠܰܐܦܱ̈ܝ ܥܽܘܡܩܳܐ. ܕܰܐܝܟ ܗܳܟܰܢܳܐ ܐܶܢܘܢ ܙܰܕܺܝ̈ܩܶܐ. ܕܟܕ ܡܶܢ ܥܳܠܡܳܐ ܗܳܢܐ ܡܶܬܥܰܠܶܝܢ. ܠܘܳܬ ܥܒܳܕܰܘ̈ܗܝ ܠܐ ܡܶܬܪܰܟܢܺܝܢ. ܡܶܛܠ ܕܶܐܡܰܪ ܢܒܺܝܐ: ܕܰܒܒܰܝܬܶܗ ܕܡܳܪܝܳܐ ܢܨܺܝܒܺܝܢ ܘܰܒܕܳܪ̈ܰܘܗܝ ܕܰܐܠܳܗܰܢ. ܘܥܰܠܗܳܝ ܟܰܕ ܡܶܬܪܰܒܶܝܢ ܒܰܡܝܰܬܪܽܘܬܳܐ. ܡܶܬܕܰܡܶܝܢ ܒܕܶܩܠܐܴ ܗܰܘ ܕܰܢܚܶܬ ܡܶܢ ܫܡܰܝܳܐ. ܘܡܶܬܪܰܒܶܝܢ ܘܡܰܦܪܥܺܝܢ ܒܣܰܝܒܽܘܬܳܐ ܐܝܟ ܕܶܐܡܰܪ ܪܽܘܚܳܐ:
ܢܰܦܪܥܽܘܢ ܬܽܘܒ ܘܢܶܬܪܰܒܽܘܢ ܒܣܰܝܒܽܘܬܳܐ. ܕܶܩܠܐܴ ܓܝܪ ܠܰܘ ܕܠܺܝܠܐܴܝ̣ܬ ܒܙܰܒܢܳܐ ܕܡܶܬܢܨܶܒ ܥܳܒܶܕ ܦܺܐܪ̈ܶܐ. ܘܠܐܴ ܐܰܪ̈ܙܶܐ ܒܫܽܘܪܳܝܳܐ ܕܡܰܘ̈ܥܝܳܬܗܘܢ ܚܳܫܚܺܝܢ ܠܒܶܢܝܳܢܳܐ. ܐܠܐ ܡܳܐ ܕܶܐܬܥܰܬܰܩܘ ܘܣܶܐܒܘ ܒܰܐܪܥܳܐ. ܬܪ̈ܰܝܗܽܘܢ ܐܳܕ̈ܫܶܐ ܗܳܠܝܢ. ܘܕܶܩܠܐܴ ܡܶܢ ܒܳܬܰܪ ܕܣܶܐܒ ܛܳܒ ܚܳܫܰܚ ܠܡܶܥܒܰܕ ܦܺܐܪ̈ܶܐ ܕܰܓܡܺܝܪܺܝܢ ܒܚܰܠܝܽܘܬܳܐ ܕܶܝܢ ܐܰܪ̈ܙܶܐ ܡܳܐ ܕܰܐܥܬܶܩܘ ܒܣܰܝܒܽܘܬܳܐ܆ ܫܳܡܶܢ ܩܰܝܣܗܽܘܢ ܘܚܳܫܰܚ ܠܦܽܘܠܚܳܢܳܐ ܕܰܥܒܳܕ̈ܐ ܫܰܦܺܝܪ̈ܶܐ ܘܰܠܬܰܛܠܺܝ̈ܠܐܷ ܕܒܴ̈ܬܶܐ. ܘܡܶܛܠ ܗܳܕܐ ܕܶܝܢ ܐܡ̣ܪ:
ܫܰܡܺܝ̈ܢܶܐ ܐܳܦ ܒܰܣܺܝ̈ܡܶܐ ܢܶܗܘܽܘܢ. ܘܰܢܚܰܘܽܘܢ ܕܰܬܪܺܝܨ ܗܽܘ ܡܳܪܝܳܐ. ܘܥܰܫܺܝܢ ܘܠܰܝܬ ܒܶܗ ܥܰܘܠܐܴ. ܘܰܒܟܺܐܢܽܘܬܳܐ ܢܳܛܰܪ ܚܰܠܝܽܘܬܳܐ ܒܕܶܩ̈ܠܐܷ ܩܰܕܺܝ̈ܫܶܐ ܡܶܛܠ ܕܶܐܬܶܐܡܶܢܘ ܒܒܰܝܬܶܗ ܕܰܐܠܗܳܐ. ܘܰܒܓܰܘ ܕܳܪ̈ܰܘܗܝ ܕܰܐܠܳܗܳܐ ܐܶܬܪܰܒܺܝܘ. ܕܠܶܗ ܫܽܘܒܚܳܐ ܘܬܰܘܕܺܝܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܬܠܬܐ
ܡܰܘܕܥ ܥܰܠ ܩܝܳܡܬܶܗ ܕܥܰܡܰܢܽܘܐܝ̣ܠ ܡܶܢ ܩܰܒܪܳܐ. ܘܥܰܠ ܠܳܐ ܡܶܬܚܰܒܠܳܢܽܘܬܳܐ ܕܦܰܓܪܶܗ ܘܥܰܠ ܫܽܘܒܚܳܐ ܕܡܰܠܟܽܘܬܶܗ ܘܥܰܠ ܫܠܺܝ̈ܚܶܐ ܘܟܳܪܽܘܙܽܘܬܗܘܢ ܘܥܰܠ ܦܽܘܢܳܝܳܐ ܕܥܰܡ̈ܡܶܐ.
ܪܰܒܽܘܬܳܐ ܕܚܰܝܠܶܗ ܪܰܒܳܐ ܕܰܨܠܺܝܒܳܐ ܡܶܫܬܰܥܶܐ ܛܽܘܒܬܳܢܳܐ ܕܰܘܝܕ. ܒܬܶܫܒܽܘܚܬܳܐ ܗܳܕܐ ܕܬܶܫܥܺܝܢ ܘܰܬܠܳܬ܆ ܘܡܶܙܕܰܟܝܳܢܽܘܬܶܗ ܕܡܰܘܬܳܐ ܡܙܰܡܰܪ ܪܽܘܚܳܢܳܐܝ̣ܬ. ܘܥܰܠ ܬܶܫܒܽܘܚܬܳܐ ܕܦܳܪܽܘܩܰܢ ܡܰܠܶܠ. ܟܕ ܠܘ ܫܰܪܒܳܐ ܕܰܡܚܺܝܠܽܘܬܳܐ ܡܰܝܬܶܐ ܠܰܡܨܰܥܬܳܐ. ܘܡܶܢ ܗܳܠܝܢ ܕܰܗܘܱ̈ܝ ܒܰܨܠܺܝܒܳܐ ܐܡ̇ܪ ܘܠܐ ܡܶܕܶܡ. ܐܠܐ ܘܫܰܪܒܳܐ ܕܰܒܩܰܒܪ̈ܶܐ ܣܳܐܷܡ ܒܰܡܨܰܥܬܳܐ. ܘܠܐ ܥܶܠܬܳܐ ܕܡܰܘܬܳܐ ܡܰܥܶܠ ܒܬܰܫܥܺܝܬܳܐ. ܘܕܳܡܝܳܐ ܗܳܕܐ ܕܥܰܠ ܕܰܒܡܰܙܡܽܘܪ̈ܶܐ ܐܚܪ̈ܳܢܶܐ ܐܰܡܺܝܪ̈ܳܢ. ܘܡܶܛܠܗܳܕܐ ܫܬܶܩ ܡܶܢ ܚܰܫ̈ܐ ܘܡܰܘܬܳܐ. ܘܥܰܠ ܩܝܳܡܬܳܐ ܒܰܠܚܽܘܕ ܐܡ̇ܪ. ܡܳܢܳܐ ܕܶܝܢ ܐܡ̣ܪ:
ܡܳܪܝܳܐ ܐܰܡܠܶܟ ܘܓܰܐܝܽܘܬܳܐ ܠܒܶܫ. ܘܡܶܛܠܡܳܢܐ ܗܳܢܐ ܦܶܬܓܳܡܳܐ ܘܡܽܘܢ ܐܴܠܨܳܐ ܗܘܳܬ ܕܢܶܠܒܰܫ ܓܰܐܝܽܘܬܳܐ܆ ܗܳܝ ܕܰܠܘܳܬ ܟܽܠ ܚܰܫܳܐ ܕܫܽܘܚܠܳܦܳܐ ܠܐ ܡܶܫܬܰܓܢܝܳܢܳܐ ܐܝ̣ܬܰܘܗܝ. ܓܰܐܝܽܘܬܳܐ ܕܫܶܡܫܳܐ ܢܰܗܺܝܪܽܘܬܶܗ. ܓܰܐܝܽܘܬܶܗ ܕܣܰܗܪܳܐ ܡܫܰܡܠܝܽܘܬܳܐ ܕܢܽܘܗܪܶܗ ܡܳܐ ܕܚܰܡܶܫܬܰܥܣܰܪ ܩܳܐܷܡ ܒܚܽܘܕܪܳܐ ܕܓܺܝܓܠܶܗ. ܟܕ ܠܐ ܚܰܣܺܝܪ. ܓܰܐܝܽܘܬܳܐ ܬܽܘܒ ܫܟܺܝܚܳܐ ܘܰܒܬܰܠܓܳܐ. ܡܳܐ ܕܰܨܡܺܝܕܳܐ ܠܶܗ ܩܰܪܺܝܪܽܘܬܳܐ ܘܒܰܠܒܽܘܫܳܐ ܗܳܢܐ ܫܶܡܫܳܢܳܝܳܐ ܘܢܰܗܺܝܪܳܐ ܡܰܦܪܶܓ ܗܘܳܐ ܒܦܰܪܕܰܝܣܳܐ ܐܳܕܳܡ܆ ܟܰܕ ܕܶܝܢ ܚܛܳܐ ܘܰܗܘܳܐ ܬܰܠܡܺܝܕܳܐ ܠܚܶܘܝܳܐ. ܐܶܬܢܣܶܒܘ ܡܶܢܶܗ ܠܒܽܘ̈ܫܶܐ ܪ̈ܺܝܫܳܝܶܐ ܕܠܐܴ ܡܶܬܚܰܒܠܳܢܽܘܬܳܐ. ܘܰܚܠܳܦ ܗܳܠܝܢ ܟܕ ܥܛܰܦ ܠܘܳܬ ܟܝܳܢܳܐ ܕܺܝܠܶܗ ܠܒܶܫ ܡܳܝܽܘܬܽܘܬܳܐ ܘܡܶܬܚܰܒܠܳܢܽܘܬܳܐ. ܘܶܐܬܟܰܣܺܝ ܢܰܚ̈ܬܶܐ ܟܡܺܝܪ̈ܶܐ ܕܙܶܩܪܰܬ ܠܶܗ ܚܛܺܝܬܳܐ. ܟܰܕ ܨܒܳܐ ܥܳܒܽܘܕܶܗ ܕܢܰܥܛܦܶܗ ܠܘܳܬ ܐܰܝܠܶܝܢ ܕܰܐܘܒܶܕ. ܡܶܢ ܥܶܠܰܬ ܡܰܗܡܝܳܢܽܘܬܳܐ. ܫܰܕܰܪ ܠܓܰܒܪܺܐܝܠ ܡܰܠܰܐܟܰܐ ܒܳܬܪܶܗ ܠܘܳܬ ܒܬܽܘܠܬܳܐ ܘܣܰܒܪܳܗ̇ ܕܢܶܫܪܶܐ ܒܗ̇ ܥܰܡܰܢܽܘܐܝܠ ܘܶܐܬܳܐ ܘܰܒܟܰܪܣܳܐ ܐܶܬܚܒܶܫ ܐܳܦ ܒܡܰܪܒܥܳܐ ܐܶܣܬܰܝܰܟ. ܘܰܒܟܰܝܠܳܐ ܗܘܳܐ ܗܰܘ ܠܐ ܡܶܬܡܰܫܚܳܢܳܐ ܟܕ ܠܐ ܐܰܘܒܶܕ ܫܒܺܝ̈ܚܳܬܳܐ ܘܰܡܥܰܠܝܴ̈ܬܳܐ ܕܰܟܝܳܢܶܗ. ܘܚܰܝܶܕ ܠܶܗ ܡܶܢ ܡܰܪܒܥܳܐ ܒܬܽܘܠܳܝܳܐ. ܒܶܣܪܳܐ ܚܳܫܽܘܫܳܐ ܘܡܳܝܽܘܬܳܐ. ܗܰܘ ܕܰܠܒܺܝܫ ܓܰܐܝܽܘܬܳܐ ܘܠܐܴ ܡܶܬܚܰܒܠܳܢܽܘܬܳܐ. ܘܰܡܥܰܛܰܦ ܗܘܳܐ ܟܝܳܢܳܐܝ̣ܬ ܠܐ ܡܳܝܽܘܬܽܘܬܳܐ ܘܚܰܫ ܒܰܟܝܳܢܶܗ ܘܣܰܝܒܰܪ ܚܰܫ̈ܐ ܘܡܰܘܬܳܐ ܘܥܠ ܠܩܰܒܪܳܐ ܘܶܐܬܡܢܺܝ ܥܰܡ ܥܰܢܺܝ̈ܕܶܐ. ܘܡܶܬܟܰܪܙܳܐ ܥܠܰܘܗܝ ܒܳܬܰܪ ܩܝܳܡܬܳܐ ܕܠܐ ܡܶܬܚܰܒܠܳܢܽܘܬܳܐ ܘܰܠܒܶܫ ܐܦ ܓܰܐܝܽܘܬܳܐ ܒܰܩܝܳܡܬܶܗ. ܕܺܐܝܬܶܝܗ̇ ܠܐ ܡܳܝܽܘܬܽܘܬܳܐ. ܡܶܛܠ ܕܗܽܘ ܡܶܠܬܳܐ ܒܰܟܝܳܢܶܗ ܠܐ ܡܶܬܚܰܒܠܳܢܳܐ ܘܠܐ ܡܳܝܽܘܬܳܐ ܐܝ̣ܬܰܘܗܝ. ܗܳܟܰܢܳܐ ܐܦ ܠܦܰܓܪܳܐ ܗܰܘ ܕܰܠܒܶܫ ܐܰܩܺܝܡ. ܠܰܘ ܡܶܬܚܰܒܠܳܢܳܐ ܐܠܐ ܠܐ ܡܶܬܚܰܒܠܳܢܳܐ. ܐܝܟ ܩܰܕܶܡ ܐܡ̣ܪ ܥܠܰܘܗܝ ܪܽܘܚܳܐ: ܕܠܐ ܫܳܒܶܩ ܐܰܢܬ ܠܢܰܦܫܝ ܒܰܫܝܽܘܠ. ܘܠܐ ܝܳܗܶܒ ܐܰܢܬ ܠܚܰܣܝܳܟ ܕܢܶܚܙܶܐ ܚܒܳܠܐܴ. ܡܳܕܶܝܢ ܫܰܦܺܝܪ ܐܡ̣ܪ ܢܒܺܝܳܐ ܕܰܠܒܶܫ ܓܰܐܝܽܘܬܳܐ.
ܘܰܠܒܶܫ ܡܳܪܝܳܐ ܥܽܘܫܢܳܐ ܘܶܐܬܥܰܫܢ. ܡܶܟܺܝܠ ܒܳܬܰܪ ܩܝܳܡܬܳܐ ܐܰܪܦܺܝ ܐܶܢܝܢ ܠܗܳܠܝܢ ܕܰܡܚܺܝܠܽܘܬܳܐ. ܘܠܘ ܬܘܒ ܒܟܰܦܢܳܐ ܘܰܒܚܰܫ̈ܐ ܡܶܬܢܰܣܶܐ ܐܝܟ ܕܰܒܙܰܒܢܳܐ ܕܰܡܕܰܒܪܳܢܽܘܬܳܐ ܕܒܰܒܣܰܪ. ܐܠܐ ܡܶܟܝ̣ܠ ܥܠ ܟܪ̈ܽܘܒܶܐ ܡܶܙܕܰܝܰܚ ܘܗܳܕܐ ܥܡ ܦܰܓܪܳܐ. ܘܥܠ ܝܰܡܺܝܢܳܐ ܝܬܶܒ ܕܰܐܒܳܐ. ܠܘ ܒܶܠܥܳܕ ܒܶܣܪܳܐ. ܘܰܒܫܽܘܒܚܳܐ ܥܠ ܥܢܴ̈ܢܶܐ ܕܰܫܡܰܝܳܐ ܐܳܬܶܐ. ܕܰܝܳܢܳܐ ܟܺܐܢܳܐ ܘܰܡܫܰܒܚܳܐ. ܘܗܳܟܰܢܳܐ ܡܰܬܩܰܢ ܠܗ̇ ܠܡܶܬܥܰܡܪܳܢܺܝܬܳܐ. ܘܥܳܒܶܕ ܠܗ̇ ܠܐ ܡܶܬܬܙܺܝܥܳܢܺܝܬܳܐ ܐܝܟ ܕܶܐܡܰܪ ܪܽܘܚܳܐ:
ܘܰܐܬܩܢܳܗ̇ ܠܬܺܒܶܝܠ ܕܠܳܐ ܬܙܽܘܥ. ܘܗܳܕܐ ܒܝܰܕ ܟܳܪܽܘܙܽܘܬܳܐ ܕܰܫܠܺܝ̈ܚܶܐ ܕܢܶܦܩܰܬ ܗܘܳܬ ܒܟܽܠܗ̇ ܥܳܡܰܪܬܳܐ. ܣܽܘܥܪܳܢܳܐ ܕܡܽܘܟܳܟܶܗ ܕܡܳܪܝܳܐ. ܗܳܠܝܢ ܓܶܝܪ ܫܽܘܘ̈ܕܳܥܶܐ ܢܣܰܒܘ ܫܠܺܝ̈ܚܶܐ ܘܰܢܦܰܩܘ ܠܒܶܝܬ ܥܰܡ̈ܡܶܐ. ܟܰܕ ܡܰܟܪܙܺܝܢ ܠܶܗ ܪܰܒܽܘܬܳܐ ܘܰܡܥܰܠܝܽܘܬܳܐ ܘܠܐ ܡܰܚܰܬܬܳܐ ܕܙܰܘܚܳܐ ܕܡܰܫܪ̈ܝܳܬܳܐ. ܐܷܠܐ ܦܰܘܠܽܘܣ ܗܰܘ ܪܰܒܳܐ ܩܥܳܐ ܠܘܳܬ ܩܽܘܪ̈ܺܝܢܬܳܝܶܐ: ܕܡܰܟܪܙܺܝܢܰܢ ܡܫܺܝܚܳܐ ܟܰܕ ܨܠܺܝܒ ܬܽܘܩܰܠܬܳܐ ܠܝܽܘ̈ܕܳܝܶܐ ܘܠܰܐܪ̈ܡܳܝܶܐ ܫܳܛܝܽܘܬܳܐ (ܐ ܩܘܪ̈ܢܬܝܐ ܐ: ܟܓ). ܘܰܠܘܳܬ ܓܰܠܰܛܳܝ̈ܐ ܬܽܘܒ ܟܳܬܶܒ ܗܘܳܐ ܦܰܘܠܽܘܣ ܫܠܺܝܚܳܐ: ܠܐܴ ܡܶܢ ܒܢܰܝ̈ܢܳܫܳܐ ܘܠܐܴ ܒܝܰܕ ܒܰܪܢܳܫܳܐ ܐܶܠܐ ܒܝܰܕ ܝܶܫܽܘܥ ܡܫܺܝܚܳܐ ܘܰܐܠܗܳܐ ܐܰܒܽܘܗܝ. ܗܰܘ ܕܰܐܩܺܝܡܶܗ ܡܶܢ ܒܶܝܬ ܡܺܝ̈ܬܶܐ (ܓܠܛܝ̈ܐ ܐ: ܐ). ܘܝܽܘܚܰܢܳܢ ܫܠܺܝܚܳܐ ܡܰܟܪܶܙ ܗܘܳܐ ܒܶܐܦܶܣܽܘܣ. ܟܰܕ ܡܰܬܩܰܢ ܠܶܗ ܐܰܬܪܳܐ ܕܰܐܣܝܰܐ: ܡܶܠܬܳܐ ܒܶܣܪܳܐ ܗܘܳܐ ܘܰܐܓܶܢ ܒܰܢ (ܝܘܚܢܢ ܐ: ܝܕ). ܘܗܳܠܶܝܢ ܩܴ̈ܠܐ ܩܰܕܺܝ̈ܫܶܐ ܘܡܰܟܬܒܳܢܘܴ̈ܬܳܐ ܕܚܰܝܷ̈ܐ܆ ܠܡܶܬܥܰܡܪܳܢܺܝܬܳܐ ܡܰܬܩ̈ܢܳܢ ܗܘܱ̈ܝ ܕܠܐ ܬܙܽܘܥ. ܐܝܟ ܕܶܐܡܰܪ ܪܽܘܚܳܐ. ܟܕ ܩܳܥܶܝܢ ܗܘܰܘ ܐܝܟ ܢܒܺܝܳܐ.
ܡܰܬܩܰܢ ܗܽܘ ܟܽܘܪܣܝܳܟ ܕܡܶܢ ܩܕܺܝܡ. ܘܡܶܢ ܥܳܠܰܡ ܐܰܢܬ ܗܽܘ. ܘܗܳܕܐ ܠܘܳܬ ܥܶܒܪ̈ܳܝܶܐ ܦܰܘܠܽܘܣ ܟܳܬܶܒ ܗܘܳܐ ܘܳܐܡܰܪ: ܟܽܘܪܣܝܳܟ ܐܰܠܗܳܐ ܠܥܳܠܰܡ ܥܳܠܡܺܝܢ. ܫܰܒܛܳܐ ܦܫܺܝܛܳܐ ܫܰܒܛܳܐ ܕܡܰܠܟܽܘܬܳܟ (ܥܒܪ̈ܝܐ ܐ: ܚ). ܘܬܽܘܒ ܐܰܢܬ ܡܶܢ ܒܪܺܝܫܺܝܬ ܣܳܡܬ ܫܶܬܶܐܣܶܝ̈ܗ̇ ܕܰܐܪܥܳܐ. ܘܰܫܡܰܝܴ̈ܐ ܥܒܳܕ ܐܺܝ̈ܕܰܝܟ ܐܶܢܽܘܢ. ܘܗܶܢܽܘܢ ܢܶܥܒܪܽܘܢ ܘܰܐܢܬ ܩܰܝܳܡ ܐܰܢܬ. ܘܟܽܠܗܽܘܢ ܐܝܟ ܢܰܚܬܳܐ ܢܶܒܠܽܘܢ. ܘܰܐܝܟ ܬܰܟܣܺܝܬܳܐ ܬܶܥܽܘܦ ܐܶܢܽܘܢ. ܘܢܶܬܚܰܠܦܽܘܢ ܘܰܐܢܬ ܐܰܝܟ ܕܺܐܝܬܰܝܟ ܐܰܢܬ. ܘܰܫܢܰܝ̈ܟ ܠܐܴ ܢܶܓܡܪ̈ܳܢ (ܥܒܪ̈ܝܐ ܐ: ܝ-ܝܒ). ܐܦ ܥܰܡܶܗ ܐܦ ܝܽܘܚܰܢܳܢ ܗܰܘ ܪܰܥܡܳܐ ܠܟܳܪܽܘܙܽܘܬܳܐ ܕܰܣܒܰܪܬܳܐ ܕܥܳܠܡܳܐ ܐܡ̣ܪ ܠܥܰܡ̈ܡܶܐ: ܕܰܡܣܰܒܪܺܝܢܰܢ ܠܟܽܘܢ ܠܗܰܘ ܕܺܐܝܬܰܘܗܝ ܗܘܳܐ ܡܶܢ ܒܪܺܝܫܺܝܬ܇ ܠܗܰܘ ܕܰܫܡܰܥܢ ܘܰܚܙܰܝܢܳܝܗܝ ܒܥܰܝ̈ܢܰܝܢ ܘܓܰܫܢ ܒܺܐܝ̈ܕܰܝܢ. ܠܗܰܘ ܕܺܐܝܬܰܘܗܝ ܡܶܠܬܳܐ ܕܚܰܝܷ̈ܐ. ܘܚܰܝܷ̈ܐ ܐܶܬܓܠܺܝܘ. ܘܰܚܙܰܝܢ ܘܣܳܗܕܺܝܢܰܢ. ܘܡܰܟܪܙܺܝܢܰܢ ܠܟܽܘܢ ܚܰܝܷ̈ܐ ܕܰܠܥܳܠܰܡ܇ ܗܰܘ ܕܺܐܝܬܰܘܗܝ ܗܘܳܐ ܠܘܳܬ ܐܰܒܳܐ ܘܶܐܬܓܠܺܝ ܠܰܢ (ܐ ܝܘܚܢܢ ܐ: ܐ-ܒ). ܕܰܠܗܽܘܢ ܠܗܳܠܝܢ ܪ̈ܳܚܡܰܘܗܝ ܕܚܰܬܢܳܐ. ܕܰܐܬܩܶܢܘ ܠܬܺܒܶܝܠ ܒܟܳܪܽܘܙܽܘܬܗܘܢ. ܩܳܪܶܐ ܗܳܪܟܳܐ ܪܽܘܚܳܐ. ܢܰܗܪ̈ܰܘܳܬܳܐ ܦܶܠܐܷܬܳܢܳܐܝ̣ܬ ܘܳܐܡܰܪ:
ܐܶܬܬܪܺܝܡܘ ܠܰܡ ܢܰܗܪ̈ܰܘܳܬܳܐ ܡܳܪܝܳܐ. ܐܰܪܺܝܡܘ ܢܰܗܪ̈ܰܘܳܬܳܐ ܩܳܠܗܽܘܢ. ܐܶܬܬܪܺܝܡܘ ܢܰܗܪ̈ܳܘܳܬܳܐ ܒܕܰܟܝܽܘܬܳܐ. ܡܶܢ ܩܳܠܳܐ ܕܡܰܝܴ̈ܐ ܣܰܓܺܝ̈ܐܐ. ܕܥܰܠ ܫܠܺܝ̈ܚܶܐ ܩܰܕܺܝ̈ܫܳܐ ܡܶܬܢܰܣܒܳܐ ܡܶܠܬܳܐ ܗܳܕܐ ܕܢܰܗܪ̈ܰܘܳܬܳܐ. ܡܦܺܝܣܳܐ ܡܶܠܬܶܗ ܕܳܐܡܰܪ: ܕܟܽܠ ܡܰܢ ܠܡ ܕܰܡܗܰܝܡܶܢ ܒܺܝ. ܐܰܝܟܰܢܳܐ ܕܶܐܡܰܪܘ ܟܬܳܒ̈ܐ ܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝ̈ܐ ܢܶܪܕܽܘܢ ܡܶܢ ܟܰܪܣܶܗ (ܝܘܚܢܢ ܙ: ܠܚ). ܐܦ ܓܝܪ ܛܽܘܒܬܳܢܳܐ ܚܰܙܩܺܝܐܝܠ ܗܰܘ ܕܰܚܙܳܐ ܗܘܳܐ ܚܰܝ̈ܘܳܬܳܐ ܕܰܟܕܺܝ̈ܢܳܢ ܒܡܰܪܟܰܒܬܳܐ ܟܕ ܐܶܬܦܰܫܰܩ ܠܶܗ ܐܪܳܙܳܐ ܪܽܘܚܳܢܳܐ ܕܰܥܠܰܝܗܶܝܢ. ܫܡܰܥ ܗܘܳܐ ܩܳܠܐܴ ܕܓܶܦܰܝ̈ܗܘܢ ܐܰܝܟ ܩܳܠܐ ܕܡܰܝܴ̈ܐ ܣܰܓܺܝ̈ܐܐ. ܘܰܐܝܟ ܩܳܠܳܐ ܕܰܐܠܗܳܐ. ܡܳܕܶܝܢ ܫܰܦܺܝܪܳܐ ܩܳܪܶܐ ܐܢܳܫ ܠܶܗ ܠܡܰܬܰܝ ܟܳܪܽܘܙܽܘܬܳܐ ܕܶܐܘܰܢܓܶܠܝܘܢ. ܟܰܕ ܩܳܐܷܡ ܒܰܐܬܪ̈ܰܘܳܬܳܐ ܕܦܰܠܶܣܛܺܝܢܺܝ ܘܰܠܥܶܠ ܡܶܢ ܪܳܡܬܳܐ ܕܰܒܢܱ̈ܝ ܩܪܺܝܛܺܝ ܘܰܡܛܺܝܦ ܐܰܝܟ ܫܶܩܝܳܐ ܕܢܰܗܪܳܐ ܝܽܘܠܦܳܢܳܐ ܕܥܰܠ ܡܶܬܒܰܪܢܫܳܢܽܘܬܶܗ ܕܡܳܪܝܳܐ. ܘܬܽܘܒ ܡܶܬܬܪܺܝܡ ܗܘܳܐ ܢܰܗܪܳܐ ܬܪܰܝܳܢܳܐ ܡܰܪܩܽܘܣ. ܘܫܳܡܥܺܝܢ ܗܘܰܘ ܠܶܗ ܒܢܱ̈ܝ ܪܗܽܘܡܺܝ ܟܕ ܩܳܥܶܐ ܘܳܐܡܰܪ: ܪܺܝܫܳܐ ܕܶܐܘܰܢܓܶܠܝܘܢ ܕܝܶܫܘܥ ܡܫܺܝܚܳܐ ܒܪܶܗ ܕܰܐܠܳܗܳܐ (ܡܪܩܘܣ ܐ: ܐ). ܢܰܗܪܳܐ ܗܘܳܐ ܬܽܘܒ ܬܠܺܝܬܳܝܳܐ ܐܳܦ ܛܽܘܒܬܳܢܳܐ ܠܽܘܩܳܐ܆ ܗܰܘ ܕܒܰܡܕܺܝܢܬܳܐ ܪܰܒܬܳܐ ܕܰܐܠܶܟܣܰܢܕܪܺܝܰܐ ܡܰܟܬܶܒ ܗܘܳܐ ܐܰܝܠܶܝܢ ܕܶܐܡܰܪ ܡܰܠܐܟܳܐ ܠܝܳܠܕܰܬ ܐܠܗܳܐ ܒܬܽܘܠܬܳܐ: ܕܪܽܘܚܳܐ ܩܰܕܺܝܫܳܐ ܢܺܐܬܶܐ ܘܚܺܝܠ ܥܶܠܳܝܳܐ ܢܰܐܓܶܢ ܥܠܰܝܟܝ. ܡܶܛܠ ܗܳܢܐ ܗܰܘ ܕܡܶܬܺܝܠܶܕ ܒܶܟܝ ܩܰܕܺܝܫܰܐ ܗ̄ܘ. ܘܰܒܪܶܗ ܕܥܶܠܳܝܳܐ ܢܶܬܩܪܶܐ (ܠܘܩܐ ܐ: ܠܗ). ܢܰܗܪܳܐ ܗܘܳܐ ܬܽܘܒ ܪܒܺܝܥܳܝܳܐ ܛܽܘܒܬܳܢܳܐ ܝܽܘܚܰܢܳܢ ܟܳܪܽܘܙܳܐ܆ ܗܰܘ ܕܰܡܛܺܝܦ ܗܘܳܐ ܒܡܰܝܴ̈ܐ ܚܰܝ̈ܐ ܕܪܳܕܶܝܢ ܡܶܢ ܟܰܪܣܶܗ ܠܐܱܬܪ̈ܰܘܳܬܳܐ ܕܶܐܦܶܣܳܝ̈ܐ ܟܰܕ ܡܰܟܪܶܙ ܘܳܐܡܰܪ: ܒܪܺܝܫܺܝܬ ܐܝ̣ܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܝ̣ܬܰܘܗܝ ܠܘܳܬ ܐܰܠܗܳܐ. ܘܰܐܠܗܳܐ ܐܝ̣ܬܰܘܗܝ ܗܘܳܐ ܗܽܘ ܡܶܠܬܳܐ. ܗܳܢܐ ܐܝ̣ܬܰܘܗܝ ܗܘܳܐ ܒܪܺܝܫܺܝܬ ܠܘܳܬ ܐܰܠܗܳܐ. ܘܟܽܠ ܒܺܐܝܕܶܗ ܗܘܳܐ. ܘܒܶܠܥܳܕܰܘܗܝ ܐܳܦܠܳܐ ܚܕܳܐ (ܝܘܚܢܢ ܐ: ܐ-ܓ). ܘܬܽܘܒ ܡܶܠܬܳܐ ܒܶܣܪܳܐ ܗܘܳܐ ܘܰܐܓܶܢ ܒܰܢ (ܝܘܚܢܢ ܐ: ܝܕ). ܢܶܬܬܪܺܝܡ ܦܰܘܠܽܘܣ ܗܰܘ ܪܰܒܳܐ ܟܰܕ ܡܰܫܦܰܥ ܢܰܗܪܳܐ ܕܡܰܝܴ̈ܐ ܚܰܝ̈ܐ ܡܶܢ ܦܽܘܡܶܗ܆ ܒܪܽܗܘܡܺܝ ܐܶܡܳܐ ܕܰܡܕܺܝ̈ܢܳܬܳܐ ܘܢܺܐܡܰܪ܆ ܫܰܕܰܪ ܐܰܠܳܗܳܐ ܠܰܒܪܶܗ ܒܰܕܡܽܘܬܳܐ ܕܒܶܣܪܳܐ ܕܰܚܛܺܝܬܳܐ ܡܶܛܠܳܬܳܗ̇ ܕܰܚܛܺܝܬܳܐ ܕܰܢܚܰܝܒܺܝܗ̇ ܠܰܚܛܺܝܬܳܐ ܒܒܶܣܪܶܗ (ܪ̈ܗܘܡܝܐ ܚ: ܓ). ܘܢܶܩܥܶܐ ܡܶܛܠ ܥܶܒܪ̈ܳܝܶܐ܆ ܕܡܶܢܗܽܘܢ ܐܶܬܚܙܺܝ ܡܫܺܝܚܳܐ ܒܰܒܣܰܪ. ܕܺܐܝܬܰܘܗܝ ܐܰܠܗܳܐ ܕܥܰܠ ܟܽܠ (ܪ̈ܗܘܡܝܐ ܛ: ܗ). ܗܳܢܐ ܕܠܰܘ ܚܰܕ ܢܰܗܪܳܐ ܒܰܠܚܽܘܕ ܙܳܕܶܩ ܕܢܶܩܪܶܝܘܗܝ. ܐܠܐ ܢܰܗܪ̈ܰܘܳܬܳܐ ܣܰܓܺܝ̈ܐܴܬܳܐ. ܗܳܟܰܢܐ ܐܳܦ ܒܟܽܠܗ̇ ܡܶܬܥܰܡܪܳܢܺܝܬܳܐ ܢܰܗܪ̈ܰܘܳܬܳܐ ܗܳܠܝܢ ܐܰܠܳܗܳܝ̈ܐ ܫܶܡܥܽܘܢ ܒܺܐܝܛܰܐܠܺܝܰܐ. ܘܬܽܐܘܡܰܐ ܒܗܶܢܕܽܘ ܒܰܐܬܪ̈ܰܘܳܬܳܐ ܕܟܽܘ̈ܫܳܝܶܐ. ܒܰܪ ܬܽܘܠܡܰܝ ܒܡܰܕܢܚܳܐ ܘܒܰܐܬܪ̈ܰܘܳܬܳܐ ܕܳܐܬܽܘܪ̈ܳܝܶܐ. ܡܰܝܴ̈ܐ ܕܟܳܪܽܘܙܽܘܬܳܐ ܡܬܰܦܶܦ ܗܘܳܐ ܘܡܰܫܩܶܐ. ܡܶܛܠ ܕܠܘ ܡܶܠܐܴܐ ܕܰܕܠܽܘܚܝܳܐ ܐܰܪܺܝܡ ܐܶܢܘܢ ܠܢܰܗܪ̈ܰܘܳܬܳܐ ܗܳܠܝܢ. ܦܰܫܶܩ ܪܽܘܚܳܐ ܘܶܐܡܰܪ: ܐܶܬܬܪܺܝܡܘ ܢܰܗܪ̈ܰܘܳܬܳܐ ܒܕܰܟܝܽܘܬܳܐ. ܟܕ ܡܚܰܘܶܐ ܕܰܟܝܽܘܬܳܐ ܕܺܝܠܶܗ. ܕܝܽܘܠܦܳܢܳܐ ܐܰܠܳܗܳܝܳܐ ܕܶܐܠܽܘ ܢܰܗܪ̈ܰܘܳܬܳܐ ܡܶܬܪ̈ܰܓܫܳܢܶܐ ܗܘܰܘ. ܠܰܘ ܒܕܰܟܝܽܘܬܳܐ ܡܶܬܬܪܺܝܡܺܝܢ ܗܘܰܘ. ܡܶܛܠ ܕܢܰܗܪ̈ܰܘܳܬܳܐ ܡܶܬܟܰܢܫܺܝܢ ܡܶܢ ܡܶܛܪܳܐ ܐܶܡܰܬܝ ܕܡܶܬܬܪܺܝܡܺܝܢ ܕܠܽܘܚܝܳܐ ܘܰܫܥܺܝܢܳܐ ܡܠܶܝܢ. ܡܶܢ ܩܳܠܐܴ ܠܰܡ ܕܡܰܝܴ̈ܐ ܣܰܓܺܝ̈ܐܐ.
ܥܰܫܺܝܢܺܝܢ ܠܰܡ ܡܰܚܫܽܘ̈ܠܰܘܗܝ ܕܝܰܡܳܐ. ܒܽܐܘ̈ܠܨܳܢܶܐ ܓܝܪ ܕܠܰܝܬ ܠܗܽܘܢ ܡܶܢܝܳܢܳܐ. ܩܳܡ ܥܳܠܡܳܐ ܐܝܟ ܕܰܒܝܰܡܳܐ ܡܶܬܡܬܶܠ ܠܽܘܩܒܰܠ ܢܰܗܪ̈ܳܘܳܬܳܐ ܗܳܠܝܢ. ܘܠܐ ܒܡܶܕܶܡ ܣܰܓܶܦ ܐܶܢܘܢ. ܐܡ̣ܪ ܓܝܪ ܪܽܘܚܳܐ.
ܡܫܰܒܰܚ ܒܰܡܪ̈ܰܘܡܶܐ ܡܳܪܝܳܐ. ܘܣܳܗܕܽܘܬܶܗ ܕܠܐ ܡܶܬܕܰܓܠܳܐ. ܐܡ̣ܪ ܓܝܪ ܪܽܘܚܳܐ:
ܣܳܗܕ̈ܘܳܬܳܟ ܛܳܒ ܡܗܰܝܡ̈ܢܳܢ. ܘܰܠܒܰܝܬܳܟ ܝܳܐܝܳܐ ܩܰܕܺܝܫܽܘܬܳܐ. ܡܳܪܝܳܐ ܠܢܽܘܓܪܳܐ ܕܝܰܘ̈ܡܳܬܳܐ. ܟܽܠܡܶܕܶܡ ܕܰܡܣܰܗܶܕ ܗܘܳܐ ܒܰܫܠܺܝ̈ܚܰܘܗܝ ܡܶܬܗܰܝܡܶܢ ܗܘܳܐ. ܒܝܰܕ ܚܰܝ̈ܠܐܷ ܕܣܳܥܰܪ ܗܘܳܐ ܒܺܐܝ̈ܕܰܝܗܘܢ. ܘܰܠܥܺܕܬܶܗ ܝܳܐܝܳܐ ܩܰܕܺܝܫܽܘܬܳܐ. ܘܒܳܗ̇ ܥܳܡܰܪ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܐܪܒܥܐ
ܕܶܐܬܪܫܶܡ ܒܶܗ ܐܪܳܙܳܐ ܕܓܶܠܝܳܢܶܗ ܕܥܰܡܰܢܽܘܐܝܠ ܘܥܰܠ ܡܰܪܳܚܽܘܬܳܐ ܕܝܽܘ̈ܕܳܝܶܐ ܕܥܰܠ ܡܫܺܝܚܳܐ ܘܡܰܟܣܳܢܽܘܬܳܐ ܠܽܘܩܒܰܠ ܨܳܠܽܘܒܷ̈ܐ.
ܪܽܘܚܳܐ ܕܰܐܠܳܗܳܐ ܒܟܳܪܽܘܙܽܘܬܳܐ ܕܰܢܒܺܝ̈ܐ ܒܟܽܠ ܚܰܫ̈ܝ̣ܢ ܕܚܰܘܺܝ ܓܶܠܝܳܢܶܗ ܕܥܰܡܰܢܽܘܐܝܠ܆ ܐܱܟܪܙܰܬ ܫܽܘ̈ܚܠܳܦܶܐ ܕܡܶܐܬܺܝܬܶܗ. ܘܟܰܕ ܠܟܽܠܗܘܢ ܐܰܘܕܥܰܬ ܐܪ̈ܳܙܶܐ ܪ̈ܳܡܶܐ ܕܓܶܠܝܳܢܰܘ̈ܗܝ ܕܥܰܠ ܐܰܪܥܳܐ. ܝܰܬܺܝܪ ܡܶܢ ܟܽܠܗܘܢ ܠܛܽܘܒܬܳܢܳܐ ܕܰܘܝܕ܆ ܫܰܘܕܥܰܬ ܕܶܝܢ ܨܽܘܪ̈ܳܬܳܐ ܕܡܶܐܬܺܝܬܶܗ ܕܗܰܘ ܦܳܪܽܘܩܳܐ ܕܟܽܠܐܴ. ܘܠܰܘ ܒܚܰܕ ܣܽܘܟܳܠܳܐ ܘܢܺܝܫܳܐ ܒܰܠܚܽܘܕ ܓܠܳܬ ܠܶܗ ܥܰܠ ܦܳܪܽܘܩܰܢ. ܐܶܠܐ ܥܰܬܺܝܪܳܐܝ̣ܬ ܟܶܬܒܰܬ ܒܶܗ ܨܶܒܥܳܐ ܕܪܽܘܚܳܐ. ܥܷ̈ܠܠܳܬܳܐ ܕܓܶܠܝܳܢܰܘ̈ܗܝ ܕܥܰܡܰܢܽܘܐܝܠ. ܘܗܳܫܐ ܕܶܝܢ ܒܡܰܙܡܽܘܪܳܐ ܗܳܢܐ ܕܬܶܫܥܺܝܢ ܘܰܐܪܒܥܳܐ ܡܰܠܦܳܐ ܕܰܢܦܺܝܣ ܠܐܠܗܳܐ ܕܢܶܬܓܠܐܷ. ܟܕ ܠܘ ܒܰܡܚܺܝܠܽܘܬܳܐ ܥܳܒܕܳܐ ܫܽܘܪ̈ܳܝܶܐ ܕܬܶܫܒܽܘܚܬܳܐ. ܐܠܐ ܬܳܒܽܘܥܳܐ ܥܰܙܺܝܙܳܐ ܝܳܕܰܥ ܠܗ̇ ܪܽܘܚܳܐ ܕܰܢܒܺܝܽܘܬܳܐ. ܠܗܰܘ ܕܶܐܡܰܪ ܠܶܗ ܢܒܺܝܐ ܢܶܬܓܠܐܷ. ܘܕܰܝܳܢܳܐ ܕܟܽܠܗ̇ ܐܰܪܥܳܐ ܡܫܰܡܰܗ ܠܗ. ܘܥܰܠܗܳܝ ܕܝܢ ܡܙܰܡܰܪ ܘܳܐܡܰܪ:
ܐܰܠܳܗܳܐ ܬܳܒܽܘܥܳܐ ܡܳܪܝܳܐ܆ ܐܰܠܗܳܐ ܬܳܒܽܘܥܳܐ ܐܶܬܓܠܺܝ. ܐܶܬܬܪܺܝܡ ܕܰܝܳܢܳܗ̇ ܕܰܐܪܥܳܐ. ܘܰܐܗܦܶܟ ܦܽܘܪܥܳܢܳܐ ܥܰܠ ܐܰܝܠܶܝܢ ܕܡܶܬܓܰܐܷܝܢ. ܗܳܠܝܢ ܩܴ̈ܠܐܷ ܡܰܘ̈ܕܥܳܢܶܐ ܐܶܢܘܢ ܕܰܡܬܽܘܡܳܝܽܘܬܶܗ ܕܡܶܠܬܳܐ ܥܰܡܰܢܽܘܐܝܠ܆ ܘܪܰܒܽܘܬܳܐ ܕܰܟܝܳܢܶܗ ܐܰܠܳܗܳܝܳܐ ܡܚܰܘܶܝܢ. ܘܕܰܡܛܰܝܰܒ ܗܘܳܐ ܕܢܺܐܬܶܐ ܠܰܐܪܥܳܐ ܒܓܶܠܝܳܢܳܐ ܡܣܰܟܠܺܝܢ. ܩܰܕܶܡ ܐܰܠܗܳܐ ܓܠܐܴ ܠܰܢܒܺܝ̈ܐ ܕܡܶܬܓܠܶܐ ܐܠܗܳܐ ܥܰܠ ܐܰܪܥܳܐ ܒܰܒܣܰܪ. ܕܠܐ ܡܳܐ ܕܶܐܬܓܠܺܝ ܢܶܬܕܰܓܰܠ ܓܶܠܝܳܢܶܗ ܘܠܐ ܬܶܬܗܰܝܡܶܢ ܡܶܐܬܺܝܬܶܗ. ܢܰܗܺܝܪܳܐܝ̣ܬ ܡܳܕܶܝܢ ܟܕ ܐܡ̣ܪ ܪܽܘܚܳܐ ܗܳܠܝܢ ܕܰܒܫܽܘܪܳܝ ܡܰܙܡܽܘܪܳܐ ܗܳܢܐ. ܡܶܣܬܰܟܠܺܝܢܰܢ ܡܶܢܗܶܝܢ ܕܠܐ ܦܽܘܠܳܓܳܐ. ܕܰܐܠܳܗܳܐ ܬܳܒܽܘܥܳܐ ܘܡܳܪܝܳܐ. ܘܝܳܕܥܳܐ ܠܶܗ ܪܽܘܚܳܐ ܕܰܢܒܺܝܽܘܬܳܐ ܠܗܰܘ ܕܶܐܬܳܐ ܡܶܢ ܫܡܰܝܳܐ. ܘܶܐܬܓܠܺܝ ܥܰܠ ܐܰܪܥܳܐ ܒܰܒܣܰܪ. ܘܠܰܘ ܣܪܺܝܩܳܐܝ̣ܬ ܐܰܠܗܳܐ ܬܳܒܽܘܥܳܐ ܩܪܳܝܗܝ ܪܽܘܚܳܐ ܩܰܕܺܝܫܳܐ. ܡܶܛܠ ܬܒܰܥܬܳܐ ܐܳܡܪܺܝܢܰܢ ܕܶܐܬܓܠܺܝ ܐܠܗܳܐ ܥܰܠ ܐܰܪܥܳܐ. ܚܕܳܐ ܡܰܢ ܕܰܢܕܽܘܢ ܕܺܝܢܳܐ ܕܰܥܠܺܝ̈ܒܶܐ ܘܕܰܐܪ̈ܡܠܳܬܳܐ. ܘܰܢܦܰܨܶܐ ܠܥܰܡܳܐ ܕܺܝܠܶܗ ܡܶܢ ܐܝ̣ܕܳܐ ܕܪ̈ܰܫܺܝܥܶܐ. ܘܢܰܗܦܶܟ ܬܒܰܥܬܳܐ ܥܰܠ ܐܰܝܠܶܝܢ ܕܫܰܥܒܕܽܘܗ̇ ܠܰܫܒܺܝܬܳܐ ܒܰܩܛܺܝܪܳܐ. ܘܢܶܬܒܰܥ ܒܺܐܝ̈ܕܰܝ ܟܳܗܢ̈ܐ ܚܽܘܫܒܳܢܳܐ ܕܪܰܒܰܬ ܒܰܝܬܽܘܬܳܐ ܕܰܡܗܰܝܡܢܺܝܢ ܗܘܰܘ. ܘܟܰܕ ܡܚܰܘܶܐ ܠܗܽܘܢ ܚܰܡܺܝ̈ܡܶܐ ܘܰܣܪ̈ܺܝܩܶܐ ܢܣܰܒ ܡܶܢܗܘܢ ܡܰܠܟܽܘܬܳܐ ܕܰܐܠܗܳܐ. ܡܶܛܠܗܳܕܐ ܐܳܡܰܪ ܐܰܝܟ ܬܳܒܽܘܥܳܐ ܢܶܬܓܠܶܐ. ܘܰܐܝܟ ܕܰܝܳܢܳܐ ܕܰܐܪܥܳܐ ܢܶܬܬܪܺܝܡ. ܟܕ ܡܰܗܦܶܟ ܦܽܘܪܥܳܢܳܐ ܥܰܠ ܐܰܝܠܶܝܢ ܕܡܶܬܓܰܐܝܢ. ܣܳܦܪ̈ܶܐ ܘܰܦܪ̈ܺܝܫܶܐ ܘܥܰܡܳܐ ܕܝܽܘ̈ܕܳܝܶܐ ܕܰܐܚܺܝܕܺܝܢ ܗܘܰܘ ܩܠܺܝ̈ܕܶܐ ܕܡܰܠܟܽܘܬܳܐ ܕܰܐܠܗܳܐ. ܒܪܳܡܽܘܬܳܐ ܘܰܒܓܰܐܝܽܘܬܳܐ ܘܟܳܠܶܝܢ ܗܘܰܘ ܐܢܳܫܴ̈ܐ ܕܠܐ ܥܳܐܠܺܝܢ ܠܡܰܠܟܽܘܬܳܐ. ܘܬܳܟܣܺܝܢ ܗܘܰܘ ܐܦ ܠܰܐܚܪ̈ܳܢܶܐ. ܡܶܛܠ ܗܳܕܐ ܕܳܐܶܢ ܠܗܽܘܢ ܐܰܠܗܳܐ ܬܳܒܽܘܥܳܐ. ܗܰܘ ܕܶܐܬܓܠܺܝ ܕܢܰܗܦܶܟ ܠܗܽܘܢ ܦܽܘܪܥܳܢܗܘܢ.
ܥܕܰܡܳܐ ܠܶܐܡܰܬܝ ܪ̈ܰܫܺܝܥܶܐ ܡܳܪܝܳܐ. ܥܕܰܡܳܐ ܠܶܐܡܰܬܝ ܪ̈ܰܫܺܝܥܶܐ ܡܶܫܬܰܒܗܪܺܝܢ. ܓܳܣܶܝܢ ܘܰܡܡܰܠܠܺܝܢ ܥܰܘܠܳܐ. ܕܡܰܟܶܟܘ ܠܥܰܡܳܟ ܡܳܪܝܳܐ. ܘܰܠܝܳܪܬܽܘܬܳܟ ܫܰܥܒܶܕܘ. ܟܰܕ ܠܰܬܪܶܝܢ ܓܰܒܺܝ̈ܢ ܪ̈ܰܫܺܝܥܶܐ ܡܶܬܦܰܠܓܺܝܢ. ܫܽܘܪܳܝܳܐ ܫܳܩܶܠ ܡܶܢ ܚܰܕ ܓܰܒܳܐ ܗܰܘ ܡܪܰܡܝܳܢܳܐ ܕܓܰܕܶܦ ܒܦܰܪܕܰܝܣܳܐ. ܡܶܛܠܡܳܢܐ ܐܶܬܦܰܩܰܕ ܒܰܪܢܳܫܳܐ ܩܰܕܡܳܝܳܐ ܕܠܐܴ ܢܶܐܟܽܘܠ ܡܶܢ ܐܝ̣ܠܳܢܳܐ. ܡܶܢ ܡܰܠܝܽܘܬܳܐ ܕܢܶܟܠܳܐ ܕܰܚܫܰܠܘ ܥܰܠ ܒܰܪܢܳܫܳܐ. ܓܳܣܘ ܘܡܰܠܶܠܘ ܥܰܘܠܳܐ ܩܕܳܡ ܚܰܘܳܐ. ܟܕ ܡܰܣܒܪܺܝܢ ܠܗ̇ ܕܰܒܨܶܒܝܳܢܳܐ ܒܺܝܫܳܐ ܟܠܳܐ ܐܶܢܽܘܢ ܐܰܠܗܳܐ ܡܶܢ ܡܶܐܟܽܘܠܬܳܐ ܕܺܐܝܠܳܢܳܐ. ܥܰܠ ܕܠܐ ܢܶܗܘܽܘܢ ܐܰܠܳܗ̈ܐ ܬܟܰܣ ܐܶܢܘܢ. ܡܶܛܠ ܕܰܒܢܰܝܴ̈ܐ ܕܰܐܠܳܗܳܐ ܗܘܰܘ ܩܕܳܡ ܕܠܐ ܢܶܫܡܥܽܘܢ ܠܚܶܘܝܳܐ. ܘܒܳܬܰܪ ܐܶܬܝܰܒܠܰܬ ܘܶܐܬܪܰܒܝܰܬ ܡܰܪܳܚܽܘܬܗܽܘܢ ܕܗܳܢܘܢ ܠܰܕܡܳܐ. ܥܕܰܡܳܐ ܕܶܝܢ ܕܩܰܒܠܽܘܗ̇ ܨܳܠܽܘ̈ܒܶܐ ܗܳܢܘܢ ܕܶܐܡܰܪ ܥܠܰܝܗܘܢ ܪܽܘܚܳܐ:
ܠܰܐܪ̈ܡܠܳܬܳܐ ܐܳܦ ܠܥܳܡܽܘܪ̈ܶܐ ܩܛܰܠܘ ܘܰܠܝܰܬܡ̈ܐ ܚܪܰܒܘ. ܘܶܐܡܰܪܘ ܕܠܳܐ ܚܳܙܶܐ ܡܳܪܝܳܐ ܘܠܳܐ ܡܶܣܬܰܟܰܠ ܐܰܠܳܗܶܗ ܕܝܰܥܩܽܘܒ. ܒܗܳܝ ܓܝܪ ܕܠܳܐ ܦܳܬܚܺܝܢ ܗܘܰܘ ܬܰܪ̈ܥܶܐ ܩܕܳܡ ܢܰܦ̈ܫܳܬܳܐ ܕܡܰܪ̈ܡܠܳܢ ܡܶܢ ܐܰܠܗܳܐ. ܕܒܺܝܫ ܡܶܢ ܩܶܛܠܳܐ ܣܳܥܪܺܝܢ ܗܘܰܘ ܨܶܐܕܰܝܗܶܝܢ. ܘܠܰܘ ܗܳܕܐ ܒܰܠܚܽܘܕ. ܐܠܐ ܘܟܕ ܐܶܬܓܠܺܝ ܐܰܠܳܗܶܗ ܕܝܰܥܩܽܘܒ. ܕܠܳܐ ܢܶܦܬܰܚ ܬܰܪܥܳܐ ܕܰܬܝܳܒܽܘܬܳܐ ܠܚܰܛܳܝ̈ܐ. ܥܰܬܶܕܘ ܥܠܰܘܗܝ ܢܶܟܠܳܐ ܘܨܰܠܒܽܘܗܝ. ܟܰܕ ܐܳܡܪܺܝܢ ܥܠܰܘܗܝ. ܕܠܐ ܠܡ ܚܳܙܶܐ ܡܳܪܝܳܐ. ܘܠܐ ܡܶܣܬܰܟܰܠ ܐܰܠܳܗܶܗ ܕܝܰܥܩܽܘܒ. ܠܽܘܩܒܰܠ ܗܳܠܝܢ ܡܰܪ̈ܳܚܶܐ ܡܙܺܝܥ ܢܒܺܝܳܐ ܡܰܟܣܳܢܽܘܬܳܐ ܗܳܕܐ ܘܳܐܡܰܪ:
ܐܶܣܬܰܟܰܠܘ ܫܳܛܰܝܴ̈ܐ ܕܥܰܡܳܐ܆ ܣܰܟ̈ܠܶܐ ܥܕܰܡܳܐ ܠܶܐܡܰܬܝ ܠܐ ܡܶܣܬܰܟܠܺܝܢ ܐܰܢܬܽܘܢ. ܗܰܘ ܕܰܢܨܰܒ ܐܶܕ̈ܢܶܐ ܕܰܠܡܳܐ ܠܳܐ ܫܳܡܰܥ܆ ܗܰܘ ܕܰܒܪܳܐ ܥܰܝ̈ܢܶܐ ܕܰܠܡܳܐ ܡܶܣܬܰܟܰܠ. ܗܰܘ ܕܪܳܕܶܐ ܥܰܡ̈ܡܶܐ ܕܰܠܡܳܐ ܠܳܐ ܡܰܟܶܣ. ܗܰܘ ܕܡܰܠܶܦ ܠܒܰܪܢܳܫܳܐ ܝ̣ܕܰܥܬܳܐ. ܠܳܐ ܥܕܰܡܳܐ ܠܗܳܫܐ ܡܶܣܬܰܟܠܺܝܢ ܐܰܢܬܘܢ. ܫܳܛܰܝܴ̈ܐ ܘܣܰܟ̈ܠܐܷ. ܡܰܢ ܐܝ̣ܬܰܘܗܝ ܗܰܘ ܕܡܶܬܬܕܺܝܢ ܡܶܢܟܽܘܢ. ܠܳܐ ܡܦܺܝ̈ܣܳܢ ܠܟܽܘܢ ܐܳܬܘܴ̈ܬܳܐ ܕܰܥܒܰܕ ܒܰܟܪ̈ܺܝܗܶܐ. ܠܳܐ ܚܙܰܝܬܽܘܢ ܟܰܕ ܢܨܰܒ ܐܶܕ̈ܢܶܐ ܠܕܽܘ̈ܓܶܐ ܘܰܫܡܰܥܘ ܩܴ̈ܠܶܐ ܘܶܐܣܬܰܟܰܠܬܽܘܢ ܡܶܢ ܗܳܕܐ. ܕܗܽܘ ܬܰܩܢܶܗ ܠܟܽܠܶܗ ܒܰܪܢܳܫܳܐ. ܐܰܘ ܠܳܐ ܚܙܰܝܬܘܢ ܟܕ ܒܪܳܐ ܥܰܝ̈ܢܶܐ ܒܛܺܝܢܳܐ ܕܰܓܒܰܠ ܡܶܢ ܪܽܘܩܶܗ ܘܛܳܫ ܠܰܣܡܰܝܴ̈ܐ. ܘܗܽܘ ܡܰܠܺܝ ܚܰܣܺܝܪܽܘܬܳܐ ܕܗܰܘ ܕܡܶܢ ܟܪܶܣ ܐܶܡܶܗ ܢܦܰܩ ܕܠܳܐ ܒܳܒܴ̈ܬܳܐ. ܕܺܝܠܶܗ ܐܝ̣ܬܰܘܗܝ ܗܘܳܐ ܐܳܦ ܫܽܘܪܳܝܳܐ ܕܬܽܘܩܳܢܶܗ. ܘܗܽܘ ܐܝ̣ܬܰܘܗܝ ܗܰܘ ܕܪܳܕܶܐ ܥܰܡ̈ܡܶܐ ܐܝܟ ܐܰܠܗܳܐ. ܘܡܰܟܶܣ ܠܗܽܘܢ ܥܰܠ ܥܒܳܕܰܝ̈ܗܘܢ ܒܺܝ̈ܫܶܐ. ܘܡܳܪܝܳܐ ܗܽܘ ܝܳܕܰܥ ܡܰܚܫ̈ܒܳܬܗܘܢ ܕܰܒܢܰܝ̈ܢܳܫܳܐ. ܘܒܳܬܰܪ ܗܳܕܐ ܡܰܥܶܠ ܢܒܺܝܳܐ ܡܰܠܦܳܢܽܘܬܳܐ ܡܰܘܬܪܳܢܺܝܬܳܐ. ܘܝܳܗܶܒ ܛܽܘܒܳܐ ܠܰܐܝܠܶܝܢ ܕܰܡܩܰܒܠܺܝܢ ܝܽܘܠܦܳܢܳܐ ܕܺܝܠܶܗ ܘܡܶܬܛܦܺܝܣܺܝܢ ܠܶܗ ܟܰܕ ܐܴܡܰܪ:
ܛܽܘܒܰܘܗܝ ܠܒܰܪܢܳܫܳܐ ܕܬܶܪܕܶܝܘܗܝ ܐܰܢܬ ܡܳܪܝܳܐ. ܘܡܶܢ ܢܳܡܽܘܣܳܟ ܬܰܠܦܺܝܘܗܝ. ܘܰܬܢܺܝܚܺܝܘܗܝ ܡܶܢ ܝܰܘ̈ܡܳܬܳܐ ܒܺܝ̈ܫܶܐ. ܥܕܰܡܳܐ ܕܢܶܬܚܦܰܪ ܠܪ̈ܰܫܺܝܥܶܐ ܓܽܘܡܳܨܳܐ. ܗܰܘ ܠܰܡ ܕܡܶܢ ܪ̈ܰܚܡܰܝܟ ܡܶܬܪܕܶܐ ܘܝܳܠܶܦ ܢܳܡܽܘܣܳܟ. ܡܶܬܬܢܺܝܚ ܡܶܢ ܝܰܘ̈ܡܳܬܳܐ ܒܺܝ̈ܫܶܐ. ܕܰܐܥܠܰܬ ܚܛܺܝܬܳܐ ܥܰܠ ܥܳܠܡܳܐ. ܘܚܳܙܶܐ ܡܳܐ ܕܡܶܬܚܦܰܪ ܦܰܚܬܳܐ ܕܬܰܫܢܺܝ̈ܩܶܐ ܠܫܺܐܕ̈ܐ ܡܳܪ̈ܽܘܕܶܐ. ܘܰܠܪ̈ܰܫܺܝܥܶܐ ܕܰܗܘܰܘ ܠܗܽܘܢ ܬܰܠܡܺܝ̈ܕܶܐ. ܘܝܳܠܶܦ ܒܰܥܒܳܕܳܐ ܘܳܐܡܰܪ:
ܕܠܳܐ ܡܰܪܦܶܐ ܡܳܪܝܳܐ ܠܥܰܡܶܗ ܘܰܠܝܳܪܬܽܘܬܶܗ ܠܳܐ ܫܳܒܶܩ. ܘܠܳܐ ܡܶܬܛܦܺܝܣ ܕܢܶܫܒܽܘܩ ܝܳܪܬܽܘܬܶܗ ܒܺܐܝ̈ܕܰܝ ܓܰܝܴ̈ܣܶܐ. ܘܠܶܗ ܚܳܐܱܪ ܥܳܠܡܳܐ ܕܒܺܐܝ̈ܕܰܘܗܝ ܢܶܬܦܪܶܩ.
ܡܶܛܠ ܠܰܡ ܕܒܳܬܰܪ ܙܰܕܺܝܩܳܐ ܗܳܦܶܟ ܕܺܝܢܳܐ. ܟܰܕ ܠܡ ܗܽܘ ܡܶܠܬܳܐ ܠܳܐ ܚܳܛܶܐ. ܘܰܡܣܳܡ ܒܪܺܝܫܳܐ ܐܳܕܳܡ ܚܰܝܳܒ ܗܘܳܐ. ܡܶܛܠ ܣܰܟܠܽܘܬܶܗ܆ ܒܳܬܪܳܗ̇ ܕܡܶܠܬܳܐ ܗܳܦܶܟ ܕܺܝܢܳܐ ܕܡܶܛܠ ܣܰܟܠܽܘܬܳܐ ܩܰܕܡܳܝܬܳܐ ܘܟܕ ܗܽܘ ܠܐ ܚܛܳܐ. ܥܰܡܰܢܽܘܐܝܠ ܩܰܒܶܠ ܥܠܰܘܗܝ ܢܶܓܕܳܐ ܐܝܟ ܡܰܣܟܠܳܢܳܐ ܚܠܳܦܰܝܢ.
ܘܒܳܬܪܶܗ ܟܽܠܗܽܘܢ ܬܪ̈ܺܝܨܰܝ ܠܶܒܳܐ. ܘܡܶܬܬܕܺܝܢܺܝܢ ܗܘܰܘ ܟܰܕ ܡܣܰܝܒܪܺܝܢ ܕܺܝ̈ܢܶܐ ܡܶܢ ܥܰܘܴ̈ܠܶܐ. ܐܝܟ ܡܰܣܟܠܳܢ̈ܐ. ܡܶܛܠܗܳܕܐ ܐܳܦ ܬܪܺܝܨ ܠܶܒܳܐ ܦܰܘܠܽܘܣ ܩܳܥܶܐ ܗܘܳܐ: ܕܰܡܡܰܠܶܐ ܐܢܳܐ ܚܰܣܺܝܪܽܘܬܳܐ ܕܚܰܫܰܘ̈ܗܝ ܕܰܡܫܺܝܚܳܐ ܒܒܶܣܪܝ. ܚܠܳܦ ܦܰܓܪܶܗ ܕܶܝܢ ܕܺܐܝܬܰܘܗܝ ܥܺܕܬܳܐ (ܩܘ̈ܠܣܝܐ ܐ: ܟܕ). ܘܥܰܠܗܳܕܐ ܢܒܺܝܐ ܐܡ̇ܪ:
ܡܰܢܽܘ ܢܩܽܘܡ ܠܺܝ ܥܰܡ ܒܺܝ̈ܫܶܐ. ܘܡܰܢܽܘ ܢܶܬܛܰܝܰܒ ܠܺܝ ܥܰܡ ܥܳܒ̈ܕܰܝ ܥܰܘܠܳܐ. ܡܰܢ ܠܰܡ ܡܶܫܟܰܚ ܩܳܐܷܡ ܠܽܘܩܒܰܠ ܒܺܝܫܽܘܬܳܐ ܕܚܰܝܠܰܘܴ̈ܬܳܐ ܕܕܰܠܩܽܘܒܠܳܐ. ܘܡܰܢ ܐܡ̇ܪ ܥܰܡܗܽܘܢ ܕܺܝܢܳܐ ܚܠܳܦܰܝܢ. ܘܡܰܢ ܣܳܦܶܩ ܕܢܶܬܛܰܝܰܒ ܠܰܩܪܳܒܳܐ. ܕܰܐܝܟ ܗܳܢܐ. ܐܶܢ ܡܳܪܝܳܐ ܠܳܐ ܐܳܬܶܐ ܘܩܳܐܷܡ ܠܽܘܩܒܰܠܗܘܢ ܘܡܶܢ ܐܺܝܕܰܝ̈ܗܘܢ ܡܦܰܨܶܐ ܠܰܢ. ܘܥܰܠܗܳܝ ܦܰܫܶܩ ܘܶܐܡܰܪ:
ܐܶܠܽܘ ܠܳܐ ܡܳܪܝܳܐ ܕܰܗܘܳܐ ܠܺܝ ܥܳܕܽܘܪܳܐ. ܥܰܕ ܩܰܠܺܝܠ ܫܳܪܝܳܐ ܗܘܳܬ ܢܰܦܫܝ ܒܕܽܘܘܳܢܳܐ. ܐܶܠܐ ܗܽܘ ܦܰܨܝܰܢܝ ܡܶܢ ܒܥܶܠܕ̈ܒܳܒܰܝ. ܘܟܕ ܠܡ ܐܶܢܳܐ ܐܶܡܪܶܬ ܕܡܳܛܝ̈ܢ ܪ̈ܶܓܠܰܝ. ܬܽܘܒ ܠܳܐ ܩܳܐܷܡ ܐܢܳܐ ܒܫܽܘܦܪܳܐ ܕܛܳܒܴ̈ܬܳܐ ܕܢܶܦܠܶܬ ܡܶܢܗܶܝܢ. ܘܬܽܘܒ ܠܳܐ ܥܳܛܶܦ ܐܢܳܐ ܠܓܰܢܬܳܐ ܕܓܶܐܘ̈ܳܬܳܐ. ܘܠܐ ܡܶܬܦܢܶܐ ܐܢܳܐ ܠܗܰܘ ܐܰܬܪܳܐ ܕܒܽܘ̈ܣܳܡܶܐ.
ܛܰܝܒܽܘܬܳܟ ܡܳܪܝܳܐ ܣܡܰܟܬܰܢܝ. ܒܣܽܘܓܳܐܐ ܕܟܺܐܒܰܘ̈ܗܝ ܕܠܶܒܝ. ܒܽܘ̈ܝܳܐܰܝܟ ܡܳܪܝܳܐ ܦܰܪܩܽܘܗ̇ ܠܢܰܦܫܝ. ܟܕ ܓܶܝܪ ܠܰܝܬ ܣܰܒܪܳܐ ܠܰܟܝܳܢܳܐ ܕܰܒܢܰܝ̈ܢܳܫܳܐ ܕܦܳܢܶܐ ܠܚܰܝ̈ܐ. ܡܶܢܫܶܝܠ ܕܶܢܚܰܬ ܛܰܘܒܽܘܬܶܗ ܕܡܳܪܝܳܐ ܘܶܐܬܓܠܺܝ ܘܶܐܬܚܙܺܝ ܐܰܠܗܳܐ ܥܰܠ ܨܠܺܝܒܳܐ. ܘܶܐܡܰܪ ܠܓܰܝܳܣܳܐ ܕܰܐܡܺܝܢ ܐܰܡܺܝܢ ܐܳܡܰܪ ܐܢܳܐ ܠܳܟ ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ (ܠܘܩܐ ܟܓ: ܡܓ). ܘܡܽܘܟܳܟܳܐ ܗܳܢܐ ܣܡܰܟ ܐܶܢܶܝܢ. ܘܰܠܪ̈ܶܓܠܶܐ ܕܶܐܨܛܳܠܺܝ̈ܝܢ ܘܡܳܛܝ̈ܢ ܡܶܢ ܦܰܪܕܰܝܣܳܐ. ܘܡܶܟܺܝܠ ܡܨܰܠܶܝܢ ܘܳܐܡܪܺܝܢ.
ܠܳܐ ܢܚܰܒܰܪ ܥܰܡܳܟ ܟܽܘܪܣܝܳܐ ܕܥܰܘ̈ܠܐܷ. ܕܰܓܒܰܠܘ ܥܰܘܠܳܐ ܥܰܠ ܢܳܡܽܘܣܳܟ. ܘܟܕ ܣܳܡ ܢܳܡܽܘܣܳܐ ܐܰܠܗܳܐ ܠܒܰܪܢܳܫܳܐ ܩܰܕܡܳܝܳܐ. ܕܠܳܐ ܢܶܐܟܽܘܠ ܡܶܢ ܐܺܝܠܳܢܳܐ ܓܒܰܠܘ ܥܰܘܠܳܐ ܡܳܪ̈ܽܘܕܶܐ ܥܰܠ ܢܳܡܽܘܣܶܗ ܕܰܐܠܳܗܳܐ. ܟܰܕ ܐܡ̇ܪ ܠܚܰܘܳܐ ܒܡܶܨܥܳܝܽܘܬܳܐ ܕܚܶܘܝܳܐ. ܕܠܳܐ ܠܰܡ ܡܡܳܬ ܬܡܽܘܬܽܘܢ. ܡܶܛܠ ܠܰܡ ܕܝܳܕܰܥ ܐܰܠܗܳܐ ܕܰܒܝܰܘܡܳܐ ܕܳܐܟܠܺܝܬܽܘܢ ܡܶܢܶܗ ܡܶܬܦܰܬܚܴ̈ܢ ܥܰܝܢܰܝ̈ܟܽܘܢ. ܘܗܳܘܶܝܢ ܐܢܬܽܘܢ ܐܰܝܟ ܐܰܠܳܗ̈ܐ ܝܳܕ̈ܥܰܝ ܛܳܒܬܳܐ ܘܒܺܝܫܬܳܐ (ܒܪܝܬܐ ܓ: ܕ-ܗ). ܗܳܢܰܘ ܥܰܘܠܳܐ ܕܰܓܒܰܠܘ ܥܰܠ ܢܳܡܽܘܣܶܗ ܕܰܐܠܳܗܳܐ. ܟܰܕ ܠܰܝܬ ܗܘܳܐ ܠܗܽܘܢ ܟܽܘܪܣܝܳܐ ܥܕܰܡܳܐ ܠܰܨܠܺܝܒܳܐ. ܐܰܝܟ ܕܰܒܟܽܘܪܣܝܳܐ ܕܡܰܠܟܽܘܬܳܐ ܡܶܬܝܰܩܰܪ ܗܘܳܐ ܡܳܪܽܘܕܳܐ. ܘܦܳܩܶܕ ܒܥܰܡ̈ܡܶܐ ܘܡܶܫܬܡܰܥ. ܘܠܽܘܩܒܰܠ ܐܠܗܳܐ ܥܒܰܕ ܠܶܗ ܟܽܘܪܣܝܳܐ ܥܰܡܳܐ ܕܡܰܪ̈ܳܚܶܐ. ܡܶܛܠܗܳܢܐ ܨܰܠܺܝ ܢܒܺܝܐ. ܕܠܳܐ ܢܚܰܒܰܪ ܥܡ ܐܠܗܐ ܟܽܘܪܣܝܶܗ ܕܳܐܟܶܠܩܰܪܨܳܐ. ܘܒܰܙܒܰܢ ܢܳܣܶܒ ܠܶܗ ܛܰܥܘܳܢ̈ܐ ܘܰܡܫܰܥܒ̈ܕܶܐ ܗܳܠܝܢ.
ܕܨܳܠܶܝܢ ܠܰܡܨܳܕ ܢܰܦܫܶܗ ܕܙܰܕܺܝܩܳܐ ܘܰܕܡܶܗ ܕܙܰܟܳܝܳܐ ܡܚܰܝܒܺܝܢ. ܙܰܕܺܝܩܳܐ ܕܶܝܢ ܘܙܰܟܳܝܳܐ ܗܽܘܝܽܘ ܡܳܪܰܢ. ܟܕ ܨܒܳܐ ܕܶܝܢ ܕܰܒܙܰܕܺܝܩܽܘܬܳܐ ܕܺܝܠܶܗ ܘܒܰܕܡܶܗ ܙܰܟܳܝܳܐ ܢܚܰܣܶܐ ܥܰܠ ܥܳܠܡܳܐ. ܛܰܫܺܝ ܪܰܒܽܘܬܶܗ ܒܰܙܥܽܘܪܽܘܬܳܐ ܕܦܰܓܪܳܐ. ܘܟܰܣܺܝ ܐܰܠܳܗܽܘܬܶܗ ܒܬܰܚܦܺܝܬܳܐ ܕܒܶܣܪܳܐ. ܘܰܫܒܰܩܘ ܠܨܰܝܳܕ̈ܐ ܥܘܺܝܪ̈ܶܐ ܘܨܳܕܘ ܠܢܰܦܫܶܗ ܕܗܰܘ ܙܰܟܳܝܳܐ ܘܙܰܕܺܝܩܳܐ ܘܟܺܐܢܳܐ. ܘܚܰܝܶܒܘ ܕܡܶܗ ܕܙܰܟܳܝܳܐ ܐܦ ܙܰܕܺܝܩܳܐ ܠܡܰܘܬܳܐ. ܘܟܕ ܒܗܳܠܝܢ ܐܶܬܦܪܶܩܢܰܢ. ܘܒܰܕܡܶܗ ܕܶܐܬܶܐܫܶܕ ܚܠܳܦܰܝܢ ܐܶܬܚܰܣܺܝܢܰܢ. ܡܰܝܬܶܐ ܢܒܺܝܐ ܘܳܐܡܰܪ:
ܘܰܗܘܳܐ ܠܺܝ ܡܳܪܝܳܐ ܡܥܰܫܢܳܢܳܐ. ܐܰܠܗܳܐ ܬܰܩܺܝܦܳܐ ܡܥܰܕܪܳܢܳܐ. ܡܳܪܝܳܐ ܠܰܡ ܗܘܳܐ ܠܗ̇ ܡܥܰܫܢܳܢܳܐ ܠܥܳܢܶܗ. ܡܶܛܠ ܕܣܳܡ ܢܰܦܫܶܗ ܚܠܳܦ ܥܶܪ̈ܒܶܐ ܕܺܝܠܶܗ. ܘܰܐܠܗܳܐ ܬܰܩܺܝܦܳܐ ܥܰܕܰܪ ܠܰܢ. ܘܰܡܨܰܠܐܷ ܕܢܺܐܬܶܐ ܥܠܰܝܗܽܘܢ ܡܣܳܡ ܒܪܺܝܫܳܐ ܕܡܰܪܳܚܽܘܬܗܽܘܢ ܘܳܐܡܰܪ:
ܘܰܐܗܦܶܟ ܥܠܰܝܗܽܘܢ ܥܰܘܠܗܽܘܢ. ܘܰܒܒܺܝܫܽܘܬܗܽܘܢ ܫܰܬܶܩ ܐܶܢܽܘܢ. ܫܰܬܶܩ ܐܶܢܽܘܢ ܡܳܪܝܳܐ ܐܰܠܳܗܳܐ. ܐܡ̣ܪ ܓܝܪ ܡܳܪܢ܆ ܕܢܺܐܬܶܐ ܥܠܰܝܗܽܘܢ ܟܽܠܶܗ ܕܡܳܐ ܕܙܰܕܺܝ̈ܩܶܐ ܕܶܐܬܶܐܫܶܕ ܡܶܢ ܕܡܶܗ ܕܗܳܒܶܝܠ ܙܰܕܺܝܩܳܐ܇ ܘܰܥܕܰܡܳܐ ܠܰܕܡܶܗ ܕܰܙܟܰܪܝܳܐ (ܡܬܝ ܟܓ: ܠܗ ܠܘܩܐ ܝܐ: ܢܢ-ܢܐ). ܒܗܳܕܐ ܚܳܐܱܪ ܪܽܘܚܳܐ ܕܰܢܒܺܝܐ. ܘܥܰܠܗܳܝ ܐܡ̣ܪ ܗܳܠܝܢ. ܒܗܳܝ ܕܰܐܠܗܳܐ ܡܫܰܬܶܩ ܠܗܽܘܢ ܠܨܳܠܽܘ̈ܒܶܐ ܒܕܺܝܢܶܗ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܚܡܫܐ
ܥܰܠܗܳܝ ܕܰܠܥܶܠ ܡܶܢܟܽܠ ܐܝܬܰܘܗܝ ܐܰܠܳܗܳܐ. ܘܒܺܐܝ̈ܕܰܘܗܝ ܐܶܬܥܒܶܕܘ ܟܽܠ. ܘܠܽܘܩܒܰܠ ܡܰܪܳܚܽܘܬܶܗ ܕܥܰܡܳܐ ܕܺܝܣܪܳܐܝܠ.
ܕܰܘ̈ܩܶܐ ܪ̈ܽܘܚܳܢܶܐ ܣܳܡ ܐܶܢܘܢ ܐܰܠܗܳܐ ܠܰܢܒܺܝ̈ܐ ܒܥܰܡܳܐ ܕܺܝܣܪܳܐܝܠ. ܘܰܥܒܰܕ ܐܶܢܘܢ ܐܳܦ ܩܴ̈ܠܐܷ ܕܩܳܪܶܝܢ ܬܝܳܒܽܘܬܳܐ ܒܶܐܕ̈ܢܰܝ ܥܰܡܳܐ. ܡܶܛܠ ܕܰܒܟܽܠܙܒܰܢ ܢܬܺܝܦ ܗܘܳܐ ܥܰܡܳܐ ܒܳܬܰܪ ܐܰܠܳܗ̈ܐ ܕܰܓܳܠܰܝ̈ ܫܡܳܐ. ܘܡܰܗܡܶܐ ܗܘܳܐ ܡܶܢ ܬܶܫܒܽܘܚܬܳܐ ܕܰܐܠܗܳܐ ܘܳܐܙܶܠ ܗܘܳܐ ܒܳܬܰܪ ܦܬܰܟܪ̈ܶܐ. ܣܳܡ ܐܰܠܗܳܐ ܪܽܘܚܳܐ ܒܰܢܒܺܝ̈ܐ. ܕܢܶܗܘܘܢ ܩܳܪܶܝܢ ܒܶܐܕ̈ܢܰܘܗܝ ܩܴ̈ܠܐ ܕܡܰܦܢܶܝܢ ܠܶܗ ܨܶܝܕ ܐܰܠܳܗܳܐ. ܘܡܳܐ ܕܫܳܬܶܩ ܗܘܳܐ ܡܶܢ ܫܽܘܒܚܳܐ ܕܰܐܠܗܳܐ. ܡܰܙܥܩܺܝܢ ܗܘܰܘ ܒܶܐܕ̈ܢܰܘܗܝ ܕܰܢܫܰܒܰܚ. ܘܡܳܐ ܕܦܳܐܷܫ ܗܘܳܐ ܡܶܢ ܦܽܘܠܚܳܢܳܐ ܕܢܳܡܽܘܣܳܐ. ܡܰܠܦܺܝܢ ܗܘܰܘ ܠܗ ܕܢܶܦܠܽܘܚ. ܘܡܳܐ ܕܠܐ ܢܳܛܰܪ ܗܘܳܐ ܫܰܒܬܳܐ ܐܝܟ ܕܶܐܬܦܰܩܰܕ܆ ܡܰܪܬܶܝܢ ܗܘܰܘ ܠܶܗ ܕܢܶܛܰܪ. ܘܟܕ ܥܒܰܕ ܗܘܳܐ ܡܶܕܶܡ. ܘܡܳܐ ܕܒܶܗ ܒܰܥܒܳܕܳܐ ܐܰܡܶܝܢ ܗܘܳܐ. ܫܳܬܩܺܝܢ ܗܘܰܘ. ܠܐܴ ܓܶܝܪ ܡܣܰܝܒܰܪ ܗܘܳܐ ܥܰܡܳܐ ܩܫܶܐ ܩܕܳܠܐܴ. ܕܢܺܐܡܰܪ ܠܶܗ ܢܒܺܝܳܐ ܕܩܰܪܶܒ ܕܶܒܚ̈ܐ. ܡܳܐ ܕܚܳܙܶܐ ܗܘܳܐ ܠܗ ܕܰܥܢܶܐ ܒܕܶܒ̈ܚܶܐ. ܡܶܛܠܗܳܕܐ ܐܳܦ ܛܽܘܒܬܳܢܳܐ ܕܰܘܝܕ. ܟܰܕ ܚܙܳܝܗܝ ܠܥܰܡܳܐ ܕܒܰܛܺܝܠ ܡܶܢ ܬܶܫܒܽܘܚܬܳܐ ܕܰܐܠܗܳܐ. ܘܰܣܒܰܪܘ ܐܰܠܳܗ̈ܐ ܕܰܐܠܳܗ̈ܐ ܕܡܶܕܶܡ ܐܶܢܘܢ. ܘܪܳܢܶܐ ܥܰܠ ܝܰܡܳܐ ܘܥܰܠ ܐܰܪܥܳܐ ܕܠܰܘ ܡܶܢ ܐܰܠܗܳܐ ܐܶܬܥܒܶܕܘ. ܘܫܰܪܺܝ ܕܰܢܫܰܒܰܚ ܟܰܕ ܩܳܪܶܐ ܠܗܽܘܢ ܠܰܒܢܱ̈ܝ ܥܰܡܳܐ ܕܳܐܦ ܥܰܡܶܗ ܗܶܢܘܢ ܢܫܰܒܚܽܘܢ. ܘܰܡܙܰܡܰܪ ܗܘܳܐ ܘܳܐܡܰܪ:
ܬܰܘ ܢܫܰܒܰܚ ܠܡܳܪܝܳܐ ܘܢܶܙܡܰܪ ܠܰܐܠܳܗܰܢ ܦܳܪܽܘܩܳܐ. ܒܗܳܝ ܕܶܐܡܰܪ: ܘܢܶܙܡܰܪ ܠܰܐܠܳܗܰܢ ܦܳܪܽܘܩܳܐ. ܕܰܢܚܰܘܶܐ ܕܗܳܠܝܢ ܡܰܢ ܐܰܠܳܗ̈ܐ ܕܥܰܡ̈ܡܶܐ ܠܘ ܦܳܪ̈ܽܘܩܶܐ ܐܶܢܘܢ. ܐܰܠܗܳܐ ܕܥܰܡܳܐ ܕܺܝܣܪܳܐܝܠ ܗܽܘܝܽܘ ܦܳܪܽܘܩܳܐ. ܒܗܳܝ ܕܰܒܚܰܝ̈ܠܐܷ ܘܒܳܐܬܘܴ̈ܬܳܐ ܦܰܪܩܶܗ ܠܥܰܡܳܐ ܡܶܢ ܐܺܝ̈ܕܰܝ ܦܶܪܥܽܘܢ. ܘܡܶܛܠܗܳܕܐ ܙܳܕܶܩ ܕܢܶܫܬܰܒܰܚ ܘܢܶܬܩܰܠܰܣ ܘܰܢܙܰܡܰܪ ܠܶܗ܆ ܥܰܠ ܦܽܘܪܩܳܢܳܐ ܕܰܥܒܰܕ ܠܰܐܒܳܗܰܝ̈ܢ. ܘܡܶܛܠܗܳܕܐ.
ܢܩܰܕܶܡ ܐܰܦܰܘ̈ܗܝ ܒܬܰܘܕܺܝܬܳܐ. ܘܒܰܙܡܺܝܪ̈ܳܬܳܐ ܢܫܰܒܚܺܝܘܗܝ. ܡܶܛܠ ܕܰܐܠܗܰܐ ܗܘ ܪܰܒܳܐ ܡܳܪܝܳܐ. ܡܰܠܟܳܐ ܕܪܰܒ ܥܰܠ ܟܽܠܗܽܘܢ ܐܰܠܳܗ̈ܐ. ܒܗܳܠܝܢ ܩܴ̈ܠܐ ܡܦܺܝܣ ܗܘܳܐ ܠܥܰܡܳܐ ܕܫܳܡܰܥ ܗܘܳܐ ܠܗ ܟܕ ܡܙܰܡܰܪ ܕܢܰܫܰܪ ܕܠܰܝܬ ܐܝܟ ܐܰܠܗܳܐ ܕܺܝܣܪܳܐܝܠ. ܘܠܘ ܥܡ ܐܰܠܳܗ̈ܐ ܕܥܰܡ̈ܡܶܐ ܡܶܬܚܫܶܒ ܘܡܶܬܡܢܶܐ. ܘܠܘ ܡܶܬܥܒܳܕܽܘ ܐܶܬܥܒܶܕ ܐܝܟ ܦܬܰܟܪ̈ܶܐ ܚܰܪ̈ܒܶܐ. ܐܰܠܳܗܰܢ ܕܶܝܢ ܕܺܝܠܰܢ ܒܰܫܡܳܐ ܘܒܰܥ̈ܒܳܕܶܐ ܐܰܠܗܰܐ ܗ̄ܘ ܪܰܒܳܐ.
ܕܒܺܐܝ̈ܕܰܘܗܝ ܐܶܢܶܝܢ ܫܶܬܶܐܣܶܝ̈ܗ̇ ܕܰܐܪܥܳܐ ܘܪܰܘܡܳܐ ܕܛܽܘܪ̈ܶܐ. ܘܕܺܝܠܶܗ ܗܽܘ ܝܰܡܳܐ ܘܗܽܘ ܥܰܒܕܶܗ ܘܝܰܒܺܝܫܬܳܐ ܐܝ̣ܕܰܘ̈ܗܝ ܓܒܱ̈ܠܝ. ܗܰܘ ܠܰܡ ܕܗܳܠܝܢ ܥܒܴ̈ܕܶܐ ܕܺܝܠܶܗ. ܪܳܡ ܗܽܘ ܡܶܢ ܟܽܠܗܘܢ ܐܰܠܳܗ̈ܐ. ܗܳܠܝܢ ܠܰܡ ܐܶܬܟܪܶܙܘ ܘܶܐܬܝ̣ܕܰܥܘ ܕܠܰܘ ܐܰܠܳܗ̈ܐ ܐܶܢܽܘܢ. ܡܶܛܠ ܕܠܘ ܦܳܪ̈ܽܘܩܶܐ ܗܘܰܘ ܠܣܳܓܽܘ̈ܕܰܝܗܘܢ. ܚܢܰܢ ܕܶܝܢ ܝܳܕܥܺܝܢܰܢ ܕܡܶܢ ܡܶܨܪܶܝܢ ܘܡܶܢ ܫܽܘܥܒܳܕܳܐ ܕܥܰܡ̈ܡܐ ܢܽܘܟܪ̈ܳܝܶܐ ܦܪܰܩ ܠܢ ܐܰܠܗܳܐ.
ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ ܘܰܢܒܰܪܟܺܝܘܗܝ ܠܡܳܪܝܳܐ ܕܥܰܒܕܰܢ. ܡܶܛܠ ܕܗܽܘܝܽܘ ܐܰܠܳܗܰܢ. ܘܰܚܢܰܢ ܥܰܡܳܐ ܕܺܝܠܶܗ ܘܥܳܢܴ̈ܐ ܕܡܰܪܥܺܝܬܶܗ. ܒܟܽܠܕܽܘܟ ܗܺܝ ܟܕ ܗܺܝ ܬܰܪܥܺܝܬܳܐ ܡܚܰܘܶܐ ܢܒܺܝܐ. ܘܗܳܝ ܕܬܰܘ ܢܫܰܒܰܚ ܘܗܳܝ ܕܬܰܘ ܢܙܰܡܰܪ. ܘܗܳܝ ܕܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܆ ܡܶܛܠ ܕܠܐ ܢܶܫܟܰܚ ܥܰܡܳܐ ܥܶܠܬܳܐ ܘܢܺܐܡܰܪ܆ ܕܡܶܛܠܡܳܢܐ ܐܡ̣ܪ ܠܰܢ ܕܢܶܥܒܶܕ ܗܽܘ ܡܶܕܶܡ ܕܥܳܒܕܺܝܢܰܢ. ܘܕܰܢܚܰܘܶܐ ܕܰܒܟܽܠܗܶܝܢ ܗܳܠܝܢ ܩܰܕܡܳܝܳܐ ܐܝ̣ܬܰܘܗܝ. ܘܰܡܫܰܒܚܳܢܳܐ ܘܰܡܙܰܡܪܳܢܳܐ ܘܰܡܒܰܪܟܳܢܳܐ ܘܣܳܓܽܘܕܳܐ. ܡܰܥܶܠ ܕܶܝܢ ܚܰܟܺܝܡܳܐܝ̣ܬ ܘܰܡܚܰܘܶܐ ܬܽܘܒ ܕܡܳܪܝܳܐ ܥܳܒܽܘܕܰܢ ܐܝ̣ܬܰܘܗܝ. ܐܝܟ ܕܳܐܦ ܠܝܰܡܳܐ ܘܰܠܛܽܘܪ̈ܶܐ ܘܠܰܐܪܥܳܐ ܗܽܘ ܥܒܰܕ. ܘܰܕܗܽܘܝܽܘ ܐܰܠܳܗܰܢ. ܘܕܰܐܟܡܳܐ ܕܰܚܢܰܢ ܕܺܝܠܶܗ ܘܥܳܢܴ̈ܐ ܕܡܰܪܥܺܝܬܶܗ. ܘܚܰܘܒܬܳܐ ܗܝ ܠܢ ܕܢܶܣܓܽܘܕ ܠܶܗ܆ ܘܠܐ ܢܶܬܕܰܡܶܐ ܠܰܐܒܳܗ̈ܝܢ ܗܳܢܘܢ ܕܟܰܕ ܚܰܘܺܝ ܠܗܽܘܢ ܣܰܓܺܝ ܐܳܬܘܴ̈ܬܳܐ ܘܬܶܕܡܪ̈ܳܬܳܐ ܟܰܕ ܦܪܰܩ ܠܗܽܘܢ ܘܗܶܢܽܘܢ ܒܩܳܠܶܗ ܠܐ ܫܡܰܥܘ. ܠܐ ܡܶܛܠ ܕܰܐܢܬܽܘܢ ܥܳܢܴ̈ܐ ܐܰܢܬܽܘܢ ܕܡܰܪܥܺܝܬܶܗ.
ܝܰܘܡܳܢܳܐ ܐܶܢ ܒܩܳܠܶܗ ܬܶܫܡܥܽܘܢ. ܠܐܴ ܬܩܰܫܽܘܢ ܠܶܒܰܘܴ̈ܬܟܽܘܢ ܠܡܰܪܓܳܙܽܘܬܶܗ ܐܰܝܟ ܡܡܰܪܡܪ̈ܳܢܶܐ ܘܰܐܝܟ ܝܰܘܡܳܐ ܕܢܶܣܝܽܘ̈ܢܶܐ ܕܰܒܡܰܕܒܪܳܐ ܕܢܰܣܝܽܘܢܝ ܐܰܒܳܗܰܝ̈ܟܘܢ. ܘܰܒܩܰܘ ܚܙܰܘ ܥܒܴ̈ܕܰܝ ܐܰܪܒܥܺܝܢ ܫܢܺܝ̈ܢ. ܗܳܠܶܝܢ ܠܰܡ ܟܰܕ ܫܡܰܥܘ ܩܳܠܶܗ ܕܰܐܠܗܳܐ ܡܶܢ ܓܰܘ ܢܽܘܪܳܐ ܒܣܰܢܝܳܐ. ܟܕ ܡܡܰܠܶܠ ܥܰܡܗܽܘܢ ܡܶܢ ܪܺܝܫ ܛܽܘܪܳܐ ܕܡܶܬܓܰܘܙܰܠ ܗܘܳܐ ܒܢܽܘܪܳܐ. ܘܰܚܕܺܝܪ ܒܥܰܪܦܶܠܐܴ ܘܰܒܬܶܢܳܢܳܐ ܐܰܝܟ ܗܰܘ ܕܠܐܴ ܐܶܬܡܰܠܰܠ ܥܰܡܗܽܘܢ. ܘܰܛܥܰܘ ܥܒܴ̈ܕܶܐ ܕܬܶܕܡܪ̈ܳܬܳܐ ܘܪܰܘܪ̈ܒܳܬܳܐ ܕܰܚܙܰܘ. ܐܠܐ ܐܦ ܐܰܢܬܽܘܢ ܗܳܫܐ. ܠܐ ܒܪܶܥܝܳܢܳܐ ܩܰܫܝܳܐ ܬܩܰܫܽܘܢ ܠܶܒܰܘܴ̈ܬܟܘܢ ܡܶܛܠ ܕܠܐ ܫܳܠܐܷ ܕܢܶܫܡܥܽܘܢ ܩܳܠܶܗ. ܘܶܐܢ ܐܳܦ ܐܰܢܬܽܘܢ ܐܰܝܟ ܐܰܒܳܗܰܝ̈ܟܘܢ ܗܳܘܶܝܢ ܐܢܬܽܘܢ ܡܰܪ̈ܓܙܳܢܶܐ ܘܰܡܡܰܪܡܪ̈ܳܢܶܐ܆ ܡܶܬܟܠܶܐ ܐܠܗܳܐ ܘܠܐ ܓܳܡܰܪ ܠܘܳܬܟܘܢ ܫܽܘܘܕܳܝܳܐ ܗܰܘ ܕܶܐܫܬܰܘܕܺܝ ܠܰܐܒܳܗܴ̈ܬܳܐ. ܘܰܚܙܰܘ ܘܠܐܴ ܬܰܐܡܶܢ ܠܶܗ ܒܗܽܘܢ ܐܰܝܟ ܕܡܶܐܢܰܬ ܠܶܗ ܒܰܐܒܳܗܰܝ̈ܟܘܢ.
ܡܶܐܢܰܬ ܠܺܝ ܒܕܳܪܳܐ ܗܰܘ܆ ܘܶܐܡܪܶܬ ܕܥܰܡܳܐ ܗܰܘ ܕܛܳܥܶܐ ܠܶܒܗܽܘܢ. ܘܗܶܢܘܢ ܠܐܴ ܝ̣ܕܰܥܘ ܐܽܘܪ̈ܚܳܬܝ. ܐܰܝܟ ܕܺܝܡܺܝܬ ܒܪܽܘܓܙܝ ܕܠܳܐ ܢܶܥܠܽܘܢ ܠܰܢܝܳܚܬܝ. ܠܗܳܠܶܝܢ ܒܢܴ̈ܬ ܩܴ̈ܠܶܐ ܦܰܫܶܩ ܐܶܢܶܝܢ ܦܰܘܠܽܘܣ ܗܰܘ ܪܰܒܳܐ ܐܰܠܗܳܝܳܐ܆ ܟܰܕ ܟܳܬܶܒ ܠܘܳܬ ܥܶܒܪ̈ܳܝܶܐ. ܘܚܰܘܺܝ ܕܗܳܕܐ ܕܶܐܡܰܪ ܛܽܘܒܬܳܢܳܐ ܕܰܘܝܕ ܕܠܐܴ ܢܶܥܠܽܘܢ ܠܰܢܝܳܚܬܝ. ܒܰܪܬ ܩܳܠܐܴ ܗܝ ܕܠܐ ܥܕܰܟܺܝܠ ܢܶܦܩܰܬ ܠܰܥܒܳܕܳܐ. ܘܰܕܠܰܘ ܬܽܘܒ ܗܶܢܘܢ ܕܥܰܠܘ ܒܝܰܕ ܝܶܫܽܘܥ ܒܰܪܢܽܘܢ. ܝܪܶܬܘ ܐܰܪܥܳܐ ܕܰܟܢܰܥܢܳܝ̈ܐ. ܡܰܛܺܝܘ ܠܗܽܘܢ ܡܶܢ ܟܰܕܽܘ ܠܰܢܝܳܚܬܳܐ ܐܰܠܳܗܳܝܬܳܐ. ܐܡ̣ܪ ܓܝܪ ܛܽܘܒܳܢܳܐ ܦܰܘܠܽܘܣ܆ ܕܶܐܠܽܘ ܓܝܪ ܝܶܫܘܥ ܒܰܪܢܽܘܢ ܐܰܢܺܝܚ ܗܘܳܐ ܐܶܢܘܢ. ܠܐܴ ܐܡ̇ܪ ܗܘܳܐ ܡܶܢ ܒܳܬܰܪܟܶܢ ܥܰܠ ܝܰܘܡܳܐ ܐܚܪܺܢܳܐ. ܡܳܕܶܝܢ ܕܝܶܫܽܘܥ ܠܐܴ ܐܰܢܺܝܚ ܐܶܢܘܢ. ܩܰܝܳܡ ܗܽܘ ܠܰܡܫܰܒܳܬܘ ܠܥܰܡܶܗ ܕܰܐܠܗܳܐ. ܘܬܽܘܒ ܐܡ̣ܪ: ܕܰܐܝܢܳܐ ܠܰܡ ܕܥܰܠ ܠܰܢܝܳܚܬܶܗ. ܐܶܬܬܢܺܝܚ ܡܰܢ ܐܦ ܗܽܘ ܡܶܢ ܥܒܳܕܰܘ̈ܗܝ ܐܰܝܟ ܕܰܐܠܗܳܐ ܡܶܢ ܕܺܝܠܶܗ (ܥܒܪ̈ܝܐ ܓ: ܚ-ܝ). ܐܰܠܳܗܳܐ ܓܝܪ ܡܶܢ ܒܳܬܰܪ ܕܫܰܠܶܡ ܝܰܘܡܳܐ ܕܫܰܒܬܳܐ. ܘܶܐܬܓܡܰܪܘ ܘܶܐܫܬܰܡܠܺܝܘ ܬܽܘܩܳܢ̈ܐ ܕܰܫܡܰܝܳܐ ܘܕܰܐܪܥܳܐ. ܘܥܰܠ ܝܰܘܡܳܐ ܕܫܰܒܥܳܐ ܘܶܐܬܬܢܺܝܚ ܡܶܢ ܥܒܴ̈ܕܶܐ. ܘܬܽܘܒ ܠܐܴ ܐܰܪܡܺܝ ܐܝ̣ܕܰܘ̈ܗܝ ܒܰܥܒܴ̈ܕܶܐ ܐܚܪ̈ܳܢܶܐ. ܘܰܫܠܺܝ ܠܶܗ ܡܶܢ ܗܳܝ ܕܢܶܥܒܶܕ. ܘܶܐܢ ܚܳܙܶܝܢܰܢ ܒܶܪ̈ܝܳܬܳܐ ܟܰܕ ܡܶܬܚܰܕ̈ܬܳܢ ܒܝܰܠܕ̈ܐ ܘܰܒܬܰܪ̈ܒܝܳܬܳܐ. ܐܠܐ ܙܰܪܥܳܐ ܐܶܢܶܝܢ ܕܰܚ̈ܕܳܕܶܐ. ܗܰܘ ܕܫܽܘܪܳܝܳܐ ܡܶܕܶܡ ܐܰܩܶܦ ܠܗܶܝܢ. ܒܗܶܝܢ ܘܠܐ ܢܶܚܣܪ̈ܳܢ. ܡܳܕܶܝܢ ܗܽܘ ܐܶܬܬܢܺܝܚ ܠܶܗ ܡܶܢ ܕܢܶܥܒܶܕ ܡܶܢ ܝܰܘܡܳܐ ܕܫܰܒܬܳܐ. ܒܗܳܝ ܕܰܫܠܺܝ ܠܗ ܡܶܢ ܥܒܴ̈ܕܶܐ. ܐܶܢܕܶܝܢ ܐܳܦ ܕܰܘܝܕ ܡܶܢ ܒܳܬܰܪ ܟܽܠܗܽܘܢ ܙܰܒܢܷ̈ܐ ܗܳܠܝܢ. ܕܝ̣ܬܶܒ ܥܰܡܳܐ ܗܳܝ ܕܡܶܣܬܰܒܪܳܐ ܗܘܳܬ ܢܝܳܚܬܳܐ܆ ܘܬܽܘܒ ܐܡ̇ܪ:
ܐܰܝܟ ܕܺܝܡܺܝܬ ܒܪܽܘܓܙܝ ܕܠܐܴ ܢܶܥܠܽܘܢ ܠܰܢܝܳܚܬܝ. ܘܓܰܠܝܳܐ ܗܝ ܡܳܕܶܝܢ ܕܗܳܝ ܢܝܳܚܬܳܐ ܥܕܰܟܺܝܠ ܠܐܴ ܐܶܬܚܰܙܝܰܬ. ܘܡܳܐ ܕܶܝܢ ܕܶܐܬܚܰܙܝܰܬ ܒܳܛܶܠ ܠܗ ܪܶܗܛܳܐ ܕܫܰܪ̈ܒܳܬܳܐ. ܘܡܶܬܬܢܺܝܚܺܝܢ ܐܳܦ ܥܰܡ̈ܠܐܷ ܕܥܶܢܘܳܝܽܘܬܳܐ. ܕܳܐܦ ܚܢܰܢ ܢܨܰܠܐܷ ܕܢܶܫܬܘܶܐ ܕܢܶܥܽܘܠ ܠܰܢܝܳܚܬܳܐ ܩܰܕܺܝܫܬܳܐ ܒܢܰܘܚܳܐ ܕܡܶܢ ܒܺܝ̈ܫܳܬܳܐ ܒܝܰܕ ܝܶܫܘܥ ܡܫܺܝܚܳܐ ܡܳܪܰܢ ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܫܬܐ
ܡܰܘܕܰܥ ܥܰܠ ܫܰܘܝܽܘܬ ܟܝܳܢܳܐ ܕܰܬܠܺܝܬܳܝܘܬܳܐ ܩܰܕܺܝܫܬܳܐ. ܐܳܦ ܕܩܰܒܠܽܘܗܝ ܢܒܺܝ̈ܐ ܠܗܳܢܳܐ ܐܪܳܙܳܐ. ܘܥܰܠ ܕܒܶܗ ܢܦܰܩ ܫܪܳܪܳܐ ܠܒܶܝܬ ܥܰܡ̈ܡܶܐ.
ܫܠܶܝܡܽܘܢ ܗܰܘ ܚܰܟܺܝܡ ܒܡܱ̈ܬܠܐܷ ܐܡ̇ܪ ܗܘܳܐ ܒܚܶܟܡܬܶܗ. ܗܰܝܡܳܢܽܘܬܳܐ ܕܡܶܬܚܰܙܝܳܐ ܡܡܰܠܶܠ ܙܰܕܺܝܩܳܐ (ܡ̈ܬܠܐ ܝܒ: ܝܙ). ܛܳܒ ܗܰܝܡܳܢܽܘܬܳܐ ܥܰܠ ܡܶܕܶܡ ܕܠܐܴ ܡܶܬܚܙܶܐ ܠܰܢ ܡܣܰܒܪܳܐ. ܫܠܶܝܡܽܘܢ ܐܡ̣ܪ: ܕܗܰܝܡܳܢܽܘܬܳܐ ܕܡܶܬܚܰܙܝܳܐ ܡܡܰܠܶܠ ܙܰܕܺܝܩܳܐ. ܙܰܕܺܝܩܳܐ ܕܶܝܢ ܐܝ̣ܬܰܘܗܝ ܗܘܳܐ ܐܳܦ ܛܽܘܒܬܳܢܳܐ ܕܰܘܝܕ. ܘܗܰܝܡܳܢܽܘܬܳܐ ܕܡܶܬܚܰܙܝܳܐ ܡܡܰܠܶܠ ܐܳܦ ܗܽܘ. ܘܝܰܬܺܝܪܐܝ̣ܬ ܒܬܶܫܒܽܘܚܬܳܐ ܗܳܕܐ ܕܬܶܫܥܺܝܢ ܘܫܶܬ. ܙܰܡܰܪ ܓܶܝܪ ܘܶܐܡܰܪ:
ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܫܰܒܰܚܘ ܠܡܳܪܝܳܐ ܟܽܠܗ̇ ܐܰܪܥܳܐ. ܫܰܒܰܚܘ ܠܡܳܪܝܳܐ ܘܒܰܪܶܟܘ ܠܰܫܡܶܗ. ܘܡܶܛܠܡܳܢܐ ܟܕ ܒܟܽܠܙܒܰܢ ܡܫܰܒܰܚ ܗܘܳܐ ܬܶܫܒ̈ܚܳܬܳܐ. ܠܐܴ ܩܳܪܶܐ ܠܗܶܝܢ ܠܰܚܕܳܐ ܡܶܢܗܶܝܢ ܚܕܰܬܳܐ. ܐܠܐ ܠܗܳܕܶܐ܆ ܘܡܳܢܳܐ ܗܝ ܥܶܠܬܳܐ ܕܗܳܕܶܐ ܬܩܰܕܶܡ ܬܶܬܩܪܶܐ ܚܕܰܬܳܐ. ܒܰܫܪܳܪܳܐ ܕܗܳܟܰܢܳܐ ܐܝܟ ܕܶܐܡܰܪ ܪܽܘܚܳܐ. ܬܶܫܒܽܘܚܬܳܐ ܗܝ ܚܕܰܬܳܐ ܗܳܕܐ. ܡܶܛܠ ܐܪܳܙܳܐ ܚܰܕܬܳܐ ܕܶܐܬܓܠܺܝ ܒܗ̇. ܒܳܗ̇ ܓܝܪ ܕܢܰܚ ܩܳܢܽܘܢܳܐ ܕܗܰܝܡܳܢܽܘܬܳܐ ܠܟܽܠܗ̇ ܐܰܪܥܳܐ. ܡܶܛܠ ܕܠܰܘ ܥܰܡܳܐ ܒܰܠܚܽܘܕ ܡܫܰܒܰܚ ܠܗ̇ ܠܗܳܕܐ ܬܶܫܒܽܘܚܬܳܐ ܚܕܰܬܳܐ. ܐܡ̣ܪ ܓܶܝܪ ܒܳܬܰܪ ܦܶܬܓܳܡܳܐ ܗܰܘ ܩܰܕܡܳܝܳܐ܆ ܫܰܒܰܚܘ ܠܡܳܪܝܳܐ ܟܽܠܗ̇ ܐܰܪܥܳܐ. ܐܶܢܓܶܝܪ ܟܽܠܗ̇ ܐܰܪܥܳܐ ܡܫܰܒܚܳܐ܆ ܠܰܝܬ ܘܠܐ ܚܰܕ ܥܰܡܳܐ ܕܠܐ ܡܢܳܬܳܐ ܐܝ̣ܬ ܠܗ ܒܬܶܫܒܽܘܚܬܳܐ ܗܳܕܐ. ܬܶܫܒܽܘܚܬܳܐ ܗܳܕܐ ܐܝ̣ܬܶܝܗ̇ ܟܳܪܽܘܙܽܘܬܳܐ ܚܕܰܬܳܐ ܕܶܐܘܰܢܓܶܠܝܘܢ. ܬܰܘܕܺܝܬܳܐ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܡܶܢ ܩܕܳܡ ܓܝܪ ܕܢܶܚܰܫ ܡܶܠܬܳܐ ܐܡ̇ܪ ܗܘܳܐ: ܟܰܕ ܝܰܗܒ ܗܘܳܐ ܟܳܣܳܐ ܕܰܕܡܶܗ ܠܬܰܠܡܺܝܕܰܘ̈ܗܝ: ܕܰܐܡܺܝܢ ܐܡ̇ܪ ܐܢܳܐ ܠܟܽܘܢ ܕܠܐܴ ܐܶܫܬܶܐ ܡܶܢ ܗܳܢܐ ܝܰܠܕܳܐ ܕܰܓܦܶܬܳܐ܇ ܥܕܰܡܳܐ ܠܝܰܘܡܳܐ ܗܰܘ ܕܒܶܗ ܐܶܫܬܺܝܘܗܝ ܥܰܡܟܽܘܢ ܚܰܕܬܳܐ ܒܡܰܠܟܽܘܬܶܗ ܕܳܐܒܝ (ܡܬܝ ܟܘ: ܟܛ ܡܪܩܘܣ ܝܕ: ܟܗ ܠܘܩܐ ܟܒ: ܝܚ). ܘܟܕ ܡܳܕܶܝܢ ܗܘܳܬ ܩܝܳܡܬܳܐ ܩܰܕܺܝܫܬܳܐ. ܩܳܡ ܒܠܳܐ ܡܶܬܚܰܒܠܳܢܽܘܬܳܐ ܡܫܰܪܶܐ ܡܶܟܺܝܠ ܚܰܕܬܳܐܝ̣ܬ ܡܶܬܗܰܦܰܟ ܥܰܡܗܘܢ. ܟܕ ܐܳܟܶܠ ܥܰܡܗܘܢ ܘܫܳܬܶܐ ܡܶܢ ܒܳܬܰܪ ܩܝܳܡܬܳܐ. ܠܘ ܟܕ ܐܝ̣ܬ ܠܗ ܦܰܓܪܳܐ ܡܳܝܽܘܬܳܐ ܘܚܳܫܽܘܫܳܐ. ܐܠܐ ܒܦܰܓܪܳܐ ܠܐ ܡܶܬܚܰܒܠܳܢܳܐ ܘܕܠܐ ܕܶܝܢ ܣܢܺܝܩ ܥܰܠ ܣܰܝܒܳܪܬܳܐ ܕܰܥܝܳܕܳܐ. ܡܶܬܗܰܦܰܟ ܗܘܳܐ ܥܰܡܗܘܢ ܐܝܟ ܡܥܰܝܕܳܐ. ܟܕ ܚܰܕܬܳܐܝ̣ܬ ܫܳܡܥܺܝܢ ܗܘܰܘ ܡܶܢܶܗ. ܕܙܶܠܘ ܗܳܟܺܝܠ ܬܰܠܡܶܕܘ ܟܽܠܗܘܢ ܥܰܡ̈ܡܶܐ (ܡܬܝ ܟܚ: ܝܛ). ܘܬܶܫܒܽܘܚܬܳܐ ܚܕܰܬܳܐ ܗܳܐ ܡܶܟܳܐ ܫܰܪܝܰܬ ܘܗܳܕܳܐ ܗܝ ܪܺܝܫܳܐ ܕܬܶܫܒܽܘܚܬܳܐ ܗܳܕܐ. ܗܳܝ ܕܶܐܡܰܪ ܒܳܬܰܪ ܩܝܳܡܬܳܐ ܠܬܰܠܡܺܝ̈ܕܶܐ: ܕܙܶܠܘ ܗܳܟܺܝܠ ܬܰܠܡܶܕܘ ܠܟܽܠܗܘܢ ܥܰܡ̈ܡܶܐ. ܘܰܐܥܡܶܕܘ ܐܶܢܘܢ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ (ܡܬܝ ܟܚ: ܝܛ). ܗܳܕܐ ܐܝ̣ܬܶܝܗ̇ ܬܶܫܒܽܘܚܬܳܐ ܚܕܰܬܳܐ. ܒܗܳܝ ܕܶܐܡܰܪ: ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܐܰܫܠܶܡ ܬܰܘܕܺܝܬܳܐ ܕܒܰܐܒܳܐ. ܘܬܽܘܒ ܐܡ̣ܪ ܫܰܒܰܚܘ ܠܡܳܪܝܳܐ ܟܽܠܗ̇ ܐܰܪܥܳܐ. ܘܰܒܗܳܕܐ ܐܰܟܪܶܙܘ ܬܰܘܕܺܝܬܳܐ ܕܰܒܚܰܕ ܒܪܳܐ. ܘܬܽܘܒ ܐܡ̣ܪ ܕܫܰܒܰܚܘ ܠܡܳܪܝܳܐ ܘܒܰܪܶܟܘ ܠܰܫܡܶܗ. ܒܗܳܢܐ ܩܳܢܽܘܢܳܐ ܦܰܫܶܩ ܩܳܠܳܐ ܕܪܽܘܚܳܐ ܩܰܕܺܝܫܳܐ. ܘܒܰܚܕܳܐ ܡܳܪܽܘܬܳܐ ܡܩܰܠܶܣ ܠܰܬܠܳܬܰܝ̈ܗܘܢ ܕܠܐ ܒܽܘܨܳܪܳܐ. ܟܕ ܡܰܘܕܰܥ ܕܰܚܕܳܐ ܗܝ ܡܳܪܽܘܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܠܰܝܬ ܒܗܽܘܢ ܩܢܽܘܡܳܐ ܕܰܛܠܐܷ ܐܰܘ ܕܩܰܫܺܝܫ ܒܰܝܢܳܬܗܘܢ. ܘܠܐ ܕܡܶܫܬܰܒܰܚ. ܐܠܐ ܡܰܢ ܬܠܳܬܰܝܗܘܢ ܒܰܚܕܳܐ ܫܰܘܝܽܘܬ ܟܝܳܢܳܐ ܡܶܬܝܰܩܪܺܝܢ ܘܡܶܫܬܰܒܚܺܝܢ. ܘܡܳܪܝܰܐ ܗܘ ܐܰܒܳܐ ܒܰܐܒܳܗܽܘܬܶܗ. ܘܡܶܢܶܗ ܫܩܰܠ ܫܽܘܡܳܗܳܐ ܫܡܳܐ ܕܡܳܪܽܘܬܳܐ. ܘܡܳܪܝܰܐ ܗܘ ܐܳܦ ܒܪܳܐ ܒܺܝܠܺܝܕܽܘܬܶܗ. ܘܠܘ ܐܝܟ ܬܪܰܝܳܢܳܐ ܥܳܐܷܠ ܒܳܬܰܪ ܐܰܒܳܐ ܒܺܐܝܩܳܪܳܐ. ܡܶܛܠ ܕܠܰܝܬ ܬܪܰܝܳܢܽܘܬ ܫܽܘܒܚܳܐ ܒܺܐܝܩܳܪܳܐ ܡܶܣܬܰܓܕܳܢܳܐ ܕܰܬܠܺܝܬܳܝܽܘܬܳܐ. ܘܟܕ ܡܳܪܝܰܐ ܗܘ ܪܽܘܚܳܐ ܒܢܳܦܽܘܩܽܘܬܳܐ. ܘܰܚܕܳܐ ܗܝ ܩܰܕܺܝܡܽܘܬܳܐ ܕܫܰܘܝܽܘܬ ܟܝܳܢܳܐ ܕܰܬܠܺܝܬܳܝܽܘܬܳܐ. ܘܥܰܠܗܳܝ ܐܡ̇ܪ ܢܒܺܝܐ܆ ܫܰܒܰܚܘ ܠܡܳܪܝܳܐ ܫܰܒܰܚܘ ܠܡܳܪܝܳܐ ܫܰܒܰܚܘ ܠܡܳܪܝܳܐ. ܕܰܐܝܟ ܕܠܐ ܙܥܽܘܪ ܫܽܘܒܚܳܐ ܡܶܢ ܫܽܘܒܚܳܐ. ܗܳܟܰܢܐ ܠܐ ܙܥܽܘܪ. ܩܢܽܘܡܳܐ ܡܶܢ ܩܢܽܘܡܳܐ. ܘܰܐܝܟ ܕܰܫܘܶܐ ܫܽܘܡܳܗܳܐ ܕܡܳܪ̈ܰܝܳܐ. ܗܳܟܰܢܳܐ ܫܰܘܝܳܐ ܕܠܐ ܒܽܘܨܳܪܳܐ. ܡܳܪܽܘܬܳܐ ܕܰܬܠܺܝܬܳܝܽܘܬܳܐ. ܬܠܳܬܳܐ ܫܽܘ̈ܒܚܶܐ ܡܶܛܠ ܫܰܘܝܽܘܬ ܬܶܫܒܽܘܚܬܳܐ ܕܰܬܠܺܝܬܳܝܽܘܬܳܐ. ܘܰܬܠܳܬܳܐ ܡܳܪ̈ܰܘܳܬܳܐ. ܥܰܠ ܕܰܢܫܰܘܕܰܥ ܠܚܽܘܕܳܝܽܘܬ ܡܳܪܽܘܬܳܐ. ܕܰܚܕܳܐ ܗܝ ܘܒܰܬܠܳܬܳܐ ܡܶܬܟܰܪܙܳܐ. ܘܰܬܠܳܬܳܐ ܐܶܢܘܢ ܩܢܽܘ̈ܡܶܐ. ܘܒܰܚܕܳܐ ܐܝ̣ܬܽܘܬܳܐ ܡܳܪܽܘܬܳܐ ܡܶܬܬܰܘܕܶܝܢ. ܘܰܒܚܰܕ ܚܰܝܠܐܴ ܡܶܬܡܰܠܠܺܝܢ ܘܒܰܚܕܳܐ ܐܰܠܳܗܽܘܬܳܐ ܡܶܫܬܰܒܚܺܝܢ. ܘܡܶܛܠܗܳܢܐ ܟܕ ܢܶܦܩܰܬ ܗܳܕܐ ܬܰܘܕܺܝܬܳܐ ܡܰܚܝܳܢܺܝܬܳܐ ܠܒܶܝܬ ܥܰܡ̈ܡܶܐ ܫܩܰܠ ܕܰܘܝܕ ܩܺܝܬܳܪܶܗ܆ ܘܰܢܦܰܩ ܩܕܳܡܶܝܗ̇ ܟܕ ܐܡ̇ܪ:
ܣܰܒܰܪܘ ܡܶܢ ܝܽܘܡ ܠܝܽܘܡ ܦܽܘܪܩܳܢܶܗ. ܘܶܐܫܬܰܥܰܘ ܒܥܰܡ̈ܡܶܐ ܐܝ̣ܩܳܪܶܗ. ܘܰܒܟܽܠܗܘܢ ܥܰܡ̈ܡܶܐ ܥܒܳܕܰܘ̈ܗܝ. ܚܙܰܝܬ ܐܰܝܟܰܢܳܐ ܬܰܘܕܺܝܬܳܐ ܬܪܺܝܨܬܳܐ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܠܐ ܕܠܺܝܠ ܗܘܳܐ ܕܢܶܬܒܰܩܶܐ ܒܗܰܘ ܕܝܳܬܶܒ ܒܰܬܪܽܘܢܽܘܣ ܠܥܶܠ ܡܶܢ ܚܰܨܳܐ ܕܰܟܪ̈ܽܘܒܶܐ. ܘܡܶܛܠ ܕܰܠܗܰܘ ܥܣܶܩ ܗܘܳܐ ܕܢܶܬܥܰܠܐܷ ܗܘܳܐ ܠܪܰܘܡܳܐ ܕܫܽܘܒܚܶܗ. ܘܩܰܒܶܠ ܚܠܳܦ ܗܳܢܐ ܟܠܺܝܠܳܐ ܕܟܽܘ̈ܒܶܐ. ܘܟܰܣܺܝ ܐܰܪ̈ܓܘܳܢܶܐ ܕܡܰܠܟܽܘܬܶܗ ܘܩܳܡ ܥܰܪܛܶܠܳܐܝ̣ܬ ܒܰܨܠܺܝܒܳܐ ܕܠܳܐ ܢܰܚ̈ܬܶܐ. ܘܟܕ ܐܶܬܦܰܫܰܩ ܠܪܺܝܫܳܐ ܕܠܶܣܛܳܝ̈ܐ ܕܟܕ ܠܐ ܡܶܬܪܗܶܒ ܢܶܬܒܰܩܶܐ ܒܶܗ. ܩܰܪܶܒ ܒܳܥܽܘܬܳܐ ܕܗܰܝܡܳܢܽܘܬܳܐ. ܘܩܰܒܶܠ ܕܳܫܢ̈ܐ ܕܫܽܘܒܩܳܢܳܐ ܕܟܽܠܡܶܕܶܡ ܕܰܚܛܳܐ ܗܘܳܐ ܠܶܗ. ܘܰܢܣܰܒ ܡܽܘܠܟܳܢܳܐ ܕܰܠܦܰܪܕܰܝܣܳܐ ܢܶܥܽܘܠ ܒܶܗ ܒܝܰܘܡܳܐ. ܘܗܳܢܐ ܐܝ̣ܩܳܪܳܐ ܡܶܫܬܰܥܶܝܢ ܗܘܰܘ ܒܰܝܢܳܬ ܥܰܡ̈ܡܶܐ ܚܰܛܳܝ̈ܐ. ܫܠܺܝ̈ܚܶܐ ܩܰܕܺܝ̈ܫܶܐ ܟܕ ܡܰܟܪܙܺܝܢ. ܕܠܰܘ ܡܶܕܶܡ ܪܰܒܳܐ ܘܥܰܣܩܳܐ ܬܳܒܰܥ ܡܶܢ ܬܰܝܳܒ̈ܐ. ܚܠܳܦ ܚܛܳܗܰܝ̈ܗܘܢ. ܕܰܒܬܰܘܕܺܝܬܳܐ ܕܥܶܕܳܢܳܐ ܙܥܽܘܪܳܐ ܠܓܰܝܳܣܳܐ ܝܰܩܪܶܗ ܘܦܰܨܝܶܗ ܡܶܢ ܨܰܥܪܳܐ ܕܰܚܛܳܗܰܘ̈ܗܝ. ܘܰܒܕܶܡ̈ܥܶܐ ܫܒܰܩ ܠܚܰܛܳܝܬܳܐ ܐܶܫܛܳܪܳܐ ܟܡܺܝܪܳܐ ܕܚܳܒܰܬ ܠܟܺܐܢܽܘܬܳܐ. ܘܰܒܫܳܪܽܘܬܳܐ ܙܥܽܘܪܬܳܐ ܚܰܪܪܶܗ ܠܙܰܟܰܝ ܡܶܢ ܚܰܘ̈ܒܳܬܳܐ ܕܰܚܛܳܗ̈ܐ. ܥܕܰܡܳܐ ܕܢܰܣܒܪܽܘܢ ܐܰܝܠܶܝܢ ܕܠܐ ܚܛܰܘ. ܕܰܟܒܰܪ ܠܘ ܡܶܛܠܳܬܗܘܢ ܐܶܬܳܐ. ܥܰܡ ܐܝ̣ܩܳܪܶܗ ܕܡܰܠܟܳܐ ܡܳܪܝܳܐ. ܐܡ̣ܪ ܪܽܘܚܳܐ: ܕܢܶܫܬܰܥܽܘܢ ܒܥܰܡ̈ܡܶܐ ܥܒܳܕܰܘ̈ܗܝ ܡܳܢܐ ܐܶܢܘܢ ܥܒܳܕܰܘ̈ܗܝ. ܗܳܝ ܕܰܙܥܰܪ ܟܕ ܐܝ̣ܬܰܘܗܝ ܪܰܒܳܐ. ܗܳܝ ܕܰܗܘܳܐ ܥܽܘܠܳܐ ܟܕ ܐܝ̣ܬܰܘܗܝ ܨܳܐܱܪ ܥܽܘ̈ܠܶܐ. ܘܗܳܝ ܕܟܕ ܗܘܳܐ ܝܰܠܽܘܳܕܐ ܘܺܐܝܬܰܘܗܝ ܩܰܫܺܝܫ ܡܶܢܟܽܠ. ܘܗܳܝ ܕܶܐܬܟܰܣܺܝ ܥܰܙܪܽܘܪ̈ܶܐ܆ ܟܕ ܐܝ̣ܬ ܠܶܗ ܠܒܽܘܫܳܐ ܕܢܽܘܗܪܳܐ ܕܠܐ ܡܶܬܚܰܒܠܳܢܽܘܬܳܐ. ܘܗܳܝ ܕܶܐܬܬܣܺܝܡ ܒܽܐܘܪܝܳܐ. ܕܢܰܘܕܰܥ ܠܬܰܘܪܳܐ ܩܳܢܝܶܗ. ܘܠܰܚܡܳܪܳܐ ܐܽܘܪܝܳܐ ܕܡܳܪܶܗ. ܘܗܳܝ ܕܰܥܡܰܕ ܘܟܕ ܐܝ̣ܬܰܘܗܝ ܚܽܘܣܳܝܳܐ. ܘܗܳܝ ܕܫܰܚܠܶܦ ܡܰܝܴ̈ܐ ܠܚܰܡܪܳܐ ܒܩܳܛܢܶܐ ܕܰܓܠܺܝܠܳܐ. ܘܗܳܝ ܕܰܩܪܳܐ ܫܠܺܝ̈ܚܶܐ. ܘܗܳܝ ܕܟܰܢܶܫ ܬܰܠܡܺܝ̈ܕܶܐ. ܘܗܳܝ ܕܰܪܕܰܦ ܪ̈ܽܘܚܶܐ ܛܰܢܦܴ̈ܬܳܐ. ܘܗܳܝ ܕܰܐܣܓܺܝ ܠܰܚܡܳܐ. ܘܗܳܝ ܕܫܰܬܶܩ ܡܰܚܫܽܘ̈ܠܶܐ ܕܝܰܡܳܐ. ܘܫܰܝܶܢ ܒܰܥܪܺܝܪܳܝܽܘܬܳܐ ܕܓ̈ܰܠܠܶܐ. ܗܳܠܶܝܢ ܡܶܫܬܰܥܶܝܢ ܗܘܰܘ ܫܠܺܝ̈ܚܶܐ ܒܰܝܢܳܬ ܥܰܡ̈ܡܶܐ ܕܰܥܒܰܕ ܡܳܪܝܳܐ. ܘܟܕ ܒܳܐܬܘܴ̈ܬܳܐ ܡܶܬܢܰܨܚܺܝܢ ܗܘܰܘ. ܟܕ ܡܚܰܘܶܝܢ ܕܚܰܕ ܗܘ ܘܚܰܝ ܗܘ ܗܰܘ ܕܰܥܒܰܕ ܥܒܴ̈ܕܶܐ ܗܳܠܝܢ. ܘܝܳܗܒܺܝܢ ܗܘܰܘ ܥܠܰܘܗܝ ܣܳܗܕܽܘܬܳܐ ܫܰܪܺܝܪܬܳܐ. ܡܶܢ ܗܳܝ ܕܥܳܒܕܺܝܢ ܗܘܰܘ ܚܰܝ̈ܠܶܐ ܒܰܫܡܶܗ. ܟܕ ܠܐ ܡܶܬܚܙܶܐ. ܘܳܐܡܪܺܝܢ ܗܘܰܘ ܥܰܡ ܢܒܺܝܐ.
ܡܶܛܠ ܕܪܰܒ ܗܽܘ ܡܳܪܝܳܐ ܘܰܡܫܰܒܰܚ ܛܳܒ. ܘܰܕܚܺܝܠ ܥܠ ܟܽܠܗܽܘܢ ܐܰܠܳܗ̈ܐ. ܡܶܛܠ ܕܟܽܠܗܽܘܢ ܐܰܠܳܗ̈ܐ ܕܥܰܡ̈ܡܶܐ ܣܪܺܝܩܺܝܢ ܐܶܢܽܘܢ. ܘܡܳܪܝܳܐ ܠܰܡ ܫܡܰܝܳܐ ܥܒܰܕ. ܘܗܳܠܝܢ ܩܴ̈ܠܐ ܕܰܡܣܰܒܪ̈ܳܢܶܐ ܗܘܰܘ. ܟܕ ܣܳܬܪܺܝܢ ܬܶܫܒܽܘܚܬܳܐ ܕܟܽܠܗܽܘܢ ܐܰܠܳܗ̈ܐ ܣܪ̈ܺܝܩܶܐ ܕܥܰܡ̈ܡܶܐ. ܘܰܡܫܰܡܗܺܝܢ ܠܗܽܘܢ ܒܰܫܡܴ̈ܗܶܐ ܡܨܰܥܪ̈ܶܐ. ܣܪ̈ܺܝܩܶܐ ܓܶܝܪ ܕܰܝ̈ܘܶܐ ܡܶܬܦܰܫܩܺܝܢ ܗܳܠܝܢ ܕܠܰܝܬ ܠܗܽܘܢ ܕܽܘܟܪܳܢܳܐ ܒܰܥܒܴ̈ܕܶܐ ܕܰܐܠܗܳܐ. ܘܠܽܘܩܒܰܠ ܗܳܠܝܢ ܣܰܓܺܝ̈ܐܐ ܘܕܠܐ ܡܶܢܝܳܢܳܐ. ܚܰܕ ܫܡܳܐ ܒܰܠܚܽܘܕ ܣܳܦܶܩ ܕܰܢܒܰܛܶܠ ܐܶܢܘܢ ܡܶܢ ܡܳܪܽܘܬܳܐ ܕܥܰܠ ܥܰܡ̈ܡܶܐ. ܘܗܽܘ ܡܳܪܝܳܐ ܫܡܰܝܳܐ ܥܒܰܕ.
ܘܙܺܝܘܳܐ ܘܫܽܘܒܚܳܐ ܩܕܳܡܰܘܗܝ. ܥܽܘܫܢܳܐ ܘܬܶܫܒܽܘܚܬܳܐ ܒܡܰܩܕܫܶܗ. ܗܳܠܝܢ ܓܝܪ ܡܫܰܘ̈ܕܥܶܐ ܐܶܢܘܢ ܕܡܰܠܟܽܘܬܶܗ. ܘܠܰܘ ܐܰܝܟ ܐܰܠܗ̈ܐ ܣܪ̈ܺܝܩܶܐ ܘܕܰܓܳܠܰܝ̈ ܫܡܳܐ ܡܶܓܢܰܒ ܓܢܰܒ ܠܶܗ ܫܽܘܒܚܳܐ. ܐܰܠܗܳܐ ܕܶܝܢ ܥܽܘܫܢܶܗ ܘܬܶܫܒܽܘܚܬܶܗ ܩܕܳܡܰܘܗܝ. ܡܶܛܠ ܕܡܶܢ ܟܽܠ ܐܰܠܳܗ̈ܝ̣ܢ ܪܰܒ ܗܘ ܘܰܡܝܰܩܰܪ ܘܡܶܣܬܓܶܕ ܘܡܶܫܬܰܒܰܚ. ܡܶܛܠܗܳܕܐ:
ܗܰܒܘ ܠܗ ܠܡܳܪܝܳܐ ܫܰܪ̈ܒܳܬܳܐ ܕܥܡ̈ܡܶܐ. ܗܰܒܘ ܠܡܳܪܝܳܐ ܬܶܫܒܽܘܚܬܳܐ ܘܺܐܝܩܳܪܳܐ. ܗܰܒܘ ܠܡܳܪܝܳܐ ܐܝ̣ܩܳܪܳܐ ܠܰܫܡܶܗ. ܐܳܦ ܗܳܪܟܳܐ ܬܘܒ ܒܰܬܠܺܝܬܳܝܽܘܬ ܫܡܳܐ ܕܡܳܪܝܳܐ ܡܶܬܚܰܫܰܚ ܢܒܺܝܐ. ܟܰܕ ܡܦܰܫܶܩ ܠܗܽܘܢ ܕܢܶܥܠܽܘܢ ܠܕܳܪ̈ܳܬܳܐ ܩܰܕܺܝ̈ܫܳܬܳܐ ܕܥܺܕܬܶܗ ܕܰܐܠܗܳܐ. ܟܕ ܛܥܺܝܢܺܝܢ ܩܽܘܪ̈ܒܳܢܰܝܗܘܢ.
ܫܩܽܘܠܘ ܠܰܡ ܩܽܘܪ̈ܒܳܢܶܐ ܘܥܽܘܠܘ ܠܕܳܪ̈ܰܘܗܝ. ܡܳܢܐ ܐܶܢܘܢ ܩܽܘܪ̈ܒܳܢܶܐ ܕܶܐܡܰܪ. ܕܢܶܫܩܠܽܘܢ ܠܰܘ ܚܰܝ̈ܘܳܬܳܐ ܕܠܐܴ ܡܶܠܬܳܐ. ܘܠܐ ܥܶܪ̈ܒܶܐ ܘܬܰܘܪ̈ܶܐ ܘܰܓܕܰܝܴ̈ܐ. ܐܠܐ ܢܰܦܫܴ̈ܬܳܐ ܕܰܣܚܰܝ̈ ܘܶܐܬܕܰܟ̈ܝ̣ܝܢ ܡܶܢ ܟܽܘ̈ܬܡܳܬܳܐ ܕܰܚܛܳܗܰܝ̈ܗܶܝܢ. ܩܽܘܪ̈ܒܳܢܶܐ ܓܶܝܪ ܕܰܐܝܟ ܗܳܠܝܢ ܐܶܢܘܢ. ܟܕ ܡܰܘܣܶܦ ܢܒܺܝܐ ܥܰܡ ܗܳܠܝܢ.
ܣܓܽܘܕܘ ܠܡܳܪܝܳܐ ܒܕܳܪܬܳܐ ܕܩܽܘܕܫܶܗ. ܠܡܳܢܐ ܕܶܝܢ ܕܳܪ̈ܳܬܳܐ ܫܰܡܰܗ. ܥܺܕ̈ܬܳܐ ܣܰܓܺܝ̈ܐܬܳܐ ܥܒܰܕܘ ܫܠܺܝ̈ܚܶܐ ܒܟܽܠܗ̇ ܐܰܪܥܳܐ. ܘܟܕ ܥܺܕ̈ܬܳܐ ܣܰܓܺܝ̈ܐܬܳܐ ܗܳܘ̈ܝܳܢ ܒܗܰܝܡܳܢܽܘܬܳܐ ܚܕܳܐ ܥܺܕܬܳܐ ܐܝ̣ܬܶܝܗ̇. ܐܝܟ ܕܰܒܕܳܪܬܳܐ ܡܶܬܐܰܡܪܳܐ ܕܣܳܓܕܳܐ ܠܡܳܪܝܳܐ. ܡܳܐ ܕܶܝܢ ܕܶܐܬܚܙܺܝ ܗܰܘ ܥܳܠܡܳܐ ܪܰܒܳܐ ܕܙܰܕܺܝܩܽܘܬܳܐ. ܠܘ ܒܕܳܪ̈ܳܬܳܐ ܣܳܓܕܺܝܢ ܠܶܗ ܥܰܡ̈ܡܶܐ ܡܗܰܝ̈ܡܢܶܐ ܠܡܳܪܝܳܐ. ܟܕ ܬܳܗܪܺܝܢ ܒܪܰܒܽܘܬܳܐ ܕܚܰܝܠܶܗ ܘܫܽܘܠܛܳܢܶܗ ܟܕ ܚܳܙܶܝܢ ܕܡܶܢܶܗ ܙܳܝܥܺܝܢ ܟܽܠܗܘܢ ܚܰܝܠܰܘܴ̈ܬܳܐ ܕܕܰܠܩܽܘܒܠܳܐ ܐܝܟ ܕܶܐܡܰܪ ܪܽܘܚܳܐ:
ܬܙܽܘܥ ܡܶܢ ܩܕܳܡܰܘܗܝ ܟܽܠܳܗ̇ ܐܰܪܥܳܐ. ܐܰܪܥܳܐ ܕܶܝܢ ܗܳܕܐ ܕܳܡܝܳܐ. ܕܠܰܘ ܡܶܛܠ ܗܳܕܐ ܕܰܥܠܶܝܗ̇ ܝܳܬܶܒ ܥܳܠܡܳܐ. ܗܳܕܐ ܓܝܪ ܡܰܬܩܳܢܽܘ ܐܰܬܩܢܳܗ̇. ܐܠܐ ܠܡܰܠܟܽܘܬܶܗ ܕܳܐܟܶܠܩܰܪܨܳܐ ܩܳܪܶܐ ܐܰܪܥܳܐ. ܕܰܥܠܶܝܗ̇ ܡܰܡܠܶܟ ܗܘܳܐ. ܘܡܶܛܠ ܗܳܕܐ ܐܡ̣ܪ ܢܒܺܝܳܐ.
ܐܶܡܰܪܘ ܒܶܝܬ ܥܰܡ̈ܡܶܐ ܕܡܳܪܝܳܐ ܐܰܡܠܶܟ. ܘܰܐܬܩܢܳܗ̇ ܠܡܶܬܥܰܡܪܳܢܺܝܬܳܐ ܕܠܳܐ ܬܙܽܘܥ. ܘܟܕ ܐܰܡܠܶܟ ܥܰܠ ܡܰܘܬܳܐ ܒܡܰܘܬܶܗ. ܘܰܫܪܳܐ ܘܒܰܛܶܠ ܫܽܘܠܛܳܢܶܗ ܡܶܢ ܢܺܝܪܳܐ ܕܡܳܝܽܘ̈ܬܶܐ. ܙܳܥܰܬ ܐܰܪܥܳܐ ܕܡܰܠܟ̈ܐ ܕܚܶܫܽܘܟܳܐ ܡܶܢ ܩܕܳܡ ܕܶܢܚܳܐ ܕܢܽܘܗܪܶܗ. ܘܰܢܦܰܩ ܩܳܠܐܴ ܕܰܢܒܺܝܽܘܬܳܐ ܩܕܳܡܰܘܗܝ ܟܕ ܡܣܰܒܰܪ ܒܶܝܬ ܥܰܡ̈ܡܶܐ ܕܒܶܛܠܰܬ ܡܰܠܟܽܘܬܶܗ ܕܡܰܘܬܳܐ. ܘܰܐܡܠܶܟ ܡܳܪܝܳܐ ܗܰܘ ܕܺܐܝܬܰܘܗܝ ܡܰܠܟܳܐ ܕܥܰܠ ܟܽܠ. ܘܰܐܬܩܢܳܗ̇ ܠܡܶܬܥܰܡܪܳܢܺܝܬܳܐ ܒܡܰܠܟܽܘܬܶܗ. ܕܬܽܘܒ ܠܐ ܬܙܽܘܥ ܡܶܢ ܛܪܽܘܢܽܘܬܶܗ ܕܡܳܪܽܘܕܳܐ ܘܡܶܟܺܝܠ:
ܢܕܽܘܢ ܠܥܰܡ̈ܡܶܐ ܒܰܬܪܺܝܨܽܘܬܳܐ. ܘܰܢܦܰܨܶܐ ܐܶܢܘܢ ܡܶܢ ܡܰܠܟܽܘܬܳܐ ܕܥܰܘܳܠܳܐ.
ܢܶܚܕܽܘܢ ܫܡܰܝܴ̈ܐ ܘܰܬܕܽܘܨ ܐܰܪܥܳܐ. ܡܶܛܠ ܕܡܶܬܚܰܠܛܳܐ ܡܰܠܟܽܘܬܗܶܝܢ ܒܰܚ̈ܕܳܕܶܐ. ܟܰܕ ܢܳܚܬܺܝܢ ܡܰܠܰܐܟ̈ܐ ܠܰܐܪܥܳܐ ܩܕܳܡ ܡܳܪܗܘܢ. ܕܰܐܡܠܶܟ ܥܰܠ ܐܰܪܥܳܐ ܒܰܨܠܺܝܒܶܗ. ܐܰܝܟ ܕܥܰܠ ܫܡܰܝܳܐ ܒܫܽܘܒܚܳܐ ܕܰܟܝܳܢܶܗ. ܘܡܶܬܥܰܠܶܝܢ ܐܳܦ ܐܰܪ̈ܥܳܢܶܐ ܒܓܶܠܝܳܢܳܐ ܥܕܰܡܳܐ ܠܰܫܡܰܝܳܐ ܕܰܬܠܳܬܳܐ:
ܘܢܶܪܘܰܙ ܝܰܡܳܐ ܒܰܡܠܐܴܗ. ܘܢܶܬܥܰܫ̈ܢܳܢ ܚܰܩ̈ܠܳܬܳܐ ܘܟܽܠ ܕܺܐܝܬ ܒܗܶܝܢ. ܗܳܝܕܶܝܢ ܢܫܰܒܚܽܘܢ ܟܽܠܗܽܘܢ ܐܝ̣ܠܳܢ̈ܐ ܕܥܳܒܳܐ. ܒܰܫܡܳܗ̈ܐ ܡܫܰܚ̈ܠܦܶܐ ܡܶܬܩܪܶܐ ܘܡܶܫܬܰܚܠܰܦ ܥܳܠܡܳܐ ܡܶܢ ܢܒܺܝܽܘܬܳܐ. ܝܰܡܳܐ ܡܶܬܩܪܶܐ ܡܶܛܠ ܫܓܺܝܫܽܘܬܶܗ. ܘܡܶܛܠ ܡܰܪܺܝܪܽܘܬܳܐ ܕܰܚܛܳܗ̈ܐ ܕܰܫܟܺܝܚܳܐ ܒܶܗ. ܥܳܒܳܐ ܕܶܝܢ ܡܶܬܟܰܢܶܐ ܡܶܛܠ ܕܠܐ ܐܝ̣ܬ ܒܶܗ ܦܺܐܪ̈ܶܐ ܕܙܰܕܺܝܩܽܘܬܳܐ. ܕܰܒܝܰܕ ܟܳܪܽܘܙܽܘܬܳܐ ܕܰܫܠܺܝ̈ܚܶܐ ܘܰܣܒܰܪܬܳܐ ܕܶܐܘܰܢܓܶܠܝܘܢ ܐܶܫܬܰܝܰܢ ܫܓܺܝܫܳܐ ܘܰܗܘܳܐ ܡܰܪܺܝܪܳܐ ܚܰܠܝܳܐ. ܘܰܓܦܶܬܳܐ ܐܳܦ ܬܺܐܬܳܐ ܝܳܗܒܺܝܢ ܚܰܝܠܗܶܝܢ. ܘܗܺܝ ܗܳܕܐ ܩܕܳܡ ܡܳܪܝܳܐ ܗܘܳܬ.
ܩܕܳܡ ܡܳܪܝܳܐ ܕܳܐܬܶܐ ܠܰܡܕܳܢܳܗ̇ ܠܰܐܪܥܳܐ. ܕܳܐܶܢ ܠܬܺܒܶܝܠ ܒܙܰܕܺܝܩܽܘܬܳܐ. ܘܰܠܥܰܡ̈ܡܶܐ ܒܗܰܝܡܳܢܽܘܬܳܐ. ܠܘ ܡܶܕܶܡ ܝܰܩܺܝܪܳܐ ܬܳܒܰܥ ܒܺܐܝ̈ܕܰܝ ܥܰܡ̈ܡܶܐ. ܕܰܦܢܰܘ ܠܘܳܬܶܗ ܘܰܐܚܺܝ ܐܶܢܘܢ. ܐܠܐ ܗܰܝܡܳܢܽܘܬܳܐ ܬܳܒܰܥ ܡܶܢܗܘܢ. ܘܒܗ̇ ܐܰܚܺܝ ܐܶܢܘܢ. ܕܠܶܗ ܬܶܫܒܽܘܚܬܳܐ ܘܬܰܘܕܺܝܬܳܐ ܘܪܽܘܡܪܳܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܫܒܥܐ
ܡܰܘܕܰܥ ܐܪܳܙ ܡܰܠܟܽܘܬܳܐ ܕܰܐܟܪܶܙܘ ܫܠܺܝ̈ܚܶܐ ܒܥܳܠܡܳܐ: ܘܥܰܠ ܢܽܘܗܪܳܐ ܕܡܰܠܦܳܢܽܘܬܳܐ ܕܶܐܘܰܢܓܶܠܝܘܢ: ܘܐܪܳܙ ܢܽܘܪܳܐ ܗܳܝ ܕܰܐܪܡܺܝ ܡܳܪܢ ܒܥܳܠܡܳܐ.
ܡܳܪܰܢ ܘܦܳܪܽܘܩܰܢ ܝܶܫܘܥ ܡܫܺܝܚܳܐ. ܟܕ ܫܰܕܰܪ ܠܬܰܠܡܺܝ̈ܕܶܐ ܕܺܝܠܶܗ. ܠܡܰܐܣܳܝܽܘ ܟܪ̈ܺܝܗܶܐ ܘܕܰܟܝܘ ܓܰܪ̈ܒܶܐ. ܘܡܰܦܳܩܘ ܕܰܝ̈ܘܶܐ. ܡܶܢ ܒܳܬܰܪ ܕܦܰܩܶܕ ܐܶܢܘܢ ܥܰܠ ܐܳܣܝܽܘܬܳܐ ܕܥܰܡܳܐ ܬܽܘܒ ܐܡ̣ܪ ܠܗܽܘܢ ܐܰܟܪܶܙ ܘܶܐܡܰܪܘ: ܕܩܶܪܒܰܬ ܠܳܗ̇ ܡܰܠܟܽܘܬܳܐ ܕܰܫܡܰܝܳܐ ܥܠܰܝܟܽܘܢ (ܡܬܝ ܝ: ܙ ܠܘܩܐ ܝ: ܝܐ). ܡܰܠܟܽܘܬܳܐ ܕܶܝܢ ܐܡ̇ܪ ܗܘܳܐ ܥܰܠ ܟܳܪܽܘܙܽܘܬܳܐ ܕܰܫܠܺܝ̈ܚܶܐ. ܗܳܝ ܕܡܶܢ ܒܳܬܰܪ ܩܝܳܡܬܳܐ ܢܶܦܩܰܬ ܒܝܰܕ ܫܠܺܝ̈ܚܶܐ ܠܟܽܠܶܗ ܥܳܠܡܳܐ. ܛܽܘܒܬܳܢܳܐ ܕܶܝܢ ܕܰܘܝܕ ܟܰܕ ܡܕܰܡܶܐ ܒܙܺܝܘܳܗ̇ ܕܰܢܒܺܝܽܘܬܳܐ ܠܗܳܠܝܢ ܒܢܴ̈ܬ ܩܴ̈ܠܐ ܐܰܠܳܗܳܝ̈ܬܳܐ. ܡܩܰܕܶܡ ܗܘܳܐ ܘܡܶܬܢܰܒܶܐ ܘܳܐܡܰܪ:
ܕܡܳܪܝܳܐ ܐܰܡܠܶܟ ܬܕܽܘܨ ܐܰܪܥܳܐ. ܘܢܶܚܕ̈ܝܳܢ ܓܳܙܪ̈ܳܬܳܐ ܣܰܓܺܝ̈ܐܬܳܐ. ܥܢܳܢܷ̈ܐ ܘܥܰܪ̈ܦܶܠܶܐ ܚܕܳܪ̈ܰܘܗܝ. ܒܙܰܕܺܝܩܽܘܬܳܐ ܘܰܒܕܺܝܢܳܐ ܡܰܬܩܰܢ ܟܽܘܪܣܝܶܗ. ܢܽܘܪܳܐ ܬܶܐܟܽܘܠ ܩܕܳܡܰܘܗܝ. ܘܬܰܘܩܶܕ ܠܰܒܥܶܠܕ̈ܒܳܒܰܘܗܝ. ܡܶܛܠܡܳܢܐ ܐܡ̇ܪ: ܡܳܪܝܳܐ ܐܰܡܠܶܟ ܬܕܽܘܨ ܐܰܪܥܳܐ. ܗܰܘ ܕܡܶܢ ܥܳܠܰܡ ܐܝ̣ܬܰܘܗܝ ܡܰܠܟܳܐ. ܘܰܐܝܕܳܐ ܗܝ ܐܰܪܥܳܐ ܗܳܝ ܕܕܳܨܰܬ ܟܕ ܐܰܡܠܶܟ. ܥܕܰܡܳܐ ܕܶܐܬܓܠܺܝ ܡܳܪܝܳܐ ܥܰܠ ܐܰܪܥܳܐ ܒܰܒܣܰܪ. ܡܰܠܟܽܘܬܳܐ ܪܰܒܬܳܐ ܕܳܐܟܶܠܩܰܪܨܳܐ ܕܰܐܚܺܝܕܳܐ ܗܘܳܬ ܠܰܐܪܥܳܐ. ܘܬܽܘܒ ܡܰܠܟܽܘܬܳܐ ܕܡܰܘܬܳܐ ܝܳܬܒܳܐ ܗܘܳܬ ܒܩܰܒܪܳܐ ܕܰܫܝܽܘܠ. ܘܠܰܝܬ ܗܘܳܐ ܘܠܐ ܚܰܕ ܣܰܒܪܳܐ ܕܦܽܘܪܩܳܢܳܐ ܠܰܒܢܰܝ̈ܢܳܫܳܐ. ܟܕ ܕܶܝܢ ܛܽܘܒܬܳܢܳܐ ܕܰܘܝܕ ܩܰܒܶܠ ܓܶܠܝܳܢܳܐ ܕܥܰܠ ܕܶܢܚܶܗ ܕܗܰܘ ܡܰܠܟܳܐ ܕܚܰܝܷ̈ܐ. ܘܰܐܪܓܶܫ ܕܰܒܡܶܐܬܺܝܬܶܗ ܒܳܛܠܳܐ ܡܰܠܟܽܘܬܶܗ ܕܳܐܟܶܠܩܰܪܨܳܐ ܡܶܢ ܐܰܪܥܳܐ. ܡܶܢ ܗܳܪܟܳܐ ܓܝܪ ܫܰܪܝܰܬ ܡܰܠܟܽܘܬܳܐ ܕܶܐܡܰܪ ܕܰܘܝܕ. ܘܠܳܗ̇ ܠܗܳܕܐ ܠܡܰܠܟܽܘܬܳܐ ܢܣܰܒܘ ܪ̈ܰܒܰܝ ܚܰܝ̈ܠܐܷ ܕܰܣܒܰܪܬܳܐ. ܘܰܢܦܰܩܘ ܐܰܟܪܶܙܘ ܒܥܳܠܡܳܐ. ܘܥܰܡܗܘܢ ܢܦܰܩ ܕܰܘܝܕ ܟܕ ܐܡ̇ܪ܆ ܕܗܳܐ ܡܰܠܟܽܘܬܳܐ ܕܚܰܕܽܘܬܳܐ ܐܶܬܓܰܠܝܰܬ. ܗܳܐ ܡܳܪܝܳܐ ܐܰܡܠܶܟ ܚܠܳܦ ܐܳܟܶܠܩܰܪܨܳܐ. ܗܳܐ ܡܰܠܟܳܐ ܪܰܒܳܐ ܩܳܛܰܪ ܬܳܓܳܐ ܕܰܩܝܳܡܬܳܐ ܒܰܫܝܽܘܠ. ܢܶܚܕ̈ܝܳܢ ܓܳܙܪ̈ܳܬܳܐ ܣܰܓܺܝ̈ܐܳܬܳܐ. ܘܢܶܩܫܽܘܢ ܟܰܦܳܐ ܥܳܒܪ̈ܰܝ ܝܰܡܳܐ. ܘܝܳܬܒܱ̈ܝ ܒܣܰܘ̈ܦܶܝܗ̇ ܕܰܐܪܥܳܐ. ܢܶܠܒܫܽܘܢ ܛܽܘܪ̈ܶܐ ܫܽܘܒܚܳܐ. ܘܪ̈ܳܡܳܬܳܐ ܢܶܬܥܰܛܦܴ̈ܢ ܦܽܘܪܩܳܢܳܐ. ܢܰܘܕܽܘܢ ܥܰܡ̈ܡܶܐ ܠܡܰܠܟܳܐ ܕܡܶܢ ܥܳܠܰܡ. ܢܶܚܕ̈ܝܳܢ ܓܳܙܪ̈ܳܬܳܐ ܕܫܰܒ̈ܝܳܢ ܗܘܱ̈ܝ ܠܰܛܪܽܘܢܳܐ. ܕܬܽܘܒ ܠܐ ܦܳܠܚܴ̈ܢ ܥܰܒܕܽܘܬܳܐ ܠܡܰܠܟܳܐ ܥܰܘܳܠܳܐ. ܬܶܚܕܶܐ ܐܰܪܥܳܐ ܡܶܛܠ ܕܩܶܪܒܰܬ ܡܰܠܟܽܘܬܶܗ ܕܡܳܪܝܳܐ. ܚܙܺܝ ܕܶܝܢ ܐܰܝܟܰܢܳܐ ܡܶܛܠ ܕܦܰܪܨܽܘܦܳܐ ܕܰܐܪܥܳܐ ܫܩܰܠ ܟܕ ܡܶܬܢܰܒܶܐ ܬܶܫܒܽܘܚܬܳܐ ܗܳܕܐ. ܠܐ ܡܰܠܶܠ ܐܝܟ ܕܥܰܡ ܦܰܪܨܽܘܦܳܐ ܐܚܪܺܢܳܐ. ܠܰܐܪܥܳܐ ܓܝܪ ܥܢܴ̈ܢܶܐ ܕܢܽܘܪܳܐ ܘܥܰܪ̈ܦܶܠܶܐ ܕܡܶܛܪܳܐ. ܫܰܦܺܝܪ ܡܳܕܶܝܢ ܐܝܟ ܕܥܰܡ ܐܰܪܥܳܐ ܡܰܠܶܠ ܥܰܡ ܐܢܳܫܽܘܬܳܐ. ܟܕ ܡܚܰܘܶܐ ܕܰܪܒܺܝܥܳܐ ܡܚܰܕܝܳܢܳܐ ܫܰܪܺܝ ܕܢܶܬܚܙܶܐ. ܫܰܪܺܝ ܥܰܠ ܙܰܪ̈ܥܶܐ ܕܺܝܒܶܫܘ ܡܶܢ ܨܰܗܝܳܐ. ܡܶܛܪܳܐ ܕܦܽܘܪܩܳܢܳܐ ܛܶܥܢܰܬ ܥܢܳܢܳܐ ܙܥܽܘܪܬܳܐ ܕܣܶܠܩܰܬ ܝܰܡܳܐ ܕܡܰܥܡܽܘܕܺܝܬܳܐ. ܘܡܶܛܪܳܐ ܡܣܰܒܪܳܢܳܐ ܡܣܰܪܗܶܒ ܠܗ̇ ܠܰܐܪܥܳܐ ܕܡܶܬܚܰܕܰܬ ܩܰܝܣܳܗ̇ ܕܰܐܨܗܝܶܗ ܓܠܺܝܕܳܐ ܕܚܰܢܦܽܘܬܳܐ. ܘܡܳܢܳܐ ܬܽܘܒ ܡܶܫܬܰܥܶܐ ܥܰܠ ܡܰܠܟܳܐ ܟܳܪܽܘܙܳܐ ܕܰܩܕܳܡ ܫܠܺܝ̈ܚܶܐ. ܗܳܕܐ ܓܝܪ ܩܰܪܢܳܐ ܕܰܢܒܺܝܽܘܬܳܐ ܩܕܳܡܰܝܗܘܢ ܡܝܰܒܒܳܐ ܗܘܳܬ. ܘܗܺܝ ܩܰܕܡܰܬ ܐܰܟܪܙܰܬ ܩܕܳܡ ܡܰܠܟܳܐ ܡܳܪܝܳܐ. ܒܙܰܕܺܝܩܽܘܬܳܐ ܠܰܡ ܘܰܒܕܺܝܢܳܐ ܡܰܬܩܰܢ ܟܽܘܪܣܝܶܗ. ܘܠܰܘ ܒܡܰܣܰܒ ܒܰܐܦ̈ܐ ܕܳܐܶܢ. ܘܡܶܟܺܝܠ ܟܽܠ ܕܥܳܒܶܕ ܚܛܺܝܬܳܐ ܕܺܝܢ ܗܽܘ. ܘܢܽܘܪܳܐ ܐܳܟܠܳܐ ܩܕܳܡܰܘܗܝ. ܘܡܰܘܩܕܳܐ ܘܡܰܘܒܕܳܐ ܠܰܒܥܶܠܕ̈ܒܳܒܰܘܗܝ. ܒܥܶܠܕ̈ܒܳܒܰܘܗܝ ܕܡܳܪܝܳܐ ܚܰܛܳܝ̈ܐ ܐܶܢܘܢ ܘܥܰܘܴ̈ܠܶܐ. ܘܢܽܘܪܳܐ ܕܢܳܦܩܳܐ ܡܶܢ ܟܽܘܪܣܝܶܗ ܠܟܽܠܗܘܢ ܡܰܘܩܕܳܐ ܘܠܐ ܣܢܺܝܩ ܕܢܶܥܒܶܕ ܥܰܡܗܘܢ ܩܪܳܒܳܐ. ܡܶܢ ܒܳܬܰܪ ܕܶܝܢ ܐܡ̇ܪ: ܢܽܘܪܳܐ ܬܶܐܟܽܘܠ ܩܕܳܡܰܘܗܝ ܘܬܰܘܩܶܕ ܠܰܒܥܶܠܕ̈ܒܳܒܰܘܗܝ. ܡܫܰܪܶܐ ܡܶܟܺܝܠ ܡܶܫܬܰܥܶܐ ܥܰܠ ܢܽܘܗܪܳܐ ܢܽܘܪܳܢܳܝܳܐ ܕܟܳܪܽܘܙܽܘܬܶܗ ܕܶܐܘܰܢܓܶܠܝܘܢ. ܐܰܝܟܰܢܳܐ ܒܩܰܠܺܝܠܽܘܬܳܐ ܐܶܚܰܕ ܠܬܺܒܶܝܠ.
ܐܰܢܗܰܪܘ ܒܰܪ̈ܩܰܘܗܝ ܠܡܶܬܥܰܡܪܳܢܺܝܬܳܐ. ܚܙܳܬ ܘܶܐܬܕܰܚܠܰܬ ܐܰܪܥܳܐ. ܘܛܽܘܪ̈ܶܐ ܐܰܝܟ ܫܥܽܘܬܳܐ ܐܶܬܦܰܫܰܪܘ. ܡܶܢ ܩܕܳܡ ܡܳܪܝܳܐ ܡܳܪܳܐ ܕܟܽܠܳܗ̇ ܐܰܪܥܳܐ. ܢܚܰܘܽܘܢ ܫܡܰܝܴ̈ܐ ܙܰܕܺܝܩܽܘܬܶܗ. ܘܰܚܙܰܘ ܟܽܠܗܽܘܢ ܥܰܡ̈ܡܶܐ ܐܝ̣ܩܳܪܶܗ. ܢܶܒܗܬܽܘܢ ܟܽܠ ܕܥܳܒܕܺܝܢ ܦܬܰܟܪ̈ܶܐ ܘܡܶܫܬܰܒܗܪܺܝܢ ܒܰܓܠܺܝ̈ܦܶܐ. ܐܠܐ ܪܶܥܝܳܢܳܐ ܥܺܝܪܳܐ ܘܠܐ ܡܶܬܚܰܠܨܳܢܳܐ ܒܳܥܝܳܐ ܢܒܺܝܽܘܬܳܐ ܕܢܶܗܘܶܐ ܚܳܐܱܪ ܒܡܶܠܶܝ̈ܗ̇. ܐܰܢܗܰܪ ܒܰܪ̈ܩܰܝܟ ܠܡܶܬܥܰܡܪܳܢܺܝܬܳܐ. ܘܡܳܢܳܐ ܐܶܢܘܢ ܒܰܪ̈ܩܶܐ. ܐܝܟ ܕܫܰܪܺܝ ܒܰܥܢܴ̈ܢܶܐ ܘܰܒܥܶܪ̈ܦܶܠܶܐ. ܗܳܟܰܢܳܐ ܪܳܕܶܐ ܒܬܰܫܥܺܝܬܶܗ. ܠܰܥܢܴ̈ܢܶܐ ܓܝܪ ܒܰܪ̈ܩܶܐ ܕܢܽܘܪܳܐ ܡܳܬܚܺܝܢ. ܘܰܡܕܰܒܪܺܝܢ ܠܗܶܝܢ ܥܰܠ ܟܶܢܦܶܝ̈ܗ̇ ܕܰܐܪܥܳܐ. ܘܗܶܢܘܢ ܒܰܕܡܽܘܬܳܐ ܕܫܰܒ̈ܛܶܐ ܥܳܐܠܺܝܢ ܒܥܽܘ̈ܒܰܝܗܶܝܢ ܕܰܥܢܳܢ̈ܐ. ܘܢܳܓܕܺܝܢ ܠܗܽܘܢ ܕܢܶܦܪ̈ܚܳܢ ܩܰܠܺܝܠܐܝ̣ܬ ܥܰܠ ܡܶܬܥܰܡܪܳܢܺܝܬܳܐ. ܘܡܶܛܠ ܕܒܰܕܡܽܘܬܳܐ ܕܶܝܢ ܕܰܥܢܳܢ̈ܐ ܐܶܬܥܰܠܝܰܬ ܡܰܠܟܽܘܬܶܗ ܕܡܳܪܝܳܐ ܡܶܢ ܝܰܡܳܐ ܕܚܽܘܣܳܝܳܐ ܘܥܰܠ ܐܰܪܥܳܐ ܐܶܬܚܰܙܝܰܬ. ܘܰܥܒܰܕ ܐܶܢܘܢ ܠܰܫܠܺܝ̈ܚܶܐ ܒܰܪ̈ܩܶܐ ܢܽܘܪ̈ܳܢܳܝܶܐ ܠܰܥܢܳܢܳܐ ܗܳܕܐ. ܟܕ ܫܰܕܰܪ ܠܶܫܳܢ̈ܐ ܕܢܽܘܪܳܐ ܠܥܶܠܳܝܬܳܐ. ܘܰܥܒܰܕ ܐܶܢܘܢ ܒܰܪ̈ܩܶܐ ܡܰܢܗܪ̈ܳܢܶܐ ܠܟܽܠܗ̇ ܒܪܺܝܬܳܐ. ܘܰܒܗܘܢ ܢܶܗܪܰܬ. ܐܰܪܥܳܐ ܕܶܝܢ ܐܶܬܕܰܠܚܰܬ. ܛܽܘܪ̈ܶܐ ܐܶܬܦܰܫܰܪܘ ܐܝܟ ܫܥܽܘܬܳܐ. ܗܳܠܝܢ ܕܝܢ ܥܰܡ̈ܡܶܐ ܚܰܢ̈ܦܶܐ ܟܕ ܚܳܙܶܝܢ ܗܘܰܘ ܠܢܽܘܗܪܳܐ ܕܶܐܘܰܢܓܶܠܝܘܢ ܕܡܶܬܓܰܘܙܰܠ ܘܡܶܬܢܰܒܪܰܫ ܒܝܰܕ ܡܰܠܦܳܢܽܘܬܳܐ ܕܰܫܠܺܝ̈ܚܶܐ. ܡܶܬܕܰܠܚܺܝܢ ܗܘܰܘ ܘܡܶܫܬܰܓܫܺܝܢ ܠܽܘܩܒܰܠ ܟܳܪ̈ܽܘܙܘܳܬܗܘܢ. ܡܶܛܠ ܕܰܡܦܰܫܰܪ ܗܘܳܐ ܠܗܽܘܢ ܚܰܝܠܶܗ ܕܰܐܠܳܗܳܐ ܐܝܟ ܕܶܐܡܰܪ ܐܶܫܰܥܝܳܐ ܢܒܺܝܳܐ. ܕܟܽܠܗܽܘܢ ܛܽܘܪ̈ܶܐ ܘܪ̈ܳܡܳܬܳܐ ܢܶܬܡܰܟܟܽܘܢ. ܘܢܶܗܘܶܐ ܥܰܪܡܳܐ ܠܫܰܦܝܳܐ ܘܰܐܬܪܳܐ ܥܰܣܩܳܐ ܠܰܦܩܰܥܬܳܐ (ܐܫܥܝܐ ܡ: ܕ). ܡܶܛܠܗܳܕܐ ܣܳܝܦܺܝܢ ܗܘܰܘ ܪ̈ܰܫܺܝܥܶܐ ܒܰܕܡܽܘܬܳܐ ܕܬܶܢܳܢܳܐ ܡܶܢ ܗܰܘܦܳܐ ܕܢܽܘܪܳܐ ܫܠܺܝܚܳܝܬܳܐ. ܐܡ̣ܪ ܓܝܪ ܪܽܘܚܳܐ ܡܶܢ ܩܕܳܡ ܡܳܪܝܳܐ ܡܳܪܳܐ ܕܟܽܠܗ̇ ܐܰܪܥܳܐ. ܟܕ ܐܶܫܬܰܘܕܥܰܬ ܐܰܪܥܳܐ ܠܡܳܪܳܗ̇ ܥܶܪܩܰܬ ܡܶܢ ܐܳܓܽܘܪ̈ܶܐ ܕܰܐܚܪܒܽܘܗ̇. ܥܒܳܕܳܐ ܓܝܪ ܕܳܐܓܽܘܪ̈ܶܐ ܗܳܢܰܘ. ܕܗܶܢܘܢ ܢܶܥܬܪܽܘܢ ܘܰܐܪܥܳܐ ܬܶܚܪܰܒ. ܡܳܪܳܗ̇ ܓܝܪ ܕܰܐܪܥܳܐ ܠܘ ܐܝܟ ܐܳܓܽܘܪ̈ܶܐ ܚܳܐܱܪ ܒܳܗ̇. ܐܠܐ ܒܛܺܝܠ ܠܗ ܥܰܠ ܫܰܝܢܳܗ̇. ܠܗܳܢܐ ܡܳܕܶܝܢ ܡܳܪܳܐ ܕܰܫܪܳܪܳܐ ܟܕ ܚܙܰܘ ܐܳܓܽܘܪ̈ܶܐ ܒܺܝ̈ܫܶܐ ܕܰܐܚܪܶܒܘ ܐܰܪܥܶܗ. ܣܳܦܘ ܘܰܥܪܰܩܘ ܡܶܢ ܩܕܳܡܰܘܗܝ. ܡܶܛܠ ܕܚܰܘܺܝܘ ܫܡܰܝܴ̈ܐ ܙܰܕܺܝܩܽܘܬܶܗ. ܘܰܐܟܪܶܙܘ ܪ̈ܰܘܡܶܐ ܦܽܘܪܩܳܢܶܗ. ܘܰܚܙܰܘ ܟܽܠܗܘܢ ܥܰܡ̈ܡܶܐ ܐܝ̣ܩܳܪܶܗ. ܕܝܰܩܰܪ ܐܶܢܘܢ ܡܶܢ ܨܰܥܪܳܐ ܕܰܚܛܳܗܰܝ̈ܗܘܢ. ܘܰܠܚܳܐ ܡܶܢ ܣܶܦܪܳܐ ܕܟܺܐܢܽܘܬܳܐ ܚܰܘ̈ܒܳܬܗܘܢ. ܡܶܟܺܝܠ ܢܶܒܗܬܽܘܢ ܟܽܠ ܕܥܳܒܕܺܝܢ ܦܬܰܟܪ̈ܶܐ. ܘܡܶܫܬܰܒܗܪܺܝܢ ܒܰܓܠܺܝ̈ܦܶܐ. ܡܶܛܠ ܕܡܳܪܝܳܐ ܚܰܘܺܝ ܠܰܢ ܛܰܝܒܽܘܬܶܗ ܘܰܓܠܐܴ ܠܰܢ ܥܰܠ ܡܰܠܟܽܘܬܶܗ. ܡܶܟܺܝܠ ܠܘ ܥܰܡ̈ܡܶܐ ܒܰܪܒܪ̈ܳܝܶܐ ܝܳܕܰܥ ܠܗܽܘܢ ܪܽܘܚܳܐ. ܐܠܐ ܟܕ ܚܙܳܐ ܕܶܐܫܬܰܚܠܰܦܘ ܘܰܗܘܰܘ ܒܰܝܬܳܝ̈ܐ. ܡܶܢܗܘܢ ܟܳܗܢ̈ܐ ܘܟܽܘܡܪ̈ܶܐ ܕܩܳܥܶܝܢ ܒܥܺܕܬܳܐ ܐܝܟ ܡܰܠܰܐܟܰܘ̈ܗܝ. ܘܡܶܛܠ ܗܳܕܐ ܐܡ̇ܪ:
ܣܓܽܘܕܘ ܠܶܗ ܟܽܠܗܽܘܢ ܡܰܠܰܐܟ̈ܐ. ܬܶܫܡܰܥ ܘܬܶܚܕܶܐ ܨܶܗܝܽܘܢ. ܘܰܢܕܽܘ̈ܨܳܢ ܒܢܴ̈ܬ ܝ̣ܗܽܘܕܳܐ ܡܶܛܠ ܕܺܝܢܰܝ̈ܟ ܡܳܪܝܳܐ. ܡܶܛܠ ܕܰܐܢܬ ܗܽܘ ܡܳܪܝܳܐ ܡܪܰܝܡܳܐ ܥܰܠ ܟܽܠܳܗ̇ ܐܰܪܥܳܐ. ܘܛܳܒ ܐܶܬܬܪܺܝܡܬ ܥܰܠ ܟܽܠܗܽܘܢ ܐܰܠܳܗ̈ܐ. ܡܰܢ ܗܺܝ ܗܳܕܶܐ ܨܶܗܝܽܘܢ ܕܫܳܡܥܳܐ ܘܚܳܕܝܳܐ ܡܳܐ ܕܣܳܓܕܺܝܢ ܠܶܗ ܟܽܠܗܽܘܢ ܡܰܠܐܟܰܘ̈ܗܝ. ܘܡܰܢ ܐܶܢܶܝܢ ܒܢܴ̈ܬ ܝ̣ܗܽܘܕܳܐ ܕܕܳܝ̈ܨܳܢ ܒܩܴ̈ܠܶܐ ܕܬܶܫܒܚܴ̈ܬܳܐ ܕܰܡܩܰܪ̈ܒܳܢ ܟܕ ܐܰܡܠܶܟ ܡܳܪܝܳܐ ܥܰܠ ܟܽܠܗ̇ ܐܰܪܥܳܐ. ܟܽܘܡܪܳܐ ܘܟܳܗܢܳܐ ܕܰܡܫܺܝܚ ܕܰܢܟܰܗܶܢ ܘܳܠܐܷ ܕܦܳܪܶܩ. ܡܶܛܠ ܗܳܝ ܐܽܘܪܺܫܠܶܡ ܕܒܰܫܡܰܝܳܐ ܐܡ̇ܪ ܢܒܺܝܐ. ܕܰܐܝܟ ܕܰܗܘܳܐ ܪܳܥܝܳܐ ܡܳܐ ܕܡܶܫܬܟܰܚ ܥܶܪܒܶܗ ܕܰܐܒܺܝܕ ܗܘܳܐ ܘܫܳܩܶܠ ܠܶܗ ܥܰܠ ܟܰܬܦܴ̈ܬܶܗ. ܗܳܟܰܢܐ ܬܶܗܘܶܐ ܚܰܕܽܘܬܳܐ ܒܰܫܡܰܝܳܐ ܥܰܠ ܚܰܕ ܚܰܛܳܝܳܐ ܕܬܳܐܶܒ. ܡܶܛܠܗܳܕܶܐ ܠܐ ܐܡ̣ܪ ܡܙܰܡܪܳܢܳܐ ܕܡܰܠܐܱܟ̈ܐ ܢܶܚܕܽܘܢ ܐܠܐ ܟܽܠܗܽܘܢ ܫܡܰܝܴ̈ܢܶܐ ܒܚܰܕ ܩܳܠܐ ܕܨܶܗܝܽܘܢ ܚܒܰܫ ܘܰܠܟܽܠܗܶܝܢ ܥܠܰܝ̈ܡܳܬܳܐ ܕܡܰܠܟܽܘܬܳܐ ܐܰܝܠܝܢ ܕܥܰܠܝ̈ ܠܰܓܢܽܘܢܶܗ ܕܒܰܪ ܕܰܘܝܕ. ܣܳܡ ܕܳܐܦ ܗܶܢܶܝܢ ܢܕܽܘ̈ܨܳܢ. ܒܰܙܒܰܢ ܡܰܢ ܥܠ ܕܰܣܓܶܕܘ ܐܰܪ̈ܥܳܢܶܐ ܕܩܰܒܶܠܘ ܡܫܺܝܚܽܘܬܳܐ ܕܟܽܘܡܪܽܘܬܳܐ ܒܰܙܒܰܢ ܡܶܛܠ ܕܺܝܢܰܘ̈ܗܝ ܕܡܳܪܝܳܐ. ܗܳܢܘܢ ܕܕܳܢ ܥܰܡ ܐܰܪܟܽܘܢܶܗ ܕܥܳܠܡܳܐ ܗܳܢܐ: ܘܗܽܘܝܽܘ ܡܳܪܝܳܐ ܡܪܰܝܡܳܐ ܥܰܠ ܟܽܠܗ̇ ܐܰܪܥܳܐ. ܘܛܳܒ ܐܶܬܬܪܺܝܡ ܥܰܠ ܟܽܠܗܘܢ ܐܰܠܳܗ̈ܐ. ܘܒܳܬܰܪ ܗܳܠܝܢ ܡܰܥܶܠ ܬܰܫܥܺܝܬܳܐ ܕܫܽܘܦܪܳܐ ܕܙܰܕܺܝ̈ܩܶܐ. ܕܰܗܘܰܘ ܠܶܗ ܪ̈ܳܚܡܶܐ ܠܡܰܠܟܳܐ. ܟܕ ܡܚܰܘܶܐ ܕܰܣܢܰܘ ܒܺܝܫܬܳܐ ܘܰܓܒܰܘ ܛܳܒܬܳܐ. ܘܳܐܡܰܪ:
ܪ̈ܳܚܡܰܘܗܝ ܕܡܳܪܝܳܐ ܣܳܢܶܝܢ ܠܒܺܝ̈ܫܳܬܳܐ. ܘܢܳܛܰܪ ܢܰܦ̈ܫܳܬܳܐ ܕܙܰܕܺܝ̈ܩܰܘܗܝ. ܠܰܫܠܺܝܚ̈ܐ ܩܰܕܺܝ̈ܫܐ ܐܡ̇ܪ ܥܰܡܰܢܘܐܝܠ. ܕܠܐ ܡܶܟܺܝܠ ܩܳܪܶܐ ܐܢܳܐ ܠܟܽܘܢ ܥܰܒ̈ܕܶܐ. ܡܶܛܠ ܕܥܰܒܕܳܐ ܠܐ ܝܳܕܰܥ ܡܳܢܳܐ ܥܳܒܶܕ ܡܳܪܶܗ. ܪ̈ܳܚܡܰܝ ܕܶܝܢ ܩܪܺܝܬܟܽܘܢ. ܡܶܛܠ ܕܟܽܠ ܕܫܶܡܥܶܬ ܡܶܢ ܐܳܒܝ ܐܰܘܕܰܥܬܟܽܘܢ. ܘܰܐܢܬܽܘܢ ܪ̈ܳܚܡܰܝ ܐܰܢܬܽܘܢ ܐܶܢ ܬܶܥܒܕܽܘܢ ܟܽܠ ܕܰܡܦܰܩܶܕ ܐܢܳܐ ܠܟܽܘܢ (ܝܘܚܢܢ ܝܗ: ܝܕ-ܝܗ). ܗܳܠܝܢ ܐܶܢܘܢ ܪ̈ܳܚܡܰܘܗܝ ܕܡܳܪܝܳܐ ܕܶܐܡܰܪ ܪܽܘܚܳܐ. ܪ̈ܳܚܡܰܘܗܝ ܕܡܳܪܝܳܐ ܣܳܢܶܝܢ ܠܒܺܝ̈ܫܳܬܳܐ.
ܘܡܶܢ ܐܝ̣ܕܳܐ ܕܪ̈ܰܫܺܝܥܶܐ ܢܦܰܨܶܐ ܐܶܢܘܢ. ܟܕ ܚܳܙܶܝܢ ܕܰܒܩܷ̈ܛܠܐܷ ܢܦܰܩܘ ܫܠܺܝ̈ܚܶܐ ܡܶܛܠܬܶܗ ܕܡܳܪܝܳܐ ܡܶܢ ܥܳܠܡܳܐ ܗܳܢܐ. ܠܘ ܡܶܢ ܐܰܝܠܶܝܢ ܕܩܳܛܠܺܝܢ ܦܰܓܪܳܐ ܦܰܨܺܝ ܘܰܦܪܰܩ ܢܰܦ̈ܫܳܬܗܘܢ. ܐܠܐ ܡܶܢ ܐܝ̣ܕܳܐ ܕܰܛܪ̈ܽܘܢܶܐ ܡܶܬܝܰܕ̈ܥܳܢܶܐ. ܘܒܳܬܰܪ ܗܳܠܝܢ ܡܶܬܢܰܒܶܐ ܥܰܠ ܢܽܘܗܪܳܐ ܕܰܕܢܰܚ ܠܰܢ ܡܶܢ ܡܳܪܢ. ܟܕ ܡܦܰܫܶܩ ܕܰܠܙܰܕܺܝ̈ܩܶܐ ܘܠܰܬܪ̈ܺܝܨܰܝ ܠܶܒܳܐ ܐܶܬܳܐ ܡܫܺܝܚܳܐ ܘܰܐܢܗܰܪ.
ܢܽܘܗܪܳܐ ܕܰܕܢܰܚ ܠܙܰܕܺܝ̈ܩܶܐ ܘܠܰܬܪ̈ܺܝܨܰܝ ܠܶܒܳܐ ܚܰܕܽܘܬܳܐ. ܚܕܰܘ ܙܰܕܺܝ̈ܩܶܐ ܒܡܳܪܝܳܐ ܘܰܐܘܕܰܘ ܠܕܽܘܟܪܳܢܳܐ ܕܩܽܘܕܫܶܗ. ܢܽܘܗܪܳܐ ܕܰܕܢܰܚ ܠܙܰܕܺܝ̈ܩܶܐ ܕܠܐ ܚܶܪܝܳܢܳܐ ܗܽܘܝܽܘ ܡܫܺܝܚܳܐ. ܘܗܰܘ ܕܶܐܡܰܪ ܥܠܰܘܗܝ ܒܫܽܘܪܳܝܳܐ ܕܬܶܫܒܽܘܚܬܳܐ ܕܰܐܡܠܶܟ. ܗܽܘܝܽܘ ܗܰܘ ܕܰܕܢܰܚ ܠܙܰܕܺܝ̈ܩܶܐ. ܥܰܠ ܕܩܰܒܠܽܘܗܝ ܐܰܝܠܝܢ ܕܠܐ ܩܰܒܠܽܘܗܝ. ܘܠܐ ܕܶܢܚܳܐ ܗܘܳܐ ܠܗܽܘܢ ܘܠܐ ܙܰܕܺܝ̈ܩܶܐ ܐܝ̣ܬܰܝܗܘܢ. ܒܗܳܢܳܐ ܕܶܢܚܳܐ ܡܶܬܦܰܨܚܺܝܢ ܘܚܳܕܶܝܢ ܬܪ̈ܺܝܨܰܝ ܠܶܒܳܐ. ܡܶܛܠ ܬܰܘܕܺܝܬܳܐ ܬܪܺܝܨܬܳܐ ܕܡܰܘܕܶܝܢ ܗܳܠܝܢ ܕܠܐ ܡܦܰܬܠܺܝܢ ܐܽܘܪ̈ܚܳܬܗܘܢ ܥܰܡ ܗܰܝܡܳܢܽܘܬܳܐ. ܕܰܠܘܳܬܗܘܢ ܐܶܡܰܪ ܪܽܘܚܳܐ. ܚܕܰܘ ܙܰܕܺܝ̈ܩܶܐ ܒܡܳܪܝܳܐ ܘܰܐܘܕܰܘ ܠܕܽܘܟܪܳܢܳܐ ܕܩܽܘܕܫܶܗ. ܕܗܽܘ ܐܶܬܓܠܺܝ ܘܰܐܡܠܶܟ ܥܰܠ ܐܰܪܥܳܐ. ܘܒܶܗ ܗܘܳܐ ܦܽܘܪܩܳܢܳܐ ܠܙܰܕܺܝ̈ܩܶܐ ܡܶܢ ܐܝ̣ܕܳܐ ܕܪ̈ܰܫܺܝܥܶܐ. ܘܗܽܘ ܐܰܢܗܰܪ ܠܰܐܪܥܳܐ ܒܓܶܠܝܳܢܶܗ. ܘܰܦܪܰܩ ܠܬܺܒܶܝܠ ܒܕܶܢܚܶܗ. ܕܠܶܗ ܝܳܐܶܐ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܝܢ ܕܬܡܢܝܐ
ܐܪܳܙ ܦܽܘܪܩܳܢܶܗ ܕܺܝܣܪܳܐܝܠ ܕܰܐܠܗܳܐ܆ ܘܐܪܳܙ ܛܰܝܒܽܘܬܳܐ ܕܶܐܬܝܰܗܒܰܬ ܠܥܳܠܡܳܐ ܒܓܶܠܝܳܢܶܗ ܕܥܰܡܰܢܽܘܐܝܠ.
ܟܽܠܡܶܕܶܡ ܕܡܶܢ ܪܽܘܚܳܐ ܩܰܕܺܝܫܳܐ ܡܶܬܩܪܶܐ ܚܰܕܬܳܐ. ܠܘ ܠܘܳܬܶܗ ܕܪܽܘܚܳܐ ܢܰܣܒܰܪ ܕܺܐܝܬܰܘܗܝ ܚܰܕܬܳܐ. ܐܠܐ ܡܶܛܠ ܐܰܝܠܝܢ ܕܡܶܣܬܥܰܪ ܚܠܳܦܰܝܗܘܢ ܚܰܕܬܳܐ ܐܝ̣ܬܰܘܗܝ. ܗܳܫܐ ܕܫܳܡܥܺܝܢܰܢ ܠܰܡܙܰܡܪܳܢܳܐ ܕܰܡܫܰܒܰܚ ܘܳܐܡܰܪ:
ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܡܶܛܠ ܕܣܽܘܥܪܳܢܳܐ ܚܰܕܬܳܐ ܐܡ̇ܪ. ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܐܳܡܪܺܝܢܰܢ ܕܶܝܢ: ܕܥܰܠ ܗܰܘ ܦܽܘܪܩܳܢܳܐ ܕܰܥܒܰܕ ܐܰܠܗܳܐ ܠܥܰܡܳܐ ܡܶܢ ܡܶܨܪܶܝܢ܆ ܟܕ ܥܒܰܕ ܬܶܕܡܪ̈ܳܬܳܐ ܘܰܦܪܰܩ ܐܶܢܘܢ ܘܰܐܥܒܰܪ ܐܶܢܘܢ ܒܓܰܘ ܝܰܡܳܐ ܐܰܝܟ ܕܰܒܝܰܒܫܳܐ. ܘܰܐܗܦܶܟ ܡܰܝܴ̈ܐ ܕܝܰܡܳܐ ܣܽܘܡܳܩܳܐ ܥܠ ܡܶܨܪ̈ܳܝܶܐ. ܡܶܛܠ ܗܳܕܐ ܥܶܠܬܳܐ ܙܰܡܰܪ ܛܽܘܒܬܳܢܳܐ ܕܰܘܝܕ ܡܰܙܡܽܘܪܳܐ ܗܳܢܐ ܕܬܶܫܥܺܝܢ ܘܰܬܡܳܢܝܳܐ. ܒܪܰܡ ܕܶܝܢ ܚܢܰܢ ܟܕ ܝܳܕܥܺܝܢܰܢ ܕܬܶܫܒܽܘܚܬܳܐ ܗܳܕܐ ܢܒܺܝܐ ܒܪܽܘܚܳܐ ܐܰܡܪܳܗ̇. ܒܐܪ̈ܳܙܶܐ ܪܰܘܪ̈ܒܶܐ ܡܶܬܒܰܩܶܝܢܰܢ ܒܗ̇. ܐܶܢ ܓܶܝܪ ܡܶܛܠ ܕܰܗܘܳܬ ܐܰܡܺܝܪܳܐ. ܠܘ ܢܒܺܝܽܘܬܳܐ ܡܶܬܚܰܫܒܳܐ. ܐܠܐ ܡܰܟܬܒܳܢܽܘܬܳܐ. ܢܒܺܝܐ ܓܝܪ ܡܳܐ ܕܳܐܡܰܪ ܐܰܝܠܝܢ ܕܰܗܘܱ̈ܝ. ܠܘ ܐܝܟ ܕܰܒܓܶܠܝܳܢܳܐ ܡܶܬܚܰܫܰܚ. ܐܠܐ ܐܝܟ ܡܰܟܬܒܳܢܳܐ ܕܬܰܫܥܺܝܬܳܐ. ܡܳܕܝܢ ܡܶܛܠ ܕܕܰܘܝܕ ܒܪܽܘܚܳܐ ܕܰܢܒܺܝܽܘܬܳܐ ܡܙܰܡܰܪ ܗܘܳܐ. ܪܽܘܚܳܢܳܐܝ̣ܬ ܢܶܒܥܶܐ ܣܽܘܟܳܠܐܴ ܕܰܐܝܠܶܝܢ ܕܳܐܡܰܪ. ܡܳܢܐ ܗܳܟܺܝܠ ܐܡ̇ܪ ܡܙܰܡܪܳܢܳܐ:
ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܐܠܐ ܘܗܳܝ ܕܬܶܫܥܺܝܢ ܘܫܶܬ ܕܰܐܝܟ ܗܳܢܐ ܫܽܘܪܳܝܳܐ ܥܒܰܕ ܠܗ. ܡܶܛܠ ܕܰܡܫܰܘܕܥܳܐ ܫܰܘܝܽܘܬܳܐ ܗܳܝ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܘܟܳܪܽܘܙܽܘܬܳܐ ܕܰܫܠܺܝ̈ܚܶܐ. ܘܫܰܝܢܳܐ ܕܰܗܘܳܐ ܒܥܳܠܡܳܐ. ܒܝܰܕ ܓܶܠܝܳܢܶܗ ܕܥܰܡܰܢܽܘܐܝܠ. ܘܰܒܗܳܕܐ ܬܶܫܒܽܘܚܬܳܐ ܚܕܰܬܳܐ ܣܽܘܥܪܳܢܳܐ ܚܰܕܬܳܐ ܡܦܰܫܶܩ ܪܽܘܚܳܐ. ܡܳܢܳܐ ܗܝ ܗܳܝ ܕܰܒܥܳܐ ܢܺܐܡܰܪ.
ܡܶܛܠ ܕܬܶܕܡܽܘܪܬܳܐ ܥܒܰܕ. ܡܳܢܳܐ ܗܝ ܗܳܝ ܕܡܶܬܚܰܫܒܳܐ ܠܘܳܬ ܐܰܠܗܳܐ ܬܶܕܡܽܘܪܬܳܐ. ܢܺܐܡܰܪ ܕܥܠ ܕܰܒܪܳܐ ܒܪܺܝܬܳܐ ܡܶܢ ܠܐ ܡܶܕܶܡ. ܘܶܐܠܐ ܥܠ ܕܰܥܒܰܕ ܫܡܰܝܳܐ. ܐܰܘ ܕܰܥܒܰܕ ܪܩܺܝܥܳܐ ܒܡܶܨܥܰܬ ܡܰܝܴ̈ܐ. ܘܶܐܠܳܐ ܥܰܠ ܫܽܘܦܪܳܐ ܕܢܰܗܺܝܪ̈ܐ. ܐܰܘ ܥܠ ܝܰܡ̈ܡܶܐ ܕܶܐܬܟܰܢܰܫܘ ܠܒܰܪ ܡܶܢ ܝܰܒܺܝܫܬܳܐ. ܐܰܘ ܥܠ ܛܽܘܪ̈ܶܐ ܕܰܬܩܰܠ. ܐܘ ܥܠ ܡܰܪܕܺܝܬܳܐ ܕܢܰܗܪ̈ܰܘܳܬܳܐ.
ܠܗܳܠܝܢ ܐܰܪܰܐ ܩܪܳܐ ܬܶܕܡܽܘܪܬܳܐ؟ ܠܐ ܠܡ ܐܠܐ ܥܠ ܒܶܪ̈ܝܳܬܳܐ ܕܚܰܝ̈ܠܰܘܳܬܳܐ ܩܰܕܺܝ̈ܫܶܐ. ܐܘ ܠܩܰܘܡܳܐ ܐܰܡܺܝܢܳܐ ܕܣܶܕܪ̈ܶܐ ܕܺܝܠܗܘܢ. ܐܘ ܠܦܰܐܝܽܘܬܳܐ ܕܰܣܪ̈ܳܦܶܐ ܫܬܺܝ̈ܬܳܝܰܝ ܓܶܦ̈ܐ. ܘܠܐ ܗܳܕܐ ܬܶܕܡܽܘܪܬܳܐ ܚܫܺܝܒܳܐ ܠܗ. ܟܽܠܗܝܢ ܓܝܪ ܒܶܪ̈ܝܳܬܳܐ ܕܠܐ ܥܰܡܠܳܐ ܐܶܫܟܰܚ ܐܶܢܝܢ. ܘܠܘ ܬܶܕܡܽܘܪܬܳܐ ܚܫܺܝ̈ܒܳܢ. ܡܳܢܳܐ ܗܝ ܗܳܝ ܕܒܳܥܶܐ ܪܽܘܚܳܐ ܬܶܕܡܽܘܪܬܳܐ. ܬܶܕܡܽܘܪܬܳܐ ܠܰܡ ܗܳܕܳܐ ܗܝ:
ܕܰܦܪܰܩܬܶܗ ܝܰܡܺܝܢܶܗ ܘܰܕܪܳܥܶܗ ܩܰܕܺܝܫܳܐ. ܘܚܰܘܺܝ ܡܳܪܝܳܐ ܦܽܘܪܩܳܢܶܗ. ܘܰܠܥܺܝܢ ܥܰܡ̈ܡܶܐ ܓܠܳܐ ܙܰܕܺܝܩܽܘܬܶܗ. ܬܶܕܡܽܘܪܬܳܐ ܠܗܳܕܐ ܚܳܫܶܒ ܪܽܘܚܳܐ. ܘܡܶܢ ܡܳܢܐ ܦܪܰܩܬܶܗ ܝܰܡܺܝܢܶܗ ܘܰܕܪܳܥܶܗ ܩܰܕܺܝܫܳܐ. ܘܰܐܝܟܰܢܳܐ ܣܢܺܝܩ ܗܘܳܐ ܢܶܬܦܪܶܩ. ܗܰܘ ܕܺܐܝܬܰܘܗܝ ܦܳܪܽܘܩܳܐ. ܘܒܰܐܝܢܳܐ ܩܪܳܒܳܐ ܐܶܣܬܢܶܩ ܥܠ ܦܽܘܪܩܳܢܳܐ. ܘܶܐܢ ܗܽܘ ܠܗ ܦܪܰܩ܆ ܡܰܢ ܐܝ̣ܬܰܝܗܘܢ ܗܘܰܘ ܐܰܝܠܝܢ ܕܡܶܬܟܰܬܫܺܝܢ ܗܘܰܘ ܥܰܡܶܗ. ܚܙܰܝܬ ܕܗܳܕܐ ܬܶܫܒܽܘܚܬܳܐ ܚܕܰܬܳܐ ܗܝ ܒܰܫܪܳܪܳܐ. ܒܡܶܢܝܳܢܳܐ ܠܡ ܕܰܟܒܺܝ̈ܫܶܐ ܐܶܬܡܢܺܝ ܗܰܘ ܒܰܪ ܚܺܐܪ̈ܶܐ. ܒܰܙܥܽܘܪܽܘܬܳܐ ܘܒܰܡܚܺܝܠܽܘܬܳܐ. ܐܶܬܚܰܫܰܒ ܗܰܘ ܪܰܒܳܐ ܘܚܰܝܠܬܳܢܳܐ. ܘܦܰܓܪܳܐ ܡܳܝܽܘܬܳܐ ܘܣܰܓܺܝ ܚܰܫ̈ܐ ܘܣܰܓܺܝ ܟܺܐܒ̈ܐ ܐܶܬܥܰܛܰܦ. ܘܡܶܢ ܡܰܪܒܥܳܐ ܕܰܒܬܽܘܠܬܳܐ ܘܰܒܡܶܣܟܺܢܽܘܬܳܐ ܕܰܟܝܳܢܰܢ ܐܶܬܢܰܣܺܝ ܗܰܘ ܥܰܬܺܝܪܳܐ. ܘܰܠܘܳܬ ܡܽܘ̈ܫܚܳܬܶܗ ܕܦܰܓܪܳܐ ܐܶܬܢܰܚܰܬ ܗܰܘ ܓܡܺܝܪܳܐ ܘܠܐ ܚܰܣܺܝܪܳܐ. ܟܕ ܫܰܕܰܪ ܐܰܠܗܳܐ ܠܰܒܪܶܗ ܒܰܕܡܽܘܬܳܐ ܕܒܶܣܪܳܐ ܕܰܚܛܺܝܬܳܐ ܡܶܛܠ ܕܰܚܛܺܝܬܳܐ. ܕܰܢܚܰܝܒܺܝܗ̇ ܠܰܚܛܺܝܬܳܐ ܒܒܶܣܪܶܗ. ܡܳܕܝܢ ܚܽܘܝܳܒܳܐ ܥܒܰܕ ܕܰܚܛܺܝܬܳܐ. ܟܰܕ ܡܩܺܝܡ ܩܪܳܒܳܐ ܠܽܘܩܒܰܠ ܗܰܘ ܕܡܰܠܶܦ ܗܘܳܐ ܕܬܶܣܬܥܰܪ ܚܛܺܝܬܳܐ. ܘܥܰܠܗܳܝ ܐܶܬܕܒܰܪ ܡܶܢ ܪܽܘܚܳܐ ܠܡܰܕܒܪܳܐ ܕܢܶܬܢܰܣܶܐ ܡܶܢ ܐܳܟܶܠܩܰܪܨܳܐ. ܬܰܡܳܢ ܠܽܘܩܕܰܡ ܦܳܪܩܳܐ ܗܘܳܬ ܠܗ ܝܰܡܺܝܢܶܗ. ܘܰܕܪܳܥܶܗ ܩܰܕܺܝܫܳܐ. ܘܠܐ ܡܶܫܬܰܦܰܠ ܗܘܳܐ ܘܚܳܐܷܒ ܡܶܢ ܐܰܝܠܝܢ ܕܰܡܢܰܣܶܝܢ ܠܗ. ܟܕ ܛܳܒ ܦܰܓܪܳܐ ܕܰܣܢܺܝܩ ܥܠ ܣܰܝܒܳܪܬܳܐ ܠܒܺܝܫ ܗܘܳܐ. ܘܗܳܟܰܢܳܐ ܡܥܰܙܶܐ ܗܘܳܐ. ܘܙܳܟܶܐ ܠܪܶܓܰܬ ܡܶܐܟܽܘܠܬܳܐ ܗܳܝ ܕܰܐܥܠܰܬ ܡܰܘܬܳܐ ܥܠ ܒܰܪܢܳܫܳܐ ܩܰܕܡܳܝܳܐ. ܘܡܶܛܠܗܳܕܐ ܟܕ ܐܡ̇ܪ ܠܗ ܗܰܘ ܕܰܡܢܰܣܶܐ: ܕܶܐܢ ܒܪܶܗ ܐܰܢܬ ܕܰܐܠܗܳܐ ܐܡ̣ܪ ܕܗܳܠܶܝܢ ܟܺܐܦ̈ܐ ܢܶܗܘ̈ܝܳܢ ܠܰܚܡܳܐ (ܡܬܝ ܕ: ܓ). ܠܐ ܫܰܡܥܶܗ ܘܰܥܒܰܕ ܠܰܚܡܳܐ ܡܶܢ ܟܺܐܦ̈ܐ. ܘܟܰܕ ܗܳܕܐ ܘܠܐ ܡܶܕܶܡ ܚܫܺܝܒܳܐ ܗܘܳܬ ܠܚܰܝܠܶܗ. ܘܡܶܢ ܒܳܬܰܪ ܕܫܰܡܠܺܝ ܟܽܠܗ̇ ܡܕܰܒܪܳܢܽܘܬܶܗ. ܘܶܐܬܳܐ ܥܕܰܡܳܐ ܠܰܨܠܺܝܒܳܐ. ܠܐ ܪܰܛܶܢ ܡܶܢ ܚܰܫ̈ܐ ܘܠܐ ܐܶܫܬܐܶܠ ܡܶܢ ܡܰܘܬܳܐ. ܐܠܐ ܣܰܝܒܰܪ ܚܰܫ̈ܐ. ܘܰܐܝܟ ܐܶܡܪܳܐ ܠܢܶܟܣܬܳܐ ܐܶܬܕܒܰܪ. ܘܰܐܝܟ ܢܶܩܝܳܐ ܩܕܳܡ ܓܳܙܽܘܙܳܐ ܫܰܬܺܝܩ ܗܘܳܐ. ܘܚܰܘܺܝ ܡܳܪܝܳܐ ܦܽܘܪܩܳܢܶܗ ܟܕ ܬܠܐܷ ܥܠ ܨܠܺܝܒܳܐ. ܘܰܡܡܰܨܰܥ ܒܰܝܢܳܬ ܓܰܝܴ̈ܣܶܐ ܘܰܠܥܺܝܢ ܥܰܡ̈ܡܶܐ ܕܰܟܢܺܝܫܺܝܢ ܗܘܰܘ ܠܰܚܙܳܬܳܐ ܗܳܝ ܕܬܶܕܡܽܘܪܬܳܐ ܓܠܳܐ ܙܰܕܺܝܩܽܘܬܶܗ. ܘܟܶܢ ܛܰܥܡܶܗ ܠܡܰܘܬܳܐ ܘܰܢܚܶܬ ܠܰܫܝܽܘܠ. ܠܘ ܡܶܢ ܐܚܪ̈ܳܢܶܐ ܫܶܐܠ ܦܽܘܪܩܳܢܳܐ ܐܝܟ ܚܰܣܺܝܪܳܐ. ܐܠܐ ܗܽܘ ܡܶܢܶܗ ܐܶܬܦܪܶܩ. ܘܗܽܘ ܠܘܳܬܶܗ ܐܶܬܥܰܠܺܝ ܘܩܳܡ ܡܶܢ ܡܰܘܬܳܐ. ܟܕ ܒܦܰܓܪܳܐ ܡܣܰܝܒܰܪ ܗܘܳܐ ܗܳܠܝܢ ܕܰܡܩܰܪܒܺܝܢ ܗܘܰܘ ܠܗ ܝܽܘ̈ܕܳܝܶܐ ܘܰܒܚܰܝܠܳܐ ܕܰܐܠܳܗܽܘܬܶܗ ܫܳܪܶܐ ܗܘܳܐ ܘܡܰܗܦܶܟ ܚܰܝܠܳܐ ܕܚܰܫ̈ܐ ܠܠܳܐ ܚܳܫܽܘܫܽܘܬܳܐ. ܘܡܰܘܬܶܗ ܕܦܰܓܪܳܐ ܡܫܰܚܠܶܦ ܗܘܳܐ ܠܠܳܐ ܡܳܝܽܘܬܽܘܬܳܐ. ܗܳܕܳܐ ܗܝ ܬܶܕܡܽܘܪܬܳܐ ܕܰܥܒܰܕ ܐܰܠܗܳܐ ܚܰܕܬܳܐܝ̣ܬ. ܟܕ ܩܳܡ ܡܶܢ ܩܰܒܪܳܐ ܘܰܐܩܺܝܡ ܗܽܘ ܠܶܗ ܕܠܳܐ ܚܒܳܠܳܐ. ܘܗܺܝ ܗܳܕܐ ܩܝܳܡܬܳܐ ܕܰܗܘܳܬ ܚܰܘܝܳܗ̇ ܠܥܺܝܢ ܥܰܡ̈ܡܶܐ. ܒܝܰܕ ܟܳܪܽܘܙܽܘܬܳܐ ܕܰܫܠܺܝ̈ܚܶܐ ܩܰܕܺܝ̈ܫܶܐ ܕܰܢܦܰܩܘ ܣܰܒܰܪܘ ܒܥܳܠܡܳܐ. ܘܒܳܬܰܪ ܗܳܠܶܝܢ ܡܰܝܬܶܐ ܢܒܺܝܳܐ ܘܳܐܡܰܪ:
ܐܶܬܕܟܰܪ ܗܰܝܡܳܢܽܘܬܶܗ ܘܛܰܝܒܽܘܬܶܗ ܠܰܕܒܶܝܬ ܝ̣ܣܪܳܐܝܠ. ܘܰܚܙܰܘ ܟܽܠܗܽܘܢ ܥܶܒܪ̈ܶܝܗ̇ ܕܰܐܪܥܳܐ ܦܽܘܪܩܳܢܶܗ ܕܰܐܠܳܗܰܢ. ܛܰܝܒܽܘܬܳܐ ܘܗܰܝܡܳܢܽܘܬܳܐ ܐܶܬܕܟܰܪ ܠܰܕܒܶܝܬ ܝ̣ܣܪܳܐܝܠ. ܒܗܳܝ ܕܰܢܚܶܬ ܐܰܠܗܳܐ ܗܘܳܐ ܒܪܳܐ ܒܰܒܣܰܪ ܠܝܰܥܩܽܘܒ ܘܠܺܝܗܽܘܕܳܐ ܘܰܠܕܰܘܝܕ. ܐܶܢܕܶܝܢ ܠܘܳܬ ܝ̣ܣܪܳܐܝܠ ܕܰܐܠܗܳܐ ܡܦܰܢܶܝܢܰܢ ܠܗ̇ ܠܡܶܠܬܳܐ. ܕܰܢܫܰܡܠܶܐ ܡܽܘܠܟܳܢܳܐ ܠܥܰܡ̈ܡܶܐ ܡܗܰܝܡ̈ܢܶܐ. ܗܳܢܘܢ ܕܩܰܕܶܡ ܗܘܳܐ ܐܠܗܳܐ ܐܡ̣ܪ ܠܰܐܒܪܳܗܳܡ. ܕܰܒܙܰܪܥܳܟ ܢܶܬܒܰܪܟܽܘܢ ܟܽܠܗܘܢ ܥܰܡ̈ܡܶܐ (ܒܪܝܬܐ ܟܒ: ܝܚ). ܡܶܛܠ ܦܽܘܪܩܳܢܳܐ ܕܰܥܒܰܕ ܐܠܗܐ ܠܥܰܡ̈ܡܶܐ ܒܰܕܡܶܗ. ܐܰܡܺܝܪ ܦܶܬܓܳܡܳܐ ܗܰܘ ܕܬܶܕܡܽܘܪܬܳܐ ܥܒܰܕ. ܢܶܫܡܰܥ ܘܰܠܗܳܝ ܒܰܪܬ ܩܳܠܳܐ ܕܶܐܡܰܪ ܡܙܰܡܪܳܢܳܐ:
ܘܰܚܙܰܘ ܟܽܠܗܽܘܢ ܥܶܒܪ̈ܶܝܗ̇ ܕܰܐܪܥܳܐ ܦܽܘܪܩܳܢܶܗ ܕܰܐܠܳܗܰܢ. ܗܳܢܐ ܕܠܘ ܠܚܰܕ ܥܰܡܳܐ ܡܶܣܟܺܢܳܐܝ̣ܬ ܦܪܰܩ ܐܝܟ ܡܽܘܫܶܐ. ܐܠܐ ܟܽܠܗܘܢ ܥܰܡ̈ܡܶܐ ܐܶܫܬܰܘܬܰܦܘ ܒܗܳܢܐ ܦܽܘܪܩܳܢܳܐ. ܡܶܛܠ ܕܦܽܘܪܩܳܢܳܐ ܗܘܳܐ ܕܰܐܠܗܳܐ. ܘܐܝܟ ܫܶܡܫܳܐ ܕܢܰܚ ܘܶܐܬܦܪܶܣ ܥܠ ܣܰܘ̈ܦܶܐ. ܘܡܶܛܠܗܳܢܐ ܡܚܰܦܶܛ ܢܒܺܝܐ. ܠܟܽܠܗ̇ ܐܰܪܥܳܐ ܕܒܰܚܕܳܐ ܫܰܘܝܽܘܬܳܐ ܬܩܰܪܶܒ ܠܶܗ ܫܽܘܒܚܳܐ ܠܡܳܪܶܗ. ܟܕ ܐܡ̇ܪ:
ܫܰܒܰܚܘ ܠܡܳܪܝܳܐ ܟܽܠܗ̇ ܐܰܪܥܳܐ. ܕܟܽܠܶܟܝ ܠܰܡ ܗܳܫܐ ܐܶܬܦܪܶܩܬܝ ܟܽܠ ܝܰܘ̈ܡܰܝ ܚܰܝܰܝ̈ܟܝ. ܠܟܽܠܗܽܘܢ ܥܰܡ̈ܡܶܐ ܕܥܰܠ ܐܰܦܰܝ̈ܟܝ ܦܪܰܩ ܐܰܠܳܗܶܟܝ. ܗܽܘ ܓܝܪ ܚܠܳܦ ܟܽܠܢܳܫ ܛܥܶܡ ܡܰܘܬܳܐ. ܘܠܐ ܐܢܳܫ ܢܶܬܚܰܫܰܒ ܕܠܰܝܬ ܠܗ ܡܢܳܬܳܐ ܒܗܳܕܐ ܡܰܘܗܰܒܬܳܐ. ܠܐ ܢܩܰܘܽܘܢ ܚܰܛܳܝ̈ܐ ܒܡܽܘ̈ܡܰܝܗܘܢ. ܠܐ ܢܦܽܘܫܽܘܢ ܐܰܝܠܝܢ ܕܰܡܟܰܬܡܺܝܢ ܒܰܚܒܳܪ̈ܳܬܗܘܢ. ܐܶܫܬܰܚܠܰܦ ܠܗ ܐܶܒܠܳܐ ܕܰܐܪܥܳܐ ܠܰܦܨܺܝܚܽܘܬܳܐ. ܘܒܶܛܠܰܬ ܠܗ̇ ܒܟܳܬܳܐ ܕܰܛܪ̈ܺܝܕܶܐ ܘܰܦܢܰܘ ܠܗܽܘܢ ܐܰܒܺܝ̈ܕܶܐ. ܐܠܐ ܫܡܰܥܘ ܠܰܢܒܺܝܐ.
ܘܶܐܬܦܰܨܰܚܘ ܘܰܙܡܰܪܘ ܘܫܰܒܰܚܘ. ܠܘ ܡܶܕܶܡ ܝܰܬܺܝܪܳܐ ܬܒܰܥ ܒܺܐܝܕܰܝ̈ܟܘܢ܆ ܗܰܘ ܕܰܦܪܰܩܟܽܘܢ ܒܰܕܡܶܗ ܒܰܠܚܽܘܕ ܐܰܘܕܰܘ ܠܶܗ ܥܠ ܦܽܘܪܩܳܢܳܐ. ܘܰܙܡܰܪܘ ܘܫܰܒܰܚܘ ܥܠ ܫܽܘܒܩܳܢܳܐ. ܠܘ ܒܡܰܝܴ̈ܐ ܐܶܬܳܐ ܘܰܐܥܡܶܕܟܽܘܢ ܠܰܬܝܳܒܽܘܬܳܐ܆ ܒܢܽܘܪܳܐ ܘܰܒܪܽܘܚܳܐ ܫܰܕܰܪ ܠܟܘܢ ܥܡܳܕܳܐ. ܘܰܐܝܟܳܐ ܕܺܐܝܬ ܢܽܘܪܳܐ ܝܩܶܕܘ ܠܗܽܘܢ ܚܛܳܗ̈ܐ. ܘܰܐܬܰܪ ܕܪܽܘܚܶܗ ܕܡܳܪܝܳܐ܆ ܚܺܐܪܽܘܬܳܐ ܗܝ. ܥܕܰܡܳܐ ܠܰܥܡܳܕܳܐ ܡܶܬܒܥܶܐ ܒܶܟܝܳܐ. ܡܶܢ ܒܳܬܰܪ ܥܡܳܕܳܐ ܒܶܛܠܰܬ ܠܗ̇ ܒܟܳܬܳܐ. ܘܶܐܫܬܰܦܥܰܬ ܛܰܝܒܽܘܬܳܐ ܘܶܐܬܬܫܺܝ̈ܓܳܢ ܚܒܳܪ̈ܳܬܳܐ. ܘܶܐܬܦܰܨܰܚܘ ܟܡܺܝܪ̈ܶܐ ܘܰܙܡܰܪܘ ܐܱܒܺܝ̈ܠܶܐ ܘܫܰܒܰܚܘ ܡܫܰܥܒ̈ܕܶܐ ܕܠܰܝܬ ܐܰܟܬܳܐ ܠܟܺܐܢܽܘܬܳܐ ܥܠܰܝܟܽܘܢ ܡܶܛܠ ܩܰܕ̈ܡܳܝܳܬܳܐ. ܫܕܰܘ ܡܶܢܟܽܘܢ ܐܶܒܠܳܐ ܕܥܠ ܚܛܳܗܰܝ̈ܟܘܢ. ܘܰܟܡܺܝܪܽܘܬܳܐ ܕܡܶܛܠ ܒܺܝ̈ܫܳܬܟܘܢ. ܘܰܗܘܰܘ ܚܕܽܘܓ̈ܐ ܠܚܰܬܢܳܐ ܡܫܺܝܚܳܐ ܘܰܠܒܰܫܘ ܚܶܘܳܪ̈ܶܐ.
ܘܰܙܡܰܪܘ ܠܡܳܪܝܳܐ ܒܟܶܢܳܪܳܐ ܘܰܒܩܳܠܳܐ ܕܰܙܡܳܪܳܐ. ܗܳܐ ܪܽܘܚܳܐ ܗܰܘ ܕܒܶܗ ܥܡܰܕܬܽܘܢ ܩܳܥܶܐ ܠܟܽܘܢ ܢܒܺܝܐ܆ ܕܰܒܡܴ̈ܐܢܰܝ ܙܡܳܪܳܐ ܬܰܘ ܠܒܶܝܬ ܡܶܫܬܽܘܬܳܐ ܚܕܰܬܳܐ. ܘܬܶܫܒܽܘܚܬܳܐ ܚܕܰܬܳܐ ܢܶܫܡܰܥ ܚܰܬܢܳܐ ܡܶܢ ܟܽܠܟܘܢ. ܡܰܠܟܳܐ ܦܩܰܕ ܕܠܐ ܐܢܳܫ ܢܶܒܟܶܐ ܥܰܠ ܩܰܕ̈ܡܳܝܳܬܳܐ. ܐܰܥܒܰܪ ܐܶܢܝܢ ܚܰܬܢܳܐ. ܘܣܰܟܠܽܘܬܳܐ ܗܳܝ ܕܰܗܘܳܬ ܒܦܰܪܕܰܝܣܳܐ ܛܥܳܗ̇ ܕܺܝܢܳܐ. ܘܬܰܪܥܳܐ ܕܓܰܢܬܳܐ ܦܰܬܚܶܗ ܩܕܳܡ ܓܰܝܳܣܳܐ. ܦܽܘܩܕܳܢܰܐ ܗ̄ܘ ܕܟܽܠܢܳܫ ܢܺܚܶܐ. ܘܡܰܘܗܰܒܬܳܐ ܗ̄ܝ ܕܡܰܠܟܳܐ ܘܡܰܓܳܢ ܝܰܗܒܳܗ̇. ܠܐ ܙܥܰܪ ܩܽܘܠܳܣܳܐ ܕܣܰܓܺܝ ܪܰܒܳܐ ܡܰܘܗܰܒܬܳܐ. ܠܘ ܕܰܗܒܳܐ ܒܳܥܶܐ ܡܶܢܟܽܘܢ ܐܶܠܐ ܟܽܠܟܽܘܢ ܪܳܚܶܡ ܕܢܶܫܟܰܚ ܕܬܶܗܘܽܘܢ ܒܢܱ̈ܝ ܚܰܝܠܳܐ.
ܢܙܽܘܥ ܝܰܡܳܐ ܒܰܡܠܐܴܗ. ܬܺܒܶܝܠ ܘܥܳܡܽܘܪ̈ܶܝܗ̇. ܫܰܦܺܝܪ ܥܒܰܕ ܥܳܠܡܳܐ ܝܰܡܳܐ ܕܡܶܬܬܙܺܝܥ ܡܶܢ ܚܛܳܗܰܘ̈ܗܝ. ܘܰܡܫܰܝܶܢ ܓ̈ܠܠܶܐ ܕܒܺܝ̈ܫܳܬܶܗ ܡܶܢ ܕܠܽܘܚܝܳܐ ܕܠܐ ܬܶܦܢܶܐ ܥܠ ܥܒܳܕܶܝ̈ܗ̇ ܕܚܰܪܪܳܗ̇ ܨܠܺܝܒܳܐ ܡܶܢܗܽܘܢ ܕܰܦܬܰܟܪ̈ܶܐ:
ܢܰܗܪ̈ܰܘܳܬܳܐ ܢܶܩܫܽܘܢ ܟܰܦܳܐ ܐܰܟܚܕܳܐ. ܗܳܠܝܢ ܕܩܳܡ̈ܝ ܨܶܝܕ ܡܰܠܟܳܐ ܟܕ ܨܠܺܝܒ ܥܰܠ ܓܳܓܽܘܠܬܳܐ. ܘܰܡܠܰܘ ܡܳܐܢܰܝ̈ܗܘܢ ܡܰܝܴ̈ܐ ܚܰܝܷ̈ܐ. ܘܰܢܦܰܩܘ ܗܘܰܘ ܢܰܗܪ̈ܰܘܳܬܳܐ ܠܡܶܬܥܰܡܪܳܢܺܝܬܳܐ ܟܽܠܗ̇. ܡܶܛܠܗܳܢܐ ܐܰܟܚܕܳܐ ܢܳܩܫܺܝܢ ܟܰܦܳܐ. ܗܳܠܝܢ ܬܽܘܒ ܐܡ̇ܪ:
ܘܛܽܘܪ̈ܶܐ ܢܫܰܒܚܽܘܢ ܩܕܳܡ ܡܳܪܝܳܐ. ܛܽܘܪ̈ܶܐ ܗܳܢܰܘ ܕܶܝܢ ܥܰܡ̈ܡܶܐ ܚܰܢܦ̈ܐ ܩܕܳܡ ܕܬܶܥܒܰܪ ܒܗܽܘܢ ܩܺܝܩܢܳܐ ܕܰܡܣܰܒܪ̈ܳܢܶܐ. ܟܕ ܥܶܒܪܰܬ ܒܗܘܢ ܦܰܕܳܢܳܐ ܕܬܰܘܪ̈ܶܐ ܫܠܺܝ̈ܚܳܝܶܐ. ܥܶܩܪܰܬ ܡܶܢܗܘܢ ܝܰܥܪܳܐ ܕܒܺܝ̈ܫܳܬܳܐ. ܘܰܠܒܰܫܘ ܟܶܢܳܪ̈ܶܐ ܘܩܺܝܬܳܪ̈ܶܐ. ܘܫܰܒܰܚܘ ܩܕܳܡ ܡܰܠܟܳܐ ܡܳܪܝܳܐ. ܡܶܛܠ ܗܳܢܐ ܡܫܰܒܚܺܝܢ ܗܘܰܘ ܩܕܳܡ ܡܳܪܝܳܐ.
ܕܳܐܬܶܐ ܠܰܡܕܳܢܳܗ̇ ܠܰܐܪܥܳܐ. ܕܳܐܶܢ ܠܬܺܒܶܝܠ ܒܙܰܕܺܝܩܽܘܬܳܐ. ܘܰܠܥܰܡ̈ܡܶܐ ܒܰܬܪܺܝܨܽܘܬܳܐ. ܒܰܬܪܶܝܢ ܢܺܝ̈ܫܺܝܢ ܡܶܬܐܶܡܰܪ ܕܰܝܳܢܳܐ ܗܳܢܐ܆ ܟܕ ܐܶܬܳܐ ܘܕܳܢܳܗ̇ ܠܰܐܪܥܳܐ ܗܳܝ ܕܦܰܪܩܳܗ̇ ܡܶܬܐܰܡܪܳܐ. ܡܶܛܠ ܕܕܳܢ ܥܡ ܐܳܟܶܠܩܰܪܨܳܐ ܘܚܰܝܒܶܗ. ܐܳܦ ܦܰܪܩܳܗ̇ ܒܩܽܘܫܬܳܐ ܠܥܳܡܰܪܬܳܐ. ܒܫܽܘܠܳܡܳܐ ܕܶܝܢ ܡܳܐ ܕܕܳܐܶܢ ܠܗ̇. ܒܗܳܝ ܢܶܦܪܰܥ ܠܟܽܠܢܳܫ ܐܝܟ ܥܒܳܕܰܘ̈ܗܝ. ܕܗܽܘ ܢܫܰܘܙܶܒ ܠܢ ܡܶܢ ܕܺܝܢܳܐ. ܘܰܢܦܰܨܶܐ ܠܢ ܡܶܢ ܬܰܫܢܺܝܩܳܐ. ܘܢܰܫܘܶܐ ܠܢ ܠܡܰܠܟܽܘܬܶܗ ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܬܫܥܝܢ ܘܬܫܥܐ
ܡܰܘܕܰܥ ܥܰܠ ܡܰܠܟܽܘܬܳܐ ܕܰܐܠܳܗܳܐ܆ ܘܥܰܠ ܕܺܝܢܳܐ ܕܚܰܛܳܝ̈ܐ ܘܥܰܠ ܦܽܘܪܩܳܢܳܐ ܕܰܢܛܺܝܪ ܠܩܰܕܝ̈ܫܶܐ.
ܡܰܠܟܽܘܬܳܐ ܕܰܐܠܗܳܐ ܡܶܫܬܰܥܶܐ ܩܕܳܡ ܟܶܢ̈ܫܶܐ ܕܥܰܡܡ̈ܐ. ܛܽܘܒܳܢܳܐ ܕܰܘܝܕ ܒܬܶܫܒܽܘܚܬܳܐ ܗܳܕܐ ܕܬܶܫܥܺܝܢ ܘܰܬܫܰܥ܆ ܡܰܠܟܽܘܬܳܐ ܕܶܝܢ ܕܡܶܬܓܰܠܝܳܐ ܒܫܽܘܒܚܳܐ ܕܬܰܗܦܶܟ ܕܺܝܢܳܐ ܘܰܡܣܳܡ ܒܪܺܝܫܳܐ ܥܰܠ ܡܰܪ̈ܳܚܶܐ܆ ܘܬܶܬܶܠ ܦܽܘܪܥܳܢܳܐ ܕܰܥ̈ܒܳܕܶܐ ܛܳܒ̈ܐ ܠܩܰܕܺܝ̈ܫܶܐ. ܡܚܰܘܶܐ ܓܝܪ ܕܡܳܐ ܕܥܰܠ ܡܰܘܬܒܳܐ ܡܶܬܚܙܶܐ܆ ܥܰܠ ܬܒܰܥܬܳܐ ܣܺܝ̈ܡܳܢ ܐܰܦܰܘ̈ܗܝ. ܗܳܟܰܢܐ ܓܝܪ ܐܦ ܛܽܘܒܬܳܢܳܐ ܚܰܙܩܺܝܐܝܠ ܟܰܕ ܐܶܙܰܠ ܠܰܡܚܰܒܳܠܘ ܠܐܽܘܪܺܫܠܶܡ܆ ܥܠ ܟܪ̈ܽܘܒܶܐ ܚܳܙܶܐ ܗܘܳܐ ܠܶܗ ܕܝܳܬܶܒ. ܐܦ ܓܰܒܪܳܐ ܗܰܘ ܕܥܰܠ ܠܒܰܝܢܳܬ ܟܪ̈ܽܘܒܶܐ ܘܰܡܠܳܐ ܚܽܘ̈ܦܢܰܘܗܝ ܓܽܘܡܪ̈ܶܐ ܕܢܽܘܪܳܐ ܘܰܐܪܡܺܝ ܒܟܶܢܦܰܘ̈ܗܝ ܕܰܐܚܪܺܢܳܐ (ܚܙܩܐܝܠ ܝ: ܙ). ܗܰܘ ܕܰܫܩܰܠ ܓܽܘܡܪ̈ܶܐ ܡܶܬܦܰܩܰܕ ܗܘܳܐ ܕܢܶܦܽܘܩ ܘܢܶܕܪܶܐ ܥܰܠ ܡܕܺܝܢܬܳܐ. ܡܳܕܝܢ ܐܦ ܕܰܘܝܕ ܝܰܘܡܳܢܳܐ. ܒܓܶܠܝܳܢܳܐ ܕܕܺܝܢܳܐ ܡܶܬܒܰܩܶܐ ܗܘܳܐ. ܟܕ ܡܙܰܡܰܪ ܗܘܳܐ ܘܳܐܡܰܪ:
ܡܳܪܝܳܐ ܐܰܡܠܶܟ ܢܙܽܘܥܽܘܢ ܥܰܡ̈ܡܶܐ. ܝܳܬܶܒ ܥܰܠ ܟܪ̈ܽܘܒܶܐ ܬܙܽܘܥ ܐܰܪܥܳܐ. ܡܶܛܠܡܳܢܐ ܗܳܢܐ ܦܶܬܓܳܡܳܐ ܕܰܡܠܶܐ ܕܶܚܠܬܳܐ. ܘܰܐܝܟܰܢܳܐ ܡܶܬܬܙܺܝܥܳܢܽܘܬܳܐ ܗܳܘܝܳܐ ܒܥܰܡ̈ܡܶܐ ܒܡܰܠܟܽܘܬܶܗ. ܘܡܶܛܠܡܳܢܐ ܐܡ̣ܪ ܕܰܐܡܠܶܟ ܗܰܘ ܕܰܒܟܽܠܙܒܰܢ ܡܰܠܟܳܐ ܐܝ̣ܬܰܘܗܝ. ܡܶܛܠ ܣܽܘܥܪܳܢܳܐ ܕܰܢܦܰܩ ܢܶܬܚܙܶܐ ܒܶܗ. ܐܶܬܩܪܺܝ ܡܰܠܟܳܐ. ܘܡܰܠܟܳܐ ܡܶܬܩܪܶܐ ܒܕܺܝܢܳܐ. ܡܶܛܠ ܠܐ ܡܶܨܛܰܠܝܳܢܽܘܬܶܗ ܕܰܒܕܺܝܢܳܐ. ܘܡܶܛܠ ܕܠܐ ܗܳܦܟܳܐ ܡܶܠܬܶܗ ܠܒܶܣܬܪܶܗ. ܘܗܳܝ ܕܰܢܙܽܘܥܽܘܢ ܥܰܡܡ̈ܐ ܘܥܠ ܐܰܝܠܝܢ ܕܡܶܬܚܰܝܒܺܝܢ ܒܕܺܝܢܳܐ ܥܰܡܡ̈ܐ ܡܶܬܩܪܶܝܢ. ܐܝܟ ܕܰܐܡܺܝܪ ܒܡܰܙܡܽܘܪܳܐ ܕܶܫܬܺܝܢ ܘܰܬܡܳܢܝܳܐ. ܕܒܰܕܰܪ ܥܰܡܡ̈ܐ ܕܨܳܒܶܝܢ ܩܪܳܒܳܐ. ܘܰܒܗܳܕܐ ܚܰܘܺܝ ܠܢ ܕܰܨܒܰܘ ܩܪܳܒܳܐ. ܘܰܐܩܺܝܡܘ ܬܰܟܬܽܘܫܳܐ ܠܽܘܩܒܰܠ ܡܰܠܟܽܘܬܶܗ ܕܰܐܠܗܐ ܡܳܐ ܕܡܶܬܚܙܶܐ ܒܟܽܘܪܣܝܳܐ ܕܡܰܠܟܽܘܬܶܗ ܥܠ ܡܰܘܬܒܳܐ ܕܰܟܪ̈ܽܘܒܶܐ. ܗܳܝܕܝܢ ܡܒܰܕܰܪ ܠܗܘܢ ܠܰܐܝܠܶܝܢ ܕܩܳܡܘ ܠܽܘܩܒܰܠ ܫܽܘܠܛܳܢܶܗ. ܥܠ ܟܪ̈ܽܘܒܶܐ ܕܶܝܢ ܡܶܬܚܙܶܐ ܡܶܛܠ ܕܶܚܠܬܳܐ ܕܰܫܟܺܝܚܳܐ ܒܚܰܝ̈ܘܳܬܳܐ ܗܳܠܝܢ ܕܡܶܬܩܪܶܝܢ ܟܪ̈ܽܘܒܶܐ. ܒܗܳܝ ܕܰܠܟܽܠ ܚܕܳܐ ܡܶܢܗܶܝܢ ܐܝ̣ܬ ܐܰܦ̈ܐ ܕܰܡܫܰܓܢ̈ܝܳܢ ܡܶܢ ܚܕܳܕ̈ܐ. ܘܟܕ ܚܳܙܶܝܢ ܗܳܠܶܝܢ ܐܳܬܶܝܢ ܠܕܺܝܢܳܐ ܕܰܐܝܢܳܐ ܙܰܘܥܳܐ ܚܳܙܶܝܢ ܒܰܡܫܰܡܫܴ̈ܢܶܐ. ܢܙܽܘܥܽܘܢ ܘܢܶܬܟܰܚܕܽܘܢ ܡܶܢ ܗܰܘ ܕܡܶܫܬܰܡܰܫ. ܡܶܛܠ ܗܳܢܐ ܠܟܽܠ ܚܕܳܐ ܡܶܢ ܚܰܝ̈ܘܳܬܳܐ ܐܝ̣ܬ ܐܰܪܒܰܥ ܐܰܦ̈ܐ. ܐܝ̣ܬ ܚܕܳܐ ܐܰܦ̈ܐ ܕܰܐܪܝܳܐ ܕܰܡܫܰܘܕܥܳܐ ܥܰܠ ܕܶܚܠܬܳܐ ܘܙܰܘܥܬܳܐ ܘܰܬܒܰܥܬܳܐ ܕܰܐܝܠܶܝܢ ܕܢܳܦܠܺܝܢ ܬܚܶܝܬ ܡܣܳܡ ܒܪܺܝܫܳܐ. ܐܰܝܟܰܢܳܐ ܕܰܐܡܺܝܪ ܒܡܱ̈ܬܠܶܐ ܓܽܘܪܝܳܐ ܕܰܐܪܝܳܐ ܓܰܢ̱ܒܳܪ ܗܘ ܡܶܢ ܟܽܠܗ̇ ܒܥܺܝܪܳܐ (ܡ̈ܬܠܐ ܠ: ܠ). ܘܰܐܝܟ ܕܰܕܚܺܝܠ ܐܰܪܝܳܐ ܥܰܠ ܚܰܝ̈ܘܳܬܳܐ. ܗܳܟܰܢܳܐ ܢܳܦܩܺܝܢ ܟܪ̈ܽܘܒܶܐ ܒܰܕܡܽܘܬ ܐܰܪ̈ܝܰܘܳܬܳܐ ܡܶܢ ܬܚܶܝܬ ܬܪܽܘܢܽܘܣ ܕܚܺܝܠܳܐ ܕܡܰܠܟܳܐ ܡܳܪܝܳܐ. ܠܡܶܢܗܰܡ ܒܓܶܐܪ̈ܶܐ ܕܥܰܡܡ̈ܐ ܐܰܝܠܝܢ ܕܰܐܩܺܝܡܘ ܩܪ̈ܳܒܶܐ ܠܽܘܩܒܰܠ ܡܰܠܟܽܘܬܶܗ. ܘܒܰܕܡܽܘܬ ܐܰܪܝܳܐ ܢܳܗܡܺܝܢ ܠܰܬܒܳܪܳܐ ܕܥܰܡܡ̈ܐ ܥܽܘܪ̈ܠܶܐ. ܘܰܠܘܳܬ ܢܺܝ̈ܚܶܐ ܘܒܰܣܺܝ̈ܡܶܐ ܐܰܝܟ ܬܰܘܪ̈ܶܐ ܘܰܦܠܰܚܘ ܟܺܐܢܽܘܬܳܐ. ܘܫܰܥܒܶܕܘ ܢܰܦܫܗܽܘܢ ܠܢܺܝܪܳܐ ܕܕܶܚܠܰܬ ܐܠܗܳܐ. ܐܰܦ̈ܐ ܕܬܰܘܪܳܐ ܡܚܰܘܶܐ ܟܪܽܘܒܳܐ ܠܰܐܝܠܝܢ ܕܗܳܟܰܢܐ ܐܶܢܘܢ. ܘܗܳܠܝܢ ܕܰܐܝܟ ܬܰܘܪܳܐ ܚܳܙܶܝܢ ܠܗܽܘܢ ܠܰܟܪ̈ܽܘܒܶܐ. ܫܰܝܢܰܐ ܗܘ ܠܗܘܢ ܘܰܫܠܳܡܳܐ ܡܶܢ ܠܘܳܬ ܕܰܝܳܢܳܐ. ܘܬܽܘܒ ܐܰܦ̈ܐ ܕܒܰܪܢܳܫܳܐ ܡܚܰܘܶܝܢ ܟܪ̈ܽܘܒܶܐ ܠܗܳܠܝܢ ܕܠܐ ܚܰܒܶܠܘ ܕܡܽܘܬܗܘܢ ܡܝܰܩܰܪܬܳܐ ܒܰܥ̈ܒܳܕܶܐ ܡܺܝ̈ܬܶܐ. ܘܰܐܟܙܢܳܐ ܕܥܰܡܽܘܕܳܐ ܗܰܘ ܕܰܡܕܰܒܰܪ ܗܘܳܐ ܠܡܰܫܪܺܝܬܳܐ ܕܰܒܢܰܝ̈ ܝܣܪܳܐܝܠ ܟܕ ܢܦܰܩ ܡܶܢ ܬܚܶܝܬ ܫܽܘܥܒܳܕܳܐ ܕܦܶܪܥܽܘܢ. ܠܰܬܪܶܝܢ ܫܽܘ̈ܓܢܳܝܶܐ ܡܶܫܬܰܚܠܰܦ ܗܘܳܐ ܗܽܘ ܟܕ ܗܽܘ. ܟܕ ܡܰܢ ܠܥܶܒܪ̈ܳܝܶܐ ܟܽܠܗ ܢܽܘܗܪܳܐ ܗܘܳܐ. ܘܰܠܡܶܨܪ̈ܳܝܶܐ ܟܽܠܗ ܚܶܫܽܘܟܳܐ ܗܘܳܐ. ܗܳܟܰܢܳܐ ܐܦ ܟܪ̈ܽܘܒܶܐ ܒܝܰܘܡܳܐ ܕܕܺܝܢܳܐ ܡܶܬܚܙܶܝܢ ܬܚܶܝܬ ܬܪܽܘܢܽܘܣ ܕܕܰܝܳܢܳܐ. ܟܕ ܠܺܝܣܪܳܐܝܠ ܕܰܐܠܗܐ ܡܶܬܚܙܶܝܢ ܐܰܦ̈ܐ ܒܰܣܺܝ̈ܡܳܬܳܐ ܕܬܰܘܪܳܐ. ܠܡܶܨܪ̈ܳܝܶܐ ܘܰܠܡܳܪ̈ܽܘܕܶܐ ܘܰܠܦܶܪܥܽܘܢ ܡܶܬܝܰܕܥܳܢܳܐ ܡܰܠܟܗܘܢ. ܐܰܦ̈ܐ ܕܰܐܪܝܳܐ ܕܚܺܝ̈ܠܳܬܳܐ ܕܢܳܗܶܡ ܠܰܬܒܳܪܳܐ. ܘܡܶܛܠܗܳܕܐ ܐܡ̣ܪ ܝܳܬܶܒ ܥܠ ܟܪ̈ܽܘܒܶܐ ܬܙܽܘܥ ܐܰܪܥܳܐ. ܡܶܬܦܰܠܰܓ ܠܗ ܓܝܪ ܟܝܳܢܳܐ ܡܠܺܝܠܳܐ ܠܰܬܪܶܝܢ ܓܰܒܺܝ̈ܢ. ܡܶܢܶܗ ܠܰܫܡܰܝܳܐ ܘܡܶܢܶܗ ܠܰܐܪܥܳܐ. ܐܰܝܠܝܢ ܕܒܰܐܪܥܳܐ ܦܳܝܫܺܝܢ ܗܳܠܝܢ ܐܶܢܘܢ ܕܰܐܣܺܝܪܺܝܢ ܗܘܰܘ ܒܚܽܘܒܳܐ ܕܰܐܪ̈ܥܳܢܝܳܬܳܐ. ܘܡܳܐ ܕܚܳܙܶܝܢ ܠܕܰܝܳܢܳܐ ܕܝܳܬܶܒ ܥܰܠ ܟܪ̈ܽܘܒܶܐ ܡܶܬܡܠܶܝܢ ܙܰܘܥܬܳܐ. ܘܰܡܚܰܘܶܐ ܕܶܝܢ ܢܒܺܝܐ ܐܦ ܪܰܒܽܘܬܶܗ ܕܡܰܠܟܳܐ ܪܰܒܳܐ ܒܰܡܕܺܝܢܬܶܗ ܘܳܐܡܰܪ:
ܡܳܪܝܳܐ ܪܰܒ ܒܨܶܗܝܽܘܢ. ܘܡܳܪܝܳܐ ܪܳܡ ܥܰܠ ܟܽܠܗܽܘܢ ܥܰܡ̈ܡܶܐ. ܒܰܫܡܳܐ ܕܨܶܗܝܽܘܢ ܠܟܽܠܗ̇ ܡܕܺܝܢܬܳܐ ܕܰܫܡܰܝܴ̈ܢܶܐ ܫܰܘܕܰܥ. ܕܬܰܡܳܢ ܠܰܡ ܪܰܒܰܐ ܗ̄ܘ ܘܰܡܫܰܒܚܳܐ. ܐܠܐ ܡܶܢ ܕܶܚܠܬܳܐ ܕܫܽܘܠܛܳܢܶܗ.
ܢܰܘܕܽܘܢ ܠܰܫܡܳܟ ܪܰܒܳܐ ܘܰܕܚܺܝܠܳܐ ܕܩܰܕܺܝܫ ܗܽܘ. ܗܳܝܕܶܝܢ ܟܽܠܗܽܘܢ ܥܶܠܳܝ̈ܐ ܘܬܰܚܬܳܝ̈ܐ ܡܰܘܕܶܝܢ ܠܗ ܠܗܰܘ ܕܡܶܬܚܙܶܐ ܪܰܒܳܐ ܘܰܕܚܺܝܠܳܐ. ܐܠܐ ܠܰܘ ܟܽܠܡܰܢ ܕܡܰܘܕܶܐ ܬܰܡܳܢ ܡܶܫܬܘܶܐ ܠܚܰܝ̈ܐ ܛܽܘܒܬܳܢ̈ܐ. ܡܶܛܠ ܕܰܒܕܺܝܢܳܐ ܥܰܫܺܝܢܳܐ ܘܚܰܝܠܬܳܢܳܐ ܦܳܪܶܫ ܡܰܠܟܳܐ ܗܳܠܝܢ ܕܺܝܠܶܗ ܡܶܢ ܢܽܘܟܪ̈ܳܝܶܐ. ܐܶܡܰܪ ܓܝܪ ܡܙܰܡܪܳܢܳܐ:
ܥܽܘܫܢܶܗ ܕܡܰܠܟܳܐ ܪܳܚܶܡ ܕܺܝܢܳܐ. ܐܰܢܬ ܬܰܩܶܢܬ ܬܪܺܝܨܽܘܬܳܐ ܘܕܺܝܢܳܐ. ܠܐ ܓܝܪ ܨܳܒܶܐ ܕܰܕܠܳܐ ܕܺܝܢܳܐ ܢܺܚܶܐ. ܟܕ ܡܦܰܪܶܫ ܒܕܺܝܢܳܐ ܬܪܺܝܨܳܐ ܠܥܶܪ̈ܒܶܐ ܡܶܢ ܓܕܰܝܴ̈ܐ. ܡܶܛܠ ܕܗܽܘ ܬܰܩܶܢ ܬܪܺܝܨܽܘܬܳܐ ܘܕܺܝܢܳܐ. ܘܠܐ ܡܚܰܒܶܠ ܐܰܝܠܝܢ ܕܰܐܬܩܶܢ. ܘܰܠܗܰܘ ܕܰܒܨܶܒܝܳܢܶܗ ܗܘܳܐ ܥܶܪܒܳܐ ܬܰܡܺܝܡܳܐ. ܠܐ ܥܳܒܶܕ ܠܶܗ ܓܰܕܝܳܐ ܓܽܘܡܕܳܢܳܐ. ܡܰܝܬܶܐ ܕܶܝܢ ܒܳܬܰܪ ܗܳܕܐ ܐܳܦ ܛܰܝܒܽܘܬܳܐ ܕܰܡܪܰܚܡܳܢܽܘܬܶܗ ܕܡܳܪܝܳܐ ܘܠܶܗ ܝܰܗܒ ܠܗ̇ ܠܙܰܕܺܝܩܽܘܬܳܐ ܕܰܥܒܰܕ ܬܶܓܡܳܐ ܕܰܓܡܺܝܪ̈ܶܐ ܟܕ ܐܡ̇ܪ.
ܙܰܕܺܝܩܽܘܬܳܐ ܒܝܰܥܩܽܘܒ ܐܰܢܬ ܥܒܰܕܬ. ܗܳܕܐ ܕܶܝܢ ܐܝ̣ܬܶܝܗ̇ ܕܰܐܝܟ ܙܢܳܐ ܠܡ ܕܗܰܘ ܕܶܝܢ ܕܰܐܠܶܦ ܚܛܺܝܬܳܐ ܒܳܬܪܶܗ ܚܳܝܪܳܐ ܡܰܪܫܽܘܬܳܐ ܟܕ ܡܩܰܒܠܺܝܢ ܡܣܳܡ ܒܪܺܝܫܳܐ ܐܦ ܐܰܝܠܶܝܢ ܕܺܝܠܶܦܘ ܡܶܢܶܗ ܘܰܚܛܰܘ. ܗܳܟܰܢܳܐ ܐܦ ܩܰܕܺܝ̈ܫܶܐ ܘܟܺܐܢ̈ܐ ܕܺܐܝܬܰܝܗܘܢ ܝܣܪܳܐܝܠ ܕܰܐܠܗܐ. ܐܰܢܬ ܐܰܠܶܦܬ ܐܶܢܘܢ ܙܰܕܺܝܩܽܘܬܳܐ ܘܥܠ ܗܳܕܐ ܐܰܢܬ ܥܒܰܕܬ ܒܗܽܘܢ ܙܰܕܺܝܩܽܘܬܳܐ ܘܕܺܝܠܳܟ ܗܺܝ ܛܰܝܒܽܘܬܳܐ ܩܰܕܡܳܝܬܳܐ ܘܰܐܚܪܳܝܬܳܐ ܘܗܳܝ ܕܰܐܠܶܦܬ ܐܽܘܪܚܳܐ ܕܚܰܝ̈ܐ. ܘܗܳܕܐ ܕܚܰܪܰܪܬ ܐܶܢܘܢ ܒܕܺܝܢܳܟ. ܘܒܳܬܰܪ ܗܳܠܝܢ ܡܰܠܶܦ ܢܒܺܝܐ ܠܰܐܝܠܶܝܢ ܕܶܐܬܚܰܪܰܪܘ ܡܶܢ ܕܺܝܢܳܐ. ܘܶܐܬܦܪܶܫܘ ܡܶܢ ܓܕܰܝܴ̈ܐ ܐܽܘܟܳܡܱ̈ܝ ܓܰܘܢܳܐ ܕܰܢܫܰܒܚܽܘܢ ܘܢܰܘܕܽܘܢ ܘܰܢܪܰܡܪܡܽܘܢ ܠܡܳܪܝܳܐ ܟܕ ܐܡ̇ܪ:
ܪܰܡܪܶܡܘ ܠܡܳܪܝܳܐ ܐܰܠܳܗܰܢ. ܘܰܣܓܽܘܕܘ ܠܟܽܘܒܫܳܐ ܕܪ̈ܶܓܠܰܘܗܝ. ܠܡܳܢܳܐ ܠܟܽܘܒܫܳܐ ܕܪ̈ܶܓܠܰܘܗܝ ܐܡ̇ܪ ܕܢܶܣܓܕܽܘܢ. ܕܰܐܝܟ ܗܳܟܰܢܳܐ ܓܝܪ ܐܝ̣ܬܰܘܗܝ ܐܝ̣ܩܳܪܳܐ ܕܡܰܠܟ̈ܐ ܕܰܠܟܽܘܒܫܳܐ ܕܪ̈ܶܓܠܰܝܗܘܢ ܣܳܓܕܺܝܢ ܡܫܰܥܒ̈ܕܶܐ ܕܡܰܠܟܽܘܬܗܽܘܢ. ܒܗܳܝ ܫܳܥܬܳܐ ܡܶܬܡܰܠܝܳܐ ܒܰܥܒܳܕܳܐ ܗܳܝ ܕܶܐܡܰܪ ܒܝܰܕ ܢܒܺܝܐ. ܕܚܰܝ ܐܢܳܐ ܐܳܡܰܪ ܡܳܪܝܳܐ ܕܠܝ ܬܶܟܽܘܦ ܟܽܠ ܒܽܘܪܟܳܐ ܘܠܺܝ ܢܰܘܕܶܐ ܟܽܠ ܠܶܫܳܢܳܐ (ܐܫܥܝܐ ܡܗ: ܟܓ). ܡܶܬܚܙܶܐ ܗܘܳܐ ܬܽܘܒ ܒܓܶܠܝܳܢܳܐ ܥܰܠ ܕܺܝܢܳܐ ܠܰܢܒܺܝܐ. ܐܦ ܕܰܪܓܳܐ ܪܳܡܳܐ ܕܟܽܘܡܪ̈ܶܐ ܩܰܕܺܝ̈ܫܶܐ ܘܪܰܘܪ̈ܒܶܐ ܕܰܗܘܰܘ ܒܥܰܡܳܐ ܟܕ ܚܙܳܐ ܡܥܰܠܝܽܘܬܗܽܘܢ ܘܺܐܝܩܳܪܗܘܢ. ܒܰܝܢܳܬ ܗܳܠܝܢ ܕܳܐܬܶܝܢ ܩܕܳܡ ܡܰܠܟܳܐ. ܙܰܡܰܪ ܘܶܐܡܰܪ:
ܩܰܕܺܝܫ ܗܽܘ ܡܽܘܫܶܐ ܘܰܐܗܪܽܘܢ ܒܟܽܘܡܪ̈ܰܘܗܝ ܘܰܫܡܽܘܐܝܠ ܒܩܳܪ̈ܝܰܝ ܫܡܶܗ. ܐܰܢܬ ܕܶܝܢ ܚܰܘܳܐ ܠܝ̣ ܒܡܶܠܬܶܗ ܕܰܢܒܺܝܐ. ܠܐ ܐܡ̣ܪ ܕܩܰܕܺܝܫܺܝܢ ܗܘܰܘ. ܐܠܐ ܕܩܰܕܺܝܫ ܗܽܘ ܡܽܘܫܶܐ ܘܰܐܗܪܽܘܢ ܗܳܕܐ ܓܝܪ ܡܚܰܘܝܳܐ ܥܰܠܗܳܝ ܕܳܐܦ ܩܰܕܺܝܫܺܝܢ ܗܘܰܘ ܠܥܳܠܰܡ. ܘܬܽܘܒ ܐܡ̣ܪ:
ܕܰܩܪܰܘ ܠܡܳܪܝܳܐ ܘܰܥܢܳܐ ܐܶܢܘܢ. ܘܰܒܥܰܡܽܘܕܳܐ ܕܰܥܢܳܢܳܐ ܡܰܠܶܠ ܥܰܡܗܽܘܢ. ܘܰܢܛܰܪܘ ܣܳܗܕܽܘܬܶܗ ܘܰܩܝܳܡܳܐ ܕܝܰܗܒ ܠܗܽܘܢ. ܡܳܪܝܳܐ ܐܰܠܳܗܰܢ ܐܰܢܬ ܥܢܰܝܬ ܐܶܢܽܘܢ. ܐܰܠܳܗܳܐ ܬܳܒܽܘܥܳܐ ܗܘܰܝܬ ܠܗܽܘܢ. ܦܪܽܘܥ ܐܶܢܘܢ ܐܰܝܟ ܥܒܳܕܰܝ̈ܗܽܘܢ. ܒܗܳܕܶܐ ܐܰܘܕܰܥ ܕܰܐܠܗܳܐ ܛܳܒ ܥܳܢܶܐ ܗܘܳܐ ܠܗܽܘܢ ܒܰܐܝܠܶܝܢ ܕܩܳܪܶܝܢ ܗܘܰܘ ܠܶܗ. ܘܠܘ ܣܪܺܝܩܳܐܝ̣ܬ ܫܳܡܰܥ ܗܘܳܐ ܠܗܽܘܢ. ܘܠܐ ܥܕܰܟܺܝܠ ܩܰܒܶܠܘ ܡܶܢ ܐܰܠܳܗܳܐ ܦܽܘܪ̈ܥܳܢܰܝܗܽܘܢ. ܐܠܘ ܓܝܪ ܡܩܰܒܶܠ ܗܘܳܐ ܠܗܽܘܢ ܦܽܘܪܥܳܢܳܐ. ܐܡ̇ܪ ܗܘܳܐ ܪܽܘܚܳܐ ܕܰܦܪܰܥ ܐܶܢܘܢ ܥܒܴ̈ܕܶܐ ܕܶܝܢ ܕܺܝܠܗܽܘܢ ܓܰܠܝܳܐܝ̣ܬ ܐܰܠܶܦ. ܕܠܐ ܕܶܝܢ ܥܕܰܟܺܝܠ ܩܰܒܶܠܘ ܡܽܘܠܟܳܢܳܐ ܓܡܺܝܪܳܐ. ܐܳܦ ܫܠܺܝܚܳܐ ܐܡ̣ܪ ܡܶܛܠܳܬܗܽܘܢ ܘܡܶܛܠ ܣܰܓܺܝ̈ܐܐ ܕܰܗܘܰܘ ܒܥܰܡܳܐ ܐܡ̣ܪ: ܕܰܐܚܪ̈ܳܢܶܐ ܐܶܬܟܪܶܟܘ ܟܰܕ ܠܒܺܝܫܺܝܢ ܡܶܫ̈ܟܶܐ ܕܶܐܡܪ̈ܶܐ ܘܰܕܥܷ̈ܙܶܐ ܘܰܣܢܺܝܩܺܝܢ ܘܰܐܠܺܝܨܺܝܢ ܘܰܡܛܰܪܦܺܝܢ. ܗܳܢܽܘܢ ܕܠܐ ܫܳܘܶܐ ܗܘܳܐ ܠܗܽܘܢ ܥܳܠܡܳܐ. ܘܰܗܘܰܘ ܐܝܟ ܛܳܥܰܝܴ̈ܐ ܒܚܽܘܪܒܳܐ ܘܰܒܛܽܘܪ̈ܶܐ ܘܒܰܡܥܰܪ̈ܶܐ ܘܰܒܦܶܥܪ̈ܶܝܗ̇ ܕܰܐܪܥܳܐ. ܗܳܠܝܢ ܠܰܡ ܟܽܠܗܽܘܢ ܕܰܗܘܳܬ ܥܠܰܝܗܽܘܢ ܣܳܗܕܽܘܬܳܐ ܒܗܰܝܡܳܢܽܘܬܗܽܘܢ ܘܠܳܐ ܩܰܒܶܠܘ ܡܽܘܠܟܳܢܳܐ ܡܶܛܠ ܕܰܐܠܗܳܐ ܩܰܕܶܡ ܚܳܪ ܒܥܽܘܕܪܳܢܰܢ ܕܺܝܠܰܢ ܕܠܐ ܒܶܠܥܳܕܰܝܢ ܢܶܬܓܰܡܪܽܘܢ (ܥܒܪ̈ܝܐ ܝܐ: ܠܙ-ܡ). ܐܳܦ ܛܽܘܒܬܳܢܳܐ ܕܰܘܝܕ ܗܳܢܐ ܪܶܥܝܳܢܳܐ ܐܰܠܶܦ ܥܰܠ ܡܽܘܫܶܐ ܘܰܐܗܪܽܘܢ ܘܰܫܡܽܘܐܝ̣ܠ ܘܡܶܛܠܗܳܕܐ ܐܰܝܬܺܝ ܐܶܢܘܢ ܒܬܶܫܒܽܘܚܬܳܐ ܗܳܕܐ ܕܰܐܘܕܰܥ ܒܗ̇ ܥܰܠ ܕܺܝܢܳܐ. ܘܨܰܠܺܝ ܥܠܰܝܗܽܘܢ ܕܢܶܦܪܽܘܥ ܐܶܢܘܢ ܐܰܠܗܳܐ ܥܒܳܕܰܝ̈ܗܽܘܢ. ܘܡܶܢ ܒܳܬܰܪܟܶܢ ܨܳܒܶܐ ܡܙܰܡܪܳܢܳܐ ܕܢܰܠܶܦ.
ܪܰܡܪܶܡܘ ܠܡܳܪܝܳܐ ܐܰܠܳܗܰܢ ܘܰܣܓܽܘܕܘ ܠܛܽܘܪܶܗ ܩܰܕܺܝܫܳܐ. ܡܶܛܠ ܕܩܰܕܺܝܫ ܗܽܘ ܡܳܪܝܳܐ ܐܰܠܳܗܰܢ. ܘܡܳܐ ܕܶܝܢ ܕܩܳܡ ܡܶܢ ܕܺܝܢܳܐ ܠܚܰܪܬܳܐ ܘܰܣܠܶܩ ܠܰܐܬܪܶܗ ܠܰܫܡܰܝܳܐ. ܗܳܝܕܶܝܢ ܡܶܬܦܰܬܶܐ ܘܝܳܪܶܒ ܒܥܰܝ̈ܢܰܝ ܩܰܕܺܝ̈ܫܰܘܗܝ. ܘܰܡܟܰܣܶܐ ܘܰܡܣܰܬܰܪ ܢܰܦܫܶܗ ܡܶܢ ܚܙܳܬܳܐ ܕܟܽܠܗܽܘܢ ܥܒܺܝ̈ܕܶܐ. ܘܰܐܝܟ ܕܰܒܛܽܘܪܳܐ ܡܰܫܪܶܐ ܫܽܘܒܚܶܗ. ܘܡܶܢ ܪܺܝܫܶܗ ܕܛܽܘܪܳܐ ܡܰܫܡܰܥ ܠܗܽܘܢ ܩܳܠܶܗ. ܛܽܘܪܳܐ ܗܳܢܐ ܐܝ̣ܬܰܘܗܝ ܗܰܘ ܕܒܰܢܝܳܐ ܥܠܰܘܗܝ ܐܽܘܪܺܫܠܶܡ ܡܕܺܝܢܬܳܐ ܥܶܠܳܝܬܳܐ. ܘܰܠܗܳܢܳܐ ܛܽܘܪܳܐ ܡܰܢ ܡܥܰܠܝܳܐ ܘܳܠܶܐ ܕܢܶܣܓܕܽܘܢ ܟܽܠܗܽܘܢ ܩܰܕܺܝ̈ܫܶܐ. ܟܕ ܡܶܬܥܰܠܶܝܢ ܒܪ̈ܰܘܡܶܐ ܕܡܰܣ̈ܩܳܢܶܐ ܕܺܝܠܶܗ. ܘܟܰܕ ܐܝܟ ܪܰܘܡܳܐ ܕܛܽܘܪܳܐ ܠܳܐ ܡܶܬܡܫܰܚ ܘܠܳܐ ܡܶܬܚܙܶܐ ܪܺܝܫܶܗ. ܡܥܰܠܶܝܢ ܚܰܘܪ̈ܰܝܗܽܘܢ ܟܕ ܝܳܕܥܺܝܢ ܕܛܽܘܪܳܐ ܩܰܕܺܝܫ. ܡܶܛܠ ܕܰܠܥܶܠ ܡܶܢ ܪܺܝܫܶܗ ܡܶܫܬܰܒܰܚ ܐܠܗܐ. ܘܠܗ ܢܩܰܪܒܽܘܢ ܣܶܓܕܬܳܐ ܘܪܽܘܡܪܳܡܳܐ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܗܳܫܐ ܘܰܠܥܳܠܰܡܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ
ܡܰܘܕܰܥ ܥܰܠ ܦܽܘܠܚܳܢܳܐ ܕܰܒܝܰܕ ܚܺܐܪܽܘܬܳܐ ܘܰܕܡܶܢ ܗܳܝ ܕܢܶܦܠܰܚ ܐܢܳܫ ܥܰܡ ܐܰܠܳܗܳܐ ܒܚܰܕܽܘܬܳܐ ܥܳܐܶܠ ܒܬܰܪ̈ܥܶܐ ܪ̈ܽܘܚܳܢܶܐ ܠܕܳܪ̈ܳܬܳܐ ܩܰܕܝ̈ܫܳܬܳܐ ܕܰܐܠܳܗܽܘܬܳܐ.
ܦܽܘܠܚܳܢܳܐ ܕܰܡܝܰܬܪܽܘܬܳܐ ܗܰܘ ܕܒܶܗ ܡܶܬܩܰܪܰܒ ܐܢܳܫ ܠܒܰܝܬܳܝܽܘܬܳܐ ܕܥܰܡ ܐܠܗܐ. ܠܰܬܠܳܬܳܐ ܦܽܘܪ̈ܫܳܢܺܝܢ ܡܶܬܦܰܠܰܓ. ܘܟܽܠ ܚܰܕ ܡܶܢܗܘܢ ܕܦܽܘܪ̈ܫܳܢܶܐ ܫܽܘܚܠܳܦܳܐ ܣܰܓܺܝܐܳܐ ܡܫܰܘܕܰܥ. ܡܳܐ ܓܝܪ ܕܰܡܫܰܪܶܐ ܐܢܳܫ ܠܡܶܦܠܰܚ ܡܶܢ ܛܶܟܣܳܐ ܡܶܕܶܡ ܕܰܐܓܺܝܪܽܘܬܳܐ ܫܳܩܶܠ ܛܽܘܦܣܳܐ ܟܕ ܩܳܪܶܒ ܠܒܰܝܬܳܝܽܘܬܳܐ ܕܰܐܠܗܳܐ ܐܝܟ ܓܰܒܪܳܐ ܐܰܓܺܝܪܳܐ. ܕܡܶܛܠ ܐܰܓܪܳܐ ܡܶܕܶܡ ܡܰܫܠܶܡ ܢܰܦܫܶܗ ܠܦܽܘܠܚܳܢܳܐ ܕܢܶܣܰܒ ܡܶܢ ܐܠܗܳܐ ܐܰܝܠܶܝܢ ܕܶܐܫܬܰܘܕܺܝ ܠܶܗ. ܘܗܳܢܐ ܠܘ ܒܪܶܚܡܬܳܐ ܘܰܒܚܰܕܽܘܬܳܐ ܦܠܰܚ ܥܡ ܐܰܠܗܳܐ. ܐܠܐ ܡܶܛܠ ܐܰܓܪܳܐ. ܕܰܐܝܟ ܗܳܟܰܢܳܐ ܗܘܳܐ ܦܽܘܠܚܳܢܳܐ ܕܦܳܥ̈ܠܐܷ ܗܳܢܘܢ ܕܰܐܓܰܪ ܡܰܠܟܳܐ ܠܟܰܪܡܶܗ ܒܨܰܦܪܳܐ ܕܚܰܕ ܡܶܢ ܗܳܠܝܢ ܕܡܳܐ ܕܺܐܝܬܰܘܗܝ ܗܘܳܐ ܐܰܒܪܳܗܳܡ ܒܫܽܘܪܳܝܳܐ ܕܦܽܘܠܚܳܢܶܗ. ܟܕ ܫܳܡܥܺܝܢܰܢ ܠܐܠܗܐ ܕܳܐܡܰܪ ܠܗ܆ ܠܐ ܬܶܕܚܰܠ ܐܰܒܪܰܡ. ܐܶܢܳܐ ܐܶܣܰܝܥܳܟ. ܘܰܐܓܪܳܟ ܛܳܒ ܣܰܓܺܝ (ܒܪܝܬܐ ܝܗ: ܐ). ܟܰܕ ܕܶܝܢ ܠܳܐ ܥܕܰܟܺܝܠ ܐܶܬܥܰܠܺܝ ܗܘܳܐ ܐܰܒܪܳܗܳܡ ܡܶܢ ܦܽܘܠܚܳܢܳܐ ܕܰܐܓܺܝܪܽܘܬܳܐ܆ ܦܰܢܺܝ ܠܘܳܬ ܐܰܠܗܳܐ ܘܶܐܡܰܪ: ܡܳܪܝܳܐ ܐܰܠܗܳܐ ܡܳܢܳܐ ܬܶܬܶܠ ܠܺܝ܆ ܕܗܳܐ ܐܶܢܳܐ ܐܳܙܶܠ ܐܢܳܐ ܕܠܳܐ ܒܢܰܝܴ̈ܐ. ܘܶܐܠܺܝܥܳܙܳܪ ܕܰܪܡܽܘܣܩܳܝܳܐ ܒܰܪ ܒܰܝܬܝ ܗܽܘ ܝܳܪܶܬ ܠܺܝ. ܘܶܐܡܰܪ ܠܶܗ ܡܳܪܝܳܐ ܠܳܐ ܢܺܐܪܬܳܟ ܗܳܢܐ. ܐܠܐ ܒܪܳܟ ܕܢܳܦܶܩ ܡܶܢ ܚܰܨܳܟ ܗܽܘ ܢܺܐܪܬܳܟ (ܒܪܝܬܐ ܝܗ: ܒ-ܕ). ܘܒܳܬܰܪܟܶܢ ܐܰܘܠܶܕ ܡܶܢ ܗܳܓܳܪ ܐܰܡܬܳܐ ܠܐܺܫܡܳܥܺܝܠ. ܡܶܬܥܰܠܐܷ ܗܘܳܐ ܓܝܪ ܡܶܢ ܐܰܓܺܝܪܽܘܬܳܐ ܘܰܦܠܰܚ ܐܝܟ ܥܰܒܕܳܐ. ܡܶܛܠܗܳܢܐ ܒܗܰܘ ܙܰܒܢܳܐ ܕܰܐܪܓܶܫ ܒܕܶܚܠܬܳܐ ܕܡܳܪܶܗ܆ ܘܙܳܥ ܡܶܢܶܗ ܐܝܟ ܥܰܒܕܳܐ ܕܰܒܕܶܚܠܬܳܐ ܘܒܰܪܬܺܝܬܳܐ ܦܳܠܰܚ ܥܡ ܡܳܪܶܗ܆ ܡܶܢ ܐܰܡܬܳܐ ܐܰܘܠܶܕ ܒܪܳܐ ܘܡܶܢ ܒܳܬܰܪ ܬܘܒ ܕܡܰܠܺܝ ܦܽܘܠܚܳܢܳܐ ܕܥܰܒܕܽܘܬܳܐ. ܬܘܒ ܡܶܬܥܰܠܶܐ ܗܘܳܐ ܠܦܽܘܠܚܳܢܳܐ ܕܰܡܥܰܠܰܝ ܡܶܢ ܗܰܘ ܕܰܡܫܰܥܒ̈ܕܶܐ. ܘܥܰܠܗܳܕܐ ܐܶܬܦܩܶܕ ܗܘܳܐ ܕܢܶܓܙܽܘܪ ܒܶܣܪܳܐ ܕܥܽܘܪܠܽܘܬܶܗ. ܘܗܳܝܕܝܢ ܡܳܐ ܕܰܫܠܰܚ ܘܰܫܕܳܐ ܡܶܢܶܗ ܫܽܘܘܕܳܥܳܐ ܕܒܰܪܢܳܫܳܐ ܥܰܬܺܝܩܳܐ. ܢܣܰܒ ܥܠܰܘܗܝ ܦܽܘܠܚܳܢܳܐ ܓܡܺܝܪܳܐ ܘܦܰܐܝܳܐ ܕܚܺܐܪܽܘܬܳܐ ܕܺܐܝܬܰܘܗܝ ܚܰܕܽܘܬܳܐ ܕܰܒܡܳܪܰܢ. ܗܰܘ ܕܠܘ ܐܝܟ ܐܰܓܺܝܪܳܐ ܡܶܛܠ ܐܰܓܪܳܐ. ܘܠܰܘ ܐܝܟ ܥܰܒܕܳܐ ܡܶܢ ܕܶܚܠܬܳܐ ܕܫܽܘܢܳܩܳܐ ܦܠܰܚ ܥܰܡ ܐܰܠܗܳܐ. ܐܠܐ ܒܡܰܪܓܫܳܢܽܘܬܳܐ ܕܢܰܦܫܳܐ ܒܰܪܬ ܚܺܐܪ̈ܶܐ. ܗܳܝ ܕܦܳܠܚܳܐ ܥܰܡ ܐܰܠܗܳܐ ܒܚܰܕܽܘܬܳܐ. ܡܶܛܠ ܗܳܢܐ ܐܶܬܡܰܛܺܝ ܠܕܰܪܓܳܐ ܗܳܢܐ ܬܠܺܝܬܳܝܳܐ ܕܦܽܘܠܚܳܢܳܐ. ܛܽܘܒܬܳܢܳܐ ܐܰܒܪܳܗܳܡ ܩܰܒܶܠ ܡܽܘܠܟܳܢܳܐ ܡܶܢ ܓܙܽܘܪܬܳܐ ܕܚܺܐܪܽܘܬܳܐ. ܕܡܰܘܕܥܳܐ ܗܘܳܬ ܐܪܳܙܳܐ ܕܣܺܝܡܰܬ ܒܢܰܝܴ̈ܐ. ܕܢܰܘܠܶܕ ܠܐܝ̣ܣܚܳܩ ܚܰܕܽܘܬܳܐ ܡܶܢ ܒܰܪܬ ܚܺܐܪ̈ܶܐ. ܗܳܟܰܢܳܐ ܓܶܝܪ ܐܶܡܪܰܬ ܣܰܪܳܐ ܟܰܕ ܝܶܠܕܰܬ ܠܐܝ̣ܣܚܳܩ. ܚܰܕܽܘܬܳܐ ܪܰܒܬܳܐ ܥܒܰܕ ܠܺܝ ܐܰܠܗܳܐ ܘܟܠ ܓܝܪ ܕܫܳܡܰܥ ܢܶܚܕܶܐ ܠܺܝ. ܡܶܛܠܗܳܢܐ ܦܽܘܠܚܳܢܳܐ ܡܰܙܡܽܘܪܳܐ ܗܳܢܐ ܐܶܬܡܰܠܰܠ ܡܶܢ ܛܽܘܒܬܳܢܐ ܕܰܘܝܕ ܕܺܐܝܬܰܘܗܝ ܕܡܳܐܐ. ܐܦ ܐܰܒܪܳܗܳܡ ܬܘܒ ܒܗܳܢܐ ܡܶܢܝܳܢܳܐ ܕܡܳܐܐ ܫ̈ܢܺܝܢ ܩܳܐܷܡ ܗܘܳܐ. ܟܰܕ ܩܰܒܶܠ ܡܽܘܠܟܳܢܳܐ ܕܚܺܐܪܽܘܬܳܐ ܘܰܒܓܰܘ ܒܰܝܬܶܗ ܕܪܺܝܫ ܐܰܒܳܗܴ̈ܬܳܐ ܐܰܒܪܗܳܡ ܡܶܫܬܡܰܥ ܗܘܳܐ ܩܳܠܐܴ ܡܶܢ ܣܰܪܳܐ ܒܰܪܬ ܚܺܐܪ̈ܶܐ ܕܚܰܕܽܘܬܳܐ ܪܰܒܬܳܐ ܥܒܰܕ ܠܺܝ ܐܰܠܗܳܐ ܝܰܘܡܳܢܳܐ (ܒܪܝܬܐ ܟܐ: ܘ). ܘܗܳܐ ܕܰܘܝܕ ܝܰܘܡܳܢܳܐ ܒܡܰܙܡܽܘܪܳܐ ܓܡܺܝܪܳܐ ܕܡܳܐܐ ܙܰܡܰܪ ܘܶܐܡܰܪ:
ܕܫܰܒܰܚܘ ܠܡܳܪܝܳܐ ܟܽܠܗ̇ ܐܰܪܥܳܐ. ܦܠܽܘܚܘ ܠܡܳܪܝܳܐ ܒܚܰܕܽܘܬܳܐ. ܗܳܐ ܦܽܘܠܚܳܢܳܐ ܡܶܢ ܫܽܘܒܚܳܐ ܡܫܰܪܶܐ ܠܘܳܬ ܐܰܠܗܳܐ ܓܶܝܪ ܟܽܠܶܗ ܦܽܘܠܚܳܢܳܐ ܕܩܰܕܺܝ̈ܫܶܐ ܫܽܘܒܚܰܐ ܗ̄ܘ ܥܽܘܠܘ ܩܕܳܡ ܡܳܪܝܳܐ ܘܰܦܠܽܘܚܘ ܠܶܗ ܒܚܰܕܽܘܬܳܐ. ܘܶܐܡܰܬܝ ܐܶܬܓܠܺܝ ܗܳܢܐ ܦܽܘܠܚܳܢܳܐ ܥܰܠ ܐܰܪܥܳܐ. ܒܗܰܘ ܙܰܒܢܳܐ ܕܢܶܦܩܰܬ ܒܶܗ ܣܒܰܪܬܳܐ ܕܟܳܪܽܘܙܽܘܬܳܐ ܕܰܫܠܺܝ̈ܚܶܐ. ܟܕ ܢܶܦܠܰܬ ܐܽܘܪܺܫܠܶܡ ܥܰܬܺܝܩܬܳܐ ܡܶܛܠ ܕܨܶܠܒܰܬ ܠܡܳܪܳܗ̇ ܕܬܶܫܒܽܘܚܬܳܐ. ܐܶܬܚܰܙܝܰܬ ܐܽܘܪܺܫܠܶܡ ܗܳܝ ܥܶܠܳܝܬܳܐ ܒܰܪܬ ܚܺܐܪ̈ܶܐ ܕܺܐܝܬܶܝܗ̇ ܐܶܡܰܢ. ܡܶܛܠܗܳܕܐ ܩܳܥܶܐ ܗܘܳܐ ܒܪܳܗ̇ ܕܒܰܪܬ ܚܺܐܪ̈ܶܐ ܦܰܘܠܽܘܣ ܠܘܳܬ ܦܺܝܠܺܝܦܳܣܳܝ̈ܐ ܕܚܳܕܶܐ ܐܢܳܐ ܘܪܳܘܶܙ ܐܢܳܐ ܥܰܡ ܟܽܠܟܽܘܢ. ܗܳܟܰܢܳܐ ܐܳܦ ܐܰܢܬܽܘܢ ܚܕܰܘ ܘܰܪܘܰܙܘ ܥܰܡܝ (ܦܝ̈ܠܝܦܣܝܐ ܒ: ܝܙ-ܝܚ). ܘܬܘܒ ܚܕܰܘ ܘܰܪܘܰܙܘ ܒܡܳܪܰܢ ܒܟܽܠܙܒܰܢ (ܦܝ̈ܠܝܦܣܝܐ ܕ: ܕ). ܗܳܠܶܝܢ ܓܝܪ ܩܴ̈ܠܐ ܠܳܐ ܠܰܐܓܺܝܪ̈ܶܐ ܘܠܳܐ ܠܥܰܒ̈ܕܶܐ ܐܶܬܟܬܶܒܘ. ܐܠܐ ܠܰܒܢܰܝܴ̈ܐ ܚܰܒܺܝ̈ܒܶܐ ܘܰܪ̈ܚܺܝܡܶܐ ܕܦܳܠܚܺܝܢ ܒܒܰܝܬܳܐ ܕܰܐܒܽܘܗܽܘܢ ܒܚܰܕܽܘܬܳܐ. ܡܶܛܠ ܕܰܒܢܰܝܴ̈ܐ ܠܰܘ ܒܰܐܓܪܳܐ ܦܳܠܚܺܝܢ ܒܒܰܝܬܳܐ ܕܰܐܒܽܘܗܽܘܢ. ܐܶܠܐ ܟܕ ܚܳܝܪܺܝܢ ܠܦܽܘܠܚܳܢܳܐ ܘܶܐܢ ܡܣܰܟܶܝܢ ܐܰܒܳܐ ܘܰܡܚܰܡܣܢܺܝܢ ܘܰܡܝܰܩܪܺܝܢ ܠܗ. ܘܛܳܥܢܺܝܢ ܥܰܣܩܽܘܬܶܗ. ܒܗܳܢܐ ܦܽܘܠܚܳܢܳܐ ܕܰܒܢܰܝܴ̈ܐ ܕܚܺܐܪܽܘܬܳܐ ܦܳܩܶܕ ܠܰܢ ܪܽܘܚܳܐ ܝܰܘܡܳܢܳܐ ܒܡܰܙܡܽܘܪܳܐ ܗܳܢܐ ܕܡܳܐܐ ܢܶܬܝܰܬܰܪ. ܘܡܳܐ ܕܰܒܗܳܢܳܐ ܕܠܐ ܡܰܐܝܢܽܘܬܳܐ ܩܳܡܢܰܢ ܗܳܝܕܶܝܢ ܡܰܦܶܣ ܠܰܐܝܠܝܢ ܕܰܦܠܰܚܘ ܠܡܳܪܝܳܐ ܒܚܰܕܽܘܬܳܐ ܐܰܝܟܰܢܳܐ ܕܢܶܥܠܽܘܢ ܩܕܳܡܰܘܗܝ ܒܬܶܫܒܽܘܚܬܳܐ.
ܥܽܘܠܘ ܠܰܡ ܩܕܳܡܰܘܗܝ ܒܬܫܒܘܚܬܐ. ܐܶܢ ܦܳܠܚܺܝܬܽܘܢ ܠܡܳܪܝܳܐ ܒܚܰܕܽܘܬܳܐ ܘܶܐܢ ܒܗܳܢܳܐ ܦܽܘܠܚܳܢܳܐ ܠܐ ܡܨܶܝܢ ܐܰܢܬܽܘܢ ܕܬܶܦܠܚܽܘܢ. ܘܠܐ ܠܘܳܬ ܬܰܪܥܶܗ ܬܰܡܪܚܽܘܢ ܕܬܶܬܩܰܪܒܽܘܢ. ܐܢ ܕܶܝܢ ܬܶܦܠܚܽܘܢ ܣܰܒܘ ܥܠܰܝܟܽܘܢ ܝܕܰܥܬܳܐ ܕܰܐܠܗܐ.
ܘܕܰܥܘ ܕܗܽܘܝܽܘ ܡܳܪܝܳܐ ܐܰܠܳܗܰܢ. ܘܗܽܘܝܽܘ ܥܰܒܕܰܢ ܘܠܐ ܗܘܳܐ ܚܢܰܢ. ܘܰܕܠܰܘ ܡܶܢ ܢܰܦܫܶܗ ܐܠܐ ܡܶܢ ܛܰܝܒܽܘܬܶܗ ܘܰܚܢܰܢ ܒܪ̈ܰܚܡܶܐ ܗܘܰܝܢܰܢ ܕܺܝܠܶܗ ܘܥܳܢܴ̈ܐ ܕܡܰܪܥܺܝܬܶܗ ܚܢܰܢ ܕܶܝܢ ܥܰܡܳܐ ܘܡܰܪܥܺܝܬܳܐ. ܘܗܽܘ ܡܰܠܟܳܐ ܘܡܳܪܳܐ ܘܰܡܕܰܒܪܳܢܳܐ ܘܰܐܠܗܳܐ. ܘܪܳܥܝܳܐ ܫܰܪܺܝܪܳܐ. ܡܳܐ ܕܶܝܢ ܕܰܒܚܽܘ̈ܫܳܒܶܐ ܡܰܟܺܝ̈ܟܶܐ ܕܕܰܐܝܟ ܗܳܠܝܢ ܩܳܝܡܺܝܢ ܒܢܰܝܴ̈ܐ. ܘܦܽܘܠܚܳܢܳܐ ܕܕܰܐܝܟ ܗܳܢܐ ܡܚܰܘܶܝܢ ܒܰܡܝܰܬܪ̈ܳܬܳܐ. ܘܝܳܕܥܺܝܢ ܢܰܦܫܗܽܘܢ ܐܝܟ ܥܶܪ̈ܒܶܐ ܕܠܐܴ ܡܶܠܬܳܐ. ܒܰܐܠܗܳܐ ܕܶܝܢ ܡܶܣܬܰܟܠܺܝܢ ܕܣܰܓܺܝ ܡܥܰܠܰܝ ܡܶܢ ܟܝܳܢܳܐ ܕܟܽܠܗܽܘܢ ܡܠܺܝ̈ܠܶܐ. ܐܝܟ ܪܳܥܝܳܐ ܡܶܢ ܥܶܪ̈ܒܶܐ ܦܳܩܶܕ ܠܗܽܘܢ ܪܽܘܚܳܐ ܘܳܐܡܰܪ:
ܥܽܘܠܘ ܒܬܰܪ̈ܥܰܘܗܝ ܒܬܰܘܕܺܝܬܳܐ ܐܳܦ ܠܕܳܪ̈ܰܘܗܝ ܒܫܽܘܒܚܳܐ. ܫܘܶܝܢ ܐܰܢܬܽܘܢ ܡܶܛܠ ܕܰܗܘܰܝܬܽܘܢ ܥܳܢܴ̈ܐ ܬܰܡܺܝ̈ܡܳܬܳܐ. ܬܰܪ̈ܥܶܐ ܗܳܠܝܢ ܐܰܠܳܗܳܝ̈ܐ ܡܣܰܟܠܺܝܢ ܐܝ̣ܬܶܝܗ̇ ܗܰܝܡܳܢܽܘܬܳܐ. ܬܰܪܥܳܐ ܐܚܪܺܢܳܐ ܣܰܒܪܳܐ. ܬܰܪܥܳܐ ܬܘܒ ܕܰܬܠܳܬܳܐ ܚܽܘܒܳܐ. ܒܳܬܰܪ ܗܳܠܝܢ ܡܰܟܺܝܟܽܘܬܳܐ. ܒܰܣܺܝܡܽܘܬܳܐ. ܛܳܒܽܘܬܳܐ. ܢܰܟܦܽܘܬܳܐ. ܩܰܕܺܝܫܽܘܬܳܐ. ܕܰܟܝܽܘܬܳܐ. ܙܰܗܝܽܘܬܳܐ. ܡܰܠܦܳܢܽܘܬܳܐ. ܘܟܽܠ ܕܰܠܗܳܠܝܢ ܕܳܡܶܝ̈ܢ. ܗܳܠܝܢ ܐܶܢܘܢ ܬܰܪ̈ܥܶܐ ܕܡܰܥܠܺܝܢ ܠܳܗ̇ ܠܥܳܢܴ̈ܐ ܕܒܶܝܬ ܦܶܛܪܽܘܣ ܠܕܳܪ̈ܳܬܶܗ ܕܡܳܪܳܗ̇. ܘܟܽܠ ܕܰܒܗܳܠܝܢ ܬܰܪ̈ܥܶܐ ܠܐ ܩܳܐܷܡ ܠܐ ܡܶܫܟܰܚ ܠܡܶܥܰܠ ܒܗܳܠܝܢ ܕܳܪ̈ܳܬܳܐ ܩܰܕܺܝ̈ܫܳܬܳܐ ܠܘܳܬ ܡܰܠܟܳܐ ܡܳܪܝܳܐ. ܐܶܢܕܶܝܢ ܠܗܳܠܝܢ ܫܽܘܘ̈ܕܳܥܶܐ ܢܳܣܶܒ ܥܠܰܘܗܝ ܗܰܘ ܕܩܳܪܶܒ ܠܡܶܥܰܠ. ܡܩܰܒܶܠ ܠܶܗ ܥܽܘܒܳܐ ܕܡܰܠܟܽܘܬܳܐ ܘܥܳܐܷܠ ܡܶܫܟܰܚ ܚܠܳܦ ܕܳܪ̈ܳܬܳܐ ܗܳܠܝܢ ܐܰܘܳܢ̈ܐ ܕܶܐܡܰܪ ܡܫܺܝܚܳܐ ܕܺܐܝܬ ܒܶܝܬ ܐܰܒܽܘܗܝ. ܕܗܶܢܘܢ ܐܶܢܘܢ ܕܳܪ̈ܳܬܳܐ ܘܰܐܘܳܢ̈ܐ ܘܟܰܘܷ̈ܐ. ܕܳܪ̈ܳܬܳܐ ܡܰܢ ܠܣܰܓܺܝܐܽܘܬ ܟܶܢ̈ܫܶܐ ܕܰܒܢܱ̈ܝ ܡܰܠܟܽܘܬܳܐ. ܐܰܘܳܢ̈ܐ ܕܶܝܢ ܠܰܫܠܺܝ̈ܚܶܐ. ܬܘܒ ܟܰܘܷ̈ܐ ܠܝܰܘ̈ܢܶܐ ܬܰܡܺܝ̈ܡܳܬܳܐ. ܕܡܳܐ ܕܶܐܬܦܬܰܚܘ ܬܰܪ̈ܥܶܐ ܗܳܠܝܢ ܕܡܰܥܠܺܝܢ ܠܕܳܪ̈ܳܬܳܐ. ܘܶܐܬܓܠܺܝ ܫܽܘܦܪܳܐ ܕܰܐܘܳܢ̈ܐ ܕܒܶܝܬ ܐܰܒܳܐ. ܘܥܰܡ ܗܳܠܝܢ ܐܶܬܚܰܙܝܰܬ ܦܰܐܝܽܘܬܳܐ ܕܟܰܘܷ̈ܐ ܗܝ ܕܰܡܩܰܒܠܳܐ ܠܝܰܘ̈ܢܶܐ. ܘܥܰܠܘ ܟܶܢ̈ܫܶܐ ܩܳܡܘ ܒܡܰܠܟܽܘܬܳܐ ܥܶܠܳܝܬܳܐ ܟܕ ܫܳܡܥܺܝܢ ܠܪܽܘܚܳܐ ܕܳܐܡܰܪ ܠܗܽܘܢ.
ܐܰܘܕܰܘ ܠܶܗ ܘܒܰܪܶܟܘ ܠܰܫܡܶܗ. ܡܶܛܠ ܕܛܳܒ ܗܽܘ ܡܳܪܝܳܐ ܘܰܠܥܳܠܰܡ ܛܰܝܒܽܘܬܶܗ. ܘܰܠܕܳܪܕܳܪ̈ܺܝܢ ܗܰܝܡܳܢܽܘܬܶܗ. ܥܕܰܡܳܐ ܠܗܳܪܟܐ ܛܰܝܒܽܘܬܶܗ ܕܰܒܪܰܬ. ܗܳܫܐ ܕܶܝܢ ܗܰܝܡܳܢܽܘܬܶܗ ܢܳܨܚܳܐ ܘܡܶܬܩܰܠܣܳܐ. ܘܗܺܝ ܡܰܘܪܒܳܐ ܠܩܰܕܺܝ̈ܫܶܐ ܒܚܰܝܷ̈ܐ ܕܠܐ ܫܽܘܠܳܡܳܐ ܕܠܶܗ ܝܳܐܷܐ ܫܽܘܒܚܳܐ ܘܩܽܘܠܳܣܳܐ ܘܗܶܕܪܳܐ ܘܦܰܐܝܽܘܬܳܐ ܘܬܰܘܕܺܝܬܳܐ ܠܥܳܠܡܰܝ̈ܥܳܠܡܶܐ ܐܰܡܺܝܢ.
ܡܐܡܘܐܪ ܕܡܐܐ ܘܚܕ
ܘܺܐܝܬܰܘܗܝ ܟܬܳܒܳܐ ܕܰܬܠܳܬܳܐ
ܕܡܰܘܕܰܥ ܥܰܠ ܛܰܝܒܽܘܬܳܐ: ܘܥܰܠ ܕܺܝܢܳܐ: ܘܥܰܠ ܕܽܘܒܳܪܳܐ ܕܩܰܕܺܝ̈ܫܶܐ: ܘܥܰܠ ܕܰܒܕܶܢܚܶܗ ܕܰܡܫܺܝܚܳܐ ܡܶܫܬܰܬܩܺܝܢ ܡܶܢ ܢܰܦ̈ܫܳܬܳܐ ܙܰܘ̈ܥܶܐ ܕܰܚܛܺܝܬܳܐ ܘܰܕܥܶܬܳܐ.
ܐܰܝܠܶܝܢ ܕܶܐܬܕܪܶܫܘ ܢܰܦ̈ܫܳܬܗܘܢ ܘܚܽܘ̈ܫܳܒܶܐ ܢܰܗܺܝܪ̈ܶܐ܆ ܕܡܰܕܥܰܝ̈ܗܘܢ ܒܩܶܪܝܳܢܳܐ ܕܦܽܘ̈ܫܳܩܶܐ ܕܗܳܠܝܢ ܬܪܶܝܢ ܟܬܳܒ̈ܐ ܕܶܐܬܥܒܶܕܘ ܡܶܢ ܒܨܺܝܪܽܘܬܰܢ܆ ܠܘܳܬ ܪܶܚܡܰܬ ܐܰܠܗܳܐ ܕܒܳܟ ܐܳܘ ܐܰܒܽܘܢ ܩܰܕܺܝܫܳܐ. ܥܰܠ ܟܬܳܒܳܐ ܕܡܰܙܡܽܘܪ̈ܶܐ. ܢܶܩܪܒܽܘܢ ܐܳܦ ܗܳܫܐ ܠܥܰܡܠܳܐ ܕܩܶܪܝܳܢܶܗ ܕܰܟܬܳܒܳܐ ܗܳܢܐ ܕܰܬܠܳܬܳܐ ܐܶܢܕܶܝܢ ܒܗܳܠܝܢ ܠܐ ܐܶܣܬܰܟܰܠܘ ܘܠܳܐ ܒܗܳܢܳܐ ܡܶܬܕܰܪܫܺܝܢ. ܟܡܳܐ ܕܶܝܢ ܙܰܒܢ̈ܝ̣ܢ ܗܳܘܶܝܢ ܥܺܝܪ̈ܶܐ ܘܰܡܛܰܝ̈ܒܶܐ. ܚܢܰܢ ܕܶܝܢ ܟܕ ܥܰܠ ܥܽܘܕܪܳܢܳܐ ܕܰܨܠܽܘܬܳܟ ܬܟܺܝܠܺܝܢܰܢ ܕܡܶܢ ܠܘܳܬܰܢ ܠܐ ܦܳܐܷܫ. ܬܘܒ ܡܢܰܣܶܝܢܰܢ ܠܡܶܪܕܳܐ ܬܠܺܝܬܳܐܝ̣ܬ ܒܽܐܘܪܚܳܐ ܕܦܽܘܫܳܩܳܐ ܕܬܶܫܒ̈ܚܳܬܶܗ ܕܰܡܙܰܡܪܳܢܳܐ ܟܕ ܩܳܪܶܝܢܰܢ ܠܰܐܠܗܳܐ ܕܢܶܗܘܶܐ ܠܰܢ ܐܺܝܳܠܳܐ. ܘܢܶܪܕܶܐ ܥܰܡܰܢ ܘܰܢܚܰܟܶܡ ܠܰܢ. ܘܢܶܬܶܠ ܠܢ ܡܶܠܬܳܐ ܒܡܰܦܬܰܚ ܦܽܘܡܳܐ ܠܰܡܡܰܠܳܠܽܘ ܘܰܠܡܰܟܬܳܒܘ ܘܠܰܡܢܰܗܳܪܽܘ ܘܠܰܡܦܰܫܳܩܽܘ ܥܰܡܺܝ̈ܩܳܬܳܐ ܘܣܽܘ̈ܟܳܠܶܐ ܐܰܠܳܗܳܝ̈ܐ ܐܰܝܠܶܝܢ ܕܰܡܛܰܫ̈ܝܳܢ ܒܰܙܡܺܝܪ̈ܳܬܳܐ ܗܳܠܝܢ ܚܰܡܫܺܝܢ ܕܗܳܐ ܩܳܝ̈ܡܳܢ ܠܰܢ. ܒܗܳܠܶܝܢ ܕܰܡܥܰܠܶܝܢ ܐܶܢܘܢ ܘܪܳܡܺܝܢ ܐܪ̈ܳܙܶܐ ܩܰܕܺܝ̈ܫܶܐ ܕܰܢܛܺܝܪܺܝܢ ܘܰܓܢܺܝܙܺܝܢ ܒܗܶܝܢ܆ ܘܰܐܝܟ ܕܰܪ̈ܓܶܐ ܕܣܶܒܶܠܬܳܐ ܕܰܙܩܺܝܦܳܐ ܠܰܐܦܰܝ̈ ܪܰܘܡܳܐ. ܘܟܽܠ ܟܡܳܐ ܕܣܳܠܶܩ ܐܢܳܫ ܠܰܐܦܰܝ̈ ܘܰܥܕܳܐ ܕܰܡܥܰܠܝܴ̈ܬܳܐ ܡܶܫܬܰܘܫܰܛ. ܗܳܟܰܢܳܐ ܐܺܝܬ ܠܡܶܫܟܳܚܘ ܒܣܶܒܶܠܬܳܐ ܗܳܕܐ ܕܰܙܩܰܦ ܠܢ ܩܕܳܡܰܝܢ ܛܽܘܒܳܢܳܐ ܕܰܘܝܕ܆ ܕܟܽܠ ܟܡܳܐ ܕܢܶܬܥܰܠܶܐ ܒܗ̇ ܠܘܳܬ ܚܙܳܬܳܐ ܗܳܝ ܕܣܽܘ̈ܟܳܠܶܐ ܕܪܳܡܶܝܢ ܚܰܕ ܡܶܢ ܚܰܕ ܡܶܬܩܰܪܒܺܝܢܰܢ. ܘܟܽܠܗ̇ ܣܶܒܶܠܬܳܐ ܐܪ̈ܳܙܶܐ ܢܰܗܺܝܪ̈ܶܐ ܣܒܺܝܣܺܝܢ ܘܰܣܕܺܝܪܺܝܢ ܒܗ̇. ܘܟܽܠ ܟܡܳܐ ܕܡܶܣܬܰܠܩܳܐ ܒܗ̇ ܢܰܦܫܳܐ ܩܰܪܺܝܒܽܘܬܳܐ ܘܰܐܚܝܳܢܽܘܬܳܐ. ܩܳܢܝܳܐ ܠܘܳܬ ܐܪ̈ܳܙܶܐ ܩܰܕܺܝ̈ܫܶܐ ܘܰܐܠܗܳܝ̈ܐ. ܐܰܝܟܰܢܳܐ ܕܠܐ ܡܶܟܺܝܠ ܬܶܗܘܶܐ ܒܗ̇ ܡܢܳܬܳܐ ܕܚܶܫܽܘܟܳܐ. ܐܠܐ ܟܽܠܗ̇ ܬܶܗܘܶܐ ܒܰܪܬ ܢܽܘܗܪܳܐ. ܡܶܛܠ ܢܰܩܺܝܦܽܘܬܶܗ ܕܰܠܘܳܬ ܢܽܘܗܪܳܐ ܕܰܫܪܳܪܳܐ. ܡܳܕܶܝܢ ܢܶܩܪܽܘܒ ܠܒܽܘܚܳܢܳܐ ܕܬܶܫܒ̈ܚܳܬܶܗ ܕܰܡܙܰܡܪܳܢܳܐ. ܘܡܶܢܗܶܝܢ ܝܳܠܦܺܝܢܰܢ ܐܰܝܟܰܢܳܐ ܡܶܬܕܰܪܰܓ ܗܘܳܐ ܘܡܶܬܥܰܠܶܐ ܒܽܐܘܪܚܳܐ ܕܐܪ̈ܳܙܶܐ ܐܰܠܗܳܝ̈ܐ ܐܝܟ ܕܰܒܣܶܒܶܠܬܳܐ. ܡܶܛܠܗܳܢܐ ܟܕ ܡܙܰܡܰܪ ܗܘܳܐ ܒܫܽܘܪܳܝܳܐ܆ ܝܳܗܶܒ ܗܘܳܐ ܛܽܘܒܳܐ ܠܓܰܒܪܳܐ ܕܠܐ ܗܰܠܶܟ ܒܽܐܘܪܚܳܐ ܕܥܰܘܴ̈ܠܶܐ܆ ܘܰܠܗܰܘ ܕܰܒܪܶܥܝܳܢܳܐ ܕܚܰܛܳܝ̈ܐ ܠܐ ܩܳܐܷܡ. ܟܕ ܕܝܢ ܡܡܰܨܰܥ ܗܘܳܐ ܒܰܟܬܳܒܳܐ ܐܝܟ ܗܰܘ ܕܫܳܐܷܠ ܫܝܳܓܬܳܐ ܕܡܶܢ ܦܽܘܠܦܳܠܳܐ ܕܰܚܛܺܝܬܳܐ. ܘܒܳܥܶܐ ܘܢܶܬܟܰܫܰܦ ܕܢܶܫܬܘܶܐ ܠܪ̈ܰܚܡܶܐ ܘܰܠܫܽܘܒܩܳܢܳܐ ܕܰܚܛܳܗ̈ܐ. ܡܶܛܠܗܳܢܐ ܐܡ̇ܪ ܗܘܳܐ:
ܪܰܚܶܡ ܥܠܰܝ ܐܰܠܗܳܐ ܐܰܝܟ ܛܰܝܽܒܘܬܳܟ. ܘܰܐܝܟ ܣܽܘܓܳܐܐ ܕܪ̈ܰܚܡܰܝܟ ܥܛܺܝ ܚܛܳܗܱ̈ܝ. ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ. ܘܡܶܢ ܚܛܳܗܱ̈ܝ ܕܰܟܳܢܝ. (ܡܙܡܘܪܐ ܢܐ: ܐ-ܒ) ܗܳܫܐ ܕܝܢ ܟܕ ܐܶܬܥܰܠܺܝ ܓܡܺܝܪܳܐ ܕܡܳܐܐ ܕܰܪ̈ܓܶܐ ܪ̈ܽܘܚܳܢܶܐ ܘܫܰܪܺܝ ܬܘܒ ܒܗܰܘ ܕܰܪܓܳܐ ܕܡܳܐܐ ܘܚܰܕ. ܠܘ ܒܩܴ̈ܠܶܐ ܡܢܰܚ̈ܬܶܐ ܐܰܝܟ ܚܰܛܳܝ̈ܐ ܡܙܰܡܰܪ. ܐܶܠܐ ܛܽܘܒܳܐ ܝܳܗܶܒ ܠܓܰܒܪܳܐ ܕܠܳܐ ܡܗܰܠܶܟ ܒܽܐܘܪܚܳܐ ܕܥܰܘܴ̈ܠܶܐ. ܘܠܐ ܒܕܶܚܠܬܳܐ ܘܰܬܘܳܬܳܐ ܐܝܟ ܐܰܝܠܝܢ ܕܰܡܦܰܠܦܠܺܝܢ ܒܰܚܛܳܗ̈ܐ ܫܳܐܷܠ ܕܽܘܟܳܝܳܐ. ܐܶܠܐ ܡܰܢ ܕܶܐܫܬܰܘܫܰܛ ܣܰܓܺܝ ܠܰܩܕܳܡܰܘܗܝ ܒܽܐܘܪܚܳܐ ܕܟܺܐܢܽܘܬܳܐ. ܘܰܗܘܰܘ ܠܗ ܒܢܱ̈ܝ ܥܶܢܝܳܢܳܐ ܐܢܳܫܴ̈ܐ ܙܰܕܺܝ̈ܩܶܐ. ܘܰܐܦܶܩ ܡܶܢ ܒܰܝܬܶܗ ܠܟܽܠ ܕܥܳܒܕܺܝܢ ܢܶܟܠܳܐ. ܘܕܰܟܺܝ ܗܰܝܟܠܳܐ ܕܢܰܦܫܶܗ ܡܶܢ ܣܰܓܺܝ̈ܐܬܳܐ ܕܦܳܠܚܱ̈ܝ ܫܽܘܩܪܳܐ. ܘܠܐ ܐܰܪܦܺܝ ܡܰܡܠܠܳܐ ܟܰܕܳܒܳܐ ܢܶܬܩܰܢ ܩܕܳܡ ܥܰܝ̈ܢܰܘܗܝ. ܐܶܠܐ ܚܠܳܦ ܗܳܠܝܢ ܡܫܰܡܫܺܝܢ ܗܘܰܘ ܠܶܗ ܓܰܒܪ̈ܶܐ ܕܰܕܟܶܝܢ ܡܶܢ ܟܠ ܡܽܘ̈ܡܶܐ ܕܰܚܛܳܗ̈ܐ. ܐܰܟܡܳܐ ܕܺܐܝܬܰܘܗܝ ܗܘܳܐ ܐܳܣܳܦ ܡܰܥܗܕܳܢܳܐ. ܗܰܘ ܕܡܰܥܗܶܕ ܗܘܳܐ ܠܡܰܠܟܳܐ ܕܰܘܝܕ ܥܠ ܐܽܘܪܚܳܐ ܕܟܺܐܢܽܘܬܳܐ ܗܰܘ ܕܳܐܦ ܥܠܰܘܗܝ ܡܙܰܡܰܪ ܡܰܙܡܽܘܪܳܐ ܗܳܢܳܐ. ܒܩܴ̈ܠܶܐ ܩܰܕܺܝ̈ܫܶܐ ܘܰܡܥܰܠܰܝܴ̈ܐ ܡܫܰܚܠܶܦ ܗܘܳܐ ܘܰܡܙܰܡܰܪ: ܐܳܡܪܺܝܢ ܕܶܝܢ ܣܰܓܺܝ̈ܐܐ ܡܶܛܠ ܐܳܣܳܦ܆ ܕܕܰܐܝܟ ܗܳܢܐ ܥܽܘܗܕܳܢܳܐ ܐܝ̣ܬ ܗܘܳܐ ܠܶܗ܆ ܕܟܽܠܗܘܢ ܕܺܝ̈ܢܶܐ ܘܟܽܠܗܘܢ ܢܳܡܽܘ̈ܣܶܐ ܕܒܶܝܬ ܐܰܠܳܗܳܐ ܢܰܗܺܝܪܳܐܝ̣ܬ ܝ̣ܕܰܥ. ܘܟܽܠܗܽܘܢ ܣܽܘܥܪ̈ܳܢܶܐ ܕܕܰܘܝܕ ܕܠܐ ܒܽܘܨܳܪܳܐ ܝܳܕܰܥ ܗܘܳܐ ܠܗܽܘܢ. ܘܟܽܠܡܶܕܶܡ ܕܣܳܥܰܪ ܗܘܳܐ ܕܰܘܝܕ ܡܰܠܟܳܐ. ܐܶܢ ܡܶܬܒܥܶܐ ܗܘܳܐ ܒܳܬܰܪ ܙܰܒܢܷ̈ܐ ܡܰܕܟܰܪ ܗܘܳܐ ܠܗ ܐܳܣܳܦ ܕܡܶܢ ܐܰܝܠܶܝܢ ܥܷ̈ܠܠܳܬܳܐ. ܕܰܫܩܰܠ ܫܽܘܪܳܪܳܐ ܟܰܕ ܗܘܳܐ. ܘܰܐܝܟܰܢܳܐ ܬܘܒ ܣܡܰܟ ܠܫܽܘܠܳܡܳܐ. ܘܥܰܠ ܕܰܚܙܳܐ ܛܽܘܒܳܢܳܐ ܕܰܘܝܕ ܕܰܐܝܟ ܗܳܕܶܐ ܛܰܝܒܽܘܬܳܐ ܐܶܫܬܰܟܢܰܬ ܠܗ܆ ܣܳܡܶܗ ܠܶܗ ܩܰܪܺܝܒܳܐ ܘܓܰܘܳܝܳܐ ܕܡܰܠܟܽܘܬܳܐ ܘܢܳܛܰܪ ܥܽܘܗܕܳܢ̈ܐ ܡܰܠܟܳܝ̈ܐ. ܡܶܬܦܰܫܰܩ ܕܶܝܢ ܡܶܢ ܠܶܫܳܢܳܐ ܥܶܒܪܳܝܳܐ ܥܽܘܗܕܳܢܳܐ. ܗܳܢܰܘ ܕܶܝܢ ܗܰܘܢܳܐ ܕܠܳܐ ܛܳܥܶܐ. ܘܡܶܛܠܗܳܕܐ ܡܰܘܗܰܒܬܳܐ ܕܡܶܢ ܐܰܠܗܳܐ ܚܫܺܝܒܳܐ ܗܘܳܬ ܠܛܽܘܒܳܢܳܐ ܕܰܘܝܕ. ܕܓܰܒܪܳܐ ܕܕܰܐܝܟ ܗܳܢܐ ܢܶܗܘܶܐ ܠܶܗ ܩܰܪܺܝܒܳܐ ܘܓܰܘܳܝܳܐ ܡܙܰܡܰܪ ܗܘܳܐ ܘܳܐܡܰܪ:
ܛܰܝܒܽܘܬܳܐ ܘܕܺܝܢܳܐ ܐܶܙܰܡܰܪ ܘܠܳܟ ܐܶܫܰܒܰܚ ܡܳܪܝܳܐ. ܘܶܐܗܰܠܶܟ ܒܽܐܘܪܚܳܟ ܕܠܳܐ ܡܽܘܡ. ܥܕܰܡܳܐ ܠܶܐܡܰܬܝ ܬܺܐܬܶܐ ܠܘܳܬܝ. ܡܶܛܠ ܡܳܢܐ ܐܡ̇ܪ ܛܰܝܒܽܘܬܳܐ ܘܕܺܝܢܳܐ ܐܶܙܰܡܰܪ. ܘܰܐܝܕܳܐ ܗܝ ܥܶܠܬܳܐ ܕܰܐܩܶܦ ܕܺܝܢܳܐ ܠܛܰܝܒܽܘܬܳܐ. ܠܳܐ ܓܶܝܪ ܡܰܚܶܢ ܕܺܝܢܳܐ ܠܛܰܝܒܽܘܬܳܐ. ܡܶܛܠ ܓܝܪ ܕܰܐܝܟܳܐ ܕܺܐܝܬ ܛܰܝܒܽܘܬܳܐ ܒܰܛܺܝܠ ܗܽܘ ܕܺܝܢܳܐ. ܘܰܐܝܟܳܐ ܕܺܐܝܬ ܕܺܝܢܳܐ ܠܰܝܬ ܬܰܡܳܢ ܐܰܬܪܳܐ ܠܛܰܝܒܽܘܬܳܐ. ܕܺܝܢܳܐ ܓܶܝܪ ܟܺܐܢܽܘܬܰܐ ܗܘ. ܘܛܰܝܒܽܘܬܳܐ ܘܪ̈ܰܚܡܶܐ ܡܥܰܠܶܝܢ ܐܶܢܘܢ ܡܶܢ ܕܺܝܢܳܐ. ܡܳܕܶܝܢ ܒܥܳܬܳܐ ܐܝ̣ܬ ܥܠ ܡܶܠܬܳܐ ܗܳܕܐ ܕܳܐܡܰܪ ܡܙܰܡܪܳܢܳܐ. ܘܙܳܕܶܩ ܕܰܢܚܰܘܶܐ ܥܠ ܕܺܝܢܳܐ ܗܳܢܐ ܕܰܐܠܘܶܬ ܠܛܰܝܒܽܘܬܳܐ. ܕܳܐܦ ܗܽܘ ܗܳܢܐ ܕܺܝܢܳܐ ܡܶܢ ܣܽܘܟܳܠܳܐ ܛܰܝܒܽܘܬܳܐ ܡܶܫܬܟܰܚ. ܘܡܶܛܠܗܳܢܐ ܕܠܐ ܚܶܪܝܳܢܳܐ. ܬܰܪ̈ܬܰܝܗܶܝܢ ܗܳܠܝܢ ܒܝܰܕ ܓܶܠܝܳܢܶܗ ܕܥܰܡܰܢܽܘܐܝܠ ܢܦܰܩ ܠܦܽܘܫܳܩܳܐ. ܡܳܢܳܐ ܗܝ ܗܳܟܺܝܠ ܛܰܝܒܽܘܬܳܐ. ܗܰܘ ܩܳܠܳܐ ܕܶܐܡܰܪ ܪܺܝܫ ܡܰܠܰܐܟ̈ܐ ܠܝܳܠܕܰܬ ܐܰܠܗܳܐ ܡܰܪܝܰܡ܆ ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ (ܠܘܩܐ ܐ: ܟܚ). ܡܳܢܰܐ ܗܘ ܦܽܘܫܳܩܳܐ ܕܡܰܠܝܽܘܬܳܐ ܗܳܝ ܡܳܪܰܢ ܥܰܡܶܟܝ ܒܪܺܝܟܰܬ ܒܢܷ̈ܫܶܐ (ܠܘܩܐ ܐ: ܟܚ). ܡܳܕܶܝܢ ܐܰܝܟܰܢܳܐ ܕܓܶܠܝܳܢܶܗ ܕܥܰܡܰܢܽܘܐܝܠ. ܛܰܝܒܽܘܬܳܐ ܗܝ ܕܒܳܗ̇ ܢܦܰܩ ܐܰܠܗܳܐ ܡܶܢ ܥܽܘܒܳܐ ܟܰܣܝܳܐ ܘܰܓܢܺܝܙܳܐ ܠܓܶܠܝܳܐ ܕܠܐ ܡܶܬܡܰܠܰܠ. ܘܰܢܚܶܬ ܠܰܙܥܽܘܪܽܘܬܳܐ ܘܶܐܬܚܰܠܰܛ ܥܰܡ ܡܶܣܟܺܢ̈ܐ. ܘܰܗܘܳܐ ܠܓܰܘ ܡܶܢ ܡܽܘ̈ܫܚܳܬܳܐ ܕܰܟܝܳܢ̈ܐ ܕܽܐܘ̈ܣܺܝܰܐܣ. ܘܶܐܬܕܰܡܺܝ ܠܥܰܒܕܳܐ ܗܰܘ ܒܰܪ ܚܺܐܪ̈ܶܐ. ܘܰܗܘܳܐ ܒܰܪܢܳܫܳܐ ܗܰܘ ܕܥܰܒܕܶܗ ܠܒܰܪܢܳܫܳܐ ܡܶܢ ܒܪܺܝܫܺܝܬ. ܗܳܕܳܐ ܗܝ ܛܰܝܒܽܘܬܳܐ ܕܶܐܡܰܪ ܡܙܰܡܪܳܢܳܐ ܢܙܰܡܰܪ ܗܳܝ ܕܶܐܬܝܰܗܒܰܬ ܚܠܳܦ ܢܳܡܽܘܣܳܐ ܕܰܒܝܰܕ ܡܽܘܫܶܐ. ܕܺܝܢܳܐ ܕܶܝܢ ܕܥܰܡ ܗܳܕܐ ܛܰܝܒܽܘܬܳܐ ܕܶܐܡܰܪ ܕܰܘܝܕ܆ ܗܳܝ ܕܡܶܢ ܒܳܬܰܪ ܕܰܥܒܰܕ ܐܰܠܗܳܐ ܚܽܘܠܛܳܢܶܗ ܥܰܡ ܐܢܳܫܴ̈ܐ ܘܡܰܠܺܝ ܡܶܢܝܳܢܳܐ ܕܰܬܠܳܬܺܝܢ ܫܢܺܝ̈ܢ. ܘܰܥܡܰܕ ܗܘܳܐ ܒܝܽܘܪܕܢܳܢ ܘܚܰܘܺܝ ܡܰܘܠܳܕܳܐ ܕܡܶܢܕܪܺܝܫ. ܢܦܰܩ ܠܡܰܕܒܪܳܐ ܕܢܶܥܒܶܕ ܕܰܪܳܐ ܥܰܡ ܐܳܟܶܠܩܰܪܨܳܐ. ܟܕ ܐܳܡܰܪ ܥܰܡܶܗ ܕܺܝܢܳܐ. ܘܰܢܣܰܒ ܡܶܢ ܬܚܶܝܬ ܢܺܝܪܶܗ ܠܟܽܠܗܘܢ ܗܳܢܘܢ ܕܒܰܩܛܺܝܪܳܐ ܕܠܐ ܢܳܡܽܘܣ ܐܶܫܬܰܥܒܰܕܘ ܠܰܚܛܺܝܬܳܐ. ܡܳܕܶܝܢ ܟܕ ܒܗܳܢܐ ܣܽܘܟܳܠܳܐ ܡܶܬܒܰܝܢܺܝܢܰܢ. ܒܫܽܘܪܳܝܳܐ ܕܬܶܫܒܽܘܚܬܳܐ ܗܳܕܐ ܡܶܫܟܚܺܝܢܰܢ ܕܕܺܝܢܳܐ ܗܳܢܐ ܕܶܐܬܶܐܡܰܪ ܗܳܪܟܳܐ ܡܶܢ ܡܙܰܡܪܳܢܳܐ ܠܰܘ ܠܽܘܩܒܰܠ ܒܰܪܢܳܫܳܐ ܐܝ̣ܬܰܘܗܝ. ܐܠܐ ܚܠܳܦܰܘܗܝ. ܒܗܳܝ ܕܒܶܗ ܗܘܳܬ ܡܶܬܦܰܨܝܳܢܽܘܬܳܐ ܠܰܛܠܺܝ̈ܡܶܐ ܡܶܢ ܐܝ̣ܕܳܐ ܕܛܳܠܽܘܡܰܝ̈ܗܘܢ. ܘܫܰܦܺܝܪ ܚܙܳܝܗܝ ܒܥܰܝܢܳܐ ܕܪܽܘܚܳܐ ܕܰܘܝܕ ܠܗܳܢܐ ܓܶܠܝܳܢܳܐ. ܘܰܫܩܰܠ ܩܺܝܬܳܪܶܗ ܘܙܰܡܰܪ ܩܕܳܡܰܘܗܝ ܘܳܐܡܰܪ ܗܘܳܐ: ܛܰܝܒܽܘܬܳܐ ܘܕܺܝܢܳܐ ܐܶܙܰܡܰܪ. ܘܠܳܟ ܐܶܫܰܒܰܚ ܡܳܪܝܳܐ. ܡܶܛܠ ܕܬܰܪ̈ܬܰܝܗܶܝܢ ܕܺܝܠܳܟ ܐܶܢܶܝܢ. ܘܛܰܝܒܽܘܬܳܐ ܚܠܳܦ ܟܺܐܢܽܘܬܳܐ ܐܰܢܬ ܚܰܘܺܝܬ. ܘܕܺܝܢܳܐ ܕܰܦܪܰܩ ܠܰܢ ܡܶܢ ܛܪܽܘܢܽܘܬܶܗ ܕܳܐܟܶܠܩܰܪܨܳܐ ܒܺܐܝ̈ܕܰܝܟ ܐܶܬܚܙܺܝ. ܘܥܰܠܗܳܕܐ ܐܶܗܰܠܶܟ ܠܝ̣ ܒܽܐܘܪܚܳܟ ܕܠܐ ܡܽܘܡ. ܡܶܛܠ ܕܰܒܛܰܝܒܽܘܬܳܟ ܩܢܺܝܬ ܕܽܘܟܳܝܳܐ. ܗܰܘ ܕܠܐ ܕܶܝܢ ܐܶܬܡܨܺܝ ܗܘܳܐ ܢܳܡܽܘܣܳܐ ܠܡܶܥܒܰܕ. ܘܠܐ ܣܳܦܩܺܝܢ ܗܘܰܘ ܕܶܒܚ̈ܶܐ ܕܚܰܝ̈ܘܳܬܳܐ ܠܰܡܕܰܟܳܝܽܘ ܚܛܳܗ̈ܐ. ܛܰܝܒܽܘܬܳܐ ܕܶܝܢ ܕܰܒܝܰܕ ܡܳܪܢ ܐܶܬܡܠܺܝ ܥܳܠܡܳܐ ܕܠܐ ܡܽܘܡܳܐ ܢܳܛܪܰܬ ܠܚܰܛܳܝ̈ܐ ܕܶܐܬܩܰܪܰܒܘ ܠܗ̇. ܐܝܟ ܕܶܐܡܰܪ ܪܽܘܚܳܐ ܒܳܬܰܪ ܗܳܠܝܢ܆ ܥܕܰܡܳܐ ܠܶܐܡܰܬܝ ܬܺܐܬܶܐ ܠܘܳܬܝ. ܥܕܰܡܳܐ ܠܰܡ ܕܳܐܬܶܐ ܠܘܳܬܝ ܠܐ ܡܶܬܕܰܟܶܐ ܐܢܳܐ ܡܶܢ ܚܛܳܗ̈ܐ. ܘܰܥܕܰܡܳܐ ܕܠܐ ܦܳܓܰܥ ܒܺܝ ܢܽܘܗܪܳܟ܆ ܠܐ ܡܶܬܕܰܟܶܐ ܐܢܳܐ ܓܡܺܝܪܳܐܝ̣ܬ ܡܶܢ ܥܰܡܛܳܢܳܐ. ܡܳܐ ܕܶܝܢ ܕܶܐܬܰܝܬ ܥܪܰܩ ܚܶܫܽܘܟܳܐ ܘܰܐܘܦܺܝ ܠܺܠܝܳܐ ܕܰܚܛܺܝܬܳܐ. ܘܡܶܬܚܙܶܐ ܫܠܳܡܳܐ ܕܙܰܕܺܝܩܽܘܬܳܐ. ܡܶܛܠ ܕܰܠܘܳܬ ܢܽܘܗܪܳܐ ܕܰܐܠܗܳܐ ܪܳܗܶܛ ܗܘܳܐ ܡܙܰܡܪܳܢܳܐ ܘܝ̣ܕܰܥ ܗܘܳܐ ܕܠܐ ܡܶܫܟܚܺܝܢ ܡܟܰܬܡܰܝ̈ ܒܰܚܛܺܝܬܳܐ ܗܳܘܶܝܢ ܠܗܶܝܢ ܡܩܰܒ̈ܠܳܢܶܐ ܡܰܘܣܶܦ ܘܳܐܡܰܪ:
ܗܰܠܟܶܬ ܒܬܰܡܺܝܡܽܘܬܶܗ ܕܠܶܒܝ ܒܓܰܘ ܒܰܝܬܝ. ܘܠܐ ܣܳܡܶܬ ܠܽܘܩܒܰܠ ܥܰܝ̈ܢܰܝ ܡܶܠܬܳܐ ܕܥܰܘܠܳܐ. ܠܰܕܥܳܒܶܕ ܒܺܝܫܬܳܐ ܣܢܺܝܬܶܗ. ܘܠܐ ܢܩܶܦ ܠܺܝ. ܩܴ̈ܠܶܐ ܗܳܠܝܢ ܕܰܡܙܰܡܰܪ ܛܽܘܒܳܢܳܐ ܕܰܘܝܕ ܒܰܝܬܳܝ̈ܐ ܩܢܽܘ̈ܡܳܝܶܐ ܕܳܡܶܝܢ ܕܺܐܝܬܰܝܗܽܘܢ ܘܥܰܠ ܢܰܦܫܶܗ ܒܰܠܚܽܘܕ ܡܶܬܚܙܶܐ ܕܶܐܡܰܪ ܐܶܢܘܢ. ܡܶܛܠ ܗܳܢܐ ܠܐ ܐܶܡܰܪ ܕܗܰܠܶܟܶܝܢ ܒܬܰܡܺܝܡܽܘܬܳܐ. ܐܶܠܐ ܕܗܰܠܟܶܬ ܒܬܰܡܺܝܡܽܘܬܶܗ ܕܠܶܒܝ ܒܓܰܘ ܒܰܝܬܝ. ܒܰܝܬܳܐ ܕܶܝܢ ܩܳܪܶܐ ܠܕܽܘܝܳܪܳܐ ܕܥܰܡ ܐܰܠܗܳܐ ܕܰܒܬܰܡܺܝܡܽܘܬܳܐ ܥܳܡܰܪ ܗܘܳܐ ܩܕܳܡܰܘܗܝ. ܘܥܰܠܗܳܕܐ ܠܐ ܣܳܐܷܡ ܗܘܳܐ ܠܽܘܩܒܰܠ ܥܰܝ̈ܢܰܘܗܝ ܡܶܠܬܳܐ ܥܰܘܳܠܬܳܐ ܘܰܡܥܰܩܒܳܢܺܝܬܳܐ. ܘܠܽܘܩܒܰܠ ܢܺܝܫܳܐ ܥܶܠܳܝܳܐ ܪܳܗܶܛ ܗܘܳܐ. ܗܰܘ ܓܝܪ ܕܗܳܕܐ ܥܳܒܶܕ ܣܳܡܳܗ̇ ܠܰܚܛܺܝܬܳܐ ܡܶܢ ܒܶܣܬܪܶܗ. ܘܠܳܐ ܡܶܟܺܝܠ ܚܳܙ̈ܝܳܢ ܥܰܝ̈ܢܰܘܗܝ ܦܬܺܝܠܘܴ̈ܬܳܐ ܕܰܚܛܳܗ̈ܐ. ܐܶܠܐ ܡܶܬܒܰܩܶܐ ܒܰܬܪܺܝܨܽܘܬܳܐ ܘܚܳܐܱܪ ܒܢܽܘܗܪܳܐ. ܘܠܐ ܫܳܒܶܩ ܠܚܽܘ̈ܫܳܒܶܐ ܡܫܰܡ̈ܫܳܢܶܐ ܕܰܚܛܺܝܬܳܐ ܕܗܺܝ ܐܝ̣ܬܶܝܗ̇ ܒܺܝܫܬܳܐ ܕܡܶܬܢܰܩܦܺܝܢ ܠܗ̇. ܐܝܟ ܕܶܐܡܰܪ ܡܙܰܡܪܳܢܳܐ. ܠܰܕܥܳܒܶܕ ܒܺܝܫܬܳܐ ܣܢܺܝܬܶܗ ܘܠܐ ܢܩܶܦ ܠܝ̣. ܟܕ ܒܗܳܕܐ ܐܰܘܕܰܥ ܕܣܶܢܐܬܳܐ ܐܝ̣ܬ ܗܘܳܐ ܠܶܗ ܠܽܘܩܒܰܠ ܟܽܠ ܚܽܘܫܳܒܳܐ ܕܡܰܠܶܦ ܒܺܝܫܬܳܐ. ܡܰܘܕܰܥ ܓܝܪ ܟܬܳܒܳܐ ܕܟܰܕ ܗܦܰܟ ܕܰܘܝܕ ܡܶܢ ܚܰܪܒܳܐ ܕܥܰܡܠܺܝ̈ܩܳܝܶܐ. ܟܳܠܶܝܢ ܗܘܰܘ ܠܗ ܐܢܳܫܴ̈ܐ ܒܺܝ̈ܫܶܐ ܘܪ̈ܰܫܺܝܥܶܐ ܕܰܢܚܶܬܘ ܥܰܡܶܗ. ܕܠܐ ܢܶܬܶܠ ܡܢܳܬܳܐ ܡܶܢ ܒܶܙܬܳܐ ܠܰܐܝܠܶܝܢ ܕܰܢܛܰܪܘ ܡܳܐܢܰܝ̈ܗܘܢ. ܐܠܘ ܟܺܐܢܽܘܬܶܗ ܕܕܰܘܝܕ ܠܐ ܦܶܣܩܰܬ ܕܗܰܘ ܕܢܳܛܰܪ ܡܳܐܢ̈ܐ ܐܪ̈ܳܙܳܢܳܝܶܐ ܘܩܰܕܺܝ̈ܫܶܐ ܫܰܘܬܳܦܳܐ ܘܒܰܪ ܦܳܠܓܽܘܬܳܐ ܢܶܗܘܶܐ. ܠܗܰܘ ܕܢܳܦܶܩ ܠܰܩܪܳܒܳܐ ܡܶܬܝܰܕܥܳܢܳܐ. ܡܳܕܶܝܢ ܠܐ ܡܚܰܪܰܪ ܗܘܳܐ ܥܰܡܳܐ ܕܢܰܩܺܝܦ ܠܶܗ ܡܶܢ ܒܺܝ̈ܫܶܐ. ܢܰܦܫܶܗ ܕܶܝܢ ܡܶܢ ܚܽܘ̈ܫܳܒܶܐ ܒܺܝ̈ܫܶܐ ܡܚܰܪܪܳܐ ܗܘܳܬ. ܘܥܰܠܗܳܝ ܡܰܝܬܶܐ ܘܳܐܡܰܪ:
ܕܠܶܒܳܐ ܒܺܝܫܳܐ ܥܒܰܪ ܡܶܢܝ ܘܒܺܝܫܬܳܐ ܠܐ ܝܶܕܥܶܬ. ܘܰܠܡܰܢ ܕܳܐܟܶܠܩܰܪܨܳܐ ܕܚܰܒܪܶܗ ܒܣܶܬܪܳܐ ܡܰܘܒܶܕ ܗܘܺܝܬ. ܒܗܳܝ ܕܠܐ ܫܩܰܠ ܗܘܳܐ ܫܽܘܠܳܡܳܐ ܕܢܳܦܶܩ ܠܰܥܒܳܕܳܐ. ܚܽܘܫܳܒܳܐ ܕܕܳܐܷܠ ܠܡܶܐܟܰܠܩܰܪܨܳܐ ܠܳܐ ܥܳܒܶܕ. ܘܠܐ ܥܰܡ ܪ̈ܳܡܶܐ ܘܫܰܒܰܗܪ̈ܳܢܶܐ ܠܐ ܡܶܫܬܰܘܬܰܦ ܗܘܺܝܬ. ܒܗܳܝ
ܕܠܰܕܪ̈ܳܡܳܢ ܥܰܝ̈ܢܰܘܗܝ ܘܰܪܘܺܝܚ ܠܶܒܶܗ ܥܰܡܶܗ ܠܳܐ ܐܳܟܶܠ ܗܘܺܝܬ. ܠܳܐ ܓܶܝܪ ܡܰܪܦܶܐ ܗܘܺܝܬ ܠܪ̈ܶܥܝܳܢܶܐ ܢܦܺܝ̈ܚܶܐ ܕܢܶܫܒܬܽܘܢ ܒܺܝ. ܘܟܰܕ ܡܶܬܝܰܠܕܺܝܢ ܗܘܰܘ ܒܢܰܦܫܝ ܚܽܘ̈ܫܳܒܶܐ ܕܪܳܡܽܘܬܳܐ. ܠܳܐ ܡܩܰܒܶܠ ܗܘܺܝܬ ܠܗܽܘܢ ܥܰܡ ܚܰܕܽܘܬܳܐ. ܘܠܳܐ ܫܳܪܶܟ ܗܘܺܝܬ ܠܢܰܘܚܳܐ. ܘܥܰܠ ܗܳܕܐ ܠܰܒܢܱ̈ܝ ܒܰܝܬܳܐ ܕܗܰܝܡܳܢܽܘܬܳܐ ܘܠܰܕܠܳܐ ܡܽܘܡ ܡܪܰܒܶܐ ܗܘܺܝܬ. ܘܡܶܛܠ ܗܳܢܐ:
ܥܰܝ̈ܢܰܝ ܒܰܡܗܰܝ̈ܡܢܶܐ ܕܰܐܪܥܳܐ ܕܢܶܬܒܽܘܢ ܥܰܡܝ. ܕܰܡܗܰܠܶܟ ܒܽܐܘܪܚܳܐ ܕܠܳܐ ܡܽܘܡ ܗܽܘ ܢܫܰܡܫܰܢܝ. ܡܗܰܝܡ̈ܢܶܐ ܕܶܝܢ ܕܶܐܡܰܪ ܠܚܽܘ̈ܫܳܒܶܐ ܪ̈ܳܚܡܰܝ ܫܪܳܪܳܐ ܫܰܘܕܰܥ ܕܺܐܝܬܰܝܗܽܘܢ. ܗܳܢܘܢ ܕܰܡܗܰܠܟܺܝܢ ܒܽܐܘܪܚܶܗ ܕܡܳܪܝܳܐ ܕܠܐ ܡܽܘܡܳܐ. ܡܶܛܠܗܳܢܐ ܥܰܠ ܕܶܐܫܬܰܡܰܫ ܡܶܢ ܚܽܘ̈ܫܳܒܶܐ ܕܠܐ ܡܽܘܡ ܛܪܰܕ ܡܶܢ ܬܰܘܬܳܒܽܘܬܶܗ ܠܟܽܠܗܘܢ ܢܰܟܽܘ̈ܠܬܳܢܶܐ. ܒܗܳܝ ܕܶܐܡܰܪ:
ܕܠܳܐ ܢܶܬܶܒ ܒܓܰܘ ܒܰܝܬܝ ܕܥܳܒܶܕ ܢܶܟܠܳܐ. ܘܡܰܡܠܠܳܐ ܟܰܕܳܒܳܐ ܠܳܐ ܢܶܬܩܰܢ ܩܕܳܡ ܥܰܝ̈ܢܰܝ. ܘܰܒܨܰܦܪܳܐ ܐܶܫܰܬܶܩ ܠܟܽܠܗܽܘܢ ܪ̈ܰܫܺܝܥܶܐ ܕܰܐܪܥܳܐ ܘܰܐܘܒܶܕ ܡܶܢ ܡܕܺܝܢܬܶܗ ܕܡܳܪܝܳܐ. ܠܟܽܠܗܽܘܢ ܥܳܒ̈ܕܰܝ ܥܰܘܠܳܐ. ܚܙܰܝܬ ܐܰܝܟܰܢܳܐ ܡܕܰܟܶܐ ܗܘܳܐ ܠܗ̇ ܠܢܰܦܫܶܗ ܡܶܢܟܽܠ ܥܰܘܠܳܐ ܘܢܶܟܠܳܐ. ܘܡܶܢܟܽܠ ܡܰܡܠܠܳܐ ܟܰܕܳܒܳܐ. ܘܡܶܛܠ ܗܳܢܐ ܗܘܳܐ ܠܗ ܐܰܠܗܳܐ ܡܶܠܬܳܐ ܨܰܦܪܳܐ. ܘܟܰܕ ܕܢܰܚ ܨܰܦܪܳܐ ܒܢܰܦܫܶܗ ܥܰܒܕܳܗ̇ ܡܕܺܝܬܳܐ ܡܚܰܣܰܢܬܳܐ ܘܕܰܟܪܺܝܟ ܠܗ̇ ܫܽܘܪܳܐ. ܘܰܒܡܶܠܬܳܐ ܨܰܦܪܳܐ ܐܶܫܰܬܶܩ ܠܟܽܠܗܽܘܢ ܒܢܱ̈ܝ ܠܺܠܝܳܐ ܘܰܐܘܒܶܕ ܐܶܢܘܢ ܡܶܢ ܡܕܺܝܢܬܶܗ ܕܡܳܪܝܳܐ ܠܥܳܒ̈ܕܰܝ ܥܰܘܠܳܐ. ܗܳܢܰܘ ܠܟܽܠ ܚܽܘ̈ܫܳܒܶܐ ܢܽܘ̈ܟܪܳܝܶܐ ܘܡܰܚ̈ܛܝܳܢܶܐ ܕܡܰܥܒܕܺܝܢ ܥܰܘܠܳܐ. ܒܰܡܕܺܝܢܬܳܐ ܢܰܦܫܳܐ. ܕܳܐܦܚܢܰܢ ܢܨܰܠܶܐ ܕܰܒܨܰܦܪܳܐ ܦܨܺܝܚܳܐ ܗܰܘ ܕܰܒܕܶܢܚܶܗ ܡܶܫܬܪܶܐ ܠܺܠܝܳܐ ܕܰܚܛܺܝܬܳܐ. ܢܫܰܬܶܩ ܘܢܰܘܒܶܕ ܡܶܢ ܢܰܦ̈ܫܳܬܰܢ ܠܟܽܠܗܽܘܢ ܒܢܱ̈ܝ ܥܰܘܠܳܐ. ܘܢܰܘܕܶܐ ܠܰܡܫܺܝܚܳܐ ܕܗܽܘܝܽܘ ܨܰܦܪܳܐ ܕܰܫܪܳܪܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܪܝܢ
ܥܰܠ ܡܽܘܟܳܟܶܗ ܕܛܽܘܒܳܢܳܐ ܕܰܘܺܝܕ ܘܥܰܠ ܐܪ̈ܳܙܶܐ ܕܶܐܬܪܫܶܡܘ ܠܥܰܡܰܢܽܘܐܝܠ ܒܩܳܩܳܐ ܘܰܒܥܽܘܕܳܐ ܘܰܒܨܶܦܪܳܐ. ܘܥܰܠ ܕܰܒܝܰܕ ܒܪܳܐ ܡܫܺܝܚܳܐ ܐܶܬܥܒܶܕܘ ܘܰܗܘܰܘ ܫܡܰܝܳܐ ܘܐܰܪܥܳܐ ܡ̣ܢ ܒܪܺܝܫܺܝܬ.
ܐܰܝܠܶܝܢ ܕܰܒܥܰܝܢܳܐ ܕܪܽܘܚܳܐ ܩܰܕܺܝܫܳܐ ܡܶܬܒܰܩܶܝܢ ܒܰܙܡܺܝܪ̈ܳܬܶܗ ܕܕܰܘܝܕ ܢܒܺܝܐ ܐܰܠܗܳܝܳܐ܆ ܕܠܺܝܠܳܐܝ̣ܬ ܕܶܝܢ ܡܰܕܪܟܺܝܢ ܠܣܽܘ̈ܟܳܠܶܐ ܪ̈ܽܘܚܳܢܶܐ ܕܰܡܛܰܫܶܝܢ ܒܗܽܘܢ. ܟܕ ܛܳܒ ܐܶܢ ܐܢܳܫ ܡܶܬܒܰܩܶܐ ܒܗܽܘܢ ܢܰܗܺܝܪܳܐܝ̣ܬ ܟܽܠܗܶܝܢ ܠܕܽܘܡܳܪܳܐ ܫܳܘ̈ܝܳܢ. ܒܪܰܡ ܕܝܢ ܗܳܕܐ ܐܶܫܟܚܶܬ ܠܡܶܕܰܥ܆ ܕܡܳܐ ܕܣܰܓܺܝ ܡܶܬܡܰܟܰܟ ܗܘܳܐ ܝܰܬܺܝܪܳܐܝ̣ܬ ܡܶܬܓܰܘܶܐ ܗܘܳܐ ܠܘܳܬ ܐܪ̈ܳܙܶܐ ܐܰܠܳܗܳܝ̈ܐ. ܘܰܟܡܳܐ ܕܨܳܒܶܐ ܗܘܳܐ ܠܰܡܚܰܘܳܝܽܘ ܕܶܐܬܡܰܟܰܟ܆ ܗܳܟܰܢܳܐ ܐܳܦ ܓܶܠܝܳܢܳܐ ܕܳܢܰܚ ܗܘܳܐ ܥܠܰܘܗܝ ܘܰܡܚܰܘܶܐ ܠܶܗ. ܕܣܰܓܺܝ ܘܰܕܠܳܐ ܣܳܟܳܐ ܙܳܐܷܠ ܡܽܘܟܳܟܳܐ ܕܩܰܕܺܝ̈ܫܶܐ. ܗܳܢܐ ܕܝܢ ܡܰܙܡܽܘܪܳܐ ܕܰܡܳܐܐ ܘܰܬܪܶܝܢ ܥܽܘܗܕܳܢܳܐ ܕܰܚܛܳܗ̈ܐ ܕܒܶܝܬ ܐܽܘܪܺܝܳܐ ܥܰܬܕܶܗ ܘܰܐܡܪܶܗ ܕܝܢ ܗܽܘ ܡܙܰܡܪܳܢܳܐ. ܟܕ ܢܦܰܩ ܡܶܢ ܐܽܘܪܺܫܠܶܡ ܒܰܪܕܽܘܦܝܳܐ ܕܡܶܢ ܩܕܳܡ ܐܰܒܺܝܫܳܠܽܘܡ ܒܪܶܗ. ܘܰܥܪܰܩ ܗܘܳܐ ܘܰܢܦܰܩ ܡܶܢ ܡܰܠܟܽܘܬܶܗ ܕܰܘܝܕ܆ ܘܰܣܠܶܩ ܗܘܳܐ ܒܓܶܢܝܳܐ ܕܛܽܘܪܳܐ ܕܙܰܝ̈ܬܶܐ ܘܒܳܟܶܐ ܘܣܳܠܶܩ ܟܰܕ ܡܚܰܦܰܝ ܪܺܝܫܶܗ. ܘܟܽܠܶܗ ܥܰܡܳܐ ܕܥܰܡܶܗ ܡܚܰܦܶܝܢ ܪ̈ܺܝܫܰܝܗܽܘܢ. ܘܒܳܟܶܝܢ ܘܣܳܠܩܺܝܢ ܥܰܡܶܗ. ܘܰܡܪܳܕܳܐ ܥܳܫܶܢ ܗܘܳܐ ܥܠܰܘܗܝ ܝܰܬܺܝܪ. ܡܶܛܠ ܕܛܳܒ ܚܰܣܺܝܢܳܐ ܗܘܳܬ ܒܟܳܬܳܐ. ܥܕܰܡܳܐ ܠܗܳܕܐ ܐܶܬܬܰܢܰܚ ܗܘܳܐ ܕܰܘܝܕ ܒܒܶܟܝܶܗ. ܥܕܰܡܳܐ ܕܢܶܕܒܰܩ ܒܶܣܪܶܗ ܠܓܰܪ̈ܡܰܘܗܝ. ܘܗܳܟܰܢܳܐ ܒܺܝܫܳܐܝ̣ܬ ܡܶܬܐܶܒܶܠ ܗܘܳܐ ܘܠܐ ܡܰܗܡܶܐ ܗܘܳܐ ܡܶܢ ܗܳܝ ܕܰܢܨܰܠܐܷ ܘܢܶܒܥܶܐ ܦܽܘܪܩܳܢܳܐ ܡܶܢ ܐܰܠܗܳܐ. ܚܽܘܪ ܠܝ̣ ܐܰܢܬ ܗܳܫܳܐ ܒܗܳܝ ܡܰܦܰܩܬܳܐ ܡܟܰܐܪܬܳܐ ܕܰܗܘܳܬ ܠܪܺܝܫ ܓܶܢܣܰܢ ܡܶܢ ܦܰܪܕܰܝܣܳܐ. ܕܽܘܡܝܳܐ ܕܰܡܚܰܦܰܝ ܗܘܳܐ ܒܟܽܘ̈ܬܺܝܢܝܳܬܳܐ ܕܡܶܫܟܳܐ ܗܽܘ ܘܚܰܘܳܐ ܐܰܢܬܬܶܗ. ܘܟܽܠܗܽܘܢ ܟܝܳܢ̈ܐ ܡܶܬܐܰܒܠܺܝܢ ܗܘܰܘ ܥܠܰܘܗܝ. ܟܕ ܡܳܕܶܝܢ ܕܰܘܝܕ ܠܐ ܥܳܒܰܪ ܠܶܗ ܠܡܰܪܕܽܘܬܳܐ ܘܫܳܐܷܛ ܠܫܰܒ̈ܛܶܐ ܕܟܺܐܢܽܘܬܳܐ. ܡܩܰܪܶܒ ܗܘܳܐ ܨܠܽܘܬܳܐ ܒܚܰܫܳܐ ܘܰܒܕܶܡܥ̈ܐ ܠܰܐܠܗܳܐ ܡܙܰܡܰܪ ܗܘܳܐ ܘܳܐܡܰܪ:
ܡܳܪܝܳܐ ܫܡܰܥ ܨܠܽܘܬܝ ܘܰܓܥܳܬܝ ܠܘܳܬܳܟ ܬܶܥܽܘܠ. ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ ܒܝܰܘܡܳܐ ܕܽܐܘܠܨܳܢܝ. ܐܶܠܐ ܐܰܪܟܶܢ ܠܺܝ ܐܶܕܢܳܟ ܒܝܰܘܡܳܐ ܕܶܐܩܪܶܝܟ ܘܒܰܥܓܰܠ ܥܢܺܝܢܝ. ܫܰܦܺܝܪ ܩܳܠܳܐ ܕܰܨܠܽܘܬܶܗ ܕܰܢܒܺܝܐ ܘܕܳܡܝܳܐ ܡܶܠܬܶܗ ܕܡܶܢ ܚܰܫܳܐ ܥܰܡܺܝܩܳܐ ܡܨܰܠܶܐ ܘܒܰܒܟܳܬܳܐ ܟܕ ܓܳܥܶܐ ܡܩܰܪܶܒ ܒܳܥܽܘܬܶܗ. ܘܰܫܒܰܩ ܠܗܳܝ ܕܰܒܝܰܕ ܙܰܝܢܳܐ ܘܩܶܫ̈ܬܳܬܳܐ ܘܓܶܐܪ̈ܶܐ ܐܝܟ ܕܢܶܥܒܶܕ ܬܰܟܬܽܘܫܳܐ ܠܽܘܩܒܰܠ ܪ̈ܳܕܽܘܦܰܘܗܝ. ܘܰܒܕܶܡ̈ܥܶܐ ܫܳܐܷܠ ܗܘܳܐ ܦܽܘܪܩܳܢܳܐ ܟܕ ܡܰܠܶܦ. ܕܡܳܐ ܕܡܶܢ ܒܰܝܬܳܝ̈ܐ ܩܳܐܷܡ ܗܘܳܐ ܩܪܳܒܳܐ ܥܠ ܩܰܕܺܝ̈ܫܐ. ܠܳܐ ܙܳܕܶܩ ܕܢܶܒܥܽܘܢ ܥܽܘܕܪܳܢܳܐ. ܒܬܰܟܬܽܘܫܳܐ ܕܰܩܪܳܒܳܐ ܘܠܳܐ ܒܠܰܘ̈ܛܳܬܳܐ ܘܰܒܨܰܥܪ̈ܶܐ ܢܶܬܚܰܫܚܽܘܢ. ܐܠܐ ܒܰܨܠܽܘܬܳܐ ܕܰܠܘܳܬ ܐܠܗܳܐ ܢܶܒܥܽܘܢ ܥܽܘܕܪܳܢܳܐ. ܩܪܳܒܳܐ ܓܝܪ ܒܰܝܬܳܝܳܐ ܡܶܢ ܗܰܘ ܕܕܰܠܩܽܘܒܠܳܐ ܡܶܬܥܰܬܰܕ. ܘܗܳܢܐ ܠܐ ܡܶܬܚܣܶܢ ܐܠܐ ܐܢ ܒܚܰܝܠܳܐ ܕܰܨܠܽܘܬܳܐ. ܘܡܶܛܠܗܳܢܐ ܡܦܺܝܣ ܗܘܳܐ ܢܒܺܝܐ ܕܠܐ ܢܰܗܦܶܟ ܐܠܗܳܐ ܐܰܦܰܘ̈ܗܝ ܡܶܢܶܗ ܘܡܶܢ ܒܳܥܽܘܬܶܗ. ܐܠܐ ܘܳܐܦܶܢ ܒܰܝܬܳܝ̈ܐ ܩܳܡܘ ܠܩܽܘܒܠܶܗ܆ ܡܶܛܠ ܕܶܐܬܥܒܶܕ ܡܶܢ ܗܰܘ ܕܕܰܠܩܽܘܒܠܳܐ. ܐܡ̇ܪ ܗܘܳܐ ܠܘܬ ܐܠܗܳܐ ܐܰܪܟܶܢ ܠܝ̣ ܘܰܐܦܢܳܐ ܠܘܳܬܝ ܚܝܳܪܳܟ. ܡܶܛܠ ܚܛܺܝܬܳܐ ܗܳܝ ܕܡܶܛܠܬܳܗ̇ ܡܶܬܩܰܦܰܚ ܐܢܳܐ. ܘܗܳܐ ܡܰܝܠܶܠ ܐܢܳܐ ܡܶܢ ܟܺܐܒܳܐ ܕܢܶܓ̈ܕܶܐ. ܠܐ ܬܶܐܚܽܘܕ ܬܰܪܥܳܐ ܕܡܰܫܡܰܥܬܳܟ ܘܟܕ ܓܳܥܶܐ ܐܢܳܐ ܠܐ ܬܶܥܢܶܐ. ܟܡܳܐ ܓܝܪ ܐܢ ܥܰܙܺܝܙ ܢܶܓܕܳܐ. ܐܝܟ ܠܐ ܡܶܕܶܡ ܚܫܺܝܒ ܠܝ̣ ܐܢ ܥܕܰܡܳܐ ܠܡܰܫܡܰܥܬܳܟ ܡܳܛܶܝܢ ܩܴ̈ܠܶܐ ܕܬܰܟܫܶܦܬܝ. ܘܰܢܦܺܐܫܳܐ ܪܰܒܳܐ ܗܳܘܶܐ ܠܺܝ ܒܽܐܘ̈ܠܨܳܢܰܝ ܐܶܢ ܟܽܠܗܘܢ ܒܽܘ̈ܓܳܢܰܝ ܡܶܬܝܰܕܥܺܝܢ ܠܪܰܒܽܘܬܳܟ. ܘܡܶܛܠܗܳܕܐ ܬܟܺܝܠ ܐܢܳܐ ܕܒܰܥܓܰܠ ܫܳܡܰܥ ܐܰܢܬ ܠܺܝ. ܗܳܠܝܢ ܗܳܟܺܝܠ ܡܨܰܠܶܐ ܗܘܳܐ ܒܰܕܝܳܕܰܥ ܗܘܳܐ ܕܡܶܛܠܗܳܕܐ ܩܳܡ ܥܠܰܘܗܝ ܪܕܽܘܦܝܳܐ ܡܶܢ ܒܰܝܬܳܝ̈ܐ. ܥܠ ܕܰܒܒܰܝܬܳܝ̈ܐ ܕܺܝܠܶܗ ܐܰܣܟܶܠ. ܐܶܠܘ ܓܝܪ ܠܐܽܘܪܺܝܳܐ ܚܺܝܬܳܝܳܐ ܠܐ ܩܳܛܶܠ ܗܘܳܐ. ܘܠܐ ܗܰܘ ܒܪܳܐ ܩܰܕܡܳܝܳܐ ܕܝܶܠܕܰܬ ܠܶܗ ܒܰܪܬܫܒܰܥ ܡܳܐܷܬ ܗܘܳܐ. ܘܠܐ ܒܪܶܗ ܚܰܡܢܽܘܢ ܡܶܬܩܛܶܠ ܗܘܳܐ. ܘܠܐ ܐܰܒܺܝܫܳܠܽܘܡ ܒܪܶܗ ܡܳܪܶܕ ܗܘܳܐ ܥܠܰܘܗܝ ܘܡܶܬܩܛܶܠ ܗܘܳܐ. ܘܠܐ ܐܰܕܽܘܢܳܝܳܐ ܒܪܳܗ̇ ܕܚܰܓܝܰܬ ܡܳܐܷܬ ܗܘܳܐ ܒܣܰܝܦܶܗ ܕܰܫܠܶܝܡܽܘܢ. ܗܳܠܝܢ ܓܝܪ ܐܰܪܒܥܳܐ ܡܺܝܬܘ ܡܶܢ ܒܰܝܬܶܗ. ܡܶܛܠ ܕܢܶܬܡܰܠܶܐ ܦܣܳܩܳܐ ܗܰܘ ܕܶܐܡܰܪ ܒܕܺܝܢܶܗ. ܐܝܟ ܕܰܐܡܺܝܪ ܗܘܳܐ ܒܢܳܡܽܘܣܳܐ ܕܦܰܪܬܳܐ ܕܡܳܗ̇ ܢܶܦܪܥܶܝܗ̇ ܚܕܳܐ ܒܰܐܪܒܰܥ ܥܰܠ ܕܰܥܒܰܕ ܗܳܟܰܢܳܐ ܘܠܐ ܚܳܣ ܥܰܠ ܐܽܘܪܺܝܳܐ ܘܰܢܣܰܒ ܐܰܢܬܬܶܗ. ܘܳܐܦܠܳܐ ܬܽܘܒ ܢܶܫܰܘ̈ܗܝ ܕܳܒܰܪ ܗܘܳܐ ܐܰܒܺܝܫܳܠܽܘܡ ܘܕܳܡܶܟ ܗܘܳܐ ܘܓܳܐܱܪ ܥܰܡܗܶܝܢ. ܥܠ ܐܶܓܳܪܳܐ ܠܥܺܝܢ ܟܽܠܶܗ ܝ̣ܣܪܳܐܝܠ. ܐܶܠܽܘ ܠܐ ܕܓܳܪ ܒܰܐܢܬܬܶܗ ܕܽܐܘܪܺܝܳܐ ܚܺܝܬܳܝܳܐ. ܗܳܐ ܡܳܕܶܝܢ܆ ܡܶܛܠ ܕܰܐܣܟܶܠ ܕܰܘܝܕ ܒܒܰܝܬܳܝ̈ܐ ܕܒܶܝܬ ܐܰܕܽܘܢܰܝ. ܐܰܣܟܶܠܘ ܒܶܗ ܒܰܝܬܳܝ̈ܐ ܡܪܰܕܘ ܥܠܰܘܗܝ ܐܳܦ ܪܰܕܦܽܘܗܝ. ܘܥܰܠܗܳܝ ܡܰܝܠܶܠ ܗܘܳܐ ܘܒܳܟܶܐ ܘܡܶܬܬܰܢܰܚ ܘܰܡܦܺܝܣ ܗܘܳܐ ܕܗܽܘ ܐܰܥܺܝܪܳܗ̇ ܠܟܺܐܢܽܘܬܳܐ. ܕܰܬܩܺܝܡ ܥܠܰܘܗܝ ܪܕܽܘܦܝܳܐ. ܡܶܛܠ ܗܳܢܳܐ ܓܳܥܶܐ ܗܘܳܐ ܘܡܳܢܳܐ ܗܝ ܓܥܳܬܶܗ ܠܐ ܡܦܰܫܶܩ ܗܘܳܐ. ܒܰܕܠܳܐ ܛܰܥܝܳܐ ܗܘܳܬ ܥܶܠܬܳܐ ܕܡܶܛܠܳܬܳܗ̇ ܒܳܠܰܥ ܗܘܳܐ. ܘܰܟܡܳܐ ܐܢ ܐܡ̣ܪ ܠܶܗ ܢܒܺܝܐ ܢܳܬܳܢ ܕܳܐܦ ܡܳܪܝܳܐ ܐܰܥܒܰܪ ܣܰܟܠܽܘܬܳܟ. ܗܽܘ ܐܝܟ ܦܳܪܽܘܫܳܐ ܚܰܟܺܝܡܳܐ. ܠܐ ܐܰܗܡܺܝ ܡܶܢ ܗܳܝ ܕܰܒܬܰܟܫܶܦܬܳܐ ܢܶܒܥܶܐ ܪ̈ܰܚܡܶܐ. ܘܡܶܬܦܰܪܰܣ ܗܘܳܐ ܕܶܐܢ ܡܶܫܟܚܳܐ ܕܳܐܦ ܠܰܦܣܳܩܳܐ ܢܒܰܛܶܠ. ܘܠܐ ܢܡܽܘܬܽܘܢ ܐܚܪ̈ܳܢܶܐ ܡܶܢ ܥܶܠܬܳܐ ܕܰܚܛܺܝܬܶܗ. ܘܥܰܠ ܗܳܕܐ ܒܬܽܘ̈ܢܳܢܶܐ ܐܶܒܠܳܢܳܝ̈ܐ ܡܓܰܡܰܪ ܗܘܳܐ ܝܰܘ̈ܡܳܬܶܗ. ܘܠܰܘ ܒܰܢܝܳܚ̈ܐ ܘܰܒܒܽܘ̈ܣܳܡܶܐ ܘܡܰܘܕܰܥ ܟܕ ܡܙܰܡܰܪ. ܒܺܝ̈ܫܳܬܳܐ ܕܰܣܒܰܠ ܟܰܕ ܐܡ̇ܪ:
ܡܶܛܠ ܕܰܓܡܰܪܘ ܒܬܽܘܢܳܢܳܐ ܝܰܘ̈ܡܰܝ ܘܓܰܪ̈ܡܰܝ ܚܘܰܪܘ ܐܰܝܟ ܡܰܘ̈ܩܕܶܐ. ܚܡܳܐ ܠܶܒܝ ܐܰܝܟ ܥܶܣܒܳܐ ܘܺܝܒܶܫ. ܡܶܛܠ ܕܰܛܥܺܝܬ ܡܶܐܟܽܘܠܬܶܗ ܕܠܰܚܡܝ. ܘܡܶܢ ܩܳܠܳܐ ܕܬܶܢܚܴ̈ܬܝ ܕܒܶܩ ܒܶܣܪܝ ܠܓܰܪ̈ܡܰܝ. ܗܳܠܝܢ ܟܽܠܗܘܢ ܐܽܘ̈ܠܨܳܢܶܐ ܠܘ ܣܪܺܝܩܳܐܝ̣ܬ ܡܚܰܘܶܐ ܢܒܺܝܐ ܕܣܳܒܶܠ ܗܘܳܐ ܠܗܽܘܢ. ܐܠܐ ܟܕ ܡܶܣܬܰܪܰܕ ܡܶܢ ܟܺܐܢܽܘܬܳܐ ܕܠܐ ܬܶܥܛܽܘܦ ܥܠܰܘܗܝ ܡܰܟܣܳܢܽܘܬܳܐ ܕܒܶܝܬ ܐܽܘܪܺܝܳܐ. ܘܡܶܛܠܗܳܕܐ ܛܥܳܐ ܠܰܢܝܴ̈ܚܶܐ ܘܒܽܘ̈ܣܳܡܶܐ. ܕܬܶܛܥܶܐ ܟܺܐܢܽܘܬܳܐ ܓܙܳܡܳܗ̇ ܕܰܥܠܰܘܗܝ. ܘܰܡܓܰܡܰܪ ܗܘܳܐ ܒܬܽܘܢܳܢܳܐ ܝܰܘ̈ܡܳܬܶܗ ܕܠܐ ܬܘܒ ܢܶܗܘܘܢ ܠܗ ܒܽܘ̈ܣܳܡܶܐ ܡܰܠܟܳܝ̈ܐ. ܥܶܠܬܳܐ ܘܬܶܡܪܰܓ ܪܶܓܠܶܗ. ܘܢܳܦܶܠ ܒܦܰܚܳܐ ܐܚܪܺܢܳܐ. ܐܠܐ ܡܫܰܚܰܪ ܗܘܳܐ ܘܡܰܘܟܶܡ ܓܽܘܫܡܶܗ ܗܰܘ ܫܰܦܺܝܪܳܐ ܘܣܽܘܡܰܩܪܳܝܳܐ. ܕܠܐ ܟܕ ܡܶܬܓܰܐܶܐ ܒܦܽܘܪ̈ܦܳܥܶܐ܆ ܡܶܬܡܪܶܩ ܘܢܶܬܬܪܺܝܡ ܘܢܶܦܶܠ ܒܡܰܫܪ̈ܽܘܥܝܳܬܳܐ ܕܶܐܬܕܰܠܺܝ ܡܶܢܗܶܝܢ ܒܰܬܝܳܒܽܘܬܳܐ. ܘܗܳܟܰܢܳܐ ܐܰܣܓܺܝ ܐܶܬܶܐܠܶܨ ܐܰܝܟܰܢܳܐ ܕܢܶܬܕܰܡܶܐ ܒܶܣܪܶܗ ܠܥܶܣܒܳܐ ܕܝܳܒܶܫ ܡܶܢ ܪܽܘܚܳܐ ܕܫܰܘܒܳܐ. ܘܡܶܛܠܗܢܐ ܒܨܰܘܡܳܐ ܘܒܰܨܠܽܘܬܳܐ ܛܥܳܐ ܗܘܳܐ ܐܳܦ ܡܶܐܟܽܘܠܬܶܗ ܕܠܰܚܡܳܐ ܘܰܐܣܓܺܝ ܐܶܬܬܰܢܰܚ ܥܕܰܡܳܐ ܕܓܶܡܪܰܬ ܪܰܛܺܝܒܽܘܬܳܐ ܕܓܽܘܫܡܶܗ ܘܰܕܒܶܩ ܒܶܣܪܶܗ ܠܓܰܪ̈ܡܰܘܗܝ. ܘܰܗܘܳܐ ܐܝܟ ܡܺܝܬܳܐ. ܗܳܢܰܘ ܫܽܘܦܪܳܐ ܕܡܽܘܟܳܟܶܗ ܕܛܽܘܒܳܐ ܕܰܘܝܕ. ܕܰܐܝܟ ܗܰܘ ܕܠܐ ܫܒܺܝܩ ܗܘܳܐ ܗܰܘ ܚܛܳܗܶܗ ܠܟܺܐܢܽܘܬܳܐ. ܗܳܟܰܢܳܐ ܡܶܬܟܰܫܰܦ ܡܶܛܠܳܬܶܗ ܐܰܝܟܰܢܳܐ ܕܟܕ ܡܰܣܓܶܐ ܡܳܪܶܩ ܠܶܗ ܠܡܳܐܢܳܐ ܕܓܽܘܫܡܳܐ ܕܦܰܓܪܶܗ ܘܠܐ ܢܶܬܚܰܙ̈ܝܳܢ ܟܽܘ̈ܬܡܳܬܳܐ ܒܓܰܘ ܦܰܐܝܽܘܬܶܗ ܒܰܟܢܽܘܫܝܳܐ ܕܩܰܕܺܝ̈ܫܐ ܕܰܩܕܳܡ ܒܺܐܡܰܐ ܕܚܺܝܠܬܳܐ. ܡܰܝܬܶܐ ܕܶܝܢ ܒܳܬܰܪܟܶܢ ܘܳܐܡܰܪ:
ܘܶܐܬܕܰܡܺܝܬ ܠܩܳܩܳܐ ܕܰܒܡܰܕܒܪܳܐ ܘܰܗܘܺܝܬ ܐܰܝܟ ܥܽܘܕܳܐ ܒܚܰܪܒܬܳܐ. ܘܗܳܠܝܢ ܦܳܪ̈ܚܳܬܳܐ ܠܐ ܐܝ̣ܬܰܝܗܶܝܢ ܕܰܟܝܴ̈ܬܳܐ ܒܢܳܡܽܘܣܳܐ. ܠܐ ܩܳܩܳܐ ܘܠܐ ܥܽܘܕܳܐ ܦܳܩܶܕ ܢܳܡܽܘܣܳܐ ܕܢܶܬܐܰܟ̈ܠܳܢ. ܒܗܳܠܶܝܢ ܦܳܪ̈ܚܳܬܳܐ ܕܶܝܢ ܡܕܰܡܶܐ ܗܘܳܐ ܢܰܦܫܶܗ. ܒܕܰܣܒܰܪ ܗܘܳܐ ܕܛܰܡܝܰܬ̣ܶܗ ܚܛܺܝܬܳܐ ܕܩܶܛܠܳܐ ܐܳܦ ܕܓܰܘܪܳܐ. ܘܠܐ ܬܘܒ ܡܶܬܢܣܶܒ ܠܦܳܬܽܘܪܳܐ ܕܰܐܠܗܐ. ܐܝܟ ܦܳܪ̈ܚܳܬܳܐ ܕܗܳܠܝܢ ܠܐ ܡܶܬܚܰܫ̈ܒܳܢ ܕܰܟܝܴ̈ܬܳܐ ܒܢܳܡܽܘܣܳܐ. ܒܪܰܡ ܕܶܝܢ ܩܴ̈ܠܶܐ ܗܳܠܝܢ ܕܡܶܛܠ ܩܳܩܳܐ ܘܡܶܛܠ ܥܽܘܕܳܐ. ܦܶܠܶܐܬܳܢܳܐܝ̣ܬ ܒܥܰܡܰܢܽܘܐܝܠ ܚܳܝܪܺܝܢ. ܗܽܘ ܓܝܪ ܟܕ ܐܝ̣ܬܰܘܗܝ ܕܰܟܝܳܐ ܘܩܰܕܺܝܫܳܐ. ܐܶܨܛܒܺܝ ܡܶܛܠ ܚܽܘܒܶܗ ܕܒܰܟܝܳܢܳܐ ܕܶܐܬܛܰܡܺܝ ܒܰܚܛܺܝܬܳܐ ܢܶܬܕܰܡܶܐ. ܐܝܟ ܕܰܐܠܶܦ ܚܰܟܺܝܡܳܐ ܛܽܘܒܳܢܳܐ ܦܰܘܠܽܘܣ ܕܶܐܡܰܪ: ܕܫܰܕܰܪ ܐܰܠܗܳܐ ܠܰܒܪܶܗ ܒܰܕܡܽܘܬܳܐ ܕܒܶܣܪܳܐ ܕܰܚܛܺܝܬܳܐ ܕܰܢܚܰܝܒܺܝܗ̇ ܠܰܚܛܺܝܬܳܐ ܒܒܶܣܪܶܗ (ܪ̈ܗܘܡܝܐ ܚ: ܓ). ܘܬܘܒ ܠܘܬ ܩܽܘܪ̈ܺܝܢܬܳܝܶܐ ܟܬܰܒ܆ ܕܗܰܘ ܠܰܡ ܕܠܳܐ ܝܳܕܰܥ ܗܘܳܐ ܚܛܺܝܬܳܐ ܡܶܛܠܬܟܽܘܢ ܚܛܺܝܬܳܐ ܥܰܒܕܶܗ܇ ܕܰܚܢܰܢ ܢܶܗܘܶܐ ܒܶܗ ܙܰܕܺܝܩܽܘܬܳܐ (ܒ ܩܘܪ̈ܢܬܝܐ ܗ: ܟܐ). ܢܺܐܡܰܪ ܗܳܫܐ ܡܶܛܠ ܕܡܳܪܳܐ ܟܝܳܢܳܝܳܐ ܕܦܳܪ̈ܚܳܬܳܐ ܗܳܠܝܢ. ܘܡܶܫܟܚܺܝܢܰܢ ܕܰܐܡܺܝܢܳܐܝ̣ܬ ܐܶܬܳܐ ܥܰܡܰܢܽܘܐܝܠ ܠܕܰܡܝܽܘܬܳܐ ܕܰܫܟܺܝܚܳܐ ܒܦܳܪ̈ܚܳܬܳܐ ܗܳܠܝܢ. ܥܠ ܩܳܩܳܐ ܐܳܡܪܺܝܢ ܕܟܽܠܗܘܢ ܚܰܝܰܘ̈ܗܝ ܒܡܰܕܒܪܳܐ ܥܳܡܰܪ. ܡܶܛܠ ܕܪܳܚܶܡ ܚܽܘܪܒܳܐ ܐܝ̣ܬܰܘܗܝ ܘܰܒܠܺܠܝܳܐ ܦܳܪܰܚ ܥܠ ܐܰܪܥܳܐ. ܒܺܐܝܡܳܡܳܐ ܕܶܝܢ ܠܐ ܦܳܪܰܚ ܡܶܛܠ ܕܰܒܕܶܢܚܶܗ ܓܳܗܰܪ ܘܠܐ ܗܘܳܐ ܕܠܺܝܠܳܐܝ̣ܬ ܚܳܙܶܐ. ܘܺܐܝܬܰܘܗܝ ܕܝܢ ܝܰܬܺܝܪܳܐܝ̣ܬ ܐܳܦ ܪܳܚܶܡ ܒܢܰܝܴ̈ܐ. ܘܡܳܐ ܕܥܳܒܶܕ ܦܰܪ̈ܽܘܓܶܐ ܘܰܪܒܰܘ ܩܰܠܺܝܠ ܣܳܒܟܺܝܢ ܒܶܗ ܘܢܳܩܙܺܝܢ ܒܶܗ ܡܶܢ ܚܽܘܒܗܽܘܢ. ܘܡܳܪܛܺܝܢ ܡܶܠܓܶܗ. ܘܡܳܐ ܕܣܰܓܺܝ ܡܣܰܝܒܰܪ ܡܶܢ ܒܢܰܘ̈ܗܝ ܢܳܩܰܚ ܠܗܽܘܢ ܒܡܰܩܽܘܙܶܗ ܘܰܒܛܶܦܪ̈ܰܘܗܝ ܘܡܳܝܬܺܝܢ. ܘܡܶܫܬܕܶܝܢ ܩܕܳܡܰܘܗܝ ܡܺܝ̈ܬܶܐ ܬܠܳܬܳܐ ܝܰܘ̈ܡܺܝܢ. ܘܡܶܢ ܒܳܬܰܪܟܶܢ ܡܶܬܬܥܺܝܩ ܥܠܰܝܗܘܢ ܘܚܳܐܷܫ ܩܰܫܝܳܐܝ̣ܬ ܘܳܐܬܶܐ ܘܩܳܐܷܡ ܠܥܶܠ ܡܶܢ ܦܰܓܪ̈ܶܐ ܡܺܝ̈ܬܶܐ ܕܰܒܢܰܘ̈ܗܝ ܘܡܶܢ ܥܳܩܬܶܗ ܡܶܬܦܢܶܐ ܥܰܠ ܕܰܦܢܶܗ ܘܢܳܩܶܙ ܠܗ̇ ܒܡܰܩܽܘܙܶܗ. ܘܡܳܠܶܐ ܦܽܘܡܶܗ ܕܡܳܐ ܕܡܶܢ ܣܶܛܪܶܗ ܟܕ ܚܒܺܝܟ ܟܽܘ̈ܢܳܝܶܐ ܕܡܶܢ ܓܽܘܫܡܶܗ. ܘܪܳܐܷܣ ܥܰܠ ܒܢܰܘ̈ܗܝ ܘܰܒܦܽܘܩܕܳܢܳܐ ܕܰܐܠܗܳܐ ܚܳܐܷܝܢ. ܘܥܳܛܶܦ ܬܽܘܒ ܘܰܡܚܰܒܶܒ ܠܗܽܘܢ ܘܰܡܪܰܒܶܐ ܠܗܽܘܢ. ܗܳܠܝܢ ܕܶܝܢ ܕܶܐܡܰܪܘ ܥܠ ܩܳܩܳܐ ܡܰܕܒܪܳܝܳܐ ܐܰܝܠܶܝܢ ܕܒܰܟܝܴ̈ܢܝܳܬܳܐ ܐܶܬܚܰܟܰܡܘ ܘܰܢܛܰܪܘ ܕܽܘܒܳܪ̈ܶܐ ܒܰܒܛܺܝܠܽܘܬܳܐ. ܚܰܝ̈ܐ ܕܦܳܪ̈ܚܳܬܳܐ ܘܰܕܚܰܝ̈ܘܳܬܳܐ. ܟܕ ܕܝܢ ܒܗܳܢܐ ܡܶܬܕܰܡܶܐ ܥܰܡܰܢܽܘܐܝܠ ܗܰܘ ܕܰܐܚܒܰܢ ܡܶܢ ܒܪܺܝܫܺܝܬ ܒܪܳܐ ܠܢ ܡܶܢܩܕܺܝܡ ܒܨܰܠܡܶܗ ܘܒܰܕܡܽܘܬܶܗ. ܘܟܕ ܠܐ ܐܰܕܪܶܟܢܰܢ ܚܽܘܒܶܗ ܕܰܠܘܳܬܶܗ ܚܰܠܶܦܢܳܝܗܝ ܠܰܐܠܗܳܐ ܗܰܘ ܕܰܐܘܠܶܕ ܠܰܢ ܒܨܰܠܡ̈ܐ ܘܰܒܕܶܡܘܴ̈ܬܳܐ ܘܨܰܥܰܪܢܰܢ ܠܰܐܒܳܐ ܕܚܰܝܷ̈ܐ. ܘܡܶܛܠ ܗܳܢܐ ܡܶܢ ܦܰܪܕܰܝܣܳܐ ܩܶܢܳܐ ܕܚܰܝܷ̈ܐ ܫܕܳܬ ܠܢ ܐܰܠܗܽܘܬܳܐ. ܘܬܘܒ ܟܕ ܐܶܬܳܐ ܗܘܳܐ ܥܰܡܰܢܽܘܐܝܠ ܕܰܢܟܰܢܶܫ ܠܓܶܢܣܳܐ ܐܢܳܫܳܝܳܐ ܬܚܶܝܬ ܓܶܦܶܝ̈ܗ̇ ܕܰܐܠܳܗܽܘܬܳܐ. ܒܗܰܘ ܛܽܘܦܣܳܐ ܕܟܳܢܫܳܐ ܬܰܪܢܳܓܽܘܠܬܳܐ ܦܰܪ̈ܽܘܓܶܝܗ̇ ܬܚܶܝܬ ܓܶܦܶܝ̈ܗ̇. ܬܘܒ ܡܨܰܥܪܺܝܢ ܗܘܰܘ ܠܶܗ ܝܽܘ̈ܕܳܝܶܐ. ܘܰܒܝܰܕ ܗܳܕܐ ܡܳܝܬܺܝܢ ܗܘܰܘ ܒܰܚܛܳܗܰܝ̈ܗܘܢ. ܟܕ ܡܳܕܶܝܢ ܡܺܝ̈ܬܶܐ ܗܘܰܘ ܟܽܠܗܘܢ ܥܰܡ̈ܡܶܐ ܒܰܚܛܳܗܰܝ̈ܗܘܢ. ܗܳܝܕܶܝܢ ܗܰܘ ܕܰܨܒܳܐ ܘܶܐܬܕܰܡܺܝ ܒܩܳܩܳܐ. ܫܒܰܩ ܕܢܶܕܩܪܽܘܢܳܝܗܝ ܒܪܽܘܡܚܳܐ ܠܣܶܛܪܶܗ ܐܶܣܛܪ̈ܰܛܺܝܽܘܛܶܐ. ܘܰܒܝܰܕ ܕܡܳܐ ܘܡܰܝܴ̈ܐ ܕܰܪܕܰܘ ܡܶܢ ܣܶܛܪܶܗ ܩܰܕܺܝܫܳܐ ܪܰܣ ܥܰܠ ܒܢܷ̈ܝܗ̇ ܕܰܐܠܳܗܽܘܬܳܐ ܘܰܚܝܰܘ. ܘܰܥܛܰܦܘ ܒܶܗ ܠܗܰܘ ܩܶܢܳܐ ܕܚܰܝܷ̈ܐ ܕܰܢܦܰܠ ܡܶܢܶܗ ܡܰܕܒܪܳܝܳܐ.
ܬܽܘܒ ܘܰܒܚܽܘܪܒܳܐ ܥܳܡܰܪ ܩܳܩܳܐ ܐܳܦ ܥܰܡܰܢܽܘܐܝܠ ܠܘܬ ܥܰܡ̈ܡܶܐ ܡܬܺܝ̈ܠܰܝ ܒܡܰܕܒܪܳܐ ܢܦܰܩ ܡܶܢ ܒܳܬܰܪ ܨܠܺܝܒܳܐ ܗܳܢܽܘܢ ܕܚܽܘܪܒܳܐ ܗܘܰܘ ܕܠܐ ܡܫܰܝܰܢ ܒܡܶܠܬܳܐ ܕܰܐܠܳܗܳܐ.
ܬܘܒ ܕܶܝܢ ܥܽܘܕܳܐ ܐܳܦ ܗܽܘ ܡܰܚܒܳܢܰܐ ܗܘ ܕܠܺܠܝܳܐ ܘܠܐ ܡܶܬܐܰܟܠܳܢܰܐ ܗܘ ܘܰܒܚܶܫܽܘܟܳܐ ܡܰܫܡܰܥ ܩܳܠܶܗ. ܡܰܚܶܒ ܕܝܢ ܠܚܰܪ̈ܒܳܬܳܐ ܘܰܠܕܽܘ̈ܟܝܳܬܳܐ ܕܰܥܩܺܝܪ̈ܳܢ ܘܢܰܦܺܝ̈ܠܳܢ. ܐܳܦ ܥܰܡ̈ܡܶܐ ܬܘܒ ܚܰܛܳܝ̈ܐ ܚܰܪ̈ܒܳܬܳܐ ܗܘܰܘ ܡܣܰܚ̈ܦܳܬܳܐ ܘܰܡܢܰܦ̈ܠܳܬܳܐ ܒܰܚܛܺܝܬܳܐ. ܘܚܶܫܽܘܟܳܐ ܗܘܰܘ ܕܠܐ ܢܽܘܗܪܳܐ. ܟܕ ܕܶܝܢ ܐܶܬܳܐ ܡܳܪܝܳܐ ܐܰܫܡܰܥ ܩܳܠܳܐ ܢܰܗܺܝܪܳܐ ܕܰܣܒܰܪܬܶܗ ܒܚܶܫܽܘܟܳܐ ܘܰܒܥܳܠܡܳܐ ܘܰܐܢܗܪܶܗ. ܘܠܰܐܝܠܶܝܢ ܕܶܝܢ ܕܝܳܬܒܺܝܢ ܗܘܰܘ ܒܚܶܫܽܘܟܳܐ ܘܰܒܛܶܠܳܠܰܝ̈ ܡܰܘܬܳܐ ܢܽܘܗܪܳܐ ܕܢܰܚ ܠܗܽܘܢ. ܐܝܟ ܕܶܐܬܢܰܒܺܝ ܐܶܫܰܥܝܳܐ ܢܒܺܝܐ. ܕܒܶܗ ܐܶܬܒܢܻ̈ܝ ܚܰܪ̈ܒܳܬܳܐ ܕܡܶܢ ܥܳܠܰܡ ܘܨܳܕܝܴ̈ܬܳܐ ܕܕܳܪܕܳܪ̈ܺܝܢ (ܐܫܥܝܐ ܣܐ: ܕ). ܠܐ ܗܳܟܺܝܠ ܣܰܓܦܰܬ ܦܳܪܰܚܬܳܐ ܗܳܕܐ ܠܐܪܳܙܳܐ ܪܰܒܳܐ ܕܕܶܚܠܰܬ ܐܠܗܐ. ܐܢ ܓܝܪ ܠܐ ܐܶܬܚܰܫܒܰܬ ܠܗ ܠܚܶܘܝܳܐ ܗܳܝ ܕܰܒܨܰܥܪܳܐ ܢܶܬܕܰܡܶܐ ܠܐܪܳܙܳܐ ܗܰܘ ܕܦܽܘܪܩܳܢܳܐ ܕܰܥܒܰܕ ܡܽܘܫܶܐ ܒܡܰܕܒܪܳܐ. ܘܢܶܬܡܬܶܠ ܒܬܰܘܠܥܳܐ ܘܢܶܬܦܰܚܰܡ ܒܥܶܣܒܳܐ. ܘܠܐ ܗܳܝ ܕܶܐܬܕܰܡܺܝ ܠܩܳܩܳܐ ܘܰܒܥܽܘܕܳܐ ܐܶܬܚܰܫܒܰܬ ܠܗ ܠܚܶܣܕܳܐ܆ ܡܶܛܠ ܕܠܘ ܩܳܩܳܐ ܘܥܽܘܕܳܐ ܗܘܳܐ. ܐܠܐ ܠܣܽܘܥܪ̈ܳܢܶܐ ܐܚܪ̈ܳܢܶܐ ܕܫܰܦܺܝܪܺܝܢ ܢܬܰܦ ܠܰܕܡܽܘܬܶܗ. ܘܳܐܦܶܢ ܢܳܡܽܘܣܳܐ ܡܶܢ ܗܳܝ ܕܢܶܬܐܰܟ̈ܠܳܢ ܟܠܳܐ ܐܶܢܶܝܢ. ܐܠܐ ܒܰܟܝܳܢܳܐ ܠܐ ܐܝ̣ܬܰܝܗܶܝܢ ܛܰܡܴ̈ܐܬܳܐ. ܡܶܛܠ ܕܰܒܢܴ̈ܬ ܟܝܳܢܳܐ ܐܶܢܝܢ ܕܝܰܘ̈ܢܶܐ ܬܰܡܺܝ̈ܡܳܬܳܐ ܘܰܕܫܽܘܦܢܺܝ̈ܢܶܐ ܢܰܟܦܷ̈ܐ ܘܠܘ ܛܰܡܴ̈ܐܬܳܐ ܐܶܢܝܢ ܒܰܒܪܺܝܬܳܐ ܕܰܟܝܳܢܗܶܝܢ. ܡܶܛܠ ܕܰܐܠܗܐ ܡܶܕܶܡ ܕܰܛܡܰܐ ܒܰܟܝܳܢܶܗ ܠܐ ܒܪܳܐ. ܘܒܳܬܰܪ ܗܳܠܝܢ ܬܽܘܒ ܡܰܝܬܶܐ ܢܒܺܝܐ ܘܳܐܡܰܪ. ܠܘ ܡܶܠܬܳܐ ܕܠܳܚܡܳܐ ܕܰܥܠܰܘܗܝ ܬܶܬܡܰܠܰܠ. ܐܠܐ ܕܚܳܝܪܳܐ ܐܪܳܙܳܢܳܐܝ̣ܬ ܠܘܬ ܡܶܠܬܶܗ ܕܰܐܠܗܳܐ.
ܣܶܪܕܶܬ ܠܰܡ ܘܰܗܘܺܝܬ ܒܰܠܚܽܘܕܰܝ. ܐܰܝܟ ܨܶܦܪܳܐ ܕܰܡܦܰܪܚܳܐ ܥܰܠ ܐܶܓܳܪ̈ܶܐ܀ ܒܰܠܚܽܘܕܰܘܗܝ ܓܶܝܪ ܐܶܫܬܒܶܩ ܗܘܳܐ ܐܝܟ ܣܪܺܝܕܳܐ ܒܥܶܕܳܢܳܐ ܕܰܨܠܺܝܒܳܐ. ܐܝܟ ܕܡܰܣܗܶܕ ܐܶܘܰܢܓܶܠܺܝܣܛܳܐ ܕܳܐܡܰܪ: ܕܩܳܝܡܺܝܢ ܗܘܰܘ ܡܶܢ ܪܽܘܚܩܳܐ ܟܽܠܗܽܘܢ ܝܳܕܽܘ̈ܥܰܘܗܝ ܕܝܶܫܽܘܥ (ܠܘܩܐ ܟܓ: ܡܛ). ܘܗܳܝ ܕܶܐܡܰܪ ܐܰܝܟ ܨܶܦܪܳܐ ܗܳܝ ܕܰܡܦܰܪܚܳܐ ܥܰܠ ܐܶܓܳܪ̈ܶܐ ܡܰܘܕܰܥ܆ ܕܰܐܟܙܢܳܐ ܕܡܳܐ ܕܥܳܐܷܠ ܚܶܘܝܳܐ ܠܩܶܢܳܐ ܕܨܶܦܪܳܐ ܘܰܡܚܰܒܶܠ ܦܰܪ̈ܽܘܓܶܝܗ̇. ܡܰܪܺܝܪܳܐܝ̣ܬ ܡܰܝܠܠܳܐ ܥܠ ܐܶܓܳܪ̈ܶܐ ܟܕ ܦܳܪܚܳܐ ܘܝܳܗܒܳܐ ܩܳܠܳܐ. ܗܳܟܰܢܳܐ ܟܕ ܐܶܬܳܐ ܗܰܘ ܨܶܦܪܳܐ ܫܡܰܝܳܢܳܐ ܐܰܫܡܰܥ ܩܳܠܶܗ ܒܝܰܕ ܫܠܺܝ̈ܚܶܐ ܩܰܕܺܝ̈ܫܐ ܥܠ ܐܶܓܳܪ̈ܶܐ ܕܥܰܡܡ̈ܐ. ܟܕ ܛܥܺܝܢ ܠܗܽܘܢ ܒܓܶܦܰܘ̈ܗܝ ܗܳܢܘܢ ܕܶܐܨܛܒܰܥܘ ܒܰܕܡܳܐ ܕܰܨܠܺܝܒܳܐ ܚܽܘܣܳܝܳܐ ܕܰܚܛܳܗ̈ܐ. ܘܰܦܪܰܚ ܗܘܳܐ ܠܒܶܝܬ ܥܰܡܡ̈ܐ ܒܝܰܕ ܩܴ̈ܠܶܐ ܕܰܡܣܰܒܪ̈ܳܢܶܐ. ܟܕ ܦܺܝܠ ܘܰܛܪܺܝܫ ܒܰܕܡܳܐ ܕܰܨܠܺܝܒܳܐ ܐܝܟ ܨܶܦܪܳܐ ܗܳܝ ܕܡܶܨܛܰܒܥܳܐ ܒܰܕܡܳܗ̇ ܡܳܐ ܕܡܶܬܢܰܟܣܳܐ ܥܠ ܡܰܒܽܘܥܳܐ ܕܡܰܝܴ̈ܐ ܚܰܝܷ̈ܐ. ܘܡܳܐ ܕܡܶܬܕܰܟܶܐ ܗܘܳܐ ܓܰܪܒܳܐ ܒܢܳܡܽܘܣܳܐ. ܩܰܕܶܡ ܗܘܳܐ ܓܝܪ ܐܶܡܰܪ ܠܰܫܠܺܝ̈ܚܶܐ ܩܰܕܺܝ̈ܫܶܐ ܕܺܝܠܶܗ. ܕܡܶܕܶܡ ܕܳܐܡܰܪ ܐܢܳܐ ܠܟܽܘܢ ܒܚܶܫܽܘܟܳܐ ܩܕܳܡ ܙܰܒܢܳܐ ܕܰܨܠܺܝܒܳܐ܆ ܐܽܘܡܪܽܘܗܝ ܐܰܢܬܽܘܢ ܒܢܰܗܺܝܪܳܐ. ܘܡܶܕܶܡ ܕܒܶܐܕ̈ܢܰܝܟܽܘܢ ܫܳܡܥܺܝܢ ܐܰܢܬܽܘܢ ܕܰܡܡܰܠܶܠ ܐܢܳܐ ܥܰܡܟܽܘܢ. ܐܰܟܪܶܙܘ ܥܠ ܐܶܓܳܪ̈ܶܐ (ܡܬܝ ܝ: ܟܙ). ܘܰܚܙܺܝ ܐܰܝܟܰܢܳܐ ܡܰܥܶܠ ܒܳܬܰܪ ܗܳܕܐ ܚܶܣܕܳܐ ܕܨܳܠܽܘ̈ܒܶܐ. ܕܚܰܣܶܕܘ ܠܡܶܠܬܳܐ ܕܰܐܠܗܳܐ ܒܰܨܠܺܝܒܳܐ. ܘܳܐܡܰܪ:
ܟܽܠܶܗ ܝܰܘܡܳܐ ܚܰܣܕܽܘܢܝ ܒܥܶܠܕ̈ܒܳܒܰܝ ܘܰܡܫܰܒܚܴ̈ܢܰܝ ܒܺܝ ܝܡܰܘ. ܗܳܝܕܶܝܢ ܗܳܕܐ ܐܝ̣ܬܶܝܗ̇܆ ܕܠܳܛܘ ܝܽܘ̈ܕܳܝܶܐ ܚܰܕ ܠܚܰܕ ܫܳܥܰܬ ܡܰܘܬܶܗ ܕܰܡܫܺܝܚܳܐ. ܟܕ ܐܳܡܪܺܝܢ ܗܘܰܘ ܠܽܘܩܒܰܠ ܚܕܳܕ̈ܐ ܒܪܽܘܓܙܳܐ ܕܢܶܓܕܰܫ ܠܗܽܘܢ ܡܶܕܶܡ ܕܰܓܕܰܫ ܠܶܗ. ܘܒܳܬܰܪ ܗܳܠܝܢ ܡܰܥܶܠ ܫܰܪܒܳܐ ܕܽܐܘ̈ܠܨܳܢܶܐ ܗܰܘ ܕܰܣܒܰܠ ܢܒܺܝܐ. ܘܰܡܫܰܚܠܶܦ ܒܽܘܣܳܡܶܗ ܒܽܐܘ̈ܠܨܳܢܶܐ ܘܒܰܐܢܰܢ̈ܩܰܐܣ.
ܡܶܛܠ ܕܩܶܛܡܳܐ ܐܰܝܟ ܠܰܚܡܳܐ ܠܶܥܣܶܬ. ܘܡܰܫܬܰܝ ܒܰܒܟܳܬܳܐ ܡܶܙܓܶܬ. ܡܶܢ ܩܕܳܡ ܚܶܡܬܳܟ ܘܪܽܘܓܙܳܟ. ܗܳܠܝܢ ܠܡ ܐܳܡܰܪ ܕܥܶܒܕܶܬ. ܥܰܠ ܕܚܳܙܶܐ ܐܢܳܐ ܡܶܢ ܐܰܝܢܳܐ ܪܰܘܡܳܐ ܢܶܦܠܶܬ. ܠܥܶܠ ܗܘܺܝܬ ܓܝܪ ܘܒܰܫܡܰܝܳܐ ܟܬܺܝܒ ܗܘܺܝܬ. ܘܬܰܡܳܢ ܒܰܟܬܳܒܳܐ ܕܚܰܝܷ̈ܐ ܪܫܺܝܡ ܗܘܺܝܬ. ܘܰܟܒܰܪ ܕܳܡܝܳܐ. ܕܥܠ ܕܗܳܝ ܕܡܰܠܟܳܐ ܗܘܳܐ ܘܶܐܬܪܕܶܦ. ܐܡ̇ܪ ܠܗ̇ ܠܡܶܠܬܳܐ. ܐܡ̣ܪ ܓܶܝܪ:
ܕܰܐܪܺܝܡܬܳܢܝ ܘܰܫܕܰܝܬܳܢܝ. ܐܰܪܺܝܡܬܳܢܝ ܠܡ ܡܶܢ ܥܰܡܳܐ. ܘܥܰܒܕܽܘܢܝ ܡܕܰܒܪܳܢܳܐ ܘܡܰܠܟܳܐ ܥܰܠ ܫܰܒ̈ܛܶܐ ܕܺܝܣܪܳܐܝܠ. ܐܠܐ ܫܕܰܝܬܳܢܝ ܗܳܫܐ ܡܶܢ ܐܺܝܩܳܪܳܐ ܕܡܰܠܟܽܘܬܳܐ ܘܺܐܝܩܳܪܝ ܥܒܰܪ ܡܶܢ. ܘܡܶܢ ܟܽܘܪܣܰܝ ܐܶܬܛܰܪܕܶܬ.
ܘܝܰܘ̈ܡܰܝ ܐܰܝܟ ܛܶܠܳܠܳܐ ܐܶܬܪܟܶܢܘ. ܒܪܰܡ ܬܽܘܒ ܚܢܰܢ ܢܶܥܛܽܘܦ ܘܢܶܬܒܰܩܶܐ ܒܰܢܒܺܝܽܘܬܳܐ ܕܡܷ̈ܠܶܐ ܗܳܠܝܢ. ܠܘ ܓܝܪ ܒܰܠܚܽܘܕܰܘܗܝ ܚܳܝܪ̈ܳܢ. ܐܠܐ ܐܳܦ ܒܰܟܝܳܢܳܐ ܐܢܳܫܳܝܳܐ ܡܬܺܝ̈ܠܳܢ. ܘܡܳܐ ܓܝܪ ܕܰܒܕܰܘܝܕ ܚܳܝܪ̈ܳܢ. ܕܳܡܝܳܐ ܕܳܐܡܰܪ ܕܰܐܪܺܝܡܬܳܢܝ ܠܘܳܬ ܡܥܰܠܝܽܘܬܳܐ ܕܐܪ̈ܳܙܰܝܟ. ܘܒܳܬܰܪ ܕܰܚܛܺܝܬ ܫܕܰܝܬܳܢܝ ܡܶܢ ܪܰܘܡܳܐ ܕܰܫܡܰܝܳܐ. ܘܢܶܦܠܶܬ ܒܥܽܘ̈ܡܩܶܐ ܬܰܚܬܳܝ̈ܐ ܕܰܚܛܺܝܬܳܐ. ܘܰܐܢܗܰܪܬܳܢܝ ܘܚܶܫܟܶܬ. ܘܰܐܥܬܰܪܬܳܢܝ ܘܶܐܬܡܰܣܟܢܶܬ. ܘܰܐܘܪܶܒܬܳܢܝ ܘܰܐܙܥܰܪܬܳܢܝ. ܘܟܕ ܓܝܪ ܩܰܠܺܝܠ ܐܰܗܡܺܝܬ ܡܶܢ ܚܰܘܪܳܟ ܥܶܛܦܶܬ ܠܘܳܬ ܣܰܟܠܽܘܬܳܐ ܘܶܐܬܕܰܡܺܝܬ ܠܺܝ ܠܚܰܝܽܘܬܳܐ. ܗܳܠܶܝܢ ܡܶܣܬܰܟܠܺܝܢܰܢ ܥܠ ܕܰܘܝܕ. ܕܡܶܢ ܥܰܦܪܳܐ ܐܰܪܺܝܡܶܗ ܐܠܗܳܐ ܠܒܰܪܢܳܫܳܐ. ܘܰܒܨܰܠܡܳܐ ܕܥܳܒܽܘܕܳܐ ܬܰܩܢܶܗ. ܘܶܐܣܛܠܳܐ ܪܺܝܫܳܝܬܳܐ ܕܠܐ ܡܶܬܚܰܒܠܳܢܽܘܬܳܐ ܐܰܠܒܫܶܗ. ܘܝܰܗܒܠܶܗ ܡܰܥܡܪܳܐ ܕܰܒܦܰܪܕܰܝܣܳܐ. ܘܫܰܟܶܢ ܠܶܗ ܚܰܝܷ̈ܐ ܛܽܘܒܬܳܢ̈ܐ ܕܠܐ ܥܰܡܠܳܐ. ܘܡܶܢ ܒܳܬܰܪ ܕܰܚܛܳܐ ܫܕܳܝܗܝ ܠܰܐܪܥܳܐ ܗܳܝ ܕܡܶܢܳܗ̇ ܐܶܬܢܣܶܒ. ܘܶܐܬܡܰܟܰܟ ܡܶܢ ܪܰܘܡܳܐ ܕܰܫܡܰܝܳܐ. ܘܰܢܦܰܠ ܡܶܢ ܪܺܝܫܶܗ ܬܳܓܳܐ ܡܝܰܩܪܳܐ ܕܡܰܠܟܽܘܬܳܐ. ܘܰܗܘܳܐ ܚܰܒܪܳܐ ܠܚܰܝ̈ܘܳܬܳܐ ܘܶܐܫܬܰܠܰܚ ܡܶܢ ܠܐ ܡܳܝܽܘܬܽܘܬܳܐ ܗܳܝ ܕܰܢܣܰܒ ܗܘܳܐ ܒܛܰܝܒܽܘܬܳܐ ܡܶܢ ܐܠܗܳܐ. ܘܰܥܛܰܦ ܠܘܳܬ ܡܰܘܬܳܐ ܘܰܚܒܳܠܳܐ. ܡܳܕܶܝܢ ܡܶܛܠ ܗܳܠܝܢ ܫܽܘ̈ܚܠܳܦܶܐ ܟܡܺܝܪ̈ܶܐ ܕܰܣܒܰܠ ܒܰܪܢܳܫܳܐ ܒܰܥܒܳܪ ܦܽܘܩܕܳܢܳܐ. ܩܳܠܳܐ ܗܳܢܐ ܐܶܡܰܪ ܕܰܘܝܕ: ܗܰܘ ܕܰܚܠܳܦ ܢܽܘܗܪܳܐ ܥܡܰܪ ܒܛܶܠܳܠܳܐ ܕܰܚܛܺܝܬܳܐ. ܡܶܛܠ ܕܶܐܬܓܠܶܙ ܡܶܢܶܗ ܢܽܘܗܪܳܐ ܐܽܘܪܺܫܠܶܡܳܝܳܐ ܕܥܳܡܰܪ ܗܘܳܐ ܒܶܗ. ܡܶܟܺܝܠ ܗܽܘ ܢܺܐܡܰܪ ܟܕ ܡܶܬܐܶܒܶܠ ܥܰܠ ܒܺܝ̈ܫܳܬܳܐ ܕܰܥܒܰܕ.
ܘܶܐܢܳܐ ܝܶܒܫܶܬ ܐܰܝܟ ܥܶܣܒܳܐ. ܗܳܟܰܢܳܐ ܐܰܘܒܶܕ ܒܰܪܢܳܫܳܐ ܩܰܕܡܳܝܳܐ ܫܽܘܦܪܳܐ ܕܠܐ ܡܶܬܚܰܒܠܳܢܽܘܬܳܐ ܒܰܥܒܳܪ ܦܽܘܩܕܳܢܳܐ. ܐܠܐ ܡܳܢܳܐ ܐܳܡܰܪ ܢܒܺܝܐ:
ܘܰܐܢܬ ܡܳܪܝܳܐ ܠܥܳܠܰܡ ܩܰܝܳܡ ܐܰܢܬ. ܘܕܽܘܟܪܳܢܳܟ ܠܕܳܪܕܳܪ̈ܺܝܢ. ܐܰܢܬ ܩܽܘܡ ܘܪܰܚܶܡ ܥܰܠ ܨܶܗܝܽܘܢ. ܡܶܛܠ ܕܰܡܛܳܐ ܙܰܒܢܳܐ ܠܰܡܪܰܚܳܡܽܘ ܥܠܶܝܗ̇. ܡܶܛܠ ܕܰܨܒܰܘ ܥܰܒ̈ܕܰܝܟ ܒܟܺܐܦܶܝ̈ܗ̇ ܘܰܠܥܰܦܪܳܗ̇ ܪܚܶܡܘ. ܘܗܳܝ ܕܶܐܡܰܪ ܢܒܺܝܐ ܕܰܐܢܬ ܡܳܪܝܳܐ ܠܥܳܠܰܡ ܩܰܝܳܡ ܐܰܢܬ ܘܕܽܘܟܪܳܢܳܟ ܠܕܳܪܕܳܪ̈ܺܝܢ. ܚܰܕ ܐܰܢܬ ܓܶܝܪ ܗܳܫܐ ܐܳܦ ܒܳܬܰܪܟܶܢ. ܗܳܝ ܕܶܐܡܰܪ ܕܩܽܘܡ ܪܰܚܶܡ ܥܰܠ ܨܶܗܝܽܘܢ܆ ܡܶܛܠ ܕܢܶܒܥܶܐ ܟܽܘܢܳܫܳܗ̇ ܕܡܶܢ ܥܰܡ̈ܡܶܐ. ܗܳܕܐ ܓܝܪ ܡܣܰܟܝܳܐ ܗܘܳܬ ܠܪ̈ܰܚܡܶܐ ܕܰܕܢܰܚܘ ܥܠܶܝܗ̇ ܒܓܶܠܝܳܢܶܗ ܕܰܡܫܺܝܚܳܐ. ܘܕܰܨܒܰܘ ܢܒܺܝ̈ܐ ܘܰܫܠܺܝ̈ܚܶܐ ܒܗ̇ܕܐ ܝܰܬܺܝܪ ܡܶܢ ܕܒܰܟܢܽܘܫܬܳܐ. ܡܶܛܠ ܠܰܡ ܕܰܨܒܰܘ ܥܰܒ̈ܕܰܝܟ ܒܟܺܐܦܷ̈ܝܗ̇ ܘܰܠܥܰܦܪܳܗ̇ ܪܚܶܡܘ. ܟܺܐܦ̈ܐ ܩܳܪܶܐ ܠܢܰܦ̈ܫܳܬܳܐ ܕܩܰܕܺܝ̈ܫܶܐ. ܕܰܗܘܱ̈ܝ ܟܺܐܦ̈ܐ ܒܒܶܢܝܳܢܳܗ̇ ܕܥܺܕܬܳܐ. ܐܝܟ ܕܺܐܝܬܰܘܗܝ ܗܘܳܐ ܦܶܛܪܽܘܣ ܟܺܐܦܳܐ ܒܒܶܢܝܳܢܳܐ ܗܳܢܐ. ܘܛܺܝܛܳܘܣ ܬܰܠܡܺܝܕܶܗ ܘܰܩܠܺܝܡܺܝܣ ܗܰܘ ܕܡܶܢ ܪܗܽܘܡܺܝ ܕܶܐܬܬܰܠܡܰܕ ܠܦܶܛܪܽܘܣ ܗܰܘ ܪܰܒܳܐ. ܘܰܐܢܣܺܝܦܳܪܽܘܣ ܗܰܘ ܡܫܰܡܫܳܢܶܗ ܕܦܶܛܪܽܘܣ ܘܦܰܘܠܽܘܣ ܘܩܽܘܪܺܝܠܽܘܣ ܗܰܘ ܕܡܶܢ ܩܶܣܰܪܺܝܰܐ. ܘܰܛܪܽܘܦܺܝܡܳܘܣ ܗܰܘ ܐܶܦܶܣܳܝܳܐ. ܘܕܺܝܽܘܢܳܘܣܺܝܳܘܣ ܗܰܘ ܕܡܶܢ ܕܰܝܳܢܳܐ ܕܰܐܪܺܝܳܘܣ ܦܰܐܓܳܘܣ. ܘܰܐܢܬܬܶܗ ܕܡܰܐܪܺܝܣ ܐܳܦ ܐܚܪ̈ܳܢܶܐ ܕܰܗܘܰܘ ܟܺܐܦ̈ܐ ܓܰܒܝܴ̈ܬܳܐ ܘܰܨܒܰܘ ܒܗܽܘܢ ܫܠܺܝܚ̈ܐ ܘܩܰܪܶܒܘ ܐܶܢܘܢ ܠܒܶܢܝܳܢܳܐ ܕܨܶܗܝܽܘܢ ܥܶܠܳܝܬܳܐ. ܘܰܥܒܰܕܘ ܐܶܢܘܢ ܒܢܱ̈ܝ ܫܶܬܶܐܣܬܳܐ ܫܠܺܝܚܳܝܬܳܐ. ܥܰܦܪܳܐ ܕܶܝܢ ܪܚܺܝܡܳܐ ܐܝ̣ܬܰܘܗܝ. ܗܳܠܝܢ ܕܰܥܕܰܟܺܝܠ ܠܐ ܐܶܬܰܘ ܠܗܽܘܢ ܠܰܓܡܺܝܪܽܘܬܳܐ ܕܢܶܗܘܽܘܢ ܟܺܐܦ̈ܐ ܓܰܒܝܴ̈ܬܳܐ. ܥܕܰܡܳܐ ܕܰܡܫܰܚܠܶܦ ܠܗܽܘܢ ܥܡܳܕܳܐ ܘܥܳܒܶܕ ܠܗܽܘܢ ܟܺܐܦ̈ܐ ܒܡܰܘܠܳܕܳܐ ܕܡܶܢܕܪܺܝܫ. ܕܡܳܐ ܕܰܗܘܳܬ ܗܳܕܐ ܘܡܶܬܡܰܠܝܳܐ ܗܳܝ ܕܶܐܡܰܪ ܡܳܪܝܳܐ
ܘܢܶܕܚܠܽܘܢ ܥܰܡ̈ܡܶܐ ܠܰܫܡܳܟ ܡܳܪܝܳܐ. ܘܟܽܠܗܽܘܢ ܡܰܠܟ̈ܐ ܕܰܐܪܥܳܐ ܠܐܺܝܩܳܪܳܟ. ܡܶܛܠ ܕܒܳܢܶܐ ܡܳܪܝܳܐ ܠܨܶܗܝܽܘܢ ܐܳܦ ܡܶܬܚܙܶܐ ܒܫܽܘܒܚܶܗ. ܡܳܕܶܝܢ ܗܳܕܐ ܠܘ ܗܳܪܟܳܐ ܒܥܳܠܡܳܐ ܗܳܢܐ ܢܳܦܩܳܐ ܠܰܥܒܳܕܳܐ ܗܳܢܐ. ܐܠܐ ܡܳܐ ܕܒܰܛܶܠ ܟܽܠ ܪܺܝܫ ܘܟܽܠ ܫܽܘܠܛܳܢ ܘܟܽܠ ܚܰܝ̈ܠܺܝܢ (ܐ ܩܘܪ̈ܢܬܝܐ ܝܗ: ܟܕ). ܗܳܝܕܶܝܢ ܒܳܢܶܐ ܠܗ̇ ܡܳܪܝܳܐ ܠܨܶܗܝܘܢ ܥܺܕܬܳܐ ܕܰܠܥܶܠ ܐܳܦ ܕܰܠܬܰܚܬ ܘܥܳܒܶܕ ܠܬܰܪ̈ܬܰܝܗܶܝܢ ܚܕܳܐ ܐܰܝܟ ܕܰܐܟܬܶܒ ܫܠܺܝܚܳܐ ܐܰܠܗܝܳܐ ܦܰܘܠܽܘܣ.
ܘܡܶܬܦܢܶܐ ܥܰܠ ܨܠܽܘܬܳܐ ܕܡܶܣܟܻ̈ܢܶܐ. ܘܠܳܐ ܫܳܐܷܛ ܨܠܰܘܴ̈ܬܗܘܢ. ܕܥܰܡܡ̈ܐ ܚܰܛܳܝ̈ܐ ܗܳܢܘܢ ܕܡܶܣܟܺܢܺܝܢ ܗܘܰܘ ܡܶܢ ܕܽܘܒܳܪ̈ܶܐ ܕܙܰܕܺܝܩܽܘܬܳܐ. ܩܳܪܶܐ ܪܽܘܚܳܐ ܡܶܣܟܺܢ̈ܐ. ܘܦܰܫܶܩ ܕܶܐܡܰܬܝ ܗܳܕܐ ܗܳܘܝܳܐ ܒܗܳܝ ܕܶܐܡܰܪ
ܕܬܶܬܟܬܶܒ ܠܕܳܪܳܐ ܐܚܪܺܢܳܐ. ܥܕܰܡܳܐ ܠܓܶܠܝܳܢܶܗ ܕܥܰܡܰܢܽܘܐܝܠ ܘܫܽܘܠܳܡܶܗ ܕܥܳܠܡܳܐ. ܐܦ ܗܽܘ ܓܝܪ ܡܰܬܠܳܐ ܕܦܳܥ̈ܠܶܐ ܕܶܐܓܰܪ ܒܰܚܕܰܥܶܣܪ̈ܶܐ ܫܳܥܺܝ̈ܢ ܕܶܐܓܰܪ ܠܟܰܪܡܶܗ ܒܝܰܕ ܫܠܺܝ̈ܚܶܐ ܦܳܥ̈ܠܶܐ ܕܡܶܢ ܒܶܝܬ ܥܰܡܡ̈ܐ. ܗܳܢܘܢ ܕܠܰܘ ܥܰܡܡ̈ܐ ܩܪܳܐ ܠܗܽܘܢ ܪܽܘܚܳܐ. ܐܠܐ ܚܰܕ
ܥܰܡܳܐ ܕܡܶܬܒܪܶܐ ܢܫܰܒܰܚ ܠܡܳܪܝܳܐ. ܗܳܢܐ ܐܝ̣ܬܰܘܗܝ. ܗܰܘ ܕܰܒܝܰܕ ܡܰܘܠܳܕܳܐ ܕܡܶܢܕܪܺܝܫ ܐܶܬܒܪܺܝ ܬܶܢܝܳܢܽܘܬ ܒܰܣܚܳܬܳܐ ܩܰܕܺܝܫܬܳܐ ܕܡܶܛܠܳܬܶܗ ܡܕܺܝܩ ܡܶܢ ܫܡܰܝܳܐ ܡܳܪܝܳܐ. ܘܰܡܫܰܕܰܪ ܪܽܘܚܳܐ ܒܥܶܕܳܢܳܐ ܕܰܥܡܳܕܳܐ ܐܝܟ ܕܶܐܡܰܪ ܢܒܺܝܐ: ܕܡܳܪܝܳܐ ܡܶܢ ܫܡܰܝܳܐ ܠܰܐܪܥܳܐ ܐܰܕܺܝܩ. ܡܳܢܳܐ ܗܝ ܕܰܐܕܺܝܩ ܗܳܝ ܕܶܐܬܓܠܺܝ ܒܦܰܓܪܳܐ ܥܰܠ ܐܰܪܥܳܐ. ܘܡܶܛܠܡܳܢܐ ܗܳܕܐ ܥܒܰܕ؟
ܠܡܶܫܡܰܥ ܐܶܢܰܩܬܶܗ ܕܰܐܣܺܝܪܳܐ. ܘܰܠܡܶܫܪܳܐ ܒܢܰܝܴ̈ܐ ܡܶܢ ܡܰܘܬܳܐ. ܡܰܢܽܘ ܐܰܣܺܝܪܳܐ ܗܳܢܐ ܕܡܶܛܠܳܬܶܗ ܐܰܕܺܝܩ ܡܳܪܝܳܐ ܡܶܢ ܫܡܰܝܳܐ ܠܰܐܪܥܳܐ. ܐܰܣܺܝܪܳܐ ܗܘܳܐ ܐܳܕܳܡ ܪܺܝܫ ܓܒܺܝܠܬܰܢ ܕܰܐܣܪܶܗ ܐܳܟܶܠܩܰܪܨܳܐ ܒܶܝܬ ܐܰܣܺܝܪ̈ܶܐ ܟܡܺܝܪ̈ܶܐ ܕܰܫܝܽܘܠ ܬܰܚܬܳܝܬܳܐ. ܘܠܰܝܬ ܗܘܳܐ ܕܡܰܪܘܰܚ ܠܶܗ ܘܫܳܡܰܥ ܐܶܢܰܩܬܶܗ ܕܡܶܢ ܒܶܝܬ ܚܒܽܘܫܝܳܐ. ܟܕ ܕܝܢ ܚܳܣ ܥܠܰܘܗܝ. ܡܳܪܝܳܐ ܢܚܶܬ ܠܘܳܬܶܗ ܠܒܶܝܬ ܐܰܣܺܝܪ̈ܶܐ ܘܰܫܡܰܥ ܓܥܳܬܶܗ ܘܰܫܪܳܝܗܝ. ܐܝܟ ܕܶܐܡܰܪ ܙܟܰܪܝܳܐ ܠܘܳܬܶܗ܆ ܕܳܐܦ ܐܰܢܬ ܠܰܡ ܫܪܰܝܬ ܒܰܕܡܳܐ ܕܕܺܝܰܬܺܝܩܺܝ ܕܺܝܠܳܟ ܐܰܣܺܝܪ̈ܶܐ ܡܶܢ ܓܽܘܒܳܐ ܕܠܰܝܬ ܒܶܗ ܡܰܝܴ̈ܐ (ܙܟܪܝܐ ܛ: ܝܐ). ܒܢܰܝܴ̈ܐ ܕܶܝܢ ܫܪܳܐ ܡܶܢ ܡܰܘܬܳܐ. ܗܳܠܝܢ ܐܶܢܽܘܢ ܕܰܒܕܽܘܒܳܪ̈ܶܐ ܕܙܰܕܺܝܩܽܘܬܳܐ ܗܘܰܘ ܒܢܰܝܴ̈ܐ ܠܰܐܠܗܳܐ. ܘܟܰܕ ܥܰܠ ܡܳܪܝܳܐ ܠܰܐܬܪܶܗ ܕܡܰܘܬܳܐ ܫܪܳܐ ܐܶܢܘܢ ܡܶܢ ܐܰܣܽܘܪ̈ܶܐ ܕܰܫܝܽܘܠ. ܘܗܳܢܝܢ ܗܳܠܝܢ ܐܳܡܰܪ ܢܒܺܝܐ.
ܕܢܶܫܬܰܥܽܘܢ ܒܨܶܗܝܽܘܢ ܫܡܶܗ ܕܡܳܪܝܳܐ. ܗܰܘ ܕܰܫܪܳܐ ܐܶܢܘܢ ܡܶܢ ܡܰܘܬܳܐ ܘܡܶܢ ܫܽܘܪ̈ܶܐ ܘܰܚܒܳܠܳܐ ܕܰܒܓܰܘ ܫܝܽܘܠ.
ܘܬܶܫܒ̈ܚܳܬܶܗ ܒܽܐܘܪܺܫܠܶܡ. ܡܳܐ ܕܶܐܬܟܰܢܰܫܘ ܥܰܡܡ̈ܐ ܐܰܟܚܕܳܐ. ܘܡܰܠܟ̈ܘܳܬܳܐ ܠܡܶܦܠܰܚ ܠܡܳܪܝܳܐ. ܒܰܡܢܳܬܳܐ ܡܰܢ ܐܳܦ ܒܥܳܠܡܳܐ ܗܳܢܐ. ܐܶܬܟܰܢܰܫܘ ܥܰܡܡ̈ܐ ܘܡܰܠܟ̈ܐ ܕܰܐܪܥܳܐ ܒܩܴ̈ܠܶܐ ܕܰܫܠܺܝ̈ܚܶܐ ܠܡܶܦܠܰܚ ܠܡܳܪܝܳܐ. ܠܚܰܪܬܳܐ ܕܶܝܢ ܡܶܬܦܰܫܩܳܐ ܘܢܳܦܩܳܐ ܠܰܥܒܳܕܳܐ ܗܳܝ ܕܰܐܡܺܝܪܳܐ ܡܶܢ ܡܳܪܝܳܐ. ܕܠܺܝ ܠܰܡ ܬܶܟܽܘܦ ܟܽܠ ܒܪܽܘܟ ܘܠܺܝ ܢܰܘܕܶܐ ܟܽܠ ܠܶܫܳܢ (ܐܫܥܝܐ ܡܗ: ܟܓ ܪ̈ܗܘܡܝܐ ܝܕ: ܝܐ ܦܝ̈ܠܝܦܣܝܐ ܒ: ܝ). ܒܳܬܰܪ ܗܳܠܝܢ ܐܡ̣ܪ ܢܒܺܝܐ:
ܡܰܟܶܟܘ ܚܰܝܠܝ ܒܰܐܪܥܳܐ. ܘܰܒܨܺܝܪܽܘܬܳܐ ܕܝܰܘ̈ܡܰܝ ܐܶܡܰܪ ܠܺܝ. ܕܠܳܐ ܬܰܣܩܰܢܝ ܒܦܶܠܓܽܘܬ ܝܰܘ̈ܡܰܝ. ܘܰܠܕܳܪܕܳܪ̈ܺܝܢ ܫܢܱ̈ܝܟ. ܗܳܠܝܢ ܐܡ̣ܪ ܢܒܺܝܐ ܠܘܳܬ ܐܰܠܗܳܐ. ܡܶܛܠ ܡܽܘܟܳܟܶܗ ܘܫܶܦܠܶܗ ܕܒܰܪܢܳܫܳܐ ܒܰܐܪܥܳܐ ܕܟܽܘ̈ܒܶܐ. ܘܰܡܦܺܝܣ ܕܠܐ ܒܗܳܠܝܢ ܚܰܝܷ̈ܐ ܢܶܫܬܰܦܰܠ. ܩܳܪܶܐ ܠܶܗ ܠܙܰܒܢܳܐ ܕܥܳܠܡܳܐ ܗܳܢܐ ܦܶܠܓܽܘܬ ܚܰܝܷ̈ܐ ܘܦܶܠܓܽܘܬ ܝܰܘܡܳܐ ܡܶܛܠ ܕܠܘ ܡܫܰܡܠܰܝܴ̈ܐ ܐܶܢܘܢ ܚܰܝܷ̈ܐ ܕܦܰܓܪܳܐ. ܕܰܐܠܗܳܐ ܕܶܝܢ ܠܐ ܗܘܳܐ ܗܳܟܰܢܐ ܐܠܐ ܡܫܰܡܠܰܝܴ̈ܐ ܐܶܢܘܢ. ܘܰܓܡܺܝܪ̈ܶܐ ܘܰܠܕܳܪܕܳܪ̈ܺܝܢ ܐܶܢܝܢ ܫܢܰܘ̈ܗܝ. ܟܕ ܕܶܝܢ ܠܗܰܘ ܕܰܐܕܺܝܩ ܡܶܢ ܫܡܰܝܳܐ ܠܰܐܪܥܳܐ ܡܶܛܠ ܐܶܢܰܩܬܶܗ ܕܰܐܣܺܝܪܳܐ܆ ܡܶܣܬܰܟܰܠ ܕܺܐܝܬܰܘܗܝ ܐܝ̣ܬܝܳܐ ܡܬܽܘܡܳܝܳܐ. ܘܰܕܡܶܢ ܥܳܠܰܡ܆ ܐܰܘܣܶܦ ܘܶܐܡܰܪ:
ܕܡܶܢ ܠܩܽܘܕܡܺܝܢ ܐܰܪܥܳܐ ܬܰܩܶܢܬ ܘܰܥܒܳܕ ܐܺܝ̈ܕܰܝܟ ܫܡܰܝܴ̈ܐ. ܘܗܶܢܘܢ ܥܳܒܪܺܝܢ ܐܰܢܬ ܩܰܝܳܡ ܐܰܢܬ. ܘܟܽܠܗܽܘܢ ܐܰܝܟ ܠܒܽܘܫܳܐ ܒܳܠܶܝܢ ܘܰܐܝܟ ܡܰܪܛܽܘܛܳܐ ܡܶܬܚܰܠܦܺܝܢ. ܘܰܐܢܬ ܐܰܝܟ ܕܺܐܝܬܰܝܟ ܐܰܢܬ ܘܰܫܢܱ̈ܝܟ ܠܳܐ ܓܳܡܪ̈ܳܢ. ܘܰܒܢܱ̈ܝ ܥܰܒܕܰܝ̈ܟ ܢܶܫܪܽܘܢ ܒܰܐܪܥܳܐ ܘܙܰܪܥܗܽܘܢ ܩܕܳܡܰܝܟ ܢܶܬܩܰܢ. ܠܗܳܠܝܢ ܒܢܴ̈ܬ ܩܴ̈ܠܶܐ ܦܰܫܶܩ ܐܶܢܶܝܢ ܦܰܘܠܽܘܣ ܫܠܺܝܚܳܐ. ܟܰܕ ܟܬܰܒ ܠܘܳܬ ܥܶܒܪ̈ܳܝܶܐ ܡܶܛܠ ܡܶܠܬܶܗ ܘܰܒܪܶܗ ܕܰܐܠܳܗܳܐ. ܘܠܐ ܣܢܺܝ̈ܩܳܢ ܥܰܠ ܢܽܘܗܳܪܳܐ ܝܰܬܺܝܪܳܐ. ܟܰܕ ܩܪܳܝܗܝ ܨܰܠܡܳܐ ܕܫܽܘܒܚܶܗ ܕܰܐܒܳܐ ܘܨܶܡܚܳܐ ܡܬܽܘܡܳܝܳܐ ܕܺܐܝܬܽܘܬܶܗ. ܐܡ̣ܪ ܗܳܠܝܢ: ܘܰܐܢܬ ܡܶܢ ܒܪܺܝܫܺܝܬ ܣܳܡܬ ܫܶܬܶܐܣܶܝ̈ܗ̇ ܕܰܐܪܥܳܐ. ܘܰܫܡܰܝܳܐ ܥܒܳܕ ܐܺܝ̈ܕܰܝܟ ܐܶܢܽܘܢ. ܘܗܶܢܽܘܢ ܢܶܥܒܪܽܘܢ ܘܰܐܢܬ ܩܰܝܳܡ ܐܰܢܬ. ܘܟܽܠܗܽܘܢ ܐܰܝܟ ܢܰܚܬܳܐ ܢܶܒܠܽܘܢ. ܘܰܐܝܟ ܬܰܟܣܺܝܬܳܐ ܬܶܥܽܘܦ ܐܶܢܽܘܢ. ܘܗܶܢܽܘܢ ܢܶܬܚܰܠܦܽܘܢ. ܘܰܐܢܬ ܐܰܝܟ ܕܺܐܝܬܰܝܟ ܐܰܢܬ. ܘܰܫ̈ܢܰܝܟ ܠܳܐ ܢܶܓܡܪ̈ܳܢ (ܥܒܪ̈ܝܐ ܐ: ܝ-ܝܒ). ܗܳܝܕܶܝܢ ܕܶܐܡܰܪ ܕܢܶܥܒܪܽܘܢ ܫܡܰܝܳܐ ܠܘ ܕܒܳܛܠܺܝܢ ܐܰܘ ܡܶܣܬܠܶܝܢ. ܐܠܐ ܕܗܳܘܶܐ ܢܰܘܚܳܐ ܠܰܟܪܽܘܟܝܶܗ ܕܰܪܩܺܝܥܳܐ ܐܰܠܶܦ. ܘܠܰܘ ܬܽܘܒ ܕܰܡܒܰܛܳܠܽܘ ܡܒܰܛܶܠ ܠܗ̇ ܠܰܐܪܥܳܐ ܡܫܰܘܕܥܳܐ ܡܶܠܬܳܐ. ܐܠܐ ܡܚܰܠܳܦܽܘ ܡܶܬܚܰܠܦܺܝܢ ܫܡܰܝܳܐ ܘܰܐܪܥܳܐ ܘܡܶܬܚܰܕܬܺܝܢ ܘܗܳܘܶܝܢ ܪ̈ܽܘܚܳܢܶܐ ܘܠܳܐ ܡܶܬܬܙܺܝܥܺܝܢ. ܘܫܳܪܶܝܢ ܒܢܱ̈ܝ ܥܰܒ̈ܕܰܘܗܝ ܕܡܶܠܬܳܐ ܒܰܐܪܥܳܐ. ܘܡܶܬܚܰܠܦܳܐ ܘܡܶܬܚܰܕܬܳܐ ܐܰܝܟ ܕܶܐܡܰܪ ܪܽܘܚܳܐ. ܘܢܶܬܩܰܢ ܩܕܳܡܰܘܗܝ ܙܰܪܥܗܽܘܢ. ܘܰܡܒܰܪܟܺܝܢ ܘܰܡܫܰܒܚܺܝܢ ܒܝܳܪܬܽܘܬܗܽܘܢ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܐ
ܕܡܰܘܕܰܥ ܥܰܠ ܣܰܝܒܘܬܶܗ ܕܕܰܘܺܝܕ ܘܥܰܠ ܥܰܬܝܩܽܘܬܶܗ ܕܥܳܠܡܳܐ ܕܰܒܝܰܕ ܡܳܪܰܢ ܐܶܬܚܰܕܬܰܬ ܘܥܰܠ ܬܶܫܒܽܘܚܬܳܐ ܕܠܳܐ ܡܶܬܚܰܒܠܳܐ ܕܰܩܢܳܬ ܢܰܦܫܳܐ ܒܰܥܡܳܕܳܐ ܩܰܕܝܫܳܐ.
ܛܰܝܒܽܘܬܳܐ ܘܪ̈ܰܚܡܶܐ ܕܰܐܠܗܐ ܕܰܕܢܰܚܘ ܥܠ ܥܳܠܡܳܐ ܒܓܶܠܝܳܢܶܗ ܕܥܰܡܰܢܘܐܝܠ. ܟܕ ܡܶܫܬܰܥܶܐ ܛܽܘܒܳܢܳܐ ܕܰܘܝܕ܆ ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܠܳܬ܆ ܟܕ ܠܘ ܩܕܳܡ ܦܰܪܨܽܘܦܳܐ ܕܺܝܠܗ ܘܩܳܐܷܡ ܠܬܰܚܘܺܝܬܳܐ ܩܕܳܡ ܫܳܡܽܘ̈ܥܶܐ. ܐܝܟ ܗܰܘ ܕܒܶܗ ܨܺܝܪ ܟܽܠܶܗ ܥܳܠܡܳܐ ܕܰܥܬܶܩ ܘܰܣܐܷܒ ܒܟܺܐܒ̈ܐ ܨܳܒܶܐ ܠܡܰܠܳܦܽܘ ܕܰܐܝܟ ܐܰܝܟܰܢܳܐ ܐܡ̇ܪ ܐܢܳܐ. ܟܕ ܩܪܶܒ ܠܫܽܘܠܳܡܳܐ ܕܚܰܝܷ̈ܐ ܦܰܓܪ̈ܳܢܳܝܶܐ ܛܽܘܒܳܢܳܐ ܕܰܘܝܕ ܡܰܘܕܰܥ ܟܬܳܒܳܐ܆ ܕܡܰܠܟܳܐ ܕܰܘܝܕ ܣܐܷܒ ܘܥܰܠ ܒܰܫܢܰܝܴ̈ܐ. ܘܰܡܟܰܣܶܝܢ ܗܘܰܘ ܠܶܗ ܒܰܠܒܽܘ̈ܫܶܐ ܘܠܳܐ ܫܳܚܶܢ ܗܘܳܐ. ܗܳܕܐ ܕܠܳܐ ܫܳܚܶܢ ܗܘܳܐ܆ ܠܰܘ ܕܟܽܠ ܒܰܪܢܳܫܳܐ ܕܗܳܘܶܐ ܒܰܪ ܫܰܒܥܺܝܢ ܫܢܻ̈ܝܢ ܠܩܰܪܺܝܪܽܘܬܳܐ ܕܰܐܝܟ ܗܳܕܐ ܡܫܰܚܠܶܦ ܓܽܘܫܡܶܗ ܡܰܘܕܥܳܐ. ܣܰܓܺܝ̈ܐܐ ܓܝܪ ܕܰܡܛܰܘ ܠܡܶܢܝܳܢܳܐ ܕܡܰܐܬܶܝܢ ܫܢܻ̈ܝܢ ܡܶܢ ܩܕܳܡ ܕܰܘܝܕ܆ ܘܰܠܟܺܐܒܳܐ ܕܰܐܝܟ ܗܳܢܐ ܠܐ ܐܶܬܰܘ. ܐܚܪ̈ܳܢܶܐ ܕܶܝܢ ܡܶܢ ܩܕܳܡ ܕܰܢܡܰܢܥܽܘܢ ܠܗܳܢܐ ܡܶܢܝܳܢܳܐ ܩܰܪ ܓܽܘܫܡܗܽܘܢ ܘܢܰܫ ܒܶܣܪܗܽܘܢ. ܕܗܺܝ ܗܳܕܐ ܡܥܳܕܳܐ ܗܳܘܝܳܐ ܡܶܢ ܥܰܡ̈ܠܐܷ ܐܰܡܺܝ̈ܢܶܐ ܕܫܰܗܪ̈ܶܐ ܐܰܡܺܝ̈ܢܶܐ ܕܠܰܝ̈ܠܰܘܳܬܳܐ ܘܰܕܨܰܘ̈ܡܶܐ ܬܟܺܝ̈ܒܶܐ. ܘܕܰܓܠܺܝܙܽܘܬܳܐ ܕܡܶܢ ܡܶܐܟ̈ܠܳܬܳܐ ܕܰܡܫܰܚܢܺܝܢ ܘܰܡܝܰܒܫܺܝܢ. ܘܝܰܬܺܝܪܳܐܝܬ ܡܶܢ ܒܶܟܝܷ̈ܐ ܬܟܺܝ̈ܒܶܐ ܕܡܰܫܦܥܺܝܢ ܕܶܡܥ̈ܐ. ܘܡܶܢ ܟܰܪܝܽܘܬܳܐ ܗܳܝ ܕܡܶܢܳܗ̇ ܡܥܳܕܳܐ ܡܶܬܝܰܠܕܳܐ ܩܽܘܪܰܬ ܡܽܘܚܳܐ. ܡܶܛܠ ܕܰܐܟܙܢܳܐ ܕܰܡܫܰܚܶܢ ܓܽܘܚܟܳܐ ܘܡܰܪܬܰܚ ܕܡܳܐ ܕܰܒܠܶܒܳܐ. ܘܡܰܕܗܶܢ ܬܽܘܒ ܠܚܰܠܒܳܐ ܕܥܰܠ ܓܰܘܢܳܐ. ܘܰܡܢܰܒܪܫܳܐ ܚܰܕܽܘܬܳܐ ܠܢܽܘܪܳܐ ܕܰܒܠܶܒܳܐ. ܘܡܰܕܠܩܳܐ ܠܗܳܝ ܕܰܒܟܰܒܕܳܐ ܘܰܒܟܽܘ̈ܠܝܳܬܳܐ. ܗܳܟܰܢܳܐ ܡܩܰܘܪܪܳܐ ܟܰܪܝܽܘܬܳܐ ܠܫܰܚܺܝܢܽܘܬܳܐ ܕܰܡܙܺܝܓܳܐ ܒܰܟܢܺܝܫܽܘܬ ܕܡܳܐ ܕܰܒܠܶܒܳܐ. ܘܰܡܫܰܚܠܦܳܐ ܠܶܗ ܠܰܕܡܳܐ ܕܢܺܐܩܰܪ ܘܢܶܥܒܶܐ. ܘܰܠܚܰܠܒܳܐ ܚܶܘܳܪܳܐ ܘܰܦܨܺܝܚܳܐ ܡܚܰܦܝܳܐ ܠܶܗ ܥܳܩܬܳܐ ܠܓܰܘܢܳܐ. ܘܰܐܝܟ ܬܶܢܳܢܳܐ ܕܡܰܘܟܶܡ ܓܰܐܝܽܘܬܳܐ ܕܒܴ̈ܬܶܐ ܡܟܰܠܫܷ̈ܐ. ܗܳܟܰܢܳܐ ܡܫܰܚܪܳܐ ܘܡܰܘܟܡܳܐ ܥܳܩܬܳܐ ܓܰܘܢܳܐ ܫܰܦܺܝܪܳܐ ܕܟܰܒܕܳܐ ܘܰܕܟܽܘ̈ܠܝܳܬܳܐ. ܘܡܶܢ ܗܳܕܐ ܥܶܠܬܳܐ ܡܶܬܕܰܠܚܺܝܢ ܘܡܰܘܟܡܺܝܢ ܦܰܪ̈ܨܽܘܦܶܐ ܕܐܢܴ̈ܫܳܐ ܡܶܢ ܩܰܪܺܝܪܽܘܬܳܐ ܕܡܶܬܝܰܠܕܳܐ ܒܦܰܓܪܳܐ. ܣܳܗܶܕ ܠܗܳܢܐ ܚܰܟܺܝܡܳܐ ܫܠܶܝܡܽܘܢ ܕܶܐܡܰܪ ܒܡܰܬܠܳܐ: ܕܡܶܢ ܟܰܪܝܽܘܬܳܐ ܡܶܬܝܰܠܕܳܐ ܥܳܩܬܳܐ ܘܡܰܗܪܳܐ ܠܶܒܶܗ ܕܓܰܒܪܳܐ (ܡ̈ܬܠܐ ܟܗ: ܟ). ܘܦܰܘܠܽܘܣ ܐܰܟܬܶܒ ܕܟܰܪܝܽܘܬܳܐ ܕܥܳܠܡܳܐ ܡܰܘܬܳܐ ܥܳܒܕܳܐ (ܒ ܩܘܪ̈ܢܬܝܐ ܙ: ܝ). ܘܡܰܘܬܳܐ ܠܳܐ ܡܶܫܟܚܳܐ ܕܢܶܗܘܶܐ ܒܶܠܥܳܕ ܩܰܪܺܝܪܽܘܬܳܐ. ܡܶܛܠ ܕܟܽܠ ܟܡܳܐ ܕܡܳܐ ܕܰܒܠܶܒܳܐ ܪܳܬܰܚ܆ ܫܳܚܶܢ ܗܰܘ ܕܰܒܟܰܒܕܳܐ ܘܰܒܟܽܘ̈ܠܝܳܬܳܐ ܪܰܚܺܝܩ ܗܽܘ ܡܰܘܬܳܐ ܘܠܐ ܐܳܬܶܐ. ܐܶܢܕܶܝܢ ܩܳܐܱܪ ܕܡܳܐ ܒܠܶܒܳܐ ܓܳܠܶܕ. ܡܶܢ ܟܰܕܽܘ ܩܰܪܺܝܒ ܗܽܘ ܡܰܘܬܳܐ. ܘܰܐܝܟ ܕܒܰܦܣܳܩܳܐ ܠܡܺܐܡܰܪ܆ ܩܰܪܺܝܪܽܘܬܳܐ ܟܽܠ ܐܶܡܰܬܝ ܕܣܳܓܝܳܐ ܡܰܘܬܳܐ ܡܥܳܕܳܐ ܠܡܶܥܒܰܕ. ܡܳܕܶܝܢ ܛܽܘܒܳܢܳܐ ܕܰܘܝܕ ܡܶܢ ܥܰܡ̈ܠܶܐ ܣܰܓܺܝ̈ܐܐ ܕܰܐܛܥܢܶܗ ܠܦܰܓܪܶܗ. ܘܡܶܢ ܕܶܡܥ̈ܐ ܣܰܓܺܝ̈ܐܳܬܳܐ ܕܰܐܪܕܺܝ ܗܘܱ̈ܝ ܥܰܝ̈ܢܰܘܗܝ. ܓܶܡܪܰܬ ܦܰܐܝܽܘܬܳܐ ܕܦܰܓܪܶܗ. ܘܰܐܘܟܶܡ ܓܽܘܫܡܶܗ ܫܰܦܺܝܪܳܐ ܘܶܐܬܚܰܒܰܠ ܒܟܺܐܒܳܐ ܕܢܰܫܺܝܫܽܘܬܳܐ ܘܰܕܩܰܪܺܝܪܽܘܬܳܐ ܐܝܟ ܕܡܰܫܡܰܥ ܠܰܢ ܒܡܰܙܡܽܘܪܳܐ ܕܰܩܕܳܡ ܗܳܢܐ ܘܳܐܡܰܪ:
ܡܶܛܠ ܕܰܓܡܰܪ ܒܬܽܘܢܳܢܳܐ ܝܰܘ̈ܡܰܝ ܐܳܦ ܓܰܪ̈ܡܰܝ ܚܘܰܪܘ ܐܝܟ ܡܰܘܩ̈ܕܶܐ. ܘܰܚܡܳܐ ܠܶܒܝ ܐܰܝܟ ܥܶܣܒܳܐ ܘܺܝܒܶܫ ܡܶܛܠ ܕܰܛܥܺܝܬ ܡܶܐܟܽܘܠܬܶܗ ܕܠܰܚܡܝ. ܘܡܶܢ ܩܳܠܐ ܕܬܶܢܚܴ̈ܬܝ ܕܒܶܩ ܒܶܣܪܝ ܠܓܰܪ̈ܡܰܝ. ܘܬܽܘܒ ܐܡ̣ܪ: ܡܶܛܠ ܕܩܶܛܡܳܐ ܐܰܝܟ ܠܰܚܡܳܐ ܠܶܥܣܶܬ ܘܡܰܫܬܰܝ ܒܰܒܟܳܬܳܐ ܡܶܙܓܶܬ (ܡܙܡܘܪܐ ܩܒ: ܕ-ܝܐ) ܡܶܢ ܥܰܡ̈ܠܶܐ ܕܰܐܝܟ ܗܳܠܝܢ ܫܰܚܺܝܢܽܘܬܳܐ ܕܦܰܓܪܶܗ ܕܰܢܒܺܝܐ ܗܶܦܟܰܬ ܠܗ̇ ܠܩܰܪܺܝܪܽܘܬܳܐ. ܡܶܛܠܗܳܢܐ ܠܐ ܡܶܫܟܚܺܝܢ ܗܘܰܘ ܠܒܽܘ̈ܫܐ ܘܠܐ ܒܰܠܰܐܢ̈ܐܣ ܠܰܡܫܰܚܳܢܽܘܬܶܗ. ܟܕ ܕܶܝܢ ܒܟܺܐܒܳܐ ܗܳܢܐ ܠܐ ܡܶܬܐܰܣܝܳܢܳܐ ܢܦܰܠ ܛܽܘܒܳܢܳܐ ܕܰܘܝܕ. ܘܰܩܪܶܒ ܫܽܘܠܳܡܳܐ ܕܚܰܝܰܘ̈ܗܝ. ܚܰܟܺܝܡܳܐܝ̣ܬ ܠܘܳܬ ܢܰܦܫܶܗ ܒܡܷ̈ܠܶܐ ܕܒܽܘܝܳܐܐ ܡܠܰܒܶܒ ܗܘܳܐ ܘܰܡܒܰܝܐ ܠܗ̇ ܟܕ ܐܡ̇ܪ ܘܰܡܙܰܡܰܪ:
ܒܰܪܶܟܝ ܢܰܦܫܝ ܠܡܳܪܝܳܐ. ܘܟܽܠܗܽܘܢ ܓܰܪ̈ܡܰܝ ܠܰܫܡܶܗ ܩܰܕܺܝܫܳܐ. ܠܐ ܠܰܡ ܢܒܰܛܠܶܟܝ ܟܽܘܪܗܳܢܳܐ ܡܶܢ ܗܳܝ ܕܰܬܒܰܪܟܺܝܢ ܠܡܳܪܝܳܐ. ܘܠܐ ܬܘܒ ܓܰܪ̈ܡܰܝ ܢܶܬܥܰܟܪܽܘܢ ܡܶܢ ܥܶܠܬܳܐ ܕܩܰܪܺܝܪܽܘܬܳܐ ܘܢܶܟܠܽܘܢ ܒܽܘܪ̈ܟܳܬܳܐ ܠܰܫܡܶܗ ܩܰܕܺܝܫܳܐ. ܘܬܘܒ ܥܳܐܷܦ ܘܰܡܒܰܪܶܟ ܘܰܡܥܺܝܪ ܠܗ̇ ܠܢܰܦܫܳܐ ܘܳܐܡܰܪ:
ܒܰܪܶܟܝ ܢܰܦܫܝ ܠܡܳܪܝܳܐ. ܘܠܐ ܬܶܛܥܶܝܢ ܠܟܽܠܗܽܘܢ ܦܽܘܪ̈ܥܳܢܰܘܗܝ. ܚܙܰܝܬ ܐܰܝܟܰܢܐ ܠܐ ܡܪܰܛܶܢ ܗܘܳܐ ܒܟܽܠܶܗ ܐܽܘܠܨܳܢܶܐ ܗܰܘ ܪܰܒܳܐ ܕܩܰܪܺܝܪܽܘܬܳܐ ܘܝܰܬܺܝܪܳܐܝ̣ܬ ܐܶܡܰܬܝ ܕܰܒܟܽܠܶܗ ܦܰܓܪܶܗ ܡܶܫܬܰܠܛܳܐ. ܗܳܝܕܶܝܢ ܘܠܳܐ ܚܰܕ ܥܽܘܕܪܳܢܳܐ ܡܶܫܟܚܳܐ ܐܽܘܡܳܢܽܘܬܳܐ ܕܳܐܣܝܽܘܬܳܐ ܠܡܶܩܪܰܒ ܠܗܰܘ ܕܟܽܠ ܟܽܠܶܗ ܐܶܬܗܦܶܟ ܠܩܰܪܺܝܪܽܘܬܳܐ. ܡܶܛܠ ܕܳܐܣܰܘܴ̈ܬܳܐ ܢܳܛܪܺܝܢ ܒܛܶܟܣܳܐ ܘܡܶܫܟܚܺܝܢ ܠܡܶܕܰܥ ܒܝܰܕ ܓܶܫܬܳܐ ܩܰܠܺܝ̈ܠܘܳܬܳܐ ܕܶܐܣܛܽܘ̈ܟܳܝܶܐ ܕܦܰܓܪܳܐ. ܐܢ ܚܳܙܶܝܢ ܕܙܶܥܪܰܬ ܚܰܡܺܝܡܽܘܬܳܐ ܘܣܶܓܝܰܬ ܩܰܪܺܝܪܽܘܬܳܐ. ܒܝܰܕ ܫܽܘܚܳܢ̈ܐ ܘܥܶܩܳܪ̈ܶܐ ܚܰܡܺܝ̈ܡܶܐ ܣܳܝܡܺܝܢ ܥܨܳܒ̈ܐ ܒܽܐܘܡܳܢܽܘܬܗܽܘܢ ܘܡܰܘܣܦܺܝܢ ܚܰܡܺܝܡܽܘܬܳܐ ܠܐܷܣܛܽܘܟܣܳܐ ܗܰܘ ܕܶܐܬܒܙܶܙ ܡܶܢ ܥܶܠܰܬ ܩܰܪܺܝܪܽܘܬܳܐ ܕܥܶܫܢܰܬ. ܘܶܐܢܕܶܝܢ ܐܶܣܛܽܘܟܣܳܐ ܚܰܡܺܝܡܳܐ ܣܳܓܶܐ ܘܚܳܛܶܦ ܚܰܝܠܶܗ ܕܦܰܓܪܳܐ ܒܥܶܩܳܪ̈ܶܐ ܩܰܪܺܝܪ̈ܶܐ ܘܰܡܦܰܝ̈ܓܳܢܶܐ ܡܬܰܪܣܶܝܢ ܠܶܐܣܛܽܘܟܣܳܐ ܩܰܪܺܝܪܳܐ. ܕܡܶܫܟܰܚ ܕܰܢܩܽܘܡ ܠܽܘܩܒܰܠ ܚܰܡܺܝܡܳܐ. ܕܠܐ ܟܕ ܣܳܓܶܐ ܘܡܶܬܥܰܫܰܢ ܢܰܘܩܶܕ ܘܰܢܝܰܒܶܫ. ܐܦ ܬܘܒ ܘܠܽܘܩܒܰܠ ܐܶܣܛܽܘܟܣܳܐ ܝܰܒܺܝܫܳܐ ܡܳܐ ܕܥܳܠܶܒ ܒܰܐܝܠܶܝܢ ܕܰܡܪ̈ܰܛܒܳܢ ܡܶܫܟܚܺܝܢ ܠܰܡܥܰܕܳܪܽܘ. ܘܠܽܘܩܒܰܠ ܐܶܣܛܽܘܟܣܳܐ ܪܰܛܺܝܒܳܐ ܒܥܶܩܳܪ̈ܶܐ ܝܰܒܺܝ̈ܫܶܐ ܡܶܫܟܚܺܝܢ ܠܰܡܥܰܕܳܪܽܘ ܠܗܰܘ ܕܶܐܬܠܒܶܟ ܒܟܺܐܒܳܐ ܡܶܢ ܥܶܠܬܳܗ̇ ܕܪܰܛܺܝܒܽܘܬܳܐ. ܘܶܐܢܕܶܝܢ ܐܶܬܠܒܶܟ ܟܽܠܶܗ ܦܰܓܪܳܐ ܒܟܺܐܒܳܐ ܓܡܺܝܪܳܐ ܕܚܰܕ ܡܶܢ ܐܶܣܛܽܘܟ̈ܣܶܐ ܠܰܝܬ ܡܶܟܺܝܠ ܥܽܘܕܪܳܢܳܐ. ܘܡܳܐ ܕܠܰܘ ܟܽܠܶܗ ܐܶܣܛܽܘܟܣܳܐ ܕܦܰܓܪܳܐ ܐܶܬܓܡܰܪ ܒܟܺܐܒܳܐ. ܡܶܛܠ ܡܢܳܬܳܐ ܕܫܰܚܺܝܢܽܘܬܳܐ ܕܦܳܫܰܬ ܒܗ܆ ܗܳܕܐ ܡܶܫܟܚܳܐ ܗ̄ܝ ܠܰܡܩܰܒܳܠܽܘ ܬܽܘܪܣܳܝܳܐ ܒܬܰܘܣܶܦܬܳܐ ܕܡܶܢ ܥܨܳܒ̈ܐ ܡܫܰܚ̈ܢܳܢܶܐ. ܐܶܢܕܶܝܢ ܟܠ ܟܽܠܗ ܬܰܘܦܶܐ .ܡܶܪܕܰܬ ܠܗ̇ ܡܶܢ ܥܽܘܕܪܳܢܳܐ ܕܗܳܘܶܐ ܒܝܰܕ ܥܶܩܳܪ̈ܶܐ. ܗܳܟܰܢܐ ܐܳܦ ܗܳܠܝܢ ܬܠܳܬܳܐ ܐܶܣܛܽܘܟ̈ܣܶܐ ܐܚܪ̈ܳܢܶܐ. ܟܕ ܠܐ ܡܰܘܦܶܝܢ ܡܽܘ̈ܙܳܓܶܐ ܕܡܰܥܒܕܳܢ̈ܘܳܬܗܘܢ ܡܩܰܒܠܺܝܢ ܬܽܘܪܣܳܝܳܐ. ܒܝܰܕ ܐܽܘܡܳܢܽܘܬܳܐ ܕܳܐܣ̈ܘܳܬܳܐ ܚܰܟܺܝ̈ܡܶܐ ܩܳܝܡܺܝܢ ܘܚܳܐܷܝܢ. ܐܶܢܕܶܝܢ ܠܰܝܬ ܐܶܢܘܢ. ܐܳܦܠܳܐ ܕܢܺܚܽܘܢ ܡܶܫܟܚܳܐ. ܡܳܕܝܢ ܩܰܪܺܝܪܽܘܬܳܐ ܗܳܝ ܕܠܰܢܒܺܝܐ ܕܶܪܟܰܬ ܠܰܝܬ ܗܘܳܐ ܫܰܪܟܳܢܳܐ ܕܫܰܚܺܝܢܽܘܬܳܐ ܕܰܡܥܰܙܝܳܐ ܘܩܳܝܡܳܐ ܠܩܽܘܒܠܗ̇. ܘܥܰܠܗܳܕܐ ܠܐ ܡܥܰܕܪܺܝܢ ܗܘܰܘ ܠܗ ܠܒܽܘ̈ܫܶܐ ܪ̈ܰܟܺܝܟܶܐ ܘܪ̈ܰܥܕܶܐ ܕܡܶܬܟܰܣܶܐ ܗܘܳܐ ܒܗܽܘܢ. ܘܰܒܟܽܠܗ̇ ܗܳܕܐ ܐܰܢܰܢܩܺܝ ܘܠܐ ܐܶܫܬܰܚܠܰܦ ܠܪ̈ܶܛܢܳܐ. ܘܠܐ ܒܰܓܶܢ ܐܝܟ ܚܰܣܺܝܪܳܐ. ܘܠܐ ܐܡ̣ܪ ܠܘܳܬ ܐܰܠܗܳܐ ܕܕܰܠܩܽܘܒܠܳܐ ܕܰܥܒܴ̈ܕܰܝ ܦܰܢܺܝܬ ܠܺܝ. ܐܠܐ ܠܢܰܦܫܶܗ ܡܠܰܒܶܒ ܗܘܳܐ ܘܰܡܫܰܝܶܢ ܘܳܐܡܰܪ: ܕܶܐܬܕܟܰܪܝ ܦܽܘܪ̈ܥܳܢܶܐ ܛܳܒ̈ܐ ܕܦܰܪܥܶܟܝ ܐܰܠܗܳܐ ܘܰܠܛܳܒ̈ܬܳܐ ܕܩܰܒܶܠܬܝ ܡܶܢ ܐܠܗܳܐ ܥܳܒܽܘܕܶܟܝ. ܠܐ ܬܶܛܥܶܝܢ ܟܽܠܗܽܘܢ ܦܽܘܪ̈ܥܳܢܰܘܗܝ. ܘܡܶܢ ܥܶܠܰܬ ܟܺܐܒܳܐ ܕܰܚܛܳܗ̈ܐ ܥܫܶܢ ܥܠܰܝܟܝ ܐܽܘܠܨܳܢܳܐ. ܘܠܘ ܡܶܬܢܰܣܳܝܽܘ ܡܶܬܢܰܣܝܰܬܝ ܒܟܺܐܒ̈ܐ ܐܠܐ ܡܶܛܠ ܚܛܳܗܰܝ̈ܟܝ. ܘܐܢ ܚܠܳܦ ܪܶܛܢܳܐ ܡܒܰܪܟܰܬܝ ܘܰܡܫܰܒܚܰܬܝ ܠܫܽܘܒܩܳܢܳܐ ܕܥܰܘ̈ܠܶܐ ܕܰܣܥܰܪܬܝ ܡܰܫܘܶܐ ܠܶܟܝ ܡܳܪܝܳܐ. ܘܰܡܚܰܣܶܐ ܠܶܟܝ ܟܽܠܶܗ ܥܰܘܠܶܟܝ. ܘܫܳܒܶܩ ܠܶܟܝ ܚܛܳܗܰܝ̈ܟܝ ܘܡܳܪܶܩ ܡܽܘܡܰܝ̈ܟܝ ܘܰܡܚܰܘܰܪ ܟܽܘ̈ܬܡܳܬܶܟܝ ܒܰܥܡܳܕܳܐ ܩܰܕܺܝܫܳܐ. ܘܰܡܚܰܣܶܐ ܠܶܟܝ ܘܰܡܩܰܕܶܫ ܠܶܟܝ ܘܡܰܥܒܰܪ ܡܶܢܶܟܝ ܡܳܐܢ̈ܐ ܨ̈ܳܐܶܐ ܕܙܶܩܪܰܬ ܠܶܟܝ ܚܛܺܝܬܳܐ. ܘܡܰܠܒܶܫ ܠܶܟܝ ܐܶܣܛܠܳܐ ܪܺܝܫܳܝܬܳܐ ܕܠܐ ܡܶܬܚܰܒܠܳܢܽܘܬܳܐ ܘܡܰܥܬܰܪ ܡܶܣܟܺܢܽܘܬܶܟܝ ܘܰܚܠܳܦ ܥܰܬܺܝܩܽܘܬܶܟܝ ܥܳܒܶܕ ܠܶܟܝ ܥܠܰܝܡܬܳܐ. ܘܡܳܪܶܩ ܡܶܢ ܐܰܦܰܝ̈ܟܝ ܩܶܛܡܳܐ ܕܰܚܛܳܗ̈ܐ ܘܰܡܩܺܝܡ ܠܶܟܝ ܡܶܢ ܝܰܡܺܝܢܶܟܝ ܟܰܠܬܳܐ ܡܨܰܒܰܬܬܳܐ ܕܠܰܝܬ ܒܳܗ̇ ܛܽܘܠܫܳܐ. ܘܰܡܚܰܝܶܠ ܟܪܺܝܗܽܘܬܶܟܝ.
ܘܡܰܐܣܶܐ ܟܽܠܗܘܢ ܟܺܐܒܰܝ̈ܟܝ. ܘܠܐ ܬܽܘܒ ܡܳܪܕܳܐ ܘܰܡܫܰܩܦܳܐ ܠܶܟܝ ܪܽܘܚܳܐ ܕܟܽܘܪܗܳܢܳܐ. ܥܳܨܶܒ ܬܒܳܪܶܟܝ ܘܡܰܚܠܶܡ ܡܰܚ̈ܘܳܬܶܟܝ. ܘܰܡܫܺܝܓ ܠܶܟܝ ܡܶܢ ܬܰܡܣܽܘܬܳܐ ܕܫܽܘ̈ܚܢܶܐ ܕܰܐܫܺܝܡܘ ܠܶܟܝ. ܘܰܡܟܰܣܶܐ ܦܽܘܪܣܳܝܶܟܝ ܘܰܡܫܰܪܰܪ ܪ̈ܶܓܠܰܝܟܝ ܕܠܐ ܬܙܽܘܥܺܝܢ.
ܘܦܳܪܶܩ ܠܶܟܝ ܡܶܢ ܚܒܳܠܳܐ. ܘܰܡܢܰܦܶܨ ܠܶܟܝ ܡܶܢ ܕܰܚܺܝܚܳܐ ܘܡܰܥܒܰܪ ܡܶܢܶܟܝ ܪܺܝܚܳܐ ܕܡܰܘܬܳܐ ܘܙܳܠܰܚ ܒܰܩܢܽܘܡܶܟܝ ܡܶܛܪܳܐ ܕܚܰܝܰܬ ܡܺܝ̈ܬܶܐ. ܘܰܡܟܰܢܶܫ ܡܶܢ ܐܰܪܥܳܐ ܕܡܺܝ̈ܬܶܐ ܨܰܥܪܶܟܝ. ܘܡܰܘܫܶܛ ܠܶܟܝ ܝܰܡܺܝܢܶܗ ܘܰܡܚܰܝܶܠ ܠܶܟܝ.
ܘܰܡܣܰܡܶܟ ܠܶܟܝ ܒܛܰܝܒܽܘܬܳܐ ܘܰܒܪ̈ܰܚܡܶܐ. ܘܠܐ ܫܳܒܶܩ ܠܟܺܐܢܽܘܬܳܐ ܕܬܶܦܓܰܥܝ ܒܶܟܝ ܡܶܛܠ ܡܚܺܝܠܽܘܬܶܟܝ. ܘܠܐ ܡܶܬܕܟܶܪ ܠܶܟܝ ܚܛܳܗܰܝ̈ܟܝ.
ܘܰܡܣܰܒܰܥ ܒܛܳܒܴ̈ܬܳܐ ܓܽܘܫܡܶܟܝ. ܘܰܡܚܰܕܶܬ ܐܝܟ ܕܢܶܫܪܳܐ ܥܠܰܝܡܽܘܬܶܟܝ. ܡܳܢܳܐ ܐܶܢܶܝܢ ܛܳܒܴ̈ܬܳܐ ܕܶܐܡܰܪ ܕܰܡܣܰܒܰܥ ܠܶܗ ܠܓܽܘܫܡܳܐ. ܩܰܕܡܳܐܝ̣ܬ ܗܳܝ ܕܰܒܝܰܕ ܓܶܠܝܳܢܶܗ ܕܥܰܡܰܢܽܘܐܝܠ ܢܰܣܒܶܗ ܠܒܶܣܪܳܐ ܚܳܫܽܘܫܳܐ. ܘܚܰܝܕܶܗ ܠܶܗ ܡܶܢ ܡܰܪܒܥܳܐ ܡܶܢ ܗܳܫܐ ܫܰܪܺܝ ܟܝܳܢܳܐ ܐܢܳܫܳܝܳܐ ܡܶܬܒܰܣܰܡ ܒܛܳܒܴ̈ܬܳܐ ܕܡܶܢ ܐܰܠܗܳܐ. ܒܰܚܕܳܝܽܘܬܳܐ ܗܳܝ ܕܰܗܘܳܬ ܒܡܰܪܒܥܳܐ ܒܬܽܘܠܳܝܳܐ ܕܝܳܠܕܰܬ ܐܠܗܳܐ ܠܒܶܣܪܳܐ ܐܢܳܫܳܝܳܐ ܕܥܰܡ ܡܶܠܬܳܐ ܡܫܰܪܶܐ ܕܢܶܬܒܰܣܰܡ ܓܽܘܫܡܳܐ ܒܛܳܒ̈ܬܳܐ ܐܰܠܗܳܝ̈ܬܳܐ. ܒܰܩܝܳܡܬܳܐ ܡܶܬܒܰܣܰܡ ܓܡܺܝܪܳܐܝ̣ܬ ܒܚܰܝܷ̈ܐ ܕܠܐ ܡܫܰܥܒܕܺܝܢ ܠܡܰܘܬܳܐ. ܘܰܒܠܳܐ ܡܶܬܚܰܒܠܳܢܽܘܬܳܐ. ܘܡܶܟܺܝܠ ܐܝܟ ܕܡܶܢ ܪܺܝܫܺܝܬܳܐ ܨܶܝܕ ܓܶܢܣܳܐ. ܡܶܬܝܰܒ̈ܠܳܢ ܠܘܳܬܰܢ ܛܳܒ̈ܬܳܐ ܡܥܰܠܝܴ̈ܬܳܐ ܕܡܶܢ ܫܡܰܝܳܐ. ܘܥܰܠܗܳܕܶܐ ܐܶܡܰܪ ܡܙܰܡܪܳܢܳܐ:
ܕܰܡܚܰܕܶܬ ܐܰܝܟ ܕܢܶܫܪܳܐ ܥܠܰܝܡܽܘܬܶܟܝ. ܡܶܛܠܡܳܢܐ ܠܰܕܢܶܫܪܳܐ ܡܕܰܡܶܐ ܠܶܗ ܚܽܘܕܳܬܳܐ ܕܗܳܘܶܐ ܠܦܰܓܪܳܐ ܒܝܰܕ ܥܡܳܕܳܐ. ܦܳܪܰܚܬܳܐ ܕܶܝܢ ܗܳܕܐ ܐܝܟ ܕܳܐܡܪܺܝܢ ܥܠܶܝܗ̇ ܐܰܝܠܶܝܢ ܕܒܰܟܝܳܢ̈ܝܳܬܳܐ ܐܶܬܚܰܟܰܡܘ܆ ܠܥܶܠ ܡܶܢ ܟܽܠܗܘܢ ܬܚܽܘ̈ܡܶܐ ܕܡܶܣܬܰܠܩܳܐ ܦܳܪܰܚܬܳܐ ܘܡܶܬܥܰܠܝܳܐ ܒܝܰܕ ܛܰܘܣܳܗ̇. ܘܗܳܟܰܢܳܐ ܡܶܬܥܰܠܶܐ ܢܶܫܪܳܐ ܡܳܐ ܕܦܳܪܰܚ. ܥܕܰܡܳܐ ܕܡܳܛܶܐ ܠܗܰܘ ܫܒܺܝܠܳܐ ܕܳܐܦ ܬܚܽܘܡܳܐ ܕܳܐܐܰܪ ܐܝ̣ܬܰܘܗܝ. ܘܰܥܕܰܡܳܐ ܠܘܳܬܶܗ ܒܰܠܚܽܘܕ ܐܝ̣ܬ ܫܽܘܠܛܳܢܳܐ ܠܦܳܪܰܚܬܳܐ ܠܡܶܬܥܰܠܳܝܽܘ. ܘܡܶܢܶܗ ܕܶܝܢ ܘܰܠܥܶܠ ܠܐ ܡܶܫܟܚܳܐ ܦܳܪܰܚܬܳܐ ܠܡܶܦܪܰܚ. ܡܶܛܠ ܕܠܰܗܓܳܐ ܚܰܡܺܝܡܳܐ ܕܰܐܬܺܝܪ ܢܽܘܪܳܢܰܐ ܗ̄ܘ ܕܟܽܠܶܗ ܐܝ̣ܬܰܘܗܝ ܢܽܘܪܳܐ܆ ܬܳܟܶܣ ܠܶܗ ܠܓܶܦܳܐ ܕܦܳܪܰܚܬܳܐ ܕܬܘܒ ܠܐ ܢܶܬܥܰܠܶܐ ܐܦ ܗܺܝ ܦܳܪܰܚܬܳܐ ܙܗܺܝܪܳܐ ܕܠܐ ܬܶܥܒܰܪܝ ܬܚܽܘܡܳܐ ܗܰܘ ܕܣܺܝܡ. ܡܶܛܠ ܕܡܰܘܬܳܐ ܠܒܰܪ ܡܰܢ ܣܺܝܡ. ܘܳܐܦܠܳܐ ܓܝܪ ܒܟܽܠܙܒܰܢ ܣܳܠܩܺܝܢ ܥܕܰܡܳܐ ܠܘܳܬܗ. ܐܠܐ ܒܰܠܚܽܘܕ ܡܳܐ ܕܣܳܠܩܺܝܢ ܥܰܠ ܚܽܘܕܳܬܳܐ ܡܶܬܥܰܠܶܝܢ ܥܕܰܡܳܐ ܠܰܐܬܺܝܪ. ܘܟܕ ܡܶܢ ܬܰܡܳܢ ܡܫܰܪܶܝܢ ܒܣܽܘܥܪܳܢܳܐ ܕܚܽܘܕܳܬܳܐ ܥܳܛܦܺܝܢ ܐܽܘܪܚܗܽܘܢ ܠܥܽܘܡܩܳܐ. ܐܰܝܟܰܢܳܐ ܕܶܝܢ ܣܳܠܩܺܝܢ ܐܳܡܪܺܝܢ ܬܰܫܥܺܝܬܳܐ ܕܥܰܠ ܢܶܫܪܳܐ ܕܢܳܦܶܠ ܒܣܰܝܒܽܘܬܳܐ ܘܡܶܬܥܰܠܰܡ ܐܰܝܟ ܥܠܰܝܡܳܐ. ܥܠ ܢܶܫܪܳܐ ܕܡܳܐ ܕܰܣܐܷܒ ܘܰܡܒܰܓܶܢ ܡܶܢ ܠܶܐܘܬܳܐ ܒܗܳܝ ܕܡܶܬܬܰܪܣܶܐ ܡܶܢ ܒܢܰܘ̈ܗܝ. ܘܪܳܒܰܥ ܒܩܶܢܳܐ ܘܠܳܐ ܡܶܫܟܰܚ ܠܡܶܦܪܰܚ. ܘܡܶܢ ܗܳܕܐ ܥܶܠܬܳܐ ܢܳܬܰܪ ܡܶܠܓܶܗ. ܘܡܶܬܡܰܚܠܺܝܢ ܘܡܶܬܡܰܪܛܺܝܢ ܐܳܦ ܓܶܦܰܘ̈ܗܝ. ܘܰܒܢܰܘ̈ܗܝ ܡܰܝܬܶܝܢ ܠܶܗ ܬܽܘܪܣܳܝܳܐ. ܘܒܳܬܰܪ ܙܰܒܢܳܐ ܡܰܘܥܶܐ ܓܽܘܫܡܶܗ ܡܰܠܓܳܐ ܚܰܕܬܳܐ. ܘܗܳܘܶܝܢ ܠܶܗ ܓܶܦ̈ܐ ܐܰܝܟ ܩܰܕ̈ܡܳܝܶܐ. ܘܰܡܪܺܝܡ ܢܰܦܫܶܗ ܡܶܢ ܩܶܢܳܐ ܘܒܳܥܶܐ ܕܰܐܝܟ ܥܝܳܕܶܗ ܢܶܦܪܰܚ. ܟܕ ܩܰܠܺܝܠ ܡܶܢ ܥܰܬܺܝܩܳܐ ܡܶܫܬܟܰܚ ܒܶܗ ܣܰܥܪܳܐ. ܡܳܢܳܐ ܕܶܝܢ ܥܳܒܶܕ. ܡܪܺܝܡ ܗܽܘ ܠܶܗ ܘܦܳܪܰܚ ܠܰܐܦܰܝ̈ ܪܰܘܡܳܐ ܥܕܰܡܳܐ ܕܡܶܬܡܰܛܶܐ ܠܢܶܫܒܳܐ ܥܶܠܳܝܳܐ. ܗܰܘ ܕܰܡܡܰܨܰܥ ܘܰܡܬܺܝܚ ܘܣܺܝܡ ܒܶܝܬ ܐܳܐܱܪ ܠܰܐܬܺܝܪ ܢܽܘܪܳܢܳܐ. ܟܡܳܐ ܕܡܰܛܺܝ ܠܚܰܡܺܝܡܽܘܬܳܐ ܘܡܶܢ ܥܽܘܙܳܐ ܕܙܰܠܺܝ̈ܩܰܝ ܫܶܡܫܳܐ ܕܕܳܢܚܳܐ ܥܠܰܘܗܝ ܡܶܬܚܰܪܰܟ ܡܰܠܓܳܐ ܗܰܘ ܥܰܬܺܝܩܳܐ ܘܝܳܩܶܕ. ܘܡܳܐ ܕܰܐܪܓܶܫ ܗܽܘ ܒܶܗ ܕܠܰܝܬ ܒܶܗ ܡܶܕܶܡ ܡܶܢ ܗܰܘ ܥܰܬܺܝܩܳܐ. ܚܳܐܱܪ ܠܰܐܦܰܝ̈ ܥܽܘܡܩܳܐ ܘܚܳܙܶܐ ܐܰܝܟܳܐ ܐܝ̣ܬ ܥܰܝܢܳܐ ܕܡܰܝܴ̈ܐ ܕܪܳܕܝܳܐ. ܘܢܳܚܶܬ ܠܰܡܥܺܝܢܳܐ ܕܢܳܒܥܳܐ ܘܥܳܡܶܕ ܒܳܗ̇ ܬܠܳܬ ܙܰܒܢܻ̈ܝܢ ܘܒܰܙܒܰܢܬܳܐ ܕܰܬܠܳܬ ܫܳܠܰܚ ܘܫܳܕܶܐ ܡܶܢܶܗ ܟܽܠܶܗ ܡܶܠܓܳܐ ܥܰܬܺܝܩܳܐ ܕܶܐܬܚܰܪܰܟ ܘܺܝܩܶܕ. ܘܡܶܬܚܰܕܰܬ ܘܗܳܘܶܐ ܥܠܰܝܡܳܐ ܘܗܳܟܰܢܳܐ ܡܶܬܥܰܠܶܐ ܚܰܕܬܳܐ ܡܶܢ ܡܥܺܝܢܳܐ. ܕܰܐܝܟ ܗܳܢܐ ܚܽܘܕܳܬܳܐ ܐܡ̣ܪ ܢܒܺܝܳܐ ܕܰܡܚܰܕܶܬ ܠܗ̇ ܐܰܠܗܳܐ ܠܢܰܦܫܳܐ ܒܰܥܡܳܕܳܐ ܩܰܕܺܝܫܳܐ. ܕܰܡܥܺܝܢܳܐ ܕܢܶܒܥܰܬ ܐܰܡܺܝܢܳܐܝ̣ܬ ܡܰܝܴ̈ܐ ܩܰܕܺܝ̈ܫܐ ܘܰܕܠܐ ܒܺܝܫܽܘ. ܘܕܰܒܝܰܕ ܗܰܝܡܳܢܽܘܬܶܗ ܘܡܰܘܕܝܳܢܽܘܬܶܗ ܒܗܰܘ ܟܝܳܢܳܐ ܡܠܶܐ ܛܽܘܒ̈ܐ ܕܺܐܝܬܰܘܗܝ ܢܽܘܪܳܐ ܐܳܟܶܠܬܳܐ. ܡܶܬܛܰܠܰܩ ܫܽܘܘܕܳܥܳܐ ܕܒܰܪܢܳܫܳܐ ܥܰܬܺܝܩܳܐ ܒܢܽܘܪܳܐ ܐܰܠܗܳܝܬܳܐ. ܢܳܚܶܬ ܕܶܝܢ ܠܰܡܥܺܝܢܳܐ ܕܦܽܘܪܩܳܢܳܐ ܘܫܳܠܰܚ ܟܽܘ̈ܬܡܳܬܳܐ ܕܥܶܒܕܰܬ ܚܛܺܝܬܳܐ. ܘܰܒܝܰܕ ܗܳܝ ܓܡܳܥܬܳܐ ܬܠܺܝܬܳܝܬܳܐ ܡܶܬܓܡܰܪ ܘܡܶܬܚܰܕܰܬ. ܘܗܳܘܶܐ ܥܠܰܝܡܳܐ ܒܰܥܡܳܕܳܐ ܩܰܕܺܝܫܳܐ. ܘܥܳܛܶܦ ܠܗܰܘ ܛܶܟܣܳܐ ܩܰܕܡܳܝܳܐ ܕܰܩܢܶܐ ܗܘܳܐ ܐܳܕܳܡ ܗܰܘ ܢܶܫܪܳܐ ܣܳܒܳܐ. ܕܰܐܘܒܕܰܬ ܚܛܺܝܬܳܐ ܘܚܰܒܠܰܬ ܐܶܒܪ̈ܰܘܗܝ ܫܰܦܺܝܪ̈ܶܐ. ܒܪܰܡ ܕܶܝܢ ܕܕܰܘܝܕ ܐܡ̣ܪ ܕܰܐܝܟ ܢܶܫܪܳܐ ܡܶܬܚܰܕܬܳܐ ܡܰܢ ܥܠܰܝܡܽܘܬܳܗ̇ ܕܢܰܦܫܳܐ. ܕܰܐܝܟ ܐܰܝܢܳܐ ܐܶܣܟܺܝܡܳܐ ܐܝ̣ܬܰܘܗܝ ܚܽܘܕܳܬܳܐ ܕܢܶܫܪܳܐ ܣܽܘܥܪܳܢܳܐܝ̣ܬ ܕܶܝܢ ܗܳܟܰܢܳܐ ܡܶܬܚܰܕܰܬ ܢܶܫܪܳܐ. ܐܠܐ ܚܽܘܕܳܬܳܐ ܗܳܢܐ ܕܢܶܫܪܳܐ ܥܳܛܶܦ ܠܗܳܝ ܕܢܶܬܚܰܒܰܠ ܘܢܶܒܠܶܐ. ܗܳܝܕܝܢ ܢܰܫܰܪ ܕܟܺܐܢܳܐܝ̣ܬ ܝܰܗܒ ܬܰܚܘܺܝܬܳܐ ܗܽܘ ܡܙܰܡܪܳܢܳܐ. ܒܪܰܡ ܚܢܰܢ ܠܘܳܬ ܢܶܫܪܳܐ ܡܶܬܝܰܕܥܳܢܳܐ ܡܶܬܦܢܶܝܢܰܢ ܗܰܘ ܕܰܢܚܶܬ ܡܶܢ ܩܶܢܳܐ ܕܰܐܠܗܽܘܬܳܐ. ܘܟܰܣܺܝ ܓܶܦܰܘ̈ܗܝ ܒܒܶܣܪܳܐ ܕܰܠܒܶܫ ܡܶܢ ܒܬܽܘܠܬܳܐ ܘܰܚܡܰܠ ܐܶܒܪ̈ܶܐ ܕܰܟܝܳܢܶܗ ܠܐ ܡܳܝܽܘܬܳܐ ܒܦܰܓܪܳܐ ܡܶܬܚܰܒܠܳܢܳܐ. ܘܟܕ ܠܒܶܫ ܠܶܗ ܒܶܣܪܳܐ ܚܳܫܽܘܫܳܐ ܐܶܬܥܰܠܺܝ ܥܰܠ ܩܶܢܳܐ ܕܓܳܓܽܘܠܬܳܐ ܘܣܰܝܒܰܪ ܟܺܐܒ̈ܐ ܕܰܨܠܺܝܒܳܐ ܘܚܰܫ ܘܡܺܝܬ ܨܶܒܝܳܢܳܐܝ̣ܬ ܘܰܫܒܰܩ ܢܰܦܫܶܗ ܕܬܶܦܪܽܘܫ ܡܶܢ ܦܰܓܪܶܗ. ܘܣܳܡܳܗ̇ ܒܺܐܝ̈ܕܰܝ ܐܰܒܽܘܗܝ. ܘܰܥܡܰܕ ܒܗܰܘܬܳܐ ܕܡܺܝ̈ܬܶܐ ܬܠܳܬܳܐ ܝܰܘ̈ܡܺܝܢ. ܘܰܫܠܰܚ ܘܰܫܕܳܐ ܡܶܢܶܗ ܒܗܰܘ ܩܰܒܪܳܐ ܟܽܠܗ̇ ܠܶܐܘܬܳܐ ܘܟܺܐܒ̈ܐ ܘܚܰܫ̈ܐ ܕܡܶܢ ܨܳܠܽܘ̈ܒܶܐ ܘܰܒܝܰܘܡܳܐ ܕܰܬܠܳܬܳܐ ܩܳܡ ܒܠܳܐ ܡܶܬܚܰܒܠܳܢܽܘܬܳܐ. ܘܥܰܠܺܝ ܥܰܡܶܗ ܠܦܰܓܪܳܐ ܡܳܝܽܘܬܳܐ ܠܘܳܬ ܠܐ ܡܶܬܚܰܒܠܳܢܽܘܬܳܐ ܘܰܥܛܰܦ ܠܘܳܬ ܚܰܝܷ̈ܐ ܠܐ ܡܶܫܬܰܓܢܝܴ̈ܢܶܐ ܕܰܐܠܗܽܘܬܶܗ. ܘܠܐ ܡܶܟܺܝܠ ܥܠܰܘܗܝ ܡܰܘܬܳܐ ܡܶܫܬܰܠܰܛ ܐܝܟ ܕܰܐܠܶܦ ܦܰܘܠܽܘܣ ܐܰܠܗܳܝܳܐ ܘܶܐܡܰܪ: ܕܰܚܢܰܢ ܝܳܕܥܺܝܢܰܢ ܕܰܡܫܺܝܚܳܐ ܩܳܡ ܡܶܢ ܒܶܝܬ ܡܺܝ̈ܬܶܐ. ܘܬܽܘܒ ܠܐ ܡܳܐܷܬ. ܘܡܰܘܬܳܐ ܠܐ ܡܶܫܬܰܠܰܛ ܒܶܗ (ܪ̈ܗܘܡܝܐ ܘ: ܛ). ܕܰܐܝܟ ܗܳܢܐ ܚܽܘܕܳܬܳܐ ܕܠܐ ܬܘܒ ܦܳܢܶܐ ܠܘܳܬ ܥܰܬܺܝܩܽܘܬܶܗ. ܐܰܠܶܦ ܡܙܰܡܪܳܢܳܐ ܕܰܡܩܰܒܠܳܐ ܢܰܦܫܳܐ ܚܽܘܕܳܬܳܐ. ܡܶܛܠ ܕܝܢ ܕܢܶܫܪܳܐ ܗܳܢܐ ܕܰܠܘܳܬܰܢ ܥܳܡܰܪ. ܡܶܢܒܳܬܰܪ ܕܡܶܬܚܰܕܰܬ ܐܝܟ ܕܶܐܡܰܪܢܰܢ ܐܠܐ ܬܽܘܒ ܘܥܳܛܶܦ ܘܡܳܐܷܬ ܘܠܐ ܬܘܒ ܡܶܬܢܰܚܰܡ. ܡܫܺܝܚܳܐ ܕܶܝܢ ܗܰܘ ܢܶܫܪܳܐ ܫܡܰܝܳܢܳܐ ܕܶܐܬܳܐ ܡܶܢ ܪܰܘܡܳܐ ܡܶܢ ܒܳܬܰܪ ܕܩܰܒܶܠ ܢܶܣܝܳܢܶܗ ܕܡܰܘܬܳܐ ܚܰܕܶܬ ܗܽܘ ܠܶܗ ܒܰܩܝܳܡܬܳܐ ܠܚܰܝܷ̈ܐ ܚܰܕ̈ܬܶܐ. ܘܬܘܒ ܠܐ ܥܳܛܶܦ ܠܘܳܬ ܚܰܫܷ̈ܐ ܘܡܰܘܬܳܐ. ܐܠܐ ܩܰܝܳܡ ܘܚܰܝ ܠܥܳܠܰܡ ܘܠܐ ܡܶܫܬܰܚܠܰܦ. ܘܒܰܕܡܽܘܬܶܗ ܐܡ̣ܪ ܕܰܘܝܕ ܕܰܡܚܰܕܶܬ ܠܶܗ ܠܰܟܝܳܢܳܐ ܐܢܳܫܳܝܳܐ ܕܰܐܥܬܶܩ ܒܰܚܒܳܠܳܐ. ܐܝܟ ܕܰܐܠܶܦ ܗܘܳܐ ܦܰܘܠܽܘܣ ܠܦܺܝܠܺܝ̈ܦܳܣܳܝܶܐ ܕܰܢܚܰܠܶܦ ܠܰܡ ܦܰܓܪܳܐ ܕܡܽܘܟܳܟܰܢ ܕܢܶܗܘܶܐ ܒܰܕܡܽܘܬܳܐ ܕܦܰܓܪܳܐ ܕܫܽܘܒܚܶܗ (ܦܝ̈ܠܝܦܣܝܐ ܓ: ܟܐ). ܘܬܽܘܒ ܠܘܳܬ ܪ̈ܽܘܡܳܝܶܐ ܟܬܰܒ ܘܶܐܡܰܪ: ܘܰܐܝܟܰܢܳܐ ܕܩܳܡ ܝܶܫܽܘܥ ܡܫܺܝܚܳܐ ܡܶܢ ܒܶܝܬ ܡܺܝ̈ܬܶܐ ܒܬܶܫܒܽܘܚܬܳܐ ܕܰܐܒܽܘܗܝ ܗܳܟܰܢܳܐ ܐܳܦ ܚܢܰܢ ܒܚܰܝܷ̈ܐ ܚܰܕ̈ܬܶܐ ܢܗܰܠܶܟ (ܪ̈ܗܘܡܝܐ ܘ: ܕ). ܘܬܽܘܒ ܐܡ̣ܪ: ܐܶܢ ܓܶܝܪ ܐܰܟܚܕܳܐ ܟܽܠܰܢ ܐܶܬܢܨܶܒܢ ܥܰܡܶܗ ܒܰܕܡܽܘܬܳܐ ܕܡܰܘܬܶܗ ܗܳܟܰܢܳܐ ܐܳܦ ܒܰܩܝܳܡܬܶܗ ܢܶܗܘܶܐ (ܪ̈ܗܘܡܝܐ ܘ: ܗ). ܫܰܦܺܝܪ ܡܳܕܶܝܢ ܐܳܡܪܺܝܢܰܢ. ܕܰܐܝܟ ܗܳܢܐ ܢܶܫܪܳܐ ܡܶܬܚܰܕܬܳܐ ܥܠܰܝܡܽܘܬܳܐ ܕܩܰܕܺܝ̈ܫܶܐ ܒܰܥܡܳܕܳܐ ܗܰܘ ܐܪܳܙܳܢܳܝܳܐ. ܟܕ ܠܒܺܝܫܳܐ ܠܐ ܡܶܬܚܰܒܠܳܢܽܘܬܳܐ ܗܢܘ ܠܶܗ ܠܰܡܫܺܝܚܳܐ ܗܰܘ ܕܺܐܝܬܰܘܗܝ ܚܰܝܷ̈ܐ ܘܠܐ ܡܳܝܽܘܬܽܘܬܳܐ ܐܝܟ ܕܰܐܠܶܦ ܩܰܕܺܝܫܳܐ ܦܰܘܠܽܘܣ ܕܰܐܝܠܶܝܢ ܕܰܥܡܰܕܬܽܘܢ ܒܰܡܫܺܝܚܳܐ. ܠܰܡܫܺܝܚܳܐ ܠܒܶܫܬܽܘܢ (ܓܠܛܝ̈ܐ ܓ: ܟܙ). ܗܰܘ ܕܺܐܝܬܰܘܗܝ ܟܺܐܢܽܘܬܳܐ ܐܳܦ ܙܰܕܺܝܩܽܘܬܳܐ ܐܰܝܟ ܕܶܐܡܰܪ ܪܽܘܚܳܐ ܠܘܳܬ ܚܽܘܕܳܬܳܐ ܗܳܢܐ.
ܥܒܰܕ ܠܡ ܙܰܕܺܝܩܽܘܬܳܐ ܡܳܪܝܳܐ. ܗܳܕܳܐ ܗܝ ܕܰܥܒܰܕ ܡܳܪܝܳܐ. ܡܰܢ ܓܶܝܪ ܡܶܫܟܰܚ ܕܰܢܙܰܕܶܩ ܡܰܓܳܢ ܠܰܒܢܰܝ̈ܢܳܫܳܐ ܕܠܐ ܕܡܰܝܴ̈ܐ ܘܰܕܠܐ ܥܰܡܠܳܐ. ܘܗܳܕܐ ܥܰܠ ܕܝܳܕܰܥ ܗܘܳܐ ܗܰܘ ܛܳܒܳܐ ܕܰܒܩܰܫܝܽܘܬܶܗ ܕܳܐܟܶܠܩܰܪܨܳܐ ܐܶܬܛܠܶܡ ܒܰܪܢܳܫܳܐ ܡܶܢ ܚܰܝܷ̈ܐ ܛܽܘܒ̈ܬܳܢܶܐ ܕܰܒܦܰܪܕܰܝܣܳܐ. ܘܡܶܛܠܗܳܢܐ ܫܰܘܕܰܥ ܪܽܘܚܳܐ. ܥܰܡ ܗܳܝ ܕܰܥܒܰܕ ܙܰܕܺܝܩܽܘܬܳܐ ܕܰܥܡܳܕܶܗ. ܐܳܦ ܕܺܝܢܳܐ ܗܰܘ ܕܰܛܠܺܝ̈ܡܶܐ ܕܳܐܷܢ. ܐܡ̣ܪ ܓܶܝܪ:
ܘܕܺܝܢܳܐ ܠܟܽܠܗܽܘܢ ܛܠܺܝܡ̈ܐ. ܗܽܘ ܓܝܪ ܕܳܐܷܢ ܠܚܰܘܳܐ ܘܠܳܐܕܳܡ ܘܰܠܟܽܠܗܘܢ ܝܰܠܕܰܘ̈ܗܝ ܡܶܢ ܐܺܝ̈ܕܰܝ ܚܰܣܺܝܢܳܐ. ܘܦܰܨܺܝ ܐܶܢܽܘܢ ܡܶܢ ܛܪܽܘܢܽܘܬܶܗ ܕܒܺܝܫܳܐ. ܡܳܢܳܐ ܕܶܝܢ ܡܶܬܢܰܒܶܐ ܒܳܬܰܪ ܗܳܠܶܝܢ.
ܡܚܰܘܶܐ ܠܰܡ ܐܽܘܪ̈ܚܳܬܶܗ ܠܡܽܘܫܶܐ. ܘܠܰܒܢܱ̈ܝ ܝ̣ܣܪܳܐܝܠ ܥܒܳܕܰܘ̈ܗܝ. ܠܗܳܠܶܝܢ ܚܰܘܺܝ ܐܽܘܪ̈ܚܳܬܶܗ ܘܰܥܒܳܕܰܘ̈ܗܝ ܫܰܘܕܰܥ ܟܕ ܦܪܰܩ ܐܶܢܘܢ. ܐܠܐ ܠܘܳܬ ܥܰܡ̈ܡܶܐ ܚܰܛܳܝ̈ܐ ܩܰܕܶܡ ܕܢܶܚܙܽܘܢ ܥܒܴ̈ܕܶܐ ܘܢܺܐܠܦܽܘܢ ܐܽܘܪ̈ܚܳܬܶܗ ܘܦܽܘ̈ܩܕܳܢܰܘܗܝ. ܚܽܘܕܳܬܳܐ ܕܝܰܗܒ ܠܗܘܢ ܫܽܘܒܩܳܢܳܐ ܕܰܚܛܳܗܰܝ̈ܗܘܢ ܫܰܟܶܢ ܠܗܘܢ. ܠܘܬ ܗܳܠܝܢ ܘܰܠܘܳܬ ܗܳܠܶܝܢ ܒܪ̈ܰܚܡܶܐ ܘܰܒܪܽܘܚܳܦܳܐ ܐܶܬܚܰܫܰܚ. ܐܰܝܟ ܕܶܐܡܰܪ ܪܽܘܚܳܐ:
ܡܪܰܚܡܳܢ ܗܽܘ ܘܰܡܪܰܚܦܳܢ ܡܳܪܝܳܐ. ܢܰܓܺܝܪܳܐ ܪܽܘܚܶܗ ܘܣܰܓܺܝܐܳܐ ܛܰܝܒܽܘܬܶܗ. ܘܡܶܛܠ ܗܳܠܝܢ ܦܳܪܶܩ ܠܶܟܝ ܐܳܘ ܢܰܦܫܳܐ ܡܶܢ ܚܒܳܠܳܐ ܘܡܶܢ ܫܝܽܘܠ ܡܶܛܠ ܕܒܰܟܝܳܢܶܗ ܡܪܰܚܡܳܢܰܐ ܗܘ ܘܰܡܪܰܚܦܳܢܳܐ.
ܡܶܛܠ ܕܠܳܐ ܐܳܠܶܡ ܠܥܳܠܰܡ. ܘܠܳܐ ܠܥܳܠܰܡ ܢܳܛܰܪ ܪܽܘܓܙܶܗ. ܡܶܛܠ ܕܠܳܐ ܗܘܳܐ ܐܰܝܟ ܚܛܳܗܰܝ̈ܢ ܥܒܰܕ ܠܰܢ. ܘܳܐܦܠܳܐ ܐܰܝܟ ܥܰܘܠܰܢ ܦܰܪܥܰܢ. ܒܗܳܠܝܢ ܦܶܬܓܳܡ̈ܐ ܟܕ ܠܐ ܐܶܣܬܰܟܰܠܘ ܣܰܓܺܝ̈ܐܐ ܡܶܢ ܐܽܘܪܚܳܐ ܕܰܫܪܳܪܳܐ ܫܓܰܘ ܘܰܢܦܰܩܘ ܘܰܗܘܳܬ ܠܗܽܘܢ ܡܰܣܒܪܳܢܽܘܬܳܐ ܕܠܐ ܗܳܘܶܐ ܕܺܝܢܳܐ. ܡܶܢ ܒܳܬܰܪ ܥܡܳܕܳܐ. ܐܶܠܐ ܟܡܳܐ ܕܡܰܣܟܶܠ ܒܰܪܢܳܫܳܐ. ܠܐ ܡܶܫܚܺܝܢ ܚܛܳܗ̈ܐ ܠܰܡܫܰܠܳܚܽܘ ܡܶܢ ܒܰܪܢܳܫܳܐ ܗܰܘ ܡܶܕܶܡ ܕܰܠܒܰܫ ܒܝܰܕ ܡܳܪܢ. ܘܗܳܕܶܐ ܐܰܣܒܰܪܘ ܥܠ ܕܠܐ ܐܶܫܬܰܘܕܰܥܘ ܡܰܠܝܳܐܝ̣ܬ ܩܳܠܰܘ̈ܗܝ ܕܰܢܒܺܝܐ. ܗܳܝ ܓܶܝܪ ܕܶܐܡܰܪ ܕܠܳܐ ܐܳܠܶܡ ܠܥܳܠܰܡ ܘܠܐ ܪܳܓܶܙ ܐܰܛܥܝܰܬ ܐܶܢܘܢ. ܠܰܘ ܡܶܛܠ ܕܺܝܢܳܐ ܐܶܬܐܰܡܪܰܬ ܕܠܐ ܐܳܠܶܡ ܠܥܳܠܰܡ. ܡܶܛܠ ܕܠܳܐ ܐܰܗܡܺܝ ܡܶܢ ܗܳܝ ܕܢܺܐܬܶܐ ܒܳܬܰܪ ܒܥܳܬܳܐ ܕܥܶܪܒܳܐ ܗܰܘ ܕܰܛܥܳܐ. ܘܠܐ ܢܳܛܰܪ ܪܽܘܓܙܶܗ ܠܥܳܠܰܡ. ܥܠ ܕܰܒܝܰܕ ܗܰܝܡܳܢܽܘܬܶܗ ܕܓܰܝܳܣܳܐ ܦܰܬܚܶܗ ܠܦܰܪܕܰܝܣܳܐ. ܘܰܕܠܰܘ ܐܝܟ ܚܛܳܗܰܝ̈ܢ ܥܒܰܕ ܠܢ ܕܠܐ ܚܳܪ ܒܡܰܪܳܚܽܘܬܳܐ ܕܒܶܝܬ ܐܳܕܳܡ ܒܗܳܝ ܕܶܐܡܰܪ ܪܽܘܚܳܐ.
ܕܰܐܝܟ ܕܪܳܡܺܝܢ ܫܡܰܝܴ̈ܐ ܡܶܢ ܐܰܪܥܳܐ. ܗܳܟܰܢ ܥܶܫܢܰܬ ܛܰܝܒܽܘܬܶܗ ܕܡܳܪܝܳܐ ܥܠ ܕܳܚܠܰܘ̈ܗܝ. ܒܗܳܕܶܐ ܐܰܘܕܰܥ ܕܠܰܝܬ ܛܰܝܒܽܘܬܳܐ ܕܰܒܝܰܕ ܥܒܴ̈ܕܶܐ ܐܝ̣ܬܶܝܗ̇ ܗܳܝ ܕܚܰܕܬܰܬ ܠܥܳܠܡܳܐ. ܐܠܐ ܛܰܝܒܽܘܬܳܐ ܕܒܺܐܝ̈ܕܰܝ ܐܰܠܗܳܐ ܗܘܳܬ. ܗܰܘ ܓܶܝܪ ܕܪܳܡ ܡܶܢ ܒܢܰܝ̈ܢܳܫܳܐ ܡܶܢ ܐܰܪܥܳܐ ܠܰܫܡܰܝܳܐ. ܐܰܠܳܗܳܐ ܗܰܘ ܕܶܐܬܓܠܺܝ ܒܰܒܣܰܪ ܘܰܦܪܰܩ ܠܥܳܠܡܳܐ ܒܓܶܠܝܳܢܶܗ. ܘܦܰܫܶܩ ܢܒܺܝܳܐ ܪܰܘܡܳܐ ܕܛܰܝܒܽܘܬܳܐ ܕܶܐܬܳܬ ܠܐܢܴ̈ܫܳܐ ܒܺܐܝܕܰܘ̈ܗܝ ܟܕ ܡܚܰܘܶܐ. ܕܰܐܝܟ ܪܰܚܺܝܩܳܐ ܪܰܘܡܳܐ ܫܡܰܝܳܐ ܡܶܢ ܐܰܪܥܳܐ ܠܟܽܠ ܗܰܘܢܳܐ ܘܪܶܥܝܳܢܳܐ ܐܢܳܫܳܝܳܐ. ܗܳܟܰܢܳܐ ܪܳܡܳܐ ܘܰܡܥܰܠܝܳܐ ܛܰܝܒܽܘܬܳܐ ܕܥܶܫܢܰܬ ܥܰܠ ܕܳܚܠܰܘ̈ܗܝ ܕܰܐܠܳܗܳܐ ܒܓܶܠܝܳܢܶܗ ܕܒܰܒܣܰܪ. ܘܬܽܘܒ ܥܳܐܷܦ ܡܶܠܬܶܗ ܟܕ ܡܰܘܪܶܒ ܠܶܗ ܠܣܽܘܥܪܳܢܳܐ.
ܘܰܐܝܟ ܠܰܡ ܕܪܰܚܺܝܩܳܐ ܡܰܕܢܚܳܐ ܡܶܢ ܡܰܥܪܒܳܐ ܗܳܟܰܢ ܢܶܪܚܰܩ ܡܶܢܰܢ ܥܰܘܠܰܢ. ܦܫܺܝܩܳܐ ܟܒܰܪ ܕܢܶܕܰܥ ܐܢܳܫ ܟܡܳܐ ܪܳܡܳܐ ܫܡܰܝܳܐ ܡܶܢ ܐܰܪܥܳܐ. ܝܰܬܺܝܪ ܡܶܢ ܕܪܰܚܺܝܩܳܐ ܡܰܕܢܚܳܐ ܡܶܢ ܡܰܥܪܒܳܐ. ܠܰܝܬ ܓܝܪ ܕܡܰܕܪܶܟ ܕܒܰܐܝܕܳܐ ܕܽܘܟܬܳܐ ܣܳܡ ܐܠܗܳܐ ܬܚܽܘܡܳܐ ܕܰܦܪܺܝܫ ܒܶܝܬ ܦܶܢܝܴ̈ܬܳܐ ܗܳܠܝܢ. ܒܪܰܡ ܠܰܝܬ ܗܘ ܬܚܽܘܡܳܐ ܡܦܰܪܫܳܢܳܐ. ܐܶܢܕܶܝܢ ܐܝ̣ܬ ܬܚܽܘܡܳܐ. ܩܰܪ̈ܺܝܒܳܢ ܐܶܢܶܝܢ ܘܢܰܩܺܝ̈ܦܳܢ ܚܕܳܐ ܠܰܚܕܳܐ. ܡܶܛܠ ܕܟܽܠܡܶܕܶܡ ܕܒܰܬܚܽܘ̈ܡܶܐ ܡܶܬܦܪܶܫ ܩܰܪܺܝܒ ܗܘ ܘܢܰܩܺܝܦ ܠܗܰܘ ܕܰܡܬܰܚܰܡ ܥܰܡܶܗ. ܘܢܺܐܡܰܪ ܗܳܝ ܕܰܐܘܕܰܥ ܢܒܺܝܐ ܠܡܰܕܢܚܳܐ ܢܽܘܗܪܳܐ ܩܳܪܶܐ. ܘܡܰܥܪܒܳܐ ܠܚܶܫܽܘܟܳܐ. ܡܳܕܶܝܢ ܠܰܝܬ ܒܰܡܨܰܥܬܳܐ ܡܶܬܡܰܫܚܳܢܳܐ ܒܶܝܬ ܢܽܘܗܪܳܐ ܠܚܶܫܽܘܟܳܐ. ܡܳܕܶܝܢ ܗܰܘ ܕܰܒܝܰܕ ܥܶܠܬܶܗ ܐܶܬܬܩܰܝܰܡ ܡܶܢ ܡܨܰܥܬܳܐ. ܥܰܡܳܗ̇ ܕܥܶܠܬܳܐ ܒܳܛܶܠ ܐܳܦ ܗܽܘ ܡܶܛܠܗܳܢܐ ܢܽܘܗܪܳܐ ܐܝ̣ܬܰܘܗܝ. ܘܳܐܦܶܢ ܠܐ ܢܶܗܘܶܐ ܕܺܐܝܬ ܓܽܘ̈ܫܡܶܐ. ܒܗܳܝ ܕܶܐܡܰܪ ܐܠܗܳܐ ܕܢܶܗܘܶܐ ܢܽܘܗܪܳܐ. ܕܢܶܗܘܶܐ ܕܶܝܢ ܚܶܫܽܘܟܳܐ ܠܐ ܐܡ̣ܪ. ܡܳܕܶܝܢ ܕܶܝܢ ܡܶܛܠ ܕܡܰܕܢܚܳܐ ܒܢܽܘܗܪܳܐ ܡܶܬܡܰܬܠܳܐ. ܡܰܥܪܒܳܐ ܕܶܝܢ ܒܚܶܫܽܘܟܳܐ ܡܶܬܦܰܚܡܳܐ. ܠܰܝܬ ܠܡܺܐܡܰܪ ܕܰܟܡܳܐ ܪܰܚܺܝܩܳܐ ܡܰܕܢܚܳܐ ܡܶܢ ܡܰܥܪܒܳܐ. ܘܰܒܗܳܢܳܐ ܛܽܘܦܣܳܐ ܐܡ̣ܪ ܢܒܺܝܐ ܕܢܰܪܚܶܩ ܡܶܢܰܢ ܥܰܘܠܰܢ. ܘܠܳܐ ܢܶܫܬܟܰܚ ܠܰܓܡܳܪ. ܡܳܢܳܐ ܬܽܘܒ ܨܳܒܶܐ ܠܡܺܐܡܰܪ:
ܕܰܐܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝܴ̈ܐ. ܡܪܰܚܶܡ ܡܳܪܝܳܐ ܥܰܠ ܕܳܚܠܰܘ̈ܗܝ. ܘܠܐ ܬܘܒ ܗܳܢܐ ܚܽܘܒܳܐ ܕܰܐܒܳܗ̈ܐ ܡܶܬܡܫܰܚ ܒܺܝܕܰܥܬܳܐ ܐܢܳܫܳܝܬܳܐ. ܡܰܢ ܓܝܪ ܡܶܫܟܰܚ ܩܳܦܶܣ ܐܰܘ ܚܳܡܶܠ ܚܽܘܒܳܐ ܕܰܐܒܳܗ̈ܐ ܡܶܢ ܒܢܰܝܴ̈ܐ. ܗܳܟܰܢܐ ܘܠܳܐ ܗܰܘ ܚܽܘܒܳܐ ܕܰܐܒܳܗܽܘܬܶܗ ܕܡܳܪܝܳܐ ܡܰܨܝܳܐ ܢܶܬܩܦܶܣ ܘܠܐ ܢܶܬܦܫܰܛ ܥܰܠ ܐܰܝܠܶܝܢ ܕܕܳܚܠܺܝܢ ܠܗ. ܒܪܰܡ ܠܰܘ ܥܠ ܟܽܠܢܳܫ ܐܡ̇ܪ ܕܰܡܪܰܚܶܡ ܒܗܳܢܐ ܛܽܘܦܣܳܐ. ܐܶܠܐ ܥܠ ܕܳܚܠܰܘ̈ܗܝ ܒܰܠܚܽܘܕ ܡܪܰܚܶܡ. ܒܗܳܢܐ ܢܺܝܫܳܐ ܐܳܦ ܐܰܒܳܐ ܓܶܝܪ ܠܰܘ ܫܰܘܝܳܐܝ̣ܬ ܡܪܰܚܶܡ ܥܰܠ ܒܢܰܝܴ̈ܐ ܕܺܝܠܶܗ. ܡܶܛܠ ܕܠܰܒܢܰܝܴ̈ܐ ܡܨܰܥܪ̈ܳܢܶܐ ܟܡܳܐ ܙܰܒ̈ܢܺܝܢ ܘܡܶܢ ܝܳܪܬܽܘܬܳܐ ܓܳܠܶܙ. ܘܗܳܟܰܢܐ ܐܳܦ ܐܠܗܳܐ ܥܰܠ ܕܳܚܠܰܘ̈ܗܝ ܡܪܰܚܶܡ. ܘܥܰܠ ܐܰܝܠܝܢ ܕܡܰܪܓܙܺܝܢ ܠܶܗ ܡܶܬܩܰܫܶܐ. ܐܰܟܡܳܐ ܕܪܰܚܶܡ ܥܠ ܡܽܘܫܶܐ. ܘܥܠ ܦܶܪܥܽܘܢ ܩܰܫܺܝ ܪܽܘܓܙܶܗ. ܠܐ ܡܳܕܶܝܢ ܢܶܒܥܶܐ ܐܢܳܫ ܪ̈ܰܚܡܶܐ ܡܶܢ ܐܠܗܐ. ܟܕ ܠܐ ܩܰܕܶܡ ܓܝܪ ܘܰܕܚܶܠ ܘܰܢܛܰܪ ܦܽܘ̈ܩܕܳܢܰܘܗܝ. ܒܗܳܝ ܕܠܐ ܪܰܚܶܡ ܥܠ ܥܰܬܺܝܪܳܐ ܒܬܰܫܢܺܝܩܳܐ. ܘܶܐܡܰܪ ܢܒܺܝܐ:
ܡܶܛܠ ܕܗܽܘ ܝܳܕܰܥ ܓܒܺܝܠܬܰܢ. ܘܡܰܬܕܟܰܪ ܕܥܰܦܪܳܐ ܚܢܰܢ. ܕܰܐܝܟ ܕܰܦܫܺܝܩ ܠܗ̇ ܠܡܶܚܛܳܐ ܡܶܛܠ ܕܠܐ ܡܶܬܬܰܟܣܳܐ ܡܶܢ ܦܳܓܽܘ̈ܕܶܐ ܕܰܩܛܺܝܪܳܐ. ܗܳܟܰܢܐ ܕܠܺܝܠ ܠܳܗ̇ ܐܳܦ ܠܡܶܙܕܰܕܳܩܽܘ. ܡܶܛܠ ܕܠܐ ܡܫܰܥܒܕܳܐ ܠܡܶܦܠܰܚ ܐܰܝܠܶܝܢ ܕܠܗ̇ ܠܳܐ ܫܰܦܺܝܪ̈ܳܢ. ܘܰܐܝܟ ܕܡܶܬܩܰܫܶܐ ܥܰܦܪܳܐ ܒܫܶܡܫܳܐ ܘܡܶܬܪܰܛܰܒ ܒܡܰܝܴ̈ܐ. ܗܳܟܰܢܐ ܡܶܫܟܰܚ ܡܶܬܕܒܰܪ ܠܘܳܬ ܫܽܘ̈ܚܠܳܦܶܐ ܨܶܒܝܳܢܴ̈ܝܶܐ ܗܰܘ ܕܡܶܢ ܗܳܢܐ ܐܶܬܩܰܝܰܡ. ܘܬܽܘܒ ܐܡ̣ܪ ܢܒܺܝܐ.
ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘ̈ܡܰܘܗܝ. ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ. ܕܡܳܐ ܕܢܶܫܒܰܬ ܒܶܗ ܪܽܘܚܳܐ ܠܰܝܬܰܘܗܝ. ܘܳܐܦܠܳܐ ܡܶܬܝܰܕܥܳܐ ܕܽܘܟܬܶܗ. ܗܳܠܶܝܢ ܩܴ̈ܠܶܐ ܕܗܰܘ ܕܰܟܪܺܝܗ ܘܰܫܕܶܐ ܬܚܶܝܬ ܕܶܚܠܬܳܐ ܕܣܰܦܣܺܪܶܗ ܕܡܰܘܬܳܐ ܐܝ̣ܬܰܝܗܽܘܢ. ܘܚܳܐܱܪ ܕܰܐܝܟܰܢܳܐ ܫܰܪܺܝ ܒܰܪܢܳܫܳܐ ܡܶܢ ܠܳܐ ܡܶܕܶܡ ܐܰܝܟ ܥܶܣܒܳܐ ܘܰܐܝܟ ܥܽܘܦܝܳܐ. ܘܳܐܦܶܢ ܡܶܢ ܙܰܪܥܳܐ ܕܙܽܘܘܳܓܳܐ ܗܘܳܐ ܠܶܗ ܫܽܘܪܳܝܳܐ. ܒܪܰܡ ܠܳܐ ܡܶܕܶܡ ܐܝ̣ܬܰܘܗܝ ܒܫܽܘܪܳܝܶܗ. ܘܥܽܘܦܝܳܐ ܕܶܝܢ ܕܚܰܩܠܳܐ ܡܶܢ ܦܶܪܕܳܐ ܕܙܰܪ̈ܥܶܐ ܡܫܰܪܝܳܐ ܡܰܘܥܺܝܬܶܗ. ܘܰܩܕܳܡ ܪܽܘܚܳܐ ܕܶܝܢ ܠܐ ܩܳܝܡܳܐ. ܘܠܐ ܡܥܰܙܶܐ ܠܽܘܩܒܰܠ ܡܰܫܒܳܐ ܕܥܰܠܥܳܠܳܐ. ܘܠܐ ܠܰܡ ܒܰܪܢܳܫܳܐ ܡܶܫܟܰܚ ܠܰܡܩܳܡ ܩܕܳܡ ܡܰܫܒܳܐ ܕܰܡܫܰܕܰܪ ܡܰܘܬܳܐ ܩܕܳܡܰܘܗܝ. ܐܶܠܐ ܩܰܠܺܝܠ ܟܰܕ ܡܶܬܢܫܶܒ ܡܶܢ ܪܽܘܚܳܐ ܕܟܽܘܪܗܳܢܳܐ ܡܶܫܬܰܩܦܳܐ ܘܢܳܦܠܳܐ ܥܰܠ ܐܰܪܥܳܐ ܒܰܡܚܺܝܠܽܘܬܳܐ ܕܦܰܓܪܶܗ. ܘܗܰܘ ܡܶܕܶܡ ܕܓܳܕܶܫ ܠܥܽܘܦܝܳܐ ܒܰܚܨܳܕܳܐ ܡܶܣܬܰܥܪܳܐ ܐܳܦ ܠܘܳܬ ܒܰܪܢܳܫܳܐ. ܠܰܘ ܕܶܝܢ ܗܳܟܰܢܐ ܣܽܘܥܪ̈ܳܢܶܐ ܐܰܠܗܳܝ̈ܐ. ܘܠܰܘ ܒܗܳܢܳܐ ܡܶܬܦܰܚܡܳܐ ܡܕܰܒܪܳܢܽܘܬܳܐ ܡܥܰܠܰܝܬܳܐ ܕܡܳܪܝܳܐ. ܡܶܛܠ ܕܶܐܡܰܪ ܢܒܺܝܐ:
ܛܰܝܒܽܘܬܶܗ ܕܡܳܪܝܳܐ ܡܶܢ ܥܳܠܰܡ ܗܺܝ ܘܰܥܕܰܡܳܐ ܠܥܳܠܰܡ ܥܰܠ ܕܳܚܠܰܘ̈ܗܝ. ܠܳܐ ܠܰܡ ܫܰܪܝܰܬ ܛܰܝܒܽܘܬܶܗ ܘܠܐ ܣܳܡܟܳܐ ܥܰܠ ܫܽܘܠܳܡܳܐ. ܗܳܝ ܓܝܪ ܕܡܶܢ ܥܳܠܰܡ ܗܺܝ ܕܠܐ ܪܺܝܫܺܝܬܳܐ ܗܝ ܐܝܟ ܥܳܒܽܘܕܶܗ ܡܕܰܡܶܐ ܠܥܳܠܰܡ. ܘܠܐ ܬܘܒ ܙܰܕܺܝܩܽܘܬܶܗ ܡܰܘܦܝܳܐ. ܡܶܛܠܗܳܕܐ ܕܳܐܦ ܠܰܒܢܱ̈ܝ ܒܢܰܝܴ̈ܐ ܕܕܳܚܠܰܘ̈ܗܝ ܝܳܗܶܒ ܠܗܽܘܢ ܐܰܝܟ ܕܶܐܡܰܪ ܪܽܘܚܳܐ:
ܘܙܰܕܺܝܩܽܘܬܶܗ ܠܰܒܢܱ̈ܝ ܒܢܰܝ̈ܗܽܘܢ. ܠܰܐܝܠܶܝܢ ܕܢܳܛܪܺܝܢ ܩܝܳܡܶܗ ܘܡܶܬܕܰܟܪܺܝܢ ܦܽܘ̈ܩܕܳܢܰܘܗܝ ܘܥܳܒܕܺܝܢ ܠܗܽܘܢ. ܗܳܪܟܳܐ ܠܰܝܬ ܫܰܪܟܳܐ ܗܳܝ ܕܝܳܗܶܒ ܠܰܒܢܱ̈ܝ ܥܰܘܠܳܐ ܛܰܝܒܽܘܬܳܐ ܐܰܘ ܙܰܕܺܝܩܽܘܬܳܐ. ܐܠܐ ܠܰܒܢܱ̈ܝ ܒܢܰܝܴ̈ܐ ܕܕܳܚܠܰܘ̈ܗܝ. ܡܳܕܶܝܢ ܐܶܢ ܡܶܢ ܗܳܝ ܕܢܶܛܰܪ ܐܢܳܫ ܦܽܘ̈ܩܕܳܢܶܐ ܡܶܫܬܘܶܐ ܠܙܰܕܺܝܩܽܘܬܳܐ ܕܡܳܪܝܳܐ. ܠܐ ܡܳܕܶܝܢ ܩܳܝܡܳܐ ܡܶܠܬܗܽܘܢ ܕܰܐܝܠܶܝܢ ܕܳܐܡܪܺܝܢ ܠܰܝܬ ܕܺܝܢܳܐ. ܣܰܓܺܝ ܥܠܰܒ ܗܰܘ ܕܠܐ ܐܶܫܬܚܶܩ ܒܰܢܛܽܘܪܽܘܬܳܐ ܕܦܽܘ̈ܩܕܳܢܶܐ. ܐܶܢ ܕܺܝܢܳܐ ܠܳܐ ܗܳܘܶܐ. ܒܗܳܝ ܕܗܳܪܟܳܐ ܚܝܳܐ ܕܠܐ ܥܰܡܠܳܐ. ܘܰܕܠܳܐ ܫܚܳܩܳܐ. ܘܰܠܗܰܠ ܠܐ ܡܶܫܬܰܢܰܩ ܡܶܢ ܕܰܝܳܢܳܐ. ܡܰܝܬܶܐ ܢܒܺܝܐ ܡܶܢ ܒܳܬܰܪܟܶܢ ܥܽܘܗܕܳܢܳܐ ܕܟܽܘܪܣܝܶܗ ܕܰܐܠܗܳܐ. ܒܗܳܕܐ ܡܫܰܡܰܗ ܟܽܘܪܣܝܳܐ ܥܰܠ ܗܰܘ ܕܠܐ ܣܢܺܝܩ ܥܠ ܡܰܘܬܒܳܐ. ܕܺܝܢܳܐ ܕܠܐ ܫܳܩܶܠ ܫܽܘܠܳܡܳܐ ܡܰܘܕܰܥ܆ ܟܽܘܪܣܝܳܐ ܡܶܛܠ ܕܺܝܢܳܐ ܡܫܰܡܗܺܝܢ ܢܒܺܝ̈ܐ ܥܰܠ ܐܰܠܗܳܐ. ܡܶܛܠ ܕܶܐܠܽܘ ܠܰܝܬ ܗܘܳܐ ܕܺܝܢܳܐ. ܘܠܐ ܥܠ ܟܽܘܪܣܝܳܐ ܣܢܺܝܩ ܗܘܳܐ.
ܡܳܪܝܳܐ ܒܰܫܡܰܝܳܐ ܡܰܬܩܰܢ ܟܽܘܪܣܝܶܗ. ܘܡܰܠܟܽܘܬܶܗ ܒܟܽܠ ܫܰܠܺܝܛܳܐ. ܘܒܳܬܰܪ ܗܳܕܐ ܡܡܰܠܶܠ ܡܙܰܡܪܳܢܳܐ ܠܰܘ ܥܰܡ ܬܰܚܬܳܝ̈ܐ ܐܶܠܐ ܥܰܡ ܥܶܠܳܝܷ̈ܐ:
ܒܰܪܶܟܘ ܠܡܳܪܝܳܐ ܡܰܠܰܐܟܰܘ̈ܗܝ ܕܰܡܨܶܝܢ ܒܚܰܝܠܳܐ ܘܥܳܒܕܺܝܢ ܦܽܘܩܕܳܢܰܘ̈ܗܝ. ܒܰܪܶܟܘ ܠܡܳܪܝܳܐ ܟܽܠܗܽܘܢ ܚܰܝ̈ܠܰܘܳܬܶܗ. ܗܳܐ ܡܳܕܶܝܢ ܘܠܳܐ ܡܰܠܰܐܟ̈ܐ ܝܪܶܒܘ ܒܶܠܥܳܕ ܢܳܛܽܘܪܽܘܬ ܦܽܘ̈ܩܕܳܢܶܐ. ܘܶܐܠܽܘ ܒܶܠܥܳܕ ܦܽܘ̈ܩܕܳܢܶܐ ܫܦܰܪܘ ܒܰܐܬܪܗܽܘܢ. ܠܐ ܐܳܠܨܳܐ ܗܘܳܬ ܕܢܺܐܡܰܪ ܢܒܺܝܐ ܕܰܡܨܶܝܢ ܒܚܰܝܠܳܐ ܘܥܳܒܕܺܝܢ ܦܽܘܩܕܳܢܰܘ̈ܗܝ. ܠܰܝܬ ܓܶܝܪ ܘܠܐ ܚܰܕ ܕܠܐ ܦܽܘ̈ܩܕܳܢܶܐ. ܐܠܐ ܗܰܘ ܕܗܽܘ ܦܳܩܶܕ ܠܟܽܠ. ܘܠܐ ܬܺܐܡܰܪ ܕܡܳܢܳܐ ܟܰܝ ܡܶܬܦܰܩܕܺܝܢ ܡܰܠܐܟ̈ܐ ܠܡܶܥܒܰܕ ܐܡ̇ܪ ܐܢܳܐ. ܕܡܶܕܶܡ ܕܠܳܚܶܡ ܕܠܰܟܝܳܢܗܽܘܢ ܣܺܝܡ ܠܗܽܘܢ ܠܡܶܛܰܪ ܘܰܠܡܶܥܒܰܕ. ܡܶܛܠܗܳܢܐ ܐܡ̇ܪ
ܘܰܡܫܰܡܫܳܢܰܘ̈ܗܝ ܕܥܳܒܕܺܝܢ ܨܶܒܝܳܢܶܗ. ܗܳܠܶܝܢ ܓܝܪ ܡܶܫܬܰܕܪܺܝܢ ܒܬܶܫܡܶܫܬܶܗ ܘܠܐ ܡܰܐܡܢܺܝܢ. ܘܦܳܪܚܺܝܢ ܠܟܽܠ ܦܶܢ̈ܝܳܢ ܕܠܐ ܫܰܠܘܳܐ. ܡܶܛܠ ܐܰܝܠܶܝܢ ܕܰܥܬܺܝܕܺܝܢ ܠܡܺܐܪܰܬ ܚܰܝܷ̈ܐ. ܘܬܘܒ ܐܡ̣ܪ:
ܒܰܪܶܟܘ ܠܡܳܪܝܳܐ ܟܽܠܗܽܘܢ ܥܒܳܕܰܘ̈ܗܝ. ܕܰܒܟܽܠܳܗ̇ ܐܰܪܥܳܐ ܫܽܘܠܛܳܢܶܗ. ܒܰܪܶܟܝ ܢܰܦܫܝ ܠܡܳܪܝܳܐ. ܡܶܛܠܡܳܢܐ ܥܒܰܕ ܫܽܘܠܳܡܳܐ ܠܡܰܙܡܽܘܪܳܐ ܗܳܢܐ ܐܝܟ ܫܽܘܪܳܝܳܐ. ܒܗܰܘ ܓܶܝܪ ܦܶܬܓܳܡܳܐ ܕܫܰܪܺܝ ܒܶܗ ܐܳܦ ܫܰܠܶܡ. ܘܗܳܕܐ ܡܰܘܕܥܳܐ ܥܰܠ ܗܰܘ ܕܰܡܫܰܪܶܐ ܒܙܰܕܺܝܩܽܘܬܳܐ. ܘܒܶܗ ܬܽܘܒ ܐܳܦ ܡܫܰܠܶܡ ܡܶܢ ܫܽܘܪܳܝܳܐ ܘܰܥܕܰܡܳܐ ܠܫܽܘܠܳܡܳܐ ܡܰܘܕܶܐ ܕܠܐ ܫܶܠܝܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܐ
ܡܰܘܕܰܥ ܥܰܠ ܒܪܺܝܬܳܐ ܕܰܒܪܳܐ ܐܠܗܐ ܘܥܰܠܗܳܝ ܒܛܶܟܣܳܐ ܫܰܦܺܝܪܐ ܐܶܬܩܰܝܰܡ ܟܽܠ ܡܶܕܶܡ ܘܥܰܠ ܥܡܳܕܳܐ ܩܰܕܺܝܫܳܐ. ܘܥܰܠ ܟܳܪܽܘܙܽܘܬܳܐ ܕܰܫܠܺܝ̈ܚܶܐ ܘܓܰܒܝܽܘܬܳܐ ܕܥܺܕܬܳܐ ܘܥܰܠ ܟܳܪܽܘܙܽܘܬܳܐ ܕܰܢܒܺܝ̈ܐ ܘܥܰܠ ܐܪ̈ܳܙܶܐ ܕܥܰܡܰܢܽܘܐܝܠ.
ܪܰܒܽܘܬܳܐ ܕܚܰܝܠܶܗ ܕܐܠܗܐ ܕܚܰܘܺܝ ܒܰܥܒܳܕ̈ܐ ܟܕ ܒܪܳܐ ܠܗܘܢ ܬܽܘܩܦܳܐ ܡܥܰܠܝܳܐ ܕܚܶܟܡܬܶܗ ܗܳܝ ܕܒܗ̇ ܐܰܬܩܶܢ ܟܽܠܡܶܕܶܡ. ܡܙܰܡܰܪ ܛܽܘܒܳܢܐ ܘܰܐܠܗܳܝܐ ܕܰܘܝܕ ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܰܥ܆ ܟܕ ܛܽܘܒܳܢܳܐ ܡܽܘܫܶܐ ܩܰܕܡܳܝܳܐ ܐܰܟܬܶܒ ܥܠ ܫܽܘܦܪܳܐ ܕܒܶܪ̈ܝܳܬܳܐ ܘܥܠ ܦܰܐܝܽܘܬܳܐ ܕܬܽܘ̈ܩܳܢܶܐ. ܬܘܒ ܐܦ ܕܰܘܝܕ ܥܛܰܦ ܕܢܶܥܒܶܕ ܥܽܘܗܕܳܢܐ ܕܥܠ ܒܶܪ̈ܝܳܬܳܐ. ܒܪܰܡ ܕܝܢ ܠܐ ܐܳܡܪܺܝܢܰܢ ܕܕܺܝܠܗܘܢ ܗܘܳܬ ܗܳܕܐ܆ ܕܟܽܠܚܰܕ ܡܶܢܗܘܢ ܐܝܠܝܢ ܕܨܳܒܶܐ ܢܰܟܬܶܒ. ܐܠܐ ܪܽܘܚܳܐ ܕܰܐܠܗܳܐ ܗܰܘ ܕܗܽܘ ܦܰܪܢܶܣ ܒܗܽܘܢ ܡܰܘܗ̈ܒܳܬܶܗ. ܠܥܰܙ ܗܘܳܐ ܟܰܣܝܳܐܝ̣ܬ ܒܢܰܦ̈ܫܳܬܗܘܢ. ܘܰܐܥܒܶܕ ܒܗܘܢ ܕܰܢܡܰܠܠܽܘܢ ܒܟܽܠܙܒܰܢ ܐܰܝܠܝܢ ܕܠܶܗ ܫܳܦܪ̈ܳܢ. ܡܶܛܠܗܳܢܐ ܩܰܕܡܳܐܝܬ ܦܩܰܕ ܠܛܽܘܒܳܢܳܐ ܡܽܘܫܐ ܘܰܟܬܰܒ ܣܶܦܪܳܐ ܕܰܒܪܺܝܬܳܐ. ܥܠ ܬܽܘܩܳܢܳܐ ܕܰܥܒܳܕ̈ܐ ܡܶܬܚܰܙܝܳܢ̈ܐ. ܘܟܕ ܐܰܓܰܪ ܙܰܒܢܳܐ ܘܫܰܪܝ̣ ܥܰܡܳܐ ܢܶܛܥܶܐ. ܐܝܠܝܢ ܕܰܟܬܰܒ ܠܗ ܣܶܦܪܳܐ ܩܰܕܡܳܝܳܐ ܡܽܘܫܶܐ܆ ܬܽܘܒ ܦܢܳܐ ܢܰܥܗܶܕ ܐܢܘܢ ܒܺܐܝ̈ܕܰܝ ܕܰܘܝܕ. ܗܳܠܝܢ ܟܬܺܝ̈ܒܳܬܳܐ ܩܰܕܡܳܝ̈ܬܐ ܕܟܶܬܒܰܬ ܨܶܒܥܳܐ ܕܪܽܘܚܳܐ. ܘܡܛܠ ܕܢܰܚܶܒ ܗܶܓܝܳܢܳܐ ܕܥܠ ܥܒܳܕ̈ܐ. ܐܦ ܩܴ̈ܠܐ ܡܫܰܚܠܶܦ ܗܘܳܐ ܪܽܘܚܐ ܟܕ ܡܰܠܶܦ ܠܗ܆ ܘܥܰܠܗܳܝ ܒܺܐܝ̈ܕܰܝ ܡܽܘܫܐ ܟܬܰܒ ܠܗ ܬܰܫܥܺܝܬܳܐ ܕܠܐ ܩܳܠܐ. ܒܰܡܙܰܡܪܳܢܳܐ ܕܝܢ ܕܘܝܕ ܒܩܳܠܐ ܕܙܽܘܡܳܪܳܐ ܪܰܟܶܒ ܘܰܐܟܬܶܒ ܠܗ̇ ܥܠ ܒܪܺܝܬܳܐ. ܐܦ ܬܰܫܥܺܝܬܳܐ ܕܝܽܘܠܦܳܢܳܐ. ܘܰܒܗܳܠܝܢ ܡܶܬܢܰܚܰܬ ܗܘܳܐ ܡܛܠ ܡܚܺܝܠܽܘܬܶܗ ܕܬܰܠܡܺܝܕܳܐ ܒܪܰܡ ܕܝܢ ܘܟܕ ܗܳܟܰܢܐ ܐܡ̇ܪ ܐܢܳܐ܆ ܒܥܰܝܢܳܐ ܕܪܽܘܚܳܐ ܙܳܕܩ ܠܰܢ ܕܢܶܬܒܰܩܶܐ ܪܽܘܚܳܢܳܐܝ̣ܬ ܕܠܐ ܡܰܐܝܢܽܘܬܳܐ. ܒܗܳܠܝܢ ܕܶܐܬܡܱ̈ܠܰܠܝ ܡܢ ܢܒܺܝ̈ܐ. ܒܗܳܝ ܕܠܘ ܥܕܰܡܳܐ ܠܫܶܡܥܳܐ ܒܰܪܝܳܐ ܒܰܠܚܽܘܕ ܩܢܶܝܢ ܚܰܝܠܳܐ ܐܠܐ ܠܓܘ ܡܢ ܬܰܚܦܺܝܬܳܐ ܕܫܽܘܦܪܶܗ ܕܡܽܘܫܶܐ. ܡܛܰܫܰܝ ܟܽܠܗ ܢܳܡܽܘܣܳܐ ܕܰܢܒܺܝ̈ܐ. ܘܪܽܘܚܳܢܳܝܬܳܐ ܗܝ ܡܶܠܬܳܐ ܕܰܢܒܺܝܽܘܬܐ. ܐܝܟ ܕܡܰܠܶܦ ܦܰܘܠܽܘܣ ܘܐܡ̇ܪ: ܕܝܳܕܥܺܝܢܰܢ ܠܰܡ ܕܢܳܡܽܘܣܳܐ ܕܪܽܘܚ ܗܽܘ (ܪ̈ܗܘܡܝܐ ܙ: ܝܕ). ܡܳܕܝܢ ܠܐ ܢܶܬܥܕܶܠ ܡܶܢ ܫܳܡܽܘܥܳܐ. ܐܶܢܗܽܘ ܕܰܠܡܷ̈ܠܐ ܕܬܶܫܒܚ̈ܬܳܐ ܕܙܰܡܰܪ ܛܽܘܒܳܢܐ ܕܘܝܕ ܡܙܰܡܪܺܝܢܰܢ ܘܰܡܦܰܢܶܝܢܰܢ ܣܽܘܟܳܠܗܶܝܢ ܠܘܬ ܨܰܠܡܳܐ ܕܪ̈ܽܘܚܳܢܳܝܳܬܳܐ. ܗܳܝ ܕܳܐܦ ܗܳܟܰܢܐ ܐܝ̣ܬܰܝܗܶܝܢ. ܗܳܫܐ ܕܝܢ ܢܶܩܪܽܘܒ ܢܶܫܡܰܥ ܩܳܠܗ ܟܕ ܡܒܰܪܶܟ ܠܡܳܪܝܳܐ ܥܠ ܐܰܝܠܝܢ ܕܰܥܒܰܕ. ܘܒܰܙܡܺܝܪ̈ܳܬܳܐ ܘܰܒܩܳܠܳܐ ܒܰܣܺܝܡܳܐ ܡܫܰܒܰܚ ܘܰܡܙܰܡܰܪ:
ܒܰܪܶܟܝ ܢܰܦܫܝ ܠܡܳܪܝܳܐ. ܡܳܪܝܳܐ ܐܰܠܳܗܝ ܝܺܪܶܒ ܛܳܒ. ܗܳܝ ܕܒܰܪܶܟܝ ܢܰܦܫܝ ܠܡܳܪܝܳܐ ܡܰܘܕܥܳܐ ܥܠ ܕܰܒܩܽܘܒܳܠܛܰܝܒܽܘܬܳܐ ܚܰܝܳܒܳܐ ܢܰܦܫܳܐ ܬܶܗܘܶܐ ܩܳܪܒܳܐ ܩܕܳܡ ܐܠܗܐ. ܡܳܐ ܕܰܡܫܰܪܝܳܐ ܠܡܶܬܢܳܐ ܥܒܳܕ̈ܐ ܕܰܥܒܰܕ ܟܕ ܬܳܗܪܳܐ ܒܶܗ. ܬܡܰܠܶܠ ܬܶܕܡܪ̈ܳܬܳܐ ܕܰܥܒܳܕܰܘ̈ܗܝ. ܠܘ ܟܕ ܚܳܝܪܳܐ ܒܗܶܝܢ ܕܠܐ ܕܽܘܡܳܪܳܐ. ܐܠܐ ܟܕ ܡܰܣܓܝܳܐ ܘܬܳܗܪܳܐ. ܬܶܫܬܰܘܕܰܥ ܘܬܶܣܬܰܟܰܠ ܡܶܢ ܒܶܪ̈ܝܳܬܳܐ ܠܗܰܘ ܕܰܒܪܳܐ ܐܢܝܢ. ܗܳܝܕܝܢ ܕܶܐܡܰܪ ܡܳܪܝܳܐ ܐܠܗܝ ܝܺܪܶܒ ܛܳܒ ܠܘ ܕܰܒܬܰܘܣܶܦܬܳܐ ܩܰܒܶܠ ܪܰܒܽܘܬܳܐ ܗܰܘ ܡܳܪܳܐ ܕܟܽܠܳܐ. ܠܐ ܓܝܪ ܡܶܫܟܚܺܝܢ ܥܰܒ̈ܕܶܐ ܠܡܰܘܣܳܦܽܘ ܪܰܒܽܘܬܳܐ ܠܗܰܘ ܕܢܽܘܟܪܳܝ ܘܡܰܒܥܰܕ ܟܝܳܢܶܗ. ܡܶܢ ܕܰܢܩܰܒܶܠ ܬܰܘܣܶܦܬܳܐ. ܒܪܰܡ ܕܝܢ ܡܛܠ ܕܥܠ ܒܪܺܝܬܳܐ ܚܕܰܬܳܐ ܡܶܬܚܰܫܒܺܝܢܰܢ܆ ܕܨܳܒܶܐ ܪܽܘܚܳܐ ܕܢܶܫܬܰܥܶܐ. ܕܳܡܝܳܐ ܠܗܳܝ ܕܰܡܛܰܝܒܳܐ ܕܬܺܐܬܶܐ ܠܦܽܘܫܳܩܳܐ. ܘܰܒܗܳܝ ܕܰܥܕܰܡܳܐ ܕܶܐܬܢܰܣܺܝ ܒܰܙܥܽܘܪܽܘܬܳܐ ܘܡܶܬܢܰܚܬܳܢܽܘܬܳܐ. ܠܐ ܫܰܪܝ̣ ܒܰܒܪܺܝܬܳܐ ܚܕܰܬܳܐ ܟܕ ܐܶܬܓܠܺܝ ܒܰܒܣܰܪ. ܐܳܠܨܳܐ ܗܘܳܬ ܕܳܐܦ ܢܺܐܪܰܒ ܘܢܶܫܬܰܥܶܐ ܘܢܶܫܬܰܒܰܚ ܐܝܟ ܕܐܡ̣ܪ ܐܶܘܰܢܓܶܠܺܝܣܛܳܐ. ܕܠܐ ܥܕܰܟܺܝܠ ܐܶܫܬܰܒܰܚ ܗܘܳܐ ܝܶܫܽܘܥ (ܝܘܚܢܢ ܙ: ܠܛ). ܘܗܳܕܐ ܠܘ ܟܕ ܚܳܐܱܪ ܠܘܳܬ ܗܳܝ ܕܺܐܝܬܰܘܗܝ ܡܫܰܒܚܳܐ ܒܟܽܠܙܒܢ. ܥܡ ܐܠܗܐ ܐܰܒܽܘܗܝ ܐܡ̣ܪ. ܐܠܐ ܟܕ ܡܶܬܒܰܩܶܐ ܒܫܽܘܒܚܳܐ ܗܰܘ ܕܩܰܒܶܠ ܒܰܨܠܺܝܒܳܐ. ܕܗܽܘ ܢܓܰܕ ܘܩܰܪܶܒ ܠܥܰܡ̈ܡܶܐ ܠܣܶܓܕܬܶܗ. ܗܳܟܰܢܐ ܐܦ ܛܽܘܒܳܢܐ ܕܘܝܕ ܐܡ̣ܪ ܕܡܳܪܝܳܐ ܐܰܠܳܗܝ ܝܺܪܶܒ ܛܳܒ. ܡܶܛܠ ܗܰܘ ܣܽܘܥܪܳܢܳܐ ܕܰܡܕܰܒܪܳܢܽܘܬܳܐ ܕܒܰܒܣܰܪ. ܡܶܛܠ ܕܰܢܚܶܬ ܘܰܣܠܶܩ ܡܶܬܬܰܘܕܶܐ ܘܡܶܫܬܰܒܰܚ. ܘܡܛܠ ܕܶܐܬܡܰܟܰܟ ܘܶܐܬܟܪܶܙ ܘܶܐܬܪܰܡܪܰܡ. ܘܡܛܠ ܕܰܚܙܰܝܢܳܝܗܝ ܒܣܽܘܪܳܩܶܗ ܨܶܒܝܳܢܳܝܳܐ ܕܠܰܝܬ ܗܘܳܐ ܠܗ ܚܶܙܘܳܐ ܕܰܐܠܗܽܘܬܳܐ. ܘܠܐ ܙܺܝܘܳܐ ܡܫܰܒܚܳܐ ܕܪܰܒܽܘܬܳܐ. ܥܰܠܗܳܝ ܐܡ̣ܪ ܢܒܺܝܐ:
ܙܺܝܘܳܐ ܘܗܶܕܪܳܐ ܠܒܶܫ. ܡܶܛܠ ܕܰܠܒܶܫ ܓܰܘܢܳܐ ܕܡܺܝ̈ܬܶܐ ܥܠ ܨܠܺܝܒܳܐ. ܟܕ ܣܠܶܩ ܙܺܝܘܳܐ ܘܗܶܕܪܳܐ ܠܒܶܫ. ܘܡܶܛܠ ܕܶܐܬܥܰܛܰܦ ܦܰܓܪܳܐ ܚܳܫܽܘܫܳܐ.
ܐܶܬܟܰܣܺܝ ܢܽܘܗܪܳܐ ܐܝܟ ܡܰܪܛܽܘܛܳܐ. ܗܳܠܝܢ ܓܝܪ ܪܰܘܪ̈ܒܳܬܳܐ ܕܰܢܣܰܒ ܡܶܬܐܰܡܪ̈ܳܢ. ܐܠܘ ܓܝܪ ܠܰܐܬܪܳܐ ܟܡܺܝܪܳܐ ܘܚܶܫܽܘܟܳܐ ܕܰܫܝܽܘܠ ܠܐ ܢܚܶܬ. ܘܠܐ ܕܶܐܬܟܰܣܺܝ ܢܽܘܗܪܳܐ ܐܝܟ ܡܰܪܛܽܘܛܳܐ ܡܶܬܡܰܠܠܳܐ ܗܘܳܬ ܥܠܰܘܗܝ. ܘܡܶܛܠ ܕܶܐܬܟܰܣܝ̣ ܕܡܽܘܬܳܐ ܕܡܳܝܽܘ̈ܬܶܐ ܒܦܰܓܪܳܐ ܡܶܬܚܰܒܠܳܢܳܐ ܕܰܠܒܶܫ. ܟܺܐܢܳܐܝ̣ܬ ܐܶܬܟܰܣܺܝ ܢܽܘܗܪܳܐ ܐܝܟ ܡܰܪܛܽܘܛܳܐ ܒܗܳܝ ܕܰܐܩܺܝܡܶܗ ܠܦܰܓܪܶܗ ܠܐ ܡܳܝܽܘܬܳܐ ܘܠܐ ܚܳܫܽܘܫܳܐ. ܘܰܣܢܺܝܩ ܗܘܳܐ ܡܛܠ ܡܽܘܟܳܟܳܐ ܕܰܠܒܶܫ ܠܒܽܘܫܳܐ ܕܡܺܝ̈ܬܶܐ ܢܳܚ̈ܬܰܝ ܚܶܫܽܘܟܳܐ ܕܶܐܬܥܰܛܰܦ. ܕܢܶܦܢܶܐ ܢܶܬܥܰܛܰܦ ܒܰܩܝܳܡܬܳܐ ܠܒܽܘܳܫܐ ܓܰܐܝܳܐ ܘܢܰܗܺܝܪܳܐ ܕܠܐ ܡܳܝܽܘܬܽܘܬܳܐ ܘܰܕܠܐ ܡܶܬܚܰܒܠܳܢܽܘܬܳܐ. ܘܰܐܝܠܝܢ ܕܚܳܪܘ ܒܶܗ ܕܡܶܬܥܰܦܶܐ ܐܝܟ ܥܰܢܺܝܕܳܐ ܢܚܽܘܪܽܘܢ ܒܶܗ ܟܕ ܠܒܺܝܫ ܢܽܘܗܪܳܐ ܘܓܰܐܝܽܘܬܳܐ ܘܠܐ ܡܶܬܚܰܒܠܳܢܽܘܬܳܐ. ܘܒܳܬܰܪ ܗܳܕܐ ܡܰܝܬܶܐ ܘܳܐܡܰܪ:
ܡܬܰܚ ܫܡܰܝܳܐ ܐܰܝܟ ܝܳܪܺܝܥܬܳܐ. ܗܰܘ ܕܰܙܥܰܪ ܘܪܰܒܽܘܬܶܗ ܠܐ ܐܰܘܒܶܕ. ܘܶܐܬܡܰܣܟܰܢ ܘܡܶܢ ܥܽܘܬܪܶܗ ܠܐ ܐܶܫܬܰܚܠܰܦ. ܗܽܘ ܡܬܰܚ ܫܡܰܝܳܐ ܐܝܟ ܝܳܪܺܝܥܬܳܐ ܘܰܥܒܳܕܳܐ ܕܺܐܝܕܰܘ̈ܗܝ ܐܝ̣ܬܰܘܗܝ ܪܩܺܝܥܳܐ. ܘܗܽܘ:
ܥܒܰܕ ܒܡܰܝܴ̈ܐ ܡܶܕܝܳܪ̈ܰܘܗܝ. ܡܳܢܳܐ ܕܝܢ ܐܝ̣ܬܰܝܗܘܢ ܡܶܕܝܳܪ̈ܐ ܕܰܥܒܰܕ ܒܡܰܝܴ̈ܐ. ܥܠ ܥܡܳܕܳܐ ܩܰܕܺܝܫܳܐ ܡܰܠܶܦ ܗܳܪܟܳܐ. ܒܗܳܕܐ ܟܰܪܣܳܐ ܕܪܽܘܚܳܐ ܣܺܝܡܺܝܢ ܡܶܕܝܳܪ̈ܶܐ ܕܰܐܠܗܽܘܬܳܐ܆ ܡܶܕܝܳܪܳܐ ܩܰܕܡܳܝܳܐ ܐܰܠܗܽܘܬܳܐ: ܗܰܝܡܳܢܽܘܬܳܐ: ܡܶܕܝܳܪܳܐ ܬܪܰܝܳܢܳܐ ܣܰܒܪܳܐ: ܡܶܕܝܳܪܳܐ ܬܠܺܝܬܳܝܳܐ ܚܽܘܒܳܐ. ܘܰܒܗܳܠܝܢ ܡܰܝܴ̈ܐ ܐܪ̈ܳܙܳܢܳܝܶܐ ܐܝܟ ܡܶܕܝܳܪ̈ܶܐ ܣܺܝ̈ܡܳܢ ܡܰܘܗ̈ܒܳܬܳܐ ܐܰܠܗܳܝ̈ܬܳܐ. ܘܰܡܦܰܠܓܳܐ ܛܰܝܒܽܘܬܳܐ ܠܰܥܳܡܽܘ̈ܕܶܐ ܒܢܷ̈ܝܗ̇ ܕܥܺܕܬܳܐ. ܘܩܳܐܷܡ ܪܽܘܚܳܐ ܐܝܟ ܓܺܝܙܰܒܪܳܐ ܒܗܳܢܐ ܒܶܢܝܳܢܳܐ ܕܰܥܒܰܕ ܐܰܪܕܺܝܟܠܳܐ ܕܥܳܠܡܳܐ ܒܓܰܘ ܡܰܝܴ̈ܐ ܘܰܡܦܰܠܶܓ ܡܶܕܝܳܪ̈ܶܐ ܘܰܡܩܺܝܡ ܝܳܪ̈ܬܶܐ. ܐܝ̣ܬ ܕܰܡܩܺܝܡ ܠܶܗ ܒܡܶܕܝܳܪܳܐ ܕܰܫܠܺܝ̈ܚܶܐ: ܘܠܰܐܚܪ̈ܳܢܶܐ ܒܡܶܕܝܳܪܳܐ ܕܰܢܒܺܝ̈ܐ: ܠܰܐܚܪ̈ܳܢܶܐ ܒܡܶܕܝܳܪܳܐ ܕܡܰܠܦܴ̈ܢܶܐ: ܠܰܐܚܪ̈ܳܢܶܐ ܒܡܶܕܝܳܪ̈ܶܐ ܕܣܳܥܪ̈ܰܝ ܚܰܝ̈ܠܶܐ: ܠܰܐܚܪ̈ܳܢܶܐ ܒܡܶܕܝܳܪ̈ܶܐ ܕܗܳܢܘܢ ܕܩܰܒܶܠܘ ܡܰܘܗ̈ܒܳܬܳܐ ܕܳܐܣܝܽܘܬܳܐ: ܠܰܐܚܪ̈ܳܢܶܐ ܒܡܶܕܝܳܪ̈ܶܐ ܕܰܡܕܰܒܪ̈ܳܢܶܐ: ܠܰܐܚܪ̈ܳܢܶܐ ܕܰܡܥܰܕܪ̈ܳܢܶܐ. ܗܳܠܝܢ ܐܶܢܘܢ ܡܶܕܝܳܪ̈ܶܐ ܕܰܥܒܰܕ ܒܡܰܝܴ̈ܐ ܚܰܝܷ̈ܐ ܕܰܣܚܳܬܳܐ ܩܰܕܺܝܫܬܳܐ. ܗܳܝ ܕܰܐܥܛܶܦ ܠܢ ܒܪܳܐ ܬܶܢܝܳܢܽܘܬ ܒܰܩܢܽܘܡܶܗ ܒܪܺܝܬܳܐ ܚܕܰܬܳܐ. ܘܡܶܟܺܝܠ ܒܗܳܠܝܢ ܡܶܕܝܳܪ̈ܶܐ ܡܶܬܥܰܠܶܐ ܐܢܳܫ ܠܰܫܡܰܝܳܐ. ܐܝܟ ܕܶܐܡܰܪ ܪܽܘܚܳܐ:
ܣܳܡ ܠܰܡ ܥܢܳܢܷ̈ܐ ܡܰܪܟܰܒܬܶܗ. ܗܳܪܟܳܐ ܓܝܪ ܩܳܝܡܳܐ ܡܰܪܟܰܒܬܳܗ̇ ܕܰܐܠܗܽܘܬܳܐ. ܠܘܬ ܥܡܳܕܳܐ ܩܰܕܺܝܫܳܐ. ܘܰܠܗܰܘ ܕܥܳܡܶܕ ܡܰܪܟܢܳܐ ܚܰܨܳܗ̇ ܘܒܰܕܡܽܘܬ ܥܢܳܢܳܐ ܗܳܝ ܕܩܰܒܶܠܬܶܗ ܠܥܰܡܰܢܽܘܐܝܠ ܟܕ ܡܶܣܬܰܠܰܩ. ܛܳܥܢܳܐ ܠܗܘܢ ܓܝܪ ܠܬܰܠܡܺܝ̈ܕܶܐ ܘܡܰܣܩܳܐ ܠܗܽܘܢ ܠܰܫܡܰܝܳܐ. ܘܰܡܗܰܠܟܺܝܢ ܠܗܘܢ ܥܠ ܟܶܢܦ̈ܐ ܕܪܽܘܚܳܐ ܥܡ ܗܰܘ ܕܰܢܚܶܬ ܒܳܬܰܪܗܘܢ ܕܰܢܥܰܠܐܷ ܐܢܘܢ ܡܶܢ ܥܽܘܡܩܳܐ ܠܪܰܘܡܳܐ ܕܰܫܡܰܝܳܐ. ܡܶܛܠ ܕܡܶܠܬܳܐ ܕܝܢ ܥܠ ܥܰܡܰܢܽܘܐܝܠ ܐܱܡܺܝܪܳܐ. ܘܰܥܢܴ̈ܢܶܐ ܕܰܡܩܰܒ̈ܠܳܢ ܡܰܪ̈ܟܒܳܬܶܗ ܐܝ̣ܬܰܝܗܶܝܢ ܢܰܦ̈ܫܳܬܳܐ ܕܩܰܕܺܝ̈ܫܶܐ ܕܒܰܥܡܳܕܳܐ ܩܳܝ̈ܡܳܢ ܒܡܶܕܝܳܪ̈ܶܐ ܕܰܥܒܰܕ ܒܡܰܝܴ̈ܐ ܡܶܛܠ ܕܰܡܫܰܚܠܶܦ ܠܗܶܝܢ ܪܽܘܚܳܐ ܡܶܢ ܦܰܓܪܳܐ ܘܥܳܒܶܕ ܠܗܶܝܢ ܪ̈ܽܘܚܳܢܶܐ. ܛܳܥ̈ܢܳܢ ܡܶܛܪܳܐ ܕܰܡܣܰܒܪܳܢܽܘܬܳܐ ܘܣܴ̈ܠܩܳܢ ܡܶܢ ܡܰܝܴ̈ܐ ܕܡܰܥܡܽܘܕܺܝܬܳܐ. ܟܕ ܡܶܙܕܰܝܚܳܐ ܥܠܰܝܗܶܝܢ ܡܰܪܟܰܒܬܶܗ ܕܡܶܠܬܳܐ. ܘܢܳܦ̈ܩܳܢ ܠܒܶܝܬ ܥܰܡܡ̈ܐ ܠܡܰܫܩܳܝܽܘ ܐܰܪܥܳܐ ܕܶܐܡܘܴ̈ܬܳܐ ܒܡܶܛܪܳܐ ܕܚܰܝ̈ܐ. ܟܕ ܗܽܘ ܡܶܠܬܳܐ ܡܶܙܕܰܝܰܚ ܥܠܰܝܗܶܝܢ ܥܠ ܟܶܢܦ̈ܐ ܕܪܽܘܚܳܐ ܘܰܡܗܰܠܶܟ. ܡܶܢ ܗܳܠܝܢ ܦܰܘܠܽܘܣ ܐܰܥܡܕܶܗ ܗܘܳܐ ܚܰܢܰܢܝܳܐ. ܘܰܫܠܰܚ ܗܘܳܐ ܘܰܫܕܳܐ ܩܠܳܦ̈ܐ ܕܢܳܡܽܘܣܳܐ ܒܓܰܘ ܥܡܳܕܳܐ. ܘܐܝܟ ܕܠܰܥܢܳܢܳܐ ܕܥܳܗܢܳܐ ܠܡܶܛܥܰܢ ܡܶܛܪܳܐ ܕܰܣܒܰܪܬܳܐ ܚܰܛܦܶܗ ܪܽܘܚܳܐ ܠܦܰܘܠܽܘܣ ܘܥܰܒܕܶܗ ܡܳܐܢܳܐ ܓܰܒܝܳܐ ܘܰܐܩܺܝܡܶܗ ܒܡܶܕܝܳܪܳܐ ܩܰܕܡܳܝܳܐ ܕܒܶܝܬ ܦܶܛܪܽܘܣ. ܘܐܝܟ ܕܥܠ ܚܰܨܳܐ ܢܺܝܚܳܐ ܘܒܰܣܺܝܡܳܐ ܣܳܡ ܥܠܰܘܗܝ ܡܰܪܟܰܒܬܶܗ ܡܰܠܟܳܐ ܙܩܺܝܦܳܐ. ܘܰܢܦܰܩ ܩܰܠܺܝܠܐܝ̣ܬ ܠܘܬ ܥܰܡܡ̈ܐ ܠܡܰܫܩܳܝܽܘ ܐܶܢܘܢ ܡܶܛܪܳܐ ܕܰܣܒܰܪܬܳܐ. ܥܢܴ̈ܢܶܐ ܬܘܒ ܐܝ̣ܬܰܝܗܘܢ ܗܘܰܘ ܕܒܶܝܬ ܦܶܛܪܽܘܣ ܘܰܕܒܶܝܬ ܙܰܒܕܰܝ. ܘܡܶܛܠܗܳܢܐ ܟܕ ܩܰܒܶܠܘ ܥܡܳܕܳܐ ܕܰܒܝܰܕ ܢܽܘܪܳܐ. ܢܦܰܩܘ ܐܝܟ ܥܢܴ̈ܢܶܐ ܩܰܠܺܝ̈ܠܳܬܳܐ. ܫܶܡܥܽܘܢ ܠܪܽܗܘܡܺܝ. ܝܽܘܚܰܢܳܢ ܠܶܐܦܶܣܽܘܣ. ܬܳܐܘܡܰܐ ܠܗܶܢܕܽܘ. ܟܕ ܛܥܺܝܢܺܝܢ ܥܠ ܚܰܨܳܐ ܕܢܰܦܫܗܽܘܢ ܡܰܪܟܰܒܬܳܐ ܕܡܰܠܟܳܐ ܙܩܺܝܦܳܐ ܘܰܡܫܰܡܪܺܝܢ ܗܘܰܘ ܒܰܐܪܥܳܐ ܕܶܐܡ̈ܘܳܬܳܐ ܩܴ̈ܠܐ ܕܪ̈ܰܥܡܶܐ ܪ̈ܽܘܚܳܢܶܐ. ܝܽܘܚܰܢܳܢ ܘܝܰܥܩܽܘܒ ܒܢܱ̈ܝ ܙܰܒܕܰܝ ܒܰܥ̈ܢܳܢܶܐ ܗܳܠܝܢ ܛܳܝܣܺܝܢ ܗܘܰܘ ܘܐܝܟ ܕܩܰܕܶܡ ܣܳܡ ܠܗܘܢ ܫܡܳܗ̈ܐ ܚܰܕ̈ܬܶܐ ܘܰܩܪܳܐ ܐܶܢܘܢ ܒܢܱ̈ܝ ܪܰܥܡܳܐ. ܥܢܳܢܳܐ ܗܘܳܐ ܬܽܘܒ ܦܺܝܠܺܝܦܽܘܣ ܡܣܰܒܪܳܢܳܐ ܒܰܐܬܪ̈ܰܘܳܬܳܐ ܕܫܳܡܪ̈ܳܝܶܐ. ܗܰܘ ܕܡܶܢ ܒܳܬܰܪ ܕܰܐܥܡܶܕ ܐܶܢܘܢ ܡܶܬܦܩܶܕ ܗܘܳܐ ܡܶܢ ܪܽܘܚܳܐ ܕܒܽܐܘܪܚܳܐ ܡܰܕܒܪܳܝܬܳܐ ܕܢܳܚܬܳܐ ܡܶܢ ܐܽܘܪܺܫܠܶܡ ܠܓܰܐܙܳܐ ܢܺܐܙܰܠ. ܗܰܘ ܕܡܶܛܠ ܕܰܐܝܟ ܥܢܳܢܳܐ ܩܰܠܺܝܠ ܗܘܳܐ܆ ܥܡ ܚܺܐܦܳܐ ܕܡܰܪܟܰܒܬܳܐ ܕܰܡܗܰܝܡܢܰܐ ܗܘ ܟܽܘܫܳܝܳܐ ܪܳܗܶܛ ܗܘܳܐ. ܘܟܕ ܣܠܶܩ ܘܝ̣ܬܶܒ ܥܠ ܡܰܪܟܰܒܬܳܐ ܐܰܛܝ̣ܦܶܗ ܠܗܰܘ ܐܽܘܟܳܡܳܐ ܘܟܽܘܫܳܝܳܐ ܒܡܶܛܪܳܐ ܢܰܗܺܝܪܳܐ ܘܚܶܘܳܪܳܐ ܕܡܰܠܝܳܐ ܗܘܳܬ ܥܢܳܢܳܐ ܕܢܰܦܫܶܗ. ܘܰܐܥܡܕܶܗ ܒܡܰܝܴ̈ܐ ܕܶܐܫܟܰܚ ܒܽܐܘܪܚܳܐ ܩܕܳܡܰܝܗܘܢ ܘܫܰܕܪܶܗ ܢܺܐܙܰܠ ܢܣܰܒܰܪ ܒܰܐܪܥܳܐ ܨܗܺܝܬܳܐ ܘܰܡܛܰܪܰܦܬܳܐ ܕܽܐܘ̈ܟܳܡܶܐ ܕܣܶܠܩܰܬ ܠܗ ܥܢܳܢܳܐ ܡܶܢ ܝܰܡܳܐ ܕܡܰܥܡܽܘܕܺܝܬܳܐ. ܘܡܳܢܳܐ ܠܳܐܐܷ ܐܢܳܐ ܠܡܶܚܫܰܒ ܐܳܬܘܴ̈ܬܳܐ ܕܰܥܒܰܕܘ ܥܢܴ̈ܢܶܐ ܩܰܕܺܝ̈ܫܳܬܳܐ ܒܰܐܪ̈ܥܳܬܳܐ ܕܥܰܡܡ̈ܐ. ܘܐܝܟ ܡܶܛܪܳܐ ܕܰܠܟܽܠ ܦܶܢ̈ܝܳܢ ܡܰܫܩܶܐ. ܡܰܪܟܰܒܬܶܗ ܕܰܙܩܺܝܦܳܐ ܡܰܠܝܳܐ ܟܽܠܗ̇ ܐܰܪܥܳܐ. ܘܡܶܢ ܒܳܬܰܪ ܕܶܐܡܰܪ ܢܒܺܝܐ ܕܣܳܡ ܥܠ ܥܢܴ̈ܢܶܐ ܗܳܠܝܢ ܡܰܪܟܰܒܬܶܗ ܘܰܡܗܰܠܶܟ ܥܰܠ ܟܶܢ̈ܦܶܐ ܕܪܽܘܚܳܐ. ܬܘܒ ܡܰܝܬܶܐ ܘܳܐܡܰܪ:
ܥܒܰܕ ܡܰܠܐܱܟܰܘ̈ܗܝ ܪܽܘܚ ܘܰܡܫܰܡܫܳܢܰܘ̈ܗܝ ܢܽܘܪ ܝܳܩܕܳܐ. ܕܰܐܝܟ ܗܳܟܰܢܳܐ ܐܝ̣ܬܰܘܗܝ ܩܽܘܝܳܡܳܐ ܕܽܐܘ̈ܣܺܝܰܐܣ ܥܶܠܳܝܴ̈ܬܳܐ. ܡܶܢ ܢܽܘܪܳܐ ܘܡܶܢ ܪܽܘܚܳܐ ܐܝ̣ܬܰܘܗܝ ܩܽܘܝܳܡܳܐ ܕܬܶܓܡ̈ܐ ܫܡܰܝܳܢܷ̈ܐ. ܘܟܕ ܒܟܽܘ̈ܢܳܝܶܐ ܗܳܠܝܢ ܡܰܘܕܰܥ ܩܰܠܺܝ̈ܠܘܳܬܳܐ ܕܰܟܝܳܢܰܝ̈ܗܶܝܢ. ܗܳܝ ܕܰܠܥܶܠ ܩܢܶܝܢ ܙܰܘܥܳܐ ܐܰܡܺܝܢܳܐ ܕܡܶܬܥܰܠܝܳܢܽܘܬܳܐ ܡܶܛܠ ܕܰܐܟܙܢܳܐ ܕܢܽܘܪܳܐ ܕܰܠܥܶܠ ܬܶܗܘܶܐ ܦܳܪܚܳܐ. ܪܽܘܚܳܐ ܕܝܢ ܟܕ ܩܳܠܗ̇ ܫܳܡܥܺܝܢܰܢ ܘܠܐ ܢܶܕܰܥ ܡܶܢ ܐܰܝܟܳܐ ܐܳܬܝܳܐ ܘܠܰܐܝܟܳܐ ܐܳܙܳܠܐ. ܗܳܟܰܢܳܐ ܐܶܢܘܢ ܓܶܢ̈ܣܶܐ ܥܶܠܳܝܷ̈ܐ ܕܡܰܠܐܱܟ̈ܐ. ܩܢܶܝܢ ܟܝܴ̈ܢܶܐ ܩܰܠܺܝ̈ܠܶܐ ܘܡܶܬܬܙܺܝ̈ܥܰܝ ܠܥܶܠ. ܘܢܽܘܗܪܳܐ ܩܢܶܝܢ ܐܰܚܰܝ̈ ܚܰܝ̈ܠܰܘܳܬܳܐ ܩܰܕܺܝ̈ܫܶܐ. ܫܳܡܥܺܝܢܰܢ ܓܝܪ ܠܡܳܪܢ ܕܶܐܡܰܪ: ܕܝܽܘܚܰܢܳܢ ܐܰܥܡܶܕ ܒܡܰܝܴ̈ܐ ܐܰܢܬܽܘܢ ܕܶܝܢ ܬܶܥܡܕܽܘܢ ܒܪܽܘܚܳܐ ܕܩܽܘܕܫܳܐ (ܦܪܟܣܝܣ ܐ: ܗ). ܘܬܘܒ ܝܽܘܚܰܢܳܢ ܐܡ̇ܪ ܗܘܳܐ ܥܠ ܡܳܪܰܢ܆ ܕܗܽܘ ܠܰܡ ܢܰܥܡܶܕܟܽܘܢ ܒܪܽܘܚܳܐ ܕܩܽܘܕܫܳܐ ܘܰܒܢܽܘܪܳܐ (ܡܬܝ ܓ: ܝܐ ܡܪܩܘܣ ܐ: ܚ ܠܘܩܐ ܓ: ܝܘ ܝܘܚܢܢ ܐ: ܠܓ). ܘܡܳܪܢ ܬܘܒ ܐܡ̣ܪ: ܕܢܽܘܪܳܐ ܐܶܬܝ̣ܬ ܕܰܐܪܡܶܐ ܒܰܐܪܥܳܐ (ܠܘܩܐ ܝܒ: ܡܛ). ܘܬܘܒ ܟܕ ܟܢܺܝܫܺܝܢ ܫܠܺܝ̈ܚܶܐ ܒܥܶܠܺܝܬܳܐ. ܗܘܳܐ ܡܶܢ ܫܶܠܝܳܐ ܡܶܢ ܫܡܰܝܳܐ ܩܳܠܐ ܐܝܟ ܕܪܽܘܚܳܐ ܥܰܙܺܝܙܬܳܐ. ܘܟܕ ܐܶܬܡܠܺܝ ܡܶܢܶܗ ܒܰܝܬܳܐ ܗܰܘ ܕܒܶܗ ܟܢܺܝܫܺܝܢ ܗܘܰܘ. ܐܶܬܚܙܺܝܘ ܠܗܽܘܢ ܒܰܕܡܽܘܬ ܠܶܫܴ̈ܢܶܐ ܕܢܽܘܪܳܐ ܘܝ̣ܬܶܒ ܥܠ ܚܰܕ ܚܰܕ ܡܶܢܗܽܘܢ. ܐܶܢ ܒܰܥܡܳܕܳܐ ܡܳܕܶܝܢ ܢܽܘܪܳܐ ܘܪܽܘܚܳܐ ܗܘܰܝܢܰܢ. ܐܝܟ ܣܳܗܕ̈ܘܳܬܳܐ ܗܳܠܝܢ. ܠܗܳܠܶܝܢ ܕܰܥܒܰܕ ܡܫܰܡܫܴ̈ܢܶܐ ܕܰܣܒܰܪܬܶܗ ܥܒܰܕ ܐܶܢܘܢ ܢܽܘܪܳܐ ܘܪܽܘܚܳܐ. ܘܰܐܝܬܺܝ ܡܙܰܡܪܳܢܳܐ ܘܶܐܡܰܪ:
ܐܰܬܩܶܢ ܐܰܪܥܳܐ ܥܰܠ ܡܰܬܩ̈ܢܶܝܗ̇. ܗܢܘ ܕܰܒܗܰܘ ܟܝܳܢܳܐ ܡܠܶܐ ܛܽܘ̈ܒܶܐ ܕܠܳܐ ܙܳܐܱܥ ܘܠܐ ܡܶܬܚܰܒܰܠ ܬܰܩܢܶܗ ܠܒܰܪܢܳܫܳܐ ܘܰܐܩܺܝܡܶܗ ܘܒܰܩܢܽܘܡܶܗ ܚܰܠܛܰܢ ܘܒܶܗ ܡܢܳܢ. ܘܡܶܢܶܗ ܥܰܒܕܰܢ. ܘܒܰܟܝܳܢܶܗ ܛܰܗܡܰܢ ܘܚܰܝܕܰܢ. ܐܡ̣ܪ ܓܝܪ ܕܥܠ ܡܰܬܩܢܶܗ ܐܰܬܩܢܰܢ ܗܢܘ ܕܰܒܡܰܘܬܒܳܐ ܠܐ ܡܶܬܬܙܺܝܥܳܢܳܐ ܕܫܽܘܒܚܶܗ ܫܰܘܬܦܰܢ.
ܕܠܐ ܠܡ ܬܙܽܘܥ ܠܥܳܠܰܡ ܥܳܠܡܺܝܢ. ܠܰܝܬ ܡܶܟܝ̣ܠ ܐܰܬܪܳܐ ܕܢܶܬܢܰܣܶܐ ܒܙܰܘ̈ܥܶܐ ܕܰܚܛܺܝܬܳܐ. ܘܠܰܝܬ ܠܡܶܦܰܩ ܡܶܢ ܒܶܝܬ ܩܕܽܘܫ ܩܽܘ̈ܕܫܶܐ. ܘܠܰܝܬ ܠܡܶܛܥܳܐ ܒܳܬܰܪ ܚܶܘܝܳܐ. ܘܠܰܝܬ ܠܡܶܐܟܰܠ ܡܶܢ ܐܝ̣ܠܳܢܳܐ ܕܺܝܕܰܥܬܳܐ ܕܛܳܒܬܳܐ ܘܰܕܒܺܝܫܬܳܐ. ܘܠܰܝܬ ܠܡܶܦܰܩ ܡܶܢ ܥܕܶܝܢ ܕܒܽܘ̈ܣܳܡܶܐ. ܘܠܐ ܠܡܶܠܒܰܫ ܟܽܘ̈ܬܝ̣ܢܝܳܬܳܐ ܡܟܰܐܪ̈ܳܬܳܐ ܕܶܐܬܥܒܶܕ ܡܶܢ ܡܶܫ̈ܟܶܐ ܡܺܝ̈ܬܶܐ. ܘܡܶܢ ܒܳܬܰܪ ܗܳܠܝܢ ܐܡ̣ܪ:
ܬܗܽܘܡܳܐ ܐܰܝܟ ܡܰܪܛܽܘܛܳܐ ܟܰܣܺܝܬܳܝܗܝ. ܘܥܰܠ ܛܽܘܪ̈ܶܐ ܩܳܡܘ ܡܰܝܴ̈ܐ. ܡܶܢ ܟܳܐܬܳܟ ܥܳܪܩܺܝܢ ܘܡܶܢ ܩܳܠܳܐ ܕܪ̈ܰܥܡܰܝܟ ܡܶܬܪܰܗܒܺܝܢ. ܣܠܶܩܘ ܛܽܘܪ̈ܶܐ ܘܰܢܚܶܬܘ ܦܰܩ̈ܥܳܬܳܐ ܒܰܐܬܪܳܐ ܕܬܰܩܶܢܬ ܠܗܽܘܢ. ܬܚܽܘܡܳܐ ܣܳܡܬ ܠܗܽܘܢ ܕܠܳܐ ܢܶܥܒܪܽܘܢ ܘܰܢܟܰܣܽܘܢܳܗ̇ ܠܰܐܪܥܳܐ. ܕܳܡܶܝܢ ܩܴ̈ܠܐ ܗܳܠܝܢ ܒܫܶܡܥܳܐ ܒܰܪܝܳܐ ܕܥܰܠ ܡܰܝܴ̈ܐ ܗܳܠܝܢ ܕܺܐܝܬ ܗܘܳܐ ܥܠ ܐܰܪܥܳܐ ܡܶܢ ܩܕܳܡ ܕܰܠܒܶܝܬ ܘܰܥܕܗܽܘܢ ܢܶܬܟܰܢܫܽܘܢ ܐܰܡܺܝܪܺܝܢ. ܗܳܝܕܶܝܢ ܥܰܠ ܛܽܘܪ̈ܶܐ ܩܳܝܡܺܝܢ ܗܘܰܘ ܘܐܝܟ ܕܰܒܡܰܪܛܽܘܛܳܐ ܡܟܰܣܝܳܐ ܗܘܳܬ ܝܰܒܺܝܫܬܳܐ ܒܡܰܝܴ̈ܐ ܕܰܬܗܽܘܡܳܐ. ܐܠܐ ܟܕ ܗܘܳܐ ܩܳܠܐ ܡܳܪܳܢܳܝܳܐ ܥܠܰܝܗܽܘܢ ܕܢܶܬܟܰܢܫܘܢ ܩܰܠܝ̣ܠܐܝ̣ܬ. ܪܗܶܛܘ ܠܒܶܝܬ ܘܰܥܕܗܽܘܢ܆ ܘܰܕܠܐ ܬܽܘܗܳܝܳܐ ܐܝܟ ܚܰܘܪܳܐ ܩܰܠܝ̣ܠܐ ܕܗܰܘܢܳܐ. ܣܳܡ ܐܶܢܘܢ ܚܰܝܠܳܐ ܕܰܐܠܗܳܐ. ܒܰܐܬܪܳܐ ܕܰܦܪܰܫ ܘܬܰܩܶܢ ܠܗܘܢ. ܒܗܳܢܐ ܛܽܘܦܣܳܐ ܡܟܰܣܰܝ ܗܘܳܐ ܟܝܳܢܳܐ ܕܰܒܢܰܝ̈ܢܳܫܳܐ ܒܡܰܝܴ̈ܐ ܕܰܚܛܺܝܬܳܐ. ܐܝܟ ܕܰܡܟܰܣܝܳܐ ܗܘܳܬ ܐܰܪܥܳܐ ܒܡܰܝܴ̈ܐ. ܘܥܠ ܪ̈ܺܝܫܰܝ ܐܰܒܳܗܴ̈ܬܳܐ ܡܬܺܝ̈ܠܰܝ ܒܛܽܘܪ̈ܶܐ ܩܳܝܡܺܝܢ ܗܘܰܘ ܡܰܝܴ̈ܐ ܕܥܰܘܠܳܐ. ܘܠܰܝܬ ܗܘܳܐ ܕܡܶܢ ܨܳܡܰܪܬܳܐ ܕܡܰܝܴ̈ܐ ܡܛܰܒܥܳܢ̈ܐ ܢܶܬܕܰܠܶܐ. ܟܕ ܕܶܝܢ ܣܰܓܺܝ ܥܶܫܢܰܬ ܚܛܺܝܬܳܐ ܘܚܰܦܝܰܬ ܠܟܠ ܐܰܦܰܝ̈ ܐܰܪܥܳܐ ܒܡܰܝܴ̈ܐ ܡܟܰܪ̈ܗܶܐ ܘܰܒܡܶܛܪ̈ܶܐ ܕܒܺܝ̈ܫܳܬܳܐ. ܗܳܝܕܝܢ ܢܦܰܩ ܥܰܡܰܢܽܘܐܝܠ ܕܢܶܒܪܶܐ ܒܪܺܝܬܳܐ ܚܕܰܬܳܐ. ܘܐܝܟ ܕܰܦܩܰܕ ܠܡܰܝܴ̈ܐ ܒܪܺܝܫܺܝܬ ܘܶܐܡܰܪ: ܕܢܶܬܟܰܢܫܽܘܢ ܠܰܐܬܪܳܐ ܚܰܕ ܐܳܦ ܬܶܬܚܙܶܐ ܝܰܒܺܝܫܬܳܐ (ܒܪܝܬܐ ܐ: ܛ). ܗܘܳܐ ܩܳܠܶܗ ܥܠ ܚܰܝ̈ܠܰܘܳܬܳܐ ܗܳܢܘܢ ܕܰܠܩܽܘܒܠܳܐ ܕܢܶܥܪܩܽܘܢ ܡܶܢ ܐܢܳܫܽܘܬܳܐ ܟܕ ܐܶܬܓܠܝ̣. ܡܶܛܠܗܳܕܐ ܓܝܪ ܐܡ̣ܪ ܪܽܘܚܳܐ܆ ܕܡܶܢ ܩܳܠܐ ܕܪ̈ܰܥܡܰܝܟ ܡܶܬܪܰܗܒܺܝܢ. ܠܘ ܟܕ ܠܘܳܬ ܡܰܝܴ̈ܐ ܩܰܕܡܳܝ̈ܐ ܗܳܕܐ ܥܒܰܕ. ܘܠܘ ܩܳܠܐ ܕܪ̈ܰܥܡܶܐ ܫܡܰܥܘ ܡܰܝܴ̈ܐ ܘܫܰܢܺܝܘ ܘܶܐܬܪܗܶܒܘ ܡܶܢ ܐܰܦܰܝ̈ ܐܰܪܥܳܐ. ܐܠܐ ܒܰܠܚܽܘܕ ܦܽܘܩܕܳܢܳܐ ܕܰܐܠܗܳܐ ܕܠܐ ܪܗܳܒܬܳܐ. ܟܰܢܶܫ ܐܶܢܘܢ ܠܰܐܬܪܳܐ ܚܰܕ. ܗܳܪܟܳܐ ܕܶܝܢ ܒܗܳܕܐ ܒܪܺܝܬܳܐ ܚܕܰܬܳܐ ܥܒܰܕ ܠܗ ܪ̈ܰܥܡܶܐ ܦܰܓܪ̈ܳܢܶܐ. ܘܰܒܗܘܢ ܐܰܪܡܺܝ ܪܗܺܝܒܽܘܬܳܐ ܒܟܶܢ̈ܫܶܐ ܕܚܰܝ̈ܠܰܘܳܬܳܐ ܕܕܰܠܩܽܘܒܠܳܐ. ܘܝܰܬܺܝܪܳܐܝ̣ܬ ܠܝܽܘܚܰܢܳܢ ܘܝܰܥܩܽܘܒ ܫܰܡܝ̣ ܒܢܱ̈ܝ ܪܓܶܫ ܕܡܶܬܦܰܫܰܩ ܒܰܪ ܪܰܥܡܳܐ. ܘܰܥܒܰܕ ܐܶܢܘܢ ܪ̈ܰܥܡܶܐ ܐܝܠܝܢ ܕܝܳܗܒܺܝܢ ܩܳܠܐ ܒܰܥܢܳܢܳܐ ܕܰܣܒܰܪܬܳܐ. ܘܡܰܪܗܒܺܝܢ ܗܘܰܘ ܠܫܺܐܕ̈ܐ ܕܒܰܕܡܽܘܬ ܡܰܝܴ̈ܐ ܡܟܰܣܶܝܢ ܗܘܰܘ ܐܰܦܰܝ̈ ܐܰܪܥܳܐ. ܘܡܶܢ ܗܳܠܝܢ ܩܴ̈ܠܐ ܪ̈ܰܥܡܳܢܳܝܶܐ. ܡܶܬܬܙܺܝܥܺܝܢ ܗܘܰܘ ܡܳܪ̈ܽܘܕܶܐ. ܘܣܳܠܩܺܝܢ ܛܽܘܪ̈ܶܐ ܘܢܳܚܬܺܝܢ ܦܰܩ̈ܥܳܬܳܐ. ܘܥܳܪܩܺܝܢ ܗܘܰܘ ܘܰܡܫܰܢܶܝܢ ܡܶܢ ܢܰܦ̈ܫܳܬܳܐ. ܘܰܠܒܰܪ ܡܶܢ ܬܚܽܘܡܳܐ ܕܥܳܠܡܳܐ ܡܶܬܛܰܪܕܺܝܢ ܗܘܰܘ. ܒܗܳܝ ܕܝܢ ܕܶܐܡܰܪ:
ܕܰܬܚܽܘܡܳܐ ܣܳܡܬ ܠܗܽܘܢ ܕܠܳܐ ܢܶܥܒܪܽܘܢ ܘܰܢܟܰܣܽܘܢܳܗ̇ ܠܰܐܪܥܳܐ. ܕܳܡܝܳܐ ܕܥܠ ܬܰܫܢܺܝܩܳܐ ܕܰܠܥܳܠܰܡ ܕܰܢܛܺܝܪ ܠܳܐܟܶܠܩܰܪܨܳܐ ܘܰܠܟܰܠܐܟܰܘ̈ܗܝ ܐܰܠܶܦ. ܘܬܽܘܒ ܡܰܝܴ̈ܐ ܐܚܪ̈ܳܢܶܐ ܫܰܕܰܪ ܠܳܗ̇ ܠܐܢܳܫܽܘܬܳܐ. ܐܰܝܟ ܕܡܰܘܕܰܥ ܢܒܺܝܳܐ. ܠܰܘ ܡܰܠܺܝ̈ܚܶܐ ܐܰܝܟ ܕܝܰܡܳܐ. ܘܠܐ ܡܰܪܺܝܪ̈ܶܐ ܐܝܟ ܕܰܬܗܽܘܡܳܐ. ܐܶܠܐ ܡܰܝܴ̈ܐ ܒܰܣܺܝ̈ܡܶܐ ܕܪܳܕܶܝܢ ܡܶܢ ܡܰܒܽܘܥܳܐ ܢܺܝܚܳܐܝ̣ܬ ܕܡܰܫܩܶܝܢ ܠܢܰܚ̈ܠܶܐ ܕܰܐܪܥܳܐ ܒܰܝܢܳܬ ܛܽܘܪ̈ܶܐ. ܠܰܘ ܟܕ ܪܳܗܛܺܝܢ ܓܳܪܦܺܝܢ. ܐܠܐ ܟܕ ܡܗܰܠܟܺܝܢ.
ܫܰܕܰܪ ܠܰܡ ܡܰܒܽܘ̈ܥܶܐ ܒܢܰܚ̈ܠܐܷ ܘܒܰܝܢܳܬ ܛܽܘܪ̈ܶܐ ܡܗܰܠܟܺܝܢ. ܘܡܰܫܩܶܝܢ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ ܘܣܳܒܥܺܝܢ ܥܪ̈ܳܕܶܐ ܕܰܨܗܶܝܢ. ܘܦܳܪܰܚܬܳܐ ܕܰܫܡܰܝܳܐ ܥܠܰܝܗܽܘܢ ܫܳܟܢܳܐ. ܫܰܦܺܝܪ ܓܶܝܪ ܒܡܰܒܽܘ̈ܥܶܐ ܡܟܰܢܶܐ ܠܗܽܘܢ ܠܰܡܣܰܒܪ̈ܳܢܶܐ. ܕܫܰܕܰܪ ܡܰܠܟܳܐ ܕܫܰܝܢܳܐ ܠܰܐܪܥܳܐ ܕܢܰܫܩܽܘܢܳܗ̇ ܝܽܘܠܦܳܢܳܐ ܕܰܡܩܰܪܶܒ ܠܳܗ̇ ܠܘܳܬ ܚܰܝܷ̈ܐ ܘܟܰܕ ܒܢܰܚ̈ܠܶܐ ܡܰܟܺܝ̈ܟܶܐ ܗܳܢܰܘ ܠܥܰܡܡ̈ܐ ܡܰܫܩܶܝܢ ܗܘܰܘ܆ ܐܠܐ ܡܰܠܟ̈ܐ ܘܺܐܝܓܡܽܘ̈ܢܶܐ ܡܶܟܳܐ ܘܡܶܟܳܐ ܠܽܘܩܒܰܠܗܘܢ ܙܩܺܝܦܺܝܢ ܗܘܰܘ ܐܝܟ ܛܽܘܪ̈ܶܐ. ܗܳܕܐ ܕܶܝܢ ܐܝ̣ܬܶܝܗ̇ ܗܳܝ ܕܶܐܡܰܪ ܠܗܘܢ ܥܰܡܰܢܽܘܐܝܠ ܟܕ ܫܰܕܰܪ ܐܶܢܽܘܢ ܠܡܰܒܽܘ̈ܥܶܐ ܗܳܠܶܝܢ܆ ܕܗܳܐ ܐܶܢܳܐ ܡܫܰܕܰܪ ܐܢܳܐ ܠܟܽܘܢ ܐܰܝܟ ܐܶܡܪ̈ܶܐ ܒܰܝ̈ܢܰܝ ܕܺܐܒ̈ܐ (ܡܬܝ ܝ: ܝܘ ܠܘܩܐ ܝ: ܓ). ܗܳܠܶܝܢ ܓܶܝܪ ܕܶܐܡܰܪ ܢܒܺܝܐ܆ ܛܽܘܪ̈ܶܐ. ܡܳܪܰܢ ܕܺܐܒ̈ܐ ܩܪܳܐ ܐܶܢܘܢ. ܕܰܥܠܰܝܗܘܢ ܐܡ̣ܪ ܢܒܺܝܐ ܐܚܪܺܢܳܐ܆ ܕܟܽܠܗܘܢ ܛܽܘܪ̈ܶܐ ܘܪ̈ܳܡܳܬܳܐ ܢܶܬܡܰܟܟܽܘܢ (ܐܫܥܝܐ ܡ: ܕ) ܡܶܛܠ ܛܽܘܪ̈ܶܐ ܗܳܠܝܢ ܐܡ̣ܪ. ܫܰܦܺܝܪ ܡܳܕܝܢ ܠܘܳܬ ܢܰܚ̈ܠܶܐ ܐܶܫܬܰܕܰܪܘ ܫܠܺܝ̈ܚܶܐ. ܐܝܟ ܡܰܒܽܘ̈ܥܶܐ. ܕܟܕ ܒܪܶܟܢܳܐ ܡܰܟܺܝܟܳܐ ܡܩܰܒܠܺܝܢ ܡܰܝܴ̈ܐ ܐܰܠܳܗܝ̈ܐ. ܕܠܝ̣ܠܳܐܝ̣ܬ ܝܳܗܒܺܝܢ ܦܺܐܪ̈ܐ. ܘܠܘ ܒܰܠܚܽܘܕ ܠܘܳܬ ܢܰܚ̈ܠܶܐ ܫܰܕܰܪ ܡܰܒܽܘ̈ܥܶܐ. ܐܠܐ ܐܦ ܕܰܠܚܰܝܽܘܬܳܐ ܕܕܰܒܪܳܐ ܢܰܫܩܽܘܢ. ܚܰܝ̈ܘܳܬܳܐ ܗܘܰܘ ܒܥܺܝܪ̈ܶܐ ܒܰܫܪܳܪܳܐ ܟܽܠܗܘܢ ܥܰܡ̈ܡܶܐ. ܘܡܶܢ ܗܳܠܝܢ ܡܰܒܽܘ̈ܥܶܐ ܐܶܫܬܺܝܘ ܘܶܐܫܬܰܝܰܢܘ. ܘܰܗܘܰܘ ܒܢܱ̈ܝ ܡܕܺܝܢܬܳܐ ܕܩܰܕܺܝ̈ܫܶܐ. ܘܰܣܒܰܥܘ ܡܰܝܴ̈ܐ ܚܰܝܷ̈ܐ ܡܶܢ ܡܰܒܽܘ̈ܥܶܐ ܗܳܠܝܢ. ܐܦ ܥܪ̈ܳܕܶܐ ܒܢܰܝ̈ ܗܳܓܳܪ. ܕܰܨܗܶܝܢ ܗܘܰܘ ܠܰܡܩܰܒܳܠܽܘ ܝܽܘܠܦܳܢܳܐ ܕܚܰܝ̈ܐ. ܘܫܶܟܢܰܬ ܥܠܰܝܗܽܘܢ ܦܳܪܰܚܬܳܐ ܕܰܫܡܰܝܳܐ. ܡܳܐ ܕܡܶܬܦܰܬܚܺܝܢ ܗܘܰܘ ܡܰܒܽܘ̈ܥܶܐ ܠܡܰܥܡܳܕܽܘ ܫܠܺܝ̈ܚܶܐ ܠܥܰܡ̈ܡܶܐ ܘܰܡܫܰܡܠܶܝܢ ܐܪ̈ܳܙܶܐ ܕܦܽܘܪܩܳܢܳܐ ܒܥܺܕܬܳܐ ܕܰܐܠܗܳܐ. ܡܚܰܘܶܐ ܢܒܺܝܳܐ ܕܳܐܦ ܡܰܠܐܱܟ̈ܐ ܕܺܐܝܬܰܝܗܽܘܢ ܦܳܪܰܚܬܳܐ ܕܰܫܡܰܝܳܐ܆ ܢܳܚܬܺܝܢ ܘܫܳܟܢܺܝܢ ܒܶܝܬ ܩܽܘܕܫܳܐ. ܠܡܶܚܙܳܐ ܕܶܒܚܬܳܐ ܕܡܳܪܗܘܢ ܥܠ ܦܳܬܽܘܪܳܐ ܕܚܰܝ̈ܐ. ܐܝܟ ܕܳܐܦ ܦܶܛܪܽܘܣ ܗܰܘ ܩܰܕܡܳܝܳܐ ܕܡܰܒܽܘ̈ܥܶܐ ܗܳܠܝܢ ܡܰܠܶܦ ܗܘܳܐ. ܕܰܒܗܳܠܝܢ ܡܶܬܪܰܓܪܓܺܝܢ ܐܳܦ ܡܰܠܰܐܟ̈ܐ ܕܰܢܕܰܝܩܽܘܢ (ܦܛܪܘܣ ܐ: ܝܒ). ܘܰܐܝܟ ܕܰܐܟܪܶܙ ܦܰܘܠܽܘܣ ܗܰܘ ܡܰܒܽܘܥܳܐ ܕܰܫܠܺܝܚܽܘܬܳܐ. ܕܰܒܥܺܕܬܳܐ ܬܶܬܝ̣ܕܰܥ ܚܶܟܡܬܶܗ ܕܰܐܠܗܳܐ ܡܰܠܝܰܬ ܦܽܘܪ̈ܫܳܢܶܐ܇ ܠܰܐܪ̈ܟܰܐܣ ܘܰܠܫܰܠܺܝ̈ܛܳܢܶܐ ܕܒܰܫܡܰܝܳܐ (ܐܦܣ̈ܝܐ ܓ: ܝ) ܬܘܒ ܕܶܝܢ ܡܰܝܬܶܐ ܢܒܺܝܐ ܘܳܐܡܰܪ:
ܡܶܢ ܒܰܝܢܳܬ ܛܽܘܪ̈ܶܐ ܝܳܗܒܺܝܢ ܩܳܠܳܐ. ܘܡܰܫܩܶܐ ܛܽܘܪ̈ܶܐ ܡܶܢ ܡܶܕܝܳܪ̈ܰܘܗܝ. ܗܳܪܟܳܐ ܛܽܘܪ̈ܶܐ ܘܛܽܘܪ̈ܶܐ ܐܶܡܰܪ ܢܒܺܝܐ. ܗܳܠܝܢ ܕܝܳܗܒܺܝܢ ܗܘܰܘ ܫܠܺܝ̈ܚܶܐ ܩܳܠܳܐ ܡܶܢ ܒܰܝܢܳܬܗܘܢ. ܠܘ ܗܶܢܘܢ ܐܶܢܘܢ. ܗܳܢܘܢ ܕܫܳܬܶܝܢ ܡܶܢ ܡܶܕܝܳܪ̈ܶܐ ܥܶܠܳܝ̈ܐ ܕܰܐܠܗܽܘܬܳܐ. ܝܳܗܶܒ ܗܘܳܐ ܩܳܠܳܐ ܦܰܘܠܽܘܣ. ܗܰܘ ܡܰܒܽܘܥܳܐ ܥܰܬܝ̣ܪ ܪܶܕܝܳܐ ܘܰܫܦܝ̣ܥ ܡܰܪܕܺܝܬܳܐ ܡܶܢ ܒܰܝܢܳܬ ܛܽܘܪ̈ܐ. ܟܕ ܩܳܐܷܡ ܗܘܳܐ ܒܰܝܢܳܬ ܐܰܓܪܺܝܦܳܘܣ ܘܦܶܗܣܛܳܘܣ ܘܒܰܪܢܺܝܩܺܝ ܘܡܰܥܟܺܝ ܘܡܰܣܗܶܕ ܗܘܳܐ ܥܰܠ ܡܶܠܬܶܗ ܕܰܐܠܗܳܐ ܟܕ ܠܐ ܕܳܚܶܠ ܒܪܽܗܘܡܝ̣ ܘܰܒܟܽܠܗܝܢ ܡܕܺܝ̈ܢܳܬܳܐ ܛܽܘܪ̈ܐ ܡܰܫܩܶܐ ܗܘܳܐ ܡܶܢ ܡܶܕܝܳܪ̈ܰܘܗܝ. ܗܳܠܝܢ ܕܡܶܢ ܐܝ̣ܬܝܳܐ ܢܳܚܬܺܝܢ ܡܰܝܴ̈ܐ ܚܰܝܷ̈ܐ ܕܫܳܩܽܘܬܳܐ ܕܓܶܠܝܴ̈ܢܶܐ ܐܠܗܝ̈ܐ. ܘܠܐ ܣܢܺܝܩܺܝܢ ܥܰܠ ܡܰܝܴ̈ܐ ܕܡܶܢ ܡܰܒܽܘ̈ܥܶܐ ܕܰܠܘܳܬܰܢ. ܘܟܕ ܡܶܢ ܦܺܐܪ̈ܶܐ ܕܰܥܒܳܕܰܘ̈ܗܝ ܕܡܳܪܝܳܐ ܣܳܒܥܺܝܢ ܥܶܠܳܝ̈ܐ ܘܬܰܚܬܳܝ̈ܐ ܐܝܟ ܕܐܡ̣ܪ ܢܒܺܝܐ܆
ܕܡܶܢ ܦܺܐܪ̈ܰܝ ܥܒܳܕܰܝ̈ܟ ܬܶܣܒܰܥ ܐܰܪܥܳܐ. ܡܰܘܥܶܐ ܥܡܺܝܪܳܐ ܠܰܒܥܺܝܪܳܐ ܘܥܶܣܒܳܐ ܠܦܽܘܠܚܳܢܶܗ ܕܒܰܪܢܳܫܳܐ. ܠܡܰܦܳܩܽܘ ܠܰܚܡܳܐ ܡܶܢ ܐܰܪܥܳܐ. ܚܰܡܪܳܐ ܡܚܰܕܶܐ ܠܶܒܶܗ ܕܒܰܪܢܳܫܳܐ ܘܡܰܦܨܰܚ ܐܰܦܰܘ̈ܗܝ ܒܡܶܫܚܳܐ. ܠܰܚܡܳܐ ܣܳܡܶܟ ܠܶܒܶܗ ܕܒܰܪܢܳܫܳܐ. ܒܟܽܠܡܶܕܶܡ ܡܨܰܒܶܬ ܠܳܗ̇ ܚܰܬܢܳܐ ܡܫܺܝܚܳܐ ܠܥܺܕܬܶܗ. ܟܕ ܡ̣ܢ ܦܺܐܪ̈ܐ ܕܰܥܒܳܕܰܘ̈ܗܝ ܡܣܰܒܰܥ ܠܗ̇. ܗܽܘ ܠܰܡ ܒܰܩܢܽܘܡܶܗ ܥܒܰܕ ܕܽܘܟܳܝܳܐ ܕܰܚܛܳܗܰܝ̈ܢ ܘܗܽܘ ܗܘܳܐ ܚܠܳܦܰܝܢ ܠܰܘܛܬܳܐ ܐܝܟ ܕܐܡ̣ܪ ܦܰܘܠܽܘܣ ܪܰܒܳܐ. ܐܰܝܟܰܢܳܐ ܕܰܚܢܰܢ ܢܶܗܘܶܐ ܒܶܗ ܙܰܕܺܝܩܽܘܬܳܐ ܕܰܐܠܗܳܐ (ܒ ܩܘܪ̈ܢܬܝܐ ܗ: ܟܐ). ܗܳܠܶܝܢ ܐܶܢܘܢ ܦܺܐܪ̈ܰܝ ܥܒܳܕܰܘ̈ܗܝ ܕܰܐܠܗܳܐ. ܥܡܺܝܪܳܐ ܕܝܢ ܕܰܐܘܥܺܝ ܠܰܒܥܺܝܪܳܐ. ܥܠ ܫܽܘܪܳܝܳܐ ܕܬܽܘܠܡܳܕܳܐ ܡܰܘܕܰܥ. ܟܠ ܟܡܳܐ ܥܡܺܝܪܳܐ ܚܫܺܝܒܳܐ ܠܳܗ̇ ܡܶܠܬܳܐ ܕܰܐܠܗܐ. ܘܰܠܡܰܦܳܩܽܘ ܠܰܚܡܳܐ ܡܶܢ ܐܰܪܥܳܐ ܡܳܐ ܕܰܢܦܰܩ ܠܰܚܡܳܐ ܫܡܰܝܳܢܳܐ ܡܶܢ ܐܰܪܥܳܐ ܗܢܘ ܡܶܢ ܕܰܢܦܰܩ ܡܶܢ ܒܬܽܘܠܬܳܐ ܡܶܠܬܳܐ ܐܠܗܐ ܒܝܰܕ ܒܶܣܪܳܐ. ܘܰܗܘܳܐ ܠܰܚܡܳܐ ܡܬܰܪܣܝܳܢܳܐ ܘܶܐܬܥܰܠܝ̣ ܘܶܐܬܬܣܺܝܡ ܥܠ ܦܳܬܽܘܪܳܐ ܐܪܳܙܳܢܳܝܳܐ. ܡܰܠܘܶܬ ܠܗ ܐܳܦ ܚܰܡܪܳܐ ܡܚܰܕܝܳܢܳܐ܆ ܐܝܟ ܕܐܡ̣ܪ ܪܽܘܚܳܐ ܕܚܰܡܪܳܐ ܡܚܰܕܶܐ ܠܶܒܶܗ ܕܒܰܪܢܳܫܳܐ. ܘܡܰܦܨܰܚ ܐܰܦܰܘ̈ܗܝ ܒܡܶܫܚܳܐ. ܕܺܐܝܬܰܘܗܝ ܡܫܺܝܚܽܘܬܳܐ ܘܪܽܘܚܳܐ ܩܰܕܺܝܫܳܐ. ܘܡܶܣܬܡܶܟ ܠܶܒܶܗ ܕܒܰܪܢܳܫܳܐ ܒܠܰܚܡܳܐ. ܗܰܘ ܕܰܒܝܰܕ ܪܽܘܚܳܐ ܡܶܫܬܰܚܠܰܦ ܘܗܳܘܶܐ ܦܰܓܪܳܐ ܚܰܝܳܐ ܕܰܐܠܗܳܐ. ܘܡܶܢ ܒܳܬܰܪ ܕܶܝܢ ܕܟܰܢܫܳܗ̇ ܠܥܺܕܬܳܐ ܒܩܴ̈ܠܐ ܕܰܫܠܺܝ̈ܚܶܐ ܘܥܰܒܕܳܗ̇ ܓܰܢܬܳܐ ܕܦܰܪܕܰܝܣܳܐ. ܘܰܫܬܰܠ ܘܰܡܠܳܗ̇ ܢܶܨ̈ܒܳܬܳܐ ܕܺܐܝܠܳܢ̈ܐ ܡܠܺܝ̈ܠܶܐ ܘܣܳܡ ܒܰܡܨܰܥܬܳܐ ܦܳܬܽܘܪܳܐ ܕܚܰܝ̈ܐ ܕܰܛܥܺܝܢ ܠܗܰܘ ܠܰܚܡܳܐ ܫܡܰܝܳܢܳܐ. ܘܫܰܕܰܪ ܡܰܒܽܘ̈ܥܶܐ ܘܰܐܫܩܺܝ ܘܪܰܒܺܝ ܢܶܨ̈ܒܳܬܳܐ ܩܰܕܺܝ̈ܫܳܬܳܐ ܕܰܒܓܰܘ ܓܰܢܰܬ ܡܰܠܟܳܐ. ܘܰܡܙܰܡܰܪ ܟܕ ܐܡ̇ܪ:
ܢܶܣܒܥܽܘܢ ܐܝ̣ܠܳܢܰܘ̈ܗܝ ܕܡܳܪܝܳܐ ܘܰܐܪ̈ܙܶܐ ܕܠܶܒܢܳܢ ܕܰܢܨܰܒܬ. ܗܳܪܟܳܐ ܢܶܩܥܶܐ ܦܰܘܠܽܘܣ ܘܢܰܟܪܶܙ ܕܶܐܢܳܐ ܢܶܨܒܶܬ ܘܰܐܦܳܠܽܘ ܐܰܫܩܺܝ. ܐܶܠܐ ܐܰܠܳܗܳܐ ܪܰܒܺܝ (ܐ ܩܘܪ̈ܢܬܝܐ ܓ: ܘ). ܥܠ ܗܳܠܝܢ ܐܺܝ̈ܠܳܢܶܐ ܨܶܦܪ̈ܶܐ ܡܰܩ̈ܢܳܢ.
ܬܰܡܳܢ ܓܝܪ ܐܰܩܶܢܘ ܨܶܦܪ̈ܶܐ. ܘܚܽܘܪܒܳܐ ܩܶܢܳܗ̇ ܒܫܰܪ̈ܘܰܝܢܶܐ. ܒܺܐܝܠܳܢ̈ܐ ܕܥܺܕ̈ܬܳܐ ܐܰܝܠܝܢ ܕܺܐܝܬܰܝܗܽܘܢ ܫܠܺܝܚ̈ܐ ܩܰܕܺܝ̈ܫܶܐ. ܐܰܩܶܢ̈ܝ ܨܶܦܪ̈ܶܐ ܢܰܦ̈ܫܳܬܳܐ ܕܶܐܫܬܰܘ̈ܙܰܒܝ ܡܶܢ ܢܶܨ̈ܐ ܡܳܪ̈ܽܘܕܶܐ. ܘܰܩ̈ܢܰܝ ܒܰܫܠܺܝ̈ܚܶܐ ܩܴ̈ܠܐ ܡܰܦܪ̈ܝܳܢܶܐ. ܘܰܦܠܰܛܝ̈ ܡܶܢ ܛܰܝܪܳܐ ܡܚܰܒܠܳܢܺܝܬܳܐ. ܐܠܐ ܡܳܢܳܐ ܐܳܡܪܺܝܢܰܢ ܥܠ ܚܽܘܪܒ̣ܳܐ ܒܺܝܫܰܬ ܪܺܝܚܳܐ ܘܣܰܪܝܰܬ ܓܰܘܢܳܐ. ܕܠܰܘ ܒܺܐܝ̈ܠܳܢܶܐ ܐܰܩܢܰܬ ܐܝܟ ܨܶܦܪ̈ܶܐ. ܐܠܐ ܒܫܰܪܘܰܝܢܳܐ ܡܫܺܝܚܳܐ ܐܰܩܢܰܬ ܩܶܢܳܐ. ܒܗܰܘ ܒܰܣܺܝܡ ܪܺܝܚܳܐ ܗܳܝ ܡܫܰܟܪܰܬ ܚܶܙܘܳܐ ܐܳܦ ܣܰܪܝܰܬ ܪܺܝܚܳܐ. ܡܳܢܳܐ ܕܝܢ ܡܰܠܶܦ ܠܢ ܪܽܘܚܳܐ ܒܗܳܕܐ. ܐܳܡܪܺܝܢ ܓܝܪ ܥܠ ܚܽܘܪܒ̣ܳܐ ܕܰܒܕܽܘ̈ܟܝܳܬܳܐ ܕܣܰܢ̈ܝܳܢ ܡܥܳܕܳܐ ܠܡܶܥܡܰܪ܆ ܘܡܶܢ ܬܰܘ̈ܠܥܶܐ ܕܪ̈ܳܚܫܳܢ ܒܪܺܝܚܳܐ ܣܰܪܝܳܐ ܡܶܬܬܰܪܣܝܳܐ. ܠܩܶܢܳܐ ܕܶܝܢ ܕܺܐܝܬ ܗܘܳܐ ܒܳܗ̇ ܦܰܪ̈ܽܘܓܶܐ ܕܚܽܘܪܒ̣ܳܐ ܘܠܐ ܐܢܳܫ ܡܶܫܟܰܚ ܠܡܶܩܪܰܒ ܡܶܛܠ ܪܺܝܚܳܐ ܣܰܪܝܳܐ ܕܡܳܚܶܐ ܠܣܰܘܩܳܐ ܡܶܢ ܦܰܪ̈ܽܘܓܶܝܗ̇. ܘܰܒܢܳܡܽܘܣܳܐ ܦܳܪܰܚܬܳܐ ܗܳܝ ܛܰܡܰܐܬܳܐ ܘܠܐ ܡܶܬܐܰܟܠܳܢܺܝܬܳܐ. ܕܰܐܝܟ ܗܘܳܬ ܡܶܢ ܩܕܺܝܡ ܥܺܕܬܳܐ. ܟܕ ܒܰܣܝܳܢܳܐ ܕܰܚܛܺܝܬܳܐ ܡܦܰܠܦܠܳܐ ܗܘܳܬ ܘܡܶܢ ܬܰܘ̈ܠܥܶܐ ܕܰܥܒܳܕ̈ܐ ܡܺܝ̈ܬܶܐ ܡܶܬܬܰܪܣܝܳܐ ܗܘܳܬ܆ ܘܪܺܝܚܳܗ̇ ܒܝ̣ܫ ܗܘܳܐ ܘܰܣܪܶܐ܆ ܘܠܐ ܡܶܬܩܰܒܰܠ ܗܘܳܐ ܒܣܰܘܩܳܐ ܕܩܰܕܺܝ̈ܫܶܐ. ܘܰܠܨܰܠܡ̈ܐ ܘܠܰܓܠܺܝ̈ܦܶܐ ܣܳܓܕܳܐ ܗܘܳܬ. ܩܶܢܳܗ̇ ܕܶܝܢ ܒܢܰܝܴ̈ܐ ܛܰܡ̈ܐܐ ܕܪܽܘܓܙܳܐ ܡܠܶܐ ܗܘܳܐ. ܘܒܰܣܝܳܢܳܐ ܣܰܪܝܳܐ ܕܰܪ̈ܓܺܝܓܳܬܳܐ ܡܶܬܗܰܦܟܺܝܢ ܗܘܰܘ ܒܢܶܝ̈ܗ̇. ܐܠܐ ܟܕ ܫܰܕܰܪ ܚܰܬܢܳܐ ܡܰܒܽܘ̈ܥܶܐ ܒܢܰܚ̈ܠܶܐ ܘܶܐܬܚܰܠܠܰܬ ܒܡܰܝܴ̈ܐ ܩܰܕܺܝ̈ܫܶܐ ܕܰܥܡܳܕܳܐ. ܘܰܥܒܰܪ ܡܶܢܳܗ̇ ܪܺܝܚܳܐ ܣܰܪܝܳܐ ܕܕܶܒܚ̈ܐ ܛܰܡ̈ܐܐ ܕܰܡܕܰܒܚܳܐ ܗܘܳܬ ܠܫܺܐܕ̈ܐ ܘܥܶܪܩܰܬ ܡܶܢ ܬܽܘܪܣܳܝܳܐ ܕܬܰܘ̈ܠܥܶܐ ܡܺܝ̈ܬܶܐ ܘܛܰܡܴ̈ܐܬܳܐ. ܘܶܐܬܩܰܕܫܰܬ ܒܰܣܚܳܬܳܐ ܩܰܕܺܝܫܬܳܐ ܕܡܰܥܡܽܘܕܺܝܬܳܐ ܘܰܗܘܳܬ ܚܶܘܳܪܬܳܐ ܘܒܰܪܬ ܢܽܘܗܪܳܐ. ܘܫܶܒܩܰܬ ܩܶܢܳܗ̇ ܥܠ ܓܶܢܒ ܣܝܳܢܳܐ ܗܰܘ ܕܒܺܝ̈ܫܳܬܳܐ. ܥܡ ܪܝ̣ܚܳܐ ܡܣܰܝܒܳܐ ܕܒܗ̇. ܘܦܶܪܚܰܬ ܠܪܺܝܫܶܗ ܕܫܰܪܘܰܝܢܳܐ ܒܰܣܺܝܡ ܪܺܝܚܳܐ ܘܫܰܦܺܝܪ ܚܶܙܘܳܐ. ܗܳܢܐ ܕܶܝܢ ܐܝ̣ܬܰܘܗܝ ܡܳܪܢ ܘܦܳܪܽܘܩܰܢ. ܐܦ ܗܽܘ ܗܳܢܐ ܐܝ̣ܠܳܢܳܐ ܫܰܦܝ̣ܪ ܡܶܬܢܣܶܒ ܠܐܪܳܙܶܗ ܕܰܡܫܺܝܚܳܐ. ܒܰܣܝ̣ܡ ܪܝ̣ܚܳܐ ܓܝܪ ܐܝ̣ܬܰܘܗܝ ܫܰܪܘܰܝܢܳܐ ܒܰܟܝܳܢܶܗ ܘܩܰܝܣܳܐ ܕܝ̣ܠܗ ܫܰܪܺܝܪܳܐ ܘܰܣܛܺܝܡܳܐ ܡܶܫܬܟܰܚ. ܘܠܐ ܡܫܰܥܒܰܕ ܠܰܚܒܳܠܳܐ ܕܡܶܢ ܒܰܠܛܺܝܬܳܐ. ܘܥܳܗܶܢ ܛܳܒ ܠܦܽܘܠܚܳܢܳܐ ܫܰܦܺܝܪܳܐ ܕܰܓܠܺܝ̈ܦܶܐ ܘܕܶܡ̈ܘܳܬܳܐ. ܘܰܡܨܰܒܶܬ ܒܦܰܐܝܽܘܬܶܗ ܐܦ ܠܬܰܪ̈ܥܶܐ ܕܩܳܐܷܡ ܒܗܽܘܢ. ܘܺܐܝܬܰܘܗܝ ܚܰܡܺܝܡܳܐ ܘܦܺܐܪ̈ܶܐ ܕܗܳܘܶܝܢ ܒܶܗ ܡܥܰܕܪܺܝܢ ܟܕ ܫܳܩܶܠ ܠܗܘܢ ܐܢܳܫ. ܠܰܐܝܠܶܝܢ ܕܶܐܬܝܰܪܰܩܘ ܓܰܘܢܗܘܢ ܡܶܢ ܡܶܪܬܳܐ ܝܽܘܪܳܩܬܳܐ. ܘܶܐܢ ܐܢܳܫ ܐܶܬܠܒܶܟ ܡܶܢ ܟܺܐܒܳܐ ܗܳܢܐ. ܫܳܬܶܐ ܒܰܐܡܺܝܢܽܘܬܳܐ ܡܶܢ ܡܰܝ̈ ܫܶܩ̈ܠܐܷ ܕܚܶܙܘܳܐ ܕܫܰܪܘܰܝܢܳܐ. ܘܰܒܬܰܦܫܽܘܪܬܳܐ ܫܳܕܶܐ ܠܶܗ ܠܝܰܪܩܳܢܳܐ ܘܡܶܬܕܰܟܶܐ. ܕܰܐܝܟ ܗܳܟܰܢܳܐ ܥܳܒܶܕ ܠܰܢ ܗܰܘ ܫܰܪܘܰܝܢܳܐ ܘܒܰܣܺܝܡ ܪܺܝܚܳܐ ܡܫܺܝܚܳܐ. ܟܕ ܓܝܪ ܡܶܢܶܗ ܫܳܬܶܝܢ ܚܰܛܳܝ̈ܐ ܫܳܕܶܝܢ ܟܽܠܗ̇ ܝܰܬܺܝܪܽܘܬܳܐ ܕܰܚܛܺܝܬܳܐ ܡܶܢܗܘܢ ܘܡܶܬܕܰܟܶܝܢ. ܘܰܣܒܺܝܣ ܗܳܢܐ ܐܝ̣ܠܳܢܳܐ ܒܣܰܘ̈ܟܶܐ. ܘܡܶܢ ܥܶܩܳܪܶܗ ܘܰܥܕܰܡܳܐ ܠܪܺܝܫܶܗ ܢܶܬܥܰܠܶܐ. ܘܰܒܗܳܕܐ ܡܰܣܡܶܟ ܠܗܰܘ ܕܒܳܥܶܐ ܕܰܒܪܺܝܫܶܗ ܢܶܬܥܰܠܶܐ ܟܕ ܕܠܝ̣ܠܳܐܝ̣ܬ ܒܰܕܪ̈ܳܥܶܐ ܡܥܰܠܶܐ ܘܡܰܣܶܩ ܠܶܗ ܠܪܰܘܡܳܐ. ܕܰܐܝܟ ܗܳܢܳܐ ܐܝ̣ܬܰܘܗܝ ܐܦ ܡܫܝ̣ܚܳܐ. ܦܫܝ̣ܩܳܐ ܘܠܐ ܥܣܺܝܩܳܐ ܕܒܰܢ ܐܶܬܪܟܶܢ ܠܘܳܬ ܥܽܘܡܩܳܐ. ܐܰܟܡܳܐ ܕܰܥܒܰܕ ܠܰܚܛܺܝܬܳܐ ܗܳܝ ܚܽܘܪܒ̣ܳܐ ܛܰܡܰܐܬ ܪܺܝܚܳܐ. ܕܟܕ ܚܙܳܐ ܡܚܺܝܠܽܘܬܳܐ ܕܓܶܦܶܝ̈ܗ̇ ܕܠܐ ܡܶܫܟܚܺܝܢ ܠܡܶܦܪܰܚ ܕܝܢ ܠܰܐܦܰܝ̈ ܪܰܘܡܳܐ. ܐܝܟ ܕܳܐܦ ܚܽܘܪܒ̣ܳܐ ܠܘ ܣܰܓܺܝ ܓܳܕܶܠ ܠܪܰܘܡܳܐ. ܐܰܝܟܰܢܳܐ ܕܳܐܦ ܠܦܰܪ̈ܽܘܓܶܝܗ̇ ܕܚܽܘܪܒ̣ܳܐ ܕܰܣܪܶܝܢ ܗܘܰܘ ܕܰܟܺܝ ܘܩܰܕܶܫ. ܗܳܢܰܘ ܕܝܢ ܠܡܰܬܰܝ ܡܳܟܣܳܐ ܗܰܘ ܕܡܶܬܬܰܪܣܶܐ ܗܘܳܐ ܡܶܢ ܬܰܘ̈ܠܥܶܐ ܕܥܳܠܽܘܒܽܘܬܳܐ. ܩܪܳܝܗܝ ܡܶܢ ܩܶܢܳܐ ܕܡܳܟܣ̈ܐ ܛܰܡܷ̈ܐܐ ܘܥܰܒܕܶܗ ܝܰܘܢܳܐ ܚܠܳܦ ܦܰܪܽܘܓܳܐ ܕܚܽܘܪܒ̣ܳܐ. ܕܰܐܝܟ ܗܳܢܐ ܐܝ̣ܬܘܗܝ ܗܘܳܐ ܐܦ ܓܰܝܳܣܳܐ ܐܦ ܐܚܪ̈ܳܢܶܐ ܕܰܠܗܳܠܝܢ ܕܳܡܶܝܢ. ܘܒܳܬܰܪ ܗܳܕܐ ܦܳܪܰܚܬܳܐ ܚܽܘܪܒ̣ܳܐ ܡܰܝܬܶܐ ܥܽܘܗܕܳܢܳܐ ܕܕܰܝ̈ܨܶܐ ܘܕܰܚ̈ܓܳܣܶܐ.
ܛܽܘܪ̈ܐ ܠܰܡ ܪ̈ܳܡܶܐ ܠܕܰܝ̈ܨܶܐ ܘܰܫܩܺܝ̈ܦܶܐ ܣܶܬܳܪܳܐ ܠܰܚ̈ܓܳܣܶܐ. ܗܳܠܝܢ ܓܶܝܪ ܬܪ̈ܰܝܗܽܘܢ ܒܰܫܩܺܝ̈ܦܶܐ ܥܳܡܪܺܝܢ ܡܶܢ ܪܺܝܫܺܝܬܳܐ. ܐܝܟ ܕܐܡ̣ܪ ܫܠܶܝܡܽܘܢ ܕܰܒܨܺܝܪܺܝܢ ܒܚܰܝܠܳܐ ܘܥܳܒܕܺܝܢ ܠܗܽܘܢ ܒܴ̈ܬܶܐ ܒܫܽܘ̈ܥܶܐ (ܡ̈ܬܠܐ ܠ: ܟܘ). ܒܰܟܬܳܒܳܐ ܕܺܐܝܽܘܒ ܐܡ̇ܪ: ܝܳܕܰܥ ܐܰܢܬ ܙܰܒܢܳܐ ܕܝܴ̈ܠܕܳܢ ܕܰܝ̈ܨܳܬܳܐ ܒܰܫܩܺܝ̈ܦܶܐ (ܐܝܘܒ ܠܛ: ܐ). ܐܦ ܗܳܠܝܢ ܠܰܘ ܚܰܝ̈ܘܳܬܳܐ ܕܰܟܝܴ̈ܬܳܐ ܐܶܢܝܢ. ܒܪܰܡ ܕܶܝܢ ܗܰܘ ܕܕܰܟܺܝ ܠܚܽܘܪܒ̣ܳܐ ܐܦ ܠܗܳܠܶܝܢ ܩܰܕܶܫ. ܘܡܶܛܠ ܕܳܐܦ ܗܳܠܝܢ ܒܐܪܳܙ ܢܰܦ̈ܫܳܬܳܐ ܕܩܰܕܺܝ̈ܫܶܐ ܕܡܶܢ ܥܰܡܡ̈ܐ ܐܝ̣ܬܰܝܗܘܢ. ܥܰܠܝ̣ ܐܶܢܘܢ ܚܰܬܢܳܐ ܠܪ̈ܰܘܡܶܐ ܥܶܠܳܝ̈ܐ ܕܙܰܕܺܝܩܽܘܬܶܗ. ܕܩܰܕܺܝ̈ܫܐ ܕܝܢ܆ ܕܰܒܥܶܢ̈ܘܳܝܶܐ ܘܰܒܨܰܝܳܡ̈ܐ ܡܶܬܝܰܕܥܺܝܢ. ܗܳܕܐ ܡܚܺܝܠܽܘܬܳܐ ܠܗܳܠܝܢ ܓܝܪ ܢܰܩܺܝܦܳܐ. ܘܡܶܢ ܒܳܬܰܪ ܗܳܠܝܢ ܓܝܪ ܐܡ̣ܪ ܪܽܘܚܳܐ:
ܥܒܰܕ ܣܰܗܪܳܐ ܠܙܰܒܢ̈ܐ܆ ܘܫܶܡܫܳܐ ܝܺܕܰܥ ܙܰܒܢܳܐ ܕܡܰܥܪ̈ܳܒܰܘܗܝ. ܣܰܗܪܳܐ ܒܗܳܝ ܕܡܳܠܶܐ ܘܥܳܛܶܦ ܚܳܣܰܪ܆ ܠܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܡܰܘܕܰܥ ܠܢ܆ ܕܡܶܢ ܒܳܬܰܪ ܕܶܐܬܡܠܺܝ ܓܶܠܝܳܢ̈ܐ ܢܰܗܺܝܪ̈ܶܐ ܒܝܰܕ ܢܒܺܝ̈ܐ. ܗܦܰܟ ܚܣܰܪ ܘܰܐܘܦܺܝ ܠܶܗ ܢܽܘܗܪܶܗ ܕܥܳܠܡܳܐ. ܫܶܡܫܳܐ ܕܝܢ ܕܺܝܕܰܥ ܙܰܒܢܳܐ ܕܡܰܥܪ̈ܳܒܰܘܗܝ܆ ܠܘ ܗܳܢܰܘ ܕܰܠܥܶܠ ܡܶܢ ܥܳܠܡܳܐ ܪܳܕܶܐ. ܗܳܢܐ ܓܝܪ ܠܰܝܬ ܠܗ ܕܝܳܕܰܥ ܐܶܡܰܬܝ ܥܳܪܶܒ ܘܠܐ ܬܘܒ ܐܶܡܰܬܝ ܕܳܢܰܚ. ܐܶܢܕܶܝܢ ܝ̣ܕܰܥ ܗܳܕܐ. ܡܳܕܶܝܢ ܢܰܦܫܳܢܳܐ ܐܝ̣ܬܰܘܗܝ. ܗܳܕܐ ܕܠܐ ܡܶܫܟܚܳܐ ܕܐܢܳܫ ܢܺܐܡܪܺܝܗ̇ ܡܶܢ ܐܰܝܠܝܢ ܕܬܰܩܢܺܝܢ ܒܗܰܘܢܗܽܘܢ. ܗܰܘ ܫܶܡܫܳܐ ܕܶܝܢ ܕܝܳܕܰܥ ܗܘܳܐ ܙܰܒܢܳܐ ܕܡܰܥܪ̈ܳܒܰܘܗܝ ܗܰܘ ܕܩܰܕܶܡ ܐܡ̣ܪ ܠܰܫܠܺܝ̈ܚܰܘܗܝ ܕܗܳܐ ܣܳܠܩܺܝܢܰܢ ܠܐܽܘܪܺܫܠܶܡ ܘܡܶܫܬܰܠܡ̈ܢ ܟܽܠܗܝܢ ܕܰܟܬܺܝ̈ܒܳܢ ܒܰܢܒܺܝ̈ܐ ܘܰܒܡܰܙܡܽܘܪ̈ܶܐ ܥܠܰܝ (ܠܘܩܐ ܝܚ: ܠܐ). ܡܰܥܪ̈ܳܒܰܘܗܝ ܕܶܝܢ ܕܫܶܡܫܳܐ ܠܡܰܘܬܶܗ ܩܳܪܶܐ. ܡܶܛܠ ܕܰܐܟܙܢܳܐ ܕܫܶܡܫܳܐ ܡܫܰܠܶܡ ܪܶܗܛܶܗ ܒܡܰܥܪܒܳܐ. ܘܥܳܪܶܒ ܡܶܢ ܩܕܳܡ ܚܙܳܬܳܐ ܕܒܶܪ̈ܝܳܬܳܐ. ܗܳܟܰܢܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ ܡܫܺܝܚܳܐ܆ ܟܕ ܥܪܰܒ ܒܡܰܘܬܳܐ ܚܰܦܺܝ ܢܽܘܗܪܳܐ ܗܰܘ ܕܕܶܢܚܶܗ ܡܶܢ ܩܕܳܡ ܥܰܝ̈ܢܶܐ ܕܬܰܠܡܺܝ̈ܕܶܐ. ܘܰܐܟܙܢܳܐ ܕܫܶܡܫܳܐ ܡܳܐ ܕܥܳܪܶܒ ܠܘ ܒܰܟܝܳܢܶܗ ܚܳܫܶܟ ܘܥܳܡܶܛ. ܐܠܐ ܡܶܬܚܰܦܳܝܽܘ ܡܶܬܚܰܦܶܐ ܡܶܢܩܕܳܡ ܐܢܳܫܽܘܬܳܐ. ܗܳܟܰܢܳܐ ܗܰܘ ܫܶܡܫܳܐ ܠܐ ܡܶܫܬܰܓܢܝܳܢܳܐ ܘܠܐ ܡܶܫܬܰܚܠܦܳܢܳܐ܆ ܟܕ ܥܡܰܕ ܒܰܨܠܺܝܒܳܐ ܒܡܰܘܬܳܐ ܗܰܘ ܕܩܰܒܶܠ ܒܰܒܣܰܪ܆ ܠܘ ܒܰܟܝܳܢܶܗ ܐܠܗܝܳܐ ܛܰܥܡܶܗ ܠܡܰܘܬܳܐ. ܗܳܕܐ ܓܝܪ ܠܐ ܡܶܫܟܚܳܐ ܗܘܳܬ ܠܡܶܗܘܳܐ. ܩܰܒܶܠ ܡܳܕܶܝܢ ܢܶܣܝܽܘܢܶܗ ܕܡܰܘܬܳܐ ܒܝܰܕ ܒܶܣܪܳܐ ܟܕ ܢܛܺܝܪܺܝܢ ܒܶܗ ܚܰܝ̈ܐ ܕܰܟܝܳܢܶܗ. ܐܰܝܟܰܢܐ ܕܳܐܦ ܫܶܡܫܳܐ ܥܳܪܶܒ ܒܥܶܕܳܢܳܐ ܕܪܰܡܫܳܐ ܡܶܢ ܩܕܳܡ ܚܙܳܬܳܐ ܕܐܢܳܫܽܘܬܳܐ. ܟܕ ܢܛܺܝܪ ܠܘܳܬܶܗ ܢܽܘܗܪܶܗ ܕܠܐ ܫܽܘܚܠܳܦܳܐ. ܘܒܳܬܰܪ ܗܳܠܶܝܢ ܐܡ̣ܪ:
ܥܒܰܕ ܚܶܫܽܘܟܳܐ ܘܰܗܘܳܐ ܠܺܠܝܳܐ. ܘܒܶܗ ܥܳܡܪ̈ܳܢ ܟܽܠܗܝܢ ܚܰܝ̈ܘܳܬܳܐ ܕܥܳܒܳܐ. ܐܰܪ̈ܝܰܘܳܬܳܐ ܢܳܗܡܺܝܢ ܠܡܶܬܒܰܪ ܘܰܠܡܶܒܥܳܐ ܡܶܢ ܐܰܠܗܳܐ ܡܶܐܟܽܘܠܬܗܽܘܢ. ܒܡܰܕ̈ܢܳܚܰܝ ܫܶܡܫܳܐ ܡܶܬܚܰܡܠܺܝܢ ܘܰܒܡܰܥܡܪ̈ܰܝܗܽܘܢ ܪܳܒܥܺܝܢ. ܕܶܐܡܰܪ ܕܰܥܒܰܕ ܚܶܫܽܘܟܳܐ ܘܰܗܘܳܐ ܠܺܠܝܳܐ. ܠܘ ܕܗܽܘ ܐܠܗܐ ܚܶܫܽܘܟܳܐ ܥܰܒܕܶܗ ܠܳܐܟܶܠܩܰܪܨܳܐ ܟܕ ܒܪܳܝܗܝ. ܐܠܐ ܡܶܢ ܢܰܗܺܝܪܳܐ ܘܫܰܦܺܝܪܳܐ ܗܦܰܟ ܠܓܰܘܢܳܐ ܟܡܺܝܪܳܐ ܕܠܺܠܝܳܐ. ܘܗܽܘ ܫܰܚܠܶܦ ܢܰܦܫܶܗ ܘܰܒܨܶܒܝܳܢܶܗ ܗܘܳܐ ܡܰܥܡܪܳܐ ܠܚܰܝܽܘܬܳܐ ܕܥܳܒܳܐ. ܐܳܦ ܚܰܝ̈ܠܰܘܳܬܶܗ ܕܗܰܘ ܕܰܠܩܽܘܒܠܳܐ ܐܝ̣ܬܰܝܗܘܢ ܐܰܪ̈ܝܰܘܳܬܳܐ ܕܢܳܗܡܺܝܢ ܒܚܶܫܽܘܟܳܐ ܗܰܘ ܕܰܚܛܺܝܬܳܐ. ܠܡܶܬܒܰܪ ܗܰܘ ܕܢܳܦܶܠ ܒܺܐܝ̈ܕܰܝܗܘܢ. ܘܗܳܝ ܕܡܶܢ ܐܠܗܐ ܒܳܥܶܝܢ ܡܶܐܟܽܘܠܬܳܐ. ܟܕ ܪܳܗܛܺܝܢ ܘܩܳܝܡܺܝܢ ܒܬܰܪܥܳܐ ܕܪܰܒܽܘܬܳܐ ܕܰܐܠܗܐ. ܘܳܐܟܠܺܝܢ ܩܰܪ̈ܨܶܐ ܕܩܰܕܺܝ̈ܫܶܐ. ܘܫܳܐܠܺܝܢ ܡܶܢ ܐܠܗܳܐ ܕܢܰܦܶܣ ܠܗܽܘܢ ܠܰܡܢܰܣܳܝܽܘ ܠܰܓܒܰܝܴ̈ܐ. ܥܕܰܡܳܐ ܕܰܡܩܰܒܠܺܝܢ ܦܽܘܩܕܳܢܳܐ. ܟܕ ܓܝܪ ܠܩܶܢܝܳܢܰܘ̈ܗܝ ܕܺܐܝܽܘܒ ܐܰܡܪܰܚܘ ܐܰܪ̈ܝܰܘܳܬܳܐ ܗܳܠܝܢ ܠܡܶܩܪܰܒ. ܥܕܰܡܳܐ ܕܶܐܡܰܪ ܐܰܠܗܳܐ ܠܣܳܛܳܢܳܐ ܕܗܳܐ ܟܽܠܡܶܕܶܡ ܕܺܐܝܬ ܠܶܗ ܠܐܺܝܽܘܒ ܡܰܫܠܰܡ ܒܺܐܝ̈ܕܰܝܟ ܒܰܠܚܽܘܕ ܥܰܠ ܢܰܦܫܶܗ ܠܐ ܬܰܘܫܶܛ ܐܝ̣ܕܳܟ (ܐܝܘܒ ܐ: ܝܒ). (ܦܽܘܫܳܩܳܐ ܕܫܶܡ ܣܳܛܳܢܳܐ܆ ܣܳܛܳܢܳܐ ܡܶܬܐܶܡܰܪ ܘܡܶܬܟܰܢܶܐ ܣܳܛܳܢܳܐ ܥܠ ܕܰܐܣܛܺܝ ܡܶܢ ܐܰܠܗܳܐ. ܘܫܺܐܕܳܐ ܥܰܠ ܕܶܐܫܬܕܺܝ ܡܶܢ ܪܰܘܡܳܐ ܕܰܫܡܰܝܳܐ. ܘܳܐܟܶܠܩܰܪܨܳܐ ܡܶܛܠ ܕܶܐܟܰܠܩܰܪ̈ܨܶܐ ܕܒܶܝܬ ܐܳܕܳܡ ܘܰܥܪܰܩ). ܘܡܶܢ ܒܳܬܰܪ ܕܩܰܒܶܠ ܫܽܘܠܛܳܢܳܐ ܥܰܠ ܟܽܠܡܶܕܶܡ ܕܰܩܢܶܐ܆ ܬܘܒ ܡܶܐܟܽܘܠܬܳܐ ܐܚܪܺܬܳܐ ܒܳܥܶܐ ܗܘܳܐ ܐܰܪܝܳܐ܆ ܕܳܐܦ ܥܠܰܘܗܝ ܕܺܐܝܽܘܒ ܢܰܘܫܶܛ ܐܝ̣ܕܳܐ. ܘܡܶܢ ܗܳܝ ܕܩܰܒܶܠ ܡܰܦܣܳܢܽܘܬܳܐ ܘܟܶܢ ܐܰܘܫܶܛ ܐܝ̣ܕܳܐ ܥܠ ܐܺܝܽܘܒ. ܓܰܠܝܳܐ ܗܝ ܡܶܠܬܳܐ ܗܳܕܐ ܕܟܽܠܗܽܘܢ ܐܰܪ̈ܝܰܘܳܬܳܐ ܟܳܡܢܺܝܢ ܠܰܓܙܳܪܳܐ ܕܥܳܢܴ̈ܐ ܐܰܠܗܳܝܬܳܐ. ܘܡܶܢܶܗ ܕܰܐܠܗܳܐ ܒܳܥܶܝܢ ܡܶܐܟܽܘܠܬܳܐ. ܠܐ ܕܶܝܢ ܝܳܗܶܒ ܠܗܘܢ ܐܠܗܐ ܚܕܳܐ ܡܶܢ ܢܰܦ̈ܫܳܬܳܐ ܕܩܰܕܺܝ̈ܫܐ܆ ܘܠܐ ܡܶܢ ܩܶܢܝܳܢܗܘܢ ܡܰܫܟܶܢ ܠܗ ܠܛܰܪܟܳܢܳܐ. ܐܠܐ ܡܳܐ ܕܒܳܥܶܐ ܕܰܢܢܰܨܰܚ ܠܰܓܒܰܝܴ̈ܐ ܕܺܝܠܗ. ܗܳܝܕܝܢ ܫܳܒܶܩ ܢܶܗܘܶܐ ܐܰܓܽܘܢܳܐ. ܘܡܶܫܰܐܠ ܫܳܐܷܠ ܣܳܛܳܢܳܐ ܡܶܢ ܐܠܗܐ ܕܢܶܥܒܶܕ ܥܰܡܗܘܢ ܩܪܳܒܳܐ. ܢܶܫܡܰܥ ܥܡ ܗܳܠܝܢ ܕܰܗܘ̈ܝ ܠܘܳܬ ܐܺܝܽܘܒ. ܐܦ ܗ̇ܝ ܕܶܐܡܰܪ ܡܳܪܢ ܠܫܶܡܥܽܘܢ ܒܙܰܒܢܳܐ ܕܚܰܫܶܗ: ܫܶܡܥܽܘܢ ܗܳܐ ܣܳܛܳܢܳܐ ܫܳܐܷܠ ܕܢܶܥܪܽܘܒܟܽܘܢ ܐܝܟ ܕܰܠܚܷ̈ܛܶܐ. ܘܶܐܢܳܐ ܒܥܺܝܬ ܥܠܰܝܟ ܡܶܢ ܐܰܒܳܐ ܕܠܐ ܬܶܚܣܰܪ ܗܰܝܡܳܢܽܘܬܳܟ (ܠܘܩܐ ܟܒ: ܠܐ-ܠܒ). ܡܳܢܐ ܕܝܢ ܡܰܝܬܶܐ ܡܶܢ ܒܳܬܰܪܟܶܢ. ܒܡܰܕܢܳܚܱ̈ܝ ܫܶܡܫܶܐ ܡܶܬܚܰܡܠܺܝܢ ܘܰܒܡܰܥܡܪ̈ܰܝܗܘܢ ܪܳܒܥܺܝܢ. ܡܳܐ ܓܝܪ ܕܕܳܢܰܚ ܫܶܡܫܳܐ ܕܙܰܕܺܝܩܽܘܬܳܐ ܥܳܪܩܺܝܢ ܠܗܘܢ ܗܳܢܘܢ ܕܰܒܓܰܘ ܚܶܫܽܘܟܳܐ ܡܰܠܦܺܝܢ. ܕܬܶܗܘܶܐ ܚܛܺܝܬܳܐ. ܠܐ ܓܝܪ ܡܶܫܟܚܺܝܢ ܠܡܶܬܒܰܪ ܒܺܐܝܡܳܡܳܐ. ܡܶܛܠ ܕܰܒܕܶܢܚܶܗ ܕܫܶܡܫܳܐ ܟܽܠܗ ܠܺܠܝܳܐ ܡܶܬܛܰܠܰܩ. ܘܰܒܥܰܡܛܳܢܳܐ ܡܶܬܚܰܦܶܐ ܣܳܛܳܢܳܐ ܘܠܘܳܬ ܡܰܥܡܪܶܗ ܡܫܰܢܶܐ. ܠܰܐܝܟܳܐ ܕܟܰܗܺܝܢܳܐ ܚܛܺܝܬܳܐ. ܘܗܳܝܕܝܢ:
ܢܳܦܶܩ ܒܰܪܢܳܫܳܐ ܠܰܥܒܳܕܶܗ ܘܰܠܦܽܘܠܚܳܢܶܗ ܥܕܰܡܳܐ ܠܪܰܡܫܳܐ. ܟܡܳܐ ܕܰܐܚܺܝܕ ܠܺܠܝܳܐ ܕܰܚܛܺܝܬܳܐ ܫܽܘܠܛܳܢܳܐ. ܕܒܰܛܺܝܠ ܗܽܘ ܒܰܪܢܳܫܐ ܡܶܢ ܦܽܘܠܚܳܢܶܗ. ܕܰܐܝܟ ܗܳܟܰܢܳܐ ܟܰܗܝ̣ܢܳܐ ܗܘܳܬ ܚܛܺܝܬܳܐ ܥܕܰܡܳܐ ܕܰܕܢܰܚ ܗܰܘ ܫܶܡܫܳܐ ܕܙܰܕܺܝܩܽܘܬܳܐ. ܘܟܕ ܐܶܬܚܙܺܝ ܥܠ ܚܰܝ̈ܘܳܬܳܐ ܗܳܠܝܢ ܕܳܫܶܗ ܠܰܐܪܝܳܐ ܘܰܠܬܰܢܺܝܢܳܐ. ܘܰܐܦܶܣ ܠܗ ܠܒܰܪܢܳܫܳܐ ܕܢܶܦܽܘܩ ܠܰܥܒܳܕܳܐ ܕܙܰܕܺܝܩܽܘܬܳܐ. ܘܰܩܪܳܗ̇ ܠܥܺܕܬܳܐ ܕܬܶܦܽܘܩ ܡܶܢ ܒܰܝܢܳܬ ܗܳܠܝܢ ܚܰܝ̈ܘܳܬܳܐ ܒܺܝ̈ܫܳܬܳܐ. ܐܝܟ ܕܰܐܟܬܶܒ ܒܰܟܬܳܒܳܐ ܕܬܶܫܒ̈ܚܳܬ ܬܶܫܒܚܴ̈ܬܳܐ ܚܰܟܺܝܡܳܐ ܫܠܶܝܡܽܘܢ. ܘܬܳܢܶܐ ܠܗ ܩܳܠܗ ܕܚܰܬܢܳܐ ܟܕ ܐܡ̇ܪ: ܬܳܝ ܡܶܢ ܠܶܒܢܳܢ ܚܳܬܝ ܟܰܠܬܳܐ. ܘܬܺܐܬܶܝܢ ܘܬܶܥܒܪܺܝܢ ܡܶܢ ܪܝ̣ܫ ܐܰܡ̈ܢܶܐ. ܘܡܶܢ ܪܝ̣ܫ ܣܳܢܺܝܪ ܘܚܶܪܡܽܘܢ. ܘܡܶܢ ܟܡܺܐܢܗܽܘܢ ܕܰܐܪ̈ܝܰܘܳܬܳܐ ܘܡܶܢ ܛܽܘܪ̈ܰܝ ܢܶܡܪ̈ܶܐ (ܬܫܒ̈ܚܬ ܬܫܒ̈ܚܬܐ ܕ: ܘ-ܚ). ܘܒܰܝܢܳܬ ܚܰܝ̈ܘܳܬܳܐ ܗܳܠܝܢ ܥܺܕܬܳܐ ܚܒܺܝܫܳܐ ܗܘܳܬ. ܐܠܐ ܘܟܕ ܕܢܰܚ ܫܶܡܫܳܐ ܕܙܰܕܺܝܩܽܘܬܳܐ. ܡ̣ܢ ܡܥܰܪܬܳܐ ܕܒܶܝܬ ܠܚܶܡ ܥܪܰܩܘ ܚܰܝ̈ܘܳܬܳܐ ܗܳܠܝܢ ܠܰܟܡܺܐܢܰܝ̈ܗܘܢ ܘܢܶܦܩܰܬ ܢܰܦܫܳܐ ܡܶܢ ܒܰܝܢܳܬ ܫܶܢܷ̈ܐ ܕܰܐܪ̈ܝܰܘܳܬܳܐ ܘܡܶܢ ܦܽܘܡܳܐ ܕܢܶܡܪ̈ܶܐ ܐܶܬܦܰܨܝܰܬ ܘܰܢܦܰܩ ܒܰܪܢܳܫܳܐ ܠܰܥܒܳܕܶܗ. ܕܬܘܒ ܢܶܦܠܽܘܚ ܘܢܶܗܦܽܘܟ ܠܦܰܪܕܰܝܣܳܐ ܕܶܐܬܛܪܶܕ ܡܶܢܶܗ. ܥܕܰܡܳܐ ܠܪܰܡܫܳܐ ܕܫܽܘܠܳܡܳܐ. ܟܕ ܡܛܠ ܗܳܠܝܢ ܪܰܘܪ̈ܒܳܬܳܐ ܕܰܥܒܰܕ ܠܘܳܬܶܗ ܥܳܒܽܘܕܶܗ ܩܳܥܶܐ ܥܡ ܢܒܺܝܐ ܘܳܐܡܰܪ:
ܡܳܐ ܣܰܓܺܝܐܝ̣ܢ ܥܒܳܕܰܝ̈ܟ ܡܳܪܝܳܐ. ܘܟܽܠܗܘܢ ܒܚܶܟܡܬܳܐ ܥܒܰܕܬ ܐܶܢܘܢ. ܘܰܡܠܳܬ ܐܰܪܥܳܐ ܩܶܢܝܳܢܳܟ. ܘܗܳܝ ܕܰܒܚܶܟܡܬܳܐ ܥܒܰܕ ܐܶܢܘܢ ܡܰܘܕܥܳܐ܆ ܕܺܐܝܬܘܗܝ ܡܫܺܝܚܳܐ ܚܶܟܡܬܶܗ ܕܰܐܒܳܐ ܐܝܟ ܕܶܐܡܰܪ ܦܰܘܠܽܘܣ ܘܒܶܗ ܥܒܰܕ ܟܽܠܡܶܕܡ܆ ܐܝܟ ܕܰܐܟܬܶܒ ܛܽܘܒܳܢܳܐ ܝܽܘܚܰܢܳܢ ܫܠܺܝܚܳܐ. ܕܟܠ ܒܺܐܝܕܶܗ ܗܘܳܐ ܘܒܶܠܥܳܕܰܘܗܝ ܐܳܦܠܳܐ ܚܕܳܐ ܗܘܳܬ (ܝܘܚܢܢ ܐ: ܓ). ܘܟܕ ܒܰܥ̈ܒܳܕܶܐ ܬܗܰܪܘ ܡܰܘܣܶܦ ܘܐܡ̇ܪ:
ܗܳܢܰܘ ܝܰܡܳܐ ܪܰܒܳܐ ܘܰܪܘܰܚܬܳܐ ܕܺܐܝ̈ܕܰܝܳܐ ܕܒܶܗ ܐܝ̣ܬ ܪ̈ܰܚܫܳܐ ܕܠܐ ܡܶܢܝܳܢ܆ ܘܚܰܝ̈ܘܳܬܳܐ ܪܰܘܪ̈ܒܳܬܳܐ ܥܡ ܕܰܩܕ̈ܩܳܬܳܐ. ܘܒܶܗ ܗܽܘ ܡܗܰܠܟܴ̈ܢ ܣܦܺܝ̈ܢܶܐ. ܠܶܘܝܳܬܰܢ ܗܳܢܐ ܕܰܒܪܰܝܬ ܠܡܶܓܚܰܟ ܥܠܰܘܗܝ. ܝܰܡܳܐ ܪܰܒܐ ܠܥܳܠܡܳܐ ܡܫܰܡܰܗ. ܪ̈ܰܚܫܳܐ ܕܠܐܴ ܡܶܢܝܳܢ ܠܗܳܠܝܢ ܕܰܒܥܰܦܪܳܐ ܕܰܚܛܳܗ̈ܐ ܛܡܺܝܪܺܝܢ ܡܫܰܘܕܰܥ. ܚܰܝ̈ܘܳܬܳܐ ܠܡ ܪܰܘܪ̈ܒܳܬܳܐ ܘܕܰܩܕ̈ܩܳܬܳܐ. ܠܐܝܠܝܢ ܕܰܐܚܺܝܕܺܝܢ ܡܕܰܒܪܳܢܽܘܬܳܐ ܕܥܳܠܡܳܐ ܗܳܢܐ ܒܡܰܠܟܽܘܬܳܐ ܘܰܒܪܝ̣ܫܳܢܽܘܬܳܐ. ܣܦܺܝ̈ܢܶܐ ܩܳܪܶܐ ܠܡܽܘ̈ܟܠܶܐ ܕܬܰܓܳܪ̈ܶܐ ܕܰܡܗܰܠܟܺܝܢ ܒܶܗ. ܠܶܘܝܳܬܳܢ ܕܶܝܢ ܠܳܐܟܶܠܩܰܪܨܳܐ ܡܶܬܢܣܶܒ. ܘܗܳܢܘܢ ܕܰܥܠܰܘܗܝ ܓܳܚܟܺܝܢ܆ ܢܒܺܝ̈ܐ ܐܢܘܢ ܘܰܫܠܺܝܚ̈ܐ.
ܟܽܠܗܘܢ ܠܰܡ ܠܳܟ ܗܽܘ ܡܣܰܟܶܝܢ ܕܬܶܬܶܠ ܠܗܽܘܢ ܡܶܐܟܽܘܠܬܳܐ ܒܙܰܒܢܗܽܘܢ. ܡܛܠ ܕܰܐܢܬ ܗܽܘ ܦܳܬܽܘܪܳܐ ܕܟܠ. ܘܡܶܢܟ ܢܳܣܒܺܝܢ ܚܰܝ̈ܐ ܟܠ ܕܺܐܝܬ ܒܶܗ ܢܫܰܡܬܳܐ ܘܰܣܢܝ̣ܩ ܥܠ ܬܽܘܪܣܳܝܳܐ. ܠܰܒܢܰܝ̈ܢܳܫܳܐ ܘܠܟܠ ܕܪܳܚܶܫ ܥܠ ܐܰܪܥܳܐ ܘܰܒܝܰܡܳܐ.
ܘܟܕ ܝܳܗܶܒ ܐܰܢܬ ܠܗܽܘܢ ܡܶܬܬܰܪܣܶܝܢ. ܘܦܳܬܰܚ ܐܰܢܬ ܐܺܝܕܳܟ ܘܣܳܒܥܺܝܢ. ܘܰܒܗܳܝ ܕܡܶܬܦܰܬܚܳܐ ܐܝ̣ܕܳܟ ܚܰܝܶܐ ܐܦ ܡܶܬܬܰܪܣܶܐ. ܘܶܐܢ ܐܶܚܕܰܬ ܝܰܡܺܝܢܳܟ ܫܪܶܟܘ ܠܡܰܘܬܳܐ ܘܠܰܚܒܳܠܐ ܟܽܠܗܘܢ ܚܰܝ̈ܐ. ܐܝܟ ܕܐܡ̣ܪ ܢܒܺܝܐ:
ܡܰܗܦܶܟ ܐܰܢܬ ܠܡ ܐܰܦܰܝ̈ܟ ܘܡܶܬܕܰܠܚܺܝܢ. ܫܳܩܶܠ ܐܢܬ ܪܽܘܚܗܽܘܢ ܘܡܳܝܬܺܝܢ. ܘܰܠܥܰܦܪܗܽܘܢ ܗܳܦܟܺܝܢ. ܒܗܳܝ ܕܫܳܩܶܠ ܪܽܘܚܳܐ ܘܗܳܦܶܟ ܥܰܦܪܳܐ ܠܰܐܪܥܳܐ ܐܝܟ ܕܰܗܘܳܐ. ܘܡܶܛܠܗܳܢܐ ܒܠܳܐ ܡܳܝܽܘܬܽܘܬܳܐ ܡܶܬܢܰܛܪܳܐ ܢܰܦܫܳܐ ܥܕܰܡܳܐ ܕܡܶܫܬܰܕܪܳܐ ܘܥܳܛܦܳܐ ܠܘܬ ܦܰܓܪܳܐ ܗܰܘ ܕܡܶܢܶܗ ܐܶܫܬܰܩܠܰܬ. ܡܛܠ ܕܠܐ ܡܶܫܟܚܳܐ ܗܘܳܬ ܕܥܠ ܢܰܦܫܳܐ ܢܶܫܬܰܠܰܛ ܡܰܘܬܳܐ ܘܰܥܠܰܘܗܝ ܕܡܶܢ ܐܠܗܐ ܡܶܫܬܰܩܠܳܐ. ܘܒܰܐܬܪ̈ܰܘܳܬܳܐ ܕܠܳܚܡܳܐ ܠܗ̇ ܡܩܰܘܝܳܐ. ܘܠܘ ܟܕ ܡܶܬܒܰܣܡܳܐ ܒܛܳܒܴ̈ܬܳܐ ܕܰܢܛܺܝܪ̈ܳܢ ܠܢܰܦ̈ܫܳܬܳܐ ܕܩܰܕܺܝ̈ܫܐ ܒܳܬܰܪ ܩܝܳܡܬܳܐ. ܘܠܐ ܪ̈ܽܘܚܳܬܳܐ ܕܚܰܛܳܝ̈ܐ ܡܶܫܬܰܢ̈ܩܳܢ ܩܕܳܡ ܫܽܘܠܳܡܳܐ. ܡܶܛܠܗܳܢܐ ܢܺܐܡܰܪ ܐܢܳܫ ܕܠܘ ܒܚܰܝ̈ܐ ܐܝ̣ܬܰܝܗܘܢ ܢܰܦ̈ܫܳܬܳܐ ܕܰܐܝܠܝܢ ܕܰܥܢܰܕܘ. ܘܢܶܚܙ̈ܝܳܢ ܢܽܘܗܪܳܐ ܟܕ ܟܳܠܝܴ̈ܢ ܡܶܢ ܒܽܘܣܳܡܳܐ ܓܡܺܝܪܳܐ. ܘܰܕܢܶܬܚܰܒ̈ܫܳܢ ܒܚܶܫܽܘܟܳܐ ܟܕ ܠܐ ܡܶܬܐܰܠܨ̈ܢ ܒܬܰܫܢܺܝܩܳܐ. ܐܰܟܙܢܳܐ ܕܶܝܢ ܐܢܳܫ ܡܶܙܕܰܡܰܢ ܠܒܶܝܬ ܡܶܫܬܽܘܬܳܐ ܡܩܰܕܶܡ ܡܰܪܓܶܫ ܒܒܽܘܣܳܡܶܗ ܩܕܳܡ ܥܶܕܳܢܳܐ ܕܫܳܪܽܘܬܳܐ. ܗܳܟܰܢܐ ܐܦ ܢܰܦ̈ܫܳܬܳܐ ܕܩܰܕܺܝ̈ܫܐ ܟܕ ܛܳܒ ܝܳܕ̈ܥܳܢ ܘܰܠܒܺܝ̈ܫܳܢ ܠܒܽܘ̈ܫܶܐ ܕܡܶܫܬܽܘܬܳܐ ܘܺܐܝܬ ܥܠܰܝܗܶܝܢ ܐܶܣ̈ܛܠܶܐ ܚܶܘܳܪ̈ܳܬܳܐ ܘܢܰܗܺܝܪ̈ܳܬܳܐ ܕܰܓܢܽܘܢܳܐ. ܐܠܐ ܠܰܓܡܺܝܪܽܘܬܳܐ ܡܫܰܡܠܰܝܬܳܐ ܠܐ ܡܩܰܒ̈ܠܳܢ ܩܕܳܡ ܫܽܘܠܳܡܳܐ. ܐܝܟ ܕܰܐܠܦ ܦܰܘܠܽܘܣ ܐܠܗܝܐ. ܕܟܕ ܠܰܡ ܐܠܗܐ ܩܰܕܶܡ ܚܳܪ ܒܥܽܘܕܪܳܢܰܢ ܕܺܝܠܰܢ ܕܠܐ ܒܶܠܥܳܕܰܝܢ ܢܶܬܓܰܡܪܽܘܢ. (ܥܒܪ̈ܝܐ ܝܐ: ܡ) ܘܗܳܟܰܢܳܐ ܐܳܦ ܢܰܦ̈ܫܳܬܳܐ ܕܚܰܛܳܝ̈ܐ ܒܚܶܫܽܘܟܳܐ ܫܳܪ̈ܝܳܢ ܘܠܐ ܡܶܬܐܰܠܨ̈ܢ. ܐܰܟܡܳܐ ܕܥܳܒ̈ܕܰܝ ܒܺܝ̈ܫܳܬܳܐ ܟܕ ܡܶܬܚܰܒܫܺܝܢ ܒܶܝܬ ܐܰܣܺܝܪ̈ܶܐ ܡܶܢ ܕܰܝܳܢܳܐ. ܘܟܕ ܠܐ ܩܰܒܶܠܘ ܡܣܳܡ ܒܪܺܝܫܳܐ ܕܒܺܝ̈ܫܳܬܗܘܢ. ܐܠܐ ܡܳܐ ܕܳܐܬܶܐ ܕܰܝܳܢܳܐ ܠܰܬܒܰܥܬܳܐ ܣܳܒܠܺܝܢ ܦܽܘܪ̈ܥܳܢܶܐ ܒܺܝ̈ܫܶܐ ܚܠܳܦ ܥܒܳܕܰܝ̈ܗܘܢ. ܗܳܟܢܐ ܢܰܦܫ̈ܳܬܗܘܢ ܕܥܰܘܴ̈ܠܶܐ ܝܳܕ̈ܥܳܢ ܘܰܡܦܴ̈ܣܳܢ ܕܡܶܬܚܰܝܒܺܝܢ ܒܕܺܝܢܳܐ ܕܟܺܐܢܽܘܬܳܐ. ܐܝܟ ܕܶܐܡܰܪ ܢܒܺܝܐ.
ܕܰܡܫܰܕܰܪ ܐܰܢܬ ܪܽܘܚܳܟ ܘܡܶܬܒܪܶܝܢ. ܘܰܡܚܰܕܶܬ ܐܰܢܬ ܐܰܦܶܝ̈ܗ̇ ܕܰܐܪܥܳܐ. ܐܝܟ ܗܰܘ ܕܡܶܬܒܪܳܝܽܘ ܡܶܬܒܪܶܝܢ ܬܶܢܝܳܢܽܘܬ. ܐܰܡܺܝܪܳܐ ܡܶܠܬܳܐ ܗܳܕܐ ܟܕ ܛܳܒ ܡܠܽܘܐܳܐ ܟܠܗ ܕܽܐܘܣܺܝܰܐ ܐܢܳܫܳܝܬܳܐ ܟܠܗ ܩܰܝܳܡ. ܢܰܦܫܳܐ ܡܶܢܶܗ ܢܛܺܝܪܳܐ ܒܚܰܝ̈ܐ ܘܰܒܠܳܐ ܡܳܝܽܘܬܽܘܬܳܐ. ܦܰܓܪ̈ܶܐ ܕܝܢ ܫܳܪܟܺܝܢ ܠܰܚܒܳܠܳܐ. ܘܰܫܟܝ̣ܚ ܡܶܢܗܘܢ ܫܰܪܟܳܢܳܐ ܟܕ ܩܳܝܡܺܝܢ ܓܰܪ̈ܡܶܐ ܘܕܰܚܺܝܚܳܐ. ܘܺܐܝܬ ܙܰܪܥܳܐ ܕܡܺܝ̈ܬܶܐ ܢܽܘܚܳܡܳܐ ܠܡܰܘܥܺܝܬܳܐ. ܘܗܳܕܐ ܕܬܰܪܬܶܝܢ ܠܐ ܕܳܡܝܳܐ ܠܗܳܝ ܩܰܕܡܳܝܬܳܐ. ܡܶܛܠ ܕܠܰܘ ܟܽܠܚܰܕ ܒܛܶܟܣܶܗ ܩܳܝܡܺܝܢ ܦܰܓܪ̈ܶܐ ܬܶܢܝܳܢܽܘܬ. ܘܠܘ ܒܶܐܣܟܺܝܡܳܐ ܕܶܟܪ̈ܶܐ ܘܢܶܩ̈ܒܳܬܳܐ. ܡܶܬܬܰܩܰܢ ܨܰܠܡܳܐ ܕܒܶܝܬ ܐܳܕܳܡ. ܡܶܛܠ ܕܠܘ ܠܡܰܘܠܕܳܢܽܘܬܳܐ ܕܰܒܢܳܝܴ̈ܐ ܡܶܬܚܰܕܰܬ ܟܝܳܢܰܢ. ܐܠܐ ܒܬܶܫܒܽܘܚܬܳܐ ܡܥܰܠܰܝܬܳܐ ܕܠܳܚܶܡ ܠܰܟܝܳܢܳܐ ܕܡܰܠܰܐܟ̈ܐ. ܘܩܳܝܡܺܝܢ ܓܽܘ̈ܫܡܶܐ ܒܠܳܐ ܡܶܬܚܰܒܠܳܢܽܘܬܳܐ ܘܡܶܬܒܪܶܝܢ ܦܰܓܪ̈ܶܐ ܒܪܺܝܬܳܐ ܚܕܰܬܳܐ. ܗܳܢܘܢ ܓܽܘ̈ܫܡܶܐ ܕܡܺܝܬܘ ܘܶܐܬܚܰܒܰܠܘ ܦܳܢܶܝܢ ܘܠܳܒܫܺܝܢ ܒܰܩܝܳܡܬܳܐ ܠܐ ܡܶܬܚܰܒܠܳܢܽܘܬܳܐ. ܘܡܶܬܚܰܪܪܺܝܢ ܡܶܢ ܚܰܫ̈ܐ ܫܓܺܝ̈ܫܶܐ ܕܒܶܣܪܳܐ ܘܰܕܡܳܐ ܘܰܕܪܶܓܬܳܐ ܡܰܘܒܕܳܢܺܝܬܳܐ. ܘܥܳܡܕܺܝܢ ܒܢܽܘܪܳܐ ܘܰܒܪܽܘܚܳܐ. ܘܗܳܘܶܝܢ ܚܰܕ ܐܶܣܛܽܘܟܣܳܐ ܕܠܐ ܦܠܺܝܓ ܥܠ ܩܢܽܘܡܶܗ. ܘܽܐܘܣܺܝܰܐ ܕܺܝܠܶܗ ܟܽܠܗ̇ ܡܶܫܬܰܚܠܦܳܐ ܒܰܒܪܺܝܬܳܐ ܚܕܰܬܳܐ ܕܠܐ ܡܶܬܚܰܒܠܳܢܽܘܬܳܐ. ܘܡܶܬܒܰܠܥܺܝܢ ܦܰܓܪ̈ܶܐ ܒܢܽܘܪܳܢܳܝܽܘܬܳܐ ܐܝܟ ܡܰܠܐܟ̈ܐ ܦܫܺܝ̈ܛܶܐ ܘܠܐ ܡܪ̈ܰܟܒܶܐ. ܘܥܳܒܪܺܝܢ ܒܫܽܘ̈ܥܶܐ ܛܡܺܝ̈ܡܶܐ ܒܦܰܓܪ̈ܰܝܗܘܢ ܘܠܐ ܡܶܬܟܠܶܝܢ. ܘܡܶܛܠ ܕܚܳܙܶܐ ܒܰܪܢܳܫܳܐ ܗܽܘ ܠܗ ܒܰܐܝܠܶܝܢ ܕܠܐ ܣܠܶܩ ܥܠ ܠܶܒܳܐ. ܕܳܡܶܐ ܒܥܰܝ̈ܢܰܝ ܢܰܦܫܶܗ. ܐܰܟܡܳܐ ܕܠܘ ܗܽܘ ܐܝ̣ܬܰܘܗܝ ܗܰܘ ܕܰܢܦܰܠ. ܘܰܡܩܰܒܠܺܝܢ ܒܢܰܝ̈ܢܳܫܳܐ ܫܰܦܝܽܘܬܳܐ ܘܢܰܩܕܽܘܬܳܐ ܕܚܰܝ̈ܐ ܡܰܠܐܟܳܝ̈ܐ. ܐܝܟܢ ܠܐ ܢܶܥܠܽܘܒ ܒܗܽܘܢ ܬܶܗܪܳܐ ܕܫܽܘܚܠܳܦ̈ܐ ܕܚܰܝ̈ܐ ܐܰܪ̈ܺܝܟܶܐ ܕܩܰܒܶܠܘ. ܘܡܶܛܠ ܗܳܠܝܢ ܐܡ̣ܪ ܢܒܺܝܐ ܕܰܡܫܰܕܰܪ ܐܰܢܬ ܪܽܘܚܳܟ ܘܡܶܬܒܪܶܝܢ. ܘܰܡܚܰܕܶܬ ܐܰܢܬ ܐܰܦܶܝ̈ܗ̇ ܕܰܐܪܥܳܐ. ܚܽܘܕܳܬܳܐ ܓܝܪ ܠܗܳܠܝܢ ܕܶܐܡܪܶܬ ܡܫܰܡܰܗ. ܗܢܘ ܕܝܢ ܕܠܐ ܡܶܬܚܰܒܠܺܝܢ. ܘܥܳܐܷܠ ܡܶܟܝ̣ܠ ܒܳܬܰܪ ܗܳܠܝܢ ܩܳܠܳܐ ܕܬܶܫܒܽܘܚܬܶܗ ܗܰܘ ܕܠܐ ܓܳܡܰܪ ܐܝܟ ܕܶܐܡܰܪ ܢܒܺܝܐ.
ܢܶܗܘܶܐ ܫܽܘܒܚܶܗ ܕܡܳܪܝܳܐ ܠܥܳܠܰܡ. ܘܢܶܚܕܶܐ ܡܳܪܝܳܐ ܒܰܥܒܳܕܰܘ̈ܗܝ. ܘܬܘܒ ܠܐ ܡܰܡܪܚܺܝܢ ܡܳܪ̈ܽܘܕܶܐ ܠܽܘܩܒܰܠ ܫܽܘܒܚܳܐ ܕܰܐܠܗܐ ܘܠܐ ܪܳܗܶܛ ܛܰܪܟܳܢܳܐ ܠܡܶܚܛܰܦ ܠܗ ܫܽܘܒܚܳܐ ܡܶܢ ܒܢܰܝ̈ܢܳܫܳܐ. ܘܠܐ ܩܳܛܰܥ ܘܡܰܘܦܶܐ ܫܽܘܒܚܳܐ ܡܶܢ ܦܽܘܡܳܐ ܒܢܱ̈ܝ ܓܢܽܘܢܳܐ. ܘܠܐ ܕܳܝܠܺܝܢ ܙܰܘ̈ܥܶܐ ܡܰܚܛܝܴ̈ܢܶܐ ܒܢܰܦ̈ܫܳܬܳܐ ܕܩܰܕܺܝ̈ܫܶܐ. ܘܠܐ ܒܢܱ̈ܝ ܐܰܠܽܘܗܺܝܡ ܢܳܚܬܝ̣ܢ ܡܶܢ ܛܽܘܪ̈ܶܐ ܩܰܕܺܝܫܳܐ ܠܰܡܙܰܢܳܝܽܘ ܒܰܒܢܴ̈ܬ ܩܳܐܷܝܢ. ܡܶܛܠܗܳܕܐ ܠܐ ܡܶܬܬܘܶܐ ܡܳܪܝܳܐ ܒܰܒܪܺܝܬܳܐ ܗܳܕܐ ܚܕܰܬܳܐ ܐܠܐ ܚܳܕܶܐ ܒܰܥܒܳܕܰܘ̈ܗܝ. ܘܬܘܒ ܠܐ ܐܡ̇ܪ ܕܶܐܬܬܘܺܝܬ ܕܥܶܒܕܶܬ ܠܳܐܕܳܡ ܒܰܐܪܥܳܐ ܐܝܟ ܩܰܕܡܳܝܬܳܐ. ܘܠܐ ܥܳܐܷܠ ܩܕܳܡܰܘܘܗܝ ܩܶܨܳܐ ܕܟܽܠܒܣܰܪ. ܘܠܐ ܐܡ̇ܪ ܐܶܥܛܶܐ ܠܰܒܢܰܝ̈ܢܳܫܳܐ ܡܶܢ ܐܰܦܰܝ̈ ܐܰܪܥܳܐ ܡܶܛܠ ܕܶܐܬܬܘܺܝܬ ܕܥܶܒܕܶܬ ܐܶܢܘܢ. ܐܠܐ ܚܳܕܶܐ ܒܗܽܘܢ. ܘܠܐ ܬܘܒ ܡܕܰܠܰܚ ܚܶܘܝܳܐ ܠܺܝܛܳܐ ܠܰܟܝܳܢܳܐ ܫܰܦܝܳܐ ܕܡܶܬܒܪܶܐ ܬܶܢܝܳܢܽܘܬ ܠܚܰܝ̈ܐ ܚܰܕ̈ܬܶܐ. ܘܒܳܬܰܪ ܗܳܠܝܢ ܐܡ̇ܪ ܢܒܺܝܐ܆ ܡܶܢ ܒܳܬܰܪ ܕܚܳܕܶܐ ܡܳܪܝܳܐ ܒܰܥܒܳܕܰܘ̈ܗܝ܆
ܕܚܳܐܱܪ ܒܰܐܪܥܳܐ ܘܙܳܝܥܳܐ. ܘܟܳܐܷܐ ܒܛܽܘܪ̈ܶܐ ܘܬܳܢܺܝܢ. ܒܗܳܝ ܕܥܳܒܶܕ ܠܛܽܘܪ̈ܶܐ ܕܢܶܗܘܘܢ ܬܶܢܳܢܳܐ. ܡܶܛܠ ܗܰܘ ܝܰܩܕܳܢܳܐ ܕܢܽܘܪܳܐ ܕܰܡܦܰܫܰܪ ܠܗܽܘܢ. ܡܶܛܠ ܕܦܳܩܶܕ ܐܰܠܗܳܐ ܠܶܐܣܛܽܘܟܣܳܐ ܕܢܽܘܪܳܐ. ܘܡܶܬܩܰܫܶܐ ܠܚܰܪܬܳܐ ܘܣܳܓܶܐ. ܘܰܡܝܰܒܶܫ ܡܰܝܴ̈ܐ ܕܝܰܡܡ̈ܐ ܘܢܰܗܪ̈ܰܘܳܬܳܐ ܘܡܰܘܩܶܕ ܠܰܐܪܥܳܐ ܘܰܠܛܽܘܪ̈ܶܐ. ܐܰܝܟܰܢܐ ܕܟܽܠܡܶܕܡ ܐܝܟ ܚܰܒܬܳܐ ܢܶܬܐܶܟܶܠ ܡܶܢ ܢܽܘܪܳܐ. ܘܗܳܕܐ ܐܡ̇ܪ ܥܠ ܟܝܳܢ̈ܐ ܕܠܐ ܡܶܠܬܳܐ. ܘܥܰܠܗܳܕܐ ܐܡ̇ܪ ܢܒܺܝܐ ܕܟܳܐܷܐ ܒܛܽܘܪ̈ܶܐ ܘܬܳܢܺܝܢ. ܒܗܳܝ ܕܣܳܦܳܐ ܒܗܽܘܢ ܢܽܘܪܳܐ ܘܫܳܪܝܳܐ ܩܰܫܝܽܘܬܗܘܢ. ܘܥܳܒܕܳܐ ܠܗܘܢ ܕܢܶܫܬܰܚܠܦܽܘܢ ܠܬܶܢܳܢܳܐ ܒܰܟܐܳܬܶܗ ܕܡܳܪܝܳܐ. ܘܚܰܝ̈ܠܰܘܳܬܳܐ ܕܕܰܠܩܽܘܒܠܳܐ ܟܕ ܫܳܡܥܺܝܢ ܩܳܠܶܗ ܕܡܰܠܟܳܐ ܪܰܒܳܐ ܝܳܒܫܺܝܢ ܘܠܐ ܡܰܡܪܚܺܝܢ ܠܡܶܩܪܰܒ ܠܘܬ ܩܰܕܺܝܫܳܐ ܡܶܢ ܟܐܳܬܶܗ ܕܡܳܪܝܳܐ. ܘܕܳܚܶܩ ܠܗܘܢ ܡܶܢ ܩܕܳܡ ܦܰܪܨܽܘܦܶܗ ܒܚܶܡܬܳܐ ܘܰܡܫܰܕܰܪ ܠܗܘܢ ܠܢܽܘܪܳܐ ܘܰܠܬܰܫܢܺܝܩܳܐ ܕܰܠܥܳܠܰܡ. ܘܡܰܘܩܶܕ ܠܗܽܘܢ ܒܢܽܘܪܳܐ ܕܠܰܝܬ ܠܗ̇ ܓܽܘܡܪ̈ܶܐ. ܘܰܡܦܰܫܪܳܐ ܠܗܘܢ ܫܰܠܗܶܒܺܝܬܳܐ ܕܰܓܠܺܝܕܳܐ. ܘܡܶܛܠܗܳܕܐ ܐܡ̇ܪ ܢܒܺܝܐ ܕܟܳܐܷܐ ܒܛܽܘܪ̈ܶܐ ܘܬܳܢܺܝܢ. ܕܺܐܝܬܰܝܗܘܢ ܫܺܐܕ̈ܐ ܡܳܪ̈ܽܘܕܶܐ. ܒܗܳܠܝܢ ܛܽܘܪ̈ܶܐ ܕܠܐ ܢܰܦܫܳܐ ܠܐ ܟܳܐܶܐ. ܡܶܛܠ ܕܠܘ ܐܰܪܓܙܽܘܗܝ ܕܢܶܟܐܶܐ ܒܗܽܘܢ. ܘܗܳܝܕܶܝܢ ܡܫܰܒܚܺܝܢ ܩܰܕܺܝ̈ܫܐ ܠܡܳܪܝܳܐ ܒܚܰܝ̈ܐ ܕܰܡܩܰܒܠܺܝܢ ܐܝܟ ܕܶܐܡܰܪ ܢܒܺܝܐ.
ܐܶܫܰܒܰܚ ܠܡܳܪܝܳܐ ܒܚܰܝܱ̈ܝ ܘܶܐܙܰܡܰܪ ܠܰܐܠܳܗܝ ܥܰܕ ܩܰܝܳܡ ܐܢܳܐ. ܘܬܶܒܣܰܡ ܠܶܗ ܬܶܫܒܽܘܚܬܝ. ܘܶܐܢܳܐ ܐܶܚܕܶܐ ܒܡܳܪܝܳܐ. ܘܠܘ ܐܝܟ ܡܳܝܽܘ̈ܬܶܐ ܡܫܰܒܚܺܝܢ ܩܰܕܺܝ̈ܫܐ. ܘܠܘ ܒܦܰܓܪ̈ܶܐ ܡܶܬܚܰܒܠܳܢ̈ܐ ܡܙܰܡܪܺܝܢ. ܡܶܛܠ ܕܠܐ ܡܶܬܬܣܺܝܡܺܝܢ ܚܰܝ̈ܐ ܕܩܰܕܺܝ̈ܫܐ ܬܚܶܝܬ ܫܽܘܠܛܳܢܳܐ ܕܰܐܚܪ̈ܳܢܶܐ. ܐܠܐ ܒܰܩܢܽܘܡܳܐ ܡܶܬܝܰܗܒܺܝܢ ܚܰܝ̈ܐ ܠܰܒܢܱ̈ܝ ܡܰܠܟܽܘܬܳܐ. ܟܕ ܡܙܰܡܪܺܝܢ ܠܐܠܗܐ ܐܦ ܡܫܰܒܚܺܝܢ ܠܗ ܬܶܫܒܽܘܚܬܳܐ ܕܦܽܘܡܗܽܘܢ ܘܚܳܕܶܝܢ ܒܗ̇. ܘܠܐ ܬܘܒ ܡܶܬܟܰܡܪܺܝܢ. ܐܡ̇ܪ ܕܝܢ:
ܘܰܢܣܽܘܦܽܘܢ ܚܰܛܳܝ̈ܐ ܡܶܢ ܐܰܪܥܳܐ. ܘܥܰܘܴ̈ܠܶܐ ܠܐ ܢܶܫܬܰܚܪܽܘܢ ܒܳܗ̇. ܘܗܳܕܐ ܠܘ ܐܝܟ ܕܰܒܠܰܘܛܬܳܐ ܐܡ̣ܪ ܕܰܢܣܽܘܦܽܘܢ ܚܰܛܳܝ̈ܐ ܡܶܢ ܐܰܪܥܳܐ. ܟܕ ܡܶܬܐܰܠܨܺܝܢ ܒܬܰܫܢܺܝܩܳܐ ܕܰܠܥܳܠܰܡ. ܥܠ ܕܠܐ ܐܰܚܶܒܘ ܠܚܰܝ̈ܐ ܕܒܰܐܠܗܐ. ܬܰܡܳܢ ܡܶܬܪܰܓܪܓܺܝܢ ܠܚܰܝ̈ܐ ܐܠܗܝ̈ܐ ܟܕ ܫܳܐܠܺܝܢ ܪ̈ܰܚܡܶܐ ܒܰܬܘܳܬܳܐ ܘܠܐ ܡܶܬܥܢܶܝܢ. ܘܥܰܠܗܳܕܶܐ ܐܡ̣ܪ ܦܰܘܠܽܘܣ ܐܠܗܳܝܳܐ ܟܰܕ ܡܰܠܶܦ. ܕܢܶܗܘܶܐ ܐܰܠܗܳܐ ܟܽܠ ܒܟܽܠ (ܐ ܩܘܪ̈ܢܬܝܐ ܝܗ: ܟܚ). ܡܶܛܠ ܕܟܽܠ ܢܦܶܫ ܠܰܐܠܗܳܐ ܒܳܥܝܳܐ ܗܳܝܕܶܝܢ ܘܥܰܠܗܳܝ ܐܡ̇ܪ ܡܙܰܡܪܳܢܳܐ ܕܰܢܣܽܘܦܽܘܢ ܚܰܛܳܝ̈ܐ ܡܶܢ ܐܰܪܥܳܐ ܘܥܰܘܴ̈ܠܶܐ ܠܐ ܢܶܫܬܰܚܪܽܘܢ ܒܳܗ̇. ܡܶܛܠ ܕܡܶܬܒܰܛܠܳܐ ܐܳܦ ܡܰܘܦܝܳܐ ܚܛܺܝܬܳܐ. ܘܗܳܢܘܢ ܕܡܶܢܳܗ̇ ܡܶܫܬܰܡܗܺܝܢ. ܘܒܳܬܰܪ ܫܽܘܠܳܡܳܐ ܠܰܝܬ ܚܰܛܳܝ̈ܐ ܘܠܐ ܥܰܘܴ̈ܠܶܐ ܕܢܳܦܠܺܝܢ ܠܗܘܢ ܒܢܽܘܪܳܐ ܕܰܠܥܳܠܰܡ. ܘܰܢܒܺܝܐ ܥܳܒܰܕ ܫܽܘܠܳܡܳܐ ܠܬܶܫܒܽܘܚܬܶܗ ܕܰܒܦܶܬܓܳܡܳܐ ܗܰܘ ܕܫܰܪܺܝ ܒܶܗ ܟܕ ܡܫܰܠܶܡ ܟܕ ܐܡ̇ܪ:
ܒܰܪܶܟܝ ܢܰܦܫܝ ܠܡܳܪܝܳܐ. ܡܶܛܠ ܕܰܐܦܢܝܶܟܝ ܠܚܰܝ̈ܐ ܕܰܠܥܳܠܰܡ. ܘܩܰܕܡܳܝ̈ܐ ܕܝܰܗܒ ܠܶܟܝ ܒܦܰܪܕܰܝܣܳܐ. ܘܰܐܥܛܦܶܟܝ ܠܓܰܢܬܳܐ ܗܳܝ ܕܰܐܦܩܶܟܝ ܡܶܢܳܗ̇ ܚܶܘܝܳܐ ܒܰܥܒܳܪ ܦܽܘܩܕܳܢܳܐ. ܘܥܰܠܗܳܕܐ ܐܰܘܕܺܝ ܘܫܰܒܰܚ ܕܠܐ ܫܰܠܘܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܝ̣ܫܳܐ.
ܡܙܡܘܪܐ ܕܡܐܐ ܘܚܡܫܐ
ܥܰܠ ܬܶܕܡܪ̈ܳܬܳܐ ܕܰܥܒܰܕ ܐܰܠܳܗܳܐ ܠܘܳܬ ܐܰܒܳܗ̈ܬܳܐ. ܘܡܰܘܕܰܥ ܬܽܘܒ ܥܰܠ ܦܽܘܩܕܳܢܳܐ ܕܰܗܘܳܐ ܒܥܰܡܳܐ ܟܰܕ ܢܦܰܩ ܡܶܢ ܡܶܨܪܶܝܢ.
ܬܶܕܡܪ̈ܬܳܐ ܕܰܥܒܰܕ ܐܰܠܳܗܳܐ ܥܰܡ ܐܰܒܳܗ̈ܬܳܐ ܡܶܢ ܩܕܺܝܡ ܫܩܰܠ ܕܢܶܫܬܰܥܶܐ ܩܕܳܡ ܥܰܡܳܐ ܒܬܶܫܒܽܘܚܬܳܐ ܗܳܕܶܐ ܕܰܡܳܐܐ ܘܚܰܡܶܫ ܛܽܘܒܳܢܳܐ ܕܰܘܝܕ. ܘܗܶܢܶܝܢ ܗܳܠܝܢ ܟܕ ܐܶܬܩܰܝܰܡ ܡܰܠܟܳܐ ܒܚܶܒܪܽܘܢ ܥܠ ܫܰܒܛܳܐ ܕܒܶܝܬ ܝ̣ܗܽܘܕܳܐ. ܘܟܕ ܐܶܬܟܰܢܰܫܘ ܠܘܳܬܶܗ ܓܰܒܪ̈ܶܐ ܙܰܕܺܝ̈ܩܶܐ ܘܓܰܢܒܳܪ̈ܰܝ ܚܰܝܠܳܐ܆ ܡܦܺܝܣܺܝܢ ܗܘܰܘ ܠܶܗ ܡܶܢ ܒܳܬܰܪ ܕܡܺܝܬ ܫܳܐܘܳܠ ܕܢܰܡܠܶܟ ܥܠ ܫܰܒܛܳܐ ܕܒܶܝܬ ܝ̣ܗܽܘܕܳܐ ܗܰܘ ܕܩܰܪܺܝܒ ܗܘܳܐ ܠܗ ܝܰܬܺܝܪ ܠܕܰܘܝܕ ܡܶܛܠ ܓܶܢܣܳܐ. ܘܡܶܛܠ ܕܦܳܫܘ ܗܘܰܘ ܚܕܰܥܣܰܪ ܫܰܒ̈ܛܶܐ ܒܳܬܰܪ ܐܰܫܒܫܽܘܠ ܒܰܪ ܫܳܐܘܳܠ܆ ܘܺܐܝܬ ܗܘܳܐ ܐܢܴ̈ܫܺܝܢ ܒܫܰܒܛܳܐ ܕܺܝܗܽܘܕܳܐ ܕܡܶܬܡܰܚܠܺܝܢ ܗܘܰܘ ܘܡܶܬܦܰܠܓܺܝܢ ܗܘܰܘ ܥܠ ܡܰܠܟܽܘܬܶܗ ܕܕܰܘܝܕ. ܡܶܛܠ ܙܥܽܘܪܽܘܬ ܥܰܡܳܐ ܡܫܰܪܶܐ ܗܘܳܐ ܕܰܘܝܕ ܠܰܡܬܰܢܳܝܽܘ ܩܕܳܡܰܝܗܽܘܢ ܟܽܠܗܝܢ ܬܶܕܡܪ̈ܳܬܶܗ ܕܰܐܠܗܳܐ ܘܪܰܘܪ̈ܒܳܬܶܗ ܕܰܥܒܰܕ ܩܕܳܡ ܥܰܡܳܐ ܟܕ ܡܚܰܘܶܐ ܒܟܽܠܙܒܰܢ ܒܰܙܥܽܘܪ̈ܶܐ ܘܰܒܨܺܝܪ̈ܶܐ ܡܶܬܢܰܨܰܚ ܐܠܗܐ. ܘܰܕܠܐ ܥܶܒܪܰܬ ܙܥܽܘܪܽܘܬܶܗ ܕܥܰܡܳܐ. ܕܠܐ ܢܺܐܪܰܬ ܐܰܪ̈ܥܳܬܳܐ ܕܫܰܒܥܳܐ ܥܰܡܡ̈ܐ ܕܰܟܢܰܥܢܳܝ̈ܐ. ܘܡܶܛܠ ܗܳܢܐ ܠܥܺܝܢ ܐܰܕܽܘܙܦܳܪ ܘܡܺܝܟܳܐܝܶܠ ܗܳܢܘܢ ܕܰܗܘܰܘ ܪ̈ܺܝܫܶܐ ܩܰܕܡܳܝ̈ܐ ܕܰܐܝܠܶܝܢ ܕܰܐܡܠܟܽܘܗܝ ܟܕ ܐܰܡܺܝܢܺܝܢ ܥܰܠ ܦܳܬܽܘܪܶܗ ܘܡܶܬܒܰܣܡܺܝܢ ܥܰܡܶܗ. ܡܙܰܡܰܪ ܗܘܳܐ ܘܳܐܡܰܪ ܩܕܳܡܰܝܗܘܢ:
ܐܰܘܕܰܘ ܠܡܳܪܝܳܐ ܘܰܩܪܰܘ ܫܡܶܗ. ܘܚܰܘܰܘ ܒܥܰܡ̈ܡܶܐ ܥܒܳܕܰܘ̈ܗܝ. ܫܰܒܚܽܘܗܝ ܘܰܙܡܰܪܘ ܠܶܗ. ܘܶܐܫܬܰܥܘ ܟܽܠܗܶܝܢ ܬܶܕܡܪ̈ܳܬܶܗ. ܘܫܰܒܰܚܘ ܠܰܫܡܳܐ ܕܩܽܘܕܫܶܗ. ܒܗܳܠܝܢ ܡܰܠܶܦ ܗܘܳܐ ܠܗܽܘܢ ܕܠܐ ܢܶܬܡܰܚܠܽܘܢ ܪ̈ܶܥܝܳܢܰܝܗܘܢ. ܐܠܐ ܢܰܘܕܽܘܢ ܠܡܳܪܝܳܐ ܘܢܶܩܪܽܘܢ ܫܡܶܗ. ܘܰܢܚܰܘܽܘܢ ܥܒܴ̈ܕܶܐ ܕܓܰܢܒܳܪܽܘܬܶܗ ܒܥܰܡܡ̈ܐ. ܘܢܶܬܠܽܘܢ ܬܶܕܡܪ̈ܳܬܳܐ ܕܰܥܒܰܕ ܟܕ ܦܪܰܩ ܐܢܘܢ ܡܶܢ ܡܶܨܪܶܝܢ. ܐܳܦ ܕܰܐܝܟܰܢܳܐ ܝܒܶܫ ܝܰܡܳܐ ܩܕܳܡܰܝܗܘܢ ܟܕ ܥܳܒܪܺܝܢ ܒܶܗ ܐܰܒܳܗܰܝ̈ܗܘܢ. ܘܕܰܐܝܟܰܢܳܐ ܒܰܝܢܳܬ ܓ̈ܰܠܠܶܐ ܕܝܰܡܳܐ ܟܕ ܙܩܺܝܦܺܝܢ ܣܺܝܡܺܝܢ ܡܰܝܴ̈ܐ ܐܝܟ ܕܰܒܙܶܩ̈ܐ. ܗܳܝ ܟܢܽܘܫܬܳܐ ܡܶܬܦܰܪܩܳܐ ܗܘܳܬ ܡܶܢ ܦܶܪܥܽܘܢ. ܢܚܰܘܽܘܢ ܬܘܒ ܐܝܟ ܒܰܝܬܳܝ̈ܐ ܕܒܶܝܬ ܐܰܕܽܘܢܰܝ. ܐܳܦ ܬܶܕܡܽܘܪܬܳܐ ܕܰܗܘܳܬ ܒܥܰܡܽܘܕܳܐ ܕܢܽܘܪܳܐ ܗܰܘ ܕܰܩܕܳܡܰܝܗܽܘܢ. ܘܡܰܢܗܰܪ ܗܘܳܐ ܠܡܰܫܪܺܝܬܳܐ ܕܺܝܣܪܳܐܝܠ. ܘܥܠ ܦܶܪܥܽܘܢ ܘܥܠ ܡܶܨܪ̈ܳܝܶܐ ܡܰܚܫܶܟ ܗܘܳܐ ܘܰܡܥܰܡܶܛ. ܘܠܐ ܐܶܠܰܨ ܠܰܒܢܱ̈ܝ ܝ̣ܣܪܳܐܝܠ ܘܠܐ ܐܰܥܺܝܩ ܐܶܢܘܢ. ܐܠܐ ܐܝܟ ܕܠܰܒܢܰܝܴ̈ܐ ܡܚܰܕܶܐ ܗܘܳܐ ܠܗܽܘܢ ܡܶܛܠ ܕܢܶܚܕܶܐ ܠܶܒܗܽܘܢ ܘܢܶܪܘܰܙ ܐܝܟ ܕܶܐܡܰܪ ܢܒܺܝܐ:
ܢܶܚܕܶܐ ܠܶܒܗܽܘܢ ܕܰܐܝܠܶܝܢ ܕܒܳܥܶܝܢ ܠܡܳܪܝܳܐ. ܒܥܰܘ ܠܡܳܪܝܳܐ ܘܶܐܬܚܰܝܰܠܘ. ܘܰܒܥܰܘ ܐܰܦܰܘ̈ܗܝ ܒܟܽܠܙܒܰܢ. ܘܶܐܬܕܟܰܪ ܬܶܕܡܪ̈ܳܬܶܗ ܕܰܥܒܰܕ. ܬܶܕܡܪ̈ܳܬܶܗ ܘܕܺܝܢܳܐ ܕܦܽܘܡܶܗ. ܙܰܪܥܶܗ ܕܰܐܒܪܳܗܳܡ ܥܰܒܕܶܗ ܘܰܒܢܱ̈ܝ ܝܰܥܩܽܘܒ ܓܒܰܘ̈ܗܝ. ܐܢ ܠܡ ܡܶܬܕܰܟܪܺܝܢ ܐܢܬܽܘܢ ܬܶܕܡܪ̈ܳܬܳܐ ܕܰܥܒܰܕ ܠܐ ܙܳܥܪܳܐ ܡܰܠܟܽܘܬܳܐ ܕܥܠ ܚܰܕ ܫܰܒܛܳܐ ܒܥܰܝ̈ܢܶܐ ܕܺܝܠܟܽܘܢ ܡܶܛܠ ܕܠܘ ܒܣܰܝܦܳܐ ܘܰܒܩܶܫܬܳܐ ܦܳܪܶܩ ܡܳܪܝܳܐ. ܘܠܘ ܓܝܪ ܒܣܰܝ̈ܦܶܐ ܘܰܒܩܶܫ̈ܬܳܬܳܐ ܥܩܰܪ ܡܳܪܝܳܐ ܫܽܘܪ̈ܶܐ ܪ̈ܳܡܶܐ ܕܺܐܝܪܺܝܚܽܘ. ܘܠܘ ܒܣܰܓܺܝܐܘ̣ܬ ܥܰܡܳܐ ܦܪܰܩ ܡܳܪܝܳܐ ܠܓܶܕܥܽܘܢ ܡܶܢ ܚܰܪܒܳܐ ܕܡܶܕܝܰܢܳܝ̈ܐ.
ܘܗܳܫܐ ܗܽܘܝܽܘ ܡܳܪܝܳܐ ܐܰܠܳܗܰܢ ܕܰܒܟܽܠܗ̇ ܐܰܪܥܳܐ ܕܺܝܢܰܘ̈ܗܝ. ܘܡܶܬܕܟܰܪ ܠܥܳܠܰܡ ܩܝܳܡܶܗ. ܡܶܠܬܳܐ ܕܦܰܩܶܕ ܠܳܐܠܶܦ ܕܳܪ̈ܺܝܢ. ܘܗܳܫܳܐ ܢܶܪܕܽܘܦ ܚܰܕ ܡܶܢܟܽܘܢ ܠܰܐܠܦܳܐ. ܡ̣ܛܠ ܕܡܳܪܝܳܐ ܐܰܠܳܗܰܢ ܥܰܡܟܽܘܢ ܗܘ. ܗܳܕܐ ܓܝܪ ܡܶܠܬܳܐ ܗܳܝ ܕܩܳܝܡܳܐ ܥܰܠܗܳܝ ܬܘܒ ܐܰܡܺܝܪܳܐ܆ ܕܠܐ ܢܰܣܢܩܳܟ ܥܰܠ ܣܰܓܺܝܐܘ̣ܬ ܦܽܘܪܩܳܢܳܐ ܕܰܐܝܟ ܗܳܟܰܢܐ ܐܝ̣ܬܰܘܗܝ ܦܽܘܪܩܳܢܶܗ ܥܡ ܕܳܚ̈ܠܰܘܗܝ.
ܕܰܐܩܺܝܡ ܩܝܳܡܶܗ ܥܰܡ ܐܰܒܪܳܗܳܡ. ܘܡܰܘ̈ܡܳܬܶܗ ܥܡ ܐܺܝܣܚܳܩ. ܘܣܳܗܕܽܘܬܶܗ ܥܰܡ ܝܰܥܩܽܘܒ. ܩܝܳܡܳܐ ܠܺܝܣܪܳܐܝܠ ܠܥܳܠܰܡ. ܘܶܐܡܰܪ ܕܠܳܟ ܐܶܬܠܺܝܗ̇ ܐܰܪܥܳܐ ܕܰܟܢܰܥܰܢ. ܚܰܒ̈ܠܶܐ ܕܝܳܪܬܽܘܬܗܽܘܢ. ܟܰܕ ܙܥܽܘܪܺܝܢ ܗܘܰܝܬܽܘܢ ܒܡܶܢܝܳܢܳܐ ܘܩܰܠܺܝܠ ܗܘܰܝܬܽܘܢ ܘܥܳܡܽܘܪ̈ܶܐ ܗܘܰܝܬܽܘܢ ܒܳܗ̇. ܚܙܰܘ ܬܰܚܘ̈ܝܳܬܳܐ ܗܳܠܝܢ ܟܕ ܡܠܰܒܶܒ ܗܘܳܐ ܘܰܡܚܰܝܶܠ ܠܰܐܝܠܝܢ ܕܰܡܚܺܝܠܺܝܢ ܗܘܰܘ ܟܕ ܡܚܰܘܶܐ. ܕܠܐ ܗܘܳܐ ܒܥܰܡܳܐ ܣܰܓܺܝܐܳܐ ܝܰܗܒ ܠܩܰܕܡܳܝ̈ܐ ܐܰܪܥܳܐ ܕܰܟܢܰܥܢܳܝ̈ܐ. ܐܠܐ ܡܶܛܠ ܩܝܳܡܶܗ ܘܡܰܘ̈ܡܳܬܶܗ ܫܰܡܠܺܝ ܫܽܘܘܕܳܝܶܗ. ܘܡܶܛܠ ܣܳܗܕܽܘܬܶܗ ܫܰܪܰܪ ܡܽܘܠܟܳܢܶܗ. ܘܠܐ ܬܶܟܣܰܬ ܘܩܶܠܰܬ ܙܥܽܘܪܽܘܬ ܡܶܢܝܳܢܗܘܢ. ܕܠܐ ܢܩܽܘܡܽܘܢ ܒܚܶܒ̈ܠܶܐ ܘܰܒܝܳܪܬܽܘܬܳܐ ܕܰܐܪܥܳܐ ܕܶܐܬܡܰܠܟܰܬ ܠܰܐܒܳܗ̈ܬܳܐ. ܟܕ ܐܝ̣ܕܳܐ ܕܰܐܠܗܳܐ ܚܳܪܒܳܐ ܗܘܳܬ ܥܰܡ̈ܡܶܐ ܘܡܰܠܟ̈ܐ ܥܰܫܺܝ̈ܢܶܐ ܡܶܢ ܩܕܳܡܰܝܗܘܢ.
ܘܠܐ ܫܒܰܩ ܗܘܳܐ ܠܒܰܪܢܳܫܳܐ ܕܢܶܛܠܽܘܡ ܐܶܢܘܢ. ܘܠܐ ܐܰܗܡܺܝ ܡܶܢܗܘܢ ܕܰܢܥܺܝܩ ܐܶܢܘܢ ܒܥܶܠܕܒܳܒܳܐ. ܐܠܐ ܟܕ ܚܳܐܱܪ ܒܚܽܘܒܳܐ ܕܰܐܒܳܗܰܝ̈ܗܘܢ.
ܐܰܟܶܣ ܡܰܠܟ̈ܐ ܥܠ ܐܰܦܰܝ̈ܗܘܢ. ܘܕܳܢ ܥܰܡ ܡܕܰܒܪ̈ܳܢܶܐ ܕܥܰܡܡ̈ܐ ܡܶܛܠܳܬܗܘܢ. ܟܕ ܡܰܟܶܣ ܗܘܳܐ ܠܗ ܠܰܐܒܺܝܡܰܠܰܟ ܡܶܛܠ ܣܰܪܳܐ ܐܰܢܬܬܶܗ ܕܰܐܒܪܳܗܳܡ. ܘܠܐ ܫܳܒܶܩ ܗܘܳܐ ܠܗ ܠܡܶܩܪܰܒ ܠܳܗ̇. ܐܠܐ ܟܕ ܕܳܐܶܢ ܠܶܗ ܕܗܳܐ ܡܡܺܝܬ ܐܢܳܐ ܠܳܟ ܥܠ ܐܰܦܰܝ̈ ܐܰܢܬܬܳܐ ܕܰܕܒܰܪܬ ܡܶܢ ܓܰܒܪܳܗ̇. ܐܦ ܠܦܶܪܥܽܘܢ ܬܽܘܒ ܒܺܐܝ̈ܕܰܝ ܡܽܘܫܶܐ ܡܰܟܶܣ ܗܘܳܐ. ܡܶܛܠ ܒܢܱ̈ܝ ܝ̣ܣܪܳܐܝܠ܆ ܘܰܐܝܟ ܕܟܽܠܗܽܘܢ ܗܘܰܘ ܢܒܺܝ̈ܐ ܘܰܡܫܺܝܚ̈ܐ ܡܡܰܠܶܠ ܗܘܳܐ ܚܠܳܦܰܝܗܘܢ.
ܕܠܐ ܠܡ ܬܶܬܩܰܪܒܽܘܢ ܠܰܢܒܺܝܱ̈ܝ ܘܠܰܡܫܺܝܚܰܝ̈ܝ ܠܐ ܬܰܒܶܐܫܽܘܢ. ܒܶܪܝ ܠܡ ܒܽܘܟܪܝ ܝ̣ܣܪܳܐܝܠ. ܐܡ̇ܪ ܗܘܳܐ ܐܠܗܐ ܠܘܳܬ ܦܶܪܥܽܘܢ܆ ܐܶܡܪܶܬ ܠܟ ܕܰܬܫܰܕܰܪ ܠܒܶܪܝ. ܘܶܐܢ ܠܐ ܨܳܒܶܐ ܐܰܢܬ ܠܰܡܫܰܕܳܪܽܘ ܠܒܪܝ܆ ܗܳܐ ܩܳܛܠ ܐܢܳܐ ܠܰܒܪܳܟ ܒܽܘܟܪܳܟ (ܡܦܩܢܐ ܕ: ܟܒ-ܟܓ). ܒܳܬܰܪ ܗܳܠܝܢ ܡܳܢܐ ܐܡ̇ܪ ܡܙܰܡܪܳܢܳܐ:
ܘܰܩܪܳܐ ܟܰܦܢܳܐ ܠܰܐܪܥܳܐ ܘܟܽܠܶܗ ܩܰܢܝܳܐ ܕܰܥܒܽܘܪܗܽܘܢ ܬܰܒܰܪ. ܗܳܕܐ ܥܠ ܗܰܘ ܟܰܦܢܳܐ ܕܰܗܘܳܐ ܒܝܰܘ̈ܡܰܝ ܦܶܪܥܽܘܢ ܟܕ ܦܫܰܪ ܠܶܗ ܝܰܘܣܶܦ ܚܶܠܡܰܘ̈ܗܝ. ܘܟܕ ܟܰܦܢܳܐ ܒܰܩܪܺܝܬܳܐ ܕܰܐܠܗܐ ܐܶܬܳܐ ܥܰܠ ܐܰܪܥܳܐ. ܩܰܕܶܡ ܫܰܕܪܶܗ ܠܝܰܘܣܶܦ ܠܰܐܪܥܳܐ ܕܡܶܨܪܶܝܢ. ܩܕܳܡ ܪ̈ܺܝܫܰܝ ܫܰܒ̈ܛܶܐ ܕܰܢܛܰܝܶܒ ܠܗܽܘܢ ܬܽܘܪܣܳܝܳܐ ܒܙܰܒܢܳܐ ܕܽܐܘܠܨܳܢܳܐ. ܘܡܶܛܠܗܳܢܐ ܐܳܦܶܢ ܒܰܚܣܳܡܳܐ ܡܶܙܕܰܒܰܢ ܗܘܳܐ ܝܰܘܣܶܦ ܒܰܚܣܳܡܳܐ ܒܨܶܒܝܳܢܳܐ ܒܺܝܫܳܐ ܡܶܢ ܐܰܚܰܘ̈ܗܝ. ܐܠܐ ܣܽܘܥܪܳܢܳܐ ܕܰܐܠܗܳܐ ܗܘܳܐ. ܕܺܝܠܗܘܢ ܓܝܪ ܐܝ̣ܬܶܝܗ̇ ܗܘܳܬ ܕܢܶܚܣܡܽܘܢ ܐܦ ܕܰܢܙܰܒܢܽܘܢ. ܕܰܐܠܗܳܐ ܕܝܢ ܗܳܝ ܕܠܐ ܫܒܰܩ ܠܰܚܣܳܡܳܐ ܕܢܰܒܶܐܫ ܐܝܟ ܨܶܒܝܳܢܶܗ. ܘܡܶܛܠ ܗܳܢܐ ܕܺܝܠܗ ܗܘܳܐ ܨܶܒܝܳܢܳܐ ܕܢܶܫܬܰܕܰܪ ܝܰܘܣܶܦ. ܘܥܠ ܗܳܝ ܐܡ̣ܪ ܢܒܺܝܐ.
ܕܫܰܕܰܪ ܩܕܳܡܰܝܗܽܘܢ ܓܰܒܪܳܐ. ܕܢܰܬܩܶܢ ܠܗܽܘܢ ܬܽܘܪܣܳܝܳܐ. ܘܢܶܬܺܝܕܰܥ ܒܰܐܪܥܳܐ ܩܕܳܡ ܡܰܥܰܠܬܶܗ ܕܥܰܡܳܐ. ܘܗܳܕܐ ܠܘ ܡܶܢ ܪܰܒܽܘܬܳܐ ܠܡ ܡܫܰܪܝܳܐ ܗܘܳܬ ܘܠܐ ܒܺܐܝܩܳܪܳܐ. ܐܠܐ ܟܕ ܒܰܐܣܽܘܪ̈ܶܐ ܥܳܐܷܠ ܗܘܳܐ ܠܡܶܨܪܶܝܢ. ܠܘܰܥܕܳܐ ܕܰܡܛܰܝܒܺܝܢ ܐܰܒܳܗ̈ܬܳܐ ܕܢܶܥܠܽܘܢ ܠܰܐܬܪܳܐ. ܡܶܢ ܥܰܒܕܽܘܬܳܐ ܡܶܫܬܪܶܐ ܘܚܺܐܪܽܘܬܳܐ ܩܳܢܶܐ. ܠܽܘܩܕܰܡ ܕܶܝܢ ܥܰܒܕܳܐ ܗܘܳܐ ܐܝܟ ܕܶܐܡܰܪ. ܢܒܺܝܐ.
ܘܰܠܥܰܒܕܽܘܬܳܐ ܐܶܙܕܰܒܰܢ ܝܰܘܣܶܦ. ܘܶܐܣܰܪܘ ܒܣܽܘ̈ܛܡܶܐ ܪ̈ܶܓܠܰܘܗܝ. ܘܰܒܦܰܪ̈ܙܠܶܐ ܥܶܠܰܬ ܢܰܦܫܶܗ ܥܕܰܡܳܐ ܕܫܶܪܰܬ ܡܶܠܬܶܗ. ܠܘ ܡܶܠܬܶܗ ܕܝܰܘܣܶܦ ܕܫܶܪܰܬ ܐܠܐ ܡܶܠܬܶܗ ܕܰܐܠܗܐ ܫܶܪܰܬ. ܡܶܛܠ ܕܰܦܣܺܝܩ ܗܘܳܐ ܕܢܺܐܬܶܐ ܟܰܦܢܳܐ ܠܰܐܪܥܳܐ. ܝܰܘܣܶܦ ܓܶܝܪ ܟܕ ܦܫܰܪ ܚܶܠܡ̈ܐ ܠܫܳܩܝܳܐ ܐܦ ܠܢܰܚܬܽܘܡܳܐ ܒܓܰܘ ܒܶܝܬ ܐܰܣܽܘܪ̈ܶܐ܆ ܠܰܬܠܳܬܳܐ ܝܰܘ̈ܡܺܝܢ ܫܶܪܰܬ ܡܶܠܬܶܗ. ܒܪܰܡ ܠܐ ܢܦܰܩ ܗܳܝܕܶܝܢ ܡܶܢ ܒܶܝܬ ܐܰܣܺܝܪ̈ܶܐ܆ ܐܠܐ ܟܕ ܚܠܰܡ ܦܶܪܥܽܘܢ ܚܶܠܡܳܐ ܕܥܠ ܟܰܦܢܳܐ ܘܣܰܒܥܳܐ. ܗܳܝܕܶܝܢ ܢܦܰܩ ܠܰܥܒܳܕܳܐ ܗܳܝ ܕܶܐܡܰܪ ܢܒܺܝܳܐ.
ܕܡܺܐܡܪܶܗ ܕܡܳܪܝܳܐ ܒܩܳܝܗܝ. ܘܫܰܕܰܪ ܡܰܠܟܳܐ ܘܰܫܪܳܝܗܝ. ܘܥܰܒܕܶܗ ܫܰܠܺܝܛܳܐ ܥܰܠ ܥܰܡܶܗ. ܘܡܳܪܳܐ ܥܰܠ ܒܰܝܬܶܗ ܘܫܰܠܺܝܛܳܐ ܥܰܠ ܟܽܠܶܗ ܩܶܢܝܳܢܶܗ. ܘܡܶܟܺܝܠ ܠܘ ܥܰܒܕܽܘܬܳܐ ܦܳܠܰܚ ܗܘܳܐ. ܘܠܘ ܐܝܟ ܡܫܰܥܒܕܳܐ ܣܳܥܰܪ ܗܘܳܐ. ܐܠܐ ܐܝܟ ܬܪܰܝܳܢܳܐ ܕܡܰܠܟܳܐ ܒܡܰܨܠܚܳܢܽܘܬܳܐ ܕܡܶܢ ܐܠܗܐ ܠܰܐܪܥܳܐ ܕܡܶܨܪܶܝܢ ܡܕܰܒܰܪ ܗܘܳܐ. ܘܰܠܗܳܕܐ ܪܰܒܽܘܬܳܐ ܠܘ ܒܰܕܪܳܥܳܐ ܘܰܒܚܰܝܠܳܐ ܕܺܝܠܗ ܐܶܬܳܬ܆ ܐܠܐ ܡܶܛܠ ܕܺܐܝܬܰܘܗܝ ܗܘܳܐ ܓܰܒܪܳܐ ܟܺܐܢܳܐ ܘܡܶܢ ܙܰܪܥܳܐ ܕܰܐܒܳܗ̈ܬܳܐ ܠܐܺܝܩܳܪ̈ܶܐ ܡܰܠܟܳܝ̈ܐ ܡܛܳܐ. ܘܡܶܢ ܢܺܝܪܳܐ ܕܥܰܒܕܽܘܬܳܐ ܐܶܬܚܰܪܰܪ ܘܶܐܬܢܣܶܒ ܕܶܐܬܝ̣ܕܰܥ ܕܡܶܢ ܙܰܪܥܶܗ ܕܰܐܒܪܳܗܳܡ ܗܘ.
ܕܢܶܪܕܶܐ ܠܫܰܠܺܝܛܳܢ̈ܐ ܐܝܟ ܕܨܳܒܶܐ ܘܰܠܩܰܫܺܝ̈ܫܶܐ ܢܚܰܟܶܡ. ܘܟܕ ܛܰܠܝܳܐ ܥܠܰܝܡܳܐ ܐܝ̣ܬܰܘܗܝ ܗܘܳܐ. ܠܣܳܒ̈ܐ ܘܰܠܩܰܫܺܝ̈ܫܶܐ ܕܰܐܪܥܳܐ ܕܡܶܨܪܶܝܢ ܡܚܰܟܶܡ ܗܘܳܐ ܘܰܡܟܰܘܶܢ. ܘܡܰܠܶܦ ܗܘܳܐ ܟܺܐܢܽܘܬܳܐ ܘܢܰܟܦܽܘܬܳܐ ܥܠ ܟܠ ܫܰܠܺܝܛܳܐ. ܘܰܡܝܰܬܪܽܘܬܳܐ ܠܟܽܠ ܦܳܩܕܳܐ ܐܦܢ ܐܝ̣ܬܰܝܗܘܢ ܥܠܰܝ̈ܡܶܐ ܒܗܽܘܢ ܡܶܫܬܰܟܚܳܐ. ܕܛܳܒ ܗܽܘ ܛܰܠܝܳܐ ܕܚܰܟܺܝܡ܇ ܡܶܢ ܡܰܠܟܳܐ ܣܳܒܳܐ ܕܰܣܟܶܠ. ܕܠܳܐ ܝܳܕܰܥ ܠܡܶܙܕܰܗܳܪܽܘ (ܩܘܗܠܬ ܕ: ܝܓ). ܗܰܘ ܓܝܪ ܕܰܣܐܷܒ ܒܰܥܒܴ̈ܕܶܐ ܒܺܝ̈ܫܶܐ ܟܺܐܢܳܐܝ̣ܬ ܡܶܬܟܣܶܣ ܡܶܢ ܛܰܠܝܳܐ ܢܰܟܦܳܐ. ܐܰܟܡܳܐ ܕܳܐܦ ܩܰܫܺܝ̈ܫܶܐ ܣܰܟ̈ܠܶܐ ܕܥܰܡܳܐ ܕܰܫܪܰܥܘ ܡܶܢ ܢܰܟܦܽܘܬܳܐ ܒܰܚܙܳܬܳܗ̇ ܕܫܽܘܫܰܢ ܚܳܬܶܗ ܕܶܐܪܰܡܝܳܐ ܒܰܪ ܚܶܠܰܩܝܳܐ. ܡܶܬܬܕܺܝܢܺܝܢ ܗܰܘܘ ܡܶܢ ܕܳܢܺܝܐܝܠ ܢܒܺܝܐ ܛܰܠܝܳܐ ܪܚܺܝܡܳܐ ܗܰܘ ܕܰܒܛܰܝܒܽܘܬܶܗ ܥܒܰܪ ܠܣܳܒ̈ܐ ܦܰܚ̈ܙܶܐ ܒܚܶܟܡܬܶܗ. ܡܶܛܠ ܫܽܘܦܪܳܐ ܪܓܺܝܓܳܐ ܕܢܰܟܦܽܘܬܶܗ. ܘܡܶܢ ܒܳܬܰܪ ܕܩܳܡ ܝܰܘܣܶܦ ܡܶܛܠ ܢܰܟܦܽܘܬܶܗ ܫܰܠܺܝܛܳܐ ܥܰܠ ܐܰܪܥܳܐ ܕܡܶܨܪܶܝܢ. ܘܰܥܒܰܪ ܣܰܒܥܳܐ ܘܶܐܬܳܐ ܟܰܦܢܳܐ. ܗܳܝܕܝܢ ܐܝܟ ܕܡܶܢ ܐܽܘܠܨܳܢܳܐ ܣܰܓܺܝܐܳܐ.
ܥܠ ܗܘܳܐ ܝ̣ܣܪܳܐܝܠ ܠܡܶܨܪܶܝܢ. ܘܝܰܥܩܽܘܒ ܥܡܰܪ ܒܡܰܫܟܢܳܐ ܕܚܰܡ. ܫܰܦܺܝܪ ܡܰܘܕܥܳܐ ܗܰܘ ܓܶܝܪ ܕܰܒܨܶܒܝܳܢܶܗ ܥܳܐܷܠ ܠܡܶܨܪܶܝܢ ܡܶܣܬܰܟܠܳܢܺܝܬܳܐ ܡܶܢܳܗ̇ ܐܝ̣ܬܰܘܗܝ ܫܽܘܥܒܳܕܶܗ ܒܰܐܪܥܳܐ ܕܰܚܛܺܝܬܳܐ. ܘܗܳܢܐ ܠܐ ܢܳܦܶܩ ܡܶܢ ܐܰܪܥܳܐ ܕܡܶܨܪܶܝܢ ܘܡܶܢ ܡܰܫܟܢܳܐ ܕܚܰܡ. ܐܶܠܐ ܢܶܚܬܰܬ ܒܳܬܪܶܗ ܐܝ̣ܕܳܐ ܚܰܝܠܬܳܢܺܝܬܳܐ ܕܡܳܪܝܳܐ. ܘܰܦܪܰܩܬܶܗ ܒܚܰܝ̈ܠܶܐ ܘܒܳܐܬܘܴ̈ܬܳܐ ܘܰܥܕܰܡܳܐ ܕܩܶܛܠܰܬ ܘܫܰܥܒܕܰܬ ܠܰܐܣܽܘܪ̈ܰܘܗܝ. ܠܐ ܢܳܦܶܩ ܗܘܳܐ ܡܶܢ ܬܚܶܝܬ ܢܺܝܪܗܽܘܢ. ܘܗܳܕܐ ܡܰܘܕܥܳܐ ܕܶܐܢ ܐܢܳܫ ܡܶܢ ܨܶܒܝܳܢܶܗ ܠܳܐ ܡܫܰܥܒܰܕ ܢܰܦܫܶܗ ܠܰܚܛܺܝܬܳܐ ܗܺܝ ܚܛܺܝܬܳܐ ܠܐ ܡܶܫܬܰܠܛܳܐ ܥܠܰܘܗܝ. ܡܶܛܠ ܕܠܘ ܦܶܪܥܽܘܢ ܣܠܶܩ ܠܰܐܪܥܳܐ ܕܰܟܢܰܥ̈ܢܳܝܶܐ ܘܰܐܚܬܶܗ ܠܺܝܣܪܳܐܝܠ ܠܰܐܪܥܳܐ ܕܡܶܨܪܶܝܢ. ܐܠܐ ܗܽܘ ܡܶܢ ܢܰܦܫܶܗ ܐܶܙܰܠ ܠܬܰܡܳܢ. ܘܒܳܬܰܪ ܗܳܠܝܢ ܐܡ̇ܪ ܢܒܺܝܐ:
ܐܰܣܓܺܝ ܛܳܒ ܥܰܡܶܗ. ܘܰܐܥܫܢܶܗ ܝܰܬܺܝܪ ܡܶܢ ܒܥܶܠܕ̈ܒܳܒܰܘܗܝ. ܟܡܳܐ ܓܝܪ ܐܢ ܡܫܰܥܒܕܳܐ ܐܰܢܰܢܩܺܝ ܟܝܳܢܳܝܬܳܐ ܠܩܰܕܺܝ̈ܫܶܐ ܠܡܶܬܚܰܫܳܚܽܘ ܒܚܰܝ̈ܐ ܠܐ ܥܕܺܝ̈ܠܶܐ. ܠܐ ܡܰܗܡܶܐ ܐܠܗܐ ܡܶܢ ܗܳܝ ܕܢܰܣܓܶܐ ܐܶܢܘܢ ܡܶܢ ܒܥܶܠܕ̈ܒܳܒܰܝܗܘܢ. ܘܢܰܥܫܶܢ ܐܶܢܘܢ ܥܠ ܣܳܢܰܐܝ̈ܗܽܘܢ ܘܰܠܗܳܢܘܢ ܕܕܰܠܩܽܘܒܠܳܐ ܡܚܰܒܶܠ ܘܡܰܙܥܰܪ. ܡܶܛܠ ܕܠܘ ܒܥܰܝܢܳܐ ܛܳܒܬܳܐ ܚܳܝܪܺܝܢ ܒܰܓܒܰܝܴ̈ܐ ܘܥܰܠܗܳܝ ܐܡ̣ܪ ܢܒܺܝܐ.
ܘܰܗܦܰܟ ܠܶܒܗܽܘܢ ܠܡܶܣܢܝܶܗ ܠܥܰܡܶܗ ܘܰܠܡܶܬܢܟܳܠܽܘ ܥܰܠ ܥܰܒܕܰܘ̈ܗܝ. ܠܐ ܣܳܟ ܡܶܨܪ̈ܳܝܶܐ ܐܰܚܶܒܘ ܠܥܶܒܪ̈ܳܝܶܐ ܘܟܕ ܛܳܒ ܩܽܘܪ̈ܝܳܐ ܕܺܝܠܗܽܘܢ ܒܳܢܶܝܢ ܗܘܰܘ ܘܒܶܝܬ ܩܦܳܣܷ̈ܐ ܠܦܶܪܥܘܢ. ܘܟܕ ܦܳܠܚܺܝܢ ܠܶܗ ܛܺܝܢܳܐ ܘܠܶܒܢ̈ܐ. ܗܽܘ ܠܐ ܡܰܗܡܶܐ ܗܘܳܐ ܡܶܢ ܗܳܝ ܕܢܶܦܩܽܘܕ ܕܢܶܫܬܕܽܘܢ ܒܢܰܝ̈ܗܘܢ ܒܓܰܘ ܢܰܗܪܳܐ ܕܠܐ ܢܺܚܽܘܢ. ܡܶܛܠ ܗܳܢܐ ܡܳܪܝܳܐ ܠܐ ܫܳܬܶܩ ܡܶܢ ܦܽܘܪܩܳܢܳܐ ܐܢ ܬܶܗܘܶܐ ܓܥܳܬܳܐ ܡܶܢ ܗܳܢܘܢ ܕܰܡܫܰܥܒܕܺܝܢ ܠܥܰܒܕܽܘܬܳܐ ܣܳܛܳܢܳܝܬܳܐ. ܘܠܐ ܓܝܪ ܠܰܒܢܱ̈ܝ ܝ̣ܣܪܳܐܝܠ ܫܒܰܩ. ܟܕ ܣܰܓܺܝ ܓܥܳܐ ܥܰܡܳܐ ܘܶܐܬܬܰܢܰܚ ܡܶܢ ܫܽܘܥܒܳܕܳܐ ܩܰܫܝܳܐ.
ܫܰܕܰܪ ܡܽܘܫܶܐ ܥܰܒܕܶܗ ܘܠܰܐܗܪܽܘܢ ܕܰܓܒܳܐ. ܘܰܥܒܰܕ ܒܗܽܘܢ ܐܳܬܘܴ̈ܬܶܗ ܘܬܶܕܡܪ̈ܳܬܶܗ ܒܰܐܪܥܳܐ ܕܚܰܡ. ܒܗܳܠܝܢ ܓܝܪ ܓܰܒܪ̈ܶܐ ܕܬܶܕܡܽܘܪܬܳܐ ܕܠܐ ܩܪܳܒܳܐ ܡܶܬܚܰܙܝܳܢܳܐ ܕܣܰܝܦܳܐ. ܠܥܰܡܳܐ ܩܰܕܺܝܫܳܐ ܦܳܪܶܩ ܗܘܳܐ. ܟܕ ܡܚܰܘܶܐ ܢܶܨܚܴ̈ܢܶܐ ܕܓܰܢܒܳܪܽܘܬܶܗ ܕܰܒܚܽܘܛܪܳܐ ܕܓܰܒܪܳܐ ܐܰܪܥܳܢܳܝܳܐ. ܡܡܰܟܶܟ ܗܘܳܐ ܘܰܡܫܰܦܶܠ ܡܰܠܟܽܘܬܳܐ ܕܚܰܣܺܝܢܳܐ ܗܘܳܬ ܐܝܟ ܦܰܪܙܠܳܐ. ܘܰܚܠܳܦ ܙܽܘܝܳܢܳܐ ܕܪ̈ܽܘܡܚܶܐ ܘܕܰܫܢܴ̈ܢܶܐ ܘܰܕܢܰܝܙ̈ܟܶܐ ܒܠܶܫܳܢܳܐ ܕܚܰܕ ܓܰܒܪܳܐ ܦܺܐܩܳܐ ܡܩܰܦܰܚ ܗܘܳܐ ܛܪܽܘܢܽܘܬܳܐ ܕܡܶܨܪ̈ܳܝܶܐ. ܡܶܛܠܗܳܢܐ ܒܰܟܝܳܢܳܐ ܕܠܐ ܡܶܠܬܳܐ ܣܕܰܪ ܙܰܝܢܳܐ ܠܽܘܩܒܰܠ ܡܶܨܪܶܝܢ.
ܫܰܕܰܪ ܠܰܡ ܚܶܫܽܘܟܳܐ ܘܰܐܚܫܶܟ ܘܡܰܪܡܰܪ ܡܶܠܬܶܗ. ܠܘ ܓܝܪ ܡܶܢ ܦܶܓܥܳܐ ܩܰܕܡܳܝܳܐ ܕܳܐܬܘܴ̈ܬܳܐ ܫܰܡܥܽܘܗܝ ܠܡܽܘܫܶܐ. ܐܠܐ ܬܳܟܣܺܝܢ ܗܘܰܘ ܡܶܠܬܶܗ ܘܰܡܡܰܪܡܪܺܝܢ ܗܘܰܘ ܪܽܘܚܶܗ ܕܙܰܕܺܝܩܳܐ. ܘܥܳܨܶܝܢ ܗܘܰܘ ܘܠܐ ܡܶܬܬܦܺܝܣܺܝܢ ܠܶܗ ܘܗܳܕܐ ܗܳܘܝܳܐ ܗܘܳܬ. ܡܶܛܠ ܕܠܐ ܒܳܥܶܐ ܗܘܳܐ ܕܢܶܬܚܰܫܰܚ ܥܰܡܗܽܘܢ ܒܰܩܛܺܝܪܳܐ ܡܳܪܳܢܳܝܳܐ ܗܰܘ ܕܫܰܕܰܪ ܐܶܢܘܢ ܠܐ ܨܳܒܶܐ ܗܘܳܐ. ܕܰܐܝܟܰܢܳܐ ܕܗܽܘ ܝ̣ܣܪܳܐܝܠ ܒܨܶܒܝܳܢܶܗ ܥܰܠ ܠܡܶܨܪܶܝܢ. ܗܳܟܰܢܳܐ ܐܦ ܦܶܪܥܽܘܢ ܕܠܐ ܩܛܺܝܪܳܐ ܢܫܰܕܪܶܗ ܠܺܝܣܪܳܐܝܠ. ܘܥܰܠܗܳܕܐ ܐܶܙܕܰܝܢܰܬ ܐܺܝܕܳܐ ܕܰܐܠܗܳܐ ܥܠܰܘܗܝ. ܠܘ ܟܕ ܓܒܳܐ ܠܗ ܡܰܪܕܽܘܬܳܐ ܐܝܟ ܪܳܚܡܳܐ. ܫܰܚܠܶܦ ܟܝܳܢ̈ܐ ܕܰܠܩܽܘܒܠܳܐ ܘܩܰܦܰܚ ܐܶܢܘܢ.
ܘܟܕ ܗܦܰܟ ܡܰܝ̈ܗܘܢ ܠܰܕܡܳܐ ܘܰܐܡܺܝܬ ܢܽܘܢܰܝ̈ܗܘܢ. ܕܡܶܛܠ ܗܳܝ ܕܰܒܡܰܝܴ̈ܐ ܚܳܢܩܺܝܢ ܗܘܰܘ ܠܝܰܠܽܘܕ̈ܐ ܕܥܶܒܪ̈ܳܝܶܐ. ܗܽܘ ܢܰܗܪܳܐ ܡܶܬܟܰܬܰܫ ܗܘܳܐ ܥܰܡܗܘܢ. ܐܰܝܟܰܢܳܐ ܕܰܒܗܰܘ ܕܰܚܛܰܘ ܒܶܗ ܢܶܬܬܕܺܝܢܽܘܢ. ܘܰܕܢܶܚܙܽܘܢ ܕܰܚܛܺܝܬܗܘܢ ܐܶܬܚܰܠܦܰܬ ܠܰܕܡܳܐ ܕܬܶܩܛܽܘܠ ܐܶܢܘܢ. ܘܡܶܢܶܗ ܬܽܘܒ ܕܢܰܗܪܳܐ ܐܦ ܡܚܽܘܬܳܐ ܗܳܝ ܕܬܰܪܬܶܝܢ ܢܳܦܩܳܐ ܗܘܳܬ.
ܐܰܪܚܶܫ ܒܰܐܪܥܗܽܘܢ ܐܽܘܪ̈ܕܥܶܐ ܘܰܒܬܰܘ̈ܢܶܐ ܕܡܰܠܟܰܝ̈ܗܘܢ. ܡܶܢ ܢܰܗܪܳܐ ܣܳܠܩ̈ܢ ܗܘ̈ܝ ܘܡܶܛܠ ܕܰܐܣܠܺܝܘ ܫܕܰܘ ܒܶܗ ܝܰܠܽܘܕ̈ܐ. ܘܬܰܪܣܺܝܘ ܒܶܗ ܠܪ̈ܰܚܫܳܐ ܘܰܠܢܽܘ̈ܢܶܐ ܕܰܒܢܰܗܪܳܐ. ܐܶܙܕܰܝܰܢ ܢܰܗܪܳܐ ܒܽܐܘܪ̈ܕܥܶܐ ܥܠ ܠܽܘܩܒܰܠܗܘܢ ܘܚܰܒܶܠ ܐܶܢܘܢ. ܘܟܕ ܥܡ ܗܳܠܝܢ ܬܘܒ ܡܚܽܘܬܳܐ:
ܕܚܰܠܽܘܛܳܐ ܘܩܰܠܡܳܐ ܒܟܽܠܶܗ ܬܚܽܘܡܗܽܘܢ. ܘܰܥܒܰܕ ܡܶܛܪܗܽܘܢ ܒܰܪܕܳܐ. ܘܢܽܘܪܳܐ ܐܶܬܓܰܘܙܠܰܬ ܒܰܐܪܥܗܽܘܢ. ܡܚܳܐ ܓܽܘ̈ܦܢܰܝܗܽܘܢ ܘܬܺܐܢܰܝ̈ܗܽܘܢ ܘܬܰܒܰܪ ܐܺܝܠܳܢ̈ܐ ܕܰܬܚܽܘ̈ܡܰܝܗܘܢ. ܐܶܡܰܪ ܘܰܐܝܬܺܝ ܩܰܡܨܳܐ ܘܙܳܚܠܳܐ ܒܟܽܠܗ̇ ܐܰܪܥܗܽܘܢ ܕܠܳܐ ܡܶܢܝܳܢ. ܗܳܠܝܢ ܐܡ̇ܪ ܡܙܰܡܪܳܢܳܐ ܟܕ ܡܰܠܶܦ ܘܡܰܪܬܶܐ ܠܗܳܢܘܢ ܕܩܳܡܘ ܥܰܡܶܗ ܟܕ ܐܰܡܠܶܟ. ܕܰܚܙܰܘ ܕܶܝܢ ܕܩܰܝܳܡ ܗܘ ܚܰܝܠܳܐ ܕܶܐܙܕܰܝܰܢ ܚܠܳܦ ܥܶܒܪ̈ܳܝܶܐ ܠܽܘܩܒܰܠ ܡܶܨܪ̈ܳܝܶܐ. ܒܪܰܡ ܠܘ ܒܕܶܚ̈ܠܳܬܳܐ. ܙܳܕܶܩ ܕܢܶܬܚܰܝܒܽܘܢ ܡܳܪ̈ܽܘܕܶܐ ܕܠܐ ܢܺܐܡܪܽܘܢ ܕܡܶܢ ܥܽܘܫܢܳܐ ܐܦ ܬܽܘܩܦܳܐ ܐܶܫܬܰܦܰܠܘ ܘܚܳܒܘ. ܘܗܳܝܕܶܝܢ ܕܶܐܡܰܪ ܙܳܚܠܳܐ܆ ܠܐ ܐܰܘܕܰܥ ܡܽܘܫܶܐ ܕܩܰܡܨܳܐ ܗܰܘ ܙܳܚܠܳܐ ܗܘܳܐ ܟܕ ܐܶܬܳܐ ܠܡܶܨܪܶܝܢ. ܒܪܰܡ ܕܶܝܢ ܫܰܪܺܝܪܳܐ ܕܺܐܝܬ ܗܘܳܐ ܥܡ ܦܳܪܚܳܐ ܐܦ ܙܳܚܠܳܐ. ܡܶܛܠ ܕܝܰܬܝ̣ܪ ܢܶܫܬܰܩܰܦ ܥܰܡܳܐ ܕܡܶܨܪ̈ܳܝܶܐ.
ܐܶܟܰܠ ܠܰܡ ܟܽܠܶܗ ܥܶܣܒܳܐ ܘܦܺܐܪ̈ܶܐ ܕܰܐܪ̈ܥܳܬܗܽܘܢ. ܘܡܶܬܚܰܒܠܳܐ ܓܝܪ ܐܰܪܥܳܐ ܕܗܳܢܘܢ ܕܰܠܩܽܘܒܠܳܐ ܥܰܡ ܦܺܐܪ̈ܶܝܗ̇ ܡܶܢ ܩܕܳܡ ܚܰܝܠܳܐ ܕܰܐܠܗܳܐ. ܘܰܢܩܰܛܶܠ ܒܽܘܟܪ̈ܶܐ ܕܡܰܫܪ̈ܝܳܬܗܽܘܢ ܕܡܳܪ̈ܽܘܕܶܐ ܐܝܟ ܕܶܐܡܰܪ ܢܒܺܝܐ.
ܩܰܛܶܠ ܟܽܠ ܒܽܘܟܪ̈ܶܐ ܕܡܶܨܪܶܝܢ ܪܺܝܫ ܟܽܠܶܗ ܝܰܠܕܗܽܘܢ. ܗܳܝܕܝܢ ܓܝܪ ܒܡܶܨܪܶܝܢ ܒܺܐܝܕܳܐ ܣܳܥܪܰܬ ܬܶܕܡܪ̈ܳܬܳܐ. ܗܳܝ ܪܺܝܫܺܝܬܳܐ ܕܝܰܠܕ̈ܐ ܕܟܽܠܗܘܢ ܡܶܨܪ̈ܳܝܶܐ ܘܕܰܒܥܺܝܪܗܽܘܢ܆ ܩܶܛܠܰܬ ܘܚܰܪܒܰܬ ܘܰܐܒܕܰܬ ܟܕ ܦܳܪܥܳܐ ܠܗܽܘܢ ܚܽܘܒܠܗܽܘܢ. ܡܶܛܠ ܕܗܶܢܘܢ ܠܰܒܢܱ̈ܝ ܝ̣ܣܪܳܐܝܠ ܠܘ ܒܰܠܚܽܘܕ ܒܽܘܟܪ̈ܶܐ ܡܩܰܛܠܺܝܢ ܗܘܰܘ܆ ܐܠܐ ܟܠ ܕܶܟܪܳܐ ܡܚܰܒܠܺܝܢ ܘܰܒܢܰܗܪܳܐ ܫܳܕܶܝܢ ܗܘܰܘ. ܥܠ ܗܳܕܐ ܒܬܰܚܠܽܘܦܳܐ ܩܛܰܠ ܒܽܘܟܪ̈ܰܝܗܘܢ. ܕܢܶܬܦܪܰܥ ܐܶܫܛܳܪܳܐ ܕܚܳܒܘ ܗܘܰܘ ܠܟܺܐܢܽܘܬܳܐ. ܘܟܕ ܐܶܬܩܰܛܰܠܘ ܒܽܘܟܪ̈ܶܐ ܕܡܶܨܪܶܝܢ ܒܺܐܝܕܳܐ ܕܡܳܪܝܳܐ ܘܒܰܨܠܺܝܒܳܐ ܗܘܳܬ ܗܳܕܐ. ܟܕ ܡܚܰܘܶܐ ܐܝܟ ܕܡܶܢ ܛܽܘܦܣܳܐ ܘܐܪܳܙܳܐ. ܘܰܠܪ̈ܺܝܫܳܢܶܐ ܕܒܺܝܫܬܳܐ ܩܛܰܠ ܨܠܺܝܒܳܐ ܘܰܐܘܒܶܕ ܘܰܦܪܰܥ ܐܶܢܘܢ ܒܺܝܫܬܳܐ ܕܰܥܒܰܕ ܒܺܝܣܪܳܐܝܠ ܗܰܘ ܕܰܐܠܗܳܐ. ܥܰܠ ܠܰܡ ܓܳܪܣܳܐ ܘܥܰܠ ܚܰܪܡܳܢܳܐ ܬܶܕܪܽܘܟ. ܘܰܬܕܽܘܫ ܐܰܪܝܳܐ ܘܬܰܢܺܝܢܳܐ (ܡܙܡܘܪܐ ܨܐ). ܗܳܠܝܢ ܓܝܪ ܒܽܘܟܪ̈ܶܐ ܗܘܰܘ ܕܡܶܨܪܶܝܢ ܚܛܺܝܬܳܐ. ܐܠܐ ܟܕ ܠܡ ܠܒܽܘܟܪ̈ܶܐ ܒܢܱ̈ܝ ܚܰܛܳܝ̈ܐ ܡܩܰܛܶܠ ܗܘܳܐ. ܘܠܰܒܢܱ̈ܝ ܙܰܕܺܝ̈ܩܶܐ ܡܰܥܬܰܪ ܗܘܳܐ ܘܡܰܘܪܶܒ. ܘܟܕ ܡܙܰܘܶܕ ܠܗܽܘܢ ܚܠܳܦ ܐܰܓܪܳܐ ܕܦܳܥܠܽܘܬܳܐ ܕܰܥܒܰܕܘ ܒܡܶܨܪܶܝܢ ܥܽܘܬܳܕܳܐ ܕܡܶܨܪ̈ܳܝܶܐ.
ܐܰܦܶܩ ܐܶܢܘܢ ܠܡ ܒܣܺܐܡܳܐ ܘܰܒܕܰܗܒܳܐ. ܒܚܰܕ ܥܶܕܳܢܳܐ ܓܝܪ ܦܪܰܥ ܐܶܢܘܢ ܐܰܓܪܳܐ ܕܦܳܥܠܽܘܬܗܽܘܢ.
ܘܠܰܝܬ ܒܫܰܪ̈ܒܳܬܗܽܘܢ ܕܰܟܪܺܝܗ. ܩܰܕܶܡ ܗܘܳܐ ܓܝܪ ܘܫܰܕܰܪ ܐܶܢܘܢ ܒܚܽܘܠܡܳܢܳܐ ܕܠܐ ܢܬܰܗܶܐ ܐܶܢܘܢ ܟܽܘܪܗܳܢܳܐ ܡܶܢ ܦܽܘܪܩܳܢܳܐ. ܐܳܦܠܳܐ ܓܝܪ ܙܳܕܶܩ ܗܘܳܐ ܕܰܒܗܰܘ ܥܰܡܳܐ ܕܰܡܚܰܘܶܐ ܗܘܳܐ ܐܠܗܐ ܛܢܳܢܳܐ ܚܠܳܦܰܘܗܝ ܢܶܫܬܰܟܚܽܘܢ ܟܪ̈ܺܝܗܶܐ ܘܟܺܐܒ̈ܬܳܢܶܐ. ܡܶܛܠ ܕܐܪܳܙܳܐ ܕܢܽܘܚܳܡܳܐ ܨܳܝܪܳܐ ܗܘܳܬ ܡܰܦܰܩܬܗܽܘܢ.
ܘܚܶܕܝܰܬ ܡܶܨܪܶܝܢ ܠܰܡ ܒܡܰܦܰܩܬܗܽܘܢ. ܡܶܛܠ ܕܢܶܦܠܰܬ ܕܶܚܠܰܬܗܽܘܢ ܥܠܰܝܗܽܘܢ. ܘܒܳܬܰܪ ܕܰܢܦܰܩܘ ܡܶܢ ܓܘ ܡܶܨܪܶܝܢ ܡܡܰܠܶܠ.
ܘܰܦܪܰܣ ܥܠܰܝܗܽܘܢ ܥܢܳܢܳܐ ܘܛܰܠܶܠ ܐܶܢܘܢ. ܘܢܽܘܪܳܐ ܠܡܰܢܗܳܪܽܘ ܒܠܺܠܝܳܐ. ܘܰܫܐܷܠ ܘܰܐܝܬܺܝ ܠܗܽܘܢ ܡܶܐܟܽܘܠܬܳܐ ܘܠܰܚܡܳܐ ܕܰܫܡܰܝܳܐ ܣܰܒܰܥ ܐܶܢܘܢ. ܘܡܶܢ ܒܳܬܰܪ ܕܰܢܦܰܩ ܒܰܪܢܳܫܳܐ ܡܶܢ ܡܶܨܪܶܝܢ ܕܰܚܛܺܝܬܳܐ. ܗܳܝܕܝܢ ܡܳܐ ܕܰܥܡܰܕ ܡܰܓܢܳܐ ܥܠܰܘܗܝ ܛܰܝܒܽܘܬܳܐ ܕܪܽܘܚܳܐ ܕܩܽܘܕܫܳܐ. ܐܰܟܡܳܐ ܕܥܠ ܗܰܘ ܥܢܳܢܳܐ ܡܰܛܠܠܳܐ ܗܘܳܬ܆ ܘܡܰܢܗܪܳܐ ܐܦ ܢܽܘܪܳܐ ܩܕܳܡ ܦܪ̈ܺܝܩܰܘܗܝ ܕܡܳܪܝܳܐ. ܪܽܘܚܳܐ ܗܳܝ ܕܢܶܚܬܰܬ ܥܰܠ ܬܰܠܡܺܝ̈ܕܶܐ ܒܥܶܠܺܝܬܳܐ. ܘܣܳܒܥܺܝܢ ܡܶܢ ܠܰܚܡܳܐ ܕܰܢܚܶܬ ܡܶܢ ܫܡܰܝܳܐ. ܘܝܰܗܒ ܚܰܝ̈ܐ ܠܥܳܠܡܳܐ. ܘܫܳܬܶܝܢ ܡܶܢ ܟܺܐܦܳܐ ܗܳܝ ܕܣܰܛܡܳܗ̇ ܘܦܰܬܚܳܗ̇ ܦܰܪܙܠܳܐ ܥܠ ܓܳܓܽܘܠܬܳܐ ܐܝܟ ܕܶܐܡܰܪ ܪܽܘܚܳܐ܆
ܦܬܰܚ ܛܰܪܳܢܳܐ ܘܰܪܕܰܘ ܡܰܝ̈ܳܐ ܘܗܰܠܶܟܘ ܡܰܝܴ̈ܐ ܒܰܐܬܪܳܐ ܨܰܗܝܳܐ. ܠܰܒܢܶܝ̈ܗ̇ ܕܥܺܕܬܳܐ ܕܡܳܐ ܕܰܚܠܺܝܛ ܒܡܰܝܴ̈ܐ ܢܦܰܩ ܠܗܽܘܢ ܡܶܢ ܛܰܪܳܢܳܐ ܡܫܺܝܚܳܐ. ܘܰܪܕܳܐ ܥܠ ܥܰܡܡ̈ܐ ܕܺܐܝܬܰܝܗܽܘܢ ܒܰܐܬܪܳܐ ܨܰܗܝܳܐ. ܘܗܰܠܶܟ ܡܰܒܽܘܥܳܐ ܗܰܘ ܕܶܐܬܦܬܰܚ ܥܠ ܨܠܺܝܒܳܐ. ܐܝܟ ܕܰܩܥܳܐ ܠܘܳܬܗܽܘܢ ܐܶܫܰܥܝܳܐ ܕܐܳܘ ܕܰܨܗܶܝܢ ܙܶܠܘ ܠܡܰܝܴ̈ܐ (ܐܫܥܝܐ ܢܗ: ܐ). ܡܶܛܠ ܕܗܳܐ ܡܰܒܽܘܥܳܐ ܕܦܽܘܪܩܳܢܳܐ ܕܶܐܬܦܬܰܚ ܥܰܠ ܓܳܓܽܘܠܬܳܐ. ܘܰܦܩܰܕ ܠܡܰܝܴ̈ܐ ܕܡܰܠܦܳܢܽܘܬܶܗ ܕܰܕܠܳܐ ܒܺܝܫܽܘ ܢܗܰܠܟܽܘܢ ܒܰܐܬܪܳܐ ܨܰܗܝܳܐ ܥܳܠܡܳܐ. ܘܰܠܟܽܠܗ ܥܳܠܡܳܐ ܒܳܥܶܐ ܕܢܰܫܩܶܐ ܡܶܛܠ ܗܕܳܐ ܓܝܪ ܐܶܬܳܐ. ܡܳܢܳܐ ܐܡ̇ܪ ܡܶܢ ܒܳܬܰܪܟܶܢ.
ܡܶܛܠ ܕܶܐܬܕܟܰܪ ܡܶܠܬܳܐ ܕܩܽܘܕܫܶܗ ܕܰܐܒܪܳܗܳܡ ܥܰܒܕܶܗ. ܘܰܐܦܶܩ ܠܥܰܡܶܗ ܒܚܰܕܽܘܬܳܐ ܘܰܒܬܶܫܒܽܘܚܬܳܐ ܠܓܰܕܽܘ̈ܕܰܘܗܝ. ܗܳܕܐ ܒܫܽܘܕܳܝܳܐ ܐܝ̣ܬܶܝܗ̇ ܗܘܳܬ ܠܘܬ ܐܰܒܪܳܗܳܡ ܕܡܶܢ ܒܳܬܰܪ ܕܡܶܫܬܰܥܒܰܕ ܥܰܡܳܐ ܗܰܘ ܕܡܶܢ ܙܰܪܥܶܗ ܡܶܬܩܰܝܰܡ ܐܰܪܒܰܥܡܳܐܐ ܫܢܺܝ̈ܢ ܢܶܦܪܽܘܩ ܐܶܢܘܢ. ܘܥܰܠܗܳܝ ܡܶܢ ܒܳܬܰܪ ܕܶܐܬܡܰܠܝ̣ ܦܣܳܩܳܐ ܗܰܘ ܕܡܶܢ ܩܕܺܝܡ ܦܣܰܩ ܐܠܗܐ. ܐܰܦܶܩ ܠܥܰܡܶܗ ܡܶܢ ܫܽܘܥܒܳܕܳܐ ܕܡܶܨܪ̈ܳܝܶܐ.
ܘܝܰܗܒ ܠܗܽܘܢ ܐܰܪ̈ܥܳܬܳܐ ܕܥܰܡ̈ܡܶܐ. ܘܥܰܡܠܳܐ ܕܶܐܡܘܴ̈ܬܳܐ ܝ̣ܪܶܬܘ. ܕܢܶܙܕܰܗܪܽܘܢ ܒܦܽܘ̈ܩܕܳܢܰܘܗܝ ܘܢܳܡܽܘ̈ܣܰܘܗܝ ܢܶܛܪܽܘܢ. ܠܘ ܒܰܠܚܽܘܕ ܡܶܛܠ ܡܶܕܶܡ ܕܶܐܫܬܰܘܕܺܝ ܗܳܕܐ ܥܒܰܕ. ܐܠܐ ܟܕ ܬܳܒܰܥ ܡܶܢ ܐܰܝܠܝܢ ܕܝܰܗܒ ܠܗܽܘܢ ܐܰܪ̈ܥܳܬܳܐ ܕܠܰܘ ܕܺܝܠܗܽܘܢ ܗܘ̈ܝ. ܘܳܐܦ ܥܠ ܥܰܡܠܳܐ ܘܥܽܘܬܪܳܐ ܕܰܐܚܪ̈ܳܢܶܐ ܐܰܘܪܶܬ ܐܶܢܘܢ. ܬܳܒܰܥ ܡܶܢܗܽܘܢ ܢܛܽܘܪܽܘܬܳܐ ܕܦܽܘܩܕܳܢ̈ܐ ܘܰܙܗܺܝܪܽܘܬܳܐ ܒܕܺܝ̈ܢܶܐ ܙܰܕܺܝ̈ܩܶܐ ܕܺܝܠܶܗ. ܟܕ ܓܶܝܪ ܗܳܕܐ ܢܶܥܒܕܽܘܢ. ܐܦ ܠܰܢܒܺܝ̈ܐ ܕܺܝܠܗܽܘܢ ܡܶܛܠܳܬܗܽܘܢ ܐܚܪ̈ܳܢܝܳܬܳܐ ܝܳܗܶܒ. ܡܶܛܠ ܕܗܳܕܳܐ ܗܝ ܬܶܫܒܽܘܚܬܳܐ ܕܝܳܪܬܽܘܬܳܐ܆ ܠܡܶܛܰܪ ܦܽܘܩܕܳܢ̈ܐ ܘܢܳܡܽܘ̈ܣܶܐ ܕܗܽܘ ܨܒܳܐ ܒܗܽܘܢ ܘܰܐܘܪܶܬ ܐܶܢܘܢ. ܕܳܐܦܚܢܰܢ ܟܕ ܡܶܬܚܰܦܛܺܝܢܰܢ ܠܡܶܛܰܪ ܦܽܘܩܕܳܢܰܘ̈ܗܝ ܕܡܳܪܝܳܐ. ܘܠܰܡܫܰܡܠܳܝܽܘ ܢܳܡܽܘܣܶܗ ܩܰܕܺܝܫܳܐ. ܢܰܘܕܶܐ ܠܗܰܘ ܕܰܒܝܰܕ ܕܶܢܚܶܗ ܘܓܶܠܝܳܢܶܗ ܗܘܳܐ ܠܢ ܡܰܦܩܳܢܳܐ ܡܶܢ ܚܶܫܽܘܟܳܐ ܗܰܘ ܕܰܚܛܺܝܬܳܐ. ܘܶܐܫܬܰܘܙܰܒܢܰܢ ܡܶܢ ܫܽܘܥܒܳܕܶܗ ܕܰܛܪܽܘܢܳܐ. ܘܶܐܬܦܰܠܰܛܢܰܢ ܡܶܢ ܢܺܝܪܶܗ ܕܡܳܪܽܘܕܳܐ. ܘܰܩܢܰܝܢܰܢ ܚܺܐܪܽܘܬܳܐ ܒܝܰܕ ܥܡܳܕܳܐ ܩܰܕܺܝܫܳܐ. ܘܝܰܗܒܠܰܢ ܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ ܘܥܰܒܕܰܢ ܒܛܰܝܒܽܘܬܶܗ ܝܳܪ̈ܬܶܐ ܠܰܐܒܽܘܗܝ. ܕܗܽܘ ܢܰܫܘܶܐ ܠܢ ܕܢܶܥܒܶܕ ܨܶܒܝܳܢܶܗ ܘܢܶܓܡܽܘܪ ܦܽܘܩܕܳܢܰܘ̈ܗܝ. ܟܰܕ ܣܳܓܕܺܝܢܰܢ ܠܶܗ ܘܠܰܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܫܬܐ
ܥܰܠ ܡܶܕܶܡ ܕܰܣܥܰܪ ܥܰܡܳܐ ܡܶܢ ܒܳܬܰܪ ܕܰܢܦܰܩ ܡܶܢ ܡܶܨܪܶܝܢ. ܘܥܰܠ ܡܰܪܳܚܽܘܬܳܐ ܕܒܶܝܬ ܩܽܘܪܰܚ ܘܕܳܐܬܳܢ ܘܰܐܒܺܝܪܰܡ
ܬܶܕܡܽܘܪܬܳܐ ܘܛܰܝܒܽܘܬܳܐ ܕܰܥܒܰܕ ܐܰܠܗܳܐ ܠܘܳܬ ܥܰܡܳܐ܆ ܡܶܫܬܰܥܶܐ ܪܽܘܚܳܐ ܒܛܽܘܒܳܢܐ ܕܰܘܝ̣ܕ ܒܡܰܙܡܽܘܪܐܳ ܗܳܢܐ ܕܰܡܳܐܐ ܘܶܫܬܳܐ. ܘܥܡ ܗܳܠܝܢ ܕܝܢ ܐܦ ܛܽܘܒܳܐ ܝܳܗܶܒ ܠܰܐܝܠܶܝܢ ܕܢܳܛܪܺܝܢ ܕܺܝܢܰܘ̈ܗܝ ܕܡܳܪܝܳܐ. ܘܠܰܐܝܠܝܢ ܕܥܳܒܕܺܝܢ ܙܰܕܺܝܩܽܘܬܳܐ܆ ܡܰܝܬܶܐ ܐܦ ܥܽܘܕܗܳܢܳܐ ܕܡܰܪܳܚܽܘܬܗܽܘܢ ܕܥܶܒܪ̈ܳܝܶܐ ܕܥܠ ܡܽܘܫܶܐ܆ ܟܕ ܠܽܘܩܕܰܡ ܡܫܰܪܶܐ ܒܬܰܘܕܺܝܬܳܐ ܘܳܐܡܰܪ:
ܐܰܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܛܰܝܒܽܘܬܶܗ. ܡܰܢܽܘ ܢܶܫܬܰܥܶܐ ܬܶܕܡܪ̈ܳܬܶܗ ܕܡܳܪܝܳܐ. ܘܢܶܫܡܰܥ ܟܽܠܗܝܢ ܬܶܫܒ̈ܚܳܬܶܗ. ܡܶܛܠܡܳܢܐ ܫܽܘܪܳܝܳܐ ܗܳܢܐ ܥܒܰܕ ܥܠ ܡܰܓܪܰܬ ܪܽܘܚܶܗ ܕܰܐܠܗܳܐ ܫܩܰܠ ܕܢܶܫܬܰܥܶܐ. ܒܗܳܝ ܕܰܡܛܰܝܰܒ ܗܘܳܐ ܕܢܺܐܡܰܪ ܥܠ ܓܽܘܡܳܕܳܐ ܘܥܠ ܡܰܪܳܚܽܘܬܳܐ ܕܗܳܢܘܢ ܕܶܐܬܦܪܶܩܘ ܡܶܢ ܡܶܨܪܶܝܢ. ܡܶܛܠܗܳܕܐ ܣܰܝܒܰܪ ܘܰܛܥܶܢ ܡܰܪܚܽܘܬܗܘܢ. ܥܠ ܕܠܐ ܡܶܣܬܰܝܟܳܐ ܛܰܝܒܽܘܬܶܗ ܘܥܠ ܕܥܳܒܪܺܝܢ ܪ̈ܰܚܡܰܘܗܝ ܠܟܽܠ ܚܽܘܫܳܒܳܐ ܘܡܶܠܬܳܐ. ܘܰܟܡܳܐ ܠܡ ܕܢܺܐܡܰܪ ܥܠ ܣܽܘܓܳܐܐ ܕܛܰܝܒܽܘܬܶܗ ܙܥܽܘܪ ܗܽܘ. ܘܰܟܡܳܐ ܕܢܶܫܬܰܥܶܐ ܐܢܳܫ ܬܶܕܡܪ̈ܳܬܶܗ ܩܰܠܝ̣ܠ ܗܘ ܐܡ̇ܪ ܥܠܰܘܗܝ. ܘܡܰܢܽܘ ܡܶܫܟܰܚ ܕܢܶܫܬܰܥܶܐ ܐܶܢܝܢ. ܘܟܕ ܐܰܪܓܶܫ ܒܺܝܕܰܥܬܶܗ ܕܠܐ ܡܶܫܟܰܚ ܥܒܺܝܕܳܐ ܕܢܶܫܬܰܥܶܐ ܐܶܢܝܢ܆ ܫܳܬܶܩ ܡܶܢ ܗܳܕܐ ܘܝܳܗܶܒ ܛܽܘܒܳܐ ܠܰܐܝܠܶܝܢ ܕܢܳܛܪܺܝܢ ܕܺܝܢܰܘ̈ܗܝ ܘܥܳܒܕܺܝܢ ܙܰܕܺܝܩܽܘܬܶܗ. ܘܗܳܕܐ ܒܰܠܚܽܘܕ ܫܳܘܝܳܐ ܠܛܽܘܒ̈ܐ ܕܕܺܝܢܰܘ̈ܗܝ ܢܶܬܢܰܛܪܽܘܢ ܘܦܽܘܩ̈ܕܳܢܰܘܗܝ ܢܶܣܬܰܥܪܽܘܢ. ܡܶܢ ܗܳܝ ܕܢܶܫܬܰܥܶܐ ܬܶܕܡܪ̈ܳܬܶܗ ܢܶܫܠܶܐ. ܡܶܛܠ ܕܠܰܝܬ ܕܰܠܗܳܕܐ ܢܶܣܦܰܩ. ܢܶܬܒܰܝܰܐ ܕܶܝܢ ܒܢܳܛܽܘܪܽܘܬ ܦܽܘ̈ܩܕܳܢܰܘܗܝ ܘܢܶܥܒܶܕ ܙܰܕܺܝܩܽܘܬܳܐ ܘܟܺܐܢܽܘܬܳܐ. ܘܟܕ ܗܳܠܝܢ ܢܶܣܥܽܘܪ ܒܨܶܒܝܳܢܳܐ ܛܳܒܳܐ:
ܐܶܬܕܰܟܪܰܝܢ ܡܳܪܝܳܐ ܒܨܶܒܝܳܢܶܗ ܕܥܰܡܳܟ. ܕܢܶܚܙܶܐ ܒܛܳܒܴ̈ܬܳܐ ܕܰܓܒܰܝ̈ܟ. ܘܢܶܚܕܶܐ ܒܚܰܕܽܘܬܳܟ ܘܢܶܫܬܰܒܰܚ ܒܝܳܪܬܽܘܬܳܟ. ܦܽܘܪܩܳܢܐ ܠܰܡ ܗܳܢܰܘ ܕܢܶܚܕܶܐ ܒܚܰܕܽܘܬܳܐ ܕܰܐܠܗܳܐ. ܘܥܰܡ ܗܳܕܐ ܢܫܰܒܰܚ ܒܝܳܪܬܽܘܬܶܗ܆ ܦܽܘܪܩܳܢܳܐ ܕܝܢ ܩܳܪܶܐ܆ ܠܗܰܘ ܕܰܥܒܰܕ ܡܫܺܝܚܳܐ ܒܓܶܠܝܳܢܶܗ ܥܰܠ ܐܰܪܥܳܐ ܟܕ ܐܶܬܚܙܺܝ ܒܰܒܣܰܪ. ܐܡ̣ܪ ܓܶܝܪ:
ܕܰܒܦܽܘܪܩܳܢܳܟ ܦܪܽܘܩܰܝܢܝ. ܝܳܪܬܽܘܬܳܐ ܕܝܢ ܡܳܢܳܐ ܗܝ. ܐܶܠܐ ܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ ܗܳܝ ܕܰܒܝܰܕ ܥܡܳܕܳܐ ܩܰܒܶܠܢܰܢ. ܘܡܶܛܠܗܳܕܐ ܐܡ̣ܪ ܢܒܺܝܐ.
ܚܛܰܝܢ ܥܰܡ ܐܰܒܳܗܱ̈ܝܢ ܘܰܐܣܟܶܠܢ ܘܰܐܪܫܰܥܢ. ܗܳܕܐ ܗܳܟܝ̣ܠ ܬܰܘܕܺܝܬܳܐ ܒܝܰܕ ܥܡܳܕܳܐ ܡܶܬܚܰܙܝܳܐ. ܘܬܽܘܒ ܐܡ̣ܪ:
ܐܰܒܳܗܰܝ̈ܢ ܒܡܶܨܪܶܝܢ ܠܐ ܐܶܣܬܰܟܰܠܘ ܬܶܕܡܪ̈ܳܬܳܟ. ܘܠܐ ܐܶܬܕܟܰܪܘ ܣܽܘܓܳܐܐ ܕܛܰܝܒܘܴ̈ܬܳܟ. ܟܡܳܐ ܕܒܰܚܛܺܝܬܳܐ ܐܝ̣ܬܰܝܗܘܢ ܗܘܰܘ ܒܢܰܝ̈ܢܳܫܳܐ ܠܳܐ ܡܶܫܟܚܺܝܢ ܠܡܶܬܕܟܳܪܽܘ ܛܰܝܒܘܴ̈ܬܳܟ ܘܠܐ ܒܬܶܕܡܪ̈ܳܬܳܐ ܕܰܥܒܰܕ ܐܠܗܐ ܡܶܬܒܰܝܢܺܝܢ ܗܘܰܘ. ܗܳܟܢܐ ܥܶܒܪ̈ܳܝܶܐ ܛܥܰܘ ܠܦܽܘܪܩܳܢܗܘܢ ܕܡܶܢ ܡܶܨܪܶܝܢ. ܘܥܰܠܗܳܝ ܐܡ̣ܪ:
ܕܶܐܬܚܪܺܝܘ ܥܰܠ ܡܰܝܴ̈ܐ ܒܝܰܡܳܐ ܕܣܽܘܦ. ܕܰܐܝܢܳܐ ܐܝ̣ܬܰܘܗܝ ܚܶܪܝܳܢܳܐ ܕܥܰܠ ܡܰܝܴ̈ܐ ܕܝܰܡܳܐ ܣܽܘܡܳܩܳܐ ܕܠܘ ܕܠܺܝܠܳܐܝ̣ܬ ܓܠܳܐ ܐܶܢܝܢ ܐܝܟ ܕܡܶܢ ܡܶܠܬܳܐ ܗܳܝ ܕܰܟܬܳܒܐ. ܠܗܰܘ ܕܠܐ ܪܳܚܶܡ ܚܶܪܝܳܢܳܐ. ܐܡ̇ܪ ܐܢܳܐ ܕܚܶܪܝܳܢܳܐ ܩܳܪܶܐ ܢܒܺܝܳܐ ܠܗܳܝ ܕܶܐܡܰܪ ܠܡܽܘܫܶܐ ܟܕ ܚܙܰܘ ܠܦܶܪܥܽܘܢ ܘܰܠܡܶܨܪ̈ܳܝܶܐ ܕܰܠܡܳܢܳܐ ܐܰܦܶܩܬܳܢ ܡܶܢ ܡܶܨܪܶܝܢ. ܘܬܘܒ ܐܡ̣ܪܘ ܠܘܳܬܶܗ ܐܝܟ ܕܡܶܢ ܚܰܫܳܐ ܪܰܒܳܐ ܘܥܰܡܺܝܩܳܐ. ܡܶܛܠ ܕܠܰܝܬ ܩܰܒܪ̈ܶܐ ܒܡܶܨܪܶܝܢ ܕܰܕܒܰܪܬܳܢ ܕܰܢܡܽܘܬ ܒܡܰܕܒܪܳܐ. ܠܡܳܢܳܐ ܥܒܰܕܬ ܠܢ ܗܳܟܰܢܳܐ܇ ܘܰܐܦܶܩܬܳܢ ܡܶܢ ܡܶܨܪܶܝܢ. ܠܐ ܗܳܘܶܐ ܗܳܢܐ ܦܶܬܓܳܡܳܐ ܕܶܐܡܰܪܢ ܗܘܰܝܢ ܠܟ ܒܡܶܨܪܶܝܢ ܕܰܫܒܽܘܩܰܝܢ ܐܰܝܟܰܢܳܐ ܕܢܶܦܠܽܘܚ ܠܡܶܨܪ̈ܳܝܶܐ ܡܶܢ ܕܰܢܡܽܘܬ ܒܡܰܕܒܪܳܐ ܗܳܢܐ (ܡܦܩܢܐ ܝܕ: ܝܐ-ܝܒ). ܚܶܪܝܳܢܳܐ ܕܰܗܘܳܐ ܥܠ ܡܰܝܴ̈ܐ ܒܝܰܡܳܐ ܕܣܽܘܦ ܗܳܢܐ ܐܝ̣ܬܘܗܝ. ܘܟܕ ܗܳܢܐ ܡܥܺܝܪ ܗܘܳܐ ܪܽܘܓܙܳܐ ܕܟܺܐܢܽܘܬܳܐ. ܠܐ ܐܶܬܚܰܡܰܬ ܗܰܘ ܒܰܣܺܝܡܳܐ.
ܐܶܠܐ ܦܪܰܩ ܐܶܢܘܢ ܡܶܛܠ ܫܡܶܗ ܕܰܢܚܰܘܶܐ ܓܰܢ̱ܒܳܪܽܘܬܶܗ. ܘܰܟܐܳܐ ܒܝܰܡܳܐ ܕܣܽܘܦ ܘܺܝܒܶܫ. ܘܗܰܠܶܟ ܐܶܢܘܢ ܒܰܬܗܽܘܡܳܐ ܐܰܝܟ ܕܰܒܡܰܕܒܪܳܐ. ܘܠܐ ܚܳܪ ܒܚܶܪܝܳܢܳܐ ܕܥܰܡܳܐ ܘܠܳܐ ܬܟܰܣ ܘܰܟܠܳܐ ܪܶܛܢܳܐ ܕܡܰܪ̈ܳܚܶܐ ܠܐܝ̣ܕܶܗ ܪܳܡܬܳܐ ܕܰܐܠܗܐ ܡܶܢ ܦܽܘܪܩܳܢܳܐ. ܦܽܘܪܩܳܢܳܐ ܓܡܺܝܪܳܐ ܕܰܥܒܰܕ ܠܗܽܘܢ ܐܰܪܥܳܐ ܚܕܰܬܳܐ ܒܓܰܘ ܝܰܡܳܐ. ܘܛܰܝܶܒ ܠܗܘܢ ܡܰܕܒܪܳܐ ܒܓܰܘ ܬܗܽܘܡܳܐ. ܘܠܐ ܫܒܰܩ ܪܰܛܺܝܒܽܘܬܳܐ ܒܗܳܝ ܐܽܘܪܚܳܐ ܕܰܕܪܰܫ ܠܗܘܢ ܒܓܘ ܝܰܡܳܐ. ܐܠܐ ܐܰܪܥܳܐ ܝܰܒܺܝܫܬܳܐ ܕܰܡܓܰܪܕܝܳܐ ܡܶܢ ܪܰܛܺܝܒܽܘܬܳܐ ܗܘܳܬ ܠܗܽܘܢ ܒܰܬܗܽܘܡܳܐ. ܐܰܝܟܰܢܳܐ ܕܰܢܚܰܘܶܐ ܥܡ ܗܳܝ ܕܰܦܪܰܩ ܐܶܢܘܢ. ܐܳܦ ܚܰܝܠܳܐ ܪܰܒܳܐ ܕܡܶܬܡܰܨܝܳܢܽܘܬܶܗ ܕܶܐܫܟܰܚܘ ܥܡ ܣܕܳܩܶܗ ܕܝܰܡܳܐ ܕܳܐܦ ܐܰܪܥܳܐ ܝܰܒܺܝܫܬܳܐ. ܒܕܰܐܝܟ ܗܳܢܐ ܥܽܘܕܪܳܢܳܐ ܚܙܳܐ ܥܰܡܳܐ ܡܶܢ ܐܠܗܐ.
ܘܰܦܪܰܩ ܐܶܢܘܢ ܡܶܢ ܐܝ̣ܕܳܐ ܕܳܐܠܽܘܨܳܐ. ܘܟܰܣܺܝܘ ܡܰܝܴ̈ܐ ܠܳܐܠܽܘ̈ܨܰܝܗܽܘܢ ܘܚܰܕ ܡܶܢܗܽܘܢ ܠܐ ܐܶܫܬܚܰܪܘ. ܒܗܳܕܐ ܓܝܪ ܕܰܡܚܰܘܶܐ ܗܘܳܐ ܠܰܒܥܶܠܕܒܳܒܳܐ ܠܐ ܡܶܙܕܰܥܙܥܳܢܳܐ ܥܰܒܕܶܗ ܠܦܽܘܪܩܳܢܳܐ. ܡܶܛܠ ܕܠܐ ܡܶܫܟܰܚ ܗܘܳܐ ܥܰܡܳܐ ܠܡܶܬܒܰܣܳܡܽܘ ܒܦܽܘܪܩܳܢܳܐ. ܗܳܟܰܢܳܐ ܓܝܪ ܐܳܦ ܒܰܥܡܳܕܳܐ ܩܰܕܺܝܫܳܐ ܥܡ ܗܳܝ ܕܡܶܬܦܰܪܩܳܐ ܢܰܦܫܳܐ ܡܶܢ ܚܛܺܝܬܳܐ. ܐܳܦ ܕܰܝ̈ܘܶܐ ܒܥܶܠܕ̈ܒܳܒܶܝܗ̇ ܒܓܘ ܡܰܝܴ̈ܐ ܩܰܕܺܝ̈ܫܶܐ ܕܰܥܡܳܕܳܐ ܡܶܬܛܰܒܥܺܝܢ ܘܡܶܬܚܰܢܩܺܝܢ. ܐܰܟܡܳܐ ܕܰܥܒܰܕ ܠܘܳܬ ܝ̣ܣܪܳܐܝܠ. ܕܟܕ ܒܝܰܡܳܐ ܦܪܰܩ ܠܥܶܒܪ̈ܳܝܶܐ. ܘܰܠܦܶܪܥܽܘܢ ܘܰܠܡܶܨܪ̈ܳܝܶܐ ܒܓܰܘ ܝܰܡܳܐ ܛܰܒܰܥ. ܐܡ̣ܪ ܓܝܪ ܒܳܬܰܪܟܶܢ ܥܠ ܕܗܰܝܡܶܢܘ ܥܶܒܪ̈ܳܝܶܐ ܒܡܳܪܝܳܐ ܘܰܒܡܽܘܫܶܐ ܥܰܒܕܶܗ.
ܗܰܝܡܶܢܘ ܠܰܡ ܒܡܶܠܰܘ̈ܗܝ ܘܫܰܒܰܚܘ ܬܶܫܒ̈ܚܳܬܶܗ. ܐܶܠܐ ܠܐ ܩܰܘܺܝ ܥܰܡܳܐ ܒܗܰܝܡܳܢܽܘܬܶܗ ܡܶܛܠ ܕܠܘ ܣܰܓܺܝ ܐܰܘܚܰܪ. ܘܰܛܥܰܘ ܥܽܘܕܪܳܢܳܐ ܕܰܗܘܳܐ ܠܗܽܘܢ:
ܐܶܣܬܰܪܗܰܒܘ ܘܰܛܥܰܘ ܠܰܐܠܗܳܐ ܘܠܳܐ ܣܰܒܰܪܘ ܠܬܰܪܥܺܝܬܶܗ. ܪܰܓܘ ܪܶܓܬܳܐ ܒܡܰܕܒܪܳܐ. ܘܢܰܣܺܝܘ ܠܰܐܠܗܳܐ ܒܰܐܫܺܝܡܽܘܢ. ܒܗܳܠܶܝܢ ܐܰܘܕܰܥ ܥܰܠ ܫܽܘܚܠܳܦܶܗ ܕܥܰܡܳܐ ܡܶܢ ܗܰܝܡܳܢܽܘܬܶܗ. ܘܰܕܠܰܘ ܟܺܐܢܳܐܝ̣ܬ ܪܰܓܘ ܪܶܓܬܳܐ ܒܰܐܬܪܳܐ ܕܠܐ ܡܶܬܚܰܙ̈ܝܳܢ ܗܘ̈ܝ ܒܶܗ ܐܰܝܠܶܝܢ ܕܶܐܬܪܰܓܪܰܓܘ ܠܗܶܝܢ. ܒܪܰܡ ܐܰܠܗܳܐ ܠܐ ܚܳܪ ܒܒܺܝܫܽܘܬܶܗ ܕܥܰܡܳܐ. ܐܠܐ ܟܕ ܠܐ ܥܨܳܐ ܕܶܝܢ ܠܚܺܐܪܽܘܬܳܐ.
ܝܰܗܒ ܠܗܽܘܢ ܫܷ̈ܐܠܳܬܗܽܘܢ ܘܫܰܕܰܪ ܣܰܒܥܳܐ ܠܢܰܦ̈ܫܳܬܗܽܘܢ. ܘܰܦܩܰܕ ܠܣܰܠܘܰܝ ܘܟܰܣܝܰܬ ܠܡܰܫܪܺܝܬܳܐ. ܘܶܐܟܰܠܘ ܘܰܣܒܰܥܘ ܛܳܒ ܡܶܢ ܦܳܪܰܚܬܳܐ. ܗܳܝ ܕܡܶܛܠ ܕܰܒܪܶܓܬܳܐ ܐܰܟܠܽܘܗ̇. ܠܐ ܗܘܳܬ ܠܗܽܘܢ ܠܬܽܘܪܣܳܝܳܐ ܡܥܰܕܪܳܢܳܐ. ܐܠܐ ܥܰܡܳܗ̇ ܕܡܶܐܟܽܘܠܬܳܐ ܬܒܰܥܬܳܐ ܕܰܐܠܗܳܐ ܡܰܕܪܟܳܐ ܗܘܳܬ ܠܗܽܘܢ. ܘܟܰܕ ܒܝܰܩܕܳܢܳܐ ܩܰܒܶܠܘ ܦܽܘܪܥܳܢܳܐ ܕܪܶܓܬܳܐ ܒܺܝܫܬܳܐ. ܬܘܒ ܥܠ ܡܽܘܫܶܐ ܘܥܠ ܐܰܗܪܽܘܢ ܐܰܡܪܰܚܘ.
ܘܛܰܢܘ ܒܡܽܘܫܶܐ ܡܰܫܪܺܝܬܳܐ ܘܒܰܐܗܪܽܘܢ ܩܰܕܺܝܫܶܗ ܕܡܳܪܝܳܐ. ܠܗܳܠܶܝܢ ܕܶܝܢ ܥܒܺܝܕ ܗܘܳܐ ܩܽܘܪܰܚ ܒܰܪ ܨܳܗܳܪ. ܐܦ ܕܳܐܬܳܢ ܘܰܐܒܺܝܪܰܡ ܘܰܐܘܳܢ ܒܰܪ ܦܶܠܰܬ. ܘܟܕ ܥܰܠ ܗܳܢܘܢ ܕܶܐܬܦܰܩܰܕܘ ܡܶܢ ܐܠܗܐ ܕܰܢܟܰܗܢܽܘܢ܆ ܐܰܩܺܝܡܘ ܡܪܳܕܳܐ ܒܡܰܪܳܚܽܘܬܳܐ ܘܒܰܡܣܳܡ ܒܪܺܝܫܳܐ ܕܫܳܘܶܐ ܠܡܰܪܳܚܽܘܬܗܽܘܢ ܩܰܒܶܠܘ.
ܘܶܐܬܦܰܬܚܰܬ ܐܰܪܥܳܐ ܬܚܽܘܬܰܝܗܽܘܢ ܘܒܶܠܥܰܬ ܠܕܳܐܬܳܢ. ܘܟܰܣܝܰܬ ܥܠ ܟܢܽܘܫܬܶܗ ܕܰܐܒܺܝܪܰܐܡ. ܘܚܶܒܰܬ ܢܽܘܪܳܐ ܒܰܟܢܽܘ̈ܫܳܬܗܽܘܢ. ܘܫܰܠܗܶܒܺܝܬܳܐ ܐܰܘܩܕܰܬ ܠܥܰܘܴ̈ܠܶܐ. ܠܘ ܡܶܛܠ ܗܳܕܶܐ ܒܰܠܚܽܘܕ ܐܠܐ ܡܶܛܠ ܕܳܐܦ ܥܶܓ̈ܠܐܷ ܩܰܕܡܳܝ̈ܐ ܗܳܢܘܢ ܚܰܦܶܛܘ ܠܡܶܗܘܳܐ. ܘܥܠ ܕܠܐ ܬܶܪܒܶܐ ܡܰܪܳܚܽܘܬܗܽܘܢ ܘܢܶܗܘܽܘܢ ܙܰܟܳܝ̈ܐ. ܢܦܰܩ ܥܠܰܝܗܽܘܢ ܡܣܳܡܒܪܺܝܫܳܐ. ܕܺܝܢܳܐ ܕܫܳܘܶܐ ܠܡܰܪܳܚܽܘܬܗܘܢ. ܘܟܕ ܩܳܡܘ ܕܒܶܝܬ ܕܳܐܬܳܢ ܘܰܐܒܺܝܪܰܡ ܥܠ ܐܰܗܪܽܘܢ ܘܰܐܠܨܽܘܗܝ ܕܢܶܥܒܶܕ ܠܗܽܘܢ ܐܰܠܗ̈ܐ. ܐܡ̣ܪ ܢܒܺܝܐ:
ܥܒܰܕܘ ܥܶܓܠܳܐ ܒܚܽܘܪܺܝܒ ܘܰܣܓܶܕܘ ܠܰܢܣܺܝܟܳܐ. ܘܚܰܠܶܦܘ ܐܝ̣ܩܳܪܗܽܘܢ ܒܰܕܡܽܘܬܳܐ ܕܬܰܘܪܳܐ ܕܳܐܟܶܠ ܥܶܣܒܳܐ. ܘܰܛܥܰܘ ܠܰܐܠܗܳܐ ܕܰܦܪܰܩ ܐܶܢܽܘܢ. ܐܰܝܟܰܢܳܐ ܗܳܟܝ̣ܠ ܡܶܢ ܗܳܢܘܢ ܕܩܳܡܘ ܒܡܰܪܳܚܽܘܬܗܽܘܢ ܠܽܘܩܒܰܠ ܡܽܘܫܶܐ ܐܶܬܥܰܬܰܕܘ ܥܶܓܠܳܐ. ܘܥܰܕ ܩܰܠܝ̣ܠ ܩܰܪܺܝܒܳܐ ܬܶܗܘܶܐ ܛܳܥܝܽܘܬܳܐ ܘܬܶܣܚܶܐ ܒܥܳܠܡܳܐ ܒܰܫܩܳܠܛܰܥܢܗܽܘܢ. ܐܠܘܠܐ ܕܕܺܝܢܳܐ ܕܰܐܠܗܳܐ ܐܰܕܪܶܟ ܐܶܢܽܘܢ ܘܰܐܘܒܶܕ ܐܢܘܢ ܡܶܢ ܓܰܘ ܟܢܽܘܫܬܳܐ ܘܠܐ ܠܡ ܐܬܕܟܰܪܘ ܠܚܰܝ̈ܠܶܐ ܕܰܥܒܰܕ ܐܰܠܗܳܐ ܟܰܕ ܦܪܰܩ ܐܢܘܢ.
ܕܰܥܒܰܕ ܪܰܘܪ̈ܒܳܬܳܐ ܒܡܶܨܪܶܝܢ. ܘܬܶܕܡܪ̈ܳܬܳܐ ܒܰܐܪܥܳܐ ܕܚܳܡ܆ ܘܰܕܚܺܝ̈ܠܳܬܳܐ ܒܝܰܡܳܐ ܕܣܽܘܦ. ܘܰܠܗܳܠܝܢ ܟܕ ܛܥܰܘ ܒܳܬܰܪ ܕܶܚ̈ܠܳܬܳܐ ܕܰܦܬܰܟܪ̈ܶܐ ܡܺܝ̈ܬܶܐ ܐܶܬܕܒܰܪܘ. ܘܰܚܠܳܦ ܐܠܗܐ ܝܰܩܰܪܘ ܠܬܰܘܪܳܐ ܚܰܪܒܳܐ. ܗܳܠܝܢ ܬܶܕܡܪ̈ܳܬܳܐ ܪܰܘܪ̈ܒܳܬܳܐ. ܥܒܰܪ ܡܶܢ ܩܕܳܡ ܥܽܘܗܕܳܢܗܽܘܢ.ܘܡܶܛܠ ܗܳܢܐ ܐܦ ܐܠܗܐ ܟܕ ܐܶܬܚܰܡܰܬ ܥܠܰܝܗܘܢ ܦܣܰܩ ܥܠܰܝܗܘܢ ܡܰܘܬܳܐ ܘܰܚܒܳܠܳܐ ܘܶܐܡܰܪ:
ܕܢܰܘܒܶܕ ܐܶܢܘܢ. ܘܶܐܠܽܘܠܳܐ ܡܽܘܫܶܐ ܓܰܒܝܶܗ ܕܩܳܡ ܒܬܽܘܪܰܥܬܳܐ ܩܕܳܡܰܘܗܝ ܘܰܐܗܦܶܟ ܪܽܘܓܙܶܗ ܕܠܳܐ ܢܚܰܒܶܠ ܐܶܢܘܢ. ܒܗܳܠܝܢ ܡܰܘܕܰܥ ܢܒܺܝܐ ܕܰܦܣܳܩܳܐ ܠܡ ܕܰܢܦܰܩ ܡܶܢ ܟܺܐܢܽܘܬܳܐ. ܕܟܽܠܶܗ ܥܰܡܳܐ ܢܺܐܒܰܕ. ܐܡ̣ܪ ܓܝܪ ܐܰܠܗܳܐ ܠܡܽܘܫܶܐ. ܕܰܫܒܽܘܩܰܝܢܝ ܐܰܘܒܶܕ ܐܶܢܽܘܢ ܘܶܐܥܒܕܳܟ ܠܥܰܡܳܐ ܕܪܰܒ ܘܥܰܫܺܝܢ ܡܶܢܗܽܘܢ (ܡܦܩܢܐ ܠܒ: ܝ) ܐܠܐ ܐܦ ܗܽܘ ܡܽܘܫܶܐ ܒܳܥܶܐ ܗܘܳܐ ܘܡܶܬܟܰܫܰܦ ܘܰܡܦܺܝܣ. ܕܠܳܐ ܠܰܡ ܡܳܪܝܳܐ ܐܰܠܗܳܐ ܠܐ ܬܰܘܒܶܕ ܠܥܰܡܳܟ ܕܰܐܦܶܩܬ ܡܶܢ ܡܶܨܪܶܝܢ܇ ܒܚܝܠܳܟ ܪܰܒܳܐ ܘܒܰܕܪܳܥܳܟ ܪܳܡܳܐ. ܘܠܳܐ ܢܺܐܡܪܽܘܢ ܡܶܨܪ̈ܳܝܶܐ܇ ܡܶܛܠ ܕܰܣܢܳܐ ܐܶܢܘܢ ܐܰܦܶܩ ܐܶܢܽܘܢ. ܘܩܰܛܶܠ ܐܶܢܘܢ ܒܡܰܕܒܪܳܐ (ܡܦܩܢܐ ܠܒ: ܝܐ-ܝܒ). ܘܟܕ ܗܳܟܰܢܳܐ ܠܳܐ ܐܶܫܬܰܚܠܰܦܘ ܡܶܢ ܩܰܫܝܽܘܬܗܽܘܢ ܘܰܐܝܟ ܠܳܐ ܡܶܕܶܡ ܚܫܺܝ̈ܒܳܢ ܗܘܱ̈ܝ ܒܥܰܝ̈ܢܰܝܗܘܢ ܛܳܒܴ̈ܬܳܐ ܕܡܶܢ ܐܰܠܗܳܐ. ܘܠܐ ܒܚܽܘܒܳܐ ܕܰܐܪܥܳܐ ܗܳܝ ܕܰܡܠܰܟ ܐܰܠܗܳܐ ܠܰܐܒܳܗܴ̈ܬܳܐ ܐܶܬܶܐܣܰܪܘ܆ ܐܡ̣ܪ ܓܝܪ ܢܒܺܝܐ:
ܘܰܐܣܠܝܽܘܗ̇ ܠܰܐܪܥܳܐ ܕܪܶܓܬܳܐ ܘܠܐ ܗܰܝܡܶܢܘ ܠܡܶܠܬܶܗ. ܘܪܰܛܶܢܘ ܒܡܰܫܟ̈ܢܰܝܗܽܘܢ ܘܠܳܐ ܫܡܰܥܘ ܒܩܳܠܶܗ ܕܡܳܪܝܳܐ. ܒܗܳܝ ܕܶܐܬܠܒܶܟܘ ܒܩܽܘܕܡܳܐ ܕܩܰܫܝܽܘܬ ܩܕܳܠܳܐ ܕܠܳܐ ܡܶܬܬܦܺܝܣܳܢܽܘܬܳܐ ܠܐ ܡܗܰܝܡܢܺܝܢ ܗܘܰܘ ܕܡܶܬܓܡܰܪ ܠܘܳܬܗܽܘܢ ܫܽܘܘܕܳܝܳܐ ܗܰܘ ܕܰܡܠܶܟ ܐܰܠܗܳܐ ܘܶܐܫܬܰܘܕܺܝ ܠܰܐܒܳܗܴ̈ܬܳܐ. ܘܡܶܛܠܗܳܢܳܐ ܠܰܐܪܥܳܐ ܗܳܝ ܫܰܡܺܝܢܬܳܐ ܐܝܟ ܠܳܐ ܡܶܕܶܡ ܓܶܝܪ ܚܰܫܒܽܘܗ̇. ܘܰܠܗܳܝ ܕܡܶܬܪܰܓܪܰܓ ܗܘܳܐ ܡܽܘܫܶܐ ܘܰܐܗܪܽܘܢ ܕܢܶܥܠܽܘܢ ܢܶܚܙܽܘܢ ܫܽܘܦܪܳܗ̇ ܘܦܰܐܝܽܘܬܳܗ̇ ܐܰܣܠܝܽܘܗ̇ ܘܶܐܫܬܰܐܰܠܘ ܡܶܢ ܡܰܥܰܠܬܳܐ ܕܠܗ̇. ܕܰܐܝܟ ܗܳܟܰܢܐ ܓܶܝܪ ܐܝ̣ܬܶܝܗ̇ ܟܠ ܢܰܦܫܳܐ ܗܳܝ ܕܡܶܬܠܰܒܟܳܐ ܒܩܽܘܕܡܳܐ ܕܰܚܛܺܝܬܳܐ ܘܡܰܣܠܝܳܐ ܠܛܳܒܴ̈ܬܳܐ ܕܰܐܠܗܳܐ. ܡܶܛܠ ܕܰܒܣܰܒܪܳܐ ܐܶܢܝܢ. ܘܰܠܘܳܬ ܐܰܝܠܶܝܢ ܕܩܰܪ̈ܺܝܒܳܢ ܠܗ̇ ܡܰܚܒܳܐ ܕܰܬܩܰܘܶܐ. ܘܥܰܠܗܳܝ ܟܕ ܡܪܰܛܢܳܐ ܥܰܠ ܡܥܰܕܪܳܢܳܗ̇. ܡܣܰܒܪܳܐ ܡܰܥܠܳܢܳܐ ܕܡܰܫܡܰܥܬܳܗ̇ ܘܠܐ ܫܳܡܥܳܐ ܒܩܳܠܶܗ. ܘܳܐܦ ܟܺܐܢܽܘܬܳܐ ܡܶܬܪܰܥܝܳܐ ܥܠ ܐܰܝܠܝܢ ܕܰܐܝܟ ܗܳܟܰܢܐ ܐܶܢܘܢ ܐܰܒܕܳܢܳܐ ܘܒܽܘܕܳܪܳܐ.
ܘܰܐܪܝ̣ܡ ܠܰܡ ܐܝ̣ܕܶܗ ܥܠܰܝܗܽܘܢ ܕܢܰܘܒܶܕ ܐܶܢܽܘܢ ܒܥܰܡ̈ܡܶܐ. ܘܰܢܒܰܕܰܪ ܙܰܪܥܗܽܘܢ ܒܥܰܡ̈ܡܶܐ ܘܢܰܘܒܶܕ ܐܶܢܘܢ ܒܰܐܪ̈ܥܳܬܳܐ. ܘܗܳܠܶܝܢ ܠܰܘ ܣܪܺܝܩܳܐܝ̣ܬ. ܐܶܠܽܘܠܳܐ ܓܝܪ ܩܰܕܶܡܘ ܐܶܬܠܒܶܟܘ ܒܰܚܛܺܝܬܳܐ. ܘܠܳܐ ܒܰܝܢܳܬ ܥܰܡܡ̈ܐ ܡܒܰܕܰܪ ܗܘܳܐ ܠܗܽܘܢ. ܘܶܐܠܽܘܠܐ ܡܡܰܪܡܪܳܢܽܘܬܳܐ ܠܳܐ ܩܰܕܡܰܬ ܘܠܳܐ ܟܺܐܢܽܘܬܳܐ ܡܶܬܠܰܚܡܳܐ ܗܘܳܬ܆ ܗܶܢܘܢ ܠܰܡ ܗܘܰܘ ܥܶܠܬܳܐ ܠܒܽܘܕܳܪܗܽܘܢ.
ܥܰܠ ܕܶܐܬܢܰܩܰܦܘ ܠܰܦܬܰܟܪ̈ܶܐ ܕܰܦܥܽܘܪ. ܘܶܐܟܰܠܘ ܕܶܒܚܷ̈ܐ ܕܡܺܝ̈ܬܶܐ. ܘܰܐܪܓܙܽܘܗܝ ܒܰܥܒܳܕܰܝ̈ܗܘܢ ܘܒܰܦܬܰܟܪ̈ܰܝܗܽܘܢ ܐܰܛܢܽܘܗܝ. ܘܰܐܥܫܶܢ ܥܠܰܝܗܽܘܢ ܡܰܘܬܳܢܳܐ ܡܶܢ ܫܶܠܝܳܐ. ܟܰܕ ܒܬܰܪܬܶܝܢ ܐܰܣܟܶܠܘ ܥܰܡܳܐ. ܗܳܝ ܕܪܰܒܳܐ ܗܘܳܬ ܡܶܢ ܚܒܰܪܬܳܗ̇. ܟܕ ܓܝܪ ܢܦܰܩ̈ܝ ܢܶܫܷ̈ܐ ܡܶܕܝܰܢܳܝܴ̈ܬܳܐ ܐܝܟ ܕܰܐܠܶܦ ܒܶܠܥܰܡ܆ ܘܶܐܨܰܛܒܱ̈ܬܝ ܒܟܽܠ ܐܶܣܟܺܝ̈ܡܺܝܢ ܠܰܡܓܰܪܳܓܽܘ ܕܶܝܢ ܠܥܰܡܳܐ ܠܘܳܬ ܚܛܺܝܬܳܐ ܩܕܳܡ ܡܰܫܟ̈ܢܰܝܗܽܘܢ. ܕܶܒܚܷ̈ܐ ܕܰܦܬܰܟܪ̈ܶܐ ܓܝܪ ܣܳܝܡܺܝܢ ܗܘܰܘ. ܘܗܰܘ ܕܡܶܬܠܒܶܟ ܗܘܳܐ ܒܚܰܫܳܐ ܕܙܳܢܝܽܘܬܳܐ ܠܽܘܩܕܰܡ ܐܳܟܶܠ ܗܘܳܐ ܕܶܒܚܷ̈ܐ ܕܡܺܝ̈ܬܶܐ ܩܕܳܡ ܬܰܪ̈ܥܶܐ ܥܡ ܙܳܢܝܴ̈ܬܳܐ. ܘܰܡܕܰܒܰܚ ܠܰܦܬܰܟܪ̈ܶܐ ܘܡܶܫܬܰܡܠܶܐ ܒܒܰܥܠ ܦܰܥܽܘܪ. ܘܒܳܬܰܪܟܶܢ ܥܳܐܷܠ ܠܩܶܠܳܝܬܳܐ ܘܰܡܙܰܢܶܐ. ܘܡܶܛܠ ܕܰܐܪܓܙܰܬ ܠܡܳܪܝܳܐ ܛܰܢܦܽܘܬܳܐ ܕܥܰܡ ܦܬܰܟܪ̈ܶܐ ܝܰܬܺܝܪ ܡܶܢ ܗܳܝ ܕܒܳܬܪܳܗ̇. ܘܠܐ ܐܶܡܰܪ ܥܠ ܕܙܰܢܺܝܘ܆ ܐܠܐ ܥܠ ܕܶܐܬܢܰܩܰܦܘ ܠܰܦܬܰܟܪ̈ܶܐ ܕܰܦܥܽܘܪ. ܕܒܰܝܢܳܬ ܗܳܠܝܢ ܓܰܒܪ̈ܶܐ ܫܳܘܶܐ ܠܢܶܨܚܴ̈ܢܶܐ ܐܶܬܚܙܺܝ ܘܟܕ ܪ̈ܺܝܫܰܝ ܥܰܡܳܐ ܡܶܬܦܰܪܣܺܝܢ ܗܘܰܘ ܩܕܳܡ ܡܰܫܟܢܳܐ ܕܣܳܗܕܽܘܬܳܐ ܩܕܳܡ ܫܶܡܫܳܐ. ܙܰܡܰܪ ܚܰܕ ܡܶܢ ܪ̈ܺܝܫܳܢܶܐ ܕܫܰܒ̈ܛܶܐ ܕܫܶܡܥܽܘܢ ܨܒܽܘܬܳܐ ܕܡܰܪܳܚܽܘܬܳܐ ܥܒܰܕ. ܘܟܕ ܡܰܡܣܰܪ ܘܫܳܐܷܛ ܠܡܽܘܫܶܐ ܘܡܰܒܣܶܐ ܥܰܠ ܦܣܳܩܳܐ ܕܰܐܠܗܳܐ ܠܥܺܝܢ ܡܽܘܫܶܐ ܘܰܠܥܺܝܢ ܣܳܒܷ̈ܐ ܕܺܝܣܪܳܐܝܠ ܐܰܡܪܰܚ ܘܥܰܠ ܠܡܰܫܟܢܳܐ ܠܘܳܬ ܟܳܘܣܒܰܝ ܒܰܪܬ ܪ̈ܺܝܫܳܢܶܐ ܕܡܶܕܝܰܢ. ܘܠܽܘܩܒܰܠ ܗܳܢܐ ܓܽܘܡܳܕܳܐ ܩܳܡ ܦܺܝܢܚܶܣ ܒܰܨܠܽܘܬܳܐ ܘܒܰܛܢܳܢܳܐ ܐܶܙܕܰܝܰܢ ܗܘܳܐ. ܘܰܢܣܰܒ ܪܽܘܡܚܳܐ ܥܰܠ ܒܳܬܪܶܗ ܕܗܰܘ ܕܶܐܙܰܠ ܕܢܶܬܒܰܣܰܡ ܒܰܚܛܺܝܬܳܐ. ܘܠܰܬܪܶܝܢ ܒܚܰܕ ܥܶܕܳܢܳܐ ܩܛܰܠ ܘܰܬܠܳܐ ܒܪܽܘܡܚܳܐ. ܘܰܨܠܽܘܬܳܐ ܘܙܳܟܽܘܬܳܐ ܐܶܬܚܰܫܒܰܬ ܠܶܗ. ܐܝܟ ܕܶܐܡܰܪ ܪܽܘܚܳܐ.
ܩܳܡ ܦܺܝܢܚܶܣ ܘܨܰܠܺܝ ܘܶܐܬܟܠܺܝ ܡܰܘܬܳܢܳܐ. ܘܶܐܬܚܰܫܒܰܬ ܠܶܗ ܙܳܟܽܘܬܳܐ ܠܕܳܪܕܳܪ̈ܺܝܢ ܘܰܥܕܰܡܳܐ ܠܥܳܠܰܡ. ܙܳܟܽܘܬܳܐ ܓܶܝܪ ܐܶܬܚܰܫܒܰܬ ܠܶܗ. ܥܠ ܕܠܽܘܩܒܰܠ ܙܳܢܝܽܘܬܳܐ ܩܰܕܶܡ ܐܶܬܟܰܫܰܦ. ܘܰܨܠܽܘܬܳܐ ܬܘܒ ܡܶܛܠ ܕܡܶܬܟܰܫܰܦ ܗܘܳܐ ܘܰܡܨܰܠܶܐ ܒܗܳܝ ܕܶܐܬܚܰܫܰܒ ܕܰܢܒܰܛܶܠ ܠܰܚܛܺܝܬܳܐ. ܟܕ ܓܝܪ ܡܰܘܬܳܢܳܐ ܠܣܰܓܺܝ̈ܐܐ ܡܶܢ ܪ̈ܺܝܫܰܝ ܥܰܡܳܐ ܐܰܝܠܶܝܢ ܕܶܐܫܬܰܡܠܺܝܘ ܒܒܰܥܠ ܦܰܥܽܘܪ. ܥܰܠ ܩܰܝ̈ܣܶܐ ܙܩܰܦ ܘܦܰܪܣܺܝ ܚܛܺܝܬܗܽܘܢ.
ܘܗܳܟܰܢܳܐ ܐܶܬܦܩܶܕ ܡܶܢ ܐܰܠܗܳܐ ܕܢܶܥܒܶܕ ܠܗܽܘܢ. ܐܠܐ ܗܰܘ ܩܶܛܠܳܐ ܕܰܥܒܰܕ ܦܺܝܢܚܶܣ ܒܰܛܶܠ ܣܽܘܥܪܳܢܳܐ ܒܺܝܫܳܐ ܡܶܢ ܥܰܡܳܐ. ܡܶܛܠ ܕܰܥܪ̈ܰܩܝ ܡܶܢܶܗ ܕܣܽܘܥܪܳܢܳܐ ܡܶܕܝܰܢܳܝܴ̈ܬܳܐ ܘܰܥܩܰܪ ܡܰܛܠܰܝ̈ܗܶܝܢ. ܘܟܕ ܥܶܪܩܰܬ ܗܘܳܬ ܠܗ̇ ܡܶܢ ܩܕܳܡ ܛܢܳܢܶܗ ܕܦܺܝܢܚܶܣ ܦܠܰܓܳܐ ܕܰܚܛܺܝܬܳܐ܆ ܐܠܐ ܬܘܒ ܥܰܡܳܐ ܒܳܬܰܪܟܶܢ ܠܰܥܝܳܕܶܗ ܒܺܝܫܳܐ ܗܳܦܶܟ ܗܘܳܐ. ܘܡܰܪܓܶܙ ܗܘܳܐ ܘܠܳܐ ܫܳܠܶܐ.
ܐܰܪܓܙܽܘܗܝ ܥܰܠ ܡܰܝܴ̈ܐ ܕܚܶܪܝܳܢܳܐ. ܘܰܐܒܶܐܫ ܠܡܽܘܫܶܐ ܡܶܛܠܳܬܗܽܘܢ. ܡܶܛܠ ܕܡܰܪܡܰܪܘ ܪܽܘܚܶܗ ܘܡܰܠܶܠ ܒܣܶܦ̈ܘܳܬܶܗ. ܟܕ ܓܝܪ ܐܶܬܦܩܶܕܘ ܡܽܘܫܶܐ ܘܰܐܗܪܽܘܢ ܕܢܰܦܩܽܘܢ ܡܰܝܴ̈ܐ ܡܶܢ ܟܺܐܦܳܐ ܘܢܶܫܬܶܐ ܥܰܡܳܐ ܡܶܛܠ ܥܰܡܳܐ ܕܶܐܬܚܪܺܝ. ܘܥܰܠܗܳܕܐ ܟܠܳܐ ܐܶܢܘܢ ܐܠܗܳܐ ܡܶܢ ܡܰܥܰܠܬܳܐ ܕܠܰܐܪܥܳܐ ܕܡܽܘܠܟܳܢܳܐ. ܘܠܐ ܐܰܥܠܽܘܗܝ ܠܥܰܡܳܐ ܐܝܟ ܕܶܐܫܬܰܘܕܺܝ ܠܗܽܘܢ. ܘܗܳܕܳܐ ܗܝ ܕܰܐܒܶܐܫ ܠܡܽܘܫܶܐ ܡܶܛܠܳܬܗܽܘܢ. ܡܶܛܠ ܕܠܐ ܫܰܒܩܶܗ ܕܠܰܐܪܥܳܐ ܕܡܽܘܠܟܳܢܳܐ. ܘܟܕ ܛܳܒ ܐܰܦܺܝܣ ܥܰܠ ܗܳܕܐ ܘܠܐ ܐܶܬܩܰܒܰܠ. ܘܬܘܒ ܒܰܐܚܪ̈ܳܢܶܐ ܘܰܐܚܪ̈ܳܢܝܳܬܳܐ ܐܰܪܓܶܙ ܥܰܡܳܐ ܠܡܳܪܝܳܐ.
ܘܠܐ ܐܰܘܒܶܕ ܠܥܰܡ̈ܡܶܐ ܕܶܐܡܰܪ ܠܗܽܘܢ ܡܳܪܝܳܐ. ܐܠܐ ܐܶܬܚܰܠܰܛܘ ܒܥܰܡܡ̈ܐ ܘܺܝܠܶܦܘ ܥܒܳܕܰܝ̈ܗܽܘܢ. ܘܰܕܚܶܠܘ ܠܰܦܬܰܟܪ̈ܰܝܗܽܘܢ ܘܰܗܘܰܘ ܠܗܽܘܢ ܠܬܽܘܩܰܠܬܳܐ. ܘܕܰܒܰܚܘ ܒܢܰܝ̈ܗܽܘܢ ܘܰܒܢܴ̈ܬܗܽܘܢ ܠܫܺܐܕ̈ܐ. ܘܶܐܫܰܕܘ ܕܡܳܐ ܙܰܟܳܝܳܐ ܕܡܳܐ ܕܰܒܢܰܝ̈ܗܽܘܢ ܘܕܰܒܢܴ̈ܬܗܽܘܢ. ܕܰܒܰܚܘ ܠܰܦܬܰܟܪ̈ܶܐ ܕܰܟܢܰܥܰܢ ܘܶܐܬܛܰܢܦܰܬ ܐܰܪܥܳܐ ܒܰܕܡܳܐ. ܘܶܐܬܛܰܢܰܦܘ ܒܰܥܒܳܕܰܝ̈ܗܽܘܢ ܘܙܰܢܺܝܘ ܒܨܶܢܥܴ̈ܬܗܽܘܢ. ܩܰܕܶܡ ܗܘܳܐ ܐܰܠܗܳܐ ܘܦܰܩܕܶܗ ܠܥܰܡܳܐ ܕܠܳܐ ܢܰܚܶܐ ܟܽܠ ܢܶܫܡܳܐ ܡܶܢ ܥܰܡܡ̈ܐ ܗܳܠܝܢ ܕܺܐܝܬ ܗܘܳܐ ܒܰܐܪܥܳܐ ܕܰܟܢܰܥܢܳܝ̈ܐ. ܡܶܛܠ ܕܟܰܕ ܝܳܕܰܥ ܗܘܳܐ ܕܟܕ ܡܶܬܬܥܺܝܪ ܒܰܝܢܳܬܗܽܘܢ ܠܳܐ ܡܶܫܬܶܐܶܠ ܡܶܢ ܥܒܳܕܰܝ̈ܗܽܘܢ. ܘܡܶܛܠ ܕܰܠܗܳܕܐ ܥܰܡܳܐ ܠܳܐ ܐܶܬܬܦܺܝܣ ܒܒܺܝ̈ܫܳܬܗܽܘܢ ܕܥܰܡܡ̈ܐ ܗܳܠܝܢ. ܐܶܬܛܰܢܰܦ ܥܰܡܳܐ ܘܚܳܒ ܘܟܰܕ ܡܕܰܒܰܚ ܒܢܰܝܴ̈ܐ ܕܰܐܠܗܳܐ ܠܰܦܬܰܟܪ̈ܶܐ ܚܰܪ̈ܒܶܐ ܘܡܺܝ̈ܬܶܐ. ܘܡܶܛܠ ܕܠܐ ܢܶܗܘܶܐ ܥܰܡܳܐ ܒܝܰܘ̈ܡܰܝ ܕܰܘܝܕ. ܐܝܟ ܕܰܒܝܰܘ̈ܡܰܝ ܡܕܰܒܪ̈ܳܢܶܐ ܕܰܩܕܳܡܰܘܗܝ. ܬܢܳܐ ܣܽܘܥܪ̈ܳܢܶܐ ܕܰܒܗܽܘܢ ܐܰܪܓܶܙ ܥܰܡܳܐ ܠܐܠܗܐ. ܕܠܳܐ ܐܳܦ ܗܶܢܘܢ ܢܶܗܘܽܘܢ ܐܝܟ ܐܰܒܳܗܰܝ̈ܗܽܘܢ ܟܕ ܐܡ̇ܪ ܠܗܽܘܢ:
ܕܡܶܛܠ ܗܳܕܐ ܐܶܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܥܰܡܶܗ. ܘܰܐܣܠܺܝ ܠܝܳܪܬܽܘܬܶܗ. ܘܰܐܫܠܶܡ ܐܶܢܘܢ ܒܺܐܝܕܳܐ ܕܥܰܡ̈ܡܶܐ. ܘܶܐܫܬܰܠܰܛܘ ܒܗܽܘܢ ܣܳܢܰܐܝ̈ܗܽܘܢ. ܘܫܰܥܒܶܕ ܐܶܢܽܘܢ ܠܰܒܥܶܠܕ̈ܒܳܒܰܝܗܽܘܢ. ܘܶܐܫܬܰܥܒܰܕܘ ܬܚܶܝܬ ܐܺܝܕܰܝ̈ܗܽܘܢ. ܘܟܕ ܗܳܟܰܢ ܡܰܣܟܠܺܝܢ ܗܘܰܘ.
ܐܶܠܐ ܙܰܒܢܴ̈ܬܳܐ ܣܰܓܺܝ̈ܐܬܳܐ ܦܰܨܺܝ ܐܶܢܽܘܢ ܘܗܶܢܽܘܢ ܡܰܪܡܪܽܘܗܝ ܒܬܰܪ̈ܥܝܳܬܗܽܘܢ ܘܶܐܬܡܰܟܰܟܘ ܒܥܰܘܠܗܽܘܢ. ܘܡܽܘܟܳܟܗܽܘܢ ܠܡ ܡܶܢ ܥܳܩܬܳܐ ܕܥܰܘܠܳܐ ܗܘܳܐ ܥܰܠ ܕܡܰܪܡܪܽܘܗܝ ܒܬܰܪ̈ܥܝܳܬܗܽܘܢ. ܠܐ ܓܶܝܪ ܡܰܗܡܶܐ ܡܶܢ ܐܰܝܠܶܝܢ ܕܚܳܛܶܝܢ ܒܠܶܒܳܐ ܕܠܐ ܢܰܟܶܣ ܐܶܢܘܢ. ܘܳܐܦܶܢ ܡܪܰܚܶܡ ܥܰܠ ܐܰܝܠܶܝܢ ܕܚܳܛܶܝܢ ܐܠܐ ܠܘ ܡܶܛܠ ܕܫܳܘܶܝܢ. ܡܶܬܥܨܶܐ ܕܶܝܢ ܐܰܘ ܡܶܢ ܚܽܘܒܶܗ ܐܰܘ ܡܶܛܠ ܫܽܘܘܕܳܝܶܗ.
ܚܙܳܐ ܠܰܡ ܒܽܐܘ̈ܠܨܳܢܰܝܗܽܘܢ ܘܰܫܡܰܥ ܒܳܥܽܘܬܗܽܘܢ. ܘܶܐܬܕܟܰܪ ܩܝܳܡܶܗ ܘܪܰܚܶܡ ܥܠܰܝܗܽܘܢ ܘܰܕܒܰܪ ܐܶܢܽܘܢ ܐܝܟ ܣܽܘܓܳܐܐ ܕܛܰܝܒ̈ܘܳܬܶܗ. ܘܝܰܗܒ ܐܶܢܽܘܢ ܒܪ̈ܰܚܡܶܐ ܩܕܳܡ ܟܽܠ ܫܳܒܰܝ̈ܗܽܘܢ. ܘܟܰܕ ܛܳܒ ܠܰܡ ܩܝܳܡܶܗ ܐܶܬܕܟܰܪ ܘܪܰܚܶܡ ܥܠܰܝܗܽܘܢ. ܡܶܢ ܒܳܬܰܪ ܕܰܓܥܰܘ ܩܕܳܡܰܘܗܝ ܘܶܐܬܟܰܫܰܦܘ ܠܶܗ܆ ܐܰܥܒܶܕ ܪ̈ܰܚܡܶܐ ܒܰܐܝܠܶܝܢ ܕܰܫܒܰܘ ܐܶܢܘܢ ܕܠܐ ܢܶܐܠܨܽܘܢ ܐܶܢܘܢ. ܘܡܶܢ ܐܰܠܗܳܐ ܢܶܒܥܽܘܢ ܦܽܘܪܩܳܢܳܐ. ܟܰܕ ܡܦܺܝܣܺܝܢ ܕܶܝܢ ܠܡܳܪܝܳܐ.
ܦܪܽܘܩܰܝܢ ܡܳܪܝܳܐ ܐܰܠܳܗܰܢ ܘܟܰܢܶܫܰܝܢ ܡܶܢ ܥܰܡܡ̈ܐ ܕܢܰܘܕܶܐ ܠܰܫܡܳܟ ܩܰܕܺܝܫܳܐ ܘܢܶܫܬܰܒܰܚ ܒܝܳܪܬܽܘܬܳܟ. ܗܳܠܝܢ ܠܰܡ ܫܳܐܠܺܝܢ ܗܘܰܘ ܕܒܰܐܪܥܳܐ ܗܳܝ ܕܰܐܘܪܶܬ ܐܶܢܽܘܢ ܐܰܠܗܳܐ ܢܶܫܬܰܟܚܽܘܢ ܘܒܳܗ̇ ܢܶܣܓܽܘܢ ܝܰܘ̈ܡܳܬܗܽܘܢ. ܐܶܠܐ ܢܒܺܝܐ ܠܰܘ ܠܘܳܬ ܐܰܪܥܳܐ ܕܦܰܠܶܣܛܺܝܢܺܝ ܚܳܐܱܪ ܗܘܳܐ. ܐܶܠܐ ܒܝܳܪܬܽܘܬܳܐ ܕܠܐ ܡܶܬܚܰܒܠܳܐ ܡܶܬܒܰܩܶܐ ܗܘܳܐ. ܒܗܳܝ ܕܰܠܥܶܠ ܡܶܢ ܫܡܰܝܳܐ ܘܰܢܛܺܝܪܳܐ ܡܶܢ ܐܠܗܳܐ ܠܩܰܕܺܝ̈ܫܶܐ. ܐܰܝܟܳܐ ܕܰܡܒܰܪܟܺܝܢ ܠܶܗ ܕܳܚܠܰܘ̈ܗܝ ܘܳܐܡܪܺܝܢ:
ܒܪܺܝܟ ܗܽܘ ܡܳܪܝܳܐ ܐܰܠܗܳܐ ܕܺܝܣܪܳܐܝܠ ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ. ܘܢܺܐܡܰܪ ܟܽܠܶܗ ܥܰܡܳܐ ܐܰܡܺܝܢ ܐܰܡܝ̣ܢ. ܗܳܠܝܢ ܩܴ̈ܠܐ ܐܝ̣ܬܰܝܗܘܢ ܕܰܐܝܠܶܝܢ ܕܥܳܐܠܺܝܢ ܠܝܳܪܬܽܘܬܶܗ ܕܰܐܠܗܳܐ ܘܰܕܠܳܐ ܫܶܠܝܳܐ ܡܫܰܒܚܺܝܢ ܘܰܡܒܰܪܟܺܝܢ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܫܒܥܐ
ܕܡܰܘܕܰܥ ܒܶܗ ܥܰܠ ܦܽܘܪܩܳܢܳܐ ܕܰܥܒܰܕ ܐܰܠܗܳܐ ܠܓܶܢܣܳܐ ܐܢܳܫܳܝܳܐ ܡܶܢ ܡܰܘܬܳܐ ܘܣܳܛܳܢܳܐ ܘܰܚܛܺܝܬܳܐ.
ܘܟܰܕ ܒܐܪ̈ܳܙܶܐ ܘܰܒܦܷ̈ܠܳܐܬܳܐ ܡܶܬܡܰܠܰܠ ܗܘܳܐ ܒܝܰܕ ܢܒܺܝ̈ܐ ܦܽܘܪܩܳܢܶܗ ܕܰܐܠܗܳܐ. ܕܰܥܒܰܕ ܒܓܶܠܝܳܢܶܗ ܡܶܢ ܡܰܘܬܳܐ ܠܡܳܝܽܘ̈ܬܶܐ. ܘܦܰܨܺܝ ܡܶܢ ܚܒܳܠܳܐ ܠܗܳܢܘܢ ܕܶܐܫܬܰܥܒܰܕܘ ܠܰܚܛܺܝܬܳܐ. ܐܠܐ ܛܽܘܒܳܢܳܐ ܕܰܘܝܕ ܕܠܐ ܬܰܚܦܺܝܬܳܐ ܒܕܽܘܟ ܕܽܘܟ ܦܰܫܩܶܗ ܘܰܓܠܳܝܗܝ ܠܦܽܘܪܩܳܢܳܐ. ܘܐܝ̣ܬ ܐܰܝܟܳܐ ܕܰܒܐܪ̈ܳܙܶܐ ܡܰܠܶܠ. ܐܰܝܠܶܝܢ ܕܚܳܝܪ̈ܳܢ ܒܦܽܘܪܩܳܢܰܢ. ܗܳܕܐ ܕܶܝܢ ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܫܒܰܥ ܠܘ ܐܝܟ ܕܰܒܐܪ̈ܳܙܶܐ ܐܡ̇ܪ. ܐܶܠܐ ܕܠܐ ܬܰܚܦܺܝܬܳܐ ܡܰܟܪܶܙ ܘܰܡܙܰܡܰܪ ܦܽܘܪܩܳܢܶܗ ܕܡܳܪܝܳܐ. ܟܕ ܡܫܰܘܕܰܥ ܕܠܘ ܕܰܚܕܳܐ ܦܢܺܝܬܳܐ ܘܠܘ ܠܚܰܕ ܥܰܡܳܐ ܐܝ̣ܬܰܘܗܝ ܦܽܘܪܩܳܢܳܐ. ܐܠܐ ܕܟܽܠܗܽܘܢ ܥܰܡ̈ܡܶܐ ܘܰܕܟܽܠܗܶܝܢ ܦܶܢܝܴ̈ܬܳܐ. ܐܠܐ ܡܶܢ ܛܰܝܒܽܘܬܳܐ ܘܪ̈ܰܚܡܶܐ ܡܫܰܪܶܐ ܒܦܽܘܪܩܳܢܶܗ. ܡܶܛܠ ܕܰܢܩܰܕܶܡ ܢܒܺܝܳܐ ܘܢܰܘܕܰܥ ܕܶܝܢ ܕܰܦܬܺܝܚ ܬܰܪܥܳܐ ܕܰܚܢܳܢܶܗ. ܘܰܒܪ̈ܰܚܡܶܐ ܦܳܓܰܥ ܒܰܫܒܺܝܬܳܐ. ܟܰܕ ܡܰܘܕܰܥ ܢܒܺܝܐ ܕܰܒܚܰܝܠܳܐ ܕܠܐ ܡܶܬܚܣܶܢ ܕܳܐܶܢ ܥܰܡ ܒܥܶܠܕ̈ܒܳܒܶܐ ܕܚܰܝܱ̈ܝܢ. ܘܡܶܛܠ ܕܰܠܡܳܪ̈ܽܘܕܶܐ ܡܥܺܝܩܳܐ ܗܳܝ ܕܰܒܛܰܝܒܽܘܬܳܐ ܢܶܬܚܰܫܰܚ ܠܘܳܬܗܽܘܢ ܕܡܰܣܟܠܳܢ̈ܐ. ܡܶܢ ܛܰܝܒܽܘܬܳܐ ܡܫܰܪܶܐ ܐܰܝܟ ܕܶܐܡܰܪ ܢܒܺܝܳܐ:
ܐܰܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܛܰܝܒܽܘܬܶܗ. ܢܺܐܡܪܽܘܢ ܦܪ̈ܺܝܩܰܘܗܝ ܕܡܳܪܝܳܐ. ܗܳܕܐ ܠܰܡ ܛܰܝܒܽܘܬܳܐ ܕܰܦܪ̈ܺܝܩܶܐ ܐܝ̣ܬܶܝܗ̇. ܠܘ ܕܗܳܢܘܢ ܕܶܐܬܦܪܶܩܘ ܒܝܰܕ ܡܽܘܫܶܐ. ܘܠܘ ܕܗܳܢܘܢ ܕܰܬܚܶܝܬ ܟܺܐܢܽܘܬܶܗ ܕܢܳܡܽܘܣܳܐ ܡܶܬܕܰܒܪܺܝܢ܆ ܐܶܠܐ ܦܪ̈ܺܝܩܶܐ ܕܡܳܪܝܳܐ ܢܰܘܕܽܘܢ ܠܛܰܝܒܽܘܬܶܗ ܕܰܦܪܰܩ ܐܶܢܘܢ ܒܓܶܠܝܳܢܶܗ. ܘܠܘ ܒܰܪܢܳܫܳܐ ܦܰܨܺܝ ܐܶܢܘܢ. ܦܪ̈ܺܝܩܰܘܗܝ ܕܡܳܪܝܳܐ ܢܰܘܕܽܘܢ.
ܡܶܛܠ ܕܰܦܪܰܩ ܐܶܢܘܢ ܡܶܢ ܐܝ̣ܕܳܐ ܕܳܐܠܽܘܨܳܐ. ܘܡܶܢ ܗܰܘ ܚܶܘܝܳܐ ܕܰܐܠܶܨ ܐܶܢܘܢ ܕܶܝܢ ܒܠܰܘ̈ܛܳܬܳܐ ܘܫܰܩܶܦ ܐܶܢܘܢ ܒܦܽܘܠܚܳܢܳܐ ܒܰܐܪܥܳܐ ܕܟܽܘ̈ܒܶܐ. ܘܠܘ ܚܰܕ ܥܰܡܳܐ ܐܝ̣ܬܰܝܗܽܘܢ ܦܪ̈ܺܝܩܰܘܗܝ ܕܡܳܪܝܳܐ. ܘܠܘ ܡ̣ܢ ܐܰܪܥܳܐ ܕܡܶܨܪܶܝܢ ܐܰܦܶܩ ܐܶܢܘܢ.
ܐܠܐ ܡܶܢ ܟܽܠܗܶܝܢ ܐܰܪ̈ܥܳܬܳܐ ܟܰܢܶܫ ܐܶܢܘܢ. ܡܶܢ ܡܰܕܢܚܳܐ ܘܡܶܢ ܡܰܥܪܒܳܐ ܘܡ̣ܢ ܓܰܪܒܝܳܐ ܘܡ̣ܢ ܝܰܡܳܐ. ܒܟܽܠܗܶܝܢ ܦܶܢܝܴ̈ܬܳܐ ܐܶܬܝ̣ܕܰܥ ܦܽܘܪܩܳܢܶܗ ܕܥܰܡܰܢܽܘܐܝܠ. ܘܰܒܟܽܠ ܐܰܬܰܪ ܐܶܬܓܠܺܝ. ܘܶܐܬܟܪܶܙ ܒܝܰܕ ܫܠܺܝܚ̈ܐ ܦܽܘܪܩܳܢܶܗ ܕܰܐܠܳܗܰܢ. ܘܗܳܝ ܕܶܐܡܰܪ ܡܶܢ ܡܰܕܢܚܳܐ ܡܰܘܕܰܥ ܠܰܫܠܺܝܚ̈ܐ ܕܶܐܬܦܪܶܩܘ ܗܳܠܶܝܢ ܓܶܝܪ ܠܰܘ ܕܠܐ ܡܰܘܕܰܥܬܳܐ ܕܰܐܠܗܳܐ ܗܘܰܘ. ܐܰܟܡܳܐ ܕܶܐܡܰܪ ܦܳܪܽܘܩܰܢ ܡܶܛܠ ܢܰܬܰܢܰܐܝܠ ܟܰܕ ܚܙܳܝܗܝ. ܕܗܳܐ ܫܰܪܺܝܪܳܐܝ̣ܬ ܒܰܪ ܝ̣ܣܪܳܐܝܠ ܕܢܶܟܠܳܐ ܠܰܝܬ ܒܶܗ (ܝܘܚܢܢ ܐ: ܡܙ). ܘܗܳܕܐ ܡܚܰܘܝܳܐ ܗܘܳܬ ܥܠܰܘܗܝ ܕܟܺܐܢܳܐ ܗܘܳܐ ܒܢܳܡܽܘܣܳܐ ܕܰܐܒܳܗܴ̈ܬܳܐ. ܘܬܘܒ ܐܳܦ ܗܳܠܝܢ ܕܒܶܝܬ ܦܶܛܪܽܘܣ ܘܰܕܒܶܝܬ ܝܽܘܚܰܢܳܢ ܡܰܥܡܕܳܢܳܐ. ܘܰܗܘܰܘ ܠܗ ܬܰܠܡܺܝ̈ܕܶܐ ܗܳܠܝܢ ܘܰܐܚܪ̈ܳܢܶܐ ܘܡܶܢ ܦܢܺܝܬܳܐ ܕܡܰܕܢܚܳܐ ܟܰܢܶܫ ܐܶܢܘܢ. ܘܗܳܢܘܢ ܕܡܶܢ ܡܰܥܪܒܳܐ ܘܡ̣ܢ ܓܰܪܒܝܳܐ ܟܰܢܶܫ ܢܰܩܺܝܦܳܐ. ܡܶܛܠ ܕܦܶܢܝܴ̈ܬܳܐ ܗܳܠܝܢ ܚܶܫܽܘ̈ܟܳܬܳܐ ܐܝ̣ܬܰܝܗܶܝܢ. ܥܰܡܡ̈ܐ ܐܶܢܘܢ ܚܰܛܳܝ̈ܐ ܕܰܚܒܺܝܫܺܝܢ ܗܘܰܘ ܒܛܳܥܝܽܘܬܳܐ. ܘܝܳܬܒܺܝܢ ܗܘܰܘ ܒܛܶܠܳܠܰܝ̈ ܡܰܘܬܳܐ. ܒܪܰܡ ܢܶܒܥܶܐ ܡܶܛܠܡܳܢܐ ܐܡ̣ܪ ܝܰܡܳܐ ܚܠܳܦ ܬܰܝܡܢܳܐ. ܐܳܦ ܗܳܕܐ ܓܝܪ ܥܰܠ ܥܽܘܬܪܶܗ ܘܪܰܒܽܘܬܶܗ ܕܐܪܳܙܳܐ ܐܶܬܟܰܬܒܰܬ. ܝܰܡܳܐ ܗܳܟܺܝܠ ܠܰܥܡܳܕܳܐ ܩܰܕܺܝܫܳܐ ܡܰܠܶܦ ܕܠܰܝܬ ܠܡܶܥܰܠ ܠܘܳܬ ܦܳܪܽܘܩܳܐ ܐܠܐ ܒܝܰܕ ܬܰܪܥܳܐ ܕܡܰܥܡܽܘܕܺܝܬܳܐ. ܘܥܰܠܗܳܝ ܣܳܐܷܡ ܝܰܡܳܐ ܒܳܬܰܪ ܗܳܠܝܢ ܬܠܳܬ ܦܶܢܝܴ̈ܬܳܐ. ܟܰܕ ܡܰܠܶܦ ܕܟܽܠܗܽܘܢ ܦܪ̈ܺܝܩܶܐ ܕܡܰܝܬܶܐ ܡܰܠܟܳܐ ܥܰܠ ܦܶܢܝܴ̈ܬܳܐ ܗܳܠܝܢ. ܒܝܰܡܳܐ ܕܡܰܥܡܽܘܕܺܝܬܳܐ ܡܚܰܣܶܐ ܘܰܡܚܰܠܶܠ ܡܳܐܢ̈ܐ ܕܢܰܦܫܴ̈ܬܗܽܘܢ. ܘܗܳܝܕܶܝܢ ܡܳܐ ܕܰܐܫܺܝܓܘ ܘܚܰܘܰܪ ܐܶܢܽܘܢ ܘܰܐܥܡܶܕ ܘܩܰܕܶܫ ܐܶܢܘܢ. ܡܰܠܒܶܫ ܠܗܽܘܢ ܐܶܣ̈ܛܠܶܐ ܚܶܘܳܪ̈ܳܬܳܐ ܕܠܐ ܡܶܬܚܰܒܠܳܢܽܘܬܳܐ ܘܡܰܥܶܠ ܘܡܰܣܡܶܟ ܠܗܽܘܢ ܒܰܚܠܽܘܠܶܗ. ܘܡܶܛܠܗܳܕܐ ܣܳܡ ܝܰܡܳܐ ܚܠܳܦ ܬܰܝܡܢܳܐ. ܥܰܠ ܕܰܒܝܰܕ ܦܶܠܐܷܬܳܐ ܗܳܕܐ ܫܰܘܕܰܥ ܐܪܳܙܳܐ ܕܡܰܥܡܽܘܕܺܝܬܳܐ. ܒܳܬܰܪ ܗܳܕܐ ܡܰܥܶܠ ܫܰܪܒܶܗ ܕܥܰܡܳܐ. ܟܰܕ ܡܶܬܕܟܰܪ ܛܳܥܝܽܘܬܶܗ ܘܠܐ ܡܶܫܬܰܡܥܳܢܽܘܬܶܗ.
ܟܕ ܛܥܰܘ ܠܰܡ ܒܡܰܕܒܪܳܐ ܕܰܐܫܺܝܡܽܘܢ ܘܽܐܘܪܚܳܐ ܕܰܩܪܺܝܬܳܐ ܕܝܳܬܒܳܐ ܘܠܳܐ ܐܶܫܟܰܚܘ. ܟܦܶܢܘ ܘܰܨܗܺܝܘ ܘܢܰܦܫܗܽܘܢ ܐܶܬܛܰܪܦܰܬ. ܟܽܠܗܶܝܢ ܗܳܠܝܢ ܓܝܪ ܣܽܘܥܪܳܢܳܐܝ̣ܬ ܗܘ̈ܝ ܠܗܰܘ ܥܰܡܳܐ ܟܕ ܛܥܳܐ ܒܡܰܕܒܪܳܐ. ܘܗܶܢܘܢ ܟܕ ܡܶܬܢܰܣܶܝܢ ܗܘܰܘ ܒܟܰܦܢܳܐ ܘܰܒܨܰܗܝܳܐ. ܘܗܶܢܘܢ ܒܚܰܣܺܝܪܽܘܬ ܪܶܥܝܳܢܳܐ ܕܗܰܝܡܳܢܽܘܬܗܽܘܢ ܠܘܳܬ ܪܛܽܘܢܝܳܐ ܡܶܬܗܰܦܟܺܝܢ ܗܘܰܘ. ܐܠܘ ܓܝܪ ܠܐ ܟܳܦܢܺܝܢ ܗܘܰܘ. ܠܐ ܩܳܥܶܐ ܗܘܳܐ ܪܽܘܚܳܐ ܒܰܢܒܺܝܐ. ܐܳܘ ܟܠ ܕܰܨܗܶܝܢ ܙܶܠܘ ܠܡܰܝܴ̈ܐ. ܕܠܰܝܬ ܠܶܗ ܟܶܣܦܳܐ ܙܶܠܘ ܡܽܘܪܘ ܘܰܐܟܽܘܠܘ ܕܠܐ ܟܶܣܦܳܐ. ܘܰܕܠܳܐ ܕܡܱ̈ܝܳܢ ܚܰܠܒܳܐ ܘܚܰܡܪܳܐ (ܐܫܥܝܐ ܢܗ: ܐ). ܘܡܳܕܶܝܢ ܗܳܕܐ ܕܶܐܡܰܪ ܡܙܰܡܪܳܢܳܐ ܕܰܟܦܶܢܘ ܘܰܨܗܺܝܘ ܘܢܰܦܫܗܽܘܢ ܐܶܬܛܰܪܦܰܬ. ܗܳܝ ܗܺܝ ܕܶܐܡܰܪ ܛܽܘܒܳܢܳܐ ܐܶܫܰܥܝܳܐ ܕܙܶܠܘ ܠܡܰܝܴ̈ܐ (ܐܫܥܝܐ ܢܗ: ܐ) ܘܰܠܘܳܬ ܐܶܫܰܥܝܳܐ ܐܶܬܦܢܺܝ ܦܶܬܓܳܡܳܐ. ܕܶܐܥܢܶܐ ܐܶܢܽܘܢ ܡܳܪܝܳܐ ܐܰܠܳܗܳܐ ܘܠܳܐ ܐܶܫܒܽܘܩ ܐܶܢܽܘܢ (ܐܫܥܝܐ ܡܐ: ܝܙ). ܗܳܪܟܳܐ ܕܶܝܢ ܐܡ̣ܪ ܢܒܺܝܳܐ.
ܒܥܰܘ ܡܶܢ ܡܳܪܝܳܐ ܒܽܐܘ̈ܠܨܳܢܶܐ ܕܺܝܠܗܽܘܢ ܘܡܶܢ ܥܳܩܴ̈ܬܗܽܘܢ ܐܰܦܶܩ ܐܶܢܽܘܢ. ܥܰܠܗܳܕܶܐ ܓܶܝܪ ܐܰܠܺܝܨܺܝܢ ܗܘܰܘ ܥܰܡܡ̈ܐ ܚܰܛܳܝ̈ܐ ܕܠܰܝܬ ܗܘܳܐ ܠܗܽܘܢ ܠܰܚܡܳܐ ܕܒܽܘܪ̈ܟܳܬܳܐ ܥܠ ܦܳܬܽܘܪܳܐ ܕܺܝܠܗܽܘܢ. ܗܢܘ ܕܶܝܢ ܠܰܚܡܳܐ ܩܰܕܺܝܫܳܐ. ܘܡܰܝ̈ܐ ܬܽܘܒ ܠܰܝܬ ܗܘܳܐ ܕܢܶܫܬܶܐ ܒܰܪܢܳܫܳܐ ܘܢܺܚܶܐ. ܡܶܛܠ ܕܰܚܠܺܝܛܳܐ ܗܘܳܬ ܡܶܪܬܶܗ ܕܚܶܘܝܳܐ ܒܡܰܒܽܘܥܶܗ ܕܥܳܠܡܳܐ. ܟܕ ܕܝܢ ܐܶܬܳܐ ܐܰܠܗܳܐ ܥܰܠ ܐܰܪܥܳܐ ܘܶܐܬܚܙܺܝ ܒܰܒܣܰܪ. ܫܒܰܩ ܕܢܶܩܪܽܘܒ ܠܕܰܦܢܶܗ ܐܶܣܛܪܰܛܺܝܽܘܛܳܐ ܘܰܒܠܰܥ ܒܪܽܘܡܚܳܐ. ܘܟܕ ܒܠܰܥ ܦܩܰܕ ܡܶܛܠ ܢܝܳܚܶܗ. ܕܢܶܦܽܘܩ ܡܰܒܽܘܥܳܐ ܕܚܰܝܷ̈ܐ ܡܶܢ ܣܶܛܪܶܗ. ܘܢܶܬܶܠ ܫܳܩܽܘܬܳܐ ܕܚܰܝ̈ܐ ܕܫܽܘܒܩܳܢ ܚܛܳܗ̈ܐ. ܠܥܰܡܡ̈ܐ ܚܰܛܳܝ̈ܐ ܕܰܨܗܶܝܢ ܗܘܰܘ ܠܪ̈ܰܚܡܶܐ. ܘܡܶܢ ܒܳܬܰܪ ܕܰܐܫܩܺܝ ܐܶܢܘܢ. ܚܰܘܺܝ ܐܶܢܘܢ ܐܽܘܪܚܳܐ ܕܚܰܝ̈ܐ ܕܰܢܗܰܠܟܽܘܢ ܒܗ̇ ܐܰܝܟ ܕܶܐܡܰܪ ܢܒܺܝܐ܆
ܗܰܠܶܟ ܐܶܢܽܘܢ ܒܽܐܘܪܚܳܐ ܕܩܽܘܫܬܳܐ ܠܡܺܐܙܰܠ ܠܩܽܘܪ̈ܝܳܐ ܕܝܳܬܒܴ̈ܢ. ܐܽܘܪܚܳܐ ܒܰܫܪܳܪܳܐ ܗܽܘܝܽܘ ܥܰܡܰܢܽܘܐܝܠ ܕܶܐܡܰܪ ܠܬܰܠܡܺܝ̈ܕܰܘܗܝ ܕܶܐܢܳܐ ܐܢܳܐ ܐܽܘܪܚܳܐ ܘܚܰܝܷ̈ܐ ܘܠܳܐ ܐܢܳܫ ܡܶܫܟܰܚ ܠܡܶܐܬܳܐ ܠܘܳܬ ܐܳܒܝ. ܐܶܠܐ ܐܶܢ ܒܺܝ (ܝܘܚܢܢ ܝܕ: ܘ). ܩܽܘܪ̈ܝܳܐ ܕܶܝܢ ܕܝܳܬܒܴ̈ܢ ܕܡܰܘܒܠܳܐ ܠܗܶܝܢ ܐܽܘܪܚܳܐ ܐܝ̣ܬܰܝܗܶܝܢ ܗܳܠܝܢ ܐܰܘܳܢ̈ܐ ܕܶܐܡܰܪ ܡܳܪܢ ܕܺܐܝܬ ܒܶܝܬ ܐܰܒܽܘܗܝ. ܘܰܩܪܺܝܬܳܐ ܩܰܕܡܳܝܬܳܐ ܐܝ̣ܬܶܝܗ̇ ܦܶܠܓܽܘܬܳܐ ܕܡܰܠܰܐܟ̈ܐ ܩܰܕܺܝ̈ܫܳܐ ܗܳܢܘܢ ܕܶܐܬܩܰܝܰܡܘ ܡܶܢ ܐܰܠܗܳܐ ܐܝܟ ܕܢܶܗܘܽܘܢ ܪ̈ܽܘܚܶܐ ܕܬܶܫܡܶܫܬܳܐ ܡܶܛܠ ܗܳܠܝܢ ܕܰܥܬܺܝܕܺܝܢ ܠܡܺܐܪܰܬ ܚܰܝ̈ܐ ܕܗܶܢܘܢ ܗܳܠܝܢ ܕܠܐ ܫܶܠܝܳܐ ܘܰܕܠܳܐ ܡܰܐܝܢܽܘܬܳܐ ܦܳܪܚܺܝܢ ܠܟܽܠ ܦܶܢ̈ܝܳܢ. ܕܰܒܢܱ̈ܝ ܩܪܺܝܬܗܽܘܢ ܠܟܽܠܗܽܘܢ ܕܡܶܬܛܦܺܝܣܺܝܢ ܠܡܰܠܦܳܢܽܘܬܗܽܘܢ ܗܳܝ ܕܟܰܣܝܳܐܝ̣ܬ ܘܠܐ ܡܶܬܕܰܪܟܳܢܳܐܝ̣ܬ ܡܰܥܒܕܺܝܢ ܒܗܰܘܢ̈ܐ ܕܩܰܕܺܝ̈ܫܶܐ. ܡܶܛܠ ܕܠܰܘ ܒܚܰܕ ܐܰܬܪܳܐ ܥܳܡܪܺܝܢ ܟܶܢ̈ܫܶܐ ܥܶܠܳܝ̈ܐ. ܘܕܳܐܡܰܪ ܡܙܰܡܪܳܢܳܐ ܩܽܘܪ̈ܝܳܐ. ܠܘ ܟܕ ܡܰܚܶܬ ܘܰܡܬܰܚܬܶܐ ܠܚܰܝ̈ܠܰܘܳܬܳܐ ܕܰܠܥܶܠ. ܟܕ ܒܗܳܕܐ ܩܰܠܶܣ ܐܶܢܶܝܢ ܒܗܳܝ ܕܠܳܐ ܡܬܽܘܡ ܐܶܬܢܰܣܺܝܘ ܐܰܬܪ̈ܰܘܳܬܗܽܘܢ ܒܨܳܕܝܽܘܬܳܐ ܕܡܶܢܗܽܘܢ. ܬܰܡܳܢ ܓܶܝܪ ܡܳܐ ܕܡܰܛܺܝܘ ܩܰܕܺܝ̈ܫܶܐ. ܡܰܘܕܶܝܢ ܠܗܰܘ ܕܰܥܒܰܕ ܐܶܢܘܢ ܒܢܱ̈ܝ ܡܰܥܡܪܳܐ ܘܩܰܪ̈ܺܝܒܶܐ ܠܡܰܠܐܱܟܱ̈ܝ ܫܡܰܝܳܐ.
ܢܰܘܕܽܘܢ ܠܡܳܪܝܳܐ. ܙܰܕܺܝܩܰܘ̈ܗܝ ܕܪ̈ܰܚܡܰܘܗܝ ܥܰܠ ܒܢܰܝ̈ܢܳܫܳܐ. ܡܰܘܕܰܥ ܕܝܢ ܡܙܰܡܪܳܢܳܐ. ܕܗܺܝ ܗܳܕܐ ܒܪ̈ܰܚܡܶܐ ܐܶܬܝܰܗܒܰܬ ܠܗܽܘܢ. ܒܗܳܝ ܕܳܐܡܰܪ ܕܪ̈ܰܚܡܰܘܗܝ ܥܰܠ ܒܢܰܝ̈ܢܳܫܳܐ. ܗܳܝܕܝܢ ܣܳܒܥܺܝܢ ܘܡܶܬܒܰܣܡܺܝܢ ܡܶܢ ܛܳܒܴ̈ܬܳܐ ܕܺܐܝܬ ܒܩܽܘܪ̈ܝܳܐ ܗܳܠܝܢ. ܐܝܟ ܕܶܐܡܰܪ ܪܽܘܚܳܐ:
ܡܶܛܠ ܕܣܰܒܰܥ ܢܰܦ̈ܫܳܬܳܐ ܡܛܰܪ̈ܦܳܬܳܐ ܢܰܦܫܳܐ ܟܦܰܢܬܳܐ ܡܠܳܐ. ܕܰܐܝܠܶܝܢ ܕܝܳܬܒܺܝܢ ܒܚܶܫܽܘܟܳܐ ܘܰܒ̈ܛܶܠܳܠܰܝ ܡܰܘܬܳܐ. ܘܗܳܝ ܕܶܐܬܐܰܡܪܰܬ ܡܶܢ ܠܥܶܠ ܕܗܳܠܝܢ ܕܡܶܬܛܰܪܦܺܝܢ ܗܘܰܘ ܒܟܰܦܢܳܐ ܘܰܒܨܰܗܝܳܐ ܥܰܡܡ̈ܐ ܗܘܰܘ ܚܰܛܳܝ̈ܐ. ܕܰܡܓܰܙܶܝܢ ܗܘܰܘ ܡܶܢ ܫܶܡܥܳܐ ܕܡܶܠܬܳܐ ܕܰܐܠܗܳܐ. ܡܶܛܠ ܕܡܶܢ ܒܳܬܰܪ ܨܠܺܝܒܳܐ ܬܪܶܥܣܰܪ ܬܰܠܡܺܝ̈ܕܶܐ ܘܫܰܒܥܺܝܢ ܫܠܺܝ̈ܚܶܐ ܩܰܕܺܝ̈ܫܶܐ. ܘܥܰܡ ܗܳܠܝܢ ܬܘܒ ܚܰܡܶܫܡܳܐܐ ܐܰܚܻ̈ܝܢ ܐܰܟܚܕܳܐ ܕܶܐܬܚܙܺܝ ܠܗܽܘܢ ܡܶܢ ܒܳܬܰܪ ܩܝܳܡܬܳܐ. ܘܫܰܕܰܪ ܐܶܢܘܢ ܠܒܶܝܬ ܥܰܡܡ̈ܐ. ܟܕ ܛܥܺܝܢܺܝܢ ܠܰܚܡܳܐ ܕܚܰܝ̈ܐ .ܘܥܰܡܗܽܘܢ ܡܰܒܽܘܥܳܐ ܕܰܡܠܶܐ ܡܰܝܴ̈ܐ ܐܰܠܗܳܐ. ܕܰܒܓܰܘ ܦܩܰܥܬܳܐ ܢܫܰܡܪܽܘܢ ܠܡܰܫܩܳܝܽܘ ܐܶܢܘܢ ܐܰܝܟ ܕܶܐܡܰܪ ܛܽܘܒܳܢܳܐ ܐܶܫܰܥܝܳܐ. ܕܶܐܦܬܰܚ ܒܦܰܩ̈ܥܳܬܳܐ ܡܰܒܽܘ̈ܥܶܐ. ܘܰܒܡܰܕܒܪܳܐ ܐܶܥܒܶܕ ܐܰܓܡ̈ܐ (ܐܫܥܝܐ ܡܐ: ܝܚ). ܕܢܶܫܬܶܐ ܥܰܡܝ ܓܰܒܝܳܐ. ܥܰܡܳܐ ܗܳܢܐ ܕܰܓܒܺܝܬ ܠܺܝ (ܐܫܥܝܐ ܡܓ: ܟ-ܟܐ). ܘܟܕ ܓܝܪ ܗܳܠܶܝܢ ܗܘ̈ܝ. ܡܰܠܝܳܐܝ̣ܬ ܣܰܒܰܥ ܢܰܦ̈ܫܳܬܳܐ ܡܛܰܪ̈ܦܳܬܳܐ ܕܥܰܡܡ̈ܐ ܚܰܛܳܝ̈ܐ. ܘܢܰܦܫܳܐ ܟܦܰܢܬܳܐ ܡܠܳܐ. ܡܳܐ ܓܝܪ ܕܥܰܠܘ ܩܰܕܺܝ̈ܫܶܐ ܠܒܶܝܬ ܡܰܠܟܽܘܬܳܐ ܠܰܘ ܢܰܦ̈ܫܳܬܳܐ ܣܰܓܺܝ̈ܐܬܳܐ ܡܶܬܚܰܫܒܺܝܢ. ܐܠܐ ܡܶܛܠ ܚܽܘܒܗܽܘܢ ܟܕ ܣܰܓܺܝ̈ܐܐ ܐܶܢܘܢ ܚܰܕ ܐܶܢܘܢ. ܐܰܝܟ ܕܰܡܒܰܕܶܩ ܫܠܶܝܡܽܘܢ ܚܰܟܺܝܡܳܐ. ܒܰܟܬܳܒܳܐ ܕܬܶܫܒܚܴ̈ܬ ܬܶܫܒ̈ܚܳܬܳܐ. ܐܡ̣ܪ ܓܝܪ ܕܶܫܬܺܝܢ ܐܶܢܶܝܢ ܡܰܠܟܴ̈ܢ. ܘܰܬܡܳܢܺܝܢ ܕܪ̈ܽܘܟܳܢ. ܘܰܥܠܰܝ̈ܡܳܬܳܐ ܠܰܝܬ ܠܗܶܝܢ ܡܶܢܝܳܢ (ܬܫܒ̈ܚܬ ܬܫܒ̈ܚܬܐ ܘ: ܙ). ܘܡܶܢ ܕܰܚܙܳܐ ܐܶܢܶܝܢ ܒܚܰܕ ܓܢܽܘܢܳܐ. ܟܰܠܬܳܐ ܩܪܳܐ ܐܶܢܶܝܢ. ܡܶܛܠ ܕܳܐܦ ܚܰܬܢܰܐ ܗܰܘ ܚܰܕ ܗܽܘ. ܚܕܳܐ ܗܝ ܠܶܐܡܳܗ̇ ܘܓܰܒܝܳܐ ܗܝ ܠܝܳܠܶܕܬܳܗ̇. ܗܳܠܝܢ ܕܺܐܝܬܰܝܗܽܘܢ ܗܘܰܘ ܒܚܶܫܽܘܟܳܐ ܘܰܒ̈ܛܶܠܳܠܰܝ ܡܰܘܬܳܐ. ܘܰܐܣܺܝܪܺܝܢ ܗܘܰܘ ܒܡܶܣܟܺܢܽܘܬܳܐ ܘܰܒܦܰܪܙܠܳܐ. ܡܶܛܠ ܕܡܰܪܡܰܪܘ ܡܶܠܬܶܗ ܕܰܐܠܗܳܐ ܘܬܰܪܥܺܝܬܶܗ ܕܰܡܪܰܝܡܳܐ ܐܰܣܠܺܝܘ. ܠܗܳܠܶܝܢ ܓܝܪ ܫܪܶܟܘ ܗܘܰܘ ܒܢܱ̈ܝܢܳܫܳܐ ܡܶܢ ܒܳܬܰܪ ܕܰܚܛܰܘ. ܘܡܶܣ̈ܟܺܢܶܐ ܗܘܰܘ ܡܶܢ ܦܽܘܠܚܳܢܳܐ ܕܙܰܕܺܝܩܽܘܬܳܐ. ܘܰܒܫܽܘܥܒܳܕܶܗ ܕܣܳܛܳܢܳܐ ܡܫܰܥܒܕܺܝܢ ܗܘܰܘ. ܘܗܺܝ ܠܡ ܗܳܕܐ ܥܠ ܕܡܰܪܡܰܪܘ ܡܶܠܬܶܗ ܕܰܐܠܗܳܐ ܒܓܰܘ ܦܰܪܕܰܝܣܳܐ ܘܰܫܡܰܥܘ ܠܚܶܘܝܳܐ. ܘܰܗܘܰܘ ܬܰܠܡܺܝ̈ܕܶܐ ܠܬܰܢܺܝܢܳܐ ܡܶܬܝܰܕܥܳܢܳܐ. ܘܰܐܣܠܺܝܘ ܬܰܪܥܺܝܬܶܗ ܕܰܡܪܰܝܡܳܐ. ܘܰܥܒܰܕܘ ܐܰܝܟ ܕܰܐܠܶܦ ܐܶܢܘܢ ܐܳܟܶܠܩܰܪܨܳܐ. ܘܥܰܠܗܳܕܐ ܐܰܫܠܶܡ ܐܶܢܘܢ ܠܦܽܘܠܚܳܢܳܐ ܕܰܐܪܥܳܐ ܕܟܽܘ̈ܒܶܐ. ܘܰܒܕܽܘܥܬܳܐ ܕܰܐܦܰܝ̈ܗܘܢ ܢܶܐܟܠܽܘܢ ܠܰܚܡܳܐ. ܘܟܕ ܡܰܣܓܶܝܢ ܦܳܠܚܺܝܢ ܒܰܐܪܥܳܐ. ܠܐ ܬܶܬܶܠ ܠܗܽܘܢ ܚܰܝܠܳܗ̇. ܐܡ̣ܪ ܓܝܪ ܪܽܘܚܳܐ.
ܘܬܰܒܰܪ ܒܥܰܡܠܳܐ ܠܶܒܗܽܘܢ ܐܳܦ ܐܶܬܟܪܰܗ ܘܠܰܝܬ ܕܰܡܥܰܕܰܪ ܠܗܽܘܢ. ܐܠܐ ܟܕ ܗܳܠܝܢ ܠܰܡ ܗܘܱ̈ܝ.
ܨܰܠܺܝܘ ܠܘܳܬ ܡܳܪܝܳܐ ܒܥܳܩܴ̈ܬܗܽܘܢ ܘܡܶܢ ܐܽܘ̈ܠܨܳܢܰܝܗܽܘܢ ܦܪܰܩ ܐܶܢܽܘܢ. ܘܰܐܦܶܩ ܐܶܢܽܘܢ ܡܶܢ ܚܶܫܽܘܟܳܐ ܘܡܶܢ ܛܶܠܳܠܰܝ̈ ܡܰܘܬܳܐ. ܘܰܚܢܳܩܰܝ̈ܗܽܘܢ ܦܰܣܶܩ. ܟܕ ܡܰܘܕܰܥ ܕܨܰܠܺܝܘ ܠܘܳܬ ܡܳܪܝܳܐ. ܣܳܗܕܽܘܬܳܐ ܥܠ ܗܳܕܐ ܠܐ ܝܰܗܒ. ܡܰܘܕܥܳܐ ܡܶܠܬܳܐ ܕܺܐܝܬ ܗܘܳܐ ܒܟܽܠܗܽܘܢ ܐܢܳܫܴ̈ܐ ܕܰܡܨܰܠܶܝܢ ܗܘܰܘ ܕܢܶܗܘܶܐ ܠܗܽܘܢ ܦܽܘܪܩܳܢܳܐ ܡܶܢ ܒܺܝ̈ܫܳܬܳܐ. ܐܝܟ ܕܳܐܦ ܒܩܶܣܰܪܺܝܰܐ ܩܽܘܪܢܺܝܠܺܝܳܘܣ ܡܨܰܠܶܐ ܗܘܳܐ. ܘܰܒܝܽܘܦܺܝ ܛܰܒܺܝܬܰܐ ܛܽܘܒܳܢܺܝܬܳܐ. ܘܰܒܥܰܡܳܐ ܬܽܘܒ ܕܥܶܒܪ̈ܳܝܶܐ ܬܘܒ ܐܢܳܫܴ̈ܐ ܩܰܕܺܝ̈ܫܶܐ ܐܰܟܡܳܐ ܕܶܐܡܰܪ ܗܘܳܐ ܫܶܡܥܽܘܢ ܟܕ ܩܰܒܠܶܗ ܠܰܡܫܺܝܚܳܐ ܥܠ ܕܪ̈ܳܥܰܘܗܝ. ܕܗܳܐ ܚܙܰܝ̈ ܥܰܝ̈ܢܰܝ ܚܢܳܢܳܟ܇ ܗܰܘ ܕܛܰܝܶܒܬ ܒܦܰܪܨܽܘܦܳܐ ܕܟܽܠܗܶܝܢ ܐܶܡ̈ܘܳܬܳܐ. ܢܽܘܗܪܳܐ ܠܓܶܠܝܳܢܳܐ ܕܥܰܡܡ̈ܐ ܘܫܽܘܒܚܳܐ ܕܥܰܡܳܟ ܝ̣ܣܪܳܐܝܠ (ܠܘܩܐ ܒ: ܠ-ܠܒ). ܗܳܠܝܢ ܐܶܢܘܢ ܐܰܝܠܶܝܢ ܕܨܰܠܺܝܘ ܠܘܳܬ ܡܳܪܝܳܐ ܒܥܳܩܴ̈ܬܗܽܘܢ. ܘܰܫܡܰܥ ܐܶܢܘܢ ܘܰܦܪܰܩ ܐܶܢܘܢ. ܘܦܰܣܶܩ ܚܢܴ̈ܩܶܐ ܕܡܰܘܬܳܐ ܘܣܳܛܳܢܳܐ ܡܶܢ ܨܰܘܪ̈ܰܝܗܽܘܢ. ܘܡܶܛܠ ܗܳܕܐ ܐܡ̇ܪ ܪܽܘܚܳܐ
ܢܰܘܕܽܘܢ ܠܡܳܪܝܳܐ ܙܰܕܺܝܩܰܘ̈ܗܝ ܕܪ̈ܰܚܡܰܘܗܝ ܥܠ ܒܢܰܝ̈ܢܳܫܳܐ. ܡܶܛܠ ܕܰܬܒܰܪ ܬܰܪ̈ܥܶܐ ܕܰܢܚܳܫܳܐ. ܘܡܽܘ̈ܟܠܶܐ ܕܦܰܪܙܠܳܐ ܓܰܕܶܡ. ܘܥܰܕܰܪ ܐܶܢܘܢ ܡܶܢ ܐܽܘܪܚܳܐ ܕܰܚܛܳܗܰܝ̈ܗܽܘܢ ܘܡܶܢ ܥܰܘܠܗܽܘܢ ܐܶܬܡܰܟܰܟܘ. ܠܘ ܐܰܟܡܰܢ ܕܡܰܣܠܶܐ ܬܰܘܕܺܝܬܳܐ ܕܰܐܝܠܶܝܢ ܕܬܳܝܒܺܝܢ ܡܰܠܶܦ. ܐܶܠܐ ܗܳܕܐ ܓܶܝܪ ܡܰܟܪܶܙ ܕܡܰܢ ܕܰܥܡܰܕ ܡܶܬܦܪܶܩ ܒܛܰܝܒܽܘܬܳܐ ܡܰܓܳܢ. ܐܝܟ ܕܶܐܡܰܪ ܦܰܘܠܽܘܣ ܛܽܘܒܳܢܳܐ. ܕܡܶܙܕܰܕܩܺܝܢ ܠܰܡ ܒܛܰܝܒܽܘܬܳܐ ܡܰܓܳܢ. ܘܰܒܦܽܘܪܩܳܢܳܐ ܕܺܐܝܬܰܘܗܝ ܝܶܫܽܘܥ ܡܫܺܝܚܳܐ. ܗܳܢܐ ܕܩܰܕܶܡ ܣܳܡܶܗ ܚܽܘܣܳܝܳܐ ܒܗܰܝܡܳܢܽܘܬܳܐ ܕܰܕܡܶܗ (ܪ̈ܗܘܡܝܐ ܓ: ܟܕ-ܟܗ). ܘܗܳܢܘܢ ܕܶܐܡܰܪ ܕܛܰܝܶܒ ܐܠܗܐ ܕܰܢܗܰܠܶܟ ܒܗܽܘܢ ܬܰܪ̈ܥܶܐ ܕܰܢܚܳܫܳܐ ܡܫܰܡܰܗ. ܡܶܛܠ ܚܰܣܺܝܢܽܘܬܶܗ ܕܡܰܘܬܳܐ ܘܣܳܛܳܢܳܐ ܘܡܽܘ̈ܟܠܶܐ ܕܦܰܪܙܠܳܐ. ܡܶܛܠ ܙܳܟܽܘܬܳܐ ܕܰܫܩܰܠ ܥܠ ܫܝܽܘܠ. ܠܗܳܠܶܝܢ ܕܶܝܢ ܡܬܰܒܰܪ ܗܘܳܐ ܘܰܡܓܰܕܶܡ ܟܕ ܥ̣ܰܠ ܠܰܐܬܪܶܗ ܕܡܰܘܬܳܐ ܘܣܳܛܳܢܳܐ. ܘܡܰܦܶܩ ܗܘܳܐ ܗܳܝܕܝܢ ܕܫܰܪܺܝܪܳܐ ܢܺܐܡܰܪ ܥܰܠ ܬܰܪ̈ܥܶܐ ܕܰܢܚܳܫܐ. ܠܫܽܘ̈ܚܠܳܦܶܐ ܣܰܓܺܝ̈ܐܝܰܝ ܢܺܝܫܳܐ ܕܚܰܫ̈ܶܐ ܫܟܺܝܪ̈ܶܐ ܕܰܪ̈ܓܺܝܓܳܬܳܐ ܕܰܠܗܶܝܢ ܡܫܰܥܒܰܕ ܗܘܳܐ ܓܶܢܣܳܐ ܕܐܢܳܫܽܘܬܳܐ. ܩܳܪܶܐ ܪܽܘܚܳܐ ܒܰܫܡܳܗ̈ܐ ܗܳܠܝܢ. ܘܰܐܝܟ ܕܶܐܡܰܪ ܡܫܺܝܚܳܐ ܠܦܶܛܪܽܘܣ ܕܥܰܠ ܗܳܕܐ ܟܺܐܦܳܐ ܐܶܒܢܶܝܗ̇ ܠܥܺܕܬܝ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇ (ܡܬܝ ܝܘ: ܝܚ). ܘܰܒܗܳܕܶܐ ܡܰܘܕܰܥ ܕܗܽܘ ܢܬܰܒܰܪ ܐܶܢܘܢ ܠܬܰܪ̈ܥܶܐ ܗܳܠܝܢ ܘܰܠܡܽܘ̈ܟܠܶܐ. ܘܫܰܪܺܝ ܕܰܢܥܰܕܰܪ ܠܗܳܢܘܢ ܕܰܒܗܽܘܢ ܡܶܫܬܰܚܩܺܝܢ ܗܘܰܘ. ܐܰܝܟ ܕܶܐܡܰܪ ܪܽܘܚܳܐ ܥܰܕܰܪ ܐܶܢܘܢ ܡܶܢ ܐܽܘܪܚܳܐ ܕܰܚܛܳܗܰܝ̈ܗܽܘܢ. ܘܰܫܩܰܠ ܚܛܺܝܬܗܽܘܢ ܘܰܬܠܳܗ̇ ܗܘܳܐ ܒܰܨܠܺܝܒܶܗ. ܘܰܗܘܳܐ ܚܛܺܝܬܳܐ ܐܰܝܟ ܕܶܐܡܰܪ ܦܰܘܠܽܘܣ ܕܰܚܢܰܢ ܢܶܗܘܶܐ ܒܶܗ ܙܰܕܺܝܩܽܘܬܳܐ ܕܰܐܠܳܗܳܐ (ܒ ܩܘܪ̈ܢܬܝܐ ܗ: ܟܐ). ܘܬܘܒ ܐܡ̣ܪ ܘܡܶܢ ܥܰܘܠܗܽܘܢ ܐܶܬܡܰܟܰܟܘ. ܘܡܶܢ ܒܳܬܰܪ ܕܶܐܬܚܙܺܝ ܒܰܨܠܺܝܒܳܐ ܘܰܐܪܓܶܫܘ ܒܶܗ ܥܰܡܡ̈ܐ ܕܰܐܪܥܳܐ. ܡܰܟܶܟܘ ܢܰܦ̈ܫܳܬܗܽܘܢ ܒܨܰܘܡܳܐ ܐܳܦ ܒܰܨܠܽܘܬܳܐ. ܘܰܫܕܰܘ ܡܶܢ ܨܰܘܪ̈ܰܝܗܽܘܢ ܠܟܽܠܳܗ̇ ܪܳܡܽܘܬܳܐ ܘܡܰܫܩܠܽܘܬܳܐ. ܘܰܠܒܶܫܘ ܡܽܘܟܳܟܶܗ ܕܰܡܫܺܝܚܳܐ. ܘܰܐܣܠܺܝܘ ܛܥܽܘ̈ܡܶܐ ܘܡܶܐܟ̈ܠܳܬܳܐ ܕܩܰܕܶܡ ܫܺܐܕ̈ܐ. ܐܝܟ ܕܰܐܘܕܰܥ ܪܽܘܚܳܐ ܡܶܛܠܳܬܗܽܘܢ.
ܟܽܠ ܡܶܐܟܠܳܐ ܣܢܳܬ ܢܰܦܫܗܽܘܢ. ܘܡܰܛܺܝܘ ܥܕܰܡܳܐ ܠܬܰܪ̈ܥܰܝ ܡܰܘܬܳܐ. ܘܰܒܥܰܘ ܡܶܢ ܡܳܪܝܳܐ ܒܽܐܘ̈ܠܨܳܢܰܝܗܽܘܢ ܘܡܶܢ ܥܳܩܴ̈ܬܗܽܘܢ ܐܰܦܶܩ ܐܶܢܽܘܢ. ܫܰܕܰܪ ܡܶܠܬܶܗ ܘܰܐܣܺܝ ܐܶܢܽܘܢ ܘܦܰܨܺܝ ܐܶܢܽܘܢ ܡܶܢ ܚܒܳܠܳܐ. ܥܕܰܡܳܐ ܠܗܳܪܟܳܐ ܒܐܪܳܙܳܐ ܕܳܡܶܐ ܗܘܳܐ ܢܒܺܝܐ ܕܳܐܡܰܪ ܬܶܫܒܽܘܚܬܶܗ. ܗܳܪܟܳܐ ܕܶܝܢ ܘܰܚܠܳܦ ܐܪ̈ܳܙܶܐ ܒܓܰܠܝܴ̈ܬܳܐ ܡܡܰܠܶܠ. ܘܗܰܘ ܡܶܕܶܡ ܕܰܐܟܬܶܒ ܠܰܢ ܝܽܘܚܰܢܳܢ ܟܳܪܽܘܙܳܐ ܕܰܣܒܰܪܬܳܐ. ܟܕ ܐܰܟܬܶܒ ܗܘܳܐ ܓܶܝܪ ܥܰܠ ܥܰܡܰܢܽܘܐܝܠ: ܕܰܒܪܺܝܫܺܝܬ ܐܝ̣ܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܝ̣ܬܰܘܗܝ ܗܘܳܐ ܠܘܳܬ ܐܰܠܳܗܳܐ. ܘܰܐܠܳܗܳܐ ܐܝ̣ܬܰܘܗܝ ܗܘܳܐ ܗܽܘ ܡܶܠܬܳܐ. ܗܳܢܳܐ ܠܰܡ ܐܝ̣ܬܰܘܗܝ ܗܘܳܐ ܒܪܺܝܫܺܝܬ ܠܘܳܬ ܐܰܠܗܳܐ (ܝܘܚܢܢ ܐ: ܐ-ܒ). ܘܕܰܘܝܕ ܐܶܡܰܪ ܕܫܰܕܰܪ ܡܶܠܬܶܗ ܘܰܐܣܺܝ ܐܶܢܘܢ ܘܰܬܪ̈ܰܝܗܽܘܢ ܚܰܕ ܝܽܘܠܦܳܢܳܐ ܐܰܫܠܶܡܘ ܠܥܺܕܬܶܗ ܕܰܐܠܗܳܐ ܒܗܳܠܶܝܢ ܐܳܬܘܴ̈ܬܳܐ ܘܚܰܝ̈ܠܶܐ ܕܰܣܥܰܪܘ ܒܰܟܪ̈ܺܝܗܶܐ. ܟܕ ܐܶܬܓܠܺܝ ܥܰܠ ܐܰܪܥܳܐ ܒܰܒܣܰܪ. ܘܗܳܝ ܕܕܰܟܺܝ ܓܰܪ̈ܒܶܐ ܘܦܰܬܰܚ ܣܡܰܝܴ̈ܐ. ܘܰܐܦܶܩ ܫܺܐܕ̈ܐ ܘܰܙܓܰܪ ܠܪ̈ܽܘܚܶܐ ܛܰܢܦܴ̈ܬܳܐ. ܗܳܪܟܳܐ ܢܒܺܝܽܘܬܳܐ ܡܫܰܡܠܶܐ ܗܘܳܐ. ܒܗܳܝ ܕܡܰܚܠܶܡ ܗܘܳܐ ܠܓܽܘܫܡܳܐ ܘܰܠܟܺܐܒ̈ܐ ܡܶܢ ܠܒܰܪ. ܘܰܡܚܰܘܶܐ ܗܘܳܐ ܕܺܐܝܬ ܠܶܗ ܒܛܺܝܠܽܘܬܳܐ ܥܠ ܦܰܓܪܳܐ. ܕܰܒܪܺܝܬܰܐ ܗܘ ܕܺܝܠܶܗ. ܘܠܰܘ ܡܶܢ ܒܺܝܫܳܐ ܐܶܬܥܒܶܕ. ܐܰܝܟ ܣܰܟܠܽܘܬܳܐ ܕܡܰܢܺܝ̈ܢܳܝܶܐ. ܘܡܰܚܠܶܡ ܗܘܳܐ ܬܽܘܒ ܠܢܰܦܫܳܐ ܡܶܢ ܡܽܘ̈ܡܶܐ ܕܰܚܛܳܗ̈ܐ. ܘܰܒܗܳܕܐ ܡܒܰܕܶܩ ܗܘܳܐ ܕܡܶܠܬܶܗ ܘܒܰܪ ܟܝܳܢܶܗ ܗ̄ܘ ܕܰܐܒܳܐ. ܘܡܰܠܶܦ ܗܘܳܐ ܕܰܐܠܗܰܐ ܗ̄ܘ ܕܡܶܢ ܐܰܠܗܳܐ. ܐܡ̣ܪ ܕܶܝܢ ܡܙܰܡܪܳܢܳܐ ܕܫܰܕܰܪ ܡܶܠܬܶܗ ܘܰܐܣܺܝ ܐܶܢܘܢ. ܘܦܰܨܺܝ ܐܶܢܽܘܢ ܡܶܢ ܚܒܳܠܳܐ ܘܰܡܕܰܡܶܐ ܩܳܠܗ̇ ܕܡܶܠܬܳܐ ܠܣܽܘܥܪܳܢܳܐ ܕܰܥܒܺܝܕ ܗܘܳܐ ܟܕ ܐܶܬܡܰܠܰܠ. ܒܗܳܕܐ ܕܶܝܢ ܡܰܠܶܦ ܕܟܽܠܡܶܕܶܡ ܕܡܶܢ ܐܰܠܗܳܐ ܡܶܬܦܣܶܩ ܕܢܶܗܘܶܐ. ܐܰܝܟ ܗܰܘ ܕܡܶܢ ܟܕ ܗܘܳܐ ܠܶܗ ܡܶܬܐܶܡܰܪ. ܡܶܛܠ ܗܳܝ ܕܠܐ ܗܳܦܶܟ ܐܰܠܗܳܐ ܡܶܬܬܘܶܐ ܒܰܐܝܠܶܝܢ ܕܶܐܡܰܪ. ܘܥܰܠ ܗܳܕܐ ܐܡ̣ܪ ܕܰܡܫܰܕܰܪ ܡܶܠܬܶܗ ܐܰܝܟ ܕܠܰܢܒܺܝܐ. ܗܘܳܐ ܗܘܳܐ ܠܶܗ ܠܣܽܘܥܪܳܢܳܐ. ܘܡܶܛܠ ܣܽܘܥܪܳܢܳܐ ܗܳܢܐ ܡܰܘܣܶܦ. ܡܬܰܠܰܬ ܡܶܠܬܶܗ ܘܳܐܡܰܪ:
ܢܰܘܕܽܘܢ ܠܡܳܪܝܳܐ ܙܰܕܺܝ̈ܩܰܘܗܝ ܕܪ̈ܰܚܡܰܘܗܝ ܥܰܠ ܒܢܰܝ̈ܢܳܫܳܐ. ܕܰܒܰܚܘ ܠܶܗ ܕܶܒܚܷ̈ܐ ܕܫܽܘܒܚܳܐ. ܫܰܒܰܚܘ ܠܰܡ ܥܒܳܕܰܘ̈ܗܝ ܒܬܶܕܡܪ̈ܳܬܶܗ. ܢܳܚ̈ܬܰܝ ܝܰܡܳܐ ܒܶܐܠܦ̈ܐ ܘܥܳܒܕܰܝ̈ ܥܒܳܕܳܐ ܒܡܰܝܴ̈ܐ ܣܰܓܺܝ̈ܐܐ. ܘܗܶܢܘܢ ܚܙܰܘ ܥܒܳܕܰܘ̈ܗܝ ܕܡܳܪܝܳܐ. ܘܬܶܕܡܪ̈ܳܬܶܗ ܒܥܽܘ̈ܡܩܰܘܗܝ ܕܝܰܡܳܐ. ܕܰܐܩܺܝܡ ܪܽܘܚܳܐ ܕܥܰܠܥܳܠܳܐ ܘܶܐܬܬܪܺܝܡܘ ܓܰܠܠܰܘ̈ܗܝ ܕܝܰܡܳܐ. ܣܳܠܩܺܝܢ ܠܰܫܡܰܝܳܐ ܘܢܳܚܬܺܝܢ ܠܰܬܗܽܘܡܳܐ. ܘܢܰܦܫܗܽܘܢ ܒܗܽܘܢ ܡܶܬܛܰܪܦܳܐ. ܙܳܥܘ ܘܢܳܕܘ ܐܰܝܟ ܪ̈ܘܰܝܳܐ. ܘܟܽܠܳܗ̇ ܚܶܟܡܰܬܗܽܘܢ ܐܶܒܕܰܬ. ܘܰܓܥܰܘ ܠܘܳܬ ܡܳܪܝܳܐ ܒܽܐܘ̈ܠܨܳܢܰܝܗܽܘܢ. ܘܡܶܢ ܥܳܩܴ̈ܬܗܽܘܢ ܐܰܦܶܩ ܐܶܢܽܘܢ. ܘܰܐܫܠܺܝ ܥܰܠܥܳܠܳܐ ܘܰܫܬܶܩ. ܘܶܐܬܬܢܺܝܚܘ ܓܰܠܠܰܘ̈ܗܝ ܕܝܰܡܳܐ܆ ܘܰܚܕܺܝܘ ܟܰܕ ܫܬܶܩܘ. ܘܰܕܒܰܪ ܐܶܢܽܘܢ ܠܰܠܡܺܐܢܳܐ ܕܰܨܒܰܘ܀ ܗܳܠܝܢ ܕܰܒܢܺܝܫܳܐ ܕܝܰܡܳܐ ܐܡ̣ܪ ܢܒܺܝܐ ܠܘܳܬ ܣܽܘ̈ܟܳܠܶܐ ܥܦܺܝ̈ܦܶܐ ܚܳܝܪ̈ܳܢ. ܟܰܕ ܡܰܘܕܰܥ ܢܒܺܝܐ ܥܰܠ ܡܰܪܕܺܝܬܳܐ ܕܰܗܘܳܬ ܒܓܰܘ ܝܰܡܳܐ ܠܰܫܠܺܝ̈ܚܶܐ ܥܰܒܕܰܘ̈ܗܝ ܕܡܶܠܬܳܐ ܘܗܳܠܝܢ ܓܝܪ ܟܕ ܪܳܕܶܝܢ ܗܘܰܘ ܒܝܰܡܳܐ ܒܶܐܠܦܳܐ. ܟܕ ܕܡܶܟ ܗܘܳܐ ܡܕܰܒܪܳܢܳܐܝ̣ܬ ܥܰܡܰܢܽܘܐܝܠ ܒܰܣܦܺܝܢܬܳܐ. ܘܰܦܩܰܕ ܗܘܳܐ ܠܪ̈ܽܘܚܶܐ ܐܰܝܟ ܕܬܶܫܓܽܘܫܝ ܝܰܡܳܐ ܥܠ ܬܰܠܡܺܝ̈ܕܶܐ. ܘܡܶܢ ܩܰܫܝܽܘܬܳܐ ܕܪܽܘܚܳܐ ܐܶܬܕܰܠܰܚ ܝܰܡܳܐ ܥܠܰܝܗܽܘܢ ܥܰܙܺܝܙܳܐܝ̣ܬ. ܐܰܝܟ ܕܥܰܠ ܝܰܘܢܳܢ ܗܰܘ ܥܶܒܪܳܝܳܐ. ܘܟܕ ܡܗܰܦܟܺܝܢ ܗܘܰܘ ܠܗܽܘܢ ܓܰܠܠܰܘ̈ܗܝ ܕܝܰܡܳܐ. ܘܚܰܕ ܢܶܫܒܳܐ ܕܪܽܘܚܳܐ ܡܥܰܠܶܐ ܗܘܳܐ ܠܗܽܘܢ ܥܕܰܡܳܐ ܠܰܫܡܰܝܳܐ. ܐܚܪܺܢܳܐ ܕܶܝܢ ܡܰܚܶܬ ܠܗܽܘܢ ܠܰܬܗܽܘܡܳܐ. ܘܰܩܪܶܒܘ ܬܰܠܡܺܝ̈ܕܶܐ ܠܘܳܬ ܡܳܪܝܳܐ ܗܰܘ ܕܟܰܕ ܕܰܡܺܝܟ ܗܘܳܐ ܕܰܢܫܰܡܠܶܐ ܡܕܰܒܪܳܢܽܘܬܳܐ. ܘܰܓܥܰܘ ܠܘܳܬܶܗ ܐܰܝܟ ܕܶܐܡܰܪ ܪܽܘܚܳܐ܆ ܡܳܪܰܢ ܦܰܨܳܢ ܐܳܒܕܺܝܢܰܢ (ܡܬܝ ܚ: ܟܗ). ܘܟܕ ܩܳܡ ܟܐܳܐ ܒܪܽܘܚܳܐ ܘܰܒܝܰܡܳܐ ܘܢܳܚ ܗܘܳܐ ܘܰܗܘܳܐ ܫܶܠܝܳܐ ܪܰܒܳܐ (ܡܬܝ ܚ: ܟܘ). ܗܳܪܟܳܐ ܚܙܰܘ ܬܰܠܡܺܝ̈ܕܶܐ ܥܒܳܕܰܘ̈ܗܝ ܕܡܳܪܝܳܐ. ܘܬܶܕܡܪ̈ܳܬܶܗ ܒܥܽܘ̈ܡܩܰܘܗܝ ܕܝܰܡܳܐ. ܒܗܳܝ ܕܟܰܕ ܩܰܪܺܝܒܺܝܢ ܗܘܰܘ ܠܡܶܛܒܰܥ. ܩܰܠܺܝܠܳܐܝ̣ܬ ܦܰܨܺܝ ܐܶܢܽܘܢ. ܘܰܒܕܽܘܟܬܳܐ ܐܚܪܺܬܳܐ ܬܽܘܒ ܚܙܰܐܘܗܝ ܟܕ ܡܗܰܠܶܟ ܒܪ̈ܶܓܠܶܐ ܕܒܶܣܪܳܐ ܥܰܠ ܡܰܝܴ̈ܐ. ܕܬܶܕܡܽܘܪܬܳܐ ܗܝ ܕܰܠܥܶܠ ܡܶܢ ܟܝܳܢܳܐ ܐܢܳܫܳܝܳܐ ܐܝ̣ܬܶܝܗ̇. ܘܠܰܝܬ ܗܘܳܐ ܒܗܽܘܢ ܐܰܬܪܳܐ ܠܰܡܗܰܝܡܳܢܽܘ. ܕܪ̈ܶܓܠܶܐ ܕܺܐܝܬ ܠܗܶܝܢ ܝܽܘܩܪܳܐ ܕܦܰܓܪܳܐ ܠܥܶܠ ܡܶܢܗܶܝܢ ܢܗܱ̈ܠܟܳܢ ܥܰܠ ܡܰܝܴ̈ܐ. ܚܠܳܦ ܬܶܕܡܽܘܪܬܳܐ ܒܥܳܩܬܳܐ ܐܶܬܚܰܫܰܚܘ ܟܰܕ ܕܳܚܠܺܝܢ ܘܠܐ ܡܰܫܪܺܝܢ ܗܘܰܘ. ܐܠܘ ܫܶܡܥܽܘܢ ܠܐ ܢܚܶܬ ܗܰܠܶܟ ܥܰܠ ܡܰܝܴ̈ܐ ܒܡܶܠܬܶܗ ܕܡܳܪܝܳܐ. ܘܰܫܩܰܠ ܢܶܣܝܳܢܳܐ ܒܰܩܢܽܘܡܶܗ ܕܗܰܘ ܕܗܳܕܐ ܥܒܰܕ. ܫܽܘܠܛܳܢܳܐ ܐܝ̣ܬ ܠܶܗ ܒܝܰܡܳܐ ܘܥܰܠ ܝܰܒܫܳܐ. ܘܥܰܠ ܫܽܘܚܠܳܦܳܐ ܕܰܟܝܴ̈ܢܶܐ. ܗܳܠܝܢ ܐܶܢܶܝܢ ܬܶܕܡܪ̈ܳܬܶܗ ܕܡܳܪܝܳܐ ܕܰܚܙܰܘ ܬܰܠܡܺܝ̈ܕܶܐ ܒܝܰܡܳܐ. ܘܶܐܬܛܰܪܦܰܬ ܢܰܦܫܗܽܘܢ. ܘܰܓܥܰܘ ܠܘܳܬ ܡܳܪܝܳܐ ܒܽܐܘ̈ܠܨܳܢܰܝܗܽܘܢ. ܘܰܩܥܳܐ ܦܶܛܪܽܘܣ ܒܕܶܚܠܬܳܐ ܘܫܰܪܺܝ ܠܡܶܛܒܰܥ: ܡܳܪܝܳܐ ܦܪܽܘܩܰܝܢܝ (ܡܬܝ ܝܕ: ܠ) ܘܰܕܒܰܪ ܐܶܢܽܘܢ ܠܰܠܡܺܐܢܳܐ ܕܨܶܒܝܳܢܶܗ. ܡܶܛܠ ܕܶܝܢ ܝܰܡܳܐ ܐܚܪܺܢܳܐ ܗܰܘ ܡܶܬܝܰܕܥܳܢܳܐ. ܕܳܡܝܳܐ ܕܡܶܬܩܪܶܐ ܝܰܡܳܐ ܥܳܠܡܳܐ ܗܳܢܐ ܕܰܚܢܰܢ ܒܶܗ. ܕܟܰܕ ܡܶܛܠ ܒܠܺܝܠܽܘܬܳܐ ܕܣܽܘܥܪ̈ܳܢܰܘܗܝ ܚܳܐܱܪ ܗܘܳܐ ܪܽܘܚܳܐ. ܐܳܦ ܓ̈ܰܠܠܶܐ ܫܰܡܰܗ ܕܐܝ̣ܬ ܠܗ. ܘܗܳܠܝܢ ܕܒܶܐܠܦ̈ܐ ܢܳܚܬܺܝܢ ܠܗ ܡܰܢ ܘܳܠܶܐ ܕܢܶܪܢܶܐ ܕܺܐܝܬܰܝܗܽܘܢ. ܐܶܠܐ ܢܒܺܝ̈ܐ ܩܰܕܺܝ̈ܫܶܐ ܥܰܒ̈ܕܰܘܗܝ ܕܡܶܠܬܳܐ. ܘܰܫܠܺܝܚ̈ܐ ܩܰܕܺܝ̈ܫܶܐ ܪ̈ܚܽܘܡܰܘܗܝ. ܘܗܳܠܝܢ ܟܕ ܓܥܰܘ ܠܘܳܬ ܡܳܪܝܳܐ ܒܽܐܘ̈ܠܨܳܢܰܝܗܘܢ ܘܦܰܨܺܝ ܐܶܢܘܢ ܡܶܢ ܚܒܳܠܳܐ ܘܡܶܢ ܐܽܘ̈ܠܨܳܢܶܐ ܕܩܳܡܘ ܥܠܰܝܗܽܘܢ ܒܥܳܠܡܳܐ ܗܳܢܐ. ܘܝܰܗܒ ܠܗܽܘܢ ܙܳܟܽܘܬܳܐ ܒܰܐܓܽܘܢܰܝ̈ܗܘܢ. ܘܬܽܘܒ ܙܒܰܢܬܳܐ ܕܰܐܪܒܰܥ ܡܰܝܬܶܐ ܢܒܺܝܐ ܘܳܐܡܰܪ.
ܢܰܘܕܽܘܢ ܠܡܳܪܝܳܐ ܙܰܕܺܝ̈ܩܰܘܗܝ ܘܪ̈ܰܚܡܰܘܗܝ ܥܰܠ ܒܢܰܝ̈ܢܳܫܳܐ. ܫܰܒܚܽܘܗܝ ܒܥܺܕܬܳܐ ܕܥܰܡܡ̈ܐ. ܘܥܰܠ ܡܰܘܬܒܳܐ ܕܣܳܒ̈ܐ ܪܰܡܪܡܽܘܗܝ. ܠܡܳܢܳܐ ܕܶܝܢ ܒܳܬܰܪ ܕܶܐܬܟܰܢܰܫܘ ܥܰܡܡ̈ܐ ܘܰܗܘܰܘ ܚܕܳܐ ܥܺܕܬܳܐ. ܦܩܰܕ ܪܽܘܚܳܐ ܕܥܰܠ ܡܰܘܬܒܳܐ ܕܣܳܒ̈ܐ ܢܶܬܪܰܡܪܰܡ ܥܶܠܳܝܳܐ ܡܶܠܬܳܐ ܐܰܠܗܳܐ. ܟܕ ܒܕܽܘܟ ܕܽܘܟ ܡܶܫܟܚܺܝܢܰܢ ܒܰܟܬܳܒ̈ܐ ܩܰܕܺܝ̈ܫܶܐ. ܕܰܠܦܰܪܨܽܘܦܳܐ ܕܠܐ ܡܶܬܩܰܠܰܣ ܡܶܫܬܰܩܠܳܐ ܣܰܝܒܽܘܬܳܐ ܐܰܟܡܳܐ ܕܳܐܡܰܪ ܡܙܰܡܪܳܢܳܐ܆ ܒܡܰܙܡܽܘܪܳܐ ܕܫܰܒܥܺܝܢ ܘܚܰܕ. ܕܰܥܕܰܡܳܐ ܠܣܰܝܒܽܘܬܳܐ ܘܰܠܩܰܫܺܝܫܽܘܬܳܐ ܠܐ ܬܶܫܒܩܰܢܝ (ܡܙܡܘܪܐ ܥܐ: ܝܙ). ܗܳܪܟܳܐ ܕܶܝܢ ܒܬܶܫܒܽܘܚܬܳܐ ܗܳܕܐ ܠܦܰܪܨܽܘܦܳܐ ܫܰܦܺܝܪܳܐ ܡܶܬܢܰܣܒܳܐ ܣܰܝܒܽܘܬܳܐ. ܕܳܡܝܳܐ ܕܺܐܝܬܰܝܗܽܘܢ ܣܳܒܷ̈ܐ ܒܥܺܕܬܶܗ ܕܰܐܠܳܗܳܐ ܘܰܒܡܰܘܬܒܳܐ ܕܪܰܒܽܘܬܳܐ. ܫܠܺܝ̈ܚܶܐ ܩܰܕܺܝ̈ܫܶܐ ܐܝ̣ܬܰܝܗܘܢ ܕܶܐܡܰܪ ܠܗܽܘܢ ܡܳܪܢ ܕܬܶܬܒܽܘܢ ܥܰܠ ܬܪܶܥܣܰܪ ܟܽܘܪ̈ܣܰܘܳܢ ܘܰܬܕܽܘܢܽܘܢ ܕܶܝܢ ܬܪܶܥܣܰܪ ܫܰܒ̈ܛܶܐ ܕܺܝܣܪܳܐܝܠ (ܡܬܝ ܝܛ: ܟܚ). ܘܡܶܛܠܗܳܕܐ ܐܡ̣ܪ:
ܕܰܥܒܰܕ ܢܰܗܪ̈ܰܘܳܬܳܐ ܐܰܝܟ ܡܰܕܒܪܳܐ ܘܡܰܒܽܘ̈ܥܶܐ ܕܡܰܝܴ̈ܐ ܠܨܰܗܝܳܐ. ܡܰܘ̈ܗܒܳܬܳܐ ܕܰܢܒܺܝ̈ܐ ܕܰܚܪ̈ܶܒܝ ܗܘܰܘ ܡܶܛܠ ܕܶܐܬܓܰܙܺܝ ܥܰܡܳܐ ܡܶܢ ܢܰܗܪ̈ܰܘܳܬܳܐ ܕܡܰܝܴ̈ܐ ܚܰܝܷ̈ܐ. ܘܕܶܐܡܰܪ ܠܗܽܘܢ ܡܳܪܰܢ ܠܝ̣ܗܽܘܕܳܝ̈ܐ ܕܗܳܐ ܡܶܫܬܒܶܩ ܠܟܽܘܢ ܒܰܝܬܟܽܘܢ ܚܰܪܒܳܐ (ܡܬܝ ܟܓ: ܠܚ ܠܘܩܐ ܝܓ: ܠܗ). ܥܰܠ ܕܰܥܒܰܕ ܟܰܪܡܗܽܘܢ ܚܰܪ̈ܽܘܒܶܐ. ܚܠܳܦ ܥܶܢ̈ܒܶܐ ܒܰܣܺܝ̈ܡܶܐ.
ܐܰܪܥܳܐ ܝܶܗܒܰܬ ܦܺܐܪ̈ܶܐ ܠܡܳܠܰܚܬܳܐ ܡܶܢ ܥܒܳܕܰܝ̈ܗܽܘܢ ܒܺܝ̈ܫܶܐ ܕܝܳܬܒܶܝ̈ܗ̇. ܘܕܰܥܒܰܕ ܠܰܡ ܡܰܕܒܪܳܐ ܠܰܐܓ̈ܡܶܐ ܕܡܰܝܴ̈ܐ. ܘܰܐܪܥܳܐ ܨܗܺܝܬܳܐ ܠܡܰܒܽܘ̈ܥܶܐ ܕܡܰܝܴ̈ܐ. ܐܰܘܬܶܒ ܬܰܡܳܢ ܟܰܦܢ̈ܐ ܘܰܒܢܰܘ ܩܽܘܪ̈ܝܳܐ ܘܺܝܬܶܒܘ ܒܗܶܝܢ. ܘܰܙܪܰܥܘ ܚܰܩ̈ܠܳܬܳܐ ܘܰܢܨܰܒܘ ܟܰܪ̈ܡܶܐ ܘܶܐܟܰܠܘ ܡܶܢ ܦܺܐܪ̈ܶܐ ܕܥܱ̈ܠܠܳܬܗܽܘܢ. ܡܳܪܰܢ ܐܡ̇ܪ ܗܘܳܐ ܠܝܽܘܕܳܝ̈ܐ ܕܬܶܫܬܩܶܠ ܡܶܢܟܽܘܢ ܡܰܠܟܽܘܬܳܐ ܕܰܐܠܳܗܳܐ. ܘܬܶܬܝ̣ܗܶܒ ܠܥܰܡܳܐ ܕܥܳܒܶܕ ܦܺܐܪ̈ܶܐ (ܡܬܝ ܟܐ: ܡܓ). ܘܗܳܕܐ ܐܝ̣ܬܶܝܗ̇ ܗܳܝ ܕܰܥܒܰܕ ܡܰܕܒܪܳܐ ܠܰܐܓܡ̈ܐ ܕܡܰܝܴ̈ܐ ܡܥܳܕܺܝܢ ܐܶܢܘܢ ܓܶܝܪ ܟܬܳܒ̈ܐ ܩܰܕܺܝ̈ܫܶܐ ܡܟܰܢܶܝܢ ܠܥܰܡܡ̈ܐ ܒܫܶܡ ܡܰܕܒܪܳܐ. ܡܶܢ ܦܽܘܠܚܳܢܳܐ ܕܰܐܟܳܪ̈ܶܐ ܘܡܶܢ ܩܳܠܳܐ ܕܐܢܳܫܽܘܬܳܐ. ܗܳܟܰܢܳܐ ܓܝܪ ܡܓܰܙܶܝܢ ܗܘܰܘ ܥܰܡ̈ܡܶܐ ܡܶܢ ܡܰܘܕܰܥܬܳܐ ܕܰܐܠܗܳܐ. ܟܕ ܕܶܝܢ ܐܶܬܳܐ ܡܳܪܰܢ ܫܰܕܰܪ ܠܡܰܕܒܪܳܐ ܕܥܰܡܡ̈ܐ ܢܰܗܪ̈ܰܘܳܬܳܐ ܫܠܺܝ̈ܚܶܐ ܩܰܕܺܝ̈ܫܶܐ. ܘܰܥܒܰܕܘ ܐܰܓܡ̈ܐ ܕܡܰܝܴ̈ܐ ܒܚܽܘܪܒܳܐ. ܘܡܰܒܽܘ̈ܥܶܐ ܒܶܝܬ ܨܰܗܘܳܢ̈ܐ. ܐܰܝܟ ܡܶܠܬܳܐ ܢܒܺܝܳܝܬܳܐ ܘܰܐܪܥܳܐ ܨܗܺܝܬܳܐ ܘܰܡܛܰܪܰܦܬܳܐ ܗܘܳܬ ܡܰܦܪܝܳܢܺܝܬܳܐ ܘܺܝܬܶܒܘ ܒܗ̇ ܟܰܦ̈ܢܶܐ ܘܰܣܒܰܥܘ ܠܰܚܡܳܐ ܕܰܣܒܰܪܬܳܐ. ܘܰܒܢܰܘ ܒܡܰܕܒܪܳܐ ܫܠܺܝ̈ܚܶܐ ܩܰܕܺܝ̈ܫܶܐ. ܩܽܘܪ̈ܝܳܐ ܩܰܕܺܝ̈ܫܳܬܳܐ ܗܳܢܰܘ ܕܶܝܢ ܥܺܕ̈ܬܳܐ ܘܕܰܝܪ̈ܳܬܳܐ ܠܟܶܢ̈ܫܶܐ ܕܰܡܗܰܝܡ̈ܢܶܐ. ܘܰܙܪܰܥܘ ܒܢܰܦ̈ܫܳܬܳܐ ܚܰܩ̈ܠܳܬܳܐ. ܙܰܪܥܳܐ ܛܳܒܳܐ ܕܡܳܪܶܐ ܒܰܝܬܳܐ. ܘܰܢܨܰܒܘ ܟܰܪ̈ܡܶܐ ܡܶܢ ܗܳܝ ܓܦܶܬܳܐ ܕܰܫܪܳܪܳܐ. ܘܰܚܠܳܦ ܚܰܕ ܟܰܪܡܳܐ ܕܺܐܝܬ ܗܘܳܐ ܠܶܗ ܠܚܰܒܺܝܒܝ ܒܩܰܪܢܳܐ ܕܰܐܬܪܳܐ ܫܡܰܝܳܢܳܐ. ܢܨܰܒܘ ܫܠܺܝܚ̈ܐ ܟܰܪ̈ܡܶܐ ܣܰܓܺܝ̈ܐܐ ܒܟܽܠܗܽܘܢ ܥܰܡܡ̈ܐ. ܠܘ ܕܥܳܒܕܺܝܢ ܚܰܪ̈ܽܘܒܶܐ. ܐܝܟ ܗܰܘ ܟܰܪܡܳܐ ܝ̣ܣܰܪܠܳܝܳܐ ܐܠܐ ܣܓܽܘ̈ܠܶܐ ܚܠܰܝܴ̈ܐ ܘܒܰܫܺܝ̈ܠܶܐ. ܕܰܡܚܰܕܶܝܢ ܕܰܡܚܰܠܶܝܢ ܚܶܟܳܗ̇ ܕܢܰܦܫܳܐ. ܠܘ ܓܽܘܦ̈ܢܶܐ ܕܡܶܬܐܰܟ̈ܠܳܢ ܡܶܢ ܚܙܺܝܪܳܐ ܕܥܳܒܳܐ. ܐܶܠܐ ܣܓܽܘ̈ܠܶܐ ܕܰܛܥܺܝܢܺܝܢ ܠܰܡ ܣܡܳܕܪ̈ܶܐ ܒܰܣܺܝ̈ܡܰܝ ܪܺܝܚܳܐ. ܐܰܟܡܳܐ ܕܺܐܝܬܰܘܗܝ ܛܺܝܛܳܘܣ ܐܳܪܳܡܳܝܳܐ. ܘܣܰܬܳܐ ܡܝܰܬܰܪܬܳܐ ܘܰܐܠܳܗܳܝܬܳܐ ܗܳܝ ܕܢܰܨܒܳܗ̇ ܦܰܘܠܽܘܣ ܗܰܘ ܦܰܠܳܚܳܐ ܚܰܟܺܝܡܳܐ ܒܰܩܪܺܝܛܺܝ. ܕܳܐܦ ܗܽܘ ܢܶܦܣܽܘܩ ܢܶܨܒܬܳܐ ܪܽܘܚܳܢܳܝܬܳܐ ܘܰܢܨܽܘܒ ܒܰܡܕܺܝ̈ܢܳܬܳܐ ܟܰܪ̈ܡܶܐ ܫܠܺܝ̈ܚܶܐ. ܐܰܝܟ ܢܺܝܣܺܝܡܳܘܣ ܘܰܛܪܽܘܦܺܝܡܳܘܣ ܘܰܐܦܰܦܗܰܕܰܢܛܺܝܩܳܣ ܣܱ̈ܬܶܐ ܕܰܢܨܰܒ ܦܰܘܠܽܘܣ. ܘܠܐ ܡܓܰܪܕܺܝܢ ܗܘܰܘ ܣܓܽܘ̈ܠܶܐ ܒܰܫܺܝ̈ܠܶܐ ܡܶܢ ܓܽܘܦ̈ܢܰܝܗܽܘܢ ܠܐ ܒܣܰܬܘܳܐ ܘܠܳܐ ܒܩܰܝܛܳܐ. ܐܠܐ ܒܟܽܠܙܒܰܢ ܐܳܟܠܺܝܢ ܗܘܰܘ ܡܶܢ ܦܺܐܪ̈ܶܐ ܕܥܱ̈ܠܠܳܬܗܽܘܢ. ܕܡܳܪܝܳܐ ܓܶܝܪ ܒܰܪܟܳܗ̇ ܠܢܶܨܒܬܳܐ ܗܳܝ ܘܝܰܗܒ ܒܳܗ̇ ܚܰܝܠܳܐ. ܕܰܒܟܽܠܙܒܰܢ ܬܶܗܘܶܐ ܣܳܓܝܳܐ ܐܝܟ ܕܶܐܡܰܪ ܪܽܘܚܳܐ.
ܒܰܪܶܟ ܐܶܢܽܘܢ ܘܰܣܓܺܝܘ ܛܳܒ. ܘܰܒܥܺܝܪܗܽܘܢ ܠܳܐ ܙܥܰܪܘ. ܒܥܺܝܪܳܐ ܩܳܪܶܐ ܠܗܳܢܘܢ ܕܦܳܪܫܺܝܢ ܗܘܰܘ ܢܰܦܫܗܽܘܢ ܡܶܢ ܚܰܝܷ̈ܐ ܕܚܰܝ̈ܘܳܬܳܐ. ܘܡܶܫܬܰܚܠܦܺܝܢ ܠܘܳܬ ܚܰܝܷ̈ܐ ܡܝܰܬܪ̈ܶܐ ܕܒܰܡܫܺܝܚܳܐ. ܘܬܘܒ ܘܳܐܡܰܪ:
ܘܰܙܥܰܪܘ ܘܶܐܬܡܰܟܰܟܘ ܒܣܽܘܓܳܐܐ ܕܒܺܝܫܬܳܐ ܘܰܕܕܽܘܘܳܢܳܐ. ܐܰܪܡܺܝ ܒܺܝܫܬܳܐ ܥܰܠ ܫܰܠܺܝ̈ܛܶܐ ܘܰܐܛܥܺܝ ܐܶܢܽܘܢ ܒܬܰܘܫܳܐ ܕܠܳܐ ܐܽܘܪܚܳܐ. ܗܳܠܶܝܢ ܕܰܙܥܰܪܘ ܘܗܳܠܶܝܢ ܕܶܐܬܡܰܟܰܟܘ ܒܒܺܝܫܬܳܐ. ܥܰܡܳܐ ܐܶܢܘܢ ܕܨܳܠܽܘ̈ܒܶܐ ܕܰܩܢܰܘ ܨܶܒܝܳܢܳܐ ܒܺܝܫܳܐ ܥܰܠ ܡܫܺܝܚܳܐ. ܬܘܒ ܫܰܠܺܝ̈ܛܶܐ ܕܰܐܪܡܺܝ ܥܠܰܝܗܽܘܢ ܒܺܝܫܬܳܐ. ܪ̈ܺܝܫܶܐ ܐܶܢܽܘܢ ܘܰܡܕܰܒܪ̈ܳܢܶܐ ܕܰܛܥܰܘ ܡܶܢ ܐܽܘܪܚܳܐ ܕܟܺܐܢܽܘܬܳܐ ܘܰܒܬܰܘܫܳܐ ܘܰܒܬܽܘܩ̈ܠܳܬܳܐ ܗܘܰܘ ܕܠܳܐ ܐܽܘܪܚܳܐ. ܘܬܘܒ ܐܡ̇ܪ ܢܒܺܝܳܐ.
ܘܰܐܥܫܶܢ ܠܡܶܣ̈ܟܺܢܶܐ ܘܰܥܒܰܕ ܐܰܝܟ ܥܳܢܴ̈ܐ ܫܰܪ̈ܒܳܬܗܽܘܢ. ܘܗܳܕܐ ܐܝ̣ܬܶܝܗ̇ ܗܳܝ ܕܡܶܬܦܰܫܰܩ ܗܘܳܐ ܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܡܶܢ ܡܳܪܝܳܐ. ܕܢܶܪܥܶܐ ܥܶܪ̈ܒܶܐ ܘܶܐܡܪ̈ܶܐ ܘܰܢܩܰܘܴ̈ܬܳܐ. ܡܶܛܠ ܕܪ̈ܳܥܰܘܳܬܳܐ ܟܰܗܺܝ̈ܢܰܝ ܒܚܶܟܡܬܳܐ ܘܥܰܫܺܝ̈ܢܰܝ ܒܚܰܝܠܳܐ ܫܰܕܰܪ ܡܳܪܳܗ̇ ܕܥܳܢܴ̈ܐ ܕܰܢܩܽܘܡܽܘܢ ܥܰܠ ܡܰܪܥܺܝܬܶܗ. ܡܶܛܠ ܗܳܝ ܕܠܳܐ ܡܶܡܬܽܘܡ ܦܓܰܥ ܗܘܳܐ ܒܥܰܡ̈ܡܶܐ ܥܽܘܬܪܳܐ ܕܡܶܠܬܳܐ ܐܰܠܗܳܐ. ܟܕ ܕܶܝܢ ܢܦܰܩܘ ܒܳܬܰܪܗܽܘܢ ܗܳܢܽܘܢ ܥܰܬܺܝܪ̈ܰܝ ܒܰܙܩܺܝܦܳܐ. ܦܬܰܚ ܠܗܽܘܢ ܓܰܙܳܐ ܕܡܰܠܟܽܘܬܳܐ ܕܒܶܝܬ ܐܰܠܗܳܐ. ܘܰܐܥܬܰܪ ܐܶܢܽܘܢ ܠܡܶܣ̈ܟܺܢܶܐ. ܘܰܗܘܳܬ ܚܰܕܽܘܬܳܐ ܠܟܽܠܗܽܘܢ ܟܺܐܢ̈ܐ ܐܰܝܟ ܕܶܐܡܰܪ ܪܽܘܚܳܐ.
ܕܢܶܚܙܽܘܢ ܙܰܕܺܝ̈ܩܶܐ ܘܢܶܚܕܽܘܢ. ܘܟܽܠܗܽܘܢ ܥܰܘܴ̈ܠܶܐ ܢܶܣܟܪܽܘܢ ܚܶܟܗܽܘܢ. ܘܡܰܢ ܕܚܰܟܺܝܡ ܢܶܛܰܪ ܗܳܠܶܝܢ ܘܢܶܕܰܥ ܚܶܣܕܶܗ ܕܡܳܪܝܳܐ. ܫܽܘܠܳܡܶܗ ܕܡܰܙܡܽܘܪܳܐ ܗܳܢܐ ܪܳܡܶܙ ܥܰܠ ܕܺܝܢܳܐ ܕܚܰܪܬܳܐ. ܕܰܟܡܳܐ ܪܰܒܳܐ ܘܰܡܫܰܒܚܳܐ ܥܠܰܠܬܶܗ ܕܰܙܩܺܝܦܳܐ. ܡܳܐ ܕܡܰܘܥܝܳܐ ܐܰܪܥܳܐ ܚܠܳܦ ܙܰܪ̈ܥܶܐ ܦܰܓܪ̈ܶܐ ܕܩܰܕܺܝ̈ܫܶܐ. ܘܙܰܕܺܝ̈ܩܶܐ ܚܳܕܶܝܢ ܘܕܳܝܨܺܝܢ ܘܰܡܩܰܒܠܺܝܢ ܦܽܘܪ̈ܥܳܢܰܝܗܽܘܢ. ܘܟܽܠܗܽܘܢ ܥܰܘܴ̈ܠܶܐ ܢܶܣܟܪܽܘܢ ܚܶܟܗܽܘܢ. ܡܶܛܠ ܕܠܳܐ ܥܒܰܕ̈ܝ ܣܰܬܰܝ̈ܗܽܘܢ ܥܶܢܒ̈ܐ. ܘܠܳܐ ܚܰܩ̈ܠܳܬܗܽܘܢ ܐܶܨܛܰܒܱ̈ܬܝ ܒܰܓܕܺܝ̈ܫܶܐ. ܐܳܦ ܗܳܢܘܢ ܕܰܒܚܶܟܡܬܳܐ ܢܛܰܪܘ ܐܪ̈ܳܙܶܐ ܗܳܠܝܢ܆ ܘܺܝܕܰܥܘ ܚܶܣܕܶܗ ܕܡܳܪܝܳܐ ܕܡܽܘܟܳܟܶܗ ܕܥܰܠ ܐܰܦܱ̈ܝܢ. ܘܰܫܩܺܝܠܺܝܢ ܒܺܐܝܕܰܝ̈ܗܽܘܢ ܟܰܦ̈ܐ ܕܚܰܕܘܴ̈ܬܳܐ ܟܕ ܥܳܐܠܺܝܢ ܠܗܳܝ ܐܶܕܪܳܐ ܕܚܰܕܘܴ̈ܬܳܐ ܘܡܶܬܟܰܢܫܺܝܢ ܐܰܝܟ ܚܷ̈ܛܶܐ ܠܰܐܘܨܪ̈ܶܐ ܕܡܰܠܟܽܘܬܳܐ ܒܪܰܦܫܶܗ ܕܡܶܠܬܳܐ ܐܰܠܗܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܡܢܝܐ
ܕܡܰܘܕܰܥ ܥܰܠ ܐܪ̈ܳܙܶܐ ܕܓܶܠܝܳܢܶܗ ܕܰܐܠܗܳܐ ܡܶܠܬܳܐ ܘܥܰܠ ܟܳܪܽܘܙܽܘܬܳܐ ܕܰܢܒܺܝ̈ܐ ܘܡܰܥܰܠܬܶܗ ܕܰܠܓܰܘ ܩܰܒܪܳܐ ܘܥܰܠ ܡܶܙܕܰܟܝܳܢܽܘܬܳܐ ܕܰܫܝܽܘܠ.
ܒܫܽܘ̈ܚܠܳܦܶܐ ܣܰܓܺܝ̈ܐܐ ܡܰܠܶܦ ܪܽܘܚܳܐ ܒܝܰܕ ܩܰܕܺܝ̈ܫܶܐ. ܕܢܶܗܘܶܐ ܥܺܝܪ̈ܶܐ ܘܰܡܛܰܝ̈ܒܶܐ ܒܬܰܪܥܳܐ ܕܡܰܠܟܽܘܬܳܐ ܕܰܐܠܗܳܐ ܗܰܘ ܝܳܗܽܘܒܳܐ ܕܪܽܘܚܳܐ. ܘܣܰܓܺܝܐܝ̣ܬ ܡܚܰܦܶܛ ܗܘܳܐ ܠܬܰܠܡܺܝ̈ܕܶܐ ܕܺܝܠܶܗ ܕܢܶܗܘܽܘܢ ܡܛܰܝ̈ܒܶܐ. ܐܝܟ ܐܢܳܫܴ̈ܐ ܕܰܡܣܰܟܶܝܢ ܠܡܳܪܗܽܘܢ ܕܶܐܡܰܬܝ ܢܶܦܢܶܐ ܡܶܢ ܒܶܝܬ ܡܶܫܬܽܘܬܳܐ. ܕܡܳܐ ܕܶܐܬܳܐ ܘܰܢܩܰܫ ܡܶܚܕܳܐ ܢܶܦܬܚܽܘܢ ܠܶܗ. ܛܽܘܒܰܝܗܽܘܢ ܠܥܰܒ̈ܕܶܐ ܗܳܢܽܘܢ ܕܢܺܐܬܶܐ ܡܳܪܗܽܘܢ ܘܢܶܫܟܰܚ ܐܶܢܘܢ ܟܕ ܥܺܝܪܺܝܢ. ܐܰܡܺܝܢ ܐܡ̇ܪ ܐܢܳܐ ܠܟܽܘܢ ܕܢܶܐܣܽܘܪ ܚܰܨܰܘ̈ܗܝ ܘܢܰܣܡܶܟ ܐܶܢܽܘܢ ܘܢܶܥܒܰܪ ܘܰܢܫܰܡܶܫ ܐܶܢܽܘܢ (ܠܘܩܐ ܝܒ: ܠܘ-ܠܚ). ܠܘ ܬܰܚܘܺܝܬܳܐ ܒܰܠܚܽܘܕ ܗܳܕܐ ܣܳܡ ܩܕܳܡ ܫܠܺܝ̈ܚܶܐ. ܐܶܠܐ ܘܒܰܒܬܽܘ̈ܠܳܬܳܐ ܬܘܒ ܥܣܰܪ ܨܳܪܶܗ ܠܛܽܘܝܳܒܳܐ. ܘܚܰܘܺܝ ܕܰܟܡܳܐ ܥܰܕܰܪ ܛܽܘܝܳܒܳܐ ܡܥܰܬܕܳܐ ܠܚܰܡܶܫ ܒܬܽܘ̈ܠܬܐ. ܘܰܟܡܳܐ ܣܰܓܦܰܬ ܠܐ ܙܗܺܝܪܽܘܬܳܐ ܠܚܰܡܶܫ ܣܰܟ̈ܠܳܬܳܐ. ܘܬܽܘܒ ܕܶܝܢ ܒܥܰܒܕܳܐ ܘܪܰܒ ܒܰܝܬܳܐ ܚܰܟܺܝܡܳܐ ܪܰܫܡܶܗ ܠܛܽܘܝܳܒܳܐ ܕܚܰܬܢܳܐ ܘܰܕܚܳܝܪܺܝܢ ܠܰܓܢܽܘܢܳܐ. ܘܰܐܚܪ̈ܳܢܶܐ ܚܰܘܪ̈ܶܐ ܠܰܐܝܠܶܝܢ ܕܰܡܣܰܘܚܺܝܢ ܠܰܡܩܰܒܳܠܽܘ ܠܰܒܪܶܗ ܕܰܚܠܽܘܠܳܐ ܕܡܶܢܗܽܘܢ ܕܗܳܠܝܢ ܡܣܰܟ̈ܝܰܝ ܠܡܰܠܟܽܘܬܳܐ. ܘܰܡܛܰܝ̈ܒܰܝ ܠܡܰܠܟܽܘܬܳܐ. ܕܳܐܦ ܕܰܘܝܕ ܗܰܘ ܩܺܝܬܳܪܽܘܕܳܐ ܐܠܗܝܳܐ. ܡܶܛܠܗܳܕܐ ܟܕ ܨܳܒܶܐ ܕܰܢܚܰܘܶܐ ܢܰܦܫܶܗ ܥܺܝܪܳܐ ܘܰܡܛܰܝܒܳܐ ܒܬܰܪܥܳܐ ܕܡܳܪܶܗ. ܡܰܫܡܰܥ ܗܘܳܐ ܩܳܠܶܗ ܒܰܙܡܳܪܳܐ ܪܽܘܚܳܢܳܐ ܘܰܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܡܳܢܶܐ. ܡܙܰܡܰܪ ܗܘܳܐ ܒܰܡܛܰܝܒܽܘܬܳܐ ܘܰܒܥܺܝܪܽܘܬܳܐ ܘܳܐܡܰܪ:
ܡܛܰܝܰܒ ܗܽܘ ܠܶܒܝ ܐܰܠܳܗܳܐ ܡܛܰܝܰܒ ܗܽܘ ܠܶܒܝ. ܐܶܫܰܒܰܚ ܘܶܐܙܰܡܰܪ ܒܺܐܝܩܳܪܝ. ܗܳܠܝܢ ܩ̈ܠܐ ܐܝ̣ܬܰܝܗܘܢ ܕܢܰܦܫܳܐ ܕܰܥܦܺܝ̈ܦܳܢ ܙܡܺܝܪ̈ܳܬܳܗ̇ ܩܕܳܡ ܐܰܠܗܳܐ. ܘܰܕܗܰܘ ܕܰܐܝܟ ܕܡܰܫܡܰܥ ܩܳܠܶܗ ܒܙܽܘܡܳܪܳܐ ܕܡܶܢ ܠܒܰܪ. ܘܡܳܠܶܐ ܠܶܒܶܗ ܬܰܘܕܺܝܬܳܐ ܡܶܢ ܠܓܰܘ ܒܢܰܦܫܶܗ. ܘܗܳܝ ܕܶܐܡܰܪ ܕܶܐܫܰܒܰܚ ܘܶܐܙܰܡܰܪ ܒܺܐܝܩܳܪܝ. ܡܶܛܠ ܕܰܡܣܰܟܶܐ ܗܘܳܐ ܕܰܒܙܳܟܽܘܬܳܐ ܕܗܳܘܝܳܐ ܠܶܗ ܒܰܩܪܳܒܳܐ ܢܶܥܒܶܕ ܙܽܘܡܳܪܶܗ. ܘܠܐ ܟܕ ܓܳܥܶܐ ܡܶܢ ܨܰܥܪܳܐ ܘܡܽܘܟܳܟܳܐ ܕܰܡܥܺܝܩ ܠܶܗ ܥܰܡܳܐ ܕܰܐܕܽܘ̈ܡܳܝܶܐ ܕܡܶܬܟܰܬܰܫ ܗܘܳܐ ܥܰܡܗܽܘܢ. ܡܶܛܠ ܕܡܰܙܡܽܘܪܳܐ ܗܳܢܐ ܐܶܬܶܐܡܰܪ ܡܶܢ ܕܰܘܝܕ ܟܰܕ ܝܽܘܐܳܒ ܪܰܒ ܚܰܝܠܳܐ ܝ̣ܬܶܒ ܠܶܗ ܒܰܐܕܽܘܡ ܫܬܳܐ ܝܰܪ̈ܚܶܐ. ܘܰܥܕܰܡܳܐ ܕܩܰܛܶܠ ܬܰܡܳܢ ܟܠ ܕܶܟܪܳܐ. ܘܟܕ ܗܘܳܬ ܠܶܗ ܗܳܕܐ ܙܳܟܽܘܬܳܐ ܪܰܒܬܳܐ. ܐܰܓܗܝ̣ ܡܶܢ ܡܰܪܳܚܽܘܬܳܐ ܕܰܒܢܱ̈ܝ ܥܺܝܣܽܘ. ܕܰܒܟܽܠܙܒܰܢ ܫܳܚܩܺܝܢ ܗܘܰܘ ܠܶܗ. ܛܰܝܶܒ ܢܰܦܫܶܗ ܘܙܰܡܰܪ ܬܶܫܒܽܘܚܬܳܐ ܗܳܕܐ. ܒܪܰܡ ܐܝܟ ܕܶܐܡܪܶܬ ܟܠ ܐܶܡܰܬܝ ܕܥܳܐܷܦ ܡܶܠܬܶܗ ܪܽܘܚܳܐ. ܢܺܝܫܳܐ ܥܦܺܝܦܳܐ ܡܰܘܕܰܥ ܥܰܠܗܳܝ ܕܡܶܬܡܰܠܠܳܐ. ܡܶܛܠܗܳܢܐ ܡܶܬܚܰܫܰܚ ܗܘܳܐ ܢܒܺܝܐ ܒܰܥܦܺܝܦܽܘܬ ܡܶܠܬܳܐ ܘܳܐܡܰܪ:
ܐܶܬܬܥܺܝܪ ܟܶܢܳܪܝ ܐܶܬܬܥܺܝܪ ܟܶܢܳܪܳܐ ܘܩܺܝܬܳܪܳܐ. ܬܰܪܬܶܝܢ ܙܰܒܢ̈ܝ̣ܢ ܐܡ̣ܪ: ܐܶܬܬܥܺܝܪ ܟܰܕ ܣܳܐܷܡ ܬܽܘܒ ܩܺܝܬܳܪܳܐ ܐܳܦ ܟܶܢܳܪܳܐ ܘܰܬܪܶܝܢ ܗܳܘܶܝܢ. ܩܺܝܬܳܪܳܐ ܡܰܢ ܗܰܘ ܕܡܶܢ ܡܶܢܷ̈ܐ ܡܺܝ̈ܬܳܬܳܐ ܡܪܰܟܰܒ ܕܒܶܗ ܡܦܰܪܶܫ ܩܳܠܶܐ ܕܙܽܘܡܳܪܳܐ ܘܡܰܠܶܦ ܕܰܒܦܰܓܪܳܐ ܕܰܐܡܺܝܬ ܡܶܢܶܗ ܚܰܫ̈ܐ ܕܒܶܣܪܳܐ ܘܕܰܪ̈ܓܺܝܓܳܬܳܐ ܙܳܕܶܩ ܕܢܶܥܒܶܕ ܐܢܳܫ ܙܽܘܡܳܪܳܐ ܐܰܠܗܳܝܳܐ. ܟܶܢܳܪܳܐ ܕܶܝܢ ܠܩܳܠܳܐ ܕܡܶܫܬܡܰܥ ܡܶܢ ܦܽܘܡܳܐ ܡܫܰܘܕܰܥ܆ ܟܰܕ ܕܶܝܢ ܐܪܳܙܳܢܳܐܝ̣ܬ ܒܰܥܦܺܝܦܽܘܬ ܣܽܘܟܳܠܳܐ ܡܶܬܒܰܝܢܺܝܢܰܢ ܒܩܺܝܬܳܪܳܐ ܘܰܒܟܶܢܳܪܳܐ. ܚܰܕ ܡܶܬܦܪܶܫ ܠܩܰܪܢܳܐ ܗܳܝ ܕܡܰܠܶܠܘ ܒܳܗ̇ ܢܒܺܝ̈ܐ. ܘܰܐܚܪܺܢܳܐ ܠܗܳܝ ܕܰܐܟܪܶܙܘ ܒܳܗ̇ ܫܠܺܝ̈ܚܶܐ ܘܰܒܗܳܝ ܕܰܒܡܰܪܟܰܒܬܳܐ ܕܐܪ̈ܳܙܰܘܗܝ ܕܰܒܪܳܐ ܝܳܬܶܒ ܗܘܳܐ ܢܒܺܝܐ ܘܰܡܙܰܡܰܪ. ܠܰܬܪܰܝܗܽܘܢ ܡܳܐܢ̈ܐ ܗܳܠܝܢ ܕܰܙܡܳܪܳܐ ܩܰܕܺܝܫܳܐ ܩܕܳܡ ܡܰܠܟܳܐ ܡܥܺܝܪ ܗܘܳܐ. ܕܰܢܙܺܝܥܽܘܢ ܩܳܠܰܝ̈ܗܽܘܢ ܩܕܳܡ ܙܰܘܚܳܐ ܕܓܶܠܝܳܢܰܘ̈ܗܝ. ܘܳܐܦ ܥܰܠ ܢܰܦܫܶܗ ܐܡ̇ܪ ܗܘܳܐ:
ܘܶܐܢܳܐ ܠܰܡ ܐܶܬܬܥܺܝܪܶܬ ܒܨܰܦܪܳܐ. ܨܰܦܪܳܐ ܗܽܘܝܽܘ ܥܰܡܰܢܽܘܐܝܠ. ܒܳܟ ܠܰܡ ܕܺܐܝܬܰܝܟ ܨܰܦܪܳܐ ܦܨܺܝܚܳܐ ܘܢܰܗܺܝܪܳܐ. ܐܶܬܬܥܺܝܪ ܡܶܢ ܕܰܡܟܽܘܬܳܐ ܘܡܶܢ ܫܶܢܬܳܐ ܕܡܰܘܬܳܐ. ܘܶܐܦܽܘܩ ܡܶܢ ܗܳܢܐ ܥܳܠܡܳܐ ܐܝܟ ܕܡܶܢ ܡܰܘܬܳܐ.
ܘܰܐܘܕܶܐ ܠܳܟ ܒܥܰܡ̈ܡܶܐ ܐܰܠܗܳܐ ܘܠܰܫܡܳܟ ܐܶܙܡܰܪ ܒܶܐܡ̈ܘܳܬܳܐ. ܠܐ ܠܰܡ ܡܶܫܟܚܳܐ ܗܳܕܐ ܕܬܶܗܘܶܐ. ܐܠܐ ܡܳܐ ܕܕܶܢܚܰܬ ܩܝܳܡܬܳܟ. ܐܝܟ ܨܰܦܪܳܐ. ܘܶܐܬܓܠܺܝ ܪܰܘܡܳܐ ܕܰܫܪܳܪܳܟ ܘܶܐܬܟܰܪܙܰܬ ܗܰܝܡܳܢܽܘܬܳܟ.
ܘܡܶܛܠ ܕܪܰܒܳܐ ܗܝ ܛܰܝܒܽܘܬܳܟ ܥܕܰܡܳܐ ܠܰܫܡܰܝܳܐ. ܘܗܰܝܡܳܢܽܘܬܳܟ ܥܕܰܡܳܐ ܠܰܫܡܱ̈ܝ ܫܡܰܝܳܐ. ܡܳܢܰܐ ܗܘ ܓܝܪ ܦܽܘܪܫܳܢܳܐ ܕܣܳܡ ܢܒܺܝܐ ܒܶܝܬ ܗܰܝܡܳܢܽܘܬܳܐ ܠܛܰܝܒܽܘܬܳܐ. ܠܡܳܢܳܐ ܒܪܰܘܡܳܐ ܥܶܠܳܝܳܐ ܐܰܣܶܩ ܐܰܩܺܝܡܳܗ̇ ܠܗܰܝܡܳܢܽܘܬܳܐ. ܠܛܰܝܒܽܘܬܳܐ ܕܶܝܢ ܒܕܰܪܓܳܐ ܕܰܡܬܰܚܬܰܝ ܕܠܳܐ ܡܫܽܘܚܬܳܐ ܣܳܡܳܗ̇. ܐܳܦ ܗܳܠܝܢ ܒܗܰܘܢܳܐ ܪܰܒܳܐ ܦܪܰܫ ܐܶܢܶܝܢ. ܟܕ ܛܰܝܒܽܘܬܳܐ ܙܰܒܢܶܗ ܕܥܳܠܡܳܐ ܗܳܢܐ ܐܰܚܺܝܕܳܐ ܘܰܡܕܰܒܪܳܐ ܒܺܝ̈ܫܶܐ ܘܛܳܒܷ̈ܐ. ܛܥܺܝܢܳܐ ܒܪ̈ܰܚܡܶܐ. ܒܗܳܝ ܕܰܒܗܳܢܳܐ ܥܳܠܡܳܐ ܡܰܕܢܰܚ ܐܰܒܳܐ ܫܶܡܫܶܗ ܥܰܠ ܛܳܒܷ̈ܐ ܘܥܰܠ ܒܺܝ̈ܫܶܐ ܘܡܰܚܶܬ ܡܶܛܪܶܗ ܥܰܠ ܟܺܐܢ̈ܐ ܘܥܰܠ ܥܰܘܴ̈ܠܶܐ. ܒܥܳܠܡܳܐ ܕܶܝܢ ܚܰܕܬܳܐ ܡܶܛܠ ܕܟܽܠܶܗ ܕܺܝܢܳܐ ܝܰܗܒܶܗ ܠܰܒܪܳܐ. ܩܰܕܶܡ ܦܰܣܩܶܗ ܓܝܪ ܠܙܰܒܢܳܗ̇ ܕܛܰܝܒܽܘܬܳܐ. ܘܬܰܚܡܶܗ ܒܰܐܪܥܳܐ ܒܰܠܚܽܘܕ ܒܗܳܝ ܕܶܐܡܰܪ. ܕܡܰܢ ܕܢܰܘܕܶܐ ܒܝ̣ ܩܕܳܡ ܒܢܰܝ̈ܢܳܫܳܐ. ܐܰܘܕܶܐ ܒܶܗ ܐܳܦ ܐܶܢܳܐ ܩܕܳܡ ܐܳܒܝ ܕܒܰܫܡܰܝܳܐ (ܡܬܝ ܝ: ܠܒ). ܡܳܕܶܝܢ ܥܕܰܡܳܐ ܠܬܰܡܳܢ ܡܶܬܥܰܠܝܳܐ ܛܰܝܒܽܘܬܳܐ ܡܶܛܠ ܕܰܐܝܟ ܐܶܡܳܐ ܡܪܰܚܡܳܢܺܝܬܳܐ ܛܥܺܝܢܳܐ ܫܰܒܪܽܘܬܶܗ ܕܥܳܠܡܳܐ. ܘܰܡܣܰܝܒܪܳܐ ܕܶܝܢ ܒܪ̈ܰܚܡܶܐ ܚܰܘ̈ܒܰܘܗܝ ܘܰܚܛܳܗܰܘ̈ܗܝ. ܡܳܐ ܕܶܝܢ ܕܶܐܬܓܠܺܝ ܗܰܘ ܥܳܠܡܳܐ ܕܩܰܕܺܝ̈ܫܶܐ. ܦܳܫܰܬ ܛܰܝܒܽܘܬܳܐ ܡܶܢ ܥܳܠܡܳܐ ܘܩܶܪܒܰܬ ܟܺܐܢܽܘܬܳܐ ܘܗܰܝܡܳܢܽܘܬܳܐ. ܕܬܰܟܪܶܙ ܢܶܨܚܳܢ̈ܐ ܕܩܰܕܺܝ̈ܫܶܐ ܒܥܳܠܡܳܐ ܕܩܰܕܺܝ̈ܫܶܐ. ܘܗܳܝܕܶܝܢ ܡܳܐ ܕܶܐܬܚܰܙܝܰܬ ܗܰܝܡܳܢܽܘܬܳܐ. ܡܙܰܡܰܪ ܢܒܺܝܐ ܘܳܐܡܰܪ:
ܐܶܬܬܪܺܝܡ ܥܰܠ ܫܡܰܝܳܐ ܐܰܠܗܳܐ. ܘܥܰܠ ܟܽܠܳܗ̇ ܐܰܪܥܳܐ ܐܺܝܩܳܪܳܟ. ܗܳܝܕܶܝܢ ܡܶܬܬܪܺܝܡ ܥܰܡܰܢܽܘܐܝܠ ܥܠ ܟܽܠܗܶܝܢ ܒܶܪ̈ܝܳܬܳܐ. ܘܟܳܦܳܐ ܘܣܳܓܕܳܐ ܠܶܗ ܟܽܠ ܒܪܽܘܟ ܕܰܫܡܰܝܴ̈ܢܶܐ ܐܳܦ ܕܰܐܪ̈ܥܳܢܳܝܶܐ. ܕܪ̈ܽܘܚܳܢܶܐ ܘܦܰܓܪ̈ܳܢܶܐ ܘܥܶܠܳܝ̈ܐ ܘܬܰܚܬܳܝ̈ܐ ܘܟܽܠ ܠܶܫܳܢ ܡܰܘܕܶܐ ܕܡܳܪܝܰܐ ܗܘ ܝܶܫܽܘܥ ܡܫܺܝܚܳܐ. ܠܫܽܘܒܚܳܐ ܕܰܐܠܳܗܳܐ ܐܰܒܽܘܗܝ (ܦܝܠܝ̈ܣܝܐ ܒ: ܝ-ܝܐ). ܒܳܬܰܪ ܐܡ̇ܪ ܢܒܺܝܐ:
ܡܶܛܠ ܕܢܶܬܦܰܪܩܽܘܢ ܚܰܒܺܝ̈ܒܰܝܟ. ܦܪܽܘܩܰܝܢܝ ܒܝܰܡܺܝܢܳܟ ܘܰܥܢܺܝܢܝ. ܢܒܺܝܐ ܕܶܝܢ ܡܨܰܠܶܐ ܗܘܳܐ ܗܳܝܕܶܝܢ ܕܡܶܢ ܐܰܕܽܘ̈ܡܳܝܶܐ ܢܶܬܦܰܪܩܽܘܢ ܒܢܱ̈ܝ ܝ̣ܣܪܳܐܝܠ ܗܳܢܘܢ ܕܰܒܗܰܘ ܙܰܒܢܳܐ ܚܰܒܺܝ̈ܒܶܐ ܐܝ̣ܬܰܝܗܘܢ ܗܘܰܘ ܡܶܛܠ ܕܦܽܘܪܩܳܢܳܐ ܗܳܢܐ ܠܘܳܬ ܨܠܺܝܒܳܐ ܚܳܐܱܪ. ܠܰܡܗܰܝ̈ܡܢܶܐ ܕܶܐܬܦܪܶܩܘ ܡܶܢ ܛܪܽܘܢܽܘܬܶܗ ܕܳܐܟܶܠܩܰܪܨܳܐ ܒܡܰܘܬܶܗ ܕܡܳܪܝܳܐ. ܩܳܪܶܐ ܪܽܘܚܳܢܳܐܝ̣ܬ ܒܫܶܡ ܚܰܒܺܝ̈ܒܶܐ. ܠܦܽܘܪܩܳܢܳܐ ܕܰܒܝܰܕ ܒܪܳܐ ܚܰܒܺܝܒܳܐ ܟܰܕ ܩܳܪܶܐ ܠܶܗ ܝܰܡܺܝܢܶܗ ܕܰܐܒܳܐ. ܦܪܽܘܩܰܝܢܝ ܠܰܡ ܒܝܰܡܺܝܢܳܟ ܘܰܥܢܺܝܢܝ. ܘܟܕ ܐܡ̣ܪ ܗܳܕܐ ܩܰܒܠܳܗ̇ ܒܥܰܝܢܳܐ ܕܪܽܘܚܳܐ ܠܦܽܘܪܩܳܢܳܐ. ܘܰܐܫܡܰܥ ܒܶܐܕ̈ܢܶܐ ܕܢܰܦܫܶܗ ܩܳܠܐ ܕܡܰܡܠܠܶܗ ܕܗܰܘ ܕܰܬܠܶܐ ܗܘܳܐ ܒܰܨܠܺܝܒܳܐ ܡܶܛܠ ܦܽܘܪܩܳܢܰܢ. ܘܰܥܠܰܘܗܝ ܐܶܬܢܰܒܺܝ ܘܶܐܡܰܪ:
ܐܰܠܳܗܳܐ ܡܰܠܶܠ ܒܩܽܘܕܫܶܗ. ܩܽܘܕܫܶܗ ܠܡܰܘܬܒܶܗ ܩܳܪܶܐ. ܡܶܛܠ ܕܳܐܦ ܬܰܘܪ̈ܶܐ ܘܥܶܪ̈ܒܶܐ ܗܳܠܝܢ ܕܰܚܠܳܦ ܚܛܳܗ̈ܐ ܡܶܬܢܰܟܣܺܝܢ ܗܘܰܘ. ܩܽܘܕ̈ܫܶܐ ܡܶܬܩܪܶܝܢ ܗܘܰܘ. ܘܗܳܠܝܢ ܡܶܬܩܪܶܝܢ ܗܘܰܘ ܩܽܘܕܫܶܗ ܡܶܛܠ ܕܣܰܓܺܝ̈ܐܐ ܗܘܰܘ. ܐܰܠܗܳܐ ܕܶܝܢ ܡܶܛܠ ܕܰܚܕܳܐ ܙܒܰܢ ܐܶܬܕܒܰܚ. ܒܡܰܘܬܳܐ ܕܰܚܠܳܦ ܚܛܳܗ̈ܐ ܕܥܶܪ̈ܒܰܘܗܝ ܡܶܢܳܗ̇ ܕܡܶܠܬܳܐ ܐܰܠܗܳܐ ܝܳܠܦܺܝܢܰܢ ܕܶܐܡܰܪ ܡܶܛܠ ܬܰܠܡܺܝ̈ܕܰܘܗܝ ܕܥܰܠ ܐܰܦܰܝ̈ܗܽܘܢ ܐܶܢܳܐ ܡܩܰܕܶܫ ܐܢܳܐ ܢܰܦܫܝ (ܝܘܚܢܢ ܝܙ: ܝܛ). ܡܳܢܳܐ ܕܶܝܢ ܡܰܠܶܠ ܒܩܽܘܕܫܶܗ. ܗܳܝ ܕܶܐܡܰܪ ܠܓܰܝܳܣܳܐ. ܕܰܐܡܺܝܢ ܐܳܡܰܪ ܐܢܳܐ ܠܳܟ ܕܝܰܘܡܳܢܳܐ ܥܰܡܝ ܬܶܗܘܶܐ ܒܓܰܘ ܦܰܪܕܰܝܣܳܐ (ܠܘܩܐ ܟܓ: ܡܓ). ܘܗܳܝ ܕܶܐܡܰܪ ܠܝܽܘܚܰܢܳܢ ܟܳܪܽܘܙܳܐ. ܡܶܛܠ ܝܳܠܕܰܬ ܐܰܠܗܳܐ ܒܬܽܘܠܬܳܐ. ܛܰܠܝܳܐ ܗܳܐ ܐܶܡܳܟ (ܝܘܚܢܢ ܝܛ: ܟܙ). ܘܗܳܝ ܬܽܘܒ ܕܶܐܡܰܪ ܠܶܐܡܶܗ܆ ܐܰܢܬܳܬܳܐ ܗܳܐ ܒܪܳܐ ܕܺܝܠܶܟܝ (ܝܘܚܢܢ ܝܛ:ܟܘ). ܘܗܳܝ ܕܰܩܥܳܐ ܠܘܳܬ ܐܰܒܳܐ܆ ܕܳܐܒܝ ܒܺܐܝ̈ܕܰܝܟ ܣܳܐܷܡ ܐܢܳܐ ܠܳܗ̇ ܠܪܽܘܚܝ (ܠܘܩܐ ܟܓ: ܡܘ). ܗܳܠܝܢ ܐܶܢܘܢ ܩܴ̈ܠܐ ܕܡܰܠܶܠ ܐܰܠܗܳܐ ܒܩܽܘܕܫܶܗ ܟܕ ܬܠܶܐ ܒܰܙܩܺܝܦܳܐ. ܗܳܫܐ ܕܝܢ ܠܘ ܐܝܟ ܕܡܶܢ ܢܒܺܝܳܐ ܫܳܡܥܺܝܢܰܢ ܗܳܠܝܢ ܕܡܶܢ ܒܳܬܰܪܟܶܢ. ܐܶܠܐ ܐܝܟ ܕܡܶܢܶܗ ܕܡܶܠܬܳܐ ܐܰܠܗܳܐ ܕܶܐܡܪ:
ܐܶܫܰܒܰܚ ܐܶܢܳܐ ܘܶܐܦܰܠܶܓ ܠܰܫܟܺܝܡ ܘܰܠܥܽܘܡܩܳܐ ܕܣܳܟܽܘܬ ܐܶܡܫܽܘܚ. ܫܳܟܺܝܡ ܐܝ̣ܬܝܗ̇ ܩܪܺܝܬܳܐ ܝܰܬܺܝܪܬܳܐ ܕܝܰܗܒ ܐܰܒܽܘܢ ܝܰܥܩܽܘܒ ܠܝܰܘܣܶܦ ܒܪܶܗ. ܝܰܬܝ̣ܪ ܡܶܢ ܐܰܚܰܘ̈ܗܝ. ܗܳܝ ܕܶܐܡܰܪ ܗܘܳܐ ܕܢܰܣܒܳܗ̇ ܡܶܢ ܐܳܡܽܘܪ̈ܳܝܶܐ ܒܣܰܝܦܶܗ ܘܰܒܩܶܫܬܶܗ. ܗܳܕܐ ܕܶܝܢ ܡܶܛܠ ܕܺܝܢܳܐ ܕܣܽܘܥܪܳܢܳܐ ܐܶܬܢܰܣܒܰܬ ܗܘܳܬ. ܟܰܕ ܨܰܥܪܶܗ ܗܘܳܐ ܫܟܺܝܡ ܒܰܪ ܚܰܡܽܘܪ. ܡܦܰܠܶܓ ܗܘܳܐ ܠܗ̇. ܡܳܕܝܢ ܡܳܪܢ ܒܳܬܰܪ ܩܝܳܡܬܶܗ ܠܘ ܠܡܳܝܽܘ̈ܬܶܐ ܐܶܠܐ ܠܚܰܝ̈ܐ ܕܠܐ ܡܝܽܘܬܽܘܬܳܐ ܚܰܝ̈ܐ ܡܦܰܠܶܓ ܗܘܳܐ. ܥܽܘܡܩܳܐ ܬܘܒ ܕܣܳܟܽܘܬ ܕܡܰܫܚܶܗ. ܗܳܢܐ ܐܝ̣ܬܰܘܗܝ ܣܽܘܥܪܳܢܳܐܝ̣ܬ. ܢܰܚܠܳܐ ܕܣܺܝܡ ܗܘܳܐ ܒܰܝܢܳܬ ܐܰܪܥܳܐ ܕܺܝܣܪܳܐܝܠ ܠܗܳܝ ܕܰܦܠܶܫܬܳܝ̈ܐ. ܘܡܶܢܶܗ ܕܗܳܢܳܐ ܢܰܚܠܳܐ ܣܳܠܶܩ ܗܘܳܐ ܓܽܘܠܝܰܕ ܦܠܶܫܬܳܝܳܐ ܥܰܠ ܫܰܒ̈ܛܶܐ ܕܰܒܢܱ̈ܝ ܝ̣ܣܪܳܐܝܠ ܘܰܡܚܰܣܶܕ ܠܗܽܘܢ. ܒܐܪܳܙܳܐ ܕܶܝܢ ܐܝ̣ܬܰܘܗܝ ܢܰܚܠܳܐ ܥܰܡܺܝܩܳܐ ܕܡܰܘܬܳܐ. ܕܟܰܕ ܢܚܶܬ ܐܰܠܗܳܐ ܡܶܠܬܳܐ ܗܰܠܶܟ ܒܰܫܝܽܘܠ. ܣܰܒܪܳܐ ܕܚܰܝܰܬ ܡܺܝ̈ܬܶܐ. ܘܗܳܝܕܝܢ ܕܡܶܢ ܒܳܬܰܪܟܶܢ ܡܟܰܢܶܫ ܠܗܽܘܢ ܠܟܽܠܗܘܢ ܥܰܡܡ̈ܐ ܠܘܳܬܶܗ ܕܚܰܕ ܥܰܡܳܐ ܩܰܕܺܝܫܳܐ ܢܶܗܘܘܢ ܠܶܗ. ܐܡ̣ܪ ܓܶܝܪ:
ܕܺܝܠܝ ܗܽܘ ܓܶܠܥܳܕ ܕܺܝܠܝ ܗܽܘ ܡܢܰܫܶܐ. ܐܰܦܪܶܝܡ ܡܥܰܫܢܳܢܶܗ ܕܪܺܝܫ. ܝܗܽܘܕܳܐ ܡܰܠܟܝ ܘܡܽܘܐܳܒ ܩܶܕܣܳܐ ܕܰܫܝܳܓܬܝ. ܓܶܠܥܳܕ ܘܰܡܢܰܫܶܐ ܘܝܺܗܽܘܕܳܐ ܘܰܐܦܪܶܝܡ ܥܰܠ ܗܳܠܶܝܢ ܒܡܳܪܢ ܡܶܢ ܥܰܡܳܐ ܡܶܬܢܰܣܒܺܝܢ. ܒܐܪܳܙ ܗܳܝ ܕܡܽܘܐܳܒ ܥܰܡܳܐ ܚܰܛܳܝܳܐ ܘܙܰܠܺܝܠܳܐ. ܢܶܗܘܶܐ ܩܶܕܣܳܐ ܕܰܫܝܳܓܬܶܗ ܕܰܒܪܳܐ ܡܶܠܬܳܐ. ܘܡܳܢܳܐ ܐܚܪܺܢܳܐ ܡܰܠܦܳܐ. ܥܰܠ ܥܡܳܕܳܐ ܩܰܕܺܝܫܳܐ ܕܝܰܗܒ ܠܥܰܡܡ̈ܐ ܚܰܛܳܝ̈ܐ ܥܰܡܰܢܽܘܐܝܠ ܕܰܟܡܳܐ ܐܶܢ ܡܶܬܟܰܬܡܺܝܢ ܗܘܰܘ ܒܡܽܘ̈ܡܶܐ ܕܰܚܛܳܗ̈ܐ. ܒܗܳܝ ܩܶܕܣܳܐ ܪܽܘܚܳܢܳܐ ܕܡܰܥܡܽܘܕܺܝܬܳܐ ܐܰܫܺܝܓ ܐܳܦ ܚܰܘܰܪ ܐܶܢܘܢ ܐܰܠܗܳܐ ܡܶܠܬܳܐ. ܘܠܐ ܬܟܰܣ ܠܳܐ ܠܡܽܘ̈ܐܳܒܳܝܶܐ ܘܠܳܐ ܠܥܰܡܽܘ̈ܢܳܝܶܐ ܡܶܢ ܡܶܠܬܳܐ ܕܰܠܘܳܬܶܗ. ܐܶܠܐ ܐܰܫܘܳܗ̇ ܠܰܓܒܺܝܠܬܳܐ ܕܥܰܡܡ̈ܐ. ܥܰܡ ܫܰܒܛܳܐ ܕܺܝܗܽܘܕܳܐ ܗܰܘ ܕܰܕܢܰܚ ܡܶܢܶܗ ܒܰܒܣܰܪ. ܟܕ ܒܗܳܕܐ ܪܳܡܶܙ. ܥܰܠܗܳܝ ܕܥܰܒܕܰܢ ܠܶܗ ܐܰܚ̈ܐ ܒܛܰܝܒܽܘܬܶܗ. ܡܰܝܬܶܐ ܕܶܝܢ ܒܳܬܰܪ ܗܳܠܝܢ ܐܳܦ ܥܽܘܗܕܳܢܳܐ ܡܫܰܠܛܳܐ ܐܳܦ ܡܳܪܳܢܳܝܳܐ ܕܡܰܘܬܶܗ ܕܥܰܡܰܢܽܘܐܝܠ.
ܥܰܠ ܐܰܕܽܘܡ ܐܶܫܪܶܐ ܡܣܴ̈ܐܢܰܝ ܘܥܰܠ ܦܠܶܫܬ ܐܶܩܥܶܐ. ܩܰܕܶܡܘ ܟܬܳܒ̈ܐ ܘܰܪܫܰܡܘ ܦܷ̈ܠܳܐܬܳܐ ܥܰܠ ܐܰܕܽܘܡ. ܒܡܰܘܬܳܐ ܡܶܬܡܬܶܠ. ܦܠܶܫܬ ܕܶܝܢ ܡܶܬܡܰܬܠܳܐ ܒܰܫܝܽܘܠ. ܡܶܛܠ ܡܳܢܳܐ ܕܶܝܢ ܐܡ̣ܪ ܪܽܘܚܳܐ. ܕܥܰܠ ܚܰܕ ܫܳܪܶܐ ܡܣܳܐܢܰܘ̈ܗܝ. ܘܰܒܚܰܕ ܩܳܥܶܐ. ܡܳܢܐ ܐܝ̣ܬܰܝܗܘܢ ܕܝܢ ܡܣܳܐܢܷ̈ܐ. ܡܣܳܐܢ̈ܐ ܓܝܪ ܡܶܢ ܡܶܫ̈ܟܶܐ ܕܚܰܝܘܴ̈ܬܳܐ ܡܺܝ̈ܬܶܐ ܡܶܬܥܰܒܕܺܝܢ. ܟܕ ܕܝܢ ܐܶܬܳܐ ܡܶܢ ܫܡܰܝܳܐ ܗܰܘ ܚܰܝܳܐ ܒܰܟܝܳܢܶܗ ܘܠܐ ܡܳܝܽܘܬܳܐ ܘܠܰܒܫܳܗ̇ ܠܟܽܘܬܺܝܢܳܐ ܕܡܶܫܟܳܐ ܒܰܩܢܽܘܡܶܗ ܗܳܝ ܕܰܠܒܰܫ ܐܳܕܳܡ. ܘܰܢܣܰܒ ܥܠܰܘܗܝ ܕܡܶܢ ܟܝܳܢܳܐ ܡܳܝܽܘܬܳܐ ܚܰܝܶܕ ܠܶܗ ܦܰܓܪܳܐ. ܚܳܫܽܘܫܳܐ ܘܒܶܣܪܳܐ ܡܳܝܽܘܬܳܐ. ܘܟܕ ܢܣܰܒ ܐܳܦ ܥܡ ܗܳܢܐ ܢܰܦܫܳܐ ܡܠܺܝܠܬܳܐ ܘܝܰܕܽܘܥܬܳܢܺܝܬܳܐ. ܘܰܒܕܽܘܡܝܳܐ ܡܶܕܶܡ ܕܰܡܣܳܐܢ̈ܐ ܕܰܡܟܰܣܶܝܢ ܒܡܶܫ̈ܟܶܐ ܡܺܝ̈ܬܶܐ ܠܪ̈ܶܓܠܶܐ ܚܰܝܴ̈ܬܳܐ ܐܶܬܟܰܣܝܰܬ ܐܰܠܗܽܘܬܳܐ ܠܳܐ ܡܳܝܽܘܬܬܳܐ ܒܶܣܪܳܐ ܡܳܝܽܘܬܳܐ. ܡܶܛܠ ܕܕܺܝܠܶܗ ܗܘܰܘ ܕܡܶܠܬܳܐ ܗܰܘ ܠܐ ܡܳܝܽܘܬܳܐ. ܦܰܓܪܳܐ ܘܢܰܦܫܳܐ. ܗܳܠܝܢ ܕܠܐ ܡܶܬܦܰܠܓܳܢܳܐܝ̣ܬ ܚܰܝܶܕ ܠܶܗ ܡܶܢ ܡܰܪܒܥܳܐ. ܩܰܕܶܡ ܗܘܳܐ ܘܶܐܡܰܪ: ܕܢܰܦܫܝ ܣܳܐܷܡ ܐܢܳܐ ܚܠܳܦ ܥܳܢܴ̈ܐ. ܘܫܰܠܺܝܛ ܐܢܳܐ ܕܶܐܣܺܝܡܺܝܗ̇ ܘܫܰܠܺܝܛ ܐܢܳܐ ܬܽܘܒ ܕܶܐܣܒܺܝܗ̇. ܕܗܳܢܐ ܦܽܘܩܕܳܢܳܐ ܩܰܒܠܶܬ ܡܶܢ ܐܳܒܝ (ܝܘܚܢܢ ܝ: ܝܚ). ܡܳܕܝܢ ܫܰܦܺܝܪ ܐܡ̣ܪ ܒܐܪܳܙܳܐ ܛܽܘܒܳܢܳܐ ܕܰܘܝܕ. ܕܥܠ ܐܰܕܽܘܡ ܐܶܫܪܶܐ ܡܣܳܐܢܱ̈ܝ ܘܥܰܠ ܦܠܶܫܬ ܐܶܩܥܶܐ. ܘܟܕ ܫܒܰܩ ܕܢܶܗܘܶܐ ܫܪܳܝܳܐ ܠܢܰܦܫܳܐ ܡܶܢ ܦܰܓܪܳܐ. ܣܳܡ ܐܶܢܘܢ ܥܰܠ ܡܰܘܬܳܐ ܚܰܕ. ܘܰܐܚܪܺܢܳܐ ܥܰܠ ܫܝܽܘܠ. ܦܰܓܪܳܐ ܓܶܝܪ ܒܓܰܘ ܩܰܒܪܳܐ ܥܰܠ ܡܰܘܬܳܐ. ܘܢܰܦܫܳܐ ܕܶܝܢ ܥܰܠ ܫܝܽܘܠ. ܠܘ ܟܕ ܣܳܡܰܬ ܐܶܢܽܘܢ ܐܰܠܳܗܽܘܬܳܐ ܠܢܰܦܫܳܐ ܘܰܠܦܰܓܪܳܐ. ܐܶܠܐ ܒܶܗ ܒܰܩܢܽܘܡܶܗ ܕܡܶܠܬܳܐ ܐܰܠܳܗܳܐ ܐܝ̣ܬܰܝܗܘܢ ܗܘܰܘ. ܟܕ ܫܪܶܝܢ ܚܰܕ ܡܶܢ ܚܰܕ. ܟܕ ܒܬܰܪ̈ܥܶܐ ܕܰܫܝܽܘܠ ܩܰܕܶܡ ܐܡ̣ܪ ܥܠܰܘܗܝ ܢܒܺܝܐ.
ܕܠܳܐ ܫܳܒܶܩ ܐܰܢܬ ܠܳܗ̇ ܠܢܰܦܫܝ ܒܰܫܝܽܘܠ. ܘܠܳܐ ܝܳܗܶܒ ܐܰܢܬ ܠܚܰܣܝܳܟ ܕܢܶܚܙܶܐ ܚܒܳܠܳܐ. ܟܕ ܕܶܝܢ ܡܚܰܘܶܐ ܕܗܽܘ ܡܶܢ ܢܰܦܫܶܗ ܐܳܙܶܠ ܨܶܝܕ ܡܰܘܬܳܐ. ܘܰܡܫܰܐܷܠ ܐܝܟ ܕܡܶܢ ܦܰܪܨܽܘܦܶܗ ܕܡܶܠܬܳܐ ܘܳܐܡܰܪ:
ܡܰܢܽܘ ܢܰܘܒܠܰܢܝ ܠܰܩܪܺܝܬܳܐ ܥܰܫܺܝܢܬܳܐ. ܘܡܰܢܽܘ ܢܕܰܒܪܰܢܝ ܥܕܰܡܳܐ ܠܰܐܕܽܘܡ. ܡܶܢ ܥܒܺܝ̈ܕܶܐ ܘܠܳܐ ܐܢܳܫ ܡܶܫܟܰܚ ܗܘܳܐ ܕܗܳܕܐ ܢܶܥܒܶܕ. ܠܘܳܬ ܚܰܝܳܐ ܘܠܐ ܡܳܝܽܘܬܳܐ. ܩܪܺܝܬܳܐ ܗܳܟܺܝܠ ܥܰܫܺܝܢܬܳܐ ܫܝܽܘܠ ܐܝ̣ܬܶܝܗ̇. ܗܳܝ ܕܰܒܓܰܘܳܗ̇ ܚܡܺܝܠܳܐ ܗܘܳܬ ܫܒܺܝܬܳܐ ܕܥܰܡܡ̈ܐ ܘܰܕܫܰܪ̈ܒܳܬܳܐ ܕܰܠܗܳܕܐ ܐܶܙܰܠ ܒܨܶܒܝܳܢܶܗ ܗܽܘ ܥܰܡܰܢܘ̣ܐܝܠ. ܘܰܐܦܶܩ ܡܶܢܳܗ̇ ܠܟܽܠܗܝܢ ܢܰܦܫܴ̈ܬܳܐ ܕܰܚܒܺܝ̈ܫܳܢ ܗܘ̈ܝ ܒܗ̇. ܘܰܫܪܳܐ ܐܰܣܽܘܪ̈ܰܝܗܶܝܢ ܘܰܦܩܰܕ ܠܗܶܝܢ ܠܡܶܦܰܩ ܡܶܢ ܬܰܡܳܢ. ܘܰܠܘܳܬ ܐܰܕܽܘܡ ܬܘܒ. ܗܽܘ ܡܶܢܶܗ ܨܒܳܐ ܘܶܐܬܕܒܰܪ. ܡܶܛܠ ܕܠܳܐ ܡܶܫܟܰܚ ܗܘܳܐ ܡܰܘܬܳܐ ܢܰܡܪܰܚ ܥܰܠ ܡܳܪܶܗ ܕܡܰܘܬܳܐ ܘܡܰܦܩܳܢܳܐ. ܗܳܫܐ ܕܶܝܢ ܐܡ̇ܪ ܦܶܬܓܳܡܳܐ ܢܒܺܝܐ. ܕܠܳܐ ܠܳܚܶܡ ܥܰܠ ܥܰܡܰܢܘ̣ܐܝܠ ܢܶܬܪܢܶܐ. ܐܠܐ ܕܳܡܶܐ ܕܰܠܘܳܬ ܥܰܡܳܐ.
ܕܗܳܐ ܠܰܡ ܐܰܢܬ ܐܰܠܗܳܐ ܛܥܰܝܬܳܢ ܘܠܳܐ ܢܳܦܶܩ ܐܰܢܬ ܒܚܰܝܠܰܢ. ܡܶܢ ܒܳܬܰܪ ܕܰܨܠܰܒ ܥܰܡܳܐ ܠܥܰܡܰܢܘ̣ܐܝܠ. ܠܐ ܬܘܒ ܢܦܰܩ ܐܰܠܗܳܐ ܒܚܰܝܠܶܗ ܕܥܰܡܳܐ. ܘܠܐ ܗܘܳܐ ܥܰܡܶܗ ܒܰܩܪܳܒܳܐ ܠܽܘܩܒܰܠ ܒܥܶܠܕ̈ܒܳܒܰܘܗܝ ܐܠܐ ܕܠܐ ܥܽܘܕܪܳܢܶܗ ܫܒܰܩ ܐܶܢܘܢ. ܡܨܰܠܶܐ ܕܶܝܢ ܢܒܺܝܳܐ ܘܳܐܡܰܪ: ܥܰܠ ܠܶܫܳܢ ܗܰܘ ܥܰܡܳܐ ܕܶܐܬܦܪܶܩ ܒܥܰܡܰܢܘ̣ܐܝܠ:
ܗܰܒ ܠܰܢ ܚܰܝܠܳܐ ܥܰܠ ܒܥܶܠܕ̈ܒܳܒܰܝܢ. ܡܶܛܠ ܕܰܣܪܺܝܩ ܗܽܘ ܦܽܘܪܩܳܢܶܗ ܕܒܰܪܢܳܫܳܐ. ܗܳܝܕܶܝܢ ܢܒܺܝܳܐ ܥܰܠ ܙܳܟܽܘܬܳܐ ܡܶܢ ܐܰܕܽܘܡ ܡܨܰܠܶܐ ܗܘܳܐ܆ ܘܰܕܢܶܗܘܶܐ ܒܶܗ ܚܰܝܠܳܐ ܕܢܶܬܦܰܨܶܐ ܡܶܢ ܥܺܝܣܽܘ ܒܳܥܶܐ ܗܘܳܐ. ܐܠܐ ܐܪܳܙܳܢܳܐܝ̣ܬ ܕܢܶܬܶܠ ܠܰܢ ܚܰܝܠܳܐ ܥܰܠ ܒܥܶܠܕܒܳܒܳܐ ܕܚܰܝܰܝ̈ܢ ܡܰܠܶܦ. ܡܰܢܽܘ ܓܶܝܪ ܡܶܫܟܰܚ ܠܰܡܩܳܡ ܗܳܠܝܢ ܕܢܺܐܡܰܪ ܕܩܰܕܺܝ̈ܫܶܐ ܡܨܶܝܢ ܠܡܶܣܕܰܪ ܩܪܳܒܳܐ ܠܽܘܩܒܰܠ ܗܳܠܝܢ ܘܰܠܡܶܦܪܰܩ ܡܶܢ ܐܺܝ̈ܕܰܝܗܘܢ. ܗܳܐ ܢܒܺܝܳܐ ܐܡ̣ܪ ܗܳܪܟܳܐ. ܡܶܛܠ ܕܰܣܪܺܝܩ ܗܽܘ ܦܽܘܪܩܳܢܶܗ ܕܒܰܪܢܳܫܳܐ. ܘܗܳܠܶܝܢ ܬܽܘܪ̈ܳܨܶܐ ܠܰܘ ܒܝܰܕ ܒܰܪܢܳܫܳܐ ܗܘܰܘ. ܘܠܰܘ ܡܶܢ ܡܰܘܬܳܐ ܕܢܰܚܘ ܠܢ ܚܰܝ̈ܐ. ܣܪܺܝܩ ܗܽܘ ܓܝܪ ܦܽܘܪܩܳܢܶܗ ܕܒܰܪܢܳܫܳܐ ܐܰܟܘܳܬܶܗ. ܗܰܘ ܓܶܝܪ ܕܗܽܘ ܠܗ ܠܐ ܦܪܰܩ. ܐܰܝܟܰܢ ܡܶܫܟܰܚ ܠܰܐܚܪ̈ܳܢܶܐ ܠܡܶܦܪܰܩ. ܐܠܐ ܚܢܰܢ ܢܺܐܡܰܪ.
ܐܰܠܳܗܳܐ ܢܰܩܢܶܝܢ ܚܰܝܠܳܐ ܘܗܽܘ ܢܕܽܘܫ ܠܰܒܥܶܠܕ̈ܒܳܒܰܝܢ. ܚܙܺܝ ܗܳܟܺܝܠ ܐܰܝܟܰܢܳܐ ܢܰܗܺܝܪܳܐܝ̣ܬ. ܒܳܬܰܪ ܐܰܠܗܳܐ ܡܚܺܝܪ ܠܶܗ ܠܦܽܘܪܩܳܢܳܐ. ܘܗܽܘ ܐܡ̣ܪ ܕܰܐܩܢܺܝ ܚܰܝܠܳܐ ܠܡܶܬܦܰܪܩܳܢܳܐ. ܘܕܳܫ ܘܫܰܦܶܠ ܠܰܒܥܶܠܕܒܳܒܳܐ ܗܰܘ ܕܚܰܝܰܝ̈ܢ. ܐܝܟ ܕܶܐܡܰܪ ܢܒܺܝܳܐ. ܘܰܬܕܽܘܫ ܐܰܪܝܳܐ ܘܬܰܢܺܝܢܳܐ. ܘܟܕ ܠܗܳܠܶܝܢ ܒܚܰܝܠܶܗ ܫܰܥܒܶܕ ܘܟܰܢܶܫ. ܘܝܰܗܒ ܬܘܒ ܠܰܫܠܺܝ̈ܚܶܐ ܕܺܝܠܶܗ ܕܰܢܕܽܘܫܽܘܢ ܚܘܰܘܴ̈ܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܳܐ ܕܰܒܥܶܠܕܒܳܒܳܐ ܕܳܐܦܚܢܰܢ ܢܨܰܠܶܐ ܕܡܶܢ ܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ ܢܽܘܟܪܳܝܳܐ ܢܶܫܬܰܘܙܰܒ. ܘܥܰܠ ܩܕܳܠܳܐ ܕܡܳܪ̈ܽܘܕܶܐ ܬܶܬܪܺܝܡ ܥܶܩܒܰܢ. ܘܢܳܦܶܠ ܒܥܶܠܕܒܳܒܰܢ ܬܚܶܝܬ ܪ̈ܶܓܠܰܝܢ ܒܝܰܕ ܐܠܗܐ ܦܳܪܽܘܩܰܢ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܫܥܐ
ܡܰܘܕܰܥ ܥܰܠ ܡܪܳܕܶܗ ܕܥܰܡܳܐ ܕܥܰܡ ܐܰܒܺܝܫܳܠܽܘܡ. ܘܥܰܠ ܡܳܪܽܘܕܽܘܬܳܐ ܕܝܽܘ̈ܕܳܝܶܐ ܕܥܰܠ ܡܫܺܝܚܳܐ ܘܡܽܘܟܳܟܶܗ ܕܥܰܠ ܨܠܺܝܒܳܐ. ܘܢܰܓܺܝܪܽܘܬ ܪܽܘܚܶܗ ܕܡܶܢ ܨܳܠܽܘ̈ܒܶܐ.
ܨܰܝܳܪ̈ܶܐ ܚܰܟܺܝ̈ܡܶܐ ܗܘܰܘ ܢܒܺܝ̈ܐ ܩܰܕܺܝ̈ܫܶܐ ܠܨܰܠܡܳܐ ܪܰܒܳܐ ܘܰܣܓܺܝܕܳܐ ܕܐܪ̈ܳܙܰܘܗܝ ܦܳܪ̈ܽܘܩܳܝܶܐ ܕܥܰܡܰܢܽܘܐܝܠ. ܐܝ̣ܬ ܕܟܰܕ ܩܰܒܶܠ ܣܰܡ̈ܡܳܢܶܐ ܕܥܳܗܢܺܝܢ ܠܕܶܡ̈ܘܳܬܳܐ ܕܨܰܠܡܳܗ̇ ܕܡܰܠܟܽܘܬܳܐ. ܐܰܩܝ̣ܡ ܩܢܽܘܡܶܗ ܚܠܳܦ ܕܰܦ̈ܐ. ܘܰܥܠܰܘܗܝ ܪܫܰܡ ܘܰܟܬܰܒ ܐܶܢܘܢ. ܐܚܪ̈ܳܢܶܐ ܕܶܝܢ ܠܒܰܪ ܡܶܢܗܽܘܢ ܐܰܣܶܩܘ ܨܰܠܡܷ̈ܐ ܘܕܶܡܘܴ̈ܬܳܐ ܠܗܰܘ ܫܽܘܦܪܳܐ ܕܰܐܠܗܳܐ ܕܠܐ ܡܶܬܚܰܒܰܠ. ܕܰܘܝܕ ܢܒܺܝܳܐ ܗܳܢܐ ܨܰܝܳܪܳܐ ܡܗܺܝܪܳܐ ܘܽܐܘܡܳܢܳܐ ܚܰܟܺܝܡܳܐ ܒܰܩܢܽܘܡܶܗ ܐܰܣܶܩ ܨܰܠܡܳܐ ܠܡܰܠܟܳܐ ܡܳܪܶܗ. ܘܳܐܦ ܗܽܘ ܡܰܠܟܳܐ ܕܰܫܪܳܪܳܐ ܟܰܕ ܐܶܫܟܚܶܗ ܡܶܛܠ ܟܺܐܢܽܘܬܶܗ ܕܫܳܘܶܐ ܠܕܶܡ̈ܘܳܬܳܐ ܗܳܠܝܢ ܩܰܕܺܝ̈ܫܳܬܳܐ ܕܝܰܬܝ̣ܪ ܡܶܢ ܟܽܠܗܘܢ ܢܒܺܝ̈ܐ. ܝܰܗܒ ܠܶܗ ܣܰܡ̈ܡܳܢܶܐ ܪ̈ܽܘܚܳܢܶܐ ܕܰܢܨܽܘܪ ܠܶܗ ܝܽܘ̈ܩܢܶܐ ܘܕܶܡ̈ܘܳܬܳܐ. ܘܳܐܦ ܗܳܫܐ ܒܰܥܝܳܕܶܗ ܡܚܰܘܶܐ ܕܩܳܐܷܡ ܝܽܘܩܢܳܐ ܠܰܡܫܺܝܚܳܐ ܒܝܰܕ ܓܶܠܝܳܢܳܐ ܕܰܗܘܳܐ ܥܠܰܘܗܝ ܨܰܠܡܶܗ ܕܡܰܓܪܰܬ ܪܽܘܚܶܗ ܕܦܳܪܽܘܩܰܢ ܕܰܠܘܳܬ ܝܽܘ̈ܕܳܝܶܐ ܨܳܐܱܪ. ܟܕ ܡܶܫܬܰܥܶܐ ܡܰܪܳܚܽܘܬܶܗ ܕܥܰܡܳܐ ܕܥܠ ܡܫܺܝܚܳܐ. ܡܶܠܬܳܐ ܢܣܰܒ ܡܶܢ ܗܳܝ ܕܰܡܪܰܕ ܥܰܡܳܐ ܘܰܐܡܠܶܟܘ ܠܰܐܒܺܝܫܳܠܽܘܡ. ܟܰܕ ܠܳܐ ܪܓܺܝܫ ܗܘܳܐ ܗܽܘ ܕܰܘܝܕ ܒܗܰܘ ܓܝܪ ܙܰܒܢܳܐ. ܙܰܡܰܪ ܕܰܘܝܕ ܡܰܙܡܽܘܪܳܐ ܗܳܢܐ ܕܬܶܫܒܽܘܚܬܳܐ ܕܰܡܳܐܐ ܘܰܬܫܰܥ ܘܶܐܡܰܪ:
ܐܰܠܗܳܐ ܕܬܶܫܒܽܘܚܬܝ ܠܳܐ ܬܶܫܬܽܘܩ. ܡܶܛܠ ܕܦܽܘܡܶܗ ܕܪܰܫܺܝܥܳܐ ܘܦܽܘܡܶܗ ܕܢܰܟܽܘܠܬܳܢܳܐ ܐܶܬܦܬܰܚ ܥܠܰܝ. ܘܡܰܠܶܠܘ ܥܰܡܝ ܒܠܶܫܳܢܳܐ ܕܰܓܳܠܳܐ ܘܰܒܩܳܠܳܐ ܕܣܶܢܐܬܳܐ. ܘܶܐܬܟܰܬܰܫܘ ܥܰܡܝ ܣܪܺܝܩܳܐܝ̣ܬ. ܘܰܚܠܳܦ ܪܶܚܡܰܬܝ ܣܰܩܪܽܘܢܝ. ܘܶܐܢܳܐ ܡܨܰܠܶܐ ܗܘܺܝܬ ܥܠܰܝܗܽܘܢ. ܦܰܪܥܽܘܢܝ ܒܺܝܫܬܳܐ ܚܠܳܦ ܛܳܒܬܳܐ ܘܣܶܢܐܬܳܐ ܚܠܳܦ ܪܶܚܡܬܳܐ. ܐܝܟ ܕܡܶܢ ܢܺܝܫܳܐ ܥܰܡܺܝܩܳܐ ܘܩܰܫܝܳܐ ܡܙܰܡܰܪ ܗܘܳܐ ܛܽܘܒܬܳܢܳܐ ܕܰܘܝܕ ܗܳܠܝܢ ܟܕ ܡܚܰܘܶܐ. ܕܠܰܝܬ ܗܘܳܐ ܐܰܬܪܳܐ ܕܢܶܗܘܶܐ ܡܪܳܕܳܐ ܗܰܘ. ܒܗܳܝ ܕܟܽܠܡܶܕܶܡ ܕܠܳܐ ܥܶܕܠܳܝ ܡܕܰܒܰܪ ܗܘܳܐ ܠܶܗ ܠܥܰܡܳܐ. ܘܛܳܒܴ̈ܬܳܐ ܣܰܓܺܝ̈ܐܬܳܐ ܥܳܒܶܕ ܗܘܳܐ ܠܗܽܘܢ. ܗܶܢܘܢ ܕܝܢ ܗܦܰܟܘ ܘܰܡܪܰܕܘ ܘܩܰܒܶܠܘ ܡܰܠܦܳܢܽܘܬܶܗ ܕܰܒܪܳܐ ܡܰܪܳܚܳܐ. ܘܒܺܝܫܬܳܐ ܡܰܢ ܚܠܳܦ ܛܳܒܬܳܐ ܦܳܪܥܺܝܢ ܗܘܰܘ ܠܶܗ ܠܡܰܠܟܳܐ ܟܺܐܢܳܐ ܕܰܦܪܰܩ ܐܶܢܘܢ ܡܶܢ ܫܽܘܥܒܳܕܳܐ ܕܥܰܡ̈ܡܶܐ ܕܒܰܚܕܳܪ̈ܰܝܗܽܘܢ. ܘܚܰܪܰܪ ܐܶܢܘܢ ܡܶܢ ܬܚܶܝܬ ܢܺܝܪܳܐ ܕܥܰܡܡ̈ܐ ܥܽܘܪ̈ܠܶܐ. ܗܳܠܝܢ ܕܶܡܘܴ̈ܬܳܐ ܗܘ̈ܝ ܕܰܟܢܽܘܫܝܶܗ ܕܥܰܡܳܐ ܡܰܪܳܚܳܐ ܕܨܳܠܽܘ̈ܒܶܐ ܕܰܐܡܪܰܚܘ ܥܠ ܦܳܪܽܘܩܰܢ. ܟܕ ܐܶܫܬܰܐܱܠܘ ܡܶܢ ܡܰܠܟܽܘܬܳܐ ܕܰܐܠܗܳܐ ܕܶܐܬܓܰܠܝܰܬ ܥܰܠ ܐܰܪܥܳܐ ܒܙܰܒܢܳܗ̇. ܩܳܥܶܝܢ ܗܘܰܘ ܩܕܳܡ ܦܺܝܠܰܛܽܘܣ ܘܳܐܡܪܺܝܢ ܕܠܰܝܬ ܠܰܢ ܡܰܠܟܳܐ ܐܶܠܐ ܐܶܢ ܩܶܣܰܪ (ܝܘܚܢܢ ܝܛ: ܝܗ). ܘܬܘܒ ܫܳܐܠܺܝܢ ܗܘܰܘ ܚܠܳܦܰܘܗܝ ܠܒܰܪܐܰܒܰܐ ܗܰܘ ܓܰܝܳܣܳܐ ܘܩܳܛܽܘܠܳܐ. ܘܰܐܝܟ ܕܰܘܝܕ ܕܶܐܡܰܪ ܐܶܢܳܐ ܡܨܰܠܶܐ ܗܘܺܝܬ ܥܠܰܝܗܽܘܢ. ܐܦ ܦܳܪܽܘܩܰܢ ܒܰܙܩܺܝܦܳܐ ܨܰܠܝ̣ ܠܘܳܬ ܐܰܒܳܐ ܘܶܐܡܰܪ: ܕܰܫܒܽܘܩ ܠܗܽܘܢ ܠܳܐ ܓܶܝܪ ܝܳܕܥܺܝܢ ܡܳܢܳܐ ܥܳܒܕܺܝܢ (ܠܘܩܐ ܟܓ: ܠܕ). ܢܒܺܝܐ ܕܶܝܢ ܡܶܛܠ ܕܰܒܟܺܐܢܽܘܬܳܐ ܡܶܬܚܰܫܰܚ ܗܘܳܐ ܝܰܬܝ̣ܪ ܡܶܢ ܕܰܒܛܰܝܒܽܘܬܳܐ ܚܳܙܶܐ ܗܘܳܐ ܪܽܘܫܥܶܗ ܕܥܰܡܳܐ ܘܳܐܡܰܪ:
ܦܩܽܘܕ ܡܳܪܝ ܥܠܰܝܗܽܘܢ ܥܰܘܴ̇ܠܳܐ. ܘܣܳܛܳܢܳܐ ܢܩܽܘܡ ܡܶܢ ܝܰܡܺܝܢܗܽܘܢ. ܘܡܳܐ ܕܡܶܬܬܕܺܝܢܺܝܢ ܢܶܦܩܽܘܢ ܟܕ ܚܰܝܳܒܺܝܢ ܘܰܨܠܽܘܬܗܽܘܢ ܬܶܗܘܶܐ ܚܛܝ̣ܬܳܐ. ܢܶܗܘܽܘܢ ܝܰܘܡܰܝ̈ܗܽܘܢ ܙܥܽܘܪ̈ܺܝܢ. ܕܳܡܶܝܢ ܩܴ̈ܠܐ ܠܰܡܣܳܡ ܒܪܺܝܫܳܐ ܕܶܐܬܳܐ ܥܠ ܝܽܘ̈ܕܳܝܶܐ ܒܳܬܰܪ ܨܠܺܝܒܳܐ. ܬܰܡܳܢ ܓܝܪ ܒܬܰܫܢܺܝܩܳܐ. ܠܘ ܙܰܕܺܝܩܽܘܬܳܐ ܕܶܝܢ ܡܶܬܚܰܫܒܳܐ ܠܗܽܘܢ ܨܠܽܘܬܳܐ. ܬܘܒ ܕܝܢ ܡܰܝܬܶܐ ܢܒܺܝܐ ܘܳܐܡܰܪ.
ܡܶܕܶܡ ܕܡܰܛܰܪ ܠܗܽܘܢ ܐܚܪ̈ܳܢܶܐ ܢܶܣܒܽܘܢ. ܟܽܠܗܽܘܢ ܢܒܺܝ̈ܐ ܘܰܟܬܳܒ̈ܐ ܕܰܢܛܰܪܘ ܝܽܘ̈ܕܳܝܶܐ ܥܰܡܡ̈ܐ ܡܗܰܝܡ̈ܢܶܐ ܢܣܰܒܘ ܐܶܢܘܢ. ܐܰܝܟ ܗܳܝ ܕܶܐܡܰܪ ܠܗܽܘܢ ܥܰܡܰܢܘ̣ܐܝܠ ܕܬܶܫܬܩܶܠ ܡܶܢܟܽܘܢ ܡܰܠܟܽܘܬܳܐ ܕܰܐܠܗܳܐ. ܘܬܶܬܝ̣ܗܶܒ ܠܥܰܡܳܐ ܕܥܳܒܶܕ ܦܺܐܪ̈ܶܐ (ܡܬܝ ܟܐ: ܡܓ). ܘܬܘܒ ܕܝܢ ܟܕ ܡܶܬܚܰܡܰܬ ܢܒܺܝܐ ܥܠ ܡܰܪܳܚܽܘܬܳܐ ܕܺܝܠܗܽܘܢ ܐܡ̇ܪ:
ܕܢܶܗܘܽܘܢ ܒܢܰܝ̈ܗܽܘܢ ܝܰܬܡ̈ܐ ܘܢܶܫܰܝ̈ܗܽܘܢ ܐܰܪ̈ܡܠܳܬܳܐ. ܢܩܽܘܡ ܡܳܪܶܐ ܚܰܘܒܳܐ ܥܰܠ ܟܽܠ ܕܺܐܝܬ ܠܗܽܘܢ ܘܢܶܒܨܽܘܢ ܢܽܘܟܪ̈ܳܝܶܐ ܚܰܝܠܗܽܘܢ. ܘܠܳܐ ܢܶܗܘܶܐ ܠܗܽܘܢ ܡܪܰܚܡܳܢܳܐ ܘܠܳܐ ܢܶܗܘܶܐ ܕܰܡܪܰܚܶܡ ܥܰܠ ܝܰܬܡܰܝ̈ܗܽܘܢ. ܬܶܗܘܶܐ ܚܰܪܬܗܽܘܢ ܠܰܐܒܕܳܢܳܐ ܘܰܠܕܳܪܳܐ ܐܚܪܺܢܳܐ ܢܶܬܥܛܶܐ ܫܶܡܗܽܘܢ. ܢܶܬܕܟܰܪ ܥܰܘܠܳܐ ܕܰܐܒܳܗܰܝ̈ܗܽܘܢ. ܘܰܚܛܳܗ̈ܐ ܕܶܐܡܗܴ̈ܬܗܽܘܢ ܠܳܐ ܢܶܬܥܛܽܘܢ. ܐܶܠܐ ܢܶܗܘܽܘܢ ܩܕܳܡ ܡܳܪܝܳܐ ܒܟܽܠܙܒܰܢ. ܒܗܳܠܶܝܢ ܟܽܠܗܶܝܢ ܥܰܠ ܗܰܘ ܥܰܡܳܐ ܕܨܳܠܽܘ̈ܒܶܐ ܕܰܐܡܪܰܚܘ ܥܠ ܡܫܺܝܚܳܐ ܚܰܝܶܒ ܗܘܳܐ ܢܒܺܝܐ. ܟܕ ܥܳܒܶܕ ܠܗܽܘܢ ܝܰܬܡ̈ܐ ܕܠܳܐ ܐܰܒܳܐ. ܒܗܳܝ ܕܶܐܬܓܠܶܙܘ ܡܰܢ ܗܰܘ ܐܰܒܳܐ ܕܚܰܝ̈ܐ. ܘܠܐ ܨܒܰܘ ܒܝܳܪܬܶܗ ܕܰܐܒܳܐ ܕܰܢܗܰܝܡܢܽܘܢ. ܘܠܐ ܕܰܢܩܰܒܠܽܘܢ ܣܺܝܡܰܬ ܒܢܰܝܴ̈ܐ ܘܢܶܗܘܽܘܢ ܒܢܱ̈ܝ ܝܳܪܬܽܘܬܳܐ ܕܩܰܕܺܝ̈ܫܶܐ. ܘܗܳܝ ܕܬܶܗܘܶܐ ܚܰܪܬܗܽܘܢ ܠܰܐܒܕܳܢܳܐ ܘܰܠܕܳܪܳܐ ܐܚܪܺܢܳܐ ܢܶܬܥܛܶܐ ܫܶܡܗܽܘܢ. ܡܶܛܠ ܕܡܶܢ ܒܳܬܰܪ ܙܩܺܝܦܳܐ ܐܰܘܒܶܕ ܐܶܢܘܢ ܘܒܰܕܰܪ ܐܶܢܘܢ ܒܶܝܬ ܥܰܡܡ̈ܐ. ܘܰܠܚܳܐ ܡܰܠܟܳܐ ܡܫܺܝܚܳܐ ܫܡܳܐ ܕܥܰܡܳܐ ܕܝܽܘ̈ܕܳܝܶܐ ܡܶܢ ܟܬܳܒܳܐ ܕܚܰܝ̈ܐ. ܘܰܟܬܰܒ ܒܣܶܦܪܳܐ ܫܡܰܝܳܢܳܐ ܫܡܳܗ̈ܐ ܕܥܰܡܡ̈ܐ ܕܗܰܝܡܶܢܘ ܒܶܗ. ܘܰܠܗܳܠܝܢ ܕܰܗܘܰܘ ܕܰܠܩܽܘܒܠܳܐ ܡܰܘܒܶܕ ܡܶܢ ܐܰܪܥܳܐ ܕܚܰܝ̈ܐ ܕܗܳܝ ܕܰܠܥܶܠ ܡܶܢ ܫܡܰܝܳܐ. ܐܝܟ ܕܶܐܡܰܪ ܢܒܺܝܐ.
ܕܢܰܘܒܶܕ ܡܶܢ ܐܰܪܥܳܐ ܕܽܘܟܪܳܢܗܽܘܢ. ܠܘ ܡܶܢ ܗܳܕܐ ܐܰܪܥܳܐ ܕܟܽܘ̈ܒܶܐ ܘܰܕܠܰܘ̈ܛܳܬܳܐ. ܒܗܳܕܐ ܓܝܪ ܡܶܟܬܰܒ ܟܳܬܶܒ ܠܗܽܘܢ. ܐܠܐ ܡܶܢ ܗܳܝ ܐܰܪܥܳܐ ܡܰܠܝܰܬ ܛܽܘ̈ܒܶܐ ܕܺܐܝܬ ܠܥܶܠ ܡܶܢ ܫܡܰܝܳܐ ܕܝܳܪܬܺܝܢ ܠܗ̇ ܡܰܟܺܝ̈ܟܶܐ ܗܳܠܝܢ ܕܶܐܡܰܪ ܦܳܪܽܘܩܰܢ. ܡܶܛܠ ܕܠܰܐܪܥܳܐ ܛܳܒܬܳܐ ܠܳܐ ܥܳܐܠܺܝܢ ܝܳܪܬܺܝܢ ܒܺܝ̈ܫܶܐ. ܐܠܐ ܡܰܘܒܶܕ ܠܗܽܘܢ ܡܶܢܳܗ̇.
ܥܠ ܕܠܐ ܥܶܗܰܕܘ ܠܡܶܥܒܰܕ ܛܳܒܬܳܐ. ܘܰܪܕܰܦܘ ܠܡܶܣܟܺܢܳܐ ܘܰܠܒܳܝܫܳܐ ܘܠܰܕܡܰܟܰܐܒ ܠܶܒܶܗ ܠܡܰܘܬܳܐ. ܟܕ ܒܗܳܠܝܢ ܕܶܡܘܴ̈ܬܳܐ ܩܰܒܶܠ ܥܠܰܘܗܝ ܕܢܶܬܚܙܶܐ ܥܠ ܐܰܪܥܳܐ. ܗܰܘ ܥܰܬܝ̣ܪܳܐ ܕܰܫܪܳܪܳܐ ܐܶܬܡܰܣܟܰܢ. ܐܝܟ ܕܰܐܠܶܦ ܥܠܰܘܗܝ ܦܰܘܠܽܘܣ ܟܳܪܽܘܙܳܐ ܕܰܫܪܳܪܳܐ. ܝܳܕܥܺܝܬܽܘܢ ܠܰܡ ܠܛܰܝܒܽܘܬܶܗ ܕܡܳܪܰܢ ܝܶܫܘܥ ܡܫܺܝܚܳܐ ܕܡܶܛܠܳܬܟܽܘܢ ܐܶܬܡܰܣܟܰܢ ܟܰܕ ܐܝ̣ܬܰܘܗܝ ܥܰܬܝ̣ܪܳܐ (ܒ ܩܘܪ̈ܢܬܝܐ ܚ: ܛ). ܗܳܕܳܐ ܗܝ ܓܝܪ ܗܳܝ ܕܶܐܡܰܪ ܠܰܕܡܰܟܰܐܒ ܠܶܒܶܗ ܠܡܰܘܬܳܐ.
ܪܚܶܡܘ ܠܰܘ̈ܛܳܬܳܐ ܘܠܳܐ ܨܒܰܘ ܒܒܽܘܪ̈ܟܳܬܳܐ. ܠܒܰܟܘ ܠܰܘ̈ܛܳܬܳܐ ܐܝܟ ܙܰܝܢܳܐ. ܟܰܕ ܓܶܝܪ ܩܳܡܘ ܥܠ ܛܽܘܪܳܐ ܗܳܢܘܢ ܕܠܳܝܛܺܝܢ ܗܘܰܘ ܟܽܠ ܕܠܐ ܢܳܛܰܪ ܟܽܠ ܕܰܟܬܺܝܒ ܒܢܳܡܽܘܣܳܐ ܕܡܳܪܝܳܐ. ܡܶܢ ܒܢܴ̈ܬ ܩܳܠܰܝ̈ܗܽܘܢ ܫܡܰܥ ܗܘܳܐ ܥܰܡܳܐ ܕܠܺܝܛ ܗܽܘ ܟܽܠ ܕܰܡܨܰܚܶܐ ܠܰܐܒܽܘܗܝ ܘܠܶܐܡܶܗ. ܘܢܺܐܡܰܪ ܟܽܠܶܗ ܥܰܡܳܐ ܐܰܡܺܝܢ. ܐܰܒܳܐ ܕܶܝܢ ܕܟܽܠ ܐܰܠܗܰܐ ܗܘ. ܘܶܐܡܳܐ ܕܰܐܘܠܕܰܬ ܚܰܝ̈ܐ ܡܰܥܡܽܘܕܺܝܬܳܐ. ܥܰܡܳܐ ܕܶܝܢ ܒܗܳܝ ܕܰܐܡܪܰܚܘ ܥܰܠ ܒܪܳܐ ܘܨܰܠܒܽܘܗܝ ܘܨܰܚܺܝܘ ܠܗܰܘ ܕܶܐܬܳܐ ܕܢܶܗܘܶܐ ܐܰܒܳܐ ܠܥܳܠܡܳܐ ܕܰܥܬܝ̣ܕ. ܘܨܰܥܰܪܘ ܠܡܰܥܡܽܘܕܺܝܬܳܐ ܐܶܡܳܐ ܕܚܰܝ̈ܐ. ܟܺܐܢܳܐܝ̣ܬ ܢܓܰܕ ܢܒܺܝܐ ܒܳܬܰܪܗܽܘܢ ܠܠܰܘ̈ܛܳܬܳܐ ܐܰܝܟ ܕܰܪܚܶܡܘ. ܡܶܛܠܗܳܢܐ ܐܡ̣ܪ:
ܕܥܰܠܘ ܒܗܽܘܢ ܐܝܟ ܡܶܫܚܳܐ. ܗܳܟܰܢܐ ܐܝ̣ܬܰܘܗܝ ܡܣܳܡ ܒܪܺܝܫܳܐ ܕܡܰܪ̈ܳܚܶܐ. ܘܠܰܘ ܠܒܰܪ ܡܶܢܗܽܘܢ ܗܘܳܐ ܕܺܝܢܳܐ. ܡܶܛܠ ܕܒܰܩܢܽܘܡܶܗ ܡܶܬܚܰܠܛܳܐ ܢܽܘܪܳܐ ܕܬܰܫܢܺܝܩܳܐ. ܘܡܶܬܡܰܙܓܳܐ ܒܗܽܘܢ.
ܘܬܶܗܘܶܐ ܠܗܽܘܢ ܐܝܟ ܡܰܪܛܽܘܛܳܐ ܕܡܶܬܟܰܣܶܝܢ. ܘܰܐܝܟ ܐܶܣܳܪ ܚܰܨ̈ܐ ܒܟܽܠܙܒܰܢ. ܒܗܳܠܶܝܢ ܡܰܠܶܦ ܥܠ ܢܰܩܺܝܦܽܘܬܳܐ ܘܩܰܪܺܝܒܽܘܬܳܐ ܕܢܽܘܪܳܐ ܗܳܝ ܕܰܠܥܳܠܰܡ. ܕܰܐܝܟ ܕܩܰܪܺܝܒ ܡܰܪܛܽܘܛܳܐ ܠܰܩܢܽܘܡܶܗ ܕܗܰܘ ܕܰܡܟܰܣܰܝ ܒܶܗ. ܘܰܐܝܟ ܕܢܰܩܝ̣ܦ ܐܶܣܳܪ ܚܰܨ̈ܐ ܠܰܠܒܽܘܫܳܐ. ܝ̣ܕܺܝܥܳܐ ܡܶܢ ܗܳܝ ܕܶܐܡܰܪ ܢܒܺܝܐ.
ܗܳܢܰܘ ܥܒܳܕܳܐ ܕܰܐܝܠܶܝܢ ܕܣܳܩܪܺܝܢ ܠܡܳܪܝܳܐ. ܘܕܰܐܝܠܶܝܢ ܕܰܡܡܰܠܠܺܝܢ ܒܺܝܫܬܳܐ ܥܠ ܢܰܦܫܝ. ܡܶܛܠ ܗܳܢܐ ܡܨܰܠܶܐ ܗܘܳܐ ܢܒܺܝܐ ܕܡܶܢ ܡܳܪܝܳܐ ܢܶܗܘܶܐ ܣܽܘܝܳܥܶܗ ܟܰܕ ܐܡ̇ܪ:
ܐܰܢܬ ܡܳܪܝܳܐ ܥܒܶܕ ܥܰܡܝ ܡܶܛܠ ܫܡܳܟ. ܡܶܛܠ ܕܛܳܒܳܐ ܗܝ ܛܰܝܒܽܘܬܳܟ ܦܰܨܳܢܝ. ܡܶܛܠ ܕܡܶܣܟܺܢܳܐ ܐܢܳܐ ܘܒܳܝܫܳܐ. ܕܠܳܐ ܚܶܪܝܳܢܳܐ ܐܰܠܶܦ. ܕܡܶܢ ܚܰܝ̈ܠܰܘܳܬܳܐ ܕܕܰܠܩܽܘܒܠܳܐ ܐܝ̣ܬ ܗܘܳܐ ܓܶܝܪ ܥܰܡܶܗ ܐܰܓܽܘܢܳܐ ܒܗܳܝ ܕܠܐ ܗܘܳܐ ܕܠܝ̣ܠܳܐܝ̣ܬ ܕܳܚܶܠ ܡܶܢ ܩܪܳܒܳܐ ܗܰܘ ܡܶܬܚܰܙܝܳܢܳܐ ܐܝܟ ܕܡܶܢ ܩܪܳܒܳܐ ܡܶܬܝܰܕܥܳܢܳܐ. ܘܥܰܠܗܳܝ ܐܡ̇ܪ ܗܘܳܐ:
ܠܶܒܝ ܐܶܬܕܰܠܰܚ ܒܓܰܘܝ. ܘܰܐܝܟ ܛܶܠܳܠܳܐ ܐܶܬܪܟܶܢܘ ܗܰܠܟܴ̈ܬܝ. ܣܰܓܺܝ ܓܶܝܪ ܡܶܬܕܰܠܰܚ ܘܡܶܫܬܓܶܫ ܠܶܒܳܐ. ܡܳܐ ܕܡܰܪܓܫܳܐ ܢܰܦܫܳܐ ܕܳܐܚܕܺܝܢ ܥܰܡܳܗ̇ ܩܪܳܒܳܐ. ܟܕ ܡܕܰܡܝܳܐ ܠܛܷ̈ܠܳܠܶܐ ܗܰܠܟܴ̈ܬܳܗ̇. ܘܣܳܒܪܳܐ ܕܠܘ ܒܢܽܘܗܪܳܐ ܩܳܝܡܳܐ. ܐܶܠܐ ܚܙܺܝ ܡܳܢܳܐ ܐܡ̇ܪ ܢܒܺܝܐ.
ܘܶܐܬܢܰܦܨܶܬ ܐܰܝܟ ܩܰܡܨܳܐ. ܘܒܽܘܪ̈ܟܰܝ ܐܶܬܟܪܰܗܝ ܡܶܢ ܨܰܘܡܳܐ. ܘܒܶܣܪܝ ܢܚܶܒ ܡܶܢ ܡܶܫܚܳܐ. ܗܳܠܝܢ ܠܘ ܒܰܢܒܺܝܐ ܐܳܬܝܴ̈ܢ ܠܦܽܘܫܳܩܳܐ. ܐܶܠܐ ܒܗܰܘ ܥܰܡܳܐ ܢܣܰܒܘ ܫܽܘܠܳܡܳܐ. ܐܰܟܙܢܳܐ ܓܝܪ ܕܩܰܡܨܳܐ ܡܢܰܦܶܨ ܘܛܳܡܰܪ ܒܢܰܘ̈ܗܝ ܒܓܰܘ ܥܰܦܪܳܐ. ܘܡܳܐ ܕܡܶܬܝܰܠܕܺܝܢ ܒܢܰܝܴ̈ܐ ܕܝ̣ܠܶܗ ܠܐ ܚܳܙܶܐ. ܗܳܟܰܢܳܐ ܐܳܦ ܥܰܡܳܐ ܕܝܽܘ̈ܕܳܝܶܐ ܐܶܬܢܰܦܰܨ ܡܶܢ ܐܪ̈ܳܙܶܐ ܩܰܕܺܝ̈ܫܶܐ ܒܝܰܕ ܨܠܺܝܒܳܐ ܘܰܢܚܶܒ ܒܶܣܪܶܗ ܡܶܢ ܡܶܫܚܳܐ. ܡܶܛܠ ܕܶܐܫܬܰܩܠܰܬ ܡܶܢܶܗ ܩܰܪܢܳܐ ܕܡܶܫܚܳܐ ܩܰܕܺܝܫܳܐ. ܗܳܝ ܕܡܰܕܗܢܳܐ ܗܘܳܬ. ܟܕ ܡܶܫܚܳܐ ܡܰܠܟ̈ܐ ܘܟܳܗܢ̈ܐ ܘܰܢܒܺܝ̈ܐ ܘܟܽܘܡܪ̈ܶܐ ܡܩܺܝܡܳܐ ܒܶܗ. ܘܗܳܠܝܢ ܥܠ ܕܰܗܘܳܐ ܠܗܽܘܢ ܓܶܠܝܳܢܶܗ ܕܰܒܪܳܐ ܠܚܶܣܕܳܐ. ܐܡ̇ܪ ܢܒܺܝܐ ܚܠܳܦ ܥܰܡܰܢܽܘܐܝܠ.
ܘܶܐܢܳܐ ܗܘܺܝܬ ܠܗܽܘܢ ܠܚܶܣܕܳܐ. ܚܙܰܐܘܽܢܝ ܘܰܐܢܺܝܕ ܒܪ̈ܺܝܫܰܝܗܽܘܢ. ܕܶܐܢ ܗܘ̈ܝ ܗܳܠܝܢ ܠܕܰܘܝܕ ܟܕ ܡܪܰܕ ܥܠܰܘܗܝ ܐܰܒܺܝܫܳܠܽܘܡ. ܠܰܝܬ ܠܢ ܠܡܶܕܰܥ ܟܬܳܒܳܐ ܓܝܪ ܠܐ ܐܡ̣ܪ ܗܳܠܝܢ. ܠܐ ܕܝܢ ܐܡ̇ܪ ܗܘܳܐ ܢܒܺܝܐ ܕܰܗ̈ܘܰܝ ܐܶܠܽܘܠܐ ܐܶܣܬܥܰܪ̈ܝ. ܒܪܰܡ ܕܶܝܢ ܠܘܬ ܥܰܡܰܢܘ̣ܐܝܠ ܒܰܫܪܳܪܳܐ ܗܘ̈ܝ. ܐܝܟ ܕܶܐܡܰܪ ܐܶܘܰܢܓܶܠܝ̣ܣܛܳܐ: ܕܰܐܝܠܶܝܢ ܕܥܳܒܪܺܝܢ ܗܘܰܘ ܡܓܰܕܦܺܝܢ ܗܘܰܘ ܥܠܰܘܗܝ. ܘܰܡܢܺܝܕܺܝܢ ܪ̈ܺܝܫܰܝܗܽܘܢ ܘܳܐܡܪܺܝܢ܆ ܣܳܬܰܪ ܗܰܝܟܠܳܐ ܗܳܢܐ ܘܒܳܢܶܐ ܠܶܗ ܠܰܬܠܳܬܳܐ ܝܰܘ̈ܡܺܝܢ ܦܰܨܳܐ ܢܰܦܫܳܟ ܘܚܽܘܬ ܡܶܢ ܙܩܺܝܦܳܐ. ܘܪ̈ܰܒܰܝ ܟܳܗܢ̈ܐ ܬܘܒ ܡܚܰܣܕܺܝܢ ܗܘܰܘ ܥܰܡ ܩܰܫܺܝ̈ܫܶܐ ܘܣܳܦܪ̈ܶܐ (ܡܬܝ ܟܙ: ܠܛ-ܡܐ). ܒܳܬܰܪ ܗܳܠܝܢ ܡܰܝܬܶܐ ܘܳܐܡܰܪ ܢܒܺܝܐ:
ܥܰܕܰܪܰܝܢܝ ܡܳܪܝܳܐ ܐܰܠܗܳܐ ܘܰܦܪܽܘܩܰܝܢܝ ܐܰܝܟ ܛܰܝܒܽܘܬܳܟ. ܐܝܟ ܕܶܐܡܰܪ ܦܳܪܽܘܩܰܢ ܕܳܐܒܝ ܐܶܢ ܡܶܫܟܚܳܐ ܢܶܥܒܪܰܢܝ ܟܳܣܳܐ ܗܳܢܐ (ܡܬܝ ܟܘ: ܠܛ).
ܕܢܶܕܥܽܘܢ ܠܰܡ ܕܕܺܝܠܳܟ ܗܺܝ ܗܳܕܐ ܘܰܐܢܬ ܥܒܰܕܬܳܗ̇. ܐܶܬܝܰܕܥܰܬ ܓܝܪ ܡܕܰܒܪܳܢܽܘܬܶܗ ܕܰܨܠܺܝܒܳܐ ܕܚܽܘܒܶܗ ܕܰܐܒܳܐ ܥܰܬܕܶܗ ܡܶܛܠ ܚܰܝ̈ܐ ܕܟܽܠܶܗ. ܘܥܰܠ ܐܰܝܠܝܢ ܕܠܐ ܩܰܒܠܽܘܗ̇ ܡܬܰܚܰܡ ܠܰܘܛܬܳܐ ܪܽܘܚܳܐ ܘܳܐܡܰܪ:
ܢܶܬܬܠܺܝܛܽܘܢ ܗܶܢܽܘܢ. ܡܶܛܠ ܕܠܳܐ ܨܒܰܘ ܢܶܬܒܰܪܟܽܘܢ ܒܰܨܠܺܝܒܳܐ.
ܐܰܢܬ ܬܶܬܒܰܪܰܟ ܘܥܰܒܕܳܟ ܢܶܚܕܶܐ. ܥܰܒܕܳܐ ܩܳܪܶܐ ܠܶܗ ܠܗܰܘ ܒܰܪ ܚܺܐܪ̈ܶܐ ܕܣܰܝܒܰܪ ܒܰܨܠܺܝܒܳܐ. ܡܶܛܠ ܕܰܨܒܳܐ ܕܢܶܗܘܶܐ ܥܰܒܕܳܐ ܠܣܰܓܺܝ̈ܐܐ ܒܬܶܫܡܶܫܬܳܐ ܕܩܶܛܠܶܗ. ܐܳܦ ܓܝܪ ܐܶܫܰܥܝܳܐ ܢܒܺܝܐ ܟܕ ܩܰܕܶܡ ܗܘܳܐ ܐܰܪܓܶܫ ܒܶܗ ܕܰܕܡܽܘܬܳܐ ܕܥܰܒܕܳܐ ܢܣܰܒ ܡܳܐ ܕܶܐܬܳܐ ܠܰܐܪܥܳܐ. ܒܥܰܝܢܳܐ ܕܪܽܘܚܳܐ ܚܳܐܱܪ ܗܘܳܐ ܘܥܰܠܗܳܝ ܐܡ̣ܪ: ܕܗܐ ܥܰܒܕܝ ܕܶܐܨܛܒܺܝܬ ܒܶܗ ܘܚܰܒܺܝܒܝ ܕܣܶܘܚܰܬ ܒܶܗ ܢܰܦܫܝ (ܐܫܥܝܐ ܡܒ: ܐ). ܘܡܶܢ ܕܰܩܪܳܝܗܝ ܥܰܒܕܳܐ. ܥܠ ܕܰܗܘܳܐ ܒܰܪܢܳܫܳܐ ܐܰܠܘܶܬ ܠܰܫܡܳܐ ܕܥܰܒܕܳܐ ܟܽܘܢܳܝܳܐ ܕܰܒܪܳܐ ܚܰܒܺܝܒܳܐ ܓܝܪ ܠܘ ܠܥܰܒܕܳܐ ܠܳܚܶܡ. ܐܠܐ ܠܰܒܪܳܐ ܚܰܒܺܝܒܳܐ ܘܰܟܝܳܢܳܝܳܐ. ܗܰܘ ܕܡܰܠܒܶܫ ܒܶܗܬܬܳܐ ܠܰܐܝܠܶܝܢ ܕܰܐܡܪܰܚܘ ܥܠܰܘܗܝ. ܘܫܽܘܒܚܳܐ ܠܰܐܝܠܶܝܢ ܕܩܰܒܠܽܘܗܝ.
ܢܶܠܒܫܽܘܢ ܠܰܡ ܒܶܗܬܬܳܐ ܐܰܝܠܶܝܢ ܕܣܳܩܪܺܝܢ ܗܘܰܘ ܠܝ̣ ܘܢܶܬܥܰܛܦܽܘܢܳܗ̇ ܐܝܟ ܦܪܺܝܣܳܐ. ܕܰܐܝܟ ܗܳܢܐ ܦܽܘܪܥܳܢܳܐ ܢܛܝ̣ܪ ܡܶܢ ܟܺܐܢܽܘܬܳܐ ܠܡܰܪ̈ܳܚܶܐ. ܘܠܰܐܝܠܶܝܢ ܕܣܰܩܪܽܘܗܝ ܠܰܒܪܳܐ. ܩܰܕܺܝ̈ܫܶܐ ܕܶܝܢ ܥܰܡ ܢܒܺܝܐ ܕܰܘܝܕ ܐܝܟ ܕܡܶܢ ܚܰܕ ܦܽܘܡܳܐ ܡܰܘܕܶܝܢ ܘܳܐܡܪܺܝܢ:
ܐܰܘܕܶܐ ܠܡܳܪܝܳܐ ܒܦܽܘܡܝ ܘܒܰܝܢܳܬ ܣܰܓܺܝ̈ܐܐ ܐܶܫܰܒܚܝ̣ܘܗܝ. ܡܶܛܠ ܕܩܳܡ ܡܶܢ ܝܰܡܺܝܢܶܗ ܕܒܳܝܫܳܐ. ܠܡܶܦܪܰܩ ܢܰܦܫܶܗ ܡܶܢ ܕܺܝܢܳܐ. ܗܳܕܳܐ ܗܝ ܬܰܘܕܺܝܬܶܗ ܕܥܰܡܳܐ ܗܳܢܐ ܕܙܰܕܺܝ̈ܩܶܐ ܡܳܐ ܕܚܳܙܶܝܢ ܠܡܳܪܝܳܐ ܕܩܳܐܷܡ ܡܶܢ ܝܰܡܺܝܢܳܐ. ܘܰܠܗܽܘܢ ܣܳܐܷܡ ܐܝܟ ܥܶܪ̈ܒܶܐ ܒܝܰܡܺܝܢܶܗ. ܘܦܳܪܶܩ ܠܗܽܘܢ ܡܶܢ ܕܝ̣ܢܳܐ ܘܡ̣ܢ ܫܽܘܢܳܩܳܐ ܘܡܰܘܕܶܝܢ ܘܰܡܫܰܒܚܺܝܢ ܠܶܗ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܐ
ܡܰܘܕܰܥ ܥܰܠ ܡܰܘܬܒܶܗ ܫܒܺܝܚܳܐ ܕܰܒܪܳܐ ܕܡܶܢ ܝܰܡܺܝܢܶܗ ܕܰܐܒܳܐ. ܘܥܰܠ ܪܰܒܽܘܬ ܟܽܘܡܪܽܘܬܳܐ ܕܡܶܢ ܥܳܠܰܡ. ܘܥܰܠܗܳܝ ܕܡܶܢ ܩܕܺܝܡ ܝܰܠܕܶܗ ܐܰܒܳܐ. ܘܥܰܠ ܕܡܶܢ ܢܰܚܠܳܐ ܕܡܳܝܽܘ̈ܬܶܐ ܐܶܫܬܺܝ ܟܳܣܶܗ ܕܡܰܘܬܳܐ.
ܡܳܪܰܢ ܘܦܳܪܽܘܩܰܢ ܝܶܫܘ̇ܥ ܡܫܺܝܚܳܐ ܟܰܕ ܨܒܳܐ ܕܢܶܬܚܙܶܐ ܥܠ ܐܰܪܥܳܐ ܒܰܒܣܰܪ܆ ܡܶܢ ܕܰܩܪܶܒ ܙܰܒܢܳܐ ܕܫܽܘܠܳܡ ܐܽܘܪܚܳܐ ܕܰܡܕܰܒܪܳܢܽܘܬܶܗ ܡܫܰܐܷܠ ܗܘܳܐ ܒܚܰܕ ܡܶܢ ܝܰܘ̈ܡܳܬܳܐ ܠܟܳܗܢ̈ܐ ܘܣܳܦܪ̈ܶܐ ܕܝܽܘܕܳܝ̈ܐ ܗܳܢܘܢ ܕܡܶܣܬܰܒܪܺܝܢ ܗܘܰܘ ܕܝܰܬܝ̣ܪܳܐ ܝܳܕܥܺܝܢ ܢܳܡܽܘܣܳܐ ܘܳܐܡܰܪ: ܡܳܢܳܐ ܐܳܡܪܝ̣ܬܽܘܢ ܥܰܠ ܡܫܺܝܚܳܐ ܒܰܪ ܡܰܢܽܘ. ܐܳܡܪܺܝܢ ܠܶܗ ܒܰܪ ܕܰܘܝܕ. ܘܳܐܡܰܪ ܠܗܽܘܢ ܘܰܐܝܟܰܢܳܐ ܕܰܘܝܕ ܒܪܽܘܚܳܐ ܩܳܪܶܐ ܠܶܗ ܡܳܪܝܳܐ. ܐܡ̣ܪ ܓܶܝܪ ܕܶܐܡܰܪ ܡܳܪܝܳܐ ܠܡܳܪܝ ܕܬܶܒ ܠܳܟ ܡܶܢ ܝܰܡܺܝܢܝ ܥܕܰܡܳܐ ܕܶܐܣܺܝܡ ܒܥܶܠܕ̈ܒܳܒܰܝܟ ܟܽܘܒܫܳܐ ܠܪ̈ܶܓܠܰܝܟ. ܐܶܢ ܗܳܟܺܝܠ ܕܰܘܝܕ ܡܳܪܝܳܐ ܩܳܪܶܐ ܠܶܗ܆ ܘܰܐܝܟܰܢܳܐ ܒܪܶܗ ܗܘ (ܡܬܝ ܟܒ: ܡܒ-ܡܗ ܡܪܩܘܣ ܝܒ: ܠܗ-ܠܙ ܠܘܩܐ ܟ: ܡܐ-ܡܕ). ܒܗܳܠܶܝܢ ܕܶܐܡܰܪ ܥܰܡܰܢܘ̣ܐܝܠ ܡܶܛܠ ܡܰܙܡܽܘܪܳܐ ܗܳܢܐ ܐܰܣܗܶܕ ܥܠ ܕܰܘܝܕ ܕܟܽܠܗܽܘܢ ܡܰܙܡܽܘܪ̈ܶܐ ܒܪܽܘܚܳܐ ܕܩܽܘܕܫܳܐ ܐܡ̣ܪ ܐܶܢܘܢ. ܘܰܕܠܘ ܒܗܳܝ ܒܰܪܬ ܩܳܠܳܐ ܕܡܶܫܬܰܡܥܺܝܢ ܢܩܰܒܶܠ ܐܶܢܘܢ. ܐܠܐ ܟܕ ܡܥܰܩܒܺܝܢܰܢ ܚܰܝܠܳܐ ܕܪܽܘܚܳܐ ܩܰܕܺܝܫܳܐ ܕܰܡܟܰܣܰܝ ܒܗܽܘܢ. ܘܟܕ ܫܳܡܥܺܝܢܰܢ ܕܳܐܡܰܪ ܡܙܰܡܪܳܢܳܐ ܒܡܶܢܝܳܢܳܐ ܗܳܢܐ ܕܰܡܳܐܐ ܘܥܶܣܪܳܐ.
ܕܶܐܡܰܪ ܡܳܪܝܳܐ ܠܡܳܪܝ ܕܬܶܒ ܠܳܟ ܡܶܢ ܝܰܡܺܝܢܝ. ܥܕܰܡܳܐ ܕܶܐܣܺܝܡ ܒܥܶܠܕ̈ܒܳܒܰܝܟ ܟܽܘܒܫܳܐ ܠܪ̈ܶܓܠܰܝܟ. ܢܶܒܥܶܐ ܕܰܐܝܕܳܐ ܥܶܠܬܳܐ ܕܶܐܡܰܪ ܠܶܗ ܕܺܝܬܶܒ. ܠܗܰܘ ܕܰܒܟܠܙܒܰܢ ܥܠ ܡܰܘܬܒܳܐ ܕܰܐܒܳܐ ܒܫܽܘܒܚܳܐ ܐܝ̣ܬܰܘܗܝ ܘܡܶܛܠܡܳܢܳܐ ܐܡ̣ܪ ܠܗ ܝܳܬܶܒ. ܐܰܪܰܐ ܐܝܟ ܐܰܝܢܳܐ ܕܠܐ ܡܶܡܬܽܘܡ ܝ̣ܬܶܒ ܥܰܠ ܝܰܡܺܝܢܳܐ. ܐܰܘ ܐܝܟ ܕܰܠܘܳܬ ܗܰܘ ܕܩܳܡ ܘܰܢܚܶܬ ܘܰܥܛܰܦ ܘܺܝܬܶܒ. ܠܘ ܡܶܛܠ ܗܳܝ ܩܰܕܡܳܝܬܳܐ. ܐܶܠܐ ܡܶܛܠ ܗܳܕܐ ܕܬܰܪܬܶܝܢ. ܡܶܛܠ ܕܰܢܚܶܬ ܡܶܢ ܫܡܰܝܳܐ ܐܳܦ ܕܰܣܠܶܩ ܡܶܬܶܐܡܰܪ. ܐܦ ܕܝܳܬܶܒ ܡܶܢ ܝܰܡܺܝܢܳܐ ܥܠ ܟܽܘܪܣܝܳܐ ܕܡܰܠܟܽܘܬܳܐ ܫܡܰܥ ܗܘܳܐ ܡܶܢ ܐܰܒܳܐ. ܗܳܝܕܶܝܢ ܕܶܐܡܰܪ ܕܰܥܕܰܡܳܐ ܕܶܐܣܺܝܡ ܒܥܶܠܕ̈ܒܳܒܰܝܟ ܟܽܘܒܫܳܐ ܠܪ̈ܶܓܠܰܝܟ. ܥܕܰܡܳܐ ܕܣܳܐܷܡ ܐܰܒܳܐ ܬܚܶܝܬ ܪ̈ܶܓܠܰܘܗܝ ܠܨܳܠܽܘ̈ܒܶܐ ܒܥܶܠܕ̈ܒܳܒܰܘܗܝ. ܘܠܶܐܪ̈ܺܝܛܺܝܩܽܘ ܕܒܰܨܰܪܘ ܫܽܘܒܚܶܗ ܘܰܐܙܥܪܽܘܗܝ ܡ̣ܢ ܐܰܒܳܐ. ܒܳܬܰܪ ܗܳܕܐ ܡܩܺܝܡ ܘܩܳܐܷܡ ܡ̣ܢ ܡܰܘܬܒܳܐ ܗܰܘ ܡܫܰܒܚܳܐ. ܐܠܐ ܗܳܕܐ ܕܰܥܕܰܡܳܐ ܐܝܟ ܡܶܕܶܡ ܕܠܐ ܫܳܩܶܠ ܫܽܘܠܳܡܳܐ ܐܰܡܪܳܗ̇ ܪܽܘܚܳܐ. ܗܳܝܕܝܢ ܡܳܐ ܕܚܳܙܶܝܢ ܠܗ ܒܥܶܠܕ̈ܒܳܒܰܘܗܝ ܥܠ ܝܰܡܺܝܢܳܐ ܕܰܐܒܳܐ. ܠܰܝܬ ܕܡܰܡܪܰܚ ܕܢܳܣܶܒ ܥܠܰܘܗܝ ܚܽܘܫܳܒܳܐ. ܐܠܐ ܟܠ ܒܪܽܘܟ ܟܳܦܳܐ ܘܣܳܓܕܳܐ ܐܝܟ ܕܰܠܡܰܠܟܳܐ ܘܠܰܐܠܗܳܐ ܘܟܽܠ ܠܶܫܳܢ ܡܰܘܕܶܐ ܕܡܳܪܝܰܐ ܗܘ ܝܶܫܽܘܥ ܡܫܺܝܚܳܐ. ܘܡܶܟܝ̣ܠ ܒܳܛܠܳܐ ܠܗ̇ ܬܰܪܥܺܝܬܳܐ ܕܒܳܨܽܘ̈ܝܶܐ ܘܕܰܡܥܰܩ̈ܒܳܢܶܐ. ܠܰܝܬ ܕܚܳܠܶܛ ܥܠ ܐܰܪܺܝܰܢܳܐ ܘܩܳܪܶܐ ܠܗ ܒܪܺܝܬܳܐ. ܘܠܐ ܕܡܰܪܫܰܥ ܥܡ ܢܶܣܛܽܘܪܺܝܳܘܣ ܘܚܳܫܶܒ ܠܶܗ ܒܰܪܢܳܫܳܐ ܫܚܝ̣ܡܳܐ. ܘܠܐ ܠܰܬܪܶܝܢ ܦܽܘ̈ܠܓܶܐ ܘܰܟܝܳܢ̈ܐ ܐܝܟ ܬܰܠܡܺܝ̈ܕܰܘܗܝ ܕܦܰܘܠܶܐ ܫܡܺܝܫܛܳܝܳܐ. ܚܙܰܝܢ ܓܝܪ ܗܳܝܕܝܢ܆ ܕܗܰܘ ܕܰܢܚܶܬ ܠܒܶܫ ܒܶܣܪܳܐ. ܟܽܠܶܗ ܡܶܣܬܓܶܕ ܥܡ ܒܶܣܪܳܐ. ܘܠܐ ܡܚܰܘܶܐ ܒܶܣܪܳܐ ܥܠ ܟܽܘܪܣܝܳܐ ܟܕ ܦܪܝ̣ܫ ܘܪܰܚܝ̣ܩ ܡܶܢܶܗ. ܐܠܐ ܥܰܡܶܗ ܥܡ ܒܽܘܟܪܳܐ ܐܳܬܶܐ ܐܝܟ ܕܶܐܡܰܪܘ ܡܰܠܰܐܟ̈ܐ ܠܬܰܠܡܺܝ̈ܕܶܐ ܕܚܳܝܪܺܝܢ ܗܘܰܘ ܒܶܗ ܣܳܠܶܩ ܠܰܫܡܰܝܳܐ ܒܒܶܣܪܳܐ ܗܰܘ ܕܰܠܒܰܫ. ܕܓܰܒܪ̈ܶܐ ܓܠܺܝܠܳܝ̈ܐ ܡܳܢܳܐ ܩܳܝܡܺܝܢ ܐܢܬܽܘܢ ܘܚܳܝܪܺܝܢ ܒܰܫܡܰܝܳܐ. ܕܗܳܢܐ ܝܶܫܘ̇ܥ ܕܶܐܣܬܰܠܰܩ ܡܶܢܟܽܘܢ ܠܰܫܡܰܝܳܐ ܗܳܟܰܢܳܐ ܢܺܐܬܶܐ ܐܰܝܟ ܡܳܐ ܕܰܚܙܰܝܬܽܘܢܳܝܗܝ ܕܰܣܠܶܩ ܠܰܫܡܰܝܳܐ (ܦܪܟܣܝܣ ܐ: ܝܐ). ܠܘ ܕܠܳܐ ܦܰܓܪܳܐ ܐܳܬܶܐ. ܐܠܐ ܒܦܰܓܪܳܐ ܡܶܬܚܙܶܐ ܥܠ ܡܰܘܬܒܳܐ ܕܰܟܪ̈ܽܘܒܶܐ ܕܰܝܳܢܳܐ. ܐܰܝܟܰܢܳܐ ܕܒܶܗ ܐܶܬܚܙܺܝ ܥܠ ܐܰܪܥܳܐ ܘܣܰܝܒܰܪ ܨܠܺܝܒܳܐ. ܗܳܟܰܢܐ ܡܶܬܚܙܶܐ ܕܰܝܳܢܳܐ ܕܚܰܝ̈ܐ ܐܳܦ ܕܡܺܝ̈ܬܶܐ. ܒܗܳܢܐ ܒܶܣܪܳܐ ܕܰܣܒܰܠ ܒܶܗ ܘܣܰܝܒܰܪ ܒܶܗ ܨܰܥܪܳܐ. ܡܶܛܠܗܳܢܐ ܓܝܪ ܠܒܶܫ ܦܰܓܪܳܐ. ܕܢܶܬܦܰܫܰܩ ܠܗ ܕܢܶܗܘܶܐ ܕܰܝ̇ܢܐ ܠܚܰܪܬܳܐ. ܐܶܢܓܝܪ ܒܝܰܕ ܡܽܘܫܶܐ ܐܰܦܶܩ ܠܺܝܣܪܳܐܝܠ ܡ̣ܢ ܡܶܨܪܶܝܢ. ܘܰܦܪܰܩ ܐܶܢܘܢ ܡ̣ܢ ܟܽܘܪܳܐ ܕܦܰܪܙܠܳܐ. ܡܳܕܝܢ ܡܶܛܠ ܕܰܗܘܳܐ ܒܰܪܢܳܫܳܐ ܟܕ ܐܝ̣ܬܰܘܗܝ ܐܰܠܗܐ. ܡܶܬܶܐܡܰܪ ܠܘܳܬܶܗ ܡ̣ܢ ܐܰܒܳܐ:
ܕܬܶܒ ܠܳܟ ܡܶܢ ܝܰܡܺܝܢܝ ܥܕܰܡܳܐ ܕܶܐܣܺܝܡ ܒܥܶܠܕ̈ܒܳܒܰܝܟ ܬܚܶܝܬ ܪ̈ܶܓܠܰܝܟ. ܠܘܳܬ ܙܰܒܢܳܐ ܕܕܺܝܢܳܐ ܐܝ̣ܬ ܠܗ̇ ܕܬܶܬܡܰܠܰܠ ܡܳܕܝܢ ܟܽܠܗ ܝܰܡܺܝܢܰܐ ܗܘ ܐܦ ܟܽܠܗ ܚܰܝܱ̈ܐ ܗܘ. ܘܟܽܠܶܗ ܢܽܘܗܪܰܐ ܗܘ. ܘܰܐܟܙܢܳܐ ܕܰܒܓܺܝܓܠܳܐ ܕܫܶܡܫܳܐ ܠܰܝܬ ܝܰܡܺܝܢܳܐ ܘܣܶܡܳܠܳܐ. ܡܶܛܠ ܕܰܒܚܽܘܕܪܳܐ ܕܢܽܘܗܪܳܐ ܚܰܕ ܡܶܕܶܡ ܐܝ̣ܬܶܝܗ̇. ܗܳܟܰܢܐ ܐܦ ܗܰܘ ܟܝܳܢܳܐ ܦܫܺܝܛܳܐ ܘܰܡܠܶܐ ܛܽܘ̈ܒܶܐ ܠܚܽܘܕܳܝܳܐ ܐܝ̣ܬܰܘܗܝ ܒܝܳܬܶܗ. ܘܰܡܥܰܠܰܝ ܡܶܢ ܫܽܘܘ̈ܕܳܥܶܐ ܕܡܶܕܶܡ ܡܶܕܶܡ. ܘܗܳܝ ܕܶܐܡܰܪ ܐܰܒܳܐ ܠܘܬ ܒܪܳܐ ܕܬܶܒ ܠܟ ܡ̣ܢ ܝܰܡܝ̣ܢܝ. ܕܬܶܒ ܠܟ ܡ̣ܢ ܝܰܡܝ̣ܢܝ܆ ܠܘ ܒܰܟܝܳܢܶܗ ܚܳܐܱܪ ܗܘܳܐ ܢܒܺܝܐ ܟܕ ܐܶܬܢܰܒܺܝ ܗܳܠܝܢ. ܐܠܐ ܒܰܡܕܰܒܪܳܢܽܘܬܶܗ ܡܶܬܒܰܩܶܐ ܗܘܳܐ. ܘܡܶܛܠ ܕܺܝܢܳܐ ܐܚܪܳܝܳܐ ܐܰܡܝ̣ܪܳܐ ܢܒܺܝܽܘܬܳܐ ܗܳܕܐ. ܥܠ ܕܰܢܒܰܕܶܩ ܒܝܰܕ ܝܰܡܺܝܢܳܐ ܐܳܦ ܡܰܘܬܒܳܐ ܕܕܰܝܳܢܳܐ. ܘܡܶܛܠ ܗܳܢܐ ܐܡ̣ܪ ܡܳܪܢ. ܕܰܐܒܳܐ ܠܐܢܳܫ ܠܳܐ ܕܳܐܶܢ. ܐܶܠܐ ܟܽܠܶܗ ܕܝ̣ܢܳܐ ܝܰܗܒܶܗ ܠܰܒܪܳܐ (ܝܘܚܢܢ ܗ: ܟܒ). ܡܶܛܠ ܕܶܐܬܚܙܺܝ ܒܰܙܥܽܘܪܽܘܬܳܐ ܟܕ ܗܘܳܐ ܒܰܪܢܳܫܳܐ. ܗܳܫܐ ܢܶܬܚܰܘܶܐ ܒܪܰܒܽܘܬܳܐ ܘܰܒܫܽܘܒܚܳܐ܆ ܡܳܐ ܕܝܳܬܶܒ ܥܠ ܟܽܘܪܣܝܳܐ ܕܫܽܘܒܚܳܐ ܕܰܝܳܢܳܐ ܕܚܰܝܷ̈ܐ ܘܰܕܡܺܝ̈ܬܶܐ ܘܕܰܐܝܠܝܢ ܕܚܰܫܒܽܘܗܝ ܒܰܪܢܳܫܳܐ ܘܨܰܥܪܽܘܗܝ ܘܨܰܠܒܽܘܗܝ ܐܝܟ ܕܰܠܓܰܒܪܳܐ ܡܰܛܥܝܳܢܳܐ. ܢܶܚܙܽܘܢ ܐܝ̣ܩܳܪܶܗ ܘܰܒܡܰܘܬܒܳܐ ܕܰܟܪ̈ܽܘܒܶܐ. ܘܡܳܐ ܕܟܳܦܺܝܢ ܫܡܰܝܳܢ̈ܐ ܘܰܐܪ̈ܥܳܢܳܝܶܐ ܒܽܘܪܟܳܐ ܒܕܶܚܠܬܳܐ ܘܰܡܩܰܪܒܺܝܢ ܠܶܗ ܣܶܓܕܬܳܐ. ܡܳܢܳܐ ܐܡ̇ܪ ܢܒܺܝܐ ܒܳܬܰܪ ܗܳܠܝܢ.
ܚܽܘܛܪܳܐ ܕܥܽܘܫܢܳܐ ܢܫܰܕܰܪ ܠܳܟ ܡܳܪܝܳܐ ܡܶܢ ܨܶܗܝܽܘܢ. ܘܢܶܫܬܰܠܰܛ ܒܰܒܥܶܠܕ̈ܒܳܒܰܝܟ. ܘܥܰܡܳܟ ܡܫܰܒܚܳܐ ܒܝܰܘܡܳܐ ܕܚܰܝܠܳܐ. ܡܥܳܕܝ̣ܢ ܢܒܺܝ̈ܐ ܩܳܪܶܝܢ ܠܗ ܠܥܰܡܰܢܘ̣ܐܝܠ ܚܽܘܛܪܳܐ. ܒܪܰܡ ܠܘ ܚܰܕ ܢܝ̣ܫܳܐ. ܐܶܫܰܥܝܳܐ ܓܶܝܪ ܐܡ̣ܪ܆ ܢܶܦܽܘܩ ܡܶܢ ܚܽܘܛܪܳܐ ܕܓܽܘܙܥܶܗ ܕܺܐܝܫܰܝ ܘܢܰܦܪܰܥ ܢܽܘܪܒܳܐ ܡ̣ܢ ܥܶܩܳܪܶܗ (ܐܫܥܝܐ ܝܐ: ܐ). ܐܶܪܰܡܝܳܐ ܐܡ̣ܪ: ܚܽܘܛܪܳܐ ܕܠܽܘܙܳܐ ܚܳܙܶܐ ܐܢܳܐ (ܐܪܡܝܐ ܐ: ܝܐ). ܠܘ ܗܳܟܰܢܳܐ ܐܡ̇ܪ ܗܳܪܟܳܐ ܡܙܰܡܪܳܢܳܐ. ܐܠܐ ܡ̣ܢ ܨܶܗܝܽܘܢ ܐܡ̣ܪ ܕܰܢܫܰܕܰܪ ܡܳܪܝܳܐ ܚܽܘܛܪܳܐ ܕܥܽܘܫܢܳܐ. ܘܕܳܡܝܳܐ ܡܶܠܬܳܐ. ܕܰܠܗܳܝ ܨܶܗܝܽܘܢ ܥܶܠܳܝܬܳܐ ܐܡ̣ܪ. ܡ̣ܢ ܬܰܡܳܢ ܢܳܚܶܬ ܡܶܠܬܳܐ ܒܥܽܘܫܢܳܐ ܘܝܳܬܶܒ ܥܠ ܟܽܘܪܣܝܳܐ ܒܕܺܝܢܳܐ. ܘܡܶܫܬܰܠܰܛ ܥܰܠ ܒܥܶܠܕ̈ܒܳܒܶܐ ܕܚܰܝܱ̈ܝܢ. ܒܪܰܡ ܡ̣ܢ ܗܳܕܐ ܨܶܗܝܽܘܢ ܠܘ ܒܥܽܘܫܢܳܐ ܐܶܫܬܰܕܰܪ ܚܽܘܛܪܳܐ ܗܳܢܐ ܐܠܐ ܒܰܡܚܺܝܠܽܘܬܳܐ ܐܶܫܬܰܕܰܪ ܐܝܟ ܕܰܐܠܶܦ ܦܰܘܠܽܘܣ ܐܰܠܗܳܝܳܐ. ܕܳܐܦܶܢ ܠܰܡ ܐܶܙܕܩܶܦ ܒܰܡܚܺܝܠܽܘܬܳܐ ܐܶܠܐ ܚܰܝ ܗܘܳܐ ܒܚܰܝܠܳܐ ܕܰܐܠܗܳܐ (ܒ ܩܘܪ̈ܢܬܝܐ ܝܓ: ܕ). ܡܳܕܶܝܢ ܫܰܦܝ̣ܪ ܐܶܬܐܰܡܪܰܬ ܕܡ̣ܢ ܫܡܰܝܳܐ ܗܝ ܘܨܶܗܝܽܘܢ ܡܶܬܐܰܡܪܳܐ ܚܽܘܛܪܳܐ ܕܥܽܘܫܢܳܐ ܕܶܐܫܬܰܕܰܪ ܘܳܐܬܶܐ ܠܚܰܪܬܳܐ ܕܰܢܩܰܦܰܚ ܠܰܐܝܠܝܢ ܕܶܐܬܬܪܺܝܡܘ ܘܠܐ ܩܰܒܠܽܘܗܝ ܟܕ ܕܢܰܚ ܒܰܒܣܰܪ ܡܶܢ ܓܽܘܙܥܶܗ ܕܺܐܝܫܰܝ. ܗܳܝܕܶܝܢ ܓܝܪ ܐܦ ܡܚܰܘܶܐ ܠܰܒܢܱ̈ܝ ܚܰܝܠܶܗ. ܡܳܐ ܕܝܳܬܒܺܝܢ ܥܠ ܟܽܘܪ̈ܣܰܘܳܬܳܐ ܬܪܶܥܣܰܪ ܫܠܺܝ̈ܚܶܐ. ܘܕܳܝܢܺܝܢ ܠܫܰܒ̈ܛܶܐ ܕܺܝܣܪܳܐܝܠ ܘܬܳܗܪܺܝܢ ܬܶܓܡ̈ܐ ܫܡܰܝܳܢ̈ܐ. ܡܳܐ ܕܝܳܬܶܒ ܟܝܳܢܳܐ ܥܰܦܪܳܢܳܐ ܥܠ ܟܽܘܪ̈ܣܰܘܳܬܳܐ ܕܢܽܘܪܳܐ. ܘܒܳܬܰܪ ܗܳܠܝܢ ܡܰܥܶܠ ܢܒܺܝܐ ܥܽܘܗܕܳܢܳܐ ܕܝܰܠܕܶܗ ܕܡܶܢ ܐܰܒܳܐ ܕܰܐܠܗܳܐ ܡܶܠܬܳܐ. ܘܰܐܝܟ ܕܡܶܢ ܦܰܪܨܽܘܦܳܐ ܕܰܐܒܳܐ ܐܡ̇ܪ ܠܘܳܬܶܗ:
ܒܗܶܕܪ̈ܰܝ ܩܽܘܕܫܳܐ ܡ̣ܢ ܡܰܪܒܥܳܐ. ܡ̣ܢ ܩܕܝ̣ܡ ܠܳܟ ܛܰܠܝܳܐ ܝ̣ܠܶܕܬܳܟ. ܗܶܕܪ̈ܰܝ ܩܽܘ̈ܕܫܶܐ ܐܝ̣ܬܘܗܝ ܦܰܐܝܽܘܬܳܐ ܕܰܟܝܳܢܳܐ ܐܰܠܳܗܳܝܳܐ ܕܰܐܘܠܶܕ ܕܠܐ ܚܰܫܳܐ ܘܰܕܠܐ ܦܣܳܩܳܐ ܡ̣ܢ ܡܰܪܒܥܳܐ ܕܢܽܘܗܪܳܐ ܘܠܐ ܡܶܬܡܰܚܠܳܢܳܐ ܘܠܐ ܡܶܬܚܰܒܠܳܢܳܐ. ܠܗܰܘ ܝܰܠܕܳܐ ܡܬܽܘܡܳܝܳܐ ܘܠܐ ܡܶܬܦܰܚܡܳܢܳܐ. ܕܕܳܡܶܐ ܒܟܽܠܡܶܕܡ ܠܰܐܒܳܐ ܝܳܠܽܘܕܶܗ. ܕܶܐܬܝ̣ܠܶܕ ܡܶܢܶܗ ܕܠܐ ܪܶܕܝܳܐ ܘܠܐ ܙܰܒܢܳܐ ܘܰܕܠܐ ܚܰܫܳܐ. ܬܘܒ ܐܝ̣ܬ ܠܶܗ ܫܡܳܐ ܕܪܰܒܽܘܬ ܟܽܘܡܪܽܘܬܳܐ ܠܐ ܡܶܫܬܰܪܝܳܢܺܝܬܳܐ ܡܰܘܕܶܐ ܥܠܰܘܗܝ ܕܐܝ̣ܬ ܠܶܗ. ܘܳܐܡܰܪ ܠܗ̇ ܠܡܶܠܬܳܐ ܢܒܺܝܳܐ ܗܳܟܰܢܳܐ:
ܝܺܡܳܐ ܡܳܪܝܳܐ ܘܠܐ ܢܟܰܕܶܒ ܕܰܐܢܬ ܗܽܘ ܟܽܘܡܪܳܐ ܠܥܳܠܰܡ ܒܰܕܡܽܘܬܶܗ ܕܡܰܠܟܺܝܙܕܶܩ. ܡܳܪܝܳܐ ܥܰܠ ܝܰܡܺܝܢܳܟ. ܒܣܰܓܺܝ̈ܐܬܳܐ ܡܰܠܶܠ ܦܰܘܠܽܘܣ ܡܶܠܬܳܐ ܕܡܶܛܠ ܡܰܠܟܺܝܙܕܶܩ. ܘܒܶܐܓܰܪܬܳܐ ܕܰܠܘܳܬ ܥܶܒܪ̈ܳܝܶܐ ܐܡ̇ܪ: ܥܠܰܘܗܝ ܗܳܢܳܐ ܡܰܠܟܺܝܙܕܶܩ. ܡܶܛܠ ܕܰܗܘܰܝܬܽܘܢ ܠܟܽܘܢ ܟܪ̈ܺܝܗܶܐ ܒܡܰܫܡܰܥܬܟܽܘܢ (ܥܒܪ̈ܝܐ ܗ: ܝܐ). ܗܳܢܳܐ ܠܰܡ ܡܰܠܟܺܝܙܕܶܩ ܐܝ̣ܬܘܗܝ ܡܠܶܟ ܫܳܠܝ̣ܡ ܟܽܘܡܪܳܐ ܕܰܐܠܳܗܳܐ ܡܪܰܝܡܳܐ (ܥܒܪ̈ܝܐ ܙ: ܐ). ܫܡܶܗ ܕܶܝܢ ܡܶܬܦܰܫܰܩ ܡܰܠܟܳܐ ܕܟܺܐܢܽܘܬܳܐ. ܬܽܘܒ ܡܠܶܟ ܫܳܠܝ̣ܡ ܕܺܐܝܬܰܘܗܝ ܡܰܠܟܳܐ ܕܰܫܠܳܡܳܐ (ܥܒܪ̈ܝܐ ܙ: ܒ). ܡܶܛܠܡܳܢܐ ܠܐ ܦܰܫܩܶܗ ܓܡܺܝܪܳܐܝ̣ܬ ܠܟܽܘܡܪܳܐ ܕܡܳܢܳܐ ܐܝ̣ܬܰܘܗܝ. ܡܶܛܠ ܕܰܟܪܺܝܗܳܐ ܗܘܳܬ ܡܰܫܡܰܥܬܶܗ ܕܥܰܡܳܐ. ܘܠܐ ܡܩܰܒܠܳܐ ܗܘܳܐ ܐܪ̈ܳܙܶܐ ܕܥܰܠ ܗܰܘ ܟܽܘܡܪܳܐ ܕܰܫܪܳܪܳܐ. ܐܠܐ ܡܶܛܠ ܕܗܳܫܐ ܠܘܳܬܳܟ ܐܰܒܽܘܢ ܛܽܘܒܳܢܳܐ ܕܠܐ ܟܪܺܝܗܳܐ ܘܠܳܐ ܡܚܺܝܠܳܐ ܡܰܫܡܰܥܬܳܟ. ܥܶܒܕܶܬ ܦܽܘܫܳܩܳܐ ܗܳܢܐ ܕܰܟܬܳܒܳܐ ܕܡܰܙܡܽܘܪ̈ܶܐ ܕܠܐ ܥܰܣܩܽܘܬܳܐ ܡܶܠܬܳܐ ܡܦܰܫܩܳܢܺܝܬܳܐ. ܕܡܶܛܠ ܗܰܘ ܡܰܠܟܺܝܙܕܶܩ ܐܡ̇ܪ ܐܢܳܐ. ܟܕ ܡܫܰܪܶܐ ܐܢܳܐ ܠܰܡܚܰܘܳܝܽܘ ܐܳܦ ܓܶܢܣܶܗ ܥܡ ܛܽܘܗܡܶܗ. ܘܰܕܡܶܛܠܡܳܢܐ ܕܚܶܠ ܛܽܘܒܳܢܳܐ ܘܠܳܐ ܦܰܫܶܩ ܫܰܪܒܶܗ ܠܥܶܒܪ̈ܳܝܶܐ ܒܓܶܢܣܳܐ ܗܳܟܝ̣ܠ ܟܢܰܥܢܳܝܳܐ ܐܝ̣ܬܰܘܗܝ ܗܘܳܐ. ܡ̣ܢ ܗܳܢܘܢ ܕܡܶܬܩܪܶܝܢ ܗܘܰܘ ܝܳܒܽܘ̈ܣܳܝܶܐ. ܘܗܳܢܳܐ ܩܰܕܡܳܝܳܐ ܒܢܳܗ̇ ܠܐܽܘܪܺܫܠܶܡ ܘܰܐܡܠܶܟ ܒܳܗ̇ ܘܣܳܡ ܠܗ̇ ܫܡܳܐ ܫܳܠܝ̣ܡ. ܒܪܰܡ ܝܳܒܽܘܣ ܡܶܬܩܰܪܝܳܐ ܗܘܳܬ ܡܶܢ ܩܕܝ̣ܡ. ܗܽܘ ܗܳܢܐ ܓܰܒܪܳܐ ܗܘܳܐ ܒܳܗ̇ ܡܰܠܟܳܐ ܘܟܽܘܡܪܳܐ ܕܰܐܠܗܳܐ. ܘܠܰܘ ܐܚܪ̈ܳܢܶܐ ܐܰܡܠܟܽܘܗܝ. ܘܡܶܛܠ ܕܙܰܕܺܝܩܳܐ ܗܘܳܐ ܡܰܠܟܳܐ ܕܙܰܕܺܝܩܽܘܬܳܐ. ܘܐܪܳܙܳܐ ܕܶܝܢ ܨܳܪ ܠܥܰܡܰܢܽܘܐܝܠ. ܒܗܳܝ ܕܰܒܢܳܐ ܠܐܽܘܪܺܫܠܶܡ ܕܗܺܝ ܗܺܝ ܫܠܳܡ. ܗܳܕܐ ܕܶܝܢ ܥܰܠ ܐܰܪܥܳܐ ܐܶܬܒܰܢܝܰܬ ܕܰܒܫܶܡ ܕܡܽܘܬܳܐ ܕܗܳܝ ܐܽܘܪܺܫܠܶܡ ܥܶܠܳܝܬܳܐ ܕܺܐܝܬ ܒܰܫܡܰܝܳܐ. ܘܗܽܘ ܡܶܢ ܢܰܦܫܶܗ ܩܛܰܪ ܬܳܓܳܐ ܕܡܰܠܟܽܘܬܳܐ ܕܢܰܣܶܩ ܕܽܘܡܝܳܐ ܘܨܰܠܡܳܐ ܠܗܰܘ ܕܡܶܢ ܥܳܠܰܡ ܡܰܠܟܰܐ ܗܘ ܘܡ̣ܢ ܡܬܽܘܡ. ܘܕܶܐܬܩܪܺܝ ܡܰܠܟܺܝܙܕܶܩ. ܡܶܬܦܰܫܰܩ ܡܰܠܟܳܐ ܕܟܺܐܢܽܘܬܳܐ. ܘܰܕܠܐ ܐܡ̇ܪ ܟܬܳܒܳܐ ܪܺܝܫܺܝܬܳܐ ܕܝܰܘ̈ܡܰܘܗܝ. ܘܠܐ ܐܰܘܕܰܥ ܫܽܘܠܳܡܳܐ ܕܚܰܝܰܘ̈ܗܝ. ܕܰܢܨܽܘܪ ܕܡܽܘܬܳܐ ܓܡܺܝܪܬܳܐ ܒܗܳܕܐ. ܠܗܰܘ ܕܠܰܝܬ ܠܶܗ ܫܽܘܪܳܝܳܐ ܒܺܐܝܬܽܘܬܶܗ. ܘܠܐ ܣܳܡܟܺܝܢ ܚܰܝܰܘ̈ܗܝ ܡܬܽܘ̈ܡܳܝܶܐ ܥܠ ܫܽܘܠܳܡܳܐ. ܘܕܰܐܦܶܩ ܠܰܚܡܳܐ ܘܚܰܡܪܳܐ ܠܰܐܒܪܳܗܳܡ ܟܕ ܗܦܰܟ ܡ̣ܢ ܚܰܪܒܳܐ ܕܡܰܠܟ̈ܐ. ܗܳܠܝܢ ܓܝܪ ܡܥܳܕ ܗܘܳܐ ܠܰܡܩܰܪܳܒܽܘ ܥܠ ܨܰܠܡܳܐ ܕܩܽܘܪܒܳܢܳܗ̇ ܕܥܺܕܬܳܐ ܩܰܕܶܡ ܒܰܕܶܩ. ܕܰܐܝܟܰܢܳܐ ܠܥܺܕܬܳܐ ܕܶܝܢ ܕܠܘ ܕܡܳܐ ܕܚܰܝ̈ܘܳܬܳܐ ܡܩܰܪܒܳܐ ܥܠ ܡܰܕܒܚ̈ܐ. ܗܳܟܰܢܐ ܟܽܘܡܪܳܐ ܡܰܠܟܝ̣ܙܕܶܩ ܠܘ ܕܡܳܐ ܕܕܶܒܚ̈ܐ ܪܳܐܷܣ ܗܘܳܐ ܥܠ ܡܰܕܒܚܳܐ ܐܶܠܐ ܠܰܚܡܳܐ ܘܚܰܡܪܳܐ ܡܩܰܪܶܒ ܗܘܳܐ ܠܰܐܠܗܳܐ. ܡܶܛܠ ܗܳܠܝܢ ܢܽܘ̈ܩܳܝܶܐ ܪ̈ܽܘܚܳܢܶܐ ܐܡ̣ܪ ܐܰܒܳܐ ܥܠ ܒܪܶܗ. ܕܰܐܢܬ ܗܘ ܟܽܘܡܪܳܐ ܠܥܳܠܰܡ. ܒܰܕܡܽܘܬܶܗ ܕܡܰܠܟܝ̣ܙܕܶܩ. ܡܶܛܠ ܕܗܰܘ ܠܘ ܒܰܡܫܺܝܚܽܘܬܳܐ ܗܘܳܐ ܟܽܘܡܪܳܐ. ܗܳܟܰܢܐ ܐܳܦ ܒܪܳܐ ܕܰܐܠܗܳܐ ܠܘ ܒܡܰܘܗܰܒܬܳܐ ܕܰܐܚܪ̈ܳܢܶܐ ܐܝ̣ܬ ܠܶܗ ܪܰܒܽܘܬ ܟܽܘܡܪܽܘܬܳܐ. ܡܶܛܠ ܗܳܢܐ ܕܚܶܠ ܦܰܘܠܽܘܣ ܐܠܗܳܝܐ. ܡ̣ܢ ܥܶܒܪ̈ܳܝܶܐ ܘܠܳܐ ܦܰܫܶܩ ܠܗܽܘܢ ܚܰܬܝ̣ܬܽܘܬܳܐ ܕܐܪ̈ܳܙܶܐ ܕܶܐܬܪܫܶܡܘ ܠܰܡܫܺܝܚܳܐ ܒܡܰܠܟܝ̣ܙܕܶܩ ܘܝܰܬܝ̣ܪܳܐܝ̣ܬ ܥܠ ܕܡ̣ܢ ܥܰܡܡ̈ܐ ܥܽܘܪ̈ܠܶܐ ܗܘܳܐ. ܘܗܳܝ ܕܶܐܡܰܪ ܕܡܳܪܝܳܐ ܥܠ ܝܰܡܝ̣ܢܳܟ. ܘܬܘܒ ܐܶܡܪܶܬ.
ܬܰܒܰܪ ܒܝܰܘܡܳܐ ܕܪܽܘܓܙܶܗ ܡܰܠܟ̈ܐ. ܢܕܽܘܢ ܥܰܡܡ̈ܐ ܘܢܶܡܠܐ ܫܠܰܕ̈ܐ. ܘܢܶܦܣܽܘܩ ܪܺܝܫܳܐ ܕܣܰܓܺܝ̈ܐܐ ܒܰܐܪܥܳܐ. ܝܰܘܡܳܐ ܕܪܽܘܓܙܶܗ ܐܳܡܪܝ̣ܢܰܢ ܕܺܐܝܬܰܘܗܝ ܝܰܘܡܳܐ ܕܚܰܫܶܗ ܕܥܰܡܰܢܘ̣ܐܝܠ. ܒܗܳܢܐ ܝܰܘܡܳܐ ܪܓܶܙ ܥܠ ܥܰܡܳܐ ܘܠܐ ܐܶܬܪܰܥܺܝ ܥܠ ܐܰܝܠܝܢ ܕܰܒܪܶܥܝܳܢܳܐ ܕܝܽܘܕܳܝܽܘܬܳܐ ܡܩܰܘܶܝܢ. ܘܡܶܛܠܗܳܢܐ ܒܰܛܠܶܗ ܠܝܽܘܒܳܠܳܐ ܕܡܰܠܟ̈ܐ ܡ̣ܢ ܥܰܡܳܐ. ܘܬܘܒ ܠܳܐ ܐܶܬܚܙܝ̣ ܒܺܝܣܪܳܐܝܠ ܡܰܠܟܳܐ. ܒܗܳܝ ܕܶܐܡܰܪ ܕܰܢܕܽܘܢ ܠܥܰܡܡ̈ܐ ܘܢܶܡܠܶܐ ܫܠܰܕ̈ܐ. ܒܰܫܡܳܐ ܕܥܰܡܡ̈ܐ ܠܚܰܝ̈ܠܰܘܳܬܳܐ ܕܫܺܐܕ̈ܐ ܡܰܥܶܠ. ܟܕ ܓܝܪ ܕܳܢ ܐܶܢܘܢ. ܩܛܺܝ̈ܠܶܐ ܕܠܐ ܡܶܢܝܳܢܳܐ ܐܰܪܡܺܝ ܡܶܢܗܽܘܢ. ܒܗܳܝ ܕܠܐ ܨܳܒܶܝܢ ܗܘܰܘ ܠܡܰܪܦܳܝܽܘ ܠܰܫܒܺܝܬܳܐ ܗܳܝ ܕܰܕܒܺܝܪܳܐ ܗܘܳܬ ܠܗܽܘܢ. ܡܶܛܠܗܳܢܐ ܡܠܳܗ̇ ܠܰܐܪܥܳܐ ܕܡܶܨܪܶܝܢ ܗܳܝ ܡܶܬܝܰܕܥܳܢܝ̣ܬܳܐ. ܫܠܰܕ̈ܐ ܠܐ ܡܶܬܚܰܙܝܳܢܝ̈ܬܳܐ ܕܡܶܨܪ̈ܳܝܶܐ ܡܶܬܝܰܕ̈ܥܳܢܶܐ. ܐܰܝܟܰܢܐ ܕܶܐܡܰܪ ܥܠܰܘܗܝ ܐܶܫܰܥܝܳܐ. ܕܰܐܝܟ ܕܰܠܓܰܒܪܳܐ ܐܰܕܽܘܡܳܝܳܐ. ܕܳܐܬܶܐ ܡ̣ܢ ܐܰܕܽܘܡ. ܚܳܙܶܝܢ ܗܘܰܘ ܠܶܗ ܚܰܝ̈ܠܰܘܳܬܳܐ ܫܡܰܝܴ̈ܢܶܐ. ܟܕ ܣܳܠܶܩ ܠܰܫܡܰܝܳܐ ܒܙܳܟܽܘܬܳܐ. ܘܰܡܫܰܐܠܺܝܢ ܗܘܰܘ ܠܰܚ̈ܕܳܕܶܐ ܕܳܐܡܪܺܝܢ: ܡܰܢܽܘ ܗܳܢܐ ܕܳܐܬܶܐ ܡܶܢ ܐܰܕܽܘܡ ܘܣܽܘܡܳܩܺܝܢ ܢܰܚ̈ܬܰܘܗܝ ܐܰܝܟ ܒܽܘܨܳܪ. ܘܰܗܕܝ̣ܪ ܒܰܠܒܽܘ̈ܫܰܘܗܝ (ܐܫܥܝܐ ܣܓ: ܐ). ܘܬܘܒ ܠܗ ܠܡܰܠܟܳܐ ܡܫܰܐܠܺܝܢ ܗܘܰܘ: ܠܡܳܢܳܐ ܣܽܘܡܳܩܺܝܢ ܢܰܚ̈ܬܰܝܟ. ܐܰܝܟ ܗܰܘ ܕܰܥܨܰܪ ܡܰܥܨܰܪܬܳܐ (ܐܫܥܝܐ ܣܓ: ܒ). ܘܟܰܕ ܦܰܢܺܝ ܠܘܳܬ ܐܰܝܠܶܝܢ ܕܫܰܐܠܽܘܗܝ. ܡܰܥܨܰܪܬܳܐ ܕܳܫܶܬ ܒܰܠܚܽܘܕܰܝ. ܘܐܢܳܫ ܡ̣ܢ ܥܰܡܡ̈ܐ ܠܰܝܬ ܗܘܳܐ ܥܰܡܝ (ܐܫܥܝܐ ܣܓ: ܓ). ܘܰܢܕܳܐ ܕܶܡܗܽܘܢ ܥܠ ܠܒܽܘ̈ܫܰܝ ܘܶܐܬܦܰܠܦܠܶܬ (ܐܫܥܝܐ ܣܓ: ܓ). ܗܳܠܝܢ ܗܽܘ ܡܶܠܬܳܐ ܐܰܠܗܳܐ ܐܡ̣ܪ ܥܠ ܢܰܦܫܶܗ. ܘܒܰܕܡܳܐ ܕܰܒܥܶܠܕ̈ܒܳܒܰܘܗܝ ܐܶܬܦܰܠܦܰܠܘ ܢܰܚ̈ܬܰܘܗܝ. ܘܪܺܝܫܳܐ ܕܗܳܠܝܢ ܐܝܟ ܕܶܐܡܰܪ ܪܽܘܚܳܐ. ܘܢܶܦܣܽܘܩ ܪܺܝܫܳܐ ܕܣܰܓܺܝ̈ܐܐ ܒܰܐܪܥܳܐ. ܟܕ ܩܪܳܒܳܐ ܩܰܫܝܳܐ ܥܒܰܕ ܒܡܰܕܒܪܳܐ ܥܡ ܪ̈ܽܘܚܶܐ ܒܺܝ̈ܫܳܬܳܐ. ܪ̈ܺܝܫܰܝܗܽܘܢ ܕܡܰܪ̈ܳܚܶܐ ܦܣܰܩ ܗܘܳܐ. ܘܰܫܠܰܕܰܝ̈ܗܘܢ ܕܡܳܪ̈ܽܘܕܶܐ ܕܳܐܷܫ ܗܘܳܐ. ܘܠܐ ܐܢܳܫ ܡܶܫܟܰܚ ܢܺܐܡܰܪ ܡܶܢܝܳܢܳܐ ܕܗܳܠܝܢ ܩܛܺܝ̈ܠܶܐ ܕܰܩܛܰܠ. ܘܡ̣ܢ ܒܳܬܰܪ ܕܰܚܪܰܒ ܐܶܢܘܢ. ܩܪܶܒ ܠܘܳܬ ܟܳܣܶܗ ܕܡܰܘܬܳܐ ܐܝܟ ܕܶܐܡܰܪ ܢܒܺܝܐ.
ܘܡ̣ܢ ܢܰܚܠܳܐ ܒܽܐܘܪܚܳܐ ܢܶܫܬܶܐ. ܡܶܛܠ ܗܳܢܐ ܢܶܬܬܪܺܝܡ ܪܺܝܫܶܗ. ܢܰܚܠܳܐ ܕܶܝܢ ܐܝ̣ܬܰܘܗܝ ܐܰܬܪܳܐ ܥܰܡܺܝܩܳܐ ܕܡܰܘܬܳܐ. ܕܒܶܗ ܚܒܺܝ̈ܫܳܢ ܗܘܱ̈ܝ ܢܰܦ̈ܫܳܬܳܐ. ܘܒܽܐܘܪܚܳܐ ܢܳܡܽܘܣܳܝܬܳܐ ܕܗܰܘܢܳܐ ܐܢܳܫܳܝܳܐ ܪܳܕܶܐ ܗܘܳܐ ܥܰܡܰܢܘ̣ܐܝܠ. ܘܡܰܛܝ̣ ܥܕܰܡܳܐ ܠܢܰܚܠܳܐ ܕܩܳܐܶܡ ܗܘܳܐ ܒܶܗ ܡܰܘܬܳܐ. ܘܟܕ ܠܟܳܣܳܐ ܕܰܡܣܳܡ ܒܪܝ̣ܫܳܐ ܚܙܳܐ ܒܺܐܝ̈ܕܰܝ ܡܰܘܬܳܐ. ܩܪܶܒ ܘܫܰܩܠܶܗ ܡ̣ܢ ܡܰܘܬܳܐ ܘܶܐܫܬܺܝ ܐܝܟ ܒܰܪܢܳܫܳܐ ܕܰܡܫܰܥܒܰܕ ܠܡܰܘܬܳܐ. ܘܗܳܝܕܶܝܢ ܩܳܡ ܡܶܢ ܒܶܝܬ ܡܺܝ̈ܬܶܐ ܒܠܳܐ ܡܶܬܚܰܒܠܳܢܽܘܬܳܐ. ܘܠܐ ܫܒܰܩ ܦܰܓܪܶܗ ܕܢܶܚܙܶܐ ܚܒܳܠܳܐ ܐܠܐ ܐܶܬܬܪܺܝܡ ܡ̣ܢ ܩܰܒܪܳܐ ܒܰܩܝܳܡܬܳܐ ܕܠܐ ܚܒܳܠܳܐ. ܘܰܐܩܝ̣ܡ ܠܳܐܕܳܡ ܡ̣ܢ ܩܺܝܩܰܠܬܳܐ ܕܰܚܒܳܠܳܐ ܕܠܶܗ ܝ̇ܐܐ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܚܕܥܣܪ
ܡܰܘܕܰܥ ܥܰܠ ܐܪ̈ܳܙܰܘܗܝ ܕܰܐܠܗܳܐ ܕܰܟܣܶܐ ܒܰܥ̈ܒܳܕܶܐ ܕܠܳܐ ܡܶܠܬܳܐ. ܘܡܰܚܶܒ ܠܰܐܝܠܶܝܢ ܕܢܳܛܪܺܝܢ ܟܽܠ ܦܽܘ̈ܩܕܳܢܰܘܗܝ.
ܒܥܰܝܢܳܐ ܫܦܝ̣ܬܳܐ ܘܰܡܪܝ̣ܩܬܳܐ ܡܶܬܒܰܩܶܐ ܗܘܳܐ ܛܽܘܒܳܢܳܐ ܕܰܘܝܕ܆ ܒܰܥ̈ܒܳܕܶܐ ܕܰܐܠܗܳܐ. ܘܰܒܬܶܗܪܳܐ ܚܳܐܱܪ ܗܘܳܐ ܒܗܘ̇ܢ. ܗܰܘ ܡܶܕܶܡ ܕܰܚܙܳܐ ܒܥܰܝܢܳܐ ܕܪܽܘܚܳܐ ܨܒܳܐ ܗܘܳܐ ܚܰܟܝ̣ܡܳܐܝ̣ܬ ܕܒܰܟܢܽܘܫܝܳܐ ܕܰܬܪ̈ܝ̣ܨܶܐ ܢܡܰܠܶܠ ܥܠܰܘܗܝ. ܡܶܛܠܗܳܢܐ ܒܬܶܫܒܘ̣ܚܬܳܐ ܕܡܳܐܐ ܘܰܚܕܰܥܶܣܪ̈ܶܐ ܡܙܰܡܰܪ ܗܘܳܐ ܘܐܡ̇ܪ:
ܐܰܘܕܶܐ ܠܡܳܪܝܳܐ ܡ̣ܢ ܟܽܠܗ ܠܶܒܝ܆ ܒܡܶܠܟܳܐ ܕܰܬܪ̈ܺܝܨܶܐ ܒܥܺܕܬܳܐ. ܪܰܘܪ̈ܒܺܝܢ ܥܒܳܕܰܘ̈ܗܝ ܕܡܳܪܝܳܐ. ܘܡܶܬܒܥܶܝܢ ܠܟܽܠ ܕܨܳܒܶܝܢ ܒܗܽܘܢ. ܐܦ ܡܫܰܒܚܝ̣ܢ ܘܪܰܘܪ̈ܒܺܝܢ ܥܒܳܕܰܘ̈ܗܝ. ܡܶܛܠܡܳܢܐ ܫܽܘܪܳܝܳܐ ܗܳܢܐ ܥܒܰܕ ܗܘܳܐ ܠܬܶܫܒܽܘܚܬܳܐ ܗܳܕܐ. ܚܙܺܝ ܐܰܝܟܰܢܐ ܬܰܘܕܝ̣ܬܳܐ ܗܳܕܐ ܓܡܺܝܪܬܳܐ ܡܩܰܪܶܒ ܠܐܠܗܐ ܡ̣ܢ ܟܽܠܗ ܠܶܒܶܗ. ܘܗܝ̣ ܗܳܕܐ ܒܰܟܢܽܘܫܝܳܐ ܕܥܺܕܬܳܐ ܕܰܬܪ̈ܝ̣ܨܶܐ. ܡܳܢܐ ܕܶܝܢ ܐܡ̣ܪ ܟܕ ܩܳܝܡܳܐ ܥܺܕܬܳܐ ܪܰܒܽܘܬܳܐ ܕܰܥܒܳܕܰܘ̈ܗܝ ܕܰܐܠܗܐ. ܠܐ ܠܡ ܓܝܪ ܣܢܝ̣ܩܝ̣ܢܰܢ ܕܡܶܕܶܡ ܚܰܕܬܳܐ ܢܰܟܪܶܙ ܥܠ ܥܳܒܽܘܕܳܐ. ܥܳܒܽܘܕܳܐ ܚܰܕ ܗܽܘ. ܥܒܳܕܰܘ̈ܗܝ ܠܰܡ ܒܰܠܚܽܘܕ ܢܶܬܢܶܐ. ܘܣܳܦܩܳܐ ܗܝ ܗܳܕܐ ܠܬܶܫܒܽܘܚܬܳܐ. ܐܠܘ ܓܝܪ ܠܰܝܬ ܗܘܳܐ ܥܒܳܕܳܐ ܡܫܰܒܚܳܐ ܠܡܳܪܝܳܐ. ܐܳܠܨܳܐ ܗܘܳܬ ܕܢܶܒܥܶܐ ܐܰܝܠܝܢ ܕܡ̣ܢ ܥܶܠܰܬܗܶܝܢ ܢܶܣܰܒ ܘܰܢܩܰܪܶܒ ܠܶܗ ܫܽܘܒܚܳܐ. ܐܠܐ ܢܶܦܗܶܐ ܒܳܬܰܪ ܒܥܳܬܳܐ ܕܠܐ ܡܶܬܚܰܙܝܳܢ̈ܝܳܬܳܐ. ܐܠܐ ܢܶܬܒܰܩܶܐ ܒܫܽܘܦܪܶܗ ܕܰܪܩܺܝܥܳܐ ܘܦܰܐܝܽܘܬܳܐ ܕܢܰܗܺܝܪ̈ܶܐ ܕܰܣܕܝ̣ܪܺܝܢ ܒܶܗ. ܘܰܒܫܽܘܦܪܶܗ ܘܕܶܢܚܶܗ ܕܫܶܡܫܳܐ ܘܫܽܘ̈ܚܠܳܦܶܐ ܕܣܰܗܪܳܐ ܘܡܰܪܕܝ̣ܬܳܐ ܕܟܰܘ̈ܟܒܶܐ. ܘܕܰܐܝܟܰܢܐ ܡܛܰܟܰܣ ܘܰܡܬܰܚܰܡ ܝܰܡܳܐ ܠܒܰܪ ܡ̣ܢ ܝܰܬܒܳܐ ܕܥܳܡܰܪܬܳܐ ܘܢܶܣܬܰܟܰܠ ܒܚܰܝ̈ܘܳܬܳܐ ܘܢܽܘ̈ܢܶܐ ܕܰܒܓܰܘܶܗ. ܘܚܽܘܪ ܒܰܐܪܥܳܐ ܐܰܝܟܰܢܐ ܒܬܶܕܡܽܘܪܬܳܐ ܪܰܩܥܳܗ̇ ܚܰܝܠܳܐ ܕܰܐܠܗܳܐ ܥܰܠ ܡܰܝܴ̈ܐ. ܘܰܐܝܟܰܢܐ ܪܳܗܛܺܝܢ ܒܗ̇ ܢܰܗܪ̈ܰܘܳܬܳܐ ܘܪܳܕܶܝܢ ܒܓܰܘܶܗ ܡܰܒܽܘ̈ܥܶܐ. ܟܕ ܡܰܘܣܦܝ̣ܢܰܢ ܡܶܬܕܰܡܪܝ̣ܢܰܢ ܒܺܐܝ̈ܠܳܢܶܐ ܘܢܶܨܒܴ̈ܬܳܐ ܘܙܰܪ̈ܥܶܐ ܕܫܳܘܚܺܝܢ ܒܳܗ̇. ܘܕܰܐܝܟܰܢܐ ܣܳܠܩܴ̈ܢ ܥܢܴ̈ܢܶܐ ܡܶܢ ܣܰܘ̈ܦܶܝܗ̇ ܥܠ ܐܰܦܶܝ̈ܗ̇. ܘܰܒܪܶܡܙܳܐ ܩܰܠܝ̣ܠܳܐ ܡܰܫܩܶܝܢ ܠܰܬܚܽܘ̈ܡܶܐ ܕܟܽܠܗ̇ ܐܰܪܥܳܐ. ܘܒܰܡܛܰܟܣܽܘܬܳܐ ܫܒܝ̣ܚܬܳܐ ܠܰܐܪܒܥܳܐ ܫܽܘ̈ܚܠܳܦܶܐ ܡܶܬܦܰܠܓܳܐ ܫܰܢܬܳܐ. ܘܰܐܚܪ̈ܳܢܝܳܬܳܐ ܣܰܓܺܝ̈ܐܬܳܐ ܕܥܳܒܪ̈ܳܢ ܠܡܶܢܝܳܢܳܐ. ܕܰܡܚܰܘ̈ܝܳܢ ܥܒܳܕܰܘ̈ܗܝ ܕܰܐܠܗܐ ܫܒܺܝܚ̈ܐ ܘܪܰܘܪ̈ܒܶܐ. ܘܡܶܬܒܥܶܝܢ ܕܶܝܢ ܠܡܶܬܗܰܪ ܒܗܽܘܢ܆ ܒܪܰܒܽܘܬܳܐ ܕܚܰܝܠܶܗ ܕܥܳܒܽܘܕܳܐ.
ܘܙܰܕܝ̣ܩܽܘܬܶܗ ܕܩܰܝܳܡܳܐ ܠܥܳܠܰܡ. ܘܥܽܘܗܕܳܢܳܐ ܝܰܗܒ ܠܬܶܕܡܪ̈ܳܬܶܗ. ܥܒܰܕ ܐܶܢܶܝܢ ܠܐ ܡܶܬܚܰܦܝܳܢ̈ܝܳܬܳܐ. ܘܰܒܗܳܝ ܕܟܽܠܝܽܘܡ ܡܶܬܟܪܶܟ ܪܩܺܝܥܳܐ ܠܥܶܠ ܡ̣ܢ ܐܰܪܥܳܐ ܘܰܬܚܽܘܬܶܝܗ̇. ܟܕ ܫܩܝ̣ܠ ܐܳܬܘܴ̈ܬܳܐ ܕܢܰܗܝ̣ܪ̈ܶܐ ܒܰܩܢܽܘܡܶܗ. ܟܠ ܝܽܘܡ ܥܳܒܰܪ ܠܥܶܠ ܡܶܢܳܗ̇. ܘܫܶܡܫܳܐ ܬܽܘܒ ܒܡܰܕܢܳܚ̈ܐ ܘܰܒܡܰܥܪ̈ܳܒܶܐ. ܐܳܦ ܣܰܗܪܳܐ ܟܕ ܡܳܠܶܐ ܐܦ ܚܳܣܰܪ. ܕܫܽܘܚܠܳܦܳܐ ܒܳܐܐܰܪ̈ܰܣ ܕܩܰܝܛܳܐ ܟܕ ܚܰܡܝ̣ܡ ܘܰܕܣܰܬܘܳܐ ܟܕ ܩܰܪܝ̣ܪ. ܘܬܘܒ ܥܱ̈ܠܠܳܬܳܐ ܕܬܽܘܪ̈ܣܳܝܶܐ ܘܡܰܘ̈ܗܒܳܬܳܐ ܕܶܐܒܒܳܢ̈ܐ. ܘܝܰܡܳܐ ܟܕ ܡܶܫܬܰܝܰܢ ܒܩܰܝܛܳܐ ܘܝܳܗܶܒ ܐܝ̣ܕܳܐ ܠܡܰܠܳܚ̈ܐ ܕܢܶܪܕܽܘܢ ܒܶܗ. ܘܟܕ ܬܘܒ ܗܳܦܶܟ ܡܶܬܕܰܠܰܚ ܒܣܰܬܘܳܐ ܘܛܳܪܶܕ ܠܣܰܦܴ̈ܢܶܐ ܒܩܳܠܰܘ̈ܗܝ ܙܥܺܝ̈ܦܶܐ ܡ̣ܢ ܓܰܘܶܗ. ܗܳܠܝܢ ܥܽܘ̈ܗܕܳܢܶܐ ܐܰܡܺܝ̈ܢܶܐ ܕܝܰܗܒ ܥܳܒܽܘܕܳܐ ܠܬܶܕܡܪ̈ܳܬܶܗ ܕܠܐ ܐܢܳܫ ܢܶܛܥܶܐ ܐܶܢܶܝܢ. ܘܰܒܪ̈ܰܚܡܶܐ ܘܰܒܪܽܘܚܳܦܳܐ. ܐܝܟ ܕܶܐܡܰܪ ܢܒܺܝܐ ܥܠܰܘܗܝ.
ܕܰܡܪܰܚܡܳܢ ܗܽܘ ܘܰܡܪܰܚܦܳܢ܀ ܘܡܳܐ ܕܰܒܗܳܢܐ ܥܒܳܕܳܐ ܬܳܗܪܳܐ ܢܰܦܫܳܐ. ܡܩܰܒܠܳܐ ܡ̣ܢ ܐܰܠܗܳܐ ܬܽܘܪܣܳܝܳܐ ܕܠܳܚܶܡ ܠܰܟܝܳܢܳܗ̇ ܐܝܟ ܕܶܐܡܰܪ ܢܒܺܝܐ:
ܡܶܐܟܽܘܠܬܳܐ ܝܰܗܒ ܠܕܳܚ̈ܠܰܘܗܝ. ܘܡܶܬܕܟܰܪ ܠܥܳܠܰܡ ܩܝܳܡܶܗ. ܘܠܳܐ ܛܳܥܶܐ ܡܶܕܶܡ ܕܶܐܫܬܰܘܕܺܝ. ܐܠܐ ܦܳܪܰܥ ܒܟܽܠܙܒܰܢ ܡܽܘ̈ܠܟܳܢܶܐ ܗܳܢܽܘܢ ܕܰܡܠܰܟ ܠܥܰܒܕܰܘ̈ܗܝ. ܘܰܐܝܟ ܕܡܰܠܝ̣ ܫܽܘܘܕܳܝܶܗ ܠܰܐܒܳܗܴ̈ܬܳܐ. ܟܰܕ ܐܰܦܶܩ ܠܰܒܢܰܝ̈ܗܘܢ ܡ̣ܢ ܡܶܨܪܶܝܢ. ܘܝܰܗܒ ܠܗܽܘܢ ܐܰܪܥܗܽܘܢ ܕܰܟܢܰܥܢܳܝ̈ܐ ܝܽܘܪܬܳܢܳܐ. ܘܠܐ ܡܶܢܰܢ ܟܳܠܶܐ ܐܰܝܠܝܢ ܕܰܡܠܰܟ ܠܰܢ. ܚܙܺܝ ܕܝܢ ܡܳܢܳܐ ܐܡ̇ܪ ܢܒܺܝܐ.
ܚܰܝܠܳܐ ܕܒܰܥܒܳܕܰܘ̈ܗܝ ܚܰܘܝ̣ ܠܥܰܡܶܗ. ܕܢܶܬܶܠ ܠܗܽܘܢ ܝܳܪܬܽܘܬܳܐ ܕܥܰܡܡ̈ܐ. ܝ̣ܠܶܦ ܗܘܳܐ ܓܝܪ ܝ̣ܣܪܳܐܝܠ ܟܕ ܢܦܰܩ ܡܶܢ ܡܶܨܪܶܝܢ. ܕܰܐܝܢܳܐ ܚܰܝܠܳܐ ܡܛܰܫܰܝ ܘܰܟܣܶܐ ܒܰܥܒܳܕܰܘ̈ܗܝ ܕܰܐܠܗܐ. ܚܳܙܶܝܢ ܗܘܰܘ ܒܢܱ̈ܝ ܝ̣ܣܪܳܐܝܠ ܕܟܕ ܡܰܚ̈ܘܳܬܳܐ ܡܢܰܓܕܺܝܢ ܗܘܰܘ ܠܡܶܨܪ̈ܳܝܶܐ. ܠܥܶܒܪ̈ܳܝܶܐ ܕܠܐ ܢܶܟܝܳܢܳܐ ܢܳܛܪ̈ܳܢ ܗܘܱ̈ܝ. ܘܢܰܗܪܳܐ ܕܶܐܬܗܰܦܰܟ ܠܰܕܡܳܐ. ܟܕ ܕܝܢ ܠܡܶܨܪ̈ܳܝܶܐ ܬܶܛܪܳܐ ܕܪܽܘܓܙܳܐ ܐܝܟ ܕܫܳܘܶܝܢ ܡܳܙܶܓ ܗܘܳܐ ܕܡܳܐ ܕܠܺܝܚܳܐ. ܐܦ ܠܥܶܒܪ̈ܳܝܶܐ ܡܰܝܴ̈ܐ ܫܦܰܝܴ̈ܐ ܡܰܫܩܶܐ ܗܘܳܐ. ܘܽܐܘܪ̈ܕܥܶܐ ܕܶܝܢ ܒܒܴ̈ܬܶܐ ܕܡܶܨܪ̈ܳܝܶܐ ܘܒܰܐܘܨܪ̈ܰܝܗܽܘܢ ܣܳܠܩܴ̈ܢ ܗܘ̈ܝ. ܘܰܠܡܰܠܟܳܐ ܘܰܠܥܰܡܶܗ ܡܚܰܒ̈ܠܳܢ ܗܘ̈ܝ. ܘܡ̣ܢ ܥܶܒܪ̈ܳܝܶܐ ܡܰܣ̈ܛܝܳܢ ܗܘ̈ܝ ܘܠܐ ܡܰܗܪ̈ܳܢ ܗܘܱ̈ܝ ܠܗܽܘܢ. ܗܳܟܰܢܐ ܐܦ ܒܝܰܕ ܚܰܝܠܳܐ ܕܰܐܠܗܳܐ ܕܰܡܕܰܒܰܪ ܗܘܳܐ ܠܗܶܝܢ ܠܡܰܚ̈ܘܳܬܳܐ. ܘܰܐܚܪ̈ܳܢܝܳܬܳܐ ܣܰܓܺܝ̈ܐܬܳܐ. ܘܰܠܥܰܡܳܐ ܕܥܶܒܪ̈ܳܝܶܐ ܦܰܨܝܶܗ ܡ̣ܢ ܢܶܟܝܴ̈ܢܶܐ ܩܰܪ̈ܺܝܒܶܐ ܡܫܰܘܙܶܒ ܗܘܳܐ ܠܶܗ. ܘܝܰܗܒ ܠܗ ܝܳܪܬܽܘܬܳܐ ܕܥܰܡ̈ܡܶܐ ܕܶܐܫܬܰܘܕܺܝ ܠܰܐܒܳܗܰܘ̈ܗܝ. ܡܶܛܠ ܕܟܽܠܡܶܕܶܡ ܕܡܶܢܶܗ ܐܶܬܥܒܶܕ ܐܘ ܐܶܬܡܰܠܰܠ ܫܪܳܪܰܐ ܗܘ ܘܠܐ ܡܶܫܬܰܚܠܰܦ.
ܘܰܥܒܳܕ ܐܺܝܕܰܘ̈ܗܝ ܩܽܘܫܬܳܐ ܘܕܺܝܢܳܐ. ܘܩܰܝܳܡܺܝܢ ܠܥܳܠܰܡ ܥܳܠܡܺܝܢ. ܘܰܡܫܰܪܪܺܝܢ ܟܽܠܗܽܘܢ ܦܽܘܩܕܳܢܰܘ̈ܗܝ. ܘܰܥܒܺܝܕܺܝܢ ܒܙܰܕܺܝܩܽܘܬܳܐ ܘܰܒܩܽܘܫܬܳܐ. ܘܟܽܠܡܶܕܶܡ ܠܡ ܕܰܥܒܰܕ ܫܪܳܪܳܐ ܐܝ̣ܬܰܘܗܝ ܘܕܺܝܢܳܐ. ܘܠܰܝܬ ܕܰܓܳܠܽܘܬܳܐ ܒܰܐܝܠܶܝܢ ܕܶܐܬܥܒܶܕܘ ܡ̣ܢ ܡܳܪܝܳܐ. ܘܠܐ ܥܒܰܕ ܡܶܕܶܡ ܕܠܐ ܡܶܬܒܥܶܐ ܕܟܰܕ ܒܛܽܘ̈ܒܶܐ ܡܶܬܒܰܣܡܺܝܢ ܒܢܰܝ̈ܢܳܫܳܐ ܢܶܕܥܽܘܢ ܕܗܳܠܶܝܢ ܡܶܛܠ ܛܳܒܷ̈ܐ ܐܶܬܥܒܶܕܘ. ܘܟܕ ܒܗܳܢܽܘܢ ܡܶܬܐܰܠܨܺܝܢ ܕܰܠܩܽܘܒܠܳܐ܇ ܢܶܣܬܰܟܠܽܘܢ ܬܘܒ ܕܗܳܠܝܢ ܦܺܐܪ̈ܶܐ ܐܶܢܘܢ ܕܥܳܒܪ̈ܰܝ ܥܠ ܦܽܘܩܕܳܢܳܐ. ܘܟܰܕ ܒܙܰܕܺܝܩܽܘܬܶܗ ܕܡܳܪܝܳܐ ܘܰܒܩܽܘܫܬܶܗ ܐܶܬܥܒܶܕܘ. ܦܽܘܪܩܳܢܳܐ ܐܝ̣ܬܰܝܗܽܘܢ ܕܥܰܡܶܗ ܕܶܐܡܰܪ ܢܒܺܝܐ. ܘܗܰܘ ܕܥܳܕܶܠ ܘܳܐܡܰܪ ܕܰܠܡܳܢܳܐ ܗܘܰܝ̈ ܐܽܘܪ̈ܕܥܶܐ. ܘܩܰܠܡܳܐ ܘܚܰܠܽܘܛܳܐ ܘܩܰܡܨܳܐ ܘܙܳܚܠܳܐ ܘܒܰܪܕܳܐ. ܢܶܕܰܥ ܕܠܘ ܒܺܝ̈ܫܶܐ ܐܶܢܘܢ. ܕܒܰܙܒܰܢ ܦܽܘܪܩܳܢܳܐ ܥܒܰܕ ܒܗܽܘܢ ܐܰܠܗܳܐ ܠܥܰܡܶܗ. ܘܰܒܝܰܕ ܗܳܠܝܢ ܕܡܶܣܬܰܒܰܪ ܕܠܐ ܡܶܬܒܰܥ̈ܝܳܢ ܚܰܝܠܳܐ ܝܰܗܒ ܒܗܶܝܢ ܠܥܰܡܳܐ ܩܰܕܺܝܫܳܐ.
ܘܡܶܬܕܟܰܪ ܠܥܳܠܰܡ ܩܝܳܡܶܗ. ܩܰܕܝ̣ܫ ܗܽܘ ܘܰܕܚܺܝܠ ܫܡܶܗ. ܗܰܘ ܕܡܶܢܶܗ ܡܶܬܐܶܡܰܪ ܩܰܝܳܡ ܗܘ ܘܠܳܐ ܡܶܫܬܰܚܠܰܦ܆ ܡܶܛܠ ܕܩܰܕܺܝܫܰܐ ܗܘ ܘܰܕܚܺܝܠܳܐ. ܩܰܕܺܝܫܳܐ ܕܠܐ ܡܕܰܓܶܠ. ܘܶܐܢ ܡܕܰܓܶܠ ܠܘ ܩܰܕܺܝܫܰܐ ܗܘ. ܘܥܰܠܗܳܕܐ ܠܡ ܠܐ ܛܳܥܶܐ ܐܰܝܠܝܢ ܕܡܶܫܬܰܘܕܶܐ. ܐܡ̣ܪ ܢܒܺܝܐ.
ܪܺܝܫ ܚܶܟܡܬܳܐ ܕܶܚܠܬܶܗ ܕܡܳܪܝܳܐ (ܐܝܘܒ ܟܚ:ܟܚ ܡ̈ܬܠܐ ܝܗ:ܠܓ ܒܰܪ ܐܰܣܺܝܪܳܐ ܐ:ܝܘ). ܘܣܽܘܟܳܠܳܐ ܛܳܒܳܐ ܠܥܳܒܽܘܕܶܝܗ̇. ܗܳܕܳܐ ܗܝ ܠܰܡ ܚܶܟܡܬܳܐ ܡܫܰܡܠܰܝܬܳܐ. ܟܕ ܡ̣ܢ ܐܰܠܗܳܐ ܢܶܕܚܰܠ ܒܰܪܢܳܫܳܐ. ܘܪܺܝܫܺܝܬܳܐ ܕܣܽܘ̈ܟܳܠܶܐ ܗܳܕܳܐ ܗܝ: ܕܰܒܝܰܕ ܕܶܚܠܬܳܐ ܕܡܳܪܝܳܐ ܢܶܫܬܰܪܰܪ ܠܗ ܬܰܠܡܺܝܕܳܐ. ܠܘ ܥܕܰܡܳܐ ܠܣܳܟܳܐ ܕܚܰܝܷ̈ܐ ܐܢܳܫܳܝ̈ܐ ܡܬܰܚܡܳܐ ܚܶܟܡܬܶܗ ܕܗܰܘ ܕܕܳܚܶܠ ܡ̣ܢ ܐܰܠܗܳܐ. ܠܐ ܠܥܳܠܰܡ ܩܰܝܳܡܳܐ ܘܰܢܛܺܝܪܳܐ ܬܶܫܒܽܘܚܬܳܐ ܕܚܶܟܡܬܶܗ. ܐܝܟ ܡܶܠܬܶܗ ܕܰܢܒܺܝܐ.
ܕܬܶܫܒܽܘܚܬܶܗ ܩܰܝܳܡܳܐ ܠܥܳܠܰܡ. ܕܳܐܦ ܚܢܰܢ
ܢܨܰܠܶܐ ܕܰܠܗܳܕܐ ܚܶܟܡܬܳܐ ܢܶܫܬܘܶܐ ܒܝܰܕ ܝܶܫܘ̇ܥ ܡܫܝ̣ܚܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀
ܡܙܡܘܪܐ ܕܡܐܐ ܘܬܪܥܣܪ
ܡܰܘܕܰܥ ܥܰܠ ܛܽܘ̈ܒܶܐ ܕܰܢܛܺܝܪܺܝܢ ܠܥܳܒ̈ܕܰܝ ܙܶܕ̈ܩܳܬܳܐ. ܘܥܰܠ ܕܶܢܚܶܗ ܕܥܰܡܰܢܽܘܐܝܠ ܒܥܳܠܡܳܐ ܕܙܰܕܺܝ̈ܩܶܐ.
ܐܰܒܳܗܴ̈ܬܳܐ ܟܺܐܢ̈ܐ ܐܰܝܠܶܝܢ ܕܰܐܪܓܶܫܘ ܒܡܰܠܟܽܘܬܶܗ ܕܰܐܠܗܳܐ. ܘܰܛܥܰܡܘ ܒܢܰܦܫܗܽܘܢ ܣܰܒܪܳܐ ܪܰܒܳܐ ܕܡܽܘ̈ܠܟܳܢܰܘܗܝ. ܒܰܫܩܳܠܛܰܥܢܳܐ ܓܝܪ ܡܦܰܩܕܺܝܢ ܗܘܰܘ ܠܰܒܢܰܝ̈ܗܘܢ ܠܡܶܛܰܪ ܦܽܘ̈ܩܕܳܢܰܘܗܝ ܕܡܳܪܝܳܐ ܘܰܠܡܶܕܚܰܠ ܡܶܢܶܗ. ܡܶܛܠܗܳܢܐ ܕܰܘܝܕ ܗܰܘ ܡܰܠܟܳܐ ܘܰܐܒܳܐ ܕܡܰܠܟ̈ܐ ܟܺܐܢ̈ܐ ܡܦܰܩܶܕ ܗܘܳܐ ܠܰܫܠܶܝܡܽܘܢ ܒܪܶܗ ܕܢܶܙܕܗܰܪ ܒܦܽܘܩ̈ܕܳܢܰܘܗܝ ܕܡܳܪܝܳܐ ܘܢܶܕܚܰܠ ܡܶܢܶܗ. ܘܡ̣ܢ ܒܳܬܰܪ ܕܰܐܣܓܺܝ ܦܰܩܕܶܗ ܥܠ ܐܽܘܪܚܳܐ ܕܟܺܐܢܽܘܬܳܐ ܐܡ̣ܪ ܠܶܗ: ܕܶܐܬܚܰܝܰܠ ܘܰܗܘܺܝ ܓܰܒܪܳܐ. ܘܛܰܪ ܢܳܛܽܘܪ̈ܘܳܬܶܗ ܕܡܳܪܝܐ ܐܰܠܳܗܳܟ ܘܗܰܠܶܟ ܒܽܐܘܪ̈ܚܳܬܶܗ (ܐ ܡܠܟ̈ܐ ܒ: ܒ-ܓ). ܐܰܙܝ̣ܥ ܟܶܢܳܪܶܗ ܘܶܐܡܰܪ ܒܶܐܕ̈ܢܰܘܗܝ ܡܰܙܡܽܘܪܳܐ ܗܳܢܐ ܘܶܐܡܰܪ:
ܛܽܘܒܰܘܗܝ ܠܓܰܒܪܳܐ ܕܕܳܚܶܠ ܡ̣ܢ ܡܳܪܝܳܐ. ܘܰܙܗܝ̣ܪ ܒܦܽܘܩ̈ܕܳܢܰܘܗܝ. ܐܰܝܟܰܢܳܐ ܗܳܟܺܝܠ ܕܶܐܡܪܶܬ ܡܶܛܠ ܕܢܺܐܠܰܦ ܫܠܶܝܡܽܘܢ ܘܰܠܡܶܕܚܰܠ ܡ̣ܢ ܐܰܠܗܳܐ ܬܶܫܒܽܘܚܬܳܐ ܗܳܕܐ ܕܡܳܐܐ ܘܬܰܪܬܰܥܶܣܪ̈ܶܐ. ܐܡ̣ܪ ܛܽܘܒܳܢܳܐ ܕܰܘܝܕ ܟܕ ܝܳܗܶܒ ܛܽܘܒܳܐ ܠܗܰܘ ܕܕܳܚܶܠ ܡ̣ܢ ܡܳܪܝܳܐ ܘܢܳܛܰܪ ܦܽܘ̈ܩܕܳܢܰܘܗܝ. ܘܥܡ ܙܗܺܝܪܽܘܬܳܐ ܘܕܶܚܠܬܳܐ ܢܶܛܰܪ ܦܽܘ̈ܩܕܳܢܶܐ. ܗܰܘ ܕܕܳܚܶܠ ܡܶܢ ܡܳܪܝܳܐ ܘܟܺܐܢܽܘܬܳܐ ܠܐ ܦܳܠܰܚ. ܡܒܰܪܰܝ ܗܽܘ ܡ̣ܢ ܛܽܘܒܳܐ ܗܳܢܐ. ܡܶܛܠ ܕܺܐܝܬ ܐܢܳܫܺܝ̈ܢ ܕܕܳܚܠܺܝܢ ܡ̣ܢ ܐܰܠܗܳܐ. ܒܰܕܟܳܘܝܳܐ ܠܗܽܘܢ ܬܺܐܪܬܗܽܘܢ ܒܰܥ̈ܒܳܕܶܐ ܒܺܝ̈ܫܶܐ ܕܰܦܠܰܚܘ. ܘܥܰܠܗܳܝ ܕܳܚܠܺܝܢ ܘܡܶܣܬܰܪܕܺܝܢ ܡ̣ܢ ܕܺܝܢܳܐ. ܡܶܛܠ ܥܒܳܕܰܝ̈ܗܘܢ ܒܺܝ̈ܫܶܐ. ܐܰܠܘܶܬ ܠܛܽܘܒܳܐ ܗܳܢܐ. ܗܳܝ ܗܰܘ ܕܕܳܚܶܠ ܡܶܢ ܡܳܪܝܳܐ. ܢܶܗܘܶܐ ܙܗܺܝܪ ܘܦܽܘ̈ܩܕܳܢܰܘܗܝ. ܡܶܛܠ ܕܠܐ ܡܥܰܕܪܳܐ ܕܶܚܠܬܳܐ ܕܡܶܢ ܕܺܝܢܳܐ ܠܠܶܣܛܳܝ̈ܐ ܘܓܰܝܳܪ̈ܶܐ ܕܰܡܩܰܘܶܝܢ ܒܰܥ̈ܒܳܕܶܐ ܒܺܝ̈ܫܶܐ. ܘܰܒܗܳܝ ܕܶܐܡܰܪ ܩܳܛܽܘܠܳܐ ܕܡܶܢ ܙܰܒܢܳܐ ܕܳܚܶܠ ܗܘܺܝܬ ܡ̣ܢ ܫܳܥܬܳܐ ܗܳܕܐ ܕܕܺܝܢܳܐ. ܘܡܳܐ ܕܡܶܬܬܚܶܕ ܘܡܶܬܚܰܝܰܒ ܕܢܶܬܦܪܰܥ ܣܽܘܥܪ̈ܳܢܰܘܗܝ. ܐܠܐ ܝܰܬܺܝܪܳܐ ܫܳܘܶܐ ܠܰܡܣܳܡ ܒܪܺܝܫܳܐ. ܕܰܠܘܳܬ ܗܰܘ ܕܗܳܕܶܐ ܥܒܰܕ ܐܡ̣ܪ ܢܒܺܝܐ.
ܢܶܗܘܶܐ ܚܰܝܠܬܳܢ ܙܰܪܥܶܗ ܒܰܐܪܥܳܐ. ܘܢܶܬܒܰܪܰܟ ܒܕܳܪܳܐ ܕܙܰܕܺܝ̈ܩܶܐ. ܐܰܪܥܳܐ ܕܶܝܢ ܐܝ̣ܬܶܝܗ̇ ܗܳܝ ܕܰܢܛܺܝܪܳܐ ܕܬܶܗܘܶܐ ܝܳܪܬܽܘܬܳܐ ܠܩܰܕܺܝ̈ܫܶܐ ܒܥܳܠܡܳܐ ܚܰܕܬܳܐ. ܘܕܳܪܳܐ ܬܽܘܒ ܕܙܰܕܺܝ̈ܩܶܐ ܐܝ̣ܬܰܘܗܝ ܟܢܽܘܫܝܳܐ ܗܰܘ ܕܥܶܪ̈ܒܶܐ ܕܰܡܩܺܝܡ ܪܳܥܝܳܐ ܡܶܢ ܝܰܡܺܝܢܶܗ. ܒܝܰܘܡܳܐ ܕܕܺܝܢܳܐ ܘܳܐܡܰܪ ܠܗܽܘܢ. ܕܬܰܘ ܒܪ̈ܺܝܟܰܘܗܝ ܕܳܐܒܝ. ܝ̣ܪܰܬܘ ܡܰܠܟܽܘܬܳܐ ܕܰܥܬܺܝܕܳܐ ܗܘܳܬ ܠܟܽܘܢ ܡ̣ܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܗܳܟܰܢ ܢܶܬܒܰܪܰܟ. ܘܣܳܓܶܐ ܥܽܘܬܪܶܗ ܘܩܶܢܝܳܢܶܗ. ܘܩܰܝܳܡܳܐ ܙܰܕܺܝܩܽܘܬܶܗ ܠܥܳܠܰܡ.
ܘܩܶܢܝܳܢܳܐ ܘܥܽܘܬܪܳܐ ܢܶܣܓܶܐ ܒܒܰܝܬܶܗ. ܘܙܰܕܝ̣ܩܽܘܬܶܗ ܬܩܽܘܡ ܠܥܳܠܰܡ. ܐܰܝܢܳܐ ܓܶܝܪ ܩܶܢܝܳܢܳܐ ܘܥܽܘܬܪܳܐ ܡܶܬܦܰܚܰܡ ܒܡܰܠܟܽܘܬܳܐ ܕܰܐܠܗܳܐ. ܐܰܘ ܐܰܝܟܳܐ ܐܝ̣ܬ ܙܰܕܺܝܩܽܘܬܳܐ ܕܩܰܝܳܡܳܐ ܠܥܳܠܰܡ. ܐܶܠܐ ܝܳܪܬܽܘܬܳܐ ܕܩܰܕܺܝ̈ܫܶܐ ܕܠܐ ܡܶܬܚܰܒܠܳܐ. ܘܒܳܬܰܪ ܗܳܕܐ ܡܰܘܕܰܥ ܥܠ ܢܽܘܗܪܳܐ ܐܰܠܗܳܝܐ ܕܕܳܢܰܚ ܠܙܰܕܺܝ̈ܩܶܐ ܒܥܳܠܡܳܐ ܚܰܕܬܳܐ.
ܕܢܰܚ ܢܽܘܗܪܳܐ ܒܚܶܫܽܘܟܳܐ ܠܰܬܪ̈ܺܝܨܶܐ. ܘܗܳܕܐ ܐܝ̣ܬܝܗ̇ ܗܳܝ ܕܶܐܡܰܪ ܝܽܘܚܰܢܳܢ ܟܳܪܽܘܙܳܗ̇ ܕܡܶܠܬܳܐ: ܕܗܽܘ ܢܽܘܗܪܳܐ ܒܚܶܫܽܘܟܳܐ ܡܰܢܗܰܪ (ܝܘܚܢܢ ܐ: ܗ). ܡܶܛܠ ܕܰܒܥܳܠܡܳܐ ܗܳܢܐ ܠܚܰܛܳܝ̈ܐ ܕܢܰܚ ܢܽܘܗܪܳܐ ܫܡܰܝܳܢܳܐ. ܐܝܟ ܕܶܐܡܰܪ ܕܶܐܢܳܐܐ ܐܢܳܐ ܢܽܘܗܪܶܗ ܕܥܳܠܡܳܐ (ܝܘܚܢܢ ܚ: ܝܒ). ܘܕܰܘܝܕ ܐܡ̣ܪ ܕܢܰܚ ܢܽܘܗܪܳܐ ܒܚܶܫܽܘܟܳܐ ܠܰܬܪ̈ܺܝܨܶܐ. ܕܳܡܝܳܐ ܡܶܠܬܳܐ ܕܰܒܥܳܠܡܳܐ ܚܰܕܬܳܐ. ܟܕ ܥܠ ܟܺܐܢ̈ܐ ܡܪܰܚܶܡ. ܘܥܠ ܥܰܘܴ̈ܠܶܐ ܘܒܺܝ̈ܫܶܐ ܡܶܬܩܰܫܶܐ.
ܘܰܡܪܰܚܶܡ ܥܠ ܙܰܕܺܝ̈ܩܶܐ. ܘܒܳܬܰܪܟܶܢ ܐܡ̇ܪ: ܛܳܒ ܗܽܘ ܓܰܒܪܳܐ ܕܰܡܪܰܚܶܡ ܘܡܰܘܙܶܦ. ܘܰܡܣܰܝܒܰܪ ܡܶܠܰܘ̈ܗܝ ܒܕܺܝܢܳܐ. ܘܰܠܥܳܠܰܡ ܠܳܐ ܢܙܽܘܥ. ܗܰܘ ܕܰܡܩܰܕܶܡ ܘܡܰܘܙܶܦ܆ ܠܟܺܐܢܽܘܬܳܐ ܪ̈ܰܚܡܶܐ ܥܠ ܣܢܺܝ̈ܩܶܐ܆ ܐܝܟ ܕܰܠܘܳܬ ܡܳܪܶܐ ܚܰܘܒܳܐ. ܢܳܦܩܳܐ ܠܐܽܘܪܥܶܗ ܒܕܺܝܢܳܐ. ܘܰܡܣܰܝܒܰܪ ܡܶܠܰܘ̈ܗܝ ܒܕܺܝܢܳܐ. ܡܶܛܠ ܕܰܚܠܳܦ ܒܺܝܫܽܘܬܳܐ ܒܪ̈ܰܚܡܶܐ ܐܶܬܚܰܫܰܚ ܠܘܳܬ ܩܰܪܺܝܒܶܗ. ܘܥܰܠܗܳܝ ܠܐ ܙܳܐܱܥ ܘܠܐ ܕܳܚܶܠ ܡ̣ܢ ܟܺܐܢܽܘܬܳܐ ܡܶܛܠ ܕܩܰܕܶܡ ܪܰܥܝܳܗ̇ ܕܪܰܚܶܡ ܥܠ ܣܢܺܝ̈ܩܶܐ. ܗܳܢܐ ܓܝܪ ܐܝ̣ܬܘܗܝ ܗܰܘ ܡܳܟܣܳܐ ܕܳܐܡܰܪ ܗܘܳܐ ܟܕ ܡܶܬܬܰܢܰܚ܆ ܐܰܠܗܳܐ ܚܽܘܢܰܝܢܝ ܠܚܰܛܳܝܳܐ (ܠܘܩܐ ܝܚ: ܝܓ). ܬܘܒ ܕܶܝܢ ܥܠ ܙܰܕܺܝܩܳܐ ܐܝ̣ܬܶܝܗ̇ ܡܶܠܬܶܗ.
ܕܽܘܟܪܳܢܳܐ ܠܥܳܠܰܡ ܢܶܗܘܶܐ ܠܙܰܕܺܝܩܳܐ. ܘܡ̣ܢ ܛܶܒܳܐ ܒܺܝܫܳܐ ܠܐ ܢܶܕܚܰܠ. ܡܶܛܠ ܗܳܢܐ ܕܽܘܟܪܳܢܶܗ ܕܙܰܕܺܝܩܳܐ ܠܥܳܠܰܡ ܠܐ ܥܳܒܰܪ ܢܳܛܰܪ ܠܶܗ ܒܥܳܠܡܳܐ ܚܰܕܬܳܐ. ܘܠܐ ܕܳܚܶܠ ܡܶܢ ܛܶܒܳܐ ܒܺܝܫܳܐ ܕܬܰܫܢܺܝܩܳܐ. ܘܠܐ ܡ̣ܢ ܢܽܘܪܳܐ ܕܰܠܥܳܠܰܡ ܡܶܬܪܗܶܒ. ܗܳܢܰܘ ܓܝܪ ܛܶܒܳܐ ܒܺܝܫܳܐ. ܘܡܶܛܠ ܗܳܢܐ ܕܰܐܬܩܶܢ ܠܶܒܶܗ ܘܥܰܒܕܶܗ ܒܶܝܬ ܡܰܫܪܝܳܐ ܠܰܐܠܗܳܐ. ܘܬܽܘܟܠܳܢܳܐ ܪܰܒܳܐ ܐܝ̣ܬ ܠܶܗ. ܒܗܳܝ ܕܫܰܪܰܪ ܠܶܒܶܗ ܒܦܽܘܠܚܳܢܳܐ ܕܟܺܐܢܽܘܬܳܐ.
ܘܠܐ ܕܳܚܶܠ ܥܕܰܡܳܐ ܕܚܳܙܶܐ ܒܰܒܥܶܠܕ̈ܒܳܒܰܘܗܝ. ܟܕ ܐܝ̣ܬ ܒܗܽܘܢ ܚܰܝܠܳܐ. ܡܳܐ ܕܚܳܙܶܐ ܕܡܶܬܡܰܣܪܺܝܢ ܒܕܺܝܢܶܗ ܕܡܰܠܟܳܐ܆ ܡܶܛܠ ܕܩܰܕܶܡ ܦܰܪܢܶܣ ܐܰܝܠܝܢ ܕܰܩܢܳܐ ܒܚܽܘ̈ܫܳܒܶܐ. ܒܚܽܘ̈ܫܳܒܶܐ ܛܳܒܷ̈ܐ ܘܒܰܥ̈ܒܳܕܶܐ ܟܺܐܢ̈ܐ.
ܒܰܕܰܪ ܠܰܡ ܘܝܰܗܒ ܠܒܳܝ̈ܫܶܐ. ܘܙܰܕܺܝܩܽܘܬܶܗ ܩܰܝܳܡܳܐ ܠܥܳܠܰܡ ܥܳܠܡܺܝܢ. ܘܩܰܪܢܶܗ ܬܶܬܪܺܝܡ ܒܫܽܘܒܚܳܐ. ܒܗܳܝ ܠܰܡ ܕܒܰܕܰܪ ܘܝܰܗܒ ܠܒܳܝ̈ܫܶܐ. ܣܢܺܐܓܪ̈ܶܐ ܣܰܓܺܝ̈ܐܐ ܫܰܕܰܪ ܩܕܳܡܰܘܗܝ ܠܘܳܬ ܕܰܝܳܢܳܐ. ܗܳܠܝܢ ܙܰܪ̈ܥܶܐ ܛܳܒ̈ܐ ܕܰܙܪܰܥܘ ܒܰܐܪܥܳܐ ܕܚܰܝ̈ܐ. ܡܰܣܓܶܝܢ ܠܗ̇ ܠܰܥܠܰܠܬܶܗ ܒܶܐܕܪܳܐ ܕܡܰܠܟܽܘܬܳܐ. ܘܢܰܦ̈ܫܳܬܳܐ ܕܰܗܘܱ̈ܝ ܐܰܪ̈ܥܳܬܳܐ ܠܙܰܪ̈ܥܰܘܗܝ ܚܰܕ ܟܡܳܐ ܡܰܦܢܶܝܢ ܠܶܗ ܦܺܐܪ̈ܐ. ܠܘ ܕܗܳܢܐ ܥܳܠܡܳܐ ܐܝ̣ܬܶܝܗ̇ ܒܰܠܚܽܘܕ ܙܰܕܺܝܩܽܘܬܶܗ. ܡܶܛܠ ܕܰܠܥܳܠܰܡ ܥܳܠܡܺܝܢ ܩܰܝܳܡܳܐ ܙܰܕܺܝܩܽܘܬܶܗ ܒܰܫܡܰܝܳܐ. ܡܳܐ ܕܳܐܡܰܪ ܪܳܥܝܳܐ ܠܘܳܬ ܐܰܟܳܪ̈ܶܐ ܘܰܠܥܶܪ̈ܒܶܐ ܛܳܒ̈ܐ: ܕܬܰܘ ܒܪ̈ܺܝܟܰܘܗܝ ܕܳܐܒܝ ܝ̣ܪܰܬܘ ܡܰܠܟܽܘܬܳܐ܆ ܕܟܶܦܢܶܬ ܘܝܰܗܒܬܽܘܢ ܠܝ̣ ܠܡܶܐܟܰܠ܆ ܘܰܨܗܺܝܬ ܘܰܐܫܩܺܝܬܽܘܢܳܢܝ. ܘܰܐܟܣܢܳܝܳܐ ܗܘܺܝܬ܆ ܘܟܰܢܶܫܬܽܘܢܳܢܝ. ܘܥܰܪܛܶܠܳܝܳܐ ܗܘܺܝܬ ܘܟܰܣܺܝܬܽܘܢܳܢܝ܆ ܘܰܟܪܺܝܗܳܐ ܗܘܺܝܬ ܘܰܣܥܰܪܬܽܘܢܳܢܝ. ܘܒܶܝܬ ܐܰܣܺܝܪ̈ܶܐ ܘܶܐܬܰܝܬܽܘܢ ܠܘܳܬܝ (ܡܬܝ ܟܗ: ܠܕ-ܠܙ). ܘܗܳܝܕܶܝܢ ܡܳܐ ܕܫܳܡܥܺܝܢ ܗܳܠܝܢ ܡܒܰܕܪܰܝ ܙܶܕܩܴ̈ܬܳܐ ܒܢܴ̈ܬ ܩܴ̈ܠܶܐ ܗܳܠܝܢ. ܐܝܟ ܕܰܐܘܕܰܥ ܪܽܘܚܳܐ.
ܥܰܘܳܠܳܐ ܠܰܡ ܢܶܚܙܶܐ ܘܢܶܪܓܰܙ ܘܫܶܢܰܘ̈ܗܝ ܢܚܰܪܶܩ ܐܳܦ ܢܶܬܕܰܠܰܚ. ܘܪܶܓܬܳܐ ܕܪ̈ܰܫܺܝܥܶܐ ܬܺܐܒܰܕ. ܓܰܒܳܐ ܕܰܒܢܱ̈ܝ ܣܶܡܳܠܳܐ ܒܓܰܒܪܳܐ ܥܰܘܳܠܳܐ ܟܰܢܝܶܗ ܢܒܺܝܐ. ܗܳܝ ܕܚܳܙܶܐ ܘܪܳܓܶܙ ܥܠ ܕܠܳܐ ܡܶܫܬܒܶܩ ܡ̣ܢ ܪܳܥܝܳܐ ܓܶܢܣܳܐ ܕܽܐܘܟܳܡܷ̈ܐ ܕܢܺܐܪܰܬ ܥܡ ܥܶܪ̈ܒܶܐ ܐܰܡܪܳܗ̇ ܪܽܘܚܳܐ. ܘܗܳܝ ܕܰܡܚܰܪܶܩ ܫܶܢܰܘ̈ܗܝ ܒܚܶܫܽܘܟܳܐ ܒܰܪܳܝܳܐ ܐܝܟ ܕܶܐܡܰܪ ܡܳܪܰܢ. ܕܬܰܡܳܢ ܢܶܗܘܶܐ ܒܶܟܝܳܐ ܘܚܽܘܪܳܩ ܫܶܢܷ̈ܐ (ܡܬܝ ܚ: ܝܒ ܟܗ: ܠ). ܘܗܳܝ ܕܪܶܓܬܳܐ ܕܪ̈ܰܫܺܝܥܶܐ ܬܺܐܒܰܕ. ܕܡܶܛܠ ܕܪܰܓܘ ܠܚܰܝ̈ܐ ܡܬܽܘܡܳܝ̈ܐ ܘܠܐ ܢܣܰܒܘ. ܡܶܬܕܰܥܟܳܐ ܘܡܰܘܦܝܳܐ ܒܗܽܘܢ ܪܶܓܬܳܐ ܕܛܳܒ̈ܬܳܐ ܘܫܳܪܟܳܐ ܠܠܳܐ ܡܶܕܶܡ. ܕܳܐܦܚܢܰܢ ܢܨܰܠܶܐ ܕܢܶܬܦܰܨܶܐ ܡ̣ܢ ܬܰܫܢܺܝܩܳܐ ܘܡ̣ܢ ܕܺܝܢܳܐ ܕܰܠܥܳܠܰܡ ܒܩܳܠܶܗ ܕܪܳܥܝܳܐ ܛܳܒܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܥܣܪ
ܡܰܠܶܦ ܒܶܗ ܥܰܠ ܪܰܒܽܘܬܳܐ ܕܫܽܘܒܚܶܗ ܕܰܐܠܗܳܐ. ܘܪܽܘܡܪܳܡܶܗ ܕܳܐܕܳܡ ܡܶܢ ܡܰܘܬܳܐ ܘܰܚܒܳܠܳܐ.
ܪܰܒܽܘܬܳܐ ܕܫܽܘܒܚܶܗ ܕܰܐܠܗܳܐ ܘܰܡܥܰܠܝܽܘܬܳܐ ܕܺܐܝܩܳܪܶܗ܆ ܡܶܫܬܰܥܶܐ ܗܘܳܐ ܛܽܘܒܳܢܐ ܕܰܘܝܕ ܩܕܳܡ ܟܢܽܘܫܝܳܐ ܕܰܢܒܺܝ̈ܐ ܘܟܳܗܢ̈ܐ. ܟܕ ܡܙܰܡܰܪ ܗܘܳܐ ܬܶܫܒܽܘܚܬܳܐ ܗܳܕܐ ܕܡܳܐܐ ܘܰܬܠܳܬܰܥܶܣܪ̈ܶܐ. ܟܕ ܡܚܰܦܶܛ ܗܘܳܐ ܠܗܽܘܢ ܕܢܶܗܘܘܢ ܡܫܰܒܚܴ̈ܢܶܐ. ܠܗܰܘ ܕܰܕܚܝ̣ܠ ܘܪܰܒ ܘܰܡܥܰܠܰܝ ܡܶܢ ܟܽܠܗܘܢ ܐܰܠܳܗ̈ܐ. ܘܛܳܐܷܢ ܗܘܳܐ ܕܰܕܠܳܐ ܫܶܠܝܳܐ ܢܒܰܪܟܽܘܢܳܝܗܝ. ܡܶܛܠ ܕܪܳܡ ܗܘ ܘܰܡܥܰܠܰܝ ܘܰܫܒܺܝܚ ܥܰܠ ܟܽܠܗܽܘܢ ܥܰܡܡ̈ܐ ܕܰܬܚܶܝܬ ܫܡܰܝܳܐ. ܡܶܛܠ ܕܰܠܘܳܬ ܥܒܳܕܰܘ̈ܗܝ ܕܰܐܠܗܳܐ ܐܰܙܝ̣ܥ ܙܽܘܡܳܪܶܗ ܘܳܐܡܰܪ:
ܕܫܰܒܰܚܘ ܥܰܒ̈ܕܰܘܗܝ ܕܡܳܪܝܳܐ ܘܫܰܒܰܚܘ ܠܰܫܡܶܗ ܕܡܳܪܝܳܐ. ܟܕ ܓܝܪ ܩܳܝܡܺܝܢ ܗܘܰܘ ܟܽܘܡܪ̈ܶܐ ܘܠܶܘܳܝ̈ܐ ܒܬܰܪܥܳܐ ܕܡܰܫܟܰܢ ܙܰܒܢܳܐ ܒܥܶܕܳܢܳܐ ܕܡܰܕ̈ܢܳܚܰܝ ܫܶܡܫܶܐ ܘܫܳܠܶܝܢ ܡ̣ܢ ܗܳܝ ܕܰܢܫܰܒܚܽܘܢ ܐܶܬܳܐ ܡܰܠܟܳܐ ܟܺܐܢܳܐ ܐܶܫܟܰܚ ܐܶܢܘܢ ܕܒܰܛܝ̣ܠܝ̣ܢ ܘܶܐܡܰܪ ܠܗܽܘܢ. ܢܫܰܒܰܚ ܠܰܫܡܶܗ ܕܡܳܪܝܳܐ. ܡܶܛܠ ܕܰܡܫܰܒܚܰܐ ܗܘ ܘܡܳܪܳܐ. ܘܠܐ ܬܶܫܠܽܘܢ ܡ̣ܢ ܬܶܫܒܽܘܚܬܶܗ.
ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ ܡ̣ܢ ܥܳܠܰܡ ܘܰܥܕܰܡܳܐ ܠܥܳܠܰܡ. ܠܘ ܐܝܟ ܕܰܣܢܝ̣ܩ ܥܰܠ ܫܽܘܒܚܳܐ ܐܡ̇ܪ ܗܘܳܐ. ܫܰܒܰܚܘ ܥܰܒܕܰܘ̈ܗܝ ܕܡܳܪܝܳܐ ܘܢܶܗܘܶܐ ܫܡܶܗ ܕܡܳܪܝܳܐ ܡܒܰܪܟܳܐ. ܐܠܐ ܕܡܶܢܰܢ ܕܶܝܢ ܕܝ̣ܠܰܢ ܠܰܡ. ܢܶܫܬܰܒܰܚ ܘܢܶܬܒܰܪܰܟ. ܘܰܚܢܰܢ ܢܶܫܬܰܒܰܚ ܒܶܗ ܘܢܶܬܝܰܬܰܪ. ܘܗܰܘ ܓܝܪ ܕܰܡܫܰܒܰܚ ܠܶܗ ܢܶܫܬܰܒܰܚ. ܘܗܰܘ ܕܰܡܒܰܪܰܟ ܠܶܗ ܡܶܬܒܰܪܰܟ. ܗܽܘ ܓܝܪ ܥܠ ܫܽܘܒܚܰܢ ܠܳܐ ܣܢܺܝܩ. ܐܠܐ ܕܡܶܢܰܢ ܢܳܣܶܒ. ܠܢ ܡܰܥܛܶܦ ܘܝܳܗܶܒ ܠܰܢ. ܐܡ̣ܪ ܓܝܪ ܦܳܪܽܘܩܰܢ: ܕܰܒܟܰܝܠܳܐ ܕܰܡܟܺܝܠܺܝܢ ܐܢܬܽܘܢ. ܡܶܬܬܟܺܝܠ ܠܟܽܘܢ (ܡܪܩܘܣ ܕ: ܟܕ ܠܘܩܐ ܘ: ܠܚ). ܡܳܕܶܝܢ ܒܗܳܠܶܝܢ ܩܴ̈ܠܐ ܩܳܪܒܺܝܢܰܢ ܠܘܳܬ ܐܰܠܗܳܐ ܘܰܒܗܽܘܢ ܢܳܦܶܩ ܠܘܳܬܰܢ ܦܽܘܪܥܳܢܶܗ. ܕܰܢܚܰܘܶܐ ܕܶܝܢ ܢܒܺܝܳܐ ܕܥܠ ܫܽܘܒܚܳܐ ܕܺܝܠܢ ܠܐ ܣܢܺܝܩ. ܡܳܪܝܳܐ ܐܡ̇ܪ:
ܡܶܢ ܡܰܕܢܳܚܰܘ̈ܗܝ ܕܫܶܡܫܳܐ ܥܕܰܡܳܐ ܠܡܰܥܪ̈ܳܒܰܘܗܝ ܪܰܒ ܗܽܘ ܫܡܶܗ ܕܡܳܪܝܳܐ. ܠܰܝܬ ܡܳܕܶܝܢ ܐܰܬܪܳܐ ܠܫܽܘܒܚܳܐ ܕܬܰܚܬܳܝ̈ܐ ܐܶܢ ܒܪ̈ܰܚܡܶܐ ܠܐ ܡܶܬܪܟܶܢ ܘܰܡܩܰܒܶܠ ܠܗ. ܡܶܛܠ ܕܒܰܝܢܳܬ ܡܰܕܢܳܚܰܘ̈ܗܝ ܕܫܶܡܫܳܐ ܠܡܰܥܪ̈ܳܒܰܘܗܝ ܣܝ̣ܡ ܟܽܠܶܗ ܥܳܠܡܳܐ.
ܘܪܳܡ ܥܰܠ ܟܽܠܗܽܘܢ ܥܰܡܡ̈ܐ ܡܳܪܝܳܐ. ܘܥܰܠ ܫܡܰܝܳܐ ܐܝ̣ܩܳܪܶܗ. ܥܰܠ ܥܰܡܡ̈ܐ ܪܳܡ ܡܶܛܠ ܕܠܐ ܣܳܓܕܺܝܢ ܠܶܗ ܐܝܟ ܐܰܝܠܶܝܢ ܕܒܺܐܝ̈ܕܰܘܗܝ ܐܶܬܥܒܶܕܘ. ܒܰܫܡܰܝܳܐ ܕܶܝܢ ܡܶܬܝܰܩܰܪ ܘܡܶܫܬܰܒܰܚ. ܘܟܕ ܕܶܝܢ ܡܙܝ̣ܥ ܗܘܳܐ ܢܒܺܝܐ ܩܺܝܬܳܪܶܗ ܒܠܶܒܳܐ ܕܰܡܫܰܘܰܪ ܘܰܡܩܰܝܶܙ ܡ̣ܢ ܣܰܓܺܝܐܽܘܬ ܚܰܕܽܘܬܳܐ. ܩܳܥܶܐ ܗܘܳܐ ܘܳܐܡܰܪ:
ܡܰܢܽܘ ܐܰܝܟ ܡܳܪܝܳܐ ܐܰܠܳܗܰܢ ܕܝܳܬܶܒ ܒܪܰܘܡܳܐ ܘܚܳܙܶܐ ܒܥܽܘܡܩܳܐ ܒܰܫܡܰܝܳܐ ܘܒܰܐܪܥܳܐ. ܗܳܠܝܢ ܐܡ̣ܪ ܠܘ ܟܕ ܦܪܰܫ ܘܝܰܗܒ ܐܰܬܪܳܐ ܥܶܠܳܝܳܐ ܠܡܰܘܬܒܳܐ ܕܰܐܠܗܳܐ. ܒܥܽܘܡܩܳܐ ܕܶܝܢ ܠܳܐ ܫܰܒܩܶܗ ܕܰܢܩܰܘܶܐ. ܠܗܰܘ ܕܰܦܫܺܝܛܰܐ ܗܘ ܒܰܟܝܳܢܶܗ. ܐܶܠܐ ܗܳܕܐ ܕܶܐܡܰܪ. ܕܝܳܬܶܒ ܒܪܰܘܡܳܐ ܥܰܠ ܡܥܰܠܝܽܘܬܳܐ ܘܪܰܒܽܘܬܳܐ ܕܰܟܝܳܢܶܗ ܐܰܠܶܦ. ܘܠܐ ܡܶܬܕܪܶܟ ܘܠܳܐ ܡܶܬܡܰܫܰܚ ܪܰܘܡܳܐ ܕܰܟܝܳܢܶܗ. ܠܘ ܒܰܚܠܽܘܕ ܡܶܢ ܬܰܚܬܳܝ̈ܐ ܐܠܐ ܘܡ̣ܢ ܥܶܠܳܝ̈ܐ. ܘܗܳܕܐ ܐܡ̣ܪ ܕܠܘ ܒܰܠܚܽܘܕ ܡ̣ܢ ܐܰܪܥܳܐ ܪܳܡ. ܐܠܐ ܐܦ ܘܡܶܢ ܫܡܰܝܳܐ. ܘܩܰܪܺܝܒ ܠܟܽܠܗܽܘܢ ܟܝܴ̈ܢܶܐ. ܠܥܶܠܳܝ̈ܐ ܐܝܟ ܢܰܦܫܳܐ ܠܡܽܘܚܳܐ ܕܒܰܪܢܳܫܳܐ. ܘܳܐܦ ܠܬܰܚܬܳܝ̈ܐ ܐܰܝܟ ܕܩܰܪܺܝܒܳܐ ܠܥܶܩ̈ܒܶܐ ܕܪ̈ܶܓܠܶܐ. ܘܰܐܝܟ ܕܠܰܝܬ ܗܰܕܳܡܳܐ ܒܦܰܓܪܳܐ ܕܩܰܪܺܝܒ ܠܢܰܦܫܳܐ ܝܰܬܺܝܪ ܡܶܢ ܚܰܒܪܶܗ. ܗܳܟܰܢܳܐ ܠܰܝܬ ܚܰܕ ܡ̣ܢ ܟܝܴ̈ܢܶܐ ܕܥܶܠܳܝ̈ܐ ܘܰܕܬܰܚܬܳܝ̈ܐ ܕܰܩܢܶܐ ܩܰܪܺܝܒܽܘܬܳܐ ܠܘܳܬ ܟܝܳܢܳܐ ܐܰܠܗܳܝܳܐ ܝܰܬܝ̣ܪ ܡ̣ܢ ܚܰܒܪܶܗ. ܘܡܶܛܠܗܳܕܐ ܐܡ̣ܪ ܢܒܺܝܐ ܕܝܳܬܶܒ ܒܪܰܘܡܳܐ ܘܚܳܙܶܐ ܒܥܽܘܡܩܳܐ ܒܰܫܡܰܝܳܐ ܘܒܰܐܪܥܳܐ. ܘܠܐ ܐܡ̇ܪ ܝܳܬܶܒ ܒܰܫܡܰܝܳܐ ܘܚܳܐܱܪ ܒܰܐܪܥܳܐ. ܐܶܠܐ ܒܪܰܘܡܳܐ. ܟܕ ܠܰܫܡܰܝܳܐ ܘܠܰܐܪܥܳܐ ܒܥܽܘܡܩܳܐ ܣܳܡ ܐܶܢܶܝܢ. ܡܶܛܠ ܕܰܐܝܟ ܕܰܡܬܰܚܬܶܝܢ ܡ̣ܢ ܟܝܳܢܶܗ ܐܰܪ̈ܥܳܢܳܝܶܐ ܗܳܟܰܢܳܐ ܐܳܦ ܫܡܰܝܳܢ̈ܐ ܠܬܰܚܬ ܡ̣ܢ ܟܝܳܢܶܗ ܕܠܐ ܣܳܟܳܐ ܐܝ̣ܬܰܝܗܘܢ ܘܶܐܢ ܩܰܪܺܝܒܺܝܢ ܠܶܗ ܫܡܰܝܴ̈ܢܶܐ ܝܰܬܺܝܪ ܡ̣ܢ ܐܰܪ̈ܥܳܢܶܐ. ܐܠܐ ܠܘ ܠܘܳܬ ܟܝܳܢܶܗ ܩܢܶܝܢ ܩܰܪܺܝܒܽܘܬܳܐ. ܐܠܐ ܠܡܰܘܕܰܥܬܳܐ ܕܰܠܘܳܬܶܗ. ܐܶܬܢܰܚܰܬ ܡܶܛܠ ܚܽܘܒܶܗ
ܘܰܡܪܺܝܡ ܡ̣ܢ ܩܺܝܩܰܠܬܳܐ ܠܒܳܝܫܳܐ. ܕܢܰܘܬܒܺܝܗܝ ܥܡ ܪܰܘܪ̈ܒܳܢܰܘܗܝ ܕܥܰܡܳܐ. ܐܳܘ ܠܐܪܳܙܳܐ ܪܰܒܐ ܘܰܠܡܷ̈ܠܶܐ ܩܰܕܺܝ̈ܫܳܬܳܐ. ܕܗܰܘ ܠܰܡ ܕܝܳܬܶܒ ܒܪܰܘܡܳܐ ܘܚܳܙܶܐ ܒܥܽܘܡܩܳܐ ܘܚܳܐܱܪ ܒܰܫܡܰܝܳܐ ܘܒܰܐܪܥܳܐ. ܐܰܪܺܝܡ ܡ̣ܢ ܩܺܝܩܰܠܬܳܐ ܠܒܳܝܫܳܐ. ܘܡܰܢܽܘ ܒܳܝܫܳܐ. ܘܡܰܢܽܘ ܗܰܘ ܕܰܐܪܺܝܡܶܗ. ܗܰܘ ܕܰܐܪܺܝܡܶܗ ܠܒܳܝܫܳܐ ܐܝܟ ܕܶܐܡܰܪ ܢܒܺܝܐ. ܡܳܪܝܰܐ ܗܘ ܐܰܠܗܳܐ. ܒܳܝܫܳܐ ܕܶܝܢ ܗܽܘܝܽܘ ܐܳܕܳܡ. ܗܳܢܐ ܓܝܪ ܥܠ ܩܺܝܩܰܠܬܳܐ ܫܕܶܐ ܗܘܳܐ ܒܰܚܒܳܠܳܐ ܕܰܫܝܽܘܠ ܘܰܚܠܳܦ ܩܶܛܡܳܐ ܒܕܰܚܺܝܚܳܐ ܛܡܺܝܪ ܗܘܳܐ. ܟܕ ܕܶܝܢ ܐܶܬܳܐ ܥܰܡܰܢܘ̣ܐܝܠ ܡ̣ܢ ܡܰܘܬܒܶܗ. ܥܠ ܒܳܬܪܶܗ ܕܒܳܝܫܳܐ ܗܢܐ ܠܡܰܪܒܥܳܐ ܕܰܒܬܽܘܠܬܳܐ ܡܰܪܝܰܡ ܘܰܗܘܳܐ ܒܰܪܢܳܫܳܐ. ܘܩܰܒܶܠ ܥܠܰܘܗܝ ܚܰܫܳܐ ܘܡܰܘܬܳܐ ܕܰܚܠܳܦܰܘܗܝ. ܘܡܶܛܠ ܕܰܢܣܰܒ ܦܰܓܪܳܐ ܚܳܫܽܘܫܳܐ ܘܡܳܝܽܘܬܳܐ ܢܚܶܬ ܒܳܬܪܶܗ ܠܰܫܝܽܘܠ ܕܡܺܝ̈ܬܶܐ ܐܰܝܟܳܐ ܕܰܫܕܶܐ ܗܘܳܐ ܒܳܝܫܳܐ ܐܳܕܳܡ ܥܰܠ ܩܺܝܩܰܠܬܳܐ. ܘܡܶܠܬܶܗ ܕܰܐܠܗܳܐ ܠܐ ܐܶܬܬܚܶܕ ܡ̣ܢ ܚܒܳܠܳܐ. ܐܰܩܺܝܡܶܗ ܥܰܡܶܗ ܠܗܰܘ ܡܶܬܚܰܒܠܳܢܳܐ ܘܦܰܢܝܶܗ ܠܠܳܐ ܡܶܬܚܰܒܠܳܢܽܘܬܳܐ. ܘܰܐܘܬܒܰܢ ܥܰܡܶܗ ܒܰܫܡܰܝܳܐ. ܠܥܶܠ ܡ̣ܢ ܐܰܪ̈ܟܰܐܣ ܘܫܽܘܠܛܳܢ̈ܐ. ܐܝܟ ܕܶܐܡܰܪ ܠܬܰܠܡܺܝ̈ܕܶܐ ܕܺܝܠܶܗ ܕܬܶܬܒܽܘܢ ܥܠ ܬܪܶܥܣܰܪ ܟܽܘܪ̈ܣܰܘܳܬܳܐ ܘܰܬܕܽܘܢܽܘܢ ܫܰܒ̈ܛܶܐ ܕܺܝܣܪܳܐܝܠ (ܠܘܩܐ ܟܒ: ܠ). ܘܗܳܕܐ ܡ̣ܢ ܩܺܝܩܰܠܬܳܐ ܡܪܺܝܡܳܐ ܠܗ ܠܒܳܝܫܳܐ. ܘܥܰܡ ܟܶܢ̈ܫܶܐ ܪܰܘܪ̈ܒܳܢܶܐ ܕܥܰܡܳܐ ܩܰܕܺܝܫܳܐ ܕܒܰܫܡܰܝܳܐ ܡܰܘܬܒܳܐ ܠܗ ܠܳܐܕܳܡ. ܘܒܳܬܰܪ ܗܳܕܐ.
ܡܰܘܬܶܒ ܥܩܰܪܬܳܐ ܒܒܰܝܬܳܐ ܘܶܐܡܳܐ ܕܰܒܢܰܝܴ̈ܐ ܟܕ ܚܳܕܝܳܐ. ܠܥܺܕܬܳܐ ܓܝܪ ܗܳܝ ܕܒܶܣܪܳܐ ܡܶܬܡܰܬܠܳܐ. ܕܰܥܩܰܪܬܳܐ ܗܘܳܬ ܘܰܕܠܳܐ ܒܢܰܝܴ̈ܐ ܘܠܳܐ ܒܰܝܬܳܐ. ܥܒܰܕ ܠܗ̇ ܒܰܝܬܳܐ ܡܫܰܒܚܳܐ ܒܟܽܠܗܽܘܢ ܥܰܡܡ̈ܐ. ܘܰܡܠܰܟ ܠܗ̇ ܡܰܥܡܪܳܐ ܒܰܫܡܰܝܳܐ ܘܥܰܒܕܳܗ̇ ܚܠܳܦ ܥܩܰܪܬܳܐ ܐܶܡܳܐ ܕܰܒܢܱ̈ܝܳܐ ܣܰܓܺܝ̈ܐܐ. ܐܝܟ ܕܶܐܡܪܰܬ ܚܰܢܰܐ ܒܰܨܠܽܘܬܳܗ̇. ܕܰܥܩܰܪܬܳܐ ܠܰܡ ܝܶܠܕܰܬ ܘܣܶܒܥܰܬ (ܐ ܫܡܘܐܝܠ ܒ: ܗ). ܘܰܗܘܳܬ ܐܶܡܳܐ ܐܳܦ ܡܰܘܠܕܳܢܺܝܬܳܐ ܕܣܰܓܺܝ̈ܐܐ. ܘܚܳܕܝܳܐ ܒܗܽܘܢ ܘܕܳܝܨܳܐ. ܐܰܝܟ ܐܶܡܳܐ ܠܐ ܡܶܬܚܰܒܠܳܢܺܝܬܳܐ. ܘܡܰܘܕܝܳܐ ܗܺܝ ܘܰܒܢܶܝ̈ܗ̇ ܠܗܰܘ ܕܥܰܒܕܳܗ̇ ܒܥܺܝܠܬܳܐ ܚܠܳܦ ܥܩܰܪܬܳܐ. ܘܡܰܣܩܳܐ ܫܽܘܒܚܳܐ ܘܬܰܘܕܺܝܬܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܡܺܝܢ ܐܰܡܝ̣ܢ܀
ܡܙܡܘܪܐ ܕܡܐܐ ܘܐܪܒܥܣܪ
ܡܰܘܕܰܥ ܥܰܠ ܐܪ̈ܳܙܶܐ ܕܡܰܦܰܩܬܰܢ. ܘܥܰܠ ܚܰܕܽܘܬܳܐ ܕܰܗܘܳܬ ܠܡܰܠܰܐܟ̈ܐ ܒܦܽܘܪܩܳܢܳܐ ܕܥܳܠܡܳܐ ܒܝܰܕ ܡܳܪܢ ܡ̣ܢ ܡܶܬܝܰܕܥܳܢܺܝܬܳܐ ܡܶܨܪܶܝܢ ܚܶܫܽܘܟܬܳܐ.
ܡܰܠܦܳܢܳܐ ܕܚܰܝܷ̈ܐ ܡܳܪܢ ܝܶܫܘ̇ܥ ܡܫܺܝܚܳܐ ܗܰܘ ܕܶܐܬܳܐ ܡ̣ܢ ܫܡܰܝܳܐ ܕܢܶܩܪܶܐ ܦܽܘܢܳܝܳܐ ܠܓܶܢܣܳܐ ܕܰܒܢܰܝ̈ܢܳܫܳܐ. ܟܕ ܡܰܠܶܦ ܐܡ̇ܪ ܗܘܳܐ. ܡܰܢܽܘ ܓܰܒܪܳܐ ܕܺܐܝܬ ܠܶܗ ܡܳܐܐ ܥܶܪ̈ܒܺܝܢ ܘܶܐܢ ܢܶܛܥܶܐ ܚܰܕ ܡܶܢܗܽܘܢ ܠܳܐ ܫܳܒܶܩ ܬܶܫܥܺܝܢ ܘܬܶܫܥܳܐ ܒܛܽܘܪܳܐ. ܘܳܐܙܶܠ ܒܳܥܶܐ ܠܗܰܘ ܕܰܛܥܳܐ. ܘܶܐܢ ܐܶܫܟܚܶܗ ܚܳܕܶܐ ܒܶܗ ܘܫܳܩܶܠ ܠܶܗ ܥܰܠ ܟܰܬܦܴ̈ܬܶܗ ܘܩܳܪܶܐ ܠܪ̈ܳܚܡܰܘܗܝ ܘܠܰܫܒܳܒܰܘ̈ܗܝ ܘܳܐܡܰܪ ܠܗܽܘܢ ܚܕܰܘ ܥܰܡܝ. ܕܶܐܫܟܚܶܬ ܥܶܪܒܝ ܕܰܐܒܺܝܕ ܗܘܳܐ. ܗܳܟܰܢܳܐ ܬܶܗܘܶܐ ܚܰܕܽܘܬܳܐ ܒܰܫܡܰܝܳܐ ܥܰܠ ܚܰܕ ܚܰܛܳܝܳܐ ܕܬܳܐܷܒ (ܡܬܝ ܝܚ: ܝܒ-ܝܓ ܠܘܩܐ ܝܗ: ܕ-ܙ). ܟܕ ܠܗܳܢܳܐ ܐܪܳܙܳܐ ܕܶܐܡܰܪ ܡܳܪܢ ܩܰܕܶܡܘ ܪܫܰܡܘ ܢܒܺܝ̈ܐ ܒܡܶܕܶܡ ܡܶܕܶܡ. ܡܙܰܡܰܪ ܗܘܳܐ ܕܰܘܝܕ ܒܩܺܝܬܳܪܶܗ ܡܶܛܠ ܚܰܕܽܘܬܳܐ ܕܰܗܘܳܬ ܠܡܰܠܰܐܟ̈ܐ ܒܡܰܦܰܩܬܶܗ ܕܺܝܣܪܳܐܝܠ ܕܰܐܠܗܳܐ ܡܶܢ ܡܶܨܪܶܝܢ ܡܶܬܝܰܕܥܳܢܺܝܬܳܐ. ܘܰܡܫܰܒܰܚ ܘܳܐܡܰܪ:
ܟܰܕ ܢܳܦܶܩ ܝ̣ܣܪܳܐܝܠ ܡ̣ܢ ܡܶܨܪܶܝܢ܆ ܘܰܕܒܶܝܬ ܝܰܥܩܽܘܒ ܡ̣ܢ ܥܰܡܳܐ ܠܳܥܽܘܙܳܐ. ܗܘܳܐ ܝ̣ܗܽܘܕܳܐ ܩܽܘܕܫܶܗ ܘܺܝܣܪܳܐܝܠ ܬܶܫܒܽܘܚܬܶܗ. ܗܳܢܐ ܗܳܟܝ̣ܠ ܡܰܙܡܽܘܪܳܐ ܕܰܡܳܐܐ ܐܳܦ ܕܰܐܪܒܰܥܣܰܪ ܥܰܠ ܡܰܦܰܩܬܳܐ ܕܥܰܡܳܐ ܕܡܶܢ ܡܶܨܪܶܝܢ. ܐܰܡܪܶܗ ܡܙܰܡܪܳܢܳܐ ܒܩܴ̈ܠܶܐ ܡܶܫܬܰܡܥܴ̈ܢܶܐ. ܚܢܰܢ ܠܘܳܬ ܬܶܐܘܳܪܺܝܰܐ ܕܣܽܘ̈ܟܳܠܶܐ ܪ̈ܽܘܚܳܢܳܝܶܐ ܦܳܢܶܝܢܰܢ. ܡܶܛܠ ܕܰܚܢܰܢ ܢܒܺܝܽܘܬܳܐ ܐܳܡܪܺܝܢܰܢ ܥܠܰܘܗܝ ܕܺܐܝܬܰܘܗܝ. ܘܠܘ ܡܰܟܬܒܳܢܽܘܬܳܐ ܕܬܰܫܥܺܝܬܳܐ. ܐܡ̣ܪ ܗܳܟܝ̣ܠ: ܟܕ ܢܳܦܶܩ ܝ̣ܣܪܳܐܝܠ ܡ̣ܢ ܡܶܨܪܶܝܢ.
ܝܰܡܳܐ ܚܙܳܝܗܝ ܘܰܥܪܰܩ. ܘܝܽܘܪܕܢܳܢ ܗܦܰܟ ܠܒܶܣܬܪܶܗ. ܒܰܫܪܳܪܳܐ ܗܘܱ̈ܝ ܗܳܠܝܢ ܟܕ ܢܦܰܩ ܥܰܡܳܐ. ܐܰܘ ܡܳܢܳܐ ܗܘܳܐ ܠܘܳܬ ܥܰܡܶܗ ܕܰܐܠܗܳܐ. ܟܰܕ ܢܦܰܩ ܒܝܰܕ ܨܠܺܝܒܳܐ ܡ̣ܢ ܬܚܶܝܬ ܢܺܝܪܳܐ ܕܣܳܛܳܢܳܐ ܘܡ̣ܢ ܫܽܘܥܒܳܕܳܐ ܕܫܺܐܕ̈ܐ. ܐܳܦ ܗܳܪܟܳܐ ܗܰܘ ܝܰܡܳܐ ܕܛܶܒܥܰܬ ܒܶܗ ܐܶܠܦܶܗ ܕܥܳܠܡܳܐ ܒܰܣܝܳܢܳܐ ܕܰܚܛܝ̣ܬܳܐ. ܥܪܰܩ ܡ̣ܢ ܩܕܳܡ ܦܳܪܽܘܩܰܢ. ܩܥܳܐ ܗܘܳܐ ܓܝܪ ܡ̣ܢ ܐܽܘܠܨܳܢܳܐ ܠܶܓܝܽܘܢ ܗܰܘ ܝܰܡܳܐ ܫܳܓܽܘܫܶܗ ܕܥܳܠܡܳܐ ܡ̣ܢ ܥܰܡܰܢܘ̣ܐܝܠ ܟܕ ܚܙܳܝܗܝ. ܡܳܐ ܠܢ ܘܠܳܟ ܝܶܫܽܘܥ ܢܳܨܪܳܝܳܐ ܕܶܐܬܰܝܬ ܩܕܳܡ ܙܰܒܢܳܐ ܕܰܬܫܰܢܩܰܢ. ܘܡܶܬܟܰܫܦܺܝܢ ܗܘܰܘ ܠܶܗ ܕܶܐܢ ܡܰܦܶܩ ܠܗܽܘܢ. ܢܰܦܶܣ ܠܗܽܘܢ ܐܝܟ ܕܒܰܚܙܺܝܪ̈ܶܐ ܢܶܥܠܽܘܢ. ܘܡܶܚܕܳܐ ܢܦܰܩܘ ܫܺܐܕ̈ܐ ܘܥܰܠܘ ܒܰܚܙܺܝܪ̈ܶܐ. ܘܟܽܠܗ̇ ܒܰܩܪܳܐ ܗܳܝ ܬܶܪܨܰܬ ܠܰܫܩܺܝܦܳܐ ܘܢܶܦܠܰܬ ܒܝܰܡܳܐ ܘܡܝ̣ܬ ܒܡܰܝܴ̈ܐ (ܡܬܝ ܚ: ܟܛ-ܠܒ ܡܪܩܘܣ ܗ: ܝܓ ܠܘܩܐ ܚ: ܠܒ-ܠܓ). ܚܙܰܝܬ ܠܗܳܢܐ ܫܶܚܪܳܐ ܕܫܺܐܕ̈ܐ. ܗܳܢܰܘ ܝܰܡܳܐ ܕܰܚܙܳܝܗܝ ܘܰܥܪܰܩ ܡ̣ܢ ܩܕܳܡ ܝ̣ܣܪܳܐܝܠ. ܕܰܐܠܗܳܐ ܟܕ ܢܦܰܩ ܡ̣ܢ ܡܶܨܪܶܝܢ ܕܰܚܛܺܝܬܳܐ. ܐܳܦ ܚܙܰܝܬ ܬܘܒ ܠܒܰܪ ܐܶܓܳܪܳܐ ܟܕ ܡܫܰܢܶܐ. ܗܳܢܰܘ ܕܶܝܢ ܝܽܘܕܪܢܳܢ ܕܰܗܦܰܟ ܠܒܶܣܬܪܶܗ. ܒܰܪ ܐܶܓܳܪ̈ܶܐ ܓܶܝܪ ܣܰܗܪܳܝܳܐ ܡܶܬܦܰܫܰܩ. ܗܰܘ ܕܰܒܫܽܘܪܳܝܶܗ ܕܣܰܗܪܳܐ ܡܶܬܩܰܫܶܐ. ܘܡܳܐ ܕܚܳܣܰܪ ܡܫܰܢܶܐ. ܐܳܦ ܢܰܗܪܳܐ ܬܘܒ ܕܰܐܝܟ ܗܳܟܰܢܐ ܐܝ̣ܬܘܗܝ. ܕܒܰܙܒܰܢ ܡܳܠܶܐ ܘܒܰܙܒܰܢ ܚܳܣܰܪ. ܐܰܝܟܰܢܐ ܕܳܐܦ ܣܰܗܪܳܐ ܟܕ ܒܫܽܘ̈ܚܠܳܦܶܐ ܕܡܰܠܝܽܘܬܳܐ ܘܰܕܚܰܣܺܝܪܽܘܬܳܐ ܓܡܰܪ ܙܰܒܢܰܘ̈ܗܝ. ܒܳܬܰܪ ܕܶܝܢ ܝܰܡܳܐ ܘܝܽܘܪܕܢܳܢ. ܗܰܘ ܚܰܕ ܥܪܰܩ ܡ̣ܢ ܩܕܳܡ ܥܰܡܳܐ. ܗܰܘ ܐܚܪܺܢܳܐ ܗܦܰܟ. ܡܰܝܬܶܐ ܢܒܺܝܳܐ ܘܳܐܡܰܪ:
ܛܽܘܪ̈ܶܐ ܪܰܩܶܕܘ ܐܰܝܟ ܐܰܝ̈ܠܶܐ. ܘܪ̈ܳܡܳܬܳܐ ܐܰܝܟ ܐܶܡܪ̈ܶܐ ܕܥܳܢܴ̈ܐ. ܕܶܐܢ ܗܘܳܬ ܗܳܕܐ ܒܗܰܘ ܙܰܒܢܳܐ ܘܶܐܢ ܠܳܐ ܗܘܳܬ܆ ܟܬܳܒܳܐ ܕܰܐܘܕܰܥ ܥܰܠ ܡܰܦܰܩܬܶܗ ܕܥܰܡܳܐ ܠܳܐ ܚܰܘܺܝ ܕܪܰܩܶܕܘ ܛܽܘܪ̈ܶܐ ܘܪ̈ܳܡܳܬܳܐ. ܒܪܰܡ ܫܪܳܪܳܐ ܗܳܢܰܘ܆ ܠܡܽܘܫܶܐ ܘܠܰܐܗܪܽܘܢ ܘܰܠܪ̈ܺܝܫܰܝ ܥܰܡܳܐ ܘܰܠܣܳܒ̈ܐ ܕܺܐܝܬ ܗܘܰܘ ܒܰܟܢܽܘܫܬܳܐ ܩܳܪܐ ܛܽܘܪ̈ܶܐ ܘܪ̈ܳܡܳܬܳܐ ܕܶܝܢ ܠܡܰܪܝܰܡ ܢܒܺܝܬܳܐ ܚܳܬܶܗ ܕܰܐܗܪܽܘܢ ܘܰܠܟܽܠܗܶܝܢ ܚܰܒܪ̈ܳܬܳܗ̇ ܢܶܫܷ̈ܐ ܕܰܢܦܰܩ̈ܝ ܒܳܬܪܳܗ̇ ܟܕ ܡܪ̈ܰܩܕܳܢ ܘܢܳܩ̈ܫܳܢ ܒܰܦܠܰܓ̈ܐ. ܗܳܠܝܢ ܗܳܟܝ̣ܠ ܐܝ̣ܬܰܝܗܘܢ ܗܘܰܘ ܛܽܘܪ̈ܶܐ ܘܪ̈ܳܡܳܬܳܐ ܕܪܰܩܶܕܘ ܟܕ ܢܦܰܩ ܝ̣ܣܪܳܐܝܠ ܡ̣ܢ ܡܶܨܪܶܝܢ. ܣܳܒܰܪ ܐܢܳܐ ܕܠܰܝܬ ܐܢܳܫ ܡ̣ܢ ܐܰܝܠܶܝܢ ܕܢܰܣܺܝܘ ܠܩܶܪܝܳܢܳܐ ܕܰܟܬܳܒܳܐ ܕܡܶܬܚܪܶܐ ܠܽܘܩܒܰܠ ܗܳܠܝܢ. ܘܗܳܐ ܐܶܫܰܥܝܳܐ ܢܒܺܝܐ ܡܦܺܝܣ ܠܶܗ ܟܕ ܩܳܪܶܐ ܠܰܐܒܪܳܗܳܡ ܛܽܘܪܳܐ ܘܳܐܡܰܪ: ܚܽܘܪܘ ܠܛܽܘܪܳܐ ܕܶܐܬܓܙܰܪܬܽܘܢ ܡܶܢܶܗ. ܘܰܠܓܽܘܒܳܐ ܕܶܐܬܢܩܰܪܬܽܘܢ ܡܶܢܶܗ. ܚܽܘܪܘ ܠܰܐܒܪܳܗܳܡ ܐܰܒܽܘܟܽܘܢ ܘܰܠܣܰܪܳܐ ܐܶܡܟܽܘܢ (ܐܫܥܝܐ ܢܐ: ܐ-ܒ). ܘܶܐܢ ܢܰܘܪܶܟ ܡܶܠܬܳܐ ܣܰܓܺܝ̈ܐܬܳܐ ܐܝ̣ܬ ܗܘܳܐ ܠܰܢ ܕܰܢܚܰܘܶܐ. ܘܟܰܕ ܫܰܪܝܰܬ ܐܢܳܫܽܘܬܳܐ ܠܡܶܫܒܰܩ ܓܠܺܝ̈ܦܶܝܗ̇ ܘܰܠܡܺܐܙܰܠ ܒܳܬܰܪ ܝܽܘܠܦܳܢܳܐ ܕܰܫܠܺܝ̈ܚܶܐ. ܚܠܳܦ ܪܶܩܕܳܐ ܐܶܬܡܠܺܝܘ ܬܰܠܡܺܝ̈ܕܶܐ ܚܰܕܽܘܬܳܐ ܒܟܽܠ ܐܰܬܰܪ ܐܝܟ ܕܰܟܬܝ̣ܒ ܕܬܰܠܡܺܝ̈ܕܶܐ ܡܶܬܡܠܶܝܢ ܚܰܕܽܘܬܳܐ ܒܪܽܘܚܳܐ ܕܩܽܘܕܫܳܐ. ܘܢܶܫܡܰܥ ܬܘܒ ܡ̣ܢ ܒܳܬܰܪܟܶܢ ܠܰܢܒܺܝܐ ܕܳܐܡܰܪ:
ܡܳܐ ܠܳܟ ܝܰܡܳܐ ܕܰܥܪܰܩܬ ܘܝܽܘܪܕܢܳܢ ܕܰܗܦܰܟܬ ܠܒܶܣܬܪܳܟ. ܘܛܽܘܪ̈ܶܐ ܕܪܰܩܶܕܬܽܘܢ ܐܰܝܟ ܐܰܝ̈ܠܶܐ ܘܪ̈ܳܡܳܬܳܐ ܐܰܝܟ ܐܶܡܪ̈ܶܐ ܕܥܳܢܴ̈ܐ. ܡܦܰܢܶܐ ܕܶܝܢ ܪܽܘܚܳܐ ܘܳܐܡܰܪ:
ܡ̣ܢ ܩܕܳܡ ܡܳܪܝܳܐ ܙܳܥܰܬ ܐܰܪܥܳܐ. ܡ̣ܢ ܩܕܳܡ ܐܰܠܳܗܶܗ ܕܝܰܥܩܽܘܒ. ܚܙܰܝܬ ܐܰܝܟܰܢܳܐ ܦܰܫܶܩ ܪܽܘܚܳܐ ܕܡ̣ܢ ܩܕܳܡ ܡܳܪܝܳܐ ܙܳܥܰܬ ܐܰܪܥܳܐ. ܟܕ ܚܙܳܬܶܗ ܕܰܬܠܶܐ ܒܰܨܠܺܝܒܳܐ. ܘܡ̣ܢ ܩܕܳܡ ܐܰܠܳܗܶܗ ܕܝܰܥܩܽܘܒ. ܟܕ ܐܶܬܕܩܰܪ ܒܪܽܘܡܚܳܐ ܥܠ ܙܩܺܝܦܳܐ. ܡܶܬܪܰܘܛܺܝܢ ܗܘܰܘ ܛܽܘܪ̈ܶܐ ܐܳܦ ܙܳܝܥܺܝܢ ܘܢܳܝ̈ܕܳܢ ܗܘܱ̈ܝ ܪ̈ܳܡܳܬܳܐ ܒܟܽܠܗܽܘܢ ܥܰܡܡ̈ܐ. ܘܰܫܪܳܐ ܗܘܳܐ ܙܰܘܥܳܐ ܒܟܽܠܗܽܘܢ ܟܝܴ̈ܢܶܐ ܡܶܛܠ ܕܰܐܪܓܶܫܘ ܕܰܬܠܶܐ ܡܳܪܗܘܢ ܒܰܙܩܺܝܦܳܐ. ܘܰܚܙܳܐ ܢܒܺܝܐ ܒܥܰܝܢܳܐ ܕܪܽܘܚܳܐ ܒܰܫܪܳܪܳܐ ܘܶܐܡܰܪ܆ ܕܛܽܘܪ̈ܶܐ ܪܰܩܶܕܘ ܐܰܝܟ ܐܰܝ̈ܠܶܐ ܘܪ̈ܳܡܳܬܳܐ ܐܝܟ ܐܶܡܪ̈ܶܐ ܕܥܳܢܴ̈ܐ. ܘܰܢܒܺܝܐ ܦܰܫܶܩ ܘܶܐܡܰܪ܆ ܕܠܰܘ ܪܶܩܕܳܐ ܗܘܳܐ ܐܠܐ ܙܰܘܥܳܐ. ܕܡ̣ܢ ܩܕܳܡ ܡܳܪܝܳܐ ܙܳܥܰܬ ܐܰܪܥܳܐ. ܘܰܒܕܽܘܟܬܳܐ ܐܚܪܺܬܳܐ ܡܶܬܕܟܰܪ ܠܰܡ ܠܬܶܕܡܪ̈ܳܬܳܐ ܕܰܗܘ̈ܝ ܒܰܨܠܺܝܒܳܐ.
ܘܕܰܗܦܰܟ ܛܰܪܳܢܳܐ ܠܰܐܓ̈ܡܶܐ ܕܡܰܝܴ̈ܐ. ܘܟܺܐܦܳܐ ܫܰܪܺܝܪܬܳܐ ܠܡܰܒܽܘ̈ܥܶܐ ܕܡܰܝܴ̈ܐ. ܗܘܱ̈ܝ ܗܳܠܝܢ ܒܡܰܕܒܪܳܐ ܠܘܳܬ ܥܰܡܳܐ. ܘܡ̣ܢ ܛܰܪܳܢܳܐ ܢܦܰܩܘ ܠܗܽܘܢ ܡܰܝܴ̈ܐ ܘܡ̣ܢ ܟܺܐܦܳܐ ܪܕܰܘ ܠܗܽܘܢ ܢܰܗܪ̈ܰܘܳܬܳܐ. ܐܶܠܐ ܗܳܠܝܢ ܛܽܘܦܣܳܐ ܗܘܱ̈ܝ ܘܕܶܡܘܴ̈ܬܳܐ. ܗܳܠܝܢ ܕܟܕ ܢܦܰܩܘ ܫܠܺܝ̈ܚܶܐ ܠܒܶܝܬ ܥܰܡܡ̈ܐ ܗܘܰܘ ܠܗܽܘܢ ܐܰܓ̈ܡܶܐ ܘܡܰܒܽܘ̈ܥܶܐ ܕܡܰܝܴ̈ܐ ܚܰܝܷ̈ܐ ܘܠܐ ܡܶܣܬܰܝ̈ܟܳܢܶܐ. ܡܶܛܠ ܕܚܰܝ ܗܽܘ ܛܰܪܳܢܳܐ ܡܫܺܝܚܳܐ ܗܰܘ ܕܰܐܪܕܺܝ ܐܶܢܘܢ. ܘܟܺܐܦܳܐ ܗܽܘܝܽܘ ܡܫܺܝܚܳܐ. ܗܰܘ ܕܦܰܘܠܽܘܣ ܪܰܒܳܐ ܟܬܰܒ ܠܩܽܘܪ̈ܺܝܢܬܳܝܶܐ ܕܟܺܐܦܳܐ ܠܰܡ ܗܽܘܝܽܘ ܡܫܺܝܚܳܐ (ܐ ܩܘܪ̈ܢܬܝܐ ܝ: ܕ). ܘܡܶܛܠ ܪܰܒܽܘܬܶܗ ܕܐܪܳܙܳܐ ܘܬܶܕܡܪ̈ܳܬܳܐ ܕܰܗܘ̈ܝ ܒܝܰܕ ܫܳܩܽܘܬܳܐ ܕܡܰܝܴ̈ܐ ܗܳܠܝܢ ܩܰܕܺܝ̈ܫܶܐ ܒܶܝܬ ܥܰܡܡ̈ܐ. ܩܥܳܐ ܗܘܳܐ ܢܒܺܝܐ ܘܶܐܡܰܪ:
ܠܳܐ ܠܰܢ ܡܳܪܝܳܐ ܠܳܐ ܠܰܢ. ܐܶܠܐ ܠܰܫܡܳܟ ܗܰܒ ܐܝ̣ܩܳܪܳܐ. ܥܰܠ ܛܰܝܒܽܘܬܳܟ ܘܥܰܠ ܩܽܘܫܬܳܟ. ܠܰܘ ܠܢ ܕܝ̣ܠܢ ܐܶܢܶܝܢ ܗܳܠܝܢ. ܘܠܘ ܕܰܟܝܳܢܳܐ ܐܢܳܫܳܝܳܐ. ܐܶܠܐ ܕܚܰܝܠܳܐ ܘܫܽܘܠܛܳܢܳܐ ܕܓܰܢܒܳܪܽܘܬܳܟ. ܕܰܐܝܟ ܗܳܟܰܢܐ ܩܳܥܶܝܢ ܗܘܰܘ ܫܶܡܥܽܘܢ ܘܝܽܘܚܰܢܳܢ ܪ̈ܺܝܫܳܢܶܐ ܕܰܫܠܺܝ̈ܚܶܐ ܩܕܳܡ ܟܶܢܫܳܐ ܕܝܽܘ̈ܕܳܝܶܐ ܟܕ ܪܳܗܶܛ ܘܬܳܗܰܪ ܕܢܶܚܙܽܘܢ ܠܰܚܓܺܝܪܳܐ ܗܰܘ ܕܶܐܬܐܰܣܺܝ ܒܬܰܪܥܳܐ ܕܗܰܝܟܠܳܐ ܕܡܶܬܩܪܶܐ ܫܰܦܺܝܪܳܐ. ܓܰܒܪ̈ܶܐ ܒܢܰܝ̈ ܝ̣ܣܪܳܐܝܠ ܡܳܢܳܐ ܡܶܬܕܰܡܪܺܝܢ ܐܢܬܽܘܢ ܒܗܳܢܳܐ ܚܓܺܝܪܳܐ. ܐܰܘ ܒܰܢ ܡܳܢܳܐ ܚܳܝܪܺܝܢ ܐܢܬܽܘܢ܇ ܐܰܝܟ ܗܰܘ ܕܰܒܚܰܝܠܳܐ ܕܺܝܠܰܢ ܐܰܘ ܒܫܽܘܠܛܳܢܰܢ ܥܒܰܕܢ ܗܳܕܐ ܕܰܢܗܰܠܶܟ ܗܳܢܐ. ܐܰܠܳܗܶܗ ܕܰܐܒܪܳܗܳܡ ܐܰܒܽܘܢ ܘܕܺܐܝܣܚܳܩ ܘܰܕܝܰܥܩܽܘܒ. ܫܰܒܰܚ ܠܰܒܪܶܗ ܝܶܫܽܘܥ (ܦܪܰܟܣܝܣ ܓ: ܝܒ-ܝܓ). ܗܰܘ ܕܰܐܢܬܽܘܢ ܙܩܰܦܬܽܘܢ. ܒܶܗ ܠܡ ܒܗܰܘ ܗܳܐ ܩܳܐܷܡ ܗܢܳܐ ܩܕܳܡܰܝܟܽܘܢ ܟܰܕ ܚܠܺܝܡ (ܦܪܟܣܝܣ ܕ:ܝ). ܘܰܒܗܳܠܶܝܢ ܒܢܴ̈ܬ ܩܴ̈ܠܶܐ ܡܚܺܝܪܺܝܢ ܗܘܰܘ ܠܗ̇ ܠܛܳܒܬܳܐ ܕܳܐܣܝܽܘܬܳܐ. ܒܳܬܰܪ ܗܰܘ ܕܥܰܒܕܳܗ̇. ܐܝܟ ܕܳܐܦ ܢܒܺܝܳܐ ܩܰܕܶܡ ܐܰܟܪܶܙ. ܕܠܳܐ ܠܢ ܡܳܪܝܳܐ ܐܠܐ ܠܰܫܡܳܟ ܗܰܒ ܐܝ̣ܩܳܪܳܐ.
ܕܠܳܐ ܢܺܐܡܪܽܘܢ ܥܰܡܡ̈ܐ ܕܰܐܝܟܰܘ ܐܰܠܳܗܗܽܘܢ. ܐܰܠܳܗܰܢ ܒܰܫܡܰܝܳܐ ܗܽܘ ܘܟܽܠ ܕܨܳܒܶܐ ܥܳܒܶܕ. ܘܳܐܦ ܗܳܕܐ ܡܫܰܐܠܺܝܢ ܗܘܰܘ ܥܰܡܡ̈ܐ ܠܰܫܠܺܝ̈ܚܶܐ ܟܕ ܣܳܥܪܺܝܢ ܗܘܰܘ ܚܰܝ̈ܠܶܐ ܒܰܫܡܶܗ ܕܝܶܫܽܘܥ. ܕܰܐܝܟܰܘ ܐܰܠܳܗܳܐ ܕܒܰܫܡܶܗ ܣܳܥܪܺܝܢ ܐܢܬܽܘܢ. ܘܰܡܦܰܢܶܝܢ ܗܘܰܘ ܫܠܺܝ̈ܚܶܐ ܒܰܫܡܰܝܰܐ ܗ̄ܘ ܥܰܡ ܐܰܒܐ ܝܳܠܽܘܕܶܗ. ܘܡܶܫܬܰܘܕܶܝܢ ܗܘܰܘ ܕܟܠ ܕܨܳܒܶܐ ܥܳܒܶܕ. ܘܠܰܘ ܕܠܳܐ ܥܒܳܕܳܐ ܐܝ̣ܬܘܗܝ ܐܝܟ ܨܰܠܡ̈ܐ ܚܰܪ̈ܒܶܐ. ܘܰܕܠܐ ܚܳܫܰܚܘ.
ܦܬܰܟܪ̈ܶܐ ܕܥܰܡܡ̈ܐ ܣܺܐܡܳܐ ܘܕܰܗܒܳܐ ܥܒܳܕ ܐܝ̣ܕܰܝ̈ܐ ܕܒܰܪܢܳܫܳܐ. ܦܽܘ̈ܡܶܐ ܐܝ̣ܬ ܠܗܽܘܢ ܘܠܐ ܡܡܰܠܠܺܝܢ. ܥܰܝ̈ܢܶܐ ܐܝ̣ܬ ܠܗܽܘܢ ܘܠܐ ܚܳܙܶܝܢ. ܐܶܕ̈ܢܶܐ ܐܝ̣ܬ ܠܗܽܘܢ ܘܠܐ ܫܳܡܥܺܝܢ. ܢܚܺܝܪ̈ܶܐ ܐܝ̣ܬ ܠܗܽܘܢ ܘܠܐ ܡܪܺܝܚܺܝܢ. ܒܺܐܝ̈ܕܰܝܗܽܘܢ ܠܐ ܓܳܝܫܺܝܢ. ܘܰܒܪ̈ܶܓܠܰܝܗܽܘܢ ܠܐ ܡܗܰܠܟܺܝܢ. ܘܠܐ ܡܡܰܠܠܺܝܢ ܒܓܰܓܪ̈ܳܬܗܽܘܢ. ܐܰܟܘܳܬܗܽܘܢ ܢܶܗܘܽܘܢ ܥܳܒܽܘܕܰܝ̈ܗܽܘܢ ܘܟܽܠ ܕܰܬܟܺܝܠܺܝܢ ܥܠܰܝܗܽܘܢ. ܗܳܠܝܢ ܦܶܬܓܳܡ̈ܐ ܠܽܘܩܒܰܠ ܐܰܝܠܶܝܢ ܕܣܳܓܕܺܝܢ ܠܰܐܠܳܗ̈ܐ ܣܪ̈ܺܝܩܶܐ ܘܕܰܓܳܠܰܝ̈ ܫܡܳܐ ܐܡ̣ܪ ܐܶܢܽܘܢ ܪܽܘܚܳܐ ܒܰܢܒܺܝܳܐ. ܕܰܐܟܙܢܳܐ ܕܠܰܝܬ ܒܗܳܠܶܝܢ ܪܳܓܽܘܫܽܘܬܳܐ ܒܪ̈ܶܓܫܰܝܗܽܘܢ. ܗܳܟܰܢܳܐ ܢܶܗܘܽܘܢ ܐܰܝܠܶܝܢ ܕܣܳܓܕܺܝܢ ܠܗܽܘܢ ܕܠܐ ܚܙܳܬܳܐ ܘܰܕܠܐ ܫܶܡܥܳܐ ܘܕܠܐ ܡܶܠܬܳܐ ܐܰܝܟܰܢܳܐ ܕܺܐܝܬܰܝܗܽܘܢ ܐܰܝܠܶܝܢ ܕܡܶܣܬܰܓܕܺܝܢ ܡܶܢܗܽܘܢ. ܟܺܐܢܳܐ ܓܝܪ ܕܒܰܐܠܳܗܽܘܬܶܗ ܢܶܬܕܰܡܶܐ ܟܠ ܒܰܪܢܳܫܳܐ. ܘܰܐܝܠܶܝܢ ܕܰܣܓܶܕܘ ܠܟܺܐܦ̈ܐ ܠܶܒܳܐ ܕܟܺܐܦܳܐ ܢܶܗܘܽܘܢ ܠܗܽܘܢ. ܠܐ ܕܶܝܢ ܥܰܡܳܐ ܩܰܕܺܝܫܳܐ ܡܶܛܠ ܕܶܐܡܰܪ ܢܒܺܝܐ:
ܕܒܶܝܬ ܝ̣ܣܪܳܐܝܠ ܬܟܺܝܠܺܝܢ ܥܰܠ ܡܳܪܝܳܐ. ܗܽܘܝܽܘ ܥܳܕܽܘܪܗܽܘܢ ܘܰܡܣܰܝܥܳܢܗܽܘܢ. ܕܒܶܝܬ ܐܰܗܪܽܘܢ ܬܟܺܝܠܺܝܢ ܥܰܠ ܡܳܪܝܳܐ. ܗܽܘܝܽܘ ܥܳܕܽܘܪܗܽܘܢ ܘܰܡܣܰܝܥܳܢܗܽܘܢ. ܕܳܚܠܰܘ̈ܗܝ ܕܡܳܪܝܳܐ ܬܟܺܝܠܺܝܢ ܥܰܠ ܡܳܪܝܳܐ. ܗܽܘܝܽܘ ܥܳܕܽܘܪܗܽܘܢ ܘܰܡܣܰܝܥܳܢܗܽܘܢ. ܡܳܪܝܳܐ ܥܶܗܰܕܢ ܘܒܰܪܟܰܢ. ܒܗܳܠܶܝܢ ܬܠܳܬ ܡܽܘ̈ܫܚܳܬܳܐ ܕܶܐܡܰܪ ܢܒܺܝܐ. ܕܒܶܝܬ ܝ̣ܣܪܳܐܝܠ ܘܰܕܒܶܝܬ ܐܰܗܪܽܘܢ ܘܕܳܚ̈ܠܰܘܗܝ ܕܡܳܪܝܳܐ. ܠܰܬܠܳܬ ܡܽܘܫ̈ܚܳܢ ܕܰܐܝܠܶܝܢ ܕܚܰܝ̣̈ܝ̣ܢ ܐܰܘܕܰܥ. ܠܰܓܡܺܝܪ̈ܶܐ ܘܰܠܟܺܐܢ̈ܐ ܘܰܠܬܰܝܳܒ̈ܐ. ܕܰܠܗܳܠܶܝܢ ܡܶܬܕܟܰܪ ܡܳܪܝܳܐ ܘܰܡܒܰܪܶܟ. ܐܝܟ ܕܶܐܡܰܪ ܪܽܘܚܳܐ:
ܢܒܰܪܶܟ ܠܰܕܒܶܝܬ ܝ̣ܣܪܳܐܝܠ. ܘܰܢܒܰܪܶܟ ܠܰܕܒܶܝܬ ܐܰܗܪܽܘܢ. ܘܰܢܒܰܪܶܟ ܡܳܪܝܳܐ ܠܕܳܚ̈ܠܰܘܗܝ. ܠܬܰܚܬܳܝ̈ܐ ܘܰܠܡܶܨܥܳܝ̈ܐ ܘܰܠܥܶܠܳܝ̈ܐ.
ܙܥܽܘܪ̈ܶܐ ܥܰܡ ܪܰܘܪ̈ܒܶܐ. ܩܰܕܡܳܝ̈ܐ ܘܰܐܚܪ̈ܳܝܶܐ ܕܡܶܢ ܥܰܡܳܐ ܘܰܕܡܶܢ ܥܰܡܡ̈ܐ.
ܢܰܘܣܶܦ ܥܠܰܝܟܽܘܢ ܡܳܪܝܳܐ. ܥܠܰܝܟܽܘܢ ܘܥܰܠ ܒܢܰܝ̈ܟܽܘܢ. ܪܺܝܫܺܝܬܳܐ ܡܶܢ ܥܰܡܳܐ ܐܶܬܢܰܣܒܰܬ ܒܗܳܝ ܕܡ̣ܢ ܝ̣ܣܪܳܐܝܠ ܐܶܢܽܘܢ ܫܠܺܝ̈ܚܶܐ. ܒܢܰܝ̈ܗܽܘܢ ܕܗܳܠܶܝܢ ܥܰܡܡ̈ܐ ܡܗܰܝܡ̈ܢܶܐ ܐܶܢܽܘܢ ܕܡܳܪܝܳܐ ܡܰܘܣܶܦ ܥܠܰܝܗܽܘܢ ܒܬܰܪܒܺܝܬܳܐ ܕܙܰܕܺܝܩܽܘܬܳܐ.
ܒܪܺܝܟܺܝܢ ܐܢܬܽܘܢ ܠܡܳܪܝܳܐ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ. ܒܗܳܕܐ ܬܰܪܥܺܝܬܳܐ ܠܦܳܠܚܱ̈ܝ ܦܬܰܟܪ̈ܶܐ ܩܰܦܰܚ. ܟܕ ܡܚܰܘܶܐ ܕܡܶܛܠܗܳܝ ܕܡܶܢ ܐܰܪܥܳܐ ܐܶܢܽܘܢ ܦܬܰܟܪ̈ܶܐ. ܥܒܳܕ̈ܐ ܐܶܢܽܘܢ ܕܰܐܠܗܳܐ ܥܰܡ ܐܰܪܥܳܐ ܗܳܝ ܕܡܶܢܳܗ̇ ܐܶܬܢܣܶܒܘ.
ܘܰܐܪܥܳܐ ܝܰܗܒܳܗ̇ ܠܰܒܢܰܝ̈ܢܳܫܳܐ. ܘܥܰܠܗܳܝ ܠܐ ܥܳܨܶܐ ܠܗܽܘܢ ܘܠܐ ܕܳܒܰܪ ܠܗܽܘܢ ܒܰܩܛܺܝܪܳܐ. ܕܚܺܐܪܽܘܬܗܽܘܢ ܐܰܫܠܶܛ ܥܰܠ ܕܽܘܒܳܪܳܐ ܕܚܰܝܰܝ̈ܗܘܢ. ܘܥܰܠ ܕܠܳܐ ܡܩܰܒܶܠ ܫܽܘܒܚܳܐ ܡ̣ܢ ܥܰܘܴ̈ܠܶܐ ܐܡ̇ܪ:
ܠܳܐ ܡܺܝ̈ܬܶܐ ܢܫܰܒܚܽܘܢ ܠܡܳܪܝܳܐ. ܐܳܦܠܳܐ ܟܽܠ ܢܳܚ̈ܬܰܝ ܚܶܫܽܘܟܳܐ. ܕܒܰܓܠܺܝܦ̈ܐ ܘܰܒܟܺܐܦ̈ܐ ܡܶܫܬܰܒܗܪܺܝܢ ܠܘ ܚܰܝܷ̈ܐ ܐܶܢܽܘܢ ܐܠܐ ܡܺܝ̈ܬܶܐ. ܘܠܐ ܡܩܰܪܒܺܝܢ ܫܽܘܒܚܳܐ ܠܰܐܠܗܳܐ.
ܚܢܰܢ ܕܶܝܢ. ܕܰܐܪܓܶܫܢܰܢ ܐܝ̣ܬ ܠܰܢ ܐܰܠܗܳܐ ܚܰܝܳܐ.
ܢܒܰܪܶܟ ܠܡܳܪܝܳܐ. ܡܶܟܝ̣ܠ ܘܰܥܕܰܡܳܐ ܠܥܳܠܰܡ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܚܡܫܬܥܣܪ
ܡܰܘܕܰܥ ܒܶܗ ܥܰܠ ܐܽܘܠܨܳܢ̈ܐ ܕܣܰܝܒܰܪ ܕܰܘܺܝܕ ܡܶܢ ܫܳܐܘܳܠ ܚܡܽܘܗܝ. ܘܰܕܠܳܐ ܫܳܒܶܩ ܐܰܠܳܗܳܐ ܠܰܐܝܠܶܝܢ ܕܰܬܟܺܝܠܺܝܢ ܥܠܰܘܗܝ.
ܡܣܰܝܒܪܳܢܽܘܬܳܐ ܕܗܳܘܝܳܐ ܠܩܰܕܺܝ̈ܫܶܐ ܒܽܐܘ̈ܠܨܳܢܶܐ ܕܩܳܝܡܝ̣ܢ ܥܠܰܝܗܘܢ ܡ̣ܢ ܒܥܶܠܕ̈ܒܳܒܶܐ. ܗܺܝ ܓܳܕܠܳܐ ܠܗܽܘܢ ܟܠܺܝ̈ܠܶܐ ܡܩܰܠܣ̈ܐ ܐܳܦ ܢܶܨܚܳܢ̈ܐ ܕܙܳܟܽܘܬܳܐ. ܐܰܟܡܳܐ ܕܳܐܦ ܠܛܽܘܒܳܢܳܐ ܕܰܘܝܕ ܕܰܚܣܳܡܶܗ ܕܫܳܐܘܳܠ ܗܘܳܐ ܠܶܗ ܡܢܰܨܚܳܢܳܐ. ܡ̣ܢ ܗܳܢܐ ܐܰܓܽܘܢܳܐ ܕܣܰܝܒܰܪ ܡ̣ܢ ܫܳܐܘܳܠ ܟܕ ܡܶܬܪܕܶܦ. ܐܰܝܟܰܢܳܐ ܐܰܘܪܶܒ ܢܶܨܚܳܢܶܗ ܘܪܰܡܪܶܡ ܟܠܺܝܠܶܗ. ܟܕ ܗܳܟܝ̣ܠ ܢܦܰܩ ܫܳܐܘܳܠ ܒܳܬܰܪ ܕܰܘܝܕ ܠܡܶܒܥܶܗ ܥܰܠ ܐܰܦܰܝ̈ ܛܽܘܪ̈ܶܐ ܕܕܰܝ̈ܨܶܐ ܡܰܘܕܰܥ ܟܬܳܒܳܐ. ܕܶܐܫܟܰܚ ܡܥܰܪܬܳܐ ܒܽܐܘܪܚܳܐ ܘܥܠ ܫܳܐܘܳܠ ܠܰܡܥܰܪܬܳܐ ܘܰܕܡܶܟ ܬܰܡܳܢ. ܘܕܰܘܝܕ ܘܓܰܒܪ̈ܰܘܗܝ ܒܰܫܦܽܘܠܶܝ̈ܗ̇ ܕܗܳܝ ܡܥܰܪܬܳܐ ܝܳܬܒܺܝܢ. ܒܗܳܢܳܐ ܗܳܟܝ̣ܠ ܐܽܘܠܨܳܢܳܐ ܗܘܳܐ ܠܕܰܘܝܕ. ܐܰܝܟܰܢܳܐ ܕܰܠܓܰܘ ܡ̣ܢ ܒܥܶܠܕܒܳܒܶܗ ܢܶܫܬܟܰܚ. ܟܕ ܡܰܣܒܰܪ ܗܘܳܐ ܕܡܶܟܝ̣ܠ ܕܠܰܝܬ ܠܡܶܬܦܰܨܳܝܽܘ ܡ̣ܢ ܫܳܐܘܳܠ ܒܰܕܚܰܒܫܶܗ. ܘܰܗܘܳܐ ܠܒܰܪ ܡܶܢܶܗ ܥܠ ܬܰܪܥܳܐ ܕܰܡܥܰܪܬܳܐ. ܒܳܥܽܘܬܳܐ ܡܩܰܪܶܒ ܗܘܳܐ ܠܰܐܠܗܳܐ ܕܢܶܬܦܰܨܶܐ. ܘܟܕ ܟܺܐܢܽܘܬܳܐ ܚܦܺܝܛܳܐ ܠܡܶܓܕܰܠ ܠܗ ܟܠܺܝܠܳܐ. ܐܶܬܳܐ ܘܩܳܡ ܥܠ ܫܳܐܘܳܠ ܘܰܦܣܰܩ ܟܶܢܦܳܐ ܕܰܦܪܝ̣ܣܶܗ ܘܰܢܦܰܩ ܡ̣ܢ ܡܥܰܪܬܳܐ. ܘܩܳܡ ܡ̣ܢ ܪܽܘܚܩܳܐ ܘܰܩܪܳܐ ܠܫܳܐܘܳܠ ܟܕ ܡܰܘܕܰܥ ܠܗ. ܕܶܐܠܽܘ ܒܥܳܐ ܩܳܛܠ ܗܘܳܐ ܠܶܗ. ܒܗܳܢܐ ܙܰܒܢܳܐ ܕܩܳܡ ܕܰܘܝܕ ܒܽܐܘܠܨܳܢܳܐ ܗܳܢܐ ܕܡܰܘܬܳܐ܆ ܙܰܡܰܪ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܚܰܡܫܰܥܶܣܪ̈ܶܐ. ܕܳܡܶܐ ܩܳܠܶܗ ܕܒܳܗ̇. ܠܗܰܘ ܕܒܰܫܪܳܪܳܐ ܡ̣ܢ ܡܰܘܬܳܐ ܐܶܬܦܰܨܝ̣:
ܪܶܚܡܶܬ ܠܰܡ ܕܢܶܫܡܰܥ ܡܳܪܝܳܐ ܩܳܠܳܐ ܕܒܳܥܽܘܬܝ. ܘܢܶܨܠܶܐ ܐܶܕܢܶܗ ܠܘܳܬܝ ܒܝܰܘܡܳܐ ܕܶܐܩܪܶܝܘܗܝ. ܡܶܛܠ ܕܚܰܕܪܽܘܢܝ ܚܶܒ̈ܠܶܐ ܕܡܰܘܬܳܐ ܘܽܐܘܠܨܳܢ̈ܐ ܕܰܫܝܽܘܠ ܡܰܛܝܽܘܢܝ. ܒܶܝܬ ܠܝ̣ ܘܰܠܡܰܘܬܳܐ ܠܰܝܬ ܗܘܳܐ ܡܶܕܶܡ. ܒܗܳܝ ܕܰܒܚܰܕ ܒܰܝܬܳܐ ܚܒܺܝܫܺܝܢ ܗܘܰܝܢ ܡ̣ܢ ܐܽܘܠܨܳܢܳܐ ܥܰܡ ܗܰܘ ܕܰܢܦܰܩ ܒܳܬܰܪܝ ܠܡܶܩܛܠܰܢܝ.
ܐܽܘܠܨܳܢܳܐ ܘܕܽܘܘܳܢܳܐ ܐܶܫܟܚܶܬ. ܘܒܰܫܡܶܗ ܕܡܳܪܝܳܐ ܐܶܩܪܶܐ. ܡܶܛܠܡܳܢܐ ܐܡ̣ܪ ܡܙܰܡܪܳܢܳܐ ܕܗܽܘ ܐܶܫܟܰܚ ܐܽܘܠܨܳܢܳܐ ܘܕܽܘܘܳܢܳܐ. ܘܠܘ ܡܰܢ ܐܽܘܠܨܳܢܳܐ ܐܶܫܟܚܶܗ. ܘܕܳܡܝܳܐ ܗܳܕܐ ܒܳܥܶܐ ܕܢܰܐܠܶܦ ܕܟܕ ܠܰܡ ܚܰܕܪܽܘܢܝ. ܐܽܘ̈ܠܨܳܢܶܐ ܕܡܰܘܬܳܐ ܦܰܨܝܰܢܝ ܡܳܪܝܳܐ. ܘܗܳܝܕܶܝܢ ܐܶܫܟܚܶܬ ܠܝ̣ ܐܶܢܳܐ ܡܶܢ ܢܰܦܫܝ ܕܽܘܘܳܢܳܐ ܘܽܐܘܠܨܳܢܳܐ. ܐܳܦ ܒܥܰܡ̈ܠܶܐ ܕܰܡܣܰܝܒܪܳܢܽܘܬܳܐ ܐܶܦܪܽܘܥ ܩܴ̈ܠܶܐ ܕܩܽܘܒܳܠܛܰܝܒܽܘܬܳܐ ܠܰܐܠܗܳܐ. ܦܳܩܚܳܐ ܗܝ ܓܝܪ ܕܗܽܘ ܐܢܳܫ ܡܶܢ ܢܰܦܫܶܗ ܢܶܫܟܚܳܗ̇ ܠܰܡܝܰܬܪܽܘܬܳܐ ܒܥܰܡܠܳܐ ܘܒܽܐܘܠܨܳܢܳܐ ܝܰܬܝ̣ܪ ܡ̣ܢ ܗܳܝ ܕܢܺܐܠܰܦ ܡ̣ܢ ܐܚܪ̈ܳܢܶܐ. ܕܰܐܝܟ ܗܳܟܰܢܳܐ ܗܘܳܐ ܓܝܪ ܛܽܘܒܳܢܳܐ ܕܰܘܝܕ. ܡܶܛܠܗܳܢܐ ܐܡ̇ܪ ܗܘܳܐ.
ܐܽܘܢ ܡܳܪܝܳܐ ܦܰܨܳܗ̇ ܠܢܰܦܫܝ. ܐܳܦ ܗܳܕܐ ܡܰܘܕܥܳܐ ܕܡ̣ܢ ܐܽܘܠܨܳܢܳܐ ܕܩܳܡ ܥܠܰܘܗܝ ܩܳܥܶܐ ܗܘܳܐ. ܘܬܰܟܬܽܘܫܳܐ ܪܰܒܳܐ ܣܕܺܝܪ ܗܘܳܐ ܥܠܰܘܗܝ ܡ̣ܢ ܒܥܶܠܕ̈ܒܳܒܶܐ ܕܢܰܦܫܳܐ. ܡܥܳܕܺܝܢ ܐܶܢܘܢ ܕܰܡܥܺܝܪܺܝܢ ܩܪܳܒܳܐ ܥܰܠ ܢܰܦܫܳܐ ܕܗܳܘܝܳܐ ܠܗ̇ ܒܽܐܘܠܨܳܢܳܐ. ܘܡܶܛܠܗܳܕܐ ܐܡ̣ܪ: ܐܽܘܢ ܡܳܪܝܳܐ ܦܰܨܳܗ̇ ܠܢܰܦܫܝ. ܘܰܒܝܰܕ ܗܳܕܐ ܠܘ ܟܽܠܶܗ ܐܽܘܠܨܳܢܳܐ ܡ̣ܢ ܫܳܐܘܳܠ ܩܳܡ ܥܠܰܘܗܝ. ܐܠܐ ܡ̣ܢ ܫܺܐܕ̈ܐ ܕܰܒܚܶܫܽܘܟܳܐ ܟܡܺܝܢܺܝܢ ܗܘܰܘ ܠܢܰܦܫܶܗ. ܫܳܐܘܠ ܓܝܪ ܠܘ ܢܰܦܫܶܗ ܒܳܥܶܐ ܗܘܳܐ. ܘܒܳܬܰܪܟܶܢ ܐܡ̣ܪ:
ܡܪܰܚܡܳܢ ܐܰܢܬ ܡܳܪܝܳܐ ܘܙܰܕܝ̣ܩ. ܘܰܐܠܗܳܐ ܐܰܢܬ ܡܪܰܚܡܳܢܳܐ. ܢܳܛܰܪ ܠܫܰܒܪ̈ܶܐ ܡܳܪܝܳܐ. ܕܺܐܝܬܰܘܗܝ ܗܘܳܐ ܫܰܒܪܳܐ ܒܰܐܓܽܘܢܳܐ ܕܠܽܘܩܒܰܠ ܗܳܢܘܢ ܕܰܐܥܬܶܩܘ ܡܰܘܕܰܥ ܒܝܰܕ ܗܳܕܐ. ܡܶܛܠ ܕܰܒܗܰܘ ܙܰܒܢܳܐ ܥܠܰܝܡܳܐ ܗܘܳܐ. ܘܠܳܐ ܡܰܠܺܝ ܗܘܳܐ ܒܰܪ ܬܠܳܬܺܝܢ ܫ̈ܢܺܝܢ. ܘܡܶܛܠ ܕܡ̣ܢ ܟܕ ܐܝ̣ܬܰܘܗܝ ܗܘܳܐ ܫܰܒܪܳܐ ܐܰܚܶܒ ܢܰܟܦܽܘܬܳܐ. ܘܗܳܕܐ ܕܶܝܢ ܒܳܥܶܐ ܗܘܳܐ ܕܢܶܫܬܰܘܙܰܒ ܡ̣ܢ ܚܰܣܺܝܢܳܐ. ܒܰܨܠܽܘܬܳܐ ܘܰܒܒܳܥܽܘܬܳܐ ܫܳܗܰܪ ܗܘܳܐ ܥܠ ܡܰܛܰܪܬܶܗ. ܘܟܕ ܚܙܳܝܗܝ ܠܦܽܘܪܩܳܢܳܐ ܕܡܰܢܰܥ ܘܰܩܪܶܒ ܠܶܗ. ܒܳܬܰܪ ܕܶܐܬܡܰܟܰܟ ܐܡ̣ܪ.
ܡܰܟܟܰܢܝ ܐܳܦ ܦܰܪܩܰܢܝ. ܥܕܰܡܳܐ ܕܶܐܬܡܰܟܟܶܬ ܠܳܐ ܐܶܬܦܰܪܩܶܬ. ܪܺܝܫܺܝܬܳܐ ܕܦܽܘܪܩܳܢܳܐ ܡܰܟܺܝܟܽܘܬܳܐ ܗܘܳܬ ܠܝ̣. ܘܥܰܠܗܳܕܐ ܐܡ̇ܪ ܐܢܳܐ:
ܐܶܬܦܢܳܝ ܢܰܦܫܝ ܠܰܢܝܳܚܶܟܝ. ܡܶܛܠ ܕܡܳܪܝܳܐ ܦܰܪܥܶܟܝ. ܡܶܛܠ ܕܦܰܨܺܝ ܢܰܦܫܝ ܡ̣ܢ ܡܰܘܬܳܐ. ܘܪ̈ܶܓܠܰܝ ܡ̣ܢ ܫܳܪ̈ܥܳܬܳܐ. ܕܶܐܫܦܰܪ ܩܕܳܡܰܝܟ ܐܰܠܗܳܐ ܒܰܐܪܥܳܐ ܕܚܰܝܷ̈ܐ. ܒܗܳܠܶܝܢ ܐܰܘܕܰܥ ܢܒܺܝܐ ܕܡ̣ܢ ܒܳܬܰܪ ܕܰܒܥܳܐ ܘܶܐܬܟܰܫܰܦ ܘܶܐܬܢܰܨܰܚ ܒܰܐܓܽܘܢܳܐ. ܐܡ̣ܪ ܠܘܳܬ ܢܰܦܫܶܗ ܕܬܶܬܦܢܶܐ ܠܰܢܝܳܚܳܗ̇ ܡܶܛܠ ܕܦܰܪܥܳܗ̇ ܡܳܪܝܳܐ ܐܰܓܪܳܐ ܚܠܳܦ ܥܰܡܠܶܝ̈ܗ̇ ܟܺܐܢ̈ܐ ܘܦܰܨܝܳܗ̇ ܡ̣ܢ ܡܰܘܬܳܐ. ܠܘ ܡ̣ܢ ܗܳܢܐ ܕܦܳܪܶܫ ܠܶܗ ܡ̣ܢ ܦܰܓܪܳܐ ܕܺܐܝܬܰܘܗܝ ܫܪܳܝܳܐ. ܐܶܠܐ ܡ̣ܢ ܗܰܘ ܕܺܐܝܬܰܘܗܝ ܓܠܺܝܙܽܘܬܳܐ ܕܡ̣ܢ ܚܰܝ̈ܐ ܕܩܰܕܺܝ̈ܫܶܐ ܕܡܰܠܰܐܟ̈ܐ. ܘܪܰܚܺܝܩܽܘܬܳܐ ܕܡܶܢ ܐܰܠܗܳܐ. ܘܪ̈ܶܓܠܰܘܗܝ ܡ̣ܢ ܫܳܪ̈ܥܳܬܳܐ. ܟܕ ܠܐ ܐܶܬܛܦܺܝܣ ܡ̣ܢ ܡܬܽܘܡ ܠܰܚܛܳܗܳܐ. ܐܶܠܐ ܒܰܠܚܽܘܕ ܒܰܨܒܽܘܬܳܐ ܕܒܶܝܬ ܐܽܘܪܺܝܳܐ. ܘܰܐܘܕܰܥ ܒܗܳܝ ܕܰܡܦܺܝܣ ܗܘܳܐ܆ ܕܒܰܐܪܥܳܐ ܕܚܰܝ̈ܐ ܢܶܫܦܰܪ ܠܰܐܠܗܳܐ. ܐܰܪܥܳܐ ܕܚܰܝ̈ܐ ܕܶܝܢ ܠܟܳܐ ܡ̣ܢ ܫܡܰܝܳܐ ܠܰܝܬ. ܐܠܐ ܗܳܝ ܕܰܢܛܺܝܪܳܐ. ܕܬܶܗܘܶܐ ܝܳܪܬܽܘܬܳܐ ܠܙܰܕܺܝ̈ܩܶܐ ܒܳܬܰܪ ܡܰܦܩܳܢܗܽܘܢ ܕܡܶܢ ܐܰܪܥܳܐ ܕܡܺܝ̈ܬܶܐ. ܢܶܚܙܶܐ ܕܶܝܢ ܗܳܫܐ ܡܳܢܳܐ ܒܳܥܶܐ ܛܽܘܒܳܢܳܐ ܕܰܘܝܕ ܠܡܺܐܡܰܪ:
ܗܰܝܡܢܶܬ ܘܡܰܠܠܶܬ ܘܶܐܬܡܰܟܟܶܬ. ܗܳܢܐ ܕܶܝܢ ܦܶܬܓܳܡܳܐ ܒܠܶܫܳܢܳܐ ܥܶܒܪܳܝܳܐ ܪܺܝܫܳܐ ܕܡܰܙܡܽܘܪܳܐ ܐܝ̣ܬܰܘܗܝ. ܡܰܝܬܶܐ ܠܶܗ ܠܣܳܗܕܽܘܬܳܐ ܠܘܳܬ ܩܽܘܪ̈ܺܝܢܬܳܝܶܐ. ܘܳܐܦ ܛܽܘܒܳܢܳܐ ܦܰܘܠܽܘܣ ܟܕ ܡܦܰܫܶܩ ܠܶܗ. ܕܡܶܢ ܗܳܝ ܕܰܡܗܰܝܡܶܢ ܐܢܳܫ ܐܳܬܶܐ ܠܘܳܬ ܡܝܰܬܪ̈ܳܬܳܐ ܣܰܓܺܝ̈ܐܬܳܐ. ܘܟܽܠ ܕܡܰܠܝܳܐܝ̣ܬ ܘܰܕܠܐ ܒܽܘܨܳܪܳܐ ܡܗܰܝܡܶܢ. ܗܳܢܐ ܐܳܦ ܡܠܺܝܠܳܐ ܐܝ̣ܬܰܘܗܝ. ܘܗܰܝܡܳܢܽܘܬܳܐ ܓܶܝܪ ܠܦܽܘܬ ܡܫܽܘܚܬܳܐ ܕܥܳܬܪܳܐ ܒܳܗ̇ ܢܰܦܫܳܐ. ܡܶܛܠܗܳܢܐ ܡܰܣܗܶܕ ܦܰܘܠܽܘܣ ܗܰܘ ܪܰܒܳܐ ܕܪܽܘܚܳܐ ܡܦܰܠܶܓ ܡܰܘܗ̈ܒܳܬܳܐ ܘܟܰܕ ܐܶܬܳܐ ܠܘܳܬ ܩܰܕܺܝ̈ܫܶܐ ܕܶܐܬܝ̣ܗܶܒ ܡܶܛܠ ܗܰܝܡܳܢܽܘܬܳܐ ܕܺܝܠܗܽܘܢ. ܟܕ ܠܘܬ ܪ̈ܽܘܡܳܝܶܐ ܟܳܬܶܒ ܗܘܳܐ ܘܶܐܡܰܪ: ܕܟܽܠܰܢ ܗܰܕܳܡ̈ܐ ܚܢܰܢ ܕܰܚܕܳܕ̈ܐ. ܐܶܠܐ ܐܝ̣ܬ ܗܽܘ ܡܰܘܗ̈ܒܳܬܳܐ ܡܫܰܚܠܦ̈ܬܳܐ ܐܝܟ ܛܰܝܒܽܘܬܳܐ ܕܶܐܬܝܰܗܒܰܬ ܠܰܢ. ܐܝ̣ܬ ܕܰܢܒܺܝܽܘܬܳܐ ܐܝܟ ܡܫܽܘܚܬܳܐ ܕܗܰܝܡܳܢܽܘܬܶܗ (ܪ̈ܗܘܡܝܐ ܝܒ: ܗ-ܘ). ܡܳܕܶܝܢ ܫܰܦܺܝܪ ܓܝܪ ܐܶܬܐܰܡܪܰܬ ܠܗܰܘ ܕܠܐ ܪܳܚܶܡ ܢܶܬܚܙܶܐ ܕܰܒܗܳܝ ܡܫܽܘܚܬܳܐ ܕܰܡܗܰܝܡܶܢ ܒܰܪܢܳܫܳܐ ܒܗ̇ ܡܶܬܥܰܠܶܐ ܒܰܪܢܳܫܳܐ ܠܰܡܥܰܠܝܽܘܬܳܐ ܕܐܪ̈ܳܙܶܐ ܩܰܕܺܝ̈ܫܶܐ. ܡܶܛܠ ܕܠܐ ܡܰܫܠܶܛ ܐܰܠܗܳܐ ܥܠ ܐܪ̈ܳܙܶܐ ܡܥܰܠܰܝܴ̈ܐ ܕܺܝܠܶܗ. ܠܢܰܦܫܳܐ ܐܰܝܕܳܐ ܕܠܐ ܡܗܰܝܡܢܳܐ ܒܗܽܘܢ. ܘܦܰܘܠܽܘܣ ܛܽܘܒܳܢܳܐ ܐܡ̇ܪ ܗܘܳܐ ܕܰܡܗܰܝܡܢܺܝܢܰܢ. ܡܶܛܠܗܳܢܐ ܐܳܦ ܡܡܰܠܠܺܝܢܰܢ. ܫܰܦܺܝܪ ܡܳܕܶܝܢ ܐܡ̣ܪ ܢܒܺܝܳܐ. ܕܗܰܝܡܶܢ ܘܡܰܠܶܠ ܕܰܒܗܳܕܐ ܢܰܘܕܰܥ ܕܰܥܕܰܡܳܐ ܕܗܰܝܡܶܢ ܘܠܳܐ ܠܛܰܝܒܽܘܬܳܐ ܕܰܢܒܺܝܽܘܬܳܐ ܐܶܫܬܘܺܝ. ܘܰܐܝܟ ܡܫܽܘܚܬܳܐ ܕܗܰܝܡܳܢܽܘܬܶܗ ܩܰܒܶܠ ܢܒܺܝܽܘܬܳܐ. ܐܰܘܣܶܦ ܡ̣ܢ ܕܺܝܠܶܗ ܢܒܺܝܳܐ ܡܰܟܺܝܟܽܘܬܳܐ. ܗܰܝܡܢܶܬ ܠܰܡ ܘܡܰܠܠܶܬ ܘܶܐܬܡܰܟܟܶܬ. ܘܰܒܗܳܕܐ ܡܰܠܶܦ. ܕܡܰܟܺܝܟܽܘܬܳܐ ܒܰܪܬ ܙܰܘܓܳܐ ܗܝ ܕܗܰܝܡܳܢܽܘܬܳܐ ܕܟܕ ܗܰܝܡܶܢ ܡܡܰܠܶܠ. ܡܶܛܠ ܕܐܢ ܡܗܰܝܡܶܢ ܒܰܪܢܳܫܳܐ. ܟܕ ܠܐ ܡܨܰܒܰܬ ܒܡܰܟܺܝܟܽܘܬܳܐ. ܗܳܢܐ ܡܨܰܥܰܪ ܠܗ̇ ܠܡܰܘܗܰܒܬܳܐ ܘܰܡܕܰܘܶܕ ܠܳܗ̇ ܠܡܶܠܬܳܐ ܕܰܢܒܺܝܽܘܬܳܐ. ܗܳܝ ܕܟܕ ܡܰܪܓܫܳܐ ܢܰܦܫܳܐ ܒܪܰܒܽܘܬܳܐ ܐܳܦ ܒܰܫܒܺܝܚܽܘܬܳܐ ܕܓܶܠܝܴ̈ܢܶܐ ܘܠܐ ܣܳܒܟܳܐ ܒܳܗ̇ ܚܬܺܝܪܽܘܬܳܐ ܘܪܳܡܽܘܬܳܐ ܟܕ ܥܳܪܩܳܐ ܡ̣ܢ ܠܘܳܬܳܗ̇ ܛܰܝܒܽܘܬܳܐ ܕܪܽܘܚܳܐ. ܘܰܡܫܰܢܶܐ ܪܽܘܚܳܐ ܩܰܕܺܝܫܳܐ ܡ̣ܢ ܢܰܦܫܳܐ ܕܰܐܚܺܝܕܳܐ ܒܢܶܫ̈ܒܶܐ ܕܪܳܡܽܘܬܳܐ. ܘܒܳܬܰܪ ܕܶܝܢ ܕܗܰܝܡܶܢ ܢܒܺܝܳܐ ܡܡܰܠܶܠ ܡܳܢܳܐ ܬܽܘܒ ܐܡ̇ܪ܆
ܐܶܢܳܐ ܐܶܡܪܶܬ ܒܰܪܥܺܝܠܽܘܬܝ ܕܟܽܠ ܒܰܪܢܳܫ ܕܰܓܳܠ. ܡܳܕܶܝܢ ܘܠܳܐ ܗܽܘ ܢܒܺܝܳܐ ܡܚܰܪܰܪ ܗܘܳܐ ܡܶܢ ܕܰܓܳܠܽܘܬܳܐ. ܘܠܰܘ ܗܽܘ ܒܰܠܚܽܘܕ. ܐܶܠܐ ܘܳܐܦ ܟܽܠܗܽܘܢ ܐܰܝܠܶܝܢ ܕܶܐܣܬܰܒܰܪܘ ܫܰܪܺܝܪ̈ܶܐ. ܠܳܐ ܡܚܰܪܪܺܝܢ ܡ̣ܢ ܕܰܓܳܠܽܘܬܳܐ. ܡܳܢܳܐ ܕܶܝܢ ܐܝ̣ܬܶܝܗ̇ ܕܰܓܳܠܽܘܬܳܐ. ܠܰܚܛܺܝܬܳܐ ܩܳܪܶܐ ܕܰܓܳܠܽܘܬܳܐ. ܘܰܒܗܳܕܐ ܕܟܽܠ ܒܰܪܢܳܫ ܕܰܓܳܠ. ܠܰܝܬ ܕܰܡܚܰܪܰܪ ܡܶܢ ܕܰܓܳܠܽܘܬܳܐ. ܘܳܐܦ ܩܽܘܗܠܰܬ ܚܰܟܺܝܡܳܐ ܕܰܐܝܟ ܗܳܢܐ ܐܡ̣ܪ܆ ܡܶܛܠ ܕܠܰܝܬ ܐܢܳܫ ܕܙܰܕܺܝܩ ܥܰܠ ܐܰܪܥܳܐ: ܕܢܶܥܒܶܕ ܕܛܳܒ ܘܠܳܐ ܢܶܚܛܶܐ (ܩܘܗܠܬ ܙ: ܟܐ). ܘܰܒܗܳܕܶܐ ܐܰܠܶܦ ܕܠܰܝܬ ܕܰܡܫܰܡܠܰܝ ܘܰܓܡܺܝܪ ܘܪܰܚܺܝܩ ܡ̣ܢ ܫܰܘܬܳܦܽܘܬܳܐ ܕܰܚܛܺܝܬܳܐ. ܘܟܽܠ ܒܰܪܢܳܫ ܕܰܓܳܠ. ܘܰܟܡܳܐ ܙܰܒ̈ܢܺܝܢ ܒܝܰܕ ܚܽܘ̈ܫܳܒܶܐ ܫܳܠܶܡ ܠܰܚܛܺܝܬܳܐ. ܐܰܘ ܒܡܶܠܬܳܐ ܐܰܘ ܒܨܶܒܝܳܢܳܐ. ܘܥܰܠܗܳܕܐ ܟܽܠ ܒܰܪܢܳܫ ܕܰܓܳܠ. ܘܗܳܕܐ ܡܶܠܬܳܐ ܕܶܐܡܰܪ ܒܰܪܥܺܝܠܽܘܬܳܐ ܐܡ̣ܪ. ܗܳܢܰܘ ܕܶܝܢ ܒܪܶܥܝܳܢܳܐ ܕܙܳܐܱܥ ܘܠܳܐ ܡܫܰܪܰܪ ܒܗܰܝܡܳܢܽܘܬܳܐ. ܡܶܛܠ ܕܥܶܠܬܳܐ ܕܡܰܘܬܳܐ ܕܰܓܳܠܽܘܬܳܐ ܗܘܳܬ ܠܒܰܪܢܳܫܳܐ. ܡܰܘܕܶܐ ܢܒܺܝܐ ܠܗܰܘ ܕܒܰܚܢܳܢܶܗ ܡܰܥܒܰܪ ܥܰܝܢܰܘ̈ܗܝ ܕܠܐ ܢܶܚܙܶܐ ܕܰܓܳܠܽܘܬܳܐ ܕܰܒܢܰܝ̈ܢܳܫܳܐ. ܡܶܛܠ ܕܨܳܒܶܐ ܕܢܺܚܽܘܢ ܟܽܠܗܽܘܢ ܡܳܟ̈ܣܶܐ ܥܰܠ ܡܽܘܡܰܝ̈ܗܘܢ. ܘܦܳܪܶܩ ܠܗܽܘܢ. ܘܡܳܢܳܐ ܗܝ ܓܝܪ ܡܰܘܕܝܳܢܽܘܬܶܗ.
ܡܳܢܳܐ ܠܰܡ ܐܶܦܪܽܘܥ ܠܡܳܪܝܳܐ. ܕܟܽܠܗܽܘܢ ܦܽܘܪ̈ܥܳܢܰܘܗܝ ܥܠܰܝ. ܡܳܢܳܐ ܕܶܝܢ ܐܝ̣ܬܰܝܗܽܘܢ ܦܽܘܪ̈ܥܳܢܰܘܗܝ ܕܡܳܪܝܳܐ ܕܥܰܠ ܢܒܺܝܳܐ.
ܟܳܣܳܐ ܕܦܽܘܪܩܳܢܳܐ ܐܶܩܰܒܶܠ ܘܒܰܫܡܶܗ ܕܡܳܪܝܳܐ ܐܶܩܪܶܐ. ܡܳܢܰܐ ܗܘ ܓܝܪ ܟܳܣܳܐ ܗܰܘ ܕܦܽܘܪܩܳܢܳܐ. ܗܰܘ ܫܽܘܠܛܳܢܳܐ ܕܰܫܪܳܐ ܫܽܘܠܛܳܢܶܗ ܕܡܰܘܬܳܐ. ܗܰܘ ܕܶܐܡܰܪ ܗܘܳܐ ܦܳܪܽܘܩܰܢ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܒܥܶܠܺܝܬܳܐ. ܕܗܳܢܳܐ ܟܳܣܳܐ ܕܶܡܝ ܗܽܘ. ܣܰܒܘ ܐܶܫܬܰܘ ܡܶܢܶܗ ܟܽܠܟܽܘܢ (ܡܬܝ ܟܘ: ܟܙ). ܘܗܰܘ ܕܰܠܗܳܢܐ ܟܳܣܳܐ ܡܩܰܒܶܠ. ܫܰܦܺܝܪ ܩܳܪܶܐ ܒܰܫܡܶܗ ܕܡܳܪܝܳܐ. ܗܰܘ ܕܡܰܙܓܶܗ ܡܶܛܠ ܦܽܘܪܥܳܢܳܐ. ܘܡܳܐ ܕܩܰܒܶܠ ܟܳܣܳܐ ܗܳܢܐ ܦܳܪܰܥ ܢܶܕܪܳܐ ܕܩܽܘܒܳܠܛܰܝܒܽܘܬܳܐ ܠܡܳܪܝܳܐ. ܐܰܝܟ ܕܶܐܡܰܪ ܢܒܺܝܳܐ:
ܢܶܕܪ̈ܰܝ ܠܡܳܪܝܳܐ ܐܶܦܪܽܘܥ ܩܕܳܡ ܟܽܠܶܗ ܥܰܡܳܐ. ܢܶܕܪ̈ܶܐ ܕܶܝܢ ܠܰܨܠܽܘܬܳܐ ܩܳܪܶܐ. ܕܟܰܕ ܠܰܡ ܥܰܡܶܗ ܕܡܳܪܝܳܐ ܚܙܳܐ ܐܰܥܒܰܕ ܗܳܕܐ. ܘܬܘܒ ܕܶܝܢ ܥܠ ܙܰܕܺܝ̈ܩܶܐ ܡܰܝܬܶܐ ܟܕ ܐܡ̇ܪ:
ܝܰܩܺܝܪ ܗܽܘ ܒܥܰܝ̈ܢܰܘܗܝ ܕܡܳܪܝܳܐ ܡܰܘܬܳܐ ܕܙܰܕܺܝ̈ܩܰܘܗܝ. ܡܶܠܬܳܐ ܕܶܝܢ ܗܳܕܐ ܕܳܡܝܳܐ ܕܠܰܬܪܶܝܢ ܢܺܝ̈ܫܶܐ ܚܳܢܝܳܐ. ܐܝ̣ܬ ܕܶܝܢ ܐܳܡܪܺܝܢ ܕܡܶܛܠ ܕܠܐ ܚܛܰܘ ܐܰܝܟ ܗܰܘ ܕܥܳܒܶܕ ܠܘܳܬܗܽܘܢ ܡܶܕܶܡ ܕܠܳܐ ܚܰܝܳܒܺܝܢ ܝܰܩܺܝܪ ܠܶܗ ܡܰܘܬܳܐ ܕܙܰܕܺܝ̈ܩܶܐ. ܐܰܝܟ ܗܰܘ ܕܰܡܢܰܓܰܕ ܠܰܒܢܱ̈ܝ ܚܺܐܪ̈ܶܐ ܟܕ ܠܐ ܐܰܣܟܶܠܘ. ܐܚܪ̈ܳܢܶܐ ܕܶܝܢ ܐܳܡܪܺܝܢ ܕܰܐܝܟ ܡܶܕܶܡ ܪܰܒܳܐ ܕܛܳܒ ܫܒܺܝܚ. ܝܰܩܝ̣ܪ ܥܠܰܘܗܝ ܡܰܘܬܳܐ ܕܙܰܕܺܝ̈ܩܶܐ. ܘܗܰܢܝ̣ ܠܗ ܡܶܛܠ ܕܰܡܚܰܪܰܪ ܠܗܽܘܢ ܡ̣ܢ ܫܚܳܩ̈ܐ ܘܛܽܘܪ̈ܳܦܶܐ. ܘܕܳܡܝܳܐ ܡܶܠܬܳܐ ܕܗܳܕܐ ܐܝ̣ܬܶܝܗ̇ ܕܚܳܕܶܐ ܒܡܰܘܬܗܽܘܢ. ܟܕ ܚܳܙܶܐ ܕܣܶܡܟܰܬ ܐܶܠܦܗܽܘܢ ܠܰܠܡܺܐܢܳܐ ܕܦܽܘܪܩܳܢܳܐ. ܗܰܘ ܕܥܰܡ ܢܒܺܝܳܐ ܩܳܥܶܐ ܒܶܗ ܟܽܠܚܰܕ ܡܶܢܗܽܘܢ ܡܳܐ ܕܡܰܢܰܥ ܐܰܝܟ ܕܶܐܡܰܪ.
ܐܳܘ ܡܳܪܝܳܐ ܐܶܢܳܐ ܥܰܒܕܳܟ. ܥܰܒܕܳܟ ܐܢܳܐ ܘܰܒܪܳܗ̇ ܕܰܐܡܬܳܟ. ܕܰܐܝܟ ܗܳܟܰܢܳܐ ܓܶܝܪ ܩܳܥܝܴ̈ܢ ܢܰܦ̈ܫܳܬܗܽܘܢ ܠܘܳܬ ܡܳܪܝܳܐ ܡܳܐ ܕܰܢܦܰܩܘ ܡ̣ܢ ܦܰܓܪ̈ܶܐ. ܘܰܐܝܟ ܗܰܘ ܕܩܳܐܷܡ ܒܥܽܘܡܩܳܐ ܘܩܳܥܶܐ ܠܗܰܘ ܕܝܳܬܶܒ ܒܪܰܘܡܳܐ. ܕܢܶܦܫܽܘܛ ܠܶܗ ܐܝ̣ܕܳܐ ܘܢܰܣܩܶܗ ܡ̣ܢ ܨܳܡܰܪܬܳܐ ܕܛܰܘܦܳܢܳܐ. ܗܳܟܰܢܳܐ ܦܳܫ̈ܛܳܢ ܢܰܦ̈ܫܳܬܳܐ ܩܳܠܰܝ̈ܗܶܝܢ ܘܩܳܥ̈ܝܳܢ ܐܝܟ ܡܶܠܬܳܐ ܗܳܕܐ ܐܰܝܠܶܝܢ ܕܰܗܘܰܝ̈ ܒܰܫܪܳܪܳܐ ܒܢܴ̈ܬ ܒܰܝܬܳܐ ܠܰܐܠܗܳܐ. ܘܗܰܘ ܕܰܐܝܟ ܕܡܶܢ ܒܶܝܬ ܐܰܣܺܝܪ̈ܶܐ ܥܳܪܶܩ ܘܢܳܦܶܩ ܡ̣ܢ ܥܳܠܡܳܐ ܗܳܢܐ. ܐܡ̇ܪ ܡܳܪܝܳܐ:
ܫܪܰܝܬ ܡܶܢܝ ܐܰܣܽܘܪ̈ܰܝ. ܘܦܰܠܶܛܬ ܡ̣ܢ ܩܕܳܠܝ ܢܺܝܪܳܐ ܕܫܽܘܥܒܳܕܳܐ. ܘܡܶܢ ܒܶܝܬ ܚܒܽܘܫܝܳܐ ܕܥܳܩܴ̈ܬܳܐ ܐܰܦܶܩܬܳܢܝ.
ܠܳܟ ܐܶܕܰܒܰܚ ܕܶܒܚ̈ܐ ܕܫܽܘܒܚܳܐ. ܘܰܩܕܳܡܰܝܟ ܐܶܩܰܪܶܒ ܩܽܘܪ̈ܒܳܢܶܐ ܕܬܰܘܕܺܝܬܳܐ.
ܘܒܰܫܡܶܗ ܕܡܳܪܝܳܐ ܐܶܩܪܶܐ. ܘܢܶܕܪ̈ܰܝ ܠܡܳܪܝܳܐ ܐܶܦܪܽܘܥ. ܩܕܳܡ ܟܽܠܶܗ ܥܰܡܳܐ. ܘܰܒܕܳܪܳܐ ܕܒܰܝܬܶܗ ܕܡܳܪܝܳܐ ܘܰܒܓܰܘܶܟܝ ܐܽܘܪܺܫܠܶܡ. ܗܳܠܝܢ ܐܶܢܘܢ ܩܴ̈ܠܐ ܕܙܰܕܺܝ̈ܩܶܐ. ܡܳܐ ܕܩܳܪܶܝܢ ܒܰܫܡܶܗ ܕܡܳܪܝܳܐ. ܒܥܶܕܳܢܳܐ ܕܡܶܬܦܬܰܚ ܓܢܽܘܢܳܐ. ܘܥܳܐܠܺܝܢ ܠܕܳܪ̈ܳܬܳܐ ܥܶܠܳܝܴ̈ܬܳܐ ܕܗܰܘ ܒܰܝܬܳܐ ܕܺܐܝܬ ܠܥܶܠ ܡܶܢ ܫܡܰܝܳܐ ܘܠܳܐ ܥܒܺܝܕ ܒܺܐܝ̈ܕܰܝܳܐ. ܘܠܐ ܗܘܳܐ ܡ̣ܢ ܗܳܠܶܝܢ ܒܶܪ̈ܝܳܬܳܐ. ܘܩܳܝܡܺܝܢ ܒܓܰܘ ܐܽܘܪܺܫܠܶܡ ܗܳܝ ܚܺܐܪܬܳܐ ܕܒܰܫܡܰܝܳܐ. ܘܰܐܝܟ ܒܢܱ̈ܝ ܡܕܺܝܢܬܳܐ ܕܩܰܕܺܝ̈ܫܶܐ. ܡܰܘܕܶܝܢ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܫܬܥܣܪ
ܡܰܘܕܰܥ ܒܶܗ ܥܰܠ ܐܪܳܙܳܐ ܕܫܽܘܒܚܳܐ ܕܡܶܬܝ̣ܗܶܒ ܒܚܰܪܬܳܐ ܡܶܢ ܟܽܠܗܽܘܢ ܥܰܡ̈ܡܶܐ ܠܚܰܕ ܐܰܠܳܗܳܐ.
ܟܽܠܗܽܘܢ ܢܒܺܝ̈ܐ ܠܰܐܝܠܶܝܢ ܕܩܰܒܶܠܘ ܡܰܠܝܳܐܝ̣ܬ ܪܽܘܚܳܐ ܕܰܢܒܺܝܽܘܬܳܐ. ܒܥܰܝܢܳܐ ܡܪܺܝܩܬܳܐ ܕܚܳܙܝܳܐ ܟܣܰܝܴ̈ܬܳܐ ܘܕܳܝܩܳܐ ܓܢܺܝ̈ܙܳܬܳܐ ܘܰܥܬܺܝ̈ܕܳܬܳܐ. ܩܰܕܶܡܘ ܚܙܰܐܘܽܗܝ ܠܫܽܘܒܚܶܗ ܕܥܰܡܰܢܽܘܐܝܠ. ܘܰܐܪܓܶܫܘ ܒܫܽܘܠܳܡܳܐ ܕܪܶܗܛܳܐ ܕܟܽܠܗܽܘܢ ܥܰܡܡ̈ܐ. ܘܰܚܙܰܐܘܽܗܝ ܒܥܰܝܢܳܐ ܕܪܽܘܚܳܐ ܠܗܰܘ ܕܺܝܢܳܐ ܕܗܳܘܶܐ ܒܫܽܘܠܳܡܳܐ. ܘܰܐܪܓܶܫܘ ܒܰܦܣܳܩܳܐ ܕܚܺܝܠܳܐ ܕܢܳܦܶܩ ܥܰܠ ܡܰܪ̈ܳܚܶܐ ܘܰܫܡܰܥܘ ܒܶܐܕ̈ܢܶܐ ܟܰܣܝܴ̈ܬܳܐ ܕܢܰܦܫܗܽܘܢ ܩܳܠܳܐ ܘܰܪܓܽܘܫܝܳܐ ܕܟܽܠܗܽܘܢ ܥܰܡܡ̈ܐ ܘܠܶܫܳܢ̈ܐ ܕܰܡܫܰܒܚܺܝܢ ܒܳܬܰܪ ܕܺܝܢܳܐ ܠܚܰܕ ܐܠܗܐ. ܘܟܽܠܚܰܕ ܡ̣ܢ ܢܒܺܝ̈ܐ ܠܦܽܘܬ ܡܰܪܓܫܳܢܽܘܬܳܐ ܕܰܐܪܓܶܫ ܐܰܟܬܶܒ ܥܰܠ ܕܺܝܢܳܐ. ܛܽܘܒܳܢܳܐ ܕܰܘܝܕ ܒܡܰܙܡܽܘܪܳܐ ܗܳܢܐ ܕܰܡܳܐܐ ܘܶܫܬܰܥܣܰܪ ܓܶܠܝܳܢܳܐ ܪܰܒܳܐ ܒܰܕܶܩ ܠܥܺܕܬܶܗ ܕܰܐܠܳܗܳܐ. ܘܰܟܡܳܐ ܐܶܢ ܙܥܽܘܪ ܒܣܶܕܪܳܐ ܕܦܶܬܓܳܡܰܘ̈ܗܝ ܐܶܠܐ ܒܚܰܝܠܳܐ ܪܰܒܳܐ ܡܶܬܡܰܠܰܠ. ܐܡ̣ܪ ܓܶܝܪ ܟܰܕ ܡܫܰܒܰܚ ܘܰܡܙܰܡܰܪ ܗܳܝ:
ܕܫܰܒܰܚܘ ܠܡܳܪܝܳܐ ܟܽܠܟܽܘܢ ܥܰܡܡ̈ܐ. ܘܫܰܒܚܳܝ̈ܗܝ ܟܽܠܗܶܝܢ ܐܶܡ̈ܘܳܬܳܐ. ܡܶܛܠ ܕܥܶܫܢܰܬ ܥܠܰܝܢ ܛܰܝܒܽܘܬܳܗ. ܘܫܰܪܺܝܪܳܐܝ̣ܬ ܡܳܪܝܰܐ ܗܘ ܠܥܳܠܰܡ. ܥܕܰܡܳܐ ܠܗܳܪܟܳܐ ܐܶܬܳܐ ܒܬܶܫܒܽܘܚܬܳܐ ܗܳܕܐ ܘܦܰܣܩܶܗ ܠܙܽܘܡܳܪܳܐ. ܘܠܐ ܐܰܘܪܶܟ ܡܶܬܚܳܐ ܠܰܙܡܺܝܪܬܶܗ. ܡܳܢܐ ܗܳܟܝ̣ܠ ܨܳܒܶܐ ܕܢܰܘܕܰܥ. ܢܺܐܡܰܪ ܥܰܠ ܩܺܝܬܳܪܳܐ ܕܰܥܒܰܕ ܒܓܶܠܝܳܢܶܗ ܐܰܠܗܳܐ ܥܠ ܐܰܪܥܳܐ ܠܟܽܠܗܽܘܢ ܥܰܡܡ̈ܐ. ܘܗܳܐ ܠܐ ܚܳܙܶܝܢܰܢ. ܕܰܒܗܳܢܳܐ ܥܳܠܡܳܐ ܫܰܒܚܽܘܗܝ ܟܽܠܗܽܘܢ ܥܰܡܡ̈ܐ ܥܕܰܡܳܐ ܠܝܰܘܡܳܢܳܐ. ܘܳܐܦܶܢ ܢܶܗܘܶܐ ܕܡܶܢ ܟܽܠ ܥܰܡܳܐ ܐܶܬܳܬ ܪܺܝܫܺܝܬܳܐ. ܐܠܐ ܗܳܕܐ ܠܐ ܓܳܡܪܳܐ ܠܗ̇ ܬܶܫܒܽܘܚܬܳܐ. ܡܶܛܠ ܕܺܐܝܬ ܗܽܘ ܥܰܡ̈ܡܶܐ ܕܠܐ ܥܕܰܟܺܝܠ ܩܰܒܶܠܘ ܣܒܰܪܬܶܗ ܕܥܰܡܰܢܽܘܐܝܠ ܘܝܰܬܝ̣ܪܳܐܝ̣ܬ ܣܒܺܝܪ̈ܳܝܶܐ. ܗܳܠܝܢ ܕܝܳܬܒܺܝܢ ܒܓܽܘܢܝܳܐ ܡܰܕܢܚܳܝܬܳܐ ܘܓܰܪܒܝܳܝܬܳܐ ܕܥܳܠܡܳܐ ܗܳܢܐ. ܘܰܐܚܪ̈ܳܢܶܐ ܕܡܶܬܩܪܶܝܢ ܐܰܢܰܐܛܽܘܣ. ܕܳܐܦܠܳܐ ܨܒܰܘ ܗܶܢܘܢ ܥܕܰܡܳܐ ܠܗܳܫܐ ܕܢܰܣܠܽܘܢ ܥܝܴ̈ܕܶܐ ܒܺܝ̈ܫܶܐ ܕܩܰܒܶܠܘ ܒܡܰܫܠܡܳܢܽܘܬܳܐ ܗܳܝ ܒܺܝܫܬܳܐ ܡ̣ܢ ܐܰܒܳܗܰܝ̈ܗܘܢ. ܘܰܐܚܪ̈ܳܢܶܐ ܕܡܶܬܩܪܶܝܢ ܒܰܠܰܐܡ̮̈ܘ. ܘܰܐܚܪ̈ܳܢܶܐ ܕܶܝܢ ܕܡܶܬܟܰܢܶܝܢ ܦܣܱ̈ܐܠܽܘ. ܕܰܒܠܽܘ̈ܚܳܫܳܬܳܐ ܕܰܚܘܰܘܴ̈ܬܳܐ ܘܕܳܐܟܶܕ̈ܢܶܐ ܘܰܕܥܶܩܰܪ̈ܒܶܐ ܡܕܰܪܫܺܝܢ. ܘܰܐܚܪ̈ܳܢܶܐ ܥܰܡܡ̈ܐ ܕܝܳܬܒܺܝܢ ܠܗܰܠ ܡ̣ܢ ܐܰܪܥܳܐ ܕܗܶܢܕܘܳܝ̈ܐ ܘܰܕܟܽܘ̈ܫܳܝܶܐ. ܘܰܐܚܪ̈ܳܢܶܐ ܕܝܳܬܒܺܝܢ ܒܥܶܒܪ̈ܶܝܗ̇ ܕܰܐܪܥܳܐ ܘܰܒܓܳܙܪ̈ܳܬܳܐ ܕܝܰܡ̈ܡܶܐ. ܕܝܰܬܝ̣ܪܬܳܐ ܗܝ ܠܺܝ ܕܶܐܟܬܽܘܒ ܫܡܳܗܰܝ̈ܗܘܢ ܗܳܠܝܢ ܕܠܐ ܩܰܒܶܠܘ ܥܕܰܡܳܐ ܠܝܰܘܡܳܢܳܐ. ܕܰܢܩܰܪܒܽܘܢ ܫܽܘܒܚܳܐ ܠܡܳܪܝܳܐ. ܟܕ ܕܶܝܢ ܠܗܳܠܶܝܢ ܡܦܰܫܶܩ ܗܘܳܐ ܦܰܘܠܽܘܣ ܗܰܘ ܪܰܒܳܐ ܘܶܐܡܰܪ: ܕܟܽܠ ܐܢܳܫ ܡܶܢܰܢ ܦܶܬܓܳܡܳܐ ܝܳܗܶܒ ܠܰܐܠܗܳܐ ܚܠܳܦ ܢܰܦܫܶܗ (ܪ̈ܗܘܡܝܐ ܝܕ: ܝܒ). ܗܳܕܶܐ ܕܶܝܢ ܠܘ ܒܥܳܠܡܳܐ ܗܳܢܐ ܗܳܘܝܳܐ. ܐܶܠܐ ܩܕܳܡ ܒܺܝܡ ܕܗܰܘ ܩܰܘܡܳܐ ܕܚܺܝܠܳܐ. ܡܶܛܠ ܕܰܡܙܰܡܪܳܢܳܐ ܠܘܳܬ ܫܽܘܠܳܡܳܐ ܢܳܓܶܕ ܠܟܽܠܗܽܘܢ ܥܰܡܡ̈ܐ ܕܰܢܫܰܒܚܽܘܢ. ܗܳܪܟܳܐ ܓܶܝܪ ܝܳܕܰܥ ܗܘܳܐ ܕܠܰܝܬ ܐܰܬܪܳܐ ܠܰܡܫܰܒܳܚܽܘ ܒܰܚܕܳܐ ܐܰܘܝܽܘܬܳܐ. ܠܰܚܕܳܐ ܐܝ̣ܬܽܘܬܳܐ ܐܰܠܳܗܳܝܬܳܐ ܠܰܚܕܳܐ ܪܺܝܫܳܢܽܘܬܳܐ. ܘܰܡܫܰܒܚܺܝܢ ܟܽܠܗܽܘܢ ܠܚܽܘܕܳܐܝ̣ܬ ܡܳܪܽܘܬܳܐ. ܡܳܐ ܕܶܐܬܒܰܛܰܠܘ ܡ̣ܢ ܐܰܪܥܳܐ ܟܽܠܗܽܘܢ ܡܳܪ̈ܰܘܳܬܳܐ ܕܰܓܳܠܰܝ̈ ܫܡܳܐ. ܘܟܽܠܗܽܘܢ ܫܰܠܺܝ̈ܛܳܢܶܐ ܘܪ̈ܺܝܫܳܢܶܐ ܡܶܢ ܥܳܡܰܪܬܳܐ. ܐܶܡܰܬܝ ܗܳܘܝܳܐ ܗܳܕܐ ܐܰܠܶܦ ܕܠܳܐ ܒܽܘܨܳܪ̈ܶܐ. ܦܰܘܠܽܘܣ ܗܰܘ ܚܰܟܺܝܡܳܐ. ܟܰܕ ܓܶܝܪ ܥܠ ܛܶܟܣܳܐ ܕܰܩܝܳܡܬܳܐ ܡܡܰܠܶܠ ܗܘܳܐ ܘܳܐܡܰܪ: ܪܺܝܫܺܝܬܳܐ ܗܘܳܐ ܡܫܺܝܚܳܐ. ܒܳܬܰܪܟܶܢ ܐܰܝܠܶܝܢ ܕܕܰܡܫܺܝܚܳܐ ܐܶܢܽܘܢ ܒܡܶܐܬܺܝܬܶܗ. ܘܗܳܝܕܶܝܢ ܬܶܗܘܶܐ ܚܰܪܬܳܐ܇ ܡܳܐ ܕܡܰܫܠܶܡ ܡܰܠܟܽܘܬܳܐ ܠܰܐܠܗܳܐ ܐܰܒܳܐ. ܘܡܳܐ ܕܒܰܛܶܠ ܟܽܠ ܪܝ̣ܫ ܘܟܽܠ ܫܽܘܠܛܳܢ ܘܟܠ ܚܰܝ̈ܠܺܝܢ. ܥܬܝ̣ܕ ܗܽܘ ܓܶܝܪ ܕܢܰܡܠܶܟ ܥܕܰܡܳܐ ܕܰܢܣܺܝܡ ܒܥܶܠܕ̈ܒܳܒܰܘܗܝ ܟܽܠܗܽܘܢ ܬܚܶܝܬ ܪ̈ܶܓܠܰܘܗܝ. ܘܰܐܚܪܳܝܳܐ ܒܥܶܠܕܒܳܒܳܐ ܡܶܬܒܰܛܰܠ ܡܰܘܬܳܐ (ܐ ܩܘܪ̈ܢܬܝܐ ܝܗ: ܟܓ-ܟܘ). ܘܡܳܐ ܕܶܐܫܬܰܥܒܰܕ ܠܶܗ ܟܠ ܗܳܝܕܶܝܢ ܗܽܘ ܒܪܳܐ ܢܶܫܬܰܥܒܰܕ ܠܗܰܘ ܕܫܰܥܒܶܕ ܠܶܗ ܟܠ܇ ܘܢܶܗܘܶܐ ܐܰܠܗܳܐ ܟܽܠ ܒܟܽܠ (ܐ ܩܘܪ̈ܢܬܝܐ ܝܗ: ܟܚ). ܗܳܠܝܢ ܠܗܰܘ ܕܰܡܦܳܣ ܒܗܰܘܢܳܐ ܕܰܟܬܳܒ̈ܐ ܩܰܕܺܝ̈ܫܶܐ. ܕܠܳܐ ܚܶܪܝܳܢܳܐ ܡܢܰܗܪ̈ܳܢ ܠܡܰܙܡܽܘܪܳܐ ܗܳܢܐ. ܡܶܛܠ ܕܳܐܚܕܳܐ ܚܕܳܐ ܪܺܝܫܳܢܽܘܬܳܐ ܘܰܚܕܳܐ ܡܕܰܒܪܳܢܽܘܬܳܐ ܠܟܽܠܗܶܝܢ ܐܶܡ̈ܘܳܬܳܐ. ܘܡܶܬܝ̣ܕܰܥ ܘܡܶܣܬܓܶܕ ܚܰܕ ܐܝ̣ܬܝܳܐ ܕܰܐܠܗܽܘܬܳܐ ܡ̣ܢ ܟܽܠܗܘܢ ܡܠܺܝ̈ܠܶܐ. ܘܗܳܘܶܐ ܐܰܠܗܳܐ ܟܽܠ ܒܟܽܠ. ܘܡܶܬܒܰܛܠܳܐ ܪܺܝܫܳܢܽܘܬܳܐ ܕܰܛܪ̈ܽܘܢܶܐ ܘܡܶܬܕܰܥܟܳܐ ܡܳܪܽܘܬܳܐ ܕܗܰܘ ܕܰܠܩܽܘܒܠܳܐ. ܘܰܡܫܰܒܚܺܝܢ ܠܰܚܕܳܐ ܡܳܪܽܘܬܳܐ ܕܚܰܕ ܐܰܠܗܳܐ ܟܽܠܗܘܢ ܥܰܡܡ̈ܐ. ܝܰܘ̈ܢܳܝܶܐ ܘܒܰܪܒܪ̈ܳܝܶܐ ܘܣܳܩܽܘ̈ܬܳܝܶܐ ܘܚܰܟܺܝ̈ܡܶܐ ܘܣܰܟ̈ܠܶܐ. ܘܰܐܝܠܶܝܢ ܕܺܝܕܰܥܘ ܠܰܐܠܗܳܐ. ܘܰܐܝܠܶܝܢ ܕܠܐ ܐܶܬܬܦܺܝܣܘ ܒܚܽܘܒܳܐ ܘܠܐ ܩܰܒܶܠܘ ܣܶܓܕܬܶܗ ܘܰܚܝܰܘ. ܣܳܓܕܺܝܢ ܠܶܗ ܒܬܰܫܢܺܝܩܳܐ ܟܕ ܠܐ ܡܶܬܥܰܕܪܺܝܢ. ܘܠܘ ܕܰܐܣܒܰܪܘ ܐܢܴ̈ܫܺܝܢ ܡܶܛܠ ܬܶܫܒܽܘܚܬܳܐ ܗܳܕܐ ܕܢܳܦܩܳܐ ܠܦܽܘܫܳܩܳܐ. ܕܳܐܡܪܺܝܢ ܕܙܰܡܶܢ ܢܒܺܝ̈ܐ ܠܟܽܠܗܽܘܢ ܥܰܡܡ̈ܐ ܕܰܢܫܰܒܚܽܘܢ. ܘܠܐ ܦܳܐܷܫ ܚܰܕ ܡܶܢ ܒܢܰܝ̈ܢܳܫܳܐ ܕܠܐ ܡܶܬܚܢܶܢ ܘܚܳܝܶܐ ܒܳܬܰܪ ܕܺܝܢܳܐ. ܗܳܠܝܢ ܓܝܪ ܕܰܡܫܰܒܚܺܝܢ. ܓܰܠܝܳܐ ܗܝ ܕܥܠ ܕܗܳܘܝܳܐ ܒܗܽܘܢ ܛܰܝܒܽܘܬܳܐ. ܗܳܐ ܠܡ ܐܶܡܰܪ ܢܒܺܝܐ.
ܡܶܛܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ. ܥܽܘܫܢܳܐ ܠܰܡ ܕܛܰܝܒܽܘܬܶܗ ܫܦܺܝܥܽܘܬ ܡܪܰܚܡܳܢܽܘܬܶܗ ܕܗܳܘܝܳܐ ܒܕܺܝܢܳܐ ܥܰܠ ܟܽܠ ܐܝ̣ܬܶܝܗ̇. ܠܗܳܠܶܝܢ ܕܗܳܟܰܢܳܐ ܐܡ̣ܪܘ ܛܥܳܬ ܐܶܢܽܘܢ ܬܰܪܥܺܝܬܳܐ ܕܰܟܬܳܒ̈ܐ ܩܰܕܺܝ̈ܫܶܐ ܘܠܳܐ ܫܰܡܥܽܘܗܝ ܠܰܡܙܰܡܪܳܢܳܐ. ܕܙܰܡܰܪ ܒܡܰܙܡܽܘܪܳܐ ܕܰܬܠܳܬܺܝܢ ܘܶܫܬܳܐ. ܟܕ ܦܳܣܶܩ ܠܬܰܪܥܺܝܗܽܘܢ ܪܦܺܝܬܳܐ ܘܢܰܫܺܝܫܬܳܐ. ܡܶܛܠ ܠܰܡ ܕܬܰܡܳܢ ܢܳܦܠܺܝܢ ܟܠ ܥܳܒ̈ܕܰܝ ܫܽܘܩܪܳܐ ܘܡܶܣܬܰܚܦܺܝܢ ܘܠܳܐ ܡܶܫܟܚܺܝܢ ܠܰܡܩܳܡ. ܘܠܐ ܫܡܰܥܘ ܕܶܐܡܰܪ܆ ܕܢܺܐܙܽܠ̱ܘܢ ܗܳܠܝܢ ܠܬܰܫܢܺܝܩܳܐ ܕܰܠܥܳܠܰܡ ܘܙܰܕܺܝ̈ܩܶܐ ܠܚܰܝܷ̈ܐ ܕܰܠܥܳܠܰܡ (ܡܬܝ ܟܗ: ܡܘ). ܗܳܝ ܡܳܕܶܝܢ ܕܰܡܫܰܒܚܺܝܢ ܒܓܰܘ ܬܰܫܢܺܝܩܳܐ ܩܰܪܺܝܒܽܘܬܳܐ ܠܘܳܬ ܕܰܝܳܢܳܐ ܠܳܐ ܥܳܒܕܳܐ. ܠܘ ܓܶܝܪ ܕܰܘܝܕ ܒܰܠܚܽܘܕ ܐܡ̣ܪ ܗܳܕܐ. ܐܶܠܐ ܐܳܦ ܦܰܘܠܽܘܣ ܗܰܘ ܪܰܒܳܐ ܐܡ̣ܪ: ܕܒܰܫܡܶܗ ܠܰܡ ܕܝܶܫܽܘܥ ܟܽܠ ܒܪܽܘܟ ܬܶܟܽܘܦ ܕܒܰܫܡܰܝܳܐ ܘܒܰܐܪܥܳܐ. ܘܕܰܠܬܰܚܬ ܡܶܢ ܐܰܪܥܳܐ܇ ܘܟܽܠ ܠܶܫܳܢ ܢܰܘܕܶܐ (ܦܝܠܝ̈ܣܝܐ ܒ: ܝ-ܝܐ). ܗܳܝ ܕܫܰܒܰܚܘ ܠܡܳܪܝܳܐ ܟܽܠܟܽܘܢ ܥܰܡܡ̈ܐ. ܗܳܝܕܶܝܢ ܐܳܚܕܳܐ ܚܕܳܐ ܡܰܠܟܽܘܬܳܐ ܘܰܚܕܳܐ ܪܺܝܫܳܢܽܘܬܳܐ ܕܰܐܠܗܳܐ. ܟܠ ܢܦܶܫ ܡܶܬܥܰܗܕܳܐ ܩܢܽܘܡܳܗ̇ ܘܟܽܠ ܠܶܫܳܢ ܝܳܕܰܥ ܡܫܽܘܚܬܶܗ. ܘܒܳܛܠܳܐ ܚܛܺܝܬܳܐ ܘܡܶܬܒܰܛܰܠ ܗܰܘ ܕܡܰܠܶܦ ܠܳܗ̇. ܘܡܶܫܬܰܬܰܩ ܩܳܠܶܗ ܕܚܶܘܝܳܐ ܡܰܛܥܝܳܢܳܐ. ܡ̣ܢ ܕܰܢܡܰܠܶܠ ܕܰܓܳܠܽܘܬܳܐ ܒܶܐܕ̈ܢܶܐ ܕܚܰܘܳܐ. ܠܐ ܕܚܳܛܶܐ ܡܶܫܬܟܰܚ. ܘܠܐ ܕܛܳܥܶܐ ܡܩܰܘܶܐ ܒܰܐܪܥܳܐ. ܐܝܟ ܕܩܰܕܶܡ ܐܶܬܢܰܒܺܝ ܐܶܫܰܥܝܳܐ ܢܒܺܝܳܐ. ܕܶܐܒܰܕܘ ܠܰܡ ܟܽܠ ܕܰܡܓܰܪܓܺܝܢ ܥܰܘܠܳܐ܇ ܘܡܰܚܛܶܝܢ ܠܐܢܴ̈ܫܳܐ ܒܡܶܠܬܳܐ (ܐܫܥܝܐ ܟܛ: ܟ-ܟܐ). ܚܰܝܠܳܐ ܓܶܝܪ ܕܰܐܠܗܳܐ ܬܳܟܶܣ ܠܡܰܪܕܺܝܬܳܐ ܘܰܠܝܰܠܕܳܐ ܕܚܽܘ̈ܫܳܒܶܐ ܕܢܶܬܝܰܠܕܽܘܢ ܒܢܰܦܫܳܐ ܚܽܘ̈ܫܳܒܶܐ ܕܣܰܩܽܘܒܠܳܝܺܝܢ ܠܰܚ̈ܕܳܕܶܐ. ܘܠܐ ܬܘܒ ܝܳܬܶܒ ܥܰܘܳܠܳܐ ܒܕܰܝܪܳܐ. ܟܰܕ ܟܳܡܶܢ ܒܚܶܫܽܘܟܳܐ ܘܰܡܚܰܦܶܐ ܗܽܘ ܠܗ ܒܬܰܟܣܺܝܬܳܐ ܕܰܪ̈ܓܺܝܓܳܬܳܐ. ܘܢܶܩܛܽܘܠ ܒܛܽܘܫܝܳܐ ܠܙܰܕܺܝܩܳܐ. ܘܠܐ ܬܘܒ ܢܶܠܒܽܘܟ ܟܢܰܥܰܢ ܡܰܣܰܐܬܳܐ ܕܢܶܟܠܳܐ ܘܢܶܛܠܽܘܡ ܐܳܦ ܢܚܰܝܶܒ ܠܰܒܢܱ̈ܝ ܫܝ̣ܬ. ܘܠܐ ܬܘܒ ܢܶܗܘܶܐ ܟܢܰܥܢܳܝܳܐ ܒܒܰܝܬܶܗ ܕܡܳܪܝܳܐ. ܐܝܟ ܕܶܐܡܰܪ ܙܟܰܪܝܳܐ ܢܒܺܝܐ. ܘܠܐ ܢܶܥܠܽܘܢ ܥܰܡܡ̈ܐ ܕܢܶܥܒܕܽܘܢ ܠܐܽܘܪܺܫܠܶܡ ܚܰܪܒܬܳܐ. ܡܶܛܠ ܗܰܘ ܕܰܐܡܠܶܟ ܥܰܠ ܟܠ. ܘܡܰܘܒܶܕ ܠܙܳܪܽܘܥܳܐ ܡ̣ܢ ܒܳܒܶܝܠ ܘܳܐܚܶܕ ܡܰܓܠܳܐ ܒܙܰܒܢܳܐ ܕܰܚܨܳܕܳܐ (ܐܪܡܝܐ ܢܢ: ܝܘ). ܘܬܘܒ ܠܐ ܫܳܩܠܳܐ ܪܳܚܺܝܠ ܡ̣ܢ ܠܶܝܰܐ ܝܰܒܪ̈ܽܘܚܶܐ ܘܝܳܗܒܳܐ ܠܶܗ ܠܝܰܥܩܽܘܒ ܚܰܬܢܳܗ̇. ܘܠܐ ܥܺܝܣܽܘ ܡܙܰܒܶܢ ܒܽܘܟܪܽܘܬܶܗ ܒܡܶܐܟܽܘܠܬܳܐ ܕܰܛܠܰܦ̈ܚܶܐ. ܘܠܐ ܚܽܘ̈ܠܕܶܐ ܣܳܠܩܺܝܢ ܘܰܡܚܰܦܶܝܢ ܟܰܪܡܳܐ ܩܰܕܺܝܫܳܐ. ܘܠܳܐ ܗܰܛܛܳܐ ܟܽܘܒܳܢܳܝܬܳܐ ܡܰܡܠܟܳܐ ܚܠܳܦ ܙܰܝܬܳܐ ܘܬܺܐܬܳܐ ܘܰܓܦܶܬܳܐ (ܕܝܢ̈ܐ ܛ: ܝܕ). ܡܶܛܠ ܕܡܳܪܝܳܐ ܗܳܘܶܐ ܡܰܠܟܳܐ ܥܠ ܟܽܠܗ̇ ܐܰܪܥܳܐ. ܘܡܰܘܒܶܕ ܡ̣ܢ ܐܰܪܥܳܐ ܐܰܟܳܪܽܘܬܳܐ ܕܙܳܪ̈ܥܰܝ ܙܺܝܙܳܢ̈ܐ. ܘܬܳܟܶܣ ܘܡܰܘܒܶܕ ܠܗܽܘܢ ܘܟܳܠܶܐ ܠܚܺܐܦ̈ܐ ܕܡܰܘܠܕܳܢܽܘܬܳܐ ܕܥܰܘܠܳܐ ܘܰܠܗܰܘ ܕܰܠܩܽܘܒܠܳܐ ܡܰܠܝܳܐܝ̣ܬ ܡܰܘܒܶܕ ܠܗ. ܘܥܳܒܶܕ ܠܗܽܘܢ ܠܟܽܠܗܽܘܢ ܚܰܝ̈ܐ ܠܳܐ ܡܶܬܬܙܺܝ̈ܥܳܢܶܐ. ܐܝܟ ܕܶܐܡܰܪ ܢܒܺܝܐ ܘܦܰܫܶܩ ܫܠܺܝܚܳܐ. ܕܬܽܘܒ ܠܰܡ ܚܕܳܐ ܙܒܰܢ ܡܙܺܝ̣ܥ ܐܢܳܐ ܫܡܰܝܳܐ ܐܳܦ ܐܰܪܥܳܐ (ܚܓܝ ܒ: ܙ). ܘܗܳܕܶܐ ܠܰܡ ܕܶܐܡܰܪ. ܗܳܫܳܐ ܡܠܰܟ ܘܶܐܡܰܪ܆ ܕܬܘܒ ܚܕܳܐ ܙܒܰܢ ܐܶܢܳܐ ܐܰܙܺܝܥ. ܠܳܐ ܒܰܠܚܽܘܕ ܐܰܪܥܳܐ. ܐܶܠܐ ܐܳܦ ܫܡܰܝܳܐ (ܥܒܪ̈ܝܐ ܝܒ: ܟܘ). ܡܳܕܶܝܢ ܠܐ ܡܶܬܬܙܺܝܥܳܢܺܝܬܳܐ ܗܳܘܝܳܐ ܢܰܦܫܳܐ ܡ̣ܢ ܚܽܘ̈ܫܳܒܶܐ ܕܰܠܩܽܘܒܠܳܐ ܕܰܐܝܟ ܗܳܟܰܢܳܐ ܓܶܝܪ ܐܝ̣ܬܶܝܗ̇ ܡ̇ܢ ܡܰܠܟܽܘܬܳܐ ܕܰܐܠܗܳܐ. ܘܠܐ ܫܳܬܩܺܝܢ ܡ̣ܢ ܗܳܝ ܕܰܢܫܰܒܚܽܘܢ. ܘܠܐ ܚܰܝ̈ܠܰܘܳܬܳܐ ܗܳܢܘܢ ܕܰܠܩܽܘܒܠܳܐ. ܘܟܺܐܢ̈ܐ ܕܰܢܣܰܒܘ ܦܽܘܪ̈ܥܳܢܰܝܗܘܢ ܡܰܘܕܶܝܢ ܕܝܰܬܝ̣ܪ ܡ̣ܢ ܡܳܐ ܕܰܡܣܰܟܶܝܢ ܩܰܒܶܠܘ ܡܽܘܠܟܳܢ̈ܐ ܒܡܰܠܟܽܘܬܳܐ. ܘܥܰܘܴ̈ܠܶܐ ܟܕ ܡܶܬܬܕܺܝܢܺܝܢ ܡܰܙܥܩܺܝܢ ܕܰܒܟܺܐܢܽܘܬܳܐ ܐܶܬܦܢܺܝܘ ܠܗܽܘܢ ܦܽܘܪ̈ܥܳܢܶܐ ܕܫܳܘܶܝܢ ܠܰܥܒܳܕܰܝ̈ܗܘܢ. ܘܗܳܝܕܶܝܢ ܢܳܦܩܳܐ ܠܰܥܒܳܕܳܐ ܓܡܺܝܪܳܐ ܙܡܺܝܪܬܳܐ ܗܳܕܐ. ܡܳܐ ܕܡܶܫܬܰܡܥܺܝܢ ܪ̈ܰܥܡܶܐ ܕܫܽܘܒܚܳܐ ܒܩܴ̈ܠܶܐ ܦܪ̈ܺܝܫܶܐ. ܠܚܰܕ ܡܳܪܝܳܐ ܡ̣ܢ ܬܪ̈ܰܝܗܘܢ ܓܰܒ̈ܐ ܕܠܗ ܫܽܘܒܚܳܐ ܠܥܳܠܡܝ̣ܢ ܐܰܡܝ̣ܢ܀
ܡܙܡܘܪܐ ܕܡܐܐ ܘܫܒܥܣܪ
ܡܰܘܕܰܥ ܥܰܠ ܐܪ̈ܳܙܶܐ ܕܓܶܠܝܳܢܶܗ ܕܥܰܡܰܢܽܘܐܝܠ. ܘܥܰܠ ܕܪܰܒ ܗܽܘ ܬܽܘܟܠܳܢܶܗ ܕܰܐܠܗܳܐ ܡܶܢܟܽܠ ܬܽܘܟܠܳܢ̈ܝܢ. ܘܥܰܠ ܕܰܒܟܺܐܦܳܐ ܡܶܬܡܬܶܠ ܗܘܳܐ ܥܰܡܰܢܽܘܐܝܠ ܒܰܢܒܺܝ̈ܐ. ܘܥܰܠ ܕܰܒܬܰܪ̈ܥܶܐ ܣܰܓܺܝ̈ܐܶܐ ܥܳܐܠܳܐ ܢܰܦܫܳܐ ܠܘܳܬ ܐܰܠܳܗܳܐ ܒܝܰܕ ܥܡܳܕܳܐ ܩܰܕܺܝܫܳܐ.
ܥܰܡ ܢܒܺܝܳܐ ܙܳܕܶܩ ܠܰܢ ܠܡܶܒܥܳܐ ܕܡܳܐ ܪܰܘܪܒܺܝܢ ܥܒܳܕܰܝ̈ܟ ܡܳܪܝܳܐ. ܘܛܳܒ ܥܰܡܺܝ̈ܩܳܢ ܡܰܚܫ̈ܒܳܬܳܟ. ܘܡ̣ܢ ܡܳܝܽܘ̈ܬܶܐ ܠܐ ܡܶܬܕܰܪ̈ܟܳܢ. ܘܡ̣ܢ ܚܰܝ̈ܐ ܠܐ ܡܶܬܩܰܕ̈ܡܳܢ. ܘܡ̣ܢ ܥܶܠܳܝ̈ܐ ܟܰܣ̈ܝܳܢ. ܘܡ̣ܢ ܬܰܚܬܳܝ̈ܐ ܓܢܺܝ̈ܙܳܢ. ܘܰܒܦܽܘܡܳܐ ܠܐ ܡܶܬܡܱ̈ܠܠܳܢ. ܘܰܒܪܶܥܝܳܢܳܐ ܠܐ ܡܶܣܬܰܝ̈ܟܳܢ ܘܰܒܢܰܦܫܳܐ ܠܐ ܡܶܬܚܰܒ̈ܫܳܢ. ܘܠܰܝܬ ܕܣܳܦܶܩ ܠܳܟ ܒܰܥܒܺܝ̈ܕܶܐ ܘܠܐ ܡܰܕܪܶܟ ܠܳܟ ܒܰܒܪ̈ܰܝܳܐ. ܘܡܶܛܠ ܠܐ ܡܶܣܬܰܝܟܳܢܽܘܬܳܐ ܕܪ̈ܰܚܡܰܝܟ ܥܰܡ ܢܒܺܝܳܐ ܕܰܘܝܕ ܢܰܘܕܶܐ ܘܢܺܐܡܰܪ:
ܕܰܐܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܪ̈ܰܚܡܰܘܗܝ. ܢܺܐܡܪܽܘܢ ܕܒܶܝܬ ܐܰܗܪܽܘܢ ܕܰܠܥܳܠܰܡ ܪ̈ܰܚܡܰܘܗܝ. ܢܺܐܡܪܽܘܢ ܕܒܶܝܬ ܝ̣ܣܪܳܐܝܠ ܕܰܠܥܳܠܰܡ ܪ̈ܰܚܡܰܘܗܝ. ܘܢܺܐܡܪܽܘܢ ܕܳܚܠܰܘ̈ܗܝ ܕܡܳܪܝܳܐ ܕܰܠܥܳܠܰܡ ܪ̈ܰܚܡܰܘܗܝ. ܫܰܦܺܝܪ ܐܰܪ̈ܒܰܥ ܙܰܒܢ̈ܝ̣ܢ ܐܶܬܥܰܗܰܕ ܠܪ̈ܰܚܡܶܐ ܕܡܳܪܝܳܐ. ܕܰܐܝܟ ܗܳܟܰܢܳܐ ܓܶܝܪ ܩܳܐܷܡ ܥܳܠܡܳܐ. ܒܰܐܪܒܥܳܐ ܣܽܘ̈ܟܳܠܶܐ ܘܫܽܘ̈ܘܕܳܥܶܐ ܡܬܰܚ̈ܡܳܢ ܣܰܓܺܝ̈ܐܬܳܐ. ܠܽܘܩܕܰܡ ܗܳܝ ܕܡܶܢ ܐܰܪܒܰܥ ܦܶܢ̈ܝܳܢ ܩܳܐܷܡ ܩܰܒܥܳܗ̇. ܘܗܳܝ ܕܰܐܪܒܥܳܐ ܦܽܘ̈ܠܳܓܶܐ ܐܝ̣ܬ ܠܐܝ̣ܡܳܡܳܐ ܘܰܐܪܒܰܥ ܬܘܒ ܡܰܛܪ̈ܳܬܳܐ ܐܝ̣ܬ ܠܠܺܠܝܳܐ. ܘܰܐܪܒܰܥ ܚܰܝ̈ܘܳܢ ܟܕܺܝ̈ܢܳܢ ܗܘܱ̈ܝ ܒܡܰܪܟܰܒܬܳܐ ܗܳܝ ܕܰܚܙܳܐ ܢܒܺܝܳܐ ܚܰܙܩܺܝܐܝܠ. ܘܰܠܟܽܠ ܚܕܳܐ ܡ̣ܢ ܗܳܠܶܝܢ ܐܰܪܒܰܥ ܐܰܦ̈ܝ̣ܢ ܐܝ̣ܬ ܗܘܳܐ. ܘܰܐܪܒܥܳܐ ܢܰܗܪ̈ܰܘܳܬܳܐ ܕܢܳܦܩܺܝܢ ܕܡܰܝܴ̈ܐ ܚܠܰܝܴ̈ܐ ܕܡܶܢ ܥܕܶܝܢ ܘܰܐܪܒܥܳܐ ܟܳܪ̈ܽܘܙܶܐ ܗܘܰܘ ܠܰܣܒܰܪܬܳܐ. ܘܰܐܪܒܥܳܐ ܛܽܘ̈ܠܩܶܐ ܐܝ̣ܬ ܗܘܳܐ ܠܡܰܫܪܺܝܬܳܐ ܗܳܝ ܕܚܳܕܪܳܐ ܗܘܳܬ ܠܡܰܫܟܰܢ ܙܰܒܢܳܐ. ܘܰܐܪܒܥܳܐ ܦܪ̈ܳܣܶܐ ܐܝ̣ܬ ܗܘܳܐ ܠܡܰܫܟܰܢܙܰܒܢܳܐ. ܘܰܐܪܒܥܳܐ ܦܽܘ̈ܠܳܓܶܐ ܕܳܐܐܰܪ̈ܰܣ ܡܩܺܝܡܺܝܢ ܫܰܢܬܳܐ. ܗܳܠܶܝܢ ܟܳܠܗܶܝܢ ܡܰܘܕ̈ܥܳܢ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܪ̈ܰܚܡܰܘܗܝ. ܘܗܳܢܰܘ ܢܺܝܫܳܐ ܕܫܽܘܪܳܝ ܡܰܙܡܽܘܪܳܐ ܗܳܢܐ. ܕܡܳܐܐ ܘܰܫܒܰܥܣܰܪ. ܡܶܛܠܗܳܢܳܐ ܣܒܺܝܣ ܒܐܪ̈ܳܙܶܐ ܥܰܒܕܶܗ ܢܒܺܝܐ. ܥܰܠ ܒܢܱ̈ܝ ܐܳܣܳܦ ܐܰܕܪܶܟܢܰܢ ܕܶܐܬܶܐܡܰܪ ܡܶܢ ܕܰܘܝܕ. ܗܳܠܝܢ ܕܣܰܓܺܝ ܒܢܰܟܦܽܘܬܳܐ ܩܳܝܡܺܝܢ ܗܘܰܘ ܒܡܰܫܟܢܳܐ ܕܣܳܗܕܽܘܬܳܐ. ܘܰܒܩܴ̈ܠܶܐ ܦܪ̈ܺܝܫܶܐ ܕܰܩܪ̈ܳܝܳܬܳܐ ܕܰܟܝܴ̈ܬܳܐ ܡܰܫܡܥܺܝܢ ܗܘܰܘ ܩܳܠܰܝ̈ܗܽܘܢ ܩܕܳܡ ܐܳܪܽܘܢܳܐ. ܡܶܛܠܗܳܕܐ ܐܳܦ ܐܡ̣ܪ ܕܰܘܝܕ.
ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ. ܗܳܠܶܝܢ ܓܶܝܪ ܙܰܕܺܝ̈ܩܶܐ ܗܘܰܘ ܘܢܳܛܪ̈ܰܝ ܢܳܡܽܘܣܳܐ. ܘܡܶܛܠ ܕܠܰܘ ܥܰܠ ܗܳܠܝܢ ܐܝ̣ܬܶܝܗ̇ ܡܶܠܬܰܢ. ܢܶܪܕܶܐ ܒܬܰܫܥܺܝܬܳܐ ܠܰܩܕܳܡܰܝܢ. ܒܳܬܰܪ ܕܰܐܫܡܰܥ ܩܳܠܶܗ ܡܙܰܡܪܳܢܳܐ ܡܶܛܠ ܪ̈ܰܚܡܶܐ ܡܳܪ̈ܳܢܳܝܶܐ. ܡܶܛܠ ܕܡ̣ܢ ܒܳܬܰܪܟܶܢ ܡܰܝܬܶܐ ܘܳܐܡܰܪ:
ܡ̣ܢ ܐܽܘܠܨܳܢܳܐ ܩܪܺܝܬ ܠܡܳܪܝܳܐ ܘܰܥܢܳܢܝ ܡܳܪܝܳܐ ܒܰܪܘܳܚܬܳܐ. ܕܰܐܝܟ ܗܳܟܰܢܳܐ ܓܶܝܪ ܫܳܡܰܥ ܠܰܐܝܠܶܝܢ ܕܩܳܪܶܝܢ ܠܶܗ. ܒܡܰܢ ܕܶܝܢ ܚܳܐܱܪ ܗܘܳܐ ܢܒܺܝܐ ܟܕ ܐܡ̇ܪ ܗܘܳܐ ܗܳܕܐ ܒܽܐܘܠܨܳܢܳܐ ܕܰܚܛܺܝܬܳܐ ܘܰܕܡܰܘܬܳܐ ܐܝ̣ܬܰܝܗܽܘܢ ܗܘܰܘ ܒܢܰܝ̈ܢܳܫܳܐ ܘܰܩܪܰܘ ܠܡܳܪܝܳܐ ܘܰܥܢܳܐ ܐܶܢܽܘܢ. ܘܠܰܘ ܒܽܐܘܠܨܳܢܳܐ ܫܡܰܥ ܐܶܢܘܢ ܐܠܐ ܒܰܪܘܳܚܬܳܐ. ܗܳܢܰܘ ܕܶܝܢ ܒܫܽܘܒܩܳܢܳܐ ܕܰܚܛܳܗܰܝ̈ܗܽܘܢ. ܒܰܥܡܳܕܳܐ ܩܰܕܺܝܫܳܐ. ܗܳܕܳܐ ܗܝ ܓܝܪ ܪܘܳܚܬܳܐ. ܘܡܶܠܬܶܗ ܕܰܐܒܳܐ ܥܰܕܰܪ ܐܶܢܘܢ ܡܶܢ ܐܽܘܪܚܳܐ ܕܰܚܛܳܗܰܝ̈ܗܽܘܢ. ܡܰܝܬܶܐ ܢܒܺܝܳܐ ܘܳܐܡܰܪ:
ܡܳܪܝܳܐ ܡܥܰܕܪܳܢܝ ܠܳܐ ܐܶܕܚܰܠ. ܡܳܢܳܐ ܥܳܒܶܕ ܠܺܝ ܒܰܪܢܳܫܳܐ. ܡܳܪܝܳܐ ܡܥܰܕܪܳܢܝ ܘܶܐܢܳܐ ܐܶܚܙܶܐ ܒܣܴ̈ܢܰܐܝ. ܕܒܰܚܛܳܗ̈ܐ ܠܐ ܢܶܬܟܣܶܣ ܚܰܛܳܝܳܐ. ܘܥܳܪܩܳܐ ܢܰܦܫܝ ܡܶܢ ܬܽܘܟܠܳܢܳܐ ܕܡܳܪܽܘܕܳܐ ܠܘܳܬ ܡܳܪܝܳܐ. ܟܕ ܡܙܰܡܪܳܐ ܥܰܡ ܢܒܺܝܳܐ ܘܳܐܡܪܳܐ:
ܛܳܒ ܠܡܶܬܬܟܳܠܽܘ ܥܰܠ ܡܳܪܝܳܐ. ܛܳܒ ܡܶܢ ܕܰܠܡܶܬܬܟܳܠܽܘ ܥܰܠ ܒܰܪܢܳܫܳܐ. ܛܳܒ ܠܡܶܬܬܟܳܠܽܘ ܥܰܠ ܡܳܪܝܳܐ܆ ܛܳܒ ܡ̣ܢ ܕܰܠܡܶܬܬܟܳܠܽܘ ܥܰܠ ܫܰܠܺܝܛܳܐ. ܫܰܦܝ̣ܪ ܡܰܘܪܶܒ ܠܗ ܠܬܽܘܟܠܳܢܳܐ ܕܰܐܠܗܳܐ ܡܶܢ ܟܽܠ. ܘܠܐ ܫܳܒܶܩ ܕܢܶܬܬܟܶܠ ܥܠ ܝܽܘ̈ܠܦܳܢܶܐ ܣܪ̈ܺܝܩܶܐ ܕܰܓ̈ܳܠܶܐ. ܒܗܰܘ ܬܽܘܟܠܳܢܳܐ ܕܒܰܪܢܳܫܳܐ ܐܰܘܕܰܥ ܥܠ ܟܽܠܗܶܝܢ ܡܽܘ̈ܫܚܳܬܳܐ ܕܺܐܝܬ ܒܥܳܠܡܳܐ. ܕܡܰܠܟ̈ܐ ܘܕܰܡܕܰܒܪ̈ܳܢܶܐ ܘܰܕܥܰܬܺܝܪ̈ܶܐ ܘܰܕܡܶܣ̈ܟܺܢܶܐ ܘܕܰܒܢܰܝܴ̈ܐ ܘܰܕܟܽܠ ܕܡܶܫܬܰܡܰܗ ܓܶܢܣܳܐ. ܚܰܘܺܝ ܕܥܰܠ ܗܳܠܝܢ ܠܰܝܬ ܬܽܘܟܠܳܢܳܐ ܕܫܰܪܺܝܪ. ܡܶܛܠ ܕܟܽܠܗܘܢ ܡܰܘܬܳܐ ܫܳܪܶܐ ܠܗܽܘܢ ܘܰܡܒܰܛܶܠ. ܗܰܘ ܕܶܝܢ ܕܡܶܬܬܟܶܠ ܥܠ ܫܰܠܺܝܛܳܐ ܗܳܢܐ ܐܝ̣ܬܰܘܗܝ. ܗܰܘ ܕܰܐܣܺܝܪ ܣܰܒܪܶܗ ܘܬܽܘܟܠܳܢܶܗ ܒܡܰܛܥܝܳܢܽܘܬܳܐ ܣܪܺܝܩܬܳܐ ܕܪ̈ܽܘܚܶܐ ܒܺܝ̈ܫܳܬܳܐ ܕܰܬܚܶܝܬ ܫܡܰܝܳܐ. ܟܰܕ ܡܚܰܘܶܐ ܘܡܰܠܶܦ ܢܒܺܝܐ ܕܳܐܦܠܳܐ ܥܠ ܗܳܠܝܢ ܢܶܬܬܰܟܠܽܘܢ ܒܢܰܝ̈ܢܳܫܳܐ. ܡܶܛܠ ܕܳܐܦ ܗܳܢܐ ܬܽܘܟܠܳܢܰܐ ܗܘ ܕܰܓܳܠܳܐ. ܡܰܝܬܶܐ ܒܳܬܰܪ ܗܳܠܝܢ ܕܢܰܗܺܝܪܳܐܝ̣ܬ ܡܰܒܪ̈ܩܳܢ ܥܠܰܘܗܝ.
ܟܽܠܗܽܘܢ ܥܰܡܡ̈ܐ ܚܰܕܪܽܘܢܝ ܘܒܰܫܡܶܗ ܕܡܳܪܝܳܐ ܐܰܣܺܝܦܶܬ ܐܶܢܘܢ. ܐܶܬܟܰܪܟܽܘܢܝ ܘܚܰܕܪܽܘܢܝ. ܘܒܰܫܡܶܗ ܕܡܳܪܝܳܐ ܐܰܣܝ̣ܦܶܬ ܐܶܢܽܘܢ. ܚܰܕܪܽܘܢܝ ܐܰܝܟ ܕܶܒܽܘܪ̈ܶܐ ܘܰܕܥܶܟܘ ܐܰܝܟ ܢܽܘܪܳܐ ܕܓ̈ܶܠܶܐ. ܘܒܰܫܡܶܗ ܕܡܳܪܝܳܐ ܐܰܣܝ̣ܦܶܬ ܐܶܢܽܘܢ. ܬܠܳܬ ܓܝܪ ܙܰܒܢ̈ܝ̣ܢ ܐܡ̣ܪ ܢܒܺܝܐ ܕܶܐܬܟܰܪܟܽܘܢܝ ܘܚܰܕܪܽܘܢܝ ܚܰܝ̈ܠܰܘܳܬܳܐ ܕܶܝܢ ܕܥܰܡܡ̈ܐ ܡܶܬܝܰܕܥܳܢ̈ܐ. ܘܰܬܠܳܬ ܙܰܒܢ̈ܝ̣ܢ ܫܡܶܗ ܕܡܳܪܝܳܐ ܡܰܕܟܰܪ ܗܘܳܐ ܘܰܡܣܝ̣ܦ ܠܗܽܘܢ. ܘܰܒܗܳܠܶܝܢ ܬܠܳܬ ܙܰܒܢ̈ܝ̣ܢ ܕܣܳܡ ܫܶܡ ܡܳܪܝܳܐ ܥܠ ܚܰܝ̈ܠܰܘܳܬܳܐ ܕܰܠܩܽܘܒܠܳܐ. ܐܪܳܙܳܐ ܣܓܺܝܕܳܐ ܕܰܬܠܺܝܬܳܝܽܘܬܳܐ ܪܫܰܡ. ܡܳܪܝܰܐ ܗܘ ܓܝܪ ܐܰܒܳܐ: ܘܡܳܪܝܰܐ ܗܘ ܒܪܳܐ: ܘܡܳܪܝܰܐ ܗܘ ܪܽܘܚܳܐ ܩܰܕܺܝܫܳܐ. ܘܰܒܗܳܢܐ ܕܽܘܟܪܳܢܳܐ ܕܰܫܡܳܗ̈ܐ ܬܠܺܝܬܳܝ̈ܐ ܡܣܺܝܦܺܝܢܰܢ ܠܚܰܝ̈ܠܰܘܳܬܳܐ ܡܳܪ̈ܽܘܕܶܐ ܗܳܢܘܢ ܕܟܰܕ ܐܰܝܟ ܥܰܡܡ̈ܐ ܡܶܬܚܙܶܝܢ ܗܘܰܘ ܒܫܽܘܪܳܝܳܐ. ܐܶܬܡܰܟܰܟܘ ܘܰܙܥܰܪ ܚܰܝܠܗܽܘܢ. ܘܰܗܘܰܘ ܚܠܳܦ ܥܰܡܡ̈ܐ ܓܰܢܒܳܪ̈ܶܐ. ܕܶܒܽܘܪ̈ܶܐ ܡܚܺܝ̈ܠܶܐ ܘܕܰܥܶܟ ܐܶܢܘܢ ܕܽܘܟܪܳܢܳܐ ܕܰܫܡܳܗ̈ܐ ܩܰܕܺܝ̈ܫܶܐ ܕܰܬܠܺܝܬܳܝܽܘܬܳܐ. ܘܥܳܒܶܕ ܠܗܽܘܢ ܩܶܛܡܳܐ ܡܚܺܝܠܳܐ ܐܝܟ ܢܽܘܪܳܐ ܕܓ̈ܶܠܶܐ ܕܡܳܐ ܕܕܶܥܟܰܬ ܦܰܚܺܝܚܳܐ ܘܰܡܚܺܝܠܳܐ ܓܝܪ ܡܶܫܬܟܰܚ ܩܶܛܡܳܐ ܕܡܶܢܳܗ̇. ܟܕ ܠܰܝܬ ܒܶܗ ܚܰܝܠܳܐ ܕܰܢܥܰܙܶܐ ܠܽܘܩܒܰܠ ܪܽܘܚܳܐ. ܕܰܐܝܟ ܗܳܟܰܢܳܐ ܓܶܡܪܰܬ ܒܺܝܫܬܳܐ ܡ̣ܢ ܩܕܳܡ ܐܰܝܠܶܝܢ ܕܰܡܩܰܒܠܺܝܢ ܛܰܝܒܽܘܬܳܐ ܕܰܥܡܳܕܳܐ ܩܰܕܺܝܫܳܐ ܘܚܳܬܡܳܐ ܕܰܬܠܺܝܬܳܝܽܘܬܳܐ ܡܶܬܥܶܗܰܕ ܕܶܝܢ ܒܗ̇ ܒܕܽܘܟܬܳܐ ܩܝܳܡܬܳܐ ܕܰܗܘܳܬ ܠܳܐܕܳܡ ܡ̣ܢ ܡܰܦܽܘܠܬܳܐ ܘܳܐܡܰܪ:
ܐܶܬܕܚܺܝܬ ܕܶܐܣܬܚܶܦ ܘܶܐܦܶܠ ܘܡܳܪܝܳܐ ܥܰܕܪܰܢܝ. ܚܰܝܠܝ ܘܫܽܘܒܚܝ ܡܳܪܝܰܐ ܗܘ. ܘܗܽܘ ܗܘܳܐ ܠܝ̣ ܦܳܪܽܘܩܳܐ. ܠܗܰܘ ܕܶܐܬܕܚܺܝ ܘܶܐܣܬܚܶܦ ܡ̣ܢ ܓܰܢܬܳܐ ܕܛܽܘ̈ܒܶܐ. ܡܳܢܰܘ ܗܳܢܐ ܐܶܠܐ ܐܳܕܳܡ ܕܣܰܚܦܽܘܗܝ ܕܰܝ̈ܘܶܐ. ܐܶܠܐ ܡܳܪܝܳܐ ܗܘܳܐ ܠܶܗ ܚܰܝܠܳܐ ܘܫܽܘܒܚܳܐ ܘܦܳܪܽܘܩܳܐ ܘܰܐܘܫܶܛ ܠܶܗ ܐܺܝܕܳܐ ܕܦܽܘܪܩܳܢܳܐ ܘܠܶܗ ܐܰܩܺܝܡ ܘܰܠܣܳܚܽܘ̈ܦܰܘܗܝ ܣܰܚܶܦ. ܘܒܰܥܡܳܕܳܐ ܗܘܳܬ ܗܳܕܐ ܘܰܐܥܶܠ ܐܶܢܘܢ ܠܰܦܪ̈ܺܝܩܶܐ ܠܡܰܫܟܢܳܗ̇ ܕܥܺܕܬܳܐ. ܘܨܳܬ ܢܒܺܝܐ ܘܰܫܡܰܥ ܩܳܠ ܪܰܘܒܳܐ ܕܗܳܢܘܢ ܕܩܰܒܶܠܘ ܣܺܝܡܰܬ ܒܢܰܝܴ̈ܐ ܕܰܡܫܰܒܚܺܝܢ ܘܳܐܡܪܺܝܢ:
ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ. ܚܰܕܽܘܬܳܐ ܘܩܳܠܳܐ ܕܗܳܢܘܢ ܕܰܒܝܰܕ ܡܳܪܰܢ ܐܶܬܦܪܶܩܘ ܘܡܰܘܕܶܝܢ ܘܰܡܫܰܒܚܺܝܢ ܒܡܰܫܟܢܳܗ̇ ܕܥܺܕܬܳܐ ܠܡܳܪܝܳܐ ܐܰܠܗܐ. ܕܰܥܒܰܕ ܚܰܝܠܳܐ ܒܰܦܪ̈ܺܝܩܶܐ ܘܶܐܡܰܪ:
ܝܰܡܺܝܢܶܗ ܕܡܳܪܝܳܐ ܥܶܒܕܰܬ ܚܰܝܠܳܐ. ܝܰܡܺܝܢܶܗ ܕܡܳܪܝܳܐ ܐܰܪܝ̣ܡܬܰܢܝ. ܝܰܡܝ̣ܢܶܗ ܕܡܳܪܝܳܐ ܥܶܒܕܰܬ ܚܰܝܠܳܐ ܠܐ ܐܶܡܽܘܬ. ܐܶܠܐ ܐܺܚܶܐ ܘܶܐܫܬܰܥܶܐ ܥܒܳܕܰܘ̈ܗܝ ܕܡܳܪܝܳܐ. ܐܳܦ ܗܳܪܟܳܐ ܬܠܳܬ ܙܰܒ̈ܢܺܝܢ ܐܰܝܬܺܝ ܫܡܳܐ ܕܝܰܡܺܝܢܶܗ ܕܡܳܪܝܳܐ. ܘܡܳܐ ܓܝܪ ܕܥܳܡܶܕ ܗܰܘ ܕܳܐܬܶܐ ܠܰܡܩܰܒܳܠܽܘ ܪܽܘܫܡܳܐ ܕܣܺܝܡܰܬ ܒܢܰܝܴ̈ܐ ܬܠܳܬ ܙܰܒܢ̈ܝ̣ܢ ܣܳܐܷܡ ܟܳܗܢܳܐ ܥܠܰܘܗܝ ܝܰܡܺܝܢܳܐ ܒܫܶܡ + ܐܰܒܳܐ. ܘܣܳܐܷܡ ܝܰܡܺܝܢܶܗ. ܘܰܒܫܶܡ + ܒܪܳܐ ܘܣܳܐܷܡ ܝܰܡܺܝܢܶܗ. ܘܰܒܫܶܡ + ܪܽܘܚܳܐ ܩܰܕܺܝܫܳܐ. ܗܳܕܳܐ ܗܝ ܝܰܡܺܝܢܳܐ ܕܡܳܪܝܳܐ ܕܶܐܬܝܰܗܒܰܬ ܠܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ. ܕܒܳܗ̇ ܢܶܥܒܶܕ ܚܰܝ̈ܠܶܐ ܒܰܡܚܺܝ̈ܠܶܐ. ܘܒܳܗ̇ ܢܪܺܝܡ ܠܰܣܚܺܝ̈ܦܰܝ ܒܚܶܦܪܳܐ ܕܰܚܛܺܝܬܳܐ. ܘܒܳܗ̇ ܢܒܰܛܶܠ ܠܡܰܘܬܳܐ ܕܰܐܡܠܶܟ ܒܰܥܒܳܪ ܦܽܘܩܕܳܢܳܐ. ܟܰܕ ܐܳܡܪܺܝܢܰܢ ܕܝܰܡܺܝܢܶܗ ܕܡܳܪܝܳܐ ܡܶܠܬܶܗ ܗܽܘ ܕܰܐܒܳܐ ܘܗܽܘ ܐܝ̣ܬܰܘܗܝ ܕܪܳܥܶܗ ܕܰܐܒܳܐ ܘܬܶܫܒܽܘܚܬܶܗ ܗܳܢܰܘ ܡܫܺܝܚܳܐ. ܘܗܳܪܟܳܐ ܬܶܬܢܣܶܒ ܡܶܠܬܳܐ ܥܰܠ ܐܳܕܳܡ ܕܰܢܦܰܠ ܗܘܳܐ ܒܰܚܛܺܝܬܳܐ ܘܰܣܥܳܐ ܥܠܰܘܗܝ ܐܳܟܶܠܩܰܪܨܳܐ. ܘܰܐܦܩܶܗ ܡ̣ܢ ܝܳܪܬܽܘܬܶܗ. ܐܶܬܳܐ ܡܶܠܬܶܗ ܕܰܐܒܳܐ ܘܰܐܪܺܝܡܶܗ ܘܕܰܠܝܶܗ ܡ̣ܢ ܥܓܳܢܳܐ ܕܰܚܛܺܝܬܳܐ. ܘܥܰܒܕܶܗ ܒܪܳܐ ܠܰܐܠܗܳܐ ܘܫܰܘܙܒܶܗ ܡ̣ܢ ܐܳܟܶܠܩܰܪܨܳܐ. ܘܬܽܘܒ ܥܬܝ̣ܕ ܕܢܺܐܬܶܐ ܕܰܢܢܰܚܶܡ ܒܨܽܘܪ̈ܳܬܶܗ. ܘܩܳܪܶܐ ܘܰܡܩܺܝܡ ܠܶܗ ܡ̣ܢ ܚܒܳܠܳܐ ܕܡܰܘܬܳܐ. ܘܗܳܕܳܐ ܗܝ ܕܶܐܡܰܪ ܡܙܰܡܪܳܢܳܐ ܒܚܰܪܬܳܐ ܕܝܰܡܺܝܢܶܗ ܕܡܳܪܝܳܐ ܥܶܒܕܰܬ ܚܰܝܠܳܐ ܠܳܐ ܐܶܡܽܘܬ. ܐܶܠܐ ܐܺܚܶܐ ܘܶܐܫܬܰܥܶܐ ܥܒܳܕܰܘ̈ܗܝ ܕܡܳܪܝܳܐ. ܟܰܕ ܡܰܘܕܶܐ ܥܠ ܦܽܘܪܩܳܢܶܗ ܘܳܐܡܰܪ:
ܡܶܪܕܳܐ ܪܕܳܢܝ ܡܳܪܝܳܐ ܘܰܠܡܰܘܬܳܐ ܠܳܐ ܐܰܫܠܡܰܢܝ. ܡܳܢܳܐ ܕܶܝܢ ܒܳܬܰܪ ܗܳܕܶܐ ܐܳܡܰܪ:
ܦܬܰܚ ܠܝ̣ ܬܰܪ̈ܥܶܐ ܕܙܰܕܺܝܩܽܘܬܳܐ ܕܶܐܥܽܘܠ ܒܗܽܘܢ ܘܰܐܘܕܶܐ ܠܡܳܪܝܳܐ. ܡܳܢܳܐ ܒܳܥܶܐ ܢܺܐܡܰܪ ܢܒܺܝܐ. ܥܠ ܥܡܳܕܳܐ ܓܝܪ ܡܶܬܦܰܬܚܺܝܢ ܬܰܪ̈ܥܶܐ ܕܙܰܕܺܝܩܽܘܬܳܐ. ܒܗܳܝ ܕܬܰܡܳܢ ܩܳܝܡܳܐ ܛܰܝܒܽܘܬܳܐ. ܘܰܡܦܰܠܓܳܐ ܡܰܘܗ̈ܒܳܬܳܐ ܠܰܐܝܠܶܝܢ ܕܰܡܩܰܒܠܺܝܢ ܣܺܝܡܰܬ ܒܢܰܝܴ̈ܐ. ܐܝܟ ܕܶܐܡܰܪ ܢܒܺܝܐ.
ܗܳܢܰܘ ܬܰܪܥܶܗ ܕܡܳܪܝܳܐ ܕܙܰܕܺܝ̈ܩܶܐ ܥܳܐܠܺܝܢ ܒܶܗ. ܬܰܪܥܳܐ ܗܳܢܳܐ ܕܶܝܢ ܗܽܘܝܽܘ ܡܳܪܰܢ. ܐܶܡܰܪ ܓܶܝܪ ܐܶܢܳܐ ܐܢܳܐ ܬܰܪܥܳܐ. ܘܒܝ̣ ܐܶܢ ܐܢܳܫ ܢܶܥܽܘܠ ܢܺܚܶܐ. ܘܢܶܥܽܘܠ ܘܢܶܦܽܘܩ ܘܪܶܥܝܳܐ ܢܶܫܟܰܚ (ܝܘܚܢܢ ܝ: ܛ). ܘܬܽܘܒ ܐܶܡܰܪ ܕܶܐܢܳܐ ܐܢܳܐ ܬܰܪܥܳܗ̇ ܕܥܳܢܴ̈ܐ (ܝܘܚܢܢ ܝ: ܙ). ܡܶܛܠ ܕܳܐܠܨܳܐ ܕܶܝܢ ܕܬܶܬܢܰܗܰܪ ܡܶܠܬܳܐ ܕܥܰܠ ܬܰܪ̈ܥܶܐ. ܬܘܒ ܕܶܝܢ ܥܠܶܝܗ̇ ܥܳܛܶܦ ܐܢܳܐ. ܬܰܪ̈ܥܶܐ ܩܳܪܶܐ ܢܒܺܝܳܐ ܠܫܽܘܚܠܳܦܳܐ ܕܰܡܝܰܬܪ̈ܘܳܬܳܐ. ܬܰܪܥܳܐ ܩܰܕܡܳܝܳܐ ܗܰܝܡܳܢܽܘܬܳܐ. ܕܠܐ ܓܝܪ ܗܳܢܐ ܠܰܝܬ ܠܡܶܥܰܠ ܠܚܰܝ̈ܐ. ܬܰܪܥܳܐ ܕܒܳܬܰܪ ܗܳܢܐ ܣܰܒܪܳܐ. ܬܰܪܥܳܐ ܬܘܒ ܬܠܺܝܬܳܝܳܐ ܚܽܘܒܳܐ. ܘܬܰܪܥܳܐ ܐܚܪܺܢܳܐ ܡܣܰܝܒܪܳܢܽܘܬܳܐ ܛܳܒܽܘܬܳܐ ܒܰܣܺܝܡܽܘܬܳܐ ܢܰܟܦܽܘܬܳܐ ܙܗܺܝܪܽܘܬܳܐ ܕܰܟܝܽܘܬܳܐ ܩܰܕܺܝܫܽܘܬܳܐ ܒܬܽܘܠܽܘܬܳܐ ܨܰܘܡܳܐ ܨܠܽܘܬܳܐ ܡܪܰܚܡܳܢܽܘܬܳܐ ܐܳܦ ܫܰܗܪܳܐ. ܘܟܽܠ ܕܰܠܗܳܠܶܝܢ ܕܳܡܶܝܢ. ܗܳܠܶܝܢ ܐܶܢܘܢ ܬܰܪ̈ܥܶܐ ܕܰܡܝܰܬܪܽܘܬܳܐ ܕܰܡܨܰܠܶܐ ܗܘܳܐ ܢܒܺܝܳܐ. ܘܰܡܣܰܟܶܐ ܗܘܳܐ ܕܰܒܝܰܘ̈ܡܳܬܶܗ ܢܶܬܦܰܬܚܽܘܢ. ܒܪܰܡ ܕܶܝܢ ܟܰܕ ܣܰܓܺܝ̈ܐܐ ܐܶܢܘܢ ܬܰܪ̈ܥܶܐ ܕܰܡܝܰܬܪܽܘܬܳܐ ܘܙܰܕܺܝܩܽܘܬܳܐ. ܠܗܰܘ ܚܰܕ ܬܰܪܥܳܐ ܝ̣ܚܺܝܕܳܝܳܐ ܡܶܬܘܰܥܕܺܝܢ ܐܰܝܠܶܝܢ ܕܩܳܝܡܺܝܢ ܕܰܒܗܽܘܢ. ܘܰܒܗܳܕܐ ܐܰܠܶܦ ܕܶܐܠܳܐ ܙܰܕܺܝ̈ܩܶܐ ܠܳܐ ܥܳܐܠܺܝܢ ܒܶܗ ܠܚܰܝ̈ܐ. ܠܳܐ ܓܝܪ ܫܳܒܶܩ ܢܒܺܝܐ ܕܢܶܥܠܽܘܢ ܒܶܗ ܐܰܝܠܶܝܢ ܕܠܰܘ ܙܰܕܺܝ̈ܩܶܐ ܐܶܢܘܢ. ܘܠܶܗ ܠܗܳܢܐ ܬܰܪܥܳܐ. ܐܳܦ ܦܳܪܽܘܩܳܐ ܡܰܘܕܶܐ ܠܶܗ ܕܺܐܝܬܰܘܗܝ ܘܳܐܡܰܪ:
ܐܰܘܕܶܐ ܠܳܟ ܕܰܥܢܰܝܬܳܢܝ ܘܰܗܘܰܝܬ ܠܝ̣ ܦܳܪܽܘܩܳܐ. ܘܒܳܬܰܪ ܗܳܠܝܢ ܬܘܒ ܠܘܳܬ ܚܙܳܬܳܐ ܡܥܰܠܰܝܬܳܐ ܕܪܳܡܳܐ ܡ̣ܢ ܗܳܠܝܢ ܡܥܰܠܶܐ ܠܰܢ ܢܒܺܝܐ܆ ܘܰܠܗܰܘ ܕܰܚܙܳܝܗܝ ܬܰܪܥܳܐ ܘܦܳܪܽܘܩܳܐ. ܗܳܫܳܐ ܟܺܐܦܳܐ ܡܚܰܘܶܐ ܠܰܢ.
ܟܺܐܦܳܐ ܠܰܡ ܕܰܐܣܠܺܝܘ ܒܰܢܳܝܷ̈ܐ ܗܺܝ ܗܘܳܬ ܠܪܺܝܫܳܐ ܕܒܶܢܝܳܢܳܐ. ܡ̣ܢ ܩܕܳܡ ܡܳܪܝܳܐ ܗܘܳܬ ܗܳܕܶܐ ܘܬܶܕܡܽܘܪܬܳܐ ܗܝ ܒܥܰܝ̈ܢܰܝܢ. ܕܗܳܕܶܐ ܕܶܝܢ ܟܺܐܦܳܐ ܗܽܘܝܽܘ ܡܫܺܝܚܳܐ ܡܳܪܰܢ. ܘܠܳܐ ܗܘܳܬ ܕܺܝܠܝ ܠܰܡܦܰܫܳܩܽܘ. ܗܽܘ ܓܶܝܪ ܥܰܡܰܢܽܘܐܝܠ ܠܘܳܬ ܥܰܡܳܐ ܕܝܽܘ̈ܕܳܝܶܐ ܘܡܰܠܦܳܢܰܝ̈ܗܘܢ. ܗܺܝ ܗܳܕܶܐ ܟܺܐܦܳܐ ܐܰܝܬܺܝ ܠܣܳܗܕܽܘܬܳܐ ܥܰܠ ܢܰܦܫܶܗ. ܟܰܕ ܠܗܽܘܢ ܩܳܪܶܐ ܢܒܺܝܳܐ ܒܢܰܝܴ̈ܐ ܡܶܛܠ ܕܣܳܦܪ̈ܶܐ ܘܪ̈ܺܝܫܰܝ ܟܳܗܢ̈ܐ ܗܘܰܘ ܒܢܰܝܴ̈ܐ ܕܒܰܝܬܶܗ ܕܰܐܠܗܳܐ. ܘܦܶܛܪܽܘܣ ܗܰܘ ܪܰܒܳܐ. ܡܶܛܠܗܳܕܐ ܩܳܥܶܐ ܗܘܳܐ ܒܶܐܕ̈ܢܰܝܗܽܘܢ ܕܝܽܘ̈ܕܳܝܶܐ ܟܰܕ ܐܡ̇ܪ. ܗܳܢܰܘ ܟܺܐܦܳܐ ܕܰܐܣܠܺܝܬܽܘܢ ܒܰܢܳܝܷ̈ܐ. ܘܗܽܘ ܗܘܳܐ ܠܪܺܝܫ ܩܰܪܢܳܐ (ܦܛܪܘܣ ܒ: ܕ ܡܬܝ ܟܐ: ܡܒ ܡܪܩܘܣ ܝܒ: ܝ ܠܘܩܐ ܟ: ܝܙ). ܘܰܢܒܺܝ̈ܐ ܐܚܪ̈ܳܢܶܐ ܩܪܰܐܘܽܗܝ ܒܰܫܡܳܐ ܗܳܢܳܐ ܟܺܐܦܳܐ. ܘܠܳܐ ܡܰܝܬܶܐ ܐܢܳܐ ܡܶܢܗܽܘܢ ܣܳܗܕ̈ܘܳܬܳܐ ܕܠܳܐ ܢܶܬܪܰܚܰܩ ܡܶܢܰܢ ܫܽܘܠܳܡܳܐ ܕܡܶܠܬܳܐ. ܘܡܳܢܳܐ ܬܘܒ ܨܳܒܶܐ ܢܺܐܡܰܪ ܢܒܺܝܳܐ.
ܗܳܢܰܘ ܠܰܡ ܝܰܘܡܳܐ ܕܰܥܒܰܕ ܡܳܪܝܳܐ. ܬܰܘ ܢܕܽܘܨ ܘܢܶܚܕܶܐ ܒܶܗ. ܝܰܘܡܳܐ ܕܶܝܢ ܚܠܳܦ ܙܰܒܢܳܐ ܡܰܥܶܠ. ܝܰܘܡܳܐ ܚܠܳܦ ܝܰܘܡܳܐ ܥܰܠ ܕܰܩܝܳܡܬܳܐ ܚܠܳܦ ܡܰܦܽܘܠܬܳܐ. ܙܰܕܺܝܩܽܘܬܳܐ ܚܠܳܦ ܕܰܚܛܺܝܬܳܐ. ܕܡܶܬܦܰܢܝܳܢܽܘܬܳܐ ܕܠܰܥܕܶܝܢ ܚܠܳܦ ܡܰܦܰܩܬܳܐ ܕܡܶܢ ܦܰܪܕܰܝܣܳܐ. ܕܰܠܒܽܘ̈ܫܶܐ ܚܶܘܳܪ̈ܶܐ ܘܫܶܡܫܳܝܷ̈ܐ ܕܰܥܡܳܕܳܐ ܩܰܕܺܝܫܳܐ. ܚܠܳܦ ܟܽܘܬܺܝ̈ܢܝܳܬܳܐ ܟܡܺܝܪ̈ܳܬܳܐ ܕܡܶܫܟܳܐ ܕܙܶܩܪܰܬ ܠܰܢ ܚܛܺܝܬܳܐ. ܫܽܘܒܚܳܐ ܘܦܰܐܝܽܘܬܳܐ ܚܠܳܦ ܛܰܪ̈ܦܶܐ ܕܦܽܘܪܣܳܝܳܐ. ܝܰܘܡܳܐ ܗܰܘ ܕܰܥܒܰܕ ܡܳܪܝܳܐ. ܠܘܳܬ ܚܰܝ̈ܐ ܡܰܠܟܳܝ̈ܐ ܦܰܢܝܶܗ ܠܳܐܕܳܡ. ܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܕܬܶܒܛܰܠ ܒܶܗ ܐܰܦܽܘܦܰܐܣܺܝܣ ܕܢܶܦܩܰܬ ܥܰܠ ܐܳܕܳܡ ܘܢܶܥܛܽܘܦ ܠܓܰܢܬܳܐ ܕܰܐܘܒܶܕ ܗܘܳܐ. ܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܕܰܐܠܒܶܫ ܠܳܐ ܡܳܝܽܘܬܽܘܬܳܐ ܠܡܳܝܽܘ̈ܬܶܐ. ܘܶܐܣܛܠܳܐ ܕܠܳܐ ܡܶܬܚܰܒܠܳܢܽܘܬܳܐ ܠܝܰܠܕܶܝ̈ܗ̇ ܕܚܰܘܳܐ. ܘܰܐܥܬܰܪ ܠܡܶܣܟܺܢ̈ܐ: ܘܰܐܦܢܺܝ ܠܛܳܥܰܝܴ̈ܐ: ܘܟܰܢܶܫ ܠܰܡܒܰܕܪ̈ܶܐ: ܘܩܰܕܶܫ ܠܛܰܡ̈ܐܐ: ܘܙܰܕܶܩ ܠܚܰܛܳܝ̈ܐ: ܘܚܰܘܰܪ ܠܰܡܟܰܬܡ̈ܐ: ܘܕܰܟܺܝ ܠܓܰܪ̈ܒܶܐ: ܘܦܰܬܰܚ ܣܡܰܝܴ̈ܐ: ܘܰܐܢܗܰܪ ܚܶܫܽܘ̈ܟܶܐ: ܘܰܐܚܠܶܡ ܟܪ̈ܺܝܗܶܐ: ܘܰܐܣܝ̣ ܟܺܐܒܬܳܢ̈ܐ: ܘܫܰܝܶܢ ܕܰܝ̈ܘܶܐ ܘܰܪܕܰܦ ܫܺܐܕ̈ܐ: ܘܰܐܦܶܩ ܪ̈ܽܘܚܶܐ ܛܰܢ̈ܦܳܬܳܐ: ܘܩܰܝܶܙ ܠܰܚܓܺܝܪ̈ܶܐ: ܘܰܦܫܰܛ ܠܫܳܦܽܘ̈ܦܶܐ: ܘܣܰܒܰܥ ܠܟܰܦ̈ܢܶܐ: ܘܰܐܪܘܺܝ ܠܰܨܗܱ̈ܝܳܐ: ܘܰܐܠܒܶܫ ܠܰܫܠܺܝ̈ܚܳܝܶܐ: ܘܟܰܣܝ̣ ܥܰܪ̈ܛܶܠܳܝܷ̈ܐ: ܘܢܰܟܶܦ ܙܰܠܺܝ̈ܠܶܐ: ܘܩܰܕܶܫ ܠܙܳܢܝܴ̈ܬܳܐ: ܘܰܐܠܶܦ ܠܡܳܟ̈ܣܶܐ ܬܝܳܒܽܘܬܳܐ: ܠܨܰܝܳܕ̈ܐ ܥܒܰܕ ܫܠܺܝܚ̈ܐ ܘܰܐܩܢܺܝ ܠܗܶܕܝܽܘ̈ܛܶܐ ܚܶܟܡܬܳܐ. ܗܳܠܶܝܢ ܬܶܕܡܪ̈ܳܬܳܐ ܕܰܥܒܰܕ ܡܳܪܝܳܐ ܒܝܰܘܡܶܗ. ܘܡܶܛܠ ܕܥܳܒܪ̈ܳܢ ܠܟܽܠ ܚܽܘܫܳܒܳܐ ܘܡܶܠܬܳܐ. ܬܰܘ ܢܕܽܘܨ ܘܢܶܚܕܶܐ ܒܶܗ. ܘܢܺܐܡܰܪ.
ܐܳܘ ܡܳܪܝܳܐ ܦܪܽܘܩܰܝܢܝ ܐܳܘ ܡܳܪܝܳܐ ܦܰܨܳܢܝ. ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ. ܒܰܪܶܟܢܳܟܽܘܢ ܡ̣ܢ ܒܰܝܬܶܗ ܕܡܳܪܝܳܐ. ܟܽܠܗܶܝܢ ܬܡܺܝ̈ܗܳܢ. ܟܽܠܗܶܝܢ ܚܒܺܝ̈ܨܳܢ ܒܕܽܘܡܳܪܳܐ. ܟܽܠܗܶܝܢ ܐܪ̈ܳܙܶܐ ܐܶܢܶܝܢ ܩܰܕܺܝ̈ܫܶܐ. ܘܝܰܬܝ̣ܪܳܐܝ̣ܬ ܠܗܳܠܶܝܢ ܕܡܶܢ ܒܳܬܰܪܟܶܢ.
ܡܳܪܝܳܐ ܐܰܠܳܗܳܐ ܐܰܢܗܰܪ ܠܰܢ. ܗܳܕܐ ܕܶܝܢ ܒܡܰܫܠܡܳܢܽܘܬܳܐ ܕܫܰܒܥܺܝܢ. ܠܰܘ ܗܳܟܰܢܳܐ ܐܶܬܟܰܬܒܰܬ ܐܠܐ ܚܠܳܦ ܗܳܝ ܕܰܐܢܗܰܪ ܠܰܢ. ܣܺܝܡܳܐ ܡܳܪܝܳܐ ܐܰܠܗܳܐ ܕܢܰܚ ܠܰܢ. ܐܰܝܟܰܢܳܐ ܕܰܒܝܰܕ ܗܳܕܐ ܢܰܠܶܦ ܪܽܘܚܳܐ. ܕܗܰܘ ܕܰܕܢܰܚ ܘܰܥܒܰܕ ܗܳܠܶܝܢ ܡܳܪܝܳܐ ܐܰܠܳܗܰܢ ܐܝ̣ܬܰܘܗܝ. ܘܰܕܢܰܚ ܘܶܐܬܚܙܺܝ ܡܶܢ ܒܬܽܘܠܬܳܐ ܐܰܝܟ ܕܶܢܚܳܐ. ܘܰܡܦܺܝܣ ܢܒܺܝܳܐ ܘܳܐܡܰܪ:
ܐܰܣܽܘܪ ܥܰܕ̈ܥܺܐܕܰܝܢ ܒܫܺܝܫ̈ܠܳܬܳܐ ܥܕܰܡܳܐ ܠܩܰܪ̈ܢܳܬܶܗ ܕܡܰܕܒܚܳܟ. ܫܺܝ̈ܫܠܳܬܳܐ ܗܳܟܺܝܠ ܐܝ̣ܬܰܝܗܶܝܢ ܕܚܽܘܒܳܐ ܘܪܶܚܡܬܳܐ. ܪܶܚܡܬܳܐ ܕܶܝܢ ܗܽܘܝܽܘ ܡܳܪܰܢ. ܘܡܶܟܝ̣ܠ ܕܗܺܝ ܗܘܳܬ ܐܶܩܥܶܐ ܘܺܐܡܰܪ:
ܐܰܠܳܗܝ ܐܰܢܬ ܐܰܘܕܶܐ ܠܳܟ. ܐܰܠܳܗܝ ܐܰܢܬ ܐܶܫܰܒܚܳܟ. ܠܗܰܘ ܕܰܕܢܰܚ ܘܗܳܐ ܬܘܒ ܐܰܠܗܳܐ ܡܰܘܕܶܐ ܘܰܡܫܰܒܰܚ ܠܶܗ ܕܺܐܝܬܰܘܗܝ. ܘܡܰܘܣܶܦ ܘܳܐܡܰܪ:
ܐܰܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܛܰܝܒܽܘܬܶܗ. ܐܪ̈ܳܙܶܐ ܫܒܺܝ̈ܚܶܐ ܐܶܬܢܰܒܺܝ ܠܰܢ ܛܽܘܒܳܢܳܐ ܕܰܘܺܝܕ ܒܡܰܙܡܽܘܪܳܐ ܗܳܢܐ. ܟܰܕ ܒܰܕܶܩ ܠܰܢ ܥܰܠ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܘܥܰܠ ܬܽܘܟܠܳܢܳܐ ܕܰܐܠܗܳܐ. ܘܥܰܠ ܬܰܪܥܳܐ ܕܡܰܠܟܽܘܬܳܐ ܕܗܽܘܝܽܘ ܡܳܪܰܢ. ܘܥܰܠ ܟܺܐܦܳܐ ܕܗܽܘܝܽܘ ܡܫܺܝܚܳܐ. ܘܥܰܠ ܝܰܘܡܳܐ ܕܰܥܒܰܕ ܡܳܪܝܳܐ. ܘܥܰܠ ܕܶܢܚܶܗ ܕܡܶܢ ܫܡܰܝܳܐ ܕܰܐܠܗܳܐ ܘܥܰܠ ܛܰܝܒܽܘܬܳܐ ܗܳܝ ܕܩܰܝܳܡܳܐ ܠܥܳܠܰܡ. ܘܳܐܦ ܚܢܰܢ ܢܰܘܕܶܐ ܠܶܗ ܠܡܳܪܝܳܐ ܐܰܠܳܗܰܢ ܕܰܒܡܽܘܟܳܟܶܗ ܐܰܘܪܒܰܢ ܘܦܰܪܩܰܢ ܒܡܶܬܓܰܫܡܳܢܽܘܬܶܗ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܡܢܬܥܣܪ
ܥܰܠ ܛܽܘ̈ܒܶܐ ܘܰܐܝܠܶܝܢ ܦܽܘ̈ܩܕܳܢܶܐ ܘܢܳܡܽܘ̈ܣܶܐ ܘܕܺܝ̈ܢܶܐ ܕܰܐܠܳܗܳܐ. ܘܥܰܠܗܳܝ ܕܰܡܬܽܘܡܳܐܝܬ ܐܝܬܰܘܗܝ ܐܰܒܳܐ ܘܰܕܥܰܡܶܗ ܐܺܝܬܰܘܗܝ ܒܪܳܐ ܡܶܢܥܳܠܰܡ.
ܡܳܪܰܢ ܘܦܳܪܽܘܩܰܢ ܝܶܫܘ̇ܥ ܡܫܝ̣ܚܳܐ ܟܕ ܐܶܬܓܠܝ̣ ܥܠ ܐܰܪܥܳܐ ܒܰܒܣܰܪ. ܘܰܩܪܳܐ ܘܩܰܪܶܒ ܠܘܳܬܶܗ ܬܰܠܡܺܝ̈ܕܶܐ ܩܰܕܺܝ̈ܫܶܐ. ܕܒܰܪ ܐܶܢܘܢ ܥܰܡ ܟܶܢ̈ܫܶܐ ܣܰܓܺܝ̈ܐܐ ܘܰܣܠܶܩ ܠܛܽܘܪ ܙܰܝ̈ܬܶܐ ܘܟܕ ܝ̣ܬܶܒ ܥܠ ܪܰܘܡܳܐ. ܥܒܰܕ ܠܘܳܬܗܽܘܢ ܡ̣ܢ ܛܽܘܪܳܐ ܪܳܡܳܐ ܕܣܽܘ̈ܟܳܠܶܐ. ܫܽܘܪܳܝܳܐ ܕܡܰܠܦܳܢܽܘܬܳܐ. ܘܰܦܬܰܚ ܦܽܘܡܶܗ ܘܡܰܠܶܦ ܗܘܳܐ ܠܗܽܘܢ ܘܳܐܡܰܪ: ܛܽܘܒܰܝܗܽܘܢ ܠܡܶܣ̈ܟܺܢܶܐ ܒܪܽܘܚ ܕܕܺܝܠܗܽܘܢ ܗܺܝ ܡܰܠܟܽܘܬܳܐ ܕܰܫܡܰܝܳܐ (ܡܬܝ ܗ: ܒ-ܓ). ܘܰܒܝܰܕ ܗܳܢܐ ܛܽܘܒܳܐ ܘܗܳܠܶܝܢ ܕܒܳܬܪܶܗ ܐܰܠܶܦ ܢܰܗܺܝܪܳܐܝ̣ܬ ܥܠ ܟܽܠܗܽܘܢ ܕܰܪ̈ܓܶܐ ܘܡܶܣ̈ܟܺܢܶܐ ܕܽܐܘܪܚܳܐ ܕܚܰܝܷ̈ܐ. ܡܶܛܠ ܕܡܳܪܳܗ̇ ܗܽܘ ܕܡܰܠܟܽܘܬܳܐ ܕܰܫܡܰܝܳܐ. ܡܠܰܟ ܥܰܡ ܛܽܘ̈ܒܶܐ ܬܘܒ ܡܰܠܟܽܘܬܳܐ. ܛܽܘܒܳܢܳܐ ܕܰܘܝܕ ܡܫܰܪܶܐ ܗܳܟܺܝܠ ܒܬܶܫܒܽܘܚܬܳܐ ܕܰܡܳܐܐ ܘܰܬܡܳܢܬܰܥܶܣܪ̈ܶܐ ܘܳܐܡܰܪ:
ܐ– ܛܽܘܒܰܝܗܽܘܢ ܠܰܐܝܠܶܝܢ ܕܰܕܠܳܐ ܡܽܘܡ ܐܶܢܽܘܢ ܒܽܐܘܪܚܳܐ. ܘܰܡܗܰܠܟܺܝܢ ܒܢܳܡܽܘܣܶܗ ܕܡܳܪܝܳܐ. ܛܽܘܒܰܝܗܽܘܢ ܠܰܐܝܠܶܝܢ ܕܢܳܛܪܺܝܢ ܣܳܗܕܽܘܬܶܗ. ܘܰܒܟܽܠܶܗ ܠܶܒܗܽܘܢ ܒܳܥܶܝܢ ܠܶܗ. ܗܳܢܰܘ ܫܽܘܪܳܝܳܐ ܕܰܥܒܰܕ ܢܒܺܝܳܐ ܠܬܶܫܒܽܘܚܬܳܐ ܗܳܕܐ ܐܰܪܝ̣ܟܬܳܐ. ܒܡܶܠܬܳܐ ܚܡܺܝܠܬܳܐ ܘܰܡܣܰܝܰܟܬܳܐ. ܣܰܝܶܟ ܘܰܚܒܰܫ ܟܽܠܗܽܘܢ ܫܽܘܦܪ̈ܶܐ ܪ̈ܳܡܶܐ ܘܰܡܥܰܠܰܝܴ̈ܐ. ܐܰܝܠܶܝܢ ܓܝܪ ܕܰܕܠܳܐ ܡܽܘܡ ܐܶܢܘܢ ܒܽܐܘܪܚܳܐ ܕܟܺܐܢܽܘܬܳܐ. ܠܗܳܠܝܢ ܕܶܝܢ ܠܰܝܬ ܠܗܽܘܢ ܩܶܢܛܳܐ ܡ̣ܢ ܕܰܝܴ̇ܢܳܐ. ܘܡܰܢܽܘ ܗܰܘ ܕܥ̣ܰܠ ܠܥܳܠܡܳܐ ܕܠܐ ܡܽܘܡܳܐ. ܣܳܒܰܪ ܐܢܳܐ ܘܠܐ ܚܰܕ. ܠܐ ܕܰܓܳܠܳܐ ܡܶܠܬܶܗ ܕܰܢܒܺܝܳܐ. ܕܠܰܝܬ ܕܙܰܕܺܝܩ ܘܠܐ ܢܶܚܛܶܐ (ܩܘܗܠܬ ܙ: ܟܐ؛ ܒ ܒܪܝܡܝܢ ܘ: ܠܘ). ܘܬܘܒ ܗܽܘ ܡܙܰܡܪܳܢܳܐ ܐܡ̇ܪ: ܐܶܢܳܐ ܐܶܡܪܶܬ ܒܰܪܥܺܝܠܽܘܬܝ ܕܟܽܠ ܒܰܪܢܳܫ ܕܰܓܳܠ (ܡܙܡܘܪܐ ܩܝܗ: ܝܐ). ܘܬܘܒ ܐܡ̣ܪ ܕܠܐ ܙܳܟܶܐ ܩܕܳܡܰܝܟ ܟܽܠ ܕܚܰܝ (ܡܙܡܘܪܐ ܩܡܒ: ܒ). ܘܡܰܢܽܘ ܕܟܰܕ ܢܳܛܰܪ ܦܽܘ̈ܩܕܳܢܶܐ ܘܠܳܐ ܐܶܬܠܒܶܟ ܡ̣ܢ ܚܰܫܳܐ ܕܚܶܡܬܳܐ. ܘܡܰܢܽܘ ܕܟܰܕ ܐܶܙܕܰܗܺܝ ܒܫܽܘܦܪܳܐ ܕܰܒܬܽܘܠܽܘܬܳܐ܆ ܠܳܐ ܕܶܠܩܰܬ ܒܶܗ ܢܽܘܪܳܐ ܕܰܛܢܳܢܳܐ. ܗܳܠܝܢ ܓܝܪ ܟܕ ܢܶܗܘܽܘܢ܆ ܠܘ ܕܠܳܐ ܢܶܟܝܳܢܳܐ ܢܳܛܪܺܝܢ ܠܰܐܝܠܝܢ ܕܡܶܬܠܰܒܟܺܝܢ ܒܗܽܘܢ. ܟܡܳܐ ܓܝܪ ܐܶܢ ܢܶܗܘܶܐ ܕܟܺܐܢܳܐܝ̣ܬ ܡܶܬܬܙܺܝܥ ܐܢܳܫ ܒܰܛܢܳܢܳܐ. ܐܠܐ ܠܘ ܕܠܐ ܡܽܘܡ ܢܳܛܰܪ ܠܗ̇ ܠܢܰܦܫܳܐ. ܡܶܛܠ ܕܰܐܝܠܶܝܢ ܕܠܐ ܡܽܘܡ ܐܶܢܘܢ. ܠܐ ܡ̣ܢ ܚܶܡܬܳܐ ܡܶܬܠܰܒܟܝ̣ܢ ܘܠܐ ܒܪܳܡܽܘܬܳܐ ܡܶܬܬܰܚܕܺܝܢ. ܫܳܬܶܩ ܐܢܳܐ ܐܺܡ̇ܪ ܗܳܠܝܢ ܚܰܫܷ̈ܐ ܐܚܪ̈ܳܢܶܐ. ܘܰܐܝܠܶܝܢ ܕܺܐܝܬܰܝܗܽܘܢ ܕܠܳܐ ܡܽܘܡܳܐ. ܘܶܐܢ ܡܶܬܒܰܩܶܝܢܰܢ ܒܗܳܝ ܕܰܡܟܰܬܡܝ̣ܢ ܚܰܫܷ̈ܐ ܒܫܽܘܪܳܝܳܐ ܕܚܰܝ̈ܐ ܐܢܳܫܳܝ̈ܐ. ܣܰܓܺܝ̈ܐܐ ܟܕ ܒܝܰܕ ܥܰܡ̈ܠܶܐ ܡܕܰܟܶܝܢ ܠܗܽܘܢ ܕܠܺܝ̈ܠܶܐ. ܘܠܐ ܚܰܕ ܐܝ̣ܬ ܕܠܐ ܡܽܘܡ. ܐܠܐ ܢܺܐܡܰܪ ܡܶܠܬܶܗ ܕܡܳܪܰܢ ܕܰܐܝܠܶܝܢ ܕܰܠܘܬ ܒܢܰܝ̈ܢܳܫܳܐ ܠܐ ܡܶܫܟ̈ܚܳܢ ܠܡܶܗܘܳܐ܆ ܠܘܳܬ ܐܰܠܗܳܐ ܡܶܫܟ̈ܚܳܢ ܠܡܶܗܘܳܐ. ܘܳܐܦܠܳܐ ܛܽܘܒܳܢܳܐ ܕܰܘܝܕ ܕܙܰܡܰܪ ܗܳܠܶܝܢ ܠܘ ܕܠܐ ܡܽܘܡܳܐ ܚܳܫܶܒ ܠܗܽܘܢ ܠܰܒܢܰܝ̈ܢܳܫܳܐ. ܟܡܳܐ ܐܶܢ ܕܟܶܝܢ ܡ̣ܢ ܒܺܝ̈ܫܳܬܳܐ. ܘܰܒܛܽܘܒܳܐ ܣܳܐܷܡ ܠܰܐܝܠܶܝܢ ܕܗܰܠܶܟܘ ܕܠܐ ܡܽܘܡܳܐ ܒܽܐܘܪܚܳܐ ܕܟܺܐܢܽܘܬܳܐ. ܐܡ̣ܪ ܓܝܪ ܢܒܺܝܐ ܘܰܒܟܽܠܶܗ ܠܶܒܗܽܘܢ ܒܳܥܶܝܢ ܠܶܗ. ܐܰܝܠܶܝܢ ܠܰܡ ܕܗܳܟܰܢܳܐ ܐܶܢܘܢ ܡܡܰܠܶܝܢ ܦܽܘܩܕܳܢܳܐ ܗܰܘ ܕܰܐܡܝ̣ܪ. ܕܰܪܚܰܡ ܠܡܳܪܝܳܐ ܐܰܠܳܗܳܟ ܡ̣ܢ ܟܽܠܶܗ ܠܶܒܳܟ܆ ܘܡ̣ܢ ܟܽܠܳܗ̇ ܢܰܦܫܳܟ ܘܡ̣ܢ ܟܽܠܶܗ ܚܰܝܠܳܟ (ܡܬܝ ܟܒ: ܠܙ ܡܪܩܘܣ ܝܒ: ܠ ܠܘܩܐ ܝ: ܟܙ). ܘܥܰܠܗܳܕܶܐ:
ܠܳܐ ܥܒܰܕ ܥܰܘܠܳܐ ܘܗܰܠܶܟܘ ܒܽܐܘܪ̈ܚܳܬܶܗ. ܡܰܝܬܶܐ ܕܶܝܢ ܟܰܕ ܡܰܠܶܦ ܗܳܕܶܐ ܘܳܐܡܰܪ:
ܐܰܢܬ ܦܩܰܕܬ ܕܢܶܛܪܽܘܢ ܦܽܘ̈ܩܕܳܢܰܝܟ ܪܰܘܪܒܳܐܝ̣ܬ. ܡܳܕܶܝܢ ܦܽܘ̈ܩܕܳܢܶܐ ܗܶܢܘܢ ܐܶܢܘܢ ܐܽܘܪ̈ܚܳܬܳܐ ܕܡܶܬܪܰܓܪܰܓ ܡܙܰܡܪܳܢܳܐ ܕܢܶܛܰܪ ܐܶܢܘܢ. ܘܳܐܡܰܪ:
ܐܶܫܬܽܘܦ ܕܶܝܢ ܡܰܬܩ̈ܢܳܢ ܐܽܘܪ̈ܚܳܬܝ ܕܶܐܛܰܪ ܦܽܘ̈ܩܕܳܢܰܝܟ. ܘܠܳܐ ܐܶܒܗܰܬ ܡܳܐ ܕܢܶܛܪܶܬ ܟܽܠܗܽܘܢ ܦܽܘ̈ܩܕܳܢܰܝܟ. ܘܰܒܗܳܕܶܐ ܕܠܳܐ ܡܽܘܡ ܗܳܘܶܐ ܗܘܺܝܬ ܘܰܕܠܐ ܒܶܗܬܬܳܐ.
ܘܰܐܘܕܶܐ ܠܳܟ ܒܰܬܪܺܝܨܽܘܬܶܗ ܕܠܶܒܝ. ܡܳܐ ܕܝܶܠܦܶܬ ܟܽܠܗܽܘܢ ܕܺܝ̈ܢܶܐ ܕܙܰܕܺܝܩܽܘܬܳܟ. ܦܽܘ̈ܩܕܳܢܰܝܟ ܢܶܛܪܶܬ ܠܳܐ ܬܰܪܦܶܝܢܝ ܠܥܳܠܰܡ. ܗܳܕܶܐ ܠܡ ܡܰܫܘܝܳܐ ܠܝ̣ ܠܛܽܘܒܳܐ ܗܰܘ ܩܰܕܡܳܝܳܐ. ܟܕ ܒܰܬܪܺܝܨܽܘܬ ܠܶܒܳܐ ܐܰܘܕܶܐ ܠܳܟ. ܗܳܫܳܐ ܬܽܘܒ ܐܰܝܟ ܛܰܠܝܳܐ ܠܣܳܦܪܳܐ ܡܫܰܐܷܠ܆ ܘܨܳܒܶܐ ܕܢܺܐܠܰܦ.
ܒ– ܕܰܒܡܳܢܳܐ ܠܡ ܡܕܰܟܶܐ ܛܰܠܝܳܐ ܐܽܘܪܚܶܗ ܕܢܶܛܰܪ ܦܽܘ̈ܩܕܳܢܰܝܟ. ܘܡ̣ܢ ܐܰܝܟܳܐ ܡܫܰܪܶܐ ܕܢܶܕܰܥ ܨܶܒܝܳܢܳܟ. ܘܰܐܝܕܳܐ ܗܝ ܟܬܺܝܒܬܳܐ ܩܰܕܡܳܝܬܳܐ ܕܗܳܘܝܳܐ ܡܚܰܘܝܳܐ ܠܶܗ ܕܰܒܣܶܦܪܳܟ ܠܳܐ ܢܶܣܬܰܟܰܠ. ܗܳܐ ܓܶܝܪ ܕܺܐܠܰܦ ܨܶܒܝܳܢܳܟ ܒܳܥܶܐ ܐܢܳܐ.
ܘܰܒܟܽܠܶܗ ܠܶܒܝ ܥܰܩܶܒܬܳܟ. ܠܳܐ ܬܶܛܥܶܝܢܝ ܡ̣ܢ ܦܽܘ̈ܩܕܳܢܰܝܟ. ܥܰܩܶܒܬܳܟ ܕܶܝܢ ܠܘ ܟܕ ܒܳܨܶܐ ܐܢܳܐ ܟܝܳܢܳܟ. ܘܠܳܐ ܟܰܕ ܡܫܰܐܷܠ ܐܢܳܐ ܕܰܐܝܟܰܢܳܐ ܐܰܘ ܡܳܢܳܐ ܐܝ̣ܬܰܝܟ. ܐܶܠܐ ܟܕ ܡܶܬܟܪܶܟ ܐܢܳܐ ܒܓܰܘ ܚܽܘ̈ܫܳܒܶܐ ܕܠܶܒܝ. ܕܟܽܠܡܶܕܶܡ ܕܨܳܒܶܐ ܐܰܢܬ ܒܶܗ ܠܳܐ ܢܶܦܠܛܰܢܝ. ܘܟܰܕ ܢܳܛܰܪ ܐܢܳܐ ܐܪܳܙܳܟ ܕܠܳܐ ܡܶܬܡܰܠܰܠ ܩܕܳܡ ܐܰܝܠܶܝܢ ܕܫܳܘܶܝܢ ܠܶܗ.
ܒܠܶܒܝ ܛܰܫܺܝܬ ܡܶܠܰܝ̈ܟ ܘܠܳܐ ܐܶܚܛܶܐ ܠܳܟ. ܡܶܛܠ ܕܠܰܘ ܟܽܠܢܳܫ ܡܨܶܐ ܠܰܡܩܰܒܳܠܽܘ ܘܰܠܡܶܛܰܪ ܐܰܝܠܶܝܢ ܕܰܐܘܕܰܥܬܳܢܝ ܟܰܣܝܳܐܝ̣ܬ ܒܓܶܠܝܳܢܳܐ ܕܪܽܘܚܳܟ. ܘܟܰܕ ܗܳܠܝܢ ܡܛܰܫܶܐ ܐܢܳܐ ܕܠܳܐ ܐܶܓܠܶܐ ܐܪ̈ܳܙܰܝܟ ܠܣܰܟ̈ܠܶܐ ܘܶܐܬܪܫܶܐ ܡ̣ܢ ܟܺܐܢܽܘܬܳܟ. ܒܗܳܝ ܕܺܐܠܰܦ ܦܽܘ̈ܩܕܳܢܰܝܟ ܡܶܬܗܰܓܶܐ ܐܢܳܐ. ܡܶܛܠܗܳܢܳܐ ܐܡ̇ܪ ܐܢܳܐ.
ܒܪܺܝܟ ܐܰܢܬ ܡܳܪܝܳܐ ܐܰܠܶܦܰܝܢܝ ܦܽܘ̈ܩܕܳܢܰܝܟ. ܒܗܳܕܶܐ ܠܰܡ ܝܳܪܶܒ ܐܢܳܐ ܐܶܢ ܦܽܘ̈ܩܕܳܢܰܝܟ ܝܳܠܶܦ ܐܢܳܐ.
ܘܟܰܕ ܒܣܶܦ̈ܘܳܬܝ ܬܢܺܝܬ ܟܽܠܗܽܘܢ ܕܺܝ̈ܢܶܐ ܕܙܰܕܺܝܩܽܘܬܳܟ. ܘܶܐܢ ܡܶܫܬܰܐܰܠ ܗܘܺܝܬ ܥܰܠ ܐܪ̈ܳܙܶܐ ܕܟܰܣܝܴ̈ܬܳܐ ܬܳܢܶܐ ܗܘܺܝܬ ܕܺܝ̈ܢܶܐ ܙܰܕܺܝ̈ܩܶܐ ܕܰܐܠܶܦܬ ܕܢܶܛܪܽܘܢ. ܘܟܰܕ ܒܽܐܘܪܚܳܐ ܕܺܝܠܳܟ ܗܰܠܟܴ̈ܬܝ ܣܳܐܷܡ ܗܘܺܝܬ.
ܠܐܽܘܪܚܳܐ ܕܣܳܗܕܽܘܬܳܟ. ܪܶܚܡܶܬ ܛܳܒ ܡ̣ܢ ܟܽܠܶܗ ܥܽܘܬܪܳܐ. ܘܠܳܐ ܦܰܚܡܶܬ ܡܶܕܶܡ ܒܚܽܘܒܳܐ ܕܰܫܒܺܝ̈ܠܰܝܟ. ܡܶܛܠ ܕܰܠܗܳܕܶܐ ܐܰܚܒܶܬ.
ܘܰܒܦܽܘ̈ܩܕܳܢܰܝܟ ܪܢܺܝܬ ܘܝܶܕܥܶܬ ܐܽܘܪ̈ܚܳܬܳܟ. ܘܠܐ ܐܶܣܬܰܢܩܶܬ ܕܰܒܝܰܕ ܐܚܪ̈ܳܢܶܐ ܐܺܠܰܦ ܕܰܐܝܕܳܐ ܗܝ ܐܽܘܪܚܳܟ. ܡܶܛܠܗܳܢܳܐ.
ܒܢܳܡܽܘܣܳܟ ܪܢܺܝܬ ܕܠܳܐ ܐܶܛܥܶܐ ܡܶܠܰܝ̈ܟ. ܠܳܐ ܓܶܝܪ ܫܒܰܩܬܶܗ ܕܠܳܐ ܡܰܪܢܺܝܬܳܐ ܠܢܳܡܽܘܣܳܟ. ܘܠܳܐ ܐܶܬܥܰܝܦܶܬ ܒܨܶܦܬܳܐ ܕܡܰܠܟܽܘܬܳܐ ܕܙܰܒܢܳܐ ܡܶܛܠܗܳܢܳܐ ܠܳܐ ܛܥܺܝܬ ܡܶܠܰܝ̈ܟ. ܘܒܳܬܰܪ ܬܽܘܒ ܗܳܕܐ ܡܦܝ̣ܣ ܕܰܠܡܷ̈ܠܶܐ ܐܰܠܳܗܳܝܴ̈ܬܳܐ ܢܶܗܘܶܐ ܢܳܛܽܘܪܳܐ ܘܰܡܨܰܠܶܐ ܘܳܐܡܰܪ.
ܓ– ܥܢܺܝ ܠܥܰܒܕܳܟ ܕܺܐܚܶܐ ܘܶܐܛܰܪ ܡܶܠܰܝ̈ܟ. ܢܳܛܽܘܪܽܘܬܳܐ ܕܡܶܠܰܝ̈ܟ ܚܰܝ̈ܐ ܗܳܘܝܳܐ ܠܥܰܒܕܳܟ. ܘܚܳܙܶܐ ܓܶܠܝܴ̈ܢܶܐ ܕܰܥܬܺܝ̈ܕܳܬܳܐ ܕܺܐܝܬ ܒܢܳܡܽܘܣܳܟ.
ܐܶܠܐ ܓܠܺܝ ܥܰܝ̈ܢܰܝ ܕܶܐܚܙܶܐ. ܬܶܕܡܪ̈ܳܬܳܐ ܕܰܒܢܳܡܽܘܣܳܟ. ܕܰܐܝܢܳܐ ܢܳܡܽܘܣܳܐ ܒܳܥܶܐ ܐܢܳܫ ܢܶܚܙܶܐ. ܟܽܠܡܶܕܶܡ ܕܡ̣ܢ ܐܰܠܗܳܐ ܐܶܬܥܒܶܕ ܐܰܘ ܐܶܬܡܰܠܰܠ. ܐܳܦ ܓܶܝܪ ܛܽܘܒܳܢܳܐ ܦܰܘܠܽܘܣ ܡ̣ܢ ܕܰܢܦܰܠܘ ܩܠܳܦܷ̈ܐ ܡ̣ܢ ܥܰܝ̈ܢܰܘܗܝ. ܗܳܝܕܶܝܢ ܐܶܫܬܘܺܝ ܗܘܳܐ ܠܡܶܚܙܳܐ ܠܟܰܣܝܴ̈ܬܶܗ ܕܢܳܡܽܘܣܳܐ. ܐܳܦ ܛܽܘܒܳܢܳܐ ܕܰܘܝܕ ܠܰܐܝܠܶܝܢ ܕܟܰܣ̈ܝܳܢ ܠܓܰܘ ܡ̣ܢ ܫܽܘܫܶܦܳܐ ܕܡܽܘܫܶܐ ܐܶܬܪܰܓܪܰܓ ܕܢܶܚܙܶܐ ܗܳܢܰܘ ܠܗܳܠܝܢ ܐܪ̈ܳܙܶܐ ܢܰܗܺܝܪ̈ܶܐ ܗܳܠܝܢ ܕܶܐܬܓܠܺܝܘ ܒܝܰܕ ܡܫܺܝܚܳܐ. ܘܥܰܠܗܳܝ ܐܡ̇ܪ ܗܘܳܐ ܕܒܰܝܬܳܝܳܐ ܐܢܳܐ ܘܠܰܘ ܒܰܪܝܳܐ. ܘܠܳܐ ܙܳܕܶܩ ܕܶܐܬܓܠܶܙ ܡ̣ܢ ܡܰܘܗܰܒܬܳܟ. ܡܶܛܠ:
ܕܥܳܡܽܘܪܳܐ ܐܢܳܐ ܥܰܡܳܟ ܠܳܐ ܬܛܰܫܶܐ ܡܶܢܝ ܦܽܘ̈ܩܕܳܢܰܝܟ. ܨܒܳܬ ܢܰܦܫܝ ܘܶܐܬܪܰܓܪܓܰܬ ܠܕܺܝ̈ܢܰܝܟ ܒܟܽܠܙܒܰܢ. ܡܶܛܠ ܕܨܳܒܝܳܐ ܢܰܦܫܝ. ܘܰܒܪܶܓܬܳܐ ܕܚܰܝܱ̈ܝܟ ܐܝ̣ܬܶܝܗ̇. ܘܠܰܘ ܐܰܝܟ ܥܰܡܡ̈ܐ ܕܠܳܐ ܐܶܬܬܦܺܝܣܘ ܠܳܟ. ܘܠܳܐ ܫܰܡܥܽܘܟ. ܒܰܟܐܳܬܳܟ ܐܶܪܚܶܩܬ ܐܶܢܘܢ ܡ̣ܢ ܗܳܝ ܕܢܶܗܘܽܘܢ ܥܰܡܳܟ ܥܳܡܽܘܪ̈ܶܐ.
ܟܐܰܝܬ ܒܥܰܡܡ̈ܐ ܘܠܺܝܛܺܝܢ ܐܶܢܽܘܢ ܐܰܝܠܶܝܢ ܕܛܳܥܶܝܢ ܡ̣ܢ ܦܽܘ̈ܩܕܳܢܰܝܟ. ܐܶܢܐ ܕܶܝܢ ܦܽܘܩܕܳܢܳܟ ܢܳܛܰܪ ܐܢܳܐ. ܘܢܳܡܽܘܣܳܟ ܠܳܐ ܛܳܥܶܐ ܐܢܳܐ. ܐܶܠܐ
ܐܰܥܒܰܪ ܡܶܢܝ ܚܶܣܕܳܐ ܡܶܛܠ ܕܣܳܗܕܽܘܬܳܟ ܢܶܛܪܶܬ. ܘܠܳܐ ܐܶܗܘܶܐ ܚܰܒܪܳܐ ܘܒܰܪ ܡܢܳܬܳܐ ܕܰܐܝܠܶܝܢ ܕܰܡܚܰܣܕܺܝܢ ܠܝ̣. ܥܰܠ ܕܫܳܗܰܪ ܐܢܳܐ ܥܰܠ ܬܰܪܥܳܐ ܕܢܳܛܽܘܪܽܘܬ ܦܽܘ̈ܩܕܳܢܰܝܟ.
ܝܳܬܒܺܝܢ ܗܘܰܘ ܥܰܘܴ̈ܠܶܐ ܘܪܳܢܶܝܢ ܗܘܰܘ ܒܺܝ. ܘܶܐܢܳܐ ܒܦܽܘ̈ܩܕܳܢܰܝܟ ܪܳܢܶܐ ܗܘܺܝܬ. ܘܰܒܬܰܪܥܺܝܬܳܟ ܛܳܒܬܳܐ. ܠܐ ܓܝܪ ܐܶܬܕܰܘܕܶܬ ܡ̣ܢ ܗܳܝ ܕܰܚܙܺܝܬ ܕܪܳܢܶܝܢ ܒܺܝ ܥܰܘܴ̈ܠܶܐ܆ ܘܫܶܒܩܶܬ ܡܰܪܢܺܝܬܳܐ ܕܢܳܛܽܘܪܽܘܬ ܦܽܘ̈ܩܕܳܢܰܝܟ. ܐܶܠܐ ܘܟܰܕ ܣܰܓܺܝ ܫܳܚܩܳܐ ܗܘܳܬ ܠܗܽܘܢ ܚܙܳܬܳܐ ܕܰܐܡܺܝܢܽܘܬܝ ܥܰܠ ܬܰܪܥܳܟ ܝܰܩܪܶܬ ܠܪܶܢܝܳܐ ܕܦܽܘ̈ܩܕܳܢܰܝܟ ܕܰܡܠܶܐ ܚܰܝ̈ܐ. ܘܰܪܢܺܝܬ ܒܬܰܪܥܺܝܬܳܟ ܛܳܒܬܳܐ. ܡܳܢܳܐ ܕܶܝܢ ܒܳܬܰܪ ܗܳܠܶܝܢ ܪ̈ܶܢܝܶܐ ܩܰܕܺܝ̈ܫܶܐ ܘܡܰܘܬܪ̈ܳܢܶܐ ܐܡ̇ܪ.
ܕ– ܢܶܩܦܰܬ ܢܰܦܫܝ ܠܥܰܦܪܳܐ ܐܰܚܳܢܝ ܐܰܝܟ ܡܶܠܬܳܟ. ܗܳܕܐ ܥܰܠ ܡܽܘܟܳܟܶܗ ܕܰܢܒܺܝܐ ܡܰܘܕܥܳܐ. ܕܠܘ ܠܡ ܒܕܶܡ̈ܘܳܬܳܐ ܣܺܝܡܳܐ ܠܝ̣ ܢܰܦܫܝ. ܐܠܐ ܡܡܰܟܰܟܬܳܐ ܘܡܰܠܝܰܬ ܬܶܢܚܴ̈ܬܳܐ ܐܶܠܐ ܚܽܘܪ ܒܳܗ̇ ܕܰܟܡܳܐ ܓܰܠܝܳܐ. ܘܰܐܝܟ ܕܡ̣ܢ ܥܰܦܪܳܐ ܡܩܰܪܒܳܐ ܬܰܟܫܶܦܬܳܐ. ܐܰܚܳܗ̇ ܐܰܝܟ ܡܶܠܬܳܟ.
ܐܶܠܐ ܐܽܘܪܚܳܟ ܚܰܘܺܝܬܳܢܝ ܘܰܥܢܰܝܬܳܢܝ ܐܰܠܶܦܰܝܢܝ ܢܳܡܽܘܣܳܟ. ܘܡܶܛܠܗܳܕܐ ܐܡ̇ܪ ܐܢܳܐ.
ܐܽܘܪܚܳܐ ܕܦܽܘ̈ܩܕܳܢܰܝܟ ܚܰܘܳܢܝ ܘܶܐܪܢܶܐ ܒܬܶܕܡܪ̈ܳܬܳܟ. ܘܶܐܬܛܰܪܦܰܬ ܢܰܦܫܝ ܒܪܶܢܝܳܐ ܐܰܚܳܢܝ ܐܰܝܟ ܡܶܠܬܳܟ. ܚܙܺܝ ܐܰܝܟܰܢܳܐ ܕܠܳܐ ܫܶܠܝܳܐ ܒܳܥܶܐ ܕܢܶܚܙܶܐ ܐܽܘܪܚܳܐ ܕܦܽܘ̈ܩܕܳܢܶܐ. ܘܟܰܕ ܛܳܒ ܝܳܕܰܥ ܗܘܳܐ ܠܗ̇ ܠܐܽܘܪܚܳܐ ܐܶܠܐ ܕܰܢܚܰܘܶܐ ܠܶܗ ܡܳܪܝܳܐ. ܗܰܘ ܕܶܐܡܰܪ ܥܠ ܢܰܦܫܶܗ ܕܶܐܢܳܐ ܐܢܳܐ ܐܽܘܪܚܳܐ ܘܚܰܝ̈ܐ ܘܰܫܪܳܪܳܐ (ܝܘܚܢܢ ܝܕ: ܘ). ܘܟܰܕ ܠܗܳܕܐ ܐܽܘܪܚܳܐ ܡܶܬܪܰܓܪܰܓ ܗܘܳܐ. ܘܡ̣ܢ ܗܳܝ ܕܰܠܩܽܘܒܠܳܐ ܡܶܫܬܐܶܠ ܗܘܳܐ ܘܳܐܡܰܪ:
ܐܽܘܪܚܳܐ ܕܥܰܘܴ̈ܠܶܐ ܐܰܥܒܰܪ ܡܶܢܝ ܘܢܳܡܽܘܣܳܟ ܐܰܠܶܦܰܝܢܝ. ܗܳܕܐ ܓܶܝܪ ܐܽܘܪܚܳܐ ܗ̄ܝ ܕܺܐܝܪ̈ܺܝܛܺܝܩܽܘ ܘܰܦܬܺܝܬܳܐ ܕܡܰܘܒܠܳܐ ܠܰܐܒܕܳܢܳܐ. ܘܗܰܘ ܕܡ̣ܢ ܗܳܕܐ ܡܶܫܬܐܶܠ ܐܰܝܟ ܢܒܺܝܐ ܕܰܒܥܳܐ ܕܢܶܥܒܰܪ ܡܶܢܳܗ̇ ܐܡ̣ܪ:
ܐܽܘܪܚܳܐ ܕܗܰܝܡܳܢܽܘܬܳܟ ܓܒܺܝܬ ܘܰܒܕܺܝ̈ܢܰܝܟ ܨܒܺܝܬ. ܢܶܩܦܶܬ ܠܣܳܗܕܽܘܬܳܟ ܡܳܪܝܳܐ ܠܳܐ ܬܰܒܗܶܬܰܝܢܝ. ܒܽܐܘܪܚܳܐ ܕܦܽܘ̈ܩܕܳܢܰܝܟ ܗܰܠܟܶܬ ܡܶܛܠ ܕܚܰܕܺܝܬܳܢܝ. ܟܡܳܐ ܠܡ ܐܶܢ ܩܰܛܺܝܢܳܐ ܐܽܘܪܚܳܐ ܕܡܰܘܒܠܳܐ ܠܚܰܝ̈ܐ. ܡܰܣܩܳܐ ܢܳܛܽܘܪܽܘܬ ܦܽܘ̈ܩܕܳܢܶܐ. ܠܰܐܝܠܶܝܢ ܕܰܐܣܺܝܪܺܝܢ ܒܚܽܘܒܳܐ ܕܥܳܒܽܘܪ̈ܝܳܬܳܐ. ܐܶܠܐ ܗܰܘ ܕܢܳܩܶܦ ܠܣܳܗܕܽܘܬܶܗ ܕܡܳܪܝܳܐ. ܘܡ̣ܢ ܒܶܗܬܬܳܐ ܕܥܰܘܴ̈ܠܶܐ ܡܶܬܚܣܶܟ. ܘܚܳܙܶܐ ܠܶܗ ܠܡܳܪܝܳܐ ܘܡܶܬܚܰܕܶܐ ܒܶܗ ܐܰܝܟ ܕܶܐܡܰܪ. ܕܬܶܚܙܽܘܢܳܢܝ ܠܡ ܘܢܶܚܕܶܐ ܠܶܒܟܽܘܢ. ܘܚܰܕܘܰܬܟܽܘܢ ܠܳܐ ܐܢܳܫ ܢܳܣܶܒ ܡܶܢܟܽܘܢ (ܝܘܚܢܢ ܝܘ: ܟܒ). ܘܬܽܘܒ ܐܰܝܟ ܕܰܒܢܺܝܫܳܐ ܨܠܽܘܬܳܐ ܡܩܰܪܶܒ ܕܢܰܠܰܦ ܐܽܘܪܚܳܐ ܕܦܽܘ̈ܩܕܳܢܶܐ ܟܕ ܐܡ̇ܪ:
ܗ– ܐܰܠܶܦܰܝܢܝ ܐܽܘܪܚܳܐ ܕܦܽܘ̈ܩܕܳܢܰܝܟ ܘܶܐܛܰܪ ܐܶܢܽܘܢ. ܘܣܰܟܶܠܰܝܢܝ ܕܶܐܛܰܪ ܢܳܡܽܘܣܳܟ ܘܶܐܛܪܺܝܘܗܝ ܡ̣ܢ ܟܽܠܶܗ ܠܶܒܝ. ܘܗܰܠܶܟܰܝܢܝ ܒܰܫܒܺܝܠܳܐ ܕܦܽܘ̈ܩܕܳܢܰܝܟ ܡܶܛܠ ܕܰܒܗܽܘܢ ܨܒܺܝܬ. ܟܡܳܐ ܠܰܡ ܐܶܢ ܣܳܒܰܪ ܐܢܳܫ ܕܝܳܕܰܥ ܦܽܘ̈ܩܕܳܢܶܐ. ܠܐ ܡܶܫܟܰܚ ܝܳܠܶܦ ܐܽܘܪܚܳܐ ܕܦܽܘ̈ܩܕܳܢܰܘܗܝ ܡܶܛܠܗܳܢܐ ܠܡܳܪܝܳܐ ܡܨܰܠܶܐ ܐܢܳܐ ܕܢܰܠܦܰܢܝ ܐܽܘܪܚܳܐ ܕܦܽܘܩܕܳܢܰܘ̈ܗܝ. ܘܗܽܘ ܢܣܰܟܠܰܢܝ ܒܢܳܡܽܘܣܶܗ. ܘܥܰܠܗܳܝ ܐܡ̇ܪ ܐܢܳܐ.
ܐܰܦܢܳܐ ܠܶܒܝ ܠܣܳܗܕܽܘܬܳܟ ܘܠܳܐ ܠܡܱ̈ܬܠܶܐ. ܣܳܗܕܽܘܬܳܟ ܠܡ ܫܰܪܺܝܪܳܐ ܗܝ. ܡܱ̈ܬܠܶܐ ܕܶܝܢ ܘܫܽܘ̈ܥܝܳܬܳܐ ܗܳܢܝܢ ܦܰܟܺܝ̈ܗܳܬܳܐ ܚܰܪ̈ܒܶܐ ܘܒܰܛܺܝ̈ܠܶܐ ܐܶܢܘܢ. ܘܰܒܗܰܘ ܡܶܕܶܡ ܕܩܳܐܷܡ ܒܡܰܣܒܪܳܢܽܘܬܳܐ ܕܰܓܳܠܬܳܐ. ܠܳܐ ܢܶܬܦܰܫܰܚ ܠܶܒܳܐ ܕܗܰܘ ܕܚܳܐܱܪ ܠܳܟ ܒܟܽܠܥܶܕܳܢ.
ܐܶܠܳܐ ܐܰܥܒܰܪ ܥܰܝ̈ܢܰܝ ܕܠܳܐ ܢܶܚܙ̈ܝܳܢ ܕܰܓܳܠܽܘܬܳܐ ܘܒܽܐܘܪ̈ܚܳܬܳܟ ܐܰܚܳܢܝ. ܕܰܓܳܠܽܘܬܳܐ ܚܛܺܝܬܳܐ ܐܝ̣ܬܶܝܗ̇. ܚܛܝ̣ܬܳܐ ܬܘܒ ܚܶܫܽܘܟܰܐ ܗܘ ܕܢܰܦܫܳܐ. ܡܶܛܠ ܕܰܐܢܬ ܫܪܳܪܳܐ ܐܰܢܬ ܘܰܒܕܰܓܳܠܽܘܬܳܐ ܠܳܐ ܨܳܒܶܝܬ. ܙܰܕܺܝܩܽܘܬܳܐ ܐܰܢܬ. ܘܠܰܚܛܺܝܬܳܐ ܫܰܘܬܳܦܽܘܬܳܐ ܥܰܡܳܟ ܠܰܝܬ ܠܳܗ̇. ܘܢܽܘܗܪܳܐ ܐܝ̣ܬܰܝܟ. ܘܰܒܚܶܫܽܘܟܳܐ ܠܳܐ ܚܳܝܪ̈ܳܢ ܥܰܝ̈ܢܰܝܟ. ܘܟܰܕ ܠܗܳܕܶܐ ܒܳܥܶܐ ܗܘܳܐ ܢܒܺܝܳܐ ܐܡ̣ܪ.
ܐܰܫܰܪ ܡܶܠܬܳܟ ܠܥܰܒܕܳܟ ܕܕܳܚܶܠ ܠܳܟ. ܘܰܐܥܒܰܪ ܡܶܢܝ ܚܶܣܕܳܐ ܡܶܛܠ ܕܕܺܝ̈ܢܰܝܟ ܫܰܦܺܝܪܺܝܢ ܐܶܢܘܢ. ܨܒܺܝܬ ܒܗܽܘܢ ܒܦܽܘ̈ܩܕܳܢܰܝܟ ܘܰܒܙܰܕܺܝܩܽܘܬܳܟ ܐܰܚܳܢܝ. ܡܶܛܠ ܠܡ ܕܣܳܢܶܝܬ ܕܰܓܳܠܽܘܬܳܐ ܐܰܫܰܪ ܐܰܢܬ ܠܘܳܬܝ ܡܶܠܬܟ. ܠܫܰܪܺܝܪܳܐ ܠܳܐ ܡܕܰܓܠܰܬ. ܘܰܒܕܰܓ̈ܳܠܶܐ ܠܳܐ ܨܳܒܶܝܬ. ܡܶܛܠ ܕܡܶܬܚܰܣܰܕ ܗܘܳܐ ܡ̣ܢ ܕܰܓ̈ܳܠܶܐ. ܥܰܠ ܕܠܳܐ ܡܫܰܘܬܰܦ ܗܘܳܐ ܠܰܥܒܳܕܰܝ̈ܗܘܢ. ܕܰܓ̈ܳܠܶܐ ܕܶܝܢ ܕܰܒܗܰܘ ܙܰܒܢܳܐ ܦܳܠܚܱ̈ܝ ܦܬܰܟܪ̈ܶܐ ܗܘܰܘ. ܐܰܝܟܰܢܳܐ ܕܳܐܦ ܝܰܘܡܳܢܳܐ ܐܶܪ̈ܺܝܛܺܝܩܽܘ. ܘܪ̈ܰܚܡܶܐ ܫܳܐܷܠ ܘܒܳܥܶܐ ܡ̣ܢ ܡܳܪܝܳܐ ܕܢܶܪܚܰܩ ܡ̣ܢ ܐܰܝܠܶܝܢ ܕܰܡܡܰܠܠܝ̣ܢ ܥܠܰܘܗܝ ܚܶܣܕܳܐ. ܘܥܰܠ ܗܳܕܐ ܐܡ̣ܪ:
ܘ– ܢܺܐܬܽܘܢ ܥܠܰܝ ܪ̈ܰܚܡܰܝܟ ܡܳܪܝܳܐ ܘܦܽܘܪܩܳܢܳܟ ܕܶܐܡܰܪܬ. ܕܬܶܬܶܠ ܦܶܬܓܳܡܳܐ ܠܰܡܚܰܣ̈ܕܳܢܰܝ. ܡܶܛܠ ܕܶܐܬܬܰܟܠܶܬ ܥܰܠ ܡܶܠܰܝ̈ܟ. ܗܳܝ ܕܢܶܫܰܐܠ ܪ̈ܰܚܡܳܐ ܕܟܽܠܢܳܫ ܐܝ̣ܬܶܝܗ̇ ܕܢܺܐܡܰܪ ܠܘܳܬ ܡܳܪܝܳܐ. ܕܢܺܐܬܶܐ ܦܽܘܪܩܳܢܳܐ ܕܶܐܡܰܪ ܠܗܽܘܢ ܕܗܳܢܘܢ ܕܰܫܡܰܥܘ ܩܳܠܶܗ ܕܡܳܪܝܳܐ ܘܩܰܒܶܠܘ ܓܶܠܝܳܢܶܗ. ܘܦܽܘܪܩܳܢܳܐ ܕܶܐܡܰܪ ܢܒܺܝܐ ܢܺܐܬܶܐ ܠܘܳܬܶܗ ܪ̈ܰܚܡܶܐ ܕܶܐܡܰܪ ܠܶܗ ܡܳܪܝܳܐ. ܕܳܐܬܶܐ ܠܘܳܬܶܗ ܪ̈ܰܚܡܶܐ ܘܦܽܘܪܩܳܢܳܐ. ܘܠܳܐ ܒܰܟܬܳܒܳܐ ܐܶܫܟܰܚܢܰܢ ܘܠܳܐ ܢܒܺܝܳܐ ܐܰܡܪܳܗ̇. ܕܶܐܡܰܪ ܠܶܗ ܡܳܪܝܳܐ ܕܳܐܬܶܐ ܠܘܳܬܶܗ ܦܽܘܪܩܳܢܳܐ. ܘܕܳܡܝܳܐ ܡܶܠܬܳܐ ܕܠܶܗ ܠܡܳܪܰܢ ܩܳܪܶܐ ܪ̈ܰܚܡܶܐ ܘܦܽܘܪܩܳܢܳܐ. ܕܺܐܝܬܰܘܗܝ ܓܶܠܝܳܢܶܗ ܕܥܰܡܰܢܽܘܐܝܠ. ܘܠܶܗ ܡܨܰܠܶܐ ܕܢܺܐܬܶܐ ܥܠܰܘܗܝ ܥܰܡ ܪ̈ܰܚܡܶܐ. ܘܢܶܬܶܠ ܦܶܬܓܳܡܳܐ ܠܰܡܚܰܣ̈ܕܳܢܰܝ.
ܘܠܳܐ ܬܶܥܢܰܕ ܡ̣ܢ ܦܽܘܡܝ ܡܶܠܬܳܐ ܕܩܽܘܫܬܳܐ܆ ܡܶܛܠ ܕܰܠܕܺܝ̈ܢܰܝܟ ܣܰܟܺܝܬ. ܘܶܐܛܰܪ ܢܳܡܽܘܣܳܟ ܠܥܳܠܰܡ ܥܳܠܡܺܝܢ ܘܶܐܗܰܠܶܟ ܒܰܪܘܳܚܬܳܐ. ܡܶܛܠ ܕܰܒܦܽܘ̈ܩܕܳܢܰܝܟ ܨܒܺܝܬ. ܡܶܠܬܳܐ ܕܶܝܢ ܕܰܫܪܳܪܳܐ ܗܽܘܝܽܘ ܡܳܪܰܢ. ܐܶܡܰܪ ܩܰܕܺܝܫܳܐ ܝܽܘܚܰܢܳܢ ܡܶܛܠܳܬܶܗ. ܕܺܐܝܬܰܘܗܝ ܗܘܳܐ ܡܶܠܬܳܐ ܘܢܽܘܗܪܳܐ ܕܰܫܪܳܪܳܐ ܕܡܰܢܗܰܪ ܠܟܽܠܢܳܫ ܕܳܐܬܶܐ ܠܥܳܠܡܳܐ (ܝܘܚܢܢ ܐ: ܛ). ܗܰܘ ܕܢܳܛܰܪ ܢܳܡܽܘܣܶܗ ܘܨܳܒܶܐ ܒܦܽܘܩܕܳܢܰܘ̈ܗܝ ܡܶܫܬܘܶܐ ܕܰܢܗܰܠܶܟ ܒܽܐܘܪ̈ܚܳܬܳܐ ܘܒܳܬܰܪ ܗܳܠܶܝܢ ܐܳܡܰܪ
ܐܶܡܰܠܶܠ ܒܙܰܕܺܝܩܽܘܬܳܐ ܩܕܳܡ ܡܰܠܟ̈ܐ ܘܠܳܐ ܐܶܒܗܰܬ. ܙܰܕܺܝܩܽܘܬܳܐ ܕܶܝܢ ܗܽܘܝܽܘ ܡܳܪܰܢ ܕܒܶܗ ܩܢܰܘ ܦܰܪܶܗܣܺܝܰܐ ܫܠܺܝ̈ܚܶܐ ܩܰܕܺܝ̈ܫܶܐ ܕܒܶܗ ܡܡܰܠܠܺܝܢ ܗܘܰܘ ܩܕܳܡ ܡܰܠܟ̈ܐ ܘܰܩܕܳܡ ܕܰܝܳܢ̈ܐ ܘܠܳܐ ܒܳܗܬܺܝܢ ܗܘܰܘ. ܐܶܡܰܪ ܠܗܽܘܢ ܓܶܝܪ ܕܶܐܬܶܠ ܠܟܽܘܢ ܦܽܘܡܳܐ ܘܚܶܟܡܬܳܐ ܐܰܝܕܳܐ ܕܠܳܐ ܡܨܶܝܢ ܕܰܢܩܽܘܡܽܘܢ ܠܩܽܘܒܠܳܗ̇ ܟܽܠܗܽܘܢ ܒܥܶܠܕ̈ܒܳܒܰܝܟܽܘܢ. ܘܟܕ ܠܡ ܗܳܕܐ ܐܡ̣ܪ ܢܒܺܝܐ.
ܐܶܪܢܶܐ ܒܦܽܘ̈ܩܕܳܢܰܝܟ ܕܪܶܚܡܶܬ. ܘܰܐܪܺܝܡ ܐܺܝ̈ܕܰܝ ܠܘܳܬ ܦܽܘ̈ܩܕܳܢܰܝܟ ܕܪܶܚܡܶܬ ܘܶܐܪܢܶܐ ܒܗܽܘܢ ܒܦܽܘ̈ܩܕܳܢܰܝܟ ܘܶܐܫܬܰܒܰܚ ܒܗܰܝܡܳܢܽܘܬܳܟ. ܗܰܘ ܓܶܝܪ ܕܪܳܢܶܐ ܒܦܽܘ̈ܩܕܳܢܶܐ ܕܡܳܪܶܗ. ܘܰܡܪܺܝܡ ܐܺܝܕܰܘ̈ܗܝ ܘܢܳܛܰܪ ܠܗܽܘܢ. ܥܰܠܗܳܝ ܡܶܫܬܰܒܰܚ ܒܗܰܝܡܳܢܽܘܬܳܐ ܕܰܐܠܳܗܳܐ. ܡܳܐ ܕܝܳܗܶܒ ܐܰܓܪܳܐ ܘܫܽܘܒܚܳܐ ܒܥܳܠܡܳܐ ܚܰܕܬܳܐ. ܠܰܐܝܠܶܝܢ ܕܰܪܚܶܡܘ ܘܰܢܛܰܪܘ ܦܽܘܩܕܳܢܰܘ̈ܗܝ. ܘܢܶܚܙܶܐ ܬܶܕܡܪ̈ܳܬܶܗ ܒܰܡܗܰܝ̈ܡܢܰܘܗܝ. ܘܰܐܝܟ ܕܡ̣ܢ ܚܰܕ ܦܽܘܡܳܐ ܬܳܢܶܝܢ ܠܘܳܬ ܕܰܝܳܢܳܐ ܡܶܠܬܶܗ ܕܰܢܒܺܝܐ ܘܳܐܡܪܺܝܢ.
ܙܙ– ܥܶܗܰܕ ܡܶܠܬܳܟ ܠܥܰܒܕܳܟ ܗܳܝ ܕܰܐܬܟܶܠܬܳܝܗܝ. ܘܒܳܗ̇ ܐܶܬܒܰܝܐܷܬ ܒܡܽܘܟܳܟܝ. ܡܶܛܠ ܕܡܺܐܡܪܳܟ ܐܰܚܝܰܢܝ. ܠܗܳܢܘܢ ܕܡܰܠܶܠܘ ܒܙܰܕܺܝܩܽܘܬܳܐ ܩܕܳܡ ܡܰܠܟ̈ܐ ܒܰܫܡܶܗ ܕܰܡܫܺܝܚܳܐ ܘܠܳܐ ܒܗܶܬܘ. ܡܶܠܬܳܐ ܫܰܟܶܢ ܠܗܽܘܢ ܘܶܐܬܟܶܠ ܐܶܢܽܘܢ ܕܢܶܬܒܽܘܢ ܥܰܠ ܬܪܶܥܣܰܪ ܟܽܘܪ̈ܣܰܘܳܢ ܘܰܢܕܽܘܢܽܘܢ ܬܪܶܥܣܰܪ ܫܰܒ̈ܛܶܐ ܕܰܒܢܱ̈ܝ ܝ̣ܣܪܳܐܝܠ. ܘܰܒܗܳܢܳܐ ܣܰܒܪܳܐ ܘܫܽܘܘܕܳܝܳܐ ܣܳܒܠܺܝܢ ܗܘܰܘ ܚܰܫ̈ܐ ܘܫܶܢ̈ܕܶܐ ܘܟܽܠ ܡܰܘ̈ܬܺܝܢ ܡ̣ܢ ܡܰܠܟ̈ܐ ܘܺܐܝܓܡܽܘܢ̈ܐ. ܘܰܡܒܰܝܐܳܐ ܗܘܳܬ ܠܗܽܘܢ ܗܳܕܐ ܡܶܠܬܶܗ ܕܡܳܪܰܢ ܘܒܳܗ̇ ܚܳܐܷܝܢ ܗܘܰܘ ܐܰܝܟ ܕܡ̣ܢ ܡܰܘܬܳܐ. ܘܥܰܠܗܳܝ ܐܳܡ̇ܪܺܝܢ:
ܥܰܘܴ̈ܠܶܐ ܐܰܠܨܽܘܢܝ ܘܡ̣ܢ ܢܳܡܽܘܣܳܟ ܠܳܐ ܣܛܺܝܬ. ܡ̇ܢ ܐܶܬܐܶܠܶܨܘ ܡ̣ܢ ܥܰܘܴ̈ܠܶܐ ܐܶܠܐ ܫܠܺܝ̈ܚܶܐ ܘܣܳܗ̈ܕܶܐ ܩܰܕܺܝ̈ܫܶܐ. ܘܰܐܝܟ ܕܡ̣ܢ ܚܰܕ ܦܽܘܡܳܐ ܐܳܡܪܺܝܢ ܗܘܰܘ ܠܘܳܬ ܡܳܪܝܳܐ.
ܐܶܬܕܰܟܪܶܬ ܕܺܝ̈ܢܰܝܟ ܡܳܪܝܳܐ ܕܡ̣ܢ ܥܳܠܰܡ ܘܶܐܬܒܰܝܐܶܬ. ܘܰܗܘܰܘ ܠܝ̣ ܠܡܰܪܕܽܘܬܳܐ. ܒܗܳܝ ܕܡܶܬܥܰܗܕܺܝܢ ܗܘܰܘ ܩܰܕܺܝ̈ܫܶܐ ܕܺܝܢ̈ܐ ܕܰܢܛܺܝܪܺܝܢ ܠܡܰܪ̈ܳܚܶܐ ܕܰܠܥܳܠܰܡ ܐܶܢܘܢ. ܡܶܬܒܰܐܝ̣ܢ ܗܘܰܘ ܒܽܐܘ̈ܠܨܳܢܰܝܗܽܘܢ. ܘܥܰܠܗܳܕܐ ܠܳܐ ܡܶܬܛܦܺܝܣܺܝܢ ܗܘܰܘ ܠܡܶܚܙܳܐ ܒܰܐܝܠܶܝܢ ܕܡܶܫܬܰܘܕܶܝܢ ܗܘܰܘ ܠܗܽܘܢ ܡܰܪ̈ܳܚܶܐ ܒܓܰܘ ܒܶܝܬ ܕܺܝܢܳܐ. ܐܰܝܟ ܕܳܐܦ ܢܒܺܝܳܐ ܡ̣ܢ ܦܰܪܨܽܘܦܳܐ ܕܺܝܠܗܽܘܢ ܐܡ̇ܪ:
ܘܰܟܡܺܝܪܽܘܬܳܐ ܐܶܚܰܕܬܰܢܝ ܡ̣ܢ ܚܰܛܳܝ̈ܐ ܕܰܫܒܰܩܘ ܢܳܡܽܘܣܳܟ. ܠܐ ܓܝܪ ܚܳܕܶܝܢ ܗܘܰܘ ܩܰܕܺܝ̈ܫܶܐ ܒܫܽܘܘ̈ܕܳܝܶܐ ܕܰܓ̈ܳܠܶܐ ܕܡܶܫܬܰܘܕܶܝܢ ܗܘܰܘ ܠܗܽܘܢ ܕܰܝܳܢ̈ܐ. ܡܳܢܳܐ ܕܶܝܢ ܐܡ̇ܪ ܢܒܺܝܐ.
ܙܡܺܝܪܬܳܐ ܗܘܰܘ ܠܺܝ ܦܽܘ̈ܩܕܳܢܰܝܟ ܒܶܝܬ ܬܰܘܬܳܒܽܘܬܝ. ܙܡܺܝܪܬܳܐ ܕܶܝܢ ܡ̣ܢ ܚܰܕܽܘܬܳܐ ܗܳܘܝܳܐ. ܗܳܟܰܢܳܐ ܠܰܡ ܘܶܐܢܳܐ ܠܘ ܟܰܕ ܟܰܪܝܳܐ ܠܝ̣ ܢܶܛܪܶܬ ܦܽܘ̈ܩܕܳܢܰܝܟ. ܘܠܘ ܒܰܟܡܺܝܪܽܘܬܳܐ ܥܶܒܕܶܬ ܐܶܢܽܘܢ. ܐܠܐ ܟܰܕ ܚܳܕܶܐ ܐܢܳܐ ܐܰܝܟ ܗܰܘ ܕܰܡܙܰܡܰܪ ܒܰܦܨܺܝܚܽܘܬܳܐ ܕܠܶܒܶܗ. ܡܶܛܠܗܳܢܐ.
ܥܶܗܕܶܬ ܒܠܺܠܝܳܐ ܫܡܳܟ ܡܳܪܝܳܐ ܘܢܶܛܪܶܬ ܢܳܡܽܘܣܳܟ. ܘܠܳܐ ܒܠܺܠܝܳܐ ܕܰܘܶܕܬܰܢܝ ܫܶܢܬܳܐ ܕܶܐܛܥܶܐ ܢܳܡܽܘܣܳܟ. ܐܶܠܐ ܗܰܘ ܕܩܳܐܷܡ ܒܢܽܘܗܪܳܐ ܡܶܬܕܟܰܪ ܗܘܺܝܬ ܛܶܟܣܳܐ ܘܢܳܡܽܘܣܳܟ ܘܢܳܛܰܪ ܗܘܺܝܬ ܠܶܗ. ܘܥܰܠ ܗܳܕܐ ܘܠܐ ܚܰܕ ܥܶܕܳܢܳܐ ܐܶܬܓܰܙܺܝܬ ܡ̣ܢ ܒܽܘ̈ܝܳܐܝܰܝܟ. ܐܡ̣ܪ ܓܶܝܪ:
ܘܶܐܬܒܰܝܐܶܬ ܡܶܛܠ ܕܢܶܛܪܶܬ ܦܽܘ̈ܩܕܳܢܰܝܟ. ܢܶܫܡܰܥ ܡ̣ܢ ܒܳܬܰܪܟܶܢ ܡܳܢܳܐ ܨܳܒܶܐ ܠܡܺܐܡܰܪ ܕܳܡܝܳܐ ܓܶܝܪ ܡܶܠܬܳܐ ܗܳܕܐ ܕܰܒܪܶܓܬܳܐ ܕܡܰܠܟܽܘܬܳܐ ܪܳܢܶܐ ܗܘܳܐ ܒܗܳܝ ܕܡܰܝܬܶܐ ܘܳܐܡܰܪ:
ܚ– ܒܦܶܠܓܽܘܬܶܗ ܕܡܳܪܝܳܐ ܪܢܺܝܬ ܕܶܐܛܰܪ ܦܽܘ̈ܩܕܳܢܰܝܟ. ܘܣܰܟܺܝܬ ܠܰܐܦܱ̈ܝܟ ܡ̣ܢ ܟܽܠܶܗ ܠܶܒܝ ܐܰܚܳܢܝ ܐܰܝܟ ܡܶܠܬܳܟ. ܐܶܬܚܰܫܒܶܬ ܐܽܘܪ̈ܚܳܬܝ ܘܰܐܗܦܟܶܬ ܪ̈ܶܓܠܰܝ ܠܰܫܒܺܝ̈ܠܰܝܟ. ܦܶܠܓܽܘܬܶܗ ܕܡܳܪܝܳܐ ܡܰܠܟܽܘܬܳܐ ܗܳܝ ܕܰܫܡܰܝܳܐ. ܒܗܳܝ ܓܝܪ ܕܰܡܦܰܠܶܓ ܠܳܗ̇ ܠܟܶܢܫܳܐ ܗܰܘ ܕܥܰܡܡ̈ܐ ܒܝܰܘܡܳܐ ܕܕܺܝܢܳܐ. ܘܰܡܩܝ̣ܡ ܥܶܪ̈ܒܶܐ ܡ̣ܢ ܝܰܡܺܝܢܶܗ ܘܰܓܕܰܝܴ̈ܐ ܡ̣ܢ ܣܶܡܳܠܶܗ ܘܰܠܥܶܪ̈ܒܶܐ ܡܰܥܶܠ ܠܗܽܘܢ ܠܡܰܠܟܽܘܬܳܐ ܘܠܰܓܕܰܝܴ̈ܐ ܡܫܰܕܰܪ ܠܗܽܘܢ ܠܢܽܘܪܳܐ ܕܰܠܥܳܠܰܡ. ܘܶܐܬܓܰܠܝܰܬ ܕܦܶܠܓܽܘܬܶܗ ܕܡܳܪܝܳܐ ܥܶܪ̈ܒܶܐ ܐܶܢܘܢ ܘܥܰܠܗܳܕܐ ܟܽܠ ܕܪܳܢܶܐ ܒܗܳܕܐ ܦܽܘܩܕܳܢܳܐ ܢܳܛܰܪ. ܘܗܰܘ ܕܗܳܟܰܢܳܐ ܐܝ̣ܬܰܘܗܝ ܦܫܺܝܩܳܐܝ̣ܬ ܐܡ̇ܪ ܥܰܡ ܢܒܺܝܳܐ.
ܐܶܬܛܰܝܒܶܬ ܘܠܳܐ ܐܶܫܬܰܘܚܪܶܬ ܕܶܐܛܰܪ ܦܽܘ̈ܩܕܳܢܰܝܟ. ܚܰܒ̈ܠܶܐ ܕܥܰܘܴ̈ܠܶܐ ܥܰܪܙܠܽܘܢܝ ܘܡ̣ܢ ܢܳܡܽܘܣܳܟ ܠܳܐ ܣܛܺܝܬ. ܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝ̈ܢܰܝܟ ܙܰܕܺܝܩܳܐ. ܒܟܽܠܡܶܕܶܡ ܓܶܝܪ ܥܰܠ ܛܽܘܝܳܒܳܐ ܡܦܰܩܶܕ ܗܘܳܐ ܡܳܪܰܢ ܠܬܰܠܡܺܝܕܰܘ̈ܗܝ ܩܰܕܺܝ̈ܫܶܐ ܟܰܕ ܐܡ̇ܪ ܠܗܽܘܢ ܕܰܐܢܬܽܘܢ ܠܰܡ ܗܘܰܘ ܡܛܰܝܒܺܝܢ ܕܰܒܗܳܝ ܫܳܥܬܳܐ ܕܠܳܐ ܣܳܒܪܺܝܢ ܐܢܬܽܘܢ ܐܳܬܶܐ ܒܪܶܗ ܕܐܢܳܫܳܐ (ܡܬܝ ܟܕ: ܡܕ ܡܪܩܘܣ ܝܓ: ܠܗ ܠܘܩܐ ܝܒ: ܡ). ܘܰܠܗܳܠܶܝܢ ܬܘܒ ܚܰܡܶܫ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܩܰܕܶܡ ܛܰܝܶܒ ܢܰܦܫܶܗ ܘܠܳܐ ܐܶܫܬܰܘܚܰܪ. ܘܩܳܡܰܬ ܥܰܡ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܢܰܦܫܶܗ ܘܰܐܘܕܝܰܬ ܠܚܰܬܢܳܐ. ܟܰܕ ܒܝܰܕ ܡܳܐܢܶܗ ܕܰܡܠܶܐ ܗܘܳܐ ܡܶܫܚܳܐ ܘܠܰܡܦܺܐܕܶܗ ܕܡܶܬܢܰܒܪܰܫ ܗܘܳܐ ܒܢܰܗܺܝܪܳܐ ܕܰܢܒܺܝܽܘܬܳܐ. ܐܶܬܦܰܠܰܛ ܡ̣ܢ ܦܰܚܷ̈ܐ ܕܥܰܘܠܳܐ ܘܡ̣ܢ ܚܒܳܠܳܐ ܕܰܫܝܽܘܠ. ܘܩܳܡ ܐܰܘܕܺܝ ܘܳܐܦ ܫܰܒܰܚ ܒܪܝ̣ܫ ܡܰܛܰܪܬܳܐ ܒܳܬܰܪ ܕܰܐܘܕܺܝ ܠܡܳܪܝܳܐ ܥܠ ܕܺܝ̈ܢܰܘܗܝ ܙܰܕܺܝ̈ܩܶܐ. ܦܶܠܓܶܗ ܕܠܺܠܝܳܐ ܥܶܕܳܢܰܐ ܗܘ ܕܰܩܝܳܡܬܳܐ ܕܟܽܠܗܽܘܢ ܥܰܡܡ̈ܐ. ܕܕܳܚܠܺܝܢ ܡ̣ܢ ܡܳܪܝܳܐ.
ܪܳܚܡܳܐ ܐܢܳܐ ܕܟܽܠܗܽܘܢ ܕܳܚܠܰܝ̈ܟ ܘܕܰܐܝܠܶܝܢ ܕܢܳܛܪܺܝܢ ܦܽܘ̈ܩܕܳܢܰܝܟ. ܪ̈ܰܚܡܰܝܟ ܡܳܪܝܳܐ ܡܰܠܝܳܐ ܐܰܪܥܳܐ ܐܰܠܶܦܰܝܢܝ ܦܽܘ̈ܩܕܳܢܰܝܟ. ܠܰܘ ܓܶܝܪ ܗܳܝ ܕܢܶܪܚܰܡ ܐܢܳܫ ܠܰܐܠܗܳܐ ܡܶܬܒܰܥܝܳܐ. ܐܶܠܐ ܕܢܶܪܚܰܡ ܠܕܳܚ̈ܠܰܘܗܝ ܕܡܳܪܝܳܐ. ܡܶܛܠ ܕܗܰܘ ܕܰܐܠܶܦ ܘܦܰܩܶܕ ܥܠ ܚܽܘܒܳܐ ܘܥܰܠ ܪܶܚܡܬܳܐ ܕܰܐܠܳܗܳܐ ܘܶܐܡܰܪ: ܕܰܪܚܶܡ ܠܡܳܪܝܳܐ ܐܰܠܳܗܳܟ ܡ̣ܢ ܟܽܠܶܗ ܠܶܒܳܟ ܘܡ̣ܢ ܟܽܠܶܗ ܚܰܝܠܳܟ ܘܡ̣ܢ ܟܽܠܶܗ ܪܶܥܝܳܢܳܟ (ܬܢܝܢ ܢܡܘܣܐ ܘ: ܗ ܡܬܝ ܟܒ: ܠܙ ܡܪܩܘܣ ܝܒ: ܠ ܠܘܩܐ ܝ: ܟܙ) ܘܰܠܗܳܢܐ ܦܽܘܩܕܳܢܳܐ ܬܪܰܝܳܢܳܐ ܕܕܳܡܶܐ ܠܶܗ܆ ܕܢܰܚܶܒ ܐܢܳܫ ܠܩܰܪܺܝܒܶܗ ܐܝܟ ܢܰܦܫܶܗ. ܘܰܒܗܳܠܶܝܢ ܬܪܶܝܢ ܦܽܘ̈ܩܕܳܢܶܐ ܐܡ̣ܪ ܡܳܪܰܢ ܕܬܰܠܝܳܐ ܐܽܘܪܳܝܬܳܐ ܘܰܢܒܺܝ̈ܐ. ܘܡܶܛܠ ܗܳܕܐ ܐܶܫܬܰܘܕܺܝ ܡܙܰܡܪܳܢܳܐ ܕܺܐܝܬܰܘܗܝ ܪܳܚܡܳܐ ܕܕܳܚ̈ܠܰܘܗܝ ܕܡܳܪܝܳܐ ܕܰܢܚܰܘܶܐ ܕܢܳܛܽܘܪܳܐ ܗܘܳܐ ܕܦܽܘ̈ܩܕܳܢܶܐ. ܘܠܳܐ ܐܡ̣ܪ ܕܢܶܛܪܶܬ ܐܶܢܘܢ ܡ̣ܢ ܛܰܠܝܽܘܬܝ ܐܰܝܟ ܗܰܘ ܕܰܩܪܶܒ ܨܶܝܕ ܡܳܪܢ. ܐܶܠܐ ܪ̈ܰܚܡܰܝܟ ܡܳܪܝܳܐ ܡܰܠܝܳܐ ܐܰܪܥܳܐ ܐܰܠܶܦܰܝܢܝ ܦܽܘ̈ܩܕܳܢܰܝܟ ܟܕ ܡܦܺܝܣ ܕܡܶܢ ܡܳܪܝܳܐ ܬܶܗܘܶܐ ܥܰܡܶܗ ܛܳܒܬܳܐ ܟܕ ܐܡ̇ܪ.
ܛ– ܛܳܒܬܳܐ ܥܒܶܕ ܥܰܡ ܥܰܒܕܳܟ ܡܳܪܝܳܐ ܐܝܟ ܕܶܐܡܰܪܬ. ܛܰܥܡܳܐ ܘܛܰܝܒܽܘܬܳܐ ܘܡܰܕܥܳܐ ܐܰܠܶܦܰܝܢܝ. ܡܶܛܠ ܕܗܰܝܡܢܶܬ ܒܦܽܘ̈ܩܕܳܢܰܝܟ. ܡܳܢܳܐ ܗܝ ܛܳܒܬܳܐ ܕܒܳܥܶܐ ܡ̣ܢ ܡܳܪܝܳܐ ܕܢܶܥܒܶܕ ܥܰܡܶܗ. ܗܳܝ ܕܢܰܠܦܶܗ ܛܰܥܡܳܐ ܘܛܰܝܒܽܘܬܳܐ ܘܡܰܕܥܳܐ. ܐܰܪܰܐ ܘܗܰܘ ܕܶܐܬܢܰܒܺܝ ܟܽܠܗܶܝܢ ܬܶܫܒܚܴ̈ܬܳܐ ܗܳܠܝܢ ܘܰܐܣܗܶܕܘ ܥܠܰܘܗܝ ܟܬܳܒ̈ܐ ܕܰܗܘܳܐ ܒܟܽܠܗܶܝܢ ܐܽܘܪ̈ܚܳܬܶܗ ܣܰܟܽܘܠܬܳܢ. ܛܰܥܡܳܐ ܕܶܝܢ ܫܐܷܠ ܕܢܺܐܠܰܦ ܘܪܽܘܚܳܐ ܕܰܢܒܺܝܽܘܬܳܐ ܠܳܐ ܣܳܦܩܳܐ ܠܛܰܥܡܳܐ ܘܰܠܡܰܕܥܳܐ ܘܰܠܛܰܝܒܽܘܬܳܐ ܕܰܫܐܷܠ ܡ̣ܢ ܐܰܠܗܳܐ. ܗܳܟܰܢܐ ܓܶܝܪ ܐܳܦ ܫܠܺܝܚ̈ܐ ܐܳܡܪܺܝܢ ܗܘܰܘ ܠܡܳܪܢ ܐܰܘܣܶܦ ܠܰܢ ܗܰܝܡܳܢܽܘܬܳܐ (ܠܘܩܐ ܝܙ: ܗ). ܘܰܒܝܰܕ ܗܳܕܐ ܝܳܠܦܺܝܢܰܢ ܕܰܟܡܳܐ ܕܰܒܚܰܝܷ̈ܐ ܕܰܬܢܳܢ ܚܢܰܢ ܠܣܳܟܳܗ̇ ܕܺܝܕܰܥܬܰܐ ܓܡܺܝܪܬܳܐ ܠܳܐ ܡܶܬܡܰܛܶܝܢܰܢ. ܐܶܠܐ ܒܚܰܝ̈ܐ ܗܳܠܝܢ ܕܰܡܥܰܪܙܠܺܝܢܰܢ ܥܰܡ ܒܶܣܪܳܐ ܟܡܳܐ ܐܶܢ ܡܶܬܥܰܠܶܝܢܰܢ. ܗܳܝ ܕܰܫܠܺܝܚܶܐ ܒܳܥܶܝܢܰܢ ܕܩܰܠܝ̣ܠ ܗܘ ܝܳܕܥܺܝܢܰܢ. ܘܩܰܠܝ̣ܠ ܡ̣ܢ ܣܰܓܺܝ ܡܶܬܢܰܒܶܝܢܰܢ (ܐ ܩܘܪ̈ܢܬܝܐ ܝܓ: ܛ). ܠܗܳܠܶܝܢ ܫܳܐܷܠ ܗܘܳܐ ܕܢܶܣܰܒ ܘܠܘ ܒܪܽܘܚܳܐ ܫܰܒܰܗܪܳܢܺܝܬܳܐ ܐܡ̇ܪ ܡܶܛܠ ܕܢܶܛܪܶܬ ܦܽܘܩ̈ܕܳܢܰܝܟ ܥܒܶܕ ܗܳܕܐ ܨܶܐܕܰܝ. ܐܶܠܐ ܡܶܛܠ ܕܗܰܝܡܢܶܬ ܒܦܽܘ̈ܩܕܳܢܰܝܟ ܗܳܕܐ ܠܰܡ ܚܠܳܦ ܗܰܝܡܳܢܽܘܬܝ ܗܰܒܠܺܝ. ܐܶܠܐ ܐܡ̇ܪ:
ܥܰܕܠܳܐ ܐܶܬܡܰܟܟܶܬ ܗܰܝܡܢܶܬ ܘܡܺܐܡܪܳܟ ܢܶܛܪܶܬ. ܛܳܒ ܐܰܢܬ ܡܳܪܝܳܐ ܘܡܰܛܶܐܒ ܐܰܠܶܦܰܝܢܝ ܦܽܘ̈ܩܕܳܢܰܝܟ. ܚܙܺܝ ܗܳܟܝ̣ܠ ܡܳܢܳܐ ܐܡ̇ܪ ܠܳܐ ܐܡ̣ܪ ܕܶܐܬܡܰܟܟܶܬ. ܗܳܕܶܐ ܒܰܪܬ ܩܳܠܳܐ ܓܶܝܪ ܫܰܒܰܗܪܳܢܺܝܬܳܐ ܗܝ. ܐܶܠܐ ܩܕܳܡ ܡܽܘܟܳܟܳܐ ܣܳܐܷܡ ܗܰܝܡܳܢܽܘܬܳܐ. ܗܰܝܡܳܢܽܘܬܳܐ ܓܶܝܪ ܠܰܘ ܥܰܡ ܕܽܘܒܳܪ̈ܶܐ ܡܶܬܡܰܢܝܳܐ. ܠܗܳܕܐ ܓܶܝܪ ܟܽܠܢܳܫ ܢܰܚܶܒ ܢܶܩܢܶܐ ܘܡܳܐ ܕܰܩܢܳܗ̇ ܢܰܠܘܶܬ ܠܳܗ̇ ܕܽܘܒܳܪ̈ܶܐ ܛܳܒ̈ܐ. ܡܶܛܠ ܕܰܕܠܳܐ ܕܽܘܒܳܪ̈ܶܐ ܕܰܡܝܰܬܪܽܘܬܳܐ ܒܚܰܣܺܝܪܽܘܬ ܩܝܳܡܳܐ. ܒܪܰܡ ܕܶܝܢ ܘܠܳܐ ܕܽܘܒܳܪ̈ܶܐ ܡܰܚܶܝܢ ܟܰܕ ܠܰܝܬ ܗܰܝܡܳܢܽܘܬܳܐ. ܛܶܟܣܳܐ ܕܶܝܢ ܫܰܦܺܝܪܳܐ ܗܳܢܰܘ ܕܟܕ ܬܶܗܘܶܐ ܩܳܕܡܳܐ ܗܰܝܡܳܢܽܘܬܳܐ ܠܕܽܘܒܳܪ̈ܶܐ. ܗܳܕܐ ܓܝܪ ܡܰܠܶܦ ܢܒܺܝܐ ܕܟܕ ܡܗܰܝܡܢܳܐ ܐܝ̣ܬܰܘܗܝ ܗܘܳܐ ܒܳܥܶܐ ܗܘܳܐ ܡ̣ܢ ܐܰܠܗܐ ܕܢܰܠܦܺܝܘܗܝ ܦܽܘ̈ܩܕܳܢܰܘܗܝ. ܟܕ ܣܳܐܷܡ ܒܰܡܨܰܥܬܳܐ ܠܥܰܘܴ̈ܠܶܐ ܘܰܠܥܰܘܠܗܽܘܢ ܐܡ̇ܪ:
ܣܓܺܝ ܥܰܘܠܳܐ ܕܫܰܒܰܗܪ̈ܳܢܶܐ. ܘܶܐܢܳܐ ܒܟܽܠܶܗ ܠܶܒܝ ܢܶܛܪܶܬ ܦܽܘ̈ܩܕܳܢܰܝܟ. ܐܶܬܓܒܶܢ ܠܶܒܗܽܘܢ ܐܰܝܟ ܚܰܠܒܳܐ ܘܶܐܢܳܐ ܢܶܛܪܶܬ ܢܳܡܽܘܣܳܟ. ܡܳܐ ܗܳܟܝ̣ܠ ܕܳܐܡܰܪ ܕܢܶܛܪܶܬ ܠܰܡ ܦܽܘ̈ܩܕܳܢܰܝܟ ܘܢܶܛܪܶܬ ܢܳܡܽܘܣܳܟ. ܥܰܠ ܕܰܢܛܰܪ ܦܽܘ̈ܩܕܳܢܶܐ ܘܣܳܗܕܘ̈ܳܬܳܐ. ܘܡܳܐ ܕܶܝܢ ܕܳܐܡܰܪ: ܐܰܠܶܦܰܝܢܝ ܢܳܡܽܘܣܳܟ ܐܰܠܶܦܰܝܢܝ ܦܽܘ̈ܩܕܳܢܰܝܟ. ܐܰܝܟ ܗܳܝ ܕܶܐܡܰܪ ܕܥܰܝܢܳܐ ܚܠܳܦ ܥܰܝܢܳܐ ܘܫܶܢܳܐ ܚܠܳܦ ܫܶܢܳܐ. ܐܝ̣ܕܳܐ ܚܠܳܦ ܐܝ̣ܕܳܐ. ܦܰܟܳܐ ܚܠܳܦ ܦܰܟܳܐ (ܡܦܩܢܐ ܟܐ: ܟܕ). ܘܬܘܒ ܐܚܪܺܬܳܐ ܕܰܪܚܰܡ ܠܩܰܪܺܝܒܳܟ ܘܰܣܢܺܝ ܠܰܒܥܶܠܕܒܳܒܳܟ (ܟܗ̈ܢܐ ܝܛ: ܝܚ ܡܰܬܝ ܗ: ܡܓ). ܘܫܰܪܟܳܐ ܕܟܽܠܗܘܢ ܦܽܘܩܕܳܢ̈ܐ ܕܰܟܬܺܝܒܺܝܢ ܒܢܳܡܽܘܣܶܗ ܕܡܽܘܫܶܐ. ܗܳܠܝܢ ܟܽܠܗܘܢ ܢܛܰܪ ܐܶܢܘܢ ܛܽܘܒܳܢܳܐ ܕܰܘܝܕ ܘܥܰܠܗܳܝ ܐܡ̣ܪ ܒܟܽܠܕܽܘܟ ܕܢܶܛܪܶܬ ܦܽܘܩ̈ܕܳܢܰܝܟ ܐܳܦ ܢܶܛܪܶܬ ܢܳܡܽܘܣܳܟ. ܘܒܳܬܰܪ ܕܶܐܬܓܠܺܝ ܥܰܡܰܢܽܘܐܝܠ ܡ̣ܢ ܒܬܽܘܠܬܳܐ ܘܶܐܬܚܙܺܝ ܒܰܒܣܰܪ ܐܡ̣ܪ ܕܰܐܚܶܒܘ ܠܰܒܥܶܠܕ̈ܒܳܒܰܝܟܽܘܢ (ܡܬܝ ܗ: ܡܕ) ܗܳܢܐ ܓܶܝܪ ܦܽܘܩܕܳܢܳܐ ܡ̣ܢ ܗܳܢܘܢ ܕܫܶܐܠ ܕܰܘܝܕ ܕܢܺܐܠܰܦ ܐܝ̣ܬܰܘܗܝ. ܘܡܰܢ ܕܡܳܚܶܐ ܠܳܟ ܥܰܠ ܦܰܟܳܟ ܩܰܪܶܒ ܠܶܗ ܐܳܦ ܐܚܪܺܢܳܐ. ܘܡܰܢ ܕܰܡܫܰܚܰܪ ܠܳܟ ܡܺܝܠܳܐ ܚܰܕ. ܙܶܠ ܥܰܡܶܗ ܬܪܶܝܢ. ܘܡܰܢ ܕܫܳܩܶܠ ܟܽܘܬܺܝܢܳܟ ܫܒܽܘܩ ܠܶܗ ܐܳܦ ܡܰܪܛܽܘܛܳܟ. ܘܡܰܢ ܕܫܳܐܷܠ ܠܳܟ ܗܰܒܠܶܗ. ܘܡܰܢ ܕܨܳܒܶܐ ܕܢܺܐܙܰܦ ܡܶܢܳܟ ܠܐ ܬܶܟܠܶܝܘܗܝ (ܡܬܝ ܗ: ܠܛ-ܡܒ). ܘܣܰܒ ܨܠܺܝܒܳܟ. ܘܬܳܐ ܒܳܬܰܪܝ (ܡܬܝ ܝܘ: ܟܕ ܡܪܩܘܣ ܚ: ܠܕ ܠܘܩܐ ܛ: ܟܓ). ܗܳܠܝܢ ܦܽܘ̈ܩܕܳܢܶܐ ܚܰܕ̈ܬܶܐ ܠܳܐ ܝܳܕܰܥ ܗܘܳܐ ܠܗܽܘܢ ܛܽܘܒܳܢܳܐ ܕܰܘܝܕ. ܘܰܒܝܰܕ ܡܰܪܓܫܳܢܽܘܬܳܐ ܕܪܽܘܚܳܐ ܩܰܕܺܝܫܳܐ. ܐܰܪܓܶܫ ܕܺܐܝܬ ܦܽܘ̈ܩܕܳܢܶܐ ܐܚܪ̈ܳܢܶܐ ܘܰܡܦܺܝܣ ܗܘܳܐ ܒܡܰܙܡܽܘܪܳܐ ܗܳܢܐ ܕܢܺܐܠܰܦ ܐܶܢܘܢ. ܐܡ̣ܪ ܛܳܒ ܐܰܢܬ ܡܳܪܝܳܐ ܘܡܰܛܶܐܒ ܐܰܠܶܦܰܝܢܝ ܦܽܘ̈ܩܕܳܢܰܝܟ. ܘܰܐܝܟܰܢܳܐ ܕܶܐܡܪܶܬ. ܗܳܝ ܩܰܕܡܳܝܬܳܐ ܐܡ̣ܪ. ܕܢܶܛܰܪ ܦܽܘ̈ܩܕܳܢܶܐ ܕܢܳܡܽܘܣܳܐ ܕܰܒܝܰܕ ܡܽܘܫܶܐ. ܗܳܕܐ ܕܶܝܢ ܕܬܰܪܬܶܝܢ ܕܰܢܚܰܘܶܐ ܪܶܓܬܳܐ ܕܺܐܝܬ ܗܘܳܐ ܠܶܗ ܠܦܽܘ̈ܩܕܳܢܶܐ ܓܡܺܝܪ̈ܶܐ ܕܰܒܝܰܕ ܡܳܪܢ. ܐܰܝܟܰܢܳܐ ܕܡܶܫܟܰܚ ܗܘܳܐ ܢܰܨܺܝܚܳܐ ܠܡܶܗܘܳܐ ܒܰܢܛܽܘܪܽܘܬ ܦܽܘ̈ܩܕܳܢܶܐ ܕܰܚ̇ܕܰܬܳܐ. ܐܰܝܟ ܕܶܐܬܝ̣ܕܰܥ ܕܰܗܘܳܐ ܢܳܛܽܘܪܳܐ ܠܗܳܠܶܝܢ ܕܰܒܝܰܕ ܡܽܘܫܶܐ ܐܶܬܝ̣ܗܶܒܘ. ܟܕ ܡܰܘܕܶܐ ܘܳܐܡܰܪ:
ܛܳܒ ܠܝ̣ ܕܶܐܬܡܰܟܟܶܬ ܕܺܐܠܰܦ ܦܽܘ̈ܩܕܳܢܰܝܟ. ܛܶܐܒ ܠܝ̣ ܢܳܡܽܘܣܶܗ ܕܦܽܘܡܳܟ ܡ̣ܢ ܐܰܠܦܷ̈ܐ ܕܕܰܗܒܳܐ ܘܰܕܣܺܐܡܳܐ. ܘܒܳܬܰܪ ܗܳܠܶܝܢ ܡܰܝܬܶܐ ܘܳܐܡܰܪ:
ܝ– ܐܺܝ̈ܕܰܝܟ ܥܰܒ̈ܕܳܢܝ ܘܰܐܬܩܢܳܢ̈ܝ ܐܰܠܶܦܰܝܢܝ ܢܳܡܽܘܣܳܟ. ܕܢܶܚܙܽܘܢ ܕܳܚܠܰܝ̈ܟ ܘܢܶܕܥܽܘܢ ܕܰܠܡܶܠܬܳܟ ܣܰܒܪܶܬ. ܘܝܶܕܥܶܬ ܕܙܰܕܝ̣ܩܝ̣ܢ ܐܶܢܘܢ ܕܺܝ̈ܢܰܝܟ ܡܳܪܝܳܐ. ܐܳܦ ܗܰܝܡܳܢܽܘܬܳܟ ܡܰܟܶܟܬ̣ܰܢܝ. ܒܗܳܠܶܝܢ ܡܰܘܕܶܐ ܕܰܥܒܳܕ ܐܺܝܕܰܘ̈ܗܝ ܕܡܳܪܝܳܐ ܐܝ̣ܬܰܘܗܝ ܘܒܳܥܶܐ ܡܶܛܠ ܗܳܕܐ ܕܢܰܠܦܶܗ ܢܳܡܽܘܣܶܗ. ܟܠ ܕܡܰܫܰܪ ܕܺܐܝܬ ܐܰܠܗܳܐ ܝܳܠܶܦ ܙܰܕܺܝܩܽܘܬܳܐ ܘܕܺܝܢܰܘ̈ܗܝ ܬܪ̈ܺܝܨܶܐ. ܠܳܐ ܢܶܗܘܶܐ ܒܶܗ ܐܰܬܪܳܐ ܠܪܳܡܽܘܬܳܐ. ܡܶܛܠ ܕܪܳܡܽܘܬܳܐ ܡ̣ܢ ܠܐ ܗܰܝܡܳܢܽܘܬܳܐ ܡܶܬܝܰܠܕܳܐ. ܘܡܶܛܠܗܳܢܐ ܠܚܰܢ̈ܦܶܐ ܘܠܶܐܪ̈ܺܝܛܺܝܩܽܘ ܒܟܽܠܡܶܕܶܡ ܢܰܩܺܝܦܳܐ ܪܳܡܽܘܬܳܐ. ܡܗܰܝܡܢܳܐ ܕܶܝܢ ܡܰܟܺܝܟܳܐ ܥܰܡ ܢܒܺܝܐ ܐܡ̇ܪ:
ܢܶܗܘܽܘܢ ܪ̈ܰܚܡܰܝܟ ܠܒܽܘܝܳܐܝ ܐܰܝܟ ܕܶܐܡܰܪܬ ܠܥܰܒܕܳܟ. ܢܺܐܬܽܘܢ ܥܠܰܝ ܪ̈ܰܚܡܰܝܟ ܘܺܐܚܶܐ ܡܶܛܠ ܕܰܒܢܳܡܽܘܣܳܟ ܐܶܬܝܰܠܦܶܬ. ܪ̈ܰܚܡܰܝܟ ܓܶܝܪ ܒܽܘܝܳܐܐ ܐܶܢܘܢ. ܥܰܠ ܐܰܝܠܝܢ ܕܢܳܛܪܝ̣ܢ ܢܳܡܽܘܣܳܟ. ܘܟܕ ܗܳܕܐ ܗܳܘܝܳܐ ܡܶܬܓܰܠܝܳܐ ܘܡܶܬܕܰܢܚܳܐ ܡܶܐܬܝ̣ܬܳܐ ܗܳܝ ܕܪ̈ܰܚܡܰܝܟ ܘܒܳܗܬܝ̣ܢ ܥܰܘܴ̈ܠܶܐ ܕܠܳܐ ܡܣܰܟܶܝܢ ܗܘܰܘ ܠܗ̇. ܡܶܛܠܗܳܢܐ.
ܢܶܒܗܬܽܘܢ ܥܰܘܴ̈ܠܶܐ ܕܰܒܥܰܘܠܳܐ ܡܰܟܟܽܘܢܝ. ܘܶܐܢܳܐ ܪܢܺܝܬ ܒܦܽܘ̈ܩܕܳܢܰܝܟ. ܢܶܬܦܢܽܘܢ ܠܘܳܬ ܕܳܚܠܰܝ̈ܟ ܐܰܝܠܶܝܢ ܕܝܳܕܥܺܝܢ ܣܳܗܕܽܘܬܳܟ. ܘܢܶܪܢܶܐ ܠܶܒܝ ܒܦܽܘ̈ܩܕܳܢܰܝܟ ܘܠܳܐ ܐܶܒܗܰܬ. ܒܥܰܘܠܳܐ ܐܡ̣ܪ ܕܰܡܡܰܟܟܺܝܢ ܗܘܰܘ ܠܶܗ ܥܰܘܴ̈ܠܶܐ ܘܰܡܨܰܚܶܝܢ ܗܘܰܘ ܠܰܢܒܺܝܽܘܬܶܗ. ܘܰܡܒܰܙܚܺܝܢ ܗܘܰܘ ܒܶܗ ܡܳܐ ܕܰܡܙܰܡܰܪ ܗܘܳܐ ܬܶܫܒܚܴ̈ܬܳܐ ܩܕܳܡ ܥܰܡܳܐ. ܡܶܛܠ ܕܠܽܘܩܒܰܠ ܢܒܺܝ̈ܐ ܫܰܪܺܝܪ̈ܶܐ. ܡܥܺܝܪ ܗܘܳܐ ܣܳܛܳܢܳܐ ܢܒܺܝ̈ܐ ܕܰܓ̈ܳܠܶܐ. ܐܰܝܟ ܨܶܕܰܩܝܳܐ ܕܶܝܢ ܠܽܘܩܒܰܠ ܡܺܝܟܳܐ. ܘܚܰܢܰܢܝܳܐ ܢܒܺܝܳܐ ܕܰܓܳܠܳܐ ܠܽܘܩܒܰܠ ܐܶܪܰܡܝܳܐ ܢܒܺܝܳܐ. ܘܣܺܝܡܽܘܢ ܚܰܪܳܫܳܐ ܠܽܘܩܒܰܠ ܦܶܛܪܽܘܣ. ܘܒܰܪܫܽܘܡܳܐ ܠܽܘܩܒܰܠ ܦܰܘܠܽܘܣ. ܘܰܐܪܺܝܽܘܣ ܠܽܘܩܒܰܠ ܐܰܠܶܟܣܰܢܕܪܽܘܣ. ܘܥܰܡ ܗܳܢܐ ܐܽܘܢܳܘܡܺܝܽܘܣ ܠܽܘܩܒܰܠ ܒܰܣܶܝܠܺܝܽܘܣ. ܘܢܶܣܛܽܘܪܺܝܽܘܣ ܠܽܘܩܒܰܠ ܩܽܘܪܺܝܠܽܘܣ. ܘܫܰܪܟܳܐ ܕܰܐܚܪ̈ܳܢܶܐ ܐܶܪ̈ܺܝܛܺܝܩܽܘ ܗܳܟܰܢܳܐ ܒܺܐܝܕܳܐ ܒܺܐܝܕܳܐ ܥܕܰܡܳܐ ܠܫܽܘܠܳܡܳܐ. ܘܠܳܐ ܫܳܬܩܳܐ ܩܰܪܢܳܐ ܕܥܰܘܴ̈ܠܶܐ ܡ̣ܢ ܕܡܶܬܟܰܬܫܳܐ ܠܽܘܩܒܰܠ ܩܰܕܺܝ̈ܫܶܐ. ܟܕ ܪܳܢܶܐ ܠܶܒܗܽܘܢ ܒܦܽܘ̈ܩܕܳܢܰܘܗܝ ܕܡܳܪܝܳܐ ܠܐ ܒܳܗܬܺܝܢ. ܛܽܘܒܳܢܳܐ ܕܰܘܝܕ ܟܕ ܡ̣ܢ ܥܰܘܴ̈ܠܶܐ ܡܶܫܬܚܶܩ ܗܘܳܐ. ܐܶܬܡܰܟܰܟ ܐܰܝܟ ܕܶܐܡܰܪ. ܘܥܰܠܗܳܝ ܐܡ̣ܪ:
ܟ– ܪܶܓܰܬ ܢܰܦܫܝ ܠܦܽܘܪܩܳܢܳܟ ܘܰܠܡܶܠܬܳܟ ܣܰܒܪܶܬ ܣܰܟ̈ܝ̣ ܥܰܝ̈ܢܰܝ ܠܡܺܐܡܪܳܟ ܕܶܐܡܰܬܝ ܬܒܰܝܰܐܝܰܢܝ. ܡܶܛܠ ܕܰܗܘܺܝܬ ܐܰܝܟ ܙܶܩܳܐ ܒܰܓܠܺܝܕܳܐ ܘܦܽܘ̈ܩܕܳܢܰܝܟ ܠܳܐ ܛܥܝ̣ܬ. ܘܣܳܗܕܳܐ ܒܝܰܕ ܗܳܠܶܝܢ ܕܶܐܡܰܪ ܠܡܶܠܬܶܗ ܕܡܳܪܰܢ ܕܶܐܡܰܪ: ܕܣܰܓܺܝ̈ܐܐ ܢܒܺܝ̈ܐ ܘܙܰܕܺܝ̈ܩܶܐ ܐܶܬܪܰܓܪܰܓܘ ܕܢܶܚܙܽܘܢ ܡܶܕܶܡ ܕܚܳܙܶܝܢ ܐܢܬܽܘܢ ܘܠܳܐ ܚܙܰܘ. ܘܰܠܡܶܫܡܰܥ ܡܶܕܶܡ ܕܫܳܡܥܺܝܢ ܐܢܬܽܘܢ ܘܠܳܐ ܫܡܰܥܘ (ܡܬܝ ܝܓ: ܝܙ ܠܘܩܐ ܝ: ܟܕ). ܬܰܪܬܰܝܗܶܝܢ ܐܡ̣ܪ ܢܒܺܝܐ ܬܢܳܢ. ܡܶܛܠ ܕܦܽܘܪܩܳܢܳܐ ܘܡܺܐܡܪܳܐ ܗܽܘܝܽܘ ܡܳܪܢ. ܕܰܐܝܟ ܕܰܠܦܽܘܪܩܳܢܳܐ ܕܺܝܠܶܗ ܪܶܓܰܬ ܢܰܦܫܶܗ ܕܰܢܒܺܝܐ. ܘܰܡܣܰܟܶܐ ܗܘܳܐ ܬܘܒ ܠܡܺܐܡܪܳܐ ܡܶܬܚܰܙܝܳܢܳܐ. ܘܰܒܝܰܕ ܗܳܕܐ ܐܡ̣ܪ ܕܣܰܟܺܝ̈ ܥܰܝ̈ܢܰܝ ܠܡܺܐܡܪܳܟ. ܘܚܰܘܺܝ ܕܰܠܗܰܘ ܡܶܠܬܳܐ ܠܳܐ ܡܶܬܚܰܙܝܳܢܳܐ. ܡܣܰܟ̈ܝܳܢ ܗܘܱ̈ܝ ܥܰܝ̈ܢܰܘܗܝ ܕܰܢܒܺܝܳܐ. ܘܟܰܕ ܐܶܬܒܰܣܰܪ ܘܰܩܢܳܐ ܓܽܘܫܡܳܐ ܘܗܰܕܳܡ̈ܐ. ܘܶܐܬܪܰܟܰܒ ܗܰܘ ܦܫܺܝܛܳܐ ܒܓܰܪ̈ܡܶܐ ܘܒܰܓܝܴ̈ܕܶܐ. ܗܰܘ ܕܒܰܠܚܽܘܕܰܘܗܝ ܒܡܰܫܡܰܥܬܳܐ ܡܶܬܛܥܶܡ ܗܘܳܐ ܘܡܶܬܩܰܒܰܠ ܗܘܳܐ ܢܒܺܝܐ ܛܽܘܒܳܢܐ. ܕܢܶܚܙܶܝܘܗܝ ܒܥܰܝܢܳܐ ܡܣܰܟܶܐ ܗܘܳܐ ܘܢܶܬܒܰܝܰܐ ܒܓܶܠܝܳܢܶܗ. ܚܙܳܬܶܗ ܓܶܝܪ ܕܗܰܘ ܠܐ ܡܶܬܚܰܙܝܳܢܳܐ ܒܽܘܝܳܐܐ ܗܘܳܐ ܠܰܐܒܺܝ̈ܠܶܐ. ܘܰܒܣܽܘܟܳܝܶܗ ܕܗܳܢܳܐ ܒܽܘܝܳܐܐ ܗܘܰܘ ܩܰܕܺܝ̈ܫܶܐ ܐܰܝܟ ܙܶܩܳܐ ܒܰܓܠܺܝܕܳܐ. ܘܰܐܥܬܶܩ ܘܰܒܠܺܝ ܚܰܝܠܳܐ ܕܢܰܦܫܗܽܘܢ ܡܶܛܠ ܕܚܰܣܢܰܬ ܐܶܢܘܢ ܩܰܪܺܝܪܽܘܬܳܐ ܕܰܚܛܺܝܬܳܐ. ܐܶܠܐ ܘܥܰܡ ܗܳܢܐ ܐܽܘܠܨܳܢܳܐ ܠܳܐ ܛܥܺܝܬ ܦܽܘ̈ܩܕܳܢܰܝܟ ܐܡ̇ܪ ܗܘܳܐ ܢܒܺܝܐ ܠܘܳܬ ܐܰܠܗܳܐ. ܘܰܐܝܟ ܕܡ̣ܢ ܐܽܘܠܨܳܢܳܐ ܡܒܰܓܶܢ ܗܘܳܐ ܘܳܐܡܰܪ:
ܟܡܳܐ ܐܶܢܽܘܢ ܝܰܘ̈ܡܳܬܶܗ ܕܥܰܒܕܳܟ ܕܶܐܡܰܬܝ ܥܳܒܶܕ ܐܰܢܬ ܠܝ̣ ܕܺܝܢܳܐ ܡ̣ܢ ܪ̈ܳܕܽܘܦܰܝ. ܚܦܰܪܘ ܠܝ̣ ܓܽܘܡܳܨܳܐ ܥܰܘܴ̈ܠܶܐ ܕܠܳܐ ܡ̣ܢ ܢܳܡܽܘܣܳܟ. ܟܽܠܗܽܘܢ ܦܽܘ̈ܩܕܳܢܰܝܟ ܡܗܰܝܡܢܺܝܢ ܘܥܰܘܴ̈ܠܶܐ ܪܰܕܦܽܘܢܝ. ܢܰܓܺܝܪܽܘܬܳܐ ܕܒܽܐܘܠܨܳܢ̈ܐ ܕܰܗܘܳܬ ܠܶܗ. ܬܰܪܥܺܝܬܳܐ ܕܰܐܝܟ ܗܳܕܐ ܐܰܘܠܕܰܬ. ܐܰܝܟܰܢܳܐ ܕܰܢܚܰܘܶܐ ܕܟܰܪܝܳܐ ܠܶܗ. ܐܶܠܐ ܚܳܙܶܐ ܟܰܕ ܥܳܒܶܕ ܠܶܗ ܐܰܠܗܳܐ ܕܺܝܢܳܐ ܡ̣ܢ ܪ̈ܳܕܽܘܦܰܘܗܝ. ܘܟܕ ܦܽܘ̈ܩܕܳܢܰܝܟ ܡܗܰܝܡܢܺܝܢ ܠܝ̣ ܘܫܰܪܺܝܪܺܝܢ. ܐܰܝܠܶܝܢ ܕܥܰܘܳܠܐܝ̣ܬ ܡܒܰܣܪܺܝܢ ܥܠܰܝܗܽܘܢ. ܪ̈ܳܕܽܘܦܶܐ ܗܘܰܘ ܠܰܢ.
ܘܥܰܕ ܩܰܠܝ̣ܠ ܡܰܘܒܕܺܝܢ ܗܘܰܘ ܠܝ̣ ܒܰܐܪܥܳܐ. ܘܶܐܢܳܐ ܠܳܐ ܫܶܒܩܶܬ ܦܽܘܩ̈ܕܳܢܰܝܟ. ܐܶܠܐ ܚܰܡܣܢܶܬ ܘܣܰܝܒܪܶܬ ܒܰܫܪܳܪܳܐ ܕܦܽܘܩ̈ܕܳܢܰܝܟ. ܟܕ ܡܶܬܐܶܠܶܨ ܐܢܳܐ ܡ̣ܢ ܥܰܘܴ̈ܠܶܐ. ܘܟܕ ܗܶܢܘܢ ܕܠܐ ܪ̈ܰܚܡܶܐ ܓܳܙܡܺܝܢ ܗܘܰܘ ܥܠܰܝ. ܐܶܢܳܐ ܠܪ̈ܰܚܡܰܝܟ ܚܳܐܱܪ ܐܢܳܐ ܘܰܡܣܰܟܶܐ ܐܢܳܐ.
ܐܶܠܐ ܐܰܝܟ ܪ̈ܰܚܡܰܝܟ ܐܰܚܳܢܝ ܕܶܐܛܰܪ ܣܳܗܕܽܘܬܶܗ ܕܦܽܘܡܳܟ. ܘܠܐ ܢܛܰܒܥܰܢܝ ܫܽܘܩܪܳܐ ܕܥܳܒ̈ܕܰܝ ܥܰܘܠܳܐ. ܘܺܐܚܶܐ ܒܪ̈ܰܚܡܶܐ ܟܕ ܢܳܛܰܪ ܐܢܳܐ ܐܰܝܟ ܫܰܪܺܝܪܳܐ ܣܳܗܕܽܘܬܳܟ. ܟܰܕ ܗܳܟܺܝܠ ܗܘܳܐ ܒܪܶܓܬܳܐ ܛܽܘܒܳܢܳܐ ܕܰܘܝܕ ܕܦܽܘܪܩܳܢܶܗ ܕܡܳܪܝܳܐ ܘܰܚܙܳܝܗܝ ܒܓܶܠܝܳܢܳܐ ܢܰܗܺܝܪܳܐ ܠܗܰܘ ܡܶܕܶܡ ܕܰܡܣܰܟܶܐ ܗܘܳܐ. ܗܳܫܳܐ ܥܠ ܡܬܽܘܡܳܝܽܘܬܳܐ ܕܰܐܒܳܐ ܨܳܒܶܐ ܕܰܢܡܰܠܶܠ. ܘܺܐܝܬܰܘܗܝ ܥܰܡܶܗ ܡܶܠܬܶܗ ܝ̣ܚܺܝܕܳܝܳܐ. ܡ̣ܢ ܩܕܳܡ ܟܽܠ ܘܩܰܝܳܡ ܒܪܳܐ ܕܠܐ ܫܽܘܚܠܳܦܳܐ ܥܰܡ ܐܰܒܽܘܗܝ. ܐܡ̣ܪ ܕܶܝܢ ܐܝܟ ܕܰܠܘܳܬ ܐܰܒܳܐ.
ܠ– ܠܥܳܠܰܡ ܐܰܢܬ ܗܽܘ ܡܳܪܝܳܐ. ܗܳܕܐ ܒܰܪܬ ܩܳܠܐ ܠܘܳܬ ܐܰܒܳܐ ܐܰܡܪܳܗ̇ ܢܒܺܝܐ. ܐܰܟܡܰܢ ܕܰܢܚܰܘܶܐ ܕܰܠܥܳܠܰܡ ܡܩܰܘܶܐ ܘܠܐ ܥܳܒܰܪ. ܘܟܰܕ ܡܶܫܬܰܘܕܰܥ ܕܳܐܦ ܒܪܳܐ ܥܰܡ ܐܰܒܳܐ ܐܝ̣ܬܰܘܗܝ ܡܬܽܘܡܳܐܝ̣ܬ ܐܰܝܬܺܝ ܟܕ ܐܡ̇ܪ:
ܘܡܶܠܬܳܟ ܩܰܝܳܡܳܐ ܒܰܫܡܰܝܳܐ. ܒܡܶܠܬܳܐ ܕܶܝܢ ܐܰܠܶܦ. ܥܰܠܗܳܝ ܕܰܐܟܬܶܒ ܝܽܘܚܰܢܳܢ ܫܠܺܝܚܳܐ ܕܰܒܪܺܝܫܺܝܬ ܐܺܝܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܝ̣ܬܰܘܗܝ ܗܘܳܐ ܠܘܳܬ ܐܰܠܗܳܐ. ܘܰܐܠܳܗܳܐ ܐܺܝܬܰܘܗܝ ܗܘܳܐ ܗܽܘ ܡܶܠܬܳܐ. ܘܗܳܢܳܐ ܒܪܺܝܫܺܝܬ ܐܺܝܬܰܘܗܝ ܠܘܳܬ ܐܰܠܗܳܐ. ܘܟܽܠ ܒܺܐܝܕܶܗ ܗܘܳܐ. ܘܒܶܠܥܳܕܰܘܗܝ ܐܳܦܠܳܐ ܚܕܳܐ ܗܘܳܬ (ܝܘܚܢܢ ܐ: ܐ-ܓ). ܡܶܛܠܗܳܕܐ ܩܰܕܶܡ ܙܰܡܰܪ ܢܒܺܝܐ ܠܘܳܬ ܐܰܠܗܳܐ.
ܕܰܠܥܳܠܰܡ ܐܰܢܬ ܗܽܘ ܡܳܪܝܳܐ. ܘܡܶܠܬܳܟ ܩܰܝܳܡܳܐ ܒܰܫܡܰܝܳܐ. ܘܰܠܕܳܪܕܳܪ̈ܺܝܢ ܗܰܝܡܳܢܽܘܬܳܟ. ܠܰܘ ܒܰܠܚܽܘܕ ܒܗܳܢܐ ܥܳܠܡܳܐ ܐܰܢܬ ܕܺܐܝܬܰܝܟ ܥܰܡ ܝܰܠܕܳܟ ܡܬܽܘܡܳܝܳܐ. ܐܶܠܐ ܘܰܠܕܳܪܕܳܪ̈ܺܝܢ. ܒܥܳܠܡܳܐ ܕܠܐ ܥܳܒܰܪ.
ܬܰܩܶܢܬ ܐܰܪܥܳܐ ܘܰܐܩܺܝܡܬܳܗ̇. ܬܽܘܩܳܢܳܗ̇ ܕܶܝܢ ܕܰܐܪܥܳܐ ܥܰܠ ܗܳܠܝܢ ܕܡܶܬܚܰܙ̈ܝܳܢ ܠܥܶܠ ܡܰܘܕܰܥ. ܒܳܬܰܪܟܶܢ ܐܡ̇ܪ:
ܐܶܠܽܘܠܳܐ ܢܳܡܽܘܣܳܟ ܕܰܗܘܳܐ ܠܝ̣ ܪܶܢܝܳܐ ܐܳܒܶܕ ܗܘܺܝܬ ܒܡܽܘܟܳܟܝ. ܠܥܳܠܰܡ ܠܳܐ ܐܶܛܥܶܐ ܡܶܠܰܝ̈ܟ. ܡܶܛܠ ܕܰܒܗܽܘܢ ܐܶܢܘܢ ܚܰܝܱ̈ܝ. ܡܳܐ ܕܥܳܒܶܕ ܐܢܳܫ ܛܳܒܴ̈ܬܳܐ ܘܡܶܬܩܰܦܰܚ ܡ̣ܢ ܥܰܘܴ̈ܠܶܐ ܣܳܒܟܺܝܢ ܒܶܗ ܕܰܝ̈ܘܶܐ ܒܝܰܕ ܚܽܘܫܳܒ̈ܐ ܕܢܰܣܒܰܪ ܡܶܛܠ ܐܰܝܠܶܝܢ ܕܰܣܒܰܠ ܕܰܕܠܳܐ ܡܕܰܒܪܳܢܽܘܬܳܐ ܫܒܺܝܩ. ܐܶܠܐ ܛܽܘܒܳܢܳܐ ܕܰܘܝܕ ܟܰܕ ܒܺܝ̈ܫܳܬܳܐ ܣܳܒܶܠ ܗܘܳܐ ܡ̣ܢ ܛܳܒܴ̈ܬܳܐ ܠܳܐ ܫܳܠܶܐ ܗܘܳܐ. ܐܡ̇ܪ ܗܘܳܐ:
ܕܺܝܠܳܟ ܐܢܳܐ ܦܰܨܳܢܝ ܡܶܛܠ ܕܦܽܘܩ̈ܕܳܢܰܝܟ ܢܶܛܪܶܬ. ܥܠܰܝ ܣܰܟܺܝܘ ܥܰܘܴ̈ܠܶܐ ܕܢܰܘܒܕܽܘܢܳܢܝ ܘܣܳܗܕܽܘܬܳܟ ܐܶܣܬܰܟܠܶܬ. ܠܟܽܠ ܣܰܘܦܳܐ ܚܙܺܝܬ ܩܶܨܳܐ ܘܛܳܒ ܪܘܺܝܚ ܦܽܘܩܕܳܢܳܟ. ܒܗܳܠܶܝܢ ܐܰܘܕܰܥ ܕܰܐܝܟ ܒܰܝܬܳܝܳܐ ܒܳܥܶܐ ܡܶܬܦܰܨܝܳܢܽܘܬܳܐ ܕܰܒܝܰܕ ܡܳܪܝܳܐ. ܘܰܐܝܟ ܢܳܛܰܪ ܦܽܘ̈ܩܕܳܢܶܐ ܡܣܰܟܶܝܢ ܗܘܰܘ ܥܰܘܴ̈ܠܶܐ ܕܢܰܘܒܕܽܘܢܳܝܗܝ. ܘܗܽܘ ܣܳܗܕܽܘܬܶܗ ܕܡܳܪܝܳܐ ܡܶܣܬܰܟܰܠ ܗܘܳܐ. ܘܕܰܠܟܽܠܗܽܘܢ ܣܰܘ̈ܦܶܐ ܚܙܳܐ ܫܽܘܠܳܡܳܐ. ܘܕܰܠܟܽܠܗܽܘܢ ܪ̈ܶܗܛܶܐ ܚܙܳܐ ܕܰܬܚܶܝܬ ܣܳܟܳܐ ܚܒܺܝܫܺܝܢ. ܘܒܰܠܚܽܘܕ ܚܰܕ ܗܽܘ ܕܠܳܐ ܡܶܬܚܒܶܫ ܒܓܰܘ ܬܚܽܘ̈ܡܶܐ ܘܰܕܟܽܠ ܕܚܰܝ ܡܫܰܥܒܰܕ ܗܽܘ ܠܩܶܨܳܐ ܘܰܠܫܽܘܠܳܡܳܐ. ܐܶܢ ܨܳܒܶܐ ܥܳܒܽܘܕܶܗ ܡܶܛܠ ܕܡ̣ܢ ܟܽܠܡܶܕܶܡ ܪܘܺܝܚ ܦܽܘܩܕܳܢܶܗ ܘܰܦܫܺܝܛ ܫܽܘܠܛܳܢܶܗ ܒܟܽܠܕܽܘܟ. ܪܶܚܡܰܬ ܢܳܡܽܘܣܳܐ ܘܰܢܛܽܘܪܽܘܬ ܦܽܘܩܕܳܢ̈ܐ ܡܚܰܘܶܐ ܛܽܘܒܳܢܳܐ ܕܰܘܝܕ ܒܡܰܙܡܽܘܪܳܐ ܗܳܢܐ ܥܰܠ ܢܰܦܫܶܗ.
ܡ– ܡܳܐ ܠܰܡ ܪܶܚܡܶܬ ܢܳܡܽܘܣܳܟ ܘܟܽܠܶܗ ܝܰܘܡܳܐ ܗܽܘܝܽܘ ܪܶܢܺܝܝ. ܚܰܟܶܡܰܝܢܝ ܡܶܢ ܒܥܶܠܕ̈ܒܳܒܰܝ ܡܶܛܠ ܕܦܽܘܩ̈ܕܳܢܰܝܟ ܢܶܛܪܶܬ. ܡ̣ܢ ܟܽܠܗܽܘܢ ܡܰܠܦܴ̈ܢܰܝ ܣܰܟܶܠܰܝܢܝ. ܡܶܛܠ ܕܣܳܗܕܽܘܬܳܟ ܗܘܳܬ ܠܺܝ ܪܶܢܝܳܐ. ܪܰܘܪܒܳܐܝ̣ܬ ܡܶܫܬܰܥܶܐ ܥܰܠ ܥܽܘܗܕܳܢܳܐ ܕܢܰܦܫܶܗ. ܘܡܰܠܶܦ ܕܰܒܟܽܠܶܗ ܝܰܘܡܳܐ ܒܢܳܡܽܘܣܶܗ ܕܡܳܪܝܳܐ ܡܶܬܗܰܓܶܐ ܗܘܳܐ. ܡܶܛܠܗܳܕܐ ܓܶܝܪ ܠܳܐ ܚܳܛܶܐ ܗܘܳܐ ܘܶܐܡܰܪ ܕܶܝܢ ܕܳܐܦ ܡ̣ܢ ܒܥܶܠܕ̈ܒܳܒܰܝ ܚܰܟܶܡܰܝܢܝ. ܕܠܳܐ ܢܰܪܡܽܘܢܳܢܝ ܒܦܰܚ̈ܐ ܕܨܳܠܶܝܢ ܠܝ̣ ܒܚܶܫܽܘܟܳܐ. ܘܒܳܥܶܐ ܗܘܳܐ ܕܝܰܬܺܝܪ ܡ̣ܢ ܡܰܠܦܳܢܰܘ̈ܗܝ ܢܶܣܬܰܟܰܠ. ܠܰܘ ܡ̣ܢ ܗܳܠܶܝܢ ܕܒܶܝܬ ܡܽܘܫܶܐ. ܐܶܠܐ ܝܰܬܝ̣ܪ ܡ̣ܢ ܣܳܦܪ̈ܶܐ. ܘܶܐܢ ܒܥܳܐ ܕܝܰܬܝ̣ܪ ܡ̣ܢ ܢܒܺܝ̈ܐ ܕܰܩܕܳܡܰܘܗܝ ܢܶܬܥܰܠܶܐ. ܘܠܳܐ ܗܳܟܰܢܐ ܡܶܬܥܕܶܠ. ܐܳܦ ܐܶܠܝ̣ܫܳܥ ܫܶܐܠ ܚܰܕ ܬܪܶܝܢ ܡ̣ܢ ܪܽܘܚܶܗ ܕܶܐܠܺܝܳܐ ܫܶܐܠ ܕܰܢܩܰܒܶܠ ܗܘܳܐ (ܒ ܡܠܟ̈ܐ ܒ: ܛ). ܗܳܝ ܕܳܐܦ ܗܘܳܬ ܠܶܗ ܒܰܥܒܳܕܳܐ ܡܳܢܳܐ ܬܽܘܒ ܐܡ̇ܪ.
ܝܰܬܝ̣ܪ ܡ̣ܢ ܩܰܫܺܝ̈ܫܶܐ ܐܶܣܬܰܟܠܶܬ. ܡܶܛܠ ܕܦܽܘܩ̈ܕܳܢܰܝܟ ܢܶܛܪܶܬ. ܡܶܢ ܗܳܕܐ ܓܝܪ ܐܳܬܳܐ ܐܢܳܫ ܟܕ ܠܐ ܝ̣ܠܶܦ. ܘܢܶܦܓܰܥ ܒܐܪ̈ܳܙܶܐ ܩܰܕܺܝ̈ܫܶܐ. ܕܢܶܬܗܰܝܡܰܢ ܥܰܠ ܟܰܣܝܴ̈ܬܳܐ ܘܰܓܢܺܝ̈ܙܳܬܳܐ ܕܰܐܠܗܳܐ. ܡ̣ܢ ܗܳܝ ܕܦܽܘ̈ܩܕܳܢܰܘܗܝ ܢܶܛܰܪ. ܕܰܒܝܰܕ ܢܳܛܽܘܪܽܘܬ ܦܽܘ̈ܩܕܳܢܶܐ ܐܶܣܬܰܟܰܠ ܝܰܬܝ̣ܪ ܡ̣ܢ ܩܰܫܺܝ̈ܫܶܐ.
ܘܡ̣ܢ ܟܽܠܳܗ̇ ܐܽܘܪܚܳܐ ܒܺܝܫܬܳܐ ܟܠܺܝܬ ܪ̈ܶܓܠܰܝ ܕܶܐܛܰܪ ܦܽܘܩ̈ܕܳܢܰܝܟ. ܘܡܶܢ ܕܺܝ̈ܢܰܝܟ ܠܐ ܣܛܺܝܬ ܡܶܛܠ ܕܰܐܢܬ ܐܰܠܶܦܬܳܢܝ. ܠܐ ܠܡ ܡܶܫܟܰܚ ܐܢܳܫ ܝܳܠܶܦ ܦܽܘܩ̈ܕܳܢܰܝܟ ܐܶܢ ܒܽܐܘܪܚܳܐ ܒܺܝܫܬܳܐ ܡܗܰܠܶܟ. ܐܶܢܳܐ ܕܶܝܢ ܒܪܶܚܡܰܬ ܦܽܘܩ̈ܕܳܢܰܝܟ ܐܶܬܐܰܣܪܶܬ ܘܰܠܟܽܠܡܶܕܶܡ ܕܺܐܝܬܰܘܗܝ ܒܺܝܫܳܐ ܣܢܺܝܬ ܘܰܐܣܠܺܝܬ. ܘܒܽܘܣܳܡܳܐ ܓܡܺܝܪܳܐ ܗܘܳܐ ܠܝ̣ ܢܳܡܽܘܣܳܟ. ܘܚܰܠܝܽܘܬܳܐ ܓܡܺܝܪܬܳܐ ܦܽܘܩ̈ܕܳܢܰܝܟ.
ܘܚܰܠܝܴ̈ܢ ܡܶܠܰܝ̈ܟ ܠܰܫܡܰܝ̈ ܚܶܟܝ. ܛܳܒ ܡ̣ܢ ܕܶܒܫܳܐ ܠܦܽܘܡܳܐ. ܡܳܢܳܐ ܓܶܝܪ ܐܝ̣ܬ ܕܰܒܡܷ̈ܠܰܝܟ ܢܶܬܦܰܚܰܡ. ܣܳܗܶܕ ܚܰܙܩܺܝܐܝܠ ܢܒܺܝܐ. ܕܟܰܕ ܕܶܝܢ ܠܟܶܪܟܳܐ ܕܐܪ̈ܳܙܶܐ ܩܰܕܺܝ̈ܫܶܐ ܛܥܶܡ ܒܦܽܘܡܳܐ ܕܢܰܦܫܶܗ ܒܕܶܒܫܳܐ ܕܡܶܠܰܘ̈ܗܝ ܕܰܐܠܳܗܳܐ ܡܶܬܒܰܣܰܡ ܗܘܳܐ. ܘܳܐܡܰܪ ܕܶܐܟܰܠܬܶܗ ܘܰܗܘܳܐ ܒܦܽܘܡܝ ܐܰܝܟ ܕܶܒܫܳܐ ܚܰܠܝܳܐ (ܚܙܩܐܝܠ ܓ: ܓ) ܘܰܩܥܳܐ ܡ̣ܢ ܛܰܥܡܶܗ ܕܝܽܘܠܦܳܢܳܐ ܛܽܘܒܳܢܳܐ ܕܰܘܝܕ. ܟܕ ܡܥܰܠܶܐ ܠܶܗ ܠܥܶܠ ܡ̣ܢ ܛܰܥܡܳܐ ܕܚܰܠܝܽܘܬܳܐ ܕܕܶܒܫܳܐ. ܘܥܰܠܗܳܝ ܐܡ̣ܪ:
ܘܦܽܘܩ̈ܕܳܢܰܝܟ ܪܢܺܝܬ ܡܶܛܠ ܗܳܢܐ ܣܢܺܝܬ ܟܽܠܳܗ̇ ܐܽܘܪܚܳܐ ܕܥܰܘܴ̈ܠܶܐ. ܬܘܒ ܠܢܽܘܗܪܳܐ ܡܕܰܡܶܐ ܠܗ̇ ܠܡܶܠܬܶܗ ܕܰܐܠܳܗܳܐ.
ܢܢ– ܫܪܳܓܳܐ ܗܝ ܡܶܠܬܳܟ ܠܪ̈ܶܓܠܰܝ ܘܢܽܘܗܪܳܐ ܠܰܫܒܺܝ̈ܠܰܝ. ܐܳܦ ܗܳܪܟܳܐ ܬܘܒ ܠܗܰܘ ܡܶܠܬܳܐ ܕܰܗܘܳܐ ܒܶܣܪܳܐ ܐܶܫܬܰܘܕܰܥ ܓܰܠܝܳܐܝ̣ܬ. ܠܗܰܘ ܕܶܐܡܰܪ ܝܽܘܚܰܢܳܢ. ܕܗܽܘ ܢܽܘܗܪܳܐ ܒܚܶܫܽܘܟܳܐ ܡܰܢܗܰܪ (ܝܘܚܢܢ ܐ: ܗ). ܘܰܠܗܰܘ ܕܡܰܘܕܝܳܐ ܠܶܗ ܥܺܕܬܳܐ ܢܽܘܗܪܳܐ ܕܡ̣ܢ ܢܽܘܗܪܳܐ ܘܰܐܠܳܗܳܐ ܫܰܪܺܝܪܳܐ ܕܡܶܢ ܐܰܠܗܳܐ ܫܰܪܺܝܪܳܐ (ܬܚܽܘܡܳܐ ܕܗܰܝܡܳܢܽܘܬܳܐ). ܘܡܶܛܠܡܳܢܐ ܕܶܝܢ ܩܪܳܝܗܝ ܫܪܳܓܳܐ ܠܗܰܘ ܫܶܡܫܳܐ ܕܙܰܕܺܝܩܽܘܬܳܐ. ܕܰܡܚܰܦܰܝ ܗܘܳܐ ܘܠܳܐ ܓܠܶܐ ܐܪܳܙܶܗ. ܘܰܠܘܳܬ ܢܒܺܝ̈ܐ ܒܨܶܡܚ̈ܐ ܡܶܬܚܙܶܐ ܗܘܳܐ. ܡܶܛܠܗܳܢܐ ܠܦܽܘܬ ܢܰܣܺܝܣܽܘܬܳܐ ܕܥܰܝ̈ܢܶܝܗ̇ ܕܠܶܝܰܐ ܚܳܙܶܝܢ ܗܘܰܘ ܢܒܺܝ̈ܐ ܒܢܶܝ̈ܗ̇ ܕܗܳܕܶܐ. ܒܢܷ̈ܝܗ̇ ܕܶܝܢ ܕܪܳܚܺܝܠ ܠܰܘ ܫܪܳܓܳܐ ܚܳܙܶܝܢ ܐܶܠܐ ܠܟܽܠܶܗ ܓܺܝܓܠܶܗ ܕܫܶܡܫܳܐ ܡܩܰܒܠܺܝܢ. ܢܶܫܡܥܶܗ ܕܶܝܢ ܡ̣ܢ ܒܳܬܰܪܟܶܢ ܕܰܚܙܳܝܗܝ ܠܡܶܠܬܶܗ ܕܰܐܒܳܐ ܡܳܢܳܐ ܐܡ̇ܪ
ܝ̣ܡܺܝܬ ܘܰܐܫܪܶܬ ܕܶܐܛܰܪ ܕܺܝܢ̈ܐ ܕܙܰܕܺܝܩܽܘܬܳܟ. ܘܡܰܢ ܡܶܫܟܰܚ ܢܺܐܡܰܪ ܐܰܝܟ ܩܳܠܳܐ ܗܳܢܐ ܒܰܫܪܳܓܳܐ ܓܶܝܪ ܫܪܳܓܳܐ ܗܝ ܘܢܽܘܗܪܳܐ ܠܰܫܒܺܝ̈ܠܰܘܗܝ ܡܶܠܬܶܗ ܕܰܠܗܳܐ. ܡܰܘܣܶܦ ܬܘܒ ܘܳܐܡܰܪ:
ܐܶܬܡܰܟܟܶܬ ܪܰܘܪܒܳܐܝ̣ܬ ܡܳܪܝܳܐ ܐܰܚܳܢܝ ܐܰܝܟ ܡܶܠܬܳܟ ܒܡܶܠܰܘ̈ܗܝ ܕܦܽܘܡܝ ܨܒܺܝ ܡܳܪܝܳܐ ܘܡ̣ܢ ܕܺܝ̈ܢܰܝܟ ܐܰܠܶܦܰܝܢܝ. ܢܰܦܫܝ ܒܺܐܝ̈ܕܰܝܟ ܗܺܝ ܒܟܽܠܙܒܰܢ ܘܢܳܡܽܘܣܳܟ ܠܳܐ ܛܥܺܝܬ. ܚܙܺܝ ܬܘܒ ܡܳܢܳܐ ܐܡ̇ܪ܆ ܟܕ ܡܩܰܪܶܒ ܗܘܳܐ ܠܡܳܪܝܳܐ ܡܷ̈ܠܶܐ ܕܫܳܘ̈ܝܳܢ ܠܨܶܒܝܳܢܳܐ ܗܳܠܝܢ ܕܳܐܦ ܡܶܛܠܳܬܗܶܝܢ ܒܥܳܐ ܕܢܰܠܦܶܗ ܕܺܝ̈ܢܰܘܗܝ. ܟܕ ܡܚܰܘܶܐ ܕܢܰܦܫܳܐ ܕܟܺܝܬܳܐ ܘܰܕܫܳܘܝܳܐ ܕܬܶܗܘܶܐ ܒܺܐܝ̈ܕܰܝ ܐܰܠܗܳܐ. ܐܝ̣ܬܶܝܗ̇ ܗܘܳܬ ܢܰܦܫܶܗ. ܘܠܳܐ ܛܥܳܐ ܗܘܳܐ ܢܳܡܽܘܣܶܗ ܘܠܐ ܟܰܕ ܣܳܝܡܺܝܢ ܠܶܗ ܥܰܘܴ̈ܠܶܐ ܦܰܚ̈ܐ ܛܳܥܶܐ ܐܽܘܪܚܳܐ ܘܡܶܬܕܰܘܰܕ.
ܣܳܡܘ ܠܺܝ ܚܰܛܳܝ̈ܐ ܦܰܚ̈ܐ ܘܡ̣ܢ ܢܳܡܽܘܣܳܟ ܠܳܐ ܣܛܺܝܬ. ܡܶܛܠ ܕܶܐܣܛܶܐ ܡ̣ܢ ܦܽܘܩ̈ܕܳܢܰܝܟ ܛܡܰܪܘ ܦܰܚܰܝ̈ܗܽܘܢ ܒܰܫܒܺܝ̈ܠܰܝ.
ܘܝܶܪܬܶܬ ܣܳܗܕܽܘܬܳܟ ܠܥܳܠܰܡ ܡܶܛܠ ܕܒܽܘܣܳܡܳܐ ܗܝ ܕܠܶܒܝ. ܘܰܐܦܢܺܝܬ ܠܶܒܝ ܕܶܐܥܒܶܕ ܦܽܘ̈ܩܕܳܢܰܝܟ ܠܥܳܠܰܡ ܒܰܫܪܳܪܳܐ. ܚܠܳܦ ܐܰܪ̈ܥܳܬܳܐ ܠܡ ܘܰܚܠܳܦ ܩܶܢܝܳܢ̈ܐ ܝܳܪܬܽܘܬܳܐ ܗܘܳܬ ܠܝ̣ ܣܳܗܕܽܘܬܳܟ. ܘܰܐܝܟ ܥܽܘܬܪܳܐ ܗܘܳܬ ܠܝ̣ ܒܶܝܬ ܬܰܘܬܳܒܽܘܬܝ. ܘܟܕ ܚܙܺܝܬ ܕܠܰܝܬ ܡܶܕܶܡ ܕܦܳܚܶܡ ܠܗ̇ ܒܰܫܪܳܪܳܐ ܛܰܝܒܶܬ ܢܰܦܫܝ ܐܶܥܒܶܕ ܐܶܢܽܘܢ ܘܠܰܘ ܒܕܰܓܳܠܽܘܬܳܐ. ܘܡܰܝܬܶܐ ܓܶܝܪ ܘܳܐܡܰܪ.
ܣ– ܣܢܺܝܬ ܠܥܰܘ̈ܳܠܶܐ ܘܢܳܡܽܘܣܳܟ ܪܶܚܡܶܬ. ܣܶܬܳܪܝ ܘܒܶܝܬ ܓܰܘܣܝ ܐܰܢܬ ܗܽܘ. ܘܰܠܡܶܠܬܳܟ ܣܰܒܪܶܬ. ܐܰܥܒܰܪܘ ܡܶܢܝ ܥܰܘܴ̈ܠܶܐ ܕܶܐܛܰܪ ܦܽܘ̈ܩܕܳܢܰܘܗܝ ܕܰܐܠܳܗܝ. ܗܳܕܶܐ ܓܶܝܪ ܒܰܪܬ ܩܳܠܳܐ ܗܝ ܕܢܰܦܫܳܐ ܡܰܙܥܩܳܐ ܗܘܳܬ ܒܚܺܐܦ̈ܐ ܩܫܰܝܴ̈ܐ ܕܚܽܘܫܳܒ̈ܐ ܒܺܝ̈ܫܶܐ ܕܠܐ ܢܶܫܬܰܠܛܽܘܢ. ܐܶܠܐ ܕܰܢܫܰܢܽܘܢ ܩܳܥܶܐ ܗܘܳܐ. ܕܢܶܫܬܰܪܰܪ ܒܡܶܠܬܶܗ ܕܡܳܪܝܳܐ ܡܨܰܠܶܐ ܗܘܳܐ.
ܐܰܫܰܪܰܝܢܝ ܒܡܶܠܬܳܟ ܘܺܐܚܶܐ ܘܠܳܐ ܬܰܒܗܶܬܰܝܢܝ ܡܶܢ ܣܰܒܪܝ. ܣܰܝܰܥܰܝܢܝ ܘܶܐܬܦܪܶܩ ܘܶܐܬܝܰܠܰܦ ܒܦܽܘܩ̈ܕܳܢܰܝܟ. ܘܰܒܟܽܠܙܒܰܢ ܐܰܣܠܺܝܬ ܠܟܽܠ ܕܛܳܥܶܝܢ ܡܶܢܳܟ. ܡܶܛܠ ܕܥܰܘܠܰܐ ܗܘ ܪܶܢܺܝܗܽܘܢ. ܡ̣ܢ ܒܳܬܰܪ ܕܰܒܥܳܐ ܫܽܘܪܳܪܳܐ ܒܡܶܠܬܶܗ ܕܡܳܪܝܳܐ ܨܰܠܺܝ ܕܢܶܗܘܶܐ ܠܶܗ ܣܽܘܝܳܥܳܐ ܕܡܶܢܶܗ. ܘܬܽܘܒ ܐܰܣܠܺܝ ܠܟܽܠ ܕܛܳܥܶܝܢ ܡ̣ܢ ܐܰܠܗܳܐ ܠܘ ܒܰܠܚܽܘܕ ܠܥܰܘܴ̈ܠܶܐ ܐܶܠܐ ܘܰܒܥܶܠܕ̈ܒܳܒܶܐ ܡܶܬܝܰܕܥܴ̈ܢܶܐ. ܘܰܒܗܳܕܶܐ ܐܰܠܶܦ ܕܠܐ ܢܶܣܬܰܝܰܥ ܡ̣ܢ ܡܳܪܝܳܐ ܐܰܝܟ ܕܢܺܐܠܰܦ ܦܽܘ̈ܩܕܳܢܰܘܗܝ. ܐܶܠܐ ܐܰܣܠܺܝ ܠܰܐܝܠܶܝܢ ܕܺܐܝܬܰܝܗܶܝܢ ܕܰܠܩܽܘܒܠܶܗ. ܘܬܽܘܒ ܡܰܘܣܶܦ ܘܳܐܡܰܪ:
ܣܰܡܶܟܰܝܢܝ ܘܶܐܬܦܪܶܩ ܘܶܐܪܢܶܐ ܒܦܽܘ̈ܩܕܳܢܰܝܟ ܘܰܩܦܽܘܕ ܒܶܣܪܝ ܡ̣ܢ ܕܶܚܠܬܳܟ ܘܡ̣ܢ ܕܺܝ̈ܢܰܝܟ ܕܶܚܠܶܬ. ܒܕܺܝܢ̈ܐ ܕܰܐܠܗܳܐ ܗܳܟܰܢܳܐ ܪܢܺܝܬ. ܐܰܝܟܰܢܳܐ ܕܡ̣ܢ ܕܶܚܠܬܳܐ ܢܶܩܦܽܘܕ ܒܶܣܪܝ ܥܰܠ ܓܰܪ̈ܡܰܝ ܘܢܺܐܒܰܫ. ܡܶܛܠ ܕܰܚܙܺܝܬ ܒܥܰܝܢܳܐ ܕܪܽܘܚ ܫܽܘܢܳܩܳܐ ܕܠܳܐ ܓܳܡܰܪ ܘܢܽܘܪܳܐ ܕܰܠܥܳܠܰܡ ܠܥܰܘܴ̈ܠܶܐ. ܒܗܳܠܝܢ ܪܳܢܶܐ ܗܘܳܐ ܢܒܺܝܐ ܘܕܳܚܶܠ ܗܘܳܐ ܘܡܶܣܬܰܪܰܕ. ܘܥܳܐܠܳܐ ܗܘܳܬ ܪܬܺܝܬܳܐ ܒܓܰܪ̈ܡܰܘܗܝ ܐܝܟ ܕܶܐܡܰܪ ܢܒܺܝܳܐ ܚܰܒܩܽܘܩ (ܚܰܒܩ ܓ: ܝܗ). ܕܰܐܝܟ ܗܳܢܐ ܙܰܘܥܳܐ ܫܪܐ ܗܘܳܐ ܒܢܰܦܫܶܗ ܕܰܢܒܺܝܐ ܡ̣ܢ ܕܺܝ̈ܢܶܐ ܐܰܠܗܳܝ̈ܐ. ܘܡܶܛܠ ܗܳܢܐ ܡܨܰܠܶܐ ܠܘܳܬ ܐܰܠܗܳܐ.
ܥ– ܗܰܘ ܕܥܳܒܶܕ ܕܺܝܢܳܐ ܘܙܰܕܺܝܩܽܘܬܳܐ. ܠܳܐ ܬܶܫܒܽܘܩܰܝܢܝ ܒܺܐܝܕܳܐ ܕܛܳܠܽܘ̈ܡܰܝ. ܒܰܣܶܡܳܝܗܝ ܠܥܰܒܕܳܟ ܒܛܳܒܴ̈ܬܳܐ ܕܠܳܐ ܢܶܥܫܩܽܘܢܳܢܝ ܫܰܒܗܪ̈ܳܢܶܐ. ܕܳܡܶܝܢ ܩ̈ܳܠܶܐ ܗܳܠܝܢ ܠܗܰܘ ܕܰܡܨܰܠܶܐ ܕܠܳܐ ܢܺܐܬܶܐ ܠܕܺܝܢܳܐ. ܘܰܠܗܰܘ ܕܰܛܦܰܣ ܒܟܶܢ̈ܦܶܐ ܕܕܰܝܳܢܳܐ ܕܒܺܐܝܳܠܶܗ ܢܶܫܬܰܘܙܰܒ ܡ̣ܢ ܛܳܠܽܘ̈ܡܶܐ. ܡ̣ܢ ܚܰܝ̈ܠܰܘܳܬܳܐ ܕܕܰܠܩܽܘܒܠܳܐ. ܗܳܢܘܢ ܕܛܰܠܡܽܘܗܝ ܠܒܰܪܢܳܫܳܐ ܩܰܕܡܳܝܳܐ ܡ̣ܢ ܫܽܘܪܳܝܳܐ ܒܦܰܪܕܰܝܣܳܐ. ܘܡܶܛܠ ܕܝܳܕܰܥ ܗܘܳܐ ܡܙܰܡܪܳܢܳܐ ܒܺܝܫܽܘܬܗܘܢ. ܡܦܝ̣ܣ ܗܘܳܐ ܕܠܐ ܢܶܫܬܠܶܡ ܒܺܐܝ̈ܕܰܝܗܘܢ. ܡܶܛܠܗܳܢܐ ܡܰܝܬܶܐ ܢܒܺܝܐ ܘܳܐܡܰܪ:
ܥܰܝ̈ܢܰܝ ܣܰܟܺܝ̈ ܠܦܽܘܪܩܳܢܳܟ ܘܰܠܡܺܐܡܪܳܐ ܕܙܰܕܺܝܩܽܘܬܳܟ. ܒܗܳܝ ܠܡ ܫܳܥܬܳܐ ܐܶܢ ܦܽܘܪܩܳܢܳܟ ܠܳܐ ܡܰܕܪܶܟ ܐܳܒܶܕ ܐܢܳܐ. ܘܥܰܠܗܳܕܐ ܚܳܐܱܪ ܐܢܳܐ ܘܰܡܣܰܟ̈ܝܳܢ ܥܰܝ̈ܢܰܝ ܕܒܶܗ ܐܶܬܦܪܶܩ ܘܶܐܬܦܰܨܶܐ.
ܐܠܐ ܥܒܶܕ ܠܥܰܒܕܳܟ ܐܰܝܟ ܪ̈ܰܚܡܰܝܟ ܘܰܐܠܶܦܰܝܢܝ ܢܳܡܽܘܣܳܟ. ܘܰܒܪ̈ܰܚܡܶܐ ܫܳܐܷܠ ܐܢܳܐ ܥܽܘܕܪܳܢܳܐ ܘܺܐܠܰܦ ܢܳܡܽܘܣܶܗ ܕܗܰܘ ܥܳܠܡܳܐ ܪܰܒܳܐ ܕܩܳܐܷܡ ܒܚܰܝ̈ܐ ܕܠܐ ܫܽܘܠܳܡܳܐ. ܘܰܐܝܟ ܥܰܒܕܳܐ ܕܚܳܐܱܪ ܘܰܡܣܰܟܶܐ ܠܡܳܪܶܗ ܕܢܺܐܠܰܦ ܡܳܢܳܐ ܨܳܒܶܐ ܐܳܡܰܪ:
ܥܰܒܕܳܟ ܐܢܳܐ ܣܰܟܶܠܰܝܢܝ ܘܶܐܕܰܥ ܣܳܗܕܽܘܬܳܟ. ܠܐ ܓܶܝܪ ܡܶܫܟܚܳܐ ܕܟܰܕ ܡܶܢܳܟ ܠܳܐ ܢܳܣܶܒ ܐܢܳܐ ܝܺܕܰܥܬܳܐ ܘܣܽܘܟܳܠܳܐ ܐܶܕܰܥ ܣܳܗܕܽܘܬܳܟ. ܒܳܬܰܪ ܗܳܠܶܝܢ ܡܳܢܳܐ ܨܳܒܶܐ ܢܺܐܡܰܪ. ܡܶܢ ܗܳܢܘܢ ܕܩܳܝܡܺܝܢ ܠܽܘܩܒܰܠ ܦܽܘܠܚܳܢܳܐ ܕܟܺܐܢܽܘܬܳܐ ܡܪܰܛܶܢ ܐܰܝܟ ܗܰܘ ܕܩܳܒܶܠ ܥܠܰܝܗܽܘܢ ܐܡ̇ܪ.
ܙܰܒܢܰܐ ܗܘ ܠܡܶܦܠܚܶܗ ܠܡܳܪܝܳܐ ܘܗܳܐ ܒܰܛܶܠܘ ܢܳܡܽܘܣܳܟ. ܗܳܪܟܳܐ ܐܝ̣ܬ ܠܰܢ ܙܰܒܢܳܐ ܠܡܶܦܠܰܚ ܛܳܒܴ̈ܬܳܐ. ܘܰܠܡܰܘܕܳܝܽܘ ܠܡܳܪܝܳܐ ܐܳܦ ܕܢܶܦܠܽܘܚ ܒܟܰܪܡܳܐ ܕܦܽܘܩܕܳܢܰܘ̈ܗܝ. ܐܶܢܳܐ ܕܶܝܢ ܠܘ ܡ̣ܢ ܗܳܢܘܢ ܕܒܳܥܶܝܢ ܠܰܡܒܰܛܳܠܽܘ ܢܳܡܽܘܣܳܟ. ܘܠܳܐ ܦܳܫܶܬ ܡ̣ܢ ܦܽܘܠܚܳܢܳܐ ܕܟܺܐܢܽܘܬܳܟ.
ܡܶܛܠ ܗܳܢܐ ܪܶܚܡܶܬ ܦܽܘ̈ܩܕܳܢܰܝܟ ܛܳܒ ܡ̣ܢ ܕܰܗܒܳܐ ܘܛܳܒ ܡ̣ܢ ܟܺܐܦ̈ܐ ܛܳܒ̈ܬܳܐ. ܟܽܠܗܽܘܢ ܦܽܘܩ̈ܕܳܢܰܝܟ ܪܶܚܡܶܬ ܘܟܽܠܳܗ̇ ܐܽܘܪܚܳܐ ܕܥܰܘܴ̈ܠܶܐ ܣܢܺܝܬ. ܘܠܐ ܦܰܚܡܶܬ ܥܰܡ ܕܰܗܒܳܐ ܦܽܘ̈ܩܕܳܢܰܝܟ ܘܠܐ ܥܰܡ ܟܺܐܦ̈ܐ ܛܳܒܴ̈ܬܳܐ ܢܳܡܽܘܣܳܟ. ܘܶܐܬܥܢܺܝܬ ܒܪܶܢܝܳܐ ܕܥܽܘܬܪܳܐ ܘܫܶܒܩܶܬ ܦܽܘܠܚܳܢܳܟ. ܐܶܠܐ ܠܗܰܘ ܥܽܘܬܪܳܐ ܕܺܝܠܳܟ ܣܳܡܶܬ ܪܺܝܫܳܐ ܘܩܰܕܡܳܝܳܐ. ܘܟܰܕ ܠܦܽܘ̈ܩܕܳܢܰܝܟ ܪܶܚܡܶܬ ܠܳܐ ܫܶܒܩܶܬ ܒܢܰܦܫܝ ܡܢܳܬܳܐ ܡܶܕܶܡ ܡ̣ܢ ܐܽܘܪܚܳܐ ܕܥܰܘܴ̈ܠܶܐ. ܘܥܠ ܣܳܗܕܽܘܬܶܗ ܕܰܐܠܗܳܐ ܒܩܴ̈ܠܶܐ ܡܶܫܬܰܡܥܴ̈ܢܶܐ ܡܙܰܡܰܪ ܩܕܳܡ ܫܳܡܽܘܥ̈ܐ ܘܳܐܡܰܪ:
ܦ– ܪܰܘܪ̈ܒܳܢ ܐܶܢܶܝܢ ܣܳܗܕ̈ܘܳܬܳܟ ܡܶܛܠ ܗܳܢܐ ܢܶܛܪܰܬ ܐܶܢܶܝܢ ܢܰܦܫܝ܆ ܦܬܰܚ ܡܶܠܬܳܟ ܘܰܐܢܗܰܪ ܘܣܰܟܶܠ ܠܫܰܒܪ̈ܶܐ. ܘܟܽܠܡܶܕܶܡ ܕܶܐܬܡܰܠܰܠ ܒܐܪ̈ܳܙܶܐ ܒܝܰܕ ܢܒܺܝ̈ܐ. ܐܶܡܰܬܝ ܕܫܰܕܰܪܬ ܠܡܶܠܬܳܟ ܡ̣ܢ ܫܡܰܝܳܐ ܘܰܦܬܰܚܬ ܬܰܪܥܳܐ ܕܰܓܢܺܝܙܳܐ ܒܶܗ ܡܶܠܬܳܟ ܕܰܡܚܰܟܡܳܐ ܠܗܶܕܝܽܘ̈ܛܶܐ. ܢܳܗܪܺܝܢ ܫܰܒܪ̈ܶܐ ܘܝܳܠܦܺܝܢ ܝܰܠܽܘܕ̈ܐ ܚܽܘܒܳܟ. ܒܶܗ ܓܶܝܪ ܢܗܰܪ ܥܳܠܡܳܐ ܚܶܫܽܘܟܳܐ ܘܶܐܣܬܰܟܰܠ ܘܺܝܕܰܥ ܐܽܘܪܚܳܐ ܕܡܰܠܟܽܘܬܳܟ. ܘܗܳܝܕܶܝܢ ܝܳܠܶܦ ܥܳܠܡܳܐ ܐܰܝܠܶܝܢ ܕܰܐܛܥܝܶܗ ܚܶܘܝܳܐ. ܟܕ ܗܳܕܐ ܐܡ̣ܪ ܡܶܛܠ ܓܶܠܝܳܢܳܐ ܐܰܠܗܳܝܳܐ. ܬܘܒ ܐܡ̣ܪ ܥܠ ܢܰܦܫܶܗ.
ܦܽܘܡܝ ܦܶܬܚܶܬ ܘܣܳܩܶܬ ܪܽܘܚܳܐ ܘܣܰܟܺܝܬ ܠܦܽܘܪܩܳܢܳܟ. ܡܳܢܐ ܨܳܒܶܐ ܢܺܐܡܰܪ: ܗܳܝ ܕܰܦܬܰܚ ܦܽܘܡܶܗ ܕܗܰܝܡܶܢ ܘܰܐܘܕܺܝ ܠܛܰܝܒܽܘܬܶܗ. ܪܽܘܚܳܐ ܕܶܝܢ ܕܣܳܩ ܡܰܘܕܰܥ ܥܰܠ ܢܒܺܝܽܘܬܳܐ. ܗܳܟܰܢܐ ܕܰܘܝܕ ܢܒܺܝܳܐ ܡܰܠܶܦ ܥܰܠ ܗܰܘ ܒܰܪܢܳܫܳܐ ܓܰܘܳܝܳܐ. ܕܺܐܝܬ ܠܶܗ ܣܰܘܩܳܐ ܡܶܕܶܡ ܠܳܐ ܡܶܬܕܰܪܟܳܢܳܐ. ܘܰܦܬܰܚ ܦܽܘܡܶܗ ܒܽܘܣܳܡܶܗ ܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ. ܠܐ ܓܝܪ ܩܳܕܡܳܐ ܡܰܘܗܰܒܬܳܐ ܠܬܰܘܕܺܝܬܳܐ. ܐܶܠܐ ܡܳܐ ܕܰܦܬܰܚ ܦܽܘܡܶܗ ܐܰܘܕܺܝ ܠܡܳܪܝܳܐ ܒܕܰܟܝܽܘܬܳܐ. ܘܒܳܬܰܪ ܬܰܘܕܺܝܬܳܐ ܩܳܪܒܳܐ ܪܽܘܚܳܐ ܠܘܳܬ ܣܰܘܩܳܐ ܕܢܰܦܫܳܐ ܘܰܡܨܰܠܶܐ ܡ̇ܢ ܢܒܺܝܐ ܡ̣ܢ ܒܳܬܰܪ ܕܩܰܒܶܠ ܒܦܽܘܡܶܗ ܪܽܘܚܳܐ ܘܣܰܘܩܳܐ ܕܰܢܒܺܝܽܘܬܳܐ ܘܳܐܡܰܪ:
ܐܶܬܦܰܢ ܥܠܰܝ ܘܪܰܚܶܡ ܥܠܰܝ. ܡܶܛܠ ܕܪܶܚܡܶܬ ܫܡܳܟ. ܘܰܐܬܩܶܢ ܗܰܠܟܴ̈ܬܝ ܥܰܠ ܫܒܺܝܠܰܝ̈ܟ ܕܠܳܐ ܢܶܫܬܰܠܰܛ ܒܺܝ ܥܰܘܳܠܳܐ. ܘܰܦܪܽܘܩܰܝܢܝ ܡܶܢ ܛܠܽܘܡܝܶܗ ܕܒܰܪܢܳܫܳܐ ܕܶܐܛܰܪ ܦܽܘ̈ܩܕܳܢܰܝܟ. ܡ̣ܢ ܕܩܰܒܶܠ ܪܽܘܚܳܐ ܘܫܐܷܠ ܡܶܢܶܗ ܕܢܰܬܩܶܢ ܗܰܠܟܴ̈ܬܶܗ ܘܒܰܫܒܺܝ̈ܠܰܘܗܝ. ܘܰܕܠܳܐ ܢܶܫܬܰܠܰܛ ܥܠܰܘܗܝ ܥܰܘܳܠܳܐ. ܗܰܘ ܕܡ̣ܢ ܒܪܺܝܫܺܝܬ ܩܳܛܶܠ ܐܢܳܫܰܐ ܗ̄ܘ. ܘܰܒܫܶܡ ܒܰܪܢܳܫܳܐ ܠܛܳܠܽܘܡܳܐ ܣܳܛܳܢܳܐ ܡܣܰܟܶܠ. ܥܳܐܷܠ ܗܘܳܐ ܓܝܪ ܫܡܳܐ ܕܗܰܘ ܛܰܪܟܳܢܳܐ ܒܕܽܘܟ ܕܽܘܟ ܒܰܫܡܳܐ ܕܒܰܪܢܳܫܳܐ ܡܳܐ ܓܝܪ ܕܗܳܘܶܐ ܐܢܳܫ ܛܳܠܽܘܡܳܐ. ܘܳܐܡܰܪ ܐܰܝܠܶܝܢ. ܕܰܡܫܰܟܪ̈ܳܢ ܥܰܠ ܚܰܒܪܶܗ. ܟܰܕ ܠܐ ܐܝ̣ܬܰܝܗܶܝܢ. ܡ̣ܢ ܗܰܘ ܕܰܠܩܽܘܒܠܳܐ ܡܶܬܬܰܥܒܰܕ. ܘܗܰܘ ܕܰܡܨܰܠܶܐ ܐܰܝܟ ܕܢܶܬܦܪܶܩ ܡ̣ܢ ܕܰܐܝܟ ܗܳܢܐ. ܕܢܶܬܦܰܨܶܐ ܡ̣ܢ ܗܰܘ ܕܡܰܥܒܶܕ ܒܶܗ ܡܨܰܠܶܐ. ܘܰܚܙܺܝ ܐܰܝܟܰܢܳܐ ܢܒܺܝܐ ܡ̣ܢ ܒܳܬܰܪ ܕܨܰܠܺܝ ܕܢܶܬܦܪܶܩ ܡ̣ܢ ܒܰܪܢܳܫܳܐ ܛܳܠܽܘܡܳܐ. ܪܳܐܷܓ ܕܰܒܢܽܘܗܪܳܐ ܕܰܐܦܰܘ̈ܗܝ ܕܰܐܠܳܗܳܐ ܢܶܬܒܰܣܰܡ.
ܐܰܢܗܰܪ ܐܰܦܰܝ̈ܟ ܥܰܠ ܥܰܒܕܳܟ ܘܰܐܠܶܦܰܝܢܝ ܢܳܡܽܘܣܳܟ. ܬܰܦ̈ܐ ܕܡܰܝܴ̈ܐ ܐܶܬܰܘ ܡ̣ܢ ܥܰܝ̈ܢܰܝ ܥܰܠ ܕܠܐ ܢܛܰܪܘ ܢܳܡܽܘܣܳܟ. ܚܙܺܝ ܗܳܟܺܝܠ ܐܰܝܟܰܢܳܐ ܫܳܐܷܠ ܗܘܳܐ ܕܰܒܢܽܘܗܪܳܐ ܢܺܐܠܰܦ ܢܳܡܽܘܣܶܗ ܕܡܳܪܝܳܐ. ܘܰܡܚܰܘܶܐ ܕܶܝܢ ܢܒܺܝܐ ܕܰܒܕܶܡ̈ܥܶܐ ܘܰܒܒܶܟܝܳܐ ܗܳܘܶܐ ܗܘܳܐ ܡܳܐ ܕܚܳܙܶܐ ܕܠܐ ܡܶܬܢܛܰܪ ܗܘܳܐ ܢܳܡܽܘܣܶܗ ܕܰܐܠܗܳܐ ܡ̣ܢ ܒܢܰܝ̈ܢܳܫܳܐ. ܘܠܐ ܡܰܗܡܶܐ ܗܘܳܐ ܘܫܳܐܷܛ ܠܰܐܝܠܶܝܢ ܕܰܒܣܽܘܥܪ̈ܳܢܶܐ ܕܡܰܪ̈ܳܚܶܐ. ܘܠܳܐ ܐܡ̇ܪ ܗܘܳܐ ܕܣܳܦܶܩ ܠܳܟ ܕܶܐܢܳܐ ܢܳܛܰܪ ܐܢܳܐ ܢܳܡܽܘܣܳܟ. ܘܠܽܘܩܒܰܠ ܐܰܝܠܶܝܢ ܕܠܳܐ ܢܳܛܪܺܝܢ ܢܳܡܽܘܣܳܐ ܛܢܳܢܳܐ ܠܰܝܬ ܠܺܝ. ܘܡܰܪ̈ܕܝܳܢ ܗܘܱ̈ܝ ܥܰܝ̈ܢܰܘܗܝ ܬܰܦ̈ܐ ܕܕܶܡܥ̈ܐ ܥܰܠ ܕܰܒܢܰܫܦܶܗ ܩܢܶܐ ܗܘܳܐ ܠܶܗ ܚܰܫܳܐ. ܘܡܰܘܣܶܦ ܬܽܘܒ ܘܢܶܫܡܰܥ ܩܳܠܳܐ ܕܙܽܘܡܳܪܶܗ ܕܰܢܒܺܝܐ ܠܘܳܬ ܐܰܠܗܳܐ ܒܬܶܫܒܽܘܚܬܳܐ ܗܳܕܐ ܐܰܪܺܝܟܬܳܐ ܘܰܡܬܺܝܚܬܳܐ.
ܨ– ܙܰܕܺܝܩ ܐܰܢܬ ܡܳܪܝܳܐ ܘܛܳܒ ܬܪܺܝܨܺܝܢ ܕܺܝ̈ܢܰܝܟ. ܦܰܩܶܕܬ ܣܳܗܕܽܘܬܳܟ ܘܰܒܙܰܕܺܝܩܽܘܬܳܐ ܘܰܒܗܰܝܡܳܢܽܘܬܳܐ ܫܰܢܩܰܢܝ ܚܣܳܡܳܐ ܒܟܽܠܙܒܰܢ. ܡܶܛܠ ܕܰܛܥܰܘ ܡܶܠܬܳܟ ܒܥܶܠܕ̈ܒܳܒܰܝܟ. ܠܽܘܩܒܰܠ ܐܰܝܠܶܝܢ ܕܳܐܡܪܺܝܢ ܕܠܳܐ ܙܰܕܺܝܩ ܡܳܪܝܳܐ ܘܠܳܐ ܬܪܺܝܨܺܝܢ ܕܺܝܢܰܘ̈ܗܝ. ܐܡ̣ܪ ܕܰܘܝܕ ܦܶܬܓܳܡܳܐ ܗܳܢܐ ܒܟܽܠܙܒܰܢ ܠܐ ܒܳܛܠܺܝܢ ܐܰܝܠܶܝܢ ܕܥܳܕܠܺܝܢ ܠܟܺܐܢܽܘܬܳܐ ܡܶܛܠ ܥܰܒ̈ܕܶܝܗ̇ ܘܝܰܬܺܝܪ ܡܶܬܥܕܶܠ ܡ̣ܢ ܪ̈ܳܚܡܰܝ ܚܰܝ̈ܐ ܕܗܳܪܟܳܐ ܡܶܬܪܫܶܐ ܐܰܠܗܳܐ. ܕܰܠܡܳܢܳܐ ܟܰܝ ܡܶܢ ܒܳܬܰܪ ܕܥܰܒܕܶܗ ܠܒܰܪܢܳܫܳܐ ܗܳܦܶܟ ܡܚܰܒܶܠ ܠܶܗ. ܘܡܳܢܳܐ ܠܡ ܐܳܠܨܳܐ ܗܘܳܬ ܕܒܳܬܰܪ ܕܣܳܡܶܗ ܒܦܰܪܕܰܝܣܳܐ ܢܣܺܝܡ ܠܶܗ ܦܽܘܩܕܳܢܳܐ. ܕܠܳܐ ܢܶܐܟܽܘܠ ܡ̣ܢ ܐܺܝܠܳܢܳܐ. ܘܳܐܡܪܺܝܢ ܦܰܛܥܷ̈ܐ ܕܥܶܠܬܳܐ ܪܰܟܶܒ ܐܰܠܗܳܐ ܕܰܒܝܰܕ ܡܶܐܟܽܘܠܬܳܐ ܕܦܺܐܪܳܐ ܢܰܦܩܶܗ ܠܳܐܕܳܡ ܡܶܢ ܓܰܢܬܳܐ. ܠܽܘܩܒܰܠ ܗܳܠܝܢ ܐܡ̣ܪ ܢܒܺܝܐ. ܕܙܰܕܺܝܩ ܐܰܢܬ ܡܳܪܝܳܐ ܘܛܳܒ ܬܪܺܝܨܺܝܢ ܕܺܝ̈ܢܰܝܟ. ܘܡܶܕܶܡ ܕܠܳܐ ܟܺܐܢܽܘܬܳܐ ܠܳܐ ܐܶܬܪܰܥܺܝܬ. ܐܶܢܳܐ ܕܶܝܢ ܒܙܰܕܺܝܩܽܘܬܳܐ ܒܟܽܠܙܒܰܢ ܦܳܩܶܕ ܐܢܳܐ ܕܺܝ̈ܢܰܝܟ. ܘܣܳܗܕܽܘܬܳܟ ܘܗܰܝܡܳܢܽܘܬܳܟ ܘܰܡܫܰܢܶܩ ܠܺܝ ܚܣܳܡܳܐ ܥܰܠ ܕܠܳܐ ܡܶܬܕܰܟܪܺܝܢ ܒܢܰܝ̈ܢܳܫܳܐ ܥܰܘܴ̈ܠܶܐ ܡܶܠܬܳܟ. ܘܣܳܢܶܝܢ ܠܳܗ̇ ܒܥܶܠܕ̈ܒܳܒܰܝܟ.
ܠܺܝ ܕܶܝܢ ܓܰܒܝܳܐ ܗܝ ܡܶܠܬܳܟ ܛܳܒ ܘܥܰܒܕܳܟ ܪܰܚܡܳܗ̇. ܘܰܐܝܟ ܕܰܠܡܶܕܶܡ ܝܰܩܺܝܪܳܐ ܢܳܛܰܪ ܐܢܳܐ ܠܳܗ̇. ܘܰܐܝܟ ܬܰܠܡܺܝܕܳܐ ܩܕܳܡ ܪܰܒܶܗ ܡܫܰܥܒܶܕ ܐܢܳܐ ܢܰܦܫܝ. ܘܛܰܠܝܳܐ ܐܢܳܐ. ܕܰܒܫܰܦܝܽܘܬܳܐ ܡܰܫܪܶ ܐܢܳܐ ܠܝܽܘܠܦܳܢܳܟ.
ܘܟܰܕ ܙܥܽܘܪ ܐܢܳܐ ܘܫܺܝܛ. ܦܽܘܩܕܳܢܳܟ ܠܳܐ ܛܥܺܝܬ. ܐܶܠܳܐ ܡ̣ܢ ܛܰܠܝܽܘܬܝ ܝܶܠܦܶܬ ܢܳܡܽܘܣܳܟ. ܕܠܳܐ ܪ̈ܰܒܳܢܶܐ ܘܝܶܕܥܶܬ.
ܕܙܰܕܺܝܩܽܘܬܳܟ ܩܰܝܳܡܳܐ ܠܥܳܠܰܡ ܘܢܳܡܽܘܣܳܟ ܒܰܫܪܳܪܳܐ. ܐܽܘܠܨܳܢܳܐ ܘܥܳܩܬܳܐ ܡܰܛܝܽܘܢܝ. ܘܰܒܦܽܘ̈ܩܕܳܢܰܝܟ ܪܢܺܝܬ. ܙܰܕܺܝܩܳܐ ܗܝ ܣܳܗܕܽܘܬܳܟ ܠܥܳܠܰܡ ܣܰܟܶܠܰܝܢܝ ܘܺܐܚܶܐ. ܡܳܢܳܐ ܗܝ ܙܰܕܺܝܩܽܘܬܶܗ ܕܩܰܝܡܳܐ ܠܥܳܠܰܡ. ܕܰܒܫܶܡ ܙܰܕܺܝܩܽܘܬܶܗ ܠܥܰܡܰܢܽܘܐܝܠ ܣܳܐܷܡ. ܗܽܘܝܽܘ ܓܶܝܪ ܙܰܕܺܝܩܽܘܬܳܐ. ܗܳܢܰܘ ܓܶܝܪ ܫܽܘܦܪܳܐ ܕܙܰܕܺܝ̈ܩܶܐ ܕܠܳܐ ܡ̣ܢ ܥܶܠܰܬ ܐܽܘܠܨܳܢ̈ܐ ܢܶܛܥܽܘܢ ܠܡܳܪܝܳܐ. ܐܶܠܐ ܕܰܗܘܰܘ ܐܳܡܪܺܝܢ ܕܰܟܡܳܐ ܐܶܢ ܡܶܬܐܰܠܨܺܝܢ ܙܰܕܺܝܩܳܐ ܗܝ ܣܳܗܕܽܘܬܳܟ ܘܚܰܝ̈ܐ ܡܰܠܝܳܐ. ܘܫܰܦܺܝܪ ܕܢܶܗܘܶܐ ܒܽܐܘܠܨܳܢ̈ܐ ܩܳܪܶܐ ܐܢܳܫ ܠܰܐܠܗܳܐ ܒܟܽܠܶܗ ܠܶܒܶܗ ܐܝܟ ܕܶܐܡܰܪ ܡܙܰܡܪܳܢܳܐ.
ܩ– ܩܪܺܝܬܳܟ ܡܶܢ ܟܽܠܶܗ ܠܶܒܝ ܡܳܪܝܳܐ ܥܢܺܝܢܝ. ܘܶܐܛܰܪ ܦܽܘ̈ܩܕܳܢܰܝܟ. ܩܪܺܝܬܳܟ ܦܪܽܘܩܰܝܢܝ ܘܶܐܛܰܪ ܣܳܗܕܽܘܬܳܟ. ܩܰܕܡܶܬ ܒܨܰܦܪܳܐ ܘܰܓܥܺܝܬ ܘܣܰܟܺܝܬ ܠܡܶܠܬܳܟ. ܗܳܢܰܘ ܓܶܝܪ ܢܶܕܪܳܐ ܕܡܶܫܬܰܘܕܶܐ ܐܢܳܐ ܠܳܟ ܢܰܦܫܝ܆ ܚܠܳܦ ܕܬܶܦܪܩܺܝܗ̇ ܢܳܛܽܘܪܬܳܐ ܕܦܽܘ̈ܩܕܳܢܰܝܟ. ܘܠܰܘ ܐܰܝܟ ܗܳܢܘܢ ܕܰܡܨܰܠܶܝܢ ܕܢܶܬܦܰܪܩܽܘܢ ܡ̣ܢ ܥܶܕܳܢܳܐ ܕܽܐܘܠܨܳܢ̈ܐ. ܘܡܶܢ ܢܝܳܚ̈ܐ ܘܰܪ̈ܓܺܝܓܳܬܳܐ ܢܶܬܓܰܠܙܽܘܢ. ܐܶܢ ܕܶܝܢ ܠܰܘ ܐܰܝܟ ܗܳܠܝܢ ܩܪܺܝܬܳܟ. ܐܶܠܐ ܐܶܛܰܪ ܣܳܗܕܽܘܬܳܟ. ܘܠܐ ܡܩܰܕܶܡ ܗܘܳܐ ܕܠܳܐ ܬܰܟܫܶܦܬܳܐ ܕܫܳܘܝܳܐ ܠܐܺܝܩܳܪܳܐ ܕܰܐܠܗܳܐ. ܘܓܳܥܶܐ ܘܰܡܣܰܟܶܐ ܠܡܶܠܬܶܗ ܦܳܪܽܘܩܳܐ. ܡܳܕܶܝܢ ܠܳܐ ܫܰܠܺܝܛ ܠܐܢܳܫ ܕܟܰܕ ܡܰܪܫܰܥ ܢܺܐܡܰܪ. ܕܠܳܐ ܡܣܰܟܶܝܢ ܗܘܰܘ ܠܓܶܠܝܳܢܶܗ ܕܥܰܡܰܢܽܘܐܝܠ. ܕܗܳܐ ܢܒܺܝܐ ܕܰܘܝܕ ܐܡ̣ܪ. ܕܒܰܓܥܳܬܳܐ ܫܳܐܷܠ ܗܘܳܐ ܘܰܡܣܰܟܶܐ ܗܘܳܐ ܕܢܶܚܙܶܐ ܠܡܶܠܬܳܐ ܕܰܐܠܗܳܐ ܐܰܒܳܐ. ܗܳܢܰܘ ܠܥܰܡܰܢܽܘܐܝܠ ܘܳܐܡܰܪ ܗܘܳܐ.
ܩܰܕܶܡ ܥܰܝ̈ܢܰܝ ܠܡܰܛܰܪܬܳܐ ܕܶܐܪܢܶܐ ܒܡܶܠܬܳܟ. ܫܡܰܥ ܩܳܠܝ ܡܳܪܝܳܐ ܐܰܝܟ ܪ̈ܰܚܡܰܝܟ ܘܰܒܕܺܝ̈ܢܰܝܟ ܐܰܚܳܢܝ. ܩܪܶܒܘ ܪ̈ܳܕܽܘܦܰܝ ܕܥܰܘܠܳܐ ܘܡ̣ܢ ܢܳܡܽܘܣܳܟ ܐܶܬܪܰܚܰܩܘ. ܠܡܰܛܰܪܬܳܐ ܐܡ̣ܪ ܕܩܳܕ̈ܡܳܢ ܗܘ̈ܝ ܥܰܝ̈ܢܰܘܗܝ. ܡܶܛܠ ܕܡ̣ܢ ܩܕܳܡ ܕܢܶܬܬܥܺܝܪܽܘܢ ܟܳܗܢ̈ܐ ܕܰܡܫܰܡܫܺܝܢ ܗܘܰܘ ܒܡܰܫܟܢܳܐ ܕܣܳܗܕܽܘܬܳܐ ܡܩܰܕܶܡ ܗܘܳܐ ܘܩܳܐܷܡ ܥܠ ܒܳܥܽܘܬܳܐ. ܘܥܰܠ ܗܳܝ ܐܡ̇ܪ ܠܘܳܬ ܐܰܠܳܗܳܐ ܕܢܶܫܡܰܥ ܩܳܠܶܗ. ܘܟܰܕ ܒܥܶܠܕ̈ܒܳܒܶܐ ܡܶܬܝܰܕܥܴ̈ܢܶܐ ܩܳܝܡܺܝܢ ܗܘܰܘ ܠܽܘܩܒܰܠ ܙܽܘܡܳܪܶܗ ܘܪܳܕܦܺܝܢ. ܘܗܽܘ ܒܢܳܡܽܘܣܶܗ ܕܡܳܪܝܳܐ ܡܶܬܟܰܬܰܫ ܗܘܳܐ ܥܰܡܗܽܘܢ. ܘܡܰܪܚܶܩ ܠܗܽܘܢ ܡ̣ܢ ܠܘܳܬܶܗ. ܘܗܳܕܐ ܥܰܠ ܕܠܰܘ ܒܪܽܘܚܩܳܐ ܗܘܳܐ ܐܰܠܗܳܐ ܗܰܘ ܕܠܶܗ ܩܳܪܶܐ ܗܘܳܐ ܒܡܰܘܬܶܗ. ܡܶܫܬܰܘܕܶܐ ܕܶܝܢ ܕܰܠܘܳܬܶܗ ܗܘܳܐ ܡܳܪܝܳܐ ܘܳܐܡܰܪ:
ܩܰܪܺܝܒ ܐܰܢܬ ܘܟܽܠܗܽܘܢ ܦܽܘ̈ܩܕܳܢܰܝܟ ܒܩܽܘܫܬܳܐ. ܘܝܰܬܺܝܪܳܐܝ̣ܬ ܠܰܐܝܠܶܝܢ ܕܩܳܪܶܝܢ ܠܳܟ.
ܩܰܕܶܡ̈ܝ ܥܰܝ̈ܢܰܝ ܠܡܰܛܰܪܬܳܐ ܕܶܐܪܢܶܐ ܠܡܶܠܬܳܟ. ܗܳܕܐ ܬܰܪܬܶܝܢ ܙܰܒܢ̈ܝ̣ܢ ܐܰܡܪܳܗ̇ ܢܒܺܝܳܐ ܒܕܽܘܟܬܳܐ ܗܳܕܐ. ܘܓܰܠܝܳܐ ܗܝ ܕܥܰܠ ܛܽܘܝܳܒܳܐ ܕܢܰܦܫܶܗ ܡܫܰܘܕ̈ܥܳܢ ܗܳܠܝܢ ܐܰܘ ܚܠܳܦܰܘܗܝ ܘܰܚܠܳܦ ܐܚܪ̈ܳܢܶܐ ܐܡ̣ܪ ܐܶܢܶܝܢ. ܡܶܛܠ ܕܣܽܘܥܪܳܢܳܐ ܗܘܳܐ ܫܰܦܺܝܪܳܐ. ܥܰܠܗܳܝ ܬܢܳܝܗܝ ܬܰܪܬܶܝܢ ܙܰܒ̈ܢܺܝܢ ܒܳܬܰܪ ܕܶܝܢ ܗܰܘ ܩܰܕܡܳܝܳܐ ܐܡ̣ܪ: ܫܡܰܥ ܩܳܠܝ ܡܳܪܝܳܐ ܐܰܝܟ ܪ̈ܰܚܡܰܝܟ ܗܳܫܐ ܕܶܝܢ ܒܳܬܰܪ ܗܳܢܐ.
ܡܶܢ ܩܕܺܝܡ ܝܶܕܥܶܬ ܣܳܗܕܽܘܬܳܟ ܡܶܛܠ ܕܡܶܢ ܥܳܠܰܡ ܬܰܩܶܢܬܳܗ̇. ܠܰܘ ܗܳܫܳܐ ܕܝܳܕܰܥ ܣܳܗܕܽܘܬܶܗ. ܐܶܠܐ ܡ̣ܢ ܩܕܺܝܡ ܘܠܘ ܡ̣ܢ ܗܳܫܐ ܐܶܬܪܰܥܺܝܬ ܗܳܠܝܢ. ܐܶܠܐ ܡ̣ܢ ܥܳܠܰܡ ܡܰܬܩܢܶܐ ܘܝ̣ܕܺܝܥܳܐ ܣܳܗܕܽܘܬܳܟ ܠܥܰܒ̈ܕܰܝܟ. ܠܘ ܓܶܝܪ ܐܰܝܟ ܒܰܪܢܳܫܳܐ ܡܶܬܝܰܠܕܺܝܢ ܒܳܟ ܙܰܘ̈ܥܶܐ ܚܰܕ̈ܬܶܐ. ܘܟܽܠ ܡܶܕܶܡ ܕܰܗܘܳܐ ܘܕܺܐܝܬ ܠܶܗ ܢܶܗܘܶܐ. ܘܟܽܠܡܶܕܶܡ ܕܶܐܬܡܰܠܰܠ ܐܰܘ ܕܳܐܬܶܐ ܬܽܘܒ ܕܢܶܬܡܰܠܰܠ ܡܶܢܥܳܠܰܡ ܝ̣ܕܺܝܥ ܠܘܳܬܳܟ ܕܠܳܐ ܒܽܘܨܳܪܳܐ. ܘܟܰܕ ܗܳܟܰܢܳܐ ܐܡ̇ܪ ܗܘܳܐ ܢܒܺܝܐ. ܕܝܳܕܰܥ ܘܰܠܘܳܬ ܪܰܒܽܘܬ ܝ̣ܕܰܥܬܳܐ ܕܰܐܝܟ ܗܳܕܐ ܐܶܬܡܰܛܺܝ ܗܘܳܐ. ܐܰܝܟ ܕܰܠܡܶܕܶܡ ܫܰܦܺܝܪ ܡܩܰܪܶܒ ܗܘܳܐ ܡܽܘܟܳܟܶܗ ܩܕܳܡ ܐܰܠܗܳܐ ܘܳܐܡܰܪ.
ܪ– ܚܙܺܝ ܡܽܘܟܳܟܝ ܘܦܰܨܳܢܝ ܡܶܛܠ ܕܢܳܡܽܘܣܳܟ ܠܳܐ ܛܥܺܝܬ. ܕܽܘܢ ܕܺܝܢܝ ܘܦܰܨܳܢܝ ܘܰܒܡܶܠܬܳܟ ܐܰܚܳܢܝ. ܪܰܚܺܝܩ ܗܽܘ ܦܽܘܪܩܳܢܳܐ ܡܶܢ ܥܰܘܴ̈ܠܶܐ. ܡܶܛܠ ܕܠܳܐ ܒܥܰܘ ܦܽܘ̈ܩܕܳܢܰܝܟ. ܕܢܶܬܦܰܨܶܐ ܢܒܺܝܐ ܡܨܰܠܶܐ. ܘܰܕܢܶܗܘܶܐ ܠܶܗ ܕܺܝܢܳܐ ܫܳܐܷܠ. ܕܡ̣ܢ ܬܰܫܢܺܝܩܳܐ ܫܳܐܷܠ ܗܘܳܐ ܦܽܘܨܳܝܳܐ܆ ܘܰܕܢܶܬܦܰܠܰܛ ܡܶܢ ܒܥܶܠܕ̈ܒܳܒܶܐ ܕܚܰܝܱ̈ܝܢ. ܘܡܶܛܠܗܳܕܐ ܐܡܿܪ ܗܘܳܐ ܕܪܰܚܺܝܩ ܗܽܘ ܦܽܘܪܩܳܢܳܐ ܡܶܢ ܥܰܘܴ̈ܠܶܐ. ܗܳܕܐ ܕܠܳܐ ܗܳܘܝܳܐ. ܐܶܠܐ ܡܳܐ ܕܶܐܬܬܚܶܕ ܗܰܘ ܬܰܪܥܳܐ ܪܰܒܳܐ ܕܡܰܠܟܽܘܬܳܐ. ܘܩܳܡ ܠܓܰܘ ܡܶܢܶܗ ܡܳܪܶܐ ܒܰܝܬܳܐ . ܩܳܥܶܐ ܠܘܳܬ ܗܳܢܘܢ ܕܶܐܡܰܪ ܕܠܳܐ ܝܳܕܰܥ ܠܗܽܘܢ. ܒܒܰܪܬ ܩܳܠܳܐ ܟܡܺܝܪܬܳܐ ܐܡ̇ܪ ܠܗܽܘܢ: ܕܰܐܪܚܶܩ ܠܟܽܘܢ ܦܳܠܚܱ̈ܝ ܥܰܘܠܳܐ (ܠܘܩܐ ܝܓ: ܟܙ). ܗܳܪܟܳܐ ܓܝܶܪ ܡܰܪܚܶܩ ܦܽܘܪܩܳܢܳܐ ܡܶܢ ܥܰܘܴ̈ܠܶܐ. ܘܰܟܡܳܐ ܕܰܒܥܳܠܡܳܐ ܗܳܢܐ ܚܢܰܢ ܦܬܺܝܚ ܗܽܘ ܬܰܪܥܳܐ ܕܰܬܝܳܒܽܘܬܳܐ ܠܟܽܠ ܕܨܳܒܶܐ ܕܢܺܚܶܐ. ܘܣܰܓܺܝܐܝ̣ܢ ܪ̈ܰܚܡܶܐ ܥܰܠ ܕܛܳܦܣܺܝܢ ܒܰܬܝܳܒܽܘܬܳܐ. ܐܰܝܟܰܢܳܐ ܕܳܐܦ ܢܒܺܝܐ ܡܶܬܕܰܡܰܪ ܒܗܽܘܢ ܘܳܐܡܰܪ.
ܣܰܓܺܝܐܝܢ ܪ̈ܰܚܡܰܝܟ ܡܳܪܝܳܐ ܘܰܒܕܺܝ̈ܢܰܝܟ ܐܰܚܳܢܝ. ܣܓܺܝܘ ܪ̈ܳܕܽܘܦܰܝ ܘܰܒܥܶܠܕ̈ܒܳܒܰܝ ܘܡܶܢ ܣܳܗܕܽܘܬܳܟ ܠܳܐ ܣܛܺܝܬ. ܘܰܟܡܳܐ ܐܶܢ ܣܰܓܺܝܐܝܢ ܪ̈ܰܚܡܰܝܟ ܕܠܳܐ ܪ̈ܰܚܡܶܐ ܐܰܢܬ ܒܕܺܝܢܳܐ ܥܰܠ ܐܰܝܠܶܝܢ ܕܚܰܝܳܒܺܝܢ ܒܟܺܐܢܽܘܬܳܐ.
ܚܙܺܝܬ ܠܰܡ ܠܥܰܘܴ̈ܠܶܐ ܘܝܶܕܥܶܬ ܕܡܺܐܡܪܳܟ ܠܳܐ ܢܛܰܪܘ. ܚܙܺܝ ܕܪܶܚܡܶܬ ܦܽܘ̈ܩܕܳܢܰܝܟ ܡܳܪܝܳܐ ܘܰܒܛܰܝܒܽܘܬܳܟ ܐܰܚܳܢܝ. ܪܺܝܫ ܡܶܠܬܳܟ ܩܽܘܫܬܳܐ ܘܰܠܥܳܠܰܡ ܟܽܠܗܽܘܢ ܕܺܝ̈ܢܶܐ ܕܙܰܕܺܝܩܽܘܬܳܟ. ܒܗܳܝ ܠܰܡ ܕܰܚܙܺܝܬ ܠܥܰܘܴ̈ܠܶܐ ܕܠܳܐ ܢܛܰܪܘ ܡܺܐܡܪܳܟ. ܠܳܐ ܛܶܢܶܬ ܒܗܽܘܢ ܕܶܐܕܰܡܶܐ ܒܰܥܒܳܕܰܝ̈ܗܘܢ ܘܠܳܐ ܐܶܡܪܶܬ ܕܶܐܥܒܶܕ ܐܰܟܘܳܬܗܽܘܢ. ܐܠܐ ܟܰܕ ܗܶܢܘܢ ܣܳܢܶܝܢ ܦܽܘ̈ܩܕܳܢܰܝܟ. ܐܶܢܳܐ ܠܦܽܘܩ̈ܕܳܢܰܝܟ ܪܳܚܶܡ ܗܘܺܝܬ. ܘܕܺܐܚܶܐ ܒܕܺܝ̈ܢܰܝܟ ܫܳܐܷܠ ܐܢܳܐ. ܘܟܽܠܗܘܢ ܕܺܝ̈ܢܰܝܟ ܙܰܕܺܝܩܽܘܬܳܐ ܐܶܢܽܘܢ ܘܦܽܘܪܩܳܢܳܐ. ܡܳܢܳܐ ܕܶܝܢ ܒܳܬܰܪ ܗܳܠܶܝܢ ܨܳܒܶܐ ܠܡܺܐܡܰܪ. ܥܰܠ ܐܽܘ̈ܠܨܳܢܰܘܗܝ ܡܙܰܡܰܪ ܘܒܰܪܕܽܘܦܝܶܗ ܡܰܘܕܶܐ ܠܘ ܟܕ ܡܒܰܓܶܢ ܘܰܡܪܰܛܶܢ. ܐܶܠܐ ܡܚܰܘܶܐ ܕܰܡܝܰܩܰܪ ܠܕܶܚܠܰܬ ܐܰܠܗܳܐ ܝܰܬܝ̣ܪ ܡܶܢ ܟܽܠܗܽܘܢ ܪܰܘܪ̈ܒܳܢܶܐ ܕܰܐܪܥܳܐ. ܘܥܰܠ ܗܳܝ ܐܡ̇ܪ.
ܫ– ܪܰܘܪ̈ܒܳܢܶܐ ܪܰܕܦܽܘܢܝ ܣܪܺܝܩܳܐܝ̣ܬ ܘܡ̣ܢ ܡܶܠܬܳܟ ܕܚܶܠ ܠܶܒܝ. ܪܰܘܪ̈ܒܳܢܶܐ ܓܶܝܪ ܪܰܕܦܽܘܗܝ ܫܳܐܘܳܠ ܘܪ̈ܰܒܰܝ ܚܰܝ̈ܠܶܐ ܕܥܰܡܶܗ ܗܳܢܘܢ ܕܪܳܕܦܺܝܢ ܗܘܰܘ ܠܶܗ ܠܕܰܘܝܕ ܣܪܺܝܩܳܐܝ̣ܬ. ܘܰܡܣܰܝܒܰܪ ܗܘܳܐ ܒܺܝ̈ܫܳܬܳܐ ܕܰܣܒܰܠ ܡܶܢܗܽܘܢ. ܘܡ̣ܢ ܡܶܠܬܶܗ ܕܡܳܪܝܳܐ ܕܳܚܶܠ ܗܘܳܐ. ܘܰܒܡܺܐܡܪܶܗ ܚܳܕܶܐ ܗܘܳܐ ܐܰܝܟ ܕܶܐܡܰܪ.
ܚܕܺܝܬ ܒܡܺܐܡܪܳܟ ܐܰܝܟ ܗܰܘ ܕܶܐܫܟܰܚ ܒܶܙܬܳܐ ܣܰܓܺܝܐܬܳܐ. ܥܰܘܠܳܐ ܣܢܺܝܬ ܘܰܐܣܠܺܝܬ ܘܢܳܡܽܘܣܳܟ ܪܶܚܡܶܬ. ܘܠܐ ܠܡ ܦܳܚܡܳܐ ܡܰܘܗܰܒܬܳܐ ܕܓܶܠܝܳܢܳܟ ܥܰܡ ܥܽܘܬܪܳܐ ܕܒܶܙܬܳܐ ܕܰܒܥܶܠܕ̈ܒܳܒܶܐ. ܘܠܐ ܣܳܡܶܬ ܠܽܘܩܒܰܠ ܡܺܐܡܪܳܟ ܫܡܰܝܳܢܳܐ. ܐܰܝܠܶܝܢ ܕܡ̣ܢ ܐܰܪܥܳܐ ܐܶܢܶܝܢ. ܡܺܐܡܪܳܐ ܕܳܐܡܰܪ ܗܳܪܟܳܐ ܠܥܰܡܰܢܽܘܐܝܠ ܩܳܪܶܐ. ܗܽܘܝܽܘ ܓܶܝܪ ܡܶܠܬܳܐ ܘܡܺܐܡܪܳܐ ܕܰܐܠܗܳܐ ܐܰܒܳܐ. ܘܟܽܠ ܢܰܦܫܳܐ ܕܒܶܗ ܡܰܪܓܫܳܐ ܡܚܰܕܝܳܐ ܠܳܗ̇ ܡܰܪܓܫܳܢܽܘܬܳܐ ܕܒܶܗ ܝܰܬܺܝܪ ܡܶܢܟܽܠ ܩܶܢܝܴ̈ܢܺܝܢ. ܘܡܰܣܠܶܐ ܥܰܘܠܳܐ ܘܣܳܢܶܐ ܚܛܺܝܬܳܐ ܘܪܳܚܶܡ ܢܳܡܽܘܣܳܐ. ܘܰܚܠܳܦ ܗܳܠܶܝܢ ܕܠܐ ܡܶܬܩܰܕ̈ܝܳܢ. ܡܫܰܒܚܳܢܳܐ ܗܳܘܶܐ ܐܰܝܟ ܕܶܐܡܰܪ ܢܒܺܝܐ.
ܫܒܰܥ ܒܝܰܘܡܳܐ ܫܰܒܰܚܬܳܟ ܥܰܠ ܕܺܝ̈ܢܰܝܟ ܙܰܕܺܝܩܳܐ. ܝܰܘܡܳܐ ܓܶܝܪ ܩܳܪܶܐ ܠܐܺܝܡܳܡܳܐ ܘܠܺܠܝܳܐ. ܫܒܰܥ ܓܶܝܪ ܙܰܒ̈ܢܺܝܢ ܡܬܰܚ̈ܡܳܢ ܫܳܥܷ̈ܐ ܠܬܶܫܒܚܴ̈ܬܳܐ ܕܡܰܙܡܽܘܪ̈ܶܐ ܠܰܐܝܠܶܝܢ ܕܰܒܦܺܝܠܳܘܣܳܦܽܘܬܳܐ ܚܰܝܷ̈ܐ ܕܒܰܡܫܺܝܚܳܐ ܓܒܰܘ ܠܗܽܘܢ ܠܡܶܚܳܐ. ܟܕ ܗܽܘ ܗܳܢܳܐ ܩܳܢܽܘܢܳܐ ܡ̣ܢ ܛܽܘܒܳܢܳܐ ܕܰܘܝܕ ܫܩܰܠ ܫܽܘܪܳܝܳܐ. ܘܥܰܠܗܳܝ ܐܶܡܰܪ ܫܒܰܥ ܙܰܒܢ̈ܝ̣ܢ ܡܫܰܒܰܚ ܗܘܳܐ. ܥܰܠ ܕܰܢܩܰܕܶܡ ܢܰܠܶܦ ܕܗܳܟܰܢܳܐ ܙܳܕܶܩ ܠܶܗ ܠܰܐܝܢܳܐ ܕܡܶܬܐܶܡܶܢ ܩܕܳܡ ܐܰܠܗܳܐ. ܬܘܒ ܢܶܒܥܶܐ ܐܳܦ ܐܪܳܙܳܐ ܕܰܡܛܰܫܰܝ ܒܦܶܬܓܳܡܳܐ ܗܳܢܐ. ܫܒܰܥ ܙܰܒܢ̈ܝ̣ܢ ܒܝܰܘܡܳܐ ܡܫܰܒܰܚ ܗܘܳܐ ܕܰܘܝܕ ܡܶܛܠ ܕܰܢܩܰܕܶܡ ܢܰܘܕܶܐ. ܚܠܳܦ ܡܽܘܟܳܟܶܗ ܕܰܐܠܗܳܐ ܕܰܚܠܳܦܰܝܢ. ܒܫܰܒܥܳܐ ܙܢܰܝܴ̈ܐ ܕܫܽܘ̈ܚܠܳܦܶܐ ܡܶܬܪܰܫܡܳܐ ܡܕܰܒܪܳܢܽܘܬܳܐ ܕܡܶܬܒܰܪܢܫܳܢܽܘܬܶܗ ܕܰܡܫܺܝܚܳܐ. ܕܰܐܝܟ ܐܰܝܟܰܢܳܐ ܐܳܡܰܪ ܐܢܳܐ. ܡܫܰܪܝܳܐ ܓܶܝܪ ܡ̣ܢ ܒܰܛܢܳܐ: ܘܒܳܬܰܪܟܶܢ ܝܰܠܕܳܐ: ܘܒܳܬܰܪ ܝܰܠܕܳܐ ܬܰܪܒܺܝܬܳܐ: ܘܒܳܬܰܪ ܬܰܪܒܺܝܬܳܐ ܡܕܰܒܪܳܢܽܘܬܳܐ: ܘܒܳܬܰܪ ܡܕܰܒܪܳܢܽܘܬܳܐ ܚܰܫܳܐ: ܘܒܳܬܰܪ ܚܰܫܷ̈ܐ ܡܰܘܬܳܐ: ܘܗܳܝܕܶܝܢ ܩܒܽܘܪܬܳܐ. ܗܳܠܝܢ ܫܰܒܥܳܐ ܡܽܘ̈ܟܳܟܶܐ ܣܰܝܒܰܪ ܐܰܠܗܳܐ ܚܠܳܦܰܝܢ ܟܰܕ ܗܘܳܐ ܒܰܪܢܳܫܳܐ ܡܶܛܠ ܐܳܕܳܡ. ܐܡ̣ܪ ܓܶܝܪ ܫܒܰܥ ܒܝܰܘܡܳܐ ܫܰܒܰܚܬܳܟ ܥܰܠ ܕܺܝ̈ܢܰܝܟ ܙܰܕܺܝܩܳܐ. ܘܦܰܫܶܩ ܕܥܰܠ ܕܺܝ̈ܢܰܝܟ ܐܰܝܟ ܐܢܳܫ ܢܺܐܡܰܪ ܠܰܡܥܰܠܝܽܘܬܳܐ ܕܗܰܘ ܟܝܳܢܳܐ ܦܫܺܝܛܳܐ ܘܠܳܐ ܡܶܬܕܰܪܟܳܢܳܐ. ܕܺܝ̈ܢܶܐ ܡܶܬܚܰܫܒܺܝܢ ܣܽܘܥܪ̈ܳܢܶܐ ܕܰܡܕܰܒܪܳܢܽܘܬܳܐ ܕܡܶܬܒܰܣܪܳܢܽܘܬܶܗ. ܠܗܳܠܶܝܢ ܫܰܒܥܳܐ ܕܺܝ̈ܢܶܐ ܦܳܪ̈ܽܘܩܳܝܶܐ. ܒܰܟܬܳܒܳܐ ܕܺܐܝܽܘܒ ܐܶܫܟܰܚܢܰܢ ܕܰܪܫܰܡ ܐܶܢܽܘܢ ܪܽܘܚܳܐ ܩܰܕܺܝܫܳܐ. ܐܰܡܺܝܪ ܬܰܡܳܢ ܡ̣ܢ ܐܺܝܽܘܒ ܒܫܶܬ ܥܴ̈ܩܳܢ ܢܶܦܪܩܳܟ ܘܰܒܗܳܝ ܕܰܫܒܰܥ ܠܳܐ ܢܶܬܩܰܪܰܒ ܠܳܟ ܒܺܝܫܳܐ (ܐܝܘܒ ܗ: ܝܛ). ܐܰܝܟܰܢܳܐ ܕܰܒܫܶܬ ܡܰܠܶܦ ܦܽܘܪܩܳܢܳܐ ܕܰܒܗܳܢܳܐ ܥܳܠܡܳܐ. ܘܥܰܠ ܚܽܘ̈ܕܳܬܶܐ ܕܰܗܘܰܘ ܠܥܳܠܡܳܐ ܒܰܡܕܰܒܪܳܢܽܘܬܳܐ ܕܰܐܠܗܳܐ. ܒܒܰܛܢܶܗ ܕܰܒܟܰܪܣܳܐ ܘܰܒܥܽܘܠܽܘܬܶܗ ܘܰܒܬܰܪܒܺܝܬܶܗ ܘܒܰܡܕܰܒܪܳܢܽܘܬܳܐ ܗܳܝ ܕܡܶܢ ܥܡܳܕܳܐ ܘܰܥܕܰܡܳܐ ܠܰܨܠܺܝܒܳܐ. ܘܰܠܚܰܫ̈ܐ ܦܳܪ̈ܽܘܩܳܝܶܐ. ܘܰܠܡܰܘܬܳܐ ܗܰܘ ܕܰܫܪܳܐ ܘܒܰܛܶܠ ܠܫܽܘܠܛܳܢܶܗ ܕܡܰܘܬܳܐ. ܗܳܝ ܕܶܝܢ ܕܒܰܫܒܰܥ ܕܶܐܡܰܪ. ܠܳܐ ܢܶܩܪܽܘܒ ܠܳܟ ܒܺܝܫܳܐ. ܥܰܠ ܕܰܒܩܰܒܪܳܐ ܐܶܙܕܟܺܝ ܚܒܳܠܳܐ ܘܰܥܪܰܩ ܡܶܢ ܦܰܓܪܶܗ. ܘܕܶܢܚܰܬ ܒܰܩܝܳܡܬܳܐ ܠܳܐ ܡܶܬܚܰܒܠܳܢܽܘܬܳܐ ܠܥܳܠܡܳܐ. ܒܝܰܕ ܠܳܐ ܡܶܬܚܰܒܠܳܢܽܘܬܶܗ ܕܡܳܪܝܳܐ. ܡܰܝܬܶܐ ܒܳܬܰܪܟܶܢ ܘܳܐܡܰܪ:
ܣܰܓܺܝ ܗܽܘ ܫܠܳܡܳܐ ܕܰܐܝܠܶܝܢ ܕܪܳܚܡܺܝܢ ܢܳܡܽܘܣܳܟ. ܘܠܰܝܬ ܠܗܽܘܢ ܟܪܺܝܗܽܘܬܳܐ. ܟܪܺܝܗܽܘܬܳܐ ܕܶܝܢ ܠܰܚܛܺܝܬܳܐ ܩܳܪܶܐ. ܒܪܶܚܡܰܬ ܐܢܳܫܽܘܬܶܗ ܕܶܝܢ ܕܡܳܪܝܳܐ ܡܰܓܗܶܐ ܐܢܳܫ ܡܶܢ ܟܽܘܪܗܳܢܳܐ ܕܥܶܠܰܬ ܚܛܺܝܬܳܐ. ܘܡܳܐ ܕܶܐܬܚܰܪܰܪ ܐܢܳܫ ܡܶܢ ܟܽܘܪܗܳܢܳܐ ܗܳܢܐ. ܩܳܪܶܒ ܗܽܘ ܠܘܳܬ ܣܰܒܪܳܐ ܐܳܦ ܠܦܽܘܠܚܳܢܳܐ ܕܙܰܕܺܝܩܽܘܬܳܐ ܐܰܝܟ ܕܶܐܡܰܪ ܡܙܰܡܪܳܢܳܐ.
ܣܰܒܪܶܬ ܠܦܽܘܪܩܳܢܳܟ ܡܳܪܝܳܐ ܘܦܽܘ̈ܩܕܳܢܰܝܟ ܥܶܒܕܶܬ. ܢܶܛܪܰܬ ܢܰܦܫܝ ܣܳܗܕܽܘܬܳܟ. ܘܟܽܠܗܶܝܢ ܐܽܘܪ̈ܚܳܬܝ ܠܩܽܘܒܠܳܟ. ܘܟܰܕ ܪܰܘܪ̈ܒܳܬܳܐ ܐܶܫܬܰܥܺܝ ܠܰܢ ܢܒܺܝܐ ܒܬܶܫܒܽܘܚܬܳܐ ܗܳܕܐ ܪܰܒܬܳܐ ܘܰܐܘܕܰܥ ܕܠܰܝܬ ܡܶܕܶܡ ܕܪܰܒ ܗܽܘ ܒܥܰܝ̈ܢܰܘܗܝ ܐܰܝܟ ܢܛܽܘܪܽܘܬ ܦܽܘ̈ܩܕܳܢܶܐ ܕܰܐܠܗܳܐ. ܡܦܺܝܣ ܗܳܫܐ ܕܰܩܪܶܒ ܠܫܽܘܠܳܡܳܐ ܕܬܶܥܽܘܠ ܬܶܫܒܽܘܚܬܶܗ ܩܕܳܡ ܡܳܪܝܳܐ ܘܕܳܡܝܳܐ ܡܶܠܬܳܐ ܕܡܶܛܠܳܬܳܗ̇ ܕܗܳܕܶܐ ܬܶܫܒܽܘܚܬܳܐ. ܩܕܳܡ ܡܳܪܝܳܐ ܬܶܬܩܰܒܰܠ ܘܥܰܠ ܗܳܝ ܐܶܡܰܪ:
ܬ– ܬܶܥܽܘܠ ܬܶܫܒܽܘܚܬܝ ܩܕܳܡܰܝܟ ܡܳܪܝܳܐ ܘܰܒܡܶܠܬܳܟ ܐܰܚܳܢܝ. ܬܶܥܽܘܠ ܒܳܥܽܘܬܝ ܩܕܳܡܰܝܟ ܡܳܪܝܳܐ ܘܰܒܡܺܐܡܪܳܟ ܦܰܨܳܢܝ. ܓܰܠܝܳܐ ܗܝ ܓܶܝܪ ܕܠܰܝܬ ܠܶܗ ܡܶܠܬܳܐ ܕܰܐܒܳܐ. ܐܠܐ ܗܰܘ ܕܶܐܡܰܪ ܓܰܒܝܳܐ ܝܽܘܚܰܢܳܢ. ܒܪܺܝܫ ܡܰܟܬܒܳܢܽܘܬܶܗ: ܒܪܺܝܫܺܝܬ ܐܝ̣ܬܰܘܗܝ ܗܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܺܝܬܰܘܗܝ ܗܘܳܐ ܠܘܳܬ ܐܰܠܗܳܐ. ܘܰܐܠܗܳܐ ܐܺܝܬܰܘܗܝ ܗܘܳܐ ܗܽܘ ܡܶܠܬܳܐ (ܝܘܚܢܢ ܐ: ܐ). ܒܗܳܢܐ ܡܶܠܬܳܐ ܫܶܐܠ ܗܘܳܐ ܕܰܘܝܕ ܕܢܺܚܶܐ. ܘܒܶܗ ܡܦܺܝܣ ܗܘܳܐ ܕܢܶܬܦܰܨܶܐ. ܘܰܐܝܬܺܝ ܘܶܐܡܰܪ:
ܢܰܒܰܥ ܠܶܫܳܢܝ ܡܺܐܡܪܳܟ ܡܶܛܠ ܕܟܽܠܗܽܘܢ ܦܽܘܩ̈ܕܳܢܰܝܟ ܒܙܰܕܺܝܩܽܘܬܳܐ. ܠܶܗ ܡܦܺܝܣ ܕܢܰܒܰܥ ܠܶܫܳܢܶܗ ܒܶܝܬ ܡܶܠܬܳܐ ܘܰܠܡܺܐܡܪܳܐ. ܐܶܠܐ ܡܳܕܶܝܢ ܠܰܝܬ ܦܽܘܪܳܫܳܐ ܒܣܽܘܟܳܠܳܐ. ܘܠܳܐ ܓܝܪ ܡܶܠܬܳܐ ܕܠܐ ܡܺܐܡܪܳܐ ܘܠܳܐ ܡܺܐܡܪܳܐ ܒܶܠܥܳܕ ܡܶܠܬܳܐ. ܘܰܒܕܽܘܟ̈ܝܳܬܳܐ ܣܰܓܺܝ̈ܬܳܐ ܐܶܫܟܰܚܢܰܢ ܒܰܟܬܳܒ̈ܐ ܩܰܕܺܝ̈ܫܶܐ ܕܡܺܐܡܪܳܐ ܡܟܰܢܶܝܢ ܠܶܗ ܠܥܰܡܰܢܽܘܐܝܠ. ܗܳܟܰܢܳܐ ܘܳܐܦ ܡܶܠܬܳܐ.
ܘܰܢܡܱ̈ܠܠܳܢ ܣܶܦܘܴ̈ܬܝ ܬܶܫܒ̈ܚܳܬܳܟ ܟܰܕ ܬܰܠܶܦܰܝܢܝ ܦܽܘ̈ܩܕܳܢܰܝܟ. ܪܰܘܪܒܳܐܝ̣ܬ ܘܰܫܒܺܝܚܳܐܝ̣ܬ ܡܩܰܠܶܣ ܗܘܳܐ ܠܗܽܘܢ ܠܦܽܘܩܕܳܢܰܘ̈ܗܝ ܕܰܐܠܳܗܳܐ. ܟܕ ܩܳܐܶܡ ܩܕܳܡ ܣܳܦܪ̈ܶܐ ܘܟܳܗܢ̈ܐ. ܘܰܒܙܽܘܡܳܪܳܐ ܢܰܓܺܝܪܳܐ ܕܬܶܫܒܽܘܚܬܳܐ ܗܳܕܐ ܐܰܪܺܝܟܬܳܐ ܩܳܥܶܐ ܗܘܳܐ ܕܠܰܝܬ ܐܰܝܟ ܕܺܝ̈ܢܰܘܗܝ ܕܡܳܪܝܳܐ. ܘܙܰܕܺܝܩܺܝܢ ܐܶܢܘܢ ܘܟܺܐܢܺܝܢ. ܘܰܬܪܺܝܨܺܝܢ ܟܽܠܗܽܘܢ ܢܳܡܽܘ̈ܣܰܘܗܝ. ܘܰܡܩܰܦܰܚ ܗܘܳܐ ܒܩܴ̈ܠܶܐ ܗܳܠܝܢ ܠܫܰܒܗܪܳܢܽܘܬܳܐ ܕܰܐܝܠܶܝܢ ܕܥܳܫܩܺܝܢ ܠܗܽܘܢ. ܘܠܰܐܝܠܶܝܢ ܕܩܳܪܶܝܢ ܗܘܰܘ ܠܕܺܝ̈ܢܰܘܗܝ ܕܡܳܪܝܳܐ ܠܐ ܙܰܕܺܝ̈ܩܶܐ ܘܠܳܐ ܬܪ̈ܺܝܨܶܐ. ܘܕܰܢܡܱ̈ܠܠܳܢ ܣܶܦ̈ܘܳܬܶܗ ܬܶܫܒܚܴ̈ܬܶܗ ܕܡܳܪܝܳܐ ܘܡܶܫܬܘܶܐ ܕܢܺܐܠܰܦ ܬܶܫܒܚ̈ܬܶܗ ܘܦܽܘܩܕܳܢܰܘܗܝ. ܦܽܘܩܕܳܢ̈ܐ ܓܝܪ ܠܘ ܗܳܢܘܢ ܕܰܒܝܰܕ ܡܽܘܫܶܐ ܐܶܬܓܠܺܝܘ. ܠܗܳܠܝܢ ܕܶܝܢ ܝܰܠܺܝܦ ܗܘܳܐ. ܐܠܐ ܠܗܳܠܝܢ ܕܰܒܝܕ ܥܰܡܰܢܽܘܐܝܠ ܕܝܶܠܦܰܬ ܐܰܪܥܳܐ. ܟܕ ܗܘܳܐ ܠܶܗ ܡܥܰܕܪܳܢܳܐ ܒܝܰܡܺܝܢܶܗ ܐܰܝܟ ܕܰܡܨܰܠܶܐ:
ܬܥܰܕܪܰܢܝ ܐܺܝܕܳܟ ܡܶܛܠ ܕܰܨܒܺܝܬ ܒܦܽܘ̈ܩܕܳܢܰܝܟ. ܡܶܛܠ ܗܳܕܐ ܥܰܕܰܪܰܝܢܝ. ܥܰܠ ܕܰܒܦܽܘ̈ܩܕܳܢܰܝܟ ܨܳܒܶܐ ܐܢܳܐ. ܚܽܘܪ ܠܰܡ ܕܢܳܛܰܪ ܐܢܳܐ ܦܽܘܩ̈ܕܳܢܰܝܟ. ܘܠܐ ܬܶܟܠܶܐ ܡܶܢܝ ܥܽܘܕܪܳܢܳܟ. ܕܰܐܝܟ ܗܳܕܐ ܓܝܪ ܨܠܽܘܬܳܐ ܡܥܳܕܺܝܢ ܠܰܡܨܰܠܳܝܽܘ ܩܰܕܺܝ̈ܫܶܐ. ܐܳܦ ܐܺܝܽܘܒ ܗܰܘ ܡܰܓܕܠܳܐ ܚܰܣܺܝܢܳܐ ܘܠܳܐ ܡܶܬܟܰܒܫܳܢܳܐ. ܕܰܐܝܟ ܗܳܕܐ ܡܶܠܬܳܐ ܐܡ̇ܪ ܗܘܳܐ ܩܕܳܡ ܪ̈ܳܚܡܰܘܗܝ. ܐܶܠܐ ܐܶܙܕܰܕܩܶܬ ܠܳܐ ܐܶܬܥܢܶܐ (ܐܝܘܒ ܛ: ܝܗ). ܘܗܳܕܶܐ ܕܶܐܡܰܪ ܛܽܘܒܳܢܳܐ ܕܰܘܝܕ. ܡܶܛܠ ܕܰܨܒܺܝܬ ܒܦܽܘܩ̈ܕܳܢܰܝܟ. ܐܶܬܥܰܕܰܪ ܡܶܢ ܐܝ̣ܕܳܟ. ܐܺܝܕܶܗ ܕܶܝܢ ܕܰܐܒܳܐ ܗܽܘܝܽܘ ܡܳܪܢ ܕܠܶܗ ܡܣܰܟܶܐ ܗܘܳܐ ܢܒܺܝܳܐ. ܐܝܟ ܕܶܐܡܰܪ:
ܣܰܟܝܰܬ ܢܰܦܫܝ ܠܦܽܘܪܩܳܢܳܟ ܘܰܒܢܳܡܽܘܣܳܟ ܪܢܺܝܬ. ܐܰܝܟ ܗܳܝ ܕܶܐܬܐܰܡܪܰܬ ܒܗܳܠܶܝܢ ܕܡܶܢ ܠܥܶܠ ܐܝ̣ܬܶܝܗ̇ ܐܳܦ ܗܳܕܐ ܩܕܳܡ ܩܰܠܝ̣ܠ ܓܝܪ ܐܡ̣ܪ. ܣܰܟܝܰܬ ܢܰܦܫܝ ܠܦܽܘܪܩܳܢܳܟ. ܗܳܝ ܓܶܝܪ ܕܰܒܪܶܓܬܳܐ ܢܶܗܘܶܐ ܐܢܳܫ ܕܛܳܥܶܐ. ܗܳܝ ܕܰܡܣܰܟܳܝܘ ܢܣܰܟܶܐ ܠܶܗ. ܫܰܦܺܝܪ ܡܳܕܶܝܢ ܟܰܕ ܡܡܰܨܰܥ ܐܡ̇ܪ ܪܶܓܰܬ ܢܰܦܫܝ. ܘܟܕ ܩܪܶܒ ܠܘܳܬ ܫܽܘܠܳܡܳܐ. ܣܳܡܶܗ ܒܣܽܘܟܳܠܳܗ̇ ܕܪܳܐܶܓ ܗܘܳܐ ܟܰܕ ܒܥܳܐ ܕܰܒܚܰܝ̈ܐ ܕܠܳܐ ܫܽܘܠܳܡܳܐ ܢܫܰܒܰܚ. ܠܗܰܘ ܕܰܒܪܶܓܬܶܗ ܝܳܬܒܳܐ ܗܘܳܬ ܢܰܦܫܶܗ ܟܕ ܐܡ̇ܪ.
ܬܺܚܶܐ ܢܰܦܫܝ ܘܰܬܫܰܒܚܳܟ ܘܕܺܝܢܳܟ ܗܽܘ ܢܥܰܕܪܰܢܝ. ܘܰܒܗܳܕܐ ܠܚܰܝ̈ܐ ܠܳܐ ܡܳܝܽܘ̈ܬܶܐ ܡܦܺܝܣ ܗܘܳܐ. ܘܡܶܢ ܗܳܝ ܕܒܳܬܪܳܗ̇.
ܐܶܬܛܥܺܝܬ ܐܰܝܟ ܢܶܩܝܳܐ ܐܰܒܺܝܕܬܳܐ ܒܥܺܝܘܗܝ ܠܥܰܒܕܳܟ. ܡܶܛܠ ܕܦܽܘܩ̈ܕܳܢܰܝܟ ܠܳܐ ܛܥܺܝܬ. ܡܶܛܠܡܳܢܐ ܢܶܩܝܳܐ ܘܠܰܘ ܐܰܝܟ ܥܶܪܒܳܐ. ܥܶܪܒܳܐ ܕܶܝܢ ܠܳܐ ܡܶܬܟܰܢܶܐ ܐܰܒܺܝܕܳܐ ܐܰܝܟ ܕܡ̣ܢ ܟܬܳܒ̈ܐ ܢܶܩܝܳܐ ܕܶܝܢ ܡܶܬܩܰܪܝܳܐ ܗܝ ܒܰܫܡܳܐ ܗܳܢܐ. ܐܡ̣ܪ ܓܶܝܪ ܢܒܺܝܳܐ: ܢܶܩܝܳܐ ܛܥܺܝܬܳܐ ܝ̣ܣܪܳܐܝܠ ܒܪܰܡ ܕܶܝܢ ܕܰܫܪܳܪܳܐ ܢܺܐܡܰܪ. ܢܶܩܝܳܐ ܛܥܺܝܬܳܐ ܗܘܳܬ ܝ̣ܣܪܳܐܝܠ ܟܽܠܗ̇ ܐܢܳܫܽܘܬܳܐ. ܘܠܰܝܬ ܗܘܳܐ ܕܒܳܥܶܐ ܗܘܳܐ ܠܗܰܘ ܕܶܐܒܰܕ. ܡܳܪܳܗ̇ ܕܥܳܢܴ̈ܐ ܗܘܳܐ ܥܶܪܒܳܐ ܘܰܢܚܶܬ ܗܘܳܐ ܫܰܩܠܶܗ ܠܰܐܒܺܝܕܳܐ ܥܰܠ ܟܰܬܦܴ̈ܬܶܗ ܘܒܰܩܢܽܘܡܶܗ ܚܰܝܕܶܗ ܠܗܰܘ. ܟܕ ܒܛܺܝܠܽܘܬܳܐ ܣܰܓܺܝ ܚܰܘܺܝ ܥܠܰܘܗܝ. ܘܥܰܠܝܶܗ ܠܘܳܬ ܬܪܽܘܢܽܘܣ ܕܪܰܒܽܘܬܳܐ. ܘܰܥܒܰܕ ܚܰܕܽܘܬܳܐ ܒܦܽܘܢܳܝܶܗ ܕܰܟܝܳܢܳܐ ܐܢܳܫܳܝܳܐ ܠܘܳܬ ܚܰܝ̈ܐ. ܠܟܽܠܗܽܘܢ ܡܰܠܰܐܟ̈ܐ ܩܰܕܺܝ̈ܫܶܐ ܕܒܰܫܡܰܝܳܐ ܡܳܕܶܝܢ ܐܳܦ ܕܰܘܝܕ ܢܒܺܝܐ ܡܶܢܶܗ ܟܰܕ ܡܶܢ ܗܰܘ ܥܶܪܒܳܐ ܕܰܐܒܺܝܕ ܗܘܳܐ ܘܶܐܫܬܟܰܚ ܐܝ̣ܬܰܘܗܝ ܐܳܦ ܗܽܘ ܘܥܰܠܗܳܝ ܐܡ̇ܪ ܕܳܐܦ ܐܶܢܳܐ ܡ̣ܢ ܗܰܘ ܟܝܳܢܳܐ ܕܶܐܒܰܕ ܒܰܥܒܳܪ ܦܽܘܩܕܳܢܳܐ ܐܝ̣ܬܰܝ. ܐܠܐ ܒܳܟ ܪܳܥܝܳܐ ܛܳܒܳܐ ܐܶܬܒܥܶܐ ܘܶܐܫܬܟܰܚ ܠܚܰܝ̈ܐ. ܥܡ ܗܳܢܘܢ ܕܠܐ ܛܥܰܘ ܦܽܘܩܕܳܢܳܟ. ܘܰܐܘܕܶܐ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܰܬܡܳܢܬܰܥܣܰܪ
ܡܙܡܘܪܐ ܕܡܐܐ ܘܬܫܥܣܪ
ܡܰܘܕܰܥ ܕܰܒܝܰܕ ܐܘܠܨܳܢ̈ܐ ܫܘܰܘ ܢܒܺܝܷ̈ܐ ܘܙܰܕܺܝ̈ܩܶܐ ܠܓܶܠܝ̈ܢܶܐ ܢܰܗܺܝܪ̈ܶܐ ܕܰܒܝܰܕ ܡܳܪܰܢ.
ܦܰܘܠܽܘܣ ܐܰܠܗܳܝܐ ܟܬܰܒ ܠܘܳܬ ܩܽܘܪ̈ܺܝܢܬܳܝܶܐ ܐܡ̣ܪ ܗܘܳܐ܆ ܒܟܽܠܡܶܕܶܡ ܢܚܰܘܶܐ ܢܰܦܫܰܢ ܕܰܡܫܰܡ̈ܫܳܢܶܐ ܚܢܰܢ ܕܰܡܫܺܝܚܳܐ. ܒܰܡܣܰܝܒܪܳܢܽܘܬܳܐ ܣܰܓܺܝܐܬܳܐ: ܘܒܽܐܘ̈ܠܨܳܢܶܐ: ܘܒܰܐܢܰܢ̈ܩܰܣ: ܘܒܰܚܒܽܘ̈ܫܝܶܐ: ܘܰܒܢܶܓ̈ܕܶܐ (ܒ ܩܘܪ̈ܢܬܝܐ ܘ: ܕ-ܗ) ܘܰܐܚܪ̈ܳܢܝܳܬܳܐ ܕܒܳܬܰܪܟܶܢ ܩܶܛܠܳܐ ܘܡܰܘܬܳܐ. ܕܠܳܐ ܐܢܳܫ ܡܚܰܘܶܐ ܢܰܦܫܶܗ ܕܺܐܝܬܰܘܗܝ ܒܚܺܝܪܳܐ ܕܰܡܫܺܝܚܳܐ ܒܶܠܥܳܕ ܡܣܰܝܒܪܳܢܽܘܬܳܐ ܕܽܐܘ̈ܠܨܳܢܶܐ. ܛܽܘܒܳܢܳܐ ܕܶܝܢ ܕܰܘܝܕ ܡܙܰܡܰܪ ܟܰܕ ܐܳܡܰܪ:
ܠܡܳܪܝܳܐ ܒܽܐܘܠܨܳܢܝ ܩܪܺܝ̇ܬ. ܘܰܥܢܳܢܝ ܡܳܪܝܳܐ ܘܦܰܨܳܗ̇ ܠܢܰܦܫܝ. ܘܗܳܠܶܝܢ ܒܢܴ̈ܬ ܩܴ̈ܠܶܐ ܕܳܡܝܴ̈ܢ܆ ܕܡܶܢ ܐܽܘܠܨܳܢܳܐ ܣܰܓܺܝܐܐ ܩܪܳܐ ܠܡܳܪܝܳܐ. ܐܳܡܪܺܝܢ ܐܰܝܠܝܢ ܕܰܒܠܶܫܳܢܳܐ ܥܶܒܪܳܝܳܐ ܡܕܰܪܫܺܝܢ ܚܰܬܺܝܬܳܐܝ̣ܬ. ܕܡܰܙܡܽܘܪܳܐ ܗܳܢܐ ܕܡܰܣܩܳܢܳܐ ܡܶܛܠ ܬܰܬܢܺܝ ܫܰܠܺܝܛܳܐ ܟܕ ܫܰܕܰܪ ܗܽܘ ܘܚܰܒܪ̈ܰܘܗܝ ܥܰܠ ܥܰܙܪܳܐ ܕܢܶܩܛܠܺܝܘܗܝ ܒܢܶܟܠܳܐ ܐܰܡܺܝܪ (ܥܰܙܪܰܐ ܗ: ܓ). ܡܩܰܕܶܡ ܗܘܳܐ ܕܰܘܝܕ ܘܳܐܡܰܪ ܗܘܳܐ ܠܥܰܡܳܐ ܐܰܝܠܶܝܢ ܕܰܗܘܱ̈ܝ ܒܳܬܰܪ ܙܰܒܢܷ̈ܐ ܡ̣ܢ ܒܺܝܫܽܘܬܳܐ ܕܥܰܡܡ̈ܐ ܥܽܘܪ̈ܠܶܐ. ܘܝܰܬܺܝܪܳܐܝ̣ܬ ܡ̣ܢ ܒܳܒܠܳܝܷ̈ܐ. ܒܪܰܡ ܕܶܝܢ ܢܥܰܩܶܒ ܚܢܰܢ ܘܢܶܚܙܶܐ. ܕܰܐܝܟܰܢܳܐ ܠܰܘ ܒܗܳܕܐ ܒܰܠܚܽܘܕ ܚܳܐܱܪ ܢܺܝܫܶܗ ܕܰܡܙܰܡܪܳܢܳܐ. ܕܳܡܝܳܐ ܓܶܝܪ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܫܰܥܶܣܪ̈ܶܐ ܕܰܠܘܳܬ ܟܽܠܗܘܢ ܩܰܕܺܝ̈ܫܶܐ ܚܳܝܪܳܐ ܒܣܽܘܟܳܠܳܐ. ܘܡܶܛܠ ܗܳܕܐ ܢܶܒܥܶܐ ܐܰܝܟܰܢܳܐ ܒܽܐܘ̈ܠܨܳܢܶܐ ܩܳܪܶܝܢ ܗܘܰܘ ܟܺܐܢ̈ܐ ܠܡܳܪܝܳܐ. ܘܥܳܢܶܐ ܠܗܽܘܢ ܘܰܡܦܰܨܶܐ. ܢܫܰܪܶܐ ܕܶܝܢ ܡ̣ܢ ܠܘܬ ܝܰܥܩܽܘܒ ܗܰܘ ܐܰܒܳܐ ܕܫܰܒ̈ܛܶܐ ܐܳܦ ܗܽܘ ܓܝܪ ܒܽܐܘܠܨܳܢܳܐ ܩܪܳܐ ܠܡܳܪܝܳܐ. ܘܦܰܨܝܶܗ ܡ̣ܢ ܚܶܡܬܳܐ ܕܥܺܝܣܽܘ ܐܰܚܽܘܗܝ ܛܳܠܽܘܡܳܐ ܘܙܳܕܶܩ ܕܰܢܫܰܪܰܪ ܠܦܶܬܓܳܡܳܐ ܗܳܢܐ. ܠܡܳܪܝܳܐ ܒܽܐܘܠܨܳܢܝ ܩܪܺܝܬ ܘܰܥܢܳܢܝ ܡܳܪܝܳܐ ܘܦܰܨܳܗ̇ ܠܢܰܦܫܝ. ܘܡܳܢܳܐ ܐܡ̇ܪ ܗܘܳܐ ܝܰܘܣܶܦ ܗܰܘ ܫܰܦܺܝܪܳܐ ܘܟܺܐܢܳܐ ܒܓܰܘ ܓܽܘܒܳܐ ܚܰܪܒܳܐ ܕܒܶܗ ܐܶܫܬܕܺܝ ܗܘܳܐ. ܡ̣ܢ ܐܰܚܰܘ̈ܗܝ ܥܶܣܪܳܐ. ܘܬܘܒ ܘܟܕ ܩܳܡܰܬ ܥܠܰܘܗܝ ܚܶܡܬܳܐ ܘܡܶܪܬܳܐ ܕܗܳܝ ܡܶܨܪܳܝܬܳܐ ܟܕ ܢܦܰܠ ܒܶܝܬ ܐܰܣܺܝܪ̈ܶܐ. ܘܗܳܐ ܬܰܪܬܶܝܢ ܒܢܴ̈ܬ ܩ̈ܠܐ ܡܶܬܚܰܙܝܳܐ ܕܶܐܡܪ. ܘܗܳܝ ܕܰܩܪܳܐ ܠܡܳܪܝܳܐ ܒܽܐܘܠܨܳܢܳܐ ܘܰܥܢܳܝܗܝ ܘܦܰܨܺܝ ܠܢܰܦܫܶܗ ܘܒܳܬܰܪ ܗܳܕܶܐ ܩܪܳܐ ܗܘܳܐ ܠܡܳܪܝܳܐ ܒܽܐܘܠܨܳܢܶܗ ܐܳܦ ܛܽܘܒܳܢܳܐ ܡܽܘܫܶܐ܆ ܟܕ ܒܥܳܐ ܦܶܪܥܽܘܢ ܠܡܶܩܛܠܶܗ. ܘܰܥܪܰܩ ܘܰܗܘܳܐ ܒܰܐܪܥܳܐ ܕܡܶܕܝܰܢ ܬܰܘܬܳܒܳܐ. ܬܘܒ ܟܕ ܡܰܦܶܩ ܠܥܰܡܳܐ ܡܶܢ ܡܶܨܪܶܝܢ ܡ̣ܢ ܐܽܘ̈ܠܨܳܢܶܐ ܘܥܳܩ̈ܬܳܐ ܐܶܬܦܰܨܺܝ ܗܘܳܐ ܘܶܐܫܬܘܺܝ ܗܘܳܐ ܠܓܶܠܝܴ̈ܢܶܐ ܢܰܗܺܝܪ̈ܐ. ܘܒܳܬܰܪ ܐܽܘܠܨܳܢܳܐ ܣܰܓܺܝܐܐ ܘܩܰܕܡܳܝܐ. ܩܰܒܶܠ ܗܘܳܐ ܓܝܪ ܓܶܠܝܳܢܳܐ ܥܠ ܪܺܝܫ ܛܽܘܪܳܐ. ܘܬܘܒ ܐܶܬܚܙܺܝ ܠܶܗ ܡܰܠܐܟܳܐ ܒܰܕܡܽܘܬ ܢܽܘܪܳܐ ܕܫܰܪܝܳܐ ܗܘܳܬ ܒܓܰܘ ܣܰܢܝܳܐ. ܟܕ ܢܳܛܰܪ ܡ̣ܢ ܝܰܩܕܳܢܳܐ ܕܫܰܠܗܶܒܺܝܬܳܐ ܗܳܝ ܐܰܠܳܗܳܝܬܳܐ. ܘܰܫܡܰܥ ܗܘܳܐ ܬܘܒ ܩܳܠܐ ܕܰܐܠܗܳܐ ܘܩܰܒܶܠ ܪܽܘܚܳܐ ܕܰܢܒܺܝܽܘܬܳܐ. ܘܶܐܬܝܗܶܒ ܠܗ ܫܡܳܐ ܕܰܐܠܗܳܐ (ܡܦܩܢܐ ܙ: ܐ). ܕܠܘ ܐܝܟ ܒܰܪܢܳܫܳܐ ܢܶܚܽܘܬ ܠܡܶܨܪܶܝܢ. ܐܶܠܐ ܐܰܝܟ ܐܰܠܗܳܝܳܐ ܕܫܰܠܺܝܛ ܠܡܶܣܥܰܪ ܟܠ ܕܨܳܒܶܐ ܗܳܠܝܢ ܩܰܒܶܠ. ܘܶܐܬܬܰܘܣܰܦ ܠܶܗ ܓܶܠܝܴ̈ܢܶܐ. ܕܰܡܥܰܠܶܝܢ ܡ̣ܢ ܩܰܕܡܳܝ̈ܐ. ܘܡ̣ܢ ܒܳܬܰܪ ܕܰܢܚܶܬ ܠܡܶܨܪܶܝܢ ܘܰܚܙܳܝܗܝ ܠܐܽܘܠܨܳܢܳܐ ܐܰܦ̈ܝ̣ܢ ܒܰܐܦ̈ܝ̣ܢ. ܘܶܐܡܰܪ ܠܗ ܦܶܪܥܽܘܢ ܕܠܳܐ ܬܰܘܣܶܦ. ܬܶܬܚܙܶܐ ܠܝ̣ ܕܠܐ ܐܶܡܽܘܬ (ܡܦܩܢܐ ܝ: ܟܚ). ܒܳܬܰܪ ܗܳܢܐ ܐܽܘܠܨܳܢܳܐ ܕܩܰܪܺܝܒ ܗܘܳܐ ܥܕܰܡܳܐ ܠܢܰܦܫܳܐ. ܩܪܳܐ ܠܡܳܪܝܳܐ ܘܶܐܬܦܰܨܺܝ. ܘܩܰܒܶܠ ܓܶܠܝܳܢܳܐ ܕܡܰܦܰܩܬܳܐ ܕܟܽܠܶܗ ܥܰܡܳܐ ܡ̣ܢ ܡܶܨܪܶܝܢ. ܣܰܕܶܩ ܗܘܳܐ ܝܰܡܳܐ. ܥܒܰܕ ܐܽܘܪܚܳܐ ܒܝܰܡܳܐ. ܡܚܰܘܶܐ ܗܘܳܐ ܫܒܺܝ̈ܠܶܐ ܒܡܶܨܥܰܬ ܬܗܽܘ̈ܡܶܐ. ܡܰܚܶܬ ܗܘܳܐ ܡܰܢܢܳܐ. ܡܰܣܶܩ ܗܘܳܐ ܣܰܠܘܰܝ ܬܪܰܥ ܗܘܳܐ ܛܰܪܳܢܳܐ. ܡܰܦܶܩ ܗܘܳܐ ܡܰܝܴ̈ܐ. ܐܳܬܶܐ ܗܘܳܐ ܠܛܽܘܪ̈ܳܢܶܐ ܕܣܺܝܢܰܝ ܙܳܟܶܐ ܗܘܳܐ ܠܥܰܡܠܺܝܩ. ܣܳܠܶܩ ܗܘܳܐ ܠܛܽܘܪܳܐ ܒܰܥܢܳܢܳܐ. ܡܩܰܒܶܠ ܗܘܳܐ ܚܙܳܬܳܐ ܕܠܳܐ ܡܶܬܡܰܠܠܳܐ. ܦܣܰܠ ܗܘܳܐ ܠܽܘܚ̈ܐ. ܨܳܡ ܗܘܳܐ ܨܰܘܡܳܐ ܕܰܐܪܒܥܺܝܢ ܝܰܘ̈ܡܺܝܢ. ܡܶܬܦܩܶܕ ܗܘܳܐ ܡܶܢ ܡܳܪܝܳܐ ܥܠ ܥܒܳܕܳܐ ܕܡܰܫܟܢܳܐ. ܫܳܚܶܩ ܗܘܳܐ ܥܶܓܠܳܐ. ܡܶܙܕܰܗܶܐ ܗܘܳܐ ܦܰܪܨܽܘܦܶܗ ܡܩܰܒܶܠ ܗܘܳܐ ܐܝ̣ܕܳܐ ܕܟܳܗܢܽܘܬܳܐ ܒܰܡܥܰܪܬܳܐ ܡ̣ܢ ܝܰܡܺܝܢܳܐ ܕܰܐܠܗܳܐ. ܕܛܰܦܚܰܬ ܛܽܘܪ̈ܶܐ ܘܰܫܡܰܝܳܐ (ܐܫܥܝܐ ܡܚ: ܝܓ). ܘܪܰܘܪ̈ܒܳܬܳܐ ܐܚܪ̈ܳܢܝܳܬܳܐ ܕܩܰܒܶܠ ܐܶܢܝܢ ܓܰܠܝܳܐܝ̣ܬ ܡ̣ܢ ܒܳܬܰܪ ܐܽܘܠܨܳܢ̈ܐ ܣܰܓܺܝ̈ܐܐ. ܘܒܳܬܰܪ ܗܳܢܐ ܩܰܕܺܝܫܳܐ. ܩܪܳܐ ܗܘܳܐ ܕܶܝܢ ܠܡܳܪܝܳܐ ܒܽܐܘܠܨܳܢܳܐ ܘܰܥܢܳܝܗܝ ܐܳܦ ܝܶܫܽܘܥ ܒܰܪܢܽܘܢ ܕܩܰܒܶܠ ܡܕܰܒܪܳܢܽܘܬܳܐ ܡ̣ܢ ܒܳܬܪܶܗ ܟܕ ܐܶܬܪܡܺܝ ܒܰܩܪܳܒܳܐ ܒܽܐܘܠܨܳܢܳܐ ܕܰܟܢܰܥܢܳܝ̈ܐ. ܐܡ̇ܪ ܗܘܳܐ ܬܘܒ: ܠܡܳܪܝܳܐ ܒܽܐܘܠܨܳܢܝ ܩܪܺܝ̇ܬ. ܘܰܥܢܳܝܗܝ ܡܳܪܝܳܐ ܘܦܰܨܳܗ̇ ܠܢܰܦܫܝ. ܐܳܦ ܐܺܠܺܝܳܐ ܬܘܒ ܗܰܘ ܪܰܒܳܐ. ܡ̣ܢ ܒܳܬܰܪ ܕܨܰܠܺܝ ܘܰܢܚܶܬ ܡܶܛܪܳܐ ܥܠ ܕܰܩܛܰܠ ܠܰܢܒܺܝܰܝ̈ ܒܰܥܠܳܐ. ܥܪܰܩ ܡ̣ܢ ܩܕܳܡ ܓܙܳܡܳܗ̇ ܕܺܐܝܙܒܺܝܠ ܘܶܐܙܰܠ ܠܡܰܕܒܪܳܐ ܘܫܶܐܠ ܡܰܘܬܳܐ ܠܢܰܦܫܶܗ (ܐ ܡܠܟ̈ܐ ܝܛ: ܕ). ܘܰܗܘܳܐ ܒܽܐܘܠܨܳܢܳܐ ܕܨܰܘܡܳܐ ܐܰܪܒܥܺܝܢ ܝܰܘ̈ܡܺܝܢ.
ܘܟܕ ܗܘܳܐ ܒܰܡܥܰܪܬܳܐ ܘܰܩܪܳܐ ܠܡܳܪܝܳܐ ܘܰܥܢܳܝܗܝ ܒܩܳܠܳܐ ܕܡܰܡܠܠܳܐ ܪܰܟܺܝܟܳܐ ܘܰܡܚܰܘܶܐ ܗܘܳܐ ܠܶܗ ܓܶܠܝܳܢܳܐ ܢܰܗܺܝܪܳܐ ܘܰܡܦܰܨܶܐ ܗܘܳܐ ܠܢܰܦܫܶܗ. ܟܕ ܡܰܣܶܩ ܠܶܗ ܒܡܰܪܟܰܒܬܳܐ ܠܰܫܡܰܝܳܐ. ܘܒܳܬܰܪ ܗܳܢܐ ܩܰܕܺܝܫܳܐ ܐܳܦ ܐܶܠܺܝܫܳܥ ܗܰܘ ܕܩܰܒܶܠ ܪܽܘܚܶܗ ܕܺܐܠܳܝܳܐ ܢܒܺܝܐ܆ ܡܶܢܒܳܬܰܪ ܕܰܦܣܰܩ ܥܠܰܘܗܝ ܡܰܠܟܳܐ ܡܰܘܬܳܐ ܕܢܰܚ ܥܠܰܘܗܝ ܓܶܠܝܳܢܳܐ ܕܦܽܘܪܩܳܢܳܐ. ܘܰܩܪܳܐ ܠܡܳܪܝܳܐ ܐܰܠܗܳܐ ܒܽܐܘܠܨܳܢܳܐ ܘܚܰܘܺܝ ܠܗ ܥܽܘܕܪܳܢܳܐ ܕܰܗܘܳܐ ܒܫܳܡܪܺܝܢ. ܘܳܐܦ ܗܳܠܝܢ ܛܠܳܝܷ̈ܐ ܕܒܶܝܬ ܚܰܢܰܢܝܳܐ ܬܠܳܬܳܐ. ܒܰܐܬܽܘܢܳܐ ܕܢܽܘܪܳܐ ܒܰܐܪܥܳܐ ܕܒܳܒܶܝܠ. ܡ̣ܢ ܓܰܘ ܢܽܘܪܳܐ ܩܪܰܘ ܠܡܳܪܝܳܐ ܘܰܥܢܳܐ ܐܶܢܘܢ. ܘܫܰܕܰܪ ܡܰܠܰܐܟܶܗ ܘܰܐܦܶܩ ܐܶܢܘܢ ܡ̣ܢ ܐܰܬܽܘܢܳܐ ܕܢܽܘܪܳܐ. ܐܳܦ ܕܳܢܺܝܐܝܠ ܗܰܘ ܓܰܒܪܳܐ ܪܓܺܝܓܳܐ. ܬܰܪܬܶܝܢ ܙܰܒܢ̈ܝ̣ܢ ܡ̣ܢ ܓܽܘܒܳܐ ܕܰܐܪ̈ܝܰܘܳܬܳܐ ܩܪܳܐ ܠܡܳܪܝܳܐ ܒܽܐܘܠܨܳܢܶܗ ܘܰܥܢܳܝܗܝ ܘܦܰܨܺܝ ܠܢܰܦܫܶܗ ܡ̣ܢ ܐܰܪ̈ܝܰܘܳܬܳܐ. ܘܡܳܢܳܐ ܠܳܐܐܶ ܐܢܳܐ ܠܡܶܚܫܰܒ ܬܰܫܥܝܴ̈ܬܳܐ ܕܥܳܒܪ̈ܳܢ ܠܡܶܢܝܳܢܳܐ. ܗܳܠܝܢ ܕܰܐܝܟ ܕܰܒܡܶܠܬܳܐ ܡܣܰܝܰܟܬܳܐ ܐܡ̇ܪ ܐܢ̣ܐ. ܕܰܕܠܐ ܐܘܠܨܳܢ̈ܐ ܠܐ ܫܦܰܪܘ. ܐܠܐ ܡ̣ܢ ܐܘܠܨܳܢ̈ܐ ܐܳܬܶܝܢ ܗܘܰܘ ܠܘܬ ܗܳܝ ܕܢܶܩܪܽܘܢ ܠܡܳܪܝܳܐ ܘܢܶܥܢܶܐ ܐܶܢܘܢ. ܘܥܰܠܗܳܕܐ ܐܡ̇ܪ ܐܢ̣ܐ ܕܛܽܘܒܳܢܳܐ ܕܰܘܝܕ. ܚܠܳܦ ܟܽܠܗܽܘܢ ܩܰܕܺܝ̈ܫܶܐ ܫܩܰܠ ܩܺܝܬܳܪܶܗ. ܘܰܙܡܰܪ ܒܶܗ ܒܩܳܠܶܗ ܥܰܠ ܬܶܫܒܽܘܚܬܳܐ ܗܳܕܐ. ܘܰܟܡܳܐ ܐܢ ܙܥܽܘܪܝܳܐ ܒܣܶܕܪܳܐ ܕܦܶܬܓܳܡܶܝ̈ܗ̇. ܐܠܐ ܒܚܰܝܠܳܐ ܪܰܒܳܐ ܡܶܬܡܰܠܠܳܐ. ܡܶܛܠ ܕܥܰܠ ܟܽܠܗܽܘܢ ܟܺܐܢ̈ܐ ܐܰܡܝ̣ܪܳܐ. ܢܠܰܚܶܡ ܒܰܪܬ ܩܳܠܐ ܗܳܝ ܕܡ̣ܢ ܒܳܬܰܪܟܶܢ.
ܦܰܨܳܗ̇ ܠܢܰܦܫܝ. ܡ̣ܢ ܣܶܦ̈ܘܳܬܳܐ ܕܥܰܘܴ̈ܠܶܐ ܘܡ̣ܢ ܠܶܫܳܢ̈ܐ ܢܰܟܽܘܠܬܳܢ̈ܐ. ܡܳܢܳܐ ܢܶܬܠܽܘܢ ܠܳܟ ܘܡܳܢܳܐ ܢܰܘܣܦܽܘܢ ܠܳܟ ܠܶܫܳܢ̈ܐ ܢܰܟܽܘܠܬܳܢ̈ܐ. ܠܶܫܳܢ̈ܐ ܕܶܝܢ ܘܣܶܦ̈ܘܳܬܳܐ ܕܥܰܘܴ̈ܠܶܐ ܗܳܢܝܢ ܕܩܳܝ̈ܡܳܢ ܗܘܱ̈ܝ ܠܽܘܩܒܰܠ ܩܰܕܺܝ̈ܫܶܐ ܗܳܠܝܢ ܐܶܢܝܢ ܣܶܦ̈ܘܳܬܳܐ ܕܥܰܘܴ̈ܠܐ. ܟܕ ܡܙܰܝܰܢ ܗܘܳܐ ܥܺܝܣܽܘ ܠܽܘܩܒܰܠ ܝܰܥܩܽܘܒ ܟܕ ܐܡ̇ܪ: ܢܶܩܪܒܽܘܢ ܝܰܘ̈ܡܳܬܳܐ ܕܒܶܝܬ ܒܳܟܶܐ ܕܳܐܒܝ. ܘܶܐܩܛܠܺܝܘܗܝ ܠܳܐܚܝ ܝܰܥܩܽܘܒ (ܒܪܝܬܐ ܟܙ: ܡܐ) ܘܰܒܣܶܦ̈ܘܳܬܳܐ ܬܘܒ ܕܥܰܘܴ̈ܠܐ ܘܰܒܠܶܫܴ̈ܢܶܐ ܢܰܟܽܘܠܬܳܢ̈ܐ ܡܙܰܝܢܺܝܢ ܗܘܰܘ ܐܰܚܰܘ̈ܗܝ ܕܝܰܘܣܶܦ ܟܕ ܐܳܡܪܺܝܢ: ܕܗܳܐ ܚܳܠܶܡ ܚܶܠܡ̈ܐ ܐܳܬܶܐ ܠܶܗ ܬܰܘ ܢܶܩܛܠܺܝܘܗܝ ܘܢܰܪܡܶܝܘܗܝ ܒܚܰܕ ܡ̣ܢ ܗܳܠܝܢ ܓܽܘ̈ܒܶܐ ܘܢܺܐܡܰܪ ܕܚܰܝܽܘܬܳܐ ܒܺܝܫܬܳܐ ܐܶܟܰܠܬܶܗ (ܒܪܝܬܐ ܠܙ: ܝܛ-ܟ). ܘܰܒܗܳܠܶܝܢ ܣܶܦ̈ܘܳܬܳܐ ܠܳܐ ܕܰܟܝܴ̈ܬܳܐ ܡܳܪܬܶܗ ܕܝܰܘܣܶܦ ܠܩܰܘܡܶܗ ܡܶܬܥܰܬܕܳܐ ܗܘܳܬ. ܘܫܳܐܘܳܠ ܕܶܝܢ ܠܽܘܩܒܰܠ ܕܰܘܝܕ ܒܣܶܦ̈ܘܳܬܳܐ ܘܰܒܠܶܫܴ̈ܢܶܐ ܢܰܟܽܘܠܬܳܢ̈ܐ. ܢܶܟܠܳܐ ܡܶܬܚܰܫܰܒ ܗܘܳܐ. ܡ̣ܢ ܗܰܘ ܐܡ̣ܪ ܢܒܺܝܐ ܓܰܒܪܳܐ ܒܺܝܫܳܐ ܘܛܰܪܟܳܢܳܐ ܘܥܳܒܶܕ ܫܓܽܘܫܝܳܐ.
ܓܶܐܪ̈ܰܘܗܝ ܕܓܰܒܪܳܐ ܫܢܺܝܢܺܝܢ ܐܰܝܟ ܓܽܘܡܪ̈ܶܐ ܕܒܰܠܽܘܛܳܐ. ܗܳܢܐ ܐܺܝܬܰܘܗܝ ܓܰܒܪܳܐ ܗܰܘ ܕܡܰܠܶܠ ܥܰܡ ܚܰܘܳܐ ܒܚܶܘܝܳܐ. ܘܰܟܡܶܢ ܒܡܶܐܟܽܘܠܬܳܐ ܠܳܐܕܳܡ. ܚܽܘܪ ܘܰܚܙܺܝ ܐܰܝܟܰܢܳܐ ܠܘ ܐܝܟ ܦܰܪܙܠܳܐ ܕܰܡܺܝ ܢܒܺܝܐ ܓܶܐܪ̈ܰܘܗܝ. ܐܶܠܐ ܐܰܝܟ ܓܽܘܡܪ̈ܶܐ ܕܒܰܠܽܘܛܳܐ. ܡܶܛܠ ܕܚܰܝܠܳܐ ܝܰܬܝ̣ܪܳܐ ܩܢܶܐ ܝܰܬܝ̣ܪ ܡ̣ܢ ܩܰܝ̈ܣܶܐ ܐܚܪ̈ܳܢܶܐ. ܒܗܳܝ ܕܡܳܐ ܕܕܳܥܶܟ ܬܽܘܒ ܒܝܰܕ ܦܽܘܠܚܳܢܳܐ ܦܳܢܶܝܢ ܠܛܶܟܣܗܽܘܢ ܩܰܕܡܳܝܳܐ. ܡܶܛܠ ܕܗܳܢܐ ܩܰܝܣܳܐ ܣܛܺܝܡܳܐ ܘܫܰܪܺܝܪܳܐ ܐܝ̣ܬܰܘܗܝ. ܥܰܠܗܳܕܐ ܓܽܘܡܪ̈ܶܐ ܕܡܶܢܶܗ ܡܰܘܩܕܳܢܝܴ̈ܬܳܐ ܐܶܢܶܝܢ. ܝܰܬܝ̣ܪ ܡ̣ܢ ܟܠ ܢܽܘܪܳܐ ܕܩܰܝ̈ܣܶܐ. ܗܳܟܰܢܳܐ ܡܶܬܕܰܡܝܳܐ ܒܺܝܫܽܘܬܶܗ ܕܳܐܟܶܠܩܰܪܨܳܐ ܒܰܡܫܰܡ̈ܫܳܢܶܐ ܕܨܶܒܝܳܢܶܗ. ܘܗܳܟܰܢܳܐ ܥܳܒܶܕ ܕܢܶܗܘܽܘܢ ܩܫܰܝܴ̈ܐ ܘܡܰܘܩܕܳܢ̈ܐ. ܡܶܛܠܗܳܢܐ ܢܒܺܝܳܐ ܟܰܕ ܥܳܪܶܩ ܘܰܡܒܰܓܶܢ ܡ̣ܢ ܕܕܰܐܝܟ ܗܳܠܝܢ ܐܶܢܽܘܢ ܘܳܐܡܰܪ:
ܘܳܝܠܺܝ ܕܬܰܘܬܳܒܽܘܬܝ ܐܰܓܪܰܬ. ܘܰܫܪܺܝܬ ܒܡܰܫܟܢܳܐ ܕܩܰܕܳܪ. ܬܰܘܬܳܒܽܘܬܳܐ ܠܚܰܝܷ̈ܐ ܐܰܟܣܢܳܝ̈ܐ ܕܰܒܥܳܠܡܳܐ ܗܳܢܐ ܩܳܪܶܐ. ܚܰܝ̈ܐ ܕܟܽܠܗܘܢ ܒܢܰܝ̈ܢܳܫܳܐ. ܐܡ̣ܪ ܓܝܪ ܠܡܽܘܫܶܐ ܕܕܺܝܠܝ ܗܺܝ ܐܰܪܥܳܐ ܟܽܠܳܗ̇. ܘܬܰܘܬܳܒ̈ܐ ܐܰܢܬܽܘܢ ܘܥܳܡܽܘܪ̈ܶܐ ܒܳܗ̇ (ܟܗܢ̈ܐ ܟܗ: ܟܓ). ܘܦܶܛܪܽܘܣ ܗܰܘ ܪܰܒܳܐ ܐܡ̣ܪ ܒܶܐܓܰܪܬܳܐ ܕܺܝܠܶܗ: ܚܰܒܺܝ̈ܒܰܝ ܐܝܟ ܥܳܪ̈ܨܶܐ ܘܰܐܝܟ ܬܰܘܬܳܒ̈ܐ ܐܶܬܦܰܪܩܘ ܡ̣ܢ ܟܽܠܗܶܝܢ ܪ̈ܓܺܝܓܳܬܳܐ (ܐ ܦܛܪܘܣ ܒ: ܝܐ). ܡܰܫܟܢܳܐ ܕܶܝܢ ܕܩܰܕܳܪ ܠܶܗ ܠܥܰܡܳܐ ܩܳܪܶܐ. ܡܶܛܠ ܕܚܶܫܽܘܟܰܐ ܗܘ ܥܳܠܡܳܐ ܗܳܢܐ. ܐܝܟ ܦܶܠܶܐܬܳܐ ܕܩܰܕܳܪ. ܩܰܕܳܪ ܚܶܫܽܘܟܳܐ ܡܶܬܦܰܫܰܩ ܒܠܶܢܳܫܳܐ ܥܶܒܪܳܝܳܐ. ܥܰܠ ܬܰܘܬܳܒܽܘܬܶܗ ܕܰܒܗܳܢܳܐ ܡܰܫܟܢܳܐ ܘܬܰܘܚܰܪܬܶܗ ܡܒܰܓܶܢ ܗܘܳܐ ܢܒܺܝܐ ܟܕ ܐܳܡܰܪ: ܕܠܰܝܬ ܫܽܘܠܳܡܳܐ ܒܟܽܘܡܪ̈ܰܘܗܝ. ܘܠܳܐ ܟܰܕ ܢܡܰܠܶܠ ܥܳܡܪ̈ܰܝ ܩܰܕܳܪ. ܗܶܢܘܢ ܫܠܳܡܳܐ ܠܳܐ ܡܡܰܠܠܝ̣ܢ. ܐܡ̣ܪ ܓܝܪ ܡܙܰܡܪܳܢܳܐ.
ܣܽܘܓܳܐܐ ܥܶܡܪܰܬ ܢܰܦܫܝ ܥܰܡ ܐܰܝܠܶܝܢ ܕܣܳܢܶܝܢ ܫܠܳܡܳܐ. ܘܶܐܢܳܐ ܫܠܳܡܳܐ ܡܡܰܠܶܠ ܗܘܺܝܬ ܘܗܶܢܽܘܢ ܡܶܬܟܰܬܫܺܝܢ ܗܘܰܘ ܥܰܡܝ. ܠܳܐ ܓܶܝܪ ܡܶܫܟܚܺܝܢ ܒܢܱ̈ܝ ܚܶܫܽܘܟܳܐ ܘܰܒܢܱ̈ܝ ܠܺܠܝܳܐ ܢܰܚܒܽܘܢ ܠܰܒܢܱ̈ܝ ܢܽܘܗܪܳܐ ܐܳܦ ܠܰܒܢܱ̈ܝ ܐܺܝܡܳܡܳܐ ܕܺܐܝܬܰܘܗܝ ܡܳܪܢ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܝܢ
ܥܰܠ ܐܪܳܙ ܛܽܘܪܳܐ ܡܶܣܬܰܟܠܳܢܳܐ. ܘܥܰܠ ܕܠܳܐ ܡܶܬܢܰܟܶܝܢ ܡܶܢ ܣܳܛܳܢܳܐ ܐܰܝܠܶܝܢ ܕܰܠܘܳܬ ܡܳܪܝܳܐ ܡܪܺܝܡܺܝܢ ܚܰܘܪܳܐ ܕܪܶܥܝܳܢܗܽܘܢ.
ܟܽܠܗܽܘܢ ܟܺܐܢ̈ܐ ܐܰܝܠܶܝܢ ܕܰܠܘܳܬ ܪܰܘܡܳܐ ܕܛܽܘܪܶܗ ܕܰܐܠܗܳܐ ܡܪܺܝܡܺܝܢ ܗܘܰܘ ܢܰܦ̈ܫܳܬܗܘܢ. ܕܠܐ ܢܶܟܝܳܢܳܐ ܡܶܬܦܰܠܛܺܝܢ ܡ̣ܢ ܩܪܳܒܶܗ ܕܳܐܟܶܠܩܰܪܨܳܐ. ܘܰܕܠܺܝܠܳܐܝ̣ܬ ܡܩܰܒܠܺܝܢ ܗܘܰܘ ܥܽܘܕܪܳܢܳܐ ܫܡܰܝܳܢܳܐ. ܘܰܐܝܠܶܝܢ ܕܰܗܘܰܘ ܝܰܬܝ̣ܪ̈ܶܐ ܠܥܽܘܕܪܳܢܳܐ ܕܡ̣ܢ ܐܰܠܗܳܐ ܡܣܰܝܰܥ ܠܩܰܕܺܝ̈ܫܶܐ. ܡܶܛܠ ܕܩܰܕܶܡ ܐܶܚܰܕ ܐܶܢܘܢ ܢܺܝܫܳܐ ܕܓܳܗܪܽܘܬܳܐ ܘܰܩܢܰܘ ܚܽܘܪܳܪܳܐ ܕܢܰܦܫܗܽܘܢ. ܘܠܳܐ ܩܰܒܶܠܘ ܡܶܛܠ ܡܽܘ̈ܡܶܐ ܗܳܠܶܝܢ ܡܫܺܝܚܽܘܬܳܐ ܡܶܬܝܰܕܥܳܢܺܝܬܳܐ. ܘܰܗܘܰܘ ܟܳܗܢ̈ܐ ܩܰܕܺܝ̈ܫܶܐ ܕܰܡܩܰܪܒܺܝܢ ܕܶܒܚ̈ܐ ܪ̈ܽܘܚܳܢܳܝܶܐ ܘܰܕܠܳܐ ܕܡܳܐ. ܕܠܐ ܕܶܝܢ ܢܰܘܪܶܟ ܡܶܠܬܳܐ ܒܪܺܝܫ ܡܺܐܡܪܳܐ. ܢܶܒܥܶܐ ܕܡܶܛܠܡܳܢܳܐ ܐܡ̇ܪ ܛܽܘܒܳܢܐ ܕܰܘܝܕ. ܒܫܽܘܪܳܝܳܐ ܕܬܶܫܒܽܘܚܬܳܐ ܗܳܕܐ ܕܡܳܐܐ ܘܥܶܣܪܺܝܢ:
ܐܰܪܺܝܡ ܥܰܝ̈ܢܰܝ ܠܛܽܘܪܳܐ ܐܰܝܡܶܟܳܐ ܢܺܐܬܶܐ ܡܥܰܕܪܳܢܝ. ܠܘܳܬ ܐܰܝܢܳܐ ܛܽܘܪܳܐ ܡܪܺܝܡ ܥܰܝ̈ܢܰܘܗܝ. ܐܰܝܠܶܝܢ ܥܰܝ̈ܢܶܐ ܐܡ̇ܪ ܕܰܡܪܺܝܡ. ܐܶܢ ܥܰܝ̈ܢܶܐ ܕܦܰܓܪܳܐ ܡܪܺܝܡ. ܐܳܦ ܗܽܘ ܦܰܓܪܳܢܳܐ ܐܝ̣ܬܰܘܗܝ. ܘܶܐܢ ܬܽܘܒ ܥܰܝ̈ܢܶܐ ܡܶܬܝܰܕܥܳܢ̈ܝܳܬܳܐ ܕܗܰܘ ܒܰܪܢܳܫܳܐ ܕܰܠܓܰܘ. ܡܳܕܶܝܢ ܐܳܦ ܗܽܘ ܛܽܘܪܳܐ ܪܽܘܚܳܢܳܝܰܐ ܗ̄ܘ. ܡܳܢܐ ܗܳܟܝ̣ܠ ܢܺܐܡܰܪ ܕܶܐܡܰܪ ܢܒܺܝܐ ܛܽܘܪܳܐ. ܠܳܐ ܦܰܫܶܩ ܐܰܝܢܳܐ ܛܽܘܪܳܐ ܐܶܡܰܪ܆ ܢܺܐܡܰܪ ܕܡܶܛܠ ܛܽܘܪܳܐ ܕܣܺܝܢܰܝ ܕܒܰܐܪܰܒܺܝܰܐ. ܗܰܘ ܕܰܚܙܳܐ ܥܠܰܘܗܝ ܡܽܘܫܶܐ ܢܽܘܪܳܐ ܕܫܰܪܝܳܐ ܒܣܰܢܝܳܐ ܟܕ ܠܐ ܡܰܘܩܕܳܐ ܠܶܗ. ܘܰܫܡܰܥ ܡ̣ܢ ܓܰܘ ܢܽܘܪܳܐ ܩܳܠܶܗ ܕܰܐܠܗܳܐ. ܐܰܘ ܢܶܪܢܶܐ ܡܶܛܠ ܛܽܘܪܳܐ ܕܚܽܘܪܺܝܒ ܗܰܘ ܕܩܰܒܶܠ ܒܶܗ ܐܺܠܺܝܳܐ ܓܶܠܝܳܢܳܐ ܐܡ̇ܪ: ܐܰܘ ܕܰܠܡܳܐ ܬܘܒ ܛܽܘܪܳܐ ܕܒܰܝܫܳܢ ܐܰܘ ܛܽܘܪܳܐ ܕܰܓܒܶܝܢܝܰܐܡ ܐܰܘ ܕܰܠܡܳܐ ܟܰܝ ܡܶܛܠ ܛܽܘܪܳܐ ܕܩܰܪܕܽܘ. ܗܰܘ ܕܫܶܟܢܰܬ ܥܠܰܘܗܝ ܩܺܒܽܘܬܳܐ ܕܢܽܘܚ. ܒܳܬܰܪ ܕܶܐܬܟܠܺܝ ܡܶܛܪܳܐ ܕܛܰܘܦܳܢܳܐ. ܘܶܐܢ ܗܳܠܝܢ ܠܰܝܬ ܐܶܢܘܢ. ܢܰܣܒܰܪ ܥܠ ܛܽܘܪܳܐ ܕܟܰܪܡܠܳܐ. ܥܰܡ ܛܽܘܪܳܐ ܕܨܶܗܝܽܘܢ ܗܰܘ ܕܣܺܝܡ ܒܰܫܦܽܘ̈ܠܰܝ ܓܰܪܒܝܳܐ. ܕܰܐܝܢܳܐ ܡ̣ܢ ܗܳܠܝܢ ܛܽܘܪ̈ܶܐ ܛܽܘܒܳܢܳܐ ܕܰܘܝܕ ܠܐ ܐܡ̣ܪ. ܘܣܳܒܰܪ ܐܢܳܐ. ܕܠܘ ܒܥܰܝ̈ܢܶܐ ܕܦܰܓܪܳܐ ܙܳܕܶܩ ܠܰܢ ܠܰܡܚܳܪ ܒܛܽܘܪܳܐ ܗܳܢܐ. ܘܠܐ ܓܶܝܪ ܢܒܺܝܐ ܒܥܰܝ̈ܢܶܐ ܒܶܣܪ̈ܳܢܝܳܬܳܐ ܡܶܬܒܰܩܶܐ ܗܘܳܐ ܒܬܶܐܘܳܪܺܝܰܐ ܕܛܽܘܪܳܐ ܗܳܢܐ. ܐܶܠܐ ܒܥܰܝ̈ܢܶܐ ܢܰܗܺܝܪ̈ܳܬܳܐ ܗܳܠܝܢ ܕܰܢܒܺܝܽܘܬܳܐ. ܐܰܪܺܝܡ ܠܛܽܘܪܳܐ ܥܶܠܳܝܳܐ. ܠܰܐܝܢܳܐ ܛܽܘܪܳܐ ܠܗܰܘ ܕܺܐܝܬܰܘܗܝ ܡܳܪܝܳܐ ܠܥܶܠ ܡܶܢܶܗ. ܠܘ ܠܗܰܘ ܕܡܶܬܓܰܘܙܰܠ ܗܘܳܐ ܒܢܽܘܪܳܐ ܩܕܳܡ ܥܰܝ̈ܢܶܐ ܕܰܟܢܽܘܫܬܳܐ. ܘܡܶܬܦܩܶܕ ܗܘܳܐ ܥܰܡܳܐ ܕܠܐ ܬܶܩܪܽܘܒ ܒܶܗ ܐܺܝܕܳܐ. ܘܳܐܦܠܳܐ ܥܳܢܴ̈ܐ ܘܬܰܘܪ̈ܶܐ ܢܶܪܥܽܘܢ ܠܩܽܘܒܠܶܗ. ܘܠܐ ܬܘܒ ܗܰܘ ܕܚܽܘܪܺܝܒ ܕܶܐܙܰܠ ܠܶܗ ܐܺܠܺܝܳܐ. ܘܠܐ ܛܽܘܪܳܐ ܡܰܟܺܝܟܳܐ ܕܨܶܗܝܽܘܢ ܨܳܠܽܘܒܬܳܐ. ܐܠܐ ܛܽܘܪܳܐ ܗܳܢܐ ܕܶܐܡܰܪ ܢܒܺܝܐ ܕܰܐܪܺܝܡ ܠܶܗ ܥܰܝ̈ܢܰܘܗܝ. ܗܽܘܝܽܘ ܕܰܠܥܶܠ ܡܶܢ ܫܡܰܝܳܐ. ܗܰܘ ܕܩܳܝܡܺܝܢ ܒܪܰܘܡܶܗ ܟܽܠܗܽܘܢ ܚܰܝ̈ܠܰܘܳܬܳܐ ܫܡܰܝܴ̈ܢܶܐ ܪ̈ܰܒܰܝ ܡܰܠܰܐܟ̈ܐ. ܗܰܘ ܛܽܘܪܳܐ ܕܰܐܠܗܳܐ ܕܶܐܡܰܪ ܚܰܙܩܺܝܐܝܠ ܕܶܐܬܩܛܶܠ ܡܶܢܶܗ ܡܰܠܟܳܐ ܡܶܬܝܰܕܥܳܢܳܐ ܕܨܽܘܪ. ܗܰܘ ܛܽܘܪܳܐ ܕܒܰܢܝܳܐ ܥܠܰܘܗܝ ܡܕܺܝܢܬܳܐ ܕܶܐܡܰܪ ܥܰܡܰܢܽܘܐܝܠ ܕܠܳܐ ܡܶܫܟܚܳܐ ܕܬܶܛܫܶܐ ܡܕܺܝܢܬܳܐ ܕܥܰܠ ܛܽܘܪܳܐ ܒܰܢܝܳܐ (ܡܬܝ ܗ: ܝܕ). ܗܳܝ ܕܰܚܙܳܐ ܒܳܗ̇ ܢܒܺܝܳܐ ܐܰܪܒܰܥ ܚܰܝ̈ܘܳܢ. ܘܥܰܠ ܛܽܘܪܳܐ ܗܳܢܐ ܐܡ̣ܪ ܦܰܘܠܽܘܣ ܠܰܡܗܰܝܡ̈ܢܶܐ ܕܡܶܢ ܥܶܒܪ̈ܳܝܶܐ. ܕܰܐܢܬܽܘܢ ܠܰܡ ܕܶܐܬܩܰܪܰܒܬܽܘܢ ܠܛܽܘܪܳܐ ܕܨܶܗܝܽܘܢ. ܘܠܰܡܕܺܝܢܬܳܐ ܕܰܐܠܗܳܐ ܚܰܝܳܐ. ܘܠܐܽܘܪܺܫܠܶܡ ܕܒܰܫܡܰܝܳܐ. ܠܟܶܢ̈ܫܶܐ ܕܪ̈ܶܒܘܳܬܳܐ ܕܡܰܠܰܐܟ̈ܐ. ܘܰܠܝܶܫܽܘܥ ܡܶܨܥܳܝܳܐ ܕܕܺܝܰܬܺܩܺܝ ܚܕܰܬܳܐ. ܘܠܰܪܣܳܣ ܕܡܶܗ. ܗܰܘ ܕܰܡܡܰܠܶܠ ܛܳܒ ܡ̣ܢ ܕܡܶܗ ܕܗܳܒܶܝܠ (ܥܒܪ̈ܝܐ ܝܒ: ܟܒ-ܟܕ). ܠܗܳܢܐ ܛܽܘܪܳܐ ܩܰܕܶܡ ܢܒܺܝܐ: ܐܰܪܺܝܡ ܥܰܝܢܳܐ ܕܪܶܥܝܳܢܶܗ. ܘܡ̣ܢ ܗܳܢܐ ܛܽܘܪܳܐ ܐܶܬܳܐ ܠܶܗ ܥܽܘܕܪܳܢܳܐ ܡ̣ܢ ܩܕܳܡ ܡܳܪܝܳܐ.
ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ. ܘܰܐܝܢܳܐ ܕܰܠܗܳܢܳܐ ܛܽܘܪܳܐ ܡܪܺܝܡ ܥܰܝ̈ܢܰܘܗܝ ܠܳܐ ܙܳܐܱܥ ܘܠܐ ܢܳܐܷܕ ܐܝܟ ܕܶܐܡܰܪ ܢܒܺܝܐ.
ܠܐ ܢܶܬܶܠ ܪܶܓܠܳܟ ܠܙܰܘܥܬܳܐ. ܡܶܛܠ ܐܰܝܕܳܐ ܙܰܘܥܬܳܐ ܐܡ̣ܪ܆ ܠܰܚܛܺܝܬܳܐ ܡܫܰܡܰܗ ܙܰܘܥܬܳܐ. ܗܳܐ ܓܶܝܪ ܟܕ ܐܶܬܬܚܶܕ ܒܳܗ̇ ܩܳܐܝܢ ܒܩܶܛܠܳܐ ܕܰܐܚܽܘܗܝ ܗܳܒܶܝܠ. ܦܣܰܩ ܕܶܝܢ ܐܰܠܗܳܐ ܥܠܰܘܗܝ ܕܢܶܗܘܶܐ ܙܳܐܱܥ ܘܢܳܐܷܕ ܒܰܐܪܥܳܐ. ܫܰܦܝ̣ܪ ܡܳܕܶܝܢ ܐܡ̣ܪ ܡܙܰܡܪܳܢܳܐ ܠܘܬ ܗܰܘ ܕܰܡܪܺܝܡ ܠܛܽܘܪܳܐ ܫܡܰܝܳܢܳܐ ܥܰܝ̈ܢܰܘܗܝ. ܕܰܡܥܰܕܰܪ ܠܶܗ ܡܳܪܝܳܐ. ܘܠܳܐ ܝܳܗܶܒ ܪܶܓܠܶܗ ܠܙܰܘܥܬܳܐ. ܘܥܰܡ ܗܳܕܐ ܐܰܘܣܶܦ.
ܕܠܳܐ ܢܢܽܘܡ ܢܳܛܽܘܪܳܟ. ܠܳܐ ܓܶܝܪ ܢܳܐܷܡ ܘܠܳܐ ܕܳܡܶܟ ܢܳܛܽܘܪܶܗ ܕܺܝܣܪܳܐܝܠ. ܡܶܛܠ ܕܗܰܘ ܕܨܳܠܶܐ ܦܰܚ̈ܐ ܕܰܢܨܽܘܕ ܢܰܦ̈ܫܳܬܳܐ ܠܰܐܒܕܳܢܳܐ ܠܳܐ ܕܳܡܶܟ ܘܠܳܐ ܡܰܡܶܐܢ. ܐܳܦ ܢܳܛܽܘܪܶܗ ܕܺܝܣܪܳܐܝܠ ܠܳܐ ܡܰܗܡܶܐ. ܕܢܶܫܬܰܠܰܛ ܥܰܠ ܚܕܳܐ ܡ̣ܢ ܢܰܦ̈ܫܳܬܳܐ ܕܩܰܕܺܝ̈ܫܶܐ. ܘܠܳܐ ܝܳܗܶܒ ܠܶܗ ܕܢܶܥܒܶܕ ܨܶܒܝܳܢܶܗ. ܘܠܳܐ ܡܶܫܟܰܚ ܨܳܐܷܕ ܒܺܝܫܳܐ. ܐܶܠܐ ܕܡܶܟܰܬ ܢܰܦܫܳܐ ܡ̣ܢ ܪܶܢܝܳܐ ܕܰܐܠܗܳܐ ܕܡܰܢ ܕܶܝܢ ܐܝ̣ܬܰܘܗܝ ܕܢܳܛܰܪ ܠܗ̇ ܡ̣ܢ ܡܰܦܽܘܠܬܳܐ ܢܒܺܝܐ ܦܰܫܶܩ ܘܶܐܡܰܪ.
ܡܳܪܝܰܐ ܗܘ ܢܳܛܽܘܪܳܟ. ܡܶܢ ܢܳܛܽܘܪܳܐ ܕܰܐܝܟ ܗܳܢܳܐ ܡܶܬܥܰܕܰܪ ܐܰܢܬ. ܚܙܺܝ ܟܡܳܐ ܪܰܒ ܗܘ ܗܰܘ ܕܫܳܗܰܪ ܥܰܠ ܐܰܦܰܝ̈ܟ ܘܠܳܐ ܬܶܕܡܰܟ. ܘܢܳܛܽܘܪܳܟ ܠܳܐ ܢܳܐܷܡ ܘܠܳܐ ܕܳܡܶܟ. ܥܕܰܡܳܐ ܕܢܰܥܒܪܳܟ ܢܺܐܪܒܳܐ ܕܓܰܝܴ̈ܣܶܐ. ܟܕ ܕܶܝܢ ܠܐ ܡܰܗܡܝܳܐ ܢܰܦܫܳܐ ܘܠܳܐ ܡܰܐܡܢܳܐ. ܟܡܳܐ ܐܶܢ ܚܰܡܺܝܡ ܘܥܰܙܺܝܙ ܐܰܓܽܘܢܳܐ. ܡܰܛܶܠ ܥܠܶܝܗ̇ ܐܰܠܗܳܐ ܘܰܡܦܰܝܶܓ ܠܗ̇. ܐܝܟ ܕܶܐܡܰܪ ܢܒܺܝܐ.
ܕܡܳܪܝܳܐ ܢܰܛܶܠ ܠܳܟ ܒܺܐܝܕܶܗ ܕܝܰܡܺܝܢܳܐ. ܐܝ̣ܕܳܐ ܕܝܰܡܺܝܢܳܐ ܠܥܰܡܰܢܽܘܐܝܠ ܩܳܪܶܐ. ܗܽܘܝܽܘ ܓܶܝܪ ܗܰܘ ܕܰܐܛܐܶܒ ܥܰܠ ܥܳܠܡܳܐ ܕܡܰܘܩܶܕ ܗܘܳܐ ܠܶܗ ܚܽܘܡܳܐ ܕܒܺܝ̈ܫܳܬܳܐ. ܘܰܡܝܰܒܶܫ ܗܘܳܐ ܠܶܗ ܫܶܡܫܳܐ ܕܚܰܢܦܽܘܬܳܐ. ܟܰܕ ܕܶܝܢ ܐܶܬܳܐ ܡ̣ܢ ܫܡܰܝܳܐ ܝܰܡܺܝܢܶܗ ܕܰܐܒܳܐ. ܗܘܳܐ ܛܰܠܳܐ ܡܦܰܝܓܳܢܳܐ ܠܗܳܢܘܢ ܕܝܳܩܕܺܝܢ ܗܘܰܘ ܒܢܶܣܝܽܘ̈ܢܶܐ. ܡܶܛܠ ܗܳܢܐ ܐܶܡܰܪ ܢܒܺܝܐ. ܠܥܰܡܳܐ ܗܰܘ ܕܒܺܐܝ̈ܕܰܘܗܝ ܐܶܬܦܪܶܩܘ ܡ̣ܢ ܝܰܩܕܳܢܳܐ.
ܒܺܐܝܡܳܡܳܐ ܫܶܡܫܳܐ ܠܳܐ ܢܰܟܶܝܟ. ܐܳܦܠܳܐ ܣܰܗܪܳܐ ܒܠܺܠܝܳܐ. ܠܰܬܪ̈ܰܝܗܽܘܢ ܗܳܠܝܢ ܢܰܗܺܝܪ̈ܶܐ. ܒܡܰܥܒܕܳܢ̈ܘܳܬܳܐ ܣܰܢܝܴ̈ܬܳܐ ܣܳܡ ܐܶܢܘܢ ܗܳܪܟܳܐ ܢܒܺܝܐ. ܘܟܰܕ ܒܕܽܘ̈ܟܝܳܬܳܐ ܣܰܓܺܝ̈ܐܬܳܐ ܡܟܰܢܶܐ ܒܫܶܡ ܫܶܡܫܳܐ ܠܰܡܫܺܝܚܳܐ. ܟܬܳܒܳܐ ܐܰܡܺܝܪ ܒܪܽܘܚܳܐ. ܗܳܪܟܳܐ ܠܗܰܘ ܕܰܠܩܽܘܒܠܳܐ ܣܳܡ ܢܒܺܝܐ. ܒܫܶܡ ܫܶܡܫܳܐ ܘܣܰܗܪܳܐ. ܫܶܡܫܳܐ ܕܶܝܢ ܐܺܝܬܰܘܗܝ ܗܰܘ ܕܶܐܡܰܪ ܥܰܡܰܢܽܘܐܝܠ. ܕܰܕܢܰܚ ܥܰܠ ܐܰܪܥܳܐ ܗܰܘ ܕܰܢܦܰܠ ܥܰܠ ܫܽܘܥܳܐ ܕܢܰܦܫܳܐ ܩܫܺܝܬܳܐ. ܗܳܝ ܕܡܶܛܠ ܕܠܳܐ ܦܶܬܚܰܬ ܥܽܘܡܩܳܐ ܓܰܘܳܝܳܐ ܕܪܶܥܝܳܢܳܗ̇. ܘܩܰܒܠܰܬ ܒܳܗ̇ ܠܙܰܪܥܳܐ ܛܳܒܳܐ. ܕܶܢܚܶܗ ܕܫܶܡܫܳܐ ܗܳܢܐ. ܐܰܘܒܶܫ ܡܶܢܳܗ̇ ܠܙܰܪܥܳܐ ܕܡܶܠܬܶܗ ܕܰܐܠܗܳܐ ܘܠܳܐ ܝܶܗܒܰܬ ܦܺܐܪ̈ܐ. ܗܳܢܐ ܬܽܘܒ ܫܶܡܫܳܐ ܐܝ̣ܬܰܘܗܝ ܗܰܘ ܕܰܒܚܰܡܺܝܡܽܘܬܶܗ ܐܰܘܟܡܳܗ̇ ܗܘܳܐ ܠܟܰܠܬܳܐ ܗܳܝ ܕܰܒܬܶܫܒܚܴ̈ܬ ܬܶܫܒܚܴ̈ܬܳܐ ܡܶܙܕܰܡܪܳܐ. ܟܰܕ ܡܰܘܕܥܳܐ ܗܘܳܬ ܒܺܝ̈ܫܳܬܳܐ ܕܣܶܒܠܰܬ ܡ̣ܢ ܝܰܩܕܳܢܳܐ. ܐܳܡܪܳܐ ܗܘܳܬ ܠܘܳܬ ܒܢܴ̈ܬ ܐܽܘܪܺܫܠܶܡ. ܕܠܳܐ ܬܚܽܘܪܽܘܢ ܒܺܝ ܕܽܐܘܟܳܡܳܐ ܐܢܳܐ ܕܰܐܘܟܡܰܢܝ ܫܶܡܫܳܐ (ܬܫܒ̈ܚܬ ܬܫܒ̈ܚܬܐ ܐ: ܗ). ܥܰܠ ܗܳܢܳܐ ܫܶܡܫܳܐ ܐܡ̣ܪ ܢܒܺܝܐ ܕܠܐ ܢܰܐܟܶܝܟ. ܠܗܰܘ ܕܢܳܛܰܪ ܠܶܗ ܡܳܪܝܳܐ. ܘܟܰܕ ܗܳܢܐ ܥܠ ܐܳܟܶܠܩܰܪܨܳܐ ܡܶܬܢܣܶܒ. ܘܳܐܦ ܣܰܗܪܳܐ ܥܠܰܘܗܝ ܡܰܠܶܦ. ܐܡ̣ܪ ܢܒܺܝܐ:
ܡܳܪܝܳܐ ܢܢܰܛܪܳܟ ܡ̣ܢ ܟܽܠܗܶܝܢ ܒܺܝ̈ܫܳܬܳܐ. ܡ̣ܢ ܚܰܫ̈ܐ ܕܒܶܣܪܳܐ ܕܡܰܠܶܦ ܣܰܗܪܳܐ. ܘܡ̣ܢ ܫܓܽܘܫܝܳܐ ܕܢܶܣܝܽܘܢ̈ܐ ܘܝܽܘܠܦܴ̈ܢܶܐ ܕܰܓܴ̈ܠܶܐ ܕܰܡܙܺܝܥ ܫܶܡܫܳܐ. ܘܰܡܒܰܪܶܟ ܬܘܒ ܘܳܐܡܰܪ:
ܢܶܛܰܪ ܢܰܦܫܳܟ ܡܳܪܝܳܐ. ܢܶܛܰܪ ܡܰܦܩܳܟ ܘܡܰܥܠܳܟ. ܡܶܟܺܝܠ ܘܰܥܕܰܡܳܐ ܠܥܳܠܰܡ. ܒܟܽܠܡܶܕܶܡ ܓܶܝܪ ܡܶܬܬܰܥܒܰܕ ܡ̣ܢ ܚܛܺܝܬܳܐ. ܢܰܦܫܳܐ ܡܥܳܕܳܐ ܡܶܣܬܰܓܦܳܐ. ܡܶܛܠ ܗܳܢܐ ܥܠܶܝܗ̇ ܨܰܠܺܝ ܩܰܕܡܳܐܝ̣ܬ. ܟܰܕ ܡܢܰܛܰܪ ܡܰܦܩܶܗ. ܗܳܢܰܘ ܕܶܝܢ ܡܳܐ ܕܢܳܦܩܳܐ ܡ̣ܢ ܒܺܝ̈ܫܳܬܳܐ ܘܰܡܢܰܛܰܪ ܬܘܒ ܐܳܦ ܡܰܥܠܳܗ̇. ܒܗܳܝ ܕܡܳܐ ܕܫܰܢܝܰܬ ܢܰܦܫܳܐ ܡ̣ܢ ܚܛܺܝܬܳܐ. ܒܝܰܕ ܥܡܳܕܳܐ ܩܰܕܺܝܫܳܐ. ܗܳܢܰܘ ܬܰܪܥܶܗ ܕܡܳܪܝܳܐ ܕܙܰܕܺܝ̈ܩܶܐ ܥܳܐܠܺܝܢ ܒܶܗ. ܐܳܦ ܥܰܠܗܳܕܶܐ ܡܒܰܪܰܟ ܢܒܺܝܐ. ܕܬܶܗܘܶܐ ܗܳܕܐ ܥܕܰܡܳܐ ܠܥܳܠܰܡ. ܟܰܕ ܡܰܘܕܶܝܢܰܢ ܠܡܳܪܢ. ܕܒܶܗ ܡܶܬܢܰܛܪܺܝܢܰܢ ܡ̣ܢ ܟܽܠܗܝܢ ܒܺܝ̈ܫܳܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܥܶܣܪܺܝܢ ܥܰܠ ܚܰܘܪܳܐ ܕܰܠܘܳܬ ܛܽܘܪܳܐ ܡܶܣܬܰܟܠܳܢܳܐ. ܡܳܪܝ ܓܶܕ ܠܢ ܠܗܰܘ ܛܽܘܪܳܐ.
ܡܙܡܘܪܐ ܕܡܐܐ ܘܥܣܪܝܢ ܘܚܕ
ܡܰܘܕܰܥ ܐܪܳܙܳܐ ܕܚܰܕܽܘܬܳܐ ܕܰܗܘܳܬ ܠܥܳܠܡܳܐ ܒܝܰܕ ܡܳܪܰܢ. ܕܢܶܬܦܢܶܐ ܠܗܰܘ ܒܰܝܬܰܢ ܕܒܰܫܡܰܝܳܐ.
ܥܰܬܝ̣ܪ ܒܓܶܠܝܴ̈ܢܶܐ ܐܰܠܗܳܝ̈ܐ ܦܰܘܠܽܘܣ ܡܰܠܶܦ ܟܕ ܠܘܳܬ ܩܽܘܪ̈ܺܝܢܬܳܝܶܐ ܟܳܬܶܒ ܗܘܳܐ: ܕܟܽܠܗܶܝܢ ܕܰܓܕܰܫ̈ܝ ܠܥܶܒܪ̈ܳܝܶܐ ܠܛܽܘܦܣܰܢ ܗܘܱ̈ܝ. ܘܶܐܬܟܬܶܒ ܡܶܛܠ ܡܰܪܕܽܘܬܳܐ ܕܺܝܠܰܢ܇ ܕܚܰܪܬܗܽܘܢ ܕܥܳܠܡ̈ܐ ܥܠܰܝܢ ܡܰܛܝܰܬ (ܐ ܩܘܪ̈ܢܬܝܐ ܝ: ܝܐ). ܢܶܒܥܶܐ ܡܳܕܶܝܢ ܕܡܳܢܐ ܛܽܘܦܣܳܐ ܪܫܺܝܡ ܗܘܳܐ ܠܰܢ ܒܦܽܘܢܳܝܳܐ ܕܰܗܘܳܐ ܠܰܫܒܺܝܬܳܐ ܕܝܽܘ̈ܕܳܝܶܐ ܡ̣ܢ ܒܳܒܶܝܠ ܠܐܽܘܪܺܫܠܶܡ ܡܶܛܠ ܡܰܙܡܽܘܪܳܐ ܗܳܢܐ ܕܰܡܳܐܐ ܘܥܶܣܪܺܝܢ ܘܚܰܕ. ܥܰܠܗܳܝ ܡܰܣܰܩܬܳܐ ܕܦܰܩܶܕ ܟܽܘܪܳܫ ܡܰܠܟܳܐ ܕܦܳܪܶܣ ܕܬܶܣܰܩ ܫܒܺܝܬܳܐ ܡ̣ܢ ܒܳܒܶܝܠ ܠܐܽܘܪܺܫܠܶܡ ܝ̣ܠܶܦܢܰܢ ܡ̣ܢ ܡܙܰܡܪܳܢܳܐ. ܘܥܰܠ ܗܳܕܐ ܒܰܪܬ ܩܳܠܳܐ ܕܡܰܠܝܳܐ ܚܰܕܽܘܬܳܐ ܐܰܙܺܝܥ ܒܩܺܝܬܳܪܶܗ ܘܶܐܡܰܪ:
ܚܕܺܝ̇ܬ ܟܰܕ ܐܳܡܪܺܝܢ ܗܘܰܘ ܠܺܝ. ܕܰܠܒܰܝܬܶܗ ܕܡܳܪܝܳܐ ܐܳܙܺܠ̱ܝܢܰܢ. ܗܳܢܐ ܩܳܠܳܐ ܠܘ ܕܰܢܒܺܝܐ ܗܘܳܐ ܣܽܘܥܪܳܢܳܐܝ̣ܬ. ܐܶܠܐ ܕܰܫܒܺܝܬܳܐ ܗܳܝ ܕܰܒܦܽܘܩܕܳܢܶܗ ܕܟܽܘܪܳܫ ܦܳܪܣܳܝܳܐ ܩܢܳܬ ܚܺܐܪܽܘܬܳܐ ܘܶܐܬܚܰܪܪܰܬ ܡ̣ܢ ܥܰܒܕܽܘܬܳܐ ܕܳܐܬܽܘܪ̈ܳܝܶܐ. ܗܳܝ ܕܰܒܚܺܐܪܽܘܬܳܐ ܡܶܬܒܰܣܡܳܐ ܗܘܳܬ. ܐܳܦ ܒܰܐܪܥܳܐ ܕܦܰܠܶܣܛܺܝܢܺܝ ܥܳܡܪܳܐ ܗܘܳܬ ܘܺܐܝܬ ܗܘܳܐ ܠܗ̇ ܡܕܺܝܢ̱ܬܳܐ ܩܕܝ̣ܫܬܐ ܐܽܘܪܺܫܠܶܡ. ܗܳܝ ܕܺܐܝܬ ܗܘܳܐ ܒܗ̇ ܒܰܝܬܳܐ ܕܰܐܠܗܳܐ ܗܰܘ ܕܰܒܢܳܐ ܫܠܶܝܡܽܘܢ ܘܺܐܝܬ ܗܘܳܐ ܠܗ̇ ܟܽܘܡܪ̈ܶܐ ܕܰܡܚܰܣܶܝܢ ܗܘܰܘ ܥܰܠ ܚܛܳܗܶܝ̈ܗ̇. ܘܟܰܕ ܡ̣ܢ ܗܳܠܝܢ ܐܶܬܓܰܠܙܰܬ ܠܥܰܒܕܽܘܬܳܐ ܡܰܪܺܝܪܬܳܐ ܕܦܳܪ̈ܣܳܝܶܐ ܐܶܫܬܰܠܡܰܬ. ܟܕ ܕܶܝܢ ܐܶܬܪܰܥܺܝ ܐܰܠܗܳܐ ܥܠܶܝܗ̇ ܦܽܘܪܩܳܢܳܐ. ܐܰܡܠܶܟ ܟܽܘܪܳܫ ܦܳܪܣܳܝܳܐ ܥܰܠ ܗܳܢܐ ܓܶܝܪ ܐܶܫܰܥܝܳܐ ܩܰܕܶܡ ܐܶܬܢܰܒܺܝ. ܕܗܽܘ ܡܫܰܕܰܪ ܠܳܗ̇ ܠܰܫܒܺܝܬܳܐ. ܡܶܢ ܩܕܳܡ ܡܰܐܬܶܝܢ ܘܬܶܫܥܺܝܢ ܫܢ̈ܝ̣ܢ ܝܰܬܺܝܪ ܚܰܣܺܝܪ ܘܶܐܡܰܪ: ܡܶܛܠܬܶܗ ܐܰܝܟ ܕܡܶܢ ܦܰܪܨܽܘܦܳܐ ܕܰܐܠܗܳܐ. ܕܗܽܘ ܠܰܡ ܢܒܺܝܐ ܩܪܺܝܬܝ. ܘܰܫܒܺܝܬܝ ܢܫܰܕܰܪ ܠܺܝ ܠܳܐ ܒܰܕܡܰܝܴ̈ܐ ܘܠܳܐ ܒܫܽܘܚܕܳܐ (ܐܫܥܝܐ ܡܗ: ܝܓ). ܬܘܒ ܐܡ̣ܪ ܥܠܰܘܗܝ ܐܶܫܰܪܶܐ ܠܡܶܦܬܰܚ ܩܕܳܡܰܘܗܝ ܬܰܪ̈ܥܶܐ. ܘܬܰܪ̈ܥܶܐ ܠܳܐ ܢܶܬܬܰܚܕܽܘܢ. ܐܶܢܳܐ ܐܺܙܰܠ ܩܕܳܡܰܝܟ. ܘܥܰܪܡܳܐ ܐܶܫܰܦܶܐ. ܘܬܰܪ̈ܥܶܐ ܕܰܢܚܳܫܳܐ ܐܶܬܰܒܰܪ. ܘܡܽܘܟ̈ܠܶܐ ܕܦܰܪܙܠܳܐ ܐܶܓܰܕܶܡ. ܘܶܐܬܶܠ ܠܳܟ ܣܺܝ̈ܡܳܬܳܐ ܕܰܒܚܶܫܽܘܟܳܐ (ܐܫܥܝܐ ܡܗ: ܐ-ܓ). ܗܳܠܝܢ ܗܳܟܺܝܠ ܘܰܐܚܪ̈ܳܢܝܳܬܳܐ ܕܳܐܡܰܪ ܪܽܘܚܳܐ. ܒܫܶܡ ܟܽܘܪܳܫ ܡܶܛܠ ܪܰܒܽܘܬܗܶܝܢ. ܫܳܪ̈ܥܳܢ ܠܗܶܝܢ ܡܶܢܶܗ ܕܓܰܒܪܳܐ. ܒܪܰܡ ܥܰܠ ܗܰܘ ܡܰܠܟܳܐ ܕܰܫܪܳܪܳܐ ܐܰܡܺܝܪ̈ܳܢ. ܗܽܘ ܕܶܝܢ ܢܚܶܬ ܫܰܕܰܪ ܫܒܺܝܬܳܐ ܕܫܰܒܝܳܐ ܗܘܳܬ ܠܣܳܛܳܢܳܐ ܡ̣ܢ ܐܽܘܪܺܫܠܶܡ ܥܶܠܳܝܬܳܐ. ܘܰܩܕܳܡܰܘܗܝ ܫܰܦܺܝ ܐܰܒܳܐ ܥܰܪܡܳܐ ܥܰܣܩܳܐ. ܘܰܩܕܳܡܰܘܗܝ ܬܰܒܰܪ ܬܰܪ̈ܥܶܐ ܕܰܢܚܳܫܳܐ ܕܺܐܝܬܰܝܗܽܘܢ ܡܰܠܟܽܘܬܶܗ ܕܳܐܟܶܠܩܰܪܨܳܐ. ܘܰܛܡܺܝܪ̈ܳܬܳܐ ܡܣܰܬܪ̈ܳܬܳܐ. ܥܺܕ̈ܳܬܳܐ ܐܶܢܶܝܢ ܕܰܢܦܰܩ̈ܝ ܡܶܢ ܬܚܶܝܬ ܬܰܚܦܺܝܬܳܐ ܕܒܺܝ̈ܫܳܬܳܐ. ܘܰܗܘܱ̈ܝ ܥܠܰܠܬܳܐ ܕܰܙܩܺܝܦܳܐ. ܡܳܕܶܝܢ ܐܢ ܡܶܛܠ ܥܰܡܰܢܽܘܐܝܠ ܐܰܡܺܝܪ̈ܳܢ ܒܐܪܳܙܳܐ ܐܳܦ ܫܒܺܝܬܳܐ ܗܳܝ ܕܣܶܠܩܰܬ ܡܶܢ ܒܳܒܶܝܠ ܛܽܘܦܣܳܐ ܡܚܰܘܝܳܐ ܠܰܢ ܕܰܫܪܳܐ ܥܰܡܰܢܽܘܐܝܠ ܡ̣ܢ ܬܚܶܝܬ ܫܽܘܠܛܳܢܳܗ̇ ܕܒܳܒܶܝܠ ܗܳܝ ܒܳܙܽܘܙܬܳܐ ܕܒܶܙܰܬ ܟܽܠܗܽܘܢ ܥܰܡܡ̈ܐ ܕܰܐܪܥܳܐ. ܒܝܰܕ ܣܰܦܣܺܪܳܗ̇ ܦܬܺܝܬܳܐ ܘܣܰܓܺܝܐܰܬ ܦܽܘ̈ܡܶܐ ܘܚܶܡܠܰܬ ܒܰܐܘܳܢܶܝ̈ܗ̇. ܫܝܽܘܠ ܕܶܝܢ ܐܺܝܬܶܝܗ̇ ܗܳܕܐ ܕܡܶܬܟܰܢܝܳܐ ܒܳܒܶܝܠ. ܘܰܫܒܺܝܬܳܐ ܗܳܝ ܕܰܦܢܳܬ ܠܐܽܘܪܺܫܠܶܡ ܥܶܠܳܝܬܳܐ. ܡܶܛܠ ܕܩܳܡܰܬ ܒܬܰܪ̈ܥܶܐ ܕܰܡܥܰܠܶܝܢ ܠܳܗ̇ ܠܬܰܡܳܢ. ܐܝܟ ܕܶܐܡܰܪ ܢܒܺܝܐ.
ܩܳܝ̈ܡܳܢ ܗܘܱ̈ܝ ܪ̈ܶܓܠܰܝ ܒܬܰܪ̈ܥܰܝܟܝ ܐܽܘܪܺܫܠܶܡ. ܬܰܪ̈ܥܶܐ ܕܽܐܘܪܺܫܠܶܡ ܗܳܝ ܚܺܐܪܬܳܐ ܕܒܰܫܡܰܝܳܐ. ܡ̇ܢ ܘܳܠܐ ܕܢܶܪܢܶܐ ܕܺܐܝܬܰܝܗܽܘܢ ܐܶܠܐ ܫܠܺܝ̈ܚܶܐ ܩܰܕܺܝ̈ܫܶܐ. ܕܗܶܢܘܢ ܩܪܰܘ ܠܗ̇ ܦܽܘܢܳܝܳܐ ܠܰܫܒܺܝܬܳܐ ܕܫܰܒܝܳܐ ܗܘܳܬ ܠܣܳܛܳܢܳܐ ܘܗܶܢܘܢ ܦܬܰܚܘ ܬܰܪܥܳܐ ܠܗܰܝܡܳܢܽܘܬܳܐ ܠܥܰܡܡ̈ܐ. ܘܥܰܠܗܳܕܶܐ ܢܒܺܝܐ ܡܩܰܠܶܣ ܠܳܗ̇ ܠܗܳܕܐ ܐܽܘܪܺܫܠܶܡ ܟܰܕ ܡܚܰܘܶܐ ܕܠܘ ܥܩܺܝܪܬܳܐ ܘܰܡܣܰܚܰܦܬܳܐ ܗܝ. ܐܶܠܐ ܡܒܰܢܰܝܬܳܐ ܘܰܕܠܐ ܡܬܽܘܡ ܬܶܬܥܩܰܪ.
ܐܽܘܪܺܫܠܶܡ ܡܒܰܢܰܝܬܳܐ ܐܰܝܟ ܡܕܺܝܢܬܳܐ ܕܰܟܪܺܝܟ ܠܳܗ̇ ܫܽܘܪܳܐ. ܗܳܕܐ ܓܶܝܪ ܠܰܘ ܒܟܺܐܦ̈ܐ ܦܣܺܝ̈ܠܳܬܳܐ ܒܰܢܝܳܐ ܐܶܠܐ ܒܟܺܐܦ̈ܐ ܓܰܒܝܴ̈ܬܳܐ ܕܠܳܐ ܢܳܦܶܠ ܥܠܰܝܗܶܝܢ ܦܰܪܙܠܳܐ. ܕܠܳܗ̇ ܠܗܳܕܐ ܣܠܶܩܘ ܡܶܢܩܕܺܝܡ ܘܝ̣ܬܶܒܘ ܒܗܶܝܢ. ܘܥܰܠܗܳܝ ܐܶܡܰܪ ܢܒܺܝܐ.
ܠܬܰܡܳܢ ܣܠܶܩ̈ܝ ܫܰܪ̈ܒܳܬܳܐ ܫܰܪ̈ܒܳܬܶܗ ܕܡܳܪܝܳܐ. ܒܪܰܡ ܬܘܒ ܐܝܟ ܡܶܠܬܳܐ ܗܳܕܐ. ܠܬܰܡܳܢ ܒܝܰܕ ܫܠܺܝ̈ܚܶܐ ܐܶܬܟܠܺܝܘ ܥܰܡܡ̈ܐ ܡܗܰܝܡ̈ܢܶܐ ܒܰܕܡܽܘܬܳܐ ܕܫܰܪ̈ܒܳܬܳܐ ܕܺܝܣܪܳܐܝܠ. ܗܳܠܝܢ ܕܡܶܬܩܰܪ̈ܝܳܢ ܫܰܪ̈ܒܳܬܶܗ ܕܡܳܪܝܳܐ. ܩܳܪܶܐ ܠܗܽܘܢ ܕܶܝܢ.
ܠܣܳܗܕܽܘܬܳܐ ܠܝ̣ܣܪܳܐܝܠ ܠܡܰܘܕܳܝܽܘ ܠܰܫܡܶܗ ܕܡܳܪܝܳܐ. ܕܰܒܣܳܗܕܽܘܬܳܐ ܕܰܐܝܠܶܝܢ ܕܶܐܬܦܢܺܝܘ ܡܶܢ ܥܰܡܡ̈ܐ ܡܰܟܶܣ ܠܗܽܘܢ ܘܰܡܟܰܘܶܢ ܠܺܝܣܪܳܐܝܠ. ܡܳܐ ܕܝܳܬܒܺܝܢ ܫܠܺܝ̈ܚܶܐ ܒܰܡܕܺܝܢܬܳܐ ܥܶܠܳܝܬܳܐ ܥܰܠ ܬܪܶܥܣܰܪ ܟܽܘܪ̈ܣܰܘܳܬܳܐ. ܐܰܝܟ ܡܶܠܬܳܐ ܕܰܢܒܺܝܐ ܕܶܐܡܰܪ:
ܡܶܛܠ ܕܬܰܡܳܢ ܐܰܪܡܺܝܘ ܟܽܘܪ̈ܣܰܘܳܬܳܐ ܠܕܺܝܢܳܐ. ܟܽܘܪ̈ܣܰܘܳܬܳܐ ܕܒܶܝܬ ܕܰܘܝܕ. ܟܰܕ ܗܰܘ ܕܰܕܢܰܚ ܡܶܢ ܙܰܪܥܶܗ ܕܕܰܘܝܕ ܐܝ̣ܬܰܘܗܝ ܫܽܘܠܛܳܢܳܐ ܘܕܺܝܢܳܐ ܡܶܛܠ ܚܽܘܒܶܗ. ܦܪܰܫ ܥܰܡܳܐ ܚܰܕ ܘܝܰܗܒܶܗ ܠܰܫܠܺܝ̈ܚܶܐ ܕܢܶܗܘܽܘܢ ܠܶܗ ܕܰܝܳܢ̈ܐ. ܕܺܐܝܬܰܘܗܝ ܥܰܡܳܐ ܕܺܝܣܪܳܐܝܠ. ܥܠ ܗܳܠܝܢ ܓܝܪ ܟܽܘܪ̈ܣܰܘܳܬܳܐ ܕܬܳܩܢܺܝܢ ܠܰܫܠܺܝ̈ܚܶܐ ܒܕܺܝܢܳܐ ܐܰܝܟ ܡܶܠܬܶܗ ܘܫܽܘܘܕܳܝܶܗ ܕܡܳܪܢ. ܐܡ̣ܪ ܡܙܰܡܪܳܢܳܐ ܡܶܠܬܳܐ ܗܳܕܐ.
ܫܰܐܠܘ ܒܰܫܠܳܡܳܗ̇ ܕܽܐܘܪܺܫܠܶܡ ܘܢܶܗܘܽܘܢ ܟܰܗܺܝܢܺܝܢ ܪ̈ܳܚܡܰܝܟܝ. ܘܢܶܗܘܶܐ ܫܠܳܡܳܐ ܒܚܰܝܠܶܟܝ ܘܟܰܗܺܝܢܽܘܬܳܐ ܒܣܳܚܪ̈ܳܬܶܟܝ. ܘܕܳܡܝܳܐ ܗܳܕܐ ܠܗܰܘ ܕܩܳܐܷܡ ܘܰܡܦܰܩܶܕ ܠܰܐܝܠܶܝܢ ܕܳܐܙܺܠ̱ܝܢ ܒܽܐܘܪܚܳܐ ܕܰܡܕܺܝܢܬܳܐ ܘܡܳܐ ܕܡܰܢܰܥܘ ܠܬܰܡܳܢ. ܢܫܰܐܠܽܘܢ ܫܠܳܡܳܗ̇ ܕܽܐܘܪܺܫܠܶܡ ܡܕܺܝܢܬܳܐ. ܘܕܰܐܝܠܶܝܢ ܕܺܐܝܬ ܒܗ̇. ܟܰܗܺܝܢܽܘܬܳܐ ܕܪ̈ܳܚܡܶܝܗ̇ ܕܽܐܘܪܺܫܠܶܡ ܐܝ̣ܬܶܝܗ̇ ܝܳܪܬܽܘܬܳܐ ܕܠܐ ܡܶܬܚܰܒܠܳܢܽܘܬܳܐ ܕܰܒܥܳܠܡܳܐ ܚܰܕܬܳܐ. ܕܠܳܐ ܡܶܬܚܰܒܠܳܢܽܘܬܳܐ ܡܫܺܝܚܰܐ ܗܘ. ܗܳܫܐ ܕܶܝܢ ܐܶܡܰܪ ܢܒܺܝܳܐ ܕܡܶܛܠ ܐܰܝܕܳܐ ܥܶܠܬܳܐ ܓܠܳܐ ܦܽܘܫܳܩܳܗ̇ ܡܫܺܝܚܳܐ ܕܰܡܕܺܝܢܬܳܐ.
ܡܶܛܠ ܐܰܚܰܝ̈ ܘܪ̈ܳܚܡܰܝ ܐܶܡܰܠܶܠ ܥܠܰܝܟܝ ܫܠܳܡܳܐ ܡܶܛܠ ܒܰܝܬܶܗ ܕܡܳܪܝܳܐ ܐܰܠܳܗܰܢ ܐܶܒܥܶܐ ܒܛܳܒܴ̈ܬܶܟܝ. ܐܰܚܰܘ̈ܗܝ ܘܪ̈ܳܚܡܰܘܗܝ ܕܰܢܒܺܝܐ. ܡ̇ܢ ܘܳܠܶܐ ܕܢܶܪܢܶܐ ܕܺܐܝܬܰܝܗܽܘܢ. ܐܶܠܐ ܢܒܺܝ̈ܐ ܘܰܫܠܺܝ̈ܚܶܐ. ܘܗܳܝ ܕܶܐܡܰܪ ܐܶܒܥܶܐ ܒܛܳܒܴ̈ܬܶܟܝ ܕܰܢܚܰܘܶܐ ܪܶܓܬܳܐ ܕܰܩܢܶܐ ܠܘܳܬ ܛܳܒܴ̈ܬܳܐ ܕܽܐܘܪܺܫܠܶܡ ܥܶܠܳܝܬܳܐ. ܗܳܝ ܕܰܡܨܰܠܶܝܢܰܢ ܕܢܶܫܬܘܶܐ ܠܳܗ̇. ܘܢܶܗܘܶܐ ܒܳܗ̇ ܝܳܪ̈ܽܘܬܶܐ ܒܝܰܕ ܡܳܪܢ ܝܶܫܽܘܥ ܡܫܺܝܚܳܐ ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܥܶܣܪܺܝܢ ܘܚܰܕ ܘܥܰܠ ܡܶܬܥܰܠܝܳܢܽܘܬܰܢ ܕܰܒܝܰܕ ܡܳܪܰܢ ܠܗܰܘ ܒܰܝܬܰܢ ܕܒܰܫܡܰܝܳܐ. ܡܳܪܰܢ ܐܰܫܘܳܐ ܠܰܢ ܠܗܰܘ ܒܰܝܬܳܐ.
ܡܙܡܘܪܐ ܕܡܐܐ ܘܥܣܪܝܢ ܘܬܪܝܢ
ܡܰܘܕܰܥ ܕܕܰܐܝܟ ܐܰܝܕܳܐ ܢܰܦܫܳܐ ܙܳܕܩܶ ܕܬܶܗܘܶܐ ܐܺܝܬ ܠܶܗ ܠܗܰܘ ܕܩܳܐܶܡ ܩܕܳܡ ܡܳܪܝܳܐ
ܐܰܝܠܶܝܢ ܕܰܐܪܓܶܫܘ ܒܪܰܒܽܘܬܳܐ ܕܰܟܝܳܢܶܗ ܕܰܐܠܳܗܳܐ. ܒܢܰܦܫܳܐ ܡܰܟܺܝܟܬܳܐ ܩܳܪܒܺܝܢ ܠܬܰܪܥܳܐ ܕܒܳܥܽܘܬܶܗ. ܟܕ ܫܳܕܶܝܢ ܡ̣ܢ ܠܘܳܬܗܽܘܢ ܟܽܠܗ̇ ܡܫܰܩܠܽܘܬܳܐ ܘܪܳܡܽܘܬܳܐ. ܘܠܳܐ ܒܰܓܒܺܝ̈ܢܶܐ ܓܽܘܡܕܳܢ̈ܐ ܬܳܠܶܝܢ ܥܰܝ̈ܢܰܝܗܽܘܢ ܡܳܐ ܕܚܳܝܪܺܝܢ ܠܘܳܬܶܗ. ܘܠܐ ܒܬܶܐܡܪ̈ܶܐ ܠܳܐ ܡܶܬܟܰܚܕܳܢ̈ܐ ܒܚܰܘܪܳܐ ܠܳܐ ܡܛܰܟܣܳܐ܆ ܡܰܨ̈ܕܳܢ ܥܰܝ̈ܢܰܝܗܽܘܢ ܒܳܬܪܶܗ. ܟܰܕ ܫܩܺܝܠܺܝܢ ܥܠܰܝܗܽܘܢ ܢܺܝܪܳܐ ܕܫܽܘܥܒܳܕܳܐ ܘܰܒܕܽܘܡܝܳܐ ܕܥܰܒ̈ܕܶܐ ܠܘܳܬ ܡܳܪ̈ܰܝܗܽܘܢ ܘܫܳܐܠܺܝܢ ܠܗ ܪ̈ܰܚܡܶܐ. ܟܰܕ ܢܳܣܒܺܝܢ ܠܗܽܘܢ ܛܶܟܣܳܐ ܘܰܕܡܽܘܬܳܐ ܡ̣ܢ ܛܽܘܒܳܢܳܐ ܕܰܘܝܕ ܗܰܘ ܡܰܠܟܳܐ ܘܰܢܒܺܝܳܐ. ܐܳܦ ܗܽܘ ܓܶܝܪ ܟܕ ܒܪܰܒܽܘܬܳܐ ܕܡܰܠܟܽܘܬܳܐ ܠܳܐ ܚܳܐܱܪ ܗܘܳܐ ܘܰܒܬܳܓܳܐ ܕܫܽܘܠܛܳܢܶܗ ܠܳܐ ܡܶܬܚܬܰܪ ܗܘܳܐ ܘܡܶܬܬܪܺܝܡ. ܩܴ̈ܠܐ ܕܡܶܬܢܰܚܬܳܢܽܘܬܳܐ ܦܳܪܽܘܫܳܐܝ̣ܬ ܡܰܫܡܰܥ ܗܘܳܐ ܒܝܕ ܩܺܝܬܳܪܶܗ ܩܕܳܡ ܐܠܗܐ ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܥܶܣܪܺܝܢ ܘܬܰܪܬܶܝܢ ܘܳܐܡܰܪ:
ܠܘܳܬܳܟ ܐܰܪܺܝܡܶܬ ܥܰܝ̈ܢܰܝ ܥܳܡܽܘܪܳܐ ܕܰܫܡܰܝܳܐ. ܐܰܝܟ ܥܰܝ̈ܢܶܐ ܕܥܰܒ̈ܕܶܐ ܠܘܳܬ ܡܳܪ̈ܰܝܗܽܘܢ. ܘܰܐܝܟ ܥܰܝ̈ܢܶܐ ܕܰܐܡܬܳܐ ܠܘܳܬ ܡܳܪܬܳܗ̇ ܗܳܟܰܢ ܥܰܝ̈ܢܰܝܢ ܠܘܳܬܳܟ ܡܳܪܝܳܐ ܐܰܠܗܳܐ ܥܕܰܡܳܐ ܕܰܬܪܰܚܶܡ ܥܠܰܝܢ. ܗܳܢܐ ܩܳܢܽܘܢܳܐ ܕܰܨܠܽܘܬܳܐ ܣܳܡ ܛܽܘܒܳܢܳܐ ܕܰܘܝܕ. ܠܰܫܒܺܝܬܳܐ ܕܰܕܒܰܪܘ ܓܰܝܴ̈ܣܶܐ ܕܰܚܛܺܝܬܳܐ. ܕܬܶܗܘܶܐ ܢܛܺܝܪܳܐ ܡܳܐ ܕܩܳܪܒܳܐ ܠܘܳܬ ܐܰܠܗܳܐ ܠܡܶܒܥܳܐ ܪ̈ܰܚܡܶܐ. ܘܡܶܢ ܥܰܒܕ̈ܐ ܕܰܟܕܺܝܢܺܝܢ ܒܢܺܝܪܳܐ ܘܰܒܫܽܘܥܒܳܕܳܐ ܕܡܳܪ̈ܰܝܗܽܘܢ. ܝܰܗܒ ܠܗܳܢܽܘܢ ܬܰܚܘܺܝܬܳܐ ܐܰܝܟ ܕܡܶܫܟܰܚ ܐܢܳܫ ܠܡܶܬܰܠ ܬܰܚܘܺܝܬܳܐ ܥܰܠ ܗܰܘ ܟܝܳܢܳܐ ܡܠܶܐ ܛܽܘ̈ܒܶܐ. ܟܕ ܓܝܪ ܡܶܬܒܰܝܢܺܝܢܰܢ ܒܰܟܝܳܢܳܐ ܡܥܰܠܝܳܐ ܕܰܐܠܗܳܐ. ܘܚܳܝܪܺܝܢܰܢ ܒܫܶܦܠܳܐ ܕܰܟܝܳܢܳܐ ܕܺܝܠܰܢ. ܘܠܳܐ ܗܳܟܰܢ ܡܶܬܡܰܛܶܝܢܰܢ ܠܰܕܡܽܘܬܳܐ ܕܥܰܒ̈ܕܶܐ ܕܰܟܡܳܐ ܐܶܢ ܡܬܰܚܬܰܝ ܥܰܒܕܳܐ ܘܺܐܝܬܰܘܗܝ ܬܚܶܝܬ ܢܺܝܪܳܐ. ܐܶܠܐ ܒܰܪ ܟܝܳܢܰܐ ܗܘ ܕܡܳܪܶܗ. ܒܡܳܢܳܐ ܓܶܝܪ ܡܶܬܦܰܚܰܡ ܥܰܒܕܳܐ ܠܥܳܒܽܘܕܶܗ. ܐܰܘ ܒܡܳܢܳܐ ܡܶܬܕܰܡܶܐ ܨܰܠܡܳܐ ܕܠܳܐ ܪܓܶܫܬܳܐ ܠܨܰܝܳܪܶܗ. ܐܶܠܐ ܡܳܕܶܝܢ ܘܠܐ ܠܗܳܕܐ ܕܡܽܘܬܳܐ ܕܥܰܒܕܶܐ ܡܛܰܝܢܰܢ ܒܦܽܘܚܳܡܳܐ ܕܗܰܘ ܕܰܡܥܰܠܰܝ ܡܶܢ ܟܽܠ. ܘܠܰܢ ܠܘܳܬ ܪܰܘܡܳܐ ܣܳܡܟܺܝܢܰܢ ܠܡܶܣܰܩ. ܘܗܳܝ ܕܶܐܡܰܪ ܢܒܺܝܳܐ. ܠܘ ܟܝܳܢܳܐܝ̣ܬ ܢܚܽܘܪ ܒܗ̇. ܐܶܠܐ ܡܕܰܒܪܳܢܳܐܝ̣ܬ. ܟܰܕ ܠܶܗ ܠܡܳܪܳܐ ܒܪ̈ܶܒܽܘ ܙܰܒܢ̈ܝ̣ܢ ܥܰܠ ܪܰܘܡܳܐ ܕܰܫܡܰܝܳܐ ܡܶܬܚܰܫܒܺܝܢܰܢ ܕܰܡܥܰܠܰܝ ܘܪܳܡ ܡܶܢܰܢ. ܘܡܶܛܠ ܕܠܘ ܐܝܟ ܕܚܳܙܶܐ ܥܰܒܕܳܐ ܠܡܳܪܶܗ. ܘܡܶܬܒܰܩܝܳܐ ܐܰܡܬܳܐ ܒܡܳܪܬܳܗ̇. ܐܝ̣ܬ ܠܰܟܝܳܢܳܐ ܐܢܳܫܳܝܳܐ ܕܰܢܚܽܘܪ ܘܢܶܬܒܰܩܶܐ ܒܗܰܘ ܟܝܳܢܳܐ ܡܠܶܐ ܛܽܘ̈ܒܶܐ. ܡܳܕܶܝܢ ܓܰܠܝܳܐܗܝ ܡܶܛܠ ܕܢܶܣܰܒ ܥܠܰܝܢ ܪܶܥܝܳܢܳܐ ܕܫܽܘܥܒܳܕܳܐ ܕܰܐܝܠܶܝܢ ܕܥܰܠ ܪ̈ܰܚܡܶܐ ܣܢܺܝܩܺܝܢ ܐܶܡܰܪ ܗܳܕܐ ܢܒܺܝܐ. ܐܶܠܐ ܡܶܛܠ ܪ̈ܰܚܡܶܐ ܫܩܰܠ ܕܡܽܘܬܳܐ ܕܰܐܝܟ ܥܰܒܕܳܐ ܢܣܺܝܡ ܕܡܽܘܬܶܗ ܕܢܰܦܫܶܗ. ܒܗܳܝ ܕܟܕ ܠܰܟܝܳܢܳܐ ܐܢܳܫܳܝܳܐ ܡܶܫܬܰܘܕܰܥ ܗܘܳܐ. ܘܠܰܟܝܳܢܳܐ ܡܠܶܐ ܛܽܘ̈ܒܶܐ ܕܰܐܠܗܳܐ ܡܰܬܕܟܰܪ ܗܘܳܐ. ܘܰܒܡܰܙܡܽܘܪܳܐ ܕܡܳܐܐ ܘܰܬܠܳܬܳܐ ܐܡ̇ܪ ܗܘܳܐ: ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘܡܰܘ̈ܗܝ. ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ. ܕܡܳܐ ܕܢܶܫܒܰܬ ܒܶܗ ܪܽܘܚܳܐ ܠܰܝܬܰܘܗܝ. ܘܳܐܦܠܳܐ ܡܶܬܝܰܕܥܳܐ ܕܽܘܟܬܶܗ (ܡܙܡܘܪܐ ܩܓ). ܘܗܳܠܶܝܢ ܐܶܡܰܪ ܡܶܛܠ ܟܝܳܢܳܐ ܐܢܳܫܳܝܳܐ. ܫܰܦܺܝܪ ܡܳܕܶܝܢ ܐܶܬܢܰܗܪܰܬ ܬܰܚܘܺܝܬܳܐ ܗܳܝ ܕܡܶܛܠ ܥܰܒ̈ܕܶܐ. ܕܠܰܘ ܒܰܟܝܳܢܳܐ ܕܪܰܒܽܘܬܳܐ ܚܳܝܪܳܐ. ܐܠܐ ܒܢܺܝܫܳܐ ܕܡܶܛܠ ܪ̈ܰܚܡܶܐ ܐܰܡܪܳܗ̇ ܢܒܺܝܐ. ܘܥܰܠܗܳܕܐ ܐܳܦ ܩ̈ܠܐ ܕܰܐܝܠܶܝܢ ܕܰܐܠܺܝܨܺܝܢ ܥܰܠ ܪ̈ܰܚܡܶܐ ܡܰܫܡܰܥ ܘܳܐܡܰܪ:
ܪܰܚܶܡܥܠܰܝܢ ܡܳܪܝܳܐ ܪܰܚܶܡܥܠܰܝܢ. ܥܦܺܝܦܳܐܝ̣ܬ ܐܶܬܚܰܫܰܚ ܒܒܰܪܬ ܩܳܠܐ ܕܫܳܐܠܳܐ ܪ̈ܰܚܡܶܐ. ܬܰܪܬܶܝܢ ܙܰܒ̈ܢܺܝܢ ܚܰܘܺܝ ܡܳܪܝܳܐ ܦܽܘܪܩܳܢܶܗ ܠܘܳܬ ܝ̣ܣܪܳܐܝܠ. ܚܕܳܐ ܟܕ ܐܰܦܶܩ ܐܶܢܘܢ ܡ̣ܢ ܡܶܨܪܶܝܢ. ܘܰܐܚܪܺܬܳܐ ܟܕ ܐܰܣܶܩ ܐܶܢܘܢ ܡ̣ܢ ܒܶܒܶܝܠ. ܘܡܶܛܠ ܐܰܝܕܳܐ ܥܶܠܬܳܐ ܡܶܬܟܰܫܰܦ ܘܳܐܡܰܪ:
ܡܶܛܠ ܕܣܽܘܓܳܐܐ ܕܫܺܝܛܽܘܬܳܐ ܫܡܰܥܢ. ܘܣܽܘܓܳܐܐ ܣܶܒܥܰܬ ܢܰܦܫܰܢ ܡܽܘܝܳܩܳܐ ܕܰܡܒܰܙ̈ܚܳܢܶܐ ܘܫܳܛܝܽܘܬܳܐ ܕܫܰܒܰܗܪ̈ܳܢܶܐ. ܒܗܳܠܶܝܢ ܡܰܘܕܰܥ ܗܘܳܐ ܥܰܠ ܫܳܛܝܽܘܬܳܐ ܕܡܶܨܪ̈ܳܝܶܐ ܘܥܰܠ ܡܽܘܩܳܝܳܐ ܕܒܳܒܠܳܝ̈ܐ ܕܰܡܡܰܝܩܺܝܢ ܗܘܰܘ ܒܥܰܡܶܗ ܕܡܳܪܝܳܐ. ܡܶܨܪ̈ܳܝܶܐ ܡ̣ܢ ܟܕ ܦܳܠܚܺܝܢ ܒܗܽܘܢ ܦܽܘܠܚܳܢܳܐ ܩܰܫܝܳܐ ܕܛܺܝܢܳܐ ܘܠܶܒܢܷ̈ܐ. ܘܬܳܢܶܝܢ ܗܘܰܘ ܒܶܐܕ̈ܢܰܝܗܽܘܢ ܨܰܥܪܳܐ ܘܡܽܘܝܳܩܳܐ ܕܥܰܒ̈ܕܶܐ ܕܰܐܠܗܳܐ. ܘܰܡܓܰܕܦܺܝܢ ܗܘܰܘ ܥܰܠ ܐܰܠܗܳܐ ܕܺܝܣܪܳܐܝܠ ܘܡܶܫܬܰܒܗܪܺܝܢ ܕܰܙܟܰܘ ܐܰܠܳܗܰܝ̈ܗܽܘܢ ܠܰܐܠܗܳܐ ܪܰܒܳܐ. ܘܰܐܚܪܶܒ ܒܰܝܬܶܗ ܘܒܰܙ ܡܳܐܢܱ̈ܝ ܩܽܘܕܫܶܗ. ܕܰܐܝܟ ܗܳܟܰܢܳܐ ܗܘܳܬ ܒܝܰܘ̈ܡܰܝ ܒܺܝܠܛܰܫܨܰܪ. ܐܰܦܶܩ ܡܳܐܢ̈ܐ ܩܰܕܺܝ̈ܫܶܐ ܕܒܰܝܬܶܗ ܕܡܳܪܝܳܐ ܘܶܐܟܰܠ ܘܶܐܫܬܺܝ ܒܗܽܘܢ ܗܽܘ ܘܢܶܫܰܘ̈ܗܝ ܘܰܕܪ̈ܽܘܟܳܬܶܗ ܚܰܡܪܳܐ (ܕܢܝܐܝܠ ܗ: ܓ). ܐܰܒܽܘܗܝ ܕܗܳܢܐ ܣܳܡ ܐܶܢܘܢ ܠܡܳܐܢ̈ܐ ܩܰܕܺܝ̈ܫܶܐ ܕܰܐܦܶܩ ܡ̣ܢ ܗܰܝܟܠܐ ܕܰܐܠܗܐ ܕܒܽܐܘܪܺܫܠܶܡ ܒܶܝܬ ܓܰܙܶܗ ܕܰܦܬܰܟܪ̈ܶܐ ܘܝܰܩܰܪ ܐܶܢܘܢ. ܡܶܛܠ ܕܣܳܓܶܕ ܗܘܳܐ ܘܰܡܝܰܩܰܪ. ܦܰܩܶܕ ܕܢܶܬܬܣܺܝܡܽܘܢ. ܒܪܶܗ ܒܺܝܠܛܰܫܨܰܪ ܡܒܰܙܳܚܽܘ ܒܰܙܰܚ ܒܡܳܐܢ̈ܐ ܩܰܕܺܝ̈ܫܶܐ. ܒܙܰܒܢܳܐ ܗܰܘ ܐܶܬܺܝܠܶܕ ܙܽܘܪܒܳܒܶܝܠ. ܗܰܘ ܕܡܶܛܠܳܬܶܗ ܙܰܡܰܪ ܕܰܘܝܕ ܬܶܫܒܽܘܚܬܳܐ ܗܳܕܶܐ: ܟܰܕ ܡܶܬܒܰܩܶܐ ܗܘܳܐ ܒܥܰܝܢܳܐ ܕܪܽܘܚܳܐ ܒܡܽܘܝܳܩܳܐ ܘܒܶܙܚܳܐ ܘܫܺܝܛܽܘܬܳܐ ܕܰܫܡܰܥ ܘܰܚܙܳܐ ܥܰܡܳܐ ܕܰܐܠܗܳܐ. ܩ̈ܠܐ ܕܚܰܫܳܐ ܘܕܰܬܘܳܬܳܐ ܡܙܰܡܰܪ ܗܘܳܐ ܕܰܐܝܟ ܗܳܟܰܢܳܐ ܓܶܝܪ ܡܥܳܕܺܝܢ ܒܥܶܠܕ̈ܒܳܒܶܐ ܕܰܐܠܗܳܐ ܡܒܰܙܚܺܝܢ ܒܡܳܐܢ̈ܐ ܕܩܰܕܺܝ̈ܫܶܐ ܕܒܰܝܬܶܗ ܡܳܐ ܕܡܶܫܬܰܠܛܺܝܢ ܥܠܰܝܗܽܘܢ. ܟܕ ܐܳܫܕܺܝܢ ܡܽܘܝܳܩܳܐ ܘܒܶܙܚܳܐ ܥܰܠ ܡܫܰܡܫܳܢܰܘ̈ܗܝ ܘܥܠ ܥܰܒ̈ܕܰܘܗܝ. ܕܳܐܦܚܢܰܢ ܢܨܰܠܶܐ ܕܡ̣ܢ ܩܴ̈ܠܐ ܕܰܡܒܰܙ̈ܚܳܢܶܐ ܢܶܬܦܪܶܩ. ܘܡ̣ܢ ܫܳܛܝܽܘܬܳܐ ܕܫܰܒܰܗܪ̈ܳܢܶܐ ܢܶܬܦܰܨܶܐ. ܘܰܠܪ̈ܰܚܡܶܐ ܕܡܳܪܶܐ ܟܽܠ ܢܶܫܬܘܶܐ ܘܰܒܥܰܒܕܽܘܬܳܐ ܕܦܰܠܳܚ̈ܐ ܥܰܡ ܐܠܗܐ ܢܟܰܬܰܪ ܘܢܶܛܰܪ ܦܽܘܩܕܳܢܰܘ̈ܗܝ ܘܢܰܘܕܶܐ ܒܟܽܠܙܒܰܢ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܝܢ ܘܬܠܬܐ
ܥܰܠ ܩܪܳܒܳܐ ܕܥܳܒܕܺܝܢ ܕܰܝ̈ܘܶܐ ܥܰܡ ܢܰܦܫܳܐ.
ܘܡܶܬܕܰܡܶܐ ܒܚܺܐܦܳܐ ܕܡܰܝܴ̈ܐ ܐܰܝܠܶܝܢ ܕܶܐܬܕܰܪܰܫܘ ܪ̈ܶܓܫܰܝܗܽܘܢ ܘܡܰܕܥܰܝ̈ܗܘܢ ܒܩܶܪܝܳܢܳܐ ܕܰܟܬܳܒ̈ܐ ܩܰܕܺܝ̈ܫܶܐ. ܠܳܐ ܛܳܥܝܳܐ ܠܗܽܘܢ ܐܽܘܡܳܢܽܘܬܳܐ ܕܰܩܪ̈ܳܒܶܐ ܕܰܡܙܺܝܥܺܝܢ ܚܰܝ̈ܠܰܘܳܬܳܐ ܒܺܝ̈ܫܶܐ ܠܽܘܩܒܰܠ ܢܰܦܫܳܐ. ܡܶܫܟܚܺܝܢ ܕܕܳܒܪܺܝܢ ܒܚܺܐܦ̈ܐ ܩܫܰܝܴ̈ܐ ܠܟܽܠܡܶܕܶܡ ܕܠܐ ܩܒܺܝܥ ܘܰܡܫܰܪܰܪ ܡܶܢ ܐܰܓܽܘܢ̈ܐ ܐܰܝܠܝܢ ܕܡܶܬܥܰܬܕܺܝܢ ܡ̣ܢ ܪ̈ܽܘܚܶܐ ܒܺܝ̈ܫܳܬܳܐ ܘܰܒܪ̈ܶܓܠܳܬܳܐ ܘܰܒܢܰܗܪ̈ܳܘܳܬܳܐ ܐܰܡܬܠܽܘܗܝ ܢܒܺܝ̈ܐ ܘܡܳܪܳܐ ܕܰܢܒܺܝ̈ܐ. ܠܗܰܘ ܩܪܳܒܳܐ ܕܰܡܛܰܝܶܒ ܐܳܟܶܠܩܰܪܨܳܐ. ܡܳܪܰܢ ܕܶܝܢ ܡܶܛܠ ܕܥܰܫܺܝܢ ܗܘ ܩܪܳܒܳܐ ܕܩܳܐܷܡ ܠܽܘܩܒܰܠ ܥܺܕܬܳܐ. ܝܰܬܺܝܪ ܡ̣ܢ ܗܰܘ ܕܩܳܡ ܥܰܠ ܝ̣ܣܪܳܐܝܠ. ܒܡܶܛܪܳܐ ܘܰܒܢܰܗܪ̈ܰܘܳܬܳܐ ܡܰܡܬܶܠ ܠܶܗ ܠܰܐܓܽܘܢܳܐ. ܡܰܢ ܕܫܳܡܰܥ ܡܶܠܰܝ̈ ܘܥܳܒܶܕ ܠܗܶܝܢ ܢܶܬܕܰܡܶܐ ܠܓܰܒܪܳܐ ܚܰܟܺܝܡܳܐ܇ ܕܰܒܢܳܐ ܒܰܝܬܶܗ ܥܰܠ ܫܽܘܥܳܐ. ܘܰܢܚܶܬ ܡܶܛܪܳܐ ܘܶܐܬܰܘ ܢܰܗܪ̈ܰܘܳܬܳܐ ܘܶܐܬܛܰܪܺܝܘ ܒܒܰܝܬܳܐ ܗܰܘ ܘܠܳܐ ܢܦܰܠ: ܫܶܬܶܐܣܰܘ̈ܗܝ ܥܠ ܫܽܘܥܳܐ ܣܺܝ̈ܡܳܢ ܗܘܱ̈ܝ. ܘܗܰܘ ܕܫܳܡܰܥ ܡܶܠܰܝ̈ ܘܠܐ ܥܳܒܶܕ ܠܗܶܝܢ܆ ܢܶܬܕܰܡܶܐ ܠܓܰܒܪܳܐ ܣܰܟܠܳܐ܇ ܕܰܒܢܳܐ ܒܰܝܬܶܗ ܥܠ ܚܶܠܳܐ. ܘܰܢܚܶܬ ܡܶܛܪܳܐ ܘܶܐܬܰܘ ܢܰܗܪ̈ܰܘܳܬܳܐ. ܘܶܐܬܛܰܪܺܝܘ ܒܒܰܝܬܳܐ ܗܰܘ ܘܰܢܦܰܠ. ܘܰܗܘܳܬ ܡܰܦܽܘܠܬܳܐ ܕܒܰܝܬܳܐ ܗܰܘ ܪܰܒܳܐ (ܡܬܝ ܙ: ܟܕ-ܟܙ). ܒܗܳܠܝܢ ܨܺܝܪ ܩܪܳܒܳܐ ܕܳܐܟܶܠܩܰܪܨܳܐ. ܥܰܠ ܕܒܰܚܛܽܘܦܝܳܐ ܘܡܶܬܚܰܫܚܺܝܢ ܕܰܝ̈ܘܶܐ. ܡܳܐ ܕܡܶܬܩܰܫܶܝܢ ܠܽܘܩܒܰܠ ܢܰܦܫܳܐ. ܥܰܠܗܳܝ ܕܰܡܝܶܗ ܥܰܡܰܢܽܘܐܝܠ ܠܰܩܪܳܒܗܽܘܢ ܠܡܶܠܐܴܐ ܕܢܰܗܪ̈ܰܘܳܬܳܐ. ܒܳܬܰܪ ܓܶܝܪ ܕܥܳܐܷܙ ܢܶܣܝܽܘܢܳܐ ܘܩܳܝܡܳܐ ܢܰܦܫܳܐ ܒܽܐܘܠܨܳܢ̈ܐ ܕܥܳܕܶܝܢ ܥܠܶܝܗ̇. ܗܳܝܕܝܢ ܡܳܐ ܕܚܳܙܶܝܢ ܠܳܗ̇ ܕܡܶܙܕܰܥܙܥܳܐ ܠܳܟܳܐ ܘܰܠܟܳܐ. ܢܳܫܒܺܝܢ ܒܗ̇ ܪ̈ܽܘܚܶܐ ܕܕܰܝ̈ܘܶܐ ܘܛܳܪܶܝܢ ܒܳܗ̇. ܒܫܽܘܪܳܝܶܗ ܕܡܰܙܡܽܘܪܳܐ ܗܳܢܐ ܕܰܡܳܐܐ ܘܥܶܣܪܺܝܢ ܘܰܬܠܳܬܳܐ. ܕܡܶܛܠ ܕܰܡܙܰܡܪܳܢܳܐ ܕܰܘܝܕ ܢܺܝܫܳܐ ܕܰܐܓܽܘܢܳܐ ܨܳܪ ܒܰܙܡܺܝܪܬܳܐ ܗܳܕܐ. ܘܝܳܠܦܺܝܢܰܢ ܡܶܢ ܩܳܠܶܗ. ܕܥܰܠܗܳܕܐ ܨܳܒܶܐ ܕܢܺܐܡܰܪ:
ܐܶܠܽܘܠܳܐ ܡܳܪܝܳܐ ܕܩܳܡ ܠܰܢ ܢܺܐܡܰܪ ܝ̣ܣܪܳܐܝܠ ܕܶܐܠܽܘܠܳܐ ܡܳܪܝܳܐ ܕܩܳܡ ܠܰܢ܆ ܟܰܕ ܩܳܡܘ ܥܠܰܝܢ ܒܢܰܝ̈ܢܳܫܳܐ ܚܰܝܰܬ ܒܳܠܥܺܝܢ ܗܘܰܘ ܠܰܢ. ܘܟܰܕ ܐܶܬܚܰܡܰܬ ܪܽܘܓܙܗܽܘܢ ܥܠܰܝܢ ܒܡܰܝܴ̈ܐ ܡܛܰܒܥܺܝܢ ܗܘܰܘ ܠܰܢ. ܗܳܠܝܢ ܕܶܐܡܰܪ ܡܙܰܡܪܳܢܳܐ ܐܰܝܟܰܢܳܐ ܕܩܰܕܡܶܬ ܐܶܡܪܶܬ ܠܰܩܪܳܒܶܗ ܕܰܒܥܶܠܕܰܪܳܐ. ܘܥܰܠܗܳܝ ܐܶܡܰܪ ܟܰܕ ܩܳܡܘ ܥܠܰܝܢ ܒܢܰܝ̈ܢܳܫܳܐ. ܡܶܛܠ ܕܠܳܐ ܥܳܪܝܳܐ ܗܘܳܬ ܬܰܪܥܺܝܬܳܐ ܕܰܐܝܠܶܝܢ ܕܡܶܐܟܽܘܠܬܗܽܘܢ ܚܰܠܒܳܐ ܗܘܳܬ ܐܰܝܠܝܢ ܓܶܝܪ ܕܶܐܬܢܰܦܰܩܘ ܪ̈ܶܓܫܰܝܗܽܘܢ ܠܡܶܦܪܰܫ ܒܺܝܫܬܳܐ ܡ̣ܢ ܛܳܒܬܳܐ. ܡܳܕܶܝܢ ܠܰܓܡܺܝܪ̈ܶܐ ܦܫܺܝܩ ܠܡܶܕܰܥ. ܕܡܶܢ ܐܳܟܶܠܩܰܪܨܳܐ ܡܶܬܥܰܬܰܕ ܩܪܳܒܳܐ ܘܕܺܝܠܗܽܘܢ ܗܺܝ ܠܡܶܕܰܥ. ܕܶܐܡܰܬܝ ܡܶܬܬܙܺܝܥܺܝܢ ܚܰܫ̈ܐ ܕܡ̣ܢ ܒܺܝܫܳܐ. ܘܶܐܢܗܽܘ ܕܫܳܡܥܺܝܢܰܢ ܡ̣ܢ ܡܦܰܫ̈ܩܳܢܶܐ ܕܗܳܢܘܢ ܕܒܳܥܶܝܢ ܗܘܰܘ ܒܚܶܡܬܳܐ ܕܪܽܘܓܙܗܽܘܢ. ܐܰܝܟ ܕܢܶܒܠܥܽܘܢ ܚܰܝܰܬ ܠܺܝܣܪܳܐܝܠ ܕܰܐܠܗܳܐ. ܐܰܝܟܰܢܳܐ ܕܶܐܢ ܡܶܫܟܚܳܐ ܒܫܶܢܰܝ̈ܗܽܘܢ ܢܶܬܚܰܫܚܽܘܢ ܚܠܳܦ ܣܰܦܣܺܪܳܐ. ܟܕ ܦܳܥܪܺܝܢ ܓܰܓܪ̈ܳܬܗܽܘܢ ܘܠܳܐ ܣܳܒܥܺܝܢ ܡ̣ܢ ܒܶܣܪܳܐ ܕܩܰܕܺܝ̈ܫܶܐ. ܘܒܳܥܶܝܢ ܐܶܢ ܡܰܨܝܳܐ ܚܰܝܰܬ ܢܶܒܠܥܽܘܢ ܠܬܰܡܺܝ̈ܡܶܐ. ܢܶܒܥܶܐ ܗܳܟܺܝܠ ܡܶܛܠ ܡܳܢܳܐ ܗ̄ܝ ܕܒܳܠܥܺܝܢ ܚܰܝܰܬ ܠܡܰܢ ܕܡܶܬܒܠܰܥ ܠܗܽܘܢ. ܠܰܐܚܪ̈ܳܢܶܐ ܒܡܰܝܴ̈ܐ ܡܛܰܒܥܺܝܢ. ܠܘ ܓܶܝܪ ܣܪܺܝܩܳܐܝ̣ܬ ܣܺܝܡܳܐ ܡܶܠܬܳܐ ܗܳܕܐ. ܡܰܝܴ̈ܐ ܕܳܡܝܳܐ܆ ܕܰܠܫܰܪܝܽܘܬܳܐ ܘܪܰܥܕܽܘܬܳܐ ܕܰܪ̈ܓܺܝܓܳܬܳܐ ܕܒܶܣܪܳܐ ܡܫܰܡܰܗ. ܒܗܳܠܝܢ ܡܥܳܕ ܟܳܡܶܢ ܚܙܺܝܪܳܐ ܗܰܘ ܕܥܳܒܳܐ. ܘܡܳܐ ܕܰܒܝܰܕ ܣܝܳܢܳܐ ܪܰܛܺܝܒܳܐ ܐܶܫܟܰܚ ܐܰܬܪܳܐ. ܚܳܠܶܕ ܥܕܰܡܳܐ ܠܥܶܩܳܪܳܐ ܕܰܓܦܶܬܳܐ. ܘܳܐܟܶܠ ܘܰܡܚܰܒܶܠ ܠܳܗ̇. ܘܥܳܩܰܪ ܠܗ̇ ܒܢܺܝܒܶܗ. ܘܫܳܒܶܩ ܕܢܶܥ̈ܠܳܢ ܒܳܬܪܶܗ ܚܰܝ̈ܘܳܬܳܐ ܕܒܰܪܳܐ ܘܢܶܪ̈ܥܝܳܢ ܘܰܢܚܰܒ̈ܠܳܢܳܗ̇ ܠܰܓܦܶܬܳܐ ܢܰܦܫܳܐ. ܘܰܕܠܺܝܠܳܐܝ̣ܬ ܠܡܶܬܒܠܥܽܘ ܗܳܘܝܳܐ. ܐܳܦ ܡܶܬܒܰܠܥܳܢܺܝܬܳܐ ܠܗܰܘ ܦܽܘܡܳܐ ܕܬܰܢܺܝܢܳܐ ܡܶܬܝܰܕܥܳܢܳܐ. ܡܶܛܠ ܗܳܕܐ ܩܰܕܡܳܐܝ̣ܬ ܒܝܰܕ ܪܶܓܬܳܐ ܕܡܶܐܟ̈ܠܳܬܳܐ ܒܰܕܡܽܘܬ ܡܰܝܴ̈ܐ ܐܳܫܶܕ ܥܰܠ ܐܰܪܥܳܐ ܡܰܘܥܺܝܬܳܗ̇. ܘܰܒܡܰܝܴ̈ܐ ܫܪ̈ܰܝܳܐ ܘܪ̈ܰܥܕܶܐ ܓܳܪܶܦ ܠܗ̇ ܠܢܰܦܫܳܐ. ܘܥܰܠܗܳܝ ܐܡ̣ܪ ܢܒܺܝܐ:
ܪܶܓܠܬܳܐ ܥܶܒܪܰܬ ܥܰܠ ܢܰܦܫܰܢ. ܘܠܳܐ ܠܰܡ ܐܶܫܬܺܝܢܰܢ ܡ̣ܢ ܡܰܝܴ̈ܐ ܕܪܶܓܠܬܳܐ. ܐܶܠܐ ܐܰܝܟ ܥܢܳܢܳܐ ܣܠܶܩܘ ܥܠܰܝܢ ܢܶܣܝܽܘܢ̈ܐ ܘܰܪ̈ܓܺܝܓܳܬܳܐ. ܘܒܰܡܣܰܝܒܪܳܢܽܘܬܳܐ ܩܳܡܢܰܢ ܘܥܰܙܺܝܢܰܢ ܠܽܘܩܒܰܠ ܪܽܘܓܙܗܽܘܢ.
ܘܡܰܝܴ̈ܐ ܣܰܓܺܝ̈ܐܐ ܥܒܰܪܘ ܥܰܠ ܢܰܦܫܰܢ. ܗܳܢܰܘ ܕܶܝܢ ܢܶܣܝܽܘܢ̈ܐ ܡܫܰܚ̈ܠܦܶܐ ܕܠܳܐ ܣܳܟ܆ ܘܩܰܪܺܝܒܺܝܢ ܗܘܰܘ ܠܡܶܚܛܦܳܗ̇ ܒܝܰܕ ܫܓܽܘܫܝܳܐ ܕܪܶܗܛܗܽܘܢ ܘܥܰܠ ܗܳܕܐ ܐܡ̣ܪ ܢܒܺܝܐ:
ܒܪܺܝܟ ܗܽܘ ܡܳܪܝܳܐ ܕܠܳܐ ܝܰܗܒܰܢ ܡܶܐܟܽܘܠܬܳܐ ܠܫܶܢܰܝ̈ܗܽܘܢ. ܘܢܰܦܫܰܢ ܐܰܝܟ ܨܶܦܪܳܐ ܐܶܬܦܰܠܛܰܬ ܡ̣ܢ ܦܰܚܳܐ ܕܨܰܝܳܕܳܐ. ܦܰܚܳܐ ܐܶܬܬܰܒܰܪ ܘܰܚܢܰܢ ܐܶܬܦܰܨܺܝܢ. ܡܶܛܠܡܳܢܐ ܠܨܶܦܪܳܐ ܡܕܰܡܶܐ ܠܳܗ̇ ܠܢܰܦܫܳܐ ܢܒܺܝܐ. ܘܰܐܝܕܳܐ ܗܝ ܥܶܠܬܳܐ ܕܗܰܘ ܕܰܠܩܽܘܒܠܳܐ ܨܰܝܳܕܳܐ ܢܶܫܬܰܡܰܗ. ܕܰܐܟܙܢܳܐ ܕܰܡܛܰܫܰܝ ܒܽܐܘܡܳܢܽܘܬܳܐ ܟܳܡܶܢ ܠܰܡܨܳܕ ܠܨܶܦܪܳܐ ܡ̇ܢ ܢܰܦܫܳܐ. ܡܕܰܡܶܐ ܠܳܗ̇ ܢܒܺܝܐ ܠܢܰܦܫܳܐ ܒܰܕܡܽܘܬܳܐ ܕܨܶܦܪܳܐ. ܡܶܛܠ ܕܰܬܪܶܝܢ ܓܶܦܷ̈ܐ ܐܝ̣ܬ ܨܶܦܪܳܐ. ܗܳܝ ܡܳܐ ܕܰܚܠܺܝܡܺܝܢ ܛܳܒ ܕܠܝ̣ܠܳܐܝ̣ܬ ܦܳܪܚܳܐ ܒܳܐܐܰܪ. ܟܰܕ ܡܶܫܬܰܘܙܒܳܐ ܡ̣ܢ ܨܰܝܳܕܳܐ. ܐܶܢܕܶܝܢ ܚܰܕ ܡ̣ܢ ܓܶܦ̈ܐ ܡܶܬܢܟܶܐ ܕܠܺܝܠܳܐܝ̣ܬ ܠܨܰܝܕܳܐ ܐܳܦ ܠܢܶܨܳܐ ܗܳܘܝܳܐ. ܘܰܟܡܳܐ ܐܶܢ ܢܶܗܘܶܐ ܕܰܚܠܺܝܡ ܚܰܕ. ܒܶܠܥܳܕ ܐܚܪܺܢܳܐ ܒܰܛܺܝܠܰܐ ܗܘ ܒܛܽܘܦܣܳܐ ܗܳܟܺܝܠ ܕܰܬܪܶܝܢ ܓܶܦ̈ܐ ܡܶܬܥܰܠܶܐ ܠܳܗ̇ ܠܨܶܦܪܳܐ ܢܰܦܫܳܐ. ܕܬܶܗܘܶܐ ܡܫܰܪܪܳܐ ܒܦܽܘܠܚܳܢܳܐ ܪܽܘܚܳܢܳܐ ܘܒܺܝܕܰܥܬܳܐ. ܗܳܠܝܢ ܐܶܢܘܢ ܬܪܶܝܢ ܓܶܦ̈ܐ ܕܢܰܦܫܳܐ. ܦܽܘܠܚܳܢܳܐ ܘܝ̣ܕܰܥܬܳܐ. ܘܡܳܐ ܕܰܚܠܺܝܡܺܝܢ ܗܳܠܝܢ. ܚܰܟܺܝܡܳܐܝ̣ܬ ܓܳܡܪܳܐ ܠܶܗ ܠܪܶܗܛܳܗ̇. ܐܶܢܕܶܝܢ ܢܶܬܢܟܶܐ ܚܰܕ ܡܶܢܗܽܘܢ. ܡܶܬܒܰܛܰܠ ܐܳܦ ܗܰܘ ܕܠܳܐ ܐܶܬܢܟܺܝ. ܡܶܛܠ ܕܶܐܢ ܬܶܗܘܶܐ ܢܰܗܺܝܪܳܐ ܘܰܓܡܺܝܪܳܐ ܢܰܦܫܳܐ ܒܝܰܕ ܦܽܘܠܚܳܢܳܐ ܘܒܺܝܕܰܥܬܳܐ. ܘܶܐܢ ܬܽܘܒ ܢܳܨܚܳܐ ܒܥܶܢܘܳܝܽܘܬܳܐ. ܒܨܰܘܡܳܐ ܐܳܡܰܪ ܐܢܳܐ ܘܒܰܢܙܺܝܪܽܘܬܳܐ ܘܰܒܫܰܗܪܳܐ. ܠܳܐ ܓܳܕܶܠ ܓܶܦܳܗ̇ ܠܪܰܘܡܳܐ ܒܶܠܥܳܕ ܗܰܝܡܳܢܽܘܬܳܐ. ܐܰܝܟ ܕܦܰܫܶܩ ܛܽܘܒܳܢܳܐ ܦܰܘܠܽܘܣ ܟܰܕ ܟܳܬܶܒ ܠܘܳܬ ܩܽܘܪ̈ܺܝܢܬܳܝܶܐ ܕܰܒܙܰܝܢܳܐ ܕܙܰܕܺܝܩܽܘܬܳܐ ܕܰܒܝܰܡܺܝܢܳܐ ܘܰܒܣܶܡܳܠܳܐ ܐܶܬܚܰܙܩܘ (ܒ ܩܘܪ̈ܢܬܝܐ ܘ: ܙ). ܣܳܡ ܝܰܡܺܝܢܳܐ ܚܠܳܦ ܫܡܳܐ. ܕܺܝܕܰܥܬܳܐ ܘܗܰܝܡܳܢܽܘܬܳܐ. ܣܶܡܳܠܳܐ ܕܶܝܢ ܚܠܳܦ ܦܽܘܠܚܳܢܳܐ܆ ܨܰܝܳܕܳܐ ܓܶܝܪ ܕܛܳܡܰܪ ܦܰܚ̈ܐ. ܠܗܰܘ ܕܰܕܠܳܐ ܝ̣ܕܰܥܬܳܐ ܛܳܡܰܪ ܠܗܽܘܢ. ܐܶܢܕܶܝܢ ܬܶܗܘܶܐ ܢܰܦܫܳܐ ܡܫܰܡܠܝܳܐ ܒܺܝܕܰܥܬܳܐ. ܘܰܠܦܰܚܳܐ ܡܶܣܬܰܟܠܳܐ. ܘܰܠܢܶܟܠܳܐ ܕܰܡܛܰܫܰܝ ܒܓܰܘܶܗ ܝܳܕܥܳܐ. ܘܶܐܢ ܡܚܰܦܰܝ ܒܽܐܘܡܳܢܽܘܬܳܐ ܕܠܶܩܛܳܐ. ܠܐ ܢܳܩܙܳܐ ܒܶܗ ܢܰܦܫܳܐ ܝܰܕܽܘܥܬܳܢܺܝܬܳܐ ܡܦܰܪܣܝܳܐ ܠܶܗ. ܡܳܐ ܕܩܳܢܝܳܐ ܝ̣ܕܰܥܬܳܐ ܘܦܽܘܠܚܳܢܳܐ ܐܳܦ ܗܰܝܡܳܢܽܘܬܳܐ. ܘܠܳܐ ܢܳܩܙܳܐ ܒܶܗ ܐܶܠܐ ܕܳܝܫܳܐ ܠܶܗ܆ ܘܟܰܕ ܫܳܘܰܪ ܣܪܺܝܩܳܐܝ̣ܬ ܐܶܠܐ ܝܰܬܺܝܪ ܥܳܪܩܳܐ ܢܰܦܫܳܐ ܡ̣ܢ ܩܳܠܶܗ. ܢܺܐܡܰܪ ܕܶܝܢ ܚܰܕ ܦܰܚܳܐ ܡ̣ܢ ܟܽܠܗܽܘܢ ܦܰܚ̈ܐ. ܛܳܡܪ ܗܳܟܺܝܠ ܨܰܝܳܕܳܐ ܕܢܰܦܫܳܐ ܦܰܚܳܐ ܒܡܶܐܟܽܘܠܬܳܐ ܠܥܶܢܘܳܝܳܐ. ܟܰܕ ܕܶܝܢ ܡܶܬܒܰܝܢܳܐ ܒܳܗ̇ ܢܰܦܫܳܐ ܕܰܓܡܺܝܪܳܐ ܒܺܝܕܰܥܬܳܐ. ܚܳܝܪܳܐ ܒܶܗ ܒܦܰܚܳܐ ܕܰܡܚܰܦܰܝ ܒܽܐܘܟܠܳܐ ܡܳܢܳܐ ܡܶܬܒܥܶܐ ܠܳܗ̇ ܠܡܶܥܒܰܕ. ܠܐ ܡܶܟܝ̣ܠ ܥܠ ܦܽܘܠܚܳܢܳܐ. ܟܕ ܓܶܝܪ ܡܣܰܝܒܪܳܐ ܟܰܦܢܳܐ ܘܡܶܬܚܰܣܠܳܐ ܡ̣ܢ ܪ̈ܓܺܝܓܳܬܳܐ. ܕܳܝܫܳܐ ܠܶܗ ܠܦܰܚܳܐ ܘܬܳܒܪܳܐ ܠܶܗ. ܘܗܳܟܰܢܳܐ ܠܽܘܩܒܰܠ ܟܽܠܗܽܘܢ ܦܰܚ̈ܐ ܕܛܳܡܰܪ ܗܰܘ ܨܰܝܳܕܳܐ ܨܢܺܝܥܳܐ. ܦܽܘܠܚܳܢܳܐ ܘܝ̣ܕܰܥܬܳܐ ܕܗܰܝܡܳܢܽܘܬܳܐ ܡܶܬܒܰܥܝܳܐ ܠܗ̇ ܠܢܰܦܫܳܐ. ܘܡܳܐ ܕܩܳܪܒܳܐ ܠܡܶܬܚܰܫܳܚܽܘ ܒܡܶܐܟܽܘܠܬܳܐ ܘܰܒܫܶܢܬܳܐ. ܒܰܠܚܽܘܕ ܥܕܰܡܳܐ ܠܡܽܘܠܳܝܳܐ ܕܣܽܘܢܩܳܢܶܗ ܕܰܟܝܳܢܳܐ. ܒܗܳܠܶܝܢ ܬܪܶܝܢ ܚܰܫ̈ܐ ܡܫܰܪܶܐ ܨܰܝܳܕܳܐ ܠܽܘܩܒܰܠ ܟܠ ܨܶܦܪܳܐ. ܒܪܰܡ ܘܟܰܕ ܡܶܬܦܰܠܛܳܐ ܢܰܦܫܳܐ ܬܶܗܘܶܐ ܐܳܡܪܳܐ: ܕܰܐܠܗܳܐ ܬܰܒܪܶܗ ܠܦܰܚܳܐ ܘܦܰܨܝܰܢܝ.
ܘܦܽܘܪܩܳܢܰܢ ܘܥܽܘܕܪܳܢܰܢ ܒܰܫܡܶܗ ܕܡܳܪܝܳܐ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܥܶܣܪܺܝܢ ܘܰܬܠܳܬܳܐ ܥܰܠ ܦܰܚܳܐ ܕܨܳܠܶܐ ܒܺܝܫܳܐ ܠܢܰܦܫܳܐ ܘܰܡܥܰܪܩܶܠ ܘܰܡܥܰܪܓܶܠ ܠܢܰܦܫܳܐ ܒܦܰܚܳܐ ܘܒܰܣܝܳܢܳܐ.
ܡܙܡܘܪܐ ܕܡܐܐ ܘܥܣܪܝܢ ܘܐܪܒܥܐ
ܡܰܘܕܰܥ ܕܪܰܒ ܗܘ ܬܽܘܟܠܳܢܳܐ ܕܰܐܝܠܶܝܢ ܕܰܡܣܰܒܪܺܝܢ ܒܡܳܪܝܳܐ. ܘܠܳܐ ܡܶܙܕܥܙܥܺܝܢ ܐܰܝܠܶܝܢ ܕܥܳܐܠܺܝܢ ܠܐܘܪܶܫܠܶܡ ܕܒܰܫܡܰܝܳܐ.
ܡܰܥܡܪܳܐ ܕܫܽܘܒܚܳܐ ܕܡܶܬܝ̣ܗܶܒ ܠܩܰܕܺܝ̈ܫܶܐ ܒܗܳܝ ܐܽܘܪܺܫܠܶܡ ܚܺܐܪܬܳܐ ܕܒܰܫܡܰܝܳܐ. ܡܦܰܫܶܩ ܛܽܘܒܳܢܳܐ ܕܰܘܝܕ ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܥܶܣܪܺܝܢ ܘܰܐܪܒܰܥ܆ ܥܰܠ ܗܰܘ ܡܰܘܬܒܳܐ ܠܐ ܡܶܬܬܙܺܝܥܳܢܳܐ ܕܝܳܬܒܺܝܢ ܟܶܢ̈ܫܶܐ ܕܙܰܕܺܝ̈ܩܶܐ ܒܥܳܠܡܳܐ ܚܰܕܬܳܐ ܒܰܡܕܺܝܢܬܳܐ ܕܢܽܘܗܪܳܐ. ܡܣܰܟܶܠ ܠܰܢ ܒܡܰܙܡܽܘܪܳܐ ܗܳܢܐ ܘܳܐܡܰܪ:
ܐܰܝܠܶܝܢ ܕܰܡܣܰܒܪܺܝܢ ܒܡܳܪܝܳܐ ܒܛܽܘܪܳܐ ܕܨܶܗܝܘܢ ܠܳܐ ܢܙܽܘܥܽܘܢ ܐܶܠܐ ܠܥܳܠܰܡ ܢܶܬܒܽܘܢ. ܡܳܢܳܐ ܨܳܒܐ ܫܽܘܪܳܝܳܐ ܗܳܢܐ ܢܰܘܕܰܥ܆ ܗܳܝ ܕܩܰܕܡܰܬ ܐܶܬܐܰܡܪܰܬ ܥܠ ܐܽܘܪܺܫܠܶܡ ܚܺܐܪܬܳܐ ܕܒܰܫܡܰܝܳܐ ܡܶܬܢܰܒܶܐ. ܒܗܳܝ ܓܝܪ ܕܶܐܡܰܪ ܕܠܳܐ ܢܙܽܘܥܽܘܢ ܐܶܠܐ ܠܥܳܠܰܡ ܢܶܬܒܽܘܢ. ܕܠܰܘ ܥܰܠ ܗܳܕܐ ܨܶܗܝܽܘܢ ܐܶܬܢܰܒܺܝ ܐܰܘܕܰܥ܆ ܡܶܛܠ ܐܰܝܠܶܝܢ ܕܺܝܬܶܒܘ ܒܨܶܗܝܽܘܢ ܗܳܝ ܕܰܒܢܳܐ ܕܰܘܝܕ ܒܳܬܰܪ ܕܫܰܩܠܳܗ̇ ܡܶܢ ܝܳܒܽܘ̈ܣܳܝܶܐ. ܙܰܒܢܴ̈ܬܳܐ ܣܰܓܺܝ̈ܐܬܳܐ. ܙܳܥܘ ܘܶܐܬܕܰܘܰܕܘ ܡ̣ܢ ܓܰܝ̈ܣܶܐ. ܙܰܘܥܳܐ ܩܰܕܡܳܝܳܐ ܟܰܕ ܣܠܶܩ ܫܳܚܳܩ ܡܰܠܟܳܐ ܕܡܶܨܪܶܝܢ ܘܰܫܒܳܗ̇ ܒܳܬܰܪ ܕܡܺܝܬ ܫܠܶܝܡܽܘܢ ܘܰܐܡܠܶܟ ܒܪܶܗ ܪܚܰܒܥܰܡ. ܘܒܳܬܰܪ ܐܰܡܽܘܨܳܝܳܐ ܣܠܶܩ ܝܰܗܽܘܐܰܫ ܡܰܠܟܳܐ ܕܺܝܣܪܳܐܝܠ ܘܰܥܩܰܪ ܒܫܽܘܪܳܗ̇. ܘܰܒܝܰܘ̈ܡܰܝ ܡܢܰܫܶܐ ܒܰܪ ܚܶܙܰܩܝܳܐ. ܫܒܳܗ̇ ܡܰܠܟܳܐ ܕܳܐܬܽܘܪ. ܘܒܳܬܰܪ ܗܳܢܐ ܒܝܰܘ̈ܡܰܝ ܝܽܘܝܰܩܺܝܡ ܫܒܳܗ̇ ܗܘܳܐ ܢܳܒܽܘܟܰܕܢܳܨܳܪ. ܘܰܒܝܰܘ̈ܡܰܝ ܨܶܕܰܩܝܳܐ ܡܰܠܟܳܐ ܫܒܳܗ̇ ܢܳܒܽܘܙܰܪܕܰܢ ܪܰܒ ܚܰܝܠܳܐ ܕܢܳܒܽܘܟܰܕܢܳܨܳܪ ܡܰܠܟܳܐ ܕܒܳܒܶܝܠ. ܘܒܳܬܰܪ ܫܶܒܝܳܐ ܗܳܢܐ ܝܶܬܒܰܬ ܒܨܳܕܝܽܘܬܳܐ ܟܰܕ ܠܳܐ ܥܡܰܪ ܒܳܗ̇ ܒܰܪܢܳܫܳܐ ܫܰܒ̈ܥܺܝܢ ܫܢܻ̈ܝܢ. ܘܡ̣ܢ ܒܳܬܰܪ ܕܰܣܠܶܩ ܥܰܡܳܐ ܡ̣ܢ ܒܳܒܶܝܠ܆ ܐܰܪܒܥܺܝܢ ܘܫܶܬ ܫܢܻ̈ܝܢ ܐܶܬܬܙܺܝܥܰܬ ܡ̣ܢ ܓܰܝ̈ܣܶܐ ܕܥܰܡܡ̈ܐ ܕܰܚܕܺܝܪܺܝܢ ܗܘܰܘ ܠܳܗ̇. ܘܰܡܒܰܛܠܝ̣ܢ ܗܘܰܘ ܒܶܢܝܳܢܳܐ ܕܗܰܝܟܠܳܐ ܒܝܰܘ̈ܡܰܝ ܙܽܘܪܒܳܒܶܝܠ. ܘܰܩܪ̈ܳܒܶܐ ܣܰܓܺܝ̈ܐܐ ܗܘܰܘ ܥܠܶܝܗ̇ ܒܳܬܰܪ ܨܠܺܝܒܳܐ. ܡ̣ܢ ܪ̈ܗܽܘܡܳܝܶܐ ܛܺܝܛܳܘܣ ܒܰܪ ܐܶܣܦܺܝܣܝܰܐܢܳܘܣ ܕܥܰܩܪܳܗ̇ ܠܰܓܡܳܪ ܘܰܫܒܳܐ ܥܰܡܳܗ̇. ܘܶܐܬܡܰܠܝܰܬ ܢܒܺܝܽܘܬܶܗ ܕܓܰܒܪܳܐ ܕܪܶܓܬܳܐ ܕܳܢܺܝܐܝܠ ܕܶܐܡܰܪ: ܕܰܩܪܺܝܬܳܐ ܕܩܽܘ̈ܕܫܶܐ ܨܶܗܝܽܘܢ ܬܶܬܚܰܒܰܠ ܥܰܡ ܡܰܠܟܳܐ ܕܳܐܬܶܐ. ܘܚܰܪܬܳܗ̇ ܒܰܓܪܽܘܦܝܳܐ ܘܰܥܕܰܡܳܐ ܠܚܰܪܬܳܐ ܕܰܩܪܳܒܳܐ (ܕܢܝܐܝܠ ܛ: ܟܘ). ܗܳܠܶܝܢ ܕܶܐܡܪܶܬ ܕܶܐܚܰܘܶܐ ܕܠܰܘ ܥܰܠ ܛܽܘܪܳܐ ܗܳܢܐ ܕܨܶܗܝܽܘܢ ܡܶܬܪܰܓܫܳܢܳܐ ܐܶܡܰܪ ܡܙܰܡܪܳܢܳܐ ܕܰܘܝܕ܆ ܐܶܠܐ ܥܰܠ ܗܰܘ ܛܽܘܪܳܐ ܕܨܶܗܝܽܘܢ ܥܶܠܳܝܬܳܐ. ܗܰܘ ܕܦܰܫܶܩ ܦܰܘܠܽܘܣ ܐܰܠܗܝܳܐ. ܕܰܟܬܰܒ ܠܘܳܬ ܥܶܒܪ̈ܳܝܶܐ ܘܶܐܡܰܪ: ܕܰܐܢܬܽܘܢ ܕܶܐܬܩܰܪܰܒܬܽܘܢ ܠܛܽܘܪܳܐ ܩܰܕܺܝܫܳܐ ܕܨܶܗܝܽܘܢ. ܘܠܐܽܘܪܺܫܠܶܡ ܕܒܰܫܡܰܝܳܐ. ܘܠܰܐܠܗܳܐ ܕܰܝܳܢܳܐ ܕܟܽܠ (ܥܒܪ̈ܝܐ ܝܒ: ܟܒ-ܟܓ). ܡܶܛܠܡܳܢܳܐ ܓܶܠܝܳܢܳܐ ܢܰܗܺܝܪܳܐ ܘܦܽܘܫܳܩܳܐ ܐܶܬܢܰܒܺܝ ܕܰܘܝܕ ܐܰܝܠܶܝܢ ܕܰܐܡܺܝܪ̈ܳܢ ܒܡܰܙܡܽܘܪܳܐ ܗܳܢܐ܆ ܘܥܰܠ ܐܰܝܠܶܝܢ ܕܰܫܘܰܘ ܕܰܢܣܰܒܪܽܘܢ ܒܡܳܪܝܳܐ. ܘܢܶܬܒܽܘܢ ܒܛܽܘܪܶܗ ܩܰܕܺܝܫܳܐ. ܗܰܘ ܕܰܠܥܶܠ ܡ̣ܢ ܫܡܰܝܳܐ ܙܰܡܰܪ ܘܶܐܡܰܪ:
ܐܰܝܠܶܝܢ ܕܰܡܣܰܒܪܺܝܢ ܒܡܳܪܝܳܐ ܒܛܽܘܪܳܐ ܕܨܶܗܝܽܘܢ: ܠܳܐ ܢܙܽܘܥܽܘܢ ܐܶܠܳܐ ܠܥܳܠܰܡ ܢܶܬܒܽܘܢ. ܐܰܝܠܶܝܢ ܕܰܠܛܽܘܪܳܐ ܗܰܘ ܫܳܘܶܝܢ ܠܡܶܣܰܩ ܠܳܐ ܡܶܬܬܙܺܝܥܺܝܢ ܡܶܢ ܛܶܒܳܐ ܕܰܩܪ̈ܳܒܶܐ ܕܳܐܟܶܠܩܰܪܨܳܐ. ܘܠܳܐ ܡܶܫܬܰܓܫܺܝܢ ܡ̣ܢ ܠܽܘ̈ܚܳܡܶܐ ܕܰܒܥܶܠܕ̈ܒܳܒܶܐ. ܘܠܐ ܡܶܣܬܰܪܕܺܝܢ ܡ̣ܢ ܐܰܝܠܶܝܢ ܕܒܳܢܶܝܢ ܩܰܠܩܽܘ̈ܡܶܐ ܠܒܰܪ ܡ̣ܢ ܫܽܘܪܳܐ ܕܰܡܕܺܝܢܬܳܐ ܠܽܘܩܒܰܠ ܦܽܘܪ̈ܩܳܣܶܐ. ܡܶܛܠ ܕܒܰܡܕܺܝܢܬܳܐ ܗܳܝ ܡܚܰܣܰܢܬܳܐ ܘܪܳܡܰܬ ܫܽܘܪ̈ܶܐ ܥܳܡܪܺܝܢ ܐܰܝܟܰܢܐ ܕܶܐܡܰܪ ܢܒܺܝܳܐ:
ܐܽܘܪܺܫܠܶܡ ܛܽܘܪ̈ܶܐ ܟܪܺܝܟܺܝܢ ܠܳܗ̇: ܘܡܳܪܝܳܐ ܟܪܺܝܟ ܠܥܰܡܶܗ ܡܶܟܺܝܠ ܘܰܥܕܰܡܳܐ ܠܥܳܠܰܡ. ܡܳܢܐ ܨܳܒܐ ܢܰܠܶܦ ܒܗܳܝ ܕܶܐܡܰܪ ܡܶܛܠ ܛܽܘܪ̈ܶܐ ܕܰܟܪܺܝܟܺܝܢ ܠܐܘܪܺܫܠܶܡ. ܕܒܰܐܪܥܳܐ ܡܶܫܬܰܟܚܳܐ ܗܳܕܐ ܕܠܳܐ ܩܳܝܡܳܐ ܒܰܥܒܳܕܳܐ: ܡܶܛܠ ܕܰܟܪܽܘܟܝܳܐ ܕܛܽܘܪ̈ܶܐ ܗܳܢܰܘ. ܐܶܡܰܬܝ ܕܢܰܩܺܝܦܳܐܝ̣ܬ ܢܶܗܘܽܘܢ ܛܽܘܪ̈ܶܐ ܟܪܺܝܟܺܝܢ. ܡ̣ܢ ܟܠ ܓܰܒܺܝ̈ܢ ܠܰܡܕܺܝܢܬܳܐ. ܠܐܘܪܺܫܠܶܡ ܕܶܝܢ ܠܳܐ ܗܘܳܐ ܛܽܘܪ̈ܶܐ ܐܶܫܟܰܚܢܰܢ ܕܰܟܪܺܝܟܺܝܢ ܘܝܰܬܝ̣ܪܳܐܝ̣ܬ ܡ̣ܢ ܟܠ ܓܰܒܳܐ ܬܰܝܡܢܳܝܳܐ ܕܰܡܕܺܝܢܬܳܐ ܕܠܰܐܦܱ̈ܝ ܦܢܺܝܬܳܐ ܕܳܐܦܪܰܬ. ܠܰܝܬ ܬܰܡܳܢ ܛܽܘܪܳܐ ܪܳܡܳܐ. ܘܠܐ ܬܘܒ ܡ̣ܢ ܓܰܒܳܐ ܕܓܰܪܒܝܳܐ ܩܰܪܺܝܒ ܠܳܗ̇ ܛܽܘܪܳܐ. ܘܳܐܦܶܢ ܐܰܪܥܳܗ̇ ܕܳܡܝܳܐ ܕܰܠܛܽܘܪܳܐ ܡܶܛܠ ܩܰܫܝܽܘܬܳܗ̇: ܐܶܠܐ ܛܽܘܪ̈ܶܐ ܦܰܪܺܝܩܺܝܢ ܐܶܢܘܢ ܡ̣ܢ ܠܘܳܬܳܗ̇. ܩܰܪܺܝܒ ܠܗ̇ ܘܢܰܩܺܝܦ ܛܽܘܪܳܐ ܕܙܰܝ̈ܬܶܐ. ܗܰܘ ܕܺܐܝܬ ܥܰܠ ܓܰܒܳܐ ܡܰܕܢܚܳܝܳܐ. ܗܳܠܝܢ ܕܶܝܢ ܐܡ̇ܪ ܐܢܳܐ. ܡܶܛܠ ܕܢܶܬܦܰܫܰܩ ܠܗܰܘ ܕܩܳܪܶܐ ܢܶܣܬܰܟܰܠ ܕܥܰܠ ܐܰܝܠܶܝܢ ܛܽܘܪ̈ܶܐ ܐܶܡܰܪ ܢܒܺܝܐ: ܛܽܘܪ̈ܐ ܕܰܟܪܝ̣ܟܝ̣ܢ ܠܐܽܘܪܺܫܠܶܡ ܕܒܰܫܡܰܝܳܐ ܐܝ̣ܬܰܝܗܽܘܢ. ܬܶܓܡ̈ܐ ܘܟܶܢ̈ܫܶܐ ܕܥܶܠܳܝ̈ܐ ܘܪ̈ܰܒܰܝ ܡܰܫܪ̈ܝܳܬܳܐ ܕܚܰܝ̈ܠܰܘܳܬܳܐ. ܗܳܠܝܢ ܓܝܪ ܒܕܽܘܡܝܳܐ ܡܶܕܶܡ ܕܛܽܘܪ̈ܶܐ ܕܰܟܪܺܝܟܺܝܢ ܠܰܡܕܺܝܢܬܳܐ ܕܢܽܘܗܪܳܐ. ܕܺܐܝܬܰܝܗܽܘܢ ܬܶܫܥܳܐ ܬܶܓܡ̈ܐ ܕܡܰܠܰܐܟ̈ܐ. ܘܰܫܠܺܝ̈ܚܶܐ ܕܶܝܢ ܗܳܘܶܝܢ ܛܽܘܪ̈ܶܐ ܒܽܐܘܪܺܫܠܶܡ. ܗܳܠܝܢ ܬܪܶܥܣܰܪ ܫܽܘܪ̈ܶܐ ܐܰܘܟܺܝܬ ܛܽܘܪ̈ܶܐ ܟܪܺܝܟܺܝܢ ܠܐܽܘܪܺܫܠܶܡ ܗܳܝ ܥܶܠܳܝܬܳܐ ܕܒܰܫܡܰܝܳܐ. ܡܶܛܠ ܕܟܽܠܗܽܘܢ ܒܢܱ̈ܝ ܡܕܺܝܢܬܳܐ ܚܕܳܐ ܐܝ̣ܬܰܝܗܽܘܢ. ܘܰܒܢܰܝ̈ ܚܰܕ ܥܳܠܡܳܐ. ܘܰܢܒܺܝܐ ܐܶܡܰܪ ܕܡܳܪܝܳܐ ܟܪܺܝܟ ܠܥܰܡܶܗ. ܡܳܐ ܕܗܳܘܶܐ ܟܢܽܘܫܝܳܐ ܕܰܐܝܠܶܝܢ ܕܚܳܐܷܝܢ. ܠܐ ܬܘܒ ܗܳܘܶܝܢ ܬܪܶܝܢ ܥܰܡܡ̈ܐ. ܐܝܟ ܕܩܰܕܶܡ ܐܰܘܕܰܥ ܢܒܺܝܳܐ ܚܰܙܩܺܝܐܝܠ ܥܰܠ ܐܪܳܙܳܐ ܗܳܢܐ ܘܶܐܡܰܪ: ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ. ܐܰܢܬ ܕܶܝܢ ܒܰܪܢܳܫܳܐ: ܣܰܒ ܠܳܟ ܩܰܝܣܳܐ ܚܰܕ: ܘܰܟܬܽܘܒ ܥܠܰܘܗܝ ܝ̣ܗܽܘܕܳܐ ܘܰܒܢܱ̈ܝ ܝ̣ܣܪܳܐܝܠ ܐܳܦ ܚܰܒܪ̈ܰܘܗܝ. ܘܣܰܒ ܩܰܝܣܳܐ ܐܚܪܺܢܳܐ ܘܰܟܬܽܘܒ ܥܠܰܘܗܝ ܝܰܘܣܶܦ ܒܩܰܝܣܳܐ ܕܰܐܦܪܶܝܡ ܘܟܽܠܗܽܘܢ ܒܢܱ̈ܝ ܝ̣ܣܪܳܐܝܠ ܚܰܒܪ̈ܰܘܗܝ. ܘܩܰܪܶܒ ܐܶܢܽܘܢ ܚܰܕ ܠܘܳܬ ܚܰܕ: ܘܢܶܗܘܽܘܢ ܚܰܕ ܩܰܝܣܳܐ ܒܺܐܝܕܳܟ. ܘܶܐܢ ܐܳܡܪܺܝܢ ܠܳܟ ܒܢܱ̈ܝ ܥܰܡܳܟ. ܚܰܘܳܢ ܐܶܢܽܘܢ ܡܳܢܳܐ ܐܶܢܶܝܢ ܗܳܠܶܝܢ ܐܡܰܪ ܠܗܽܘܢ: ܗܳܟܰܢܳܐ ܐܡ̇ܪ ܡܳܪܶܐ ܡܳܪ̈ܰܘܳܬܳܐ ܗܳܐ ܢܳܣܶܒ ܐܢܳܐ ܩܰܝܣܶܗ ܕܝܰܘܣܶܦ ܕܒܺܐܝܕܶܗ ܕܰܐܦܪܶܝܡ: ܘܫܰܒ̈ܛܶܐ ܕܺܝܣܪܳܐܝܠ ܚܰܒܪ̈ܰܘܗܝ: ܘܶܐܬܶܠ ܐܶܢܽܘܢ ܥܰܡ ܩܰܝܣܳܐ ܕܺܝܗܽܘܕܳܐ. ܘܶܐܥܒܶܕ ܐܶܢܘܢ ܚܰܕ ܩܰܝܣܳܐ ܘܢܶܗܘܽܘܢ ܚܰܕ ܒܺܐܝ̈ܕܰܝ. ܘܩܰܝ̈ܣܶܐ ܕܟܳܬܶܒ ܐܰܢܬ ܥܠܰܝܗܽܘܢ ܐܰܚܽܘܕ ܐܶܢܘܢ ܒܺܐܝܕܳܟ ܠܥܺܢܰܝ̈ܗܽܘܢ. ܘܐܡ̣ܪ ܠܗܽܘܢ: ܗܳܟܰܢܳܐ ܐܡ̇ܪ ܡܳܪܶܐ ܡܳܪ̈ܰܘܳܬܳܐ: ܗܳܐ ܢܳܣܶܒ ܐܢܳܐ ܠܰܒܢܱ̈ܝ ܝ̣ܣܪܳܐܝܠ ܡܶܢ ܒܰܝܢܳܬ ܥܰܡܡ̈ܐ ܕܶܐܙܰܠܘ ܠܘܳܬܗܘܢ. ܘܶܐܟܰܢܶܫ ܐܶܢܘܢ ܘܰܐܝܬܶܐ ܐܶܢܘܢ ܠܰܐܪܥܗܽܘܢ. ܘܶܐܥܒܶܕ ܐܶܢܘܢ ܚܰܕ ܥܰܡܳܐ ܒܰܐܪܥܳܐ ܒܛܽܘܪ̈ܶܐ ܕܺܝܣܪܳܐܝܠ. ܘܚܰܕ ܡܰܠܟܳܐ ܢܶܗܘܶܐ ܠܟܽܠܗܘܢ. ܘܬܘܒ ܠܐ ܢܶܗܘܽܘܢ ܬܪܶܝܢ ܥܰܡ̈ܡܺܝܢ. ܘܬܘܒ ܠܐ ܢܶܬܦܰܠܓܽܘܢ ܠܬܰܪܬܶܝܢ ܡܰܠܟ̈ܘܳܢ. ܘܠܐ ܢܶܬܛܰܢܦܽܘܢ ܒܰܦܬܰܟܪ̈ܰܝܗܽܘܢ ܘܰܒܟܽܠܶܗ ܥܰܘܠܗܽܘܢ. ܘܶܐܦܪܽܘܩ ܐܶܢܘܢ ܡ̣ܢ ܟܽܠܶܗ ܡܰܥܡܰܪܗܽܘܢ ܕܰܚܛܰܘ ܒܶܗ. ܘܶܐܕܰܟܶܐ ܐܶܢܘܢ ܘܢܶܗܘܽܘܢ ܠܺܝ ܥܰܡܳܐ. ܘܶܐܢܳܐ ܐܶܗܘܶܐ ܠܗܽܘܢ ܐܰܠܳܗܳܐ. ܘܥܰܒܕܝ ܕܰܘܝܕ ܢܰܡܠܶܟ ܥܠܰܝܗܽܘܢ. ܘܪܳܥܝܳܐ ܚܰܕ ܢܶܗܘܶܐ ܠܟܽܠܗܽܘܢ. ܘܰܒܕܺܝ̈ܢܰܝ ܢܗܰܠܟܽܘܢ ܘܦܽܘ̈ܩܕܳܢܰܝ ܢܶܛܪܽܘܢ. ܘܝܶܗܒܶܬ ܠܗܽܘܢ ܐܰܪܥܳܐ ܗܳܝ ܕܝܶܗܒܶܬ ܠܥܰܒܕܝ ܕܰܘܝܕ ܕܢܶܬܒܽܘܢ ܒܳܗ̇. ܘܠܰܒ̈ܢܰܝ ܝܰܥܩܽܘܒ ܘܢܶܬܒܽܘܢ ܒܳܗ̇ ܗܶܢܘܢ ܘܰܒܢܰܝ̈ܗܽܘܢ ܘܰܒܢܱ̈ܝ ܒܢܰܝ̈ܗܽܘܢ ܠܥܳܠܰܡ. ܘܥܰܒܕܝ ܕܰܘܺܝܕ ܢܶܗܘܶܐ ܠܗܽܘܢ ܡܕܰܒܪܳܢܳܐ ܠܥܳܠܰܡ. ܘܰܐܩܺܝܡ ܠܗܽܘܢ ܩܝܳܡܳܐ ܕܰܫܠܳܡܳܐ ܘܰܩܝܳܡܳܐ ܕܰܠܥܳܠܰܡ ܢܶܗܘܶܐ ܥܰܡܗܽܘܢ ܘܰܐܣܓܶܐ ܐܶܢܘܢ. ܘܢܶܗܘܶܐ ܡܰܩܕܰܫܝ ܒܰܝܢܳܬܗܽܘܢ ܠܥܳܠܰܡ. ܘܢܶܗܘܶܐ ܒܶܝܬ ܡܰܫܪܰܝ ܒܗܽܘܢ. ܘܶܐܗܘܶܐ ܠܗܽܘܢ ܐܰܠܗܳܐ. ܘܢܶܗܘܽܘܢ ܠܝ̣ ܥܰܡܳܐ. ܘܢܶܕܥܽܘܢ ܥܰܡܡ̈ܐ ܕܶܐܢܳܐ ܐܢܳܐ ܡܳܪܝܳܐ ܕܰܡܩܰܕܶܫ ܐܢܳܐ ܠܺܝܣܪܳܐܝܠ. ܘܡܳܐ ܕܰܗܘܳܐ ܒܗܽܘܢ ܡܰܩܕܰܫܝ ܠܥܳܠܰܡ (ܚܙܩܐܝܠ ܠܙ: ܝܗ-ܟܚ). ܒܗܳܠܶܝܢ ܐܪ̈ܳܙܶܐ ܕܰܪܫܺܝܡ ܒܰܐܝܠܶܝܢ ܕܶܐܬܶܐܡܰܪܘ ܡܶܢ ܛܽܘܒܳܢܳܐ ܚܰܙܩܺܝܐܝܠ ܬܢܳܢ ܢܰܗܺܝܪܳܐܝ̣ܬ ܐܶܬܝܰܕܥܰܬ ܕܚܰܕ ܥܰܡܳܐ ܘܰܚܕܳܐ ܡܕܰܒܪܳܢܽܘܬܳܐ ܘܚܰܕ ܡܰܠܟܳܐ ܡܶܬܚܙܶܐ ܥܰܠ ܟܽܠ: ܡܳܪܝܳܐ: ܘܰܐܝܟܰܢܳܐ ܕܩܰܝ̈ܣܶܐ ܗܳܠܶܝܢ ܬܪܶܝܢ ܕܶܐܡܰܪ ܕܗܳܟܰܢܳܐ ܗܳܘܶܝܢ ܒܢܱ̈ܝ ܝ̣ܣܪܳܐܝܠ ܘܰܒܢܱ̈ܝ ܝ̣ܗܽܘܕܳܐ. ܥܰܡܳܐ ܚܰܕ ܡܳܐ ܕܰܣܠܶܩܘ ܡ̣ܢ ܒܳܒܶܝܠ. ܘܚܰܕ ܡܰܠܟܳܐ ܘܚܰܕ ܡܕܰܒܪܳܢܳܐ ܩܳܐܷܡ ܥܠܰܝܗܽܘܢ. ܗܳܟܰܢܳܐ ܡܳܐ ܕܰܣܠܶܩ ܥܰܡܳܐ ܩܰܕܺܝܫܳܐ ܡ̣ܢ ܒܳܒܶܝܠ ܡܶܬܝܰܕܥܳܢܺܝܬܳܐ. ܠܛܽܘܪ̈ܶܐ ܗܳܠܶܝܢ ܡܶܣܬܰܟܠܳܢ̈ܐ ܕܺܝܣܪܳܐܝܠ. ܗܳܘܶܝܢ ܐܰܪ̈ܥܳܢܶܐ ܘܰܫܡܰܝܴ̈ܢܶܐ ܚܰܕ ܥܰܡܳܐ ܘܰܚܕܳܐ ܡܰܠܟܽܘܬܳܐ. ܒܽܐܘܪܺܫܠܶܡ ܚܺܐܪܬܳܐ ܕܒܰܫܡܰܝܳܐ. ܘܰܚܙܺܝ ܕܡܶܛܠ ܗܳܢܐ ܐܪܳܙܳܐ ܩܰܕܶܡ ܐܶܬܢܰܒܺܝ ܚܰܙܩܺܝܐܝܠ. ܡܶܢ ܗܳܝ ܕܶܐܡܰܪ: ܘܥܰܒܕܝ ܕܰܘܝܕ ܢܰܡܠܶܟ ܥܠܰܝܗܽܘܢ. ܘܗܽܘ ܢܶܗܘܶܐ ܠܗܽܘܢ ܡܕܰܒܪܳܢܳܐ ܠܥܳܠܰܡ (ܚܙܩܐܝܠ ܠܙ: ܟܗ). ܘܶܐܢ ܫܰܪܺܝܪܳܐ ܕܰܗܘܳܐ ܠܗܽܘܢ ܕܰܘܝܕ ܡܕܰܒܪܳܢܳܐ ܡ̣ܢ ܒܳܬܰܪ ܕܰܣܠܶܩ ܥܰܡܳܐ ܡ̣ܢ ܒܳܒܶܝܠ. ܫܰܪ̈ܺܝܪܶܐ ܕܣܽܘܥܪܳܢܳܐܝ̣ܬ ܐܡ̣ܪ ܢܒܺܝܳܐ ܘܠܰܘ ܐܪܳܙܳܢܳܐܝ̣ܬ. ܐܰܝܟܰܢܳܐ ܕܰܘܝܕ ܡܰܡܠܶܟ ܗܘܳܐ ܥܰܠ ܥܰܡܳܐ ܡܶܢ ܒܳܬܰܪ ܕܡܺܝܬ؟ ܘܶܐܢ ܐܡ̇ܪ ܐܢܳܫ ܕܓܰܒܪܳܐ ܕܰܫܡܶܗ ܕܰܘܝܕ ܐܰܡܠܶܟ ܥܠܰܝܗܽܘܢ ܡ̣ܢ ܒܳܬܰܪ ܕܰܣܠܶܩܘ. ܘܠܳܐ ܗܳܕܐ ܗܘܳܬ. ܫܡܳܗܴ̈ܬܳܐ ܓܶܝܪ ܕܗܳܢܽܘܢ ܕܰܣܠܶܩܘ ܘܰܗܘܰܘ ܠܗܽܘܢ ܡܕܰܒܪ̈ܳܢܶܐ ܥܕܰܡܳܐ ܕܶܐܬܳܐ ܡܫܺܝܚܳܐ ܘܶܐܬܓܠܺܝ ܒܰܒܣܰܪ ܝ̣ܕܺܝܥܺܝܢ ܐܶܢܘܢ. ܕܰܘܝܕ ܒܣܶܕܪܳܐ ܠܐ ܡܶܫܬܟܰܚ ܒܗܽܘܢ. ܐܶܠܘ ܓܶܝܪ ܐܶܫܬܟܰܚ. ܡܫܰܡܠܶܐ ܗܘܳܐ ܐܰܝܠܶܝܢ ܕܶܐܡܰܪ ܢܒܺܝܐ. ܟܡܳܐ ܕܰܠܥܳܠܰܡ ܠܳܐ ܗܘܳܐ ܡܕܰܒܪܳܢܳܐ. ܡܳܕܶܝܢ ܕܠܐ ܚܶܪܝܳܢܳܐ ܐܶܬܝ̣ܕܰܥ ܕܐܪܳܙܰܐ ܗܘ܆ ܕܥܰܠ ܗܰܘ ܕܰܕܢܰܚ ܡ̣ܢ ܙܰܪܥܶܗ ܕܕܰܘܝܕ ܘܩܰܝܳܡ ܠܥܳܠܰܡ. ܗܳܠܶܝܢ ܐܶܬܶܐܡܰܪ. ܗܰܘ ܪܳܥܶܐ ܠܗܽܘܢ ܠܩܰܕܺܝ̈ܫܶܐ ܘܰܠܟܽܠܶܗ ܝ̣ܣܪܳܐܝܠ ܕܰܐܠܗܳܐ ܒܛܽܘܪ̈ܶܐ ܗܳܠܝܢ. ܕܰܠܥܶܠ ܡ̣ܢ ܫܡܰܝܳܐ ܕܶܐܬܶܐܡܰܪ ܡ̣ܢ ܢܒܺܝܐ. ܪܳܥܝܳܐ ܕܚܰܝܷ̈ܐ ܘܰܕܠܳܐ ܡܶܬܚܰܒܠܳܢܽܘܬܳܐ. ܘܶܐܠܽܘ ܥܰܠ ܚܰܙܩܺܝܐܝܠ ܘܥܰܠ ܐܰܝܠܶܝܢ ܕܰܐܟܬܶܒ ܣܺܝܡ ܗܘܳܐ ܠܝ̣ ܢܺܝܫܳܐ ܠܡܺܐܡܰܪ: ܠܟܽܠ ܚܕܳܐ ܡ̣ܢ ܗܳܠܝܢ ܕܰܐܝܬܺܝܬ ܠܣܳܗܕܽܘܬܳܐ ܠܚܽܘܕܳܐܝ̣ܬ ܐܶܢܳܐ ܡܦܰܫܶܩ ܗܘܺܝܬ. ܐܠܐ ܗܳܫܐ ܐܳܠܨܳܐ ܠܡܶܪܕܳܐ ܒܽܐܘܪܚܳܐ ܕܡܰܙܡܽܘܪ̈ܶܐ ܡ̣ܢ ܒܳܬܰܪ ܕܰܐܘܕܰܥ ܥܰܠ ܠܛܽܘܪ̈ܶܐ ܥܶܠܳܝ̈ܐ ܘܥܰܠ ܐܰܝܠܶܝܢ ܕܰܒܗܽܘܢ ܡܶܬܒܰܣܡܺܝܢ. ܐܶܬܦܢܺܝ ܕܢܰܟܪܶܐ ܠܥܰܘܴ̈ܠܶܐ ܡܶܢ ܢܝܳܚܬܳܐ ܕܩܰܕܺܝ̈ܫܶܐ ܟܰܕ ܐܡ̇ܪ.
ܡܶܛܠ ܕܠܐ ܢܶܬܬܢܺܝܚ ܫܰܒܛܳܐ ܕܥܰܘܴ̈ܠܶܐ ܒܰܡܢܳܬܳܐ ܕܙܰܕܺܝ̈ܩܶܐ. ܟܬܺܝܒ ܓܶܝܪ ܕܶܐܡܰܪ ܡܳܪܢ. ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ. ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܐܟܰܘ̈ܗܝ (ܡܬܝ ܟܗ: ܡܐ). ܘܬܘܒ ܐܡ̣ܪ ܡܙܰܡܪܳܢܳܐ:
ܘܠܐ ܢܰܘܫܛܽܘܢ ܙܰܕܺܝ̈ܩܶܐ ܐܝ̣ܕܰܝܴ̈ܐ ܕܺܝܠܗܽܘܢ ܒܥܰܘܠܳܐ. ܘܠܐ ܓܝܪ ܡܰܘܫܶܛ ܠܳܥܳܙܳܪ ܨܶܒܥܶܗ ܘܡܰܛܶܦ ܡܰܝܴ̈ܐ ܒܓܰܘ ܦܽܘܡܶܗ ܕܥܰܬܺܝܪܳܐ ܒܬܰܫܢܺܝܩܳܐ. ܐܠܐ ܡܶܬܒܰܣܰܡ ܥܰܡ ܐܰܒܪܳܗܳܡ ܒܛܳܒܴ̈ܬܳܐ. ܐܰܝܟ ܡܶܠܬܶܗ ܕܰܢܒܺܝܐ ܕܶܐܡܰܪ.
ܕܰܐܛܶܐܒ ܡܳܪܝܳܐ ܠܛܳܒ̈ܐ ܘܠܰܐܝܠܶܝܢ ܕܰܬܪܺܝܨܺܝܢ ܒܠܶܒܗܽܘܢ. ܕܰܐܝܟ ܗܳܟܰܢܳܐ ܗܘܰܘ ܟܽܠܗܽܘܢ ܩܰܕܺܝ̈ܫܶܐ.
ܘܰܐܝܠܶܝܢ ܕܰܡܥܰܩܡܺܝܢ ܫܒܺܝ̈ܠܰܝܗܽܘܢ. ܢܶܕܒܰܪ ܐܶܢܘܢ ܡܳܪܝܳܐ ܥܰܡ ܥܰܒ̈ܕܝ ܥܰܘܠܳܐ. ܘܗܳܠܶܝܢ ܕܰܒܓܰܘ ܬܰܫܢܺܝܩܳܐ. ܡ̣ܢ ܚܕܳܐ ܡܕܰܒܪܳܢܽܘܬܳܐ ܡܩܰܒܠܺܝܢ ܦܽܘܪܥܳܢܗܽܘܢ. ܘܚܰܕ ܗܽܘ ܕܰܡܕܰܒܰܪ. ܘܗܽܘ ܚܳܒܶܫ ܥܰܡ ܡܰܠܐܟܰܘ̈ܗܝ ܕܳܐܟܶܠܩܰܪܨܳܐ. ܠܟܽܠܗܽܘܢ ܗܳܢܘܢ ܡܥܰܪ̈ܡܶܐ ܘܰܦܬܺܝ̈ܠܰܝ ܨܶܒܝܳܢܳܐ. ܘܡ̣ܢ ܒܳܬܰܪ ܕܗܳܘܝܳܐ ܗܳܕܐ. ܡܶܬܦܢܶܐ ܡܳܪܝܳܐ ܥܰܠ ܥܰܡܶܗ ܘܥܳܒܶܕ ܫܠܳܡܳܐ ܠܺܝܣܪܳܐܝܠ ܕܰܐܠܗܳܐ. ܐܰܝܟ ܡܶܠܬܳܐ ܗܳܝ ܕܰܢܒܺܝܐ ܕܶܐܡܰܪ.
ܘܰܫܠܳܡܳܐ ܠܺܝܣܪܳܐܝܠ. ܕܗܽܘ ܢܰܫܘܶܐ ܠܰܢ ܕܡܶܢ ܥܰܡܶܗ ܟܽܠܢ ܢܶܬܡܢܶܐ ܘܒܺܝܣܪܳܐܝܠ ܢܶܬܚܫܶܒ. ܘܠܶܗ ܢܶܬܶܠ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܝܢ ܘܚܡܫܐ
ܥܰܠ ܐܪܳܙ ܦܽܘܢܳܝܳܐ ܕܩܰܕܺܝ̈ܫܶܐ ܠܥܳܠܡܳܐ ܚܰܕܬܳܐ. ܘܥܰܠ ܦܽܘܢܳܝܳܐ ܕܰܫܒܺܝܬܳܐ ܡ̣ܢ ܣܳܛܳܢܳܐ. ܗܳܝ ܕܰܒܝܰܕ ܡܳܪܰܢ ܦܢܳܬ ܫܒܺܝܬܳܐ ܠܘܳܬ ܐܰܒܳܐ.
ܠܘܳܬ ܚܰܘܪܳܐ ܕܣܽܘ̈ܟܳܠܶܐ ܪ̈ܽܘܚܳܢܶܐ ܘܪ̈ܳܡܰܝ ܡܶܢܟܠ ܚܽܘܫܳܒ̈ܐ. ܦܳܩܶܕ ܠܰܢ ܢܒܺܝܐ ܒܬܶܫܒܚܴ̈ܬܳܐ ܗܳܠܝܢ ܕܡܰܣܩܳܢ̈ܐ ܠܡܶܬܩܰܪܳܒܽܘ ܘܡܶܕܶܡ ܕܰܡܥܰܠܰܝ ܡ̣ܢ ܚܰܝܠܳܐ ܕܡܰܪ̈ܢܝܳܬܳܐ ܐܢܳܫܳܝܴ̈ܬܳܐ. ܡܰܪܬܶܐ ܠܰܢ ܠܡܶܬܚܰܫܳܒܽܘ. ܘܬܽܘܒ ܫܡܰܥ ܩܳܠܶܗ ܟܰܕ ܡܙܰܡܰܪ ܒܬܶܫܒܽܘܚܬܳܐ ܕܰܡܳܐܐ ܘܥܶܣܪܺܝܢ ܘܚܰܡܶܫ. ܘܰܐܝܟ ܗܰܘ ܕܰܒܓܰܘ ܟܶܢ̈ܫܶܐ ܕܰܦܢܰܘ ܡ̣ܢ ܓܳܠܽܘܬܳܐ ܡܙܰܡܰܪ ܘܳܐܡܰܪ:
ܟܰܕ ܡܦܰܢܶܐ ܡܳܪܝܳܐ ܫܒܺܝܬܳܐ ܕܨܶܗܝܽܘܢ ܗܘܰܝܢ ܐܰܝܟ ܗܳܢܘܢ ܕܚܳܕܶܝܢ. ܗܳܠܝܢ ܐܡ̣ܪ ܟܰܕ ܩܰܕܶܡ ܚܙܳܐ ܒܥܰܝܢܳܐ ܕܪܽܘܚܳܐ: ܠܚܰܓܺܝ ܢܒܺܝܳܐ ܘܠܰܙܟܰܪܝܳܐ. ܕܳܐܬܶܝܢ ܥܰܡ ܫܒܺܝܬܳܐ ܡ̣ܢ ܒܳܒܶܝܠ ܠܨܶܗܝܽܘܢ. ܡܶܛܠ ܕܳܐܦ ܗܶܢܘܢ ܢܒܺܝ̈ܐ ܗܘܰܘ. ܚܰܘܺܝ ܢܒܺܝܐ ܠܪܽܘܚܳܐ ܕܰܢܒܺܝܽܘܬܳܐ ܕܚܳܕܝܳܐ. ܟܰܕ ܐܶܬܦܪܶܩܘ ܢܒܺܝ̈ܐ ܡ̣ܢ ܥܰܒܕܽܘܬܳܐ. ܘܥܰܠܗܳܝ ܐܰܝܟ ܗܰܘ ܕܚܳܕܶܐ ܐܡ̇ܪ ܗܘܳܐ. ܘܬܘܒ ܡܰܘܣܶܦ ܐܡ̇ܪ:
ܗܳܝܕܶܝܢ ܢܶܬܡܠܶܐ ܦܽܘܡܰܢ ܓܽܘܚܟܳܐ ܘܠܶܫܳܢܰܢ ܬܶܫܒܽܘܚܬܳܐ. ܓܽܘܚܟܳܐ ܚܠܳܦ ܚܰܕܽܘܬܳܐ ܣܳܐܷܡ.
ܗܳܝܕܶܝܢ ܢܺܐܡܪܽܘܢ ܒܶܝܬ ܥܰܡܡ̈ܐ: ܕܰܐܣܓܺܝ ܡܳܪܝܳܐ ܠܡܶܥܒܰܕ ܥܰܡ ܗܳܠܝܢ. ܐܰܣܓܺܝ ܡܳܪܝܳܐ ܠܡܶܥܒܰܕ ܠܰܢ ܘܰܗܘܰܝܢ ܒܚܰܕܽܘܬܳܐ. ܥܕܰܡܳܐ ܕܰܐܥܶܠ ܫܰܪܒܳܐ ܕܥܰܡܡ̈ܐ. ܕܳܡܝܳܐ ܗܘܳܬ ܡܶܠܬܳܐ ܐܰܝܟ ܗܰܘ ܕܰܠܚܽܘܕܳܐܝ̣ܬ ܡܶܛܠ ܗܳܝ ܫܒܺܝܬܳܐ ܕܣܶܠܩܰܬ ܡ̣ܢ ܒܳܒܶܝܠ ܡܙܰܡܰܪ܆ ܐܠܐ ܒܰܠܚܽܘܕ ܡܶܛܠ ܥܰܡܳܐ ܡܶܬܢܰܒܶܐ ܗܳܫܐ. ܐܠܐ ܘܥܰܠ ܥܰܡܡ̈ܐ ܡܡܰܠܶܠ. ܡܶܛܠܗܳܢܳܐ ܩܰܕܡܶܬ ܐܶܡܪܶܬ. ܕܰܠܘܳܬ ܚܽܘܫܳܒ̈ܐ ܡܥܰܠܰܝܴ̈ܐ ܦܩܰܕ ܠܰܢ ܢܒܺܝܐ ܠܡܶܩܪܰܒ ܘܰܒܚܰܘܪ̈ܶܐ ܫܡܰܝܳܢ̈ܐ ܪܳܡܶܙ ܠܰܢ ܠܡܶܬܒܰܩܳܝܽܘ. ܐܰܝܟܰܢ ܓܝܪ ܠܘ ܫܡܰܝܴ̈ܢܶܐ ܢܶܩܪܶܐ ܠܣܽܘ̈ܟܳܠܶܐ ܕܐܪ̈ܳܙܶܐ ܗܳܠܝܢ ܟܡܳܐ ܕܚܳܙܶܝܢܰܢ ܕܰܫܒܺܝܬܳܐ ܗܳܕܐ ܠܬܰܡܳܢ ܡܶܬܥܰܠܝܳܐ. ܘܰܠܨܶܗܝܽܘܢ ܗܳܝ ܕܒܰܫܡܰܝܳܐ ܣܳܠܩܳܐ. ܠܗ̇ ܓܶܝܪ ܐܰܦܢܺܝ ܡܳܪܝܳܐ ܫܒܺܝܬܳܐ ܕܫܰܒܝܳܐ ܗܘܳܬ ܠܣܳܛܳܢܳܐ. ܟܰܕ ܢܦܰܩܘ ܫܠܺܝ̈ܚܶܐ ܒܳܬܰܪ ܓܳܠܽܘܬܳܐ ܕܰܕܒܺܝܪܳܐ ܗܘܳܬ ܠܡܳܪܽܘܕܳܐ. ܕܰܐܣܓܺܝ ܡܳܪܝܳܐ ܠܡܶܥܒܰܕ ܠܰܢ ܗܳܠܝܢ. ܡܳܢܐ ܐܶܢܶܝܢ ܗܳܠܝܢ ܕܰܥܒܰܕ ܡܳܪܝܳܐ ܦܽܘܢܳܝܳܐ ܕܰܠܘܳܬ ܒܰܝܬܰܢ ܕܒܰܫܡܰܝܳܐ. ܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ ܕܰܒܝܰܕ ܥܡܳܕܳܐ. ܐܶܣܛܠܳܐ ܪܺܝܫܳܝܬܳܐ ܕܗܶܦܟܰܬ ܠܰܒܪܳܐ ܝܳܪܬܳܐ ܕܦܰܪܰܚ ܢܶܟ̈ܣܰܘܗܝ. ܡܣܳܢܷ̈ܐ ܘܥܶܙܰܩܬܳܐ ܕܰܢܣܰܒ ܒܪܳܐ ܬܰܝܳܒܳܐ ܡ̣ܢ ܐܰܒܳܐ ܕܩܰܒܠܶܗ ܒܪ̈ܰܚܡܶܐ. ܬܰܘܪܳܐ ܕܦܰܛܡܳܐ ܕܰܦܩܰܕ ܐܰܒܳܐ ܕܢܶܬܩܛܶܠ ܠܒܽܘܣܳܡܳܐ ܗܰܘ ܕܰܥܛܰܦ ܡ̣ܢ ܫܽܘܩܳܐ ܕܙܳܢܝܽܘܬܳܐ. ܗܳܠܝܢ ܗܘܱ̈ܝ ܕܥܳܒ̈ܕܳܢ ܠܳܗ̇ ܠܰܫܒܺܝܬܳܐ ܠܡܺܐܡܰܪ.
ܕܰܐܣܓܺܝ ܡܳܪܝܳܐ ܠܡܶܥܒܰܕ ܠܰܢ ܘܰܗܘܰܝܢ ܒܚܰܕܽܘܬܳܐ: ܘܰܐܗܦܶܟ ܡܳܪܝܳܐ ܫܒܺܝܬܰܢ ܐܰܝܟ ܦܨܺܝ̈ܕܶܐ ܕܰܒܬܰܝܡܢܳܐ. ܠܰܦܨܺܝ̈ܕܶܐ ܕܰܒܬܰܝܡܢܳܐ ܡܕܰܡܶܐ ܠܗܳܢܐ ܣܽܘܥܪܳܢܳܐ ܪܰܒܳܐ. ܘܙܳܕܶܩ ܕܢܶܒܥܶܐ ܡܳܢܳܐ ܗܝ ܦܶܠܶܐܬܳܐ ܗܳܕܐ. ܬܰܝܡܢܳܐ ܗܳܟܺܝܠ ܥܰܡܳܐ ܗܝ ܕܩܰܕܺܝ̈ܫܶܐ. ܡܶܛܠ ܕܟܽܠܗ̇ ܒܟܽܠܗ̇ ܢܰܗܺܝܪ̈ܶܐ. ܘܰܠܟܽܠܗ̇ ܕܠܳܐ ܒܽܘܨܳܪܳܐ ܡܰܢܗܰܪ ܫܶܡܫܳܐ. ܦܨܺܝ̈ܕܶܐ ܡܳܕܶܝܢ ܢܰܦ̈ܫܳܬܳܐ ܕܩܰܕܺܝ̈ܫܶܐ ܐܶܢܶܝܢ ܕܰܢܒܺܝ̈ܐ ܗܳܠܝܢ ܕܰܡܠܶܝܢ ܗܘܰܘ ܦܨܺܝ̈ܕܰܝܗܘܢ ܡܰܝܴ̈ܐ ܫܡܰܝܳܢ̈ܐ. ܡ̣ܢ ܥܢܳܢܳܐ ܕܪܽܘܚܳܐ ܩܰܕܺܝܫܳܐ. ܐܰܟܡܳܐ ܕܶܐܡܰܪ ܗܘܳܐ ܦܶܛܪܽܘܣ ܗܰܘ ܚܰܝܠܳܐ ܕܰܡܣܰܒܪ̈ܳܢܶܐ ܒܒܰܝܬܶܗ ܕܶܝܢ ܕܩܽܘܪܢܺܝܠܺܝܰܐܣ. ܕܟܰܕ ܚܙܳܐ ܕܶܐܬܡܠܺܝܘ ܐܰܝܠܺܝܢ ܕܬܰܡܳܢ ܫܳܡܥܺܝܢ ܗܘܰܘ. ܡܶܠܬܶܗ ܕܪܽܘܚܳܐ ܕܩܽܘܕܫܳܐ. ܘܰܐܩܶܦܘ ܗܘܰܘ ܠܰܡܡܰܠܳܠܽܘ ܒܠܶܫܳܢ ܠܶܫܳܢ ܐܡ̣ܪ ܫܶܡܥܽܘܢ. ܕܰܠܡܳܐ ܡܰܝܴ̈ܐ ܡܶܫܟܰܚ ܟܳܠܶܐ ܐܢܳܫ ܕܠܳܐ ܢܰܥܡܕܽܘܢ ܗܳܢܽܘܢ ܕܗܳܐ ܩܰܒܶܠܘ ܪܽܘܚܳܐ ܕܩܽܘܕܫܳܐ. ܐܰܟܡܳܐ ܕܰܚܢܰܢ (ܦܪܟܣܝܣ ܝ: ܡܙ). ܐܶܢܕܶܝܢ ܨܳܒܶܐ ܐܢܳܫ ܕܳܐܦ ܠܰܫܠܺܝܚ̈ܐ ܢܟܰܢܶܐ ܒܰܫܡܳܐ ܗܳܢܐ. ܟܰܕ ܣܳܐܷܡ ܚܠܳܦ ܬܰܝܡܢܳܐ ܠܥܶܠܳܝܬܳܐ ܗܳܝ ܕܰܒܝܰܕ ܠܶܫܳܢܷ̈ܐ ܕܢܽܘܪܳܐ ܢܶܗܪܰܬ. ܟܰܕ ܡܶܬܢܰܫܒܳܐ ܡ̣ܢ ܪܽܘܚܳܐ ܥܰܙܺܝܙܬܳܐ. ܟܒܰܪ ܘܠܳܐ ܗܳܟܰܢܳܐ ܡܣܰܟܶܠ ܒܳܬܰܪ ܦܶܠܶܐܬܳܐ ܕܰܦܨܺܝ̈ܕܶܐ ܡܰܝܬܶܐ ܬܽܘܒ ܘܳܐܡܰܪ:
ܐܰܝܠܶܝܢ ܕܙܳܪܥܺܝܢ ܒܕܶܡܥܬܳܐ ܒܚܰܕܽܘܬܳܐ ܢܶܚܨܕܽܘܢ. ܘܡܰܢ ܘܳܠܶܐ ܕܢܶܪܢܶܐ ܕܰܙܪܰܥ ܒܕܶܡܥܬܳܐ ܐܠܐ ܦܰܘܠܽܘܣ ܗܰܘ ܟܳܪܽܘܙܳܐ. ܗܰܘ ܕܶܐܡܰܪ ܗܘܳܐ ܠܘܳܬ ܐܶܦܺܝ̈ܣܩܽܘܦܶܐ ܕܶܐܦܶܣܳܝ̈ܐ ܡ̣ܢ ܒܳܬܰܪ ܕܡܰܠܶܠ ܥܰܡܗܽܘܢ ܒܡܺܝܠܺܝܛܳܘܣ ܥܰܠ ܟܽܠܶܗ ܥܰܡܠܳܐ ܕܰܗܘܳܐ ܠܶܗ ܒܰܐܬܪܳܐ ܕܶܐܦܶܣܳܝ̈ܐ. ܡܶܛܠ ܗܳܢܐ ܗܘܰܝܬܽܘܢ ܥܺܝܪܺܝܢ ܘܥܳܗܕܺܝܢ ܕܰܫܢܰܝܴ̈ܐ ܬܠܳܬ ܠܳܐ ܫܠܺܝܬ ܒܠܺܠܝܳܐ ܘܒܺܐܝܡܳܡܳܐ܇ ܘܰܒܕܶܡ̈ܥܶܐ ܡܰܪܬܶܐ ܐܢܳܐ ܠܐܢܳܫ ܐܢܳܫ ܡܶܢܟܽܘܢ (ܦܪܟܣܝܣ ܟ: ܠܐ). ܗܳܟܰܢܳܐ ܐܳܦ ܟܽܠܗܘܢ ܫܠܺܝ̈ܚܶܐ ܒܕܶܡܥܬܳܐ ܙܪܰܥܘ ܝܽܘܠܦܳܢܗܽܘܢ ܒܶܝܬ ܥܰܡܡ̈ܐ. ܐܰܝܟ ܕܩܰܕܶܡ ܐܰܠܶܦ ܐܶܢܽܘܢ ܥܰܡܰܢܽܘܐܝܠ ܒܝܰܕ ܬܰܚܘܺܝܬܳܐ ܕܰܐܢܬܬܳܐ ܕܝܳܠܕܳܐ. ܐܰܢܬܬܳܐ ܠܰܡ ܡܳܐ ܕܝܳܠܕܳܐ. ܟܳܪܝܳܐ ܠܳܗ̇ ܕܰܡܛܳܐ ܝܰܘܡܳܐ ܕܡܰܘܬܳܗ̇ ܡܳܐ ܕܶܝܢ ܕܝܶܠܕܰܬ ܒܪܳܐ ܠܳܐ ܥܳܗܕܳܐ ܐܽܘܠܨܳܢܳܗ̇: ܡܶܛܠ ܚܰܕܽܘܬܳܐ ܕܶܐܬܝ̣ܠܶܕ ܒܰܪܢܳܫܳܐ ܒܥܳܠܡܳܐ. ܗܳܟܰܢܳܐ ܐܰܢܬܽܘܢ ܟܰܪܝܳܐ ܠܟܽܘܢ. ܬܘܒ ܕܶܝܢ ܐܶܚܙܶܝܟܽܘܢ ܘܢܶܚܕܶܐ ܠܶܒܟܽܘܢ. ܘܚܰܕܘܰܬܟܽܘܢ ܠܐ ܐܢܳܫ ܢܳܣܶܒ ܡܶܢܟܽܘܢ (ܝܘܚܢܢ ܝܘ: ܟܐ-ܟܒ). ܒܗܳܠܝܢ ܢܰܗܺܝܪܳܐܝ̣ܬ ܢܶܦܩܰܬ ܠܰܥܒܳܕܳܐ ܡܶܠܬܳܐ ܗܳܕܶܐ. ܗܳܟܰܢܳܐ ܢܦܰܩܘ ܫܠܺܝ̈ܚܶܐ ܒܥܳܠܡܳܐ ܘܰܒܒܶܟܝܳܐ ܘܰܒܕܶܡ̈ܥܶܐ ܙܪܰܥܘ ܡܶܠܬܳܐ ܕܚܰܝ̈ܐ ܒܶܝܬ ܥܰܡܡ̈ܐ. ܘܚܳܨܕܺܝܢ ܕܶܝܢ ܒܚܰܕܽܘܬܳܐ ܡܳܐ ܕܚܳܙܶܝܢ ܠܗܰܘ ܐܰܟܳܪܳܐ ܕܚܰܝ̈ܐ ܕܰܡܫܰܕܰܪ ܡܰܠܰܐܟܰܘ̈ܗܝ ܘܰܡܟܰܢܶܫ ܙܰܪܥܗܽܘܢ ܡ̣ܢ ܐܰܪ̈ܒܥܳܬ ܟܶܢ̈ܦܶܝܗ̇ ܕܰܐܪܥܳܐ. ܘܡܶܫܬܰܩ̈ܠܳܢ ܟܰܦܰܝ̈ܗܽܘܢ ܒܚܰܕܽܘܬܳܐ ܥܰܠ ܟܰܬܦܴ̈ܬܳܐ ܕܡܰܠܰܐܟ̈ܐ. ܘܡܶܬܟܰܢ̈ܫܳܢ ܠܶܐܕܪܳܐ ܕܰܥܠܰܠܬܳܐ ܕܚܰܝ̈ܐ. ܘܚܳܙܶܝܢ ܠܗܳܢܘܢ ܕܒܳܟܶܝܢ. ܕܰܫܩܺܝܠܺܝܢ ܗܘܰܘ ܙܰܪܥܳܐ ܕܪܽܘܚܳܐ ܕܳܐܬܶܝܢ ܒܚܰܕܽܘܬܳܐ ܘܰܛܥܺܝܢܺܝܢ ܥܰܠ ܟܰܬܦܴ̈ܬܗܽܘܢ ܟܰܦܷ̈ܐ ܕܥܴ̈ܐܠܳܢ ܠܗܰܘ ܓܕܺܝܫܳܐ ܕܚܰܝ̈ܐ. ܘܫܳܠܡܳܐ ܡܶܠܬܶܗ ܕܰܢܒܺܝܐ ܕܶܐܡܰܪ ܗܳܝ:
ܕܰܡܗܰܠܳܟܽܘ ܡܗܰܠܶܟ ܘܒܳܟܶܐ. ܐܰܝܢܳܐ ܕܰܫܩܺܝܠ ܙܰܪܥܳܐ. ܡܶܐܬܳܐ ܐܳܬܶܐ ܒܚܰܕܽܘܬܳܐ ܐܰܝܢܳܐ ܕܰܫܩܺܝܠ ܟܰܦܳܐ. ܗܳܟܰܢܳܐ ܓܶܝܪ ܐܶܡܰܪ ܠܗܽܘܢ ܠܰܫܠܺܝ̈ܚܶܐ ܟܰܕ ܝܰܗܒ ܠܗܽܘܢ ܙܰܪܥܶܗ. ܐܰܡܺܝܢ ܐܰܡܺܝܢ ܐܳܡܰܪ ܐܢܳܐ ܠܟܽܘܢ. ܕܬܶܒܟܽܘܢ ܐܰܢܬܽܘܢ ܘܬܶܐܠܽܘܢ. ܘܥܳܠܡܳܐ ܢܶܚܕܶܐ ܘܰܠܟܽܘܢ ܬܶܟܪܶܐ (ܝܘܚܢܢ ܝܘ: ܟ). ܘܬܘܒ ܒܕܽܘܟܬܳܐ ܐܚܪܺܬܳܐ ܟܰܕ ܝܳܗܶܒ ܠܗܽܘܢ ܛܽܘܒܳܐ ܐܡ̣ܪ: ܛܽܘܒܰܝܟܽܘܢ ܠܰܕܒܳܟܶܝܢ ܗܳܫܐ ܕܬܶܓܚܟܽܘܢ. (ܠܘܩܐ ܘ: ܟܐ). ܒܗܳܠܝܢ ܓܶܝܪ ܒܦܳܣܺܝ̈ܩܳܬܳܐ ܐܶܬܢܰܗܰܪ ܡܰܙܡܽܘܪܳܐ ܗܳܢܐ. ܐܳܦ ܒܰܫܠܺܝ̈ܚܶܐ ܢܶܦܩܰܬ ܡܶܠܬܳܐ ܗܳܕܐ ܠܦܽܘܫܳܩܳܐ. ܘܳܐܬܶܝܢ ܒܚܰܕܽܘܬܳܐ ܡܳܐ ܕܰܫܩܺܝܠܺܝܢ ܟܰܦܳܐ ܕܬܰܘܕܺܝܬܳܐ. ܪܺܝܫܺܝܬܳܐ ܕܟܽܠܗܽܘܢ ܥܰܡܡ̈ܐ. ܘܟܽܠܚܰܕ ܡ̣ܢ ܫܠܺܝ̈ܚܶܐ ܡܩܰܪܶܒ ܟܰܦܶܗ ܠܡܳܪܳܗ̇ ܕܶܐܕܪܳܐ. ܐܳܬܶܐ ܒܚܰܕܽܘܬܳܐ ܪܺܝܫܳܐ ܕܰܫܠܺܝ̈ܚܶܐ ܫܶܡܥܽܘܢ ܘܰܐܝܟ ܟܰܦܳܐ ܡܩܰܪܶܒ ܪܗܽܘܡܺܝ ܪܺܝܫܳܐ ܘܡܰܠܟܬܳܐ ܕܟܽܠܗܶܝܢ ܡܕܺܝ̈ܢܳܬܳܐ. ܘܝܽܘܚܰܢܳܢ ܒܰܪ ܙܰܒܕܰܝ ܗܰܘ ܟܳܪܽܘܙܳܐ ܕܚܰܝ̈ܐ. ܝܳܗܶܒ ܟܰܦܳܐ ܠܶܐܦܶܣܳܘܣ ܘܰܠܩܰܕܺܝ̈ܫܶܐ ܕܬܰܡܳܢ. ܡܰܬܰܝ ܠܰܩܪܺܝܛܺܝ. ܡܰܪܩܽܘܣ ܕܶܝܢ ܠܡܶܨܪܶܝܢ. ܠܽܘܩܳܐ ܠܰܐܠܶܟܣܰܢܕܪܺܝܰܐ. ܬܳܐܘܡܰܐ ܠܗܶܢܕܽܘ. ܒܰܪ ܬܽܘܠܡܰܝ ܠܦܳܪܶܣ. ܐܰܕܰܝ ܠܐܽܘܪܗܳܝ. ܝܰܥܩܽܘܒ ܠܐܽܘܪܺܫܠܶܡ. ܐܰܢܕܪܶܐܘܳܣ ܠܰܐܬܪܳܐ ܕܟܰܠܒܺܝܢ. ܫܶܡܥܽܘܢ ܛܰܢܳܢܳܐ ܠܕܰܠܡܰܛܺܝܰܐ. ܦܰܘܠܽܘܣ ܠܩܽܘܪܺܝܢܬܳܘܣ ܘܠܰܐܬܝ̣ܢܳܘܣ ܘܰܠܟܽܠܗܽܘܢ ܥܰܡܡ̈ܐ. ܒܗܳܠܶܝܢ ܟܰܦ̈ܐ ܐܳܬܶܝܢ ܫܠܺܝ̈ܚܶܐ ܡܳܐ ܕܰܡܩܰܪܒܺܝܢ ܠܗܰܘ ܕܰܐܚܺܝܕ ܪܰܦܫܳܐ ܒܺܐܝܕܶܗ. ܘܰܡܕܰܟܶܐ ܐܶܕܪ̈ܶܐ ܕܡܰܠܟܽܘܬܶܗ. ܘܳܐܦܚܢܰܢ ܢܶܫܬܘܶܐ ܕܡ̣ܢ ܟܰܦܳܐ ܕܰܫܠܺܝ̈ܚܶܐ ܢܶܫܬܟܰܚ ܘܚܷ̈ܛܶܐ ܢܶܗܘܶܐ ܒܰܐܘܨܪܳܐ ܕܺܝܠܶܗ ܕܗܰܘ ܐܰܟܳܪܳܐ ܕܚܰܝ̈ܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܝܢ ܘܫܬܐ
ܡܰܘܕܰܥ ܥܰܠ ܐܪܳܙ ܒܰܝܬܰܢ ܕܒܰܫܡܰܝܳܐ: ܘܥܰܠ ܕܰܒܝܰܕ ܡܳܪܰܢ ܐܶܬܚܰܕܰܬ ܒܰܝܬܳܐ ܕܢܰܦܫܰܢ.
ܐܰܝܟ ܐܰܪ̈ܕܺܝܟܠܶܐ ܚܰܟܺܝ̈ܡܶܐ ܐܶܫܬܰܕܰܪܘ ܡ̣ܢ ܐܰܠܗܳܐ ܪ̈ܺܝܫܰܝ ܐܰܒܳܗ̈ܬܳܐ ܘܰܢܒܺܝ̈ܐ. ܕܢܶܒܢܽܘܢ ܒܰܝܬܳܐ ܕܥܳܠܡܳܐ ܗܳܢܐ ܕܰܥܩܰܪ ܒܺܝܫܳܐ. ܘܟܰܕ ܐܰܣܓܺܝܘ ܘܰܥܡܰܠܘ ܒܶܗ ܕܢܶܒܢܽܘܢܳܝܗܝ ܘܠܳܐ ܐܶܬܡܨܺܝܘ܆ ܒܗܳܢܳܐ ܒܶܢܝܳܢܳܐ ܕܒܰܝܬܳܐ ܕܶܐܬܥܩܰܪ܆ ܥܡܰܠ ܢܽܘܚ ܬܫܰܥܡܳܐܐ ܘܚܰܡܫܺܝܢ ܫܢ̈ܝ̣ܢ. ܘܰܐܒܪܳܗܳܡ ܡܳܐܐ ܘܫܰܒܥܺܝܢ ܘܚܰܡܶܫ ܫܢ̈ܝ̣ܢ. ܘܝܰܥܩܽܘܒ ܗܰܘ ܬܰܡܺܝܡܳܐ ܡܳܐܐ ܘܰܐܪܒܥܺܝܢ ܘܰܫܒܰܥ ܫܢ̈ܝ̣ܢ. ܘܝܰܘܣܶܦ ܬܽܘܒ ܡ̣ܢ ܗܳܠܶܝܢ ܐܰܪ̈ܕܺܝܟܠܶܐ ܡܶܬܚܫܶܒ. ܡܽܘܫܶܐ ܥܰܠ ܟܽܠܶܗ ܒܰܝܬܳܐ ܕܰܐܠܗܐ ܐܶܬܗܰܝܡܰܢ ܡܳܐܐ ܘܥܺܣܪܺܝܢ ܫ̈ܢܺܝܢ. ܝܶܫܽܘܥ ܒܰܪܢܽܘܢ ܡܳܐܐ ܘܥܶܣܪܺܝܢ ܘܰܫܒܰܥ ܫܢ̈ܝ̣ܢ. ܓܶܕܥܽܘܢ ܐܰܪܒܥܺܝܢ ܫܢ̈ܝ̣ܢ. ܘܟܽܠܗܽܘܢ ܢܒܺܝ̈ܐ ܘܰܐܒܳܗܴ̈ܬܳܐ ܒܒܶܢܝܳܢܶܗ ܕܒܰܝܬܳܐ ܗܳܢܐ ܠܳܐܝܶܢ ܗܘܰܘ ܕܒܶܝܬ ܐܳܕܳܡ. ܘܒܳܬܰܪ ܗܳܠܝܢ ܚܰܓܰܝ ܘܰܙܟܰܪܝܳܐ ܟܰܕ ܣܠܶܩܘ ܡ̣ܢ ܦܽܘܢܳܝܳܐ ܕܰܫܒܺܝܬܳܐ ܕܒܳܒܶܝܠ܆ ܥܡܰܠܘ ܐܰܪܒܥܺܝܢ ܘܫܶܬ ܫܢ̈ܝ̣ܢ. ܟܰܕ ܣܺܝܡ ܗܘܳܐ ܠܗܽܘܢ ܠܛܽܘܦܣܳܐ ܕܒܰܝܬܳܐ ܗܰܘ ܕܰܒܢܳܐ ܙܽܘܪܒܳܒܺܝܠ ܒܳܬܰܪ ܕܣܶܠܩܰܬ ܫܒܺܝܬܳܐ ܡܶܢ ܒܳܒܶܝܠ. ܘܟܰܕ ܒܩܰܕܡܳܝ̈ܐ ܘܒܰܐܚܪ̈ܳܝܶܐ ܚܳܝܪܳܐ ܗܘܳܬ ܥܰܝܢܳܐ ܪܰܒܬܳܐ ܕܰܢܒܺܝܽܘܬܳܐ ܒܛܽܘܒܳܢܳܐ ܕܰܘܝܕ ܙܶܥܩܰܬ ܠܽܘܩܒܰܠ ܟܽܠܗܽܘܢ ܐܰܪ̈ܕܺܝܟܠܶܐ ܘܒܰܢܳܝܷ̈ܐ ܘܰܩܥܳܬ:
ܐܶܢ ܡܳܪܝܳܐ ܠܳܐ ܒܳܢܶܐ ܒܰܝܬܳܐ ܣܪܺܝܩܳܐܝ̣ܬ ܠܳܐܝܶܢ ܒܰܢܳܝܰܘ̈ܗܝ. ܡܳܢܳܐ ܠܰܡ ܠܳܐܝܶܢ ܐܢܬܽܘܢ. ܒܰܝܬܳܐ ܒܟܽܘܢ ܠܳܐ ܡܶܬܒܢܶܐ. ܡܰܬܩܢܳܐ ܒܟܽܘܢ ܠܳܐ ܡܶܬܚܰܕܰܬ. ܗܰܘ ܕܰܢܦܰܠ ܒܟܽܘܢ ܠܳܐ ܩܳܐܷܡ. ܐܶܢ ܐܝ̣ܕܳܐ ܕܡܳܪܝܳܐ ܗܺܝ ܕܰܒܢܳܬܶܗ ܡܶܢ ܩܕܺܝܡ ܠܒܰܪܢܳܫܳܐ ܠܳܐ ܒܳܢܝܳܐ ܘܰܡܚܰܕܬܳܐ. ܒܰܣܚܺܝܦܽܘܬܶܗ ܦܳܐܷܫ. ܡܶܛܠܗܳܢܐ ܠܰܢܒܺܝܽܘܬܳܐ ܗܳܕܐ ܡܫܰܡܠܶܐ ܗܘܳܐ ܡܳܪܝܳܐ. ܘܰܡܚܰܘܶܐ ܒܛܺܝܠܽܘܬܶܗ ܕܥܰܠ ܒܰܝܬܳܐ ܗܳܢܐ ܕܺܐܝܬܰܘܗܝ ܒܰܪܢܳܫܳܐ. ܟܰܕ ܚܙܳܐ ܕܰܐܘܦܺܝܘ ܐܰܪ̈ܕܺܝܟܠܶܐ ܘܰܐܪ̈ܓܽܘܒܠܶܐ ܡ̣ܢ ܒܶܢܝܳܢܶܗ ܗܳܝܕܶܝܢ ܢܚܶܬ ܡ̣ܢ ܫܡܰܝܳܐ. ܘܥܰܠ ܒܳܬܪܶܗ ܠܡܰܪܒܥܳܐ ܕܰܒܬܽܘܠܬܳܐ ܝܳܠܕܰܬ ܐܠܗܐ ܡܰܪܝܰܡ. ܘܰܒܢܳܝܗܝ ܠܒܰܝܬܳܐ ܒܰܩܢܽܘܡܶܗ ܘܣܳܡ ܠܶܗ ܫܶܬܶܐܣ̈ܐ ܘܚܰܠܛܶܗ ܒܰܟܝܳܢܶܗ. ܘܫܰܡܠܝܶܗ ܒܟܽܠܗܶܝܢ ܐܢܳܫܳܝܴ̈ܬܳܐ. ܘܢܺܐܠܰܦ ܕܡܶܛܠ ܒܶܢܝܳܢܶܗ ܕܒܰܝܬܳܐ ܗܳܢܐ ܐܶܬܳܐ. ܘܳܐܡܰܪ ܗܘܳܐ ܠܘܳܬ ܝܽܘ̈ܕܳܝܶܐ ܟܰܕ ܐܳܡܪܺܝܢ ܠܶܗ: ܕܡܳܢܳܐ ܐܳܬܳܐ ܡܚܰܘܶܐ ܐܰܢܬ ܠܰܢ ܕܗܳܠܶܝܢ ܥܳܒܶܕ ܐܰܢܬ؟. ܐܡ̣ܪ ܫܪܰܘ ܠܗܰܝܟܠܳܐ ܗܳܢܳܐ ܘܠܰܬܠܳܬܳܐ ܝܰܘ̈ܡܺܝܢ ܐܶܢܳܐ ܡܩܺܝܡ ܐܢܳܐ ܠܶܗ. ܐܳܡܪܺܝܢ ܠܶܗ ܠܰܐܪܒܥܺܝܢ ܘܫܶܬ ܫܢ̈ܝ̣ܢ ܐܶܬܒܢܺܝ ܗܰܝܟܠܳܐ ܗܳܢܐ. ܘܰܐܢܬ ܠܰܬܠܳܬܳܐ ܝܰܘ̈ܡܺܝܢ ܡܩܺܝܡ ܐܰܢܬ ܠܶܗ؟ ܗܽܘ ܕܶܝܢ ܐܡ̣ܪ ܗܘܳܐ ܥܰܠ ܗܰܝܟܠܳܐ ܕܦܰܓܪܶܗ (ܝܘܚܢܢ ܒ: ܝܚ-ܟܐ). ܡܶܛܠ ܗܳܢܐ ܐܪܳܙܳܐ ܩܥܳܐ ܢܒܺܝܐ.
ܕܶܐܢ ܡܳܪܝܳܐ ܠܳܐ ܒܳܢܶܐ ܒܰܝܬܳܐ ܣܪܺܝܩܳܐܝ̣ܬ ܠܳܐܝܶܢ ܒܰܢܳܝܰܘ̈ܗܝ. ܘܶܐܢ ܡܳܪܝܳܐ ܠܳܐ ܢܳܛܰܪ ܩܪܺܝܬܳܐ ܣܪܺܝܩܳܐܝ̣ܬ ܫܳܗܪܺܝܢ ܢܳܛܽܘܪ̈ܶܝܗ̇. ܩܪܺܝܬܳܐ ܠܟܽܠܶܗ ܥܳܠܡܳܐ ܩܳܪܶܐ. ܕܰܟܡܳܐ ܐܶܢ ܡܶܬܥܰܕܪܳܐ ܡܶܢ ܢܳܛܽܘܪܽܘܬܳܐ ܕܩܰܕܺܝ̈ܫܶܐ ܕܠܳܐ ܥܽܘܕܪܳܢܳܐ ܕܡ̣ܢ ܐܠܗܐ ܠܐ ܡܰܘܬܪܺܝܢ ܠܗ̇ ܡܶܕܶܡ. ܘܬܘܒ ܐܡ̣ܪ:
ܣܪܺܝܩܺܝܢ ܐܶܢܘܢ ܐܰܝܠܶܝܢ ܕܰܡܩܰܕܡܺܝܢ ܠܰܡܩܳܡ ܘܡܰܘܚܪܺܝܢ ܠܡܶܬܰܒ. ܐܳܟܠܰܝ̈ ܠܰܚܡܳܐ ܒܟܺܐܒ̈ܐ. ܗܳܠܝܢ ܐܝ̣ܬܰܝܗܽܘܢ ܐܰܝܠܶܝܢ ܕܰܬܟܺܝܠܺܝܢ ܘܳܐܚܕܺܝܢ ܓܰܘܣܳܐ ܒܫܽܘܠܛܳܢ̈ܐ ܘܰܒܪ̈ܺܝܫܳܢܘܳܬܳܐ. ܕܳܐܦܠܳܐ ܗܳܢܘܢ ܠܰܡܥܰܕܳܪܽܘ ܠܰܩܪܺܝܬܳܐ ܥܳܠܡܳܐ. ܐܶܢ ܡܳܪܝܳܐ ܠܳܐ ܢܳܛܰܪ ܠܳܗ̇ ܒܺܐܝ̈ܕܰܝܗܽܘܢ. ܘܠܰܚܡܳܐ ܕܟܺܐܒ̈ܐ ܐܝ̣ܬܰܘܗܝ ܠܰܚܡܗܽܘܢ. ܘܒܳܬܰܪ ܗܳܠܝܢ ܐܡ̣ܪ ܢܒܺܝܐ.
ܗܳܟܰܢ ܢܶܬܶܠ ܠܚܰܒܺܝ̈ܒܰܘܗܝ ܫܶܢܬܳܐ. ܝܳܪܬܽܘܬܶܗ ܓܶܝܪ ܕܡܳܪܝܳܐ ܒܢܰܝܴ̈ܐ ܐܶܢܽܘܢ. ܐܰܓܪܳܐ ܕܦܺܐܪ̈ܶܐ ܕܰܒܡܰܪܒܥܳܐ. ܟܬܳܒܳܐ ܐܰܡܺܝܪ ܒܪܽܘܚܳܐ ܠܟܽܠܗܽܘܢ ܩܰܕܺܝ̈ܫܶܐ ܒܢܰܝܴ̈ܐ ܩܳܪܶܐ. ܡܶܛܠ ܕܳܐܦ ܢܒܺܝ̈ܐ ܒܢܰܝܴ̈ܐ ܕܰܐܠܗܳܐ ܐܶܬܩܪܺܝܘ. ܘܟܰܕ ܕܶܝܢ ܐܶܬܳܐ ܐܰܠܗܳܐ ܒܰܒܣܰܪ ܠܰܐܪܥܳܐ. ܒܝܰܕ ܥܡܳܕܳܐ ܩܰܕܺܝܫܳܐ ܝܰܗܒ ܣܺܝܡܰܬ ܒܢܰܝܴ̈ܐ. ܒܰܫܪܳܪܳܐ ܐܶܬܝܰܗܒܰܬ ܠܰܢ ܠܡܳܝܽܘ̈ܬܶܐ ܕܢܶܗܘܶܐ ܒܢܰܝܴ̈ܐ ܕܰܐܠܗܳܐ ܒܛܰܝܒܽܘܬܳܐ. ܘܗܳܫܳܐ ܥܰܡܡ̈ܐ ܡܗܰܝܡ̈ܢܶܐ ܒܢܰܝܴ̈ܐ ܘܝܳܪܬܽܘܬܶܗ ܐܶܢܽܘܢ ܕܡܳܪܝܳܐ. ܗܳܠܝܢ ܐܰܓܪܳܐ ܐܶܢܘܢ ܕܥܰܡܠܳܟ ܘܰܕܠܶܐܘܬܳܟ ܕܰܠܐܝ̣ܬ ܒܰܙܩܺܝܦܳܐ ܚܠܳܦܰܝܗܽܘܢ. ܐܰܝܟ ܕܶܐܡܰܪ ܢܒܺܝܐ܆ ܐܰܓܪܳܐ ܕܦܺܐܪܳܐ ܕܰܒܡܰܪܒܥܳܐ. ܡܰܪܒܥܳܐ ܠܟܰܪܣܳܐ ܕܡܰܥܡܽܘܕܺܝܬܳܐ ܕܡܰܘܠܕܳܐ ܠܰܢ ܒܢܰܝܴ̈ܐ ܕܰܐܠܗܳܐ ܩܳܪܶܐ. ܕܡܳܐ ܕܰܒܗܳܕܶܐ ܗܘܰܘ ܦܺܐܪ̈ܶܐ. ܘܳܐܬܶܝܢ ܠܥܰܡ̈ܠܶܐ ܕܰܡܝܰܬܪܽܘܬܳܐ ܘܰܠܦܽܘܠܚܳܢܳܐ ܛܳܒܳܐ: ܐܰܓܪܗܽܘܢ ܐܝ̣ܬܰܘܗܝ ܡܰܠܟܽܘܬܳܐ ܕܰܫܡܰܝܳܐ. ܥܳܒܶܕ ܠܗܽܘܢ ܡܫܰܪܪ̈ܶܐ ܒܰܒܪܽܘܬܳܐ ܕܰܐܠܗܳܐ. ܘܰܡܥܰܠܶܐ ܠܗܽܘܢ ܕܢܶܗܘܽܘܢ ܝܳܪܬܽܘܬܶܗ ܕܡܳܪܝܳܐ. ܟܰܕ ܠܐ ܗܳܦܟܺܝܢ ܠܒܶܣܬܰܪܗܽܘܢ ܡ̣ܢ ܐܽܘܪܚܳܐ ܕܟܺܐܢܽܘܬܳܐ. ܘܰܬܪܺܝܨܺܝܢ ܠܽܘܩܒܰܠ ܢܺܝܫܳܐ ܥܶܠܳܝܳܐ.
ܐܰܝܟ ܓܶܐܪܳܐ ܒܺܐܝܕܶܗ ܕܚܰܝܠܬܳܢܳܐ. ܗܳܟܰܢ ܐܶܢܽܘܢ ܒܢܱ̈ܝ ܥܠܰܝܡܽܘܬܳܐ. ܛܽܘܒܰܘܗܝ ܠܓܰܒܪܳܐ ܕܢܶܡܠܶܐ ܩܛܺܪܩܶܗ ܡܶܢܗܽܘܢ. ܘܠܳܐ ܢܶܒܗܬܽܘܢ ܟܰܕ ܡܡܰܠܠܺܝܢ ܥܰܡ ܒܥܶܠܕܒܳܒܳܐ ܒܬܰܪܥܳܐ. ܒܢܱ̈ܝ ܥܠܰܝܡܽܘܬܳܐ ܡܫܰܡܰܗ ܠܕܽܘܒܳܪ̈ܶܐ ܚܠܺܝ̈ܨܶܐ. ܗܳܢܽܘܢ ܕܰܫܠܰܚܘ ܘܰܫܕܰܘ ܠܒܰܪܢܳܫܳܐ ܥܰܬܺܝܩܳܐ ܡܶܢܗܽܘܢ ܘܰܡܠܰܘ ܩܛܺܪܩܳܐ ܕܢܰܦܫܳܐ ܕܺܝܠܗܽܘܢ ܙܰܝܢܳܐ ܕܪܽܘܚܳܐ. ܕܒܶܗ ܢܰܪܡܽܘܢ ܒܩܶܫܬܳܐ ܡܰܪܡܝܳܢܺܝܬܳܐ ܠܣܶܕܪ̈ܶܐ ܕܳܐܟܶܠܩܰܪܨܳܐ. ܘܡ̣ܢ ܗܳܠܝܢ ܐܝ̣ܬܰܘܗܝ ܗܘܳܐ ܫܳܐܘܳܠ ܥܠܰܝܡܳܐ ܚܰܝܠܬܳܢܳܐ. ܗܳܢܐ ܕܟܰܕ ܫܡܰܥ ܕܠܳܐ ܚܶܪܝܳܢܳܐ ܠܩܳܠܳܐ ܫܡܰܝܳܢܳܐ ܥܰܠ ܠܕܰܪܡܣܽܘܩ ܘܶܐܬܚܰܕܰܬ ܒܰܥܡܳܕܳܐ ܩܰܕܺܝܫܳܐ. ܘܰܡܠܳܐ ܩܛܺܪܩܶܗ ܓܶܐܪ̈ܶܐ ܕܙܰܝܢܳܐ ܕܪܽܘܚܳܐ ܩܰܕܺܝܫܳܐ. ܘܰܐܪܟܶܒ ܐܝ̣ܕܶܗ ܥܰܠ ܩܶܫܬܳܐ ܕܰܫܠܺܝܚܽܘܬܳܐ. ܘܰܫܕܳܐ ܒܰܒܥܶܠܕ̈ܒܳܒܰܘܗܝ ܕܡܰܠܟܳܐ. ܡܶܛܠܗܳܢܐ ܩܳܥܶܐ ܗܘܳܐ ܕܒܶܣܬܰܪܝ ܛܳܥܶܐ ܐܢܳܐ. ܘܠܰܩܕܳܡܰܝ ܡܶܫܬܰܘܫܰܛ ܐܢܳܐ (ܦܝܠܝ̈ܣܝܐ ܓ: ܝܓ). ܕܰܐܝܟ ܗܳܟܰܢܐ ܐܶܢܽܘܢ ܒܢܰܝܴ̈ܐ ܕܰܥܠܰܝܡܽܘܬܳܐ ܕܒܰܪܢܳܫܳܐ ܚܰܕܬܳܐ ܦܳܠܚܺܝܢ. ܡܶܛܠܗܳܢܐ ܝܰܗܒ ܛܽܘܒܳܐ ܡܙܰܡܪܳܢܳܐ ܠܓܰܒܪܳܐ ܕܰܡܠܳܐ ܩܛܺܪܩܶܗ ܡܶܢܗܽܘܢ. ܡܳܐ ܕܰܚܠܺܝ̈ܡܶܐ ܐܝ̣ܬܰܝܗܽܘܢ ܚܽܘܫܳܒ̈ܐ ܕܢܰܦܫܳܐ. ܒܟܽܠ ܬܰܪܥܳܐ ܕܳܐܬܶܐ ܒܥܶܠܕܒܳܒܳܐ ܕܢܶܥܽܘܠ ܠܳܗ̇. ܐܶܢ ܒܬܰܪܥܳܐ ܕܥܰܝܢܳܐ ܘܶܐܢ ܒܬܰܪܥܳܐ ܕܶܐܕܢܳܐ. ܘܶܐܢ ܒܬܰܪܥܳܐ ܕܣܰܘܩܳܐ. ܘܶܐܢ ܒܬܰܪܥܳܐ ܕܛܰܥܡܳܐ ܢܳܦܩܺܝܢ ܒܢܱ̈ܝ ܥܠܰܝܡܽܘܬܳܐ ܘܰܡܡܰܠܠܺܝܢ ܥܰܡ ܒܥܶܠܕܒܳܒܳܐ ܘܠܳܐ ܒܳܗܬܺܝܢ. ܘܫܳܡܥܺܝܢܰܢ ܠܰܢܒܺܝܐ ܐܚܪܺܢܳܐ ܕܳܐܡܰܪ: ܕܡܶܛܠ ܕܥܰܠ ܡܰܘܬܳܐ ܒܟܰܘܱ̈ܝܢ ܘܰܕܪܰܟ ܒܣܳܚܪ̈ܳܬܰܢ (ܐܪܡܝܐ ܛ: ܟܐ). ܠܟܰܘ̈ܐ ܕܠܳܐ ܚܶܪܝܳܢܳܐ: ܬܰܪ̈ܥܶܐ ܩܳܝܡܺܝܢ. ܐܳܦܚܢܰܢ ܢܨܰܠܶܐ ܠܘܳܬ ܡܳܪܝܳܐ: ܕܗܽܘ ܢܩܽܘܡ ܥܰܠ ܬܰܪ̈ܥܶܐ ܕܢܰܦܫܰܢ. ܘܰܢܢܰܛܰܪ ܐܶܢܘܢ ܡ̣ܢ ܡܰܥܠܬܳܐ ܕܰܒܥܶܠܕ̈ܒܳܒܶܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܝܢ ܘܫܒܥܐ
ܥܰܠ ܐܪ̈ܳܙܶܐ ܫܒܺܝ̈ܚܶܐ ܕܥܺܕܬܳܐ: ܘܥܰܠ ܒܢܰܝ̈ܐ ܕܡܰܥܡܽܘܕܺܝܬܳܐ: ܐܰܝܠܶܝܢ ܕܰܒܪܽܘܚܳܐ ܕܡܰܕܥܰܝ̈ܗܽܘܢ ܩܢܰܘ ܡܰܪܓܫܳܢܽܘܬܳܐ ܕܬܶܫܒܽܘܚܬܶܗ ܕܥܳܠܡܳܐ ܚܰܕܬܳܐ.
ܒܟܽܠܙܒܰܢ ܒܝܰܕ ܥܷ̈ܠܠܳܬܳܐ ܡܰܝܬܶܝܢ ܠܓܶܠܝܳܢܳܐ ܦܰܐܝܽܘܬܳܐ ܕܐܪ̈ܳܙܰܘܗܝ ܘܝܳܗܒܺܝܢ ܛܽܘܳܒܐ ܠܗܰܘ ܕܰܡܩܰܕܶܡ ܘܢܳܛܰܪ ܘܰܡܗܰܠܶܟ ܒܰܫܒܺܝ̈ܠܶܐ ܪ̈ܽܘܚܳܢܶܐ. ܗܳܟܰܢܳܐ ܓܶܝܪ ܐܳܦ ܛܽܘܒܳܢܳܐ ܕܰܘܝܕ܇ ܡܰܠܶܦ ܗܘܳܐ ܠܰܒܢܱ̈ܝ ܥܰܡܶܗ. ܥܰܠ ܕܶܚܠܰܬ ܐܰܠܗܳܐ. ܟܰܕ ܒܛܽܘܒܳܐ ܡܰܘܪܶܒ ܗܘܳܐ ܠܟܽܠ. ܕܕܳܚܶܠ ܡ̣ܢ ܡܳܪܝܳܐ. ܐܡ̣ܪ ܓܶܝܪ ܟܕ ܡܫܰܪܶܐ ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܥܶܣܪܺܝܢ ܘܰܫܒܰܥ.
ܛܽܘܒܰܘܗܝ ܠܟܽܠ ܕܕܳܚܶܠ ܡ̣ܢ ܡܳܪܝܳܐ ܘܰܡܗܰܠܶܟ ܒܰܫܒܺܝ̈ܠܰܘܗܝ. ܫܰܦܺܝܪ ܚܰܘܺܝ ܠܶܗ ܐܽܘܪܚܳܐ ܠܗܰܘ ܕܕܳܚܶܠ ܡܶܢ ܡܳܪܝܳܐ. ܡܶܛܠ ܕܗܰܘ ܕܝܳܕܰܥ ܕܺܐܝܬ ܡܳܪܝܳܐ ܘܕܳܚܶܠ ܡܶܢܶܗ. ܒܗܳܕܐ ܡܶܫܬܘܶܐ ܠܛܽܘܒܳܐ ܡܳܐ ܕܗܰܠܶܟ ܒܰܫܒܺܝ̈ܠܰܘܗܝ. ܡܳܢܐ ܐܶܢܘܢ ܫܒܺܝ̈ܠܰܘܗܝ ܕܡܳܪܝܳܐ. ܐܶܠܐ ܢܳܛܽܘܪܽܘܬ ܦܽܘ̈ܩܕܳܢܰܘܗܝ. ܘܡܳܐ ܕܗܳܕܐ ܐܢܳܫ ܥܳܒܶܕ. ܡ̣ܢ ܥܰܡܠܶܗ ܡܶܬܒܰܣܰܡ. ܘܡ̣ܢ ܦܽܘܠܚܳܢܶܗ ܡܶܬܬܰܪܣܶܐ. ܘܥܰܠܗܳܕܐ ܥܳܐܷܦ ܛܽܘܒܳܐ ܠܗܰܘ ܕܡܶܛܠ ܥܰܡ̈ܠܶܐ ܟܺܐܢ̈ܐ. ܡܶܬܝܰܗܒܳܐ ܠܶܗ ܡܶܐܟܽܘܠܬܳܐ ܕܙܰܕܺܝܩܽܘܬܳܐ ܘܳܐܡܰܪ:
ܥܰܡܠܳܐ ܕܺܐܝ̈ܕܰܝܟ ܟܕ ܬܶܐܟܽܘܠ ܒܰܪܢܳܫܳܐ. ܛܽܘܒܰܝܟ ܘܛܳܒܬܳܐ ܠܢܰܦܫܳܟ. ܐܶܢ ܠܰܡ ܡܶܛܠ ܕܽܘܒܳܪ̈ܰܝܟ ܫܰܦܺܝܪ̈ܶܐ ܡܶܬܝܰܗܒܳܐ ܠܳܟ ܡܰܠܟܽܘܬܳܐ ܕܰܐܠܳܗܳܐ. ܠܳܐ ܡܶܬܚܫܶܒ ܠܳܟ ܐܰܓܪܳܐ ܐܰܝܟ ܕܰܒܛܰܝܒܽܘܬܳܐ ܐܠܐ ܐܰܟܡܰܢ ܕܡܶܬܬܚܺܝܒ ܠܳܟ ܠܗܳܢܐ ܡܶܛܠ ܕܥܰܡܠܳܐ ܕܺܐܝ̈ܕܰܘܗܝ ܐܶܟܰܠ. ܐܡ̇ܪ ܠܶܗ ܪܽܘܚܳܐ:
ܛܽܘܒܰܝܟ ܘܛܳܒܬܳܐ ܠܢܰܦܫܳܟ. ܐܰܢܬܬܳܟ ܓܶܝܪ ܐܰܝܟ ܓܦܶܬܳܐ ܫܒܺܝܚܬܳܐ ܒܰܫܦܽܘ̈ܠܰܝ ܒܰܝܬܳܟ. ܬܘܒ ܥܰܠ ܒܢܰܝܴ̈ܐ ܐܡ̣ܪ:
ܘܰܒܢܰܝ̈ܟ ܐܰܝܟ ܢܶܨܒܬܳܐ ܕܙܰܝܬܳܐ ܟܪܺܝܟܺܝܢ ܠܦܳܬܽܘܪܳܟ. ܒܟܽܠܗܽܘܢ ܡܰܙܡܽܘܪ̈ܶܐ ܡܶܬܚܰܦܰܛ ܗܘܳܐ ܛܽܘܒܳܢܳܐ ܕܰܘܝܕ ܕܐܪܳܙܶܗ ܕܡܳܪܢ ܢܶܗܘܶܐ ܨܳܐܱܪ ܒܪܰܡ ܪܽܘܚܳܐ ܩܰܕܺܝܫܳܐ ܡܚܰܘܶܐ ܗܘܳܐ ܠܶܗ ܡܳܢܐ ܢܺܐܡܰܪ. ܒܰܐܢܬܬܳܐ ܓܶܝܪ ܠܐܪܳܙܳܐ ܕܥܺܕܬܳܐ ܡܰܘܕܰܥ ܢܒܺܝܐ. ܗܳܕܶܐ ܓܶܝܪ ܒܰܠܚܽܘܕ ܐܶܬܕܰܡܝܰܬ ܠܰܓܦܶܬܳܐ ܫܒܺܝܚܬܳܐ. ܘܰܡܠܳܬ ܡ̣ܢ ܢܶܨܒܬܳܗ̇ ܠܟܽܠܳܗ̇ ܬܺܒܶܝܠ ܘܶܐܬܟܰܣܺܝܘ ܛܽܘܪ̈ܶܐ ܡܶܢ ܛܶܠܳܠܳܗ̇. ܘܗܽܘ ܥܰܡܰܢܽܘܐܝܠ ܐܡ̣ܪ܆ ܐܶܢܳܐ ܐܢܳܐ ܓܦܶܬܳܐ ܕܰܫܪܳܪܳܐ (ܝܘܚܢܢ ܝܗ: ܐ) ܐܶܡܰܪ ܠܰܫܠܺܝ̈ܚܰܘܗܝ. ܕܶܐܢܳܐ ܐܢܳܐ ܓܦܶܬܳܐ ܘܰܐܢܬܽܘܢ ܫܒܺܫ̈ܬܶܐ (ܝܘܚܢܢ ܝܗ: ܗ). ܥܰܠܗܳܝ ܠܳܐ ܐܶܡܰܪ ܢܒܺܝܐ ܕܰܐܢܬܬܳܟ ܓܦܶܬܳܐ. ܐܶܠܐ ܐܰܝܟ ܓܦܶܬܳܐ ܐܳܡܰܪ ܐܢܳܐ. ܕܗܰܘ ܕܰܡܗܰܠܶܟ ܒܰܫܒܺܝ̈ܠܰܘܗܝ ܕܡܳܪܝܳܐ. ܐܰܟܡܳܐ ܕܶܐܡܰܪ ܗܰܘ ܫܒܺܫܬܶܗ ܕܰܡܫܺܝܚܳܐ ܦܰܘܠܽܘܣ. ܕܶܐܬܕܰܡܰܘ ܒܺܝ ܐܰܝܟܰܢܳܐ ܕܳܐܦ ܐܶܢܳܐ ܒܰܡܫܺܝܚܳܐ (ܐ ܩܘܪ̈ܢܬܝܐ ܝܐ: ܐ)! ܘܠܘ ܗܳܕܐ ܒܰܠܚܽܘܕ ܐܡ̣ܪ ܢܒܺܝܐ܆ ܘܠܰܒܢܰܝܴ̈ܐ ܬܽܘܒ ܡܰܣܓܶܐ ܡܩܰܠܶܣ.
ܒܢܰܝ̈ܟ ܠܰܡ ܐܰܝܟ ܢܶܨܒܬܳܐ ܕܙܰܝܬܳܐ ܟܪܺܝܟܺܝܢ ܠܦܳܬܽܘܪܳܟ. ܒܢܱ̈ܝ ܢܽܘܗܪܳܐ ܐܝ̣ܬܰܝܗܘܢ ܒܢܶܝ̈ܗ̇ ܕܡܰܥܡܽܘܕܺܝܬܳܐ ܘܰܒܢܱ̈ܝ ܐܺܝܡܳܡܳܐ. ܢܶܨܒܬܳܐ ܓܶܝܪ ܕܙܰܝܬܳܐ܆ ܥܰܠ ܢܽܘܗܪܳܐ ܘܕܰܗܺܝܢܽܘܬܳܐ ܘܰܦܨܺܝܚܽܘܬܳܐ ܡܰܘܕܥܳܐ. ܡܶܛܠ ܕܺܐܝܠܳܢܳܐ ܕܶܝܢ ܕܙܰܝܬܳܐ ܥܰܠ ܗܳܕܐ ܡܰܠܶܦ. ܘܰܡܠܽܘܐܳܐ ܠܢܽܘܗܪܳܐ ܐ̣ܝܬܰܝܗܽܘܢ ܦܺܐܪ̈ܶܐ ܕܺܝܠܶܗ. ܡܶܛܠ ܕܶܐܡܰܪ ܢܒܺܝܐ:
ܗܳܟܰܢܳܐ ܢܶܬܒܰܪܰܟ ܓܰܒܪܳܐ ܕܕܳܚܶܠ ܡܶܢ ܡܳܪܝܳܐ. ܒܗܰܘ ܛܽܘܦܣܳܐ ܕܰܓܦܶܬܳܐ ܕܙܰܝܬܳܐ. ܕܟܰܕ ܢܛܺܝܪ ܩܰܝܳܡ ܥܳܩܳܪܳܗ̇. ܗܳܟܰܢܳܐ ܐܝ̣ܬܰܝܗܽܘܢ ܩܰܕܺܝ̈ܫܶܐ. ܕܟܕ ܠܣܰܓܺܝ̈ܐܐ ܡܚܰܘܶܝܢ ܐܽܘܪܚܳܐ ܕܚܰܝ̈ܐ. ܘܗܶܢܘܢ ܡܶܢ ܐܽܘܪܚܳܐ ܠܳܐ ܢܳܦܩܺܝܢ. ܘܡܶܢ ܫܒܺܝ̈ܠܶܐ ܠܳܐ ܡܫܰܢܶܝܢ. ܘܰܠܗܰܘ ܕܗܳܟܰܢ ܗ̄ܘ ܡܒܰܪܶܟ ܠܶܗ ܡܳܪܝܳܐ ܡܶܢ ܨܶܗܝܽܘܢ. ܐܰܝܟ ܕܶܐܡܰܪ ܪܽܘܚܳܐ.
ܢܒܰܪܟܳܟ ܡܳܪܝܳܐ ܡܶܢ ܨܶܗܝܽܘܢ. ܗܰܘ ܕܡܶܬܒܰܪܰܟ ܡܶܢ ܨܶܗܝܽܘܢ ܗܰܘ ܕܡܰܘܫܶܛ ܠܶܗ ܐܠܗܐ ܒܽܘܪܟܬܳܐ ܘܡܰܘܗܰܒܬܳܐ ܡ̣ܢ ܡܕܺܝܢܬܳܐ ܩܰܕܺܝܫܬܳܐ. ܘܟܳܬܶܒ ܠܶܗ ܒܣܶܦܪܳܐ ܠܳܐ ܡܶܬܠܰܚܝܳܢܳܐ ܕܡܰܠܟܽܘܬܶܗ. ܗܳܟܰܢܳܐ ܐܳܦ ܡܙܰܡܪܳܢܳܐ ܒܗܳܝ ܕܶܐܡܰܪ ܕܰܢܒܰܪܟܳܟ ܡܳܪܝܳܐ ܡܶܢ ܨܶܗܝܽܘܢ. ܥܰܠ ܡܰܘܗܰܒܬܳܐ ܫܡܰܝܳܢܺܝܬܳܐ ܗܳܝ ܕܡܶܬܝܰܗܒܳܐ ܒܥܳܠܡܳܐ ܚܰܕܬܳܐ ܠܓܰܒܪܳܐ ܕܕܳܚܶܠ ܡܶܢ ܐܰܠܗܳܐ ܣܰܟܶܠ. ܘܡܳܢܳܐ ܐܝ̣ܬܶܝܗ̇ ܗܳܝ ܒܽܘܪܟܬܳܐ ܒܳܗ̇ ܒܕܽܘܟܬܳܐ ܡܦܰܫܶܩ ܘܳܐܡܰܪ:
ܬܶܚܙܶܐ ܒܛܳܒܴ̈ܬܳܐ ܕܽܐܘܪܺܫܠܶܡ ܟܽܠ ܝܰܘ̈ܡܰܝ ܚܰܝܰܝ̈ܟ. ܛܳܒܴ̈ܬܳܐ ܕܽܐܘܪܺܫܠܶܡ ܗܳܢܶܝܢ ܐܶܢܝܢ ܒܽܘܣܳܡܳܐ ܕܡܰܠܟܽܘܬܳܐ ܕܰܫܡܰܝܳܐ ܗܳܝ ܕܶܐܡܰܪ ܡܳܪܰܢ ܕܥܳܒܶܕ ܠܰܐܝܠܶܝܢ ܕܡܶܫܟܰܚ ܠܗܽܘܢ ܕܥܺܝܪܺܝܢ ܘܰܡܣܰܟܶܝܢ ܕܶܐܡܰܬܝ ܢܺܐܬܶܐ ܘܰܢܩܽܘܡ ܢܶܦܬܚܽܘܢ ܠܶܗ. ܘܰܚܠܳܦ ܥܺܝܪܽܘܬܗܽܘܢ ܢܶܐܣܽܘܪ ܚܰܨܰܘ̈ܗܝ ܘܢܰܣܡܶܟ ܐܶܢܘܢ ܘܢܶܥܒܰܪ ܘܰܢܫܰܡܶܫ ܐܶܢܘܢ. ܘܗܳܝ ܕܶܐܫܬܰܘܕܺܝ ܠܰܫܠܺܝ̈ܚܶܐ ܕܢܶܐܟܠܽܘܢ ܘܢܶܫܬܽܘܢ ܥܰܠ ܦܳܬܽܘܪܳܐ ܕܡܰܠܟܽܘܬܳܐ ܕܰܐܠܗܳܐ. ܘܗܳܝ ܕܶܐܡܰܪ ܠܗܰܘ ܥܰܒܕܳܐ ܛܳܒܳܐ ܕܩܰܪܶܒ ܥܣܰܪ ܟܰܟܪ̈ܶܐ. ܚܠܳܦ ܚܰܡܶܫ ܕܰܢܣܰܒ. ܕܳܐܘ ܥܰܒܕܳܐ ܛܳܒܳܐ ܘܰܡܗܰܝܡܢܳܐ܆ ܕܥܰܠ ܩܰܠܝ̣ܠ ܡܗܰܝܡܰܢ ܗܘܰܝܬ܆ ܥܰܠ ܣܰܓܺܝ ܐܰܩܺܝܡܳܟ. ܥܽܘܠ ܠܚܰܕܽܘܬܶܗ ܕܡܳܪܳܟ (ܡܬܝ ܟܗ: ܟܐ). ܗܳܠܝܢ ܐܶܢܶܝܢ ܛܳܒܴ̈ܬܳܗ̇ ܕܽܐܘܪܺܫܠܶܡ ܘܬܰܡܳܢ ܚܳܙܶܝܢ ܙܰܕܺܝ̈ܩܶܐ ܘܩܰܕܺܝ̈ܫܶܐ ܒܢܰܝܴ̈ܐ ܠܰܒܢܰܝ̈ܗܘܢ ܗܳܢܰܘ ܚܳܙܶܝܢ ܫܠܺܝܚ̈ܐ ܘܚܳܕܶܝܢ ܠܰܘ ܒܰܠܚܽܘܕ ܬܰܠܡܺܝ̈ܕܰܝܗܽܘܢ ܒܡܰܠܟܽܘܬܳܐ. ܡܶܟܝ̣ܠ ܠܰܝܬ ܪܶܗܛܳܐ ܕܪܳܕܶܐ ܘܠܐ ܫܽܘܪܳܝܳܐ ܘܝܽܘܒܳܠܳܐ ܕܫܰܪ̈ܒܳܬܳܐ. ܡܳܐ ܕܚܳܬܶܡ ܪܽܘܚܳܐ ܘܳܐܡܰܪ:
ܫܠܳܡܳܐ ܠܺܝܣܪܳܐܝܠ. ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܥܶܣܪܺܝܢ ܘܫܰܒܥܳܐ ܥܰܠ ܛܳܒܴ̈ܬܳܐ ܕܽܐܘܪܺܫܠܶܡ. ܡܳܪܰܢ ܐܰܫܘܳܢ ܠܛܳܒܴ̈ܬܳܗ̇ ܕܽܐܘܪܺܫܠܶܡ.
ܡܙܡܘܪܐ ܕܡܐܐ ܘܥܣܪܝܢ ܘܬܡܢܝܐ
ܡܰܘܕܰܥ ܥܰܠ ܐܽܘ̈ܠܨܳܢܶܐ ܕܩܰܕܺܝ̈ܫܶܐ: ܘܰܕܠܳܐ ܡܶܫܟܚܺܝܢ ܒܥܶܠܕ̈ܒܳܒܶܐ: ܚܰܝܠܳܐ ܕܗܰܘ ܕܰܡܚܰܡܣܶܢ ܠܘܳܬ ܕܶܚܠܰܬ ܐܰܠܳܗܳܐ.
ܟܕ ܡ̣ܢ ܫܽܘܪܳܝܳܐ ܕܚܰܝ̈ܐ ܐܢܳܫܳܝ̈ܐ ܡܶܬܥܰܬܕܺܝܢ ܐܰܝܠܝܢ ܕܰܡܙܺܝܥܺܝܢ ܩܪܳܒܳܐ ܥܰܠ ܩܰܕܺܝ̈ܫܶܐ. ܐܠܐ ܠܐ ܡܶܬܡܨܶܝܢ ܚܰܝܠܳܐ ܕܰܐܝܠܶܝܢ ܕܰܬܟܺܝܠܺܝܢ ܥܰܠ ܡܳܪܝܳܐ. ܘܝܰܬܺܝܪܳܐܝ̣ܬ ܕܗܰܘ ܕܡ̣ܢ ܫܽܘܪܳܝܳܐ ܕܛܰܠܝܽܘܬܶܗ ܦܳܪܶܫ ܙܰܪ̈ܥܶܐ ܡܰܢ ܕܢܰܦܫܳܐ. ܘܡܰܣܠܶܐ ܒܺܝܫܬܳܐ ܘܓܳܒܶܐ ܛܳܒܬܳܐ. ܒܗܳܕܶܐ ܓܶܝܪ ܣܳܓܶܝܢ ܢܶܨܚܳܢ̈ܐ ܕܰܐܬܠܺܝ̈ܛܶܐ ܪ̈ܽܘܚܳܢܶܐ. ܟܰܕ ܥܳܒܕܺܝܢ ܐܰܓܽܘܢܳܐ ܠܽܘܩܒܰܠ ܒܥܶܠܕ̈ܒܳܒܶܐ ܕܡ̣ܢ ܒܶܠܥܳܕ ܩܪܳܒܳܐ ܠܐ ܡܶܬܢܰܨܚܺܝܢ ܐܰܬܠܺܝ̈ܛܶܐ. ܘܒܶܠܥܳܕ ܬܰܟܬܽܘܫܳܐ ܕܥܰܡ ܪ̈ܽܘܚܶܐ ܒܺܝ̈ܫܳܬܳܐ ܠܳܐ ܡܶܬܝܰܕܥܺܝܢ ܩܪ̈ܰܒܬܳܢܶܐ ܕܟܺܐܢܽܘܬܳܐ. ܡܳܕܶܝܢ ܗܰܘ ܕܣܳܢܶܐ ܐܰܓܽܘܢܳܐ ܠܳܐ ܡܶܬܪܰܓܪܰܓ ܠܰܟܠܺܝܠܳܐ. ܘܗܰܘ ܕܡܰܚܶܒ ܠܰܟܠܺܝܠܳܐ. ܘܠܐ ܡ̣ܢ ܬܰܟܬܽܘܫܳܐ ܡܶܫܬܐܶܠ. ܕܰܐܝܟ ܗܳܟܰܢܳܐ ܗܘܳܐ ܐܳܦ ܛܽܘܒܳܢܳܐ ܕܰܘܝܕ. ܘܰܡܚܰܘܶܐ ܕܒܰܩܪ̈ܳܒܶܐ ܕܠܽܘܩܒܰܠ ܒܥܶܠܕ̈ܒܳܒܶܐ ܡܶܬܝܰܕ̈ܥܢܶܐ ܐܶܬܪܰܒܺܝ. ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܥܶܣܪܺܝܢ ܘܰܬܡܳܢܶܐ ܘܳܐܡܰܪ:
ܣܓܺܝܘ ܐܳܠܽܘ̈ܨܰܝ ܡܶܢ ܛܰܠܝܽܘܬܝ. ܠܰܘ ܒܰܠܚܽܘܕ ܣܓܺܝܘ ܐܳܠܽܘܨ̈ܐ ܐܠܐ ܐܳܦ ܟܽܠܡܰܢ ܕܺܝܣܪܳܐܝܠ ܕܰܐܠܗܐ ܐܝ̣ܬܰܘܗܝ ܒܽܐܘܠܨܳܢ̈ܐ ܣܰܓܺܝ̈ܐܐ ܡܶܬܪܰܒܶܐ ܡ̣ܢ ܛܰܠܝܽܘܬܶܗ. ܡܶܛܠ ܕܠܳܐ ܫܳܠܶܐ ܡܶܢܰܢ ܐܽܘܠܨܳܢܳܐ. ܟܡܳܐ ܕܚܳܙܶܐ ܠܰܢ ܕܰܒܦܽܘܠܚܳܢܳܐ ܕܰܡܝܰܬܪܽܘܬܳܐ ܡܚܰܡܣܢܺܝܢܰܢ. ܘܰܐܝܠܶܝܢ ܕܰܙܥܽܘܪܺܝܢ ܐܽܘܠܨܳܢܰܝ̈ܗܽܘܢ. ܡܶܛܠ ܕܰܒܨܺܝܪܺܝܢ ܕܽܘܒܳܪ̈ܰܝܗܽܘܢ. ܘܰܐܝܠܶܝܢ ܕܠܰܓܡܳܪ ܐܽܘܠܨܳܢ̈ܐ ܠܐ ܚܙܰܘ ܟܰܗܺܝ̈ܢܰܝ ܒܪܽܘܫܥܳܐ ܐܝ̣ܬܰܝܗܽܘܢ. ܗܳܐ ܗܳܠܶܝܢ ܪ̈ܰܫܺܝܥܶܐ ܟܰܗܺܝܢܺܝܢ ܒܥܳܠܡܳܐ ܘܥܰܫܺܝܢܺܝܢ ܒܚܰܝܠܳܐ. ܘܠܳܐ ܣܰܓܺܝܐܝ̣ܢ ܐܽܘܠܨܳܢܰܝ̈ܗܘܢ. ܬܰܘܪܶܗ ܕܪܰܫܺܝܥܳܐ ܥܳܒܰܪ ܘܠܳܐ ܓܳܥܶܐ. ܘܬܽܘܪܬܶܗ ܦܳܠܛܳܐ ܘܠܐ ܡܚܰܒܠܳܐ. ܫܳܩܠܺܝܢ ܦܠܰܓ̈ܐ ܘܟܶܢܳܪ̈ܶܐ ܘܚܳܕܶܝܢ ܠܩܳܠܳܐ ܕܰܙܡܳܪܳܐ ܘܳܐܡܪܺܝܢ ܠܰܐܠܗܳܐ ܥܒܰܪ ܡܶܢܰܢ. ܘܠܐ ܒܽܐܘܪܚܶܗ ܨܳܒܶܝܢ ܠܰܡܗܰܠܳܟܽܘ. ܐܠܐ ܗܳܢܘܢ ܕܰܣܢܰܘ ܩܪܳܒܳܐ. ܒܟܽܘܐܳܪܳܐ ܢܦܰܩܘ ܡ̣ܢ ܐܰܓܽܘܢܳܐ. ܘܥܠ ܕܚܰܘܺܝܘ ܚܰܨܳܐ ܠܰܒܥܶܠܕܒܳܒܳܐ. ܡܶܪܛܰܬ ܟܺܐܢܽܘܬܳܐ ܟܠܺܝ̈ܠܰܝܗܽܘܢ. ܐܠܐ ܢܶܬܗܰܪ ܒܗܰܘ ܐܰܬܠܺܝܛܳܐ ܢܰܨܺܝܚܳܐ ܕܝܳܬܶܒ ܒܰܐܓܽܘܢܳܐ ܥܰܠ ܩܶܛܡܳܐ ܒܛܰܗܪܳܐ. ܘܡܳܫܰܚ ܦܰܓܪܶܗ ܚܠܳܦ ܡܶܫܚܳܐ ܒܪܶܗܠܳܐ ܕܫܽܘܚܢܳܐ ܒܺܝܫܳܐ. ܗܳܢܐ ܫܰܦܺܝܪ ܩܳܥܶܐ ܗܘܳܐ ܥܰܡ ܕܰܘܝܕ ܢܒܺܝܐ. ܡܶܛܠ ܐܳܠܽܘܨ̈ܐ ܕܩܳܡܘ ܥܠܰܘܗܝ. ܕܠܐ ܐܶܬܩܰܫܺܝܘ ܡ̣ܢ ܡܣܰܝܒܪܳܢܽܘܬܝ.
ܘܠܳܐ ܐܶܬܡܨܺܝܘ ܚܰܝܠܝ. ܘܥܰܠ ܚܰܨܝ ܢܰܓܶܕܘ ܢܶܓܕܶܐ ܘܰܐܓܰܪܘ ܡܽܘܟܳܟܗܽܘܢ. ܡܰܢ ܓܶܝܪ ܦܫܺܝܩ ܠܶܗ ܕܰܢܚܰܘܶܐ ܢܶܓ̈ܕܶܐ ܕܶܐܬܢܰܓܰܕܘ ܡ̣ܢ ܡܳܪܽܘܕܳܐ ܐܰܝܟ ܛܽܘܒܳܢܳܐ ܐܺܝܽܘܒ. ܗܳܢܳܐ ܕܰܡܚܰܘܶܐ ܗܘܳܐ ܚܰܨܶܗ ܕܰܢܫܺܝܛ ܗܘܳܐ ܡ̣ܢ ܫܽܘܚܢܳܐ ܕܰܡܚܳܝܗܝ ܗܘܳܐ ܒܺܝܫܳܐ. ܘܰܫܒܰܥ ܫ̈ܢܝ̣ܢ ܐܰܓܰܪ ܥܰܠ ܩܺܝܩܰܠܬܳܐ ܕܩܶܛܡܳܐ ܝ̣ܬܶܒ ܒܽܐܘܠܨܳܢ̈ܐ ܢܰܓܺܝܪ̈ܶܐ. ܟܰܕ ܡܣܰܟܶܐ ܠܦܽܘܪܩܳܢܳܐ ܕܰܐܠܗܐ ܘܡܶܫܬܰܒܗܰܪ ܗܘܳܐ ܘܳܐܡܰܪ ܥܰܡ ܡܙܰܡܪܳܢܳܐ.
ܡܳܪܝܳܐ ܙܰܕܺܝܩ ܘܰܡܦܰܫܰܚ ܣܰܘܟܰܝ̈ܗܽܘܢ ܕܥܰܘܴ̈ܠܶܐ. ܘܢܶܗܦܟܽܘܢ ܠܒܶܣܬܰܪܗܽܘܢ ܟܽܠܗܽܘܢ ܣܳܢܷ̈ܐܝܗ̇ ܕܨܶܗܝܽܘܢ. ܡܶܛܠܡܳܢܐ ܐܡ̣ܪ ܣܰܘ̈ܟܶܐ ܠܥܰܘܴ̈ܠܶܐ. ܐܰܝܠܶܝܢ ܓܶܝܪ ܕܰܡܢܰܓܕܺܝܢ ܒܶܝܬ ܕܺܝܢܳܐ ܕܥܳܠܡܳܐ ܐܳܚܶܕ ܘܡܳܚܶܐ ܒܗܽܘܢ ܠܰܐܬܠܺܝ̈ܛܶܐ ܕܟܺܐܢܽܘܬܳܐ܆ ܕܟܰܕ ܠܗܳܠܶܝܢ ܡܦܰܫܚܳܐ ܗܳܝ ܐܝ̣ܕܳܐ ܐܰܚܺܝܕܰܬ ܠܟܽܠ ܕܡܳܪܝܳܐ. ܐܰܝܟܰܢܳܐ ܕܰܠܕܽܘܡܝܳܐ ܬܰܚܽܘܒܳܐ ܕܫܶܒ̈ܠܶܐ ܕܶܐܓܳܪܳܐ ܬܰܚܠܶܦ ܐܶܢܶܝܢ ܐܰܝܟ ܕܶܐܡܰܪ ܪܽܘܚܳܐ.
ܢܶܗܘܽܘܢ ܐܰܝܟ ܥܡܺܝܪܳܐ ܕܶܐܓܳܪܳܐ. ܕܡܳܐ ܕܢܶܫܒܰܬ ܒܶܗ ܪܽܘܚܳܐ ܫܳܠܶܦ ܘܝܳܒܶܫ. ܠܳܐ ܓܝܪ ܡܶܫܬܰܟܚܺܝܢ ܐܰܝܠܶܝܢ ܓܶܝܪ ܕܰܥܒܳܕܰܝ̈ܗܘܢ ܬܶܒܢܳܐ ܐܶܢܘܢ ܒܟܰܪܝܳܐ ܕܚܰܝ̈ܐ. ܐܶܠܐ ܡܳܐ ܕܠܳܒܶܟ ܡܳܪܳܐ ܕܶܐܕܪܳܐ ܪܰܦܫܳܐ ܒܺܐܝܕܶܗ. ܠܰܡܕܰܟܳܝܽܘ ܟܰܪܝܶܗ ܡܶܢ ܥܽܘܪܳܐ ܘܡܶܢ ܬܶܒܢܳܐ. ܘܢܳܫܒܳܐ ܠܶܗ ܪܽܘܚܳܐ ܕܩܽܘܕܫܳܐ ܠܡܶܦܪܰܫ ܚܷ̈ܛܶܐ ܡܶܢ ܬܶܒܢܳܐ. ܘܕܳܥܶܟ ܢܽܘܒܪܳܫܳܐ ܕܢܽܘܪܗܽܘܢ ܘܗܳܘܶܐ ܩܶܛܡܳܐ. ܘܫܳܩܠܳܐ ܠܗܽܘܢ ܪܽܘܚܳܐ ܐܰܝܟ ܕܰܠܥܽܘܪܳܐ ܘܫܳܕܝܳܐ ܠܗܽܘܢ ܒܢܽܘܪܳܐ ܕܳܠܐ ܕܳܥܟܳܐ. ܘܥܰܠܗܳܝ ܠܳܐ ܟܰܦܶܗ ܡܳܠܶܐ ܡܶܢܶܗ ܚܳܨܽܘܕܳܐ. ܐܳܦܠܳܐ ܩܳܦܠܶܗ ܡܩܰܒܪܳܢܳܐ. ܪܺܝܫܳܐ ܕܡܰܠܰܐܟ̈ܐ ܢܳܦܶܩ ܒܫܽܘܠܳܡܶܗ ܕܥܳܠܡܳܐ ܘܗܳܘܶܐ ܚܳܨܽܘܕܳܐ ܥܰܡ ܪ̈ܶܒܘܳܬܳܐ ܕܟܶܢ̈ܫܶܐ ܕܡܰܠܰܐܟ̈ܐ. ܕܡܶܫܬܰܕܪܺܝܢ ܠܡܶܚܨܰܕ ܠܟܽܠܗܽܘܢ ܥܰܡܡ̈ܐ. ܡܳܠܶܐ ܟܰܦܶܗ ܡ̣ܢ ܥܰܘܴ̈ܠܶܐ. ܐܶܠܐ ܐܳܣܰܪ ܠܗܽܘܢ ܡܶܐܣܰܪ̈ܝܳܬܳܐ ܙܺܝܙܳܢܳܝܴ̈ܬܳܐ ܘܫܳܕܶܐ ܠܗܶܝܢ ܒܢܽܘܪܳܐ. ܘܡܳܠܶܐ ܕܶܝܢ ܟܰܦܶܗ ܡܶܢ ܐܰܪ̈ܥܳܬܳܐ ܕܩܰܕܺܝ̈ܫܶܐ. ܘܫܳܩܶܠ ܠܗܽܘܢ ܥܰܠ ܕܪ̈ܳܥܰܘܗܝ ܘܰܡܩܰܪܶܒ ܠܗܽܘܢ ܪܺܝܫܺܝܬܳܐ ܠܦܳܬܽܘܪܳܐ ܕܰܐܠܗܐ. ܘܟܕ ܡ̣ܢ ܥܡܺܝܪܳܐ ܕܥܳܒ̈ܕܰܝ ܒܺܝ̈ܫܳܬܳܐ ܡܩܰܒܪܳܢܳܐ ܐܠܗܐ ܩܳܦܠܶܗ ܠܳܐ ܡܳܠܐ. ܡܩܰܒܰܪ ܘܰܡܟܰܢܶܫ ܟܰܦ̈ܐ ܢܰܦܫܴ̈ܬܳܐ ܕܩܰܕܺܝ̈ܫܶܐ. ܘܣܳܐܷܡ ܒܰܓܕܺܝܫܳܐ ܕܚܰܝ̈ܐ ܕܣܳܠܶܩ ܒܙܰܒܢܶܗ ܠܶܐܕܪܳܐ ܕܡܰܠܟܽܘܬܳܐ. ܒܳܬܰܪ ܗܳܠܝܢ ܐܰܝܬܺܝ ܘܶܐܡܰܪ:
ܘܠܳܐ ܐܶܡܰܪܘ ܐܰܝܠܶܝܢ ܕܥܳܒܪܺܝܢ. ܕܒܽܘܪܟܬܶܗ ܕܡܳܪܝܳܐ ܥܠܰܝܟܽܘܢ ܒܰܪܶܟܢܳܟܽܘܢ ܒܰܫܡܶܗ ܕܡܳܪܝܳܐ. ܒܽܘܪܟܬܳܐ ܕܶܝܢ ܒܰܚܨܳܕܳܐ ܗܰܘ ܕܶܐܡܰܪ ܡܳܪܢ ܕܺܐܝܬܰܘܗܝ ܫܽܘܠܳܡܳܐ. ܠܰܘ ܠܥܰܘܴ̈ܠܶܐ ܕܺܐܝܬܰܝܗܽܘܢ ܥܡܺܝܪܳܐ ܡܶܬܝܰܗܒܳܐ ܒܽܘܪܟܬܳܐ. ܐܶܠܐ ܠܗܳܠܶܝܢ ܕܶܐܡܰܪ ܡܳܪܰܢ: ܕܬܰܘ ܒܪ̈ܺܝܟܰܘܗܝ ܕܳܐܒܝ ܝ̣ܪܰܬܘ ܡܰܠܟܽܘܬܳܐ܇ ܕܰܥܬܺܝܕܳܐ ܗܘܳܬ ܠܟܽܘܢ ܡܶܢܩܕܳܡ ܬܰܪ̈ܡܝܳܬܶܗ ܕܥܳܠܡܳܐ (ܡܬܝ ܟܗ: ܠܕ). ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܥܣܪܝܢ ܘܬܫܥܐ
ܕܠܳܐ ܙܳܕܶܩ ܕܢܶܬܬܟܶܠ ܐܢܳܫ ܥܰܠ ܢܰܦܫܶܗ: ܐܶܠܳܐ ܢܶܗܘܶܐ ܒܳܥܶܐ ܪ̈ܰܚܡܶܐ ܡܶܢ ܐܰܠܳܗܳܐ.
ܒܒܳܥܽܘܬܳܐ ܘܰܒܬܰܟܫܶܦܬܳܐ ܡܶܬܓܰܘܰܣ ܗܘܳܐ ܛܽܘܒܳܢܐ ܕܰܘܝܕ܆ ܡܶܢ ܕܺܝܢ̈ܐ ܥܰܡܺܝ̈ܩܶܐ ܕܟܺܐܢܽܘܬܳܐ. ܘܡ̣ܢ ܥܽܘ̈ܡܩܶܐ ܟܣܰܝܴ̈ܐ ܕܢܰܦܫܶܗ. ܡܩܰܪܶܒ ܗܘܳܐ ܠܡܰܠܟܳܐ ܡܳܪܶܗ ܒܳܥܽܘܬܳܐ. ܟܰܕ ܡܚܰܘܶܐ ܕܠܐ ܬܟܺܝܠ ܥܠ ܙܰܕܺܝܩܽܘܬܳܐ ܕܢܰܦܫܶܗ. ܫܽܘܒܩܳܢܳܐ ܐܳܦ ܪ̈ܰܚܡܶܐ ܫܳܐܷܠ ܗܘܳܐ. ܘܰܐܝܟ ܕܡܶܢ ܬܗܽܘܡܳܐ ܬܰܚܬܳܝܳܐ ܓܳܥܶܐ ܘܳܐܡܰܪ:
ܡܶܢ ܥܽܘܡܩܳܐ ܩܪܺܝܬܳܟ ܡܳܪܝܳܐ ܘܰܫܡܰܥܬ ܒܩܳܠܝ. ܢܶܗܘ̈ܝܳܢ ܐܶܕܢܰܝ̈ܟ ܨܳܝ̈ܬܳܢ ܠܩܳܠܳܐ ܕܟܽܘܫܳܦܝ. ܥܽܘܡܩܳܐ ܡܫܰܡܰܗ ܛܽܘܒܳܢܐ ܕܰܘܝܕ܆ ܠܡܶܬܢܰܚܬܳܢܽܘܬܳܐ ܕܺܐܝܬܰܘܗܝ ܒܳܗ̇ ܟܝܳܢܳܐ ܐܢܳܫܳܝܳܐ. ܒܗܳܝ ܕܰܒܦܽܘܚܳܡܳܐ ܕܗܰܘ ܟܝܳܢܳܐ ܡܠܶܐ ܛܽܘ̈ܒܶܐ ܟܽܠܗܽܘܢ ܟܝܴ̈ܢܶܐ ܒܥܽܘܡܩܳܐ ܐܝ̣ܬܰܝܗܽܘܢ. ܘܗܽܘ ܒܰܠܚܽܘܕܰܘ̈ܗܝ ܡܪܺܝܡ ܡܶܢܟܽܠ: ܥܶܠܳܝ ܕܶܝܢ ܘܪܳܡ ܟܝܳܢܳܐ ܕܰܐܠܳܗܽܘܬܳܐ. ܠܘ ܐܝܟ ܕܰܒܛܽܘܪ̈ܶܐ ܡܬܰܚ̈ܡܶܐ ܕܒܶܪ̈ܝܳܬܳܐ ܕܥܶܠܳܝܴ̈ܢ ܚܕܳܐ ܡ̣ܢ ܚܕܳܐ ܗܳܢܰܘ ܠܘ ܐܝܟ ܕܪܳܡܳܐ ܫܡܰܝܳܐ ܡ̣ܢ ܐܰܪܥܳܐ. ܪܳܡܺܝܢ ܘܰܡܥܰܠܶܝܢ ܫܡܱ̈ܝ ܫܡܰܝܳܐ ܡ̣ܢ ܪܩܺܝܥܳܐ. ܗܳܠܝܢ ܓܶܝܪ ܛܽܘܪ̈ܶܐ ܐܶܢܽܘܢ ܕܰܒܪܺܝܬܳܐ ܘܰܬܚܶܝܬ ܬܚܽܘ̈ܡܶܐ ܣܺܝܡܺܝܢ. ܟܝܳܢܗ ܕܶܝܢ ܕܥܳܒܽܘܕܳܐ. ܠܘ ܒܗܳܢܐ ܛܽܘܦܣܳܐ ܪܳܡ ܡ̣ܢ ܥܒܺܝ̈ܕܶܐ. ܐܶܠܐ ܠܥܶܠ ܡܶܢ ܡܰܪ̈ܢܝܳܬܳܐ ܕܚܽܘ̈ܫܳܒܶܐ. ܠܘܳܬ ܗܳܢܐ ܪܰܘܡܳܐ ܡܥܰܠܝܳܐ ܡܰܠܶܠ ܛܽܘܒܳܢܳܐ ܕܰܘܝܕ. ܬܶܫܒܽܘܚܬܳܐ ܗܳܕܶܐ ܕܰܡܳܐܐ ܘܥܶܣܪܺܝܢ ܘܰܬܫܰܥ ܟܰܕ ܐܳܡܰܪ: ܕܶܐܢ ܒܳܟ ܚܳܐܱܪ ܐܢܳܫ ܟܕ ܡܰܝܬܶܐ ܐܰܢܬ ܠܕܺܝܢܳܐ ܣܽܘܥܪ̈ܳܢܰܝܗܽܘܢ ܕܰܒܢܰܝ̈ܢܳܫܳܐ. ܠܰܝܬ ܘܠܳܐ ܚܰܕ ܕܡܶܫܟܰܚ ܠܰܡܩܳܡ ܘܠܰܡܣܰܝܒܳܪܽܘ.
ܘܶܐܢ ܚܛܳܗ̈ܐ ܢܳܛܰܪ ܐܰܢܬ ܡܳܪܝܳܐ ܡܰܢܽܘ ܡܶܫܟܰܚ ܠܰܡܩܳܡ. ܡܶܢ ܒܢܰܝ̈ܢܳܫܳܐ ܠܰܡ ܘܠܐ ܐܝ̣ܬ ܚܰܕ ܕܙܳܟܶܐ. ܐܶܠܐ ܟܽܠܗܽܘܢ ܬܚܶܝܬ ܚܰܝܳܒܽܘܬܳܐ ܡܶܫܬܰܟܚܺܝܢ. ܡܶܛܠ ܕܠܳܐ ܙܳܟܶܐ ܩܕܳܡܰܝܟ ܟܽܠ ܕܚܰܝ. ܘܳܐܦܶܢ ܐܝ̣ܬ ܕܒܰܥ̈ܒܳܕܶܐ ܐܶܬܢܰܨܰܚ. ܐܶܠܐ ܡ̣ܢ ܚܽܘܫܳܒ̈ܐ ܠܳܐ ܐܶܬܚܰܪܰܪܘ. ܟܕ ܕܶܝܢ ܠܘܳܬ ܛܰܝܒܽܘܬܳܟ ܚܳܐܱܪ ܐܢܳܐ ܕܰܐܝܟ ܐܶܡܳܐ ܡܪܰܚܡܳܢܺܝܬܳܐ ܡܣܰܝܒܪܳܐ ܫܰܒܪܽܘܬܶܗ ܕܥܳܠܡܳܐ ܐܳܡܰܪܐܢܳܐ.
ܡܶܛܠ ܕܡܶܢ ܠܘܳܬܳܟ ܗܽܘ ܫܽܘܒܩܳܢܳܐ. ܘܰܒܓܰܙܳܟ ܠܳܐ ܚܳܣܪܺܝܢ ܪ̈ܰܚܡܶܐ ܘܰܒܬܰܪܥܳܟ ܠܳܐ ܡܰܘܦܶܐ ܚܢܳܢܳܐ. ܗܳܠܝܢ ܟܰܕ ܫܳܡܥܺܝܢ ܐܰܝܠܶܝܢ ܕܳܐܡܪܺܝܢ ܕܗܳܘܶܐ ܫܽܘܠܳܡܳܐ ܠܕܺܝܢܳܐ. ܐܳܡܪܺܝܢ ܕܗܳܐ ܠܰܡ ܕܰܘܝܕ ܐܡ̣ܪ ܕܡܶܢ ܠܘܳܬܳܟ ܗܘ ܫܽܘܒܩܳܢܳܐ. ܘܰܒܗܳܕܶܐ ܐܰܝܟ ܕܡܶܢ ܨܶܐܕܰܝܗܽܘܢ ܣܰܒܪܳܐ ܝܰܗܒ ܠܚܰܝܴ̈ܒܶܐ. ܘܗܰܘ ܓܰܒܪܳܐ ܙܰܕܺܝܩܳܐ ܕܶܐܫܟܚܶܗ ܐܰܠܳܗܳܐ ܐܰܝܟ ܠܶܒܶܗ. ܕܳܚܶܠ ܗܘܳܐ ܡ̣ܢ ܕܰܝܳܢܳܐ ܕܠܳܐ ܚܛܰܗܰܘ̈ܗܝ ܡܳܐ ܕܩܳܪܶܐ ܠܶܗ ܠܕܺܝܢܳܐ. ܘܥܰܠ ܗܳܕܶܐ ܡܣܰܟܶܐ ܗܘܳܐ ܠܡܳܪܝܳܐ ܟܰܕ ܥܳܒܶܕ ܙܰܕܺܝܩܽܘܬܳܐ.
ܣܰܒܪܶܬ ܒܡܳܪܝܳܐ ܘܣܰܟܝܰܬ ܢܰܦܫܝ ܠܡܶܠܬܶܗ. ܣܰܟܺܝܬ ܠܡܳܪܝܳܐ ܡ̣ܢ ܡܰܛܰܪܬܳܐ ܕܨܰܦܪܳܐ ܘܰܥܕܰܡܳܐ ܠܡܰܛܰܪܬܳܐ ܕܨܰܦܪܳܐ. ܡܳܕܶܝܢ ܘܠܳܐ ܚܰܕ ܥܶܕܳܢܳܐ ܝܳܬܶܒ ܗܘܳܐ ܡܶܛܠ ܣܽܘܟܳܝܳܐ. ܐܶܠܐ ܒܣܰܒܪܳܐ ܘܰܒܣܽܘܟܳܝܳܐ ܫܳܗܰܪ ܗܘܳܐ ܘܚܳܐܱܪ ܠܦܽܘܪܩܳܢܳܐ ܕܰܐܠܗܳܐ. ܘܡ̣ܢ ܢܽܘܗܪܳܐ ܡܫܰܪܶܐ ܗܘܳܐ. ܘܰܒܢܽܘܗܪܳܐ ܡܫܰܠܶܡ ܗܘܳܐ. ܘܡܰܠܶܦ ܗܘܳܐ ܠܥܰܡܶܗ ܕܒܶܗ ܢܶܬܕܰܡܶܐ.
ܢܣܰܟܶܐ ܝ̣ܣܪܳܐܝܠ ܠܡܳܪܝܳܐ ܡܶܛܠ ܕܡܶܢ ܠܘܳܬܶܗ ܐܶܢܽܘܢ ܪ̈ܰܚܡܶܐ. ܘܣܰܓܺܝ ܠܘܳܬܶܗ ܦܽܘܪܩܳܢܳܐ. ܗܽܘ ܢܶܦܪܩܺܝܘܗܝ ܠܝ̣ܣܪܳܐܝܠ ܡ̣ܢ ܟܽܠܶܗ ܥܰܘܠܶܗ. ܗܰܘ ܕܰܡܣܰܟܶܐ ܠܡܳܪܝܳܐ ܐܳܦ ܪ̈ܰܚܡܶܐ ܡܶܫܟܰܚ. ܘܰܟܡܳܐ ܐܶܢ ܥܰܘܠܳܐ ܡܶܬܦܪܶܩ ܗܰܘ ܕܰܡܣܰܟܶܐ. ܡܶܛܠ ܕܡܳܪܝܳܐ ܡܶܬܓܠܶܐ ܒܰܒܣܰܪ. ܘܗܽܘ ܦܳܪܶܩ ܠܶܗ ܠܺܝܣܪܳܐܝܠ ܕܰܐܠܗܳܐ ܡܶܢ ܟܽܠܶܗ ܥܰܘܠܶܗ ܘܡܶܢ ܟܽܠܗܽܘܢ ܚܛܳܗܰܘ̈ܗܝ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܝܢ
ܥܰܠ ܕܽܘܒܳܪܳܐ ܕܡܰܟܺܝܟܽܘܬܶܗ ܕܛܽܘܒܳܢܳܐ ܕܰܘܝܕ.
ܟܽܠܗܽܘܢ ܟܺܐܢ̈ܐ ܘܰܢܒܺܝ̈ܐ ܐܰܝܠܶܝܢ ܕܰܒܫܽܘܦܪ̈ܶܐ ܪ̈ܳܡܶܐ ܘܰܡܥܰܠܰܝܴ̈ܐ ܕܰܐܠܗܳܐ ܡܶܬܒܰܩܶܝܢ ܗܘܰܘ: ܒܡܰܟܺܝܟܽܘܬܳܐ ܘܰܒܢܺܝܚܽܘܬܳܐ ܡܨܰܒܬܺܝܢ ܗܘܰܘ ܩܢܽܘܡܰܝ̈ܗܽܘܢ. ܒܗܳܝ ܕܰܡܩܰܕܡܺܝܢ ܗܘܰܘ ܘܝܳܠܦܺܝܢ ܡ̣ܢ ܗܰܘ ܕܶܐܡܰܪ: ܬܰܘ ܠܘܳܬܝ ܘܺܝܠܰܦܘ ܡܶܢܝ ܕܢܺܝܚ ܐܢܳܐ ܘܡܰܟܺܝܟ ܐܢܳܐ ܒܠܶܒܝ (ܡܬܝ ܝܐ: ܟܚ-ܟܛ). ܘܥܳܒܕܺܝܢ ܗܘܰܘ ܐܰܝܟ ܕܰܐܠܶܦ ܐܶܢܘܢ. ܘܳܐܦ ܗܶܢܘܢ ܢܒܺܝ̈ܐ ܡܶܬܒܰܩܶܝܢ ܗܘܰܘ ܚܰܕ ܒܚܰܕ. ܟܰܕ ܢܳܣܒܺܝܢ ܗܘܰܘ ܛܽܘܦܣܳܐ ܡ̣ܢ ܕܽܘܒܳܪ̈ܶܐ ܕܰܚ̈ܕܳܕܶܐ. ܠܳܐ ܛܰܥܝܳܐ ܗܘܳܬ ܡܶܢܗܽܘܢ ܓܶܝܪ ܬܰܡܺܝܡܽܘܬܶܗ ܕܝܰܥܩܽܘܒ ܕܡܶܬܡܰܟܰܟ ܗܘܳܐ ܠܘܳܬ ܥܺܝܣܽܘ: ܟܰܕ ܦܓܰܥ ܒܶܗ ܒܽܐܘܪܚܳܐ. ܟܰܕ ܐܶܬܳܐ ܡ̣ܢ ܦܳܕܳܢ ܕܳܐܪܳܡ. ܘܝܳܠܦܺܝܢ ܗܘܰܘ ܡ̣ܢ ܡܽܘܫܶܐ ܕܡܰܟܺܝܟ ܗܘܳܐ ܡ̣ܢ ܟܽܠܗܽܘܢ ܒܢܰܝ̈ܢܳܫܳܐ ܕܥܰܠ ܐܰܪܥܳܐ. ܘܒܳܬܰܪ ܗܳܠܝܢ ܪܳܗܶܛ ܗܘܳܐ ܛܽܘܒܳܢܳܐ ܕܰܘܝܕ. ܡܰܟܺܝܟܳܐ ܟܰܕ ܡܰܘܕܰܥ ܫܽܘܦܪܳܐ ܕܡܰܟܺܝܟܽܘܬܶܗ. ܡܙܰܡܰܪ ܗܘܳܐ ܒܡܰܙܡܽܘܪܳܐ ܕܰܡܳܐܐ ܘܰܬܠܳܬܺܝܢ ܘܳܐܡܰܪ:
ܡܳܪܝܳܐ ܠܳܐ ܐܶܬܬܪܺܝܡ ܠܶܒܝ ܘܠܳܐ ܐܶܬܬܪ̈ܺܝܡ ܥܰܝ̈ܢܰܝ ܘܠܳܐ ܗܰܠܟܶܬ ܒܰܕܪܰܘܪ̈ܒܳܢ ܡܶܢܝ. ܗܳܠܶܝܢ ܐܡ̣ܪ ܕܰܢܩܰܦܰܚ ܠܪܳܡܽܘܬܳܐ ܕܫܰܒܰܗܪ̈ܳܢܶܐ. ܠܰܘ ܡܶܛܠ ܕܢܰܘܕܰܥ ܠܰܐܠܗܳܐ ܕܠܳܐ ܐܶܬܬܪܺܝܡ ܒܳܥܶܐ ܗܘܳܐ. ܡܶܛܠ ܕܚܳܙܶܐ ܗܘܳܐ ܠܐܢܳܫ̈ܝ̣ܢ ܕܰܒܥܰܡܶܗ ܕܰܢܦܺܝܚܺܝܢ ܒܚܽܘܬܪܳܐ ܥܰܠ ܡܶܕܶܡ ܡܶܕܶܡ ܕܠܳܐ ܢܺܐܡܰܪ ܗܘܳܐ ܠܽܘܩܒܰܠܗܽܘܢ ܘܢܰܟܶܣ ܐܶܢܽܘܢ. ܝܰܗܒ ܠܗܽܘܢ ܛܽܘܦܣܳܐ ܡܶܢ ܢܰܦܫܶܗ ܘܳܐܡܰܪ: ܕܶܐܢܳܐ ܠܰܡ ܣܳܢܶܐ ܐܢܳܐ ܠܪܳܡܽܘܬܳܐ ܘܠܳܐ ܡܗܰܠܶܟ ܐܢܳܐ ܒܰܕܪܰܘܪ̈ܒܳܢ. ܘܟܰܕ ܠܝ̣ ܣܰܓܺܝ ܦܫܺܝܩܳܐ ܗܘܳܬ ܡܫܰܩܠܽܘܬܳܐ ܡܶܛܠ ܬܳܓܳܐ ܘܺܐܝܩܳܪܳܐ ܕܡܰܠܟܽܘܬܳܐ. ܒܚܽܘܬܪܳܐ ܠܳܐ ܐܶܬܢܰܦܚܶܬ. ܘܰܒܪܳܡܽܘܬܳܐ ܠܳܐ ܐܶܫܬܰܩܠܶܬ.
ܐܶܠܐ ܡܰܟܟܶܬ ܢܰܦܫܝ ܐܰܝܟ ܚܣܺܝܠܳܐ ܥܰܠ ܐܶܡܶܗ. ܘܰܐܝܟ ܚܣܺܝܠܳܐ ܗܘܳܬ ܥܠܰܝ ܢܰܦܫܝ. ܡܽܘܟܳܟܶܗ ܕܰܚܣܺܝܠܳܐ ܢܣܰܒ. ܘܰܒܕܶܡܥ̈ܐ ܚܰܒܺܝܒܳܐ ܡܶܐܟܽܘܠܬܶܗ ܘܥܰܠ ܬܕܰܝܴ̈ܐ ܕܡܰܝܢܰܩܬܶܗ. ܡܶܢ ܠܒܰܪ ܥܶܩܳܪܳܐ ܡܰܪܺܝܪܳܐ ܛܝ̣ܫ. ܕܠܐ ܢܶܬܩܰܪܰܒ ܢܶܡܬܽܘܩ ܘܚܰܠܒܳܐ ܡܶܢ ܡܪܰܒܝܳܢܺܝܬܶܗ. ܒܗܳܠܶܝܢ ܡ̣ܢ ܚܰܝ̈ܐ ܫܚܺܝ̈ܩܶܐ ܕܣܰܓܺܝ ܡܰܠܝܴ̈ܢ ܬܶܢܚܴ̈ܬܳܐ. ܢܒܺܝܳܐ ܡܕܰܡܶܐ ܗܘܳܐ ܢܰܦܫܶܗ ܘܳܐܡܰܪ ܗܘܳܐ: ܕܰܒܥܳܠܡܳܐ ܗܳܢܐ ܟܡܳܐ ܕܒܶܗ ܚܢܰܢ. ܡ̣ܢ ܗܰܘ ܬܕܳܐ ܕܰܐܠܳܗܽܘܬܳܐ ܕܡܰܝܢܶܩ ܚܰܝ̈ܐ ܚܠܰܝܴ̈ܐ ܘܒܰܣܺܝ̈ܡܶܐ. ܓܠܺܝܙܺܝܢܰܢ ܕܠܳܐ ܢܶܫܠܶܐ ܡܶܢ ܒܶܟܝܳܐ ܙܳܕܶܩ ܠܰܢ. ܘܰܕܢܶܐܟܽܘܠ ܕܠܳܐ ܕܶܡ̈ܥܶܐ: ܠܳܐ ܦܰܐܝܳܐ ܠܰܢ ܐܶܠܐ ܢܶܗܘܶܐ ܡܶܬܕܰܡܶܝܢܰܢ ܠܫܰܒܪܳܐ ܕܶܐܬܚܣܶܠ ܡ̣ܢ ܬܕܳܐ ܕܡܰܝܢܰܩܬܶܗ. ܕܟܰܕ ܡܶܬܕܟܰܪ ܠܗܰܘ ܛܰܥܡܳܐ ܚܰܠܝܳܐ ܘܒܰܣܺܝܡܳܐ ܕܢܶܒܥܳܐ ܕܚܰܠܒܳܐ ܕܶܐܬܓܠܶܙ ܡܶܢܶܗ. ܠܰܝܬ ܡܶܕܶܡ ܕܒܰܣܺܝܡ ܘܡܰܗܢܶܐ ܠܶܗ. ܕܳܐܦ ܐܶܢܳܐ ܗܳܟܰܢܳܐ ܡܶܬܬܰܢܰܚ ܐܢܳܐ ܘܡܰܝܠܶܠ ܐܢܳܐ ܘܡܰܟܺܝܟܳܐ ܠܝ̣ ܢܰܦܫܝ ܐܰܝܟ ܚܣܺܝܠܳܐ. ܡܶܛܠ ܕܚܳܙܶܐ ܠܶܐܡܶܗ. ܕܬܶܟܣܰܬ ܡܶܢܶܗ ܪܶܕܝܳܐ ܕܚܰܠܒܳܐ ܠܳܐ ܫܳܠܶܐ ܡܶܢ ܒܶܟܝܳܐ. ܘܠܳܐ ܠܰܡ ܐܶܢܳܐ ܫܳܬܶܩ ܐܢܳܐ. ܥܕܰܡܳܐ ܕܦܳܢܶܐ ܐܢܳܐ ܠܥܽܘܒܳܗ̇ ܕܗܳܝ ܐܶܡܳܐ ܕܚܰܝ̈ܐ. ܕܰܐܝܟ ܗܳܕܶܐ ܢܰܦܫܳܐ ܡܶܬܒܰܥܝܳܐ ܢܶܩܢܶܐ ܟܽܠܡܰܢ ܕܨܳܒܶܐ ܕܢܺܚܶܐ ܒܰܡܫܺܝܚܳܐ. ܟܰܕ ܡܣܰܟܶܐ ܠܶܗ ܥܕܰܡܳܐ ܠܰܢܫܰܡܬܳܐ ܐܚܪܳܝܬܳܐ ܐܰܝܟ ܕܶܐܡܰܪ ܢܒܺܝܐ.
ܢܣܰܟܶܐ ܝ̣ܣܪܳܐܝܠ ܡܶܟܝ̣ܠ ܘܰܥܕܰܡܳܐ ܠܥܳܠܰܡ. ܗܰܘ ܓܶܝܪ ܕܰܥܕܰܡܳܐ ܠܥܳܠܰܡ ܠܳܐ ܡܣܰܟܶܐ. ܠܳܐ ܗܳܘܶܐ ܒܰܪ ܡܢܳܬܳܐ ܕܩܰܕܺܝ̈ܫܶܐ. ܡܶܛܠ ܗܳܢܳܐ ܚܢܰܢ ܢܣܰܟܶܐ ܥܡ ܝ̣ܣܪܳܐܝܠ ܠܡܳܪܝܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܝ̣ܢ܀
ܡܙܡܘܪܐ ܕܡܐܐ ܘܬܠܬܝܢ ܘܚܕ
ܡܰܘܕܰܥ ܕܰܒܝܰܕ ܓܶܠܝܳܢܶܗ ܕܥܰܡܰܢܘ̇ܐܝܠ܆ ܢܳܚܘ ܩܰܕܺܝ̈ܫܶܐ ܡ̣ܢ ܛܽܘܪܳܦܳܐ. ܘܥܰܠ ܕܶܢܚܶܗ ܕܒܳܐܦܰܪܬܳܐ.
ܐܰܝܠܶܝܢ ܕܰܗܘܰܘ ܡܰܟܬܒܳܢ̈ܐ ܠܬܰܫܥܝܴ̈ܬܳܐ ܕܡܶܛܠ ܕܰܘܝܕ ܘܰܪܫܰܡܘ ܒܰܟܬܳܒܳܐ ܕܰܫܡܽܘܐܝܠ ܣܽܘܥܪ̈ܳܢܶܐ ܕܓܰܢܒܳܪܽܘܬܶܗ ܘܶܐܡܰܪܘ: ܕܟܰܕ ܝܬܶܒ ܠܶܗ ܡܰܠܟܳܐ ܒܒܰܝܬܶܗ܇ ܘܡܳܪܝܳܐ ܐܰܢܺܝܚ ܠܶܗ ܡ̣ܢ ܟܽܠܗܽܘܢ ܒܥܶܠܕ̈ܒܳܒܰܘܗܝ. ܐܡ̣ܪ ܡܰܠܟܳܐ ܠܢܳܬܳܢ ܢܒܺܝܳܐ. ܚܙܺܝ ܕܶܐܢܳܐ ܝܳܬܶܒ ܐܢܳܐ ܒܒܰܝܬܳܐ ܕܐܪ̈ܳܙܶܐ. ܘܳܐܪܽܘܢܶܗ ܕܰܐܠܗܳܐ ܒܓܰܘ ܝܳܪܺܝܥܬܳܐ. ܘܶܐܡܰܪ ܢܳܬܳܢ ܠܡܰܠܟܳܐ ܟܽܠ ܕܰܒܠܶܒܳܟ ܥܒܶܕ ܡܶܛܠ ܕܡܳܪܝܳܐ ܥܰܡܳܟ (ܒ ܫܡܘܐܝܠ ܙ: ܐ-ܓ). ܒܗܰܘ ܙܰܒܢܳܐ ܗܘܳܬ ܒܠܶܒܶܗ ܕܕܰܘܝܕ ܕܢܶܒܢܶܐ ܒܰܝܬܳܐ ܠܡܳܪܝܳܐ ܐܰܠܗܳܐ. ܘܰܚܠܳܦ ܡܰܫܟܢܳܐ ܗܰܘ ܕܰܥܒܰܕ ܡܽܘܫܶܐ. ܢܶܥܒܶܕ ܗܽܘ ܢܒܺܝܐ ܒܰܝܬܳܐ ܕܟܺܐܦ̈ܐ ܘܒܶܗ ܢܣܺܝܡ ܠܳܐܪܽܘܢܳܐ ܕܡܳܪܝܳܐ. ܘܟܰܕ ܩܰܕܶܡ ܛܰܝܶܒ ܟܽܠܡܶܕܶܡ ܕܡܶܬܒܥܶܐ ܠܨܶܒ̈ܘܳܬܶܗ ܘܰܠܢܰܦ̈ܩܳܬܶܗ ܕܗܰܝܟܠܳܐ. ܘܕܰܗܒܳܐ ܘܣܺܐܡܳܐ ܘܰܢܚܳܫܳܐ. ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܠܳܬܺܝܢ ܘܰܚܕܳܐ ܐܡ̣ܪ:
ܐܶܬܕܰܟܪ ܡܳܪܝܳܐ ܠܕܰܘܝܕ ܘܰܠܟܽܠܶܗ ܡܽܘܟܳܟܶܗ. ܕܺܝܡܳܐ ܠܡܳܪܝܳܐ ܘܰܢܕܰܪ ܠܰܐܠܳܗܶܗ ܕܝܰܥܩܽܘܒ. ܕܠܳܐ ܐܶܥܽܘܠ ܠܡܰܛܠܠܶܗ ܕܒܰܝܬܝ ܘܠܳܐ ܐܶܣܰܩ ܡ̇ܢ ܠܬܶܫܘܺܝܬܳܗ̇ ܕܥܰܪܣܝ. ܘܠܳܐ ܐܶܬܶܠ ܫܶܢܬܳܐ ܠܥܰܝ̈ܢܰܝ ܐܳܦܠܳܐ ܢܰܘܡܬܳܐ ܠܰܓܒܺܝ̈ܢܰܝ. ܥܕܰܡܳܐ ܕܶܐܫܟܰܚ ܐܰܬܪܳܐ ܠܡܳܪܝܳܐ ܘܡܰܫܟܢܳܐ ܠܰܐܠܳܗܶܗ ܕܝܰܥܩܽܘܒ. ܗܳܠܶܝܢ ܡܙܰܡܰܪ ܗܘܳܐ ܛܽܘܒܳܢܳܐ ܕܰܘܝܕ ܟܰܕ ܗܘܳܐ ܒܠܶܒܶܗ ܕܢܶܒܢܶܐ ܒܰܝܬܳܐ ܠܰܐܠܗܳܐ. ܘܡܶܢ ܫܽܘܪܳܝܳܐ ܕܶܝܢ ܡܶܬܚܰܫܰܚ ܗܘܳܐ ܒܩܴ̈ܠܐ ܒܰܣܺܝ̈ܡܶܐ ܕܡܰܟܺܝܟܽܘܬܳܐ ܘܡܰܪܚܶܩ ܗܘܳܐ ܘܫܳܕܶܐ ܡܶܢܶܗ ܠܪܳܡܽܘܬܳܐ ܝܳܕܰܥ ܗܘܳܐ ܓܶܝܪ ܕܠܳܐ ܡܩܰܒܶܠ ܕܢܶܬܒܢܶܐ ܠܶܗ ܒܰܝܬܳܐ ܒܪܳܡܽܘܬܳܐ ܡܶܛܠ ܕܒܰܝܬܳܐ ܕܡܰܫܪܝܶܗ ܕܰܐܠܳܗܳܐ ܡܰܟܺܝܟܽܘܬܳܐ ܗܝ. ܘܒܶܝܬ ܡܰܥܡܪܶܗ ܪܰܒܳܐ ܢܺܝܚܽܘܬܳܐ. ܘܗܰܝܟܠܳܐ ܕܩܽܘܕܫܶܗ ܒܰܣܺܝܡܽܘܬܳܐ. ܘܳܐܦܰܕܢܳܐ ܕܡܰܠܟܽܘܬܶܗ ܢܰܟܦܽܘܬܳܐ. ܘܟܕ ܩܪܶܒ ܕܢܶܒܢܶܐ ܒܰܝܬܳܐ ܒܡܽܘܟܳܟܶܗ܆ ܬܽܘܒ ܡܰܘܣܶܦ ܗܘܳܐ ܡܶܬܚܰܫܰܚ ܒܡܰܘ̈ܡܳܬܳܐ ܘܡܰܩܶܦ ܠܡܰܘ̈ܡܳܬܳܐ ܢܶܕܪ̈ܶܐ ܕܠܳܐ ܢܳܐܷܡ ܘܠܳܐ ܕܳܡܶܟ. ܘܠܳܐ ܥܰܠ ܥܰܪܣܶܗ ܫܳܟܶܒ ܘܡܶܬܢܺܝܚ ܥܕܰܡܳܐ ܕܥܳܒܶܕ ܐܰܬܪܳܐ ܘܕܽܘܟܬܳܐ ܘܒܶܝܬ ܡܰܫܪܝܳܐ ܠܳܐܪܽܘܢܶܗ ܕܡܳܪܝܳܐ. ܕܰܐܝܟ ܗܳܟܰܢܳܐ ܐܝ̣ܬܶܝܗ̇ ܟܽܠ ܢܰܦܫܳܐ ܕܺܐܝܬ ܠܳܗ̇ ܒܛܺܝܠܽܘܬܳܐ ܥܰܠ ܩܢܽܘܡܳܗ̇ ܕܬܶܥܒܕܶܗ ܒܰܝܬܳܐ ܠܰܐܠܗܳܐ ܕܝܰܥܩܽܘܒ. ܐܡ̣ܪ ܓܶܝܪ ܡܳܪܰܢ: ܕܟܰܕ ܠܰܡ ܕܡܶܟܘ ܐܢܳܫܴ̈ܐ ܐܶܬܳܐ ܒܥܶܠܕܒܳܒܳܐ ܘܰܙܪܰܥ ܙܺܝ̈ܙܳܢܶܐ ܒܰܝܢܳܬ ܚܷ̈ܛܶܐ ܘܶܐܙܰܠ (ܡܬܝ ܝܓ: ܟܗ). ܡܶܛܠܗܳܕܶܐ ܣܰܢܝܳܐ ܕܰܡܟܽܘܬܳܐ ܥܰܠ ܐܰܝܠܶܝܢ ܕܰܩܢܶܝܢ ܒܛܺܝܠܽܘܬܳܐ ܕܢܶܒܢܽܘܢ ܒܰܝܬܳܐ ܠܡܳܪܝܳܐ. ܘܠܳܐ ܫܶܢܬܳܐ ܚܳܫܚܳܐ ܠܗܰܘ ܕܰܡܛܰܝܰܒ ܕܰܡܕܰܟܶܐ ܡܰܥܡܪܳܐ ܕܢܰܦܫܶܗ. ܡ̣ܢ ܗܰܘ ܕܢܳܛܰܪ ܥܶܕܳܢ̈ܐ ܘܚܳܐܱܪ ܢܶܚܙܶܐ ܕܶܐܡܰܬܝ ܕܳܡܟܺܝܢ ܡܳܪ̈ܰܘܗܝ ܕܒܰܝܬܳܐ ܗܳܢܰܘ ܫܺܐܕܳܐ. ܥܒܳܕܶܗ ܓܶܝܪ ܕܓܰܢܳܒܳܐ ܗܳܢܰܘ: ܘܥܰܠ ܗܳܕܐ ܡܦܰܩܶܕ ܗܘܳܐ ܡܳܪܢ ܠܬܰܠܡܺܝ̈ܕܰܘܗܝ ܕܢܶܗܘܽܘܢ ܥܺܝܪܺܝܢ ܘܰܡܛܰܝܒܺܝܢ. ܘܬܽܘܒ ܡܰܠܶܦ ܗܘܳܐ: ܕܶܐܠܽܘ ܝܳܕܰܥ ܗܘܳܐ ܒܰܐܝܕܳܐ ܡܰܛܰܪܬܳܐ ܐܳܬܶܐ ܓܰܢܳܒܳܐ. ܡܳܪܶܐ ܒܰܝܬܳܐ ܡܶܬܬܥܺܝܪ ܗܘܳܐ ܘܠܳܐ ܫܳܒܶܩ ܗܘܳܐ ܕܢܶܬܦܠܶܫ ܒܰܝܬܶܗ (ܠܘܩܐ ܝܒ: ܠܛ). ܐܰܢܬ ܕܶܝܢ ܣܺܝܡ ܚܠܳܦ ܢܰܘܡܬܳܐ ܡܰܗܡܝܳܢܽܘܬܳܐ. ܘܰܚܠܳܦ ܫܶܢܬܳܐ ܡܰܐܝ̣ܢܽܘܬܳܐ. ܘܰܚܠܳܦ ܕܰܡܟܽܘܬܳܐ ܚܒܰܢܳܢܽܘܬܳܐ. ܚܠܳܦ ܬܶܫܘܺܝܬܳܐ ܘܥܰܪܣܳܐ ܢܝܴ̈ܚܶܐ ܘܒܽܘܣܳܡ̈ܐ. ܟܰܕ ܝܳܕܰܥ ܐܰܢܬ ܕܢܰܦܫܳܐ ܒܗܳܠܶܝܢ ܡܶܬܠܰܒܟܳܐ ܘܪܶܥܝܳܢܳܐ ܒܕܰܐܝܟ ܗܳܠܝܢ ܡܶܬܶܐܣܰܪ. ܘܠܐ ܡܶܫܟܰܚ ܒܳܢܶܐ ܒܰܝܬܳܐ ܠܡܳܪܝܳܐ. ܘܥܰܠܗܳܝ ܐܡ̣ܪ ܢܒܺܝܳܐ ܕܠܳܐ ܫܳܒܶܩ ܗܘܳܐ ܠܰܢܝܳܚ̈ܐ ܘܰܠܒܽܘ̈ܣܳܡܶܐ ܘܠܐ ܠܰܚܒܰܢܳܢܽܘܬܳܐ ܡܶܬܬܦܺܝܣ ܥܕܰܡܳܐ ܕܡܰܬܩܶܢ ܒܢܰܦܫܶܗ ܐܰܬܪܳܐ ܠܡܳܪܝܳܐ. ܘܢܳܩܶܫ ܡܰܫܟܢܳܐ ܠܰܐܠܗܶܗ ܕܝܰܥܩܽܘܒ ܒܪܶܥܝܳܢܶܗ. ܘܟܰܕ ܒܰܝܬܳܐ ܕܟܺܐܦܳܐ ܠܳܐ ܒܢܳܐ. ܚܙܳܐ ܒܥܰܝܢܳܐ ܕܪܽܘܚܳܐ ܠܗܰܘ ܕܳܐܬܶܐ ܘܰܡܚܰܕܶܬ ܒܰܩܢܽܘܡܶܗ ܒܰܝܬܶܗ ܕܥܳܠܡܳܐ ܘܫܰܠܶܡ ܦܽܘܪܫܳܢܶܗ. ܘܟܰܕ ܚܳܐܱܪ ܗܘܳܐ ܐܰܝܟ ܕܡ̣ܢ ܩܽܘܪܒܳܐ ܒܰܐܪܥܳܐ ܕܳܐܦܪܰܬ. ܕܰܢܚܶܬ ܘܶܐܬܚܙܺܝ ܒܗ̇ ܗܰܘ ܕܺܐܝܬܰܘܗܝ ܡܰܥܡܪܳܐ ܕܟܽܠ. ܘܡܶܟܺܝܠ ܕܺܝܠܶܗ ܗܳܝ ܕܢܶܒܢܶܐ ܒܰܝܬܳܐ ܐܰܠܳܗܳܝܳܐ ܠܩܰܕܺܝ̈ܫܶܐ ܐܡ̣ܪ.
ܗܳܐ ܫܡܰܥܢܳܝܗܝ ܒܳܐܦܰܪܬܳܐ ܘܶܐܫܟܰܚ̈ܢܳܝܗܝ ܒܚܰܩ̈ܠܳܬܳܐ. ܠܡܰܢ ܫܡܰܥ ܒܳܐܦܰܪܬܳܐ ܕܺܐܝܬܶܝܗ̇ ܒܶܝܬܠܚܶܡ. ܠܡܳܪܝܳܐ ܕܺܝܡܳܐ ܠܶܗ ܡܰܘ̈ܡܳܬܳܐ ܘܠܰܐܠܳܗܶܗ ܕܝܰܥܩܽܘܒ ܕܰܢܕܰܪ ܠܶܗ ܢܶܕܪܳܐ. ܩܴ̈ܠܶܐ ܓܶܝܪ ܕܰܡܠܶܝܢ ܕܽܘܡܳܪܳܐ ܫܡܰܥ. ܨܳܐܷܬ ܗܘܳܐ ܓܶܝܪ ܒܶܐܕ̈ܢܶܐ ܕܪܽܘܚܳܐ ܘܫܳܡܰܥ ܗܘܳܐ ܩܴ̈ܠܶܐ ܕܡܳܪܝܳܐ ܐܰܠܳܗܶܗ ܕܝܰܥܩܽܘܒ. ܟܰܕ ܝܰܗܒ ܩܳܠܳܐ ܩܰܕܡܳܝܳܐ ܐܰܝܟ ܝܰܠܽܘܕܳܐ. ܘܡܰܫܡܰܥ ܩܳܠܶܗ ܒܣܶܦ̈ܘܳܬܳܐ ܒܶܣܪ̈ܳܢܳܝܳܬܳܐ. ܘܫܳܐܷܠ ܚܰܠܒܳܐ ܕܢܺܐܢܰܩ ܡܶܢ ܬܕܰܝܴ̈ܐ ܕܰܒܬܽܘܠܬܳܐ. ܘܰܠܗܳܠܶܝܢ ܩܴ̈ܠܐ ܩܰܛܺܝ̈ܢܶܐ ܘܰܡܚܺܝ̈ܠܶܐ ܕܗܰܘ ܓܰܢܒܳܪ ܥܳܠܡ̈ܐ ܕܰܗܘܳܐ ܒܳܐܦܰܪܬܳܐ. ܥܽܘܠܳܐ ܘܝܰܠܽܘܕܳܐ ܫܡܰܥ ܗܘܳܐ ܢܒܺܝܳܐ. ܘܶܐܡܰܪ ܗܳܐ ܫܡܰܥܢܳܝܗܝ ܒܳܐܦܰܪܬܳܐ. ܘܶܐܫܟܰܚܢܳܝܗܝ ܒܚܰܩ̈ܠܳܬܳܐ. ܘܥܰܠ ܕܰܢܦܰܠ ܒܶܐܕ̈ܢܶܐ ܕܢܰܦܫܶܗ ܩܴ̈ܠܶܐ ܕܣܶܦܘܴ̈ܬܶܗ ܕܰܐܠܗܶܗ ܕܝܰܥܩܘܒ. ܟܕ ܡܶܬܬܠܶܝܢ ܒܓܽܘܫܡܳܐ ܬܕܶܝ̈ܗ̇ ܕܰܒܬܽܘܠܬܳܐ ܘܝܳܢ̈ܩܳܢ ܚܰܠܒܳܐ ܠܬܽܘܪܣܳܝܶܗ. ܕܗܰܘ ܙܳܐܷܢ ܟܽܠ. ܘܥܰܠܗܳܝ ܐܡ̣ܪ ܗܳܐ ܫܡܰܥܢܳܝܗܝ ܒܳܐܦܰܪܬܳܐ. ܘܫܳܡܰܥ ܗܘܳܐ ܬܽܘܒ ܠܩܳܠܶܗ ܕܡܰܠܰܐܟܳܐ. ܕܶܐܬܳܐ ܠܘܳܬ ܪ̈ܳܥܰܘܳܬܳܐ ܕܰܫܪܶܝܢ ܗܘܰܘ ܒܰܐܪܥܳܐ ܕܳܐܦܪܰܬ. ܗܳܠܶܝܢ ܕܠܳܐ ܢܳܝܡܺܝܢ ܗܘܰܘ ܘܠܳܐ ܕܳܡܟܺܝܢ ܘܠܰܘ ܒܒܰܝܬܳܐ ܫܪܶܝܢ ܗܘܰܘ ܘܠܳܐ ܥܰܠ ܬܰܫܘܺܝܬܳܐ ܫܪܶܝܢ ܗܘܰܘ ܕܥܰܪܣܳܐ. ܩܰܒܶܠܘ ܚܙܳܬܳܐ ܕܡܰܠܰܐܟܳܐ ܕܶܐܬܳܐ ܠܘܳܬܗܽܘܢ. ܘܰܦܓܰܥܘ ܒܬܶܫܒܽܘܚܬܶܗ ܕܡܳܪܝܳܐ ܕܰܐܢܗܪܰܬ ܥܠܰܝܗܽܘܢ. ܘܟܽܠܗܶܝܢ ܐܰܝܠܶܝܢ ܕܶܐܡܰܪ ܕܰܘܝܕ܆ ܗܳܝ ܕܺܝܡܳܐ ܘܗܳܝ ܕܰܢܕܰܪ. ܗܳܝ ܕܠܳܐ ܝܰܗܒ ܫܶܢܬܳܐ ܠܥܰܝܢܰܘ̈ܗܝ ܘܠܐ ܢܰܘܡܬܳܐ ܠܰܓܒܺܝ̈ܢܰܘܗܝ. ܘܗܳܝ ܕܠܐ ܢܶܥܽܘܠ ܠܡܰܛܠܠܶܗ ܕܒܰܝܬܶܗ ܘܠܐ ܢܶܣܰܩ ܠܬܰܫܘܺܝܬܳܗ̇ ܕܥܰܪܣܶܗ. ܟܽܠܗܶܝܢ ܗܳܠܝܢ ܒܪ̈ܳܥܰܘܳܬܳܐ ܐܶܬܢܛܰܪܘ ܘܶܐܫܬܰܡܠܺܝܘ. ܘܶܐܢܳܐ ܐܡ̇ܪ ܐܢܳܐ ܕܰܥܠܰܝܗܽܘܢ ܐܡ̣ܪ ܪܽܘܚܳܐ ܒܕܰܘܝܕ ܐܰܝܠܶܝܢ ܕܰܟܬܺܝ̈ܒܳܢ ܒܫܽܘܪܳܝ ܡܰܙܡܽܘܪܳܐ ܗܳܢܐ. ܘܰܚܠܳܦ ܕܰܘܝܕ ܪ̈ܳܥܰܘܳܬܳܐ ܫܗܰܪܘ ܘܰܢܛܰܪܘ ܥܳܢܴ̈ܐ ܘܰܠܗܽܘܢ ܐܶܬܐܡܪܰܬ ܗܳܝ ܕܠܳܐ ܐܶܬܶܠ ܫܶܢܬܳܐ ܠܥܰܝ̈ܢܰܝ ܘܠܐ ܢܰܘܡܬܳܐ ܠܰܓܒܺܝ̈ܢܰܝ. ܘܰܠܪܺܝܫܳܐ ܕܗܳܠܶܝܢ ܕܠܺܝܠܳܐ ܠܡܺܐܡܰܪ. ܕܠܐ ܐܶܣܰܩ ܠܬܰܫܘܺܝܬܳܗ̇ ܕܥܰܪܣܝ ܘܠܐ ܐܶܥܽܘܠ ܠܡܰܛܠܠܶܗ ܕܒܰܝܬܝ. ܥܕܰܡܳܐ ܕܡܶܫܟܰܚ ܐܢܳܐ ܡܥܰܪܬܳܐ ܐܰܬܪܳܐ ܠܡܳܪܝܳܐ. ܘܽܐܘܪܝܳܐ ܕܰܗܘܳܐ ܡܰܫܟܢܳܐ ܠܰܐܠܗܶܗ ܕܝܰܥܩܘܒ ܘܕܰܢܚܶܬ ܘܶܐܬܟܰܣܺܝ ܥܰܙܪܽܘܪ̈ܶܐ ܚܠܳܦ ܬܶܫܒܽܘܚܬܳܐ ܕܢܽܘܗܪܳܐ ܕܰܟܪܺܝܟܳܐ ܠܶܗ ܒܰܫܡܰܝܳܐ. ܘܡܶܢ ܒܳܬܰܪ ܕܶܐܡܰܪ ܡܰܠܰܐܟܳܐ ܠܪ̈ܳܥܰܘܳܬܳܐ: ܕܗܳܐ ܡܣܰܒܰܪ ܐܢܳܐ ܠܟܽܘܢ ܚܰܕܽܘܬܳܐ ܕܬܶܗܘܶܐ ܠܟܽܠܶܗ ܥܳܠܡܳܐ. ܐܶܬܝ̣ܠܶܕ ܓܶܝܪ ܝܰܘܡܳܢܳܐ ܦܳܪܽܘܩܳܐ ܕܺܐܝܬܰܘܗܝ ܡܳܪܝܳܐ ܡܫܺܝܚܳܐ ܒܰܡܕܺܝܢܬܶܗ ܕܕܰܘܝܕ. ܘܗܳܕܶܐ ܐܶܬܳܐ ܠܟܽܘܢ. ܟܰܕ ܡܶܫܟܚܺܝܢ ܐܢܬܽܘܢ ܥܽܘܠܳܐ ܕܰܟܪܺܝܟ ܥܰܙܪܽܘܪ̈ܶܐ ܘܣܺܝܡ ܒܽܐܘܪܝܳܐ. ܘܒܳܬܰܪ ܗܳܠܶܝܢ ܐܶܬܚܙܺܝܘ ܥܰܡ ܡܰܠܰܐܟܳܐ ܚܰܝ̈ܠܰܘܳܬܳܐ ܣܰܓܺܝ̈ܐܶܐ ܕܰܫܡܰܝܳܐ: ܟܰܕ ܡܫܰܒܚܺܝܢ ܠܰܐܠܗܳܐ ܘܳܐܡܪܺܝܢ ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ. ܘܥܰܠ ܐܰܪܥܳܐ ܫܠܳܡܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ. ܘܡܶܢ ܒܳܬܰܪ ܕܶܐܙܰܠܘ ܡܶܢ ܠܘܳܬܗܽܘܢ ܡܰܠܰܐܟ̈ܐ ܠܰܫܡܰܝܳܐ. ܡܰܠܶܠܘ ܪ̈ܳܥܰܘܳܬܳܐ ܚܰܕ ܥܰܡ ܚܰܕ ܘܳܐܡܪܺܝܢ. ܢܶܪܕܶܐ ܥܕܰܡܳܐ ܠܒܶܝܬܠܚܶܡ ܘܢܶܚܙܶܐ ܠܡܶܠܬܳܐ ܗܳܕܐ ܕܰܗܘܳܬ ܐܰܝܟ ܕܡܳܪܝܳܐ ܐܰܘܕܰܥ ܠܰܢ (ܠܘܩܐ ܒ: ܝ-ܝܗ). ܕܰܐܝܟ ܗܳܕܶܐ ܐܡ̣ܪ. ܡܶܢ ܒܳܬܰܪ ܕܰܫܡܰܥ ܕܒܳܐܦܰܪܬܳܐ ܐܶܬܝ̣ܠܶܕ ܡܳܪܝܳܐ ܐܰܠܗܶܗ ܕܝܰܥܩܽܘܒ.
ܢܶܥܽܘܠ ܠܡܰܫܟܢܶܗ ܘܢܶܣܓܽܘܕ ܠܟܽܘܒܫܳܐ ܕܪ̈ܶܓܠܰܘܗܝ. ܘܡܶܢ ܒܳܬܰܪ ܕܥܰܠܘ ܪ̈ܳܥܰܘܳܬܳܐ ܘܰܚܙܰܘ ܠܡܳܪܝܳܐ ܕܰܟܪܺܝܟ ܥܰܙܪܽܘܪ̈ܶܐ܆ ܥܰܠܘ ܬܽܘܒ ܐܳܦ ܡܓܽܘ̈ܫܶܐ ܗܳܢܘܢ ܕܶܐܬܰܘ ܘܰܐܝܬܺܝܘ ܠܶܗ ܩܽܘܪ̈ܒܳܢܶܐ. ܘܡܰܠܺܝܘ ܢܒܺܝܽܘܬܶܗ ܕܕܰܘܝܕ ܘܠܳܐ ܫܳܛܘ ܘܠܳܐ ܒܰܣܰܪܘ ܥܰܠ ܫܰܒܪܽܘܬܶܗ. ܐܶܠܐ ܢܦܰܠܘ ܘܰܣܓܶܕܘ ܠܶܗ ܘܰܦܬܰܚܘ ܣܺܝ̈ܡܳܬܗܽܘܢ ܘܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ. ܘܒܳܬܰܪ ܗܳܠܶܝܢ ܡܳܢܳܐ ܐܡ̇ܪ ܗܘܳܐ ܢܒܺܝܳܐ.
ܩܽܘܡ ܡܳܪܝܳܐ ܠܰܢܝܳܚܬܳܟ. ܐܰܢܬ ܘܩܺܒܽܘܬܳܐ ܕܥܽܘܫܢܳܟ. ܗܳܝ ܕܩܽܘܡ ܥܰܠ ܡܕܰܒܪܳܢܽܘܬܳܐ ܡܫܰܘܕܥܳܐ. ܘܩܺܐܒܽܘܬܳܐ ܠܰܒܬܽܘܠܬܳܐ ܩܳܪܶܐ. ܕܰܒܩܺܐܒܽܘܬܳܐ ܕܰܒܕܰܗܒܳܐ ܗܳܝ ܕܰܥܒܰܕ ܡܽܘܫܶܐ ܣܺܝܡܺܝܢ ܗܘܰܘ ܐܪ̈ܳܙܶܐ ܕܰܡܩܰܕܡܺܝܢ ܨܳܝܪܺܝܢ ܠܥܰܡܰܢܽܘܐܝܠ. ܐܡ̇ܪ ܐܢܳܐ ܕܶܝܢ ܥܰܠ ܫܰܒܛܶܗ ܕܰܐܗܪܽܘܢ ܗܰܘ ܕܰܐܦܪܰܥ ܘܥܰܠ ܩܶܣܛܳܐ ܕܕܰܗܒܳܐ ܗܳܝ ܕܺܐܝܬ ܗܘܳܐ ܒܳܗ̇ ܡܰܢܢܳܐ. ܗܳܟܰܢܳܐ ܐܦ ܒܬܽܘܠܬܳܐ ܗܘܳܬ ܩܺܐܒܽܘܬܳܐ ܕܒܶܣܪܳܐ ܠܥܰܡܰܢܽܘܐܝܠ. ܘܰܥܡܰܪ ܒܳܗ̇ ܝܰܪ̈ܚܶܐ ܬܶܫܥܳܐ ܘܰܢܣܰܒ ܡܶܢܳܗ̇ ܒܶܣܪܳܐ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܘܡܰܕܥܳܐ ܢܰܗܺܝܪܳܐ ܡܶܬܝܰܩܪܳܐ ܘܡܶܬܬܢܺܝܚܳܐ. ܩܺܐܒܽܘܬܳܐ ܗܳܕܐ ܒܥܺܕܬܶܗ ܕܰܐܠܗܳܐ ܕܺܐܝܬܶܝܗ̇ ܢܝܳܚܬܶܗ. ܡܳܐ ܓܶܝܪ ܕܰܒܦܽܘܡܳܐ ܕܩܰܕܺܝ̈ܫܶܐ ܡܶܬܬܰܘܕܶܐ ܘܡܶܬܟܪܶܙ ܐܠܗܐ ܕܰܗܘܳܐ ܒܰܪܢܳܫܳܐ. ܓܰܢܒܳܪ ܥܳܠܡ̈ܐ ܕܰܗܘܳܐ ܝܰܠܽܘܕܳܐ. ܗܰܘ ܟܝܳܢܳܐ ܦܫܺܝܛܳܐ ܕܝܶܫܽܘܥ ܐܰܠܗܳܐ ܕܶܐܬܪܰܟܰܒ ܒܰܓܝܴ̈ܕܶܐ ܘܰܒܗܰܕܳܡ̈ܐ. ܐܰܝܟܰܢܳܐ ܕܠܰܝܬ ܠܡܺܐܡܰܪ. ܗܰܘ ܕܰܠܥܶܠ ܡܶܢܟܽܠ ܣܳܟ̈ܝ̣ܢ ܗܘܳܐ ܬܚܶܝܬ ܣܳܟܳܐ. ܗܰܘ ܠܐ ܡܶܬܡܰܫܚܳܢܳܐ ܗܘܳܐ ܬܚܶܝܬ ܡܽܘ̈ܫܚܳܬܳܐ ܐܢܳܫܳܝܴ̈ܬܳܐ ܒܦܰܓܪܳܐ ܡܳܝܽܘܬܳܐ ܘܗܰܘ ܕܡܰܘܕܶܐ ܕܶܐܬܝ̣ܠܶܕ ܐܠܗܳܐ ܡܶܢ ܐܰܢܬܬܳܐ ܘܰܡܗܰܝܡܶܢ ܕܡ̣ܢ ܒܬܽܘܠܬܳܐ ܡܰܪܝܰܡ ܐܶܬܒܰܣܰܪ ܘܶܐܬܓܰܫܰܡ. ܘܥܰܠܗܳܝ ܐܶܬܢܰܒܺܝ ܢܒܺܝܳܐ. ܕܥܰܡܶܗ ܕܡܳܪܝܳܐ ܩܳܐܷܡ ܠܰܢܝܳܚܬܶܗ. ܬܩܽܘܡ ܐܦ ܩܺܐܒܽܘܬܳܐ ܕܥܽܘܫܢܳܐ ܘܬܽܘܒ ܐܶܡܰܪ:
ܟܳܗܢܰܝ̈ܟ ܢܶܠܒܫܽܘܢ ܙܰܕܺܝܩܽܘܬܳܐ ܘܙܰܕܺܝ̈ܩܰܝܟ ܫܽܘܒܚܳܐ. ܙܰܕܺܝܩܽܘܬܳܐ ܕܠܳܐ ܚܶܪܝܳܢܳܐ ܗܽܘܝܽܘ ܥܰܡܰܢܘ̇ܐܝܠ. ܐܝܟ ܕܰܐܟܬܶܒ ܛܽܘܒܳܢܳܐ ܦܰܘܠܽܘܣ: ܕܰܐܝܠܶܝܢ ܕܒܰܡܫܺܝܚܳܐ ܥܡܰܕܬܽܘܢ ܠܰܡܫܺܝܚܳܐ ܠܒܶܫܬܽܘܢ (ܓܠܛܝ̈ܐ ܓ: ܟܙ). ܟܳܗܢ̈ܐ ܕܶܝܢ ܠܳܒܫܺܝܢ ܙܰܕܺܝܩܽܘܬܳܐ. ܫܠܺܝܚ̈ܐ ܐܶܢܘܢ ܕܩܰܕܶܡܘ ܠܰܒܫܽܘܗܝ ܠܰܡܫܺܝܚܳܐ. ܘܰܢܦܰܩܘ ܐܰܠܒܫܽܘܗܝ ܠܥܳܠܡܳܐ. ܕܥܰܪܛܶܠܳܝ ܗܘܳܐ ܡ̣ܢ ܢܰܚ̈ܬܶܐ ܕܫܽܘܒܚܳܐ ܕܰܐܫܠܚܶܗ ܚܶܘܝܳܐ. ܘܡܶܬܡܰܠܝܳܐ ܡܰܘܡܬܳܐ ܗܳܝ:
ܕܺܝܡܳܐ ܡܳܪܝܳܐ ܠܕܰܘܝܕ ܒܰܫܪܳܪܳܐ ܕܠܳܐ ܢܶܗܦܽܘܟ ܡܶܢܶܗ: ܘܳܐܡܰܪ: ܡܶܛܠ ܕܰܘܝܕ ܥܰܒܕܳܟ ܠܳܐ ܬܰܗܦܶܟ ܐܰܦܰܘ̈ܗܝ ܕܰܡܫܺܝܚܳܟ. ܝ̣ܡܳܐ ܡܳܪܝܳܐ ܠܕܰܘܺܝܕ ܒܰܫܪܳܪܳܐ ܕܠܳܐ ܢܶܗܦܽܘܟ ܡܶܢܶܗ. ܡܳܢܳܐ ܗܝ ܡܰܘܡܬܳܐ ܗܳܕܐ ܪܰܒܬܳܐ؟ ܘܡܳܢܰܐ ܗܘ ܫܪܳܪܳܐ ܕܡܰܘܡܬܳܐ ܗܳܕܐ؟ ܘܰܐܝܕܳܐ ܗܝ ܬܽܘܒ ܥܶܠܬܳܐ ܕܢܺܐܡܶܐ. ܘܡܰܘܡܬܳܐ ܡܶܛܠܡܳܢܐ ܐܶܫܬܰܡܫܰܬ ܠܽܘܩܒܰܠ ܐܶܪ̈ܺܝܛܺܝܩܽܘ ܣܳܒܰܪ ܐܢܳܐ ܕܺܝܡܳܐ ܡܳܪܝܳܐ. ܐܡ̣ܪ ܐܶܫܰܥܝܳܐ ܢܒܺܝܳܐ ܐܰܝܟ ܕܡܶܢ ܦܽܘܡܳܐ ܕܰܐܠܗܳܐ: ܕܒܺܝ ܝ̣ܡܺܝܬ. ܘܢܶܦܩܰܬ ܡܶܢ ܦܽܘܡܝ ܡܶܠܬܳܐ ܕܙܰܕܺܝܩܽܘܬܳܐ ܘܠܳܐ ܬܶܗܦܽܘܟ. ܕܠܺܝ ܬܟܽܘܦ ܟܽܠ ܒܪܽܘܟ ܘܒܺܝ ܢܰܘܕܶܐ ܟܽܠ ܠܶܫܳܢ (ܐܫܥܝܐ ܡܗ: ܟܓ) ܗܳܟܰܢܳܐ ܝ̣ܡܳܐ ܐܰܒܳܐ ܕܰܠܥܳܠܰܡ ܢܰܘܬܶܒ ܡܶܢ ܦܺܐܪ̈ܰܝ ܟܰܪܣܳܗ̇ ܥܰܠ ܟܽܘܪܣܝܶܗ. ܗܳܢܰܘ ܥܰܠ ܝܰܡܺܝܢܶܗ. ܕܰܩܢܰܘ ܡܰܚܫ̈ܒܳܬܳܐ ܒܨܺܝܪ̈ܳܬܳܐ ܕܰܩܢܰܘ ܝܽܘܕܳܝ̈ܐ ܘܶܐܪ̈ܺܝܛܽܝܩܽܘ ܥܰܠ ܥܰܡܰܢܽܘܐܝܠ. ܘܒܳܬܰܪ ܗܳܕܐ ܬܘܒ ܐܡ̇ܪ:
ܕܶܐܢ ܢܶܛܪܽܘܢ ܒܢܱ̈ܝܟ ܩܝܳܡܝ ܣܳܗܕܽܘܬܳܐ ܗܳܕܐ ܕܡܰܠܶܦ ܐܢܳܐ ܠܗܽܘܢ. ܘܳܐܦ ܡ̣ܢ ܒܢܰܝ̈ܗܽܘܢ ܢܶܬܒܽܘܢ ܠܥܳܠܰܡ ܥܳܠܡܺܝܢ ܥܰܠ ܟܽܘܪܣܝܳܟ. ܐܠܐ ܕܰܘܝܕ ܥܰܠ ܟܽܘܪܣܝܳܐ ܡܶܬܪܰܓܫܳܢܳܐ ܝܳܬܶܒ ܗܘܳܐ. ܡܫܺܝܚܳܐ ܕܶܝܢ ܕܰܒܨܶܒܝܳܢܶܗ ܢܚܶܬ ܘܰܗܘܳܐ ܡܶܢ ܦܺܐܪ̈ܰܝ ܟܰܪܣܶܗ ܕܕܰܘܝܕ ܒܰܒܣܰܪ. ܥܰܠ ܗܰܘ ܟܽܘܪܣܝܳܐ ܫܡܰܝܳܢܳܐ ܕܡܰܬܩܰܢ ܒܡܰܠܟܽܘܬܳܐ ܘܥܰܠ ܫܰܒ̈ܛܶܐ ܕܺܝܣܪܳܐܝܠ ܘܫܽܘܠܛܳܢܳܐ ܕܰܐܠܗܳܐ ܝܳܬܶܒ. ܘܰܒܗܳܝ ܐܽܘܪܺܫܠܶܡ ܚܺܐܪܬܳܐ ܕܒܰܫܡܰܝܳܐ ܡܰܬܩܰܢ ܟܽܘܪܣܝܶܗ.
ܡܶܛܠ ܕܰܨܒܳܐ ܡܳܪܝܳܐ ܒܨܶܗܝܽܘܢ. ܘܰܓܒܳܗ̇ ܠܶܗ ܠܒܶܝܬ ܡܰܥܡܪܳܐ. ܘܗܳܕܳܐ ܗܝ ܢܝܳܚܬܝ ܠܥܳܠܰܡܥܳܠܡܺܝܢ. ܗܳܪܟܳܐ ܐܶܬܶܒ ܡܶܛܠ ܕܪܰܓܬܳܗ̇. ܕܠܰܘ ܡܶܛܠ ܨܶܗܝܽܘܢ ܗܳܝ ܕܰܒܗܳܓܳܪ ܡܶܬܡܰܬܠܳܐ ܐܰܡܺܝܪ̈ܳܢ ܗܳܠܝܢ. ܢܰܗܺܝܪܳܐܝ̣ܬ ܗܳܝ ܕܶܐܡܰܪ ܕܰܢܝܳܚܬܶܗ ܗܺܝ ܠܥܳܠܰܡ ܥܳܠܡܺܝܢ. ܒܗܳܝ ܕܶܐܬܬܢܺܝܚ ܥܰܠ ܨܠܺܝܒܳܐ ܒܝܰܘܡܳܐ ܫܬܺܝܬܳܝܳܐ. ܕܰܛܥܶܢ ܒܶܗ ܨܠܺܝܒܳܐ ܥܰܠ ܟܰܬܦܶܗ ܘܰܢܦܰܩ ܠܓܳܓܽܘܠܬܳܐ ܘܰܒܗܳܝ ܠܳܐ ܝ̣ܬܶܒ. ܡܶܛܠ ܕܟܕ ܚܙܰܐܘܽܗܝ ܟܳܗܢ̈ܐ ܘܣܳܦܪ̈ܶܐ ܕܝܽܘܕܳܝ̈ܐ ܐܳܡܪܺܝܢ ܗܘܰܘ ܠܩܽܘܒܠܶܗ ܗܳܢܰܘ ܝܳܪܬܳܐ ܬܰܘ ܢܶܩܛܠܺܝܘܗܝ ܘܢܶܐܚܽܘܕ ܝܳܪܬܽܘܬܶܗ. ܘܰܐܚܕܽܘܗܝ ܘܰܐܦܩܽܘܗܝ ܠܒܰܪ ܡܶܢ ܟܰܪܡܳܐ ܘܩܰܛܠܽܘܗܝ (ܡܬܝ ܟܐ: ܠܚ-ܠܛ). ܡܳܕܶܝܢ ܠܘ ܒܗܳܝ ܝ̣ܬܶܒ ܒܪܶܓܬܳܐ. ܐܠܐ ܒܥܺܕܬܳܐ ܕܰܬܪ̈ܺܝܨܰܝ ܫܽܘܒܚܳܐ܆ ܗܳܝ ܕܩܳܝܡܺܝܢ ܒܳܗ̇ ܐܰܝܟ ܕܰܒܒܰܝܬܳܐ ܕܡܰܠܟܳܐ ܪܰܒܳܐ ܕܟܽܠܗܽܘܢ ܩܰܕܺܝ̈ܫܶܐ. ܗܳܝ ܕܳܐܦܶܢ ܥܰܠ ܐܰܪܥܳܐ ܡܶܬܚܰܙܝܳܐ ܡܶܛܠ ܕܰܒܦܰܓܪܳܐ ܩܳܝܡܳܐ ܒܚܰܝ̈ܐ ܕܰܬܢܳܢ. ܐܶܠܐ ܗܘܳܬ ܠܳܗ̇ ܫܡܰܝܳܢܺܝܬܳܐ ܘܚܶܠܛܰܬ ܥܰܡ ܥܺܕܬܳܐ ܕܰܠܥܶܠ. ܗܳܝ ܕܒܰܫܠܺܝ̈ܚܶܐ ܨܰܝܴ̈ܕܶܐ ܐܶܬܒܰܪܟܰܬ ܘܶܐܬܩܰܝܡܰܬ. ܐܝܟ ܕܶܐܡܰܪ ܠܳܗ̇ ܡܳܪܝܳܐ ܒܝܰܕ ܪܽܘܚܳܐ.
ܘܰܠܨܰܝܴ̈ܕܶܝܗ̇ ܐܶܒܰܪܶܟ܀ ܕܒܶܝܬ ܦܶܛܪܽܘܣ ܘܦܰܘܠܽܘܣ. ܘܰܠܗܽܘܢ ܐܶܡܰܪ ܪܽܘܚܳܐ ܕܰܡܒܰܪܶܟ. ܟܰܕ ܒܺܐܝ̈ܕܰܝܗܽܘܢ ܡܬܰܪܣܶܐ ܘܰܡܣܰܒܰܥ ܠܟܽܠܗܽܘܢ ܟܰܦ̈ܢܶܐ ܕܰܐܪܥܳܐ. ܐܰܝܟܰܢܳܐ ܕܶܐܡܰܪ:
ܘܰܠܡܶܣ̈ܟܺܢܶܝܗ̇ ܐܶܣܰܒܰܥ ܠܰܚܡܳܐ܀ ܠܡܳܢܳܐ ܠܚܡܐ ܒܰܠܚܽܘܕ ܐܶܡܰܪ. ܘܡܶܢ ܐܚܪ̈ܳܢܝܳܬܳܐ ܫܬܶܩ. ܐܝ̣ܬ ܗܽܘ ܐܰܝܟܳܐ ܕܣܳܐܷܡ ܟܬܳܒܳܐ ܫܡܳܐ ܕܠܰܚܡܳܐ ܒܰܠܚܽܘܕ. ܚܠܳܦ ܟܽܠܗܶܝܢ ܗܳܠܶܝܢ ܡܶܐܟ̈ܠܳܬܳܐ ܐܡ̣ܪ ܓܶܝܪ ܐܰܠܗܳܐ ܠܳܐܕܳܡ. ܕܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ (ܒܪܝܬܐ ܓ: ܝܛ) ܘܰܒܗܳܢܳܐ ܫܡܳܐ ܕܠܰܚܡܳܐ ܠܟܽܠܡܶܕܶܡ ܕܡܶܬܶܐܟܶܠ ܚܒܰܫ ܟܬܳܒܳܐ. ܐܡܼܪ ܓܶܝܪ ܥܰܡܰܢܘ̇ܐܝܠ ܕܶܐܢܳܐ ܐܢܳܐ ܠܰܚܡܳܐ ܕܚܰܝ̈ܐ ܕܡܶܢ ܫܡܰܝܳܐ ܢܶܚܬܶܬ. ܘܡܰܢ ܕܢܶܐܟܽܘܠ ܡܶܢ ܗܳܢܳܐ ܠܰܚܡܳܐ ܢܺܚܶܐ ܠܥܳܠܰܡ. ܕܦܰܓܪܝ ܗܽܘ ܕܥܰܠ ܐܰܦܰܝ̈ ܚܰܝܰܘ̈ܗܝ ܕܥܳܠܡܳܐ ܝܳܗܶܒ ܐܢܳܐ (ܝܘܚܢܢ ܘ: ܢܐ). ܕܡܶܢܶܗ ܡܶܢ ܠܰܚܡܳܐ ܗܳܢܐ ܡܣܰܒܰܥ ܠܡܶܣ̈ܟܺܢܶܝܗ̇ ܕܥܺܕܬܳܐ. ܕܺܐܝܬܰܝܗܽܘܢ ܟܽܘܡܪ̈ܶܐ ܠܒܺܝ̈ܫܰܝ ܦܽܘܪܩܳܢܳܐ ܕܡܳܪܝܳܐ.
ܠܟܽܘܡܪ̈ܶܝܗ̇ ܐܰܠܒܶܫ ܦܽܘܪܩܳܢܳܐ ܘܰܠܙܰܕܺܝ̈ܩܶܝܗ̇ ܫܽܘܒܚܳܐ. ܘܬܰܡܳܢ ܐܰܕܢܰܚ ܩܰܪܢܳܐ ܠܕܰܘܝܕ ܘܰܐܢܗܰܪ ܫܪܳܓܳܐ ܠܰܡܫܺܝܚܶܗ. ܘܗܳܠܶܝܢ ܕܠܳܐ ܬܰܚܦܺܝܬܳܐ ܡܰܠܦܴ̈ܢ ܥܰܠ ܪ̈ܳܥܰܘܳܬܳܐ ܘܟܳܗܢ̈ܐ ܕܥܺܕܬܳܐ ܕܰܐܠܗܳܐ. ܩܰܪܢܳܐ ܕܶܝܢ ܗܽܘܝܽܘ ܥܰܡܰܢܽܘܐܝܠ. ܐܳܦ ܫܪܳܓܳܐ ܠܶܗ ܟܰܕ ܠܶܗ ܩܳܪܶܐ.
ܘܠܰܒܥܶܠܕ̈ܒܳܒܰܘܗܝ ܐܰܠܒܶܫ ܒܶܗܬܬܳܐ. ܗܳܠܶܝܢ ܕܺܐܝܬܰܝܗܽܘܢ ܐܶܪ̈ܺܝܛܺܝܩܽܘ ܗܳܢܘܢ ܕܰܡܒܰܨܪܺܝܢ ܠܶܗ ܡܶܢ ܫܽܘܒܚܶܗ ܒܥܶܠܕ̈ܒܳܒܰܘܗܝ ܐܶܢܘܢ.
ܘܰܥܠܰܘܗܝ ܢܶܥܦܶܐ ܩܽܘܕܫܝ. ܥܽܘܦܝܶܗ ܕܩܽܘܕܫܶܐ ܥܰܠ ܫܽܘܒܚܳܐ ܕܠܳܐ ܡܶܬܚܰܒܠܳܢܽܘܬܶܗ ܕܰܡܫܺܝܚܳܐ ܡܰܘܕܰܥ. ܕܠܶܗ ܬܶܫܒܽܘܚܬܳܐ ܘܬܰܘܕܺܝܬܳܐ ܠܥܳܠܡܺܝܢ܀
ܡܙܡܘܪܐ ܕܡܐܐ ܘܬܠܬܝܢ ܘܬܪܝܢ
ܥܰܠ ܕܢܶܣܰܒ ܬܰܚܘܺܝܬܳܐ ܕܰܒܡܳܪܰܢ ܟܽܠܗܽܘܢ ܟܳܪ̈ܘܙܶܐ ܕܐܪ̈ܳܙܰܘܗܝ ܕܡܳܪܰܢ ܘܰܫܠܺܝ̈ܚܶܐ ܕܰܗܘܰܘ ܡܣܰܒܪ̈ܳܢܶܐ ܠܥܰܡܰܢܽܘܐܝܠ. ܡܰܠܦܳܐ ܚܦܺܝܛܳܐܝ̣ܬ ܘܣܰܓܺܝܳܐܝ̣ܬ ܐܰܠܶܦܘ ܥܰܠ ܚܽܘܒܳܐ ܗܰܘ ܕܰܒܝܰܕ ܡܳܪܰܢ ܐܶܬܓܠܺܝ ܠܥܳܠܡܳܐ.
ܘܟܰܕ ܬܰܚܘܺܝܬܳܐ ܨܳܒܶܐ ܛܽܘܒܳܢܳܐ ܕܰܘܝܕ ܢܶܬܶܠ ܠܚܽܘܒܳܐ ܕܰܐܚܽܘܬܳܐ ܕܥܳܡܪܳܐ ܒܰܐܘܝܽܘܬܳܐ ܡܶܛܠ ܡܫܺܝܚܳܐ. ܐܶܡܰܪ:
ܡܳܐ ܛܳܒ ܘܡܳܐܐ ܫܰܦܺܝܪ ܠܰܐܚܷ̈ܐ ܡܳܐ ܕܥܳܡܪܺܝܢ ܐܰܟܚܕܳܐ. ܗܳܢܐ ܚܽܘܒܳܐ ܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ ܩܰܕܶܡ ܐܶܬܚܙܺܝ ܒܗܰܘ ܟܢܽܘܫܝܳܐ ܕܰܗܘܳܐ ܒܽܐܘܪܺܫܠܶܡ ܕܠܐ ܦܠܺܝܓܳܐ ܥܰܠ ܢܰܦܫܶܗ ܚܳܐܷܝܢ ܗܘܰܘ. ܗܳܠܝܢ ܕܠܳܐ ܐܢܳܫ ܡܶܢܗܽܘܢ ܐܡ̇ܪ ܗܘܳܐ ܥܰܠ ܕܰܩܢܶܐ ܗܘܳܐ ܕܕܺܝܠܶܗ ܐܶܢܘܢ (ܦܪܟܣܝܣ ܕ: ܠܒ). ܘܰܒܗܰܘ ܟܢܽܘܫܝܳܐ ܒܰܠܚܽܘܕ ܕܡܶܬܕܰܒܰܪ ܗܘܳܐ ܡ̣ܢ ܫܠܺܝ̈ܚܶܐ ܕܠܰܝܬ ܒܶܗ ܦܠܺܝܓܽܘܬܳܐ. ܩܰܕܶܡ ܚܳܪ ܕܰܘܝܕ ܒܥܰܝܢܳܐ ܕܪܽܘܚܳܐ. ܘܶܐܡܰܪ ܡܰܙܡܽܘܪܳܐ ܗܳܢܐ ܕܰܡܳܐܐ ܘܰܬܠܳܬܺܝܢ ܘܰܬܪܶܝܢ ܟܰܕ ܕܶܝܢ ܣܰܓܺܝ ܡܩܰܠܶܣ ܠܶܗ ܒܥܳܐ ܕܢܰܪܡܶܐ ܠܶܗ ܚܽܘܒܳܐ ܕܰܒܢܱ̈ܝ ܥܰܡܶܗ ܘܠܐ ܐܶܫܟܰܚ ܕܦܳܚܶܡ ܠܶܗ. ܐܶܠܐ ܒܰܠܚܽܘܕ ܗܳܠܶܝܢ ܬܪܶܝܢ ܐܰܚܱ̈ܐ ܕܬܶܕܡܽܘܪܬܳܐ. ܡܽܘܫܶܐ ܘܰܐܗܪܽܘܢ ܕܒܰܐܚܽܘܬܳܐ ܓܒܺܝܬܳܐ ܕܰܡܝܰܩܪܳܐ ܥܰܠ ܒܢܰܝ̈ܢܳܫܳܐ ܘܪ̈ܳܚܡܶܐ ܕܰܐܠܗܳܐ ܡܕܰܒܪܺܝܢ ܗܘܰܘ ܗܰܘ ܥܰܡܳܐ ܩܰܕܺܝܫܳܐ. ܘܰܐܝܟ ܐܰܝܟܰܢܳܐ ܝܳܗܶܒ ܬܰܚܘܺܝܬܳܐ.
ܐܰܝܟ ܡܶܫܚܳܐ ܠܰܡ ܕܢܳܚܶܬ ܥܰܠ ܪܺܝܫܳܐ ܘܥܰܠ ܕܰܩܢܳܐ. ܡܶܛܠ ܐܰܝܢܳܐ ܡܶܫܚܳܐ ܨܳܒܶܐ ܢܺܐܡܰܪ؟ ܡܶܛܠ ܐܰܝܢܳܐ ܕܰܩܢܳܐ؟
ܕܰܩܢܶܗ ܕܰܐܗܪܽܘܢ ܕܢܳܚܶܬ ܥܰܠ ܒܰܪ ܨܰܘܪܳܐ ܕܟܽܘܬܺܝܢܶܗ. ܪܰܘܪ̈ܒܳܢ ܬܰܚܘܝܴ̈ܬܳܐ ܗܳܠܝܢ ܕܝܰܗܒ ܚܽܘܒܳܐ ܕܰܐܚܷ̈ܐ ܩܰܕܺܝ̈ܫܶܐ. ܡܶܫܚܳܐ ܓܶܝܪ ܕܢܳܚܶܬ ܗܘܳܐ ܥܰܠ ܪܺܝܫܳܐ ܘܥܰܠ ܕܰܩܢܳܐ ܕܡܶܬܡܫܰܚ ܗܘܳܐ ܒܶܗ ܪܰܒ ܟܽܘܡܪ̈ܶܐ ܕܡܶܬܩܰܕܰܫ ܗܰܘ ܕܝܳܗܶܒ ܗܘܳܐ ܒܰܡܫܺܝܚܽܘܬܳܐ ܕܺܝܠܶܗ ܡܰܘܗܰܒܬܳܐ ܕܟܳܗܢܽܘܬܳܐ. ܕܰܠܗܳܢܳܐ ܡܶܬܕܰܡܶܝܢ ܐܰܚܷ̈ܐ ܩܰܕܺܝ̈ܫܶܐ ܕܒܰܡܫܺܝܚܳܐ. ܟܰܕ ܛܰܝܒܽܘܬܳܐ ܥܳܡܪܳܐ ܒܰܝܢܳܬܗܽܘܢ ܘܰܡܕܰܗܢܳܐ ܠܰܐܘܝܽܘܬܗܽܘܢ ܒܰܡܫܺܝܚܽܘܬܳܐ ܡܶܬܝܰܕܥܳܢܺܝܬܳܐ. ܡܶܬܚܰܙܝܳܐ ܥܰܠ ܢܰܦܫܗܽܘܢ ܬܰܠܒܶܫܬܳܐ ܕܟܽܘܬܺܝܢܳܐ ܗܳܝ ܕܰܒܩܰܡܪܳܐ ܕܟܳܗܢܽܘܬܳܐ ܕܪܽܘܚܳܐ ܡܗܰܕܪܳܐ ܠܨܰܘܪ̈ܰܝܗܽܘܢ. ܟܰܕ ܪܺܝܫܳܐ ܗܳܘܶܐ ܠܗܽܘܢ ܡܫܺܝܚܳܐ. ܕܰܩܢܳܐ ܐܰܗܪܽܘܢܳܝܳܐ ܕܶܝܢ܆ ܡܰܕܥܳܐ ܕܶܝܢ ܕܰܦܪܺܝܣ ܥܰܠ ܨܰܘܪܳܗ̇ ܕܢܰܦܫܳܐ ܒܚܽܘܫܳܒ̈ܐ ܣܒܺܝ̈ܣܰܝ ܒܐܪ̈ܳܙܶܐ. ܒܰܕܡܽܘܬ ܡܶܢܷ̈ܐ ܕܣܰܥܪܳܐ ܕܢܳܦܩܺܝܢ ܡܶܢ ܕܰܩܢܳܐ ܠܒܰܪ ܨܰܘܪܳܐ ܕܟܽܘܬܺܝܢܳܐ. ܡܰܩܶܦ ܫܟܳܚܴ̈ܬܳܐ ܢܰܗܺܝܪ̈ܳܬܳܐ ܕܢܰܦܫܳܐ ܗܳܝ ܕܡܶܢܶܗ ܡܶܬܕܰܒܪܳܐ. ܐܰܝܟ ܬܰܚܘܺܝܬܳܐ ܕܰܐܝܬܺܝ ܢܒܺܝܳܐ. ܐܡ̣ܪ ܓܶܝܪ:
ܐܰܝܟ ܛܰܠܳܐ ܕܚܶܪܡܽܘܢ ܕܢܳܚܶܬ ܥܰܠ ܛܽܘܪܳܐ ܕܨܶܗܝܽܘܢ. ܡܳܐ ܕܰܥܡܰܪܘ ܐܰܚ̈ܐ ܒܰܚܕܳܐ ܐܰܘܝܽܘܬܳܐ. ܘܰܗܘܰܘ ܟܶܢܫܳܐ ܚܰܕ ܘܰܚܕܳܐ ܐܰܘܝܽܘܬܳܐ ܘܰܚܕܳܐ ܢܰܦܫܳܐ. ܗܳܝܕܶܝܢ ܢܶܫܟܚܽܘܢ ܕܒܰܕܡܽܘܬܳܐ ܕܛܰܠܳܐ ܢܶܪܣܡܽܘܢ ܥܰܠ ܐܰܪܥܳܐ ܕܙܰܪ̈ܥܶܐ ܢܰܚܽܘܒ̈ܐ. ܘܡܰܝܬܶܐ ܠܗܽܘܢ ܠܡܶܥܒܰܕ ܦܺܐܪ̈ܶܐ ܐܰܝܟ ܛܰܠܳܐ ܕܢܳܚܶܬ ܡܶܢ ܫܡܰܝܳܐ ܘܡܰܪ̈ܓܶܐ ܥܶܩܳܪ̈ܶܐ ܝܰܒܺܝ̈ܫܶܐ ܘܰܡܕܰܗܶܢ. ܕܰܐܝܟ ܗܳܟܰܢ ܗܘܰܘ ܫܠܺܝ̈ܚܶܐ ܩܰܕܺܝ̈ܫܶܐ. ܘܟܰܕ ܗܘܰܘ ܠܶܗ ܩܽܘܨ̈ܘܳܬܳܐ ܠܚܰܬܢܳܐ ܡܫܺܝܚܳܐ. ܩܰܒܶܠܘ ܛܰܠܳܐ ܡܶܢ ܚܶܪܡܽܘܢ ܗܳܝ ܕܡܶܬܡܰܬܠܳܐ ܒܺܝܕܰܥܬܳܐ ܕܟܽܠ ܝܰܕ̈ܥܳܢ. ܘܰܢܦܰܩܘ ܗܘܰܘ ܛܰܠܳܐ ܒܝܽܘܠܦܳܢܗܽܘܢ ܠܟܽܠܗܽܘܢ ܥܰܡܡ̈ܐ. ܘܕܰܗܶܢܘ ܒܛܰܠܳܐ ܕܣܶܦ̈ܘܳܬܗܽܘܢ ܪ̈ܶܥܝܳܢܶܐ ܢܰܚ̈ܒܶܐ ܘܚܰܪ̈ܒܶܐ: ܘܰܫܘܰܚ ܒܰܐܪܥܳܐ ܙܰܪܥܳܐ ܕܙܰܕܺܝܩܽܘܬܳܐ. ܗܳܢܽܘܢ ܕܟܰܕ ܚܳܙܶܐ ܗܘܳܐ ܪܽܘܚܳܐ ܡܶܬܬܦܺܝܣܳܢܽܘܬܗܽܘܢ ܘܗܰܝܡܳܢܽܘܬܗܽܘܢ ܦܩܰܕ ܥܠܰܝܗܽܘܢ ܒܽܘܪܟܬܳܐ ܐܰܝܟ ܕܶܐܡܰܪ ܢܒܺܝܳܐ.
ܡܶܛܠ ܕܬܰܡܳܢ ܦܩܰܕ ܡܳܪܝܳܐ ܒܽܘܪܟܬܳܐ ܘܚܰܝ̈ܐ ܥܕܰܡܳܐ ܠܥܳܠܰܡ. ܕܗܽܘ ܢܰܫܘܶܐ ܠܰܢ ܕܰܒܚܽܘܒܳܐ ܕܰܐܚܽܘܬܳܐ ܗܳܕܐ ܕܶܐܬܰܐܡܪܰܬ ܢܶܨܛܰܒܰܬ. ܘܪܶܚܡܬܳܐ ܕܰܠܘܳܬ ܚܕܳܕ̈ܐ ܬܶܓܡܰܪ ܒܰܢ. ܒܝܶܫܽܘܥ ܡܫܺܝܚܳܐ ܡܳܪܢ ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܰܬܠܳܬܺܝܢ ܘܰܬܪܶܝܢ ܕܥܰܠ ܚܽܘܒܳܐ ܘܰܐܘܝܽܘܬܳܐ ܘܠܰܘ ܕܡܶܬܚܰܪܝܳܢܽܘܬܳܐ
ܡܙܡܘܪܐ ܕܡܐܐ ܘܬܠܬܝܢ ܘܬܠܬܐ
ܬܽܘܒ ܡܰܘܕܰܥ ܥܰܠ ܥܰܒ̈ܕܶܐ ܐܰܦܢܺܝ ܪܽܘܚܳܐ ܕܰܢܒܰܪܟܽܘܢ ܠܡܳܪܝܳܐ.
ܕܠܳܐ ܢܶܣܬܒܰܪ ܡܶܢ ܐܢܳܫ̈ܝ̣ܢ ܕܒܳܬܰܪ ܣܰܓܺܝܐܽܘܬ ܡܰܡܠܠܳܐ ܪܳܗܛܺܝܢܰܢ ܐܶܠܐ ܒܳܬܰܪ ܒܥܳܬܳܐ ܕܰܫܪܳܪܳܐ. ܟܡܳܐ ܐܶܢ ܡܶܣܬܒܰܪ ܗܳܢܐ ܡܰܙܡܽܘܪܳܐ ܕܰܡܳܐܐ ܘܰܬܠܳܬܺܝܢ ܘܰܬܠܳܬܳܐ ܕܰܒܣܶܕܪܳܐ ܕܦܶܬܓܳܡ̈ܐ ܙܥܽܘܪ̈ܶܐ ܐܝ̣ܬܰܘܗܝ. ܣܰܓܺܝ ܐܝ̣ܬ ܗܘܳܐ ܠܺܝ ܕܰܐܟܬܶܒ ܘܶܐܡܰܠܶܠ ܥܠܰܘܗܝ. ܘܶܐܢ ܙܥܽܘܪ ܟܽܠܗܽܘܢ ܡܶܢܝܴ̈ܢܶܐ ܕܩܰܕܺܝ̈ܫܶܐ ܚܒܺܝܫܺܝܢ ܒܶܗ. ܐܠܐ ܒܰܠܚܽܘܕ ܕܬܰܚܬܳܝ̈ܐ ܐܶܠܐ ܘܰܕܥܶܠܳܝ̈ܐ. ܐܡ̣ܪ ܓܶܝܪ ܛܽܘܒܳܢܳܐ ܕܰܘܺܝܕ. ܐܰܝܟ ܕܰܒܡܶܠܬܳܐ ܡܣܰܝܰܟܬܳܐ.
ܒܰܪܶܟܘ ܠܡܳܪܝܳܐ ܟܽܠܗܽܘܢ ܥܰܒ̈ܕܰܘܗܝ ܕܡܳܪܝܳܐ. ܐܰܝܠܶܝܢ ܕܩܳܝܡܺܝܢ ܒܒܰܝܬܶܗ ܕܡܳܪܝܳܐ ܒܠܰܝ̈ܠܰܘܳܬܳܐ. ܐܰܪܺܝܡܘ ܐܺܝܕܰܝ̈ܟܽܘܢ ܠܩܽܘܕܫܶܗ ܘܒܰܪܶܟܘ ܠܡܳܪܝܳܐ. ܒܗܳܝ ܕܶܐܡܰܪ ܕܟܽܠܗܽܘܢ ܥܰܒ̈ܕܰܘܗܝ ܕܡܳܪܝܳܐ ܢܒܰܪܟܽܘܢ ܠܡܳܪܝܳܐ. ܘܠܳܐ ܫܒܰܩ ܚܰܕ ܡܶܢ ܥܰܒ̈ܕܶܐ ܕܠܳܐ ܢܒܰܪܶܟ ܠܡܳܪܝܳܐ. ܘܰܒܗܳܕܶܐ ܡܶܠܬܳܐ ܚܒܺܝܫܺܝܢ ܩܰܕܡܳܝ̈ܐ ܘܡܶܨܥܳܝ̈ܐ ܘܰܐܚܪ̈ܳܝܶܐ. ܘܪ̈ܺܝܫܰܝ ܐܰܒܳܗܴ̈ܬܳܐ ܘܰܢܒܺܝ̈ܐ. ܘܡܰܠܰܐܟ̈ܐ ܕܰܫܡܰܝܳܐ ܘܪ̈ܺܝܫܰܝ ܡܰܠܰܐܟ̈ܐ. ܘܠܳܐ ܬܺܐܡܰܪ ܕܡܰܠܰܐܟ̈ܐ ܘܠܰܘ ܥܰܒ̈ܕܶܐ ܐܶܢܘܢ ܟܽܠܡܶܕܶܡ ܓܶܝܪ ܡܶܢ ܐܰܠܳܗܳܐ ܐܶܬܥܒܶܕ ܘܰܥܒܳܕ ܐܺܝܕܰܘ̈ܗܝ ܐܶܢܘܢ. ܘܶܐܢ ܐܶܬܩܪܺܝܘ ܡܰܠܰܐܟ̈ܐ ܡܶܛܠ ܕܰܥܒܰܕ ܐܶܢܘܢ ܪ̈ܽܘܚܳܢܶܐ ܘܬܰܚܬܳܝ̈ܐ ܐܶܬܩܪܺܝܘ ܒܢܰܝܴ̈ܐ ܒܛܰܝܒܽܘܬܳܐ. ܡܶܛܠ ܕܩܰܒܶܠܘ ܡܰܘܗܰܒܬܳܐ ܕܣܺܝܡܰܬ ܒܢܰܝܴ̈ܐ. ܡܳܕܶܝܢ ܒܰܟܝܳܢܳܐ ܟܽܠܗܽܘܢ ܐܰܝܠܶܝܢ ܕܶܐܬܒܪܺܝܘ ܥܰܒ̈ܕܶܐ ܐܶܢܘܢ: ܒܛܰܝܒܽܘܬܳܐ ܐܶܬܩܪܺܝܘ ܡܶܢܗܽܘܢ ܒܢܰܝܴ̈ܐ ܘܡܶܢܗܽܘܢ ܥܰܒ̈ܕܶܐ. ܡܳܕܶܝܢ ܟܽܠܗܽܘܢ ܥܰܒ̈ܕܶܐ ܐܶܢܘܢ ܡܶܛܠ ܟܝܴ̈ܢܶܐ ܥܒܺܝ̈ܕܶܐ. ܘܥܰܠܗܳܝ ܦܳܩܶܕ ܠܗܽܘܢ ܪܽܘܚܳܐ ܒܦܽܘܡ ܡܙܰܡܪܳܢܳܐ ܕܟܽܠܗܽܘܢ ܢܒܰܪܟܽܘܢ ܠܡܳܪܝܳܐ ܥܶܠܳܝܷ̈ܐ ܘܬܰܚܬܳܝ̈ܐ ܫܡܰܝܳܢ̈ܐ ܘܰܐܪ̈ܥܳܢܳܝܶܐ ܘܟܽܠܗܽܘܢ ܐܰܝܠܶܝܢ ܕܩܳܝܡܺܝܢ ܒܒܰܝܬܶܗ ܕܡܳܪܝܳܐ. ܒܠܰܝ̈ܠܰܘܳܬܳܐ ܢܰܘܕܽܘܢ ܘܰܢܒܰܪܟܽܘܢ ܠܡܳܪܶܗ ܕܒܰܝܬܳܐ. ܒܰܝܬܳܐ ܕܶܝܢ ܗܳܢܐ ܐܝ̣ܬܰܘܗܝ ܫܶܬܶܐܣܰܘ̈ܗܝ ܐܝ̣ܬܰܝܗܶܝܢ ܐܰܪܥܳܐ ܘܬܰܛܠܺܝܠܶܗ ܫܡܰܝܳܐ. ܘܰܒܗܳܢܳܐ ܒܰܝܬܳܐ ܥܳܡܪܺܝܢ ܟܽܠܗܽܘܢ ܛܽܘ̈ܗܡܶܐ ܕܪ̈ܽܘܚܳܢܶܐ ܘܰܕܦܰܓܪ̈ܳܢܶܐ. ܘܥܰܠ ܗܳܢܐ ܒܰܝܬܳܐ ܐܶܬܗܰܝܡܰܢ ܗܘܳܐ ܡܽܘܫܶܐ ܗܰܘ ܪܰܒܳܐ. ܘܰܐܟܬܶܒ ܥܰܠ ܥܒܳܕܶܗ ܘܥܰܠ ܒܶܢܝܳܢܶܗ ܘܶܐܡܰܪ ܕܡܶܢ ܐܰܠܗܳܐ ܐܶܬܥܒܶܕ. ܘܕܶܐܡܰܪ ܕܰܒܠܰܝ̈ܠܳܘܳܬܳܐ ܩܳܝܡܺܝܢ ܒܶܗ ܐܰܘܕܰܥ. ܕܰܠܘܳܬ ܦܽܘܚܳܡܳܐ ܕܺܝܕܰܥܬܳܐ ܢܰܗܺܝܪܬܳܐ ܕܰܐܠܗܳܐ. ܟܽܠܗܽܘܢ ܡܠܺܝ̈ܠܶܐ ܒܠܰܝ̈ܠܳܘܳܬܳܐ ܩܳܝܡܺܝܢ. ܘܗܳܟܰܢܳܐ ܐܝ̣ܬܰܘܗܝ ܠܰܫܡܰܝܴ̈ܢܶܐ ܘܠܰܐܪ̈ܥܳܢܳܝܶܐ ܠܳܐ ܡܶܬܡܰܫܚܳܢܳܐ ܘܠܳܐ ܡܶܬܕܰܪܟܳܢܳܐ. ܘܗܽܘ ܒܰܠܚܽܘܕܰܘܗܝ ܥܳܡܰܪ ܒܢܽܘܗܪܳܐ ܠܳܐ ܡܶܬܦܰܚܡܳܢܳܐ. ܘܰܐܝܠܶܝܢ ܕܰܥܒܺܝ̈ܕܶܐ ܐܶܢܘܢ ܟܡܳܐ ܐܶܢ ܥܳܡܪܺܝܢ ܫܡܰܝܳܢ̈ܐ ܒܢܽܘܗܪܳܐ. ܐܠܐ ܒܦܽܘܚܳܡܳܐ ܕܗܰܘ ܢܽܘܗܪܳܐ ܠܐ ܡܶܬܦܰܫܩܳܢܳܐ ܕܰܐܠܗܳܐ ܠܳܐ ܗܳܘܶܐ. ܘܰܐܝܟ ܕܰܒܠܰܝ̈ܠܰܘܳܬܳܐ ܩܳܝܡܺܝܢ. ܫܰܦܺܝܪ ܡܳܕܶܝܢ ܐܡ̣ܪ ܢܒܺܝܐ ܕܰܐܝܠܝܢ ܕܩܳܝܡܺܝܢ ܒܒܰܝܬܶܗ ܕܡܳܪܝܳܐ ܒܠܰܝ̈ܠܰܘܳܬܳܐ ܕܰܢܦܰܫܶܩ ܗܳܠܝܢ ܠܳܐ ܡܦܰܫܚܳܐ ܠܗܽܘܢ ܡܰܪܢܺܝܬܳܐ ܕܰܒܨܳܬܳܐ ܕܰܐܠܗܳܐ ܘܥܰܠܗܳܝ ܐܡ̣ܪ. ܐܰܪܺܝܡܘ ܐܝ̣ܕܰܝ̈ܟܽܘܢ ܠܩܽܘܕܫܶܗ ܘܒܰܪܶܟܘ ܠܡܳܪܝܳܐ. ܩܽܘܕܫܳܐ ܕܶܝܢ ܥܰܠ ܫܽܘܒܚܳܐ ܬܪܺܝܨܳܐ ܡܰܠܶܦ ܘܥܰܠ ܕܠܰܝܬ ܠܳܗ̇ ܠܢܰܦܫܳܐ ܕܰܬܪܺܝܡ ܐܺܝ̈ܕܶܝܗ̇ ܠܘܳܬ ܐܰܠܗܳܐ ܡܳܐ ܕܠܐ ܡܰܠܝܴ̈ܢ ܩܽܘܕܫܳܐ. ܗܳܢܰܘ ܕܰܟܝܽܘܬܳܐ ܕܡܶܢܟܽܠ ܛܰܢܦܽܘܬܳܐ ܕܰܥ̈ܒܳܕܶܐ ܒܺܝ̈ܫܶܐ. ܠܗܰܘ ܡܒܰܪܶܟ ܡܳܪܝܳܐ ܘܰܡܫܰܕܰܪ. ܡܫܰܕܰܪ ܠܶܗ ܡܳܪܝܳܐ ܒܽܘܪܟܬܳܐ ܡܶܢ ܡܕܺܝܢܬܳܐ ܕܰܠܥܶܠ ܐܰܝܟ ܕܶܐܡܰܪ ܪܽܘܚܳܐ. ܗܳܝ:
ܕܰܢܒܰܪܟܳܟ ܡܳܪܝܳܐ ܡܶܢ ܨܶܗܝܽܘܢ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ. ܨܶܗܝܽܘܢ ܕܶܝܢ ܠܗܳܝ ܚܺܐܪܬܳܐ ܕܒܰܫܡܰܝܳܐ ܩܳܪܶܐ. ܡܶܢ ܬܰܡܳܢ ܡܶܬܒܰܪܰܟ. ܟܽܠܡܰܢ ܕܩܳܐܷܡ ܒܒܰܝܬܶܗ ܕܡܳܪܝܳܐ ܡܶܬܒܰܪܰܟ ܠܶܗ ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܰܙܡܽܘܪܳܐ ܕܰܡܳܐܐ ܘܰܬܠܳܬܺܝܢ ܘܰܬܠܳܬܳܐ
ܡܙܡܘܪܐ ܕܡܐܐ ܘܬܠܬܝܢ ܘܐܪܒܥܐ
ܥܰܠ ܕܺܝܢܳܐ ܕܰܐܠܳܗܳܐ ܕܪܰܒ ܗܽܘ ܡܶܢܟܽܠ. ܘܥܰܠ ܦܳܠܚܰܝ̈ ܦܬܰܟܪ̈ܶܐ.
ܪܽܘܚܳܐ ܕܰܐܠܗܳܐ ܒܟܳܪܽܘܙܽܘܬܳܐ ܕܰܢܒܺܝ̈ܐ ܩܰܕܺܝ̈ܫܶܐ ܠܽܘܩܒܰܠ ܛܳܥܝܽܘܬܳܐ ܡܰܙܥܩܳܐ ܗܘܳܬ ܘܰܕܠܰܘ ܡܶܕܶܡ ܐܶܢܘܢ ܦܬܰܟܪ̈ܶܐ ܩܳܥܝܳܐ ܗܘܳܬ. ܘܥܰܡ ܚܰܢܦ̈ܐ ܡܶܬܟܰܬܫܳܐ. ܘܠܰܘ ܟܰܕ ܒܚܰܝܠܳܐ ܘܫܽܘܠܛܳܢܳܐ ܗܳܠܝܢ ܣܳܥܪܳܐ ܗܘܬ. ܐܶܠܐ ܒܰܦܝܳܣܳܐ ܘܰܒܝܽܘܠܦܳܢܳܐ. ܠܐ ܓܶܝܪ ܨܳܒܶܐ ܗܘܳܐ ܗܰܘ ܕܝܰܗܒ ܚܺܐܪܽܘܬܳܐ ܕܒܰܩܛܺܝܪܳܐ ܢܶܕܒܰܪ ܠܒܰܪܢܳܫܳܐ ܠܘܳܬ ܐܰܝܠܶܝܢ ܕܥܳܨܝܴ̈ܢ ܠܨܶܒܝܳܢܶܗ. ܐܶܠܘ ܓܝܪ ܨܳܒܶܐ ܕܒܰܩܛܺܝܪܳܐ ܢܶܕܒܰܪ ܐܰܝܟܳܐ ܚܰܝܠܳܐ ܐܝ̣ܬ ܕܰܡܨܶܐ ܕܥܰܡ ܚܰܝܠܶܗ ܡܶܬܟܰܬܰܫ. ܟܕ ܡܳܕܶܝܢ ܥܰܙܺܝܙܺܝܢ ܗܘܰܘ ܦܳܠܚܰܝ̈ ܦܬܰܟܪ̈ܶܐ ܒܰܛܢܳܢܳܐ ܕܰܚܠܳܦ ܕܶܚܠܰܬܗܽܘܢ܆ ܘܟܽܠ ܡܰܠܟܳܐ ܘܥܰܡܳܐ ܡܝܰܩܰܪ ܗܘܳܐ ܘܦܳܠܰܚ ܠܰܐܠܗܶܗ. ܐܰܙܺܝܥ ܪܽܘܚܳܐ ܩܺܝܬܳܪܶܗ ܕܛܽܘܒܳܢܳܐ ܕܰܘܝܕ. ܘܙܰܡܰܪ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܠܳܬܺܝܢ ܘܰܐܪܒܰܥ. ܠܽܘܩܒܰܠ ܕܶܚ̈ܠܳܬܳܐ ܣܪ̈ܺܝܩܳܬܳܐ ܕܥܰܡܡ̈ܐ. ܢܒܺܝܐ ܕܶܝܢ ܟܕ ܡܰܛܶܢ ܠܰܒܢܱ̈ܝ ܥܰܡܶܗ. ܒܪܰܒܽܘܬܳܐ ܕܫܽܘܒܚܳܐ ܕܰܐܠܗܳܐ. ܘܡܶܢ ܡܰܪܢܺܝܬܳܐ ܕܰܦܬܰܟܪ̈ܶܐ ܢܟܰܢܶܫ ܐܶܢܘܢ. ܟܰܕ ܣܳܬܰܪ ܗܘܳܐ ܘܰܡܨܰܚܶܐ ܠܰܐܝܠܝܢ ܕܠܐ ܗܘܰܘ ܐܰܠܗ̈ܐ ܐܡ̇ܪ ܗܘܳܐ.
ܫܰܒܰܚܘ ܠܰܫܡܶܗ ܕܡܳܪܝܳܐ. ܫܰܒܰܚܘ ܥܰܒܕܰܘ̈ܗܝ ܕܡܳܪܝܳܐ. ܐܰܝܠܶܝܢ ܕܩܳܝܡܺܝܢ ܒܒܰܝܬܶܗ ܕܡܳܪܝܳܐ ܘܰܒܕܳܪܶܐ ܕܒܰܝܬܶܗ ܕܰܐܠܳܗܰܢ. ܗܳܢܐ ܫܽܘܪܳܝܳܐ ܥܒܰܕ ܢܒܺܝܐ ܠܘܳܬܗܽܘܢ. ܕܠܐ ܠܡ ܬܚܽܘܪܽܘܢ ܒܡܳܪ̈ܰܘܳܬܳܐ ܣܪ̈ܺܝܩܶܐ ܘܕܰܓܴ̈ܠܶܐ. ܐܶܠܐ ܫܰܒܰܚܘ ܐܰܢܬܽܘܢ ܠܰܫܡܶܗ ܕܡܳܪܝܳܐ. ܡܶܛܠ ܕܥܰܒ̈ܕܶܐ ܕܺܝܠܶܗ ܐܰܢܬܽܘܢ ܘܰܒܕܳܪ̈ܳܬܳܐ ܩܰܕܺܝ̈ܫܳܬܳܐ ܕܒܰܝܬܶܗ ܕܰܐܠܗܐ ܩܳܝܡܺܝܢ ܐܢܬܽܘܢ. ܘܟܠ ܟܪ ܕܬܺܐܙܽܠ̱ܘܢ ܒܰܝܬܶܗ ܗܽܘ ܕܰܐܠܗܐ. ܡܶܛܠ ܕܰܦܬܰܟܪ̈ܶܐ ܡ̣ܢ ܒܺܝܫܳܐ ܐܶܬܥܒܶܕܘ. ܐܰܢܬܽܘܢ ܒܳܬܰܪ ܒܺܝܫܳܐ ܠܐ ܬܶܛܥܽܘܢ.
ܐܶܠܐ ܫܰܒܰܚܘ ܠܡܳܪܝܳܐ ܡܶܛܠ ܕܛܳܒ ܗܽܘ ܘܰܙܡܰܪܘ ܠܰܫܡܶܗ ܡܶܛܠ ܕܒܰܣܺܝܡ ܗܽܘ. ܒܛܳܒܳܐ ܠܰܝܬ ܒܺܝܫܬܳܐ. ܘܗܰܘ ܕܦܳܠܰܚ ܥܡ ܛܳܒܳܐ: ܛܳܒܳܐ ܗܳܘܶܐ ܐܳܦ ܗܽܘ. ܘܒܰܣܺܝܡܳܐ ܡ̇ܚ̣ܰܪܰܪ ܗܽܘ ܡ̣ܢ ܡܰܪܺܝܪܳܐ. ܥܰܡ ܛܳܒܳܐ ܡܳܕܶܝܢ ܫܰܦܺܝܪ ܠܡܶܦܠܰܚ. ܘܠܐ ܥܰܡ ܐܰܠܗ̈ܐ ܒܺܝ̈ܫܶܐ. ܘܟܕ ܨܒܳܐ ܕܢܶܗܘܶܐ ܠܶܗ ܝܳܪܬܽܘܬܳܐ.
ܡܶܛܠ ܕܰܠܝܰܥܩܽܘܒ ܓܒܳܐ ܠܶܗ ܡܳܪܝܳܐ. ܘܺܝܣܪܳܐܝܠ ܠܟܶܢܫܶܗ. ܘܡܶܫܟܰܚ ܗܘܳܐ ܓܝܪ ܐܠܘ ܫܦܰܪ ܠܶܗ. ܕܳܐܦ ܡܶܨܪ̈ܳܝܶܐ ܘܰܟܢܰܥܢܳܝ̈ܐ ܥܰܡܶܗ ܢܶܥܒܶܕ ܐܶܢܘܢ.ܐܠܐ ܡܶܛܠ ܚܽܘܒܳܐ ܕܰܐܒܳܗܴ̈ܬܳܐ ܥܳܒܶܕ. ܓܒܳܐ ܠܝܰܥܩܽܘܒ ܘܠܺܝܣܪܳܐܝܠ. ܕܗܽܘ ܢܶܗܘܶܐ ܥܰܡܳܐ ܩܰܕܺܝܫܳܐ ܘܟܳܗܢܳܝܳܐ. ܗܳܠܝܢ ܚܽܘܫܳܒ̈ܐ ܐܝ̣ܬ ܗܘܳܐ ܠܰܢܒܺܝܐ. ܕܢܶܥܒܶܕ ܒܥܰܡܳܐ ܣܶܢܐܬܳܐ ܕܰܐܠܗ̈ܐ. ܘܢܰܪܬܶܐ ܐܶܢܘܢ ܠܡܶܦܠܰܚ ܠܰܐܠܗܐ ܪܰܒܳܐ. ܟܰܕ ܩܳܪܶܐ ܠܗܽܘܢ ܠܡܺܐܠܰܦ ܥܰܠ ܪܰܒܽܘܬܳܐ ܕܚܰܝܠܳܐ ܕܰܐܠܗܐ. ܘܥܠ ܡܶܬܡܰܨܝܳܢܽܘܬܶܗ ܐܡ̣ܪ.
ܡܶܛܠ ܕܝܳܕܰܥ ܐܢܳܐ ܕܪܰܒ ܗܽܘ ܡܳܪܝܳܐ ܡܳܪܰܢ ܥܰܠ ܟܽܠܗܘܢ ܐܠܗ̈ܐ. ܗܳܕܐ ܕܶܝܢ ܐܡ̣ܪ. ܟܕ ܫܳܡܰܥ ܥܰܡܳܐ ܕܓܰܒܪܳܐ ܡܰܠܟܳܐ ܘܰܢܒܺܝܐ ܐܡ̣ܪ. ܕܪܰܒ ܗܽܘ ܐܠܗܐ ܕܺܝܣܪܳܐܝܠ ܡ̣ܢ ܟܽܠܗܽܘܢ ܐܰܠܗ̈ܐ ܢܰܫܰܪ ܘܠܐ ܢܶܬܦܰܠܰܓ ܥܰܠ ܡܶܠܬܶܗ. ܘܢܺܐܡܪܽܘܢ ܥܰܡܳܐ ܚܰܕ ܠܚܰܕ. ܕܠܰܝܬ ܕܦܳܚܶܡ ܒܪܰܒܽܘܬܳܐ ܥܰܡ ܡܳܪܝܳܐ ܐܰܠܳܗܰܢ: ܕܗܐ ܢܒܺܝܳܐ ܘܡܰܠܟܳܐ ܩܳܥܶܐ ܕܠܰܝܬ ܐܰܟܘܳܬܶܗ. ܐܡ̇ܪ ܗܘܳܐ ܕܶܝܢ ܢܒܺܝܐ ܕܪܰܒ ܡܶܢܟܽܠ ܐܰܠܗ̈ܐ. ܐܶܠܐ ܟܕ ܠܡ ܐܰܠܗ̈ܐ ܠܰܝܬ ܒܗܽܘܢ ܚܰܝܠܳܐ ܠܡܶܥܒܰܕ ܥܒܳܕ̈ܐ. ܘܠܐ ܒܰܫܡܰܝܳܐ ܫܰܠܺܝܛܺܝܢ ܘܠܳܐ ܒܰܐܪܥܳܐ. ܠܘ ܠܗܳܠܝܢ ܦܳܚܶܡ ܐܰܠܗܳܐ ܕܺܝܠܰܢ. ܡܶܛܠ ܕܰܒܟܽܠ ܫܰܠܺܝܛ.
ܘܟܠ ܕܨܳܒܶܐ ܡܳܪܝܳܐ ܥܳܒܶܕ ܒܰܫܡܰܝܳܐ ܘܒܰܐܪܥܳܐ. ܒܰܝܰܡܡ̈ܐ ܘܰܒܟܽܠܗܽܘܢ ܬܗܽܘܡ̈ܐ. ܗܳܠܝܢ ܠܡ ܥܒܳܕ̈ܐ ܐܶܢܘܢ ܕܚܰܝܠܶܗ.
ܘܡܰܣܶܩ ܥܢܳܢܷ̈ܐ ܡܶܢ ܣܰܘ̈ܦܶܝܗ̇ ܕܰܐܪܥܳܐ ܘܒܰܪ̈ܩܶܐ ܠܡܶܛܪܳܐ ܥܒܰܕ. ܘܡܰܦܶܩ ܪ̈ܽܘܚܶܐ ܡ̣ܢ ܐܰܘܨܪ̈ܶܐ. ܗܳܠܝܢ ܓܶܝܪ ܫܽܘܘܕܳܥ̈ܐ ܐܶܢܘܢ ܕܡܰܠܦܺܝܢ. ܕܗܰܘ ܕܥܳܒܶܕ ܗܳܠܝܢ. ܗܽܘܝܽܘ ܪܺܝܫܺܝܬܳܐ ܕܟܽܠܡܶܕܡ. ܢܶܒܥܶܐ ܕܝܢ ܚܢܰܢ ܕܡܳܢܳܐ ܗܝ ܥܶܠܬܳܐ ܕܡ̣ܢ ܣܰܘܦ̈ܐ ܕܰܐܪܥܳܐ ܢܶܣ̈ܩܳܢ ܥܢܴ̈ܢܶܐ. ܘܡܳܢܰܐ ܗܘ ܬܘܒ ܟܝܳܢܳܐ ܕܰܥܢܴ̈ܢܶܐ. ܦܽܘܩܕܳܢܳܐ ܗܳܟܝ̣ܠ ܕܰܐܠܗܐ ܠܒܰܪ ܡ̣ܢ ܐܰܪܥܳܐ ܟܰܢܶܫ ܐܶܢܽܘܢ ܠܝܰܡ̈ܡܶܐ. ܘܰܒܣܰܘܦ̈ܐ ܒܰܪ̈ܳܝܶܐ ܬܰܚܶܡ ܐܢܘܢ ܒܓܰܘ ܒܶܝܬ ܟܢܽܘܫܝܳܐ ܗܰܘ ܕܰܦܪܰܫ ܠܗܽܘܢ. ܘܡܶܛܠ ܕܰܥܢܳܢܷ̈ܐ ܡܶܢ ܡܰܝܴ̈ܐ ܘܡ̣ܢ ܐܳܐܰܪ ܡܶܬܩܰܝܡܺܝܢ. ܘܰܒܣܰܘܦ̈ܐ ܕܰܬܚܽܘܡ̈ܐ ܕܝܰܒܺܝܫܬܳܐ ܡ̣ܢ ܐܳܐܰܪ ܕܰܠܥܶܠ ܡ̣ܢ ܝܰܡܳܐ. ܟܕ ܢܳܫܒܳܐ ܒܶܗ ܡܶܬܥܰܒܶܐ. ܘܩܳܛܰܪ ܩܰܠܝ̣ܠ ܡ̣ܢ ܩܰܛܺܝܢܽܘܬܶܗ. ܘܰܒܪܶܡܙܳܐ ܕܰܐܠܗܳܐ ܛܳܥ̈ܢܳܢ ܡܰܝܴ̈ܐ ܡ̣ܢ ܝܰܡܳܐ ܘܣܳܠܩܴ̈ܢ ܡ̣ܢ ܣܰܘ̈ܦܶܝܗ̇ ܕܰܐܪܥܳܐ ܘܡܶܬܥܰܠܝܴ̈ܢ ܠܥܽܘ̈ܒܶܐ ܥܶܠܳܝ̈ܐ ܕܳܐܐܰܪ. ܘܒܳܪܩܺܝܢ ܒܰܪ̈ܩܶܐ ܢܽܘܪ̈ܳܢܳܝܶܐ ܒܕܽܘܡܝܳܐ ܕܣܰܝ̈ܦܽܘܢܶܐ ܘܡܰܣܩܺܝܢ ܡܰܝܴ̈ܐ ܘܡܳܠܶܝܢ ܥܽܘܒܳܐ ܕܰܥܢܳܢ̈ܐ. ܘܗܳܝܕܶܝܢ ܒܚܰܝܠܳܐ ܚܰܡܺܝܡܳܐ. ܕܰܡܕܰܒܰܪ ܒܪܶܗܛܳܐ ܩܰܠܺܝܠܳܐ. ܦܳܪܣܺܝܢ ܠܗܶܝܢ ܒܰܪ̈ܩܶܐ ܒܪܶܡܙܳܐ ܕܰܐܠܗܳܐ ܥܰܠ ܐܰܪܥܳܐ. ܐܶܠܐ ܠܥܶܠ ܡ̣ܢ ܡܰܝܴ̈ܐ ܡܪܰܚܦܳܐ ܪܽܘܚܳܐ. ܐܰܝܟܰܢܳܐ ܕܳܐܦ ܡ̣ܢ ܩܕܺܝܡ ܗܳܟܰܢܳܐ ܗܘܳܬ. ܘܰܟܝܳܢܳܐ ܗܰܘ ܕܪܽܘܚܳܐ ܠܳܐ ܓܳܡܰܪ. ܬܗܽܘܡ̈ܐ ܓܝܪ ܡܶܬܩܪܶܝܢ ܐܰܘܨܪ̈ܶܐ ܡܰܢ ܐܝܟ ܡܶܠܬܶܗ ܕܰܟܬܳܒܳܐ. ܐܡ̣ܪ ܐܰܠܗܳܐ ܒܫܽܘܐܳܠܳܐ ܠܘܬ ܐܺܝܽܘܒ. ܥܶܠܶܬ ܠܰܐܘܪ̈ܨܶܐ ܕܬܰܠܓܳܐ. ܘܰܐܘܨܪ̈ܶܐ ܕܒܰܪܕܳܐ ܚܙܰܝܢ ܠܟ. ܕܰܢܛܺܝܪܺܝܢ ܐܶܢܘܢ ܠܙܰܒܢܳܐ ܕܽܐܘܠܨܳܢܳܐ. ܘܰܠܝܰܘܡܳܐ ܕܬܰܟܬܽܘܫܳܐ ܕܰܩܪܳܒܳܐ (ܐܝܘܒ ܠܚ: ܟܒ-ܟܓ). ܬܰܠܓܳܐ ܘܒܰܪܕܳܐ ܘܓܰܠܝܳܐ ܗܝ ܡ̣ܢ ܐܰܝܟܳܐ ܣܳܠܶܩ ܡܶܛܪܳܐ ܘܣܳܠܩܺܝܢ. ܘܡܶܢ ܒܳܬܰܪ ܕܶܐܡܰܪ ܢܒܺܝܐ ܩܰܕܺܝܫܳܐ ܕܗܳܠܝܢ ܥܒܳܕ̈ܐ ܥܳܒܶܕ ܐܰܠܗܐ. ܟܕ ܣܳܗܶܕ ܥܠ ܚܰܝܠܶܗ ܕܰܒܟܠ ܫܰܠܝ̣ܛ. ܘܰܠܟܠ ܐܰܚܝ̣ܕ ܘܰܠܒܝ̣ܟ. ܘܡ̣ܢ ܪܶܡܙܶܗ ܡܶܬܦܰܪܢܣܺܝܢ. ܘܟܕ ܦܢܳܐ ܥܰܠ ܥܰܡܳܐ ܕܢܰܪܬܶܐ ܐܶܢܘܢ. ܕܡܶܛܠܳܬܗܘܢ ܝܰܬܝ̣ܪ ܡ̣ܢ ܥܰܡܡ̈ܐ ܡܚܰܘܶܐ ܒܛܺܝܠܽܘܬܶܗ. ܟܕ ܓܝܪ ܦܪܰܩ ܗܘܳܐ ܠܰܐܒܳܗܰܝ̈ܗܘܢ ܡ̣ܢ ܫܽܘܥܒܳܕܳܐ ܕܡܶܨܪܶܝܢ ܘܰܕܦܶܪܥܽܘܢ.
ܘܰܡܚܳܐ ܠܒܽܘܟܪ̈ܶܝܗ̇ ܘܰܒܢܰܝ̈ܢܳܫܳܐ ܘܰܒܥܺܝܪܳܐ. ܘܫܰܕܰܪ ܐܳܬܘ̈ܬܶܗ ܠܓܰܘܳܗ̇ ܕܡܶܨܪܶܝܢ. ܥܰܠ ܦܶܪܥܽܘܢ ܘܥܰܠ ܟܽܠܗܽܘܢ ܥܰܒ̈ܕܰܘܗܝ. ܗܳܠܝܢ ܠܰܡ ܥܒܰܕ ܟܰܕ ܦܪܰܩ ܠܰܐܒܳܗܱ̈ܝܢ. ܘܡܶܛܠ ܕܠܰܝܬ ܚܰܝܠܳܐ ܒܰܐܠܗ̈ܐ ܕܥܰܡܡ̈ܐ. ܠܳܐ ܩܳܡܘ ܠܽܘܩܒܰܠ ܚܰܝܠܶܗ ܦܬܰܟܪ̈ܶܐ ܕܡܶܨܪܶܝܢ. ܟܕ ܡܰܦܶܩ ܗܘܳܐ ܥܰܡܶܗ ܡ̣ܢ ܒܰܝܢܳܬ ܐܠܗ̈ܐ ܕܡܶܨܪ̈ܳܝܶܐ. ܘܗܳܠܝܢ ܪܰܘܪ̈ܒܳܬܳܐ ܕܰܥܒܰܕ ܡܶܛܠܳܬܟܽܘܢ ܟܰܕ ܦܳܪܶܫ ܠܟܽܘܢ ܡܶܢ ܒܰܝܢܳܬ ܡܶܨܪ̈ܳܝܶܐ. ܘܟܰܕ ܐܰܝܬܺܝܟܽܘܢ ܝܶܫܽܘܥ ܒܰܪܢܽܘܢ ܠܡܶܥܰܠ ܠܰܐܬܪܳܐ ܕܰܟܢܰܥܢܴ̈ܝܶܐ ܘܰܠܡܺܐܪܬܶܗ. ܚܰܘܺܝ ܕܰܟܡܳܐ ܡܰܚܶܒ ܠܟܽܘܢ ܝܰܬܺܝܪ ܡܶܢ ܥܰܡܡ̈ܐ ܐܚܪ̈ܳܢܶܐ. ܠܗܳܢܘܢ ܓܶܝܪ ܡܩܰܦܳܚܽܘ ܡܩܰܦܰܚ ܗܘܳܐ. ܘܡܶܚܪܰܒ ܚܳܪܶܒ ܗܘܳܐ ܠܗܽܘܢ. ܘܰܚܙܰܘ ܐܰܒܳܗܱ̈ܝܢ ܐܺܝܕܶܗ ܬܰܩܺܝܦܬܳܐ ܘܰܕܪܳܥܶܗ ܪܳܡܳܐ ܕܰܡܙܰܝܶܢ ܘܥܳܒܶܕ ܩܪܳܒܳܐ ܚܠܳܦܰܝܢ.
ܒܗܳܝ ܕܰܡܚܳܐ ܠܥܰܡܡ̈ܐ ܣܰܓܺܝ̈ܐܐ. ܘܩܰܛܶܠ ܡܰܠܟ̈ܐ ܥܰܫܺܝ̈ܢܶܐ. ܠܣܺܝܚܽܘܢ ܡܰܠܟܳܐ ܕܳܐܡܽܘܪ̈ܳܝܶܐ ܘܰܠܥܽܘܓ ܡܰܠܟܳܐ ܕܒܰܝܫܳܢ. ܘܰܠܟܽܠܗܶܝܢ ܡܰܠܟܘܴ̈ܬܳܐ ܕܰܟܢܰܥܢ. ܟܽܠܗܶܝܢ ܗܳܠܝܢ ܡܰܠܟ̈ܐ ܚܪܰܒ ܡܳܪܝܳܐ ܩܕܳܡ ܥܰܡܶܗ ܐܶܡܰܪ ܢܒܺܝܐ. ܠܘ ܡܶܛܠ ܕܗܳܢܽܘܢ ܕܝܳܪܬܺܝܢ ܫܳܘܶܝܢ ܗܘܰܘ. ܐܶܠܐ ܗܳܢܽܘܢ ܕܡܶܬܩܰܛܠܺܝܢ ܗܘܰܘ ܚܰܛܳܝܺܝܢ ܗܘܰܘ. ܘܠܳܐ ܡ̣ܢ ܝܳܪܬܽܘܬܗܽܘܢ ܛܳܪܶܕ ܗܘܳܐ ܠܗܽܘܢ. ܡܶܛܠܡܳܢܳܐ ܬܠܳܬܺܝܢ ܘܚܰܕ ܗܳܘܶܝܢ ܗܘܰܘ ܡܰܠܟ̈ܐ ܕܩܰܛܶܠ ܗܘܳܐ ܡܶܢܗܽܘܢ ܝܶܫܽܘܥ ܒܰܪܢܽܘܢ. ܒܰܠܚܽܘܕ ܟܰܕ ܫܡܳܗ̈ܐ ܕܰܬܪܶܝܢ ܡܰܠܟ̈ܐ ܐܰܕܟܰܪ ܢܒܺܝܳܐ. ܐܪܳܙܳܐ ܗܘܳܐ ܓܝܪ ܐܰܝܟܰܢܳܐ ܕܟܰܕ ܣܰܓܺܝ̈ܐܐ ܗܘܰܘ ܪ̈ܺܝܫܳܢܶܐ ܕܰܡܪܰܕܘ. ܬܪܶܝܢ ܐܶܢܘܢ ܒܰܠܚܽܘܕ ܕܡܶܫܬܰܡܗܺܝܢ ܗܳܢܰܘ ܡܰܘܬܳܐ ܘܣܳܛܳܢܳܐ. ܘܥܰܠܗܳܝ ܐܶܡܰܪ ܢܒܺܝܳܐ ܥܰܠ ܥܰܡܰܢܽܘܐܝܠ.
ܘܰܬܕܽܘܫ ܐܰܪܝܳܐ ܘܬܰܢܺܝܢܳܐ. ܠܗܳܠܶܝܢ ܬܪܶܝܢ ܕܳܫܰܬ ܘܪܶܨܰܬ ܥܶܩܒܶܗ ܕܰܨܠܺܝܒܳܐ. ܡܶܛܠܗܳܢܐ ܠܣܺܝܚܽܘܢ ܘܰܠܥܽܘܓ ܡܽܘܫܶܐ ܩܛܰܠ. ܐܰܝܟ ܕܳܐܦ ܥܰܡܰܢܽܘܐܝܠ ܕܳܫ ܠܰܐܪܝܳܐ ܘܬܰܢܺܝܢܳܐ. ܘܝܶܫܽܘܥ ܒܰܪܢܽܘܢ ܩܛܰܠ ܠܗܳܠܶܝܢ ܡܰܠܟ̈ܐ ܕܠܐ ܐܶܬܟܬܶܒܘ ܫܡܳܗܰܝ̈ܗܽܘܢ. ܗܳܠܝܢ ܕܶܐܡܰܪ ܢܒܺܝܐ ܬܢܳܢ:
ܘܝܰܗܒ ܐܰܪܥܗܽܘܢ ܝܳܪܬܽܘܬܳܐ ܠܺܝܣܪܳܐܝܠ ܥܰܒܕܶܗ. ܡܳܪܝܳܐ ܫܡܳܟ ܠܥܳܠܰܡ ܡܳܪܝܳܐ ܕܽܘܟܪܳܢܳܟ ܠܕܳܪܕܳܪ̈ܺܝܢ. ܡܶܛܠ ܕܕܳܐܶܢ ܡܳܪܝܳܐ ܠܥܰܡܶܗ ܘܰܒܥܰܒ̈ܕܰܘܗܝ ܡܬܶܒܰܝܰܐ. ܒܗܳܝ ܕܡܳܪܝܳܐ ܫܡܳܟ ܠܥܳܠܰܡ ܡܳܪܝܳܐ ܕܽܘܟܪܳܢܳܟ ܠܕܳܪܕܳܪ̈ܺܝܢ. ܥܰܠ ܕܰܢܚܰܘܶܐ ܠܥܰܡܶܗ ܕܠܳܐ ܥܳܒܰܪ ܥܰܡ ܐܰܠܗ̈ܐ ܣܪ̈ܺܝܩܶܐ. ܘܳܕܠܳܐ ܫܳܒܶܩ ܠܥܰܡܶܗ ܕܠܳܐ ܕܺܝܢܳܐ ܘܺܐܝܬ ܠܶܗ ܕܢܶܬܚܙܶܐ ܒܰܥ̈ܒܳܕܰܘܗܝ܆ ܘܗܳܕܐ ܠܰܝܬ ܠܰܐܠܗ̈ܐ ܕܰܓܳܠܰܝ̈ ܫܡܳܐ ܕܢܶܥܒܕܽܘܢ ܠܘܳܬ ܣܳܓܽܘܕܰܝ̈ܗܽܘܢ ܡܶܛܠ ܕܠܰܘ ܚܰܝ̈ܐ ܐܶܢܽܘܢ ܐܠܐ ܡܺܝ̈ܬܶܐ ܘܰܣܦܺܝ̈ܩܶܐ.
ܦܬܰܟܪ̈ܶܐ ܕܥܰܡ̈ܡܶܐ ܣܺܐܡܳܐ ܘܕܰܗܒܳܐ ܥܒܳܕ ܐܺܝܕܰܝܴ̈ܐ ܕܒܰܪܢܳܫܳܐ. ܦܽܘ̈ܡܶܐ ܐܝ̣ܬ ܠܗܽܘܢ ܘܠܳܐ ܡܡܰܠܠܺܝܢ. ܥܰܝ̈ܢܶܐ ܐܝܼܬ ܠܗܽܘܢ ܘܠܳܐ ܚܳܙܶܝܢ. ܐܶܕ̈ܢܶܐ ܐܝ̣ܬ ܠܗܽܘܢ ܘܠܳܐ ܫܳܡܥܺܝܢ. ܘܠܰܝܬ ܪܽܘܚܳܐ ܒܦܽܘܡܗܽܘܢ. ܐܰܟܘܳܬܗܽܘܢ ܢܶܗܘܽܘܢ ܥܳܒܽܘ̈ܕܰܝܗܽܘܢ. ܘܟܽܠܗܽܘܢ ܕܰܬܟܺܝܠܺܝܢ ܥܠܰܝܗܽܘܢ. ܐܰܝܟܰܢܳܐ ܕܩܰܕܡܶܬ ܐܶܡܪܶܬ. ܠܽܘܩܒܰܠ ܕܶܚ̈ܠܳܬܳܐ ܣܪ̈ܺܝܩܳܬܳܐ ܕܰܐܠܗ̈ܐ ܕܰܓܳܠܰܝ̈ ܫܡܳܐ. ܙܰܡܰܪ ܕܰܘܝܕ ܬܶܫܒܽܘܚܬܳܐ ܗܳܕܐ. ܘܥܰܠܗܳܝ ܡܶܢ ܒܳܬܪ ܕܰܐܥܺܝܪ ܛܢܳܢܶܗ ܕܥܰܡܳܐ ܠܰܡܫܰܒܳܚܽܘ ܠܰܐܠܗܳܐ. ܘܰܣܕܰܪ ܩܕܳܡܰܝܗܽܘܢ ܥܒܴ̈ܕܶܐ ܘܰܓܒܰܪ̈ܘܳܬܳܐ ܕܚܰܝܠܶܗ ܘܰܕܫܽܘܠܛܳܢܶܗ. ܘܰܒܛܺܝܠܽܘܬܳܐ ܕܚܰܘܺܝ ܡܶܛܠ ܝ̣ܣܪܳܐܝܠ ܘܰܕܦܰܪܩܶܗ ܡܶܢ ܡܶܨܪܶܝܢ ܘܝܰܗܒ ܠܶܗ ܐܰܪܥܳܐ ܕܰܟܢܰܥܢܳܝ̈ܐ ܝܽܘܪܬܳܢܳܐ. ܐܳܬܶܐ ܗܳܫܳܐ ܠܕܺܝܢܳܐ ܕܰܢܦܰܪܣܶܐ ܕܰܓܳܠܽܘܬܳܐ ܕܰܐܠܗ̈ܐ ܕܥܰܡܡ̈ܐ ܘܠܐ ܩܳܪܶܐ ܠܗܽܘܢ ܐܠܗ̈ܐ ܐܶܠܐ ܦܬܰܟܪ̈ܶܐ. ܦܽܘܫܳܩܳܐ ܕܶܝܢ ܕܰܦܬܰܟܪܳܐ ܚܒܳܠܰܐ ܗܘ. ܘܥܰܠܗܳܝ ܐܳܡܰܪ ܗܘܳܐ ܠܘܳܬ ܥܰܡܳܐ ܚܽܘܪܘ ܠܰܡ ܒܥܰܝܢܰܝ̈ܗܽܘܢ ܕܠܳܐ ܢܶܚܙ̈ܝܳܢ. ܘܰܒܦܽܘ̈ܡܰܝܗܽܘܢ ܕܠܳܐ ܡܡܰܠܠܺܝܢ. ܘܶܐܕܢܰܝ̈ܗܽܘܢ ܕܠܐ ܥܳܒܪܳܐ ܒܗܶܝܢ ܒܰܪܬ ܩܳܠܳܐ. ܘܫܽܘܛܘ ܘܰܒܣܽܘܪܘ ܐܶܢܘܢ ܘܰܕܚܰܠܘ ܡܶܢ ܛܰܢܦܽܘܬܳܐ ܗܳܕܶܐ. ܘܰܐܡܺܝܪ ܕܗܰܘ ܕܰܡܝܰܩܰܪ ܠܟܺܐܦܳܐ. ܠܶܒܳܐ ܕܟܺܐܦܳܐ ܐܝ̣ܬ ܠܶܗ. ܡܶܛܠ ܕܕܰܗܒܳܐ ܘܣܺܐܡܳܐ ܘܰܢܚܳܫܳܐ ܘܦܰܪܙܠܳܐ ܐܝ̣ܬܰܝܗܽܘܢ. ܕܠܐ ܥܰܝ̈ܢܶܐ ܘܰܕܠܳܐ ܡܶܠܬܳܐ ܘܰܕܠܳܐ ܫܶܡܥܳܐ. ܘܢܺܐܒܰܕ ܡܶܢܗܽܘܢ ܡܰܦܰܩ ܒܪܽܘܚܳܐ ܩܕܳܡ ܕܰܝܳܢܳܐ ܕܟܽܠ. ܐܶܠܐ ܚܢܰܢ ܢܺܐܡܰܪ ܬܰܘ ܢܒܰܪܶܟ ܠܡܳܪܝܳܐ ܕܚܳܙܶܐ ܟܽܠ ܘܺܐܝܬܰܘܗܝ ܚܰܝ̈ܐ ܘܡܶܠܬܳܐ ܘܫܳܡܰܥ ܠܰܕܩܳܪܶܝܢ ܠܶܗ. ܘܨܳܐܶܬ ܚܽܘܫܳܒ̈ܐ ܕܠܶܒܳܐ.
ܕܒܶܝܬ ܝ̣ܣܪܳܐܝܠ ܒܰܪܶܟܘ ܠܡܳܪܝܳܐ. ܕܒܶܝܬ ܐܰܗܪܽܘܢ ܒܰܪܶܟܘ ܠܡܳܪܝܳܐ. ܕܒܶܝܬ ܠܶܘܺܝ ܒܰܪܶܟܘ ܠܡܳܪܝܳܐ. ܕܳܚܠܰܘ̈ܗܝ ܕܡܳܪܝܳܐ ܒܰܪܶܟܘ ܠܡܳܪܝܳܐ. ܒܗܳܠܶܝܢ ܚܒܰܫ ܠܟܽܠܗܽܘܢ ܥܰܡܡ̈ܐ ܘܰܠܟܽܠܗܶܝܢ ܦܶܢܝܴ̈ܬܳܐ ܩܳܪܶܐ ܢܒܺܝܳܐ ܕܰܢܒܰܪ̈ܟܳܢ ܠܡܳܪܝܳܐ. ܐܳܦ ܗܳܟܰܢܳܐ ܓܝܪ ܡܶܫܬܟܰܚ ܩܳܐܷܡ ܣܽܘܟܳܠܳܐ ܕܰܡܫܰܒܚܴ̈ܢܶܐ ܒܳܬܰܪ ܕܺܝܢܳܐ ܘܰܐܪܒܥܳܐ ܛܽܘ̈ܠܩܶܐ ܩܳܝܡܺܝܢ ܡܫܰܒܚܴ̈ܢܶܐ ܒܥܳܠܡܳܐ ܚܰܕܬܳܐ. ܘܡܳܐ ܕܶܐܬܓܠܺܝ ܗܰܘ ܡܰܫܟܢܳܐ ܓܰܠܝܳܐ ܕܠܳܐ ܥܒܺܝܕ ܒܺܐܝܕܰܝܴ̈ܐ ܒܰܫܡܰܝܳܐ. ܒܚܰܕ ܩܳܠܳܐ ܕܠܳܐ ܦܠܺܝܓ ܘܠܳܐ ܡܕܰܘܰܕ: ܩܳܥܶܝܢ ܠܘܳܬ ܐܰܠܗܐ ܐܰܝܟ ܕܶܐܡܰܪ ܢܒܺܝܐ.
ܒܪܺܝܟ ܗܽܘ ܡܳܪܝܳܐ ܡܶܢ ܨܶܗܝܽܘܢ ܗܰܘ ܕܥܳܡܰܪ ܒܽܐܘܪܺܫܠܶܡ. ܗܳܠܶܝܢ ܬܪ̈ܰܝܗܽܘܢ ܫܽܘ̈ܐܳܠܶܐ ܕܗܳܝ ܡܕܺܝܢܬܳܐ ܓܠܺܝܬܳܐ ܐܝ̣ܬܰܝܗܽܘܢ. ܕܒܳܗ̇ ܥܳܡܰܪ ܡܳܪܝܳܐ ܘܒܳܗ̇ ܡܶܬܒܰܪܰܟ. ܕܳܐܦܚܢܰܢ ܢܶܫܬܘܶܐ ܕܡ̣ܢ ܨܶܗܝܽܘܢ ܗܳܝ ܥܶܠܳܝܬܳܐ ܢܒܰܪܶܟ ܠܡܳܪܝܳܐ. ܘܢܶܬܶܠ ܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܝܢ ܘܚܡܫܐ
ܡܰܘܕܰܥ ܥܰܠ ܬܶܕܡܪ̈ܬܳܐ ܕܰܥܒܰܕ ܐܰܠܳܗܳܐ ܠܽܘܩܒܰܠ ܗܳܢܽܘܢ ܕܳܐܡܪܺܝܢ ܕܗܳܘܶܐ ܫܘܠܳܡܳܐ ܠܕܺܝܢܳܐ ܕܰܐܠܳܗܳܐ.
ܡܶܠܬܳܐ ܕܝܽܘ̈ܠܦܳܢܶܐ ܒܟܽܠܙܒܢ ܩܪܳܒܳܐ ܐܝ̣ܬ ܠܳܗ̇ ܠܽܘܩܒܰܠ ܕܰܓ̈ܠܶܐ. ܘܰܒܟܽܠܙܒܰܢ ܡܶܬܚܙܶܐ ܕܠܳܐ ܬܰܚܦܺܝܬܳܐ ܢܶܨܚܳܢܶܗ ܕܰܫܪܳܪܳܐ. ܘܡܰܪ̈ܳܚܶܐ ܠܳܐ ܡܰܚܒܺܝܢ ܠܰܫܪܳܪܳܐ ܘܡܶܛܠܗܳܕܐ ܟܕ ܩܰܕܶܡ ܐܰܟܳܪܳܐ ܒܺܝܫܳܐ ܘܰܙܪܰܥ ܙܺܝ̈ܙܳܢܶܐ ܕܕܰܓܳܠܽܘܬܳܐ. ܙܰܝܶܢ ܠܩܽܘܒܠܶܗ ܠܶܫܳܢܷ̈ܐ ܕܰܢܒܺܝ̈ܐ ܪܽܘܚܳܐ ܕܰܐܠܗܐ. ܕܢܶܥܩܪܽܘܢ ܡܶܢ ܠܶܒܰܘܴ̈ܬܳܐ ܙܰܪܥܳܐ ܒܺܝܫܳܐ ܕܰܢܦܰܠ ܒܺܐܕ̈ܢܰܝܗܘܢ. ܐܝ̣ܬ ܓܝܪ ܝܽܘ̈ܠܦܳܢܶܐ ܕܰܓ̈ܠܶܐ ܒܶܝܬ ܥܰܡܡ̈ܐ ܕܳܐܡܪܺܝܢ. ܕܠܰܘ ܡܶܢ ܐܰܠܗܳܐ ܡܶܬܦܰܪܢܰܣ ܥܳܠܡܳܐ. ܘܠܰܘ ܡܶܢ ܐܰܠܗܐ ܐܶܬܥܒܶܕ. ܘܬܘܒ ܐܝ̣ܬ ܡ̇ܢ ܚܰܢܦ̈ܐ ܕܳܐܡܪܺܝܢ ܕܺܐܝܬ ܐܶܡܰܬܝ ܕܠܰܝܬ ܗܘܳܐ ܥܳܠܡܳܐ. ܘܺܐܝܬ ܐܚܪ̈ܳܢܶܐ ܕܳܐܡܪܺܝܢ ܕܡܶܢ ܢܰܦܫܶܗ ܩܳܡ ܥܳܠܡܳܐ. ܘܠܰܘ ܒܰܚܕܳܐ ܙܒܰܢ ܩܳܡ. ܐܶܠܐ ܙܰܒܢܴ̈ܬܳܐ ܣܰܓܺܝ̈ܐܬܳܐ ܩܳܡ. ܘܰܐܝܟ ܕܩܳܐܷܡ ܡ̣ܢ ܢܰܦܫܶܗ ܥܳܛܶܦ ܘܡܶܫܬܪܶܐ. ܗܳܟܰܢܳܐ ܐܳܦ ܗܳܫܐ ܥܳܛܶܦ ܘܩܳܐܷܡ. ܘܶܐܢ ܐܢܳܫ ܡܫܰܐܷܠ ܕܰܟܡܳܐ ܫܢܰܝܴ̈ܐ ܗܳܘܝܳܐ ܟܽܠ ܙܒܰܢܬܳܐ. ܐܳܡܪܺܝܢ ܕܫܰܒܥܳܐ ܐܰܠܦܺܝ̈ܢ ܕܰܫܢܰܝܴ̈ܐ ܗܳܘܝܳܐ ܙܒܰܢܬܳܐ. ܘܝܰܬܺܝܪܳܐܝ̣ܬ ܒܗܳܠܶܝܢ ܫܽܘܥ̈ܝܳܬܳܐ ܐܚܪ̈ܳܢܝܳܬܳܐ. ܗܳܠܶܝܢ ܦܺܝܠܽܘܣܽܘ̈ܦܐ ܕܡܶܬܩܪܶܝܢ ܕܒܶܝܬ ܕܽܘܪܰܐܬܳܘܣ ܐܶܬܚܰܫܰܚܘ. ܟܕ ܕܶܝܢ ܒܙܰܒܢ̈ܐ ܚܳܐܱܪ ܗܘܳܐ. ܘܒܰܫܟܴ̈ܚܳܬܗܽܘܢ ܡܶܬܒܰܝܰܢ ܗܘܳܐ ܘܰܦܩܰܕ ܠܰܢܒܺܝܳܐ ܕܰܢܙܰܡܰܪ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܠܳܬܺܝܢ ܘܚܰܡܶܫ ܟܰܕ ܫܳܪܶܐ ܘܰܡܒܰܛܶܠ ܒܳܗ̇ ܠܟܽܠܗܶܝܢ ܗܰܦ̈ܟܳܬܳܐ ܕܝܽܘܠܦܴ̈ܢܶܐ ܕܶܐܬܐܶܡܰܪܘ ܡܶܢ ܗܳܠܝܢ. ܘܰܡܫܰܪܶܐ ܕܰܢܫܰܒܰܚ ܘܢܺܐܡܰܪ:
ܐܰܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܪ̈ܰܚܡܰܘܗܝ. ܐܰܘܕܰܘ ܠܰܐܠܳܗ ܐܰܠܳܗ̈ܝ̣ܢ ܕܰܠܥܳܠܰܡ ܪ̈ܰܚܡܰܘܗܝ. ܐܰܘܕܰܘ ܠܡܳܪܶܐ ܡܳܪ̈ܰܘܳܬܳܐ ܕܰܠܥܳܠܰܡ ܪ̈ܰܚܡܰܘܗܝ. ܒܗܳܠܝܢ ܐܰܠܶܦ ܕܡܳܪܝܳܐ ܘܰܐܠܳܗ ܐܰܠܳܗ̈ܝ̣ܢ ܘܡܳܪܶܐ ܡܳܪ̈ܰܘܳܬܳܐ ܡܬܽܘܡܳܐܝ̣ܬ ܐܝ̣ܬܰܘܗܝ. ܘܠܳܐ ܡܶܥܒܰܪ ܥܳܒܰܪ. ܘܕܰܠܥܳܠܰܡ ܩܳܐܷܡ ܘܠܳܐ ܡܶܫܬܪܶܐ. ܘܰܒܚܰܝܠܶܗ ܬܰܠܝܳܐ ܫܡܰܝܳܐ ܘܰܐܪܥܳܐ. ܥܠ ܡܰܝܴ̈ܐ ܪܩܺܝܥܳܐ. ܡܶܛܠܗܳܢܐ ܐܶܡܰܪ ܢܰܘܕܶܐ.
ܠܕܰܥܒܰܕ ܬܶܕܡܪ̈ܳܬܳܐ ܪܰܘܪ̈ܒܳܬܳܐ ܒܰܠܚܽܘܕܰܘܗܝ ܕܰܠܥܳܠܰܡ ܪ̈ܰܚܡܰܘܗܝ. ܠܕܰܥܒܰܕ ܫܡܰܝܳܐ ܒܚܶܟܡܬܶܗ ܕܰܠܥܳܠܰܡ ܪ̈ܰܚܡܰܘܗܝ. ܠܕܰܪܩܰܥ ܐܰܪܥܰܐ ܥܠ ܡܰܝܴ̈ܐ ܕܰܠܥܳܠܰܡ ܪ̈ܰܚܡܰܘܗܝ. ܠܕܰܥܒܰܕ ܢܰܗܺܝܪ̈ܶܐ ܪܰܘܪ̈ܒܶܐ ܕܰܠܥܳܠܰܡ ܪ̈ܰܚܡܰܘܗܝ. ܫܶܡܫܳܐ ܠܫܽܘܠܛܳܢܳܐ ܕܺܐܝܡܳܡܳܐ ܕܰܠܥܳܠܰܡ ܪ̈ܰܚܡܰܘܗܝ. ܣܰܗܪܳܐ ܘܟܰܘ̈ܟܒܶܐ ܠܫܽܘܠܛܳܢܳܐ ܕܠܺܠܝܳܐ ܕܰܠܥܳܠܰܡ ܪ̈ܰܚܡܰܘܗܝ. ܗܳܠܶܝܢ ܥܒܳܕ̈ܐ ܚܰܕ ܒܳܬܰܪ ܚܰܕ ܡܛܰܟܣܳܐܝ̣ܬ ܣܕܰܪ ܐܶܢܘܢ ܢܒܺܝܐ. ܟܕ ܡܚܰܘܶܐ ܕܒܺܐܝܕܳܐ ܕܰܐܠܳܗܳܐ ܐܶܬܥܒܶܕ ܟܽܠܡܶܕܶܡ ܘܠܰܝܬ ܡܶܕܶܡ ܕܩܳܐܷܡ ܡܶܢ ܢܰܦܫܶܗ. ܫܡܰܝܳܐ ܘܰܐܪܥܳܐ ܘܢܰܗܺܝܪ̈ܶܐ. ܦܽܘܩܕܳܢܶܗ ܐܰܝܬܺܝ ܐܶܢܘܢ ܕܢܶܗܘܽܘܢ. ܘܠܘ ܡܶܛܠ ܫܽܘܦܪܗܽܘܢ ܥܒܰܕ ܐܶܢܘܢ. ܐܠܐ ܡܶܛܠ ܪ̈ܰܚܡܰܘܗܝ. ܘܠܐ ܥܒܰܕ ܡܶܕܶܡ ܕܠܳܐ ܪ̈ܰܚܡܶܐ. ܘܶܐܢ ܪܳܕܶܐ ܘܶܐܢ ܩܳܛܶܠ ܒܪ̈ܰܚܡܶܐ ܣܳܥܰܪ. ܘܥܰܠܗܳܝ ܡܰܝܬܶܐ ܢܒܺܝܐ ܘܳܐܡܰܪ:
ܠܕܰܡܚܳܐ ܠܒܽܘܟܪ̈ܶܐ ܕܡܶܨܪܶܝܢ ܕܰܠܥܳܠܰܡ ܪ̈ܰܚܡܰܘܗܝ ܘܰܐܦܶܩ ܠܺܝܣܪܳܐܝܠ ܡ̣ܢ ܒܰܝܢܳܬܗܽܘܢ ܕܰܠܥܳܠܰܡ ܪ̈ܰܚܡܰܘܗܝ ܒܺܐܝܕܳܐ ܥܰܫܺܝܢܬܳܐ ܘܒܰܕܪܳܥܳܐ ܪܳܡܳܐ ܕܰܠܥܳܠܰܡ ܪ̈ܰܚܡܰܘܗܝ. ܠܕܰܦܠܰܓ ܝܰܡܳܐ ܕܣܽܘܦ ܕܰܠܥܳܠܰܡ ܪ̈ܰܚܡܰܘܗܝ. ܟܰܕ ܐܢܳܫ̈ܝ̣ܢ ܥܳܕܠܺܝܢ ܠܗܳܝ ܕܰܡܚܳܐ ܠܒܽܘܟܪ̈ܶܐ ܕܡܶܨܪ̈ܳܝܶܐ ܐܳܡܪܺܝܢ. ܠܡܳܢܳܐ ܠܰܡ ܡܚܳܐ ܠܰܒܢܱ̈ܝܳܐ ܒܰܚܛܳܗ̈ܐ ܕܰܐܒܳܗܰܝ̈ܗܘܢ. ܘܰܠܡܳܢܳܐ ܕܰܡܺܝ ܒܦܶܪܥܽܘܢ ܥܰܘܳܠܳܐ ܥܰܠ ܕܣܳܢܶܐ ܗܘܳܐ ܠܥܰܡܳܐ ܕܺܝܣܪܳܐܝܠ ܘܕܳܚܶܠ ܕܠܳܐ ܢܶܣܓܶܐ. ܦܩܰܕ ܕܢܶܫܬܕܽܘܢ ܝܰܠܽܘܕܰܝ̈ܗܽܘܢ ܒܓܰܘ ܢܰܗܪܳܐ ܕܠܳܐ ܢܺܚܽܘܢ. ܘܰܐܝܟܰܢܳܐ ܡܶܫܬܰܡܥܳܐ ܗܳܝ ܕܰܡܚܳܐ ܠܒܽܘܟܪ̈ܶܐ ܕܰܠܥܳܠܰܡ ܪ̈ܰܚܡܰܘܗܝ. ܐܰܠܗܳܐ ܓܶܝܪ ܠܽܘܩܒܰܠ ܗܳܠܶܝܢ ܣܰܓܺܝ ܒܪ̈ܰܚܡܶܐ ܡܚܳܐ ܠܒܽܘܟܪ̈ܶܐ ܗܳܠܝܢ ܕܡܶܨܪܶܝܢ. ܐܶܠܘ ܓܝܪ ܗܳܟܰܢܳܐ ܠܳܐ ܥܒܰܕ. ܒܽܘܟܪ̈ܶܐ ܕܚܳܝܶܢ ܗܘܰܘ ܝܰܬܝ̣ܪ ܥܰܠ ܐܰܒܳܗܰܝ̈ܗܘܢ ܡܰܪܫܥܺܝܢ ܗܘܰܘ. ܘܠܳܐ ܗܶܢܘܢ ܐܰܒܳܗ̈ܐ ܕܪܽܘܫܥܳܐ ܡܶܬܛܦܺܝܣܺܝܢ ܗܘܰܘ ܠܡܶܕܚܰܠ ܡܶܢ ܐܰܠܳܗܳܐ. ܡܶܛܠܗܳܢܐ ܒܪ̈ܰܚܡܶܐ ܡܚܳܐ ܘܠܘ ܒܰܓܪܽܘܦܝܳܐ ܥܒܰܕ. ܐܶܠܐ ܒܟܠ ܡܰܚ̈ܘܳܢ ܕܰܡܚܳܐ ܠܡܶܨܪ̈ܳܝܶܐ ܠܐ ܥܒܰܪ ܠܗܰܘ ܡܶܢܝܳܢܳܐ ܕܫܰܒܪ̈ܶܐ ܕܶܐܬܚܰܢܰܩܘ ܒܢܰܗܪܳܐ ܡ̣ܢ ܥܶܒܪ̈ܳܝܶܐ. ܘܗܰܘ ܕܰܐܠܶܦ ܦܰܟܳܐ ܚܠܳܦ ܦܰܟܳܐ. ܘܢܰܦܫܳܐ ܚܠܳܦ ܢܰܦܫܳܐ (ܡܦܩܢܐ ܟܐ: ܟܓ-ܟܗ). ܠܐ ܡܚܳܐ ܠܡܶܨܪ̈ܳܝܶܐ ܬܪܶܝܢ ܦܰܟ̈ܐ ܚܠܳܦ ܚܰܕ. ܘܠܐ ܒܽܘܟܪ̈ܶܐ ܝܰܬܝ̣ܪ ܡܶܢ ܡܶܢܝܳܢܳܐ ܕܡܺܝܬܘ ܫܰܒܪ̈ܶܐ ܒܢܰܗܪܳܐ ܡܶܢ ܥܶܒܪ̈ܳܝܶܐ. ܡܳܕܶܝܢ ܦܪܰܥ ܐܰܝܟ ܡܶܕܶܡ ܕܰܥܒܰܕܘ ܗܘܰܘ ܒܰܠܚܽܘܕ. ܡܰܢܽܘ ܐܳܡܰܪ ܕܠܰܘ ܒܪ̈ܰܚܡܶܐ ܥܒܰܕ ܠܘܳܬ ܡܶܨܪ̈ܳܝܶܐ. ܘܡܶܢ ܫܰܪܟܳܢܳܐ ܬܟܰܣ ܐܺܝܕܶܗ. ܗܳܝ ܬܽܘܒ ܕܰܐܦܶܩ ܠܺܝܣܪܳܐܝܠ ܒܺܐܝܕܳܐ ܥܰܫܺܝܢܬܳܐ ܘܒܰܕܪܳܥܳܐ ܪܳܡܳܐ. ܐܪܳܙܳܐ ܕܦܽܘܪܩܳܢܳܐ ܕܥܳܠܡܳܐ ܒܰܒܪܶܗ ܚܰܒܺܝܒܳܐ. ܐܺܝܕܳܐ ܥܰܫܺܝܢܬܳܐ ܘܰܕܪܳܥܳܐ ܪܳܡܳܐ ܥܰܡܰܢܽܘܐܝܠ ܐܝ̣ܬܰܘܗܝ. ܘܰܢܒܺܝ̈ܐ ܡܥܳܕܺܝܢ ܐܶܢܘܢ ܩܳܪܶܝܢ ܠܶܗ ܥܰܡܰܢܘ̇ܐܝܠ. ܐܶܡܰܪ ܓܶܝܪ ܐܶܫܰܥܝܳܐ: ܐܺܝܕܶܗ ܕܡܳܪܝܳܐ ܥܶܒܕܰܬ ܗܳܠܶܝܢ (ܐܫܥܝܐ ܡܐ: ܟ). ܘܬܘܒ ܐܶܡܰܪ ܡܳܪܝܳܐ: ܡܰܢ ܗܰܝܡܶܢ ܠܫܶܡܥܰܢ: ܘܰܕܪܳܥܶܗ ܕܡܳܪܝܳܐ ܠܡܰܢ ܓܝܪ ܐܶܬܓܠܺܝ (ܐܫܥܝܐ ܢܓ: ܐ). ܘܛܽܘܒܳܢܳܐ ܡܽܘܫܶܐ ܐܶܡܰܪ: ܗܳܐ ܐܺܝܕܳܐ ܥܰܠ ܟܽܘܪܣܝܳܐ (ܡܦܩܢܐ ܝܙ: ܝܘ). ܘܰܒܗܳܕܶܐ ܡܰܠܶܦ ܗܘܳܐ ܕܥܰܡܰܢܽܘܐܝܠ ܐܝ̣ܬܰܘܗܝ ܗܰܘ ܕܝܳܬܶܒ ܥܠ ܟܽܘܪܣܝܳܐ ܡܶܢ ܝܰܡܺܝܢܶܗ ܕܰܐܒܳܐ. ܡܙܰܡܪܳܢܳܐ ܐܶܡܰܪ: ܐܶܣܝ̣ܡ ܐܶܝܕܶܗ ܒܝܰܡܳܐ ܘܰܒܢܰܗܪ̈ܰܘܳܬܳܐ (ܡܙܡܘܪܐ ܦܛ: ܟܗ). ܗܳܝܕܶܝܢ ܕܶܐܡܰܪ ܕܰܦܠܰܓ ܝܰܡܳܐ ܕܣܽܘܦ ܝܰܡܳܐ ܡܶܢ ܒܳܬܰܪ ܕܦܰܠܓܶܗ ܬܽܘܒ ܥܛܰܦ ܚܰܝܠܳܐ ܕܰܐܠܗܳܐ ܘܚܰܠܛܶܗ ܐܝܟ ܕܡܶܢ ܩܕܺܝܡ. ܠܰܘ ܡܶܛܠ ܣܽܘܥܪ̈ܳܢܶܐ ܐܶܡܰܪ ܢܒܺܝܳܐ ܐܶܠܐ ܡܶܛܠ ܐܪ̈ܳܙܶܐ. ܝܰܡܳܐ ܓܶܝܪ ܛܽܘܦܣܳܐ ܕܰܥܡܳܕܳܐ ܡܶܬܚܙܶܐ ܗܘܳܐ ܒܶܗ. ܡܶܛܠ ܕܒܰܥܡܳܕܳܐ ܡܶܬܦܰܪܩܺܝܢ ܡܗܰܝܡ̈ܢܶܐ ܘܡܶܬܛܰܒܥܺܝܢ ܡܶܨܪ̈ܳܝܶܐ ܡܶܬܝܰܕܥܴ̈ܢܶܐ ܥܰܡ ܦܶܪܥܽܘܢ ܪܺܝܫܳܐ ܕܰܚܛܺܝܬܳܐ ܐܰܝܟ ܕܶܐܡܰܪ ܢܒܺܝܐ:
ܘܛܰܪܶܦ ܠܦܶܪܥܽܘܢ ܘܰܠܚܰܝܠܶܗ ܒܝܰܡܳܐ ܕܣܽܘܦ ܕܰܠܥܳܠܰܡ ܪ̈ܰܚܡܰܘܗܝ. ܘܶܐܢ ܒܝܰܡܳܐ ܠܳܐ ܡܶܬܚܢܶܩ ܗܘܳܐ ܬܘܒ ܠܒܺܝ̈ܫܳܬܳܐ ܪܰܘܪ̈ܒܳܬܳܐ ܝܰܬܺܝܪ ܡܶܢ ܩܰܕܡܳܝܴ̈ܬܳܐ ܥܳܒܰܪ ܗܘܳܐ ܒܗܳܢܳܐ ܛܽܘܦܣܳܐ ܐܳܦ ܐܳܟܶܠܩܰܪܨܳܐ ܡܶܬܡܬܶܠ ܡܛܰܪܶܦ ܠܶܗ ܚܰܝܠܳܐ ܕܰܐܠܗܳܐ. ܘܒܳܬܰܪ ܗܳܠܶܝܢ ܐܳܡܰܪ ܕܰܘܝܕ:
ܠܕܰܕܒܰܪ ܥܰܡܶܗ ܒܡܰܕܒܪܳܐ ܕܰܠܥܳܠܰܡ ܪ̈ܰܚܡܰܘܗܝ. ܒܪܰܡ ܣܰܓܺܝ̈ܐܬܳܐ ܐܰܣܟܶܠܘ ܥܶܒܪ̈ܳܝܶܐ ܒܡܰܕܒܪܳܐ ܘܣܰܝܒܰܪ ܐܶܢܘܢ ܐܰܠܗܐ. ܘܶܐܢܗܽܘ ܕܰܒܪ̈ܰܚܡܶܐ ܠܳܐ ܡܶܬܚܰܫܰܚ ܗܘܳܐ ܠܟܽܠܗܽܘܢ ܡܓܰܡܰܪ ܘܰܡܣܺܝܦ ܗܘܳܐ. ܐܰܝܟ ܕܶܐܡܰܪ ܠܡܽܘܫܶܐ: ܫܒܽܘܩܰܝܢܝ ܕܶܐܥܛܶܐ ܐܶܢܽܘܢ ܘܶܐܥܒܕܳܟ ܠܥܰܡܳܐ ܕܪܰܒ ܘܥܰܫܺܝܢ ܡܶܢܗܽܘܢ (ܡܦܩܢܐ ܠܒ: ܝ). ܘܟܰܕ ܐܰܦܺܝܣ ܡܽܘܫܶܐ ܠܘܳܬ ܐܰܠܗܐ ܥܰܠܗܳܕܐ ܩܰܒܠܶܗ ܘܰܫܒܰܩ ܠܥܰܡܳܐ ܡܶܛܠ ܕܰܒܪ̈ܰܚܡܶܐ ܡܕܰܒܰܪ ܗܘܳܐ. ܘܒܳܬܰܪ ܕܰܛܥܶܢ ܥܰܣܩܽܘܬܶܗ ܕܥܰܡܳܐ ܩܪܶܒ ܕܢܶܪܕܶܐ ܠܥܰܡܡ̈ܐ ܥܽܘܪ̈ܠܶܐ ܕܰܢܓܰܡܰܪ ܒܚܰܪܒܳܐ ܠܡܰܠܟܰܝ̈ܗܽܘܢ. ܐܰܝܟ ܕܶܐܡܰܪ ܢܒܺܝܳܐ.
ܠܕܰܡܚܳܐ ܠܡܰܠܟ̈ܐ ܪܰܘܪ̈ܒܶܐ ܕܰܠܥܳܠܰܡ ܪ̈ܰܚܡܰܘܗܝ. ܩܰܛܶܠ ܡܰܠܟ̈ܐ ܥܰܫܺܝ̈ܢܶܐ ܕܰܠܥܳܠܰܡ ܪ̈ܰܚܡܰܘܗܝ. ܠܣܺܝܚܽܘܢ ܡܰܠܟܳܐ ܕܳܐܡܽܘܪ̈ܳܝܶܐ ܕܰܠܥܳܠܰܡ ܪ̈ܰܚܡܰܘܗܝ. ܘܰܠܥܽܘܓ ܡܰܠܟܳܐ ܕܒܰܝܫܳܢ ܕܰܠܥܳܠܰܡ ܪ̈ܰܚܡܰܘܗܝ. ܘܝܰܗܒ ܐܰܪܥܗܽܘܢ ܝܽܘܪܬܳܢܳܐ ܕܰܠܥܳܠܰܡ ܪ̈ܰܚܡܰܘܗܝ. ܝܳܪܬܽܘܬܳܐ ܠܺܝܣܪܳܐܝܠ ܥܰܒܕܶܗ ܕܰܠܥܳܠܰܡ ܪ̈ܰܚܡܰܘܗܝ. ܘܗܳܠܶܝܢ ܬܘܒ ܒܪ̈ܰܚܡܶܐ ܐܶܬܚܰܫܰܚ ܥܰܡܗܽܘܢ. ܘܟܶܢ ܩܰܛܠ ܐܶܢܽܘܢ. ܟܕ ܐܰܦܶܩ ܠܺܝܣܪܳܐܝܠ ܡܶܢ ܡܶܨܪܶܝܢ . ܒܟܽܠܗܶܝܢ ܐܰܬܪ̈ܰܘܳܬܳܐ ܕܰܟܢܰܥ̈ܢܳܝܶܐ ܢܦܰܩ ܛܶܒܳܐ ܗܳܢܐ ܘܺܝܠܶܦܘ ܐܳܡܽܘܪ̈ܳܝܶܐ ܘܚܺܝܬܳܝ̈ܐ ܕܰܒܚܰܝ̈ܠܶܐ ܘܰܓܒܰܪ̈ܘܳܬܳܐ ܦܪܰܩ ܐܰܠܗܳܐ ܠܥܰܡܳܐ ܡܶܢ ܡܶܨܪܶܝܢ. ܘܰܫܡܰܥܘ ܝܳܒܽܘܣܳܝ̈ܐ ܘܦܳܪ̈ܙܳܝܶܐ. ܕܰܐܘܒܶܫ ܡܳܪܝܳܐ ܡܰܝܴ̈ܐ ܕܝܰܡܳܐ ܕܣܽܘܦ ܩܕܳܡ ܥܶܒܪ̈ܳܝܶܐ. ܘܣܳܗܕܳܐ ܠܡܶܠܬܰܢ ܪܳܚܳܒ ܙܳܢܺܝܬܳܐ ܐܳܦ ܓܶܒܥܽܘ̈ܢܳܝܶܐ. ܗܳܝ ܡܰܢ ܕܳܐܡܪܳܐ ܗܘܳܬ ܠܓܳܫܽܘܫ̈ܐ ܕܫܰܕܰܪ ܝܶܫܽܘܥ ܒܰܪܢܽܘܢ. ܕܝܶܕܥܶܬ ܕܰܐܫܠܡܳܗ̇ ܠܟܽܘܢ ܡܳܪܝܳܐ ܠܰܐܪܥܳܐ ܗܳܕܐ. ܘܢܶܦܠܰܬ ܕܶܚܠܰܬܟܽܘܢ ܥܠܰܝܢ. ܘܰܕܚܶܠܘ ܟܽܠܗܽܘܢ ܥܳܡܽܘܪ̈ܶܝܗ̇ ܕܰܐܪܥܳܐ ܡܶܢ ܩܕܳܡܰܝܟܽܘܢ. ܟܰܕ ܢܦܰܩܬܽܘܢ ܡܶܢ ܡܶܨܪܶܝܢ. ܘܡܶܕܶܡ ܕܰܥܒܰܕܬܽܘܢ ܠܰܬܪܶܝܢ ܡܰܠܟ̈ܐ ܕܳܐܡܽܘܪ̈ܳܝܶܐ. ܠܣܺܝܚܽܘܢ ܘܰܠܥܽܘܓ ܕܰܚܪܰܒܬܽܘܢ ܐܶܢܘܢ. ܘܟܕ ܫܡܰܥܢ ܙܳܥ ܠܶܒܰܢ. ܘܠܳܐ ܐܶܫܬܰܚܪܰܬ ܪܽܘܚܳܐ ܒܐܢܳܫ ܡܶܢܰܢ ܡܶܢ ܩܕܳܡܰܝܟܽܘܢ ܡܶܛܠ ܕܡܳܪܝܳܐ ܐܰܠܳܗܟܽܘܢ܆ ܗܽܘܝܽܘ ܐܰܠܗܳܐ ܒܰܫܡܰܝܳܐ ܠܥܶܠ ܘܒܰܐܪܥܳܐ ܠܬܰܚܬ (ܝܫܘܥ ܒܪܢܘܢ ܐ: ܛ-ܝܐ). ܘܒܳܬܰܪ ܕܰܚܝܳܬ ܙܳܢܺܝܬܳܐ ܘܗܰܝܡܢܰܬ. ܐܳܦ ܓܶܒܥܽܘܢܴ̈ܝܶܐ ܬܘܒ ܡܚܰܘܶܝܢ ܠܰܢ ܕܝܳܕܥܺܝܢ ܗܘܰܘ ܡܶܕܶܡ ܕܰܥܒܰܕ ܐܰܠܗܳܐ ܠܺܝܣܪܳܐܝܠ. ܘܰܐܝܟܰܢܳܐ ܕܰܟܬܺܝܒ ܘܰܥܢܰܘ ܘܶܐܡܰܪܘ ܠܝܶܫܽܘܥ ܒܰܪܢܽܘܢ ܡܶܫܬܡܳܥܽܘ ܐܶܫܬܡܰܥ ܠܥܰܒ̈ܕܰܝܟ. ܡܶܕܶܡ ܕܦܰܩܶܕ ܐܰܠܗܳܐ ܠܡܽܘܫܶܐ ܥܰܒܕܶܗ ܠܡܶܬܰܠ ܠܟܽܘܢ ܟܽܠܳܗ̇ ܐܰܪܥܳܐ ܘܰܠܡܰܘܒܳܕܽܘ ܠܟܽܠܗܽܘܢ ܥܳܡܽܘܪ̈ܶܐ ܕܰܐܪܥܳܐ ܡܶܢ ܩܕܳܡܰܝܟܽܘܢ. ܘܰܕܚܶܠܢ ܛܳܒ ܡܶܢ ܢܰܦܫܰܢ. ܘܥܰܠܗܳܝ ܐܰܓܰܪ ܥܰܡܳܐ ܒܡܰܕܒܪܳܐ ܐܰܪܒܥܺܝܢ ܫܢ̈ܝ̣ܢ. ܕܰܠܡܳܐ ܬܳܝܒܺܝܢ ܟܢܰܥܢܴ̈ܝܶܐ ܘܡܶܬܦܰܨܶܝܢ ܘܚܳܐܷܝܢ. ܘܒܳܬܰܪ ܐܶܡܰܪ ܡܙܰܡܪܳܢܳܐ:
ܠܕܶܐܬܕܟܰܪܢ ܒܡܽܘܟܳܟܰܢ ܕܰܠܥܳܠܰܡ ܪ̈ܰܚܡܰܘܗܝ. ܘܦܰܪܩܰܢ ܡܶܢ ܒܥܶܠܕ̈ܒܳܒܰܝܢ ܕܰܠܥܳܠܰܡ ܪ̈ܰܚܡܰܘܗܝ. ܗܳܠܝܢ ܐܡ̣ܪ ܡܶܛܠ ܦܽܘܪܩܳܢܶܗ ܕܥܰܡܳܐ ܡܶܢ ܡܶܨܪܶܝܢ. ܟܰܕ ܡܶܬܥܰܗܰܕ ܫܽܘܥܒܳܕܳܐ ܡܰܪܺܝܪܳܐ. ܘܡܽܘܟܳܟܳܐ ܕܥܰܒܕܽܘܬܳܐ ܘܡܶܢ ܦܽܘܠܚܳܢܳܐ ܕܛܺܝܢܳܐ ܘܠܶܒܢ̈ܐ ܚܰܪܰܪ ܐܶܢܘܢ. ܘܗܳܝܕܶܝܢ ܡܙܰܡܰܪ ܥܰܠ ܦܽܘܪ̈ܢܳܣܶܐ ܕܪܰܒܽܘܬܶܗ ܕܡܳܪܝܳܐ ܘܳܐܡܰܪ:
ܠܰܕܝܳܗܶܒ ܡܶܐܟܽܘܠܬܳܐ ܠܟܽܠ ܒܣܰܪ ܕܰܠܥܳܠܰܡ ܪ̈ܰܚܡܰܘܗܝ. ܐܰܘܕܰܘ ܠܰܐܠܳܗܳܐ ܕܒܰܫܡܰܝܳܐ ܕܰܠܥܳܠܰܡ ܪ̈ܰܚܡܰܘܗܝ. ܫܰܦܺܝܪ ܛܽܘܒܳܢܳܐ ܕܰܘܺܝܕ ܡܚܰܬܶܡ ܬܶܫܒܽܘܚܬܳܐ ܗܳܕܐ. ܡܶܢ ܒܳܬܰܪ ܕܰܣܕܰܪ ܒܳܗ̇ ܪܰܘܪ̈ܒܳܬܳܐ ܕܰܥܒܰܕ ܐܰܠܗܐ ܡܶܢܩܕܺܝܡ ܦܢܳܐ ܘܶܐܡܰܪ ܕܗܽܘ ܡܬܰܪܣܶܐ ܠܟܽܠܒܣܰܪ. ܘܡܶܢܶܗ ܚܳܝܶܐ ܟܠ ܢܶܫܡܳܐ ܘܒܰܫܡܰܝܳܐ ܥܳܡܰܪ. ܘܰܠܥܶܠ ܡܶܢܟܽܠ ܐܝ̣ܬܰܘܗܝ ܘܕܺܝܠܶܗ ܐܶܢܘܢ ܪ̈ܰܚܡܶܐ ܘܠܶܗ ܝܳܐܷܐ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܠܬܝܢ ܘܫܬܐ
ܡܩܰܕܶܡ ܐܳܦ ܡܰܘܕܰܥ ܥܰܠ ܫܶܒܝܳܐ ܕܶܐܫܬܒܺܝ ܥܰܡܳܐ ܠܒܳܒܶܝܠ: ܘܐܪܳܙ ܫܒܺܝܬܳܐ ܕܡܶܢ ܐܘܪܶܫܠܶܡ ܥܶܠܝܬܳܐ: ܘܥܰܠ ܡܰܦܽܘܠܬܳܐ ܕܡܶܢ ܦܰܪܕܰܝܣܳܐ.
ܥܰܠ ܪ̈ܰܘܡܶܐ ܥܶܠܳܝ̈ܐ ܕܛܽܘܪ̈ܶܐ ܕܨܶܗܝܽܘܢ ܗܳܝ ܡܶܬܝܰܕܥܳܢܺܝܬܳܐ. ܩܳܝܡܳܐ ܗܘܳܬ ܪܽܘܚܳܐ ܕܰܢܒܺܝ̈ܐ ܘܰܡܚܰܘܝܳܐ ܠܗܽܘܢ ܒܨܶܒܥܳܐ ܐܰܠܳܗܳܝܬܳܐ. ܐܰܝܠܶܝܢ ܕܰܥܬܺܝ̈ܕܳܢ ܗܘܱ̈ܝ ܠܡܶܐܬܳܐ ܥܰܠ ܥܰܡܳܐ ܕܺܝܣܪܳܐܝܠ ܡܶܛܠ ܚܛܳܗܰܘ̈ܝ. ܥܠ ܓܰܝܣܳܐ ܘܫܶܒܝܳܐ ܕܡܶܢ ܥܰܡ̈ܡܶܐ ܕܒܰܚܕܳܪ̈ܰܝܗܽܘܢ. ܘܥܰܠ ܓܰܝ̈ܣܶܐ ܕܳܐܬܽܘܪ̈ܳܝܶܐ ܘܥܰܠ ܫܶܒܝܳܐ ܕܒܳܒܠܳܝ̈ܐ ܘܰܕܦܳܪ̈ܣܳܝܶܐ. ܘܥܰܠ ܡܰܣܰܩܬܳܐ ܕܒܶܝܬ ܐܳܓܽܘܓ ܘܡܳܓܽܘܓ ܡܶܢ ܐܰܪܥܳܐ ܕܓܰܪܒܝܳܐ. ܘܡܶܛܠ ܫܶܒܝܳܐ ܕܶܐܫܬܒܺܝܘ ܠܒܳܒܶܝܠ ܣܰܓܺܝ̈ܐܐ ܢܒܺܝ̈ܐ ܒܰܒܢܴ̈ܬ ܩܴ̈ܠܶܐ ܡܫܰܚ̈ܠܦܳܬܳܐ. ܩܰܕܶܡܘ ܐܶܬܢܰܒܺܝܘ ܘܙܰܗܰܪܘ ܠܥܰܡܳܐ ܡ̣ܢ ܓܰܝ̈ܣܶܐ ܕܟܰܠܕܳܝ̈ܐ. ܐܶܫܟܰܚܢܰܢ ܕܡܶܢ ܩܕܳܡ ܟܽܠܗܽܘܢ ܢܒܺܝ̈ܐ. ܕܰܘܝܕ ܐܰܠܗܝܳܐ ܐܶܬܕܟܰܪ ܫܰܪܒܳܐ ܕܰܫܒܺܝܬܳܐ ܕܡܶܫܬܒܶܐ ܥܰܡܳܐ ܠܒܳܒܶܝܠ. ܘܗܳܠܶܝܢ ܡܰܢ ܕܡܶܢ ܒܳܬܰܪ ܕܰܘܝܕ: ܒܣܰܓܺܝ̈ܐܳܬܳܐ ܐܰܘܕܰܥܘ ܥܰܠ ܪܽܘܓܙܳܐ ܘܥܰܠ ܫܶܒܝܳܐ ܕܰܥܬܺܝܕ ܗܘܳܐ ܕܢܺܐܬܶܐ ܡ̣ܢ ܒܳܒܶܝܠ. ܠܰܘ ܒܰܠܚܽܘܕ ܥܰܠ ܥܰܡܳܐ ܐܶܠܐ ܘܥܰܠ ܥܰܡ̈ܡܶܐ. ܐܶܫܰܥܝܳܐ ܗܳܟܺܝܠ ܩܳܥܶܐ ܗܘܳܐ ܥܒܰܪܘ ܥܒܰܪܘ ܦܽܘܩܘ ܡܶܢ ܒܳܒܶܝܠ (ܐܫܥܝܐ ܡܚ: ܟ). ܘܬܘܒ ܩܳܥܶܐ ܗܘܳܐ ܢܶܦܠܰܬ ܢܶܦܠܰܬ ܒܳܒܶܝܠ (ܐܫܥܝܐ ܟܐ: ܛ ܓܶܠܝܢܳܐ ܝܕ: ܚ؛ ܝܚ: ܚ). ܘܟܰܕ ܥܰܠ ܐܰܒܕܳܢܳܗ̇ ܡܶܬܢܰܒܶܐ ܗܘܳܐ ܘܳܐܡܰܪ. ܘܰܐܘܒܶܕ ܙܳܪܽܘܥܳܐ ܡܶܢ ܒܳܒܶܝܠ. ܘܳܐܚܶܕ ܡܰܓܠܳܐ ܒܙܰܒܢܳܐ ܕܰܚܨܳܕܳܐ (ܐܪܡܝܐ ܢܢ: ܝܘ). ܡܶܢ ܩܕܳܡ ܗܳܠܶܝܢ ܩܴ̈ܠܶܐ ܛܽܘܒܳܢܳܐ ܕܰܘܝܕ ܟܰܕ ܒܥܰܝܢܳܐ ܢܰܗܺܝܪܬܳܐ ܕܰܢܒܺܝܽܘܬܳܐ ܩܰܕܶܡ ܚܙܳܐ ܫܶܒܝܳܐ ܕܰܥܬܺܝܕ ܕܢܺܐܬܶܐ ܡܶܢ ܒܳܒܶܝܠ ܥܰܠ ܐܽܘܪܺܫܠܶܡ. ܒܰܙܡܺܝܪܬܳܐ ܗܳܕܐ ܕܰܡܳܐܐ ܘܰܬܠܳܬܺܝܢ ܘܫܶܬ ܙܰܡܰܪ ܘܶܐܡܰܪ:
ܥܰܠ ܢܰܗܪ̈ܰܘܳܬܳܐ ܕܒܳܒܶܝܠ ܬܰܡܳܢ ܝ̣ܬܶܒܢ ܘܰܒܟܰܝܢ ܟܕ ܐܶܬܕܟܰܪܢܳܗ̇ ܠܨܶܗܝܽܘܢ. ܥܰܠ ܥܰܪ̈ܒܶܐ ܕܰܒܓܰܘܳܗ̇ ܬܠܰܝܢ ܟܶܢܳܪ̈ܰܝܢ. ܗܳܠܶܝܢ ܩܴ̈ܠܐ ܕܰܢܒܺܝܽܘܬܳܐ ܗܳܕܐ ܩܰܕܶܡܘ ܐܶܡܰܪܘ ܢܒܺܝ̈ܐ ܠܥܰܡܳܐ. ܠܘ ܡܶܛܠ ܕܰܢܚܰܘܽܘܢ ܕܝܳܕܥܺܝܢ ܐܰܝܠܶܝܢ ܕܰܥܬܺܝ̈ܕܳܢ ܠܡܶܐܬܳܐ ܒܳܬܰܪ ܙܰܒܢܳܐ. ܐܶܠܐ ܕܟܰܕ ܝܳܠܦܺܝܢ ܐܰܝܠܶܝܢ ܕܳܐܬܶܝܢ ܒܳܬܰܪܗܽܘܢ. ܡܳܐ ܕܰܫܡܰܥܘ ܡܶܢ ܩܴ̈ܠܶܐ ܕܰܢܒܺܝ̈ܐ ܕܫܶܒܝܳܐ ܦܳܣܩܺܝܢ ܥܠܰܝܗܽܘܢ ܢܶܒܥܽܘܢ ܪ̈ܰܚܡܶܐ ܡܶܢ ܐܰܠܗܳܐ ܘܢܶܬܟܽܘܣ ܐܝ̣ܕܳܐ ܩܫܺܝܬܳܐ ܡܶܢܗܽܘܢ ܕܡܰܠܟܳܐ ܒܳܒܠܳܝܳܐ. ܘܡܶܢ ܩܕܳܡ ܙܰܒܢ̈ܐ ܡܙܰܗܰܪ ܗܘܳܐ ܡܶܢܶܗ. ܘܟܰܕ ܥܕܰܟܺܝܠ ܫܰܒܛܳܐ ܒܓܰܘ ܥܶܩܳܪܳܐ ܘܰܒܥܰܦܪܳܐ ܛܡܺܝܪ. ܣܰܗܕܶܗ ܠܡܶܬܬܕܺܝܢܳܢܳܐ ܕܰܒܕܶܡܥ̈ܐ ܕܰܬܝܳܒܽܘܬܳܐ ܢܶܚܢܩܶܗ ܠܢܽܘܪܒܳܐ ܘܠܳܐ ܢܺܐܬܶܐ ܠܬܰܪܒܺܝܬܳܐ. ܘܟܰܕ ܗܳܠܶܝܢ ܡܶܢ ܢܒܺܝ̈ܐ ܩܰܕܶܡܘ ܐܶܬܡܰܠܰܠܘ. ܘܡܶܕܶܡ ܠܳܐ ܥܰܕܪܶܗ ܠܥܰܡܳܐ ܡܶܛܠ ܕܰܒܟܠ ܙܰܒܢ̈ܝ̣ܢ ܩܽܘܕܡܳܐ ܕܠܳܐ ܡܶܬܬܦܺܝܣܳܢܽܘܬܳܐ ܠܒܺܝܟ ܗܘܳܐ. ܘܥܰܠܗܳܕܐ ܥܠ ܕܠܐ ܐܶܬܬܦܺܝܣ ܠܰܢܒܺܝܳܐ ܐܶܪܰܡܝܳܐ. ܒܝܰܘ̈ܡܳܬܶܗ ܕܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܒܰܫܢܰܬ ܚܕܰܥܶܣܪܶܐ ܕܡܰܠܟܽܘܬܶܗ ܕܗܳܢܐ. ܢܶܦܩܰܬ ܠܦܽܘܫܳܩܳܐ ܡܶܠܬܳܐ ܗܳܕܐ ܕܶܐܬܢܰܒܺܝ ܕܰܘܝܕ ܒܡܰܙܡܽܘܪܳܐ ܗܳܢܐ. ܒܗܰܘ ܓܶܝܪ ܙܰܒܢܳܐ ܟܕ ܕܒܰܪ ܡܰܠܟܳܐ ܕܒܳܒܶܝܠ ܫܒܺܝܬܳܐ ܡܶܢ ܐܽܘܪܺܫܠܶܡ ܒܺܐܝ̈ܕܰܝ ܢܳܒܽܘܙܰܪܕܰܢ ܪܰܒ ܚܰܝܠܳܐ ܕܢܳܒܽܘܟܰܕܢܳܨܳܪ. ܘܢܶܚܬܰܬ ܓܶܝܪ ܓܳܠܽܘܬܳܐ ܡܶܢ ܐܰܪܥܳܐ ܕܺܝܗܽܘܕ ܘܝܶܬܒܰܬ ܥܰܠ ܢܰܗܪ̈ܰܘܳܬܳܐ ܕܒܳܒܶܝܠ. ܘܰܡܒܰܟܝܳܐ ܗܘܳܬ ܩܴ̈ܠܶܐ ܕܚܰܫܳܐ ܒܕܶܡܥ̈ܐ ܚܢܺܝ̈ܓܳܬܳܐ. ܘܰܡܪ̈ܺܝܡܳܢ ܢܶܫܷ̈ܐ ܟܶܢܳܪ̈ܰܝܗܶܝܢ ܒܽܐܘ̈ܠܝܳܬܳܐ. ܘܒܶܐܒܠܳܐ ܪܰܒܳܐ ܘܒܳܬܰܪ ܪܶܥܡܬܳܐ ܕܳܐܠܨ̈ܢ ܡܶܢ ܡܰܪ̈ܳܚܶܐ ܚܰܕ̈ܬܶܐ. ܘܰܡܒܰܟ̈ܝܳܢ ܘܡܰܪ̈ܩܕܳܢ ܗܘ̈ܝ. ܟܕ ܚܳܙܶܝܢ ܕܡܰܠܟܳܐ ܕܽܐܘܪܺܫܠܶܡ ܕܰܡܥܰܘܪ̈ܳܢ ܥܰܝ̈ܢܰܘܗܝ ܘܰܐܣܺܝܪ ܒܫܺܝ̈ܫܠܳܬܳܐ ܗܰܘ ܕܰܐܘܕܰܥ ܡܶܛܠܳܬܶܗ ܩܰܕܺܝܫܳܐ ܐܰܢܰܦܽܘܠܺܛܳܘܣ ܟܕ ܚܒܺܝܫ ܒܶܝܬ ܢܛܽܘܪܬܳܐ ܕܡܰܠܟܳܐ ܕܒܳܒܶܝܠ ܛܳܚܶܢ ܠܶܗ ܒܪܰܚܝܳܐ ܕܰܚܡܳܪܳܐ. ܘܫܳܚܶܩ ܗܘܳܐ ܕܶܝܢ ܒܶܟܝܳܐ ܠܓܳܠܽܘܬܳܐ ܥܰܠ ܢܰܗܪ̈ܰܘܳܬܳܐ ܕܒܳܒܶܝܠ. ܡܶܛܠ ܛܰܥܡܳܐ ܒܺܝܫܳܐ ܕܺܝܠܗܽܘܢ ܕܡܰܝܴ̈ܐ. ܘܠܐ ܓܶܝܪ ܒܰܣܺܝܡܺܝܢ ܗܘܰܘ ܡܰܝܴ̈ܐ ܕܢܰܗܪ̈ܰܘܳܬܳܐ ܗܳܢܝܢ. ܘܥܰܪ̈ܒܶܐ ܬܽܘܒ ܕܝܳܥܶܝܢ ܗܘܰܘ ܥܰܠ ܢܰܗܪ̈ܰܘܳܬܳܐ ܕܠܳܐ ܦܺܐܪ̈ܶܐ ܗܘܰܘ. ܡܶܛܠ ܕܠܳܐ ܝܳܗ̈ܒܺܢ ܚܰܪ̈ܒܳܬܳܐ ܦܺܐܪ̈ܶܐ ܡܶܬܐܰܟ̈ܠܳܢܶܐ. ܡܶܛܠܗܳܢܐ ܥܦܺܝܦܳܐܝ̣ܬ ܡܶܫܬܰܚܩܳܐ ܗܘܳܬ ܓܳܠܽܘܬܳܐ ܒܰܕܚܰܠܦܰܬ ܡܰܝܴ̈ܐ ܒܰܣܺܝ̈ܡܶܐ ܕܓܽܘ̈ܒܶܐ. ܗܳܢܝܢ ܕܡܶܢ ܥܢܳܢ̈ܐ ܢܳܚ̈ܬܳܢ ܥܰܠ ܛܽܘܪܳܐ ܕܽܐܘܪܺܫܠܶܡ. ܘܰܚܠܳܦ ܐܺܝ̈ܠܳܢܶܐ ܒܰܣܺܝ̈ܡܶܐ ܛܥܺܝ̈ܢܰܝ ܦܺܐܪ̈ܶܐ. ܫܰܪܝܳܐ ܗܘܳܬ ܥܰܠ ܒܶܟܝܳܐ ܘܰܬܚܶܝܬ ܥܰܪ̈ܒܶܐ ܡܶܬܬܰܢܚܳܐ ܗܘܳܬ ܒܰܕܠܰܝܬ ܗܘܳܐ ܒܗܽܘܢ ܦܺܐܪ̈ܶܐ ܕܡܶܐܟܽܘܠܬܳܐ. ܟܕ ܓܝܪ ܛܰܪ̈ܦܰܝܗܽܘܢ ܛܳܒ ܡܰܪܺܝܪܺܝܢ ܗܘܰܘ. ܘܠܳܐ ܫܰܒܛܰܝ̈ܗܽܘܢ. ܚܳܫܚܺܝܢ ܗܘܰܘ ܕܢܶܗܘܽܘܢ ܚܽܘܛܪܳܐ ܕܬܽܘܟܠܳܢܳܐ. ܕܠܺܝ̈ܠܰܝ ܠܰܬܒܳܪܳܐ ܓܝܪ ܐܝ̣ܬܰܝܗܽܘܢ ܫܰܒ̈ܛܶܐ ܕܥܰܪ̈ܒܳܬܳܐ. ܘܕܽܘܟܪܳܢܳܗ̇ ܕܨܶܗܝܽܘܢ ܫܳܚܶܩ ܗܘܳܐ ܠܗܽܘܢ ܕܶܐܬܓܠܶܙܘ ܡܶܢܳܗ̇. ܡܶܢ ܡܕܺܝܢܬܳܐ ܕܟܰܗܺܝܢܳܐ ܗܘܳܬ ܒܰܐܬܪܳܐ ܘܰܒܬܳܓܳܐ ܕܡܰܠܟܽܘܬܳܐ ܘܰܒܪ̈ܰܒܰܝ ܟܽܘܡܪ̈ܶܐ ܘܰܒܙܽܘܦܳܐ ܡܚܰܣܝܳܢܳܐ ܕܟܳܗܢ̈ܐ ܘܰܒܦܰܐܝܽܘܬܳܐ ܕܟܳܗܢܽܘܬܳܐ ܘܰܒܬܶܫܒܽܘܚܬܳܐ ܕܗܰܝܟܠܳܐ. ܝܰܬܝ̣ܪܳܐܝ̣ܬ ܕܫܳܐܠܺܝܢ ܗܘܰܘ ܠܗܽܘܢ ܕܰܢܫܰܒܚܽܘܢ ܕܬܶܫܒ̈ܚܳܬܳܐ ܩܰܕܺܝ̈ܫܳܬܳܐ ܕܰܡܕܺܝܢܬܳܐ ܢܫܰܒܚܽܘܢ ܒܰܡܕܺܝܢܬܳܐ ܢܽܘܟܪܳܝܬܳܐ ܡܰܠܝܰܬ ܛܰܡܽܐܘܬܳܐ. ܐܶܡܰܪ ܓܶܝܪ ܢܒܺܝܳܐ:
ܡܶܛܠ ܕܬܰܡܳܢ ܫܰܐܠܽܘܢ ܫܳܒܰܝ̈ܢ ܡܷ̈ܠܶܐ ܕܬܶܫܒܚܴ̈ܬܳܐ ܘܕܳܒܽܘܪ̈ܰܝܢ ܐܶܡܰܪܘ ܠܰܢ܆ ܕܫܰܒܰܚܘ ܠܰܢ ܡܶܢ ܬܶܫܒ̈ܚܳܬܳܗ̇ ܕܨܶܗܝܽܘܢ. ܟܕ ܓܶܝܪ ܡܫܰܒܚܺܝܢ ܗܘܰܘ ܩܕܳܡ ܐܳܪܽܘܢܶܗ ܕܡܳܪܝܳܐ ܒܓܰܘ ܗܰܝܟܠܳܐ. ܒܩܰܪ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ. ܘܰܠܗܳܕܐ ܠܐ ܐܶܬܬܦܺܝܣܘ ܗܘܰܘ ܟܳܗܢ̈ܐ ܠܡܶܥܒܰܕ. ܘܶܐܡܰܪ ܢܒܺܝܳܐ ܒܓܶܠܝܳܢܳܐ ܕܪܽܘܚܳܐ܆ ܕܶܐܡܰܪܘ ܟܳܗܢ̈ܐ ܠܟܰܠܕܳܝ̈ܐ.
ܐܰܝܟܰܢܳܐ ܢܫܰܒܰܚ ܠܟܽܘܢ ܬܶܫܒ̈ܚܳܬܶܗ ܕܡܳܪܝܳܐ ܒܰܐܪܥܳܐ ܢܽܘܟܪܳܝܬܳܐ. ܠܳܐ ܠܰܡ ܡܰܨܝܳܐ ܕܩܴ̈ܠܶܐ ܩܰܕܺܝ̈ܫܶܐ ܢܫܰܒܚ܆ ܕܠܰܡܕܺܝܢܬܳܐ ܕܰܫܪܳܐ ܒܳܗ̇ ܡܳܪܝܳܐ ܦܪܺܝܫܺܝܢ. ܗܳܠܝܢ ܗܳܟܺܝܠ ܥܰܠ ܫܒܺܝܬܳܐ ܗܳܝ ܕܢܶܚܬܰܬ ܠܒܳܒܶܝܠ ܡܶܢ ܨܶܗܝܽܘܢ ܐܶܬܐܰܡܪܰܬ. ܒܰܚܛܺܝܬܳܐ ܗܳܟܝܠ ܘܒܰܫܝܽܘܠ ܡܰܡܬܠܺܝܢ ܠܗ̇ ܠܒܳܒܶܝܠ ܟܬܳܒ̈ܐ ܩܰܕܺܝ̈ܫܶܐ. ܠܨܶܗܝܘܢ ܕܶܝܢ ܒܰܡܕܺܝܢܬܳܐ ܗܳܝ ܕܰܠܥܶܠ ܪܳܫܡܺܝܢ ܠܗ̇ ܢܒܺܝ̈ܐ. ܘܰܐܪܥܳܐ ܗܳܝ ܕܦܶܠܶܣܛܺܝܢܺܝ ܒܦܰܪܕܰܝܣܳܐ ܕܰܡܠܶܐ ܛܽܘܒ̈ܐ. ܘܰܡܦܰܚܡܺܝܢ ܢܰܗܪ̈ܰܘܳܬܳܐ ܕܒܳܒܶܝܠ ܬܘܒ. ܕܽܘܡܝܳܐ ܕܦܷ̈ܠܳܐܬܳܐ ܪ̈ܓܺܝܓܳܬܳܐ ܫܰܪ̈ܝܳܬܳܐ ܕܒܶܣܪܳܐ. ܘܟܕ ܒܽܐܘܪܺܫܠܶܡ ܚܺܐܪܬܳܐ ܗܳܝ ܕܒܰܢܝܳܐ ܒܦܰܪܕܰܝܣܳܐ ܥܳܡܰܪ ܗܘܳܐ ܪܺܝܫ ܓܶܢܣܰܢ ܡܶܢ ܩܕܺܝܡ. ܘܰܒܗܳܝ ܕܰܠܦܽܘܩܕܳܢܳܐ ܠܳܐ ܢܛܰܪ ܠܰܐܪܥܳܐ ܕܟܽܘ̈ܒܶܐ ܐܶܫܬܕܺܝ ܐܰܝܟ ܨܶܕܰܩܝܳܐ ܕܶܐܫܬܕܺܝ ܡܶܢ ܐܽܘܪܺܫܠܶܡ ܠܰܐܪܥܳܐ ܕܒܳܒܶܝܠ ܘܰܐܝܟܰܢܳܐ ܕܰܠܥܰܝ̈ܢܰܘܗܝ ܕܗܰܘ ܕܶܐܫܬܒܺܝ ܡܶܢ ܪܰܒ ܡܰܓܺܝܪ̈ܣܶܐ ܥܰܘܰܪ ܡܰܠܟܳܐ ܕܒܳܒܶܝܠ. ܗܳܟܰܢܳܐ ܫܒܳܝܗܝ ܠܳܐܕܳܡ ܗܰܘ ܡܰܠܟܳܐ ܕܰܚܛܺܝܬܳܐ ܕܒܳܒܶܝܠ ܡܶܬܝܰܕܥܳܢܺܝܬܳܐ ܒܓܳܠܽܘܬܳܐ ܘܥܰܘܰܪ ܥܰܝ̈ܢܰܘܗܝ ܡܶܢ ܦܽܘܠܚܳܢܳܐ ܘܺܝܕܰܥܬܳܐ: ܘܥܰܒܕܶܗ ܐܰܣܺܝܪܳܐ ܠܰܚܛܺܝܬܳܐ ܒܳܒܶܝܠ. ܘܰܚܠܳܦ ܪܺܝܚܳܐ ܕܒܳܒܶܝܠ܆ ܒܕܽܘܥܬܳܐ ܘܰܒܟܺܐܒ̈ܐ ܐܶܟܰܠ ܠܰܚܡܳܐ. ܗܳܢܰܘ ܣܽܘܟܳܠܳܐ ܪܽܘܚܳܢܳܐ ܕܗܳܠܶܝܢ ܕܶܐܬܐܶܡܰܪ̈ܝ. ܘܒܰܫܝܽܘܠ ܡܶܬܡܰܬܠܳܐ ܒܳܒܶܝܠ. ܡܶܛܠ ܕܒܳܗ̇ ܢܦܰܠ ܥܰܡܳܐ ܘܡܺܝܬ ܒܰܫܒܺܝܬܳܐ ܟܕ ܢܳܚܶܬ ܡܶܢ ܐܽܘܪܺܫܠܶܡ. ܐܠܐ ܟܕ ܒܛܰܝܒܽܘܬܳܐ ܕܰܐܠܗܳܐ. ܟܕ ܚܙܳܐ ܕܰܘܩܳܐ ܪܳܟܽܘܒܳܐ ܕܰܬܪܶܝܢ ܦܰܪ̈ܳܫܶܐ ܕܰܪܟܺܝܒ ܓܰܡܠܳܐ ܘܰܪܟܺܝܒ ܚܡܳܪܳܐ (ܐܫܥܝܐ ܟܐ: ܙ). ܚܰܕ ܡܶܢ ܗܳܠܶܝܢ ܐܶܡܰܪ: ܢܶܦܠܰܬ ܢܶܦܠܰܬ ܒܳܒܶܝܠ (ܐܫܥܝܐ ܟܐ: ܛ). ܗܳܢܰܘ ܫܝܽܘܠ. ܘܗܰܘ ܕܶܝܢ ܕܰܪܟܺܝܒ ܗܘܳܐ ܥܰܠ ܚܡܳܪܳܐ ܐܝ̣ܬܰܘܗܝ. ܗܰܘ ܕܩܰܒܶܠ ܘܥܰܠ ܠܨܶܗܝܽܘܢ ܘܰܡܩܰܒܶܠ ܗܘܳܐ ܠܶܗ ܟܶܢܫܳܐ ܕܰܛܠܳܝ̈ܐ ܟܕ ܩܳܥܶܝܢ ܩܕܳܡܰܘܗܝ: ܐܽܘܫܰܥܢܳܐ ܠܰܒܪܶܗ ܕܕܰܘܝܕ. ܘܗܰܘ ܕܣܳܠܩܳܐ ܐܽܘܪܺܫܠܶܡ ܥܰܠ ܒܳܠܶܗ ܥܰܡ ܢܒܺܝܳܐ ܢܺܐܡܰܪ:
ܐܶܢ ܐܶܛܥܶܝܟܝ ܐܽܘܪܺܫܠܶܡ ܬܶܛܥܶܝܢܝ ܝܰܡܺܝܢܝ܆ ܘܢܶܕܒܰܩ ܠܶܫܳܢܝ ܠܰܫ̈ܡܰܝ ܚܶܟܝ ܐܶܠܐ ܐܶܬܕܰܟܪܶܟܝ. ܕܰܐܝܟ ܗܳܢܐ ܐܝ̣ܬܰܘܗܝ ܗܘܳܐ ܕܳܢܺܝܐܝܠ ܗܰܘ ܓܰܒܪܳܐ ܕܪܶܓܬܳܐ ܗܰܘ ܕܟܰܘܷ̈ܐ ܦܬܺܝ̈ܚܳܢ ܗܘܱ̈ܝ ܠܶܗ ܒܥܶܠܺܝܬܶܗ ܠܽܘܩܒܰܠ ܐܽܘܪܺܫܠܶܡ܆ ܬܠܳܬ ܙܰܒܢ̈ܝ̣ܢ ܒܝܰܘܡܳܐ ܒܳܪܶܟ ܗܘܳܐ ܐܳܦ ܣܳܓܶܕ ܠܰܐܦܰܝ̈ ܛܽܘܪܳܐ ܕܨܶܗܝܽܘܢ (ܕܢܝܐܝܠ ܘ: ܝ). ܘܗܰܘ ܕܰܒܗܳܢܳܐ ܡܶܬܕܰܡܶܐ. ܐܶܠܐ ܛܳܥܶܐ ܠܐܽܘܪܺܫܠܶܡ ܗܳܝ ܚܺܐܪܬܳܐ ܕܒܰܫܡܰܝܳܐ. ܘܠܳܐ ܫܬܳܐ ܡܰܝܴ̈ܐ ܕܡܶܢ ܪ̈ܓܺܝܓܳܬܳܐ ܕܒܶܣܪܳܐ. ܐܰܟܡܳܐ ܕܕܳܢܺܝܐܝܠ ܘܚܰܒܪ̈ܰܘܗܝ ܠܳܐ ܫܳܬܶܝܢ ܗܘܰܘ ܡܶܢ ܚܰܡܪܳܐ ܕܡܰܠܟܳܐ. ܘܡܶܛܠܗܳܕܐ ܐܰܪ̈ܒܥܳܬܰܝܗܽܘܢ ܛܠܳܝ̈ܐ ܐܶܬܢܰܨܰܚܘ. ܘܰܬܠܳܬܳܐ ܟܕ ܡܕܺܝܫܺܝܢ ܥܰܠ ܚܰܝܠܳܐ ܕܢܽܘܪܳܐ ܕܒܰܐܬܽܘܢܳܐ. ܕܳܢܺܝܐܝܠ ܕܶܝܢ ܬܰܪܬܶܝܢ ܙܰܒܢ̈ܝ̣ܢ ܙܟܳܐ ܠܰܐܪ̈ܝܰܘܳܬܳܐ. ܘܰܫܩܰܠ ܟܠܺܝܠܳܐ ܕܙܳܟܽܘܬܳܐ. ܘܰܩܒܰܠ ܢܒܺܝܐ ܥܰܠ ܒܢܱ̈ܝ ܥܺܝܣܽܘ ܡܶܛܠ ܕܰܚܕܺܝܘ ܒܚܰܪܒܳܐ ܕܽܐܘܪܫܠܡ.
ܐܶܬܕܟܰܪ ܡܳܪܝܳܐ ܠܰܒܢܱ̈ܝ ܐܰܕܽܘܡ ܒܝܰܘܡܳܗ̇ ܕܽܐܘܪܺܫܠܶܡ ܕܳܐܡܪܺܝܢ: ܓܰܠܰܘ ܓܰܠܰܘ ܥܕܰܡܳܐ ܠܫܶܬܶܐܣܶܝ̈ܗ̇. ܗܳܠܝܢ ܓܝܪ ܚܕܺܝܘ ܒܰܥܩܽܘܪܝܳܐ ܕܽܐܘܪܺܫܠܡ ܘܣܳܢܶܝܢ ܗܘܰܘ ܠܺܝܣܪܳܐܝܠ ܘܠܐ ܓܶܝܪ ܒܰܠܚܽܘܕ ܒܫܶܒܝܳܐ ܕܰܡܕܺܝܢܬܳܐ ܚܕܺܝܘ. ܐܶܠܐ ܘܟܰܕ ܣܶܠܩܰܬ ܫܒܺܝܬܳܐ ܡܶܢ ܒܳܒܶܝܠ. ܡܒܰܛܠܺܝܢ ܗܘܰܘ ܠܥܰܡܳܐ ܕܰܐܠܗܳܐ ܕܠܐ ܢܶܒܢܶܐ ܠܰܡܕܺܝܢܳܬܳܐ. ܡܶܛܠ ܕܡܶܢ ܒܳܬܰܪ ܕܫܰܪܝܰܬ ܥܺܕܬܳܐ ܠܡܶܥܛܰܦ ܠܘܳܬ ܗܰܘ ܡܰܠܟܳܐ ܕܰܫܪܳܪܳܐ. ܘܰܠܡܶܒܢܳܐ ܒܰܝܬܰܢ ܒܰܫܡܰܝܳܐ ܗܳܝ ܚܺܐܪܬܳܐ. ܠܰܝܬ ܡܶܕܶܡ ܕܰܡܥܰܟܰܪ ܠܒܶܢܝܳܢܳܐ ܗܳܢܐ ܐܰܝܟ ܐܶܪ̈ܺܝܛܺܝܩܳܝܶܐ. ܐܠܐ ܡܳܢܳܐ ܐܡܪ ܢܒܺܝܐ:
ܒܰܪܬ ܒܳܒܶܝܠ ܒܳܙܽܘܙܬܳܐ ܛܽܘܒܰܘܗܝ ܠܡܰܢ ܕܢܶܦܪܥܶܟܝ ܦܽܘܪܥܳܢܳܐ ܕܰܦܪܰܥܬܺܝܢ. ܛܽܘܒܰܘܗܝ ܠܡܰܢ ܕܢܶܐܚܽܘܕ ܝܰܠܽܘܕܰܝ̈ܟܝ ܘܰܢܫܰܩܶܦ ܠܟܺܐܦܳܐ. ܗܳܫܐ ܥܰܠ ܚܛܺܝܬܳܐ ܡܶܬܢܰܣ̈ܒܳܢ ܗܳܠܝܢ. ܕܰܦܪܰܥ ܠܗ̇ ܐܝܟ ܕܦܶܪܥܰܬ: ܘܗܰܘ ܕܶܝܢ ܕܳܐܚܶܕ ܝܰܠܽܘܕܰܝ̈ܟܝ ܘܰܡܫܰܩܶܦ ܠܟܺܐܦܳܐ. ܗܰܘ ܕܰܡܩܰܛܶܠ ܘܰܡܚܰܒܶܠ ܡܰܘܠܕܳܢܽܘܬܳܐ ܕܙܰܪ̈ܥܶܝܗ̇ ܘܰܚܛܺܝܬܳܐ ܡ̣ܢ ܢܰܦܫܶܗ. ܘܰܒܝܰܕ ܟܺܐܦܳܐ ܡܫܺܝܚܳܐ ܚܢܰܩ ܠܝܰܠܕܶܝ̈ܗ̇ ܕܒܺܝܫܬܳܐ. ܘܗܳܢܐ ܫܳܘܶܐ ܠܛܽܘܒܳܐ ܕܰܒܝܰܕ ܡܳܪܰܢ. ܟܕ ܡܰܘܕܶܐ ܠܶܗ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܝܢ ܘܫܒܥܐ
ܥܰܠ ܡܰܦܰܩܬܳܐ ܕܰܢܒܺܝܘܬܳܐ ܠܒܶܝܬ ܥܰܡ̈ܡܶܐ: ܘܥܰܠ ܦܽܘܪܩܳܢܳܐ ܕܰܗܘܳܐ ܠܥܳܠܡܳܐ ܒܝܰܡܺܝܢܶܗ ܕܰܐܒܐܳ.
ܪܽܘܚܳܐ ܕܰܐܠܗܳܐ ܝܳܕܰܥ ܥܰܡܺܝ̈ܩܳܬܳܗ̇ ܕܺܐܝܬܽܘܬܳܐ ܟܕ ܡܩܰܕܶܡ ܗܘܳܐ ܚܳܙܶܐ ܟܰܪܝܽܘܬܳܐ ܕܺܐܝܬ ܠܰܢܒܺܝ̈ܐ. ܡܶܛܠ ܕܠܳܐ ܫܳܡܰܥ ܗܘܳܐ ܥܰܡܳܐ ܡܶܠܰܝ̈ܗܽܘܢ. ܘܠܐ ܫܬܶܩ ܗܘܳܐ ܩܳܠܶܗ ܡܶܢ ܕܰܡܠܰܒܶܒ ܘܰܡܚܰܝܶܠ ܠܗܽܘܢ. ܟܕ ܡܰܘܕܰܥ ܠܗܘܢ ܥܠ ܡܰܦܰܩܬܳܐ ܕܗܳܘܝܳܐ ܠܰܫܠܺܝ̈ܚܶܐ ܘܠܰܟܬܳܒܰܝ̈ܗܘܢ. ܠܒܶܝܬ ܥܰܡܡ̈ܐ. ܡܶܛܠ ܗܳܢܐ ܛܽܘܒܳܢܐ ܕܰܘܝܕ ܡܰܝܬܶܐ ܫܰܪܒܳܐ ܕܰܩܪܳܝܬܳܐ ܕܥܰܡ̈ܡܶܐ ܐܰܝܟܰܢܳܐ ܕܩܰܕܶܡ ܐܶܡܰܪ: ܟܽܠܟܽܘܢ ܥܰܡ̈ܡܶܐ ܩܽܘܫܘ ܟܰܦܳܐ (ܡܙܡܘܪܐ ܡܙ: ܐ) ܘܬܘܒ ܐܡ̣ܪ: ܫܡܰܥܘ ܗܳܕܐ ܟܽܠܟܽܘܢ ܥܰܡ̈ܡܶܐ (ܡܙܡܘܪܐ ܡܛ: ܐ). ܘܢܰܘܕܽܘܢ ܠܳܟ ܥܰܡ̈ܡܶܐ ܐܰܠܗܳܐ ܢܰܘܕܽܘܢ ܠܳܟ ܥܰܡܡ̈ܐ ܟܽܠܗܽܘܢ (ܡܙܡܘܪܐ ܣܙ: ܗ) ܘܬܽܘܒ ܐܡ̣ܪ: ܢܶܕܚܠܽܘܢ ܥܰܡܡ̈ܐ ܠܰܫܡܳܟ ܡܳܪܝܳܐ. ܘܟܽܠܗܽܘܢ ܡܰܠܟ̈ܐ ܕܰܐܪܥܳܐ ܠܐܺܝܩܳܪܳܟ (ܡܙܡܘܪܐ ܩܒ: ܝܗ). ܘܬܘܒ ܐܶܡܰܪ ܐܰܘܕܶܐ ܠܳܟ ܒܥܰܡܡ̈ܐ ܐܰܠܗܳܐ ܘܠܰܫܡܳܟ ܐܶܙܡܰܪ ܒܶܐܡ̈ܘܳܬܳܐ (ܡܙܡܘܪܐ ܢܙ: ܝ). ܗܳܫܐ ܕܶܝܢ ܥܰܠ ܗܳܠܝܢ ܩܴ̈ܠܶܐ ܡܰܘܣܶܦ. ܘܡܶܬܪܰܓܪܰܓ ܕܢܶܗܘܶܐ ܫܰܘܬܳܦܳܐ ܒܗܰܝܡܳܢܽܘܬܳܐ ܕܥܰܡ̈ܡܶܐ ܘܰܢܙܰܡܰܪ ܬܶܫܒܚܴ̈ܬܶܗ ܩܕܳܡ ܟܽܠܗܽܘܢ ܡܰܠܟ̈ܐ ܕܰܐܪܥܳܐ. ܙܰܡܰܪ ܬܶܫܒܽܘܚܬܳܐ ܗܳܕܶܐ ܕܰܡܳܐܐ ܘܰܬܠܳܬܺܝܢ ܘܰܫܒܰܥ ܘܶܐܡܰܪ:
ܐܰܘܕܶܐ ܠܳܟ ܡܳܪܝܳܐ ܡܶܢ ܟܽܠܶܗ ܠܶܒܝ ܘܰܩܕܳܡ ܡܰܠܟ̈ܐ ܐܶܙܰܡܰܪ ܠܳܟ. ܥܰܠ ܙܽܘܡܳܪܶܗ ܕܰܘܝܕ ܩܕܳܡ ܡܰܠܟ̈ܐ ܡܩܰܕܡܺܝܢ ܗܘܰܘ ܡܰܟܪܙܺܝܢ ܒܥܺܕܬܳܐ ܕܰܐܠܗܳܐ ܟܕ ܩܳܝܡܺܝܢ ܡܰܠܟ̈ܐ ܡܙܰܡܰܪ ܘܳܐܡܰܪ.
ܘܶܐܣܓܽܘܕ ܒܗܰܝܟܠܳܐ ܕܩܽܘܕܫܳܟ ܘܰܐܘܕܶܐ ܠܰܫܡܳܟ. ܒܥܺܕܬܳܐ ܠܰܡ ܐܶܩܰܪܶܒ ܠܳܟ ܣܶܓܕܬܳܐ. ܘܒܳܗ̇ ܬܶܗܘܶܐ ܗܳܕܶܐ ܥܰܠ ܛܰܝܒܽܘܬܳܟ ܘܥܰܠ ܩܽܘܫܬܳܟ. ܛܰܝܒܽܘܬܳܐ ܥܰܠ ܓܶܠܝܳܢܶܗ ܐܳܡܰܪ: ܩܽܘܫܬܳܐ ܥܰܠ ܗܰܝܡܳܢܽܘܬܶܗ ܘܰܫܪܳܪܶܗ ܡܫܰܘܕܥܳܐ. ܒܗܳܠܶܝܢ ܬܰܪܬܶܝܢ ܚܰܘܺܝ ܐܠܗܐ ܥܠ ܐܰܪܥܳܐ ܓܶܠܝܳܢܳܐ ܕܰܚܢܳܢܶܗ. ܐܰܝܟܰܢܳܐ ܕܡܶܛܠ ܛܰܝܒܽܘܬܳܐ ܢܶܬܺܝܕܰܥ ܓܶܠܝܳܢܳܐ ܕܰܡܪܰܚܡܳܢܽܘܬܳܐ ܘܰܩܪܳܝܬܳܐ ܕܥܰܡܡ̈ܐ ܚܰܛܳܝ̈ܐ. ܘܗܳܠܶܝܢ ܬܰܪܬܶܝܢ ܕܶܐܡܰܪ ܢܒܺܝܐ ܕܢܶܣܓܽܘܕ ܡܶܛܠܳܬܗܶܝܢ ܒܗܰܝܟܠܳܐ ܩܰܕܺܝܫܳܐ ܕܰܐܠܗܳܐ ܒܗܶܝܢ ܩܳܝܡܺܝܢ ܥܰܡܡ̈ܐ ܡܗܰܝ̈ܡܢܶܐ ܘܰܒܗܶܝܢ ܢܛܺܝܪ ܥܳܠܡܳܐ ܡܶܢ ܠܽܘܚܳܡ̈ܐ ܕܟܺܐܢܽܘܬܳܐ. ܘܥܰܠܗܳܝ ܐܰܝܬܺܝ ܢܒܺܝܳܐ ܒܳܬܰܪ ܗܳܠܝܢ ܗܰܘ ܡܶܕܶܡ ܕܰܐܥܒܶܕ ܒܰܡܠܺܝ̈ܠܶܐ.
ܡܶܛܠ ܕܰܐܘܪܶܒܬ ܥܰܠ ܟܽܠ ܫܶܡ ܡܺܐܡܪܳܟ. ܘܰܒܗܳܕܐ ܡܶܠܬܳܐ ܚܒܰܫ ܟܽܠܡܶܕܶܡ ܕܺܐܝܬ ܠܶܗ ܫܽܘܡܳܗܳܐ ܒܰܫܡܰܝܳܐ ܘܒܰܐܪܥܳܐ. ܘܡܳܢܰܐ ܗܘ ܗܳܢܐ ܕܰܐܘܪܒܶܗ ܐܰܒܳܐ ܗܳܟܰܢܳܐ؟ ܡܺܐܡܪܰܐ ܗܘ ܗܳܢܐ ܕܺܝܪܶܒ ܠܥܶܠ ܡܶܢܟܠ. ܘܡܳܢܰܘ ܡܺܐܡܪܳܐ ܗܰܘ ܕܶܐܡܰܪ ܝܽܘܚܰܢܳܢ ܥܠܰܘܗܝ؟ ܕܰܒܪܺܝܫܺܝܬ ܐܺܝܬܰܘܗܝ ܗܘܳܐ ܡܶܠܬܳܐ: ܘܗܽܘ ܡܶܠܬܳܐ ܐܺܝܬܰܘܗܝ ܗܘܳܐ ܠܘܳܬ ܐܰܠܗܳܐ (ܝܘܚܢܢ ܐ: ܐ). ܘܡܶܠܬܳܐ ܒܶܣܪܳܐ ܗܘܳܐ ܘܰܐܓܶܢ ܒܰܢ (ܝܘܚܢܢ ܐ: ܝܕ). ܘܰܩܪܳܝܗܝ ܕܰܘܝܕ ܡܺܐܡܪܳܐ: ܡܺܐܡܪܳܐ ܗܳܢܳܐ ܐܺܝܬܰܘܗܝ ܡܶܠܬܶܗ ܕܰܐܒܳܐ. ܐܶܠܐ ܡܶܛܠ ܕܰܒܓܰܘ ܥܺܕܬܳܐ ܐܶܬܟܰܪܙܰܬ ܪܰܒܽܘܬܳܐ ܕܡܺܐܡܪܶܗ ܕܰܐܒܳܐ. ܕܡܶܬܐܶܡܰܪ ܠܘܳܬܶܗ ܕܺܝܪܶܒ. ܡܶܛܠ ܕܰܙܥܰܪ ܟܰܕ ܨܒܳܐ ܘܰܗܘܳܐ ܒܰܪܢܳܫܳܐ. ܠܰܘ ܟܝܳܢܳܐܝ̣ܬ ܐܠܐ ܡܕܰܒܪܳܢܳܐܝ̣ܬ. ܘܒܳܬܰܪ ܡܶܠܬܳܐ ܕܥܠ ܡܺܐܡܪܳܐ. ܡܰܘܕܶܐ ܢܒܺܝܐ ܕܶܐܫܬܰܡܥܰܬ ܨܠܽܘܬܶܗ. ܘܰܢܦܰܩ ܠܰܥܒܳܕܳܐ ܗܰܘ ܡܶܕܶܡ ܕܡܶܬܟܰܫܰܦ ܗܘܳܐ ܥܠܰܘܗܝ. ܘܥܰܠܗܳܝ ܐܶܡܰܪ:
ܒܝܰܘܡܳܐ ܕܰܩܪܺܝܬܳܟ ܥܢܰܝܬܳܢܝ ܘܰܐܣܓܺܝܬ ܥܽܘܫܢܳܗ̇ ܕܢܰܦܫܝ. ܘܥܰܠܗܳܕܐ ܡܙܰܡܰܪ ܘܰܡܝܰܒܶܒ ܐܢܳܐ ܘܳܐܡܰܪ ܐܢܳܐ:
ܢܰܘܕܽܘܢ ܠܳܟ ܡܳܪܝܳܐ ܟܽܠܗܽܘܢ ܡܰܠܟ̈ܐ ܕܰܐܪܥܳܐ. ܡܶܛܠ ܕܰܫܡܰܥܘ ܡܺܐܡܪܶܗ ܕܦܽܘܡܳܟ. ܗܰܘ ܕܠܐ ܡܬܽܘܡ ܐܶܫܬܡܰܥ ܛܶܒܶܗ ܒܶܝܬ ܥܰܡܡ̈ܐ ܘܰܩܕܳܡ ܡܰܠܟ̈ܐ ܕܰܐܪܥܳܐ. ܡܣܰܒܪܳܐ ܗܘܳܬ ܠܶܗ ܫܠܺܝܚܽܘܬܳܐ ܩܕܳܡ ܡܰܠܟ̈ܐ ܘܫܰܠܺܝܛܳܢ̈ܐ ܫܳܡܥܺܝܢ ܗܘܰܘ ܡܶܢ ܫܠܺܝ̈ܚܶܐ ܦܶܛܪܽܘܣ ܘܦܰܘܠܽܘܣ ܡܰܠܟ̈ܐ ܕܪܽܗܘܡܺܝ ܥܠ ܡܺܐܡܪܶܗ ܕܰܐܒܳܐ. ܘܨܳܝܬܺܝܢ ܗܘܰܘ ܡܰܠܟ̈ܐ ܕܒܰܪܒܪ̈ܳܝܶܐ ܘܰܕܝܰܘܢܳܝ̈ܐ ܡܶܠܬܶܗ ܕܡܳܪܝܳܐ ܘܟܽܠܗܽܘܢ ܡܗܰܝܡܢܺܝܢ ܗܘܰܘ. ܘܰܡܫܰܒܚܺܝܢ ܟܕ ܚܳܕܶܝܢ ܒܦܽܘܪܢܳܣܳܐ ܚܰܟܺܝܡܳܐ ܕܰܡܕܰܒܪܳܢܽܘܬܶܗ ܕܡܳܪܝܳܐ. ܐܝܟ ܡܶܠܬܶܗ ܕܰܢܒܺܝܐ ܕܶܐܡܰܪ:
ܕܰܢܫܰܒܚܽܘܢ ܐܽܘܪ̈ܚܳܬܶܗ ܕܡܳܪܝܳܐ. ܡܰܠܟ̈ܐ ܕܰܐܪܥܳܐ ܗܳܝ ܕܰܠܒܺܝܟ ܡܶܢ ܥܽܘܒܳܐ ܕܺܐܝܬܽܘܬܶܗ ܕܰܐܒܳܐ. ܘܰܪܕܳܐ ܟܰܣܝܳܐܝ̣ܬ ܘܠܐ ܡܶܬܚܰܙܝܳܢܳܐܝ̣ܬ ܠܓܰܘ ܥܽܘܒܳܗ̇ ܕܝܳܠܕܰܬ ܐܰܠܗܳܐ ܡܰܪܝܰܡ ܒܬܽܘܠܬܳܐ. ܘܗܳܝ ܕܰܠܒܰܟ ܡܶܢ ܒܳܬܰܪ ܕܶܐܬܓܰܫܰܡ. ܘܰܪܕܳܐ ܘܰܥܒܰܪ ܒܰܒܬܽܘ̈ܠܶܐ ܟܰܕ ܡܶܬܝ̣ܠܶܕ ܘܠܐ ܚܰܒܶܠ ܒܬܽܘ̈ܠܶܝܗ̇. ܘܽܐܘܪܚܳܐ ܕܫܰܒܪܽܘܬܳܐ ܘܬܰܪܒܺܝܬܳܐ ܥܰܡ ܗܳܠܝܢ. ܐܽܘܪܚܳܐ ܗܳܝ ܕܰܠܒܰܟ ܠܝܽܘܪܕܢܳܢ ܟܕ ܐܶܬܳܐ ܕܢܶܥܡܰܕ ܡܶܢ ܝܽܘܚܰܢܳܢ ܟܳܪܽܘܙܶܗ. ܘܽܐܘܪܚܳܐ ܕܰܡܕܰܒܪܳܢܽܘܬܶܗ ܟܕ ܪܳܕܶܐ ܒܗܶܝܢ ܒܩܽܘܪ̈ܝܳܐ ܐܦ ܒܰܡܕܺܝ̈ܢܳܬܳܐ ܘܣܳܥܰܪ ܚܰܝ̈ܠܶܐ: ܘܡܰܐܣܶܐ ܟܪ̈ܺܝܗܶܐ: ܘܰܡܕܰܟܶܐ ܓܰܪ̈ܒܶܐ: ܘܰܡܦܰܬܰܚ ܣܡܰܝܴ̈ܐ: ܘܡܰܦܶܩ ܫܺܐܕ̈ܐ: ܘܰܡܚܰܪܰܪ ܕܰܝܘܳܢ̈ܐ: ܘܰܡܩܰܝܶܙ ܚܓܺܝܪ̈ܶܐ: ܘܦܳܫܶܛ ܟܦܺܝ̈ܦܶܐ: ܘܰܡܙܰܕܶܩ ܠܡܳܟܣܷ̈ܐ ܘܰܠܙܳܢܝܴ̈ܬܳܐ ܡܩܰܕܶܫ: ܘܰܠܨܰܝܴ̈ܕܶܐ ܥܒܰܕ ܫܠܺܝ̈ܚܶܐ: ܘܰܠܡܶܣ̈ܟܺܢܶܐ ܥܒܰܕ ܥܰܬܺܝܪ̈ܶܐ: ܘܰܠܡܺܝ̈ܬܶܐ ܡܰܦܢܶܐ ܠܒܶܝܬ ܚܰܝ̈ܐ: ܘܝܰܗܒ ܫܶܡܥܳܐ ܠܕܽܘ̈ܓܶܐ: ܘܰܬܟܰܣ ܡܶܢ ܓܽܘܫܡܳܐ ܡܚܺܝܠܳܐ ܕܰܐܢܬܬܳܐ ܚܕܳܐ ܡܰܪܕܺܝܬܳܐ ܕܰܕܡܳܐ: ܘܰܠܒܰܪܬ ܝܽܘܐܳܪܳܫ ܡܢܰܚܶܡ: ܘܠܰܥܠܰܝܡܳܐ ܒܪܳܗ̇ ܕܰܐܪܡܰܠܬܳܐ ܐܰܗܦܶܟ ܡܶܢ ܩܰܒܪܳܐ: ܘܢܰܚܡܶܗ ܠܠܳܥܳܙܳܪ ܪܳܚܡܶܗ ܡܶܢ ܒܳܬܰܪ ܕܰܣܪܺܝ ܒܰܐܪܒܥܳܐ ܝܰܘ̈ܡܺܝܢ ܐܰܦܶܩ ܡܶܢ ܚܷ̈ܙܶܐ ܕܰܐܒܕܳܢܳܐ: ܘܬܘܒ ܐܶܬܳܐ ܠܘܳܬ ܨܠܺܝܒܳܐ ܘܡܰܘܬܳܐ: ܘܡܶܢ ܒܳܬܰܪ ܐܽܘܪܚܳܐ ܗܳܕܐ ܘܡܰܥܰܠܬܶܗ ܕܰܠܓܰܘ ܩܰܒܪܳܐ. ܐܳܦ ܘܰܩܝܳܡܬܶܗ ܕܠܐ ܚܒܳܠܳܐ ܕܠܰܬܠܳܬܳܐ ܝܰܘܡ̈ܝ̣ܢ. ܘܣܽܘܠܳܩܶܗ ܕܠܰܫܡܰܝܳܐ ܕܰܠܘܳܬ ܐܰܒܽܘܗܝ. ܗܳܠܝܢ ܐܶܢܶܝܢ ܐܽܘܪ̈ܚܳܬܶܗ ܕܡܳܪܝܳܐ ܕܰܡܫܰܒܚܺܝܢ ܗܘܰܘ ܡܰܠܟ̈ܐ ܕܰܐܪܥܳܐ ܘܡܶܢ ܒܳܬܰܪ ܕܰܫܡܰܥܘ ܒܝܰܕ ܫܠܺܝ̈ܚܶܐ ܟܳܪ̈ܽܘܙܶܐ ܡܺܐܡܪܶܗ ܕܰܐܒܳܐ. ܘܰܒܗܳܠܶܝܢ ܐܽܘܪ̈ܚܳܬܳܐ ܝ̣ܠܶܦܢܰܢ ܥܰܠ ܐܽܘܪܚܳܐ ܕܚܰܝܷ̈ܐ ܘܬܘܒ ܐܶܡܰܪ ܢܒܺܝܐ:
ܡܶܛܠ ܕܪܰܒ ܗܽܘ ܐܺܝܩܳܪܶܗ ܕܡܳܪܝܳܐ. ܘܪܳܡ ܗܽܘ ܡܳܪܝܳܐ ܕܰܒܥܽܘܡܩܳܐ ܚܳܙܶܐ. ܘܰܐܝܢܳܐ ܕܡܶܬܬܪܺܝܡ ܡܶܢ ܪܽܘܚܩܳܐ ܝܳܕܰܥ. ܘܬܘܒ ܐܡ̣ܪ ܢܒܺܝܳܐ ܥܰܠ ܐܺܝܩܳܪܶܗ ܕܰܐܠܳܗܳܐ ܡܶܠܬܳܐ.
ܐܶܢ ܐܶܗܰܠܶܟ ܒܽܐܘܠܨܳܢܳܐ ܬܰܚܶܝܢܝ ܒܪܽܘܓܙܳܐ ܕܰܒܥܶܠܕ̈ܒܳܒܰܝ. ܒܣܶܢܐܬܳܐ ܕܪ̈ܳܕܽܘܦܰܝ ܒܚܶܡܬܳܐ ܕܰܐܝܠܶܝܢ ܕܣܳܢܶܝܢ ܠܺܝ ܡܰܓܳܢ. ܠܘܳܬ ܗܳܠܶܝܢ ܚܳܐܱܪ ܢܺܝܫܳܐ. ܘܶܐܡܰܪ ܢܒܺܝܐ ܠܘܳܬ ܐܰܠܗܳܐ.
ܬܰܘܫܶܛ ܐܝ̣ܕܳܟ ܘܬܶܦܪܩܰܢܝ. ܝܰܡܺܝܢܳܟ ܡܳܪܝܳܐ ܐܰܓܶܢ ܥܠܰܝ. ܐܝ̣ܕܳܐ ܓܶܝܪ ܕܰܐܠܗܐ ܗܳܝ ܕܶܐܬܬܰܘܫܛܰܬ ܡܶܢ ܫܡܰܝܳܐ ܘܦܶܪܩܰܬ ܠܥܳܠܡܳܐ. ܗܽܘ ܐܝ̣ܬܰܘܗܝ ܒܰܪ ܟܝܳܢܶܗ ܕܰܐܒܳܐ ܘܒܰܪ ܡܰܘܬܒܶܗ. ܘܟܰܕ ܓܢܶܐ ܐܰܒܳܐ ܒܪܰܘܡܳܐ ܕܰܫܡܰܝܳܐ ܘܠܳܐ ܡܶܬܚܙܶܐ. ܐܰܘܫܶܛ ܐܝ̣ܕܶܗ ܐܰܝܟ ܕܨܰܠܺܝ ܢܒܺܝܐ. ܘܣܳܡܳܗ̇ ܒܥܽܘܒܳܐ ܕܰܒܬܽܘܠܬܳܐ ܘܰܩܢܳܬ ܓܽܘܫܡܳܐ. ܘܢܶܦܩܰܬ ܠܓܶܠܝܳܐ ܒܶܣܪܳܢܳܐܝ̣ܬ ܘܰܗܘܳܐ ܦܽܘܪܩܳܢܳܐ ܠܰܢܒܺܝܐ: ܘܰܠܟܽܠܶܗ ܥܳܠܡܳܐ. ܘܟܕ ܡܶܬܥܰܠܝܳܐ ܗܘܳܬ ܐܝ̣ܕܳܐ ܗܳܕܐ ܠܰܫܡܰܝܳܐ ܠܘܳܬ ܐܰܒܳܐ. ܕܰܐܘܫܛܳܗ̇ ܗܘܳܐ ܕܢܶܬܦܪܶܩ ܒܳܗ̇ ܥܳܠܡܳܐ. ܘܬܘܒ ܡܰܓܶܢ ܗܘܳܐ ܠܳܗ̇ ܥܰܠ ܫܠܺܝ̈ܚܶܐ ܘܰܡܫܰܟܶܢ ܠܗܽܘܢ ܐܝ̣ܕܳܐ ܕܟܳܗܢܽܘܬܳܐ. ܐܰܝܟܰܢܳܐ ܕܢܰܗܺܝܪܳܐܝ̣ܬ ܬܶܬܦܰܫܰܩ ܗܳܝ ܕܶܐܡܰܪ ܢܒܺܝܐ.
ܝܰܡܺܝܢܳܟ ܡܳܪܝܳܐ ܐܰܓܶܢ ܥܠܰܝ ܡܳܪܝܳܐ ܪ̈ܰܚܡܰܝܟ ܠܥܳܠܰܡ ܘܰܥܒܳܕ ܐܝ̣̈ܕܰܝܟ ܠܳܐ ܬܰܪܦܶܐ. ܫܰܦܺܝܪ ܒܪ̈ܰܚܡܶܐ ܥܒܰܕ ܫܽܘܠܳܡܳܐ ܠܰܙܡܺܝܪܬܳܐ ܗܳܕܐ. ܡܶܕܶܡ ܕܥܶܒܕܰܬ ܝܰܡܺܝܢܶܗ ܕܰܐܒܳܐ ܒܓܶܠܝܳܢܶܗ ܕܥܠ ܐܰܪܥܳܐ ܕܪ̈ܰܚܡܶܐ ܗܘܳܐ ܘܛܰܝܒܽܘܬܳܐ. ܘܡܶܛܠ ܥܒܴ̈ܕܰܝܢ ܘܠܳܐ ܡܶܕܶܡ ܥܳܒܶܕ. ܐܶܠܐ ܕܰܚܢܳܢܶܗ ܥܰܡ ܚܽܘܒܶܗ ܐܝ̣ܬܰܝܗܶܝܢ ܡܰܘܗ̈ܒܳܬܶܗ. ܕܓܳܠܘ ܪ̈ܰܚܡܰܘܗܝ ܥܠ ܥܒܳܕ ܐܝ̣ܕܰܘ̈ܗܝ. ܘܠܐ ܐܰܪܦܝܶܗ ܒܡܰܘܬܳܐ ܘܒܰܚܒܳܠܳܐ. ܐܝܟ ܕܰܐܦܺܝܣܶܗ ܢܒܺܝܐ. ܕܠܶܗ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܝܢ ܘܬܡܢܝܐ
ܡܰܘܕܰܥ ܥܠ ܡܽܘܟܳܟܶܗ ܕܰܢܒܺܝܳܐ: ܘܥܰܠܗܳܝ ܕܰܒܟܽܠܕܽܘܟ ܐܝ̣ܬܰܘܗܝ ܐܰܠܳܗܳܐ: ܘܥܰܠ ܐܪ̈ܳܙܶܐ ܕܰܡܕܰܒܪܳܢܽܘܬܶܗ ܕܥܰܡܰܢܽܘܐܶܝܠ.
ܟܰܕ ܗܳܟܺܝܠ ܢܦܰܩ ܗܘܳܐ ܕܰܘܝܕ ܡܶܢ ܐܽܘܪܺܫܠܶܡ ܒܰܥܪܽܘܩܝܳܐ ܕܡܶܢ ܩܕܳܡ ܐܰܒܺܝܫܳܠܽܘܡ ܒܪܶܗ. ܟܕ ܥܳܒܰܪ ܥܰܠ ܓܶܢ̱ܒ ܒܶܝܬ ܚܽܘܪܺܝܡ ܩܪܺܝܬܳܐ. ܗܳܕܐ ܕܶܝܢ ܐܝ̣ܬܶܝܗ̇ ܗܘܳܬ ܕܫܰܒܛܳܐ ܕܰܒܢܱ̈ܝ ܒܶܢܝܳܡܺܝܢ. ܒܗܰܘ ܙܰܒܢܳܐ ܢܦܰܩ ܡܶܢ ܬܰܡܳܢ ܓܰܒܪܳܐ ܚܰܕ ܡܶܢ ܫܰܒܛܳܐ ܕܰܒܢܱ̈ܝ ܒܶܢܝܳܡܺܝܢ ܘܡܶܢ ܕܒܶܝܬ ܫܳܐܘܳܠ ܗܘܳܐ. ܘܰܢܦܰܩ ܟܕ ܡܨܰܚܶܐ ܠܕܰܘܝܕ. ܘܪܳܓܶܡ ܗܘܳܐ ܠܶܗ ܒܟܺܐܦ̈ܐ ܘܫܳܕܶܐ ܗܘܳܐ ܥܠܰܘܗܝ ܥܰܦܪܳܐ. ܘܗܳܟܰܢܳܐ ܐܳܡܰܪ ܗܘܳܐ ܠܶܗ ܠܕܰܘܺܝܕ ܫܶܡܥܺܝ ܟܕ ܡܨܰܚܶܐ ܠܶܗ. ܦܽܘܩ ܦܽܘܩ ܓܰܒܪܳܐ ܐܳܫܶܕ ܕܡܳܐ ܘܥܰܘܳܠܳܐ. ܢܶܦܪܥܳܟ ܡܳܪܝܳܐ ܟܽܠܶܗ ܕܡܳܐ ܕܒܶܝܬ ܫܳܐܘܳܠ ܕܰܐܡܠܶܟܬ ܒܳܬܪܶܗ. ܘܢܰܫܠܡܺܝܗ̇ ܡܳܪܝܳܐ ܠܡܰܠܟܽܘܬܳܟ ܒܺܐܝܕܶܗ ܕܰܒܪܳܟ ܐܰܒܺܝܫܳܠܽܘܡ. ܘܗܳܐ ܐܶܬܦܰܪܥܰܬ ܒܺܝܫܬܳܟ ܡܶܛܠ ܕܓܰܒܪܳܐ ܐܰܢܬ ܐܳܫܶܕ ܕܡܳܐ (ܒ ܫܡܘܐܝܠ ܝܘ: ܗ-ܚ). ܡܳܢܳܐ ܐܶܡܰܪ ܕܰܘܝܕ ܗܰܘ ܢܺܝܚܳܐ ܘܒܰܣܺܝܡܳܐ ܠܽܘܩܒܰܠ ܗܳܢܐ ܨܰܥܪܳܐ ܠܳܐ ܢܳܡܽܘܣܳܝܳܐ. ܘܕܰܡܠܶܐ ܓܽܘܡܕܳܐ. ܠܳܐ ܦܩܰܕ ܕܢܶܬܩܛܶܠ ܘܟܕ ܛܳܒ ܡܶܫܟܰܚ ܗܘܳܐ ܠܡܶܩܛܠܶܗ. ܘܶܐܡܰܪ ܕܰܘܺܝܕ: ܫܽܘܒܩܽܘܗܝ ܕܰܡܨܰܚܶܐ ܡܳܪܝܳܐ ܗܽܘ ܐܶܡܰܪ ܠܶܗ ܕܨܰܚܳܐ ܠܕܰܘܺܝܕ (ܒ ܫܡܘܐܝܠ ܝܘ: ܝ). ܘܟܰܕ ܠܰܡܨܰܥܪܳܢܳܐ ܣܰܝܒܰܪ ܒܰܣܺܝܡܳܐܝ̣ܬ ܘܰܠܗܳܕܐ ܬܟܰܣ ܡܶܢ ܗܳܢܘܢ ܕܒܳܥܶܝܢ ܗܘܰܘ ܠܡܶܩܛܠܶܗ. ܘܶܐܬܦܢܺܝ ܠܘܬ ܐܠܗܐ ܒܰܥܝܳܕܶܗ. ܘܫܰܒܰܚ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܠܳܬܺܝܢ ܘܰܬܡܳܢܶܐ ܩܰܕܶܡ ܡܳܪܝܳܐ. ܘܟܰܕ ܢܳܦܶܩ ܪܽܘܚܳܐ ܒܙܽܘܡܳܪܶܗ ܕܠܳܐ ܒܺܝܫܬܳܐ. ܘܕܰܡ̇ܚܰܣ̣ܰܝ ܡܶܢ ܨܽܘܚ̈ܝܳܬܳܐ ܕܰܫܕܳܐ ܒܶܗ ܫܶܡܥܺܝ ܒܰܪ ܓܶܐܪܳܐ. ܘܰܡܙܰܡܰܪ ܗܘܳܐ ܘܳܐܡܰܪ:
ܡܳܪܝܳܐ ܒܨܰܝܬܳܢܝ ܘܺܝܕܰܥܬܳܢܝ. ܘܰܐܢܬ ܝܳܕܰܥ ܐܰܢܬ ܡܰܘܬܰܒܝ ܘܰܡܩܳܡܝ. ܐܶܣܬܰܟܰܠܬ ܡܰܚܫ̈ܒܳܬܝ ܡܶܢ ܪܰܘܡܳܐ ܐܽܘܪܚܝ ܘܰܫܒܺܝ̈ܠܰܝ ܝܳܕܰܥ ܐܰܢܬ. ܘܟܽܠܗܶܝܢ ܐܽܘܪ̈ܚܳܬܝ ܥܰܩܶܒܬ. ܐܶܢ ܐ̣ܝܬ ܫܽܘܚܠܳܦܳܐ ܒܠܶܫܳܢܝ ܐܰܢܬ ܡܳܪܝܳܐ ܝܳܕܰܥ ܐܰܢܬ ܟܽܠܗܶܝܢ ܕܡܶܢ ܩܕܺܝܡ ܘܰܠܚܰܪܬܳܐ. ܗܳܠܝܢ ܦܶܬܓܳܡ̈ܐ ܕܡܰܦܰܩ ܒܪܽܘܚܳܐ ܥܒܰܕ ܢܒܺܝܳܐ ܒܗܰܘ ܙܰܒܢܳܐ ܠܘܳܬ ܡܳܪܝܳܐ. ܡܶܛܠ ܨܽܘܚ̈ܝܳܬܳܐ ܕܶܐܨܛܰܚܺܝ ܡܶܢ ܫܶܡܥܺܝ. ܟܰܕ ܡܰܘܕܰܥ ܕܠܰܝܬ ܐܶܡܰܬܝ ܕܠܳܐ ܒܳܨܶܐ ܐܠܗܐ. ܘܝܳܕܰܥ ܠܶܗ ܠܰܢܒܺܝܐ. ܘܰܒܡܰܘܬܒܶܗ ܐܳܦ ܒܰܩܝܳܡܶܗ ܡܶܬܒܰܩܶܐ ܗܘܳܐ ܘܡܰܚܫ̈ܒܳܬܶܗ ܡܶܣܬܰܟܰܠ ܗܘܳܐ. ܠܘ ܕܠܐ ܥܽܘܩܳܒܳܐ ܫܒܺܝ̈ܩܳܢ ܐܽܘܪ̈ܚܳܬܶܗ ܡܶܢ ܡܳܪܝܳܐ. ܘܶܐܫܟܚܶܗ ܕܰܡܚܰܣܰܝ ܡܶܢ ܕܡܳܐ ܙܰܟܳܝܳܐ. ܘܡܶܛܠܗܳܕܐ ܐܳܡܰܪ ܗܘܳܐ. ܕܠܘ ܚܕܳܐ ܐܶܡܪܶܬ ܒܣܶܦ̈ܘܳܬܝ ܘܰܐܚܪܺܬܳܐ ܛܰܫܺܝܬ ܒܓܰܘ ܠܶܒܝ. ܝܳܕܰܥ ܗܘܺܝܬ ܕܰܒܚܽܘܫܳܒ̈ܐ ܘܰܒܪܶܥܝܳܢܳܐ ܒܢܽܘܗܪܳܐ ܕܠܐ ܬܰܚܦܺܝܬܳܐ ܡܶܬܒܰܩܶܐ ܐܰܢܬ. ܘܟܰܕ ܒܩܰܝܬܳܢܝ ܘܠܳܐ ܐܶܫܟܰܚܬ ܒܺܝ ܥܰܘܠܳܐ. ܦܪܰܫܬܳܢܝ ܒܰܣܝܳܡ ܐܝ̣ܕܳܐ ܠܰܡܕܰܒܪܳܢܽܘܬܶܗ ܕܥܰܡܳܟ. ܘܠܘ ܒܰܚܛܽܘܦܝܳܐ ܒܥܺܝܬ ܡܰܠܟܽܘܬܳܐ. ܘܰܕܠܐ ܡܫܺܝܚܽܘܬܳܐ ܕܡܶܢܳܟ ܠܐ ܐܶܬܺܝܬ ܠܪܺܝܫܳܢܽܘܬܳܐ ܕܫܰܒ̈ܛܶܐ. ܘܠܳܐ ܡܰܪܕܶܬ ܘܩܶܛܠܶܬ ܘܰܐܡܠܟܶܬ. ܐܠܐ ܐܰܢܬ ܒܝܰܕ ܟܽܘܡܪܳܐ ܕܰܡܫܺܝܚ ܒܡܶܫܚܳܐ ܩܰܕܺܝܫܳܐ ܦܪܰܫܬܳܢܝ ܡܶܢ ܒܶܝܬ ܐܳܒܝ ܕܶܐܗܘܶܐ ܡܰܠܟܳܐ ܥܰܠ ܝ̣ܣܪܳܐܝܠ. ܡܶܢ ܫܡܽܘܐܝܠ ܟܽܘܡܪܳܐ ܘܰܢܒܺܝܐ. ܡܶܛܠ ܕܰܠܐܪܳܙܳܐ ܕܰܥܡܳܕܳܐ ܩܰܕܺܝܫܳܐ ܕܰܒܝܰܕ ܡܳܪܢ ܡܩܰܕܡܳܐ ܗܘܳܬ ܪܳܫܡܳܐ. ܘܟܰܕ ܠܳܐ ܫܰܠܡܶܬ ܠܗܰܘ ܡܶܕܶܡ ܕܩܰܒܠܶܬ ܐܶܠܐ ܒܰܣܝܳܡ ܐܝ̣ܕܳܟ ܕܰܥܠܰܝ ܗܳܕܐ ܐܶܡܰܪ ܕܰܘܝܕ. ܥܰܠܗܳܝ ܕܟܰܕ ܐܶܬܡܫܰܚ ܩܰܒܶܠ ܐܝ̣ܕܳܐ ܕܰܡܕܰܒܪܳܢܽܘܬܳܐ ܘܐܪܳܙܳܐ ܕܰܥܡܳܕܳܐ ܕܰܒܓܰܘ ܡܰܝܴ̈ܐ. ܡܰܠܶܦ ܕܶܝܢ ܕܳܐܦ ܟܕ ܓܰܒܠܶܗ ܐܠܗܐ ܠܒܰܪܢܳܫܳܐ ܡܶܢ ܥܰܦܪܳܐ. ܐܝ̣ܕܳܐ ܣܳܡ ܥܠܰܘܗܝ ܒܰܓܒܺܝܠܬܳܐ. ܘܫܰܟܶܢ ܠܶܗ ܡܰܘܗܰܒܬܳܐ ܕܰܢܒܺܝܽܘܬܳܐ. ܗܳܝ ܕܒܳܗ̇ ܣܳܡ ܫܡܴ̈ܗܶܐ ܠܟܽܠܗܽܘܢ ܗܳܢܘܢ ܕܠܐ ܡܶܠܬܳܐ. ܡܳܢܳܐ ܕܶܝܢ ܨܳܒܶܐ ܠܡܺܐܡܰܪ ܡܶܢ ܒܳܬܰܪܟܶܢ.
ܡܶܢܝ ܗܘܳܬ ܝܺܕܰܥܬܳܐ ܘܬܶܕܡܽܘܪܬܳܐ. ܗܳܢܐ ܦܶܬܓܳܡܳܐ ܕܰܐܠܗܳܐ ܐܺܝܬܰܘܗܝ. ܕܡܶܫܬܰܘܕܶܐ ܕܗܳܠܝܢ ܕܶܐܡܰܪ ܢܒܺܝܐ. ܕܺܐܝܬܰܝܗܶܝܢ ܬܶܕܡܪ̈ܳܬܳܐ ܕܡܶܢ ܠܘܳܬܶܗ ܗ̈ܘܰܝ ܘܗܽܘ ܦܰܩܶܕ ܥܠܰܝܗܶܝܢ ܕܗܳܟܰܢ ܢܶܗܘ̈ܝܳܢ. ܕܟܕ ܒܪܰܒܽܘܬܳܐ ܠܳܐ ܡܶܬܕܰܪܟܳܢܺܝܬܳܐ ܕܰܐܠܗܳܐ ܚܳܐܱܪ ܗܘܳܐ ܢܒܺܝܐ. ܘܒܰܒܨܺܝܪܽܘܬܳܐ ܕܰܟܝܳܢܳܐ ܐܢܳܫܳܝܳܐ ܕܠܳܐ ܡܰܘܦܶܐ ܠܡܶܛܥܰܢ ܚܰܝܠܳܐ ܕܰܬܡܺܝ̈ܗܳܬܳܐ ܕܥܳܒܽܘܕܳܐ. ܩܥܳܐ ܘܶܐܡܰܪ:
ܐܶܬܚܰܝܠܶܬ ܘܠܳܐ ܡܨܶܐ ܐܢܳܐ ܚܰܝܠܳܐ. ܘܢܶܣܒܶܬ ܛܰܝܒܽܘܬܳܐ ܘܩܰܒܠܶܬ ܣܝܳܡ ܐܝ̣ܕܳܐ ܟܕ ܠܳܐ ܣܳܦܶܩ ܐܢܳܐ. ܘܰܟܡܳܐ ܐܶܢ ܝܶܪܒܶܬ ܒܦܽܘܚܳܡܳܐ ܕܪܰܒܽܘܬܳܐ ܕܚܰܝܠܳܟ ܘܠܐ ܒܡܶܕܶܡ ܣܳܦܶܩ ܐܢܳܐ ܐܶܬܚܫܶܒ. ܒܡܳܢܳܐ ܓܶܝܪ ܡܶܬܦܰܚܰܡ ܗܰܘ ܕܥܰܠ ܕܽܘܟܬܳܐ ܕܬܰܪܬܶܝܢ ܐܰܡܷ̈ܐ ܩܳܐܷܡ ܘܰܡܣܰܝܰܟ ܒܳܗ̇. ܠܗܰܘ ܕܠܳܐ ܥܳܪܶܝܢ ܠܶܗ ܫܡܰܝܴ̈ܐ ܘܰܐܪܥܳܐ. ܘܥܰܠܗܳܕܐ ܐܳܡܰܪ ܐܢܳܐ:
ܠܰܐܝܟܳܐ ܐܺܙܰܠ ܡܶܢ ܐܽܘܪܚܳܟ. ܘܰܐܝܟܳܐ ܐܶܛܫܶܐ ܡܶܢ ܩܕܳܡܰܝܟ. ܠܟܽܠ ܦܶܢ̈ܝܳܢ ܚܳܪܶܬ ܘܬܰܡܳܢ ܐܶܫܟܰܚܬܳܟ. ܘܰܒܗܽܘܢ ܡܕܰܝܰܪ ܚܰܝܠܳܟ ܘܠܰܐܪܥܳܐ ܘܠܰܫܡܰܝܳܐ ܡܕܰܒܰܪ ܪܶܡܙܳܟ. ܘܪܰܘܡܳܐ ܘܥܽܘܡܩܳܐ ܡܠܶܝܢ ܡܶܢܳܟ.
ܐܶܢ ܐܶܣܰܩ ܠܰܫܡܰܝܳܐ ܬܰܡܳܢ ܐܰܢܬ. ܘܶܐܢ ܐܶܚܽܘܬ ܠܳܫܝܽܘܠ ܐܶܦ ܬܰܡܳܢ ܐܢܬ. ܘܶܐܢ ܐܰܪܺܝܡ ܟܶܢ̈ܦܰܝ ܐܰܝܟ ܕܢܶܫܪܳܐ. ܘܶܐܫܪܶܐ ܒܚܰܪܬܶܗ ܕܝܰܡܳܐ. ܘܳܐܦ ܬܰܡܳܢ ܐܝ̣ܕܳܟ ܬܶܐܚܕܰܢܝ. ܘܰܬܕܰܒܪܰܢܝ ܝܰܡܺܝܢܳܟ. ܘܣܶܠܩܶܬ ܒܪܶܥܝܳܢܝ ܠܰܫܡܰܝܳܐ ܘܰܚܙܺܝܬ ܕܰܡܩܰܕܫܺܝܢ ܠܳܟ ܣܪ̈ܳܦܶܐ ܐܳܦ ܡܒܰܪܟܺܝܢ ܠܳܟ ܟܪ̈ܽܘܒܶܐ. ܘܰܡܫܰܡܫܺܝܢ ܠܳܟ ܡܰܠܰܐܟ̈ܐ. ܘܰܡܛܰܟܣܺܝܢ ܚܰܝ̈ܠܰܘܳܬܳܐ ܒܪܶܡܙܳܟ. ܘܢܶܚܬܶܬ ܬܽܘܒ ܠܰܫܝܽܘܠ ܘܠܳܐ ܐܶܫܟܰܚܬܳܗ̇ ܕܰܡܓܰܙܝܳܐ ܡܶܢܳܟ. ܘܰܠܝܰܡܳܐ ܬܘܒ ܟܰܕ ܢܶܦܩܶܬ ܥܰܡ ܚܽܘܫܳܒ̈ܐ ܕܪܶܥܝܳܢܝ. ܐܶܫܟܚܶܬ ܕܬܰܡܳܢ ܡܶܬܚܙܶܐ ܚܰܝܠܳܟ ܝܰܬܺܝܪܳܐ. ܘܝܶܕܥܶܬ ܕܬܰܡܳܢ ܐܶܠܽܘܠܐ ܩܳܐܷܡ ܦܽܘܩܕܳܢܳܟ ܒܚܰܝܠܳܐ. ܘܬܳܟܶܣ ܠܶܗ ܕܠܳܐ ܢܶܥܒܰܪ ܬܚܽܘܡܶܗ. ܘܶܐܠܽܘܠܐ ܝܰܡܺܝܢܳܟ ܘܰܕܪܳܥܳܟ ܠܐ ܩܳܐܷܡ ܗܘܳܐ ܒܰܐܦܱ̈ܝ ܡܰܝܴ̈ܐ ܪ̈ܦܰܝܳܐ. ܘܬܘܒ ܘܠܳܐ ܪ̈ܰܚܫܳܐ ܘܚܰܝ̈ܘܳܬܳܐ ܕܰܡܕܰܝܪ̈ܳܢ ܒܰܬܗܽܘܡܳܐ ܢܳܛܪ̈ܳܢ ܗܘܱ̈ܝ ܬܚܽܘܡܰܝ̈ܗܶܝܢ ܒܶܐܫܬܶܗ ܕܝܰܡܳܐ. ܘܶܐܠܽܘܠܳܐ ܕܰܐܝܟ ܫܽܘܪܳܐ ܟܪܺܝܟ ܠܗܶܝܢ ܚܰܝܠܳܟ ܘܫܽܘܠܛܳܢܳܟ. ܘܰܡܬܰܟܶܣ ܘܟܳܠܶܐ ܠܗܶܝܢ ܕܠܳܐ ܢܫܰܢ̈ܝܳܢ ܡܶܢ ܕܽܘܟܝܴ̈ܬܗܶܝܢ. ܘܟܕ ܩܳܥܶܐ ܒܥܰܡܛܳܢܳܐ ܕܰܓܕܰܫ ܠܪ̈ܶܥܝܳܢܶܐ ܡܶܢ ܥܶܠܰܬ ܛܽܘܥܝܰܝ ܐܳܡܰܪ ܗܘܳܐ.
ܐܶܡܪܶܬ ܕܚܶܫܽܘܟܳܐ ܢܰܢܗܰܪ ܠܺܝ. ܘܠܺܠܝܳܐ ܢܶܢܗܰܪ ܒܰܐܦܱ̈ܝ. ܘܚܶܫܽܘܟܳܐ ܠܳܐ ܢܶܚܫܰܟ ܡܶܢܳܟ. ܘܠܺܠܝܳܐ ܐܰܝܟ ܐܺܝܡܳܡܳܐ ܠܐ ܢܶܢܗܰܪ. ܘܚܶܫܽܘܟܳܐ ܐܰܝܟ ܢܰܗܺܝܪܳܐ. ܚܶܫܽܘܟܳܐ ܓܶܝܪ ܠܠܳܐ ܝ̣ܕܰܥܬܳܐ ܩܳܪܶܐ. ܢܽܘܗܪܳܐ ܕܝܢ ܕܒܰܕܡܽܘܬ ܫܶܡܫܳܐ ܕܳܢܚܳܐ ܥܠܶܝܗ̇ ܝ̣ܕܰܥܬܳܐ. ܒܗܳܝ ܕܟܽܠ ܫܽܘܦܪܳܐ ܡܶܬܝܰܕܥܳܢܳܐ ܛܡܺܝܪ ܘܰܟܣܶܐ ܒܓܰܘ ܟܝܴ̈ܢܶܐ ܒܚܶܫܽܘܟܳܐ ܕܠܐ ܝ̣ܕܰܥܬܳܐ ܡܚܰܦܰܝ. ܐܶܢܕܶܝܢ ܬܶܗܘܶܐ ܝ̣ܕܰܥܬܳܐ ܓܡܺܝܪܬܳܐ ܒܢܰܦܫܳܐ. ܩܳܦܠܳܐ ܘܫܳܩܠܐ ܠܶܗ ܠܚܶܫܟܳܐ ܕܠܐ ܝ̣ܕܰܥܬܳܐ ܗܰܘ ܕܰܦܪܺܝܣ ܒܕܽܘܡܝܳܐ ܕܰܐܦܱ̈ܝ ܬܰܪܥܳܐ. ܘܢܰܗܺܝܪܳܐܝ̣ܬ ܡܶܬܒܰܩܶܐ ܒܫܽܘܦܪ̈ܶܐ ܕܰܟܝܴ̈ܢܶܐ. ܘܡܳܐ ܬܘܒ ܕܰܦܣܰܥ ܪܶܥܝܳܢܳܐ ܠܡܶܪܕܳܐ ܒܽܐܘܪ̈ܚܳܬܳܐ ܕܠܐ ܚܳܙܶܝܢ ܠܶܗ܆ ܒܰܕܡܽܘܬ ܠܺܠܝܳܐ ܦܳܓ̈ܥܳܢ ܒܶܗ ܟܕ ܡܗܰܠܶܟ. ܐܶܢܕܶܝܢ ܐܝ̣ܬ ܥܰܡܶܗ ܚܰܝܠܳܐ ܕܪܽܘܚܳܐ. ܗܳܝܕܶܝܢ ܡܺܫܟܰܚ ܐܳܡܰܪ ܠܠܺܠܝܳܐ ܐܝܟ ܕܢܶܢܗܰܪ ܒܰܐܦܰܘ̈ܗܝ ܡܶܛܠ ܕܰܡܫܰܡܰܪ ܪܽܘܚܳܐ ܨܶܡܚ̈ܐ ܢܰܗܺܝܪ̈ܶܐ ܕܺܝܕܰܥܬܳܐ ܕܺܝܠܶܗ ܩܕܳܡܰܘܗܝ. ܗܳܘܶܐ ܠܶܗ ܚܶܫܽܘܟܳܐ ܐܝܟ ܢܰܗܺܝܪܳܐ. ܘܠܺܠܝܳܐ ܠܰܕܡܽܘܬܳܐ ܕܢܽܘܗܪܳܐ ܡܶܬܗܰܦܰܟ. ܘܡܳܐ ܕܶܝܢ ܕܢܶܦܩܰܬ ܢܰܦܫܳܐ ܡܶܢ ܠܐ ܝ̣ܕܰܥܬܳܐ ܘܰܥܒܰܪ ܡܶܢܳܗ̇ ܠܚܶܫܟܳܐ ܕܛܳܥܝܽܘܬܳܐ ܗܰܘ ܕܒܰܕܡܽܘܬ ܥܰܡܛܳܢܳܐ ܦܪܺܝܣ ܥܠ ܚܙܳܬܳܗ̇. ܕܰܐܝܟ ܐܰܝܟܰܢ ܐܡ̇ܪ ܐܢܳܐ. ܟܰܕ ܥܳܡܰܪ ܗܘܳܐ ܡܽܘܫܶܐ ܒܡܶܨܪܶܝܢ ܐܝܟ ܕܰܒܠܳܐ ܝ̣ܕܰܥܬܳܐ ܡܚܰܦܰܝ ܗܘܳܐ. ܟܕ ܕܝܢ ܢܦܰܩ ܡܶܢ ܡܶܨܪܶܝܢ ܒܰܥܪܽܘܩܝܳܐ. ܕܡܶܢ ܩܕܳܡ ܦܶܪܥܽܘܢ ܡܶܛܠ ܕܠܐ ܥܕܰܟܺܝܠ ܐܶܬܕܰܟܝܰܬ ܗܘܳܬ ܚܙܳܬܶܗ ܒܫܽܘܪܳܝܳܐ ܟܕ ܢܦܰܩ ܟܕ ܐܶܫܬܒܶܩ ܕܰܐܪܒܥܺܝܢ ܫܢܺܝ̈ܢ ܢܶܗܘܶܐ ܒܡܰܕܒܪܳܐ. ܟܕ ܪܳܥܶܐ ܥܳܢܴ̈ܐ ܥܕܰܡܳܐ ܕܶܐܬܡܰܪܩܰܬ ܚܙܳܬܳܐ ܕܡܰܕܥܶܗ ܡܶܢ ܥܰܡܛܳܢܳܐ ܕܡܶܨܪ̈ܳܝܶܐ. ܟܕ ܕܝܢ ܐܶܫܬܰܦܺܝ ܡܶܢ ܟܽܠܶܗ ܗܰܘ ܥܽܘܗܕܳܢܳܐ ܘܚܶܫܽܘܟܳܐ ܠܺܠܝܳܝܳܐ. ܩܰܒܠܶܗ ܚܶܙܘܳܐ ܢܰܗܺܝܪܳܐ. ܘܟܕ ܛܳܒ ܐܝ̣ܬ ܗܘܳܐ ܥܰܡܶܗ ܪ̈ܳܥܰܘܳܬܳܐ ܐܚܪ̈ܳܢܶܐ ܒܰܓܙܳܪܳܐ ܗܰܘ. ܚܰܕ ܡܶܢܗܽܘܢ ܠܚܶܙܘܳܐ ܗܰܘ ܪܰܒܳܐ ܕܢܽܘܪܳܐ ܕܰܒܣܰܢܝܳܐ ܠܳܐ ܚܙܳܐ. ܒܗܳܝ ܕܰܒܠܳܐ ܝ̣ܕܰܥܬܳܐ ܡܚܰܦܝܴ̈ܢ ܗܘܱ̈ܝ ܢܰܦܫܴ̈ܬܗܽܘܢ. ܡܽܘܫܶܐ ܕܝܢ ܡܶܛܠ ܕܩܳܡ ܗܘܳܐ ܠܶܗ ܒܬܰܪܥܳܐ ܕܺܝܕܰܥܬܳܐ. ܡܶܛܠ ܕܫܰܢܺܝ ܡܶܢ ܩܕܳܡܰܘܗܝ ܚܶܫܽܘܟܳܐ. ܕܰܐܩܒܶܠ ܥܰܠ ܪܺܝܫ ܛܽܘܪܳܐ ܗܰܘ ܢܽܘܗܪܳܐ ܕܢܽܘܪܳܐ ܐܰܠܗܳܝܬܳܐ. ܘܒܳܬܰܪ ܗܳܠܝܢ ܡܰܝܬܶܐ ܢܒܺܝܐ ܘܳܐܡܰܪ:
ܡܶܛܠ ܕܰܐܢܬ ܬܰܩܶܢܬ ܟܽܘ̈ܠܝܳܬܝ ܘܩܰܒܶܠܬܳܢܝ ܡܶܢ ܟܰܪܣܳܗ̇ ܕܶܐܡܝ. ܐܰܘܕܶܐ ܠܳܟ ܡܶܛܠ ܬܶܕܡܽܘܪܬܳܐ ܕܰܥܒܰܕܬ. ܡܪܰܡܪܡܺܝܢ ܐܶܢܘܢ ܓܶܝܪ ܥܒܴ̈ܕܰܝܟ ܘܢܰܦܫܝ ܛܳܒ ܝܳܕܥܳܐ. ܘܠܐ ܟܣܶܝܢ ܓܰܪ̈ܡܰܝ ܡܶܢܳܟ ܕܰܥܒܰܕܬ ܒܣܶܬܪܳܐ. ܟܽܘ̈ܠܝܳܬܳܐ ܕܳܐܡܰܪ ܕܰܐܢܬ ܬܰܩܶܢܬ ܐܶܢܝܢ. ܥܠ ܒܽܘܝܳܢܳܐ ܘܣܽܘܟܳܠܳܐ ܡܢܰܗܪ̈ܳܢ. ܗܳܟܢܐ ܡܶܢ ܟܽܘ̈ܠܝܳܬܳܐ ܕܳܢܰܚ ܒܽܘܝܳܢܳܐ. ܡܶܢ ܝ̣ܕܰܥܬܳܐ ܓܶܝܪ ܐܰܝܟ ܕܰܠܥܽܘܠܳܐ ܡܶܢ ܟܰܪܣܳܐ ܟܰܕ ܡܩܰܒܶܠ ܠܶܗ ܠܒܰܪܢܳܫܳܐ. ܘܠܰܘ ܕܗܳܟܰܢܰܐ ܗܘ. ܐܝܟ ܕܰܠܝܰܠܕܳܐ ܚܰܒܺܝܒܳܐ ܫܳܩܶܠ ܠܗ ܒܰܕܪ̈ܳܥܰܘܗܝ. ܕܰܐܝܟ ܗܳܢܐ ܓܝܪ ܐܝ̣ܬܘܗܝ ܗܘܳܐ ܫܠܶܝܡܽܘܢ. ܕܺܐܝܬ ܗܘܳܐ ܠܶܗ ܝ̣ܕܰܥܬܳܐ ܓܡܺܝܪܬܳܐ. ܫܰܕܰܪ ܡܳܪܝܳܐ ܠܢܳܬܳܢ ܢܒܺܝܐ: ܘܰܩܪܳܐ ܫܡܶܗ ܝܰܕܺܝܕܳܐ (ܒ ܫܡܘܐܝܠ ܝܒ: ܟܗ) ܕܡܶܬܦܰܫܰܩ ܚܰܒܺܝܒܳܐ. ܓܰܪ̈ܡܶܐ ܕܶܐܡܰܪ ܢܒܺܝܐ ܕܰܥܒܰܕܬ ܒܣܶܬܪܳܐ. ܪ̈ܽܘܟܳܒܶܐ ܪ̈ܽܘܚܳܢܶܐ ܕܗܰܘ ܒܰܪܢܳܫܳܐ ܓܰܘܳܝܳܐ ܡܣܰܟܠܺܝܢ. ܘܥܠ ܩܽܘܝܳܡܳܐ ܕܰܡܝܰܬܪ̈ܳܬܳܐ ܡܰܠܦܺܝܢ. ܘܟܕ ܗܳܠܝܢ ܐܡ̣ܪ. ܡܚܰܘܶܐ ܕܰܒܥܽܘܡ̈ܩܶܐ ܬܰܚܬܳܝ̈ܐ ܕܰܐܪܥܳܐ ܢܚܶܬ ܗܰܠܶܟ ܒܰܗܘܳܝܶܗ. ܘܰܚܙܳܐ ܬܰܡܳܢ ܫܪܳܪܳܐ ܕܟܠ ܡܶܕܶܡ. ܘܦܽܘܪ̈ܥܳܢܶܐ ܕܰܥ̈ܒܳܕܶܐ ܛܳܒ̈ܐ ܘܒܺܝ̈ܫܶܐ.
ܘܢܶܚܬܶܬ ܠܰܡ ܠܬܰܚܬܳܝܴ̈ܬܳܗ̇ ܕܰܐܪܥܳܐ. ܘܦܽܘܪܥܳܢܝ ܚܙܰܝ̈ ܥܰܝ̈ܢܰܝ. ܬܰܡܳܢ ܓܶܝܪ ܡܳܐ ܕܢܶܚܬܰܬ ܢܰܦܫܳܐ ܠܫܶܦܠܳܗ̇ ܕܰܫܝܽܘܠ ܗܳܢܰܘ ܬܰܚܬܳܝܴ̈ܬܳܗ̇ ܕܰܐܪܥܳܐ ܒܗܳܝ ܕܰܚܣܺܝܟܳܐ ܡܶܢ ܝܽܘܩܪܶܗ ܕܦܰܓܪܳܐ. ܚܳܙܝܳܐ ܓܶܝܪ ܦܽܘܪܥܳܢܳܗ̇ ܢܰܗܺܝܪܳܐܝ̣ܬ. ܘܡܰܪܓܫܳܐ ܒܡܶܕܶܡ ܕܰܢܛܺܝܪ ܠܗ̇. ܘܰܐܝܕܳܐ ܕܕܳܡܝܳܐ ܠܢܰܦܫܶܗ ܕܰܢܒܺܝܐ ܐܳܡܪܳܐ ܠܘܳܬ ܐܠܗܐ ܐܰܟܘܳܬܶܗ.
ܘܥܰܠ ܟܬܳܒܰܝ̈ܟ ܟܽܠܗܶܝܢ ܢܶܬܟܰܬܒܴ̈ܢ. ܘܰܐܝܕܳܐ ܕܗܳܟܰܢܳܐ ܐܳܡܪܳܐ ܦܰܪܶܗܣܺܝܰܐ ܘܬܽܘܟܠܳܢܳܐ ܐܝ̣ܬ ܠܗ̇ ܥܠ ܥܒܳܕܶܝ̈ܗ̇ ܕܰܠܬܶܫܒܽܘܚܬܶܗ ܡܶܬܟܰܬܒܺܝܢ ܒܣܶܦܪ̈ܶܐ ܐܰܠܗܝ̈ܐ. ܡܶܛܠ ܕܰܒܥܳܠܡܳܐ ܗܳܢܐ ܥܳܡܪܳܐ ܗܘܳܬ. ܟܽܠܝܽܘܡ ܒܫܽܘܠܳܡܳܗ̇ ܡܶܬܒܰܩܝܳܐ ܗܘܳܬ. ܘܳܐܡܪܳܐ ܐܝܟ ܢܒܺܝܐ.
ܗܳܐ ܝܰܘ̈ܡܳܬܳܐ ܐܶܬܟܰܪܺܝܘ ܘܠܰܝܬ ܒܗܽܘܢ ܐܢܳܫ. ܠܺܝ ܕܝܢ ܛܳܒ ܝ̣ܩܰܪܘ ܪ̈ܰܚܡܰܝܟ ܐܰܠܗܳܐ ܘܛܳܒ ܥܫܶܢܘ. ܠܰܝܬ ܒܗܽܘܢ ܒܰܪܢܳܫܳܐ ܡܶܛܠ ܙܥܽܘܪܽܘܬܗܽܘܢ ܫܳܐܷܛ ܘܰܡܒܰܣܰܪ ܠܗܽܘܢ ܘܪܳܚܶܡ ܕܢܶܗܘܶܐ ܕܢܺܚܶܐ ܒܙܰܕܺܝܩܽܘܬܳܐ. ܐܶܠܽܘ ܓܝܪ ܐܝ̣ܬ ܗܘܳܐ ܡܶܬܚܳܐ ܒܚܰܝ̈ܐ. ܟܒܰܪ ܠܐ ܥܕܺܝܠ ܗܘܳܐ ܗܰܘ ܕܒܳܥܶܐ ܕܢܺܚܶܐ ܒܗܽܘܢ. ܘܠܰܝܬ ܘܠܳܐ ܚܰܕ ܒܰܪܢܳܫܳܐ ܕܢܳܛܰܪ ܐܽܘܪܚܶܗ ܘܠܐ ܢܶܚܛܶܐ. ܐܶܢܳܐ ܕܶܝܢ ܠܐ ܕܳܡܶܐ ܐܢܳܐ ܠܗܳܠܝܢ ܘܠܐ ܫܳܛܶܬ ܢܳܡܽܘܣܳܟ ܘܠܐ ܒܰܣܪܶܬ ܥܠ ܦܽܘ̈ܩܕܳܢܰܝܟ. ܘܺܝܩܰܪܘ ܪ̈ܰܚܡܰܝܟ ܥܠܰܝ ܘܫܰܡܫܶܬ ܠܩܰܕܺܝ̈ܫܰܝܟ. ܘܝܰܩܺܝܪ̈ܶܐ ܘܥܰܫܺܝ̈ܢܶܐ ܗܘܰܘ ܒܥܰܝ̈ܢܰܝ. ܘܒܳܬܰܪ ܡܶܠܬܳܐ ܗܳܕܐ ܥܳܐܷܠ ܥܰܡܳܐ ܣܰܓܺܝܐܳܐ ܕܥܺܕܬܳܐ. ܗܰܘ ܕܠܰܝܬ ܠܶܗ ܡܶܢܝܳܢܳܐ ܘܠܐ ܪ̈ܺܝܫܳܢܰܘܗܝ ܡܶܬܡܢܶܝܢ.
ܘܫܰܠܺܝ̈ܛܳܢܰܝܗܘܢ ܐܶܡܢܶܐ ܐܶܢܘܢ. ܘܝܰܬܝ̣ܪ ܡܶܢ ܚܳܠܳܐ ܢܶܣܓܽܘܢ. ܪܰܒ ܬܶܗܪܳܐ ܗܳܢܳܐ ܕܰܠܟܰܘܟܒ̈ܐ ܕܰܫܡܰܝܳܐ ܡܢܳܐ ܡܶܢܝܳܢܳܐ ܘܰܠܟܽܠܗܽܘܢ ܩܪܳܐ ܫܡܳܗ̈ܐ. ܘܰܠܫܰܠܺܝ̈ܛܳܢܶܐ ܕܥܰܡܳܐ ܩܰܕܺܝܫܳܐ ܕܥܺܕܬܶܗ ܕܰܐܠܗܳܐ. ܟܕ ܫܰܪܺܝ ܢܶܡܢܶܐ ܐܶܢܘܢ. ܐܰܣܓܺܝ ܡܶܢ ܚܳܠܳܐ ܠܐ ܡܶܬܡܰܢܝܳܢܳܐ. ܪ̈ܺܝܫܶܐ ܘܰܡܕܰܒܪ̈ܳܢܶܐ ܕܥܺܕܬܳܐ. ܗܳܕܐ ܕܶܝܢ ܣܰܓܺܝܐܘܬܳܐ ܕܳܡܝܳܐ ܓܝܪ ܕܡܳܐ ܕܡܶܬܦܬܰܚ ܬܰܪܥܳܐ ܕܡܰܠܟܽܘܬܳܐ ܒܫܽܘܠܳܡܶܗ ܕܙܰܒܢܳܐ ܡܶܬܚܙܶܐ ܒܗܰܘ ܝܰܘܡܳܐ. ܡܳܐ ܕܶܐܬܬܥܺܝܪܘ ܐܝܟ ܕܡ̣ܢ ܫܶܢܬܳܐ ܟܽܠܗܽܘܢ ܥܰܡܡ̈ܐ ܒܰܩܝܳܡܬܳܐ. ܗܳܝܕܶܝܢ ܚܳܙܶܐ ܢܒܺܝܐ ܢܰܦܫܶܗ ܟܕ ܡܕܰܝܪܳܐ ܥܰܡ ܐܰܠܗܳܐ ܒܰܓܢܽܘܢܳܐ.
ܐܶܬܬܥܺܝܪܶܬ ܘܬܽܘܒ ܥܰܡܳܟ ܐܢܳܐ. ܘܢܳܕܶܬ ܡ̣ܢ ܫܶܢܬܶܗ ܕܡܰܘܬܳܐ ܘܩܰܒܠܰܢܝ ܥܽܘܒܳܐ ܕܡܰܠܟܽܘܬܳܟ. ܘܚܳܐܱܪ ܒܥܰܘܴ̈ܠܶܐ ܒܢܱ̈ܝ ܓܰܒܶܗ ܕܰܛܪܽܘܢܳܐ ܘܦܳܩܶܕ ܥܠܰܝܗܘܢ ܩܶܛܠܳܐ ܘܳܐܡܰܪ.
ܐܶܢ ܬܶܩܛܽܘܠ ܐܰܠܗܳܐ ܠܚܰܛܳܝ̈ܐ. ܘܓܰܒܪ̈ܶܐ ܕܰܕܡܳܐ ܢܶܥܒܪܽܘܢ ܡܶܢܝ. ܗܳܠܝܢ ܠܘ ܟܕ ܡܫܰܐܷܠ ܐܳܡܰܪ܆ ܐܠܐ ܡܩܰܛܪܶܓ ܠܗܽܘܢ ܒܰܐܝܠܶܝܢ ܕܰܥܒܰܕܘ. ܥܠ ܕܰܡܚܰܦܛܺܝܢ ܗܘܰܘ ܠܛܳܥܱ̈ܝܳܐ ܕܰܢܓܰܕܦܽܘܢ ܥܠ ܫܡܳܟ.
ܡܶܛܠ ܕܡܰܠܠܽܘܟ ܘܰܢܣܰܒܘ ܒܰܣܪܺܝܩܽܘܬܳܐ ܡܕܺܝܢܬܳܟ. ܐܰܡܪܽܘܟ ܓܶܝܪ ܒܺܝܫܳܐܝ̣ܬ ܘܚܰܒܶܠܘ ܫܽܘܪ̈ܶܝܗ̇ ܕܢܰܦܫܳܟ ܡܕܺܝܢܬܳܟ. ܐܳܦ ܛܰܪܕܽܘܟ ܡܶܢ ܓܰܘ ܡܕܺܝܢܬܳܐ ܕܰܥܒܰܕܬ ܠܳܟ ܒܩܰܕܺܝܫܽܘܬܳܐ ܕܬܶܫܪܳܐ ܒܗ̇. ܐܶܢܳܐ ܕܝܢ:
ܠܣܳܢܱ̈ܐܝܟ ܡܳܪܝܳܐ ܣܢܺܝܬ. ܘܥܰܠ ܐܰܝܠܶܝܢ ܕܩܳܝܡܺܝܢ ܠܩܽܘܒܠܳܟ ܐܶܬܚܰܡܬܶܬ. ܘܣܶܢܐܬܳܐ ܡܫܰܡܠܰܝܬܳܐ ܣܢܺܝܬ ܐܶܢܽܘܢ. ܘܰܗܘܰܘ ܠܺܝ ܒܥܶܠܕ̈ܒܳܒܶܐ. ܒܗܳܠܝܢ ܡܰܠܶܦ ܕܡܶܢ ܫܽܘܪܳܝܳܐ ܒܛܰܪܟܳܢܽܘܬܳܐ ܡܥܰܬܕܺܝܢ ܗܘܰܘ ܕܰܝ̈ܘܶܐ ܢܶܟܠܳܐ ܘܰܟܡܻ̈ܐܢܶܐ ܥܰܠ ܢܰܦܫܳܐ. ܗܳܟܰܢܳܐ ܓܝܪ ܐܶܡܰܪ ܗܘܳܐ ܡܶܢ ܩܕܺܝܡ ܒܦܰܪܕܰܝܣܳܐ. ܗܰܘ ܕܡܰܠܶܠ ܒܚܶܘܝܳܐ ܥܰܡ ܚܰܘܳܐ: ܡܶܛܠ ܕܝܳܕܰܥ ܐܰܠܗܳܐ ܕܰܒܝܰܘܡܳܐ ܕܬܶܐܟܠܽܘܢ ܡܶܢ ܐܝ̣ܠܳܢܳܐ ܡܶܬܦܰܬܚܴ̈ܢ ܥܰܝܢܰܝ̈ܟܽܘܢ ܘܗܳܘܶܝܬܽܘܢ ܐܰܝܟ ܐܰܠܳܗ̈ܐ ܝܳܕ̈ܥܰܝ ܛܳܒܬܳܐ ܘܒܺܝܫܬܳܐ (ܒܪܝܬܐ ܓ: ܕ-ܗ). ܘܥܰܠ ܕܰܒܟܽܠܙܒܰܢ ܩܳܝܡܺܝܢ ܗܘܰܘ ܠܽܘܩܒܰܠ ܐܰܠܗܐ. ܣܶܢܐܬܳܐ ܡܫܰܡܠܰܝܬܳܐ ܣܳܢܶܐ ܗܘܳܐ ܠܗܽܘܢ. ܘܰܒܥܶܠܕ̈ܒܳܒܶܐ ܕܢܰܦܫܶܗ ܚܳܫܶܒ ܗܘܳܐ ܠܗܽܘܢ. ܘܥܰܠܗܳܝ ܐܳܡܰܪ ܗܘܳܐ ܠܘܳܬ ܐܰܠܗܳܐ.
ܒܨܺܝܢܝ ܐܰܠܗܳܐ ܘܕܰܥ ܠܶܒܝ ܘܰܒܚܽܘܪܰܝܢܝ ܘܕܰܥ ܗܰܠܟܴ̈ܬܝ. ܘܰܚܙܺܝ ܐܶܢ ܐܝ̣ܬ ܒܺܝ ܐܽܘܪܚܳܐ ܕܫܽܘܩܪܳܐ ܕܰܒܰܪܰܝܢܝ ܒܽܐܘܪܚܳܟ ܕܰܠܥܳܠܰܡ. ܕܢܺܐܡܰܪ ܐܢܳܫ ܠܐܠܗܐ ܕܢܶܒܨܶܝܘܗܝ ܘܢܶܕܰܥ ܠܶܒܶܗ. ܘܥܰܠ ܕܰܬܟܺܝܠ ܗܘܳܐ ܢܒܺܝܐ ܒܕܰܟܝܽܘܬܳܐ ܕܠܶܒܶܗ ܩܪܳܐ ܠܰܐܠܗܳܐ ܕܢܶܗܘܶܐ ܠܶܗ ܒܳܨܽܘܝܳܐ. ܘܥܰܠ ܕܠܳܐ ܣܛܳܐ ܡܶܢ ܐܽܘܪܚܳܐ ܕܡܰܠܟܳܐ ܫܶܐܠ ܡܶܢܶܗ ܕܢܶܒܚܽܘܪ ܗܰܠܟܴ̈ܬܶܗ. ܘܥܰܠ ܕܠܰܝܬ ܗܘܳܐ ܐܽܘܪܚܳܐ ܕܫܽܘܩܪܳܐ. ܕܰܒܪܶܗ ܒܽܐܘܪܚܳܐ ܕܰܠܥܳܠܰܡ. ܐܽܘܪܚܳܐ ܕܫܶܐܠ ܢܒܺܝܐ ܕܒܳܗ̇ ܢܶܕܒܪܶܗ܆ ܗܽܘܝܽܘ ܥܰܡܰܢܽܘܐܝܠ ܗܰܘ ܕܶܐܡܰܪ ܠܬܰܠܡܺܝ̈ܕܰܘܗܝ ܕܶܐܢܳܐ ܐܢܳܐ ܐܽܘܪܚܳܐ ܘܰܫܪܳܪܳܐ ܘܚܰܝ̈ܐ (ܝܘܚܢܢ ܝܕ: ܘ) ܕܗܽܘ ܢܶܗܘܳܐ ܠܳܗ̇ ܡܕܰܒܪܳܢܳܐ ܠܢܰܦܫܰܢ. ܠܘܳܬ ܡܰܦ̈ܩܳܢܶܐ ܟܺܐܢ̈ܐ ܘܰܬܪ̈ܺܝܨܶܐ. ܘܠܶܗ ܝܳܐܶܐ ܫܽܘܒܚܳܐ ܘܬܰܘܕܺܝܬܳܐ ܠܥܳܠܰܡ ܐܰܡܺܝܢ܀
ܡܙܡܘܪܐ ܕܡܐܐ ܘܬܠܬܝܢ ܘܬܫܥܐ
ܥܰܠ ܕܒܳܥܶܐ ܣܳܛܳܢܳܐ ܕܰܒܝܰܕ ܐܢܳܫ̈ܐ ܥܰܘܴ̈ܠܶܐ ܡܰܥܒܶܕ ܨܶܒܝܳܢܶܗ.
ܛܰܝܒܽܘܬܶܗ ܕܰܐܠܗܳܐ ܠܐܢܳܫܴ̈ܐ ܩܰܕܺܝ̈ܫܶܐ ܒܰܫܡܳܐ ܟܰܢܝܰܬ ܐܶܢܘܢ܆ ܡܶܛܠ ܕܰܟܝܽܘܬܳܐ ܕܕܽܘܒܳܪ̈ܰܝܗܽܘܢ ܨܰܒܬܰܬ ܣܰܢܝܽܘܬܶܗ ܕܰܟܝܳܢܳܐ ܕܶܐܬܚܰܝܰܒ ܠܰܚܛܺܝܬܳܐ. ܘܡܶܛܠ ܫܽܘܦܪܳܐ ܕܕܽܘܒܳܪ̈ܰܘܗܝ ܕܡܽܘܫܶܐ. ܣܳܡ ܠܶܗ ܫܡܳܐ ܝܰܩܺܝܪܳܐ ܕܰܐܠܗܳܐ ܢܶܬܩܪܶܐ ܠܦܶܪܥܽܘܢ (ܡܦܩܢܐ ܙ: ܐ). ܘܰܐܟܙܢܳܐ ܕܐܢܳܫܴ̈ܐ ܩܰܕܺܝ̈ܫܐ ܒܫܶܡ ܩܰܕܺܝܫܳܐ ܡܶܬܟܰܢܶܝܢ. ܗܳܟܰܢܳܐ ܐܳܦ ܥܰܘܴ̈ܠܶܐ ܡܶܢ ܗܰܘ ܥܰܘܳܠܳܐ ܢܳܣܒܺܝܢ ܟܽܘܢܳܝܳܐ. ܘܒܺܝ̈ܫܶܐ ܡ̣ܢ ܒܺܝܫܳܐ. ܘܚܰܛܳܝ̈ܐ ܡ̣ܢ ܚܰܛܳܝܳܐ. ܡܳܕܶܝܢ ܗܳܝ ܕܶܐܡܰܪ ܢܒܺܝܳܐ ܒܙܽܘܡܳܪܶܗ.
ܦܰܨܳܢܝ ܡܳܪܝܳܐ ܡܶܢ ܒܰܪܢܳܫܳܐ ܒܺܝܫܳܐ. ܡܶܢ ܗܰܘ ܕܡܰܥܒܶܕ ܒܺܝܫܬܳܐ. ܟܺܐܢܳܐܝ̣ܬ ܡܨܰܠܶܐ ܒܰܪܢܳܫܳܐ ܕܢܶܬܦܰܨܶܐ ܡܶܢ ܒܺܝܫܳܐ ܕܰܐܝܟ ܗܳܢܐ ܐܳܦ ܓܝܪ ܛܽܘܒܳܢܳܐ ܕܰܘܝܕ ܟܕ ܢܩܰܫ ܒܩܺܝܬܳܪܶܗ ܘܰܛܪܰܕ ܪܽܘܚܳܐ ܒܺܝܫܬܳܐ ܡܶܢ ܫܳܐܘܳܠ. ܗܰܘ ܡܰܠܟܳܐ ܕܺܝܣܪܳܐܝܠ ܕܡܶܬܬܰܥܒܰܕ ܗܘܳܐ ܡܶܢ ܪܽܘܚܳܐ ܒܺܝܫܳܐ ܕܫܺܐܕܳܐ. ܒܗܳܢܐ ܙܰܒܢܳܐ ܒܳܥܶܐ ܗܘܳܐ ܫܳܐܘܳܠ ܠܡܶܩܛܠܶܗ ܠܕܰܘܝܕ ܒܡܽܘܪܳܢܺܝܬܳܐ ܕܺܝܠܶܗ. ܥܪܰܩ ܡ̣ܢ ܩܕܳܡܰܘܗܝ ܘܶܐܬܦܰܠܰܛ ܘܠܐ ܩܒܰܠ ܥܠܰܘܗܝ ܠܪ̈ܰܒܰܝ ܚܰܝ̈ܠܶܐ. ܘܠܐ ܢܦܰܩ ܐܰܡܪܶܗ ܒܺܝܫܳܐܝ̣ܬ ܩܕܳܡ ܥܰܡܳܐ ܕܣܳܢܶܐ ܗܘܳܐ ܠܶܗ. ܐܠܐ ܚܳܪ ܠܘܳܬ ܟܺܐܢܽܘܬܳܐ ܘܒܰܨܠܽܘܬܳܐ ܐܳܡܰܪ ܗܘܳܐ ܘܰܡܙܰܡܰܪ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܬܠܳܬܺܝܢ ܘܰܬܫܰܥ ܘܳܐܡܰܪ:
ܦܰܨܳܢܝ ܡܳܪܝܳܐ ܡܶܢ ܒܰܪܢܳܫܳܐ ܒܺܝܫܳܐ. ܘܡܶܢ ܓܰܒܪ̈ܶܐ ܥܰܘܴ̈ܠܶܐ ܢܰܛܰܪܰܝܢܝ. ܕܶܐܬܚܰܫܰܒܘ ܘܰܛܡܰܪܘ ܦܰܚܷ̈ܐ. ܘܟܽܠܶܗ ܝܰܘܡܳܐ ܓܰܪܶܓܘ ܗܶܪܬܳܐ. ܗܳܠܶܝܢ ܐܶܡܰܪ ܟܕ ܬܢܳܐ ܒܺܝܫܽܘܬܶܗ ܕܫܳܐܘܳܠ. ܡܶܛܠ ܗܳܢܐ ܫܰܘܕܰܥ ܫܡܶܗ.
ܕܰܠܛܰܫܘ ܠܶܫܳܢܗܽܘܢ ܐܰܝܟ ܕܚܶܘܝܳܐ. ܘܚܶܡܬܳܐ ܕܶܐܣܦܶܣ ܬܚܶܝܬ ܣܶܦܘܴ̈ܬܗܘܢ. ܚܶܘܝܳܐ ܕܰܠܛܰܫ ܗܘܳܐ ܠܶܫܳܢܶܗ ܕܫܳܐܘܳܠ ܗܰܘ ܩܰܕܡܳܝܳܐ ܕܰܐܠܶܦ ܠܚܰܘܳܐ ܕܬܶܪܗܰܛ ܠܘܬ ܐܝ̣ܠܳܢܳܐ. ܘܶܐܬܦܰܩܕܰܬ ܡܶܢ ܐܰܠܗܐ ܕܠܐ ܬܶܐܟܽܘܠ ܡܶܢܶܗ. ܡܕܰܡܶܐ ܚܶܡܬܗܽܘܢ ܠܗܳܝ ܕܶܐܣܦܶܣ. ܡܶܛܠ ܕܠܐ ܡܶܬܛܦܺܝܣܳܐ ܠܫܰܝܢܳܐ. ܗܳܟܰܢܳܐ ܓܶܝܪ ܐܝ̣ܬܶܝܗ̇ ܐܶܣܦܶܣ ܠܘܳܬ ܩܳܠܳܐ ܕܠܳܚܽܘܫܳܐ ܘܰܕܚܰܒܳܪܳܐ ܘܰܕܚܰܟܺܝܡܳܐ ܟܕ ܡܰܣܓܶܝܢ ܠܳܚܫܺܝܢ ܠܘܳܬܳܗ̇. ܘܟܕ ܡܩܰܕܡܳܐ ܡܰܪܓܫܳܐ ܒܩܳܠܳܐ ܕܠܳܚܽܘܫܳܐ ܪܳܡܝܳܐ ܗܺܝ ܠܳܗ̇ ܥܰܠ ܐܰܪܥܳܐ ܘܰܚܕܳܐ ܐܶܕܢܳܐ ܕܺܝܠܳܗ̇ ܪܳܡܝܳܐ ܠܗ̇ ܒܓܰܘ ܥܰܦܪܳܐ ܘܣܳܟܪܳܐ ܠܗ̇. ܘܗܳܝ ܥܶܠܳܝܬܳܐ ܕܠܐ ܢܰܩܺܝܦܳܐ ܠܰܐܪܥܳܐ. ܟܳܝܦܳܐ ܕܽܘܢܒܳܗ̇ ܘܣܳܝܡܳܐ ܒܓܰܘܳܗ̇. ܘܗܳܟܰܢܳܐ ܠܳܐ ܡܶܬܬܦܺܝܣܳܐ ܠܐܷܫܦܳܐ ܕܚܰܟܺܝܡܳܐ. ܕܰܐܝܟ ܗܳܟܰܢܐ ܐܝ̣ܬܶܝܗ̇ ܚܶܡܬܳܐ ܕܥܰܘܴ̈ܠܶܐ. ܡܶܛܠܗܳܢܐ ܡܨܰܠܶܐ ܢܒܺܝܐ ܘܳܐܡܰܪ:
ܢܰܛܰܪܰܝܢܝ ܐܰܠܗܳܐ ܡܶܢ ܐܝ̣ܕܳܐ ܕܥܰܘܴ̈ܠܶܐ ܘܡܶܢ ܓܰܒܪ̈ܶܐ ܚܳܛܽܘܦܶܐ ܢܰܛܰܪܰܝܢܝ. ܕܶܐܬܚܰܫܰܒܘ ܠܡܶܕܚܳܐ ܗܰܠܟܴ̈ܬܝ ܘܰܛܡܰܪܘ ܠܝ̣ ܫܰܒܰܗܪ̈ܳܢܶܐ ܦܰܚܷ̈ܐ. ܘܚܰܒ̈ܠܶܐ ܕܰܡܨܺܝ̈ܕܳܬܗܽܘܢ ܦܪܰܣܘ ܥܰܠ ܫܒܺܝ̈ܠܰܝ. ܘܰܡܨܺܝܕܬܳܐ ܫܕܰܘ ܥܠܰܝ. ܦܰܚ̈ܐ ܓܝܪ ܘܰܡܨܺܝ̈ܕܳܬܳܐ ܘܚܰܒ̈ܠܶܐ ܠܐ ܡܶܡܬܽܘܡ ܐܶܫܬܰܡܥܰܬ ܕܰܛܡܰܪܘ ܥܰܘܴ̈ܠܶܐ ܠܰܐܝܠܶܝܢ ܕܣܳܢܶܝܢ ܠܗܽܘܢ. ܘܠܳܐ ܫܳܐܘܳܠ ܕܣܳܢܶܐ ܗܘܳܐ ܠܶܗ ܠܕܰܘܝܕ. ܠܐ ܐܶܡܰܪ ܠܨܰܝܴ̈ܕܶܐ ܕܢܰܪܡܽܘܢ ܡܨܺܝ̈ܕܳܬܳܐ ܥܰܠ ܗܰܠܟܴ̈ܬܶܗ. ܐܶܠܐ ܓܰܠܝܳܐܝ̣ܬ ܡܚܰܘܶܐ ܗܘܳܐ ܫܳܐܘܳܠ ܒܺܝܫܽܘܬܶܗ ܕܰܠܘܳܬ ܕܰܘܝܕ ܟܕ ܫܕܳܐ ܒܶܗ ܡܽܘܪܳܢܺܝܬܳܐ. ܟܕ ܕܒܰܪ ܓܰܒܪ̈ܶܐ. ܓܰܒܪ̈ܶܐ ܡܶܢ ܟܽܠܶܗ ܝ̣ܣܪܳܐܝܠ ܘܰܪܕܰܦ ܒܳܬܪܶܗ ܠܡܶܩܛܠܶܗ. ܡܳܕܶܝܢ ܗܳܠܝܢ ܕܰܛܡܰܪܘ ܦܰܚܷ̈ܐ ܠܰܢܒܺܝܐ. ܚܕܳܐ ܙܒܰܢ ܨܠܰܘ ܠܶܗ ܦܰܚܳܐ ܘܨܳܕܽܘܗܝ. ܟܕ ܓܝܪ ܢܶܦܩܰܬ ܒܰܪܬܫܒܰܥ ܠܡܶܣܚܳܐ ܡ̣ܢ ܟܶܦܣܳܗ̇. ܗܳܝܕܶܝܢ ܦܰܚܳܐ ܕܓܰܘܪܳܗ̇ ܛܡܰܪ ܗܘܳܐ ܠܶܗ ܠܗܰܘ ܝܰܘܢܳܐ ܬܰܡܺܝܡܳܐ. ܘܨܳܕܶܗ ܠܬܰܡܺܝܡܳܐ ܦܰܚܳܐ ܕܓܰܘܪܳܐ. ܠܓܰܒܪܳܐ ܢܰܟܦܳܐ ܕܰܐܝܟ ܗܳܢܐ. ܘܬܘܒ ܦܰܚܳܐ ܐܚܪܺܢܳܐ ܨܠܳܐ ܠܶܗ ܕܩܶܛܠܳܐ. ܘܰܩܛܰܠ ܘܫܰܡܠܺܝ ܪܶܓܬܶܗ. ܒܰܪ̈ܓܺܝܓܳܬܳܐ ܕܒܶܣܪܳܐ ܛܡܺܝܪܺܝܢ ܦܰܚܰܝ̈ܗܽܘܢ ܕܫܰܒܰܗܪ̈ܳܢܶܐ. ܗܰܘ ܕܰܡܨܰܠܶܐ ܩܳܥܶܐ ܘܡܰܙܥܶܩ ܗܘܳܐ ܢܒܺܝܐ ܘܳܐܡܰܪ:
ܐܶܡܪܶܬ ܠܡܳܪܝܳܐ ܕܰܐܠܳܗܝ ܐܰܢܬ ܨܽܘܬ ܠܩܳܠܳܐ ܕܒܳܥܽܘܬܝ. ܡܳܪܝܳܐ ܦܳܪܽܘܩܝ ܥܰܫܺܝܢܳܐ. ܡܰܛܠܠܶܗ ܕܪܺܝܫܝ ܒܝܰܘܡܳܐ ܕܰܩܪܳܒܳܐ. ܠܳܐ ܬܶܬܶܠ ܡܳܪܝܳܐ ܪܶܓܬܶܗ ܠܥܰܘܳܠܳܐ. ܘܬܰܪܥܺܝܬܶܗ ܠܳܐ ܬܶܣܰܩ ܠܪܺܝܫܝ. ܗܳܠܶܝܢ ܩܴ̈ܠܶܐ ܕܒܳܥܽܘܬܳܐ ܕܰܒܗܽܘܢ ܡܶܬܚܰܫܚܳܐ ܢܰܦܫܳܐ ܠܘܬ ܐܰܠܗܐ. ܕܠܺܝܠܳܐܝ̣ܬ ܡܰܡܕܳܐ ܢܰܦܫܳܐ ܡ̣ܢ ܦܰܚ̈ܐ ܕܰܒܥܶܠܕ̈ܒܳܒܶܐ. ܘܡܶܣܬܰܚܦܺܝܢ ܒܰܡܨܺܝܕܬܳܐ ܕܰܛܡܰܪܘ ܘܡܶܬܬܰܚܕܺܝܢ ܐܝܟ ܕܶܐܡܰܪ ܢܒܺܝܐ.
ܢܟܰܣܶܐ ܐܶܢܽܘܢ ܥܰܘܠܳܐ ܕܣܶܦ̈ܘܳܬܗܽܘܢ. ܘܢܶܚ̈ܬܳܢ ܥܠܰܝܗܽܘܢ ܓܽܘܡܪ̈ܶܐ. ܘܢܶܦܠܽܘܢ ܒܢܽܘܪܳܐ: ܘܠܐ ܢܶܫܟܚܽܘܢ ܠܰܡܩܳܡ. ܗܳܠܝܢ ܥܠ ܕܺܝܢܳܐ ܘܥܠ ܬܰܫܢܺܝܩܳܐ ܡܰܠܦܴ̈ܢ. ܕܢܳܦܠܺܝܢ ܥܳܒ̈ܕܰܝ ܫܽܘܩܪܳܐ ܒܓܺܗܰܢܳܐ ܗܳܝ ܕܰܠܥܳܠܰܡ ܗܳܝ ܕܶܐܡܰܪ ܠܗܽܘܢ ܪܳܥܝܳܐ: ܕܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ. ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ (ܡܬܝ ܟܗ: ܡܐ). ܘܰܬܟܰܣ ܠܗܽܘܢ ܚܺܐܦܳܐ ܩܰܠܺܝܠܳܐ ܕܢܽܘܪܳܐ ܘܟܶܒܪܺܝܬܳܐ ܕܠܳܐ ܢܶܗܘܽܘܢ ܚܳܝܪܺܝܢ ܒܰܫܡܰܝܳܐ. ܡܶܛܠܗܳܢܐ ܟܕ ܚܰܒܶܠ ܐܰܠܗܐ ܠܰܣܕܽܘܡ ܘܰܠܥܳܡܽܘܪܳܐ. ܠܘ ܡ̣ܢ ܐܰܪܥܳܐ ܐܰܣܶܩ ܥܠܰܝܗܽܘܢ ܢܽܘܪܳܐ. ܐܠܐ ܡ̣ܢ ܫܡܰܝܳܐ ܐܰܡܛܰܪ ܥܠܰܝܗܽܘܢ ܢܽܘܪܳܐ ܘܟܶܒܪܺܝܬܳܐ. ܗܳܟܰܢܐ ܘܟܕ ܚܪܰܒ ܐܶܢܘܢ ܐܰܠܗܳܐ ܠܳܐܬܽܘܪ̈ܳܝܶܐ ܘܠܰܟܢܰܥ̈ܢܳܝܶܐ. ܡ̣ܢ ܩܕܳܡ ܒܢܱ̈ܝ ܝ̣ܣܪܳܐܝܠ.ܟܕ ܢܳܚܬܺܝܢ ܒܡܰܚܰܬܬܳܐ ܕܒܶܝܬ ܚܰܘܪܰܢ. ܟܺܐܦ̈ܐ ܕܒܰܪܕܳܐ ܫܳܕܶܐ ܗܘܳܐ ܥܠܰܝܗܽܘܢ ܡܶܢ ܫܡܰܝܳܐ. ܘܡܶܬܢܰܩܡܳܐ ܗܘܳܬ ܡܶܢܗܘܢ ܐܝ̣ܕܳܐ ܕܰܐܠܗܳܐ. ܡܶܛܠܗܳܢܐ ܐܡ̣ܪ ܢܒܺܝܐ:
ܒܰܪܢܳܫܳܐ ܠܶܫܳܢܳܢܳܐ ܠܳܐ ܢܶܬܩܰܝܰܡ ܒܰܐܪܥܳܐ. ܓܰܒܪܳܐ ܥܰܘܳܠܳܐ ܒܺܝܫܬܶܗ ܬܨܽܘܕܺܝܘܗܝ ܠܰܐܒܕܳܢܳܐ܀ ܠܶܫܳܢܳܢܳܐ ܩܳܪܶܐ ܠܶܗ ܡܶܛܠ ܕܰܒܣܰܓܺܝܐܘܬ ܠܶܫܳܢ̈ܐ ܡܰܠܶܦ ܒܺܝܫܬܳܐ. ܘܠܐ ܝܳܕܰܥ ܕܢܶܫܬܽܘܩ ܡܶܢ ܛܰܪܟܳܡܽܘܬܳܐ. ܗܳܝ ܕܠܐ ܢܶܬܩܰܝܰܡ ܒܰܐܪܥܳܐ. ܐܝܟ ܗܳܝ ܕܰܢܣܽܘܦܽܘܢ ܚܰܛܳܝ̈ܐ ܡܶܢ ܐܰܪܥܳܐ. ܘܥܰܘܴ̈ܠܶܐ ܠܳܐ ܢܶܫܬܰܚܪܽܘܢ ܒܳܗ̇ (ܡܙܡܘܪܐ ܩܕ: ܠܗ). ܘܰܠܓܰܒܪܳܐ ܥܰܘܳܠܳܐ ܒܺܝܫܬܶܗ ܨܳܝܕܳܐ ܠܶܗ ܒܬܰܫܢܺܝܩܳܐ ܕܠܳܐ ܓܳܡܰܪ. ܟܺܐܢܳܐ ܓܶܝܪ ܒܗܰܘ ܡܶܕܶܡ ܕܰܚܛܳܐ ܡܶܬܬܕܺܝܢ. ܘܰܒܚܰܒܠܳܐ ܕܰܚܛܳܗܰܘ̈ܗܝ ܢܶܬܦܟܰܪ. ܡܶܛܠܗܳܢܐ ܐܳܡܰܪ ܪܽܘܚܳܐ ܒܰܢܒܺܝܳܐ:
ܝܶܕܥܶܬ ܕܥܳܒܶܕ ܡܳܪܝܳܐ ܕܺܝܢܳܐ ܕܡܶܣܟܻ̈ܢܶܐ ܘܕܺܝܢܳܐ ܕܒܳܝ̈ܫܶܐ. ܒܪܰܡ ܙܰܕܺܝ̈ܩܶܐ ܢܰܘܕܽܘܢ ܠܰܫܡܳܟ. ܘܢܶܬܒܽܘܢ ܬܪ̈ܺܝܨܶܐ ܩܕܳܡ ܐܰܦܰܝ̈ܟ. ܕܺܝܢܳܐ ܕܥܳܒܶܕ ܡܳܪܝܳܐ ܠܡܶܣܟܺܢ̈ܐ ܘܰܠܒܳܝ̈ܫܶܐ ܦܽܘܪܩܳܢܳܐ ܕܡܶܢ ܡܰܘܬܳܐ ܘܰܚܒܳܠܳܐ ܐܝ̣ܬܰܘܗܝ. ܘܰܬܪ̈ܺܝܨܶܐ ܕܝܳܬܒܺܝܢ ܩܕܳܡ ܐܰܦܰܘ̈ܗܝ. ܠܗ ܡܫܰܡܰܗ ܒܳܝ̈ܫܶܐ. ܕܳܐܦܚܢܰܢ ܢܶܫܬܘܶܐ ܕܰܒܪ̈ܰܚܡܶܐ ܢܶܥܒܶܕ ܡܳܪܝܳܐ ܕܺܝܢܰܢ ܘܰܢܦܰܨܶܐ ܠܰܢ ܡܶܢ ܡܰܘܬܳܐ ܘܰܚܒܳܠܳܐ ܒܝܰܘܡܳܐ ܕܓܶܠܝܳܢܶܗ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ
ܡܰܘܕܰܥ ܕܟܺܐܦܳܐ ܐܝ̣ܬܰܘܗܝ ܥܰܡܰܢܽܘܐܝܠ ܕܰܦܣܰܩ ܝܽܘܒܳܠܳܐ ܕܟܽܘܡܪ̈ܶܐ ܘܡܰܠܟܷ̈ܐ ܘܰܢܒܺܝܷ̈ܐ ܡܶܢ ܥܰܡܳܐ ܕܝܽܘܕܳܝܷ̈ܐ. ܘܥܰܠ ܩܽܘܪܒܳܢܳܐ ܘܬܶܫܡܶܫܬܳܐ ܕܪܰܡܫܳܐ.
ܟܕ ܡ̣ܢ ܡܽܘܫܶܐ ܫܰܪܺܝ ܢܳܡܽܘܣܳܐ ܐܰܠܗܝܳܐ ܢܶܬܚܙܶܐ ܒܺܝܣܪܳܐܝܠ. ܗܽܘ ܓܝܪ ܗܘܳܐ ܩܰܕܡܳܝܳܐ ܣܳܐܷܡ ܢܳܡܽܘܣܳܐ ܪܽܘܚܳܢܳܐ: ܘܕܰܘܝܕ ܗܰܘ ܡܰܠܟܳܐ ܘܰܢܒܺܝܐ ܡܶܬܚܰܙܝܳܐ ܕܳܐܦ ܣܰܓܺܝ̈ܐܬܳܐ ܡܰܠܝ̣ ܡܽܘܫܶܐ ܗܳܟܝ̣ܠ ܣܳܡ ܢܳܡܽܘܣܳܐ ܠܟܳܗܢ̈ܐ. ܕܰܒܥܶܕܳܢܳܐ ܕܪܰܡܫܳܐ ܢܰܢܗܪ̈ܳܢ ܫܪ̈ܳܓܶܐ ܥܠ ܡܢܳܪܬܳܐ ܒܡܰܫܟܢܳܐ ܕܣܳܗܕܽܘܬܳܐ ܘܢܶܗܘܶܐ ܣܳܕܰܪ ܠܗܽܘܢ ܐܰܗܪܽܘܢ ܠܰܫܪ̈ܳܓܶܐ ܩܕܳܡ ܡܳܪܝܳܐ. ܡ̣ܢ ܪܰܡܫܳܐ ܥܕܰܡܳܐ ܠܨܰܦܪܳܐ ܕܰܢܫܰܡܫܽܘܢ ܬܶܫܡܶܫܬܳܐ ܒܡܰܫܟܢܳܐ. ܟܕ ܕܶܝܢ ܐܶܬܳܐ ܛܽܘܒܳܢܳܐ ܕܰܘܝܕ ܘܶܐܫܟܰܚ ܐܶܢܘܢ ܟܕ ܡܰܢܗܪܺܝܢ ܫܪ̈ܳܓܶܐ ܒܪܰܡܫܳܐ ܩܕܳܡ ܡܳܪܝܳܐ. ܐܝܟ ܕܪܳܕܶܐ ܠܘܳܬܗܽܘܢ ܛܶܟܣܳܐ ܕܬܶܫܡܶܫܬܳܐ ܒܝܽܘܒܳܠܳܐ. ܐܰܘܣܶܦ ܠܗܽܘܢ ܠܟܳܗܢ̈ܐ ܥܰܠ ܡܰܫܠܡܳܢܽܘܬܳܐ. ܕܢܶܗܘܽܘܢ ܡܫܰܒܚܺܝܢ ܠܡܳܪܝܳܐ ܡܳܐ ܕܡܰܢܗܪܺܝܢ ܫܪ̈ܳܓܶܐ. ܘܟܕ ܩܳܝܡܺܝܢ ܟܳܗܢ̈ܐ ܒܡܰܫܟܢܳܐ. ܘܰܡܙܰܡܰܪ ܗܘܳܐ ܟܰܕ ܩܳܐܷܡ ܗܘܳܐ ܒܰܝܢܳܬܗܽܘܢ ܘܰܡܫܰܒܰܚ ܘܳܐܡܰܪ:
ܡܳܪܝܳܐ ܩܪܺܝܬܳܟ ܐܰܢܬ ܥܢܺܝܢܝ: ܘܨܽܘܬ ܡܶܠܰܝ̈ ܘܩܰܒܶܠ. ܨܠܽܘܬܝ ܐܰܝܟ ܥܶܛܪܳܐ ܩܕܳܡܰܝܟ: ܩܽܘܪܒܳܢܳܐ ܕܺܐܝ̈ܕܰܝ ܐܰܝܟ ܩܽܘܪܒܳܢܳܐ ܕܪܰܡܫܳܐ܀ ܗܳܢܐ ܫܽܘܪܳܝܳܐ ܥܒܰܕ ܡܙܰܡܪܳܢܳܐ ܠܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܥܺܝܢ. ܘܡܶܛܠ ܬܶܫܒܽܘܚܬܳܐ ܕܪܰܡܫܳܐ ܐܶܬܢܰܒܺܝ ܗܳܠܝܢ. ܟܕ ܡܦܺܝܣ ܒܰܥܝܳܕܶܗ ܘܩܳܪܶܐ ܐܝܟ ܢܳܡܽܘܣܶܗ ܕܢܶܬܥܢܶܐ ܡܶܢ ܡܳܪܝܳܐ. ܘܰܕܢܶܫܬܰܘܙܰܒ ܡ̣ܢ ܒܥܶܠܕ̈ܒܳܒܰܘܗܝ ܘܢܶܫܬܰܡ̈ܥܳܢ ܡܶܠܰܘ̈ܗܝ ܡܶܬܟܰܫܰܦ. ܘܬܶܗܘܶܐ ܨܠܽܘܬܶܗ ܐܰܝܟ ܥܶܛܪܳܐ ܕܒܶܣ̈ܡܶܐ ܛܳܒܷ̈ܐ ܩܕܳܡ ܐܰܠܗܳܐ ܘܩܽܘܪܒܳܢܳܐ ܕܪܰܡܫܳܐ ܗܽܘܝܽܘ ܡܫܺܝܚܳܐ ܕܩܰܪܶܒ ܗܽܘ ܠܶܗ ܒܪܰܡܫܳܐ ܕܰܥܪܽܘܒܬܳܐ ܘܦܰܠܶܓ ܒܶܣܪܶܗ ܠܰܫܠܺܝ̈ܚܶܐ ܘܠܰܡܣܰܒܪ̈ܳܢܶܐ ܩܕܳܡ ܕܶܐܬܥܰܠܺܝ ܠܰܨܠܺܝܒܳܐ. ܘܗܳܢܰܘ ܩܽܘܪܒܳܢܳܐ ܩܰܕܡܳܝܳܐ ܕܰܚܕܰܬܳܐ ܐܰܟܡܳܐ ܕܶܐܬܢܰܒܺܝ ܩܕܳܡ ܙܰܒܢ̈ܐ ܘܕܳܪ̈ܶܐ ܥܰܠ ܡܫܺܝܚܳܐ ܗܽܘ ܡܙܰܡܪܳܢܳܐ ܕܰܘܝܕ. ܫܰܦܝ̣ܪ ܓܶܝܪ ܕܰܡܺܝ ܡܙܰܡܪܳܢܳܐ. ܠܩܽܘܪܒܳܢܳܐ ܕܺܐܝܕܰܘ̈ܗܝ ܐܝܟ ܩܽܘܪܒܳܢܳܐ ܕܪܰܡܫܳܐ. ܡܶܛܠ ܕܒܰܪ ܕܰܘܝܕ ܟܰܢܝܶܗ ܣܰܡܝܳܐ. ܐܶܢܗܽܘ ܕܰܒܪܰܡܫܳܐ ܕܫܽܘܠܳܡܳܐ ܡܳܐ ܕܢܳܦܩܳܐ ܢܰܦܫܳܐ ܡ̣ܢ ܦܰܓܪܳܐ. ܟܰܕ ܬܶܫܟܰܚ ܠܰܡܩܰܪܳܒܽܘ ܒܶܣܡ̈ܐ ܕܰܐܝܟ ܗܳܠܝܢ܆ ܗܳܝܕܶܝܢ ܒܩܽܘܪܒܳܢܳܐ ܕܪܰܡܫܳܐ ܡܶܬܕܰܡܶܐ ܩܽܘܪܒܳܢܳܐ ܕܺܐܝ̈ܕܶܝܗ̇. ܐܰܝܢܰܐ ܗܘ ܩܽܘܪܒܳܢܳܐ ܕܪܰܡܫܳܐ ܕܗܳܟܰܢ ܫܰܒܚܶܗ ܢܒܺܝܐ ܘܰܐܘܪܒܶܗ. ܐܶܠܘ ܓܶܝܪ ܠܳܐ ܪܰܒ ܗܘܳܐ. ܘܠܐ ܕܢܶܗܘܶܐ ܩܽܘܪܒܳܢܳܐ ܕܺܐܝܕܰܘ̈ܗܝ ܐܰܟܘܳܬܶܗ ܡܦܺܝܣ ܗܘܳܐ. ܩܽܘܪܒܳܢܳܐ ܕܪܰܡܫܳܐ ܗܳܢܰܘ ܗܰܘ ܕܶܒܚܳܐ ܩܰܕܺܝܫܳܐ ܘܶܐܡܪܳܐ ܕܚܰܝ̈ܐ ܡܫܺܝܚܳܐ. ܕܩܰܪܶܒ ܗܽܘ ܠܶܗ ܥܰܠ ܡܰܕܒܚܳܐ ܕܓܳܓܽܘܠܬܳܐ. ܟܕ ܡܩܰܪܒܺܝܢ ܠܶܗ ܟܳܗܢ̈ܐ ܕܝܽܘܕܳܝ̈ܐ. ܗܘܳܐ ܪܰܡܫܳܐ ܒܥܶܕܳܢܳܐ ܕܛܰܗܪܳܐ. ܘܟܰܣܺܝ ܚܶܫܽܘܟܳܐ ܠܰܐܪܥܳܐ ܒܥܶܕܳܢܳܐ ܕܶܐܨܛܠܶܒ. ܗܳܢܰܘ ܩܽܘܪܒܳܢܳܐ ܕܪܰܡܫܳܐ ܕܩܰܕܶܫ ܠܥܶܠܳܝܷ̈ܐ ܘܰܠܬܰܚܬܳܝ̈ܐ. ܒܢܽܘܩܳܝܳܐ ܕܰܕܡܶܗ ܝܰܩܺܝܪܳܐ. ܘܰܒܗܳܢܳܐ ܕܶܒܚܳܐ ܩܰܕܺܝܫܳܐ ܘܩܽܘܪܒܳܢܳܐ ܕܬܰܪܥܽܘܬܳܐ. ܕܩܰܪܶܒܘ ܨܳܠܽܘܒ̈ܐ ܒܪܰܡܫܳܐ ܕܚܰܫܳܐ ܐܰܠܗܳܝܳܐ. ܡܦܺܝܣ ܗܘܳܐ ܕܰܘܝܕ ܐܰܠܗܳܝܳܐ. ܕܢܶܬܚܰܠܰܛ ܩܽܘܪܒܳܢܳܐ ܕܺܐܝܕܰܘ̈ܗܝ. ܡܶܛܠ ܕܰܫܡܰܥ ܢܒܺܝܐ ܒܶܐܕ̈ܢܶܐ ܕܪܽܘܚܳܐ ܩܳܠܳܐ ܕܟܳܗܢ̈ܐ ܘܪܰܘܒܳܐ ܕܨܳܠܽܘܒ̈ܐ ܕܰܡܨܰܚܶܝܢ ܗܘܰܘ ܠܶܗ ܠܩܽܘܪܒܳܢܳܐ ܗܳܢܐ ܕܪܰܡܫܳܐ ܟܰܕ ܐܰܣܩܽܘܗܝ ܥܰܠ ܥܠܳܬܳܐ ܕܰܨܠܺܝܒܳܐ ܒܰܨܠܽܘܬܳܐ ܡܶܬܟܰܫܰܦ ܗܘܳܐ ܘܳܐܡܰܪ.
ܐܰܩܺܝܡ ܡܳܪܝܳܐ ܢܳܛܽܘܪܳܐ ܠܦܽܘܡܝ ܘܢܳܛܽܘܪܳܐ ܠܣܶܦ̈ܘܳܬܝ: ܕܠܳܐ ܢܶܣܛܶܐ ܠܶܒܝ ܠܡܶܠܬܳܐ ܒܺܝܫܬܳܐ ܘܶܐܥܒܶܕ ܥܒܴ̈ܕܶܐ ܕܥܰܘܠܳܐ. ܥܰܡ ܓܰܒܪ̈ܶܐ ܪ̈ܰܫܺܝܥܶܐ ܠܐ ܐܶܬܡܰܠܰܚ ܥܰܡܗܽܘܢ. ܚܙܰܝܬ ܐܰܝܟܰܢܳܐ ܥܳܪܶܩ ܢܒܺܝܳܐ ܡ̣ܢ ܫܰܘܬܳܦܽܘܬܳܐ ܕܓܰܒܪ̈ܶܐ ܥܰܘܴ̈ܠܶܐ ܨܳܠܽܘܒ̈ܐ ܘܰܡܦܺܝܣ ܕܰܢܩܽܘܡ ܢܳܛܽܘܪܳܐ ܘܰܠܣܶܦ̈ܘܳܬܶܗ ܕܠܳܐ ܟܰܕ ܣܳܛܶܐ ܠܶܒܶܗ ܡ̣ܢ ܡܳܪܝܳܐ ܢܶܗܘܶܐ ܠܶܗ ܡ̣ܢ ܓܽܘ̈ܕܶܐ ܟܬܺܝ̈ܫܳܬܳܐ ܕܪ̈ܰܒܰܝ ܟܳܗܢ̈ܐ ܕܝܽܘܕܳܝ̈ܐ ܗܳܢܘܢ ܕܒܰܩܥܳܬܳܐ ܕܪܽܘܫܥܳܐ ܩܳܥܶܝܢ ܗܘܰܘ ܩܕܳܡ ܦܺܝܠܰܛܳܘܣ ܕܰܨܠܽܘܒܳܝܗܝ ܨܠܽܘܒܳܝܗܝ (ܝܘܚܢܢ ܝܛ: ܝܗ ܠܘܩܐ ܟܓ: ܟܐ). ܘܟܕ ܐܰܫܝ̣ܓ ܦܺܝܠܰܛܳܘܣ ܐܺܝܕܰܘ̈ܗܝ ܠܥܺܝܢ ܟܶܢܫܳܐ ܡܚܰܣܰܝ ܐܢܳܐ ܡ̣ܢ ܕܡܶܗ ܕܗܳܢܐ ܙܰܕܺܝܩܳܐ. ܥܢܰܘ ܟܽܠܗܽܘܢ ܘܶܐܡܰܪܘ ܕܡܶܗ ܥܠܰܝܢ ܘܥܰܠ ܒܢܱ̈ܝܢ (ܡܬܝ ܟܙ: ܟܕ-ܟܗ). ܐܰܙܥܶܩ ܢܒܺܝܐ ܕܪܽܘܚܳܐ ܠܽܘܩܒܰܠ ܗܳܠܝܢ ܪ̈ܰܫܺܝܥܶܐ ܘܶܐܡܰܪ. ܥܰܡ ܓܰܒܪ̈ܶܐ ܪ̈ܰܫܺܝܥܶܐ ܠܳܐ ܐܶܬܡܰܠܰܚ ܥܰܡܗܽܘܢ. ܒܗܳܕܶܐ ܒܰܪܬ ܩܳܠܳܐ ܥܪܰܩ ܢܒܺܝܐ ܕܠܳܐ ܢܶܫܬܰܘܬܰܦ ܥܰܡ ܨܳܠܽܘܒ̈ܐ ܒܩܶܛܠܶܗ ܕܰܐܠܗܳܐ. ܘܰܚܠܳܦ ܐܰܝܠܶܝܢ ܕܗܰܝܡܶܢܘ ܡ̣ܢ ܥܰܡܳܐ ܐܳܡܰܪ ܗܘܳܐ.
ܢܰܠܦܰܢܝ ܙܰܕܺܝܩܳܐ ܘܢܰܟܣܰܢܝ. ܡܶܛܠ ܕܰܡܩܰܒܶܠ ܐܢܳܐ ܛܰܝܒܽܘܬܶܗ ܘܡܰܠܦܳܢܽܘܬܶܗ ܕܚܰܝ̈ܐ. ܛܳܒ ܠܝ̣ ܢܳܡܽܘܣܶܗ ܕܦܽܘܡܳܟ ܡ̣ܢ ܐܰܠܦ̈ܐ ܕܕܰܗܒܳܐ ܘܰܕܣܺܐܡܳܐ. ܗܳܠܝܢ ܒܢܴ̈ܬ ܩܴ̈ܠܶܐ ܕܰܫܠܺܝ̈ܚܶܐ ܐܶܢܶܝܢ ܕܩܳܪܶܝܢ ܗܘܰܘ ܠܗ ܙܰܕܺܝܩܳܐ ܠܥܰܡܰܢܘ̇ܐܝܠ. ܐܝܟ ܕܣܳܗܶܕ ܦܶܛܪܽܘܣ ܗܰܘ ܪܺܝܫܳܐ ܕܰܫܠܺܝ̈ܚܶܐ ܕܡܰܟܶܣ ܗܘܳܐ ܠܝܽܘܕܳܝ̈ܐ ܘܳܐܡܰܪ: ܕܰܐܢܬܽܘܢ ܕܰܟܦܰܪܬܽܘܢ ܒܙܰܕܺܝܩܳܐ ܘܩܰܕܺܝܫܳܐ. ܘܫܶܐܠܬܽܘܢ ܠܟܽܘܢ ܠܓܰܒܪܳܐ ܩܳܛܽܘܠܳܐ ܕܢܶܬܺܝܗܶܒ. ܘܰܠܗܰܘ ܪܺܝܫܳܐ ܕܚܰܝ̈ܐ ܩܛܰܠܬܽܘܢ (ܦܪܟܣܝܣ ܓ: ܝܕ). ܘܡܶܟܝ̣ܠ ܠܡ ܠܳܐ ܢܩܰܪܒܽܘܢ ܩܽܘܪ̈ܒܳܢܶܐ ܘܠܐ ܢܢܰܩܽܘܢ ܠܡܳܪܝܳܐ ܚܰܡܪܳܐ. ܡܶܛܠ ܕܠܳܐ ܡܶܬܩܰܪܒܺܝܢ ܩܽܘܪ̈ܒܳܢܰܝܗܽܘܢ ܒܳܬܰܪ ܩܽܘܪ̈ܒܳܢܶܐ ܕܪܰܡܫܳܐ. ܗܰܘ ܕܨܰܠܺܝ ܥܰܠ ܨܳܠܽܘܒ̈ܐ ܒܫܳܥܰܬ ܩܶܛܠܶܗ. ܐܝܟ ܕܩܰܕܶܡ ܐܰܘܕܰܥ ܢܒܺܝܳܐ ܡܶܛܠܳܬܶܗ ܘܳܐܡܰܪ.
ܡܶܛܠ ܕܰܨܠܽܘܬܝ ܥܰܠ ܒܺܝܫܽܘܬܗܽܘܢ. ܗܳܕܐ ܐܝ̣ܬܶܝܗ̇ ܕܶܐܡܰܪ ܥܰܡܰܢܘ̇ܐܝܠ ܠܘܳܬ ܐܰܒܳܐ. ܫܒܽܘܩ ܠܗܽܘܢ ܓܶܝܪ ܠܳܐ ܝܳܕܥܺܝܢ ܡܳܢܳܐ ܥܳܒܕܺܝܢ (ܠܘܩܐ ܟܓ: ܠܕ). ܘܡܶܢ ܒܳܬܰܪ ܕܶܐܡܰܪ ܥܰܠ ܪܽܘܫܥܳܐ ܕܨܳܠܽܘܒ̈ܐ ܐܰܘܕܰܥ ܕܠܐ ܡܶܬܩܰܒܠܺܝܢ ܩܽܘܪ̈ܒܳܢܶܐ ܘܕܶܒܚ̈ܐ ܕܝܽܘܕܳܝ̈ܐ ܐܶܬܢܰܒܺܝ ܘܶܐܡܰܪ:
ܘܶܐܬܟܠܺܝܘ ܒܺܐܝܕܳܐ ܕܟܺܐܦܳܐ ܕܰܝܳܢܰܝ̈ܗܽܘܢ. ܐܰܝܕܳܐ ܐܰܪܰܐ ܐܝ̣ܬܶܝܗ̇ ܟܺܐܦܳܐ ܕܡܶܬܐܰܡܪܳܐ ܕܺܐܝܬ ܠܗ̇ ܓܶܝܪ ܐܝ̣ܕܳܐ. ܐܶܠܐ ܡܫܺܝܚܳܐ ܦܳܪܽܘܩܰܢ. ܗܰܘ ܟܺܐܦܳܐ ܕܚܰܝ̈ܐ. ܗܰܘ ܟܺܐܦܳܐ ܕܰܐܣܠܺܝܘ ܒܰܢܳܝ̈ܐ: ܘܗܳܝ ܟܺܐܦܳܐ ܕܺܐܝܬ ܠܳܗ̇ ܐܝ̣ܕܳܐ: ܗܳܝ ܝܰܡܺܝܢܳܐ ܕܛܶܦܚܰܬ ܫܡܰܝܳܐ (ܐܫܥܝܐ ܡܚ: ܝܓ). ܗܳܕܳܐ ܗܝ ܐܝ̣ܕܳܐ ܕܰܟܠܰܬ ܠܕܰܝܴ̈ܢܶܐ ܕܥܰܡܳܐ ܕܬܽܘܒ ܠܐ ܢܕܽܘܢܽܘܢ. ܗܳܝ ܕܬܶܫܬܩܶܠ ܡܶܢܟܽܘܢ ܡܰܠܟܽܘܬܳܐ ܕܰܐܠܳܗܐ ܘܬܶܬܺܝܗܶܒ ܠܥܰܡܳܐ ܕܥܳܒܶܕ ܦܺܐܪ̈ܶܐ (ܡܬܝ ܟܐ: ܡܓ). ܘܰܡܦܺܝܣ ܢܒܺܝܐ ܕܢܶܫܬܰܡ̈ܥܳܢ ܡܶܠܰܘ̈ܗܝ ܘܳܐܡܰܪ:
ܘܰܫܡܰܥ ܡܶܠܰܝ̈ ܕܒܰܣܺܝ̈ܡܳܢ: ܐܰܝܟ ܣܰܟܬܳܐ ܕܨܳܪܝܳܐ ܠܰܐܪܥܳܐ. ܘܥܳܒܕܳܐ ܠܳܗ̇ ܠܰܡܩܰܒܳܠܽܘ ܙܰܪܥܳܐ. ܢܶܬܩܰܒ̈ܠܳܢ ܗܳܟܰܢܳܐ ܡܶܠܰܝ̈ ܒܰܣܺܝ̈ܡܳܬܳܐ. ܘܒܳܬܰܪ ܗܳܕܐ ܠܳܐܛ ܠܨܳܠܽܘܒ̈ܐ ܘܳܐܡܰܪ:
ܐܶܬܒܰܕܰܪܘ ܓܰܪ̈ܡܰܝܗܽܘܢ ܥܰܠ ܦܽܘܡܳܐ ܕܰܫܝܽܘܠ. ܘܗܳܟܰܢܳܐ ܡܶܬܒܰܕܪܺܝܢ ܒܫܽܘܠܳܡܳܐ ܨܳܠܽܘܒ̈ܐ ܒܚܶܦܪܳܐ ܕܰܫܝܽܘܠ. ܘܗܳܝܕܶܝܢ ܡܪܺܝܡܺܝܢ ܩܰܕܺܝ̈ܫܶܐ ܥܰܝ̈ܢܰܝܗܽܘܢ ܠܘܳܬ ܡܳܪܝܳܐ. ܐܝܟ ܕܰܐܘܕܰܥ ܢܒܺܝܐ.
ܘܶܐܢܳܐ ܠܘܳܬܳܟ ܡܳܪܝܳܐ ܐܰܪܺܝܡܶܬ ܥܰܝ̈ܢܰܝ. ܘܰܥܠܰܝܟ ܐܶܬܬܰܟܠܶܬ ܠܳܐ ܬܶܫܕܶܝܗ̇ ܠܢܰܦܫܝ: ܢܰܛܰܪܰܝܢܝ ܡ̣ܢ ܐܺܝܕܳܐ ܕܫܰܒܰܗܪ̈ܳܢܶܐ ܕܰܛܡܰܪܘ ܠܝ̣ ܦܰܚܷ̈ܐ: ܢܶܦܠܽܘܢ ܥܰܘܴ̈ܠܶܐ ܐܰܟܚܕܳܐ ܒܰܡܨܺܝ̈ܕܳܬܗܽܘܢ. ܥܕܰܡܳܐ ܕܶܐܥܒܰܪ ܐܶܢܳܐ. ܗܳܠܶܝܢ ܡܰܘܕ̈ܥܳܢ ܕܡܳܐ ܕܶܐܬܚܰܝܰܒܘ ܪ̈ܰܫܺܝܥܶܐ ܒܕܺܝܢܳܐ. ܡܪܺܝܡܺܝܢ ܥܰܝܢܰܝ̈ܗܽܘܢ ܠܘܳܬ ܐܰܠܗܳܐ. ܘܚܳܙܶܝܢ ܕܠܳܐ ܫܳܕܶܐ ܠܗܽܘܢ ܠܰܐܝܠܶܝܢ ܕܶܐܬܬܟܶܠܘ ܥܠܰܘܗܝ. ܟܰܕ ܡܢܰܛܰܪ ܠܗܽܘܢ ܡ̣ܢ ܐܝ̣ܕܳܐ ܕܫܰܒܰܗܪ̈ܳܢܶܐ. ܐܝܟ ܕܨܰܠܺܝ ܢܒܺܝܐ. ܘܡܶܬܬܰܚܕܺܝܢ ܒܰܡܨܺܝ̈ܕܳܬܗܘܢ ܫܰܒܰܗܪ̈ܳܢܶܐ. ܥܕܰܡܳܐ ܕܥܳܒܰܪ ܟܽܠܶܗ ܟܶܢܫܳܐ ܕܩܰܕܺܝ̈ܫܐ ܠܡܰܠܟܽܘܬܳܐ ܗܳܝܕܶܝܢ ܚܳܙܶܝܢ ܠܗ ܨܰܝܳܕ̈ܐ ܠܨܰܝܕܳܐ ܕܦܳܪܰܚ ܠܩܶܢܳܐ ܕܰܫܡܰܝܳܐ. ܘܡܰܘܕܶܐ ܠܗܽܘܢ ܕܦܰܨܝܶܗ ܡ̣ܢ ܡܨܺܝܕܬܳܐ ܕܰܐܒܕܳܢܳܐ. ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܚܕ
ܡܰܘܕܰܥ ܕܰܐܝܟ ܕܡ̣ܢ ܒܶܝܬ ܚܒܽܘܫܝܳܐ ܡܨܰܠܶܝܢ ܩܰܕܝ̈ܫܐ ܕܢܶܦܩܽܘܢ ܡ̣ܢ ܚܰܝ̈ܐ ܒܺܝ̈ܫܶܐ ܕܥܳܠܡܳܐ ܗܳܢܳܐ.
ܐܰܝܠܶܝܢ ܕܰܒܟܺܐܢܽܘܬܳܐ ܘܰܒܕܶܚܠܰܬ ܐܠܗܐ ܩܳܝ̇ܡܝ̣ܢ ܒܡܰܠܟܽܘܬܳܐ ܘܒܰܡܕܰܒܪܳܢܽܘܬܳܐ: ܕܠܺܝܠܳܐܝ̣ܬ ܘܰܕܠܳܐ ܒܽܘܨܳܪܳܐ ܡܰܘܕܰܥ ܠܗܽܘܢ ܒܝܰܕ ܩܰܕܺܝ̈ܫܐ ܥܰܠ ܟܽܠܡܶܕܶܡ ܕܓܳܕܶܫ ܠܫܰܒ̈ܛܶܐ ܕܡܰܠܟܽܘܬܗܽܘܢ. ܘܰܠܗܳܕܐ ܡܰܠܶܦ ܠܢ ܣܽܘܥܪܳܢܳܐ ܕܰܗܘܳܐ ܒܥܰܡܳܐ ܒܝܰܘ̈ܡܰܝ ܕܰܘܝܕ ܗܰܘ ܡܰܠܟܳܐ ܟܺܐܢܳܐ. ܕܟܕ ܬܶܩܦܰܬ ܚܶܡܬܶܗ ܕܰܐܠܗܳܐ ܒܥܰܡܳܐ. ܘܦܶܣܩܰܬ ܟܺܐܢܽܘܬܳܐ ܫܰܒ̈ܛܶܐ ܕܰܬܢܰܓܶܕ ܠܡܰܣܟ̈ܠܳܢܶܐ ܡܶܛܠ ܚܛܳܗ̈ܐ ܕܰܥܒܰܕܘ ܘܠܐ ܨܒܳܐ ܡܳܪܝܳܐ ܕܰܢܚܰܒܶܠ ܠܥܰܡܳܐ ܥܕܰܡܳܐ ܕܰܐܘܕܰܥ ܠܰܡܕܰܒܪܳܢܳܐ ܟܺܐܢܳܐ. ܘܫܰܕܰܪ ܠܘܳܬܶܗ ܓܳܕ ܢܒܺܝܐ. ܘܶܐܬܳܐ ܠܘܳܬ ܕܰܘܝܕ ܒܡܶܠܬܶܗ ܕܡܳܪܝܳܐ ܘܶܐܡܰܪ ܠܶܗ. ܗܳܟܰܢܐ ܐܡ̣ܪ ܡܳܪܝܳܐ: ܬܠܳܬ ܡܰܚ̈ܘܳܢ ܡܰܝܬܶܐ ܐܢܳܐ ܥܠܰܝܟ: ܓܒܺܝ ܐܰܝܕܳܐ ܕܪܳܓܳܐ ܠܳܟ. ܡܚܽܘܬܳܐ ܩܰܕܡܳܝܬܳܐ ܗܳܘܶܐ ܫܒܰܥ ܫܢ̈ܝ̣ܢ ܟܰܦܢܳܐ ܒܰܐܪܥܳܟ: ܐܰܘ ܬܠܳܬܐ ܝܪ̈ܚܝ̣ܢ ܬܶܬܡܣܰܪ ܒܺܐܝܕܳܐ ܕܰܒܥܶܠܕ̈ܒܳܒܰܝܟ: ܐܰܘ ܬܠܳܬܳܐ ܝܰܘ̈ܡܺܝܢ ܢܶܗܘܶܐ ܡܰܘܬܳܢܳܐ ܒܰܐܪܥܳܟ (ܒ ܫܡܘܐܝܠ ܟܕ: ܝܒ-ܝܓ). ܘܒܳܬܰܪ ܕܺܝܠܶܦ ܢܒܺܝܐ ܗܳܠܶܝܢ ܬܠܳܬܳܐ ܦܣܳܩ̈ܶܐ ܕܚܺܝ̈ܠܶܐ. ܐܶܬܟܡܰܪ ܘܫܶܐܠ ܚܰܟܺܝܡܳܐܝ̣ܬ ܕܒܺܐܝ̈ܕܰܝ ܐܰܠܗܳܐ ܢܶܒܠܰܥ. ܘܟܰܕ ܢܦܰܩ ܡܰܠܰܐܟܳܐ ܘܫܰܪܺܝ ܕܢܰܪܡܶܐ ܩܛܺܝ̈ܠܶܐ ܒܥܰܡܳܐ ܒܪܽܘܡܚܳܐ ܠܐ ܡܶܬܬܰܚܕܳܢܳܐ. ܘܰܢܦܰܠ ܡ̣ܢ ܕܳܢ ܥܕܰܡܳܐ ܠܒܺܝܪܫܒܰܥ ܫܰܒܥܺܝܢ ܐܰܠܦ̈ܝ̣ܢ ܩܛܺܝ̈ܠܶܐ ܒܫܶܬ ܫܳܥܺܝ̈ܢ. ܘܶܐܬܳܐ ܡܰܠܰܐܟܳܐ ܗܰܘ ܘܩܳܡ ܠܥܶܠ ܡ̣ܢ ܐܽܘܪܺܫܠܶܡ ܠܰܡܚܰܒܳܠܽܘܬܳܗ̇ (ܒ ܫܡܘܐܝܠ ܟܕ: ܝܗ-ܝܘ). ܘܕܰܘܺܝܕ ܘܟܽܠܶܗ ܥܰܡܳܐ ܒܳܟܶܝܢ ܗܘܰܘ ܘܩܰܫܺܝ̈ܫܶܐ ܘܟܳܗܢ̈ܐ ܟܕ ܠܒܺܝܫܺܝܢ ܣܰܩܷ̈ܐ ܘܰܫܕܶܝܢ ܥܰܠ ܐܰܦܰܝ̈ܗܽܘܢ ܩܕܳܡ ܐܳܪܽܘܢܳܐ ܕܡܳܪܝܳܐ. ܒܙܰܒܢܳܐ ܗܰܘ ܩܰܫܝܳܐ ܘܡܰܪܺܝܪܳܐ ܘܰܐܝܟ ܡܰܠܳܚܳܐ ܛܳܒܳܐ ܘܩܽܘܒܰܪܢܺܝܛܺܝ ܚܰܟܺܝܡܳܐ ܡ̣ܢ ܓܰܘ ܡܰܚܫܽܘܠܳܐ ܗܰܘ ܕܚܺܝܠܳܐ ܕܰܘܝܕ ܐܰܠܗܝܳܐ ܐܰܙܥܶܩ ܒܩܴ̈ܠܶܐ ܡܰܪܺܝܪ̈ܶܐ ܕܚܰܫܳܐ ܘܰܡܙܰܡܰܪ ܗܘܳܐ ܒܩܺܝܬܳܪܶܗ ܘܳܐܡܰܪ:
ܒܩܳܠܝ ܠܡܳܪܝܳܐ ܩܪܺܝܬ ܒܩܳܠܝ ܠܡܳܪܝܳܐ ܐܶܬܟܰܫܦܶܬ. ܘܰܐܪܡܺܝܬ ܩܕܳܡܰܘܗܝ ܬܰܟܫܶܦܬܝ: ܘܽܐܘܠܨܳܢܝ ܩܕܳܡܰܘܗܝ ܚܰܘܺܝܬ. ܟܰܕ ܐܶܬܛܰܪܦܰܬ ܪܽܘܚܝ ܐܰܢܬ ܝܳܕܰܥ ܐܰܢܬ ܫܒܺܝ̈ܠܰܝ. ܗܳܠܶܝܢ ܩܴ̈ܠܶܐ ܕܟܽܘܫܳܦܳܐ ܕܰܡܠܶܝܢ ܗܘܰܘ ܕܶܡ̈ܥܶܐ ܡܶܛܠ ܥܶܠܬܳܐ ܗܳܕܐ ܕܶܐܬܐܰܡܪܰܬ. ܐܶܬܡܰܠܰܠ ܡܶܢ ܕܰܘܝܕ. ܘܰܒܗܰܘ ܙܰܒܢܳܐ ܕܡܶܬܛܰܪܰܦ ܗܘܳܐ ܘܳܐܡܰܪ ܩܕܳܡ ܐܰܠܗܳܐ. ܕܶܐܢ ܐܶܢܳܐ ܚܛܺܝܬ ܘܰܐܪܓܙܶܬ ܗܳܠܶܝܢ ܥܳܢܴ̈ܐ ܬܰܡܺܝ̈ܡܬܳܐ ܡܳܢܳܐ ܥܒܰܕ̈ܝ (ܒ ܫܡܘܐܝܠ ܟܕ: ܝܙ). ܘܒܶܗ ܙܰܡܰܪ ܢܒܺܝܐ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܥܺܝܢ ܘܰܚܕܳܐ. ܘܰܒܝܰܕ ܬܰܟܫܶܦܬܶܗ ܡܰܠܶܦ ܗܘܳܐ ܕܰܐܝܢܳܐ ܐܽܘܠܨܳܢܳܐ ܡܛܳܐ ܠܢܰܦܫܶܗ. ܡܶܛܠ ܥܰܡܳܐ ܕܡܳܐܷܬ ܒܣܰܦܣܺܪܶܗ ܕܡܰܠܰܐܟܳܐ: ܘܳܐܡܰܪ ܗܘܳܐ ܩܕܳܡ ܡܳܪܝܳܐ: ܕܠܳܟ ܚܰܘܺܝܬ ܐܽܘܠܨܳܢܝ. ܘܰܐܢܬ ܝܳܕܰܥ ܐܰܢܬ ܛܽܘܪܳܦܳܗ̇ ܕܪܽܘܚܝ. ܡܰܘܕܰܥ ܘܳܐܡܰܪ:
ܒܽܐܘܪܚܳܐ ܕܗܰܠܟܴ̈ܬܝ ܛܡܰܪܘ ܠܝ̣ ܥܰܘܴ̈ܠܶܐ ܦܰܚ̈ܐ. ܡܳܢܳܐ ܗܝ ܡܶܠܬܳܐ ܗܳܕܐ. ܗܳܝ ܕܰܦܩܰܕ ܕܢܶܬܡܢܶܐ ܥܰܡܳܐ ܕܠܳܐ ܦܽܘܩܕܳܢܳܐ ܕܰܐܠܗܳܐ ܕܡܶܛܠܳܬܳܗ̇ ܐܶܬܳܐ ܡܰܘܬܳܢܳܐ. ܚܠܳܦ ܦܰܚ̈ܐ ܣܳܐܷܡ ܠܳܗ̇. ܡܶܛܠ ܕܰܒܡܽܘܠܟܳܢܳܐ ܕܰܐܠܗܳܐ ܘܰܒܒܽܘܪܟܬܳܐ ܕܰܡܠܺܝܟܳܐ ܗܘܳܬ ܠܘܳܬ ܐܰܒܳܗܴ̈ܬܳܐ ܕܠܐ ܢܶܬܡܢܶܐ ܙܰܪܥܗܽܘܢ ܡ̣ܢ ܣܽܘܓܶܐܗ. ܐܰܪܓܶܫ ܒܢܰܦܫܶܗ ܘܺܝܕܰܥ ܕܰܢܦܰܠ ܒܰܚܛܳܗܳܐ. ܐܶܠܐ ܬܽܘܒ ܐܡ̇ܪ:
ܚܳܪܶܬ ܠܝܰܡܺܝܢܳܐ. ܘܰܚܙܺܝܬ ܘܠܰܝܬ ܕܚܳܟܶܡ ܠܺܝ. ܠܰܝܬ ܠܰܡ ܕܝܳܕܰܥ ܠܺܝ ܕܢܶܚܰܫ ܥܰܡܝ ܥܰܠ ܟܺܐܒܳܐ. ܘܠܐ ܕܰܡܦܳܣ ܒܟܽܘܪܗܳܢܳܐ ܕܢܰܦܫܝ ܐܰܟܘܳܬܝ ܟܰܕ ܥܰܠ ܗܰܘ ܚܰܕ ܩܶܛܠܳܐ ܕܽܐܘܪܺܝܳܐ ܚܰܣܺܝܬ ܠܺܝ. ܗܳܫܳܐ ܕܚܰܪܒܶܬ ܐܰܠܦ̈ܐ ܘܪ̈ܶܒܘܳܬܳܐ ܥܰܠ ܕܰܐܣܟܠܶܬ ܡܳܪܝ ܩܕܳܡܰܝܟ. ܐܰܝܟܰܢܳܐ ܐܶܡܰܕ ܡ̣ܢ ܡܰܪܕܽܘܬܳܐ. ܘܟܰܕ ܚܳܐܱܪ ܕܶܐܚܙܶܐ ܐܰܬܪܳܐ ܕܡܶܬܦܰܨܝܳܢܽܘܬܳܐ.
ܐܶܒܰܕ ܡܶܢܝ ܒܶܝܬ ܡܰܥܪܩܳܐ. ܘܠܰܝܬ ܬܳܒܽܘܥܳܐ ܠܢܰܦܫܝ. ܕܰܐܝܟ ܗܳܟܰܢܐ ܡܚܰܘܶܐ ܢܒܺܝܐ ܐܝ̣ܬܰܘܗܝ ܐܽܘܠܨܳܢܳܐ ܕܰܐܝܠܶܝܢ ܕܢܳܦܠܺܝܢ ܒܺܐܝ̈ܕܰܝ ܟܺܐܢܽܘܬܳܐ. ܕܒܺܐܝܕܳܐ ܕܥܰܫܺܝ̈ܢܶܐ. ܘܠܳܐ ܡܶܬܦܰܠܰܛ ܘܰܡܢܰܓܕܳܢܰܘ̈ܗܝ ܠܐ ܩܢܶܝܢ ܪ̈ܰܚܡܶܐ ܥܰܠ ܡܰܚ̈ܘܳܬܶܗ. ܐܠܐ ܘܟܠ ܕܰܡܩܰܦܰܚ ܠܶܗ ܝܰܬܝ̣ܪ ܡܰܘܣܶܦ ܥܰܠ ܢܶܓ̈ܕܶܐ. ܡܳܕܶܝܢ ܐܝܟ ܕܶܐܡܰܪ ܢܒܺܝܐ ܠܰܝܬ ܒܶܝܬ ܡܰܥܪܩܳܐ ܡ̣ܢ ܬܰܫܢܺܝܩܳܐ. ܠܰܐܝܠܶܝܢ ܕܡܶܬܚܰܝܒܺܝܢ ܒܕܺܝܢܳܐ. ܐܶܠܐ ܟܰܕ ܐܰܪܓܶܫ ܢܒܺܝܐ ܒܕܺܝܢܳܐ ܠܐ ܡܶܫܬܰܠܡܳܢܳܐ ܕܥܰܠ ܡܰܪ̈ܳܚܶܐ ܒܩܴ̈ܠܶܐ ܪ̈ܳܡܶܐ ܘܒܶܟܝܳܐ ܐܡ̣ܪ:
ܘܰܓܥܺܝܬ ܠܘܳܬܳܟ ܡܳܪܝܳܐ ܘܶܐܡܪܶܬ: ܕܰܐܢܬ ܗܽܘ ܣܰܒܪܝ ܘܰܡܢܳܬܝ ܒܰܐܪܥܳܐ ܕܚܰܝܷ̈ܐ. ܘܨܽܘܬ ܠܒܳܥܽܘܬܝ ܡܶܛܠ ܕܶܐܬܡܰܟܟܶܬ ܛܳܒ: ܦܰܨܳܢܝ ܡ̣ܢ ܪ̈ܳܕܽܘܦܰܝ ܡܶܛܠ ܕܰܥܫܶܢܘ ܡܶܢܝ. ܟܽܠ ܟܡܳܐ ܓܶܝܪ ܕܰܒܥܳܠܡܳܐ ܗܳܢܐ ܚܢܰܢ. ܩܶܢܛܰܐ ܗܘ ܠܰܢ ܪܰܒܳܐ ܡ̣ܢ ܪ̈ܳܕܽܘܦܶܐ. ܘܠܰܝܬ ܠܰܢ ܬܽܘܟܠܳܢܳܐ ܠܡܶܬܦܰܨܳܝܽܘ ܡܶܢܗܽܘܢ: ܥܕܰܡܳܐ ܕܕܳܢܚܳܐ ܥܠܰܝܢ ܚܙܳܬܶܗ ܕܡܰܠܟܳܐ ܘܰܡܦܰܨܝܳܐ ܠܰܢ ܡܶܢܗܽܘܢ. ܡܶܛܠ ܕܟܽܠܗܽܘܢ ܝܰܘ̈ܡܳܬܶܗ ܕܥܳܠܡܳܐ ܗܳܢܐ ܐܰܝܟ ܕܒܶܝܬ ܐܰܣܺܝܪ̈ܶܐ ܐܝ̣ܬܰܝܢ. ܘܰܚܒܺܝܫܺܝܢ ܒܶܗ ܐܰܬܠܺܝ̈ܛܶܐ ܕܟܺܐܢܽܘܬܳܐ ܐܝܟ ܕܰܐܘܕܰܥ ܢܒܺܝܐ ܘܶܐܡܰܪ:
ܐܰܦܶܩ ܢܰܦܫܝ ܡܶܢ ܒܶܝܬ ܚܒܽܘܫܝܳܐ ܕܰܐܘܕܶܐ ܠܰܫܡܳܟ. ܒܶܝܬ ܚܒܽܘܫܝܳܐ ܐܝ̣ܬܰܘܗܝ ܥܳܠܡܳܐ ܗܳܢܐ ܠܰܐܝܠܶܝܢ ܕܰܐܝܟ ܢܒܺܝܐ ܐܰܠܺܝܨܺܝܢ ܠܡܶܚܙܰܩ ܡܶܢܶܗ. ܐܰܝܟ ܝܰܘܣܶܦ ܕܰܡܨܰܠܶܐ ܗܘܳܐ ܐܰܝܟܰܢܳܐ ܕܢܶܦܽܘܩ ܡܶܢ ܒܶܝܬ ܚܒܽܘܫܝܳܐ. ܘܡܶܚܕܳܐ ܕܰܢܦܰܩ ܩܰܒܶܠܬܶܗ ܡܶܚܕܳܐ ܡܰܪܟܰܒܬܳܐ ܕܡܰܠܟܽܘܬܳܐ. ܗܳܟܰܢܳܐ ܡܩܰܒܠܳܐ ܠܗܽܘܢ ܡܰܠܟܽܘܬܳܐ ܕܰܫܡܰܝܳܐ ܒܫܽܘܠܳܡܶܗ ܕܥܳܠܡܳܐ. ܠܰܪ̈ܕܺܝܦܶܐ ܘܰܫܚܺܝ̈ܩܶܐ ܕܣܰܟܺܝܘ ܠܦܽܘܪܥܳܢܳܐ ܕܰܐܠܗܳܐ. ܐܰܝܟ ܡܶܠܬܶܗ ܕܰܢܒܺܝܳܐ ܕܶܐܡܰܪ:
ܕܠܺܝ ܢܣܰܟܽܘܢ ܙܰܕܺܝ̈ܩܰܝܟ ܟܰܕ ܬܶܦܪܥܰܢܝ. ܐܰܝܠܶܝܢ ܓܶܝܪ ܕܰܠܥܰܡܰܢܘ̇ܐܝܠ ܡܣܰܟܶܝܢ ܟܰܕ ܡܚܰܡܣܢܺܝܢ ܒܕܽܘܒܳܪ̈ܶܐ ܕܙܰܕܺܝܩܽܘܬܳܐ. ܠܗܳܠܶܝܢ ܦܳܪܰܥ ܠܗܽܘܢ ܐܰܓܽܘ̈ܢܶܐ ܕܰܡܣܰܝܒܪܳܢܽܘܬܗܘܢ. ܡܰܠܟܽܘܬܳܐ ܘܚܰܝ̈ܐ ܘܒܽܘܣܳܡܳܐ ܘܡܰܘܕܶܝܢ ܘܰܡܫܰܒܚܺܝܢ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܬܪܝܢ
ܥܰܠ ܕܒܰܢܒܺܝ̈ܐ ܐܶܬܩܪܺܝ ܥܰܡܰܢܽܘܐܝܠ ܐܽܘܪܚܳܐ: ܘܥܰܠ ܨܠܽܘܬܳܐ.
ܢܳܡܽܘܣܳܐ ܕܰܨܠܽܘܬܳܐ ܡܰܠܶܦ ܗܘܳܐ ܒܝܰܕ ܪܽܘܚܳܐ ܒܰܢܒܺܝܐ ܠܰܐܝܠܶܝܢ ܕܫܳܡܥܺܝܢ ܗܘܰܘ ܡܰܠܦܳܢܽܘܬܶܗ. ܒܰܨܠܽܘܬܳܐ ܡܰܘܕܰܥ ܗܘܳܐ ܕܰܐܝܟܰܢܳܐ ܒܟܽܠܙܒܰܢ ܒܝܰܕ ܒܪܳܐ ܡܶܬܟܰܫܦܺܝܢ ܗܘܰܘ ܢܒܺܝ̈ܐ ܘܕܰܐܝܟܢ ܥܳܢܶܐ ܐܶܢܘܢ. ܗܳܝ ܕܡܳܐ ܕܶܐܬܥܰܫܰܢ ܥܠܰܝܢ ܩܪܳܒܳܐ ܡ̣ܢ ܒܥܶܠܕ̈ܒܳܒܶܐ ܒܰܕܡܽܘܬܶܗ ܕܰܢܒܺܝܐ ܢܶܒܥܶܐ ܦܽܘܪܩܳܢܳܐ: ܟܰܕ ܡܦܺܝܣܺܝܢܰܢ ܠܰܐܒܳܐ ܕܟܽܠ: ܕܰܒܝܰܕ ܡܶܠܬܶܗ ܢܶܥܢܶܐ ܠܰܢ. ܢܒܺܝܳܐ ܗܳܟܝ̣ܠ ܕܰܘܝܕ ܒܙܰܒܢܳܐ ܗܰܘ ܕܶܐܙܰܠܘ ܐܰܕܽܘ̈ܡܳܝܶܐ ܒܢܱ̈ܝ ܥܺܝܣܽܘ. ܘܶܐܓܰܪܘ ܗܘܰܘ ܠܗܰܕܪܰܥܙܰܪ ܡܰܠܟܳܐ ܕܰܢܨܺܝܒܺܝܢ ܘܶܐܬܳܐ ܘܶܐܬܟܰܬܰܫ ܥܰܡ ܕܰܘܝܕ ܒܽܐܘܪܺܫܠܶܡ. ܘܰܩܪܳܒܳܐ ܪܰܒܳܐ ܥܒܰܕܘ ܥܰܡܶܗ. ܒܰܨܠܽܘܬܳܐ ܘܰܒܒܳܥܽܘܬܳܐ ܡܶܬܟܰܫܰܦ ܗܘܳܐ ܘܒܳܥܶܐ ܪ̈ܰܚܡܶܐ ܘܳܐܡܰܪ:
ܫܡܰܥ ܡܳܪܝܳܐ ܨܠܽܘܬܝ ܘܨܽܘܬ ܠܒܳܥܽܘܬܝ: ܒܡܺܐܡܪܳܟ ܥܢܺܝܢܝ ܘܰܒܙܰܕܺܝܩܽܘܬܳܟ. ܒܥܶܠܬܳܐ ܗܳܝ ܕܶܐܬܐܰܡܪܰܬ ܙܰܡܰܪ ܕܰܘܝܕ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܥܺܝܢ ܘܬܰܪܬܶܝܢ. ܟܰܕ ܡܦܺܝܣ ܕܰܒܝܰܕ ܡܺܐܡܪܶܗ ܕܰܐܠܗܳܐ ܢܶܬܥܢܶܐ. ܗܳܢܰܘ ܕܶܝܢ ܒܝܰܕ ܒܪܶܗ ܚܰܒܺܝܒܳܐ. ܐܶܠܐ ܠܐ ܙܳܕܶܩ ܕܰܐܝܠܶܝܢ ܕܩܰܕܶܡܢܰܢ ܢܰܗܰܪܢܰܢ ܒܗܳܠܶܝܢ ܡܺܐܡܪ̈ܶܐ ܐܚܪ̈ܳܢܶܐ ܕܬܘܒ ܠܗܶܝܢ ܢܦܰܫܶܩ. ܢܺܐܡܰܪ ܕܶܝܢ ܗܳܫܐ ܡܶܛܠܡܳܢܳܐ ܓܰܝܣܳܐ ܕܰܐܕܽܘ̈ܡܳܝܶܐ ܚܕܺܝܪ ܗܘܳܐ ܠܰܒܢܱ̈ܝ ܐܽܘܪܺܫܠܶܡ. ܘܰܠܕܰܘܝܕ ܢܒܺܝܐ. ܠܰܘ ܡܶܢ ܗܳܝ ܕܡܶܬܝܰܕܥܳܐ ܕܶܐܡܰܪ ܓܶܝܪ:
ܕܠܳܐ ܬܰܥܠܺܝܘܗܝ ܠܥܰܒܕܳܟ ܒܕܺܝܢܳܐ: ܡܶܛܠ ܕܠܳܐ ܙܳܟܶܐ ܩܕܳܡܰܝܟ ܟܽܠ ܕܚܰܝ. ܕܠܐ ܢܶܥܽܘܠ ܒܕܺܝܢܳܐ ܩܕܳܡ ܟܺܐܢܽܘܬܳܐ ܡܶܬܟܰܫܰܦ ܗܘܳܐ. ܕܠܳܐ ܓܶܝܪ ܡܰܨܝܳܐ ܕܰܒܕܺܝܢܳܟ ܐܢܳܫ ܙܰܟܳܝܳܐ ܢܶܗܘܶܐ. ܘܗܳܕܶܐ ܥܒܶܕ ܠܘܳܬܝ ܕܰܠܕܺܝܢܳܐ ܠܳܐ ܐܶܥܽܘܠ.
ܘܡܶܛܠ ܕܰܪܕܰܦ ܒܥܶܠܕܒܳܒܳܐ ܠܢܰܦܫܝ: ܘܡܰܟܶܟ ܚܰܝܱ̈ܝ ܒܰܐܪܥܳܐ. ܚܙܰܝܬ ܐܰܝܟܰܢܳܐ ܡܰܝܠܶܠ ܡ̣ܢ ܐܰܓܽܘ̈ܢܶܐ ܩܫܰܝܴ̈ܐ ܘܰܟܣܰܝܴ̈ܐ ܕܰܒܥܶܠܕ̈ܒܳܒܶܐ ܡܶܬܝܰܕܥܴ̈ܢܶܐ. ܕܰܫܕܰܘ ܒܶܗ ܓܶܐܪܳܐ ܕܰܪ̈ܓܺܝܓܳܬܳܐ ܘܡܰܟܟܶܗ ܘܰܐܘܬܒܶܗ ܒܚܶܫܽܘܟܳܐ. ܐܡ̣ܪ ܓܶܝܪ:
ܐܰܘܬܒܰܢܝ ܒܚܶܫܽܘܟܳܐ ܐܰܝܟ ܡܺܝܬܳܐ ܠܥܳܠܰܡ: ܘܶܐܬܛܰܪܦܰܬ ܥܠܰܝ ܪܽܘܚܝ ܘܙܳܥ ܠܶܒܝ ܒܓܰܘܝ. ܡܳܐ ܕܩܳܝܡܳܐ ܢܰܦܫܳܐ ܒܰܐܓܽܘܢܳܐ ܟܠ ܟܡܳܐ ܕܰܣܕܺܝܪ ܩܪܳܒܳܐ ܠܩܽܘܒܠܳܗ̇ ܡܶܢ ܚܰܝ̈ܠܰܘܳܬܳܐ ܕܚܶܫܽܘܟܳܐ. ܒܗܳܝ ܕܠܐ ܥܕܰܟܝ̣ܠ ܐܰܓܗܝܰܬ ܡܶܢ ܩܪܳܒܳܐ ܐܰܝܟ ܕܰܒܚܶܫܽܘܟܳܐ ܣܳܒܪܳܐ ܕܺܐܝܬܶܝܗ̇ ܘܡܶܬܛܰܪܦܳܐ ܘܙܳܝܥܳܐ ܡܶܢ ܪ̈ܦܳܬܶܐ ܕܡܰܚܫ̈ܒܳܬܳܐ ܕܡܶܬܬܥܺܝܪ̈ܳܢ ܒܳܗ̇. ܘܡܶܬܕܰܠܰܚ ܠܶܒܳܐ ܘܟܽܘ̈ܠܝܳܬܳܐ. ܐܰܝܟ ܕܶܐܡܰܪ ܢܒܺܝܐ ܢܳܦܶܠ ܒܓܰܘ ܢܰܦܫܳܐ ܚܽܘܫܳܒܳܐ ܕܪܶܓܬܳܐ. ܗܳܢܐ ܓܶܝܪ ܐܰܝܟ ܓܶܐܪܳܐ ܕܰܨܒܺܝܥܳܐ ܠܽܘܠܺܝܬܶܗ ܒܢܽܘܪܳܐ ܕܠܐ ܕܳܥܟܳܐ ܕܳܡܶܐ. ܘܡܶܛܠ ܕܰܢܣܰܝܒܰܪ ܚܰܝܠܳܐ ܡܶܢ ܟܝܳܢܳܐ. ܚܰܝܠܬܳܢܳܐܝ̣ܬ ܥܳܐܷܠ ܚܽܘܪܦܳܐ ܕܠܽܘܠܺܝܬܶܗ ܒܓܰܘ ܠܶܒܳܐ ܘܫܳܓܶܫ ܠܶܗ. ܗܳܟܰܢܳܐ ܐܳܦ ܚܰܫܷ̈ܐ ܐܚܪ̈ܳܢܶܐ. ܡܶܛܠ ܕܺܐܝܬ ܐܶܡܰܬܝ ܕܦܰܪ̈ܨܽܘܦܶܐ ܕܰܛܢܳܢܳܐ ܕܠܽܘܩܒܰܠ ܒܺܝ̈ܫܳܬܳܐ ܠܳܒܶܫ ܟܕ ܫܚܺܝܩ ܒܟܶܣܝܳܐ. ܡܰܚܶܐ ܒܦܰܪܨܽܘܦܳܐ ܕܰܛܢܳܢܳܐ. ܘܰܐܢܰܢܩܺܝ ܓܶܝܪ ܕܢܺܐܬܽܘܢ ܚܰܫ̈ܐ ܥܰܠ ܢܰܦܫܳܐ܆ ܐܶܠܐ ܘܳܝ ܕܶܝܢ ܠܗܳܝ ܕܢܳܦܠܳܐ ܒܦܰܚܷ̈ܐ ܕܰܨܠܶܝܢ. ܘܡܶܛܠܗܳܕܐ ܥܺܝܪܽܘܬܳܐ ܡܶܬܒܰܥܝܳܐ. ܟܰܕ ܚܳܙܝܳܐ ܕܗܰܘ ܕܰܠܩܽܘܒܠܳܐ ܥܺܝܪ. ܘܳܐܦ ܢܒܺܝܳܐ ܡܶܛܠܗܕܐ ܐܡ̇ܪ ܗܘܳܐ: ܕܠܳܐ ܙܳܟܶܐ ܩܕܳܡܰܝܟ ܟܽܠ ܕܚܰܝ. ܡܶܛܠ ܕܰܪܕܰܦ ܗܘܳܐ ܒܥܶܠܕܒܳܒܳܐ ܠܢܰܦܫܶܗ ܡܶܛܠ ܕܰܡܙܺܝܥܺܝܢ ܗܘܰܘ ܠܳܗ̇ ܚܰܫ̈ܐ ܠܢܰܦܫܶܗ. ܘܡܶܢ ܒܽܘ̈ܓܳܢܶܐ ܕܰܒܓܰܘ ܩܪܳܒܳܐ ܟܕ ܡܨܰܠܶܐ ܢܒܺܝܳܐ. ܩܳܥܶܐ ܗܘܳܐ ܠܘܳܬܳܟ ܘܳܐܡܰܪ:
ܐܶܬܕܟܰܪܬܳܟ ܡܳܪܝܳܐ ܡܶܢ ܩܕܺܝܡ: ܘܰܪܢܺܝܬ ܒܟܽܠܗܽܘܢ ܥܒܳܕܰܝ̈ܟ. ܘܰܪܢܺܝܬ ܒܰܥܒܳܕ ܐܺܝܕܰܝ̈ܟ ܘܦܶܫܛܶܬ ܐܺܝ̈ܕܰܝ ܠܘܳܬܳܟ. ܒܗܳܠܶܝܢ ܩܪ̈ܳܒܶܐ ܕܡܶܢ ܒܥܶܠܕ̈ܒܳܒܶܐ ܟܪܺܝܟܺܝܢ ܗܘܰܘ ܠܰܢܒܺܝܳܐ ܡܰܠܶܦ ܗܘܳܐ ܕܕܽܘܟܪܳܢܶܗ ܕܡܳܪܝܳܐ ܗܳܘܶܐ ܠܶܗ ܡܦܰܨܝܳܢܳܐ. ܘܰܟܡܳܐ ܐܶܢ ܥܰܙܺܝܙ ܗܘܳܐ ܕܰܝܳܢܳܐ ܕܳܐܠܶܨ ܗܘܳܐ ܠܝ̣ ܐܶܠܐ ܠܐ ܥܰܘܟܰܢܝ ܡܶܢ ܕܽܘܟܪܳܢܳܟ. ܘܟܰܕ ܪܳܕܶܦ ܗܘܳܐ ܠܢܰܦܫܝ ܠܳܟ ܡܶܬܕܟܰܪ ܗܘܺܝܬ. ܘܪܳܢܶܐ ܗܘܺܝܬ ܒܰܥܒܳܕܳܐ ܕܓܰܢܒܳܪܽܘܬܳܟ. ܗܳܠܝܢ ܐܝ̣ܬܰܝܗܽܘܢ ܚܽܘ̈ܫܳܒܶܐ ܬܪ̈ܺܝܨܶܐ ܕܢܰܦܫܳܐ. ܐܰܝܟܰܢܳܐ ܕܳܐܦ ܚܰܟܺܝܡ ܒܟܽܠ ܛܽܘܒܳܢܳܐ ܦܰܘܠܽܘܣ ܡܰܠܶܦ ܗܘܳܐ ܟܰܕ ܟܬܰܒ ܠܘܳܬ ܛܺܝܡܳܬܶܐܘܳܣ. ܕܨܳܒܶܐ ܐܢܳܐ ܕܰܗܘܰܘ ܓܰܒܪ̈ܶܐ ܒܟܽܠ ܕܽܘܟܳܐ ܘܰܡܪܺܝܡܺܝܢ ܐܺܝܕܰܝ̈ܗܘܢ ܕܰܟܝܳܐܝ̣ܬ (ܐ ܛܝܡܬܐܘܣ ܒ: ܚ). ܘܟܕ ܡܰܠܶܦ ܠܘ ܡܶܛܠ ܐܺܝܕܰܝܴ̈ܐ ܕܦܰܓܪܳܐ ܐܡ̇ܪ ܗܘܳܐ. ܐܶܠܐ ܐܺܝ̈ܕܰܝܳܐ ܗܳܠܝܢ ܕܢܰܦܫܳܐ ܕܰܡ̈ܥܳܕܳܢ ܡܛܰܢ̈ܦܳܢ ܒܪܽܘܓܙܳܐ. ܘܡܳܐ ܕܰܡܦܰܠܦ̈ܠܳܢ ܗܳܠܶܝܢ ܒܨܳܐܬܳܐ ܕܡܰܚܫ̈ܒܳܬܳܐ ܡܫܰܟܪ̈ܳܬܳܐ. ܠܐ ܕܠܺܝ̈ܠܳܢ ܕܢܶܬܦܰܫ̈ܛܳܢ ܠܘܳܬ ܗܰܘ ܕܫܰܝܢܰܐ ܗ̄ܘ: ܘܟܽܠܶܗ ܕܰܟܝܽܘܬܰܐ ܗ̄ܘ: ܘܟܽܠܶܗ ܚܶܘܒܰܐ ܗ̄ܘ: ܘܟܽܠܶܗ ܫܠܳܡܰܐ ܗ̄ܘ: ܘܟܽܠܶܗ ܢܽܘܗܪܰܐ ܗ̄ܘ: ܘܗܰܘ ܕܒܰܥ̈ܒܳܕܶܐ ܡܺܝ̈ܬܶܐ ܡܣܰܝ̈ܒܳܢ ܐܺܝܕܰܘ̈ܗܝ. ܠܐ ܡܶܫܟܰܚ ܦܳܫܶܛ ܠܗܶܝܢ. ܠܘܳܬ ܗܰܘ ܕܟܽܠܶܗ ܚܰܝ̈ܐ ܗ̄ܘ. ܢܒܺܝܐ ܕܶܝܢ ܕܰܘܝܕ ܟܰܕ ܡܚܰܘܶܐ ܕܰܐܝܟ ܐܰܪܥܳܐ ܛܳܒܬܳܐ ܕܫܳܘܝܳܐ ܠܡܶܛܪܳܐ ܛܽܘܒܬܳܢܳܐ ܕܓܶܠܝܳܢܶܗ ܕܥܰܡܰܢܽܘܐܝܠ.
ܢܰܦܫܝ ܠܰܡ ܨܰܗܝܳܐ ܠܳܟ ܐܰܝܟ ܐܰܪܥܳܐ ܨܗܺܝܬܳܐ. ܥܰܠ ܪܶܚܡܬܳܐ ܕܺܐܝܬ ܗܘܳܐ ܠܘܳܬ ܐܰܠܗܳܐ. ܘܗܳܟܰܢܳܐ ܐܰܝܢܳܐ ܕܨܰܗܝܳܐ ܢܰܦܫܶܗ ܘܚܳܝܪܳܐ ܠܰܐܠܗܳܐ. ܡܰܠܝܳܐܝ̣ܬ ܒܰܕܡܽܘܬ ܪܒܺܝܥܳܐ. ܡܰܫܩܶܐ ܠܳܗ̇ ܒܡܶܐܬܺܝܬܶܗ ܡܳܐ ܕܕܳܢܚܳܐ ܥܠܰܘܗܝ. ܐܡ̣ܪ ܓܶܝܪ:
ܒܰܥܓܰܠ ܥܢܺܝܢܝ ܡܳܪܝܳܐ ܡܶܛܠ ܕܓܶܡܪܰܬ ܪܽܘܚܝ: ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܝ. ܕܠܳܐ ܐܶܫܬܠܶܡ ܥܰܡ ܢܳܚ̈ܬܰܝ ܓܽܘܒܳܐ. ܡܶܢ ܓܽܘܒܳܐ ܗܳܢܐ ܒܟܽܠܕܽܘܟ ܡܶܣܬܰܪܰܕ ܢܒܺܝܐ. ܐܡ̣ܪ ܓܶܝܪ ܒܡܰܙܡܽܘܪܳܐ ܐܚܪܺܢܳܐ. ܘܰܐܚܺܝܬܳܢܝ ܡܶܢ ܢܳܚ̈ܬܰܝ ܓܽܘܒܳܐ (ܡܙܡܘܪܐ ܠ: ܓ). ܘܬܽܘܒ ܐܶܡܰܪ: ܘܰܐܣܩܰܢܝ ܡܶܢ ܓܽܘܒܳܐ ܕܕܽܘܘܳܢܳܐ (ܡܙܡܘܪܐ ܡ: ܒ). ܘܶܐܡܰܪ ܓܶܝܪ ܠܘܳܬ ܐܰܠܗܳܐ ܕܰܐܢܬ ܐܰܠܗܳܐ ܐܰܚܶܬ ܐܶܢܽܘܢ ܠܓܽܘܒܳܐ ܕܰܐܒܕܳܢܳܐ ܠܓܰܒܪ̈ܶܐ ܐܳܫ̈ܕܰܝ ܕܡܳܐ ܘܢܳܟܠܰܝ̈ ܢܶܟܠܳܐ (ܡܙܡܘܪܐ ܢܗ: ܟܓ). ܗܽܘ ܗܳܢܐ ܓܽܘܒܳܐ ܐܝ̣ܬܰܘܗܝ ܥܽܘܡܩܳܐ ܟܡܺܝܪܳܐ ܕܚܶܫܽܘܟܳܐ ܕܰܠܥܳܠܰܡ ܘܥܰܠܗܳܝ ܐܳܡܰܪ ܗܘܳܐ. ܕܠܳܐ ܢܰܗܦܶܟ ܐܰܦܰܘ̈ܗܝ ܡܶܢܶܗ. ܡܶܛܠ ܕܟܽܠ ܐܰܝܟܳܐ ܕܠܰܝܬ ܢܽܘܗܪܳܐ ܕܰܐܦܰܘ̈ܗܝ ܕܰܐܠܗܳܐ. ܚܶܫܽܘܟܰܐ ܗ̄ܘ ܘܚܽܘܪܳܩ ܫܶܢܷ̈ܐ: ܘܢܽܘܪܳܐ ܗܳܝ ܕܠܳܐ ܕܳܥܟܳܐ. ܐܶܠܐ ܡܳܢܳܐ ܐܳܡܰܪ ܢܒܺܝܐ.
ܐܰܫܡܰܥܰܝܢܝ ܒܨܰܦܪܳܐ ܛܰܝܒܽܘܬܳܟ. ܡܶܛܠ ܕܰܥܠܰܝܟ ܗܽܘ ܬܟܺܝܠ ܐܢܳܐ. ܚܽܘܪ ܒܦܳܪܽܘܫܽܘܬܶܗ ܕܰܢܒܺܝܐ ܕܟܽܠܝܽܘܡ ܒܽܐܘܪܚܳܐ ܕܰܐܠܗܳܐ ܡܗܰܠܶܟ ܗܘܳܐ. ܬܘܒ ܕܰܢܚܰܘܶܐ ܠܶܗ ܐܽܘܪܚܳܐ ܕܚܰܝܷ̈ܐ ܫܳܐܷܠ ܘܳܐܡܰܪ:
ܚܰܘܳܢܝ ܐܽܘܪܚܳܟ ܕܺܐܙܰܠ ܒܳܗ̇. ܡܶܛܠ ܕܰܠܘܳܬܳܟ ܡܳܪܝܳܐ ܐܰܪܺܝܡܶܬ ܢܰܦܫܝ: ܦܰܨܳܢܝ ܡ̣ܢ ܒܥܶܠܕ̈ܒܳܒܰܝ ܘܰܐܠܶܦܰܝܢܝ ܠܡܶܥܒܰܕ ܨܶܒܝܳܢܳܟ. ܡܶܛܠ ܕܰܐܢܬ ܗܽܘ ܐܰܠܳܗܝ: ܪܽܘܚܳܟ ܡܒܰܣܰܡܬܳܐ ܬܕܰܒܪܰܢܝ ܒܽܐܘܪܚܳܟ ܕܚܰܝܷ̈ܐ. ܥܰܠܗܳܕܐ ܐܽܘܪܚܳܐ ܙܰܒܢ̈ܝ̣ܢ ܣܰܓܺܝ̈ܐܳܢ ܚܰܘܺܝܬ ܒܦܽܘ̈ܫܳܩܶܐ ܗܳܠܝܢ ܕܗܽܘܝܽܘ ܥܰܡܰܢܘ̇ܐܝܠ. ܘܡܶܛܠܗܳܕܐ ܫܳܐܷܠ ܗܘܳܐ ܢܒܺܝܳܐ ܕܢܶܚܙܶܝܗ̇. ܥܰܠ ܕܰܐܪܓܶܫ ܕܳܐܬܶܐ ܡ̣ܢ ܫܡܰܝܳܐ ܐܰܠܗܳܐ. ܘܗܳܘܶܐ ܐܽܘܪܚܳܐ ܕܰܫܪܳܪܳܐ ܠܡܰܠܟܽܘܬܳܐ. ܐܰܝܟܰܢܳܐ ܕܶܐܡܰܪ ܟܰܕ ܡܰܠܶܦ. ܕܶܐܢܳܐ ܐܢܳܐ ܐܽܘܪܚܳܐ ܘܚܰܝܷ̈ܐ (ܝܘܚܢܢ ܝܕ: ܘ). ܘܰܐܟܙܢܳܐ ܕܶܐܡܰܪ ܗܘܳܐ: ܕܠܳܐ ܐܢܳܫ ܐܳܬܶܐ ܠܘܳܬ ܐܳܒܝ ܐܶܠܳܐ ܐܶܢ ܒܺܝ (ܝܘܚܢܢ ܝܕ: ܘ). ܗܳܟܰܢܳܐ ܚܰܘܺܝ ܢܒܺܝܳܐ ܕܒܽܐܘܪܚܶܗ ܡܒܰܣܰܡܬܳܐ ܩܰܕܺܝ̈ܫܶܐ ܡܶܬܕܰܒܪܺܝܢ. ܡܶܛܠܗܳܢܐ ܐܶܡܰܪ:
ܡܶܛܠ ܫܡܳܟ ܡܳܪܝܳܐ ܒܰܝܰܐܝܰܢܝ: ܘܡܶܛܠ ܛܰܝܒܽܘܬܳܟ ܐܰܦܶܩ ܢܰܦܫܝ ܡܶܢ ܐܽܘܠܨܳܢܳܐ. ܘܰܒܛܰܝܒܽܘܬܳܟ ܫܰܬܶܩ ܠܣܳܢܱ̈ܐܝ: ܘܰܐܘܒܶܕ ܠܰܒܥܶܠܕ̈ܒܳܒܶܝܗ̇ ܕܢܰܦܫܝ. ܡܶܛܠ ܕܶܐܢܳܐ ܐܢܳܐ ܥܰܒܕܳܟ. ܗܰܘ ܕܫܳܐܷܠ ܕܢܶܬܒܰܝܰܐ ܡܶܢ ܡܳܪܝܳܐ ܒܳܥܶܐ ܗܘܳܐ ܕܬܶܦܽܘܩ ܢܰܦܫܶܗ ܡܶܢ ܐܽܘܠܨܳܢܳܐ. ܡܰܢ ܘܳܠܐܷ ܕܢܶܪܢܶܐ ܕܺܐܝܬܰܘܗܝ. ܐܶܠܐ ܗܳܢܘܢ ܕܶܐܡܰܪ ܡܰܪܢ ܥܠܰܝܗܽܘܢ ܛܽܘܒܰܝܗܽܘܢ ܠܰܐܒܺܝ̈ܠܶܐ ܕܗܶܢܽܘܢ ܢܶܬܒܰܝܐܽܘܢ (ܡܬܝ ܗ: ܕ). ܣܳܢܰܐܘ̈ܗܝ ܕܰܢܒܺܝܐ ܡܦܺܝܣ ܕܢܶܫܬܰܬܩܽܘܢ ܒܛܰܝܒܽܘܬܳܐ. ܗܳܠܶܝܢ ܐܶܢܘܢ ܕܰܠܒܶܟܘ ܕܰܪܳܐ ܥܰܡ ܩܰܕܺܝ̈ܫܶܐ ܡܶܢ ܫܽܘܪܳܝܶܗ ܕܥܳܠܡܳܐ. ܘܟܰܕ ܡܚܰܘܶܐ ܕܰܥܠܰܝܗܽܘܢ ܐܶܡܰܪ. ܒܗܳܝ ܕܰܩܪܳܐ ܐܶܢܘܢ ܒܥܶܠܕ̈ܒܳܒܶܐ ܕܢܰܦܫܶܗ. ܗܳܝܕܶܝܢ ܡܳܐ ܕܶܐܬܚܙܺܝ ܡܳܪܝܳܐ ܗܰܘ ܕܰܡܒܰܝܰܐ ܠܰܐܒܺܝ̈ܠܶܐ ܕܨܶܗܝܽܘܢ. ܘܝܰܗܒ ܠܗܽܘܢ ܫܽܘܒܚܳܐ. ܘܰܡܫܰܬܶܩ ܠܣܳܢܰܐܘ̈ܗܝ ܕܒܰܪܢܳܫܳܐ ܒܬܰܫܢܺܝܩܳܐ ܕܢܽܘܪܳܐ. ܘܡܰܘܒܶܕ ܠܢܰܦ̈ܫܳܬܳܐ ܕܰܒܥܶܠܕ̈ܒܳܒܶܐ ܕܰܓܒܰܘ̈ܗܝ. ܘܟܰܕ ܚܳܕܶܝܢ ܥܰܒ̈ܕܶܐ ܕܒܰܝܬܶܗ ܕܰܐܠܗܳܐ ܒܚܺܐܪܽܘܬܳܐ ܕܰܡܩܰܒܠܺܝܢ. ܡܰܘܕܶܝܢ ܠܶܗ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܬܠܬܐ
ܥܰܠ ܩܪܳܒܳܐ ܪܽܘܚܳܢܳܝܐ ܕܺܐܝܬ ܠܢܰܦܫܳܐ ܥܰܡ ܛܪ̈ܽܘܢܶܐ ܒܥܶܠܕ̈ܒܳܒܶܐ ܕܚܰܝ̈ܠܰܘܳܬܳܐ ܕܚܶܫܽܘܟܳܐ: ܘܥܰܠ ܕܰܒܝܰܕ ܓܶܠܝܳܢܶܗ ܕܥܰܡܰܢܽܘܐܝܠ ܐܶܬܦܰܨܺܝ ܓܶܢܣܳܐ ܐܢܳܫܳܝܳܐ ܡܶܢ ܚܛܺܝܬܳܐ.
ܦܰܘܠܽܘܣ ܐܰܠܗܳܝܳܐ ܗܰܘ ܣܳܐܷܡ ܢܳܡܽܘ̈ܣܶܐ ܪ̈ܽܘܚܳܢܶܐ ܗܰܘ ܩܪܰܒܬܳܢܳܐ ܚܠܺܝܨܳܐ ܕܕܶܚܠܰܬ ܐܰܠܗܳܐ. ܗܰܘ ܕܰܕܠܳܐ ܫܶܠܝܳܐ ܡܬܺܝܚܳܐ ܗܘܳܬ ܩܶܫܬܶܗ ܘܡܰܠܝܳܐ ܓܶܐܪ̈ܶܐ ܠܽܘܩܒܰܠ ܓܽܘ̈ܕܶܐ ܕܫܺܐܕ̈ܐ. ܘܟܰܕ ܢܰܚܫܺܝܪܬܳܢܳܐܝ̣ܬ ܡܰܠܶܦ ܗܘܳܐ ܩܪ̈ܳܒܶܐ ܠܶܐܦܶܣܳܝ̈ܐ ܟܳܬܶܒ ܗܘܳܐ ܠܗܽܘܢ ܢܰܦܫܶܗ ܘܳܐܡܰܪ: ܡܶܟܺܝܠ ܐܰܚܰܝ̈ ܐܶܬܚܰܝܠܘ ܒܡܳܪܢ ܘܰܒܬܽܘܩܦܳܐ ܕܚܰܝܠܶܗ ܘܰܠܒܰܫܘ ܟܽܠܶܗ ܙܰܝܢܳܐ ܕܰܐܠܗܳܐ. ܐܰܝܟܰܢܳܐ ܕܬܶܫܟܚܽܘܢ ܠܰܡܩܳܡ ܠܽܘܩܒܰܠ ܨܶܢܥܴ̈ܬܶܗ ܕܳܐܟܶܠܩܰܪܨܳܐ. ܡܶܛܠ ܕܬܰܟܬܽܘܫܟܽܘܢ ܠܳܐ ܗܘܳܐ ܥܰܡ ܒܶܣܪܳܐ ܘܰܕܡܳܐ ܐܶܠܐ ܥܰܡ ܐܰܪ̈ܟܰܐܣ ܘܫܰܠܺܝ̈ܛܳܢܶܐ ܘܰܐܚܺܝ̈ܕܰܝ ܥܳܠܡܳܐ ܗܳܢܐ ܕܚܶܫܽܘܟܳܐ (ܐܦܣܝ̈ܐ ܘ: ܝ-ܝܒ). ܗܳܠܝܢ ܟܶܬܒܶܬ ܒܫܽܘܪܳܝܶܗ ܕܡܺܐܡܪܳܐ ܗܳܢܐ. ܟܰܕ ܒܳܥܶܐ ܐܢܳܐ ܕܰܕܠܳܐ ܫܚܳܩܳܐ ܬܶܗܘܽܘܢ. ܘܢܶܕܰܥ ܕܥܠ ܐܰܝܢܳܐ ܩܪܳܒܳܐ ܐܳܡܰܪ ܗܘܳܐ ܕܰܘܝܕ ܟܕ ܡܙܰܡܰܪ:
ܒܪܺܝܟ ܗܽܘ ܡܳܪܝܳܐ ܕܰܐܠܶܦ ܐܺܝ̈ܕܰܝ ܠܰܩܪܳܒܳܐ ܘܨܶܒ̈ܥܳܬܝ ܠܰܩܪܳܒܳܐ. ܘܳܐܦܶܢ ܕܡܶܛܠ ܩܪܳܒܳܐ ܐܚܪܺܢܳܐ ܕܰܦܠܶܫܬܳܝܳܐ ܐܶܫܟܰܚܢܰܢ. ܕܒܶܗ ܐܶܬܩܰܛܰܠܘ ܐܰܪܒܥܳܐ ܓܰܢܒܳܪ̈ܰܝܗܽܘܢ. ܗܳܢܘܢ ܕܶܐܬܺܝܠܶܕܘ ܠܗܽܘܢ ܒܓܳܬ ܐܶܡܰܪ ܕܰܘܝܕ ܡܰܙܡܽܘܪܳܐ ܗܳܢܐ ܕܰܡܳܐܐ ܘܰܐܪܒܥܺܝܢ ܘܰܬܠܳܬܳܐ. ܐܶܠܐ ܟܕ ܪܽܘܚܳܢܳܐܝ̣ܬ ܡܥܰܩܒܺܝܢܰܢ ܪܶܥܝܳܢܳܐ ܩܰܛܺܝܢܳܐ ܕܰܟܣܶܐ ܒܡܶܠܰܘ̈ܗܝ. ܐܰܕܪܶܟܢܰܢ ܡܶܛܠ ܗܰܘ ܩܪܳܒܳܐ ܕܰܣܕܺܝܪ ܗܘܳܐ ܠܶܗ ܟܰܣܝܳܐܝ̣ܬ ܠܽܘܩܒܰܠ ܪ̈ܽܘܚܶܐ ܟܰܣܝܴ̈ܬܳܐ ܡܙܰܡܰܪ ܗܳܠܶܝܢ. ܡܶܛܠ ܗܰܘ ܕܰܐܠܶܦ ܦܰܘܠܽܘܣ ܗܰܘ ܪܰܒܳܐ ܠܰܒܢܱ̈ܝ ܚܰܝܠܳܐ ܕܰܣܒܰܪܬܳܐ. ܐܰܝܟܰܢܐ ܕܡܶܢ ܒܳܬܰܪ ܕܰܐܩܺܝܡ ܣܶܕܪ̈ܶܐ ܠܽܘܩܒܰܠ ܣܶܕܪ̈ܶܐ ܘܡܰܫܪ̈ܝܳܬܳܐ ܠܽܘܩܒܰܠ ܡܰܫܪ̈ܝܳܬܳܐ. ܘܰܣܕܰܪ ܓܰܒܳܐ ܗܰܘ ܕܺܝܠܶܗ ܠܽܘܩܒܰܠ ܗܰܘ ܕܰܒܥܶܠܕ̈ܒܳܒܰܘܗܝ. ܡܶܛܠ ܕܗܽܘ ܙܰܒܢ̈ܝ̣ܢ ܣܰܓܺܝ̈ܐܳܢ ܣܰܚܶܦ ܡܰܫܪ̈ܝܳܬܶܗ ܕܰܒܥܶܠܕܒܳܒܳܐ ܘܰܐܠܶܦ ܠܰܒܢܱ̈ܝ ܚܰܝܠܳܐ ܟܰܕ ܐܳܡܰܪ: ܩܽܘܡܘ ܗܳܟܺܝܠ ܘܰܚܙܽܘܩܘ ܚܰܨܰܝ̈ܟܽܘܢ ܒܩܽܘܫܬܳܐ. ܘܣܰܐܢܘ ܒܪ̈ܶܓܠܰܝܟܽܘܢ ܛܽܘܝܳܒܶܗ ܕܶܐܘܰܢܓܶܠܝܽܘܢ ܕܰܫܠܳܡܳܐ. ܘܣܺܝܡܘ ܣܰܢܘܰܪܬܳܐ ܕܦܽܘܪܩܳܢܳܐ ܘܰܐܚܽܘܕܘ ܣܰܝܦܳܐ ܕܪܽܘܚܳܐ ܕܺܐܝܬܰܘܗܝ ܡܶܠܬܳܐ ܕܰܐܠܳܗܳܐ (ܐܦܣ̈ܝܐ ܘ: ܝܕ-ܝܙ). ܡܶܟܝ̣ܠ ܐܶܬܝܰܕܥܰܬ ܠܗ̇ ܕܡܶܛܠ ܐܰܝܢܳܐ ܩܪܳܒܳܐ ܐܶܡܰܪ ܡܙܰܡܪܳܢܳܐ. ܐܳܦ ܗܽܘ ܓܶܝܪ ܡܶܕܶܡ ܚܠܳܦ ܡܶܕܶܡ ܐܶܡܰܪ. ܚܠܳܦ ܐܺܝܕܰܝܴ̈ܐ ܓܝܪ ܠܙܰܝܢܳܐ ܗܰܘ ܕܙܰܕܺܝܩܽܘܬܳܐ ܕܰܒܝܰܡܺܝܢܳܐ ܘܰܒܣܽܘܟܳܠܳܐ ܡܰܥܶܠ. ܟܰܕ ܩܳܪܶܐ ܨܶܒܥܴ̈ܬܳܐ ܠܟܽܠ ܦܽܘܪ̈ܫܳܢܶܐ ܕܙܰܕܺܝܩܽܘܬܳܐ. ܘܟܰܕ ܡ̣ܢ ܐܰܠܗܳܐ ܡܶܣܬܰܝܰܥ ܗܘܳܐ ܒܰܩܪܳܒܳܐ ܗܰܘ ܘܳܐܡܰܪ:
ܒܶܝܬ ܓܰܘܣܝ ܡܦܰܨܝܳܢܝ. ܘܰܡܣܰܝܥܳܢܝ ܕܰܥܠܰܘܗܝ ܬܟܺܝܠ ܐܢܳܐ: ܫܰܥܒܶܕ ܠܥܰܡܡ̈ܐ ܬܚܽܘܬܰܝ. ܒܶܝܬ ܓܰܘܣܳܐ ܘܰܡܦܰܨܝܳܢܳܐ ܩܳܪܶܐ ܠܶܗ ܠܡܳܪܝܳܐ. ܟܰܕ ܡܩܰܒܠܳܐ ܢܰܦܫܳܐ ܛܰܝܒܽܘܬܶܗ ܕܰܡܦܰܨܝܳܢܳܗ̇ ܘܳܐܡܪܳܐ.
ܡܳܪܝܳܐ ܡܳܢܰܘ ܒܰܪܢܳܫܳܐ ܕܺܝܕܰܥܬܳܝܗܝ: ܘܒܰܪܢܳܫܳܐ ܕܰܚܫܰܒܬܳܝܗܝ. ܒܰܪܢܳܫܳܐ ܠܠܰܗܓܳܐ ܕܳܡܶܐ. ܗܳܠܶܝܢ ܩܴ̈ܠܐ ܦܳܪ̈ܽܘܫܶܐ ܐܝ̣ܬܰܝܗܽܘܢ ܕܗܰܘ ܕܥܰܠ ܠܰܩܪܳܒܳܐ ܘܰܙܟܳܐ ܘܰܢܨܰܚ. ܘܰܩܛܰܪ ܠܶܗ ܟܠܺܝܠܳܐ ܕܢܶܨܚܴ̈ܢܶܐ. ܘܟܕ ܐܺܝܬܰܘܗܝ ܬܶܒܢܳܐ ܘܠܰܗܓܳܐ ܐܳܚܶܕ ܐܰܓܽܘ̈ܢܶܐ ܥܰܡ ܪ̈ܽܘܚܶܐ ܩܰܠܺܝ̈ܠܳܬܳܐ. ܘܠܘ ܒܰܠܚܽܘܕ ܠܠܰܗܓܳܐ ܡܕܰܡܶܐ ܠܶܗ ܢܒܺܝܐ. ܐܶܠܐ ܐܡ̇ܪ.
ܘܝܰܘ̈ܡܳܬܶܗ ܥܳܒܪܺܝܢ ܐܰܝܟ ܛܶܠܳܠܳܐ. ܗܳܟܰܢ ܡܰܘܦܶܐ ܒܰܪܢܳܫܳܐ ܡܶܢ ܚܰܝ̈ܐ ܗܳܠܝܢ. ܡܶܛܠ ܕܗܳܐ ܡ̣ܢ ܫܽܘܪܳܝܶܗ ܕܥܳܠܡܳܐ ܒܬܰܟܬܽܘܫܳܐ ܡܥܰܝܕܺܝܢ. ܘܟܰܕ ܒܳܥܶܐ ܒܰܪܢܳܫܳܐ ܕܢܶܣܕܽܘܪ ܥܰܡܗܽܘܢ ܩܪܳܒܳܐ ܐܰܕܪܟܶܗ ܡܰܘܬܳܐ. ܐܳܦܶܢ ܢܶܗܘܶܐ ܕܙܳܟܶܐ ܠܗܽܘܢ ܘܡܳܐ ܕܰܚܙܰܘ ܕܰܐܕܪܶܟ ܠܗܰܘ ܡܰܘܬܳܐ. ܘܰܓܚܶܟܘ ܥܰܠ ܡܰܦܩܳܢܶܗ ܘܰܣܒܰܪܘ ܠܗܽܘܢ ܕܙܳܟܽܘܬܳܐ ܩܳܢܶܝܢ ܟܰܕ ܚܳܙܶܝܢ ܡܰܦܩܳܢܳܐ ܕܰܐܬܠܺܝ̈ܛܶܐ ܡ̣ܢ ܩܪ̈ܳܒܰܝܗܽܘܢ ܕܰܒܡܰܘܬܳܐ ܡܩܰܒܠܺܝܢ ܟܠܺܝ̈ܠܰܝܗܽܘܢ. ܐܶܠܐ ܡܶܛܠܗܳܢܐ ܠܘ ܕܺܝܠܰܢ ܗܽܘ ܩܪܳܒܳܐ. ܠܐ ܓܝܪ ܕܰܢܚܰܝܒܺܝܘܗܝ ܠܛܰܪܟܳܢܳܐ ܡܶܫܟܚܺܝܢܰܢ ܘܠܰܝܬ ܒܰܢ ܚܰܝܠܳܐ ܕܥܰܡ ܛܽܘܪ̈ܶܐ ܪ̈ܳܡܶܐ ܢܶܬܟܰܬܰܫ. ܡܶܛܠ ܕܒܳܟ ܚܳܐܱܪ ܣܽܘܥܪܳܢܳܐ.
ܐܰܪܟܶܢ ܫܡܰܝܳܐ ܡܳܪܝܳܐ ܘܚܽܘܬ ܘܰܟܐܝ̣ ܒܛܽܘܪ̈ܶܐ ܘܢܶܬܢܽܘܢ: ܐܰܒܪܶܩ ܒܰܪ̈ܩܰܝܟ ܘܕܰܠܰܚ ܐܶܢܽܘܢ. ܫܰܕܰܪ ܓܶܐܪ̈ܰܝܟ ܘܒܰܕܰܪ ܐܶܢܽܘܢ. ܫܰܦܺܝܪ ܦܰܫܩܶܗ ܢܒܺܝܐ ܠܣܽܘܥܪܳܢܳܐ ܕܰܩܪܳܒܳܐ. ܟܕ ܡܚܰܘܶܐ ܕܽܐܘܪܚܳܐ ܕܡܳܪܝܳܐ ܐܝ̣ܬܶܝܗ̇. ܠܐ ܓܝܪ ܐܶܡܰܪ ܗܘܳܐ ܠܶܗ ܕܢܶܚܽܘܬ. ܡܶܛܠܗܳܢܐ ܟܰܕ ܫܰܡܥܶܗ ܠܰܢܒܺܝܐ ܢܚܶܬ ܡܶܢ ܫܡܰܝܳܐ ܘܰܟܐܳܐ ܒܗܽܘܢ ܒܛܽܘܪ̈ܶܐ ܗܳܠܶܝܢ ܘܰܥܒܰܕ ܐܶܢܘܢ ܬܶܢܳܢܳܐ. ܠܽܘܩܕܰܡ ܓܶܝܪ ܐܰܪܟܶܢ ܫܡܰܝܳܐ ܗܰܘ ܝܰܠܕܳܐ ܕܪܰܒܽܘܬܳܐ. ܘܰܢܚܶܬ ܘܰܗܘܳܐ ܒܰܪܢܳܫܳܐ ܡܫܰܠܡܳܢܳܐ ܡܶܢ ܦܰܓܪܳܐ ܘܡܶܢ ܢܰܦܫܳܐ ܡܠܺܝܠܬܳܐ. ܘܶܐܬܳܐ ܠܰܥܡܳܕܳܐ ܡܶܢ ܥܰܒܕܶܗ ܝܽܘܚܰܢܳܢ. ܘܰܢܦܰܩ ܒܳܬܰܪ ܥܡܳܕܳܐ ܠܰܐܓܽܘܢܳܐ ܕܠܽܘܩܒܰܠ ܐܳܟܶܠܩܰܪܨܳܐ. ܘܰܒܨܰܘܡܳܐ ܥܰܙܺܝ ܠܽܘܩܒܰܠ ܗܰܘ ܕܰܐܚܛܺܝ ܒܡܶܐܟܽܘܠܬܳܐ ܠܰܕܒܶܝܬ ܐܳܕܳܡ. ܗܳܪܟܳܐ ܟܳܐܷܐ ܒܛܽܘܪ̈ܶܐ ܘܬܳܢܶܝܢ. ܘܟܕ ܐܳܟܶܠܩܰܪܨܳܐ ܒܫܽܘܠܳܡܳܐ ܕܬܰܟܬܽܘܫܶܗ ܠܚܰܪܬܳܐ ܩܰܪܶܒ ܠܰܡܫܺܝܚܳܐ ܬܠܳܬܳܐ ܬܰܟܬܽܘܫ̈ܐ. ܗܰܘ ܕܢܶܥܒܶܕ ܡܶܢ ܟܺܐܦ̈ܐ ܠܰܚܡܳܐ. ܘܗܰܘ ܕܢܶܫܕܶܐ ܢܰܦܫܶܗ ܡܶܢ ܗܰܝܟܠܳܐ. ܘܰܒܗܰܘ ܐܚܪܳܝܳܐ ܕܢܶܣܬܓܶܕ ܡܶܢ ܐܰܠܗܳܐ ܫܳܐܷܠ ܗܘܳܐ. ܒܰܕܠܳܐ ܝܳܕܰܥ ܗܘܳܐ. ܕܰܐܝܟ ܒܰܪܢܳܫܳܐ ܡܶܬܢܰܣܶܐ ܡܶܢܶܗ. ܘܰܐܠܗܰܐ ܗܘ ܡܶܣܬܰܓܕܳܢܳܐ. ܘܡܳܪܰܐ ܗܘ ܕܟܽܠ. ܘܟܕ ܕܶܝܢ ܠܒܰܪ ܐܶܓܳܪܳܐ ܗܰܘ ܕܒܰܫܡܳܐ ܕܛܽܘܪܳܐ ܩܪܳܝܗܝ ܐܶܡܰܪ ܠܗܽܘܢ: ܐܰܡܺܝܢ ܐܳܡܰܪ ܐܢܳܐ ܠܟܽܘܢ. ܕܶܐܢ ܬܶܗܘܶܐ ܒܟܽܘܢ ܗܰܝܡܳܢܽܘܬܳܐ ܐܰܝܟ ܦܪܶܕܬܳܐ ܕܚܰܪܕܠܳܐ. ܬܺܐܡܪܽܘܢ ܠܛܽܘܪܳܐ ܗܳܢܳܐ ܕܫܰܢܳܐ ܡܶܟܳܐ ܘܰܢܫܰܢܶܐ (ܡܬܝ ܝܙ: ܟ). ܗܰܘ ܕܒܰܕܡܽܘܬܳܐ ܕܛܽܘܪܳܐ ܢܳܦܶܠ ܗܘܳܐ ܥܰܠ ܗܰܘ ܛܰܠܝܳܐ ܥܰܠ ܕܠܐ ܥܕܰܟܺܝܠ ܓܡܺܝܪܺܝܢ ܗܘܰܘ ܒܗܰܝܡܳܢܽܘܬܳܐ. ܘܟܕ ܗܳܠܝܢ ܗܳܟܝ̣ܠ ܥܒܰܕ ܥܰܡܰܢܽܘܐܝܠ. ܒܰܪ̈ܩܰܘܗܝ ܐܰܒܪܶܩ ܕܰܠܰܚ ܐܶܢܘܢ ܠܛܽܘܪ̈ܶܐ ܗܳܠܝܢ. ܗܳܝܕܶܝܢ ܒܳܬܰܪ ܕܡܰܠܺܝ ܐܽܘܪܚܳܐ ܕܰܡܕܰܒܪܳܢܽܘܬܳܐ ܣܠܶܩ ܠܰܫܡܰܝܳܐ. ܘܫܰܕܰܪ ܒܰܕܡܽܘܬܳܐ ܕܰܥܢܳܢ̈ܐ ܠܶܫܳܢ̈ܐ ܕܢܽܘܪܳܐ ܘܰܢܚܶܬ ܥܠ ܡܳܐܐ ܘܥܶܣܪܺܝܢ ܬܰܠܡܺܝ̈ܕܶܐ ܒܥܶܠܺܝܬܳܐ. ܘܰܫܟܶܢ ܥܠ ܫܠܺܝ̈ܚܶܐ ܒܰܕܡܽܘܬ ܠܶܫܴ̈ܢܶܐ ܕܢܽܘܪܳܐ. ܘܰܥܒܰܕ ܐܶܢܘܢ ܒܰܪ̈ܩܶܐ ܢܰܗܺܝܪ̈ܶܐ ܘܢܽܘܗܪܳܐ ܠܚܶܫܽܘܟܳܐ. ܘܫܰܕܰܪ ܡܶܠܰܘ̈ܗܝ ܒܩܶܫܬܳܐ ܕܰܫܠܺܝܚܽܘܬܳܐ ܠܟܽܠܗܽܘܢ ܥܰܡܡ̈ܐ. ܓܶܐܪ̈ܰܝܗܶܝܢ ܗܘ̈ܝ ܠܣܶܕܪ̈ܶܐ ܕܰܒܥܶܠܕ̈ܒܳܒܶܐ ܘܰܡܒܰܕܪ̈ܳܢ ܠܗܽܘܢ. ܡܳܢܳܐ ܕܶܝܢ ܨܳܒܶܐ ܗܳܫܐ ܢܒܺܝܐ ܠܡܺܐܡܰܪ:
ܐܰܘܫܶܛ ܐܝ̣ܕܳܟ ܡܶܢ ܡܪܰܘܡܳܐ ܘܰܫܠܺܝܢܝ ܡܶܢ ܡܰܝܴ̈ܐ ܣܰܓܺܝ̈ܐܶܐ ܘܡܶܢ ܐܝ̣ܕܳܐ ܕܥܰܘܴ̈ܠܶܐ. ܕܦܽܘܡܗܽܘܢ ܡܡܰܠܶܠ ܣܪܺܝܩܽܘܬܳܐ ܘܝܰܡܺܝܢܗܽܘܢ ܝܰܡܺܝܢܳܐ ܗ̄ܝ ܕܥܰܘܠܳܐ. ܡܶܛܠܡܳܢܳܐ ܒܳܬܰܪ ܕܶܐܡܰܪ ܠܡܳܪܝܳܐ ܕܢܰܪܟܶܢ ܫܡܰܝܳܐ ܘܢܶܚܽܘܬ. ܗܳܫܐ ܠܰܘ ܠܶܗ ܐܡ̇ܪ ܕܢܶܚܽܘܬ. ܐܠܐ ܕܺܐܝܕܶܗ ܢܰܘܫܶܛ. ܫܡܶܗ ܕܰܐܒܳܐ ܠܐ ܡܶܬܩܪܶܐ ܒܶܗ ܒܪܳܐ. ܘܠܐ ܪܽܘܚܳܐ ܡܶܬܩܪܶܐ ܒܪܳܐ. ܘܠܐ ܒܪܳܐ ܡܶܬܩܪܶܐ ܒܰܫܡܳܐ ܕܰܐܒܳܐ ܘܰܕܪܽܘܚܳܐ. ܘܶܐܢ ܫܡܰܥܢܰܢ ܕܶܐܡܰܪ ܢܒܺܝܐ ܕܰܐܪܟܶܢ ܫܡܰܝܳܐ ܡܳܪܝܳܐ ܘܚܽܘܬ. ܠܰܒܪܳܐ ܐܶܫܬܰܘܕܰܥܢܰܢ ܒܗܳܕܶܐ ܒܰܪܬ ܩܳܠܳܐ. ܡܶܛܠ ܕܰܒܪܳܐ ܒܰܠܚܽܘܕ ܢܚܶܬ ܘܶܐܬܓܰܫܰܡ ܘܶܐܬܒܰܪܢܰܫ. ܘܰܗܘܳܐ ܒܶܣܪܳܐ ܡܶܢ ܒܬܽܘܠܬܳܐ. ܪܽܘܚܳܐ ܡܶܛܠ ܕܰܢܩܰܕܫܺܝܗ̇ ܠܰܒܬܽܘܠܬܳܐ ܐܰܓܶܢ ܥܠܶܝܗ̇. ܘܰܕܢܶܬܶܠ ܠܳܗ̇ ܚܰܝܠܳܐ ܕܬܶܛܥܰܢܝ ܠܰܐܠܗܳܐ ܒܡܰܪܒܥܳܗ̇. ܘܚܰܕ ܐܶܡܰܪ ܠܳܗ̇ ܡܰܠܰܐܟܳܐ ܕܝܳܠܕܳܐ. ܗܳܝ ܡܳܕܶܝܢ ܕܶܐܡܰܪ ܢܒܺܝܳܐ ܕܰܐܘܫܶܛ ܡܶܢ ܡܪܰܘܡܳܐ ܘܰܫܠܳܢܝ. ܗܳܝ ܕܰܐܘܫܶܛ ܐܝ̣ܕܶܗ ܐܰܒܳܐ ܐܝ̣ܬܰܘܗܝ. ܕܶܐܬܬܰܘܫܛܰܬ ܒܪܳܐ ܒܰܪ ܟܝܳܢܶܗ ܐܝ̣ܬܰܘܗܝ. ܘܦܰܫܶܩ ܒܗܳܕܐ ܥܠ ܠܐ ܡܶܬܦܰܪܫܳܢܽܘܬܶܗ ܕܰܒܪܳܐ ܡܶܢ ܐܰܒܳܐ. ܘܶܐܢ ܡܰܘܫܶܛ ܐܝ̣ܕܶܗ ܠܘܳܬ ܗܰܘ ܕܰܡ̇ܛܰܒ̣ܰܥ ܒܡܰܝܴ̈ܐ ܘܡܰܣܶܩ ܠܶܗ܆ ܥܰܠ ܐܳܕܳܡ ܡܚܰܘܶܐ ܕܰܐܣܩܶܗ ܡܫܺܝܚܳܐ ܡܶܢ ܫܝܽܘܠ ܗܳܝ ܬܰܚܬܳܝܬܳܐ. ܘܒܰܒܪܳܐ ܫܠܳܐ ܘܰܐܣܶܩ ܠܰܒܢܰܝ̈ܢܳܫܳܐ ܡܶܢ ܝܰܡܳܐ ܕܒܺܝ̈ܫܳܬܳܐ ܕܚܳܢܶܩ ܗܘܳܐ ܠܗܽܘܢ. ܘܕܰܢܚܰܘܶܐ ܢܒܺܝܐ ܕܠܰܚܛܺܝܬܳܐ ܩܳܪܶܐ ܡܰܝܴ̈ܐ. ܘܰܐܝܬܺܝ ܒܳܬܪܶܗ ܗܳܝ ܕܡܶܢ ܐܝ̣ܕܳܐ ܕܰܒܥܶܠܕ̈ܒܳܒܶܐ ܘܗܳܝ ܬܘܒ ܕܦܽܘܡܗܽܘܢ ܡܰܠܶܠ ܣܪܺܝܩܽܘܬܳܐ ܘܝܰܡܺܝܢܗܽܘܢ ܝܰܡܺܝܢܳܐ ܗ̄ܝ ܕܥܰܘܠܳܐ. ܡܶܛܠ ܕܟܰܕ ܥܒܰܕ ܦܽܘܪܩܳܢܳܐ ܗܳܢܐ ܫܰܒܰܚܘ ܠܶܗ ܬܶܫܒܽܘܚܬܳܐ ܐܰܝܠܶܝܢ ܕܶܐܬܦܪܶܩܘ ܡܶܢ ܚܛܺܝܬܳܐ ܘܶܐܡܰܪ:
ܐܰܠܗܳܐ ܬܶܫܒܽܘܚܬܳܐ ܚܕܰܬܳܐ ܐܶܫܰܒܰܚ ܠܳܟ ܘܰܒܟܶܢܳܪܳܐ ܕܰܥܣܰܪ ܡܶܢ̈ܝ̣ܢ ܐܶܙܰܡܰܪ ܠܳܟ. ܗܳܠܝܢ ܩܴ̈ܠܶܐ ܐܶܢܘܢ ܓܡܺܝܪ̈ܰܝ ܒܪ̈ܶܓܫܶܐ ܥܦܺܝ̈ܦܶܐ ܕܰܐܝܠܶܝܢ ܕܶܐܬܦܪܶܩܘ. ܗܳܝܕܶܝܢ ܝܶܫܽܘܥ ܡܰܠܟܳܐ ܡܳܪܝܳܐ ܫܩܰܠ ܦܽܘܪܩܳܢܳܐ ܡܶܢ ܫܡܰܝܳܐ ܘܰܢܚܶܬ. ܘܝܰܗܒ ܦܽܘܪܩܳܢܳܐ ܠܡܰܠܟܳܐ ܟܺܐܢܳܐ. ܘܦܰܨܺܝ ܠܕܰܘܺܝܕ ܥܰܒܕܶܗ ܡܶܢ ܚܰܪܒܳܐ ܒܺܝܫܬܳܐ. ܐܰܝܟ ܕܶܐܡܰܪ ܪܽܘܚܳܐ.
ܕܝܰܗܒܬ ܦܽܘܪܩܳܢܳܐ ܠܡܰܠܟܳܐ: ܘܦܰܨܺܝܬ ܠܕܰܘܺܝܕ ܥܰܒܕܳܟ ܡܶܢ ܚܰܪܒܳܐ ܒܺܝܫܬܳܐ. ܘܒܳܬܰܪ ܗܳܠܝܢ ܡܨܰܠܐ ܢܒܺܝܳܐ ܕܢܶܬܦܰܨܶܐ ܡܶܢ ܥܰܘܴ̈ܠܶܐ ܘܳܐܡܰܪ:
ܦܰܨܳܢܝ ܡܶܢ ܐܝ̣ܕܳܐ ܕܥܰܘܴ̈ܠܶܐ. ܕܦܽܘܡܗܽܘܢ ܡܡܰܠܶܠ ܣܪܺܝܩܽܘܬܳܐ: ܘܝܰܡܺܝܢܗܽܘܢ ܝܰܡܺܝܢܳܐ ܗ̄ܝ ܕܥܰܘܠܳܐ. ܬܰܪܬܶܝܢ ܙܰܒ̈ܢܺܝܢ ܐܶܬܚܰܫܰܚ ܒܡܶܠܬܳܐ ܗܳܕܐ ܬܢܳܢ. ܗܳܝ ܩܰܕܡܳܝܬܳܐ ܥܰܠ ܗܳܢܘܢ ܕܡܰܠܦܺܝܢ ܚܛܺܝܬܳܐ ܐܳܡܰܪ. ܗܳܫܳܐ ܕܶܝܢ ܡܶܛܠ ܕܗܳܠܶܝܢ ܐܚܪ̈ܳܝܶܐ ܒܢܰܝ̈ܢܳܫܳܐ ܥܳܒܕܰܝ̈ ܒܺܝܫܬܳܐ ܐܶܢܘܢ. ܟܰܕ ܨܰܠܺܝ ܕܢܶܬܦܰܨܶܐ ܡܶܢܗܽܘܢ. ܘܚܰܘܺܝ ܕܫܽܘܒܗܳܪܗܘܢ ܟܽܠܶܗ ܣܪܺܝܩܰܐ ܗ̄ܘ ܘܕܰܓܳܠܳܐ. ܘܰܕܟܽܠܶܗ ܣܰܒܪܗܽܘܢ ܒܰܐܪܥܰܐ ܗܘ ܘܰܐܣܺܝܪܺܝܢ ܒܰܒܢܰܝܴ̈ܐ ܘܰܒܩܶܢܝܴ̈ܢܶܐ.
ܒܢܰܝ̈ܗܽܘܢ ܠܡ ܐܰܝܟ ܢܶܨܒܬܳܐ ܡܶܬܪܰܒܶܝܢ ܡܶܢ ܛܰܠܝܽܘܬܗܽܘܢ. ܘܰܒܢܴ̈ܬܗܽܘܢ ܐܰܝܟ ܟܱ̈ܠܠܳܬܳܐ ܕܰܡܨܰܒ̈ܬܳܢ ܒܰܕܡܽܘܬܳܐ ܕܗܰܝܟ̈ܠܶܐ. ܬܰܐܘܳܢܰܝ̈ܗܽܘܢ ܡܠܶܝܢ ܘܡܶܬܐܰܫܕܺܝܢ ܚܰܕ ܠܚܰܕ. ܒܰܩܪ̈ܰܝܗܽܘܢ ܥܰܫܺܝ̈ܢܳܢ ܘܠܰܝܬ ܒܗܶܝܢ ܕܥܰܩܪܳܐ. ܐܳܦ ܥܳܢ̈ܗܽܘܢ ܝܴ̈ܠܕܳܢ ܘܰܡܪ̈ܰܒܝܳܢ ܒܫܽܘ̈ܩܰܝܗܽܘܢ. ܘܠܰܝܬ ܬܽܘܪܰܥܬܳܐ ܐܳܦܠܳܐ ܝ̣ܠܰܠܬܳܐ ܒܫܽܘܩܰܝ̈ܗܽܘܢ. ܗܳܠܝܢ ܐܶܡܰܪ ܢܒܺܝܐ. ܟܕ ܬܳܢܶܐ ܥܰܠ ܫܽܘܒܗܳܪܳܐ ܕܪ̈ܰܫܺܝܥܶܐ ܕܰܒܗܳܢܳܐ ܥܳܠܡܳܐ ܘܕܳܡ̈ܝܳܢ ܠܗܳܠܶܝܢ ܐܰܝܠܶܝܢ ܕܺܐܝܽܘܒ ܐܶܡܰܪ: ܬܰܘܪܶܗ ܠܰܡ ܥܳܒܰܪ ܘܠܳܐ ܓܳܥܶܐ: ܘܦܳܠܛܳܐ ܬܽܘܪܬܶܗ ܘܠܳܐ ܡܚܰܒܠܳܐ: ܘܰܡܫܰܪܪܺܝܢ ܐܰܝܟ ܥܳܢܴ̈ܐ ܒܢܰܝ̈ܗܽܘܢ: ܘܝܰܠܽܘܕܰܝ̈ܗܽܘܢ ܡܫܰܘܪܺܝܢ ܘܚܳܕܶܝܢ ܠܩܳܠܳܐ ܕܰܙܡܳܪܳܐ: ܘܳܐܡܪܺܝܢ ܠܰܐܠܗܳܐ ܐܰܥܒܰܪ ܡܶܢܰܢ: ܘܰܠܡܶܕܰܥ ܐܽܘܪ̈ܚܳܬܳܟ ܠܳܐ ܨܳܒܶܝܢܰܢ (ܐܝܘܒ ܟܐ: ܝ-ܝܕ). ܗܳܠܝܢ ܡܰܥܗܕܳܢ̈ܝܳܬܳܐ ܐܶܢܶܝܢ ܕܰܐܝܠܶܝܢ ܕܶܐܡܰܪ ܡܙܰܡܪܳܢܳܐ. ܘܰܕܠܰܝܬ ܠܗܽܘܢ ܛܽܘܒܳܐ. ܡܶܛܠ ܩܶܢܝܴ̈ܢܶܐ ܗܳܠܝܢ ܡܰܝܬܶܐ ܢܒܺܝܐ ܘܳܐܡܰܪ:
ܛܽܘܒܰܘܗܝ ܠܥܰܡܳܐ ܕܗܳܟܰܢ ܐܝ̣ܬ ܠܶܗ. ܠܰܘ ܗܳܢܰܘ ܛܽܘܒܳܐ ܕܺܐܝܟ ܗܳܠܶܝܢ ܐܢܳܫ ܢܶܩܢܶܐ. ܐܶܠܐ ܢܶܫܡܰܥ ܠܡܰܢ ܝܳܗܶܒ ܛܽܘܒܳܐ.
ܛܽܘܒܰܘܗܝ ܠܥܰܡܳܐ ܕܡܳܪܝܰܐ ܗ̄ܘ ܐܰܠܳܗܶܗ. ܠܗܳܢܳܐ ܠܰܡ ܐܝ̣ܬ ܠܶܗ ܛܽܘܒܳܐ ܡܶܛܠ ܩܶܢܝܳܢܳܐ ܕܰܡܝܰܬܪܽܘܬܳܐ. ܐܳܦ ܛܽܘܒܳܢܳܐ ܐܺܝܽܘܒ ܐܶܡܰܪ: ܕܠܳܐ ܗܘܳܐ ܒܺܐܝܕܰܝ̈ܗܘܢ ܛܽܘܒܗܽܘܢ. ܘܡܰܚܫܰܒܬܳܐ ܕܪ̈ܰܫܺܝܥܶܐ ܐܶܬܪܰܚܩܰܬ ܡܶܢܝ (ܐܝܘܒ ܟܐ: ܝܘ). ܡܶܛܠ ܕܟܽܠ ܕܰܒܥܳܠܡܳܐ ܐܶܢܶܝܢ ܒܶܗ ܦܳܝ̈ܫܳܢ. ܐܳܦ ܡܙܰܡܪܳܢܳܐ ܬܽܘܒ ܠܳܐ ܫܳܠܶܡ ܠܚܽܘܫܳܒ̈ܐ ܒܺܝ̈ܫܶܐ. ܒܗܳܝ ܕܠܰܘ ܠܗܳܠܶܝܢ ܝܰܗܒ ܛܽܘܒܳܐ. ܐܠܐ ܠܥܰܡܳܐ ܕܺܐܝܬ ܠܶܗ ܡܳܪܝܳܐ ܐܰܠܗܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܐܪܒܥܐ
ܥܰܠ ܪܰܒܽܘܬܳܐ ܕܡܰܠܟܽܘܬܳܐ ܕܰܐܠܳܗܳܐ: ܘܥܰܠ ܕܰܒܝܰܕ ܪܶܡܙܳܐ ܕܰܐܠܳܗܳܐ ܚܳܝܶܐ ܟܽܠ ܢܶܫܡܳܐ: ܘܥܰܠ ܫܽܘܠܳܡܳܐ ܘܥܰܠ ܕܺܝܢܳܐ.
ܪܰܒܽܘܬܳܐ ܘܫܽܘܒܚܳܐ ܕܡܰܠܶܦ ܕܡܰܠܟܽܘܬܶܗ ܕܰܐܠܗܳܐ. ܗܳܝ ܕܳܐܚܕܳܐ ܐܳܦ ܠܳܒܟܳܐ ܠܟܽܠ ܐܳܦ ܒܫܽܘܠܳܡܳܐ ܕܥܳܠܡ̈ܐ ܡܶܫܬܰܥܶܐ ܛܽܘܒܳܢܳܐ ܕܰܘܝܕ. ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܥܺܝܢ ܘܰܐܪܒܰܥ܆ ܥܰܠܗܳܝ ܦܩܽܘܕܝܳܐ ܕܡܶܫܬܰܠܛܳܐ ܥܰܠܟܽܠ ܒܫܽܘܠܳܡܶܗ ܕܥܳܠܡܳܐ. ܗܳܫܐ ܡܶܬܢܰܒܶܐ ܢܒܺܝܐ ܬܢܳܢ. ܘܳܐܡܰܪ ܥܰܠ ܗܳܠܶܝܢ:
ܐܶܪܰܡܪܡܳܟ ܡܳܪܝ ܡܰܠܟܳܐ. ܘܶܐܒܰܪܶܟ ܫܡܳܟ ܠܥܳܠܰܡ ܥܳܠܡܺܝܢ. ܡܶܛܠ ܡܳܢܳܐ ܩܳܪܶܐ ܠܶܗ؟ ܥܰܠܗܳܝ ܕܡܶܬܚܙܶܐ ܥܰܡܰܢܘ̇ܐܝܠ ܡܰܠܟܳܐ ܒܕܺܝܢܳܐ ܩܳܪܶܐ ܠܶܗ ܘܡܰܘܕܥܳܐ ܗܳܕܐ. ܗܳܝܕܶܝܢ ܡܫܰܪܶܝܢ ܩܰܕܺܝ̈ܫܶܐ ܠܰܡܫܰܒܳܚܽܘ ܠܰܫܡܶܗ ܠܥܳܠܰܡ ܥܳܠܡܺܝܢ. ܡܳܐ ܕܠܳܐ ܡܶܫܬܰܟܚܳܐ ܥܶܠܬܳܐ ܕܰܡܒܰܛܠܳܐ ܠܗܽܘܢ ܡܶܢ ܫܽܘܒܚܳܐ ܕܰܐܠܗܳܐ. ܘܠܳܐ ܡܶܫܬܰܟܚܳܐ ܡܰܠܟܽܘܬܳܐ ܕܣܳܛܳܢܳܐ. ܐܶܠܐ ܕܗܰܘ ܕܡܶܬܚܙܶܐ ܥܰܠ ܟܽܘܪܣܝܳܐ ܕܫܽܘܒܚܳܐ ܕܰܝܳܢܳܐ ܕܚܰܝܷ̈ܐ ܘܰܕܡܺܝ̈ܬܶܐ. ܒܗܰܘ ܓܶܝܪ ܙܰܒܢܳܐ ܠܘ ܡܶܛܠ ܕܢܰܠܶܦ ܬܝܳܒܽܘܬܳܐ ܐܳܬܶܐ. ܐܠܐ ܕܢܶܦܪܽܘܥ ܠܟܽܠܢܳܫ ܐܰܝܟ ܥܒܳܕܰܘ̈ܗܝ. ܘܡܳܐ ܕܶܐܬܓܰܠܝܰܬ ܗܳܝ ܪܰܒܽܘܬܳܐ ܕܠܳܐ ܡܶܬܡܰܠܠܳܐ ܡܰܘܣܦܺܝܢ ܘܳܐܡܪܺܝܢ ܐܰܝܟ ܢܒܺܝܳܐ:
ܒܟܽܠܝܽܘܡ ܐܶܒܰܪܟܳܟ ܘܶܐܫܰܒܰܚ ܫܡܳܟ ܠܥܳܠܰܡ. ܘܡܳܐ ܕܚܳܙܶܝܢ ܗܰܘ ܫܽܘܒܚܳܐ ܪܰܒܳܐ ܕܰܐܠܗܳܐ ܥܰܠ ܬܪܽܘܢܽܘܣ ܕܡܰܠܟܽܘܬܶܗ. ܕܠܰܝܬ ܡܶܕܶܡ ܕܦܳܚܶܡ ܠܶܗ ܘܡܶܬܡܠܶܝܢ ܬܶܗܪܳܐ ܐܰܝܟ ܢܒܺܝܳܐ ܕܳܐܡܰܪ:
ܪܰܒ ܗܽܘ ܡܳܪܰܢ ܘܰܡܫܰܒܰܚ ܛܳܒ: ܘܠܰܝܬ ܣܳܟܳܐ ܠܪܰܒܽܘܬܶܗ. ܘܡܶܕܶܡ ܐܚܪܺܝܢ ܠܳܐ ܝܳܕܰܥ ܗܘܳܐ ܕܢܺܐܡܰܪ ܢܒܺܝܐ. ܐܶܠܐ ܒܰܠܚܽܘܕ ܗܳܝ ܕܪܰܒ ܗܽܘ ܘܰܡܫܰܒܰܚ ܛܳܒ ܘܠܐ ܡܶܣܬܰܝܟܳܐ ܪܰܒܽܘܬܶܗ. ܘܠܘ ܐܶܢܳܐ ܐܳܡܰܪ ܐܢܳܐ ܕܪܰܒ ܗܽܘ ܒܰܠܚܽܘܕ. ܐܶܠܐ ܘܗܳܠܶܝܢ ܕܳܐܬܶܝܢ ܒܳܬܰܪ ܥܳܠܡܳܐ ܥܰܠ ܪܰܒܽܘܬܶܗ ܡܰܟܪܙܺܝܢ. ܘܫܳܬܩܺܝܢ ܡܶܢܶܗ ܘܡܶܫܬܰܥܶܝܢ ܥܰܠ ܥܒܳܕܰܘ̈ܗܝ ܕܒܳܪܽܘܝܳܐ. ܘܶܐܢܳܐ ܫܳܬܶܩ ܐܢܳܐ ܘܩܳܥܶܐ ܐܢܳܐ ܗܳܝ ܕܰܡܥܰܕܪܳܐ ܠܝ ܘܰܠܘܳܬ ܥܳܐܠܰܝ̈ ܠܥܳܠܡܳܐ. ܕܢܰܘܕܽܘܢ ܠܳܟ ܟܰܕ ܫܳܬܩܺܝܢ ܡܶܢ ܒܨܳܬܳܐ.
ܘܕܳܪܳܐ ܠܕܳܪܳܐ ܢܶܫܬܰܥܽܘܢ ܥܒܳܕܰܝ̈ܟ: ܘܓܰܢܒܳܪܽܘܬܳܟ ܢܚܰܘܽܘܢ. ܘܥܽܘܫܢܳܐ ܕܰܕܚܺܝܠܽܘܬܳܟ ܢܺܐܡܪܽܘܢ: ܐܳܦ ܪܰܘܪ̈ܒܳܬܳܟ ܢܶܫܬܰܥܽܘܢ. ܘܰܕܚܺܝܠܽܘܬ ܥܽܘܫܢܳܟ ܢܺܐܡܪܽܘܢ: ܘܪܰܒܽܘܬܳܟ ܐܶܫܬܰܥܶܐ. ܗܳܠܶܝܢ ܠܰܡ ܡܰܦܶܣ ܠܰܥܒܺܝ̈ܕܶܐ ܕܰܢܡܰܠܠܽܘܢ ܘܰܕܢܶܫܬܰܥܽܘܢ. ܘܶܐܠܽܘ ܡܶܫܟܚܳܐ ܗܘܳܬ ܕܢܳܦܶܠ ܬܚܶܝܬ ܒܨܳܬܳܐ ܟܝܳܢܳܐ ܗܰܘ ܕܰܐܠܳܗܽܘܬܳܐ. ܟܰܕ ܡܶܬܒܨܶܐ ܘܡܶܬܕܪܶܟ. ܡܶܬܥܰܕܰܪ ܗܘܳܐ ܗܰܘ ܕܡܰܕܪܶܟ ܘܒܳܨܶܐ. ܘܠܐ ܗܳܕܐ ܟܳܠܶܐ ܗܘܳܐ ܘܡܰܢ ܡܶܛܠ ܬܰܪܬܶܝܢ ܟܰܣܺܝ ܟܝܳܢܶܗ ܡܶܢ ܥܒܺܝ̈ܕܶܐ ܕܠܳܐ ܢܶܚܙܽܘܢܳܝܗܝ. ܚܕܳܐ ܥܰܠ ܕܠܳܐ ܡܶܫܟܚܳܐ ܕܢܳܦܶܠ ܬܚܶܝܬ ܚܙܳܬܳܐ. ܘܰܕܬܰܪܬܶܝܢ ܥܰܠ ܕܠܳܐ ܡܰܘܬܪܳܐ ܠܰܥܒܺܝ̈ܕܶܐ ܕܢܰܕܪܟܽܘܢ ܘܢܶܚܙܽܘܢ ܠܥܳܒܽܘܕܗܽܘܢ. ܡܳܕܶܝܢ ܫܰܦܺܝܪ ܐܶܡܰܪ ܢܒܺܝܳܐ: ܕܪܰܒܽܘܬܳܟ ܘܰܕܚܺܝܠܽܘܬ ܥܽܘܫܢܳܟ ܘܓܰܢܒܳܪܽܘܬܳܟ ܗܳܠܝܢ ܕܰܥܒܰܕܬ ܢܶܫܬܰܥܽܘܢ ܥܒܳܕܰܝ̈ܟ. ܘܳܐܦ ܐܶܢܳܐ ܥܰܡܗܽܘܢ ܐܶܫܬܰܥܶܐ ܪܰܒܽܘܬܳܟ.
ܘܕܽܘܟܪܳܢܳܐ ܕܛܰܝ̈ܒܘܳܬܳܟ ܣܰܓܺܝ̈ܐܬܳܐ ܢܶܒܥܽܘܢ ܙܰܕܺܝ̈ܩܰܝܟ ܘܢܶܫܟܚܽܘܢ. ܗܳܕܐ ܒܥܳܬܳܐ ܡܰܘܬܪܳܐ ܠܙܰܕܺܝ̈ܩܶܐ ܕܢܶܗܘܽܘܢ ܓܝܪ ܡܶܬܕܰܟܪܺܝܢ ܛܰܝܒ̈ܘܳܬܳܐ ܣܰܓܺܝ̈ܐܬܳܐ ܕܰܐܠܗܳܐ: ܨܶܝܕ ܒܢܰܝ̈ܢܳܫܳܐ. ܡܶܢ ܐܰܝܟܳܐ ܙܳܕܶܩ ܠܰܡܫܰܪܳܝܽܘ ܒܕܽܘܟܪܳܢܳܐ ܕܛܰܝܒ̈ܘܳܬܶܗ ܕܡܳܪܝ ܡܰܠܟܳܐ. ܡܶܢ ܐܰܝܟܳܐ ܕܥܰܒܕܶܗ ܠܒܰܪܢܳܫܳܐ ܟܕ ܠܐ ܐܝ̣ܬܰܘܗܝ: ܘܥܰܒܕܶܗ ܐܰܠܳܗܳܐ ܒܨܰܠܡܶܗ ܠܒܰܪܢܳܫܳܐ: ܘܥܰܒܕܶܗ ܪܺܝܫܳܐ: ܘܝܰܗܒ ܠܶܗ ܫܽܘܠܛܳܢܳܐ ܥܰܠ ܗܳܠܝܢ ܕܠܐ ܡܶܠܬܳܐ: ܘܝܰܗܒ ܠܶܗ ܡܰܘܗܰܒܬܳܐ ܕܠܐ ܡܶܬܚܰܒܠܳܢܽܘܬܳܐ: ܕܦܳܠܰܚ ܒܡܰܥܡܪܳܐ ܕܰܒܦܰܪܕܰܝܣܳܐ: ܘܗܳܝ ܕܒܳܬܰܪ ܕܰܚܛܳܐ ܠܐ ܩܰܛܠܶܗ ܐܰܝܟ ܕܰܠܡܰܪܳܚܳܐ: ܐܶܠܐ ܫܰܒܩܶܗ ܕܢܺܚܶܐ ܒܰܬܝܳܒܽܘܬܳܐ. ܐܠܐ ܟܕ ܗܘܳܬ ܒܛܺܝܠܽܘܬܳܐ ܥܠܰܘܗܝ. ܟܰܕ ܡܫܰܕܰܪ ܒܳܬܪܶܗ ܐܰܒܳܗܴ̈ܬܳܐ ܘܰܢܒܺܝ̈ܐ ܕܰܢܥܰܛܦܽܘܢܳܝܗܝ. ܘܰܕܪܰܒܳܐ ܡܶܢ ܟܽܠܗܝܢ ܛܰܝܒ̈ܘܳܬܳܐ ܢܶܬܕܟܰܪ ܗܳܫܳܐ ܚܢܰܢ. ܗܳܝ ܕܰܢܚܶܬ ܐܰܠܗܐ ܡܶܢ ܫܡܰܝܳܐ ܘܰܫܪܳܐ ܒܓܰܘ ܟܰܪܣܳܐ ܕܒܶܣܪܳܐ: ܗܰܘ ܕܥܶܠܳܝ ܡܶܢܟܽܠ ܡܽܘܫ̈ܚܳܢ ܘܰܪܘܺܝܚ ܡܶܢܟܽܠ ܡܰܕ̈ܥܺܝܢ: ܘܰܗܘܳܐ ܬܚܶܝܬ ܣܳܟܳܐ: ܘܶܐܬܬܚܶܕ ܠܒܶܣܪܳܐ ܥܰܒܝܳܐ ܗܰܘ ܩܰܛܺܝܢܳܐ ܘܰܦܫܺܝܛܳܐ ܘܰܗܘܳܐ ܒܰܪܢܳܫܳܐ: ܗܰܘ ܕܥܰܒܕܶܗ ܠܒܰܪܢܳܫܳܐ ܩܰܕܡܳܝܳܐ ܡܶܢ ܒܪܺܝܫܺܝܬ: ܘܶܐܬܳܐ ܠܨܰܥܪܳܐ ܘܰܠܒܶܙܚܳܐ: ܘܰܣܒܰܠ ܚܰܫ̈ܐ ܘܰܛܥܶܡ ܡܰܘܬܳܐ ܒܰܒܣܰܪ: ܘܶܐܬܬܣܺܝܡ ܒܩܰܒܪܳܐ ܘܰܢܚܶܬ ܠܰܫܝܽܘܠ ܗܰܘ ܚܰܝܳܐ ܘܡܰܚܝܳܢܳܐ: ܘܰܒܗܳܠܶܝܢ ܦܰܪܩܶܗ ܠܗܰܘ ܛܳܥܝܳܐ. ܘܰܐܦܢܺܝ ܠܰܛܪܺܝܕܳܐ ܠܓܰܢܬܳܐ. ܘܩܳܡ ܒܫܽܘܒܚܳܐ ܘܰܒܠܳܐ ܡܶܬܚܰܒܠܳܢܽܘܬܳܐ ܘܥܰܠܺܝ ܥܰܡܶܗ ܠܗܰܘ ܕܰܢܦܰܠ. ܗܳܠܝܢ ܛܰܝܒ̈ܘܳܬܳܐ ܢܶܚܙܽܘܢ ܙܰܕܺܝ̈ܩܶܐ ܘܰܢܫܰܒܚܽܘܢ. ܘܢܺܐܡܰܪ ܥܰܡ ܢܒܺܝܳܐ:
ܡܪܰܚܡܳܢ ܗܽܘ ܡܳܪܝܳܐ ܘܰܡܪܰܚܦܳܢ: ܢܰܓܺܝܪܳܐ ܪܽܘܚܶܗ ܘܣܰܓܺܝܐܳܐ ܛܰܝܒܽܘܬܶܗ. ܛܳܒ ܗܽܘ ܡܳܪܝܳܐ ܘܪ̈ܰܚܡܰܘܗܝ ܥܰܠ ܟܽܠܗܽܘܢ ܥܒܳܕܰܘ̈ܗܝ. ܗܳܢܰܘ ܝܽܘܠܦܳܢܳܐ ܕܰܡܥܰܕܰܪ ܘܡܰܘܬܰܪ ܕܢܶܬܗܰܓܶܐ ܘܰܢܡܰܠܶܠ. ܕܒܰܕܡܽܘܬ ܦܳܪܰܚܬܳܐ ܕܰܡܪܰܚܦܳܐ ܒܓܶܦܶܝ̈ܗ̇ ܥܰܠ ܦܰܪ̈ܽܘܓܶܝܗ̇. ܦܳܪܶܣ ܓܶܦ̈ܐ ܕܰܐܒܳܗܽܘܬܶܗ ܘܰܡܣܰܬܰܪ ܬܚܶܝܬ ܐܶܒܪ̈ܰܘܗܝ ܠܥܰܒܕܰܘ̈ܗܝ. ܡܳܕܶܝܢ ܥܰܠ ܗܳܕܶܐ:
ܢܰܘܕܽܘܢ ܠܳܟ ܡܳܪܝܳܐ ܥܰܒ̈ܕܰܝܟ. ܘܙܰܕܺܝ̈ܩܰܝܟ ܢܫܰܒܚܽܘܢܳܟ: ܘܫܽܘܒܚܳܐ ܕܡܰܠܟܽܘܬܳܟ ܢܺܐܡܪܽܘܢ ܘܰܒܥܽܘܫܢܳܟ ܢܡܰܠܠܽܘܢ. ܘܰܢܚܰܘܽܘܢ ܠܰܒܢܰܝ̈ܢܳܫܳܐ ܓܰܢܒܳܪܽܘܬܳܟ ܘܫܽܘܒܚܳܐ ܕܡܰܠܟܽܘܬܳܟ. ܗܳܠܶܝܢ ܡܰܘܕ̈ܥܳܢ ܫܽܘܒܚܶܗ ܘܡܰܠܟܽܘܬܶܗ ܕܥܰܡܰܢܽܘܐܝܠ. ܘܗܳܝܕܶܝܢ ܢܺܐܬܶܐ ܫܽܘܠܳܡܳܐ. ܘܶܐܡܰܪ ܡܙܰܡܪܳܢܳܐ ܬܢܳܢ:
ܡܰܠܟܽܘܬܳܟ ܡܰܠܟܽܘܬ ܟܽܠ ܥܳܠܡܺܝ̈ܢ: ܘܫܽܘܠܛܳܢܳܟ ܒܟܽܠ ܕܳܪܕܳܪ̈ܺܝܢ. ܡܗܰܝܡܰܢ ܗܽܘ ܡܳܪܝܳܐ ܒܡܶܠܰܘ̈ܗܝ. ܘܙܰܕܺܝܩ ܒܟܽܠܗܽܘܢ ܥܒܳܕܰܘ̈ܗܝ. ܗܳܝܕܶܝܢ ܡܶܬܚܰܙܝܳܐ ܡܰܠܟܽܘܬܶܗ ܘܫܽܘܠܛܳܢܳܐ ܕܽܐܘܚܕܳܢܶܗ. ܥܰܠ ܟܽܠܗܽܘܢ ܥܳܠܡ̈ܐ ܘܰܒܟܽܠܕܳܪ̈ܺܝܢ ܘܡܶܬܗܰܝܡܰܢ ܒܡܶܠܰܘ̈ܗܝ ܘܡܶܬܚܰܙܝܳܐ ܙܰܕܺܝܩܽܘܬܶܗ ܥܰܠ ܥܰܒ̈ܕܰܘܗܝ. ܘܗܳܝܕܶܝܢ:
ܣܳܡܶܟ ܡܳܪܝܳܐ ܠܟܽܠ ܕܢܳܦܠܺܝܢ: ܘܬܳܪܶܨ ܠܟܽܠ ܕܰܟܦܺܝܦܺܝܢ. ܡܳܐ ܓܶܝܪ ܕܰܗܘܳܬ ܩܝܳܡܬܳܐ ܠܐ ܗܳܘܶܐ ܐܰܬܪܳܐ ܠܡܰܦܽܘܠܬܳܐ. ܘܠܳܐ ܡܶܫܬܟܰܚ ܗܰܘ ܕܣܳܚܶܦ ܗܘܳܐ ܡܶܢ ܪܰܘܡܳܐ ܕܟܺܐܢܽܘܬܳܐ ܠܙܰܕܺܝ̈ܩܶܐ. ܡܶܛܠ ܕܬܳܪܶܨ ܡܳܪܝܳܐ ܠܟܽܠܗܽܘܢ ܦܬܺܝ̈ܠܶܐ. ܘܰܡܗܰܠܶܟ ܫܰܒܛܳܐ ܕܙܰܕܺܝ̈ܩܶܐ ܒܩܰܘܡܳܐ ܦܫܺܝܛܳܐ. ܘܰܠܘܳܬ ܚܰܕ ܚܰܘܪܳܐ ܬܰܠܝܴ̈ܢ ܥܰܝ̈ܢܰܝܗܽܘܢ. ܟܽܠܗܽܘܢ ܥܳܠܡ̈ܐ ܥܶܠܳܝ̈ܐ ܘܬܰܚܬܳܝ̈ܐ. ܐܰܝܟ ܕܶܐܡܰܪ ܪܽܘܚܳܐ:
ܕܥܰܝ̈ܢܶܐ ܕܟܽܠ ܐܢܳܫ ܠܘܳܬܳܟ ܬܰܠܝܴ̈ܢ: ܝܳܗܶܒ ܐܰܢܬ ܠܗܽܘܢ ܡܶܐܟܽܘܠܬܳܐ ܒܙܰܒܢܗܽܘܢ. ܘܦܳܬܰܚ ܐܰܢܬ ܐܺܝܕܳܟ ܘܰܡܣܰܒܰܥ ܐܰܢܬ ܨܶܒܝܳܢܳܐ ܕܟܽܠ ܕܚܰܝ. ܡܳܐ ܕܰܒܛܶܠܘ ܐܰܟܳܪ̈ܶܐ ܡܶܢ ܦܽܘܠܚܳܢܳܐ ܕܰܐܪܥܳܐ. ܬܘܒ ܠܳܐ ܚܳܝܪܺܝܢ ܐܰܟܳܪ̈ܶܐ ܕܢܶܬܬܰܪܣܽܘܢ ܡܶܢ ܦܺܐܪ̈ܶܐ ܕܚܰܩ̈ܠܳܬܗܽܘܢ. ܡܶܛܠ ܕܶܐܡܰܪ ܢܒܺܝܐ:
ܙܰܕܺܝܩ ܗܽܘ ܡܳܪܝܳܐ ܒܟܽܠܗܶܝܢ ܐܽܘܪ̈ܚܳܬܶܗ. ܘܥܰܠ ܙܰܕܺܝ̈ܩܶܐ ܦܳܪܶܣ ܐܺܝܕܶܗ ܘܡܳܠܐ ܬܽܘܪܣܳܝܳܐ ܠܠܶܒܰܘܴ̈ܬܗܘܢ. ܗܳܠܶܝܢ ܡܰܘ̈ܕܥܳܢ ܥܰܠ ܐܽܘܪ̈ܚܳܬܶܗ ܕܟܺܐܢܰܐ ܗܘ. ܒܗܳܝ ܕܰܠܟܽܠܢܳܫ ܦܳܪܰܥ ܐܰܝܟ ܥܒܳܕܰܘ̈ܗܝ.
ܘܰܡܪܰܚܡܳܢ ܒܟܽܠܗܽܘܢ ܐܽܘܪ̈ܚܳܬܶܗ. ܘܩܳܪܶܐ ܠܰܡܪ̈ܰܚܡܳܢܶܐ ܨܶܝܕ ܛܽܘ̈ܒܶܐ ܕܡܰܠܟܽܘܬܶܗ. ܐܡ̣ܪ ܓܶܝܪ ܢܒܺܝܳܐ:
ܕܩܰܪܺܝܒ ܗܽܘ ܡܳܪܝܳܐ ܠܰܐܝܠܶܝܢ ܕܩܳܪܶܝܢ ܠܶܗ ܒܩܽܘܫܬܳܐ. ܘܥܳܒܶܕ ܨܶܒܝܳܢܳܐ ܕܕܳܚܠܰܘ̈ܗܝ. ܫܳܡܰܥ ܒܳܥܽܘܬܗܽܘܢ ܘܦܳܪܶܩ ܠܗܽܘܢ. ܘܢܳܛܰܪ ܡܳܪܝܳܐ ܠܟܽܠܗܽܘܢ ܕܳܚܠܰܘ̈ܗܝ ܘܰܠܟܽܠܗܽܘܢ ܥܰܘܴ̈ܠܶܐ ܡܰܘܒܶܕ. ܘܰܐܝܠܶܝܢ ܕܳܐܡܪܺܝܢ ܥܰܠ ܕܺܝܢܳܐ ܕܰܐܠܗܳܐ ܕܫܽܘܠܳܡܳܐ ܐܝ̣ܬ ܠܶܗ: ܒܗܳܢܐ ܡܰܙܡܽܘܪܳܐ ܣܰܓܺܝ ܥܡܰܠܘ ܘܳܐܦ ܣܒܰܪܘ ܒܦܰܛܥܽܘܬܗܽܘܢ ܕܡܶܢ ܗܳܝ ܕܶܐܡܰܪ ܢܒܺܝܳܐ. ܕܦܳܫܶܛ ܐܝ̣ܕܶܗ ܘܰܡܣܰܒܰܥ ܨܶܒܝܳܢܳܐ ܕܟܽܠ ܕܚܰܝ. ܠܳܐ ܫܡܰܥܘ ܠܰܢܒܺܝܳܐ ܕܳܐܡܰܪ: ܕܩܰܪܺܝܒ ܗܽܘ ܡܳܪܝܳܐ ܠܰܐܝܠܶܝܢ ܕܩܳܪܶܝܢ ܠܶܗ ܒܩܽܘܫܬܳܐ. ܘܰܠܕܳܚܠܰܘ̈ܗܝ ܥܳܒܶܕ ܨܶܒܝܳܢܳܐ ܘܰܠܗܽܘܢ ܫܳܡܰܥ ܘܰܠܗܽܘܢ ܦܳܪܶܩ. ܘܰܠܟܽܠܗܽܘܢ ܥܰܘܴ̈ܠܶܐ ܡܰܘܒܶܕ. ܘܶܐܢ ܡܳܕܶܝܢ ܡܰܘܒܶܕ ܠܥܰܘܴ̈ܠܶܐ ܠܰܝܬ ܫܽܘܠܳܡܳܐ ܠܕܺܝܢܳܐ ܘܰܠܬܰܫܢܺܝܩܳܐ.
ܘܬܶܫܒܚܴ̈ܬܶܗ ܕܡܳܪܝܳܐ ܐܶܡܰܠܶܠ ܒܦܽܘܡܝ: ܘܰܢܒܰܪܟܽܘܢ ܟܽܠ ܒܢܱ̈ܝ ܒܶܣܪܳܐ ܠܰܫܡܳܐ ܕܩܽܘܕܫܶܗ ܠܥܳܠܰܡ ܥܳܠܡܺܝܢ. ܐܳܦ ܗܳܕܶܐ ܕܰܢܒܰܪܟܽܘܢ ܟܽܠ ܒܢܱ̈ܝ ܒܶܣܪܳܐ. ܕܠܳܐ ܙܥܽܘܪ ܐܰܛܥܝܰܬ ܐܶܢܘܢ. ܐܳܡܪܺܝܢ ܓܶܝܪ ܕܟܽܠ ܕܰܡܒܰܪܰܟ ܠܚܰܝ̈ܐ ܥܳܐܷܠ. ܐܰܛܥܝܰܬ ܐܶܢܘܢ ܕܰܒܗܰܘ ܙܰܒܢܳܐ ܕܕܺܝܢܳܐ ܘܠܳܐ ܚܰܝ̈ܠܰܘܳܬܳܐ ܕܰܠܩܽܘܒܠܳܐ ܫܳܬܩܺܝܢ ܡܶܢ ܩܴ̈ܠܶܐ ܕܒܽܘܪ̈ܟܳܬܳܐ. ܘܟܰܕ ܡܶܫܬܰܢܩܺܝܢ ܒܢܽܘܪܳܐ ܡܰܘܕܶܝܢ ܘܰܡܫܰܒܚܺܝܢ. ܟܰܕ ܠܳܐ ܝܰܬܝ̣ܪ ܠܗܽܘܢ ܡܶܕܶܡ. ܘܟܽܠ ܠܶܫܳܢ ܢܰܘܕܶܐ ܕܡܳܪܝܰܐ ܗܘ ܝܶܫܽܘܥ ܡܫܺܝܚܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܚܡܫܐ
ܥܰܠ ܕܠܳܐ ܢܗܰܝܡܶܢ ܠܬܽܘܟܠܳܢܳܐ ܕܗܳܘܶܐ ܡܶܢ ܒܰܪܢܳܫܳܐ: ܘܠܳܐ ܢܶܬܬܟܶܠ ܥܰܠ ܫܰܠܝܛܳܐ. ܘܐܪܳܙ ܓܶܠܝܳܢܶܗ ܕܥܰܡܰܢܽܘܐܝܠ: ܘܥܰܠ ܚܰܝ̈ܠܶܐ ܕܰܣܥܰܪ ܒܰܒܣܰܪ.
ܒܢܽܘܗܪܳܐ ܐܰܠܗܳܝܳܐ ܪܳܕܝܳܐ ܐܽܘܪܚܳܐ ܕܩܰܕܺܝ̈ܫܶܐ ܘܝܰܬܝ̣ܪܳܐܝ̣ܬ ܐܽܘܪܚܳܐ ܕܰܙܡܺܝܪ̈ܳܬܶܗ ܕܛܽܘܒܳܢܳܐ ܕܰܘܝܕ. ܗܳܠܝܢ ܕܒܰܕܡܽܘܬ ܪܩܺܝܥܳܐ ܕܰܣܒܺܝܣ ܒܢܰܗܺܝܪ̈ܶܐ. ܣܒܺܝ̈ܣܳܢ ܒܐܪ̈ܳܙܶܐ ܩܰܕܺܝ̈ܫܶܐ ܘܰܒܒܽܘܪ̈ܟܳܬܳܐ. ܡܶܛܠ ܕܟܽܠܗܶܝܢ ܒܚܰܝܠܳܐ ܪܰܒܳܐ ܡܶܬܡܱ̈ܠܠܳܢ. ܢܶܫܡܰܥ ܗܳܫܳܐ ܩܳܠܳܐ ܕܰܙܡܳܪܶܗ ܚܰܠܝܳܐ ܕܰܢܒܺܝܳܐ ܟܰܕ ܡܙܰܡܰܪ ܘܡܰܠܶܦ ܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܥܺܝܢ ܘܚܰܡܶܫ. ܟܕ ܡܫܰܪܶܐ ܡܶܢ ܗܳܝ ܕܰܢܫܰܒܰܚ ܘܳܐܡܰܪ:
ܕܫܰܒܰܚܝ ܢܰܦܫܝ ܠܡܳܪܝܳܐ. ܘܶܐܫܰܒܰܚ ܠܡܳܪܝܳܐ ܒܚܰܝܱ̈ܝ: ܘܶܐܙܡܰܪ ܠܰܐܠܳܗܝ ܥܰܕ ܩܰܝܳܡ ܐܢܳܐ. ܡܳܢܰܐ ܗ̄ܘ ܙܽܘܡܳܪܳܐ ܗܳܢܐ. ܕܶܐܫܰܒܰܚ ܠܡܳܪܝܳܐ ܒܚܰܝܱ̈ܝ. ܗܰܘ ܕܰܬܟܺܝܠ ܗܘܳܐ ܕܡܳܐ ܕܰܦܛܰܪ ܡ̣ܢ ܚܰܝܷ̈ܐ ܗܳܠܝܢ ܥܰܡ ܡܳܪܝܳܐ ܗܳܘܶܐ. ܘܠܳܐ ܗܳܕܐ ܣܪܺܝܩܳܐܝ̣ܬ ܐܰܡܺܝܪܳܐ ܗܳܪܟܳܐ ܙܳܕܶܩ ܕܰܢܫܰܒܰܚ. ܡܶܛܠ ܕܰܒܡܰܘܬܳܐ ܫܳܬܶܩ ܠܶܗ ܟܶܢܳܪܳܐ ܡܶܢ ܫܽܘܒܚܳܐ. ܘܠܐ ܢܶܒܛܰܠ ܒܬܶܫܒܚ̈ܬܳܐ ܕܒܰܪܢܳܫܳܐ ܘܰܕܫܰܠܺܝܛܳܐ.
ܠܳܐ ܠܡ ܬܶܬܰܟܠܽܘܢ ܥܰܠ ܫܰܠܺܝܛܳܐ ܘܥܰܠ ܒܰܪܢܳܫܳܐ ܕܠܰܝܬ ܒܺܐܝܕܶܗ ܦܽܘܪܩܳܢܳܐ. ܗܳܕܐ ܠܟܳܗܢ̈ܐ ܒܢܱ̈ܝ ܠܶܘܺܝ ܐܳܡܰܪ ܗܘܳܐ. ܕܟܰܕ ܡܫܰܒܚܺܝܢ ܠܰܐܕܽܘܢܰܝ ܢܶܗܘܽܘܢ ܒܳܥܶܝܢ ܦܽܘܪܩܳܢܳܐ ܒܺܐܝܕܶܗ ܕܰܐܠܗܳܐ. ܘܠܳܐ ܢܚܽܘܪܽܘܢ ܒܰܡܕܰܒܪ̈ܳܢܶܐ. ܗܳܕܐ ܕܡܶܬܚܰܦܛܳܐ ܒܰܒܢܰܝܴ̈ܐ ܕܠܳܐ ܡܶܬܬܦܺܝܣܳܢܽܘܬܳܐ. ܕܠܽܘܩܒܰܠ ܗܳܢܘܢ ܕܚܳܫܒܺܝܢ ܠܶܗ ܠܥܰܡܰܢܽܘܐܝܠ ܒܰܪܢܳܫܳܐ ܫܚܺܝܡܳܐ. ܩܳܥܶܐ ܗܘܳܐ ܢܒܺܝܳܐ ܘܳܐܡܰܪ:
ܕܠܳܐ ܬܶܬܰܟܠܽܘܢ ܥܰܠ ܫܰܠܺܝܛܳܐ ܘܥܰܠ ܒܰܪܢܳܫܳܐ ܕܠܰܝܬ ܒܺܐܝܕܶܗ ܦܽܘܪܩܳܢܳܐ. ܕܢܳܦܩܳܐ ܪܽܘܚܶܗ ܘܗܳܦܶܟ ܠܰܐܪܥܶܗ: ܘܰܒܗܰܘ ܝܰܘܡܳܐ ܐܳܒ̈ܕܳܢ ܟܽܠܗܶܝܢ ܡܰܚܫ̈ܒܳܬܶܗ. ܒܗܳܠܶܝܢ ܒܢܴ̈ܬ ܩܴ̈ܠܶܐ ܡܰܥܪܶܩ ܠܰܢ ܢܒܺܝܐ ܕܠܳܐ ܢܶܗܘܶܐ ܬܽܘܟܠܳܢܰܢ ܥܰܠ ܒܰܪܢܳܫܳܐ. ܘܡܳܐ ܕܢܶܦܩܰܬ ܪܽܘܚܶܗ ܕܒܰܪܢܳܫܳܐ ܗܳܦܶܟ ܠܰܐܪܥܶܗ ܘܒܳܛܠܳܐ ܡܰܚܫܰܒܬܶܗ. ܘܡܰܘܦܶܐ ܒܡܰܘܬܳܐ. ܘܗܳܠܶܝܢ ܠܽܘܩܒܰܠ ܒܺܝ̈ܫܰܝ ܫܽܘܒܚܳܐ ܢܶܣܛܽܘܪ̈ܝܰܢܽܘ ܩܰܕܶܡ ܐܶܢܶܝܢ ܪܽܘܚܳܐ ܙܰܡܰܪ ܐܶܢܝܢ ܢܒܺܝܐ. ܕܶܐܢ ܒܰܪܢܳܫܰܐ ܗ̄ܘ ܥܰܡܰܢܘ̇ܐܝܠ. ܘܠܳܐ ܗܘܳܐ ܐܰܠܗܳܐ ܕܶܐܬܒܰܪܢܰܫ. ܠܰܝܬ ܡܳܕܶܝܢ ܒܺܐܝܕܶܗ ܦܽܘܪܩܳܢܳܐ. ܐܶܠܐ ܐܶܪܰܡܝܳܐ ܗܳܟܰܢ ܐܶܡܰܪ: ܠܺܝܛ ܗܽܘ ܟܽܠܡܰܢ ܕܡܶܬܬܟܶܠ ܥܰܠ ܒܰܪܢܳܫܳܐ܇ ܘܢܶܥܒܶܕ ܒܰܪ ܒܶܣܪܳܐ ܕܪܳܥܶܗ܇ ܡܶܢ ܡܳܪܝܳܐ ܢܶܣܛܶܐ ܠܶܒܶܗ (ܐܪܡܝܐ ܝܙ: ܗ).
ܛܽܘܒܰܘܗܝ ܠܡܰܢ ܕܰܐܠܳܗܶܗ ܕܝܰܥܩܽܘܒ ܒܥܶܕܪܶܗ: ܘܣܰܒܪܶܗ ܥܰܠ ܡܳܪܝܳܐ ܐܰܠܳܗܳܐ. ܕܰܥܒܰܕ ܫܡܰܝܳܐ ܘܰܐܪܥܳܐ: ܘܝܰܡ̈ܡܶܐ ܘܟܽܠ ܕܺܐܝܬ ܒܗܽܘܢ. ܡܰܘܣܶܦ ܬܽܘܒ ܥܰܠ ܡܕܰܒܪܳܢܽܘܬܶܗ ܕܒܰܒܣܰܪ ܘܥܰܠ ܚܰܝ̈ܠܶܐ ܕܰܣܥܰܪ ܒܰܟܪ̈ܺܝܗܶܐ.
ܢܳܛܰܪ ܠܰܡ ܩܽܘܫܬܳܐ ܠܥܳܠܰܡ: ܘܥܳܒܶܕ ܕܺܝܢܳܐ ܠܟܽܠܗܽܘܢ ܛܠܺܝ̈ܡܶܐ. ܛܠܺܝ̈ܡܶܐ ܩܳܪܶܐ ܠܳܐܕܳܡ ܘܰܠܚܰܘܳܐ ܘܰܠܝܰܠܕܰܝ̈ܗܽܘܢ ܐܳܦ ܒܳܬܰܪ ܗܳܕܐ ܡܰܝܬܶܐ ܢܒܺܝܳܐ ܘܳܐܡܰܪ:
ܝܳܗܶܒ ܠܰܚܡܳܐ ܠܟܰܦ̈ܢܶܐ ܡܳܪܝܳܐ. ܗܳܕܳܐ ܗܝ ܗܳܝ ܕܒܰܪܶܟ ܥܰܠ ܚܰܡܫܳܐ ܠܰܚܡܷ̈ܐ ܘܰܬܪܶܝܢ ܢܽܘ̈ܢܶܐ ܕܰܩܕ̈ܩܶܐ ܘܣܰܒܰܥ ܠܟܶܢ̈ܫܶܐ ܕܰܗܘܰܘ ܠܘܳܬܶܗ ܒܚܽܘܪܒܳܐ ܬܰܪܬܶܝܢ ܙܰܒ̈ܢܺܝܢ. ܘܰܒܗܳܠܶܝܢ ܟܰܦ̈ܢܶܐ ܕܰܣܒܰܥܘ ܚܳܐܱܪ ܗܘܳܐ ܢܒܺܝܐ ܟܰܕ ܐܡ̇ܪ ܗܳܠܶܝܢ:
ܫܳܪܶܐ ܐܰܣܺܝܪ̈ܶܐ ܡܳܪܝܳܐ. ܘܗܳܕܐ ܒܢܺܝ̈ܫܶܐ ܣܰܓܺܝ̈ܐܐ ܡܶܫܬܰܡܥܳܐ ܒܗܳܝ ܕܰܫܪܳܐ ܡܶܢ ܚܰܛܳܝ̈ܐ ܐܰܣܽܘܪ̈ܶܐ ܕܰܚܛܺܝܬܳܐ. ܘܡܶܢ ܒܰܪܬ ܝܽܘܐܳܪܳܫ ܘܡܶܢ ܠܳܥܳܙܳܪ ܦܟܳܪ̈ܶܐ ܕܡܰܘܬܳܐ. ܘܟܰܕ ܢܚܶܬ ܠܰܫܝܽܘܠ ܐܶܡܰܪ ܬܰܡܳܢ ܠܢܰܦ̈ܫܳܬܳܐ ܕܰܐܣܺܝܪ̈ܳܢ ܗܘܱ̈ܝ ܒܰܫܝܽܘܠ ܕܢܶܦ̈ܩܳܢ.
ܘܦܳܬܰܚ ܥܘܺܝܪ̈ܶܐ ܡܳܪܝܳܐ: ܬܳܪܶܨ ܟܦܺܝ̈ܦܶܐ ܡܳܪܝܳܐ. ܡܰܢܽܘ ܗܰܘ ܕܝܰܗܒ ܢܽܘܗܪܳܐ ܠܰܣܡܰܝܴ̈ܐ ܐܶܠܐ ܐܶܢ ܗܰܘ ܕܝܰܗܒ ܢܽܘܗܪܳܐ ܠܣܰܡܝܳܐ ܕܡܶܢ ܟܪܶܣ ܐܶܡܶܗ ܕܙܶܠ ܐܰܫܺܝܓ ܒܡܰܥܡܽܘܕܺܝܬܳܐ ܕܫܺܝܠܽܘܚܳܐ (ܝܘܚܢܢ ܛ: ܙ). ܘܰܐܫܺܝܓ ܘܶܐܬܳܐ ܘܰܚܙܳܐ. ܘܗܳܝ ܕܰܟܦܺܝܦܳܐ ܡܶܢ ܪܽܘܚܳܐ ܕܟܽܘܪ̈ܗܳܢܶܐ ܬܡܳܢܰܥܶܣܪ̈ܶܐ ܫܢ̈ܝ̣ܢ ܣܳܗܕܳܐ ܠܰܢܒܺܝܽܘܬܳܐ ܕܶܐܬܦܰܫܛܰܬ ܡܶܢ ܟܦܺܝܦܽܘܬܳܗ̇. ܡܳܪܝܳܐ ܗܰܘ ܕܦܳܫܶܛ ܟܦܺܝ̈ܦܶܐ.
ܘܪܳܚܶܡ ܙܰܕܺܝ̈ܩܶܐ ܡܳܪܝܳܐ: ܘܰܡܢܰܛܰܪ ܠܡܶܣ̈ܟܺܢܶܐ. ܗܳܢܰܘ ܙܰܕܺܝ̈ܩܶܐ. ܗܳܢܘܢ ܕܶܝܢ ܕܶܐܡܰܪ ܠܗܘܢ ܥܰܡܰܢܘ̇ܐܝܠ ܕܪ̈ܳܚܡܰܝ ܐܰܢܬܽܘܢ ܐܰܟܬܶܒ ܒܰܣܒܰܪܬܳܐ ܡܶܣ̈ܟܺܢܶܐ ܕܰܡܢܰܛܰܪ ܐܝ̣ܬܰܝܗܽܘܢ ܥܰܡܡ̈ܐ ܡܗܰܝ̈ܡܢܶܐ. ܗܳܠܝܢ ܕܶܐܡܰܪ ܥܰܡܰܢܘ̇ܐܝܠ ܛܽܘܒܰܝܗܽܘܢ ܠܡܶܣ̈ܟܺܢܶܐ ܒܪܽܘܚ ܕܕܺܝܠܗܽܘܢ ܗܺܝ ܡܰܠܟܽܘܬܳܐ ܕܰܫܡܰܝܳܐ (ܡܬܝ ܗ: ܓ). ܘܒܳܬܰܪ ܡܶܣ̈ܟܺܢܶܐ ܐܡ̇ܪ:
ܡܬܰܪܣܶܐ ܠܝܰܬܡ̈ܐ ܘܠܰܐܪ̈ܡܠܳܬܳܐ: ܘܽܐܘܪܚܳܐ ܕܥܰܘܴ̈ܠܶܐ ܡܛܰܒܰܥ. ܝܰܬܡ̈ܐ ܗܘܰܝܢ ܕܠܳܐ ܐܰܒܳܐ ܕܚܰܝܷ̈ܐ ܕܠܳܐ ܐܝ̣ܬ ܗܘܳܐ ܠܰܢ. ܘܟܰܕ ܐܶܬܓܠܺܝ ܥܰܡܰܢܘ̇ܐܝܠ ܐܰܝܬܺܝ ܥܰܡܶܗ ܐܶܡܳܐ ܕܚܰܝܷ̈ܐ ܐܰܘܠܕܰܢ ܡܶܢ ܡܰܝܴ̈ܐ ܘܪܽܘܚܳܐ ܘܝܰܗܒ ܠܰܢ ܫܽܘܠܛܳܢܳܐ ܒܝܰܕ ܣܺܝܡܰܬ ܒܢܰܝܴ̈ܐ ܕܩܰܒܶܠܢܰܢ. ܕܰܒܢܰܝܴ̈ܐ ܕܰܐܠܗܳܐ ܢܶܗܘܶܐ. ܘܬܰܪܣܺܝ ܠܰܢ ܒܝܰܕ ܠܰܚܡܳܐ ܕܰܢܚܶܬ ܡܶܢ ܫܡܰܝܳܐ ܕܢܶܬܶܠ ܚܰܝ̈ܐ ܠܥܳܠܡܳܐ. ܗܳܢܰܘ ܬܽܘܪܣܳܝܳܐ ܕܝܰܬܡ̈ܐ ܘܕܰܐܪ̈ܡܠܳܬܳܐ. ܘܰܐܪ̈ܡܠܳܬܳܐ ܕܶܐܡܰܪ ܢܒܺܝܐ ܢܰܦ̈ܫܳܬܳܐ ܗܳܠܝܢ ܐܶܢܶܝܢ ܕܰܐܪ̈ܡܶܠܝ ܡ̣ܢ ܫܰܘܬܳܦܽܘܬܳܐ ܕܚܰܬܢܳܐ ܡܫܺܝܚܳܐ. ܟܰܕ ܕܶܝܢ ܐܶܬܳܐ ܡܳܪܝܳܐ ܠܰܐܪܥܳܐ ܗܘܳܐ ܚܰܬܢܳܐ ܘܰܩܪܳܐ ܐܶܢܶܝܢ ܠܰܓܢܽܘܢܶܗ. ܘܰܚܕܳܐ ܟܰܠܬܳܐ ܥܰܒܕܳܗ̇ ܠܳܐ ܡܳܝܽܘܬܬܳܐ ܘܠܳܐ ܡܶܬܚܰܒܠܳܢܺܝܬܳܐ. ܐܡ̣ܪ ܓܶܝܪ ܥܠܰܘܗܝ ܟܳܪܽܘܙܶܗ ܝܽܘܚܰܢܳܢ. ܕܗܰܘ ܕܺܐܝܬ ܠܶܗ ܟܰܠܬܳܐ ܚܰܬܢܰܐ ܗܘ (ܝܘܚܢܢ ܓ: ܟܛ). ܗܰܘ ܕܡܰܡܠܶܟ ܒܰܓܢܽܘܢܳܐ ܕܠܳܐ ܦܳܛܰܪ. ܐܰܝܟ ܕܫܰܠܶܡ ܢܒܺܝܐ ܘܶܐܡܰܪ.
ܐܰܡܠܶܟ ܡܳܪܝܳܐ ܠܥܳܠܰܡ: ܐܰܠܳܗܶܟܝ ܨܶܗܝܽܘܢ ܠܕܳܪܕܳܪ̈ܺܝܢ. ܕܗܽܘ ܢܰܫܘܶܐ ܠܰܢ ܠܬܽܘܪܣܳܝܳܐ ܐܰܡܺܝܢܳܐ. ܘܠܰܓܢܽܘܢܶܗ ܫܰܪܺܝܪܳܐ ܐܰܡܺܝܢ.
ܡܙܡܘܪܐ ܕܡܐܐ ܘܐܪܒܥܝܢ ܘܫܬܐ
ܡܰܘܕܰܥ ܥܰܠ ܒܶܢܝܳܢܳܐ ܕܽܐܘܪܺܫܠܶܡ ܡܶܢ ܒܳܬܰܪ ܕܰܣܠܶܩ ܥܰܡܳܐ ܡܶܢ ܒܳܒܶܝܠ: ܘܐܪܳܙ ܦܽܘܢܳܝܳܐ ܕܩܰܕܺܝ̈ܫܶܐ ܠܐܽܘܪܺܫܠܶܡ ܗܳܝ ܚܺܐܪܬܳܐ ܕܒܰܫܡܰܝܳܐ.
ܒܥܰܝ̈ܢܶܐ ܢܰܗܺܝܪ̈ܳܬܳܐ ܕܚܳܙ̈ܝܳܢ ܡܶܢ ܪܽܘܚܩܳܐ ܟܰܣܝܴ̈ܬܳܐ ܚܳܐܱܪ ܗܘܳܐ ܛܽܘܒܳܢܳܐ ܕܰܘܝܕ ܒܰܚܙܳܬܳܐ ܡܥܰܠܳܝܬܳܐ ܕܰܢܒܺܝܽܘܬܳܐ. ܐܰܝܠܶܝܢ ܕܳܐܬܝܴ̈ܢ ܗܘܱ̈ܝ ܥܰܠ ܥܰܡܳܐ ܒܳܬܰܪ ܕܳܪ̈ܶܐ ܣܰܓܺܝ̈ܐܐ. ܘܰܐܝܟ ܗܰܘ ܕܰܒܣܽܘܥܪܳܢܳܐ ܗܰܘ ܕܰܡܛܰܝܰܒ ܗܘܳܐ ܒܳܬܰܪ ܙܰܒܢ̈ܐ ܚܳܐܱܪ ܗܘܳܐ. ܡܶܛܠܗܳܢܐ ܟܰܕ ܚܙܳܐ ܕܣܳܠܩܺܝܢ ܡܶܢ ܒܳܒܶܝܠ. ܘܦܳܢܶܝܢ ܘܝܳܬܒܺܝܢ ܕܶܝܢ ܒܽܐܘܪܺܫܠܶܡ ܥܰܡܳܐ ܘܟܳܗ̈ܢܶܐ. ܐܰܝܟ ܗܰܘ ܕܚܳܙܶܐ ܘܚܳܐܱܪ ܗܘܳܐ ܒܙܽܘܪܒܳܒܶܝܠ ܘܰܒܝܶܫܽܘܥ ܒܰܪ ܝܽܘܙܳܕܳܩ ܟܳܗܢܳܐ ܪܰܒܳܐ. ܘܰܒܥܰܙܪܳܐ ܣܳܦܪܳܐ ܟܰܕ ܡܒܰܢܶܝܢ ܫܽܘܪ̈ܶܝܗ̇ ܕܽܐܘܪܺܫܠܶܡ ܘܣܳܝܓܺܝܢ ܬܽܘܪ̈ܥܳܬܳܗ̇. ܒܩܳܠܳܐ ܕܰܡܠܶܐ ܚܰܕܘܳܐ ܘܰܦܨܺܝܚܽܘܬܳܐ. ܘܰܒܣܰܝܒܽܘܬܳܐ ܡܙܰܡܰܪ ܗܘܳܐ ܡܰܙܡܽܘܪܳܐ ܗܳܢܐ ܕܰܡܳܐܐ ܘܰܐܪܒܥܺܝܢ ܘܶܫܬܳܐ ܘܳܐܡܰܪ:
ܛܳܒ ܠܡܶܙܡܰܪ ܠܰܐܠܳܗܰܢ ܘܒܰܣܺܝܡ: ܘܠܶܗ ܗܽܘ ܝܳܐܝܳܐ ܬܶܫܒܽܘܚܬܳܐ. ܒܳܢܶܐ ܠܐܽܘܪܺܫܠܶܡ ܡܳܪܝܳܐ: ܘܠܰܡܒܰܕܪ̈ܶܐ ܕܺܝܣܪܳܐܝܠ ܡܟܰܢܶܫ. ܡܰܐܣܶܐ ܠܰܬܒܺܝܪ̈ܰܝ ܠܶܒܳܐ ܘܥܳܨܶܒ ܟܺܐܒܰܝ̈ܗܽܘܢ. ܗܳܠܝܢ ܗܳܟܺܝܠ ܐܰܝܠܶܝܢ ܕܩܰܕܶܡ̈ܝ ܐܶܬܐܶܡܰܪ̈ܝ ܡܶܛܠ ܦܽܘܢܳܝܳܐ ܕܰܫܒܺܝܬܳܐ ܡܶܢ ܒܳܒܶܝܠ ܐܶܬܢܰܒܺܝ ܕܘܝܕ. ܘܥܰܠ ܟܽܘܢܳܫܳܐ ܕܰܡܒܰܕܪ̈ܶܐ ܕܺܝܣܪܳܐܝܠ. ܡܶܢ ܐܰܪ̈ܥܳܬܳܐ ܕܟܰܠܕܳܝ̈ܐ ܘܰܕܦܳܪ̈ܣܳܝܶܐ ܐܶܬܐܶܡܰܪ̈ܝ ܗܳܠܶܝܢ. ܘܥܰܠ ܒܶܢܝܳܢܳܐ ܕܗܰܝܟܠܳܐ ܐܶܢܓܶܝܪ ܐܽܘܪܺܫܠܶܡ ܗܳܝ ܒܗܴ̇ܓܳܪ ܡܶܬܡܰܬܠܳܐ ܐܶܬܒܰܢܝܰܬ. ܟܡܳܐ ܝܰܬܺܝܪܳܐܝ̣ܬ ܡܶܬܒܰܢܝܳܐ ܗܳܝ ܚܺܐܪܬܳܐ ܕܒܰܫܡܰܝܳܐ. ܐܰܟܡܳܐ ܓܶܝܪ ܕܶܐܡܰܪ ܦܰܘܠܽܘܣ ܕܰܚܢܰܢ ܠܳܐ ܗܘܰܝܢ ܒܢܱ̈ܝ ܐܰܡܬܳܐ ܐܶܠܐ ܒܢܱ̈ܝ ܚܺܐܪܬܳܐ (ܓܠܛܝ̈ܐ ܕ: ܠܐ). ܡܳܕܶܝܢ ܚܢܰܢ ܗܳܫܳܐ ܥܰܠ ܒܶܢܝܳܢܳܗ̇ ܕܗܳܝ ܚܺܐܪܬܳܐ ܐܽܘܪܺܫܠܶܡ ܢܶܫܰܐܠ. ܘܥܰܠ ܟܽܘܢܳܫܳܐ ܕܰܡܒܰܕܪ̈ܶܐ ܕܺܝܣܪܳܐܝܠ ܢܥܰܩܶܒ. ܐܳܦ ܓܶܝܪ ܠܗܳܕܶܐ ܐܽܘܪܺܫܠܶܡ ܝܶܫܽܘܥ ܟܳܗܢܳܐ ܪܰܒܳܐ ܒܳܢܶܐ ܠܳܗ̇. ܘܰܟܡܳܐ ܐܶܢ ܡܚܰܦܝܳܐ ܡܶܠܬܳܐ ܕܰܢܒܺܝܽܘܬܳܐ. ܐܶܠܐ ܠܳܐ ܗܘܳܐ ܠܰܓܡܳܪ ܡܟܰܣܝܳܐ ܡܶܢ ܐܰܝܠܶܝܢ ܕܺܐܝܬ ܥܰܡܗܽܘܢ ܛܰܝܒܽܘܬܳܐ. ܗܽܘ ܦܳܪܽܘܩܰܢ ܡܶܬܩܪܶܐ ܘܺܐܝܬܰܘܗܝ ܛܰܝܒܽܘܬܳܐ ܝܶܫܽܘܥ ܡܳܪܝܳܐ ܘܟܳܗܢܳܐ ܪܰܒܳܐ. ܘܟܰܕ ܛܳܒ ܝܶܫܽܘܥ ܒܰܪ ܝܽܘܙܳܕܳܩ ܒܳܢܶܐ ܗܘܳܐ ܠܐܽܘܪܺܫܠܶܡ ܥܰܡ ܙܽܘܪܒܳܒܶܝܠ. ܐܠܐ ܒܗܳܢܳܐ ܐܪܳܙܳܐ ܩܰܕܶܡ ܗܘܳܐ ܛܽܘܒܳܢܳܐ ܕܰܘܝܕ. ܬܰܪܬܰܝܗܶܝܢ ܓܶܝܪ ܙܰܒܢܴ̈ܬܳܐ ܒܗܳܢܳܐ ܫܡܳܐ ܝ̣ܪܶܬ ܥܰܡܳܐ ܠܐܽܘܪܺܫܠܶܡ. ܗܳܝ ܡܰܢ ܩܰܕܡܳܝܬܳܐ ܒܝܰܕ ܝܶܫܽܘܥ ܒܰܪܢܽܘܢ. ܥܰܠܘ ܗܘܰܘ ܠܰܐܪܥܳܐ ܕܦܰܠܶܣܛܺܝܢܺܝ ܘܺܝܪܶܬܘ ܠܐܽܘܪܺܫܠܶܡ. ܘܗܳܝ ܕܬܰܪܬܶܝܢ ܟܰܕ ܦܢܰܘ ܡܶܢ ܒܳܒܶܝܠ. ܝܶܫܽܘܥ ܒܰܪ ܝܽܘܙܳܕܳܩ ܡܕܰܒܰܪ ܗܘܳܐ ܪܰܒܽܘܬ ܟܽܘܡܪܽܘܬܳܐ. ܘܗܽܘ ܐܰܥܠܳܗ̇ ܠܰܫܒܺܝܬܳܐ ܥܰܡ ܙܽܘܪܒܳܒܶܝܠ. ܘܥܰܙܪܳܐ ܣܳܦܪܳܐ. ܓܰܠܝܳܐ ܗܝ ܗܳܕܐ ܐܰܝܟ ܕܡܶܢ ܐܪܳܙܳܐ ܗܳܢܐ. ܕܳܐܦ ܙܒܰܢܬܳܐ ܕܰܬܠܳܬ ܗܰܘ ܫܡܳܐ ܣܓܺܝܕܳܐ ܕܝܶܫܽܘܥ ܡܳܪܝܳܐ ܒܳܢܶܐ ܠܐܽܘܪܺܫܠܶܡ. ܘܠܰܡܒܰܕܪ̈ܶܐ ܕܺܝܣܪܳܐܝܠ ܡܟܰܢܶܫ. ܠܰܘ ܡܶܢ ܐܰܪܥܳܐ ܕܟܰܠܕܳܝ̈ܐ ܐܶܠܐ ܡܶܢ ܟܽܠܳܗ̇ ܐܰܪܥܳܐ ܗܳܝ ܕܒܳܒܶܝܠ. ܗܳܢܰܘ ܡܶܢ ܟܽܠܳܗ̇ ܥܳܡܰܪܬܳܐ. ܘܰܒܗܳܢܳܐ ܒܶܢܝܳܢܳܐ ܒܢܳܐ ܠܐܽܘܪܺܫܠܶܡ ܥܰܠ ܫܶܬܶܐܣܬܳܐ ܡܳܪܝܳܐ. ܘܰܐܠܶܦ ܠܰܐܪ̈ܕܺܝܟܠܶܐ ܕܫܰܕܰܪ ܕܢܶܒܢܽܘܢ ܠܰܡܟܰܢܳܫܽܘ ܟܺܐܦܰܘ̈ܗܝ ܙܪ̈ܺܝܩܶܐ ܕܒܶܢܝܳܢܳܐ. ܘܥܰܒܕܶܗ ܠܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܫܡܳܐ ܟܺܐܦܳܐ. ܘܥܰܠܗܳܝ ܐܶܫܬܰܘܕܺܝ ܕܢܶܒܢܶܝܗ̇ ܠܐܽܘܪܺܫܠܶܡ ܥܶܠܳܝܬܳܐ. ܘܬܽܘܒ ܫܰܕܰܪ ܠܦܰܘܠܽܘܣ ܡܒܰܢܝܳܢܳܐ ܚܰܟܺܝܡܳܐ. ܘܟܰܕ ܒܳܢܶܐ ܩܳܥܶܐ ܗܘܳܐ ܠܥܶܠ ܡܶܢ ܒܶܢܝܳܢܳܐ ܒܩܽܘܪܺܝܢܬܳܘܣ ܘܰܡܚܰܦܶܛ ܥܰܠ ܒܶܢܝܳܢܳܗ̇ ܕܽܐܘܪܺܫܠܶܡ ܘܳܐܡܰܪ: ܥܰܡ ܐܰܠܳܗܳܐ ܦܳܠܚܺܝܢܰܢ. ܘܦܽܘܠܚܳܢܳܐ ܕܰܐܠܳܗܳܐ ܘܒܶܢܝܳܢܳܐ ܐܰܢܬܽܘܢ ܐܶܢܽܘܢ. ܘܰܐܝܟ ܛܰܝܒܽܘܬܳܐ ܕܰܐܠܳܗܳܐ ܕܶܐܬܝܰܗܒܰܬ ܠܺܝ ܣܳܡܶܬ ܫܶܬܶܐܣܬܳܐ ܐܰܝܟ ܐܰܪܕܺܝܟܠܳܐ ܚܰܟܺܝܡܳܐ (ܐ ܩܘܪ̈ܢܬܝܐ ܓ: ܛ-ܝ). ܘܗܳܝ ܕܶܐܡܰܪ ܢܒܺܝܳܐ ܕܒܳܢܶܐ ܠܐܽܘܪܺܫܠܶܡ ܡܳܪܝܳܐ. ܘܠܰܡܒܰܕܪ̈ܶܐ ܕܺܝܣܪܳܐܝܠ ܡܟܰܢܶܫ. ܗܳܝ ܕܚܰܘܺܝ ܡܳܪܝܳܐ ܛܰܝܒܽܘܬܶܗ. ܘܰܐܣܺܝ ܠܰܬܒܺܝܪ̈ܰܝ ܠܶܒܳܐ ܘܰܥܨܰܒ ܟܺܐܒܰܝ̈ܗܘܢ. ܘܟܰܕ ܠܰܡ ܢܚܶܬ ܝܶܫܽܘܥ ܡܶܢ ܛܽܘܪܳܐ ܢܰܩܦܽܘܗܝ ܟܶܢ̈ܫܶܐ ܣܰܓܺܝ̈ܐܐ ܚܰܕ ܩܪܶܒ ܣܓܶܕ ܠܶܗ ܘܶܐܡܰܪ: ܡܳܪܝ ܐܶܢ ܨܳܒܶܝܬ ܡܶܫܟܰܚ ܐܰܢܬ ܠܰܡܕܰܟܳܝܽܘܬܝ. ܘܟܰܕ ܦܫܰܛ ܐܺܝܕܶܗ ܘܶܐܡܰܪ ܨܳܒܶܐ ܐܢܳܐ ܐܶܬܕܰܟܳܐ. ܘܰܒܫܳܥܬܳܐ ܐܶܬܕܰܟܺܝ ܓܰܪܒܶܗ (ܡܬܝ ܚ: ܒ-ܓ ܡܪܩܘܣ ܐ: ܡܐ-ܡܒ ܠܘܩܐ ܗ: ܝܒ-ܝܓ). ܚܙܰܝܬ ܐܰܝܟܰܢܳܐ ܝܳܨܶܦ ܥܰܠ ܒܶܢܝܳܢܳܐ ܕܥܺܕܬܳܐ: ܗܳܝ ܕܡܶܛܠܳܬܳܗ̇ ܢܚܶܬ. ܟܰܕ ܡܦܰܬܰܚ ܠܰܣܡܰܝܴ̈ܐ: ܘܡܰܚܠܶܡ ܟܪ̈ܺܝܗܶܐ: ܘܡܰܐܣܶܐ ܠܰܬܒܺܝܪ̈ܶܐ: ܘܰܡܩܰܝܶܙ ܚܓܺܝܪ̈ܶܐ: ܘܰܟܦܺܝ̈ܦܶܐ ܦܳܫܶܛ: ܘܡܰܫܡܰܥ ܕܽܘ̈ܓܶܐ: ܘܰܡܙܰܕܶܩ ܠܚܰܛܳܝ̈ܐ: ܟܰܕ ܡܢܰܟܶܦ ܙܰܠܺܝ̈ܠܶܐ: ܘܰܡܩܰܕܶܫ ܠܛܰܡ̈ܐܐ: ܘܰܡܚܰܘܰܪ ܠܰܡܟܰܬܡ̈ܐ: ܘܰܐܝܟ ܕܒܰܦܣܳܩܳܐ ܠܡܺܐܡܰܪ: ܡܶܢ ܗܳܠܶܝܢ ܟܺܐܦ̈ܐ ܕܡܰܣܠܝܴ̈ܢ ܗܘܱ̈ܝ ܡܶܢ ܡܽܘܡܰܝ̈ܗܶܝܢ ܡܶܢ ܒܶܢܝܳܢܶܗ ܕܥܳܠܡܳܐ. ܡܶܢܗܶܝܢ ܥܒܰܕ ܫܽܘܪܳܝܳܐ ܠܒܶܢܝܳܢܶܗ. ܐܝܟ ܕܩܰܕܶܡ ܐܶܬܢܰܒܺܝ ܥܠܰܘܗܝ ܡܙܰܡܪܳܢܳܐ. ܕܡܰܐܣܶܐ ܠܰܬܒܺܝܪ̈ܰܝ ܠܶܒܳܐ ܘܥܳܨܶܒ ܟܺܐܒܰܝ̈ܗܘܢ. ܘܒܳܬܰܪ ܗܳܕܐ ܡܰܝܬܶܐ ܘܳܐܡܰܪ:
ܡܢܳܐ ܡܶܢܝܳܢܳܐ ܠܟܰܘܟ̈ܒܶܐ. ܘܰܠܟܽܠܗܽܘܢ ܩܪܳܐ ܫܡܳܗ̈ܐ. ܟܰܘ̈ܟܒܶܐ ܠܰܘ ܥܰܠ ܐܰܪܥܳܐ ܙܳܕܶܩ ܢܶܒܥܶܐ ܐܶܢܽܘܢ. ܐܶܠܐ ܒܰܫܡܰܝܳܐ ܐܰܝܟ ܕܰܩܪܳܐ ܠܫܶܡܥܽܘܢ ܫܡܳܐ ܟܺܐܦܳܐ: ܘܰܠܝܰܥܩܽܘܒ ܘܰܠܝܽܘܚܰܢܳܢ ܒܢܱ̈ܝ ܙܰܒܕܰܝ. ܣܳܡ ܠܗܽܘܢ ܫܡܳܐ ܒܢܱ̈ܝ ܪܓܶܫ: ܕܺܐܝܬܰܘܗܝ ܒܰܪ ܪܰܥܡܳܐ. ܘܗܳܟܰܢܳܐ ܩܰܕܡܳܐܝ̣ܬ ܬܪܶܥܣܰܪ ܟܰܘ̈ܟܒܶܐ ܣܕܰܪ ܒܗܳܢܳܐ ܒܶܢܝܳܢܳܐ ܫܡܰܝܳܢܳܐ. ܘܒܳܬܰܪ ܗܳܠܶܝܢ ܫܰܒܥܺܝܢ ܫܠܺܝ̈ܚܶܐ: ܘܒܳܬܰܪ ܗܳܠܶܝܢ ܚܰܡܶܫܡܳܐܐ ܐܰܚ̈ܝ̣ܢ: ܘܬܘܒ ܕܶܝܢ ܠܫܳܐܘܳܠ ܦܰܘܠܽܘܣ ܚܛܰܦ ܡܶܢ ܐܽܘܪܚܳܐ ܘܰܐܣܩܶܗ ܠܰܫܡܰܝܳܐ ܘܥܰܒܕܶܗ ܟܰܘܟܒܳܐ ܢܰܗܺܝܪܳܐ. ܘܰܠܟܽܠܗܽܘܢ ܟܰܘܟ̈ܒܶܐ ܚܰܕܬܶܐ ܕܰܫܡܰܝܳܐ ܩܪܳܐ ܫܡܳܗ̈ܐ. ܡܶܛܠܗܳܢܐ ܟܕ ܩܳܝܡܺܝܢ ܥܰܠ ܫܶܬܶܐܣܬܳܐ ܕܰܥܡܳܕܳܐ ܟܳܗܢ̈ܐ ܩܰܕܺܝ̈ܫܶܐ ܘܒܺܐܝܕܳܐ ܒܺܐܝܕܳܐ ܩܳܪܶܝܢ ܫܡܳܗ̈ܐ ܠܟܽܠܗܽܘܢ ܐܰܝܠܶܝܢ ܕܥܳܡܕܺܝܢ ܒܰܫܡܳܐ ♱ ܕܰܐܒܳܐ ♱ ܘܕܰܒܪܳܐ ♱ ܘܰܕܪܽܘܚܳܐ ܩܰܕܺܝܫܳܐ. ܘܡܶܣܬܰܕܪܺܝܢ ܒܓܽܘܫܡܶܗ ܕܰܡܫܺܝܚܳܐ ܘܰܡܫܰܪܶܝܢ ܠܡܶܩܥܳܐ ܥܰܡ ܢܒܺܝܳܐ.
ܕܪܰܒ ܗܽܘ ܡܳܪܰܢ ܘܥܰܫܺܝܢ ܚܰܝܠܶܗ. ܘܠܰܝܬ ܣܳܟܳܐ ܠܣܽܘܟܳܠܶܗ: ܡܪܺܝܡ ܡܳܪܝܳܐ ܠܡܶܣ̈ܟܺܢܶܐ. ܘܰܡܡܰܟܶܟ ܠܥܰܘܴ̈ܠܶܐ ܥܕܰܡܳܐ ܠܰܐܪܥܳܐ. ܪܽܘܡܪܳܡܳܐ ܕܡܶܣܟܻ̈ܢܶܐ ܗܳܢܰܘ ܕܰܥܒܰܕ ܐܶܢܽܘܢ ܚܠܳܦ ܒܢܰܝ̈ܢܳܫܳܐ ܒܢܰܝܴ̈ܐ ܕܰܐܠܗܳܐ. ܘܡܽܘܟܳܟܳܐ ܕܥܰܘܴ̈ܠܶܐ ܕܰܣܚܰܦ ܒܰܐܪܥܳܐ ܘܕܳܫ ܒܥܰܦܪܳܐ. ܡܰܠܟܽܘܬܳܐ ܕܫܺܐܕ̈ܐ. ܡܶܛܠܗܳܢܳܐ ܩܳܥܶܐ ܟܶܢܫܳܐ ܕܰܦܪ̈ܺܝܩܶܐ ܥܰܡ ܢܒܺܝܳܐ.
ܕܫܰܒܰܚܘ ܠܡܳܪܝܳܐ ܒܫܽܘܒܚܳܐ. ܘܰܙܡܰܪܘ ܠܡܳܪܝܳܐ ܒܟܶܢܳܪܳܐ: ܕܰܡܟܰܣܶܐ ܫܡܰܝܴ̈ܐ ܒܰܥܢܳܢ̈ܐ. ܘܝܳܗܶܒ ܡܶܛܪܳܐ ܥܰܠ ܐܰܪܥܳܐ: ܘܡܰܘܥܶܐ ܥܡܺܝܪܳܐ ܥܰܠ ܛܽܘܪ̈ܶܐ. ܘܝܳܗܶܒ ܠܰܒܥܺܝܪܳܐ ܡܶܐܟܽܘܠܬܳܐ: ܘܠܰܒ̈ܢܰܝ ܢܰܥܒܳܐ ܕܩܳܪܶܝܢ. ܗܳܠܶܝܢ ܩܴ̈ܠܶܐ ܐܳܦܶܢ ܡܶܢ ܢܒܺܝܳܐ ܐܰܡܺܝܪܺܝܢ. ܐܶܠܐ ܒܢܴ̈ܬ ܩܴ̈ܠܶܐ ܐܶܢܶܝܢ ܕܰܡܒܰܕܪ̈ܶܐ ܕܰܒܢܱ̈ܝ ܝ̣ܣܪܳܐܝܠ ܕܶܐܬܟܰܢܰܫܘ ܒܓܳܠܽܘܬܳܐ ܕܥܶܛܦܰܬ ܡܶܢ ܒܳܒܶܝܠ ܡܶܢ ܫܒܺܝܬܶܗ ܕܣܳܛܳܢܳܐ. ܘܡܰܘܕܶܝܢ ܒܓܰܘ ܥܺܕܬܳܐ ܩܰܕܺܝܫܬܳܐ. ܟܕ ܚܳܙܶܝܢ ܕܰܡܟܰܣܝܳܐ ܫܡܰܝܳܐ ܒܰܥ̈ܢܳܢܶܐ ܢܰܗܺܝܪ̈ܳܬܳܐ ܕܰܢܒܺܝܷ̈ܐ ܘܰܫܠܺܝܚ̈ܐ. ܘܡܰܚ̈ܬܳܢ ܚܠܳܦ ܡܶܛܪܳܐ ܫܶܦ̈ܥܶܐ ܕܡܰܠܦܳܢܽܘܬܳܐ. ܗܳܢܐ ܡܶܛܪܳܐ ܡܰܘܥܶܐ ܒܠܶܒܱ̈ܘܳܬܳܐ ܪܶܥܝܳܐ ܡܚܰܕܝܳܢܳܐ. ܟܰܕ ܡܶܬܚܙܶܐ ܥܡܺܝܪܳܐ ܒܫܶܢܴ̈ܬܳܐ ܕܰܫܩܺܝ̈ܦܶܐ. ܘܳܐܟܠܳܐ ܒܥܺܝܪܳܐ ܘܣܳܒܥܳܐ. ܗܳܢܰܘ ܕܶܝܢ ܥܰܡܡ̈ܐ ܕܰܐܝܟ ܒܥܺܝܪܳܐ ܛܳܥܶܝܢ ܗܘܰܘ ܘܗܳܫܳܐ ܣܳܒܥܺܝܢ ܡܶܢ ܝܽܘܠܦܳܢܳܐ ܕܰܫܠܺܝ̈ܚܶܐ. ܚܙܺܝ ܘܡܳܪܰܢ ܚܶܛܬܳܐ ܩܪܳܐ ܢܰܦܫܶܗ. ܡܳܕܶܝܢ ܥܡܺܝܪܳܐ ܗܳܢܐ ܐܝ̣ܬܰܘܗܝ. ܗܰܘ ܕܡܰܘܥܶܐ ܒܢܰܦܫܳܐ ܚܶܛܬܳܐ ܕܚܰܝ̈ܐ. ܗܳܟܰܢܳܐ ܡܶܠܬܳܐ ܕܰܣܒܰܪܬܳܐ ܟܕ ܩܰܒܠܽܘܗ̇ ܥܰܡܡ̈ܐ ܒܕܽܘܡܝܳܐ ܕܰܥܡܺܝܪܳܐ ܕܶܝܢ ܐܰܟܠܽܘܗ̇ ܐܝܟ ܒܥܺܝܪܳܐ. ܘܟܶܢ ܐܶܬܢܰܗܰܪܘ ܒܳܗ̇. ܘܟܰܕ ܫܶܡܢܰܬ ܘܰܗܘܳܬ ܚܶܛܬܳܐ ܐܶܫܬܰܚܠܰܦܘ ܒܢܰܝ̈ܢܳܫܳܐ ܡܶܢ ܒܥܺܝܪܳܐ ܘܰܒܢܰܝܴ̈ܐ ܕܰܐܠܳܗܳܐ ܗܘܰܘ. ܡܶܛܠܡܳܢܐ ܒܢܱ̈ܝ ܢܰܥܒܳܐ ܩܳܪܶܐ ܠܗܽܘܢ ܢܒܺܝܳܐ. ܗܳܠܶܝܢ ܦܳܪ̈ܚܳܬܳܐ ܒܢܳܡܽܘܣܳܐ ܛܰܡܴ̈ܐܬܳܐ ܐܶܢܝܢ ܘܽܐܘܟܳܡܴ̈ܬܳܐ. ܐܳܡܪܺܝܢ ܕܶܝܢ ܥܰܠ ܢܰܥܒܳܐ ܕܠܰܘ ܡ̣ܢ ܙܽܘܘܳܓܳܐ ܡܰܘܠܶܕ ܒܢܰܝܴ̈ܐ. ܐܶܠܐ ܡܳܐ ܕܰܗܘܰܘ ܠܗ ܦܰܪ̈ܽܘܓܶܐ ܠܳܐ ܡܬܰܪܣܶܐ ܠܗܽܘܢ. ܡܶܛܠ ܕܪܺܝܚܳܐ ܕܺܝܠܗܽܘܢ ܒܓܰܘ ܩܶܢܳܐ ܣܰܓܺܝ ܒܺܝܫ ܘܰܣܪܶܐ ܠܰܐܒܳܗܰܝ̈ܗܘܢ. ܘܡܶܢ ܥܰܘܦܳܐ ܫܺܝܛܳܐ ܕܒܳܩܳܐ ܡܶܬܬܰܪܣܺܝܢ ܟܰܕ ܦܳܪܰܚ ܠܥܶܠ ܡܶܢܗܽܘܢ. ܒܗܳܝ ܕܰܕܠܺܝܠܐܝ̣ܬ ܥܠܰܝܗܽܘܢ ܫܳܟܶܢ ܘܩܰܠܺܝܠ ܢܳܚܶܬ ܠܦܽܘܡܗܽܘܢ ܘܒܳܠܥܺܝܢ ܠܶܗ ܘܚܳܐܶܝܢ. ܘܰܠܘܳܬ ܐܰܒܳܗܰܝ̈ܗܘܢ ܩܳܪܶܝܢ ܒܩܳܠܳܐ ܘܠܳܐ ܥܳܢܶܝܢ ܠܗܽܘܢ ܘܠܳܐ ܡܰܝܬܶܝܢ ܠܗܽܘܢ ܬܽܘܪܣܳܝܳܐ. ܒܕܰܐܝܟ ܗܳܠܶܝܢ ܡܶܬܡܰܬܠܺܝܢ ܐܰܒܳܗܷ̈ܐ ܒܺܝ̈ܫܶܐ ܣܳܛܳܢܳܐ ܘܰܚܛܺܝܬܳܐ. ܣܳܢ̈ܝܰܝ ܓܰܘܢܳܐ ܘܒܺܝ̈ܫܰܝ ܨܶܒܝܳܢܳܐ. ܟܕ ܕܶܝܢ ܟܢܰܫܘ ܥܰܡܡ̈ܐ ܘܣܳܡܘ ܒܩܶܢܳܐ ܕܰܚܛܺܝܬܳܐ. ܒܗܳܝ ܕܠܘ ܡܶܢ ܙܽܘܘܳܓܳܐ ܐܰܘܠܶܕܘ ܐܶܢܘܢ. ܠܳܐ ܩܢܰܘ ܥܠܰܝܗܽܘܢ ܪ̈ܰܚܡܶܐ. ܘܠܳܐ ܬܰܪܣܺܝ ܐܶܢܘܢ ܒܚܰܝܷ̈ܐ. ܘܠܰܝܬ ܠܗܽܘܢ ܒܢܰܝܴ̈ܐ ܒܓܰܘ ܩܶܢܳܐ. ܥܰܠ ܗܳܠܝܢ ܒܢܰܝܴ̈ܐ ܒܺܝ̈ܫܰܝ ܪܺܝܚܳܐ ܐܶܬܦܢܺܝ ܡܳܪܝܳܐ ܒܪ̈ܰܚܡܶܐ. ܘܚܰܪܰܪ ܐܶܢܘܢ ܡܶܢ ܚܛܺܝܬܳܐ ܘܡܰܘܬܳܐ. ܘܰܐܥܒܰܪ ܡܶܢܗܽܘܢ ܪܺܝܚܳܐ ܣܰܪܝܳܐ ܕܰܚܛܳܗܰܝ̈ܗܽܘܢ. ܘܰܐܥܡܶܕ ܘܩܰܕܶܫ ܐܶܢܘܢ ܘܕܰܟܺܝ ܐܶܢܘܢ ܘܫܰܚܠܶܦ ܓܰܘܢܗܽܘܢ ܐܽܘܟܳܡܳܐ. ܐܰܠܒܶܫ ܐܶܢܘܢ ܐܶܣ̈ܛܠܶܐ ܚܶܘܳܪ̈ܳܬܳܐ. ܘܬܰܪܣܺܝ ܐܶܢܘܢ ܡܶܢ ܬܰܘܪܳܐ ܕܦܶܛܡܳܐ ܕܰܢܟܰܣ ܠܗܽܘܢ ܐܰܒܳܐ. ܘܰܚܠܳܦ ܩܶܢܳܐ ܗܰܘ ܣܰܪܝܳܐ ܕܰܦܬܰܟܪܽܘܬܳܐ. ܐܰܥܶܠ ܐܶܢܘܢ ܠܓܰܘ ܥܺܕܬܳܐ ܩܰܕܺܝܫܬܳܐ. ܘܡܰܠܝܳܐ ܪܺܝܚܳܐ ܒܰܣܺܝܡܳܐ ܕܰܡܫܺܝܚܳܐ. ܘܝܳܗܶܒ ܠܗܽܘܢ ܡܶܐܟܽܘܠܬܳܐ ܒܙܰܒܢܗܽܘܢ. ܘܒܳܬܰܪ ܗܳܠܶܝܢ ܐܡ̇ܪ ܢܒܺܝܳܐ:
ܠܳܐ ܨܳܒܶܐ ܡܳܪܝܳܐ ܒܚܰܝܠܶܗ ܕܣܽܘܣܝܳܐ: ܘܳܐܦܠܳܐ ܒܫܳܩܰܘ̈ܗܝ ܕܓܰܢܒܳܪܳܐ ܨܳܒܶܐ. ܒܰܬܪܶܝܢ ܗܳܠܝܢ ܡܶܬܡܬܶܠ ܣܳܛܳܢܳܐ. ܡܶܛܠ ܕܡܶܢ ܗܳܠܶܝܢ ܡܶܬܬܥܺܝܪ ܩܪܳܒܳܐ ܥܰܠ ܡܗܰܝܡ̈ܢܶܐ ܘܡܶܬܕܰܘܰܕ ܫܰܝܢܳܐ.
ܐܶܠܐ ܨܳܒܶܐ ܡܳܪܝܳܐ ܒܕܳܚܠܰܘ̈ܗܝ: ܘܒܰܐܝܠܶܝܢ ܕܰܡܣܰܟܶܝܢ ܠܛܰܝܒܽܘܬܶܗ. ܠܗܳܠܶܝܢ ܓܶܝܪ ܒܐܪܳܙ ܫܒܺܝܬܳܐ ܕܣܶܠܩܰܬ ܡܶܢ ܒܳܒܶܝܠ. ܡܰܣܶܩ ܠܗܽܘܢ ܠܐܽܘܪܺܫܠܶܡ ܚܺܐܪܬܳܐ ܕܒܰܫܡܰܝܳܐ. ܘܒܳܢܶܐ ܠܗܽܘܢ ܥܰܠ ܛܽܘܪ̈ܶܐ ܕܨܶܗܝܽܘܢ ܡܶܬܝܰܕܥܳܢܺܝܬܳܐ ܘܡܰܦܢܶܐ ܠܗܽܘܢ ܠܰܡܕܺܝܢܬܳܐ ܕܰܠܥܶܠ ܘܡܰܣܩܺܝܢ ܫܽܘܒܚܳܐ ܘܬܰܘܕܺܝܬܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܫܒܥܐ
ܐܪܳܙܳܐ ܕܒܶܢܝܳܢܳܗ̇ ܕܥܺܕܬܳܐ ܕܰܒܝܰܕ ܡܳܪܰܢ: ܘܰܩܪ̈ܳܒܶܐ ܕܳܐܟܶܠܩܰܪܨܳܐ: ܘܒܽܘܛܳܠܳܐ ܕܗܳܠܶܝܢ ܕܰܒܝܰܕ ܡܳܪܰܢ.
ܥܰܠ ܫܽܘܒܚܳܐ ܪܰܒܳܐ ܕܩܰܘܡܳܐ ܠܳܐ ܡܶܬܬܙܺܝܥܳܢܳܐ܇ ܕܬܰܪ̈ܥܶܝܗ̇ ܕܥܺܕܬܳܐ ܘܰܕܒܶܢܝܳܢܳܗ̇ ܪܽܘܚܳܢܳܐ. ܡܶܫܬܰܥܶܐ ܢܒܺܝܳܐ ܒܬܶܫܒܽܘܚܬܳܐ ܕܰܡܳܐܐ ܘܰܐܪܒܥܺܝܢ ܘܰܫܒܰܥ ܟܰܕ ܐܡ̇ܪ:
ܫܰܒܰܚܝ ܐܽܘܪܺܫܠܶܡ ܠܡܳܪܝܳܐ. ܫܰܒܰܚܝ ܠܰܐܠܳܗܶܟܝ ܨܶܗܝܽܘܢ: ܡܶܛܠ ܕܰܐܥܫܶܢ ܡܽܘܟ̈ܠܶܐ ܕܬܰܪ̈ܥܰܝܟܝ: ܘܒܰܪܶܟ ܠܰܒܢܰܝ̈ܟܝ ܒܓܰܘܶܟܝ: ܘܣܳܡ ܬܚܽܘ̈ܡܰܝܟܝ ܒܰܫܠܳܡܳܐ. ܗܳܠܶܝܢ ܐܡ̣ܪ ܢܒܺܝܳܐ ܒܪܽܘܚ ܥܰܠ ܒܶܢܝܳܢܳܐ ܕܶܐܬܒܰܢܝܰܬ ܐܽܘܪܺܫܠܶܡ ܡ̣ܢ ܒܳܬܰܪ ܕܰܣܠܶܩ ܥܰܡܳܐ ܡܶܢ ܒܳܒܶܝܠ. ܘܥܰܠ ܒܶܢܝܳܢܶܗ ܕܗܰܝܟܠܳܐ ܕܰܒܢܳܐ ܗܘܳܐ ܙܽܘܪܒܳܒܶܝܠ ܘܝܶܫܽܘܥ ܒܰܪ ܝܽܘܙܳܕܳܩ ܘܚܰܓܺܝ ܘܰܙܟܰܪܝܳܐ ܘܥܰܙܪܳܐ ܢܒܺܝ̈ܐ. ܒܪܰܡ ܕܶܝܢ ܟܰܕ ܠܘܳܬ ܒܶܢܝܳܢܳܗ̇ ܕܥܺܕܬܳܐ ܡܰܦܢܶܝܢܰܢ ܬܶܐܘܳܪ̈ܺܝܰܐܣ ܗܳܠܝܢ ܡܶܣܬܰܟܠܺܝܢܰܢ ܠܒܶܢܝܳܢܳܗ̇ ܗܰܘ ܠܐ ܡܶܬܬܙܺܝܥܳܢܳܐ ܘܠܳܐ ܡܶܬܥܰܩܪܳܢܳܐ. ܗܰܘ ܕܟܕ ܐܶܬܥܰܫܰܢ ܒܝܰܕ ܡܳܪܰܢ. ܩܳܡܘ ܒܶܗ ܬܰܪ̈ܥܶܐ ܠܳܐ ܡܶܬܚܰܣ̈ܢܰܝ ܡܶܢ ܡܰܘܬܳܐ. ܐܰܝܟ ܕܶܐܡܰܪ ܠܦܶܛܪܽܘܣ ܪܺܝܫܳܐ ܕܰܫܠܺܝܚ̈ܐ: ܕܰܐܢܬ ܗܽܘ ܟܺܐܦܳܐ. ܘܥܰܠܗܳܕܐ ܟܺܐܦܳܐ ܐܶܒܢܶܝܗ̇ ܠܥܺܕܬܝ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇ (ܡܬܝ ܝܘ: ܝܚ). ܘܠܰܒܢܷ̈ܝܗ̇ ܕܗܳܕܐ ܡܒܰܪܶܟ ܒܓܰܘܳܗ̇ ܕܠܐ ܢܶܗܘܽܘܢ ܬܚܶܝܬ ܠܰܘܛܬܶܗ ܕܢܳܡܽܘܣܳܐ. ܘܠܰܘ ܒܰܩܛܺܝܪܳܐ ܢܳܛܪܺܝܢ ܦܽܘ̈ܩܕܳܢܶܐ. ܘܠܳܐ ܫܳܡܥܺܝܢ ܕܠܺܝܛ ܗܽܘ ܟܽܠ ܕܠܳܐ ܢܶܥܒܶܕ ܟܽܠ ܕܰܟܬܺܝܒ ܒܢܳܡܽܘܣܳܐ (ܬ ܢܡܘܣܐ ܟܙ: ܟܘ). ܘܠܳܐ ܡܶܬܟܰܬܫܺܝܢ ܠܡܶܦܪܰܥ ܦܰܟܳܐ ܚܠܳܦ ܦܰܟܳܐ. ܘܰܚܠܳܦ ܨܽܘܠܦܬܳܐ ܨܽܘܠܦܬܳܐ. ܐܶܠܐ ܒܫܰܝܢܳܐ ܘܒܰܫܠܳܡܳܐ ܢܛܰܪܘ ܦܽܘ̈ܩܕܳܢܰܘܗܝ ܕܡܳܪܰܢ. ܡܶܛܠ ܕܒܰܫܠܳܡܳܐ ܣܳܡ ܬܚܽܘ̈ܡܶܝܗ̇ ܘܢܳܡܽܘ̈ܣܶܝܗ̇ ܕܥܺܕܬܳܐ. ܗܳܝ ܕܠܰܘ ܡܶܢ ܠܰܚܡܳܐ ܕܰܣܥܳܪ̈ܶܐ ܡܶܬܬܰܪܣܝܳܐ ܐܝܟ ܒܥܺܝܪܳܐ. ܘܠܘ ܓܶܕܥܽܘܢ ܗܰܘ ܡܬܺܝܠ ܒܟܽܘܟܳܐ ܕܰܣܥܳܪ̈ܶܐ ܦܰܪܩܳܗ̇ ܐܶܠܐ ܥܰܡܰܢܽܘܐܝܠ ܡܳܪܝܳܐ ܗܰܘ ܕܰܩܪܳܐ ܢܰܦܫܶܗ ܦܪܶܕܬܳܐ ܕܚܶܛܬܳܐ. ܗܰܘ ܕܶܐܡܰܪ: ܕܶܐܢ ܦܪܶܕܬܳܐ ܕܚܶܛܬܳܐ ܠܳܐ ܡܳܝܬܳܐ ܒܰܐܪܥܳܐ܆ ܦܺܐܪ̈ܶܐ ܣܰܓܺܝ̈ܐܐ ܠܳܐ ܡܰܝܬܝܳܐ (ܝܘܚܢܢ ܝܒ: ܟܕ). ܗܽܘ ܡܳܕܶܝܢ ܟܕ ܡܺܝܬ ܨܶܒܝܳܢܳܐܝ̣ܬ ܘܰܣܠܶܩ ܒܰܥܠܳܬܳܐ ܪܰܒܬܳܐ ܘܰܥܒܰܕ ܟܰܪܝܳܐ ܕܚܷ̈ܛܶܐ. ܘܡܶܢܶܗ ܡܬܰܪܣܶܐ ܠܗ̇ ܠܥܺܕܬܶܗ ܐܝܟ ܕܶܐܡܰܪ ܢܒܺܝܐ.
ܘܰܒܫܽܘܡܢܳܐ ܕܚܷ̈ܛܶܐ ܣܰܒܥܶܟܝ: ܡܫܰܕܰܪ ܡܶܠܬܶܗ ܥܰܠ ܐܰܪܥܳܐ. ܘܒܰܥܓܰܠ ܪܳܗܶܛ ܦܶܬܓܳܡܶܗ. ܫܰܦܺܝܪ ܐܰܢܬܝ ܪܽܘܚܳܐ ܣܶܕܪܳܐ ܕܛܳܒܴ̈ܬܳܐ ܐܰܠܳܗܳܝܴ̈ܬܳܐ. ܕܝܰܗܒ ܐܰܒܳܐ ܠܥܺܕܬܳܐ. ܘܦܶܬܓܳܡܶܗ ܕܰܐܒܳܐ ܥܰܡܰܢܽܘܐܝܠ ܐܝ̣ܬܰܘܗܝ. ܕܶܐܫܬܰܕܰܪ ܡܶܢ ܐܰܒܳܐ ܕܚܰܝ̈ܐ. ܕܢܶܒܢܶܐ ܠܐܽܘܪܺܫܠܶܡ ܕܰܥܩܺܝܪܳܐ ܗܘܳܬ ܠܓܰܝ̈ܣܶܐ ܕܰܚܛܺܝܬܳܐ. ܘܟܰܕ ܐܶܬܓܰܠܝܰܬ ܡܶܠܬܶܗ ܕܰܐܒܳܐ ܒܰܒܣܰܪ. ܘܪܶܗܛܰܬ ܣܒܰܪܬܳܐ ܩܰܠܺܝܠܐܝ̣ܬ ܒܥܳܠܡܳܐ. ܘܶܐܬܚܙܺܝ ܥܰܡܳܐ ܩܰܕܺܝܫܳܐ ܒܝܰܕ ܫܠܺܝ̈ܚܶܐ ܛܽܘ̈ܒܳܢܶܐ ܘܰܦܢܰܘ ܡܶܢ ܛܳܥܝܽܘܬܳܐ ܥܰܡܡ̈ܐ ܚܰܛܳܝ̈ܐ ܘܣܶܒܥܰܬ ܥܺܕܬܳܐ ܬܽܘܪܣܳܝܳܐ ܕܚܰܝ̈ܐ ܕܰܡܚܰܪܰܪ ܡܶܢ ܦܟܳܪ̈ܶܐ. ܘܡܰܘܕܰܥ ܢܒܺܝܐ ܐܳܦ ܥܰܠ ܢܶܣܝܽܘ̈ܢܶܐ ܕܩܳܡܘ ܥܠܶܝܗ̇ ܡܶܢ ܚܰܢܦ̈ܐ ܘܒܰܕܡܽܘܬ ܣܰܬܘܳܐ ܩܰܫܝܳܐ ܡܙܰܡܰܪ ܒܩܴ̈ܠܶܐ ܕܛܳܒ ܟܡܺܝܪܺܝܢ ܘܳܐܡܰܪ:
ܝܳܗܶܒ ܬܰܠܓܳܐ ܐܰܝܟ ܥܰܡܪܳܐ. ܘܰܓܠܺܝܕܳܐ ܡܰܢ ܐܰܝܟ ܩܶܛܡܳܐ ܡܒܰܕܰܪ: ܪܳܡܶܐ ܓܠܺܝܕܳܐ ܐܰܝܟ ܦܷ̈ܬܶܐ. ܘܰܩܕܳܡ ܥܰܪܝܶܗ ܡܰܢܽܘ ܡܶܫܟܰܚ ܠܰܡܩܳܡ. ܬܰܠܓܳܐ ܘܰܓܠܺܝܕܳܐ ܐܝ̣ܬܰܘܗܝ ܡܳܪܝܳܐ. ܠܣܰܬܘܳܐ ܕܢܶܣܝܽܘ̈ܢܶܐ ܘܰܕܒܺܝ̈ܫܳܬܳܐ ܕܰܐܩܺܝܡ ܐܳܟܶܠܩܰܪܨܳܐ ܥܰܠ ܫܠܺܝܚ̈ܐ ܩܰܕܺܝ̈ܫܶܐ ܡܰܠܶܦ ܥܠܰܝܗܽܘܢ. ܘܰܠܗܳܢܳܐ ܣܰܬܘܳܐ ܕܥܰܙܺܝܙ ܗܘܳܐ ܥܠ ܐܢܳܫܽܘܬܳܐ ܐܰܥܒܪܶܗ ܡܳܪܰܢ ܒܰܙܩܺܝܦܽܘܬܳܐ. ܐܰܝܟ ܕܩܰܕܶܡ ܐܰܘܕܰܥ ܢܒܺܝܐ ܒܰܟܬܳܒܳܐ ܕܬܶܫܒܚܴ̈ܬ ܬܶܫܒܚܴ̈ܬܳܐ ܟܰܕ ܐܳܡܰܪ. ܐܰܝܟ ܕܡܶܢ ܚܰܬܢܳܐ ܠܘܳܬ ܟܰܠܬܳܐ ܚܰܟܺܝܡܳܐ ܫܠܶܝܡܽܘܢ. ܕܗܳܐ ܣܰܬܘܳܐ ܥܒܰܪ܆ ܘܡܶܛܪܳܐ ܐܶܙܰܠ ܠܶܗ (ܬܫܒ̈ܚܬ ܬܫܒ̈ܚܬܐ ܒ: ܝܐ). ܗܳܫܐ ܕܶܝܢ ܒܰܟܬܳܒܳܐ ܗܳܢܳܐ ܕܡܰܙܡܽܘܪ̈ܶܐ ܐܡ̇ܪ:
ܡܫܰܕܰܪ ܡܶܠܬܶܗ ܘܰܡܦܰܫܰܪ ܠܗܽܘܢ. ܟܡܳܐ ܥܰܫܺܝܢ ܩܪܳܒܳܐ ܕܰܒܥܶܠܕܒܳܒܳܐ ܕܡܶܫܟܰܚ ܩܳܐܷܡ ܠܽܘܩܒܰܠ ܚܰܝܠܳܐ ܕܡܶܠܬܶܗ ܕܰܐܠܗܐ. ܕܰܐܝܟ ܗܳܟܰܢܳܐ ܓܶܝܪ ܡܚܺܝܠ ܩܕܳܡ ܕܶܢܚܶܗ ܕܫܶܡܫܳܐ ܕܙܰܕܺܝܩܽܘܬܳܐ. ܐܝܟ ܕܡܶܬܡܚܶܠ ܬܰܠܓܳܐ ܘܰܓܠܺܝܕܳܐ ܡܶܢ ܥܽܘܙܳܐ ܚܰܡܺܝܡܳܐ ܕܙܰܠܺܝ̈ܩܰܘܗܝ ܕܫܶܡܫܳܐ. ܗܳܟܰܢܐ ܡܶܬܒܰܠܥܳܐ ܚܛܺܝܬܳܐ ܘܡܰܘܦܝܳܐ ܡ̣ܢ ܩܕܳܡ ܡܫܰܡ̈ܫܳܢܶܐ ܕܙܰܕܺܝܩܽܘܬܳܐ. ܘܡܶܢ ܒܳܬܰܪ ܠܰܡ ܕܗܳܘܝܳܐ ܗܳܕܐ. ܗܳܝܕܶܝܢ:
ܡܰܫܶܒ ܚܰܬܢܳܐ ܪ̈ܽܘܚܶܐ ܘܡܰܪ̈ܕܝܳܢ ܡܰܝܴ̈ܐ. ܟܕ ܓܶܝܪ ܚܕܳܐ ܗܝ ܪܽܘܚܳܐ ܕܩܽܘܕܫܳܐ. ܒܫܶܡ ܪ̈ܽܘܚܶܐ ܡܰܢ ܡܫܰܡܰܗ ܠܗ̇ ܢܒܺܝܐ. ܡܶܛܠ ܫܽܘܚܠܳܦ̈ܐ ܕܡܰܘܗܒܴ̈ܬܳܐ ܕܦܰܠܓܰܬ ܠܰܫܠܺܝ̈ܚܶܐ ܘܰܠܬܰܠܡܺܝ̈ܕܶܐ. ܐܝ̣ܬ ܕܺܝܗܺܝܒܳܐ ܠܶܗ ܒܪܽܘܚܳܐ ܡܶܠܬܳܐ ܕܚܶܟܡܬܳܐ: ܠܰܐܚܪܺܢܳܐ ܡܶܠܬܳܐ ܕܺܝܕܰܥܬܳܐ ܒܳܗ̇ ܒܪܽܘܚܳܐ: ܠܰܐܚܪ̈ܳܢܶܐ ܗܰܝܡܳܢܽܘܬܳܐ: ܠܰܐܚܪ̈ܳܢܶܐ ܢܒܺܝܽܘܬܳܐ: ܠܰܐܚܪ̈ܳܢܶܐ ܚܰܝ̈ܠܶܐ: ܠܰܐܚܪ̈ܳܢܶܐ ܡܰܘ̈ܗܒܳܬܳܐ ܕܳܐܣܝܽܘܬܳܐ: … ܘܟܽܠܗܶܝܢ ܕܶܝܢ ܗܳܠܶܝܢ ܚܕܳܐ ܗܝ ܪܽܘܚܳܐ ܣܳܥܪܳܐ (ܐ ܩܘܪ̈ܢܬܝܐ ܝܒ: ܚ-ܝܐ). ܐܰܟܡܳܐ ܕܰܐܠܶܦ ܚܰܟܺܝܡ ܒܟܽܠ ܦܰܘܠܽܘܣ. ܢܒܺܝܳܐ ܕܶܝܢ ܠܗܳܠܶܝܢ ܒܰܫܡܳܐ ܕܡܰܝܴ̈ܐ ܐܰܡܬܶܠ ܐܶܢܶܝܢ. ܡܶܛܠ ܕܚܰܝ̈ܐ ܐܶܢܶܝܢ. ܘܪܽܘܚܳܐ ܐܶܢܶܝܢ ܕܦܽܘܪܩܳܢܳܐ. ܘܒܳܬܰܪ ܗܳܠܝܢ:
ܡܚܰܘܶܐ ܡܶܠܬܶܗ ܒܝܰܥܩܽܘܒ ܘܢܳܡܽܘܣܶܗ ܘܦܽܘܩ̈ܕܳܢܰܘܗܝ ܒܺܝܣܪܳܐܝܠ. ܕܠܳܐ ܥܒܰܕ ܗܳܟܰܢܳܐ ܠܟܽܠܗܽܘܢ ܥܰܡܡ̈ܐ ܘܕܺܝ̈ܢܰܘܗܝ ܠܳܐ ܚܰܘܺܝ ܐܶܢܽܘܢ. ܡܶܛܠ ܕܙܰܒ̈ܢܺܝܢ ܣܰܓܺܝ̈ܐܢ ܐܶܡܰܪܢܰܢ ܕܡܶܠܬܶܗ ܕܰܐܒܳܐ ܒܪܶܗ ܗܽܘ. ܐܰܟܡܳܐ ܕܺܝܠܶܦܢܰܢ ܡܶܢ ܝܽܘܚܰܢܳܢ ܟܳܪܽܘܙܳܐ. ܘܗܳܕܐ ܕܚܰܘܺܝ ܡܶܠܬܶܗ ܒܝܰܥܩܽܘܒ ܥܰܠܗܳܝ ܕܶܐܬܚܙܺܝ ܡܶܠܬܶܗ ܕܰܐܠܗܳܐ ܒܰܒܣܰܪ. ܡܶܢ ܝܰܥܩܽܘܒ ܐܰܡܪܳܗ̇ ܢܒܺܝܐ ܗܳܝ ܕܰܠܘܳܬ ܚܰܕ ܚܰܕ ܡܶܢ ܥܰܡ̈ܡܶܐ ܠܳܐ ܣܥܰܪ ܐܰܠܗܳܐ ܕܢܶܓܠܶܐ ܒܪܶܗ ܡܶܢܶܗ ܒܝܰܕ ܓܽܘܫܡܳܐ. ܘܠܳܐ ܬܘܒ ܡܰܠܦܳܢܽܘܬܳܐ ܘܕܺܝ̈ܢܶܐ ܕܰܒܝܰܕ ܟܬܳܒ̈ܐ ܕܰܢܒܺܝ̈ܐ ܚܰܘܺܝ ܠܥܰܡܡ̈ܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܬܡܢܝܐ
ܥܰܠ ܕܰܒܪܽܘܚܳܐ ܐܶܬܥܰܠܺܝ ܢܒܺܝܳܐ ܠܰܚܙܳܬܳܐ ܪܰܒܬܳܐ ܕܰܐܝܠܶܝܢ ܕܩܳܝܡܺܝܢ ܥܰܠ ܛܘܪ̈ܶܐ ܥܶܠܳܝܷ̈ܐ. ܘܥܰܠ ܬܶܫܒܽܘܚܬܳܐ ܕܰܫܡܰܝܴ̈ܢܶܐ ܘܰܐܪ̈ܥܳܢܳܝܶܐ.
ܡܰܘܗܰܒܬܳܐ ܕܛܰܝܒܽܘܬܳܐ ܕܰܒܝܰܕ ܪܽܘܚܳܐ ܩܰܒܶܠ ܢܒܺܝܐ ܐܰܠܳܗܳܝܳܐ ܕܰܘܝܕ ܘܡܰܠܦܳܢܳܐ ܕܥܶܠܳܝ̈ܐ ܘܰܕܬܰܚܬܳܝ̈ܐ ܥܰܠܝܰܬ ܘܰܐܣܰܩܬܶܗ ܐܰܩܺܝܡܬܶܗ ܘܒܺܐܡܰܐ ܩܰܒܥܰܬ ܠܶܗ ܕܡܰܠܦܳܢܽܘܬܳܐ. ܕܰܫܡܰܝܳܢ̈ܐ ܐܰܝܟ ܕܠܰܐܪ̈ܥܳܢܳܝܶܐ. ܢܚܰܦܶܛ ܥܰܠ ܬܶܫܒܚܴ̈ܬܳܐ ܕܰܐܠܳܗܳܐ. ܡܶܛܠܗܳܢܐ ܟܕ ܡܫܰܒܰܚ ܬܶܫܒܽܘܚܬܳܐ ܕܰܡܳܐܐ ܘܰܐܪܒܥܺܝܢ ܘܰܬܡܳܢܶܐ. ܐܰܙܺܝܥ ܩܳܠܶܗ ܒܫܽܘܠܛܳܢܳܐ ܕܪܽܘܚܳܐ ܠܘܳܬ ܟܽܠܗܽܘܢ ܟܶܢ̈ܫܶܐ ܥܳܡܪ̈ܰܝ ܒܰܫܡܰܝܳܐ ܘܰܩܥܳܐ ܘܶܐܡܰܪ:
ܫܰܒܰܚܘ ܠܡܳܪܝܳܐ ܡܶܢ ܫܡܰܝܳܐ ܫܰܒܚܽܘܗܝ ܒܰܡܪ̈ܰܘܡܶܐ: ܫܰܒܚܽܘܗܝ ܟܽܠܗܽܘܢ ܡܰܠܐܱܟܰܘ̈ܗܝ: ܫܰܒܚܽܘܗܝ ܟܽܠܗܽܘܢ ܚܰܝ̈ܠܰܘܳܬܶܗ. ܒܗܳܠܶܝܢ ܦܶܬܓܳܡ̈ܐ ܐܰܪܒܥܳܐ ܠܟܽܠܗܶܝܢ ܡܰܫܪ̈ܝܳܬܳܐ ܕܥܶܠܳܝ̈ܐ ܚܰܦܶܛ ܠܰܡܫܰܒܳܚܽܘ. ܘܠܳܐ ܦܪܰܫ ܬܶܓ̈ܡܶܐ ܒܰܫܡܳܗ̈ܐ ܕܺܝܠܳܢܳܝ̈ܐ. ܒܗܳܝ ܓܶܝܪ ܕܶܐܡܰܪ ܕܡܰܠܰܐܟ̈ܐ ܘܚܰܝ̈ܠܰܘܳܬܳܐ ܡܰܢ ܠܟܽܠܗܽܘܢ ܛܶܟ̈ܣܶܐ ܥܶܠܳܝ̈ܐ ܚܒܰܫ. ܘܟܰܕ ܠܥܽܘܡܩܳܐ ܕܣܽܘܟܳܠܳܐ ܡܶܬܓܰܘܶܝܢܰܢ. ܠܐ ܡܰܡܪܚܺܝܢܰܢ ܕܥܰܠ ܗܳܠܶܝܢ ܢܰܥܶܠ ܒܨܺܝܪܽܘܬܳܐ ܘܰܣܢܺܝܩܽܘܬܳܐ. ܡܰܠܦܴ̈ܢܶܐ ܕܶܝܢ ܗܳܠܶܝܢ ܐܶܢܘܢ ܐܶܢ ܫܳܘܶܝܢܰܢ. ܘܟܰܕ ܣܰܓܺܝ ܢܺܐܪܰܒ ܒܰܪܢܳܫܳܐ ܗܳܝ ܕܰܢܡܰܠܶܠ ܒܶܗ ܡܰܠܰܐܟܳܐ. ܡܳܕܶܝܢ ܗܳܝ ܕܶܐܡܰܪ ܢܒܺܝܐ. ܕܫܰܒܰܚܘ ܠܡܳܪܝܳܐ ܡܰܠܐܱܟ̈ܐ ܘܚܰܝ̈ܠܰܘܳܬܳܐ. ܠܘ ܡܶܛܠ ܕܠܐ ܡܫܰܒܚܺܝܢ ܗܘܰܘ ܐܰܠܦܰܬ. ܐܶܠܐ ܥܰܠ ܕܠܳܐ ܫܳܠܶܝܢ ܡܶܢ ܫܽܘܒܚܳܐ ܫܰܘܕܥܰܬ. ܘܫܰܪܺܝ ܢܡܰܠܶܠ ܥܰܡ ܠܐ ܡܠܺܝ̈ܠܶܐ ܟܕ ܐܡ̇ܪ:
ܫܰܒܚܽܘܗܝ ܫܶܡܫܳܐ ܘܣܰܗܪܳܐ. ܫܰܒܚܽܘܗܝ ܟܽܠ ܟܰܘ̈ܟܒܶܐ ܘܢܽܘܗܪܳܐ. ܫܰܒܚܽܘܗܝ ܫܡܰܝ̈ ܫܡܰܝܳܐ ܘܡܰܝܴ̈ܐ ܕܰܠܥܶܠ ܡܶܢ ܫܡܰܝܳܐ. ܢܫܰܒܚܽܘܢ ܠܰܫܡܶܗ ܕܡܳܪܝܳܐ. ܡܶܛܠ ܕܗܽܘ ܐܶܡܰܪ ܘܰܗܘܰܘ. ܘܗܽܘ ܦܩܰܕ ܘܶܐܬܒܪܺܝܘ. ܘܰܐܩܺܝܡ ܐܶܢܽܘܢ ܠܥܳܠܰܡ ܥܳܠܡܺܝܢ. ܘܢܳܡܽܘܣܳܐ ܝܰܗܒ ܘܠܳܐ ܥܳܒܰܪ. ܡܶܛܠ ܕܶܐܡܰܪ ܡܙܰܡܪܳܢܳܐ ܥܰܠ ܫܶܡܫܳܐ ܘܟܰܘܟ̈ܒܶܐ ܕܰܢܫܰܒܚܽܘܢ ܘܰܐܣܒܰܪܘ ܐܢܳܫܺܝ̈ܢ ܦܰܛܥܷ̈ܐ ܕܢܰܦܫܳܐ ܚܰܝܬܳܐ ܘܡܰܪܓܫܳܢܺܝܬܳܐ ܐܝ̣ܬ ܒܢܰܗܺܝܪ̈ܶܐ ܘܗܳܕܶܐ ܕܳܢܘ. ܥܰܠ ܕܠܳܐ ܝ̣ܕܰܥܘ ܣܽܘܟܳܠܶܗ ܕܰܢܒܺܝܐ. ܐܶܠܐ ܕܰܒܝܰܕ ܪܶܡܙܶܗ ܕܰܐܠܗܐ ܡܶܬܬܙܺܝܥܺܝܢ ܒܪ̈ܶܗܛܰܝܗܽܘܢ. ܘܓܳܡܪܺܝܢ ܬܶܫܡܶܫܬܳܐ ܕܶܐܬܦܪܶܫܘ ܠܗ̇ ܡܶܢ ܥܳܒܽܘܕܳܐ. ܢܒܺܝܐ ܕܶܝܢ ܐܡ̣ܪ ܕܰܢܫܰܒܚܽܘܢ ܠܡܳܪܝܳܐ. ܒܢܺܝܫܳܐ ܕܰܐܝܟ ܗܳܢܳܐ. ܡܶܛܠ ܕܰܒܗܰܘ ܙܰܒܢܳܐ ܐܝ̣ܬ ܗܘܳܐ ܐܢܳܫܺܝ̈ܢ ܣܪ̈ܺܝܩܰܝ ܫܽܘܒܚܳܐ ܕܣܳܓܕܺܝܢ ܗܘܰܘ ܠܗܳܠܶܝܢ ܢܰܗܺܝܪ̈ܶܐ. ܘܰܡܩܰܪܒܺܝܢ ܗܘܰܘ ܠܗܽܘܢ ܩܽܘܪ̈ܒܳܢܶܐ. ܐܝܟ ܕܰܠܡܳܪܝܳܐ ܘܠܰܐܠܗܐ. ܐܡ̣ܪ ܗܽܘ ܢܒܺܝܐ ܕܰܢܫܰܒܚܽܘܢ ܢܰܗܺܝܪ̈ܶܐ ܠܡܳܪܝܳܐ. ܡܶܛܠ ܕܶܝܢ ܕܚܰܝܴ̈ܒܺܝܢ ܐܶܢܘܢ ܠܡܶܣܓܰܕ ܠܥܳܒܽܘܕܗܽܘܢ. ܘܢܶܕܥܽܘܢ ܕܚܰܕ ܗܽܘ ܡܳܪܝܳܐ ܒܰܫܡܰܝܳܐ ܘܒܰܐܪܥܳܐ ܕܫܰܠܺܝܛ ܥܰܠ ܟܽܠ. ܘܒܳܬܰܪ ܗܳܠܶܝܢ ܠܘܳܬ ܐܰܪܥܳܐ ܩܳܪܶܒ ܢܒܺܝܐ. ܕܰܢܩܺܝܡ ܡܶܢܳܗ̇ ܡܫܰܒܚܳܢ̈ܐ ܟܕ ܐܡ̇ܪ:
ܫܰܒܰܚܘ ܠܡܳܪܝܳܐ ܡܶܢ ܐܰܪܥܳܐ. ܬܰܢܺܝ̈ܢܶܐ ܘܟܽܠܗܽܘܢ ܬܗܽܘ̈ܡܶܐ: ܢܽܘܪܳܐ ܘܒܰܪܕܳܐ ܘܬܰܠܓܳܐ ܘܰܓܠܺܝܕܳܐ. ܘܪ̈ܽܘܚܶܐ ܘܥܰܠܥܴ̈ܠܶܐ ܥܒܳܕܳܐ ܕܡܶܠܬܶܗ. ܛܽܘܪ̈ܶܐ ܘܟܽܠܗܶܝܢ ܪ̈ܳܡܳܬܳܐ ܐܺܝܠܳܢ̈ܐ ܕܦܺܐܪ̈ܶܐ ܘܟܽܠܗܽܘܢ ܐܰܪ̈ܙܶܐ. ܚܰܝܽܘܬܳܐ ܘܟܽܠܳܗ̇ ܒܥܺܝܪ̈ܳܐ ܪ̈ܰܚܫܳܐ ܘܛܰܝܪܳܐ ܘܦܳܪܰܚܬܳܐ. ܒܗܳܠܶܝܢ ܐܰܠܶܦ ܛܽܘܒܳܢܳܐ ܕܰܘܝܕ. ܕܰܒܗܰܘ ܛܶܟܣܳܐ ܕܰܐܝܬܺܝ ܠܰܒܪܺܝܬܳܐ ܠܰܗܘܳܝܳܐ. ܗܳܝ ܕܪܰܘܡܳܐ ܘܥܽܘܡܩܳܐ ܡܶܢ ܥܳܒܽܘܕܳܐ. ܒܶܗ ܐܰܠܶܦ ܐܶܢܶܝܢ ܠܰܡܫܰܒܳܚܽܘ ܐܚܪ̈ܳܢܶܐ ܕܶܝܢ ܠܬܰܢܺܝ̈ܢܶܐ ܩܰܪܶܒܘ ܣܶܓܕܬܳܐ. ܐܰܝܟܰܢܳܐ ܕܣܳܗܶܕ ܕܳܢܺܝܐܝܠ ܪܓܺܝܓܳܐ. ܐܚܪ̈ܳܢܶܐ ܠܢܽܘܪܳܐ ܝܰܩܰܪܘ. ܘܰܐܚܪ̈ܳܢܶܐ ܠܐܺܝ̈ܠܳܢܶܐ ܘܰܠܟܺܐܦ̈ܐ ܕܰܒܰܚܘ ܕܶܒܚܷ̈ܐ ܘܩܰܪܶܒܘ ܩܽܘܪ̈ܒܳܢܶܐ. ܟܰܕ ܕܶܝܢ ܡܶܢ ܕܶܚ̈ܠܳܬܳܐ ܣܪ̈ܺܝܩܳܬܳܐ ܡܰܘܓܶܐ ܗܘܳܐ ܠܗܽܘܢ ܪܽܘܚܳܐ ܒܝܰܕ ܢܒܺܝܳܐ. ܘܢܶܕܰܥ ܕܠܰܝܬ ܕܪܰܒ ܐܰܝܟ ܐܰܠܳܗܰܢ. ܘܟܽܠܗܽܘܢ ܒܪܶܡܙܳܐ ܕܰܐܠܗܳܐ ܥܳܒܽܘܕܗܽܘܢ ܢܶܣܥܪܽܘܢ ܘܰܢܫܰܒܚܽܘܢ ܘܰܒܪ̈ܽܘܚܶܐ ܘܰܒܥܱ̈ܠܥܳܠܶܐ. ܡܕܰܒܪܺܝܢ ܒܪܶܡܙܳܐ ܐܰܠܳܗܳܝܳܐ. ܢܶܫܒ̈ܐ ܢܺܝܚ̈ܐ ܘܣܰܩܽܘ̈ܒܠܳܝܶܐ. ܘܡܶܢ ܗܳܠܶܝܢ ܕܰܗܘܱ̈ܝ ܒܡܶܨܪܶܝܢ ܝܳܠܦܺܝܢܰܢ ܕܰܐܝܟ ܡܶܠܬܶܗ ܕܰܢܒܺܝܳܐ ܡܰܠܰܐܟܳܐ ܗܰܘ ܕܰܡܕܰܒܰܪ ܗܘܳܐ ܠܶܐܣܛܽܘ̈ܟܣܶܐ ܕܡܰܝܴ̈ܐ ܘܰܕܢܽܘܪܳܐ. ܐܶܫܬܰܕܰܪ ܠܬܰܡܳܢ ܥܰܡ ܛܽܘܒܳܢܳܐ ܢܒܺܝܳܐ ܡܽܘܫܶܐ. ܫܰܕܰܪ ܠܰܡ ܒܝܰܕ ܡܰܠܰܐܟܳܐ ܒܺܝܫܳܐ. ܘܰܬܪܰܥ ܫܒܺܝ̈ܠܶܐ ܘܠܳܐ ܚܣܰܟ ܡܶܢ ܡܰܘܬܳܐ ܢܰܦܫܴ̈ܬܗܽܘܢ ܘܚܰܝ̈ܘܳܬܗܽܘܢ ܠܡܰܘܬܳܐ ܐܰܫܠܶܡ. ܗܳܠܶܝܢ ܐܶܡܪܶܬ ܠܰܘ ܟܰܕ ܝܳܗܶܒ ܐܢܳܐ ܫܽܘܠܛܳܢܳܐ ܕܥܳܒܽܘܕܳܐ ܠܡܰܠܰܐܟ̈ܐ. ܡܶܛܠ ܕܡܶܢ ܢܰܦܫܗܽܘܢ ܘܠܳܐ ܡܶܕܶܡ ܥܳܒܕܺܝܢ. ܐܶܠܐ ܟܰܕ ܡܶܬܦܰܩܕܺܝܢ ܡܶܢ ܐܰܠܗܐ ܣܳܥܪܺܝܢ ܐܰܝܠܶܝܢ ܕܡܶܫܬܰܕܪܺܝܢ. ܘܰܠܝܰܘܡܳܐ ܕܫܽܘܠܳܡܳܐ ܒܰܕܡܽܘܬ ܚܳܨܽܘ̈ܕܶܐ ܢܳܦܩܺܝܢ ܠܟܽܠܗܽܘܢ ܥܰܡܡ̈ܐ. ܐܰܝܟ ܕܶܐܡܰܪ ܡܳܪܰܢ. ܕܢܶܦܩܽܘܢ ܡܰܠܰܐܟ̈ܐ ܘܢܶܦܪܫܽܘܢ ܙܰܕܺܝ̈ܩܶܐ ܡܶܢ ܒܰܝ̈ܢܰܝ ܚܰܛܳܝ̈ܐ. ܘܢܰܪܡܽܘܢ ܚܰܛܳܝ̈ܐ ܒܰܐܬܽܘܢܳܐ ܕܢܽܘܪܳܐ (ܡܬܝ ܝܓ: ܡܛ). ܘܰܢܫܰܕܰܪ ܒܪܶܗ ܕܐܢܳܫܳܐ ܡܰܠܰܐܟܰܘ̈ܗܝ ܥܰܡ ܫܺܝܦܽܘܪܳܐ ܪܰܒܳܐ. ܘܰܢܟܰܢܫܽܘܢ ܠܰܓܒܰܝܴ̈ܐ ܕܺܝܠܶܗ ܡܶܢ ܐܰܪ̈ܒܥܳܬ ܪ̈ܽܘܚܶܐ. ܡܶܢ ܪܺܝܫܗܽܘܢ ܕܰܫܡܰܝܳܐ ܘܰܥܕܰܡܳܐ ܠܪܺܝܫܗܽܘܢ (ܡܬܝ ܟܕ: ܠܐ ܡܪܩܘܣ ܝܓ: ܟܙ). ܘܗܳܝ ܕܶܐܡܰܪ: ܕܰܚܨܳܕܳܐ ܐܝ̣ܬܰܘܗܝ ܫܽܘܠܳܡܶܗ ܕܥܳܠܡܳܐ. ܚܳܨܽܘܕ̈ܐ ܕܶܝܢ ܡܰܠܰܐܟ̈ܐ (ܡܬܝ ܝܓ: ܠܛ). ܡܳܕܶܝܢ ܠܰܝܬ ܚܶܪܝܳܢܳܐ ܥܰܠ ܡܶܠܬܳܐ ܗܳܕܐ. ܕܡܰܠܐܟ̈ܐ ܣܺܝܡܺܝܢ ܠܬܶܫܡܶܫܬܳܐ ܕܒܶܪ̈ܝܳܬܳܐ ܕܢܶܕܒܪܽܘܢ ܒܦܽܘܩܕܳܢܳܐ ܕܰܐܠܗܳܐ. ܗܰܘ ܡܶܕܶܡ ܕܠܶܗ ܫܳܦܰܪ. ܘܡܳܐ ܕܫܳܡܥܺܝܢܰܢ ܕܳܐܡܰܪ ܪ̈ܽܘܚܶܐ ܕܰܐܠܗܳܐ: ܕܰܢܫܰܒ̈ܚܳܢ ܗܳܠܶܝܢ ܒܶܪ̈ܝܳܬܳܐ ܕܠܰܝܬ ܠܗܶܝܢ ܡܶܠܬܳܐ. ܠܐ ܢܩܰܘܶܐ ܠܘܳܬ ܫܶܡܥܳܐ ܒܰܪܳܝܳܐ ܕܒܰܪܬ ܒܩܳܠܳܐ. ܐܶܠܐ ܢܰܫܰܪ ܕܰܠܗܳܠܶܝܢ ܕܰܦܩܺܝܕܺܝܢ ܥܰܠ ܡܕܰܒܪܳܢܽܘܬܳܐ ܪܳܡܶܙ ܠܗܽܘܢ ܠܰܡܫܰܒܳܚܽܘ. ܘܰܒܛܶܟܣܳܐ ܕܬܶܫܒܽܘܚܬܳܐ ܢܳܚܶܬ ܠܒܶܝܬ ܡܰܠܟܳܐ ܘܳܐܡܰܪ:
ܡܰܠܟ̈ܐ ܕܰܐܪܥܳܐ ܘܟܽܠܗܶܝܢ ܐܶܡܘܴ̈ܬܳܐ. ܘܪܰܘܪ̈ܒܳܢܶܐ ܘܟܽܠܗܽܘܢ ܕܰܝܳܢܷ̈ܐ ܕܰܐܪܥܳܐ: ܓܰܕܽܘ̈ܕܶܐ ܘܰܒܬܽܘ̈ܠܳܬܳܐ ܘܣܳܒ̈ܐ ܘܰܥܠܰܝ̈ܡܶܐ ܢܫܰܒܚܽܘܢ ܠܰܫܡܶܗ ܕܡܳܪܝܳܐ. ܡܶܛܠܡܳܢܐ ܠܟܽܠ ܡܽܘ̈ܫܚܳܢ ܐܰܫܘܺܝ ܒܫܽܘܒܚܳܐ. ܕܠܰܘ ܡܶܛܠ ܪܰܒܽܘܬܳܐ ܢܶܫܬܩܽܘܢ ܡܰܠܟ̈ܐ ܘܠܳܐ ܢܫܰܒܚܽܘܢ܆ ܘܢܶܗܘܽܘܢ ܡܫܰܪ̈ܝܳܢܶܐ ܒܬܶܫܒܚܴ̈ܬܳܐ ܕܰܐܠܗܳܐ. ܥܰܡ ܛܶܟܣ̈ܐ ܕܪܰܘܪ̈ܒܳܢܶܐ ܘܓܰܕܽܘ̈ܕܶܐ ܘܣܳܒ̈ܐ. ܘܓܽܘ̈ܕܶܐ ܕܰܒܬܽܘ̈ܠܳܬܳܐ ܡܶܛܠ ܕܰܡܝܰܬܪܽܘܬܳܐ ܒܶܠܥܳܕ ܥܰܡ̈ܠܶܐ ܠܳܐ ܡܶܬܩܰܢܝܳܐ. ܘܠܳܐ ܒܰܩܛܺܝܪܳܐ. ܐܶܠܐ ܒܕܽܘܥ̈ܬܶܐ ܘܒܽܐܘ̈ܠܨܳܢܶܐ ܘܰܒܥܰܡ̈ܠܶܐ ܕܙܰܕܺܝܩܽܘܬܳܐ. ܡܶܛܠ ܕܡܶܢ ܒܳܬܰܪ ܕܰܐܘܒܶܕ ܐܳܕܳܡ ܓܰܢܬܳܐ ܕܛܽܘ̈ܒܶܐ ܗܳܝ ܕܡܰܓܳܢ ܐܶܬܝܰܗܒܰܬ ܠܶܗ ܡܶܢ ܐܰܠܗܳܐ. ܢܦܰܩ ܥܠܰܘܗܝ ܦܣܳܩܳܐ ܡܶܢ ܥܳܒܽܘܕܳܐ. ܕܰܒܕܽܘܥܬܳܐ ܕܰܐܦܱ̈ܝܟ ܬܶܐܟܽܘܠ ܠܰܚܡܳܐ (ܒܪܝܬܐ ܓ: ܝܛ). ܗܳܝ ܕܰܕܠܳܐ ܥܰܡ̈ܠܶܐ ܕܙܰܕܺܝܩܽܘܬܳܐ ܘܰܡܣܰܝܒܪܳܢܽܘܬܳܐ ܘܒܶܟܝܳܐ. ܠܐ ܬܘܒ ܡܶܫܬܘܶܐ ܠܗܰܘ ܒܽܘܣܳܡܳܐ ܕܰܢܦܰܩ ܡܶܢܶܗ ܒܝܰܕ ܡܶܫܬܰܡܥܳܢܽܘܬܶܗ ܕܰܠܚܶܘܝܳܐ. ܡܳܕܶܝܢ ܟܽܠܢܳܫ ܢܫܰܒܰܚ ܠܡܳܪܝܳܐ ܘܢܶܫܗܰܪ ܘܢܶܥܡܰܠ ܘܠܳܐ ܢܰܣܒܰܪ ܕܒܶܠܥܳܕ ܥܰܡܠܳܐ ܕܰܡܝܰܬܪܽܘܬܳܐ ܢܶܚܙܶܐ ܚܰܝ̈ܐ. ܗܳܫܳܐ ܕܶܝܢ ܢܒܺܝܳܐ. ܡܶܛܠܡܳܢܐ ܡܡܰܠܶܠ ܘܳܐܡܰܪ:
ܡܶܛܠ ܕܪܰܒ ܗܽܘ ܫܡܶܗ ܒܰܠܚܽܘܕܰܘܗܝ. ܘܫܽܘܒܚܶܗ ܒܰܐܪܥܳܐ ܘܒܰܫܡܰܝܳܐ. ܘܠܰܝܬ ܕܡܶܫܬܰܒܰܚ ܘܺܐܝܬܰܘܗܝ ܡܫܰܒܚܳܐ ܐܶܠܐ ܡܳܪܝܳܐ. ܘܶܐܢ ܩܳܡܘ ܒܕܰܓܳܠܽܘܬܳܐ ܡܳܪ̈ܰܝܳܐ. ܐܶܠܐ ܠܰܘ ܡܶܫܬܰܒܚܴ̈ܢܶܐ ܐܶܢܘܢ. ܚܙܰܝܬ ܕܠܽܘܩܒܰܠ ܗܳܢܘܢ ܕܰܡܝܰܩܪܺܝܢ ܠܒܶܪ̈ܝܳܬܳܐ ܕܠܳܐ ܡܶܠܬܳܐ. ܣܕܰܪ ܟܽܠܗܶܝܢ ܒܶܪ̈ܝܳܬܳܐ ܕܰܠܥܶܠ ܘܕܰܠܬܰܚܬ ܠܰܡܫܰܒܳܚܽܘ ܒܬܶܫܒܽܘܚܬܳܐ ܗܳܕܶܐ. ܐܶܠܐ ܡܳܢܳܐ ܐܡ̇ܪ ܡܶܢ ܒܳܬܰܪܟܶܢ.
ܡܪܺܝܡ ܩܰܪܢܳܐ ܕܥܰܡܶܗ ܘܬܶܫܒܽܘܚܬܳܐ ܠܟܽܠܗܽܘܢ ܙܰܕܺܝ̈ܩܰܘܗܝ. ܘܠܰܒܢܱ̈ܝ ܝ̣ܣܪܳܐܝܠ ܥܰܡܳܐ ܕܩܰܪܺܝܒ ܠܶܗ. ܩܰܪܢܳܐ ܕܰܡܪܺܝܡ ܠܥܰܡܶܗ ܥܰܠ ܫܽܘܘܕܳܥܳܐ ܕܰܡܕܰܒܪܳܢܽܘܬܳܐ ܐܡ̇ܪ. ܘܥܰܠ ܩܰܪܢܳܐ ܕܡܰܠܟ̈ܘܳܬܳܐ ܕܩܳܝܡܳܐ ܒܥܰܡܶܗ ܕܡܳܪܝܳܐ. ܘܰܡܕܰܩܪܳܐ ܠܰܒܥܶܠܕ̈ܒܳܒܶܐ ܕܰܐܠܗܳܐ. ܡܳܕܶܝܢ ܩܰܪܢܳܐ ܗܳܕܶܐ ܕܶܐܬܬܪܺܝܡܰܬ ܒܪܺܝܫ ܥܰܡܶܗ ܕܡܳܪܝܳܐ. ܥܰܡܰܢܘ̇ܐܝܠ ܐܝ̣ܬܰܘܗܝ. ܘܒܶܗ ܡܕܰܩܪܺܝܢ ܩܰܕܺܝ̈ܫܶܐ ܠܟܽܠܶܗ ܚܰܝܠܳܐ ܕܰܒܥܶܕܠܒܳܒܳܐ. ܘܙܳܟܶܝܢ ܠܗܰܘ ܕܰܐܥܺܝܪ ܩܪܳܒܳܐ ܡܶܢ ܪܺܝܫܺܝܬܳܐ. ܗܳܝ ܕܠܰܒܢܱ̈ܝ ܝ̣ܣܪܳܐܝܠ ܥܰܡܳܐ ܕܩܰܪܺܝܒ ܠܶܗ. ܥܰܠ ܝ̣ܣܪܳܐܝܠ ܕܰܐܠܗܳܐ ܐܝ̣ܬܶܝܗ̇ ܡܶܠܬܳܐ. ܕܰܒܩܰܪܢܳܐ ܕܦܽܘܪܩܳܢܳܐ ܕܺܐܝܬܰܘܗܝ ܡܫܺܝܚܳܐ. ܐܶܬܟܰܢܰܫܘ ܘܩܳܡܘ ܫܰܒܛܰܘ̈ܗܝ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܡܙܡܘܪܐ ܕܡܐܐ ܘܐܪܒܥܝܢ ܘܬܫܥܐ
ܡܰܘܕܰܥ ܥܰܠ ܦܽܘܪܩܳܢܳܐ ܕܥܰܡ̈ܡܶܐ: ܘܥܰܠ ܬܶܫܒܽܘܚܬܳܐ ܚܕܰܬܳܐ ܕܰܡܗܰܝ̈ܡܢܶܐ: ܘܥܰܠ ܫܽܘܠܛܳܢܳܐ ܕܝܰܗܒ ܠܰܫܠܺܝ̈ܚܰܘܗܝ ܥܰܡܰܢܽܘܐܝܠ.
ܒܩܴ̈ܠܶܐ ܚܰܕ̈ܬܶܐ ܕܬܶܫܒܽܘܚܬܳܐ ܦܳܩܶܕ ܪܽܘܚܳܐ ܠܰܡܫܰܒܳܚܽܘ ܠܡܳܪܝܳܐ ܘܟܰܕ ܒܟܽܠܗܽܘܢ ܡܰܙܡܽܘܪ̈ܶܐ ܬܰܘܕܺܝܬܳܐ ܘܫܽܘܒܚܳܐ ܡܙܰܡܰܪ ܗܘܳܐ ܢܒܺܝܳܐ. ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܰܐܪܒܥܺܝܢ ܘܰܬܫܰܥ: ܬܶܫܒܽܘܚܬܳܐ ܚܕܰܬܳܐ ܐܶܬܢܰܒܺܝ ܠܰܡܫܰܒܳܚܽܘ ܘܶܐܡܰܪ:
ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܡܳܢܰܘ ܫܽܘܪܳܝܳܐ ܕܡܰܙܡܽܘܪܳܐ ܗܳܢܐ ܘܰܒܗܳܕܐ ܕܰܬܠܳܬ ܡܳܢܳܐ ܗܝ ܬܶܫܒܽܘܚܬܳܐ ܚܕܰܬܳܐ؟ ܒܗܳܕܐ ܒܰܪܬ ܩܳܠܐ ܠܗܳܠܶܝܢ ܬܶܫܒܚܴ̈ܬܳܐ ܐܚܪ̈ܳܢܝܳܬܳܐ ܥܰܬܺܝ̈ܩܳܬܳܐ ܚܳܫܶܒ. ܘܡܶܟܺܝܠ ܐܰܝܟ ܕܡܶܢ ܛܶܟܣܳܐ ܘܫܶܡܥܳܐ ܕܡܶܠܬܳܐ ܡܶܕܶܡ ܚܕܰܬܳܐ ܙܳܕܶܩ ܢܶܒܥܶܐ ܒܣܽܘܟܳܠܳܐ. ܒܪܰܡ ܕܶܝܢ ܙܳܕܶܩ ܕܢܶܒܥܶܐ ܥܶܠܬܳܐ ܕܡܶܛܠܳܬܳܗ̇ ܐܰܡܪܳܗ̇ ܢܒܺܝܳܐ. ܐܳܡܪܺܝܢ ܓܶܝܪ ܕܥܰܠ ܫܽܘܠܳܡܳܐ ܕܒܶܢܝܳܢܶܗ ܕܒܰܝܬܳܐ ܕܰܐܠܗܳܐ. ܕܰܒܢܳܐ ܙܽܘܪܒܳܒܶܝܠ ܪܰܒܳܐ ܕܰܒܢܱ̈ܝ ܝ̣ܗܽܘܕܳܐ ܘܝܶܫܽܘܥ ܒܰܪ ܝܽܘܙܳܕܳܩ ܟܳܗܢܳܐ ܪܰܒܳܐ. ܟܰܕ ܣܠܶܩܘ ܡܶܢ ܒܳܒܶܝܠ ܐܶܬܢܰܒܺܝ ܕܰܘܝܕ ܬܶܫܒܽܘܚܬܳܐ ܗܳܕܐ. ܘܡܶܛܠ ܕܚܽܘܕܳܬܳܐ ܗܘܳܐ ܗܘܳܐ ܠܐܽܘܪܺܫܠܶܡ ܟܰܕ ܐܶܬܒܢܺܝ ܫܽܘܪܳܗ̇ ܡܶܢ ܒܳܬܰܪ ܕܰܦܢܳܐ ܥܰܡܳܐ ܡܶܢ ܫܒܺܝܬܳܐ ܥܺܐܕܳܐ ܕܚܽܘܕܳܬܳܐ ܥܒܰܕܘ ܗܘܰܘ ܥܶܒܪ̈ܳܝܶܐ. ܡܶܛܠ ܕܶܐܬܒܢܺܝ ܗܰܝܟܠܳܐ ܗܰܘ ܕܰܥܩܺܝܪ ܗܘܳܐ ܥܰܡ ܡܕܺܝܢܬܳܐ. ܘܥܰܠ ܗܳܕܐ ܐܳܡܪܺܝܢ ܕܫܰܒܰܚ ܕܰܘܝܕ ܬܶܫܒܽܘܚܬܳܐ ܗܳܕܐ. ܒܪܰܡ ܚܢܰܢ ܡܶܢ ܣܽܘ̈ܟܳܠܶܐ ܠܕܰܡܥܰܠܶܝܢ ܡܶܢܳܗ̇ ܕܗܳܕܐ ܡܰܣܩܺܝܢܰܢ ܠܳܗ̇ ܠܬܶܫܒܽܘܚܬܳܐ ܗܳܕܐ. ܘܡܶܫܬܰܘܕܥܺܝܢܰܢ ܕܰܐܝܢܰܘ ܙܰܒܢܳܐ ܕܠܳܚܶܡ ܠܳܗ̇. ܘܡܶܢ ܦܶܬܓܳܡܳܐ ܬܪܰܝܳܢܳܐ. ܐܶܡܰܪ ܓܶܝܪ ܢܒܺܝܐ:
ܬܶܫܒܽܘܚܬܶܗ ܒܥܺܕܬܳܐ ܕܙܰܕܺܝ̈ܩܶܐ. ܐܶܢ ܒܥܺܕܬܳܐ ܐܶܫܬܰܒܚܰܬ ܬܶܫܒܽܘܚܬܳܐ ܗܳܕܐ. ܡܳܕܶܝܢ ܕܥܺܕܬܳܐ ܕܰܐܠܗܳܐ ܕܰܩܢܳܗ̇ ܒܰܕܡܶܗ ܡܶܢ ܩܕܺܝܡ. ܘܠܰܘ ܕܒܰܝܬܳܐ ܗܰܘ ܕܶܐܬܥܩܰܪ ܒܰܡܣܳܡ ܒܪܺܝܫܳܐ ܕܡܶܢ ܐܰܠܗܳܐ ܕܶܐܬܳܐ ܥܰܠ ܥܰܡܳܐ ܕܝܽܘ̈ܕܳܝܶܐ. ܡܶܢ ܒܳܬܰܪ ܕܰܨܠܰܒܘ ܠܡܳܪܳܗ̇ ܕܬܶܫܒܽܘܚܬܳܐ. ܙܰܕܺܝ̈ܩܶܐ ܕܶܝܢ ܕܠܳܐ ܚܶܪܝܳܢܳܐ ܠܰܫܠܺܝܚ̈ܐ ܩܰܕܺܝ̈ܫܶܐ ܡܰܘܕܰܥ ܢܒܺܝܐ. ܠܗܳܠܶܝܢ ܐܶܬܝ̣ܗܶܒ ܦܽܘܫܳܩܳܐ ܕܬܶܫܒܽܘܚܬܳܐ ܗܳܕܐ. ܘܰܠܗܳܠܶܝܢ ܐܶܡܰܪ ܥܰܡܰܢܘ̇ܐܝܠ ܟܕ ܐܰܫܩܺܝ ܐܶܢܽܘܢ ܡܶܢ ܟܳܣܳܐ ܗܰܘ ܕܰܩܪܳܝܗܝ ܕܡܶܗ. ܕܰܐܡܺܝܢ ܐܰܡܺܝܢ ܐܳܡܰܪ ܐܢܳܐ ܠܟܽܘܢ. ܕܠܳܐ ܐܶܫܬܶܐ ܡܶܢ ܗܳܫܳܐ ܡܶܢ ܗܳܢܳܐ ܝܰܠܕܳܐ ܕܰܓܦܶܬܳܐ ܥܕܰܡܳܐ ܠܝܰܘܡܳܐ ܗܰܘ ܕܒܶܗ ܐܶܫܬܶܝܘܗܝ ܥܰܡܟܽܘܢ ܒܡܰܠܟܽܘܬܶܗ ܕܳܐܒܝ (ܡܬܝ ܟܘ: ܟܛ ܡܪܩܘܣ ܝܕ: ܟܗ). ܡܰܠܟܽܘܬܳܐ ܕܶܝܢ ܕܰܐܒܳܐ ܐܝ̣ܬܶܝܗ̇ ܠܐ ܡܶܬܚܰܒܠܳܢܽܘܬܳܐ. ܗܳܝ ܕܟܰܕ ܩܳܡ ܥܰܡܰܢܽܘܐܝܠ ܡܶܢ ܒܶܝܬ ܡܺܝ̈ܬܶܐ ܘܠܳܐ ܡܳܝܽܘܬܽܘܬܳܐ ܘܠܳܐ ܡܶܬܚܰܒܠܳܢܳܐ ܐܰܩܺܝܡܶܗ ܠܦܰܓܪܶܗ. ܘܰܒܓܰܘ ܥܺܕܬܳܐ ܕܙܰܕܺܝ̈ܩܶܐ. ܫܠܺܝ̈ܚܶܐ ܟܕ ܡܩܰܕܫܺܝܢ ܗܘܰܘ ܐܪ̈ܳܙܶܐ ܥܰܠ ܡܰܕ̈ܒܚܶܐ ܘܡܶܫܬܰܘܬܰܦ ܗܘܳܐ ܠܗܽܘܢ ܡܫܺܝܚܳܐ. ܬܰܡܳܢ ܡܫܰܒܰܚ ܕܰܘܝܕ ܢܒܺܝܐ ܬܶܫܒܽܘܚܬܳܐ ܚܕܰܬܳܐ ܒܥܺܕܬܳܐ ܕܙܰܕܺܝ̈ܩܶܐ ܘܰܓܒܰܝܴ̈ܐ. ܗܳܢܘܢ ܕܙܰܕܶܩ ܠܗܽܘܢ ܐܰܠܳܗܳܐ ܫܳܩܽܘܬܳܐ ܠܐ ܡܶܬܚܰܒܠܳܢܺܝܬܳܐ ܡܶܢ ܟܳܣܳܐ ܝܰܩܺܝܪܳܐ ܕܰܕܡܶܗ ܡܰܚܝܳܢܳܐ. ܘܥܰܡܗܽܘܢ ܩܳܐܷܡ ܝ̣ܣܪܳܐܝܠ ܕܰܐܠܳܗܳܐ. ܒܰܟܢܽܘܫܝܳܐ ܕܰܢܟܺܝܣ ܒܶܗ ܬܰܘܪܳܐ ܕܦܶܛܡܳܐ. ܐܰܝܟ ܕܶܐܡܰܪ ܪܽܘܚܳܐ:
ܢܶܚܕܶܐ ܝ̣ܣܪܳܐܝܠ ܒܥܳܒܽܘܕܶܗ. ܘܰܒܢܱ̈ܝ ܨܶܗܝܽܘܢ ܢܶܪܽܘܙܽܘܢ ܒܡܰܠܟܗܽܘܢ. ܥܳܒܽܘܕܳܐ ܘܡܰܠܟܳܐ ܕܺܝܣܪܳܐܝܠ ܡܰܟܪܶܙ ܠܶܗ ܢܒܺܝܐ ܠܥܰܡܰܢܘ̇ܐܝܠ. ܡܰܠܟܳܐ ܕܰܒܢܱ̈ܝ ܨܶܗܝܽܘܢ. ܨܶܗܝܽܘܢ ܕܶܝܢ ܗܳܕܐ ܐܝ̣ܬܶܝܗ̇. ܠܰܘ ܗܳܝ ܕܩܶܒܥܰܬ ܠܶܗ ܨܠܺܝܒܳܐ ܥܰܠ ܚܕܳܐ ܡܶܢ ܪ̈ܳܡܳܬܳܗ̇. ܐܶܠܐ ܨܶܗܝܽܘܢ ܕܰܠܥܶܠ ܡܶܢ ܫܡܰܝܳܐ. ܗܳܝ ܕܰܒܢܶܝ̈ܗ̇ ܠܐ ܡܳܝܬܺܝܢ ܘܠܳܐ ܡܶܬܚܰܒܠܺܝܢ. ܐܰܝܟ ܡܶܠܬܳܐ ܕܰܢܒܺܝܽܘܬܳܐ.
ܘܰܢܫܰܒܚܽܘܢ ܠܰܫܡܶܗ ܒܰܦܠܰܓ̈ܐ ܘܒܰܪ̈ܒܺܝܥܶܐ. ܘܰܒܟܶܢܳܪ̈ܶܐ ܢܙܰܡܪܽܘܢ ܠܶܗ. ܗܳܠܝܢ ܡܳܐܢ̈ܐ ܐܶܢܘܢ ܕܰܙܡܳܪܳܐ ܕܰܡܬܰܩܢܺܝܢ ܗܘܰܘ ܒܽܐܘܡܳܢܽܘܬܳܐ ܕܢܶܗܘܶܐ ܡܫܰܒܰܚ ܒܗܽܘܢ ܥܰܡܳܐ ܡܳܐ ܕܩܳܐܷܡ ܥܠܰܝܗܽܘܢ ܡܰܠܟܳܐ. ܘܡܶܛܠ ܕܰܩܪܳܝܗܝ ܡܰܠܟܳܐ ܠܥܰܡܰܢܽܘܐܝܠ. ܘܰܚܠܳܦ ܦܠܰܓ̈ܐ ܘܰܪ̈ܒܺܝܥܶܐ ܘܰܚܠܳܦ ܩܺܝܬܳܪ̈ܶܐ ܘܟܶܢܳܪ̈ܶܐ ܡܶܬܚܰܠܦܺܝܢ ܙܰܘ̈ܥܶܐ ܦܰܓܪ̈ܳܢܳܝܶܐ ܘܩܳܝܡܺܝܢ ܒܫܽܘܒܚܳܐ ܪܽܘܚܳܢܳܝܐ ܘܰܡܫܰܒܚܺܝܢ ܒܩܴ̈ܠܶܐ ܕܰܒܢܰܝ̈ ܪܰܘܡܐ ܗܳܘܶܝܢ ܚܰܕ ܝ̣ܣܪܳܐܝܠ ܕܰܐܠܳܗܳܐ ܘܥܳܐܠܺܝܢ ܠܚܰܝ̈ܐ ܡܶܛܠ ܥܒܳܕܰܝ̈ܗܘܢ.
ܕܢܶܥܠܽܘܢ ܡܶܛܠ ܠܰܡ ܕܨܳܒܶܐ ܡܳܪܝܳܐ ܒܥܰܡܶܗ. ܘܝܳܗܶܒ ܠܡܶܣ̈ܟܺܢܶܐ ܦܽܘܪܩܳܢܳܐ. ܗܳܝ ܕܨܳܒܶܐ ܡܳܪܝܳܐ ܒܥܰܡܶܗ. ܠܰܘ ܕܠܳܐ ܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢܺܚܽܘܢ ܡܰܠܦܳܐ. ܐܶܠܐ ܒܰܐܝܠܶܝܢ ܕܥܳܒܕܺܝܢ ܙܰܕܺܝܩܽܘܬܳܐ ܨܳܒܶܐ. ܡܶܛܠ ܕܢܶܦܪܽܘܥ ܠܗܽܘܢ ܡܰܠܟܽܘܬܳܐ ܕܰܫܡܰܝܳܐ. ܒܗܳܠܶܝܢ ܨܳܒܶܐ ܡܳܪܝܳܐ ܒܗܰܘ ܗܰܘ ܪܰܒܳܐ ܕܦܳܪܰܥ ܠܟܽܠ ܚܰܕ ܐܰܝܟ ܥܒܰܕܰܘ̈ܗܝ ܘܒܳܬܰܪܟܶܢ ܡܫܰܒܚܺܝܢ ܙܰܕܺܝ̈ܩܶܐ ܒܺܐܝܩܳܪܳܐ. ܐܰܝܟ ܕܶܐܡܰܪ ܪܽܘܚܳܐ:
ܢܶܬܥܰܫܢܽܘܢ ܙܰܕܺܝ̈ܩܶܐ ܒܺܐܝܩܳܪܳܐ. ܘܰܢܫܰܒܚܽܘܢܳܝܗܝ ܥܰܠ ܥܰܪ̈ܣܳܬܗܽܘܢ. ܡܶܛܠ ܕܰܒܗܳܢܳܐ ܥܳܠܡܳܐ ܛܥܶܢ ܥܠܰܝܗܽܘܢ ܝܽܘܩܪܳܐ ܘܰܡܣܰܝܒܪܳܢܽܘܬܳܐ ܘܰܗܘܰܘ ܟܳܪ̈ܽܘܙܶܐ ܠܰܨܠܺܝܒܳܐ. ܡܝܰܩܰܪ ܠܗܽܘܢ ܬܰܡܳܢ ܡܰܠܟܳܐ ܗܰܘ ܕܶܐܨܛܰܥܰܪܘ ܚܠܳܦܰܘܗܝ: ܒܗܰܘ ܐܝ̣ܩܳܪܳܐ ܕܠܰܝܬ ܒܶܗ ܨܰܥܪܳܐ ܡܶܬܥܰܫܢܺܝܢ ܙܰܕܺܝ̈ܩܶܐ. ܒܗܳܝ ܬܶܫܒܽܘܚܬܳܐ ܕܠܳܐ ܡܶܬܚܰܒܠܳܐ. ܘܡܶܛܠ ܥܰܡܠܰܝ̈ܗܽܘܢ ܡܢܺܝܚ ܠܗܽܘܢ ܡܰܠܟܳܐ ܒܰܣܡܳܟܳܐ ܕܠܰܝܬ ܠܶܗ ܫܽܘܠܳܡܳܐ. ܗܳܠܶܝܢ ܕܰܢܒܺܝܳܐ ܥܰܪ̈ܣܳܬܳܐ ܡܫܰܡܰܗ ܠܗܽܘܢ. ܕܰܐܡܺܝܢܺܝܢ ܗܘܰܘ ܒܨܰܘ̈ܡܶܐ ܘܒܰܨܠܰܘ̈ܬܳܐ ܘܫܰܗܪܳܐ ܘܥܰܪܛܶܠܳܝܽܘܬܳܐ ܘܥܰܠܗܳܝ ܐܶܡܰܪ ܢܒܺܝܳܐ:
ܢܫܰܒܚܽܘܢܳܝܗܝ ܥܰܠ ܥܰܪ̈ܣܳܬܗܽܘܢ. ܐܶܡܰܪ ܓܶܝܪ ܡܶܛܠ ܥܰܒ̈ܕܶܐ ܕܰܡܫܰܒܰܚ ܠܗܽܘܢ ܟܰܕ ܥܺܝܪܺܝܢ ܢܶܐܣܽܘܪ ܚܰܨܰܘ̈ܗܝ ܘܢܰܣܡܶܟ ܐܶܢܽܘܢ. ܘܢܶܥܒܰܪ ܘܰܢܫܰܡܶܫ ܐܶܢܘܢ (ܠܘܩܐ ܝܒ: ܠܙ). ܗܳܠܝܢ ܐܶܢܶܝܢ ܥܰܪ̈ܣܳܬܳܐ ܕܶܐܡܰܪ ܢܒܺܝܳܐ ܡܶܛܠܳܬܗܶܝܢ. ܘܰܒܗܶܝܢ:
ܡܪܰܡܪܡܺܝܢ ܠܰܐܠܗܳܐ ܒܓܰܓܪ̈ܳܬܗܽܘܢ. ܘܕܳܡܝܳܐ ܗܳܕܐ. ܕܰܒ̈ܩܳܠܶܐ ܪ̈ܽܘܚܳܢܶܐ ܕܫܽܘܒܚܳܐ ܡܪܰܡܪܡܺܝܢ ܠܰܐܠܗܳܐ ܚܠܳܦ ܒܶܣ̈ܡܶܐ ܕܡܶܬܦܰܛܡܺܝܢ ܒܗܽܘܢ ܒܗܳܠܶܝܢ ܥܰܪ̈ܣܳܬܳܐ ܕܰܥܒܺܝܕ ܡܳܪܰܢ ܡܫܰܡܫܳܢܳܐ ܕܦܳܬܽܘܪ̈ܶܐ ܕܰܩܕܳܡܰܝܗܽܘܢ. ܣܰܝܦܳܐ ܓܶܝܪ ܕܰܬܪܶܝܢ ܦܽܘ̈ܡܰܘܗܝ ܡܳܢܳܐ ܡܶܬܒܥܶܐ ܠܰܐܝܠܶܝܢ ܕܰܐܓܗܺܝܘ ܡܶܢ ܩܪܳܒܳܐ. ܐܶܡܰܪ ܓܶܝܪ ܢܒܺܝܳܐ:
ܕܣܰܝܦܳܐ ܕܰܬܪܶܝܢ ܦܽܘ̈ܡܰܘܗܝ ܒܺܐܝ̈ܕܰܝܗܘܢ. ܡܰܢ ܐܶܢܽܘܢ ܗܳܠܶܝܢ ܕܰܛܥܺܝܢܺܝܢ ܠܶܗ ܠܣܰܝܦܳܐ ܗܳܢܐ ܕܗܳܟܰܢܳܐ ܕܚܺܝܠ ܡܦܰܫܰܩ ܠܶܗ ܠܣܰܝܦܳܐ ܗܳܢܐ ܦܰܘܠܽܘܣ ܗܰܘ ܪܰܒ ܚܰܝܠܳܐ ܕܰܩܪ̈ܰܒܬܳܢܶܐ ܪ̈ܽܘܚܳܢܶܐ. ܐܶܡܰܪ ܓܶܝܪ ܟܕ ܟܳܬܶܒ ܠܘܳܬ ܐܶܦܶܣܳܝ̈ܐ: ܕܰܐܚܽܘܕܘ ܣܰܝܦܳܐ ܕܪܽܘܚܳܐ ܕܺܐܝܬܰܘܗܝ ܡܶܠܬܳܐ ܕܰܐܠܳܗܳܐ (ܐܦܣܝ̈ܐ ܘ: ܝܙ). ܘܰܠܘܳܬ ܥܶܒܪ̈ܳܝܶܐ ܬܘܒ ܟܳܬܶܒ ܗܘܳܐ. ܚܰܝܳܐ ܗܝ ܓܶܝܪ ܡܶܠܬܳܐ ܕܰܐܠܳܗܳܐ ܘܟܽܠ ܣܳܥܪܳܐ. ܘܚܰܪܺܝܦܳܐ ܡܶܢ ܣܰܦܣܺܪܳܐ ܕܰܬܪܶܝܢ ܦܽܘ̈ܡܶܝܗ̇ (ܥܒܪ̈ܝܐ ܕ: ܝܒ). ܕܡܶܛܠ ܡܳܢܳܐ ܬܪܶܝܢ ܦܽܘ̈ܡܶܐ ܐܝ̣ܬ ܗܘ ܠܡܶܠܬܳܐ ܕܰܐܠܳܗܳܐ. ܐܳܦ ܗܳܕܐ ܐܳܡܰܪ ܐܢܳܐ. ܐܶܡܰܪ ܓܶܝܪ ܡܳܪܰܢ ܠܦܶܛܪܽܘܣ ܟܰܕ ܐܶܫܬܰܘܕܺܝ ܕܝܳܗܶܒ ܠܶܗ ܣܰܝܦܳܐ ܗܳܢܐ. ܕܬܶܐܣܽܘܪ ܒܰܐܪܥܳܐ ܢܶܗܘܶܐ ܐܰܣܺܝܪ ܒܰܫܡܰܝܳܐ. ܘܡܶܕܶܡ ܕܬܶܫܪܶܐ ܒܰܐܪܥܳܐ ܢܶܗܘܶܐ ܫܪܶܐ ܒܰܫܡܰܝܳܐ (ܡܬܝ ܝܘ: ܝܛ). ܗܳܠܶܝܢ ܐܶܢܘܢ ܬܪܶܝܢ ܦܽܘ̈ܡܶܐ ܕܺܐܝܬ ܠܣܰܝܦܳܐ ܗܰܘ ܕܰܠܒܰܟܘ ܫܠܺܝ̈ܚܶܐ ܒܺܐܝ̈ܕܰܝܗܽܘܢ ܘܰܢܦܰܩܘ ܠܰܒܪܺܝܬܳܐ ܗܳܝ ܕܳܐܣܪܺܝܢ ܦܽܘܡܳܐ ܚܰܕ ܘܳܐܦ ܗܳܝ ܕܫܳܪܶܝܢ ܦܽܘܡܳܐ ܐܚܪܺܢܳܐ. ܬܪ̈ܰܝܗܽܘܢ ܦܽܘ̈ܡܶܐ ܗܳܠܶܝܢ ܒܚܰܕ ܣܰܝܦܳܐ ܐܶܢܽܘܢ. ܘܰܒܗܳܢܳܐ ܣܰܝܦܳܐ ܥܳܒܕܺܝܢ ܗܘܰܘ ܡܰܟܣܳܢܽܘܬܳܐ ܡܶܢ ܥܰܡ̈ܡܶܐ ܚܰܛܳܝ̈ܐ. ܘܡܶܢ ܐܶܡ̈ܘܳܬܳܐ ܕܪܽܘܫܥܳܐ.
ܠܡܶܥܒܰܕ ܦܽܘܪܥܳܢܳܐ ܡܶܢ ܥܰܡܡ̈ܐ. ܘܡܰܟܣܳܢܽܘܳܬܐ ܡܶܢ ܐܶܡ̈ܘܳܬܳܐ. ܘܥܰܡܡ̈ܐ ܗܳܠܶܝܢ ܕܶܐܡܰܪ ܗܳܪܟܳܐ ܢܒܺܝܳܐ ܥܰܠ ܚܰܝ̈ܠܰܘܳܬܳܐ ܕܰܠܩܽܘܒܠܳܐ. ܐܰܘܕܰܥ ܘܶܐܡ̈ܘܳܬܳܐ ܬܽܘܒ ܪ̈ܰܫܺܝܥܳܬܳܐ ܕܡܶܬܟܰܣ̈ܣܳܢ ܡܶܢ ܡܰܠܦܳܢܽܘܬܳܐ ܕܰܫܠܺܝ̈ܚܶܐ. ܪܽܘܚܳܐ ܐܶܢܶܝܢ ܕܡܰܛܥܝܳܢܽܘܬܳܐ. ܠܽܘܩܒܰܠ ܗܳܠܝܢ ܣܰܝܦܳܐ ܗܰܘ ܕܪܽܘܚܳܐ ܒܺܐܝ̈ܕܰܝ ܫܠܺܝ̈ܚܶܐ ܫܡܺܝܛ ܗܘܳܐ. ܟܰܕ ܡܕܺܝܫܺܝܢ ܠܗܶܝܢ ܒܪ̈ܶܓܠܰܝܗܽܘܢ ܐܰܝܟ ܡܶܠܬܶܗ ܕܡܳܪܰܢ ܕܶܐܡܰܪ ܠܗܽܘܢ: ܕܗܳܐ ܝܳܗܶܒ ܐܢܳܐ ܠܟܽܘܢ ܚܰܝܠܳܐ ܕܰܬܕܽܘܫܽܘܢ ܚܘܰܘܴ̈ܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܳܐ ܕܰܒܥܶܠܕܒܳܒܳܐ (ܠܘܩܐ ܝ: ܝܛ). ܡܶܢܗܽܘܢ ܥܳܒܕܺܝܢ ܗܘܰܘ ܡܰܟܣܳܢܽܘܬܳܐ ܟܰܕ ܐܳܣܪܺܝܢ ܠܗܽܘܢ ܕܠܳܐ ܢܩܰܘܽܘܢ ܒܠܶܒܰܘܴ̈ܬܳܐ ܕܰܐܝܠܶܝܢ ܕܛܳܪܕܺܝܢ ܗܘܰܘ ܠܗܽܘܢ ܡܶܢܗܽܘܢ.
ܠܡܶܐܣܰܪ ܠܰܡ ܡܰܠܟܰܝ̈ܗܽܘܢ ܒܣܽܘ̈ܛܡܶܐ. ܘܝܰܩܺܝܪ̈ܰܝܗܽܘܢ ܒܫܺܝܫ̈ܠܳܬܳܐ ܕܦܰܪܙܠܳܐ. ܗܳܠܶܝܢ ܓܶܝܪ ܐܶܢܽܘܢ ܪ̈ܺܝܫܳܢܶܐ ܕܒܺܝ̈ܫܳܬܳܐ: ܒܝܰܕ ܫܠܺܝܚ̈ܐ ܩܰܕܺܝ̈ܫܶܐ ܐܶܣܰܪ ܐܶܢܽܘܢ ܚܰܝܠܳܐ ܕܥܰܡܰܢܽܘܐܝܠ. ܘܰܐܝܟ ܕܰܒܣܽܘ̈ܛܡܶܐ ܘܰܒܫܺܝ̈ܫܠܳܬܳܐ ܢܛܺܝܪܺܝܢ ܠܬܰܫܢܺܝܩܳܐ ܘܰܠܕܺܝܢܳܐ ܕܰܠܥܳܠܰܡ.
ܠܡܶܥܒܰܕ ܒܗܽܘܢ ܕܺܝܢܳܐ ܕܰܟܬܺܝܒ. ܕܥܰܠ ܡܶܠܬܶܗ ܕܡܳܪܰܢ ܐܶܡܰܪ ܗܳܠܶܝܢ. ܡܶܛܠ ܕܢܽܘܪܳܐ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܐܟܰܘ̈ܗܝ. ܠܙܰܕܺܝ̈ܩܶܐ ܕܶܝܢ ܐܰܝܟ ܕܶܐܡܰܪ ܢܒܺܝܐ ܡܰܚܶܐ ܒܡܰܠܟܽܘܬܳܐ.
ܫܽܘܒܚܳܐ ܠܰܡ ܠܟܽܠܗܽܘܢ ܙܰܕܺܝ̈ܩܰܘܗܝ. ܕܠܶܗ ܝܳܐܐ ܫܽܘܒܚܳܐ ܠܰܡܫܺܝܚܳܐ ܕܰܡܫܰܒܰܚ ܠܙܰܕܺܝ̈ܩܶܐ ܒܰܓܢܽܘܢܶܗ ܠܥܳܠܡܺܝܢ ܐܡܝܢ܀
ܡܙܡܘܪܐ ܕܡܐܐ ܘܚܡܫܝܢ
ܡܰܘܕܰܥ ܥܰܠ ܐܪܳܙܳܐ ܕܰܙܩܺܝܦܳܐ ܕܰܐܠܳܗܳܐ. ܩܳܪܝܳܐ ܢܒܺܝܘܬܳܐ ܩܽܘܕܫܳܐ: ܘܰܕܠܶܗ ܠܰܙܩܺܝܦܳܐ ܡܫܰܒܚܺܝܢ ܠܚܰܪܬܳܐ: ܟܽܠ ܕܺܐܝܬ ܒܶܗ ܢܫܰܡܬܳܐ ܕܚܰܝܷ̈ܐ.
ܟܽܠܗܽܘܢ ܩܰܕܺܝ̈ܫܶܐ ܐܰܝܠܶܝܢ ܕܰܠܒܰܟܘ ܒܺܐܝ̈ܕܰܝܗܽܘܢ ܟܰܣܝܴ̈ܬܳܐ. ܫܺܝܦܽܘܪ̈ܶܐ ܪ̈ܳܡܶܐ ܕܰܢܒܺܝܽܘܬܳܐ ܘܰܒܝܰܕ ܓܶܠܝܴ̈ܢܶܐ ܢܰܗܺܝܪ̈ܶܐ ܐܶܫܬܰܘܕܰܥܘ ܠܐܪܳܙܳܐ ܪܰܒܳܐ ܕܕܶܚܠܰܬ ܐܰܠܗܳܐ. ܘܰܐܪܓܶܫܘ ܒܺܐܝܬܽܘܬܶܗ ܕܥܰܡܰܢܽܘܐܝܠ ܕܡܶܢܥܳܠܰܡ ܐܝ̣ܬܰܘܗܝ. ܘܗܽܘ ܐܝ̣ܬܰܘܗܝ ܩܰܕܡܳܝܳܐ ܘܰܐܚܪܳܝܳܐ. ܘܫܽܘܪܳܝܳܐ ܐܳܦ ܫܽܘܠܳܡܳܐ ܘܰܡܚܰܬܡܳܢܳܐ. ܘܒܶܗ ܡܫܰܪܶܝܢ ܗܘܰܘ ܒܩܰܪܢܳܐ ܕܰܢܒܺܝܽܘܬܳܐ. ܡܳܐ ܕܰܡܩܰܒܠܺܝܢ ܕܶܢܚܳܐ ܕܓܶܠܝܴ̈ܢܶܐ. ܘܰܥܠܰܘܗܝ ܡܢܺܝܚܺܝܢ ܩܴ̈ܠܶܐ ܕܝܽܘܒܳܒܰܝ̈ܗܽܘܢ ܡܳܐ ܕܰܡܚܰܬܡܺܝܢ ܢܒܺܝܽܘܬܳܐ. ܗܽܘ ܕܶܝܢ ܐܰܠܗܳܐ ܡܥܰܠܰܝ ܗܽܘ ܡܶܢ ܫܽܘܪܳܝܳܐ ܘܡܶܢ ܫܽܘܠܳܡܳܐ. ܘܡܶܛܠ ܕܩܰܕܶܡ ܨܒܳܐ ܕܢܶܬܕܰܡܶܐ ܠܰܒܢܰܝ̈ܢܳܫܳܐ ܘܢܶܣܰܒ ܥܠܰܘܗܝ ܕܡܽܘܬܳܐ ܕܥܰܒ̈ܕܶܐ. ܘܰܗܘܳܐ ܬܚܶܝܬ ܫܽܘܪܳܝܳܐ ܘܰܬܚܶܝܬ ܫܽܘܠܳܡܳܐ ܒܽܐܘܪܚܳܐ ܕܓܶܠܝܳܢܶܗ ܕܒܰܒܣܰܪ. ܠܶܗ ܠܗܳܢܳܐ ܐܪܳܙܳܐ ܕܰܡܕܰܒܪܳܢܽܘܬܳܐ ܓܠܳܐ ܠܰܐܝܠܶܝܢ ܕܰܨܒܳܐ. ܘܠܳܐ ܓܶܝܪ ܫܶܬܩܰܬ ܩܰܪܢܳܐ ܕܰܢܒܺܝܽܘܬܳܐ ܥܕܰܡܳܐ ܕܰܦܓܰܥ ܒܳܗ̇ ܗܰܘ ܕܡܶܛܠܳܬܶܗ ܩܳܥܝܳܐ ܗܘܳܬ ܥܠܰܘܗܝ ܘܰܐܢܺܝܚܳܗ̇. ܘܠܳܐ ܛܽܘܒܳܢܳܐ ܕܰܘܝܕ ܕܰܥܒܰܕ ܗܳܫܳܐ ܫܽܘܠܳܡܳܐ ܠܬܶܫܒܚܴ̈ܬܶܗ. ܠܰܘ ܢܒܺܝܽܘܬܳܐ ܫܰܠܶܡ ܘܠܳܐ ܬܶܫܒ̈ܚܳܬܳܐ ܚܰܬܶܡ. ܐܶܠܳܐ ܗܽܘ ܐܶܬܦܩܶܕ ܕܢܺܐܙܰܠ ܢܶܬܬܢܺܝܚ ܥܰܠ ܐܰܒܳܗܰܘ̈ܗܝ ܡܶܢ ܥܰܡ̈ܠܶܐ ܘܰܫܚܳܩܷ̈ܐ. ܠܪܶܕܝܳܐ ܓܶܝܪ ܕܰܢܒܺܝܽܘܬܳܐ ܟܰܕ ܡܶܫܬܰܦܰܥ ܫܰܒܩܶܗ ܘܫܰܢܺܝ. ܘܟܰܕ ܒܰܡܨܰܥܬܳܐ ܬܡܺܝ̈ܗܳܬܳܐ ܣܰܓܺܝ̈ܐܬܳܐ ܐܶܬܢܰܒܺܝ ܘܡܰܠܶܠ. ܐܶܠܳܐ ܒܗܳܝ ܬܶܫܒܽܘܚܬܳܐ ܩܰܕܡܳܝܬܳܐ ܐܪܳܙܳܐ ܪܰܒܳܐ ܕܰܡܕܰܒܪܳܢܽܘܬܶܗ ܕܒܰܒܣܰܪ ܪܫܰܡ ܗܘܳܐ ܚܰܟܺܝܡܳܐܝ̣ܬ ܟܰܕ ܡܕܰܡܶܐ ܠܶܗ ܬܰܡܳܢ ܠܐܺܝܠܳܢܳܐ ܕܰܢܨܺܝܒ ܥܰܠ ܬܰܦܳܐ ܕܡܰܝܴ̈ܐ. ܗܳܢܰܘ ܥܰܠ ܥܡܳܕܳܐ ܩܰܕܺܝܫܳܐ ܕܗܳܢܰܘ ܫܽܘܪܳܝܳܐ ܕܽܐܘܪܚܳܐ ܕܓܶܠܝܳܢܶܗ ܕܰܐܠܗܳܐ. ܐܳܦܶܢ ܓܶܝܪ ܡܶܢ ܟܰܪܣܳܐ ܕܒܶܣܪܳܐ ܫܰܪܺܝ ܘܰܗܘܳܐ ܒܰܪܢܳܫܳܐ. ܐܶܠܐ ܗܳܝܕܶܝܢ ܠܰܘ ܒܣܳܥܽܘܪ̈ܘܳܬܳܐ ܕܚܰܝ̈ܠܶܐ ܡܫܰܪܶܐ ܗܘܳܐ. ܒܗܳܝ ܕܦܺܐܪ̈ܶܐ ܣܰܓܺܝ̈ܐܐ ܡܰܦܪܶܐ ܐܺܝܠܳܢܳܐ ܕܰܥܡܳܕܳܐ. ܥܰܠܗܳܝ ܐܶܫܬܰܘܕܰܥ ܢܒܺܝܳܐ ܘܰܟܬܰܒ. ܕܦܺܐܪ̈ܰܘܗܝ ܝܳܗܶܒ ܒܙܰܒܢܶܗ ܘܛܰܪ̈ܦܰܘܗܝ ܠܳܐ ܢܳܬܪܺܝܢ. ܡܶܢ ܗܳܪܟܳܐ ܫܰܪܺܝ ܢܒܺܝܳܐ ܒܽܐܘܪܚܳܐ ܕܰܡܕܰܒܪܳܢܽܘܬܳܐ. ܗܳܫܳܐ ܕܶܝܢ ܒܬܶܫܒܽܘܚܬܳܐ ܕܫܽܘܠܳܡܳܐ ܕܰܥܒܰܕ ܠܡܰܙܡܽܘܪ̈ܶܐ. ܒܬܶܫܒܽܘܚܬܳܐ ܗܳܕܐ ܕܰܡܳܐܐ ܘܚܰܡܫܺܝܢ܆ ܒܰܙܩܺܝܦܳܐ ܩܰܕܺܝܫܳܐ ܕܡܳܪܳܗ̇ ܕܬܶܫܒܽܘܚܬܳܐ ܥܒܰܕ ܠܳܗ̇ ܠܬܶܫܒܽܘܚܬܳܐ ܫܽܘܪܳܝܳܐ. ܟܰܕ ܡܫܰܒܰܚ ܒܚܰܕܽܘܬܳܐ ܘܳܐܡܰܪ:
ܫܰܒܰܚܘ ܠܡܳܪܝܳܐ ܒܩܽܘܕܫܶܗ. ܫܰܒܚܽܘܗܝ ܒܰܪܩܺܝܥܳܐ ܕܥܽܘܫܢܶܗ. ܩܽܘܕܫܶܗ ܕܡܳܪܝܳܐ ܠܰܙܩܺܝܦܶܗ ܩܳܪܶܐ. ܘܰܠܡܰܘܬܳܐ ܕܺܝܠܶܗ ܗܰܘ ܕܩܰܕܶܫ ܠܛܰܡܷ̈ܐܐ. ܘܰܫܪܳܐ ܠܰܐܝܠܶܝܢ ܕܰܐܣܺܝܪܺܝܢ ܗܘܰܘ ܒܡܶܣܟܺܢܽܘܬܳܐ ܘܰܒܦܰܪ̈ܙܠܶܐ. ܠܗܳܢܳܐ ܩܪܳܐ ܢܒܺܝܳܐ ܩܽܘܕܫܶܗ ܕܡܳܪܝܳܐ. ܡܳܢܳܐ ܡܶܬܩܪܶܐ ܡܶܢ ܡܗܰܝܡ̈ܢܶܐ ܬܪ̈ܺܝܨܰܝ ܫܽܘܒܚܳܐ. ܩܽܘܪܒܳܢܳܐ ܠܳܐ ܗܘܳܐ ܩܽܘܕܫܳܐ ܘܦܰܘܠܽܘܣ ܛܽܘܒܳܢܳܐ ܡܰܠܶܦ ܕܺܐܝܬܰܘܗܝ ܘܳܐܡܰܪ. ܟܽܠ ܐܶܡܰܬܝ ܕܳܐܟܠܺܝܢ ܐܢܬܽܘܢ ܠܰܚܡܳܐ ܗܳܢܳܐ: ܘܫܳܬܶܝܢ ܐܢܬܽܘܢ ܟܳܣܳܐ ܗܳܢܳܐ: ܡܰܘܬܶܗ ܕܡܳܪܰܢ ܡܰܥܗܕܺܝܢ ܐܢܬܽܘܢ ܥܕܰܡܳܐ ܠܡܶܐܬܺܝܬܶܗ (ܐ ܩܘܪ̈ܢܬܝܐ ܝܐ: ܟܘ). ܗܳܐ ܡܳܕܶܝܢ ܩܽܘܕܫܶܗ ܕܡܳܪܝܳܐ. ܡܰܘܬܶܗ ܐܝ̣ܬܰܘܗܝ. ܘܡܳܪܝܳܐ ܟܰܕ ܡܛܰܝܰܒ ܗܘܳܐ ܕܰܢܩܰܒܶܠ ܡܰܘܬܳܐ ܗܰܘ ܕܩܰܕܶܫ ܠܰܡܗܰܝ̈ܡܢܶܐ. ܩܰܕܶܡ ܐܶܡܰܪ ܩܕܳܡ ܫܠܺܝ̈ܚܶܐ ܠܘܳܬ ܐܰܒܳܐ. ܕܥܰܠ ܐܰܦܰܝ̈ܗܽܘܢ ܐܶܢܳܐ ܡܩܰܕܶܫ ܐܢܳܐ ܢܰܦܫܝ (ܝܘܚܢܢ ܝܙ: ܝܛ). ܘܶܐܢܕܶܝܢ ܘܗܳܠܶܝܢ ܠܳܐ ܣܳܦ̈ܩܳܢ. ܡܰܘܣܶܦ ܐܢܳܐ ܐܚܪܺܬܳܐ ܗܳܝ ܕܟܽܠܗܽܘܢ ܥܶܪ̈ܒܶܐ ܕܰܡܩܰܪܒܺܝܢ ܗܘܰܘ ܒܢܱ̈ܝ ܝܺܣܪܳܐܝܠ ܚܠܳܦ ܚܛܳܗ̈ܐ. ܩܽܘܕ̈ܫܶܐ ܕܶܝܢ ܡܶܬܩܪܶܝܢ ܗܘܰܘ. ܗܳܠܶܝܢ ܕܰܒܝܰܕ ܕܶܒܚܬܳܐ ܕܡܰܘܬܰܝ̈ܗܽܘܢ ܡܩܰܕܡܺܝܢ ܗܘܰܘ ܨܳܝܪܺܝܢ ܠܡܳܪܝܳܐ. ܗܰܘ ܕܰܗܘܳܐ ܐܶܡܪܳܐ ܘܶܐܬܩܰܪܰܒ ܠܕܶܒܚܳܐ ܡܩܰܕܫܳܢܳܐ ܕܟܽܠܗܽܘܢ ܚܰܛܳܝ̈ܐ. ܘܥܰܠܗܳܝ ܡܶܬܩܪܶܐ ܡܰܘܬܶܗ ܕܡܳܪܝܳܐ ܩܽܘܕܫܳܐ. ܡܶܛܠ ܕܶܐܬܩܰܕܰܫܘ ܒܶܗ ܡܶܢ ܛܰܡܽܐܘܬܳܐ ܕܰܚܛܳܗܰܝ̈ܗܘܢ. ܘܡܶܟܝ̣ܠ ܡܶܠܬܳܐ ܕܥܰܠ ܩܽܘܕܫܶܗ ܕܡܳܪܝܳܐ ܛܳܒ ܐܶܬܢܰܗܪܰܬ. ܢܶܥܒܰܪ ܠܦܶܬܓܳܡܳܐ ܕܒܳܬܪܶܗ.
ܫܰܒܚܽܘܗܝ ܠܰܡ ܒܰܪܩܺܝܥܳܐ ܕܥܽܘܫܢܶܗ. ܪܩܺܝܥܳܐ ܠܥܺܕܬܳܐ ܩܳܪܶܐ. ܡܶܛܠ ܕܒܰܪܩܺܝܥܳܐ ܩܒܺܝܥܺܝܢ ܟܽܠܗܽܘܢ ܢܰܗܺܝܪ̈ܶܐ. ܫܶܡܫܳܐ ܘܣܰܗܪܳܐ ܘܟܰܘܟ̈ܒܶܐ. ܗܳܟܰܢܳܐ ܒܥܺܕܬܳܐ ܕܰܐܠܗܳܐ ܟܢܺܝܫܺܝܢ ܟܽܠܗܽܘܢ ܩܰܕܺܝ̈ܫܶܐ. ܘܡܰܢܗܪܳܐ ܫܠܺܝܚܽܘܬܳܐ ܐܰܝܟ ܫܶܡܫܳܐ. ܘܰܢܒܺܝܽܘܬܳܐ ܐܰܝܟ ܣܰܗܪܳܐ. ܘܰܚܠܳܦ ܟܰܘ̈ܟܒܶܐ ܢܒܺܝ̈ܐ ܘܰܫܠܺܝ̈ܚܶܐ ܘܟܽܠܗܽܘܢ ܡܰܠܦܴ̈ܢܶܐ. ܥܺܕܬܳܐ ܕܶܝܢ ܦܰܓܪܶܗ ܗܺܝ ܕܰܡܫܺܝܚܳܐ. ܘܰܪܩܺܝܥܳܐ ܕܦܳܪܶܫ ܒܶܝܬ ܡܰܝܴ̈ܐ ܠܡܰܝܴ̈ܐ. ܗܳܢܰܘ ܕܶܝܢ ܥܺܕܬܳܐ. ܒܶܝܬ ܡܗܰܝܡ̈ܢܶܐ ܠܠܳܐ ܡܗܰܝܡܢܺܝܢ. ܡܳܢܳܐ ܕܶܝܢ ܒܳܬܰܪ ܗܳܠܶܝܢ:
ܫܰܒܚܽܘܗܝ ܒܚܰܝܠܬܳܢܽܘܬܶܗ ܫܰܒܚܽܘܗܝ ܒܣܽܘܓܳܐܐ ܕܪܰܒܽܘܬܶܗ. ܫܰܒܚܽܘܗܝ ܒܡܶܬܒܰܪܢܫܳܢܽܘܬܶܗ. ܫܰܒܚܽܘܗܝ ܒܚܰܝܠܬܳܢܽܘܬܶܗ ܒܰܡܚܺܝܠܽܘܬܶܗ. ܘܒܰܙܥܽܘܪܽܘܬܶܗ ܘܰܒܫܺܝܛܽܘܬܶܗ. ܟܰܕ ܝܳܕܥܺܝܢܰܢ ܠܶܗ ܡܶܢ ܬܰܪ̈ܬܰܝܗܶܝܢ ܚܰܕ ܐܰܠܳܗܳܐ ܚܰܕ ܒܪܳܐ ܡܫܺܝܚܳܐ. ܡܶܢ ܐܰܠܳܗܽܘܬܳܐ ܘܡܶܢ ܐܢܳܫܽܘܬܳܐ. ܚܰܕ ܟܝܳܢܳܐ ܚܕܳܐ ܚܕܳܝܽܘܬܳܐ ܒܬܶܕܡܽܘܪܬܳܐ ܚܰܕ ܟܝܳܢܳܐ ܒܰܠܚܽܘܕ ܡܶܬܐܶܡܰܪ ܕܰܡܒܰܣܰܪ ܘܰܡܒܰܪܢܰܫ. ܘܕܺܝܠܶܗ ܐܶܢܶܝܢ ܪ̈ܳܡܳܬܳܐ ܘܡܳܟܴ̈ܬܳܐ ܘܰܐܠܳܗܳܝܴ̈ܬܳܐ ܘܐܢܳܫܳܝܴ̈ܬܳܐ. ܟܰܕ ܠܳܐ ܡܶܬܦܰܠܓܺܝܢ ܠܰܬܪܶܝܢ ܟܝ̈ܳܢܶܐ ܐܰܘ ܠܰܬܪܶܝܢ ܩܢܽܘܡ̈ܐ. ܐܶܠܳܐ ܚܰܕ ܐܶܢܶܝܢ ܒܰܚܕܳܝܽܘܬܳܐ ܗܳܢܰܘ ܕܚܰܕ ܩܢܽܘܡܳܐ ܘܰܕܚܰܕ ܟܝܳܢܳܐ ܕܰܐܠܗܳܐ ܡܶܠܬܳܐ ܕܶܐܬܒܰܣܰܪ. ܘܡܶܬܬܰܘܕܶܐ ܐܰܠܳܗܳܐ ܥܰܠ ܕܺܐܝܬܰܘܗܝ ܡܶܢ ܐܰܒܳܐ. ܘܰܒܪܳܐ ܡܶܛܠ ܕܰܗܘܳܐ ܒܶܣܪܳܐ ܡܶܢ ܒܬܽܘܠܬܳܐ. ܘܺܐܝܬ ܠܶܗ ܐܰܠܳܗܳܝܴ̈ܬܳܐ ܡܬܽܘܡܳܐܝ̣ܬ. ܘܐܢܳܫܳܝܴ̈ܬܳܐ ܡܕܰܒܪܳܢܳܐܝ̣ܬ. ܘܗܽܘ ܟܰܕ ܗܽܘ ܕܠܳܐ ܫܽܘܚܠܳܦܳܐ. ܘܠܶܗ ܐܶܡܰܪ ܗܘܳܐ ܢܒܺܝܐ.
ܫܰܒܚܽܘܗܝ ܒܩܳܠܳܐ ܕܩܰܪܢܳܐ. ܗܳܕܐ ܓܶܝܪ ܩܰܪܢܳܐ ܕܰܢܒܺܝܽܘܬܳܐ ܗܘܳܬ. ܘܗܺܝ ܩܰܕܡܳܝܬܳܐ ܪܶܗܛܰܬ ܣܰܒܪܰܬ ܒܥܰܡܳܐ ܘܰܐܟܪܙܰܬ ܥܰܠ ܡܶܐܬܺܝܬܶܗ ܕܡܳܪܝܳܐ. ܘܒܳܬܰܪ ܩܳܠܳܐ ܗܳܢܳܐ ܡܰܠܶܠ ܩܴ̈ܠܶܐ ܐܚܪ̈ܳܢܶܐ ܕܛܳܒ ܣܰܓܺܝܐܝ̣ܢ ܘܶܐܡܰܪ.
ܫܰܒܚܽܘܗܝ ܒܩܺܝܬܳܪ̈ܶܐ ܘܰܒܟܶܢܳܪ̈ܶܐ: ܫܰܒܚܽܘܗܝ ܒܰܦܠܰܓ̈ܐ ܘܒܰܪ̈ܒܺܝܥܶܐ. ܩܺܝܬܳܪ̈ܶܐ ܘܟܶܢܳܪ̈ܶܐ ܗܳܢܘܢ ܐܶܢܽܘܢ ܦܠܰܓ̈ܐ ܘܰܪ̈ܒܺܝܥܶܐ ܥܰܠ ܣܰܓܺܝܐܘܬܳܐ ܕܩܴ̈ܠܶܐ ܡܫܰܚ̈ܠܦܶܐ ܕܰܡܫܰܒܚܺܝܢ ܒܓܰܘ ܥܺܕܬܳܐ ܠܥܰܡܰܢܽܘܐܝܠ. ܩܺܝܬܳܪ̈ܶܐ ܗܳܟܺܝܠ ܥܰܠ ܫܠܺܝ̈ܚܶܐ ܡܶܬܢܰܣܒܺܝܢ ܕܡܶܢ ܩܰܝ̈ܣܶܐ ܡܶܬܪܰܟܰܒ ܩܺܝܬܳܪܳܐ. ܠܗܳܠܶܝܢ ܕܶܐܫܬܰܕܰܪܘ ܐܰܝܟ ܐܶܡܪ̈ܶܐ ܒܰܝ̈ܢܰܝ ܕܺܐܒ̈ܐ. ܗܳܢܘܢ ܕܡܶܛܠ ܕܰܐܡܺܝܬܘ ܗܰܕܳܡܰܝ̈ܗܘܢ ܕܒܰܐܪܥܳܐ. ܣܪܰܓܘ ܢܰܦܫܗܽܘܢ ܩܺܝܬܳܪܳܐ ܕܰܨܠܺܝܒܳܐ. ܘܝܶܗܒܰܬ ܒܗܶܝܢ ܨܶܒܥܳܐ ܕܪܽܘܚܳܐ. ܩܴ̈ܠܶܐ ܒܰܣܺܝ̈ܡܶܐ ܘܰܚܠܰܝܴ̈ܐ. ܘܪܳܕܦܺܝܢ ܗܘܰܘ ܡܶܢ ܥܳܠܡܳܐ ܒܗܳܠܶܝܢ ܙܡܳܪ̈ܶܐ ܪ̈ܽܘܚܳܢܶܐ ܟܽܠ ܪ̈ܽܘܚܶܐ ܒܺܝ̈ܫܳܬܳܐ. ܟܰܕ ܐܝ̣ܬ ܗܘܳܐ ܥܰܡܗܽܘܢ ܬܰܠܡܺܝ̈ܕܶܐ ܩܰܕܺܝ̈ܫܶܐ ܡܶܢ ܥܰܡܳܐ ܘܡܶܢ ܥܰܡܡ̈ܐ. ܐܰܝܟ ܛܺܝܛܳܘܣ ܘܳܐܪܳܡܳܝܳܐ ܘܛܰܪܽܘܦܺܝܡܳܘܣ ܐܶܦܶܣܳܝܳܐ. ܘܛܺܝܡܳܬܶܐܘܳܣ ܕܡܶܢ ܓܳܙܰܪܬܳܐ ܘܚܰܒܪ̈ܰܝܗܽܘܢ. ܦܠܰܓ̈ܐ ܕܶܝܢ ܘܰܪ̈ܒܺܝܥܶܐ ܗܳܠܝܢ ܡܰܘܕܥܺܝܢ ܥܰܠ ܡܰܠܦܴ̈ܢܶܐ ܘܥܶܢܘܳܝ̈ܐ. ܦܠܰܓ̈ܐ ܕܶܝܢ ܡܶܢ ܓܶܠܕ̈ܐ ܕܚܰܝ̈ܘܳܬܳܐ ܡܺܝ̈ܬܳܬܳܐ ܡܶܬܥܰܒܕܺܝܢ. ܐܳܦ ܠܗܳܠܶܝܢ ܡܶܬܕܰܡܶܝܢ ܐܰܝܠܶܝܢ ܕܰܒܨܰܘ̈ܡܐ ܒܰܨܠܰܘܴ̈ܬܳܐ ܘܒܰܢܙܺܝܪܽܘܬܳܐ. ܘܰܒܕܶܡܥ̈ܐ ܘܒܰܡܣܰܝܒܪܳܢܽܘܬܳܐ ܕܽܐܘ̈ܠܨܳܢܶܐ ܕܰܝܶܒܘ ܦܰܓܪ̈ܰܝܗܽܘܢ ܘܰܥܒܰܕ ܐܶܢܽܘܢ ܐܰܝܟ ܦܠܰܓ̈ܐ ܡܺܝ̈ܬܶܐ ܘܢܰܓܺܝ̈ܒܶܐ ܒܰܡܚܰܡܣܢܳܢܽܘܬܳܐ ܕܡܶܢ ܡܶܐܟܠܳܐ ܘܡܰܫܬܝܳܐ. ܡܶܛܠܗܳܢܐ ܗܘܰܘ ܦܠܰܓ̈ܐ ܪ̈ܽܘܚܳܢܶܐ ܒܥܺܕܬܶܗ ܕܰܐܠܳܗܳܐ. ܟܰܕ ܡܫܰܒܠܺܝܢ ܒܢܰܦ̈ܫܳܬܳܐ ܚܰܝܴ̈ܬܳܐ ܘܰܒܦܰܓܪ̈ܶܐ ܡܺܝ̈ܬܰܝ ܠܚܱ̈ܫܶܐ. ܪ̈ܒܺܝܥܶܐ ܬܽܘܒ ܣܰܓܺܝ̈ܐܝ ܩܴ̈ܠܶܐ ܐܶܢܘܢ ܘܡܶܢ ܣܺܐܡܳܐ ܘܡܶܢ ܕܰܗܒܳܐ ܘܦܰܪܙܠܳܐ ܘܡܶܢ ܢܚܳܫܳܐ ܡܶܬܩܰܝܡܺܝܢ. ܘܝܳܗܒܺܝܢ ܩܴ̈ܠܶܐ ܒܰܣܺܝ̈ܡܶܐ. ܘܝܰܬܺܝܪܳܐܝ̣ܬ ܡܳܐ ܕܡܰܡܠܶܟ ܡܰܠܟܳܐ ܚܰܕܬܳܐ. ܒܗܳܠܶܝܢ ܪܳܒܥܺܝܢ ܗܘܰܘ ܟܰܕ ܐܰܡܠܶܟ ܫܠܶܝܡܽܘܢ ܐܰܝܟܰܢܳܐ ܕܰܟܬܺܝܒ. ܘܥܰܡܳܐ ܠܰܡ ܪܳܒܥܺܝܢ ܒܰܪ̈ܒܺܝܥܶܐ (ܐ ܡܠܟ̈ܐ ܐ: ܡ). ܗܳܠܶܝܢ ܗܳܟܺܝܠ ܡܶܬܢܰܣܒܺܝܢ ܠܛܽܘܦܣܳܐ ܕܡܰܠܦܳܢ̈ܐ ܕܩܳܡܘ ܒܥܺܕܬܳܐ ܘܰܒܩܴ̈ܠܶܐ ܡܫܰܚ̈ܠܦܶܐ ܕܟܽܠ ܕܶܡܘܴ̈ܢ. ܪܰܟܶܒܘ ܬܶܫܒܚܴ̈ܬܳܐ ܐܳܦ ܥܽܘ̈ܢܝܳܬܳܐ ܘܰܙܡܺܝܪ̈ܳܬܳܐ ܘܰܐܫܡܰܥܘ ܩܴ̈ܠܐ ܚܠܰܝ̈ܳܐ ܕܠܐ ܡܶܢܝܴ̈ܢ ܒܥܺܕܬܳܐ ܕܰܐܠܳܗܳܐ. ܘܒܳܬܰܪܟܶܢ ܐܡ̇ܪ ܢܒܺܝܳܐ.
ܫܰܒܚܽܘܗܝ ܒܡܶܢܷ̈ܐ ܚܰܠܝܴ̈ܬܳܐ. ܡܶܢܷ̈ܐ ܚܰܠܝܴ̈ܬܳܐ ܩܳܪܶܐ ܠܢܰܦ̈ܫܳܬܳܐ ܕܰܫܕܰܝ̈ ܡܶܢܗܶܝܢ ܪܶܢܝܶܗ ܕܥܳܠܡܳܐ ܘܰܪ̈ܓܺܝܓܳܬܶܗ. ܘܰܒܕܶܒܫܳܐ ܕܢܳܛܽܘܪܽܘܬ ܦܽܘܩ̈ܕܳܢܰܘܗܝ ܕܡܳܪܝܳܐ ܒܰܣܶܡ̈ܝ ܦܽܘܡܰܝ̈ܗܶܝܢ ܘܚܰܠܝܴ̈ܢ ܡܶܠܰܘ̈ܗܝ ܠܰܫܡܱ̈ܝ ܚܶܟܗܶܝܢ. ܛܳܒ ܡܶܢ ܕܶܒܫܳܐ ܠܦܽܘܡܳܐ. ܘܰܡܫܰܒܚܺܝܢ ܠܶܗ ܠܚܰܬܢܳܐ ܒܰܟܬܳܒܳܐ ܕܬܶܫܒ̈ܚܳܬ ܬܶܫܒܚܴ̈ܬܳܐ ܘܳܐܡܰܪ: ܟܰܟܳܪܺܝܬܳܐ ܡܰܛܦܴ̈ܢ ܣܶܦܘܴ̈ܬܶܟܝ ܟܰܠܬܳܐ ܘܕܶܒܫܳܐ ܘܚܰܠܒܳܐ ܬܚܶܝܬ ܠܶܫܳܢܶܟܝ (ܬܫܒ̈ܚܬ ܬܫܒ̈ܚܬܐ ܕ: ܝܐ). ܒܗܳܝ ܕܩܰܒܶܠ ܪܽܘܚܳܐ ܩܰܕܺܝܫܳܐ. ܘܥܰܠܗܳܕܐ ܛܽܘܒܳܢܳܐ ܚܰܙܩܺܝܐܝܠ ܕܺܐܝܬܰܘܗܝ ܚܰܕ ܡܶܢ ܡܶܢܷ̈ܐ ܕܩܺܝܬܳܪܳܐ ܡܰܘܕܶܐ ܗܘܳܐ ܡܶܢ ܛܰܥܡܳܐ ܗܳܢܳܐ ܚܰܠܝܳܐ. ܟܰܕ ܡܚܰܘܶܐ ܡܶܢܷ̈ܐ ܕܩܺܝ̈ܢܳܬܶܗ ܕܺܐܝܬܰܝܗܶܝܢ ܚܰܠܝܴ̈ܬܳܐ. ܟܰܕ ܚܙܳܐ ܠܐܺܝܕܳܐ ܗܳܝ ܐܰܠܳܗܳܝܬܳܐ ܕܶܐܬܦܰܫܛܰܬ ܘܝܶܗܒܰܬ ܠܶܗ ܟܶܪܟܳܐ ܗܰܘ ܕܓܶܠܝܴ̈ܢܶܐ ܕܰܡܠܶܐ ܗܘܳܐ ܚܰܠܝܽܘܬܳܐ ܕܐܪ̈ܳܙܶܐ ܕܶܒܫܳܢܳܝܷ̈ܐ. ܩܥܳܐ ܘܶܐܡܰܪ ܕܶܐܟܰܠܬܶܗ ܘܰܗܘܳܐ ܒܦܽܘܡܝ ܐܰܝܟ ܕܶܒܫܳܐ ܚܰܠܝܳܐ (ܚܙܩܝܐܝܠ ܓ: ܓ). ܗܳܟܰܢܳܐ ܬܘܒ ܐܳܦ ܫܠܺܝ̈ܚܶܐ ܩܰܕܺܝ̈ܫܶܐ ܡܶܢ ܒܳܬܰܪ ܕܩܳܡ ܥܰܡܰܢܽܘܐܝܠ ܡܶܢ ܒܶܝܬ ܡܺܝ̈ܬܶܐ ܘܥܰܠ ܠܘܳܬܗܘܢ ܠܥܶܠܺܝܬܳܐ. ܟܰܕ ܐܰܚܺܝܕܺܝܢ ܬܰܪ̈ܥܶܐ ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘܢ (ܠܘܩܐ ܟܕ: ܠܘ ܝܘܚܢܢ ܟ: ܝܛ؛ ܟܐ؛ ܟܘ). ܘܡܶܛܠ ܪܰܒܽܘܬܳܗ̇ ܕܬܶܕܡܽܘܪܬܳܐ ܐܶܡܰܪ ܠܗܽܘܢ. ܐܝ̣ܬ ܠܘܳܬܟܽܘܢ ܡܶܕܶܡ ܠܡܶܐܟܰܠ (ܠܘܩܐ ܟܕ: ܡܐ). ܘܟܰܕ ܠܰܘ ܙܰܒܢܳܐ ܗܘܳܐ ܕܟܰܟܳܪ̈ܝܳܬܳܐ. ܫܰܦܺܝܪ ܩܰܕܡܰܬ ܛܰܝܒܰܬ ܡܕܰܒܪܳܢܽܘܬܳܗ̇ ܟܰܟܳܪܺܝܬܳܐ ܡܶܛܠ ܐܪܳܙܳܐ. ܐܰܝܟܰܢܳܐ ܕܟܽܠܗܽܘܢ ܐܰܝܠܶܝܢ ܕܰܒܥܶܠܺܝܬܳܐ ܗܘܰܘ ܡܶܢܷ̈ܐ ܚܰܠܝܴ̈ܬܳܐ ܐܝ̣ܬܰܝܗܽܘܢ ܗܘܰܘ. ܘܰܢܩܰܪܒܽܘܢ ܠܶܗ ܫܽܘܘܕܳܥܳܐ ܕܫܽܘܒܚܳܐ. ܗܰܘ ܕܡܶܢ ܡܶܢܷ̈ܐ ܚܰܠܝܴ̈ܬܳܐ ܘܒܰܣܺܝ̈ܡܳܬܳܐ. ܘܡܶܛܠܡܳܢܐ ܝܰܗܒܘ ܠܶܗ ܡܢܳܬܳܐ ܡܶܢ ܢܽܘܢܳܐ ܕܛܰܘܝܳܐ ܘܡܶܢ ܟܰܟܳܪܺܝܬܳܐ ܕܕܶܒܫܳܐ. ܘܟܰܕ ܡܶܬܦܰܠܓܺܝܢ ܗܘܰܘ ܢܣܰܒ ܐܶܟܰܠ ܠܥܺܢܰܝ̈ܗܽܘܢ. ܗܳܠܶܝܢ ܐܶܢܶܝܢ ܡܶܢܷ̈ܐ ܚܰܠܝܴ̈ܬܳܐ ܕܶܐܡܰܪ ܡܙܰܡܪܳܢܳܐ ܘܒܳܬܰܪ ܡܶܢܷ̈ܐ ܡܰܝܬܶܐ ܛܶܟܣ̈ܐ ܐܚܪ̈ܳܢܶܐ ܠܰܡܫܰܒܳܚܽܘ ܘܳܐܡܰܪ:
ܫܰܒܚܽܘܗܝ ܒܨܺܝܨ̈ܠܰܝ ܫܶܡܥܳܐ. ܫܰܒܚܽܘܗܝ ܒܩܳܠܳܐ ܘܒܰܩܥܳܬܳܐ. ܒܗܳܠܶܝܢ ܡܶܬܡܱ̈ܬܠܳܢ ܘܡܶܬܕܰܡ̈ܝܳܢ ܓܽܘ̈ܕܶܐ ܕܩܰܕܺܝ̈ܫܶܐ ܘܰܕܢܰܟܦܷ̈ܐ ܘܰܒܬܽܘ̈ܠܶܐ ܘܬܶܓ̈ܡܶܐ ܕܰܒܓܰܘ ܥܺܕܬܳܐ. ܕܒܰܕܡܽܘܬ ܨܺܝ̈ܨܠܶܐ ܡܚܰܕܝܴ̈ܢܶܐ ܡܰܫܡܥܺܝܢ ܩܴ̈ܠܶܐ ܩܰܕܺܝ̈ܫܶܐ ܒܙܽܘܡܳܪ̈ܶܐ ܡܬܺܝ̈ܚܶܐ. ܒܥܶܕܳܢ̈ܐ ܕܦܳܪܫܺܝܢ ܠܬܶܫܡܶܫܬܳܐ ܐܰܠܳܗܳܝܬܳܐ. ܒܩܴ̈ܠܶܐ ܡܶܫܬܰܡܥܳܢ̈ܐ ܡܶܬܓܰܡܪ̈ܳܢ ܒܟܽܠܙܒܰܢ ܒܰܡܕܰܒܪܳܢܽܘܬܳܐ ܥܺܕܬܳܢܳܝܬܳܐ. ܐܳܦ ܨܺܝ̈ܨܠܶܐ ܬܽܘܒ ܡܶܢ ܩܰܝ̈ܣܶܐ ܘܡܶܢ ܢܚܳܫܳܐ ܡܶܬܥܰܒܕܺܝܢ. ܟܕ ܩܢܶܝܢ ܡܰܠܒ̈ܟܶܐ ܕܩܰܝܣܳܐ ܘܕܽܘܟܬܳܐ ܕܢܳܩܫܳܐ ܗܳܘܝܳܐ ܡܶܢ ܢܚܳܫܳܐ. ܘܳܐܚܕܺܝܢ ܠܗܽܘܢ ܒܬܰܪܬܰܝܗܶܝܢ ܐܺܝ̈ܕܰܝܗܽܘܢ. ܘܝܳܗܒܺܝܢ ܩܳܠܳܐ ܘܰܡܚܰܘܶܝܢ ܛܽܘܦܣܳܐ ܗܰܘ ܕܰܒܥܺܕܬܳܐ. ܘܟܽܠܶܗ ܥܰܡܳܐ ܟܰܕ ܡܙܰܡܰܪ ܥܰܠ ܪ̈ܶܓܠܰܘܗܝ ܩܳܐܷܡ. ܘܒܳܬܰܪ ܗܳܠܶܝܢ ܟܽܠܗܽܘܢ ܛܶܟ̈ܣܶܐ ܥܺܕܬܳܢܳܝܷ̈ܐ ܕܶܐܡܰܪ ܢܒܺܝܳܐ. ܡܳܢܳܐ ܬܽܘܒ ܨܳܒܶܐ ܠܡܺܐܡܰܪ.
ܟܽܠ ܢܶܫܡܳܐ ܬܫܰܒܰܚ ܠܡܳܪܝܳܐ. ܫܰܦܺܝܪ ܒܫܽܘܠܳܡܳܐ ܕܡܰܙܡܽܘܪܳܐ. ܣܳܡ ܡܙܰܡܪܳܢܳܐ ܦܶܬܓܳܡܳܐ ܗܳܢܳܐ. ܡܶܛܠ ܕܦܽܘܫܳܩܶܗ ܕܦܶܬܓܳܡܳܐ ܗܳܢܳܐ ܠܘܳܬ ܫܽܘܠܳܡܳܐ ܕܪܶܗܛܶܗ ܕܥܳܠܡܳܐ ܗܳܢܳܐ ܢܳܓܶܕ ܠܰܢ ܢܶܬܒܰܩܶܐ.
ܗܳܝܕܶܝܢ ܶܓܶܝܪ.
ܫܩܰܠ ܣܳܟܳܐ ܛܽܘܟܳܣ ܟܬܳܒܳܐ ܗܳܢܐ ܕܦܽܘܫܳܩ ܡܰܙܡܽܘܪ̈ܶܐ ܕܕܳܢܺܝܐܝܠ ܨܰܠܰܚܰܝܳܐ ܒܕܰܝܪܳܐ ܕܡܳܪܝ ܐܰܦܪܶܝܡ ܣܽܘܪܝܳܝܳܐ ܕܰܒܡܰܠܟܽܘܬܳܐ ܕܗܽܘܠܰܢܕܰܐ ܒܢܺܝܣܳܢ ܝܰܪܚܳܐ ܕܗܰܒܳܒ̈ܐ ܬܫܰܥܣܰܪ ܒܶܗ ܕܰܫܢܰܬ 4200 ܒܺܐܝ̈ܕܰܝ ܬܰܚܽܘܒܳܐ ܡܳܪܝ ܝܽܘܠܺܝܳܘܣ ܝܶܫܽܘܥ ܓܺܝܓܰܟ ܡܶܛܪܳܦܽܘܠܺܝܛܳܐ ܕܣܽܘܪ̈ܝܳܝܶܐ ܐܰܪ̈ܬܳܕܽܘܟܣܘ ܕܽܐܘܪܺܝܦܺܝ ܡܶܨܥܳܝܬܳܐ ܕܝܰܬܺܝܒ ܒܳܗ̇ ܒܕܰܝܪܳܐ ܕܡܳܪܝ ܐܰܦܪܶܝܡ ܕܰܒܫܽܘܪܳܝ ܨܰܘܡܳܐ ܐܰܪܒܥܺܝܢܳܝܳܐ ܒܶܗ ܫܰܪܺܝ ܘܰܒܝܽܘܡ ܫܰܒܬܳܐ ܕܢܽܘܚܳܡܶܗ ܕܠܳܥܳܙܳܪ ܫܰܡܠܝܶܗ ܟܰܕ ܟܽܠܝܽܘܡ ܒܨܺܝܪ ܩܰܠܺܝܠ ܬܡܳܢܶܐ ܐܰܘ ܬܫܰܥ ܫܳܥ̈ܝ̣ܢ ܒܛܽܘܟܳܣܶܗ ܒܝܰܕ ܚܳܫܽܘܒܬܳܐ ܐܰܠܶܟܬܪܽܘܢܺܝܟܳܝܬܳܐ ܡܛܰܟܶܣ ܗܘܳܐ.