ܒܫܡ ܐܝܬܝܐ ܡܬܘܡܝܐ ܐܠܨܝ ܐܝܬܘܬܐ ܕܟܠ ܐܚܝܕ

ܐܝܓܢܛܝܘܣ ܦܛܪܝܪܟܐ ܕܟܘܪܣܝܐ ܫܠܝܚܝܐ ܕܐܢܛܝܘܟܝܐ ܘܕܟܠܗ̇ ܡܕܢܚܐ

ܘܪܝܫܐ ܓܘܢܝܐ ܕܥܕܬܐ ܣܘܪܝܝܬܐ ܐܪܬܕܘܟܣܝܬܐ ܕܒܟܠܗ̇ ܬܒܝܠ

ܕܗܘ ܐܦܪܝܡ ܬܪܝܢܐ ܡ̄

 ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܛܽܘܒܬܳܢܽܘܬܶܗ ܕܡܳܪܝ ܒܣܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܦܽܘܠܺܝܛܽܘ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.

« ܘܬ݂ܶܗܘܽܘܢ ܠܺܝ ܣܳܗܕ̈ܶܐ » ܦܪܟܣܝܣ ܕܫܠܝ̈ܚܐ ( 8:1)

بعد تفقّد خواطركم العزيزة، نقول:

ܣܳܗܕܽܘܬܳܐ (ܣܽܘܒܳܪܳܐ) ܦܽܘܩܕܳܢܰܐ ܗܘ ܕܡܳܪܰܢ ܝܶܫܘܥ ܡܫܺܝܚܳܐ

 ܡܫܰܪܶܐ ܟܬܳܒܳܐ ܕܰܦܪܟܣܺܝܣ ܕܰܫܠܺܝ̈ܚܶܐ ܒܣܽܘܠܳܩܶܗ ܕܡܳܪܰܢ ܠܰܫܡܰܝܳܐ܆ ܟܰܕ ܥܠܰܘܗܝ ܡܶܬܬܩܺܝܡ ܘܡܶܬܒܢܶܐ ܟܠܶܗ ܣܶܦܪܳܐ ܗܳܢܳܐ ܘܬܶܫܡܫܬܗܽܘܢ ܫܠܺܝܚܳܝܬܳܐ ܕܬܰܠܡܺܝܕ̈ܶܐ܆ ܘܒܣܽܘܠܳܩܗ ܕܪܰܫ ܡܳܪܰܢ ܠܐܽܘܪܚܳܐ ܩܕܳܡ ܫܠܺܝ̈ܚܶܐ ܩܰܕ̈ܝܫܶܐ ܕܢܶܦܩܽܘܢ ܘܢܰܟܪܙܽܘܢ ܐܶܘܢܓܠܝܽܘܢ ܩܰܕܝܫܳܐ ܠܥܳܠܡܳܐ܆ ܘܰܢܫܰܡܠܘܢ ܠܬܶܫܡܶܫܬܳܐ ܕܣܳܗܕܽܘܬܳܐ ܕܐܶܬܩܰܪܝܰܬ ܠܗ̇ ܥܺܕܰܬ ܩܽܘܕܫܳܐ ܡܶܢ ܡܳܪܰܢ ܝܶܫܘܥ ܐܝܟ ܦܽܘܩܕܳܢܶܗ ܐܰܠܳܗܳܝܳܐ ܕܳܐܡܰܪ: « ܐܶܠܳܐ ܟ݁ܰܕ݂ ܬ݁ܺܐܬ݂ܶܐ ܪܽܘܚܳܐ ܕ݁ܩܽܘܕ݂ܫܳܐ ܥܠܰܝܟ݁ܽܘܢ ܬ݁ܩܰܒ݁ܠܽܘܢ ܚܰܝܠܳܐ ܘܬ݂ܶܗܘܽܘܢ ܠܺܝ ܣܳܗܕ݁̈ܐ ܒ݁ܽܐܘܪܺܫܠܶܡ ܘܰܒ݂ܟ݂ܽܠܳܗܿ ܝܺܗܽܘܕ݂ ܘܳܐܦ݂ ܒ݁ܶܝܬ݂ ܫܳܡܪ̈ܳܝܶܐ ܘܰܥܕ݂ܰܡܳܐ ܠܣܰܘܦ݁ܶܝ̈ܗܿ ܕ݁ܰܐܪܥܳܐ܂» (ܦܪܟܣܝܣ ܕܫܠــܝܚ̈ܐ 8: 1 ). ܘܠܦܽܘܬ ܦܽــܘܩܕܳܢܶܗ ܕܡܳܪܰܢ ܫܰܪܺܝــܘ ܫܠܝܺܚ̈ܐ ܠܡܰܟܪܳܙܘ ܒܳܬܰܪ ܡܳܐ ܕܰܐܓܢܰܬ ܥܠܰܝܗܽܘܢ ܪܽܘܚ ܩܽܘܕܫܳܐ ܒܝܘܡ ܦܶܢܛܺܝܩܽܘܼܣܛܺܝ܆ ܘܣܰܒܰܪܘ ܠܡܶܠܰܬ ܚܰܝ̈ܶܐ ܣܳܗܕܽܘܬܳܐ ܠܟܳܠܗ̇ ܒܪܺܝܬܳܐ܆ ܩܰܕܡܳܝܰܬ ܒܐܘܪܫܠܡ ܟܶܢ ܒܐܢܛܝܘܟ ܕܒܗ̇ ܐܶܬܩܪܺܝܘ ܬܰܠܡܺܝܕ̈ܶܐ ܡܫܺܝܚܳܝ̈ܶܐ ܠܰܙܒܰܢ̱ܬܳܐ ܩܰܕܡܳܝܬܳܐ (ܦܪܟܣܝܣ 26: 11) ܘܡܶܢܳܗ̇ ܕܰܐܢܛܺܝܘܟܝܐ ܣܰܒܰܪܘ ܠܣܰܘܦܶܝ̈ܗ̇ ܕܰܐܪܥܳܐ.

 ܨܶܡܚܰܬ̥ ܥܺܕܬܰܢ ܣܽܘܪܝܳܝܬܳܐ ܐܪܬܕܘܟܣܳܝܬܳܐ ܕܰܐܢܛܺܝܘܟ ܒܗܳܕܶܐ ܩܪܳܝܬܳܐ ܫܠܺܝܚܳܝܬܳܐ ܘܣܽܘܒܳܪܳܐ܆ ܐܝܟ ܠܰܡܦܺܐܕܳܐ ܕܡܰܢܗܰܪ ܠܒܶܪ̈ܝܳܬܳܐ ܒܡܶܠܰܝ̈ ܢܽܘܗܪܳܐ ܕܐܘܢܶܓܝܠܝܽܘܢ ܩܰܕܝܫܳܐ܆ ܘܝܰܒܶܠܘ ܐܰܒܳܗ̈ܬܳܐ ܕܥܺܕܬܰܢ ܠܡܶܠܬܳܐ ܐܶܘܢܰܓܝܠܝܬܳܐ ܘܟܳܪܽܘܙܘܬܳܐ ܠܟܽܠܗܽܘܢ ܐܰܬܪ̈ܰܘܬܳܐ ܘܰܡܕ̈ܺܝܢܳܬܳܐ ܕܐܝܬܰܝܗܶܝܢ ܗ̱ܘܰܝ̈ ܬܶܚܶܝܬ ܥܰܠܠܳـܢܽܘܼܬܶܗ ܘܫܽܘܠܛܳܢܽܘܬܶܗ ܕܟܘܪܣܝܳܐ ܫܠܺܝܚܳܝܳܐ ܕܰܐܢܛܺܝܘܟ ܘܐܶܬܦܰܪܣܰܬ݂ ܣܒܰܪܬܳܐ ܥܕܰܡܳܐ ܠܣܘ̈ܦܰܝ ܡܰܕܢܚܳܐ.

 ܘܚܰܕ ܡܶܢ ܗܳܠܶܝܢ ܐܰܒܗ̈ܳܬܳܐ ܩܰܕ̈ܝܫܶܐ ܐܝܬܘܗܝ ܗ̱ܘܐ ܡܪܝ ܓܶܘܪܓܺܝܣ ܐܶܦܣܩܽܘܦܳܐ ܕܥܰܪ̈ܒܳܝܶܐ܆ ܕܰܦܪܰܫܢܰܢ ܒܣܘܢܗܶܕܘܣ ܕܺܝܠܰܢ ܩܰܕܺܝܫܬܳܐ ܕܥܶܒܪܰܬ ܕܗܳܕܶܐ ܫܰܢ̱ܬܳܐ ܬܶܗܘܳܐ ܠܕܽܘܟ݂ܪܳܢ ܥܰܕܥܺܐܕܳܐ ܕܰܐܠܦܳܐ ܘܰܬܠܳܬܡܳܐܐ ܫܢܺܝ̈ܢ ܠܫܽܘܢܳܝܶܗ ܡܶܢ ܚܰܝ̈ܶܐ ܕܙܰܒܢܳܐ ܠܚܰܝ̈ܶܐ ܕܰܠܥܳܠܰܡ܆ ܕܒܗ̇ ܢܶܬܕܟܰܪ ܠܰܥܒܳܕܰܘܗ̈ܝ ܛܳܒ̈ܶܐ ܘܠܰܐܓܽܘܢܶܗ ܫܠܺܝܚܳܝܳܐ܆ ܘܪܳܥܝܽܘܬܶܗ ܕܰܛܝܳܪܶܗ ܕܰܡܫܺܝܚܳܐ ܒܕܶܚܠܰܬ ܐܰܠܗܳܐ܆ ܒܰܬܚܽܘܡ̈ܶܐ ܕܫܰܪ̈ܒܳܬܳܐ ܕܥܰܪ̈ܒܳܝܶܐ ܒܬܰܝܡܢܶܗ ܕܰܐܬܪܳܐ ܕܥܶܝܪܐܩ (ܒܝܬ ܢܰܗܪܺܝܢ) ܘܓܳܙܰܪܬܐ ܥܰܪܒܳܝܬܳܐ܆ ܘܐܝܟܰܢ ܡܥܰܫܶܢ ܗ̱ܘܳܐ ܠܰܡܗܰܝ̈ܡܢܶܐ ܒܗܳܠܶܝܢ ܐܰܬܪ̈ܰܘܬܳܐ ܘܰܡܫܰܪܰܪ ܗ̱ܘܳܐ ܠܗܘܢ ܒܰܗܝܡܳܢܽܘܬܗܽܘܢ ܕܰܒܡܳܪܰܢ ܝܫܘܥ ܡܫܺܝܚܳܐ.

ܥܕܬܐ ܣܘܪܝܳܝܬܐ ܕܐܢܛܝܘܟ ܣܳܗܕܬܳܐ ܒܰܐܬܪ̈ܰܘܳܬܐ ܕܥܰܪ̈ܒܳܝܶܐ ܘܰܐܬܪ̈ܰܘܳܬܐ ܐ̱ܚܪ̈ܳܢܝܳܬܳܐ ܥܕܰܡܳܐ ܠܐܰܬܪܳܐ ܕܨܺܝܢܳܝ̈ܐ

ܡܶܢ ܝܰܘܡܳܐ ܩܰܕܡܝܳܐ ܕܰܕܢܰܚܘ ܒܶܗ ܙܰܠ̈ܓܰܝ ܨܰܦܪܳܐ ܕܡܫܺܝܚܳܝܘܼܬܳܐ ܒܰܒܪܺܝܬܳܐ܆ ܘܥܕܬܳܐ ܕܰܐܢܛܺܝܘܟ ܠܳܐ ܪܢܳܬ ܘܠܳܐ ܒܶܩܪܰܬ ܒܰܪ̈ܕܽܘܦܝܶܐ܆ ܐܶܠܳܐ ܐܶܬܥܰܫܢܰܬ ܒܚܰܝܠܳܐ ܕܪܽܘܚܳܐ ܩܰܕܝܫܳܐ ܕܰܐܓܶܢ ܒܗ̇ ܘܡܕܰܒܰܪ ܠܗ̇ ܥܕܰܡܳܐ ܠܝܰܘܡܳܐ ܕܝܰܘܡܳܢܳܐ܆ ܘܰܡܗܰܕܶܐ ܠܗ̇ ܒܳܗܢܳܐ ܥܳܠܡܳܐ ܕܬܰܣܗܶܕ ܠܰܫܪܳܪܳܐ ܕܠܳܐ ܙܰܘܥܬ̥ܳܐ ܡܶܢ ܚܰܝܠܶܗ ܕܪܳܕܽܘܦܳܐ ܘܥܰܣ̈ܩܳܬܳܐ ܘܡܥܺܝܩܳܢ̈ܝܳܬܳܐ ܕܗܠܝܢ ܪ̈ܕܽܘܦܝܶܐ܆ ܐܠܐ ܕܶܢܚܰܬ̥ ܒܰܒܪܺܝܬܳܐ ܐܝܟ ܡܢܳܪܬܳܐ ܢܰܗܺܝܪܬܳܐ ܕܰܛܥܺܝܢܳܐ ܠܢܽܘܗܪܳܗ̇ ܕܰܣܒܰܪܬܳܐ ܐܶܘܰܢܓܠܝܬܳܐ ܠܟܽܠܗܘܢ ܥܰܡ̈ܡܶܐ ܕܰܐܪܥܳܐ ܕܰܡܗܰܠܟ݂ܺܝܢ ܒܚܶܫܽܘܟ݂ܳܐ܆ ܘܰܕ݂ܝܳܬ݂ܒܺܝܢ ܒܰܐܪܥܳܐ ܕܛܶܠܳܠܰܝ̈ ܡܰܘܬܳܐ (ܐܫܥܝܐ (2: 9܆ ܡܫܰܟܢܳܐ ܦܘܪܩܳܢܳܐ ܘܡܰܥܡܕܳܐ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܘܚܳܐ ܩܰܕܝܫܳܐ (ܡܬܝ 19: 28) ܟܽܠ ܡܰܢ ܕܒܡܳܪܰܢ ܝܫܘܥ ܡܫܺܝܚܳܐ ܡܗܰܝܡܶܢ܆ ܘܐܰܬܪܳܐ ܕܥܰܪ̈ܒܳܝܶܐ ܐܝܬܘܗܝ ܗ̱ܘܐ ܚܰܕ ܡܶܢ ܐܰܬܪ̈ܰܘܬܳܐ ܢܰܩܺܝ̈ܦܶܐ ܕܟܽܘܪܣܳܝܳܐ ܫܠܺܝܚܳܝܳܐ ܕܰܐܢܛܝܘܟ܆ ܗܳܟܰܢܳܐ ܕܶܝܢ ܛܥܶܢܘ ܐܰܒܗ̈ܳܬܳܐ ܕܥܺܕܬܰܢ ܠܢܺܝܪܳܗ̇ ܕܰܣܒܰܪܬܳܐ ܕܡܰܠܟܽܘܬܳܐ ܫܰܡܝܳܢܺܝܬܳܐ ܠܗܳܠܶܝܢ ܕܽܘ̈ܟܝܳܬܳܐ܆ ܘܐܰܠܶܦܘ ܠܥܰܡ̈ܡܶܝܗ̇ ܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ܆ ܡܛܽܠ ܗܳܕܶܐ ܓܶܝܪ ܩܰܒܶܠܝ̈ ܫܰܪ̈ܒܳܬܳܐ ܣܰܓܝ̈ܐܬܳܐ ܡܶܢ ܥܰܪ̈ܒܳܝܶܐ ܠܗܰܝܡܳܢܽܘܬܳܐ܆ ܘܰܚܝܰܝ̈ ܠܗܳܕ ܬܰܘܕܺܝܬܳܐ ܐܝܟ ܗܰܕ̈ܳܡܶܐ ܒܥܺܕܬܳܐ ܣܽܘܪܝܳܝܳܬܐ ܐܳܪܬܘܕܘܟܣܳܝܬܳܐ ܕܰܐܢܛܝܽܘܟܝܰܐ܆ ܘܡܶܢ ܗܳܠܶܝܢ ܫܰܪ̈ܒܳܬܳܐ ܕܗܰܝܡܶܢܝ̈: ܚܶܡܝܰܪ̈ܳܝܶܐ܆ ܩܰܛܪ̈ܳܝܶܐ܆ ܬܓ݂ܠܒܝ̈ܐ܆ ܒܢ̈ܝ ܟܢܕܗ̈܆ ܒܢ̈ܝ ܛܝ܆ ܥܩܝܠ܆ ܬܢܘܟ܆ ܔܣܐܢܳܝ̈ܐ܆ ܐܠܢܡܪ܆ ܒܢ̈ܝ ܫܰܝܒܐܢ (ܬ݂ܥܠܒܗ̈)܆ ܒܢ̈ܝ ܒܟܪ ܒܪ ܘܐܝܠ ܡܢ ܕܝܐܪ ܒܟܪ܆ ܡܳܢܕ݂ܪ̈ܳܝܶܐ܆ ܘܐ̱ܚܪ̈ܳܢܶܐ.

ܒܳܬܰܪ ܡܳܐ ܕܩܰܒܶܠܘ ܥܰܪ̈ܒܳܝܶܐ ܠܗܰܝܡܳܢܽܘܬܳܐ ܡܫܺܝܚܳܝܬܳܐ܆ ܛܰܟܣܰܬ ܥܺܕܬܳܐ ܠܡܕܰܒܪܳܢܽܘܬܗܽܘܢ ܥܺܕܬܳܢܳܐܺܝܬ܆ ܘܫܰܬܐܣܰܬ ܠܗܽܘܢ ܐܶܦܣܩܽܘܦܘ̈ܳܬܳܐ܆ ܘܣܰܓܺܝ ܡܶܢ ܗܳܠܶܝܢ ܐܶܦܣܩܽܘܦܘ̈ܳܬܳܐ ܛܳܒ ܐܶܬܝܕ̈ܰܥܝ ܒܡܰܟܬܰܒܙܰܒܢܳܐ ܕܥܺܕܬܳܐ܆ ܘܡܶܢ ܗܳܠܶܝܢ ܐܶܦܣܩܽܘ̈ܦܘܳܬܳܐ ܢܰܔܪܐܢ ܘܐܠܝܰܡܐܡܰܗ̈ ܕܐܶܫܬ̊ܰܬ̥ܐܰܣܬ̥ ܫܢܰܬ 225 ܡ. ܘܡܰܕܟܰܪ ܠܰܢ ܡܰܟܬܰܒܙܰܒܢܳܐ ܥܺܕܬܳܢܳܝܳܐ ܠܶܫܬܐ ܡܶܢ ܐܶܦܣܩ̈ܽܘܦܶܝܗ̇ ܕܐܶܬܛܰܝܰܒܘ ܒܣܘܢܗܳܕܘܣ ܬܶܒܶܠܳܝܬܳܐ ܘܩܰܕܺܝܫܬܳܐ ܕܢܺܝܩܺܝܐ ܫܢܰܬ 325 ܡ܆ ܘܬܽܘܒ ܡܶܢ ܐܶܦܣܩ̈ܘܦܶܐ ܝܕ̈ܺܝܥܶܐ ܕܢܔܪܐܢ ܩܤ ܒܢ ܣܐܥܕܗ̈ (600+)܆ ܕܐܝܬܘܗܝ ܗ̱ܘܐ ܟܳܪܽܘܙܳܐ ܡܗܺܝܪܳܐ ܘܚܰܟܺܝܡܳܐ܆ ܗܰܘ ܕܺܐܝܬ ܗ̱ܘܐ ܠܶܗ ܥܝܳܕܳܐ ܕܢܺܐܙܰܠ ܠܫܽܘܩܳܐ ܕܰܫܡܶܗ ܥܘܟܐܜ ܘܢܰܟܪܶܙ ܘܢܰܣܰܒܰܪ ܒܡܫܝܚܐ ܠܽܘܩܒܰܠ ܚܰܢܦܽܘܬܳܐ܆ ܟܰܕ ܛܥܺܝܢ ܠܡܽܘܪܢܝܬܳܐ ܐܘܟܺܝܬ ܚܽܘܛܪܳܐ ܒܐܝܕܗ.

ܥܳܗܶܕ ܠܰܢ ܡܰܟܬܰܒܙܰܒܢܳܐ ܥܺܕܬܳܢܳܝܳܐ ܒܳܬܰܪ ܕܳܪܐ ܪܒܺܝܥܳܝܳܐ ܠܰܫܡ̈ܗܶܐ ܕܗܳܠܶܝܢ ܐܶܦܣܩܽܘ̈ܦܘܳܬܳܐ ܐܝܟ: ܬܰܕܡܘܪ܆ ܔܰܕܰܪ ܐܳܡ ܩܰܝܤ܆ ܒܘܨܪܰܐ܆ ܦܹ݁ܝܬܪܰܐ܆ ܘܰܐܠܚܝܪܗ̈. ܘܒܰܙܒܰܢ ܙܒܰܢ ܡܰܕܟܰܪ ܠܰܢ ܕܶܝܢ ܕܐܺܝܬ ܠܳܗܠܶܝܢ ܫܰܪ̈ܒܳܬܳܐ ܝܰܬܺܝܪ ܡܶܢ ܚܰܕ ܐܶܦܣܩܽܘܦܳܐ܆ ܘܐܶܬܟܰܢܝܘ ܗܳܠܶܝܢ ܐܶܦܣܩܽܘܦ̈ܶܐ ܒܰܫܡܳܐ ܕܐܶܦܣܩ̈ܽܘܦܶܐ ܕܡܰܫܟ̈ܢܶܐ܆ ܥܰܠ ܕܠܰܝܬ ܗ̱ܘܐ ܠܗܽܘܢ ܥܺܕ̈ܳܬܳܐ ܐܶܠܳܐ ܚܳܙܩܺܝܢ ܗ̱ܘܘ ܡܶܢ ܕܽܘܟܬܳܐ ܠܰܐܚܪܺܬܳܐ ܥܰܡ ܗܳܠܶܝܢ ܫܰܪ̈ܒܳܬܳܐ܆ ܘܰܡܨܰܠܶܝܢ ܗ̱ܘܘ ܘܰܡܫܰܡܠܶܝܢ ܗ̱ܘܘ ܠܛܶܟܣܳܐ ܥܺܕܬܳܢܳܝܳܐ ܬܚܶܝܬ ܡ̈ܛܰܠܠܶܐ ܘܡܰܫــܟ̈ܢܶܐ܆ ܘܡܶܢ ܐܶܦܣܩܽܘ̈ܦܘܳܬܳܐ ܡܫــܡ̈ܗܳܬܳܐ ܕܥܰܪ̈ܒܳـܝܳܐ: ܐܶܦܣܩܽܘܦܘܬܳܐ ܕܥܰܪ̈ܒܳܝܶܐ ܓܰܘܳܢܳܐܺܝܬ܆ ܗܳܝ ܕܚܰܕ ܡܶܢ ܐܶܦܣܩܽܘܦܝ̈ܗ̇ ܡܫܰܡ̈ܗܶܐ ܐܺܝܬܰܘܗܝ ܗ̱ܘܐ ܡܪܝ ܓܶܘܪܓܺܝܤ ܕܶܐܬܟܰܢܺܝ ܒܰܫܡܳܗ̇ ܐܶܦܣܩܽܘܦܳܐ ܕܥܰܪ̈ܒܳܝܶܐ܆ ܘܐ̱ܚܪܺܬܐ ܐܺܝܬܶܝܗ̇ ܕܰܒܢ̈ܰܝ ܬܰܓܼܠܒ. ܘܬܽܘܒ ܟܬܰܒ ܡܰܟܬܰܒܙܰܒܢܳܐ ܥܺܕܬܳܢܳܝܳܐ ܥܰܠ ܐܶܦܣܩܽܘܦܘܬܳܐ ܐ̱ܚܪܺܬܳܐ ܕܺܐܝܬܝܶܗ̇ ܗ̱ܘܳܬ̥ ܒܡܰܠܟܽܘܬܳܐ ܕܰܒܢ̈ܰܝ ܓܼܰܣܐܢ܆ ܕܰܐܩܺܝܡܰܬ ܡܶܢ ܡܕܺܝܢ̱ܬܳܐ ܕܐܠܔܐܒܝܗ̈ (ܚܘܪܐܢ – ܒܣܘܪܝܐ) ܐܝܟ ܩܶܢܛܪܽܘܢܳܐ ܠܳܗ̇܆ ܘܺܐܝܬ ܗ̱ܘܐ ܒܳܗ̇ ܝܰܬܺܝܪ ܡܶܢ ܡܳܐܐ ܘܥܶܣܪܺܝܢ ܕܰܝܪ̈ܶܐ ܒܕܳܪܐ ܫܬܺܝܬܳܝܳܐ ܘܡܶܢ ܐܶܦܣܩܽܘܦܶܝ̈ܗ̇ ܝܕ̈ܺܝܥܶܐ ܕܡܰܪܥܺܝܬܳܐ ܗܕܐ ܡܪܝ ܬ̥ܶܐܘܿܕܽܘܿܪ ܛܰܢܳܢܳܐ ܗܰܘ ܕܶܐܬܬܰܣܪܰܚ ܐܶܦܣܩܽܘܦܳܐ ܠܥܰܪ̈ܒܳܝܶܐ ܥܰܡ ܡܪܳܝ ܝܰܥܩܽܘܒ ܒܘܪܕܥܳܢܳܐ܆ ܘܒܶܝܬ ܡܩܳܡܳܐ ܕܚܰܣܝܽܘܬܶܗ ܐܝܬܘܗܝ ܗ̱ܘܐ ܒܰܡܕܺܝܢܰܬ̥ ܒܽܘܨܪܰܐ ܕܫܐܡ.

ܡܶܬܓܰܠܝܳܐ ܒܛܝܠܘܬܳܐ ܕܰܐܒܳܗ̈ܳܬܰܢ ܣܽܘܪ̈ܝܳܝܶܐ ܡܫܰܒܚ̈ܶܐ ܘܥܘܫܢܳܐ ܕܣܽܘܒܳܪܳܐ ܕܥܺܕܬܰܢ ܩܰܕܝܫܬܳܐ ܒܰܐܬܪ̈ܰܘܬܳܐ ܕܥܰܪ̈ܒܳܝܶܐ ܒܬܽܘܪܓܳܡܳܐ ܕܰܟܬܳܒ̈ܶܐ ܣܰܓܝ̈ܐܐ ܠܠܶܫܳܢܳܐ ܥܰܪܰܒܝܳܐ ܡܰܠܽܘܢ ܕܝܢ ܠܬܽܘܪܓܡܳܐ ܕܐܘܢܰܓܝܠܝܽܘܢ ܩܰܕܺܝܫܳܐ ܒܝܰܘ̈ܡܰܝ ܡܪܝ ܝܽܘܚܰܢܳܢ ܐܰܒܳܐ ܕܣܶܕܪ̈ܶܐ ܫܢܰܬ݂ 643 ܡ.

ܐܶܬܡܰܬܚܰܬ ܣܳܗܕܽܘܬܳܐ ܕܥܺܕܬܰܢ ܣܽܘܪܝܳܝܳܬܳܐ ܒܚܰܝܠܳܐ ܪܰܒܳܐ ܠܳܐ ܒܰܠܚܽܘܕ ܒܕܽܘ̈ܟܝܳܬܳܐ ܩܰܪ̈ܺܝܒܳܬܳܐ ܡܶܢ ܬܚܽܘܡܳܐ ܕܟܽܘܪܣܝܳܐ ܫܠܺܝܚܳܝܳܐ ܐܝܟ ܐܰܬܪ̈ܰܘܬܳܐ ܕܥܰܪ̈ܒܳܝܶܐ܆ ܐܶܠܳܐ ܡܛܳܬ ܠܰܐܬܪ̈ܰܘܬܳܐ ܣܰܓܝ̈ܐܶܐ ܘܰܡܫܰܚܠܦ̈ܶܐ ܐܝܟ: ܦܳܪܶܣ܆ ܐܦܓ݂ܐܢܣܬܐܢ܆ ܗܶܢܽܕܘ܆ ܨܺܝܢܺܝ܆ ܐܰܪܡܺܝܢܺܝܰܐ܆ ܐܬܪܐ ܕܟܽܘܫܝ̈ܶܐ܆ ܐܰܣܺܝܐ܆ ܘܰܐܬܪ̈ܰܘܬܳܐ ܐ̱ܚܪ̈ܳܢܶܐ ܕܡܰܕܢܚܳܐ. ܥܺܕܬܰܢ ܕܝܢ ܕܒܗܢܽܕܘ ܛܽܘܦ݁ܣܳܐ ܐܝܬܝܗ̇ ܠܦܽܘܠܚܳܢ ܣܒܰܪܬܳܐ ܘܰܠܣܳܗܕܽܘܬܳܐ ܕܐܒܳܗ̈ܳܬܰܢ ܒܰܒܪܺܝܬܳܐ܆ ܕܫܰܪܺܝܪܳܐܺܝܬ ܐܝܬܝܗ̇ ܡܰܪܓܳܢܺܝܬܳܐ ܕܥܺܕܬܳܐ ܣܽܘܪܝܳܝܳܬܐ ܕܰܐܢܛܺܝܘܟ ܘܫܽܘܒܚܳܗ̇ ܒܡܰܕܢܚܳܐ.

ܣܳܗܕܳܐ ܫܰܪܝܼܪܐ ܡܪܝ ܓܘܪܓܝܤ ܕܥܪ̈ܒܝܐ (724+)

ܠܐ ܫܟܺܝܚ ܒܰܝܢܳܬ ܕ̈ܰܦܶܐ ܕܬܰܫܥܺܝܬ ܙܰܒܢܳܐ ܥܺܕܬܳܢܳܝܬܳܐ ܣܰܓܺܝ ܥܰܠ ܗܳܢ ܟܽܘܡܪܳܐ ܩܰܕܝܫܳܐ ܘܝܰܕܽܘܥܬ݂ܳܢܳܐ ܡܪܝ ܓܘܪܓܝܤ ܐܶܦܣܩܽܘܦܳܐ ܕܥܰܪ̈ܒܳܝܶܐ܆ ܕܐܝܬܘܗܝ ܗ̱ܘܐ ܚܰܕ ܡܶܢ ܬܰܠܡܝܕ̈ܶܐ ܕܡܰܕܪܰܫܬܳܐ ܕܩܶܢܫܪܺܝܢ ܬܶܐܽܘܿܠܽܘܿܓ̥ܳܝܬܳܐ. ܐܶܬܬܰܠܡܰܕ ܡܪܝ ܓܘܪܓܝܣ ܒܝܰܘ̈ܡܶܐ ܩܰܕ̈ܡܶܐ ܕܰܥܠܝܡܽܘܬܶܗ ܠܡܪܝ ܣܐܘܺܝܪܐ ܣܐܒܘܟ݂ܬ܆ ܟܕ ܒܝܰܕ̈ܥܬܳܐ ܕܡܶܠܰܬ ܚܝ̈ܐ ܗܘܳܐ ܓܝܪ ܒܚܺܝܪܳܐ܆ ܘܠܳܗ̇ ܟܕ ܠܳܗ̇ ܒܫܰܪܺܝܪܽܘܬܳܐ ܚܝܳܐ܆ ܘܒܗܳܝ ܪܶܚܡܬܳܐ ܕܟܠ ܚܶܟ̈ܡܳܬܳܐ ܕܐܝܬܝܗ̇ ܦܺܝܠܳܣܽܘܦܘܬܐ ܡܰܠܦܳܢܳܐ ܛܒܺܝܒܳܐ ܐܶܬܟܢܺܝ܆ ܘܠܟܽܠܗܽܘܢ ܕܶܝܢ ܣܶܦܪ̈ܶܐ ܕܪܽܘܚܳܐ ܕܒܟܬܳܒ ܩܽܘܕܫܳܐ ܐܰܟܪܶܙ ܘܦܰܫܶܩ܆ ܘܰܒܝܽܘܠܦܳܢ̈ܶܐ ܕܫܟ݂ܺܝܚܺܝܢ ܗ̱ܘܰܘ ܒܰܙܒܰܢ ܚܰܝ̈ܘܰܗܝ ܗܪܰܓ ܒܥܰܡܺܝܩܽܘܬܳܐ܆ ܐܝܟ ܐܰܠܳܗܳܝ̈ܳܬ̥ܳܐ܆ ܐܶܣܛܪܽܘܢܽܘܡܺܝܰܐ (ܚܽܘܫܒܳܢ ܟܰܘܟܒ̈ܶܐ)܆ ܡܰܟܬܰܒܙܰܒܢܳܐ܆ ܘܠܶܫܳܢܳܐ ܣܽܘܪܝܳܝܐ.

ܒܢܰܟܦܽܘܬܳܐ ܘܰܟܢܺܝܟܽܘܬܳܐ ܠܒܶܫ ܠܐܣܟܺܝܡܳܐ ܡܒܰܪܟܳܐ ܕܕܰܝܪܳܝܽܘܬܳܐ ܘܰܪܕܳܐ ܒܐܽܘܪܚܳܗ̇ ܒܕ̥ܶܚܠܰܬ̥ ܐܰܠܗܳܐ ܘܪܶܚܡܬ̥ܶܗ܆ ܟܕ ܛܥܺܝܢ ܠܢܺܝܪܶܗ ܕܰܡܫܺܝܚܳܐ܆ ܘܨܡܰܚ ܓܶܝܪ ܐܝܟ ܢܰܒ̥ܪܰܫܬ̊ܳܐ ܒܚܰܝ̈ܶܐ ܕܥܳܢܘܳܝܽܘܬܳܐ ܘܰܐܒܺܝܠܽܘܬܳܐ܆ ܘܶܐܬܬܰܣܪܰܚ ܕܶܝܢ ܩܰܫܺܝܫܳܐ ܟܶܢ ܐܶܦܣܩܽܘܦܳܐ ܠܫܰܪ̈ܒܳܬܳܐ ܥܰܪ̈ܰܒܳܝܳܬܳܐ ܕܒܢ̈ܰܝ ܛܝ܆ ܥܩܝܠ܆ ܘܬܢܘܟܼ܆ ܘܒܝܬ ܚܰܣܝܽܘܬܶܗ ܐܝܬܘܗܝ ܗ̱ܘܳܐ ܒܰܡܕܺܝܢܰܬ (ܥܰܐܩܽܘܠܰܐ) ܕܡܶܬܝܰܕܥܳܐ ܝܰܘܡܳܢܳܐ ܒܰܫܡܳܐ ܕܟܽܘܦܰܐ ܒܰܐܬܪܳܐ ܕܥܺܝܪܐܩ. ܘܕܰܒܰܪ ܡܰܢ ܠܡܰܪܥܺܝܬܶܗ ܒܩܰܕܺܝܫܽܘܬܳܐ ܘܙܰܕܺܝܩܽܘܬܳܐ ܘܥܰܡ̈ܠܶܐ ܕܦܽܘܪܫܳܢܳܐ ܬܠܳܬܺܝܢ ܘܰܬܡܳܢܶܐ ܫܢܺܝ̈ܢ ܥܕܰܡܳܐ ܕܫܰܢܺܝ ܡܶܢ ܚܰܝ̈ܶܐ ܥܳܠܡܳܢܳܝ̈ܶܐ ܠܚܰܝ̈ܶܐ ܫܡܰܝܳܢܳܝ̈ܶܐ ܫܢܰܬ (724+) ܒܣܰܝܒܽܘܬܳܐ ܒܗܺܝܠܬܳܐ܆ ܒܳܬܰܪ ܡܳܐ ܕܰܐܣܗܶܕ ܠܡܫܺܝܚܳܐ ܘܣܰܒܰܪ ܡܶܠܬܶܗ ܫܰܪܺܝܪܬܳܐ ܠܟܽܠܗܶܝܢ ܫܰܪ̈ܒܳܬܳܐ ܕܥܰܪ̈ܒܳܝܶܐ ܒܢ̈ܰܝ ܡܰܪܥܺܝܬܶܗ ܘܫܰܪܰܪ ܐܶܢܽܘܢ ܒܚܽܘܒܶܗ ܕܡܳܪܰܢ ܘܐܠܳܗܰܢ ܝܫܘܥ ܡܫܺܝܚܳܐ.

ܣܳܗܕܳܐ ܩܰܕܝܫܳܐ ܚܰܐܪܶܬ̥ ܒܶܢ ܟ݁ܰܥܒ ܘܫܰܪܒܳܐ ܕܣܳܗܕ̈ܶܐ ܩܰܕ̈ܝܫܶܶܐ ܚܶܡܝܰܪ̈ܳܝܶܐ ܣܘܪ̈ܝܳܝܶܐ ܐܘܪ̈ܬܕܘܟܣܘ

ܡܶܫܬܰܥܶܐ ܠܰܢ ܡܰܟܬܒܰܙܰܒܢܳܐ ܥܺܕܬܳܢܳܝܳܐ ܥܰܠ ܣܳܗܕ̈ܶܐ ܒܪܺܝܪ̈ܶܐ ܒܚܶܡܝܰܪ ܒܰܐܬܪܳܐ ܕܣܰܒܰܐ ܕܝܰܡܰܢ܆ ܗܳܠܶܝܢ ܣܳܗܕ̈ܶܐ ܣܰܝܒܰܪܘ ܪܕܽܘܦܝܳܐ ܕܡܰܠܟܳܐ ܝܺܗܽܘܕܳܝܳܐ ܕܗܽܘ ܡܰܣܪܽܘܩ (ܕ̥ܘ ܢܽܘܐܰܤ) ܕܰܐܡܠܶܟ ܥܰܠ ܐܬܪܗܽܘܢ ܫܢܰܬ 523 ܡ܆ ܘܟܰܕ ܐܰܡܠܶܟ ܐܶܙܰܠ ܠܶܐܡܳܐ ܕܰܡܕ̈ܺܝܢܳܬܳܐ ܕܚܶܡܝܰܪ ܕܰܫܡܳܗܿ ܜܰܦܐܪ ܕܰܢܩܺܝܡ ܩܪܒܳܐ ܥܰܡ ܟܽܘܫܳܝ̈ܶܐ ܕܥܳܡܪܝܼܢ ܗ̱ܘܰܘ ܒܳܗ̇܆ ܘܠܳܐ ܡܨܶܐ ܗ̱ܘܳܐ ܥܠܰܝܗܽܘܢ ܒܰܩܪܳܒܳܐ ܐܶܠܳܐ ܢܟܰܠ ܒܗܽܘܢ ܒܺܝܫܳܐܺܝܬ ܘܩܛܰܠ ܐܶܢܽܘܢ܆ ܘܐܰܘܩܶܕ ܠܥܺܕܬܗܽܘܢ ܒܢܽܘܪܳܐ܆ ܒܳܬܰܪ ܡܳܐ ܕܰܗܦܰܟܼ ܗ̱ܘܐ ܒܩܝܳܡܳܐ ܕܫܰܝܢܳܐ ܕܥܒܰܕ ܥܡܗܽܘܢ. ܘܫܰܕܰܪ ܬܘܒ ܡܰܣܪܽܘܩ ܠܟܳܗ̈ܢܶܐ ܕܺܝܗܽܘܕ̈ܳܝܶܐ ܥܰܡ ܕܰܚܫ̈ܶܐ ܘܚܰܝ̈ܠܶܐ ܠܟܽܠ ܕܽܘܟ݁̈ܝܳܢ ܒܡܰܠܟܘܬܶܗ ܕܢܶܩܛܠܽܘܢ ܠܰܡܗܰܝܡܢ̈ܶܐ ܡܫܺܝܚ̈ܳܝܶܐ܆ ܐܶܠܐ ܢܩܰܒܠܽܘܢ ܠܗܰܝܡܳܢܽܘܬܳܐ ܕܺܝܗܘܕܳܝ̈ܐ܆ ܘܰܦܩܰܕ ܗ̱ܘܳܐ ܕܢܶܬܬܰܘܩܰܕ ܟܽܠܡܰܢ ܕܰܗܘܳܐ ܣܶܬܳܪܳܐ ܠܰܡܫܺܝ̈ܚܳܝܶܐ܆ ܗܽܘ ܘܒܰܝܬܶܗ܆ ܘܰܕ݂ܢܶܣܒ݂ܘܼܢ ܠܟܽܠܗܽܘܢ ܡܳܡܽܘ̈ܢܘܗܝ.

ܠܳܐ ܣܦ݂ܰܩ ܠܶܗ ܠܡܰܠܟܳܐ ܗܳܢܳܐ ܘܠܳܐ ܣܒܰܥ ܡܶܢ ܕܡܳܐ ܕܣܗ̈ܕܐ ܕܰܩܛܰܠ ܐܶܠܳܐ ܫܰܕܰܪ ܠܟܳܗ̈ܢܶܐ ܕܺܝܗܼܘܕ̈ܝܶܐ ܥܰܡ ܕܰܚܫ̈ܶܐ ܘܚܰܝ̈ܠܶܐ ܠܢܰܔܪܐܢ܆ ܘܰܐܚܕܪ ܠܗ̇܆ ܘܟܰܕ ܠܳܐ ܐܶܬܡܨܺܝ ܕܢܶܥܒܰܪ ܘܢܶܟ݂ܒܘܿܫ ܠܰܡܕܺܝܢ̱ܬܳܐ܆ ܫܰܕܰܪ ܠܟܳܗܢ̈ܘܰܗܝ ܟܰܕ ܛܥܺܝܢܺܝܢ ܠܰܟܬܳܒܳܐ ܕܫܰܝܢܳܐ ܕܰܚܬܺܝܡ ܒܰܚܬܳܡܶܗ ܡܰܠܟܳܝܳܐ܆ ܕܒܶܗ ܐܫܬܰܘܕܺܝ ܠܗܽܘܢ ܫܰܝܢܳܐ ܐܶܢ ܗܘ ܢܶܥܒܰܪ ܠܰܡܕܺܝܢ̱ܬܳܐ ܕܠܳܐ ܚܰܪܒܳܐ ܘܰܩܪܳܒܳܐ܆ ܒܪܰܡ ܕܶܝܢ܆ ܟܰܕ ܢܦܰܩܘ ܟܽܠܗܽܘܢ ܠܐܘܼܪܥܶܗ܆ ܠܳܐ ܢܛܰܪ ܫܽܘܘܕܝܶܗ ܐܶܠܳܐ ܐܶܣܰܪ ܐܶܢܽܘܢ ܘܫܰܕܰܪ ܠܚܰܝ̈ܠܰܘܳܬܶܗ ܘܰܦܟܰܪܘ ܠܟܽܠܗܽܘܢ ܡܫܺܝܚܳܝ̈ܶܐ ܕܐܺܝܬ݂ܰܝܗܘܿܢ ܗ̱ܘܘ ܒܰܡܕܺܝܢ̱ܬܳܐ.

ܘܡܶܢ ܐܰܬܠܺܝ̈ܛܶܐ ܕܗܰܝܡܢܽܘܬܳܐ ܒܰܡܕܺܝܢ̱ܬܳܐ ܕܢܰܔܪܐܢ ܩܰܕܝܫܳܐ ܘܣܳܗܕܳܐ ܡܪܝ ܚܐܪܬ̥ ܒܰܪ ܟ݁ܰܥܒ܆ ܕܐܝܬܰܘܗܝ ܗ̱ܘܳܐ ܪܺܝܫ ܥܰܡܳܗ̇ ܘܚܰܕ ܡܶܢ ܪܘܪ̈ܒܝܗ̇ ܡܰܗܝܡܢ̈ܶܐ܆ ܣܳܒܳܐ ܙܰܗܝܳܐ ܕܠܳܐ ܟܦܰܪ ܒܰܡܫܺܝܚܳܐ ܩܕܳܡ ܡܰܠܟܳܐ ܥܰܘܳܠܳܐ܆ ܒܪܰܡ ܐܰܣܗܶܕ ܘܒܰܕܶܩ ܠܗܰܝܡܳܢܽܘܬܳܐ ܫܰܪܺܝܪܬܳܐ ܘܰܬܪܺܝܨܬܳܐ܆ ܘܐܶܬܚܰܘܝ ܩܕܳܡ ܥܰܡܶܗ ܐܝܟ ܘܰܟܺܝܠܳܐ ܚܰܟܺܝܡܳܐ ܘܒܽܘܟ̥ܢܳܐ ܕܣܳܡ ܢܰܦܫܶܗ ܚܠܳܦ ܩܽܘܛܢܶܗ܆ ܘܐܶܬ݂ܩܰܕܰܡ ܒܚܰܕܽܘܬܳܐ ܕܰܢܡܽܘܬ ܡܛܽܠ ܫܡܳܐ ܕܡܳܪܶܗ܆ ܟܰܕ ܐܳܡܰܪ ܘܰܡܙܰܡܰܪ ܥܰܡ ܡܪܝ ܦܘܠܘܿܤ ܫܠܺܝܚܳܐ: «ܡܰܢܽܘ ܢܶܦ݂ܪܫܰܢܝ ܡܶܢ ܚܽܘܒ݁ܶܗ ܕ݁ܰܡܫܺܝܚܳܐ܆ ܐܽܘܠܨܳܢܳܐ ܐܰܘ ܚܒ݂ܽܘܫܝܳܐ ܐܰܘ ܪܕ݂ܽܘܦ݂ܝܳܐ ܐܰܘ ܟ݁ܰܦ݂ܢܳܐ ܐܰܘ ܥܰܪܛܶܠܳܝܽܘܬ݂ܳܐ ܐܰܘ ܩܺܢܕ݂ܺܝܢܳܘܣ ܐܰܘ ܣܰܝܦ݂ܳܐ» (ܖ̈ܗܘܡܝܐ 35:8)܆ ܘܶܐܬܟܰܠܰܠ ܒܰܟܠܺܝܠ ܣܳܗܕܽܘܬܳܐ ܗܽܘ ܘܗܳܠܶܝܢ ܕܥܰܡܶܗ܆ ܟܶܢ ܦܩܰܕ ܡܰܠܟܳܐ ܛܳܠܽܘܡܳܐ ܕܰܚ̈ܫܰܘܗܝ ܕܢܰܘܩܕ݂ܽܘܢ ܠܥܺܕ̈ܳܬܳܐ ܘܰܠܟܽܠ ܡܰܢ ܕܐܝܬ ܒܓܰܘܗܶܝܢ܆ ܘܟܰܕ ܚܙܰܝ̈ ܢܶܫ̈ܶܐ ܕܢܰܔܪܐܢ ܐܝܟܰܢ ܐܰܥܶܠܘ ܦܳܠ̈ܚܶܐ ܠܓܰܒܪ̈ܰܝܗܶܝܢ ܠܥܺܕ̈ܳܬܳܐ ܘܐܰܘܩܶܕܘ ܐܶܢܽܘܢ܆ ܠܰܒܶܒܝ̈ ܠܚܕܳܕ̈ܶܐ ܘܰܪ̈ܗܶܛܝ ܥܰܡ ܒܢܰܝ̈ܗܶܝܢ ܘܥܰܠܝ̈ ܠܗܶܝܢ ܠܥܺܕ̈ܳܬܳܐ ܕܰܗܘ̈ܰܝ ܐܝܟ ܐܰܬܽܘܢܳܐ ܕܢܽܘܪܳܐ ܕܐܳܦ݂ ܗܶܢܶܝܢ ܢܶܩܢ̈ܝܳܢ ܟܠܺܝ̈ܠܶܐ ܕܣܳܗܕܘܼܬ݂ܳܐ.

ܢܶܛܪܰܬ ܠܢ ܡܰܟܬܒܳܢܽܘܬ̥ ܙܰܒܢܳܐ ܕܥܺܕܬܳܐ ܫܡܳܗ̈ܶܐ ܕܗܳܠܶܝܢ ܣܳܗܕ̈ܶܐ ܩܰܕ̈ܺܝܫܶܐ܆ ܓܰܒܪ̈ܶܐ ܟܺܝܬ ܘܢܶܫ̈ܶܐ ܥܰܡ ܛܠܳܝ̈ܶܐ ܘܫܰܒܪ̈ܶܐ܆ ܝܰܬ̊ܺܝܪ ܚܰܣܺܝܪ ܬܪܶܝܢ ܐܠܦܺܝܼ̈ܢ ܕܶܐܬܬܰܘܩܰܕܘ ܒܥܺܕ̈ܳܬܳܐ ܕܢܰܔܪܐܢ܆ ܘܐܙܕܠܰܚ ܕܶܡܗܽܘܢ ܡܛܽܠ ܡܳܪܗܽܘܢ܆ ܘܒܳܬܰܪ ܗܳܠܶܝܢ ܟܽܠܗܶܝܢ ܥܒܰܕ ܡܰܠܟܳܐ ܐܰܕܽܘܓ݂ܳܐ ܪܰܒܳܐ ܘܫܰܘܓ̊ܰܪ ܠܰܫܠܰܕ̈ܶܐ ܒܓܰܘܶܗ. ܘܰܠܗܺܝ ܟܰܕ ܗܺܝ ܬܰܫܥܺܝܬܳܐ ܡܰܕܟܰܪ ܡܰܟܬܰܒܙܰܒܢܳܐ ܥܰܪܰܒܳܝܳܐ ܘܰܡܫܰܡܰܗ ܠܣܳܗܕ̈ܶܐ ܕܢܰܔܪܐܢ ܒܫܶܡ (ܐܰܗܠ ܐܠܐܽܟ̥ܕܽܘܕ).

ܒܢ̈ܝܐ ܕܝܠܢ ܪ̈ܘܚܢܝܐ:
ܗܳܐ ܨܰܘܡܐ ܐܰܪܒܥܺܝܢܳܝܐ ܩܰܕܺܝܫܐ ܚܰܕܬܳܐܺܝܬ ܥܠܰܝܢ ܡܕܺܝܩ܆ ܘܝܳܗܶܒ ܠܟܽܠ ܐ̱ܢܳܫ ܡܶܢܰܢ ܦܽܘܪܣܳܐ ܚܰܕܬܳܐ ܕܢܶܬܒܰܩܶܐ ܒܚܰܝܠܶܗ ܕܣܽܘܒܳܪܳܐ ܘܥܽܘܫܢܳܐ ܕܣܳܗܕܽܘܬܳܐ. ܨܘܡܐ ܗܢܐ ܬܘܒ ܩܪܐ ܠܢ ܕܢܰܩܶܬ ܚܰܘܪܰܢ ܠܘܳܬ ܘܳܠܺܝܼܬ̥ܰܢ ܐܝܟ ܡܗܰܝܡܢ̈ܶܐ ܫܰܪܺܝܪ̈ܶܐ ܒܗܳܢ ܥܳܠܡܳܐ ܕܰܡܠܶܐ ܒܘܠܒ̈ܠܐ܆ ܘܚܡܝܠ ܒܒܨܺܝܼܪܽܘܬ̥ ܗܰܝܡܳܢܘܼܬ݂ܳܐ ܘܟܦ̥ܽܘܼܪܝܳܐ ܘܩܪ̈ܳܒܶܐ ܪܽܘܚܳܢܳܝ̈ܐ. ܒܶܗ ܓܶܝܪ ܒܨܰܘܡܳܐ ܗܳܢܳܐ ܩܰܕܺܝܫܳܐ ܬܰܘ ܟܠܢ ܢܰܣܗܶܕ ܠܡܳܪܰܢ ܘܢܶܪܕܶܐ ܒܽܐܘܪܚܳܐ ܕܰܐܓܽܘܢܰܢ ܡܫܺܝܚܳܝܳܐ ܐܝܟ ܫܠܺܝܚ̈ܶܐ ܩܰܕܝ̈ܫܶܐ܆ ܘܢܺܚܶܐ ܠܗܰܝܡܳܢܽܘܬܰܢ ܐܰܟܡܳܐ ܕ݁ܝܳܐܶܐ ܠܰܣܒ݂ܰܪܬ݂ܶܗ (ܚܙܝ ܦܝܠܝ̈ܦܣܝܐ 27: 1)܆ ܒܣܽܘܥܪ̈ܳܢܶܐ ܛܳܒ̈ܶܐ ܕܒܗܘܢ ܫܡܶܗ ܕܰܐܒܳܐ ܫܡܰܝܢܳܐ ܡܶܫܬܰܒܰܚ (ܚܙܝ ܡܬܝ 16: 5)܆ ܒܝܰܕ ܗܰܝܡܳܢܽܘܬܳܐ ܬܪܺܝܨܰܬ ܫܘܼܒ݂ܚܳܐ܆ ܟܰܕ݂ ܡܶܬܒܰܩܶܝܢܰܢ ܒܬܰܫܥ̈ܝܳܬ̥ܳܐ ܕܣܳܗ̈ܕܶܐ ܘܩܰܕ̈ܝܫܶܐ ܐܬܠܺܝ̈ܛܶܐ ܕܗܰܝܡܳܢܽܘܬܳܐ܆ ܕܰܪܚܶܡܘ ܠܚܽܘܒܶܗ ܕܰܡܫܺܝܚܳܐ ܘܝܰܗ̱ܒܘ ܚܰܝܝ̈ܰܗܘܢ ܡܶܛܽܠܬܶܗ܆ ܘܢܶܬܥܰܕܰܪ ܒܰܨܠܰܘ̈ܬܗܽܘܢ ܘܢܶܬܕܰܡܶܐ ܒܗܽܘܢ ܘܢܶܪܕܶܐ ܒܥܶܩ̈ܒܳܬܗܽܘܢ (ܚܙܝ ܥܒܪ̈ܝܐ 7: 13). ܠܶܗ ܠܡܳܪܝܐ ܚܰܝܠܬܳܢܐ ܡܶܬܟܰܫܦܺܝܢܰܢ ܕܨܰܘܡܟܽܘܢ ܘܰܨܠܰܘ̈ܳܬܟܽܘܢ ܘܙܶܕ̈ܩܳܬܟܽܘܢ ܥܰܡ ܬܝܳܒܽܘܬܟܽܘܢ ܒܚܰܕܘܳܐ ܢܩܰܒܶܠ܆ ܘܠܰܦܨܺܝܚܽܘܬܐ ܕܥܺܐܕܐ ܕܰܩܝܳܡܬܶܗ ܡܫܰܒܰܚܬܐ ܒܚܽܘܠܡܳܢܐ ܛܳܒܐ ܠܟܽܘܢ ܢܰܫܘܶܐ܆ ܘܰܠܥܰܢܺܝ̈ܕܰܝܟܽܘܢ ܡܗܰܝܡ̈ܢܶܐ ܒܪ̈ܰܚܡܰܘܗ̱ܝ ܣܰܓܺܝ̈ܶܐܐ ܢܚܰܣܶܐ܆ ܒܰܨܠܰܘ̈ܳܬܳܗ̇ ܕܰܒܬܽܘܠܬܐ ܩܰܕܺܝܫܬܐ ܝܳܠܕܰܬ ܐܰܠܳܗܐ ܡܰܪܝܰܡ܆ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ܆ ܘܰܕ݂ܡܳܪܝ ܓܶܘܰܪܓܝܼܤ ܐܶܦ݁ܣܩܘܿܦ݁ܳܐ ܕ݂ܥܰܪ̈ܰܒ݂ܳܝܶܐ܆ ܘܰܕ݂ܣܳܗܕ݁ܳܐ ܘܩܰܕܝܼܫܳܐ ܡܳܪܝ ܚܰܐܪܶܬ̥ ܒܰܪ ܟܰܥܒ܆ ܥܰܡ ܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܘܰܢܛܺܝܪܺܝܢ ܒܡܳܪܰܢ ܬܩܰܘܽܘܢ. ܘܐܒܘܢ ܕܒܫܡܝܐ ܘܫܪܟܐ.

ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ – ܣܘܪܝܐ
ܬܠܬܥܣܪ ܒܝܪܚܐ ܕܐܕܪ ܕܫܢܬ ܒ݈ܟܕ
ܕܐܝܬܝܗ̇ ܫܢ̱ܬܐ ܥܣܝܪܝܬܐ ܕܦܛܪܝܪܟܘܬܢ