منارة الأقداس ܕܡܢܪܬ ܩܘܕ̈ܫܐ

ܥܠ ܚܝܠܐ ܠܚܘܕܝܐ ܘܥܘܕܪܢܐ ܬܠܝܬܝܐ ܘܣܘܝܥܐ ܝܡܝܢܝܐ ܡܫܪܝܢܢ

ܠܡܟܬܒ ܩܘܕܝܟܘܣ ܕܟܬܒܐ

ܕܡܢܪܬ ܩܘܕ̈ܫܐ

 

ܩܕܡܝܬ

 

 

 

ܣܬܐܣܬܐ ܩܕܡܝܬܐ

 

           ܡܛܠ ܝܕܥܬܐ ܦܫܝܛܬܐ     

 

     ܩܦܠܐܘܢ ܩܕܡܝܐ:  ܘܒܗ ܐܝܬ ܦܣܘ̈ܩܐ ܬܠܬܐ     

 

     ܦܣܘܩܐ ܩܕܡܝܐ:   ܡܛܠ ܗܝ ܕܐܠܨܝܬܐ ܗܝ ܡܪܕܘܬܐ ܠܡܠܝ̈ܠܐ    

 

     ܬܪܝܢܐ: ܡܛܠ ܗܝ ܕܬܪܥܝܬܐ ܣܩܘܒܠܝܬܐ ܕܗܢܘܢ ܕܐܡܪܝܢ ܠܝܬ ܡܕܪܟܢܘܬܐ        

 

     ܬܠܝܬܝܐ:   ܡܛܠ ܣܬܘܪܝܐ ܕܬܪܥܝܬܐ ܕܙܐܦܢ̈ܐ ܘܡܙܝ̈ܦܢܐ ܕܝܕܥܬܐ     

 

 

 

ܫܬܐܣܬܐ ܬܪܝܢܝܬܐ

 

           ܡܛܠ ܟܝܢܝܘܬܐ ܕܗܢܐ ܟܠ ܘܒܗ ܐܝܬ ܥܘܬܕܐ ܘܩܦ̈ܠܐܐ ܓ     

 

     ܩܦܠܐܘܢ ܩܕܡܝܐ:  ܡܛܠ ܗܘܝܘܬܗ ܕܥܠܡܐ ܗܢܐ ܘܒܗ ܐܝܬ ܦܣܘ̈ܩܐ ܬܪܝܢ       

 

     ܦܣܘܩܐ ܩܕܡܝܐ:   ܡܛܠ ܕܗܘܝܐ ܗ̱ܘ ܘܠܘ ܡܬܘܡܝܐ ܗ̱ܘ ܥܠܡܐ ܗܢܐ     

 

     ܬܪܝܢܐ: ܡܛܠ ܬܪ̈ܥܝܬܐ ܫܟܝܪ̈ܬܐ ܕܒܪ̈ܝܐ. ܕܡܬܘܡܝܐ ܐܡܪܝܢ ܠܥܠܡܐ ܗܢܐ      

 

     ܩܦܠܐܘܢ ܬܪܝܢܐ:   ܡܛܠ ܥܠܡܝܢܝܘܬܗ ܕܥܠܡܐ ܗܢܐ ܘܡܫܬܪܝܢܘܬܗ ܘܒܗ ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠ ܗܝ ܕܥܠܡܐ ܗܢܐ ܡܬܚܒܠܢܐ. ܠܐ ܡܬܚܒܠܢܘܬܐ ܥܬܝܕ ܠܡܠܒܫ ܒܪܡܙܐ      

 

           ܒܪܝܝܐ     

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܠܝܬܝܘܬܐ ܘܟܘܠܢܝܘܬܐ ܕܥܠܡܐ ܗܢܐ ܡܘܕܝܢ ܘܣܬܘܪܝܗ̇      

 

     ܩܦܠܐܘܢ ܬܠܝܬܝܐ: ܡܛܠ ܝܕܝܥܬܐ ܕܟܠ ܚܕ ܡ̣ܢ ܗܘܝܐ ܠܦܘܬ ܡܛܟܣܘܬܐ ܥܕܬܢܝܬܐ ܕܒܫܬܬ ܝܘ̈ܡܐ       

 

           ܘܒܗ ܐܝܬ ܦܣܘ̈ܩܐ ܫܬܐ      

 

     ܦܣܘܩܐ ܩܕܡܝܐ:   ܡܛܠ ܗܢܝܢ ܕܒܝܘܡܐ ܩܕܡܝܐ ܐܬܒܪ̈ܝ       

 

     ܬܪܝܢܐ: ܡܛܠ ܗܢܝܢ ܕܒܝܘܡܐ ܕܬܪܝܢ ܐܬܒܪ̈ܝ       

 

     ܬܠܝܬܝܐ:   ܡܛܠ ܗܢܝܢ ܕܒܝܘܡܐ ܕܬܠܬܐ ܐܬܒܪ̈ܝ      

 

     ܪܒܝܥܝܐ:    ܡܛܠ ܗܢܝܢ ܕܒܝܘܡܐ ܕܐܪܒܥܐ ܐܬܒܪ̈ܝ     

 

     ܚܡܝܫܝܐ:   ܡܛܠ ܗܢܝܢ ܕܒܝܘܡܐ ܕܚܡܫܐ ܐܬܒܪ̈ܝ      

 

     ܫܬܝܬܝܐ:   ܡܛܠ ܗܢܝܢ ܕܒܝܘܡܐ ܕܫܬܐ ܐܬܒܪ̈ܝ      

 

 

 

ܫܬܐܣܬܐ ܬܠܝܬܝܬܐ

 

           ܡܛܠ ܡܡܠܠܘܬ ܐܠܗܘܬܐ ܘܒܗ ܐܝܬ ܩܦ̈ܠܐܐ ܥܣܪܐ         

 

     ܩܦܠܐܘܢ ܩܕܡܝܐ:  ܡܛܠ ܫܘܪܪ ܫܟܝܚܘܬܗ ܕܒܪܘܝܐ ܐܠܨܝ ܐܝܬܘܬܐ ܘܒܗ ܐܝܬ ܦܣܘܩܐ ܒ̄      

 

     ܦܣܘܩܐ ܩܕܡܝܐ:   ܡܛܠ ܡܚܘ̈ܝܢܘܬܐ ܚܫܘ̈ܒܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ           

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܠܐ ܐܠܗܝ ܘܣܬܘܪܝܗ̇        

 

     ܩܦܠܐܢ ܬܪܝܢܐ:    ܡܛܠ ܗܝ ܕܡܬܘܡܝܐ ܗܘ ܘܥܠܡܢܝܐ ܥܒܘܕܐ ܘܒܗ ܐܝܬ ܦܣܘ̈ܩܐ ܒ̄     

 

     ܦܣܘܩܐ ܩܕܡܝܐ:   ܡܛܠ ܬܪܥܝܬܐ ܣܩܘܒܠܝܬܐ ܕܟܦܪܝ ܒܡܬܘܡܝܘܬܗ ܘܥܠܡܝܢܝܘܬܗ ܕܥܒܘܕܐ       

 

           ܘܣܬܘܪܝܗ̇     

 

     ܩܦܠܐܘܢ ܬܠܝܬܝܐ: ܡܛܠ ܗܝ ܕܒܪܘܝܐ ܠܘ ܒܐܬܪܐ ܗܘ ܘܠܐ ܓܫܘܡ ܗܘ. ܘܒܗ ܐܝܬ ܦܣܘ̈ܩܐ ܓ̄     

 

     ܦܣܘܩܐ ܩܕܡܝܐ:   ܡܛܠ ܡܚܘ̈ܝܢܘܬܐ ܚܫܘ̈ܒܝܬܐ ܡܫܪܪ̈ܢܝܬܐ ܕܒܥܬܐ ܗܕܐ    

 

     ܬܪܝܢܐ: ܡܛܠ ܬܪܥܝܬܐ ܫܟܝܪܬܐ ܕܡܓܫ̈ܡܢܐ      

 

     ܬܠܝܬܝܐ:   ܡܛܠ ܒܘܛܠ ܬܪܥܝܬܐ ܕܡܓܫ̈ܡܢܐ       

 

     ܩܦܠܐܘܢ ܪܒܝܥܝܐ: ܡܛܠ ܗܝ ܕܒܪܘܝܐ ܠܘ ܓܘܫܡܐ ܗ̱ܘ. ܐܦܠܐ ܐܪܐ ܩܢܐ ܡܕܡ ܡ̣ܢ ܚܝ̈ܠܐ ܓܘܫ̈ܡܢܝܐ        

 

           ܐܟܙܢܐ ܕܫܡܥܐ ܘܚܙܝܐ ܫܟܝܚܝܢ ܠܗ ܐܘ ܠܐ. ܘܒܗ ܐܝܬ ܦܣܘ̈ܩܐ ܒ̄         

 

     ܦܣܘܩܐ ܩܕܡܝܐ:   ܡܛܠ ܗ̇ܝ ܕܒܪܘܝܐ ܚܙܐ ܘܫܡܥ    

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܟܦܪ̈ܝ ܒܚܙܝܐ ܘܫܡܥܐ ܕܒܪܘܝܐ ܘܣܬܘܪܝܗ̇     

 

     ܩܦܠܐܘܢ ܚܡܝܫܝܐ: ܡܛܠ ܗ̇ܝ ܕܒܪܘܝܐ ܝܕܘܥܐ ܗ̱ܘ ܕܝܬܗ ܘܕܟܠܗܝܢ ܗܠܝܢ ܕܐܝܬܝܗܝܢ. ܘܒܗ ܐܝܬ        

 

            ܦܣܘ̈ܩܐ ܒ    

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ      

 

     ܬܪܝܢܐ: ܡܛܠ ܬܪܥܝܬܐ ܟܦܪܬ݀ ܒܝܕܥܬܗ ܕܒܪܘܝܐ ܘܗ̣ܝ ܗܕܐ ܠܫܒܥ ܐܪ̈ܣܝܣ ܡܬܦܠܓܐ     

 

     ܐܪܣܝܣ ܩܕܡܝܬܐ: ܕܗܢܘܢ ܕܛܠܡܝܢ ܠܝܕܥܬܗ ܕܒܪܘܝܐ ܟܠܢܐܝܬ ܘܣܬܘܪܝܗ̇      

 

     ܬܪܝܢܝܬܐ:    ܕܗܢܘܢ ܕܐܡܪܝܢ ܠܘ ܝܕܘܥܐ ܕܝܬܗ ܐܝܬܘܗܝ ܘܫܪܝܗ̇    

 

     ܬܠܝܬܝܬܐ:  ܕܗܢܘܢ ܕܐܡܪܝܢ ܕܠܝܬܗ̇ ܡ̇ܢ ܝܕܥ. ܐܠܐ ܠܐ ܠܐܚܪ̈ܢܐ ܘܫܪܝܗ̇        

 

     ܪܒܝܥܝܬܐ:   ܕܗܢܘܢ ܕܐܡܪܝܢ ܕܠܟ̈ܝܢܐ ܟܠܢܝ̈ܐ ܝܕܥ. ܘܠܘ ܠܡܢܬܝ̈ܐ ܘܣܬܘܪܝܗ̇     

 

     ܚܡܝܫܝܬܐ:  ܕܗܢܘܢ ܕܐܡܪܝܢ ܕܒܪܘܝܐ ܠܩܢܘܡܝ̈ܗܘܢ ܕܣܘܥܪ̈ܢܐ ܒܬܪ ܕܗܘܝܢ ܝܕܥ ܘܣܬܘܪܝܗ̇     

 

     ܫܬܝܬܝܬܐ:  ܕܗܢܘܢ ܕܐܡܪܝܢ ܠܡܣܝ̈ܟܐ ܒܠܚܘܕ ܝ̇ܕܥ ܐܠܗܐ. ܘܠܘ ܠܠܐ ܡܣܝ̈ܟܐ ܘܣܬܘܪܝܗ̇    

 

     ܫܒܝܥܝܬܐ:  ܕܗܢܘܢ ܕܐܡܪܝܢ ܕܠܘ ܠܟܠܗܘܢ ܡܬܝܕ̈ܥܢܐ ܝܕܥ ܘܣܬܘܪܝܗ̇           

 

     ܩܦܠܐܘܢ ܫܬܝܬܝܐ: ܡܛܠ ܗ̇ܝ ܕܒܪܘܝܐ ܠܐ ܡܬܚܙܝܢܐ ܗ̱ܘ ܠܥܝ̈ܢܐ ܦܓܪ̈ܢܝܐ. ܘܒܗ ܐܝܬ ܦܣܘ̈ܩܐ ܓ̄      

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ      

 

     ܬܪܝܢܐ: ܡܛܠ ܗܢܘܢ ܕܡܬܚܙܝܢܐ ܡܘܕܝܢ ܠܗ ܠܒܪܘܝܐ        

 

     ܬܠܝܬܝܐ:   ܡܛܠ ܣܬܘܪܝܐ ܕܬܪܥܝܬܐ ܡܘܕܝܬ݀ ܡܬܚܙܝܢܘܬܗ ܕܒܪܘܝܐ      

 

     ܩܦܠܐܘܢ ܫܒܝܥܝܐ: ܡܛܠ ܗܝ ܕܟܝܢܐ ܐܠܗܝܐ ܐܝܟ ܕܐܝܬܘܗܝ ܓܢܝܙܐ ܗ̱ܘ ܘܠܐ ܡܬܕܪܟܢܐ. ܘܒܗ ܐܝܬ         

 

           ܦܣܘ̈ܩܐ ܓ̄    

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ      

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܡܬܕܪܟܢܐ ܘܠܘ ܓܢܝܙܐ ܡܘܕܝܢ ܠܗ ܠܒܪܘܝܐ      

 

     ܬܠܝܬܝܐ:   ܡܛܠ ܣܬܘܪܝܐ ܕܬܪܥܝܬܐ ܗܕܐ ܕܡܬܕܪܟܢܐ ܘܠܘ ܓܢܝܙܐ ܡܘܕܝܐ ܠܗ ܠܒܪܘܝܐ       

 

     ܩܦܠܐܘܢ ܬܡܝܢܝܐ: ܡܛܠ ܕܚܕ ܗܘ ܐܠܗܐ ܘܠܘ ܣܓܝ̈ܐܐ ܘܒܗ ܐܝܬ ܦܣܘ̈ܩܐ ܒ̄        

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ      

 

     ܬܪܝܢܐ: ܡܛܠ ܬܪܥܝܬܐ ܚܢܦܝܬܐ ܕܣܓܝܐܘܬ ܐܠܗ̈ܐ ܘܣܬܘܪܝܗ̇       

 

     ܩܦܠܐܘܢ ܬܫܝܥܝܐ: ܡܛܠ ܬܠܝܬܝܘܬ ܩܢܘ̈ܡܐ ܕܚܕܢܝܘܬ ܟܝܢܐ ܕܐܠܗܘܬܐ. ܘܒܗ ܐܝܬ ܦܣܘ̈ܩܐ ܒ̄       

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ ܘܒܗ ܐܝܬ ܢܝ̈ܫܐ ܓ̄      

 

     ܢܝܫܐ ܩܕܡܝܐ: ܡܛܠ ܬܫܥ ܬܐܘܪ̈ܝܐܣ       

 

     ܬܐܘܪܝܐ ܩܕܡܝܬܐ:   ܡܛܠ ܗ̇ܝ ܕܒܪܘܝܐ ܚܟܝܡ ܘܚܝ      

 

     ܬܪܝܢܝܬܐ:    ܡܛܠ ܗ̇ܝ ܕܒܪܘܝܐ ܒܚܟܡܬܗ ܚ̇ܟܡ ܘܒܚܝ̈ܐ ܗ̣ܘ ܚܝ     

 

     ܬܠܝܬܝܬܐ:  ܡܛܠ ܗ̇ܝ ܕܚܟܡܬܐ ܘܚܝ̈ܐ ܕܒܪܘܝܐ. ܘܩܢܘ̈ܡܐ ܐܢܘܢ ܡܩܝ̈ܡܐ    

 

     ܪܒܝܥܝܬܐ:   ܡܛܠ ܗܝ ܕܐܦܢ ܩܢܘ̈ܡܐ ܡܩܝ̈ܡܐ ܐܢܘܢ ܐܠܐ ܠܐ ܡܬܦܪ̈ܫܢܐ ܐܢܘܢ     

 

     ܚܡܝܫܝܬܐ:  ܡܛܠ ܗ̇ܝ ܕܠܩܢܘܡܐ ܗ̇ܘ ܕܚܟܡ ܘܚܝ ܐܒܐ ܩܪܝܐ ܬܐܘܠܘܓܝܐ        

 

     ܫܬܝܬܝܬܐ:  ܡܛܠ ܗ̇ܝ ܕܒܪܐ ܘܪܘܚܐ ܐܦܢ ܥܠܬܢ̈ܐ ܐܢܘܢ ܕܩܢܘܡ ܐܒܐ. ܐܠܐ ܠܒܪܐ ܡ̇ܢ ܝܠܝܕܘܬܐ     

 

           ܗܝ ܕܝܠܝܬܐ. ܠܪܘܚܐ ܕܝܢ ܢܦܘܩܘܬܐ      

 

     ܫܒܝܥܝܬܐ:  ܡܛܠ ܗ̇ܝ ܕܗܢܘܢ ܬܠܬܐ ܩܢܘ̈ܡܐ ܣܓܝ̈ܕܐ ܚܕܐ ܗ̱ܝ ܠܗܘܢ ܐܘܣܝܐ ܘܟܝܢܐ    

 

     ܬܡܝܢܝܬܐ:   ܡܛܠ ܗ̇ܝ ܕܟܠܚܕ ܡ̣ܢ ܩܢܘ̈ܡܐ ܩܕܝ̈ܫܐ ܡܢܗ ܘܠܗ ܐܠܗܐ ܡܫܬܡܗ ܘܠܘ ܬܠܬܐ       

 

           ܐܠܗ̈ܐ    

 

     ܬܫܝܥܝܬܐ:  ܡܛܠܗ̇ܝ ܕܕܝܠܝܬܐ ܕܪܘܚܐ ܟܕ ܢܦܘܩܘܬܐ ܗ̇ܝ. ܡܢܐ ܗ̱ܝ ܗܝ ܕܡܘܣܦܐ ܬܐܘܠܘܓܝܐ        

 

           ܕܢܣܒ ܠܡ ܡ̣ܢ ܒܪܐ        

 

     ܢܝܫܐ ܬܪܝܢܐ: ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪܝܬܗ̇ ܕܒܥܬܐ ܗܕܐ       

 

     ܢܝܫܐ ܬܠܝܬܝܐ:    ܡܛܠ ܣܗ̈ܕܘܬܐ ܒܪ̈ܝܬܐ ܡܫܪܪܢܝܬܗ̇ ܕܒܥܬܐ ܗܕܐ       

 

     ܦܣܘܩܐ ܬܪܝܢܐ:    ܡܛܠ ܬܪܥܝܬܐ ܟܦܪܬ ܒܬܠܝܬܝܘܬ ܩܢܘ̈ܡܐ. ܘܒܗ ܐܝܬ ܢܝ̈ܫܐ ܬܪܝܢ     

 

     ܢܝܫܐ ܩܕܡܝܐ: ܡܛܠ ܣܥܝܝ̈ܗܘܢ    

 

     ܬܪܝܢܐ: ܡܛܠ ܫܪܝܐ ܕܣܥܝܝ̈ܗܘܢ    

 

     ܩܦܠܐܘܢ ܥܣܝܪܝܐ: ܡܛܠ ܕܒܪܐ ܘܪܘܚܐ ܠܘ ܒܪ̈ܝܐ ܘܥܒܝ̈ܕܐ ܐܢܘܢ ܐܝܟ ܬܪܥܝܬܐ ܕܐܪܝܢܘ. ܘܒܗ ܐܝܬ      

 

           ܦܣܘ̈ܩܐ ܬܠܬܐ       

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ      

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܒܪ̈ܝܐ ܘܥܒܝ̈ܕܐ ܡܘܕܝܢ ܠܒܪܐ ܘܠܪܘܚܐ      

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܕܒܪ̈ܝܐ ܘܥܒܝ̈ܕܐ ܡܘܕܝܐ ܠܒܪܐ ܘܠܪܘܚܐ       

 

 

 

ܫܬܐܣܬܐ ܪܒܝܥܝܬܐ

 

           ܡܛܠ ܡܬܒܪܢܫܢܘܬܗ ܕܐܠܗܐ ܡܠܬܐ. ܘܒܗ ܐܝܬ ܩܦ̈ܠܐܐ ܫܬܐ     

 

     ܩܦܠܐܘܢ ܩܕܡܝܐ:  ܡܛܠ ܡܬܡܨܝܢܘܬ ܡܬܒܪܢܫܢܘܬܐ. ܘܒܗ ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠ ܫܘܪܪܗ̇ ܕܬܪܥܝܬܐ ܗܕܐ ܘܒܗ ܐܝܬ ܢܝ̈ܫܐ ܓ̄     

 

     ܢܝܫܐ ܩܕܡܝܐ: ܡܛܠ ܡܚܘ̈ܝܢܘܬܐ ܚܘܫ̈ܒܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ       

 

     ܬܪܝܢܐ: ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ      

 

     ܬܠܝܬܝܐ:   ܡܛܠ ܣܗܕ̈ܘܬܐ ܒܪ̈ܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ        

 

     ܦܣܘܩܐ ܬܪܝܢܐ:    ܡܛܠ ܬܪܥܝܬܐ ܟܦܪܬ ܒܡܬܡܨܝܢܘܬ ܡܬܒܪܢܫܢܘܬܐ ܘܣܬܘܪܝܗ̇     

 

     ܩܦܠܐܘܢ ܬܪܝܢܐ:   ܡܛܠ ܗܝ ܕܡ̣ܢ ܟܕܘ ܗܘܬ݀ ܚܕܝܘܬܐ ܒܡܪܢ ܡܫܝܚܐ. ܘܒܗ ܐܝܬ ܦܣܘ̈ܩܐ ܒ̄        

 

     ܦܣܘܩܐ ܩܕܡܝܐ:   ܡܛܠ ܫܘܪܪ ܫܬܐܣܬܐ ܐܝܕܐ ܕܥܠܝܗ̇ ܡܫܬܟ̈ܠܠܢ ܡܚܘ̈ܝܢܘܬܐ ܡܫܪܪ̈ܢܝܬܐ ܕܒܥܬܐ       

 

           ܗܕܐ ܕܗ̣ܝ ܗ̣ܝ ܬܟܝܒܘܬ ܣܗܕ̈ܘܬܐ     

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܡܙܝܦܝܢ ܠܬܟܝܒܘܬ ܣܗܕ̈ܘܬܐ ܘܣܬܘܪܝܗ̇         

 

     ܩܦܠܐܘܢ ܬܠܝܬܝܐ: ܡܛܠ ܫܘܘ̈ܕܥܐ ܕܝܠܢܝ̈ܐ ܕܒܬܟܝܒܘܬ ܣܗܕ̈ܘܬܐ ܡܫܪܪܝܢ ܡܬܒܪܢܫܢܘܬܗ ܕܐܠܗܐ        

 

           ܡܠܬܐ ܘܒܗ ܐܝܬ ܦܣܘ̈ܩܐ ܒ̄       

 

     ܦܣܘܩܐ ܩܕܡܝܐ:   ܘܒܗ ܐܝܬ ܢܝ̈ܫܐ ܒ̄          

 

     ܢܝܫܐ ܩܕܡܝܐ: ܡܛܠ ܣܗܕ̈ܘܬܐ ܢܒܝܝ̈ܬܐ      

 

     ܬܪܝܢܐ: ܡܛܠ ܬܕܡܪ̈ܬܐ ܬܡܝ̈ܗܬܐ ܕܡܫܘ̈ܕܥܢ ܠܢ ܒܡܬܒܪܢܫܢܘܬܗ ܕܐܠܗܐ ܡܠܬܐ ܡ̣ܢ ܫܘܪܝ       

 

           ܡܕܒܪܢܘܬܐ ܥܕܡܐ ܠܫܘܡܠܝܗ̇       

 

     ܦܣܘܩܐ ܬܪܝܢܐ:    ܡܛܠ ܬܪܥܝܬܐ ܣܩܘܒܠܝܬܐ ܡܒܛܠܢܝܬܗܘܢ ܕܫܘܘ̈ܕܥܐ ܕܒܝܕ ܣܥܘܪܘܬ ܬܕܡܪ̈ܬܐ       

 

           ܡܫܪܪܝܢ ܡܬܒܪܢܫܢܘܬܐ. ܘܗ̣ܝ ܗܕܐ ܠܫܒܥ ܐܪ̈ܣܝܣ ܡܬܦܠܓܐ     

 

     ܐܪܣܝܣ ܩܕܡܝܬܐ: ܕܗܢܘܢ ܕܟܦܪܝܢ ܒܣܥܘܪܘܬ ܬܕܡܪ̈ܬܐ ܘܣܬܘܪܝܗ̇    

 

     ܬܪܝܢܝܬܐ:    ܕܗܢܘܢ ܕܐܡܪܝܢ ܕܐܦܢ ܡܬܡܨܝܢܝܬܐ ܗܝ ܣܥܘܪܘܬ ܬܕܡܪ̈ܬܐ. ܐܠܐ ܡܨܝܐ ܕܠܘ ܡ̣ܢ ܐܠܗܐ        

 

           ܡܣܬܥܪ̈ܢ ܘܣܬܘܪܝܗ̇       

 

     ܬܠܝܬܝܬܐ:  ܕܗܢܘܢ ܕܐܡܪܝܢ ܕܐܦܢ ܐܠܗܐ ܗܘ ܣܥܘܪܗܝܢ ܕܬܕܡܪ̈ܬܐ: ܐܠܐ ܡܨܝܐ ܕܠܘ ܡܛܠ ܗܝ       

 

           ܕܢܫܪܪ ܡܠܬܗ ܕܗܘ ܕܒܐܝ̈ܕܘܗܝ ܡܣܬܥܪ̈ܢ ܣܥܪ ܐܢܘܢ ܘܣܬܘܪܝܗ̇         

 

     ܪܒܝܥܝܬܐ:   ܕܗܢܘܢ ܕܐܡܪܝܢ ܕܐܦܢ ܐܠܗܐ ܐܝܟ ܕܠܫܘܪܪ ܡܠܬܗ ܕܗܘ ܕܒܐܝ̈ܕܘܗܝ ܡܣܬܥܪ̈ܢ      

 

           ܣܥܪ ܐܢܝܢ. ܐܠܐ ܡܛܠ ܡܢܐ ܐܡܪܬܘܢ ܕܫܪܝܪܐ ܙܕܩ ܕܢܗܘܐ ܗܘ ܕܡܫܪܪ ܐܠܗܐ ܡܠܬܗ         

 

           ܘܣܬܘܪܝܗ̇      

 

     ܚܡܝܫܝܬܐ:  ܕܗܢܘܢ ܕܐܡܪܝܢ. ܕܐܦܢ ܫܪܝܪܐ ܙܕܩ ܕܢܗܘܐ ܗ̇ܘ ܕܐܠܗܐ ܡܫܪܪ ܡܠܬܗ ܒܝܕ ܬܕܡܪ̈ܬܐ.        

 

           ܐܠܐ ܐܝܕܐ ܣܢܝܩܘܬܐ ܐܝܬ ܗܘܐ ܥܠ ܡܬܒܪܢܫܢܘܬܗ. ܟܕ ܒܢܝ̈ܢܫܐ ܗ̇ܘ ܕܒܪܐ ܒܗܘܢ    

 

           ܒܠܚܘܕ ܡܨܝܢ ܠܡܣܥܪ ܐܘ ܕܠܡܐ ܐܠܗܐ ܠܐ ܡܨܐ ܗܘܐ ܕܒܠܥܕ ܗܟܢ. ܐܘ ܒܝܕ ܐܢܫ        

 

           ܡ̣ܢ ܢܒܝ̈ܐ ܢܗܕܐ ܗܘܐ ܠܒܢܝ̈ܢܫܐ ܘܣܬܘܪܝܗ̇        

 

     ܫܬܝܬܝܬܐ:  ܗܘ ܕܝܘ̈ܕܝܐ ܕܐܡܪܝܢ ܕܢܡܘܣܐ ܡܘܫܝܐ ܠܥܠܡ ܙܕܩ ܠܡܟܬܪܘ ܘܐܠܘ ܡܫܝܚܐ ܗܘܐ     

 

           ܫܪܝܪܐ ܗ̇ܘ ܕܐܬܐ. ܠܐ ܫܚܠܦܗ ܘܣܬܘܪܝܗ̇        

 

     ܫܒܝܥܝܬܐ:  ܗ̇ܝ ܕܡܫܠܡܢ̈ܐ ܕܐܡܪܝܢ. ܕܡܫܝܚܐ ܗܘܝܘ ܗ̇ܘ ܕܡܣܬܟܐ ܗܘܐ ܘܡܛܠܬܗ ܐܬܢܒܝܘ     

 

           ܢܒܝ̈ܐ ܫܪܝܪܐܝܬ. ܒܪܡ ܕܝܢ ܠܘ ܐܠܗܐ ܗ̇ܘ ܐܦܠܐ ܒܪܗ ܕܐܠܗܐ. ܐܠܐ ܢܒܝܗ ܒܠܚܘܕ         

 

           ܕܐܠܗܐ ܘܥܒܕܗ ܘܣܬܘܪܝܗ̇         

 

     ܩܦܠܐܘܢ ܪܒܝܥܝܐ: ܡܛܠܗܝ ܕܚܕܝܘܬܐ ܗܝ ܟܝܢܝܬܐ ܘܩܢܘܡܝܬܐ ܗܝ ܕܗܘܬ݀ ܒܡܪܢ. ܘܠܘ ܕܡܨܛܒܝܢܘܬܐ      

 

           ܒܠܚܘܕ ܘܒܗ ܐܝܬ ܦܣܘ̈ܩܐ ܫܒܥܐ         

 

     ܦܣܘܩܐ ܩܕܡܝܐ:   ܡܛܠ ܢܘܗܪܐ ܕܒܢ̈ܬ ܩ̈ܠܐ ܐܝܠܝܢ ܕܥܠܝܗܝܢ ܗܝ ܣܢܝܩܘܬܐ ܪܒܬܐ ܕܒܘܚ̈ܢܐ ܗܠܝܢ         

 

     ܬܪܝܢܐ: ܡܛܠ ܕܡܪܢ ܡܫܝܚܐ ܚܕ ܗ̣ܘ ܟܝܢܐ ܡ̣ܢ ܬܪܝܢ ܟܝܢܝ̈ܢ ܒܡܚܘ̈ܝܢܘܬܐ ܘܣܗܕ̈ܘܬܐ       

 

     ܬܠܝܬܝܐ:   ܡܛܠܗܝ ܕܐܢ ܚܕ ܗܘ ܩܢܘܡܗ ܕܡܪܢ ܡܫܝܚܐ. ܐܠܨܐ ܕܐܦ ܟܝܢܗ ܚܕ ܢܗܘܐ      

 

           ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܪܒܝܥܝܐ:    ܡܛܠ ܗܝ ܕܐܢ ܚܕ ܗܘ ܒܪܐ ܡܪܝܐ ܘܦܪܨܘܦܐ ܗ̣ܘ ܡܪܢ ܡܫܝܚܐ. ܚܕ ܬܘܒ ܟܝܢܐ       

 

           ܘܩܢܘܡܐ ܐܠܨܐ ܕܢܗܘܐ         

 

     ܚܡܝܫܝܐ:   ܡܛܠ ܗܝ ܕܝܠܕܬ݀ ܐܠܗܐ ܗ̇ܝ ܒܬܘܠܬܐ ܩܕܝܫܬܐ ܘܡܛܠ ܗ̇ܝ ܕܒܥܠܬ ܚܕܝܘܬܐ       

 

           ܐܦ ܥܠ ܐܠܗܐ ܡܚܝܠܘ̈ܬܐ ܐ̱ܢܫܝ̈ܬܐ ܡܬܐܡܪ̈ܢ ܒܟܬܒ̈ܐ ܩܕܝ̈ܫܐ ܘܒܗ ܐܝܬ ܢܝ̈ܫܐ ܒ̄        

 

     ܢܝܫܐ ܩܕܡܝܐ: ܡܛܠ ܡܚܘ̈ܝܢܘܬܐ ܚܘܫ̈ܒܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ         

 

     ܬܪܝܢܐ: ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ ܕܒܥܬܐ ܗܕܐ      

 

     ܦܣܘܩܐ ܫܬܝܬܝܐ: ܡܛܠ ܬܪܥܝܬܐ ܕܬܪ̈ܝܝ ܟܝ̈ܢܐ ܘܒܗ ܐܝܬ ܢܝ̈ܫܐ ܬܪܝܢ      

 

     ܢܝܫܐ ܩܕܡܝܐ: ܡܛܠ ܣܥܝܝ̈ܗܘܢ     

 

     ܬܪܝܢܐ: ܡܛܠ ܣܗ̈ܕܘܬܗܘܢ         

 

     ܦܣܘܩܐ ܫܒܝܥܝܐ:  ܡܛܠ ܣܬܘܪܝܗ̇ ܕܬܪܥܝܬܐ ܗܝ ܕܬܪ̈ܝܝ ܟܝ̈ܢܐ. ܘܒܗ ܐܝܬ ܢܝ̈ܫܐ ܒ̄        

 

     ܢܝܫܐ ܩܕܡܝܐ: ܡܛܠ ܫܪܝܐ ܕܣܥܝܝ̈ܗܘܢ     

 

     ܬܪܝܢܐ: ܡܛܠ ܦܘܢܝܐ ܕܣܗܕ̈ܘܬܗܘܢ        

 

     ܩܦܠܐܘܢ ܚܡܝܫܝܐ: ܡܛܠ ܗܝ ܕܟܕ ܢܛܝܪܝܢ ܫܘܘ̈ܕܥܐ ܕܫܘܚܠܦܐ ܟܝܢܝܐ. ܚܕ ܟܝܢܐ ܡ̣ܢ ܬܪܝܢ ܟܝ̈ܢܐ         

 

           ܡܘܕܝܐ ܥܕܬܐ ܕܝܥܩܘ̈ܒܝܐ ܘܒܗ ܐܝܬ ܦܣܘ̈ܩܐ ܓ̄         

 

     ܦܣܘܩܐ ܩܕܡܝܐ:   ܡܛܠ ܫܘܪܪܐ ܕܬܪܥܝܬܐ ܗܕܐ        

 

     ܬܪܝܢܐ: ܡܛܠ ܬܪܥܝܬܐ ܫܟܝܪܬܐ ܕܐܘܛܘ̈ܟܝܐܢܘ ܗܢܘܢ ܕܡܘܙܓܐ ܘܫܘܚܠܦܐ ܡܥܠܝܢ ܕܟܝܢܐ      

 

           ܐܠܗܝܐ          

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܒܝܫܬܐ ܕܐܘܛܘ̈ܟܝܐܢܘ        

 

     ܩܦܠܐܘܢ ܫܬܝܬܝܐ: ܡܛܠ ܗܝ ܕܠܘ ܠܟܝܢ ܡܠܬܐ ܐܫܬܚܠܦ ܦܓܪܐ ܒܬܪ ܚܕܝܘܬܐ. ܐܦܠܐ ܐܟܘܬܗ ܠܐ     

 

           ܡܣܝܟܐ ܘܠܐ ܚܫܘܫܐ ܗܘܐ ܡ̣ܢ ܩܕܡ ܩܝܡܬܐ ܐܝܟ ܕܐܡܪܝܢ ܝܘܠܝܢܝ̈ܣܛܐ ܘܒܗ ܐܝܬ       

 

           ܦܣܘ̈ܩܐ ܓ̄     

 

     ܦܣܘܩܐ ܩܕܡܝܐ:   ܒܗ ܐܝܬ ܢܝ̈ܫܐ ܓ̄     

 

     ܢܝܫܐ ܩܕܡܝܐ: ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ         

 

     ܬܪܝܢܐ: ܡܛܠ ܣܗܕ̈ܘܬܐ ܟܬܒܝ̈ܬܐ ܕܡܫܪܪ̈ܢ ܗܝ ܕܡ̣ܢ ܩܕܡ ܩܝܡܬܐ ܚܫܘܫܐ ܘܡܬܚܒܠܢܐ     

 

           ܗܘܐ ܒܟܝܢܐ ܦܓܪܗ ܕܦܪܘܩܢ         

 

     ܬܠܝܬܝܐ:   ܡܛܠ ܣܗܕ̈ܘܬܐ ܟܬܒܝ̈ܬܐ ܕܡܫܪܪ̈ܢ ܗܝ ܕܠܐ ܚܫܘܫܐ ܘܠܐ ܡܝܘܬܐ ܘܠܐ ܡܬܚܒܠܢܐ       

 

           ܥܒܕܗ ܡܪܢ ܠܦܓܪܗ ܒܬܪ ܩܝܡܬܐ       

 

     ܦܣܘܩܐ ܬܪܝܢܐ:    ܡܛܠ ܬܪܥܝܬܐ ܕܝܘܠܝܢܝ̈ܣܛܐ ܗܢܘܢ ܕܐܦ ܗܓܓܝ̈ܐ ܘܓܪܓܘܪ̈ܝܢܐ ܡܬܩܪܝܢ ܘܒܗ        

 

           ܐܝܬ ܢܝ̈ܫܐ ܒ̄    

 

     ܢܝܫܐ ܩܕܡܝܐ: ܡܛܠ ܣܥܝܝ̈ܗܘܢ     

 

     ܬܪܝܢܐ: ܡܛܠ ܣܗܕ̈ܘܬܗܘܢ         

 

     ܦܣܘܩܐ ܬܠܝܬܝܐ:  ܡܛܠ ܣܬܘܪܝܐ ܕܬܪܥܝܬܐ ܗܓܓܝܬܐ ܘܒܗ ܐܝܬ ܢܝ̈ܫܐ ܓ̄     

 

     ܢܝܫܐ ܩܕܡܝܐ: ܡܛܠ ܫܪܝܐ ܕܣܥܝܝ̈ܗܘܢ     

 

     ܬܪܝܢܐ: ܡܛܠ ܦܘܢܝܐ ܕܣܗܕ̈ܘܬܗܘܢ        

 

     ܬܠܝܬܝܐ:   ܡܛܠ ܚܘܬܡܐ ܕܫܬܐܣܬܐ ܗܕܐ ܒܡܫܘܕܥܢܘܬܐ ܕܐܪ̈ܣܝܣ ܕܗܢܝܢ ܕܒܫܡܐ ܟܚܝܕܐ         

 

           ܕܟܪܣܛܝܢܘܬܐ ܐܬܩܪܝܝܢ ܘܐܝܬܝܗܘܢ ܐܪ̈ܣܝܣ ܬܠܬܝܢ      

 

 

 

ܫܬܐܣܬܐ ܚܡܝܫܝܬܐ

 

           ܡܛܠ ܝܕܥܬܐ ܕܐܘܣܝ̈ܐܣ ܫܡܝܢ̈ܝܬܐ ܕܐܝܬܝܗܘܢ ܡܠܐܟ̈ܐ ܘܒܗ ܐܝܬ ܩܦ̈ܠܐܐ ܚܡܫܐ         

 

     ܩܦܠܐܘܢ ܩܕܡܝܐ:  ܡܛܠ ܫܘܝܘܬܗܘܢ ܕܡܠܐܟ̈ܐ ܘܒܗ ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠ ܫܘܪܪ ܫܟܝܚܘܬܗܘܢ ܘܒܗ ܐܝܬ ܢܝ̈ܫܐ ܒ̄         

 

     ܢܝܫܐ ܩܕܡܝܐ: ܡܛܠ ܡܚܘ̈ܝܢܘܬܐ ܚܘܫ̈ܒܝܬܐ ܕܒܥܬܐ ܗܕܐ        

 

     ܬܪܝܢܐ: ܡܛܠ ܣܗ̈ܕܘܬܐ ܟܬܒܝ̈ܬܐ  ܡܫܪܪ̈ܢܝܬܗ̇ ܕܒܥܬܐ ܗܕܐ     

 

     ܦܣܘܩܐ ܬܪܝܢܐ:    ܡܛܠ ܬܪܥܝܬܐ ܕܟܦܪ̈ܝ ܒܫܟܝܚܘܬܐ ܕܡܠܐܟ̈ܐ. ܘܒܗ ܐܝܬ ܢܝ̈ܫܐ ܒ̄        

 

     ܢܝܫܐ ܩܕܡܝܐ: ܡܛܠ ܣܥܝܝ̈ܗܘܢ     

 

     ܬܪܝܢܐ: ܡܛܠ ܫܪܝܐ ܕܣܥܝܝ̈ܗܘܢ     

 

     ܦܣܘܩܐ ܬܠܝܬܝܐ:  ܡܛܠ ܕܒܕܐܝܟ ܐܝܠܝܢ ܡܚܘ̈ܝܢܘܬܐ ܡܫܪܪܝܢ ܦܝܠܠܘ̈ܣܘܦܐ ܒܪ̈ܝܐ. ܫܟܝܚܘܬܗܘܢ    

 

           ܕܡܠܐܟ̈ܐ ܕܝܠܗܘܢ ܩܪܝܢ ܗܘ̈ܢܐ       

 

     ܩܦܠܐܘܢ ܬܪܝܢܐ:   ܡܛܠ ܡܢܝܢܝ̈ܗܘܢ ܕܬܓ̈ܡܐ ܡܠܐܟܝ̈ܐ. ܘܒܗ ܐܝܬ ܦܣܘ̈ܩܐ ܕ̄          

 

     ܦܣܘܩܐ ܩܕܡܝܐ:   ܡܛܠ ܡܢܝܢܐ ܕܬܓܡܝ̈ܗܘܢ         

 

     ܬܪܝܢܐ: ܡܛܠ ܫܘܡܗܐ ܕܫܡܝ̈ܢܐ. ܘܒܗ ܐܝܬ ܢܝ̈ܫܐ ܓ̄    

 

     ܢܝܫܐ ܩܕܡܝܐ: ܡܛܠ ܕܡܢ ܐܝܟܐ ܢܣܝܒ ܟܘܢܝܗܘܢ       

 

     ܬܪܝܢܐ: ܡܛܠ ܗܝ ܕܡ̣ܢ ܡ̇ܢ ܐܬܝܒܠܬ݀ ܡܫܠܡܢܘܬܐ ܕܫܘܡܗܝ̈ܗܘܢ     

 

     ܬܠܝܬܝܐ:   ܡܛܠ ܗܝ ܕܐܝܟܐ ܟܠܗܘܢ ܬܓܡ̈ܐ ܒܫܡܐ ܕܡܠܐܟ̈ܐ ܡܬܩܪܝܢ        

 

     ܦܣܘܩܐ ܬܠܝܬܝܐ:  ܡܛܠ ܡܐܪܙܢܘܬܗܘܢ ܕܠܚ̈ܕܕܐ ܘܕܒܡܨܥܝܘܬܗܘܢ ܡܬܝܒܠܐ ܠܘܬܢ ܡܬܐܪܙܢܘܬܐ.     

 

           ܘܕܐܪܐ ܟܕ ܐܬܛܟܣܘ ܐܬܢܗܪܘ. ܐܘ ܟܕ ܐܬܢܗܪܘ ܐܬܛܟܣܘ     

 

     ܪܒܝܥܝܐ:    ܡܛܠ ܗܝ ܕܠܘ ܒܠܚܘܕ ܠܓܡܝܪ̈ܐ ܕܒܢ ܡܗܕܝܢ ܘܡܦܪܢܣܝܢ ܪܘܚܢܐ ܐܠܐ       

 

           ܘܠܟܠܗܘܢ ܟܝ̈ܢܐ ܕܒܪ̈ܝܬܐ ܘܒܗ ܐܝܬ ܢܝ̈ܫܐ ܕ̄      

 

     ܢܝܫܐ ܩܕܡܝܐ: ܡܛܠ ܗܝ ܕܠܟܠܚܕ ܡ̣ܢ ܩܢܘ̈ܡܐ ܢܩܝܦ ܡܠܐܟܐ ܕܠܗ ܡܗܕܐ       

 

     ܬܪܝܢܐ: ܕܠܟܠ ܥܡܡܝ̈ܢ ܫܠܝܛ ܢܩܝܦ ܪܘܚܢܐ ܘܡܕܒܪ ܠܗ    

 

     ܬܠܝܬܝܐ:   ܕܐܦ ܥܠ ܕ̄ ܐܣܛܘܟ̈ܣܐ ܡܠܐܟ̈ܐ ܐܝܬ ܩܝܘ̈ܡܐ     

 

     ܪܒܝܥܝܐ:    ܡܛܠ ܕܐܝܬ ܠܟܠܚܕܐ ܡ̣ܢ ܡܘܙ̈ܠܬܐ ܡܠܐܟܐ ܐܝܬ ܕܡܦܪܢܣ ܠܗ̇       

 

     ܩܦܠܐܘܢ ܬܠܝܬܝܐ: ܡܛܠ ܒܪܝܬܗܘܢ ܕܡܠܐܟ̈ܐ. ܘܒܗ ܐܝܬ ܦܣܘ̈ܩܐ ܒ̄    

 

     ܦܣܘܩܐ ܩܕܡܝܐ:   ܒܗ ܐܝܬ ܢܝ̈ܫܐ ܒ̄     

 

     ܢܝܫܐ ܩܕܡܝܐ: ܡܛܠ ܗܝ ܕܩܕܝܡܐ ܒܪܝܬܗܘܢ ܕܡܠܐܟ̈ܐ ܠܕܡܬܪ̈ܓܫܢܐ      

 

     ܬܪܝܢܐ: ܕܡܛܠ ܡܢܐ ܐܪܐ ܒܪܐ ܐܠܗܐ ܡܠܐܟ̈ܐ      

 

     ܦܣܘܩܐ ܬܪܝܢܐ:    ܡܛܠ ܗܝ ܕܡܢܐ ܗ̱ܘ ܟܝܢܗܘܢ ܕܡܠܐܟ̈ܐ. ܘܡܛܠ ܡܣܝܟܘܬܗܘܢ. ܘܕܠܐ ܡܝܘ̈ܬܐ ܐܢܘܢ        

 

           ܒܟܝܢܐ ܘܕܫܠܝ̈ܛܝ ܒܝܬܗܘܢ ܐܝܬܝܗܘܢ. ܘܡܬܡܨܝܢܘܬܐ ܩܢܝܢ ܠܗܝ ܕܢܙܕܕܩܘܢ.       

 

           ܘܠܗܝ ܕܢܚܛܘܢ. ܘܠܘ ܟܝܢܝܬܐ    

 

     ܩܦܠܐܘܢ ܪܒܝܥܝܐ: ܡܛܠ ܦܘܚܡܗܘܢ ܕܡܠܐܟ̈ܐ ܠܘܬ ܒܢܝ̈ܢܫܐ. ܘܒܗ ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠܗܝ ܕܡܠܐܟ̈ܐ ܡܝܬܪܝܢ ܡ̣ܢ ܓܡܝܪ̈ܐ ܒܡܚܘ̈ܝܢܘܬܐ ܘܣܗ̈ܕܘܬܐ       

 

     ܬܪܝܢܐ: ܡܛܠ ܬܪܥܝܬܐ ܕܡܝܬܪܘܬܐ ܡܘܕܝܐ ܕܒܢܝ̈ܢܫܐ ܓܡܝܪ̈ܐ ܛܒ ܡ̣ܢ ܡܠܐܟ̈ܐ ܘܣܬܘܪܝܗ̇      

 

     ܩܦܠܐܘܢ ܚܡܝܫܝܐ: ܡܛܠ ܬܪ̈ܥܝܬܐ ܕܗܘܝ̈ ܠܒܪ̈ܝܐ ܡܛܠ ܡܠܐܟ̈ܐ. ܘܒܗ ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠ ܬܐܘܪܐ ܕܦܝܠܠܘ̈ܣܘܦܐ ܡܛܠ ܡܠܐܟ̈ܐ     

 

     ܬܪܝܢܐ: ܡܛܠ ܦܠܝܪܘܦܘܪ̈ܝܐܣ ܕܥܒܕܝܢ ܗܢܘܢ ܕܐܡܪܝܢ ܕܡܠܐ ܒܡܨܥܝܘܬ ܣܓܕܬ ܨܠܡ̈ܐ     

 

           ܦܠܚܝܢ         

 

 

 

ܫܬܐܣܬܐ ܫܬܝܬܝܬܐ

 

           ܡܛܠ ܟܗܢܘܬܐ ܗܕܐ ܐܪܥܢܝܬܐ ܘܒܗ ܐܝܬ ܩܦ̈ܠܐܐ ܕ̄      

 

     ܩܦܠܐܘܢ ܩܕܡܝܐ:  ܡܛܠ ܡܢܝܘܬܗ̇. ܦܣܘ̈ܩܐ ܒ̄       

 

     ܦܣܘܩܐ ܩܕܡܝܐ:   ܐܝܬ ܒܗ ܢܝ̈ܫܐ ܒ̄      

 

     ܢܝܫܐ ܩܕܡܝܐ: ܡܛܠ ܪܘܫܡܗ̇ ܕܟܗܢܘܬܐ ܘܪܝܫܘܬ ܟܗܢܘܬܐ       

 

     ܬܪܝܢܐ: ܕܠܟܡܐ ܐܕܫܝ̈ܢ ܡܬܦܠܓܐ ܟܗܢܘܬܐ        

 

     ܦܣܘܩܐ ܬܪܝܢܐ:    ܡܛܠ ܕܝܠܝܘܬ ܣܥܘܪܘܬܐ ܕܬܓ̈ܡܐ ܥܕܬܢܝ̈ܐ. ܘܕܐܝܠܝܢ ܐܢܘܢ ܗܢܘܢ ܕܡܬܕܟܝܢ       

 

           ܘܡܬܢܗܪܝܢ ܘܡܬܓܡܪܝܢ     

 

     ܩܦܠܐܘܢ ܬܪܝܢܐ:   ܡܛܠ ܫܘܡ̈ܠܝܐ ܕܒܝܕ ܪܝܫܘܬ ܟܗܢܘܬܐ. ܘܒܗ ܐܝܬ ܦܣܘ̈ܩܐ ܗ̄        

 

     ܦܣܘܩܐ ܩܕܡܝܐ:   ܡܛܠ ܫܘܡܠܝܐ ܕܟܝܪ̈ܘܛܘܢܝܐܣ ܪ̈ܝܫܟܗܢܝܐ. ܘܟܗ̈ܢܐ ܘܡܫܡ̈ܫܢܐ. ܘܐܪ̈ܙܢܝܬܐ         

 

           ܘܫܘܡܠܝܐ ܕܕܝܪ̈ܝܐ      

 

     ܬܪܝܢܐ: ܡܛܠ ܫܘܡܠܝܐ ܕܡܘܪܘܢ ܕܠܡܢܘ ܨܐܪ. ܘܢܝܫܘ̈ܗܝ ܫܒܝ̈ܚܐ    

 

     ܬܠܝܬܝܐ:   ܡܛܠ ܥܡܕܐ ܘܢܝܫܘ̈ܗܝ ܘܙܢܘ̈ܗܝ         

 

     ܪܒܝܥܝܐ:    ܡܛܠ ܩܘܪܒ ܩܘܪ̈ܒܢܐ        

 

     ܚܡܝܫܝܐ:   ܡܛܠ ܬܫܡܫܬܐ ܕܡܫܬܡܠܝܐ ܥܠ ܗܢܘܢ ܕܒܡܫܝܚܐ ܫܟܒܝܢ. ܘܢܝ̈ܫܐ ܕܫܐܘ̈ܠܐ        

 

           ܘܦܘ̈ܢܝܐ. ܘܥܘ̈ܒܐ ܐܒܪ̈ܗܡܝܐ ܘܡܬܒܪܪܟܢܘܬܐ ܕܡ̣ܢ ܫܟܝܢܬܐ ܕܩܕܝ̈ܫܐ      

 

 

 

ܫܬܐܣܬܐ ܫܒܝܥܝܬܐ

 

           ܡܛܠ ܪ̈ܘܚܐ ܒܝ̈ܫܬܐ ܐܘܟܝܬ ܫܐܕ̈ܐ ܘܒܗ ܐܝܬ ܩܦ̈ܠܐܐ ܒ̄       

 

     ܩܦܠܐܘܢ ܩܕܡܝܐ:  ܡܛܠ ܬܪ̈ܥܝܬܐ ܡܫܚ̈ܠܦܬܐ ܕܗܘ̈ܝ ܠܒܢܝ̈ܢܫܐ ܥܠ ܫܐܕ̈ܐ ܘܒܗ ܐܝܬ ܢܝ̈ܫܐ ܘ̄      

 

     ܢܝܫܐ ܩܕܡܝܐ: ܡܛܠ ܪܘܫܡܗܘܢ ܘܥܠܬ ܡܦܘܠܬܗܘܢ       

 

     ܬܪܝܢܐ: ܡܛܠ ܗܢܘܢ ܓܘܫ̈ܡܐ ܩܛܝ̈ܢܐ ܘܐܐܪ̈ܝܐ ܐܡܪܝܢ ܕܐܝܬܝܗܘܢ ܫܐܕ̈ܐ        

 

     ܬܠܝܬܝܐ:   ܡܛܠ ܬܪܥܝܬܐ ܕܗܢܘܢ ܕܢܦ̈ܫܬܐ ܐ̱ܢܫܝ̈ܬܐ ܕܚܛܝ̈ܐ ܕܐܡܪܝܢ ܕܐܝܬܝܗܘܢ ܫܐܕ̈ܐ       

 

     ܪܒܝܥܝܐ:    ܡܛܠ ܬܪܥܝܬܐ ܕܗܢܘܢ ܕܐܡܪܝܢ ܕܠܫܐܕ̈ܐ ܡ̇ܢ ܐܣܛܘܟ̈ܣܐ ܐܪܒܥܐ ܕܘܟܬ ܦܓܪܐ     

 

           ܡܡܠܝܢ        

 

     ܚܡܝܫܝܐ:   ܡܛܠ ܬܪ̈ܥܝܬܗܐ ܕܗܢܘܢ ܕܐܡܪܝܢ ܕܪ̈ܓܫܐ ܓܘܝ̈ܐ ܗܢܘܢ ܐܢܘܢ ܫܐܕ̈ܐ          

 

     ܫܬܝܬܝܐ:   ܡܛܠ ܬܪܥܝܬܐ ܕܗܘܬ݀ ܠܡܓܘ̈ܫܐ ܘܠܡܢܝ̈ܢܝܐ ܡܛܠ ܫܐܕ̈ܐ     

 

     ܦܣܘܩܐ ܬܪܝܢܐ:    ܡܛܠ ܫܘܪܪ ܫܟܝܚܘܬܗܘܢ ܕܫܐܕ̈ܐ ܒܡܚܘ̈ܝܢܘܬܐ ܘܣܗܕ̈ܘܬܐ ܟܬܒܝ̈ܬܐ        

 

     ܬܠܝܬܝܐ:   ܡܛܠ ܬܪܥܝܬܐ ܟܦܪܬ݀ ܒܫܟܝܚܘܬܗܘܢ ܕܫܐܕ̈ܐ ܘܣܬܘܪܝܗ̇       

 

     ܩܦܠܐܘܢ ܬܪܝܢܐ:   ܡܛܠ ܟܝܢܗܘܢ ܒܝܫܐ ܕܫܐܕ̈ܐ. ܘܒܗ ܐܝܬ ܦܣܘ̈ܩܐ ܓ̄        

 

     ܦܣܘܩܐ ܩܕܡܝܐ:   ܘܒܗ ܐܝܬ ܢܝ̈ܫܐ ܕ̄     

 

     ܢܝܫܐ ܩܕܡܝܐ: ܡܛܠ ܗܝ ܕܐܢ ܒܟܝܢܐ ܐܬܒܪܝܘ ܒܝ̈ܫܐ. ܐܘ ܒܚܐܪܘܬܗܘܢ ܠܘܬ ܒܝܫܬܐ ܐܨܛܠܝܘ      

 

     ܬܪܝܢܐ: ܐܢ ܡܬܦܢܝܢ ܡܬܚܢܢܝܢ ܐܘ ܠܐ      

 

     ܬܠܝܬܝܐ:   ܡܛܠܗܝ ܕܐܪܐ ܫܘ̈ܝܝ ܒܒܝܫܬܐ ܐܝܬܝܗܘܢ         

 

     ܪܒܝܥܝܐ:    ܡܛܠܗܝ ܕܐܢ ܒܛܝܠܘܬܐ ܐܠܗܝܬܐ ܚܒܫܬ݀ ܠܟܠ ܗܝ. ܐܝܟܢܐ ܠܐ ܡܬܐܣܝܢܝܬܐ ܗܘܬ      

 

           ܒܝܫܘܬܗܘܢ ܕܫܐܕ̈ܐ      

 

     ܦܣܘܩܐ ܬܪܝܢܐ:    ܡܛܠ ܗܝ ܕܡܫܬܘܕܥܝܢ ܐܪܐ ܠܒܪܘܝܗܘܢ ܘܕܡܢܚܝܢ ܐܪܐ ܒܗܘ ܡܐ ܕܐܝܬܝܗܘܢ ܒܗ.     

 

           ܘܕܐܪܐ ܡܚܒܝܢ ܠܚ̈ܕܕܐ ܐܘ ܠܐ        

 

     ܬܠܝܬܝܐ:   ܘܒܗ ܐܝܬ ܢܝ̈ܫܐ ܓ̄         

 

     ܢܝܫܐ ܩܕܡܝܐ: ܡܛܠ ܗܝ ܕܐܝܟܢܐ ܢܓܕܝܢ ܠܢ ܠܘܬ ܣܥܘܪ̈ܘܬܐ ܫܟܝܪ̈ܬܐ        

 

     ܬܪܝܢܐ: ܡܛܠ ܗܝ ܕܫܐܕ̈ܐ ܠܐ ܡܨܝܢ ܠܡܦܠܘ ܠܒܢܝ̈ܢܫܐ ܐܠܐ ܒܡܨܥܝܘܬܐ ܕܚܝ̈ܠܐ ܢܦܫܢܝ̈ܐ         

 

           ܘܦܓܪ̈ܢܝܐ       

 

     ܬܠܝܬܝܐ:   ܡܛܠ ܗܝ ܕܒܡܢܐ ܦܪܝܫܝܢ ܙܪ̈ܥܐ ܐܠܗܝ̈ܐ ܕܒܢ ܡܬܬܙܝܥܝܢ ܡ̣ܢ ܗܢܘܢ ܫܐܕܢܝ̈ܐ         

 

 

 

ܫܬܐܣܬܐ ܬܡܝܢܝܬܐ

 

           ܡܛܠ ܢܦܫܐ ܡܠܝܠܬܐ. ܘܒܗ ܐܝܬ ܦܪܘܡܝܘܢ ܘܩܦ̈ܠܐܐ ܚ̄         

 

     ܩܦܠܐܘܢ ܩܕܡܝܐ:  ܡܛܠ ܠܐ ܓܫܝܡܘܬܗ̇ ܕܢܦܫܐ. ܘܒܗ ܐܝܬ ܦܣܘ̈ܩܐ ܓ̄       

 

     ܦܣܘܩܐ ܩܕܡܝܐ:   ܡܛܠ ܕܠܐ ܓܫܝܡܬܐ ܗܝ ܢܦܫܐ. ܐܦܠܐ ܒܓܘܫܡܐ ܫܪܝܐ ܐܝܟ ܓܕܫܐ. ܐܠܐ ܡܢܗ̇ ܘܠܗ̇       

 

           ܡܩܝܡܐ ܐܝܟ ܫܪܟܐ ܕܐܘܣܝ̈ܐܣ. ܘܒܗ ܐܝܬ ܢܝ̈ܫܐ ܒ̄      

 

     ܢܝܫܐ ܩܕܡܝܐ: ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ         

 

     ܬܪܝܢܐ: ܡܛܠ ܣܗܕ̈ܘܬܐ ܟܬܒܝ̈ܬܐ    

 

     ܦܣܘܩܐ ܬܪܝܢܐ:    ܡܛܠ ܬܪܥܝܬܐ ܕܗܢܘܢ ܕܓܘܫܡܐ ܡܘܕܝܢ ܠܗ̇ ܠܢܦܫܐ ܘܣܬܘܪܝܗ̇      

 

     ܬܠܝܬܝܐ:   ܡܛܠ ܣܬܘܪܝܐ ܕܬܪܥܝܬܐ ܐܝܕܐ ܕܐܪܡܘܢܝܐ ܐܘܟܝܬ ܡܠܚܡܘܬܐ ܕܡܘܙܓܗܘܢ     

 

           ܕܐܣܛܘ̈ܟܣܐ ܐܡܪܐ ܕܐܝܬܝܗ̇ ܢܦܫܐ    

 

     ܩܦܠܐܘܢ ܬܪܝܢܐ:   ܡܛܠ ܦܘܪܫܢܝܗ̇ ܕܢܦܫܐ ܡܠܝܠܬܐ. ܘܒܗ ܐܝܬ ܦܣܘ̈ܩܐ ܛ̄     

 

     ܦܣܘܩܐ ܩܕܡܝܐ:   ܡܛܠܗܝ ܕܫܘ̈ܝܬ ܒܟܝܢܐ ܐܢܝܢ ܢܦ̈ܫܬܐ      

 

     ܬܪܝܢܐ: ܡܛܠ ܕܦܪܫܬ ܒܟܝܢܐ ܡܘܕܝܐ ܠܢܦ̈ܫܬܐ ܘܣܬܘܪܝܗ̇      

 

     ܬܠܝܬܝܐ:   ܡܛܠ ܦܘܪ̈ܫܢܝܗܘܢ ܕܩܢܘ̈ܡܐ ܐ̱ܢܫܝ̈ܐ ܠܦܘܬ ܚܝ̈ܠܐ ܬܠܝܬܝ̈ܐ. ܡܠܝܠܘܬܐ ܘܚܡܬܐ     

 

           ܘܪܓܬܐ         

 

     ܪܒܝܥܝܐ:    ܡܛܠ ܗܝ ܕܟܕ ܚܕܐ ܗܝ ܢܦܫܐ ܒܟܠ ܚܕ ܡ̣ܢ ܒܢܝ̈ܢܫܐ ܣܥܘܪ̈ܘܬܐ ܣܓܝ̈ܐܬ݀ ܦܘܪ̈ܫܢܐ       

 

           ܥܒܕܐ     

 

     ܚܡܝܫܝܐ:   ܡܛܠܗܝ ܕܗܕܡܐ ܡܪܢܝܐ ܦܫܝܛܐܝܬ ܠܒܐ ܐܝܬܘܗܝ ܕܡܚܘ̈ܝܢܘܬܐ ܘܣܗܕ̈ܘܬܐ       

 

     ܫܬܝܬܝܐ:   ܡܛܠ ܬܪܥܝܬܐ ܐܣܝܝܬܐ ܕܒܝܬ ܓܠܝܢܘܣ ܕܠܡܘܚܐ ܡܘܕܝܐ ܗܕܡܐ ܡܪܢܝܐ ܕܗܘܢܐ    

 

           ܘܣܬܘܪܝܗ̇ ܐܝܟ ܕܡ̣ܢ ܦܪܦܛܝܩܘ ܕܒܝܬ ܐܪܝܣܛܘܛܐܠܝܣ       

 

     ܫܒܝܥܝܐ:   ܡܛܠ ܕܪ̈ܓܝܗ̇ ܕܢܦܫܐ ܡܠܝܠܬܐ ܒܝܕ̈ܥܬܐ ܘܝܘܠܦܢ̈ܐ       

 

     ܬܡܝܢܝܐ:    ܡܛܠ ܕܝܠܝ̈ܬܐ ܕܢܦܫܐ ܐ̱ܢܫܝܬܐ ܒܡܠܬܐ ܢܦܘܩܬܐ ܘܪܡܙܢܝܬܐ ܘܟܬܘܒܘܬܐ      

 

           ܘܐܘܡܢܘܬܐ ܘܥܘܗܕܢܐ ܕܣܘܥܪ̈ܢܐ ܕܥܒܪܘ     

 

     ܬܫܝܥܝܐ:    ܡܛܠ ܬܚܘܝܬܐ ܕܐܝܬܝܘ ܚܟܝ̈ܡܐ ܠܢܦܫܐ ܡܠܝܠܬܐ ܒܦܚܡܗ̇ ܕܥܡ ܦܓܪܐ     

 

           ܘܡܢܘ̈ܬܗ ܒܛܘ̈ܦܣܐ ܫܒܥܐ     

 

     ܩܦܠܐܘܢ ܬܠܝܬܝܐ: ܡܛܠ ܒܪܝܬܗ̇ ܕܢܦܫܐ ܡܠܝܠܬܐ. ܘܒܗ ܐܝܬ ܦܣܘ̈ܩܐ ܓ̄     

 

     ܦܣܘܩܐ ܩܕܡܝܐ:   ܡܛܠ ܗܝ ܕܡܫܪܝܢܝܬܐ ܗܝ ܢܦܫܐ ܘܥܡ ܦܓܪܐ ܒܪܝܐ ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܬܪܝܢܐ: ܡܛܠ ܬܪ̈ܥܝܬܐ ܕܗܢܘܢ ܕܡܬܘܡܝܬܐ ܡܘܕܝܢ ܠܗ̇ ܠܢܦܫܐ ܘܣܬܘܪܝܗ̇        

 

     ܬܠܝܬܝܐ:   ܡܛܠ ܬܪܥܝܬܐ ܐܘܪܓܢܝܬܐ ܗ̇ܝ ܕܩܕܡܝܘܬܐ ܒܠܥܕ ܡܬܘܡܝܘܬܐ ܝܗܒܐ ܠܒܪܝܬܗ̇       

 

           ܕܢܦܫܐ ܘܣܬܘܪܝܗ̇    

 

     ܩܦܠܐܘܢ ܪܒܝܥܝܐ: ܡܛܠ ܫܘܢܝܐ ܕܢܦ̈ܫܬܐ ܡ̣ܢ ܦܓܪ̈ܝܗܝܢ. ܘܬܪ̈ܥܝܬܐ ܕܗܘܝ̈ ܠܐܢܫܝ̈ܢ ܥܠ ܗܟܢ ܘܒܗ     

 

           ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠ ܗܝ ܕܠܐ ܡܬܡܨܝܢܝܬܐ ܫܘܢܝ̈ܗܝܢ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ ܒܡܚܘ̈ܝܢܘܬܐ         

 

           ܘܣܗ̈ܕܘܬܐ      

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܫܘܢܝܐ ܡܘܕܝܢ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ ܘܣܬܘܪܝܗ̇     

 

     ܩܦܠܐܘܢ ܚܡܝܫܝܐ: ܡܛܠ ܢܦ̈ܫܬܐ ܕܚܝܘ̈ܬܐ. ܘܒܗ ܐܝܬ ܦܣܘ̈ܩܐ ܓ̄        

 

     ܦܣܘܩܐ ܩܕܡܝܐ:   ܡܛܠ ܗܝ ܕܓܠܝ̈ܙܢ ܐܢܝܢ ܚܝܘ̈ܬܐ ܠܐ ܡܠܝ̈ܠܬܐ ܡ̣ܢ ܢܦܫܐ ܡܠܝܠܬܐ       

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܫܟܝܚܘܬ ܢܦܫܐ ܡܠܝܠܬܐ ܡܙܕܩܝܢ ܠܚܝ̈ܘܬܐ      

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ     

 

     ܩܦܠܐܘܢ ܫܬܝܬܝܐ: ܡܛܠ ܩܘܝܡܗܘܢ ܕܢܦ̈ܫܬܐ ܡܠܝ̈ܠܬܐ ܒܬܪ ܚܘܒܠܐ ܕܦܓܪ̈ܝܗܝܢ ܒܡܚܘ̈ܝܢܘܬܐ       

 

           ܘܣܗܕ̈ܘܬܐ       

 

     ܫܒܝܥܝܐ:   ܡܛܠ ܝܕܥܬܗ ܕܢܦܫܐ. ܘܒܗ ܐܝܬ ܦܣܘ̈ܩܐ ܕ̄     

 

     ܦܣܘܩܐ ܩܕܡܝܐ:   ܕܡܕܥ ܝܕܥܐ ܢܦܫܐ ܠܟܠܗܘܢ ܣܘܥܪ̈ܢܐ ܟܠܢܝ̈ܐ ܘܡܢܬܝ̈ܐ ܡ̣ܢ ܒܬܪ ܦܘܪܫܢܐ    

 

           ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܐܡܪܝܢ ܕܢܦܫܐ ܠܐ ܡܕܪܟܐ ܠܫܪ̈ܒܐ ܡܢܬܝ̈ܐ ܟܕ ܥܡ ܦܓܪܐ      

 

           ܐܣܝܪܐ ܘܠܐ ܒܬܪ ܫܪܝܐ ܘܣܬܘܪܝܗ̇       

 

     ܬܠܝܬܝܐ:   ܡܛܠ ܗ̇ܝ ܕܐܝܟܐ ܘܐܝܟܢܐ ܗܘ̈ܝܢ ܢܦ̈ܫܬܐ ܡܠܝ̈ܠܬܐ ܡ̣ܢ ܒܬܪ ܫܪܝܐ ܕܡ̣ܢ ܦܓܪܐ      

 

     ܪܒܝܥܝܐ:    ܡܛܠ ܗܝ ܕܗܢܝ̈ܐܘܬܐ ܪ̈ܘܚܢܝܬܐ ܕܗܘ̈ܝܢ ܠܢܦܫܐ  ܡ̣ܢ ܒܬܪ ܫܪܝܐ ܝܬܝܪ ܡܥܠܝ̈ܢ         

 

           ܘܥܫܝ̈ܢܢ ܡ̣ܢ ܗܢܝ̈ܐܘܬܐ ܦܓܪ̈ܢܝܬܐ. ܘܪ̈ܓܝܓܬܐ ܒܣܪ̈ܢܝܬܐ       

 

     ܩܦܠܐܘܢ ܬܡܝܢܝܐ: ܡܛܠ ܚܙܘ̈ܢܐ ܘܓܠܝ̈ܢܐ. ܘܒܗ ܐܝܬ ܦܣܘ̈ܩܐ ܓ̄        

 

     ܦܣܘܩܐ ܩܕܡܝܐ:   ܡܛܠ ܚܠܡ̈ܐ. ܘܒܗ ܐܝܬ ܢܝ̈ܫܐ ܒ̄        

 

     ܢܝܫܐ ܩܕܡܝܐ: ܡܛܠ ܚܠܡ̈ܐ ܕܓ̈ܠܐ ܘܥ̈ܠܠܬܗܘܢ      

 

     ܬܪܝܢܐ: ܡܛܠ ܚܠܡ̈ܐ ܫܪܝܪ̈ܐ         

 

     ܬܠܝܬܝܐ:   ܡܛܠ ܓܠܝ̈ܢܐ. ܘܒܗ ܐܝܬ ܢܝ̈ܫܐ ܒ̄      

 

     ܢܝܫܐ ܩܕܡܝܐ: ܡܛܠ ܓܠܝ̈ܢܐ ܕܓ̈ܠܐ ܘܥ̈ܠܠܬܗܘܢ     

 

     ܬܪܝܢܐ: ܡܛܠ ܓܠܝ̈ܢܐ ܫܪܝܪ̈ܐ ܘܥ̈ܠܠܬܗܘܢ      

 

     ܦܣܘܩܐ ܩܕܡܝܐ:   ܡܛܠ ܢܦ̈ܫܬܐ ܓܡܝܪ̈ܬܐ ܕܢܒܝ̈ܐ ܘܕܫܠܝ̈ܚܐ ܘܐܒܗ̈ܬܐ. ܘܒܗ ܐܝܬ ܢܝ̈ܫܐ ܕ̄     

 

     ܢܝܫܐ ܩܕܡܝܐ: ܡܛܠ ܐܝܟܢܝܘܬ ܣܢܝܩܘܬܐ ܕܒܢܝ̈ܢܫܐ ܥܠ ܢܒܝ̈ܐ ܘܫܠܝ̈ܚܐ      

 

     ܬܪܝܢܐ: ܡܛܠ ܗܝ ܕܒܐܝܟ ܐܝܠܝܢ ܡܗܕܝܢ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ     

 

     ܬܠܝܬܝܐ:   ܡܛܠ ܕܝܠܝ̈ܬܐ ܕܢܦ̈ܫܬܗܘܢ ܕܢܒܝ̈ܐ ܘܕܫܠܝ̈ܚܐ ܘܕܐܒܗ̈ܬܐ ܒܚܝܪ̈ܐ      

 

     ܪܒܝܥܝܐ:    ܡܛܠ ܬܪ̈ܥܝܬܐ ܕܗܘܝ̈ ܠܒܢܝ̈ܢܫܐ ܡܛܠ ܬܕܡܪ̈ܬܐ ܕܒܐܝ̈ܕܝ ܓܡܝܪ̈ܐ ܡܣܬܥܪ̈ܢ      

 

 

 

ܫܬܐܣܬܐ ܬܫܝܥܝܬܐ

 

           ܡܛܠ ܫܠܝܛܘܬ ܒܝܬܐ ܘܚܐܪܘܬܐ. ܘܡܛܠ ܚܠܩܐ ܘܚܪܩܐ. ܘܡܛܠ ܩܨܐ ܩܦ̈ܠܐܐ ܗ̄       

 

     ܩܦܠܐܘܢ ܩܕܡܝܐ:  ܡܛܠ ܛܒܬܐ ܘܒܝܫܬܐ ܘܒܗ ܐܝܬ ܦܣܘ̈ܩܐ ܓ̄         

 

     ܦܣܘܩܐ ܩܕܡܝܐ:   ܡܛܠ ܗܝ ܕܛܒܬܐ ܟܝܢܝܬܐ ܗ̱ܝ ܘܒܝܫܬܐ ܢܡܘܣܝܬܐ ܗ̱ܝ ܘܠܘ ܟܝܢܝܬܐ ܗ̱ܝ      

 

           ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܗ̇ܝ ܕܟܝܢܐ ܘܠܘ ܢܡܘܣܝܬܐ ܡܘܕܝܐ ܠܒܝܫܬܐ        

 

           ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܬܠܝܬܝܐ:   ܡܛܠ ܣܬܘܪܝܐ ܕܬܪܥܝܬܐ ܗܕܐ ܒܫܪܝܐ ܕܣܥܝ̈ܐ ܘܦܘ̈ܢܝܐ ܕܣܗܕ̈ܘܬܐ     

 

     ܩܦܠܐܘܢ ܬܪܝܢܐ:   ܡܛܠ ܒܛܝܠܘܬܐ ܐܠܗܝܬܐ ܗ̇ܝ ܕܓܘܢܐܝܬ ܠܟܠ ܣܥܪܐ. ܘܒܗ ܐܝܬ ܦܣܘ̈ܩܐ ܒ̄        

 

     ܦܣܘܩܐ ܩܕܡܝܐ:   ܡܛܠ ܗܝ ܕܟܠܡܕܡ ܒܚܝܠܐ ܐܠܗܝܐ. ܡ̣ܢ ܚܝܠܐ ܠܡܥܒܕܢܘܬܐ ܢܦܩ ܣܛܪ ܡ̣ܢ ܒܘܨܪ̈ܐ       

 

           ܐܝܠܝܢ ܕܡ̣ܢ ܚܐܪܘܬܢ ܒܡܚܘ̈ܝܢܘܬܐ ܘܣܗܕ̈ܘܬܐ      

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܗܢܘܢ ܕܐܡܪܝܢ ܠܘ ܒܒܛܝܠܘܬܐ ܐܠܗܝܬܐ ܡܣܬܥܪ        

 

           ܟܠ ܡܕܡ. ܘܗܕܐ ܬܪܥܝܬܐ ܠܚܡܫ ܐܪ̈ܣܝܣ ܐܬܦܓܠܬ݀       

 

     ܐܪܣܝܣ ܩܕܡܝܬܐ: ܕܦܝܠܠܘ̈ܣܘܦܐ ܦܐܪ̈ܦܐܛܝܩܘ ܕܐܡܪܝܢ ܕܚܕ ܗܘ ܒܠܚܘܕ ܥܠܬܢܐ ܥܠܬܐ ܐܠܗܐ.      

 

           ܘܥܠܬܢ̈ܐ ܐ̱ܚܪ̈ܢܐ ܚܕ ܡ̣ܢ ܚܕ ܡܬܬܗܘܝܢ ܘܣܬܘܪܝܗ̇      

 

     ܬܪܝܢܝܬܐ:    ܕܦܘܣܝ̈ܘܠܘܓܘ ܘܣܬܘܪܝܗ̇        

 

     ܬܠܝܬܝܬܐ:  ܕܐܣܛܪ̈ܘܢܘܡܘ ܘܫܪܝܗ̇        

 

     ܪܒܝܥܝܬܐ:   ܡܢܝ̈ܢܝܐ ܘܫܪܝܗ̇       

 

     ܚܡܝܫܝܬܐ:  ܕܦܪ̈ܝܫܐ ܡ̣ܢ ܡܫܠܡܢ̈ܐ ܘܣܬܘܪܝܗ̇         

 

     ܩܦܠܐܘܢ ܬܠܝܬܝܐ: ܡܛܠ ܨܒܝܢܐ ܐܠܗܝܐ ܘܒܗ ܐܝܬ ܦܣܘ̈ܩܐ ܓ̄     

 

     ܦܣܘܩܐ ܩܕܡܝܐ:   ܡܛܠ ܗܝ ܕܒܛܒܬܐ ܘܙܕܝܩܘܬܐ ܒܠܚܘܕ ܨܒܐ ܐܠܗܐ. ܘܠܘ ܒܒܝ̈ܫܬܐ ܘܚܛܗ̈ܐ ܒܝܕ        

 

           ܡܚܘܝܢ̈ܘܬܐ ܘܣܗܕ̈ܘܬܐ         

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܐܡܪܐ. ܕܐܟܡܐ ܕܒܛܒܬܐ ܨܒܐ ܐܠܗܐ. ܒܗ̇ ܒܕܡܘܬܐ         

 

           ܘܒܒܝܫܬܐ. ܒܣܥܝ̈ܐ ܘܣܗܕ̈ܘܬܐ      

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ. ܘܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܗܘܢ     

 

     ܩܦܠܐܘܢ ܪܒܝܥܝܐ: ܡܠܬܐ ܕܝܠܢܝܬܐ ܥܠ ܫܠܝܛܘܬ ܒܝܬܐ ܘܚܐܪܘܬܐ ܐ̱ܢܫܝܬܐ ܘܒܗ ܐܝܬ ܦܣܘ̈ܩܐ ܓ̄       

 

     ܦܣܘܩܐ ܩܕܡܝܐ:   ܡܛܠ ܗܝ ܕܐܝܬ ܚܐܪܘܬܐ ܠܒܢܝ̈ܢܫܐ ܒܡܚܘ̈ܝܢܘܬܐ ܘܣܗܕ̈ܘܬܐ ܟܬܒܝ̈ܬܐ        

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܡܒ̈ܛܠܝ ܚܐܪܘܬܐ ܕܐܡܪܝܢ ܡܚܪܩ ܚܪ̈ܝܩܢ ܡ̣ܢ ܐܠܗܐ       

 

           ܣܥܘܪ̈ܘܬܐ ܐ̱ܢܫܝ̈ܬܐ ܒܣܥܝ̈ܐ ܚܘܫܒܝ̈ܐ ܘܣܗܕ̈ܘܬܐ ܟܬܒܝ̈ܬܐ       

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܕܡܒ̈ܛܠܝ ܚܐܪܘܬܐ ܘܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܐ       

 

     ܩܦܠܐܘܢ ܚܡܝܫܝܐ: ܡܛܠ ܡܠܬܐ ܕܥܠ ܩܨܐ ܘܒܗ ܐܝܬ ܦܣܘ̈ܩܐ ܘ̄        

 

     ܦܣܘܩܐ ܩܕܡܝܐ:   ܡܛܠ ܗܝ ܕܒܥܕܢܐ ܡܐܬ ܒܪܢܫܐ ܒܦܘܩܕܢܗ ܕܐܠܗܐ. ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܗܢܘܢ ܕܐܡܪܝܢ ܕܠܘ ܒܥܕܢܗ ܡܐܬ ܟܠ ܒܪܢܫܐ ܐܦܠܐ     

 

           ܒܦܘܩܕܢܐ ܕܐܠܗܐ ܒܣܥܝ̈ܐ ܘܣܗܕ̈ܘܬܐ       

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܒܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܗܘܢ     

 

     ܪܒܝܥܝܐ:    ܡܛܠ ܗܝ ܕܠܐ ܡܩܕܡ ܡܬܚܡ ܡ̣ܢ ܐܠܗܐ ܩܨܗܘܢ ܕܒܢܝ̈ܢܫܐ ܒܡܚܘ̈ܝܢܘܬܐ ܘܣܗܕ̈ܘܬܐ        

 

     ܚܡܝܫܝܐ:   ܡܛܠ ܬܪܥܝܬܐ ܣܩܘܒܠܝܬܐ ܕܗܢܘܢ ܕܡܬܚܡܘܬ ܩܨܐ ܡܘܕܝܢ ܒܣܥܝ̈ܐ ܘܣܗܕ̈ܘܬܐ     

 

     ܫܬܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܘܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܗܘܢ     

 

 

 

ܫܬܐܣܬܐ ܥܣܝܪܝܬܐ

 

           ܡܛܠ ܡܠܬܐ ܕܥܠ ܚܝܬ݀ ܡܝ̈ܬܐ. ܘܒܗ ܐܝܬ ܩܦ̈ܠܐܐ ܓ̄     

 

     ܩܦܠܐܘܢ ܩܕܡܝܐ:  ܡܛܠ ܡܬܬܗܘܝܢܘܬܐ ܕܗܘ ܕܐܬܠܝܬܝ. ܘܒܗ ܐܝܬ ܦܣܘ̈ܩܐ ܒ̄          

 

     ܦܣܘܩܐ ܩܕܡܝܐ:   ܡܛܠ ܗ̇ܝ ܕܡܬܡܨܝܢܝܬܐ ܗ̱ܝ ܥܛܝܦܘܬ ܡܬܬܗܘܝܢܘܬܐ ܕܗܘ ܕܐܬܠܝܬܝ       

 

           ܒܡܚܘ̈ܝܢܘܬܐ      

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܠܐ ܡܬܡܨܝܢܝܬܐ ܕܝܢܝܢ ܠܥܛܝܦܘܬ ܡܬܬܗܘܝܢܘܬܐ ܕܗܘ      

 

           ܕܐܬܠܝܬܝ ܘܣܬܘܪܝܗ̇        

 

     ܩܦܠܐܘܢ ܒ:     ܡܛܠ ܩܝܡܬܐ ܘܚܘܕܬܐ ܕܦܓܪ̈ܐ ܐ̱ܢܫܝ̈ܐ ܘܒܗ ܐܝܬ ܦܣܘ̈ܩܐ ܓ        

 

     ܦܣܘܩܐ ܩܕܡܝܐ:   ܡܛܠ ܗ̇ܝ ܕܐܠܨܝܬܐ ܗ̱ܝ ܩܝܡܬܐ ܕܦܓܪ̈ܐ ܐ̱ܢܫܝ̈ܐ ܒܡܚܘ̈ܝܢܘܬܐ ܘܣܗܕ̈ܘܬܐ      

 

     ܬܪܝܢܐ: ܡܛܠ ܬܪܥܝܬܐ ܙܕܘܩܝܬܐ ܟܦܪܬ݀ ܒܩܝܡܬܐ ܕܦܓܪ̈ܐ. ܒܣܥܝ̈ܐ ܘܣܗܕ̈ܘܬܐ      

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܟܦܪܬ݀ ܒܩܝܡܬܐ ܒܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܐ       

 

     ܩܦܠܐܘܢ ܬܠܝܬܝܐ: ܡܛܠ ܐܝܟܢܝܘܬܗܘܢ ܕܦܓܪ̈ܐ ܒܬܪ ܩܝܡܬܐ. ܘܒܗ ܐܝܬ ܦܣܘ̈ܩܐ ܝܗ̄      

 

     ܦܣܘܩܐ ܩܕܡܝܐ:   ܡܛܠ ܗ̇ܝ ܕܦܓܪܐ ܗܘ ܕܡܐܬ. ܗ̣ܘ ܟܕ ܗ̣ܘ ܩܐܡ        

 

     ܬܪܝܢܐ: ܡܛܠ ܕܠܘ ܦܓܪ̈ܐ ܪ̈ܘܚܢܝܐ ܘܐܐܪ̈ܝܐ ܩܝܡܝܢ        

 

     ܬܠܝܬܝܐ:   ܡܛܠ ܕܠܐ ܡܕܡ ܡ̣ܢ ܗܕܡ̈ܐ ܚܣܪ ܡ̣ܢ ܦܓܪ̈ܐ ܒܩܝܡܬܐ       

 

     ܪܒܝܥܝܐ:    ܡܛܠ ܕܒܪ ܬܠܬܝܢ ܫܢܝ̈ܢ ܩܝܡܝܢ ܦܓܪ̈ܐ       

 

     ܚܡܝܫܝܐ:   ܡܛܠ ܗܝ ܕܟܠ ܪܓܫܐ ܒܡܬܪܓܫܢܗ ܒܠܚܘܕ ܡܪܓܫ     

 

     ܫܬܝܬܝܐ:   ܕܐܝܠܝܢ ܕܡ̣ܢ ܚܝ̈ܠܐ ܢܦܫܢܝ̈ܐ ܦܝܫܝܢ ܒܬܪ ܩܝܡܬܐ ܘܕܐܝܠܝܢ ܠܐ        

 

     ܫܒܝܥܝܐ:   ܡܛܠ ܗܝ ܕܠܘ ܒܙܢܝ̈ܐ ܓܕܫܢܝ̈ܐ ܕܒܗܘܢ ܡܬܝܩܢܝܢ ܩܢܘ̈ܡܐ ܕܗܪܟܐ. ܓܘܢܐ         

 

           ܠܡܐܡܪ. ܘܕܡܘ̈ܬܐ ܡܫܚ̈ܠܦܬܐ ܡܬܦܪܫܝܢ      

 

     ܬܡܝܢܝܐ:    ܡܛܠ ܣܥܪܐ ܘܛܦܪ̈ܐ܆ ܕܐܢ ܐܪܐ ܡܫܬܟܚܝܢ ܠܒܢܝ̈ܢܫܐ ܐܘ ܠܐ         

 

     ܬܫܝܥܝܐ:    ܕܐܪܐ ܥܒܪܝܢ ܒܫܘ̈ܥܐ ܛܡܝ̈ܡܐ ܦܓܪ̈ܐ ܒܬܪ ܩܝܡܬܐ ܐܘ ܠܐ     

 

     ܥܣܝܪܝܐ:   ܡܛܠ ܗܝ ܕܠܐ ܡܣܬܢܩܝܢ ܦܓܪ̈ܐ ܥܠ ܬܟܣܝܬܐ ܒܬܪ ܩܝܡܬܐ     

 

     ܝܐ:   ܡܛܠ ܗܝ ܕܐܝܟܢܐ ܡܬܟܢܫܝܢ ܦܓܪ̈ܐ ܒܝܘܡ ܢܘܚܡܐ    

 

     ܝܒ̄:  ܡܛܠ ܕܐܪܐ ܡܬܚܫܚܝܢ ܒܢܝ̈ܢܫܐ ܒܡܠܬܐ ܢܦܘܩܬܐ ܒܬܪ ܩܝܡܬܐ     

 

     ܝܓ̄:  ܡܛܠ ܗܝ ܕܡܫܬܘܕܥܝܢ ܒܢܝ̈ܢܫܐ ܠܚܕ̈ܕܐ ܒܬܪ ܩܝܡܬܐ       

 

     ܝܕ̄:   ܡܛܠ ܗܝ ܕܠܐ ܡܣܬܢܩܝܢ ܒܢܝ̈ܢܫܐ ܥܠ ܡܐܟܠܐ ܘܡܫܬܝܐ ܒܬܪ ܩܝܡܬܐ        

 

     ܝܗ̄:  ܡܛܠ ܕܠܐ ܡܙܕܘܓܝܢ ܒܢܝ̈ܢܫܐ ܒܬܪ ܩܝܡܬܐ    

 

 

 

ܫܬܐܣܬܐ ܚܕܥܣܝܪܝܬܐ

 

           ܡܛܠ ܚܪܬܐ ܘܕܝܢܐ ܘܦܘܪܥܢܐ ܕܛܒ̈ܐ ܘܕܒܝ̈ܫܐ. ܘܒܗ ܐܝܬ ܩܦ̈ܠܐܐ ܘ̄    

 

     ܩܦܠܐܘܢ ܩܕܡܝܐ:  ܘܒܗ ܐܝܬ ܦܣܘ̈ܩܐ ܕ̄        

 

     ܦܣܘܩܐ ܩܕܡܝܐ:   ܡܛܠ ܗܝ ܕܐܢ ܐܪܐ ܝܕܥ ܗܘ ܙܒܢܐ ܕܫܘܠܡܐ ܐܘ ܠܐ    

 

     ܬܪܝܢܐ: ܡܛܠ ܫܘܘ̈ܕܥܐ ܕܩܪܝܒ ܗܘ ܫܘܠܡܐ     

 

     ܬܠܝܬܝܐ:   ܡܛܠ ܒܪܐ ܕܐܒܕܢܐ. ܘܫܡܗ ܘܓܢܣܗ ܘܕܡܘ̈ܬܗ       

 

     ܪܒܝܥܝܐ:    ܡܛܠ ܡܐܬܝܬܗ ܕܬܪܬܝܢ ܕܡܪܢ. ܒܢܝ̈ܢܫܐ ܘܣܗܕ̈ܘܬܐ     

 

     ܩܦܠܐܘܢ ܬܪܝܢܐ:   ܡܛܠ ܒܘܣܡܐ ܕܙܕܝ̈ܩܐ ܘܫܘܢܩܐ ܕܚܛܝ̈ܐ. ܘܒܗ ܐܝܬ ܦܣܘܩܐ ܕ̄         

 

     ܦܣܘܩܐ ܩܕܡܝܐ:   ܡܛܠ ܗܝ ܕܡܬܝܕܥ̈ܢܐ ܘܠܘ ܡܬܪ̈ܓܫܢܐ ܐܢܘܢ ܒܘ̈ܣܡܐ ܘܫܘ̈ܢܩܐ ܒܣܗ̈ܕܘܬܐ     

 

           ܟܬܒܝ̈ܬܐ        

 

     ܬܪܝܢܐ: ܡܛܠ ܕܥܠܡܝ̈ܢܝܐ ܐܢܘܢ ܒܘ̈ܣܡܐ ܕܙܕܝ̈ܩܐ ܘܫܘ̈ܢܩܐ ܕܚܛܝ̈ܐ. ܒܚܘܝ̈ܢܘܬܐ ܘܣܗ̈ܕܘܬܐ       

 

     ܬܠܝܬܝܐ:   ܡܛܠ ܬܪܥܝܬܐ ܕܗܢܘܢ ܕܫܘܠܡܐ ܡܘܕܝܢ ܕܫܘܢܩܐ ܕܚܛܝ̈ܐ. ܒܣܥܝ̈ܐ ܘܣܗܕ̈ܘܬܐ       

 

     ܪܒܝܥܝܐ:    ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܕܐܬܩܕܡܬ݀ ܒܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܐ       

 

     ܢܝܫܐ ܐ̱ܚܪܢܐ: ܡܛܠ ܬܪܥܝܬܐ ܕܩܢܝܢ ܦܐܪ̈ܦܐܛܝܩܘ ܡܛܠ ܫܘܠܡܗ ܕܬܫܢܝܩܐ ܘܥܠܡܝܢܝܘܬܗ        

 

     ܩܦܠܐܘܢ ܬܠܝܬܝܐ: ܡܛܠ ܦܚܡܐ ܕܗܝܡܢܘܬܐ ܠܘܬ ܥܒ̈ܕܐ. ܘܒܗ ܐܝܬ ܦܣܘ̈ܩܐ ܕ̄          

 

     ܦܣܘܩܐ ܩܕܡܝܐ:   ܡܛܠ ܟܢܝܫܘܬ ܣܘܢܝܦܛܪܘܢܝܬܐ ܕܗܝܡܢܘܬܐ ܘܥܒܕ̈ܐ ܡܘܬܪܐ ܒܡܚܘܝ̈ܢܘܬܐ ܘܣܗܕ̈ܘܬܐ        

 

           ܟܬܒܝ̈ܬܐ        

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܠܗܝܡܢܘܬܐ ܒܠܥܕ ܥܝ̈ܕܐ ܣܝܡܝܢ ܥܠܬ݀ ܛܘܒܬܢܘܬܐ      

 

           ܒܣܥܝ̈ܐ ܘܣܗ̈ܕܘܬܐ     

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܕܐܬܩܕܡܬ݀ ܒܫܪܝ ܣܥܝ̈ܐ ܘܦܘܢܝ ܣܗܕ̈ܘܬܐ        

 

     ܪܒܝܥܝܐ:    ܡܛܠ ܬܪܥܝܬܐ ܕܗܢܘܢ ܕܠܥܒ̈ܕܐ ܒܠܥܕ ܗܝܡܢܘܬܐ ܣܝܡܝܢ ܥܠܬ݀ ܒܘܣ̈ܡܐ         

 

           ܣܬܘܪܝܗ̇       

 

     ܩܦܠܐܘܢ ܪܒܝܥܝܐ: ܡܛܠ ܦܘܚܡܐ ܕܗܝܡܢܘܬܐ ܘܥܒܕ̈ܐ ܠܦܘܬ ܦܘܪܥܢܐ. ܘܒܗ ܐܝܬ ܦܣܘ̈ܩܐ ܓ̄       

 

     ܦܣܘܩܐ ܩܕܡܝܐ:   ܡܛܠ ܗܝ ܕܗܝܡܢܘܬܐ ܫܪܝܪܬܐ ܘܥܒܕ̈ܐ ܛܒ̈ܐ ܥ̈ܠܠܬܐ ܐܢܘܢ ܕܦܘܪ̈ܥܢܐ ܥܠܡܝ̈ܢܝܐ    

 

           ܒܡܚܘ̈ܝܢܘܬܐ ܘܣܗ̈ܕܘܬܐ        

 

     ܬܪܝܢܐ: ܡܛܠ ܬܪܥܝܬܐ ܣܩܘܒܠܝܬܐ ܕܗܢܘܢ ܕܐܡܪܝܢ ܕܠܘ ܒܝܕ ܥ̈ܠܬܐ ܗܘܐ ܦܘܪܥܢܐ ܐܠܐ     

 

           ܡܓܢ ܒܣܥܝ̈ܐ ܘܣܗܕ̈ܘܬܐ    

 

     ܬܠܝܬܝܐ:   ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܕܐܬܩܕܡܬ݀ ܒܫܪܝ ܣܥܝܝ̈ܗܘܢ ܘܦܘܢܝ ܣܗܕ̈ܘܬܐ       

 

     ܩܦܠܐܘܢ ܚܡܝܫܝܐ: ܡܛܠ ܚܛܗ̈ܐ ܘܬܝܒܘܬܐ. ܘܒܗ ܐܝܬ ܦܣܘ̈ܩܐ ܚܡܫܐ      

 

     ܦܣܘܩܐ ܩܕܡܝܐ:   ܡܛܠ ܗܝ ܕܡܩܒ̈ܠܢܐ ܐܢܘܢ ܚܛܗ̈ܐ ܘܙܕܝܩܘܬܐ ܘܗܝܡܢܘܬܐ ܕܝܬܝܪܘܬܐ ܘܒܨܝܪܘܬܐ     

 

     ܬܪܝܢܐ: ܡܛܠ ܗܝ ܕܬܝܒܘܬܐ ܡܩܒܠܬܐ ܗܝ ܒܡܚܘ̈ܝܢܘܬܐ ܘܣܗܕ̈ܘܬܐ ܟܬܒܝ̈ܬܐ       

 

     ܬܠܝܬܝܐ:   ܡܛܠ ܬܪܥܝܬܐ ܣܩܘܒܠܝܬܐ ܕܢܐܘܐܛܝ̈ܢܘ ܗܢܘܢ ܕܠܐ ܡܩܒܠܝܢ ܬܝܒܘܬܐ ܒܬܪ ܥܡܕܐ     

 

           ܒܣܥܝ̈ܐ ܘܣܗ̈ܕܘܬܐ    

 

     ܪܒܝܥܝܐ:    ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܕܐܬܩܕܡܬ݀ ܒܫܪܝ ܣܥܝ̈ܐ ܘܦܘܢܝ ܣܗܕ̈ܘܬܐ        

 

     ܚܡܝܫܝܐ:   ܡܛܠ ܗܝ ܕܡܘܕܝܢܘܬܐ ܥܠܬܐ ܗܝ ܪܒܬܐ ܕܡܬܠܚܝܢܘܬ ܚܛܗ̈ܐ. ܒܡܚܘ̈ܝܢܘܬܐ      

 

           ܘܣܗ̈ܕܘܬܐ ܟܬܒܝ̈ܬܐ     

 

     ܢܝܫܐ ܐ̱ܚܪܢܐ: ܡܛܠܗܝ ܕܐܝܟܢܐ ܙܕܩ ܕܢܗܘܐ ܗ̇ܘ ܕܡܩܒܠ ܠܗ̇ ܠܡܘܕܝܢܘܬܐ        

 

     ܩܦܠܐܘܢ ܘ̄: ܡܛܠ ܓܘܢܝܘܬ ܫܘܪ̈ܥܬܐ ܠܟܠܗܘܢ ܝܠܝ̈ܕܝ ܐ̱ܢܫܐܝܬ. ܘܒܗ ܐܝܬ ܦܣܘ̈ܩܐ ܒ̄      

 

     ܦܣܘܩܐ ܩܕܡܝܐ:   ܡܛܠܗܝ ܕܠܐ ܐ̱ܢܫ ܡ̣ܢ ܠܒܝ̈ܫܝ ܒܣܪܐ ܐܝܬ ܕܡܚܪܪ ܡ̣ܢ ܒܘܨܪ̈ܐ ܐ̱ܢܫܝ̈ܐ ܒܣܗ̈ܕܘܬܐ       

 

           ܟܬܒܝ̈ܬܐ        

 

     ܬܪܝܢܐ: ܡܛܠ ܬܪܥܝܬܐ ܕܗܢܘܢ ܕܠܐ ܡܬܡܨܝܢܝܬܐ ܕܝܢܝܢ ܠܫܘܪ̈ܥܬܐ ܕܗܢܘܢ ܕܡ̣ܢ ܟܕܘ       

 

           ܐܬܢܦܚܘ ܒܪܘܚܐ ܩܕܝܫܐ ܘܣܬܘܪܝܗ̇         

 

 

 

ܫܬܐܣܬܐ ܬܪܥܣܝܪܝܬܐ

 

           ܡܛܠ ܦܪܕܝܣܐ ܕܥܕܝܢ ܘܒܗ ܐܝܬ ܩܦ̈ܠܐܐ ܕ̄     

 

     ܩܦܠܐܘܢ ܩܕܡܝܐ:  ܡܛܠ ܬܐܘܪܝܐ ܕܥܠ ܡܢܝܘܬܐ ܕܦܪܕܝܣܐ ܘܒܗ ܐܝܬ ܦܣܘ̈ܩܐ ܕ̄        

 

     ܦܣܘܩܐ ܩܕܡܝܐ:   ܕܡܢܐ ܗ̱ܘ ܥܕܝܢ ܘܡܢܐ ܦܪܕܝܣܐ ܘܕܒܐܝܕܐ ܐܢܘܢ ܦܢܝܬܐ ܒܣܗܕ̈ܘܬܐ      

 

     ܬܪܝܢܐ: ܡܛܠܗܝ ܕܥܦܝܦܐ ܗ̱ܘ ܦܪܕܝܣܐ ܪܘܚܢܝܐ ܘܓܘܫܡܢܝܐ. ܒܣܗ̈ܕܘܬܐ ܟܬܒܝ̈ܬܐ          

 

     ܬܠܝܬܝܐ:   ܡܛܠܗܝ ܕܒܐܝܢܐ ܝܘܡܐ ܡ̣ܢ ܗܠܝܢ ܫܬܐ ܝܘ̈ܡܝܢ ܐܬܒܪܝ ܦܪܕܝܣܐ. ܘܕܡܛܠ ܡܢܐ         

 

           ܐܬܒܪܝ     

 

     ܪܒܝܥܝܐ:    ܡܛܠܗܝ ܕܐ̱ܚܪܬܐ ܗ̱ܝ ܡܠܟܘܬܐ ܕܫܡܝܐ ܘܐ̱ܚܪܢܐ ܦܪܕܝܣܐ        

 

     ܩܦܠܐܘܢ ܬܪܝܢܐ:   ܡܛܠ ܐܝܠܢܐ ܕܚܝ̈ܐ. ܘܐܝܠܢܐ ܕܝܕܥܬܐ ܕܛܒܬܐ ܘܕܒܝܫܬܐ. ܘܒܗ ܐܝܬ ܦܣܘ̈ܩܐ ܕ̄         

 

     ܦܣܘܩܐ ܩܕܡܝܐ:   ܡܛܠܗܝ ܕܡܢܘ ܐܝܠܢܐ ܕܚܝ̈ܐ         

 

     ܬܪܝܢܐ: ܡܛܠܗܝ ܕܡܢܘ ܐܝܠܢܐ ܕܝܕܥܬܐ ܕܛܒܬܐ ܘܕܒܝܫܬܐ        

 

     ܬܠܝܬܝܐ:   ܡܛܠܡܢܐ ܒܟܘ̈ܢܝܐ ܗܠܝܢ ܐܬܟܢܝܘ ܬܪ̈ܝܗܘܢ ܗܠܝܢ ܐܝܠܢ̈ܐ     

 

     ܪܒܝܥܝܐ:    ܡܛܠ ܚܘܝܐ ܕܐܛܥܝ ܒܕܒܝܬ ܐܕܡ    

 

     ܩܦܠܐܘܢ ܬܠܝܬܝܐ: ܘܒܗ ܐܝܬ ܦܣܘ̈ܩܐ ܒ̄        

 

     ܦܣܘܩܐ ܩܕܡܝܐ:   ܡܛܠܗܝ ܕܕܐܝܟܢܐ ܗܘܝܢ ܗܘܘ ܕܒܝܬ ܐܕܡ ܐܠܘܠܐ ܥܒܪܘ ܥܠ ܦܘܩܕܢܐ         

 

     ܬܪܝܢܐ: ܡܛܠܗܝ ܕܟܡܐ ܐܪܐ ܡܟܬܪܝܢ ܗܘܘ ܕܒܝܬ ܐܕܡ ܒܦܪܕܝܣܐ. ܘܟܢ ܡܬܥܠܝܢ ܗܘܘ      

 

           ܠܡܠܟܘܬܐ ܕܫܡܝܐ     

 

     ܩܦܠܐܘܢ ܪܒܝܥܝܐ: ܡܛܠ ܦܘܫܩܐ ܕܡ̈ܠܐ ܕܒܐܘܪܝܬܐ ܡܝܬܝܢ ܥܠ ܫܪܒܗ ܕܦܪܕܝܣܐ. ܘܒܗ ܐܝܬ         

 

           ܥܘܬܕܐ ܘܦܣܘ̈ܩܐ ܬܫܥܐ ܠܦܘܬ ܡܢܝܢܐ ܕܟܠܚܕ ܡ̣ܢ ܗܢܘܢ ܦܬܓܡ̈ܐ        

 

     ܦܣܘܩܐ ܩܕܡܝܐ:   ܡܛܠ ܦܘܫܩܐ ܕܦܬܓܡ̈ܐ ܡܫܘܕܥܢܝܗ̇ ܕܒܪܝܬ ܦܪܕܝܣܐ       

 

     ܬܪܝܢܐ: ܡܛܠ ܢܗܪܐ ܗ̇ܘ ܪܒܐ ܕܠܐ ܪܒܥܐ ܢܗܪ̈ܘܬܐ ܡܬܦܠܓ    

 

     ܬܠܝܬܝܐ:   ܡܛܠ ܫܘܪܝ ܗܘܝܐ ܕܦܪܕܝܣܐ ܘܣܝܘܡܘܬ ܢܡܘܣܐ       

 

     ܪܒܝܥܝܐ:    ܡܛܠ ܒܪܝܬܐ ܕܟܝ̈ܢܐ ܚܝ̈ܐ ܠܐ ܡܠܝ̈ܠܐ    

 

     ܚܡܝܫܝܐ:   ܡܛܠ ܐܝܟܢܝܘܬܐ ܕܡܫܪܬܚܘܬ ܩܢܘ̈ܡܐ        

 

     ܫܬܝܬܝܐ:   ܡܛܠ ܙܢܐ ܕܡܫܬܒܝܢܘܬܗܘܢ ܕܠܪܓܬܐ    

 

     ܫܒܝܥܝܐ:   ܡܛܠ ܙܢܐ ܕܒܗܬܬܗܘܢ ܘܡܦܩ ܒܪܘܚܗܘܢ ܠܣܐܡ ܢܡܘܣܗܘܢ      

 

     ܬܡܝܢܝܐ:    ܡܛܠ ܙܢܐ ܕܡܣܡ ܒܪܝܫܐ ܕܩܒܠܘ ܡ̣ܢ ܒܪܘܝܐ     

 

     ܬܫܝܥܝܐ:    ܡܛܠ ܒܛܝܠܘܬܐ ܐܠܗܝܬܐ ܡܦܪܢܣܢܝܬܗܘܢ ܡ̣ܢ ܒܬܪ ܡܣܡ ܒܪܝܫܐ. ܗܝ ܕܥܕܪܐ      

 

           ܗܘܬ݀ ܠܗܘܢ ܫܟܢܬ݀     

 

 

 

#1 

 

ܒܝܕ ܐܠܗܐ ܡܪܐ ܟܠ ܡܫܪܝܢܢ ܕܢܟܬܘܒ ܟܬܒܐ ܕܡܢܪܬ ܩܘܕ̈ܫܐ ܡܛܠ ܫܬܐܣ̈ܐ ܥܕܬܢܝ̈ܬܐ ܡܢ ܣܝ̈ܡܐ ܕܡܪܝ ܓܪܝܓܘܪܝܘܣ ܕܒܛܝܒܘ ܡܦܪܝܢܐ ܕܡܕܢܚܐ ܩܕܡܝܬ ܥܘܬܕܐ

 

 

 

ܬܫܒ̈ܚܬܐ ܠܐ ܣܘ̈ܦܝܬܐ. ܘܬܘܕ̈ܝܬܐ ܠܐ ܢܘ̈ܦܝܬܐ. ܠܐܒܐ ܕܡ̣ܢ ܐܒܗܘܬܗ ܟܠ ܐܒܗܘܬܐ ܡܫܬܡܝܐ. ܘܠܒܪܐ ܕܒܒܪܘܬܢܘܬܗ ܥܠܬܢܝܘܬ ܟܠ ܥܠܬܐ ܡܬܬܗܘܝܐ. ܘܠܪܘܚܐ ܩܕܝܫܐ ܕܒܝܕ ܫܘܟܢܘ̈ܗܝ ܫܦܝ̈ܥܐ ܫܦܝܪܘܬ ܗܘܝܐ ܠܗܘܝ̈ܐ ܡܬܬܝܬܝܐ. ܟܝܢܐ ܣܓܝܕܐ ܕܒܬܠܝܬܝܘܬ ܩܢܘ̈ܡܐ ܡܬܗܘܢܢ. ܘܒܕܝ̣̈ܠܝܬܐ ܡܝܩ̈ܢܢܝܬܐ ܡܬܗܝܡܢ. ܗ̇ܘ ܕܠܒܪܢܫܐ ܥܠܡܐ ܙܥܘܪܐ ܒܥܠܡܐ ܪܒܐ ܬܗܝܪܐܝܬ ܐܩܝܡ. ܘܒܗܘܢܐ ܕܡܘ̣ܬܐ ܐܠܗܝܬܐ ܠܥܠ ܡܢ ܬܓ̈ܡܐ ܓܘܫ̈ܡܢܝܐ ܕܡܝܪܐܝܬ ܐܪܝܡ. ܘܒܢܛܚ̈ܐ ܪ̈ܘܚܢܝܐ ܥܕܪܗ. ܘܒܕܢܚ̈ܐ ܙܠܓܢܝ̈ܐ ܗܕܪܗ. ܘܐܘܪܚܐ ܗ̇ܝ ܕܒܝܕ ܒܪ̈ܝܬܐ ܠܘܬ ܒܪܘܝܐ. ܒܬܗܪܐ ܠܗ ܕܪܫ ܘܢܩܠ. ܘܠܡܕܪ̈ܟܢܘܬܗ ܒܗܘܦܟ ܚܘ̈ܫܒܐ ܣܘܠܘܓܝܣܛܝ̈ܩܝܐ ܐܝܟ ܕܒܡܣܐܬܐ ܦܪܫ ܘܬܩܠ. ܕܠܐ ܢܫܓܐ ܡ̣ܢ ܫܒܝܠ ܟܐܢܘܬܐ ܣܝܓܐ ܢܡܘܣܝܐ ܐܚܕܪܗ. ܘܕܢܐܪܓ ܠܚܝ̈ܐ܆ ܘܢܢܦܪ ܡ̣ܢ ܬܘܫܐ ܡܡܝܬܢܐ ܙܗܪܗ. ܗ̣ܘ ܕܝܢ ܐܬܬܡܝܬ ܡ̣ܢ ܚܫ̈ܐ ܗ̇ܢܘܢ ܕܠܡܡܬܘܬܗܘܢ ܐܬܦܪܓܠ ܘܒܢܫܒܝ̈ܗܘܢ ܕܘܝܐܝܬ ܐܬܦܪܟܠ. ܘܐܝܩܪܗ ܛܥܐ܆ ܘܥܠ ܣܐܡ ܢܡܘܣܗ ܣܥܐ. ܒܪܚܡܬ݀ ܛܒܬܐ ܛܠܢܝ̣ܬܐ ܡܪܬ ܒܝܫܬܐ܆ ܛܒ ܡ̣ܢ ܕܒܚܘܒ ܛܒܬܐ ܡܚܪܪܬ݀ ܡܢ ܡܪܬ݀ ܒܝܫܬܐ ܐܫܬܪܓܪܓ. ܘܬܪ̈ܥܝܬܐ ܣܩܘܒ̈ܠܝܬܐ ܠܘܩܒܠ ܡܗܘܝܢܗ ܐܬܗܓܓ. ܘܠܗܝܢ ܠܡܫܠܡܢ̈ܘܬܐ ܗܠܝܢ ܕܒܗܝܢ ܗ̣ܘ ܒܩܢܘܡܗ ܫܪܝ ܐܦ ܫܠܡ. ܠܝܠܕܘ̈ܗܝ ܬܘܒ ܡܢ ܒܬܪܗ ܐܫܠܡ. ܘܗܟܢܐ ܗܪ̈ܣܝܣ ܫܛܝ̈ܬܐ. ܘܦܢܛܣܝ̈ܐܣ ܫܛܘܪ̈ܘܬܐ ܒܥܠܡܐ ܐܫܬܪ̈ܬܚܝ. ܘܗ̇ܘ ܕܐܝܬܘܗܝ ܐܝܟ ܗ̇ܘ ܕܠܐ ܐܝܬܘܗܝ ܐܫܬܟܚ. ܘܠܡܪܝܪܐ ܚܠܝܐ ܫܡܐ ܐܬܩܪܝ. ܘܚܫܘܟܐ ܠܘܩܒܠ ܢܗܝܪܐ ܐܬܚܪܝ. ܘܒܘܪܘܬܐ ܠܪܘܡܐ ܐܪܝܡܬ݀ ܩܪܢܗ̇. ܘܗܕܝܘܛܘܬܐ ܒܥܠܡܐ ܐܚܕܪܬ݀ ܣܪܢܗ̇ ܝܬܝܪܐܝܬ ܒܙܒܢܢ ܗܢܐ ܡܙܠܗܙܐ. ܕܣܝ̣ܡܬ݀ ܝܕܥܬܐ ܒܗ ܒܙܝܙܐ. ܘܡܪܕܘܬܐ ܒܬܘ̈ܢܐ ܡܛܫܝܐ ܘܓܢܝܙܐ. ܘܐܡܬܐ ܥܠ ܡܪܬܗ̇ ܡܫܠܛܐ ܘܬܙܝ̣ܙܐ. ܘܕܠܐ ܪ̈ܚܡܝ̣ܢ ܪ̈ܚܡܝ ܣܘܦܝܐ ܣܝܦܝ̣ܢ. ܘܡܪܪ̈ܐ ܡܥܝ̈ܣܢܐ ܣܒܝ̣ܣܐܝܬ ܣܪܦܝ̣ܢ. ܩܠܝ̈ܗܘܢ ܣܩܝܪܝܢ܆ ܘܩܘܠܡܝ̈ܗܘܢ ܙܩܝܪܝܢ. ܒܕܦ̈ܢܬܗܘܢ ܕܩܝܪܝܢ. ܓܕܝ̈ܗܘܢ ܒܝܫܝܢ܆ ܘܡ̣ܢ ܢܝܚ̈ܐ ܥܩܝܪܝܢ ܘܓܕܕܝ̈ܗܘܢ ܝܒܝܫܝܢ܆ ܘܐܝܟ ܕܒܫܘ̈ܥܐ ܢܩܝܪܝܢ. ܘܣܓܝ̈ܐܐ ܡ̣ܢ ܗ̇ܢܘܢ ܕܪܘܚܐ ܐܬܗܝܡܢܘ ܠܡܙܪܥ. ܐܦܠܐ ܐܢ ܐܝܬ ܪܘܚܐ ܩܕܝܫܐ ܝܕܥܘ. ܘܠܘ ܠܐ ܒܚܝܪܝܢ. ܒܪܡ ܕܝܢ ܒܗܝ ܕܒܕ ܬܒܝܪܬܐ ܠܐ ܢܐܨܕܘܢ. ܘܒܗܝ ܕܢܐܪܙܘܢ ܘܢܟܣܘܢ ܐܦܢ ܠܐ ܫܗܪܘ. ܐܠܐ ܒܗܝ ܕܢܓܙܘܢ ܘܢܟܣܘܢ ܬܡܝܗܐܝܬ ܐܬܡܗܪܘ. ܘܡ̣ܢ ܬܐܘܪ̈ܝܐܣ ܡܢ ܠܗܝ ܒܠܚܘܕ ܕܠܐ ܬܒܠܘܡ ܬܘܪܐ ܕܡܕܪܟ ܐܣܬܟܠܘ. ܘܡ̣ܢ ܣܥܘܪ̈ܘܬܐ ܒܗܝ ܒܠܚܘܕ ܕܢܬܩܪܘܢ ܪܒܝ ܐܙܕܪܟܠܘ. ܘܟܕ ܗܢܘ ܘܕܐܝܟ ܗܢܐ ܙܢܗ ܕܙܒܢܢ ܡܪܒܐ ܫܛܝ̈ܐ. ܠܠܐ ܡܠܝ̈ܠܐ ܐܬܝܐ ܠܝ ܕܐܕܡܝܘܗܝ. ܘܒܫܘܡܗܝ̈ܗܘܢ ܦܘܐܝ̣ܛܝܩܐܝܬ ܐܫܡܝܘܗܝ ܘܐܡܪ: ܙܒܢܐ ܣܡܐ ܐܢ̱ܬ ܐܝܟ ܚܘܠܕܐ. ܘܟܘ̈ܒܐ ܡܠܐܷ ܐܢ̱ܬ ܐܝܟ ܩܘܦܕܐ. ܣܦܪܟ ܕܡܐ ܠܥܪܕܐ. ܘܐܪܕܝܟܠܟ ܗܘܝܘ ܥܘܕܐ. ܡܛܠ ܕܠܦܘܬ ܣܘܓܐܬ݀ ܬܪ̈ܥܝܬܐ ܗ̇ܢܝܢ ܙܐܦܢܝ̈ܬܐ ܕܒܥܠܡܐ ܢܒܥ̈ܝ. ܡܠܦܢ̈ܐ ܩܕܝ̈ܫܐ ܣܘܓܐܬ݀ ܡܠܦܢ̈ܘܬܐ ܡܪ̈ܢܝܬܐ ܠܘܩܒܠܗܝܢ ܐܒܥܘ. ܘܒܢܝ̈ ܕܪܢ ܢܫܝ̈ܓܐ ܘܡܠܝ̣̈ܓܐ ܠܐ ܣܦܩܝܢ ܠܡܣܝܟܘ ܪܘܝܚܘܬܗܝܢ ܐܦܠܐ ܠܡܡܫܚܘ ܠܐ ܡܡܫܚܘܬ ܫܛܝ̣ܚܘܬܗܝܢ. ܘܡܛܠ ܗܕܐ ܙܪܥ ܚܟܡܬܐ ܗܐ ܒܪܬ݀: ܘܪܚܡܬܗ̇ ܩܪܬ݀: ܢܘܪܗ̇ ܕܥܟܬ݀. ܘܢܗܝܪܘܬܗ̇ ܚܫܟܬ݀. ܐܠܨܝܬܐ ܐܬܬܕܝܢܬ݀ ܠܝ ܕܒܡܟܬܒܢܘܬܐ ܡܕܡ ܚܒܘܫܬܐ. ܠܒ̈ܥܬܐ ܐܠܨܝ̈ܬܐ ܐܩܗܠ. ܘܒܗ̇ ܥܠ ܕܘܓܡܛܐ ܠܘܓܝܩܝܐ ܟܝܬ ܘܦܘܣܝܘܠܘܓܝܩܝܐ. ܦܝ̣ܠܠܘܣܘܦܝܣܐ ܐܥܒܕ ܘܐܡܠܠ. ܘܕܠܡܐ ܐ̱ܢܫ ܡ̣ܢ ܠܐ ܡܢܣܝܐ܆ ܟܕ ܒܗ̇ ܒܬܐܓܘܪܬܐ ܗܕܐ ܫܪܘܐܝܬ ܦܓܥ. ܥܘܕܝܝܬܐ ܠܕܪ̈ܬܐ ܟܗܢܝ̈ܬܐ ܢܕܘܢܝܗ̇. ܗܢܐ ܠܡܬܬܟܣܘ ܘܠܐܷ ܠܗ ܡ̣ܢ ܚܐܦܐ ܠܐ ܙܗܝܪܐ ܕܩܠܝܠܘܬܗ. ܘܠܡܬܪܥܐ ܐܠܗܝ̈ܬܐ ܢܨܠܐ ܐܕܢܗ ܕܐܡ̇ܪ. ܠܝ ܕܝܢ ܣܘܥܪܢܐ ܡܕܡ ܡܬܚܙܐ. ܠܘ ܡ̣ܢ ܗܠܝܢ ܕܫܝ̣ܛܝܢ܆ ܘܠܐ ܕܪܘܚܐ ܙܥܘܪܬܐ. ܕܢܬܠ ܒܙܒܢܐ ܠܟܠܢܫ ܦܪܣܗ̇ ܕܡܠܬܐ: ܘܕܢܕܒܪ ܒܕܝ̣ܢܐ ܠܫܪܪܐ ܕܝܘ̈ܠܦܢܐ ܕܝܠܢ: ܗܠܝܢ ܕܡܛܠ ܥܠܡܐ ܐܘ ܥܠܡ̈ܐ ܦܝܠܠܝܣܘ̈ܦܝ̣ܣܐ ܥܒܝ̈ܕܢ. ܡܛܠ ܗܘܠܐ ܘܡܛܠ ܢܦܫܐ. ܡܛܠ ܗܘܢܐ ܘܡܛܠ ܟܝ̈ܢܐ ܝܕܘܥ̈ܬܢܐ. ܡܝܬܪ̈ܐ ܘܒܝ̈ܫܐ܇ ܡܛܠ ܒܛܝܠܘܬܐ ܗ̇ܝ ܕܟܠ ܡܕܡ ܡܚܙܩܐ ܘܡܢܦܩܐ. ܘܟܠܗܝܢ ܗܠܝܢ ܕܐܝܟ ܡܠܬܐ ܡܣܬܒܪ̈ܢ ܕܦܓ̈ܥܢ. ܘܗܠܝܢ ܕܠܒܪ ܡ̣ܢ ܡܠܬܐ ܕܠܬܚܬ ܘܐ̱ܢܫܝ̈ܬܐ. ܬܘܒ ܕܝܢ ܗܠܝܢ ܕܡܛܠ ܩܘܝܡܐ ܕܝܠܢ ܩܕܡܝܐ. ܘܡܛܠ ܓܒܝܠܬܐ ܕܡ̣ܢ ܕܪܝܫ ܐ̱ܚܪܝܬܐ ܡܛܠ ܛܘ̈ܦܣܐ ܟܝܬ ܘܫܪܪܐ ܘܕܝܬܝ̈ܩܐܣ. ܘܡܐܬܝܬܐ ܕܡܫܝܚܐ ܩܕܡܝܬܐ ܟܝܬ ܘܕܬܪܬܝܢ܇ ܘܡܬܒܣܪܢܘܬܐ ܘܚܫ̈ܐ ܘܫܪܝܐ: ܗܠܝܢ ܕܡܛܠ ܩܝܡܬܐ܇ ܡܛܠ ܫܘܠܡܐ܇ ܕܝ̣ܢܐ ܘܦܘܪܥܢܐ ܗ̇ܘ ܕܝܬܝܪ ܟܡܝܪ. ܘܗܘ ܕܝܬܝܪ ܫܒܝܚ. ܘܩܦܠܐܘܢ܆ ܟܠܗܝܢ ܐܝܠܝܢ ܕܡܛܠ ܬܠܝܬܝܘܬܐ ܪܝܫܝܬܐ ܘܛܘܒܬܢܝܬܐ ܙܕܩ ܕܢܣܒܪ. ܗ̇ܝ ܟܝܬ ܕܐܝܬܝܗ̇ ܡ̣ܢ ܩܝܢܕܘ̈ܢܘ ܗ̇ܘ ܕܣܓܝ ܪܒ ܠܐܝܠܝܢ ܕܢܢܗܪܘܢ ܐܬܗܝܡܢܘ. ܘܥܠܝܗܝܢ ܬܘܒ ܟܕ ܥܠܝܗܝܢ ܡܓܪܓ ܘܡܠܒܛ ܐܦ ܒܩܕܝܡܘܬ ܡܠܬܐ ܕܠܘܩܒܠ ܐܘܢܘܡ̈ܝܐܢܘ. ܘܠܗܝܢ ܬܘܒ ܡܝܬܐ ܩܕܝܫܐ ܐܘܓܪܝܣ ܟܕ ܐܡ̇ܪ. ܚܡܫ ܐܢܝܢ ܬܐܘܪ̈ܝܐܣ. ܘܩܕܡܝܬܐ ܡ̇ܢ ܐܝܬܝܗ̇ ܐܝܟ ܕܐܡܪܝܢ ܐܒܗ̈ܬܐ. ܬܐܘܪܝܐ ܕܬܠܝܬܝܘܬܐ ܣܓܝܕܬܐ. ܘܗ̇ܝ ܕܬܪܬܝܢ ܘܕܬܠܬ܆ ܬܐܘܪܝܐ ܕܗ̇ܢܘܢ ܕܠܐ ܓܫܘܡ ܘܕܝܠܗܘܢ ܕܓܘ̈ܫܡܐ. ܕܐܪܒܥ ܕܝܢ ܘܕܚܡܫ: ܬܐܘܪܝܐ ܕܕܝ̣ܢܐ ܘܕܒܛܝܠܘܬܗ ܕܐܠܗܐ. ܠܗܠܝܢ ܡ̣ܢ ܟܕ ܢܫܡܥ ܪܚ̇ܡ ܪ̈ܘܥܐ ܐܘܟܝܬ ܕܒܒܐ ܒܥܐ ܫܘܚ̈ܢܐ܇ ܛܟ ܢܕܥ ܕܠܛܝܪܐ ܥܕܬܢܝܐ ܝܬܝܪ ܐܢܢܩܝܐ ܡܠܡܕܘܬ ܡܢܘ̈ܬܐ ܬܐܘܪ̈ܝܛܝܩܝܬܐ. ܕܗܐ ܗܫܐ ܐܬܬܝܬܝܝ̈ܢ. ܘܕܥܠܝܗܝܢ ܕܒܥ̈ܬܐ ܗܠܝܢ ܗ̣ܝ ܣܢܝܩܘܬܐ ܪܒܬܐ ܘܥܪܝܨܬܐ ܕܗ̇ܢܘܢ ܕܗܘܢܐ ܕܡܫܝܚܐ ܙܕܩ ܕܢܗܘܐ ܐܝܬ ܠܗܘܢ. ܒܕܓܘܢ ܟܕ ܐܝܟ ܡܒܥܪܢܐ ܕܟܪܡܐ ܐܢܐ ܡܚܝܠܐ ܒܬܪ ܩܛܘ̈ܦܐ ܐܬܝܬ. ܒܛܝܒܘ ܕܐܠܗܝ܆ ܐܝܟ ܩܛܘܦܐ ܡܥܨܪܬܝ ܡܠܝܬ. ܘܒܦܪ̈ܘܛܐܣܝܣ ܗ̇ܢܝܢ ܕܒܗܝܢ ܪܘܡܐ ܕܒܪ̈ܝܐ ܠܘܩܒܠ ܝܕܥܬܗ ܕܐܠܗܐ ܐܬܬܪܝܡ. ܘܣܢܐܓܪܐ ܠܝܕܥܬܐ ܕܓܠܬ݀ ܫܡܐ ܐܬܬܩܝܡ. ܠܚܣܢܝ̈ܗܘܢ ܡܪ̈ܝܕܐ ܡܠܬܐ ܟܒܫܬ݀ ܘܚܣܢܬ݀. ܘܒܙܝܢܐ ܕܚܝܠܐ ܐܠܗܝܐ܆ ܠܥܠܝ̈ܬܐ ܕܦܘܪ̈ܩܣܝܗ̇ ܕܡܕܝܢ̱ܬܗ ܕܐܠܗܢ ܚܣܢܬ݀܇ ܘܡܢ ܗܪܟܐ ܠܘ ܒܠܚܘܕ ܠܓܘ ܡ̣ܢ ܠܩ̈ܚܝ ܐܘܪܫܠܡ ܗܝ ܕܝܘܕܝܝ̈ܗ̇ ܐܬܘ̈ܬܐ ܫܐܠܝܢ. ܣܒܪܬܐ ܦܪܘܩܝܬܐ ܩܡܬ݀܇ ܐܠܐ ܘܠܥܠ ܡ̣ܢ ܡܚܘ̈ܙܝ ܐܝܠܘܪܝܩܘܢ ܗ̇ܝ ܕܐܪ̈ܡܝܝܗ̇ ܚܟܡܬܐ ܒܥܝܢ ܐܬܡܬܚܬ݀ ܘܐܬܪܡܪܡܬ݀. ܘܟܕ ܬܪܝܢܝ̣ܬܐ ܐܝܬܝܗ̇ ܟܠ ܡܠܬܐ: ܕܗܕܐ ܡ̇ܢ ܗ̇ܝ ܕܝܠܗ̇ ܡܥܬܕܐ: ܗܕܐ ܕܝܢ ܗ̇ܝ ܕܠܩܘܒܠܐ ܡܒܛܠܐ. ܐܝܟ ܝܘܠܦܢܗ ܕܡܗܕܝܢܢ ܐܠܗܝܐ ܒܟܠ ܪܝܫܐ ܘܦܣܘܩܐ ܟܕ ܗܠܝܢ ܕܝܠܢ ܩܕܡܬ ܣܡܬ. ܐܝܛܐ ܗܠܝܢ ܕܗܢܘܢ ܕܕܠܩܘܒܠܐ ܢܣܝܬ ܕܐܒܛܠ. ܘܟܠܗܝܢ܆ ܒܝܕ ܡܚܘ̈ܝܢܘܬܐ ܣܘܢܝ̣ܦܐܛܪ̈ܢܝܬܐ ܕܚܘܫܒܐ ܟܝܬ ܘܟܬܒܐ. ܘܡܛܠ ܕܐܝܟ ܕܥܠ ܡܢܪܬܐ ܫܪܓܗܘܢ ܐܘܟܝܬ ܫܪܪܗܘܢ ܕܟܬܒܝ̈ ܩܘܕܫܐ ܒܦܪܐܓܡܐܛܝܐ ܗܕܐ ܕܥܠ ܐܝܕܝ̈ܐ ܡܬܬܣܝܡ. ܙܕܩܐܝܬ ܡܢܪܬ݀ ܩܘܕ̈ܫܐ ܐܬܟܢܝܬ݀: ܘܒܟܐܦ̈ܐ ܫܠܡܠܡ̈ܝܬܐ ܕܪ̈ܥܝܢܐ ܠܐ ܡܬܚܣ̈ܢܢܐ ܐܬܒܢܝܬ݀. ܘܒܡܢܝܢܐ ܬܪܥܣܝ̣ܪܝܐ ܐܣܬܝܟ ܡܢܝܢ ܫܬܐܣܝ̈ܗ̇. ܘܐܫܬܪܪܘ ܕܘܡܣܝ̈ܗ̇. ܒܗܝ ܕܐܦ ܡ̣ܢ ܪܝܫܝ̣ܬܐ ܥܠܘܗܝ ܡܪܢ ܥܕܬܗ ܒܢܗ̇. ܘܒܗ ܛܘܢ̈ܒܝܗ̇ ܣܬܬ ܟܕ ܒܕܡܗ ܩܢܗ̇܀

 

ܫܬܐܣܬܐ ܩܕܡܝܬܐ ܡܛܠ ܝܕܥܬܐ ܦܫܝܛܐܝܬ. ܝܘܡܝܐ.

 

ܫܬܐܣܬܐ ܬܪܝܢܝܬܐ ܡܛܠ ܟܝܢܝܘܬܐ ܕܗܢܐ ܟܠ ܐܝܟ ܛܘܟܣܐ ܫܬܬ

 

ܫܬܐܣܬܐ ܬܠܝܬܝܬܐ ܡܛܠ ܡܡܠܠܘܬ ܐܠܗܬܐ. (ܐܠܗܘܬܐ)

 

ܫܬܐܣܬܐ ܪܒܝܥܝܬܐ ܡܛܠ ܡܬܒܣܪܢܘܬܐ.

 

ܫܬܐܣܬܐ ܚܡܝܫܝܬܐ ܡܛܠ ܡܠܐܟ̈ܐ.

 

ܫܬܐܣܬܐ ܫܬܝܬܝܬܐ ܡܛܠ ܟܗܢܘܬܐ.

 

ܫܬܐܣܬܐ ܫܒܝܥܝܬܐ ܡܛܠ ܫܐܕ̈ܐ.

 

ܫܬܐܣܬܐ ܬܡܝܢܝܬܐ ܡܛܠ ܢܦܫܐ ܡܠܝܠܬܐ.

 

ܫܬܐܣܬܐ ܬܫܝܥܝܬܐ ܡܛܠ ܫܠܝܛܘܬ ܒܝܬܐ ܘܒܛܝܠܘܬܐ ܐܠܗܝܬܐ ܘܩܨܐ.

 

ܫܬܐܣܬܐ ܥܣܝܪܝܬܐ ܡܛܠ ܚܝܬ݀ ܡܝ̈ܬܐ.

 

ܫܬܐܣܬܐ ܚܕܥܣܝܪܝܬܐ ܡܛܠ ܕܝܢܐ ܘܦܘܪܥܢܐ.

 

ܫܬܐܣܬܐ ܬܪܥܣܝܪܝܬܐ ܡܛܠ ܦܪܕܝܣܐ.

 

 

 

ܫܬܐܣܬܐ ܩܕܡܝܬܐ ܡܛܠ ܝܕܥܬܐ ܦܫܝܛܐܝܬ. ܘܒܗ̇ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܗ̇ܝ ܕܐܠܨܝܬܐ ܗ̱ܝ ܡܪܕܘܬܐ ܠܡܠܝ̣̈ܠܐ ܘܒܗ ܐܝܬ ܢܝ̈ܫܐ ܚܡܫܐ. ܢܝܫܐ ܩܕܡ̄ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܝܕܥܬܐ ܫܘܡܠܝܐ ܗ̱ܝ ܕܗܘܢܐ. ܘܫܘܡܠܝܐ ܡܬܒܥܝܢܐ ܗ̱ܘ ܠܝܬܗ. ܝܕܥܬܐ ܡܕܝܢ ܡܬܒܥܝܢܬܐ ܗ̱ܝ ܠܝܬܗ̇. ܘܕܫܘܡܠܝܐ ܡܬܒܥܝܢܐ ܗ̱ܘ ܠܝܬܗ. ܝܕܝܥܐ ܡ̣ܢ ܗ̇ܝ ܕܐܠܘܠܐ ܡܬܒܥܝܢܐ ܗܘܐ ܠܝܬܗ. ܙܕܩ ܗܘܐ ܕܚܣܝ̣ܪܘܬܐ ܕܐܝܬܝܗ̇ ܐܢܛܝܦܐܣܝܣ ܕܝܠܗ ܡܬܒܥܝܢܝ̣ܬܐ ܗܘܬ݀ ܠܝܬܗ̇. ܘܟܕ ܚܣܝ̣ܪܘܬܐ ܕܓܠܝܙܘܬܐ܆ ܡܢܬܗ̇ ܗ̣ܝ. ܡܬܥܪܩܢܝ̣ܬܐ ܗ̱ܝ ܠܝܬܗ̇. ܐܠܨܐ ܕܫܘܡܠܝܐ ܡܬܒܥܝܢܐ ܢܗܐ ܠܝܬܗ. ܟܠ ܗܘܢܐ ܡܕܝܢ ܚܦܝܛܐ. ܠܝܕܥܬܐ ܕܗ̣ܝ ܗ̣ܝ ܫܘܡܠܝܗ. ܙܕܩ ܠܗ ܠܡܬܝܐܝܒܘ.

 

 

 

ܡܚܘܝܢܘܬܐ ܬܪܝܢܝܬܐ

 

ܐܡܪܝܢܢ ܕܡܬܕܪ̈ܟܢܝܗܘܢ ܕܪ̈ܓܫܐ܆ ܡܬܪ̈ܓܫܢܐ ܐܝܬܝܗܘܢ. ܘܡܬܕܪ̈ܟܢܘܗܝ ܕܗܘܢܐ. ܡܬܗܘ̈ܢܢܐ. ܐܟܡܐ ܡܕܝܢ ܕܟܕ ܫܡܥܝܢܢ ܩܠܐ ܡܕܡ ܡܠܚܡܐ ܘܐܪܡܘܢܝܐ ܡܬܝܐܝ̣ܒܝܢܢ ܠܡܨܕܘܬܗ. ܘܟܕ ܚܙܝܢܢ ܚܙܘܐ ܡܕܡ ܬܡܝܗܐ ܘܡܦܪܓܐ. ܡܬܪܓܪܓܝܢܢ ܠܡܨܕܘܬܗ. ܒܗ̇ ܒܕܡܘ̣ܬܐ. ܘܟܕ ܣܠܩ ܥܠ ܒܠܢ ܡܕܡ ܡܬܝܕܥܢܐ ܓܐܝܐ ܘܡܥܠܝܐ. ܐܠܨܐ ܠܢ ܠܡܣܬܘܝܘ ܠܡܬܗܘܢܢܘܬܗ. ܝܕܥܬܐ ܡܕܝܢ ܕܟܠܗܝܢ ܡܬܝܕ̈ܥܢܐ ܐܠܨܝܬܐ ܗ̱ܝ ܠܡܠܝ̈ܠܐ. ܘܐܦܢ ܚܝ̈ܐ ܗܘܠܢܝ̈ܐ ܐܦܟܗܘܢ ܒܢ ܠܣܘܝܘܬܐ ܕܐܝܟ ܗܕܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܒܪܢܫܐ ܒܗܝ ܕܡܠܝܠ ܘܝܕܘܥ ܒܪܢܫܐ ܗ̱ܘ. ܘܠܘ ܒܗܝ ܕܐܟܘܠ ܘܫܬܘܝ ܒܗܝ ܕܗ̇ܢܝܢ ܗܠܝܢ ܘܠܠܐ ܐ̱ܢܫܐ ܫܟܝܚܝܢ. ܟܡܐ ܡܕܝܢ ܕܒܡܠܝܠܘܬܗ ܘܝܕܥܬܗ ܕܚܣܝ̣ܪܘܬܐ ܚܐܫ ܒܪܢܫܐ. ܗܢܐ ܟܠܗ ܒܐܢܫܘܬܗ ܚܣܪ. ܒܪܢܫܐ ܡܕܝܢ ܫܪܝܪܐ ܗ̇ܘ ܗ̣ܘ ܕܡܫܡܠܝ ܒܝܕܥܬܐ ܘܓܠܝܙ ܡ̣ܢ ܝܕܥܬܐ ܠܒܥܝܪܐ ܝܬܝܪ ܒܝܬܝ. ܘܒܪܢܫܐ ܗ̱ܘ ܫܝ̣ܥܐ ܘܐܫܝ̣ܠܐ.

 

 

 

ܢܝܫܐ ܬܪܝܢܐ ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܝܘܒ. ܛܒܐ ܗ̱ܝ ܚܟܡܬܐ ܡ̣ܢ ܟܐܦ̈ܐ ܛܒ̈ܬܐ. ܘܠܐ ܦܚܡ ܠܗ ܦܬܘܬܟܐ ܕܟܝܐ. ܘܒܙܡܪ̈ܓܕܐ ܘܒܩܪ̈ܟܕܢܐ ܠܐ ܡܬܚܠܦܐ. ܛܒܐ ܗ̱ܝ ܓܝܪ ܚܟܡܬܐ ܡ̣ܢ ܟܠ ܡܕܡ. ܘܡܕܡ ܠܐ ܦܚܡ ܠܗ̇.

 

 

 

ܣܗܕܘܬܐ ܕܬܪܬܝܢ

 

ܩܘܗܠܬ. «ܘܚܙܝܬ ܕܐܝܬ ܝܘܬܪܢ ܒܚܟܡܬܐ ܝܬܝܪ ܡ̣ܢ ܣܟܠܘܬܐ. ܐܝܟ ܕܝܬܝܪ ܢܘܗܪܐ ܡ̣ܢ ܚܫܘܟܐ». ܘܬܘܒ «ܠܐ ܬܗܘܐ ܣܟܠ܆ ܕܠܐ ܬܡܘܬ ܕܠܐ ܒܙܒܢܟ».

 

 

 

ܣܗܕܘܬܐ ܕܬܠܬ

 

ܒܪ ܐܣܝܪܐ. «ܐܝܟ ܚܟܡܬܐ ܕܟܠܗܘܢ ܩܕ̈ܡܝܐ ܢܒܥܐ. ܘܠܘܬ ܢܒܝ̈ܐ ܩܕ̈ܡܝܐ ܢܬܦܢܐ. ܘܫܘܥ̈ܝܬܐ ܕܟܠ ܐ̱ܢܫܐ ܕܥܠܡܐ ܢܐܠܦ. ܘܒܕܥܡܝ̈ܩܢ ܢܬܚܫܒ» ܘܬܘܒ. «ܚܟܝܡܐ ܕܥܠܡܐ ܢܐܪܬ݀ ܐܝܩܪܗ. ܘܫܡܗ ܩܝܡ ܠܚܝ̈ܐ ܕܠܥܠܡ». ܘܬܘܒ. «ܥܠ ܡܝܬܐ ܘܠܐܷ ܠܡܒܟܐ. ܕܐܬܟܠܝ ܡ̣ܢ ܢܘܗܪܐ. ܘܥܠ ܣܟܠܐ ܕܐܬܟܠܝ ܡ̣ܢ ܚܟܡܬܐ».

 

 

 

ܣܗܕܘܬܐ ܕܐܪܒܥ

 

ܗܘܫܥ. «ܡܢܘ̣ ܕܚܟܝܡ ܢܣܬܟܠ ܗܠܝܢ. ܘܕܡܬܒܝܢ ܢܫܬܘܕܥ ܐܢܝܢ. ܕܬܪ̈ܝܨܢ ܐܘܪ̈ܚܬܗ ܕܡܪܝܐ».

 

 

 

ܣܗܕܘܬܐ ܕܚܡܫ

 

ܐܘܢܓܠܝܘܢ. «ܒܨܘ ܟܬܒ̈ܐ. ܕܒܗܘܢ ܡܣܒܪܝܢ ܐܢ̱ܬܘܢ ܕܚܝ̈ܐ ܕܠܥܠܡ ܐܝܬ ܠܟܘܢ. ܘܗ̣ܢܘܢ ܣܗܕܝܢ ܥܠܝ». ܘܬܘܒ. «ܟܠ ܣܦܪܐ ܕܡܬܬܠܡܕ ܠܡܠܟܘܬܐ ܕܫܡܝܐ ܕܡܐ ܠܓܒܪܐ ܡܪܐ ܒܝܬܐ ܕܡܦܩ ܡ̣ܢ ܣܝ̈ܡܬܗ ܚܕ̈ܬܬܐ ܘܥܬܝ̈ܩܬܐ». ܘܬܘܒ «ܫܒܘܩ ܠܗܘܢ. ܣܡܝ̈ܐ ܐܢܘܢ ܢܓܘ̈ܕܐ ܕܣܡܝ̈ܐ. ܣܡܝܐ ܕܝܢ ܐܢ ܠܣܡܝܐ ܢܕܒܪ ܬܪ̈ܝܗܘܢ ܒܓܘܡܨܐ ܢܦܠܝܢ».

 

 

 

ܣܗܕܘܬܐ ܕܫܬ

 

ܦܘܠܘܣ ܒܐܓܪܬܐ ܕܠܘܬ ܛܝܡܬܐܘܣ «ܡ̣ܢ ܛܠܝܘܬܟ ܣܦܪ̈ܐ ܩܕܝ̈ܫܐ ܝܠܝܦ ܐܢ̱ܬ. ܐܝܠܝܢ ܕܡܨܝܢ ܕܢܚܟܡܘܢܟ». ܘܬܘܒ «ܥܕ ܐܬܐ ܐ̱ܢܐ ܐܬܚܦܛ ܒܩܪܝܢܐ ܘܒܒܥܘܬܐ ܘܒܝܘܠܦܢܐ. ܘܬܘܒ «ܒܚܟܡܬܐ ܗܠܟܘ ܠܘܬ ܒܪ̈ܝܐ. ܘܡܠܬܟܘܢ ܒܛܝܒܘܬܐ ܐܝܟ ܕܒܡܠܚܐ ܬܗܘܐ ܡܡܕܟܐ». ܘܬܘܒ «ܚܝܒܝܢ ܗܘܝܬܘܢ ܓܝܪ ܡܠܦܢ̈ܐ ܠܡܗܘܐ. ܗܫܐ ܕܝܢ ܬܘܒ ܣܢܝܩܝܢ ܐܢ̱ܬܘܢ ܕܬܐܠܦܘܢ». ܐܝܠܝܢ ܐܢܝܢ ܟܬܝ̈ܒܬܐ ܩܕ̈ܡܝܬܐ ܕܪܝܫ ܡܠܘ̈ܗܝ ܕܐܠܗܐ.

 

 

 

ܣܗܕܘܬܐ ܕܫܒܥ

 

ܝܥܩܘܒ ܒܩܐܬܘܠܝ̣ܩܝ̣ ܕܝܠܗ. «ܐܢ ܐ̱ܢܫ ܡܢܟܘܢ ܚܣܝܪ ܡ̣ܢ ܚܟܡܬܐ. ܢܫܐܠ ܡ̣ܢ ܐܠܗܐ܇ ܕܝ̇ܗܒ ܠܟ ܦܫܝ̣ܛܐܝܬ ܘܠܐ ܡܚܣܕ ܘܡܬܝܗܒܐ ܠܗ».

 

 

 

ܣܗܕܘܬܐ ܕܬܡܢܐ

 

ܐܘܓܪܝ̣ܣ. ܟܠܗ ܟܝܢܐ ܡܠܝ̣ܠܐ ܐܬܬܟܝܢ ܠܡܐܠܦ ܝܕܥܬܐ ܕܫܪܪܐ. ܘܬܘܒ. ܝܬܝܪ ܡܢ ܟܠܗܘܢ ܚܝ̈ܠܐ ܕܢܦܫܐ܇ ܡܢܬܐ ܡܠܝܠܬܐ ܡܝܩܪܐ. ܡܛܠ ܕܗ̣ܝ ܗܕܐ ܠܚܟܡܬܐ ܕܐܠܗܐ ܡܫܘܬܦܐ.

 

 

 

ܣܗܕܘܬܐ ܕܬܫܥ

 

ܓܪܝ̣ܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܩܣܪܝܘܣ ܐܚܘܗܝ. ܐܦ ܓܝܪ ܕܡܝܬܪܘܬܐ ܐܝܬܝܗ̇ ܗܘܬ݀ ܩܕܝ̣ܡܘܬ ܐܝܩܪܐ. ܐܠܘ ܒܨܝܪ ܐܘ ܕܕܪ̈ܓܐ.

 

 

 

ܣܗܕܘܬܐ ܕܥܣܪ

 

ܡܪܝ ܐܦܪܝܡ. ܟܬܒ̈ܐ ܢܗܘܘܢ ܦܬܘܪܟ. ܘܡܢܗܘܢ ܬܣܒܥ ܒܘ̈ܣܡܐ. ܘܗ̣ܢܘܢ ܢܗܘܘܢ ܬܫܘܝ̣ܬܟ. ܘܕܡܟܬ ܫܢܬܐ ܕܢܝܚܐ.

 

 

 

ܢܝܫܐ ܬܠܝܬܝܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܗ̇ܝ ܕܐܦ ܠܝܕܥܬܐ ܕܒܪ̈ܝܐ ܐܫܦܘ ܠܡܫܬܘܬܦܘ ܩܕܝ̈ܫܐ. ܣܗܕܘܬܐ ܩܕܡܝܬܐ

 

ܩܕܝܫܐ ܕܝܘܢܢܘܣܝܘܣ ܐܪܝܘܦܐܓܝ̣ܬܝܘܣ܇ ܒܐܓܪܬܐ ܕܠܘܬ ܦܘܠܩܪܦܘܣ ܪܝܫ ܟܗ̈ܢܐ ܟܕ ܐܡ̇ܪ ܠܗ. ܕܐܡ̣ܪ ܠܐܦܘܠܘܦܘܢܝܘܣ ܣܘܦܝ̣ܣܛܐ. ܗ̇ܘ ܕܡܨܚܐ ܠܝ ܘܩ̇ܪܐ ܠܝ ܡܚܐ ܐܒܗܘ̈ܗܝ. ܐܟܡ̇ܢ ܠܡ ܕܡܬܚܫܚ ܐ̱ܢܐ ܠܐ ܟܐܢܐܝܬ ܒܗܠܝܢ ܕܚܢ̈ܦܐ ܠܘܩܒܠ ܚܢ̈ܦܐ. ܕܡܢܐ ܐܡ̇ܪ ܐܢ̱ܬ ܥܠ ܐܩܠܦܣܝ̣ܣ ܕܗܘܬ݀ ܒܙܩܝ̣ܦܐ ܦܪܘܩܝܐ. ܟܕ ܓܝܪ ܬܪ̈ܝܢ ܒܡܕܝܢܬ݀ ܫܡܫܐ ܩܪܝܒܝܢ ܗܘܝܢ܇ ܐܟܚܕܐ ܘܩܝܡܝܢ ܗܘܝܢ ܫܘܝܐܝܬ܇ ܚܙܝܢܗ̇ ܠܣܗܪܐ ܕܢܦܠܬ݀ ܬܡܝܗܐܝܬ ܒܫܡܫܐ. ܠܘ ܓܝܪ ܙܒܢܐ ܕܣܘܢܗܕܘܣ ܕܝܠܗܘܢ ܐܝܬܘܗܝ ܗܘܐ ܘܬܘܒ ܕܡ̣ܢ ܫܥܬܐ ܕܬܫܥ܆ ܘܥܕܡܐ ܠܪܡܫܐ ܩܡܬ݀ ܒܕܝܐܡܛܪܘܢ ܕܫܡܫܐ ܠܥܠ ܡܢ ܟܝܢܐ ܥܗܕܝܗܝ ܕܝܢ܆ ܐܦ ܡܕܡ ܐ̱ܚܪܝܢ. ܝܕܥ ܓܝܪ ܕܐܦ ܠܗ̇ ܠܡܐܬܝܬܗ ܡ̣ܢ ܡܕܢܚܐ ܚܙܝܢܗ̇ ܕܫܪܝܬ݀ ܘܐܬܬ݀ ܥܕܡܐ ܠܣܟܗ ܕܫܡܫܐ. ܘܒܬܪܟܢ ܗܦܟܬ݀ ܪܓܠܬ݀. ܘܬܘܒ܆ ܕܠܘ ܡܢܗ̇ ܟܕ ܡܢܗ̇ ܕܦܢܝ̣ܬܐ ܗܘܬ݀ ܡܦܘܠܬܗ̇ ܕܒܗ. ܘܕܘܟܝܗ̇ ܕܡ̣ܢ ܕܪܝܫ. ܐܠܐ ܡ̣ܢ ܦܢܝܬܐ ܕܐܝܬܝܗ̇ ܠܩܘܒܠܗ̇ ܒܕܝܐܡܛܪܘܢ. ܕܐܝܟ ܗܠܝܢ ܐܝܬܝܗܘܢ ܬܡܝ̈ܗܬܐ ܕܙܒܢܐ ܗ̇ܘ. ܘܡ̣ܢ ܗܠܝܢ ܘܕܐܝܟ ܗܠܝܢ ܐܝܬ ܠܡܫܬܘܕܥܘ. ܕܬܩܢܐܝܬ ܡܕܩ ܗܘܐ ܗ̣ܘ ܩܕܝܫܐ ܕܝܘܢܢܘܣܝܘܣ ܒܝܘܠܦܢ ܡܘܙܠܬܐ.

 

 

 

ܣܗܕܘܬܐ ܕܬܪܬܝܢ

 

ܩܕܝܫܐ ܓܪܝ̣ܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܩܒܘ̣ܪܬܗ ܕܩܣܪܝܘܣ ܐܚܘܗܝ. ܘܗܝܕܝܢ ܩܕܡܝܬ݀ ܟܕ ܡ̣ܢ ܚܕܕ̈ܐ ܐܣܬܕܩܢܢ܇ ܟܕ ܐܢܐ ܡ̣ܢ ܒܝܬ ܝܘܠܦܢ̈ܐ ܕܒܦܠܣܛܝ̣ܢܝ̣ ܩܘܝܬ ܕܡܗܒܒܝ̣ܢ ܗܘܘ ܗܝܕܝܢ ܒܪܚܡܬܐ ܕܪܗܛܪܘܬܐ ܗ̇ܘ ܕܝܢ ܟܕ ܡܛܐ ܠܡܕܝܢ̱ܬܗ ܕܐܠܟܣܢܕܪܘܣ. ܕܚܢܘܬܐ ܕܟܠ ܡܪܕܘܬܐ. ܘܗܝܕܝܢ ܐܦ ܗܫܐ ܐܝܬܝܗ̇ ܐܦ ܡܣܬܒܪܐ. ܘܬܘܒ. ܓܐܘܡܛܪܝܐ ܡ̇ܢ ܓܝܪ ܘܐܣܛܪܘܢܘܡܝܐ. ܘܡ̣ܢ ܡܪܕܘܬܐ ܐܝܕܐ ܕܠܐ ܚܝ̈ܐ ܕܩܝܢܕܘܢܝܘܣ ܐܝܬܝܗ̇. ܟܕ ܗ̇ܘ ܡܐ ܕܚܫܚ ܓܒܝ. ܘܬܘܒ. ܒܡܢܝܢ̈ܐ ܕܝܢ ܘܚܘܫܒܝ̈ܐ. ܘܒܐܣܝܘܬܐ ܬܡܝܗܬܐ. ܗ̇ܝ ܕܗܠܝܢ ܕܥܠ ܟܝܢ̈ܐ. ܘܡܘ̈ܙܓܐ ܘܫܘܪ̈ܝܐ ܕܟܘܪ̈ܗܢܐ ܦܝ̣ܠܠܘܣܘܦܝ̣̈ܣܐ ܥܒܕܐ. ܐܝܟܢܐ ܕܟܕ ܥܩܪ̈ܐ ܡܬܬܪܝܡܝܢ܇ ܥܡܗܘܢ ܢܬܦܣ̈ܩܢ ܐܦ ܡܘܥ̈ܝܬܐ܆ ܡܢܘ ܕܗܟܢܐ ܠܐ ܝܠܝ̣ܦܐ ܘܚܪܝܝܐ܇ ܐܟܡ̇ܢ ܕܠܗ̇ܘ ܢܬܠ ܬܪ̈ܝܢܝܬܐ܇ ܘܠܐ ܢܚܒ. ܐܢܗܘ ܕܡ̣ܢ ܒܬܪ ܗܘ ܡܚܕܐ ܢܬܡܢܐ. ܘܗܠܝܢ ܡ̈ܠܐ ܡܫܘ̈ܕܥܢ ܕܒܟܠܗܘܢ ܗܠܝܢ ܝܘܠܦܢ̈ܐ. ܗܠܝܢ ܕܒܪ̈ܝܐ ܡܕܪܫܝ̣ܢ ܗܘܘ ܬܡܝܗܐܝܬ ܡܠܦܢ̈ܐ ܩܕܝ̈ܫܐ.

 

 

 

ܣܗܕܘܬܐ ܕܬܠܬ

 

ܩܕܝܫܐ ܓܪܝ̣ܓܘܪܝܘܣ ܕܢܘܣܐ. ܒܡܐܡܪܐ ܕܥܠ ܬܘܩܢܗ ܕܒܪܢܫܐ. ܝܕܥܬ ܐܦ ܐܢܐ ܥܠܬܐ ܐ̱ܚܪܬܐ: ܕܪ̈ܡܙܐ ܗܢܘܢ ܕܗܘܝܢ ܒܫܢܬܐ. ܟܕ ܡܐܣܐ ܗܘܝܬ ܠܐܢܫ ܡ̣ܢ ܩܪ̈ܝܒܐ܆ ܕܐܬܬܚܕ ܒܫܘܓܢܝܐ ܕܗܘܢܐ. ܘܬܘܒ. ܐ̱ܚܪ̈ܢܐ ܡ̇ܢ ܐܝܬܝܗܘܢ. ܕܗ̇ܢܘܢ ܕܟܐܒ ܐܣܛܘܡܟܗܘܢ. ܐ̱ܚܪ̈ܢܐ ܕܝܢ ܗܠܝܢ ܕܟܐܒ ܚܠܒܐ ܕܥܠ ܡܘܚܗܘܢ. ܘܐ̱ܚܪ̈ܢܐ ܬܘܒ ܕܗ̇ܢܘܢ ܕܐܝܬܝܗܘܢ ܒܐܫܬܐ. ܘܕܗ̇ܢܘܢ ܕܒܡܪܬܐ ܘܒܦܠܓܡܐ ܟܪܝܗܝܢ܆ ܠܘ ܗ̣ܢܘܢ ܟܕ ܗ̣ܢܘܢ. ܘܕܗ̣ܢܘܢ ܕܒܡܠܝܘܬܐ ܐܝܬܝܗܘܢ܆ ܘܕܗ̣ܢܘܢ ܕܡܫܢܩܝܢ ܬܘܒ ܐ̱ܚܪ̈ܢܐ. ܘܡ̣ܢ ܗܠܝܢ ܝܕܝ̣ܥܐ ܡܗܝܪܘܬܗ ܕܩܕܝܫܐ ܓܪܝ̣ܓܘܪܝܘܣ ܒܐܘܡܢܘܬܐ ܐܘܣܝܝܬܐ.

 

 

 

ܣܗܕܘܬܐ ܕܐܪܒܥ

 

ܟܬܒ̈ܐ ܕܐܩܠܝ̣ܣܝ̣ܣܛܝ̈ܩܐܣ ܡܬܢܝܢ. ܕܩܕܝܫܐ ܒܣܝܠܠܝܘܣ ܗܘ ܕܗܘܐ ܐܦܣܩܘܦܐ ܒܩܣܐܪܝܐ ܕܩܦܐܕܘܩܝܐ. ܘܩܕܝܫܐ ܓܪܝ̣ܓܘܪܝܘܣ ܕܡܢܗ ܐܬܬܣܪܚ ܠܢܐܙܝܢܙܘ. ܒܐܬܝܢܐܣ ܡܬܕܪܫܝܢ ܗܘܘ ܒܝܘܠܦܢܐ ܕܒܪ̈ܝܐ. ܘܗܪܬܡܢ ܟܕ ܚܙܝܗܝ ܠܪܫܝܥܐ ܝܘܠܝܢܘܣ܆ ܗ̇ܘ ܕܐܦ ܗ̣ܘ ܐܙܠ ܗܘܐ ܠܬܡܢ ܒܙܒܢܐ ܗ̇ܘ ܐܝܟ ܕܠܡܪܕܘܬܐ. ܩܕܝܫܐ ܓܪܝܓܘܪܝܘܣ ܐܡܪ. ܘܝ ܠܗ̇ ܠܪܘܡܐܢܝܐ ܡܢܐ ܡܪܒܝܐ.

 

 

 

ܢܝܫܐ ܪܒܝܥܝܐ ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܗ̇ܝ ܕܐܦ ܒܕܪ̈ܫܐ ܘܗܦ̈ܟܬܐ ܘܥܘܪ̈ܙܠܐ ܐܬܚܫܚ ܡܠܦܢ̈ܐ ܩܕܝ̈ܫܐ. ܣܗܕܘܬܐ ܩܕܡܝܬܐ

 

ܦܪܟܣܝܣ. ܗ̣ܘ ܕܝܢ ܦܘܠܘܣ ܟܕ ܡܩܘܐ ܗܘܐ ܒܐܬܝܢܣ܇ ܡܬܡܪܡܪ ܗܘܐ ܒܪܘܚܗ܆ ܟܕ ܚܙܐ ܗܘܐ ܕܡܕܝܢ̱ܬܐ ܟܠܗ̇ ܡܠܝܐ ܦܬܟܪ̈ܐ. ܘܡܡܠܠ ܗܘܐ ܒܟܢܘܫܬܐ ܥܡ ܝܘܕܝ̈ܐ. ܘܥܡ ܐܝܠܝܢ ܕܕܚܠܝܢ ܡ̣ܢ ܐܠܗܐ. ܘܒܫܘ̈ܩܐ ܥܡ ܐܝܠܝܢ ܕܡܣܬܩܒܠܝܢ ܗܘܘ ܟܠ ܝܘܡ. ܘܐܦ ܦܝܠܠܘ̈ܣܘܦܐ ܕܡ̣ܢ ܝܘܠܦܢܗ ܕܐܦܝ̣ܩܘܪܘܣ ܘܐ̱ܚܪ̈ܢܐ ܕܡܬܩܪܝܢ ܐܣܛܘ̈ܐܝ̣ܩܘ. ܘܕܪܫܝܢ ܗܘܘ ܥܡܗ. ܘܐ̱ܢܫ ܐ̱ܢܫ ܡܢܗܘܢ ܐܡܪܝܢ ܗܘܘ܆ ܡܢܐ ܨܒܐ ܗܢܐ ܡܠܩܛ ܡ̈ܠܐ. ܘܬܘܒ. ܘܕܪܫ ܗܘܐ ܥܡ ܝܘ̈ܕܝܐ ܐܝܠܝܢ ܕܝܕܥܝܢ ܗܘܘ ܝܘܢܐܝܬ.

 

 

 

ܣܗܕܘܬܐܕܬܪܬܝܢ

 

ܦܘܠܘܣ. ܘܗܘܝܬܘܢ ܝܕܥܝܢ ܠܐܢܫ ܐ̱ܢܫ ܐܝܟܢܐ ܘܠܐ ܠܡܦܢܝܘ ܦܬܓܡܐ.

 

 

 

ܣܗܕܘܬܐ ܕܬܠܬ

 

ܩܕܝܫܐ ܕܝܘܢܢܘܣܝܘܣ ܒܗܦ̈ܟܬܐ ܗ̇ܢܝܢ ܥܣܪܝܢ ܘܐܪܒܥ ܕܩܦܠܐܘܢ ܕܐܪܒܥܐ ܕܡܐܡܪܐ ܕܬܠܬܐ ܡܚܘܐ ܕܣܓܝ ܪܚܡ ܕܪ̈ܫܐ ܘܥܘܪ̈ܙܠܐ ܡܠܬܢܝ̈ܐ ܐܝܬܘܗܝ.

 

 

 

ܣܗܕܘܬܐ ܕܐܪܒܥ

 

ܩܕܝܫܐ ܓܪܝ̣ܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܩܒܘܪܬܗ ܕܩܣܪܝܘܣ. ܐܦ ܓܝܪ ܘܗܦ̈ܟܬܐ ܡܕܡ ܡܠܝ̣̈ܠܬܐ ܐܝܬ ܒܗܝܢ ܘܡܥܠܝ̈ܬܐ. ܕܠܝ ܟܝܬ ܠܘ ܠܐ ܗܢܝ̈ܐܬܐ ܐܢܝܢ ܠܥܘܗܕܢܐ. ܘܬܘܒ. ܒܡܐܡܪܐ ܩܕܡ̄ ܕܡܛܠ ܒܪܐ. ܠܐ ܓܝܪ ܗܢܝܐܐ ܠܡܗܝ̈ܡܢܐ ܠܙ̈ܬܐ ܘܗܦ̈ܟܬܐ ܕܡ̈ܠܐ. ܣܦܩ ܓܝܪ ܘܚܕ ܣܩܘܒܠܝܐ܆ ܒܪܡ ܐܠܨܐܝܬ܆ ܡܛܠ ܕܐܦ ܣܡ̈ܡܢܐ ܡܛܠ ܟܘܪ̈ܗܢܐ܆ ܐܝܟܢܐ ܕܢܕܥܘܢ ܕܠܘ ܒܟܠܡܕܡ ܐܝܬܝܗܘܢ ܚܟܝ̣̈ܡܐ܇ ܘܠܐ ܠܐ ܡܙܕܟ̈ܝܢܐ: ܒܗܠܝܢ ܝܬܝܪ̈ܬܐ ܘܕܡܣܪ̈ܩܢ ܠܐܘܢܓܠܝܘܢ.

 

 

 

ܣܗܕܘܬܐ ܕܚܡܫ

 

ܡܪܝ ܐܦܪܝܡ܇ ܕܪܫܐ ܒܟܝܠܐ ܣܡ ܚܝ̈ܐ ܗ̣ܘ. ܘܕܠܐ ܟܝܠܐ ܣܡ ܡܘܬܐ. ܐܘ ܕܫܬܐ ܡܝ̈ܐ ܒܟܝܠܐ. ܥܒܕ ܟܝܠܐ ܐܦ ܠܕܪܫܟ.

 

 

 

ܣܗܕܘܬܐ ܕܫܬ

 

ܡܪܝ ܐܝܘܐܢܢܝܣ. ܐܡܬܝ ܕܫܠ̣ܝܛ ܠܟ ܕܠܒܥܠܕܪܟ ܬܪܡܐ ܒܦܘܫܟܐ. ܠܐ ܥܓܠ ܫܪܝܐ ܬܬܠ ܠܗ. ܐܢ ܓܝܪ ܦܫܝ̣ܩܐ ܕܐܦ ܗ̣ܘ ܢܬܚܙܐ ܡܫܥܒܕܐ ܕܝܠܗ̇ ܟܕ ܕܝܠܗ̇ ܕܠܐ ܝܕܥܬܐ. ܠܡܢܐ ܩܝ̣ܢܕܘ̈ܢܘ ܝܬܝܪ̈ܐ ܬܩܒܠ ܥܠܝܟ.

 

 

 

ܢܝܫܐ ܚܡܝܫܝܐ ܡܛܠ ܗ̇ܝ ܕܐܟܡܐ ܕܒܬܐܘܪܝܐ. ܗ̣ܘ ܗܟܘܬ ܐܦ ܒܣܥܘܪܘܬܐ ܐܠܨܐ ܠܡܬܝܬܪܘ

 

ܙܕܩ ܠܗ ܓܝܪ ܠܒܪܢܫܐ ܕܥܠ ܦܘܪܩܢ ܢܦܫܗ ܒܛܝܠ ܠܗ. ܕܥܡ ܗ̇ܝ ܕܡ̣ܢ ܚܝܠܐ ܠܡܥܒܕܢܘܬܐ ܒܝܕܥܬܐ ܢܦܩܝܗ̇. ܕܐܦ ܒܣܥܘܪ̈ܘܬܐ ܡܝܬܪ̈ܬܐ ܢܢܦܩܝܗ̇ ܒܕܡܠܬ݀ ܚܟܝ̈ܡܐ ܐܡܪܐ. ܕܒܢܦܫܐ ܡܠܬܟܬ݀ ܒܒܝ̣̈ܫܬܐ܆ ܚܟܡܬܐ ܠܐ ܥܡܪܐ. ܘܟܕ ܗܘܢܐ ܡܒܪܝ ܡ̣ܢ ܙܢܝ̈ܐ ܗܘܠܢܝ̈ܐ ܢܥܒܕܝܗ̇. ܐܝܛܐ ܒܕܝ̣ܠܝ̈ܬܐ ܠܐ ܚܫܘ̈ܫܬܐ ܢܥܝܕܝܗ̇. ܘܡ̣ܢ ܪ̈ܓܝܓܬܐ ܡܥܡܛܢ̈ܝܬܗ̇ ܢܕܟܝܗ̇. ܘܐܝܟ ܡܠܟܬܐ ܥܠ ܡܫܥܒ̈ܕܝܗ̇ ܘܡܫܡ̈ܫܢܝܗ̇. ܥܠ ܚܝ̈ܠܐ ܟܝܢܝ̈ܐ ܢܫܠܛܝܗ̇. ܘܕܠܗܘܢ ܘܒܟܠܗܘܢ ܗܘܦܟܝ̈ܗ̇ ܢܙܟܝܗ̇. ܐܝܟ ܡܪܬܐ ܠܥܒ̈ܕܝܗ̇ ܘܠܐܡܗ̈ܬܗ̇ ܬܦܪܢܣ ܢܚܦܛܝܗ̇. ܘܡ̣ܢ ܡܐܟܠܐ ܘܫܩܝܐ ܘܬܟܣܝ̣ܬܐ ܒܐܢܢ̈ܩܝܬܐ ܒܠܚܘܕ ܢܬܚܫܚ. ܘܐܝܟ ܕܠܩܘܝܡܐ ܘܠܘ ܦܘܪܦܥܐ ܒܗܘܢ ܐܦܣܘܢܝܐܝܬ ܢܬܡܫܚ. ܘܐܢܗܘ ܕܒܫܘܬܦܘܬܐ ܢܩܦܝܬܐ ܝܘ̈ܡܬܗ ܠܐ ܢܦܪܚ. ܗܝܕܝܢ ܠܘܬ ܪܘܡܐ ܩܠܝܠܐܝܬ ܢܬܡܨܐ ܠܡܦܪܚ. ܘܠܢܟ̈ܣܐ ܘܩܢ̈ܝܢܐ ܢܣܠܐ ܐܦ ܢܣܢܐ. ܘܠܐ ܢܩܢܐ ܐܢ ܡܨܝܐ ܐܦܠܐ ܚܘܛܐ. ܘܣܦܩܐ ܠܗ ܬܚܘܝܬܐ ܕܓܡܠܐ ܘܚܪܘܪ ܡܚܛܐ. ܘܠܚܡܬܐ ܢܫܝܫ ܘܢܪܝܚ. ܘܐܢ ܡܬܚܡܬ݀. ܐܢ ܢܬܚܒܢܢ ܘܢܬܬܪܡܛ ܘܢܬܩܛܥ. ܘܢܕܥ ܕܡܝܬܪܐ ܕܟܠܗܘܢ ܙܘ̈ܥܐ ܦܓܪ̈ܢܝܐ܆ ܙܘܥܐ ܗ̇ܘ ܨܠܘܬܢܝܐ ܐܝܬܘܗܝ. ܘܡܘܬܪܢܐ ܕܟܠܗܘܢ ܫܠܝ̈ܐ ܦܓܪ̈ܢܝܐ. ܫܠܝܐ ܗ̇ܘ ܨܘܡܢܝܐ ܐܝܬܘܗܝ. ܘܕܫܬܩܐ ܝܬܝܪ ܡܢ ܪܬܡܐ ܦܩܚ ܒܕܩ ܗ̣ܘ ܟܝܢܐ. ܟܕ ܬܐܡ̈ܐ ܠܪ̈ܓܫܐ ܥܒܕ ܘܝܚܝ̈ܕܝܐ ܠܠܫܢܐ. ܣܒܝ̣ܣܐܝܬ ܕܝܢ ܒܚܘܪܐ ܕܠܘܬ ܐܠܗܐ ܐܝܟ ܕܒܨܕܝܕܐ ܥܝ̈ܢܝ ܬܪܥܝܬܗ ܢܟܚܘܠ. ܘܕܢܬܬܒܪܩ ܘܐܦܢ ܒܒܪܩܐ ܙܥܘܪܐ ܡ̣ܢ ܗܢܘܢ ܕܠܥܠ ܢܒܥܐ. ܘܕܡ̈ܥܐ ܢܚܫܘܠ. ܘܗ̣ܘ ܚܘܪܐ ܕܐܝܟ ܗܟܢܐ ܠܘ ܡܫܟܐܝܬ ܡܨܐ ܕܢܗܘܐ. ܐܦܠܐ ܠܝ̣ܓܐܝܬ ܒܪܢܫܐ ܒܠܥܕ ܕܘܪܓܐ ܘܕܘܪܫܐ ܠܗ ܡܫܬܘܐ. ܐܠܐ ܒܒܪ̈ܝܬܐ ܬܡܝ̣̈ܗܬܐ ܕܫܡܝ̈ܢܐ ܘܕܐܪ̈ܥܢܝܐ. ܘܒܡܛܟܣ̈ܘܬܐ ܕܙܘ̈ܥܐ ܡܘܙܠܬܢܝ̈ܐ. ܘܒܚܘܠܛܢ̈ܐ ܘܡܘܙܓ̈ܐ ܐܣܛܘܟ̈ܣܢܝܐ. ܘܒܢܛܝ̣ܪܘܬ ܐܕܫ̈ܐ ܚܝܘ̈ܬܢܝܐ. ܒܢܘܛܦܬܐ ܐܫܝ̣ܕܬܐ. ܘܗܕܝ̣ܪܘܬ ܟܝ̈ܢܐ ܢܨܒܬܢܝ̈ܐ. ܒܦܪܕܬܐ ܡܝܬܬܐ ܘܐܒܝ̣ܕܬܐ. ܟܕ ܢܬܒܩܐ ܒܚܝ̣ܪܐܝܬ. ܘܡ̣ܢ ܥܠܬܢ̈ܐ ܠܘܬ ܥܠܬܐ ܢܬܥܠܐ ܕܡܝܪܐܝܬ. ܗܝܕܝܢ ܡܠܟܘܬܐ ܕܫܡܝܐ ܠܓܘ ܡܢܗ ܗܘܝܐ. ܘܬܡܝ̣ܗܘܬ ܗܘܝ̈ܐ ܠܗ ܡܬܓܐܝܐ. ܘܩܕܡ ܟܠ ܡܕܡ ܗ̣ܘ ܠܗ ܐܘܟܝܬ ܢܦܫܗ ܠܗ ܡܬܓܠܝܐ. ܒܪܬ ܚܐܪ̈ܐ ܕܐܡܕ ܬܡܢ ܣܘܛܡ̈ܐ ܘܦܟܪ̈ܐ ܗܘܠܢܝ̈ܐ. ܘܨܦܪܐ ܕܦܠܛܬ݀ ܡ̣ܢ ܦܚ̈ܐ ܘܐܣܘܪ̈ܐ ܗܒܠܢܝ̈ܐ. ܘܟܕ ܚܐܪ ܒܥܠܡܐ ܗܢܐ ܘܪ̈ܓܝܓܬܗ. ܘܒܐܣܟܡܐ ܗܢܐ ܘܫܪܓܪ̈ܓܝܬܗ. ܡܬܬܢܚܘ ܡܬܬܢܚ ܥܠ ܪ̈ܚܡܘܗܝ. ܘܓܠܝܢ ܥܠܝܗܘܢ ܪ̈ܚܡܘܗܝ. ܐܝܛܐ ܡܬܒܝܬܐ ܠܗܘ̈ܢܐ ܡܬܦܪ̈ܫܢܐ. ܘܡܬܪܟܢܝܢ ܠܡܒܝܐܢܘܬܗ ܒܓܠܝ̈ܢܐ ܘܚܙ̈ܘܢܐ ܣܓܝ̈ܐܝܝ ܦܘܪ̈ܫܢܐ. ܘܕܢܚܝܢ ܥܠܘܗܝ ܙܠܓܝ̈ ܐܠܗܘܬܐ ܕܠܚ̈ܕܕܐ ܥܠܒܝܢ ܢܛܚܝ̈ܗܘܢ. ܘܠܚ̈ܕܕܐ ܬܘܒ ܥܒܪܝܢ ܨܡܚܝ̈ܗܘܢ. ܘܟܕ ܢܬܕܟܐ ܡܢ ܫܥܝ̣ܢܐ܆ ܗܝܕܝܢ ܢܡܬܘܩ ܡܢ ܡܥܝ̣ܢܐ. ܘܗܘܐ ܥܡ ܦܓܪܐ ܐܝܟ ܗ̇ܘ ܕܠܘ ܥܡܗ ܗ̣ܘ. ܘܡܬܚܘܐ ܒܓܘ ܥܡܗ܆ ܐܝܟ ܗ̇ܘ ܕܠܘ ܡܢ ܥܡܗ ܗ̣ܘ. ܗܕܐ ܗ̱ܝ ܚܟܡܬܐ ܕܪܝܫܗ̇ ܕܚܠܬܗ ܕܡܪܝܐ. ܘܢܝܫܗ̇ ܪܚܡܬܗ ܕܒܪܝܐ. ܛܘܒܘܗܝ ܠܡܢ ܕܢܓܢܐ ܒܬܘܢܝ̈ܗ̇. ܘܢܕܝܪ ܒܐܘܢܝ̈ܗ̇. ܘܢܬܬܪܣܐ ܡ̣ܢ ܐܣܢܗ̇. ܘܡܫܬܘܐ ܠܡܫܬܐ ܡܢ ܐܓܢܗ̇.

 

 

 

ܦܣܘܩܐ ܒ̄ ܕܩܦܠܐܘܢ ܩܕܡ̄ ܕܫܬܐܣܬܐ ܩܕܡ̄ ܡܛܠ ܬܪܥܝܬܐ ܣܩܘܒܠܝܬܐ ܕܗ̇ܢܘܢ ܕܐܡܪܝܢ ܕܠܝܬ ܡܕܪܟܢܘܬܐ. ܘܒܗ ܐܝܬ ܢܝ̈ܫܐ ܬܠܬܐ

 

ܢܝܫܐ ܩܕܡ̄ ܡܛܠ ܣܥܝܐ ܕܗ̇ܢܘܢ ܕܠܡܕܪܟܢܘܬ ܪ̈ܓܫܐ ܡܙܝܦܝܢ. ܣܥܝܐ ܩܕܡܝܐ

 

ܐܡܪܝܢ ܕܙܒܢܝ̈ܢ ܣܓܝ̈ܐܢ ܪܓܫܐ ܚܙܘܝܐ ܠܗܘ ܕܐܝܬܘܗܝ ܐܝܟ ܗ̇ܘ ܕܠܐ ܐܝܬܘܗܝ ܡܕܪܟ. ܟܐܡܬ݀ ܠܛܠܠܐ ܕܡܬܬܙܝܥ ܐܝܟ ܗ̇ܘ ܕܫܠܐܷ. ܘܠܟܘܟܒܐ ܕܫܠܐܷ ܒܩܪܝܒܘܬ ܥܢܢܐ ܕܪܕܝܐ ܐܝܟ ܗ̇ܘ ܕܪܕܐ. ܘܠܣܦܝܢ̱ܬܐ ܕܪܕܝܐ ܐܝܟ ܗ̇ܝ ܕܫܠܝܐ. ܘܠܐܪܥܐ ܕܣܦܪ̈ܝ ܝܡܐ ܐܘ ܢܗܪܐ. ܐܝܟ ܗ̇ܝ ܕܡܬܬܙܝܥܐ. ܘܠܛܘ̣ܦܬܐ ܕܢܚܬܐ ܒܐܐܪ ܐܝܟ ܣܘܪܛܐ ܬܪܝܨܬܐ. ܘܠܛܘܛܝ̣ܬܐ ܐܝܟ ܚܚܬܐ ܒܡܝ̈ܐ. ܘܠܥܙܩܬܐ ܟܕ ܩܪܒܐ ܠܥܝܢܐ ܐܝܟ ܩܘܠܒܐ. ܘܠܚܕ ܬܪܝܢ ܟܕ ܡܙܕܠܡܐ ܒܒܬܐ. ܘܠܣܓܝ̈ܐܐ ܚܕ ܐܝܟ ܓܘ̈ܢܐ ܡܦܬܟ̈ܐ ܕܥܠ ܟܐܦ ܪܚܝܐ ܕܚܕܪܐ. ܘܒܡܝ̈ܐ ܣܗܪܐ ܟܕ ܠܝܬ ܒܗ ܣܗܪܐ. ܘܠܬܠܓܐ ܚܘܪܐ ܟܕ ܡܢ ܡܢܘ̈ܬܐ ܓܠܝ̣ܕܢܝ̈ܬܐ ܙܥܘܪ̈ܝܬܐ ܕܠܐ ܚܘܪ̈ܢ ܡܪܟܒ. ܘܠܨܪܝ ܙܓܘܓܝ̣ܬܐ ܕܚܘܪ ܟܕ ܠܐ ܗ̣ܝ ܚܘܪܐ ܐܦܠܐ ܐܐܪ ܕܒܗ̇. ܘܕܗܠܝܢ ܟܠܗܝܢ ܘܕܐܟܘܬܗܝܢ ܡܕܪ̈ܟܢܘܬܐ ܐܢܝܢ ܪ̈ܓܫܢܝܬܐ ܘܠܐ ܫܪܝܪ̈ܢ ܓܠܝܐ. ܘܠܗܕܐ ܡܐܪܙ ܐܫܥܝܐ ܗ̇ܘ ܢܒܝܐ ܕܐܡܪ ܠܐ ܐܝܟ ܕܚܙ̈ܝܢ ܥܝܢܘ̈ܗܝ ܢܕܘܢ. ܘܠܐ ܐܝܟ ܕܫܡ̈ܥܢ ܐܕܢܘ̈ܗܝ ܢܟܣ. ܢܕܘܢ ܒܩܘܫܬܐ ܘܢܟܣ ܒܬܪܝܨܘܬܐ. ܟܐܡܬ ܚܙܝܐ ܕܥܝ̈ܢܐ ܘܫܡܥܐ ܕܐܕ̈ܢܐ ܠܘ ܩܘܫ̈ܬܢܝܐ ܐܢܘܢ܆ ܐܦܠܐ ܬܪ̈ܝܨܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܒܪܢܫܐ ܣܘܥܪ̈ܢܐ ܣܓܝ̈ܐܐ ܚܙܐ ܒܚܠܡܗ. ܘܐܦܦܝܦܐܢܝܣܬܐ ܥܒܕ ܕܫܪܝܪܝܢ. ܘܟܕ ܡܬܬܥܝܪ ܝܕܥ ܕܠܐ ܫܪܝܪ. ܗܘܐ ܦܣܩܗ ܚܠܡܝܐ. ܒܕܓܘܢ ܠܘ ܠܐ ܡܨܝܐ ܕܩܛܐܣܛܣܝܣ ܐ̱ܚܪܬܐ ܬܗܘܐ. ܕܒܗ̇ ܡܬܚܘܝܐ ܠܢ ܠܐ ܫܪܝܪܘܬ ܟܠܗܘܢ ܣܘܥܪ̈ܢܐ ܗܠܝܢ ܥܝܪ̈ܘܬܢܝܐ ܕܒܗܘܢ ܡܬܗܦܟܝܢ. ܘܡܢ ܗܪܟܐ ܛܠܢܝ̈ܬܐ ܡܣܬܥܪ̈ܢ ܡܕܪ̈ܟܢܘܬܐ ܗܠܝܢ ܪ̈ܓܫܢܝܬܐ ܟܠܗܝܢ ܘܠܐ ܡܫܬܣ̈ܬܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܗܠܝܢ ܕܚܫܝ̣ܫܝܢ ܒܚܫܐ ܗ̇ܘ ܕܦܪܢܝܛܘܣ ܐܘ ܕܡܠܐܢܟܘܠܝܐ. ܕܡܘ̈ܬܐ ܕܠܐ ܐܝܬܝܗܝܢ ܐܝܟ ܗܢܝܢ ܕܐܝܬܝܗܝܢ ܚܙܝܢ. ܘܓܥܝܢ ܘܒܟܝܢ ܘܟܘܙܝܢ ܡܢܗܝܢ. ܘܟܕ ܒܙܒܢ ܟܘܪܗܢܐ ܙܢܐ ܕܐܝܟ ܗܢܐ ܡܨܐ ܠܡܓܕܫ ܠܒܪܢܫܐ. ܠܘ ܠܐ ܡܨܐ ܕܐܦ ܒܙܒܢ ܚܘܠܡܢܐ ܥܠܬܐ ܡܕܡ ܠܗ ܬܓܕܫ ܕܡܛܠܬܗ ܗܠܝܢ ܕܠܐ ܐܝܬܝܗܝܢ ܐܝܟ ܗܢܝܢ ܕܐܝܬܝܗܝܢ ܢܚܙܐ ܘܟܕ ܚܠܝܡ. ܘܡ̣ܢ ܗܪܟܐ ܘܠܐ ܚܕܐ ܬܟܝܠܘܬܐ ܦܝܫܐ ܥܠ ܡܕܪܟܢܘܬܐ ܪܓܫܢܝܬܐ.

 

 

 

ܢܝܫܐ ܬܪܝܢܐ ܡܛܠ ܣܥܝ̈ܐ ܕܗܢܘܢ ܕܠܡܕܪܟܢܘܬ ܗܘܢܐ ܡܒܛܠܝܢ. ܣܥܝܐ ܩܕܡܝܐ

 

ܐܡܪܝܢ ܕܠܝܬ ܡܕܡ ܕܗܟܢܐ ܠܘܬ ܗܘܢܐ ܐܠܨܐܝܬ ܫܪܝܪ. ܐܝܟ ܗ̇ܝ ܕܝܕܥ ܕܟܠܡܕܡ ܐܘ ܐܝܬܘܗܝ ܐܘ ܠܐ ܐܝܬܘܗܝ. ܘܕܗܕܐ ܝܕܥܬܐ ܠܐ ܫܪܝܪܐ. ܝܕܝ̣ܥܐ ܡ̣ܢ ܗ̇ܝ ܕܗ̇ܘ ܕܡܫܪܐ ܠܡܗܘܐ. ܐܢ ܐܝܬܘܗܝ܆ ܐܝܟܢܐ ܡ̣ܢ ܕܪܝܫ ܗܘܐ. ܘܐܢ ܠܐ ܐܝܬܘܗܝ. ܒܡܢܐ ܦܪܝܫ ܡ̣ܢ ܗ̇ܘ ܕܠܐ ܡܫܪܐ ܠܡܗܘܐ. ܬܪ̈ܝܗܘܢ ܓܝܪ ܐܝܬܝܗܘܢ. ܘܠܗܕܐ ܡܫܪܪ ܩܕܝܫܐ ܕܝܘܢܢܘܣܝܘܣ ܟܪ ܕܐܡܪ. ܕܐܠܗܐ ܠܐ ܡ̣ܢ ܗܠܝܢ ܕܐܝܬܝܗܝܢ ܗܘܘ܆ ܘܐܦܠܐ ܡ̣ܢ ܗܠܝܢ ܕܠܐ ܐܝܬܝܗܝܢ. ܠܘ ܡܕܝܢ ܟܠܡܕܡ ܐܘ ܐܝܬܘܗܝ ܐܘ ܠܐ ܐܝܬܘܗܝ. ܐܟܡܐ ܕܗܘܢܐ ܦܣܩ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܥܠ ܣܘܥܪ̈ܢܐ ܕܒܡܥܒܕܢܘܬܐ ܐܠܨܐܝܬ ܠܗܝ ܕܐܝܬܝܗܘܢ܆ ܗܘܢܐ ܡܩܛܪܓ ܟܕ ܐܡܪ. ܐܝܟ ܐܝܬܐ ܠܡܐܡܪ ܕܫܡܫܐ ܐܝܬܘܗܝ. ܒܕܓܘܢ ܐܢ ܣܘܟܠܐ ܕܫܡܫܐ ܗ̣ܘ ܟܕ ܗ̣ܘ ܣܘܟܠܐ ܕܐܝܬܘܗܝ ܐܝܬܘܗܝ܆ ܠܐ ܦܪܝܫܐ ܗ̱ܝ ܕܢܐܡܪ ܕܫܡܫܐ ܐܝܬܘܗܝ. ܡ̣ܢ ܗ̇ܝ ܕܢܐܡܪ ܕܫܡܫܐ ܫܡܫܐ܆ ܗ̇ܝ ܕܫܟܝܪܐ. ܘܐܢܗܘ ܕܣܘܟܠ ܫܡܫܐ ܠܘ ܗ̣ܘ ܟܕ ܗܘ ܣܘܟܠ ܗ̇ܝ ܕܐܝܬܘܗܝ ܐܝܬܘܗܝ. ܡܫܬܟܚ ܗ̇ܘ ܕܐܝܬܘܗܝ ܕܥܠ ܗ̇ܘ ܕܠܐ ܐܝܬܘܗܝ ܡܬܩܛܪܓ ܗ̇ܝ ܕܝܬܝܪ ܫܟܝܪܐ. ܟܝܢ̈ܐ ܡܕܝܢ ܕܒܡܥܒܕܢܘܬܐ ܐܢܘܢ. ܠܘ ܟܐܢܐܝܬ ܠܗܝ ܕܐܝܬܘܗܝ܆ ܥܠܝܗܘܢ ܡܩܛܪܓ ܗܘܢܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܟܕ ܚܙܝܢܢ ܓܒܪܐ ܐ̱ܢܫ ܣܒܐ ܥܘܕܝܝܐ. ܐܠܨܐܝܬ ܦܣܩ ܗܘܢܢ. ܕܡ̣ܢ ܐܒܐ ܘܡܢ ܐܡܐ ܝܠܝ̣ܕ. ܘܡ̣ܢ ܩܘܡܬܐ ܠܩܘܡܬܐ ܫܢܝ ܥܕܡܐ ܕܣܐܷܒ. ܘܥܡܗ̇ ܕܗܕܐ ܝܕܥܬܐ ܐܠܨܝܬܐ. ܡܨܝܐ ܕܗܟܢܐ ܡ̣ܢܫܝܠ ܒܪܝܗܝ ܐܠܗܐ ܡܛܠ ܕܠܐ ܥܛܠ ܠܐܠܗܐ ܡܕܡ ܐܝܟ ܬܪܥܝ̣ܬܐ ܕܟܪ̈ܣܛܝܢܐ ܘܡܫܠܡܢ̈ܐ ܘܝܘܕܝ̈ܐ. ܐܘ ܕܡܫܬܘܪܝܢܘܬܐ ܡܕܡ ܐܟܣܢܝܬܐ ܕܟܘܟ̈ܒܐ ܓܕܫܬ݀. ܘܠܗ̇ ܨܒܘܬܐ ܐܟܣܢܝܬܐ ܕܒܪܝܬܗ ܕܓܒܪܐ ܗ̇ܘ ܗܟܢܐ ܡ̣ܢܫܝܠ ܣܒܐ ܕܠܐ ܐܒܐ ܘܐܡܐ ܢܩܦܬ݀ ܐܝܟ ܬܪܥܝܬܐ ܕܦܝܠܠܘܣܘ̈ܦܐ ܒܪ̈ܝܐ. ܘܓܠܝܐ ܕܗ̣ܝ ܡܬܡܨܝܢܘܬܐ ܕܐܝܟ ܗܕܐ ܡܒܛܠܘ ܡܒܛܠܐ. ܘܬܚܝܬ ܣܒܝܪ̈ܘܬܐ ܡܦܠܐ ܠܡܕܪ̈ܟܢܘܬܐ ܟܠܗܝܢ ܐܠܨܝ̈ܬܐ ܕܗܘܢܐ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܕܘܠܐ ܚܕܐ ܬܘܕܝܬܐ ܐܝܬ. ܐܢ ܥܕܬܢܝܬܐ ܘܐܢ ܒܪܝܬܐ. ܕܠܘ ܡܬܕܠܩܒܐ ܡ̣ܢ ܬܘܕܝܬܐ. ܘܒܟܠ ܬܘܕܝܬܐ ܓܠܝܐ ܕܐ̱ܢܫ̈ܐ ܐܝܬ ܡܗܘ̈ܢܐ ܘܝܕܘ̈ܥܬܢܐ ܘܡܗܝܪ̈ܐ ܘܣܦܝܪ̈ܐ. ܘܐܠܘ ܣܦܩ ܗܘܐ ܗܘܢܐ ܠܡܕܪܟܘܬܗ ܠܫܪܪܐ. ܠܐ ܙܕܩ ܗܘܐ ܕܬܫܬܟܚ ܕܠܩܘܒܠܝܘܬܐ ܗܕܐ. ܒܝܬ ܡܗܘ̈ܢܐ ܗܢܘܢ. ܘܟܕ ܫܟܝܚܐ. ܝܕܝܥܐ ܕܗ̇ܘ ܕܐܝܬܘܗܝ ܠܘ ܐܝܟ ܕܐܝܬܘܗܝ ܡܬܕܪܟ ܡ̣ܢ ܗܘܢܐ.

 

 

 

ܣܥܝܐ ܚܡܝܫܝܐ

 

ܐܡܪܝܢ ܕܚܙܝܢܢ ܠܒܪܢܫܐ ܐ̱ܢܫ ܕܚܠܝ̣ܡܐܝܬ ܐܚܝܕ ܒܬܘܕܝܬܐ ܡܕܡ. ܐܝܛܐ ܫܒܩ ܠܗ̇ ܘܠܐܚܪܬܐ ܢܩܦ. ܐܝܟ ܦܘܠܘܣ ܠܡܐܡܪ ܘܕܝܘܢܢܘܣܝܘܣ ܘܐ̱ܚܪ̈ܢܐ ܣܓܝ̈ܐܐ. ܘܗ̣ܝ ܗܕܐ ܒܝܕ ܬܘܣܦܬܐ ܕܡܬܢܗܪܢܘܬܗ ܕܗܘܢܐ ܡܨܝܐ ܕܬܗܘܐ. ܘܟܕ ܠܗ̇ ܠܬܘܣܦܬܐ ܗܕܐ ܣܘܦܐ ܠܐ ܐܝܬ. ܒܗܝ ܕܓܡܝܪܘܬܗ ܕܗܘܢܐ ܒܕܡܝܘܬܐ ܕܒܐܠܗܐ ܗܘܝܐ. ܝܕܝܥܐ ܕܟܠܡܕܡ ܕܡ̣ܢ ܗܘܢܐ ܡܬܕܪܟ ܘܫܪܝܪܐ ܡܬܬܘܕܐ. ܠܘ ܫܪܝܪܐ ܗ̱ܘ. ܐܠܐ ܗ̇ܘ ܕܒܝܕ ܡܬܢܗܪܢܘܬܐ ܕܝܬܝܪܐ ܡܬܕܪܟ ܝܬܝܪ ܫܪܝܪ ܘܡ̣ܢ ܗܢܐ ܬܘܒ ܗ̇ܘ ܕܝܬܝܪ: ܝܬܝܪ ܝܬܝܪ. ܘܗܟܢܐ ܠܠܐ ܣܘܦ. ܘܠܐ ܡܣܬܡܟ ܗܘܢܐ ܥܠ ܕܫܪܝܪܐ.

 

 

 

ܣܥܝܐ ܫܬܝܬܝܐ

 

ܐܡܪܝܢ ܕܫܘܚܠܦܐ ܕܥܝ̈ܕܐ܆ ܫܘܚܠܦܐ ܪܒܐ ܡܥܒܕܝܢ ܒܬܘܕ̈ܝܬܐ. ܐܟܙܢܐ ܕܗ̇ܘ ܕܒܟܠܗ ܙܒܢܗ ܠܡܫܡܥ ܡܠܝ̈ܗܘܢ ܕܚܟܝ̈ܡܐ ܒܪ̈ܝܐ ܐܬܥܝܕ. ܟܕ ܫܡܥ ܐ̱ܪ̈ܙܝܗܘܢ ܕܟܪ̈ܣܛܝܢܐ ܘܬܘܢܝ̈ܐ ܕܡܬܒܪܢܫܢܘܬܗ ܕܡܠܬܐ ܐܠܗܐ ܐܝܟ ܫܛܘܪ̈ܘܬܐ ܕܐܢ ܡܠܝ̈ܗܘܢ. ܘܐܦܢ ܪܒܘ ܡܚܘ̈ܝܢܘܢ ܘܣܗܕ̈ܘܢ ܡܬܬܝ̈ܬܝܢ ܠܗ. ܘܟܕ ܥܝܕܐ ܡܟܠܐ ܟܠܐ ܠܗܘܢܐ ܡ̣ܢ ܡܕܪ̈ܟܢܘܬܗ ܡܪ̈ܢܝܬܐ ܡܨܝܐ ܕܟܠܗܝܢ ܗܠܝܢ ܕܐܠܨܐܝܬ ܡܕܪܟ ܠܗܝܢ ܠܗܘܢܐ܆ ܒܝܕ ܥܝܕܐ ܡܕܡ ܓܘܢܝܐ ܡܕܪܟ ܠܗܝܢ ܗܟܢܐ. ܟܕ ܠܘ ܗܟܢܐ ܐܢܝܢ.

 

 

 

ܢܝܫܐ ܬܠܝܬܝܐ ܡܛܠ ܣܗܕ̈ܘܬܐ ܟܬܒܝ̈ܬܐ ܕܣܢ̈ܝܝ ܚܟܡܬܐ. ܣܗܕܘܬܐ ܩܕܡܝܬܐ

 

ܩܘܗܠܬ݀. ܒܣܘܓܐܬ݀ ܚܟܡܬܐ܆ ܣܓܝܐܬ݀ ܪܘܓܙܐ. ܘܕܡܘܣܦ ܠܡܕܥ܆ ܡܘܣܦ ܟܐܒܐ. ܘܬܘܒ. ܠܐ ܬܬܚܟܡ ܝܬܝܪ ܕܠܐ ܬܬܡܗ.

 

 

 

ܣܗܕܘܬܐ ܬܪܝܢܝܬܐ

 

ܦܘܠܘܣ ܒܗ̇ܝ ܕܩܘܪ̈ܝܢܬܝܐ ܩܕܡ̄. ܠܐ ܗܐ ܐܫܛܝܗ̇ ܐܠܗܐ ܠܚܟܡܬܗ ܕܥܠܡܐ ܗܢܐ. ܘܬܘܒ. ܓܒܐ ܐܠܗܐ ܠܣܟܠܘ̈ܗܝ ܕܥܠܡܐ. ܕܢܒܗܬ ܠܚܟܝ̈ܡܐ. ܘܬܘܒ. ܠܐ ܒܡܡܠܠܐ ܪܘܪܒܐ. ܐܦܠܐ ܒܚܟܡܬܐ ܣܒܪܬ ܐܢܘܢ ܐ̱ܪܙܗ ܕܐܠܗܐ. ܘܬܘܒ. ܡܠܬܝ ܠܐ ܗܘܬ݀ ܒܡܦܝ̣ܣܢܘܬܐ ܕܡ̈ܠܐ ܕܚܟܡܬܐ. ܐܠܐ ܒܬܚܘܝ̣ܬܐ ܕܪܘܚܐ ܘܕܚܝܠܐ. ܘܬܘܒ. ܚܟܡܬܗ ܓܝܪ ܕܥܠܡܐ ܗܢܐ ܠܠܘ̣ܬܐ ܗ̱ܝ ܠܘܬ ܐܠܗܐ. ܘܬܘܒ. ܒܕܩܘܠܣܝ̈ܐ. ܐܙܕܗܪܘ ܕܠܡܐ ܐ̱ܢܫ ܢܚܠܨܟܘܢ ܒܦܝ̣ܠܠܘܣܘ̣ܦܘ̣ܬܐ ܘܒܛܥܝܘܬܐ ܣܪܝ̣ܩܬܐ. ܐܝܟ ܝܘܠܦܢܐ ܕܒܢܝ̈ܢܫܐ. ܘܐܝܟ ܐܣܛܘܟ̈ܣܘܗܝ ܕܥܠܡܐ ܗܢܐ. ܘܬܘܒ. ܒܗܝ ܕܠܘܬ ܛܝܡܬܐܘܣ. ܐܘ ܛܝܡܘܬܐܐ. ܐܙܕܗܪ ܒܡܕܡ ܕܐܬܓܥܠ ܠܟ. ܘܥܪܘܩ ܡ̣ܢ ܒܢ̈ܬ ܩ̈ܠܐ ܣܪ̈ܝ̣ܩܬܐ. ܘܡ̣ܢ ܗܦ̈ܟܬܐ ܕܝܕܥܬܐ ܕܓܠܬܐ. ܐܝܠܝܢ ܓܝܪ ܕܡܫܬܘܕܝܢ ܠܗ̇. ܛܥܘ ܠܗܘܢ ܡ̣ܢ ܗܝܡܢܘܬܐ. ܘܬܘܒ. ܡܢ ܚܪ̈ܝܢܐ ܠܡ ܘܡ̣ܢ ܬܟܬܘ̈ܫܐ ܕܣܦܪ̈ܐ ܐܫܬܐܠ. ܝܘܬܪܢ ܓܝܪ ܠܝܬ ܒܗܝܢ ܘܣܪ̈ܝܩܢ ܐܢܝܢ. ܘܬܘܒ. ܡܢ ܓܒܪܐ ܐܪܣܝܘܛܐ ܡܢ ܒܬܪ ܚܕܐ ܙܒܢ ܘܬܪܬܝܢ ܕܡܪܬܐ ܐܢ̱ܬ ܠܗ ܐܫܬܐܠ.

 

 

 

ܣܗܕܘܬܐ ܬܠܝܬܝܬܐ

 

ܝܥܩܘܒ ܒܩܐܬܘܠܝ̣ܩܝ̣ ܕܝܠܗ. ܗܕܐ ܓܝܪ ܚܟܡܬܐ ܡܢ ܠܥܠ ܠܐ ܢܚܬܬ݀. ܐܠܐ ܐܝܬܝܗ̇ ܐܪܥܢܝܬܐ. ܡ̣ܢ ܚܘ̈ܫܒܐ ܕܢܦܫܐ ܘܡ̣ܢ ܫܐܕ̈ܐ.

 

 

 

ܣܗܕܘܬܐ ܪܒܝܥܝܬܐ

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܚܡܫܐ ܕܡܛܠ ܒܪܕܐ. ܚܟܡܬܐ ܩܕܡܝܬܐ܆ ܕܢܒܣܐ ܒܚܟܡܬܐ ܗ̇ܝ ܕܡܠܬܐ ܣܝܡܐ܇ ܘܒܗܘ̈ܦܟܐ ܕܦܬܓܡ̈ܐ ܘܒܗܦ̈ܟܬܐ ܡܣܠܝ̈ܬܐ ܘܝܬܝܪ̈ܬܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܩܕܡܝܬܐ ܡܛܠ ܣܬܘܪܝܗ̇ ܕܬܪܥܝܬܐ ܕܙܐܦܢ̈ܐ܆ ܡܙܝ̈ܦܢܐ ܕܝܕܥܬܐ ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܫܪܝܐ ܕܣܥ̈ܝܝ ܗ̇ܢܘܢ ܕܠܡܕܪܟܢܘܬ ܪ̈ܓܫܐ ܡܙܝܦܝܢ. ܫܪܝܐ ܕܣܥܝܐ ܩܕܡܝܐ.

 

ܐܡܪܝܢܢ ܕܪ̈ܓܫܐ ܡ̇ܢ ܟܡܐ ܕܟܝܢܐܝܬ ܪܕܝܢ ܒܚܠܝ̣ܡܘܬ ܐܘܪ̈ܓܢܝܗܘܢ ܗܕܡܝ̈ܐ. ܘܡܬܪ̈ܓܫܢܝܗܘܢ ܬܘܒ ܟܕ ܒܙܢܐ ܥܗܢܝܐ ܢܗܘܘܢ ܐܝܬܝܗܘܢ܆ ܦܘܕܐ ܘܠܐ ܚܕ ܓܕܫ ܠܡܕܪ̈ܟܢܘܬܗܘܢ. ܘܡܛܠ ܕܗܘܢܐ ܕܝܢܐ ܗ̱ܘ ܕܪ̈ܓܫܐ. ܗ̣ܘ ܣܦܩ ܠܡܦܪܫ ܒܬ ܡܕܪ̈ܟܢܘܬܐ ܪ̈ܓܫܢܝܬܐ ܗܢܝܢ ܕܬܪ̈ܝܨܢ ܘܗܢܝܢ ܕܙܠܝ̈ܡܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܐܠܘ ܒܩܛܐܣܛܣܝ̣ܣ ܗܕܐ ܥܝܪܘܬܢܝܬܐ. ܠܗܝ ܚܠܡܢܝܬܐ ܡܕܪܟܝܢ ܗܘܝܢ. ܐܟܡܐ ܕܒܗ̇ܝ ܚܠܡܢܝܬܐ ܠܗܕܐ ܥܝܪܘܬܢܝܬܐ ܐܠܐ ܡܕܪܟܝܢܢ. ܟܒܪ ܐܝܬ ܗܘܐ ܠܡܕܡܝܘܬܗ̇ ܕܠܐ ܩܘܡܐ ܡܕܡ ܐܝܬܝܗ̇ ܘܠܐ ܡܫܪܪܬܐ. ܘܟܕ ܒܩܛܐܣܛܐܣܝܣ ܗܕܐ ܥܝܪܘܬܢܝܬܐ ܐܦ ܠܗܝ ܚܠܡܢܝܬܐ ܡܕܪܟܝܢܢ. ܐܦ ܠܗܝ ܕܠܚܪܬܐ ܡܥܕܐ ܕܬܗܘܐ ܠܢ ܒܬܪ ܩܝܡܬܐ ܓܘܢܝܬܐ. ܐܝܢܐ ܦܘܚܡܐ ܘܕܘܡܝܐ ܢܗܘܐ ܠܗܕܐ ܒܗ̇ܝ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܐܟܡܐ ܕܟܘܪܗܢܐ ܣܩܘܒܠܝܐ ܗ̱ܘ ܠܚܘܠܡܢܐ ܗ̣ܘ ܗܟܘܬ ܘܥܠܬܢܝ̈ܗܘܢ ܣܩܘܒ̈ܠܝܐ ܙܕܩ ܕܢܗܘܘܢ. ܒܕܓܘܢ ܕܡܘ̈ܬܐ ܗܢܝܢ ܕܒܙܒܢ ܟܘܪ̈ܗܢܐ ܡܬܚܙ̈ܝܢ܇ ܟܕ ܠܐ ܐܝܬܘܬܢܝ̈ܬܐ ܐܝܬܝܗܝܢ. ܗ̇ܢܝܢ ܕܒܙܒܢ ܚܘܠܡܢܐ ܡܬܚܙ̈ܝܢ ܐܝܬܘܬܢܝ̈ܬܐ ܙܕܩ ܕܢܗܘ̈ܝܢ. ܘܐܠܐ ܠܘ ܣܩܘܒ̈ܠܝܐ ܗܘ ܣܩܘܒܠܝ̈ܐ ܗ̇ܝ ܕܫܟܝ̣ܪܐ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗ̇ܢܘܢ ܕܠܡܕܪܟܢܘܬ ܗܘ̈ܢܐ ܡܒܛܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܗ̇ܘ ܕܡܫܪܐ ܠܡܗܘܐ. ܘܐܦܢ ܡܫܘܬܦ ܠܗܘ ܕܠܐ ܡܫܪܐ ܠܡܗܘܐ. ܒܗܝ ܕܠܐ ܐܝܬܘܗܝ. ܐܠܐ ܦܪܝܫܝܢ. ܒܗ̇ܝ ܕܥܠܬܗ ܥܒܘܕܬܐ ܕܗ̇ܘ ܕܡܫܪܐ ܠܡܗܘܐ. ܡܟܢܘܬ ܡܗܘܝܢܘܬܐ ܩܢܝܐ. ܒܗܦܟܐ ܕܥܠܬܗ ܥܒܘܕܬܐ ܕܗ̇ܘ ܕܠܐ ܡܫܪܐ ܠܡܗܘܐ. ܘܡ̣ܢ ܗܪܟܐ ܡܙܕܢܩܐ ܫܟܝ̣ܪܘܬܐ ܗ̇ܝ ܕܟܢܫܬܘܢ ܒܩܨܬ ܫܘܬܦܘܬܐ ܕܗ̇ܘ ܕܡܫܪܐ ܠܡܗܘܐ܆ ܘܗ̇ܘ ܕܠܐ ܡܫܪܐ ܠܡܗܘܐ. ܒܗ̇ܝ ܕܬܪ̈ܝܗܘܢ ܠܐ ܐܝܬܝܗܘܢ. ܘܩܕܝܫܐ ܕܝܘܢܢܘܣܝܘܣ ܠܗ̇ܝ ܕܠܐ ܡܕܡ ܦܚܡ ܠܟܝܢܐ ܐܠܗܝܐ ܡܫܘܕܥ ܒܦܬܓܡܗ ܗ̇ܘ. ܘܠܘ ܕܐܠܗܐ ܠܐ ܐܝܬܘܗܝ. ܘܝܕܝܥܐ ܗܕܐ ܡܢ ܫܪܟܐ ܕܡܠܦܢ̈ܘܬܗ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܐܦܢ ܦܪܝܫܝܢ ܬܪ̈ܝܗܘܢ ܣܘ̈ܟܠܐ ܕܫܡܫܐ ܘܕܐܝܬܘܗܝ ܡ̣ܢ ܚܕ̈ܕܐ. ܐܠܐ ܠܐ ܣܩܘܒ̈ܠܝܝܢ ܠܚܕ̈ܕܐ. ܐܝܟܢܐ ܕܠܐ ܢܬܡܨܘܢ ܠܡܬܩܛܪܓܘ ܥܠ ܚܕܕ̈ܐ. ܘܫܡܫܐ ܡܢ ܟܕ ܟܝܢܐ ܡܕܡ ܕܝܠܢܝܐ ܐܝܬܘܗܝ. ܕܒܝܬܗ ܡܬܝܕܥ. ܒܗ̇ܝ ܕܒܡܥܒܕܢܘܬܐ ܫܟܝܚ܆ ܗܝ ܕܐܝܬܘܗܝ ܥܠܘܗܝ ܡܬܩܛܪܓܐ. ܘܐܠܘ ܒܡܥܒܕܢܘܬܐ ܠܐ ܫܟܝܚ ܗܘܐ. ܟܐܢܐܝܬ ܗ̇ܝ ܕܠܐ ܐܝܬܘܗܝ ܥܠܘܗܝ ܡܬܩܛܪܓܐ ܗܘܬ݀.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܦܪܘܛܐܣܝ̣ܣ ܗ̇ܝ ܕܐܡܪܐ ܕܟܠ ܒܪܢܫܐ ܡ̣ܢ ܐܒܐ ܘܐܡܐ ܝܠܝܕ. ܘܒܕܘܪܓܐ ܡܛܐ ܠܣܝܒܘܬܐ. ܠܘ ܐܠܨܝܬܐ ܗ̱ܝ. ܐܝܟ ܦܪܘܛܐܣܝܣ ܗ̇ܝ ܕܐܡܪܐ ܕܬܪܝܢ ܦܠܓܐ ܗ̱ܘ ܕܐܪܒܥܐ. ܘܕܒܪܢܫܐ ܚܝܘܬܐ ܗ̱ܘ ܐܠܐ ܡܬܡܨܝܢܝ̣ܬܐ. ܘܕܠܡܬܡܨ̈ܝܢܐ ܐܝܟ ܡܬܡܨ̈ܝܢܐ ܢܕܪܟ ܗܘܢܐ܆ ܘܠܐ ܚܕ ܥܕܠܝܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܠܘ ܒܠܚܘܕ ܠܘܬܢ ܕܝܠܢ ܟܪ̈ܣܛܝܢܐ. ܐܠܐ ܠܘܬ ܦܝ̣ܠܠܘܣܘ̈ܦܐ ܒܪ̈ܝܐ ܫܪܝܪܐ ܗ̱ܝ ܕܒܝܕ ܡܬܢܗܪܢܘܬܐ ܕܡ̣ܢ ܠܥܠ ܡܬܗܕܐ ܗܘܢܐ ܠܘܬ ܡܕܪܟܢܘܬܗ ܕܫܪܪܐ. ܒܕܓܘܢ ܟܠ ܟܡܐ ܕܥ̈ܠܬܐ ܘܐܬܘ̈ܬܐ ܕܡܬܢܗܪܢܘܬܐ ܗܕܐ ܢܣܓ̈ܝܢ. ܗܟܢܐ ܟܠܗ ܙܕܩ ܠܡܬܬܟܠܘ ܥܠ ܡܕܪܟܢܘܬܗ ܕܗܘܢܐ. ܘܕܥ̈ܠܬܐ ܗܠܝܢ ܕܐܝܬܝܗܝܢ. ܕܘܟܝܐ ܕܗܘܢܐ ܕܒܝܕ ܢܙܝܪܘܬܐ. ܘܬܟܝ̣ܒܘܬ ܨܠܘ̈ܬܐ. ܘܒܨܝܪܘܬ ܚܘܠܛܢ̈ܐ ܦܓܪ̈ܢܝܐ. ܘܐܬܘ̈ܬܗ̇. ܕܐܝܬܝܗܝܢ ܬܡܝ̈ܗܬܐ ܕܒܐܝ̈ܕܝ ܪܘܪ̈ܒܢܝܗ̇ ܕܬܘܕܝܬܐ ܡܣܬܥܪ̈ܢ. ܒܗܕܐ ܬܘܕܝܬܢ ܡܫܝ̣ܚܝܬܐ ܝܬܝܪ ܣܓܝ̈ܐܢ ܓܠܝܐ. ܟܠܗܝܢ ܡܕܝܢ ܗܠܝܢ ܕܠܡܠܦܢ̈ܐ ܩܕܝ̈ܫܐ ܥܠ ܗܘܝ̈ܐ ܬܐܘܪ̈ܝܣܐ ܥܒܝ̈ܕܢ܆ ܗ̣ܢܝܢ ܫܪܝܪ̈ܢ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܬܘܕܝܬܐ ܫܪܝܪܬܐ ܠܘ ܠܓܡܪ̈ܝ ܗܘܢܐ ܒܠܚܘܕ ܡܟܢܐ ܕܬܗܘܐ. ܐܝܟܢܐ ܕܒܘܪ̈ܐ ܘܦܫܝ̣̈ܛܐ ܠܐ ܬܗܘܐ ܠܗܘܢ ܬܘܕܝܬܐ ܕܫܪܝܪܐ܇ ܠܐ. ܘܬܘܕܝܬܐ ܫܪܝܪܬܐ ܗ̇ܝ ܗ̣ܝ ܕܢܕܥ ܕܟܝܢܐ ܐܠܗܝܐ ܚܕ ܗ̣ܘ ܕܚܝ ܘܡܠܝܠ. ܘܕܚܝܘ̈ܗܝ ܘܡܠܬܗ. ܩܢܘ̈ܡܐ ܐܢܘܢ ܡܩܝ̈ܡܐ ܘܡܬܘ̈ܡܝܐ. ܘܓܠܝܐ ܕܗ̣ܘ ܗܢܐ ܪܥܝܢܐ ܠܘ ܠܐ ܡܣܝܟܐ ܗ̱ܘ܇ ܐܝܟܢܐ ܕܠܐ ܡܬܡܨܝܢܝ̣ܬܐ ܬܗܘܐ ܡܬܩܢܝܢܘܬ ܬܘܕܝܬܐ ܡܪܢܝܬܐ ܐܝܟ ܕܐܡܪܬܘܢ.

 

 

 

ܫܪܝܐ ܫܬܝܬܝܐ

 

ܐܡܪܝܢ ܕܥܝܕܐ ܠܗܘ̈ܢܐ ܠܐ ܪ̈ܕܝܐ ܘܠܐ ܡܕܪ̈ܫܐ ܘܗܕܝܘ̈ܛܐ ܘܦܫܝ̈ܛܐ ܒܠܚܘܕ ܡܨܐ ܠܡܟܠܐܴ ܡ̣ܢ ܡܕܪܟܢܘܬܗ ܕܫܪܪܐ. ܘܠܘ ܠܗܠܝܢ ܕܡܪܡܝܢ ܘܡܥܠܝܢ ܒܝܕܥܬܐ.

 

 

 

ܢܝܫܐ ܬܠܝܬܝܐ ܡܛܠ ܦܘܢܝ̈ܐ ܕܣܗܕܘ̈ܬܗܘܢ ܕܣܢܐܝ̈ܗ̇ ܕܚܟܡܬܐ ܐܟܚܕܐ ܟܢܝܫܐܝܬ

 

ܐܡܪܝܢܢ ܕܒܪܬ݀ ܩܠܐ ܕܚܟܡܬܐ ܫܘܝܘܬ ܫܡܗܐܝܬ. ܥܠ ܝܕܥܬܐ ܗ̇ܝ ܫܪܝܪܬܐ ܘܡܪܢܝܬܐ ܢܦܠܐ: ܘܥܠ ܗ̇ܝ ܐܫܝ̣ܠܬܐ ܘܕܓܠܬܐ. ܐܝܟ ܚܟܡܬܐ ܗ̇ܝ ܕܐܣܬܠܝܬ݀ ܡ̣ܢ ܢܒܝ̈ܐ ܘܫܠܝ̣̈ܚܐ ܘܐܒܗ̈ܬܐ. ܗ̇ܝ ܐܫܝ̣ܠܬܐ ܗ̱ܝ ܘܠܘ ܗ̇ܝ ܫܪܝܪܬܐ. ܘܕܚܢܢ ܡܢ ܠܗܕܐ ܡܪܢܝܬܐ. ܟܡܐ ܕܡܨܝܐ ܒܝܕ ܚܘܫܒܐ ܘܟܬܒܐ ܥܬܝ̣ܕܝܢܢ ܠܡܒܚܢܘ ܘܠܗܝ ܕܣܩܘܒܠܝܐ ܠܡܣܬܪ ܡܢܗ̇ ܕܗܕܐ ܦܪܐܓܡܛܝܐ ܐܝܬ ܠܡܫܬܘܕܥܘ.

 

 

 

 

 

 

#1 

 

ܫܬܐܣܬܐ ܬܪܝܢܝܬܐ܆ ܡܛܠ ܟܝܢܝܘܬܐ ܕܗܢܐ ܟܠ. ܘܒܗ ܐܝܬ ܥܘܬܕܐ ܘܩܦ̈ܠܐ ܬܠܬܐ. ܩܕܡܝܬ ܥܘܬܕܐ

 

ܬܪ̈ܥܝܬܐ ܡ̇ܢ ܣܓܝ̈ܐܬܐ ܘܡܫܚ̈ܠܦܬܐ ܗܘܝ̈ ܠܩܕ̈ܡܝܐ ܥܠ ܟܝܢܝܘܬܐ ܕܗܢܐ ܟܠ. ܒܗ̇ܝ ܕܡܢܗܘܢ ܡܢ ܚܕ ܪܝܫܐ ܡܬܬܙܝܥܢܐ ܣܡ ܠܡܝ̈ܐ. ܐܟܙܢܐ ܕܬܐܠܝ̣ܣ ܡܝ̣ܠܝ̣ܛܝ̣ܢܝܐ ܗ̇ܘ ܕܗ̣ܘ ܒܟܝܪܐܝܬ ܐܫܟܚ ܦܝ̣ܠܠܘܣܘܦܘܬܐ. ܒܕܚܙܐ ܕܡ̣ܢ ܪܛܝ̣ܒܘܬܐ ܙܪܥܢܝܬܐ ܡܬܝܠܕܐ ܟܠ ܚܝܘܬܐ. ܘܡܢܗ̇ ܡܬܬܪ̈ܣܝܢ܇ ܘܒܗ̇ ܪ̈ܒܝܢ ܢܨ̈ܒܬܐ. ܘܒܠܗ̈ܓܐ ܚܡܝ̣̈ܡܐ. ܢܘܪܐ ܘܫܡܫܐ ܘܟܘܟ̈ܒܐ ܡܬܪܒܝܐ. ܐܦ ܓܝܪ ܐܘܡܝ̣ܪܘܣ ܦܘܐܝ̣ܛܐ ܕܐܝܟ ܗܠܝܢ ܫܒܚ. ܟܕ ܠܐܘܩܝ̣ܢܘܢ ܘܛܝ̣ܡܬܘܐܣ ܠܝܡܐ ܘܪܛܝ̣ܒܘܬܐ ܐܒܗ̈ܐ ܕܗܘܝ̈ܐ ܩܪܐ. ܐ̱ܚܪ̈ܢܐ ܕܝܢ ܠܐܐܪ ܣܡܘ. ܐܟܙܢܐ ܕܐܢܐܟܣܝܡܢܝ̣ܣ ܘܕܝܘܓܢܝܣ. ܐܡܪܘ ܓܝܪ ܕܢܦܫܐ ܕܟܠ ܕܚܝ ܒܐܐܪ ܡܬܢܛܪܐ. ܘܪܘܚܐ ܘܐܐܪ ܢܛܪܝܢ ܠܥܠܡܐ ܗܢܐ. ܐ̱ܚܪܢܐ ܕܝܢ ܠܢܘܪܐ ܣܡ ܘܐܝܟ ܙܢܐ ܕܝܘܦܘܦܐܣܘܣ ܘܐܪܩܠܝ̣ܛܝ̣ܣ ܘܬܐܘܦܪܝܣܛܝܘܣ܇ ܐܡܪܘ ܓܝܪ ܕܚܡܝ̣ܡܘܬܐ ܗ̣ܝ ܡܘܠܕܐ ܟܠ ܡܕܡ ܘܡܫܘܫܛܐ. ܘܟܕ ܗܕܐ ܕܥܟܐ. ܐܦ ܥܠܡܐ ܒܛܠ. ܡܢܗܘܢ ܕܝܢ ܚܕ ܪܝܫܐ ܠܐ ܡܬܬܙܝܥܢܐ ܣܡܘ ܐܝܟ ܙܢܐ ܕܣܘܢܘܦܐܢܝ̣ܣ. ܗܢܐ ܓܝܪ ܡܒܛܠ ܠܟܠ ܗܘܝܐ ܘܚܘܒܠܐ ܘܚܕ ܐܡܪ ܕܐܝܬܘܗܝ ܟܠ ܡܕܡ. ܘܕܠܒܪ ܡ̣ܢ ܟܠ ܫܘܓܢܝܐ. ܦܪܡܢܝܕܝܣ ܕܝܢ ܚܕ ܐܡܪ ܪܝܫܐ ܠܐ ܡܬܬܙܝܥܢܐ. ܐܠܐ ܚܕ ܒܡܠܬܐ ܒܠܚܘܕ. ܘܡܛܠ ܗܕܐ ܡܣܝܟܐ ܐܡܪܗ. ܡܝܠܝ̣ܣܘܣ ܕܝܢ ܒܡܢܝܢܐ ܘܒܗܘܠܐ ܣܡܗ ܚܕ ܘܠܐ ܡܣܝܟܐ ܐܡܪܗ. ܘܡܢܗܘܢ ܬܘܒ ܪ̈ܝܫܐ ܣܓܝ̈ܐܐ ܐܡܪܘ. ܘܡ̣ܢ ܗܠܝܢ ܡ̇ܢ ܐܝܬ ܗ̣ܘ ܕܠܐ ܡܣܝ̈ܟܐ ܕܡ̈ܝܝ ܡܢܘ̈ܬܐ ܐܡ̣ܪܘ. ܐܟܙܢܐ ܕܐܟܐܟܣܓܘܪܘܣ. ܐܡܪ ܓܝܪ ܕܗ̣ܢܝܢ ܗܠܝܢ ܡܢܘ̈ܬܐ܆ ܟܕ ܡܬܢܩ̈ܦܢ ܠܚ̈ܕܕܐ. ܘܡ̣ܢ ܚܕ̈ܕܐ ܡܬܦܪܫܝܢ܆ ܗܘܝܐ ܘܚܘܒܠܐ ܡܫܡ̈ܠܝܢ. ܘܥܠܬܐ ܥܒܘܕܬܐ ܕܗܘܝܐ܆ ܠܗܘܢܐ ܣܡ ܕܐܝܬܘܗܝ ܐܦ ܓܝܪ ܘܠܘܩܝܦܘܣ ܪ̈ܝܫܐ ܡܣܝ̈ܟܐ ܐܡ̣ܪ. ܐܠܐ ܕܩܢܝܢ ܫܘܓܢܝܐ ܘܗܘܝܐ ܐܡܝ̣ܢܐ. ܘܠܝܬ ܡܕܡ ܕܝܬܝܪܐܝܬ ܐܝܬܘܗܝ ܐܘ ܠܐ ܐܝܬܘܗܝ ܐܝܬܘܗܝ. ܘܕܝܡܘܩܪܛܝܣ ܬܘܒ ܪܝܫܐ ܠܐ ܡܣܝ̈ܟܐ ܐܡ̣ܪ ܐܣܦܝܪ̈ܢܝܝ ܐܣܟܡܐ ܕܒܗܘܢܐ ܒܠܚܘܕ ܘܠܘ ܒܣܘܥܪܢܐ ܡܬܦܣܩܝܢ. ܘܐܦܝܩܘܪܘܣ ܬܘܒ ܠܐ ܡܣܝ̈ܟܐ ܘܠܐ ܡܬܦܣ̈ܩܢܐ ܕܡܬܬܙܝܥܝܢ ܒܣܦܝ̣ܩܘܬܐ ܠܐ ܡܣܝܟܬܐ ܘܐܝܬ ܠܗܘܢ ܪܒܘܬܐ ܘܐܣܟܡܐ ܘܝܘܩܪܐ ܐܡ̣ܪ ܠܪ̈ܝܫܐ. ܐ̱ܚܪ̈ܢܐ ܕܝܢ ܡܣܝ̈ܟܐ ܣܡܘ ܠܪ̈ܝܫܐ. ܐܟܙܢܐ ܕܐܡܦܝܕܘܩܠܝܣ. ܗܢܐ ܓܝܪ ܠܐܪܒܥܐ ܐܣܛܘ̈ܟܣܐ ܣܐܡ ܪ̈ܝܫܐ. ܘܠܚܘܠܛܢܐ ܕܐܝܬܘܗܝ ܗܘܝܐ܆ ܪܚܡܘܬܐ ܩܪܐ. ܘܠܦܘܪܫܢܐ ܕܐܝܬܘܗܝ ܚܘܒܠܐ ܙܟܘܬܐ ܐܪܝ̣ܣܛܘܛܠܝܣ ܕܝܢ ܬܠܬܐ ܣܐܡ ܪ̈ܝܫܐ. ܗܘܠܐ ܘܐܕܫܐ ܘܓܠܝ̣ܙܘܬܐ. ܘܠܓܠܝ̣ܙܘܬܐ ܡ̣ܢ ܪܝܫܐ ܣܡ. ܒܗܝ ܕܚܘܒܠ ܟܠ ܐܕܫܐ܇ ܥܠܬܐ ܗ̱ܘ ܕܗܘܝ ܐܕܫܐ ܐ̱ܚܪܢܐ. ܐܣܛܘܐܝ̈ܩܘ ܕܝܢ ܐܠܗܐ ܘܗܘܠܐܷ ܐܡ̣ܪܘ ܪ̈ܝܫܐ. ܗܘ ܡ̇ܢ ܐܝܟ ܥܒܘܕܐ. ܗ̇ܝ ܕܝܢ ܐܝܟ ܚܫܘܫܬܐ ܐܘ ܡܩܒܠܢܝ̣ܬܐ ܕܐܒܐ ܠܡܐܡܪ ܘܐܡܐ. ܘܐ̱ܢܫܝ̈ܢ ܡܢ ܐܣܛܘܐܝ̈ܩܘ ܚܡܫܐ ܐܡ̣ܪܘ ܪ̈ܝܫܐ. ܐܠܗܐ ܘܢܦܫܐ ܘܗܘܠܐܷ ܘܙܒܢܐ ܘܣܦܝ̣ܩܘܬܐ. ܦܝܬܐܓܘܪ ܕܝܢ ܪܡܝܣܐܪܟܘܣ ܕܡ̣ܢ ܣܐܡܝܐ. ܗ̇ܘ ܕܗ̣ܘ ܩܕܡܝܐ ܦܝܠܠܘܣܘܦܐ ܠܦܝܠܠܘܣܘܦܝܐ ܫܡܗ. ܠܡܢ̈ܝܢܐ ܣܡ ܪ̈ܝܫܐ ܕܗܢܐ ܟܠ. ܒܗܝ ܕܐܡ̣ܪ ܕܡܪ̈ܟܒܐ ܡ̣ܢ ܫܝ̣̈ܛܐ ܡܩܝܡܝܢ. ܘܠܝܬ ܕܦܫܝ̣ܛ ܡ̣ܢ ܡܢܝ̈ܢܐ. ܒܥܠܬ݀ ܗ̇ܝ ܕܥܪ̈ܛܠܝܝܢ ܡ̣ܢ ܟܝ̈ܢܐ. ܘܟܠ ܟܝܢܐ ܟܕ ܐܠܨܐܝܬ ܡܢܝܢܐ ܠܗ ܢܩܦ. ܡܪܟܒܐ ܗ̱ܘ ܘܠܘ ܦܫܝ̣ܛܐ. ܘܐܡ̣ܪ ܬܘܒ ܕܡܢܝܢܐ ܩܕܡܝܐ ܗܘܝܘ ܥܒܘܕܐ. ܘܗ̇ܘ ܕܬܪܝܢ ܗܘܠܐ ܡܩܒܠܢܝ̣ܬܐ. ܘܡܢܝܢܐ ܡܫܡܠܝܐ ܥܣܪܐ ܗ̱ܘ. ܒܕܠܐ ܡܨܝܐ ܠܡܘܣܦܘ ܥܠܘܗܝ. ܐܠܐ ܟܒܪ ܡܢܗ. ܘܡܢܝܢܐ ܕܐܪܒܥܐ ܫܬܐܣܬܗ ܗ̣ܘ. ܒܗ̇ܝ ܕܒܗ̇ ܡܫܬܡܠܐ. ܟܐܡܬ݀ ܒܚܕ ܘܒܬܪܝܢ ܘܒܬܠܬܐ ܘܒܐܪܒܥܐ. ܐܛܝܩܘܣ ܒܡܐܡܪܐ ܩܕܡܝܐ ܕܟܬܒܐ ܕܦܝܠܝܟܘܣ ܐܡ̇ܪ ܕܐܪܒܥܐ ܐܕܫ̈ܐ ܡܬܪܥܐ ܦܠܐܛܘܢ. ܗܘܢܐ ܕܐܝܬܘܗܝ ܥܒܘܕܐ ܐܘܟܝܬ ܐܠܗܐ ܫܘܒܚܐ ܠܛܝܒܘܬܗ. ܘܕܘܟܬܐ ܐܘܟܝ̣ܬ ܗܘܠܐ. ܗ̇ܝ ܕܐܦ ܐܡܐ ܡܩܒܠܢܝ̣ܬܐ. ܘܐܩܡܐܓܘܢܘܢ ܩܪܐ ܠܗ. ܘܪܘܫܡܐ ܐܘܟܝܬ ܐܕܫܐ ܗ̇ܘ ܕܐܦ ܚܘܪܐ ܩܪܐ ܠܗ ܘܐܡ̇ܪ. ܕܒܕܡܘܬܗ ܐܬܬܩܢܘ ܟܝ̈ܢܐ. ܘܙܘܥܐ ܐܘܟܝܬ ܢܦܫܐ ܕܗܝܕܝܟ ܕܠܐ ܡܕܥܐ ܐܝܬܝܗ̇ ܗܘܬ݀ ܒܗܘܠܐ. ܐܝܟ ܪܝܫܐ ܩܕܡܝܐ. ܘܒܠܝ̣ܠܐ ܘܠܐ ܡܛܟܣܐܝܬ ܡܬܬܙܝܥܐ ܗܘܬ݀. ܘܒܟܬܒܐ ܡ̇ܢ ܕܛܝܡܐܘܣ ܗ̣ܘ ܦܠܐܛܘܢ ܐܡ̇ܪ. ܕܗܠܝܢ ܬܠܬܐ ܐܝܬܝܗܘܢ. ܐܝܬܘܗܝ. ܘܕܘܟܬܐ ܘܗܘܝܐ. ܬܠܬܐ ܬܠܝܬܐܝܬ ܘܩܕܡ ܕܢܗܘܘܢ ܫܡܝܐ. ܘܐܝܬܘܗܝ ܡܢ ܩܪܐ ܠܐܠܗܐ. ܘܐܕܫܐ ܘܕܘܟܬܐ ܠܗܘܠܐ. ܘܗܘܝܐ ܠܙܘܥܐ ܐܘܟܝܬ ܢܦܫܐ. ܘܒܕܘܟ ܬܘܒ ܬܪܝܢ ܐܡ̇ܪ ܪ̈ܝܫܐ. ܟܕ ܠܐܠܗܐ ܘܠܐܕܫܐ ܠܚܕ ܡܟܢܫ. ܘܠܗܘܠܐ ܘܠܙܘܥܐ ܠܚܕ. ܠܣܝܒܪܝܘܣ ܕܝܢ ܗ̇ܘ ܕܠܗ ܢܩܦ ܦܠܘܛܝܢܘܣ ܘܠܒܘܬܘܣ ܗ̇ܘ ܕܠܗ ܢܩܦ ܠܘܢܓܝܘܣ ܡܠܦܢܗ ܕܦܪܦܘܪܝܘܣ ܣܓܝ̈ܐܬܐ ܐܡܝܪ̈ܢ ܠܗ ܥܠ ܪ̈ܥܝܢܘܗܝ ܕܦܠܐܛܘܢ. ܘܕܠܐ ܬܐܪܟܝ ܡܠܬܐ ܫܒܩܢ ܐܢܝܢ. ܘܡܢ ܐ̱ܚܪ̈ܝܐ ܡܢ ܒܪܕܝܨܢ ܚܡܫܐ ܣܐܡ ܪ̈ܝܫܐ ܐܘܟܝܬ ܐܝܬܝ̈ܐ ܢܘܪܐ ܘܪܘܚܐ ܘܡܝ̈ܐ ܘܢܘܗܪܐ ܘܚܫܘܟܐ. ܡܐܢܝ ܕܝܢ ܬܪܝܢ ܒܠܚܘܕ ܛܒܐ ܘܒܝ̣ܫܐ. ܘܡܛܠ ܕܟܠܗܘܢ ܗܠܝܢ ܒܪ̈ܝܐ ܡܬܘܡܝܐ ܘܠܐ ܗܘܝܐ ܡܘܕܝܢ ܠܗ ܠܥܠܡܐ ܗܢܐ. ܒܕܠܩܘܒܠܐ ܕܥܕܬܐ ܩܕܝܫܬܐ ܗ̇ܝ ܕܠܘ ܡܬܘܡܝܐ. ܐܠܐ ܗܘܝܐ ܐܘܟܝܬ ܡܫܪܝܢܐ ܘܙܒܢܝܐ ܡܘܕܝܐ ܠܗ. ܟܕ ܠܗܘܝܘܬܗ ܡܫܪܪܝܢܢ. ܘܠܡܬܘܡܝܘܬܗ ܫܪܝܢܢ. ܐܝܟ ܗ̇ܝ ܕܠܟܠܗܝܢ ܬܪ̈ܥܝܬܗܘܢ ܫܟܝ̣ܪ̈ܬܐ ܟܢܝ̣ܫܐܝܬ ܣܬܪܝ̣ܢܢ. ܒܗܝ ܕܡܠܬܐ ܕܝܠܢܝܬܐ ܕܠܘܩܒܠ ܟܠܚܕܐ ܚܕܐ ܡ̣ܢ ܗܠܝܢ ܐܪ̈ܣܝ̣ܣ ܟܠ ܟܡܝܘܬܐ ܕܝܬܝܪ ܪܒܐ ܡ̣ܢ ܕܗܕܐ ܡܟܬܒܢܘܬܐ ܣܢܝ̣ܩܐ.

 

 

 

ܩܦܠܐܘܢ ܩܕܡܝܐ ܕܫܬܐܣܬܐ ܒ̄ ܡܛܠ ܗܘܝܘܬܗ ܕܥܠܡܐ ܗܢܐ ܘܒܗ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܕܗܘܝܐ ܗ̱ܘ ܘܠܘ ܡܬܘܡܝܐ ܥܠܡܐ ܗܢܐ ܘܒܗ ܐܝܬ ܢܝܫܐ ܚܕ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܡܢܘ̈ܬܗ ܕܥܠܡܐ ܗܢܐ ܓܘܫܡܢܝܐ. ܓܘܫ̈ܡܐ ܙܕܩ ܕܢܗܘܘܢ. ܒܕܓܘܢ ܗ̣ܢܘܢ ܗܠܝܢ ܓܘܫ̈ܡܐ ܐܢ ܡܬܘܡܝܝ̈ܢ ܗܘܘ. ܐܘ ܫܠܝ̈ܐ ܗܘܘ ܒܡܬܘܡܝܘܬܗܘܢ܆ ܐܠܐ ܡܬܬܙܝ̈ܥܢܐ. ܘܗܘ ܩܕܡܝܐ ܠܐ ܫܪܝܪ. ܒܗܝ ܕܙܢܝ̈ܐ ܡܬܘ̈ܡܝܐ܆ ܐܢܢܩܝ̈ܐ ܐܢܘܢ. ܘܐܢܢܩܝ̈ܐ ܠܐ ܡܫܬܚ̈ܠܦܢܐ ܐܢܘܢ. ܘܐܠܘ ܫܠܝܗܘܢ ܕܓܘܫ̈ܡܐ ܡܬܘܡܝܐ ܗܘܐ. ܡܢ ܠܐ ܡܫܟܚܢ̈ܝܬܐ ܙܕܩ ܗܘܐ ܕܬܗܘܐ ܡܬܬܙܝܥܢܘܬܗܘܢ. ܘܟܕ ܐܬܬܙܝܥܘ. ܠܐ ܡܬܘܡܝ ܗܘܐ ܫܠܝܗܘܢ. ܘܗܘ ܕܬܪܝܢ ܬܘܒ ܠܐ ܫܪܝܪ . ܒܗ̇ܝ ܕܟܠ ܙܘܥܐ ܫܘܪܝܐ ܩܢܐ ܘܫܘܠܡܐ. ܘܗܘ ܕܗܟܢܐ ܗܘܐ. ܐܝܟܢܐ ܡܬܘܡܝܐ ܢܗܘܐ. ܘܟܕ ܠܐ ܫܠܝ̈ܐ ܐܦܠܐ ܡܬܬܙܝ̈ܥܢܐ ܐܝܬܝܗܘܢ ܗܘܘ. ܐܦܠܐ ܣܟ ܐܝܬܝܗܘܢ ܗܘܘ ܒܡܬܘܡܝܘܬܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܗܠܝܢ ܓܘ̈ܫܡܐ ܡܢܘ̈ܬܗ ܕܥܠܡܐ ܗܢܐ ܓܘܫܡܢܝܐ. ܐܠܘ ܡܬܘܡܝܝ̈ܢ ܗܘܘ ܟܠ ܚܕ ܡܢܗܘܢ ܒܐܬܪܐ ܡܕܡ ܕܝܠܢܝܐ ܙܕܩ ܗܘܐ ܕܢܗܘܐ. ܘܡܛܠ ܗܕܐ ܠܐ ܙܕܩ ܗܘܐ ܕܢܦܘܩ ܡ̣ܢ ܐܬܪܗ. ܒܗ̇ܝ ܕܡܬܘܡܝܘܬܐ ܐܠܐ ܡܩܒܠܢܝ̣ܬܐ ܗ̱ܝ ܕܫܘܚܠܦܐ. ܘܟܕ ܢܦܩ ܒܝܕ ܙܘܥܐ ܪܘܟܒܝܐ. ܠܘ ܡܬܘܡܝܐ ܗ̱ܘ. ܘܗܟܢܐ ܟܠܗܘܢ. ܘܗܟܢܐ ܥܠܡܐ ܗܢܐ ܕܡܢܗܘܐ ܗܘܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܐܠܘ ܣܟ ܓܘܫܡܐ ܕܐܝܬܘܗܝ ܗܘܐ ܡܬܘܡܝܐ. ܘܗ̣ܝ ܡܬܘܡܝܘܬܗ ܐܘ ܓܘܫܡܢܝܘܬܗ ܐܝܬܝܗ̇ ܗܘܬ. ܐܘ ܡܕܡ ܐ̱ܚܪܝܢ ܘܗ̇ܘ ܩܕܡܝܐ ܠܐ ܫܪܝܪ. ܘܐܠܐ ܟܠ ܕܝܕܥ ܗܘܐ ܠܓܘܫܡܐ. ܐܦ ܠܡܬܘܡܝܐ ܝܕܥ ܗܘܐ. ܘܗܐ ܠܘ ܗܟܢܐ. ܘܗܘ ܕܬܪܝܢ ܬܘܒ ܠܐ ܫܪܝܪ. ܒܗܝ ܕܗܘ ܡܕܡ ܐܢ ܡܬܘܡܝܐ ܗ̱ܘ: ܡܫܬܟܚܐ ܠܟܠ ܡܬܘܡܝܘܬܐ ܡܬܘܡܝܘܬܐ ܐ̱ܚܪܬܐ ܠܠܐ ܣܘܦ. ܗ̇ܝ ܕܫܟܝ̣ܪܐ. ܘܐܢ ܠܘ ܡܬܘܡܝܐ ܗ̱ܘ. ܡܫܬܟܚܐ ܡܬܘܡܝܘܬܐ ܕܠܘ ܡܬܘܡܝܘܬܐ ܗ̱ܝ ܗ̇ܝ ܕܝܬܝܪ ܫܟܝ̣ܪܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡ̄ ܕܫܬܐܣܬܐ ܬܪܝܢܝܬܐ ܡܛܠ ܬܪܥܝܬܐ ܫܟܝܪܬܐ ܕܒܪ̈ܝܐ ܕܡܬܘܡܝܐ ܐܡܪܝܢ ܠܥܠܡܐ ܗܢܐ ܘܣܬܘܪܝܗ ܘܒܗ ܐܝܬ ܢܝ̈ܫܐ ܬܪܝܢ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܥܠܡܐ ܗܢܐ ܟܕ ܡܬܡܨܝܢܐ ܗ̱ܘ܇ ܥܠ ܥܠܬܐ ܣܢܝܩ ܐܠܨܐܝܬ ܐܝܬܘܬܐ. ܒܡܨܥܝܐ ܐܘ ܕܠܐ ܡܨܥܝܐ. ܘܗ̣ܝ ܗ̇ܝ ܥܠܬܐ. ܐܢ ܣܦܩܐ ܠܡܗܘܝܘ ܐܦ ܥܠܬܢܗ̇ ܐܟܘܬܗ̇ ܡܬܘܡܝܐ ܙܕܩ ܕܢܗܘܐ. ܘܐܢ ܠܐ ܣܦܩܐ ܘܥܠ ܡܣܝܥܢܐ ܣܢܝܩܐ. ܘܗ̣ܘ ܗ̇ܘ ܡܣܝܥܢܐ ܐܢ ܡܬܘܡܝܐ ܗ̱ܘ. ܐܠܨܐ ܕܐܦ ܥܠܬܢܗ ܡܬܘܡܝܐ ܢܗܘܐ. ܘܐܢ ܠܘ ܡܬܘܡܝܐ ܗ̱ܘ ܗܘܝܐ ܗ̱ܘ. ܘܥܠ ܥܠܬܐ ܣܢܝܩ ܒܕܓܘܢ ܗ̣ܝ ܥܠܬܐ ܐܘ ܡܬܘܡܝܬܐ ܗ̱ܝ ܐܘ ܠܐ. ܘܗܟܢܐ ܠܠܐ ܣܘܦ ܡܫܬܠܫܠܐ ܡܠܬܐ ܗ̇ܝ ܕܫܟܝܪܐ.

 

 

 

ܣܥܝܐ ܕܬܪܝܢ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܐܢ ܒܡܬܘܡܝܘܬܗ ܥܠܬܐ ܗ̱ܘ ܘܒܪܘܝܐ. ܐܦ ܥܠܡܐ ܥܠܬܢܗ ܘܒܪܝ̣ܬܗ ܡܬܘܡܝܐ ܙܕܩ ܕܢܗܘܐ. ܘܐܢ ܠܘ ܗܟܢܐ. ܐܠܐ ܟܕ ܠܐ ܐܝܬܘܗܝ ܘܗܘܐ ܥܠܬܐ ܘܒܪܘܝܐ. ܠܚܪܬܐ ܗܘܐ ܥܠܬܐ ܘܒܪܘܝܐ. ܡܫܬܟܚ ܕܫܘܚܠܦܐ ܚܫ ܒܟܝܢܗ ܗ̇ܝ ܕܫܟܝܪܐ܆ ܥܠܡܐ ܡܬܘܡܝܐ ܗ̱ܘ ܡܕܝܢ ܘܠܐ ܗܘܝܐ.

 

 

 

ܣܥܝܐ ܕܬܠܬܐ

 

ܐܡܪܝܢ ܕܟܠ ܡܕܡ ܕܡ̣ܢ ܒܬܪ ܕܠܐ ܐܝܬܘܗܝ ܗܘܐ ܗܘܐ ܐܘ ܗܘܐ ܐܠܘܠܐ ܡܬܡܨܝܢܝ ܗܘܝܐ ܗܘܐ ܠܐ ܣܟ ܗܘܐ. ܘܡܬܡܨܝܢܘܬܐ ܟܕ ܚܝܠܐ ܡܕܡ ܗ̣ܝ. ܥܠ ܗ̇ܘ ܕܣܝܡ ܣܢܝ̣ܩܐ ܕܒܗ ܬܩܘܡ. ܘܗ̣ܘ ܗ̇ܘ ܕܣܝ̣ܡ܆ ܡܬܘܡܝܐ ܙܕܩ ܕܢܗܘܐ. ܘܐܠܐ ܐܝܬܘܗܝ ܗܘܐ ܐܡܬܝ ܕܠܐ ܡܬܡܨܝܢܝ ܗܘܝܐ ܗܘܐ ܗ̇ܝ ܕܫܟܝܪܐ. ܘܗܘܠܐ ܠܗ ܠܗ̇ܘ ܕܣܝ̣ܡ ܩܪܝܐ ܦܝܠܠܘܣܘܦܝܐ. ܘܟܕ ܗܕܐ ܡܬܘܡܝܬܐ ܗ̱ܝ ܐܠܨܐ ܕܐܦ ܐܕܫܐ ܡܬܘܡܝܐ ܢܗܘܐ. ܒܕܡ̣ܢ ܒܠܥܕܘܗܝ ܠܐ ܡܨܝܐ ܕܬܗܘܐ. ܘܟܕ ܬܪ̈ܝܗܘܢ ܡܬܘܡܝܝ̈ܢ ܐܦ ܥܠܡܐ ܗܢܐ ܓܘܫܡܢܝܐ ܕܡܢܗܘܢ ܡܪܟܒ. ܡܬܘܡܝܐ ܙܕܩ ܕܢܗܘܐ. ܘܡ̣ܢ ܗܪܟܐ ܝܕܝ̣ܥܐ ܕܠܘ ܗܘܝܐ ܗ̱ܘ.

 

 

 

ܣܥܝܐ ܕܐܪܒܥܐ

 

ܐܡܪܝܢܢ ܕܟܠ ܗܘܝܐ. ܓܠܝܙܘܬܗ ܡ̣ܢ ܩܕܡ ܫܟܝ̣ܚܘܬܗ ܗ̣ܝ. ܘܗ̣ܝ ܗ̇ܝ ܩܕܡܝܘܬܐ ܠܘ ܐܦ ܗ̇ܝ ܓܠܝ̣ܙܘܬܐ ܗ̱ܝ. ܘܐܠܐ ܐܝܟܢܐ ܓܠܝ̣ܙܘܬܐ ܒܗ̇ ܡܬܬܚܡܐ ܗܘܬ݀. ܗ̣ܝ ܡܕܝܢ ܩܕܡܝܘܬܐ ܗ̱ܝ ܟܕ ܫܟܝܚܘܬܢܝܬܐ ܗ̱ܝ. ܘܐܦ ܗ̣ܝ ܗܘܝܬܐ ܗ̱ܝ. ܡܫܪܝܢܝ̣ܬܐ ܥܠ ܩܕܡܝܘܬܐ ܐ̱ܚܪܬܐ ܣܢܝܩܐ. ܘܗ̇ܝ ܥܠ ܐ̱ܚܪܬܐ. ܘܗܟܢܐ ܠܠܐ ܣܘܦ. ܘܠܗܝܢ ܠܩܕܡܝ̈ܘܬܐ ܘܐ̱ܚܪ̈ܝܘܬܐ ܗܠܝܢ. ܙܒܢܐ ܐܘܟܝܬ ܡܫܘܚܬܐ ܕܙܘܥܗ ܕܓܘܫܡܐ ܚܘܕܪܢܝܐ ܩܪܝܐ ܡܠܬܐ. ܙܒܢܐ ܡܕܝܢ ܘܙܘܥܐ ܕܓܘܫܡܐ. ܟܠܗܘܢ ܐܟܚܕܐ ܡܬܘܡܝܝ̈ܢ.

 

 

 

ܣܥܝܐ ܕܚܡܫܐ

 

ܐܡܪܝܢ ܕܗܘܝܗ ܕܥܠܡܐ ܗܢܐ ܛܒܬܐ ܗ̱ܝ. ܘܐܠܐ ܠܐ ܐܗܘܝܗ ܗܘܐ ܡܬܘܡ ܐܠܗܐ. ܘܐܠܘܠܐ ܒܡܬܘܡܝܘܬܐ ܐܗܘܝܗ ܗ̣ܘ ܐܠܗܐ. ܡܫܬܟܚ ܐܠܗܐ ܕܐܬܟܠܝ ܡܢ ܛܒܬܐ ܡܬܚܐ ܕܛܒ ܡܬܝ̣ܚ܆ ܗ̇ܝ ܕܫܟܝܪܐ.

 

 

 

ܣܥܝܐ ܕܫܬܐ

 

ܐܡܪܝܢ ܕܡܬܘܡܝܘܬܗ ܕܥܠܡܐ ܠܗ̇ܝ ܕܟܝܢܐܝܬ ܡܥܒܕ ܐܠܗܐ ܡܫܪܪܐ. ܘܗܘܝܘܬܗ. ܠܗ̇ܝ ܕܨܒܝܢܐܝܬ܆ ܘܕܠܘ ܨܒܝܢܐܝܬ ܡܥܒܕ ܝܕܝ̣ܥܐ ܡ̣ܢ ܗ̇ܝ ܕܐܠܘ ܨܒܝܢܐܝܬ ܡܥܒܕ ܡܛܠ ܡܕܡ ܡܥܒܕ. ܒܥܠܬ݀ ܠܐ ܡܬܡܨܝܢܘܬ ܢܬܥܐ ܒܠܥܕ ܡܢܬܥܢܐ. ܒܕܓܘܢ ܗ̣ܘ ܗܘ ܡܕܡ ܐܢ ܡܘܬܪ ܠܗ ܠܥܒܘܕܐ܇ ܚܣܝܪܐ ܡܫܬܟܚ ܠܗ ܡ̣ܢ ܩܕܡܘܗܝ. ܘܐܢ ܠܐ ܡܘܬܪ ܠܗ. ܐܝ̣ܩܝ ܡܫܬܟܚ ܠܗ ܣܥܘܪܘܬܗ. ܘܬܪ̈ܬܝܗܝܢ ܫܟܝܪ̈ܢ.

 

 

 

ܗܦܟܬܐ ܘܦܘܢܝܐ

 

ܘܐܡܪܝܢܢ ܕܠܐ ܡܬܐܡܪܐ ܕܠܒܪܝ̣ܬܐ ܘܠܘ ܠܒܪܘܝܐ ܡܘܬܪ ܗ̣ܘ ܗ̇ܘ ܡܕܡ ܕܡܛܠܬܗ ܒܪܝܗܝ ܐܠܗܐ ܠܥܠܡܐ ܘܐܗܘܝܗ. ܒܗܝ ܕܐܡܪܝܢܢ. ܕܗ̣ܝ ܗ̇ܝ ܡܘܬܪܢܘܬܐ ܕܒܪܝܬܐ܆ ܐܘ ܡܘܬܪܢܘܬܐ ܗ̱ܝ ܒܦܚܡܐ ܕܒܪܘܝܐ ܐܘ ܠܐ. ܘܗܟܢܐ ܠܗ̇ ܠܫܟܝ̣ܪܘܬܐ ܩܕܡܝܬܐ ܡܟܢܫܝ̣ܢܢ. ܥܠܡܐ ܡܕܝܢ ܠܘ ܗܘܝܐ ܗ̱ܘ ܘܡܫܪܝܢܐ. ܐܠܐ ܡܬܘܡܝܐ ܕܠܐ ܫܘܪܝ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܐܢܗܘ ܕܡ̣ܢ ܥܠܬܐ ܡܬܘܡܝܬܐ. ܥܠܬܢܐ ܡܬܘܡܝܐ ܘܠܘ ܗܘܝܐ ܘܡܫܪܝܢܐ ܒܠܚܘܕ ܡܨܐ ܗܘܐ ܠܡܗܘܐ. ܙܕܩ ܗܘܐ ܕܘܠܐ ܚܕ ܗܘܝܐ ܘܚܘܒܠܐ. ܐܘ ܫܘܚܠܦܐ ܒܥܠܡܢ ܗܢܐ ܗܘܐ ܗܘܐ. ܒܗ̇ܝ ܕܟܠܗܘܢ ܠܘܬ ܚܕܐ ܥܠܬܐ ܡܬܘܡܝܬܐ ܡܬܝܒܠܝܢ ܒܥܠܬܢܝܘܬܗ. ܥܠܡܐ ܡܕܝܢ ܟܕ ܗܘܝܐ ܗ̱ܘ ܘܡܫܪܝܢܐ ܡ̣ܢ ܥܠܬܐ ܠܐ ܗܘܝܬܐ ܘܡܬܘܡܝܬܐ ܗܘܬ݀ ܡ̣ܢ ܐܠܗܐ.

 

 

 

ܗܦܟܬܐ

 

ܐܡܪܝܢ ܕܣܘܥܪ̈ܢܐ ܗܘܝ̈ܐ ܘܡܫܪ̈ܝܢܐ. ܠܘ ܥܠܬܢ̈ܐ ܐܢܘܢ ܕܐܠܗܐ ܠܐ ܗܘܝܐ ܘܠܐ ܡܫܪܝܢܐ. ܐܠܐ ܕܙܘ̈ܥܐ ܡܘܙܠܬܢܝ̈ܐ ܕܗܘܝ̈ܐ ܘܡܫܪ̈ܝܢܐ ܐܢܘܢ.

 

 

 

ܦܘܢܝܐ

 

ܐܡܪܝܢܢ ܕܡܕܝܢ ܗܢܘܢ ܙܘ̈ܥܐ ܡܘܙܠܬܢܝ̈ܐ ܒܗ̇ܝ ܕܗܘܝ̈ܐ ܐܢܘܢ. ܥܠ ܥ̈ܠܬܐ ܗܘܝ̈ܬܐ ܣܢܝܩܝܢ. ܘܐܝܟܢܐ ܠܘܬ ܐܠܨܝ ܐܝܬܘܬܐ ܕܠܐ ܗܘܝܐ ܗ̱ܘ܆ ܡܣܡܟܝܢ ܐܢ̱ܬܘܢ ܠܟܠܗܘܢ ܥܠܬܢ̈ܐ. ܘܟܕ ܡ̣ܢ ܐܠܨ̈ܬܐ ܠܙܘ̈ܥܐ ܗܘܝ̈ܐ ܕܫܡܝ̈ܢܐ. ܥܠܬܐ ܠܐ ܗܘܝܬܐ ܙܕܩ ܕܬܗܘܐ. ܡܛܠ ܡܢܐ ܟܦܪܝܬܘܢ. ܘܐܝܟ ܠܐ ܡܫܟܚܢܐ ܕܝܢܝܬܘܢ. ܕܐܠܗܐ ܠܐ ܗܘܝܐ ܥܠܡܐ ܗܘܝܐ ܢܒܪܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܐܠܗܐ ܒܡܬܘܡܝܘܬܗ܆ ܒܚܝܠܐ ܗܘܐ ܥܠܬܗ ܕܥܠܡܐ ܗܢܐ. ܐܝܛܐ ܟܕ ܒܪܝܗܝ ܒܡܥܒܕܢܘܬܐ ܗܘܐ ܥܠܬܗ. ܘܕܫܘܚܠܦܐ ܕܐܝܟ ܗܢܐ. ܫܘܚܠܦܐ ܗ̱ܘ ܒܐܚܝܢܘܬܐ ܠܘܬ ܡܕܡܝܬܐ. ܘܠܘ ܫܘܚܠܦܐ ܕܒܟܝܢܐ܆ ܓܠܝܐ. ܐܢܗܘ ܓܝܪ ܕܐܪܕܝܟܠܐ ܕܒܪܢܫܐ ܗ̱ܘ ܚܫܘܫܐ. ܐܦܢ ܪܒܘ ܒܐܪ̈ܝܢ ܡܫܟܠܠ. ܫܘܚܠܦܐ ܘܠܐ ܚܕ ܚܐܫ ܒܟܝܢܗ ܐ̱ܢܫܝܐ. ܐܝܟܢܐ ܥܠ ܒܪܘܝܐ ܫܘܚܠܦܐ ܙܕܩ ܠܡܣܒܪܘ ܒܒܪܘܝܘܬܗ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܐܠܘ ܠܟܠ ܡܬܡܨܝܢܐ ܗܘܠܐ ܙܕܩ ܕܬܗܘܐ ܕܒܗ̇ ܬܩܘܡ ܡܬܡܨܝܢܘܬܗ. ܡܕܝܢ ܐܦ ܠܗܘܢܐ ܒܗ̇ܝ ܕܡܬܡܨܝܢܝ̣ܬܐ ܗ̱ܘ ܗܘܠܐ ܐ̱ܚܪܬܐ ܙܕܩ ܕܬܗܘܐ. ܘܠܗ̇ܝ ܐ̱ܚܪܬܐ ܐ̱ܚܪܬܐ. ܘܗܟܢܐ ܠܠܐ ܣܘܦ ܬܫܬܠܫܠ ܡܠܬܐ ܗ̇ܝ ܕܫܟܝܪܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܩܕܡܝܘܬܐ ܗ̇ܝ ܠܘ ܫܟܝܚܘܬܢܝܬܐ ܗ̱ܝ. ܘܐܠܐ ܐܝܟܢܐ ܥܠ ܓܠܝ̣ܙܘܬܐ ܡܬܩܛܪܓܐ ܗܘܬ݀. ܟܕ ܡܬܐܡܪܐ ܓܠܝ̣ܙܘܬܐ ܩܕܡܝܬܐ. ܘܓܠܝ̣ܙܘܬܐ ܐ̱ܚܪܝܬܐ. ܘܟܕ ܠܘ ܫܟܝ̣ܚܘܬܢܝܬܐ ܗ̱ܝ. ܐܝܟܢܐ ܬܬܐܡܪ ܕܗܘܝܬܐ ܗ̱ܝ. ܘܥܠ ܩܕܡܝܘܬܐ ܐ̱ܚܪܬܐ ܣܢܝܩܐ. ܘܗܕܐ ܥܠ ܐ̱ܚܪܬܐ ܠܠܐ ܣܘܦ. ܐܝܟܢܐ ܕܡܬܘܡܝܘܬ ܙܒܢܐ ܘܙܘܥܐ ܘܓܘܫܡܐ ܬܬܬܘܕܐ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܐܦ ܗܘܝܗ ܕܟܠ ܚܕ ܡܢ ܩܢܘ̈ܡܐ ܐ̱ܢܫܝ̈ܐ ܛܒܬܐ ܗ̱ܘ. ܘܐܠܗܐ ܗ̱ܘ ܥܠܬܗ ܕܠܐ ܡܨܥܝܐ ܐܝܟ ܬܪܥܝܬܢ. ܘܒܝܕ ܡܨܥܝܘܬܐ ܕܙܘ̈ܥܐ ܫܡܝ̈ܢܐ ܐܝܟ ܬܪܥܝܬܟܘܢ. ܘܐܝܟܢܐ ܗܘܝ̈ܐ ܘܠܘ ܡܬܘܡܝ̈ܐ ܐܢܘܢ ܟܠܗܘܢ ܩܢܘ̈ܡܐ ܐ̱ܢܫܝ̈ܐ. ܘܗܟܢܐ ܘܗ̇ܢܘܢ ܚܝܘܬܢܝ̈ܐ ܘܢܨܒܬܢܝ̈ܐ.

 

 

 

ܫܪܝܐ ܕܣܥܝܐ ܕܫܬܐ

 

ܐܡܪܝܢܢ ܕܗ̇ܘ ܕܨܒܝܢܐܝܬ ܡܥܒܕ ܠܘ ܠܐ ܡܨܐ ܕܢܢܬܥ ܚܕ ܡ̣ܢ ܬܪ̈ܝܗܘܢ ܓܒ̈ܐ ܥܠ ܗ̇ܘ ܐ̱ܚܪܢܐ ܒܠܥܕ ܥܠܬܐ ܡܢܬܥܢܝܬܐ. ܐܟܙܢܐ ܕܗ̇ܘ ܕܨܒܐ ܠܡܫܬܐ. ܟܕ ܬܪܝܢ ܟܣܝ̣̈ܢ ܕܒܟܠܡܕܡ ܫܘܝܢ ܢܬܩܪܒܘܢ ܠܗ. ܕܠܐ ܬܘܗܝ ܡ̣ܢ ܚܕ ܡܢܗܘܢ ܡܫܪܐ ܠܡܫܬܐ. ܘܐܦܢ ܒܡܕܡ ܠܐ ܡܝܬܪ ܡ̣ܢ ܗ̇ܘ ܐ̱ܚܪܢܐ. ܒܗ̇ ܒܕܡܘܬܐ ܘܐܠܗܐ ܫܘܒܚܐ ܠܛܝܒܘܬܐ. ܟܕ ܠܐ ܗܘܝܗ ܕܥܠܡܐ ܠܗ ܡܘܬܪ ܗܘܐ. ܐܦܠܐ ܠܐ ܗܘܝܗ ܠܗ ܡܚܣܪ ܗܘܐ. ܨܒܐ ܘܐܗܘܝܗ.

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܬܪܝܢܝܬܐ ܡܛܠ ܥܠܡܝ̣ܢܝܘܬܗ ܕܥܠܡܐ ܗܢܐ. ܘܡܫܬܪܝܢܘܬܗ. ܘܒܗ ܐܝܬ ܥܘܬܕܐ ܘܦܣܘ̈ܩܐ ܬܪܝܢ. ܩܕܡܝܬ ܥܘܬܕܐ

 

ܐܡܪܝܢܢ ܕܥܠܡܐ ܗܢܐ ܟܕ ܠܐ ܐܝܬܘܗܝ ܗܘܐ ܘܗܘܐ. ܡ̣ܢ ܐܠܨ̈ܬܐ ܟܝܢܐ ܙܕܩ ܕܢܗܘܐ ܠܗ ܡܩܒܠܢܐ ܕܫܪܝܐ. ܗ̣ܘ ܗܟܘܬ ܘܒܗ̇ܝ ܕܡܬܡܨܝܢܐ ܗ̱ܘ. ܠܘ ܡ̣ܢ ܝܬܗ ܗ̣ܝ ܠܗ ܗ̇ܝ ܕܢܗܘܐ ܐܘ ܗ̇ܝ ܕܠܐ ܢܗܘܐ. ܐܠܐ ܡ̣ܢ ܥܠܬܗ ܕܐܝܬܘܗܝ ܐܠܗܐ ܫܘܒܚܐ ܠܛܝܒܘܬܗ. ܘܕܐܠܗܐ ܫܘܒܚܐ ܠܛܝܒܘܬܗ: ܨܒܝܢܐܝܬ ܘܠܘ ܟܝܢܐܝܬ ܡܥܒܕ ܒܗܠܝܢ ܕܒܬܪܟܢ ܡܬܚܘܝܐ. ܒܕܓܘܢ ܠܘ ܗ̇ܝ ܕܐܢ ܐܠܗܐ ܫܘܒܚܐ ܠܛܝܒܘܬܗ ܕܠܥܠܡ ܢܛܪ ܠܗ ܠܥܠܡܐ ܗܢܐ ܕܠܐ ܚܒܠ ܐܘ ܫܪܐ ܘܡܒܛܠ ܠܗ ܟܠܢܐܝܬ. ܐܘ ܠܐܣܟܡܗ ܒܠܚܘܕ ܡܒܛܠ. ܠܘ ܡ̣ܢ ܚܘܫܒܐ ܗܘܢܢܝܐ ܡܨܝܢܢ ܠܡܬܗܕܝܘ. ܐܠܐ ܡ̣ܢ ܟܬܒ̈ܐ ܩܕܝ̈ܫܐ ܒܠܚܘܕ. ܕܒܪܘܚܐ ܩܕܝܫܐ ܠܥܝܙܝܢ. ܐܝܟ ܕܡܬܚܘܝܐ.

 

 

 

ܦܣܘܩܐ ܩܕܡܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܪܝܢܝܬܐ. ܡܛܠ ܗ̇ܝ ܕܥܠܡܐ ܗܢܐ ܡܬܚܒܠܢܐ ܠܐ ܡܬܚܒܠܢܘܬܐ ܥܬܝܕ ܠܡܠܒܫ ܒܪܡܙܐ ܒܪܝܝܐ. ܘܒܗ ܐܝܬ ܢܝܫܐ ܚܕ. ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܕܘܝܕ. ܐܬܩܢ ܐܪܥܐ ܥܠ ܡܬܩ̈ܢܝܗ̇. ܕܠܐ ܬܙܘܥ ܠܥܠܡ ܥܠܡܝܢ.

 

 

 

ܣܗܕܘܬܐ ܕܬܪܬܝܢ

 

ܦܘܠܘܣ ܒܐܓܪܬܐ ܕܠܘܬ ܪ̈ܘܡܝܐ. ܒܪܝܬܐ ܓܝܪ ܕܐܫܬܥܒܕܬ݀ ܠܣܪܝ̣ܩܘܬܐ ܠܐ ܒܨܒܝܢܗ̇. ܐܠܐ ܡܛܠ ܡ̇ܢ ܕܫܥܒܕܗ̇ ܥܠ ܣܒܪܐ. ܕܐܦ ܗ̣ܝ ܒܪܝ̣ܬܐ ܬܬܚܪܪ ܡ̣ܢ ܥܒܕܘܬܐ ܕܚܒܠܐ. ܒܚܪܘܪ̈ܐ ܕܬܫܒܘܚܬܐ ܕܒܢܝ̈ܐ ܕܐܠܗܐ.

 

 

 

ܣܗܕܘܬܐ ܕܬܠܬ

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܢܣܟܐ ܠܚܘܪܪܗܘܢ ܕܐܣܛܘ̈ܟܣܐ. ܘܠܚܘܕܬܐ ܕܥܠܡܐ ܟܠܗ. ܘܬܘܒ ܥܠ ܡܠܬܐ ܕܢܒܝܐ ܡܠܐܟܝ. ܕܬܘܒ ܡ̇ܢ ܚܕܐ ܙܒܢ ܡܬܬܙܝ̣ܥܝ̣ܢ ܫܡܝ̈ܐ ܘܐܪܥܐ ܠܟܬܒܐ ܫܡܥܬ ܕܐܡ̇ܪ. ܐܟܡܢ ܕܗܕܐ ܚܫܘ ܘܡ̣ܢ ܩܕܝܡ. ܟܕ ܗܟܢܐ ܡܬܝܕܥ ܐܝܟ ܕܣܒܪ ܐ̱ܢܐ. ܚܕܬܘܬ ܦܣܩܐ ܕܢܝܚܐ ܕܣܘܥܪܢܐ. ܘܪܥܠܐ ܐ̱ܚܪܝܐ. ܠܦܘܠܘܣ ܙܕܩ ܕܢܗܝܡܢ ܕܐܡ̇ܪ. ܕܠܘ ܡܕܡ ܐ̱ܚܪܢܐ ܐܝܬܘܗܝ. ܐܠܐ ܐܢ ܡܐܬܝܬܐ ܕܡܫܝܚܐ. ܘܫܘܚܠܦܗ ܕܗܢܐ ܟܠ. ܫܘܢܝܐ ܕܠܘܬ ܗ̇ܝ ܕܠܐ ܡܬܬܙܝܥܐ ܘܠܐ ܡܙܕܥܙܥܐ.

 

 

 

ܘܬܘܒ ܗ̣ܘ ܟܕ ܗ̣ܘ

 

ܒܡܐܡܪܐ ܕܥܠ ܩܣܪܝܘܣ ܐܚܘܗܝ. ܡܢܐ ܗܟܝܠ ܙܥܘܪ ܢܦܫܐ ܗܘܐ ܐ̱ܢܐ ܠܘܬ ܣܒܪ̈ܐ. ܠܡܢܐ ܗܘܐ ܐ̱ܢܐ ܕܡܠܐ ܙܒܢܐ. ܡܟܬܪ ܐ̱ܢܐ ܠܒܪܬ݀ ܩܠܐ ܕܪܝܫ ܡܠܐܟ̈ܐ. ܠܫܝ̣ܦܘܪܐ ܐ̱ܚܪܝܐ ܠܫܘܚܠܦ ܐܣܟܡܐ ܕܫܡܝܐ. ܠܫܘܚܠܦ ܗܘܝܗ̇ ܕܐܪܥܐ. ܠܚܘܪܪܐ ܕܐܣܛܘܟ̈ܣܐ. ܚܘܕܬܐ ܕܥܠܡܐ ܟܠܗ.

 

 

 

ܣܗܕܘܬܐ ܕܐܪܒܥ

 

ܡܬܘܕܝܘܣ ܒܡܠܬܐ ܕܠܘܩܒܠ ܐܘܪܝܓܢܝ̣ܣ. ܒܬܪ ܗ̇ܝ ܕܠܐ ܫܡܝܐ ܘܠܐ ܐܐܪ ܘܠܐ ܐܪܥܐ ܥܒܪܝܢ. ܒܢܘܪܐ ܡ̇ܢ ܕܢܚܬܐ ܡܫܬܠܗܒ ܐܝܟ ܕܠܬܕܟܝ̣ܬܐ ܘܠܚܘܕܬܐ ܟܠܗ ܥܠܡܐ.

 

 

 

ܣܗܕܘܬܐ ܕܚܡܫ

 

ܩܕܝܫܐ ܝܘܚܢܢ ܣܟܘܠܝܣܛܝܩܐ ܕܡ̣ܢ ܒܝܫܢ. ܟܕ ܡܢܗܪ ܠܗ̇ܝ ܕܐܡ̣ܪ ܩܕܝܫܐ ܕܝܘܢܢܘܣܝܘܣ ܐܪܝܘܦܐܓܝܛܝܣ. ܣܝܡܐ ܕܟܠ ܘܡܪܝ̣ܡܢܘܬܐ ܕܟܠ ܐܡ̣ܪ. ܡܪܝ̣ܡܢܘܬܐ ܕܝܢ ܬܘܒ ܕܟܠ ܕܐܝܬܘܗܝ. ܐܟܡܢ ܕܐܦ ܠܗ ܠܣܝܡܐ ܘܥܒܝ̣ܕܘܬܐ ܕܟܠ܆ ܗܦܟ ܡܠܚܡ. ܘܗܦܟ ܡܬܩܢ. ܘܡܪܝܡ ܡܢ ܗ̇ܢܝܢ ܕܐܬܬܣܝ̈ܡܝ ܒܟܝܢܐ. ܘܬܘܒ. ܣܝܡܐ ܕܝܢ ܩܪܝܢ ܦܝܠܠܘܣܘ̈ܦܐ. ܐܦ ܠܐܕ̈ܫܐ ܕܐܬܬܣܝܡܘ ܥܠ ܗܘܠܐ. ܘܡܪ̈ܝܡܢܘܬܐ ܠܐܝܢܝ̈ܘܬܐ ܕܡܬܬܪ̈ܝܡܢ ܡ̣ܢ ܐܕܫ̈ܐ. ܗ̄ ܝܩܝ̣ܪܘܬܐ ܘܝܒܝ̣ܫܘܬܐ ܡ̣ܢ ܐܪܥܐ. ܗܝܕܝܢ ܓܝܪ ܡܝ̈ܐ ܗܘܝܐ. ܐܠܗܐ ܕܝܢ ܐܦ ܠܗܠܝܢ ܗܦܟ ܡܣܟܡ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܪܝܢܝܬܐ ܡܛܠ ܬܪܥܝܬܐ ܕܗܢܘܢ ܕܠܝܬܝܘܬܗ ܟܠܢܝܬܐ ܕܥܠܡܐ ܗܢܐ ܡܘܕܝܢ ܘܣܬܘܪܝܗ̇ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܕܘܝܕ. ܗ̣ܢܘܢ ܥܒܪܝܢ ܘܐܢ̱ܬ ܩܝܡ ܐܢ̱ܬ. ܘܟܠܗܘܢ ܐܝܟ ܠܒܘܫܐ ܒܠܝܢ. ܘܬܘܒ. ܛܘܪ̈ܐ ܐܝܟ ܫܥܘܬܐ ܐܬܦܫܪܘ. ܡ̣ܢ ܩܕܡ ܡܪܝܐ ܕܐܬܐ ܠܡܕܢܗ̇ ܠܐܪܥܐ.

 

 

 

ܣܗܕܘܬܐ ܕܬܪܬܝܢ

 

ܐܫܥܝܐ. ܗܐ ܒܪܐ ܐ̱ܢܐ ܫܡܝ̈ܐ ܚܕ̈ܬܐ ܘܐܪܥܐ ܚܕܬܐ. ܘܬܘܒ. ܢܬܟܪܟܘܢ ܫܡܝ̈ܐ ܐܝܟ ܡܓܠܬܐ.

 

 

 

ܣܗܕܘܬܐ ܕܬܠܬ

 

ܐܘܢܓܠܝܘܢ. ܫܡܫܐ ܢܚܫܟ. ܘܣܗܪܐ ܠܐ ܢܚܘܐ ܢܘܗܪܗ. ܘܟܘܟ̈ܒܐ ܢܦܠܘܢ ܡ̣ܢ ܫܡܝ̈ܐ. ܘܬܘܒ. ܫܡܝܐ ܘܐܪܥܐ ܢܥܒܪܘܢ܆ ܘܡܠܝ̈ ܠܐ ܢܥܒܪ̈ܢ.

 

 

 

ܣܗܕܘܬܐ ܕܐܪܒܥ

 

ܒܩܐܬܘܠܝ̣ܩܝ ܕܝܠܗ. ܥܒܪ ܥܠܡܐ ܗ̣ܘ ܘܪܓܬܗ.

 

 

 

ܣܗܕܘܬܐ ܕܚܡܫ

 

ܦܘܠܘܣ ܒܕܘܪ̈ܝܢܬܝܐ ܩܕܡ̄. ܥܒܪ ܠܗ ܓܝܪ ܐܣܟܡܗ ܕܥܠܡܐ ܡܛܠ ܗܢܐ ܨܒܐ ܐ̱ܢܐ ܕܕܠܐ ܨܦܬܐ ܬܗܘܘܢ.

 

 

 

ܣܗܕܘܬܐ ܕܫܬ

 

ܝܗܘܕܐ ܫܠܝܚܐ ܒܐܓܪܬܗ. ܕܦܩܕ ܠܢܘܪܐ ܒܪܡܙܐ ܩܠܝ̣ܠܐ ܘܪܦܦܐ ܕܥܝܢܐ. ܘܐܚܕܐ ܒܗܠܝܢ ܬܠܬܐ ܐܣܛܘܟ̈ܣܐ ܘܒܢܗܝܪ̈ܐ ܘܡܘܩܕܐ ܠܗܘܢ ܐܝܟ ܕܠܩܝ̈ܣܐ.

 

 

 

ܢܝܫܐ ܬܪܝܢܐ. ܡܛܠ ܦܘܢܝܐ ܕܣܗܕ̈ܘܬܐ ܐܟܚܕܐ ܟܢܝܫܐܝܬ

 

ܐܡܪܝܢܢ ܕܟܠܗܝܢ ܐܟܚܕܐ ܠܒܘܛܠ ܐܕܫܢܝܘܬܗ ܡܬܚܒܠܢܝ̣ܬܐ ܕܥܠܡܐ ܗܢܐ ܪ̈ܡܙܢ ܘܡܫܘ̈ܕܥܢ. ܘܠܘ ܠܒܘܛܠܗ ܟܠܢܝܐ ܘܓܡܘܪܝܗ ܕܠܓܡܪ. ܒܗ̇ܝ ܕܒܠܝܗ ܡ̣ܢ ܕܠܒܘܫܐ ܘܦܫܪܗ ܕܛܘܪܐ. ܘܡܬܟܪܟܢܘܬܗܘܢ ܕܫܡܝܐ ܐܝܟ ܡܓܠܬܐ. ܘܚܫܟܗ ܕܫܡܫܐ ܘܕܣܗܪܐ ܘܡܦܘܠܬܗܘܢ ܕܟܘܟ̈ܒܐ. ܘܡܬܩܛܢܢܘܬܗܘܢ ܘܡܬܕܟܝܢܘܬܗܘܢ ܕܐܣܛܘ̈ܟܣܐ ܒܢܘܪܐ ܟܢܬܗܘܢ. ܠܘ ܠܠܝܬܝܘܬܗܘܢ ܡܫܘܕܥܝܢ. ܐܦܠܐ ܗ̇ܝ ܕܢܬܒܪܘܢ ܫܡܝܐ ܚܕ̈ܬܐ ܘܐܪܥܐ ܚܕܬܐ. ܗܐ ܓܝܪ ܕܘܝܕ ܠܒܐ ܕܟܝܐ ܒܥܐ ܠܡܬܒܪܝܘ ܒܗ. ܠܡܬܕܟܝܘ ܠܡ ܠܒܗ. ܘܠܘ ܠܡܬܠܝܬܝܘ. ܘܗ̇ܝ ܕܢܥܒܪܘܢ ܬܘܒ ܠܫܘܚܠܦܐ ܕܡ̣ܢ ܡܬܚܒܠܢܘܬܐ ܠܠܐ ܡܬܚܒܠܢܘܬܐ ܡܫܘܕܥܐ. ܘܗ̇ܝ ܕܐܠܗܝܐ ܦܘܠܘܣ. ܗ̣ܝ ܠܗ̇ ܣܦܩܐ ܕܬܦܫܩ. ܒܕܐܣܟܡܗ ܐܡܪܐ. ܕܥܠܡܐ ܠܘ ܘܥܠܡܐ.

 

ܩܦܠܐܘܢ ܬܠܝܬܝܐ ܕܫܬܐܣܬܐ ܬܪܝܢܝܬܐ. ܡܛܠ ܝܕܥܬܐ ܕܟܠܚܕ ܚܕ ܡ̣ܢ ܗܘܝ̈ܐ ܠܦܘܬ ܡܛܟܣܘܬܐ ܥܕܬܢܝܬܐ ܕܒܫܬܬ݀ ܝܘ̈ܡܐ. ܘܒܗ ܐܝܬ ܦܣܘ̈ܩܐ ܫܬܐ. ܦܣܘܩܐ ܩܕܡܝܐ ܡܛܠ ܗ̇ܢܝܢ ܕܒܝܘܡܐ ܩܕܡܝܐ ܐܬܒܪ̈ܝ. ܘܒܗ ܐܝܬ ܥܘܬܕܐ ܘܢܝ̈ܫܐ ܫܬܐ. ܩܕܡܝܬ ܥܘܬܕܐ

 

ܒܪ̈ܝܬܐ ܡ̇ܢ ܓܝܪ ܕܒܝܘܡܐ ܩܕܡܝܐ ܐܝܬܝܗܝܢ܆ ܫܡܝܐ ܗ̇ܘ ܥܠܝܐ ܕܠܟܠ ܐܚܝ̣ܕ. ܘܐܪܥܐ ܘܡܝ̈ܐ ܘܢܘܗܪܐ. ܘܒܡܝ̈ܐ ܡ̇ܢ ܐܐܪ ܐܬܥܙܪܪ. ܒܢܘܗܪܐ ܕܝܢ ܢܘܪܐ. ܒܩܨܬ ܐ̱ܚܝܢܘܬܐ ܕܒܝܢܬܗܘܢ. ܐܠܐ ܡܛܠ ܫܡܝܐ ܗܢܐ ܕܒܝܘܡܐ ܩܕܡܝܐ ܐܬܒܪܝ. ܠܐ ܙܥܘܪ ܐܬܦܠܓܘ ܡܠܦܢ̈ܐ ܩܕܝ̈ܫܐ. ܩܕܝܫܐ ܓܝܪ ܒܣܝܠܠܝܘܣ ܐܡ̇ܪ. ܕܐ̱ܚܪܝܢ ܗ̣ܘ ܡ̣ܢ ܪܩܝܥܐ ܗ̇ܘ ܕܒܝܘܡܐ ܬܪܝܢܐ ܐܬܒܪܝ. ܡܪܝ ܐܝܘܐܢܢܝܣ ܕܝܢ ܐܡ̇ܪ ܕܗ̣ܘ ܟܕ ܗ̣ܘ ܐܝܬܘܗܝ. ܘܒܝܘܡܐ ܕܬܪܝܢ ܫܪܒܗ ܘܠܘ ܒܪܝܬܗ ܐܬܬܝܬܝ̣. ܡܪܝ ܐܦܪܝܡ ܕܝܢ ܘܡܪܝ ܝܥܩܘܒ ܕܣܪܘܓ ܐܡܪܝܢ. ܕܒܝܬ ܫܡܝܐ ܘܝܬ ܐܪܥܐ܆ ܠܒܪܝܬܐ ܕܡܬܝܕ̈ܥܢܐ ܐܘܟܝܬ ܡܠܐܟ̈ܐ. ܘܕܡܬܪ̈ܓܫܢܐ ܫܘܕܥܬ݀ ܚܟܡܬܐ ܐܠܗܝܬܐ. ܝܥܩܘܒ ܕܝܢ ܐܘܪܗܝܐ ܠܢܘܪܐ ܘܐܐܪ ܐܡ̣ܪ ܕܩܪܐ ܡܘܫܐ ܫܡܝܐ. ܒܕܥܝܕܐ ܐܝܬ ܠܗ ܠܟܬܒܐ ܩܕܝܫܐ. ܕܫܡܝܐ ܢܩܪܐ ܠܐܐܪ. ܐܝܟ ܗ̇ܝ ܕܕܘܝܕ ܕܦܪܚܬܐ ܕܫܡܝܐ. ܘܒܐܘܪܝܬܐ ܛܠܐ ܕܫܡܝܐ. ܠܝ ܕܝܢ ܟܐܢܐ. ܕܫܡܝܐ ܗ̇ܘ ܥܠܝܐ ܗܘܝܘ ܗ̇ܘ ܕܐܬܒܪܝ ܒܝܘܡܐ ܩܕܡܝܐ. ܘܫܡܝܐ ܗ̇ܘ ܕܐܬܩܪܝ ܪܩܝܥܐ: ܘܒܝܘܡܐ ܕܬܪܝܢ ܐܬܒܪܝ܆ ܬܡܢܝܐ ܗ̇ܢܘܢ ܐ̱ܚܪ̈ܢܐ ܕܠܐ ܛܥܝ̈ܐ ܘܛܥܝ̈ܐ ܐܝܬܝܗܘܢ. ܘܕܠܐ ܦܐܝܐ ܗܘܬ݀ ܠܚܟܡܬܐ ܒܐܘܪܝܬܐ. ܕܐܟܚܕܐ ܠܗܢܐ ܐܦ ܠܗ̇ܢܘܢ ܬܒܪܐ. ܗ̣ܘ ܦܘܪܫܢܐ ܪܒܐ ܕܒܝܢܬܗܘܢ ܡܫܪܪ. ܒܕ ܗ̇ܘ ܡ̇ܢ ܕܝܠܢܐܝܬ ܠܐ ܡܟܘܟܒ. ܘܡ̣ܢ ܡܕܢܚܐ ܠܡܥܪܒܐ ܚܪܝ̣ܦܐܝܬ ܡܬܬܙܝܥ. ܘܐܝܡܡܐ ܡ̣ܢ ܠܠܝܐ ܦܪܫ. ܘܝܘܡܐ ܫܠܡܐ ܡܫܡܠܐ. ܗ̇ܢܘܢ ܕܝܢ ܐ̱ܚܪ̈ܢܐ ܟܠܗܘܢ ܐܟܚܕ ܡܟܘܟܒܝܢ. ܘܡ̣ܢ ܡܥܪܒܐ ܠܡܕܢܚܐ ܡܫܘܚܪܐܝܬ ܡܬܬܙܝ̣ܥܝܢ. ܘܐ̱ܢܫܝ̈ܢ ܡ̇ܢ ܟܪ̈ܝ̣ܗܝ ܒܬܪܥܝ̣ܬ ܒܪ̈ܝܐ. ܕܢܘܗܪܐ ܠܡ ܒܠܚܘܕܘܗܝ ܐܬܒܪܝ ܒܝܘܡܐ ܩܕܡܝܐ ܐܬܒܪܝ ܐܡܪ. ܘܕܗ̇ܢܘܢ ܕܫܪܟܐ ܡܬܘ̈ܡܝܐ ܗܘܘ. ܐܝܟ ܕܡܫܘܕܥܐ ܗ̇ܝ ܕܒܪܝܫܝ̣ܬ. ܘܠܘܬܗܘܢ ܡܬܐܡܪܐ. ܕܠܘ ܒܟܠ ܕܘܟ ܡܬܘܡܝܘܬܐ ܡܫܘܕܥܐ ܗ̇ܝ ܕܒܪܝܫܝ̣ܬ. ܐܠܐ ܒܕܘܟ ܡ̇ܢ ܐܝܟ ܗ̇ܝ ܕܒܪܝܫܝ̣ܬ ܐܝܬܘܗܝ ܗܘܐ ܡܠܬܐ. ܘܐܝܟ ܗ̇ܝ ܕܡܢܘ ܓܝܪ ܕܩܫܝܫ ܡ̣ܢ ܗ̇ܝ ܕܒܪܝܫܝ̣ܬ. ܒܕܘܟ ܕܝܢ ܠܐ. ܐܝܟ ܗ̇ܝ ܕܗ̇ܘ ܕܥܒܕ ܡ̣ܢ ܒܪܝܫܝ̣ܬ. ܕܟܪܐ ܘܢܩܒܬܐ ܥܒܕ. ܘܐܝܟ ܗ̇ܝ ܕܡ̣ܢ ܒܪܝܫܝ̣ܬ ܩܛܠ ܐ̱ܢܫܐ ܗ̱ܘ. ܘܡ̣ܢ ܡܠܦܢ̈ܐ ܡ̇ܢ. ܡܢܗܘܢ ܠܒܪܬ݀ ܩܠܗ ܕܟܬܒܐ ܫܠܡܘ ܘܐܡܪܘ. ܕܒܫܬܐ ܝܘܡܝ̈ܢ ܐܬܒܪ̈ܝ̣ܝܢ ܒܪ̈ܝܬܐ. ܐܟܙܢܐ ܕܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܕܐܡ̣ܪ. ܡܛܠ ܗܕܐ ܒܪܐ ܐܠܗܐ ܒܪܝܬܐ ܚܕܬܐ ܗܕܐ ܒܫܬܐ ܝܘܡܝ̈ܢ. ܐܝܟܢܐ ܕܢܥܘܠ ܥܡ ܒܪ̈ܝܬܐ ܐܦ ܛܘܟܣܐ. ܘܡܪܝ ܐܝܘܐܢܢܝܣ ܬܘܒ ܐܡ̣ܪ. ܕܘܠܐ ܗܘܐ ܕܬܗܘܐ ܒܪܝܬܐ. ܐܠܐ ܠܘ ܟܠܗ̇ ܐܟܚܕܐ. ܘܗܟܢܐ ܐܦ ܡܪܝ ܐܦܪܝܡ. ܘܡܪܝ ܝܥܩܘܒ ܐܬܪܥܝܘ. ܓܪܝܓܘܪܝܘܣ ܕܝܢ ܕܢܘܣܐ. ܘܝܥܩܘܒ ܐܘܪܗܝܐ ܠܘ ܗܟܢܐ ܐܣܒܪܘ. ܐܠܐ ܕܟܠܗܝܢ ܒܪ̈ܝܬܐ ܒܚܕ ܪܦܦ ܥܝܢܐ ܘܪܡܙܐ ܩܠܝܠܐ ܐܬܟܝܢ̈ܝ. ܘܗ̇ܝ ܕܐܡܝ̣ܪܐ. ܕܒܝܘܡܐ ܦܠܢܝܐ ܙܦܠܢ ܐܬܒܪܝ. ܘܒܝܘܡܐ ܦܠܢܝܐ ܙܦܠܢ. ܡܠܬܐ ܗ̱ܝ ܕܛܘܟܣܐ ܒܠܚܘܕ. ܘܠܦܘܬ ܚܘܫܒܝܐ ܡ̇ܢ ܗܢܐ ܪܥܝܢܐ ܚܬܝ̣ܬ. ܠܦܘܬ ܟܬܒܐ ܕܝܢ ܗܘܐ. ܘܕܥܠ ܟܬܒܐ ܢܒܝܝܐ ܝܬܝܪ ܡܢ ܕܥܠ ܚܘܫܒܐ ܡܠܦܢܝܐ ܙܕܩ ܠܢ ܠܡܬܬܟܠܘ ܝܬܝܪ ܙܗܝ̣ܪܐ.

 

 

 

ܢܝܫܐ ܩܕܡܝܐ ܡܛܠ ܟܝܢܐ ܕܫܡܝܐ

 

ܥܕܬܐ ܡ̇ܢ ܓܝܪ ܩܕܝܫܬܐ ܕܐܠܗܐ. ܠܘ ܟܝܢܐ ܐ̱ܚܪܢܐ ܐܟܣܢܝ ܡ̣ܢ ܕܐܪܒܥܐ ܐܣܛܘ̈ܟܣܐ ܝܕܥܐ ܠܟܝܢ ܫܡܝܐ ܟܠܗܘܢ ܐܟܚܕܐ. ܗܘ ܟܝܬ ܥܠܝܐ ܘܪܩܝܥܐ ܕܒܓܘܗ. ܐܠܐ ܥܠ ܗ̇ܝ ܕܐܢ ܡ̣ܢ ܐܪ̈ܒܥܬܝܗܘܢ. ܐܘ ܡܢ ܚܕ ܚܕ ܡܢܗܘܢ ܡܪܟܒ. ܐܬܦܠܓܘ ܩܝܘ̈ܡܝܗ̇. ܘܡܢ ܢܒܝ̈ܐ ܡ̇ܢ ܐܫܥܝܐ ܐܡ̣ܪ. ܐܠܐ ܒܠܚܘܕ ܕܠܬܢܢܐ ܕܡܐ. ܐܡ̣ܪ ܓܝܪ ܗ̇ܘ ܕܪܩܥ ܫܡܝܐ ܐܝܟ ܬܢܢܐ. ܘܩܕܝܫܐ ܒܣܝܠܠܝܘܣ ܐܡ̣ܪ ܕܪܩܝܥܐ ܠܘ ܡ̣ܢ ܚܘܠܛܢܐ ܗ̱ܘ ܕܓܘ̈ܫܡܐ. ܐܠܐ ܟܝܢܝܐ ܗ̱ܘ ܡܩܝܡܐ ܘܫܪܪܐ ܘܠܐ ܡܬܕܪܟܢܐ ܠܪ̈ܓܫܐ. ܘܓܪܝܓܘܪܝܘܣ ܕܢܘܣܐ ܐܡ̇ܪ. ܕܪܩܝܥܐ ܬܚܘܡܐ ܗ̱ܘ ܕܡܡܨܥ ܒܝܬ ܒܪܝܬܐ ܗܕܐ ܓܘܫܡܢܝܬܐ ܘܗ̇ܝ ܪܘܚܢܝܬܐ ܘܡܣܟܡ ܘܡܓܘܢܢ. ܡܪܝ ܐܦܪܝܡ ܕܝܢ ܘܬܐܘܕܘܪܘܣ ܡܦܫܩܢܐ ܕܢܣܛܘܪ̈ܝܢܘ܇ ܡܢ ܟܝܢܐ ܕܡܝ̈ܐ ܐܡܪܝܢ ܕܐܬܬܟܝܢ ܪܩܝܥܐ ܐܝܟ ܓܒܬܐ ܡܢ ܚܠܒܐ ܘܓܠܝ̣ܕܐ ܡ̣ܢ ܡܝ̈ܐ. ܘܡܪܝ ܐܝܘܢܢܝܣ ܐܡ̣ܪ. ܕܡܢܐ ܕܝܢ ܐܝܬܘܗܝ ܪܩܝܥܐ ܠܐ ܐ̱ܢܫ ܢܒܨܐ. ܠܐ ܐܢ ܡܝ̈ܐ ܐܢܘܢ ܕܩܛܝ̣ܪܝܢ. ܐܦܠܐ ܐܐܪ ܕܟܢܝ̣ܫ. ܘܝܥܩܘܒ ܕܐܘܪܗܝ ܒܕܘܟ ܡ̇ܢ ܐܐܪ ܚܝܨܐ ܘܡܫܪܪܐ ܐܡ̇ܪ ܕܐܝܬܘܗܝ. ܘܒܟܬܒܐ ܕܦܣܝ̣̈ܩܬܐ ܐܡ̇ܪ. ܕܪܘܚܐ ܩܕܝܫܐ ܚܙܩ ܠܫܪܝܪܘܬܗܘܢ ܕܡܝ̈ܐ. ܘܡܬܚ ܡܢܗܘܢ ܪܩܝܥܐ ܐܝܟ ܡܫܟܢܐ ܐܝܟ ܟܦܬܐ. ܘܡܛܠ ܕܟܠܗܘܢ ܠܘ ܐܣܛܘܟܣܐ ܚܡܝܫܝܐ ܐܡܪܝܢ ܠܗ ܐܝܟ ܐܪܝ̣ܣܛܘܛܐܠܝܣ. ܐܠܐ ܕܡ̣ܢ ܡܕܡ ܡ̣ܢ ܗܠܝܢ ܐܪܒܥܐ ܐܬܬܟܝܢ. ܡ̣ܢ ܐܠܨ̈ܬܐ ܕܐܟܘܬܗܘܢ ܡܩܒܠܢܐ ܕܗܘܝܐ ܘܕܚܘܒܠܐ ܘܕܨܪܝܐ ܢܗܘܐ. ܘܗ̣ܘ ܗܟܘܬ ܚܡܝܡܐ ܢܗܐ ܐܘ ܩܪܝܪܐ ܐܘ ܪܛܝ̣ܒܐ ܐܘ ܝܒܝ̣ܫܐ. ܐܘ ܩܠܝܠܐ ܐܘ ܝܩܝܪܐ ܘܫܪܟܐ. ܘܠܗ̇ ܠܗܕܐ ܒܝܕ ܐܦܘܕܝ̣ܟܣܝܣ ܢܫܪܪܝܗ̇.

 

 

 

ܡܚܘܝܢܘܬܐ

 

ܐܡܪܝܢܢ ܕܟܠܗܘܢ ܓܘ̈ܫܡܐ ܫܘܝܢ ܒܓܘܫܡܢܝܘܬܐ. ܘܐܠܘ ܠܓܘܫܡܐ ܕܫܡܝܐ܆ ܙܢܐ ܡܕܡ ܕܝܠܢܝܐܝܬ ܢܫܬܟܚ. ܐܘ ܒܗ̇ܝ ܕܓܘܫܡܐ ܗ̱ܘ ܡܫܬܟܚ ܠܗ. ܘܡ̣ܢ ܗܪܟܐ ܐܠܨܐ ܕܗ̇ܘ ܡܐ ܕܠܗ ܡܫܬܟܚ܆ ܐܦ ܠܗܢܘܢ ܢܫܬܟܚ ܘܒܗܦܟܐ. ܐܘ ܒܗܝ ܕܙܢܐ ܡܕܡ ܕܥܠܬܐ ܗ̱ܘ ܕܗ̇ܘ ܙܢܐ ܕܝܠܢܐܝܬ ܒܗ ܫܟܝܚ. ܘܗ̣ܘ ܗ̇ܘ ܙܢܐ ܐܢ ܐܠܨܝܐ ܗ̱ܘ ܠܟܝܢܗ. ܐܠܨܐ ܕܐܦ ܠܟܠܗܘܢ ܢܫܬܟܚ ܐܦ ܗ̇ܘ ܐܦ ܥܠܬܗ. ܘܐܢ ܠܘ ܐܠܨܝܐ ܗ̱ܘ. ܡ̣ܢ ܐܠܨ̈ܬܐ ܥܠ ܥܠܬܐ ܣܢܝܩ. ܘܥܠܬܗ ܐܘ ܐܠܨܝܬܐ ܗ̱ܝ ܐܘ ܠܐ. ܘܗܟܢܐ ܠܠܐ ܣܘܦ ܡܫܬܠܫܠܐ ܡܠܬܐ ܗ̇ܝ ܕܫܟܝܪܐ. ܓܘܫܡܐ ܡܕܝܢ ܫܡܝܢܐ܆ ܡܩܒܠܢܐ ܙܕܩ ܕܢܗܘܐ ܠܟܠܗܘܢ ܙܢܝ̈ܐ ܕܫܪܟܐ ܕܓܘܫ̈ܡܐ ܡܩܒܠܝܢ.

 

 

 

ܣܥܝܐ

 

ܦܪ̈ܝܦܐܛܝܩܘ ܐܡܪܝܢ. ܕܫܡܝܐ ܠܐ ܡܨܛܪܝܢܐ ܗ̱ܘ. ܒܗܝ ܕܨܪܝܐ ܒܝܕ ܙܘܥܐ ܬܪܝ̣ܨܐ ܡܥܕ ܠܡܗܘܐ. ܘܫܡܝܐ ܚܘܕܪܢܐܝܬ ܡܬܬܙܝܥ. ܘܟܕ ܠܐ ܡܩܒܠܢܐ ܗ̱ܘ ܕܨܪܝܐ. ܐܦܠܐ ܕܗܘܝܐ ܘܚܘܒܠܐ ܡܩܒܠܢܐ ܙܕܩ ܕܢܗܘܐ. ܐܦܠܐ ܬܘܒ ܚܡܝ̣ܡܐ ܗ̱ܘ. ܒܗܝ ܕܚܡܝ̣ܡܐ܆ ܠܥܠ ܡܬܬܙܝܥ. ܘܡܛܠ ܗܕܐ ܐܦܠܐ ܩܠܝ̣ܠܐ ܗ̱ܘ. ܐܦܠܐ ܬܘܒ ܩܪܝ̣ܪܐ ܗܘܐ ܐܘ ܝܩܝܪܐ. ܒܗܝ ܕܗܠܝܢ ܠܐܦܝ̈ ܠܬܚܬ ܡܬܬܙܝܥܝ̣ܢ. ܘܫܡܝܐ ܠܐ ܠܥܠ܆ ܐܦܠܐ ܠܬܚܬ. ܐܦܠܐ ܬܘܒ ܪܛܝܒ ܐܘ ܝܒܝܫ. ܒܗܝ ܕܠܐ ܦܫܝܩܐܝܬ ܐܦܠܐ ܥܣܩܐܝܬ ܚܐܫ. ܘܕܠܐ ܓܘܢܐ ܗ̱ܘ. ܘܐܠܐ ܡܟܠܐ ܟܠܐ ܗܘܐ ܗ̇ܘ ܕܠܬܚܬ. ܠܗ̇ܘ ܕܠܥܠ ܡܢܗ ܡ̣ܢ ܚܙܬܢ. ܘܗܐ ܟܘܟ̈ܒܐ ܥܠܝ̈ܐ ܘܬܚܬܝ̈ܐ ܐܟܚܕܐ ܡܬܚܙܝܢ. ܘܕܦܫܝ̣ܛܐ ܗ̱ܘ ܘܠܐ ܡܪܟܒܐ܆ ܐܣܦܪܢܝܘܬܗ ܣܗܕܐ. ܘܠܐ ܝܪܒ ܐܘ ܙܥܪ. ܘܐܠܐ ܐܠܨܐ ܗܘܬ݀ ܫܟܝ̣ܚܘܬ ܣܦܝ̣ܩܘܬܐ ܗ̇ܝ ܕܠܐ ܡܨܝܐ. ܘܚܝܐ ܗ̱ܘ. ܒܗܝ ܕܠܘ ܐܝܟ ܠܐ ܚܝ̈ܐ ܐܣܛܘܟ̈ܣܐ ܠܡܐܡܪ ܘܢܨ̈ܒܬܐ ܬܪܝܨܐܝܬ ܡܬܬܙܝܥ. ܘܬܘܒ ܐܡܪܝܢ ܕܦܚܡܐ ܕܐܪ̈ܒܥܬܝܗܘܢ ܐܣܛܘܟ̈ܣܐ ܕܠܐ ܚܝܝܢ ܠܘܬ ܟܘܠܝܘܬ ܫܡܝܐ. ܘܣܓܝ ܒܨܝܪ ܡܢ ܦܚܡܐ ܕܚܛܬܐ ܕܒܠܥ ܠܗ̇ ܒܪܢܫܐ ܠܘܬ ܦܓܪܗ. ܘܟܕ ܗ̣ܝ ܚܛܬܐ ܡܝܬܬܐ ܕܒܓܘܗ ܕܒܪܢܫܐ ܠܐ ܟܠܝܐ ܠܢ ܠܡܟܢܝܘ ܠܒܪܢܫܐ ܚܝܘܬܐ. ܐܦܠܐ ܗ̣ܢܘܢ ܗܠܝܢ ܐܣܛܘ̈ܟܣܐ ܡܝ̈ܬܐ ܕܒܓܘ ܫܡܝܐ. ܟܠܝܢ ܠܢ ܕܢܟܢܐ ܠܫܡܝܐ ܚܝܘܬܐ. ܘܕܡܠܝܠ. ܗ̣ܝ ܦܐܝܘܬ ܡܛܟܣܘܬܐ ܕܙܘܥܗ ܬܡܝ̣ܗܐ ܡܫܘܕܥܐ. ܘܕܠܐ ܩܢܝܢ ܡܕܡ ܡ̣ܢ ܪ̈ܓܫܐ ܚܡܫܐ ܒܪ̈ܝܐ. ܘܗ̇ܢܘܢ ܓܘܝ̈ܐ. ܘܚܡܬܐ ܘܪܓܬܐ. ܝܕܝ̣ܥܐ ܡ̣ܢ ܗ̇ܝ ܕܗ̣ܢܘܢ ܗܠܝܢ. ܡܛܠܗܝ ܕܢܬܦܘܢ ܚܫܚܝ̈ܬܐ ܘܢܕܚܘܢ ܡܣܓܦܢ̈ܝܬܐ ܐܬܒܪܝܘ ܒܚܝܘܬܐ. ܘܠܫܡܝܐ ܪ̈ܘܚܢܝܐ ܒܠܚܘܕ ܐܢܘܢ. ܗ̇ܢܘܢ ܕܠܗ ܚܫܚܝܢ. ܘܠܘ ܒܪ̈ܓܫܐ ܡܬܢܬܦܝܢ.

 

 

 

ܫܪܝܐ

 

ܐܡܪܝܢܢ ܕܡܚܘܝܢܘܬܢ ܗ̇ܝ ܝ̣ܚ̣ܝܕܝܬܐ ܠܟܠܗܘܢ ܗܠܝܢ ܣܥܝ̈ܐ ܟܢܝ̣ܫܐܝܬ ܫܪܝܐ. ܘܕܥܠ ܟܠ ܚܕ ܚܕ ܡܢܗܘܢ ܕܝܠܢܐܝܬ ܢܣܬܘܕ. ܠܘ ܕܦܪܐܓܡܛܝܐ ܗܕܐ ܗ̱ܝ.

 

 

 

 

 

 

 

 

     #1 

 

ܢܝܫܐ ܬܪܝܢܐ ܡܛܠ ܒܘ̈ܚܢܐ ܕܐܣܛܘܟܣܐ ܐܪܥܢܝܐ ܩܕܡܝܬ ܡܛܠ ܟܝܢܗ̇ ܘܐܣܟܡܗ̇

 

ܕܩܪܝܪܘܬܐ ܗ̱ܝ ܡ̇ܢ ܐܪܥܐ ܘܝܒܝ̣ܫܬܐ ܒܟܝܢܗ̇. ܘܠܐ ܐ̱ܢܫ ܬܦܫܟ. ܒܕܓܘܢ ܠܐܣܟܡܗ̇ ܢܫܪܪ. ܘܐܡܪܝܢܢ ܕܐܪܥܐ ܡ̇ܢ ܒܐܘܪܟܗ̇. ܟܐܡܬ݀ ܡ̣ܢ ܡܥܪܒܐ ܠܡܕܢܚܐ ܚܘܕܪܢܝܬܐ ܗ̱ܝ. ܘܝܕܝ̣ܥܐ ܗܕܐ ܡ̣ܢ ܗ̇ܝ ܕܒܐܬܪ̈ܘܬܐ ܡܕܢ̈ܚܝܐ ܡ̣ܢ ܩܕܡ ܕܒܡܥܪ̈ܒܝܐ ܕܢܚ ܫܡܫܐ. ܘܝ̣ܕܝ̣ܥܐ ܗܐ ܡ̣ܢ ܚܫ̈ܟܐ ܣܗܪ̈ܢܝܐ ܕܒܕܘܟ̈ܝܬܐ ܕܡܕܢܚܝ̈ܢ. ܡ̣ܢ ܩܕܡ ܕܒܗ̇ܢܝܢ ܕܡܥܪ̈ܒܝܢ ܡܫܪܝܢ. ܘܕܒܦܬܝܗ̇ ܬܘܒ ܟܐܡܬ݀ ܡ̣ܢ ܬܝܡܢܐ ܠܓܪܒܝܐ ܚܘܕܪܢܝܐ. ܝ̣ܕܝ̣ܥܐ ܡ̣ܢ ܗ̇ܝ ܕܟܠܡܐ ܕܠܓܪܒܝܐ ܡܬܩܪܒ ܐ̱ܢܫ ܝܬܝܪ ܡܬܥܠܐ ܡ̣ܢ ܪܝܫܗ ܦܘܠܘܣ ܗ̇ܘ ܓܪܒܝܝܐ. ܘܟܕ ܒܐܘܪܟܗ̇ ܘܒܦܬܝܗ̇ ܚܘܕܪܢܝܐ. ܡ̣ܢ ܐܠܨ̈ܬܐ ܕܐܣܦܪܢܝ ܗ̣ܘ ܠܗ̇ ܐܣܟܡܐ. ܘܐܦܢ ܛܘܪ̈ܐ ܪ̈ܡܐ ܘܫܠܒ̈ܐ ܥܡܝ̈ܩܐ ܫܟܝ̣ܚܝ̣ܢ ܒܗ̇. ܐܠܐ ܠܐ ܡܦܩܝܢ ܠܗ̇ ܡ̣ܢ ܐܣܦܝ̣ܪܢܝܘܬܗ̇. ܒܗܝ ܕܐܦܢ ܪܘܪ̈ܒܝܢ. ܐܠܐ ܛܒ ܙܥܘܪܝܢ ܒܦܚܡܗ̇. ܘܛܘܦܣܐ ܕܦܪ̈ܕܐ ܚܪ̈ܕܠܝܬܐ ܩܢ̈ܝܢ ܠܘܬܗ̇.

 

 

 

ܡܛܠ ܓܘܢܗ̇

 

ܒܪ̈ܝܐ ܡ̇ܢ ܐܡܪܝܢ ܕܐܪܥܐ ܒܗ̇ܝ ܕܦܫܝ̣ܛܐ ܕܠܐ ܓܘܢܐ ܙܕܩ ܕܬܗܘܐ. ܐܝܟ ܕܐܦ ܐܣܛܘܟ̈ܣܐ ܕܫܪܟܐ. ܘܚܢܢ ܐܡܪܝܢܢ ܕܪܘܟܒܐ ܐܦܢ ܥܠܬܐ ܗ̱ܘ ܕܓܘܢܐ. ܐܠܐ ܠܐ ܐܠܨܐ ܕܟܠ ܓܘܢܐ ܡ̣ܢ ܪܘܟܒܐ ܢܗܘܐ. ܩܛܦܣܝ̣ܣ ܓܝܪ ܟܘܠܢܝܬܐ ܐܟܡܐ ܕܠܘܓܝ̣ܩܝ̣ ܠܢ ܡܠܦܐ. ܠܘ ܥܠ ܝܬܗ̇ ܗܦܟܐ. ܒܕܓܘܢ ܐܡܪܝܢܢ ܕܓܘܢܐ ܟܝܢܝܐ ܕܐܪܥܐ ܐܘܟܡܐ ܗ̱ܘ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܟܡܐ ܕܚܡܝܡܘܬܐ ܠܪ̈ܛܝܒܐ ܡܘܟܡܐ ܟܕ ܡܦܘܫܫܐ ܡܢܗܘܢ ܠܡܢܘ̈ܬܐ ܨܠܝ̣̈ܠܬܐ ܕܡܝ̈ܐ ܘܐܐܪ. ܩܪܝܪܘܬܐ ܠܝܒܝ̣̈ܫܐ ܙܕܩ ܕܬܘܟܡ. ܟܕ ܡܠܒܕܐ ܠܗܘܢ. ܩܘܢܐܐ ܕܝܢ ܘܠܘ ܐܘܟܡܐ ܡܬܕܪܟ ܠܢ ܓܘܢܗ̇ ܒܥܠܬ݀ ܡܢܘ̈ܬܐ ܐܐܪ̈ܝܬܐ ܕܒܗ̇ ܚܒܝ̈ܟܢ. ܐܝܟ ܕܐܦ ܕܘܟܬܐ ܕܨܪܝܐ ܒܙܓܘܓܝ̣ܬܐ. ܘܗ̣ܝ ܙܓܘܓܝ̣ܬܐ ܠܘ ܫܚܝܩܬܐ. ܐܪ̈ܥܬܐ ܕܝܢ ܗ̇ܢܝܢ ܕܣܘ̈ܡܩܢ ܘܝܘܪ̈ܩܢ ܘܚܪ̈ܘܥܢ ܘܚܘܪ̈ܢ܆ ܠܘ ܦܫܝ̣̈ܛܬܐ ܐܢܝܢ ܡܪ̈ܢܝܬܐ. ܐܠܐ ܪܘܟܒܐ ܡܕܡ. ܘܐܦܢ ܒܨܝܪܐ ܡ̣ܢ ܚܡܝ̣ܡܘܬܐ ܘܪܛܝ̣ܒܘܬܐ ܘܩܪܝܪܘܬܐ ܘܝܒܝ̣ܫܘܬܐ ܐܝܬ ܒܗܝܢ.

 

 

 

ܡܛܠ ܛܘܪ̈ܐ

 

ܚܡܝ̣ܡܘܬܐ ܓܝܪ ܥܫܝ̣ܢܬܐ܆ ܟܕ ܛܝܢܐ ܡܫܟܚܐ ܣܓܝܐܐ ܘܛܠܘܫܐ. ܡܛܪܢܘ ܡܛܪܢܐ ܠܗ ܘܡܝܒܫܐ. ܘܡܢܗ ܟܐܦܐ ܥܒܕܐ ܪܒܬܐ ܕܡܬܩܪܝܐ ܛܘܪܐ. ܘܥܠܬܐ ܕܪܡܘܬܗܘܢ ܕܛܘܪ̈ܐ ܐܝܬܝܗ̇ ܗ̇ܝ ܕܗ̣ܘ ܛܝ̣ܢܐ ܡ̣ܢ ܒܬܪ ܡܬܛܪܢܢܘܬܗ ܒܩܫܝܘܬܐ ܘܪܟܝܟܘܬܐ ܡܫܚ̈ܠܦܢ ܡܢܘ̈ܬܗ. ܒܕܓܘܢ ܟܕ ܡܝ̈ܐ ܣܓܝ̈ܐܐ ܐܘ ܪ̈ܘܚܐ ܩܫܝ̈ܐ ܒܚܐܦ̈ܐ ܥܒܪܝܢ ܥܠܘܗܝ. ܡܚܦܪ ܚܦܪܝܢ ܠܡܢܘ̈ܬܗ ܪ̈ܟܝ̣ܟܬܐ ܘܦܝ̈ܫܢ ܗ̇ܢܝܢ ܩܫ̈ܝܬܐ. ܘܗܟܢܐ ܗܘܝܢ ܛܘܪ̈ܐ ܪ̈ܡܐ ܘܫܠܒ̈ܐ ܥܡܝ̣̈ܩܐ. ܘܡܛܠ ܟܐܦ̈ܐ ܒܝܕ ܡܡܙܓܘܬܐ ܕܐܪܒܥ ܗܠܝܢ ܐܝܢܝ̈ܘܬܐ ܗܘ̈ܝܢ. ܡܛܠ ܗܕܐ ܚܝ̈ܠܐ ܡܦܬܟ̈ܐ ܩܢܝ̈. ܐܝܟ ܟܐܦܐ ܕܕܡܐ ܕܡܝܒܫܐ ܚܒܪܬܐ ܕܥܝܢܐ. ܘܐܝܟ ܐܪܡܐܢܝܐܩܘܢ ܐܘܟܝܬ ܠܐܙܘܪܕ. ܘܟܐܦܐ ܐܪܡܢܝܬܐ ܕܡܢܦܨܝܢ ܡܪܬܐ ܐܘܟܡܬܐ. ܘܐܝܟ ܛܘܦܘܠܝܩܘܢ ܐܘܟܝܬ ܟܐܦܐ ܝܘܕܝܬܐ ܕܡܦܪܟܟܐ ܟܐܦ̈ܐ ܕܒܫܠܦܘܚܬܐ. ܘܐܝܟ ܩܝܣܘܪܐ ܕܓܪܥ ܣܥܪܐ ܘܡܪܩ ܫܢ̈ܐ. ܘܫܪܟܐ ܕܐ̱ܚܪ̈ܢܝܬܐ ܣܓܝ̈ܐܬܐ.

 

 

 

ܡܛܠ ܚܠܐ

 

ܝܡܐ ܡܢ ܓܝܪ ܟܕ ܫܦܥ ܐܢ ܥܠ ܛܘܪܐ ܣܠܩ ܥܡ ܢܘܓܪܐ ܡܦܪܟܟ ܠܗ. ܘܐܢ ܥܠ ܥܦܪܐ ܡܛܠܫ ܠܗ. ܐܝ̣ܛܐ ܗܢܝܢ ܗܠܝܢ ܡܢܘ̈ܬܐ ܡ̣ܢ ܙܠܝ̈ܩܐ ܫܡܫܢܝ̈ܐ ܡܬܛܪܢܢ ܘܠܟܐܦܢܝ̈ܘܬܐ ܕܗܦ̈ܟܢ. ܘܡܛܠ ܕܣܒܝ̣ܣܐܝܬ ܪ̈ܘܚܐ ܥܙܝ̣̈ܙܬܐ ܥܠܝܗܝܢ ܢܫ̈ܒܢ. ܡܦܪܩܘ ܡܦܪ̈ܩܢ ܠܗܝܢ. ܘܐܝܟ ܕܥܘܪܐ ܕܪ̈ܝܢ ܘܡܙܪ̈ܩܢ. ܘܗܟܢܐ ܚܠܐ ܡܬܬܟܝ̣ܢ. ܗܐ ܓܝܪ ܩܪܡܝ̣ܕܐ ܘܛܝ̣ܢܐ ܡܬܩܪܒܝܢ. ܩܪܡܝܕܐ ܡܢ ܡܬܦܪܟܟ. ܘܛܝ̣ܢܐ ܡܬܛܪܢ.

 

 

 

ܡܛܠ ܓܘܫ̈ܡܐ ܡܐܛܐܠܝ̈ܩܘ ܘܡܬܚܦܪ̈ܢܐ

 

ܘܗ̣ܢܘܢ ܗܠܝܢ ܐܘ ܚܠܝ̈ܡܝ ܪܘܟܒܐ ܐܢܘܢ. ܐܘ ܡܚܝ̈ܠܝ ܪܘܟܒܐ. ܘܚܠܝ̈ܡܝ ܪܘܟܒܐ ܐܘ ܡܬܛܣ̈ܣܢܐ ܐܢܘܢ. ܐܟܙܢܐ ܕܕܗܒܐ ܘܣܐܡܐ ܘܐܝ̣ܠܩܛܪܘܢ. ܘܢܚܫܐ ܘܦܪܙܠܐ. ܘܐܒܪܐ ܘܐܢܟܐ. ܐܠܐ ܠܐ ܡܬܛܣ̈ܣܢܐ. ܘܗ̣ܢܘܢ ܗܠܝܢ. ܐܘ ܒܥܠܬ݀ ܣܓܝܐܘܬ ܪܟܝܟܘܬܗܘܢ ܠܐ ܡܬܛܣܣܝ̣ܢ. ܐܟܙܢܐ ܕܙܝܘܓ. ܐܘ ܒܥܠܬ݀ ܣܓܝܐܘܬ ܩܫܝܘܬܗܘܢ. ܘܗ̣ܢܘܢ ܗܠܝܢ. ܐܘ ܓܠܝ̣ܙܝܢ ܡ̣ܢ ܕܗܝ̣ܢܘܬܐ ܘܡܛܠܗܕܐ ܡܬܦܪܟܟܝܢ. ܐܟܙܢܐ ܕܝܘܩܢ̈ܕܐ. ܐܘ ܥܡ ܕܗܝ̣ܢܘܬܐ ܐܝܕܐ ܕܚܣܝ̣ܢܐܝܬ ܣܪܟܬ݀. ܗܕܐ ܓܝܪ ܠܘ ܒܠܚܘܕ ܘܪܨܦܬ݀ ܠܡܢܘ̈ܬܗ̇ ܘܐܬܝܒܫܬ݀ ܡܢܗܝܢ ܐܬܬܟܝܢ. ܐܟܙܢܐ ܕܐܕܡܐܣ ܟܐܦܐ. ܗܕܐ ܓܝܪ ܠܘ ܒܠܚܘܕ ܠܐ ܡܬܛܣܣܐ. ܐܠܐ ܘܟܕ ܡܬܡܚܝܐ ܥܠ ܣܕܢܐ ܥܡܕܐ ܒܗ. ܘܟܕ ܗܟܢܐ ܠܟܠ ܓܫܘܡ ܩܫܝܐ ܙܟܝܐ ܘܚܣܢܐ ܡ̣ܢ ܕܡܐ ܕܥܙ̈ܐ ܡܬܦܪܟܟܐ ܘܡܬܚܒܠܐ. ܘܡܚܝ̈ܠܝ ܪܘܟܒܐ ܡ̇ܢ. ܐܘ ܒܪܛܝ̣ܒܘܬܐ ܡܬܦܫܪ̈ܢ܆ ܐܝܟ ܟܠܗܝܢ ܡܠܚ̈ܐ. ܫܚܝܪܐ ܐܡܪ ܐ̱ܢܐ ܘܢܝܛܪܘܢ ܘܨܪܦܐ ܘܐܡܘܢܝ̣ܩܘܢ ܘܩܠܩܢܬܝ̣ܣ. ܐܘ ܐܟܙܢܐ ܕܙܪܢܝܟܐ ܘܟܒܪܝ̣ܬܐ.

 

 

 

ܡܛܠ ܡܬܝܠܕܢܘܬܗܘܢ ܕܡܐܛܠܝ̈ܩܘ

 

ܟܝܢܝ̈ܐ ܡ̇ܢ ܘܐܘܡܢܝ̈ ܟܡܝ̈ܐܬܐ ܐܡܪܝܢ. ܕܐܒܗܝ̈ ܡܛܠܝ̈ܩܘ ܙܝܘܓ ܘܟܒܪܝܬ̣ܐ ܐܝܬܝܗܘܢ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܟܕ ܡܬܦܫܪܝܢ ܠܙܝܘܓ ܡܬܪܡܝܢ ܒܩܘܝܡܐ. ܘܡ̣ܢ ܗ̇ܝ ܕܟܕ ܩܛܪ ܙܝܘܓ ܒܪܝ̣ܚ ܟܒܪܝ̣ܬܐ ܐܝܟ ܐܢܟܐ ܗܘܐ. ܒܕܓܘܢ ܐܢ ܕܟܝ̈ܐ ܢܗܘܘܢ ܬܪ̈ܝܗܘܢ. ܘܡܫܡܠܝܐܝܬ ܡܬܒܫܠܝ̣ܢ ܥܡ ܚܕ̈ܕܐ. ܘܚܘܪܬܐ ܬܗܐ ܟܒܪܝ̣ܬܐ. ܣܐܡܐ ܡܬܝܠܕ. ܘܐܢ ܣܘܡܩܬܐ ܬܗܐ ܠܐ ܝܩܝ̣ܕܬܐ. ܕܗܒܐ ܡܬܝ̣ܠܕ. ܘܐܢܗܘ ܕܡ̣ܢ ܩܕܡ ܕܢܩܒܠܘܢ ܒܫܠܐ ܡܫܡܠܝܐ܆ ܩܪܝܪܘܬܐ ܩܛܘܪܬܐ ܡܛܝܐ ܠܗܘܢ. ܐܝܠܗܩܛܪܘܢ ܡܬܝܠܕ. ܐܢܕܝܢ ܙܝܘܓ ܒܠܚܘܕܘܗܝ ܢܗܐ ܕܟܝܐ ܘܟܒܪܝܬܐ ܕܠܝܚܬܐ ܘܝܩܝ̣ܕܬܐ ܢܚܫܐ ܡܬܝܠܕ. ܘܐܢܗܘ ܕܠܘ ܬܩܢܐܝܬ ܡܬܚܒܟܝܢ ܒܚܕ̈ܕܐ ܐܢܟܐ ܡܬܝܠܕ. ܘܐܢܗܘ ܕܬܪ̈ܝܗܘܢ ܕܠܝ̣ܚܝ̣ܢ ܘܒܝ̣ܫܝ̣ܢ܇ ܘܗ̣ܘ ܙܝܘܓ ܡܦܪܣܥܐ ܘܐܪܥܢܝܐ ܢܗܐ. ܘܟܒܪܝܬܐ ܝܩܝ̣ܕܬܐ ܦܪܙܠܐ ܡܬܝܠܕ. ܘܐܢܗܘ ܕܥܡ ܒܝ̣ܫܘܬܗܘܢ ܡܚܝ̈ܠܝ ܪܘܟܒܐ ܢܗܘܘܢ. ܐܒܪܐ ܡܬܝܠܕ. ܘܒܗܢܐ ܙܢܐ ܡܬܛܟܢܝܢ ܟܡܝ̈ܠܐܝܩܘ ܠܡܕܡܝܘ ܟܡܐ ܕܡܨܝܐ ܠܥܒܕܐ ܐܘܡܢܝܐ ܒܥܒܕܐ ܟܝܢܝܐ. ܘܡܚܫܒܬܐ ܡܠܝ̣ܠܬܐ ܣܗܕܐ܆ ܕܠܘ ܠܐ ܡܬܡܨܝܢܝ̣ܬܐ ܗ̇ܝ ܫܟܚܬܗ̇ ܕܐܘܡܢܘܬܐ ܗܕܐ.

 

 

 

ܡܛܠ ܡܬܝܠܕܢܘܬܗܘܢ ܕܡܬܚܦܪ̈ܢܐ

 

ܚܠܝ̣̈ܡܝ ܪܘܟܒܐ ܕܝܢ ܘܠܐ ܡܬܛܣ̈ܣܢܐ. ܐܟܙܢܐ ܕܟܐܦ̈ܐ ܢܗܝ̣ܪ̈ܬܐ܆ ܝܘܩܢ̈ܕܐ ܟܝܬ ܘܒܪ̈ܘܠܐ ܘܫܪܟܐ. ܡ̣ܢ ܡܝܢܝܘܬܐ ܕܩܛܪܐ ܒܩܪܝܪܘܬܐ ܘܝܒܝ̣ܫܘܬܐ ܗܘ̈ܝܢ. ܘܗ̇ܢܘܢ ܡܚܝ̈ܠܝ ܪܘܟܒܐ ܕܦܫܝ̣ܩܐܝܬ ܡܬܦܫܪܝܢ ܟܠܗܘܢ ܡ̣ܢ ܐܕ̈ܫܝ ܡܠܚ̈ܐ ܐܢܘܢ. ܘܟܒܪܝܬܐ ܡ̣ܢ ܡܝܢܘܬܐ ܕܚܡܥܬ݀ ܒܐܪܥܢܝܘܬܐ ܘܐܐܪܝܘܬܐ ܥܫܝ̣ܢܐܝܬ. ܘܠܕܗܝ̣ܢܘܬܐ ܐܫܬܚܠܦܬ݀. ܘܒܩܪܝܪܘܬܐ ܩܛܪܬ݀ ܗܘܝܐ ܘܫܚܝ̣ܪ̈ܬܐ ܟܠܗܝܢ ܡ̣ܢ ܡܠܚܐ ܘܟܒܪܝ̣ܬܐ ܘܟܐܦ̈ܐ ܡܬܦܫܪ̈ܢܝܬܐ ܐܟܙܢܐ ܕܩܠܩܢܬܝ̣ܣ ܗܘܝ̈. ܗܘܝܢ ܕܝܢ ܬܘܒ ܟܐܦ̈ܐ ܘܡ̣ܢ ܡܝ̈ܐ ܕܪܨܢܝ̣ܢ ܡ̣ܢ ܡܥܪ̈ܐ ܡܕܡ ܘܩܛܪܝܢ. ܘܐܝܬ ܬܘܒ ܡܝ̈ܐ ܕܟܕ ܥܐܠܝܢ ܒܗܘܢ ܩܝ̈ܣܐ ܟܐܦ̈ܐ ܗܘܝܢ. ܘܒܩܐܪܝܐܣ ܕܘܟ̈ܝܬܐ ܐܝܬ. ܕܟܠ ܕܚܠܕ ܒܗܝܢ ܟܐܦܐ ܗܘܐ. ܐܦ ܒܩܢܝ̣ܕܘܣ ܟܕ ܫܕܝܢ ܫܘܠܥ̈ܐ ܒܡܒܘ̈ܥܐ܆ ܟܐܦ̈ܐ ܥܒܕܝܢ ܠܗܘܢ. ܗܘܝ̈ܢ ܕܝܢ ܟܐܦ̈ܐ ܐܦ ܒܓܝܕ̈ܐ ܕܪ̈ܓܠܐ ܕܗ̇ܢܘܢ ܕܐܝܬ ܠܗܘܢ ܚܫܐ ܕܦܘܕܐܓܪ̈ܐ ܘܒܫܠܦܘܚܬܐ ܕܛܠܝ̈ܐ ܘܫܪܟܐ.

 

 

 

ܡܛܠ ܫܠܝܗ̇ ܕܐܪܥܐ

 

ܕܠܐ ܡܬܬܙܝ̣ܥܢܝ̣ܬܐ ܗ̱ܝ ܐܪܥܐ. ܝܕܝ̣ܥܐ ܡ̣ܢ ܗ̇ܝ ܕܡܢܬܗ̇ ܐܝ̇ܕܐ ܕܩܛܝ̣ܪܐܝܬ ܡܢܗ̇ ܐܬܦܪܩܬ݀܆ ܟܕ ܠܗ̇ ܡܛܝܐ ܫܠܝܐ. ܘܐ̱ܢܫܝ̈ܢ ܐܡܪܝܢ ܕܫܡܝܐ ܡ̇ܢ ܡ̣ܢ ܡܥܪܒܐ ܠܡܕܢܚܐ ܡܬܬܙܝܥ ܡܫܘܚܪܐܝܬ. ܐܪܥܐ ܕܝܢ ܡ̣ܢ ܡܕܢܚܐ ܠܡܥܪܒܐ ܡܬܬܙܝ̣ܥܐ ܡܣܪܗܒܐܝܬ ܒܙܘܥܐ ܗܢܐ ܡܫܡܠܐ ܝܘܡܐ. ܘܡܝܬܝܢ (ܓܘܦܣܝܢ ܬܘܒ ܛܝ̣ܢܐ ܗ̱ܝ ܚܘܪܐ ܕܟܐܦܐ ܗܘܐ. ܐܦ) ܬܚܘܝܬܐ ܫܠܝܐ ܕܣܦܪ̈ܝ ܝܡ̈ܡܐ. ܘܙܘܥܐ ܕܣܦܝ̣̈ܢܬܐ. ܘܐܦܢ ܚܙܝܐ ܗ̇ܝ ܕܒܗܦܟܐ ܡܪܓܫ ܘܕܠܐ ܫܪܝܪ ܨܒܪܐ ܗܢܐ. ܝܕܝ̣ܥܐ ܡ̣ܢ ܗ̇ܝ ܕܡܚܪܘܬܐ ܡܠܦܐ ܠܢ. ܕܚܘܕܪܗ̇ ܕܐܪܥܐ. ܥܣܪܝܢ ܘܐܪܒܥܐ ܐܠܦܝ̈ܐ ܡܝ̈ܠܐ ܗ̣ܘ. ܘܗܕܐ ܗ̱ܝ ܟܡܝܘܬܐ ܕܙܘܥܗ̇. ܒܥܣܪܝܢ ܘܐܪܒܥܐ ܫܥ̈ܐ ܕܝܘܡܐ ܡܫܡܠܝܐ. ܐܢ ܡܬܬܙܝ̣ܥܐ ܐܝܟ ܕܐܡܪܝܢ. ܘܡܢܬܐ ܕܟܠ ܫܥܬܐ. ܐܠܦܐ ܡܝ̣̈ܠܐ ܗ̣ܝ. ܟܠ ܬܠܬܐ ܡܝ̈ܠܐ ܐܣܛܕܐ ܚܕ. ܘܟܠ ܐܣܛܕܐ ܬܪܥܣܪ ܐܠܦܝ̈ܐ ܐܡ̈ܐ ܗ̣ܘ. ܘܟܠ ܐܡܐ ܥܣܪܝܢ ܘܐܪܒܥ ܨܒ̈ܥܢ. ܘܟܠ ܬܪܥܣܪ ܐܣܛܕܘ̈ܬܐ ܡܪܕܐ ܝܘܡܐ ܚܕ ܠܕܛܒܠܪܐܝܬ ܪܕܐ ܒܕܓܘܢ ܐܡܪܝܢܢ. ܐܠܘ ܐܪܥܐ ܡܬܬܙܝ̣ܥܐ ܗܘܬ݀ ܐܝܟ ܕܐܡ̣ܪܘ. ܙܕܩ ܗܘܐ ܕܬܠܬ ܡܐܐ ܘܬܠܬܝܢ ܘܬܠܬܐ ܐܣܛܕܘ̈ܬܐ. ܘܬܘܠܬܐ ܕܐܣܛܕܐ ܡܫܢܝܐ ܗܘܬ݀ ܦܪܚܬܐ ܡ̣ܢ ܕܘܟܬܗ̇. ܟܕ ܫܥܬܐ ܚܕܐ ܩܝܡܐ ܗܘܬ݀ ܒܐܐܪ. ܘܟܕ ܠܐ ܫܪܝܪ ܙܢܐ ܗܢܐ. ܐܦܠܐ ܡܬܬܙܥܘ ܡܬܬܙܝ̣ܥܐ ܐܪܥܐ ܚܘܕܪܢܐܝܬ ܡ̣ܢ ܡܕܢܚܐ ܠܡܥܪܒܐ ܐܝܟ ܕܐܡܪܘ. ܐܦܠܐ ܒܗܦܟܐ. ܘܕܠܐ ܬܘܒ ܠܐܦܝ̈ ܠܥܠ ܡܬܬܙܝܥܐ. ܝܕܝ̣ܥܐ ܡ̣ܢ ܗ̇ܝ ܕܐܠܘ ܠܐܦܝ̈ ܠܥܠ ܡܬܬܙܝ̣ܥܐ ܗܘܬ݀. ܙܕܩ ܗܘܐ ܕܝܘܡ ܡ̣ܢ ܝܘܡ ܠܘܬ ܡܘܙܠܬܐ ܡܬܩܪܒܝܢ ܗܘܝܢ. ܘܐܠܘ ܡܬܩܪܒܝܢ ܗܘܝܢ ܐܝܟܢܐ ܠܐ ܡܬܬܘ̈ܣܦܢ ܪ̈ܒܘܬܐ ܕܟܘܟ̈ܒܐ ܒܪ̈ܓܫܝܢ. ܘܐܠܘ ܬܘܒ ܠܐܦܝ̈ ܠܬܚܬ ܡܬܬܙܝܥܐ ܗܘܬ݀. ܟܕ ܫܕܝܢ ܗܘܝܢ ܟܐܦܐ ܡܕܡ ܠܐܦܝ̈ ܠܥܠ. ܙܕܩ ܗܘܐ ܕܠܐ ܡܬܘܡ ܡܛܝܐ ܗܘܬ݀ ܠܐܪܥܐ ܒܡܚܬܬܗ̇. ܒܗ̇ܝ ܕܐܪܥܐ ܝܬܝܪ ܢܛܝ̣ܠܐ ܘܝܩܝܪܐ ܡܢܗ̇. ܒܕܓܘܢ ܗ̣ܝ ܝܬܝܪ ܡ̣ܢ ܟܐܦܐ ܙܕܩ ܗܘܐ ܕܡܣܪܗܒܐܝܬ ܠܐ ܡܨܐ ܠܡܕܪܟܘ ܠܗ̇ܘ ܕܝܬܝܪ ܡܢܗ ܡܣܪܗܒ܆ ܓܠܝܐ. ܘܟܕ ܡܕܪܟܐ ܠܗ̇ ܘܥܠܝܗ̇ ܢܦܠܐ ܫܠܝ̣ܬܐ ܗ̱ܝ ܘܠܐ ܡܬܬܙܝܥܢܝ̣ܬܐ.

 

 

 

ܡܛܠ ܦܘܠܓܝ̈ܗ̇ ܕܐܪܥܐ

 

ܕܐܣܦܝܪܢܝܬܐ ܗ̱ܝ ܠܡ ܐܪܥܐ܆ ܡܢ ܟܕܘ ܐܬܚܘܝ. ܒܕܓܘܢ ܐܡܪܝܢܢ ܕܟܕ ܡܬܚܫܒܝ̣ܢܢ ܬܚܝܬ ܚܘܕܪܐ ܗ̇ܘ ܡܬܪܨܢܐ ܕܐܝܡܡܐ ܕܒܫܡܝܐ܆ ܕܒܬܪܟܢ ܡܢܢ ܡܬܚܘܐ. ܚܘܕܪܐ ܕܝܬܝܪ ܪܒ ܥܠ ܫܛܝ̣ܚܘܬܗ̇ ܕܐܪܥܐ. ܗ̣ܘ ܗܢܐ ܚܘܕܪܐ. ܠܬܪܬܝܢ ܡܢܘ̈ܢ ܫܘ̈ܝܬܐ ܡܦܠܓ ܠܗ̇ ܠܐܪܥܐ. ܘܡܬܩܪܐ ܣܘܪܛܐ ܕܫܘܝܘܬܐ. ܒܕܟܠܗ̇ ܫܢ̱ܬܐ. ܫܘܐ ܠܠܠܝܐ ܐܝܡܡܐ ܗܪܬܡܢ. ܐܝܟ ܕܥܬܝ̣ܕܝ̣ܢܢ ܠܡܚܘܝܘ. ܘܟܕ ܡܬܚܫܒܝ̣ܢܢ ܬܘܒ ܚܘܕܪܐ ܐ̱ܚܪܢܐ ܕܝܬܝܪ ܪܒ ܗ̇ܘ ܕܥܒܪ ܥܠ ܬܪ̈ܝܗܘܢ ܦܘ̈ܠܘ ܐܘܟܝܬ ܩܘܢܕܝ̈ܩܝܗ̇ ܕܐܪܥܐ. ܘܦܣܩ ܠܗ ܠܚܘܕܪܐ ܐܘܟܝܬ ܣܘܪܛܐ ܗ̇ܘ ܕܫܘܝܘܬܐ ܠܬܪܝܢ ܦܠܓ̈ܐ ܚܕ ܠܥܠ ܘܐ̱ܚܪܢܐ ܠܬܚܬ. ܗܝܕܝܢ ܡܬܦܠܓܐ ܗ̣ܝ ܐܪܥܐ ܠܐܪܒܥܐ ܪ̈ܘܒܥܝ̣ܢ ܫܘܝ̈ܐ. ܬܪܝܢ ܡܢܗܘܢ ܬܝܡܢܝ̈ܐ܆ ܘܬܪܝܢ ܐ̱ܚܪ̈ܢܐ ܓܪ̈ܒܝܝܐ. ܘܡܬܥܡܪܢܝ̣ܬܐ ܡ̇ܢ ܟܠܗ̇ ܒܚܕ ܡ̣ܢ ܗܠܝܢ ܬܪܝܢ ܪ̈ܘܒܥܐ ܓܪ̈ܒܝܝܐ ܟܐܡܬ݀ ܒܗ̇ܘ ܥܠܝܐ ܡܣܬܝܟܐ. ܘܟܕ ܡܬܚܫܒܝ̣ܢܢ ܚܘܕܪܐ ܐ̱ܚܪܢܐ ܪܒܐ ܗ̇ܘ ܕܥܒܪ ܥܠ ܐܪ̈ܒܥܬܝܗܘܢ ܦܘ̈ܠܘ ܕܬܪ̈ܝܗܘܢ ܗ̇ܢܘܢ ܚܘܕܪ̈ܐ. ܗܝܕܝܢ ܦܣܩ ܠܗ̇ ܠܡܬܥܡܪܢܝ̣ܬܐ ܗ̣ܘ ܗܢܐ ܚܘܕܪܐ ܠܬܪܝܢ ܦܠܓ̈ܐ ܫܘܝ̈ܐ. ܚܕ ܡܕܢܚܝܐ. ܘܐ̱ܚܪܢܐ ܡܥܪܒܝܐ. ܘܢܘܩܕܬܐ ܕܡܬܦܣܩܢܘܬ ܣܘܪܛܐ ܕܫܘܝܘܬܐ ܡܢܗ ܕܗܢܐ ܚܘܕܪܐ. ܩܘܒܬܗ̇ ܐܘܟܝܬ ܡܨܥܬܗ̇ ܡܪܢܝܬܐ ܕܐܪܥܐ ܡܬܩܪܝܐ. ܘܥܠ ܐܝܟܢܝܘܬܗ̇ ܕܕܘܟܬܐ ܗܕܐ ܘܠܐ ܡܕܡ ܐܫܟܚܢܢ ܒܟܬܒ̈ܐ ܕܝܘܢܝ̈ܐ. ܐܝܢ܆ ܠܗܢܕ̈ܘܝܐ ܫܡܥܢܢ ܕܐܡܪܝܢ. ܕܬܡܢ ܗ̣ܘ ܥܘܡܪܐ ܕܫܐܕ̈ܐ ܗ̇ܘ ܕܩܪܝܢ ܠܗ ܒܒܪܬ݀ ܩܠܗܘܢ ܟܢܓ. ܘܬܚܝܬ ܦܘܠܘܣ ܗ̇ܘ ܓܪܒܝܝܐ ܐܡܪܝܢ ܕܐܝܬ ܗ̣ܘ ܛܘܪܐ ܗ̇ܘ ܕܡܬܩܪܐ ܡܝܪ. ܘܥܘܡܪܐ ܗ̱ܘ ܕܡܠܐܟ̈ܐ. ܘܥܠ ܣܘܪܛܐ ܗ̇ܘ ܕܒܝܬ ܬܪ̈ܝܗܘܢ ܐܝܬ ܡܕܝܢ̱ܬܐ ܐܘܙܝܢ ܒܡܠܟܘܬܐ ܕܡܐܠܘ. ܘܚܣܢܐ ܙܘܗܝܬܓ ܘܡܕܒܪܐ ܬܐܢܝܫ. ܘܛܘܪ̈ܐ ܬܩܝ̣̈ܦܝ ܩܘܪܐ ܘܡܬܠܓ̈ܐ ܕܩܕܡ ܐܪܥܐ ܕܗܘ̈ܢܝܐ. ܘܡܛܠ ܕܠܗ̇ ܠܐܣܦܝ̣ܪ ܐܪܥܐ. ܒܬܠܬ ܡܐܐ ܘܫܬܝܢ ܡܢܘ̈ܢ ܦܠܓܘܗ̇ ܡܚܪ̈ܐ ܐܝܟ ܕܐܦ ܠܫܡܝ̈ܐ ܟܕ ܦܠܓܘܬ ܚܘܕܪܐ ܬܗܘܐ ܡ̣ܢ ܐܪܥܐ ܒܝܬ ܬܪܝܢ ܒܢܝ̈ܢܫܐ. ܡ̣ܢ ܐܠܨ̈ܬܐ ܕܠܘܩܒܠ ܚܕܕ̈ܐ ܢܗܘ̈ܝܢ ܪ̈ܓܠܝܗܘܢ. ܟܐܡܬ݀ ܣܘܪܛܐ ܬܪܝܨܐ ܗ̇ܘ ܕܢܒܗ ܡ̣ܢ ܬܚܝܬ ܪ̈ܓܠܐ ܕܨܝܢܝ̈ܐ ܗ̇ܢܘܢ ܕܒܣܟܝ̈ ܡܕܢܚܐ ܬܪܝܨܐܝܬ ܪܕܐ. ܘܬܚܝܬ ܪ̈ܓܠܝܗܘܢ ܕܗ̇ܢܘܢ ܕܒܓܐܕܝܪܐ ܓܙܪܬܐ ܕܒܣܟܝ̈ ܡܥܪܒܐ ܡܫܠܡ. ܒܗ̇ܝ ܕܪܝܫ ܟܠܢܫ ܠܐܦܝ̈ ܫܡܝܐ ܕܥܠܝ ܨܠܐ. ܘܪ̈ܓܠܐ ܠܐܦܝ̈ ܩܢܛܪܘܢ ܕܐܪܥܐ. ܕܬܚܬܝ. ܘܡܛܠ ܗܕܐ ܐܡܝ̣ܪܐ. ܕܪܚܝ̣ܩܘܬܐ ܕܒܝܬ ܪ̈ܝܫܝܗܘܢ ܕܗ̇ܢܘܢ ܕܩܝܡܝܢ ܥܠ ܐܪܥܐ. ܛܒ ܝܬܝܪܐ ܡ̣ܢ ܪܚܝ̣ܩܘܬܐ ܕܒܝܬ ܪ̈ܓܠܝܗܘܢ. ܐܠܐ ܗ̣ܝ ܗܕܐ ܪܚܝ̣ܩܘܬܐ ܒܗ̇ܢܘܢ ܕܡ̣ܢ ܚܕܕ̈ܐ ܡܒܥܕܝܢ ܡܬܚܘܝܐ ܘܠܐ ܡܬܚܘܝܐ ܒܗܢܘܢ ܕܩܪܝ̣ܒܝ̣ܢ.

 

 

 

ܡܛܠ ܐܘܪܟܗ̇ ܕܐܪܥܐ ܘܦܬܝܗ̇

 

ܐܘܪܟܗ̇ ܡ̇ܢ ܕܡܬܥܡܪܢܝ̣ܬܐ ܐܝܟ ܪܥܝܢܐ ܕܝܘ̈ܢܝܐ. ܡܫܪܝܐ ܡ̣ܢ ܓܙܪ̈ܬܐ ܗ̇ܢܝܢ ܫܬ ܕܒܡܥܪܒܐ ܗ̇ܢܝܢ ܕܡܬܩܪ̈ܝܢ ܛܘܒܬܢܝ̈ܬܐ ܘܠܥܠܡܝ̣̈ܢܝܬܐ. ܘܪ̈ܚܝ̣ܩܢ ܡ̣ܢ ܣܦܪ̈ܝ ܝܡܐ ܐܝܟ ܥܣܪ ܡܢܘ̈ܢ. ܡ̣ܢ ܬܠܬ ܡܐ ܘܫܬܝܢ. ܘܐ̱ܚܪ̈ܢܐ ܡܢܗܘܢ ܕܣܦܪ̈ܝ ܝܡܐ ܡܫܪܝܢ. ܘܡܛܠ ܗܕܐ ܬܪܝܢ ܛܘ̈ܦܣܐ ܕܐܘܪܟܐ ܡܫܬܟܚܝ̣ܢ ܒܟܬܒ̈ܐ ܠܚܕ ܐܬܪܐ. ܕܒܥܣܪܐ ܕܪ̈ܓܝ̣ܢ ܝܬܝܪ ܚܕ ܡܢܗܘܢ ܡ̣ܢ ܗ̇ܘ ܐ̱ܚܪܢܐ. ܦܬܝܗ̇ ܕܝܢ ܕܡܬܥܡܪܢܝ̣ܬܐ ܡ̣ܢ ܣܘܪܛܐ ܗ̇ܘ ܕܫܘܝܘܬܐ ܡܫܪܐ ܠܐܦܝ̈ ܓܪܒܝܐ. ܘܡܛܠܗܕܐ ܟܠ ܐܬܪܬܐ ܕܬܝܡܢܝ܇ ܒܨܝ̣ܪ ܗ̣ܘ ܦܬܝܗ܆ ܡ̣ܢ ܐܬܪܐ ܗ̇ܘ ܕܓܪܒܝܝ. ܟܐܡܬ݀ ܟܡܐ ܕܣܓܝܐ ܪܚܝ̣ܩܘܬܐ ܕܡ̣ܢ ܣܘܪܛܐ ܗ̇ܘ ܕܫܘܝܘܬܐ܆ ܝܬܝܪ ܣܓܐ ܘܦܬܝܐ.

 

 

 

ܡܛܠ ܩܠܝ̈ܡܐ ܫܒܥܐ

 

ܩܕܡܢܢ ܐܡ̣ܪܢܢ ܕܡܬܥܡܪܢܝ̣ܬܐ ܟܠܗ̇ ܠܓܪܒܝܐ ܗ̱ܝ ܡ̣ܢ ܣܘܪܛܐ ܗ̇ܘ ܕܫܘܝܘܬܐ ܕܬܚܝܬ ܐܣܦܝ̣ܪܐ ܬܪܝܨܬܐ܆ ܐܘܟܝܬ ܡ̣ܢ ܐܪܥܐ ܗ̱ܝ ܗ̇ܝ ܝܩܝ̣ܕܬܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܟܠܕܘܟ ܒܫܘܝܘܬ ܐܝܡܡܐ ܘܠܠܝܐ ܒܛܗܪ̈ܝܬܐ ܠܐܦܝ̈ ܓܪܒܝܐ ܡܨܛܠܝ̈ܢ ܛܠܢܝ̈ܬܐ ܟܠܗܝܢ. ܕܐܝܟ ܗܠܝܢ ܓܝܪ ܐܡ̣ܪ ܦܛܘܠܘܡܐܘܣ ܒܟܬܒܐ ܕܡܓܐܣܛܝ. ܐܠܐ ܒܬܪ ܗܟܢ ܝܠܦܗ̇ ܠܡܬܥܡܪܢܝ̣ܬܐ ܗ̇ܝ ܕܠܐܦܝ̈ ܬܝܡܢܐ ܡ̣ܢ ܣܘܪܛܐ ܕܫܘܝܘܬܐ. ܐܝܟ ܫܬܬܥܣܪ̈ܐ ܡܢܘ̈ܢ ܘܪܘܒܥܐ ܘܣܘܕܣܐ. ܘܐܟܬܒ ܥܠܝܗ̇ ܒܟܬܒܐ ܗ̇ܘ ܕܙܘܓܪܐܦܝܐ. ܘܗ̇ܝ ܕܡܬܐܡܪܐ ܡܛܠ ܐܬܪܐ ܗ̇ܘ ܕܫܘܝܘܬܐ ܕܡܡܙܓܐ ܗ̱ܘ. ܠܝܬ ܠܗ̇ ܕܘܡܝܐ. ܘܝܕܝ̣ܥܐ ܗܕܐ ܡ̣ܢ ܗ̇ܝ ܕܡܣܝܛܝ̣ܢ ܘܫܘܚܪܝܢ ܘܡܚܪܟܝ̣ܢ ܥܡܘܪ̈ܘܗܝ. ܘܟܠܗܘܢ ܗ̇ܢܘܢ ܕܩܪܝ̣ܒܝܢ ܒܓܘܢܐ ܘܣܥܪܐ ܘܥܝ̈ܕܐ ܘܗܘܢܐ. ܘܐܝܟܢܐ ܢܬܡܙܓ ܐܬܪܐ ܐܝܢܐ ܕܡܪܬܚ ܫܡܫܐ ܡܘܚܝ̈ܗܘܢ ܕܥܡܘܪ̈ܘܗܝ. ܐܝܟܢܐ ܕܟܕ ܩܠܝܠ ܢܪܚܩ ܡܢܗܘܢ. ܒܗܠܝܢ ܬܪܝܢ ܫܘܚ̈ܠܦܐ ܕܝܕܥܝ̣ܢܢ ܒܣܬܘܐ ܟܝܬ ܘܒܩܝܛܐ ܡܓܗܝܢ ܩܠܝܠ ܡ̣ܢ ܝܩܕܢܐ ܘܡܬܬܢܝ̣ܚܝ̣ܢ.

 

 

 

ܩܠܝܡܐ ܩܕܡܝܐ

 

ܩܠܝ̣ܡܐ ܡ̇ܢ ܩܕܡܝܐ ܡܫܪܐ ܐܝܟ ܕܒܦܬܝܐ ܡܢܗ ܕܣܘܪܛܐ ܕܫܘܝܘܬܐ. ܘܡܫܠܡ ܠܐܦܝ̈ ܓܪܒܝܐ܆ ܟܡܝܘܬܐ ܕܥܣܪܝܢ ܕܪ̈ܓܐ. ܘܐܪܒܥܣܪ̈ܐ ܩܛܝ̣̈ܢܬܐ. ܘܐܝܬ ܒܗ ܡ̇ܢ ܡܕܝ̈ܢܬܐ. ܡܐܪܘܝ ܗ̇ܝ ܕܒܢܗ̇ ܘܩܪܗ̇ ܥܠ ܫܡ ܡܐܪܝ̣ܣ ܒܪܬ݀ ܦܪܥܘܢ ܗ̇ܝ ܕܪܒܝܬܗ. ܘܡ̣ܢ ܡܕܢܚܐ ܡܫܪܐ ܡ̣ܢ ܐܪܥܐ ܕܨܝܢ ܘܥܒܪ ܥܠ ܢܗܪ̈ܘܬܐ ܗ̇ܢܘܢ ܕܒܗܘܢ ܣܠܩ̈ܢ ܣܦܝ̣̈ܢܐ ܡ̣ܢ ܝܡܐ. ܘܡܫܠܡ ܠܘܬ ܝܡܐ ܐܘܩܝܐܢܘܣ. ܘܥܡܘܪ̈ܘܗܝ ܡܫܟܪܝܢ ܘܥܪ̈ܛܠܝܝ̣ܢ ܘܡܫܡܪܝܢ ܕܠܐ ܢܡܘܣ. ܘܚܝ̈ܘܬܗܘܢ ܒܥܪܝ̣ܪ̈ܝ̣ܢ. ܘܦܪ̈ܚܬܗܘܢ ܕܚܝ̣̈ܠܢ. ܘܬܢܝ̣ܢܝ̈ܗܘܢ ܪܘܪ̈ܒܝܢ. ܘܪ̈ܚܫܝܗܘܢ ܣܓܝܐܝܢ.

 

 

 

ܩܠܝܡܐ ܬܪܝܢܐ

 

ܘܗܢܐ ܡ̇ܢ ܡܫܪܐ ܡ̣ܢ ܟܪ ܕܫܠܡ ܩܠܝ̣ܡܐ ܗ̇ܘ ܩܕܡܝܐ܆ ܘܡܫܠܡ ܠܐܦܝ̈ ܓܪܒܝܐ. ܟܪ ܕܦܬܝܗ ܥܣܪܝܢ ܘܫܒܥܐ. ܟܪ ܕܦܬܝܗ ܥܣܪܝܢ ܘܫܒܥܐ ܕܪ̈ܓܝܢ ܘܬܪܬܥܣܪ̈ܐ ܩܛܝ̣̈ܢܝܢ. ܘܡܕܢܚܐ ܡܫܪܐ ܡ̣ܢ ܐܪܥܐ ܕܨܝܢ ܘܥܒܪ ܥܠ ܓܪܒܝܗܘܢ ܕܛܘܪ̈ܝ ܩܐܡܪܘܢ ܘܟܒܘܓ ܘܝܐܪܐܢܣܝ. ܘܐܘܓܝܢ. ܘܐܝܬ ܒܗ ܡ̇ܢ ܡܕܝ̣̈ܢܬܐ ܕܟܘ̈ܫܝܐ ܣܘܐܢܝ ܡܕܝܢ̱ܬܐ ܘܕܒܝ̣ܠ. ܘܒܡܥܪܒܝܗ ܥܡܢ ܘܗܓܪ. ܘܝܡܐܡܐ. ܘܡܗܪܗ ܘܫܒܐ ܘܣܒܐ ܘܝܬܪܒ ܘܡܠܟܘܬܐ ܕܚܒܫܝ̈ܐ. ܘܐܣܘܐܢ ܘܩܘܨܘܨܥܝܕ ܥܠܝܐ ܘܡܫܠܡ ܠܘܬ ܝܡܐ ܐܘܩܝܐܢܘܣ. ܘܥܡܘܪ̈ܘܗܝ ܒܨܝܪ ܫܟܝ̣ܪܝܢ ܡ̣ܢ ܗ̇ܢܘܢ ܕܒܩܠܝ̣ܡܐ ܩܕܡܝܐ. ܗ̣ܘ ܗܟܘܬ ܘܚܝ̈ܘܬܗܘܢ. ܘܠܐ ܫܠܝ̣ܚܝܢ ܐܝܟ ܗ̇ܢܘܢ ܘܡܬܚܫܚܝ̣ܢ ܒܠܘ̈ܚܫܬܐ ܘܐܪ̈ܙܐ.

 

 

 

ܩܠܝܡܐ ܬܠܝܬܝܐ

 

ܗ̣ܘ ܗܢܐ ܡܫܪܐ ܡ̣ܢ ܟܪ ܕܫܠܡ ܩܠܝ̣ܡܐ ܗ̇ܘ ܬܪܝܢܐ. ܘܡܫܠܡ ܠܐܦܝ̈ ܓܪܒܝܐ ܟܪ ܕܦܬܝܗ ܬܠܬܝܢ ܘܬܠܬܐ ܕܪ̈ܓܝ̣ܢ. ܘܫܬܬ݀ ܥܣܪܐ ܩܛܝ̈ܢܝܢ. ܘܡ̣ܢ ܡܕܢܚܐ ܡܫܪܐ ܡ̣ܢ ܐܪܥܐ ܕܨܝܢ. ܘܒܗ̇ ܗ̣ܘ ܟܘܪܣܝ ܡܠܟܘܬܗ̇ ܘܡܠܟܘܬ ܗܢܕܘ ܒܪܝܬܐ. ܘܒܗ̇ ܐܝܬ ܡܕܝܢ̱ܬܐ ܬܐܢܝܫ ܘܩܢܕܗܐܪ ܘܡܘܠܬܐܢ ܘܟܪܘܪܘܣܓܣܬܢ. ܘܟܪܡܐܢ ܘܦܪܣ ܘܐܨܦܗܐܢ. ܘܐܬܪܐ ܕܗܘ̈ܙܝܐ ܘܟܘܦܗ. ܘܡܕܡ ܡ̣ܢ ܣܘܪܝܐ ܘܦܐܠܣܛܝܢܝ ܘܕܪܡܣܘܩ ܘܐܘܪܫܠܡ ܘܝܡܐ ܕܣܘܦ. ܘܡܕܒܪܐ ܘܐܪܥܐ ܕܡܨܪ̈ܝܐ ܘܐܠܟܣܢܕܪܝܐ ܘܐܦܪܝ̣ܩܝ̣. ܘܫܪ̈ܒܬܐ ܕܒܪܒܪ̈ܝܐ ܕܒܡܥܪܒܐ. ܘܡܫܠܡ ܒܐܘܩܝܐܢܘܣ.

 

 

 

ܩܠܝ̣ܡܐ ܪܒܝܥܝܐ

 

ܗ̣ܘ ܗܢܐ ܡܫܪܐ ܡ̣ܢ ܟܪ ܕܫܠܡ ܩܠܝ̣ܡܐ ܗ̇ܘ ܬܠܝܬܝܐ. ܘܡܫܠܡ ܠܐܦܝ̈ ܓܪܒܝܐ. ܟܪ ܕܦܬܝܗ ܬܠܬܝܢ ܘܬܡܢܝܐ ܕܪ̈ܓܐ. ܘܬܠܬܝܢ ܘܚܡܫ ܩܛܝ̈ܢܝܢ. ܘܡ̣ܢ ܡܕܢܚܐ ܡܫܪܐ ܡ̣ܢ ܐܪܥܐ ܕܨܝܢ. ܘܥܒܪ ܥܠ ܡܕܝ ܘܐܪܝ ܘܒܒܝܠ. ܘܡܗܡܕܐܢ ܘܐܬܘܪ. ܘܢܨܝ̣ܒܝ̣ܢ ܘܚܪܢ ܘܐܘܪܗܝ ܘܡܒܘܓ ܘܒܪܘܘܐܐ ܘܐܘܦܡܝܐ ܘܩܪܝ̣ܛܝ̣. ܘܩܘܦܪܘܣ ܘܪܘܕܘܣ ܘܣܠܘܩܝܐ ܘܚܡܨ ܘܚܡܬ. ܘܛܪܣܘܣ ܘܡܡܦܣܘܣܛܝ. ܘܐܢܛܝܘܟܝܐ. ܘܡܫܠܡ ܒܐܘܩܝܐܢܘܣ. ܥܡܘܪ̈ܘܗܝ ܚܟܝ̣ܡܝ̣ܢ ܘܡܛܟܣܝ̣ܢ ܘܫܦܝ̣ܪܝܢ ܡ̣ܢ ܟܠܗܘܢ ܒܢܝ̈ܢܫܐ.

 

 

 

ܩܠܝܡܐ ܚܡܝܫܝܐ

 

ܗ̣ܘ ܗܢܐ ܡܫܪܐ ܡ̣ܢ ܟܪ ܕܫܠܡ ܩܠܝ̣ܡܐ ܗ̇ܘ ܪܒܝܥܝܐ. ܘܡܫܠܡ ܠܐܦܝ̈ ܓܪܒܝܐ. ܟܪ ܕܦܬܝܗ ܐܪܒܥܝܢ ܘܬܠܬܐ ܕܪ̈ܓܝ̣ܢ ܘܚܡܫܥܣܪ̈ܐ ܩܛܝ̈ܢܝܢ. ܘܡ̣ܢ ܡܕܢܚܐ ܡ̇ܢ ܡܫܪܐ. ܘܡ̣ܢ ܐܪܥܐ ܕܗܘ̈ܢܝܐ. ܘܓܘܓ ܗ̇ܢܘܢ ܚܒܝ̈ܫܝܐ. ܘܥܒܪ ܥܠ ܫܪ̈ܒܬܐ ܡܫܚ̈ܠܦܬܐ ܕܛܘ̣ܪ̈ܩܝܐ ܥܕܡܐ ܠܟܐܫܓܪ. ܒܐܠܐܱܣܐܓܘܬ. ܘܣܡܪܩܢܕ ܘܒܘܟܐܪܐ. ܘܟܘܪܐܙܡ ܥܕܡܐ ܠܬܪܥ ܬܪ̈ܥܝܢ ܕܘܡܝܦܛܪܩܛ ܘܐܪܡܢܝܐ ܘܡܝܠܝܛܝܢܝ ܘܪܘܡܝ ܪܒܬܐ ܘܩܘܣܛܢܛܝܢܘܦܘܠܝܣ. ܘܐܬܝܢܣ ܘܬܪܐܩܝ. ܘܡܫܠܡ ܠܘܬ ܝܡܐ. ܥܡܘܪ̈ܘܗܝ ܕܝܢ ܣܡܩܪ̈ܝܝܢ ܘܣܓܝ̈ܐܝܝ ܩܪ̈ܒܐ ܐܢܘܢ.

 

 

 

ܩܠܝ̣ܡܐ ܫܬܝܬܝܐ

 

ܗ̣ܘ ܗܢܐ ܡܫܪܐ ܡ̣ܢ ܟܪ ܕܫܠܡ ܩܠܝ̣ܡܐ ܗ̇ܘ ܚܡܝܫܝܐ ܘܡܫܠܡ ܠܐܦܝ̈ ܓܪܒܝܐ ܟܪ ܕܦܬܝܗ ܐܪܒܥܝܢ ܓܪܒܝܐ ܟܪ ܕܦܬܝܗ ܐܪܒܥܝܢ ܘܫܬܐ ܕܪ̈ܓܐ ܘܚܡܫܝܢ ܘܚܕܐ ܩܛܝ̣ܢܬܐ. ܘܡܫܪܐ ܡ̣ܢ ܡܕܢܚܐ. ܡ̣ܢ ܐܪܥ ܛܘ̣ܪܩܝܣ ܐܘܟܝܬ ܕܘܟ̈ܝܬܐ ܕܡܬܩܪ̈ܝܢ ܩܐܝ̈ ܘܩܘܢ ܘܟܪܡܝ̣ܪ ܘܟܝܡܐܓ ܘܦܐܪܐܒ. ܘܥܒܪ ܥܠ ܝܡܐ ܕܛܪܒܝܙܘܢܛܐ ܒܩܘܪܒܐ ܡ̣ܢ ܒܘܙܢܛܝܐ. ܘܦܪܢܓܝܐ. ܘܒܗ ܥܡܪܝܢ ܥܡ̈ܡܐ ܗ̇ܢܘܢ ܕܡܬܩܪܝܢ ܓܠܘܦܪܝܓܘܣ ܘܙܥܘܪܝܢ ܒܩܘ̈ܡܬܗܘܢ. ܗ̣ܘ ܗܟܘܬ ܘܚܝ̈ܘܬܗܘܢ. ܘܢܫܝ̈ܗܘܢ ܕܡܬܩܪ̈ܝܢ ܐܡܙܐܢ̈ܐܣ. ܦܣ̈ܩܢ ܠܬܕܐ ܕܝܡܝ̣ܢܐ. ܐܝܟ ܕܢܬܥ̈ܬܕܢ ܠܡܟܫܛ. ܘܡܫܠܡ ܒܝܡܐ ܡܥܪܒܝܐ.

 

 

 

ܩܠܝܡܐ ܫܒܝܥܝܐ

 

ܗ̣ܘ ܗܢܐ ܡܫܪܐ ܡ̣ܢ ܟܪ ܕܫܠܡ ܩܠܝ̣ܡܐ ܗ̇ܘ ܫܬܝܬܝܐ. ܘܡܫܠܡ ܠܐܦܝ̈ ܓܪܒܝܐ ܟܪ ܕܦܬܝܗ ܒܩܘܪܒܐ ܡ̣ܢ ܚܡܫܝܢ ܕܪ̈ܓܐ. ܘܒܗܢܐ ܩܠܝ̣ܡܐ ܒܨܝ̣ܪܐ ܡܬܥܡܪܢܝ̣ܬܐ. ܘܒܡܕܢܚܗ ܛܘܪ̈ܐ ܐܝܬ ܡܙܩ̈ܦܐ. ܘܥܡܪܝܢ ܒܗܘܢ ܗ̇ܢܘܢ ܕܡܬܩܪܝܢ ܓܘܓ ܘܡܓܘܓ. ܘܐܡܘ̈ܬܐ ܐ̱ܚܪ̈ܢܝܬܐ ܒܥܪܝ̣ܪ̈ܝܬܐ. ܘܒܗ̇ ܗ̣ܝ ܡܕܝܢ̱ܬܐ ܗ̇ܝ ܕܡܬܩܪܝܐ ܒܘܪܘܣܬܐܢܝ̣. ܘܢܗܪܐ ܒܐܬܪܐ ܓܘܝܐ ܘܓܕܘ ܕܣܐܪܡܐܛܐ ܠܓܘ ܡ̣ܢ ܥܒܪ ܥܠ ܛܘܪ̈ܘ ܒܐܫܟܪܬ ܘܬܚܘ̈ܡܐ ܕܒܘܓܢ̈ܟܝܐ. ܘܒܘܠܓܪ̈ܝܐ ܘܣܩܘ̈ܬܝܐ. ܘܡܫܠܡ ܒܝܡܐ ܡܥܪܒܝܐ. ܘܥܫܝ̣ܢ ܩܘܪܐ ܒܩܠܝ̣ܡܐ ܗܢܐ. ܘܟܪܝܢ ܚܝܝ̈ ܥܡܘܪ̈ܘܗܝ. ܘܠܐ ܒܢܝܢ ܒ̈ܬܐ. ܐܠܐ ܥܠ ܥܓ̈ܠܬܐ ܥܡ ܫܡܫܐ ܟܪܟܝܢ. ܘܒܬܪ̈ܘܗܝ ܕܩܠܝ̣ܡܐ ܗܢܐ ܒܓܪܒܝܐ. ܫܪ̈ܒܬܐ ܐܝܬ ܒܨܝ̣ܪ̈ܬܐ ܕܡܬܩܪ̈ܝܢ ܛܘܪܩܐܝܬ ܐܝܣܘܐ ܘܘܪܐܢܓ ܘܝܘܪܐ. ܐ̱ܢܫ̈ܐ ܒܥܝ̣ܪ̈ܝܐ ܘܣܓܝ ܒܥܪܝ̣ܪ̈ܝܐ ܕܠܚܝ̈ܘܬܐ ܘܠܒܢܝ̈ܢܫܐ ܕܡܝܢ. ܘܗܢܐ ܡ̇ܢ ܙܢܐ ܕܦܘܠܓܐ ܕܦܠܓܘܗ̇ ܚܟܝ̈ܡܐ ܠܡܬܥܡܪܢܝ̣ܬܐ. ܡܟܝܠ ܠܙܢܝ̈ܐ ܐ̱ܚܪ̈ܢܐ ܕܦܘ̈ܠܓܐ ܙܕܩ ܠܢ ܕܢܣܥܘܪ.

 

 

 

ܡܛܠ ܦܘܠܓܐ ܕܢܘܚ

 

ܢܘܚ ܡ̇ܢ ܓܝܪ ܠܬܠܬ ܡܢܘ̈ܢ ܦܠܓܗ̇ ܠܐܪܥܐ. ܐܝܟ ܕܠܦܬܝܐ. ܘܠܦܢܝܬܐ ܡ̇ܢ ܬܝܡܢܝܬܐ. ܕܒܗ̇ ܐܢܘܢ ܐܘܟܡ̈ܐ. ܠܚܡ ܒܪܗ ܝܗܒܗ̇. ܘܠܦܢܝܬܐ ܓܪܒܝܝܬܐ ܕܒܗ̇ ܐܢܘܢ ܚܘܪ̈ܐ. ܠܝܦܬ ܒܪܗ ܝܗܒܗ̇. ܘܠܡܨܥܬܐ ܕܒܗ̇ ܐܢܘܢ ܫܚ̈ܡܐ. ܠܫܝܡ ܒܪܗ ܝܗܒܗ̇.

 

 

 

ܡܛܠ ܦܘܠܓܐ ܕܗܢܕ̈ܘܝܐ

 

ܗܢܕ̈ܘܝܐ ܕܝܢ ܠܬܫܥ ܡܢܘ̈ܢ ܦܠܓܘܗ̇ ܠܐܪܥܐ. ܠܡܕܢܚܐ ܘܩ̣ܪܐܘܘܗ̇ ܒܠܟܣܝܣܗܘܢ ܝܘܪܐܒ. ܘܠܡܥܪܒܐ ܘܩ̣ܪܐܘܘܗ̇ ܝܣܓܡ. ܘܠܓܪܒܝܐ ܘܩ̣ܪܐܘܘܗ̇ ܐܘܬܪ. ܘܠܬܝܡܢܐ ܘܩ̣ܪܐܘܘܗ̇ ܕܟܫܢ. ܘܠܡܕܢܚ ܓܪܒܝ ܘܩ̣ܪܐܘܘܗ̇ ܒܐܝܒ ܘܠܡܕܢܚ ܬܝܡܢ ܘܩ̣ܪܐܘܘܗ̇ ܠܟܢܝ. ܘܠܡܥܪܒ ܬܝܡܢ. ܘܩ̣ܪܐܘܘܗ̇ ܢܝܪܬ. ܘܠܡܨܥܬܐ ܕܟܠܗܝܢ ܘܩ̣ܪܐܘܘܗ̇ ܡܪܕܝܫ.

 

 

 

ܡܛܠ ܦܘܠܓܐ ܕܦܪ̈ܣܝܐ

 

ܐܦܪܝܕܘܢ ܡ̇ܢ ܓܢ̱ܒܪܗܘܢ ܕܦܪ̈ܣܝܐ ܠܬܠܬ ܡܢܘ̈ܢ ܦܠܓܗ̇ ܠܐܪܥܐ ܐܝܟ ܕܠܐܘ̣ܪܟܐ. ܘܠܦܢܝ̣ܬܐ ܡ̇ܢ ܡܕܢܚܝܬܐ ܕܒܗ̇ ܐܢܘܢ ܛܘܪ̈ܩܝܐ ܘܨܝ̣ܢܝ̈ܐ ܝܗܒܗ̇ ܠܒܪܗ ܬܘܓ. ܘܠܦܢܝ̣ܬܐ ܡܥܪܒܝܬܐ ܕܒܗ̇ ܐܢܘܢ ܪ̈ܘܡܝܐ ܝܗܒܗ̇ ܠܒܪܗ ܣܠܡ. ܘܠܡܨܥܝܬܐ ܕܒܗ̇ ܗ̣ܝ ܐܝܪܐܢܫܗܪ ܝܗܒܗ̇ ܠܒܪܗ ܐܝܪܓ.

 

 

 

ܡܛܠ ܦܘܠܓܐ ܐ̱ܚܪܢܐ ܕܦܪ̈ܣܝܐ

 

ܐ̱ܚܪ̈ܢܐ ܕܝܢ ܡ̣ܢ ܦܪ̈ܣܝܐ ܠܫܒܥ ܡܠܟ̈ܘܢ ܦܠܓܘܗ̇ ܗ̇ܢܘܢ ܕܠܟܠ ܚܕܐ ܡܢܗܝܢ (ܟܫܘܪ ܦܐܪ̈ܣܝܗ̈) ܩܪܝܢ ܒܠܥܙܗܘܢ. ܘܡܠܟܘܬܐ ܡ̇ܢ ܩܕܡܝܬܐ ܗ̇ܝ ܕܗܢܕ̈ܘܝܐ. ܕܬܪܬܝܢ ܕܝܢ ܗ̇ܝ ܕܐܪ̈ܐܒܝܐ. ܕܬܠܬ ܗ̇ܝ ܕܣܘܪ̈ܝܝܐ ܘܡܥܪ̈ܒܝܐ. ܕܐܪܒܥ ܗ̇ܝ ܕܐܝܪܐܢܫܗ. ܕܚܡܫ ܗ̇ܝ ܕܪ̈ܘܡܝܐ ܘܣܩܘ̈ܬܝܐ. ܕܫܬ ܗ̇ܝ ܕܛܘ̣ܪ̈ܩܝܐ ܘܗܘܢܝ̈ܐ. ܕܫܒܥ ܗ̇ܝ ܕܨܝ̣ܢܝ̈ܐ ܘܬܒܬܝ̈ܐ ܕܡܥܗܕ ܠܗܘܢ ܢܒܝܐ ܕܢܝܐܝܠ.

 

 

 

ܡܛܠ ܦܘܠܓܐ ܕܝܘ̈ܢܝܐ

 

ܦܛܘܠܘܡܐܘܣ ܡ̇ܢ ܒܟܬܒܐ ܕܡܝܓܝܣܛܝ. ܠܫܒܥܐ ܗ̇ܢܘܢ ܩܠܝ̣̈ܡܐ ܕܚܘܝ̣ܢܢ ܦܠܓܗ̇ ܠܡܬܥܡܪܢܝ̣ܬܐ ܠܦܘܬ ܕܐܣܦܝܪ ܫܡܝܐ. ܘܝܬܝ̣ܪܘܬܐ ܘܒܨܝ̣ܪܘܬܐ ܕܐܝܡܡ̈ܐ ܘܠܝ̈ܠܘܬܐ. ܒܟܬܒܐ ܕܝܢ ܕܙܘܓܪܐܦܝܐ ܐܘܟܝܬ ܕܡܟܬܒܢܘܬ ܐܪܥܐ ܠܬܠܬ ܬܘܒ ܦܠܓܗ̇. ܐܝܟ ܕܠܐܘܪܟܐ ܟܐܡܬ ܠܟܠܗ̇ ܐܪܥܐ ܗ̇ܝ ܕܠܡܕܢܚܐ ܡ̣ܢ ܡܨܪܝܢ. ܐܣܝܐ ܩܪܗ̇ ܓܘܢܐܝܬ. ܘܠܦܢܝ̣ܬܐ ܡ̇ܢ ܡܥܪܒܝܬܐ. ܡܛܠ ܕܝܡܐ ܐܕܪܝܘܣ ܗܢܐ ܪܒܐ ܕܒܝܬ ܐܠܟܣܢܕܪܝܐ ܠܒܘܙܢܛܝܐ ܠܬܪܬܝܢ ܡܢܘ̈ܢ ܦܣܩ ܠܗ. ܠܦܢܝ̣ܬܐ ܗ̇ܝ ܕܠܓܪܒܝܐ ܡ̣ܢ ܗܘܐ ܝܡܐ ܥܕܡܐ ܒܢܝ̈ܢܫܐ ܚܘܪ̈ܐ ܘܣܡܩܪ̈ܝܐ ܐܘܪܝ̣ܦܝ ܩܪܗ̇. ܘܠܦܢܝ̣ܬܐ ܗ̇ܝ ܕܠܬܝܡܢܐ ܡ̣ܢ ܝܡܐ ܗܢܐ ܥܕܡܐ ܠܐܪܥܐ ܗ̇ܝ ܝܩܝ̣ܕܬܐ ܐܘܟܝܬ ܕܣܘܪܛܐ ܕܫܘܝܘܬܐ ܕܒܗ ܐܢܘܢ ܐܘܟܡ̈ܐ ܘܫܚ̈ܡܐ. ܠܝܒܘܐܝ ܩܪܗ̇. ܘܡܛܠ ܕܦܢܝ̣ܬܐ ܗ̇ܝ ܡܕܢܚܝܬܐ ܥܐܦܐ ܗ̱ܝ ܕܗ̇ܝ ܡܥܪܒܝܬܐ. ܦܪܫ ܡܢܗ̇ ܠܒܒܝܠ ܘܟܘܪܣܐܢ ܘܐܣܝܐ ܙܥܘܪܬܐ ܫܡܗ ܐܢܝܢ. ܘܠܕܫܪܟܐ ܐܣܝܐ ܪܒܬܐ.

 

 

 

ܢܝܫܐ ܬܠܝܬܝܐ ܡܛܠ ܒܘ̈ܚܢܐ ܕܐܣܛܘ̈ܟܐ ܡܝܢܝܐ ܩܕܡܝܬ݀ ܟܝܢܗܘܢ ܕܡܝ̈ܐ

 

ܕܩܪܝ̣ܪܝ̣ܢ ܠܡ ܡܝ̈ܐ ܘܪܛܝ̣ܒܝ̣ܢ ܠܐ ܐ̱ܢܫ ܐܬܦܫܟ. ܐܠܐ ܐ̱ܢܫܝ̈ܢ ܐܡ̣ܪܘ ܕܐܪܥܐ ܝܬܝܪ ܡ̣ܢ ܡܝ̈ܐ ܩܪܝ̣ܪܐ ܒܝܕ ܬܪܬܝܢ. ܚܕܐ ܡ̇ܢ ܕܐܪܥܐ ܝܬܝܪ ܠܒܝ̣ܕܐ ܘܡܛܠ ܗܕܐ ܝܬܝܪ ܩܪܝ̣ܪܐ. ܕܬܪܬܝܢ ܕܝܢ ܕܐܪܥܐ ܝܬܝܪ ܪܚܝ̣ܩܐ ܡ̣ܢ ܙܘܥܐ ܡܘܙܠܬܢܝܐ ܕܡܚܡ ܘܠܘܩܒܠ ܣܥܝܐ ܩܕܡܝܐ ܐܡܪܝܢܢ ܕܐܦܢ ܟܠ ܩܪܝ̣ܪܘܬܐ ܥܠܬܐ ܗ̱ܝ ܕܠܒܝ̣ܕܘܬܐ. ܐܠܐ ܠܐ ܐܠܨܐ ܕܟܠ ܠܒܝ̣ܕܘܬܐ ܥܠܬܢܝܬܐ ܬܗܐ ܕܩܪܝ̣ܪܘܬܐ. ܒܕܩܛܦܣܝ̣ܣ ܟܘܠܢܝܬܐ ܠܐ ܗܦܟܐ ܥܠ ܢܦܫܗ̇. ܒܕܓܘܢ ܡܨܝܐ ܕܠܒܝ̣ܕܘܬܗ̇ ܕܐܪܥܐ ܠܘ ܡ̣ܢ ܩܪܝ̣ܪܘܬܗ̇ ܗ̣ܝ. ܐܠܐ ܡ̣ܢ ܥܠܬܐ ܐ̱ܚܪܬܐ. ܘܠܘܩܒܠ ܣܥܝܐ ܬܪܝܢܐ ܐܡܪܝܢܢ. ܕܙܘܥܐ ܡܘܙܠܬܢܝܐ ܐܠܘ ܡܚܡ ܗܘܐ. ܠܐ ܙܕܩ ܗܘܐ ܕܬܫܬܠܛ ܩܪܝ̣ܪܘܬܐ ܥܠ ܐܪܥܐ ܘܡܝ̈ܐ ܘܐܐܪ ܟܕ ܡܪܚܩ ܗܘܐ ܫܡܫܐ. ܫܪܝ̣ܟܐ ܡܕܝܢ ܕܡܝ̈ܐ ܝܬܝܪ ܩܪܝ̣ܪܝܢ ܡ̣ܢ ܐܪܥܐ. ܘܝܕܝ̣ܥܐ ܡ̣ܢ ܗ̇ܝ ܕܓܫܬܢ ܡܢܗܘܢ ܐܘ ܡ̣ܢ ܐܪܥܐ ܝܬܝܪ ܩܐܪܐ.

 

 

 

ܡܛܠ ܩܛܝ̣ܪܘܬܗܘܢ ܕܡܝ̈ܐ

 

ܡܝ̈ܐ ܓܝܪ ܟܝܢܐܝܬ ܩܛܪܝ̣ܢ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܟܕ ܡܪܚܩ ܗ̇ܘ ܕܡܚܡ ܟܐܡܬ ܫܡܫܐ ܡܓܠܕܝ̣ܢ. ܘܟܕ ܟܝܢܐܝܬ ܩܛܪܝܢ. ܐܠܨܐ ܕܠܘ ܟܝܢܐܝܬ ܡܬܐܫܕܝ̣ܢ. ܐܠܐ ܒܥܠܬ݀ ܡܦܪܫܢܘܬܗܘܢ.

 

 

 

ܡܛܠ ܓܘܢܗܘܢ ܘܛܥܡܗܘܢ

 

ܐܠܘܠܐ ܩܢܝܢ ܗܘܘ ܓܘܢܐ ܐܦܠܐ ܡܬܚܙܝܢ ܗܘܘ. ܐܦܠܐ ܬܘܒ ܥܛܦܝ̣ܢ ܗܘܘ ܙܠܝ̣̈ܩܐ ܡ̣ܢ ܫܛܝ̣ܦܬܐ ܗ̇ܝ ܕܡܠܝܐ ܡܝ̈ܐ. ܐܟܡܐ ܕܠܐ ܥܛܦܝ̣ܢ ܡ̣ܢ ܗ̇ܝ ܕܣܦܝ̣ܩܐ. ܘܡܛܠ ܛܥܡܗܘܢ ܒܦܘܫܟܐ ܚܢܢ. ܟܕ ܠܐ ܝܕܥܝ̣ܢܢ ܐܢ ܒܚܝܠܐ ܗ̇ܘ ܓܫܘܫܐ ܡܪܓܫܝ̣ܢܢ ܒܗܘܢ ܒܕܫܬܝܢܢ. ܐܘ ܒܗ̇ܘ ܛܥܘܡܐ.

 

 

 

ܡܛܠ ܐܣܟܡܝ̈ܗܘܢ

 

ܕܐܣܦܝܪ̈ܢܝܝܢ ܠܡ ܡܝ̈ܐ ܝܕܝܥܐ ܡ̣ܢ ܬܠܬ. ܚܕܐ ܡ̇ܢ ܗ̇ܘ ܕܪܕܐ ܒܝܡܐ. ܩܕܡܝܬ݀ ܠܪܝܫܗ ܕܛܘܪܐ ܚܙܐ܆ ܐܝܛܐ ܠܫܦܘܠܘ̈ܗܝ ܛܘܪܐ. ܕܬܪܬܝܢ ܕܝܢ ܕܟܕ ܪܡܝܢܢ ܡܝ̈ܐ ܠܐܦܝ̈ ܠܥܠ ܡܣܬܟܡܘ ܡܣܬܟܡܢ ܓܠܝ̣ܠܐܝܬ ܛܘܦܘ̈ܗܝ. ܘܗܟܢܐ ܬܘܒ ܟܕ ܪܐܣܝ̣ܢܢ ܛܘ̈ܦܐ ܡܕܡ ܥܠ ܥܦܪܐ ܕܛܒ ܕܚܝ̣ܚ. ܕܬܠܬ ܕܝܢ ܡ̣ܢ ܗ̇ܝ ܕܦܫܝ̣̈ܛܐ ܐܢܘܢ. ܘܐܣܦܝ̣ܪܢܝܐ ܗ̱ܘ ܐܣܟܡܐ ܠܟܠܗܘܢ ܦܫܝ̈ܛܐ.

 

 

 

ܡܛܠ ܐܬܪܗܘܢ ܟܝܢܝܐ ܕܡܝ̈ܐ

 

ܐܬܪܗܘܢ ܟܝܢܝܐ ܕܡܝ̈ܐ ܠܥܠ ܗ̣ܘ ܡ̣ܢ ܐܪܥܐ. ܘܐܠܘܠܐ ܫܢܢ̈ܬܐ ܗܠܝܢ ܕܢܕܝ̈ ܡ̣ܢ ܐܪܥܐ. ܥܠ ܟܠܗ̇ ܡܬܦܪܣܝܢ ܗܘܘ ܡܝ̈ܐ. ܘܠܟܠܗ̇ ܡܛܒܥܝܢ ܗܘܘ. ܐܠܐ ܗ̣ܝ ܗܕܐ ܢܕܝܘܬܐ ܒܒܛܝ̣ܠܘܬܐ ܘܚܟܡܬܐ ܐܠܗܝܬܐ ܗܘܬ. ܡܛܠ ܚܝ̈ܐ ܕܚܝ̈ܘܬܐ ܗܠܝܢ ܝܒ̈ܫܝܬܐ ܣܘܓܐܐ. ܘܡܝ̈ܐ ܡ̇ܢ ܟܕ ܪܕܝܢ ܒܓܘ ܚܠܝ̣̈ܠܐ ܘܬܚܬܝ̈ܬܐ ܕܐܪܥܐ. ܠܘ ܕܢܬܬܚܬܘܢ ܡ̣ܢ ܐܪܥܐ ܡܨܛܠܝܢ. ܐܠܐ ܕܠܬܚܬ ܡ̣ܢ ܐܐܪ ܕܒܗܝܢ ܒܥܡܝ̈ܩܘܬܐ ܗܠܝܢ ܢܗܘܘܢ ܒܥܝܢ ܟܝܢܐܝܬ. ܒܕܠܐ ܡܣܝܒܪܝܢ ܕܠܥܠ ܡ̣ܢ ܐܐܪ ܗ̇ܘ ܕܪܡ ܗ̣ܘ ܡܢܗܘܢ. ܟܝܢܐܝܬ ܢܥܙܘܢ. ܘܕܥܠ ܬܠܬܐ ܪ̈ܘܒܥܝܗ̇ ܕܐܪܥܐ ܡܫܠܛܝ̣ܢ ܡܝ̈ܐ. ܐܕܪܟܘ ܚܟܝ̣̈ܡܐ. ܘܠܫܪܟܐ ܕܝܡ̈ܡܐ ܘܢܗܪ̈ܘܬܐ ܠܗ̇ܢܝܢ ܕܝܘܡܐ ܬܪܝܢܐ ܫܒܩܝ̣ܢ.

 

 

 

ܡܛܠ ܪܘܚܐ ܗ̇ܝ ܕܡܪܚܦܐ ܗܘܬ݀ ܥܠ ܐܦܝ̈ ܡܝ̈ܐ

 

ܩܕܝܫܐ ܒܣܝܠܠܝܘܣ ܒܡܐܡܪܐ ܬܪܝܢܐ ܕܫܬܬ݀. ܝܘ̈ܡܐ ܐܡ̣ܪ. ܕܥܠܝܗ̇ ܥܠ ܪܘܚܐ ܗܕܐ ܗܘܐ ܫܘܐܠܐ ܡ̣ܢ ܐܝܠܝܢ ܕܩܕܝ̣ܡܝܢ ܠܢ. ܘܐܡ̣ܪܘ ܕܪܘܚܐ ܗ̱ܝ ܕܩܘܕܫܐ. ܘܠܗܕܐ ܘܠܐ ܕܢܩܒܠ ܒܬܪܥܝܬܢ. ܘܠܣܘܟܠܗ ܕܪܘܚܦܐ ܐܡ̣ܪ. ܕܡ̣ܢ ܓܒܪܐ ܐ̱ܢܫ ܡܝܬܪܐ ܣܘܪܝܝܐ ܝܠܦܗ̇. ܒܕܡܚܝܢ ܗ̣ܘ ܠܫܢܐ ܐܪܡܝܐ ܠܥܒܪܝܐ. ܡܪܚܦܐ ܗܘܬ݀ ܠܡ ܐܡ̣ܪ ܪܘܚܐ ܕܐܠܗܐ ܥܠ ܐܦܝ̈ ܡܝ̈ܐ. ܕܢܬܥܬܕܘܢ ܗܘܘ ܠܡܘܠܕܘ ܢܦܫܐ ܚܝܬܐ ܠܓܢܣܗ̇. ܐܝܟ ܐܣܟܡܐ ܕܬܪܢܓܘܠܬܐ ܕܡܪܚܦܐ ܘܡܚܒܒܐ ܒܚܘܒܗ̇ ܥܠ ܒܥ̈ܬܐ ܕܬܚܘܬܝܗ̇ ܕܬܬܠ ܒܗܝܢ ܚܝܘܬܐ ܘܬܫܪܐ ܒܗܝܢ ܙܘܥܐ. ܘܠܗܢܐ ܪܥܝܢܐ ܬܘܒ ܫܠܡ ܚܣܝܐ ܝܥܩܘܒ ܕܐܘܪܗܝ. ܡܪܝ ܐܦܪܝܡ ܕܝܢ ܒܦܘܫܩܐ ܣܘܥܪܢܝܐ ܕܒܪܝ̣ܬܐ. ܘܡܪܝ ܝܥܩܘܒ ܣܪܘܓܝܐ ܒܫܬܬ݀ ܝܘܡܗ. ܘܬܐܘܕܘܪܘܣ ܡܦܫܩܢܐ ܕܢܣܛܘܪ̈ܝܐܢܘ ܐܡ̣ܪܘ. ܕܠܘ ܪܘܚܐ ܕܩܘܕܫܐ ܐܝܬܝܗ̇ ܗܘܬ݀ ܪܘܚܐ ܗ̇ܝ. ܐܠܐ ܪܘܚܐ ܗܕܐ ܒܪܝ̣ܬܐ ܐܘܟܝ̣ܬ ܐܐܪ. ܐܡ̣ܪ ܓܝܪ ܡܪܝ ܝܥܩܘܒ. ܗܘܐ ܚܫܘܟܐ ܘܢܫܒܬ݀ ܪܘܚܐ ܠܥܠ ܡ̣ܢ ܡܝ̈ܐ. ܪܘܚܐ ܒܪܝ̣ܬܐ. ܠܘ ܩܕܝܫܬܐ ܐܝܟ ܕܐܣܬܒܪܬ݀. ܪܘܚܗ ܕܡܪܝܐ ܩܪܗ̇ ܗܘܐ ܡܘܫܐ ܐܝܟ ܕܐܬܐܡܪܬ݀. ܒܪܝ̣ܬܗ ܕܡܪܝܐ ܕܡܪܚܦܐ ܗܘܬ݀ ܒܪ̈ܝܬܗ. ܘܕܪܥܝܢܐ ܗ̇ܘ ܩܕܡܝܐ ܚܬܝ̣ܬ. ܝ̣ܕܝ̣ܥܐ ܡ̣ܢ ܗ̇ܝ ܐܠܘ ܠܐ ܪܘܚܐ ܕܩܘܕܫܐ ܐܝܬܝܗ̇ ܗܘܬ݀ ܪܘܚܐ ܗ̇ܝ. ܠܘ ܪܘܚܐ ܕܐܠܗܐ ܐܬܩܪܝܬ݀ ܗܘܬ. ܒܕܠܐ ܣܟ ܡܬܐܡܪ ܐܐܪ ܕܐܠܗܐ. ܐܘ ܐܪܥܐ ܐܘ ܢܘܪܐ ܐܠܗܐ. ܥܠ ܪܘܚܐ ܕܝܢ ܕܩܘܕܫܐ ܐܝܟ ܕܒܣܘ̣ܓܐܐ ܡܬܐܡܪ ܗܟܢ ܐܝܟ ܗ̇ܝ ܕܡܫܕܪ ܐܢ̱ܬ ܪܘܚܟ ܘܡܬܒܪܝܢ. ܗ̣ܘ ܗܟܘܬ ܘܥܠ ܒܪܐ ܐܝܟ ܗ̇ܝ ܕܠܡܠܬܐ ܕܐܠܗܐ ܐܫܒܚ. ܐ̱ܚܪ̈ܢܐ ܕܝܢ ܣܓܝ̈ܐܬܐ ܐܡ̣ܪܘ ܠܘܬ ܫܘܪܪܗ̇ ܕܬܪܥܝ̣ܬܐ ܗܕܐ. ܐܠܐ ܠܝ ܒܨܝܪܐ ܗ̣ܝ ܗܕܐ ܡܠܬܐ ܩܦܝ̣ܣܬܐ ܐܬܚܙܝܬ݀ ܕܐܡܪ. ܘܩܕܝܫܐ ܣܐܘܝܪܐ ܒܟܬܒܐ ܗ̇ܘ ܕܠܘܩܒܠ ܓܪܐܡܛܝܩܘܣ ܐܡ̣ܪ. ܕܡܪܝ ܐܦܪܝܡ ܗ̣ܘ ܓܒܪܐ ܗ̇ܘ ܣܘܪܝܝܐ. ܘܕܠܘ ܗܘܝܘ܆ ܝ̣ܕܝ̣ܥܐ ܡ̣ܢ ܗ̇ܝ ܕܠܘ ܗܟܢ ܡܬܪܥܐ ܗ̣ܘ ܩܕܝܫܐ.

 

 

 

 

 

 

 

 

 

 

 

 

 

 

 

 

 

 

 

     #1 

 

ܢܝܫܐ ܪܒܝܥܝܐ ܡܛܠ ܒܘ̈ܚܢܐ ܕܐܣܛܘܟܣܐ ܐܐܪܝܐ. ܩܕܡܝܬ݀ ܡܛܠ ܟܝܢܗ

 

ܕܚܡܝܡ ܐܐܪ ܒܟܝܢܗ ܝ̣ܕܝ̣ܥܐ ܗܕܐ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܗ̇ܝ ܕܟܕ ܠܡܝ̈ܐ ܐܐܪ ܨܒܝܢܢ ܕܢܥܒܕ. ܒܚܡܝ̣ܡܘܬܐ ܝܬܝ̣ܪܬܐ ܡܪܬܚܝ̣ܢܢ ܠܗܘܢ. ܘܟܢ ܗܘܝܢ ܐܐܪ. ܕܬܪܬܝܢ ܕܝܢ ܡ̣ܢ ܗ̇ܝ ܕܐܐܪ ܪܛܝ̣ܒܐ ܗ̱ܘ ܐܟܡܐ ܕܡܬܚܘܐ. ܒܕܓܘܢ ܐܢ ܩܪܝ̣ܪ ܗܘܐ ܡܝ̈ܐ ܗܘܐ. ܘܟܕ ܠܘ ܡܝ̈ܐ ܗ̱ܘ. ܝ̣ܕܝ̣ܥܐ ܕܚܡܝܡܐ ܗ̱ܘ. ܘܐ̱ܢܫܝ̈ܢ ܡܗܦܟܝ̣ܢ ܘܐܡܪܝܢ. ܐܠܘ ܚܡܝ̣ܡ ܗܘܐ ܐܐܪ. ܙܕܩ ܗܘܐ ܠܡܬܩܘܪܪܘ ܒܪܚܝ̣ܩܘܬܗ ܕܫܡܫܐ. ܘܐܠܘ ܬܘܒ ܚܡܝ̣ܡ ܗܘܐ. ܡܛܠ ܡܢܐ ܐܐܪ ܫܦܝܐ ܕܒܪ̈ܝܫܝ ܛܘܪ̈ܐ ܝܬܝܪ ܩܪܝ̣ܪ. ܘܐܠܘ ܬܘܒ ܚܡܝ̣ܡ. ܒܣܟ̈ܐ ܐ̱ܚܪ̈ܢܐ ܙܕܩ ܗܘܐ ܕܬܗܘܐ ܚܡܝ̣ܡܘܬܗ. ܟܕ ܠܝܬ ܒܗ̇ ܩܪܝ̣ܪܘܬܗ. ܟܕ ܠܝܬ ܒܗ̇ ܩܪܝ̣ܪܘܬܐ ܕܡܫܗܝܐ ܗܘܬ݀ ܠܗ. ܘܐܠܘ ܗܟܢܐ ܗܘܐ. ܢܘܪܐ ܗܘܐ ܘܠܘ ܐܐܪ. ܘܐܠܘܠܐ ܩܪܝ̣ܪ ܗܘܐ ܐܝܟܢܐ ܟܕ ܫܒܒܗ̇ ܗ̣ܘ ܕܢܘܪܐ. ܠܐ ܡܬܥܦܦܐ ܗܘܬ݀ ܚܡܝ̣ܡܘܬܗ̇ ܕܢܘܪܐ ܥܠ ܚܡܝ̣ܡܘܬܗ ܕܝܠܗ ܘܬܪ̈ܬܝܗܝܢ ܡܝܒ̈ܫܢ ܗܘܝ̈ ܠܐܘܣܝܗ. ܘܡ̣ܢ ܗܪܟܐ ܝܒܝ̣ܫܐ ܘܠܘ ܪܛܝ̣ܒܐ ܙܕܩ ܗܘܐ ܕܢܗܘܐ ܐܐܪ ܗ̇ܝ ܕܠܐ ܫܪܝܪܐ. ܘܠܘܩܒܠ ܣܥܝܐ ܗ̇ܘ ܩܕܡܝܐ ܐܡܪܝ̣ܢܢ. ܕܟܕ ܡܣܛܐ ܫܡܫܐ. ܡ̣ܢ ܩܪܝ̣ܪܘܬܗ̇ ܕܐܪܥܐ ܘܠܘ ܡ̣ܢ ܟܝܢܗ ܕܝܠܗ ܩܐܪ ܐܐܪ. ܘܠܘܩܒܠ ܣܥܝܐ ܬܪܝܢܐ ܐܡܪܝܢܢ. ܕܒܝܕ ܡܫܠܛܘܬ ܪ̈ܘܚܐ ܩܪܝܪ̈ܬܐ ܕܥܠ ܪ̈ܝܫܝ ܛܘܪ̈ܐ ܩܐܪ ܐܐܪ ܘܠܘ ܒܟܝܢܗ. ܕܡܛܠܡܢܐ ܪܘܚܐ ܟܕ ܐܐܪ ܗ̣ܝ ܩܪܝ̣ܪܐ ܠܚܪܬܐ ܐܡܪܝܢܢ. ܘܠܘܩܒܠ ܣܥܝܐ ܬܠܝܬܝܐ܆ ܐܡܪܝܢܢ. ܕܪܛܝ̣ܒܘܬܗ ܠܐ ܫܒܩܐ ܠܚܡܝ̣ܡܘܬܗ ܕܒܣܟ̈ܐ ܐ̱ܚܪ̈ܝܐ ܬܗܘܐ. ܡܛܠ ܕܚܡܝ̣ܡܘܬܐ ܥܡ ܝܒܝܫܘܬܐ ܥܐܙܐ. ܘܥܡ ܪܛܝ̣ܒܘܬܐ ܡܫܬܗܝܐ. ܘܠܘܩܒܠ ܣܥܝܐ ܪܒܝܥܝܐ ܐܡܪܝܢܢ ܕܠܘ ܚܕܐ ܗ̱ܝ ܥܪܩܬܐ ܐܐܪ. ܐܠܐ ܬܠܬ. ܚܕܐ ܡ̇ܢ ܐܐܪ ܗ̇ܘ ܥܠܝܐ ܕܠܢܘܪܐ ܢܩܝ̣ܦ ܘܢܘܪܢܝܐ ܗ̱ܘ. ܘܐ̱ܚܪܢܐ ܗ̇ܘ ܕܠܐܪܥܐ ܘܡܝ̈ܐ ܢܩܝ̣ܦ. ܘܐܟܘܬܗܘܢ ܩܪܝܪ ܟܕ ܠܐ ܢܗܐ ܗ̇ܘ ܕܡܚܡ. ܘܐ̱ܚܪܬܐ ܗ̇ܘ ܡܨܥܝܐ ܕܗܘܘ ܐܐܪ ܡܪܢܝܐ ܘܟܝܢܝܐ. ܘܚܡܝ̣ܡ ܘܪܛܝ̣ܒ. ܘܪܛܝ̣ܒ ܐܐܪ ܠܐ ܐ̱ܢܫ ܡܬܦܫܟ. ܐܠܐ ܒܙܢܐ ܗ̇ܘ ܕܕܠܝ̣ܠܘܬ ܡܣܬܟܡܢܘܬܐ ܘܠܘ ܕܬܠܝ̣ܠܘܬܐ. ܘܕܓܠܝ̣ܙ ܡ̣ܢ ܓܘܢܐ ܘܛܥܡܐ ܘܐܣܟܡܐ ܐܐܪ ܓܠܝܐ. ܒܕܓܘܢ ܒܗܠܝܢ ܕܒܗ ܒܐܐܪ ܡܬܬܟܝܢܝ̣ܢ ܙܕܩ ܠܡܫܬܓܡܘ. ܟܐܡܬ ܒܗܠܝܢ ܕܡ̣ܢ ܥܬܝ̣ܩܐ ܡܛܐܘܪܘܠܣܓܝܐ ܡܬܩܪܝܐ ܝܕܥܬܗܘܢ ܐܘܟܝܬ ܡܡܠܠܘܬ ܦܗ̈ܝܬܐ.

 

 

 

ܡܛܠ ܥܢܢܐ ܘܡܛܪܐ ܘܬܠܓܐ ܘܛܠܐ ܘܙܡܝܬܐ

 

ܚܡܝ̣ܡܘܬܐ ܡ̇ܢ ܓܝܪ ܕܙܠܝ̣̈ܩܐ ܫܡܫܢܝ̈ܐ ܟܕ ܠܪܛܝ̣ܒܘܬܗܘܢ ܕܡܝ̈ܐ ܫܪܝܐ ܘܡܠܗܓܐ. ܩܠܝ̣ܠܘܬܐ ܡܕܡ ܡܫܟܢܐ ܠܗ ܠܠܗܓܐ ܘܠܐܦܝ̈ ܠܥܠ ܡܣܩܐ ܠܗ܇ ܒܕܓܘܢ ܐܢ ܣܓܝ ܠܥܠ ܡܣܬܠܩ. ܟܪ ܕܐܣܛܘܟܣܐ ܗ̇ܘ ܢܘܪܢܝܐ. ܡܫܬܪܝܘ ܡܫܬܪܐ ܘܡܬܦܘܫܫ ܘܐܐܪ ܗܘܐ. ܐܢܕܝܢ ܡܡܫܚܐܝܬ ܣܠܩ܇ ܘܠܘ ܣܓܝ ܩܪܝܪܐ ܢܗܐ ܗ̣ܘ ܐܐܪ ܡܬܪܨܦܘ ܡܬܪܨܦ ܗ̣ܘ ܠܗܓܐ ܘܡܬܥܨܪ ܘܢܘܛܦܝ̈ ܡܝ̈ܐ ܡܢܗ ܢܚ̈ܬܢ. ܘܗ̣ܘ ܠܗܓܐ ܗ̇ܘ ܪܨܝ̣ܦܐ ܥܢܢܐ ܡܬܩܪܐ. ܘܗ̇ܢܝܢ ܢܘܛܦ̈ܬܐ ܡܛܪܐ. ܐܢܕܝܢ ܠܘ ܗܢܐ ܟܠܗ ܢܬܪܨܦ ܗ̣ܘ ܠܗܓܐ ܐܝܟܢܐ ܕܢܬܥܨܪ. ܗܝܕܝܢ ܥܪܦܠܐ ܡܬܩܪܐ. ܘܡ̣ܢ ܗܪܟܐ ܝ̣ܕܝ̣ܥܐ ܕܥܪܦܠܐ ܡ̇ܢ ܥܒܐ ܡ̣ܢ ܐܐܪ. ܘܩܛܝ̣ܢ ܡ̣ܢ ܥܢܢܐ. ܐܢܕܝܢ ܣܓܝ ܩܪܝܪܐ ܢܗܐ ܗ̣ܘ ܐܐܪ. ܘܡ̣ܢ ܩܕܡ ܕܢܬܚܝ̈ܕܢ ܡܬܟܢ̈ܫܢ ܠܘܬ ܚܕ̈ܕܐ ܡܢܘ̈ܬܗ̇ ܕܥܢܢܐ. ܬܓܫܘܦ ܒܗܝܢ ܩܪܝ̣ܪܘܬܐ܆ ܗܝܕܝܢ ܬܠܓܐ ܢܚܬ. ܐܢܕܝܢ ܡ̣ܢ ܒܬܪ ܕܐܬܚܝܕܝܢ ܠܚܕ̈ܕܐ. ܘܠܢܘ̈ܛܦܬܐ ܡܛܪ̈ܝܬܐ ܐܫܬܚ̈ܠܦܝܢ ܕܓܫܦܐ ܒܗܝܢ ܩܪܝܪܘܬܐ ܥܫܝ̣ܢܬܐ ܘܓܠܝ̣ܕܢܝܬܐ. ܗܝܕܝܢ ܒܪܕܐ ܢܚܬ. ܘܗ̣ܝ ܢܓܝ̣ܪܘܬ ܡܚܬܬܗܝܢ ܕܦܪ̈ܕܐ ܒܪ̈ܕܢܝܬܐ ܡܬܒܪܐ ܠܢܕܝܝ̈ܗܘܢ ܘܐܣܦܝܪ̈ܢܝܬܐ ܥܒܕܐ ܠܗܝܢ. ܐܢܕܝܢ ܠܐܬܪܐ ܕܡܬܚܬܝ ܡ̣ܢ ܕܥܢܢܐ ܘܥܪܦܠܐ ܢܬܥܠܐ ܗ̣ܘ ܠܗܓܐ ܘܢܗܘܐ ܒܨܝ̣ܪ ܟܡܝܘܬܐ. ܘܦܓܥܐ ܒܗ ܩܪܝ̣ܪܘܬܐ ܕܠܘ ܣܓܝ ܥܙܝܙܐ ܘܡܪܨܦܐ ܠܗ ܒܠܥܕ ܗ̇ܝ ܕܢܩܛܪܝܘܗܝ ܘܢܓܠܕܝܘܗܝ܆ ܗܝܕܝܢ ܛܠܐ ܗܘܐ. ܒܗ̇ܝ ܕܐܢ ܟܡܝܘܬܐ ܝܬܝ̣ܪܬܐ ܬܗܘܐ ܠܕܐܝܟ ܗܕܐ. ܡܛܪܐ ܢܚܬ. ܐܢܕܝܢ ܩܪܝ̣ܪܘܬܐ ܡܓܠܕܢܝܬܐ ܒܗ ܦܓܥܐ. ܗܝܕܝܢ ܩܪܨܢܐ ܐܘܟܝܬ ܙܡܝܬܐ. ܐܘ ܛܠܓܠܝ̣ܕ. ܐܢ ܒܨܝ̣ܪ ܡ̣ܢ ܩܪܨܐ ܢܓܠܕ. ܘܡܛܪܐ ܗ̇ܘ ܕܒܚܐܦܐ ܚܝܨܐ ܢܚܬ ܢܘܛܦ̈ܬܐ ܪܘܪ̈ܒܬܐ. ܕܥܢܢܐ ܕܬܟܝ̣ܒܐܝܬ ܐܬܠܒܕܬ݀ ܠܗܝܢ ܢܦܨܐ. ܙܝܩܐ ܡܬܩܪܐ. ܘܬܠܓܐ ܗ̇ܘ ܕܡ̣ܢܫܝܠ ܘܬܟܝ̣ܒܐܝܬ ܢܚܬ. ܟܘܟܝܬܐ ܡܫܬܡܗ. ܘܠܦܘܬ ܪܒܘܬܐ ܕܩܛܥ̈ܐ ܡܬܬܠܚܝܢ. ܗܘ̈ܝܢ ܐܦ ܙܪ̈ܝ̣ܦܝܬܐ ܕܩܛܝ̣ܪܐܝܬ ܚܒ̈ܛܢ. ܘܨܚܘܐ ܠܡ ܠܘ ܡܕܡ ܗ̣ܘ ܐ̱ܚܪܝܢ. ܐܠܐ ܐܐܪ ܕܠܐ ܥܢܢ ܘܕܠܐ ܥܪܦܠ.

 

 

 

ܡܛܠ ܚܘܓܬܐ

 

ܥܢܢܐ ܡ̇ܢ ܓܝܪ ܫܥܝ̣ܥܬܐ ܘܪܨܝ̣ܦܬܐ ܘܢܗܝ̣ܪܬܐ ܟܕ ܡܬܟܝܢܐ ܬܚܘܬܘܗܝ ܕܣܗܪܐ ܐܟ ܕܒܩܐܬܗܛܘܣ ܗ̣ܘ ܡ̣ܢ ܣܗܪܐ ܩܢܘܡܐܝܬ ܡܬܚܙܐ. ܙܗܪܐ ܕܝܢ ܕܢܨܝ̣ܚܘܬܗ ܥܠ ܥܢܢܐ ܗ̇ܝ ܕܚܕܪ̈ܝ ܓܝ̣ܓܠܗ ܢܦܠ. ܘܗܟܢܐ ܚܘܓܬܐ ܡܫܠܡܢܝܬ ܚܘܕܪܐ ܡܬܚܙܝܐ ܗܓܓܢܐܝܬ. ܘܡܛܠܗܕܐ ܨܝܕ ܚܘܕܪܐ ܛܗܪܢܝܐ ܝܬܝ̣ܪܐܝܬ ܗܘܝܐ. ܘܠܘ ܒܐܘܪܢܝܙܘܢ. ܚܕܪ̈ܝ ܫܡܫܐ ܕܝܢ ܒܨܝ̣ܪܐܝܬ ܗܘܝܐ ܚܘܓܬܐ. ܡܛܠ ܕܠܘ ܒܠܚܘܕ ܡܬܦ ܢܬܦ ܫܡܫܐ ܠܠܗܓܐ. ܐܠܐ ܘܡܦܘܫܫ ܠܗ. ܚܕܪ̈ܝ ܟܘܟ̈ܒܐ ܕܝܢ ܚܕܐ ܠܟܡܐ ܡܬܩܝܡܐ. ܡܛܠ ܕܟܘܟܒܐ ܡܚܝ̣ܠܐܝܬ ܢܬܦ. ܘܡܚܝܠܐܝܬ ܡܦܘܫܫ. ܐܢܕܝܢ ܝܬܝܪ ܠܒܝܕܬܐ ܘܪܩܝ̣ܥܬܐ ܬܗܐ ܥܢܢܐ ܗܝܕܝܟ ܘܚܕܪ̈ܝ ܫܡܫܐ ܡܨܝܐ ܕܬܗܘܐ ܚܘܓܬܐ. ܘܟܕ ܬܪܬܝܢ ܥܢ̈ܢܐ ܚܕܐ ܠܥܠ ܡ̣ܢ ܚܕܐ ܢܗܘ̈ܝܢ ܒܙܢܐ ܕܐܡܝ̣ܪ. ܗܝܕܝܢ ܚܘܓܬܐ ܠܥܠ ܡ̣ܢ ܚܘܓܬܐ ܡܬܚܙܝܐ. ܘܐ̱ܢܫܝ̈ܢ ܐܡ̣ܪܘ ܕܫܒܥ ܚܘ̈ܓܬܐ ܚܙܘ.

 

 

 

ܡܛܠ ܩܫܬܐ

 

ܒܕܝܐܡܛܪܘܢ ܡ̇ܢ ܕܫܡܫܐ ܟܕ ܡܢܘ̈ܬܐ ܢܗܘ̈ܝܢ ܡܝܢ̈ܝܬܐ ܕܨܠܝ̣̈ܠܢ ܘܣܩܝ̣̈ܠܢ. ܘܡ̣ܢ ܒܣܬܪܗܝܢ ܓܘܫܡܐ ܢܗܘܐ ܪܩܝ̣ܥܐ ܘܠܒܝ̣ܕܐ ܘܚܫܘܟܐ܆ ܛܘܪܐ ܠܡܐܡܪ ܐܘ ܥܢܢܐ. ܗܝܕܝܢ ܙܗܪܝܪ̈ܘܗܝ ܨܡܘ̈ܚܬܢܐ ܕܫܡܫܐ ܥܠܝܗܝܢ ܕܡܢܘ̈ܬܐ ܗ̇ܢܝܢ ܣܩܝ̣̈ܠܬܐ ܢܛܚ̈ܢ. ܘܓܘ̈ܢܐ ܡܦܬܟ̈ܐ ܒܕܡܘ̣ܬܐ ܩܫܬܝܬܐ ܡܬܚܙܝܢ. ܘܚܘܕܪܗ̇ ܡ̇ܢ ܒܪܝܐ ܕܩܫܬܐ ܣܘܡܩܐ ܡܬܚܙܐ. ܡܛܠ ܕܢܗܝ̣ܪܐ ܒܡܨܥܝܘܬ ܐܘܟܡܐ ܣܘܡܩܐ ܡܟܢ ܠܡܬܚܙܝܘ. ܚܘܕܪܐ ܕܝܢ ܕܒܬܪ ܗܢܐ ܟܪܬܢܝܐ ܡܬܚܙܐ ܡܛܠ ܪܚܝ̣ܩܘܬܗ ܕܢܗܝܪܐ. ܚܘܕܪܗ ܕܝܢ ܬܠܝܬܝܐ ܐܪܓܘܢܝܐ ܡܛܠ ܝܬܝ̣ܪܘܬ ܪܚܝ̣ܩܘܬܗ ܕܢܗܝ̣ܪܐ. ܦܠܓܘܬ ܚܘܕܪܐ ܕܝܢ ܐܝܬܝܗ̇ ܩܫܬܐ. ܡܛܠ ܕܠܘܬ ܐܘܪܝ̣ܙܘܢ ܐܝܬܘܗܝ ܫܡܫܐ. ܒܕܓܘܢ ܦܠܓܗ ܐ̱ܚܪܢܐ ܕܚܘܕܪܐ ܠܬܚܬ ܡ̣ܢ ܐܪܥܐ ܙܕܩ ܕܢܗܘܐ ܠܐ ܡܬܚܙܝܢܐ. ܘܚܕܪ̈ܝ ܟܘܟ̈ܒܐ ܠܐ ܡܬܘܡ ܗܘܝܐ ܩܫܬܐ ܡܛܠ ܡܚܝ̣ܠܘܬܗܘܢ ܚܕܪ̈ܝ ܣܗܪܐ ܕܝܢ ܚܕܐ ܠܟܡܐ. ܡܛܠ ܕܒܠܠܝܐ ܛܥܝܢ ܓܘܢܝ̈ܗ̇ ܠܪܓܫܬܐ. ܘܡܛܠ ܕܒܡܠܝܘܬܗ ܙܕܩ ܕܢܗܘܐ. ܚܕ ܕܝܢ ܝܘܡܐ ܡ̣ܢ ܝܪܚܐ ܗܘܐ ܡܠܐܷ. ܘܟܕ ܕܢܚ ܘܠܘ ܟܕ ܥܪܒ. ܘܐܝܟ ܕܐܡܪ ܐܪܝܣܛܘܛܠܝܣ ܒܚܡܫܝܢ ܫܢܝ̈ܢ ܬܪܬܝܢ ܙܒܢܝ̈ܢ ܚܙܐ ܕܗܘܬ݀ ܩܫܬܐ ܚܕܪ̈ܝ ܣܗܪܐ.

 

 

 

ܡܛܠ ܒܢ̈ܬ ܫܡܫܐ

 

ܥܢܢܐ ܓܝܪ ܪܨܝ̣ܦܬܐ ܘܣܩܝ̣ܠܬܐ ܟܕ ܡܬܟܝܢܐ ܒܩܪܝ̣ܒܘܬܗ ܕܫܡܫܐ. ܘܕܡܘ̣ܬ ܡܚܙܝ̣ܬܐ ܬܗܐ ܪܒܬܐ ܐܝܟܢܐ ܕܬܣܦܩ ܕܬܩܒܠ ܥܡ ܓܘܢܐ ܐܘܟܝܬ ܙܗܪܗ ܕܫܡܫܐ ܐܦ ܠܐܣܟܡܗ. ܗܝܕܝܢ ܒܢ̈ܬ ܫܡܫܐ ܡܬܚܘ̈ܝܢ. ܡܢܘ̈ܬܐ ܕܝܢ ܗ̇ܢܝܢ ܕܚܘܓܬܐ ܘܩܫܬܐ ܒܗܝܢ ܡܬܚܘ̈ܝܢ. ܒܕܙܥܘܪܝܐ ܟܠ ܚܕܐ ܡܢܗܝܢ ܡܢ ܗܕܐ ܕܒܪܬ݀ ܫܡܫܐ ܡ̇ܢ ܥܠ ܓܢ̱ܒ ܫܡܫܐ ܗܘ̈ܝܢ. ܡܐ ܕܥܪܒ ܝܬܝ̣ܪܐܝܬ ܚܕܐ ܠܟܡܐ ܕܝܢ ܟܕ ܐܝܬܘܗܝ ܒܚܘܕܪܐ ܛܗܪܢܝܐ ܒܒܘܣܦܘܪܘܣ ܓܝܪ ܐܝܟ ܕܐܡ̣ܪ ܐܪܝܣܛܘܛܠܝܣ ܬܪܬܝܢ ܒܢ̈ܬ ܫܡܫܐ ܕܢܚ̈ܝ. ܘܩܘܝ̈ ܟܠܗ ܝܘܡܐ. ܘܟܕ ܥܪܒ ܫܡܫܐ ܥܪ̈ܒܝ ܥܡܗ. ܗܘܝܐ ܕܝܢ ܒܪܬ݀ ܫܡܫܐ ܘܡ̣ܢ ܠܗܓܐ ܛܠܘܫܐ ܕܣܠܩ ܒܐܐܪ ܘܡܬܓܠܓܠ ܘܡܬܡܢܥ ܥܕܡܐ ܠܓܝܓܠܐ ܢܘܪܢܝܬܐ. ܘܡܬܢܝܪ ܗܪܬܡܢ ܘܐܝܟ ܫܡܫܐ ܡܬܚܙܐ. ܘܠܦܘܬ ܥܒܝܘܬܗ ܝܘ̈ܡܬܐ ܘܝܪ̈ܚܐ ܦܐܫ. ܘܐܝܬ ܐܡܬܝ ܕܥܡܗ̇ ܕܡܘܙܠܬܐ ܚܕܪ.

 

 

 

ܡܛܠ ܢܝ̈ܙܟܐ

 

ܢܝܙ̈ܟܐ ܡ̇ܢ ܘܓܐܪ̈ܐ ܕܡܬܩܪܝܢ ܐܦ ܫܒ̈ܛܐ ܘܫܒܘ̈ܩܐ ܗܓܓ̈ܐ ܐܢܘܢ ܕܡ̈ܝܝ ܠܩܫܬܐ ܕܒܥ̈ܢܢܐ ܒܓܘܢܗܘܢ. ܘܒܣܛܪܗ ܕܫܡܫܐ ܗܘܝܢ ܡ̣ܢ ܝܡܝܢܐ ܘܡܢ ܣܡܠܐ. ܘܬܪܝܨܐܝܬ ܡ̇ܢ ܡܬܚܙܝܢ. ܐܘ ܒܥܠܬ݀ ܗ̇ܝ ܕܡܢܘ̈ܬܐ ܐܢܘܢ ܙܥܘܪ̈ܝܬܐ ܡ̣ܢ ܚܘܕܪ̈ܐ ܪܘܪ̈ܒܐ. ܘܡܛܠ ܗܕܐ ܬܪ̈ܝ̣ܨܐ ܡܬܚܘܝܢ. ܐܘ ܡܛܠ ܗ̇ܝ ܕܗ̇ܘ ܕܚܙܐ ܩܘܡܐ ܩܢܐ ܐܝܢܐ ܕܒܗ ܟܘܣܬܢܝܐ ܐܝܟ ܬܪܝ̣ܨܐ ܡܟܢ ܠܡܬܚܙܝܘ. ܘܐܝܟ ܕܒܕܠܝ̣ܠܘ ܠܘܬ ܚܘܕܪܐ ܛܗܪܢܝܐ ܡܬܚܙܝܢ. ܒܕܡܬܦܘܫܫܝ̣ܢ ܘܡܬܛܠܩ̣ܝܢ ܡ̣ܢ ܥܘܙܗ̇ ܕܚܡܝ̣ܡܘܬܐ. ܐܠܐ ܟܕ ܕܢܚ ܐܘ ܟܕ ܥܪܒ ܫܡܫܐ.

 

 

 

ܡܛܠ ܪܥܡܐ ܘܒܪܩܐ

 

ܙܕܩ ܠܡܕܥ ܕܚܘܓܬܐ ܘܩܫܬܐ ܘܒܢ̈ܬ ܫܡܫܐ ܘܢܝܙ̈ܟܐ ܠܘ ܣܘܥܪ̈ܢܝܐ ܩܢܘ̈ܡܝܐ ܐܢܘܢ. ܐܠܐ ܗܓܓ̈ܐ ܒܠܚܘܕ ܘܦܢܛܐܣܝ̈ܐܣ ܕܠܦܘܬ ܚܙܬܢ ܡܬܚܙܝܢ. ܪ̈ܥܡܐ ܕܝܢ ܘܒܪ̈ܩܐ ܘܫܪܟܐ ܕܗܠܝܢ ܕܥܬܝ̣ܕܝ̣ܢ ܠܡܚܘܝܘ. ܩܢܘ̈ܡܐ ܐܢܘܢ ܡܩܝܡ̈ܐ ܘܠܘ ܗܓܓ̈ܐ. ܒܕܓܘܢ ܐܡܪܝܢܢ ܕܐܝܟ ܕܒܣܘܓܐܐ ܠܗܓܐ ܪܛܝ̣ܒܐ ܥܡ ܥܛܪܐ ܬܢܢܝܐ ܓܕܐ ܘܣܠܩ. ܘܟܕ ܐܟܚܕܐ ܡܬܥܠܝܢ. ܘܥܢܢܐ ܡܢܗܘܢ ܡܬܩܛܪܐ. ܗ̣ܘ ܥܛܪܐ ܬܢܢܝܐ ܒܓܘܗ ܕܠܗܓܐ ܗ̇ܘ ܕܗܘܐ ܥܢܢܐ ܡܬܚܒܫ. ܘܟܕ ܚܐܡ ܬܡܢ. ܠܐܬܪܐ ܗ̇ܘ ܥܠܝܐ ܘܢܘܪܢܐ ܒܥܐ. ܘܗܟܢܐ ܡܣܕܩ ܠܥܢܢܐ ܚܒܘܫܬܗ. ܘܡܢܗ ܕܣܘܕܩܐ ܗ̇ܘ ܚܐܦܢܝܐ ܩܠܐ ܗ̇ܘ ܕܪܥܡܐ ܡܬܩܪܐ ܡܫܬܡܥ. ܘܡܛܠ ܕܗ̣ܘ ܥܛܪܐ ܬܢܢܝܐ ܗܢܐ ܓܘܫܡܐ ܗ̱ܘ ܩܛܝ̣ܢܐ. ܘܡܢܬܐ ܡܕܡ ܡܝܢܝܬܐ. ܘܐ̱ܚܪܬܐ ܐܪܥܢܝܬܐ ܐܝܬ ܒܗ. ܗ̣ܝ ܚܡܝ̣ܡܘܬܐ ܥܠܬܢܝܬ݀ ܙܘܥܐ ܟܪ ܡܪܬܚܐ ܠܡܝܢܝܘܬܐ ܗ̇ܝ ܕܐܪܥܢܝܘܬܐ ܠܘܬ ܕܗܝ̣ܢܘܬܐ ܡܕܡ ܡܫܚܠܦܐ ܠܗܝܢ. ܘܗܟܢܐ ܕܠܝ̣ܠ ܠܡܫܬܠܗܒܘ ܘܠܡܬܢܝܪܘ ܥܒܕܐ ܠܓܘܫܡܐ ܗ̇ܘ ܡܪܟܒܐ ܕܡܢܗܝܢ. ܘܗ̣ܝ ܡܬܢܝܪܢܘܬܐ ܗ̇ܝ ܒܪܩܐ ܡܬܩܪܐ. ܘܗܟܢܐ ܟܕ ܪܥܡܐ ܥܠܬܐ ܗ̱ܘ ܕܒܪܩܐ. ܒܪܩܐ ܡ̣ܢ ܩܕܡܘܗܝ ܡܬܪܓܫ. ܒܗܝ ܕܡܫܬܡܥܢܐ ܡܟܢ ܠܡܬܩܕܡܘ ܘܠܡܬܥܒܪܘ ܡ̣ܢ ܡܬܚܙܝܢܐ. ܝܬܝ̣ܪܐܝܬ ܟܕ ܗ̇ܘ ܕܡܬܚܙܐ ܝܬܝܪ ܩܠܝ̣ܠܐ ܢܗܘܐ ܗ̄ ܢܘܪܢܐ. ܘܗ̇ܘ ܕܡܫܬܡܥ܆ ܢܗܘܐ ܒܨܝ̣ܪ ܒܩܠܝ̣ܠܘܬܗ ܠܡܐܬܐ ܠܘܬ ܡܫܡܥܬܐ. ܐܝܟ ܡܕܡ ܕܬܠܝ̣ܠ ܒܡܢܘ̈ܬܗ. ܘܕܚܪܝ̣ܦܐ ܚܙܬܐ ܡ̣ܢ ܡܫܡܥܬܐ. ܝܕܝܥܐ ܡ̣ܢ ܐܝܠܝܢ ܕܡܚܝܢ ܒܦܠܩ̈ܐ. ܕܠܩܠܐ ܕܡܚܘܬܐ ܩܕܡܝܬܐ ܒܬܪ ܚܙܬܐ ܕܡܚܘܬܐ ܬܪܝܢܝܬܐ ܫܡܥܝ̣ܢܢ. ܐܡܦܗܕܘܩܠܝܘܣ ܘܐܢܐܟܣܓܘܪܐܣ ܐ̱ܚܪ̈ܢܝܬܐ ܐܬܪܥܝܘ ܡܛܠ ܪܥܡܐ ܘܒܪܩܐ. ܘܕܗܓܓ̈ܐ ܐܢܘܢ ܐܡ̣ܪܘ. ܘܠܐܘܕܝܡܘܣ ܡ̇ܢ ܠܒܪܩܐ ܒܠܚܘܕ ܐܡ̣ܪ ܕܗܓܓܐ ܗ̱ܘ. ܘܕܠܐ ܬܫܢܙ ܡܠܬܢ ܠܒܪ ܡ̣ܢ ܢܝ̣ܫܐ ܡܫܬܐܠܝ̣ܢܢ ܡ̣ܢ ܣܥܝܝ̈ܗܘܢ ܘܐܪ̈ܘܥܘܬܗܘܢ.

 

 

 

ܡܛܠ ܦܩܥܐ ܘܩܝܪܐܢܘܣ ܘܦܪܝܣܛܝܪ

 

ܬܢܢܐ ܡ̇ܢ ܓܝܪ ܘܗ̇ܘ ܕܡܬܢܦܨ ܡ̣ܢ ܥܢܢܐ ܠܐܦܝ̈ ܠܬܚܬ ܒܝܕ ܝܩܝ̣ܪܘܬܗ. ܐܘ ܒܝܕ ܗ̇ܘ ܕܚܓܪ ܠܗ ܘܙܓܪ ܡ̣ܢ ܡܣܩܬܐ. ܟܕ ܡܛܐ ܠܐܪܥܐ ܒܚܐܦܐ ܩܫܝܐ. ܘܢܗܘܐ ܕܡܢܒܪܫ ܣܓܝ. ܐܢܗܘ ܕܗܘܠܐ ܕܝܬܝܪ ܩܛܝ̣ܢܐ ܩܢܐ܆ ܥܒܪ ܒܓܘܫܡܐ ܕܦܓܥ ܒܗ. ܟܕ ܠܐ ܡܬܪܓܫ. ܐܦܠܐ ܠܓܘܢܗ ܡܫܚܡ. ܘܗ̣ܘ ܗܢܐ ܐܪܓܝܘܣ ܐܘܟܝܬ ܚܘܪܐ ܡܬܩܪܐ. ܐܢܕܝܢ ܗܘܠܐ ܕܥܒܝܐ ܡ̣ܢ ܕܗܢܐ ܩܢܐ. ܠܓܘܫ̈ܡܐ ܕܥܒܪ ܒܗܘܢ ܡܘܟܡ. ܘܒܡܦܪ̈ܣܥܐ ܟܝܬ ܘܣܚܝ̣̈ܚܐ ܡܢܗܘܢ ܥܒܪ ܟܕ ܠܐ ܡܗܪ ܠܗܘܢ. ܠܐܛܝ̣̈ܡܐ ܕܝܢ ܡܘܩܕ. ܐܝܟ ܗ̇ܝ ܕܙܒܢ̈ܬܐ ܟܕ ܒܣܟܪܐ ܦܓܥ. ܠܢܚܫܐ ܕܒܗ ܦܫܪ. ܘܠܩܝܣܐ ܕܠܐ ܥܩܐ ܢܛܪ. ܘܗ̣ܘ ܗܢܐ ܦܣܘܠܘܐܢܘܣ ܐܘܟܝܬ ܓܫܘܦܐ ܡܬܩܪܐ. ܘܬܘܒ ܒܛܘܪ̈ܐ ܪ̈ܡܐ ܦܓܥ ܘܬܠܚ ܐܢܘܢ. ܘܙܒ̈ܢܬܐ ܬܘܒ ܒܝܡܐ ܥܡܕ ܘܠܚܝ̈ܘܬܗ ܐܘܩܕ. ܘܙܒ̈ܢܬܐ ܬܘܒ ܐܝܟ ܣܝܦܐ ܚܪܝ̣ܦܐ ܠܓܘܫܡܐ ܠܬܪܝܢ ܦܣܩ. ܘܬܪ̈ܝܗܘܢ ܗܠܝܢ ܒܫܡܐ ܓܘܢܝܐ ܩܗܪܐܢܘܣ ܐܘܟܝ̣ܬ ܦܩܥܐ ܡܬܩܪܝܢ. ܐܢܕܝܢ ܗܘܠܐ ܕܝܬܝܪ ܥܒܝܐ ܘܛܠܘܫܐ ܘܕܗܝ̣ܢܐ ܩܢܐ ܗ̣ܘ ܬܢܢܐ ܗܢܐ. ܡܘܩܕ ܘܡܫܠܗܒ ܠܐܐܪ. ܘܐܝܟ ܓܘܙܠܬܐ ܒܗ ܡܬܚܙܐ. ܐܟܡܐ ܕܒܝܩܕܢܐ ܕܗܝܟܠܐ ܕܒܐܦܣܘܣ ܐܬܚܙܝ. ܘܗ̣ܘ ܗܢܐ ܦܪܝܣܛܝܪ ܡܬܩܪܐ.

 

 

 

ܡܛܠ ܕܘܩܝܕܗ̈ܣ ܐܘܟܝܬ ܠܡܦܐܕ̈ܐ ܘܒܠܨܘ̈ܨܝܬܐ ܕܡܬܚܙܝܢ ܒܠܝܠܘ̈ܬܐ

 

ܕܘܟ̈ܝܬܐ ܗܢܝܢ ܕܐܝܬ ܒܗܝܢ ܟܝܢܐ ܟܒܪܝ̣ܬܢܝܐ. ܣܠܩܝܢ ܡܢܗܘܢ ܥܛܪ̈ܐ ܟܒܪ̣̈ܝܬܢܝܐ. ܘܣܪܟܝܢ ܒܐܐܪ ܗ̇ܘ ܕܐܬܪܛܒ ܒܩܪܝܪܘܬܐ ܠܠܝܝܬܐ. ܘܗܟܢܐ ܡܫܬܚܠܦ ܗ̣ܘ ܗ̇ܘ ܐܐܪ ܠܟܝܢܐ ܕܗܝ̣ܢܐ ܕܕܠܝ̣ܠ ܠܡܬܢܒܪܫܘ. ܡܬܢܒܪܫ ܕܝܢ ܡ̣ܢ ܙܠܝ̣̈ܩܝ ܟܘܟ̈ܒܐ. ܐܟܡܐ ܕܓܕܫܐ ܒܫܪܓܐ. ܕܡ̣ܢ ܕܠܩܐ ܕܠܥܠ ܕܠܩ ܐܝܢܐ ܕܠܬܚܬ. ܘܗܟܢܐ ܢܘܗܪ̈ܐ ܣܓܝ̈ܐܐ ܐܝܟ ܥܡܘ̈ܕܐ ܡܬܚܙܝܢ ܕܢܚܬܝܢ ܠܐܪܥܐ ܘܠܝܡܐ. ܘܢܘܪܐ ܬܘܒ ܣܓܝ̈ܐܐ ܡܬܚܙ̈ܝܢ ܒܠܠܝܐ ܕܩܝ̈ܡܢ ܘܡܣ̈ܬܬܢ ܝܬܝܪܐܝܬ ܒܨܚܘܐ. ܗܠܝܢ ܕܦܚ̈ܬܬܐ ܡܬܩܪ̈ܝܢ ܘܥܘ̈ܡܩܐ ܘܗܓܓ̈ܐ ܣܓܝ̈ܐܐ ܕܡܕܡ̈ܝܢܐ ܘܙܚܘܪ̈ܝܬܢܝܐ ܘܐܪ̈ܓܘܢܝܐ. ܒܗ̇ܝ ܕܓܘܢܐ ܡܦܪܓܐ ܕܢܘܪܐ ܟܕ ܥܡ ܚܫܘܟܐ ܒܨܝܪܐ ܡܬܚܠܛ. ܓܘ̈ܢܐ ܕܐܝܟ ܗܠܝܢ ܥܒܕ. ܘܡܐ ܕܒܠܩ ܢܘܗܪܐ. ܗ̣ܝ ܕܘܟܬܐ ܕܦܢܛܣܝܐ ܕܦܚܬܐ ܥܒܕܐ. ܘܒܐܝܡܡܐ ܡ̇ܢ ܠܐ ܡܬܚܙ̈ܝܢ ܗܠܝܢ ܢܒܪ̈ܫܬܐ ܡܛܠ ܫܡܫܐ.

 

 

 

ܡܛܠ ܟܘܟ̈ܒܐ ܨܘܨ̈ܝܢܐ

 

ܗܘܠܐ ܓܝܪ ܬܢܢܝܬܐ ܘܛܠܘܫܬܐ ܘܕܗܝ̣ܢܬܐ. ܟܕ ܠܘܬ ܓܝܓܠܐ ܗ̇ܝ ܢܘܪܢܝܬܐ ܡܛܝܐ ܕܠܩܐ. ܘܟܕ ܝܩܕܐ ܡܫܡܠܝܐܝܬ. ܠܟܝܢ ܢܘܪܐ ܗܦܟܐ. ܘܠܐ ܡܬܚܙܝܢܝ̣ܬܐ ܗܘܝܐ. ܘܐܝܟ ܟܘܟ̈ܒܐ ܕܢܦܠ ܡ̣ܢ ܫܡܝܐ ܘܢܬܪ ܡܬܚܙܝܐ. ܐܢܕܝܢ ܠܘ ܡܫܡܠܝܐܝܬ ܝܩܕܐ. ܠܦܘܬ ܥܒܝܘܬܗ̇ ܝܘ̈ܡܬܐ ܡܟܬܪܐ. ܘܕܡܘܬ ܨܘܨܝ̣ܬܐ ܘܕܘܢܒܐ. ܐܘ ܝܪܝ̣ܥܬܐ. ܐܘ ܚܝܘܬܐ ܕܩܪ̈ܢܝܗ̇ ܡܬܚܘܝܐ. ܘܐܢ ܣܓܝ ܥܒܝܐ ܗ̱ܝ ܗܘܠܐ. ܐܬܘ̈ܬܐ ܕܚܝ̣̈ܠܬܐ ܕܣܘ̈ܡܩܢ ܘܐܘܟܡ̈ܢ ܡܬܚܘ̈ܝܢ. ܘܐܝܬ ܐܡܬܝ ܕܥܡ ܡܬܟܪܟܢܘܬ ܢܘܪܐ ܗ̇ܝ ܕܥܡ ܡܘܙܠܬܐ ܟܪܟܐ. ܐܦ ܗ̣ܝ ܗ̇ܝ ܕܡܘܬܐ ܒܚܘܕܪܐ ܬܟܪܘܟ. ܕܝܡܘܩܪܐܛܝܣ ܕܝܢ ܘܐܢܐܟܣܓܘܪܐܣ. ܘܐ̱ܢܫܝ̈ܢ ܦܘܬܐܓܘܪ̈ܝܩܝܐ ܘܐܝܦܘܩܪܐܛܝܣ ܕܡ̣ܢ ܟܝܘܣ ܘܐܣܟܘܠܘܣ ܚܒܪܗ. ܡܬܟܢܫܢܘܬܐ ܕܟܘܟ̈ܒܐ ܠܐ ܛܥܝ̈ܐ ܐܡܪܝܢ ܕܐܝܬܝܗܘܢ ܨܘܨ̈ܝܢܐ. ܘܕܗܓܓ̈ܐ ܥܒܕܝܢ ܡܛܠ ܩܪܝ̣ܒܘܬܗܘܢ ܕܠܚ̈ܕܕܐ ܒܝܕ ܥܛܦܐ ܕܗ̇ܘܐ ܠܗܘܢ. ܘܐܪܝܣܛܘܛܠܝܣ ܠܣܥܝܝ̈ܗܘܢ ܕܟܠܗܘܢ ܡܙܝܦ ܘܫܪܐ.

 

 

 

ܡܛܠ ܝܩܕܢܐ

 

ܥܛܪܐ ܓܝܪ ܬܢܢܝܐ ܘܛܠܘܫܐ ܘܕܗܝ̣ܢܐ ܟܕ ܣܠܩ ܡ̣ܢ ܐܪܥܐ. ܒܠܥܕ ܗ̇ܝ ܕܢܬܦܣܩ ܥܩܪܗ ܡ̣ܢ ܐܪܥܐ. ܟܕ ܡܬܡܛܐ ܠܐܬܪܐ ܗ̇ܘ ܢܘܪܢܝܐ ܝܩܕ ܘܡܫܬܠܗܒ. ܘܗܟܢܐ ܒܐܝܕܐ ܒܐܝܕܐ ܗ̣ܝ ܢܘܪܢܝܘܬܐ ܗ̇ܝ ܕܒܟܠܗܝܢ ܡܢܘ̈ܬܗ ܕܥܛܪܐ ܗ̇ܝ ܐܚܕܐ ܥܕܡܐ ܕܡܬܡܛܝܐ ܠܐܪܥܐ ܘܡܘܩܕܐ ܟܠܡܐ ܕܥܠܝܗ̇. ܐܟܡܐ ܕܚܙܝܢ ܗܫܐ ܒܝܘ̈ܡܬܢ܆ ܕܓܕܫ ܡ̣ܢ ܢܘܪܐ ܗ̇ܝ ܕܐܘܩܕܬ݀ ܣܘܓܐܐ ܕܒܢ̈ܝܢܐ ܕܒܐܪܐܒܝܐ ܐܦ ܠܗ ܠܒܝܬ ܣܓܕܬܐ ܕܡܫܠܡܢ̈ܐ ܕܗܪܬܡܢ ܗ̇ܝ ܕܟܥܒܗ ܡܬܩܪܝܐ.

 

 

 

ܡܛܠ ܫܒܝܠ ܬܒܢܐ

 

ܐܪܝܣܛܘܛܠܝܣ ܡ̇ܢ ܐܡ̇ܪ. ܕܥܛܪܐ ܗ̱ܘ ܬܢܢܝܐ ܕܒܐܐܪ ܡܩܝܡ. ܘܡܬܚܡ ܠܗ ܕܐܝܬܘܗܝ ܨܘܨܝ̣ܬܐ ܕܚܘܕܪܐ ܕܛܒ ܪܒ. ܕܝܡܘܩܪܐܛܝܣ ܕܝܢ ܘܐܟܐܣܓܘܪܐܣ. ܢܘܗܪܐ ܡܕܡ ܕܟܘ̈ܟܒܐ ܙܥܘܪ̈ܐ ܕܛܒ ܣܓܝ̈ܐܝܢ ܘܠܚܕ̈ܕܐ ܩܪܝ̣ܒܝܢ ܐܡܪܝܢ ܕܐܝܬܘܗܝ. ܘܟܕ ܒܟܠܡܕܡ ܐܪܝܣܛܘܛܠܝܣ ܝܬܝܪ ܡ̣ܢ ܟܠܗܘܢ ܗ̇ܢܘܢ ܐ̱ܚܪ̈ܢܐ ܐܨܠܚ. ܒܗܕܐ ܚܕܐ ܠܘ ܣܓܝ ܚܝܠܬܢܝ̣ܬܐ ܡܬܚܙܝܐ ܬܪܥܝܬܗ. ܒܗ̇ܝ ܕܟܘ̣ܬܪܐ ܕܥܛܪܐ ܬܢܢܝܐ ܕܐܝܟ ܗܢܐ ܕܠܐ ܫܘ̣ܚܠܦ. ܙܒ̈ܢܐ ܕܐܝܟ ܗܠܝܢ ܢܓܝ̣ܪ̈ܐ ܠܐ ܡܬܗܝܡܢܢܐ ܗ̱ܘ. ܘܐܠܘ ܬܘܒ ܒܐܐܪ ܗܘܐ ܗ̣ܘ ܗܢܐ. ܐܝܟܢܐ ܠܘ ܡܫܚܠܦܐ ܡܬܚܙܐ ܒܐܬܪ̈ܘܬܐ ܡܫܚ̈ܠܦܐ. ܘܗܐ ܣܗܪܐ ܕܪܡ ܗ̣ܘ ܡܢܗ ܡܫܚܠܦܐܝܬ ܡܬܚܙܐ. ܦܘܬܐܓܘܪ̈ܝܩܝܐ ܕܝܢ ܐܡܪܝܢ. ܕܐܘܪܚܐ ܐܝܬܘܗܝ ܗܢܐ ܕܚܕ ܡ̣ܢ ܟܘܟ̈ܒܐ ܕܢܦܠܘ ܒܝܩܕܢܐ ܗ̇ܘ ܕܐܡܝ̣ܪ ܥܠ ܦܐܬܘܢ. ܘܐ̱ܚܪ̈ܢܐ ܠܡ ܐܡܪܘ ܕܒܗܕܐ ܠܡ ܐܘܪܚܐ ܒܙܒܢ ܪܕܐ ܗܘܐ ܫܡܫܐ. ܘܡܛܠ ܗܕܐ ܝܩܕܬ݀ ܗ̣ܝ ܕܘܟܬܐ. ܘܕܠܡܬܠܐ ܝܬܝܪ ܡ̣ܢ ܕܠܫܪܪܐ ܕܡܝ̈ܢ ܡ̈ܠܐ ܗܠܝܢ ܓܠܝܐ.

 

 

 

ܡܛܠ ܪܘܚܐ

 

ܥܛܪܐ ܓܝܪ ܬܢܢܝܐ ܡܐ ܕܣܠܩ ܡ̣ܢ ܐܪܥܐ. ܟܕ ܡܛܐ ܠܥܪܩܬܐ ܗ̇ܝ ܕܐܐܪ ܩܪܝ̣ܪܐ. ܐܢ ܡܫܬܗܝܐ ܚܡܝ̣ܡܘܬܗ ܡ̣ܢ ܩܪܝܪܘܬܐ ܗ̇ܝ. ܗܝܕܝܢ ܝܩܕ ܘܢܚܬ. ܘܒܡܚܬܬܗ ܡܚܫܘܠܐ ܡܕܡ ܒܐܐܪ ܡܙܝ̣ܥ. ܕܠܗ ܪܘܚܐ ܐܘܟܝ̣ܬ ܡܫܒܐ ܩܪܝܐ ܡܠܬܐ. ܐܢܕܝܢ ܠܐ ܡܫܬܗܝܐ ܚܡܝ̣ܡܘܬܗ ܗܪܬܡܢ. ܕܠܐ ܟܠܘ ܥܕܡܐ ܠܓܝܓܠܐ ܢܘܪܢܝܬܐ ܡܬܡܛܐ. ܘܡܛܠ ܕܗ̣ܝ ܗܕܐ ܥܡܗ̇ ܕܡܘܙܠܬܐ ܚܕܪܐ. ܡܟܠܐ ܟܠܝܐ ܠܗ ܠܥܛܪܐ ܗ̇ܘ ܬܢܢܝܐ ܡ̣ܢ ܡܣܩܬܐ. ܘܗܟܢܐ ܬܘܒ ܠܐܦܝ̈ ܠܬܚܬ ܡܬܬܙܝ̣ܥ. ܘܠܡܚܫܘܠܐ ܗ̇ܘ ܕܐܬܐܡܪ ܥܒܕ ܒܐܐܪ ܘܪܘܚܐ ܡܙܝ̣ܥ. ܐܝܦܦܣܪܛܝܣ ܕܝܢ ܘܐܣܛܘܝܩܘܣ ܐܡ̣ܪܘ. ܕܪܕܝܐ ܘܐܫܝ̣ܕܘܬܐ ܕܐܐܪ ܐܝܬܝܗܘܢ ܪ̈ܘܚܐ. ܘܕܠܐ ܫܪܝ̣ܪܐ ܡܣܒܪܢܘܬܐ ܗܕܐ ܝ̣ܕܝ̣ܥܐ ܡ̣ܢ ܗ̇ܝ ܕܒܫܢܝ̈ܐ ܝܒܝ̣̈ܫܬܐ ܕܒܨܝ̣ܪ ܒܗܝܢ ܡܛܪܐ܆ ܪ̈ܘܚܐ ܣܓܝ̈ܐܬܐ ܗܘ̈ܝܢ. ܘܗܕܐ ܡܫܘܕܥܐ. ܕܥܛܪܐ ܗ̇ܘ ܬܢܢܝܐ ܘܝܒܝ̣ܫܐ ܗܘܝܘ ܗܘܠܐ ܕܪܘܚܐ. ܐܟܡܐ ܕܥܛܪܐ ܗ̇ܘ ܠܗܓܢܝܐ ܘܪܛܝ̣ܒܐ ܗܘܠܐ ܗ̣ܘ ܕܡܛܪܐ. ܘܟܕ ܗܟܢܐ ܣܩܘܒ̈ܠܝܐ ܐܢܘܢ ܬܪ̈ܝܗܘܢ ܥܛܪܐ ܡܬܥܕܪܘ ܡܬܥܕܪܝ̣ܢ ܡ̣ܢ ܚܕܕ̈ܐ ܐܝܟ ܕܒܓܕܫܐ. ܡܥܕܪ ܕܝܢ ܥܛܪܐ ܗ̇ܘ ܠܗܓܢܝܐ ܠܗܘ ܬܢܢܝܐ ܠܘܬ ܗܘܝܐ. ܒܗ̇ܝ ܕܟܕ ܡܬܪܛܒܐ ܐܪܥܐ ܘܡܬܪܓܙ ܬܢܢܐ ܝܬܝܪܐ ܘܥܣܩܐ ܐܝܟ ܩܝ̈ܣܐ ܕܪܛܝ̣ܒܝ̣ܢ. ܡܘ̈ܠܕܢ ܕܝܢ ܪ̈ܘܚܐ ܠܡܛܪܐ. ܒܗ̇ܝ ܕܕܚ̈ܝܢ ܠܥܢܢ̈ܐ ܘܠܒ̈ܕܢ ܘܥܨܪ̈ܢ ܠܗܝܢ. ܘܒܗ̇ܝ ܕܡܩ̈ܛܢܢ ܒܙܘܥܗܝܢ ܠܥܛܪܐ ܬܢܢܝܐ ܕܥܡ ܠܗܓܐ. ܟܕ ܗܢܐ ܓܝܪ ܫܒܩ ܠܠܗܓܐ ܐܝܟ ܕܠܡܘܒܠܐ ܝܩܝ̣ܪܬܐ ܘܢܘܟܪܝܬܐ. ܩܐܪ ܗ̣ܘ ܠܗܓܐ ܘܡܬܥܒܐ ܘܢܚܬ ܘܗܘܐ ܡܛܪܐ. ܒܟܝܢܐ ܕܝܢ ܫܪܝܢ ܡܛܪܐ ܠܪܘܚܐ ܒܕܡܕܥܟܝܢ ܠܥܛܪܗ̇ ܬܢܢܝܐ. ܘܡܢܝ̈ܚܢ ܪ̈ܘܚܐ ܠܡܛܪܐ. ܒܕܡܒܕܪ̈ܢ ܘܡܦܠܗ̈ܕܢ ܠܡܢܘ̈ܬܐ ܥܢܢ̈ܝܬܐ.

 

 

 

ܡܛܠ ܩܪ̈ܚܐ ܘܟܘܟ̈ܝܬܐ ܘܥܠܥ̈ܠܐ

 

ܪܘܚܐ ܓܝܪ ܐܝܕܐ ܕܡ̣ܢ ܥܢܢܐ ܦܠܛܐ ܘܢܚܬܐ. ܟܕ ܦܓܥܐ ܒܗ̇ ܒܐܘܪܚܗ̇ ܥܢܢܐ ܐ̱ܚܪܬܐ. ܠܐܦܝ̈ ܠܬܚܬ ܕܚܝܐ ܠܗ̇ ܠܥܢܢܐ ܗ̇ܝ. ܘܗ̣ܝ ܡ̣ܢ ܗ̇ܝ ܠܐܦܝ̈ ܠܥܠ ܡܬܕܚܝܐ. ܘܗܟܢܐ ܡ̣ܢ ܬܪ̈ܝܗܘܢ ܕܚ̈ܝܐ ܗܠܝܢ ܣܩܘܒ̈ܠܝܐ. ܕܥܠ ܢܦܫܗ̇ ܬܟܪܘܟ ܪܘܚܐ ܗ̇ܝ ܓܕܫܐ ܠܗ̇. ܘܒܗ ܒܟܪܘܟܝܗ̇ ܩܪܚܐ ܘܟܪ̈ܘܟܝܬܐ ܡܬܩܪܝܐ. ܘܟܕ ܡܫܪܝܐ ܕܬܥܛܘܦ ܠܐܦܝ̈ ܠܥܠ ܘܬܣܩ܆ ܗܝܕܝܢ ܥܠܥܠܐ ܡܬܩܪܝܐ. ܗܘ̈ܝܢ ܕܝܢ ܬܘܒ ܘܟܪ̈ܘܟܝܬܐ. ܘܟܕ ܗܘܠܐ ܪܘܝ̣ܚܬܐ ܡܛܝܐ ܠܘܬ ܐܪܥܐ ܘܫܘܪܐ ܘܡܙܕܢܩܐ ܡܢܗ̇ ܘܥܛܦܐ ܕܬܣܩ. ܐܝܛܐ ܦܓܥܐ ܒܗ̇ ܒܐܘܪܚܐ ܪܘܚܐ ܐ̱ܚܪܬܐ ܕܢܚܬܐ. ܘܗܟܢܐ ܕܚܝܐ ܣܩܘܒ̈ܠܝܐ ܕܐܝܟ ܗ̇ܢܘܢ ܓܕܫܝܢ. ܘܙܒܢܝ̈ܢ ܣܓܝ̈ܐܢ ܠܐܝܠܢ̈ܐ ܡ̣ܢ ܫܪ̈ܫܝܗܘܢ ܥܩܪܝܢ ܩܪ̈ܚܐ. ܘܠܐܠܦ̈ܐ ܡ̣ܢ ܝܡܐ ܚܛܦܝܢ.

 

 

 

ܡܛܠ ܦܢ̈ܝܬܐ ܕܡܢܗܝܢ ܪ̈ܘܚܐ ܢܫ̈ܒܢ

 

ܠܚܘܕܪܐ ܓܝܪ ܐܘܪܝܙܘܢܝܐ ܠܬܪ̈ܬܥܣܪܐ ܡܢܘ̈ܢ ܫܘ̈ܝܬܐ ܦܠܓܘܗ̇. ܠܬܠܬ ܡܕܢ̈ܚܝܬܐ ܟܐܡܬ ܠܛܪܘܦܝ̣ܩܘܣ ܐܝܣܝܡܗܪܝܐ. ܘܠܪܘܚܗ̇ ܡܕܢܚܝܬܐ ܦܫܝ̣ܛܐܝܬ ܩ̣ܪܘ. ܘܠܛܪܘܦܝܩܘܣ ܕܡܣ̈ܩܝ ܫܡܫܐ ܩܝܛܝܐ ܘܠܪܘܚܗ ܩܝܩܐܘܣ ܩ̣ܪܘ. ܘܠܛܪܘܦܝܩܘܣ ܕܡܣ̈ܩܝ ܫܡܫܐ ܣܬܘܝܐ. ܘܠܪܘܚܗ̇ ܐܦܠܝܛܝܘܣ ܩ̣ܪܘ. ܘܠܬܠܬ ܡܥܪ̈ܒܝܬܐ ܟܐܡܬ݀ ܠܛܪܘܦܝܩܘܣ ܐܝܣܝ ܡܗܪܝܐ ܕܡܥܪ̈ܒܝ ܫܡܫܐ. ܘܠܪܘܚܗ̇ ܡܥܪܒܝܬܐ ܦܫܝ̣ܛܐܝܬ ܩܪܘ. ܘܠܛܪܘܦܝܩܘܣ ܕܡܥܪ̈ܒܝ ܫܡܫܐ ܩܝܛܝܐ. ܘܠܪܘܚܗ̇ ܐܪܓܐܣܛܝܣ ܩ̣ܪܘ. ܘܠܛܪܘܦܝ̣ܩܘܣ ܕܡܥܪ̈ܒܝ ܫܡܫܐ ܣܬܘܝܐ. ܘܠܪܘܚܗ̇ ܠܝܒܐ ܩ̣ܪܘ. ܘܠܬܠܬ ܓܪ̈ܒܝܝܬܐ. ܟܐܡܬ݀ ܠܐܬܪܐ ܗ̇ܘ ܕܦܘܠܘܣ ܓܪܒܝܝܐ. ܘܠܪܘܚܗ̇ ܓܪܒܝܝܬܐ܆ ܦܫܝ̣ܛܐܝܬ ܩ̣ܪܘ. ܘܠܗ̇ܘ ܕܡܕܢܚ ܓܪܒܝ ܘܠܪܘܚܗ ܐܦܕܝܩܝܣ ܩ̣ܪܘ. ܘܠܗ̇ܘ ܕܡܥܪܒ ܓܪܒܝ. ܘܠܪܘܚܗ ܬܪܐܣܩܝܐܣ ܩ̣ܪܘ. ܘܠܬܠܬ ܬܝܡ̈ܢܝܬܐ. ܟܐܡܬ݀ ܠܐܬܪܐ ܗ̇ܘ ܕܦܘܠܘܣ ܬܝܡܢܝܐ. ܘܠܪܘܚܗ ܬܝܡܢܝܬܐ ܦܫܝ̣ܛܐܝܬ ܩ̣ܪܘ. ܘܠܗ̇ܘ ܕܡܕܢܚ ܬܝܡܢ. ܘܠܪܘܚܗ ܐܘܪܘܢܘܛܘܣ ܩ̣ܪܘ. ܘܠܗ̇ܘ ܕܡܥܪܒ ܬܝܡܢ ܘܠܪܘܚܗ ܠܝܒܐܢܘܛܘܢ ܩ̣ܪܘ. ܘܥܠ ܪ̈ܘܚܐ ܘܡܥܒܕܢ̈ܘܬܗܝܢ܇ ܡ̈ܠܐ ܐܝܬ ܠܗܘܢ ܦܬܝ̈ܬܐ ܠܚܟܝ̣̈ܡܐ ܕܠܐ ܥܪܝܐ ܠܗܝܢ ܡܟܬܒܢܘܬܐ ܗܕܐ.

 

 

 

ܡܛܠ ܢܝܕܐ ܕܐܪܥܐ ܐܘܟܝܬ ܙܘܥܗ̇ ܕܐܪܥܐ

 

ܥܛܪܐ ܡ̇ܢ ܬܢܢܝܐ ܕܚܡܝ̣ܡ ܛܒ. ܘܣܓܝ ܝܬܝܪ ܟܡܝܘܬܐ. ܟܕ ܢܬܝܠܕ ܬܚܝܬ ܐܪܥܐ. ܘܬܗܘܐ ܗ̣ܝ ܐܪܥܐ܆ ܟܐܡܬ ܫܛܝ̣ܚܘܬܗ̇ ܒܪܝܬܐ ܕܪܨܝ̣ܦܐ. ܗܝܕܝܢ ܡܬܚܒܨ ܗ̣ܘ ܥܛܪܐ ܗ̇ܘ ܠܡܩܦ. ܘܟܕ ܡܢܗ̇ ܕܪܨܝ̣ܦܘܬ ܦܘܪܘ ܕܐܪܥܐ ܡܬܥܟܪ. ܡܙܝ̣ܥ ܠܗ̇ ܘܡܢܝ̣ܕ. ܘܐܢ ܝܬܝܪ ܚܝܠܬܢܐ ܢܗܘܐ ܡܨܪܐ ܨܪܐ ܠܗ̇ ܠܐܪܥܐ ܘܢܩܦ ܥܡ ܩ̈ܠܐ ܙܝ̣̈ܥܐ ܘܡܫܚ̈ܠܦܐ. ܒܙܒܢ ܡ̇ܢ ܐܝܟ ܩܠ ܡܫܪܘܩܝ̣ܬܐ. ܒܙܒܢ ܕܝܢ ܐܝܟ ܓܥܬܐ ܕܬܘܪܐ. ܠܦܘܬ ܫܘܚܠܦ ܐܣܟܡܐ ܕܚܪܘܪ̈ܝܗ̇ ܕܐܪܥܐ. ܘܙܒܢܝ̈ܢ ܣܓܝ̈ܐܢ ܗ̣ܘ ܙܘܥܐ ܕܐܪܥܐ ܣܒܝ̣ܣܐ ܘܐܡܝ̣ܢܐ ܗܘܐ ܥܕܡܐ ܠܙܒܢܐ ܣܓܝܐܐ. ܒܥܠܬ݀ ܣܓܝܐܘܬܐ ܕܪܘܚܐ. ܘܥܩܠܩܠܘܬܐ ܕܚܪܘܪ̈ܝ ܐܪܥܐ. ܘܟܘܬܪܐ ܕܥܠܬܗ ܡܘܠܕܢܝ̣ܬܐ ܕܥܛܪܐ. ܘܒܙܒܢ ܡ̇ܢ ܣܛܪ ܡ̣ܢ ܙܘܥܐ ܗܘܝܐ ܓܥܬܐ ܡ̣ܢ ܐܪܥܐ. ܟܕ ܠܐ ܬܣܦܩ ܪܘܚܐ ܠܡܙܥܘܬܗ̇ ܠܐܪܥܐ. ܐܠܐ ܨܪܝܐ ܠܗ̇ ܘܢܦܩܐ. ܘܒܙܒܢ ܡ̇ܢ ܩܛܡܐ ܕܩܝܡܐ ܒܗ ܢܘܪܐ ܐܝܟ ܒܠܨܘܨܝ̣ܬܐ. ܐܣܩܬ݀ ܗ̣ܝ ܪܘܚܐ. ܘܡܠܬܗ̇ ܠܡܕܝܢ̱ܬܐ ܕܠܝ̣ܦܐܪܐܘ. ܗܟܢܐ ܕܝܢ ܗܘܝ̈ ܘܐܓܢ̈ܐ ܕܢܘܪܐ ܕܒܐܛܢܝ. ܒܙܒܢ ܕܝܢ ܟܐܦ̈ܐ ܪܘܪ̈ܒܬܐ ܡܣܩܐ ܡ̣ܢ ܓܘ ܐܪܥܐ. ܒܙܒܢ ܕܝܢ ܛܝ̣ܢܐ. ܒܙܒܢ ܕܝܢ ܡܒܘ̈ܥܐ ܕܡܝ̈ܐ ܐܘܟܡ̈ܐ ܡܓܝ̣ܚܐ. ܒܙܒܢ ܕܝܢ ܡܒܘ̈ܥܐ ܕܐܝܬܝܗܘܢ ܗܘܘ ܡܓܝ̈ܙܐ. ܘܒܙܒܢ ܡ̇ܢ ܠܦܬܝܐ ܗܘܝܢ ܗ̣ܢܘܢ ܙܘ̈ܥܐ ܪܥܠܢܐܝܬ ܘܪܬܝ̣ܬܢܐܝܬ. ܒܙܒܢ ܕܝܢ ܠܥܘܡܩܐ ܢܩܫܢܐܝܬ. ܘܛܒ ܥܣܩܝ̣ܢ. ܘܡܛܠ ܗܕܐ ܚܕܐ ܠܟܡܐ ܗܘܝܢ. ܐܢܐܟܣܓܘܪܐܣ ܕܝܢ ܐܡ̇ܪ. ܕܐܪܥܐ ܦܬܝܐ. ܘܥܠ ܗܕܐ ܡܬܛܥܢܐ ܡ̣ܢ ܡܝ̈ܐ. ܐܝܟ ܛܣ̈ܐ ܕܕܗܒܐ ܕܡܬܛܥܢܝܢ ܡ̣ܢ ܡܝ̈ܐ. ܘܟܕ ܡܬܩܦܣܝ̣ܢ ܫܟܬܝ̣ܢ. ܘܡܛܠ ܕܟܠܗ̇ ܐܪܥܐ  ܦܚܝ̣ܚܬܐ ܗ̱ܝ ܣܛܪ ܡ̣ܢ ܐܦܝ̈ܗ̇ ܕܪ̈ܨܝ̣ܦܝܢ. ܘܐܢ ܟܕ ܡܢܬܐ ܡ̣ܢ ܐܐܪ ܢܦܠܐ ܒܗ̇ ܘܠܐ ܡܫܟܚܐ ܕܬܣܩ ܡܛܠ ܪܨܝܦܘܬ ܐܦܝ̈ܗ̇. ܡܙܝܥܐ ܘܡܢ̣ܝܕܐ ܠܗ̇. ܕܝܡܘܩܪܐܛܝܣ ܕܝܢ ܐܡ̇ܪ. ܕܥܘ̈ܒܝܗ̇ ܕܐܪܥܐ ܡܠܝܢ. ܘܟܕ ܣܓܝܢ ܡ̣ܢ ܡܝ̈ܐ ܕܡܛܪܐ ܕܢܚܬܝܢ ܠܥܡܝ̣ܩܘܬܗ̇. ܘܠܐ ܥܪܝܢ ܠܗܘܢ ܥܘ̈ܒܝܗ̇ ܕܐܪܥܐ܇ ܡܬܚܒܨܝܢ. ܘܟܕ ܡܙܕܪܒܝ̣ܢ܆ ܙܘܥܐ ܘܢܝܕܐ ܕܐܪܥܐ ܥܒܕܝ̣ܢ. ܐܢܐܟܣܝܡܗܐܢܝܣ ܕܝܢ ܐܡ̇ܪ܆ ܕܪ̈ܝܫܝ ܛܘܪ̈ܐ ܟܕ ܡ̣ܢ ܡܛܪܐ ܡܫܬܪܝܢ. ܐܘ ܡ̣ܢ ܝܒܝ̣ܫܘܬܐ ܡܬܦܪܟܟܝܢ ܘܢܦܠܝܢ. ܙܘܥܐ ܕܐܪܥܐ ܥܒܕܝ̣ܢ. ܘܕܪ̈ܘܚܐ ܐܢܝܢ ܥ̈ܠܬܐ ܕܢܝܕܐ ܘܠܘ ܐܐܪ ܐܘ ܡܝ̈ܐ ܐܘ ܪ̈ܝܫܝ ܛܘܪ̈ܐ. ܝܕܝܥܐ ܡ̣ܢ ܗ̇ܝ ܕܒܠܠܝܐ ܝܬܝܪܐܝܬ ܗܘܝܢ ܙܘ̈ܥܐ ܒܝܕ ܪܨܝܦܘܬܐ ܕܡ̣ܢ ܩܪܝ̣ܪܘܬܐ. ܘܒܛܗܪ̈ܝܬܐ ܒܗ̇ܝ ܕܫܡܫܐ ܗܝܕܝܟ ܡܝܒܫ ܘܩܦܕ ܠܒܪܝܘܬܗ̇ ܕܐܪܥܐ. ܘܒܬܐܕܐܐ ܘܒܬܫܪ̈ܝܬܐ ܬܘܒ. ܒܕ ܒܣܬܘܐ ܒܨܝ̣ܪ ܩܛܪ ܥܛܪܐ ܬܢܢܝܐ. ܘܒܩܝܛܐ ܡܬܦܘܫܫ. ܘܡ̣ܢ ܗ̇ܝ ܕܒܓܪܒܝܐ ܒܥܠܬ݀ ܪܨܝ̣ܦܘܬܐ ܝܬܝܪ ܗܘܝܢ ܙܘ̈ܥܐ ܡ̣ܢ ܕܒܬܝܡܢܐ. ܘܡ̣ܢ ܗ̇ܝ ܕܐܟܡܐ ܕܒܢ ܪܬܝ̣ܬܐ ܘܪܦܦܐ ܘܙܩܬܐ ܡ̣ܢ ܪܘܚܐ ܗܘܝܢ. ܗܟܘܬ ܐܦ ܒܐܪܥܐ.

 

 

 

ܢܝܫܐ ܚܡܝܫܝܐ ܡܛܠ ܒܘ̈ܚܢܐ ܕܐܣܛܘܟܣܐ ܢܘܪܢܝܐ. ܩܕܡܝܬ݀ ܡܛܠ ܟܝܢܗ̇

 

ܕܢܘܪܐ ܗܕܐ ܕܠܘܬܢ ܚܡܝܡܬܐ ܗ̱ܝ. ܗ̣ܝ ܪܓܫܬܐ ܣܗܕܐ. ܐܝܢ ܡܛܠ ܓܝܓܠܐ ܗ̇ܝ ܢܘܪܢܝܬܐ ܐ̱ܢܫܝ̈ܢ ܐܣܒܪܘ ܕܠܘ ܚܡܝ̣ܡܬܐ ܗ̱ܝ. ܒܗ̇ܝ ܕܐܠܘ ܚܡܝ̣ܡܐ ܗܘܬ݀. ܐܝܟܢܐ ܚܪܟܬܗ ܠܐܐܪ ܫܒܒܗ̇ ܗܢܐ ܟܠܗ ܢܘܓܪܐ ܘܢܘܪܐ ܥܒܕܬܗ. ܘܕܝܒܝ̣ܫܬܐ ܗ̱ܝ ܒܙܢܐ ܗ̇ܘ ܕܠܐ ܕܒܩܐ ܒܓܘܫ̈ܡܐ ܐܝܟ ܡܝ̈ܐ ܓܠܝܐ. ܘܠܘ ܒܙܢܐ ܕܥܣܩܘܬ ܡܣܬܟܡܢܘܬܐ.

 

 

 

ܡܛܠ ܗ̇ܝ ܕܠܐ ܓܘܢܐ ܗ̱ܝ

 

ܐܠܘ ܓܘܢܐ ܩܢܝܐ ܗܘܬ ܢܘܪܐ ܡܟܠܐ ܟܠܝܐ ܗܘܬ݀ ܡ̣ܢ ܚܙܬܢ ܠܟܘܟ̈ܒܐ ܟܠܗܘܢ ܕܠܥܠ ܡܢܗ̇. ܘܟܕ ܠܘܬܢ ܕܝܠܢ ܟܪ ܕܥܫܢܐ ܢܘܪܐ ܐܟܡܐ ܕܒܟܘܪ ܩܝܢܝ̈ܐ. ܘܒܥܩܪ ܕܠܩܐ ܫܪܓܢܝܐ ܕܠܐ ܓܘܢܐ ܗܘܝܐ. ܘܐܝܟ ܣܦܝ̣ܩܘܬܐ ܡܬܚܙܐ ܐܬܪܗ̇ ܢܘܪܐ ܗ̇ܝ ܟܘܠܢܝܬܐ. ܐܝܟܢܐ ܠܘ ܕܠܐ ܓܘܢܐ ܬܗܘܐ.

 

 

 

ܡܛܠ ܗ̇ܝ ܕܒܟܪܘܟܝܗ̇ ܕܡܘܙܠܬܐ ܟܪܟܐ

 

ܟܠ ܡܢܬܐ ܡ̣ܢ ܢܘܪܐ ܒܡܢܬܐ ܡ̣ܢ ܡܘܙܠܬܐ ܣܗܪܐ ܐܝܟ ܕܒܐܬܪܐ ܣܝܡܐ. ܘܟܠܡܕܡ ܡ̣ܢ ܐܠܨ̈ܬܐ ܕܒܙܘܥܐ ܕܐܬܪܗ ܢܬܬܙܝܥ. ܢܘܪܐ ܡܕܝܢ ܒܙܘܥܗ̇ ܕܡܘܙܠܬܐ ܡܬܬܙܝ̣ܥܐ.

 

 

 

ܡܛܠ ܫܪܓܗ̇ ܕܢܘܪܐ ܘܕܘܥܟܗ̇

 

ܟܠ ܡܢܬܐ ܕܡ̣ܢ ܢܘܪܐ ܕܡܫܬܓܪܐ ܟܕ ܒܟܝܢܐ ܠܐܦܝ̈ ܠܥܠ ܡܬܬܙܝ̣ܥܐ܆ ܡ̣ܢ ܩܪܝ̣ܪܘܬܐ ܕܦܓܥܐ ܒܗ̇ ܕܥܟܐ. ܘܠܕܘܥܟܗ̇ ܕܡܢܬܐ ܗ̇ܝ ܫܓܪܐ ܕܡܢܬܐ ܐ̱ܚܪܬܐ ܢܩܦ. ܘܗܟܢܐ ܣܒܝ̣ܣܐܝܬ ܦܐܫ ܗ̣ܘ ܕܠܩܐ. ܟܡܐ ܕܠܐ ܡܘܦܝܐ ܗܘܠܐ ܗ̇ܝ ܕܝܩܕܐ ܐܝܬ ܓܝܪ ܘܙܢܐ ܐ̱ܚܪܢܐ ܕܕܘܥܟܐ. ܗ̇ܘ ܕܒܫܪܪܐ ܠܘ ܕܘܥܟܐ ܗ̱ܘ. ܐܝܟ ܗ̇ܝ ܕܟܕ ܢܘܪܐ ܥܙܝ̣ܙܬܐ ܬܫܠܛ ܥܠ ܗܘܠܐ ܕܝܩܕܐ. ܠܡܢܘ̈ܬܗ̇ ܐܪ̈ܥܢܝܬܐ ܘܡܝܢܝ̈ܬܐ ܘܐܐܪ̈ܝܬܐ ܟܘܠܢܐܝܬ ܬܛܠܩ. ܘܠܢܘܪܢܝܘܬܐ ܦܫܝ̣ܛܬܐ ܫܚܠܦܝܗ̇. ܘܡ̣ܢ ܗܪܟܐ ܕܠܐ ܓܘܢܐ ܘܐܝܟ ܗ̇ܝ ܕܠܐ ܐܝܬܝܗ̇ ܬܚܘܝܗ̇. ܐܟܡܐ ܕܓܕܫܐ ܠܟܘ̈ܟܒܐ ܨܘܨ̈ܝܢܐ ܗ̇ܢܘܢ ܕܟܕ ܠܢܘܪܢܝܘܬܐ ܡܫܬܚܠܦܝ̣ܢ. ܐܝܟ ܗ̇ܢܘܢ ܕܕܥܟܘ ܘܐܘܦܝ̣ܘ ܡܣܬܒܪܝܢ.

 

 

 

ܡܛܠ ܢܘܪ̈ܘܬܐ ܗ̇ܢܘܢ ܕܓܕ̈ܝܢ ܒܛܘܪ̈ܐ ܕܦܪܘܓܝܐ ܘܕܩܪܝܛܝ ܘܣܝܩܝܠܝܐ. ܘܐܛܢܝ

 

ܥܠܬܐ ܕܝܢ ܕܗܠܝܢ ܐܝܬܝܗ̇ ܪܘܚܐ ܬܝܡܢܝܬܐ ܕܡ̣ܢ ܙܘܢܝ ܝܩܕܬܐ ܢܫܒܐ ܒܓܘ ܚܠܝ̣̈ܠܐ ܘܦܚ̈ܬܐ ܘܦܥܪ̈ܐ ܕܐܪܥܐ. ܘܡ̣ܢ ܚܡܝ̣ܡܘܬܐ ܕܩܢܝܐ ܒܩܨܬ ܙܘܥܝ̈ܗ̇ ܪ̈ܗܝ̣ܒܐ ܡܬܢܝܪܐ. ܘܟܕ ܡܫܟܚܐ ܠܗ̇ ܡܦܩܢܐ ܢܦܩܐ. ܘܐܝܟ ܕܒܣܘܓܐܐ ܒܨܪ̈ܝܐ ܗ̇ܢܘܢ ܕܡܝ̈ܐ ܡܢܗܘܢ ܪܕܝܢ ܡܬܢܦܨܐ. ܘܠܗܘܢ ܠܡܝ̈ܐ ܗܠܝܢ ܡܪܬܚܐ ܘܚܡܡ̈ܬܐ ܥܒܕܐ. ܐܦ ܓܝܪ ܘܒܟܝܘܣ ܓܙܪܬܐ܇ ܠܡܝ̈ܐ ܚܡܝ̣̈ܡܐ ܘܡܘܩ̈ܕܢܐ ܕܢܒܥܝܢ ܡ̣ܢ ܓܘ ܫܘܥܐ ܕܒܝܡܐ. ܒܝܕ ܐܒܘܬܐ ܕܐܒܪܐ ܠܘܬ ܝܒܫܐ ܢܬܦܘ ܐ̱ܢܫܝ̈ܢ ܘܒܝܬ ܡܣܚܘܬܐ ܠܐܣܝܘܬܐ ܥܠܝܗܘܢ ܥܒܕܘ.

 

 

 

ܢܝܫܐ ܫܬܝܬܝܐ ܡܛܠ ܒܘ̈ܚܢܐ ܕܢܘܗܪܐ ܘܚܫܘܟܐ ܘܓܘܢܐ ܘܐܝܡܡܐ ܘܠܠܝܐ

 

ܡ̣ܢ ܡܠܦܢܝ̈ܢ ܡ̇ܢ ܩܕܝܫܐ ܓܪܝܓܘܪܝܘܣ ܕܢܘܣܐ. ܘܚܣܝܐ ܝܥܩܘܒ ܕܐܘܪܗܝ ܐܡ̣ܪܘ. ܕܢܘܗܪܐ ܙܗܪܐ ܘܨܡܚܐ ܕܢܘܪܐ ܐܝܬܘܗܝ. ܗ̇ܝ ܕܩܕܝ̣ܡܐ ܗܘܬ݀ ܒܪܝܐ ܘܚܒܝ̣ܟܐ ܗܘܬ ܥܡ ܫܪܟܐ ܕܐܣܛܘܟ̈ܣܐ. ܘܟܕ ܐܡ̣ܪ ܐܠܗܐ ܢܗܘܐ ܢܘܗܪܐ. ܐܬܦܪܫܘ ܐܣܛܘܟ̈ܣܐ ܡ̣ܢ ܚܕܕ̈ܐ. ܘܪܗܛܬ݀ ܘܩܡܬ݀ ܢܘܪܐ ܒܐܬܪܐ ܥܠܝܐ. ܘܐܙܠܓ ܢܘܗܪܗ̇ ܥܠ ܬܒܝܠ. ܘܙܕܩ ܠܡܕܥ ܕܡܛܠ ܢܘܗܪܐ ܗ̇ܘ ܕܒܝܘܡܐ ܩܕܡܝܐ ܐܬܒܪܝ ܡ̣ܢ ܩܕܡ ܒܪܝ̣ܬܐ ܕܫܡܫܐ ܘܣܗܪܐ ܘܕܟܘܟ̈ܒܐ ܐܡ̣ܪܘ ܡܠܦܢ̈ܐ ܩܕܝ̈ܫܐ ܕܐܝܬܘܗܝ ܙܗܪܗ̇ ܕܢܘܪܐ. ܘܠܘ ܡܛܠ ܟܠ ܢܘܗܪܐ. ܘܟܕ ܒܬܚܘܡܐ ܓܘܢܝܐ ܨܒܝܢܢ ܕܢܚܬܡܝܘܗܝ. ܐܡܪܝܢܢ ܕܢܘܗܪܐ ܐܝܬܘܗܝ܆ ܐܝܢܝܘܬܐ ܐܝܕܐ ܕܒܠܥܕ ܡܨܥܝܘܬܐ ܕܡܕܡ ܐ̱ܚܪܝܢ ܡܬܚܙܝܢܐ ܡܬܚܙܐ. ܘܒܡܨܥܝܘܬܗ ܡܬܚܙ̈ܝܢܐ ܟܠܗܘܢ ܡܬܚܙܝܢ. ܘܚܫܘܟܐ ܕܝܢ ܠܘ ܡܕܡ ܝܬܢܝܐ ܐܝܬܘܗܝ. ܐܠܐ ܓܠܝ̣ܙܘܬܗ ܒܠܚܘܕ ܕܢܘܗܪܐ. ܛܠܠܐ ܕܝܢ ܐܝܬܘܗܝ ܡܬܟܠܝܢܘܬܗ ܡܢܬܝܬܐ ܕܢܘܗܪܐ ܒܝܕ ܓܘܫܡܐ ܡܕܡ ܐܛܝ̣ܡܐ.

 

 

 

ܡܛܠ ܕܢܘܗܪܐ ܠܘ ܓܘܫܡܐ ܗ̱ܘ

 

ܐܠܘ ܓܘܫܡܐ ܗܘܐ ܢܘܗܪܐ ܠܚܕܐ ܦܢܝ̣ܬܐ ܡܬܬܙܝ̣ܥ ܗܘܐ. ܘܗܐ ܠܦܢ̈ܝܬܐ ܡܫܚ̈ܠܦܬܐ ܒܚܕ ܙܒܢܐ ܡܬܬܙܝܥ. ܘܕܠܘ ܓܘܫܡܐ ܗ̱ܘ. ܝ̣ܕܝ̣ܥܐ ܡ̣ܢ ܗ̇ܝ ܕܟܕ ܡ̣ܢܫܝܠ ܣܟܪܝܢܢ ܟܘ̈ܐ ܕܒܝܬܐ ܒܐܝܡܡܐ. ܠܘ ܡܦܫ ܦܐܫ ܒܗ ܢܘܗܪܐ. ܘܡ̣ܢ ܗ̇ܝ ܬܘܒ ܕܥܡ ܗ̇ܝ ܕܕܢܚ ܫܡܫܐ ܡܬܦܪܣܘ ܡܬܦܪܣ ܢܘܗܪܐ ܐܟܚܕܐ ܥܠ ܟܠܗ̇ ܥܡܪܬܐ. ܘܐܠܘ ܓܘܫܡܐ ܗܘܐ. ܐܝܟܢܐ ܒܚܕ ܪܦܦ ܥܝܢܐ ܡܬܡܛܐ ܗܘܐ ܠܕܘܟ̈ܝܬܐ ܕܪ̈ܚܝ̣ܩܢ ܘܕܩܪ̈ܝ̣ܒܢ ܫܘܝܐܝܬ. ܫܪܝ̣ܟܐ ܡܕܝܢ ܕܐܝܢܝܘܬܐ ܗ̱ܘ ܕܓܘܫܡܐ ܕܣܓܝ ܨܠܝܠ.

 

 

 

ܡܛܠ ܗ̇ܝ ܕܚܫܘܟܐ ܕܣܓܝ ܓܠܝ̣ܙܘܬܗ ܗ̣ܘ ܕܢܘܗܪܐ

 

ܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܟܕ ܡܥܡܨܝܢܢ ܥܝܢܝ̈ܢ ܒܐܝܡܡܐ. ܘܟܕ ܠܐ ܡܥܡܨܝܢܢ ܒܠܠܝܐ ܫܘܝܐܝܬ ܠܐ ܚܙܝܢܢ. ܘܡ̣ܢ ܗ̇ܝ ܕܗ̇ܘ ܕܝܬܒ ܒܒܝܬܐ ܚܫܘܟܐ܆ ܚܙܐ ܠܗ̇ܢܘܢ ܕܠܒܪ. ܘܗ̇ܢܘܢ ܕܠܒܪ ܒܢܘܗܪܐ ܠܐ ܚܙܝܢ ܠܗ. ܘܐܠܘ ܡܕܡ ܩܢܘܡܝܐ ܐܝܬܘܗܝ ܗܘܐ ܚܫܘܟܐ. ܙܕܩ ܗܘܐ ܕܐܦܠܐ ܗ̇ܘ ܕܒܚܫܘܟܐ ܠܗ̇ܢܘܢ ܕܒܢܘܗܪܐ ܢܚܙܐ ܗܘܐ.

 

 

 

ܡܛܠ ܓܘ̈ܢܐ

 

ܠܓܘ̈ܢܐ ܡ̇ܢ ܒܝܕ ܪܓܫܐ ܟܝܢܐܝܬ ܡܕܪܟܝܢܢ. ܘܡܛܠ ܗܕܐ ܗ̇ܢܘܢ ܕܒܝܕ ܬܚܘ̈ܝܬܐ ܡܠܦܝ̣ܢ ܥܠ ܓܘ̈ܢܐ. ܠܗܘ ܕܝ̣ܕܝ̣ܥ ܒܗ̇ܘ ܕܟܣܐ ܡܢܗ ܡܫܘܕܥܝ̣ܢ. ܘܐ̱ܢܫܝ̈ܢ ܡ̇ܢ ܡܟܦܪ ܟܦܪܝܢ ܒܓܘ̈ܢܐ ܘܐܡܪܝܢ. ܕܚܘܪܘܬܐ ܠܐ ܡܕܡ ܐ̱ܚܪܝܢ ܗ̣ܝ. ܐܠܐ ܚܒܝ̣ܟܘܬܐ ܕܐܐܪ ܥܡ ܓܘܫ̈ܡܐ ܨܠܝ̣̈ܠܐ. ܐܝܟ ܪܘܥܬܐ ܕܡܝ̈ܐ. ܘܙܓܘܓܝ̣ܬܐ ܕܫܚ̣ܝܩܐ. ܘܐܘܟܡܘܬܐ ܗܘܝܐ ܒܥܠܬ݀ ܠܐ ܚܒܝ̣ܟܘܬܐ ܕܐܝܟ ܗܕܐ. ܘܐ̱ܚܪ̈ܢܐ ܐܡ̣ܪܘ. ܕܐܘܟܡܘܬܐ ܒܠܚܘܕ ܗ̣ܝ ܓܘܢܐ. ܒܕܟܠܗܘܢ ܠܗ̇ ܡܫܬܚܠܦܝ̣ܢ. ܘܗ̣ܝ ܠܡܕܡ ܠܐ ܡܫܬܚܠܦܐ. ܘܐ̱ܚܪ̈ܢܐ ܐܡܪܝܢ ܕܓܘ̈ܢܐ ܡܪ̈ܢܝܐ ܚܘܪܘܬܐ ܘܐܘܟܡܘܬܐ ܐܢܘܢ. ܘܗ̣ܢܘܢ ܐ̱ܚܪ̈ܢܐ ܡܢܗܘܢ ܡܬܝܠܕܝܢ. ܘܐ̱ܚܪ̈ܢܐ ܚܡܫܐ ܣܡܘܓܘ̈ܢܐ ܡܪ̈ܢܝܐ. ܐܘܟܡܘܬܐ ܘܚܘܪܘܬܐ ܘܟܘܪܟܡܘܬܐ ܘܣܘܡܩܘܬܐ. ܘܟܪܬܘܬܐ. ܘܦܘܬܐܓܘܪ̈ܝܩܝܐ ܠܟܠ ܓܘܫܡܐ ܓܘܢܐ ܩܪܝܢ ܗܘܘ. ܘܐܡܦܝ̣ܕܘܩܠܝ̣ܣ ܐܡ̣ܪ܇ ܕܓܘܢܐ ܐܝܬܘܗܝ ܐܣܟܡܐ ܩܕܡܝܐ ܕܐܣܛܘܟ̈ܣܐ. ܘܦܠܐܛܘܢ ܐܡ̣ܪ. ܕܓܘܢܐ ܐܝܬܘܗܝ ܣܟܗ ܒܪܝܐ ܕܓܘܫܡܐ ܕܡܫܘܬܦ ܠܚܙܝܐ.

 

 

 

ܡܛܠ ܐܝܡܡܐ ܘܠܠܝܐ

 

ܐܝܡܡܐ ܟܠܗ ܙܒܢܐ ܕܫܟܝ̣ܚܘܬܗ ܕܢܘܗܪܐ ܠܥܠ ܡ̣ܢ ܐܪܥܐ ܐܝܬܘܗܝ. ܘܠܠܝܐ ܟܠܗ ܙܒܢܐ ܕܠܐ ܫܟܝ̣ܚܘܬܗ. ܠܐ ܐ̱ܢܫ ܐܬܦܫܟ. ܐܠܐ ܐܬܦܫܟܘ ܥܕܬܢܝ̈ܐ. ܕܟܕ ܢܘܗܪܐ ܗ̇ܘ ܩܕܡܝܐ ܙܗܪܗ̇ ܗܘܐ ܕܢܘܪܐ. ܘܢܘܪܐ ܠܟܠܗܘܢ ܐܣܛܘܟ̈ܣܐ ܠܝ̈ܠܝ ܐܝܡܡ ܚܕܝ̣ܪܐ. ܐܝܟܢܐ ܡܫܬܡܫ ܗܘܐ ܠܠܝܐ ܒܗܠܝܢ ܬܠܬܐ ܝܘ̈ܡܝ̣ܢ ܕܡ̣ܢ ܩܕܡ ܒܪܝܬܗ ܕܫܡܫܐ ܘܣܗܪܐ ܘܟܘܟ̈ܒܐ. ܘܡܪܝ ܐܦܪܝܡ ܘܡܪܝ ܝܥܩܘܒ ܕܣܪܘܓ ܐܡܪܝܢ. ܕܒܝܘܡܐ ܩܕܡܝܐ ܥܢܢ̈ܐ ܩܡ̈ܝ ܒܐܦܝ̈ ܫܡܝܐ ܗ̇ܘ ܥܠܝܐ ܘܢܗܝܪܐ ܬܪܬܥܣܪ̈ܐ ܫܥܝ̈ܢ ܘܗܘܐ ܠܠܝܐ. ܘܐܬܩ̈ܦܠܝ ܬܘܒ ܬܪܬܥܣܪ̈ܐ ܫܥܝ̈ܢ ܘܗܘܐ ܐܝܡܡܐ. ܘܒܝܘܡܐ ܬܪܝܢܐ ܘܬܠܝܬܝܐ. ܪܩܝ̣ܥܐ ܥܒܕ ܗܘܐ ܛܠܠܐ ܕܐܝܟ ܗܢܐ ܒܠܝܠܘ̈ܬܐ. ܘܒܐܝܡܡܐ ܣܠܩ ܗܘܐ ܢܗܝ̣ܪܐ ܠܥܠ ܡ̣ܢ ܬܗܘܡܐ ܘܪܕܦ ܗܘܐ ܠܛܠܠܗ. ܓܪܝܓܘܪܝܘܣ ܕܝܢ ܕܢܘܣܐ. ܐܡ̣ܪ. ܕܢܘܪܐ ܩܝܡܐ ܗܘܬ݀ ܒܓܒܐ ܬܚܬܝܐ. ܘܗܘܝܢ ܗܘܘ ܐܝܡܡ̈ܐ ܘܠܝܠܘ̈ܬܐ. ܘܝܥܩܘܒ ܕܐܘܪܗܝ ܐܡ̣ܪ. ܕܗ̇ܢܘܢ ܬܠܬܐ ܝܘ̈ܡܬܐ܆ ܒܢܘܗܪܐ ܐܫܝ̣ܕܐ ܘܠܐ ܡܛܟܣܐ ܡܬܝܕܥܝ̣ܢ ܗܘܘ.

 

 

 

ܡܛܠ ܗ̇ܝ ܕܐܝܢܐ ܠܐܝܢܐ ܩܕܝܡ

 

ܩܕܝܫܐ ܒܣܝܠܠܝܘܣ ܘܡܪܝ ܐܝܘܐܢܢܝܣ ܡܬܪܥܝܢ. ܕܐܝܡܡܐ ܩܕܝ̣ܡ ܠܠܠܝܐ. ܘܝ̣ܕܝ̣ܥܐ ܗܕܐ ܐܡܪܝܢ ܡ̣ܢ ܗ̇ܝ ܕܡ̣ܢ ܒܬܪ ܕܒܪܐ ܐܠܗܐ ܠܢܘܗܪܐ ܘܦܪܫ ܒܝܬ ܠܗ ܠܚܫܘܟܐ. ܩܪܐ ܠܢܘܗܪܐ ܐܝܡܡܐ ܘܠܣܟܗ ܪܡܫܐ. ܘܩܪܐ ܠܚܫܘܟܐ ܠܠܝܐ. ܘܠܣܟܗ ܨܦܪܐ. ܘܕܣܟܗ ܕܐܝܡܡܐ ܡܬܩܪܐ ܪܡܫܐ. ܝܕܝ̣ܥܐ ܡ̣ܢ ܗ̇ܝ ܕܐܡ̣ܪ ܐܘܢܓܠܝ̣ܣܛܐ. ܒܪܡܫܐ ܕܫܒܬܐ ܕܢܓܗ ܚܕ ܒܫܒܐ ܘܬܘܒ. ܘܟܕ ܗܘܐ ܪܡܫܐ ܕܗ̇ܘ ܝܘܡܐ ܕܚܕ ܒܫܒܐ. ܡܪܝ ܐܦܪܝܡ ܕܝܢ ܐܡ̇ܪ. ܕܟܕ ܫܡܫ ܚܫܘܟܐ ܗ̇ܘ ܕܦܪܝ̣ܣ ܗܘܐ ܥܠ ܐܦܝ̈ ܬܗܘܡܐ ܬܪܬܥܣܪ̈ܐ ܫܥܝ̈ܢ ܘܥܒܕ ܠܠܝܐ. ܐܬܒܪܝ̣ ܢܘܗܪܐ. ܘܟܕ ܫܡܫ ܗܟܘܬ ܬܪܬܥܣܪ̈ܐ ܫܥܝ̣̈ܢ ܥܒ̣ܕ ܐܝܡܡܐ. ܘܕܪܥܝܢܐ ܗ̇ܘ ܩܕܡܝܐ ܝܬܝܪ ܚܬܝ̣ܬ ܡܚܘܝܢܘܬܗ ܣܗܕܐ. ܘܗ̇ܝ ܕܡ̣ܢ ܠܠܝܗ ܕܚܕ ܒܫܒܐ ܥܒܕܝ̣ܢܢ ܩܝܡܬܗ ܕܦܪܘܩܢ. ܘܕܡ̣ܢ ܪܡܫܐ ܢܫܪܘܢ ܥܒܪ̈ܝܐ ܠܡܛܪ ܫܒܬܐ ܐܬܦܩܕܘ ܡ̣ܢ ܐܠܗܐ܇ ܓܠܝܐ ܕܠܘ ܠܩܕܝ̣ܡܘܬ ܒܪܝ̣ܬܗ ܕܠܠܝܐ ܡܫܘܕܥܝܢ. ܐܠܐ ܠܛܘܝܒܐ ܒܠܚܘܕ ܕܨܒܝܢܐ ܘܥܗܢܘܬܐ ܕܗ̇ܝ ܕܢܩܒܠ ܠܝܘ̈ܡܬܐ ܡܝܩܪ̈ܐ. ܘܡ̣ܢ ܗܠܝܢ ܝܕܝ̣ܥܐ ܕܗ̇ܝ ܕܒܫܘܠܡ ܐܝܡܡܐ ܕܝܘܡ ܐܪܒܥܐ ܘܕܥܪܘܒܬܐ ܣܘܪ̈ܝܝܐ ܕܝܠܢܐܝܬ ܢܫܪܘܢ ܨܘܡܐ ܘܢܫܪܘܢ ܠܡܬܛܪܛܫܘ ܒܛܘܪܫܐ ܡ̣ܢ ܥܝܕܐ ܪܦܝܐ ܓܕܫܬ݀ ܠܗܘܢ. ܘܠܘ ܡ̣ܢ ܡܕܡ ܐ̱ܚܪܝܢ. ܘܡܛܠ ܕܐܝܟ ܕܒܣܘܓܐܐ ܠܬܪ̈ܝܗܘܢ ܪ̈ܡܐ ܫܪܝܢ ܒܠܝ̣ܠܐܝܬ.

 

 

 

 

 

     #1 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܪܝܢܝܬܐ. ܡܛܠ ܗ̇ܢܘܢ ܕܒܝܘܡܐ ܕܬܪܝܢ ܐܬܒܪ̈ܝ܆ ܘܒܗ ܐܝܬ ܥܘܬܕܐ ܘܢܝܫܐ ܚܕ. ܩܕܡܝܬ ܥܘܬܕܐ

 

ܒܝܘܡܐ ܓܝܪ ܕܬܪܝܢ ܐܝܟ ܕܗ̣ܘ ܟܬܒܐ ܐܠܗܝܐ ܡܒܕܩ. ܪܩܝ̣ܥܐ ܒܠܚܘܕ ܐܬܒܪܝ. ܘܦܪܫ ܒܝܬ ܡܝ̈ܐ ܕܠܥܠ ܠܡܝ̈ܐ ܕܠܬܚܬ. ܘܥܠ ܟܝܢܗ ܕܪܩܝ̣ܥܐ ܘܐܣܟܡܗ. ܡ̣ܢ ܠܥܠ ܐܡ̣ܪܢܢ ܟܡܐ ܕܣܦܩܢܢ. ܘܡܛܠ ܕܪܩܝ̣ܥܐ ܐܦܢ ܚܕ ܗ̣ܘ ܒܓܢܣܐ ܘܒܐܕܫܐ. ܐܠܐ ܠܘ ܚܕ ܗ̣ܘ ܒܡܢܝܢܐ. ܥܠ ܡܢܝܢܗ ܟܐܡܬ ܕܟܡܐ ܗ̱ܘ ܟܕ ܥܠ ܟܘܟ̈ܒܐ ܡܡܠܠܝ̣ܢܢ ܐܡܪܝܢܢ ܗܪܟܐ ܡܕܝܢ ܥܠ ܡܢܝܘܬܗܘܢ ܒܠܚܘܕ ܕܡܝ̈ܐ ܕܠܥܠ ܡ̣ܢ ܫܡܝܐ ܙܕܩ ܠܢ ܠܡܣܬܘܕܘ.

 

 

 

ܢܝܫܐ ܕܝܠܗ ܕܦܣܘܩܐ ܡܛܠ ܡܝ̈ܐ ܕܠܥܠ ܡ̣ܢ ܪܩܝ̣ܥܐ

 

ܩܕܝܫܐ ܐܬܐܢܐܣܝܘܣ ܪܒܐ ܘܓܪܝܓܘܪܝܘܣ ܕܢܘܣܐ ܐܡܪܝܢ ܕܠܡܠܐܟ̈ܐ ܩܪܐ ܟܬܒܐ ܡܝ̈ܐ ܕܠܥܠ ܡ̣ܢ ܫܡܝܐ. ܘܝ̣ܕܝ̣ܥܐ ܗܕܐ ܒܝܕ ܬܪܬܝܢ. ܚܕܐ ܡ̇ܢ ܡ̣ܢ ܗ̇ܝ ܕܐܡ̣ܪ ܕܘܝܕ. ܕܡܝ̈ܐ ܕܠܥܠ ܡ̣ܢ ܫܡܝܐ ܢܫܒܚܘܢ ܠܫܡܗ ܕܡܪܝܐ. ܘܡܝ̈ܐ ܟܕ ܠܐ ܡܠܝ̣̈ܠܐ ܐܢܘܢ. ܐܠܐ ܐܦܠܐ ܚܝ̈ܐ. ܐܠܐ ܐܦܠܐ ܡܢܦ̈ܫܐ. ܐܝܟܢܐ ܡܫܒ̈ܚܢܐ ܢܗܘܘܢ. ܕܬܪܬܝܢ ܕܝܢ ܡ̣ܢ ܗ̇ܝ ܕܡܝ̈ܐ ܟܕ ܕܝܘ̈ܒܐ ܘܪ̈ܦܝܐ ܘܫܝܘ̣̈ܚܐ ܘܫܪ̈ܘܥܐ ܐܢܘܢ. ܐܝܟܢܐ ܥܠ ܩܒܒܗ̇ ܐܘܟܝܬ ܟܣܣܬܗ̇ ܕܡܘܙܠܬܐ ܡܨܝܢ ܕܢܩܘܡܘܢ ܘܠܐ ܢܬܐܫܕܘܢ. ܩܕܝܫܐ ܕܝܢ ܒܣܝܠܠܝܘܣ ܒܫܬܬ݀ ܝܘܡܗ ܐܡ̣ܪ. ܕܚܢܢ ܠܡܝ̈ܐ ܡܝ̈ܐ ܐܡܪܝܢܢ ܘܝܕܥܝ̣ܢܢ. ܘܠܐ ܗܘܐ ܡܛܠ ܕܐܬܐܡܪ ܡܛܠ ܡܝ̈ܐ ܗ̇ܢܘܢ ܥܠܝ̈ܐ ܕܡܫܒ̈ܚܢܐ ܐܢܘܢ ܕܡܪܐ ܕܓܘܐ. ܒܟܝܢܐ ܕܡܠܝ̣̈ܠܐ ܐܘܟܝܬ ܕܡܠܐܟ̈ܐ ܢܣܝܡ ܐܢܘܢ. ܗܐ ܓܝܪ ܐܦ ܕܫܡܝ̈ܐ ܡܫܬܥܝܢ ܫܘܒܚܗ ܕܐܠܗܐ ܟܬܝܒ. ܟܕ ܠܐ ܡܠܝ̣̈ܠܐ ܐܢܘܢ ܐܦܠܐ ܡܠܐܟ̈ܐ. ܘܕܢܝܐܝܠ ܬܘܒ ܐܡ̣ܪ. ܛܠܐ ܘܩܘܪܫܐ ܘܓܠܝ̣ܕܐ ܫܒܚܘ ܠܐܠܗܐ. ܘܕܘܝܕ. ܠܬܢܝ̣̈ܢܐ ܬܘܒ ܘܠܬܗܘ̈ܡܐ ܗ̣ܘ ܗܟܘܬ ܐܡ̣ܪ. ܘܠܘܩܒܠ ܗ̇ܝ ܐ̱ܚܪܬܐ ܬܘܒ ܐܡ̣ܪ. ܕܠܐ ܗܘܐ ܐܣܟܡܗ̇ ܕܐܣܦܝ̣ܪܐ ܫܩܝ̣ܠ ܪܘܡܗ ܥܠܝܐ ܕܪܩܝ̣ܥܐ. ܘܠܐ ܢܗܐ ܒܕܡܘ̣ܬܐ ܕܛܘ̣ܪܢܘܣ ܡܬܩܢ. ܐܠܐ ܐܬܪܐ ܫܘܝܐ ܡܬܩܢ ܠܥܠ ܡܢܗ. ܐܟܡܐ ܕܚܙܝܢܢ ܕܒܢܘ̈ܬܐ ܡܣ̈ܩܢ ܡ̣ܢ ܓܘ ܒܟܦܦܐ ܕܡ̣ܢ ܟܠܕܘܟ. ܘܐܓܪܐ ܕܬܛܠܝ̣̈ܠܝܗܝܢ ܩܐܡ ܒܫܘܝܘܬܐ. ܘܒܐܬܪܐ ܬܩܝ̣ܢܐ. ܘܠܗ ܠܗܢܐ ܪܥܝܢܐ ܩܕܝ̈ܫܐ ܫܠܡܝ̣ܢ ܡܪܝ ܐܦܪܝܡ ܘܡܪܝ ܝܥܩܘܒ ܕܣܪܘܓ. ܘܚܣܝܐ ܝܥܩܘܒ ܕܐܘܪܗܝ ܡܘܣܦ ܐܡ̇ܪ. ܕܪܩܝ̣ܥܐ ܐܐܪ ܗ̣ܘ ܚܝ̣ܨܐ ܘܡܫܪܪܐ ܕܟܪܝ̣ܟ ܠܐܪܥܐ. ܘܠܥܠ ܡܢܗ ܕܗܢܐ ܐܐܪ ܐܝܬ ܡܝ̈ܐ. ܘܡܢܗܘܢ ܗܘܝܢ ܡܛܪ̈ܐ ܘܛܠܐ ܘܫܪܟܐ. ܐܢܐ ܕܝܢ ܒܨܝܪܐ ܟܕ ܡܬܚܪܐ ܐ̱ܢܐ ܠܘܩܒܠ ܪܒܘܬܗ ܕܒܣܝܠܠܝܘܣ. ܘܐܦܢ ܡܪܚܐܝܬ ܐܡ̇ܪ ܐ̱ܢܐ. ܕܐܦܠܐ ܐܢ ܐܣܟܡܐ ܫܘܝܐ ܢܗܐ ܠܐܓܪܗ. ܕܪܩܝ̣ܥܐ ܗܢܐ ܟܦܝ̣ܦܐ ܘܩܒܝ̣ܒܐ ܘܚܘܓܬܢܝܐ ܣܦܩ ܠܡܚܒܫ ܠܡܝ̈ܐ ܗ̇ܢܘܢ ܥܠܝ̈ܐ ܗ̣ܘ ܒܗ. ܐܠܐ ܐܣ̈ܐ ܡܕܡ ܟܠܘ̈ܝܬܐ ܢܗܘ̈ܝܢ ܡ̣ܢ ܟܠ ܓܒܝ̈ܗ̇. ܘܐܦܠܐ ܬܘܒ ܐܣ̈ܐ ܕܐܝܟ ܗܠܝܢ ܡܗܢܝ̈ܢ ܗܘܝ̈ ܥܡ ܟܪܘܟܝܗ ܣܒܝ̣ܣܐ ܕܪܩܝ̣ܥܐ. ܘܟܕ ܡܠܬܐ ܕܐܝܟ ܗܕܐ ܗܟܢܐ ܡܙܕܛܡܐ. ܗ̇ܝ ܕܟܐܢܐ ܗܕܐ ܗ̱ܝ ܕܒܪܡܙܗ ܒܠܚܘܕ ܕܒܪܘܝܐ ܠܘ ܡܝ̈ܐ ܒܠܚܘܕ ܥܠܝ̈ܐ ܬܠܝܢ. ܐܠܐ ܘܗܢܐ ܟܠ ܥܠ ܠܐ ܡܕܡ. ܒܕܟܠܗܝܢ ܦܫܝ̣̈ܩܢ ܠܗ. ܘܐܢ ܠܡܠܬܐ ܟܝܢܝܬܐ ܢܬܪܓܪܓ ܩܪܘܝܐ. ܗܕܐ ܝܬܝܪ ܒܝܬܝܐ ܠܗ ܠܡܬܪܥܝܘ. ܕܒܕܡܘܬ ܚܘܪܐ ܕܒܪܬܐ ܗ̇ܘ ܕܩܒܐ ܒܝܬ ܡܘܩܪܗ̇ ܠܩܠܦܬܗ̇. ܗܟܢܐ ܐܦ ܘܡܝ̈ܐ ܕܠܥܠ ܡ̣ܢ ܪܩܝ̣ܥܐ ܩܒܝܢ ܒܝܬ ܠܗ ܠܫܡܝܐ ܗ̇ܘ ܥܠܝܐ ܕܒܝܘܡܐ ܩܕܡܝܐ ܐܬܒܪܝ ܡ̣ܢ ܟܠ ܓܒܝ̣̈ܢ. ܘܥܡܗ̇ ܕܬܐܘܪܝܐ ܗܕܐ ܠܐ ܡܬܐܠܨܝ̣ܢܢ ܠܡܬܛܢܘ ܐܓܪܐ ܫܘܝܐ ܠܪܩܝ̣ܥܐ ܩܒܝ̣ܒܐ. ܐܦܠܐ ܩܢܛܝ̣ܢܢ ܡ̣ܢ ܡܬܐܫܕܢܘܬܗܘܢ ܕܡܝ̈ܐ ܗܠܝܢ. ܘܟܒܪ ܡܛܠ ܡܫܬܗܝܢܘܬܐ ܕܚܡܝ̣ܡܘܬܐ ܗ̇ܝ ܕܡ̣ܢ ܙܘ̈ܥܐ ܣܒܝ̣̈ܣܐ ܘܪ̈ܗܝ̣ܒܐ ܕܡܘܙܠܬܐ ܡܥܕܐ ܕܬܬܝ̣ܠܕ ܐܬܛܟܣܘ ܡܝ̈ܐ ܗܠܝܢ ܒܝܬ ܪܩܝ̣ܥܐ ܫܡܝܐ ܬܪܝܢܐ ܠܫܡܝܐ ܩܕܡܝܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܪܝܢܝܬܐ. ܡܛܠ ܗ̇ܢܘܢ ܕܒܝܘܡܐ ܕܬܠܬܐ ܐܬܒܪ̈ܝ. ܘܒܗ ܐܝܬ ܥܘܬܕܐ ܘܢܝ̈ܫܐ ܬܪܝܢ. ܩܕܡܝܬ ܥܘܬܕܐ

 

ܒܝܘܡܐ ܕܝܢ ܕܬܠܬܐ. ܡܝ̈ܐ ܗ̇ܢܘܢ ܕܩܕܝ̣ܡܝ̣ܢ ܒܪܝܢ ܗܘܘ. ܟܕ ܐܬܟܢܫܘ ܠܐܬܪܐ ܚܕ. ܡ̣ܢ ܟܢܘܫܝܗܘܢ ܗܘܘ ܝܡ̈ܡܐ. ܘܐܪܥܐ ܗ̇ܝ ܕܐܦ ܗ̣ܝ ܩܕܝ̣ܡܐ ܗܘܬ ܘܒܪܝܐ. ܒܝܘܡܐ ܩܕܡܝܐ ܟܕ ܐܣܛܝܘ ܡܝ̈ܐ ܡ̣ܢ ܐܦܝ̈ܗ̇ ܐܬܩܪܝܬ݀ ܐܪܥܐ. ܘܐܘܥܝܬ݀ ܬܕܐܐ ܟܕ ܡܫܪܐ ܠܡܐܥܐ. ܘܥܣܒܐ ܐܘܟܝ̣ܬ ܥܡܝ̣ܪܐ ܟܕ ܣܠܩ ܛܒܐܝܬ. ܘܙܪܥܐ ܟܕ ܡܫܬܡܠܐ ܫܒܠܐ. ܘܐܝܠܢܐ ܟܕ ܣܠܩ ܘܡܣܬܪܥܦ ܘܡܐܛܠ. ܘܗܪܟܐ ܡܬܬܡܗܐ ܚܟܡܬܐ ܐܠܗܝܬܐ. ܕܡ̣ܢ ܩܕܡ ܕܢܬܒܪܐ ܫܡܫܐ ܗ̇ܘ ܡܘܥܝܢܐ ܘܡܪܒܝܢܐ ܕܗܠܝܢ ܐܬܒܪܝ̣ܘ. ܟܕ ܡܫܡܠܝܢ ܘܛܥܝ̣ܢܝ̣ܢ ܛܪ̈ܦܐ ܘܦܪ̈ܕܐ ܘܫܢܢ̈ܐ ܘܦܐܪ̈ܐ. ܐܝܟ ܕܡܙܕܩܝ̣ܢ ܡܪܝ ܐܦܪܝܡ ܘܡܪܝ ܝܥܩܘܒ ܡܠܦܢܐ. ܐܝܟܢܐ ܕܐܦ ܣܗܪܐ ܟܕ ܡܠܐܷ ܘܐܕܡ ܘܚܘܐ ܟܕ ܡܫܡܠܝܢ ܒܩܘܡܬܐ ܐܬܒܪܝܘ. ܘܠܘ ܗ̇ܘ ܡܐ ܕܐܝܬ ܗܘܐ ܒܗ̇ ܒܐܪܥܐ ܐܦܩܬ݀. ܐܠܐ ܗ̣ܘ ܪܡܙܐ ܐܠܗܝܐ ܝܗܒ ܠܗ̇ ܚܝܠܐ ܕܬܦܩ ܗ̇ܘ ܡܐ ܕܠܐ ܐܝܬ ܗܘܐ ܒܗ̇. ܐܝܟ ܕܐܡ̣ܪ ܪܒܐ ܒܣܝܠܠܝܘܣ. ܘܗ̣ܘ ܟܕ ܗ̣ܘ ܩܕܝܫܐ ܐܡ̣ܪ. ܕܠܘ ܠܟܠܗܝܢ ܗܠܝܢ. ܕܦܩܕ ܐܠܗܐ ܠܐܪܥܐ ܕܬܦܩ ܐܬܥܗܕ ܡܘܫܐ. ܗܐ ܓܝܪ ܠܣܓܝ̈ܐܬܐ ܕܠܐ ܡܙܕܪ̈ܥܢ. ܐܟܙܢܐ ܕܩܢܝܐ ܘܐܪܒܢܐ ܘܝܒܠܐ ܫܒܩ. ܗܟܘܬ ܘܠܐܝܠܢ̈ܐ ܕܠܐ ܥܒܕܝܢ ܦܐܪ̈ܐ. ܐܟܙܢܐ ܕܐܪܙܐ ܘܫܪܘܝܢܐ ܘܥܪܒܐ ܘܫܪܟܐ.

 

 

 

ܢܝܫܐ ܩܕܡܝܐ ܡܛܠ ܝܡ̈ܡܐ. ܩܕܡܝܬ݀ ܡܛܠ ܗ̇ܝ ܕܝܡܐ ܗܘܝܘ ܟܘܠܢܝܘܬܗܘܢ ܕܡܝ̈ܐ

 

ܐܠܘܠܐ ܝܡܐ ܗܘܐ ܟܘܠܢܝܘܬܗܘܢ ܕܡܝ̈ܐ ܐܠܨܐ ܗܘܬ݀ ܕܡܝ̈ܐ ܟܘ̈ܠܢܝܐ܆ ܒܓܘܗ̇ ܕܐܪܥܐ ܚܒܝ̣ܫܝ̣ܢ ܗܘܘ. ܘܡ̣ܢ ܗܪܟܐ ܡܫܬܟܚ ܗܘܐ ܐܣܛܘܟܣܐ ܡܝܢܝܐ ܕܣܓܝ ܙܥܘܪ ܡ̣ܢ ܐܪܥܐ ܗ̇ܝ ܕܫܟܝ̣ܪܐ. ܗܕܐ ܗ̱ܝ ܬܪܥܝܬܗ ܕܐܪܝ̣ܣܛܘܛܠܝ̣ܣ ܘܠܗ̇ ܡܫܪܪ ܩܕܝܫܐ ܒܣܝܠܠܝܘܣ ܒܡܐܡܪܐ ܕܐܪܒܥܐ ܕܫܬܬ݀ ܝܘܡܗ. ܘܗ̣ܢܘܢ ܗܠܝܢ ܝܡ̈ܡܐ ܚܕ ܠܚܕ ܥܦܝ̣ܩܝ̣ܢ. ܦܘܩܕܢܐ ܗܟܝܠ ܕܐܠܗܐ. ܪܘܚ ܬܡܢ ܠܗܘܢ ܐܬܪܐ. ܠܗܠܝܢ ܡܝ̈ܐ ܣܓܝ̈ܐܐ ܕܠܬܡܢ ܢܬܟܢܫܘܢ. ܦܠܐܛܘܢ ܕܝܢ ܒܦܐܗܕܘܢ ܕܝܠܗ ܐܡ̣ܪ. ܕܒܛܐܪܛܐܪܘܣ ܠܡ ܗܘܝܢ. ܕܒܩܢܛܪܘܢ ܐܘܟܝ̣ܬ ܡܨܥܬܗ̇ ܓܘܝܬܐ ܕܐܪܥܐ ܡܝ̈ܐ ܟܘܠܢܝ̈ܐ ܐܝܬܝܗܘܢ. ܘܠܗܕܐ ܬܪܥܝ̣ܬܐ ܒܣܓܝ̈ܐܬܐ ܡܟܣ ܐܪܝ̣ܣܛܘܛܠܝ̣ܣ.

 

 

 

ܡܛܠ ܥܠܬܐ ܕܡܠܝ̣ܚܘܬܗ ܕܝܡܐ

 

ܡܠܝ̣̈ܚܐ ܡ̇ܢ ܗܘܘ ܡܝ̈ܐ ܕܝܡܐ ܡܛܠ ܕܡܢܬܐ ܩܛܝ̣ܢܬܐ ܕܒܗܘܢ ܐܬܠܗܓܬ݀ ܡ̣ܢ ܚܡܝ̣ܡܘܬܗ ܕܫܡܫܐ. ܥܒܝܘܬܗ ܕܝܢ ܘܫܘ̈ܟܬܗ ܘܬܐܛܪܗ ܩܘܝܘ. ܘܡܛܠܗܕܐ ܡܠܚ̈ܐ ܟܕ ܚܣܪ ܠܗܘܢ ܡܝ̈ܐ ܡܫܬܬܝܢ̈ܐ. ܡܒܫܠܝ̣ܢ ܠܡܝ̈ܐ ܕܝܡܐ ܘܒܐܣܦܘܓܐ ܡܕܡ ܡܩܒܠܝܢ ܠܠܗ̈ܓܐ. ܡܝ̈ܐ ܚܠܝ̈ܐ ܡܢܗܘܢ ܥܨܪܝܢ. ܘܡܝ̈ܐ ܗ̇ܢܘܢ ܕܫܪܟܝ̣ܢ ܝܬܝܪ ܥܒܝ̈ܐ ܘܡܠܝ̣̈ܚܐ ܡܫܬܟܚܝ̣ܢ. ܐܡܦܗܕܘܩܠܝܘܣ ܕܝܢ ܐܡ̇ܪ ܕܟܕ ܚܐܡܐ ܐܪܥܐ ܡ̣ܢ ܫܡܫܐ ܘܕܘܥܬܐ ܗܘܝܢ ܡܝ̈ ܝܡܐ. ܘܡܛܠ ܗܕܐ ܐܝܟ ܕܘܟܬܐ ܕܡܬܐܫܕܐ ܡ̣ܢ ܦܓܪܐ ܡܠܚܝ̣ܢ. ܐܢܐܟܣܓܘܪܘܣ ܕܝܢ ܐܡ̣ܪ. ܕܡܠܝ̣ܚܐ ܐܝܬܘܗܝ ܝܡܐ ܡܛܠ ܚܘܠܛܢܐ ܕܐܪܥܐ. ܗܐ ܓܝܪ ܐܦ ܡܝ̈ܐ ܕܡܫܬܚܠܝ̣ܢ ܡ̣ܢ ܩܛܡܐ ܗܘܝܢ ܡܠܝ̣̈ܚܐ. ܘܐܝܟܢ ܕܗ̣ܘ܆ ܥܠܬܐ ܫܘܡܠܝܢܝܬܐ ܕܒܡܠܝ̣ܚܘܬܗܘܢ ܐܝܬܝܗ̇. ܗ̇ܝ ܕܠܐ ܢܣܪܘܢ ܘܢܚܒܠܘܢ ܠܐܐܪ ܘܠܗ̇ܢܘܢ ܕܣܝܩܝܢ ܠܗ. ܘܕܡܝ̈ܐ ܡܠܝ̣̈ܚܐ ܝܬܝܪ ܥܒܝܢ ܡ̣ܢ ܗ̇ܢܘܢ ܚܠܝ̈ܐ. ܝ̣ܕܝ̣ܥܐ ܡ̣ܢ ܗ̇ܝ ܕܒܡܠܝ̣̈ܚܐ ܡ̇ܢ ܒܪܬܐ ܛܝܦܐ. ܒܚܠܝ̈ܐ ܕܝܢ܆ ܕܝܢ ܫܟܬܐ. ܘܡ̣ܢ ܗ̇ܝ ܕܐܠܦ̈ܐ ܕܪ̈ܕܝܢ ܒܝܡܐ ܝܬܝܪ ܝܩܝ̣ܪ̈ܢ. ܗ̇ܢܘܢ ܕܝܢ ܕܒܝܡܐ ܕܗܢܕܘ ܪܕܝܢ. ܒܗ̇ܝ ܕܒܝܡ̈ܡܬܐ ܕܡܚܝ̈ܕܢ ܠܝܡܐ ܪܕܝܢ܇ ܕܠܝ̣ܠܐܝܬ ܛܒܥܝܢ.

 

 

 

ܡܛܠ ܗ̇ܝ ܕܡܫܢܝܐ ܗ̱ܘ ܝܡܐ ܡ̣ܢ ܕܘܟ ܠܕܘܟ

 

ܝܡܐ ܓܝܪ ܡ̣ܢ ܢܗܪ̈ܘܬܐ ܘܡܥܝ̣̈ܢܐ ܘܡܛܪ̈ܐ ܢܣܒ ܡܠܘܘܐ. ܗ̣ܢܘܢ ܗܠܝܢ ܟܕ ܒܐܬܪܐ ܡܕܡ ܒܨܪܝܢ. ܒܐܬܪܐ ܐ̱ܚܪܝ̣ܢ ܫܦܥܝ̣ܢ. ܘܡܛܠܗܕܐ ܐܦ ܠܝܡ̈ܡܐ ܓܕܫ ܫܘܚܠܦܐ ܕܐܝܟ ܗܢܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܡܨܪܝܢ ܟܕ ܝܡܐ ܐܝܬܝܗ̇ ܗܘܬ ܛܡܪܗ ܢܝ̣ܠܘܣ. ܘܐܪܝܡ ܒܗ̇ ܠܐܪܥܐ. ܒܕܓܘܢ ܐܬܝܒܫ ܝܡܐ ܘܗܘܐ ܝܒܫܐ. ܘܕܝܡܐ ܐܝܬܝܗ̇ ܗܘܬ݀ ܡ̣ܢ ܩܕܝܡ ܡܨܪܝܢ. ܣܗܕ ܥܘܡܩܐ ܗ̇ܘ ܕܡܬܩܪܐ ܐܪܣܗܐܘܢܝܛܘܣ ܗ̇ܘ ܕܥܕܡܐ ܠܝܘܡܢܐ ܡܬܚܘܝܢ ܒܗ ܫܘܘ̈ܕܥܐ ܕܐܪܥܐ ܝܡܡܝܬܐ. ܕܐܝܬܝܗܘܢ ܩܘܢܟܘ̈ܠܘ ܘܛܐܠܠܝ̈ܢܘ ܐܘܟܝܬ ܙܠܦ̈ܬܐ ܕܡܫܬܟܚܝܢ ܬܡܢ.

 

 

 

ܡܛܠ ܙܘ̈ܥܐ ܕܝܡ̈ܡܐ

 

ܡܬܬܙܝܥܝ̣ܢ ܡ̇ܢ ܡܝ̈ܐ ܕܝܡ̈ܡܐ. ܐܘ ܡ̣ܢ ܪ̈ܘܚܐ ܕܢܫ̈ܒܢ ܥܠ ܐܦܝ̈ܗܘܢ. ܐܘ ܡ̣ܢ ܓܒܝ̈ܗܘܢ. ܘܒܥܠܬ݀ ܙܪܘܒܝ̣ܗܘܢ ܕܒܫܒܝ̣̈ܠܐ ܐܠܝ̣̈ܨܐ ܕܒܗܘܢ. ܘܡܛܠ ܡܝ̈ܐ ܐܘܪ̈ܝ̣ܦܝܐ ܕܪܕܝܢ ܠܬܪ̈ܝܗܘܢ ܓܒ̈ܐ ܐܡ̣ܪ ܐܪܝ̣ܣܛܘܛܠܝ̣ܣ ܕܐܘܪܝܦܘܣ ܐܝܬܘܗܝ ܡܥܒܪܢܐ ܕܒܝܬ ܬܪܝܢ ܝܡ̈ܡܐ. ܘܟܕ ܢܫܒܐ ܪܘܚܐ ܡܬܕܚܝܢ ܡܝ̈ܐ ܕܒܗ ܒܡܥܒܪܢܐ ܗ̇ܘ ܘܡܬܬܝܬܝܢ ܥܕܡܐ ܠܝܡܐ. ܘܟܕ ܒܛܠ ܢܫܒܗ̇܆ ܥܛܦܝܢ ܡܝ̈ܐ ܠܕܘܟܬܗܘܢ. ܘܗܦܝ̣ܟܘܬ ܪܕܝܐ ܚܐܫܝ̣ܢ. ܘܐ̱ܚܪ̈ܢܐ ܐ̱ܚܪ̈ܢܝܬܐ ܐܡ̣ܪܘ. ܘܗ̇ܝ ܕܚܬܝ̣ܬܐ ܘܢܣܝܢܐ ܣܗܕ ܠܗ̇ ܗܕܐ ܗ̱ܝ. ܕܥܠܬܗ̇ ܕܗܦܝ̣ܟܘܬ ܪܕܝܐ ܕܐܝܟ ܗܢܐ. ܫܘܚܠܦܗ̇ ܗ̣ܘ ܝܘܡܢܝܐ ܘܝܪܚܢܝܐ ܕܣܗܪܐ ܒܡܠܝܘܬܗ ܘܚܣܝ̣ܪܘܬܗ. ܘܡܬܐܡܪܐ ܬܘܒ ܕܒܝܡܐ ܐܘܪܝ̣ܦܘܣ ܫܢܐ ܚܕܐ ܐܝܬ܆ ܕܥܣܪ ܙܒ̈ܢܬܐ ܒܝܘܡܐ ܣܠܩܐ ܘܢܚܬܐ. ܐܝܟ ܚܡܫܡܐܐ ܐܡܝ̣̈ܢ ܒܚܕ ܥܕܢܐ ܥܕܡܐ ܕܡܬܓܠܝܐ ܐܫܬܗ ܕܝܡܐ. ܘܥܠ ܓܒܗ̇ ܝܬܒ ܝܘ̈ܡܬܐ ܣܓܝ̈ܐܐ ܦܠܛܘܢ. ܠܡܕܪܟܘ ܥܠܬܗ̇ ܘܠܐ ܐܬܡܨܝ. ܘܬܡܢ ܐܬܟܪܗ ܘܡܝܬ.

 

 

 

ܡܛܠ ܣܝܡܗ ܕܝܡܐ ܘܥܘ̈ܒܘܗܝ

 

ܝܡܐ ܡ̇ܢ ܟܘܠܢܝܐ. ܗ̇ܘ ܕܐܝܬܘܗܝ ܠܒܪ ܡ̣ܢ ܟܠܗ̇ ܥܡܪܬܐ. ܘܚܕܝ̣ܪ ܠܟܠܗ̇ ܐܪܥܐ. ܠܐ ܡܬܕܠܝܢܐ ܘܐܘܩܝܐܢܘܣ ܡܬܩܪܐ. ܘܐ̱ܢܫܝ̈ܢ ܠܓܒܗ ܡܥܪܒܝܐ ܕܝܠܢܐܝܬ ܐܘܩܝܐܢܘܣ ܩܪܝܢ. ܗ̣ܘ ܕܝܢ ܗܢܐ ܒܦܢܝ̣ܬܐ ܡܥܪܒܝܬܐ ܡ̣ܢ ܠܓܘ. ܦܘܡܐ ܐܠܝ̣ܨܐ ܦܬܝ̣ܚ ܠܗ. ܗ̇ܘ ܕܡܥܒܪܬܐ ܕܐܪܩܠܝܣ ܡܬܩܪܐ. ܘܬܡܢ ܐܢܝܢ ܐܦ ܣܛܝ̈ܠܐܣ ܐܘܟܝܬ ܩܝ̈ܡܬܐ ܕܐܪܡܝܣ. ܘܗ̣ܘ ܗܢܐ ܦܘܡܐ ܟܕ ܠܐܦܝ̈ ܡܕܢܚܐ ܪܕܐ ܡܬܦܬܐ܆ ܘܠܥܘܒܐ ܗ̇ܘ ܕܝܡܐ ܐܕܪܝܘܣ. ܕܗܘܝܘ ܝܡܐ ܕܪ̈ܘܡܝܐ ܘܝܡܐ ܕܣܘܪܝܐ ܥܒܕ. ܘܡ̣ܢ ܗܢܐ ܥܘܒܐ܆ ܠܫܢܐ ܡܕܡ ܡܬܝܒܠ ܘܡܬܩܛܢ. ܘܥܒܪ ܥܠ ܫܘܪܗ̇ ܕܩܘܣܛܢܛܝ̣ܢܘ ܘܦܘܠܝ̣ܣ. ܘܡܬܩܪܐ ܝܡܐ ܕܦܘܢܛܘܣ. ܘܗܟܢܐ ܡ̣ܢ ܬܝܡܢܝܗ ܕܝܡܐ ܐܕܪܝܘܣ. ܦܝܫܐ ܐܠܟܣܢܕܪܝܐ ܘܡܨܪܝܢ. ܘܡ̣ܢ ܓܪܒܝܝܗ ܩܘܣܛܢܛܝܢܘܦܘܠܝܣ ܘܪܘܡܝ. ܘܟܠܗ ܐܬܪܐ ܕܦܪ̈ܢܓܝܐ. ܘܒܗ ܐܝܬܝܗܝܢ ܓܙܪ̈ܬܐ ܡܫܡ̈ܗܬܐ ܕܝܬܝܪܐܝܬ ܝ̣ܕܝ̣̈ܥܢ ܠܢ. ܐܟܙܢܐ ܕܩܘܦܪܘܣ ܘܣܐܡܘܣ ܘܟܝܘܣ ܘܪܘܕܘܣ ܘܣܝܩܝܠܝܐ. ܘܡ̣ܢ ܡܕܢܚܝܗ ܐܝܬܝܗܘܢ ܐܬܪ̈ܘܬܐ ܕܣܘܪܝܐ. ܘܗܠܝܢ ܡ̇ܢ ܕܝܡܐ ܗܢܐ ܕܝܠܢ. ܝܡܐ ܕܝܢ ܐܘܩܝܐܢܘܣ ܗ̇ܘ ܕܠܒܪ ܡ̣ܢ ܩܝ̈ܡܬܐ ܐܪ̈ܡܝ̣ܣܝܬܐ. ܟܕ ܠܐܦܝ̈ ܬܝܡܢܐ ܢܦܩ ܪܕܝܗ. ܥܒܪ ܥܠ ܐܬܪ̈ܘܬܐ ܕܡܥܪ̈ܒܝܐ ܛܝܝ̈ܐ. ܘܥܠ ܛܘܪܐ ܗ̇ܘ ܣܐܡܢܝܐ. ܘܛܘܪ̈ܐ ܣܗܪ̈ܢܝܐ ܕܡ̣ܢ ܡܥܪ̈ܝܗܘܢ ܢܒܥܝ̣ܢ ܡܝ̈ܐ ܕܢܝ̣ܠܘܣ ܢܗܪܐ. ܘܥܠ ܐܬܪ̈ܘܬܐ ܕܚܒܫܝ̈ܐ. ܘܥܠ ܐܬܪܐ ܕܢܘ̣ܒܝ̈ܐ. ܐܘܟܝܬ ܥܠ ܟܠܗ ܐܬܪܐ ܕܟܘ̈ܫܝܐ. ܘܒܣܘܦܝܗ̇ ܕܗܕܐ ܐܪܥܐ. ܘܡܬܡܬܚ ܡܢܗ ܥܘܒܐ ܡܕܡ ܙܥܘܪܐ ܠܐܦܝ̈ ܓܪܒܝܐ ܠܘܩܒܠ ܡܨܪܝܢ. ܗ̇ܘ ܕܝܡܐ ܕܣܘܦ ܡܬܩܪܐ. ܐܟܡܢ ܕܣܘܦܐ ܗ̱ܘ ܘܣܟܐ ܕܝܡܐ ܪܒܐ. ܘܒܗ ܥܒ̣ܪܘ ܒܢܝ̈ ܐܝܣܪܐܝܠ ܒܪܓܠ. ܘܛܒܥ ܦܪܥܘܢ. ܘܒܥܠܬ݀ ܣܘܓܐܐ ܕܛܘܪ̈ܐ ܘܫܘ̈ܥܐ ܕܐܝܬ ܒܗܢܐ ܥܘܒܐ. ܠܐ ܡܨ̈ܝܢ ܣܦܝ̣̈ܢܐ ܠܡܛܦ ܒܗ. ܐܠܐ ܟܒܪ ܒܐܝܡܡܐ ܥܡ ܣܦܪ̈ܘܗܝ. ܘܝܡܐ ܗ̇ܘ ܪܒܐ ܕܡܢܗ ܢܦܩ ܗܢܐ ܥܘܒܐ. ܝܡܐ ܣܘܡܩܐ ܡܬܩܪܐ. ܘܗ̣ܘ ܗܢܐ ܟܕ ܠܐܦܝ̈ ܡܕܢܚܐ ܪܕܐ ܥܒܪ ܥܠ ܐܬܪ̈ܘܬܐ ܕܫܒܐ ܘܕܣܐܒܐ. ܘܥܠ ܟܠܗ̇ ܐܪܥܐ ܗ̇ܝ܆ ܦܫܝ̣ܛܐܝܬ ܬܝܡܢܐ ܡܬܩܪܝܐ. ܘܬܡܢ ܐܢܘܢ ܐܝܠܢ̈ܐ ܕܠܒܘܢܬܐ. ܘܒܣܟܗ̇ ܕܗܕܐ ܐܪܥܐ܆ ܗ̣ܘ ܗܢܐ ܝܡܐ ܕܡܬܩܪܐ ܣܘܡܩܐ. ܥܘܒܐ ܚܕ ܪܒܐ ܥܒܕ ܠܐܦܝ̈ ܓܪܒܝܐ ܗ̇ܘ ܕܝܡܐ ܕܦܪܣ ܡܬܩܪܐ. ܘܒܓܒܗ ܡܥܪܒܝܐ ܕܗܢܐ ܝܡܐ ܐܝܬܝܗ̇ ܡܕܝܢ̱ܬܐ ܕܡܬܩܪܝܐ ܒܨܪܐ. ܘܟܠܗ̇ ܐܪܥܐ ܕܒܒܝܠ. ܘܠܝܩ ܘܩܛܝ̣ܣܦܘܢ. ܘܒܓܒܗ ܓܪܒܝܝܐ ܐܝܬܝܗܘܢ ܟܠܗܘܢ ܐܬܪ̈ܘܬܐ ܕܦܪ̈ܣܝܐ. ܘܒܓܒܗ ܡܕܢܚܝܐ ܐܝܬܝܗܘܢ ܐܬܪ̈ܘܬܐ ܕܗܢܕܘܝ̈ܐ. ܘܗ̣ܘ ܬܘܒ ܝܡܐ ܟܘܠܢܝܐ ܕܠܒܪ ܡ̣ܢ ܗ̇ܘ ܥܘܒܐ. ܟܕ ܬܘܒ ܠܐܦܝ̈ ܡܕܢܚܐ ܪܕܐ. ܥܒܪ ܥܠ ܐܬܪ̈ܘܬܐ ܕܗܢܕ̈ܘܝܐ. ܘܒܣܟܗܘܢ ܥܒܕ ܚܕ ܥܘܒܐ ܠܐܦܝ̈ ܓܪܒܝܐ ܗ̇ܘ ܕܝܡܐ ܕܗܢܕ̈ܘܝܐ ܡܬܩܪܐ. ܘܡ̣ܢ ܡܥܪܒܗ ܕܗܢܐ ܝܡܐ ܐܝܬܝܗܘܢ ܐܬܪ̈ܘܬܐ ܕܗܢܕ̈ܘܝܐ. ܘܡ̣ܢ ܡܕܢܚܗ ܐܝܬܝܗܘܢ ܐܬܪ̈ܘܬܐ ܕܬܒܬܝ̈ܐ. ܘܒܬܪܗܘܢ ܐܬܪ̈ܘܬܐ ܕܨܝܢܝ̈ܐ. ܘܒܓܪܒܝܝܗ܆ ܐܬܪ̈ܬܐ ܕܗܘ̈ܢܝܐ ܐܘܟܝ̣ܬ ܛܘܪܩܝܘܣ ܕܐܝܬܝܗܘܢ ܡܓܘ̈ܠܝܐ. ܟܐܡܬ݀ ܐܬܪܗܘܢ ܩܕܡܝܐ ܕܡܢܗ ܢܦ̣ܩܘ. ܝܡܐ ܕܝܢ ܟܘܠܢܝܐ ܕܠܒܪ ܡ̣ܢ ܗܢܐ ܥܘܒܐ. ܟܕ ܬܘܒ ܪܕܐ ܠܐܦܝ̈ ܡܕܢܚܐ. ܥܒܪ ܥܠ ܓܙܪ̈ܬܐ ܡܫܡ̈ܗܬܐ ܕܗܢܕ̈ܘܝܐ ܚܕܐ ܕܡܬܩܪܝܐ ܣܪܢܕܝ̣ܒ. ܘܐ̱ܚܪܬܐ ܕܡܬܩܪܝܐ ܩܡܝܪ. ܘܥܠ ܫܪܟܐ ܕܓܙܪ̈ܬܐ ܘܛܘܪ̈ܐ ܕܡܢܗܘܢ ܡܬܬܝܬܝܢ ܘܡܬܬܡܝ̣ܪܝ̣ܢ ܗܠܢ ܣܡ̈ܡܢܐ ܚܡܝ̣̈ܡܐ ܘܪ̈ܝܫܝܐ ܘܗܪ̈ܘܡܬܢܝܐ. ܩܪܢܦܘܠ. ܘܐܘܠܢܓܘܓ. ܘܦܠܦ̈ܠܐ ܘܩܐܦܦܘܪ. ܘܫܪܟܐ. ܘܟܐܦ̈ܐ ܬܘܒ ܝܩܝ̣ܪ̈ܬܐ ܝܘܩܢ̈ܕܐ ܘܫܪܟܐ. ܘܗܟܢܐ ܬܘܒ ܟܕ ܡܬܡܬܚ ܡ̣ܢ ܡܕܢܚܐ ܠܐܦܝ̈ ܓܪܒܝܐ. ܥܒܪ ܥܠ ܐܬܪ̈ܘܬܐ ܕܬܒܬܝ̈ܐ ܘܕܨܝ̈ܢܝܐ. ܘܥܠ ܐܬܪ̈ܘܬܐ ܕܗܘܢܝ̈ܐ ܕܐܡ̣ܪܢܢ. ܘܥܠ ܐܬܪ̈ܘܬܐ ܕܐܝܒܪ̈ܝܐ. ܘܥܠ ܐܪ̈ܥܬܐ ܣܓܝ̈ܐܬܐ ܕܫܗ̈ܝܢ. ܘܛܘܪ̈ܐ ܕܠܐ ܡܬܗܠܟܝ̣ܢ. ܘܥܒܪ ܬܘܒ ܥܠ ܛܘܪܐ ܪܒܐ ܘܐܘܟܡܐ ܕܒܓܪܒܝܐ. ܘܥܠ ܦܩ̈ܥܬܐ ܕܩܦܫܐܩܝ̈ܐ. ܘܥܠ ܐܪܥܐ ܕܐܠܢܝ̈ܐ. ܘܗܪܬܡܢ ܥܒܕ ܚܕ ܥܘܒܐ܆ ܡ̣ܢ ܓܪܒܝܐ ܠܬܝܡܢܐ. ܗ̇ܘ ܕܡܬܩܪܐ ܘܪܢܓ ܒܠܫܢܗ ܕܐܬܪܐ ܗ̇ܘ. ܘܗܟܢܐ ܬܘܒ ܟܠ ܡܬܡܬܚ ܡ̣ܢ ܓܪܒܝܐ ܠܐܦܝ̈ ܡܥܪܒܐ. ܥܒܪ ܥܠ ܐܬܪ̈ܘܬܐ ܕܣܩܘ̈ܬܝܐ. ܘܥܠ ܡܕܝ̈ܢܬܐ ܕܒܘܠܓܪ̈ܝܐ. ܘܥܠ ܟܠܗ̇ ܦܪܢܓܝܐ. ܘܥܠ ܐܬܪܐ ܕܐܢܕܠܘܣ ܕܛܝܝ̈ܐ. ܕܗܫܐ ܒܝܘ̈ܡܬܢ ܐܫܬܠܛܘ ܥܠܘܗܝ ܦܪ̈ܢܓܝܐ. ܘܡܫܠܡ ܠܘܬܗܝܢ ܕܩܝ̈ܡܬܐ ܐܪ̈ܡܝܣܝܬܐ܆ ܡ̣ܢ ܐܝܟܐ ܕܫܪܝ. ܘܗܟܢܐ ܦܝܫܐ ܟܠܗ̇ ܥܡܪܬܐ ܐܝܟ ܚܕܐ ܓܙܪܬܐ ܠܓܘ ܡ̣ܢ ܝܡܐ ܟܠܢܝܐ ܕܚܕܝ̣ܪ ܠܗ̇ ܠܐܪܥܐ. ܐܝܟ ܟܠܝ̣ܠܐ. ܘܐܝܟ ܩܡܪܐ ܠܚܨܐ. ܘܡ̣ܢ ܪܘܫܡܐ ܗܢܐ ܕܣܟܡܢܢ. ܐܝܟ ܕܒܡܚܙܝ̣ܬܐ ܐܝܬ ܠܡܚܙܐ ܠܥܡܪܬܐ ܟܠܗ̇. ܟܕ ܡܦܠܓܐ ܠܫܒ̈ܥܬܝܗܘܢ ܩܠܝ̣̈ܡܐ. ܘܠܣܝܡܐ ܕܟܠ ܐܬܪܐ. ܘܟܠ ܥܘܒܐ ܝܡܡܝܐ. ܕܡ̣ܢ ܝܡܐ ܗ̇ܘ ܟܘܠܢܝܐ ܡܬܝܒܠ. ܘܒܐܬܪܐ ܡ̇ܢ ܕܐܝܒܪ̈ܝܐ ܐܝܬ ܝܡܬܐ ܚܕܐ ܕܡܢܗ̇ ܘܠܗ̇ ܗ̣ܝ. ܘܠܐ ܡܚܝܕܐ ܠܝܡܐ ܟܘܠܢܝܐ. ܐܝܟܢܐ ܕܗ̇ܘ ܕܡܫܪܐ ܡ̣ܢ ܐܬܪܐ ܡܕܡ ܝ̣ܕܝ̣ܥܐ ܕܒܣܦܪ̈ܘܗܝ. ܘܪܕܐ ܚܕܪ̈ܘܗܝ. ܠܗ̇ ܠܕܘܟܬܐ ܕܡܢܗ̇ ܫܪܝ ܡܨܐ ܗܘܐ ܠܡܬܡܛܝܘ. ܐܠܘܠܐ ܢܗܪܐ ܗ̇ܘ ܪܒܐ ܕܡܬܩܪܐ ܐܬܠ. ܕܒܗ̇ ܒܗܕܐ ܝܡܬܐ ܫܕܐ ܡܘ̈ܗܝ. ܘܠܗ̇ ܠܗܕܐ ܝܡܬܐ܆ ܡܛܠ ܪܒܘܬܗ̇ ܘܪܘܝܚܘܬܗ̇܇ ܝܡܐ ܘܠܘ ܝܡܬܐ ܩܪܝܢ ܠܗ̇ ܒܟܬܒ̈ܐ ܘܒܡܡܠܠܐ ܕܥܝܕܐ. ܘܠܗ̇ ܩܪܐ ܦܛܘܠܘܡܐܘܣ ܝܡܐ ܕܐܪܩܐܢܝܐ. ܘܒܝܘ̈ܡܬܢ ܒܙܪ ܩܪܝܢ ܠܗ̇. ܘܒܡܥܪܒܝܗ ܕܝܡܐ ܗܢܐ ܐܝܬܘܗܝ ܬܪܥܐ ܕܦܪܙܠܐ ܘܦܩܥܬܐ ܕܩܦܫܩ̈ܝܐ. ܘܫܪܘܐܢ ܘܛܒܪܣܬܐܢ. ܘܒܬܝܡܢܝܗ܆ ܐܪܡܢܝܐ ܪܒܬܐ. ܘܒܡܕܢܚܝܗ ܐܬܪ̈ܘܬܐ. ܘܒܓܪܒܝܝܗ܆ ܛܘܪܐ ܗ̇ܘ ܪܒܐ ܘܫܗܝܐ ܘܐܘܟܡܐ ܘܕܒܣܟܗ̇ ܕܐܪܥܐ ܗ̇ܝ ܕܡ̣ܢ ܡܕܢܚ ܝܡ̈ܡܬܐ ܕܝܢ ܐܝܬܝܗܝܢ ܗ̇ܢܝܢ ܕܠܐ ܡܚܝ̈ܕܢ ܠܝܡܐ ܗ̇ܘ ܪܒܐ ܐܘܩܝܐܢܘܣ. ܘܣܓܝ̈ܐܢ ܐܢܝܢ ܒܥܡܪܬܐ. ܐܠܐ ܗ̇ܢܝܢ ܕܝ̣ܕܝ̣̈ܥܢ ܠܢ܆ ܗܠܝܢ ܐܝܬܝܗܝܢ. ܝܡܬܐ ܕܐܘܦܝܡܝܐ. ܘܗ̇ܝ ܕܛܝ̣ܒܪܝܘܣ. ܘܗ̇ܝ ܕܡܬܩܪܝܐ ܡܐܪܝܘܛܝ ܕܠܘܬ ܐܠܟܣܢܕܪܝܐ. ܘܝܡܬܐ ܗ̇ܝ ܕܟ̣ܢܪܬ݀ ܕܐܝܟ ܕܐܡܪܝܢ. ܢܘ̈ܢܐ ܠܐ ܗܘܝܢ ܒܗ̇. ܡܛܠ ܕܡܘ̈ܗܝ ܬܠܬ ܙܒܢܝ̣̈ܢ ܒܝܘܡܐ ܡܫܬܚܠܦܝ̣ܢ. ܢܒܥ ܡܢܗ ܟܘ̣ܦܪܐ ܒܕܡܘܬ ܬܘܪܐ ܕܠܐ ܪܝܫܐ. ܘܠܐ ܦܪܙܠܐ ܐܦܠܐ ܒܟܐܦܐ ܡܬܦܣܩ ܐܘ ܡܬܬܒܪ. ܐܠܐ ܒܡܝ̈ܐ ܣܪ̈ܝܐ ܘܕܡܐ ܕܟܦܣܐ ܡܫܬܪܐ. ܘܝܡܬܐ ܗ̇ܝ ܕܒܐܪܡܢܝܐ ܕܡܬܩܪܝܐ ܐܪܟܣܛܝܐ ܐܘܟܝܬ ܐܪܓܝ̣ܫ. ܘܝܡ̈ܡܬܐ ܐ̱ܚܪ̈ܢܝܬܐ ܕܐܝܬ ܒܐܕܘܪܒܝܓܐܢ ܘܒܐܬܪ̈ܘܬܐ ܕܦܪܣ. ܘܐ̱ܚܪ̈ܢܝܬܐ ܕܠܐ ܡܢܝܢ.

 

 

 

ܡܛܠ ܡܥܝ̈ܢܐ ܘܢܗܪ̈ܘܬܐ

 

ܬܪܝܢ ܐܡ̣ܪܢܢ ܥܛܪ̈ܐ ܡ̣ܢ ܠܥܠ. ܚܕ ܡ̇ܢ ܝܒܝ̣ܫܐ ܘܬܢܢܝܐ. ܘܐ̱ܚܪܢܐ ܠܗܓܢܝܐ ܘܪܛܝ̣ܒܐ. ܘܟܠ ܚܕ ܡܢܗܘܢ ܐܘ ܠܥܠ ܡ̣ܢ ܐܪܥܐ ܗܘܐ. ܐܘ ܠܓܘ ܡܢܗ̇. ܘܗ̇ܘ ܬܢܢܝܐ ܠܥܠ ܡ̣ܢ ܐܪܥܐ ܪ̈ܘܚܐ ܥܒܕ. ܘܠܐܐܪ ܫܓܫ. ܘܠܓܘ ܒܐܪܥܐ ܠܐܪܥܐ ܡܙܝܥ. ܘܡܢܝ̣ܕ ܘܡܪܥܠ ܠܦܘܬ ܥܘܫܢܗ. ܘܗ̇ܘ ܠܗܓܢܝܐ ܬܘܒ ܠܥܠ ܡ̣ܢ ܐܪܥܐ ܐܘܟܝܬ ܒܐܐܪ. ܡܛܪ̈ܐ ܘܬܠܓ̈ܐ ܘܫܪܟܐ ܥܒܕ. ܠܓܘ ܡܢܗ̇ ܕܝܢ ܡܒܘ̈ܥܐ ܕܡܝ̈ܐ ܡܪܕܐ. ܒܕܓܘܢ ܗ̣ܢܘܢ ܥܛܪ̈ܐ ܕܒܐܪܥܐ܆ ܐܢ ܩܢܝܢ ܚܝܠܐ ܕܢܨܪܘܢܗ̇ ܠܐܪܥܐ ܘܣܓܝ ܗ̣ܘ ܡܠܘܘܗܘܢ܆ ܢܗܪ̈ܘܬܐ ܥܒܕܝܢ. ܐܢܕܝܢ ܒܨܝ̣ܪ ܗ̣ܘ ܡܠܘܘܗܘܢ܆ ܦܨܝ̈ܕܐ ܥܒܕܝܢ. ܘܐܢܕܝܢ ܬܘܒ ܝܬܝܪ ܒܨܝܪ. ܐܓܡ̈ܐ ܥܒܕܝܢ. ܘܐܢܗܘ ܕܠܐ ܡܨܝܢ ܚܝܠܐ ܠܡܨܪܐ ܐܪܥܐ. ܐܢܕܝܢ ܪ̈ܕܘܝܐ ܐܢܘܢ ܐܓܘ̈ܓܝܐ ܡܬܩܪܝܢ. ܐܢܕܝܢ ܠܐ ܪܕܝܢ ܒܐܪ̈ܐ ܡܬܩܪܝܢ. ܣܘܓܐܗܘܢ ܕܝܢ ܕܡܒܘ̈ܥܐ ܡ̣ܢ ܓܪܒܝܐ ܪܕܝܢ ܒܥܠܬ݀ ܛܘܪ̈ܐ ܪܘܪ̈ܒܐ ܕܗܪܬܡܢ. ܣܓܝ̈ܐܝܢ ܕܝܢ ܚܘܠܚ̈ܠܐ ܕܛܘܪ̈ܐ. ܘܕܡܝܢ ܠܒܙ̈ܥܐ ܕܐܣܦܘ̈ܓܐ. ܘܡ̣ܢ ܟܠ ܓܒ ܪܨܢܝ̣ܢ ܡܢܗܘܢ ܡܝ̈ܐ ܠܐܦܝ̈ ܠܬܚܬ. ܘܕܢܗܪ̈ܘܬܐ ܕܛܒ ܪܘܪܒܝܢ ܡ̣ܢ ܛܘܪ̈ܐ ܪܘܪ̈ܒܐ ܢܒܥܝܢ. ܝ̣ܕܝ̣ܥܐ ܡ̣ܢ ܗ̇ܝ ܕܐܪܐܟܣܝܣ ܢܗܪܐ ܪܒܐ. ܡ̣ܢ ܛܘܪܐ ܦܪܐܢܐܣܘܣ ܕܒܐܣܝܐ ܢܚܬ. ܘܡܢܗ ܬܘܒ ܕܗܢܐ ܛܘܪܐ ܐܝܢܕܘܣ ܗ̇ܘ ܕܝܬܝܪ ܪܒ. ܡ̣ܢ ܟܠܗܘܢ ܢܗܪ̈ܘܬܐ ܢܚܬ. ܦܐܣܝܣ ܕܝܢ ܢܗܪܐ ܡ̣ܢ ܩܐܘܩܐܣܝܣ ܛܘܪܐ ܪܕܐ ܘܠܦܘܢܛܘܣ ܢܚܬ. ܘܕܡ̣ܢ ܟܠܗܘܢ ܛܘܪ̈ܝ ܡܕܢܚܐ ܩܝܛܝܐ ܪܡ ܗ̣ܘ ܛܘܪܐ ܗܢܐ. ܝ̣ܕܝ̣ܥܐ ܡ̣ܢ ܗ̇ܝ ܕܒܬܘܠܬܐ ܒܠܚܘܕ ܡܨܥܝܐ ܕܠܠܝܐ ܠܐ ܡܬܚܙܐ ܒܗ ܫܡܫܐ. ܘܡ̣ܢ ܦܘܪܝܢܝ ܬܘܒ ܛܘܪܐ ܕܒܡܥܪܒܐ. ܛܪܛܝܣܘܣ ܘܐܝܣܛܪܘܣ ܢܗܪ̈ܘܬܐ ܪܘܪ̈ܒܐ ܪܕܝܢ. ܘܡ̣ܢ ܛܘܪ̈ܐ ܕܣܩܘ̈ܬܢܝܐ܆ ܢܗܪ̈ܘܬܐ ܕܛܒ ܪܘܪ̈ܒܝܢ ܢܚܬܝܢ. ܘܡ̣ܢ ܒܝܬ ܟܘ̈ܫܝܐ ܬܘܒ ܡܫܪܝܢ ܢܗܪ̈ܘܬܐ ܗܓܘܢ ܘܢܘܣܩܘܣ. ܘܡ̣ܢ ܛܘܪܐ ܗ̇ܘ ܣܐܡܢܝܐ ܟܪܗܡܗܛܝܣ ܘܢܝ̣ܠܘܣ ܢܗܪ̈ܘܬܐ ܢܒܥܝ̣ܢ. ܘܦܝ̣ܫܘܢ ܡ̇ܢ ܐܝܟ ܕܡܫܘܕܥ ܟܬܒܐ ܕܐܘܪܝܬܐ. ܐܝܬܘܗܝ ܢܗܪܐ ܗ̇ܘ ܕܡܫܩܐ ܠܐܬܪܐ ܕܗܢܕ̈ܘܝܐ ܕܡܬܩܪܐ ܚܘܝܠܐ. ܘܓܝ̣ܚܘܢ ܗܘܝܘ ܢܝ̣ܠܘܣ ܢܗܪܐ. ܕܡܫܩܐ ܠܐܪܥܐ ܕܟܘ̈ܫܝܐ ܘܡܨܪܝܢ ܘܡܥܪܒܐ. ܘܡܬܩܪܐ ܬܘܒ ܫܝ̣ܚܘܪ. ܘܕܩܠܬ ܐܠܝ̣ܨ ܘܚܪܝܦ. ܘܡܫܩܐ ܠܐܪܥܐ ܕܦܪܣ ܘܓܪܒܝܐ. ܘܦܪܬ ܡܫܩܐ ܠܐܪܥܐ ܕܒܒܝܠ ܘܡܝܫܢ ܐܘܟܝܬ ܒܨܪܐ.

 

 

 

ܡܛܠ ܬܡܝ̈ܗܬܐ ܕܒܢܗܪ̈ܘܬܐ

 

ܒܐܣܦܐܢܝܐ ܓܘܝܬܐ ܐܡܪܝܢ ܕܐܝܬ ܢܗܪܐ ܕܫܡܗ ܒܛܣ. ܕܫܬܫܥܝ̣̈ܢ ܩܕܡܝ̈ܬܐ ܕܝܘܡܐ. ܫܕܐ ܡܘ̈ܗܝ ܒܝܡܐ. ܘܒܗܠܝܢ ܫܬܫܥܝ̈ܢ ܐ̱ܚܪ̈ܢܝܬܐ ܡܬܠܝܢ ܡܘ̈ܗܝ ܒܡܒܘܥܗ. ܘܟܠܗ ܫܛܚܗ ܡܬܚܙܐ ܝܒܝ̣ܫܐ. ܘܒܐܣܦܐܢܝܐ ܬܘܒ ܐܡܪܝܢ ܕܐܝܬ ܢܗܪܐ ܕܫܬ ܫܢܝ̣̈ܢ ܓܡܝ̣ܪܐܝܬ ܝܒܫ. ܘܒܫܢ̱ܬܐ ܕܫܒܥ ܡܪܕܐ ܡܝ̈ܐ ܣܓܝ̈ܐܐ. ܘܒܗ̇ ܬܘܒ ܒܐܣܦܐܢܝܐ ܐܝܬ ܢܗܪܐ ܐ̱ܚܪܢܐ ܕܫܬܐ ܝܘ̈ܡܝ̣ܢ ܝܒܫ. ܘܒܫܒܬܐ ܪܕܐ. ܘܡܬܐܡܪ ܥܠ ܢܗܪܐ ܚܕ ܕܠܘ ܡܝ̈ܐ ܗ̱ܝ ܡܪܕܝܬܗ ܐܠܐ ܚܠܐ ܝܒܝ̣ܫܐ ܕܒܚܐܦܐ ܥܫܝ̣ܢܐ ܪܕܐ. ܘܠܐ ܒܐܠܦܐ ܡܬܥܒܪ ܐܦܠܐ ܒܪܓܠ. ܘܒܝܘܡܐ ܕܫܒܬܐ ܟܠܝܐ ܡܪܕܝܬܗ. ܘܥܕܡܐ ܕܥܪܒ ܫܡܫܐ܆ ܡܬܚܙܐ ܚܠܐ ܕܒܓܘܗ ܟܕ ܡܓܫܡ ܐܝܟ ܐܪܥܐ ܝܒܝ̣ܫܬܐ.

 

 

 

ܢܝܫܐ ܬܪܝܢܐ ܡܛܠ ܝܥ̈ܝܬܐ. ܩܕܡܝܬ݀ ܡܛܠ ܟܝܢܝ̈ܗܘܢ

 

ܡ̣ܢ ܥܬܝ̣̈ܩܐ ܡ̇ܢ ܐܢܐܟܣܓܘܪܐܣ ܐܡ̇ܪ. ܕܟܝܢܐ ܚܝܘܬܢܝܐ ܩܢ̈ܝܢ ܝܥ̈ܝܬܐ ܒܕܚܕ̈ܝܢ ܘܡܐܟܒ̈ܢ. ܘܗܡܦܗܕܩܠܝܣ ܐܡ̇ܪ ܕܐܦ ܕܟܪ̈ܐ ܐܢܝܢ ܘܢܩ̈ܒܬܐ. ܟܕ ܒܟܠ ܚܕܐ ܡܢܗܝܢ܇ ܬܪ̈ܝܗܘܢ ܗܠܝܢ ܟܝ̈ܢܐ ܚܠܝ̣ܛܝ̣ܢ ܘܟܢܝܫܝ̣ܢ. ܦܠܐܛܘܢ ܕܝܢ ܡܢܬܐ ܒܠܚܘܕ ܪܓܘܓܬܐ ܝܗܒ ܠܗܝܢ. ܒܕܐܢܢܩܝܬܐ ܗ̱ܝ ܠܘܬ ܬܘܪܣܝܐ ܪܓܬܐ. ܘܗܢܝܐܘܬܐ ܕܡ̣ܢ ܣܒܥܐ ܘܥܩܬܐ ܕܡ̣ܢ ܟܦܢܐ. ܘܗܢܝܢ ܗܠܝܢ ܒܝܕ ܪܓܫܬܐ ܗܘ̈ܝܢ. ܘܝ̣ܕܝ̣ܥܐ ܬܘܒ ܐܡܪܝܢ ܕܚܝ̈ܘܬܐ ܡ̣ܢ ܗ̇ܝ ܕܪ̈ܒܝܢ ܘܡܬܛܠܝ̈ܢ ܘܣܐܒ̈ܢ. ܘܡܬܟܪ̈ܗܢ ܘܡܬܚܠܡ̈ܢ. ܕܝܡܘܩܪܐܛܝܣ ܕܝܢ ܐܦ ܗܘܢܐ ܝܗܒ ܠܗܝܢ. ܘܐܢ ܢܐܫܦ ܐܡܪܝܢ ܕܠܝܬ ܠܗܝܢ. ܐܠܐ ܡܛܠ ܗܕܐ ܠܐ ܐܠܨܐ ܕܠܐ ܚܝ̈ܬܐ ܢܐܡܪ ܐܢܝܢ. ܗܐ ܓܝܪ ܘܒܚܝ̈ܘܬܐ ܕܛܒ ܡܝܩܪ̈ܢ ܐܟܙܢܐ ܕܒܫܡܝܐ. ܦܘܫܟܐ ܐܝܬ ܥܠ ܪܓܫܬܐ. ܡܛܠ ܕܠܝܬ ܡܕܡ ܠܒܪ ܡܢܗ ܕܒܗ ܢܪܓܫ. ܐܦܠܐ ܬܘܒ ܡܛܠ ܕܠܐ ܡܬܬܙܝ̈ܥܢ ܨܒܝܢܐܝܬ. ܒܗ̇ܝ ܕܗܐ ܐܦ ܫܡܫܐ ܘܟܠܗܘܢ ܟܘܟ̈ܒܐ ܠܘ ܨܒܝܢܐܝܬ. ܐܠܐ ܒܙܘܥܐ ܕܡܘܙܠܬܗܘܢ ܡܬܬܙܝܥܝ̣ܢ. ܘܝ̣ܕܝ̣ܥܐ ܬܘܒ ܕܚܝ̈ܘܬܐ ܐܢܝܢ ܡ̣ܢ ܗ̇ܝ ܕܗܕܡ̈ܐ ܩܢ̈ܝܢ ܕܕܡ̈ܝܢ ܠܕܚܝ̈ܘܬܐ. ܩܠܦܬܐ ܐܝܟ ܡܫܟܐ. ܘܥܩܪܐ ܐܝܟ ܦܘܡܐ. ܘܐܝܢܗܣ ܐܝܟ ܓܝܕ̈ܐ. ܘܩܘ̈ܚܐ ܘܕܢ̈ܐ ܘܣܘ̈ܟܬܐ ܐܝܟ ܐܝܕܝ̈ܐ ܘܪ̈ܓܠܐ ܘܛܪ̈ܦܐ ܘܗܒܒ̈ܐ ܘܦܩ̈ܚܐ. ܐܝܟ ܣܥܪܐ ܘܓܠܦ̈ܢܐ ܘܦܐܪ̈ܐ ܐܝܟ ܥܘ̈ܠܐ. ܘܚܠܒܐ ܐܝܟ ܫܠܝ̣ܬܐ ܘܫܪܟܐ. ܘܐܪܝ̣ܣܛܘܛܠܝ̣ܣ ܕܝܢ ܠܟܠܗܘܢ ܗܠܝܢ ܣܥܝ̈ܐ ܡܙܛܡ ܘܡܙܝܦ. ܘܟܝܢܐ ܡܢܦܫܐ ܘܠܘ ܚܝܘܬܢܝܐ ܝܗܒ ܠܗܝܢ.

 

 

 

ܡܛܠ ܦܘܠܓܗܝܢ

 

ܟܠ ܝܥܝ̣ܬܐ ܐܘ ܐܝܠܢܐ ܗ̱ܝ. ܐܢ ܡ̣ܢ ܥܩܪܗ̇ ܐܝܬ ܠܗ̇ ܩܝܡܬܐ ܘܣܓܝ̈ܐܢ ܣܘ̈ܟܬܗ̇ ܐܝܟ ܙܝܬܐ ܘܬܬܐ. ܐܘ ܬܐܡܢܘܣ ܗ̣ܝ ܐܢ ܡ̣ܢ ܥܩܪܗ̇ ܡܚܕܗ̇ ܡܣܬܪ̈ܥܦܢ ܣܘ̈ܟܬܗ̇ ܐܝܟ ܩܢܝܐ ܘܣܢܝܐ. ܐܘ ܚܒܘܒܐ ܗ̣ܝ ܐܢ ܡ̣ܢ ܥܩܪܗ ܣܓܝ̈ܐܢ ܩܝ̈ܡܬܗ̇ ܘܣܘ̈ܟܬܗ̇ ܐܝܟ ܟܪܒܐ ܘܦܝܓܢܐ. ܐܘ ܥܣܒܐ ܗ̱ܝ ܐܢ ܡ̇ܢ ܛܥܝ̣ܢܐ ܛܪ̈ܦܐ. ܘܠܝܬ ܠܗ̇ ܩܝܡܬܐ. ܘܫܢܐ ܒܫܢܐ ܝܥܝܐ ܘܚܡܝܐ ܐܝܟ ܝܪ̈ܩܘܢܐ. ܣܠܩܐ ܕܝܢ ܒܝܬ ܚܒܘܒܐ ܠܥܣܒܐ ܐܝܬܘܗܝ. ܐܣܐ ܕܝܢ ܘܚܙܘܪܐ ܘܪܘܡܢܐ ܘܟܘܡܬܪܐ ܒܫܘܪܝܐ ܡ̇ܢ ܬܐܡ̈ܢܘ ܫܘܚܝܢ ܐܝܛܐ ܐܝܠܢ̈ܐ ܗܘܝܢ.

 

 

 

ܦܘܠܓܐ ܐ̱ܚܪܢܐ

 

ܐܝܠܢ̈ܐ ܡ̇ܢ ܡܢܗܘܢ ܒܪ̈ܝܐ ܐܢܘܢ ܘܝܬܝܪ ܣܓܝ̈ܐܝܢ ܦܐܪ̈ܝܗܘܢ. ܡܢܗܘܢ ܕܝܢ ܕܫܝܢܐ ܘܝܬܝܪ ܛܒܝܢ ܦܐܪ̈ܝܗܘܢ.

 

 

 

ܦܘܠܓܐ ܐ̱ܚܪܢܐ

 

ܝܥ̈ܝܬܐ ܡ̇ܢ ܡܢܗܝܢ ܚܕܢܝܬ݀ ܩܠܦܬܐ ܐܢܝܢ ܐܟܙܢܐ ܕܬܬܐ. ܡܢܗܝܢ ܕܝܢ ܣܓܝ̈ܐܢ ܩܠܦ̈ܬܗܝܢ ܐܟܙܢܐ ܕܐܪ̈ܙܐ. ܡܢܗܝܢ ܕܝܢ ܒܟܘ̈ܠܝܬܗܝܢ ܩܠܦܢ̈ܝܬܐ ܐܢܝܢ ܐܟܙܢܐ ܕܒܘܠܒܣ̈ܐ ܘܒܨ̈ܠܐ.

 

 

 

ܦܘܠܓܐ ܐ̱ܚܪܢܐ

 

ܡܢܗܘܢ ܕܝܢ ܕܟܘ̈ܡܘ ܕܦܐܪ̈ܐ ܡܐܪ̈ܝܬܢܝܐ ܐܢܘܢ ܐܝܟ ܥܢ̈ܒܐ ܘܚܙܘܪ̈ܐ ܘܪ̈ܘܡܢܐ ܘܬܘܬܐ ܘܐܣܐ. ܡܢܗܘܢ ܕܝܢ ܡܫܚܢܝ̈ܐ ܐܟܙܢܐ ܕܓܘܙܐ ܘܙܝܬܐ ܘܐܪܙܐ. ܘܗܢܝܢ ܗܠܝܢ ܒܥܠܬ݀ ܪܛܝ̣ܒܘܬܗܝܢ ܚܠܝ̣ܡܬܐ ܝܬܝܪ ܚܐܝ̈ܢ. ܡܢܗܘܢ ܬܘܒ ܕܒܫܢܝ̈ܐ ܐܝܟ ܬܬܐ ܘܕܩܠܐ. ܘܡܢܗܘܢ ܚܪܝ̣ܦܝܢ ܐܝܟ ܨܬܪܐ ܘܚܪܕܠܐ. ܘܡܢܗܝܢ ܡܪܝ̣ܪܝܢ ܐܝܟ ܐܦܣܢܬܝܘܢ.

 

 

 

ܦܘܠܓܐ ܐ̱ܚܪܢܐ

 

ܦܐܪ̈ܐ ܡ̇ܢ ܡܢܗܘܢ ܡ̣ܢ ܒܣܪܐ ܘܐܝܢܗܣ ܡܪܟܒܝܢ ܐܝܟ ܚܚ̈ܐ ܘܩܛܝ̈ܐ. ܘܡܢܗܘܢ ܕܝܢ ܡ̣ܢ ܒܣܪܐ ܒܠܚܘܕ ܐܝܟ ܚܙܘܪ̈ܐ. ܡܢܗܘܢ ܕܝܢ ܡ̣ܢ ܪܛܝ̣ܒܘܬܐ ܘܦܪ̈ܕܐ ܐܝܟ ܪ̈ܘܡܢܐ.

 

 

 

ܦܘܠܓܐ ܐ̱ܚܪܢܐ

 

ܝܥ̈ܝܬܐ ܡ̇ܢ ܡܢܗܝܢ ܡܙܕܪ̈ܥܢ ܘܡܢܗܝܢ ܡܫ̈ܬܬܠܢ. ܘܡܢܗܝܢ ܡ̇ܢ ܡ̣ܢ ܝܬܗܝܢ ܗܘ̈ܝܢ. ܘܐܝܠܝܢ ܕܡܫ̈ܬܬܠܢ. ܐܘ ܒܐܪܥܐ ܡܫ̈ܬܬܠܢ. ܐܘ ܒܐܝ̈ܠܢܐ. ܐܝܟ ܐܝܠܝܢ ܕܡܬܕܥܨܝ̣ܢ. ܙܕܩ ܕܝܢ ܕܕܡ̈ܝܝܬܐ ܒܕܡ̈ܝܝܬܐ ܢܫ̈ܬܬܠܢ. ܐܝܟ ܚܙܘܪ̈ܐ ܒܚܙܘܪ̈ܐ. ܘܬܬܐ ܒܬܬܐ. ܘܣܬܐ ܒܣܬܐ. ܗܘܝܢ ܕܝܢ ܘܒܐܚܪ̈ܢܝܝ ܓܢܣܐ. ܐܝܟ ܕܐܦܢܝ ܒܕܘܠܒܐ. ܘܒܛܡܬܐ ܒܙܝܬܐ. ܘܐܝܠܢܐ ܕܫܝܢܐ ܒܕܕܒܪܐ. ܘܕܒܪ̈ܝܐ ܒܫܝ̈ܢܝܐ. ܣܘܓܐܗܝܢ ܕܝܢ ܕܢܨ̈ܒܬܐ ܡܫ̈ܬܬܠܢ ܒܬܕܐܐ. ܒܬܪܟܢ ܒܬܫܪ̈ܝܬܐ ܘܒܣܬܘܐ. ܕܠܝ̣̈ܠܬܐ ܕܝܢ ܘܒܕܘܟ̈ܝܬܐ ܕܠܝ̣̈ܠܬܐ ܡ̣ܢ ܒܬܪ ܕܢܚܗ ܕܟܠܒܐ. ܐܟܙܢܐ ܕܒܩܘܪܝ̣ܢܝ̣ ܘܒܠܐܩܘܢܝܩܝ.

 

 

 

ܦܘܠܓܐ ܐ̱ܚܪܢܐ

 

ܦܐܪ̈ܐ ܡ̇ܢ ܡܢܗܘܢ ܒܫܘܪ̈ܢܩܐ ܐܢܘܢ܆ ܐܟܙܢܐ ܕܡܬܥܨܪܝܢ ܒܐܝܕܐ. ܡܢܗܘܢ ܕܝܢ ܒܚܠܒܐ. ܐܟܙܢܐ ܕܚ̈ܛܐ. ܘܡܢܗܘܢ ܒܒܣܪܐ ܐܟܙܢܐ ܒܣܒܝ̣ܣܘ ܕܬܡܪ̈ܐ. ܡܢܗܘܢ ܒܡܫܟܐ ܐܟܙܢܐ ܕܒܠܘܛܐ ܘܚܙܘܪܐ. ܡܢܗܘܢ ܕܝܢ ܒܩܠܦܬܐ ܥܒܝܬܐ ܘܚܠܒܐ ܘܓܪܘܡܐ܆ ܐܟܙܢܐ ܕܓܘܙܐ ܘܡܢܗܘܢ ܣܓܝ̈ܐܝܝ ܩܠܦ̈ܬܐ ܐܢܘܢ ܐܟܙܢܐ ܕܦܐܪ̈ܐ ܕܙܝܬܐ ܐܝܬ ܠܗ ܩܠܦܬܐ ܩܕܡܝܬܐ ܡܫܟܐ. ܘܬܪܝܢܝ̣ܬܐ ܒܣܪܐ. ܘܬܠܝ̣ܬܝܬܐ ܓܪܘܡܐ ܘܪܒܝܥܝܬܐ ܕܠܓܘ. ܙܪܥܐ ܕܝܢ ܚܡܝ̣ܫܝܬܐ ܠܓܘ ܡ̣ܢ ܗܠܝܢ.

 

 

 

ܡܛܠ ܡܫܬܚܠܦܢܘܬܗܘܢ ܕܝܥ̈ܝܬܐ ܠܚܕ̈ܕܐ

 

ܠܗܘܩܝ ܐܘܟܝܬ ܚܘܪܐ ܟܕ ܣܐܒܐܗܓܝܪܘܣ ܐܘܟܝܬ ܚܘܪܢܝܬܐ ܗܘܝܐ. ܘܣܝܣܡܒܪܝܘܢ ܠܗܪܙܡܐ ܡܫܬܚܠܦ. ܘܚܘܟܐ ܠܣܝܣܡܒܪܝܘܢ ܒܝܡܐ ܣܘܡܩܐ. ܘܚ̈ܛܐ ܘܟܬܢ̈ܐ ܠܙܝ̣̈ܙܢܐ. ܘܦܪܣܬܐ ܕܡܬܩܪܝܐ ܦܪܣܐܝܬ ܠܙܝܓ. ܟܕ ܒܦܪܣ ܡܡܝ̣ܬܢܝܬܐ ܗܘܬ݀. ܒܡܨܪܝܢ ܘܒܣܘܪܝܐ ܡܬܐܟܠܢܝ̣ܬܐ ܗܘܬ݀. ܘܪܘܡܢܐ ܚܡܘܨܐ ܟܕ ܡܬܪܡܐ ܠܗ ܙܒܠܐ ܕܚܙܝ̣ܪ̈ܐ ܥܡ ܡܝ̈ܐ ܩܪܝܪ̈ܐ ܚܠܐ. ܘܠܘ̈ܙܐ ܡܪܝܪ̈ܐ ܟܕ ܢܬܩܒܥ ܐܣܦܝ̣ܢܐ ܫܡܝܢܐ ܡ̣ܢ ܦܘܡܐ ܠܐܦܝ̈ ܥܩܪܗܘܢ ܥܒܪܐ ܡܢܗܘܢ ܫܘ̣ܟܬܐ ܕܡܪܝܪܘܬܐ ܘܚܠܝܢ. ܘܕܩܠܐ ܟܕ ܢܬܒܕܪ ܒܠܒܗ ܡ̣ܢ ܗܒܒܐ ܕܕܟܪܐ ܡܒܫܠ ܠܦܐܪܗ ܘܟܠܐ ܠܗ ܡ̣ܢ ܕܢܬܪ. ܘܕܟܪܐ ܡ̇ܢ ܒܟܠܗܘܢ ܐܝܠܢ̈ܐ ܝܬܝܪ ܪܨܝܦ ܘܣܘܟܢܝ ܘܩܫܐ. ܘܒܨܝܪ ܕܗܝ̣ܢ. ܘܙܥܘܪ̈ܝܢ ܦܐܪ̈ܘܗܝ ܘܠܐ ܒܫܝ̣ܠܝ̣ܢ. ܢܩܒܬܐ ܕܝܢ ܒܗܦܟܐ. ܘܙܒܢܝ̈ܢ ܣܓܝ̈ܐܢ ܟܕ ܪܘܚܐ ܥܙܝ̣ܙܬܐ ܗܘܝܐ ܡܝܒܠܐ ܚܝܠܐ ܡ̣ܢ ܕܟܪܐ ܠܢܩܒܬܐ. ܡܗܢܝܐ ܬܬܐ ܕܒܪܝܬܐ ܐܘܟܝܬ ܫܛܘܚܬܐ ܠܬܐܢ̈ܐ. ܘܟܦܬܐ ܕܪ̈ܘܡܢܐ ܠܙܝܬܐ. ܘܗܠܝܢ ܡ̇ܢ ܬܡܝ̣ܗ̈ܬܐ ܕܝܘܡܐ ܬܠܝܬܝܐ.

 

 

 

 

     #1 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܪܝܢܝܬܐ. ܡܛܠ ܗܢܝܢ ܕܒܝܘܡܐ ܕܐܪܒܥܐ ܐܬܒܪ̈ܝ. ܘܒܗ ܐܝܬ ܥܘܬܕܐ ܘܢܝ̈ܫܐ ܬܠܬܐ. ܩܕܡܝܬ ܥܘܬܕܐ

 

 

 

ܒܗܢܐ ܡ̇ܢ ܝܘܡܐ ܢܗܝܪ̈ܐ ܕܒܪܩܝ̣ܥܐ ܕܫܡܝܐ ܐܘܟܝ̣ܬ ܟܘܟ̈ܒܐ ܐܬܒܪܝ̣ܘ. ܢܗܝ̣ܪܐ ܡ̣ܢ ܪܒܐ ܐܘܟܝܬ ܫܡܫܐ ܠܫܘܠܛܢܐ ܕܐܝܡܡܐ. ܘܢܗܝ̣ܪܐ ܙܥܘܪܐ ܐܘܟܝ̣ܬ ܣܗܪܐ ܠܫܘܠܛܢܐ ܕܠܠܝܐ. ܘܗܘܘ ܠܐܬܘ̈ܬܐ ܘܒܗܘܢ ܐܬܛܟܣܘ ܙܒ̈ܢܐ܆ ܝܘ̈ܡܬܐ ܟܝ̣ܬ ܘܝܪ̈ܚܐ ܘܫܢܝ̈ܐ. ܘܡܬܦܫܟܐ ܕܐܝܟܢܐ ܟܕ ܠܬܪ̈ܝܗܘܢ ܪܘܪ̈ܒܐ ܩܪܐ ܐܠܗܐ ܫܘܒܚܐ ܠܛܝܒܘܬܗ. ܗܦܟ ܙܥܘܪܐ ܩܪܐ ܠܣܗܪܐ. ܘܡܬܦܢܝܐ ܕܪܘܪܒܝ̣ܢ ܡ̇ܢ ܬܪ̈ܝܗܘܢ ܒܦܚܡܐ ܕܟܘܟ̈ܒܐ ܐ̱ܚܪ̈ܢܐ. ܣܗܪܐ ܕܝܢ ܠܘ ܒܦܚܡܐ ܗܢܐ. ܐܠܐ ܒܦܚܡܐ ܕܫܡܫܐ ܐܬܐܡܪ ܕܙܥܘܪ. ܘܡܬܦܫܟܐ ܬܘܒ ܕܐܝܟܢܐ ܟܕ ܩܕܝܡ ܗܘܐ ܘܒܪܐ ܢܘܗܪܐ. ܡܛܠ ܫܡܫܐ ܐܬܐܡܪ ܗܫܐ ܕܐܬܒܪܝ̣ ܡ̇ܢ ܠܡܢܗܪܘ. ܩܕܝܫܐ ܒܣܝܠܠܝܘܣ ܡܦܢܐ ܘܐܡ̇ܪ ܕܗܝܕܝܟ ܡ̇ܢ ܐܝܢܝܘܬܗ ܕܢܗܝ̣ܪܐ ܐܬܒܪܝܬ݀. ܗܫܐ ܕܝܢ ܓܘܫܡܗ ܐܘܟܝ̣ܬ ܪܘܟܒܝܗ. ܘܠܗܕܐ ܡܫܪܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܟܕ ܐܡ̇ܪ. ܠܝܬ ܐܕܫܐ ܕܩܕܝ̣ܡ ܠܗܘܠܐ ܐܠܐ ܗܢܐ. ܘܩܕܝܫܐ ܓܪܝܓܘܪܝܘܣ ܕܢܘܣܐ. ܕܐܘܣܝܐ ܠܡ ܡܢܗܪܢܝ̣ܬܐ ܗ̇ܝ ܕܒܟܠ ܙܪܝ̣ܥܐ ܗܘܬ݀ ܠܘܬ ܒܪ ܓܢܣܗ̇ ܐܟܚܕܐ ܪܗܛܬ݀. ܘܟܠܗ̇ ܠܘܬܗ̇ ܐܬܟܢܫܬ݀ ܟܐܡܬ݀ ܠܘܬ ܫܡܫܐ ܟܕ ܐܬܒܪܝ ܐܬܟܢܫ ܢܘܗܪܐ. ܘܐ̱ܚܪܢܐ ܐܡ̣ܪ ܕܢܘܗܪܐ ܗ̇ܘ ܐܫܝ̣ܕܐ ܟܕ ܒܚܕܐ ܐܣܦܝ̣ܪܐ ܐܨܛܡܕ ܒܪܡܙܗ ܕܒܪܘܝܐ ܫܡܫܐ ܡܢܗ ܗܘܐ. ܘܗ̇ܝ ܕܠܚܘܫܒܝ ܒܝܬܝܐ ܠܡܐܡܪ. ܕܟܕ ܢܘܪܐ ܩܕܝ̣ܡܐ ܗܘܬ݀ ܘܒܪܝܐ ܘܠܐ ܪܚܝ̣ܩܐ ܡ̣ܢ ܫܪܪܐ. ܕܠܢܘܗܪܐ ܗ̇ܘ ܩܕܡܝܐ ܐܝܢܝܘܬܗ̇ ܢܣܝ̣ܡ. ܠܡܝ̈ܐ ܒܙܪ̈ܘܒܝܐ ܕܡ̈ܠܐ ܗܠܝܢ ܢܬܐܢܣ ܕܢܥܘܠ. ܒܕܓܘܢ ܒܬܠܬܐ ܗܠܝܢ ܝܘ̈ܡܬܐ ܩܕ̈ܡܝܐ܆ ܒܢܘܗܪܗ̇ ܕܢܘܪܐ ܐܝܡܡ̈ܐ ܘܠܝܠܘ̈ܬܐ ܡܬܦܪܫܝܢ ܗܘܘ. ܘܕܐܝܟܢܐ ܩܕܡܬ݀ ܐܬܐܡܪܬ݀܆ ܝܘ̈ܡܬܐ ܕܝܢ ܗܠܝܢ ܕܒܬܪܟܢ ܒܢܘܗܪܗ ܕܫܡܫܐ ܗ̇ܘ ܕܛܒ ܡ̣ܢ ܗ̇ܘ ܡܒܪܚ ܡܬܦܪܫܝܢ. ܘܡܛܠ ܟܝܢܗ ܕܫܡܫܐ ܐܡ̣ܪ ܩܕܝܫܐ ܒܣܝܠܠܝܘܣ ܒܡܐܡܪܐ ܕܠܘܩܒܠ ܣܒܠܝܘܣ ܘܐܪܝܘܣ ܕܠܝܬܘܗܝ ܚܕ ܡ̣ܢ ܗܠܝܢ ܐܣܛܘܟ̈ܣܐ ܐܪܒܥܐ. ܒܗ̇ܝ ܕܗܠܝܢ ܡ̇ܢ ܬܪܝܨܐܝܬ ܡܬܬܙܝ̣ܥܝ̣ܢ. ܗ̣ܘ ܕܝܢ ܚܘܕܪܢܐܝܬ. ܐܦܠܐ ܡܢܗܘܢ ܡܪܟܒ. ܒܕܟܠ ܡܪܟܒܐ ܡ̣ܢ ܠܐܘܬܐ ܡܬܬܚܕ. ܗܢܐ ܕܝܢ ܠܐ ܐܠܐ ܐܦܠܐ ܫܠܐ. ܒܕܓܘܢ ܐܢ ܗܕܐ ܗܟܢܐ ܗ̱ܝ. ܠܡܢܐ ܡܬܟܣܣ ܐܪܝܣܛܘܣ ܕܫܡܫܐ ܘܟܠܗܘܢ ܫܡܝ̈ܢܐ. ܚܘܕܪ̈ܢܝܝ ܙܘܥܐ. ܐܣܛܘܟܣܐ ܚܡܝ̣ܫܝܐ ܩܪܐ. ܘܡܛܠ ܣܗܪܐ ܡ̇ܢ ܡܪܝ ܐܦܪܝܡ ܘܡܪܝ ܝܥܩܘܒ ܕܣܪܘܓ ܡܬܪܥܝܢ. ܕܟܕ ܡܠܐܷ ܐܬܒܪܝ̣ ܘܝܬܝܪ ܟܐܢܐܝܬ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܢܗܝܪܐ ܘܠܡܢܗܪܘ ܐܬܩܪܝ.

 

 

 

ܢܝܫܐ ܩܕܡܝܐ ܡܛܠ ܓܘܫ̈ܡܐ ܫܡܝ̈ܢܐ ܡܛܠ ܡܢܝܢܐ ܕܡܘܙ̈ܠܬܐ ܘܟܘܟ̈ܒܐ

 

ܬܪܝܢ ܓܝܪ ܙܘ̈ܥܐ ܡܫܟܚܝ̣ܢܢ ܠܟܠܚܕ ܡ̣ܢ ܟܘܟ̈ܒܐ ܚܕ ܡ̇ܢ ܪܗܝ̣ܒܐ ܘܓܘܢܝܐ ܡ̣ܢ ܡܕܢܚܐ ܠܡܥܪܒܐ. ܘܐ̱ܚܪܢܐ ܡܫܘܚܪܐܝܬ ܘܕܝܠܢܝܐ ܡ̣ܢ ܡܥܪܒܐ ܠܡܕܢܚܐ ܒܕܓܘܢ ܝܕܥܢܢ ܕܟܠ ܚܕ ܡ̣ܢ ܙܘ̈ܥܐ ܗܠܝܢ ܒܝܕ ܓܝܓܠܐ ܕܝ̣ܠܢܝܬܐ ܗܘܐ. ܘܗ̣ܝ ܗ̇ܝ ܓܝܓܠܐ ܕܡܙܝ̣ܥܐ ܠܟܠܗܝܢ ܩܛܝ̣ܪܐܝܬ ܡ̣ܢ ܡܕܢܚܐ ܠܡܥܪܒܐ ܥܠܝܬܐ ܙܕܩ ܕܬܗܘܐ. ܝ̣ܕܝ̣ܥܐ ܡ̣ܢ ܗ̇ܝ ܕܗ̇ܘ ܕܚܒܫ ܠܗ̇ܘ ܕܒܗ ܚܒܝ̣ܫ ܡܥܕ ܠܡܕܒܪ ܝܬܝܪ ܡ̣ܢ ܕܒܗܦܟܐ. ܐܝܛܐ ܚܙܝܢܢ ܠܟܠܗܘܢ ܟܘܟ̈ܒܐ ܩܒܝ̣̈ܥܐ ܕܒܚܕܐ ܡܫܘܚܬܐ ܠܐ ܡܬܥܒܪܢܝ̣ܬܐ ܡܬܬܙܝ̣ܥܝ̣ܢ ܡ̣ܢ ܡܥܪܒܐ ܠܡܕܢܚܐ. ܒܠܥܕ ܗ̇ܝ ܕܡ̣ܢ ܚܕܕ̈ܐ ܢܪܚܩܘܢ. ܘܗܟܢܐ ܝܕܥܢܢ ܕܚܕܐ ܗ̱ܝ ܓܝܓܠܐ ܕܠܟܠܗܘܢ ܡܙܝ̣ܥܐ. ܐܝܛܐ ܚܙܝܢܢ ܠܟܠܚܕ ܡ̣ܢ ܛܥܝ̈ܐ ܫܒܥܐ ܕܕܝ̣ܠܢܐܝܬ ܡܬܬܙܝ̣ܥ ܡ̣ܢ ܡܥܪܒܐ ܠܡܕܢܚܐ ܒܝܕ ܩܘܪ̈ܒܐ ܘܪ̈ܘܚܩܐ ܕܡ̣ܢ ܚܕܕ̈ܐ ܘܡܢܗܘܢ ܩܒܝ̣̈ܥܐ. ܘܡܛܠ ܗܕܐ ܝܕܥܢܢ ܕܠܟܠ ܚܕ ܡܢܗܘܢ ܓܝܓܠܐ ܐܝܬ ܕܝܠܢܝܬܐ ܕܠܗ ܡܟܪܟܐ. ܠܫܒܥܐ ܟܐܡܬ ܫܒܥ. ܘܚܕܐ ܠܩܒܝ̣ܥܐ ܘܐ̱ܚܪܬܐ ܠܠܐ ܡܟܘܟܒܬܐ ܕܠܟܠܗܝܢ ܚܒܫܐ. ܘܗܟܢܐ ܬܫܥ ܗܘ̈ܝܢ.

 

 

 

ܡܛܠ ܡܬܬܙܝ̣ܥܢܘܬܐ ܕܟܘܟ̈ܒܐ ܘܪܒܘܬܗܘܢ

 

ܣܗܪܐ ܡ̇ܢ ܒܥܣܪܝܢ ܘܬܫܥܐ ܝܘ̈ܡܝ̣ܢ ܘܦܠܓܗ ܡܫܡܠܐ ܠܚܘܕܪܐ. ܘܗܦܟ ܠܐܝܟܐ ܕܫܪܝ. ܘܚܕ ܗ̣ܘ ܡ̣ܢ ܬܠܬܝܢ ܘܬܫܥ ܡܢܘ̈ܢ ܕܐܪܥܐ. ܐܪܡܝܣ ܕܝܢ ܠܫܢ̱ܬܐ ܚܕܐ ܡܫܡܠܐ ܚܘܕܪܐ. ܘܡܢܬܐ ܗ̱ܘ ܡ̣ܢ ܥܣܪܝܢ ܘܬܪܝܢ ܐܠܦܝ̣̈ܢ ܡܢܘ̈ܢ ܕܐܪܥܐ ܘܐܦܪܘܕܝܛܝ ܒܗ̇ ܒܕܡܘ̣ܬܐ ܡܬܬܙܝ̣ܥܐ. ܘܡܢܬܐ ܗ̱ܝ ܡ̣ܢ ܬܠܬܝܢ ܘܐܪܒܥ ܡܢܘ̈ܢ ܕܐܪܥܐ. ܘܫܡܫܐ ܗ̣ܘ ܗܟܘܬ ܡܬܬܙܝܥ. ܘܡܐܐ ܘܫܬܝܢ ܘܫܬ ܙܒܢܝ̣̈ܢ ܗܘܐ ܐܝܟ ܐܪܥܐ. ܘܐܪܝ̣ܣ ܠܫܢ̱ܬܐ ܘܦܠܓܗ̇ ܡܫܡܠܐ ܚܘܕܪܐ. ܘܬܡܢܝܢ ܘܐܪܒܥ ܙܒܢܝ̈ܢ ܪܒ ܡ̣ܢ ܐܪܥܐ. ܘܩܪܘܢܘܣ ܕܗ̣ܘ ܟܐܘܢ. ܠܬܠܬܝܢ ܫܢܝ̣̈ܢ ܡܫܡܠܐ ܚܘܕܪܐ. ܘܬܡܢܝܢ ܘܚܕܐ ܙܒܢ̱ܬܐ ܗܘܐ ܐܝܟ ܐܪܥܐ. ܘܟܘܟ̈ܒܐ ܩܒܝ̣̈ܥܐ ܒܥܣܪܝܢ ܘܬܠܬܐ ܐܠܦܝ̈ܐ ܫܢܝ̈ܐ ܘܫܒܥܡܐܐ ܘܫܬܝܢ ܫܢܝ̣̈ܢ ܡܫܡܠܝܢ ܚܘܕܪܐ. ܘܪܒܐ ܕܒܗܘܢ ܫܬܝܢ ܘܐܪܒܥ ܙܒܢܝ̣̈ܢ ܪܒ ܡ̣ܢ ܐܪܥܐ. ܙܥܘܪܗܘܢ ܕܝܢ ܫܬܬܥܣܪ̈ܐ ܙܒܢܝ̈ܢ ܪܒ ܡ̣ܢ ܐܪܥܐ. ܘܣܗܪܐ ܟܕ ܣܓܝ ܙܥܘܪ ܡܢܗܘܢ ܒܥܠܬ݀ ܩܪܝ̣ܒܘܬܗ ܕܠܘܬܢ܆ ܗܟܢܐ ܪܒ ܡܬܚܙܐ. ܘܠܘ ܡܛܠ ܗ̇ܝ ܕܪܒ. ܕܐܝܟ ܗܠܝܢ ܓܝܪ ܐܠܦܘ ܠܢ ܬܐܘܪ̈ܝܡܛܐ ܡܬܡܛܝ̣̈ܩܝܐ.

 

 

 

ܡܛܠ ܡܢܝܢܗܘܢ ܕܟܘܟ̈ܒܐ ܩܒܝ̣̈ܥܐ ܘܕܡܘ̈ܬܗܘܢ

 

ܟܕ ܣܓܝܐܝܢ ܐܢܘܢ ܗܠܝܢ ܟܘܟ̈ܒܐ ܘܥܒܪܝܢ ܠܡܢܝܢܐ. ܐܠܐ ܐܠܦܐ ܘܥܣܪܝܢ ܘܬܪܝܢ ܟܘܟ̈ܒܐ ܒܠܚܘܕ ܐܕܪܟܘ ܚܟܝ̈ܡܐ. ܘܒܕܡ̈ܘܬܐ ܡܫܚ̈ܠܦܬܐ ܟܢܝ̣ܘ ܐܢܘܢ. ܟܕ ܣܘܪ̈ܛܐ ܡܕܡ ܪܢܘ ܕܡܛܝܢ ܡ̣ܢ ܚܕ ܠܚܕ. ܘܒܐܪܒܥܝܢ ܘܬܡܢܐ ܕܡ̈ܘܢ ܚܒܫܘ ܠܟܠܗܘܢ. ܬܪܬܥܣܪ̈ܐ ܡܢܗܝܢ ܥܠ ܩܡܪܐ ܗ̇ܘ ܕܙܘܝܕܝ̈ܐ. ܘܡܛܠ ܗܕܐ ܐܦ ܡܠܘ̈ܫܐ ܡܬܩܪܝܢ. ܘܥܣܪܝܢ ܘܚܕܐ ܡܢܗܝܢ ܠܓܪܒܝܐ ܡܢܗܝܢ ܘܚܡܫܥܣܪ̈ܐ ܠܬܝܡܢܐ.

 

 

 

ܡܛܠ ܕܡܘ̈ܬܗܘܢ ܕܡܠܘ̈ܫܐ

 

ܐܡܪܐ

 

ܬܠܬܥܣܪ ܐܢܘܢ ܟܘܟܒܘ̈ܗܝ. ܘܠܒܪ ܡ̣ܢ ܨܘܪܬܗ ܥܣܪܐ ܐܝܬ ܟܘܟ̈ܒܐ. ܘܕܡܘܬ ܕܟܪܐ ܕܩܘܕܡܗ ܠܡܥܪܒܐ ܘܒܣܬܪܗ ܠܡܕܢܚܐ ܩܢܐ. ܘܐܝܟ ܗ̇ܘ ܕܦܢܐ ܠܒܣܬܪܗ ܗ̣ܘ. ܟܐܡܬ ܚܪܛܘܡܗ ܥܠ ܚܨܗ.

 

ܬܘܪܐ

 

ܬܠܬܝܢ ܘܬܠܬܐ ܐܢܘܢ ܟܘܟܒܘ̈ܗܝ. ܘܚܕܥܣܪ ܟܘܟ̈ܒܐ ܠܒܪ ܡ̣ܢ ܨܘܪܬܗ ܐܝܬ. ܘܕܡܘ̣ܬ ܦܠܓܗ ܩܕܡܝܐ ܕܬܘܪܐ ܩܢܐ. ܘܐܝܟ ܗ̇ܘ ܕܐܪܟܢ ܪܝܫܗ ܠܡܕܩܪ. ܘܡܢܗܝܢ ܐܢܘܢ ܟܝܡܐ ܘܥܝܘܬܐ.

 

ܬܐܡ̈ܐ

 

ܬܡܢܬܥܣܪ ܐܢܘܢ ܟܘܟܒܘ̈ܗܝ. ܘܫܒܥܐ ܟܘܟ̈ܒܐ ܠܒܪ ܡ̣ܢ ܨܘܪܬܐ ܐܝܬ. ܘܕܡܘܬܐ ܗ̱ܘ ܕܬܪܝܢ ܛܠܝ̈ܐ ܕܩܝܡܝ̣ܢ. ܘܣܝܡܐ ܐܝܕܗ ܕܟܠ ܚܕ ܡܢܗܘܢ ܥܠ ܟܬܦܗ ܕܗ̇ܘ ܐ̱ܚܪܢܐ. ܪ̈ܝܫܝܗܘܢ ܡܕܢܚ ܓܪܒܝ ܒܣܟܗ ܕܫܒܝ̣ܠ ܬܒܢܐ.

 

ܣܪܛܢܐ

 

ܫܒܥܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܗ ܐܪܒܥܐ ܟܘܟ̈ܒܐ ܩܘܕܡܗ ܠܡܕܢܚܐ. ܘܒܣܬܪܗ ܠܡܥܪܒ ܬܝܡܢ.

 

ܐܪܝܐ

 

ܥܣܪܝܢ ܘܫܒܥܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܗ. ܬܡܢܝܐ ܟܘܟ̈ܒܐ. ܘܕܡܘܬܐ ܗ̱ܘ ܡܫܡܠܝܬܐ ܘܟܘܟܒܐ ܗ̇ܘ ܕܠܒܐ ܕܐܪܝܐ ܡܬܩܪܐ. ܟܘܟܒܐ ܗ̇ܘ ܪܒܐ ܘܢܗܝ̣ܪܐ ܕܪܒܝ̣ܥܝܐ ܗ̱ܘ ܕܬܠܬܐ ܟܘܟ̈ܒܐ ܐ̱ܚܪ̈ܢܐ ܕܒܣܘܪܛܐ ܥܩܠܩܠܐ ܣܝ̣ܡܝ̣ܢ.

 

ܫܒܠܬܐ

 

ܥܣܪܝܢ ܘܫܬܐ ܘܟܘܟ̈ܒܐ. ܘܠܒܪ ܡ̣ܢ ܨܘܪܬܐ. ܫܬܐ ܟܘܟ̈ܒܐ. ܘܕܡܘܬܐ ܗ̇ܘ ܕܛܠ̣ܝܬܐ ܕܬܪܬܝܢ ܓܦܝ̈ܗ̇. ܘܐܘܪܟܬ݀ ܟܢܦܝ̈ܗ̇.

 

ܡܐܣܬܐ

 

ܬܡܢܝܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܬܫܥܐ ܟܘܟ̈ܒܐ. ܘܕܡܘ̣ܬܗ ܐܝܟ ܫܡܗ.

 

ܥܩܪܒܐ

 

ܥܣܪܝܢ ܘܚܕܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܬܠܬܐ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܣܘܣܝ ܒܪܢܫ ܓܘܫܡܐ ܕܒܥܝ̣ܪܐ. ܘܡ̣ܢ ܩܕܠܗ ܢܦܩ ܦܠܓܘܬ ܒܪܢܫܐ ܕܡܠܗ̇ ܠܩܫܬܐ ܒܓܐܪܐ.

 

ܓܕܝܐ

 

ܥܣܪܝܢ ܘܬܡܢܝܐ ܟܘܟ̈ܒܐ ܩܘܕܡܗ ܐܝܟ ܦܠܓܘܬ ܓܕܝܐ ܘܐ̱ܚܪܝܗ ܐܝܟ ܕܘܢܒܐ ܕܢܘܢܐ.

 

ܕܘܠܐ

 

ܐܪܒܥܝܢ ܘܬܪܝܢ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܬܠܬܐ ܟܘܟ̈ܒܐ. ܘܕܡܘܬܐ ܗ̱ܘ ܕܓܒܪܐ ܕܩܐܡ ܘܦܫܝ̣̈ܛܢ ܐܝܕܘ̈ܗܝ. ܘܒܚܕܐ ܡܢܗܝܢ ܩܘܠܬܐ ܕܟܦܐ ܦܘܡܗ̇ ܘܙܠܝ̣ܠܝ̣ܢ ܡܝ̈ܗ̇ ܠܘܬ ܪ̈ܓܠܘܗܝ ܠܬܝܡܢܐ.

 

ܢܘܢܐ

 

ܬܠܬܝܢ ܘܐܪܒܥܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܐܪܒܥܐ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܬܪܝܢ ܢܘܢܝ̣̈ܢ ܕܡܥܪ̈ܙܠܢ ܕܘܢ̈ܒܬܗܘܢ ܒܚܕ̈ܕܐ.

 

 

 

ܡܛܠ ܕܡܘ̈ܬܐ ܓܪ̈ܒܝܝܬܐ

 

ܕܒܐ ܙܥܘܪܬܐ

 

ܫܒܥܐ ܟܘܟ̈ܒܐ ܕܡܬܩܪܝܢ ܥܓܠܬܐ. ܘܠܒܪ ܡ̣ܢ ܨܘܪܬܐ ܚܕ ܟܘܟܒܐ. ܗ̇ܘ ܕܥܠ ܪܝܫ ܕܘܢܒܗ̇ ܓܕ ܝܘܢܐ ܡܬܩܪܐ. ܘܥܠ ܓܒܗ ܗ̣ܘ ܕܦܘܠܘܣ ܐܘܟܝܬ ܩܘܢܕܐ ܓܪܒܝܝܐ.

 

ܕܒܐ ܪܒܬܐ

 

ܥܣܪܝܢ ܘܫܒܥܐ ܟܘܟ̈ܒܐ. ܘܕܡܘ̣ܬܗ̇ ܠܕܗܝ ܙܥܘܪܬܐ ܕܡܝܐ.

 

ܬܢܝ̣ܢܐ

 

ܬܠܬܝܢ ܘܚܕ ܟܘܟܒܐ. ܘܕܡܘ̣ܬܐ ܗ̱ܘ ܕܚܘܝܐ ܥܩܠܩܠܐ ܕܪܒ ܘܐܪܝ̣ܟ. ܘܡ̣ܢ ܐܪܒܥܐ ܟܘܟ̈ܒܐ ܛܛܪ̈ܐܓܘܢܐ ܡܫܪܐ.

 

ܩܝܦܐܘܣ

 

ܚܕܥܣܪ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܬܪܝܢ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܓܒܪܐ ܠܒܝܫ ܩܘܒܥܐ. ܕܒܪܝܟ ܥܠ ܒܘܪ̈ܟܘܗܝ ܘܦܫܝ̣̈ܛܢ ܐܝܕܘ̈ܗܝ. ܘܒܐܝܕܗ ܕܝܡܝܢܐ ܫܒܛܐ. ܘܒܝܬ ܥܛܡ̈ܬܗ܆ ܟܘܟܒܐ ܗ̇ܘ ܪܒܐ ܘܓܪܒܝܝܐ ܕܡܬܩܪܐ ܛܥܝ̣ܢ ܢܝܙܟܐ.

 

ܟܠܝܠ ܓܪܒܝܐ

 

ܘܥܡ̈ܡܝܐ ܩܪܝܢ ܠܗ ܠܓܬ ܡܣܟܢ̈ܐ. ܬܡܢܝܐ ܟܘܟ̈ܒܐ ܐܝܟ ܚܘܕܪܐ ܕܦܠܝ̣ܫ.

 

ܗ̇ܘ ܕܒܪܝܟ ܘܡܪܩܕ

 

ܥܣܪܝܢ ܘܬܫܥܐ ܟܘ̈ܟܒܐ. ܘܠܒܪ ܡ̣ܢ ܨܘܪܬܐ ܚܕ ܟܘܟܒܐ. ܘܐܝܟ ܫܡܗ ܕܡܘ̣ܬܗ.

 

ܠܘܪܐ

 

ܘܡܬܩܪܐ ܬܘܒ ܩܝ̣ܬܪܐ ܘܓܠܐ. ܥܣܪܐ ܟܘܟ̈ܒܐ. ܘܡܢܗ ܗ̣ܘ ܟܘܟܒܐ ܪܒܐ ܕܡܬܩܪܐ ܢܫܪܐ ܕܢܦܠ ܒܗ̇ܝ ܕܐܚܝ̣̈ܕܢ ܓܦܘ̈ܗܝ.

 

ܬܪܢܓܘܠܬܐ

 

ܫܒܬܥܣܪ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܬܪܝܢ ܟܘܟ̈ܒܐ ܘܣܘܓܐܐ ܕܟܘܟ̈ܒܘܗܝ ܒܫܒܝ̣ܠ ܬܒܢܐ ܐܢܘܢ.

 

ܡܪܬ݀ ܥܪܣܐ

 

ܬܠܬܥܣܪ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܐܢ̱ܬܬܐ ܕܝܬܝ̣ܒܐ ܥܠ ܒܣܕܝܐ ܕܥܠ ܥܪܣܐ. ܘܦܫܝ̣̈ܛܢ ܪ̈ܓܠܝܗ̇ ܠܬܚܬ.

 

ܒܪ ܫܐܘܫ

 

ܥܣܪܝܢ ܘܫܬܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܬܠܬܐ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܓܒܪܐ ܕܩܐܡ ܥܠ ܪܓܠܗ ܕܣܡܠܐ ܘܬܠܝܐ ܪܓܠܗ ܕܝܡܝ̣ܢܐ. ܘܐܝܕܗ ܕܝܡܝ̣ܢܐ ܠܥܠ ܡ̣ܢ ܪܝܫܗ. ܘܒܐܝܕܗ ܕܣܡܠܐ ܪܝܫ ܚܝܘܬܐ.

 

ܐܚܝ̣ܕ ܥܪ̈ܩܐ

 

ܐܪܒܬܥܣܪ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܓܒܪܐ ܕܩܐܡ ܘܒܐܝܕܗ ܫܒܛܐ. ܘܒܗ̇ܝ ܐ̱ܚܪܬܐ ܫܡܛ ܦܓܘܕܬܐ.

 

ܚܘܝܐ

 

ܥܣܪܝܢ ܘܐܪܒܥܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܚܡܫܐ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܓܒܪܐ ܕܩܐܡ ܘܐܚܝ̣ܕ ܚܘܝܐ ܒܬܪ̈ܬܝܗܝܢ ܐܝܕܘ̈ܗܝ.

 

ܚܘܝܐ ܕܚܘܝܐ

 

ܬܡܢܬܥܣܪ ܟܘܟ̈ܒܐ. ܘܕܡܘ̣ܬܗ ܗ̣ܝ ܗ̣ܝ ܚܘܝܐ ܗ̇ܘ ܕܐܚܝ̣ܕ ܚܘܝܐ ܕܐܡܪܢܢ. ܘܬܠܐܷ ܪܝܫܗ ܘܕܘܢܒܗ ܠܥܠ ܡ̣ܢ ܪܝܫܗ ܕܚܘܝܐ.

 

ܓܐܪܐ

 

ܚܡܫܐ ܟܘܟ̈ܒܐ ܡܨܥܬ ܫܒܝ̣ܠ ܬܒܢܐ. ܠܘܠܝ̣ܬܗ ܠܡܕܢܚܐ.

 

ܢܫܪܐ ܕܦ̇ܪܚ

 

ܬܫܥܐ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܫܬܐ ܟܘܟ̈ܒܐ. ܘܚܕ ܡܢܗܘܢ ܗ̇ܘ ܢܗܝܪܐ ܕܐܝܬ ܡܨܥܬ݀ ܬܪܝܢ ܕܥܡܘ̈ܛܝ̣ܢ ܒܣܘܪܛܐ ܬܪܝ̣ܨܐ ܕܡܬܩܪܐ ܢܫܪܐ ܕܦ̇ܪܚ. ܒܗ̇ܝ ܕܦܫܝ̣̈ܛܢ ܓܦܘ̈ܗܝ.

 

ܕܘܠܦܝ̣ܢܐ

 

ܥܣܪܐ ܟܘܟ̈ܒܐ ܕܟܢܝ̣ܫܝ̣ܢ ܒܬܪ ܣܪܛܢܐ. ܘܕܡܘ̣ܬܐ ܗ̱ܘ ܕܚܝܘܬܐ ܝܡܡܝܬܐ ܕܕܡܝܐ ܠܪܩܒܐ ܕܢܦܝ̣ܚ.

 

ܡܢܬ ܣܘܣܝܐ

 

ܐܪܒܥܐ ܟܘܟ̈ܒܐ ܕܡܬܩܪܝܢ ܩܘܕܡܐ ܕܣܘܣܝܐ.

 

ܣܘܣܝܐ ܪܒܐ

 

ܘܡܬܩܪܐ ܬܘܒ ܓܦܢܐ. ܘܕܡܘ̣ܬܐ ܗ̱ܘ ܕܣܘܣܝܐ ܕܩܢܐ ܪܝܫܐ ܘܐܝܕܝ̈ܐ ܕܠܚܘܕ.

 

ܐܢܕܪܘܡܝܕܐ

 

ܘܡܬܩܪܐ ܐܢ̱ܬܬܐ ܕܠܐ ܚܙܬ݀ ܠܗ̇ ܒܥܠܐ. ܥܣܪܝܢ ܘܬܪܝܢ ܟܘܟ̈ܒܐ. ܘܕܡܘ̣ܬܗ̇ ܐܝܟ ܫܡܗ̇.

 

ܛܪܝܓܘܢܘܢ

 

ܐܪܒܥܐ ܟܘܟ̈ܒܐ ܒܕܡܘ̣ܬ ܛܪܝܓܘܢܘܢ ܐܪܝ̣ܟܐ. ܪܝܫܗ ܚܕ ܟܘܟܒܐ ܘܒܐܣܝܣ ܕܝܠܗ ܬܠܬܐ ܟܘܟ̈ܒܐ.

 

 

 

ܡܛܠ ܕܡܘ̈ܬܐ ܬܝܡܢܝ̈ܬܐ܇ ܩܝܛܘܣ

 

ܥܣܪܝܢ ܘܬܪܝܢ ܟܘܟ̈ܒܐ. ܘܕܡܘ̣ܬܐ ܗ̱ܘ ܕܚܝܘܬܐ ܝܡܡܝܬܐ ܬܪܝܢܬ݀ ܪ̈ܓܠܐ ܕܘܢܒܬܢܝܬܐ ܐܝܟ ܦܪܚܬܐ ܓܢ̱ܒܪܐ ܬܠܬܝܢ ܘܬܡܢܝܐ ܟܘܟ̈ܒܐ. ܒܕܡܘ̣ܬ ܓܒܪܐ ܕܥܠ ܟܘܪܣܝܐ ܘܒܐܝܕܗ ܫܒܛܐ. ܘܒܚܨܗ ܣܝܦܐ ܘܩܡܪܐ.

 

ܢܗܪܐ

 

ܬܠܬܝܢ ܘܐܪܒܥܐ ܟܘܟ̈ܒܐ ܒܐܣܟܡ ܫܩܝ̣ܬܐ ܣܓܝܐܬ݀ ܙܠܡ̈ܐ.

 

ܐܪܢܘܒܐ

 

ܬܪܥܣܪ ܟܘܟ̈ܒܐ ܕܨܡܝ̣ܕܝ̣ܢ ܬܚܝܬ ܪ̈ܓܠܘܗܝ ܕܓܢ̱ܒܪ̈ܐ ܐܦܘ̈ܗܝ ܠܡܥܪܒܐ.

 

ܟܠܒܐ ܪܒܐ

 

ܬܡܢܬܥܣܪ ܟܘܟ̈ܒܐ. ܘܠܒܪ ܡ̣ܢ ܨܘܪܬܐ ܚܕܥܣܪ ܟܘܟ̈ܒܐ

 

ܟܠܒܐ ܙܥܘܪܐ

 

ܬܪܝܢ ܟܘܟ̈ܒܐ ܚܕ ܡܢܗܘܢ ܪܒܐ ܗ̱ܘ.

 

ܣܦܝܢ̱ܬܐ

 

ܐܪܒܥܝܢ ܘܚܡܫܐ ܟܘܟ̈ܒܐ ܨܡܝ̣̈ܕܐ ܒܬܝܡܢܐ. ܚܕ ܡܢܗܘܢ ܗ̇ܘ ܕܣܘܡܩܐ ܪܒܐ ܕܡܬܩܪܐ ܣܘܗܝܠ.

 

ܠܘܝܬܢ

 

ܥܣܪܝܢ ܘܚܡܫܐ ܟܘܟ̈ܒܐ. ܘܒܕܡܘ̣ܬ ܚܘܝܐ ܥܩܠܩܠܐ.

 

ܟܣܐ

 

ܫܒܥܐ ܟܘܟ̈ܒܐ ܒܕܡܘ̣ܬ ܚܘܕܪܐ. ܘܡܬܩܪܐ ܬܘܒ ܐܓܢܐ.

 

ܥܘܪܒܐ

 

ܫܒܥܐ ܟܘܟ̈ܒܐ

 

ܩܢܛܘܕܘܣ

 

ܬܠܬܝܢ ܘܫܒܥܐ ܟܘܟ̈ܒܐ ܒܕܡܘ̣ܬ ܣܘܣܝ ܒܪܢܫ. ܡ̣ܢ ܪܝܫܗ ܠܚܨܗ ܕܡܘ̣ܬܐ ܕܒܪܢܫܐ. ܘܡ̣ܢ ܚܨܗ ܠܕܘܢܒܗ ܣܘܣܝܐ. ܘܐܚܝ̣ܕ ܒܐܝܕܗ ܬܪܬܝܢ ܪ̈ܓܠܐ ܕܐܪܝܐ.

 

ܐܪܝܐ

 

ܬܫܬܥܣܪ ܟܘܟ̈ܒܐ ܨܡܝ̣̈ܕܐ ܒܣܬܪ ܟܘܟ̈ܒܝ

 

ܩܢܛܘܪܘܣ ܡ̣ܢ ܬܝܡܢܗ ܕܥܩܪܒܐ.

 

ܒܝܬ ܢܘܪܐ

 

ܫܒܥܐ ܟܘܟ̈ܒܐ.

 

ܟܠܝܠܐ ܬܝܡܢܝܐ

 

ܬܠܬܥܣܪ ܟܘܟ̈ܒܐ ܒܐܣܟܡ ܩܘܢܘܣ.

 

ܢܘܢܐ ܕܬܝܡܢܐ

 

ܚܕܥܣܪ ܟܘܟ̈ܒܐ ܘܠܒܪ ܡ̣ܢ ܨܘܪܬܐ ܫܬܐ ܟܘܟ̈ܒܐ ܒܕܡܘ̣ܬ ܢܘܢܐ ܪܒܐ ܒܬܝܡܢܗ ܕܕܘܠܐ. ܪܝܫܗ ܠܡܕܢܚܐ ܘܕܘܢܒܗ ܠܡܥܪܒܐ. ܘܗܠܝܢ ܐܢܘܢ ܟܠܗܘܢ ܟܘܟ̈ܒܐ ܡܢܝ̈ܐ ܕܡܠܘ̈ܫܐ ܡ̇ܢ ܬܠܬܡܐܐ ܘܐܪܒܥܝܢ ܘܫܬܐ. ܘܕܕܡ̈ܘܬܐ ܓܪ̈ܒܝܝܬܐ ܬܠܬܡܐܐ ܘܫܬܝܢ. ܘܕܬܝܡܢܝ̈ܬܐ ܬܠܬܡܐܐ ܘܫܬܥܣܪ. ܐܝܬ ܓܝܪ ܘܟܘܟ̈ܒܐ ܐ̱ܚܪ̈ܢܐ ܚܡܫܐ ܥܢܢܝ̈ܐ ܕܙܥܘܪܝܢ ܛܒ ܣܛܪ ܡ̣ܢ ܕܡܘ̈ܬܐ ܗܠܝܢ.

 

ܡܛܠ ܗ̇ܝ ܕܣܗܪܐ ܡ̣ܢ ܫܡܫܐ ܡܩܒܠ ܢܘܗܪܐ

 

ܝ̣ܕܝ̣ܥܐ ܗܕܐ ܡ̣ܢ ܬܪܬܝܢ. ܚܕ ܡ̇ܢ ܡ̣ܢ ܗ̇ܝ ܕܠܦܘܬ ܩܪܝ̣ܒܘܬܗ ܘܪܚܝ̣ܩܘܬܗ ܕܡ̣ܢ ܫܡܫܐ ܒܨܪ ܘܡܬܬܘܣܦ ܢܘܗܪܗ. ܘܐ̱ܚܪܬܐ ܡ̣ܢ ܗ̇ܝ ܕܟܕ ܡܬܡܨܥܐ ܐܪܥܐ ܒܝܬ ܠܗ ܠܫܡܫܐ ܚܫܟ. ܘܐܠܘܠܐ ܡ̣ܢ ܫܡܫܐ ܗܘܐ ܠܗ ܢܘܗܪܐ. ܠܘ ܕܐܝܟ ܗܠܝܢ ܓܕ̈ܫܢ ܗܘܝ̈ ܠܗ. ܘܕܟܘܟ̈ܒܐ ܐ̱ܚܪ̈ܢܐ ܟܝܢܐܝܬ ܢܗܝ̣ܪܐܝܬ ܘܠܘ ܡ̣ܢ ܐ̱ܚܪܝܢ ܡܬܬܓܪܝܢ ܢܘܗܪܐ. ܡܢܗܘܢ ܕܗܠܝܢ ܬܪܝܢ ܙܢܝ̈ܐ ܕܠܐ ܓܕܫܝ̣ܢ ܠܗܝܢ ܝ̣ܕܝ̣ܥܐ.

 

 

 

ܡܛܠ ܬܘܣܦܬܐ ܘܒܘܨܪܐ ܕܢܘܗܪܗ ܕܣܗܪܐ

 

ܣܗܪܐ ܡ̇ܢ ܓܝܪ ܓܠܝ̣ܙ ܡ̣ܢ ܢܘܗܪܐ ܗ̱ܘ ܒܝܬܗ. ܐܠܐ ܒܥܠܬ݀ ܣܩܝ̣ܠܘܬܗ ܡܢܗܪ ܢܗܪ ܡ̣ܢ ܙܠܝ̣̈ܩܘܗܝ ܕܫܡܫܐ ܟܕ ܢܛܚܝܢ ܥܠܘܗܝ ܐܝܟ ܕܥܠ ܡܚܙܝ̣ܬܐ. ܒܕܓܘܢ ܟܕ ܥܡ ܫܡܫܐ ܗܘܐ. ܐܘܟܝ̣ܬ ܬܚܘ̣ܬܘܗܝ ܐܝܟ ܕܒܩܐܬܗܛܘܣ. ܗܝܕܝܢ ܟܠܗ̇ ܗ̇ܝ ܫܛܝ̣ܚܘܬܗ ܢܗܝ̣ܪܬܐ ܠܥܠ ܗܘܝܐ ܠܐܦܝ̈ ܫܡܫܐ. ܘܟܠܗ̇ ܫܛܝ̣ܚܘܬܗ ܗ̇ܝ ܚܫܘܟܬܐ ܠܬܚܬ ܗܘܝܐ ܠܩܘܒܠܢ. ܐܝܛܐ ܟܕ ܡܫܪܐ ܠܡܪܚܩܘ ܡ̣ܢ ܫܡܫܐ ܠܐܦܝ̈ ܡܥܪܒܐ. ܗܝܕܝܢ ܒܩܠܝ̣ܠ ܩܠܝ̣ܠ ܢܗܪܐ ܫܛܝ̣ܚܘܬܗ ܗ̇ܝ ܕܠܘܬܢ ܘܒܨܪ ܢܘܗܪܗ̇ ܕܫܛܝ̣ܚܘܬܗ ܗ̇ܝ ܕܓܢܝܐ ܡܢܢ. ܥܕܡܐ ܕܢܪܚܩ ܡ̣ܢ ܫܡܫܐ ܡܐܐ ܘܬܡܢܝܢ ܝܘ̈ܡܬܐ ܐܘܟܝ̣ܬ ܫܬܐ ܒܘܪ̈ܓܐ. ܗܝܕܝܢ ܒܕܝܐܡܛܪܘܢ ܕܫܡܫܐ ܗܘܐ. ܘܟܠܗ̇ ܫܛܝ̣ܚܘܬܗ ܢܗܝ̣ܪܬܐ ܠܘܩܒܠ ܫܡܫܐ ܘܠܩܘܒܠܢ ܗܘܝܐ. ܘܟܠܗ̇ ܫܛܝ̣ܚܘܬܗ ܗ̇ܝ ܚܫܘܟܬܐ ܓܢܝܐ ܐܦ ܡܢܢ ܐܦ ܡ̣ܢ ܫܡܫܐ. ܘܗܟܢܐ ܟܕ ܢܗܝܪ ܟܠܗ ܘܡܠܐܷ ܡܢܢ ܡܬܚܙܐ. ܐܝܛܐ ܬܘܒ ܟܕ ܡܫܪܐ ܠܡܬܩܪܒܘ ܠܘܬ ܫܡܫܐ ܒܐܝܕܐ ܒܐܝܕܐ ܒܨܪ ܢܘܗܪܐ ܕܫܛܝ̣ܚܘܬܐ ܗ̇ܝ ܕܠܩܘܒܠܢ. ܘܝܬܪ ܢܘܗܪܐ ܕܗ̇ܝ ܫܛܝ̣ܚܘܬܐ ܕܓܢܝܐ ܡܢܢ ܡܬܚܙܐ. ܟܕ ܫܛܝ̣ܚܘܬܗ ܥܠܝܬܐ ܢܗܪܐ.

 

 

 

ܡܛܠ ܐܩܠܦܣܝܣ ܗ̇ܝ ܕܫܡܫܐ ܘܗ̇ܝ ܕܣܗܪܐ

 

ܬܪܝܢ ܚܘܕܪ̈ܐ ܙܕܩ ܠܡܪܢܐ ܗܪܟܐ. ܚܕ ܡ̇ܢ ܗ̇ܘ ܕܐܝ̣ܣܡܗܪܘܣ ܐܘܟܝ̣ܬ ܕܫܘܝܘܬܐ ܕܫܡܫܐ ܡܬܩܪܐ. ܘܐ̱ܚܪܢܐ ܗ̇ܘ ܙܘܕܝܐܩܘܢ ܕܥܠܘܗܝ ܣܝ̣ܡܝ̣ܢ ܡܠܘ̈ܫܐ. ܘܡܛܠ ܕܟܠ ܚܕ ܡܢܗܘܢ ܣܝܡܐ ܕܙܠܝܡ ܡ̣ܢ ܕܗ̇ܘ ܐ̱ܚܪܢܐ ܩܢܐ. ܡ̣ܢ ܐܠܨ̈ܬܐ ܒܬܪܬܝܢ ܕܘܟ̈ܝܢ ܐܪܥܝ̣ܢ ܒܚܕ̈ܕܐ ܒܣܝܡܗܘܢ. ܕܚܕܐ ܡܢܗܝܢ ܐܢܐܒܝܒܐܙܘܢ ܐܘܟܝ̣ܬ ܪܝܫ ܬܢܝ̣ܢܐ ܡܬܩܪܝܐ. ܘܗ̇ܝ ܐ̱ܚܪܬܐ ܘܐܛܐܒܝܒܐܙܘܢ ܐܘܟܝ̣ܬ ܕܢܘܒ ܬܢܝ̣ܢܐ. ܒܕܓܘܢ ܟܕ ܫܡܫܐ ܘܣܗܪܐ ܒܚܕܐ ܡ̣ܢ ܗܠܝܢ ܕܘܟ̈ܝܬܐ ܢܬܟܝܢܘܢ. ܗܝܕܝܢ ܡܪܢܐܝܬ ܐܝܟ ܕܒܩܐܬܗܛܘܣ ܣܗܪܐ ܬܚܝܬ ܫܡܫܐ ܗܘܐ. ܘܟܠܢܐܝܬ ܟܠܐ ܡܢܢ ܢܘܗܪܗ. ܕܫܡܫܐ ܒܥܠܬ݀ ܚܫܘܟܘܬ ܓܘܫܡܗ ܐܝܟ ܕܐܡ̣ܪܢܢ. ܘܗܟܢܐ ܚܫܟܐ ܕܫܡܫܐ ܓܡܝ̣ܪܐܝܬ ܗܘܐ. ܐܢܕܝܢ ܩܠܝ̣ܠ ܢܗܘܐ ܕܨܠܐܷ ܡ̣ܢ ܬܚܝܬ ܫܡܫܐ܆ ܗܝܕܝܢ ܡܬܓܠܝܐ ܠܢ ܡܢܬܐ ܡ̣ܢ ܫܛܝ̣ܚܘܬܗ ܢܗܝܪܬܐ ܕܫܡܫܐ. ܘܚܫܟܐ ܠܘ ܡܫܡܠܝܐ ܗܘܐ. ܐܢܕܝܢ ܫܡܫܐ ܡ̇ܢ ܒܚܕܐ ܡ̣ܢ ܗܠܝܢ ܬܪܬܝܢ ܕܘܟ̈ܝܬܐ ܕܐܪܘܥܘܬܗܘܢ. ܕܬܪ̈ܝܗܘܢ ܗܠܝܢ ܚܘܕܪ̈ܐ ܢܗܘܐ. ܘܣܗܪܐ ܒܗ̇ܝ ܐ̱ܚܪܬܐ. ܗܝܕܝܢ ܒܕܝܐܡܛܪܘܢ ܕܚܕ̈ܕܐ ܗܘܝܢ ܫܡܫܐ ܘܣܗܪܐ ܘܐܪܥܐ ܒܕܡܨܥܬܐ ܗ̱ܝ ܕܗܢܐ ܟܠ. ܡܬܡܨܥܐ ܐܦ ܒܝܢܬܗܘܢ. ܘܟܠܝܐ ܠܙܠܝ̣̈ܩܐ ܫܡܫܢܝ̈ܐ ܕܢܕܢܚܘܢ ܥܠ ܓܘܫܡܗ ܕܣܗܪܐ. ܘܗܟܢܐ ܟܕ ܬܚܝܬ ܛܠ̈ܠܐ ܕܐܪܥܐ ܢܦܠ ܚܫܟܐ ܓܡܝ̣ܪܐ ܠܗ ܓܕܫ. ܐܢܕܝܢ ܩܠܝ̣ܠ ܢܗܘܐ ܙܠܝ̣ܡ ܡ̣ܢ ܐܣܪܐ ܗ̇ܘ. ܗ̣ܘ ܐܘ ܫܡܫܐ. ܗܝܕܝܢ ܡܢܬܐ ܡܢܗ ܦܠܛ ܡ̣ܢ ܬܚܝܬ ܛܠܠܝ̈ܗ̇ ܕܐܪܥܐ ܘܢܗܝ̣ܪܬܐ ܠܢ ܡܬܚܙܝܐ. ܘܚܫܟܐ ܠܘ ܓܡܝ̣ܪܐ ܗܝܕܝܟ ܘܗܫܐ ܘܡ̣ܢ ܗܠܝܢ ܐܬܚܘܝ ܕܫܡܫܐ ܡ̇ܢ ܡ̣ܢ ܣܗܪܐ ܚܫܟ. ܣܗܪܐ ܕܝܢ ܡ̣ܢ ܐܪܥܐ.

 

 

 

ܡܛܠ ܫܘ̈ܡܬܐ ܕܒܐܦܝ̈ ܣܗܪܐ ܡܬܚܙ̈ܝܢ

 

ܐ̱ܢܫܝ̈ܢ ܐܡܪܝܢ ܕܣܗܪܐ ܡ̇ܢ ܒܗ̇ܝ ܕܣܩܝ̣ܠ ܕܡܘ̣ܬ ܡܚܙܝ̣ܬܐ. ܠܨܘܪܬܐ ܕܛܘܪ̈ܐ ܘܝܡ̈ܡܐ ܡܩܒܠ ܗ̣ܘ ܒܗ. ܘܗܟܢܐ ܐܬܘ̈ܬܐ ܗ̇ܢܝܢ ܒܗ ܡܬܚܘ̈ܝܢ. ܐ̱ܚܪ̈ܢܐ ܕܝܢ ܐܡܪܝܢ ܕܟܘܟ̈ܒܐ ܡܕܡ ܥܢܢܝ̈ܐ ܒܐܦܝ̈ ܣܗܪܐ ܩܒܝ̣ܥܝ̣ܢ. ܘܡܛܠ ܗܕܐ ܗܟܢܐ ܡܬܚܙܝܢ. ܐ̱ܚܪ̈ܢܐ ܕܝܢ ܐܡܪܝܢ ܕܥܛܪ̈ܐ ܬܢܢܝ̈ܐ ܕܡ̣ܢ ܐܣܛܘܟܣܐ ܢܘܪܢܝܐ ܠܐܦܝ̈ ܣܗܪܐ ܣܠܩܝ̣ܢ. ܫܘ̈ܡܬܐ ܗܠܝܢ ܥܒܕܝܢ. ܐ̱ܚܪ̈ܢܐ ܕܝܢ ܐܡܪܝܢ. ܕܡܢܘ̈ܬܐ ܩܛܝ̣̈ܢܬܐ ܡܢܗ ܕܣܗܪܐ ܟܕ ܦܫܪ̈ܢ ܒܝܕ ܚܡܝ̣ܡܘܬܐ ܕܐܣܛܘܟܣܐ ܢܘܪܢܝܐ܆ ܕܘܟ̈ܝܬܗܝܢ ܗܟܢܐ ܚܫܘ̈ܟܬܐ ܡܬܚܙ̈ܝܢ.

 

 

 

ܡܛܠ ܗ̇ܝ ܕܟܘܟ̈ܒܐ ܓܘ̈ܢܐ ܩܢܝ̈ܢ

 

ܩܘ̣ܢܐܐܘܬܗ ܕܩܪܘܢܘܣ. ܘܢܗܝ̣ܪܘܬܗ ܕܙܘܣ. ܘܓܘܡܪܢܝܘܬܗ ܕܐܪܝ̣ܣ. ܘܟܘܪܟܡܘܬܗ ܕܐܪܡܝ̣ܣ. ܡܫܘ̈ܕܥܢ ܕܠܐ ܓܠܝ̣ܙܝ̣ܢ ܓܘ̈ܢܐ ܡ̣ܢ ܟܘܟ̈ܒܐ.

 

 

 

ܢܝܫܐ ܬܪܝܢܐ ܡܛܠ ܙܒܢܐ ܘܡܢܘ̈ܬܗ

 

ܕܙܒܢܐ ܡ̇ܢ ܡܫܘܚܬܗ ܗ̣ܘ ܕܙܘܥܐ ܚܘܕܪܢܝܐ ܕܫܡܫܐ ܠܟܠܢܫ ܝ̣ܕܝ̣ܥܐ܆ ܘܡܛܠܗܕܐ ܥܠ ܟܠ ܚܕܐ ܡ̣ܢ ܡܢܘ̈ܬܗ ܕܐܝܬܝܗܝܢ ܫܢܝ̈ܐ ܘܝܪ̈ܚܐ ܘܝܘ̈ܡܬܐ ܘܫܥ̈ܐ ܙܕܩ ܕܢܢܗܪ.

 

 

 

ܡܛܠ ܫܢ̱ܬܐ

 

ܫܡܫܐ ܡ̇ܢ ܓܝܪ ܟܕ ܚܘܕܪܐ ܡܫܡܠܝܐ ܓܡܪ ܒܙܘܥܗ ܗ̇ܘ ܕܝܠܢܝܐ ܕܡ̣ܢ ܡܥܪܒܐ ܠܡܕܢܚܐ ܫܢ̱ܬܐ ܥܒܕ. ܟܐܡܬ ܥܛܦ ܒܪܕܪܝܫ ܠܢܘܩܕܬܐ ܗ̇ܝ ܕܡܢܗ̇ ܫܪܝ܆ ܫܘܪܝܐ ܕܝܢ ܥܒܕܘ ܚܟܝ̣̈ܡܐ ܠܙܘܥܐ ܗܢܐ ܡ̣ܢ ܪܝܫܗ ܕܡܠܘܫܐ ܗ̇ܘ ܕܐܡܪܐ ܕܗܘܝܘ ܡܡܙܓܘܬܐ ܬܐܕܢܝܬܐ. ܒܕܓܘܢ ܟܕ ܠܗܢܐ ܡܠܘܫܐ ܦܣܩ ܘܠܗ̇ܘ ܕܥܡܗ ܕܐܝܬܘܗܝ ܕܬܘܪܐ. ܘܠܗܘ ܐ̱ܚܪܢܐ ܕܬܐܡ̈ܐ. ܗܝܕܝܢ ܠܬܐܕܐ ܡ̇ܢ ܡܫܡܠܐ. ܘܠܢܘܩܕܬܐ ܕܛܪܘܦܝܩܘܣ ܩܝܛܝܐ ܡܬܡܛܐ ܟܐܡܬ ܠܪܝܫܗ ܕܣܪܛܢܐ. ܘܬܘܒ ܟܕ ܠܗܢܐ ܥܒܪ ܘܠܗܢܘܢ ܬܪܝܢ ܐ̱ܚܪ̈ܢܐ ܕܥܡܗ ܟܐܡܬ ܠܐܪܝܐ ܘܠܒܬܘܠܬܐ. ܗܝܕܝܢ ܟܕ ܩܝܛܐ ܥܒܕ. ܠܡܡܙܓܘܬܐ ܬܫܪܝܝܬܐ ܕܡܐܣܬܐ. ܐܝܛܐ ܟܕ ܠܗܢܐ ܘܠܗ̇ܢܘܢ ܬܪܝܢ ܕܥܡܗ ܥܒܪ܆ ܟܐܡܬ ܠܥܩܪܒܐ ܘܠܟܫܛܐ ܗܝܕܝܟ ܙܒܢܐ ܥܒܕ ܕܬܫܪ̈ܝܬܐ ܘܠܛܪܘܦܝܩܘܣ ܗ̇ܘ ܣܬܘܝܐ ܡܬܝܒܠ ܟܐܡܬ ܠܪܝܫܗ ܕܓܕܝܐ. ܘܟܕ ܠܗܢܐ ܘܠܗ̇ܢܘܢ ܬܪܝܢ ܕܥܡܗ ܗ̄ ܠܕܘܠܐ ܘܢܘܢܐ ܥܒܪ. ܗܝܕܝܟ ܣܬܘܐ ܥܒܕ. ܘܒܪ ܕܪܝܫ ܠܘܬ ܢܘܩܕܬܐ ܗ̇ܝ ܬܐܕܢܝܬܐ ܕܪܝܫ ܐܡܪܐ ܕܡܢܗ ܫܪܝ ܡܫܠܡ. ܘܫܢ̱ܬܐ ܡܫܡܠܝܬܐ ܒܐܪܒܥܐ ܫܘܚ̈ܠܦܝܗ̇ ܥܒܕ. ܘܗ̣ܝ ܗܕܐ ܫܢ̱ܬܐ ܫܡܫܢܝܬܐ ܡܬܩܪܝܐ. ܘܐܝܬܝܗ̇ ܬܠܬܡܐܐ ܘܫܬܝܢ ܘܚܡܫܐ ܝܘ̈ܡܬܐ ܘܪܘܒܥܐ ܕܝܘܡܐ. ܐܝܬ ܕܝܢ ܘܫܢ̱ܬܐ ܐ̱ܚܪܬܐ ܣܗܪܢܝܬܐ ܗ̱ܝ ܕܬܠܬܡܐܐ ܘܚܡܫܝܢ ܘܐܪܒܥܐ ܝܘ̈ܡܬܐ ܐܝܬܝܗ̇ ܘܟܘܡܣܐ ܘܣܘܕܣܐ ܕܝܘܡܐ. ܘܡܛܠ ܗܕܐ ܒܩܪܝ̣ܒܘܬܐ ܕܬܠܬܝܢ ܘܬܠܬ ܫܢܝ̈ܐ. ܘܚܕܐ ܫܢ̱ܬܐ ܡܬܬܘܣ̈ܦܢ ܫܢܝ̈ܐ ܣܗܪ̈ܢܝܬܐ. ܡ̣ܢ ܫܢܝ̈ܐ ܣܗܪ̈ܢܝܬܐ. ܡ̣ܢ ܫܢܝ̈ܐ ܫܡܫܢܝ̈ܬܐ. ܘܥܣܪܐ ܝܘܡܝ̣̈ܢ ܘܥܣܪܝܢ ܫܥܝ̣̈ܢ ܒܨܝ̣ܪܐ ܫܢ̱ܬܐ ܣܗܪܢܝܬܐ ܡ̣ܢ ܫܢ̱ܬܐ ܫܡܫܢܝܬܐ. ܘܗ̣ܝ ܗ̇ܝ ܝܬܝ̣ܪܘܬܐ ܕܪܘܒܥܐ ܕܝܘܡܐ ܕܫܢ̱ܬܐ ܫܡܫܢܝܬܐ. ܟܠ ܐܪܒܥ ܫܢܝ̣̈ܢ ܝܘܡܐ ܚܕ ܥܒܕܐ. ܘܗ̣ܝ ܗ̇ܝ ܫܢ̱ܬܐ ܫܡܫܢܝܬܐ. ܟܠ ܐܪܒܥ ܫܢܝ̣̈ܢ ܝܘܡܐ ܚܕ ܥܒܕܐ. ܘܗ̣ܝ ܗ̇ܝ ܫܢ̱ܬܐ ܟܒܝ̣ܫܬܐ ܡܬܩܪܝܐ. ܘܗ̇ܘ ܕܨܒܐ ܕܢܕܥܝܗ̇. ܢܒܨܪ ܡ̣ܢ ܫܢܝ̈ܐ ܕܐܠܟܣܢܕܪܘܣ ܬܠܬܐ ܘܢܦܠܓ ܠܫܪܟܐ ܥܠ ܐܪܒܥܐ. ܘܐܢ ܢܬܦܠܓ ܟܒܝ̣ܫܬܐ ܗ̱ܝ ܫܢ̱ܬܐ ܗ̇ܝ. ܘܐܠܐ ܠܐ.

 

 

 

ܡܛܠ ܝܪܚܐ

 

ܠܚܘܕܪܐ ܓܝܪ ܡܘܙܠܬܢܝܐ ܟܕ ܠܬܠܬܡܐܐ ܘܫܬܝܢ ܘܡܢܘ̈ܢ ܦܠܓܘܗܝ. ܘܠܟܠ ܬܠܬܝܢ ܡܢܘ̈ܢ ܒܘܪܓܐ ܚܕ ܩܪܘ. ܠܟܠܗ ܙܒܢܐ ܕܡܪܕܝ̣ܬܗ ܕܫܡܫܐ ܒܚܕ ܡ̣ܢ ܒܘܪ̈ܓܐ ܝܪܚܐ ܚܕ ܩ̣ܪܘ. ܘܗܢܘ ܝܪܚܐ ܫܡܫܢܝܐ. ܝܪܚܐ ܕܝܢ ܣܗܪܢܝܐ ܐܝܬܘܗܝ ܟܠܗ ܙܒܢܐ ܗ̇ܘ ܕܦܪܫ ܣܗܪܐ ܡ̣ܢ ܫܡܫܐ ܒܙܒܢ ܣܘܢܘܕܘܣ ܠܐܦܝ̈ ܡܕܢܚܐ. ܘܦܢܐ ܡ̣ܢ ܕܪܝܫ ܠܗ̇ ܠܗ̇ܝ ܢܘܩܕܬܐ ܕܡܢܗ̇ ܦܪܫ. ܘܠܝܘ̈ܡܬܗ ܕܝܪܚܐ ܗܢܐ ܟܕ ܨܒ̣ܘ ܕܢܚܬܬܘܢ. ܒܨܪܘ ܠܙܘܥܐ ܕܩܢܛܪܘܢ ܕܫܡܫܐ ܕܐܝܬܘܗܝ ܚܡܫܝܢ ܘܬܫܥ ܩܛܝ̣̈ܢܬܐ ܘܬܡܢܐ ܬܪ̈ܝܢܝܬܐ. ܘܥܣܪܝܢ ܬܠܝ̣ܬܝ̈ܬܐ ܡ̣ܢ ܙܘܥܐ ܕܩܢܛܪܘܢ ܕܣܗܪܐ. ܕܐܝܬܘܗܝ ܬܠܬܥܣܪ ܕܪ̈ܓܐ ܘܐܪܒܥ ܩܛܝ̣̈ܢܬܐ. ܘܬܠܬܝܢ ܘܚܡܫ ܩܛܝ̣̈ܢܬܐ ܬܪ̈ܝܢܝܬܐ ܘܬܪܬܝܢ ܬܠܝ̣ܬܝ̈ܬܐ. ܘܠܕܫܪܟܐ ܦܠܓܘܗܝ ܥܠ ܚܘܕܪܐ ܕܐܝܬܘܗܝ ܬܠܬܡܐܐ ܘܫܬܝܢ ܕܪ̈ܓܐ. ܢܦܩ ܡ̣ܢ ܦܘܠܓܐ ܥܣܪܝܢ ܘܬܫܥܐ ܝܘ̈ܡܬܐ. ܘܬܡܢܐ ܩܛܝ̣̈ܢܬܐ ܘܥܣܪܝܢ ܬܪ̈ܝܢܝܬܐ. ܘܗ̇ܢܘ ܝܪܚܐ ܣܗܪܢܝܐ.

 

 

 

ܡܛܠ ܝܘܡܐ

 

ܝܘܡܐ ܕܝܢ ܐܝܬܘܗܝ܆ ܟܠܗ ܙܒܢܐ ܗ̇ܘ ܕܒܗ ܗܦܟ ܫܡܫܐ ܒܝܕ ܙܘܥܐ ܗ̇ܘ ܕܡܘܙܠܬܐ ܗ̇ܝ ܥܠܝܬܐ. ܠܢܘܩܕܬܐ ܗ̇ܝ ܕܡܢܗ̇ ܫܪܝ. ܘܗ̣ܝ ܗܕܐ ܗܘܝܐ ܒܫܘܡܠܝܐ ܕܐܝܡܡܐ ܟܝ̣ܬ ܘܕܠܠܝܐ. ܘܐܣܛܪ̈ܘܢܘܡܘ ܡ̇ܢ ܡ̣ܢ ܚܘܕܪܐ ܗ̇ܘ ܛܗܪܢܝܐ ܥܒܕܝ̣ܢ ܠܫܘܪܝܗ ܕܝܘܡܐ. ܒܕܗܟܢܐ ܚܬܝ̣ܬܐܝܬ ܡܬܬܝܬܝܢ ܠܗܘܢ ܚܘ̈ܫܒܢܐ. ܣܘܪ̈ܝܝܐ ܕܝܢ ܘܥܒܪ̈ܝܐ ܘܐܪ̈ܒܝܐ ܡ̣ܢ ܐܘܪܝܙܘܢ ܡܥܪܒܝܐ ܥܒܕܝ̣ܢ ܠܫܘܪܝܗ ܕܝܘܡܐ ܟܐܡܬ ܡ̣ܢ ܪܡܫܐ. ܒܗ̇ܝ ܕܣܗܪ̈ܢܝܐ ܐܢܘܢ ܝܪ̈ܚܝܗܘܢ. ܘܒܪ̈ܡܫܐ ܡܬܚܙܐ ܣܗܪܐ ܚܕܬܐ. ܝܘ̈ܢܝܐ ܕܝܢ ܘܦܪ̈ܣܝܐ. ܡ̣ܢ ܐܘܪܝܙܘܢ ܡܕܢܚܝܐ ܡܫܪܝܢ. ܒܗ̇ܝ ܕܫܡܫܢܝ̈ܐ ܐܢܘܢ ܝܪ̈ܚܝܗܘܢ. ܘܕܡ̣ܢ ܕܢܚܗ ܘܠܘ ܡ̣ܢ ܥܪܒܗ ܦܐܐ ܠܡܫܪܝܘ ܓܠܝܐ. ܐܠܐ ܐܝܡ̈ܡܐ ܡ̇ܢ ܘܠܝ̈ܠܘܬܐ ܠܘ ܒܟܠܕܘܟ ܘܒܟܠ ܐܬܪ ܫܘܝܢ. ܒܐܬܪ̈ܘܬܐ ܓܝܪ ܕܣܘܪܛܐ ܕܫܘܝܘ̣ܬܐ. ܐܘܟܝ̣ܬ ܒܐܪܥܐ ܗ̇ܝ ܝܩܕܬܐ܆ ܬܪܝܨܐܝܬ ܪܕܐ ܫܡܫܐ. ܘܟܕ ܒܚܘܕܪܐ ܐܝ̣ܣܡܗܪܘܣ ܗܘܐ. ܘܟܕ ܒܚܘܕܪ̈ܐ ܐ̱ܚܪ̈ܢܐ ܦܪ̈ܠܠܝܠܘ ܪܕܐ. ܘܡܛܠ ܗܕܐ ܐܡܝ̣ܢܐܝܬ ܩܫܬܐ ܗ̇ܝ ܕܠܥܠ ܡ̣ܢ ܐܪܥܐ ܫܘܝܐ ܠܩܫܬܐ ܗ̇ܝ ܕܬܚܝܬ ܐܪܥܐ. ܘܗܟܢ ܐܟܠܗ̇ ܫܢ̱ܬܐ ܬܪܬܥܣܪ̈ܐ ܫܥܝ̣̈ܢ ܗܘܐ ܐܝܡܡܗܘܢ. ܘܬܪܬܥܣܪ̈ܐ ܐ̱ܚܪ̈ܢܝܢ ܠܠܝܗܘܢ. ܘܒܗ̇ ܒܗܕܐ ܐܪܥܐ. ܬܪ̈ܝܗܘܢ ܦܘ̈ܠܘ ܠܘܬ ܐܘܪܝܙܘܢ ܡܬܚܙܝܢ ܠܗܘܢ ܒܐܡܝ̣ܢܘ. ܒܠܥܕ ܡܬܬܪܝ̣ܡܢܘܬܐ ܕܚܕ ܡܢܗܘܢ ܘܡܬܬܚܬܝܢܘܬܐ ܕܗܘܐ ܐ̱ܚܪܢܐ ܐܟܡܐ ܕܠܘܬܢ. ܒܐܬܪ̈ܘܬܐ ܕܝܢ ܕܠܐܦܝ̈ ܓܪܒܝܐ܆ ܡܬܥܠܐ ܠܗ ܦܘܠܘܣ ܗ̇ܘ ܓܪܒܝܝܐ. ܘܡܬܬܚܬܐ ܦܘܠܘܣ ܬܝܡܢܝܐ. ܘܟܕ ܒܚܘܕܪܐ ܐܝܣܡܗܪܘܣ ܗܘܐ. ܫܡܫܐ ܒܠܚܘܕ ܪܕܐ ܬܪܝ̣ܨܐܝܬ. ܒܚܘܕܪ̈ܐ ܕܝܢ ܗ̇ܢܘܢ ܦܕܠܠܝ̈ܠܘ ܐ̱ܚܪ̈ܢܐ ܙܠܝ̣ܡܐܝܬ ܪܕܐ. ܘܡܛܠ ܗܕܐ ܡ̣ܢ ܪܝܫ ܐܡܪܐ ܥܕܡܐ ܠܪܝܫ ܣܪܛܢܐ ܩܫܬܐ ܗ̇ܝ ܕܠܥܠ ܡ̣ܢ ܐܪܥܐ ܕܪܒܐ ܡ̣ܢ ܩܫܬܐ ܕܬܚܝܬ ܐܪܥܐ ܗܘܝܐ. ܘܗܟܢܐ ܬܘܒ ܘܥܕܡܐ ܠܪܝܫ ܡܣܐܬܐ. ܘܡ̣ܢ ܪܝܫ ܡܣܐܬܐ ܥܕܡܐ ܠܪܝܫ ܓܕܝܐ. ܘܗܟܢܐ ܬܘܒ ܥܕܡܐ ܠܪܝܫ ܐܡܪܐ ܒܗܦܟܐ ܕܗܠܝܢ. ܒܕܓܘܢ ܐܝܡܡܐ ܕܝܬܝ̣ܪ ܐܪܝ̣ܟ ܒܡܨܥܬܗ ܕܩܠܝ̣ܡܐ ܩܕܡܝܐ ܬܠܬܥܣܪ̈ܐ ܫܥ̈ܐ ܗܘܐ. ܘܠܠܝܗ ܚܕܥܣܪ̈ܐ ܫܥ̈ܐ. ܘܒܡܨܥܬܗ ܕܩܠܝ̣ܡܐ ܬܪܝܢܐ. ܬܠܬܥܣܪ̈ܐ ܘܦܠܓܗ̇. ܘܒܡܨܥܬܗ ܕܪܒܝܥܝܐ ܐܪܒܥܣܪ̈ܐ ܘܦܠܓܗ̇. ܘܒܡܨܥܬܗ ܕܚܡܝܫܝܐ܆ ܚܡܫܥܣܪ̈ܐ. ܘܒܡܨܥܬܗ ܕܫܬܝܬܝܐ ܚܡܫܥܣܪ̈ܐ ܘܦܓܠܗ. ܘܒܡܨܥܬܗ ܕܫܒܝ̣ܥܝܐ ܫܬܥܣܪ̈ܐ. ܘܗܟܢܐ ܦܚܡ ܠܠܝ̈ܠܘܬܐ. ܒܐܬܪ̈ܘܬܐ ܕܝܢ ܠܐ ܡܬܥܡܪ̈ܢܐ ܕܓܪܒܝܐ ܝܬܝܪ ܡܟܢ ܕܢܐܪܒ ܐܝܡܡܐ. ܐܝܟܢܐ ܕܥܣܪܝܢ ܘܐܪܒܥܐ ܫܥ̈ܐ ܢܗܘܐ. ܘܠܐ ܢܥܪܒ ܒܗ̇ܘ ܝܘܡܐ. ܒܗܝ ܕܝܬܝܪ ܙܠܝ̣ܡܐܝܬ ܪܕܐ ܗܪܬܡܢ ܫܡܫܐ. ܒܐܬܪ̈ܘܬܐ ܕܝܢ ܗ̇ܢܘܢ ܕܬܘܒ ܝܬܝ̣ܪ ܪܡ ܒܗܘܢ ܦܘܠܘܣ ܓܪܒܝܝܐ. ܐܝܟܢܐ ܕܠܥܠ ܡ̣ܢ ܪܝܫܐ ܢܗܘܐ. ܗܝܕܝܢ ܫܡܫܐ ܐܝܟ ܣܪܢܐ ܕܪܝܚܐ ܚܕܪ. ܘܛܠܠܝ̈ ܩܝ̈ܡܬܐ ܕܬܡܢ ܚܕܪ̈ܝܗܝܢ ܟܪ̈ܟܢ. ܘܒܗ̇ܢܘܢ ܫܬܐ ܝܪ̈ܚܝܢ ܕܒܗܘܢ ܪܕܐ ܫܡܫܐ ܡ̣ܢ ܪܝܫ ܐܡܪܐ ܥܕܡܐ ܠܡܣܐܬܐ. ܚܕ ܐܝܡܡܐ ܣܒܝ̣ܣܐ ܗܘܐ. ܘܟܕ ܢܚܬ ܒܗܠܝܢ ܫܬܐ ܒܘܪ̈ܓܐ ܬܝܡܢܝ̈ܐ. ܚܕ ܠܠܝܐ ܣܒܝ̣ܣܐ ܗܘܐ ܒܓܪܒܝܐ.

 

 

 

ܡܛܠ ܫܥ̈ܐ

 

ܫܥ̈ܐ ܡ̇ܢ ܐܘ ܫܘ̈ܝܬܐ ܐܢܝܢ ܐܘ ܙܠܝ̣̈ܡܬܐ. ܘܫܥܬܐ ܫܘܝ̣ܬܐ ܕܬܠܝܬܝܐ ܐܪܒܥܣܪ̈ܐ ܘܒܡܨܥܬܗ ܡܢܬܐ ܗ̱ܝ ܡ̣ܢ ܥܣܪܝܢ ܘܐܪܒܥ ܡܢܘ̈ܬܐ ܕܐܝܡܡܐ ܘܕܠܠܝܐ. ܘܡܛܠ ܗܕܐ ܠܐ ܝܪܒܐ ܫܥܬܐ ܡ̣ܢ ܫܥܬܐ ܐܦܠܐ ܒܨܪܐ. ܘܐܦܢ ܝܪܒܝܢ ܘܒܨܪܝ̣ܢ ܐܝܡܡ̈ܐ ܘܠܝܠܘ̈ܬܐ. ܘܫܥܬܐ ܙܠܝ̣ܡܬܐ ܡܢܬܐ ܗ̱ܝ ܡ̣ܢ ܬܪܬܥܣܪ̈ܐ ܡܢܘ̈ܢ ܕܐܝܡܡܐ ܘܕܠܠܝܐ. ܘܡܛܠ ܗܕܐ ܠܐ ܡܬܬܘܣܦ ܡܢܝܢܗܝܢ ܕܫܥ̈ܐ ܙܠܝ̣̈ܡܬܐ ܣܟ. ܘܐܦܢ ܝܪܒܝ̣ܢ ܘܒܨܪܝ̣ܢ ܐܝܡܡ̈ܐ ܘܠܝ̈ܠܘܬܐ. ܘܡ̣ܢ ܗܪܟܐ ܝ̣ܕܝ̣ܥܐ ܕܫܥ̈ܐ ܫܘ̈ܝܬܐ ܡܢܝܢܗܝܢ ܡܬܬܘܣܦ ܒܪܒܘܬܐ ܕܐܝܡܡܐ ܘܕܠܠܝܐ ܘܠܘ ܡܢܘ̈ܬܗܝܢ. ܒܕܟܠ ܫܥܬܐ ܫܘܝ̣ܬܐ ܚܡܫܬܥܣܪ ܗ̣ܝ ܡܢܘ̈ܢ ܡ̣ܢ ܬܠܬܡܐܐ ܘܫܬܝܢ ܕܚܘܕܪܐ. ܫܥ̈ܐ ܕܝܢ ܙܠܝ̣̈ܡܬܐ ܠܘ ܡܢܝܢܗܝܢ ܕܝܠܗܝܢ ܡܬܬܘܣܦ ܒܪܒܘܬܐ ܕܐܝܡܡܐ ܘܕܠܠܝܐ܇ ܐܠܐ ܡܢܘ̈ܬܗܝܢ. ܒܗܝ ܕܟܠܚܕܐ ܡ̣ܢ ܫܥ̈ܐ ܙܠܝ̣̈ܡܬܐ ܕܐܝܡܡܐ ܪܒܐ܆ ܝܬܝܪ ܪܒܐ ܡ̣ܢ ܟܠ ܚܕܐ ܡ̣ܢ ܫܥ̈ܐ ܙܠܝ̣̈ܡܬܐ ܕܠܠܝܗ ܕܗ̇ܘ ܐܝܡܡܐ.

 

 

 

ܢܝܫܐ ܬܠܝܬܝܐ ܡܛܠ ܐܬܘ̈ܬܐ ܕܡ̣ܢ ܬܪ̈ܝܗܘܢ ܢܗܝܪ̈ܐ ܘܫܪܟܐ ܕܟܘܟ̈ܒܐ

 

ܠܗܝܢ ܓܝܪ ܠܐܬܘ̈ܬܐ ܗܠܝܢ ܕܐܒܐ ܒܥܬܝ̣ܩܬܐ ܥܗܕ. ܠܗܝܢ ܟܕ ܠܗܝܢ ܐܦ ܒܪܐ ܒܚܕܬܐ ܫܘܕܥ. ܐܡ̣ܪ ܓܝܪ ܐܬܠ ܐܬܘ̈ܬܐ ܘܓܒܪ̈ܘܬܐ ܒܫܡܝܐ. ܫܡܫܐ ܢܬܚܠܦ ܘܫܪܟܐ. ܘܡܛܠ ܐܬܘ̈ܬܐ ܬܘܒ ܕܚܪܬܐ ܐܡ̣ܪ. ܫܡܫܐ ܢܚܫܟ. ܘܣܗܪܐ ܠܐ ܢܚܘܐ ܢܘܗܪܗ. ܘܟܘܟ̈ܒܐ ܢܦܠܘܢ. ܡܛܠ ܐܬܘ̈ܬܐ ܗܠܝܢ ܗ̇ܢܘܢ ܕܢܣܝ̣ܘ ܐܡ̣ܪܘ. ܕܫܡܫܐ ܡ̇ܢ ܟܕ ܣܘܡܩܐ ܢܬܚܙܐ ܒܣܬܘܐ. ܘܥܡܗ ܕܗ̇ܝ ܕܣܠܩ ܥܢܢܐ ܐܘܟܡܬܐ ܡܩܒܠܐ ܠܗ. ܥܠ ܩܪܝܪܘܬܗ ܕܣܬܘܐ ܡܫܘܕܥ. ܗ̣ܘ ܗܟܘܬ ܘܒܗܘܪܘܬ ܙܠܝ̣̈ܩܘܗܝ. ܥܠ ܪܛܝ̣ܒܘܬܐ ܕܐܐܪ ܡܫܘܕܥܐ. ܣܗܪܐ ܕܝܢ ܥܒܕ ܐܬܘ̈ܬܐ ܡܫܚ̈ܠܦܬܐ ܟܕ ܚܫܟ. ܘܒܚܘܓ̈ܝܬܗ. ܘܬܪ̣ܝܨܘܬ ܩܪ̈ܢܬܗ ܟܕ ܡܬܝܠܕ. ܥܠ ܩܘܪܐ ܘܥܪܝܐ ܡܫܘܕܥ. ܘܫܪܟܐ ܕܐ̱ܚܪ̈ܢܝܬܐ ܣܓܝ̈ܐܬܐ. ܗ̣ܘ ܗܟܘܬ ܘܥܡܘܛܘܬܐ ܕܟܘܟ̈ܒܐ ܥܠ ܪܛܝ̣ܒܘܬܐ ܕܐܐܪ ܡܫܘܕܥܐ. ܐܝܬ ܓܝܪ ܘܐܬܘ̈ܬܐ ܐ̱ܚܪ̈ܢܝܬܐ ܗ̇ܢܝܢ ܕܒܐܐܪ ܡܬܟܝ̈ܢܢ. ܕܥܠܝܗܝܢ ܒܡܠܬܐ ܩܦܝ̣ܣܬܐ ܪܡܙ ܡܪܝܐ ܘܐܡ̣ܪ. ܕܡܐ ܕܚܙܝܬܘܢ ܥܢܢܐ ܕܐܬܝܐ ܡ̣ܢ ܡܥܪܒܐ. ܐܡܪܝܢ ܐܢ̱ܬܘܢ ܡܛܪܐ ܗܘܐ܆ ܘܗܘܐ. ܘܡܐ ܕܬܝܡܢܐ ܕܗܘܪܢܐ ܐܘܟܝ̣ܬ ܚܘܡܐ ܗܘܐ܆ ܘܗܘܐ. ܘܡܐ ܕܣܡܩܬ݀ ܬܘܒ ܫܡܝܐ ܒܪܡܫܐ ܥܠ ܨܚܘܐ ܠܡ ܡܘܕܥܐ. ܘܡܐ ܕܣܡܩܬ݀ ܬܘܒ ܒܨܦܪܐ ܥܠ ܡܛܪܐ ܡܚܘܐ ܕܗܘܐ. ܐܡ̣ܪ ܓܝܪ ܦܛܘܠܘܡܐܘܣ ܒܟܬܒܗ ܗ̇ܘ ܕܐܣܛܪܘܠܘܓܝܐ ܕܦܐܪܐ ܩܪܝܗܝ. ܕܩܘܢܛܪ̈ܐ ܒܐܐܪ ܥܠ ܝܒܝ̣ܫܘܬܐ ܕܐܐܪ ܡܫܘܕܥܝܢ. ܘܒܕ ܒܚܕܐ ܦܢܝ̣ܬܐ ܡܬܚܙܝܢ. ܪ̈ܘܚܐ ܥܙܝ̣̈ܙܬܐ ܢܫ̈ܒܢ ܒܗ̇ܝ ܦܢܝ̣ܬܐ. ܘܟܕ ܒܦܢ̈ܝܬܐ ܡܬܡܬܚܝ̣ܢ. ܡܒܘ̈ܥܐ ܓܝܙܝ̣ܢ. ܘܚܝܠܘ̈ܬܐ ܕܢܘܟܪ̈ܝܐ ܥܐܠܝܢ ܘܡܫܬܠܛܝ̣ܢ ܒܩܠܝ̣ܡܐ ܗ̇ܘ. ܘܐܪܣܝܣ ܡܬܚܕܬܐ ܒܗ. ܘܟܘܟ̈ܒܐ ܨܘܨܝ̈ܢܐ ܗܠܝܢ ܐܢܘܢ ܕܚܕܥܣܪ ܒܘܪ̈ܓܐ ܒܝܢܬܗܘܢ ܘܒܝܢܬ ܫܡܫܐ. ܘܟܕ ܢܬܚܙܐ ܡܢܗܘܢ ܗ̇ܘ ܕܣܓܝ ܨܘܨܝ̈ܬܗ. ܒܣܟܬܐ ܡ̣ܢ ܣܟܝ̈ ܡܠܟܘܬܐ ܗ̇ܝ. ܡܡܬ ܡܐܬ ܡܠܟܗ̇. ܘܐܢ ܒܗ̇ܘ ܕܥܡ ܣܟܬܐ ܢܬܚܘܐ܆ ܡܠܟ ܡܠܟܝ̈ܗ̇ ܡܐܬ ܐܘ ܡܬܚܠܦ. ܘܓܙܝ̈ܗ̇ ܡܬܒܙܙܝܢ. ܘܐܢ ܒܗ̇ܘ ܕܢܦܝ̣ܠ ܡ̣ܢ ܣܟܬܐ ܢܬܚܘܐ. ܡܘ̈ܬܐ ܕܡ̣ܢ ܫܝܠ ܓܕܫܝܢ. ܘܣܓܝ̈ܐܐ ܡܬܐܣܪܝܢ ܘܡܬܟܪܗܝܢ. ܘܗ̇ܘ ܨܘܨܝܢܐ ܐܢ ܡ̣ܢ ܡܥܪܒܐ. ܠܡܕܢܚܐ ܪܕܐ ܗ̣ܘ ܛܪܘܢܐ ܕܩܐܡ ܡ̣ܢ ܐܪܥܐ ܢܘܟܪܝܬܐ ܐܬܐ. ܘܐܢ ܠܐ ܪܕܐ ܡܢܗ̇ ܕܐܪܥܐ ܗ̇ܝ ܗܘܐ. ܠܗܠܝܢ ܣܘܓܐܐ ܘܕܐܝܟ ܗܠܝܢ ܡܬܢܝܢ ܘܡܫܪܪܝܢ ܡܟܬܒ̈ܝ ܙܒ̈ܢܐ. ܡܛܠ ܐܬܘ̈ܬܐ ܕܗ̣ܘܝ̈ ܒܟܠ ܕܪ ܘܕܪ. ܘܠܚܘ̈ܕܬܐ ܕܡܝ̣ܪ̈ܐ ܫܘܕܥܘ. ܐܦ ܓܝܪ ܘܚܣܝܐ ܝܥܩܘܒ ܕܐܘܪܗܝ ܡܬܢܐ ܡܛܠ ܬܕܡܘܪܬܐ ܗ̇ܝ ܕܐܬܚܙܝܬ݀ ܒܐܐܪ܆ ܒܫܢܬ ܐܠܦ ܘܐܪܒܥ ܕܝܘ̈ܢܝܐ. ܡ̣ܢ ܒܬܪ ܝܘ̈ܡܬܐ ܥܣܪܐ܇ ܕܡܥܠܬܐ ܕܚܝܠܐ ܕܛܝܝ̈ܐ ܠܐܪܥܐ ܕܪ̈ܘܡܝܐ. ܟܠܗ ܠܠܝܐ ܒܟܠܗ̇ ܐܣܦܝ̣ܪܐ ܥܠܝܬܐ. ܡ̣ܢ ܡܥܪܒܐ ܠܡܕܢܚܐ ܟܫ̈ܛܐ ܘܙܝ̈ܩܐ ܢܘܪ̈ܢܐ ܒܕܡܘ̣ܬ ܩܢܛܪ̈ܐ ܡܬܟܫܛܝ̣ܢ ܗܘܘ ܕܠܐ ܫܠܘܐ ܣܒܝ̣ܣܐܝܬ ܘܥܒܝ̣ܛܐܝܬ܆ ܡ̣ܢ ܬܝܡܢܐ ܠܓܪܒܝܐ ܬܪܝ̣ܨܐܝܬ. ܘܠܡܢܐ ܠܪܘܚܩܐ ܦܗܝܢܢ. ܗܐ ܨܘܨ̈ܝܬܐ ܗܠܝܢ ܕܡ̣ܢ ܩܕܡ ܬܠܬ ܫܢܝ̣̈ܢ ܕܗܕܐ ܫܢ̱ܬܐ. ܐܘܟܝ̣ܬ ܒܫܢܬ ܐܠܦ ܘܚܡܫܡܐܐ ܘܫܒܥܝܢ ܘܚܡܫ ܕܝܘ̈ܢܝܐ. ܒܩܝܛܐ ܐܬܚܙܝ ܟܘܟܒܐ ܕܐܝܬ ܠܗ ܬܡܢܐ ܨܘܨ̈ܝܬܐ ܕܡܬܝ̣̈ܚܢ ܡ̣ܢ ܒܘܪܓܐ ܕܐܪܝܐ ܥܕܡܐ ܠܬܐܡ̈ܐ. ܥܠ ܩܪܘܢܘܣ ܘܙܘܣ ܘܐܪܝܣ. ܘܢܓܪ ܬܠܬܐ ܝܪ̈ܚܝܢ ܘܒܣܬܘܐ ܕܫܢ̱ܬܐ ܕܒܬܪܗ̇ ܫܢܝ ܡܠܟ ܡܠܟ̈ܐ. ܘܬܘܒ ܒܬܪ ܩܠܝ̣ܠ ܡܠܟܬܐ ܪܒܬܐ ܘܡܗܝܡܢܬܐ. ܘܙܝܡܝ̈ܐܣ ܣܓܝ̈ܐܬܐ ܥܕܝ̈ ܥܠ ܟܪ̈ܣܛܝܢܐ. ܘܗܢܐ ܫܪܒܐ ܗܪܟܐ ܢܢܘܚ. ܠܐܣܛܪ̈ܘܠܘܓܘ ܕܝܢ ܣܓܝ̈ܐܬܐ ܐܡܝ̣ܪ̈ܢ ܘܡܟ̈ܬܒܢ. ܥܠ ܡܡܠܠܘܬ ܟܘܟ̈ܒܐ. ܗ̇ܢܘܢ ܕܐܦ ܩܕܝܫܐ ܒܣܝܠܠܝܘܣ ܠܐ ܐܡܐܢ ܠܡܬܢܐ ܡܕܡ ܡ̣ܢ ܡܥܝ̣̈ܣܬܗܘܢ. ܠܡܟܣܢܘܬܐ ܕܗ̇ܢܘܢ ܕܒܝܘܠܦܢܗܘܢ ܐܬܬܚܕܘ. ܘܠܙܗܝ̣ܪܘܬܐ ܕܗ̇ܢܘܢ ܕܠܐ ܐܫܬܪܓܠܘ ܒܬܪܗܘܢ. ܐܡܪܝܢ ܓܝܪ ܕܗ̇ܘ ܠܡ ܕܡܬܝܠܕ ܒܗ̇ܘ ܪܦܦܐ ܙܥܘܪܐ ܕܗ̇ܝ ܫܥܬܐ. ܪܒܐ ܠܡ ܗܘܐ. ܘܪܝܫܐ ܕܡܕܝܢ̱ܬܐ. ܘܥܬܝ̣ܪܐ ܘܚܝܠܬܢܐ. ܘܐ̱ܚܪ̈ܢܐ ܠܡ ܡ̇ܢ ܕܗ̇ܘ ܕܡܬܝܠܕ ܒܫܥܬܐ ܐ̱ܚܪܬܐ ܕܪܡܙܐ ܩܠܝ̣ܠܐ. ܪܦܠܐ ܠܡ ܗ̣ܘܐ. ܘܚܕܘܪܐ. ܡܚܠܦ ܠܡ ܐܣܟ̈ܦܬܐ ܘܬܪ̈ܥܐ ܒܦܗܝܗ. ܕܬܘܪܣܝܐ ܕܝܘܡܐ ܠܗ ܢܟܢܫ. ܣܓܝ̈ܐܬܐ ܓܝܪ ܕܐܝܟ ܗܠܝܢ ܒܕܝܢ ܒܕܠܝܢ. ܘܕܠܐ ܫܪܝ̣ܪܝܢ ܨܒܪ̈ܝܗܘܢ ܘܥܣܣܝ̈ܗܘܢ. ܗ̣ܘ ܢܣܝܢܐ ܣܗܕ. ܐ̱ܚܪ̈ܢܐ ܕܝܢ ܡܛܠ ܫܐܕ̈ܐ ܐܡܪܝܢ ܕܡ̣ܢ ܐܬܘ̈ܬܐ ܕܟܘܟ̈ܒܐ ܡܩܕܡܝ̣ܢ ܝܕܥܝܢ ܥܬܝ̣̈ܕܬܐ. ܘܠܡܢܝ̣̈ܚܢܝܗܘܢ ܡܐܪܙܝܢ. ܘܐܠܐ ܡ̣ܢ ܐܝܟܐ ܗ̱ܝ ܠܗܘܢ ܡܩܕܡܘܬ ܝܕܥܬܐ ܗܕܐ ܕܒܝܕ ܩܨ̈ܡܐ ܘܙܟܘܪ̈ܐ ܘܝܕܘ̈ܥܐ ܟܕ ܣܩܘܒ̈ܠܝܐ ܣܝ̣ܡܝ̣ܢ ܠܘܩܒܠ ܐܠܗܐ ܘܐܠܗܝ̈ܬܐ.

 

 

 

 

 

 

 

 

     #1 

 

ܦܣܘܩܐ ܚܡܝܫܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܪܝܢܝܬܐ. ܡܛܠ ܗ̇ܢܘܢ ܕܒܝܘܡܐ ܕܚܡܫܐ ܐܬܒܪ̈ܝ. ܘܒܗ ܐܝܬ ܥܘܬܕܐ ܘܢܝ̈ܫܐ ܐܪܒܥܐ. ܩܕܡܝܬ݀ ܥܘܬܕܐ

 

ܒܗܢܐ ܬܘܒ ܝܘܡܐ ܚܝ̈ܘܬܐ ܟܠܗܝܢ ܡܝܢ̈ܝܬܐ. ܒܐܣܛܘܟܣܐ ܡܝܢܝܐ ܐܬܒܪ̈ܝܝܢ ܒܪܡܙܗ ܕܒܪܘܝܐ. ܘܗ̣ܢܝܢ ܗܠܝܢ ܠܬܪܝܢ ܓܢܣܝ̈ܢ ܡܬܦܠܓ̈ܢ. ܠܗ̇ܢܝܢ ܕܒܓܘ ܡܝ̈ܐ ܣܚ̈ܝܢ. ܘܠܗ̇ܢܝܢ ܕܒܐܐܪ ܦܪ̈ܚܢ. ܡܚܝ̈ܢܢ ܓܝܪ ܠܚܕ̈ܕܐ ܒܪܥܕܘܬ ܒܣܪܐ ܟܝܬ ܘܒܝܠܘܕܘܬ ܒܢ̈ܬܐ. ܘܓܠܝ̣ܙܘܬܐ ܕܬܕܝ̈ܐ ܘܕܚܠܒܐ ܘܕܟܘ̈ܠܝܬܐ. ܘܒܗ̇ܝ ܕܢܘܢܐ ܬܘܒ ܕܡܘ̣ܬ ܦܪ̈ܚܬܐ. ܓܦ̈ܐ ܩܢܝܢ. ܡ̣ܢ ܣܛܪ̈ܝܗܘܢ ܘܕܘܢܒ̈ܬܗܘܢ. ܘܐ̱ܢܫܝ̈ܢ ܟܕ ܠܒܪܬ݀ ܩܠܐ ܐܠܗܝܬܐ ܫܡ̣ܥܘ ܕܠܡܝ̈ܐ ܦܩܕܬ݀ ܠܡܪܚܫܘ ܗܠܝܢ ܬܪܝܢ ܓܢܣܝ̈ܢ ܕܚܝ̈ܘܬܐ ܐܣܒܪܘ ܕܠܘ ܡ̣ܢ ܐܪܒܥܐ ܐܣܛܘ̈ܟܣܐ ܡܪܟܒܝ̣ܢ. ܐܠܐ ܡ̣ܢ ܚܕ ܡܢܗܘܢ ܐܘܟܝ̣ܬ ܡ̣ܢ ܒܠܚܘܕ. ܘܕܠܐ ܫܪܝܪ ܣܒܪܗܘܢ ܗܢܐ. ܗ̣ܘ ܟܝܢܗܘܢ ܕܓܢ̈ܣܐ ܐܪܒܥܐ ܡܠܦܝ̣ܢ ܟܐܡܬ݀ ܥܡ ܢܘ̈ܢܐ ܟܝܬ ܘܦܪ̈ܚܬܐ. ܘܠܗ̇ܢܘܢ ܕܡܬܩܪܝܢ ܡܠܐܣܝܘܢ ܕܐܝܬܝܗܘܢ ܣܪ̈ܛܢܐ ܘܩܙܪ̈ܒܘ ܘܐܣܛܐܩ̈ܘ ܘܚܠܝ̣̈ܙܘܢܐ ܘܙܠܦ̈ܬܐ ܘܐܣܦܘ̈ܓܐ. ܘܠܐ ܪܚܝ̣ܩܐ ܐܢ ܐܦ ܠܗܠܝܢ ܢܘ̈ܢܐ ܢܫܡܗ. ܐܝܟ ܕܐܦ ܐܪܝ̣ܣܛܘܣ ܢܘܢܐ ܕܠܐ ܕܡܐ ܩ̣ܪܐ ܐܢܘܢ. ܘܓܢܣܐ ܪܒܝ̣ܥܝܐ ܕܗ̇ܢܘܢ ܕܡܢ̈ܝܐ ܐܟܙܢܐ ܕܓ̈ܠܐ ܘܐܘܪ̈ܕܥܐ.

 

 

 

ܢܝܫܐ ܩܕܡܝܐ ܡܛܠ ܓܢ̈ܣܐ ܕܢܘ̈ܢܐ

 

ܩܕܠܐ ܡ̇ܢ ܘܠܐ ܚܕ ܢܘܢܐ ܩܢܐ. ܕܝ̣ܠܢܐܝܬ ܕܝܢ ܩܢܝܢ ܢܘ̈ܢܐ. ܒܪܐܢܟܝܐ ܕܒܗܘܢ ܡܓܝ̣ܠܝܢ ܠܡܝ̈ܐ. ܟܕ ܒܦܘܡܐ ܡܩܒܠܝܢ. ܘܡ̣ܢ ܐܕ̈ܢܐ ܡܦܩܝ̣ܢ. ܘܡܢܗܘܢ ܡ̇ܢ ܚܕ ܒܪܐܢܟܝܘܢ ܩܢܝܢ ܡ̣ܢ ܬܪ̈ܝܗܘܢ ܓܒ̈ܐ. ܡܢܗܘܢ ܕܝܢ ܬܪܝܢ ܬܪܝܢ. ܘܐܝܬ ܕܐܪܒܥܐ ܐܪܒܥܐ. ܘܐܝܬ ܕܚܡܫܐ ܚܡܫܐ. ܘܡܛܠ ܕܢܘ̈ܢܐ ܡܢܗܘܢ ܡ̇ܢ ܩܠܦܢܝ̈ܐ ܐܢܘܢ ܐܟܙܢܐ ܕܫܒܘ̈ܛܐ ܘܫܪܟܐ. ܡܢܗܘܢ ܕܝܢ ܕܠܐ ܩܠܦ̈ܐ ܐܟܙܢܐ ܕܣܠܘܪܐ ܘܗܢܟܠܝܣ. ܗܠܦܘܣ ܢܘܢܐ܆ ܥܠ ܣܘ̈ܦܐ ܕܩܠܦܬܗ ܟܘ̈ܒܐ ܩܢܐ. ܘܟܠܗܘܢ ܢܘ̈ܢܐ ܫܢ̈ܐ ܚܪ̈ܝ̣ܦܬܐ ܘܡܥܪ̈ܙܠܬܐ ܩܢܝܢ. ܣܛܪ ܡ̣ܢ ܣܩܐܪܘܣ ܢܘܢܐ. ܘܢܘ̈ܢܐ ܟܠܗܘܢ ܕܓܢ̈ܣܐ ܗܠܝܢ ܣܗܕ. ܕܠܘ ܒܠܚܘܕ ܩܪܝ̣ܪܘܬܐ ܘܪܛܝ̣ܒܘܬܐ ܐܝܢܝ̈ܘܬ ܡܝ̈ܐ ܫܟܝ̣̈ܚܢ ܒܗܘܢ. ܐܠܐ ܘܚܡܝ̣ܡܘܬܐ ܬܘܒ ܘܝܒܝ̣ܫܘܬܐ ܥܡܗܝܢ ܕܗ̇ܢܝܢ. ܘܙܕܩ ܠܡܕܥ ܕܪܚܫܐ ܗܪܟܐ ܡ̣ܢ ܪܚܘܫܘܬܐ ܢܣܝ̣ܒ. ܘܪܚܫܐ ܕܝܘܡܐ ܫܬܝ̣ܬܝܐ ܡ̣ܢ ܫܦܘܦܘܬܐ. ܘܡܛܠ ܗܕܐ ܚܘܘ̈ܬܐ ܘܫܪܟܐ ܕܫܪܨܐ ܒܗ ܒܝܘܡܐ ܫܬܝܬܝܐ ܘܠܘ ܒܗܢܐ ܐܬܒܪܝ̣ܘ. ܬܢܝ̣̈ܢܐ ܕܝܢ ܕܗܪܟܐ ܥܗܝ̣ܕܝ̣ܢ ܫܘܚ̈ܠܦܐ ܐܢܘܢ ܕܢܘ̈ܢܐ ܕܝܬܝܪ ܪܘܪ̈ܒܝܢ ܘܒܝܡ̈ܡܐ ܕܠܒܪ ܡ̣ܢ ܥܡܪܬܐ ܡܬܝܠܕܝܢ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܡܦܩܬܐ ܫܒܥܝ̣ܢܝܬܐ ܩܝ̣̈ܛܘ ܡܬܩܪܝܢ. ܘܕܢܘ̈ܢܐ ܐܢܘܢ ܩܝ̣̈ܛܘ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܡܫܪܪ ܟܕ ܠܒܠܘܥܗ ܕܝܘܢܢ ܗ̇ܘ ܢܒܝܐ ܩܝ̣ܛܘܣ ܩܪܝܗܝ. ܘܕܡܝܐ ܕܠܘܝܬܢ ܗ̇ܘ ܕܐܡ̣ܪ ܕܘܝܕ. ܬܢܝ̣ܢܐ ܡܕܡ ܐܝܬܘܗܝ. ܘܚܣܝܐ ܝܥܩܘܒ ܕܐܘܪܗܝ ܚܘܝܐ ܪܒܐ ܘܠܘ ܢܘܢܐ ܪܒܐ ܩܪܐ ܠܗ ܠܬܢܝ̣ܢܐ. ܘܐܦܢ ܬܪܝܢ ܓܢܣܝ̈ܢ ܕܚܝ̈ܘܬܐ ܡܝܢ̈ܝܬܐ ܡܥܗܕ ܟܬܒܐ ܩܕܝܫܐ ܒܗܢܐ ܝܘܡܐ. ܐܠܐ ܡܦܫ̈ܩܢܐ ܥܪܩܝ̣ܢ ܟܕ ܣܝܩܝܢ ܪܝܚ ܕܡܗܘܢ. ܚܙܬܐ ܕܝܢ ܐܝܬ ܕܩܢܝܢ. ܘܐܝܬ ܕܠܐ ܩܢܝܢ ܐܝܟ ܗ̇ܢܘܢ ܩܫ̈ܝܝ ܥܝ̈ܢܐ. ܘܐܝܠܝܢ ܕܡ̣ܢ ܚܝ̈ܘܬܐ ܕܒܡܝ̈ܐ ܕܩܢܝܢ ܒܪܐܢܟܝܐ ܠܐ ܩܢܝܢ ܠܒܐ ܓܪܡܢܐ ܐܝܟ ܣܘܣܝܐ. ܕܝܠܢܐܝܬ ܕܝܢ ܢܘ̈ܢܐ ܠܐ ܩܢܝܢ ܠܫܢܐ. ܐܦܠܐ ܐܫܟ̈ܐ. ܡܐܢ̈ܐ ܕܝܢ ܕܙܪܥܐ. ܩܢܝܢ ܓܦ̈ܐ ܕܝܢ ܡܢܗܘܢ ܡ̇ܢ ܬܪܝܢ ܩܢܝܢ. ܡܢܗܘܢ ܕܝܢ ܐܪܒܥܐ. ܡܢܗܘܢ ܐܦܠܐ ܠܓܡܪ ܩܢܝܢ. ܘܠܘ ܒܟܠܗܘܢ ܢܘ̈ܢܐ ܐܝܬ ܠܡܫܟܚܘ ܕܟܪܐ ܘܢܩܒܬܐ. ܗܐ ܓܝܪ ܗܢܟܗܠܝܣ. ܠܐ ܕܟܪܐ ܐܝܬܘܗܝ ܐܦܠܐ ܢܩܒܬܐ ܐܦܠܐ ܠܓܡܪ ܡܘܠܕ. ܢܘ̈ܢܐ ܕܝܢ ܠܒܪ ܡ̣ܢ ܗ̇ܢܘܢ ܣܗܠܐܟܘܪܝ ܟܕ ܐܟܚܕܐ ܢܦܠܝ̣ܢ ܥܠ ܓܢ̱ܒ ܚܕܕ̈ܐ ܡܫܬܘܬܦܝܢ. ܗܠܝܢ ܕܝܢ ܦܬܝ̈ܐ ܘܛܥܝ̣̈ܢܝ ܕܘܢܒܐ ܐܟܙܢܐ ܕܒܐܛܘܣ ܘܛܪܘܓܘܢ. ܘܟܕ ܢܦܝ̣ܠܝ̣ܢ ܥܠ ܓܢ̱ܒ ܢܩܒܬܐ ܘܟܕ ܪܟܒܝ̣ܢ ܥܠܝܗܘܢ. ܪܝ̣ܢܗܘܣ ܕܝܢ ܘܗ̇ܢܘܢ ܐ̱ܚܪ̈ܢܐ. ܟܕ ܣܘܓܐܐ ܫܝܦܝ̣ܢ ܘܙܪܒܝܢ ܘܚܒܨܝ̣ܢ ܘܚܪܓܝ̣ܢ ܕܘܢܒܬܗܘܢ ܒܚܕܕ̈ܐ ܡܫܬܘܬܦܝܢ. ܣܓܝ̈ܐܐ ܕܝܢ ܡ̣ܢ ܣܠܐܟܝ ܐܦ ܡܬܐܣܪܝܢ ܐܝܟ ܟܠܒ̈ܐ ܟܕ ܡܫܬܘܬܦܝ̣ܢ. ܢܘ̈ܢܐ ܕܝܢ ܡܢܗܘܢ ܠܚ̈ܕܕܐ ܐܟܠܝܢ. ܡܢܗܘܢ ܕܝܢ ܙܒܠܐ ܐܟܠܝܢ ܘܐܝܬ ܕܣܝܢܐ ܘܐܝܬ ܕܥܣܒܐ ܕܒܝܡܐ ܘܐܠܘܥܐ ܘܠܙܪܥܐ ܕܚܕ̈ܕܐ. ܘܐܝܬ ܕܫܘܟܬܐ ܐܟܙܢܐ ܕܩܗܦܐܠܗܐ ܐܘ ܠܙܪܥܐ ܕܝܢ ܕܝܠܗܘܢ ܠܐ ܛܥܡܝ̣ܢ. ܡܐ ܕܝܢ ܕܕܚܠܝܢ ܡܛܫܝܢ ܠܪ̈ܝܫܝܗܘܢ. ܐܝܟ ܗ̇ܘ ܕܠܟܠܗ ܦܓܪܗܘܢ ܛܫܝ̣ܘ. ܡ̣ܢ ܢܘ̈ܢܐ ܕܝܢ ܣܩܐܪܘܣ ܒܠܚܘܕ ܡܬܓܘܪܪ. ܐܟܠܝܢ ܕܝܢ ܒܣܪܐ. ܘܣܘܓܐܗܘܢ ܕܢܘ̈ܢܐ. ܗܢܟܗܠܝܣ ܕܝܢ ܒܡܝ̈ܐ ܡܫܬܬܝܢ̈ܐ ܕܫܦܝܢ ܡܬܬܪܣܝܢ. ܘܡܛܠ ܗܕܐ ܡܐ ܕܨܒܝܢ ܕܢܨܘܕܘܢ ܐܢܝܢ ܫܓܫܝ̣ܢ ܠܣܝܢܐ ܘܐܚܕܝܢ ܠܗܝܢ. ܘܟܕ ܡܝ̈ܬܢ ܕܝܢ ܠܐ ܛܝ̈ܦܢ ܥܠ ܡܝ̈ܐ ܐܝܟ ܫܪܟܐ ܕܢܘ̈ܢܐ. ܐܠܐ ܠܬܚܬ ܫܟ̈ܬܢ. ܠܢܘ̈ܢܐ ܕܝܢ ܙܒ̈ܢܐ ܡܛܝܪ̈ܐ ܠܚܡܝܢ. ܘܒܡܝ̈ܐ ܚܠܝ̈ܐ ܡܬܝܬܪܝܢ. ܟܘܪ̈ܗܢܐ ܕܝܢ ܚܒܠܢܝ̈ܐ ܢܦܠܝ̣ܢ ܒܟܠܗܝܢ ܚܝ̈ܘܬܐ ܘܡܝ̈ܬܢ ܣܛܪ ܡ̣ܢ ܕܒܢܘ̈ܢܐ. ܒܠܚܘܕ ܕܝܢ ܚܕܚ̈ܕܢܐ ܡܢܗܘܢ ܡܬܒܨܨܘ ܡܬܒܨܨܝ̣ܢ. ܟܠܗܘܢ ܕܝܢ ܢܘ̈ܢܐ ܕܣܐܒܘ ܠܐ ܚܫܚܝܢ ܠܘܬ ܡܠܚܐ. ܘܗܝܕܝܢ ܛܒ ܪܘܪ̈ܒܐ ܗܘܝܢ. ܒܕܓܘܢ ܐܦ ܬܘܢܢܘܣ ܒܙܒܢ ܣܒܐ ܐܫܬܟܚ ܕܬܩܠ ܗܘܐ ܚܡܫܬܥܣܪ ܟܟܪ̈ܝ̣ܢ. ܦܬܝܐ ܕܕܘܢܒܗ ܐܝܬܘܗܝ ܬܪܬܝܢ ܐܡܝ̣̈ܢ. ܘܙܪܬܐ ܚܕܐ ܐܝܟ ܕܐܡ̣ܪ ܐܪܝ̣ܣܛܘܣ. ܘܡ̣ܢ ܢܘ̈ܢܐ ܗ̇ܢܘܢ ܡ̇ܢ ܕܒܩܪܢܐܝܬ ܪܗܛܝ̣ܢ. ܪ̈ܚܡܐ ܐܝܬܝܗܘܢ. ܗ̇ܢܘܢ ܕܝܢ ܕܠܐ ܒܥܠܕ̈ܒܒܐ. ܠܐܒܪܐܟܘܣ ܕܝܢ ܣܗܣܛܪܗܘܣ ܟܕ ܛܒ ܣܓܝ ܒܥܠܕ̈ܒܒܐ ܐܢܘܢ. ܐܟܝܐ ܪܗܛܝܢ ܟܡܐ ܙܒܢܝ̈ܢ. ܕܘܠܦܝ̣̈ܢܣ ܕܝܢ ܛܒ ܡܫܝ̈ܢܬܐ ܐܝܬܝܗܝܢ ܘܪ̈ܚܡܢ ܛܠܝ̈ܐ ܘܡܥܕܪ̈ܢ ܠܚܕ̈ܕܐ. ܐܬܚ̈ܙܝ ܕܝܢ ܒܙܒܢ ܕܘܠܦܝ̣̈ܢܣ ܟܕ ܛܥܝ̣̈ܢܢ ܡܝ̣ܬܐ ܕܠܐ ܢܬܐܟܠ ܡ̣ܢ ܢܘ̈ܢܐ. ܘܚܝ̈ܘܬܐ ܕܒܡܝ̈ܐ ܒܒܪܐܢܟܝܐ ܕܝܠܗܝܢ ܡܪ̈ܡܚܢ. ܘܐܝܬ ܡܢܗܝܢ ܕܒܐܒܘܒܐ ܡܕܡ ܕܕܗܠܦܝܘܣ. ܡ̣ܢ ܚܝ̈ܘܬܐ ܕܝܢ ܕܒܡܝ̈ܐ ܟܠܗܘܢ ܩܝܛܘܕܝ. ܐܘܟܝ̣ܬ ܗ̇ܢܘܢ ܕܠܐ ܩܢܝܢ ܒܪܐܢܟܝܐ ܐܟܙܢܐ ܕܒܐܠܗܝܐ ܘܕܠܦܝܣ ܪܐܬܐ ܩܢܝ̈ܢ. ܘܒܗ̇ ܩܢܝ̈ܢ ܢܫܡܬܐ ܘܡܬܢܦ̈ܫܢ.

 

 

 

ܢܝܫܐ ܬܪܝܢܐ ܡܛܠ ܓܢ̈ܣܐ ܕܡܠܐܩܝܐ ܘܗ̇ܢܘܢ ܐ̱ܚܪ̈ܢܐ

 

ܚܝܘ̈ܬܐ ܓܝܪ ܡܝܢ̈ܝܬܐ ܗ̇ܢܝܢ ܬܪ̈ܝܢܬ݀ ܪ̈ܓܠܐ ܘܪ̈ܒܝ̣ܥܝܬ݀ ܪ̈ܓܠܐ ܩܢ̈ܝܬ݀ ܕܡܐ ܐܢܝܢ. ܗ̇ܢܝܢ ܕܝܢ ܣܓܝ̈ܐܬ݀ ܪ̈ܓܠܐ. ܐܝܟ ܣܝܦܗܐ ܐܘܩܪܐܒܘܣ ܕܠܐ ܕܡܐ ܐܢܝܢ. ܡܣܬܒܪ ܕܝܢ ܐܦ ܐܣܦܘܓܐ ܡܢܗܝܢ ܕܚܝ̈ܘܬܐ ܐܝܬܘܗܝ ܘܕܒܝ̣ܩ ܠܫܘܥܐ. ܘܚܝ̈ܘܬܐ ܡܝܢ̈ܝܬܐ ܡ̇ܢ ܩܢ̈ܝܬ݀ ܢܘܗܪܐ ܐܢܝܢ. ܡܢܗܝܢ ܕܝܢ ܠܐ. ܘܩܢ̈ܝܬ݀ ܢܘܗܪܐ ܐܝܬܝܗܝܢ ܗ̇ܢܝܢ ܚܣܚܘ̈ܣܢܝܬܐ ܐܟܙܢܐ ܕܒܐܛܘܣ ܘܛܪܘܓܘܢ. ܘܛܗܘܬܝܣ ܘܣܝܦܝܐ. ܘܒܐܛܪܐܟܘܣ ܘܣܓܝ ܪ̈ܓܠܐ. ܘܠܐ ܩܢ̈ܝܬ݀ ܢܘ̣ܗܪܐ ܐܝܬܝܗܝܢ ܗ̇ܢܝܢ ܓܪ̈ܡܢܝܬܐ. ܐܟܙܢܐ ܕܚܠܝ̣̈ܙܘܢܐ ܘܙܠܦ̈ܬܐ ܘܩܢ̈ܝܬ݀ ܢܘܗܪܐ ܬܘܒ ܡܢܗܝܢ ܪ̈ܟܝ̣ܟܬܐ ܐܢܝܢ. ܐܟܙܢܐ ܕܗܠܝܢ ܕܩܢ̈ܝܢ ܪ̈ܓܠܐ. ܘܐܟܙܢܐ ܕܣܝܦܝܐ ܘܛܐܗܘܬܝܘܣ ܣܓܝ ܪ̈ܓܠܐ ܕܝܢ ܒܣܒ̈ܟܬܗ ܐܝܟ ܕܒܪ̈ܓܠܐ ܡܬܚܫܚ. ܘܣܪܛܢܐ ܒܠܚܘܕ ܐܪܒܥ ܪ̈ܓܠܐ ܩܢܐ ܩܘܕܡܢ̈ܝܬܐ. ܘܡ̣ܢ ܚܝ̈ܘܬܐ ܕܒܡܝ̈ܐ ܐܘܪܕܥܐ ܒܠܚܘܕ ܩܢܐ ܠܫܢܐ. ܘܣܗܠܐܟܘܣ ܕܐܝܬܝܗ̇ ܚܝܘܬܐ ܕܠܝܬ ܠܗ̇ ܪ̈ܓܠܐ. ܘܐܝܬ ܠܗ̇ ܒܪܐܢܟܝܐ. ܘܓܐܠܗ̈ܐ ܘܚܝ̈ܘܬܐ ܝܠܕ̈ܢ ܟܕ ܠܓܘ ܩܕ̈ܡܢ ܝܠܕ̈ܢ ܒܝ̣̈ܥܐ. ܗܟܢܐ ܐܦ ܐܟܕܢܐ. ܘܡ̣ܢ ܚܝ̈ܘܬܐ ܕܒܡܝ̈ܐ. ܗܠܝܢ ܡ̇ܢ ܝܠܕ̈ܬ݀ ܒܝ̣̈ܥܐ ܟܘ̈ܒܐ ܩܢܝ̈ܢ. ܗ̇ܢܝܢ ܕܝܢ ܝܠܕ̈ܬ݀ ܚܝ̈ܘܬܐ ܟܘܒܐ ܚܣܚܘܣܢܝܐ ܘܡܠܐܩܝܐ ܡ̣ܢ ܗ̇ܢܘܢ ܕܪ̈ܝܫܝܗܘܢ ܒܝܢܬ ܪ̈ܓܠܝܗܘܢ ܠܟܪ̈ܣܬܗܘܢ ܐܝܬܝܗܘܢ. ܚܕܪ̈ܝ ܗܢܐ ܓܠܦܢ̈ܐ ܩܢܝܢ ܒܚܘܕܪܐ. ܪ̈ܓܠܝܗܘܢ ܕܝܢ ܟܕ ܬܡܢܐ ܐܝܬܝܗܝܢ ܟܠ ܚܕܐ ܡܢܗܝܢ ܥܦܝ̣ܦܬܐ ܗ̱ܝ ܣܛܪ ܡ̣ܢ ܣܓܝ ܪ̈ܓܠܐ. ܘܗ̣ ܗܢܐ ܒܣܒܟܬܗ ܗ̇ܝ ܐ̱ܚܪܝܬܐ ܕܙܥܘܪܝܐ ܘܚܘܪܐ ܘܦܠܝ̣ܓ ܪܝܫܗ̇ ܠܬܪܝܢ ܠܘܬ ܙܘܘܓܐ ܡܬܚܫܚ. ܘܕܝ̣ܠܢܐܝܬ ܩܢܝܢ ܣܝܦܗ ܐܘܛܗܘܬܕܝܘܣ ܬܪ̈ܬܝܗܝܢ ܪ̈ܥܝܬܐ ܐܪ̈ܝ̣ܟܬܐ ܕܒܗܝܢ ܡܝܬܝܢ ܣܝܒܪܬܐ ܠܦܘܡܗܘܢ. ܘܡܐ ܕܡܬܬܥܝܪ ܡܚܫܘܠܐ ܣܒܟܝ̣ܢ ܠܗܝܢ ܘܡܟܬܪܝܢ ܨܝܕ ܫܘ̈ܥܐ. ܣܓܝ ܪ̈ܓܠܐ ܕܝܢ ܩܕܡ ܚܠܝ̣ܠܗ ܠܥܠ ܡ̣ܢ ܣܒ̈ܬܗ ܩܢܐ ܐܒܘܒܐ ܚܠܝ̣ܠܐ. ܕܒܗ ܠܡܝ̈ܐ ܡܩܒܠ ܘܐܫܪ. ܡܫܚܠܦ ܕܝܢ ܓܘܢܗ ܠܦܘܬ ܫܘ̈ܥܐ. ܐܟܙܢܐ ܕܒܡܐܠܐܷܘܢ ܠܦܘܬ ܐܪܥܐ. ܘܡ̣ܢ ܗܠܝܢ ܡ̇ܢ ܘܠܐ ܚܕܐ ܐܝܬ ܠܗ̇ ܡܐܢ̈ܝ ܓܘܐ. ܐܠܐ ܐܢ ܒܠܚܘܕ ܗ̇ܝ ܕܡܬܩܪܝܐ ܡܘܣܛܝ̣ ܕܡܥܝܐ ܐܘܟܡܐ. ܘܐܦ ܒܝ̣̈ܥܐ ܕܝܢ ܩܢܝܢ ܣܓܝ̈ܐܬܐ ܐܝܟ ܟܐܦ̈ܐ ܕܒܪܕܐ. ܒܦܘܢܝ̣ܩܝ̣ ܕܝܢ ܣܪܛܢܐ ܐܝܬ ܕܡܬܩܪܝܢ ܪ̈ܟܫܐ. ܒܕܒܩܠܝ̣ܠܘܬܐ ܣܓܝܐܬܐ ܪܗܛܝ̣ܢ. ܟܠܗܘܢ ܕܝܢ ܣܪ̈ܛܢܐ ܕܥܡ ܦܪ̈ܣܘܥܝܗܘܢ ܥܣܪ ܪ̈ܓܠܐ ܩܢܝܢ. ܘܚܠܝ̣̈ܙܘܢܐ ܡ̇ܢ ܡܢܗܘܢ ܚܕܢ̈ܝܝ ܚܨܦܐ ܐܝܬܝܗܘܢ. ܐܟܙܢܐ ܕܚܠܝ̣̈ܙܘܢܐ ܗ̇ܢܘܢ ܕܐܪ̈ܓܘܢܐ. ܡܢܗܘܢ ܕܝܢ ܬܪ̈ܝܢܝ ܬܪ̈ܥܐ ܐܝܟ ܗ̇ܢܘܢ ܕܡܬܩܪܝܢ ܡܣܘܪܩܐ ܘܡܘܐܩܗܘܣ ܕܐܝܬܝܗܝܢ ܙܠܦ̈ܬܐ. ܘܐܝܬܝܗܘܢ ܗܠܝܢ ܕܟܕ ܡܬܬܚܕܝ̣ܢ ܡܣܬܒܪܝ̣ܢ ܕܡܦܪܚ ܦܪܚܝܢ. ܘܡܢܗܘܢ ܡ̇ܢ ܕܗܠܝܢ ܟܘܒܢܝ̈ܐ ܐܢܘܢ ܘܕܠܐ ܒܣܪܐ ܐܝܟ ܩܘܦܕܐ ܕܝܡܐ ܡܢܗܘܢ ܕܝܢ ܒܣܪ̈ܢܝܐ ܘܕܠܐ ܟܘ̈ܒܐ. ܐܝܟ ܦܗܠܘܪܝܕܗܣ. ܐܩܐܠܝܦܝ ܕܝܢ ܕܒܝ̣ܩܐ ܡ̇ܢ ܐܦ ܗ̇ܝ ܘܕܠܐ ܓܪܡܐ. ܘܚܝܐ ܡ̣ܢ ܚܝ̈ܘܬܐ ܕܢܦ̈ܠܢ ܥܠ ܫܘܥܐ܆ ܘܣܒܟܐ ܒܗܝܢ ܘܐܟܠܐ ܠܗܝܢ. ܘܠܝܬ ܒܗ̇ ܝܬܝ̣ܪܘܬܐ. ܩܐܪ̈ܒܘ ܕܝܢ ܘܐܣܛܘܐܩܘ ܘܥܩܝ̣̈ܣܐ ܘܟܠܗܘܢ ܪ̈ܟܝ̣ܟܝ ܚܨܦܐ ܥܠ ܟܣܣܬܐ ܡܫܬܘܬܦܝܢ. ܣܪ̈ܛܢܐ ܕܝܢ ܡ̣ܢ ܓܒܝ̈ܗܘܢ ܩܘܕ̈ܡܢܝܐ. ܡܠܐܩܝܐ ܕܝܢ ܣܓܝ̈ܐܝܝ ܪ̈ܓܠܐ ܘܣܝܦܝܗ. ܒܦܘܡܝ̈ܗܘܢ ܡܬܥܪܙܠܝ̣ܢ. ܟܕ ܡܬܥܦܩܝ̣ܢ ܒܣܒ̈ܟܬܗܘܢ. ܘܡܛܠ ܚܪܕܢܐ ܕܢܗܪܐ ܐܡܪܝܢ ܕܝܠܕ ܫܬܝܢ ܒܝ̣̈ܥܐ ܘܝܬܒ ܥܠܝܗܝܢ ܫܬܝܢ ܝܘ̈ܡܝܢ. ܓܠܐ ܕܝܢ ܡܐ ܕܐܟܠ ܡ̣ܢ ܒܣܪܐ ܕܐܟܕܢܐ. ܐܟܠ ܡ̣ܢ ܒܬܪܗ ܐܘܪܝܓܐܢܘܢ. ܘܐܠܐ ܡܐܬ. ܘܐܘܪ̈ܕܥܐ ܠܘ ܒܝ̣̈ܥܐ ܝܠܕܝܢ. ܐܠܐ ܐܝܟ ܡܥܝ̈ܐ ܩܛܝ̣̈ܢܐ ܕܡܠܝܢ ܦܪ̈ܕܐ ܐܘܟܡ̈ܬܐ ܐܝܟ ܩܡܚܐ. ܘܒܩܘܪܝܢܝ ܡ̇ܢ ܠܐ ܩܒܝܢ ܐܘܪ̈ܕܥܐ.

 

 

 

ܢܝܫܐ ܬܠܝܬܝܐ ܡܛܠ ܦܪ̈ܚܬܐ ܚܠܒܢܝ̈ܬ ܓܦ̈ܐ

 

ܕܒܘ̣ܪ̈ܝܬܐ ܡ̇ܢ ܓܝܪ ܘܩܡ̈ܨܐ ܘܕܒܒ̈ܐ. ܒܗ̇ܝ ܕܡܫܘܬܦܝܢ ܠܣܝܦܝܐ ܘܩܐܪܒܘܣ ܘܣܪ̈ܛܢܐ ܒܣܓܝܐܘܬ ܪ̈ܓܠܐ. ܐܟܘܬܗܘܢ ܐܦ ܗ̣ܢܘܢ ܕܠܐ ܕܡܐ ܐܝܬܝܗܘܢ. ܐܝܟܢܐ ܕܡ̣ܢ ܬܫܪܝ ܦܪܘܛܐܣܝܣ ܟܠܢܝܬܐ ܕܐܡܪܐ. ܕܟܠ ܚܝܘܬܐ ܣܓܝܐܬ݀ ܪ̈ܓܠܐ܆ ܕܠܐ ܕܡܐ. ܘܗ̣ܢܝܢ ܗܠܝܢ ܦܪ̈ܚܬܐ ܘܓܠܝ̈ܬ݀ ܓܦ̈ܐ ܐܢܝܢ. ܐܟܙܢܐ ܕܦܪ̈ܚܕܘܕܐ ܘܩܡ̈ܨܐ ܘܕܒܘܪ̈ܐ ܘܕܒܘܪ̈ܝܬܐ. ܘܕܒܒ̈ܐ ܘܡܫܘ̈ܛܐ. ܐܘ ܟܣ̈ܝܬ݀ ܓܦܐ ܐܝܟ ܓܢ̈ܣܐ ܕܚܒܫܘ̈ܫܐ. ܘܡ̣ܢ ܗܠܝܢ ܡ̇ܢ ܗ̇ܢܝܢ ܬܪ̈ܝܢܬ݀ ܓܦ̈ܐ. ܩܘܕܡܢܝܬ݀ ܥܘܩܣܐ ܐܢܝܢ. ܐܟܙܢܐ ܕܕܒܒܐ ܘܗܡܦܝܣ ܘܐܣܛܐܪܘܣ. ܘܪ̈ܒܝ̣ܥܝܬ݀ ܓܦ̈ܐ ܒܣܬܪ̈ܝܬ݀ ܥܘܩܣܐ ܐܢܝܢ. ܐܟܙܢܐ ܕܕܒܘܪ̈ܐ ܘܕܒܘܪ̈ܝܬܐ. ܘܕܒܘܪ̈ܐ ܡ̇ܢ ܘܕܒܒ̈ܐ ܒܓܦܝ̈ܗܘܢ ܙܝܡܝܢ ܡܐ ܕܦܪܚܝܢ. ܘܩܡ̈ܨܐ ܟܕ ܟܪ̈ܥܝܗܘܢ ܣܘܟܢܝ̈ܐ ܫܝܦܝܢ ܝܗܒܝܢ ܩܠܐ. ܒܩ̈ܐ ܕܝܢ ܒܦܘܡܗܘܢ ܠܥܙܝܢ. ܘܕܒܘܪ̈ܐ ܘܕܒܘܪ̈ܝܬܐ ܡ̣ܢ ܠܓܘ ܩܢܝܢ ܥܘܩܣܐ. ܗ̇ܘ ܕܡܐ ܕܫܒܩܝܢ ܠܗ ܒܒܣܪܐ ܟܕ ܕܒܨܝܢ ܡܝܬܝܢ. ܘܡ̣ܢ ܚܠܒܢܝ̈ܬ݀ ܓܦ̈ܐ. ܐܝܬ ܕܩܪ̈ܢܐ ܩܢ̈ܝܢ ܩܕܡ ܥܝܢܝ̈ܗܝܢ. ܘܬܪܝܢ ܟܪ̈ܥܐ ܐܪ̈ܝ̣ܟܐ ܐܝܟ ܣܘܟܢܝ̈ܐ ܕܟܦܝ̣ܦܝܢ ܠܒܣܬܪܐ. ܘܣܘܓܐܗܝܢ ܚܕܢܝ̈ܬ݀ ܡܥܝܐ ܐܢܝܢ ܡ̣ܢ ܦܘܡܗܝܢ ܠܡܦܩܢܗܝܢ. ܘܒܕܒܒ̈ܐ ܢܩ̈ܒܬܐ ܝܬܝܪ ܪܘܪ̈ܒܢ ܡ̣ܢ ܕܟܪ̈ܐ. ܗܟܘܬ ܘܒܐܘܪ̈ܕܥܐ ܘܚܘܘ̈ܬܐ ܘܐܡܩܬܐ. ܙܪܥܐ ܕܝܢ ܕܕܒܘܪ̈ܝܬܐ܆ ܐ̱ܢܫܝ̈ܢ ܡ̣ܢ ܗܒܒ̈ܐ ܕܙܝܬܐ ܐܡܪܝܢ ܕܗܘܐ. ܐ̱ܢܫܝ̈ܢ ܕܝܢ ܕܡ̣ܢ ܙܘܘܓܐ ܗܘܐ ܐܡܪܝܢ. ܟܕ ܡܠܟܝ̈ܗܘܢ ܡܫܬܘܬܦܝܢ ܠܗܝܢ. ܡܠܟ̈ܐ ܕܝܢ ܕܕܒܘܪ̈ܝܬܐ ܩܢܝܢ ܪܒܘܬܐ ܚܕ ܬܪܝܢ ܕܢܩܒܬܐ. ܐ̱ܚܪ̈ܢܐ ܕܝܢ ܐܡܪܝܢ ܕܩܝܦܝܢܗܣ ܗ̇ܢܘܢ ܕܠܐ ܩܢܝܢ ܥܘܩ̈ܣܐ. ܘܕܟܪ̈ܐ ܒܠܚܘܕ ܐܝܬܝܗܘܢ ܡܫܬܘܬܦܝ̣ܢ ܠܗܝܢ. ܡܠܟ̈ܐ ܕܝܢ ܕܕܒܘܪ̈ܝܬܐ. ܠܐ ܩܢܝܢ ܥܘܩ̈ܣܐ ܐܝܟ ܕܒܘܪ̈ܝܬܐ. ܘܡܠܟ̈ܐ ܣܓܝ̈ܐܐ ܐܝܬ ܒܟܠ ܚܕܐ ܡ̣ܢ ܟܘ̣ܪ̈ܐ. ܐܒܕܝܢ ܕܝܢ ܡܐ ܕܠܐ ܗܘܐ ܒܗܘܢ ܡܠܟܐ. ܗ̇ܘܐ ܕܝܢ ܕܒܫܐ ܒܙܒܢܐ ܕܓܠܝ̣ܙܘܬ ܡܛܪܐ. ܙܪܥܐ ܕܝܢ ܒܙܒܢܐ ܡܛܪܝܐ. ܡܝܬܪ ܕܝܢ ܕܒܫܐ ܬܫܪܝܝܐ. ܘܩܐܪܘܬܐ ܡ̇ܢ ܡ̣ܢ ܗܒܒܐ ܐܝܬܝܗ̇. ܡܠܛܐ ܕܝܢ ܡ̣ܢ ܕܡܥ̈ܐ ܕܐܝܠܢ̈ܐ. ܕܒܫܐ ܕܝܢ ܡ̣ܢ ܐܐܪ ܘܛܠܐ. ܫܘܘܕܥܐ ܕܝܢ ܢܗܘܐ ܠܟ ܥܠ ܗܕܐ ܐܡܢ ܗ̇ܝ ܕܒܬܪܝܢ ܝܘ̈ܡܬܐ ܚܙܝܢܢ ܕܡܠܝܐ ܩܝܛܐܪܘ ܡܕܡ ܡܝܢܐ. ܡܬܥܒܐ ܕܝܢ ܒܥܣܪܝܢ ܝܘ̈ܡܬܐ. ܠܩ̈ܛܢ ܕܝܢ ܕܒܘܪ̈ܝܬܐ ܡ̣ܢ ܟܠܗܘܢ ܗܒܒ̈ܐ ܕܒܫܘܪ̈ܢܩܐ ܐܝܬܝܗܘܢ. ܟܕ ܘܠܐ ܠܡܕܡ ܡ̣ܢ ܦܐܪ̈ܐ ܡܣܓ̈ܦܢ. ܘܠܩܐܪܘܬܐ ܡ̇ܢ ܛܥ̈ܢܢ ܕܒܘܪ̈ܝܬܐ ܒܟܪ̈ܥܝܗܝܢ. ܠܕܒܫܐ ܕܝܢ ܒܦܘܡܝ̈ܗܝܢ ܠܩ̈ܛܢ. ܝܬܒ̈ܢ ܕܝܢ ܥܠ ܙܪ̈ܥܝܗܝܢ ܐܝܟ ܦܪ̈ܚܬܐ. ܙܪ̈ܥܝܗܝܢ ܕܝܢ ܚܘܪ ܘܩܕܡܝܬ݀ ܬܘܠܥ̈ܐ ܡܬܝ̈ܠܕܢ. ܐܝܛܐ ܕܝܢ ܡܬܪ̈ܒܝܢ ܕܒܘܪ̈ܝܬܐ ܗܘ̈ܝܢ. ܡ̣ܢ ܡܠܟ̈ܐ ܕܝܢ ܬܘܠܥܐ ܠܐ ܡܬܝܠܕ. ܐܠܐ ܡܚܕܐ ܕܒܘܪܬܐ. ܙܒܢܐ ܕܝܢ ܕܕܒܘܪ̈ܝܬܐ ܐܝܬܘܗܝ ܫܬ ܫܢܝ̣̈ܢ. ܘܐܝܬ ܕܫܒܥ. ܡܐ ܕܝܢ ܕܡܬܬܢ̈ܢ ܕܒܘܪ̈ܝܬܐ܆ ܣܓܝ ܫܩ̈ܠܢ ܡ̣ܢ ܕܒܫܐ. ܐܟܡܢ ܕܥܬܝܕ ܕܢܐܒܕ ܡܢܗܝܢ. ܩܕܡ ܗܟܢ ܕܝܢ ܚܝ̈ܣܢ ܥܠܘܗܝ. ܘܡܚܣ̈ܢܢ ܠܗ. ܩ̈ܛܠܢ ܕܝܢ ܒܐܡܝ̣ܢܘ ܠܩܝܦܝܢܗܣ. ܡܐ ܕܢܗܘܐ ܒܨܝ̣ܪ ܕܒܫܐ. ܘܠܡܠܟܝ̈ܗܝܢ ܒܝ̈ܫܐ. ܘܡܢܗܝܢ ܡ̇ܢ ܗܒܒ̈ܐ ܛܥ̈ܢܢ. ܡܢܗܝܢ ܕܝܢ ܡܝ̈ܐ. ܘܡܢܗܝܢ ܠܗܠܝܢ ܫܚ̈ܩܢ. ܘܡܢܗܝܢ ܠܟܟܪ̈ܝܬܐ ܓܒ̈ܠܢ. ܟܕ ܡܫܪ̈ܝܢ ܡ̣ܢ ܬܛܠܝ̣ܠܐ. ܘܠܚܪܘܪ̈ܐ ܬܪ̈ܝܢܝ ܦܘ̈ܡܐ ܥܒ̈ܕܢ. ܘܠܗ̇ܢܝܢ ܕܡܝ̈ܬܢ ܡܦ̈ܩܢ ܡ̣ܢ ܟܘܪ̈ܐ. ܘܣܢܝܢ ܟܠ ܪܝܚܐ ܣܪܝܐ. ܫܕ̈ܝܢ ܕܝܢ ܙܒܠܐ ܟܕ ܦܪ̈ܚܢ ܡܛܠ ܢܩܕܘܬܗܘܢ. ܐܘ ܟܠܗܝܢ ܒܚܕܐ ܟܟܪܝ̣ܬܐ. ܚܕ̈ܝܢ ܕܝܢ ܒܢܩܫܐ. ܒܕܓ ܢ ܗ̇ܢܘܢ ܕܡܟܢܫܝܢ ܠܗܝܢ ܢܩܫܝ̣ܢ ܒܦܣ̈ܦܣܐ. ܠܐ ܕܝܢ ܓܠܝܐ. ܕܐܢ ܡܛܠ ܗܢܝܐܘܬܐ ܡܬܟܢ̈ܫܢ ܐܘ ܡܛܠ ܕܚܠܬܐ. ܘܦܪ̈ܚܕܘܕܐ ܡ̇ܢ ܟܕ ܦܪ̈ܚܬܐ ܐܢܝܢ ܘܓܦ̈ܐ ܡܫܟܢ̈ܝܬܐ ܩܢ̈ܝܢ. ܐܝܟ ܚܝܘ̈ܬܐ ܕܐܪ̈ܒܥܬ݀ ܪ̈ܓܠܐ. ܐܪܒܥ ܪ̈ܓܠܐ ܩܢܝܢ. ܘܒܟܪܣܐ ܒܛܢ̈ܢ ܘܛܥ̈ܢܢ. ܘܡ̣ܢ ܒܣܬܪܗܝܢ ܡܝܢ̈ܩܢ ܝܠܕܝ̈ܗܝܢ. ܘܫܢ̈ܐ ܐܝܬ ܠܗܝܢ.

 

 

 

ܢܝܫܐ ܪܒܝܥܝܐ ܡܛܠ ܦܪ̈ܚܬܐ ܣܕܝ̣ܩܬ݀ ܓܦ̈ܐ

 

ܘܗ̇ܢܝܢ ܗܠܝܢ ܐܘ ܚܪ̈ܡܬܐ ܐܟ̈ܠܬ݀ ܒܣܪܐ ܐܢܝܢ. ܘܡܬܩܪ̈ܝܢ ܛܝܪܐ ܐܝܟ ܢܫܪܐ ܘܟܘܕܪܐ. ܐܘ ܡܫܝ̈ܢܬܐ ܐܟ̈ܠܬ݀ ܥܣ̈ܒܐ ܐܢܝܢ ܘܒܫܡܐ ܓܘܢܝܐ ܦܪܚܬܐ ܡܬܩܪ̈ܝܢ ܐܝܟ ܝܘ̈ܢܐ ܘܨܦܪ̈ܐ. ܐܘ ܡܨܥܬ݀ ܗܠܝܢ ܐܢܝܢ ܐܝܟ ܩܪܘܢܐ ܘܩܪܩܣܐ. ܘܦܪ̈ܚܬܐ ܬܘܒ ܡܢܗܝܢ ܡ̇ܢ ܝܗܠܝ̈ܬܐ ܐܢܝܢ ܐܘܟܝܬ ܒܩܪ̈ܢܝܬܐ. ܡܢܗܝܢ ܕܝܢ ܠܚܘ̈ܕܝܬܐ. ܟܠܗܝܢ ܕܝܢ ܚܪ̈ܡܬܐ ܟܦܝ̣ܦܬ݀ ܛܦܪ̈ܐ ܠܐ ܒܩܪ̈ܢܝܬܐ ܐܢܝܢ. ܘܡܢܗܝܢ ܕܦܪ̈ܚܬܐ ܡ̣ܢ ܚܕ ܪܝܫܐ ܡܬܕܒܪ̈ܢ܆ ܐܘ ܩܘܪ̈ܠܐ. ܡܢܗܝܢ ܕܝܢ ܠܐ. ܐܝܟ ܗ̇ܢܝܢ ܕܫܪܟܐ. ܘܡܢܗܝܢ ܡ̇ܢ ܣܓܝ̈ܐܬ݀ ܙܘܘܓܐ ܐܢܝܢ ܐܝܟ ܚܓܠܐ ܘܬܪܢܘܓܠܐ. ܘܡܢܗܝܢ ܠܐ. ܐܝܟ ܥܘܪ̈ܒܐ ܚܕܐ ܠܟܡܐ ܓܝܪ ܡܙܕܘ̈ܓܢ. ܘܡܢܗܝܢ ܡܬܟܚܕܢ̈ܝܬܐ ܐܢܝܢ ܐܟܙܢܐ ܕܘܙ̈ܐ. ܡܢܗܝܢ ܕܝܢ ܚܣܡ̈ܬܐ ܘܪ̈ܚܡܬ݀ ܫܘܦܪܐ ܐܢܝܢ ܐܟܙܢܐ ܕܛܘܣܐ. ܐܝܬ ܕܝܢ ܘܦܪܚܬܐ ܠܚܘܕܝܬܐ ܕܐܪܒܥ ܓܦ̈ܐ ܥܡ ܐܪܒܥ ܪ̈ܓܠܐ ܩܢܝܐ ܗ̇ܝ ܕܐܦܝܡܗܪܘܢ ܡܬܩܪܝܐ ܐܘܟܝܬ ܒܪܬ݀ ܝܘܡܐ. ܡܛܠ ܕܒܚܕ ܝܘܡܐ ܡܬܝܠܕܐ ܘܣܐܒܐ ܘܡܝܬܐ. ܘܦܪ̈ܚܬܐ ܬܘܒ ܡܢܗܝܢ ܡ̇ܢ ܣܕܝ̣̈ܩܬ݀ ܪ̈ܓܠܐ ܐܢܝܢ ܐܟܙܢܐ ܕܥܘܪܒܐ. ܡܢܗܝܢ ܕܝܢ ܡܚܝ̈ܕܬ݀ ܪ̈ܓܠܐ. ܐܟܙܢܐ ܕܡܝܣܘ̈ܟܐ. ܘܡܢܗܝܢ ܦܬܝ̈ܬ݀ ܠܫܢܐ ܐܝܟ ܗ̇ܢܝܢ ܕܡܡܪ̈ܝܢ ܒܩ̈ܠܐ ܕܒܪܢܫܐ. ܐܟܙܢܐ ܕܦܢܣܛܝܩܘܣ ܐܘܟܝܬ ܒܒܓܐ. ܘܡܢܗܝܢ ܬܘܒ ܩܢ̈ܝܢ ܢܒܪ̈ܐ ܘܥܘ̈ܩܣܐ ܐܟܙܢܐ ܕܬܪܢܘܓܠܐ. ܠܝܬ ܕܝܢ ܦܪܚܬܐ ܕܐܟܚܕܐ ܟܦܝ̣ܦܬ݀ ܛܦܪ̈ܐ ܘܩܢܝܬ݀ ܢܒܪ̈ܐ ܐܝܬܝܗ̇. ܘܦܪ̈ܚܬܐ ܕܩܢ̈ܝܢ ܟܪ̈ܒܠܬܐ. ܡܢܗܝܢ ܡ̇ܢ ܟܢܘܫܝܐ ܕܓܠܦܢ̈ܐ ܡܩܝܡܐ ܟܪܒܠܬܗܝܢ. ܡܢܗܝܢ ܕܝܢ ܡܢܗ̇ ܘܠܗ̇ ܐܟܙܢܐ ܕܬܪܢܘܓܠܐ. ܡܢܗܝܢ ܕܝܢ ܐܝܟ ܩܘܪܘܡܘܣ ܡܕܡ ܩܢܝܢ ܚܠܦ ܟܪܒܠܬܐ ܐܟܙܢܐ ܕܛܘܣܐ. ܘܣܓܝ̈ܐܬܐ ܕܐܝܬܝܗܝܢ ܕܒܘܝܢܐ ܡܬܚܙ̈ܝܢ ܒܩܘܪ̈ܠܐ ܘܒܡܠܟܝ̈ܗܘܢ ܘܒܟܠܗܝܢ ܗܠܝܢ ܐ̱ܚܪ̈ܢܝܬܐ ܗ̇ܢܝܢ ܓܝܪ ܣܓܝ ܦܪ̈ܘܚܬܐ ܒܫܩܝ̣̈ܦܐ ܦܣܝ̣̈ܩܐ ܡܩ̈ܢܢ. ܐܝܟ ܢܫܪܐ ܘܒܘܙܝ̣ܩܐ. ܗ̇ܢܝܢ ܕܝܢ ܡܚܝ̣̈ܠܬܐ ܥܠ ܐܪܥܐ ܐܟܙܢܐ ܕܚܓܠܐ. ܐ̱ܚܪ̈ܢܝܬܐ ܕܝܢ ܐܦܠܐ ܥܠ ܐܝܠܢ̈ܐ ܝܬܒ̈ܢ ܐܟܙܢܐ ܕܩܘ̣ܦܫܝ̈ܢܐ. ܝܘ̈ܢܐ ܕܝܢ ܠܐ ܨܒ̈ܝܢ ܕܠܕܟܪ̈ܐ ܣܓܝ̈ܐܐ ܢܫܬܘ̈ܬܦܢ. ܐܠܐ ܟܕ ܡܪ̈ܡܠܢ. ܘܟܕ ܚܒ̈ܠܐ ܚܐܫܐ ܢܩܒܬܐ. ܩܪܒ ܕܟܪܐ ܘܡܥܕܪ ܠܗ̇. ܘܠܒܢܘ̈ܗܝ ܡܠܥܣ ܡܠܚܘܬܐ ܘܝܗܒ ܠܗܘܢ ܒܦܘܡܗܘܢ. ܟܕ ܡܓܪܓ ܐܢܘܢ ܠܘܬ ܣܝܒܪܬܐ. ܢܫܪܐ ܬܠܬ ܒܝ̣ܥܝ̈ܢ ܝܠܕ. ܘܬܪܬܝܢ ܦܥ̈ܢ. ܘܚܕܐ ܦܐܕܐ. ܘܐܦ ܡ̣ܢ ܬܪܬܝܢ ܠܚܕܐ ܡܦܩ. ܚܓ̈ܠܐ ܕܝܢ ܬܪܝܢ ܓܙܪ̈ܝܢ ܥܒܕܝ̣ܢ ܕܒܝ̣̈ܥܐ ܘܥܠ ܚܕ ܡ̣ܢ ܓܙܪܐ ܕܟܪܐ ܝܬܒ. ܥܠ ܐ̱ܚܪܢܐ ܢܩܒܬܐ. ܘܡܦܥ ܟܠ ܚܕ ܡܢܗܘܢ ܘܡܬܪܣܐ ܠܦܪ̈ܘܓܘܗܝ. ܒܘܙܝ̣ܩܐ ܕܝܢ ܟܕ ܒܣܪܐ ܚܝܐ ܐܟܠ. ܠܐ ܐܟܠ ܠܒܐ. ܦܪܘܓܐ ܕܝܢ ܕܟܘܕܪܐ ܠܝܬ ܐ̱ܢܫ ܕܚܙܐ ܩܢܗ. ܬܪܢܘܓܠ ܒܪܐ ܒܛܘܪܐ ܡܩܢ ܘܥܒܕ ܩܝ̣̈ܢܬܐ. ܩܘܩܢܘܣ ܕܝܢ ܪܩܝ̣ܥ ܪ̈ܓܠܐ ܐܝܬܘܗܝ ܘܪܚܡ ܡܝ̈ܐ ܘܐܓܡܢܝܐ ܘܫܦܝܪ ܣܝܒܪܬܐ ܘܫܦܝܪ ܕܘܒܪܐ. ܘܫܦܝܪ ܥܝ̈ܕܐ. ܥܒܕ ܩܝ̣ܢܬܐ ܕܝܢ ܐܝܬܘܗܝ ܘܝܬܝܪܐܝܬ ܒܫܘܠܡ ܚܝܘ̈ܗܝ. ܟܕ ܦܪܚ ܕܝܢ ܠܝܡܐ܆ ܡܐ ܕܡ̣ܢ ܪܘܚܐ ܠܥܘܡ̈ܩܘܗܝ ܢܬܕܒܪ܇ ܚܢܝ̣ܓܐܝܬ ܩܥܐ. ܐܟܡ̇ܢ ܕܥܬܝ̣ܕ ܕܢܡܘܬ. ܠܐܒܗܝ̈ܗܘܢ ܕܝܢ ܡܬܪܣܝܢ ܦܝܠܪ̈ܓܐ. ܡ̣ܢ ܦܪ̈ܚܬܐ ܕܝܢ ܐܢܬܘܣ ܒܠܚܘܕ ܐܝܬܘܗܝ ܚܓܝ̣ܪܐ ܒܟܝܢܗ. ܒܚܕܐ ܪܓܠܐ. ܚܕܐ ܠܟܡܐ ܕܝܢ ܡܫܬܟܚ. ܥܘܪܒܐ ܕܝܢ ܘܩܪܘܢܐ ܠܐ ܡܚܠܦܝܢ ܕܘܟ̈ܝܬܗܘܝ ܐܦܠܐ ܚܠܕܝܢ ܒܢܩܥܐ. ܩܘܪ̈ܢܐ ܕܝܢ ܡ̣ܢ ܐܬܪ̈ܘܬܐ ܓܪ̈ܒܝܝܐ ܠܬܝܡ̈ܢܝܐ ܚܙܩܝ̣ܢ ܒܣܬܘܐ. ܘܡ̣ܢ ܕܪܝܫ ܥܛܦܝ̣ܢ.  ܩܘܩܩܘܟܝܘܣ ܕܝܢ ܒܩܢܐ ܢܘܟܪܝܐ ܝܠܕ ܘܡܬܪܣܐ. ܟܡܐ ܙܒܢܝ̈ܢ ܕܝܢ ܐܦ ܠܦܪ̈ܘܓܘܗܝ ܕܝܠܗ ܕܬܡܢ ܣܢܐ ܘܡܦܩ ܛܪܕ. ܒܗ̇ܝ ܕܚܙܐ ܠܗ̇ܢܘܢ ܕܝܬܝܪ ܫܦܝܪܝܢ. ܘܡܛܠ ܡܚܝ̣ܠܘܬܗ. ܟܕ ܠܐ ܡܬܡܨܐ ܕܢܬܪܣܐ ܠܒܢܘ̈ܗܝ ܠܡܐܟܘܠܬܐ ܝܗܒ ܠܗܘܢ. ܩܘܦܣܗܠܗ ܕܝܢ ܒܟܘ̣ܪ̈ܐ ܕܕܒܘܪ̈ܝܬܐ ܡܩ̈ܢܢ ܘܡܛܠ ܗܕܐ ܗܟܢܐ ܡܬܩܪ̈ܝܢ. ܗܓܐܘܬܐܠܝܣ ܕܝܢ ܟܡܐ ܙܒܢܝ̈ܢ ܡܝܢܩ ܠܥܙ̈ܐ ܟܕ ܦܪܚ ܥܡܗܝܢ ܟܐܡܬ ܡܢܗܝܢ ܝܢܩ. ܢܫܪܐ ܕܝܢ ܣܓܝ ܓܢ̈ܣܐ ܗ̣ܘ. ܘܟܕ ܣܐܒ ܡܬܟܦܦ ܡܩܘܙܗ. ܐܝܟܢܐ ܕܢܡܘܬ ܡ̣ܢ ܟܦܢܐ. ܡܛܠ ܕܠܐ ܡܨܐ ܕܢܦܪܩ ܠܣܦܬܗ ܬܚܬܝܬܐ. ܨܐܕ ܕܝܢ ܠܐܪ̈ܢܒܐ ܘܠܬܥ̈ܠܐ ܘܠܒ̈ܢܝ ܐܝ̈ܠܐ. ܣܓܝ ܕܝܢ ܚܪܝ̣ܦ ܚܙܝܗ. ܘܡ̣ܢ ܒܘܙܝ̣ܩܐ ܕܝܢ ܝܬܝܪ ܚܝܠܬܢ. ܗ̇ܘ ܕܡܬܩܪܐ ܛܪܝܘܪܟܝܘܣ ܐܘܟܝܬ ܬܠܝ̣ܬܝ ܐܫ̈ܟܐ. ܣܓܝܐܝܢ ܕܝܢ ܓܢ̈ܣܝ ܒܘܙܝ̣̈ܩܐ ܘܟܠܗܘܢ ܒܥܠܕ̈ܒܒܐ ܐܢܘܢ ܝܘ̈ܢܐ. ܬܪ̈ܢܓܠܬܐ ܕܝܢ ܐܢܗܘ ܕܙܟ̈ܝܢ ܠܬܪ̈ܢܘܓܠܐ܆ ܩܥ̈ܝܢ. ܘܡܘܥ̈ܝܢ ܟܪܒܠܬܐ ܘܢܒܪܐ. ܘܐܝܬ ܕܟܪܐ ܕܟܕ ܡܝܬܐ ܢܩܒܬܐ ܡܬܪܣܐ ܠܦܪ̈ܘܓܝܗ̇ ܘܡܬܪܟܒ ܘܠܐ ܪܟܒ. ܠܦܪ̈ܚܬܐ ܕܝܢ ܚܠܦ ܐܝܕܐ ܐܝܬܘܗܝ ܡܩܘܙܐ. ܠܛܝܪܐ ܕܝܢ ܘܠܘܬ ܬܘܩܦܐ. ܐܝܟܢܐ ܕܐܦ ܛܦܪ̈ܐ ܪܘܪ̈ܒܬܐ. ܐܦ ܓܝܪ ܢܩܪ̈ܝ ܒܠܘܛܐ ܡܩܘܙܐ ܚܝܠܬܢܐ ܩܢܝܢ. ܘܠܦܪ̈ܚܬܐ ܗ̇ܢܝܢ ܪ̈ܩܝ̣ܥܬ݀ ܪ̈ܓܠܐ. ܘܠܗ̇ܢܝܢ ܕܒܡܝ̈ܐ. ܠܘܬ ܗ̇ܝ ܕܡ̣ܢ ܥܘܡܩܐ ܢܬܦ̈ܢ ܡܕܡ. ܡܛܠ ܗܕܐ ܐܦ ܫܩܝ̈ܗܝܢ ܐܪ̈ܝ̣ܟܢ. ܘܒܩܕܠܝ̈ܗܝܢ ܐܝܟ ܕܒܐܘܪ̈ܡܢܐ ܡܬܚܫ̈ܚܢ. ܒܡܩܘ̈ܙܐ ܕܝܢ ܐܝܟ ܕܒܨܢܪ̈ܝܬܐ ܘܒܦܪ̈ܚܬܐ ܗ̇ܢܝܢ ܕܓܘܫܡܗܝܢ ܙܥܘܪ ܓܠܦܢܝ̈ܗܝܢ ܪܘܪ̈ܒܝܢ ܘܒܗܦܟܐ. ܒܝ̣̈ܥܐ ܕܐܪ̈ܝ̣ܟܢ ܡܘ̈ܠܕܢ ܢܩ̈ܒܬܐ. ܘܗ̇ܢܝܢ ܕܓܠܝ̣̈ܠܢ ܕܟܪ̈ܐ. ܦܥ̈ܢ ܕܝܢ ܒܝ̣̈ܥܐ ܒܩܝܛܐ ܝܬܝܪ ܡ̣ܢ ܕܒܣܬܘܐ. ܡ̣ܢ ܪܥܡܐ ܡܬܚܒ̈ܠܢ ܒܝ̈ܥܐ ܕܬܚܝܬ ܦܪܚܬܐ ܡܫܬܚ̈ܢܢ. ܐܝܬܘܗܝ ܕܝܢ ܦܪܘܓܐ ܡ̣ܢ ܚܘܪܐ ܕܒܝ̣ܥܬܐ. ܣܘܡܩܐ ܕܝܢ ܬܪܣܝܬܗ ܐܝܬܘܗܝ. ܐܝܬ ܕܝܢ ܒܝ̈ܥܐ ܬܐܡ̈ܬܐ ܕܬܪܝܢ ܬܪܝܢ ܡܘ̣ܩܪ̈ܝ̣ܢ ܡܬܬܙܝ̈ܥܢ. ܥܠ ܐܪܥܐ ܕܝܢ ܒܬܪܬܝܢ ܪ̈ܓܠܐ ܡܬܚܫ̈ܚܢ. ܘܒܓܦ̈ܐ ܡ̇ܢ ܐܝܬܘܗܝ ܟܦܦܐ ܠܦܪ̈ܚܬܐ. ܕܘܢܒܐ ܕܝܢ ܐܝܟ ܣܘܟܢܐ ܢܩܝ̣ܦ ܠܗܝܢ. ܠܘ ܕܝܢ ܒܪܡ ܘܠܛܘ̈ܣܐ ܘܠܬܪ̈ܢܓܠܐ ܘܠܘܙ̈ܐ. ܠܐ ܦܪ̈ܚܐ ܓܝܪ ܐܝܬܝܗܘܢ. ܐܝܠܝܢ ܕܝܢ ܕܟܕ ܦܪ̈ܚܬܐ ܐܝܬܝܗܝܢ ܠܐ ܩܢ̈ܝܢ ܐܘܪܘܦܘܓܢܘܢ ܐܘܟܝ̣ܬ ܕܘܢܒܐ. ܟܕ ܡܬܚ̈ܢ ܠܫܩܝ̈ܗܝܢ ܚܠܦܘܗܝ܇ ܢܣ̈ܒܢ ܬܪܝ̣ܨܘܬܐ. ܐܟܙܢܐ ܕܗܪܘܕܘܝܘ ܐܘܟܝܬ ܚܘܪ̈ܒܐ. ܬܪ̈ܢܘܓܠܐ ܕܝܢ ܟܕ ܙܟ̈ܝܢ ܝܬܝܪ ܩܥܝܢ ܐܝܟ ܗ̇ܘ ܕܡܒܕܩܝ̣ܢ ܥܠ ܙܟܘܬܗܘܢ. ܘܙ̈ܐ ܕܝܢ ܗܢܐ ܟܠܗ ܥܝ̣ܪ̈ܢ. ܐܝܟܢܐ ܕܟܕ ܒܩ̈ܠܐ ܬܟܝ̣̈ܒܐ ܫܓܫ̈ܝ ܘܐܪ̈ܗܒܝ ܠܩܪ̈ܒܬܢܐ ܗ̇ܢܘܢ ܕܒܚ̈ܠܠܐ ܕܠܐ ܡܬܚܙ̈ܝܢ ܩܪܒܘ ܗܘܘ ܕܢܥܠܘܢ ܠܪܘܡܝ ܘܢܟܒܫܘܢܗ̇. ܡܢܫܝܠ ܫܒܩܘܗ̇ ܘܥܪܩܘ. ܘܡܕܝܢ̱ܬܐ ܐܬܦܨܝܬ݀. ܐܝܟ ܕܡܬܢܐ ܩܕܝܫܐ ܒܣܝܠܠܝܘܣ. ܨܦܪܡܕܝ ܕܝܢ ܦܪܚܬܐ ܗ̱ܝ ܕܡܣܝ̣ܦܐ ܠܩܡܨܐ. ܘܕܠܐ ܣܒܥܐ ܗ̣ܝ ܒܟܝܢܐ. ܘܡܛܠ ܒܗܡܘܬ ܐܡ̣ܪ ܚܣܝܐ ܝܥܩܘܒ ܕܐܘܪܗܝ. ܕܫܡܐ ܗ̱ܘ ܓܢܣܢܝܐ ܠܟܠ ܚܝܘܬܐ. ܘܒܗܡܘܬ ܗ̇ܘ ܕܐܡܝ̣ܪ ܒܐܝܘܒ ܩܡܨܐ ܗ̱ܘ. ܘܝܕܝ̣ܥܐ ܗܕܐ ܡ̣ܢ ܗ̇ܝ ܕܐܡ̣ܪ ܕܥܣܒܐ ܐܝܟ ܬܘܪܐ ܐܟܠ. ܘܡܛܠ ܟܢ̈ܦܝ ܫܒܚܝ̈ܢ ܐܡ̣ܪ ܕܦܪܚܬܐ ܗ̱ܝ ܫܒܝ̣ܚܬܐ. ܟܠܗܝܢ ܓܝܪ ܦܪ̈ܚܬܐ ܝܬܝ̣ܪܐܝܬ ܗ̇ܢܝܢ ܐܟܠܬ݀ ܒܣܪܐ܆ ܚܝ̈ܘܬ݀ ܟܢܦܐ ܐܘܟܝܬ ܓܦܐ ܡܬܩܪ̈ܝܢ.

 

 

 

 

 

 

     #1 

 

ܦܣܘܩܐ ܫܬܝܬܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܪܝܢܝܬܐ ܡܛܠ ܗ̇ܢܘܢ ܕܒܝܘܡܐ ܕܫܬܐ ܐܬܒܪ̈ܝ ܘܒܗ ܐܝܬ ܥܘܬܕܐ ܘܢܝ̈ܫܐ ܐܪܒܥܐ. ܩܕܡܝܬ݀ ܥܘܬܕܐ

 

ܒܗܢܐ ܡ̇ܢ ܝܘܡܐ ܒܥܝܪܐ ܘܚܝܘܬܐ ܘܪܚܫܐ ܐܬܒܪܝܘ. ܘܒܥܝ̣ܪܐ ܡ̇ܢ ܩܪܐ ܟܬܒܐ܆ ܠܗܠܝܢ ܕܐܟ̈ܠܢ ܥܣܒܐ ܘܥܡܝ̣ܪܐ. ܐܝܟ ܚܡܪ̈ܐ ܘܬܘܪ̈ܐ. ܚܝܘܬܐ ܕܝܢ ܘܚܝܘܬ ܫܢܐ܆ ܠܗ̇ܢܘܢ ܕܐܟ̈ܠܢ ܒܣܪܐ ܐܝܟ ܐܪܝܐ ܘܕܐܒܐ. ܪ̈ܚܫܐ ܕܝܢ ܠܗ̇ܢܝܢ ܕܚܠܕ̈ܢ ܒܐܪܥܐ ܘܥܡܪ̈ܢ ܒܗ̇ ܐܝܟ ܥܘܩܒܪ̈ܐ ܘܨܘܪ̈ܝܬܐ ܘܬܘܠܥ̈ܐ. ܐܦ ܓܪ ܘܒܪܢܫܐ ܕܚܝܘܬܐ ܗ̱ܘ ܡܠܝ̣ܠܬܐ ܒܗܢܐ ܝܘܡܐ ܐܬܒܪܝ ܒܨܠܡܗ ܟܝܬ ܕܐܠܗܐ ܘܒܕܡܘ̣ܬܗ. ܘܟܠܗܘܢ ܡܠܦܢ̈ܐ ܩܕܝ̈ܫܐ ܠܢܦܫܐ ܐܡܪܝܢ ܕܐܬܒܪܝܬ݀ ܒܨܠܡܐ ܕܐܠܗܐ. ܐܡ̣ܪ ܓܝܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ܇ ܡܢܗ ܕܝܢ ܚܝ̈ܐ ܣܡ. ܗܠܝܢ ܟܝ̣ܬ ܕܢܦܫܐ ܝܕܘܥܬܢܝ̣ܬܐ ܘܨܠܡܐ ܕܐܠܗܐ ܝܕܥܐ ܡܠܬܐ. ܘܬܘܒ ܗ̣ܘ ܟܕ ܗ̣ܘ ܕܠܘܬܗܘܢ ܙܗܝ̣ܪܐ ܕܬܚܘܪ ܢܦܫܐ ܗ̇ܝ ܕܥܒܝ̣ܕܐ ܒܨܠܡܐ ܕܐܠܗܐ. ܩܕܝܫܐ ܕܝܢ ܡܪܝ ܝܥܩܘܒ ܕܣܪܘܓ. ܕܦܓܪܐ ܠܡ ܐܬܒܪܝ ܒܨܠܡ ܐܠܗܐ ܐܬܪܥܝ. ܐܡ̣ܪ ܓܝܪ ܒܡܐܡܪܐ ܕܫܬܬ݀ ܝܘܡܗ. ܢܚܬ ܗܘܐ ܘܡܛܐ ܠܟܬܐ ܒܨܝ̣ܪܬܐ ܛܝܢܗ ܕܐܕܡ. ܘܒܗ ܒܗ̇ܘ ܛܝ̣ܢܐ ܨܠܡ ܝܬܗ ܐܝܬܝܐ ܪܒܐ. ܥܕܡܐ ܠܐܪܥܐ ܢܚܬܬ݀ ܨܘܪܬܗ̇ ܕܐܠܗܘܬܐ. ܘܥܠ ܐܕܡܬܐ ܡܬܪܫܡܐ ܗܘܬ݀ ܕܢܗܘܐ ܐܕܡ. ܚܣܝܐ ܕܝܢ ܝܥܩܘܒ ܕܐܘܪܗܝ ܒܝ̣ܫܐܝܬ ܨܚܝܗ ܠܡܐܡܪܐ ܗܢܐ ܘܠܗ̇ܘ ܕܣܡܗ. ܘܕܠܘ ܕܝܠܗ ܗ̣ܘ ܕܩܕܝܫܐ ܡܪܝ ܝܥܩܘܒ ܐܡ̣ܪ.ܐܠܐ ܕܐ̱ܢܫ ܡ̣ܢ  ܡܠܝܠܘ̈ܢܐ ܕܨܒܐ ܕܢܬܚܙܘܙܐ ܘܢܚܪܘܙ ܢܦܫܗ ܒܣܝܘ̈ܡܐ. ܘܢܫܡ ܘܛܫ ܡܚܘ̈ܛܘܗܝ ܒܩܕܝܫܐ ܡܪܝ ܝܥܩܘܒ. ܘܚܣܝܐ ܡܘܫܐ ܒܪ ܟܐܦܐ ܒܕܘܟ̈ܝܬܐ ܠܐ ܙܥܘܪ ܣܗܕ̈ܘܬܐ ܡܝܬܐ ܡܢܗ ܕܡܐܡܪܐ ܗܢܐ ܘܠܐ ܡܙܝܦ ܠܗ. ܘܢܦܩ ܪܘܚܐ ܚܠܦܘܗܝ. ܕܟܒܪ ܠܡ ܡܛܠ ܡܢܝ̣̈ܢܝܐ ܘܡܪ̈ܩܝܘܢܐ ܕܡܣܠܝܢ ܗܘܘ ܠܦܓܪ̈ܐ ܐܡܪܗ̇ ܠܗܕܐ ܩܕܝܫܐ ܡܪܝ ܝܥܩܘܒ. ܘܡܛܠ ܚܕܝܘܬܐ ܕܢܦܫܐ ܘܕܦܓܪܐ. ܘܩܕܝܫܐ ܓܪܝܓܘܪܝܘܣ ܕܢܘܣܐ ܐܡ̇ܪ. ܕܒܪܢܫܐ ܡ̇ܢ ܒܗ̇ܝ ܕܦܓܪܢܝ ܘܠܐ ܣܟ. ܒܗ̇ܝ ܕܐܝܟ ܕܐܡ̣ܪ ܫܠܝܚܐ. ܒܡܫܝ̣ܚܐ ܝܫܘܥ ܠܐ ܕܟܪܐ ܘܠܐ ܢܩܒܬܐ ܐܝܬ. ܘܩܕܝܫܐ ܡܪܝ ܣܐܘܝܪܐ ܘܐܦ ܣܐܘܝܪܐ ܣܐܒܘܟܬ. ܦܪܫܝܢ ܒܝܬ ܨܠܡܐ ܘܠܕܡܘ̣ܬܐ ܘܐܡܪܝܢ. ܕܗܠܝܢ ܕܨܠܡܐ ܟܝܢܐܝܬ ܐܝܬܝܗܝܢ ܠܢ. ܗܠܝܢ ܕܝܢ ܕܕܡܘܬܐ ܨܒܝܢܐܝܬ ܩܢܝܢܢ. ܘܒܐܠܗܐ ܟܡܐ ܕܡܨܝܐ ܡܬܕܡܝܢܢ. ܠܘܬ ܒܪ̈ܝܐ ܕܝܢ ܠܝܬ ܦܘܪܫܢܐ ܒܝܬ ܨܠܡܐ ܠܕܡܘܬܐ. ܐܠܐ ܐܣܟܡܐ ܡ̇ܢ ܥܠ ܠܐ ܡܢܦ̈ܫܐ ܡܬܐܡܪ ܠܘܬܗܘܢ. ܨܠܡܐ ܕܝܢ ܝܬܝ̣ܪܐܝܬ ܥܠ ܒܪܢܫܐ. ܘܡܬܦܫܟܝܢ ܐ̱ܢܫܝ̈ܢ ܕܐܝܟܢܐ ܟܕ ܐܕܡ ܒܠܚܘܕܘܗܝ ܥܕܟܝܠ ܒܪܐ ܗܘܐ. ܣܓܝܢܐܝܬ ܐܡ̣ܪ ܐܠܗܐ. ܕܢܫܠܛܘܢ ܒܢܘ̈ܢܝ ܝܡܐ ܘܒܦܪܚܬܐ ܘܫܪܟܐ. ܘܐ̱ܢܫܝ̈ܢ ܐܡܪܝܢ ܕܡܛܠ ܗ̇ܝ ܕܒܟܝܢܗ ܕܐܕܡ ܐܝܬܝܗ̇ ܗܘܬ݀ ܚܘܐ. ܘܥܬܝ̣ܕܝ̣ܢ ܗܘܘ ܕܢܬܝܒܠܘܢ ܘܢܣܓܘܢ ܐܡܪܗ̇ ܠܗܕܐ ܐܠܗܐ. ܠܝ ܕܝܢ ܗܕܐ ܫܪܝܪܐ ܕܐܡܪ. ܕܩܕܝ̣ܡܐ ܗܘܬ݀ ܘܒܪܝܐ ܚܘܐ ܡ̣ܢ ܐܠܥܐ ܟܕ ܐܡܪܗ̇ ܐܠܗܐ ܠܗ̇ܝ ܕܢܫܠܛܘܢ. ܐܦ ܓܝܪ ܘܡ̣ܢ ܫܘܪܝܗ̇ ܕܡܠܬܐ ܣܓܝܢܐܝܬ ܐܡ̣ܪ ܐܠܗܐ ܘܠܘ ܚܕܢܐܝܬ. ܐ̱ܢܫ̈ܐ ܠܡ ܐܡ̣ܪ ܕܢܥܒܕܘ ܠܘ ܒܪܢܫܐ. ܘܐܦܢ ܠܚܪܬܐ ܡ̣ܢ ܒܬܪ ܕܐܝܬܝ̣ ܥܘܗܕܢܗ ܕܦܪܕܝܣܐ ܗ̇ܘ ܕܐܦ ܗ̣ܘ ܒܝܘܡܐ ܕܬܠܬܐ ܩܕܝ̣ܡ ܗܘܐ ܘܒܪܐ. ܐܝܬܝ̣ ܐܦ ܦܘܫܩܐ ܕܐܝܟܢܝܘܬ ܒܪܝܬܗ̇ ܕܚܘܐ ܪܘܚܐ ܗ̇ܘ ܕܒܡܘܫܐ ܡܠܠ. ܘܪܒܐܒܣܝܠܠܝܘܣ ܟܕ ܣܛܪ ܡ̣ܢ ܡܠܬܐ ܕܥܠ ܬܘܩܢܗ ܕܒܪܢܫܐ ܚܬܡܗ ܠܫܬܬ݀ ܝܘܡܗ. ܐܝܟ ܚܣܝ̣ܪܐ ܕܣܢܝ̣ܩ ܥܠ ܡܘܠܝܐ ܐܬܬܕܝܢ ܗ̣ܘ ܡܐܡܪܐ ܡ̣ܢ ܩܕܝܫܐ ܓܪܝܓܘܪܝܘܣ ܕܢܘܣܐ. ܘܡܛܠ ܗܕܐ ܡܐܡܪܐ ܗ̇ܘ ܕܡܝ̣ܪܐ ܕܥܠ ܬܘܩܢܗ ܕܒܪܢܫܐ ܠܗ ܐܩܦ. ܟܕ ܠܟܠܗܝܢ ܗܠܝܢ ܕܒܒܪܢܫܐ ܕܩܕܡ̈ܝ ܠܡ ܗܘܝ̈ ܠܗ ܘܕܡܣܬܟ̈ܝܢ ܕܢܗܘ̈ܝܢ. ܘܕܐܝܬܝܗܝܢ ܗܫܐ ܒܗ ܐܝ̣ܬܝ. ܐܢܐ ܕܝܢ ܒܨܝ̣ܪܐ ܗ̇ܘ ܕܡ̣ܢ ܦܪ̈ܬܘܬܐ ܕܦܬܘܪ̈ܘܗܝ ܕܗܢܐ ܘܕܟܢܘ̈ܬܗ ܐܬܬܪܣܝ̣ܬ. ܘܠܡܫܘܚܬܐ ܕܩܘܡܬܐ ܐܬܡܛܝ̣ܬ. ܕܢܬ ܕܠܗܠܝܢ ܕܬܘܩܢ ܗܝܟܠܐ ܗܢܐ ܦܓܪܢܝܐ ܒܠܚܘܕ ܐܝܬܐ ܒܗܕܐ ܫܬܐܣܬܐ. ܟܕ ܠܗܠܝܢ ܐ̱ܚܪ̈ܢܝܬܐ ܠܫܬܐܣ̈ܐ ܕܢܩ̈ܦܢ ܫܒܩ ܐ̱ܢܐ.

 

 

 

ܢܝܫܐ ܩܕܡܝܐ ܡܛܠ ܪ̈ܚܫܐ

 

ܪ̈ܚܫܐ ܡ̇ܢ ܓܝܪ ܠܓܢ̈ܣܐ ܣܓܝ̈ܐܐ ܘܡܫܚ̈ܠܦܐ ܡܬܦܠܓ. ܒܗ̇ܝ ܕܐܘ ܪ̈ܒܝܥܝ ܪ̈ܓܠܐ ܗ̣ܘ ܐܝܟ ܚܝܘܬ ܫܢܐ ܘܒܥܝ̣ܪܐ ܘܐܟܘܬܗܘܢ ܒܛܢ ܘܝܠܕ. ܐܟܙܢܐ ܕܚܘ̈ܠܕܐ ܘܥܘܩܒܪ̈ܐ ܘܟܟܘ̈ܫܝܬܐ. ܐܘ ܟܕ ܪ̈ܒܝ̣ܥܝ ܪ̈ܓܠܐ ܗ̣ܘ ܒܝ̈ܥܐ ܝܠܕ. ܐܟܙܢܐ ܕܨܪܘܪܝܬܐ ܘܚܪܕܢܐ ܘܢܕܠܐ ܘܐܡܩܬܐ ܘܚܘܠܡܛܐ ܐܘܟܝ̣ܬ ܟܡܐ ܠܗܐܘܢ ܕܩܪܝܢ ܠܗ ܝܘ̈ܢܝܐ ܐܪܝܐ ܕܥܦܪܐ. ܘܠܟܠ ܓܘܢ ܡܫܬܚܠܦ. ܐܘ ܣܓܝ ܪ̈ܓܠܐ ܗ̣ܘ ܐܝܟ ܚܪ̈ܓܠܐ ܘܩܠܡܐ ܘܦܘܪ̈ܬܥܢܐ. ܐܘ ܕܬܡܢܐ ܪ̈ܓܠܐ ܗ̣ܘ. ܐܝܟ ܓܘܓܝ ܐܘ ܕܠܐ ܪ̈ܓܠܐ ܗ̣ܘ ܐܝܟ ܚܘܘ̈ܬܐ ܘܬܘܠܥ̈ܐ. ܘܡܫܘܛܐ ܬܘܒ ܪܚܫܐ ܗ̱ܘ ܦܪܘܚܐ. ܘܫܘܫ̈ܡܢܐ ܬܘܒ ܡ̣ܢ ܪܚܫܐ ܡܬܡܢܝܢ. ܘܗܟܢܐ ܨܨܪܐ. ܘܩܡܨܐ ܥܡ ܦܪ̈ܘܚܐ ܦܪܚܬܐ ܗ̱ܘ. ܘܥܡ ܪ̈ܚܫܐ ܪܚܫܐ. ܥܩܪܒܐ ܕܝܢ ܡܐ ܕܝܠܕܐ ܡ̣ܢ ܒܢܝ̈ܗ̇ ܡܬܐܟܠܐ. ܘܟܟܘܫܬܐ ܒܦܘܡܗ̇ ܡܩܒܠܐ ܒܛܢܐ ܘܡ̣ܢ ܐܕܢܗ̇ ܝܠܕܐ. ܠܥܘܩܒܪ̈ܐ ܬܢܢܐ ܕܩܠܩܕܝܣ ܡܥܪܩ ܡ̣ܢ ܒܝܬܐ. ܨܪܘܪ̈ܝܬܐ ܡ̣ܢ ܦܘܡܝ̈ܗܝܢ ܡܙܕܘ̈ܓܢ ܘܝܠܕ̈ܢ ܒܢ̈ܬܐ. ܫܘܫ̈ܡܢܐ ܕܝܢ ܠܘ ܡ̣ܢ ܙܘܘܓܐ ܪܕܐ ܝܘܒܠܗܘܢ. ܐܠܐ ܡܠܘܘܐ ܡܕܡ ܙܥܘܪܐ ܢܦܩ ܡܢܗܘܢ ܘܢܦܠ ܒܐܪܥܐ. ܘܡܬܓܒ̈ܠܢ ܒܢ̈ܬܐ. ܘܗܝܕܝܢ ܡܬܬܨܝ̣ܪܝܢ ܒܓܘܗܝܢ ܘܡܬܝܠܕܝܢ. ܘܡ̣ܢ ܪܝܚܐ ܒܠܚܘܕ ܕܕܩ̈ܐ ܡܬܬܪܣܝܢ ܫܘܫ̈ܡܢܐ. ܒܩ̈ܐ ܕܝܢ ܘܚܝܦܝ ܡ̣ܢ ܨܐܘܬܐ ܕܫܩ̈ܝܬܐ ܡܬܝܠܕܝܢ. ܚܘܠܕܐ ܕܝܢ ܠܐ ܩܢܐ ܥܝ̈ܢܐ. ܘܣܓܝ ܬܥܫ ܘܦܠܚ ܒܐܪܥܐ. ܘܥܒܕ ܠܗ ܥܡܠܐ ܕܠܐ ܠܗ ܡܗܢܐ ܐܦܠܐ ܠܐܚܪ̈ܢܐ. ܚܪܝ̣ܦ ܕܝܢ ܣܓܝ ܫܡܥܗ. ܥܘܩܒܪ̈ܐ ܓܢ̈ܒܐ ܐܢܘܢ ܕܟܠܡܕܡ. ܝܬܝܪܐܝܬ ܕܥܒܘܪܐ ܗܟܘܬ ܘܟܟܫܬܐ. ܘܐܩܡܬܐ ܒܒ̈ܬܐ ܕܡܠܟ̈ܐ ܥܡܪܐ. ܘܡ̣ܢ ܕܒܒ̈ܐ ܡܬܬܪܣܝܐ. ܚܘܘ̈ܬܐ ܕܝܢ ܡܫܚܠܦܝܢ ܠܦܘܬ ܕܘܟ̈ܝܬܐ. ܘܐܝܬ ܕܥܡ ܟܐܒܐ ܩܛܠܝܢ. ܘܐܝܬ ܕܒܠܥܕ ܟܐܒܐ. ܠܟܠܗܝܢ ܕܝܢ ܚܝ̈ܘܬܐ ܐܫ̈ܕܬ݀ ܙܗܪܐ. ܒܥܠܕܒܒܐ ܐܝܬܘܗܝ ܪܘܩܐ ܕܒܪܢܫܐ. ܡ̣ܢ ܐܘܢܘܦܝܘܣ ܥܪܩܝܢ ܟܠܗܘܢ ܚܘܘ̈ܬܐ. ܟܕ ܛܒ ܡ̣ܢ ܟܠܗܘܢ ܙܥܘܪ. ܚܘܘ̈ܬܐ ܕܝܢ ܥܢܝܢ ܣܓܝ ܒܡܐܟܘܠܬܐ ܘܒܫܩܝܐ ܕܚܡܪܐ. ܟܕ ܛܒ ܙܒܢܐ ܣܓܝܐܐ ܡܟܬܪܝܢ ܕܠܐ ܡܐܟܘܠܬܐ. ܘܚܘܘ̈ܬܐ ܘܨܪܘܪ̈ܝܬܐ ܟܕ ܡܬܥܪܙܠܝܢ ܡܫܬܘܬܦܝܢ ܠܚܕ̈ܕܐ ܘܒܢ̈ܬܐ ܝܠܕܝܢ. ܘܒܐܪܒܥ ܢܘܩ̈ܕܬܐ ܡܬܚܫܚܝܢ ܠܘܬ ܪܫܦܐ. ܟܕ ܐܝܟ ܓ̈ܠܠܐ ܡܬܬܪܝ̣ܡܝ̣ܢ. ܘܟܕ ܣܡܟܝ̣ܢ ܠܡܢܬܐ ܩܘܕܡܢܝܬܐ. ܠܘܬܗ̇ ܡܝܬܝܢ ܠܕܒܬܪ ܗ̇ܘ ܬܪܝܢ ܠܫ̈ܢܐ ܩܢܝܢ. ܘܛܥܡܬܐ ܡ̇ܢ ܒܪܝܫ ܠܫܢܐ ܩܢܝܢ. ܗܢܝܐܘܬܐ ܕܝܢ ܒܡܒܠܘܥܝ̣ܬܐ. ܚܘܝܐ ܟܕ ܢܦܩ ܠܢܘܗܪܐ ܘܫܪ̈ܓܢ ܥܝܢܘ̈ܗܝ ܒܡܐܟܘܠܬܐ ܕܫܘܡܪܐ ܡܬܐܣܐ. ܠܐܟܕܢܐ ܕܝܢ ܐܦ̈ܐ ܕܒܪܢܫܐ ܐܝܬ. ܘܚܝܘܬܐ ܘܠܘ ܒܪܬܐ ܝܠܕܐ ܐܝܟ ܫܪܟܐ ܕܚܘ̈ܘܬܐ. ܘܡܦܩܢܐ ܠܝܬ ܠܗ ܠܥܘܒܗ̇ ܕܢܩܒܬܐ. ܐܠܐ ܐܝܟ ܚܪܘܪ ܡܚܛܐ. ܘܒܙܒܢ ܙܘܘܓܐ ܐܢ ܡܩܒܠܐ ܠܙܪܥܐ ܦܣܩܐ ܠܟܝܢܗ ܕܕܟܪܐ ܡܛܠ ܕܒܦܘܡܐ ܡܫܬܘܬܦܝܢ. ܘܗܟܢܐ ܡܐܬ ܠܗ ܕܟܪܐ. ܘܗ̣ܝ ܬܘܒ ܟܕ ܨܒܝܐ ܕܬܐܠܕ ܐܟܠܝܢ ܒܢܝ̈ܗ̇ ܠܟܪܣܗ̇ ܘܢܦܩܝܢ. ܘܗܟܢܐ ܬܪ̈ܝܗܘܢ ܡܝܬܝ̣ܢ̣. ܣܠܡܢܕܪܐ ܕܝܢ ܨܪܘܪܝ̣ܬܐ ܡܕܡ ܗ̣ܝ. ܘܥ̣ܐܠܐ ܠܢܘܪܐ ܘܠܐ ܡܬܢܟܝܐ. ܓܘܓܝ ܕܝܢ ܡ̣ܢ ܟܪܣܗ̇ ܡܦܩܐ ܫܬܝ̈ܐ ܩܛܝ̣̈ܢܐ. ܘܡܬܚܐ ܐܢܘܢ ܒܐܐܪ. ܘܒܗܘܢ ܨܝܪܐ ܠܗ̇ ܕܒܒ̈ܐ ܘܡܬܬܪܣܝܐ. ܘܐܝܬ ܓܘܓܝ ܕܩܛܘܠܬܐ ܗ̱ܝ ܢܘܟܬܬܗ̇. ܘܐܝܬ ܓܢܣܐ ܕܓܘܓܝ ܕܡܬܩܪܐ ܕܐܒܐ ܕܠܐ ܙܩܪ. ܦܠܚܐ ܕܝܢ ܢܩܒܬܐ. ܕܟܪܐ ܕܝܢ ܥܡܗ̇ ܡܬܬܪܣܐ ܡ̣ܢ ܨܝܕܐ. ܘܢܩܒܬܐ ܕܩܡܨܐ ܡܐ ܕܒܛܢܐ. ܛܡܪܐ ܠܝܠܕܗ̇ ܒܓܘ ܥܘ̣ܫܗ̇ ܕܐܪܥܐ. ܘܗ̣ܝ ܐܪܥܐ ܓܒܠܐ ܘܩܛܪܐ ܠܗ ܫܘܪ̈ܢܩܐ ܠܗܘ ܡܠܘܘܐ ܕܕܠܐ ܕܡܘ. ܘܐܝܟ ܕܒܡܪܒܥܐ ܬܪܝܢܐ ܠܗܠܝܢ ܣܚܦ̈ܣܐ ܡܪܟܒܐ ܘܨܝܪܐ ܠܗ.

 

 

 

ܢܝܫܐ ܬܪܝܢܐ ܡܛܠ ܚܝܘܬ ܫܢܐ ܘܒܥܝ̣ܪܐ ܘܒܪܢܫܐ

 

ܡܢܗܝܢ ܡ̇ܢ ܕܚܝ̈ܘܬܐ ܒܐܡܝ̣ܢܘ ܕܫܝܢܐ ܐܢܝܢ܆ ܐܟܙܢܐ ܕܒܪܢܫܐ. ܡܢܗܝܢ ܕܝܢ ܒܐܡܝ̣ܢܘ ܕܕܒܪܐ ܐܟܙܢܐ ܕܢܡܪܐ. ܘܡܢܗܝܢ ܡܨܝܐ ܕܢܫܬܝ̈ܢܢ ܐܟܙܢܐ ܕܦܝ̣ܠܐ. ܘܚܝ̈ܘܬܐ ܐܝܠܝܢ ܕܕܫܝܢܐ ܐܢܝܢ ܟܠܗܝܢ ܐܦ ܕܕܒܪܐ. ܘܡܛܠ ܗܕܐ ܐܦ ܐ̱ܢܫܘܬܐ ܗ̇ܝ ܕܒܣܘ̈ܦܝ ܬܒܝܠ. ܒܪܒܪܝܬܐ ܗ̱ܝ ܘܝܬܝܪ ܕܒܪܝܬܐ. ܘܡܢܗܝܢ ܕܚܝ̈ܘܬܐ ܠܒܝ̣̈ܟܬܐ ܘܡܛܗ̈ܡܬܐ ܘܚܐܪ̈ܬܐ ܐܢܝܢ ܐܟܙܢܐ ܕܐܪܝܐ. ܡܢܗܝܢ ܕܝܢ ܥܫܝ̈ܢܬܐ ܘܒܥܪ̈ܝ̣ܪ̈ܝܬܐ ܘܒܥܠܕ̈ܒܒܐ ܐܟܙܢܐ ܕܕܐܒܐ. ܡܢܗܝܢ ܕܝܢ ܡܕܪ̈ܡܬܐ܆ ܐܟܙܢܐ ܕܬܥܠܐ. ܘܡܢܗܝܢ ܪ̈ܚܘܡܬܐ܆ ܐܟܙܢܐ ܕܟܠܒܐ. ܘܡܢܗܝܢ ܢܚܝ̈ܬܐ ܘܡܬܚܒܒ̈ܢܝܬܐ ܐܟܙܢܐ ܕܐܝܠܐ. ܘܚܝ̈ܘܬܐ ܣܓܝ̈ܐܬ݀ ܝܠܕܐ. ܣܓܝ̈ܐܬ݀ ܬܕܝ̈ܐ ܐܢܝܢ ܐܟܙܢܐ ܕܟܠܒܬܐ ܡܚܝܕܬ݀ ܦܪܣܬܐ ܕܐܝܬܝܗ̇ ܛܥܝ̣ܢܬ݀ ܩܪ̈ܢܐ. ܣܛܪ ܡ̣ܢ ܚܡܪܐ ܗܢܕܘܝܐ. ܕܚܕܐ ܩܪܢܐ ܩܢܝܐ. ܘܡ̣ܢ ܓܡ̈ܠܐ ܗ̇ܘ ܐܪܐܒܝܐ ܚܕܐ ܚܛܪܬܐ ܒܠܚܘܕ ܩܢܐ. ܘܐܝܬ ܡ̣ܢ ܓܡ̈ܠܐ ܐܝܢܐ ܕܚܛܪܬܐ ܬܪܝܢܬ݀ ܟܘܣܬܐ ܩܢܐ. ܘܡܢܗܝܢ ܕܚܝ̈ܘܬܐ ܬܪܝܢܬ݀ ܬܕܝ̈ܐ ܐܢܝܢ. ܐܟܙܢܐ ܕܐܢ̱ܬܬܐ ܘܐܝܠܬܐ ܘܐܪܝܘܬܐ. ܡܢܗܝܢ ܕܝܢ ܪܒܝܥܝܬ݀ ܬܕܝ̈ܐ ܐܝܟ ܬܘܪ̈ܐ ܘܢܡܪ̈ܬܐ. ܦܝ̣ܠܐ ܕܝܢ ܠܓܘ ܘܠܘ ܠܒܪ ܩܢܐ ܐܫܟ̈ܐ. ܘܒܪܢܫܐ ܡ̇ܢ ܚܣܚܘܣܢܝܐ ܩܢܐ ܙܘܠܒܢܐ. ܓܡܠܐ ܕܝܢ ܘܐܝܠܐ ܓܝܕܢܝܐ. ܬܥܠܐ ܕܝܢ ܘܕܐܒܐ ܘܟܟܘܫܬܐ ܓܪ̈ܡܢܐ. ܩܪ̈ܢܐ ܕܐܝ̈ܠܐ ܒܠܚܘܕ ܛܡܝ̣̈ܡܢ ܘܣܘܟܢܴ̈ܝܢ. ܘܕܗܠܝܢ ܕܫܪܟܐ ܚܠܝ̣̈ܠܢ. ܘܡܛܠ ܕܩܪ̈ܢܐ ܠܡܫܟܐ ܝܬܝ̣ܪܐܝܬ ܢܩܝ̣̈ܦܢ. ܬܘܪ̈ܐ ܣܓܝ̈ܐܐ ܕܡܙܝ̣ܥܝܢ ܩܪ̈ܢܝܗܘܢ ܐܟܡܐ ܕܠܐܕܢܝ̈ܗܘܢ. ܒܡܫܟܐ ܕܬܘܪܐ ܪܛܝ̣ܒܘܬܐ ܝܬܝܪܬܐ ܡܚܘ̣ܛܢܝܬܐ ܐܝܬ. ܘܥܠ ܗܕܐ ܥܒܕܝܢ ܡܢܗ ܬܬܐ. ܣܥܪܐ ܕܒܪܢܫܐ ܒܠܚܘܕ ܚܘܪ. ܐܢ̱ܬܬܐ ܐܢ ܢܬܟܠܐ ܟܣܦܗ̇ ܡܘܥܝܐ ܕܩܢܐ. ܛܠܝ̈ܐ ܕܝܢ ܘܣܪ̈ܝ̣ܣܐ ܠܐ ܡܘܥܝܢ ܕܩܢܐ ܒܗ̇ܝ ܕܢܫܝ̈ܐ ܐܢܘܢ. ܘܥܠܗܕܐ ܚܪܝ̣ܦ ܩܠܗܘܢ. ܐܪܢܒܐ ܒܠܚܘܕܘܗܝ ܣܥܪܐ ܐܝܬ ܠܗ ܡ̣ܢ ܠܓܘ ܒܠܘ̣ܥܘ̈ܗܝ. ܘܬܚܝܬ ܪ̈ܓܠܘܗܝ. ܣܓܝ ܗ̣ܘ ܕܡܐ ܘܝܬܝܪ ܪܛܝ̣ܒ ܒܐܢ̱ܬܬܐ. ܘܡܛܠܗܕܐ ܪܕܐ ܡܢܗ̇ ܟܦܣܐ ܝܪܚܢܐܝܬ. ܘܡܢ ܚܫ̈ܐ ܣܓܝ̈ܐܐ ܡܡܕܐ ܒܪܕܝܗ. ܒܨܝ̣ܪ ܡܘܚܐ ܕܓܪ̈ܡܐ ܒܚܙܝ̣ܪ̈ܐ. ܒܐܪ̈ܝܘܬܐ ܕܝܢ ܠܝܬܘܗܝ ܠܓܡܪ. ܐܬܝܠܕ ܕܝܢ ܚܠܒܐ ܒܙܒܢ ܘܒܬܕܝ̈ܐ ܕܓܒܪܐ. ܚܘܪܐ ܗ̱ܘ ܙܪܥ ܟܠ ܚܝܘܬܐ܇ ܘܠܘ ܐܘܟܡܐ ܗ̱ܘ ܗ̇ܘ ܕܟܘܫܝܐ ܐܝܟ ܕܐܡ̇ܪ ܐܝܪܘܕܘܛܘܣ. ܒܟܠܒܐ ܕܝܢ ܘܒܩܛܘ ܠܫܢܐ ܠܘܬ ܛܥܡܬܐ ܒܠܚܘܕ ܐܝܬܘܗܝ. ܘܠܘ ܠܘܬ ܩܠܐ. ܚܡܪܐ ܡܛܠ ܢܩܒܬܐ ܘܡܛܠ ܡܐܟܘܠܬܐ ܥܒܕ ܩܝ̣̈ܢܬܐ. ܒܡܐܩܕܘܢܝܐ ܠܐ ܢܨܪ ܚܙܝ̣ܪܐ. ܟܠܗܝܢ ܚܝ̈ܘܬܐ ܕܡ̈ܟܢ ܘܚܠܡ̈ܢ. ܚܠܡ ܕܝܢ ܝܬܝ̣ܪܐܝܬ ܒܪܢܫܐ. ܒܪܡ ܒܬܪ ܫܢ̱ܬܐ ܪܒܝܥܝܬܐ. ܗܐܠܝܢܝܩܘܣ ܕܝܢ ܐܡ̇ܪ ܕܐܝܬ ܥܡܐ ܒܠܝܒܘܐܝ ܕܠܐ ܠܓܡܪ ܚܙܐ ܚܠܡ̈ܐ. ܒܟܠܗܝܢ ܚܝ̈ܘܬܐ ܝܬܝ̣ܪܐ ܝܩܝ̣ܪܘܬܐ ܕܟܪ̈ܐ ܡ̣ܢ ܕܢܩ̈ܒܬܐ. ܐܠܐ ܒܬܘܪ̈ܐ. ܡܦܪܐ ܓܒܪܐ ܥܕܡܐ ܠܫܒܥܝܢ ܫܢܝ̣̈ܢ. ܘܐܢ̱ܬܬܐ ܥܕܡܐ ܠܚܡܫܝܢ. ܥܪܒܐ ܕܝܢ ܥܕܡܐ ܠܚܕܥܣܪ̈ܐ ܫܢܝ̣̈ܢ. ܘܣܘܣܝܐ ܥܕܡܐ ܠܬܠܬܝܢ ܘܬܠܬ. ܘܣܘܣܬܐ ܥܕܡܐ ܠܐܪܒܥܝܢ ܘܚܙܝ̣ܪܐ ܛܪܩܐ ܒܪ ܬܠܬܝܢ. ܘܟܠܒܬܐ ܥܕܡܐ ܠܥܣܪ. ܓܡܠܐ ܒܛܢܐ ܫܢ̱ܬܐ ܘܚܕ ܝܠܕܐ. ܘܦܝ̣ܠܐ ܒܛܢܐ ܬܪܬܝܢ ܫܢܝ̈ܢ ܘܗܟܘܬ ܚܕ ܝܠܕܐ. ܒܚܡܪܐ ܠܐ ܩܠܡ̈ܐ ܗܘܝܢ ܐܦܠܐ ܩܪ̈ܕܐ. ܒܬܘܪܐ ܕܝܢ ܬܪ̈ܝܗܘܢ ܗܘܝܢ. ܘܒܢܩܘ̈ܬܐ ܘܥܪ̈ܒܐ ܩܪ̈ܕܐ ܗܘܝܢ. ܘܒܟܠܒ̈ܐ ܕܒܒ̈ܝ ܟܠܒܐ. ܬܘܪܬܐ ܘܣܘܣܬܐ ܡܪ̈ܕܝܬ݀ ܟܦܣܐ ܐܢܝܢ. ܒܛܢܐ ܕܝܢ ܥܙܐ ܘܢܩܝܐ. ܚܡܫܐ ܝܪ̈ܚܝܢ. ܝܠܕܬ݀ ܕܝܢ ܢܩܝܐ ܡܐ ܙܒܢܝ̈ܢ ܘܬܪܝܢ ܘܬܠܬܐ ܘܐܪܒܥܐ. ܚܝܐ ܕܝܢ ܥܪܒܐ ܘܢܩܝܐ ܥܣܪ ܫܢܝ̈ܢ ܘܥܙܐ ܬܡܢܐ. ܟܠܒܬܐ ܕܝܢ ܬܪܝܢ ܝܪ̈ܚܝ̣ܢ ܒܛܢܐ. ܝܠܕܝ̈ܗ̇ ܕܝܢ ܠܐ ܚܙܝܢ ܬܪܝܢ ܝܘܡܝ̈ܢ. ܐܝܬ ܕܝܢ ܟܠܒ̈ܬܐ ܕܒܛܢ̈ܢ ܫܒܥܝܢ. ܐܝܬ ܕܝܢ ܟܠܒ̈ܬܐ ܕܬܠܬܐ ܝܪ̈ܚܝܢ ܒܛܢ̈ܢ. ܗ̇ܢܝܢ ܕܝܠܕܝ̈ܗܝܢ ܡܟܬܪܝܢ ܣܡܝ̈ܐ ܫܒܬܥܣܪ ܝܘ̈ܡܝܢ. ܚܝܐ ܕܝܢ ܟܠܒܐ ܟܕ ܣܓܝ ܥܣܪܝܢ ܫܢܝ̣̈ܢ. ܗܟܘܬ ܘܬܘܪܐ. ܣܘܣܝܐ ܕܝܢ ܐܥܦܐ. ܒܛܢܐ ܕܝܢ ܬܘܪܬܐ ܥܣܪܐ ܝܪ̈ܚܝܢ. ܘܬܘܪܐ ܒܪ ܫܢ̱ܬܐ ܡܫܬܘܬܦ. ܣܘܣܬܐ ܕܝܢ ܒܛܢܐ ܡ̇ܢ ܚܕܥܣܪ ܝܪ̈ܚܝܢ ܘܒܬܪ ܥܣܪܐ ܝܠܕܐ. ܡܫܬܘܬܦ ܕܝܢ ܣܘܣܝܐ ܘܣܘܣܬܐ ܒܢܝ̈ ܬܠܬ ܫܢܝ̈ܢ. ܒܪܕܘܢܐ ܡ̇ܢ ܒܟܠ ܫܢܐ ܝܠܕܐ ܣܘܣܬܐ ܘܣܘܣܝܐ ܕܝܢ ܫܢ̱ܬܐ ܘܫܢ̱ܬܐ ܠܐ. ܚܝܐ ܕܝܢ ܒܪܕܘܢܐ ܙܒܢܐ ܕܩܪܝ̣ܒ ܠܚܝ̈ܐ ܕܒܪܢܫܐ. ܐܬܢܐ ܕܝܢ ܒܛܢܐ ܫܢ̱ܬܐ ܘܚܕ ܝܠܕܐ. ܘܗ̇ܝ ܕܡܬܐܡܪܐ ܥܠ ܢܓܝ̣ܪܘܬ ܚܝܘ̈ܗܝ ܕܦܝ̣ܠܐ. ܠܐ ܡܫܪܪ ܠܗ̇ ܐܪܝ̣ܣܛܘܣ. ܝܠܕ̈ܐ ܕܛܒ ܙܥܘܪܝܢ ܝܠܕܐ ܕܒܐ. ܕܒܨܝ̣ܪܝܢ ܡ̣ܢ ܟܟܘܫܬܐ ܘܪܘܪ̈ܒܝܢ ܡ̣ܢ ܥܘܩܒܪ̈ܐ. ܘܡܓܙܝܢ ܡ̣ܢ ܣܥܪܐ ܘܣܡܝܢ. ܘܠܐ ܡܚܝܨܝ̣ܢ ܫܪ̈ܝܬܗܘܢ. ܒܛܢܐ ܕܝܢ ܬܠܬܝܢ ܝܘ̈ܡܝܢ. ܐܪܝܘܬܐ ܕܝܢ ܬܪܝܢ ܝܠܕܐ. ܘܥܕܡܐ ܠܚܡܫܐ ܒܫܢ̱ܬܐ. ܕܓܠܐ ܕܝܢ ܐܦ ܗ̇ܝ ܕܐܦܥܐ ܩܢܝܐ ܡܚܣ̈ܢܐ ܕܕܟܪ̈ܐ ܘܕܢܩܒܬܐ. ܗ̇ܘ ܕܝܢ ܕܡܬܚܙܐ ܩܡܛܐ ܗ̱ܘ ܕܠܐ ܚܙܘܪܐ. ܐܪ̈ܢܒܐ ܕܝܢ ܒܛܢ̈ܢ ܥܠ ܒܛܢܝ̈ܗܝܢ ܘܝܠܕ̈ܢ ܒܟܠ ܝܪܚܐ ܚܕ. ܬܥ̈ܠܬܐ ܕܝܢ ܐܝܟ ܢܩ̈ܣܐ ܕܒܣܪܐ ܝܠܕ̈ܢ ܝܠܕܝ̈ܗܝܢ. ܘܒܠܫܢܗܝܢ ܡܚܝ̈ܨܢ ܠܗܘܢ. ܝܠܕ̈ܢ ܕܝܢ ܐܦ ܐܪܒܥܐ. ܕܓܠܐ ܗ̱ܝ ܗ̇ܝ ܕܚܕܐ ܙܒܢ ܒܠܚܘܕ ܒܚܝܝ̈ܗܘܢ ܝܠܕ̈ܢ ܕܐܒ̈ܐ. ܕܐܒ̈ܐ ܠܘ ܒܠܚܘܕ ܒܣܪܐ ܐܟܠܝܢ. ܐܠܐ ܐܦ ܡܕܪܐ ܡܕܡ ܘܥܣܒܐ ܐܝܟ ܕܠܐܣܝܘܬܐ. ܐܪܝܐ ܕܝܢ ܣܛܪ ܡ̣ܢ ܒܣܪܐ ܠܐ ܡܕܡ ܛܥܡ. ܣܘܣܬܐ ܘܚܡܪܐ ܘܬܘܪܐ ܟܕ ܟܦܢܝܢ ܕܠܝ̣ܠܐܝܬ ܡܣܬܟܠܝܢ. ܣܓܝ ܫܩܝܐ ܐܝܬܝܗܘܢ ܗܠܝܢ. ܦܝ̣ܠܐ ܣܓܝ ܡܐܟܘܠܬܐ ܗ̱ܘ. ܘܣܓܝ ܫܩܝܐ. ܣܘܣܬܐ ܕܒܛܢܐ ܐܢܗܘ ܕܬܣܘܩ ܪܝ̣ܚ ܬܢܢܐ ܕܫܪܓܐ ܕܡܕܥܟ ܚܝܛܐ. ܟܡܐ ܙܒܢܝ̈ܢ ܕܝܢ ܐܦ ܐܢ̱ܬܬܐ. ܝܬܝܪ ܡ̣ܢ ܟܠܗܝܢ ܚܝ̈ܘܬܐ ܩܪܫ ܚܡܪܐ. ܒܕܓܘܢ ܠܐ ܒܦܘܢܛܘܣ ܐܦܠܐ ܒܐܬܪܐ ܕܣܩܘ̈ܬܝܐ ܗܘܐ. ܟܠܒܐ ܐܦ ܠܬܥܠܬܐ ܡܫܬܘܬܦ ܕܡܢܗ̇ ܡܬܝܠܕܝܢ ܟܠܒ̈ܐ ܕܠܐ ܩܘܢܝ̈ܩܘ. ܐܦ ܓܝܪ ܘܠܕܐܒܐ. ܒܟܠܗܝܢ ܚܝ̈ܘܬܐ ܪ̈ܦܝܢ ܢܩ̈ܒܬܐ ܒܥܝܕܝ̈ܗܝܢ ܣܛܪ ܡ̣ܢ ܕܒܐ ܘܢܡܪܬܐ. ܒܒܪܢܫܐ ܕܝܢ ܝܬܝܪ ܓܠܝܢ ܘܠܐ ܥܡܘ̈ܛܢ ܫܘܘ̈ܕܥܐ. ܡܫܡܠܝܬܐ ܓܝܪ ܐܝܬܝܗ̇ ܗܕܐ ܚܝܘܬܐ. ܝܬܝܪ ܕܝܢ ܚܝܘܣܬܢܝܬܐ ܐܝܬܝܗ̇ ܐܢ̱ܬܬܐ ܡ̣ܢ ܓܒܪܐ. ܘܝܬܝܪ ܣܓܝܐܬ݀ ܕܡ̈ܥܐ. ܚܣܡܬܐ ܗ̱ܝ ܘܥܕܠܬ݀ ܓܕܗ̇ ܘܪܚܡܬ݀ ܨܘܚ̈ܝܬܐ ܘܦܟܢܝܬܐ. ܘܝܬܝܪ ܒܝܫܬ݀ ܢܦܫܐ. ܘܟܡܝ̣ܪܬܐ ܘܒܝ̣ܫܬ݀ ܣܒܪܐ. ܘܝܬܝܪ ܟܪܘܡܬܝܐ. ܘܝܬܝܪ ܕܓܠܐ. ܘܝܬܝܪ ܕܠܝ̣ܠܐܝܬ ܡܫܬܕܠܐ. ܘܝܬܝܪ ܡܬܥܗܕܐ. ܘܝܬܝܪ ܫܗܪܐ. ܘܝܬܝܪ ܡܐܝ̣ܢܐ. ܘܝܬܝܪ ܒܨܝ̣ܪܬ݀ ܙܘ̈ܥܐ ܗ̣ܝ. ܒܪܡ ܪܚܡܬ݀ ܐܘܡܢܘܬܐ ܗ̱ܝ. ܘܥܠ ܣܝܒܪܬܐ ܒܨܝ̣ܪܬܐ ܣܢܝ̣ܩܐ. ܟܠܗܝܢ ܚܝ̈ܘܬܐ ܟܕ ܬܗܘܐ ܡܙܠܗܙܐ ܣܝܒܪܬܐ ܢܨ̈ܝܢ. ܐܦ ܓܝܪ ܘܒܢ̈ܬ݀ ܚܕ ܓܢܣܐ ܥܡ ܚܕ̈ܕܐ. ܘܕܟܪ̈ܐ ܥܡ ܢܩ̈ܒܬܐ. ܟܕ ܕܝܢ ܫܦܝ̣ܥܬܐ ܬܗܘܐ ܣܝܒܪܬܐ ܫܝܢܐ ܗܘܐ ܠܗܝܢ ܐܦ ܥܡܢ ܐܦ ܥܡ ܚܕ̈ܕܐ. ܕܐܒܐ ܒܥܠܕܒܒܐ ܗ̱ܘ ܕܚܡܪܐ ܘܬܘܪܐ ܘܬܥܠܐ. ܘܬܥܠܐ ܪܚܡܐ ܗ̱ܘ ܕܥܘܪܒܐ ܘܕܚܘܝܐ. ܡܬܟܬܫܝ̣ܢ ܘܦܝ̈ܠܐ ܥܡ ܚܕ̈ܕܐ. ܘܗ̇ܘ ܕܚܐܒ ܪܐܬ ܡ̣ܢ ܗ̇ܘ ܕܙܟܐ. ܡ̣ܢ ܟܠܗܝܢ ܚܝ̈ܘܬܐ ܣܟܠܐ ܘܫܒܘܪܐ ܢܩܝܐ. ܘܢܦܩܐ ܐܝܟܐ ܕܠܐ ܘܠܐ ܠܗ̇ ܠܡܦܩ. ܐܦܢ ܡܛܪܐ ܢܗܘܐ ܢܚܬ ܬܠܓܐ. ܘܠܐ ܡܨܝܐ ܕܬܬܦܪܣ ܬܥܕܝ̣ܪܐ ܠܝܬܗ̇ ܪܥܝܐ. ܗܟܢܐ ܐܦ ܥܙ̈ܐ. ܡ̣ܢ ܪ̈ܟܫܐ ܚܕܢܝܬ݀ ܪܥܝܐ. ܡܐ ܕܚܕܐ ܬܛܥܐ. ܠܥܝ̣ܠܐ ܗ̇ܢܝܢ ܕܫܪܟܐ ܡܬܪ̈ܣܝܢ. ܡ̣ܢ ܚܝ̈ܘܬܐ ܕܒܪ̈ܝܬܐ܆ ܝܬܝܪ ܡܕܥܢܝ ܐܝܠܐ ܒܕܘܒܪܐ ܕܝܠܕ̈ܐ. ܘܟܕ ܫܕܐ ܩܪ̈ܢܘܗܝ ܗܝܕܝܢ ܡܙܕܗܪ ܐܟܡ̇ܢ ܕܐܣܬܪܩ ܡ̣ܢ ܙܝܢܐ. ܘܟܕ ܒܠܥ ܣܪܛܢܐ ܐܟܠ ܘܡܬܐܣܐ. ܘܥܙ̈ܐ ܒܕܝܩܛܐܡܢܘܢ ܡܬܐܣ̈ܝܢ. ܘܢܡܪܐ ܒܙܒܠܐ ܕܒܪܢܫܐ. ܘܟܠܒ̈ܬܐ ܒܚܛܬܐ. ܘܟܟܘܫܬܐ ܒܦܝ̣ܓܢܐ. ܐܟܙܢܐ ܕܝܢ ܕܕܐܒܐ ܥܡ ܥܪ̈ܒܐ ܘܢܩܘ̈ܬܐ. ܗܟܢܐ ܟܟܘܫܬܐ ܠܦܪ̈ܚܬܐ. ܗܟܘܬ ܘܢܡܣܐ. ܝܬܝܪ ܕܝܢ ܢܝ̣ܚ ܐܪܝܐ ܣܛܪ ܡ̣ܢ ܕܟܕ ܟܦܢ. ܘܡ̣ܢ ܡܕܡ ܠܐ ܩܢܛ. ܐܠܐ ܡ̣ܢ ܢܘܪܐ. ܣܓܝ̈ܐܬܐ ܝܠܦ ܦܝܠܐ. ܐܝܟܢܐ ܕܐܦ ܢܣܓܘܕ ܠܡܠܟܐ. ܘܠܢܩܒܬܐ ܕܒܛܢܬ݀ ܡܢܗ. ܠܐ ܠܓܡܪ ܬܘܒ ܡܫܬܘܬܦ. ܓܡܠܐ ܠܐ ܡܫܬܘܬܦ ܠܐܡܗ. ܟܕ ܒܙܒܢ ܠܗ̇ܘ ܕܐܛܥܝ̣ ܒܗ ܒܟܣܝ ܪܝܫܗ ܩܛܠ. ܐܡܪܝܢ ܕܝܢ ܕܣܥܪ ܗܕܐ ܘܐܦ ܣܘܣܝܐ. ܟܕ ܫܕܝܗܝ ܠܓܒܪܐ ܕܐܛܥܝ ܒܗ ܡ̣ܢ ܫܩܝ̣ܦܐ. ܢܫ̈ܐ ܣܓܝ̈ܐܬ݀ ܝܠܕܐ ܡܬܢܟ̈ܦܢ ܘܐܦܢ ܫܪ̈ܝ̣ܚܢ. ܘܣܓܝ̈ܐܝܝ ܫܘܬܦܘܬܐ ܩܠܝ̣ܠܐܝܬ ܣܐܒܝܢ ܘܓܒܪ̈ܐ ܘܢܫ̈ܐ. ܒܡܘܠܝ ܐܪܒܥܝܢ ܝܘܡܝ̈ܢ ܡܪܓܫܐ ܒܛܢܬܐ ܒܒܛܢܗ̇. ܘܒܗܢܐ ܙܒܢܐ ܐܢ ܝܚܛܐ ܘܕܟܪܐ ܢܗܐ ܥܘ̣ܠܐ. ܟܕ ܬܪܡܝ̣ܘܗܝ ܠܕܡܐ ܒܡܝ̈ܐ ܩܪܝ̣ܪ̈ܐ ܠܐ ܢܫܬܪܐ ܘܢܬܐܫܕ. ܡܬܚܘܐ ܗ̣ܘ ܥܘ̣ܠܐ ܕܪܒ ܩܠܝ̣ܠ ܡ̣ܢ ܫܘ̈ܫܡܢܐ. ܘܢܛܝ̣ܪܝܢ ܡܚܣܢܘ̈ܗܝ ܘܥܝܢܘ̈ܗܝ. ܢܩܒܬܐ ܕܝܢ ܠܓܘ ܡ̣ܢ ܬܠܬܐ ܝܪ̈ܚܝܢ. ܠܐ ܡܦܪܫܐ ܐܝܬܘܗܝ ܦܓܪܗ̇. ܘܠܓܘ ܡ̇ܢ ܐܦܢ ܗܟܢܐ ܡܫܘܚܪܐܝܬ ܡܫܬܡܠܝܐ. ܐܠܐ ܠܒܪ ܝܬܝܪ ܡ̣ܢ ܕܟܪ̈ܐ ܡܫܬܘܫܛܐ ܘܡܬܡܛܝܐ ܠܥܘ̣ܙܐ ܕܩܘܡܬܐ ܘܡܘܠܕܐ ܘܣܐܒܐ. ܠܒܛܢ̈ܬܐ ܪ̈ܓܝ̣ܓܬܐ ܘܡܫܚ̈ܠܦܬܐ ܗܘ̈ܝܢ. ܒܥܠܬ݀ ܡܬܟܠܝܢܘܬܗ ܕܕܡܐ. ܠܐ ܡܬܚܡܐ ܕܝܢ ܐܝܬܘܗܝ ܙܒܢܐ ܕܒܛܢܐ ܒܒܢܝ̈ܫܐ. ܐܦ ܓܝܪ ܬܡܝܢܝ ܝܪ̈ܚܐ ܝܠܕܐ ܐܢ̱ܬܬܐ ܘܫܒܝ̣ܥܝ ܝܪ̈ܚܐ ܘܬܫܝ̣ܥܝ ܝܪ̈ܚܐ. ܘܥܣܝ̣ܪܝ ܝܪ̈ܚܐ. ܘܚܕܥܣܝ̣ܪܝ ܝܪ̈ܚܐ. ܐܬܚܙܝܬ݀ ܐܢ̱ܬܬܐ ܕܒܐܪܒܥ ܙܒܢܝ̣̈ܢ ܥܣܪܝܢ ܝܠܕܬ݀. ܝܬܝܪ ܕܝܢ ܡ̣ܢ ܟܠܗܝܢ ܚܝ̈ܘܬܐ ܥܣܩܐܝܬ ܝܠܕܐ ܐܢ̱ܬܬܐ܆ ܡܛܠ ܡܐܝ̣ܢܘܬܗ̇. ܘܡܛܠ ܕܠܐ ܡܨܝܐ ܕܬܠܒܘܟ ܠܢܫܡܬܐ. ܥܕܡܐ ܠܝܘܡܐ ܫܒܝܥܝܐ ܬܚܝܬ ܩܝ̣ܢܕܘܢܘܣ ܐܝܬܝܗܘܢ ܥܘ̣̈ܠܐ. ܘܡܛܠܗܕܐ ܡ̣ܢ ܒܬܪ ܝܘܡܐ ܫܒܝ̣ܥܝܐ ܣܝܡܝ̣ܢ ܠܗܘܢ ܫܘ̈ܡܗܐ. ܩܝ̣ܢܕܘܢܘܣ ܕܝܢ ܐܝܬ ܥܠܝܗܘܢ. ܘܒܟܠ ܡܠܝܘܬܐ ܕܣܗܪܐ. ܟܠܗܝܢ ܚܝܘ̈ܬܐ ܣܚ̈ܝ̣ܬܐ ܟܝܬ ܘܦܪ̈ܚܬܐ ܘܗܠܟ̈ܬܐ ܡܢܘ̈ܬܗܝܢ ܥܠܝ̈ܬܐ ܝܬܝܪ ܥܒ̈ܝܢ ܘܪܘܪ̈ܒܢ. ܣܛܪ ܡ̣ܢ ܒܪܢܫܐ. ܒܕܓܘܢ ܚܠܦ ܪ̈ܓܠܐ ܩܘܕ̈ܡܢܝܬܐ ܐܝܕܝ̈ܐ ܝܗܒ ܠܗ ܒܪܘܝܐ. ܘܠܘ ܣܓܝ ܐܠܒܫ ܐܢܝܢ ܒܣܪܐ. ܐܝܟܢܐ ܕܠܐ ܢܛܥܢܝ̣ܘܗܝ ܝܘܩܪܐ ܠܚܝܠܐ ܡܬܗܘܢܢܐ. ܟܐܡܬ ܠܡܢܬܗ ܐܠܗܝܬܐ. ܘܡܛܠ ܕܚܟܝ̣ܡܐ ܗ̱ܘ ܐܝܬ ܠܗ ܐܝܕܝ̈ܐ ܠܘܬ ܣܥܘܪ̈ܘܬܐ ܡܦܬܟ̈ܬܐ ܐܝܟ ܕܐܡ̣ܪ ܐܪܝ̣ܣܛܘܣ. ܘܠܘ ܡܛܠ ܕܐܝܬ ܠܗ ܐܝܕܝ̈ܐ ܐܝܬܘܗܝ ܚܟܝ̣ܡܐ ܐܝܟ ܕܣܒܪ ܐܢܐܟܣܓܘܪܘܣ ܠܙܡܪܐ ܓܝܪ ܙܕܩ ܕܢܬܠ ܐܒܘܒܐ. ܘܠܘ ܠܐܝܢܐ ܕܐܝܬ ܠܗ ܐܒܘܒܐ ܙܕܩ ܕܢܙܕܩ ܙܡܪܘܬܐ. ܘܡܛܠ ܕܡܢܘ̈ܬܗ ܬܚܬܝ̈ܬܐ ܝܬܝܪ ܝܩܝ̣ܪ̈ܢ܆ ܬܪܝܨ ܩܘܡܬܐ ܗܘܐ. ܟܐܢܐܝܬ ܡܕܝܢ ܫܒܪ̈ܐ ܕܠܐ ܥܕܟܝܠ ܐܬܥܒܝ̈ ܡܢܘ̈ܬܗܘܢ ܬܚܬܝ̈ܬܐ. ܫܦܘ̈ܦܐ ܘܠܘ ܡܗܠܟ̈ܢܐ ܐܝܬܝܗܘܢ. ܘܡܛܠ ܗܢܐ ܬܘܒ ܒܨܝ̣ܪ ܚܟܝ̣ܡܝ̣ܢ. ܘܗܟܢܐ ܐܦ ܓܒܪ̈ܐ ܕܥܒܝܢ ܡ̣ܢ ܠܥܠ ܚܣܝ̣ܪܝܢ ܒܗܘܢܐ ܘܐܦܢ ܒܬܘܩܦܐ ܝܬܝ̣ܪܝܢ ܡ̣ܢ ܓܝܪ ܡܣܒܗܘܬܐ ܕܒܠܐ ܡܠܝ̣̈ܠܐ ܣܓܝ̈ܐܬܐ ܡܫܬܘܕܥܝ̣ܢ. ܦܘܣܝܘܓܢܘ̈ܡܘܢܝܩܘ. ܘܐܟܡܐ ܕܥܒܝܘܬܐ ܕܠܥܠ ܡܒܨܪܢܝ̣ܬܐ ܗ̱ܝ ܕܗܘܢܐ. ܒܗ̇ ܒܕܡܘ̣ܬܐ ܘܕܪܓܫܬܐ. ܘܡܗܦܢܝ̣ܬܐ ܗ̇ܝ ܕܪܝܫܐ ܠܐܦܝ̈ ܠܬܚܬ. ܐܟܙܢܐ ܕܒܓܠܝ̣̈ܙܝ ܪܓܫܬܐ ܠܥܠܝܗܘܢ ܠܬܚܬ ܥܒܕܐ. ܘܠܬܚܬܝܬܗܘܢ ܠܥܠ ܐܟܙܢܐ ܕܒܢܨܒܬܐ. ܠܝܥ̈ܝܬܐ ܓܝܪ ܥܩܪ̈ܐ ܐܝܬܝܗܘܢ ܦܘܡܐ ܘܪܝܫܐ. ܒܪܢܫܐ ܡ̇ܢ ܠܘ ܡܛܠ ܕܕܠܐ ܙܝܢܐ ܗ̱ܘ ܘܣܬܪܐ. ܒܨܝ̣ܪ ܡ̣ܢ ܚܝ̈ܘܬܐ ܒܬܘܩܢܗ. ܒܗ̇ܝ ܓܝܪ ܕܗܘܢܐ ܘܐܝܕܐ ܩܢܐ. ܟܠܗܘܢ ܗܠܝܢ ܩܢܐ. ܘܕܓܠܝ̣ܙܘܬܗ ܗܕܐ ܝܬܝܪ ܡܝܬܪܐ ܡ̣ܢ ܩܢܝܘܬܗ. ܗ̇ܢܘܢ ܕܡܬܥܨܝܢ ܕܢܕܡܟܘܢ ܟܕ ܣܐܝܢܝܢ ܘܟܕ ܡܙܝܢܝ̣ܢ ܟܠܗ ܙܒܢܐ ܕܚܝܝ̈ܗܘܢ ܡܙܕܩܝܢ. ܙܕܩ ܓܝܪ ܕܢܬܗܘܢܢ ܐܝܠܝܢ ܕܣܥܪܝ̣ܢܢ ܒܬܘܩܢܢ ܗܫܐ. ܘܕܟܡܐ ܚܣܝ̣ܪܝ̣ܢܢ ܗ̣ܘ ܘܐܠܘ ܐ̱ܚܪܢܐܝܬ ܐܝܬܘܗܝ ܗܘܐ ܠܢ ܬܘܩܢܢ.

 

 

 

ܢܝܫܐ ܬܠܝܬܝܐ ܡܛܠ ܬܘܩܢܐ ܕܒܪܢܫܐ ܕܝ̣ܠܢܐܝܬ ܘܚܫ̈ܚܬܐ ܕܗܕܡܘ̈ܗܝ. ܩܕܡܝܬ݀ ܡܛܠ ܚܫ̈ܚܬܐ ܕܗܕܡ̈ܐ ܦܫܝ̣̈ܛܐ

 

ܐܘܪܓܢܘܢ ܡ̇ܢ ܓܝܪ ܦܓܪܢܝܐ܆ ܟܕ ܥܠ ܣܘܡܟܐ ܡܕܡ ܣܢܝ̣ܩ ܗܘܐ ܒܙܘܥܘ̈ܗܝ. ܘܥܠ ܐܚܘܕܘܗܝ ܘܕܝܚܐ ܒܣܥܘܪ̈ܘܬܗ. ܘܗ̣ܢܘܢ ܗܠܝܢ܇ ܠܐ ܡܨܝܢ ܠܡܗܘܐ ܒܗܕܡܘ̈ܗܝ ܕܪܕܦܝ̣ܢ ܘܢܫܝ̣ܫܝ̣ܢ. ܐܠܐ ܒܩ̈ܫܝܐ. ܒܕܓܘܢ ܠܓܪ̈ܡܐ ܒܪܐ ܠܗ ܒܪܘܝܐ. ܐܟܡ̇ܢ ܕܒܗܘܢ ܢܬܠܘܢ ܗܕܡ̈ܐ ܐ̱ܚܪ̈ܢܐ ܕܪܟܝ̣ܟܝ̣ܢ. ܘܠܘ ܚܕ ܓܪܡܐ ܕܣܒܝ̣ܣ ܘܠܐ ܡܦܪܫ ܒܪܐ ܐܢܘܢ ܠܓܪ̈ܡܐ. ܕܠܐ ܒܚܫܐ ܕܚܕܐ ܡܢܬܐ ܡܢܗ܆ ܟܠܗܝܢ ܡܢܘ̈ܬܐ ܣܓܝ̈ܐܬܐ ܕܐܣܝ̣ܪ̈ܢ ܒܚܕ̈ܕܐ ܒܝܕ ܐܣܪ̈ܐ ܥܫܝ̣̈ܢܐ. ܘܗܟܢܐ ܝܘܬܪܢܐ ܗ̇ܘ ܕܣܒܝ̣ܣܘܬܐ ܐܟܚܕ ܘܕܡܦܪܫܘܬܐ ܠܗܘܢ ܗܘܐ. ܘܥܘܩܒܪ̈ܐ ܡ̇ܢ ܐܘܪ̈ܓܢܐ ܐܢܝܢ ܕܙܘܥܐ ܨܒܝܢܝܐ. ܟܕ ܒܡܩܣܝܘܬܗܝܢ ܡ̇ܢ ܡܬܢܬܦ̈ܢ ܠܗܘܢ ܠܗܕܡ̈ܐ ܡܬܬܙܝ̣̈ܥܝ ܨܒܝܢܐܝܬ ܒܡܨܥܝܘܬ ܝܬܪ̈ܐ ܕܢܒܗܝܢ ܡ̣ܢ ܪ̈ܝܫܝܗܘܢ. ܘܡܬܐܣܪܝܢ ܒܗܕ̈ܡܐ. ܘܓܝܕ̈ܐ ܡ̇ܢ ܟܕ ܡ̣ܢ ܡܘܚܐ ܘܓܪܡ ܚܨܐ ܫܘܚܝ̣ܢ. ܙܘܥܐ ܘܪܓܫܬܐ ܠܘܬ ܗܕܡ̈ܐ ܡܝܒܠܝܢ܇ ܘܘܪ̈ܝ̣ܕܐ ܡ̣ܢ ܟܒܕܐ ܫܘܚܝ̣ܢ. ܙܘܥܐ ܘܪܓܫܬܐ ܠܘܬ ܗܕ̈ܡܐ ܡܝܒܠܝܢ܇ ܘܘܪ̈ܝ̣ܕܐ ܡ̣ܢ ܟܒܕܐ ܫܘܚܝ̣ܢ. ܘܕܡܐ ܥܒܝܐ ܘܪܘܚܐ ܟܝܢܝܐ ܠܘܬ ܗܕ̈ܡܐ ܡܝܒܠܝܢ. ܘܫܪ̈ܝܢܐ ܡ̣ܢ ܠܒܐ ܡܫܪܝܢ ܡ̣ܢ ܟܪܣܗ ܟܝܬ ܣܡܠܝܬܐ. ܘܕܡܐ ܩܛܝ̣ܢܐ ܘܪܘܚܐ ܚܝܘܬܢܝܐ ܠܘܬ ܗܕܡ̈ܐ ܡܝܒܠܝܢ. ܘܒܣܪܐ ܡ̇ܢ ܠܘܬ ܡܠܝܘܬܐ ܕܫܗܝ̈ܘܬܐ ܘܣܦܝ̣̈ܩܘܬܐ ܕܒܝܢܬ ܘܪ̈ܝ̣ܕܐ ܘܫܪ̈ܝܢܐ ܘܓܝܕ̈ܐ ܐܬܒܪܝ. ܕܠܐ ܠܡ ܢܬܬܠܚܘܢ ܡ̣ܢ ܙܘ̈ܥܐ ܩܛܝ̣ܪ̈ܝܐ ܘܢܙܕܡܘܢ ܡ̣ܢ ܓܕ̈ܫܐ ܕܡ̣ܢ ܠܒܪ. ܘܠܘܬ ܗ̇ܝ ܕܢܫܚܢܝ̣ܘܗܝ ܠܦܓܪܐ ܒܚܡܝ̣ܡܘܬܗ ܘܪܛܝ̣ܒܘܬܗ. ܘܠܐ ܬܡܛܐ ܩܪܝ̣ܪܘܬܐ ܠܡܐܢ̈ܝ ܟܪܣܐ. ܘܣܥܪܐ ܡ̇ܢ ܐܬܒܪܝ ܠܡܕܟܝܘܬܗ ܠܦܓܪܐ ܡ̣ܢ ܝܬܝ̣ܪ̈ܘܬܐ ܬܢܢܝ̈ܬܐ ܕܒܗܝܢ ܡܬܬܪܣܐ. ܘܠܘܬ ܡܕܡ ܡ̣ܢ ܡܢܘ̈ܬܐ ܡܛܠ ܨܒܬܐ ܘܠܘܬ ܢܛܘܪܬܐ ܐܬܒܪܝ. ܒܪܡ ܠܓܒܪ̈ܐ ܒܠܚܘܕ. ܟܕ ܠܢܫ̈ܐ ܓܠܝ̣ܙܘܬܗ. ܗ̣ܝ ܨܒܬܐ. ܘܥܡ ܗܕܐ ܠܐ ܣܟ ܣܢܝ̣̈ܩܢ ܥܠ ܬܚܦܝ̣ܬܐ ܕܠܘ̣ܥ̈ܐ. ܣܡܐ ܗ̱ܘ ܓܝܪ ܪܒܐ ܠܗܝܢ ܠܘܬ ܩܘ̣ܪܫܐ ܥܡܘܪܝܐ ܐܡܝ̣ܢܐ ܕܒܒ̈ܬܐ. ܘܛܦܪ̈ܐ ܕܝܢ ܠܘܬ ܡܚܝܠܢܘܬܐ ܕܪ̈ܝܫܝ ܨܒܥ̈ܬܐ ܐܬܒܪ̈ܝ. ܘܡܛܠ ܬܨܒܝ̣ܬܐ ܘܫܘܦܪܐ. ܘܠܘܬ ܡܙܝܢܘܬܐ ܟܝ̣ܬ ܠܘܬ ܚܝ̈ܘܬܐ ܕܠܐ ܡܠܬܐ.

 

ܡܛܠ ܚܫ̈ܚܬܐ ܕܗܕ̈ܡܐ ܐܘܪ̈ܓܢܝܐ ܡܛܠ ܚܫ̈ܚܬܐ ܕܡܢܘ̈ܬܐ ܕܪܝܫܐ

 

ܩܪܦܬܐ ܡ̇ܢ ܓܝܪ ܕܡܘ̣ܬ ܣܢܘܪܬܐ ܐܚܝ̣ܕܐ ܠܗ ܠܡܘܚܐ. ܘܡܣܬܪܐ ܠܗ ܘܡܢܛܪܐ ܡ̣ܢ ܢܟ̈ܝܢܐ ܕܡ̣ܢ ܠܒܪ. ܘܡܛܠ ܕܠܘ ܒܡܨܥܬܗ ܕܦܓܪܐ ܗ̣ܘ ܪܝܫܐ ܐܬܛܟܣ. ܠܘ ܟܠܗܘܢ ܓܝ̈ܕܐ ܡܢܗ ܫܘܚܝ̣ܢ. ܕܠܐ ܠܡ ܢܘܚܠܘܢ ܗܘܘ ܒܡܪܕܝ̣ܬܗܘܢ ܕܠܘܬ ܗܕܡ̈ܐ ܗ̇ܢܘܢ ܪ̈ܚܝ̣ܩܐ. ܐܠܐ ܡܢܗ̇ ܕܐܘܣܝܐ ܕܡܘܚܐ ܡܢܬܐ ܡܕܡ ܢܚܬܬ݀ ܒܐܘܪܟܗ ܕܦܓܪܐ. ܡܨܥܬ݀ ܓܪ̈ܡܐ ܟܝ̣ܬ ܚܝܠܬܢ̈ܐ ܗ̇ܢܘܢ ܕܒܕܡܘܬ ܩܪܩܦܬܐ ܠܡܘܚܐ ܕܪܝܫܐ ܗ̣ܢܘܢ ܠܗ̇ ܡܣܬܪܝܢ ܘܢܛܪܝ̣ܢ. ܘܐܝܬܝܗܘܢ ܦܩܪ̈ܐ ܐܘܟܝܬ ܚܘܡܪ̈ܬܐ ܕܓܪܡ ܚܨܐ. ܗ̇ܢܘܢ ܕܠܘܬ ܓܪܡܐ ܟܗܢܝܐ ܡܣܬܝܟܝܢ. ܒܕܓܘܢ ܟܠ ܡܐ ܕܠܘܩܒܠ ܗܕܡܐ ܡܕܡ ܕܣܢܝ̣ܩ ܥܠ ܙܘܥܐ ܨܒܝܢܝܐ ܡܬܡܢܥܐ ܒܡܚܬܬܗ̇. ܡܐܥܐ ܝܥܐ ܡܢܗ̇ ܙܘܓܐ ܕܓܝ̈ܕܐ ܚܕ ܠܝܡܝ̣ܢܐ ܘܐ̱ܚܪܢܐ ܠܣܡܠܐ. ܘܗܟܢܐ ܪܓܫܬܐ ܘܙܘܥܐ ܠܗܕ̈ܡܐ ܡܫܬܟܢܝܢ. ܘܡ̣ܢ ܡܢܘ̈ܬܐ ܣܓܝ̈ܐܬܐ ܐܬܪܟܒ ܗ̣ܘ ܓܪܡ ܚܨܐ. ܐܝܟܢܐ ܕܡܟܢܘܬܐ ܬܗܐ ܠܒܪܢܫܐ. ܘܠܘܬ ܗ̇ܝ ܕܢܬܟܦܦ ܘܢܬܦܫܛ. ܘܡܢܬܗ ܡ̇ܢ ܩܘܕܡܢܝܬܐ ܕܡܘܚܐ ܪܟܝ̣ܟܬܐ ܐܬܒܪܝܬ݀. ܘܗ̇ܝ ܒܣܬܪܝܬܐ ܩܫܝ̣ܬܐ. ܡܛܠ ܕܡ̣ܢ ܗ̇ܝ ܩܘܕܡܢܝܬܐ ܡܫܢܝܢ ܓܝ̈ܕܝ ܪܓܫܬܐ. ܗ̇ܢܘܢ ܕܛܒ ܩܛܝ̣ܢܝܢ ܡ̣ܢ ܓܝ̈ܕܝ ܙܘܥܐ ܕܥܠ ܚܘܝܠܐ ܘܩܫܝܘܬܐ ܣܢܝ̣ܩܝ̣ܢ. ܘܡ̣ܢ ܗ̇ܝ ܒܣܬܪܝܬܐ ܫܘܚܝ̣ܢ. ܘܥܝ̈ܢܐ ܡ̇ܢ ܒܪܝܫܐ ܐܬܛܟܣ̈ܝ. ܡܛܠ ܕܕܘܟܬ݀ ܕܘ̈ܩܐ ܡܡܠܝ̈ܢ. ܘܡܛܠܬܗܝܢ ܬܘܒ ܐܦ ܪܝܫܐ ܠܥܠ ܫܘܙܒ ܣܝܡܐ ܘܠܘ ܡܛܠ ܡܕܡ ܐ̱ܚܪܝܢ. ܘܨܝܕ ܣܟܐ ܡ̇ܢ ܕܬܪ̈ܝܗܘܢ ܚܪܘܪ̈ܘܗܝ ܕܢܚܝ̣ܪܐ܆ ܓܪܡܐ ܡܕܡ ܐܣܦܘ̣ܓܢܝܐ ܣܓܝ ܢܩ̈ܒܐ ܐܬܒܪܝ. ܕܒܝܕܗ ܢܬܝܒܠܘܢ ܪ̈ܝ̣ܚܢܐ ܠܘܬ ܬܪ̈ܬܝܗܝܢ ܡܫܘܚܢܘ̈ܗܝ ܒܙܢܝ̈ܬܐ ܕܒܩܘܕܡܗ ܕܡܘܚܐ ܕܐܝܬܝܗܝܢ ܐܘܪ̈ܓܢܐ ܕܡܪܝܚܢܘܬܐ. ܘܗ̣ܢܘܢ ܢܩ̈ܒܐ ܐܣܦܘ̈ܓܢܝܐ ܥܩܠܩ̈ܠܐ ܘܠܘ ܬܪ̈ܝ̣ܨܐ ܐܬܒܪܝܘ. ܐܟܡ̇ܢ ܕܒܗܘܢ ܢܬܬܗܐ ܩܠܝ̣ܠ ܗ̣ܘ ܐܐܪ ܡܬܬܣܝ̣ܩܢܐ ܥܕ ܢܫܚܢ. ܘܠܐ ܒܩܪܝ̣ܪܘܬܗ ܢܐܟܝܘܗܝ ܠܡܘܚܐ ܗ̇ܘ ܕܛܒ ܩܪܝ̣ܪ ܒܟܝܢܐ. ܘܒܗܘܢ ܬܘܒ ܝܬܝܪ̈ܘܬܗ ܡܚܘܛܢ̈ܝܬܐ ܕܡܘܚܐ ܡܣܬܦ̈ܩܢ. ܘܐܕܢܐ ܡ̇ܢ ܟܕ ܐܘܪܓܢܘܢ ܗ̣ܘ ܕܡܕܪܟܢܘܬ ܩ̈ܠܐ. ܘܗ̣ܘ ܓܝܕܐ ܕܒܗ ܡܫܬܡܠܝܐ ܡܕܪܟܢܘܬܐ ܕܐܝܟ ܗܕܐ. ܠܘܬ ܗ̇ܝ ܕܒܝܬܗ ܢܦܓܥ ܒܗ ܒܐܐܪ ܗ̇ܘ ܕܛܥܝܢ ܠܗ̇ ܠܐܝܢܝܘܬܐ ܩܠܢܝܬܐ ܣܢܝ̣ܩ. ܘܐܠܘ ܒܗ̇ ܒܩܪܝ̣ܪܘܬܗ ܓܫܦ ܗܘܐ ܒܗ ܗ̣ܘ ܗܢܐ ܐܐܪ܆ ܡܐܟܝܘ ܡܐܟܐ ܗܘܐ ܠܗ. ܟܐܢܐܝܬ ܓܪܡܐ ܡܕܡ ܟܐܦܢܝܐ ܐܬܒܪܝ ܩܘܕܡܘܗܝ. ܗ̇ܘ ܕܢܩܝ̣ܒ ܢܩܒܐ ܡܕܡ ܕܕܡܐ ܠܩܘܟ̈ܠܝܐ ܕܢܓܪ̈ܐ. ܕܒܗ ܒܗܢܐ ܟܕ ܢܬܥܟܪ ܐܐܪ ܢܬܡܙܓ ܘܠܐ ܢܙܡܝܘܗܝ ܠܓܝܕܐ ܪܓܘܫܐ ܒܩܪܝ̣ܪܘܬܗ. ܘܚܣܚܘܣܐ ܬܘܒ ܛܒܠܢܝܐ ܐܬܩܪܡ ܥܠܘܗܝ ܕܢܩܒܐ. ܐܟܡܢ ܕܢܗܦܟܝ̣ܘܗܝ ܠܩܠܐ ܘܢܟܠܝܘܗܝ ܡ̣ܢ ܦܘܠܗܕܐ. ܘܚܣܚܘܣܢܝܬܐ ܐܬܒܪܝܬ݀ ܗ̣ܝ ܗܕܐ ܐܘܣܝܐ. ܒܕܚܣܚܘܣܐ ܝܬܝܪ ܥܗܢ ܠܩܘܒܠ ܩ̈ܠܐ. ܐܝܟ ܕܐܦ ܡܫ̈ܟܐ ܝܒܝ̈ܫܐ ܕܡܬܝ̣ܚܝ̣ܢ ܥܠ ܦܠܓ̈ܐ. ܘܫܢ̈ܐ ܡ̇ܢ ܝܬܝܪ ܩܫ̈ܝܬܐ ܐܬܒܪ̈ܝܝܢ ܛܒ ܡ̣ܢ ܓܪ̈ܡܐ ܕܫܪܟܐ. ܒܕܦܚܡܐ ܕܦܪܙܠܐ ܕܕܟܪܢܝ ܘܩܫܐ ܠܘܬ ܦܪܙܠܐ ܕܪܟܝ̣ܟ ܩܢ̈ܝܢ ܠܘܬܗܘܢ ܘܗ̇ܢܝܢ ܡ̇ܢ ܩܘܕ̈ܡܢܝܬܐ ܦܬܝ̈ܬܐ ܗܘܝ̈ ܘܚܪ̈ܝ̣ܦܬܐ. ܐܟܡܢ ܕܢܗܘ̈ܝܢ ܥܗ̈ܢܢ ܠܘܬ ܓܕܡܐ ܘܦܣܩܐ. ܘܢܝ̣̈ܒܐ ܬܘܒ ܚܪ̈ܝ̣ܦܝ ܪ̈ܝܫܐ ܗܘܘ ܐܟܡ̇ܢ ܕܢܗܘܘܢ ܥܗܢܝ̣ܢ ܠܘܬ ܗ̇ܝ ܕܢܬܒܪܘܢ. ܘܥܪ̈ܫܐ ܐܬܦܬܝ̣ܘ ܪ̈ܝܫܝܗܝܢ. ܐܟܡ̇ܢ ܕܢܗܘ̈ܝܢ ܥܗ̈ܢܢ ܠܘܬ ܗ̇ܝ ܕܢܛܚ̈ܢܢ. ܫܪܫܐ ܡ̇ܢ ܕܗ̇ܢܝܢ ܥܠܝ̈ܬܐ ܝܬܝܪ ܡ̣ܢ ܕܗ̇ܢܝܢ ܬܚܬܝ̈ܬܐ ܗܘܘ ܐܟܡ̇ܢ ܕܢܣܦܩܘܢ ܠܡܛܥܢ ܝܘܩܪܗܝܢ. ܗ̇ܘ ܕܣܩܘܒܠܝ ܠܩܒܠܗܝܢ ܒܗܦܟܐ ܕܗ̇ܢܝܢ ܬܚܬܝ̈ܬܐ. ܘܠܘ̣ܥܐ ܡ̇ܢ ܬܚܬܝܐ. ܡܬܬܠܝܘ ܐܬܬܠܝ ܒܠܘܥܐ ܥܠܝܐ. ܘܠܘ ܒܗܦܟܐ. ܒܗ̇ܝ ܕܛܒ ܩܠܝܠ ܡ̣ܢ ܥܠܝܐ. ܘܕܠܝ̣ܠ ܠܡܬܬܙܥܘ ܠܘܬ ܦܢ̈ܝܬܐ ܡܫܚ̈ܠܦܬܐ.

 

 

 

ܡܛܠ ܚܫ̈ܚܬܐ ܕܡܐܢ̈ܝ ܢܫܡܬܐ

 

ܩܢܝܐ ܡ̇ܢ ܕܪܐܬܐ ܡ̣ܢ ܚܘܪܪܐ ܚܙܝ̣̈ܩܝ ܒܚܠܒ̈ܐ ܐܬܒܪܝ. ܐܝܟܢܐ ܕܢܗܘܐ ܡܟܢ ܠܡܬܩܦܣܘ ܘܠܡܬܦܫܛܘ ܟܕ ܢܣܬܢܩ ܒܪܢܫܐ ܠܡܪܡܘ ܩܠܗ ܘܠܡܬܚܬܝܘ ܘܠܡܫܠܐ. ܘܡ̣ܢ ܩܘܕܡܐ ܐܬܛܟܣ. ܐܝܟܢܐ ܕܬܪܝ̣ܨܐܝܬ ܘܒܩܪܝ̣ܒܘ ܢܬܠܚܡ ܠܪܐܬܐ. ܘܗ̣ܢܘܢ ܚܘܕܪ̈ܘܗܝ ܬܪܝܢ ܬܘ̈ܠܬܐ ܕܚܘܕܪܐ ܗܘܘ܆ ܘܬܘܠܬܐ ܐ̱ܚܪܢܐ ܒܝܕ ܚܠܒܐ ܐܬܡܠܝ ܐܟܡ̇ܢ ܕܦܫܝ̣ܩܐܝܬ ܢܬܪܘܚ ܠܘܬ ܩܥܬܐ. ܘܗ̣ܘ ܗܢܐ ܣܛܪܐ ܒܦܢܝ̣ܬܗ ܕܝܫܛܐ܆ ܙܒܢ ܒܠܥܐ. ܘܡܛܠ ܕܡ̣ܢ ܒܣܬܪܗ ܗ̣ܘ ܝܫܛܐ. ܒܟܣܝܐ ܡܕܡ ܐܬܟܣܝ̣ ܦܘܡܗ. ܕܠܐ ܠܡ ܢܦܠ ܒܗ ܡܕܡ ܡ̣ܢ ܗ̇ܘ ܡܐ ܕܡܬܐܟܠ ܐܘ ܡܫܬܬܐ. ܗ̇ܘ ܕܟܕ ܚܕܐ ܠܟܡܐ ܓܕܫ ܓܕܫܐ ܕܐܝܟ ܗܢܐ. ܟܕ ܢܗܘܐ ܦܬܝ̣ܚ ܗ̣ܘ ܗܢܐ ܡܥܒܪܢܐ ܐܘ ܒܙܒܢ ܢܫܡܐ ܐܘ ܡܡܠܠܐ. ܘܢܦܠ ܒܗ ܡܕܡ ܡ̣ܢ ܕܐܝܟ ܗܠܝܢ܆ ܚܢܘ̣ܩܝܐ ܐܘ ܫܥܘ̣ܬܐ ܩܫܝܐ ܓܕܫ. ܘܠܒܐ ܡ̇ܢ ܘܪܐܬܐ ܒܬܢܘܪ ܚܕܝܐ ܐܬܛܟܣܘ. ܟܕ ܚܕܝ̣ܪܝ̣ܢ ܠܗܘܢ ܓܪ̈ܡܐ ܡ̣ܢ ܟܠ ܓܒܝ̣̈ܢ. ܘܬܚܘ̈ܬܝܗܘܢ ܚܠܒܐ ܗ̇ܘ ܚܙܘܩܐ ܕܡܬܩܪ ܦܪܗܢܘܣ. ܐܟܡܢ ܕܣܟܪ̈ܐ ܡܣܬܪ̈ܢܝܬܐ ܢܗܘܘܢ ܠܗܘܢ ܘܢܢܛܪܘܢ ܐܢܘܢ ܡ̣ܢ ܢܟ̈ܝܢܐ ܕܡ̣ܢ ܠܒܪ. ܘܥܘܩܒܪ̈ܬܐ ܬܘܒ ܐܬܛܟܣ̈ܝ ܡܨܥܬ݀ ܐܠܥ̈ܐ. ܘܥܠܝܗܝܢ ܡ̣ܢ ܠܓܘ ܘܡ̣ܢ ܠܒܪ. ܐܟܡ̇ܢ ܕܒܗܝܢ ܢܫܬܡܠܘܢ ܙܘܥܝ̈ ܚܕܝܐ ܒܦܫܛܐ ܘܩܦܣܐ. ܟܕ ܒܦܫܛܗ̇ ܡ̇ܢ ܕܪܐܬܐ ܐܐܪ ܥܐܠ ܩܪܝ̣ܪܐ ܒܩܦܣܗ̇ ܐܐܪ ܗ̇ܘ ܬܢܢܝܐ ܕܐܬܚܪܟ ܡܬܕܚܐ. ܘܗ̣ܝ ܡ̇ܢ ܪܐܬܐ ܟܕ ܐܘܪܓܢܘܢ ܗ̣ܝ ܠܘܬ ܡܦܚܢܘܬܗ ܕܠܒܐ܆ ܩܠܘ̣ܠܬܐ ܐܬܒܪܝܬ݀. ܘܡ̣ܢ ܒܣܪܐ ܪܦܘܚܐ ܘܪܦܝܐ. ܐܟܡ̇ܢ ܕܕܠܝ̣ܠܐܝܬ ܢܬܩܦܣ ܘܢܬܦܫܛ. ܘܡܛܠ ܗ̇ܝ ܬܘܒ ܕܐܘܨܪܐ ܗ̇ܝ ܕܗܘܠܐ ܕܪܘܚܐ ܚܝܘܬܢܝܐ ܡ̣ܢ ܚܠܝ̣̈ܠܘܬܐ ܣܓܝ̈ܐܬܐ ܐܬܪܟܒܬ݀. ܘܦܘܡܐ ܗ̇ܘ ܕܒܗ ܥܐܠ ܕܡܐ ܘܐܐܪ ܠܘܬ ܠܒܐ. ܘܡ̣ܢ ܠܓܘ ܠܐܦܝ̈ ܠܒܪ ܡܬܬܚܕ. ܐܝܟܢܐ ܕܦܫܝ̣ܩܐܝܬ ܢܬܦܬܚ ܠܘܬ ܡܥܠܬܐ ܕܕܡܐ ܘܐܐܪ ܕܡ̣ܢ ܠܒܪ ܥܐܠܝܢ ܠܠܒܐ. ܘܠܐ ܢܬܦܬܚ ܟܕ ܢܙܕܪܒܘܢ ܠܡܦܩ. ܐܠܐ ܥܫܝܢ̣ܐܝܬ ܢܬܬܚܕ. ܘܦܘܡܐ ܗ̇ܘ ܕܒܗ ܢܦܩ ܪܘܚܐ ܚܝܘܬܢܝܐ ܡ̣ܢ ܠܒܐ ܠܘܬ ܗܕܡ̈ܐ. ܡ̣ܢ ܠܒܪ ܠܐܦܝ̈ ܠܓܘ ܡܬܬܚܕ. ܐܝܟܢܐ ܕܦܫܝ̣ܩܐܝܬ ܢܬܦܬܚ ܠܘܬ ܡܦܩܬܐ ܕܝܠܗ ܕܪܘܚܐ. ܘܠܐ ܢܬܦܬܚ ܟܕ ܢܙܕܪܒ ܠܡܗܦܟ ܠܒܣܬܪܐ ܘܠܡܥܠ ܒܪ ܕܪܝܫ ܠܠܒܐ. ܐܠܐ ܚܣܝ̣ܢܐܝܬ ܢܬܬܚܕ ܡܢܗ ܕܙܘܥܐ ܗܢܐ ܕܠܒܪ ܡ̣ܢ ܟܝܢܐ.

 

 

 

ܡܛܠ ܚܫ̈ܚܬ ܕܡܐܢܝ̈ ܬܪܣܝ̣ܬܐ

 

ܠܝܫܛܐ ܕܝܢ ܐܝܟ ܕܠܐܘܪܟܐ ܒܠܚܘܕ ܘܐܝܟ ܕܠܦܬܝܐ ܗܘܝ̈ ܐܝܢܗܣ ܒܕܥܠ ܢܬܘܦܘܬܐ ܒܠܚܘܕ ܕܬܪܣܝ̣ܬܐ ܘܕܚܝܗ̇ ܣܢܝ̣ܩ. ܠܐܣܛܘܡܟܐ ܕܝܢ ܥܡ ܗܠܢ ܐܦ ܐܝܢܗܣ ܬܘܒ ܙܠܝ̣ܡܬܐ ܗܘܬ݀. ܐܝܟܢܐ ܕܒܗ̇ ܬܐܚܘܕ ܠܬܪܣܝ̣ܬܐ ܥܕ ܢܫܬܡܠܐ ܦܫܪܗ̇. ܘܩܕܠܗ̇ ܡ̇ܢ ܬܚܬܝܐ ܛܒ ܡ̇ܢ ܗ̇ܘ ܥܠܝܐ ܐܬܐܠܨ. ܒܕ ܗ̇ܘ ܡܐ ܕܒܗ ܥܒܪ ܡ̣ܢ ܟܕܘ ܐܬܩܛܢ. ܘܦܫܝ̣ܩ ܠܡܪܕܝ̣ܬܐ ܗܘܐ ܟܐܡܬ ܗ̣ܘ ܟܘܠܘܣ. ܘܠܡܥܝ̣ܢܐ ܡ̇ܢ ܩܛܝ̣̈ܢܐ. ܟܪ̈ܟܬܐ ܗܘܝ̈. ܐܝܟܢܐ ܕܙܒܢܐ ܕܐܪܝܟ ܬܦܘܫ ܒܗܘܢ ܬܪܣܝ̣ܬܐ. ܘܠܘ ܪܗܝ̣ܒܐܝܬ ܬܬܢܦܨ ܡ̣ܢ ܩܕܡ ܕܬܡܘܪ ܡܢܗ̇ ܟܒܕܐ ܣܢܝ̣ܩܘܬܗ ܕܦܓܪܐ. ܘܟܕ ܗܕܐ ܚܫܚܬܐ ܬܬܡܠܐ. ܢܚܬ ܫܪܟܢܗ̇ ܗ̇ܘ ܕܬܐܛܪܐ ܗ̱ܘ ܒܫܪܪܐ ܘܐܠܨܐ ܠܡܬܢܦܨܘ ܠܘܬ ܡܥܝ̈ܐ ܬܚܬܝ̈ܐ. ܘܡܥܝܐ ܗ̇ܘ ܬܪܝ̣ܨܐ ܕܡ̣ܢ ܟܠܗܘܢ ܬܚܬܝ ܝܬܝܪ ܕܡ̣ܢ ܟܠܗܘܢ ܬܚܬܝ ܝܬܝܪ ܪܘܝ̣ܚܐ ܗ̣ܘܐ. ܐܝܟܢܐ ܕܢܥܪܐ ܡܢܗ̇ ܕܝܬܝ̣ܪܘܬܐ ܡܢܬܐ ܕܡܫܪܬܚܐ. ܘܠܐ ܢܣܬܢܩ ܒܪܢܫܐ ܠܗ̇ܝ ܕܒܐܡܝ̣ܢܘ ܘܣܒܝ̣ܣܐܝܬ ܢܩܘܡ ܠܘܬ ܬܕܟܝ̣ܬܐ. ܘܠܘܬ ܣܘܦܗ ܥܘܩܒܪܬܐ ܡܕܡ ܐܬܬܟܝ̣ܢܬ݀. ܗ̇ܝ ܐܝܕܐ ܕܨܒܝܢܐܝܬ ܦܬܚܐ ܠܗ ܘܐܚܕܐ. ܡܗܣܐܪ̈ܝܩܐ ܕܝܢ ܐܘܟܝܬ ܘܪ̈ܝ̣ܕܐ ܗ̇ܢܘܢ ܩܛܝ̣̈ܢܐ ܕܡ̣ܢ ܐܣܛܘܡܟܐ ܕܡܥܝ̈ܐ ܒܟܒܕܐ ܡܬܠܚܡܝ̣ܢ. ܡܛܠ ܢܬܦܐ ܕܟܘܠܘܣ ܐܬܒܪܝ̣ܘ. ܘܒܗ̇ ܒܚܠܝ̣ܠܘܬܐ ܕܟܒܕܐ. ܠܡܢܘ̈ܬܐ ܣܓܝ̈ܐܬܐ ܕܝܬܝܪ ܩܛܝ̣̈ܢܢ ܡܬܦܠܓܝ̣ܢ. ܐܟܡ̇ܢ ܕܕܠܝ̣ܠ ܠܫܘܚܠܦܐ ܢܗܐ ܗܘܟܘܠܘܣ. ܘܡܛܠ ܕܒܗ ܒܗܢܐ ܦܫܪܐ ܟܒܕܢܝܐ. ܬܪܬܝܢ ܝܬܝ̣ܪ̈ܘܬܐ ܐ̱ܚܪ̈ܢܝܬܐ ܡܫܬܟ̈ܚܢ. ܚܕܐ ܡ̣ܢ ܡܪܬܐ ܣܘܡܩܬܐ܆ ܗ̇ܝ ܕܠܗ̇ ܡܪܪܬܐ ܢܬܦܐ ܒܚܕ ܡ̣ܢ ܬܪ̈ܝܗܘܢ ܦܘܡܝ̈ܗ̇. ܘܒܗܘ ܐ̱ܚܪܢܐ ܕܚܝܐ ܠܗ̇ ܠܘܬ ܡܥܝܐ. ܢܬܦܐ ܡ̇ܢ ܒܩܨ ܡܨܛܥܠܢܘܬܗ ܕܕܡܐ ܡܢܗ̇ ܕܝܬܝ̣ܪܘܬܐ ܡܪܬܢܝܬܐ. ܘܕܝܚܐ ܬܘܒ܆ ܒܩܨܬ݀ ܗ̇ܝ ܕܬܙܝ̣ܥ ܐܢܘܢ ܠܡܥܝ̈ܐ ܠܘܬ ܕܚܝܗ̇ ܕܝܬܝ̣ܪܘܬܐ ܬܐܛܪܢܝ̣ܬܐ ܕܐܝܬܝܗ̇ ܬܕܟܝ̣ܬܐ ܘܬܫܝ̣ܓ ܐܢܘܢ. ܐ̱ܚܪܬܐ ܕܝܢ ܝܬܝܪܘܬܐ ܐܝܬܝܗ̇܆ ܡܪܬܐ ܐܘܟܡܬܐ. ܗ̇ܝ ܕܐܦ ܠܗ̇ ܛܚܠܐ ܢܬܦ ܠܗ̇ ܒܚܕ ܡ̣ܢ ܬܪ̈ܝܗܘܢ ܦܘ̈ܡܝܗ̇܆ ܘܒܗ̇ܘ ܐ̱ܚܪܢܐ ܕܚܐ ܠܗ̇ ܠܘܬ ܦܘܡܗ̇ ܕܐܣܛܘܡܟܐ. ܢܬܦܐ ܡ̇ܢ ܒܩܨ ܡܨܛܥܠܢܘܬܐ ܗ̇ܝ ܕܩܕܝ̣ܡܐ ܐܡܝ̣ܪܐ. ܘܕܝܚܐ ܬܘܒ܆ ܒܩܨܬ݀ ܗ̇ܝ ܕܬܥܝ̣ܪܝܗ̇ ܠܪܓܬ݀ ܡܐܟܘܠܬܐ ܒܚܡܘܨܘܬܗ̇ ܘܢܘ̣ܟܬܗ̇. ܘܟܘ̈ܠܝܬܐ ܡ̇ܢ ܐܘܪ̈ܓܢܐ ܐܢܝܢ ܕܢܬܘܦܘܬ ܡܝܢܘܬܐ ܡ̣ܢ ܕܡܐ ܕܒܟܒܕܐ. ܘܗ̇ܝ ܕܝܡܝ̣ܢܐ ܡ̇ܢ ܝܬܝܪ ܡ̣ܢ ܗ̇ܝ ܕܣܡܠܐ ܪܡܐ ܒܣܝܡܗ̇. ܐܝܟܢܐ ܕܠܐ ܬܪ̈ܬܝܗܝܢ ܒܥܪܐ ܫܘܝܐ ܢܬܦ̈ܢ ܗܘܝ̈ ܡ̣ܢ ܟܒܕܐ. ܘܢܬܕܠܩ̈ܒܢ ܗܘܝ̈ ܠܚܕܕ̈ܐ. ܒܕܟܠܝܐ ܗܘܬ݀ ܟܠ ܚܕܐ ܡܢܗܝܢ ܠܚܒܪܬܗ̇. ܘܟܠ ܚܕܐ ܡܢܗܝܢ ܒܩܕܠܗ̇ ܗ̇ܘ ܕܡܚܝܢ ܠܘܪܝ̣ܕܐ ܪܒܐ ܕܢܦܩ ܡ̣ܢ ܩܒܥܗ̇ ܕܟܒܕܐ ܢܬܦܐ ܠܗ̇ ܠܡܝܢܘܬܐ. ܘܒܗ̇ܘ ܐ̱ܚܪܢܐ ܬܚܬܝܐ ܕܡܚܝܕ ܠܫܠܦܘܚܬܐ ܕܚܝܐ ܠܗ̇ ܠܘܬܗ̇. ܘܗ̣ܘ ܗܢܐ ܩܕܠܐ ܥܡ ܚܒܪܗ܆ ܐܪ̈ܒܘܒܝܬܐ ܡܬܩܪܝܢ ܟܐܡܬ݀ ܬܪ̈ܝܗܘܢ ܩܕ̈ܠܐ ܬܚܬܝ̈ܐ ܕܬܪ̈ܬܝܗܝܢ ܟܘ̣ܠܝ̈ܬܐ. ܘܠܩܕܠܗ̇ ܡ̇ܢ ܕܫܠܦܘ̣ܚܬܐ ܥܦܝ̣ܩܐ ܥܘܩܒܪܬܐ ܗ̇ܝ ܕܡܚܝܨܐ ܠܗ. ܕܠܐ ܒܨܒܝܢܢ ܢܬܬܦܫܪ. ܘܢܕܝ̣̈ܕܐ ܘܕܠܐ ܨܒܬܐ ܢܗܘܐ. ܘܐܪ̈ܒܘܒܝܬܐ ܡ̇ܢ ܕܒܗܝܢ ܐܬܝܐ ܬܦܫܘܪܬܐ ܡ̣ܢ ܟܘܠܝ̈ܬܐ. ܟܕ ܡܬܡܢ̈ܥܢ ܠܘܬ ܫܠܦܘܚܬܐ. ܣܕ̈ܩܢ ܚܕܐ ܡ̣ܢ ܬܪ̈ܬܝܗܝܢ ܟܘܬܝ̣ܢ̈ܝܬܗ̇ ܘܪ̈ܕܝܢ ܒܝܬ ܬܪ̈ܬܝܗܝܢ. ܥܕܡܐ ܕܡܛܝ̈ܢ ܠܩܕܠܗ̇ ܕܫܠܦܘܚܬܐ. ܐܝܛܐ ܣܕ̈ܩܢ ܐܦ ܠܟܘ̣ܬܝ̣ܢܐ ܗ̇ܝ ܐ̱ܚܪܬܐ ܓܘܝܬܐ. ܘܡܣܦ̈ܩܢ ܠܬܦܫܘܪܬܐ ܒܓܘܗ̇. ܘܗ̣ܢܘܢ ܗܠܝܢ ܫܒܝ̣̈ܠܐ ܕܐܝܟ ܗܟܢܐ ܐܬܒܪܝ̣ܘ. ܐܝܟܢܐ ܕܦܫܝ̣ܩܐܝܬ ܬܥܘܠ ܒܗܘܢ ܬܦܫܘܪܬܐ ܘܥܣܩܐܝܬ ܬܦܘܩ. ܒܗ̇ܝ ܕܟܡܐ ܕܣܓܝܐܝܬ ܬܬܡܬܚ ܗ̣ܝ ܫܠܦܘ̣ܚܬܐ ܟܕ ܬܬܡܠܐ. ܝܬܝܪ ܥܫܝ̣ܢܐܝܬ ܡܬܬܚܕ ܗ̣ܘ ܫܒܝ̣ܠܐ ܕܒܗ̇ ܥܐܠ. ܘܗ̣ܘ ܡ̇ܢ ܦܓܪܐ ܡ̣ܢ ܡܐܬܝܢ ܘܐܪܒܥܝܢ ܘܬܡܢܝܐ ܓܪ̈ܡܝ̣ܢ ܐܬܪܟܒ. ܣܛܪ ܡ̣ܢ ܓܪܡܐ ܗ̇ܘ. ܕܒܓܓܪܬܐ ܕܕܡܐ ܠܠܥܕܐ ܫܢܝܬܐ. ܘܓܪܡܐ ܗ̇ܘ ܕܒܠܒܐ ܕܐܦ ܒܪ̈ܟܫܐ ܘܒܬܘܪ̈ܐ ܚܙܝܗܝ ܐܪܝ̣ܣܛܘܣ. ܘܣܛܪ ܡ̣ܢ ܓܪ̈ܡܐ ܕܩܕ̈ܩܐ ܕܡܝ̈ܝ ܠܫܘ̈ܫܦܐ ܕܒܨܒ̈ܥܬܐ. ܘܡ̣ܢ ܚܡܫܡܐܐ ܘܥܣܪܝܢ ܘܫܒܥ ܥܘܩܒܪ̈ܢ. ܘܡ̣ܢ ܫܒܥܐ ܙܘܓܝ̣̈ܢ ܕܓܝܕ̈ܐ ܕܡ̣ܢ ܡܘܚܐ ܡܬܝܠܕܝܢ. ܘܬܠܬܝܢ ܘܚܕ ܙܘܓܐ. ܘܐܦܙܓܐ ܕܠܐ ܟܢܬܐ ܕܡ̣ܢ ܓܪܡ ܚܨܐ ܫܘܚܝ̣ܢ. ܘܡ̣ܢ ܟܒܕܐ ܡ̇ܢ ܬܪܝܢ ܫܪ̈ܫܝ̣ܢ ܕܘܪ̈ܝ̣ܕܐ ܫܘܚܝ̣ܢ. ܚܕ ܡ̣ܢ ܚܠܝ̣ܠܘܬܗ̇܆ ܘܒܗ ܥܐܠ ܬܘܪܣܝܐ ܠܘܬܗ̇ ܘܐ̱ܚܪܢܐ ܡ̣ܢ ܟܘܣܬܗ̇. ܘܡܢܗ̇ ܢܦܩ ܬܘܪܣܝܐ ܠܘܬ ܗܕܡ̈ܐ. ܘܡ̣ܢ ܠܒܐ ܗܟܘܬ ܬܪܝܢ ܫܪ̈ܫܝ̣ܢ ܕܫܪ̈ܝܢܐ ܫܘܚܝ̣ܢ ܐܝܟ ܕܩܕܡܬ݀ ܐܬܚܘܝܬ݀ ܘܗܪܟܐ ܡܣܬܝܟܐ ܬܐܘܪܝܐ ܕܥܠ ܓܘܫ̈ܡܐ.

 

 

 

ܫܠܡܬ݀ ܫܬܐܣܬܐ ܬܪܝܢܝܬܐ

 

 

 

 

 

 

 

 

 

 

 

 

 

 

     #1 

 

ܫܬܐܣܬܐ ܬܠܝܬܝܬܐ. ܡܛܠ ܡܡܠܠܘܬ ܐܠܗܘܬܐ. ܘܒܗ ܐܝܬ ܩܦ̈ܠܐ ܥܣܪܐ. ܩܦܠܐܘܢ ܩܕܡܝܐ ܡܛܠ ܫܘܪܪ ܫܟܝ̣ܚܘܬܗ ܕܒܪܘܝܐ ܐܠܨܝ ܐܝܬܘܬܐ ܣܓܝܕ ܒܐܝܬܘܬܗ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܕܒܗ ܐܝܬ ܢܝܫܐ ܚܕ܆ ܡܛܠ ܡܚܘܝܢ̈ܘܬܐ ܚܘ̈ܫܒܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܟܠܡܕܡ ܕܐܝܬܘܗܝ. ܐܢ ܠܐ ܡܩܒܠܢܐ ܗ̱ܘ ܟܝܢܗ̇ ܕܠܝܬܝܘܬܐ ܠܝܬܗ. ܐܠܨܝ ܐܝܬܘܬܐ ܗ̱ܘ. ܘܗܘܝܘ ܒܪܘܝܐ ܕܟܠ. ܘܐܢ ܡܩܒܠܢܗ̇ ܗ̣ܘ. ܡ̣ܢ ܐܢܢܩܝ ܕܒܫܘܝܘܬ ܢܙܠܐ ܢܗܘ̈ܝܢ ܒܦܚܡܗ. ܘܐܝܬܘܬܐ ܘܠܝܬܝܘܬܐ. ܘܟܠ ܕܗܟܢܐ ܗ̱ܘ܆ ܥܠ ܡܢܬܥܢܐ ܕܐܝܬܘܬܗ ܣܢܝ̣ܩ ܒܐܝܬܘܬܗ. ܘܗ̣ܘ ܗ̇ܘ ܡܢܬܥܢܐ ܐܢ ܡܬܡܨܝܢܐ ܗ̱ܘ ܗܟܘܬ ܥܠ ܡܢܬܥܢܐ ܣܢܝ̣ܩ. ܘܠܠܐ ܣܘܦ ܡܫܬܠܫܠܐ ܡܠܬܐ ܗ̇ܝ ܕܫܟܝ̣ܪܐ. ܒܕܓܘܢ ܡ̣ܢ ܐܠܨ̈ܬܐ ܕܠܘܬ ܡܢܬܥܢܐ ܐܠܨܝ ܐܝܬܘܬܐ ܬܩ̣ܦ. ܕܗܘܝܘ ܒܪܘܝܐ ܕܟܠ ܘܐܠܗܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܟܠܗܘܢ ܓܘ̈ܫܡܐ ܫܘܝܢ ܐܢܘܢ ܒܓܘܫܡܢܝܘܬܐ ܐܠܨܐܝܬ. ܘܐܠܐ ܙܕܩ ܗܘܐ ܕܓܘܫܡܐ ܝܬܝܪ ܡ̣ܢ ܓܘܫܡܐ܇ ܓܘܫܡܐ ܢܗܘܐ ܗܘܐ ܗ̇ܝ ܕܫܟܝ̣ܪܐ. ܘܟܕ ܫܘܝܢ ܡ̣ܢ ܐܢܢܩܝ ܕܟܠ ܙܢܐ ܐܝܢܐ ܕܥܠ ܚܕ ܡܢܗܘܢ ܡܬܩܛܪܓ. ܠܘ ܠܐ ܢܬܡܨܐ ܕܥܠ ܟܠܗܘܢ ܢܬܩܛܪܓ. ܡܕܝܢ ܟܕ ܚܕ ܡ̣ܢ ܓܘܫ̈ܡܐ ܥܠ ܡܗܘܝܢܐ ܣܢܝ̣ܩ. ܡ̣ܢ ܐܢܢܩܝ ܕܐܦ ܟܠܗܘܢ ܥܠܘܗܝ ܢܣܬܢܩܘܢ. ܘܗ̣ܘ ܗ̇ܘ ܐܢ ܓܘܫܡܐ ܗ̱ܘ. ܐܦ ܗ̣ܘ ܢܣܬܢܩ. ܫܪܝ̣ܟܐ ܡܕܝܢ ܕܡܗܘܝܢܐ ܗ̇ܘ ܠܘ ܡܕܡ ܡ̣ܢ ܓܘܫ̈ܡܐ ܢܗܘܐ. ܐܠܐ ܠܐ ܓܫܘܡ ܗ̣ܘ ܠܟܠܗܘܢ ܓܘܫ̈ܡܐ ܗ̇ܝ ܕܢܗܘܘܢ ܐܝܬܝܗܘܢ ܫܟܢ. ܘܗܘܝܘ ܒܪܘܝܐ ܕܟܠ ܘܐܠܗܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܥܠܡܐ ܗܘܝܐ ܗ̱ܘ ܐܘܟܝܬ ܡܫܪܝܢܐ܆ ܐܟܡܐ ܕܡ̣ܢ ܠܥܠ ܚܘܝ̣ܢܢ. ܘܟܠ ܗܘܝܐ ܡ̣ܢ ܒܬܪ ܗ̇ܝ ܕܠܐ ܐܝܬܘܗܝ ܗ̣ܘܐ ܗܘ̣ܐ. ܘܟܠ ܕܗܟܢܐ ܗ̱ܘ ܠܘ ܡ̣ܢ ܕܝܠܗ ܗ̣ܝ ܠܗ ܗ̇ܝ ܕܢܗܘܐ. ܘܐܠܐ ܠܐ ܐܝܬܘܗܝ ܗܘܐ ܡܬܘܡ. ܘܒܐܡܝ̣ܢܘ ܐܝܬܘܗܝ ܗܘܐ. ܘܫܪܝ̣ܟܐ ܡܕܝܢ ܕܡ̣ܢ ܐ̱ܚܪܢܐ ܐܬܬܗܘܝ. ܘܗ̇ܘ ܐ̱ܚܪܢܐ ܐܢ ܐܦ ܗ̣ܘ ܗܘܝܐ ܗ̱ܘ. ܗܟܘܬ ܥܠ ܡܗܘܝܢܐ ܐܦ ܗ̣ܘ ܣܢܝ̣ܩ. ܘܡ̣ܢ ܐܠܨ̈ܬܐ ܕܠܘܬ ܡܗܘܝܢܐ ܕܡܬܘܡܝܐ ܗ̱ܘ ܘܠܘ ܗܘܝܐ܆ ܬܫܪܟ ܘܬܩܦ ܗ̣ܝ ܡܠܬܐ. ܕܗܘܝܘ ܒܪܘܝܐ ܕܟܠ ܘܐܠܗܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܒܢܝ̈ܗ̇ ܕܐܣܝܘܬܐ ܐܡܪܝܢ. ܕܟܝܢܐ ܐܘܟܝܬ ܚܝܠܐ ܡܕܒܪܢܐ ܕܦܓܪ ܚܝܘܬܐ ܡܢܬܐ ܡܕܡ ܦܪܫ ܡ̣ܢ ܬܪܣܝ̣ܬܐ. ܘܠܘܬ ܗܕܡ̈ܐ ܡܦܪ̈ܝܢܐ ܡܫܡܪ. ܘܗܪܬܡܢ ܡܬܢܛܪܐ ܕܕܡ ܡܠܘܘܐ ܢܗܘܐ ܠܝ̣ܠܝ̣ܕܘܬܐ. ܐ̱ܚܪ̈ܢܐ ܕܝܢ ܐܡܪܝܢ ܕܚܡܝ̣ܡܘܬܐ ܪܓܬܢܝܬܐ. ܟܕ ܡܫܬܓܪܐ ܒܦܓܪܐ. ܡ̣ܢ ܟܠ ܗܕܡ ܡܢܬܐ ܡܕܡ ܡܦܫܪܐ. ܘܒܡܐܢܝ̈ ܙܪܥܐ ܠܗ̇ ܐܣܢܐ. ܡܛܠܬܗ ܕܡܠܘܘܐ ܗ̇ܘ ܕܐܬܐܡܪ ܕܡܬܥܬܕ. ܘܠܦܘܬ ܪܥܝܢܐ ܩܕܡܝܐ. ܕܡܐ ܡܢܘ̈ܬܐ ܙܕܩ ܕܢܗܘܐ ܙܪܥܐ ܚܝܘܬܢܝܐ ܒܟܝܢܗ ܐܘܟܝ̣ܬ ܦܫܝ̣ܛܐ. ܠܦܘܬ ܕܝܢ ܪܥܝܢܐ ܬܪܝܢܐ ܠܘ ܕܡܐ ܡܢܘ̈ܬܐ ܙܕܩ ܕܢܗܘܐ. ܒܕܓܘܢ ܐܢ ܕܡܐ ܡܢܘ̈ܬܐ ܗ̱ܘ. ܘܓܒܘܠܗ ܘܡܣܟܡܢܗ ܗ̣ܘ ܟܝܢܐ ܐܝܬܘܗܝ ܐܝܟ ܕܐܡܪܝܢ ܐܣܘ̈ܬܐ. ܐܘ ܚܝ̈ܠܐ ܟܘܟ̈ܒܢܝܐ ܐܝܟ ܕܐܡܪܝܢ ܦܝܠܘ̈ܣܘܦܐ ܒܪ̈ܝܐ. ܒܐܣܟܡܐ ܐܣܦܝ̣ܪܢܝܐ ܙܕܩ ܗܘܐ ܕܢܣܬܟܡ ܗ̣ܘ ܦܓܪܐ. ܗ̇ܢܘ ܓܝܪ ܐܣܟܡܐ ܟܝܢܝܐ ܕܒܝܬܝ ܠܦܫܝ̣̈ܛܐ. ܐܢܕܝܢ ܠܘ ܕܡܐ ܡܢܘ̈ܬܐ ܗ̱ܘ. ܡ̣ܢ ܐܢܢܩܝ ܕܟܠܚܕܐ ܡ̣ܢ ܡܢܘ̈ܬܗ ܕܡܝܬ݀ ܡܢܘ̈ܬܐ ܬܗܘܐ. ܡܛܠ ܕܟܠ ܕܡܪܟܒ ܡ̣ܢ ܦܫܝ̣̈ܛܐ ܗ̣ܘ ܡܪܟܒ. ܘܗܟܢܐ ܬܘܒ ܙܕܩ ܗܘܐ ܕܟܠ ܚܕ ܡ̣ܢ ܗܕܡܝ̈ ܦܓܪܐ ܡ̣ܢ ܡܢܘ̈ܬܐ ܐܣܦܝ̣ܪ̈ܢܝܬܐ ܡܪܟܒ ܗܘܐ. ܐܢ ܟܝܢܐ ܐܘ ܚܝܠ ܟܘܟܒܐ ܗܘܐ ܓܒܘܠܗܘܢ ܡܣܟܡܢܗܘܢ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܥܒܘܕܐ ܕܟܠ ܘܒܪܘܝܐ ܘܓܒܘܠܐ ܘܐܠܗܐ ܠܘ ܚܝܠܐ ܗܘܐ ܐܣܛܘܟܣܢܝܐ. ܐܦܠܐ ܟܘܟܒܢܝܐ ܕܟܝܢܐܝܬ ܒܠܥܕ ܪܓܫܬܐ ܡܥܒܕܝ̣ܢ. ܐܠܐ ܟܝܢܐ ܐܠܨܝ ܐܝܬܘܬܐ ܕܨܒܝܢܐܝܬ ܡܥܒܕ. ܘܠܗ̇ܢܘܢ ܕܠܐ ܐܝܬܝܗܘܢ ܗ̇ܝ ܕܢܗܘܘܢ ܡܫܟܢ. ܘܠܗ̇ܢܘܢ ܕܐܝܬܝܗܘܢ ܟܡܐ ܕܫܦܪܐ ܠܗ ܢܛܪ. ܘܠܗ ܠܗܢܐ ܢܝ̣ܫܐ ܪܡܙ ܪܘܚܐ ܒܦܘܡ ܐܫܥܝܐ ܗ̇ܘ ܢܒܝܐ ܕܐܡ̇ܪ. ܗܟܢܐ ܐܡ̇ܪ ܡܪܝܐ. ܕܥܒܕܟ ܘܓܒܠܟ ܒܡܪܒܥܐ ܘܥܕܪܟ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܠܝܬܝܬܐ. ܡܛܠ ܬܪܥܝܬܐ ܣܩܘܒܠܝܬܐ ܕܠܐ ܐܠܗ܆ ܘܣܬܘܪܝܗ̇. ܘܒܗ ܐܝܬ ܢܝ̈ܫܐ ܬܪܝܢ܇ ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܕܣܩܘܒ̈ܠܝܐ. ܣܥܝܐ ܩܕܡܝܐ

 

ܐܡܪܝܢ ܐܠܘ ܡ̣ܢ ܗܠܝܢ ܕܐܝܬܝܗܘܢ ܗܘܐ ܒܪܘܝܐ ܡܫܘܬܦܘ ܡܫܘܬܦ ܗܘܐ ܠܗܘܢ ܒܐܝ̣ܬܘܬܐ ܟܐܡܬ݀ ܒܗ̇ܝ ܕܐܝܬܘܗܝ ܘܦܪܝ̣ܫ ܗܘܐ ܡܢܗܘܢ ܒܕܝ̣ܠܝܘܬ ܐܝܬܘܬܗ. ܘܟܠ ܕܗܟܢܐ ܗ̱ܘ ܡ̣ܢ ܓܢܣܐ ܘܡ̣ܢ ܦܘܪܫܢܐ ܡܪܟܒܐ ܗ̱ܘ ܘܠܘ ܦܫܝ̣ܛܐ ܗ̱ܘ. ܒܪܘܝܐ ܡܕܝܢ ܐܢ ܐܝܬܘܗܝ ܡܪܟܒܐ ܗ̱ܘ. ܘܟܕ ܐܝܬܘܬܗ ܠܘܬ ܫܟܝ̣ܪܘܬܐ ܕܐܝܟ ܗܕܐ ܡܘܒܠܐ܆ ܠܝܬܘܗܝ ܡܕܝܢ.

 

 

 

ܣܥܝܐ ܕܬܪܝܢ

 

ܐܡܪܝܢ ܐܠܘ ܥܠܡܐ ܗܢܐ ܥܠ ܥܒܘܕܐ ܣܢܝ̣ܩ ܗܘܐ. ܐܘ ܟܕ ܐܝܬܘܗܝ ܣܢܝ̣ܩ ܗܘܐ ܥܠܘܗܝ. ܐܘ ܟܕ ܠܐ ܐܝܬܘܗܝ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܠܘܬ ܥܒܘܕܘܬܐ ܕܗ̇ܘ ܕܫܟܝ̣ܚ ܘܐܝܬܘܗܝ ܡܘܒܠ. ܗܟܘܬ ܘܗ̇ܘ ܕܬܪܝܢ ܠܐ ܫܪܝ̣ܪ. ܒܗ̇ܝ ܕܗ̇ܘ ܕܠܐ ܐܝܬܘܗܝ. ܐܝܟܢ ܬܬܩܛܪܓ ܥܠܘܗܝ ܗ̇ܝ ܕܣܢܝ̣ܩ ܒܕܣܢܝ̣ܩܘܬ ܫܟܝ̣ܚܘܬܢܝܐ ܡܕܡ ܐܝܬܝܗ̇. ܘܡܛܠ ܗܕܐ ܠܐ ܡܨܝܐ ܠܡܬܩܛܪܓܘ ܥܠ ܗ̇ܘ ܕܠܐ ܐܝܬܘܗܝ. ܥܠܡܐ ܡܕܝܢ ܡ̣ܢ ܕܝܠܗ ܗ̣ܝ ܠܗ ܗ̇ܝ ܕܐܝܬܘܗܝ܆ ܘܠܘ ܡ̣ܢ ܥܒܘܕܐ.

 

 

 

ܣܥܝܐ ܕܬܠܬܐ

 

ܐܡܪܝܢ ܐܠܘ ܥܒܘܕܐ ܐܝܬ ܗܘܐ ܠܥܠܡܐ ܗܢܐ. ܐܘ ܠܟܝܢܗ ܐܥܒܕ ܗܘܐ. ܐܘ ܠܫܟܝ̣ܚܘܬ ܟܝܢܗ. ܐܘܟܝ̣ܬ ܠܗ̇ܝ ܕܢܗܘܐ ܗܘܐ ܟܝܢܗ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܠܘ ܐܘܟܡܘܬܐ ܒܝܕ ܥܒܘܕܐ ܗܘܬ݀ ܐܘܟܡܘܬܐ. ܙܕܩ ܗܘܐ ܕܟܕ ܢܬܬܪܝܡ ܗܘܐ ܥܒܘܕܗ̇܆ ܐܦ ܗ̣ܝ ܐܘܟܡܘܬܐ ܡܬܬܪܝ̣ܡܐ ܗܘܬ݀ ܡ̣ܢ ܐܘܟܡܘܬܐ ܗ̇ܝ ܕܫܟܝ̣ܪܐ. ܒܗ̇ܝ ܕܐܘܟܡܘܬܐ ܒܐܡܝ̣ܢܘ ܐܘܟܡܘܬܐ ܗ̱ܝ. ܟܕ ܢܗܘܐ ܥܒܘܕܐ ܘܟܕ ܠܐ ܢܗܘܐ. ܗܟܘܬ ܘܗ̇ܘ ܕܬܪܝܢ ܠܐ ܫܪܝ̣ܪ. ܒܗ̇ܝ ܕܐܠܨܐ ܗܘܬ݀ ܗܝܕܝܟ ܕܟܕ ܢܬܬܪܝ̣ܡ ܗܘܐ ܥܒܘܕܐ ܐܦ ܘܫܟܝ̣ܚܘܬܐ ܡܬܬܪܝ̣ܡܐ ܗܘܬ݀. ܗ̇ܝ ܕܫܟܝ̣ܪܐ. ܒܗ̇ܝ ܕܫܟܝ̣ܚܘܬܐ ܒܐܡܝ̣ܢܘ ܫܟܝ̣ܚܘܬܐ ܗ̱ܝ. ܐܢ ܢܗܘܐ ܥܒܘܕܐ ܐܘ ܠܐ ܢܗܘܐ. ܥܠܡܐ ܡܕܝܢ ܠܐ ܒܟܝܢܗ ܐܦܠܐ ܒܫܟܝ̣ܚܘܬܗ ܣܢܝ̣ܩ ܥܠ ܥܒܘܕܐ.

 

 

 

ܣܥܝܐ ܕܐܪܒܥܐ

 

ܐܡܪܝܢ ܐܠܘ ܡܬܡܨܝܢܘܬ ܐܝܬܘܬܐ ܥܠ ܥܠܬܐ ܥܒܘܕܬܐ ܡܣܢܩܐ ܠܡܬܡܨܝܢܐ܆ ܙܕܩ ܕܐܦ ܡܬܡܨܝܢܘܬ ܠܝܬܝܘܬܐ ܬܘܒ ܥܠ ܥܠܬܐ ܬܣܬܢܩ. ܥܒܘܕܬܐ ܗ̇ܝ ܕܫܟܝ̣ܪܐ. ܒܗ̇ܝ ܕܠܝܬܝܘܬܐ ܟܕ ܠܐ ܡܕܡ ܗ̣ܝ܆ ܐܝܟܢܐ ܣܢܝ̣ܩܘܬܐ ܥܠܝܗ̇ ܬܬܩܛܪܓ. ܘܟܕ ܗܕܐ ܠܐ ܡܨܝܐ. ܐܦܠܐ ܗ̇ܝ ܡܨܝܐ. ܟܐܡܬ݀ ܕܡܬܡܨܝܢܘܬ ܐܝܬܘܬܐ. ܥܠ ܥܠܬܐ ܥܒܘܕܬܐ ܬܣܢܩܝ̣ܘܗܝ ܠܡܬܡܨܝܢܐ ܒܗܘܝܗ.

 

 

 

ܣܥܝܐ ܕܚܡܫܐ

 

ܐܠܘ ܡܬܡܨܝܢܘܬ ܐܝܬܘܬܐ ܥܠ ܡܗܘܝܢܐ ܡܣܢܩܐ ܗܘܬ݀ ܠܡܬܡܨܝܢܐ. ܐܠܨܐ ܗܘܬ݀ ܕܐܦ ܡ̣ܢ ܒܬܪ ܕܗܘܐ ܡܬܡܨܝܢܐ܆ ܥܠܘܗܝ ܕܡܗܘܝܢܐ ܢܣܬܢܩ. ܒܗ̇ܝ ܕܗ̇ܝ ܕܢܗܘܐ ܡܬܡܨܝܢܐ ܠܐ ܡܦܩܐ ܠܗ ܡ̣ܢ ܡܬܡܨܝܢܘܬܐ. ܗ̇ܝ ܕܫܟܝ̣ܪܐ. ܒܕܠܘܬ ܡܗܘܝܢܘܬܐ ܕܗ̇ܘ ܕܐܝܬܘܗܝ ܡܘܒܠܐ. ܡܬܡܨܝܢܐ ܡܕܝܢ ܘܠܐ ܟܕ ܐܝܬܘܗܝ ܘܠܐ ܟܕ ܠܐ ܐܝܬܘܗܝ ܣܢܝܩ ܥܠ ܥܒܘܕܐ.

 

 

 

ܣܥܝܐ ܕܫܬܐ

 

ܐܡܪܝܢ ܕܨܘܪ̈ܬܐ ܘܓܕ̈ܫܐ ܗܠܝܢ ܡܫܪ̈ܝܢܐ ܕܒܥܠܡܐ ܗܢܐ ܐܠܘ ܒܝܕ ܥܠܬܐ ܗܘ̈ܝܢ ܥܒܘܕܬܐ ܐܘܟܝ̣ܬ ܡܗܘܝܢܐ. ܗ̣ܘ ܗ̇ܘ ܡܗܘܝܢܐ ܐܘ  ܡܬܘܡܝܐ ܗ̣ܘ ܐܘ ܡܫܪܝܢܐ. ܘܠܐ ܡܨܝܐ ܕܡܬܘܡܝܐ ܢܗܘܐ. ܒܗ̇ܝ ܕܐܠܘ ܡܬܘܡܝܐ ܗܘܐ. ܐܘ ܥܠ ܥܠܬܐ ܡܕܡ ܡܫܪܝܢܝ̣ܬܐ ܣܢܝ̣ܩ ܗܘܐ ܠܘܬ ܡܗܘܝܢܘܬܗ ܕܠܡܫܪ̈ܝܢܐ ܗ̇ܢܘܢ܆ ܐܘ ܠܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܡܬܐܡܪܐ ܗܝܕܝܟ ܕܗ̣ܝ ܗ̇ܝ ܥܠܬܐ ܡܫܪܝܢܝ̣ܬܐ. ܐܘ ܥܠ ܥܠܬܐ ܐ̱ܚܪܬܐ ܡܫܪܝܢܝ̣ܬܐ ܣܢܝ̣ܩܐ ܠܘܬ ܗܘܝܐ ܐܘ ܠܐ. ܘܐܢ ܥܠ ܥܠܬܐ ܐ̱ܚܪܬܐ ܣܢܝ̣ܩܐ ܡܫܪܝܢܝ̣ܬܐ܆ ܘܗ̣ܝ ܗ̇ܝ ܥܠ ܥܠܬܐ ܐ̱ܚܪܬܐ ܬܣܬܢܩ. ܘܠܠܐ ܣܘܦ ܦܗܝܐ ܡܠܬܐ. ܗܟܘܬ ܘܗ̇ܘ ܕܬܪܝܢ ܠܐ ܫܪܝ̣ܪ. ܒܗ̇ܝ ܕܡܫܬܟܚܐ ܫܟܝ̣ܚܘܬܗ ܕܡܫܪ̈ܝܢܐ ܗ̇ܢܘܢ ܒܙܒܢܐ ܗ̇ܘ. ܣܛܪ ܡ̣ܢ ܙܒ̈ܢܐ ܐ̱ܚܪ̈ܢܐ܆ ܒܠܥܕ ܥܠܬܐ ܡܢܬܥܢܝ̣ܬܐ ܗ̇ܝ ܕܫܟܝ̣ܪܐ. ܐܦܠܐ ܬܘܒ ܡܨܝܐ ܕܡܫܪܝܢܐ ܢܗܘܐ ܡܗܘܝܢܗܘܢ ܕܡܫܪ̈ܝܢܐ. ܒܗ̇ܝ ܕܐܦ ܗ̣ܘ ܡܣܬܢܩ ܥܠ ܡܗܘܝܢܐ ܐ̱ܚܪܢܐ ܡܫܪܝܢܐ. ܘܗ̇ܘ ܥܠ ܐ̱ܚܪܢܐ. ܘܗܟܢܐ ܬܘܒ ܠܠܐ ܣܘܦ ܢܦܩܐ ܡܠܬܐ. ܘܟܕ ܡܫܪ̈ܝܢܐ ܗܠܝܢ ܠܐ ܡܬܘ̈ܡܝܐ ܐܢܘܢ ܐܦܠܐ ܡܫܪܝܢܐ ܡܗܘܝܢܗܘܢ. ܣܛܪ ܡ̣ܢ ܡܗܘܝܢܐ ܐܝܬܘܗܝ. ܘܗܟܢܐ ܐܦ ܘܥܠܡܐ ܗܢܐ ܒܟܘܠܝܘܬܗ. ܒܕܐܟܘܬܗܘܢ ܐܦ ܗ̣ܘ ܡܫܪܝܢܐ ܗ̱ܘ.

 

 

 

ܣܥܝܐ ܕܫܒܥܐ

 

ܟܠܗܘܢ ܣܘܥܪ̈ܢܐ ܡܫܪ̈ܝܢܐ ܕܗܘܘ ܒܙܒܢܐ ܗܢܐ. ܐܢ ܠܐ ܣܢܝ̣ܩܝܢ ܥܠ ܡܗܘܝܢܐ܆ ܗܐ ܗ̇ܝ ܕܡܬܒܥܝܐ. ܒܗܝ ܕܐܡܪܝܢܢ ܕܐܦ ܥܠܡܐ ܒܟܘܠܝܘܬܗ ܟܕ ܡܫܪܝܢܐ ܗ̱ܘ܆ ܠܐ ܣܢܝ̣ܩ ܥܠ ܡܗܘܝܢܐ. ܘܐܢܗܘ ܕܣܢܝ̣ܩܝܢ ܗ̣ܘ ܡܗܘܝܢܗܘܢ܆ ܐܘ ܡܫܪܝܢܐ ܗ̣ܘ ܐܘ ܡܬܘܡܝܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗܝ ܕܐܦ ܗ̣ܘ ܡܗܘܝܢܐ ܐ̱ܚܪܢܐ ܡܫܪܝܢܐ ܙܕܩ ܕܢܣܬܢܩ. ܘܗ̇ܘ ܥܠ ܐ̱ܚܪܢܐ. ܘܗܟܢܐ ܠܠܐ ܣܘܦ ܫܢܙܐ ܡܠܬܐ ܗ̇ܝ ܕܫܟܝ̣ܪܐ. ܗܟܘܬ ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܡܬܘܡܝܐ ܗ̱ܘ܇ ܡ̣ܢ ܩܕܡ ܗܘܝܗ ܕܡܫܪܝܢܐ ܗ̇ܘ܆ ܠܐ ܐܝܬܘܗܝ ܗܘܐ ܡܗܘܝܢܐ ܘܗܘܐ. ܒܕܓܘܢ ܡܗܘܝܢܘܬܗ ܡܫܪܝܢܝ̣ܬܐ ܗ̱ܝ ܐܝܟܢ ܕܗ̇ܘ. ܘܡ̣ܢ ܗܪܟܐ ܥܠ ܡܗܘܝܢܐ ܐ̱ܚܪܢܐ ܡܫܪܝܢܐ ܐܠܨܐ ܕܢܣܬܢܩ ܒܡܗܘܝܢܘܬܗ. ܘܗܟܢܐ ܗ̇ܘ ܥܠ ܐ̱ܚܪܢܐ. ܘܠܘܬ ܠܐ ܣܘܦ ܡܫܬܠܫܠܐ ܡܠܬܐ ܗ̇ܝ ܕܫܟܝ̣ܪܐ. ܘܟܕ ܡܗܘܝܢܗ ܕܥܠܡܐ ܠܐ ܡܬܘܡܝܐ ܗ̱ܘ. ܐܦܠܐ ܡܫܪܝܢܐ ܠܘ ܡܕܡ ܗ̣ܘ. ܒܗ̇ܝ ܕܟܠ ܡܕܡ ܐܘ ܡܬܘܡܝܐ ܗ̱ܘ. ܐܘ ܡܫܪܝܢܐ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܒܪܘܝܐ ܐܠܨܝ ܐܝܬܘܬܐ. ܠܐ ܡܫܘܬܦܐ ܐܝܬܘܬܗ ܠܐܝܬܘܬ ܡܬܡܨ̈ܝܢܐ. ܐܝܟܢܐ ܕܐܠܨܐ ܡ̣ܢ ܗܕܐ ܪܘܟܒܗ ܕܡ̣ܢ ܓܢܣܐ ܘܦܘܪܫܢܐ ܐܝܟ ܕܐܡܪܬܘܢ. ܒܗ̇ܝ ܕܐܠܘ ܓܢܣܗ ܕܝܠܗ ܘܕܡܬܡܨ̈ܝܢܐ ܗܘܬ݀ ܐܝܬܘܬܐ. ܫܘܝܐܝܬ ܙܕܩ ܗܘܐ ܕܬܬܩܛܪܓ ܘܣܘܢܘܢܘܡܐܝܬ ܥܠܘܗܝ. ܘܥܠ ܗ̇ܢܘܢ. ܘܗܐ ܠܘ ܗܟܢܐ. ܒܗ̇ܝ ܕܥܠܘܗܝ ܡ̇ܢ ܩܕܡܝܬ݀ ܘܡܪܢܐܝܬ ܡܬܩܛܪܓܐ. ܘܥܠ ܗ̇ܢܘܢ ܐ̱ܚܪܝܬ݀ ܘܠܘ ܡܪܢܐܝܬ. ܒܗܦܟܐ ܕܓܢܣܐ. ܒܕܠܘ ܝܬܝ̣ܪܐܝܬ ܗ̣ܘ ܒܪܢܫܐ ܚܝܘܬܐ. ܒܨܝ̣ܪܐܝܬ ܕܝܢ ܬܘܪܐ. ܐܠܨܝ ܐܝܬܘܬܐ ܕܝܢ ܡܪܢܐܝܬ ܐܝܬܘܗܝ. ܒܕܡ̣ܢ ܝܬܗ ܐܝܬ ܠܗ ܗܕܐ. ܡܬܡܨܝܢܝ ܐܝܬܘܬܐ ܕܝܢ ܐܫܝ̣ܠܐܝܬ. ܒܕܠܘ ܡ̣ܢ ܝܬܗ ܗ̣ܝ ܠܗ ܗܕܐ. ܐܠܐ ܡܢܗ ܕܗ̇ܘ ܣܓܝ̣ܕ ܘܡܥܠܝ ܒܐܝܬܘܬܗ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܥܠܡܐ ܗܢܐ ܐܣܬܢܩ ܥܠ ܥܒܘܕܐ܆ ܙܒܢ ܗܘܝܗ. ܠܐ ܡ̣ܢ ܩܕܡ ܕܢܗܘܐ܆ ܐܦܠܐ ܒܬܪ ܕܗܘܐ. ܘܡ̣ܢ ܗܪܟܐ ܠܐ ܢܩ̈ܦܢ ܫܟܝ̣ܪ̈ܘܬܐ ܕܟܢܫܬܘܢ.

 

 

 

ܫܪܝܐ ܕܣܥܝܐ ܬܠܬܝܐ

 

ܐܠܘ ܫܪܝ̣ܪ ܗܘܐ ܣܥܝܟܘܢ ܬܠܝܬܝܐ. ܠܐ ܙܕܩ ܗܘܐ ܕܡܥܒܕܢܘܬܐ ܡܕܡ ܡܬܘܡ ܒܥܠܡܢ ܗܢܐ ܡܫܬܡܫܐ ܗܘܬ݀ ܗܘܬ݀. ܒܗ̇ܝ ܕܡܬܐܡܪܐ ܕܡܥܒܕܢܗ̇. ܐܘ ܠܟܝܢܗ̇ ܡܥܒܕ. ܐܘ ܠܗ̇ܝ ܕܢܗܘܐ ܟܝܢܗ̇. ܘܬܪ̈ܝܗܘܢ ܫܟܝ̣ܪܝ̣ܢ. ܡܕܝܢ ܐܠܨܐ ܕܠܐ ܬܗܘܐ ܡܥܒܕܢܘܬܐ ܣܟ. ܘܗܐ ܚܙܝܢܢ ܐܢܢܩܐܝܬ ܘܝܕܥܝ̣ܢܢ ܐܠܨܐܝܬ ܣܘܓܐܬ݀ ܡܥܒܕܢ̈ܘܬܐ ܠܐ ܡܣܝ̈ܟܬܐ ܕܗܘ̈ܝܢ. ܣܥܝܟܘܢ ܡܕܝܢ ܗܘܝܘ ܕܙܐܦܢܝ. ܘܠܘ ܚܙܝܢ ܘܝܕܥܬܢ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܡܬܡܨܝܢܘܬ ܠܝܬܝܘܬܐ. ܠܘ ܥܠ ܥܠܬܐ ܡܣܢܩܐ ܥܒܘܕܬܐ. ܐܠܐ ܥܠ ܠܝܬܝܘܬ ܥܠܬܐ ܕܡܬܡܨܝܢܘܬ ܐܝܬܘܬܐ. ܐܟܡܐ ܕܡܥܕܐ ܕܬܬܐܡܪ. ܕܥܠܬܐ ܕܓܠܝ̣ܙܘܬܐ. ܓܠܝ̣ܙܘܬܐ ܐܝܬܝܗ̇ ܕܥܠܬܐ. ܘܡ̣ܢ ܗܪܟܐ ܠܐ ܢܩܦܐ ܫܟܝ̣ܪܘܬܐ ܕܩܛܠܒܬܘܢ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܡܬܡܨܝܢܐ ܟܕ ܐܝܬܘܗܝ ܣܢܝ̣ܩ ܥܠ ܥܠܬܐ. ܠܘ ܡܛܠ ܗ̇ܝ ܕܬܫܟܢ ܠܗ ܐܝܬܘܬܐ ܐ̱ܚܪܬܐ ܚܕܬܐܝܬ. ܐܠܐ ܕܠܗ̇ ܠܐܝܬܘܬܗ ܢܛܪܝܗ̇ ܥܠܘܗܝ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ ܕܣܥܝܟܘܢ ܗ̇ܘ ܥܛܠ ܠܫܪܝܐ ܗܘܐ. ܐܠܘ ܐܡܪܝܢ ܗܘܝܢ ܕܥܒܘܕܗܘܢ ܕܨܘܪ̈ܬܐ ܘܓܕ̈ܫܐ ܐܘܟܝ̣ܬ ܥܒܘܕܗ ܕܥܠܡܐ܆ ܟܝܢܐܝܬ ܡܥܒܕ ܗܘܐ. ܘܟܕ ܠܘ ܗܕܐ ܡܘܕܝܢܢ. ܐܠܐ ܕܥܒܘܕܐ ܗ̱ܘ ܨܒܝܢܝܐ. ܠܐ ܡܬܐܠܨܝ̣ܢܢ ܒܡܕܡ ܡ̣ܢ ܗܠܝܢ ܕܟܢܫܬܘܢ. ܒܗ̇ܝ ܕܗ̇ܘ ܕܨܒܝܢܐܝܬ ܡܥܒܕ. ܐܡܬܝ ܕܨܒܐ ܘܫܦܪ ܠܗ ܡܥܒܕ. ܘܐܦܢ ܠܐ ܬܗܐ ܥܠܬܐ ܡܕܡ ܣܟ ܡ̣ܢ ܠܒܪ.

 

 

 

ܫܪܝܐ ܕܣܥܝܐ ܫܒܝܥܝܐ

 

ܐܡܪܝܢܢ ܕܗ̣ܘ ܟܕ ܗ̣ܘ ܦܘܢܝܐ ܕܣܥܝܐ ܫܬܝܬܝܐ. ܦܘܢܝܐ ܗ̱ܘ ܐܦ ܕܗܢܐ ܣܥܝܐ. ܒܗ̇ܝ ܕܐܡܪܝܢܢ ܕܥܠܬܗ̇ ܕܡܗܘܝܢܘܬܗ ܡܫܪܝܢܝ̣ܬܐ ܕܡܗܘܝܢܐ ܡܬܘܡܝܐ. ܠܘ ܡܕܡ ܗ̣ܘ ܐ̱ܚܪܝܢ ܣܛܪ ܡ̣ܢ ܨܒܝܢܗ. ܘܥܠܬ݀ ܨܒܝܢܗ ܝܕܥܬܗ. ܘܥܠܬ݀ ܝܕܥܬܗ ܟܝܢܗ. ܘܨܝܕܘܗܝ ܡܣܬܝܟܐ ܡܠܬܐ. ܘܠܘ ܠܠܐ ܣܘܦ ܡܫܬܠܫܠܐ ܐܝܟ ܕܐܡ̣ܪܬܘܢ. ܒܕܠܘ ܥܠܬܢܐ ܗ̱ܘ ܟܝܢܗ ܕܥܒܘܕܐ. ܐܠܐ ܥܠܬܐ ܒܠܚܘܕ ܕܟܠܗܘܢ ܥܠܬܢ̈ܐ. ܘܒܗ ܘܒܝܕܗ ܟܠ. ܘܠܗ ܬܫܒ̈ܚܢ ܘܒܘܪ̈ܟܢ ܡ̣ܢ ܟܠ. ܘܠܐ ܡܨܝܬܘܢ ܕܬܐܡܪܘܢ. ܕܡܕܝܢ ܐܟܡܐ ܕܟܝܢܗ ܘܝܕܥܬܗ ܡܬܘܡܝܝ̈ܢ ܙܕܩ ܕܐܦ ܨܒܝܢܗ ܘܡܗܘܝܢܘܬܗ ܘܐܦ ܗ̣ܘ ܥܠܬܢܗ ܡܬܘ̈ܡܝܐ ܢܗܘܘܢ. ܒܗ̇ܝ ܕܐܡܪܝܢܢ ܕܗܕܐ ܥܠ ܗ̇ܢܘܢ ܕܟܝܢܐܝܬ ܡܥܒܕܝܢ ܫܪܝ̣ܪܐ. ܘܠܘ ܥܠ ܗ̇ܢܘܢ ܕܨܒܝܢܐܝܬ.

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܬܠܝܬܝܬܐ ܡܛܠ ܗ̇ܝ ܕܡܬܘܡܝܐ ܗ̱ܘ ܘܥܠܡܝ̣ܢܝܐ ܥܒܘܕܐ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܕܒܗ ܐܝܬ ܢܝܫܐ ܚܕ ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܡܬܘܡܝܐ ܓܝܪ. ܠܐܝܬܝܐ ܗ̇ܘ ܕܠܐ ܫܪܝ̣ ܩܪܝܐ ܡܠܬ݀ ܚܟܡܬܐ. ܘܥܠܡܝ̣ܢܝܐ ܠܗ̇ܘ ܕܠܐ ܡܫܠܡ. ܐܝܟ ܕܐܡ̣ܪ ܩܕܝܫܐ ܬܐܘܠܘܓܘܣ ܕܛܘܪܐ ܗ̇ܘ ܕܡܬܡܬܚ ܥܡ ܡܬܘ̈ܡܝܐ ܠܥܠܡ ܢܣܒܝ̣ܢܢ. ܘܙܕܩ ܠܡܕܥ ܕܡ̣ܢ ܠܥܠ ܚܘܝ̣ܢܢ. ܕܥܠܬܢܝܘܬ ܡܬܡܨ̈ܝܢܐ ܟܠܗܘܢ. ܡ̣ܢ ܐܢܢܩܝ ܕܠܘܬ ܥܠܬܐ ܐܝܕܐ ܕܐܠܨܝܬܐ ܗ̱ܝ ܐܝܬܘܬܗ̇. ܒܝܬܗ̇ ܙܕܩ ܕܬܣܬܝܟ. ܘܟܠ ܕܐܠܨܝ ܐܝܬܘܬܐ ܗ̱ܘ ܒܝܬܗ܆ ܡ̣ܢ ܠܘ ܡܫܟܚܢ̈ܝܬܐ ܗ̱ܝ ܕܠܝܬܝܘܬܐ ܠܟܝܢܗ ܬܩܦ ܡܬܘܡ. ܘܟܠ ܕܗܟܢܐ ܗ̱ܘ܇ ܡ̣ܢ ܐܠܨ̈ܬܐ ܕܡܬܘܡܝܐ ܟܝ̣ܬ ܘܥܠܡܝܢܝܐ ܢܗܘܐ. ܘܒܐܡܝ̣ܢܘ ܬܫܪܝ ܥܠܘܗܝ ܗ̇ܝ ܕܐܝܬܘܗܝ ܗܘܐ ܘܐܝܬܘܗܝ. ܘܢܗܘܐ ܐܝܬܘܗܝ. ܐܝܟ ܕܗ̣ܘ ܦܘܡܗ ܩܕܝܫܐ ܫܘܕܥ ܒܕ ܐܫܥܝܐ ܗ̇ܘ ܢܒܝܐ܆ ܕܐܢܐ ܐܝ̣ܬܝ ܩܕܡܝܐ. ܘܐܢܐ ܒܬܪܟܢ. ܘܩܕܡܝ ܠܝܬ ܐܠܗܐ ܐ̱ܚܪܝܢ. ܘܒܬܪܝ ܠܐ ܢܗܘܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܠܘ ܠܝܬܝܘܬܐ ܣܟ ܠܟܝܢܗ ܕܒܪܘܝܐ ܡܨܝܐ ܗܘܬ݀ ܕܬܩܦ. ܗ̣ܝ ܗܕܐ ܐܘ ܡ̣ܢ ܕܝܠܗ ܗܘܝܐ ܗܘܬ݀ ܠܗ. ܐܘ ܡ̣ܢ ܐ̱ܚܪܝܢ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܗ̇ܘ ܕܡ̣ܢ ܝܬܗ ܗ̣ܝ ܠܗ ܗ̇ܝ ܕܢܗܘܐ. ܠܘ ܡܫܟܚܐ ܕܡ̣ܢ ܝܬܗ ܬܗܘܐ ܠܗ ܗ̇ܝ ܕܠܐ ܢܗܘܐ. ܘܗ̇ܘ ܕܬܪܝܢ ܗܟܘܬ ܠܐ ܫܪܝܪ. ܒܗ̇ܝ ܕܗ̇ܘ ܐ̱ܚܪܢܐ ܐܢ ܐܠܨܐ ܗ̱ܝ ܐܝܬܘܬܐ ܗ̱ܘ. ܗ̣ܘ ܟܕ ܗ̣ܘ ܐܝܬܘܗܝ ܘܠܘ ܐ̱ܚܪܢܐ. ܐܝܟ ܕܥܬܝ̣ܕܝܢ ܠܡܚܘܝܘ ܕܐܠܨܝ ܐܝܬܘܬܐ ܠܐ ܡܨܐ ܠܡܗܘܐ ܝܬܝܪ ܡ̣ܢ ܚܕ. ܘܒܛܠܢܝܗܝ ܠܫܩܐ ܗܢܐ ܕܦܘܠܓܐ. ܘܐܢ ܡܬܡܨܝܢܐ ܗ̱ܘ. ܡ̣ܢ ܐܠܨܝ ܐܝܬܘܬܐ ܗ̱ܝ ܠܗ ܕܢܗܘܐ ܘܢܬܢܛܪ ܐܝܟ ܕܚܘܝ̣ܢܢ. ܒܕܓܘܢ ܐܝ̣ܩܐ ܡܨܝܐ ܕܢܠܝܬܝܘܗܝ.

 

 

 

ܡܚܘܝܢܘܬܐ ܕܬܠܬ

 

ܐܠܘ ܡܨܐ ܗܘܐ ܠܡܬܠܝܬܝܘ ܗ̇ܘ ܢܒܥܐ ܕܐܝܬܘܬ ܟܠ ܐܘ ܡ̣ܢ ܗ̇ܘ ܕܥܫܝ̣ܢ ܡܢܗ ܓܕܫܐ ܗܘܬ݀ ܠܗ ܗܕܐ. ܐܘ ܡ̣ܢ ܗ̇ܘ ܕܫܘܐ: ܐܘ ܡ̣ܢ ܗ̇ܘ ܕܡܚܝ̣ܠ. ܘܬܪ̈ܝܗܘܢ ܫܩܘ̈ܗܝ ܕܦܘܠܓܐ ܫܟܝ̣ܪܝܢ. ܒܕܠܐ ܡܨܝܢ ܠܡܗܘܐ. ܐܠܐ ܥܡ ܗܘܝܐ ܕܐܠܨܝ ܐܝܬܘܬܐ ܝܬܝܪ ܡ̣ܢ ܚܕ ܗ̇ܝ ܕܠܐ ܡܫܟܚܐ. ܘܫܩܐ ܬܘܒ ܬܠܝܬܝܐ ܫܟܝ̣ܪ. ܒܕ ܗ̇ܘ ܕܡܚܝ̣ܠ ܗ̇ܝ ܕܢܙܕܟܐ ܝܬܝܪ ܒܝܬܝܐ ܠܗ ܡ̣ܢ ܗ̇ܝ ܕܢܙܟܐ.

 

 

 

ܡܚܘܝܢܘܬܐ ܕܐܪܒܥ

 

ܐܠܘ ܡܨܝܐ ܗܘܬ݀ ܠܝܬܝܘܬܗ ܕܡܬܩܢܢܐ ܕܟܠ. ܟܝܢܐ ܩܢܐ ܗܘܐ ܡܩܒܠܢܐ ܕܠܝܬܝܘܬܐ ܘܕܐܝܬܘܬܐ. ܘܐܠܘ ܗܟܢܐ ܣܢܝ̣ܩ ܗܘܐ ܡܫܪܝܢܐ ܗܘܐ. ܘܐܠܘ ܡܫܪܝܢܐ ܗܘܐ. ܘܗ̇ܘ ܥܠ ܐ̱ܚܪܢܐ ܣܢܝ̣ܩ ܗܘܐ ܘܗ̇ܘ ܥܠ ܐ̱ܚܪܢܐ. ܘܗܟܢܐ ܠܠܐ ܣܘܦ ܡܫܬܠܫܠܐ ܗܘܬ݀ ܡܠܬܐ. ܘܠܝܬ ܗܘܐ ܠܒܪܝ̣ܬܐ ܒܪܘܝܐ ܠܐ ܒܪܝܐ ܗ̇ܝ ܕܫܟܝ̣ܪܐ. ܘܡ̣ܢ ܗܠܝܢ ܟܐܢܐܝܬ ܐܬܚܘܝ ܕܡܬܘܡܝܐ ܗ̱ܘ ܥܒܘܕܐ ܘܥܠܡܝ̣ܢܝܐ. ܐܟܡܐ ܕܪܬܡܐ ܢܒܝܝܐ ܡܒܕܩ. ܕܐܢ̱ܬ ܐܝܟ ܕܐܝܬܝܟ ܘܫܢܝ̈ܟ ܠܐ ܓܡܪ̈ܢ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܠܝܬܝܬܐ ܡܛܠ ܬܪܥܝ̣ܬܐ ܣܩܘܒܠܝܬܐ ܕܟܦܪ̈ܝ ܒܡܬܘܡܝܘܬܗ ܘܥܠܡܝ̣ܢܝܘܬܗ ܕܥܒܘܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ. ܣܥܝܐ ܩܕܡܝܐ

 

ܐܡܪܝܢ ܕܠܘ ܠܐ ܡܨܝܐ ܕܒܪܘܝܗ ܕܥܠܡܐ ܗܢܐ ܡܬܪܓܫܢܐ ܡܫܪܝܢܐ ܡܕܡ ܢܗܘܐ. ܘܒܪܘܝܗ ܕܡܫܪܝܢܐ ܗ̱ܘ ܐ̱ܚܪܢܐ ܡܬܘܡܝܐ. ܘܡ̣ܢ ܗܪܟܐ ܡܬܟܢܫܐ ܕܒܪܘܝܗ ܕܥܠܡܐ ܗܢܐ ܡܫܪܝܢܐ ܗ̱ܘ ܘܠܘ ܡܬܘܡܝܐ. ܗܐ ܓܝܪ ܦܝ̣ܠܠܘ̈ܣܘܦܐ ܒܪ̈ܝܐ ܐܡܪܝܢ ܕܡܕܒܪܢܐ ܕܟܠܗܘܢ ܐܝܠܝܢ ܕܠܓܘ ܡ̣ܢ ܚܘܓܬ݀ ܣܗܪܐ܆ ܗܘܢܐ ܡܥܒܕܢܐ ܐܝܬܘܗܝ. ܘܗ̣ܘ ܗܢܐ ܥܠܬܢܐ ܗ̱ܘ ܕܗܘܢܐ ܡܕܒܪܢܐ ܕܡܘܙܠܬܐ ܗܪܡܝ̣ܣ. ܘܗܢܐ ܕܗ̇ܘ ܕܒܠܬܝ. ܘܗܢܐ ܕܗ̇ܘ ܕܫܡܫܐ. ܘܗܢܐ ܕܗ̇ܘ ܕܐܪܝ̣ܣ. ܘܗܢܐ ܕܗ̇ܘ ܕܙܘܣ. ܘܗܢܐ ܕܗ̇ܘ ܕܩܪܘܢܘܣ. ܘܗܢܐ ܕܗ̇ܘ ܕܕܩܢ̈ܣܐ. ܘܗܢܐ ܕܗ̇ܘ ܕܫܡܝ̈ ܫܡܝ̈ܐ. ܘܗܢܐ ܕܥܠܬܢܐ ܩܕܡܝܐ ܘܝ̣ܚܝ̣ܕܝܐ. ܘܗܢܐ ܕܥܠܬܐ ܩܕܡܝܬܐ ܐܠܨܝܬ݀ ܐܝܬܘܬܐ. ܘܥܡܐ ܡܕܡ ܡ̣ܢ ܥܡ̈ܡܐ ܐܡ̇ܪ. ܕܐܠܗܐ ܫܘܒܚܐ ܠܛܝܒܘܬܗ. ܒܪܐ ܡܘܙ̈ܠܬܐ ܫܒܥ. ܕܛܥܝ̈ܐ ܫܒܥܐ ܘܠܗܘܢ ܐܓܥܠ ܦܘܪܢܣܗ ܕܥܠܡܐ ܗܢܐ ܕܗܘܝܐ ܘܚܘܒܠܐ. ܘܠܦܘܬ ܪ̈ܥܝܢܐ ܗܠܝܢ ܒܪܘܝܗ ܕܥܠܡܐ ܗܢܐ ܠܘ ܡܬܘܡܝܐ ܗ̱ܘ ܐܦܠܐ ܐܠܨܝ ܐܝܬܘܬܐ. ܘܟܠ ܕܗܟܢܐ ܠܘ ܠܐ ܡܨܐ ܠܡܬܠܝܬܝܘ. ܒܕ ܡܬܡܨܝܢܐ ܗ̱ܘ. ܘܡܬܟܢܫܐ ܬܘܒ ܕܐܦܠܐ ܠܥܠܡܝ̣ܢܝܐ ܗ̱ܘ ܒܝܬܗ.

 

 

 

ܣܥܝܐ ܕܬܪܝܢ

 

ܐܡܪܝܢ ܕܐܠܘ ܒܪܘܝܐ ܡܬܘܡܝܐ ܗܘܐ. ܗ̣ܘ ܗܢܐ ܥܠܡܐ. ܐܘ ܥܡܗ ܗܘܐ ܐܘ ܒܬܪܘܗܝ ܗܘܐ. ܘܗ̇ܘ ܩܕܡܝܐ ܠܐ ܫܪܝܪ ܐܝܟ ܪܥܝܢܟܘܢ. ܒܗ̇ܝ ܕܡܫܪܝܢܐ ܡܘܕܝܬܘܢ ܕܒܪܝܬܐ. ܐܘ ܒܡܫܘܚܬܐ ܗܘܬ݀ ܡܣܝܟܬܐ ܐܘ ܒܡܫܘܚܬܐ ܠܐ ܡܣܝܟܬܐ. ܘܗ̇ܘ ܩܕܡܝܐ ܠܘܬ ܡܫܪܝܢܘܬܗ ܕܒܪܘܝܐ ܡܘܒܠ. ܘܗ̇ܘ ܕܬܪܝܢ ܠܐ ܫܪܝ̣ܪ. ܒܗ̇ܝ ܕܡܫܬܟܚ ܝܘܡܐ ܗܢܐ ܫܘܠܡܗ̇ ܕܫܪܝ ܒܬܪ ܫܘܠܡܗ̇ ܕܡܫܘܚܬܐ ܐܠܐ ܡܣܝܟܬܐ ܗ̇ܝ ܕܫܟܝ̣ܪܐ. ܒܕܫܘܠܡܐ ܣܘܝܟܐ ܗ̱ܘ ܕܡܕܡ ܡܫܘܕܥ. ܘܕܢܣܬܝܟ ܠܐ ܡܣܝܟܐ ܡ̣ܢ ܗ̇ܢܝܢ ܕܛܒ ܫܟܝ̣ܪ̈ܢ ܗ̣ܝ. ܘܡ̣ܢ ܗܠܝܢ ܐܬܚܘܝ. ܕܠܘ ܡܬܘܡܝܐ ܗ̱ܘ ܒܪܘܝܗ ܕܥܠܡܐ ܗܢܐ.

 

 

 

ܣܥܝܐ ܕܬܠܬܐ

 

ܐܡܪܝܢ ܐܠܘ ܒܪܘܝܐ ܡܬܘܡܝܐ ܗܘܐ ܘܥܠܡܝ̣ܢܝܐ. ܫܪܝ̣ܪܐ ܗܘܬ݀ ܥܠܘܗܝ. ܗ̇ܝ ܕܐܝܬܘܗܝ ܗܘܐ ܘܐܝܬܘܗܝ ܘܢܗܘܐ ܐܝܬܘܗܝ. ܘܐܠܘ ܫܪܝ̣ܪ̈ܢ ܗܘܝ̈ ܥܠܘܗܝ. ܒܢ̈ܬ ܩ̈ܠܐ ܗܠܝܢ. ܐܠܨܐ ܗܘܬ݀ ܕܩܢܐ ܗܘܐ ܟܝܢܐ ܐܘ ܡܕܡ ܕܡܫܥܒܕ ܠܗܘܝܐ ܘܚܘܒܠܐ. ܘܚܘܕܬܐ ܘܒܘܛܠܐ ܗ̇ܝ ܕܫܟܝ̣ܪܐ. ܒܗ̇ܝ ܕܗ̇ܝ ܐܝܬܘܗܝ ܗܘܐ܆ ܐܝܬܘܗܝ ܐܝܬܘܬܗ ܕܡܕܡ ܡܫܘܕܥܐ ܒܙܒܢܐ ܕܩܐܡ. ܘܕܗܫܐ ܐܝܬܘܗܝ. ܐܝܬܘܬܗ ܕܡܕܡ ܡܫܘܕܥܐ ܒܙܒܢܐ ܕܩܐܡ. ܘܕܗܫܐ ܐܝܬܘܗܝ ܘܗ̇ܝ ܕܢܗܘܐ ܐܝܬܘܗܝ. ܐܝܬܘܬܗ ܕܡܕܡ ܡܫܘܕܥܐ ܒܙܒܢܐ ܕܥܬܝ̣ܕ. ܘܕܗܫܐ ܬܘܒ ܠܐ ܐܝܬܘܗܝ. ܘܟܕ ܡܬܘܡܝܘܬܗ ܕܒܪܘܝܐ ܘܥܠܡܝ̣ܢܝܘܬܗ ܠܘܬ ܫܟܝ̣ܪܘܬܐ ܕܐܝܟ ܗܕܐ ܡܘܒܠܐ. ܘܠܘ ܡܬܘܡܝܐ ܗ̣ܘ ܐܦܠܐ ܠܥܠܡܝ̣ܢܝܐ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܥܬܝ̣ܕܝ̣ܢܢ ܠܡܚܘܝܘ ܒܝܕ ܐܠܗܐ ܕܚܕ ܗ̣ܘ ܒܪܘܝܐ ܐܠܗܐ ܣܓܝܕ ܐܝܩܪܗ. ܘܠܝܬ ܐܠܗܐ ܐ̱ܚܪܢܐ ܠܒܪ ܡܢܗ. ܘܡ̣ܢ ܗܪܟܐ ܒܛܠܐ ܡܠܬܐ ܕܥܒܘ̣ܕܘܬ ܗܘ̈ܢܐ ܡܨܥܝ̈ܐ. ܘܕܡܘܙ̈ܠܬܐ ܕܐܡ̣ܪܬܘܢ.

 

 

 

ܫܪܝܐ ܕܣܥܝܐ ܕܬܪܝܢ

 

ܐܡܪܝܢ ܕܩܕܝ̣ܡܘܬܗ ܕܒܪܘܝܐ ܥܠ ܒܪܝܬܐ ܠܘ ܒܙܒܢܐ ܗ̱ܝ. ܐܝܟܢܐ ܡܨܝܐ ܕܬܬܡܫܚ ܒܡܫܘ̣ܚܬܐ ܡܣܝܟܬܐ ܐܘ ܠܐ ܡܣܝܟܬܐ. ܒܕܒܪܘܝܐ ܗ̱ܘ ܐܦ ܕܙܒܢܐ ܒܪܘܝܐ. ܘܟܒܪ ܬܐܡܪܘܢ ܕܡܕܝܢ ܫܘ̈ܝܝ ܒܙܒܢܐ ܐܝܬܝܗܘܢ ܒܪܘܝܐ ܘܒܪ̣ܝܬܐ. ܘܡ̣ܢ ܗܪܟܐ ܐܠܨܐ ܡܫܪܝܢܘܬܗ ܕܒܪܘܝܐ ܐܘ ܡܬܘܡܝܘܬܗ̇ ܕܒܪܝ̣ܬܐ ܘܬܪ̈ܬܝܗܝܢ ܫܟܝ̣ܪ̈ܢ. ܕܠܘܬ ܗܕܐ ܡܦܢܝܢܢ ܘܐܡܪܝܢܢ ܕܠܐ ܐܠܨܐ ܗܕܐ. ܒܗ̇ܝ ܕܗܐ ܡܢܘ̈ܬܐ ܕܙܒܢܐ ܟܕ ܠܘ ܐܟܚܕܐ ܐܢܝܢ ܒܙܒܢܐ ܐܦܠܐ ܩܕܝ̣̈ܡܢ ܠܚܕ̈ܕܐ ܒܙܒܢܐ. ܘܐܠܐ ܡܫܬܟܚ ܗܘܐ ܠܙܒܢܐ ܙܒܢܐ. ܘܠܗ̇ܘ ܐ̱ܚܪܢܐ ܐ̱ܚܪܢܐ ܠܠܐ ܣܘܦ. ܒܕܓܘܢ ܠܘ ܠܐ ܡܨܝܐ ܕܐܦ ܩܕܝ̣ܡܘܬܗ ܕܒܪܘܝܐ ܥܠ ܒܪܝ̣ܬܐ ܒܗܢܐ ܙܢܐ ܬܗܘܐ. ܟܐܡܬ݀ ܕܠܐ ܫܘ̈ܝܝ ܒܙܒܢܐ ܢܗܘܘܢ܆ ܐܦܠܐ ܕܩܕܝ̣ܡ ܗܢܐ ܠܗܕܐ ܒܙܒܢܐ. ܐܠܐ ܕܠܐ ܙܒܢܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܒܗ ܕܐܝܬܘܗܝ ܗܘܐ ܘܐܝܬܘܗܝ ܘܢܗܘܐ ܐܝܬܘܗܝ. ܠܩܒܝ̣ܥܘܬ ܐܝܬܘܬܗ. ܥܡܗܘܢ ܕܙܒ̈ܢܐ ܕܦܛܪܘ ܘܕܥܬܝ̣ܕܝ̣ܢ ܡܫܘܕܥܝ̣ܢܢ. ܒܠܥܕ ܗ̇ܝ ܕܢܫܬܚܠܦ ܥܡ ܫܘܚܠܦܝ̈ܗܘܢ ܕܙܒ̈ܢܐ ܗܠܝܢ. ܘܠܘ ܠܡܕܡ ܐ̱ܚܪܝܢ. ܘܐܠܘ ܐܬܡܨܝ̣ܢ ܠܡܦܫܩܘܬܗ ܠܣܘܟܠܐ ܗܢܐ ܒܕܣܛܪ ܡ̣ܢ ܒܢ̈ܬ ܩ̈ܠܐ ܗܠܝܢ܆ ܠܐ ܡܬܘܡ ܐܬܚܫܚܢܢ ܒܗܝܢ.

 

 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܬܠܝܬܝܬܐ ܡܛܠ ܗ̇ܝ ܕܒܪܘܝܐ ܠܘ ܒܐܬܪܐ ܗ̱ܘ. ܘܡܛܠ ܗܕܐ ܐܦܠܐ ܓܘܫܡܐ ܗ̱ܘ. ܐܠܐ ܠܐ ܓܫܘܡ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܕܒܗ ܐܬ ܢܝܫܐ ܚܕ. ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܠܘ ܓܘܫܡܐ ܗܘܐ. ܡܫܪܝܢܐ ܗܘܐ ܘܠܘ ܡܬܘܡܝܐ. ܒܗ̇ܝ ܕܟܠ ܓܘܫܡܐ ܡܫܪܝܢܐ ܐܝܟ ܕܡ̣ܢ ܠܥܠ ܫܪܪܢܢ. ܘܟܕ ܡܬܘܡܝܐ ܗ̱ܘ ܠܘ ܓܘܫܡܐ. ܘܠܗ̇ ܠܗܕܐ ܡܫܘܕܥ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܟܪ ܕܐܡ̇ܪ. ܐܡܬܝ ܕܝܢ ܕܓܘܫܡܐ ܫܡܥܬܝܘܗܝ ܠܐܠܗܐ. ܗܢܐ ܟܕ ܠܐ ܐܝܬܘܗܝ ܐܬܓܒܠ. ܟܐܡܬ݀ ܠܐ ܡܫܪܝܢܐ ܠܗ̇ܘ ܕܠܝܬܝܘܬܐ ܠܐܝܬܘܬܗ ܩܕܝ̣ܡܐ ܝܕܥܐ ܡܠܬܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܠܘ ܒܪܘܝܐ ܓܘܫܡܐ ܗܘܐ ܡܬܦܠܓܢܐ ܗܘܐ. ܘܐܠܘ ܡܬܦܠܓܢܐ ܗܘܐ܆ ܡܬܡܨܝܢܐ ܗܘܐ. ܒܕ ܟܠ ܡܬܦܠܓܢܐ ܡܣܢܩ ܣܢܝ̣ܩ ܒܗܘܝܗ ܥܠ ܡܢܘ̈ܬܐ ܗ̇ܢܝܢ ܕܠܗܝܢ ܡܬܦܠܓ. ܘܒܪܘܝܐ ܟܕ ܐܠܨܝܐ ܗ̱ܘ܆ ܠܘ ܓܘܫܡܐ ܗ̱ܘ.

 

 

 

ܡܚܘܝܢܘܬܐ ܕܬܠܬ

 

ܐܠܘ ܒܪܘܝܐ ܓܘܫܡܐ ܗܘܐ ܡܣܝܟܐ ܗܘܐ ܒܬܠܬ ܩܝ̈ܡܢ. ܘܐܠܘ ܡܣܝܟܐ ܗܘܐ ܠܘ ܡܬܘܡܝܐ ܗܘܐ. ܒܗ̇ܝ ܕܡܬܘܡܝܐ ܠܗ̇ܘ ܕܕܠܐ ܣܟ ܗ̣ܘ ܐܡܪܝܢܢ. ܒܪܘܝܐ ܡܕܝܢ ܒܕܡܬܘܡܝܐ ܗ̱ܘ ܠܘ ܓܘܫܡܐ ܗ̱ܘ.

 

 

 

ܡܚܘܝܢܘܬܐ ܕܐܪܒܥ

 

ܐܠܘ ܓܘܫܡܐ ܗܘܐ ܒܪܘܝܐ. ܡܫܘܬܦܘ ܡܫܘܬܦ ܗܘܐ ܠܟܠܗܘܢ ܓܘܫ̈ܡܐ ܒܓܘܫܡܢܝܘܬܐ. ܒܕܓܘܢ ܐܢ ܦܪܝ̣ܫ ܗܘܐ ܡܢܗܘܢ. ܒܙܢܐ ܡܕܡ ܟܝܢܝܐ . ܡܫܬܟܚ ܗܘܐ ܟܝܢܗ ܕܡܪܟܒ ܡ̣ܢ ܟܝܢܐ ܕܓܘܢܝܐ ܘܡ̣ܢ ܡܢܬܐ ܕܝ̣ܠܢܝܬܐ ܐܘܟܝ̣ܬ ܡ̣ܢ ܓܢܣܐ ܘܦܘܪܫܢܐ. ܘܟܠ ܡܪܟܒܐ ܡܬܡܨܝܢܐ ܘܠܘ ܡܬܘܡܝܐ. ܘܐܢ ܠܐ ܦܪܝ̣ܫ ܗܘܐ ܡܢܗܘܢ ܒܡܕܡ ܐܠܨܐ ܗܘܬ݀ ܕܐܟܘܬܗܘܢ ܐܦ ܗ̣ܘ ܡܩܒܠܢܐ ܢܗܘܐ ܗܘܐ ܕܗܘܝܐ ܘܚܘܒܠܐ. ܗ̇ܝ ܕܟܦܘܪܝܐ ܗ̱ܝ ܠܐ ܡܬܡܠܚܢܐ.

 

 

 

ܡܚܘܝܢܘܬܐ ܕܚܡܫ

 

ܐܠܘ ܓܘܫܡܢܝܘܬܐ ܘܡܣܝܟܘܬܐ. ܠܐ ܟܠܝ̈ܢ ܗܘܝ̈ ܡ̣ܢ ܩܘܛܪܓܐ ܕܣܘܟܠ ܐܠܗܘܬܐ. ܥܛܠܐܝܬ ܡܨܝܢ ܗܘܝܢ ܠܡܒܛܠܘ ܐܠܗܘܬ ܫܡܫܐ ܘܗ̇ܝ ܕܣܗܪܐ. ܒܕܠܐ ܒܡܕܡ ܡܨܝܢܢ ܠܡܟܢܫܘ ܠܘܬ ܡܟܫܚܢܘܬ ܐܠܗܘܬܐ ܕܟܠܚܕ ܡܢܗܘܢ. ܐܠܐ ܒܗ̇ܝ ܕܓܘܫ̈ܡܐ ܐܢܘܢ ܘܡܣܝ̈ܟܐ. ܘܐܠܘ ܐܬܗܘܢܢܢ ܡܬܡܨܝܢܘܬ ܓܘܫܡܢܝܘܬܗ ܕܒܪܘܝܐ. ܣܓܝ̈ܐܐ ܗܘܘ ܠܢ ܐܠܗ̈ܐ ܘܠܘ ܚܕ ܐܠܗܐ. ܫܡܫܐ ܠܡܐܡܪ ܘܣܗܪܐ ܕܐܝܟ ܕܐܡ̣ܪ ܩܕܝܫܐ ܕܝܘܢܢܘܣܝܘܣ. ܘܠܐ ܐܡ̇ܪ ܐ̱ܢܐ ܐܝܟ ܡܠܬܐ ܥܬܝ̣ܩܬܐ ܕܐܠܗܐ ܗ̱ܘ ܫܡܫܐ. ܘܒܪܘܝܗ ܕܗܢܐ ܟܠ. ܘܩܕܝ̣ܫܐ ܓܪܝܓܘܪܝܘܣ ܬܘܒ. ܡ̣ܢ ܗܪܟܐ ܗ̇ܢܘܢ ܡ̇ܢ ܠܫܡܫܐ. ܗ̇ܢܘܢ ܕܝܢ ܠܣܗܪܐ. ܗ̇ܢܘܢ ܕܝܢ ܠܣܓܝܐܘܬܐ ܕܟܘܟ̈ܒܐ. ܗ̇ܢܘܢ ܕܝܢ ܠܗ ܠܫܡܝܐ ܥܡ ܗܠܝܢ܇ ܕܠܗܘܢ ܘܕܢܕܒܪܘܢ ܠܟܠ ܝܗܒܘ.

 

 

 

ܡܚܘܝܢܘܬܐ ܕܫܬ

 

ܐܠܘ ܒܪܘܝܐ ܓܘܫܡܐ ܗܘܐ. ܒܐܬܪܐ ܗܘܐ. ܒܕܓܘܢ ܗ̣ܘ ܐܬܪܗ. ܐܘ ܡܬܘܡܝܐ ܗ̱ܘ ܐܘ ܡܫܪܝܢܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܬܪܐ ܫܛܝ̣ܚܘܬܗ ܗ̣ܘ ܓܘܝܬܐ ܕܓܘܫܡܐ ܗ̇ܘ ܕܚܒܫ. ܘܚܢܢ ܡ̣ܢ ܠܥܠ ܫܪܪܢܢ ܕܟܠ ܓܘܫܡܐ ܡܫܪܝܢܐ ܗ̱ܘ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܟܕ ܒܪܘܝܐ ܐܝܬܘܗܝ ܗܘܐ ܘܠܐ ܐܬܪܐ ܐܝܬ ܠܗ ܐܘ ܚܒܫ ܠܗ. ܠܐ ܡܕܝܢ ܣܢܝ̣ܩ ܟܝܢܗ ܥܠ ܐܬܪܐ ܠܡܗܘܐ ܒܗ. ܘܟܕ ܗ̣ܝ ܗܕܐ ܠܐ ܣܢܝ̣ܩܘܬܐ ܟܝܢܝܬܐ ܗ̱ܝ ܠܗ. ܠܥܠܡ ܥܠܡܝܢ ܠܗ ܙܕܩ ܕܬܩܦ. ܒܪܘܝܐ ܡܕܝܢ ܟܕ ܠܘ ܒܐܬܪܐ ܗ̱ܘ. ܠܘ ܓܘܫܡܐ ܗ̱ܘ.

 

 

 

ܡܚܘܝܢܘܬܐ ܕܫܒܥ

 

ܥܠܡܐ ܗܢܐ ܐܣܦܝܪܢܝ ܐܣܟܡܐ ܗ̱ܘ. ܘܐܠܘ ܒܪܘܝܐ ܓܘܫܡܐ ܗܘܐ. ܐܠܨܐ ܗܘܬ݀ ܕܒܦܢܝ̣ܬܐ ܡܢܗ ܢܗܘܐ ܗܘܐ ܕܒܦܢܝ̣ܬܐ ܡܢܗ ܢܗܘܐ ܗܘܐ. ܘܐܠܘ ܒܦܢܝܬܐ ܡܢܗ ܗܘܐ ܐܠܨܐ ܗܘܬ݀ ܕܠܥܠ ܡ̣ܢ ܐ̱ܢܫܝ̈ܢ ܢܗܘܐ ܗܘܐ. ܘܠܬܚܬ ܡ̣ܢ ܐ̱ܢܫܝ̈ܢ ܐ̱ܚܪ̈ܢܐ. ܒܗ̇ܝ ܕܕܘܟܬܐ ܡ̣ܢ ܫܡܝܐ ܐܝܕܐ ܕܠܥܠ ܡ̣ܢ ܪ̈ܝܫܝܢ ܗ̣ܝ. ܡ̣ܢ ܐܢܢܩܝ ܕܠܬܚܬ ܡ̣ܢ ܪ̈ܓܠܝ ܗ̇ܢܘܢ ܕܠܩܘܒ̈ܠܝܝܢ ܡ̇ܢ ܕܝܐܡܛܪܐܝܬ ܒܣܝܡܐ ܕܥܠ ܐܪܥܐ ܬܗܘܐ ܒܕܦܣܝ̈ܢ ܠܩܘܒܠܝܢ ܐܢܝܢ. ܘܟܕ ܐܠܗܐ ܫܘܒܚܐ ܠܛܝܒܘܬܗ ܠܐ ܡܨܝܐ ܐܦܠܐ ܦܐܝܐ ܕܠܬܚܬ ܡܬܘܡ ܢܗܘܐ. ܠܘ ܓܘܫܡܐ ܗ̱ܘ ܒܕܠܘ ܒܐܬܪܐ ܗ̱ܘ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܠܝܬܝܬܐ. ܡܛܠ ܬܪܥܝ̣ܬܐ ܫܟܝ̣ܪܬܐ ܕܡܓܫ̈ܡܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ. ܣܥܝܐ ܩܕܡܝܐ

 

ܐܡܪܝܢ ܕܗ̇ܢܘܢ ܕܐܝܬܝܗܘܢ ܐܘ ܫܘ̈ܝܝ ܒܐܬܪܐ ܐܝܬܝܗܘܢ ܐܟܙܢܐ ܕܐܘܣܝܐ ܘܓܕܫܐ. ܒܕܠܘ ܐܘܣܝܐ ܒܐܬܪܐ ܡܕܡ ܐܝܬܝܗ̇܆ ܘܓܕܫܐ ܒܐ̱ܚܪܝܢ. ܐܘ ܦܪ̈ܝ̣ܫܝ ܒܐܬܪܐ. ܐܟܙܢܐ ܕܬܪܝܢ ܓܘܫ̈ܡܝ̣ܢ. ܒܕܐܬܪ ܟܠܚܕ ܡܢܗܘܢ ܐ̱ܚܪܢܐ. ܙܕܩ ܕܢܗܘܐ ܐܝܬܘܗܝ. ܘܟܠ ܕܒܐܬܪܐ ܗ̱ܘ ܓܘܫܡܐ ܗ̱ܘ. ܒܪܘܝܐ ܡܕܝܢ ܐܢ ܐܝܬܘܗܝ. ܓܘܫܡܐ ܐܝܬܘܗܝ.

 

 

 

ܣܥܝܐ ܕܬܪܝܢ

 

ܓܘܫܡܐ ܒܐܬܪܐ ܗ̱ܘ. ܒܕܩܐܡ ܠܝܬܗ ܐܝܬܘܗܝ. ܘܓܕܫܐ ܠܘ ܒܐܬܪܐ ܗ̱ܘ. ܒܕ ܒܓܘܫܡܐ ܩܢܐ ܩܘܝܡܐ ܘܠܘ ܠܝܬܗ. ܒܪܘܝܐ ܡܕܝܢ ܐܢ ܩܐܡ ܠܝܬܗ ܐܝܬܘܗܝ ܘܠܘ ܓܕܫܐ ܗ̱ܘ ܓܘܫܡܐ ܐܝܬܘܗܝ.

 

 

 

ܣܥܝܐ ܕܬܠܬܐ

 

ܒܢܝ̈ܢܫܐ ܓܝܪ ܒܦܫܝ̣ܛܘܬ ܬܪ̈ܥܝܬܗܘܢ ܘܠܐ ܚܫܢܝܘܬܗܘܢ ܕܒܡܩܡܘܬ ܨܒܝܢܐ ܕܥܠ ܫܘܪܪ ܬܘܕܝܬܐ ܡܕܡ. ܐܦ ܓܝܪ ܘܣܩܘܒ̈ܠܝܝ ܗܝܡܢ̈ܘܬܐ ܐܟܚܕܐ. ܟܕ ܠܘܬ ܐܠܗܐ ܡܩܬܝ̣ܢ ܚܝܪ̈ܝܗܘܢ. ܠܐܦܝ̈ ܠܥܠ ܡܪܝܡܝ̣ܢ ܐܝܕ̈ܝܗܘܢ. ܘܠܥܠ ܚܝܪܝܢ. ܘܡ̣ܢ ܗ̇ܘ ܕܒܡܪ̈ܘܡܐ ܥܠܝ̈ܐ ܥܡܪ ܦܘܢܝ ܫܐܠܬܗ̈ܘܢ ܫܐܠܝܢ. ܘܐܠܘܠܐ ܒܦܢܝ̣ܬܐ ܗܘܐ ܥܠܝܬܐ ܒܪܘܝܐ. ܠܘ ܠܘܬ ܗܕܐ ܡܬܗܕܝܢ ܗܘܘ ܐ̱ܢܫ̈ܐ ܡ̣ܢ ܕܝܠܗܘܢ. ܘܡ̣ܢ ܕܐܝܟ ܗܠܝܢ ܡܬܟܢܫܐ ܕܒܐܬܪܐ ܗ̱ܘ ܒܪܘܝܐ. ܘܡܛܠ ܗܕܐ ܐܦ ܓܘܫܡܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܕܝܠܗܘܢ ܕܡܓܫ̈ܡܢܐ. ܣܗܕܘܬܐ ܩܕܡܝܬܐ ܐܘܪܝܬܐ

 

ܠܘ̈ܚܐ ܕܟܬܝ̈ܒܢ ܒܨܒܥܗ ܕܐܠܗܐ.

 

 

 

ܣܗܕܘܬܐ ܕܬܪܬܝܢ

 

ܒܗ̇ ܟܕ ܒܗ̇. ܘܚܙܘ ܠܐܠܗܐ ܕܐܝܣܪܐܝܠ. ܘܬܚܝܬ ܪ̈ܓܠܘܗܝ ܐܝܟ ܥܒܕܐ ܕܣܦܝ̣ܠܐ.

 

 

 

ܣܗܕܘܬ ܕܬܠܬ

 

ܕܘܝܕ. ܝܡܝܢܗ ܕܡܪܝܐ ܐܪܝ̣ܡܬܢܝ. ܝܡܝܢܗ ܕܡܪܝܐ ܥܒܕܬ݀ ܚܝܠܐ ܘܠܐ ܐܡܘܬ.

 

 

 

ܣܗܕܘܬܐ ܕܐܪܒܥ

 

ܗ̣ܘ ܟܕ ܗ̣ܘ. ܕܝܬܒ ܒܫܡܝܐ ܢܓܚܟ.

 

 

 

ܣܗܕܘܬܐ ܕܚܡܫ

 

ܗ̣ܘ ܟܕ ܗ̣ܘ. ܒܝܡܐ ܐܘܪܚܟ. ܘܫܒܝ̣̈ܠܝܟ ܒܡܝ̈ܐ ܣܓܝ̈ܐܐ.

 

 

 

ܣܗܕܘܬܐ ܕܫܬ

 

ܐܫܥܝܐ. ܚܝܠܬܟ ܐܦ ܥܕܪܬܟ. ܘܣܡܟܬܟ ܒܝܡܝ̣ܢܝ ܙܕܝ̣ܩܬܐ.

 

 

 

ܣܗܕܘܬܐ ܕܫܒܥ

 

ܗ̣ܘ ܟܕ ܗ̣ܘ ܫܡܝܐ ܟܘܪܣܝ. ܘܐܪܥܐ ܟܘܒܫܐ ܬܚܝܬ ܪ̈ܓܠܝ.

 

 

 

ܣܗܕܘܬܐ ܕܬܡܢܐ

 

ܢܚܘܡ. ܡܪܝܐ ܒܥܠܥܠܐ ܘܒܟܘ̣ܟܝ̣ܬܐ ܐܘܪܚܗ. ܘܥܢܢ̈ܐ ܚܠܐ ܕܪ̈ܓܠܘܗܝ.

 

 

 

ܣܗܕܘܬܐ ܕܬܫܥ

 

ܕܢܝܐܝܠ. ܚܙܐ ܗܘܝܬ ܟܘܪ̈ܣܘܬܐ ܕܐܬܬܣܝ̣ܡܘ. ܘܥܬܝ̣ܩ ܝܘ̈ܡܬܐ ܝ̣ܬܒ. ܠܒܘܫܗ ܐܝܟ ܬܠܓܐ ܚܘܪܐ. ܘܣܥܪܐ ܕܪܝܫܗ ܐܝܟ ܥܡܪܐ ܕܟܝܐ. ܟܘܪܣܝܗ ܫܠܗܒܝܬܐ ܕܢܘܪܐ. ܘܓܝ̣ܓ̈ܠܘܗܝ ܕܢܘܪܐ ܝܩܕܬܐ. ܢܗܪܐ ܕܢܘܪܐ ܪܕܐ ܘܢܦܩ ܡ̣ܢ ܩܕܡܘܗܝ.

 

 

 

ܣܗܕܘܬܐ ܕܥܣܪ

 

ܐܠܗܐ ܡ̣ܢ ܬܝܡܢܐ ܐܬܐ. ܘܩܕܝܫܐ ܡ̣ܢ ܛܘܪܐ ܕܦܪܢ.

 

 

 

ܣܗܕܘܬܐ ܕܝ̄ܐ

 

ܣܒܪܬܐ ܡܪܢܝܬܐ. ܐܒܘܢ ܕܒܫܡܝܐ ܢܬܩܕܫ ܫܡܟ.

 

 

 

ܣܗܕܘܬܐ ܕܝܒ̄

 

ܝܥܩܘܒ ܒܩܘܪܒ ܩܘܪܒܢܗ. ܗ̇ܘ ܕܒܡܪ̈ܘܡܐ ܥܡܪ. ܘܒܡܟܝ̣̈ܟܬܐ ܚܐܪ.

 

 

 

ܣܗܕܘܬܐ ܕܝܓ̄

 

ܦܪܟܣܝ̣ܣ ܕܫܠܝ̈ܚܐ ܡܛܠ ܐܣܛܦܐܢܘܣ. ܚܪ ܒܫܡܝܐ. ܘܚܙܐ ܬܫܒܘܚܬܐ ܕܐܠܗܐ. ܘܠܝܫܘܥ ܟܕ ܩ̇ܐܡ ܡ̣ܢ ܝܡܝܢܐ ܕܐܠܗܐ.

 

 

 

ܣܗܕܘܬܐ ܕܝܕ̄

 

ܐܠܘ ܡܪܟܒܬܐ ܠܐ ܐܝܬܝܗ̇ ܗܘܬ݀ ܐܬܪܗ. ܐܝܟܢܐ ܥܠܝܗ̇ ܐܬܚܙܝ̣ ܕܝܬܝ̣ܒ. ܘܗ̣ܝ ܗܕܐ ܐܠܘܠܐ ܓܫܝ̣ܡܬܐ ܗܘܬ݀. ܐܝܟܢܐ ܡ̣ܢ ܓܫܝ̣̈ܡܐ ܡܬܛܥܢܐ ܗܘܬ݀. ܒܪܢܫܐ ܠܡܐܡܪ ܘܐܪܝܐ ܘܬܘܪܐ ܘܢܫܪܐ ܐܝܟ ܕܟܬܝ̣ܒ.

 

 

 

 

 

 

 

 

 

 

 

 

 

 

 

     #1 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܠܝܬܝܬܐ. ܡܛܠ ܒܘܛܠ ܬܪܥܝ̣ܬ ܡܓܫ̈ܡܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢ ܕܦܘܠܓܟܘܢ ܗ̇ܘ ܒܡܢܬܐ ܚܣܝ̣ܪ. ܒܕܗܘܢܐ ܡܠܝ̣ܠܐ ܬܠܬܐ ܡܫܟܚ ܫܩܘ̈ܗܝ. ܘܠܘ ܬܪܝܢ. ܟܐܡܬ݀ ܕܗ̇ܢܘܢ ܕܐܝܬܝܗܘܢ܆ ܐܘ ܫܘ̈ܝܝ ܒܐܬܪܐ ܐܝܬܝܗܘܢ. ܐܘ ܦܪ̈ܝܫܝ ܒܐܬܪܐ. ܐܘ ܠܐ ܫܘ̈ܝܝ ܒܐܬܪܐ: ܐܦܠܐ ܦܪ̈ܝ̣ܫܝ ܒܐܬܪܐ. ܘܠܐܝܬܘܬܗ ܡ̇ܢ ܕܒܪܘܝܐ ܗ̣ܘ ܗܢܐ ܫܩܐ ܬܠܝܬܝܐ ܢܩܦ. ܒܕܠܘ ܒܐܬܪܐ ܗ̱ܘ. ܘܡܛܠ ܗܕܐ ܠܐ ܫܘܐ ܐܦܠܐ ܦܪܝܫ ܒܐܬܪܐ ܡ̣ܢ ܗ̇ܢܘܢ ܕܒܐܬܪܐ. ܦܪܝ̣ܫ ܕܝܢ ܡܢܗܘܢ ܒܫܪܪܐ. ܒܙܢܝ̈ܐ ܡܕܡ ܠܘ ܐܬܪ̈ܢܝܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܓܘܫܡܐ ܠܘ ܒܗ ܕܩܐܡ ܠܝܬܗ ܐܝܬܘܗܝ܆ ܒܐܬܪܐ ܗ̱ܘ. ܐܠܐ ܒܗ̇ܝ ܕܓܘܫܡܐ ܗ̱ܘ. ܗܐ ܓܝܪ ܟܠ ܕܡܕܪܟ ܠܓܘܫܡܐ. ܡ̣ܢ ܐܢܢܩܝ ܡܕܪܟ ܐܦ ܠܗ̇ܝ ܕܒܐܬܪܐ ܡܕܡ ܘܦܢܝ̣ܬܐ ܐܝܬܘܗܝ. ܘܠܘ ܟܠ ܕܡܕܪܟ ܠܗ̇ܘ ܕܩܐܡ ܠܝܬܗ. ܡܕܪܟ ܐܢܢܩܐܝܬ ܐܦ ܠܗ̇ܝ ܕܒܐܬܪܐ ܐܝܬܘܗܝ. ܡܬܦܫܟ ܓܝܪ ܘܐܡ̇ܪ. ܕܗܢܐ ܕܩܐܡ ܠܝܬܗ. ܘܠܐ ܣܢܝ̣ܩ ܥܠ ܗ̇ܘ ܕܣܝ̣ܡ ܕܒܗ ܢܩܢܐ ܩܘܝܡܐ ܕܝܬܐ ܒܕܡܘ̣ܬ ܓܕܫܐ. ܐܪܐ ܟܝ ܐܦ ܥܠ ܐܬܪܐ ܬܘܒ ܠܐ ܣܢܝ̣ܩ ܒܩܘܝܡܗ. ܐܘ ܡܣܢܩ ܣܢܝ̣ܩ ܥܠܘܗܝ. ܘܡ̣ܢ ܗܠܝܢ ܐܬܚܘܝ. ܕܩܐܡ ܠܝܬܗ ܠܘ ܥܠܬܐ ܗ̱ܘ ܕܗ̇ܝ ܕܢܗܘܐ ܡܕܡ ܒܐܬܪܐ. ܒܪܘܝܐ ܡܕܝܢ ܩܐܡ ܠܝܬܗ ܗ̣ܘ ܘܠܘ ܒܐܬܪܐ ܗ̱ܘ. ܘܡܛܠ ܗܕܐ ܐܦܠܐ ܓܘܫܡܐ ܗ̱ܘ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܐܠܘ ܡܪܡܘܬ ܐܝܕܝ̈ܐ. ܘܚܘܪܐ ܕܠܥܠ. ܠܗ̇ܝ ܕܒܪܘܝܐ ܒܦܢܝ̣ܬܐ ܗ̱ܘ ܥܠܝܬܐ ܡܫܘܕܥܝ̣ܢ ܗܘܘ. ܙܕܩ ܗܘܐ ܕܡܪܡܝܘܬ ܨܘܪܐ ܕܥܠ ܐܪܥܐ ܒܓܗܢ̈ܬܐ. ܠܗ̇ܝ ܕܠܓܘ ܡ̣ܢ ܐܪܥܐ ܗ̱ܘ ܡܫܘܕܥܐ ܗܘܬ݀. ܘܟܕ ܗܕܐ ܠܐ ܫܪܝ̣ܪܐ ܐܦܠܐ ܗ̇ܝ ܕܐܡ̣ܪܬܘܢ.

 

 

 

ܢܝܫܐ ܬܪܝܢܐ ܦܘ̈ܢܝܐ ܕܣܗܕ̈ܘܬܗܘܢ ܟܬܒܝ̈ܬܐ: ܥܘܬܕܐ ܕܩܕܡ ܦܘ̈ܢܝܐ

 

ܐܡܪܝܢܢ ܕܬܪܝܢ ܐܢܘܢ ܡܗܕ̈ܝܢܐ. ܟܬܒܐ ܐܠܗܝܐ܆ ܘܚܘܫܒܐ ܡܠܝ̣ܠܐ. ܘܡܛܠ ܕܟܬܒܐ ܡܠܝ̣ܣܛܐ ܐܠܗܝܐ. ܥܠ ܚܘܫܒܐ ܕܝܬܝܪ ܡܪܢܝ ܡܕܡܣ. ܘܒܬܐܘܪܝܐ ܕܪܡܐ ܘܡܥܠܝܐ ܣܪܝ̣ܛ. ܘܠܘ ܫܝ̣ܥܐܝܬ ܘܐܝܟ ܕܐܬܝܐ. ܗ̣ܘ ܚܘܫܒܐ ܥܩܪܐ ܗ̱ܘ. ܘܟܬܒܐ ܢܓܒܗ. ܘܡ̣ܢ ܩܨ ܗ̇ܝ ܕܠܘ ܒܟܠܙܒܢ ܐܘܝܢ ܐܢܘܢ. ܐܠܐ ܐܝܬ ܐܡܬܝ ܕܣܩܘܒܠܝ ܠܚܕ̈ܕܐ ܡܬܟܝܢܝ̣ܢ ܚܘܫܒܐ ܘܟܬܒܐ. ܠܐ ܡܨܝܐ ܕܠܬܪ̈ܝܗܘܢ ܐܟܚܕܐ ܢܩܒܠ. ܘܐܠܐ ܢܗܘܐ ܕܣܥܝܢܢ ܠܡܟܢܫܘ ܐܟܚܕܐ ܠܣܩܘܒ̈ܠܝܐ ܒܚܕ ܗ̇ܘ ܕܣܝ̣ܡ. ܗ̇ܝ ܕܠܘ ܡܫܟܚܐ ܘܫܟܝ̣ܪܐ. ܐܦܠܐ ܬܘܒ ܡܨܝܐ ܕܠܬܪ̈ܝܗܘܢ ܐܟܚܕܐ ܕܠܐ ܢܩܒܠ. ܘܐܠܐ ܡܬܓܠܙܝ̣ܢܢ ܗ̣ܘ ܡ̇ܢ ܟܘܠܢܐܝܬ ܡ̣ܢ ܗܘܕܝܐ. ܘܢܗܘܐ ܬܘܒ ܕܣܥܝܢܢ ܕܢܪܝ̣ܡ ܬܪ̈ܝܗܘܢ ܦܫ̈ܚܝܗ̇ ܕܐܢܛܝ̣ܦܐܣܝ̣ܣ ܗ̇ܝ ܕܝܬܝܪ ܫܟܝ̣ܪܐ. ܘܠܐ ܡܨܝܐ ܕܠܟܬܒܐ ܢܩܒܠ ܘܠܚܘܫܒܐ ܢܣܠܐ. ܡܛܠ ܕܗ̣ܝ ܗܕܐ ܐܦ ܠܘܬ ܡܣܬܠܝܢܘܬܗ ܕܟܬܒܐ ܡܘܒܠܐ. ܒܗܝ ܕܐܢ ܥܩܪܐ ܒܝ̣ܫ ܗ̣ܘ. ܗ̣ܘ ܗܟܘܬ ܐܦ ܣܘ̈ܟܐ. ܐܦܠܐ ܬܘܒ ܡܨܝܐ ܕܠܚܘܫܒܐ ܢܩܒܠ ܘܠܟܬܒܐ ܢܣܠܐ. ܒܕܝܕܥܝ̣ܢܢ ܕܡܢܗ ܕܐܠܗܐ ܐܡܝ̣ܪ ܗܘܐ. ܘܟܕ ܗܠܝܢ ܗܟܢܐ ܐܢܝܢ. ܠܝܬ ܦܘܪܣܐ ܐ̱ܚܪܢܐ. ܐܠܐ ܕܠܚܘܫܒܐ ܡ̇ܢ ܢܩܒܠ. ܘܠܟܬܒܐ ܢܦܫܩ. ܘܠܘܬ ܫܠܡܘܬܐ ܢܝܬܝܘܗܝ ܕܚܘܫܒܐ ܒܣܘܟܠܐ. ܘܐܦܢ ܒܒܪܬ݀ ܩܠܐ ܕܣܩܘܒܠܝ ܡܬܚܘܐ. ܟܐܡܬ݀ ܢܚܙܐ ܕܠܘܬ ܐܝܠܝܢ ܐܡܝ̣ܪ ܗ̣ܘ. ܟܬܒܐ. ܘܡܛܠ ܐܝܢܐ ܢܝ̣ܫܐ. ܘܕܐܢ ܐܪܐ ܒܝܕ ܒܪܬ ܩܠܐ݀ ܫܘܝܬ݀ ܫܡܐ ܡܫܬܟܚܐ ܫܘܝܘܬ ܣܩܘܒܠܝܘܬܐ ܘܢܩܦܐ ܛܘܥܝܝ.

 

 

 

ܦܘܢܝܐ ܕܣܗܕܘܬܐ ܩܕܡܝܬܐ

 

ܗ̇ܝ ܓܝܪ ܕܒܨܒܥܗ ܕܐܠܗܐ. ܐܝܟ ܕܠܫܘܪܪ ܬܪܥܝ̣ܬܗ ܕܥܡܐ ܗ̇ܘ ܩܫܐ ܩܕܠܐ. ܘܕܠܝ̣ܠ ܠܡܨܛܠܝܘ ܒܪ ܒܣܬܪܐܝܬ ܡ̣ܢ ܡܬܬܦܝ̣ܣܢܘܬܐ ܕܗ̇ܘ ܕܐܦܩ ܘܦܪܩ ܐܢܘܢ ܡ̣ܢ ܫܘܥܒܕܐ ܦܪܥܘܢܝܐ ܐܡܝ̣ܪܐ. ܟܐܡܬ݀ ܕܡܢܗ ܕܐܠܗܐ ܘܒܪܡܙܗ ܣܪ̈ܝ̣ܛܢ ܗ̇ܢܝܢ ܠܘ̈ܚܐ ܘܠܘ ܒܨܒܥܐ ܐ̱ܢܫܝܬܐ. ܘܕܗ̣ܝ ܨܒܥܐ ܠܪܡܙܐ ܗ̱ܘ ܨܝܪܐ ܗܪܟܐ ܓܠܝܐ. ܒܗ̇ܝ ܕܐܦ ܚܢܢ ܦܓܪ̈ܢܐ ܐܝܟ ܕܒܣܘܓܐܐ ܒܨܒ̈ܥܬܢ ܗ̣ܘ ܪܡܙܝ̣ܢܢ ܚܫ̈ܐ ܕܢܦ̈ܫܬܢ ܠܚܕ̈ܕܐ. ܘܟܕ ܗ̣ܢܘܢ ܐܝܣܪ̈ܠܝܐ ܠܐ ܥܪܝܢ ܗܘܘ ܠܡܣܬܟܠܘ ܪܡܙܐ ܐܘ ܣܘܪܛܐ ܕܠܐ ܨܒܥܐ. ܒܨܒܥܐ ܐܬܛܦܣ ܠܗܘܢ ܗ̣ܘ ܪܡܙܐ.

 

 

 

ܦܘܢܝܐ ܕܣܗܕܘܬܐ ܕܬܪܬܝܢ

 

ܡܕܪܟܢܘܬܗ ܓܝܪ ܕܗܘܢܐ ܐ̱ܢܫܝܐ ܠܣܘܥܪ̈ܢܐ. ܒܥܝ̣ܪܘܬܐ ܡ̇ܢ ܓܠܝܢܐ ܡܬܩܪܝܐ. ܒܫܢܬܐ ܕܝܢ ܚܠܡܐ. ܘܟܠ ܚܕ ܡܢܗܘܢ. ܐܢ ܐܟܡܐ ܕܐܝܬܘܗܝ ܡܟܬܪ. ܟܐܡܬ ܐܟܡܐ ܕܡܢܗ ܕܗܘܢܐ ܐܬܕܪܟ. ܘܡ̣ܢ ܚܝܠܐ ܡܬܗܓܓܢܐ ܠܐ ܡܬܚܛܦ ܘܡܬܛܦܣ. ܠܐ ܥܠ ܦܘܫܩܐ ܡܣܬܢܩ ܐܦܠܐ ܥܠ ܦܫܪܐ. ܐܢܕܝܢ ܡܢܗ ܕܗܢܐ ܡܬܬܨܝ̣ܕ. ܘܒܝܘܩ̈ܢܘܗܝ ܓܘܫ̈ܡܢܝܐ ܡܬܬܨܝ̣ܪ. ܐܢ ܓܠܝܢܐ ܗ̱ܘ ܥܠ ܦܘܫܩܐ ܡܣܬܢܩ. ܘܐܢ ܚܠܡܐ ܥܠ ܦܫܪܐ. ܘܗ̣ܘ ܗܢܐ ܓܠܝܢܐ ܕܗܪܟܐ ܡܕܟܪ. ܓܠܝܐ ܕܡ̣ܢ ܨܝ̈ܕܐ ܗ̣ܘ ܕܚܝܠܐ ܡܬܗܓܓܢܐ. ܕܠܣܘ̈ܟܠܐ ܡܕܡ ܒܝܬܝ̈ܝ ܠܒܪܘܝܐ ܒܨܘܪ̈ܬܗ ܝܩ̈ܢ. ܟܕ ܠܡܘܙܠܬܐ ܡ̇ܢ ܒܥܒܕܐ ܕܣܦܝ̣ܠܐ ܕܡ̣ܝ. ܒܕܓܘܢܐ ܗܢܐ ܗܘܝܘ ܓܘܢ ܫܡܝܐ. ܘܒܗ̇ܝ ܕܬܚܝܬ ܪ̈ܓܠܘܗܝ ܐܬܚܙܝ̈ܝܢ. ܡܢܗܘܢ ܕܚܙܝ̈ܐ ܗ̇ܢܘܢ ܠܚܪܝܘ̣ܬܗܝܢ ܕܒܬܪ ܒܪܘܝܐ ܐܘܟܝܬ ܠܡܫܪܝܢܘܬܗܝܢ ܕܡܬܘܡܝܘܬܗ ܕܒܪܘܝܐ ܫܘܕܥ ܗ̣ܘ ܚܙܘܐ. ܒܕܪ̈ܓܠܐ ܗ̣ܢܝܢ ܐܢܝܢ ܗܕܡܝ̈ܗ̇ ܐ̱ܚܪ̈ܝܐ ܕܚܝܘܬܐ. ܘܠܗ̇ܝ ܕܬܚܝܬ ܪ̈ܓܠܐ ܬܘܒ. ܠܗ̇ܝ ܕܡܫܡ̈ܫܢܝܬܐ ܐܢܝܢ ܓܝ̣ܓ̈ܠܝ ܫܡܝܐ ܠܨܒܝܢܗ ܕܒܪܘܝܐ ܒܙܘܥܝ̈ܗܘܢ ܡܒܕܩܐ. ܐܝܟ ܕܐܦ ܪ̈ܓܠܐ ܡܫܡ̈ܫܢܝܬܐ ܐܢܝܢ ܕܨܒܝܢܗ̇ ܕܚܝܘܬܐ.

 

 

 

ܦܘܢܝܐ ܕܣܗܕܘܬܐ ܬܠܝܬܝܬܐ

 

ܐܡܪܝܢܢ ܕܝܡܝ̣ܢܐ ܕܐܠܗܐ ܒܟܬܒ̈ܐ ܩܕܝ̣̈ܫܐ ܘܥܠ ܚܝܠܐ ܘܥܘܫܢܐ ܕܝܠܗ ܕܒܪܘܝܐ ܡܫܘܕܥܐ. ܘܠܘ ܥܠ ܫܟܝ̣ܚܘܬ ܗܕܡ̈ܐ܆ ܠܒܪܐ ܗܕ̈ܡܐ. ܘܗܕܐ ܝ̣ܕܝ̣ܥܐ ܡ̣ܢ ܬܪܬܝܢ. ܚܕܐ ܡ̇ܢ ܕܐܡܝ̣ܢܐܝܬ ܠܣܘܟܠ ܬܘܩܦܐ ܘܓܢ̱ܒܪܘܬܐ ܡܩܦ ܥܘܗܕܢ ܝܡܝ̣ܢܐ. ܐܝܟ ܗ̇ܝ ܕܝܡܝܢܟ ܡܪܝܐ ܬܒܪܬ݀ ܠܒܥܠܕ̈ܒܒܝܢ ܘܫܪܟܐ. ܘܕܬܪܬܝܢ ܗ̣ܘ ܢܣܝܢܐ ܡܠܦ ܠܢ. ܟܕ ܠܗ̇ ܠܝܡܝ̣ܢܐ ܒܣܡܠܐ ܡܦܚܡܝ̣ܢܢ. ܠܘܬܢ ܕܝܠܢ. ܘܓܠܝܐ ܕܗ̣ܝ ܝܬܝܪ ܙܪܝ̣ܙܐ.

 

 

 

ܗܦܟܬܐ

 

ܐܡܪܝܢ ܕܝܡܝܢܐ ܕܐܠܗܐ ܠܐ ܡܬܕܪܟܢܝ̣ܬܐ ܗ̱ܝ ܠܒܢܝ̈ܢܫܐ. ܐܝܟ ܕܐܡ̣ܪ ܩܕܝܫܐ ܐܘܓܪܝܣ. ܗ̇ܘ ܕܒܠܚܘܕܘܗܝ ܝܬܒ ܡ̣ܢ ܝܡܝ̣ܢܐ ܕܐܒܐ. ܗ̣ܘ ܒܠܚܘܕܘܗܝ ܩܢܐ ܝܕܥܬܐ ܕܝܡܝ̣ܢܐ. ܘܐܝܟܢܐ ܐܢ̱ܬܘܢ ܐܓܡܕܬܘܢ ܠܡܦܫܩܢܘܬܗ̇.

 

 

 

ܦܘܢܝܐ

 

ܐܡܪܝܢܢ. ܕܝܡܝܢܐ ܡ̇ܢ ܠܘ ܟܠܢܐܝܬ ܠܐ ܡܬܕܪܟܢܝ̣ܬܐ ܗ̱ܝ. ܐܠܐ ܒܙܢܐ ܡܕܡ ܒܕܝܕܥܝ̣ܢܢ ܗ̣ܘ ܕܐܝܬ ܝܡܝ̣ܢܐ ܠܐܠܗܐ ܐܘܟܝ̣ܬ ܚܝܠܬܢܘܬܐ. ܘܕܗ̣ܝ ܗܕܐ ܝܬܝ̣ܪ ܡ̣ܢ ܚܝܠܬܢ̈ܘܬܐ ܕܟܠܗܘܢ ܚܝܠܬܢ̈ܐ ܡܬܡܨ̈ܝܢܐ ܚܝܠܬܢܝܐ. ܐܝܟ ܕܟܡܐ ܡ̇ܢ ܐܝܬܝܗ̇܆ ܐܘ ܕܕܐܝܟ ܐܝܕܐ ܐܝܬܝܗ̇. ܐܘ ܕܓܕܫܐ ܗ̱ܝ ܐܘ ܐܘܣܝܐ. ܠܐ ܡܬܘܡ ܡܬܕܪܟܐ ܠܢ. ܒܗ̇ܝ ܕܚܝܠܐ ܐܠܗܝܐ ܠܐ ܡܣܝܟܐ ܗ̱ܘ ܘܐܢ ܐܬܕܪܟ ܐܣܬܝܟ.

 

 

 

ܦܘܢܝܐ ܕܣܗܕܘܬܐ ܪܒܝܥܝܬܐ

 

ܐܡܪܝܢܢ ܕܐܝܢܐ ܕܠܐ ܡܕܪܫ ܠܡܕܟܢܘܬܐ ܕܬܐܘܪ̈ܝܐܣ ܪ̈ܘܚܢܝܬܐ ܘܡܒܪ̈ܝܬܐ܆ ܠܐ ܡܫܟܚ ܠܡܬܗܘܢܢܘ. ܐܝܬܝܐ ܡܕܡ܆ ܐܠܐ ܐܢ ܒܐܬܪܐ. ܘܟܕ ܐܘܣܝܐ ܕܫܡܝܐ ܛܒ ܬܗܝ̣ܪܐ ܘܡܝܩܪܐ. ܘܕܡܝ̣ܪܐ ܘܗܕܝ̣ܪܐ ܡ̣ܢ ܐܘܣܝܐ ܕܐܪܥܐ. ܠܫܡܝܐ ܐܬܪܐ ܠܡܪܝܐ ܕܡܥܠܝ ܡ̣ܢ ܐܬܪܐ. ܡܫܟܚ ܗܘܢܐ ܬܚܘܒܐ. ܗܘܢܐ ܕܝܢ ܓܒܪܢܝܐ. ܗ̇ܘ ܕܕܟܝܐܝܬ ܥܡ ܕܟܝܐ ܐܬܥܢܝ܆ ܠܘ ܗܟܢܐ ܝܕܥ ܐܠܐ ܐܟܡܐ ܕܠܩܕܝ̣ܫܐ ܕܝܘܢܢܘܣܝܘܣ ܫܦܪܐ. ܐܡ̇ܪ ܓܝܪ ܟܕ ܬܐܘܠܘ̈ܓܝܣܐ ܥܒܕ. ܡܥܠܝ ܡܣܬܬ݀ ܕܝܢ ܒܚܝܠܐ ܠܐ ܡܣܬܝܟܢܐ. ܐܦ ܠܥܠ ܡ̣ܢ ܟܠܗܘܢ ܗܘ̈ܢܐ ܕܠܥܠ ܡ̣ܢ ܫܡܝܐ. ܘܬܘܒ ܚܒܫ ܘܥܪܐ ܘܩܕܡ ܠܟܠ. ܗ̣ܘ ܕܝܢ ܠܐ ܡܬܬܚܕܢܐ ܗ̱ܘ ܠܟܠ. ܘܬܘܒ ܠܥܠ ܡ̣ܢ ܥܠܡܐ. ܠܥܠ ܡ̣ܢ ܫܡܝ̈ܐ. ܠܥܠ ܡ̣ܢ ܐܘܣܝܐ. ܒܕܓܘܢ ܗ̣ܘ ܢܒܝܐ ܟܕ ܠܘܬ ܦܫܝ̣̈ܛܐ ܗܘܬ ܡܠܬܗ ܠܡܕܪܟܢܘܬ ܗܘܢܗܘܢ ܒܒܘܣܝܐ ܐܬܕܢܝ ܘܐܡ̣ܪ. ܗ̇ܘ ܕܝܬܒ ܒܫܡܝܐ ܢܓܚܟ. ܗ̇ܘ ܕܫܪܝܪܐܝܬ ܠܐ ܒܫܡܝܐ ܗ̱ܘ ܐܦܠܐ ܓܚܟ.

 

 

 

ܦܘܢܝܐ ܕܣܗܕܘܬܐ ܚܡܝܫܝܬܐ

 

ܐܡܪܝܢܢ ܕܗ̇ܝ ܒܝܡܐ ܐܘܪܚܟ ܠܓܢܝ̣ܙܘܬܗ̇ ܕܐܠܗܘܬܐ ܠܐ ܡܬܡܠܠܢܝ̣ܬܐ ܘܠܐ ܡܬܒܕܩܢܝ̣ܬܐ ܡܫܘܕܥܐ. ܟܐܡܬ ܐܟܡܐ ܕܐܘܪܚܐ ܒܝܡܐ ܠܐ ܡܫܬܘܙܒܐ. ܗܟܢܐ ܐܠܐ ܗ̇ܢܝܢ ܕܐܠܗܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܘܣܦ ܐܡ̣ܪ ܗ̣ܘ ܢܒܝܐ. ܘܥܩ̈ܒܬܟ ܠܐ ܢܬܝܕ̈ܥܢ.

 

 

 

ܦܘܢܝܐ ܣܗܕܘܬܐ ܫܬܝܬܝܬܐ

 

ܗܘܝܘ ܟܕ ܗ̣ܘ ܦܘܢܝܐ ܕܣܗܕܘܬܐ ܬܠܝܬܝܬܐ.

 

 

 

ܦܘܢܝܐ ܕܣܗܕܘܬܐ ܫܒܝܥܝܬܐ

 

ܗܘܝܘ ܟܕ ܗ̣ܘ ܦܘܢܝܐ ܕܣܗܕܘܬܐ ܪܒܝܥܝܬܐ

 

 

 

ܦܘܢܝܐ ܕܣܗܕܘܬܐ ܬܡܝܢܝܬܐ

 

ܐܡܪܝܢܢ ܕܗ̇ܝ ܕܒܥܠܥܠܐ ܘܒܟܘ̣ܟܝ̣ܬܐ ܐܘܪܚܗ. ܠܗܝ ܕܥܠܥܠܐ ܘܟܘ̣ܟܝ̣ܬܐ ܒܝܕ ܪܡܙܗ ܘܡܪܕܝܬ ܫܘܠܛܢܗ ܒܗܘܢ ܡܬܬܙܝ̣ܥܝܢ ܙܘܥܝ̈ܗܘܢ ܙܝ̣̈ܥܐ ܘܪ̈ܗܝ̣ܒܐ ܡܫܘܕܥܐ. ܘܗ̇ܝ ܕܥܢܢ̈ܐ ܚܠܐ ܕܪ̈ܓܠܘܗܝ. ܠܗܘ ܕܥܢܢ̈ܐ ܡ̣ܢ ܠܗ̈ܓܐ ܕܡܬܬܪܝ̣ܡܝ̣ܢ ܡ̣ܢ ܐܪܥܐ ܗܘ̈ܝܢ ܡܐܪܙܐ. ܠܠܗ̈ܓܐ ܡ̇ܢ ܒܚܠܐ ܕܡܝ ܢܒܝܐ. ܘܠܐܪܥܐ ܒܪ̈ܓܠܐ. ܒܗ̇ܝ ܕܩܕܡܢܢ ܚܘܝ̣ܢܢ ܕܠܘ ܐܪܥܐ ܒܠܚܘܕ. ܐܠܐ ܐܦ ܫܡܝܐ. ܡܠܘܢ ܕܝܢ ܟܠܗ̇ ܒܪܝ̣ܬܐ ܒܗ̇ܝ ܕܐ̱ܚܪܝܐ ܘܡܫܪܝܢܐ. ܡܣܒܗܘܬܐ ܕܪ̈ܓܠܝܗ̇ ܕܡܬܘܡܝܘܬ ܒܪܘܝܐ ܗ̣ܝ ܒܗ̇ ܡܝܬܝܐ.

 

 

 

ܦܘܢܝܐ ܕܣܗܕܘܬܐ ܬܫܝܥܝܬܐ

 

ܐܡܪܝܢܢ ܕܗܢܐ ܚܙܘܐ ܗ̱ܘ ܕܥܠ ܦܘܫܩܐ ܣܢܝ̣ܩ. ܐܝܟ ܕܡ̣ܢ ܠܥܠ ܐܡ̣ܪܢܢ. ܒܗ̇ܝ ܕܒܐܣܟܡ ܐ̱ܢܫ̈ܐ ܐܬܚܙܝ ܗ̣ܘ ܐܠܗܐ ܠܢܒܝܐ. ܘܠܘ ܒܟܝܢܗ. ܘܝܕܝ̣ܥܐ ܗܕܐ ܕܐܦ ܠܡܠܟܐ ܕܒܒܠܝ̈ܐ ܠܘ ܐܝܟ ܕܐܝܬܘܗܝ ܚܙܝܗܝ ܢܒܝܐ܆ ܐܠܐ ܐܝܟ ܐܪܝܐ ܕܓܦ̈ܐ ܩܢܐ ܕܢܫܪܐ. ܘܠܡܠܟܐ ܕܡܕܝ̈ܐ ܐܝܟ ܕܒܐ. ܘܡܠܟܐ ܕܦܪ̈ܣܝܐ ܐܝܟ ܢܡܪܐ. ܒܕܓܘܢ ܐܦ ܠܡܠܟ ܡܠܟܝ̣̈ܢ ܘܐܠܗ ܐܠܗܝ̈ܢ. ܘܡܪܐ ܡܪ̈ܘܢ ܐܝܟ ܒܪܢܫܐ ܚܙܝܗܝ. ܘܥܬܝ̣ܩܘܬ ܝܘ̈ܡܬܐ ܠܡܬܘܡܝܘܬܗ ܡܫܘܕܥܐ. ܘܚܘܪܘܬ ܠܒܘܫܐ ܘܣܥܪܐ ܠܢܗܝ̣ܪܘܬ ܙܠܓܘ̈ܗܝ ܠܐ ܗܘܠܢܝ̈ܐ ܘܡܨܡܚܘܬ ܙܗܪܝ̣ܪ̈ܘܗܝ ܠܐ ܐܝܢܝ̈ܐ. ܘܟܘܪܣܝܐ ܫܠܗܒܝ̣ܬܢܝܐ ܘܓܝ̣̈ܓܠܐ ܢܘܪ̈ܢܝܬܐ. ܘܠܚܪܝ̣ܦܘܬ ܟܝܢܐ ܕܬܓ̈ܡܐ ܪ̈ܘܚܢܝܐ. ܘܢܗܪܐ ܕܢܘܪܐ ܕܪܕܐ ܡ̣ܢ ܩܘܕܡܘܗܝ. ܠܡܘܙܠܬܐ ܗ̇ܝ ܥܠܝܬܐ ܘܬܫܝ̣ܥܝܬܐ ܕܐܡܝ̣ܢܬ ܙܘ̈ܥܐ ܗ̣ܝ ܒܕܡܘ̣ܬ ܢܘܪܐ ܡܛܦܣܐ ܡܠܬܐ ܢܒܝܝܬܐ.

 

 

 

ܦܘܢܝܐ ܕܣܗܕܘܬܐ ܥܣܝܪܝܬܐ

 

ܦܢܝ̣ܬܐ ܗ̇ܝ ܕܥܠ ܝܡܝ̣ܢܗ ܗ̣ܝ ܕܗ̇ܘ ܕܚܐܪ ܠܡܕܢܚܐ ܬܝܡܢܐ ܡܬܩܪܝܐ. ܘܦܪܢ ܫܡ ܛܘܪܐ ܗ̇ܘ ܒܬܝܡܢܐ. ܘܗ̇ܝ ܕܐܠܗܐ ܡ̣ܢ ܬܝܡܢܐ ܐܬܐ. ܠܗ̇ܝ ܕܝܡܝ̣ܢܐܝܬ ܡܛܐ ܠܐܝܠܐ ܕܗ̇ܢܘܢ ܕܩܪܝܢ ܠܗ ܡܫܘܕܥܐ. ܗܘܐ ܠܗܘܢ ܟܐܡܬ ܥܕܪܐ ܘܣܬܪܐ ܘܫܘܪܐ ܢܛܘܪܐ.

 

 

 

ܦܘܢܝܐ ܕܣܗܕܘܬܐ ܕܚܕܥܣܪ̈ܐ ܘܕܗ̇ܝ ܕܬܪܬܥܣܪ̈ܐ

 

ܗܘܝܘ ܟܕ ܗ̣ܘ ܦܘܢܝܐ ܕܣܗܕܘܬܐ ܪܒܝܥܝܬܐ

 

 

 

ܦܘܢܝܐ ܕܣܗܕܘܬܐ ܕܬܠܬܥܣܪ̈ܐ

 

ܗܘܝܘ ܟܕ ܗ̣ܘ ܦܘܢܝܐ ܕܣܗܕܘܬܐ ܬܠܝܬܝܬܐ

 

 

 

ܦܘܢܝܐ ܕܣܗܕܘܬܐ ܕܐܪܒܥܣܪ̈ܐ

 

ܐܠܘ ܡܪܟܒܬܐ ܓܘܫܡܢܝܬܐ ܗܘܬ݀܆ ܡܣܝܟܬܐ ܗܘܬ݀ ܒܕ ܟܠ ܓܘܫܡܐ ܡܣܝܟܐ. ܘܐܠܘ ܡܢܗ̇ ܐܬܛܥܢ. ܗ̇ܘ ܕܠܪܒܘܬܗ ܠܝܬ ܣܘܦܐ܆ ܡܫܬܟܚ ܠܐ ܡܣܝܟܐ ܕܐܬܥܪܝ̣ ܒܡܣܝܟܐ ܗ̇ܝ ܕܠܐ ܡܫܟܚܐ. ܘܡ̣ܢ ܗܪܟܐ ܐܠܨܐ ܕܡܬܝܕܥܢܝ̣ܬܐ ܡܕܡ ܬܗܘܐ܇ ܕܡܫܘܕܥܐ ܫܘܬܦܘܬܐ ܟܕܢܬ݀ ܐܟܚܕܐ ܠܬܓ̈ܡܐ ܫܡܝ̈ܢܐ ܒܢܝ̣ܪܐ ܕܡܫܥܒܕܘܬܐ ܠܡܗܘܝܢܗܘܢ. ܘܒܨܘܪܬܐ ܐ̱ܢܫܝܬܐ ܐܬܛܦܣܘ ܚܝܠܘ̈ܬܐ ܪ̈ܘܚܢܝܐ ܡܛܠ ܝܕܘܥܬܢܘܬܗܘܢ. ܘܒܗ̇ܝ ܕܐܪܝܐ. ܡܛܠ ܡܠܟܝܘܬܐ ܘܬܘܩܦܐ. ܘܓܢܝ̣ܙܘܬܐ ܕܒܝܕ ܚܘܦܝܐ ܕܥܩ̈ܒܬܐ ܡܬܝܕ̈ܥܢ̈ܝܬܐ. ܘܒܗ̇ܝ ܕܬܘܪܐ ܡܛܠ ܡܪܘܚܘܬ ܚܛܘ̈ܛܐ ܠܘܬ ܩܘܒܠܐ ܕܡܛܪܐ ܐܘܟܝ̣ܬ ܙܠܓܐ ܕܪܝ̣ܫܘܬ ܐܠܗܘܬܐ ܕܥܠܝܗܘܢ ܕܠܐ ܦܣܩ ܢܛܚ. ܘܒܗ̇ܝ ܕܢܫܪܐ܆ ܡܛܠܬܗ̇ ܕܡܠܟܝܘܬܐ ܘܚܪܝ̣ܦܘܬ ܦܪܚܐ ܕܚܝܠܐ ܚܙܘܝܐ ܠܘܬ ܙܠܓܐ ܕܐܡܝ̣ܪ. ܒܗ̇ ܒܕܡܘܬܐ ܘܟܠܗܝܢ ܡ̈ܠܐ ܡܚܝ̣̈ܠܬܐ ܘܡܓܫܡܢ̈ܝܬܐ ܕܡ̣ܢ ܗܠܝܢ ܕܝܠܢ ܡܫܡܗܝ̣ܢܢ ܗܠܝܢ ܕܐܠܗܐ. ܐܝܟ ܕܐܡ̇ܪ ܩܕܝܫܐ ܓܪܝܓܘܪܝܘܣ. ܐܝܟ ܗ̇ܝ ܕܕܡܝ̣ܟ. ܟܕ ܡܗܡܐ ܡܢܢ ܒܥܠܬ݀ ܥܒܕܝ̈ܢ ܒܝ̈ܫܐ. ܘܥܝ̣ܪ ܟܕ ܡ̣ܢܫܝܠ ܥܒܕ ܕܫܦܝܪ. ܡܗܠܟ ܟܕ ܥܒܪܐ ܒܛܝ̣ܠܘܬܗ ܡ̣ܢ ܗܢܐ ܠܘܬ ܗܢܐ. ܡ̣ܢ ܒܪ ܩܝ̣ܫ ܟܐܡܬ݀ ܠܘܬ ܒܪ ܐܝ̣ܫܝ. ܘܡܬܬܘܚ ܒܕܠܐ ܡܨܛܒܐ ܒܠܐ ܢܡܘܣܝܘܬܐ ܕܡܣܬܥܪܐ ܒܗܟܢܐ ܗܠܝܢ ܕܫܪܟܐ.

 

 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܬܠܝܬܝܬܐ ܡܛܠܗ̇ܝ ܕܒܪܘܝܐ ܟܕ ܠܘ ܓܘܫܡܐ ܗ̱ܘ. ܐܪܐ ܐܦܠܐ ܩܢܐ ܡܕܡ ܡ̣ܢ ܚܝܠܐ ܓܘܫܡܢܝܘܬܐ ܐܟܙܢܐ ܕܫܡܥܐ ܘܚܙܝܐ ܫܟܝ̣ܚܝ̣ܢ ܠܗ ܐܘ ܠܐ. ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠܗ̇ܝ ܕܒܪܘܝܐ ܚܙܐ ܘܫ̇ܡܥ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘ̈ܫܒܝܬܐ ܡܫܪܪ̈ܢܝܬܐ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܚܙܝܐ ܘܫܡܥܐ ܚܝ̈ܠܐ ܐܢܘܢ ܡܫܘܕ̈ܥܝ ܫܘܡܠܝܐ. ܘܟܕ ܠܐ ܢܗܘܘܢ ܒܫܪܪܐ ܕܚܣܝ̣ܪܘܬܐ ܡܫܘܕܥܝ̣ܢ. ܘܒܪܘܝܐ ܟܕ ܡܫܡܠܝܐ ܗ̱ܘ ܘܠܗ̇ܘ ܡ̣ܢ ܟܠ ܚܣܝ̣ܪܘܬܐ. ܫܟܝ̣ܪܐ ܠܡܣܒܪܘ ܥܠܘܗܝ ܕܠܐ ܚܙܐ ܘܠܐ ܫܡ̇ܥ. ܡ̣ܢ ܐܠܨ̈ܬܐ ܡܕܝܢ ܚܙܐ ܘܫܡܥ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܒܪܘܝܐ ܚܝ ܗ̣ܘ. ܘܟܠ ܕܡܟܢ ܟܝܢܗ ܠܡܚܙܐ ܘܠܡܫܡܥ܆ ܘܠܐ ܢܚܙܐ ܘܠܐ ܢܫܡܥ. ܡ̣ܢ ܐܢܢܩܝ ܕܒܟܘ̈ܢܝܝ ܓܠܝ̣ܙܘܬܐ ܕܚܙܝܐ ܘܫܡܥܐ ܢܬܟܢܐ ܒܣܡܝܘܬܐ ܠܡܐܡܪ ܘܕܘܓܘܬܐ. ܒܪܘܝܐ ܡܕܝܢ ܟܕ ܣܢܝܐ ܕܒܕܐܝܟ ܗܠܝܢ ܢܬܟܢܐ. ܡ̣ܢ ܐܠܨ̈ܬܐ ܚܙܐ ܘܫܡ̇ܥ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܒܪܘܝܐ ܠܟܠܗܝܢ ܗܠܝܢ ܕܐܝܬܝܗܝܢ ܡܕܪܟ ܐܝܟ ܕܥܬܝ̣ܕܝ̣ܢ ܠܡܚܘܝܘ. ܘܓܘ̈ܢܐ ܘܩ̈ܠܐ ܡ̣ܢ ܗܠܝܢ ܕܐܝܬܝܗܝܢ ܐܢܘܢ. ܒܪܘܝܐ ܡܕܝܢ ܐܦ ܠܗܘܢ ܡܕܪܟ ܘܡܛܠ ܕܡܕܪܟܢܘܬܗܘܢ ܒܝܕ ܫܡܥܐ ܘܚܙܝܐ ܗܘܝܐ܇ ܡ̣ܢ ܐܠܨ̈ܐ ܡܕܝܢ ܕܒܪܘܝܐ ܚܙܐ ܘܫܡ̇ܥ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܢܦܫܐ ܡܠܝ̣ܠܬܐ ܟܕ ܠܐ ܚܒܝ̣ܟܬ݀ ܒܦܓܪܐ ܐܝܬܝܗ̇. ܘܠܐ ܓܫܝ̣ܡܬܐ ܘܐܘܟܡܐ ܠܐ ܡܨܝܐ ܕܢܬܟܢܫܘܢ ܐܟܚܕܐ ܒܚܕ ܗ̇ܘ ܕܣܝ̣ܡ. ܘܚܘܪܐ ܘܐܘܟܡܐ ܟܕ ܓܘ̈ܢܐ ܐܢܘܢ. ܐܠܐ ܐܢ ܒܚܙܝܐ ܠܐ ܡܬܕܪܟܝ̣ܢ. ܘܡܕܪܟܐ ܬܘܒ ܕܓܚܘܟܘܬܐ ܕܝ̣ܠܝܬܐ ܗ̱ܝ ܕܒܪܢܫܐ. ܘܨܗܠܘܬܐ ܕܣܘܣܝܐ. ܘܗ̣ܢܝܢ ܗܠܝܢ ܟܕ ܩܠܐ ܐܢܝܢ ܐܠܐ ܐܢ ܒܫܡܥܐ ܠܐ ܡܬܕܪ̈ܟܢ. ܘܢܦܫܐ ܡ̇ܢ ܟܕ ܠܐ ܗܘܠܢܝܬܐ ܗ̱ܝ. ܐܦܠܐ ܩܢܝܐ ܡܕܡ ܡ̣ܢ ܗܕ̈ܡܐ ܓܘܫܡܢܝ̈ܐ. ܫܡܥܐ ܐܦ ܚܙܝܐ. ܟܡܐ ܟܝ̣ܬ ܒܪܘܝܐ ܕܢܦܫܐ ܛܘܦܬܐ ܗ̱ܝ ܡ̣ܢ ܝܡܐ ܕܝܕܥܬܗ. ܘܫܪܓܐ ܒܨܝ̣ܪܐ ܗ̇ܝ ܡ̣ܢ ܪܒܘܬ ܠܡܦܐܕܗ. ܙܕܩ ܕܢܚܙܐ ܐܦ ܢܫܡܥ.

 

 

 

ܗܦܟܬܐ

 

ܐܡܪܝܢ ܕܢܦܫܐ ܒܝܕ ܐܘܪ̈ܓܢܐ ܕܠܦܓܪܗ̇ ܫܟܝܚܝܢ ܡܪܓܫܐ ܒܕܐܝܟ ܗܠܝܢ. ܒܪܘܝܐ ܕܝܢ ܕܠܐ ܦܓܪܐ ܠܗ ܐܝܬ ܐܦܠܐ ܐܘܪ̈ܓܢܐ ܐܘܟܝܬ ܗܕܡ̈ܐ ܒܡܢ ܐܪܐ ܡܪܓܫ؟

 

 

 

ܦܘܢܝܐ

 

ܐܡܪܝܢܢ ܕܢܦܫܐ ܒܩܨܬ݀ ܡܚܝ̣ܠܘܬܗ̇ ܥܠ ܐܘܪ̈ܓܢܐ ܡܣܬܢܩܐ ܒܡܕܪ̈ܟܢܘܬܗ̇. ܒܪܘܝܐ ܕܝܢ ܒܥܠܬ݀ ܡܫܡܠܝܘܬܗ ܠܐ ܣܢܝ̣ܩ ܥܠ ܡܕܡ ܡ̣ܢ ܕܐܝܟ ܗܠܝܢ. ܠܐ ܚܙܐ ܐܢ̱ܬ ܐܝܟܢܐ ܢܓܪܐ ܒܠܥܕ ܥܫܦܐ ܘܡܣܪܐ ܘܠܐ ܚܕ ܐܣܟܡܐ ܡܨܐ ܠܡܫܟܢܘ ܠܗ ܠܩܝܣܐ. ܘܒܪܘܝܐ ܒܠܥܕ ܗܠܝܢ ܒܐܣ̈ܟܡܐ ܡܦܬܟ̈ܐ ܘܬܡܝ̣̈ܗܐ ܨܒܬ ܠܓܘ̈ܫܡܐ ܕܢܨ̈ܒܬܐ ܘܚܝ̈ܘܬܐ ܘܫܪܟܐ.

 

 

 

ܢܝܫܐ ܕܬܪܝܢ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ.

 

ܐܘܪܝܬܐ. ܘܚܙܐ ܐܠܗܐ ܕܟܠ ܕܥܒܝ̣ܕ ܛܒ ܘܫܦܝܪ.

 

 

 

ܣܗܕܘܬܐ ܕܬܪܬܝܢ

 

ܕܘܝܕ. ܣܟ̈ܠܐ܆ ܥܕܡܐ ܠܐܡܬܝ ܠܐ ܡܣܬܟܠܝܢ ܐܢ̱ܬܘܢ. ܗ̇ܘ ܕܢܨܒ ܐܕܢ̈ܐ ܕܠܡܐ ܠܐ ܫܡ̇ܥ܆ ܗ̇ܘ ܕܒܪܐ ܥܝ̈ܢܐ ܕܠܡܐ ܠܐ ܡܣܬܟܠ܆

 

 

 

ܗܦܟܬܐ

 

ܐܡܪܝܢ ܕܠܡܐ ܠܐ ܡܣܬܟܠ ܐܡܝ̣ܪܐ. ܘܠܘ ܕܠܡܐ ܠܐ ܚܙܐ. ܘܓܠܝܐ ܕܣܘܟܠܐ ܐ̱ܚܪܢܐ ܗ̱ܘ ܡ̣ܢ ܚܙܝܐ.

 

 

 

ܦܘܢܝܐ

 

ܐܡܪܝܢܢ ܕܐܦܢ ܣܘܟܠܐ ܐ̱ܚܪܝܢ ܗ̣ܘ ܡ̣ܢ ܚܙܝܐ. ܐܠܐ ܗܪܟܐ ܠܚܙܝܐ ܒܥܐ ܢܒܝܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܕܠܡܐ ܠܐ ܫܡ̇ܥ ܐܡ̣ܪ ܟܕ ܠܐܕ̈ܢܐ ܥܗܕ. ܘܗ̇ܘ ܕܡܟܢ ܠܡܫܡܥ ܠܘ ܠܐ ܡܟܢ ܕܢܚܙܐ.

 

 

 

ܣܗܕܘܬܐ ܕܬܠܬ

 

ܗ̣ܘ ܟܕ ܗ̣ܘ ܕܘܝܕ. ܘܚܙܐ ܒܐܘܠܨܢܝ̈ܗܘܢ. ܘܫܡܥ ܒܥܘܬܗܘܢ.

 

 

 

ܣܗܕܘܬܐ ܕܐܪܒܥ

 

ܒܣܒܪܬܐ. ܘܐܒܘܟ ܕܚܙܐ ܒܟܣܝܐ ܦܪܥ ܠܟ ܒܓܠܝܐ.

 

 

 

ܣܗܕܘܬܐ ܕܚܡܫ

 

ܦܘܠܘܣ. ܘܠܝܬ ܒܪܝܬܐ ܕܛܫܝܐ ܡ̣ܢ ܩܕܡܘܗܝ. ܐܠܐ ܟܠ ܡܕܡ ܥܪܛܠ ܘܓܠܐܷ ܩܕܡ ܥܝܢܘ̈ܗܝ. ܘܟܕ ܣܓܝ̈ܐܢ ܐܢܝܢ ܒܢ̈ܬ ܩ̈ܠܐ ܕܐܝܟ ܗܠܝܢ ܒܟܬܒ̈ܐ ܩܕܝ̈ܫܐ. ܗܠܝܢ ܣܦ̈ܩܢ.

 

 

 

ܦܣܘܩܐ ܬܪܝܢܐ ܕܫܬܐܣܬܐ ܬܠܝܬܝܬܐ ܡܛܠ ܬܪܥܝܬܐ ܣܩܘܒܠܝܬܐ ܕܟܦܪ̈ܝ ܒܚܙܝܐ ܘܫܡܥܐ ܕܒܪܘܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܒܪܘܝܐ ܐܠܘ ܚܙܐ ܘܫܡ̇ܥ. ܐܘ ܡܬܘ̈ܡܝܐ ܐܢܘܢ ܚܙܝܗ ܘܫܡܥܗ܇ ܐܘ ܡܫܪ̈ܝܢܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܡܬܚܙ̈ܝܢܐ ܘܡܫܬܡ̈ܥܢܐ ܡܫܪ̈ܝܢܐ ܐܢܘܢ. ܒܕܓܘܢ ܟܕ ܠܐ ܐܝܬܝܗܘܢ ܐܝܟܢܐ ܐܬܚܙܝ̣ܘ ܘܐܫܬܡܥܘ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܡܫܬܟܚ ܒܪܘܝܐ. ܕܐܬܚܕܬ݀ ܒܗ ܡܕܡ ܕܠܐ ܐܝܬ ܗܘܐ ܠܗ ܗ̇ܝ ܕܫܟܝ̣ܪܐ.

 

 

 

ܣܥܝܐ ܕܬܪܝܢ

 

ܐܡܪܝܢ ܕܚܙܝܐ ܘܫܡܥܐ ܒܝܕ ܡܫܬܚܠܦܢܘܬܗܘܢ ܕܗܕܡ̈ܐ ܪ̈ܓܫܢܝܐ ܗܘܝܢ. ܘܐܠܗܐ ܫܘܒܚܐ ܠܛܝܒܘܬܗ ܥܡ ܗ̇ܝ ܕܠܐ ܡܕܡ ܡ̣ܢ ܗܠܝܢ ܗܕܡ̈ܐ. ܐܦܠܐ ܡܫܬܚܡܢܐ ܗ̱ܘ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܬܪܝܢ ܐܢܘܢ ܙܢܝ̈ܗ̇ ܕܐܝܬܘܬܐ ܗ̇ܝ ܕܒܣܘܥܪܢܐ. ܘܗ̇ܝ ܕܒܡܚܫܒܬܐ. ܘܡܬܚܙ̈ܝܢܐ ܡ̇ܢ ܘܡܫܬܡ̈ܥܢܐ. ܐܦܢ ܒܣܘܥܪܢܐ ܠܐ ܐܝܬܝܗܘܢ ܡܬܘܡܐܝܬ. ܐܠܐ ܠܐ ܡܕܡ ܟܠܝܐ ܕܒܚܘܫܒܐ ܢܗܘܘܢ ܐܝܬܝܗܘܢ ܡܬܘܡܐܝܬ. ܐܘܟܝܬ ܡܩܕܡܘܬ ܝܕܥܬܗ ܕܒܪܘܝܐ. ܒܕܓܘܢ ܠܘ ܟܐܢܐܝܬ ܠܐ ܐܝܬܝܗܘܢ ܒܡܬܘܡܝܘܬܐ. ܐܝܟܢܐ ܕܠܐ ܡܬܡܨܝܢܐ ܢܗܐ ܚܙܝܗܘܢ ܐܘ ܫܡܥܗܘܢ ܠܒܪܘܝܐ. ܘܗܪܟܐ ܒܘܚܢܐ ܐܝܬ ܩܛܝ̣ܢܐ. ܘܠܐ ܡܨܐ ܠܡܫܪܝܗ. ܐܠܐ ܗ̇ܘ ܕܒܙܗܪܝܪ̈ܐ ܐܠܗܝ̈ܐ ܐܬܬܙܠܓ ܗܘܢܗ ܘܐܬܬܙܠܩ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܘ ܒܝܕ ܡܫܬܚܠܦܢܘܬܐ ܕܗܕܡ̈ܐ ܪ̈ܓܫܢܝܐ ܗܘܝܢ ܚܙܝܐ ܘܫܡܥܐ. ܒܗ̇ܝ ܕܚܙܝܐ ܡ̇ܢ ܡ̣ܢܫܝܠ ܡܕܪܟ ܦܠܓܗ̇ ܕܐܣܦܝ̣ܪ ܡܘܙܠܬܐ. ܘܠܐ ܡܨܝܐ ܕܗܕܡܐ ܙܥܘܪܐ ܕܐܝܟ ܒܒܬܐ ܒܟܠܗ̇ ܗ̇ܝ ܪܒܘܬܐ ܬܫܬܚܠܦ ܘܬܩܢܐ ܒܗ ܨܘܪܬܗ̇. ܘܫܡܥܐ ܬܘܒ ܡܕܪܟ ܠܩܠܐ ܘܠܦܢܝ̣ܬܐ ܬܘܒ ܕܡܢܗ̇ ܡܫܬܡܪ. ܘܩܠܐ ܡ̇ܢ ܐܦ ܡܛܐ ܠܛܒܠܐ ܕܠܓܘ ܡ̣ܢ ܢܩܒܐ ܩܘܟܠܝܘܢܝܐ ܐܝܟܢܐ ܕܢܫܬܚܠܦ ܡܢܗ. ܐܠܐ ܦܢܝ̣ܬܐ ܗ̇ܝ ܠܐ ܣܟ ܡܛܐ ܠܗ̇ ܕܢܫܬܚܠܦ ܡܢܗ̇. ܘܐܠܘ ܡܕܪܟܢܘܬܗ ܒܝܕ ܫܘܚܠܦܐ ܗܘܝܐ ܗܘܬ݀ ܠܐ ܙܕܩ ܗܘܐ ܕܢܕܪܟܝܗ̇. ܒܪܘܝܐ ܡܕܝܢ ܡܕܪܟܘ ܡܕܪܟ ܠܕܐܝܟ ܗܠܝܢ܆ ܒܠܥܕ ܫܘܚܠܦܐ܀

 

 

 

 

 

 

     #1 

 

ܩܦܠܐܘܢ ܚܡܝܫܝܐ ܕܫܬܐܣܬܐ ܬܠܝܬܝܬܐ ܡܛܠ ܗ̇ܝ ܕܒܪܘܝܐ ܝܕܘܥܐ ܗ̱ܘ ܕܝܬܗ ܘܕܟܠܗܝܢ ܗܠܝܢ ܕܐܝܬܝܗܝܢ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܟܠ ܐܘܣܝܐ ܡܒܪܝܬܐ ܡ̣ܢ ܐܢܢܩܝ ܡܟܢܐ ܕܬܬܝ̣ܕܥ ܡ̣ܢ ܐܘܣܝܐ ܐ̱ܚܪܬܐ ܡܒܪܝܬܐ. ܟܕ ܒܠܚܘܕܝܗ̇ ܬܗܘܐ. ܘܟܕ ܥܡ ܐ̱ܚܪ̈ܢܝܬܐ ܡܬܝܕ̈ܥܢܝܬܐ ܬܬܚܒܪ. ܘܡ̣ܢ ܗܪܟܐ ܡܬܟܢܫܐ ܕܟܠ ܐܘܣܝܐ ܡܒܪܝܬܐ. ܡܟܢܐ ܕܠܐܘܣ̈ܝܐܣ ܐ̱ܚܪ̈ܢܝܬܐ ܡܒܪ̈ܝܬܐ ܬܩܦ܇ ܘܥܡܗܝܢ ܬܬܟܢܫ. ܘܝܕܘܥܘܬܐ ܠܘ ܡܕܡ ܐ̱ܚܪܝܢ ܐܝܬܝܗ̇܆ ܐܠܐ ܗܕܐ ܢܩܝ̣ܦܘܬܐ ܘܟܢܝ̣ܫܘܬܐ ܕܨܘܪܬ݀ ܐܘܣܝܐ ܡܬܝܕܥܢܝ̣ܬܐ ܥܡ ܐܘܣܝܐ ܝܕܘܥܬܐ. ܒܪܘܝܐ ܡܕܝܢ ܟܕ ܐܘܣܝܐ ܐܝܬܘܗܝ ܡܒܪܝܬܐ ܡ̣ܢ ܐܠܨ̈ܬܐ ܕܢܕܥ ܠܟܠܗܘܢ ܡܬܝܕ̈ܥܢܐ. ܘܟܠ ܕܝܕܥ ܠܡܬܝܕܥܢܐ ܡܕܡ. ܡ̣ܢ ܐܢܢܩܝ ܕܢܕܥ ܕܝܕܥ ܠܡܬܝܕܥܢܐ ܗ̇ܘ. ܘܡ̣ܢ ܗܕܐ ܐܠܨܐ ܕܐܦ ܠܝܬܗ ܢܕܥ. ܒܗ̇ܝ ܕܐܠܘܠܐ ܝ̣ܕܥ ܝܬܗ܇ ܐܝܟܢܐ ܡܨܐ ܗܘܐ ܕܢܚܪܘܩ ܥܠ ܝܬܗ ܕܝܕܥ ܠܡܬܝܕܥܢܐ ܗ̇ܘ. ܒܪܘܝܐ ܡܕܝܢ ܟܕ ܠܡܬܝܕ̈ܥܢܐ ܝܕܥ. ܐܦ ܠܝܬܗ ܐܠܨܐܝܬ ܝ̇ܕܥ.

 

 

 

ܗܦܟܬܐ

 

ܐܡܪܝܢ ܕܢܩܝ̣ܦܘܬܐ ܗ̇ܝ. ܕܐܝܟ ܘܟܢܝ̣ܫܘܬܐ ܕܐܘܣ̈ܝܐܣ ܡܒܪ̈ܝܬܐ ܕܐܡ̣ܪܬܘܢ܆ ܒܐܘܣܝܐ ܝܕܘܥܬܐ ܫܪܪܬܘܢ ܐܢܝܢ. ܘܡ̣ܢ ܗܪܟܐ ܐܠܨܐ ܕܒܪܘܝܐ ܠܐ ܢܕܥ ܡܕܡ ܐܠܐ ܟܕ ܗ̣ܘ ܥܡ ܗ̇ܘ ܡܕܡ. ܡ̣ܢ ܐ̱ܚܪܢܐ ܢܬܝܕܥܘܢ.

 

 

 

ܦܘܢܝܐ

 

ܐܡܪܝܢܢ ܕܫܟܝ̣ܚܘܬ ܐܘܣܝܐ ܕܒܪܘܝܐ ܒܐܘܣܝܐ ܕܗ̇ܘ ܕܝܕܥ. ܐܦ ܗ̣ܝ ܡ̣ܢ ܗܢܐ ܙܢܐ ܕܫܟܝ̣ܚܘܬܐ ܐܝܬܝܗ̇ ܕܐܡ̣ܪܢܢ. ܒܕܓܘܢ ܐܢ ܡܟܢܘܬܐ ܕܫܟܝ̣ܚܘܬܐ ܕܐܝܟ ܗܕܐ ܠܐ ܐܝܬܝܗ̇ ܗܘܬ݀ ܠܗ. ܐܠܐ ܒܬܪ ܕܒܗ̇ ܒܐܘܣܝܐ ܝܕܘܥܬܐ ܢܫܬܟܚ ܗܘܐ. ܙܕܩ ܗܘܐ ܕܠܐ ܣܟ ܒܐܘܣܝܐ ܝܕܘܥܬܐ ܢܫܬܟܚ ܗܘܐ. ܘܐܠܐ ܡܫܬܟܚܐ ܗܘܬ݀ ܡܟܢܘܬܐ ܕܐܝܬܝܗ̇ ܡ̣ܢ ܩܕܡ ܕܬܗܘܐ ܗ̇ܝ ܕܫܟܝ̣ܪܐ. ܒܕܓܘܢ ܒܪܘܝܐ ܘܫܪܟܐ ܕܐܘܣܝ̈ܐܣ ܡܒܪ̈ܝܬܐ. ܘܟܕ ܩܝ̈ܡܬ݀ ܠܝܬܗܝܢ ܐܝܬܝܗܝܢ܇ ܘܠܘ ܒܠܚܘܕ ܟܕ ܒܐܘܣܝܐ ܐ̱ܚܪܬܐ ܝܕܘܥܬܐ ܐܢܝܢ. ܡܟܢ̈ܢ ܕܢܫܬܟ̈ܚܢ ܥܡ ܚܕ̈ܕܐ ܘܢܩ̈ܦܢ ܠܚܕ̈ܕܐ. ܘܡ̣ܢ ܗܪܟܐ ܐܠܨܐ ܕܢܕ̈ܥܢ ܠܚܕ̈ܕܐ ܘܢܬܝܕ̈ܥܢ ܡ̣ܢ ܚܕܕ̈ܐ ܒܐܡܝ̣ܢܘ. ܟܕ ܠܐ ܢܗܘܐ ܡܕܡ ܕܟܠܐ. ܐܟܡܐ ܕܠܢܦ̈ܫܬܐ ܐ̱ܢܫܝ̈ܬܐ.

 

 

 

ܗܦܟܬܐ

 

ܐܡܪܝܢ ܕܐܝܟ ܩܢܘܢܟܘܢ ܗܢܐ. ܒܪܘܝܐ ܡܬܕܪܟܢܐ ܗ̱ܘ ܠܟܠܗܘܢ ܗܘ̈ܢܐ. ܘܠܘ ܠܐ ܡܬܕܪܟܢܐ ܐܟܡܐ ܕܡܟܪܙܝܬܘܢ.

 

 

 

ܦܘܢܝܐ

 

ܐܡܪܝܢܢ ܕܒܬܪ ܩܠܝ̣ܠ ܡܚܘܝܢܢ ܕܒܐܝܢܐ ܙܢܐ ܡܬܕܪܟܢܐ ܗ̱ܘ܆ ܘܒܐܝܢܐ ܙܢܐ ܠܐ ܡܬܕܪܟܢܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܘܣܝܐ ܡܒܪܝܬܐ ܠܗ̇ܝ ܐܡܪܝܢܢ ܕܗ̣ܝ ܠܗ̇ ܘܠܘ ܠܐܚܪܢܐ ܒܐܡܝ̣ܢܘ ܫܟܝ̣ܚܐ. ܘܟܠ ܕܗ̣ܘ ܠܗ ܒܐܡܝ̣ܢ ܫܟܝ̣ܚ ܘܡܕܪܟܢܐ ܗ̱ܘ. ܡ̣ܢ ܐܠܨ̈ܬܐ ܕܗ̣ܘ ܠܗ ܢܕܥ. ܘܡ̣ܢ ܗܪܟܐ ܬܘܒ ܐܠܨܐ ܕܐܢ ܥܠܬܐ ܗ̱ܘ ܬܘܒ ܠܐܚܪ̈ܢܐ܇ ܕܐܦ ܠܟܠܗܘܢ ܥܠܬܢܘ̈ܗܝ ܢܕܥ. ܒܗ̇ܝ ܕܐܢܗܘ ܕܗ̣ܘ ܠܗ ܝܕܥ. ܡ̣ܢ ܐܢܢܩܝ ܕܡ̣ܢ ܝܬܗ ܢܕܥ. ܕܠܕܐܝܟ ܐܝܠܝܢ ܥܠܬܐ ܐܝܬܘܗܝ. ܒܪܘܝܐ ܡܕܝܢ ܒܕܐܘܣܝܐ ܡܒܪܝܬܐ ܐܝܬܘܗܝ. ܘܥܠܬܐ ܗ̱ܘ ܕܟܠܗܘܢ ܗܠܝܢ ܕܐܝܬܝܗܘܢ ܡ̣ܢ ܐܠܨ̈ܬܐ ܗ̣ܘ ܠܗ ܐܦ ܠܗܘܢ ܝܕܥ ܘܠܗ̇ ܠܗܕܐ ܬܪܥܝ̣ܬܐ ܡܐܪܙ ܩܕܝܫܐ ܕܝܘܢܢܘܣܝܘܣ ܟܕ ܐܡ̇ܪ. ܐܢܗܘ ܓܝܪ ܕܒܚܕܐ ܥܠܬܐ ܝ̇ܗܒ ܐܠܗܐ ܠܟܠܗܘܢ ܐܝܠܝܢ ܕܐܝܬܝܗܘܢ ܗ̇ܝ ܕܢܗܘܘܢ. ܒܗ̇ ܟܕ ܒܗ̇ ܒܥܠܬܐ ܚܕܢܝܬܐ ܝܕܥ ܠܟܠܡܕܡ. ܐܟܡ̇ܢ ܕܡܢܗ ܐܢܘܢ. ܘܒܗ ܩܕܡܘ ܐܬܩܝܡܘ. ܘܬܘܒ ܐܡ̇ܪ ܗ̣ܘ ܩܕܝܫܐ. ܡܕܝܢ ܐܪܐ ܠܘ ܕܝ̣ܠܢܝܬܐ ܩܢܐ ܐܠܗܐ ܠܝ̣ܕܥܬܐ ܕܝܠܗ. ܘܐ̱ܚܪܬܐ ܠܗܝ ܓܘܢܝܬܐ܆ ܠܗ̇ܝ ܕܚܒܫܐ ܠܟܠܗܝܢ ܐܝܠܝܢ ܕܐܝܬܝܗܝܢ. ܟܕ ܓܝܪ ܗ̣ܝ ܠܗ̇ ܝܕܥܐ ܥܠܬܐ ܕܟܠ. ܐܝܟܢܐ ܠܗܠܝܢ ܕܡܢܗ̇܇ ܘܠܐܝܠܝܢ ܕܐܝܬܝܗ̇ ܥܠܬܗܝܢ ܠܐ ܬܕܥ.

 

 

 

ܡܚܘܝܢܘܬܐ ܕܬܠܬ

 

ܟܠ ܐܘܣܝܐ ܡܒܪܝܬܐ ܘܡܬܝܕܥܢܝ̣ܬܐ. ܟܕ ܒܐܘܣܝܐ ܡܒܪܝܬܐ ܘܝܕܘܥܬܐ ܬܫܬܟܚ. ܒܡܥܒܕܢܘܬܐ ܝܕܘܥܬܐ ܥܒܕܐ ܠܗ̇. ܒܕܡ̣ܢ ܩܕܡ ܫܟܝ̣ܚܘܬܗ̇ ܒܗ̇. ܝܕܘܥܬܐ ܗܘܬ݀ ܒܚܝܠܐ. ܘܡ̣ܢ ܗܪܟܐ ܐܠܨܐ ܕܐܦ ܗ̇ܝ ܐܣܝܐ ܡܬܝܕܥܢܝ̣ܬܐ ܝܕܘܥܬܐ ܬܗܐ ܒܡܥܒܕܢܘܬܐ ܗ̣ܝ ܒܝܬܗ̇. ܒܗ̇ܝ ܕܐܢܗܘ ܕܟܕ ܒܐܘܣܝܐ ܐ̱ܚܪܬܐ ܡܒܪܝܬܐ ܫܪܝܐ. ܝܕܘܥܬܐ ܥܒܕܐ ܠܗ̇ ܠܗ̇ܝ ܒܡܥܒܕܢܘܬܐ. ܟܡܐ ܝܬܝܪܐܝܬ ܙܕܩ ܕܗ̣ܝ ܒܝܬܗ̇ ܝܕܘܥܬܐ ܬܗܘܐ. ܗܐ ܓܝܪ ܚܡܝ̣ܡܘܬܐ ܗܕܐ ܕܡܫܚܢܐ ܠܓܘ̈ܫܡܐ. ܐܠܘ ܡܟܢܐ ܗܘܬ݀ ܕܬܩܘܡ ܒܝܬܗ̇ ܐܘܟܝ̣ܬ ܗ̣ܝ ܒܗ̇ ܐܝܟ ܐܘܣܝܐ. ܟܡܐ ܝܬܝܪܐܝܬ ܙܕܩ ܗܘܐ ܕܫܚܝ̣ܢܬܐ ܗܘܝܐ ܗܘܬ݀. ܒܪܘܝܐ ܡܕܝܢ ܝܕܘܥܐ ܗ̱ܘ ܒܡܥܒܕܢܘܬܐ ܢܦܩܝ̣ܢ ܝܕܘ̈ܥܐ ܟܠܗܘܢ.

 

 

 

ܡܚܘܝܢܘܬܐ ܕܐܪܒܥ

 

ܥܒܕܘ̈ܗܝ ܕܒܪܘܝܐ ܣܓܝ̣ܕ ܐܝܩܪܗ ܛܒ ܬܡܝ̣ܗܝܢ ܘܡܫܡܠܝܢ. ܘܟܠ ܕܬܡܝܗܝܢ ܥܒܕܘ̈ܗܝ ܘܡܫܡܠܝܢ ܡ̣ܢ ܐܠܨ̈ܬܐ ܕܒܝ̣ܕܥܬܐ ܕܛܒ ܬܡ̣ܝܗܐ ܘܡܫܡܠܝܐ ܥܒ̣ܕ ܐܢܘܢ. ܒܪܘܝܐ ܡܕܝܢ ܠܟܠ ܝܕ̈ܥܢ ܙܟܝܐ ܘܥܒܕܐ ܝ̣ܕܥܬܗ. ܕܬܡܝ̣ܗܝܢ ܥܒܕܘ̈ܗܝ ܘܬܗܝ̣ܪܝܢ ܝ̣ܕܝ̣ܥܐ. ܡ̣ܢ ܐܣܟܡ̈ܝ ܡܘܙ̈ܠܬܐ ܘܟܘܟ̈ܒܝܗܝܢ ܘܙܘܥܝ̈ܗܝܢ. ܘܠܘ ܡ̣ܢ ܗܠܝܢ ܒܠܚܘܕ. ܐܠܐ ܘܒܟܠܚܕܐ ܡ̣ܢ ܚܝ̈ܘܬܐ ܫܝ̣̈ܛܬܐ ܕܠܘܬܢ ܬܗܪ̈ܐ ܪܘܪ̈ܒܐ ܐܝܬ ܠܡܚܙܐ ܒܣܝܡܐ ܕܗܕܡܝ̈ܗ̇ ܒܪ̈ܝܐ ܐܦ ܓܘܝ̈ܐ ܐܝܟ ܕܐܘܡܢܘܬ ܨܪ̈ܝܐ ܡܠܦܐ ܠܢ.

 

 

 

ܗܦܟܬܐ

 

ܐܡܪܝܢ ܕܬܡܝ̣ܗܘܬ ܥܒܕ̈ܐ ܠܘ ܫܘܘܕܥܐ ܗ̱ܝ ܕܬܡܝ̣ܗܘܬ ܝܕܥܬܐ. ܡܠܝ̣ܣܛܐ ܐܦܠܐ ܣܟ ܕܝ̣ܕܥܬܐ ܘܐܦܢ ܬܗܐ ܠܐ ܬܡܝ̣ܗܘܬܐ. ܗܐ ܓܝܪ ܕܒܘܪܝ̣ܬܐ ܠܐ ܡܠܝ̣ܠܬܐ. ܩܘ̣ܩ̈ܝܬܐ ܒܢܝܐ ܫܬܝ̣̈ܬܝܬ݀ ܙܘ̈ܝܬܐ ܒܠܥܕ ܟܢܘ̣ܢܬܐ ܐܘ ܡܕܡ ܐ̱ܚܪܝܢ ܡ̣ܢ ܐܘܪ̈ܓܢܐ. ܗ̇ܢܝܢ ܐܝܠܝܢ ܕܐܦܠܐ ܓܒܪܐ ܓܐܘܡܝܛܪܐ ܡܨܐ ܠܡܥܒܕ ܐܟܘܬܗܝܢ. ܘܓܘܓܝ ܬܘܒ ܓܕܕ ܩܘܝܢ ܡܕܡ ܢܘܠܢܝܐ ܒܐܐܪ ܙܩܪ܆ ܘܒܝܬܐ ܠܡܥܡܪܗ ܩܒܥ ܒܠܥܕ ܐܘܪ̈ܓܢܐ. ܐܝܢܐ ܕܠܐ ܐ̱ܢܫ ܡ̣ܢ ܓܪ̈ܕܝܝܐ ܘܐܦܢ ܣܓܝ ܢܗܘܐ ܡܗܝ̣ܪ ܡܨܐ ܠܡܕܡܝܘ ܒܗ.

 

 

 

ܦܘܢܝܐ

 

ܐܡܪܝܢܢ ܕܚܝ̈ܘܬܐ ܗܠܝܢ ܟܝܢܐܝܬ ܥܒ̈ܕܢ ܗܠܝܢ ܕܥܒ̈ܕܢ ܐܝܟ ܕܐܦ ܢܘܪܐ ܠܡܘܩܕܢܘܬܐ ܘܫܡܫܐ ܠܡܒܫܠܢܘܬܐ ܕܐܒܒ̈ܢܐ. ܘܡܛܠ ܗܕܐ ܠܐ ܐܠܨܐ ܕܡܕܥ ܢܕ̈ܥܢ ܗ̇ܢܝܢ ܕܥܒ̈ܕܢ. ܗ̇ܘ ܕܝܢ ܕܨܒܝܢܐܝܬ ܘܡܠܝ̣ܠܐܝܬ ܥܒܕ. ܡ̣ܢ ܐܠܨ̈ܬܐ ܕܒܝܕ ܝ̣ܕܥܬܐ ܠܦܘܬ ܡܫܘܚܬܗ ܢܥܒܕ. ܐܟܡܐ ܕܒܪܢܫܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܐܒܪܗܡ ܡܗܘܐ ܢܗܘܐ ܠܥܡܐ ܪܒܐ ܘܣܓܝܐܐ. ܘܢܬܒܪܟܘܢ ܒܗ ܟܠܗܘܢ ܥܡ̈ܡܐ ܕܐܪܥܐ. ܡܛܠ ܕܝ̇ܕܥ ܐ̱ܢܐ ܠܗ.

 

 

 

ܣܗܕܘܬܐ ܕܬܪܬܝܢ

 

ܕܘܝܕ. ܡܪܝܐ ܒܨܝܬܢܝ ܘܝ̣ܕܥܬܢܝ. ܐܢ̱ܬ ܝ̇ܕܥ ܐܢ̱ܬ ܡܘܬܒܝ ܘܡܩܡܝ. ܐܣܬܟܠܬ ܡܚܫ̈ܒܬܝ ܡ̣ܢ ܡܪܘܡܐ. ܐܘܪܚܝ ܘܫܒܝ̣̈ܠܝ ܝ̇ܕܥ ܐܢ̱ܬ.

 

 

 

ܣܗܕܘܬܐ ܕܬܠܬ

 

ܐܫܥܝܐ. ܡܛܠ ܕܒܚܝܠܐ ܕܝܠܝ ܥܒܕܬ ܘܒܚܟܡܬܝ ܡܛܠ ܕܣܟܘܠܬܢ ܐ̱ܢܐ.

 

 

 

ܣܗܕܘܬܐ ܕܐܪܒܥ

 

ܦܘܠܘܣ. ܐܘ ܥܘܡܩܐ ܕܥܘܬܪܐ ܘܚܟܡܬܐ ܘܡܕܥܐ ܕܐܠܗܐ. ܘܕܐ̱ܢܫ ܠܐ ܡܫ ܕܝܢܘ̈ܗܝ. ܘܐܘܪ̈ܚܬܗ ܠܐ ܡܬܥܩ̈ܒܢ.

 

 

 

ܣܗܕܘܬܐ ܕܚܡܫ

 

ܕܝܘܢܢܘܣܝܘܣ ܐܪܝܘܦܐ ܓܝܛܘܣ. ܐܝܟܢܐ ܕܝܢ ܗ̣ܘ ܐܠܗܐ ܡܫܬܒܚ ܚܟܡܬܐ ܡܥܠܝܬ݀ ܡ̣ܢ ܚܟܡܬܐ. ܘܗܘܢܐ ܘܡܠܬܐ ܘܝܕܘܥܐ. ܐܝܟܢܐ ܓܝܪ ܢܣܬܟܠ ܡ̣ܢ ܡܬܝܕ̈ܥܢܝܬܐ. ܐܢ ܠܝܬ ܒܗ ܡܥܒܕܢܘܬܐ ܝܕܘܥܬܐ. ܐܘ ܐܝܟܢܐ ܢܕܥ ܐܢܝܢ ܠܡܬܪ̈ܓܫܢܝܬܐ ܟܕ ܡܥܠܝ ܡܣܬܬ ܠܥܠ ܡ̣ܢ ܪܓܫܬܐ.

 

 

 

ܣܗܕܘܬܐ ܕܫܬ

 

ܓܪܝܓܘܪܝܘܣ ܕܢܐܙܝܢܙܘ. ܗܕܐ ܓܝܪ ܐܝܬܝܗ̇ ܗܘܬ݀ ܕܛܒܘܬܐ ܪܝ̣ܫܝܬܐ ܩܕܡܝܬ݀ ܡ̇ܢ ܡܬܪܢܐ ܚܝܠܘ̈ܬܐ ܡܠܐܟܝ̈ܐ ܘܫܡܝ̈ܢܐ. ܘܗ̣ܝ ܡܚܫܒܬܐ ܥܒܕܐ ܐܝܬܝܗ̇ ܗܘܬ݀. ܕܒܡܠܬܐ ܡܬܡܠܐ܆ ܘܒܪܘܚܐ ܡܫܬܡܠܐ.

 

 

 

ܣܗܕܘܬܐ ܕܫܒܥ

 

ܐܘܓܪܝܣ. ܒܟܠ ܚܕܐ ܡ̣ܢ ܐܘܡܢ̈ܘܬܐ. ܠܗܘ ܕܥܠܝܗ̇ ܩܐܡ ܚ̇ܙܐ ܐܢ̱ܬ. ܬܐܘܪܝܐ ܕܝܢ ܕܝ̣ܕܥܬܐ ܕܫܪܪܐ. ܒܟܠܗܝܢ ܗܠܝܢ ܬܫܟܚ. ܡܛܠ ܕܟܠܡܕܡ ܡܪܢ ܒܚܟܡܬܐ ܒܪܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܠܝܬܝܬܐ ܡܛܠ ܬܪܥܝ̣ܬܐ ܟܦܪܬ݀ ܒܝܕܥܬܗ ܕܒܪܘܝܐ. ܘܗ̣ܝ ܗܕܐ ܐܪܣܝܣ܆ ܠܫܒܥ ܐܪ̈ܣܝܣ ܡܬܦܠܓܐ. ܐܪܣܝܣ ܩܕܡܝܬܐ ܕܗ̇ܢܘܢ ܕܛܠܡܝܢ ܠܝܕܥܬܗ ܟܠܢܐܝܬ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܝܬܝܘܬ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ.

 

 

 

ܣܥܝܐ ܩܕܡܝܐ

 

ܐܡܪܝܢ. ܐܠܘ ܝ̇ܕܘܥܐ ܗܘܐ. ܗ̣ܝ ܝ̣ܕܥܬܗ. ܐܘ ܗ̣ܘ ܟܝܢܗ ܐܝܬܝܗ̇ ܗܘܬ݀ ܐܘ ܡܕܡ ܐ̱ܚܪܝܢ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܠܝ̣ܕܥܬܐ ܥܠ ܟܝܢܗ ܡܩܛܪܓܝ̣ܢܢ. ܘܓܠܝܐ ܕܗ̇ܘ ܕܣܝ̣ܡ ܠܘ ܗ̣ܘ ܟܕ ܗ̣ܘ ܗ̇ܘ ܕܡܬܩܛܪܓ ܐܝܬܘܗܝ. ܘܐܦܢ ܐܝܬ ܐܡܬܝ ܕܡܫܪ ܥܠ ܗ̇ܘ ܕܣܝ̣ܡ ܗ̇ܘ ܕܡܬܩܛܪܓ. ܗܟܘܬ ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܥܠܬ݀ ܗ̇ܝ ܕܬܫܬܟܚ ܠܗ ܝܕܥܬܐ. ܐܢ ܗ̣ܘ ܟܝܢܗ ܐܝܬܘܗܝ܇ ܡܫܬܟܚ ܟܝܢܗ. ܕܗ̣ܘ ܟܕ ܗ̣ܘ ܥܒܘܕܐ ܗ̱ܘ ܘܡܩܒܠܢܐ ܐܘܟܝ̣ܬ ܝܗܘܒܐ ܘܢܣܘܒܐ ܗ̇ܝ ܕܫܟܝ̣ܪܐ. ܒܗ̇ܝ ܕܝܗܘܒܐ ܠܘ ܢܣܘܒܐ ܗ̱ܘ. ܘܢܣܘܒܐ ܒܗ̇ܝ ܕܢܣܘܒܐ ܠܘ ܝܗܘܒܐ ܗ̱ܘ. ܘܡ̣ܢ ܗܪܟܐ ܐܠܨܐ ܕܡܪܟܒܐ ܢܗܘܐ ܟܝܢܗ ܕܒܪܘܝܐ ܡ̣ܢ ܗ̇ܘ ܕܝܗܒ ܐܘܟܝܬ ܥܒ̇ܕ. ܘܡ̣ܢ ܗ̇ܘ ܕܢܣ̇ܒ ܐܘܟܝܬ ܡܩܒܠ. ܗ̇ܝ ܕܝܬܝ̣ܪ ܫܟܝ̣ܪܐ ܒܕܡܦܩܐ ܠܗ ܠܒܪܘܝܐ ܡ̣ܢ ܦܫܝ̣ܛܘܬܗ. ܒܪܘܝܐ ܡܕܝܢ ܟܕ ܦܫܝ̣ܛܐ ܗ̱ܘ. ܠܘ ܝܕܘܥܐ ܗ̱ܘ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܟܝܢܗ ܕܒܪܘܝܐ ܒܠܥܕ ܝܕܥܬܐ. ܐܘ ܡܫܡܠܝܐ ܗ̱ܘ܆ ܐܘ ܠܐ ܡܫܡܠܝܐ. ܘܐܢ ܡܫܡܠܝܐ ܗ̱ܘ. ܐܝ̣ܩܝ̣ ܗܘܝܐ ܫܟܝ̣ܚܘܬܗ̇ ܕܝ̣ܕܥܬܐ ܠܝܬܗ̇. ܘܐܢ ܠܐ ܡܫܡܠܝܐ ܗ̱ܘ ܒܠܥܕܝܗ̇. ܡܫܬܟܚ ܒܪܘܝܐ ܕܚܣܝ̣ܪܐ ܗ̱ܘ ܒܟܝܢܗ. ܘܡ̣ܢ ܐ̱ܚܪܝܢ ܡܫܬܡܠܐ ܗ̇ܝ ܕܫܟܝܪܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܗ̇ܝ ܕܢܗܘܐ ܒܪܘܝܐ ܐܠܗܗ ܕܗܢܐ ܟܠ. ܐܢ ܠܐ ܣܢܝ̣ܩܐ ܥܠ ܫܟܝ̣ܚܘܬܐ ܕܗܕܐ ܝܕܥܬܐ܆ ܡ̣ܢ ܝܬܝܪ ܘܗܘܝܐ ܠܗ̇ ܫܟܝ̣ܚܘܬܗ̇. ܘܐܢ ܣܢܝ̣ܩܐ ܡܫܬܟܚܐ ܐܠܗܘܬܗ ܕܡܪܟܒܐ ܡ̣ܢ ܟܝܢܗ. ܘܡ̣ܢ ܝܕܥܬܗ ܗ̇ܝ ܕܫܟܝ̣ܪܐ. ܒܗ̇ܝ ܕܟܠ ܡܪܟܒܐ ܡܬܡܨܝܢܐ ܗ̱ܘ. ܘܒܪܘܝܐ ܐܠܨܝܐ ܗ̱ܘ ܘܠܘ ܡܬܡܨܝܢܐ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢ ܕܗ̇ܝ ܕܝܗܘܒܐ ܢܗܘܐ ܗ̣ܘ ܟܕ ܗ̣ܘ ܡܕܡ ܘܢܣܘܒܐ. ܠܘ ܠܘܬ ܡܪܟܒܘܬܗ ܡܘܒܠܐ ܕܦܫܝ̣ܛܐ. ܗܐ ܓܝܪ ܠܚܘܕܝܘܬܐ ܕܛܒ ܡ̣ܢ ܟܠ ܡܕܡ ܡܒܥܕܐ ܡ̣ܢ ܣܘܟܠ ܣܓܝܐܘܬܐ. ܦܠܓܐ ܗ̱ܝ ܕܬܪܝܢ. ܘܬܘܠܬܐ ܕܬܠܬܐ. ܘܪܘܒܥܐ ܕܐܪܒܥܐ. ܘܗܟܘܬ ܠܠܐ ܣܘܦ. ܘܓܠܝܐ ܕܟܠܚܕ ܡ̣ܢ ܣܘ̈ܟܠܐ ܗܠܝܢ ܐ̱ܚܪܝܢ ܗ̣ܘ ܡ̣ܢ ܗ̇ܘ ܐ̱ܚܪܢܐ. ܘܥܡ ܗܠܝܢ ܠܐ ܡܬܢܟܪܐ ܗ̣ܝ ܠܚܘܕܝܘܬܐ ܡ̣ܢ ܦܫܝ̣ܛܘܬܗ̇. ܒܗ̇ܝ ܕܣܓܝܐܘܬܐ ܕܣܘ̈ܟܠܐ ܗܠܝܢ ܠܘ ܣܓܝܐܘܬܐ ܥܒ̈ܕܢ ܒܟܝܢܗ̇. ܗܟܢܐ ܡܕܝܢ ܒܪܘܝܐ ܘܝ̣ܕܥܬܗ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܡܫܡܠܝܘܬ ܟܝܢܗ ܕܒܪܘܝܐ. ܗ̣ܝ ܗ̣ܝ ܥܠܬ݀ ܫܟܝ̣ܚܘܬܗ̇ ܕܝ̣ܕܥܬܐ ܡܬܘܡܐܝܬ ܠܟܝܢܗ. ܘܠܘ ܫܟܝ̣ܚܘܬܗ̇ ܕܝ̣ܕܥܬܐ܆ ܗ̣ܝ ܗ̣ܝ ܥܠܬ݀ ܡܫܡܠܝܘܬܐ ܕܟܝܢܗ. ܘܐܦܢ ܠܘܬܢ ܕܝܠܢ ܕܘܝ̈ܐ ܘܚܣܝ̣ܪ̈ܐ. ܫܟܝ̣ܚܘܬܗ̇ ܕܝ̣ܕܥܬܐ ܗ̣ܝ ܗ̣ܝ ܥܠܬ݀ ܡܫܡܠܝܘܬܐ ܕܟܝܢܢ. ܘܐܝܬ ܠܟ ܕܬܬܗܕܐ ܠܘܬ ܗܕܐ ܡ̣ܢ ܗ̇ܝ ܕܫܟܝ̣ܚܘܬ ܗܘܝ̈ܐ. ܗ̣ܝ ܐܝܬܝܗ̇ ܥܠܬ݀ ܝ̣ܕܥܬܢ ܕܠܗܘܝ̈ܐ. ܝ̣ܕܥܬܗ ܕܝܢ ܕܒܪܘܝܐ ܗ̣ܝ ܗ̣ܝ ܥܠܬ݀ ܫܟܝ̣ܚܘܬܗܘܢ ܕܗܘܝ̈ܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܥܠܬ݀ ܗܢܐ ܥܠ ܗ̣ܘ ܟܝܢܗ ܕܒܪܘܝܐ ܐܝܬܘܗܝ. ܗ̇ܘ ܕܐܠܨܝܐ ܗ̱ܘ ܒܐܝ̣ܬܘܬܗ ܘܝܕܥܬܗ ܥܠܬܢܝܬܐ ܗ̱ܝ ܕܡܫܡܠܝܘܬ ܟܝܢܗ܇ ܘܠܘ ܥܠܬܐ. ܐܝܟܢܐ ܕܢܥܘܠ ܪܘܟܒܐ ܗ̇ܘ ܕܐܘܠܕܬܘܢ ܡ̣ܢ ܟܘܢܫܗܘܢ. ܟܐܡܬ݀ ܕܬܗܘܐ ܗ̣ܝ ܐܠܗܘܬܐ ܕܡܪܟܒܐ ܡ̣ܢ ܟܝܢܗ̇ ܘܡ̣ܢ ܝܕܥܬܗ̇.

 

 

 

ܗܪܣܝܣ ܬܪܝܢܝܬܐ ܕܗ̇ܢܘܢ ܕܐܡܪܝܢ ܠܘ ܝܕܘܥܐ ܗ̱ܘ ܕܝܬܗ. ܘܥܠ ܗܕܐ ܚܕ ܐܝܬ ܠܗܘܢ ܣܥܝܐ

 

ܐܡܪܝܢ ܕܝܕܥܬܐ ܐ̱ܚܝܢܘܬܐ ܗ̱ܝ ܕܡܫܘܕܥܐ ܒܝܬ ܝܕܘܥܐ ܠܡܬܝܕܥܢܐ. ܒܕܓܘܢ ܠܐ ܡܨܝܐ ܕܬܬܩܝܡ܆ ܐܠܐ ܟܪ ܕܬܪܝܢܘܬܐ ܬܗܐ. ܟܐܡܬ݀ ܐܝܟܐ ܕܝܕܘܥܐ ܠܘ ܗ̣ܘ ܟܕ ܗ̣ܘ ܡܬܝܕܥܢܐ ܢܗܘܐ. ܘܒܪܘܝܐ ܡ̇ܢ ܟܕ ܚܕ ܗ̣ܘ ܘܦܫܝ̣ܛܐ ܗ̱ܘ ܡܪܢܝܐ. ܐܝܟܢܐ ܡܨܝܐ ܠܡܥܠܘ ܒܟܝܢܗ ܬܪܝܢܘܬܐ ܐܝܟܢܐ ܕܬܫܬܪܪ ܠܗ ܝܕܥܬܐ ܕܝܬܗ. ܟܠ ܚܕ ܡܢܢ ܕܝܢ ܡܕܥ ܝܕܥ ܗ̣ܘ ܠܗ܇ ܘܡܬܝ̣ܕܥ ܗ̣ܘ ܡܢܗ. ܒܕܢܦܫܐ ܕܟܠ ܚܕ ܡܢܢ ܠܘ ܟܠܢܐܝܬ ܡܚܪܪܐ ܡ̣ܢ ܪܘܟܒܐ. ܠܦܓܪܐ ܓܝܪ ܢܩܝ̣ܦܐ. ܘܒܗ ܘܒܚܝܠܘ̈ܗܝ ܐܣܝ̣ܪܐ ܐܣܪܐ ܟܝܢܝܐ.

 

 

 

ܫܪܝܐ

 

ܐܡܪܝܢܢ ܕܡ̣ܢ ܟܕܘ ܚܘܝ̣ܢܢ ܕܒܪܘܝܐ ܝ̇ܕܥ ܡܕܡ. ܘܟܠ ܕܝܕܥ ܡܕܡ ܡ̣ܢ ܐܢܢܩܝ ܝܕܥ ܕܝܕܥ ܠܗ̇ܘ ܡܕܡ. ܘܡ̣ܢ ܗܪܟܐ ܐܠܨܐ ܕܢܕܥ ܝܬܗ. ܘܗ̇ܝ ܕܐܡ̣ܪܬܘܢ܆ ܕܝ̣ܕܥܬܐ ܐ̱ܚܝܢܘܬܐ ܕܒܝܬ ܝܕܘܥܐ ܠܡܬܝܕܥܢܐ ܡܫܘܕܥܐ. ܘܡ̣ܢ ܗܪܟܐ ܥܐܠܐ ܬܪܝܢܘܬܐ ܥܡ ܝܕܥܬܐ ܥܪܝ̣ܨܐܝܬ. ܐܡܪܝܢܢ ܕܠܘ ܟܠ ܣܓܝܐܘܬܐ ܒܪܬ݀ ܩܠܝܬܐ. ܐܦ ܣܓܝܐܘܬܐ ܙܕܩ ܕܬܫܘܕܥ ܣܘܟܠܝܬܐ. ܗܐ ܓܝܪ ܐܡܪܝܢܢ ܕܟܝܢܗ̇ ܕܐ̱ܢܫܘܬܐ. ܘܡܢܝܘܬܗ̇ ܕܢܦܫܐ. ܟܕ ܠܐ ܐ̱ܢܫܘܬܐ ܐ̱ܚܪܬܐ ܗ̱ܝ ܡ̣ܢ ܟܝܢܗ̇ ܐܦܠܐ ܢܦܫܐ ܡ̣ܢ ܡܢܝܘܬܗ̇. ܗܟܢܐ ܡܕܝܢ ܙܕܩ ܠܡܣܬܟܠܘ ܠܝܕܘܥܐ ܘܡܬܝܕܥܢܐ. ܟܕ ܚܕ ܢܗܘܐ ܗ̇ܘ ܕܝܕܥ ܘܡܬܝ̣ܕܥ.

 

 

 

ܗܪ̈ܣܝܣ ܬܠܝܬܝܬܐ ܕܗ̇ܢܘܢ ܕܐܡܪܝܢ ܕܠܝܬܗ ܡ̇ܢ ܝܕܥ ܐܠܐ ܠܐܚܪ̈ܢܐ ܠܐ ܡܟܢ ܠܡܕܥ. ܘܥܠܝܗ̇ ܕܗܕܐ ܬܘܒ ܚܕ ܐܝܬ ܠܗܘܢ ܣܥܝܐ

 

ܐܡܪܝܢ ܕܝܕܥܬܐ ܕܒܡܬܝܕܥܢܐ ܡܕܡ. ܐ̱ܚܪܬܐ ܙܕܩ ܕܬܗܘܐ ܡ̣ܢ ܝܕܥܬܐ ܕܒܡܬܝܕܥܢܐ ܐ̱ܚܪܢܐ. ܘܐܠܘܠܐ ܗܕܐ ܐ̱ܚܪܢܝܘܬܐ. ܙܕܩ ܗܘܐ ܕܟܕ ܡܬܝܕܥܢܐ ܡܕܡ ܝܕܥܝܢ ܗܘܝܢ܆ ܕܐܦ ܠܟܠܗܘܢ ܡܬܝܕ̈ܥܢܐ ܝ̇ܕܥܝܢ ܗܘܝܢ. ܘܟܕ ܗܕܐ ܗܟܢܐ ܗ̱ܝ. ܐܠܘ ܒܪܘܝܐ ܝܕܘܥܐ ܗܘܐ ܕܟܠܗܘܢ ܡܬܝܕ̈ܥܢܐ. ܡܫܬܟܚܐ ܗܘܬ݀ ܒܝܬܗ ܠܦܘܬ ܟܠ ܡܬܝܕܥܢܐ ܝ̣ܕܥܬܐ. ܗ̇ܝ ܕܠܐ ܫܪܝܪܐ. ܒܗ̇ܝ ܕܟܢܝ̣ܫܘܬܐ ܕܝܕ̈ܥܬܐ ܠܐ ܡܣܝ̈ܟܬܐ ܐܟܚܕܐ ܒܡܥܒܕܢܘܬܐ ܠܐ ܡܨܝܐ.

 

 

 

ܦܘܢܝܐ

 

ܐܡܪܝܢܢ ܕܟܢܝ̣ܫܘܬܐ ܕܝܕ̈ܥܬܐ ܠܐ ܡܣܝ̈ܟܬܐ ܒܡܣܝܟܐ ܫܟܝ̣ܪܐ. ܘܠܘ ܒܠܐ ܡܣܝܟܐ. ܐܠܗܐ ܓܝܪ ܠܐ ܡܣܝܟܐ ܗ̱ܘ. ܘܬܘܒ ܐܡܪܝܢܢ. ܕܗ̇ܝ ܕܐܡ̣ܪܬܘܢ ܠܘܬܢ ܕܝܠܢ ܒܪ̈ܝܐ ܥܛܠܐ. ܒܗ̇ܝ ܕܡ̣ܢ ܗܠܝܢ ܕܐܝܬܝܗܝܢ ܢܣܒܝ̣ܢܢ ܠܝ̣ܕܥܬܐ ܕܥܠܝܗܝܢ ܒܕܓܘܢ ܠܦܘܬ ܣܓܝܐܘܬܗܝܢ ܙܕܩ ܕܢܣܓ̈ܝܢ ܝܕܥ̈ܬܢ. ܠܘܬ ܒܪܘܝܐ ܕܝܢ ܛܒ ܕܠܝܠܐ. ܒܗ̇ܝ ܕܒܚܕܐ ܝܕܥܬܐ ܕܗ̣ܝ ܗ̣ܝ ܝܕܥܬܗ ܒܝܬܗ. ܝܕܥ ܠܟܠܗܝܢ ܗܠܝܢ ܕܐܝܬܝܗܝܢ.

 

 

 

ܐܪܣܝܣ ܪܒܝܥܝܬܐ ܕܗ̇ܢܘܢ ܕܐܡܪܝܢ ܕܠܟܝ̈ܢܐ ܟܘܠܢܝ̈ܐ ܒܠܚܘܕ ܝܕܥ. ܘܠܘ ܠܗ̇ܢܘܢ ܡܢܬܝ̈ܐ ܕܗ̇ܘܝܢ ܘܒܛܠܝܢ. ܘܒܗ̇ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܝܬܝܘܬ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ. ܐܠܘ ܝܕܥ ܐܠܗܐ ܕܣܘܩܪܐܛܝܣ ܝܬܝ̣ܒ ܗܫܐ ܒܗܕܐ ܕܘܟܬܐ. ܟܕ ܢܩܘܡ ܢܫܢܐ ܡܢܗ̇ ܕܗܕܐ ܕܘܟܬܐ. ܐܢ ܗ̇ܝ ܝܕܥܬܗ ܩܕܡܝܬܐ ܐܝܟ ܕܐܝܬܝܗ̇ ܦܝܫܐ. ܠܐ ܝܕܥܬܐ ܗ̱ܝ ܘܣܟܠܘܬܐ. ܒܗ̇ܝ ܕܠܣܘܩܪܐܛܝܣ ܗ̇ܘ ܕܩܡ ܘܫܢܝ̣. ܐܝܟ ܗ̇ܘ ܕܥܕܡܫ ܝܬܝ̣ܒ ܝ̇ܕܥܐ ܠܗ. ܘܐܢ ܠܘ ܗ̣ܝ ܦܫܬ݀ ܐܫܬܚܠܦܬ݀. ܘܕܫܘܚܠܦܐ ܒܟܝܢܗ ܕܒܪܘܝܐ ܢܥܘܠ܆ ܠܐ ܡܨܝܐ. ܟܠܢܐܝܬ ܡܕܝܢ ܝܕܥ ܠܗ ܐܠܗܐ ܠܣܘܩܪܐܛܝܣ. ܟܐܡܬ݀ ܕܒܪܢܫܐ ܗ̱ܘ. ܘܡܟܢ ܕܢܬܒ ܘܢܩܘܡ ܘܢܫܢܐ ܘܢܐܬܐ. ܘܗܢܐ ܙܢܐ ܕܝ̣ܕܥܬܐ ܠܐ ܡܬܘܡ ܡܩܒܠ ܫܘܚܠܦܐ. ܒܕܟܘܠܢܝ̈ܐ ܟܠܗܘܢ ܠܐ ܡܫܬܚ̈ܠܦܢܐ ܐܢܘܢ. ܘܠܗ ܠܪܥܝܢܢ ܗܢܐ ܡܫܪܪ ܩܕܝܫܐ ܕܝܘܢܢܘܣܝܘܣ ܟܕ ܐܡ̇ܪ. ܟܕ ܗܟܝ̣ܠ ܝ̇ܕܥܐ ܚܟܡܬܐ ܐܠܗܝܬܐ ܗ̣ܝ ܠܗ̇܆ ܠܟܠܗܝܢ ܗܘܠܢܝ̈ܬܐ ܐܠܐ ܗܘܠܢܐܝܬ ܝܕܥܐ. ܘܠܗܠܝܢ ܦܠܝ̣̈ܓܬܐ ܠܐ ܡܦܠܓܐܝܬ. ܘܠܣܓܝ̈ܐܬܐ ܚܕܢܐܝܬ. ܘܬܘܒ ܐܡ̣ܪ. ܘܠܐ ܐܝܠܝܢ ܕܐܝܬܝܗܝܢ ܐܟܡܐ ܕܐܝܬܝܗܝܢ ܝ̇ܕܥܐ ܠܗܝܢ.

 

 

 

ܣܥܝܐ ܬܪܝܢܐ

 

ܟܠ ܡܕܪܟܢܘܬܐ ܡܢܬܝܬܐ܆ ܒܝܕ ܐܘܪܓܢܘܢ ܓܘܫܡܢܝܐ ܗܘܝܐ. ܐܝܟ ܙܢܐ ܕܚܙܝܐ ܒܝܕ ܥܝܢܐ. ܘܫܡܥܐ ܒܝܕ ܐܕܢܐ ܘܫܪܟܐ ܒܝܕ ܫܪܟܐ. ܘܐܠܘ ܒܪܘܝܐ ܡܕܪܟܢܘܬܐ ܩܢܐ ܗܘܐ ܓܘܫ̈ܡܢܝܐ ܘܓܘܫܡܐ ܗܘܐ. ܗ̇ܝ ܕܫܟܝ̣ܪܐ.

 

 

 

ܣܥܝܐ ܬܠܝܬܝܐ

 

ܥܠܬ݀ ܗ̇ܝ ܕܢܕܥ ܕܐܝܬܘܗܝ ܡܕܡ. ܗ̣ܝ ܐܝܬܘܬܗ ܕܗ̇ܘ ܡܕܡ ܐܝܬܝܗ̇. ܒܗ̇ܝ ܕܐܢ ܠܐ ܐܝܬܘܗܝ ܡܕܡ. ܠܐ ܡܨܝܐ ܕܢܕܥ ܕܐܝܬܘܗܝ. ܒܪܘܝܐ ܡܕܝܢ ܐܠܘ ܝ̇ܕܥ ܗܘܐ ܠܡܕ̈ܡܐ ܕܗܘܝܢ ܘܡܬܚܕܬܝ̣ܢ. ܡܫܬܟܚܐ ܗܘܬ݀ ܝ̣ܕܥܬܗ ܕܥܠܬܢܝܬܐ ܗ̱ܝ ܕܗܠܝܢ ܡܕ̈ܡܐ. ܘܡܬܡܨܝܢܝ̣ܬܐ ܘܠܘ ܐܠܨܝܬܐ ܗ̇ܝ ܕܫܟܝ̣ܪܐ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܫܪܝܐ ܩܕܡܝܐ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܝܕܥ ܕܣܘܩܪܐܛܝܣ ܝܬܝ̣ܒ. ܘܕܟܡܐ ܥܬܝܕ ܠܡܬܒ ܘܕܐܡܬܝ ܢܩܘܡ. ܒܕܡܫܡܠܝܬܐ ܗ̱ܝ ܠܗ ܝܕܥܬܗ. ܘܡ̣ܢ ܗܪܟܐ ܝ̣ܕܝ̣ܥܐ ܕܠܐ ܡܫܬܚܠܦܐ ܝ̣ܕܥܬܗ ܙܒܢ ܩܘܡܗ ܕܣܩܪܐܛܝܣ. ܒܗ̇ܝ ܕܡ̣ܢ ܩܕܡ ܕܢܩܘܡ ܝܕܥ ܗܘܐ ܩܘܡܗ ܒܗ ܒܙܒܢܐ ܕܒܗ ܩܡ.

 

 

 

ܗܦܟܬܐ

 

ܐܡܪܝܢ ܕܝܕܥܬܐ ܗ̇ܝ ܕܒܗ̇ ܝܕܥ ܝܕܘܥܐ ܕܥܬܝ̣ܕ ܕܢܩܘܡ ܣܩܪܐܛܝܣ. ܗܐ ܓܝܪ ܣܡܝܐ ܐܣܛܪܘܢܘܡܝܐ ܝܕܥ ܕܒܫܥܬܐ ܦܠܢܝܬ݀ ܥܬܝ̣ܕ ܕܚܫܟ ܠܗ ܣܗܪܐ. ܟܡܐ ܕܠܐ ܝܕܥ ܕܐܬܬ݀ ܠܗ̇ ܗ̇ܝ ܫܥܬܐ. ܘܡ̣ܢ ܗܕܐ ܝ̣ܕܝ̣ܥܐ ܕܠܘ ܚܕܐ ܗ̱ܝ ܝܕܥܬܐ ܕܗ̇ܝ ܕܥܬܝ̣ܕ ܕܢܩܘܡ܇ ܘܕܗ̇ܝ ܕܩܡ. ܘܕܗ̇ܝ ܕܢܚܫܟ. ܘܕܗ̇ܝ ܕܚܫܟ.

 

 

 

ܦܘܢܝܐ

 

ܐܡܪܝܢܢ ܕܗ̇ܝ ܕܐܡ̣ܪܬܘܢ ܠܘܬܢ ܕܝܠܢ ܚܣܝ̣ܪ̈ܝ ܝܕܥܬܐ ܒܠܚܘܕ ܡܟܢܐ ܕܬܓܕܫ. ܒܕܡܨܝܐ ܕܢܕܥ ܠܗ̇ܝ ܕܗܘܝܐ. ܘܠܐ ܢܕܥ ܠܗܘܝܗ ܕܙܒܢܐ ܗ̇ܘ ܕܒܗ ܗܘܝܐ. ܐܟܡܐ ܕܐܡ̣ܪܬܘܢ ܡܛܠ ܣܡܝܐ ܗ̇ܘ ܓܠܝ̣ܙ ܡ̣ܢ ܚܙܝܐ. ܒܪܘܝܐ ܕܝܢ ܗ̇ܘ ܕܠܗܠ ܗ̣ܘ ܡ̣ܢ ܟܠ ܚܣܝ̣ܪܘܬܐ. ܘܡܫܡܠܝܬ݀ ܒܟܠ ܝܕܥܬܗ. ܠܐ ܡܨܝܐ ܕܢܗܘܐ ܠܗ ܡܕܡ ܡ̣ܢ ܗ̇ܘ ܡܐ ܕܐܡ̣ܪܬܘܢ. ܘܡܛܠ ܡܠܬ݀ ܟܬܒܐ ܕܐܝܬܝ̣ܬܘܢ ܐܡܪܝܢܢ ܕܠܐ ܗܘܠܢܐܝܬ ܝܕܥ ܗ̇ܘ ܠܐ ܗܘܠܢܝܐ ܠܗܘܠܢܝ̈ܐ. ܟܐܡܬ݀ ܠܘ ܒܪ̈ܓܫܐ ܐܘܟܝ̣ܬ ܗܕܡ̈ܐ ܗܘܠܢܝ̈ܐ. ܥܝܢܐ ܠܡܐܡܪ ܐܘ ܐܕܢܐ ܘܫܪܟܐ. ܐܠܐ ܒܝܕ ܝܕܥܬܗ ܚܕܢܝܬ݀ ܙܢܐ ܘܠܐ ܗܘܠܢܝܬܐ. ܘܗ̇ܝ ܬܘܒ ܕܐܡ̣ܪ ܟܬܒܐ ܩܕܝܫܐ. ܕܠܘ ܐܟܡܐ ܕܐܝܬܝܗܘܢ ܠܐܝܠܝܢ ܕܐܝܬܝܗܝܢ ܝ̇ܕܥܐ ܠܗܝܢ ܚܟܡܬܐ ܐܠܗܝܬܐ܆ ܗܕܐ ܒܥܝܐ. ܕܠܘ ܟܡܐ ܕܐܝܬܝܗܝܢ ܘܐܡܬܝ ܕܐܝܬܝܗܝܢ ܒܠܚܘܕ ܝܕܥܐ ܚܟܡܬܐ ܒܪܘܝܬܐ ܠܗܠܝܢ ܕܐܝܬܝܗܝܢ. ܐܠܐ ܘܡ̣ܢ ܩܕܡ ܕܢܗܘ̈ܝܢ ܐܝܬܝܗܝܢ ܘܡ̣ܢ ܒܬܪ ܗ̇ܝ ܬܘܒ ܕܢܦܘ̈ܫܢ ܡ̣ܢ ܗ̇ܝ ܕܢܗܘ̈ܝܢ ܐܝܬܝܗܝܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܘ ܟܠ ܡܕܪܟܢܘܬܐ ܡܢܬܝܬܐ ܒܝܕ ܐܘܪܓܢܘܢ ܓܘܫܡܢܝܐ ܗܘܝܐ. ܗܐ ܓܝܪ ܢܦܫܐ ܡܠܝ̣ܠܬܐ. ܟܕ ܠܐ ܥܝ̈ܢܐ ܐܝܬ ܠܗ̇ ܒܝܬܗ̇. ܐܦܠܐ ܐܕܢ̈ܐ ܡܕܥ ܝܕܥܐ ܠܡܬܚܙ̈ܝܢܐ ܐܟܚܕܐ ܘܠܡܫܬܡ̈ܥܢܐ ܘܫܪܟܐ ܕܡܬܪ̈ܓܫܢܐ. ܘܐܠܘܠܐ ܡܕܪܟܐ ܗܘܬ݀ ܠܗܝܢ ܐܝܟܢܐ ܡܨܝܐ ܠܡܚܪܩ ܕܣܩܘܒ̈ܠܝܬܐ ܠܐ ܡܨ̈ܝܢ ܐܟܚܕܐ ܠܡܫܬܟܚܘ ܒܚܕ ܙܒܢܐ. ܒܚܕ ܗ̇ܘ ܕܣܝ̣ܡ. ܚܘܪܐ ܟܐܡܬ݀ ܘܐܘܟܡܐ. ܐܟܡܐ ܕܙܒ̈ܢܬܐ ܐܡ̣ܪܢܢ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܠܘܬܢ ܕܝܠܢ ܐܝܬܘܬܗ ܕܡܕܡ. ܥܠܬܐ ܗ̱ܝ ܕܗ̇ܝ ܕܢܕܥ ܕܐܝܬܘܗܝ ܗ̇ܘ ܡܕܡ. ܠܘܬ ܒܪܘܝܐ ܕܝܢ ܝܕܥܬܗ. ܕܐܝܬܘܗܝ ܗ̇ܘ ܡܕܡ. ܗ̣ܝ ܗ̣ܝ ܥܠܬܐ ܕܗ̇ܝ ܕܢܗܘܐ ܗ̇ܘ ܡܕܡ. ܒܕܓܘܢ ܝ̣ܕܥܬܗ ܕܒܪܘܝܐ ܥܒܘܕܬܐ ܗ̱ܝ ܘܥܠܬܐ. ܝܕܥܬܢ ܕܝܢ ܕܝܠܢ ܚܫܘܫܬܐ ܗ̱ܘ ܘܥܠܬܢܝܬܐ. ܘܡܛܠ ܗܕܐ ܫܟܝ̣ܪܐ ܠܡܦܚܡܘ ܗܕܐ ܒܗ̇ܝ. ܐܘ ܗ̇ܝ ܒܗܕܐ.

 

 

 

ܗܪܣܝܣ ܚܡܝܫܝܬܐ ܕܗ̇ܢܘܢ ܕܐܡܪܝܢ ܕܒܪܘܝܐ ܠܩܢܘ̈ܡܝܗܘܢ ܕܣܘܥܪ̈ܢܐ ܘܓܕܫܝ̈ܗܘܢ ܒܬܪ ܕܗܘܝܢ ܝܕܥ ܠܗܘܢ. ܒܗ̇ܝ ܕܒܡܩܕܡܘܬ ܝܕܥܬܗ ܠܟܝܢܝ̈ܗܘܢ ܒܠܚܘܕ ܝ̇ܕܥ ܘܒܗ̇ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܝܬܝܘܬ ܣܥܝܝ̈ܗܘܢ. ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ.

 

ܐܡܪܝܢ ܐܠܘ ܝ̇ܕܥ ܗܘܐ ܐܠܗܐ ܠܣܥܘܪ̈ܘܬܐ ܡܢܬܢܝ̈ܬܐ ܡ̣ܢ ܩܕܡ ܗܘܝ̈ܗܝܢ. ܟܠܗܝܢ ܣܥܘܪ̈ܘܬܐ ܐܢܢ̈ܩܝܬܐ ܗܘܝ̈܆ ܠܐ ܡܫܟܚܢ̈ܝܬܐ. ܒܗ̇ܝ ܕܗ̇ܘ ܡܐ ܕܝܕܥ ܐܠܗܐ ܕܥܬܝ̣ܕ ܕܢܗܘܐ ܡ̣ܢ ܐܢܢܩܝ̣ ܗܘܐ. ܘܗ̇ܘ ܡܐ ܕܝܕܥ ܐܠܗܐ ܕܠܐ ܥܬܝ̣ܕ ܕܢܗܘܐ ܠܘ ܡܫܟܚܐ ܕܢܗܘܐ. ܘܡ̣ܢ ܗܪܟܐ ܒܛܠܐ ܗܘܬ݀ ܚܐܪܘܬ ܒܢܝ̈ܢܫܐ ܘܫܠܝ̣ܛܘܬ ܒܝܬܗܘܢ. ܘܡ̣ܢ ܗܪܟܐ ܬܘܒ ܐܝ̣ܩܝ̣ ܡܫܬܟܚܝ̣ܢ ܢܡܘ̈ܣܐ ܟܠܗܘܢ ܐܠܗܝ̈ܐ ܕܐܬܬܣܝ̣ܡܘ ܠܒܢܝ̈ܢܫܐ܆ ܕܢܥܒܕܘܢ ܗܠܝܢ܇ ܘܠܐ ܢܥܒܕܘܢ ܗܠܝܢ. ܘܓܠܝܐ ܕܬܘܕܝܬܐ ܕܐܝܟ ܗܕܐ ܠܘܬ ܟܦܘܪܝܐ ܕܒܐܠܗܐ ܡܘܒܠܐ. ܘܗ̇ܝ ܕܡܢܗ̇ ܦܪܩܐ܆ ܕܢܐܡܪ ܕܐܠܗܐ ܫܘܒܚܐ ܠܛܝܒܘܬܗ ܝܕܥ ܗܘܐ ܒܡܩܕܡܘܬ ܝ̣ܕܥܬܗ ܠܟܝܢܗ ܕܦܛܪܘܣ ܘܕܦܘܠܘܣ. ܘܕܬܘܕܝܬܐ ܘܕܟܦܘܪܝܐ ܡ̣ܢ ܩܕܡ ܕܢܗܘܘܢ. ܐܝܢ ܠܗ̇ܝ ܕܦܛܪܘܣ ܟܦܪ ܘܦܘܠܘܣ ܡܗܝܡܢ܇ ܠܐ ܝ̇ܕܥ ܗܘܐ. ܐܠܐ ܒܬܪ ܕܟܦ̣ܪ ܗ̇ܘ ܘܗܝܡܢ ܗ̇ܘ. ܒܗ̇ܝ ܕܐܠܘ ܝ̇ܕܥ ܗܘܐ ܡ̣ܢ ܩܕܝ̣ܡ ܕܟܦܪ ܦܛܪܘܣ ܠܐ ܡܨܐ ܗܘܐ ܦܛܪܘܣ ܕܠܐ ܢܟܦܘܪ. ܒܕܓܘܢ ܠܡܢܐ ܡܬܥܕܠ. ܐܘ ܡܫܬܢܩ ܥܠ ܕܟܦ̣ܪ. ܘܐܠܘ ܬܘܒ ܝ̇ܕܥ ܗܘܐ ܕܡܗܝܡܢ ܦܘܠܘܣ. ܠܐ ܡܨܐ ܗܘܐ ܦܘܠܘܣ ܕܠܐ ܢܗܝܡܢ. ܒܕܓܘܢ ܠܡܢܐ ܡܬܩܠܣ. ܐܝܟ ܕܗ̣ܘ ܡ̣ܢ ܕܝܠܗ ܣܥܪܗ̇ ܠܣܥܘܪܘܬܐ ܡܝܬܪܬܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܣܥܘܪ̈ܘܬܐ ܡ̣ܢ ܩܕܡ ܗܘܝ̈ܗܝܢ ܠܐ ܐܝܬܝܗܝܢ. ܘܗ̇ܘ ܕܠܐ ܐܝܬܘܗܝ ܠܐ ܡܨܐ ܠܡܬܦܪܫܘ ܡ̣ܢ ܐ̱ܚܪܢܐ ܕܠܐ ܐܝܬܘܗܝ. ܒܗ̇ܝ ܕܗ̇ܝ ܕܠܐ ܐܝܬܘܗܝ ܓܘܢܐܝܬ ܠܟܠܗܘܢ ܫܟܝ̣ܚܐ. ܘܠܝܬ ܠܗܘܢ ܟܝܢܐ ܐ̱ܚܪܢܐ ܕܒܗ ܢܬܦܪܫܘܢ ܡ̣ܢ ܚܕ̈ܕܐ. ܘܗ̇ܘ ܕܠܐ ܡܬܦܪܫ ܡ̣ܢ ܟܢܬܗ܆ ܐܝܟܢܐ ܡܨܐ ܕܢܬܕܪܟ ܐܘ ܢܬܝ̣ܕܥ. ܣܥܘܪ̈ܘܬܐ ܡܕܝܢ ܒܬܪ ܗܘܝܗܝܢ ܡܬܝܕ̈ܥܢ ܠܒܪܘܝܐ ܘܠܘ ܡ̣ܢ ܩܕܡ ܗܘܗܝܢ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܐܠܘ ܝܕܥ ܗܘܐ ܒܪܘܝܐ ܣܥܘܪܘܬܐ ܡܕܡ ܡ̣ܢ ܩܕܡ ܗܘܝܗ̇. ܙܕܩ ܗܘܐ ܕܢܕܥ ܙܢܝ̈ܐ ܕܒܘ̈ܣܡܐ ܟܠܗܘܢ ܕܙܕܝ̈ܩܐ. ܘܙܢܝ̈ܐ ܕܫܘ̈ܢܩܐ ܟܠܗܘܢ ܕܚܛܝ̈ܐ. ܘܐܠܘ ܙܢܝ̈ܐ ܗܠܝܢ ܡܬܝܕܥܝܢ ܗܘܘ܇ ܡܣܝ̈ܟܐ ܗܘܘ. ܘܕܠܝܬܝܗܘܢ ܡܣܝ̈ܟܐ ܝ̣ܕܝ̣ܥܐ ܡ̣ܢ ܗ̇ܝ ܕܐܡ̣ܪ ܡܪܢ. ܕܢܐܙܠ̱ܘܢ ܗܠܝܢ ܠܚܝ̈ܐ ܕܠܥܠܡ ܘܗܠܝܢ ܠܬܫܢܝ̣ܩܐ ܕܠܥܠܡ. ܘܓܠܝܐ ܕܠܥܠܡ ܗ̇ܘ ܗ̣ܘ ܕܠܝܬ ܠܗ ܣܟܐ ܘܫܘܠܡܐ. ܒܪܘܝܐ ܡܕܝܢ ܠܐ ܝ̇ܕܥ ܠܡܕܡ ܡ̣ܢ ܣܥܘܪܘܬܐ܆ ܐܠܐ ܒܬܪ ܗܘܝܗ.

 

 

 

ܢܝܫܐ ܬܪܝܢܐ ܡܛܠ ܫܪܝܗܘܢ ܕܣܥܝ̈ܐ ܗܠܝܢ. ܐܝܟ ܕܡ̣ܢ ܕܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܡܥܒܕܢ̈ܘܬܐ ܡܢܬܝ̈ܬܐ ܐܟܙܢܐ ܕܡܩܡܗ ܕܣܘܩܪܐܛܝܣ ܘܡܘܬܒܗ ܘܟܦܘܪܝܗ ܘܡܘܕܝܢܘܬܗ. ܠܘ ܝ̣ܕܥܬܐ ܐܠܗܝܬܐ ܐܝܬܝܗ̇ ܥܠܬܗܝܢ ܥܒܘܕܬܐ. ܘܐܦܢ ܝ̇ܕܥ ܠܗܝܢ. ܐܠܐ ܚܐܪܘܬܗ ܕܣܘܩܪܐܛܝܣ ܘܡܘܬܒܗ ܘܟܦܘܪܝܗ ܘܡܘܕܝܢܘܬܗ. ܠܘ ܝܕܥܬܐ ܐܠܗܝܬܐ ܐܝܬܝܗ̇ ܥܠܬܗܝܢ ܥܒܘܕܬܐ. ܘܐܦܢ ܝ̇ܕܥ ܠܗܝܢ. ܐܠܐ ܚܐܪܘܬܗ ܕܣܘܩܪܐܛܝܣ ܘܫܘܠܛܢܗ. ܐܟܡܐ ܕܥܬܝ̣ܕܝܢ ܠܡܚܘܝܘ ܒܬܪܟܢ. ܒܕܓܘܢ ܝܕܥܬܗ ܕܐܠܗܐ ܟܕ ܠܘ ܥܠܬܗܝܢ ܗ̣ܝ. ܠܐ ܟܠܝܐ ܠܥܠܬܗܝܢ ܐܘܟܝ̣ܬ ܠܚܐܪܘܬ ܣܘܩܪܐܛܝܣ ܕܬܣܥܘܪ ܣܥܘܪ̈ܘܬܗ̇ ܨܒܝܢܝ̈ܬܐ܆ ܨܒܝܢܐܝܬ. ܐܝܟܢܐ ܕܢܫܬܘܐ ܡ̣ܢ ܗܪܟܐ ܠܕܘܢܩܐ ܐܘ ܠܦܘܢܩܐ ܟܐܢܐܝܬ ܒܥܠܡܐ ܕܥܬܝ̣ܕ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܐ ܣܢܝ̣ܩܝܢ ܣܘܥܪ̈ܢܐ ܒܦܘܪܫܢܗܘܢ ܕܡ̣ܢ ܚܕܕ̈ܐ ܠܘܬ ܗ̇ܝ ܕܢܫܬܟܚܘܢ ܒܡܥܒܕܢܘܬܐ. ܗܐ ܓܝܪ ܐܠܨܐܝܬ ܟܠܚܕ ܡܢܢ ܦܪܫ ܒܝܬ ܛܪܝܓܘܢܘܢ ܠܛܛܪܐܓܘܢܘܢ. ܘܐܦܢ ܠܐ ܢܗܘܐ ܚܕ ܡܢܗܘܢ ܕܫܟܝ̣ܚ ܣܟ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܠܟܠܡܕܡ ܐܝܟ ܕܐܝܬܘܗܝ ܝ̇ܕܥ ܠܗ. ܠܡܣܝܟܐ ܐܝܟ ܡܣܝܟܐ. ܘܠܠܐ ܡܣܝܟܐ ܐܝܟ ܠܐ ܡܣܝܟܐ.

 

 

 

ܐܪܣܝܣ ܫܬܝܬܝܬܐ ܕܗ̇ܢܘܢ ܕܐܡܪܝܢ ܕܠܡܣܝ̈ܟܐ ܒܠܚܘܕ ܝ̇ܕܥ ܐܠܗܐ. ܘܠܘ ܠܠܐ ܡܣܝ̈ܟܐ. ܘܒܗ ܐܝܬ ܦܣܘ̈ܩܐ ܬܪܝܢ. ܢܝܫܐ ܩܕܡܝܐ ܡܛܠ ܡܝܬܝܘܬ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܐܠܘ ܝ̇ܕܥ ܗܘܐ ܒܪܘܝܐ ܠܗ̇ܢܘܢ ܕܠܐ ܡܣܝܟܝ̣ܢ. ܡܫܬܟ̈ܚܢ ܗܘܝ̈ ܒܝܬܗ ܝܕ̈ܥܬܐ ܕܠܐ ܡܣܝ̈ܟܢ ܒܡܥܒܕܢܘܬܐ. ܗ̇ܝ ܕܠܐ ܡܨܝܐ. ܒܕܟܠ ܡܢܝܢܐ ܕܒܡܥܒܕܢܘܬܐ ܡܩܒܠܢܐ ܗ̱ܘ ܕܬܘܣܦܬܐ ܘܕܒܘܨܪܐ. ܘܟܠ ܡܩܒܠܢܐ ܕܬܘܣܦܬܐ ܘܒܘܨܪܐ ܡܣܝܟܐ ܗ̱ܘ ܘܠܘ ܠܐ ܡܣܝܟܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܟܠ ܕܡܬܝ̣ܕܥ ܦܪܝ̣ܫܐ ܙܕܩ ܕܢܗܘܐ ܡ̣ܢ ܕܣܛܪ ܡܢܗ. ܘܟܠ ܕܦܪܝ̣ܫ ܡ̣ܢ ܕܣܛܪ ܡܢܗ ܡܣܝܟܐ ܗ̱ܘ. ܒܗ̇ܝ ܕܦܪܝ̣ܫܐ ܗ̇ܘ ܗ̣ܘ ܕܡܫܚܠܦ ܡ̣ܢ ܕܣܛܪ ܡܢܗ ܒܬܚܘܡܗ ܘܣܟܗ ܐܘܟܝ̣ܬ ܣܘܦܗ. ܒܕܓܘܢ ܟܠ ܕܝ̣ܕܝ̣ܥ ܠܒܪܘܝܐ ܡܣܝܟܐ ܙܕܩ ܕܢܗܘܐ. ܘܠܘ ܠܐ ܡܣܝܟܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܒܪ̈ܝܬܗ ܕܐܠܗܐ ܛܒ ܣܓܝ̈ܐܢ ܡ̣ܢ ܗ̇ܢܘܢ ܕܠܗ ܝ̣ܕܝ̣̈ܥܢ. ܐܝܟܢܐ ܠܐ ܘܗܐ ܣܓܝ̈ܐܬܐ ܝܕܥܝ̣ܢܢ ܕܝ̇ܕܥ ܐܢܝܢ ܘܠܐ ܒܪ̈ܝܢ ܠܗ. ܐܝܟ ܫܡ̈ܫܐ ܘܣܗܪ̈ܐ ܣܓܝ̈ܐܐ. ܘܝܡ̈ܡܐ ܡ̣ܢ ܙܝܘܓ ܘܛܘܪ̈ܐ ܡ̣ܢ ܝܘܩܢ̈ܕܐ. ܟܡܐ ܡܕܝܢ ܐܝܬ ܘܐ̱ܚܪ̈ܢܝܬܐ ܕܚܢܢ ܠܐ ܝ̣ܕܥܢ ܐܢܝܢ. ܘܗ̣ܘ ܝ̣ܕܥ ܐܢܝܢ ܘܠܐ ܒܪ̈ܝܢ. ܘܟܕ ܗܕܐ ܗܟܢܐ ܐܝܬܝܗ̇. ܡ̣ܢ ܐܢܢܩܝ̣ ܕܡܬܝܕ̈ܥܢܝܬܗ ܥܐܦ̈ܐ ܢܗܘ̈ܝܢ ܕܒܪ̈ܝܬܗ. ܘܟܕ ܒܪ̈ܝܬܗ ܡܣܝ̈ܟܢ܆ ܐܦ ܡܬܝܕ̈ܥܢܝܬܗ ܡܣܝ̈ܟܬܐ ܙܕܩ ܕܢܗܘ̈ܝܢ ܘܠܘ ܠܐ ܡܣܝ̈ܟܬܐ. ܒܕܥܐܦܘ̈ܗܝ ܕܡܣܝܟܐ܆ ܡܣܝܟܝ̣ܢ ܐܢܘܢ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܩܕܡܢܢ ܚܘܝ̣ܢܢ ܕܝ̣ܕܥܬܗ ܕܐܠܗܐ ܚܕܢܝܬܐ ܗ̱ܝ ܘܠܚܘܕܝܬ݀ ܙܢܐ. ܐܝܢ ܐ̱ܚܝܢ̈ܘܬܗ̇ ܕܠܘܬ ܡܬܝܕ̈ܥܢܐ ܣܓܝ̈ܐܐ܆ ܣܓܝ̈ܐܢ. ܘܕܠܐ ܡܣܝܟܘܬ ܐ̱ܚܝܢ̈ܘܬܐ ܠܐ ܫܟܝ̣ܪܐ܆ ܙܒ̈ܢܬܐ ܐܡ̣ܪܢܢ. ܕܠܚܘܕܝܘܬܐ ܟܕ ܚܕܐ ܗ̱ܝ ܦܠܓܐ ܗ̱ܝ ܕܬܪܝܢ ܘܬܘܠܬܐ ܕܬܠܬܐ. ܘܗܟܢܐ ܠܠܐ ܣܘܦ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ. ܕܠܐ ܡܣܝܟܐ ܒܠܐ ܡܣܝܟܘܬܐ ܦܪܝ̣ܫ ܡ̣ܢ ܕܣܛܪ ܡܢܗ ܡ̣ܢ ܡܣܝܟܐ. ܒܕܓܘܢ ܦܘܪܫܗ ܕܡ̣ܢ ܠܐ ܡܣܝܟܘܬܗ.

 

 

 

ܗܦܟܬܐ

 

ܐܡܪܝܢ ܕܗܕܐ ܡܠܬܐ ܦܘܪܫܗ ܕܠܐ ܡܣܝܟܐ ܡ̣ܢ ܡܣܝܟܐ ܒܠܚܘܕ ܡܫܘܕܥܐ. ܠܐ ܡܣܝ̈ܟܐ ܡܕܝܢ ܟܕ ܡܫܬܘܦܝܢ ܒܠܐ ܡܣܝܟܘܬܐ ܒܡܢܐ ܐܪܐ ܢܬܦܪܫܘܢ.

 

 

 

ܦܘܢܝܐ

 

ܐܡܪܝܢܢ ܕܒܟܝܢܝ̈ܗܘܢ ܡܬܦܪܫܝܢ. ܒܗ̇ܝ ܕܟܝܢܗ ܕܡܕܡ ܐ̱ܚܪܝܢ ܗ̣ܘ ܡ̣ܢ ܠܐ ܡܣܝܟܘܬܗ. ܐܝܟܢܐ ܠܐ. ܘܗܐ ܠܐ ܡܣܝܟܘܬ ܓܘ̣ܢܝܐ ܠܟܠܚܕ ܡ̣ܢ ܡܣܝ̈ܟܐ. ܒܕ ܥܠ ܟܠܗܘܢ ܡܬܩܛܪܓܐ. ܟܝܢܗ ܕܝܢ ܕܟܠ ܚܕ ܡܢܗܘܢ ܠܗ ܒܠܚܘܕ ܕܝ̣ܠܢܝ ܘܠܘ ܥܠ ܟܠܗܘܢ ܡܬܩܛܪܓ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܗ̇ܝ ܕܡܬܐܡܪܐ ܕܒܪ̈ܝܬܗ ܕܐܠܗܐ ܒܨܝ̣ܪ̈ܢ ܡ̣ܢ ܡܬܝܕ̈ܥܢܝܬܗ. ܟܐܡܬ݀ ܕܝ̣ܕܥܬܗ ܕܐܠܗܐ ܠܐܠܨܝ̈ܐ ܘܐܠܘ ܡܫܟܚܐ ܘܠܡܬܡܨ̈ܝܢܐ ܐܟܚܕܐ ܚܒܫܐ. ܒܪܘܝܘܬܗܝܢ ܠܡܬܡܨ̈ܝܢܐ ܒܠܚܘܕ. ܘܒܗܢܐ ܙܢܐ ܠܐ ܐܠܨܐ ܡ̣ܢ ܡܣܝܟܘܬܗܝܢ ܕܒܪ̈ܝܬܐ܆ ܡܣܝܟܘܬܗܝܢ ܕܡܬܝܕ̈ܥܢܝܬܗ ܕܒܪܘܝܐ. ܘܡܬܡܨܝܢܐ ܡ̇ܢ ܟܕ ܫܡܥ ܐܢ̱ܬ ܠܘ ܠܗ̇ܢܝܢ ܒܠܚܘܕ ܕܒܦܚܡܢ ܡܬܡܨ̈ܝܢܐܝܢ ܬܣܬܟܠ. ܒܕ ܣܓܝ̈ܐܬܐ ܡ̣ܢ ܗ̇ܢܝܢ ܕܠܢ ܠܐ ܡܬܡܨ̈ܝܢܐ ܐܢܘܢ. ܠܐܠܗܐ ܠܘ ܠܐ ܡܬܡܨ̈ܝܢܐܝܢ. ܘܗܕܐ ܗ̱ܝ ܕܐܡܝ̣ܪܐ. ܗ̇ܘ ܕܠܠܐ ܡܬܡܨܝܢ̈ܝܬܐ ܡܬܡܨܝܢ̈ܝܬܐ ܩܢܐ ܐܢ̱ܬ.

 

 

 

ܐܪܣܝܣ ܫܒܝܥܝܬܐ ܕܗ̇ܢܘܢ ܕܐܡܪܝܢ ܕܠܘ ܠܟܠܗܘܢ ܡܬܝܕ̈ܥܢܐ ܝܕܥ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܝܬܝܘܬ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܐܠܘ ܠܟܠܗܘܢ ܡܬܝܕ̈ܥܢܐ ܝܕܥ ܗܘܐ. ܟܕ ܝܕܥ ܗܘܐ ܡܬܝܕܥܢܐ ܡܕܡ. ܙܕܩ ܗܘܐ ܕܢܕܥ ܕܝܕܥ ܠܡܬܝܕܥܢܐ ܗ̇ܘ. ܘܟܕ ܝܕܥ ܗܘܐ ܕܝܕܥ. ܙܕܩ ܗܘܐ ܐܦ ܕܢܕܥ. ܕܝ̇ܕܥ ܕܝ̇ܕܥ. ܘܟܕ ܝܕܥ ܗܘܐ ܕܢܕܥ ܕܝܕܥ ܕܝܕܥ. ܘܗܟܢܐ ܠܠܐ ܣܘܦ. ܘܟܕ ܗܕܐ ܠܐ ܡܨܝܐ. ܫܪܝܪܐ ܗ̇ܝ ܕܠܐ ܝܕܥ ܠܟܠܗܘܢ ܡܬܝܕ̈ܥܢܐ.

 

 

 

ܣܥܝܐ ܬܪܝܢܐ

 

ܐܡܪܝܢ. ܐܠܘ ܠܟܠܗܘܢ ܡܬܝܕ̈ܥܢܐ ܝ̇ܕܥ ܗ̣ܘ ܒܪܘܝܐ. ܟܐܡܬ݀ ܠܗ̇ܢܘܢ ܕܗܘܘ ܘܡܨܝܢ ܠܡܗܘܐ. ܘܟܕ ܝܕܥ ܗܘܐ ܩܢܘܡܐ ܡܕܡ ܠܡܐܡܪ ܐ̱ܢܫܝܐ. ܗ̣ܘ ܗ̇ܘ ܩܢܘܡܐ ܠܘ ܠܐ ܡܟܢ ܠܡܐܠܦ ܐܘܡܢ̈ܘܬܐ ܕܠܐ ܣܟ ܒܚܝܠܐ. ܘܠܡܣܥܪ ܬܘܒ ܣܥܘܪ̈ܘܬܐ ܕܠܐ ܣܘܦ. ܘܕܢܗܘܐ ܒܙܒ̈ܢܐ ܠܐ ܡܣܝ̈ܟܐ. ܟܐܡܬ݀ ܠܚܡ ܒܗ̇ܝ ܕܒܪܢܫܐ ܗ̱ܘ ܕܢܗܘܐ ܐܣܝܐ. ܐܘ ܐܣܛܪܘܢܘܡܝܐ ܐܘ ܓܐܘܡܝܛܪܐ ܐܘ ܢܓܪܐ. ܐܘ ܐܫܟܦܐ. ܒܗ̇ܝ ܕܚܝܘܬܐ ܗ̱ܘ. ܕܢܬܒ ܐܘ ܢܩܘܡ ܐܘ ܢܪܗܛ ܐܘ ܢܕܪܪ. ܐܘ ܢܬܬܪܣܐ ܕܩܐ ܐܘ ܝܪܩܐ. ܐܘ ܬܐܢ̈ܐ ܐܘ ܬܡܪ̈ܐ. ܘܒܗ̇ܝ ܕܡܫܪܝܢܐ ܗ̱ܘ ܕܢܬܝܠܕ܇ ܡ̣ܢ ܩܕܡ ܛܘܦܢܐ ܐܘ ܒܬܪܘܗܝ ܒܝܘܡܐ܆ ܐܘ ܒܬܪܝܢ ܐܘ ܒܬܠܬܐ. ܘܗܟܢܐ ܫܪ̈ܒܐ ܕܠܝܬ ܠܗܘܢ ܡܢܝܢܐ. ܘܟܕ ܠܝܕܥܬܐ ܕܚܕ ܡ̣ܢ ܩܢܘ̈ܡܐ ܝܕ̈ܥܬܐ ܗܠܝܢ ܕܠܐ ܣܘܦ ܢܩ̈ܦܢ. ܠܝ̣ܕܥܬܐ ܕܟܠܗܝܢ ܗܠܝܢ ܕܐܝܬܝܗܝܢ ܟܡܐ ܟܝܬ ܙܕܩ ܕܢܩ̈ܦܢ. ܘܕܟܠܗܝܢ ܡܬܝܕ̈ܥܢܝܬܐ ܢܗܘ̈ܝܢ ܒܚܕܐ ܡܛܪܘܦܝ̣ܬܐ ܠܐ ܡܩܒܠ ܗܠܝܢ ܗܘܢܐ. ܘܥܛܠ ܠܡܬܬܦܣܘ ܗܘܐ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܝܕܥܬܗ ܓܝܪ ܕܐܠܗܐ ܚܕܐ ܗ̱ܝ. ܘܕܪ̈ܓܐ ܗܠܝܢ ܕܡܢܝܬܘܢ. ܦܘ̈ܚܡܐ ܐܢܘܢ ܘܐ̱ܚܝܢ̈ܘܬܐ ܕܡܬܝܕ̈ܥܢܐ ܗ̇ܢܘܢ ܣܓܝ̈ܐܐ ܠܘܬܗ̇ ܕܝ̣ܕܥܬܐ ܗ̇ܝ ܚܕܢܝܬ݀ ܙܢܐ. ܘܕܫܟܝ̣ܚܘܬ ܦܘ̈ܚܡܐ ܕܠܐ ܣܟ ܘܐ̱ܚܝܢ̈ܘܬܐ ܕܠܐ ܣܘܦ ܠܘ ܠܐ ܡܨܝܐ ܙܒ̈ܢܬܐ ܐܡܪܝܢܢ ܒܠܚܘܕܝܘܬܐ ܗ̇ܝ ܕܦܠܓܐ ܗ̇ܝ ܕܬܪܝܢ. ܘܬܘܠܬܐ ܕܬܠܬܐ. ܘܫܪܟܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܥܠ ܠܘ ܡܫܟܚܢܘܬ ܫܟܝ̣ܚܘܬܐ ܕܝܕ̈ܥܬܐ ܗ̇ܢܝܢ ܡܫܪ̈ܬܚܬܐ ܕܝܕ̈ܥܬܐ ܗ̇ܢܝܢ ܡܫܪ̈ܬܚܬܐ ܕܐܕܟܪܬܘܢ. ܡܚܘܝܢܘܬܐ ܐܦܘܕܝܩܛܝܩܝܬܐ ܘܠܐ ܚܕܐ ܐܝܬܝ̣ܬܘܢ. ܐܠܐ ܒܠܚܘܕ ܬܫܥܝ̣ܬܐ ܕܗܘܢܐ ܠܐ ܡܩܒܠ ܠܗ̇. ܘܠܐ ܐܠܨܐ ܕܠܐ ܢܫܬܟܚ ܟܠ ܡܐ ܕܡ̣ܢ ܗܘܢܐ ܐ̱ܢܫܝܐ ܠܐ ܡܬܩܒܠ. ܒܕܠܐ ܡܨܐ ܠܡܩܡ ܥܠ ܪܘܡܐ ܕܝ̣ܕܥܬܗ. ܗܐ ܓܝܪ ܣܓܝ̈ܐܐ ܡ̣ܢ ܗܘ̈ܢܐ ܐ̱ܢܫܝ̈ܐ ܠܐ ܡܩܒܠܝܢ ܕܢܦܫܐ ܠܐ ܒܛܠܐ ܒܒܘܛܠܗ ܕܦܓܪܐ. ܐܘ ܕܐܝܬ ܡܕܡ ܕܠܘ ܓܘܫܡܐ ܗ̱ܘ ܐܦܠܐ ܒܐܬܪܐ. ܘܠܐ ܠܓܘ ܡ̣ܢ ܥܠܡܐ ܗ̱ܘ. ܐܦܠܐ ܠܒܪ ܡܢܗ. ܘܠܐ ܐܠܨܐ ܕܡܛܠ ܡܚܝ̣ܠܘܬܗ ܕܗܘܢܐ ܡܕܡ܆ ܟܠܢ ܢܟܦܘܪ ܒܕܐܝܟ ܗܠܝܢ. ܙܢܝ̈ܐ ܓܝܪ ܐܠܗܝ̈ܐ ̇ ܡ̣ܢ ܟܠ ܓܡܝ̣ܪ̈ܘܢ ܓܡܝ̣ܪܝ̣ܢ. ܘܡ̣ܢ ܟܠ ܬܕܡܪ̈ܢ ܕܡܝ̣ܪܝ̣ܢ. ܘܡܢܘ ܕܢܕܪܟ ܐܢܘܢ ܐܝܟ ܕܐܝܬܝܗܘܢ.

 

 

 

 

 

 

 

     #1 

 

ܩܦܠܐܘܢ ܫܬܝܬܝܐ ܕܫܬܐܣܬܐ ܬܠܝܬܝܬܐ. ܡܛܠܗ̇ܝ ܕܒܪܘܝܐ ܠܐ ܡܬܚܙܝܢܐ ܗ̱ܘ ܠܥܝ̈ܢܐ ܦܓܪ̈ܢܝܐ ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܡܫܡ̈ܠܝܢܝܗ̇ ܕܚܙܘܝܘܬܐ܆ ܬܫܥܐ ܐܢܘܢ ܩܢܘ̈ܢܐ. ܚܠܝ̣ܡܘܬܗ ܕܪܓܫܐ ܚܙܘܝܐ. ܘܢܗܝ̣ܪܘܬ ܐܐܪ. ܘܕܡܓܘܢܢ ܢܗܘܐ ܗ̣ܘ ܡܕܡ ܕܡܬܒܥܝܐ ܡܬܚܙܝܢܘܬܗ. ܘܕܠܐ ܢܗܐ ܒܣܟܐ ܕܩܪܝ̣ܒܘܬܐ. ܐܦܠܐ ܒܣܟܗ̇ ܕܡܥܒܕܢܘܬܐ. ܘܕܒܕܝܐܡܛܪܘܢ ܢܗܘܐ ܕܣܝ̣ܡ ܗ̇ܘ ܕܚܙܐ. ܘܕܠܐ ܢܗܐ ܒܣܟܗ̇ ܕܙܥܘܪܘܬܐ. ܐܦܠܐ ܒܣܟܗ̇ ܕܩܛܝ̣ܢܘܬܐ. ܘܕܠܐ ܢܗܐ ܘܝ̣ܠܐ ܒܝܬ ܚܙܘܝܐ ܠܡܬܚܙܝܢܐ. ܘܗܠܝܢ ܡ̇ܢ ܫܒܥܐ ܩܢܘ̈ܢܐ ܐ̱ܚܪ̈ܝܐ ܠܓܘ̈ܫܡܐ ܒܠܚܘܕ ܫܟܝ̣ܚܝ̣ܢ. ܘܐܠܗܐ ܠܘ ܓܘܫܡܐ ܗ̱ܘ. ܡܕܝܢ ܐܦܠܐ ܡܬܚܙܝܢܐ ܗ̱ܘ. ܘܠܐ ܡܨܝܐ ܠܡܐܡܪ ܕܗܠܝܢ ܬܪܝܢ ܩܢܘ̈ܢܐ ܩܕܡܝ̈ܐ ܣܦܩܝ̣ܢ ܠܘܬ ܡܬܚܙܝܢܘܬܗ ܕܡܕܡ. ܒܕ ܗܐ ܗܫܐ ܫܟܝ̣ܚܝ̣ܢ. ܒܠܥܕ ܗ̇ܝ ܕܚܙܝܢܢ ܠܗ ܠܒܪܘܝܐ ܣܓܝܕ ܐܝܩܪܗ. ܟܐܡܬ݀ ܪܓܫܢ ܚܠܝ̣ܡ ܘܐܐܪ ܢܗܝ̣ܪ. ܐܠܐ ܠܐ ܡܨܝܢܢ ܕܢܚܙܝܘܗܝ. ܠܐ ܕܝܢ ܚܙܝܢܢ ܠܗ. ܒܕܠܐ ܡܟܢ ܠܡܬܚܙܝܘ.

 

 

 

ܡܬܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܟܠ ܕܡܟܢ ܠܡܬܚܙܝܘ. ܒܕܝܐܡܛܪܘܢ ܙܕܩ ܕܢܗܘܐ ܒܣܝܡܐ ܒܦܚܡܐ ܕܚܙܘܝܗ. ܘܗ̣ܝ ܕܝܐܡܛܪܘܬ ܣܝܡܐ ܠܐ ܡܨܝܐ ܕܬܗܘܐ܆ ܐܠܐ ܠܗܘ ܕܒܐܬܪܐ ܗ̱ܘ ܘܕܘܟܬܐ. ܐܠܗܐ ܡܕܝܢ ܫܘܒܚܐ ܠܫܡܗ ܟܕ ܠܘ ܡܬܚܙܝܢܐ ܗ̱ܘ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ܇ ܕܟܠ ܡܬܚܙܝܢܐ. ܡ̣ܢ ܐܢܢܩܝ ܕܡܬܛܒܥܘ̣ ܢܬܛܒܥ ܐܣܟܡܗ ܘܕܡܘ̣ܬܗ ܒܒܒܬܐ ܕܗ̇ܘ ܕܚܙܐ. ܐܠܗܐ ܡܕܝܢ ܟܕ ܠܝܬ ܠܗ ܐܣܟܡܐ ܘܕܡܘ̣ܬܐ܆ ܠܐ ܡܬܚܙܝܢܐ ܗ̱ܘ.

 

 

 

ܗܦܟܬܐ

 

ܐܝܟܢܐ ܠܝܬ ܠܗ ܐܣܟܡܐ ܘܕܡܘ̣ܬܐ. ܘܗܐ ܠܒܪܢܫܐ ܒܐܣܟܡܗ ܒܪܝܗܝ ܘܒܕܡܘ̣ܬܗ.

 

 

 

ܦܘܢܝܐ

 

ܒܗܠܝܢ ܕܥܠ ܢܦܫܐ ܥܬܝ̣ܕܝ̣ܢܢ ܠܡܚܘܝܘ. ܕܢܦܫܐ ܗ̱ܝ ܐ̱ܢܫܝܬܐ ܕܐܬܒܪܝܬ݀ ܒܐܣܟܡܗ ܘܕܡܘ̣ܬܗ ܕܒܪܘܝܐ ܘܠܘ ܦܓܪܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܟܠ ܡܬܚܙܝܢܐ ܓܘܢܐ ܙܕܩ ܕܢܗܘܐ ܠܗ ܘܐܣܟܡܐ. ܐܝܟܢܐ ܠܐ. ܘܗܐ ܐܐܪ ܓܠܝ̣ܙ ܡܢܗܘܢ ܠܐ ܡܬܚܙܝܢܐ ܗ̱ܘ. ܘܐܦܢ ܡܩܦ ܢܩܝ̣ܦ ܠܢ ܘܡ̣ܢ ܠܒܪ ܘܡ̣ܢ ܠܓܘ. ܐܠܗܐ ܡܕܝܢ ܠܝܬ ܟܕ ܠܗ ܓܘܢܐ ܐܘ ܐܣܟܡܐ ܠܘ ܡܬܚܙܝܢܐ ܗ̱ܘ. ܘܕܠܝܬ ܠܗ ܗܠܝܢ ܓܠܝܐ. ܒܗ̇ܝ ܕܗܠܝܢ ܠܓܘ̈ܫܡܐ ܗ̣ܘ ܒܠܚܘܕ ܢܩܝ̣ܦܝܢ. ܗ̣ܘ ܕܝܢ ܠܐ ܓܫܘܡ ܗ̣ܘ.

 

 

 

ܢܝܫܐ ܕܬܪܝܢ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܐܡܪ ܡܪܝܐ ܠܡܘܫܐ. ܠܐ ܡܫܟܚ ܐܢ̱ܬ ܠܡܚܙܐ ܐܦܝ̈. ܡܛܠ ܚܙܐ ܠܝ ܒܪܢܫܐ ܘܚܝܐ. ܘܬܚܙܐ ܒܣܬܪܝ ܘܐܦܝ̈ ܠܐ ܢܬܚܙ̈ܝܢ.

 

 

 

ܣܗܕܘܬܐ ܕܬܪܬܝܢ

 

ܒܣܒܪܬܐ. ܐܠܗܐ ܠܐ ܚܙܐ ܐ̱ܢܫ ܡܡܬܘܡ. ܗ̣ܘ ܒܪܐ ܐܡ̣ܪ.

 

 

 

ܣܗܕܘܬܐ ܕܬܠܬ

 

ܕܝܢܢܘܣܝܘܣ ܕܐܪܝܘܦܐܓܝܛܘܣ. ܐܟܙܢܐ ܓܝܪ ܕܠܐ ܡܬܕܪ̈ܟܢܝܬܐ ܘܠܐ ܡܬܚܙܝܢ̈ܝܬܐ ܐܝܬܝܗܝܢ ܠܡܬܪ̈ܓܫܢܐ ܗܠܝܢ ܡܬܝܕ̈ܥܢܝܬܐ. ܘܠܗ̇ܢܘܢ ܕܒܓܒܝ̣ܠܬܐ ܘܛܘܦܣܐ ܗܠܝܢ ܦܫܝ̈ܛܬܐ ܘܠܐ ܡܛܦ̈ܣܬܐ. ܘܠܗ̇ܢܘܢ ܕܒܐܣ̈ܟܡܐ ܘܓܘ̈ܫܡܐ ܡܨܠܡܝ̣ܢ ܠܐ ܕܡ̣ܘܬܗܘܢ ܠܐ ܡܬܓܫܫܢܝ̣ܬܐ ܘܠܐ ܡܣܟܡܬܐ ܕܠܐ ܓܫܝ̈ܡܐ.

 

 

 

ܣܗܕܘܬܐ ܕܐܪܒܥ

 

ܗ̣ܘ ܟܕ ܗ̣ܘ. ܘܐܢ ܐ̱ܢܫ ܟܕ ܚܙܐ ܠܐܠܗܐ. ܐܣܬܟܠ ܠܗܘ ܡܐ ܕܚܙܐ. ܠܐ ܗܘܐ ܠܗ ܚܙܐ. ܐܠܐ ܠܡܕܡ ܡ̣ܢ ܗܠܝܢ ܕܝܠܗ.

 

 

 

ܣܗܕܘܬܐ ܕܚܡܫ

 

ܗ̣ܘ ܟܕ ܗ̣ܘ. ܥܪܦܠܐ ܐܠܗܝܬܐ ܐܝܬܝܗ̇. ܢܘܗܪܐ ܗ̇ܘ ܠܐ ܡܬܩܪܒܢܐ. ܕܒܗ ܡܬܐܡܪ ܕܥܡ̇ܪ ܐܠܗܐ. ܘܐܦ ܟܕ ܐܝܬܘܗܝ ܠܐ ܡܬܚܙܝܢܐ. ܡܛܠ ܢܗܝ̣ܪܘܬܗ ܡܥܠܝܬܐ.

 

 

 

ܣܗܕܘܬܐ ܕܫܬ

 

ܓܪܝܓܘܪܝܘܣ ܬܐܘܠܘܓܘܣ. ܘܐܝܟܢܐ ܗ̇ܘ ܕܠܐ ܣܟܐ ܘܠܐ ܡܬܚܡܐ. ܘܕܠܐ ܐܣܟܡܐ ܘܠܐ ܡܬܓܫܫܢܐ. ܘܠܐ ܡܬܚܙܝܢܐ. ܐܘ ܐܦ ܗܠܝܢ ܓܘ̈ܫܡܐ. ܐܘ ܡ̣ܢ ܫܘܠܛܢܐ. ܠܘ ܓܝܪ ܗܢܐ ܗ̱ܘ ܟܝܢܐ ܕܓܘܫܡܐ.

 

 

 

ܣܗܕܘܬܐ ܕܫܒܥ

 

ܗ̣ܘ ܟܕ ܗ̣ܘ. ܐܘ ܙܕܩ ܕܒܝܕ ܫܘܦܪܗܝܢ ܕܗܠܝܢ ܕܡܬܚܙ̈ܝܢ. ܘܒܝܕ ܡܛܟܣܘܬܗܝܢ ܠܐܠܗܐ ܢܫܬܘܕܥ. ܘܒܡܗܕܝܢܐ ܢܬܚܫܚ. ܒܚܙܬܐ ܕܗܠܝܢ ܕܠܥܠ ܡ̣ܢ ܚܙܬܐ.

 

 

 

ܣܗܕܘܬܐ ܕܬܡܢܐ

 

ܗ̣ܘ ܟܕ ܗ̣ܘ. ܘܟܡܐ ܐܢ ܣܓܝ ܢܦܪܘܫ ܗ̣ܘ ܠܗ ܗܘܢܢ ܡ̣ܢ ܗܠܝܢ ܕܡܬܚܙ̈ܝܢ܇ ܘܡܢܗ ܘܠܗ ܢܗܘܐ܇ ܟܕ ܣܥܐ ܕܢܬܩܪܒ ܠܘܬ ܐ̱ܚܝܢܘ̈ܗܝ ܘܗܠܝܢ ܕܠܐ ܡܬܚܙ̈ܝܢ.

 

 

 

ܣܗܕܘܬܐ ܕܬܫܥ

 

ܗ̣ܘ ܟܕ ܗ̣ܘ. ܗ̇ܘ ܡܠܬܐ ܕܐܠܗܐ. ܗ̇ܘ ܕܩܕܡ ܥܠܡܐ ܗ̣ܘ ܠܐ ܡܬܚܙܝܢܐ.

 

 

 

ܣܗܕܘܬܐ ܕܥܣܪ

 

ܩܕܝܫܐ ܐܘܓܪܝܣ ܗ̇ܘ ܕܐܝܬܘܗܝ ܒܕܡܘ̣ܬܐ ܕܐܠܗܐ ܕܠܐ ܡܬܚܙܐ. ܗܘܝܘ ܡܠܦܢܐ ܕܝ̣ܕܥܬܐ ܕܥܠܘܗܝ. ܗ̇ܢܘ ܕܝܢ ܠܘܬ ܟܠܗ ܟܝܢܐ ܡܠܝ̣ܠܐ ܕܗܘܐ ܒܨܠܡܗ.

 

 

 

ܣܗܕܘܬܐ ܕܝ̄ܐ

 

ܐܝܘܐܢܢܝܣ ܟܪܘܣܘܣܛܘܡܘܣ. ܢܝܩܪܝܘܗܝ ܗܟܝܠ ܢܝܩܪܝܘܗܝ ܠܗ̇ܘ ܠܐ ܡܬܦܫܩܢܐ. ܠܗ̇ܘ ܠܐ ܡܬܕܪܟܢܐ. ܠܗ̇ܘ ܠܐ ܡܬܚܙܝܢܐ܆ ܠܗ̇ܘ ܠܐ ܡܬܝܕܥܢܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܬܠܝܬܝܬܐ. ܡܛܠ ܗ̇ܢܘܢ ܕܡܬܚܙܝܢܐ ܡܘܕܝܢ ܠܗ ܠܒܪܘܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܗܘܢ ܚܘܫܒܝܐ ܕܗܠܝܢ

 

ܐܡܪܝܢ ܕܓܘܫܡܐ ܘܓܕܫܐ ܫܘܝܢ ܐܢܘܢ ܒܡܟܢܘܬܐ ܡܬܚܙܝܢܘܬܐ. ܘܗ̣ܝ ܗܕܐ ܡܟܢܘܬܐ ܕܓܘܝܐ ܠܬܪ̈ܝܗܘܢ. ܡ̣ܢ ܐܢܢܩܝ̣ ܥܠܬܐ ܙܕܩ ܕܬܗܘܐ ܠܗ̇ ܗܟܘܬ ܕܓܘܢܝܐ ܠܬܪ̈ܝܗܘܢ. ܘܗ̣ܝ ܗܕܐ ܐܘ ܡܫܪܝܢܘܬܐ ܐܝܬܝܗ̇ ܐܘ ܐܝܬܘܬܐ. ܘܠܐ ܡܨܝܐ ܕܡܫܪܝܢܘܬܐ ܬܗܘܐ. ܒܗ̇ܝ ܕܡܫܪܝܢܘܬܐ ܥܠ ܐܝܬܘܬܗ ܕܡܕܡ ܒܬܪ ܗ̇ܝ ܕܠܐ ܐܝܬܘܗܝ ܗܘܐ ܡܫܘܕܥܐ. ܡܕܝܢ ܠܐ ܐܝܬܘܬܐ ܡܥܠ ܥܐܠܐ ܒܣܘܟܠܗ̇. ܘܟܠ ܕܠܐ ܐܝܬܘܬܐ ܒܣܘܟܠܗ ܥܐܠܐ. ܠܐ ܡܨܐ ܠܡܗܘܐ ܥܠܬܐ ܐܝܬܘܬܢܝܐ ܡܕܡ ܐܟܙܢܐ ܕܡܬܚܙܝܢܘܬܐ. ܫܪܝ̣ܟܐ ܡܕܝܢ ܕܐܝܬܘܬܐ ܗ̣ܝ ܬܗܘܐ ܥܠܬ݀ ܡܬܚܙܝܢܘܬܗܘܢ ܕܓܘܫܡܐ ܘܓܕܫܐ. ܘܡ̣ܢ ܗܪܟܐ ܐܠܨܐ ܕܟܪ ܕܬܫܬܟܚ ܗ̣ܝ܆ ܬܫܬܟܚ ܘܗ̇ܝ. ܘܐܝܬܘܬܗ ܕܒܪܘܝܐ ܒܐܡܝ̣ܢܘ ܐܝܬܝܗ̇. ܡܕܝܢ ܘܡܬܚܙܝܢܘܬܗ ܒܐܡܝ̣ܢܘ ܙܕܩ ܕܬܗܘܐ. ܠܐ ܕܝܢ ܡܬܚܙܐ ܒܐܡܝ̣ܢܘ. ܟܒܪ ܕܝܢ ܡܛܠ ܡܚܝܠܘܬ ܚܙܝܐ ܕܗ̇ܘ ܕܚ̇ܙܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܕܗܠܝܢ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܣܠܩܘ ܡܘܫܐ ܘܐܗܪܘܢ ܘܢܕܒ ܘܐܒܝ̣ܗܘ. ܘܫܒܥܝܢ ܡ̣ܢ ܣܒ̈ܐ ܕܐܝܣܪܐܝܠ. ܘܚ̣ܙܘ ܠܐܠܗܐ ܕܐܝܣܪܐܝܠ.

 

 

 

ܣܗܕܘܬܐ ܕܬܪܬܝܢ

 

ܐܝܘܒ. ܠܫܡܥܐ ܗ̱ܘ ܕܐܕܢܐ ܫܡܥܬܟ. ܗܫܐ ܥܝܢܝ ܗܐ ܚܙܬܟ.

 

 

 

ܣܗܕܘܬܐ ܕܬܠܬ

 

ܗ̇ܝ ܕܡܢܘܚ ܠܐܢ̱ܬܬܗ. ܐܒ̣ܕܢܢ ܐܘ ܐܢ̱ܬܬܐ ܕܠܐܠܗܐ ܚܙܝܢܢ.

 

 

 

ܣܗܕܘܬܐ ܕܐܪܒܥ.

 

ܐܫܥܝܐ. ܘܠܡܠܟܐ ܡܪܝܐ ܚܝܠܬܢܐ ܚ̣ܙܝ̈ ܥܝ̈ܢܝ.

 

 

 

ܣܗܕܘܬܐ ܕܚܡܫ

 

ܚܙܩܝܐܝܠ. ܘܚܙܝܬ ܘܗܐ ܕܡܘ̣ܬܐ ܐܝܟ ܚܙܘܐ ܕܢܘܪܐ ܡ̣ܢ ܚܙܘܐ ܕܚܨܘ̈ܗܝ ܘܠܥܠ. ܚܙܝܬ ܐܝܟ ܚܙܘܐ ܕܙܗܪܐ. ܘܐܝܟ ܚܙܘܐ ܕܐܠܗܐ.

 

 

 

ܣܗܕܘܬܐ ܕܫܬ

 

ܡܝ̣ܟܐ. ܚܙܝܬ ܠܡܪܝܐ ܝܬܒ ܥܠ ܟܘܪܣܝܐ.

 

 

 

ܣܗܕܘܬܐ ܕܫܒܥ

 

ܥܡܘܣ. ܚܙܝܬ ܠܡܪܝܐ ܕܝ̣ܬܒ ܥܠ ܡܕܒܚܐ ܘܥܠ ܫܘܪܐ ܪܡܐ.

 

 

 

ܣܗܕܘܬܐ ܕܬܡܢܐ

 

ܕܢܝܐܝܠ. ܚܙܐ ܗܘܝܬ ܟܘܪ̈ܣܘܬܐ ܕܐܬܬܣܝ̣ܡܘ ܘܥܬܝ̣ܩ ܝܘ̈ܡܐ ܝ̣ܬܒ.

 

 

 

ܣܗܕܘܬܐ ܕܬܫܥ

 

ܒܣܒܪܬܐ. ܡ̇ܢ ܕܚܙܢܝ ܚܙܐ ܠܐܒܐ.

 

 

 

ܣܗܕܘܬܐ ܕܥܣܪ

 

ܒܗ̇ ܒܣܒܪܬܐ. ܛܘܒܝܗܘܢ ܠܐܝܠܝܢ ܕܕܟܝܢ ܒܠܒܗܘܢ. ܕܗ̣ܢܘܢ ܢܚܙܘܢ ܠܐܠܗܐ.

 

 

 

ܣܗܕܘܬܐ ܕܝ̄ܐ

 

ܦܘܠܘܣ. ܠܐ ܡܬܚܙ̈ܝܢܝܬܗ ܕܐܠܗܐ܆ ܡ̣ܢ ܬܪ̈ܡܝܬܗ ܕܥܠܡܐ ܒܣܘܟܠܐ ܡܬܚܙ̈ܝܢ.

 

 

 

ܣܗܕܘܬܐ ܕܝܒ̄

 

ܩܕܝܫܐ ܕܝܢܢܘܣܝܘܣ. ܐܡܬܝ ܕܠܐ ܡܝܘ̈ܬܐ ܘܠܐ ܢܗܘܐ ܡܬܚܒ̈ܠܢܐ. ܘܠܘܬ ܫܘܡܠܝܐ ܡܕܡܐ ܒܡܫܝ̣ܚܐ ܘܛܘܒܬܢܐ ܢܡܢܥ ܗܘܝܢܢ ܒܟܠ ܥܡ ܡܪܢ ܐܝܟ ܟܬܒܐ. ܘܡܬܡܠܝܢܢ ܡ̣ܢ ܡܬܚܙܝܢܘܬܐ ܕܡܬܓܠܝܢܘܬܗ ܐܠܗܝܬܐ.

 

 

 

ܣܗܕܘܬܐ ܕܝܓ̄

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܘܙܕܩ ܕܟܕ ܡܪܚܩܝ̣ܢܢ ܡ̣ܢ ܗܠܝܢ܆ ܕܠܗ ܠܐܠܗܐ ܡܢܗ ܘܠܗ ܢܚܙܐ.

 

 

 

ܣܗܕܘܬܐ ܕܝܕ̄

 

ܐܘܓܪܝܣ. ܐܝܟܢܐ ܕܗܫܐ ܒܝܕ ܪ̈ܓܫܐ ܚܙܝܢܢ ܬܐܘܪܝܐ ܕܝܠܗܘܢ. ܘܗܟܢܐ ܡܐ ܕܝܬܝܪ ܐܬܕܟܝܢܢ܆ ܡܕܝ̣ܩܝ̣ܢܢ ܒܬܐܘܪܝܐ ܕܠܐ ܓܘܫ̈ܡܐ. ܘܡܐ ܕܬܠܝܬܐܝܬ ܐܬܕܟܝܢܢ܇ ܡܫܬܘܝܢܢ ܐܦ ܠܚܙܬܐ ܕܬܠܝܬܝܘܬܐ ܩܕܝܫܬܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܬܠܝܬܝܬܐ. ܡܛܠ ܣܬܘܪܝܐ ܕܬܪܥܝ̣ܬܐ ܡܘܕܝܬ݀ ܡܬܚܙܝܢܘܬܗ ܕܒܪܘܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪܝܐ ܕܣܥܝܗܘܢ ܚܘܫܒܝܐ ܘܠܘܩܒܠ ܣܥܝܗܘܢ ܡ̇ܢ ܚܘܫܒܝܐ ܗ̇ܘ ܕܐܣܪܚܘ. ܫܬܐ ܙܢܝ̈ܐ ܕܫܪ̈ܝܐ ܡܣܪܚܝ̣ܢܢ. ܫܪܝܐ ܩܕܡܝܐ

 

ܕܡܠܬܟܘܢ ܗ̇ܝ ܕܐܡ̇ܪܐ ܕܓܘܫܡܐ ܘܓܕܫܐ ܫܘܝܢ ܐܢܘܢ ܒܡܟܢܘܬ ܡܬܚܙܝܢܘܬܗܘܢ ܘܣܓܝ ܪܚܝ̣ܩܐ ܡ̣ܢ ܫܪܪܐ. ܒܗ̇ܝ ܕܓܘܫܡܐ ܒܡܨܥܝܘܬܗ ܕܓܘܢܐ ܡܬܚܙܐ. ܘܡܛܠ ܗܕܐ ܐܐܪ ܓܠܝ̣ܙ ܡܢܗ ܟܕ ܓܘܫܡܐ ܗܘ ܠܘ ܡܬܚܙܝܢܐ ܗ̱ܘ. ܘܡ̣ܢ ܗܪܟܐ ܝ̣ܕܝ̣ܥܐ ܕܠܐ ܫܘܝܢ ܐܢܘܢ ܓܘܫܡܐ ܘܓܕܫܐ ܒܡܟܢܘܬ ܡܬܚܙܝܢܘܬܐ. ܘܟܕ ܫܬܐܣܬܗ ܕܣܥܝܟܘܢ ܗܟܢܐ ܥܠ ܚܠܐ ܣܝ̣ܡܐ. ܠܐ ܡܩܒܠܐ ܗ̱ܘ ܣܘܢܦܪܝ̣ܣܡܐ ܕܟܢܫܬܘܢ. ܟܐܡܬ݀ ܒܪܘܝܐ ܡܬܚܙܝܢܐ ܗ̱ܘ.

 

 

 

ܫܪܝܐ ܬܪܝܢܐ

 

ܐܡܪܝܢܢ ܐܫܦܢܟܘܢ ܕܓܘܫܡܐ ܘܓܕܫܐ ܫܘܝܢ ܐܢܘܢ ܒܡܟܢܘܬ ܡܬܚܙܝܢܘܬܐ. ܐܠܐ ܡܛܠ ܡܢܐ ܐܡ̣ܪܬܘܢ ܕܗܕܐ ܡܟܢܘܬܐ ܒܕܓܘܢܝܐ ܡ̣ܢ ܬܪ̈ܝܗܘܢ. ܥܠ ܥܠܬܐ ܗܟܘܬ ܕܓܘܢܝܐ ܡ̣ܢ ܬܪ̈ܝܗܘܢ ܣܢܝ̣ܩܐ. ܘܐܝܟܢܐ ܠܐ ܝܕܥܝ̣ܬܘܢ ܕܚܕܐ ܘܗ̣ܝ ܟܕ ܗ̣ܝ ܣܥܘܪܘܬܐ ܥܠܬܢܝܬܐ ܡܨܝܐ ܕܬܗܘܐ ܕܥ̈ܠܬܐ ܡܫܚ̈ܠܦܬܐ ܒܟ̈ܝܢܐ ܕܡܫܚܠܦܝܢ. ܗܐ ܓܝܪ ܪܗܛܐ ܟܕ ܣܥܘܪܘܬܐ ܡܕܡ ܚܕܢܝܬ݀ ܙܢܐ ܗ̱ܝ. ܐܠܐ ܒܕܐܒܐ ܡ̇ܢ ܥܠܬܗ ܗ̇ܝ ܕܢܥܕܐ ܐܝܬܝܗ̇. ܒܥܪܒܐ ܗ̇ܝ ܕܠܐ ܢܬܬܥܕܐ.

 

 

 

ܫܪܝܐ ܬܠܝܬܝܐ

 

ܐܡܪܝܢܢ ܐܫܦܢܟܘܢ܆ ܕܥܠܬܢܐ ܓܘܢܝܐ ܥܠ ܥܠܬܐ ܕܓܘܢܝܐ ܣܢܝ̣ܩ. ܐܠܐ ܡܛܠ ܡܢܐ ܐܡ̣ܪܬܘܢ ܕܗ̣ܝ ܥܠܬܐ ܐܘ ܡܫܪܝܢܘܬܐ ܐܝܬܝܗ̇ ܐܘ ܐܝܬܘܬܐ. ܘܠܘ ܡܕܡ ܐ̱ܚܪܝܢ. ܘܐܢ ܬܐܡܪܘܢ ܕܠܐ ܐܕܪܟܢܢ ܡܕܡ ܐ̱ܚܪܝܢ. ܐܡܪܝܢܢ ܕܠܐ ܐܠܨܐ ܡ̣ܢ ܓܠܝ̣ܙܘܬ ܡܕܪܟܢܘܬܟܘܢ. ܓܠܝ̣ܙܘܬܗ ܕܝܠܗ ܕܗ̇ܘ ܡܕܡ ܒܝܬܗ. ܘܠܐ ܥܛܠܐ ܥܠ ܐܡܘܪܐ ܐ̱ܢܫ ܕܢܐܡܪ. ܕܠܐ ܡܫܪܝܢܘܬܐ ܐܝܬܝܗ̇ ܥܠܬܐ ܐܦܠܐ ܐܝܬܘܬܐ ܦܫܝ̣ܛܐܝܬ܇ ܐܠܐ ܡܬܡܨܝܢܘܬ ܐܝܬܘܬܐ. ܘܟܕ ܐܝܬܘܬܗ ܕܒܪܘܝܐ ܠܘ ܡܬܡܨܝܢܝ̣ܬܐ ܗ̣ܝ ܐܠܐ ܐܠܨܝܬܐ ܠܘ ܡܬܚܙܝܢܐ ܗ̱ܘ. ܘܕܦܪܝ̣ܫܝ̣ܢ ܡ̣ܢ ܚܕ̈ܕܐ ܡܬܡܨܝܢܘܬܐ ܘܡܫܪܝܢܘܬܐ ܓܠܝܐ. ܒܗ̇ܝ ܕܡܫܪܝܢܘܬܐ ܠܗܘܝܗ ܕܡܕܡ ܒܬܪ ܗ̇ܝ ܕܠܐ ܐܝܬܘܗܝ ܗܘܐ ܡܫܘܕܥܐ. ܘܡܬܡܨܝ̣ܢܘܬܐ ܠܗ̇ܝ ܕܡ̣ܢ ܐ̱ܚܪܝܢ ܬܗܘܐ ܠܗ ܠܡܕܡ ܐܝܬܘܬܐ܆ ܒܠܥܕ ܬܘܚܡܐ ܗ̇ܘ ܕܡ̣ܢ ܒܬܪ ܗ̇ܝ ܕܠܐ ܐܝܬܘܗܝ ܗܘܐ. ܘܡ̣ܢ ܗܪܟܐ ܝ̣ܕܝ̣ܥܐ ܕܟܠ ܡܫܪܝܢܐ ܡܬܡܨܝܢܐ. ܘܠܘ ܟܠ ܡܬܡܨܝܢܐ ܡܫܪܝܢܐ ܒܣܘܟܠܐ. ܘܐܦܢ ܒܗܠܝܢ ܕܫܟܝ̣ܚܝ̣ܢ ܒܡܥܒܕܢܘܬܐ ܟܠ ܡܬܡܨܝܢܐ ܡܫܪܝܢܐ ܠܦܘܬ ܪܥܝܢܐ ܬܪܝ̣ܨ ܫܘܒܚܐ ܕܥܕܬܐ ܩܕܝܫܬܐ. ܒܗ̇ܝ ܕܐܠܗܐ ܣܓܝܕ ܐܝܩܪܗ. ܠܟܠܗܝܢ ܗܠܝܢ ܕܐܝܬܝܗܝܢ ܡ̣ܢ ܠܐ ܐܝܬܘܬܐ ܠܗܘܝܐ ܐܝܬܝ ܐܢܝܢ.

 

 

 

ܫܪܝܐ ܪܒܝܥܝܐ

 

ܐܡܪܝܢܢ ܐܫܦܢܟܘܢ ܕܥܠܬ݀ ܡܟܢܘܬ ܡܬܚܙܝܢܘܬܐ ܐܘ ܡܫܪܝܢܘܬܐ ܐܝܬܝܗ̇ ܐܘ ܐܝܬܘܬܐ ܘܠܘ ܡܕܡ ܐ̱ܚܪܝܢ܇ ܐܠܐ ܡܛܠ ܡܢܐ ܐܡ̣ܪܬܘܢ ܕܡܫܪܝܢܘܬܐ ܠܐ ܠܚܡܐ ܕܬܗܘܐ ܥܠܬܐ. ܒܥܠܬ݀ ܗ̇ܝ ܕܠܐ ܐܝܬܘܬܐ ܥܐܠܐ ܒܣܘܟܠܗ̇. ܘܐܝܟܢܐ ܠܐ ܡܬܒܝܢܝ̣ܢ ܐܢ̱ܬܘܢ ܕܡܫܪܝܢܘܬܐ ܠܐ ܡܫܪܐ ܥܠ ܡܫܪܝܢܐ. ܐܠܐ ܡ̣ܢ ܫܘܪܝ ܙܒܢܐ ܕܗܘܝܗ. ܘܓܠܝܐ ܕܒܗ ܒܗ̇ܘ ܙܒܢܐ܆ ܠܐ ܡܨܝܐ ܕܠܐ ܐܝܬܘܬܐ ܬܥܘܠ ܒܣܘܟܠܗ ܕܡܫܪܝܢܐ. ܘܠܦܘܬ ܗܢܐ ܪܥܝܢܐ܇ ܒܪܘܝܐ ܟܕ ܠܘ ܡܫܪܝܢܐ ܗ̱ܘ. ܠܘ ܡܬܚܙܝܢܐ ܗ̱ܘ.

 

 

 

ܫܪܝܐ ܚܡܝܫܝܐ

 

ܐܡܪܝܢܢ ܐܫܦܢܟܘܢ ܕܐܝܬܘܬܐ ܗ̣ܝ ܗ̣ܝ ܥܠܬ݀ ܡܬܚܙܝܢܘܬܐ. ܐܠܐ ܡܛܠ ܡܢܐ ܐܡ̣ܪܬܘܢ. ܕܟܪ ܕܬܫܬܟܚ ܘܥܠܬܢܐ. ܗܕܐ ܓܝܪ ܐܠܨܐ. ܟܕ ܠܐ ܢܫܬܟܚ ܗ̇ܘ ܕܚܓܪ ܘܟܠܐ. ܗܐ ܓܝܪ ܫܡܫܐ ܡܘܥܝܢܐ ܗ̱ܘ ܕܙܪ̈ܥܘܢܐ. ܘܡܪܒܝܢܐ ܕܐܝܠܢ̈ܐ. ܐܠܐ ܟܕ ܠܐ ܢܗܘܐ ܣܬܘܐ. ܗ̇ܘ ܕܚܓܪ ܘܟܠܐ. ܒܕܓܘܢ ܐܦܢ ܫܟܝ̣ܚܐ ܐܝܬܘܬܐ ܗ̇ܝ ܕܥܠܬܗ̇ ܗ̣ܝ ܕܡܬܚܙܝܢܘܬܐ ܐܝܟ ܪܥܝܢܟܘܢ ܠܒܪܘܝܐ. ܐܠܐ ܠܘ ܠܐ ܡܨܝܐ ܕܥ̈ܠܬܐ ܢܫܬܟ̈ܚܢ ܟܠܘ̈ܝܬܐ ܒܝܬܗ. ܗ̇ܢܝܢ ܕܚܓܪ̈ܢ ܠܡܬܚܙܝܢܘܬܗ ܣܓܝܕ ܐܝܩܪܗ. ܘܡܛܠܗܕܐ ܠܐ ܡܬܚܙܝܢܐ ܗ̱ܘ.

 

 

 

ܫܪܝܐ ܫܬܝܬܝܐ

 

ܐܫܦܢܟܘܢ ܕܠܝܬ ܥܠܬܐ ܕܟܠܝܐ. ܐܠܐ ܡܨܝܐ ܕܗ̣ܝ ܡܬܚܙܝܢܘܬܐ ܠܐ ܡܨܝܐ ܕܬܗܘܐ ܐܠܐ ܒܝܕ ܫܟܝ̣ܚܘܬ ܙܢܐ ܐܝܢܐ ܕܠܐ ܡܨܐ ܠܡܩܦ ܠܟܝܢܗ ܕܒܪܘܝܐ. ܘܗ̣ܘ ܗܢܐ ܙܢܐ ܐܝܟ ܡܬܛܒܥܢܘܬ ܝܬܗ ܒܒܒܬܐ ܕܗ̇ܘ ܕܚܙܐ. ܐܘ ܕܝܐܡܛܪܘܬ ܣܝܡܗ. ܘܡ̣ܢ ܗܪܟܐ ܠܐ ܡܬܡܨܝܢܝ̣ܬܐ ܗ̱ܝ ܡܬܚܙܝܢܘܬܗ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕ̈ܘܬܐ ܗ̇ܢܝܢ ܕܡ̣ܢ ܥܬܝܩܬܐ ܟܢܝ̣ܫܐܝܬ

 

ܐܡܪܝܢܢ ܕܚܢܢ ܐܡ̣ܪܢܢ ܕܒܪܘܝܐ ܒܟܝܢܗ܇ ܐܘܟܝܬ ܒܗ̇ܝ ܕܗ̣ܘ ܐܝܬܘܗܝ܆ ܠܐ ܡܬܚܙܝܢܐ ܗ̱ܘ. ܐܝܢ ܕܒܐܣܟܡܐ ܡܕܡ ܓܘܫܡܢܝܐ ܢܬܚܙܐ ܠܗ̇ܢܘܢ ܕܨܒܐ ܠܐ ܟܦܪܝ̣ܢܢ. ܗܐ ܓܝܪ ܗ̣ܘ ܫܘܒܚܐ ܠܛܝܒܘܬܗ. ܠܗ̇ ܠܗܕܐ ܫܘܕܥܗ̇ ܒܦܘܡ ܢܒܝܐ ܕܐܡ̣ܪ. ܐܢܐ ܚܙ̈ܘܢܝ ܐܣܓܝܬ. ܘܒܐܝܕܐ ܕܢܒܝ̈ܐ ܐܬܕܡܝܬ. ܘܕܗ̣ܝ ܚܙܬܗܘܢ ܕܢܒܝ̈ܐ ܗܓܓܢܝܬܐ ܗܘܬ݀ ܘܠܘ ܟܝܢܝܬܐ ܓܠܝܐ. ܡ̣ܢ ܗ̇ܝ ܕܟܠܚܕ ܡܢܗܘܢ ܒܛܘܦܣܐ ܡܕܡ ܚܙܝܗܝ. ܐܦ ܓܝܪ ܘܩܕܝܫܐ ܬܐܘܠܘܓܘܣ ܡܦܫܩ ܠܗ̇ܝ ܕܡܢܘܚ ܘܐܡ̇ܪ. ܕܟܕ ܒܗܓܓܘܬܐ ܗܘ̣ܘ ܕܐܠܗܐ ܐܣܒ̣ܪܘ ܕܠܐܠܗܐ ܚ̣ܙܘ. ܟܐܡܬ݀ ܒܫܪܪܐ ܠܘ ܠܗ ܚ̣ܙܘ. ܐܠܐ ܛܟ ܡܕܡ ܡ̣ܢ ܗܠܝܢ ܕܝܠܗ. ܐܝܟ ܛܠܢܝ̣ܬܐ ܡ̣ܢ ܓܘܫܡܐ. ܐܡ̇ܪ ܐ̱ܢܐ ܕܝܢ ܟܐܢܐܝܬ ܕܐܦܠܐ ܥܕܡܐ ܠܗܕܐ ܐܬܡܛܝ̣ܘ. ܘܬܘܒ ܐܡܪܝܢܢ ܕܚܙܬܐ ܐܝܬ ܐܡܬܝ ܕܥܠ ܫܡܥܐ ܡܬܩܪܓܐ ܒܟܬܒ̈ܐ ܩܕܝ̈ܫܐ. ܐܝܟ ܗ̇ܝ ܕܐܫܥܝܐ ܢܒܝܐ ܕܐܡ̣ܪ. ܦܬܓܡܐ ܕܚ̣ܙܐ ܐܫܥܝܐ ܒܪ ܐܡܘܨ. ܘܓܠܝܐ ܕܦܬܓܡܐ ܡܫܬܡܥ ܘܠܘ ܡܬܚܙܐ. ܒܕܓܘܢ ܡܨܝܐ ܕܐ̱ܢܫܝ̈ܢ ܡ̣ܢ ܢܒܝ̈ܐ. ܟܕ ܡ̈ܠܐ ܡܕܡ ܐܠܗܝ̈ܬܐ ܫܡ̣ܥܘ ܡ̣ܢ ܐܠܗܐ܆ ܐܡ̣ܪܘ ܕܠܐܠܗܐ ܚ̣ܙܘ.

 

 

 

ܦܘܢܝܐ ܕܣܗܕ̈ܘܬܗܘܢ ܗܠܝܢ ܕܡ̣ܢ ܚܕܬܐ ܟܢܝ̣ܫܐܝܬ

 

ܙܕܩ ܠܡܕܥ ܕܒܪܬ݀ ܩܠܐ ܕܚܙܬܐ. ܒܙܒܢ ܡ̇ܢ ܟܠ ܚܙܬܐ ܕܥܝ̈ܢܐ ܦܓܪ̈ܢܝܬܐ ܡܬܐܡܪܐ܆ ܘܒܙܒܢ ܥܠ ܚܙܬܐ ܕܥܝ̈ܢܐ ܗܘܢܢ̈ܝܬܐ. ܐܝܟ ܕܐܡ̣ܪ ܩܕܝܫܐ ܐܘܓܪܝ̣ܣ. ܕܚܙܬܐ ܕܗܘ̈ܢܐ ܐܝܟ ܕܐܝܬܝܗ̇ ܒܫܪܪܐ. ܐܘ ܗܘܢܐ ܕܟܝܐ ܚܙܐ. ܐܘ ܡܠܬܐ ܕܚܟܝ̣̈ܡܐ ܡܫܘܕܥܐ. ܘܕܚܙܬܐ ܗ̇ܝ ܕܒܚܕܬܐ ܐܡܝ̣ܪܐ. ܠܗ̇ܝ ܕܗܘܢܐ ܪܡܙܐ. ܝ̣ܕܝ̣ܥܐ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܗ̇ܝ ܕܐܡ̣ܪ ܡܪܢ. ܕܡ̇ܢ ܕܚܙܢܝ ܚܙܐ ܠܐܒܐ܆ ܘܐܠܘ ܠܚܙܬܐ ܪܓܫܢܝܬܐ ܒܥܐ ܗܘܐ. ܙܕܩ ܗܘܐ ܕܟܠܗܘܢ ܚܙܝܘ̈ܗܝ ܕܒܪܐ܆ ܚܙܘ̈ܝܐ ܗܘ̣ܘ ܗ̣ܘܘ ܐܦ ܕܐܒܐ. ܘܐܠܘ ܗܕܐ ܗܘܬ݀ ܗܘܬ݀ ܠܗܘܢ. ܐܝܟܢܐ ܐܡ̣ܪܘ ܠܒܪܐ. ܕܚܘܐ ܠܢ ܠܐܒܐ ܘܣܦܩ ܠܢ. ܘܟܕ ܛܒ ܠܘ ܠܐ ܚܙܝܢ ܗܘܘ ܠܒܪܐ. ܗ̇ܢܘܢ ܕܗܕܐ ܠܘ ܫܐܠܘ. ܕܬܪܬܝܢ ܕܝܢ܆ ܡ̣ܢ ܗ̇ܝ ܕܐܠܘ ܚܙܬܐ ܪܓܫܢܝܬܐ ܗܘܬ݀ ܗ̇ܝ ܕܡܬܐܡܪܐ. ܠܘ ܠܕܟ̈ܝܝ ܒܠܒܗܘܢ ܛܘܒܐ ܝܗܒ ܗܘܐ ܡܪܢ. ܐܠܐ ܡܠܘܢ ܠܗ̇ܢܘܢ ܕܕܟܝܢ ܒܥܝܢܝ̈ܗܘܢ. ܘܒܝܕ ܗܠܝܢ ܬܘܒ ܕܠܝ̣ܠܐܝܬ ܡܬܕܟܐ ܫܘܐܠܐ ܗ̇ܘ ܫܩܝ̣ܦܝܐ܆ ܕܒܗ ܐܬܬܩܒܠܘ ܢܣܛܘܪ̈ܝܢܘ܆ ܒܙܒܢܗ ܕܛܝܡܬܐܘܣ ܩܬܘܠܩܗܘܢ. ܟܕ ܐ̱ܢܫܝ̈ܢ ܡܢܗܘܢ ܐܡ̣ܪܘ ܕܡܚܙܐ ܚܙܝܐ ܐ̱ܢܫܘܬܗ ܕܡܪܢ ܠܐܠܗܘܬܗ. ܐ̱ܢܫܝ̈ܢ ܕܝܢ ܕܠܐ. ܘܐܠܘ ܐܬܗܕܝ̣ܘ ܠܘܬ ܦܘܪܫܐ ܕܥܝ̈ܢܐ ܦܓܪ̈ܢܝܬܐ ܕܠܐ ܡܟܢ̈ܢ ܠܡܚܙܐ ܡܕܡ ܠܐ ܓܫܝ̣ܡܐ. ܡ̣ܢ ܥܝ̈ܢܐ ܢܦܫܢܝ̈ܬܐ ܕܠܘ ܠܐ ܡܟܢ̈ܢ. ܠܘ ܗܢܐ ܟܠܗ ܐܬܕܠܩܒܘ ܗܘܘ ܠܚ̈ܕܕܐ ܐܝܟܢܐ ܕܢܚܪܡܘܢ ܒܚܕܕ̈ܐ ܐܝ̣ܩܝ̣. ܠܗ̇ܝ ܓܝܪ ܕܪܘܚܢܐܝܬ ܢܚܙܘܢܝܗܝ ܠܐܠܗܐ ܐܝܟܢ ܕܗ̣ܘ. ܟܠܗܘܢ ܩܕܝ̈ܫܐ ܡܣܟܝܢ ܠܡܫܬܘܝܘ. ܘܟܕ ܠܒܢܝ̈ܢܫܐ ܫܚܝ̣̈ܡܐ ܕܐܝܟ ܗܠܝܢ ܕܒܙܢܐ ܡܕܡ ܐܬܓܡܪܘ. ܘܠܘ ܠܐ  ܡܬܡܨܝܢܐ ܗ̱ܘ ܙܢܐ ܗܢܐ ܕܚܙܘ̈ܝܘܗܝ. ܠܒܪܢܫܐ ܗ̇ܘ ܕܗܢܐ ܟܠܗ ܒܝܬܝ ܠܐܠܗܐ ܐܝܟܢܐ ܕܥܡܗ ܢܬܚܝܕ. ܡܢܘ ܡܓܡܕ ܕܠܐ ܡܬܡܨܝܢܐ ܢܕܘܢܝܘܗܝ.

 

 

 

ܩܦܠܐܘܢ ܫܒܝܥܝܐ ܕܫܬܐܣܬܐ ܬܠܝܬܝܬܐ. ܡܛܠ ܗ̇ܝ ܕܟܝܢܐ ܐܠܗܝܐ ܐܝܟ ܕܐܝܬܘܗܝ ܓܢܝ̣ܙܐ ܗ̱ܘ ܘܠܐ ܡܬܕܪܟܢܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܡ̣ܢ ܟܝܢܐ ܐܠܗܝܐ ܠܐ ܡܕܡ ܐܕܪܟܢܢ ܐܠܐ ܐܝܬܘܬܗ. ܘܟܕ ܐܬܚܫܒܢܢ ܕܡܬܡܨ̈ܝܢܐ ܟܠܗܘܢ ܡ̣ܢ ܐܠܨܝ ܐܝܬܘܬܐ ܐܝܬ ܠܗܘܢ ܗ̇ܝ ܕܢܗܘܘܢ. ܘܫܘܡܗܘ̈ܗܝ ܐܦܘܦܛܝ̈ܩܝܐ ܐܝܟ ܗ̇ܝ ܕܠܐ ܓܘܫܡܐ ܗ̱ܘ ܐܦܠܐ ܒܐܬܪܐ. ܘܠܝܬ ܠܗ ܣܩܘܒܠܝܐ ܐܦ ܓܝܪ ܘܫܘ̈ܡܗܐ ܗ̇ܢܘܢ ܩܛܦܛܝ̈ܩܝܐ ܐܦܘܦܛܝ̈ܩܝ ܣܘ̈ܟܠܐ ܐܢܘܢ. ܐܝܟ ܡܬܘܡܝܐ ܕܡܫܘܕܥ ܠܐ ܫܘܪܝܐ. ܘܐܝܟ ܠܥܠܡܝ̣ܢܝܐ ܕܡܫܘܕܥ ܠܠܐ ܫܘܠܡܐ. ܘܐܝܟ ܚܝ̈ܐ ܕܡܫܘܕܥܝ̣ܢ ܠܠܐ ܡܝܘܬܘܬܐ. ܘܐܝܟ ܚܝܠܐ ܕܡܫܘܕܥ ܠܠܐ ܬܚܘܒܘܬܐ. ܘܦܚܡܘ̈ܗܝ ܠܘܬ ܡܕ̈ܡܝܐ ܐܘܟܝ̣ܬ ܐ̱ܚܝܢ̈ܝܐ. ܐܝܟ ܫܡ ܒܪܘܝܐ ܕܡܫܘܕܥ ܕܡܢܗ ܗ̣ܝ ܫܟܝ̣ܚܘܬ ܗ̇ܢܘܢ ܕܣܛܪ ܡܢܗ. ܘܐܝܟ ܚܟܡܬܐ ܕܡܫܘܕܥܐ ܡܫܡܠܝܘܬ ܥܒܕܘ̈ܗܝ ܘܬܩܢܘܬܗܘܢ. ܐܘܟܝ̣ܬ ܡܫܬܬܘܕܥܐ ܡܢܗܝܢ ܘܓܠܝܐ ܕܣܛܪ ܡ̣ܢ ܗܠܝܢ ܬܠܬܐ ܙܢܝ̈ܐ ܠܐ ܡܕܪܟܝ̣ܢܢ ܡܕܡ ܡܢܗ ܣܓܝܕ ܐܝܩܪܗ. ܘܕܗ̣ܢܘܢ ܗܠܝܢ ܠܐ ܣܦܩܝ̣ܢ ܠܡܫܘܕܥܘ ܟܝܢܗ. ܝ̣ܕܝ̣ܥܐ ܡ̣ܢ ܗ̇ܝ ܕܟܕ ܡܬܚܫܒܝ̣ܢܢ ܒܗܘܢܢ ܠܐ ܡܕܡ ܝܬܝ̣ܪܐ ܡܕܪܟܝ̣ܢܢ ܡ̣ܢ ܗ̇ܝ ܕܟܝܢܐ ܡܕܡ ܐܝܬܘܗܝ ܕܩܢܐ ܗܠܝܢ ܫܘ̈ܡܗܐ ܘܦܚ̈ܡܐ ܐ̱ܚܝܢܝܐ. ܐܝܢ ܕܡܢܐ ܗ̱ܝ ܡܢܝܘܬܗ ܐܘܟܝ̣ܬ ܟܝܢܗ ܠܐ ܣܟ ܡܕܪܟܝ̣ܢܢ. ܐܝܟ ܗ̇ܝ ܕܟܕ ܚܙܝܢܢ ܢܬܝ̣ܦܘܬܗ ܕܦܪܙܠܐ ܡ̣ܢ ܡܓܢܛܝ̣ܣ. ܝ̇ܕܥܝ̣ܢܢ ܚܬܝܬܐܝܬ ܕܡܓܢܛܝ̣ܣ ܟܝܢܐ ܡܕܡ ܐܝܬܘܗܝ ܕܡܟܢ ܠܡܬܦ ܠܦܪܙܠܐ. ܘܐܦܢ ܠܐ ܢܬܩܪܒ ܠܗ. ܐܝܢ ܕܡܢܐ ܗ̱ܘ ܟܝܢܗ܇ ܟܐܦܐ ܐܪܐ ܐܘ ܦܪܙܠܐ ܐܘ ܩܝܣܐ. ܐܘ ܓܒܝ̣ܠܐ ܡܕܡ ܐܘ ܠܘ ܗܟܢܐ. ܠܘ ܡܢܗ̇ ܕܢܬܘܦܘܬܗ ܕܠܦܪܙܠܐ ܡܨܝܢܢ ܠܡܫܬܘܕܥܘ. ܐܠܐ ܡ̣ܢ ܚܘܪܐ ܘܓܫܬܐ ܘܒܘܝܢܐ. ܗܟܢܐ ܡܕܝܢ ܐܦ ܗܠܝܢ ܕܐܠܗܐ ܙܕܩ ܠܡܫܬܘܕܥܘ. ܘܠܗ̇ ܠܗܕܐ ܡܫܘܕܥ ܩܕܝܫܐ ܓܪܝܓܘܪܝܘܣ ܟܕ ܐܡ̇ܪ. ܠܘ ܓܝܪ ܗܢܐ ܗ̱ܘ ܠܗ ܟܝܢܐ ܦܫܝ̣ܛܘܬܐ: ܐܢܗܘ ܕܐܦܠܐ ܠܡܪ̈ܟܒܐ ܒܠܚܘܕ ܗ̇ܝ ܕܐܝܬܝܗܘܢ ܡܪ̈ܟܒܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܬܪܝܢ ܐܢܘܢ ܡܕܪ̈ܟܢܐ ܕܒܢ. ܪܓܫܐ ܘܗܘܢܐ. ܪܓܫܐ ܡ̇ܢ ܕܡܬܪ̈ܓܫܢܐ ܐܝܟ ܓܘ̈ܢܐ ܘܩ̈ܠܐ ܘܪ̈ܝ̣ܚܢܐ ܘܛܥܘ̈ܡܐ ܘܫܪܟܐ. ܗܘܢܐ ܕܝܢ ܕܡܬܝܕ̈ܥܢܐ ܐܝܟ ܗ̇ܝ ܕܟܠܐ ܪܒ ܡ̣ܢ ܡܢܬܐ. ܘܬܪܝܢ ܘܬܪܝܢ ܠܐ ܡܨܝܢ ܕܢܫܡܠܘܢ ܚܡܫܐ. ܘܓܠܝܐ ܕܗܢܐ ܙܢܐ ܙܢܐ ܬܪܝܢܐ ܢܒܓܐ ܗ̱ܘ ܕܗ̇ܘ ܩܕܡܝܐ. ܘܩܕܡܝܐ ܫܬܐܣܬܗ ܗ̣ܘ ܒܗ̇ܝ ܕܐܠܘܠܐ ܚܙܝܢܢ ܒܥܝܢܢ ܠܟܠܐ ܘܠܡܢܬܐ ܠܐ ܐܬܡܨܝ̣ ܗܘܢܢ ܠܡܚܪܩ ܕܟܠܐ ܪܒ ܡ̣ܢ ܡܢܬܐ. ܟܝܢܐ ܡܕܝܢ ܕܒܪܘܝܐ ܟܕ ܠܐ ܡܬܕܪܟܢܐ ܗ̱ܘ ܠܡܕܡ ܡ̣ܢ ܪ̈ܓܫܝܢ. ܐܦܠܐ ܠܗܘܢܝ̈ܢ ܡܨܐ ܠܡܬܕܪܟܘ܆ ܪܓܫܐ ܓܝܪ ܠܘܬ ܗ̇ܝ ܕܐܝܬܘܗܝ ܒܠܚܘܕ ܡܣܝܥ ܠܗ ܠܗܘܢܐ ܕܢܕܪܟ. ܟܕ ܡ̣ܢ ܚܙܝܐ ܕܒܪ̈ܝܬܐ܆ ܡܬܥܠܐ ܠܘܬ ܫܟܝ̣ܚܘܬܐ. ܕܒܪܘܝܗܝܢ. ܐܝܟ ܠܘܬ ܗ̇ܝ ܕܢܕܪܟ ܕܡܢܐ ܐܝܬܘܗܝ. ܘܠܐ ܣܟ.

 

 

 

ܡܚܘܝܢܘܬܐ ܕܬܠܬ

 

ܙܢܝ̈ܐ ܗܠܝܢ ܕܡܬܕܪܟܝ̣ܢ ܠܢ ܡܢܗ ܕܒܪܘܝܐ. ܠܐ ܟܠܐ ܣܘܟܠܗܘܢ ܡ̣ܢ ܗ̇ܝ ܕܢܫܬܘܬܦܘܢ ܒܗ ܣܓܝ̈ܐܐ. ܘܐܠܐ ܠܐ ܐܣܬܢܩܢܢ ܠܡܫܬܪܪܘ ܚܕܢܝܘܬ ܟܝܢܗ ܒܝܕ ܐܦܘ̣ܕܝ̣ܟ̈ܣܝ̣ܣ. ܘܗ̣ܘ ܟܝܢܗ ܣܓܝ̣ܕܐ ܡ̣ܢ ܐܢܢܩܝ̣ ܟܠܐ ܣܘܟܠܗ ܡ̣ܢ ܗ̇ܝ ܕܢܫܬܘܬܦܘܢ ܒܗ ܣܓܝ̈ܐܐ. ܘܗ̇ܘ ܕܠܐ ܟܠܐ ܐ̱ܚܪܝܢ ܗ̣ܘ ܡ̣ܢ ܗ̇ܘ ܕܟܠܐ. ܡܕܝܢ ܗܠܝܢ ܕܡܬܕܪܟܝ̣ܢ ܠܢ. ܠܘ ܗ̣ܘ ܟܝܢܗ ܐܝܬܝܗܘܢ. ܟܝܢܗ ܡܕܝܢ ܓܢܝ̣ܙ ܗ̣ܘ ܡܢܢ ܘܠܐ ܡܬܕܪܟܢܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ ܣܗܕܘܬܐ ܩܕܡܝܬܐ

 

ܐܝܘܒ. ܗܐ ܐܠܗܐ ܬܩܝܦ ܗ̣ܘ: ܘܠܐ ܡܬܝܕܥ. ܘܠܡܡܢܐ ܫܢܘ̈ܗܝ ܠܝܬ ܣܘܦ.

 

 

 

ܣܗܕܘܬܐ ܕܬܪܬܝܢ

 

ܕܘܝܕ. ܐܬܕܡܪܬ݀ ܝܕܥܬܐ ܕܝܠܟ ܡܢܝ. ܐܬܥܫܢܬ݀ ܘܠܐ ܡܨܐ ܐ̱ܢܐ ܚܝܠܐ ܠܘܬܗ̇.

 

 

 

ܣܗܕܘܬܐ ܕܬܠܬ

 

ܒܪ ܣܝ̣ܪܟ. ܡܛܠ ܕܦܪܝ̣ܫܝ̣ܢ ܐܢܘܢ ܐ̱ܪ̈ܙܘܗܝ ܕܐܠܗܐ. ܘܡܛܫܝܢ ܡ̣ܢ ܒܢܝ̈ܢܫܐ ܥܒܕܘ̈ܗܝ. ܕܐܢܗܘ ܕܥܒܕܘ̈ܗܝ ܓܢܝ̣ܙܝ̣ܢ. ܟܡܐ ܡܕܝܢ ܟܝܢܗ.

 

 

 

ܣܗܕܘܬܐ ܕܐܪܒܥ

 

ܦܘܠܘܣ. ܐܝܢܘ ܓܝܪ ܒܪܢܫܐ ܕܝܕܥ ܕܒܒܪܢܫܐ. ܐܠܐ ܐܢ ܪܘܚܐ ܕܒܪܢܫܐ ܕܒܗ. ܘܗܟܢܐ ܐܦ ܕܒܐܠܗܐ ܐ̱ܢܫ ܠܐ ܝܕܥ. ܐܠܐ ܐܢ ܪܘܚܗ ܕܐܠܗܐ.

 

 

 

ܣܗܕܘܬܐ ܕܚܡܫ

 

ܕܝܢܢܘܣܝܘܣ. ܒܕܓܘܢ ܠܐ ܙܕܩ ܠܡܡܪܚܘ ܠܡܐܡܪ ܐܘ ܠܡܬܚܫܒܘ ܡܕܡ ܥܠ ܐܠܗܘܬܐ ܓܢܝ̣ܙܬܐ ܐܘ ܡܥܠܝܬ݀ ܡ̣ܢ ܐܘܣܝܐ܆ ܠܒܪ ܡ̣ܢ ܐܝܠܝܢ ܕܐܬܒܕܩ̈ܝ ܠܢ ܐܠܗܐܝܬ ܡ̣ܢ ܟܬܒ̈ܐ ܩܕܝ̈ܫܐ. ܠܝ̣ܕܥܬܐ ܓܝܪ ܕܡܥܠܝܘܬܐ ܕܝܠܗ̇ ܕܡ̣ܢ ܐܘܣܝܐ܆ ܗ̇ܝ ܕܪܡܐ ܡ̣ܢ ܡܠܬܐ ܘܗܘܢܐ. ܘܐܘܣܝܐ ܠܗ̇ ܢܬܠܝܗ̇. ܒܕ ܟܠܗ ܗܢܐ ܡܬܡܬܚܝ̣ܢܢ ܠܥܠ. ܠܘܬ ܙܠܓ̈ܐ ܡܥܠܝ̈ܐ܆ ܐܝܟ ܟܡܐ ܕܝܗܒ ܗ̣ܘ ܠܗ܇ ܙܠܝ̣ܩܐ ܕܡ̈ܠܐ ܕܪܝ̣ܫܘܬ ܐܠܗܘܬܐ.

 

 

 

ܣܗܕܘܬܐ ܕܫܬ

 

ܓܪܝܓܘܪܝܘܣ ܬܐܘܠܘܓܘܣ. ܗ̇ܝ ܕܝܢ ܕܣܘܥܪܢܐ ܕܐܝܟ ܗܢܐ ܟܠܗ ܒܬܪܥܝ̣ܬܐ ܢܣܬܝܟ ܟܠ ܟܠܗ ܠܐ ܡܨܝܐ. ܘܕܠܐ ܦܘܪܣܐ ܗ̱ܝ. ܠܘ ܠܡܥܫ̈ܩܐ ܘܠܐܝܠܝܢ ܕܠܬܚܬ ܚܝܪܝ̣ܢ ܒܠܚܘܕ. ܐܠܐ ܘܠܗ̇ܢܘܢ ܕܣܓܝ ܡܥܠܝܢ ܘܪ̈ܚܡܝ ܐܠܗܝ̈ܬܐ. ܘܣܟ ܠܟܠܗ ܟܝܢܐ ܥܒܝ̣ܕܐ.

 

 

 

ܣܗܕܘܬܐ ܕܫܒܥ

 

ܐܘܓܪܝܣ. ܟܠܡܕܡ ܕܗ̣ܘܐ ܟܪܘܙܐ ܗ̱ܘ ܕܚܟܡܬܗ ܕܐܠܗܐ. ܠܝܬ ܕܝܢ ܡ̣ܢ ܟܠ ܕܗ̣ܘܐ܆ ܕܢܗܘܐ ܡܕܪܟܢܐ ܠܟܝܢܗ.

 

 

 

ܣܗܕܘܬܐ ܕܬܡܢܐ

 

ܗ̣ܘ ܟܕ ܗ̣ܘ. ܗ̇ܘ ܕܡ̣ܢ ܚܙܬܐ ܕܗܘ̈ܢܐ ܒܐܠܗܐ ܚܐܪ. ܠܘ ܠܟܝܢܗ ܚ̇ܙܐ. ܐܠܐ ܠܡܕܒܪܢܘܬܐ ܕܚܟܡܬܗ. ܘܐܢ ܗܕܐ ܗܟܢܐ ܐܝܬܝܗ̇. ܡܢܐ ܗ̱ܝ ܟܝ̣ܬ ܫܢܝܘܬܐ ܕܐܝܠܝܢ ܕܡܡܪܚܝ̣ܢ ܠܡܐܡܪ ܕܟܝܢܗ ܕܐܠܗܐ ܝ̇ܕܥܝܢ.

 

 

 

ܣܗܕܘܬܐ ܕܬܫܥ

 

ܐܝܘܐܢܢܝܣ. ܠܗܘ ܕܥܠܝ ܡ̣ܢ ܡܕܪܟܢܘܬܐ ܕܝܠܗ̇ ܕܡܚܫܒܬܐ ܕܡܝܘ̈ܬܐ. ܠܗ̇ܘ ܕܠܐ ܡܬܒܨܐ ܡ̣ܢ ܡܠܐܟ̈ܐ. ܠܗ̇ܘ ܕܠܐ ܡܬܥܩܒ ܡ̣ܢ ܪ̈ܒܝ ܡܠܐܟ̈ܐ. ܠܗ̇ܘ ܕܠܐ ܡܬܕܪܟ ܡ̣ܢ ܟܪ̈ܘܒܐ. ܠܗܘ ܕܠܐ ܡܬܚܙܐ ܡ̣ܢ ܣܪ̈ܦܐ. ܠܗܘ ܕܠܐ ܡܬܝ̣ܕܥ ܠܐ ܡ̣ܢ ܐܪ̈ܟܐܣ. ܘܠܐ ܡ̣ܢ ܫܘܠܛܢ̈ܐ. ܘܠܐ ܡ̣ܢ ܚܝ̈ܠܐ ܘܕܦܫܝ̣ܩܐܝܬ ܐܡ̇ܪ. ܘܠܐ ܡ̣ܢ ܟܠ ܕܒܪܝ̣ܬܐ ܐܝܬܘܗܝ.

 

 

 

ܣܗܕܘܬܐ ܕܥܣܪ

 

ܕܩܕܝܫܐ ܕܣܐܘܝ̣ܪܐ. ܡ̣ܢ ܩܦܠܐܘܢ ܩܕܡܝܐ ܕܡܐܡܪܐ ܕܬܪܝܢ ܕܠܘܩܒܠ ܓܪܐܡܛܝܩܘܣ. ܡܢܐ ܕܝܢ ܐܝܬܝܗ̇ ܐܘܣܝܐ ܕܐܠܗܐ܆ ܠܓܡܪ ܠܐ ܡܬܝܕܥܐ. ܠܘ ܠܢ ܒܠܚܘܕ. ܐܠܐ ܘܠܟܠܗ ܒܪܝܬܐ ܡܠܝ̣ܠܬܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܫܒܝܥܝܐ ܕܫܬܐܣܬܐ ܬܠܝܬܝܬܐ. ܡܛܠ ܬܪܥܝ̣ܬܐ ܕܗ̇ܢܘܢ ܕܡܬܕܪܟܢܐ ܘܠܘ ܓܢܝ̣ܙܐ ܡܘܕܝܢ ܠܗ ܠܒܪܘܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܡܬܝܩܢܢܘܬܐ ܥܩܪܐ ܗ̱ܝ ܘܡܫܪܪܢܘܬܐ ܢܒܓܗ̇. ܘܫܟܝ̣ܚܘܬܗ ܕܢܒܓܐ ܡ̣ܢ ܐܢܢܩܝ̣ ܠܫܟܝ̣ܚܘܬܗ ܕܥܩܪܐ ܡܫܘܕܥܐ. ܒܗ̇ܝ ܕܐܠܘܠܐ ܥܩܪܐ ܐܦܠܐ ܢܒܓܐ. ܒܕܓܘܢ ܗ̣ܘ ܟܝܢܐ ܐܠܗܝܐ ܐܠܘܠܐ ܡܬܝܩܢܢܐ ܗ̣ܘܐ ܠܢ. ܐܝܟܢܐ ܡܬܡܨܝܢ ܗܘܝܢ ܠܡܫܪܪܘ ܥܠܘܗܝ ܕܓܢܝ̣ܙܐ ܗ̱ܘ ܘܠܐ ܡܬܕܪܟܢܐ.

 

 

 

ܣܥܝܐ ܕܬܪܝܢ

 

ܐܡܪܝܢ ܕܡܚܪܩ ܚܪܩܝ̣ܢܢ ܥܠܘܗܝ ܕܟܝܢܐ ܐܠܗܝܐ. ܕܐܝܬܘܗܝ ܘܕܐܠܨܝܐ ܗ̱ܘ ܘܡܬܘܡܝܐ ܗ̱ܘ. ܘܒܪܘܝܐ ܗ̱ܘ ܘܛܒܐ ܗ̱ܘ. ܘܫܪܟܐ. ܘܐܠܘܠܐ ܕܝ̣ܕܝ̣ܥ ܠܢ ܗ̣ܘ ܗ̇ܘ ܟܝܢܐ. ܥܠ ܡܢܘ ܐܪܐ ܚܪܩܝ̣ܢܢ ܗܠܝܢ. ܥܠ ܗ̇ܘ ܕܠܐ ܝ̣ܕܝ̣ܥ ܠܢ ܟܒܪ. ܘܐܝܟܢܐ ܢܬܩܒܠܘܢ ܘܢܫܪܘܢ ܚܪ̈ܘܩܝܝܢ ܗܠܝܢ. ܒܕܓܘܢ ܐܢ ܫܪܝ̣ܪܝ̣ܢ ܚܪ̈ܘܩܝܝܢ. ܝ̣ܕܝ̣ܥ ܗ̣ܘ ܠܢ ܗ̣ܘ ܟܝܢܐ. ܘܐܢ ܠܐ ܝ̣ܕܝ̣ܥ ܗ̣ܘ ܠܢ ܗ̣ܘ ܟܝܢܐ ܠܐ ܫܪܝ̣ܪܝܢ ܚܪ̈ܘܩܝܝܢ. ܣܘܠܘܓܝܣܡܘܣ ܗ̣ܘ ܓܝܪ ܬܢܝܝܐ ܕܡ̣ܢ ܦܪܘܛܐܣܝܣ ܐܘܦܘܬܛܝܩܝܬܐ ܣܒܝ̣ܣܬܐ ܡܪܟܒ. ܘܓܠܝܐ ܕܬܢܝܗ̇ ܕܐܢܛܝܦܐܣܝܣ ܕܢܩܦܝܐ ܠܐܢܛܝܦܐܣܝܣ ܕܩܕܝ̣ܡܝܐ ܡܟܢܫ ܒܗ̇ ܕܠܐ ܦܘܠܓ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܣܗܕܘܬܐ ܩܕܡܝܬܐ

 

ܫܡܘܐܝܠ. ܘܫܡܘܐܝܠ ܠܐ ܥܕܟܝܠ ܝ̣ܕܥ ܠܡܪܝܐ. ܘܥܕܟܝܠ ܠܐ ܐܬܓܠܝ̣ ܥܠܘܗܝ ܦܬܓܡܗ ܕܡܪܝܐ. ܐܡܪܝܢ ܕܗ̇ܝ ܕܠܐ ܥܕܟܝܠ ܠܡܬܡܨܝܢܘܬ ܝ̣ܕܥܬܐ ܕܒܬܪܟܢ ܡܫܘܕܥܐ. ܘܠܗ̇ܝ ܬܘܒ ܕܟܕ ܐܬܓܠܝ̣ ܥܠܘܗܝ ܦܬܓܡܗ ܕܡܪܝܐ ܝܕܥܗ ܠܡܪܝܐ.

 

 

 

ܣܗܕܘܬܐ ܕܬܪܬܝܢ

 

ܫܠܝܡܘܢ. ܗܝܕܝܢ ܬܣܬܟܠ ܝܕܥܬܗ ܕܡܪܝܐ ܘܬܫܟܚ ܝ̣ܕܥܬܗ ܕܐܠܗܐ.

 

 

 

ܣܗܕܘܬܐ ܕܬܠܬ

 

ܐܫܥܝܐ. ܘܢܬܝ̣ܕܥ ܡܪܝܐ ܠܡܨܪ̈ܝܐ. ܘܢܕܥܘܢܗ ܡܨܪ̈ܝܐ ܠܡܪܝܐ ܒܝܘܡܐ ܗ̇ܘ.

 

 

 

ܣܗܕܘܬܐ ܕܐܪܒܥ

 

ܒܣܒܪܬܐ. ܠܐ ܐ̱ܢܫ ܝܕܥ ܠܐܒܐ ܐܠܐ ܐܢ ܒܪܐ. ܘܗ̇ܘ ܕܨܒܐ ܒܪܐ ܕܢܓܠܐ. ܐܡܪܝܢ ܕܗܕܐ ܡܫܘܕܥܐ ܕܐܟܡܐ ܕܗ̣ܘ ܒܪܐ ܝܕܥ ܠܐܒܐ. ܗܟܘܬ ܘܟܠܗܘܢ ܗ̇ܢܘܢ ܕܒܪܐ ܨܒ̇ܐ ܕܢܓܠܐ ܠܗܘܢ ܝ̇ܕܥܝܢ ܠܗ ܠܐܒܐ.

 

 

 

ܣܗܕܘܬܐ ܕܚܡܫ

 

ܒܗ̇ ܟܕ ܒܗ̇. ܗܠܝܢ ܐܢܘܢ ܚܝ̈ܐ ܕܠܥܠܡ܆ ܕܢܕܥܘܢܟ ܕܐܢ̱ܬ ܗ̣ܘ ܐܠܗܐ ܕܫܪܪܐ ܒܠܚܘܕܝܟ. ܘܡ̇ܢ ܕܫܕܪܬ ܝܫܘܥ ܡܫܝܚܐ.

 

 

 

ܣܗܕܘܬܐ ܕܫܬ

 

ܕܝܢܢܘܣܝܘܣ. ܗܫܐ ܕܝܢ ܠܝܘܡܗ ܢܘܗܪܐ ܡܬܝܕܥܢܐ ܕܗ̇ܘ ܛܒܐ ܢܫܒܚ. ܘܢܐܡܪ ܕܢܘܗܪܐ ܡܬܝܕܥܢܐ ܡܬܐܡܪ ܛܒܐ. ܡܛܠ ܕܠܟܠ ܗܘܢܐ ܕܠܥܠ ܡ̣ܢ ܫܡܝܐ ܡܠܐ ܡ̣ܢ ܢܘܗܪܗ ܡܬܝܕܥܢܐ. ܘܪܕܦ ܠܟܠܗ̇ ܠܐ ܝ̣ܕܥܬܐ ܘܛܥܝܘܬܐ܇ ܡ̣ܢ ܟܠܗܝܢ ܢܦ̈ܫܬܐ ܕܗ̇ܘܐ ܒܗܝܢ. ܘܡܫܘܬܦ ܠܟܠܗܝܢ ܥܡ ܢܘܗܪܗ ܩܕܝܫܐ. ܘܡܪܩ ܠܥܝ̈ܢܐ ܡܬܝܕ̈ܥܢܝܬܐ ܕܝܠܗܝܢ. ܡ̣ܢ ܥܡܛܢܐ ܕܩܪܝ̣ܡ ܥܠܝܗܝܢ ܡ̣ܢ ܠܐ ܝ̣ܕܥܬܐ. ܘܡܥܝ̣ܪ ܘܡܦܬܚ ܠܗܝܢ ܕܐܬܥܡܨ̈ܝ ܒܝܘܩܪܐ ܣܓܝܐܐ ܕܚܫܟܐ. ܘܡܫܘܬܦ ܠܗܝܢ ܠܘܩܕܡ ܡ̇ܢ. ܒܨܡܚܐ ܡܡܫܚܐ. ܒܬܪܟܢ ܕܝܢ ܐܟܡ̇ܢ ܕܛܥܡ̈ܝ ܗܠܝܢ ܢܘܗܪ̈ܐ. ܘܝܬܝܪ ܐܬܝܐܝܒܝ̈܆ ܝܬܝܪ ܝܗܒ ܠܗܝܢ ܗ̣ܘ ܠܗ. ܘܝܬܝܪ ܡܢܗܪ ܠܗܝܢ ܡܛܠ ܕܐܚܒ̣ܝ̈ܢ ܣܓܝ. ܘܡܬܚ ܠܗܝܢ ܒܟܠܙܒܢ ܠܐܦܝ̈ ܠܥܠ. ܠܦܘܬ ܡܫܘܚܬܗܝܢ ܕܠܘܬ ܥܘܠܝܐ.

 

 

 

ܣܗܕܘܬܐܕܫܒܥ

 

ܓܪܝܓܘܪܝܘܣ ܬܐܘܠܘܓܘܣ. ܡܢܐ ܗ̱ܝ ܗܟܝܠ ܐܘܣܝܐ ܕܐܠܗܐ. ܕܡܫܩܠܘܬܐ ܕܝܠܟ ܐܝܬܝܗ̇ ܗܕܐ ܠܡܐܡܪ. ܗ̇ܝ ܕܡܥܩܒ ܐܢ̱ܬ ܝ̣ܠܝ̣ܕܘܬܗ. ܠܢ ܕܝܢ ܪܒܐ ܗ̱ܝ. ܘܕܐܢ ܐܡܬܝ ܕܗ̣ܘ ܘܠܚܪܬܐ ܢܐܠܦ ܗܕܐ. ܡܐ ܕܐܫܬܪܝ̣ ܠܢ ܚܫܘܟܐ ܘܥܒܝܘܬܐ ܐܝܟ ܫܘܘܕܝܗ ܕܗ̇ܘ ܠܐ ܕܓܠܐ. ܗܕܐ ܡ̇ܢ ܗܟܝܠ ܘܬܣܬܟܠ ܘܬܣܬܟܐ ܠܗ̇ܢܘܢ ܕܠܗܕܐ ܡܬܕܟܝܢ.

 

 

 

ܣܗܕܘܬܐ ܕܬܡܢܐ

 

ܗ̣ܘ ܟܕ ܗ̣ܘ. ܬܐܘܪܝܐ ܕܬܠܝܬܝܘܬܐ ܩܕܝܫܬܐ ܡܠܟܝܬܐ. ܕܕܢܚܐ ܝܬܝ̣ܪ ܢܗܝ̣ܪܐܝܬ. ܘܝܬܝܪ ܕܟܝܐܝܬ. ܘܟܠܗ̇ ܒܟܠܗ ܗܘܢܐ ܡܬܚܠܛܐ.

 

 

 

ܣܗܕܘܬܐ ܕܬܫܥ

 

ܐܘܓܪܝܣ. ܠܘ ܒܗ̇ܝ ܕܐܝܬܘܗܝ ܕܠܐ ܓܫܘܡ ܗܘܢܐ܆ ܐܝܬܘܗܝ ܕܡܘ̣ܬܗ ܕܐܠܗܐ. ܐܠܐ ܒܗ̇ܝ ܕܡܩܒܠܢܐ ܐܝܬܘܗܝ ܕܝ̣ܕܥܬܐ ܕܬܠܝܬܝܘܬܐ ܩܕܝܫܬܐ.

 

 

 

ܣܗܕܘܬܐ ܕܥܣܪ

 

ܗ̣ܘ ܟܕ ܗ̣ܘ. ܝ̣ܕܝ̣ܥ ܡܪܝܐ ܩܕܡ ܕܝ̣ܢܗ ܠܦܪ̈ܘܫܐ. ܒܬܪ ܕܝ̣ܢܗ ܕܝܢ ܡܬܝ̣ܕܥ ܠܦܪ̈ܘܫܐ ܘܠܕܠܐ ܦܘܪܫܢ ܐܝܟ ܕܟܬܝ̣ܒ. ܕܡܬܝ̣ܕܥ ܡܪܝܐ ܒܕܝ̣ܢܐ ܕܥܒ̇ܕ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܫܒܝܥܝܐ ܕܫܬܐܣܬܐ ܬܠܝܬܝܬܐ. ܡܛܠ ܣܬܘܪܝܐ ܕܬܪܥܝ̣ܬܐ ܗܕܐ ܕܡܬܕܪܟܢܐ ܘܠܘ ܓܢܝ̣ܙܐ ܡܘܕܝܐ ܠܗ ܠܒܪܘܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘ̈ܫܒܝܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܠܘ ܒܟܠܡܕܡ ܠܐ ܡܬܝܩܢܢܐ ܗ̱ܘ ܠܢ ܐܠܗܐ ܫܘܒܚܐ ܠܛܝܒܘܬܗ. ܒܗ̇ܝ ܕܐܝܬܘܬܗ ܡ̇ܢ ܝܕܥܬܐ ܗ̱ܝ ܠܢ. ܟܝܢܗ ܕܝܢ ܘܠܐ ܣܟ. ܘܕܐܝܬܘܬܗ ܠܘ ܟܝܢܗ ܗ̣ܝ ܓܠܝܐ. ܡ̣ܢ ܗ̇ܝ ܕܣܓܝ̈ܐܐ ܝܕܥܝܢ ܕܐܝܬ ܐܠܗܐ. ܕܡܢܐ ܗ̱ܘ ܕܝܢ ܟܝܢܗ܇ ܘܠܐ ܚܕ. ܒܕܓܘܢ ܥܩܪ̈ܝܗܝܢ ܕܡܫܪܪ̈ܢܘܬܐ ܗܠܝܢ ܕܡܕܪܟܝ̣ܢܢ ܒܗܠܝܢ ܕܡܛܠܬܗ ܣܓܝܕ ܐܝܩܪܗ. ܗ̣ܝ ܐܝܬܘܬܗ ܡܬܕܪܟܢܝ̣ܬܐ ܐܝܬܝܗ̇. ܘܠܘ ܡܕܡ ܠܐ ܡܬܕܪܟܢܐ ܣܟ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܣܥܝܟܘܢ ܗ̇ܘ ܬܪܝܢܐ ܗ̣ܘ ܟܕ ܗ̣ܘ ܚܝܠܐ ܕܗ̇ܘ ܩܕܡܝܐ ܩܢܐ. ܘܒܫܘܓܢܝ ܪܘܟܒܐ ܒܠܚܘܕ ܡܢܗ ܦܪܝ̣ܫ. ܡܣܬܬܪ ܕܝܢ ܘܡܫܬܪܐ ܒܣܘܓܐܐ ܕܣܡ̈ܡܢܐ ܘܬܘܪ̈ܣܝܐ ܕܠܡܥܒܕܢ̈ܘܬܗܘܢ ܡ̇ܢ ܝ̇ܕܥܝ̣ܢܢ. ܠܟܝܢܝ̈ܗܘܢ ܕܝܢ ܘܠܐ ܣܟ. ܗܐ ܓܝܪ ܠܘ ܟܠ ܕܝܕܥ ܕܡܫܒܚܬܐ ܡܢܦܨܢܝ̣ܬܐ ܗ̱ܝ ܕܡܪܬܐ ܣܘܡܩܬܐ ܝ̇ܕܥ ܐܦ ܕܚܡܝܡܬܐ ܗ̱ܝ ܐܘ ܩܪܝ̣ܪܬܐ. ܐܦܠܐ ܬܘܒ ܟܠ ܕܝܕܥ ܕܢܘ̈ܢܐ ܡܨܗܝܢ. ܝܕܥ ܐܦ ܕܒܝܕ ܩܪܝ̣ܪܘܬܗܘܢ ܐܪܐ ܐܘ ܒܝܕ ܪܛܝ̣ܒܘܬܗܘܢ. ܐܘ ܒܝܕ ܛܠܘܫܘܬܗܘܢ ܐܘ ܒܝܕ ܚܡܝܡܘܬܐ ܐܪܐ ܗ̇ܝ ܐܝܕܐ ܕܛܒ ܒܨܝ̣ܪܐ ܒܗܘܢ. ܘܚܡܪܐ ܠܘ ܡܝ̈ܐ ܡܫܗܐ ܨܗܘܐ ܕܡܢܗܘܢ. ܘܙܕܩ ܗܘܐ ܕܡܝ̈ܐ ܕܩܪܝ̣ܪܝܢ ܝܬܝܪ ܢܫܗܘܢ. ܘܗܐ ܠܘ ܗܟܢܐ. ܘܟܕ ܣܓܝ̈ܐܐ ܐܢܘܢ ܗ̇ܢܘܢ ܕܠܘ ܟܠܢܐܝܬ ܠܢ ܝ̣ܕܝ̣ܥܝܢ. ܡܟܠܢܘܬܐ ܗ̱ܝ ܠܡܣܒܪܘ ܕܒܪܘܝܐ܆ ܐܘ ܒܟܠܡܕܡ ܙܕܩ ܕܢܬܕܪܟ. ܐܘ ܒܟܠܡܕܡ ܠܐ ܢܬܕܪܟ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕ̈ܘܬܗܘܢ ܟܬܒܝ̈ܬܐ ܟܠܗܝܢ ܟܢܝ̣ܫܐܝܬ

 

ܙܕܩ ܠܡܕܥ ܕܟܠ ܡܕܡ ܕܡܢܢ ܡܬܕܪܟܢܐ ܡܟܢ ܠܡܗܘܐ. ܐܘ ܐܝܬܘܬܗ ܗ̣ܝ ܒܠܚܘܕ ܦܫܝ̣ܛܬܐ ܘܫܚܝ̣ܡܬܐ ܕܡܕܡ܆ ܐܘ ܥܡ ܐܝܬܘܬܗ ܡܕܡ ܡ̣ܢ ܡܥܒܕܢ̈ܘܬܗ. ܐܘ ܥܡ ܐܝܬܘܬܗ ܟܠܗܝܢ ܡܥܒܕܢ̈ܘܬܗ. ܘܓܠܝܐ ܕܙܢܐ ܗ̇ܘ ܩܕܡܝܐ ܠܐ ܡܨܐ ܠܡܬܠ ܫܘܘܕܥܐ ܕܟܝܢܗ ܕܡܕܡ ܡܦܪܫܐܝܬ. ܒܗܝ ܕܐܝܬܘܬܐ ܓܘܢܝܬܐ ܗ̱ܝ ܠܟܠܗܘܢ ܗ̇ܢܘܢ ܕܐܝܬܝܗܘܢ ܒܙܢܐ ܡܕܡ ܘܐܦܢ ܠܘ ܐܝܟ ܓܢܣܐ. ܘܟܝܢܐ ܕܟܠܚܕ ܡ̣ܢ ܗ̇ܢܘܢ ܕܐܝܬܝܗܘܢ ܠܘ ܓܘܢܝܐ ܗ̱ܘ ܠܟܠܗܘܢ. ܙܢܐ ܕܝܢ ܗ̇ܘ ܬܪܝܢܐ. ܐܦܢ ܝܗܒ ܫܘܘܕܥܐ ܕܟܝܢܗ ܕܡܕܡ ܐܠܐ ܠܘ ܡܫܡܠܝܐܝܬ. ܙܢܐ ܕܝܢ ܬܘܒ ܬܠܝܬܝܐ ܐܢܗܘ ܕܡܣܝ̈ܟܬܐ ܐܢܝܢ ܡܥܒܕܢ̈ܘܬܐ ܗ̇ܢܝܢ ܒܫܪܪܐ ܕܫܘܘܕܥܐ ܡܫܡܠܝܐ ܝܗܒܐ ܝ̣ܕܥܬܗܝܢ. ܐܢܕܝܢ ܠܐ ܡܣܝ̈ܟܢ܇ ܘܠܐ ܣܟ. ܒܕܠܐ ܡܨ̈ܝܢ ܠܡܬܕܪܟܘ. ܘܗ̇ܘ ܕܠܐ ܝ̣ܕܝ̣ܥ. ܠܘ ܒܗ̇ܘ ܕܠܐ ܝ̣ܕܝ̣ܥ ܡܬܝ̣ܕܥ ܓܠܝܐ. ܘܟܕ ܗܠܝܢ ܗܟܢܐ ܐܢܝܢ. ܐܡܪܝܢܢ ܕܒܗܠܝܢ ܕܡܛܠ ܐܠܗܘܬܐ ܣܓܝ̣ܕܬܐ. ܠܙܢܐ ܗ̇ܘ ܩܕܡܝܐ ܕܝ̣ܕܥܬܐ. ܣܘܓܐܐ ܕܒܢܝ̈ܢܫܐ ܒܚܝ̈ܐ ܗܠܝܢ ܬܢܢܝ̈ܐ ܘܐܦܢ ܒܟܝ̈ܢܐ ܡܥܡܛܝ̣ܢ ܬܢܢܝ̈ܐ ܡܕܪܟܝ̣ܢ. ܠܙܢܐ ܕܝܢ ܬܪܝܢܐ ܕܠܝ̣̈ܠܐ ܐ̱ܢܫܝ̈ܢ܇ ܒܝܕ ܟܬܒܐ ܪܘܚܢܝܐ. ܐܘ ܒܝܕ ܚܘܫܒܐ ܪܥܝܢܐ. ܐܘ ܒܝܕ ܚܙܘܐ ܓܠܝܢܝܐ ܡܫܬܘܝܢ ܠܡܕܥ. ܟܕ ܟܠ ܚܕ ܠܦܘܬ ܨܘܠܠ ܗܘܢܗ. ܘܚܘܠܠ ܡܕܥܗ. ܘܣܘܓܐܬ݀ ܥܡܠܗ܇ ܡܬܡܨܐ ܘܠܡܚܠܕ ܒܥܪܦܠܐ ܗ̇ܝ ܐܠܗܝܬܐ. ܘܠܡܥܒܕ ܒܥܢܢܐ ܗ̇ܝ ܠܒܝ̣ܕܬܐ ܘܐ̱ܪܙܢܝܬܐ. ܐܝܟ ܕܐܡ̣ܪ ܐܠܗܝܐ ܦܘܠܘܣ. ܕܠܦܘܬ ܡܫܘܚܬܐ ܕܚܝܠܗ ܕܟܠܢܫ ܡܬܝܗܒܐ ܠܗ ܚܟܝ̣ܡܐܝܬ܆ ܡܬܢܗܪܢܘܬܐ ܕܡ̣ܢ ܐܠܗܐ. ܠܙܢܐ ܕܝܢ ܗ̇ܘ ܬܠܝܬܝܐ ܟܠܢܐܝܬ ܠܐ ܡܬܡܛܝܢܐ ܙܕܩ ܕܢܕܘܢܝ̣ܘܗܝ܇ ܘܐܝܬܘܬܗ. ܠܘ ܒܠܚܘܕ ܠܡܠܝ̣̈ܠܐ ܪ̈ܫܦܝ ܒܐܪܥܐ. ܐܠܐ ܘܠܟܠܗܘܢ ܬܓ̈ܡܐ ܡܠܐܟܝ̈ܐ. ܒܗ̇ܝ ܕܐܟܡܐ ܕܡ̣ܢ ܠܘ ܡܫܟ̈ܚܢܝܬܐ ܗ̱ܝ ܕܢܩܕܘܡ ܓܘܫܡܐ ܠܛܠܠܗ. ܐܘ ܕܡܢܝܢܐ ܥܣܝ̣ܪܝܐ ܫܘܐ ܢܗܘܐ ܠܗ̇ܘ ܐܠܦܢܝܐ ܐܘ ܠܗ̇ܘ ܪܒܘܬܢܝܐ. ܗܟܢܐ ܡ̣ܢ ܠܘ ܡܫܟ̈ܚܢܝܬܐ ܗ̱ܝ ܠܡܣܬܝܟܘ ܗ̇ܘ ܠܐ ܡܣܝܟܐ ܡ̣ܢ ܡܣܝ̈ܟܐ. ܘܕܠܗ̇ ܠܬܐܘܪܝܐ ܗܕܐ ܡܬܝܕܥܢܝ̣ܬܐ ܒܟܪ̈ܝܣܝܣ ܡܬܪ̈ܓܫܢܝܬܐ ܐܛܦܣܝܗ̇ ܠܐ ܡܫܬܐܠ ܐ̱ܢܐ. ܢܣܝ̣ܡ ܒܪܢܫܐ ܐ̱ܢܫ ܗ̇ܘ ܐܝܢܐ ܕܠܐ ܣܟ ܚܙܐ ܢܘܪܐ. ܕܐܨܕ ܒܚܕ ܡ̣ܢ ܠܝܠܘ̈ܬܐ ܒܕܒܪܐ ܡܕܡ ܫܗܝܐ ܘܚܫܘܟܝܐ܆ ܘܐܫܟܚܗ ܕܢܗܪ. ܘܟܕ ܠܘܬ ܗܘܢܗ ܦܢܐ. ܝ̣ܕܥ ܚܬܝ̣ܬܐܝܬ ܕܗ̣ܘ ܗ̇ܘ ܢܘܗܪܐ ܠܘ ܕܠܐ ܥܠܬܐ ܗܘܐ ܗܪܬܡܢ. ܐܠܐ ܡ̣ܢ ܐܠܨ̈ܬܐ ܒܝܕ ܥܠܬܐ. ܐܝܢ ܕܕܐܝܟ ܐܝܕܐ ܐܝܬܝܗ̇ ܗ̇ܝ ܥܠܬܐ. ܐܘ ܕܡܢܐ ܗ̱ܝ ܠܐ ܥܕܟܝܠ ܝ̣ܕܝ̣ܥ. ܘܗ̇ܢܘ ܗ̇ܘ ܕܪܓܐ ܩܕܡܝܐ. ܐܝ̣ܛܐ ܟܕ ܬܘܒ ܐܬܒܚܪ ܒܚܙܝܗ. ܕܩ ܒܦܢܝ̣ܬܐ ܡ̣ܢ ܗ̇ܘ ܕܒܪܐ. ܨܡܚ ܐܘ ܐܙܠܓ ܙܠܓܐ ܡܕܡ ܫܪܓܢܝܐ܇ ܕܝܬܝܪ ܢܨܝ̣ܚ ܒܡܨܥܬ݀ ܢܘܗܪܐ ܗ̇ܘ. ܘܝ̣ܕܥ ܚܬܝ̣ܬܐܝܬ ܕܗܘܝܘ ܥܠܬܗ ܕܢܘܗܪܐ ܗ̇ܘ. ܒܗ̇ܝ ܕܗ̇ܘ ܕܒܨܝ̣ܪ ܡ̣ܢ ܗ̇ܘ ܕܡܝܬܪ ܝܬܪ ܘܠܘ ܒܗܦܟܐ. ܘܗܪܟܐ ܡ̇ܢ ܡܕܡ ܡ̣ܢ ܙܢܝ̈ܗ̇ ܘܐܝܟܢܝ̈ܘܬܗ̇ ܕܢܘܪܐ ܐܕܪܟ ܒܗ̇ ܒܝܬܗ̇ ܕܢܘܪܐ. ܘܒܗ̇ܘ ܩܕܡܝܐ ܐܦܢ ܐܕܪܟ ܡܕܡ ܡ̣ܢ ܙܢܝ̈ܗ̇. ܒܪܡ ܠܘ ܒܝܬܗ̇. ܐܠܐ ܒܥܠܬܢܗ̇. ܘܗ̇ܢܘ ܕܪܓܐ ܬܪܝܢܐ. ܐܝ̣ܛܐ ܟܕ ܣܡ ܒܢܦܫܗ ܘܪܕܐ ܐܟܝ̣ܦܐܝܬ ܥܕܡܐ ܕܡܛܐ ܠܗ ܠܗ̇ܘ ܐܬܪܐ. ܘܩܪܒ ܗܢܐ ܟܠܗ ܐܝܟܢܐ ܕܢܓܫܘܦ ܐܦ ܒܗ̇ ܒܢܘܪܐ. ܗܝܕܝܟ ܐܕܪܟܗ̇ ܘܝܕܥܗ̇ ܚܬܝ̣ܬܐܝܬ. ܘܐܫܬܘܕܥ ܟܠܗܘܢ ܙܢܝ̈ܗ̇ ܘܚܝ̈ܠܝܗ̇ ܘܐܝܟ ܕܐܝܬܝܗ̇ ܕܩܗ̇. ܟܐܡܬ݀ ܕܚܪܝ̣ܦܬ݀ ܙܘ̈ܥܐ ܗ̣ܝ ܘܚܐܦܢܝܬܐ ܕܠܐܦܝ̈ ܠܥܠ. ܘܕܐܘܣܝܐ ܩܢܝܐ ܕܛܒ ܢܗܝ̣ܪܐ ܘܩܛܝ̣ܢܐ. ܘܕܗܢܐ ܟܠܗ ܡܘܩܕܢܝܐ܆ ܐܝܟܢܐ ܕܐܦ ܡܛܪܦ ܬܡܪܐ ܠܐ ܡܣܝܒܪ ܓܫܬܗ̇ ܗ̇ܘ ܕܡܡܪܚ ܠܡܓܫܦ ܒܗ̇. ܘܕܠܟܠܡܕܡ ܡ̣ܢ ܗ̇ܢܘܢ ܕܠܗ̇ ܡܬܩܪܒܝ̣ܢ ܠܟܝܢܗ ܡܫܚܠܦܐ. ܘܗ̣ܝ ܠܟܝܢ ܡܕܡ ܠܐ ܡܫܬܚܠܦܐ. ܗܠܝܢ ܘܣܘܓܐܐ ܕܐܝܟ ܗܠܝܢ. ܘܗ̇ܢܘ ܕܪܓܐ ܬܠܝܬܝܐ ܗ̇ܘ ܕܠܐ ܡܬܕܪܟܢܐ ܗ̣ܘ ܒܗܠܝܢ ܕܡܛܠ ܐܠܗܐ ܘܐܠܗܝ̈ܬܐ. ܒܕܓܘܢ ܟܕ ܒܟܬܒ̈ܐ ܩܕܝ̣̈ܫܐ ܥܘܗܕܢܐ ܕܡܬܝܕܥܢܘܬܗ ܕܐܠܗܐ ܫܘܒܚܐ ܠܛܝܒܘܬܗ ܡܫܬܡܫ. ܠܗ ܠܗ̇ܘ ܙܢܐ ܩܕܡܝܐ܆ ܐܘ ܠܗ̇ܘ ܬܪܝܢܐ ܙܕܩ ܠܡܣܬܟܠܘ ܒܠܚܘܕ. ܒܗ̇ܝ ܕܗ̇ܘ ܬܠܝܬܝܐ ܡ̣ܢ ܥܠܡ ܕܪܝ̣ܫܐ ܐܘܪܚܗ. ܘܐܚܝ̣ܕ ܬܪܥܗ. ܫܗܝܐ ܗ̱ܘ ܡܕܒܪܗ. ܘܚܬܝ̣ܡ ܐܘܨܪܗ. ܘܡ̣ܢ ܗܠܝܢ ܫܦܝܪܐ ܐܬܚܘܝ̣ ܕܒܪܘܝܐ ܣܓܝ̣ܕ ܐܝܩܪܗ. ܠܐ ܒܟܠܡܕܡ ܡܬܕܪܟܢܐ ܗ̱ܘ. ܐܦܠܐ ܒܟܠ ܡܕܡ ܠܐ ܡܬܕܪܟܢܐ. ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ. ܣܓܝ ܓܝܪ ܡܫܚܠܦܐ ܗ̇ܝ ܕܗ̣ܘܐ ܡܦܣ ܐ̱ܢܫ ܕܐܝܬܘܗܝ ܡܕܡ܆ ܡ̣ܢ ܗ̇ܝ ܕܡܢܐ ܐܝܬܘܗܝ ܗܢܐ ܢܕܥ. ܟܐܡܬ݀ ܠܒܪܘܝܐ ܡ̇ܢ ܡܕܪܟܝ̣ܢܢ ܕܐܝܬܘܗܝ. ܘܐܦܢ ܠܐ ܡܕܪܟܝ̣ܢܢ ܕܡܢܐ ܐܝܬܘܗܝ.

 

 

 

 

 

 

 

 

 

     #1 

 

ܩܦܠܐܘܢ ܬܡܝܢܝܐ ܕܫܬܐܣܬܐ ܬܠܝܬܝܬܐ. ܡܛܠܗ̇ܝ ܕܚܕ ܗ̣ܘ ܐܠܗܐ ܘܠܘ ܣܓܝ̈ܐܐ ܐܢܘܢ ܐܠܗ̈ܐ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ. ܘܒܗ̇ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘ̈ܫܒܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܠܘ ܬܪܝܢ ܡܨܝܢ ܗܘܘ ܠܡܗܘܐ ܟܝ̈ܢܐ ܐܠܗܝ̈ܐ. ܒܐܠܨܝܘܬ ܐܝܬܘܬܐ ܡܫܬܘܬܦܝ̣ܢ ܗܘܘ. ܫܘܬܦܘܬܐ ܕܐܕ̈ܫܐ ܒܓܢܣܗܘܢ. ܘܒܟܝܢܝ̈ܗܘܢ ܕܝ̣ܠܢܝ̈ܐ ܡܬܦܪܫܝ̣ܢ ܗܘܘ ܦܘܪܫܢܐ ܕܐܕ̈ܫܐ ܒܫܘܚܠܦܝ̈ܗܘܢ ܡܩܝ̣̈ܡܢܐ. ܘܡ̣ܢ ܗܪܟܐ ܡܫܬܟܚ ܗܘܐ ܟܠ ܚܕ ܡܢܗܘܢ ܕܡܪܟܒ ܡ̣ܢ ܡܢܘ̈ܬܐ ܬܪܬܝܢ ܡܩܝ̣̈ܡܬܐ܆ ܓܢܣܐ ܠܡܐܡܪ ܘܦܘܪܫܢܐ. ܘܟܠ ܡܪܟܒܐ ܡܬܡܨܝܢܐ ܗ̱ܘ ܘܠܘ ܐܠܨܝܐ ܐܠܘ ܡܕܝܢ ܬܪܝܢ ܗܘܘ ܐܠܗ̈ܐ. ܡܬܡܨ̈ܝܢܐ ܗ̣ܘܘ ܠܘ ܐܠܨܝ̈ܐ. ܘܟܠ ܕܡܬܡܨܝܢܐ ܩܢܐ ܟܝܢܐ ܠܘ ܐܠܗܐ ܗ̱ܘ. ܟܝܢܐ ܡܕܝܢ ܐܠܗܝܐ ܐܠܨܝ ܐܝܬܘܬܐ ܚܕ ܗ̣ܘ ܡ̣ܢ ܐܢܢܩܝ̣.

 

 

 

ܗܦܟܬܐ

 

ܐܡܪܝܢ ܡܕܝܢ ܟܠܚܕ ܡ̣ܢ ܩܢܘ̈ܡܐ ܕܒܪܐ ܘܕܪܘܚܐ ܒܕ ܥܠܬܢܐ ܗ̱ܘ ܕܐܒܐ ܡܬܡܨܝܢܐ ܗ̱ܘ. ܒܕܓܘܢ ܠܐ ܫܪܝ̣ܪ ܥܠ ܚܕ ܚܕ ܡܢܗܘܢ ܕܐܠܗܐ ܢܬܩܪܐ. ܘܡ̣ܢ ܗܪܟܐ ܡܣܬܬܪܐ ܬܘܕܝ̣ܬܐ ܟܪܣܛܝܢܝܬܐ.

 

 

 

ܦܘܢܝܐ

 

ܐܡܪܝܢܢ ܕܒܗ̇ܝ ܕܐܡ̣ܪܬܘܢ ܡܬܬܚܕܝܢ ܗܘܝܢ. ܐܠܘ ܬܠܬܐ ܟܝ̈ܢܐ ܠܬܠܬܝ̈ܗܘܢ ܩܢܘܡܐ ܡܘܕܝܢ ܗܘܝܢ. ܘܟܕ ܚܕ ܗ̣ܘ ܘܗ̣ܘ ܟܕ ܗ̣ܘ ܟܝܢܐ ܐܠܨܝ ܐܝܬܘܬܐ ܠܟܠ ܚܕ ܡ̣ܢ ܩܢܘ̈ܡܐ. ܪܚܝ̣ܩ ܗ̣ܘ ܣܒܪܟܘܢ ܗ̇ܘ ܕܟܢܫܬܘܢ ܡ̣ܢ ܫܪܪܐ. ܫܪܝܪ ܗܘܐ ܕܝܢ ܐܠܘ ܐܡܪܝܢ ܗܘܝܢ ܕܟܝܢܗ ܕܒܪܐ ܐܘ ܕܪܘܚܐ ܥܠܬܢܐ ܗ̱ܘ ܕܟܝܢܗ ܕܐܒܐ. ܘܗܐ ܠܘ ܗܟܢܐ. ܒܗ̇ܝ ܕܥܠܬܐ ܘܥܠܬܢܐ ܠܘ ܗ̣ܘ ܟܝܢܐ ܗ̱ܘ: ܐܠܐ ܣܘ̈ܟܠܐ ܐܝܠܝܢ ܕܠܗܘܢ ܠܩܢܘ̈ܡܐ ܢܩܝ̣ܦܝ̣ܢ ܝܠܘܕܘܬܐ ܘܝܠܝܕܘܬܐ ܠܡܐܡܪ ܘܢܦܘܩܘܬܐ. ܘܕܗ̣ܢܘܢ ܗܠܝܢ ܠܘ ܠܘܬ ܪܘܟܒܐ ܟܝܢܝܐ ܡܘܒ̈ܠܢ ܓܠܝܐ. ܒܗ̇ܝ ܕܕܝ̣ܠܝ̈ܬܐ ܐܢܝܢ ܘܠܘ ܦܘܪ̈ܫܢܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܐܠܘ ܬܪܝܢ ܡܨܝܢ ܗܘܘ ܠܡܗܘܐ ܐܠܗ̈ܐ. ܡܨܝܐ ܗܘܬ݀ ܕܚܕ ܡܢܗܘܢ ܢܨܒܐ ܗܘܐ ܕܠܐ ܢܗܘܐ. ܒܕܓܘܢ ܐܘ ܨܒܝܢܐ ܕܬܪ̈ܝܗܘܢ ܐܟܚܕܐ ܡܫܬܡܠܝܢ ܗܘܘ܆ ܐܘ ܐܦܠܐ ܨܒܝܢܐ ܕܚܕ ܡܢܗܘܢ ܡܫܬܡܠܐ ܗܘܐ. ܐܘ ܨܒܝܢܐ ܕܚܕ ܡܢܗܘܢ ܕܝ̣ܠܢܐܝܬ ܡܫܬܡܠܐ ܗܘܐ ܘܕܗ̇ܘ ܐ̱ܚܪܢܐ ܠܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܠܘܬ ܟܢܝ̣ܫܘܬܐ ܕܬܪ̈ܝܗܘܢ ܦܫܚܝ̈ܗ̇ ܕܐܢܛܝ̣ܦܐܣܝ̣ܣ ܡܘܒܠ. ܟܐܡܬ݀ ܕܢܗܘܐ ܛܘܦܢܐ ܘܕܠܐ ܢܗܘܐ ܒܚܕ ܙܒܢܐ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܠܘܬ ܡܪܝ̣ܡܢܘܬܐ ܕܬܪ̈ܝܗܘܢ ܦܫܚܝ̈ܗ̇ ܕܢܛܝ̣ܦܐܣܝ̣ܣ ܡܘܒܠ. ܟܐܡܬ݀ ܕܠܐ ܢܗܘܐ ܛܘܦܢܐ ܘܠܐ ܠܐ ܢܗܘܐ ܐܟܚܕܐ. ܘܗ̇ܘ ܕܬܠܬܐ ܬܘܒ ܠܐ ܫܪܝ̣ܪ. ܒܗ̇ܝ ܕܗ̇ܘ ܕܒܛܠ ܨܒܝܢܗ ܘܠܐ ܡܫܬܡܠܐ. ܠܘ ܐܠܗܐ ܗ̱ܘ. ܘܗ̇ܘ ܐ̱ܚܪܢܐ ܗܘܝܘ ܐܠܗܐ ܒܠܚܘܕܘܗܝ ܣܓܝ̣ܕ ܐܝܩܪܗ. ܘܠܝܬ ܐܠܗܐ ܠܒܪ ܡܢܗ.

 

 

 

ܡܚܘܝܢܘܬܐ ܕܬܠܬ

 

ܐܠܘ ܬܪܝܢ ܗܘܘ ܐܠܗ̈ܐ. ܟܠ ܚܕ ܡܢܗܘܢ ܡܨܐ ܗܘܐ ܚܝܠܐ ܕܒܪܘܝܘܬ ܒܪܝ̣ܬܐ ܡܕܡ ܡܫܡܠܝܐܝܬ. ܒܕܓܘܢ ܗ̣ܝ ܗ̇ܝ ܒܪܝ̣ܬܐ ܐܘ ܒܬܪ̈ܝܗܘܢ ܡܫܬܟܚܐ. ܐܘ ܒܠܐ ܚܕ ܡܢܗܘܢ. ܐܘ ܒܚܕ ܡܢܗܘܢ ܕܝ̣ܠܢܐܝܬ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܟܕ ܬܪ̈ܝܗܘܢ ܢܫܬܘܬܦܘܢ ܒܒܪܘܝܘܬܗ̇ ܕܒܪܝ̣ܬܐ ܗ̇ܝ. ܠܘ ܒܪܘܝܐ ܗ̱ܘ ܡܫܡܠܝܐ ܟܠܚܕ ܡܢܗܘܢ ܕܒܪ̣ܝܬܐ ܗ̇ܝ. ܐܠܐ ܦܠܓܘܬ ܒܪܘܝܐ. ܘܡ̣ܢ ܗܪܟܐ ܠܐ ܡܫܬܪܪܐ ܡܬܡܨܝܢܘܬ ܚܝܠܐ ܕܒܪܘܝܘܬܐ ܕܟܠܚܕ ܡܢܗܘܢ ܡܫܡܠܝܐܝܬ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܗ̇ܘ ܕܟܠܐ ܡ̣ܢ ܫܘܪܪ ܡܬܡܨܝܢܘܬ ܚܝܠܐ ܕܒܪܘܝܘܬܐ ܕܚܕ ܡܢܗܘܢ. ܫܟܝ̣ܚܘܬ ܡܬܡܨܝܢܘܬ ܚܝܠܐ ܕܒܪܘܝܘܬ ܗ̇ܘ ܐ̱ܚܪܢܐ ܐܝܬܝܗ̇. ܘܡ̣ܢ ܗܪܟܐ ܐܠܨܐ ܕܐܠܘܠܐ ܐܫܬܟܚܘ ܬܪ̈ܝܗܘܢ. ܐܫܬܟܚܘ ܬܪ̈ܝܗܘܢ ܗ̇ܝ ܕܫܟܝܪܐ. ܘܗ̇ܘ ܕܬܠܬܐ ܬܘܒ ܠܐ ܫܪܝܪ. ܒܗ̇ܝ ܕܠܬܪ̈ܝܗܘܢ ܐܟܚܕܐ ܐܡ̣ܪܢܢ ܕܫܟܝ̣ܚܐ ܚܝ̣ܠ ܡܬܡܨܝܢܘܬ ܚܝ̣ܠ ܒܪܘܝܘܬܐ ܡܫܡܠܝܐܝܬ. ܘܠܘ ܠܚܕ ܡܢܗܘܢ. ܒܕܓܘܢ ܐܝܟܢܐ ܡܨܝܐ ܕܚܕ ܡܢܗܘܢ ܢܒܪܐ ܘܐ̱ܚܪܢܐ ܠܐ. ܘܟܕ ܬܪܝܢܘܬ ܐܠܗ̈ܐ ܠܘܬ ܫܟܝ̣ܪ̈ܘܬܐ ܕܐܝܟ ܗܠܝܢ ܡܘܒܠܐ. ܚܕ ܗ̣ܘ ܐܠܗܐ ܒܫܪܪܐ ܘܠܘ ܝܬܝܪ ܡ̣ܢ ܚܕ.

 

 

 

ܢܝܫܐ ܕܬܪܝܢ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܫܡܥ ܐܝܣܪܐܝܠ. ܡܪܝܐ ܐܠܗܟ ܡܪܝܐ ܚܕ ܗ̣ܘ.

 

 

 

ܣܗܕܘܬܐ ܕܬܪܬܝܢ

 

ܒܗ̇ ܟܕ ܒܗ̇. ܚ̣ܙܘ ܗܟܝܠ ܕܐܢܐ ܐ̱ܢܐ. ܘܠܝܬ ܐܠܗܐ ܠܒܪ ܡܢܝ.

 

 

 

ܣܗܕܘܬܐ ܕܬܠܬ

 

ܙܟܪܝܐ. ܒܗ ܒܝܘܡܐ ܗ̇ܘ ܢܗܘܐ ܡܪܝܐ ܚܕ ܘܫܡܗ ܚܕ.

 

 

 

ܣܗܕܘܬܐ ܕܐܪܒܥ

 

ܕܢܝܐܝܠ. ܘܢܕܥܘܢ ܕܐܢ̱ܬ ܚܕ ܐܠܗܐ ܒܠܚܘܕܝܟ. ܘܡܫܒܚ ܐܢ̱ܬ ܒܟܠܗܘܢ ܥܒܕܝ̈ܟ.

 

 

 

ܣܗܕܘܬܐ ܕܚܡܫ

 

ܐܫܥܝܐ. ܡ̣ܢ ܦܘܡ ܡܪܝܐ. ܐܢܐ ܐܝ̣ܬܝ ܡܪܝܐ ܘܠܝܬ ܐܠܗܐ ܐ̱ܚܪܝܢ ܠܒܪ ܡܢܝ.

 

 

 

ܣܗܕܘܬܐ ܕܫܬ

 

ܒܣܒܪܬܐ ܗ̣ܘ ܡܪܢ ܠܘܩܒܠ ܗ̇ܘ ܕܒܪܢܫܐ ܫܚܝܡܐ ܝܕܥ ܗܘܐ ܠܗ. ܡܢܐ ܐܡ̇ܪ ܐܢ̱ܬ ܠܝ ܛܒܐ. ܠܝܬ ܕܝܢ ܛܒܐ ܐܠܐ ܐܢ ܚܕ ܐܠܗܐ.

 

 

 

ܣܗܕܘܬܐ ܕܫܒܥ

 

ܦܘܠܘܣ. ܠܡܐ ܓܝܪ ܐܠܗܐ ܕܝܘ̈ܕܝܐ ܗ̣ܘ ܒܠܚܘܕ. ܘܕܥܡ̈ܡܐ ܠܐ܇ ܐܝܢ ܐܠܗܐ ܕܡܙܕܩ ܓܙܘܪܬܐ ܒܗܝܡܢܘܬܐ. ܐܦ ܥܘܪܠܘܬܐ ܒܗܝܡܢܘܬܐ.

 

 

 

ܣܗܕܘܬܐ ܕܬܡܢܐ

 

ܗ̣ܘ ܟܕ ܗ̣ܘ. ܝܕܥܝ̣ܢܢ ܕܠܐ ܗܘܐ ܡܕܡ ܗ̣ܘ ܦܬܟܪܐ ܒܥܠܡܐ ܘܕܠܝܬ ܐܠܗܐ ܐ̱ܚܪܝܢ ܐܠܐ ܐܢ ܚܕ. ܐܦܢ ܓܝܪ ܐܝܬ ܕܡܬܩܪܝܢ ܐܠܗ̈ܐ ܐܘ ܒܫܡܝܐ ܐܘ ܒܐܪܥܐ. ܐܝܟܢܐ ܕܐܝܬ ܐܠܗ̈ܐ ܣܓܝ̈ܐܐ. ܘܡܪ̈ܘܬܐ ܣܓܝ̈ܐܐ. ܐܠܐ ܠܢ ܕܝܠܢ ܚܕ ܗ̣ܘ ܐܠܗܐ ܐܒܐ.

 

 

 

ܣܗܕܘܬܐ ܕܬܫܥ

 

ܕܝܘܢܢܘܣܝܘܣ. ܚܕ ܐܠܗܐ ܡܥܠܝ ܐܘܣܝܐ. ܠܐ ܡܬܦܠܓܢܐ ܒܡܬܦܠܓܢ̈ܐ. ܘܕܡܚܝܕ ܗ̣ܘ ܠܗ ܘܠܣܓܝ̈ܐܐ. ܠܐ ܚܠܝ̣ܛܐ ܘܕܠܐ ܣܓܐ.

 

 

 

ܣܗܕܘܬܐ ܕܥܣܪ

 

ܓܪܝܓܘܪܝܘܣ. ܒܗܕܐ ܕܝܢ ܒܣܩܘܒܠܝܘܬܐ ܒܝ̣ܫܬܐ ܕܝܢ ܕܫܘܝܐ ܢܦܠ. ܟܕ ܣܝܡܝ̣ܢܢ ܬܠܬ ܪ̈ܝܫܐ. ܘܬܠܬܐ ܐܠܗ̈ܐ. ܗܕܐ ܕܡ̣ܢ ܗܠܝܢ ܕܩܕܡܘ ܐܬܐܡܪܘ ܝܬܝܪ ܫܟܝ̣ܪܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܡܝܢܝܐ ܕܫܬܐܣܬܐ ܬܠܝܬܝܬܐ ܡܛܠ ܬܪܥܝ̣ܬܐ ܚܢܦܝܬܐ ܕܣܓܝܐܘܬ ܐܠܗ̈ܐ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ ܕܗܠܝܢ. ܣܥܝܐ ܩܕܡܝܐ.

 

ܐܡܪܝܢ ܕܬܪ̈ܝܗܘܢ ܐܠܗ̈ܐ ܕܐܡܪܝܢܢ ܚܟܝ̣̈ܡܝ ܒܟܠ ܙܕܩ ܕܢܗܘܘܢ. ܘܚܟܝ̣ܡܐ ܗ̇ܘ ܗ̣ܘ ܕܠܐ ܡܨܛܒܐ ܠܡܣܥܪ܆ ܐܠܐ ܣܥܘܪܘܬܐ ܕܛܒ ܡܝܬܪܐ. ܘܣܥܘܪܘܬܐ ܕܛܒ ܡܝܬܪܐ ܒܟܠ ܨܒܘ̣ ܚܕܐ ܗ̣ܝ. ܒܕܓܘܢ ܟܠܚܕ ܡܢܗܘܢ ܟܕ ܚܟܝ̣ܡ ܗ̣ܘ ܒܗ̇ ܒܗ̇ܝ ܣܥܘܪܘܬܐ ܡܨܛܒܐ. ܘܡ̣ܢ ܗܪܟܐ ܠܐ ܐܠܨܐ ܕܡܫܚ̈ܠܦܬܐ ܐܘ ܣܩܘܒ̈ܠܝܬܐ ܢܗܘ̈ܝܢ ܣܥܘܪ̈ܘܬܗܘܢ ܒܥܠܬ݀ ܗ̇ܝ ܕܡܫܚܠܦܝ̣ܢ ܐܘ ܣܩܘܒ̈ܠܝܝܢ ܟܝܢܝ̈ܗܘܢ.

 

 

 

ܣܥܝܐ ܬܪܝܢܐ

 

ܐܡܪܝܢ. ܕܬܪ̈ܝܗܘܢ ܗܠܝܢ ܐܠܗ̈ܐ. ܡ̣ܢ ܐܠܨ̈ܬܐ ܕܢܕܥܘܢ ܒܡܩܕܡܘܬ ܝ̣ܕܥܬܗܘܢ. ܠܟܠܗܘܢ ܣܘܥܪ̈ܢܐ ܕܢܦܠܝ̣ܢ ܒܡܥܒܕܢܘܬܐ ܘܠܗܠܝܢ ܕܠܐ ܢܦܠܝܢ. ܘܠܐ ܡܨܝܐ ܠܡܬܒܥܝܘ ܗ̇ܘ ܕܠܐ ܢܦܠ. ܒܕܓܘܢ ܬܪ̈ܝܗܘܢ ܠܗܠܝܢ ܕܢܦܠܝ̣ܢ ܒܥܝܢ ܘܥܒܕܝ̣ܢ. ܘܠܗܠܝܢ ܕܠܐ ܢܦܠܝ̣ܢ ܠܐ ܒܥܝܢ ܘܠܐ ܥܒܕܝ̣ܢ. ܘܡ̣ܢ ܗܪܟܐ ܡܬܟܢܫܐ ܗ̇ܝ ܕܫܘ̈ܝܝ ܒܨܒܝܢܐ ܘܫܘ̈ܝܝ ܒܣܥܘܪܘܬܐ ܐܠܨܐ ܕܢܗܘܘܢ ܬܪ̈ܝܗܘܢ. ܘܐܦܢ ܠܐ ܫܘܝܢ ܒܟܝܢܝ̈ܗܘܢ.

 

 

 

ܣܥܝܐ ܬܠܬܝܐ

 

ܐܡܪܝܢ ܕܒܥܠܡܐ ܗܢܐ܆ ܛܒ̈ܬܐ ܡܫܟܚܝ̣ܢܢ ܘܒܝ̈ܫܬܐ. ܘܥܒܘܕܐ ܚܕܢܝܐ ܠܐ ܡܨܝܐ ܕܛܒܬܐ ܐܟܚܕܐ ܘܒܝ̣ܫܬܐ ܢܥܒܕ. ܘܒܬܪ̈ܬܝܗܝܢ ܐܟܚܕܐ ܢܨܛܒܐ. ܒܕܓܘܢ ܥܒܘܕܗ̇ ܕܛܒܬܐ ܛܒܐ ܗ̱ܘ. ܘܗ̇ܘ ܕܒܝܫܬܐ ܒܝܫܐ ܗ̱ܘ. ܘܡ̣ܢ ܗܪܟܐ ܐܠܨܐ ܕܬܪܝܢ ܢܗܘܘܢ ܥܒܘ̈ܕܐ ܐܘܟܝ̣ܬ ܐܠܗ̈ܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ ܫܪܝܐ ܩܕܡܝܐ

 

ܐܡܪܝܢܢ ܕܣܥܘܪܘܬܐ ܕܡܝܬܪܐ ܐܦܢ ܚܕܐ ܗ̱ܝ ܒܟܠܡܕܡ. ܐܠܐ ܠܬܪ̈ܝܗܘܢ ܗ̇ܢܘܢ ܐܠܗܝ̈ܟܘܢ. ܟܕ ܡܫܚ̈ܠܦܝ ܒܟܝܢܐ ܐܢܘܢ. ܠܘ ܚܕܐ ܡܨܝܐ ܕܬܗܘܐ ܘܗ̣ܝ ܟܕ ܗ̣ܝ ܡܝܬܪܘܬܐ ܐܠܐ ܡܠܘܢ ܗ̇ܘ ܡܐ ܕܠܚܕ ܡܢܗܘܢ ܡܝܬܪܘܬܐ ܗ̱ܘ. ܡ̣ܢ ܐܠܨ̈ܬܐ ܕܠܗܘܢ ܐ̱ܚܪܢܐ. ܠܘ ܡܝܬܪܘܬܐ ܢܗܘܐ. ܘܐܠܐ ܡܫܘ̈ܬܦܐ ܒܟܝܢܐ ܗܘܘ. ܘܠܘ ܡܫܚ̈ܠܦܐ. ܘܡ̣ܢ ܗܪܟܐ ܗ̣ܝ ܗ̇ܝ ܫܟܝ̣ܪܘܬܐ ܕܣܩܘܒܠܝܘܬ ܨܒܝ̈ܢܐ ܕܟܢܫܢܢ ܡܬܟܢܫܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܝ̣ܕܥܬܐ ܠܡܬܝܕܥܢܐ ܢܩܝ̣ܦܐ. ܘܠܘ ܡܬܝܕܥܢܐ ܠܝ̣ܕܥܬܐ. ܒܕܓܘܢ ܡܬܡܨܝܢܘܬ ܫܟܝ̣ܚܘܬܗ ܕܣܘܥܪܢܐ ܒܡܥܒܕܢܘܬܐ. ܩܕܝ̣ܡܐ ܠܝ̣ܕܥܬܐ ܕܡܬܡܨܝܢܘܬ ܫܟܝ̣ܚܘܬܗ̇ ܕܒܡܥܒܕܢܘܬܐ. ܘܗ̇ܘ ܕܩܕܝ̣ܡ ܐܝܟܢܐ ܡܨܐ ܕܥܠܬܢܐ ܢܗܐ ܕܗ̇ܘ ܕܐ̱ܚܪܝ ܡܢܗ. ܥܠܬܢܐ ܓܝܪ ܐ̱ܚܪܢܐ ܙܕܩ ܕܢܗܘܐ ܘܠܘ ܩܕܡܝܐ. ܘܡ̣ܢ ܗܪܟܐ ܡܬܦܪܣܝܐ ܗ̇ܝ ܕܐܡ̣ܪܬܘܢ ܕܡܩܕܡܘܬ ܝ̣ܕܥܬܗܘܢ ܠܗ̇ܢܘܢ ܕܥܬܝ̣ܕܝ̣ܢ ܠܡܫܬܟܚܘ ܥܠܬܐ ܗ̱ܝ ܕܒܥܬܗܘܢ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܛܒܐ ܐܢ ܡܬܡܨܐ ܚܝܠܐ ܕܢܒܛܠܝܗ̇ ܠܒܝܫܬܐ ܬܚܘܒܐ ܗ̱ܘ. ܘܥܠ ܗܕܐ ܠܘ ܐܠܗܐ ܗ̱ܘ. ܘܐܢ ܡܬܡܨܐ ܘܠܐ ܡܒܛܠ. ܒܝܫܐ ܗ̱ܘ ܘܠܘ ܛܒܐ. ܗ̣ܘ ܗܟܘܬ ܘܒܝܫܐ. ܐܢ ܠܐ ܡܨܐ ܚܝܠܗ̇ ܕܛܒܬܐ ܬܚܘܒ. ܘܐܢ ܡܨܐ ܐܠܐ ܠܐ ܨܒܐ ܛܒܐ ܗ̱ܘ ܘܠܘ ܒܝܫܐ. ܘܗܟܢܐ ܡܫܬܪܐ ܐܠܗܘܬܗܘܢ ܡܥܝ̣ܣܬܐ ܕܬܪ̈ܝܗܘܢ.

 

 

 

ܩܦܠܐܘܢ ܬܫܝ̣ܥܝܐ ܕܫܬܐܣܬܐ ܬܠܝܬܝܬܐ. ܡܛܠ ܬܠܝܬܝܘܬܐ ܩܢܘ̈ܡܐ ܕܚܕܢܝܘܬ ܟܝܢܐ ܕܐܠܗܘܬܐ. ܘܒܗ ܐܝܬ ܦܣܘ̈ܩܐ ܕܬܪܝܢ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ ܡܪܢܝܬܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܕܒܬܫܥ ܬܐܘܪ̈ܝܐܣ ܡܫܪܪ̈ܢ ܠܗ̇ ܠܒܥܬܐ ܗܕܐ. ܬܐܘܪܝܐ ܩܕܡܝܬܐ ܡܛܠ ܗ̇ܝ ܕܒܪܘܝܐ ܚܟܝ̣ܡ ܘܚܝ.

 

ܕܚܟܡ ܡ̇ܢ ܒܪܘܝܐ. ܘܠܟܠܗܝܢ ܕܐܝܬܝܗܝܢ ܒܝ̣ܕܥܬܗ ܕܠܝܬܗ ܝܕܥ ܡ̣ܢ ܠܥܠ ܦܬܝܐܝܬ ܦܬܚܬ݀ ܡܠܬܐ. ܘܕܚܝ ܡ̇ܢ ܝ̣ܕܝ̣ܥܐ ܡ̣ܢ ܗ̇ܝ ܕܝܕܥ. ܘܟܠ ܕܝܕܥ ܚܝ. ܒܪܘܝܐ ܡܕܝܢ ܕܝ̇ܕܥ ܟܠ ܚܝ. ܘܟܠ ܕܝ̇ܕܥ ܚܝ ܐܡ̣ܪܢܢ. ܡܛܠ ܕܗܦܘܟܝܐ ܐܢܛܝ̣ܦܛܝ̣ܩܝܐ ܕܦܪ̈ܘܛܣܝܣ ܐܠܦ ܠܢ ܗܕܐ ܟܐܡܬ݀ ܗ̇ܝ ܕܟܠ ܕܠܐ ܚܝ ܠܐ ܝ̇ܕܥ.

 

 

 

ܬܐܘܪܝܐ ܬܪܝܢܝܬܐ ܡܛܠ ܗ̇ܝ ܕܒܪܘܝܐ ܒܚܟܡܬܐ ܗ̱ܘ ܚ̇ܟܡ ܘܒܚܝ̈ܐ ܗ̣ܘ ܚܝ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ܆ ܐܠܘܠܐ ܒܚܟܡܬܐ ܗ̱ܘ ܚܟܡ ܗܘܐ ܗ̇ܘ ܕܚܝ. ܡܫܬܟܚ ܗܘܐ ܕܓܠܝ̣ܙ ܡ̣ܢ ܚܟܡܬܐ ܘܡ̣ܢ ܚܝ̈ܐ. ܘܟܠ ܕܓܠܝ̣ܙ ܡ̣ܢ ܚܟܡܬܐ ܘܡ̣ܢ ܚܝ̈ܐ܆ ܠܐ ܚܟܡ ܐܦܠܐ ܚܝ. ܒܪܘܝܐ ܡܕܝܢ ܐܢ ܠܘ ܒܚܟܡܬܐ ܘܒܚܝ̈ܐ ܚܟܡ ܘܚܝ. ܠܐ ܚܟܡ ܐܦܠܐ ܚܝ ܗ̇ܝ ܕܫܟܝ̣ܪܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܐܦܘܕܝܟܣܝܣ ܗ̇ܝ ܕܡܫܪܪܐ ܠܢ ܚܕܢܝܘܬܗ ܕܒܪܘܝܐ ܠܐ ܣܦܩ ܕܬܫܪܪ ܗ̇ܝ ܕܚܟܡ ܘܚܝ. ܘܐܠܐ ܠܘ ܥܠ ܐܦܘܕܝܟܣܝܣ ܐ̱ܚܪܬܐ ܡܣܬܢܩܝ̣ܢ ܗܘܝܢ ܠܡܫܬܪܪܘ ܗ̇ܝ ܕܚܟܡ ܘܗ̇ܝ ܕܚܝ. ܘܡ̣ܢ ܗܪܟܐ ܝ̣ܕܝ̣ܥܐ ܕܟܝܢܐ ܐܠܨܝ ܐܝܬܘܬܐ ܐ̱ܚܪܝܢ ܗ̣ܘ ܣܘܟܠܗ ܡ̣ܢ ܣܘܟܠ ܗ̇ܝ ܕܚܟܡ ܘܗ̇ܝ ܕܚܝ. ܒܬܪ̈ܝܗܘܢ ܡܕܝܢ ܗܠܝܢ ܣܘ̈ܟܠܐ ܚ̇ܟܡ ܘܚܝ ܒܪܘܝܐ.

 

 

 

ܬܐܘܪܝܐ ܬܠܝܬܝܬܐ ܡܛܠ ܗ̇ܝ ܕܚܟܡܬܐ ܘܚܝ̈ܐ ܕܒܪܘܝܐ ܩܢܘ̈ܡܐ ܐܢܘܢ ܡܩܝ̈ܡܐ

 

ܐܡܪܝܢܢ ܕܚܟܡܬܐ ܘܚܝ̈ܐ ܕܒܪܘܝܐ ܟܠܚܕ ܡ̣ܢ ܬܪ̈ܝܗܘܢ ܐܘ ܐܘܣܝܐ ܐܝܬܘܗܝ ܐܘ ܓܕܫܐ. ܘܠܐ ܡܨܝܐ ܕܓܕܫܐ ܢܗܘܐ ܘܐܠܐ ܡܫܬܟܚ ܒܪܘܝܐ ܕܡܫܪܝܐ ܗ̱ܘ ܕܓܕ̈ܫܐ ܘܣܒܥ ܫܘܚ̈ܠܦܐ ܘܚܫ̈ܐ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܐܘܣܝܐ ܟܠܢܝܬܐ ܢܗܘܐ. ܘܐܠܐ ܐܟܡܐ ܕܥܠ ܒܪܘܝܐ ܗܟܘܬ ܘܥܠ ܒܪ̈ܝܐ ܡܬܩܛܪܓܐ ܗܘܬ݀ ܚܟܡܬܗ. ܒܗ̇ ܒܕܡܘ̣ܬܐ ܘܚܝܘ̈ܗܝ ܫܪܝ̣ܟܐ ܡܕܝܢ ܕܐܘܣܝܐ ܗ̱ܘ ܝ̣ܚܝ̣ܕܝܬܐ. ܘܕܗܕܐ ܠܘ ܡܕܡ ܐ̱ܚܪܝܢ ܗ̣ܝ ܐܠܐ ܩܢܘܡܐ ܓܠܝܐ. ܘܚܟܡܬܗ ܡܕܝܢ ܕܒܪܘܝܐ ܩܢܘܡܐ ܡܩܝܡܐ. ܗ̣ܘ ܗܟܘܬ ܘܚܝܘ̈ܗܝ. ܘܡܛܠ ܕܗ̇ܘ ܕܚܟܡ ܘܚܝ ܐ̱ܚܪܝܢ ܗ̣ܘ ܣܘܟܠܗ ܡ̣ܢ ܚܟܡܬܐ ܘܚܝ̈ܐ܆ ܐܝܟ ܕܐܡ̣ܪܢܢ. ܐܦ ܗ̣ܘ ܡܕܝܢ ܩܢܘܡܐ ܗ̱ܘ ܡܩܝܡܐ. ܘܕܝܠܗ ܐܢܘܢ ܚܝ̈ܐ ܘܚܟܡܬܐ. ܘܡ̣ܢ ܗܪܟܐ ܡܬܬܒܪܩ ܠܢ ܢܗܝܪܐܝܬ ܨܡܚܗ̇ ܕܬܠܝ̣ܬܝܘܬ ܩܢܘ̈ܡܐ ܕܚܕ ܟܝܢܐ ܐܠܗܝܐ.

 

 

 

ܗܦܟܬܐ

 

ܐܡܪܝܢ ܕܐܢܗܘ ܕܒܗ̇ܝ ܕܡܠܝ̣ܠ ܘܚܝ ܒܪܘܝܐ܆ ܩܢܘ̈ܡܐ ܡܩܝ̈ܡܐ ܙܕܩ ܕܢܗܘܘܢ ܘܡܠܬܗ ܐܘܟܝ̣ܬ ܚܟܡܬܗ ܘܚܝܘ̈ܗܝ. ܡܕܝܢ ܒܗ̇ܝ ܬܘܒ ܕܡܨܐ ܚܝܠܐ ܗ̱ܘ. ܘܒܪܘܝܐ ܘܛܒܐ ܘܟܐܢܐ ܘܡܪܚܡܢܐ ܘܛܢܢܐ. ܘܡܬܘܡܝܐ ܘܥܠܡܝ̣ܢܝܐ. ܩܢܘ̈ܡܐ ܡܩܝ̈ܡܐ ܙܕܩ ܕܢܗܘܘܢ. ܘܟܠܗܘܢ ܗܠܝܢ ܙܢܝ̈ܐ. ܘܡ̣ܢ ܗܪܟܐ܆ ܠܘ ܒܠܚܘܕ ܠܘܬ ܬܠܝ̣ܬܝܘܬܐ ܩܐܡ ܡܢܝܢ ܩܢܘ̈ܡܐ.ܐܠܐ ܘܠܘܬ ܥܣܝ̣ܪܝܘܬܐ ܘܝܬܝܪ.

 

 

 

ܦܘܢܝܐ

 

ܐܡܪܝܢܢ ܕܫܘ̈ܡܗܐ ܐܠܗܝ̈ܐ܆ ܡܢܗܘܢ ܡ̇ܢ ܐܘܣܝܝ̈ܐ ܐܢܘܢ. ܡܢܗܘܢ ܕܝܢ ܐ̱ܚܝܢ̈ܝܐ. ܡܢܗܘܢ ܡ̇ܢ ܐܝܬܝܗܘܢ܆ ܚܟܡܬܐ ܘܚܝ̈ܐ. ܟܕ ܠܘ ܒܦܚܡܐ ܕܠܘܬ ܐ̱ܚܪܢܐ ܡܬܐܡܪܝܢ. ܐܦܠܐ ܓܠܝ̣ܙܘܬܐ ܕܡܕܡ ܡܫܘܕܥܝ̣ܢ. ܘܡܛܠ ܗܕܐ ܙܕܩܐܝܬ ܩܢܘ̈ܡܐ ܡܩܝ̈ܡܐ ܐܬܬܘܕܝ̣ܘ ܡ̣ܢ ܟܪ̈ܣܛܝܢܐ ܘܐܝܬܝܗܘܢ. ܫܘܡܗ̈ܐ ܕܝܢ ܐ̱ܚܝܢܝ̈ܐ܆ ܐܟܙܢܐ ܕܡܨܐ ܚܝܠܐ. ܕܒܦܚܡܐ ܕܗ̇ܘ ܕܡܬܬܗܘܐ ܡܬܐܡܪ. ܘܐܝܟ ܛܒܐ ܕܒܦܚܡܐ ܕܗ̇ܘ ܕܫܘܐ ܘܗ̇ܘ ܕܠܐ ܫܘܐ ܡܬܐܡܪ. ܘܐܝܟ ܟܐܢܐ ܕܒܦܚܡܐ ܕܗ̇ܘ ܕܫܘܐ ܡܬܐܡܪ. ܘܐܝܟ ܗܠܝܢ ܐ̱ܚܪ̈ܢܐ ܠܘ ܩܢܘ̈ܡܐ ܡܩܝ̈ܡܐ ܡܨܝܢ ܕܢܗܘܘܢ. ܘܡܛܠ ܗܕܐ ܐܦܠܐ ܡܬܬܘܕܝܢ. ܒܗ̇ܝ ܕܡ̣ܢ ܩܐܛܝܓܘܪܝܐ ܕܠܘܬ ܡܕܡ ܐܢܘܢ. ܕܗ̣ܝ ܝܬܝ̣ܪ ܡ̣ܢ ܟܠܗܘܢ ܓܢܣܢ̈ܝ ܓܕ̈ܫܐ ܬܚܘܒܐ. ܘܒܡܕܡ ܐ̱ܚܪܝܢ ܘܠܘ ܒܝܬܗ̇ ܡܨܝܐ ܕܬܩܘܡ ܐܘ ܬܬܗܘܢܢ. ܘܫܘ̈ܡܗܐ ܬܘܒ ܗ̇ܢܘܢ ܐܦܘܦܛܝ̈ܩܝܐ. ܐܟܙܢܐ ܕܡܬܘܡܝܘܬܐ ܘܥܠܡܝ̣ܢܝܘܬܐ. ܕܡܪܝ̣ܡܢܘܬ ܫܘܪܝܐ ܘܫܘܠܡܐ ܡܫܘܕܥܝ̣ܢ. ܐܦܠܐ ܗ̣ܢܘܢ ܩܢܘ̈ܡܐ ܡܩܝ̈ܡܐ ܡܨܝܢ ܠܡܗܘܐ. ܒܕ ܗ̇ܘ ܡܐ ܕܠܐ ܐܝܬܘܗܝ ܡܕܡ ܡܫܘܕܥܝ̣ܢ. ܘܠܘ ܗ̇ܘ ܡܐ ܕܐܝܬܘܗܝ. ܐܠܨܐܝܬ ܡܕܝܢ ܡܠܬܐ ܘܪܘܚܐ ܕܝ̣ܠܢܐܝܬ ܩܢܘ̈ܡܐ ܡܩܝ̈ܡܐ ܡܫܬܟܚܝ̣ܢ܇ ܥܡ ܩܢܘܡܐ ܗ̇ܘ ܕܕܝܠܗ ܐܢܘܢ ܡܠܬܐ ܘܚܝ̈ܐ.

 

 

 

ܗܦܟܬܐ

 

ܐܡܪܝܢ ܐܢܗܘ ܕܡܨܐ ܚܝܠܐ ܒܗ̇ܝ ܕܒܦܚܡܐ ܕܗ̇ܘ ܕܡܬܬܗܘܐ ܡܬܐܡܪ. ܠܘ ܩܢܘ̈ܡܐ ܡܩܝܡܐ ܡܨܐ ܠܡܗܘܐ. ܡܕܝܢ ܘܗ̇ܘ ܕܚ̇ܟܡ ܐܘܟܝ̣ܬ ܝ̇ܕܥ. ܒܗ̇ܝ ܕܒܦܚܡܐ ܕܗ̇ܘ ܕܡܬܚܟܡ ܐܘܟܝ̣ܬ ܡܬܝ̣ܕܥ ܡܬܐܡܪ. ܠܘ ܩܢܘܡܐ ܡܩܝܡܐ ܡܨܐ ܠܡܗܘܐ.

 

 

 

ܦܘܢܝܐ

 

ܐܡܪܝܢܢ ܕܡܨܐ ܚܝܠܐ ܫܘܡܗܐ ܗ̱ܘ ܕܠܐ ܡܬܘܡ ܡܣܬܟܠ. ܐܠܐ ܒܦܚܡܐ ܕܠܘܬ ܐ̱ܚܪܢܐ. ܒܗ̇ܝ ܕܐܠܘܠܐ ܢܗܘܐ ܗ̇ܘ ܕܡܬܬܗܘܐ ܒܗܘܢܐ ܐܘ ܒܣܘܥܪܢܐ. ܕܡܢܘ̣ ܐܪܐ ܢܬܡܨܐ ܚܝܠܐ܆ ܗ̇ܘ ܕܡܨܐ ܚܝܠܐ. ܗ̇ܘ ܕܚ̇ܟܡ ܕܝܢ ܐܘܟܝ̣ܬ ܝ̇ܕܥ. ܠܘ ܗܟܢܐ܆ ܒܗ̇ܝ ܕܠܝܬܗ ܡܬܐܡܪ ܕܚ̇ܟܡ ܘܝ̇ܕܥ ܩܕܡܝܬ݀ ܘܡܪܢܐܝܬ ܒܪܘܝܐ. ܐܝ̣ܛܐ ܒܡܨܥܝܘܬ ܝܕܥܬܗ ܕܠܝܬܗ. ܐܦ ܠܗܠܝܢ ܐ̱ܚܪ̈ܢܝܬܐ ܣܓܝ̈ܐܬܐ ܝ̇ܕܥ. ܐܟܡܐ ܕܡ̣ܢ ܠܥܠ ܦܬܝܐܝܬ ܚܘܝ̣ܢܢ. ܘܡ̣ܢ ܗܪܟܐ ܝ̣ܕܝ̣ܥܐ ܕܝ̣ܕܥܬܐ ܩܕܡܝܬܐ ܘܡܪܢܝܬܐ ܗ̇ܝ ܕܠܘ ܒܦܚܡܐ ܕܡܕܡ ܐ̱ܚܪܝܢ ܕܠܒܪ ܡ̣ܢ ܝܬܗ ܕܒܪܘܝܐ ܡܬܐܡܪܐ܇ ܝ̣ܕܥܬܐ ܕܝܢ ܕܒܦܚܡܐ ܕܗܠܝܢ ܐ̱ܚܪ̈ܢܐ ܡܬܢܩܦܢܝ̣ܬܐ ܗ̱ܝ ܕܗܕܐ ܘܐ̱ܚܪܝܐ ܡܢܗ̇. ܒܕܓܘܢ ܠܗ̇ܝ ܩܕܡܝܬܐ ܘܝ̣ܚܝ̣ܕܝܬܐ ܐܡܪܝܢܢ ܩܢܘܡܐ ܡܩܝܡܐ. ܘܠܘ ܠܗܕܐ ܐ̱ܚܪܝܬܐ ܘܦܚܡܝܬܐ ܘܡܬܢܩܦܢܝ̣ܬܐ ܐܦ ܓܝܪ ܘܠܚܟܝ̣̈ܡܐ ܒܪ̈ܝܐ ܣܓܝ̈ܐܬܐ ܐܡܝ̣ܪ̈ܢ ܥܠ ܫܘܪܪ ܢܝ̣ܫܐ ܗܢܐ. ܟܪ ܕܨܒܝܢ ܠܡܫܪܪܘ܇ ܕܚܕܢܝܬ݀ ܙܢܐ ܗ̱ܝ ܝ̣ܕܥܬܗ ܕܒܪܘܝܐ. ܘܐܦܢ ܠܣܓܝ̈ܐܐ ܘܡܫܚܠܦܝ̣ܢ ܚ̇ܟܡ.

 

 

 

ܬܐܘܪܝܐ ܪܒܝܥܝܬܐ ܡܛܠ ܗ̇ܝ ܕܐܦܢ ܩܢܘ̈ܡܐ ܡܩܝ̈ܡܐ ܐܢܘܢ. ܐܠܐ ܠܐ ܡܬܦܪ̈ܫܢܐ ܘܠܐ ܡܣܬܕ̈ܩܢܐ ܐܢܘܢ ܡ̣ܢ ܩܢܘܡܐ ܗ̣ܘ ܕܕܝܠܗ ܐܢܘܢ ܚܟܡܬܐ ܘܚܝ̈ܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܠܘ ܒܠܥܕܗܘܢ ܡܟܢ ܗܘܐ ܠܡܗܘܐ ܩܢܘܡܐ ܗ̇ܘ ܕܕܝܠܗ ܐܢܘܢ ܚܟܡܬܐ ܘܚܝ̈ܐ. ܡܫܬܟܚ ܗܘܐ ܕܓܠܝ̣ܙ ܡܢܗܘܢ ܘܡ̣ܢ ܗܪܟܐ ܫܟܝ̣ܪܘܬܐ ܗ̇ܝ ܕܒܬܐܘܪܝܐ ܬܪܝܢܝ̣ܬܐ ܐܬܟܢܫܬ݀ ܡܬܟܢܫܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܐܠܘ ܚܟܡܬܐ ܘܚܝ̈ܐ ܐܫܬܟܚܘܢ ܒܠܥܕ ܩܢܘܡܐ ܗ̇ܘ ܕܕܝܠܗ ܐܢܘܢ ܚܟܡܬܐ ܘܚܝ̈ܐ. ܡܫܬܟܚܐ ܚܟܡܬܐ܆ ܕܠܘ ܠܡܕܡ ܗ̣ܝ ܚܟܡܬܐ. ܘܚܝ̈ܐ ܕܠܘ ܠܡܕܡ ܐܢܘܢ ܚܝ̈ܐ܆ ܗ̇ܝ ܕܫܟܝ̣ܪܐ. ܠܐ ܡܦܪܫܐ ܐܢܘܢ ܡܕܝܢ ܘܠܐ ܣܕܝ̣̈ܩܐ ܡ̣ܢ ܚܕܕ̈ܐ ܩܢܘ̈ܡܝܗ̇ ܕܐܠܗܘܬܐ ܡܚܝܕܬܐ ܘܐܦܢ ܒܣܘܟܠܐ ܕܝܬܝ̣ܪ ܩܛܝ̣ܢ ܡܬܦܪܫܝܢ ܒܗܘܢܐ. ܒܝܕ ܫܘܘܕܥܝ̈ܗܘܢ ܕܝ̣ܠܢܝ̈ܐ.

 

 

 

ܬܐܘܪܝܐ ܚܡܝܫܝܬܐ. ܡܛܠ ܗ̇ܝ ܕܠܩܢܘܡܐ ܗ̇ܘ ܕܚܟܡ ܘܚܝ ܐܒܐ ܩܪܝܐ ܬܐܘܠܘܓܝܐ. ܘܠܚܟܡܬܐ ܒܪܐ. ܘܠܚܝ̈ܐ ܪܘܚܐ

 

ܐܡܪܝܢܢ ܕܠܗ̇ ܠܚܟܡܬ݀ ܐܠܗܐ. ܡܠܬܐ ܩܪܝܐ ܬܐܘܠܘܓܝܐ. ܡܛܠ ܕܡܠܬܐ ܡ̣ܢ ܗܘܢܐ ܡܥܕܐ ܕܬܬܝ̣ܠܕ. ܦܐܝܘܬ ܙܕܩܐܝܬ ܠܡܠܬܐ ܡ̇ܢ ܒܪܐ ܩܪܬ݀. ܠܝܠܘܕܗ̇ ܕܝܢ ܐܘܟܝ̣ܬ ܠܗܘܢܐ ܐܠܨܝ ܐܝܬܘܬܐ ܥܠܬ݀ ܟܠ ܗܘܢܝ̣̈ܢ ܘܗܘܝܝ̈ܢ ܐܒܐ. ܠܚܝ̈ܐ ܕܝܢ ܬܘܒ ܪܘܚܐ ܩܕܝܫܐ. ܡ̣ܢ ܛܘܦܣܐ ܕܗܠܝܢ ܕܝܠܢ. ܒܗ̇ܝ ܕܘܠܐ ܡܕܡ ܡ̣ܢ ܗܠܝܢ ܕܚܐܝܝܢ ܐܝܬܝܗ̇ ܘܠܘܬܢ܇ ܗ̇ܘ ܕܠܘ ܒܪܘܚܐ ܚܝ. ܡܠܬܐ ܕܝܢ ܗܪܟܐ. ܠܘ ܗ̇ܝ ܢܦܘܩܬܐ ܕܒܐܐܪ ܡܬܐܫܕܐ ܙܕܩ ܕܬܣܬܟܠ. ܐܠܐ ܗ̇ܝ ܕܡ̣ܢ ܫܘܬܦܘܬܢ ܕܒܗ̇܆ ܠܦܘܬ ܗܘܠܢܝܘܬ ܟܝܢܢ ܡܬܦܪܫܝ̣ܢܢ ܡ̣ܢ ܒܥܝ̣ܪܐ. ܘܐܦܢ ܦܐܩ̈ܐ ܐ̱ܢܫܝ̈ܢ ܘܕܠܐ ܪܬܡܐ ܢܗܘܐ ܘܪܘܚܐ ܬܘܒ ܠܘ ܗ̇ܝ ܕܒܓܝ̈ܕܐ ܐܘ ܫܪ̈ܝܢܐ ܐܘ ܘܪ̈ܝ̣ܕܐ ܡܝܒܠܐ ܠܚܝ̈ܐ ܢܦܫܢܝ̈ܐ. ܐܘ ܠܗ̇ܢܘܢ ܚܝܘܬܢܝ̈ܐ. ܐܘ ܠܗ̇ܢܘܢ ܟܝܢܝ̈ܐ ܙܕܩ ܕܬܣܬܟܠ. ܐܠܐ ܗ̇ܝ ܡܒܪܝܬܐ ܘܠܐ ܗܘܠܢܝܬܐ. ܕܒܠܨܘܨܝ̣ܬܐ ܗ̱ܝ ܐܘܟܝ̣ܬ ܙܠܓܐ ܡ̣ܢ ܠܡܦܐܕ ܐܠܗܘܬܐ. ܘܒܗ ܐܝܬܝܢ ܚܝ̈ܐ ܡܠܝ̣̈ܠܐ.

 

 

 

ܗܦܟܬܐ

 

ܐܡܪܝܢ ܘܡܢܐ ܐܠܨܬ݀ ܠܩܝܘ̈ܡܝܗ̇ ܕܬܘܕܝ̣ܬܟܘܢ ܗܕܐ ܕܒܟܠܗܝܢ ܗܠܝܢ ܟܪ̈ܟܬܐ ܘܥܘܪ̈ܩܠܐ ܢܬܥܫܘܢ ܗܘܘ ܘܢܬܥܫܘܢ ܠܫܡܘ̈ܥܝܗܘܢ. ܘܒܟܘ̈ܢܝܐ ܚܝܘܬܢܝ̈ܐ ܕܐܝܟ ܗܠܝܢ ܢܫܚܡܘܢ ܗܘܘ ܠܫܘܡܗܘ̈ܗܝ ܕܟܝܢܐ ܐܠܗܝܐ. ܘܕܒܠܥܕܗܘܢ ܕܟܘ̈ܢܝܐ ܗܠܝܢ. ܝܬܝ̣ܪ ܦܫܝ̣ܩܬܐ ܗܘܝܐ ܗܘܬ݀ ܬܘܕܝܬܐ ܗ̇ܝ ܕܒܟܝܢܐ ܚܕܢܝܐ ܕܐܠܗܐ܆ ܓܠܝܐ. ܠܗ̇ܝ ܓܝܪ ܕܚܕ ܟܝܢܐ ܘܩܢܘܡܐ ܕܐܠܗܐ. ܕܠܐ ܦܘܫܟ ܘܦܘܪܬܟ ܟܠ ܐ̱ܢܫ ܡܬܕܢܐ ܠܡܩܒܠܘ.

 

 

 

ܦܘܢܝܐ

 

ܐܡܪܝܢܢ ܕܠܘ ܩܝܘ̈ܡܝܗ̇ ܕܬܘܕܝܬܐ ܗܕܐ ܡ̣ܢ ܕܝܠܗܘܢ ܐܬܚܫܚܘ ܒܟܘ̈ܢܝܐ ܗܠܝܢ. ܐܠܐ ܗ̣ܘ ܦܘܡܗ ܩܕܝܫܐ ܒܕܩ ܥܠܝܗܘܢ. ܐܟܡܐ ܕܥܬܝ̣ܕܝ̣ܢ ܠܡܚܘܝܘ ܒܝܕ ܐܠܗܐ. ܘܕܠܘ ܗܕܐ ܬܘܕܝܬܐ ܒܠܚܘܕܝܗ̇ ܐܬܚܫܚܬ݀ ܒܗܘܢ ܒܟܘ̈ܢܝܐ ܗܠܝܢ. ܝ̣ܕܝ̣ܥܐ ܡ̣ܢ ܗ̇ܝ ܕܒܕܘܟ̈ܝܬܐ ܣܓܝ̈ܐܬܐ ܒܥܬܝ̣ܩܬܐ܆ ܐܒܘܢ ܐܬܩܪܝ̣. ܘܐܦ ܗ̣ܘ ܫܘܒܚܐ ܠܛܝܒܘܬܗ. ܒܪܗ ܒܘܟܪܐ ܩܪܝܗܝ ܠܐܝܣܪܐܝܠ. ܘܣܓܝ̈ܐܬܐ ܕܐܝܟ ܗܠܝܢ ܡܫܟܚ ܗ̇ܘ ܕܩ̇ܪܐ. ܘܐܢ ܢܐܫܦ ܕܡ̣ܢ ܕܝܠܗܘܢ ܐܬܚܫܚܘ ܒܗܘܢ ܩܝܘ̈ܡܐ ܩܕܝ̈ܫܐ. ܐܠܐ ܠܘ ܐܝ̣ܩܝ̣ ܗܘܬ݀ ܠܗܘܢ ܗܕܐ. ܒܕ ܡܛܠ ܬܠܬ ܥ̈ܠܠܢ ܐܠܨܝ̈ܬܐ ܐܬܕܢܝ̣ܘ ܠܗܟܢ. ܚܕܐ ܡ̇ܢ ܕܒܝܕ ܪ̈ܡܙܐ ܒܗܘܪ̈ܐ ܢܫܠܡܘܢ ܗܘܘ ܠܬܐܘܪ̈ܝܐܣ ܐܠܗܝ̈ܬܐ. ܠܗ̇ܢܘܢ ܕܡܬܬܠܡܕܝ̣ܢ. ܕܕܡ ܠܐ ܢܬܦܪܣܘܢ ܐ̱ܪ̈ܙܐ ܡܥܠܝ̈ܐ ܘܢܣܬܝܟܘܢ ܒܡܫܡ̈ܥܬܐ ܣܟ̈ܠܬܐ ܐܝܟ ܕܗ̣ܘ ܫܪܝ̣ܪܐ ܐܡ̣ܪ. ܕܠܐ ܬܪܡܘܢ ܩܘܕܫܐ ܠܟܠܒ̈ܐ. ܘܠܐ ܬܫܕܘܢ ܡܪ̈ܓܢܝܬܟܘܢ ܩܕܡ ܚܙܝ̣ܪ̈ܐ ܕܠܡܐ  ܢܕܫܘܢ ܐܢܝܢ ܘܢܒܙܥܘܢܟܘܢ. ܐܦ ܓܝܪ ܘܩܕܝܫܐ ܓܪܝܓܘܪܝܘܣ. ܡܐܡܪܐ ܕܝ̣ܠܢܝܐ ܥܠܘܗܝ ܕܢܝܫܐ ܗܢܐ ܐܟܬܒ. ܕܠܘ ܕܟܠ ܒܪܢܫܐ. ܘܠܐ ܕܟܠ ܙܒܢܐ ܗ̱̇ܝ ܕܢܡܠܠ ܡܛܠ ܐܠܗܘܬܐ. ܕܬܪܬܝܢ ܕܝܢ ܡܛܠܗ̇ܝ ܕܒܝܕ ܟܘ̈ܢܝܐ ܗܠܝܢ ܪ̈ܡܙܢܝܐ. ܢܓܪܓܘܢ ܐܢܘܢ ܘܢܠܒܛܘܢ ܠܪ̈ܚܡܝ ܫܪܪܐ ܥܠ ܗ̇ܝ ܕܚܦܝ̣ܛܐܝܬ ܘܒܐܟܝ̣ܦܘܬܐ ܪܒܬܐ ܢܒܚܢܘܢ ܥܠ ܐ̱ܪ̈ܙܐ ܕܐܝܟ ܗܠܝܢ ܪ̈ܡܐ ܘܡܥܠܝ̈ܐ. ܘܡ̣ܢ ܗܪܟܐ ܡ̣ܢ ܬܐܘܪܝܐ ܬܐܘܪܝܐ ܡܬܝܠܕܐ ܠܗܘܢ ܘܡ̣ܢ ܡܕܪܟܢܘܬܐ ܡܕܪܟܢܘܬܐ. ܘܗܟܢܐ ܒܝܕ ܕܪ̈ܓܐ ܕܐܝܟ ܗܠܝܢ ܠܘܬ ܬܓܡܐ ܕܓܡܝ̣ܪܘܬܐ ܢܬܡܛܘܢ. ܒܕܚܘܫܒܐ ܡܨܝ̣ܕܬܐ ܗ̱ܘ ܕܝ̣ܕܥܬܐ ܡܬܩܢܝܢܝ̣ܬܐ. ܘܡܛܠ ܗܕܐ ܐܦ ܣܘܓܐܐ ܕܩܕ̈ܡܝܐ ܒܝܕ ܐܘܚ̈ܕܬܐ ܘܦ̈ܠܐܬܐ ܐܫܠܡܘ ܡܠܦܢ̈ܘܬܗܘܢ. ܐܟܙܢܐ ܐܦܘܬܐܓܪܐܣ ܘܐ̱ܚܪ̈ܢܐ. ܕܬܠܬ ܕܝܢ ܐܝܟܢܐ ܕܒܝܕ ܟܘ̈ܢܝܐ ܗܠܝܢ ܒܝܬܝܝ̈ܢ ܠܢ. ܘܒܣܘܓܐܐ ܝ̣ܕܝ̣ܥܝܢ ܘܐܦܢ ܫܚܝ̣ܡܝܢ. ܬܐܘܪ̈ܝܐܣ ܗ̇ܢܘܢ ܓܢܝ̣̈ܙܬܐ ܘܥ̈ܛܠܬ݀ ܠܡܬܕܪܟܘ ܘܐܦܢ ܒܡܢܬܐ ܠܢ ܢܬܓܠܝ̈ܢ. ܒܗ̇ܝ ܕܗ̇ܘ ܕܠܐ ܝ̣ܕܝ̣ܥ ܒܗ̇ܘ ܕܝ̣ܕܝ̣ܥ ܡܟܢ ܠܡܬܝ̣ܕܥܘ܇ ܐܝܟ ܩܢܘܢܐ ܟܐܢܐ ܘܟܝܢܝܐ. ܐܝܟ ܕܐܡ̣ܪ ܩܕܝܫܐ ܕܝܢܢܘܣܝܘܣ. ܗܟܢܐ ܕܠܐ ܛܘܟܢ ܓܝܪ ܐܬܚܫܚܬ݀ ܬܐܘܠܘܓܝܐ ܒܓܒܘ̈ܠܝܐ ܕܩܕܝ̈ܫܐ ܦܘܐܝ̣ܛܐܝܬ. ܡܛܠ ܗܘ̈ܢܐ ܠܐ ܡܣܟ̈ܡܐ. ܟܕ ܠܗܘܢܐ ܕܝܠܢ ܐܝܟ ܕܐܬܐܡܪܬ݀ ܣܥܪܐ ܘܝ̇ܨܦܐ ܕܡܣܩܬܗ ܒܝܬܝܬܐ ܘܒܪܬ݀ ܟܝܢܗ. ܘܓܒܠܐ ܠܦܘܬ ܡܫܘܚܬܗ ܨܘܪ̈ܬܐ ܩܕܝ̈ܫܬܐ. ܘܡܕܝ̈ܠܝܬܐ. ܘܠܘܩܒܠ ܗ̇ܝ ܕܐܡ̣ܪܘ ܕܒܠܥܕ ܫܘ̈ܡܗܐ ܗܠܝܢ܇ ܦܫܝ̣ܩܬ݀ ܠܩܘܒܠܐ ܗܘܝܐ ܗܘܬ݀ ܬܘܕܝܬܐ ܐܡܪܝܢܢ ܗ̇ܝ ܕܫܪܪܐ ܢܫܠܡܘܢ ܠܩܘܛܢܐ ܕܥܣܩܐܝܬ ܙܕܩ ܕܢܗܘܐ. ܘܠܘ ܕܦܫܝ̣ܩܐ ܢܗܘܐ ܗ̇ܘ ܡܐ ܕܡܫܠܡܝ̣ܢ. ܘܐܠܐ ܣܘܓܐܐ ܡ̣ܢ ܟܐܢܘܬܐ ܦܐܕܝܢ. ܒܕܠܘ ܟܠ ܦܫܝ̣ܩܐ ܫܪܝ̣ܪܐ. ܐܦܠܐ ܟܠ ܫܪܝܪܐ ܦܫܝ̣ܩܐ. ܘܥܡ ܗܠܝܢ ܗܐ ܬܘܕܝܬܐ ܗܕܐ ܥܡ ܥܣܩܘܬܗ̇ ܦܫܝ̣ܩܬ݀ ܠܩܘܒܠܐ ܗܘܬ݀ ܠܡܠܟ̈ܐ ܘܡܐܟ̈ܐ ܘܣܦܪ̈ܐ ܘܒܘ̣ܪ̈ܐ. ܘܗ̇ܝ ܕܣܛܪ ܡܢܗ̇ ܥܡ ܦܫܝ̣ܩܘܬܗ̇ ܘܣܘܓܐܬ݀ ܫܘܘ̈ܕܝܝܗ̇ ܣܘܢܝܘ̣ܦܛܪ̈ܘܢܝܐ ܠܡܚܣܢ ܘܥܡ ܣܝܦܐ ܐܬܩܒܠܬ݀ ܡ̣ܢ ܕܠܝ̣̈ܠܐ. ܘܗ̇ܝ ܐ̱ܚܪܬܐ ܐܦܢ ܦܫܝ̣ܩܐܝܬ ܡܬܩܒܠܐ ܗܘܬ݀. ܐܠܐ ܐܦ ܘܦܫܝ̣ܩܐܝܬ ܡܬܟܦܪܐ ܗܘܬ݀. ܘܒܥܓܠ ܒܥܓܠܐ ܡܬܚܠܦܐ ܗܘܬ݀.

 

 

 

ܬܐܘܪܝܐ ܫܬܝܬܝܬܐ ܡܛܠ ܗ̇ܝ ܕܒܪܐ ܘܪܘܚܐ ܐܦܢ ܥܠܬܢ̈ܐ ܐܢܘܢ ܕܩܢܘܡ ܐܒܐ. ܐܠܐ ܠܒܪܐ ܡ̣ܢ ܝ̣ܠܝ̣ܕܘܬܐ ܗ̱ܝ ܕܝ̣ܠܝܬܐ. ܠܪܘܚܐ ܕܝܢ ܢܦܘܩܘܬܐ

 

ܐܡܪܝܢܢ ܕܥܠܬ݀ ܗ̇ܝ ܕܡܠܬܐ ܒܠܚܘܕܘܗܝ ܒܪܐ ܝ̣ܠܝ̣ܕܐ ܢܬܩܪܐ. ܚܝ̈ܐ ܕܝܢ ܪܘܚܐ ܢܦܘܩܐ ܢܫܬܡܗܘܢ܆ ܘܠܘ ܒܪܐ ܝ̣ܠܝ̣ܕܐ. ܗܕܐ ܗ̱ܝ. ܕܡܠܬܐ ܡ̇ܢ ܟܕ ܒܗܘܢܐ ܓܢܝ̣ܙܐ ܘܡܚܦܝܐ. ܒܝܕ ܙܘܥܐ ܡܚܫܒܬܢܝܐ ܕܗܘܢܐ ܡܬܝܠܕܐ. ܚܝ̈ܐ ܕܝܢ ܟܕ ܠܘ ܓܢܝ̣̈ܙܐ ܘܡܚܦ̈ܝܐ ܡܨܝܢ ܠܡܗܘܐ ܒܗ̇ܘ ܕܚܝ. ܐܟܡܐ ܕܡܠܬܐ ܡܬܓܢܙܐ ܘܡܬܚܦܝܐ ܒܗ̇ܘ ܕܡܠܝ̣ܠ. ܐܠܐ ܒܟܠ ܙܒܢ ܫܘܘܕܥܐ ܕܡܬܓܠܝܢܘܬܐ ܘܕܡܦܩܐ ܟܝܢܝܐ ܘܠܐ ܡܣܬܪܘܬܐ ܡܝܬܝܢ ܗ̣ܢܘܢ ܒܗܘܢ ܕܢܝ̣ܚܐܝܬ. ܐܟܡܐ ܕܗ̣ܝ ܬܐܘܠܘܓܝܐ  ܡܠܦܐ. ܕܪܘܚܐ ܟܪ ܕܨܒܐ ܢܫ̇ܒ. ܘܡܛܠ ܗܢܐ ܓܠܝܐ ܗ̱ܘ ܘܠܐ ܡܬܟܠܝܢܐ. ܟܐܢܐܝܬ ܠܡܠܬܐ ܡ̇ܢ ܐܘܟܝ̣ܬ ܠܒܪܐ. ܝ̣ܠܝ̣ܕܘܬܐ ܗܘܬ݀ ܕܝ̣ܠܝܬܐ. ܠܚܝ̈ܐ ܕܝܢ ܐܘܟܝ̣ܬ ܠܪܘܚܐ ܩܕܝܫܐ܆ ܢܦܘܩܬܐ ܕܝ̣ܠܢܐܝܬ.

 

 

 

ܗܦܟܬܐ

 

ܐܡܪܝܢ. ܐܢܗܘ ܕܡܠܬܐ ܗܪܟܐ ܠܘ ܠܗ̇ܝ ܢܦܘܩܬܐ ܘܡܬܠܫܢܢܝܬܐ ܐܡܪ ܐܢ̱ܬ܆ ܐܠܐ ܠܗ̇ܝ ܡܬܡܕܥܢܝ̣ܬܐ ܐܝܟ ܕܐܡ̣ܪܬ. ܠܡܢܐ ܐܡ̇ܪ ܐܢ̱ܬ ܕܒܝܕ ܝ̣ܠܝ̣ܕܘܬܗ̇ ܕܡ̣ܢ ܗܘܢܐ ܠܓܠܝܐ ܐܬܝܐ. ܗ̇ܝ ܓܝܪ ܕܡܬܝܠܕܐ ܘܡܬܓܠܝܐ ܗ̇ܝ ܗ̣ܝ ܕܒܐܐܪ ܡܬܐܫܕܐ.

 

 

 

ܦܘܢܝܐ

 

ܐܡܪܝܢܢ ܕܡܠܬܐ ܡ̇ܢ ܡܬܡܕܥܢܝܬܐ ܐܦܢ ܠܘ ܡܬܪܓܫܢܐܝܬ ܡܬܓܠܝܐ܆ ܐܠܐ ܒܝܕ ܫܘܘ̈ܕܥܐ ܬܐܘܪ̈ܝ̣ܛܝ̣ܩܝܐ ܡܬܝܕܥܐ ܝ̣ܠܝ̣ܕܘܬܗ̇ ܘܡܬܓܠܝܢܘܬܗ̇. ܗܐ ܣܘܓܐܐ ܕܝܕ̈ܥܬܐ ܡܕܪܟܝ̣ܢܢ ܗ̇ܢܝܢ ܐܝܠܝܢ ܕܡ̣ܢ ܩܕܝ̣ܡ ܠܐ ܝ̇ܕܥܝܢ ܗܘܝܢ ܠܗܝܢ. ܘܓܠܝܐ ܕܠܘ ܡ̣ܢ ܠܒܪ ܥ̈ܐܠܢ ܠܢ ܝܕ̈ܥܬܐ ܗܠܝܢ. ܫܪܝ̣ܟܐ ܡܕܝܢ ܕܡ̣ܢ ܗܘܢܐ ܡܬܝܠܕܐ ܒܢ ܒܝܕ ܡܚܫܒܬܐ ܡܠܬܐ ܕܥܠܝܗܝܢ ܐܘܟܝ̣ܬ ܝ̣ܕܥܬܗܝܢ. ܒܕܓܘܢ ܠܘܬܢ ܕܝܠܢ ܚܣܝ̣ܪ̈ܝ ܝܕܥܬܐ ܕܒܚܝܠܐ ܐܝܬܝܗܝܢ ܠܢ ܝܕ̈ܥܬܐ. ܗ̣ܝ ܝ̣ܠܝ̣ܕܘܬܐ ܕܡܠܬܐ ܡ̣ܢ ܗܘܢܐ܆ ܝ̣ܠܝ̣ܕܘܬܐ ܗ̱ܝ ܡܫܪܝܢܝ̣ܬܐ. ܠܘܬ ܒܪܘܝܐ ܕܝܢ ܡܫܡܠܝܐ ܘܓܡܝ̣ܪܐ. ܕܒܡܥܒܕܢ̈ܘܬܐ ܟܠܗܝܢ ܠܗ ܝ̣ܕܝ̣̈ܥܢ. ܡܬܘܡܝܬܐ ܗ̱ܝ ܗ̣ܝ ܝ̣ܠܝ̣ܕܘܬܐ ܕܡܠܬܐ. ܒܕܠܝܬ ܗܘܐ ܐܡܬܝ ܕܠܐ ܐܝܬܝܗ̇ ܗܘܬ݀ ܗ̣ܝ ܝ̣ܕܥܬܐ ܕܒܡܥܒܕܢܘܬܐ ܐܘܟܝ̣ܬ ܡܠܬܐ. ܘܚܢܢ ܬܘܒ ܒܗ̇ܝ ܕܒܝܕ ܙܢܝ̈ܐ ܡܫܚ̈ܠܦܐ ܝ̇ܕܥܝ̣ܢܢ ܠܗ ܠܚܕ ܡܬܝܕܥܢܐ ܡ̣ܢ ܩܨ ܡܚܝܠ̣ܘܬܢ. ܣܓܝ̈ܐܬܐ ܐܢܝܢ ܠܘܬܢ ܡ̈ܠܐ ܕܡܬܝ̈ܠܕܢ. ܒܪܘܝܐ ܕܝܢ ܒܗ̇ܝ ܕܒܚܕܐ ܝ̣ܕܥܬܐ ܠܡܬܝܕ̈ܥܢܐ ܣܓܝ̈ܐܐ ܝ̇ܕܥ. ܟܐܡܬ݀ ܝܕܥܬܗ ܕܒܝܬܗ. ܚܕ ܗ̣ܘ ܠܗ ܡܠܬܐ ܗ̇ܘ ܕܙܕܩܐܝܬ ܝ̣ܚܝ̣ܕܝܐ ܐܬܩܪܝ.

 

 

 

ܬܐܘܪܝܐ ܫܒܝܥܝܬܐ ܡܛܠ ܗ̇ܝ ܕܗ̣ܢܘܢ ܬܠܬܐ ܩܢܘ̈ܡܐ ܣܓܝ̈ܕܐ ܚܕܐ ܗ̱ܝ ܠܗܘܢ ܐܘܣܝܐ܆ ܐܘܟܝܬ ܟܝܢܐ

 

ܐܡܪܝܢܢ ܕܚܕܐ ܗ̱ܝ ܠܗܘܢ ܐܘܣܝܐ ܐܘܟܝ̣ܬ ܟܝܢܐ ܠܬܠܬܝ̈ܗܘܢ ܩܢܘ̈ܡܐ ܩܕܝ̈ܫܐ. ܒܗ̇ܝ ܕܐܠܘ ܐܦ ܟܝ̈ܢܐ ܗܘܘ ܡܫܚ̈ܠܦܐ ܬܠܬܐ. ܟܠܚܕ ܡܢܗܘܢ ܐܘ ܚ̇ܟܡ ܗܘܐ ܘܚܝ ܗܘܐ. ܐܘ ܠܐ ܚ̇ܟܡ ܗܘܐ ܘܠܐ ܚܝ ܗܘܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܚܟܡܬܐ ܘܚܝ̈ܐ ܕܟܠ ܚܕ ܡܢܗܘܢ ܟܕ ܩܢܘ̈ܡܐ ܙܕܩ ܕܢܗܘܘܢ ܡܩܝ̈ܡܐ. ܐܢ ܐܦ ܟܝ̈ܢܐ ܐܢܘܢ ܡܫܚ̈ܠܦܐ. ܗܟܘܬ ܒܝܕ ܚܟܡܬܐ ܘܚܝ̈ܐ. ܙܕܩ ܕܢܚܟܡܘܢ ܘܢܐܚܘܢ. ܘܗܟܢܐ ܠܠܐ ܣܘܦ ܦܗܝܐ ܡܠܬܐ܇ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܗ̇ܘ ܕܠܐ ܚ̇ܟܡ ܘܠܐ ܚܝ. ܪܚܝ̣ܩ ܡ̣ܢ ܗ̇ܝ ܕܐܠܗܐ ܢܬܩܪܐ ܡܫܬܐܷܠ ܐ̱ܢܐ ܕܐܡ̇ܪ ܕܢܗܘܐ.

 

 

 

ܬܐܘܪܝܐ ܬܡܝܢܝܬܐ ܡܛܠܗ̇ܝ ܕܟܕ ܟܠܚܕ ܡ̣ܢ ܩܢܘ̈ܡܐ ܩܕܝ̈ܫܐ ܡܢܗ ܘܠܗ ܐܠܗܐ ܡܫܬܡܗ ܠܘ ܬܠܬܐ ܐܠܗ̈ܐ ܐܘ ܐܠܗܘ̈ܬܐ ܡܬܩܪܝܢ

 

ܐܡܪܝܢܢ ܕܟܠ ܚܕ ܡ̣ܢ ܩܢܘ̈ܡܐ ܣܓܝ̣̈ܕܐ ܕܬܠܝ̣ܬܝܘܬܐ ܩܕܝ̣ܫܬܐ. ܡܢܗ ܘܠܗ ܐܠܗܐ ܘܒܪܘܝܐ ܘܐܝܬܝܐ ܡܬܩܪܐ. ܘܠܘ ܬܠܬܐ ܐܠܗ̈ܐ ܐܘ ܬܠܬܐ ܒܪ̈ܘܝܐ ܐܘ ܬܠܬܐ ܐܝܬܝ̈ܐ ܡܬܐܡܪܝ̣ܢ. ܘܗ̣ܝ ܗܕܐ ܒܝܕ ܬܪܬܝܢ.

 

 

 

ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܗ̇ܝ ܕܬܠܬܐ ܐܠܗ̈ܐ ܘܒܪ̈ܘܝܐ ܘܐܝܬܝ̈ܐ ܠܘܬ ܬܠܝ̣ܬܝܬܐ ܕܟܝ̈ܢܐ ܡܝܒܠܐ ܒܣܕܝ̣ܩܘܬ ܐܘܣܝ̈ܐܣ. ܘܡ̣ܢ ܟܕܘ ܙܝܦܢܗ̇ ܠܬܪܥܝ̣ܬܐ ܗܕܐ. ܒܕܓܘܢ ܠܘ ܬܠܬܐ ܐܠܗ̈ܐ ܘܒܪ̈ܘܝܐ ܘܐܝܬܝ̈ܐ ܡܬܩܪܝܢ܆ ܡܛܠ ܫܘܝܘܬ ܐܘܣܝܐ. ܟܠ ܚܕ ܕܝܢ ܡܢܗ ܘܠܗ ܐܠܗܐ ܘܒܪܘܝܐ ܘܐܝܬܝܐ ܡܬܩܪܐ ܡܛܠ ܡܫܡܠܝܘܬܗ ܘܩܢܘܡܝܘܬܗ ܠܐ ܚܣܝ̣ܪܬܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܟܠ ܚܕ ܡ̣ܢ ܬܠܬܝ̈ܗܘܢ ܩܢܘ̈ܡܐ ܐܠܗܐ ܗ̱ܘ ܡܢܗ ܘܠܗ. ܬܠܬܝ̈ܗܘܢ ܕܝܢ ܠܘ ܬܠܬܐ ܐܠܗ̈ܐ. ܒܗ̇ܝ ܕܣܘ̈ܟܠܐ ܗܠܝܢ ܡܝܩ̈ܢܝ ܩܢܘ̈ܡܐ ܐܟܙܢܐ ܕܝܠܘܕܘܬܐ ܘܝ̣ܠܝ̣ܕܘܬܐ ܘܢܦܘܩܘܬܐ. ܐ̱ܚܝܢܝܐ ܐܘܟܝ̣ܬ ܠܘܬ ܡܕ̈ܡܝܐ ܡܕܡ ܐܝܬܝܗܘܢ. ܘܕܣܓܝܐܘܬ ܐ̱ܚܝܢܘ̈ܬܐ ܠܘ ܠܘܬ ܣܓܝܐܘܬܐ ܕܟܝ̈ܢܐ ܡܘܒܠܐ ܝ̣ܕܝ̣ܥܐ. ܗܐ ܓܝܪ ܕܘܝܕ ܠܡܐܡܪ. ܟܕ ܒܪܐ ܗ̱ܘ ܕܐܝܫܝ ܒܪܢܫܐ ܗ̱ܘ. ܘܟܕ ܐܒܐ ܗ̱ܘ ܕܫܠܝܡܘܢ ܒܪܢܫܐ ܗ̱ܘ. ܗܟܘܬ ܘܟܕ ܩܫܝܫܐ ܗ̱ܘ ܕܪܚܒܥܡ ܒܪܢܫܐ ܗ̱ܘ. ܘܡܛܠ ܗܕܐ ܠܐ ܙܕܩ ܕܬܠܬܐ ܒܢܝ̈ܢܫܐ ܢܬܩܪܐ܆ ܗ̣ܘ ܟܕ ܗ̣ܘ ܕܘܝܕ. ܒܗ̇ ܒܕܡܘ̣ܬܐ ܡܕܝܢ ܘܟܝܢܐ ܐܠܗܝܐ. ܐܦܢ ܥܡ ܝܠܘܕܘܬܐ ܐܠܗܐ ܗ̱ܘ. ܘܥܡ ܝ̣ܠܝ̣ܕܘܬܐ ܐܠܗܐ ܗ̱ܘ. ܘܥܡ ܢܦܘܩܘܬܐ ܬܘܒ ܐܠܗܐ ܗ̱ܘ. ܐܠܐ ܠܘ ܡܛܠ ܗܕܐ ܬܠܬܐ ܐܠܗ̈ܐ ܙܕܩ ܕܢܬܩܪܐ. ܗܟܢܐ ܗ̇ܝ ܕܐܝܬܝܐ ܘܒܪܘܝܐ.

 

 

 

ܗܦܟܬܐ ܕܛܪ̈ܝܬܝܛܐ

 

ܐܡܪܝܢ ܕܗ̇ܝ ܕܠܐ ܢܬܐܡܪ ܕܘܝܕ ܬܠܬܐ ܒܢܝ̈ܢܫܐ܆ ܒܥܠܬ݀ ܗ̇ܝ ܕܚܕ ܩܢܘܡܐ ܗ̱ܘ ܓܕܫܬ݀. ܐܠܐ ܟܪ ܕܬܠܬܐ ܩܢܘ̈ܡܐ ܕܟܠ ܚܕ ܡܢܗܘܢ ܐܠܗܐ. ܐܝܟܢܐ ܠܘ ܬܠܬܐ ܐܠܗ̈ܐ.

 

 

 

ܦܘܢܝܐ

 

ܐܡܪܝܢ ܕܗܐ ܐܦ ܐܝܫܝ ܐܘܣܝܐ ܗ̱ܘ ܘܠܘ ܓܕܫܐ. ܘܕܘܝܕ ܗܟܘܬ ܐܘܣܝܐ. ܘܫܠܝܡܘܢ ܬܘܒ ܐܘܣܝܐ. ܐܠܐ ܠܘ ܬܠܬ ܐܘܣܝ̈ܐܣ. ܐܘܟܝ̣ܬ ܟܝ̈ܢܐ ܡܬܐܡܪܝܢ. ܐܠܐ ܬܠܬܐ ܩܢܘ̈ܡܐ ܒܠܚܘܕ. ܚܕܐ ܕܝܢ ܐܘܣܝܐ ܘܟܝܢܐ.

 

 

 

ܗܦܟܬܐ

 

ܐܡܪܝܢ ܬܠܬ ܐܘܣܝ̈ܐܣ ܘܟܝ̈ܢܐ ܠܐ ܡܬܐܡܪܝܢ. ܐܠܐ ܬܠܬܐ ܒܢܝ̈ܢܫܐ ܠܘ ܠܐ ܡܬܐܡܪܝ̣ܢ.

 

ܒܕܓܘܢ ܐܦ ܠܟܘܢ ܐܠܨܐ. ܕܐܦܢ ܬܠܬ ܐܘܣܝ̈ܐܣ ܘܟܝ̈ܢܐ ܠܐ ܬܐܡܪܘܢ. ܐܠܐ ܬܠܬܐ ܐܠܗ̈ܐ ܡ̣ܢ ܐܠܨ̈ܬܐ ܕܬܐܡܪܘܢ ܘܐܦܢ ܠܐ ܬܨܒܘܢ.

 

 

 

ܦܘܢܝܐ

 

ܐܡܪܝܢܢ ܕܫܡܐ ܕܒܪܢܫܐ ܥܠ ܫܘ̈ܝܝ ܒܟܝܢܐ ܒܠܚܘܕ ܕܢܦܠ. ܠܘ ܕܝܢ ܗܟܢܐ ܘܫܡܐ ܕܐܠܗܐ. ܐܠܐ ܐܦ ܘܥܠ ܦܪ̈ܝ̣ܫܝ ܒܟܝܢܐ܆ ܒܗ̇ܝ ܕܥܡ̈ܡܐ ܣܓܝ̈ܐܐ ܘܠܒܪ̈ܝܬܐ ܡܕܡ ܐܠܗ̈ܐ ܩܪܝܢ. ܠܡܠܐܟ̈ܐ ܐܡ̇ܪ ܐ̱ܢܐ ܘܠܫܐܕ̈ܐ. ܘܠܫܡܫܐ ܘܠܣܗܪܐ ܘܢܗܝ̣ܪ̈ܐ ܐ̱ܚܪ̈ܢܐ. ܘܠܓܠܝ̣̈ܦܐ ܡܕܡ ܦܬܟܪ̈ܝܐ ܒܥܠܐ ܘܕܓܘܢ ܘܫܪܟܐ. ܘܡܘܫܐ ܬܘܒ ܟܕ ܒܪܢܫܐ ܗ̱ܘ ܐܠܗ ܦܪܥܘܢ ܐܬܩܪܝ̣. ܒܕܓܘܢ ܟܕ ܣܓܝܐܘܬܐ ܕܒܫܡ ܒܪܢܫܐ܆ ܠܘ ܠܘܬ ܣܓܝܐܘܬܐ ܕܟܝ̈ܢܐ ܡܘܒܠܐ ܬܟܝ̣ܠܐܝܬ ܒܢܝ̈ܢܫܐ ܐܡܪܝܢܢ. ܘܡ̣ܢ ܗ̇ܝ ܕܒܫܟܝ̣ܪܘܬܐ ܢܦܠ ܕܠܐ ܨܦܬܐ ܚܢܢ. ܒܣܓܝܐܘܬܐ ܕܝܢ ܕܒܫܡ ܐܠܗܐ ܟܕ ܐܦ ܘܣܓܝܐܘܬܐ ܕܟܝ̈ܢܐ ܡܥܕܐ ܕܬܥܘܠ ܘܬܣܬܟܠ. ܐܝܟ ܕܡ̣ܢ ܙܗܪܐ ܡܡܝ̣ܬܢܐ ܡ̣ܢ ܗ̇ܝ ܕܐܠܗ̈ܐ ܐܘ ܒܪ̈ܘܝܐ ܐܘ ܐܝܬܝ̈ܐ ܢܐܡܪ ܡܙܕܗܪܝ̣ܢܢ.

 

 

 

ܬܐܘܪܝܐ ܬܫܝ̣ܥܝܬܐ ܡܛܠܗ̇ܝ ܕܕܝ̣ܠܝܬܐ ܕܪܘܚܐ ܟܕ ܢܦܘܩܘܬܐ ܗ̱ܝ. ܡܢܐ ܗ̱ܝ ܗ̇ܝ ܕܡܘܣܦܐ ܒܬܐܘܠܘܓܝܐ ܕܢܣܒ ܠܡ ܡ̣ܢ ܒܪܐ

 

ܐܡܪܝܢܢ ܕܙܢܐ ܗ̇ܘ ܕܡܬܓܠܝܢܘܬܐ ܕܠܒܪ̈ܝܬܐ. ܝܬܝ̣ܪ ܒܝܬܝܐ ܠܡܐܡܪ ܕܢܣܒ ܪܘܚܐ ܡ̣ܢ ܒܪܐ. ܘܗܕܐ ܡܬܚܘܝܐ ܒܝܕ ܬܪܬܝܢ ܡܚܘ̈ܝܢܘܢ.

 

 

 

ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܝ̣ܠܝ̣ܕܘܬܐ ܗ̇ܝ ܕܗ̣ܝ ܗ̣ܝ ܕܝ̣ܠܝܬܐ ܕܒܪܐ ܠܘ ܡܕܡ ܐ̱ܚܪܝܢ ܡܫܘܕܥ ܣܘܟܠܗ̇܇ ܐܠܐ ܕܢܚܐ ܕܗ̇ܘ ܕܓܢܝ̣ܙ ܘܓܠܝܐ ܕܗ̇ܘ ܕܟܣܐ. ܒܕܓܘܢ ܠܗ̇ܝ ܕܠܒܪ̈ܝܬܐ ܢܬܓܠܐ ܘܢܬܝ̣ܕܥ. ܗ̣ܘ ܪܘܚܐ ܒܬܪ ܗ̇ܝ ܕܠܐ ܝ̣ܕܝ̣ܥ ܗܘܐ ܠܗܝܢ ܡ̣ܢ ܒܪܐ ܢܣܒܗ ܪܘܚܐ. ܘܐܦܢ ܗ̣ܘ ܒܩܢܘܡܗ ܓܠܝܐ ܗܘܐ ܘܠܐ ܡܬܟܠܝܢܐ ܡܬܘܡܝܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ. ܕܐܠܘܠܐ ܡܬܒܪܢܫܢܘܬܗ ܕܩܢܘܡ ܒܪܐ ܒܚܪܬ݀ ܙܒ̈ܢܐ. ܐܦܠܐ ܗ̣ܘ ܪܘܚܐ ܡܬܝ̣ܕܥ ܗܘܐ ܚܬܝ̣ܬܐܝܬ ܠܟܠܗܘܢ ܡܠܝ̣̈ܠܐ. ܐܠܐ ܒܙܢܐ ܡܕܡ ܕܫܘܘܕܥܐ ܒܗܘܪܐ ܘܪܡܙܢܝܐ ܝܕܥܝܢ ܗܘܘ ܠܗ ܢܒܝ̈ܐ ܡ̣ܢ ܩܕܝ̣ܡ. ܘܝ̣ܕܝ̣ܥܐ ܗܕܐ ܡ̣ܢ ܡܠܝ̈ܗܘܢ ܕܥܠܘܗܝ. ܟܕ ܕܝܢ ܒܪܐ ܐܬܓܠܝ̣ ܥܠܘܗܝ ܕܪܘܚܐ ܩܕܝܫܐ ܫܘܕܥ ܢܗܝ̣ܪܐܝܬ. ܐܦ ܒܡܠܬܐ ܐܦ ܒܥܒܕܐ. ܒܡܠܬܐ ܡ̇ܢ ܒܦܪܘܬܐܣܡܝܐ ܕܝܗܒ ܠܫܠܝ̣̈ܚܘܗܝ. ܒܥܒܕܐ ܕܝܢ. ܟܕ ܠܗ̇ ܠܦܪܘܬܐܣܡܝܐ ܗܕܐ ܡ̣ܢ ܚܝܠܐ ܠܡܥܒܕܢܘܬܐ ܐܦܩ ܒܝܕ ܠܫܢ̈ܐ ܢܘܪ̈ܢܝܐ. ܘܛܘܦܣܐ ܗ̇ܘ ܝܘܢܝܐ ܕܐܬܚܙܝ̣ ܠܥܠ ܡ̣ܢ ܪܝܫܗ ܟܕ ܥܡܕ. ܘܗ̇ܝ ܕܡ̣ܢ ܐ̱ܢܫܝ̈ܢ ܡܬܐܡܪܐ܆ ܕܚܝܠܐ ܐܘ ܫܘܠܛܢܐ ܐܘ ܨܒܝܢܐ ܢܣܒ ܐܘ ܡܕܡ ܐ̱ܚܪܝܢ ܕܠܗܘܢ ܕܡܐ. ܡܣܒܪܢܘܬܐ ܗ̱ܝ ܠܐ ܟܐܢܬܐ. ܘܡܬܚܘܝܐ ܒܝܕ ܬܠܬ ܡܚܘ̈ܝܢܘܢ.

 

 

 

ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܢܗܘ ܕܟܠܗܝܢ ܕܐܒܐ. ܐܦ ܕܒܪܐ ܘܕܪܘܚܐ ܐܢܝܢ܆ ܣܛܪ ܡ̣ܢ ܝܠܘܕܘܬܐ. ܘܟܠܗܝܢ ܕܒܪܐ ܐܦ ܕܐܒܐ ܘܕܪܘܚܐ ܐܢܝܢ܇ ܣܛܪ ܡ̣ܢ ܝ̣ܠܝ̣ܕܘܬܐ. ܘܟܠܗܝܢ ܕܪܘܚܐ܆ ܐܦ ܕܐܒܐ ܘܕܒܪܐ ܐܢܝܢ ܣܛܪ ܡ̣ܢ ܢܦܘܩܘܬܐ. ܘܚܝܠܐ ܘܫܘܠܛܢܐ ܘܨܒܝܢܐ ܣܛܪ ܡ̣ܢ ܝܠܘܕܘܬܐ ܘܝ̣ܠܝ̣ܕܘܬܐ ܐܘ ܢܦܘܩܘܬܐ ܐܢܘܢ. ܠܐ ܫܪܝܪܐ ܡܕܝܢ ܕܡܕܡ ܡ̣ܢ ܗܠܝܢ ܕܠܘ ܠܐ ܫܟܝ̣ܚ ܠܪܘܚܐ ܪܘܚܐ ܡ̣ܢ ܒܪܐ ܢܣܒ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ. ܐܢܗܘ ܕܡܕܡ ܕܐܝܟ ܗܠܝܢ ܣܢܝ̣ܩ ܪܘܚܐ ܠܡܣܒ ܡ̣ܢ ܒܪܐ. ܐܘ ܟܕ ܫܟܝ̣ܚܝ̣ܢ ܠܗ ܢܣܒ ܐܢܘܢ܆ ܐܘ ܟܕ ܠܐ ܫܟܝ̣ܚܝ̣ܢ ܠܗ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܢܗܘ ܕܗ̇ܘ ܕܫܟܝ̣ܚ ܐܝܟ ܗ̇ܘ ܕܠܐ ܫܟܝ̣ܚ ܡܬܢܣܒ. ܡܫܬܟܚ ܗ̇ܘ ܕܫܟܝ̣ܚ ܕܫܘܐ ܠܗ̇ܘ ܕܠܐ ܫܟܝ̣ܚ ܒܗ̇ ܒܫܟܝ̣ܚܘܬܐ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܠܘܬ ܚܣܝ̣ܪܘܬ ܩܢܘܡܗ ܕܪܘܚܐ ܡܘܒܠ܆ ܗ̇ܝ ܕܝܬܝܪ ܫܟܝ̣ܪܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܗ̇ܘ ܡܐ ܕܪܘܚܐ ܡ̣ܢ ܒܪܐ ܢܣܒ. ܐܢܗܘ ܐܦ ܕܠܐܒܐ ܫܟܝ̣ܚ. ܡܛܠ ܡܢܐ ܡ̣ܢ ܒܪܐ ܕܝ̣ܠܢܐܝܬ ܢܣܒ ܠܗ ܪܘܚܐ. ܘܠܘ ܐܦ ܡ̣ܢ ܐܒܐ. ܘܐܢܗܘ ܕܠܘ ܐܦ ܠܐܒܐ ܫܟܝ̣ܚ. ܡܫܬܟܚ ܐܒܐ ܕܚܣܝ̣ܪ ܡ̣ܢ ܒܪܐ ܚܝܠܐ ܐܘ ܫܘܠܛܢܐ ܐܘ ܨܒܝܢܐ ܗ̇ܝ ܕܫܟܝ̣ܪܐ.

 

 

 

ܗܦܟܬܐ

 

ܐܡܪܝܢ ܐܢܗܘ ܕܗ̇ܝ ܕܢܗܘܐ ܠܚܕ ܡ̣ܢ ܩܢܘ̈ܡܐ ܙܢܐ ܡܕܡ. ܐܝܢܐ ܕܠܘ ܠܗ̇ܘ ܐ̱ܚܪܢܐ ܫܟܝ̣ܚ. ܠܘܬ ܚܣܝ̣ܪܘܬܗ ܕܗ̇ܘ ܐ̱ܚܪܢܐ ܡܘܒܠܐ. ܟܠܗܘܢ ܡܕܝܢ ܚܣܝ̣ܪܝܢ. ܒܕ ܕܝ̣ܠܝܬܐ ܕܟܠ ܚܕ ܡܢܗܘܢ ܠܘ ܠܟܠܗܘܢ ܐܟܚܕܐ ܫܟܝ̣ܚܐ.

 

 

 

ܦܘܢܝܐ

 

ܐܡܪܝܢܢ ܕܗ̇ܝ ܕܠܐ ܬܫܬܟܚ ܕܝ̣ܠܝܬܐ ܕܟܠ ܚܕ ܡܢܗܘܢ ܠܗ̇ܘ ܐ̱ܚܪܢܐ. ܠܘܬ ܗ̇ܝ ܕܟܠ ܚܕ ܡܢܗܘܢ ܠܘ ܗ̇ܘ ܐ̱ܚܪܢܐ ܗ̱ܘ ܡܘܒܠܐ. ܘܗܕܐ ܠܐ ܫܟܝ̣ܪܐ. ܐܠܐ ܝܬܝ̣ܪ ܐܠܨܐ. ܟܐܡܬ݀ ܕܠܐ ܢܗܘܐ ܐܒܐ ܒܪܐ ܐܘ ܪܘܚܐ. ܘܒܪܐ ܐܒܐ ܐܘ ܪܘܚܐ. ܘܪܘܚܐ ܐܒܐ ܐܘ ܒܪܐ. ܗ̇ܝ ܕܝܢ ܕܢܚܣܪ ܚܕ ܡ̣ܢ ܩܢܘ̈ܡܐ ܫܘܠܛܢܐ ܐܘ ܚܝܠܐ. ܐܘ ܕܠܐ ܢܗܘܐ ܠܗ ܨܒܝܢܐ ܕܗ̇ܘ ܐ̱ܚܪܢܐ. ܠܘܬ ܚܣܝ̣ܪܘܬܐ ܕܒܟܝܢܐ ܘܩܢܘܡܐ ܡܘܒܠܐ ܗ̇ܝ ܕܝܬܝܪ ܫܟܝ̣ܪܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܬܘ ܢܥܒܕ ܐ̱ܢܫܐ ܒܨܠܡܢ ܐܝܟ ܕܡܘ̣ܬܢ. ܘܓܠܝܐ ܕܢܘ̄ܢ ܠܕܝܬܝ̣ܪ ܡ̣ܢ ܚܕ ܡܫܘܕܥܐ. ܘܕܠܗ̇ ܠܬܠܝ̣ܬܝܘܬ ܩܢܘ̈ܡܐ ܡܒܕܩܐ  ܗܪܟܐ ܝ̣ܕܝ̣ܥܐ܆ ܡ̣ܢ ܬܠܝܬܝܘܬ ܣܝܡܗ̇. ܢܘ̄ܢ ܐܡ̇ܪ ܐ̱ܢܐ ܕܢܥܒܕ. ܘܢܘ̄ܢ ܕܨܠܡܢ ܘܢܘ̄ܢ ܕܕܡܘ̣ܬܢ. ܘܗܢܐ ܪܡܙܐ ܗ̱ܘ ܕܝܬܝ̣ܪ ܩܛܝ̣ܢ ܠܗ̇ܢܘܢ ܕܡܣܬܟܠܝܢ.

 

 

 

ܣܗܕܘܬܐ ܕܬܪܬܝܢ

 

ܒܗ̇ ܟܕ ܒܗ̇. ܬܘ ܢܚܘܬ ܠܒܒܝܠ܆ ܘܢܦܠܓ ܬܡܢ ܠܫ̈ܢܐ.

 

 

 

ܣܗܕܘܬܐ ܕܬܠܬ

 

ܒܗ̇ ܟܕ ܒܗ̇. ܐܚܬ ܡܪܝܐ ܡ̣ܢ ܩܕܡ ܡܪܝܐ ܢܘܪܐ ܥܠ ܣܕܘܡ.

 

 

 

ܣܗܕܘܬܐ ܕܐܪܒܥ

 

ܕܘܝܕ. ܢܒܪܟܢ ܐܠܗܐ ܐܠܗܢ. ܘܢܒܪܟܢ ܐܠܗܐ.

 

 

 

ܣܗܕܘܬܐ ܕܚܡܫ

 

ܗ̣ܘ ܟܕ ܗ̣ܘ. ܒܡܠܬܗ ܕܡܪܝܐ ܐܬܥܒܕܘ ܫܡܝ̈ܐ. ܘܒܪܘܚܐ ܕܦܘܡܗ ܟܠܗܘܢ ܚܝܠܘ̈ܬܗ.

 

 

 

ܣܗܕܘܬܐ ܕܫܬ

 

ܗ̣ܘ ܟܕ ܗ̣ܘ. ܠܡܠܬܐ ܐܠܗܐ ܐܫܒܚ.

 

 

 

ܣܗܕܘܬܐ ܕܫܒܥ

 

ܗ̇ܝ ܕܚ̣ܙܐ ܐܫܥܝܐ ܠܣܪ̈ܦܐ. ܘܫܡ̣ܥ ܕܡܩܕܫܝ̣ܢ ܬܠܬ ܙܒܢܝ̈ܢ. ܩܕܝܫ ܩܕܝܫ ܩܕܝܫ܆ ܡܪܝܐ ܚܝܠܬܢܐ ܠܬܠܝ̣ܬܝܘܬ ܩܢܘ̈ܡܐ ܘܚܕܢܝܘܬ ܟܝܢܐ ܡܫܘܕܥܐ.

 

 

 

ܣܗܕܘܬܐ ܕܬܡܢܐ

 

ܒܣܒܪܬܐ. ܙܠܘ ܬܠܡܕܘ ܘܐܥܡܕܘ ܠܟܠܗܘܢ ܥܡ̈ܡܐ ܒܫܡ ܐܒܐ ܘܒܪܐ ܘܪܘܚܐ ܩܕܝܫܐ.

 

 

 

ܣܗܕܘܬ ܕܬܫܥ

 

ܒܗ̇ ܟܕ ܒܗ̇. ܐܝܟܢܐ ܓܝܪ ܕܠܐܒܐ ܐܝܬ ܚܝ̈ܐ ܒܩܢܘܡܗ. ܗܟܢܐ ܝܗ̣ܒ ܐܦ ܠܒܪܐ ܕܢܗܘܘܢ ܚܝ̈ܐ ܒܩܢܘܡܗ. ܘܬܘܒ ܐܡ̣ܪ ܪܘܚܐ ܗ̇ܘ ܕܡ̣ܢ ܐܒܐ ܢܦܩ.

 

 

 

ܣܗܕܘܬܐ ܕܥܣܪ

 

ܒܗ̇ ܟܕ ܒܗ̇. ܡ̇ܢ ܕܡܓܕܦ ܥܠ ܪܘܚܐ ܩܕܝܫܐ ܠܐ ܢܫܬܒܩ ܠܗ. ܠܐ ܒܥܠܡܐ ܗܢܐ܆ ܘܠܐ ܒܥܠܡܐ ܕܥܬܝ̣ܕ.

 

 

 

ܣܗܕܘܬܐ ܕܝ̄ܐ

 

ܐܠܗܐ ܓܝܪ ܪܘܚܐ ܗ̱ܘ.

 

 

 

ܣܗܕܘܬܐ ܕܝܒ̄

 

ܦܘܠܘܣ. ܠܢ ܕܝܢ ܚܕ ܗ̣ܘ ܐܠܗܐ ܐܒܐ ܕܡܢܗ ܟܠ. ܘܚܕ ܒܪܐ ܕܒܐܝ̣ܕܗ ܟܠ.

 

 

 

ܣܗܕܘܬܐ ܕܝܓ̄

 

ܗ̣ܘ ܟܕ ܗ̣ܘ. ܪܘܚܐ ܓܝܪ ܟܠܡܕܡ ܒܨܐ. ܐܦ ܥܘܡ̈ܩܘܗܝ ܕܐܠܗܐ. ܐܝܢܘ ܓܝܪ ܒܪܢܫܐ. ܕܝ̇ܕܥ ܕܒܒܪܢܫܐ܆ ܐܠܐ ܐܢ ܪܘܚܐ ܕܒܪܢܫܐ ܕܒܗ. ܗܟܢܐ ܐܦ ܕܒܐܠܗܐ ܐ̱ܢܫ ܠܐ ܝ̇ܕܥ. ܐܠܐ ܐܢ ܪܘܚܗ ܕܐܠܗܐ.

 

 

 

ܣܗܕܘܬܐ ܕܝܕ̄

 

ܦܪܟܣܝܣ ܕܫܠܝ̈ܚܐ. ܗܘܐ ܨܒܝܢܐ ܠܪܘܚܐ ܩܕܝܫܐ ܐܦ ܠܢ ܕܠܐ ܢܬܬܣܝ̣ܡ ܝܘܩܪܐ ܥܠ ܬܠܡܝ̣̈ܕܐ ܠܒܪ ܡ̣ܢ ܗܠܝܢ ܕܐܠܨ̈ܢ.

 

 

 

ܣܗܕܘܬܐ ܕܝܗ̄

 

ܒܗ ܒܟ ܒܗ. ܘܗܠܟܘ ܠܡ ܫܠ̣ܝ̈ܚܐ ܒܦܪܘܓܝܐ ܘܒܓܠܐܛܝܐ ܐܬܪ̈ܘܬܐ. ܘܟ̣ܠܐ ܐܢܘܢ ܪܘܚܐ ܕܩܘܕܫܐ ܕܠܐ ܢܡܠܠܘܢ ܡܠܬܐ ܕܐܠܗܐ ܒܐܣܝܐ.

 

 

 

ܣܗܕܘܬܐ ܕܝܘ̄

 

ܒܗ ܟܕ ܒܗ. ܨܒܝܢ ܗܘܘ ܠܡ ܕܢܐܙܠ̱ܘܢ ܠܒܝܬܘܢܝܐ. ܘܠܐ ܐܦܣܬ݀ ܠܗܘܢ ܪܘܚܗ ܕܝܫܘܥ.

 

 

 

ܢܝܫܐ ܬܠܝܬܝܐ ܡܛܠ ܣܗܕ̈ܘܬܐ ܒܪ̈ܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܗܪܡܝܣܛܪܝܣܡܘܣ. ܚܕ ܐܝܬܘܗܝ ܒܠܚܘܕܘܗܝ ܢܘܗܪܐ ܡܬܗܘܢܢܐ. ܕܢܘܪܐ ܡܬܝܕܥܢܝ̣ܬܐ. ܘܗܘܢܐ ܕܟܠܫܥ ܢܗܝ̣ܪ ܒܡܕܥܐ ܢܗܝ̣ܪܐ. ܘܠܝܬ ܡܕܡ ܐ̱ܚܪܢܐ ܒܚܘܠܛܢܗ. ܘܒܪܘܚܐ ܠܟܠ ܟܪܝ̣ܟ. ܘܠܒܪ ܡ̣ܢ ܗܢܐ ܠܐ ܐܠܗܐ. ܘܠܐ ܡܠܐܟܐ ܘܠܐ ܫܐܕܐ. ܘܠܐ ܐܘܣܝܐ ܐܝ̇ܕܐ ܗ̣ܝ. ܐܠܐ ܗ̣ܘ ܐܝܬܘܗܝ ܡܪܝܐ ܕܟܠ ܘܐܠܗܐ ܘܐܒܐ. ܘܟܠ ܒܗ ܘܬܚܝܬ ܫܘܠܛܢܗ. ܗ̇ܘ ܕܡܠܬܐ ܕܝܠܗ ܟܕ ܡܫܡܠܝܐܝܬ ܡܢܗ ܢܦܩ ܘܐܬܝܠܕ. ܥܒܘܕܐ ܕܟܠ ܐܝܬܘܗܝ. ܘܟܕ ܒܝ̣ܠܝ̣ܕܘܬܗ ܥܠ ܟܝܢܐ ܕܡܝ̈ܐ ܐܓܢ܆ ܕܢܘܠܕܘܢ ܗ̣ܢܘܢ ܡܝ̈ܐ ܐܥܒ̣ܕ ܐܢܘܢ.

 

 

 

ܣܗܕܘܬܐ ܕܬܪܬܝܢ

 

ܩܨܡܐ ܕܐܬܝܗܒ ܠܗܠܝ̣ܣ ܒܐܬܪܐ ܕܐܦܪܝ̣ܩܝ̣. ܟܕ ܫܐܠ ܕܡܢܘ̣ ܡ̣ܢ ܩܕܡܘܗܝ ܐܘ ܡ̣ܢ ܒܬܪܘܗܝ ܐܫܟܚ ܕܢܫܥܒܕ ܟܠܗ ܐܪܥܐ. ܘܐܬܐܡܪ ܠܗ ܕܡ̣ܢ ܩܕܡܝܟ ܡ̇ܢ ܐܠܗܐ. ܒܬܪܟܢ ܕܝܢ ܘܡܠܬܐ ܘܪܘܚܐ ܕܥܡ ܚܕ̈ܕܐ ܣܘܚܝ̣ܢ. ܘܟܠܗܘܢ ܠܚܕ ܐܬܝܢ. ܠܗ̇ܘ ܕܐܘܚܕܢܗ ܠܥܠܡ. ܗܫܐ ܬܡܘܬ ܩܠܝ̣ܠܐܝܬ ܕܠܐ ܐܬܚܫܒܬ ܐܘܪܚܟ.

 

 

 

ܣܗܕܘܬܐ ܕܬܠܬ

 

ܐܘܢܘܡܝܘܣ ܦܝܠܠܘܣܘܦܐ ܐܡ̣ܪ. ܥܝܢܐ ܕܐܒܐ ܠܐ ܡܬܚܒܠܢܝ̣ܬܐ ܕܐܡܝ̣ܢ ܪܕܝܗ̇. ܕܒܨܒܝܢܗ̇ ܐܝܬ ܠܗ ܚܝܠܐ ܫܘܐ ܒܪܗܛܐ. ܕܡܢܗ ܡܟܢ ܗ̇ܘ ܚܝܠܬܢ ܒܟܠ ܡܠܬܐ. ܟܕ ܐܝܬܘܗܝ ܘܗ̣ܘ ܒܟܝܢܗ ܐܚܝ̣ܕ ܟܠ.

 

 

 

ܣܗܕܘܬܐ ܕܐܪܒܥ

 

ܦܘܠܘܛܪܟܘܣ. ܩܕܡ ܗ̇ܝ ܥܠܬܐ ܕܝܬܝ̣ܪ ܡ̣ܢ ܟܠ ܡܥܠܝܐ ܠܐ ܡܬܗܘܢܢ ܐ̱ܢܐ ܡܕܡ. ܟܠܗ ܕܝܢ ܡ̣ܢ ܟܠܗ. ܘܐ̱ܚܪܢܐ ܡܢܗ ܐܟܘܬܗ. ܐ̱ܚܪܢܐ ܕܝܢ܆ ܐܠܐ ܠܘ ܐ̱ܚܪܢܝܐܝܬ.

 

 

 

ܣܗܕܘܬܐ ܕܚܡܫ

 

ܗ̣ܘ ܗܪܡܝ̣ܣ. ܘܟܕ ܐܠܗܐ ܘܐܒܐ ܕܟܠ ܐܝܬܝܟ. ܘܠܘ ܡ̣ܢ ܐ̱ܚܪܢܐ ܐܝܬ ܠܟ ܗܕܐ. ܗ̇ܝ ܟܝ̣ܬ ܕܟܠ ܫܥ ܐܝܬܝܟ. ܒܬܪܟ ܠܚܕ ܝܕܥ ܐ̱ܢܐ ܐܟܘܬܟ. ܕܐܝܟ ܕܝ̇ܕܥ ܐܢ̱ܬ ܝ̣ܠܕܬܝܗܝ. ܘܐܝܬܘܗܝ ܒܪܐ ܘܐܠܗܐ ܕܡ̣ܢ ܐܠܗܐ. ܐܘܣܝܐ ܕܡ̣ܢ ܐܘܣܝܐ ܕܝܠܟ. ܗ̇ܘ ܕܝܘܩܢܐ ܠܐ ܡܬܚܒܠܢܐ ܘܕܘܡܝܐ ܒܟܠܡܕܡ ܠܟ ܐܠܗܐ ܘܐܒܐ ܡܝܬܐ. ܕܢܗܘܐ ܗ̣ܘ ܒܟ ܘܐܢ̱ܬ ܒܗ ܡܚܙܝ̣ܬܐ ܕܫܘܦܪ̈ܐ ܘܩܢܘ̈ܡܐ ܡܚܝ̈ܕܝ ܠܚܕ̈ܕܐ.

 

 

 

ܣܗܕܘܬܐ ܕܫܬ

 

ܐܪܝ̣ܣܛܘܛܠܝ̣ܣ. ܠܟܝܢܐ ܕܠܐ ܥܡܠܐ ܕܝܠܕܐ ܕܐܠܗܐ ܠܝܬ ܡܕܡ ܕܩܕܝ̣ܡ. ܡܛܠ ܕܡܢܗ ܡܟܢ ܗ̇ܘ ܚܝܠܬܢ ܒܟܠ ܡܠܬܐ.

 

 

 

ܣܗܕܘܬܐ ܕܫܒܥ

 

ܣܘܦܘܩܠܘܣ. ܗܢܐ ܕܝܢ ܐܝܬܘܗܝ ܐܠܗܐ ܐܒܐ ܕܡ̣ܢ ܢܦܫܗ ܕܠܐ ܐܒܐ. ܒܪܐ ܕܝܠܗ ܕܡܢܗ ܕܗ̣ܘ ܠܗ ܐܥܬܪ ܬܠܝ̣ܬܐܝܬ. ܒܡܢܬܐ ܕܝܢ ܙܥܘܪܬܐ ܕܡܠܐܟ̈ܐ ܚܢܢ. ܗܫܐ ܕܝ̣ܠܦܬ ܙܠ. ܘܒܫܬܩܐ ܗܘܝ̣.

 

 

 

ܣܗܕܘܬܐ ܕܬܡܢܐ

 

ܦܠܐܛܘܢ. ܚܕ ܓܝܪ ܐܝܬܘܗܝ ܥܠܬܐ ܕܟܠ. ܘܡܢܗ ܚܕ ܒܪܐ. ܘܗܢܐ ܚܕ ܠܘ ܒܙܒ̈ܢܐ. ܡܬܘܡܝܐ ܗ̱ܘ ܐ̱ܚܪܢܐ. ܘܠܘ ܬܪܝܢܐ. ܘܠܝܬ ܡܕܡ ܐ̱ܚܪܢܐ ܕܫܘܐ ܠܗܘܢ ܒܡܬܘܡܝܘܬܐ. ܐܡ̣ܪ ܕܝܢ ܗ̇ܘ ܕܦܫܩ ܠܣܗܕ̈ܘܬܐ ܘܩܨ̈ܡܐ ܗܠܝܢ ܡ̣ܢ ܝܘܢܝܐ ܠܣܘܪܝܝܐ. ܕܗ̣ܘ ܡܝܬܪܐ ܢܘܢܐ ܕܐܫ̇ܟܚܬ ܐܦ ܣܗܕܘܬܐ ܐ̱ܚܪܬܐ ܘܡܛܠ ܕܐܝܬܝܗ̇ ܗܘܬ݀ ܐܝܟ ܡܡܠܠܐ ܕܐܘܡܝܪܘܣ܆ ܠܐ ܐܬܡܨܝ̣ܬ ܠܡܦܫܩܘܬܗ̇.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܫܝ̣ܥܝܐ ܕܫܬܐܣܬܐ ܬܠܝ̣ܬܝܬܐ. ܡܛܠ ܬܪܥܝ̣ܬܐ ܟܦܪܬ݀ ܒܬܠܝ̣ܬܝܘܬ ܩܢܘ̈ܡܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ ܕܗܠܝܢ ܕܒܗܕܐ ܬܪܥܝ̣ܬܐ ܐܚܝ̣ܕܝܢ ܦܝ̣ܠܘܣܘ̈ܦܐ ܘܝܘܕܝ̈ܐ ܘܡܫܠܡܢ̈ܐ ܘܣܒܠܝ̈ܐܢܘ. ܣܥܝܐ ܩܕܡܝܐ

 

ܐܡܪܝܢ ܐܠܘ ܩܢܘ̈ܡܐ ܝܬܝܪ ܡ̣ܢ ܚܕ ܗܘܘ ܠܟܝܢܐ ܐܠܨܝ ܐܝܬܘܬܐ. ܗ̣ܢܘܢ ܩܢܘ̈ܡܐ ܐܘ ܐܠܨܝ̈ܐ ܗܘܘ. ܐܘ ܡܬܡܨ̈ܝܢܐ. ܘܗ̇ܘ ܩܕܡܝܐ ܠܐ ܫܪܝܪ ܒܝܕ ܬܪܬܝܢ. ܚܕ ܡ̇ܢ ܡ̣ܢ ܗ̇ܝ ܕܐܫܬܪܪܬ ܒܝܕ ܐܦܘܕܝ̣ܟܣܝ̣ܣ ܕܐܠܨܝ ܐܝܬܘܬܐ ܚܕ ܗ̣ܘ. ܕܬܪܬܝܢ ܕܝܢ ܗ̇ܝ ܕܗ̣ܢܘܢ ܩܢܘ̈ܡܐ ܒܝܕ ܟܝܢܐ ܡܬܩܝܡܝ̣ܢ. ܘܟܠ ܕܐ̱ܚܪܝܢ ܗ̣ܘ ܡܩܝܡܢܗ. ܡܬܡܨܝܢܐ ܗ̱ܘ ܘܠܘ ܐܠܨܝܐ. ܘܗ̇ܘ ܕܬܪܝܢ ܠܐ ܫܪܝ̣ܪ. ܒܗ̇ܝ ܕܩܢܘ̈ܡܐ ܡܬܡܨ̈ܝܢܐ ܥܠ ܥܠܬܐ ܣܢܝ̣ܩܝ̣ܢ. ܘܠܝܬ ܥܠܬܐ ܐܠܐ ܗ̣ܘ ܟܝܢܐ ܐܠܨܝ ܐܝܬܘܬܐ. ܘܕܗ̣ܘ ܗܢܐ ܥܠܬܐ ܢܗܐ ܕܫܟܝ̣ܚܘܬ ܩܢܘ̈ܡܐ ܠܝܬܗ ܠܐ ܡܨܝܐ. ܒܗ̇ܝ ܕܡܫܬܟܚ ܗ̣ܘ ܟܕ ܗ̣ܘ ܕܡܥܒܕܢܐ ܗ̱ܘ ܒܝܬܗ. ܘܡܩܒܠܢܐ ܒܝܬܗ. ܗ̇ܝ ܕܫܟܝ̣ܪܐ. ܡܩܒܠܢܐ ܓܝܪ ܐ̱ܚܪܢܐ ܙܕܩ ܕܢܗܘܐ ܡ̣ܢ ܗ̇ܘ ܡܐ ܕܒܗ ܡܥܒܕ. ܩܢܘ̈ܡܐ ܡܕܝܢ ܗܠܝܢ ܕܐܡܪܝܢ ܐܢ̱ܬܘܢ. ܟܕ ܠܐ ܐܠܨܝ̈ܐ ܐܦܠܐ ܡܬܡܨ̈ܝܢܐ ܐܝܬܝܗܘܢ܆ ܠܐ ܐܝܬܝܗܘܢ. ܡܛܠ ܕܟܠܡܕܡ ܕܐܝܬܘܗܝ. ܐܘ ܐܠܨܝܐ ܗ̱ܘ ܐܘ ܡܬܡܨܝܢܐ.

 

 

 

ܣܥܝܐ ܕܬܪܝܢ

 

ܐܡܪܝܢ. ܐܠܘ ܚܟܡܬܗ ܕܐܠܗܐ ܐܘܟܝ̣ܬ ܡܠܬܗ. ܘܚܝܘ̈ܗܝ ܐܘܟܝ̣ܬ ܪܘܚܗ. ܩܢܘ̈ܡܐ ܗܘܘ ܡܩܝ̈ܡܐ. ܡܫܬܟܚ ܗܘܐ ܐܠܗܐ ܕܡܣܢܩ ܣܢܝ̣ܩ ܥܠܝܗܘܢ ܠܘܬ ܗ̇ܝ ܕܢܗܘܐ ܚܟܝ̣ܡ ܘܚܝ. ܘܟܠ ܕܣܢܝ̣ܩܐ ܗ̱ܘ܇ ܠܘ ܐܠܗܐ ܗ̱ܘ. ܡܬܟܢܫܐ ܕܐܠܗܐ ܠܘ ܐܠܗܐ ܗ̱ܘ ܗ̇ܝ ܕܫܟܝ̣ܪܐ.

 

 

 

ܣܥܝܐ ܕܬܠܬܐ

 

ܐܡܪܝܢ ܕܟܠ ܟܝܢܐ ܕܠܘ ܗܘܠܢܝܐ ܗ̱ܘ. ܡ̣ܢ ܠܐ ܡܬܡܨܝܢܝ̣ܬܐ ܗ̱ܝ ܢܫܬܟܚܘܢ ܠܗ ܩܢܘ̈ܡܐ ܝܬܝܪ ܡ̣ܢ ܚܕ. ܒܗ̇ܝ ܕܣܓܝܐܘܬܐ ܕܩܢܘ̈ܡܐ. ܒܝܕ ܡܦܬܟܘܬܐ ܕܙܢܝ̈ܐ ܗܠܝܢ ܕܒܗܘܠܐ ܡܬܩܝܡܝ̣ܢ ܗܘܝܐ. ܘܐܝܬܝܗܘܢ ܐܟܙܢܐ ܕܡܘ̈ܫܚܬܐ ܘܩܘ̈ܡܬܐ ܘܓܘ̈ܢܐ ܘܣܝܡ̈ܐ ܘܙܒ̈ܢܐ. ܐܘܟܝ̣ܬ ܕܝ̣ܠܝ̈ܬܐ ܕܟܠ ܚܕ. ܣܘܩܪܐܛܝ̣ܣ ܓܝܪ ܡ̣ܢ ܦܠܐܛܘܢ ܠܘ ܒܟܝܢܐ ܦܪܝ̣ܫ. ܐܠܐ ܒܝܕ ܙܢܝ̈ܐ ܗܠܝܢ. ܘܐܠܘܠܐ ܗܠܝܢ܆ ܠܐ ܒܡܕܡ ܦܪܝ̣ܫ ܗܘܐ ܚܕ ܡܢܗܘܢ ܡ̣ܢ ܗ̇ܘ ܐ̱ܚܪܢܐ. ܒܕܓܘܢ ܠܘ ܬܪܝܢ ܗܘܘ ܐܠܐ ܚܕ. ܐܝܟܐ ܡܕܝܢ ܕܠܝܬ ܙܢܝ̈ܐ ܗܘܠܢܝ̈ܐ ܐܦܠܐ ܝܬܝ̣ܪܘܬܐ ܕܩܢܘ̈ܡܐ ܡܨܝܐ ܕܬܗܘܐ. ܒܪܘܝܐ ܡܕܝܢ ܟܝ ܠܘ ܗܘܠܢܝܐ ܗ̱ܘ. ܚܕ ܗܘ ܠܗ ܩܢܘܡܐ܆ ܐܝܟ ܕܐܦ ܚܕ ܟܝܢܐ.

 

 

 

ܣܥܝܐ ܕܐܪܒܥܐ

 

ܟܠ ܟܝܢܐ ܕܠܘ ܚܕ ܗ̣ܘ ܠܗ ܩܢܘܡܐ. ܒܗ̇ܘ ܗ̣ܘ ܦܪܝ̣ܫ ܡ̣ܢ ܩܢܘ̈ܡܘܗܝ. ܕܗ̣ܘ ܡ̇ܢ ܡܬܝܕܥܢܐ ܡܕܡ ܐܝܬܘܗܝ. ܗܠܝܢ ܕܝܢ ܡܬܪ̈ܓܫܢܐ. ܗܐ ܓܝܪ ܟܝܢܐ ܐ̱ܢܫܝܐ ܒܗܘܢܐ ܒܠܚܘܕ ܡܬܕܪܟ. ܩܢܘ̈ܡܘܗܝ ܕܝܢ ܒܪ̈ܓܫܐ. ܣܩܪܐܛܝ̣ܣ ܐܡ̇ܪ ܐ̱ܢܐ ܘܦܠܐܛܘܢ. ܒܪܘܝܐ ܡܕܝܢ ܟܕ ܡܬܝܕܥܢܐ ܗ̱ܘ ܘܠܘ ܡܬܪܓܫܢܐ. ܚܕ ܗ̣ܘ ܠܗ ܩܢܘܡܐ. ܐܝܟ ܕܐܦ ܟܝܢܐ.

 

 

 

ܣܥܝܐ ܚܡܝܫܝܐ

 

ܐܡܪܝܢ ܟܠܚܕ ܡ̣ܢ ܩܢܘ̈ܡܐ ܕܟܝܢܐ ܐܠܗܝܐ ܐܢܗܘ ܕܡܬܘܡܝܐ ܗ̱ܘ. ܐܝܟ ܕܐܦ ܗ̣ܘ ܟܝܢܐ ܐܠܗܝܐ. ܐܘ ܦܪܝ̣ܫܝ̣ܢ ܡ̣ܢ ܚܕ̈ܕܐ ܗ̣ܘ ܩܢܘܡܐ ܗ̱ܘ ܘܟܝܢܐ. ܐܘ ܠܐ ܦܪܝ̣ܫܝ̣ܢ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܡܫܬܟܚ ܟܝܢܐ ܐܠܗܝܐ ܕܡܪܟܒ ܡ̣ܢ ܡܬܘܡܝܘܬܐ ܘܡ̣ܢ ܗ̇ܘ ܡܐ ܕܒܗ ܦܪܝ̣ܫ ܡ̣ܢ ܗ̇ܘ ܩܢܘܡܐ. ܘܟܠ ܕܡܪܟܒܐ ܗ̱ܘ ܠܘ ܐܠܨܝܐ ܗ̱ܘ. ܟܝܢܐ ܡܕܝܢ ܐܠܗܝܐ ܟܕ ܐܠܨܝܐ ܗ̱ܘ. ܠܘ ܡܪܟܒܐ ܗ̱ܘ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܐܦܢ ܠܐ ܦܪܝ̣ܫܝ̣ܢ ܡ̣ܢ ܚܕ̈ܕܐ ܟܝܢܐ ܗ̇ܘ ܘܟܠ ܚܕ ܡ̣ܢ ܩܢܘ̈ܡܐ. ܐܠܨܐ ܕܐܘ ܟܝܢܐ ܐܟܘܬܗܘܢ ܕܩܢܘ̈ܡܐ ܬܠܬܐ ܢܗܘܐ. ܐܘ ܩܢܘ̈ܡܐ ܐܟܘܬܗ ܕܟܝܢܐ ܚܕ ܢܗܘܘܢ. ܘܟܕ ܠܘ ܬܠܬܐ ܐܢܘܢ ܟܝ̈ܢܐ ܐܠܨܐ ܕܐܦܠܐ ܢܗܘܘܢ ܩܢܘ̈ܡܐ.

 

 

 

ܣܥܝܐ ܕܫܬܐ

 

ܐܡܪܝܢ ܕܬܠܬܝ̈ܗܘܢ ܗܠܝܢ ܩܢܘ̣̈ܡܐ ܐܘ ܡܬܘܡܝ̈ܐ ܐܢܘܢ܆ ܐܘ ܠܘ ܡܬܘܡܝ̈ܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܟܠ ܡܬܘܡܝܐ ܐܠܨܝܐ ܗ̱ܘ. ܘܐܠܘ ܡܬܘ̈ܡܝܐ ܝܬܝ̣ܪ ܡ̣ܢ ܚܕ ܐܝܬ ܗܘܐ. ܡܫܬܟܚܝ̣ܢ ܗܘܘ ܐܦ ܐܠܨܝ̈ܐ ܝܬܝ̣ܪ ܡ̣ܢ ܚܕ ܗ̇ܝ ܕܫܟܝ̣ܪܐ. ܒܗ̇ܝ ܕܐܠܨܝ ܐܝܬܘܬܐ ܚܕ ܗ̣ܘ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܠܘܬ ܗ̇ܝ ܕܠܐ ܢܗܘܐ ܠܐܠܨܝ ܐܝܬܘܬܐ ܩܢܘܡܐ ܒܡܬܘܡܝܘܬܗ ܡܘܒܠܐ ܗ̇ܝ ܕܫܟܝ̣ܪܐ. ܒܗ̇ܝ ܕܠܘܬ ܠܝܬܝܘܬܗ ܕܒܪܘܝܐ ܡܘܒܠܐ. ܒܗ̇ܝ ܕܟܠ ܟܝܢܐ ܒܩܢܘܡܐ ܡܨܐ ܠܡܗܘܐ ܒܡܥܒܕܢܘܬܐ܆ ܘܐܠܐ ܕܠܐ ܩܢܘܡܐ ܚܘܫܒܐ ܗ̱ܘ ܒܠܚܘܕ ܕܫܚܝ̣ܡܐ. ܘܟܕ ܩܢܘ̈ܡܐ ܗܠܝܢ ܠܐ ܡܬܘ̈ܡܝܐ ܐܦܠܐ ܡܬܘ̈ܡܝܐ ܡܨܝܢ ܕܢܗܘܘܢ܆ ܠܐ ܐܝܬܝܗܘܢ. ܒܗ̇ܝ ܕܟܠ ܕܐܝܬܘܗܝ. ܐܘ ܡܬܘܡܝܐ ܗ̱ܘ ܐܘ ܠܘ ܡܬܘܡܝܐ.

 

 

 

ܣܥܝܐ ܕܫܒܥܐ

 

ܐܡܪܝܢ ܕܠܐ ܐ̱ܢܫ ܡܬܦܠܓ ܕܐܠܗܐ ܫܘܒܚܐ ܠܛܝܒܘܬܗ ܡܬܝܕ̈ܥܢܐ ܕܠܐ ܣܘܦ ܝ̇ܕܥ. ܒܕܓܘܢ ܐܘ ܒܚܕܐ ܝ̣ܕܥܬܐ ܐܘܟܝ̣ܬ ܚܟܡܬܐ ܕܗ̣ܝ ܗ̣ܝ ܡܠܬܐ ܝ̇ܕܥ ܠܗܘܢ. ܐܘ ܒܝܕ ܝܕ̈ܥܬܐ ܡܣܝ̈ܟܬܐ܆ ܐܘ ܒܝܕ ܝܕ̈ܥܬܐ ܠܐ ܡܣܝ̈ܟܬܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܢ ܝ̣ܕܥܬܗ ܕܠܐܘܟܡܐ ܗ̣ܝ ܗܘܬ݀. ܝ̣ܕܥܬܗ ܕܠܚܘܪܐ. ܐܘܟܡܘܬܐ ܚܘܪܘܬܐ ܐܝܬܝܗ̇ ܗܘܬ݀. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܡܫܬܟ̈ܚܢ ܗܝܕܝܟ ܝܕ̈ܥܬܐ ܡܣܝ̈ܟܬܐ ܕܫܘ̈ܝܢ ܠܡܬܝܕ̈ܥܢܐ ܠܐ ܡܣܝ̈ܟܐ ܒܡܢܝܢܐ ܗ̇ܝ ܕܫܟܝ̣ܪܐ. ܘܗ̇ܘ ܕܬܠܬܐ ܬܘܒ ܠܐ ܫܪܝ̣ܪ. ܒܗ̇ܝ ܕܫܟܝ̣ܚܘܬ ܡܢܝܢܐ ܕܠܐ ܣܘܦ܇ ܡ̣ܢ ܠܘ ܡܫܟ̈ܚܢܝܬܐ ܗ̱ܝ. ܘܐܝܟܢܐ ܘܗܐ ܟܠ ܡܢܝܢܐ ܡܩܒܠܢܐ ܗ̱ܘ ܕܬܘܣܦܬܐ ܘܒܘܨܪܐ. ܘܟܠ ܕܗܟܢܐ ܗ̱ܘ܆ ܡܣܝܟܐ ܗ̱ܘ ܘܠܘ ܠܐ ܡܣܝܟܐ. ܐܟܡܐ ܕܙܒ̈ܢܬܐ ܐܬܚܘܝ̣. ܘܟܕ ܗܠܝܢ ܬܠܬܐ ܦܘ̈ܠܓܐ ܫܟܝ̣ܪܝ̣ܢ. ܠܘ ܒܝܕ ܝ̣ܕܥܬܐ ܐܘܟܝ̣ܬ ܚܟܡܬܐ ܕܗ̣ܝ ܗ̣ܝ ܩܢܘܡ ܡܠܬܐ ܝ̇ܕܥ ܒܪܘܝܐ ܗܠܝܢ ܕܝ̇ܕܥ.

 

 

 

ܣܥܝܐ ܕܬܡܢܝܐ

 

ܐܡܪܝܢ ܐܠܘ ܒܝܕ ܡܠܬܗ ܝ̇ܕܥ ܐܠܗܐ ܗܠܝܢ ܕܝ̇ܕܥ. ܠܡܠܬܗ ܐܪܐ ܒܝܕ ܡܠܬܐ ܝ̇ܕܥ ܐܘ ܠܘ ܒܝܕ ܡܠܬܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܡܪܝܢܢ ܕܠܗ ܠܡܠܬܐ ܗ̇ܘ ܕܒܗ ܝ̇ܕܥ ܠܡܠܬܗ܇ ܐܠܨܐ ܕܒܝܕ ܡܠܬܐ ܢܕܥܝ̣ܘܗܝ. ܘܠܗ̇ܘ ܒܐܚܪܢܐ. ܘܗܟܢܐ ܠܠܐ ܣܘܦ ܡܫܬܘܫܛܐ ܡܠܬܐ ܗ̇ܝ ܕܫܟܝ̣ܪܐ. ܒܗ̇ܝ ܕܐܠܨܐ ܕܩܢܘ̈ܡܐ ܣܓܝ̈ܐܐ ܢܗܘܘܢ ܠܡܠܬܗ. ܫܪܝ̣ܟܐ ܡܕܝܢ ܕܠܘ ܒܝܕ ܡܠܬܐ ܝ̇ܕܥ ܠܡܠܬܗ. ܘܟܕ ܡܨܝܐ ܕܠܡܠܬܗ ܕܡܕܡ ܡ̣ܢ ܡܬܝܕ̈ܥܢܘܗܝ ܗ̣ܘ ܠܗ ܒܡܠܬܐ ܢܕܥ. ܠܟܠܗܘܢ ܡܬܝܕ̈ܥܢܘܗܝ ܢܕܥ܆ ܡܕܝܢ ܠܘ ܒܝܕ ܡܠܬܐ ܝ̇ܕܥ. ܘܡ̣ܢ ܗܪܟܐ ܡܫܬܪܪܐ ܕܠܝܬ ܠܗ ܠܒܪܘܝܐ ܡܠܬܐ ܩܢܘܡܝܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܡ̣ܢ ܠܘ ܡܫܟ̈ܚܢܝܬܐ ܗܘܬ݀ ܕܚܕ ܡܕܡ ܡܥܒܕܢܐ ܐܟܚܕܐ ܘܡܩܒܠܢܐ ܢܗܘܐ ܗܘܐ. ܐܠܘ ܡ̣ܢ ܚܕܐ ܥܠܬܐ ܬܪܝܢ ܥܠܬܢ̈ܐ ܠܐ ܡܨܝܢ ܗܘܘ ܠܡܗܘܐ. ܘܟܕ ܗܕܐ ܠܘ ܠܐ ܡܨܝܐ. ܐܟܡܐ ܕܥܬܝ̣ܕܝ̣ܢ ܠܡܚܘܝܘ ܒܗܠܝܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܟܝܢܐ ܐܠܗܝܐ ܟܕ ܥܠ ܡܠܬܗ ܘܪܘܚܗ ܢܣܬܢܩ ܠܘܬ ܗ̇ܝ ܕܢܗܘܐ ܚ̇ܟܡ ܘܝ̇ܕܥ. ܠܘ ܥܠ ܡܕܡ ܕܠܘ ܗ̣ܘ ܟܝܢܗ ܗ̣ܘ ܡܣܬܢܩ. ܐܝܟܢܐ ܕܠܘܬ ܫܟܝ̣ܪܘܬܐ ܬܘܒܠ ܣܢܝ̣ܩܘܬܐ ܕܐܝܟ ܗܕܐ. ܗ̇ܝ ܕܒܫܪܪܐ ܠܘ ܣܢܝ̣ܩܘܬܐ ܗ̱ܝ. ܘܐܦܢ ܒܥܠܬ݀ ܐܠܝ̣ܨܘܬ ܠܟܣܝܣ ܒܫܡ ܣܢܝ̣ܩܘܬܐ ܡܬܦܫܩ ܣܘܟܠܗ̇. ܗ̣ܘ ܓܝܪ ܗ̣ܘ ܐܝܬܘܗܝ ܟܝܢܐ ܠܐܠܗܐ ܘܡܠܬܗ ܘܪܘܚܗ. ܗܐ ܓܝܪ ܡܬܐܡܪܐ ܕܒܪܢܫܐ ܥܠ ܟܢܝ̣ܫܘܬܐ ܕܚܝܠܐ ܘܡܠܝ̣ܠܐ ܣܢܝ̣ܩ ܕܢܗܘܐ ܒܪܢܫܐ. ܘܓܠܝܐ ܕܠܘ ܐ̱ܚܪܝܢ ܗ̣ܘ ܒܪܢܫܐ ܡ̣ܢ ܟܢܝ̣ܫܘܬܐ ܕܚܝܐ ܘܡܠܝ̣ܠܐ. ܒܕܓܘܢ ܒܪܢܫܐ ܗ̣ܘ ܥܠܘܗܝ ܣܢܝ̣ܩ ܕܢܗܘܐ ܒܪܢܫܐ. ܘܟܕ ܒܡܪ̈ܟܒܐ ܗ̣ܘ ܙܢܐ ܕܐܝܟ ܗܢܐ ܠܐ ܫܟܝ̣ܪ. ܒܦܫܝ̣̈ܛܐ ܐܝܟܢܐ ܢܗܘܐ ܫܟܝ̣ܪܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܠܐ ܐܠܨܐ ܐܢܗܘ ܕܙܢܝ̈ܐ ܗܘܠܢܝ̈ܐ ܣܓܝܐܘܬܐ ܡܥܕܝ̣ܢ ܠܡܥܒܕ ܕܩܢܘ̈ܡܐ. ܕܐܦ ܟܠ ܣܓܝܐܘܬܐ ܕܩܢܘ̈ܡܐ ܒܝܕ ܙܢܝ̈ܐ ܢܗܘܐ ܗܘܠܢܝ̈ܐ. ܩܛܦܣܝ̣ܣ ܓܝܪ ܠܘ ܟܠܢܝܬܐ ܬܗܐ ܐܘ ܡܢܬܝܬܐ. ܐܟܡܐ ܕܒܠܘܓܝܩܝ ܡܬܚܘܝܐ. ܘܬܘܒ ܐܡܪܝܢܢ ܕܢܦ̈ܫܬܐ ܡܠܝ̣̈ܠܬܐ܆ ܟܕ ܫܘ̈ܝܬ݀ ܒܟܝܢܐ ܐܢܝܢ. ܠܘ ܠܐ ܦܪ̈ܝ̣ܫܢ ܡ̣ܢ ܚܕ̈ܕܐ ܩܢܘܡܐܝܬ ܒܠܥܕ ܙܢܝ̈ܐ ܗܠܝܢ ܗܘܠܢܝ̈ܐ܆ ܒܬܪ ܦܘܪܫܢܗܝܢ ܡ̣ܢ ܦܓܪ̈ܐ ܐܝܟ ܬܪܥܝ̣ܬܗ ܕܐܪܝ̣ܣܛܘܛܠܝ̣ܣ. ܘܡ̣ܢ ܩܕܡ ܢܩܝ̣ܦܘܬܗܝܢ ܕܠܦܓܪ̈ܐ ܘܒܬܪ ܦܘܪܫܢܗܝܢ ܕܡܢܗܘܢ ܐܝܟ ܪܥܝܢܗ ܠܐܦܠܐܛܘܢ. ܒܗ̇ ܒܕܡܘ̣ܬܐ ܡܕܝܢ ܘܟܝܢܐ ܐܠܗܝܐ ܦܪܝ̣ܫܝ̣ܢ ܡ̣ܢ ܚܕ̈ܕܐ ܩܢܘܡܘ̈ܗܝ. ܒܠܥܕ ܙܢܝ̈ܐ ܗܘܠܢܝ̈ܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܠܘ ܟܠ ܟܝܢܐ ܕܩܢܘ̈ܡܐ ܩܢܐ ܣܓܝ̈ܐܐ܆ ܡܬܪ̈ܓܫܢܐ ܐܢܘܢ ܩܢܘ̈ܡܘܗܝ. ܐܟܡܐ ܕܚܘܝ̣ܢܢ ܒܬܚܘܝ̣ܬܐ ܕܢܦ̈ܫܬܐ ܡܠܝ̣̈ܠܬܐ ܕܦܪ̈ܫܢ ܡ̣ܢ ܦܓܪ̈ܝܗܝܢ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܡܬܘܡܝܘܬܐ ܠܘ ܣܘܟܠܐ ܐܝܬܘܬܢܝܐ ܩܢܝܐ. ܒܗ̇ܝ ܕܥܠ ܠܝܬܝܘܬܐ ܕܫܘܪܝܐ ܡܫܘܕܥܐ. ܘܡܛܠ ܗܕܐ ܠܐ ܐܠܨܐ ܕܡܢܬܐ ܬܗܘܐ ܠܡܕܡ. ܟܐܡܬ݀ ܕܡܢܗ̇ ܘܡ̣ܢ ܐ̱ܚܪܢܐ ܡܕܡ ܢܬܪܟܒ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ ܕܠܘ ܟܠ ܡܬܘܡܝܐ ܐܠܨܝܐ ܗ̱ܘ. ܘܗܕܐ ܝ̣ܕܝ̣ܥܐ ܒܝܕ ܬܪܬܝܢ. ܚܕ ܡ̇ܢ ܕܥܠܡܐ ܐܝܟ ܬܪܥܝ̣ܬܐ ܕܒܪ̈ܝܐ ܡܬܘܡܝܐ ܘܠܘ ܐܠܨܝܐ ܗ̱ܘ. ܒܗ̇ܝ ܕܠܘ ܡ̣ܢ ܝܬܗ ܗ̣ܝ ܠܗ ܗ̇ܝ ܕܐܝܬܘܗܝ܆ ܐܠܐ ܡ̣ܢ ܒܪܘܝܐ. ܕܬܪܬܝܢ ܕܝܢ ܗ̇ܝ ܕܡܬܘܡܝܐ ܗ̇ܘ ܗ̣ܘ ܕܠܝܬ ܠܗ ܫܘܪܝܐ. ܘܐܠܨܝܐ ܗ̇ܘ ܗ̣ܘ ܕܠܝܬ ܠܗ ܥܠܬܐ. ܒܕܓܘܢ ܦܪܝ̣ܫܝ̣ܢ ܡ̣ܢ ܚܕ̈ܕܐ. ܘܡܨܝܐ ܕܒܙܒܢ ܡ̇ܢ ܢܩ̈ܦܢ ܠܚ̈ܕܕܐ ܡܬܘܡܝܘܬܐ ܘܐܠܨܝܘܬܐ܆ ܒܙܒܢ ܠܐ.

 

 

 

ܫܪܝܐ ܕܣܥܝܐ ܫܒܝܥܝܐ

 

ܐܡܪܝܢܢ ܕܠܐ ܐܠܨܐ ܡ̣ܢ ܗ̇ܝ ܕܒܚܕܐ ܝ̣ܕܥܬܐ ܢܕܥ ܝܕܘܥܐ ܠܐܘܟܡܐ ܘܠܚܘܪܐ. ܕܐܘܟܡܐ ܚܘܪܐ ܢܗܘܐ. ܒܗ̇ܝ ܕܒܚܕܐ ܝ̣ܕܥܬܐ ܝܕܥܝ̣ܢܢ ܕܐܘܟܡܐ ܣܩܘܒܠܐ ܗ̱ܘ ܕܚܘܪܐ. ܘܐܠܘ ܒܥܠܬ݀ ܗܕܐ ܝ̣ܕܥܬܐ ܝ̣ܚܝ̣ܕܝܬܐ܆ ܠܐܘܟܡܐ ܚܘܪܐ ܝܕܥܝܢ ܗܘܝܢ. ܘܠܚܘܪܐ ܐܘܟܡܐ. ܐܝܟܢܐ ܚܪܩܝ̣ܢ ܗܘܝܢ ܕܣܩܘܒܠܝ ܐܘܟܡܐ ܠܚܘܪܐ. ܘܟܕ ܙܢܐ ܕܐܝܟ ܗܢܐ ܐܦ ܠܘܬܢ ܕܝܠܢ ܚܣܝ̣ܪ̈ܝ ܝ̣ܕܥܬܐ ܠܘ ܠܐ ܡܬܡܨܝܢܐ ܗ̱ܘ. ܠܘܬ ܗ̇ܝ ܕܓܡܝ̣ܪܬ݀ ܒܟܠ ܗ̣ܝ ܝ̣ܕܥܬܗ ܐܝܟܢܐ ܠܐ ܡܬܡܨܝܢܐ ܢܬܬܕܝ̣ܢ.

 

 

 

ܫܪܝܐ ܕܣܥܝܐ ܬܡܝܢܝܐ

 

ܐܡܪܝܢܢ ܕܠܟܠܡܕܡ ܕܣܛܪ ܡ̣ܢ ܡܠܬܗ ܒܡܠܬܗ ܝ̇ܕܥ. ܠܡܠܬܗ ܕܝܢ ܠܘ ܒܡܠܬܐ ܐ̱ܚܪܬܐ. ܐܠܐ ܠܗ ܒܗ ܝ̇ܕܥ. ܗܐ ܓܝܪ ܒܪܢܫܐ ܠܟܠܗܝܢ ܗܠܝܢ ܕܝ̇ܕܥ܆ ܒܗܘܢܗ ܝ̇ܕܥ. ܠܗܘܢܗ ܕܝܢ ܠܘ ܒܗܘܢܐ ܐ̱ܚܪܢܐ. ܐܠܐ ܠܗ ܒܗ ܝ̇ܕܥ.

 

 

 

 

 

 

 

 

 

 

     #1 

 

ܩܦܠܐܘܢ ܥܣܝܪܝܐ ܕܫܬܐܣܬܐ ܬܠܝܬܝܬܐ. ܡܛܠܗ̇ܝ ܕܒܪܐ ܘܪܘܚܐ ܠܘ ܒܪ̈ܝܐ ܘܥܒܝ̣̈ܕܐ ܐܝܬܝܗܘܢ ܐܝܟ ܬܪܥܝ̣ܬܐ ܕܐܪ̈ܝܢܘ ܘܡܩܕܘ̈ܢܝܢܘ ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܒܪܐ ܘܪܘܚܐ ܐܢ ܒܪܝܢ܆ ܫܘܝܢ ܠܒܪ̈ܝܬܐ ܒܗ̇ܝ ܕܒܪ̈ܝܐ ܐܢܘܢ. ܒܕܓܘܢ ܐܘ ܒܟܝܢܐ ܬܘܒ ܫܘܝܢ ܠܗܝܢ. ܐܘ ܒܟܝܢܐ ܠܐ ܫܘܝܢ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܢ ܒܟܝܢܐ ܫܘܝܢ ܠܫܪܟܐ ܕܒܪ̈ܝܬܐ. ܘܫܪܟܐ ܕܒܪ̈ܝܬܐ ܦܪ̈ܝ̣ܫܢ ܒܟܝܢܐ ܡ̣ܢ ܐܒܐ. ܡܬܟܢܫܐ ܕܒܪܐ ܘܪܘܚܐ ܦܪܝ̣ܫܝ̣ܢ ܒܟܝܢܐ ܡ̣ܢ ܐܒܐ ܗ̇ܝ ܕܫܟܝ̣ܪܐ. ܒܗ̇ܝ ܕܒܐܦܘܕܝ̣ܟܣܝ̣ܣ ܚܘܝ̣ܢܢ ܡ̣ܢ ܠܥܠ܆ ܫܘܝܘܬ ܟܝܢܐ ܕܬܠܬܝ̈ܗܘܢ ܩܢܘ̈ܡܐ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܐܢ ܦܪܝ̣ܫܝ̣ܢ ܒܟܝܢܐ ܡ̣ܢ ܒܪ̈ܝܬܐ܆ ܐܠܨܐ ܕܟܕ ܒܪ̈ܝܬܐ ܟܝܢܐ ܩܢ̈ܝܢ܇ ܡܩܒܠܢܐ ܕܗ̇ܝ ܕܒܪ̈ܝܬܐ ܢܗܘܝ̈ܢ. ܒܪܐ ܘܪܘܚܐ ܟܝܢܐ ܢܗܘܐ ܠܗܘܢ ܠܐ ܡܩܒܠܢܐ ܕܗ̇ܝ ܕܒܪ̈ܝܐ ܢܗܘܘܢ. ܒܪܐ ܘܪܘܚܐ ܟܝܢܐ ܢܗܘܐ ܠܗܘܢ ܠܐ ܡܩܒܠܢܐ ܕܗ̇ܝ ܕܒܪ̈ܝܐ ܢܗܘܘܢ. ܒܪܐ ܡܕܝܢ ܘܪܘܚܐ ܐܢ ܒܪ̈ܝܐ ܐܢܘܢ ܫܘܝܢ ܒܟܝܢܐ ܠܒܪ̈ܝܬܐ. ܘܐܡ̣ܪܢܢ ܕܦܪܝ̣ܫܝܢ܆ ܗ̇ܝ ܕܫܟܝ̣ܪܐ. ܠܐ ܒܪ̈ܝܐ ܐܢܘܢ ܡܕܝܢ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܐܒܐ ܟܕ ܒܪܐ ܠܒܪܐ ܘܪܘܚܐ ܐܝܟ ܕܐܡܪܝ̣ܬܘܢ. ܩܢܐ ܗܘܐ ܐܪܐ ܚܟܡܬܐ ܘܚܝ̈ܐ܆ ܐܘ ܠܐ ܩܢܐ ܗܘܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܕܠܐ ܡܫܟܚܐ ܬܢܝܢܘܬ ܫܟܝ̣ܚܘܬܐ ܕܗ̇ܢܘܢ ܕܫܟܝ̣ܚܝܢ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܗ̇ܘ ܕܠܐ ܚܝ. ܠܐ ܡܬܘܡ ܠܡܒܪܐ ܡܨܐ. ܘܗ̇ܘ ܕܠܐ ܚܟܝ̣ܡ. ܐܦܢ ܠܘ ܠܐ ܡܨܐ ܠܡܣܥܪ ܡܕܡ܆ ܐܠܐ ܬܩܢܐܝܬ ܠܐ ܣܟ ܡܨܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܡ̣ܢ ܩܕܡ ܕܢܒܪܐ ܐܒܐ ܙܒܢܐ ܐܪܐ ܒܪܐ ܠܒܪܐ ܘܠܪܘܚܐ. ܐܘ ܡ̣ܢ ܒܬܪ ܕܒܪܝܗܝ ܠܙܒܢܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܠܘ ܡܨܝܐ ܗܘܬ݀ ܠܡܫܬܟܚܘ ܒܪܝ̣ܬܐ ܡܕܡ ܕܠܐ ܙܒܢܐ. ܐܝ̣ܩܝ̣ ܗܘܬ݀ ܒܪܝ̣ܬܗ ܕܙܒܢܐ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܐܠܘ ܡܬܬܝܬܝܐ ܗܘܬ݀ ܠܒܪܘܝܐ ܕܢܒܪܐ ܗܘܐ ܙܒܢܐ. ܐܘ ܡܕܡ ܐ̱ܚܪܝܢ ܒܠܥܕ ܗ̇ܝ ܕܬܗܘܐ ܠܗ ܚܟܡܬܐ ܘܚܝ̈ܐ. ܕܐܝܬܝܗܘܢ ܩܢܘ̈ܡܐ ܕܒܪܐ ܘܪܘܚܐ. ܐܝ̣ܩܝ̣ ܗܘܝܐ ܗܘܬ݀ ܠܗ ܫܟܝ̣ܚܘܬܐ ܕܒܪܐ ܘܕܪܘܚܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܒܣܒܪܬܐ. ܒܪܝ̣ܫܝܬ ܐܝܬܘܗܝ ܗܘܐ ܡܠܬܐ. ܘܗ̣ܘ ܡܠܬܐ ܐܝܬܘܗܝ ܗܘܐ ܠܘܬ ܐܠܗܐ. ܘܐܠܗܐ ܐܝܬܘܗܝ ܗܘܐ ܡܠܬܐ.

 

 

 

ܣܗܕܘܬܐ ܕܬܪܬܝܢ.

 

ܒܗ̇ ܟܕ ܒܗ̇. ܝܚܝ̣ܕܝܐ ܒܪܐ ܗ̇ܘ ܕܐܝܬܘܗܝ ܒܥܘܒܗ ܕܐܒܐ ܗ̣ܘ ܦܫܩ.

 

 

 

ܣܗܕܘܬܐ ܕܬܠܬ

 

ܒܗ̇ ܟܕ ܒܗ̇. ܠܗܢܐ ܓܝܪ ܐܒܐ ܚܬܡ ܐܠܗܐ.

 

 

 

ܣܗܕܘܬܐ ܕܐܪܒܥ

 

ܒܗ̇ ܟܕ ܒܗ̇. ܪܘܚܐ ܗ̱ܘ ܓܝܪ ܐܠܗܐ. ܘܐܝܠܝܢ ܕܣܓܕܝܢ ܠܗ܆ ܒܪܘܚܐ ܘܒܫܪܪܐ ܘܠܐ ܠܡܣܓܕ.

 

 

 

ܣܗܕܘܬܐ ܕܚܡܫ

 

ܦܘܠܘܣ. ܬܫܒܘܚܬܗ ܕܡܪܝܐ ܐܝܟ ܕܒܡܚܙܝ̣ܬܐ ܚܙܝܢܢ. ܘܠܗ̇ ܠܕܡܘ̣ܬܐ ܡܫܬܚܠܦܝ̣ܢܢ. ܡ̣ܢ ܫܘܒܚܐ ܠܫܘܒܚܐ. ܐܝܟ ܕܡ̣ܢ ܪܘܚܐ.

 

 

 

ܢܘܗܪܐ

 

ܡܪܝܐ ܕܥ ܕܣܗܕܘܬܐ ܩܕܡܝܬܐ ܡܫܘܕܥܐ ܕܠܘ ܒܪܝܐ ܗ̱ܘ ܒܪܐ. ܒܗ̇ܝ ܕܐܠܘ ܒܪܝܐ ܗܘܐ. ܒܪܝ̣ܫܝ̣ܬ ܒܪܐ ܐܠܗܐ ܡܠܬܐ܆ ܐܡ̇ܪ ܗܘܐ ܝܘܚܢܢ. ܘܠܘ ܕܐܝܬܘܗܝ ܗܘܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܡܘܫܐ. ܕܟܕ ܥܠ ܒܪ̈ܝܬܐ ܡܠܠ܆ ܐܡ̣ܪ. ܒܪܝ̣ܫܝ̣ܬ ܒܪܐ ܐܠܗܐ ܝܬ ܫܡܝܐ ܘܝܬ ܐܪܥܐ. ܘܠܐ ܐܡ̣ܪ ܕܒܪܝ̣ܫܝ̣ܬ ܐܝܬܘܗܝ ܗܘܐ ܫܡܝܐ ܐܘ ܐܪܥܐ. ܡܛܠ ܕܠܒܪ̈ܝܬܐ ܠܐ ܠܚܡܐ ܗܘܬ݀ ܒܪܬ݀ ܩܠܐ ܗ̇ܝ ܕܐܝܬܘܗܝ ܗܘܐ. ܐܝܟ ܕܐܦܠܐ ܠܠܐ ܒܪ̈ܝܐ ܗ̇ܝ ܕܒܪܐ. ܘܗ̇ܝ ܕܬܪܬܝܢ ܡܫܘܕܥܐ ܕܒܪ ܟܝܢܗ ܗ̣ܘ ܕܐܒܐ ܡܠܬܐ. ܥܘܒܐ ܓܝܪ ܠܟܝܢܐ ܓܢܝ̣ܙܐ ܕܐܠܗܐ ܡܫܘܕܥ ܗܪܟܐ. ܘܡܛܠ ܗܕܐ ܬܘܒ ܠܘ ܒܪܝܐ ܗ̱ܘ. ܘܗ̇ܝ ܕܬܠܬ ܡܫܘܕܥܐ ܕܐܠܗܐ ܗ̱ܘ ܘܡܛܠ ܗܕܐ ܗܟܘܬ ܠܘ ܒܪܝܐ ܗ̱ܘ ܐܠܐ ܝ̣ܠܝ̣ܕܐ. ܘܠܗ̇ ܠܗܕܐ ܬܘܒ ܡܫܪܪ ܕܘܝܕ. ܒܗ̇ܝ ܕܡ̣ܢ ܩܕܡ ܟܘܟܒ ܢܘܓܗܐ ܝܠܕܬܟ. ܘܗ̇ܝ ܕܐܪܒܥ ܘܕܚܡܫ ܡܫܘܕ̈ܥܢ ܕܐܠܗܐ ܗ̱ܘ ܘܡܪܝܐ ܪܘܚܐ ܘܡܛܠ ܗܕܐ ܗܟܘܬ ܠܘ ܒܪܝܐ ܗ̱ܘ. ܘܒܚܕܐ ܠܡܐܡܪ. ܕܗܠܝܢ ܣܗܕ̈ܘܬܐ ܡܫܪܪ̈ܢ܇ ܕܟܠ ܚܕ ܡ̣ܢ ܒܪܐ ܘܪܘܚܐ܆ ܐܠܗܐ ܗ̱ܘ ܘܡܪܝܐ. ܘܟܠ ܕܐܠܗܐ ܗ̱ܘ ܘܡܪܝܐ ܒܪܘܝܐ ܗ̱ܘ ܘܠܘ ܒܪܝܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܥܣܝܪܝܐ ܕܫܬܐܣܬܐ ܬܠܝܬܝܬܐ. ܡܛܠ ܬܪܥܝ̣ܬܐ ܕܗ̇ܢܘܢ ܒܪ̈ܝܐ ܘܥܒܝ̣̈ܕܐ ܡܘܕܝܢ ܠܒܪܐ ܘܠܪܘܚܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ. ܣܥܝܐ ܩܕܡܝܐ

 

ܐܡܪܝܢ ܕܐܒܐ ܐܪܐ. ܟܕ ܨܒܐ ܝܠܕ ܠܒܪܐ ܘܡܦܩ ܠܪܘܚܐ܆ ܐܘ ܟܕ ܠܐ ܨܒܐ. ܘܐܢ ܟܕ ܨܒܐ܆ ܗܐ ܗ̇ܝ ܕܡܬܒܥܝܐ ܒܗ̇ܝ ܕܡܫܬܟܚܝ̣ܢ ܒܪܐ ܘܪܘܚܐ ܕܥܠܬܢ̈ܐ ܐܢܘܢ ܕܨܒܝܢܐ܆ ܘܠܘ ܕܟܝܢܐ. ܘܡܛܠ ܗܕܐ ܐܠܨܐ ܕܒܪ̈ܝܐ ܘܥܒܝ̣̈ܕܐ ܢܗܘܘܢ. ܘܐܢ ܟܕ ܠܐ ܨܒܐ. ܡܫܬܟܚ ܠܗ ܐܒܐ ܕܟܕ ܐܬܡܪܕ܇ ܘܡ̣ܢ ܩܛܝ̣ܪ ܗܘܐ ܥܠܬܐ ܕܒܪܐ ܘܕܪܘܚܐ ܗ̇ܝ ܕܫܟܝ̣ܪܐ. ܘܟܕ ܗܢܐ ܦܫܚܐ ܬܪܝܢ ܫܟܝ̣ܪ. ܡ̣ܢ ܐܢܢܩܝ̣ ܕܗ̇ܘ ܩܕܡܝܐ ܫܪܝ̣ܪ.

 

 

 

ܣܥܝܐ ܕܬܪܝܢ

 

ܐܡܪܝܢ ܕܟܕ ܐܝܬܝܗܘܢ ܐܪܐ ܒܪܐ ܘܪܘܚܐ. ܗ̇ܘ ܡ̇ܢ ܐܬܝ̣ܠܕ. ܗ̇ܘ ܕܝܢ ܢܦܩ. ܐܘ ܟܕ ܠܐ ܐܝܬܝܗܘܢ ܘܐܢ ܟܕ ܠܐ ܐܝܬܝܗܘܢ܆ ܗܐ ܗ̇ܝ ܡܬܒܥܝܐ. ܒܗ̇ܝ ܕܡܫܬܟܚܝ̣ܢ ܕܡܫܪ̈ܝܢܐ ܐܢܘܢ. ܘܟܠ ܡܫܪܝܢܐ ܒܪܝܐ. ܒܪܐ ܡܕܝܢ ܘܪܘܚܐ ܒܪ̈ܝܐ ܐܢܘܢ. ܘܠܐ ܡܨܝܐ ܕܟܕ ܐܝܬܝܗܘܢ ܗ̇ܘ ܡ̇ܢ ܐܬܝܠܕ. ܗ̇ܘ ܕܝܢ ܕܢܦܩ. ܒܗ̇ܝ ܕܗ̣ܝ ܗܕܐ ܠܘܬ ܬܢܝܢܘܬ ܫܟܝ̣ܚܘܬܐ ܕܗ̇ܘ ܕܫܟܝ̣ܚ ܡܘܒܠܐ ܗ̇ܝ ܕܫܟܝ̣ܪܐ.

 

 

 

ܣܥܝܐ ܕܬܠܬܐ

 

ܐܡܪܝܢ ܐܢ ܓܝܪ ܠܐ ܝ̣ܠܝ̣ܕܘܬܐ ܕܝ̣ܠܝܬܐ ܗ̱ܝ ܕܟܝܢܐ ܐܠܗܝܐ. ܝ̣ܠܝ̣ܕܘܬܐ ܠܘ ܕܝ̣ܠܝܬܗ ܙܕܩ ܕܬܗܘܐ. ܡܛܠ ܕܥܠ ܟܠ ܡܕܡ ܐܘ ܩܛܦܣܝ̣ܣ ܡܫܪܐ ܐܘ ܐܦܘܦܣܝ̣ܣ. ܒܪܐ ܡܕܝܢ ܟܕ ܝ̣ܠܝ̣ܕܐ ܗ̱ܘ ܘܠܘ ܠܐ ܝ̣ܠܝ̣ܕܐ. ܠܘ ܟܝܢܐ ܩܢܐ ܐܠܗܝܐ. ܘܡܛܠ ܗܕܐ ܐܢ ܐܝܬܘܗܝ ܐܠܨܐ ܕܒܪܝܐ ܐܘܟܝ̣ܬ ܥܒܝ̣ܕܐ ܢܗܘܐ.

 

 

 

ܣܥܝܐ ܪܒܝܥܐ

 

ܐܡܪܝܢ ܕܟܠ ܕܐܝܬܘܗܝ. ܐܘ ܝ̣ܠܝ̣ܕܐ ܗ̱ܘ ܐܘ ܠܐ ܝ̣ܠܝ̣ܕܐ. ܪܘܚܐ ܡܕܝܢ ܐܢ ܐܝܬܘܗܝ ܐܘ ܝ̣ܠܝ̣ܕܐ ܗ̱ܘ ܐܘ ܠܐ ܝ̣ܠܝ̣ܕܐ ܗ̱ܘ. ܘܟܕ ܠܐ ܝ̣ܠܝ̣ܕܐ ܗ̱ܘ ܐܦܠܐ ܠܐ ܝ̣ܠܝ̣ܕܐ ܐܠܐ ܐܝܬܘܗܝ. ܒܗ̇ܝ ܕܐܢ ܝ̣ܠܝ̣ܕܐ ܗ̱ܘ ܒܪܐ ܗ̣ܘ. ܘܐܢ ܠܐ ܝ̣ܠܝ̣ܕܐ ܗ̱ܘ. ܐܒܐ ܗ̱ܘ ܘܠܘ ܪܘܚܐ. ܪܘܚܐ ܡܕܝܢ ܟܠ ܟܠܗ ܠܐ ܐܝܬܘܗܝ.

 

 

 

ܣܥܝܐ ܕܚܡܫܐ

 

ܐܡܪܝܢ ܒܐܡܝ̣ܢܘ ܐܪܐ ܡܘܠܕ ܐܒܐ ܠܒܪܐ ܘܡܦܩ ܠܪܘܚܐ ܐܘ ܠܘ ܒܐܡܝ̣ܢܘ. ܘܟܕ ܗ̇ܘ ܩܕܡܝܐ ܠܐ ܫܪܝ̣ܪ ܒܗ̇ܝ ܕܠܘܬ ܬܢܝܢܘܬ ܫܟܝ̣ܚܘܬܐ ܕܗ̇ܘ ܕܫܟܝ̣ܚ ܡܘܒܠ. ܗ̇ܝ ܕܫܟܝ̣ܪܐ. ܫܪܝ̣ܟܐ ܕܗ̇ܘ ܕܬܪܝܢ ܗ̣ܘ ܫܪܝܪ. ܟܐܡܬ݀ ܕܠܘ ܒܐܡܝ̣ܢܘ ܡܘܠܕ ܘܡܦܩ. ܘܡ̣ܢ ܗܪܟܐ ܡܫܬܟܚܐ ܝ̣ܠܝ̣ܕܘܬܐ ܕܒܪܐ ܕܡ̣ܢ ܟܕܘ ܩܡܬ݀ ܠܗ̇ ܐܘܟܝ̣ܬ ܕܫܘܠܡܐ ܗܘܐ ܠܗ̇. ܘܗܟܢܐ ܐܦ ܢܦܘܩܘܬܐ ܕܪܘܚܐ. ܘܟܠ ܕܫܘܠܡܐ ܐܝܬ ܠܗ ܡ̣ܢ ܐܢܢܩܝ̣ ܕܐܦ ܫܘܪܝܐ ܢܗܘܐ ܠܗ. ܘܟܠ ܕܫܘܪܝܐ ܐܝܬ ܠܗ ܒܪܝܐ ܗ̱ܘ. ܒܪܐ ܡܕܝܢ ܘܪܘܚܐ ܒܪ̈ܝܐ ܐܢܘܢ.

 

 

 

ܣܥܝܐ ܕܫܬܐ

 

ܐܡܪܝܢ ܒܟܝܢܐ ܗܘܐ ܐܪܐ ܐܒܐ ܥܠܬܐ ܕܒܪܐ ܘܕܪܘܚܐ. ܐܘ ܠܘ ܒܟܝܢܐ. ܘܐܢ ܠܘ ܒܟܝܢܐ ܗ̱ܘ. ܗܐ ܗ̇ܝ ܕܡܬܒܥܝܐ. ܒܗ̇ܝ ܕܟܠ ܥܠܬܢܐ ܕܠܘ ܒܟܝܢܐ ܗ̱ܘ ܥܠܬܢܐ܇ ܒܪܝܐ ܗ̱ܘ ܘܥܒܝ̣ܕܐ. ܒܪܐ ܡܕܝܢ ܘܪܘܚܐ ܒܪ̈ܝܐ ܐܢܘܢ ܘܥܒܝ̣̈ܕܐ. ܘܐܢ ܒܟܝܢܐ ܐܢܘܢ ܥܠܬܢ̈ܐ܆ ܡܫܬܟܚܝ̣ܢ ܕܒܟܝܢܐ ܐ̱ܚܪ̈ܝܝܢ ܡ̣ܢ ܐܒܐ. ܘܟܠ ܕܗܟܢܐ ܗ̱ܘ܇ ܠܘ ܫܘܐ ܒܟܝܢܐ ܙܕܩ ܕܢܗܘܐ ܠܥܠܬܗ. ܡܛܠ ܕܒܟܝܢܐ ܫܘܝܐ ܠܝܬ ܩܕܡܝܘܬܐ ܘܐ̱ܚܪܝܘܬܐ܆ ܐܠܐ ܟܒܪ ܒܙܒܢܐ. ܐܟܡܐ ܕܐܚܪܝ ܫܠܝܡܘܢ ܡ̣ܢ ܕܘܝܕ. ܘܓܠܝܐ ܕܠܘ ܒܟܝܢܐ ܐ̱ܚܪܝ ܐܠܐ ܒܙܒܢܐ ܒܠܚܘܕ. ܒܪܐ ܡܕܝܢ ܘܪܘܚܐ. ܟܕ ܢܘܟܪ̈ܝܝ ܒܟܝܢܐ ܐܢܘܢ ܠܐܒܐ. ܒܪ̈ܝܐ ܐܢܘܢ ܘܥܒܝ̣̈ܕܐ.

 

 

 

ܣܥܝܐ ܕܫܒܥܐ

 

ܐܡܪܝܢ ܕܐܒܐ ܐܪܐ ܕܟܝܢܐ ܗ̱ܘ ܐܒܐ. ܐܘ ܕܡܥܒܕܢܘܬܐ. ܘܐܢ ܕܡܥܒܕܢܘܬܐ ܗܐ ܗ̇ܝ ܕܡܬܒܥܝܐ. ܒܗ̇ܝ ܕܡܫܬܟܚ ܐܒܐ ܕܥܒܘܕܐ ܗ̱ܘ ܘܒܪܐ ܥܒܝ̣ܕܐ. ܘܐܢ ܕܟܝܢܐ ܗ̱ܘ ܐܒܐ. ܗܟܘܬ ܗܐ ܗ̇ܝ ܕܡܬܒܥܝܐ. ܒܗ̇ܝ ܕܠܘܬ ܢܘܟܪܝܘܬܐ ܕܟܝ̈ܢܐ ܕܐܒܐ ܘܕܒܪܐ ܡܘܒܠܐ ܗܕܐ. ܟܝܢܐ ܓܝܪ ܗ̇ܘ ܕܥܠܬܐ ܡܟܢ ܠܡܗܘܐ. ܕܐ̱ܚܪܢܐ ܙܕܩ ܕܢܗܘܐ ܡ̣ܢ ܟܝܢܐ ܗ̇ܘ ܕܗ̇ܝ ܕܒܗܦܟܐ ܡܟܢ. ܟܐܡܬ݀ ܕܥܠܬܢܐ ܡܟܢ ܠܡܗܘܐ. ܘܥܠܬܐ ܠܐ ܡܟܢ ܠܡܗܘܐ: ܒܪܐ ܡܕܝܢ ܐܢ ܝ̣ܠܝ̣ܕ ܗܘܐ ܡ̣ܢ ܐܒܐ ܒܪ ܟܝܢܗ ܗ̣ܘ: ܘܟܕ ܠܘ ܒܪ ܟܝܢܗ ܗ̣ܘ: ܠܐ ܝ̣ܠܝ̣ܕ ܐܠܐ ܒܪܐ ܘܥܒܝ̣ܕ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܕܐܪ̈ܝܢܘ ܘܡܩܕܘ̈ܢܝܢ.ܘ ܣܗܕܘܬܐ ܩܕܡܝܬܐ

 

ܡ̈ܬܠܐ. ܘܡܪܝܐ ܒܪܢܝ ܒܪܝܫ ܒܪ̈ܝܬܗ. ܘܡ̣ܢ ܩܕܡ ܥܒܕܘ̈ܗܝ ܟܠܗܘܢ. ܘܡ̣ܢ ܩܕܡ ܥܠܡ̈ܐ ܐܬܩܢܢܝ.

 

 

 

ܣܗܕܘܬܐ ܕܬܪܬܝܢ

 

ܒܣܒܪܬܐ. ܠܐ ܡܫܟܚ ܒܪܐ ܕܢܥܒܕ ܡܕܡ ܡ̣ܢ ܨܒܘܬ ܢܦܫܗ. ܐܠܐ ܡܕܡ ܕܚܙܐ ܠܐܒܐ ܕܥܒ̇ܕ.

 

 

 

ܣܗܕܘܬܐ ܕܬܠܬ

 

ܒܗ̇ ܟܕ ܒܗ̇. ܢܚܬܬ ܡ̣ܢ ܫܡܝܐ ܠܐ ܗܘܐ ܕܐܥܒܕ ܨܒܝܢܝ. ܐܠܐ ܕܐܥܒܕ ܨܒܝܢܗ ܕܡ̇ܢ ܕܫܕܪܢܝ. ܕܟܠ ܕܝܗܒ ܠܝ. ܠܐ ܐܘܒܕ ܡܢܗ.

 

 

 

ܣܗܕܘܬܐ ܕܐܪܒܥ

 

ܒܗ̇ ܟܕ ܒܗ̇. ܕܢܕܥܘܢܟ ܠܟ ܒܠܚܘܕܝܟ ܐܠܗܐ ܫܪܝ̣ܪܐ. ܘܠܗ̇ܘ ܕܫܕܪܬ ܝܫܘܥ ܡܫܝܚܐ.

 

 

 

ܣܗܕܘܬܐ ܕܚܡܫ

 

ܒܗ̇ ܟܕ ܒܗ̇. ܡܢܐ ܐܡ̇ܪ ܐܢ̱ܬ ܠܝ ܛܒܐ. ܠܝܬ ܐ̱ܢܫ ܛܒܐ ܐܠܐ ܐܢ ܚܕ ܐܠܗܐ.

 

 

 

ܣܗܕܘܬܐ ܕܫܬ

 

ܒܗ̇ ܟܕ ܒܗ̇. ܠܐ ܢܬܕܘܕ ܠܒܟܘܢ. ܗܝܡܢܘ ܒܐܠܗܐ ܘܒܝ ܗܝܡܢܘ.

 

 

 

ܣܗܕܘܬܐ ܕܫܒܥ

 

ܒܗ̇ ܟܕ ܒܗ̇. ܠܐ ܐ̱ܢܫ ܝ̇ܕܥ ܠܝܘܡܐ ܐ̱ܚܪܝܐ ܐܘ ܫܥܬܐ܆ ܐܦܠܐ  ܗ̣ܘ ܒܪܐ. ܐܠܐ ܐܢ ܐܒܐ.

 

 

 

ܣܗܕܘܬܐ ܕܬܡܢܐ

 

ܒܗ̇ ܟܕ ܒܗ̇. ܐܒܐ ܡܘܕܐ ܐ̱ܢܐ ܠܟ ܕܫܡܥܬܢܝ. ܘܐܢܐ ܝ̇ܕܥ ܐ̱ܢܐ ܕܒܟܠܙܒܢ ܫ̇ܡܥ ܐܢ̱ܬ ܠܝ. ܐܠܐ ܡܛܠ ܟܢܫܐ ܗܢܐ ܕܩܐܡ ܐܡ̇ܪ ܐ̱ܢܐ ܗܠܝܢ. ܕܢܗܝܡܢܘܢ ܕܐܢ̱ܬ ܫܕܪܬܢܝ.

 

 

 

ܣܗܕܘܬ ܕܬܫܥ

 

ܒܗ̇ ܟܕ ܒܗ̇. ܐܒܐ ܕܫܕܪܢܝ܇ ܗ̣ܘ ܝܗܒ ܠܝ ܦܘܩܕܢܐ ܡܢܐ ܐܡܪ ܝܘܡܢܐ ܐܡܠܠ.

 

 

 

ܣܗܕܘܬܐ ܕܥܣܪ

 

ܒܗ̇ ܟܕ ܒܗ̇. ܐܠܘ ܪܚܡܝ̣ܢ ܗܘܝܬܘܢ ܠܝ. ܚܕܝܢ ܗܘܝܬܘܢ ܕܐܙܠ ܐ̱ܢܐ ܠܘܬ ܐܒܝ. ܕܐܒܝ ܪܒ ܗ̣ܘ ܡܢܝ.

 

 

 

ܣܗܕܘܬܐ ܕܝ̄ܐ

 

ܒܗ̇ ܟܕ ܒܗ̇. ܡܐ ܕܝܢ ܕܐܬܐ ܦܪܩܠܝܛܐ ܗ̇ܘ ܕܐܢܐ ܡܫܕܪ ܐ̱ܢܐ ܠܟܘܢ ܡ̣ܢ ܠܘܬ ܐܒܝ.

 

 

 

ܣܗܕܘܬܐ ܕܝܒ̄

 

ܦܘܠܘܣ. ܡܐ ܕܡܫܠܡ ܡܠܟܘܬܐ ܠܐܠܗܐ ܐܒܐ. ܡܐ ܕܒܛܠ ܟܠ ܪܝܫ ܘܟܠ ܫܘܠܛܢ ܘܟܠ ܚܝܠܝ̣̈ܢ. ܘܡܐ ܕܐܫܬܥܒܕ ܠܗ ܟܠ. ܗܝܕܝܢ ܗ̣ܘ ܒܪܐ ܢܫܬܥܒܕ ܠܗ̇ܘ ܕܫܥܒܕ ܠܗ ܟܠ. ܕܢܗܘܐ ܐܠܗܐ ܟܠ ܒܟܠ.

 

 

 

ܣܗܕܘܬܐ ܕܝܓ̄

 

ܗ̣ܘ ܟܕ ܗ̣ܘ. ܐܦ ܟܕ ܒܣܪܐ ܠܒܝ̣ܫ ܗܘܐ. ܒܥܘܬܐ ܘܬܟܫܦܬܐ ܒܓܥܬܐ ܚܝܠܬܢܝܬܐ ܘܒܕܡ̈ܥܐ ܩܪܒ ܗܘܐ. ܠܡ̇ܢ ܕܡܫܟܚ ܗܘܐ ܡ̣ܢ ܡܘܬܐ ܢܐܚܝܘܗܝ ܘܐܫܬܡܥ. ܘܟܕ ܛܒ ܒܪܐ ܐܝܬܘܗܝ. ܡ̣ܢ ܕܚܠܬܐ ܘܚܫ̈ܐ ܕܣܒܠ܆ ܝܠܦܗ̇ ܠܡܫܬܡܥܢܘܬܐ. ܘܗܟܢܐ ܐܬܓܡܪ.

 

 

 

ܣܗܕܘܬܐ ܕܝܕ̄

 

ܗ̣ܘ ܟܕ ܗ̣ܘ. ܗܟܢܐ ܐܦ ܪܘܚܐ ܡܥܕܪܐ ܠܟܪܝ̣ܗܘܬܢ. ܡܢܐ ܓܝܪ ܢܨܠܐ܆ ܐܟܡܐ ܕܘܠܐ ܠܐ ܝ̇ܕܥܝ̣ܢܢ. ܐܠܐ ܗ̣ܝ ܪܘܚܐ ܡܨܠܝܐ ܚܠܦܝܢ ܒܬܢ̈ܚܬܐ ܕܠܐ ܡܬܡ̈ܠܠܢ. ܕܡܐܫ ܕܝܢ ܠܒܘ̈ܬܐ ܗ̣ܘ ܝ̇ܕܥ ܡܢܐ ܗ̱ܝ ܬܪܥܝ̣ܬܐ ܕܪܘܚܐ. ܕܐܝܟ ܨܒܝܢܗ ܗ̣ܘ ܕܐܠܗܐ ܡܨܠܝܐ ܚܠܦ ܩܕܝ̈ܫܐ.

 

 

 

ܢܘܗܪܐ

 

ܐܡܪܝܢ ܓܝܪ ܐܪ̈ܝܢܘ ܥܡ ܡܩܕܘ̈ܢܝܢܘ. ܕܣܗܕܘܬܐ ܡ̇ܢ ܩܕܡܝܬܐ ܓܠܝܐܝܬ ܡܫܘܕܥܐ ܕܒܪܐ ܒܪܝܐ ܗ̱ܘ ܘܥܒܝ̣ܕܐ. ܘܗ̇ܢܝܢ ܐ̱ܚܪ̈ܢܝܬܐ ܡܫܘܕ̈ܥܢ ܕܒܪܐ ܡ̇ܢ ܒܨܝ̣ܪ ܡ̣ܢ ܐܒܐ. ܘܪܘܚܐ. ܐܦ ܡ̣ܢ ܐܒܐ܆ ܐܦ ܡ̣ܢ ܒܪܐ. ܡ̣ܢ ܐܒܐ ܡ̇ܢ܆ ܒܗܝ ܕܠܘܬܗ ܒܬܢ̈ܚܬܐ ܕܠܐ ܡܬܡ̈ܠܠܢ ܡܨܠܐ ܚܠܦܝܢ. ܐܝܟ ܕܐܡ̣ܪ ܫܠܝܚܐ. ܡ̣ܢ ܒܪܐ ܕܝܢ܆ ܒܗ̇ܝ ܕܡܢܗ ܡܫܬܕܪ. ܐܝܟ ܕܗ̣ܘ ܒܪܐ ܐܡ̣ܪ ܒܐܘܢܓܠܝܘܢ. ܘܟܠ ܕܒܨܝ̣ܪ ܡ̣ܢ ܡܕܡ ܠܘ ܒܪ ܟܝܢܗ ܡܨܐ ܠܡܗܘܐ. ܐܒܐ ܡܕܝܢ ܘܒܪܐ ܘܪܘܚܐ ܠܘ ܫܘ̈ܝܝ ܒܟܝܢܐ ܐܝܬܝܗܘܢ. ܐܠܐ ܒܕܪ̈ܓܐ ܕܝ̣ܠܢܝ̈ܐ ܪܡܝܢ ܘܡܬܚܬܝܢ ܡ̣ܢ ܚܕ̈ܕܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܥܣܝ̣ܪܝܐ ܕܫܬܐܣܬܐ ܬܠܝ̣ܬܝܬܐ. ܡܛܠ ܣܬܘܪܝܐ ܕܬܪܥܝ̣ܬܐ ܗ̇ܝ ܕܒܪ̈ܝܐ ܘܥܒܝ̣̈ܕܐ ܡܘܕܝܐ ܠܒܪܐ ܘܠܪܘܚܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܟܠ ܡܕܡ ܕܥܠܬܐ ܗ̱ܘ ܟܝܢܝܬܐ ܕܡܕܡ ܐ̱ܚܪܝܢ. ܘܐܢ ܚܝ ܘܝܕܘܥܬܢ. ܡܩܦ ܢ̇ܩܦ ܒܨܒܝܢܗ ܠܗܘܝܐ ܕܥܠܬܢܗ. ܟܐܡܬ݀ ܗܘܝܐ ܕܥܠܬܢܗ. ܥܠܬܐ ܗܘܐ ܕܗ̇ܝ ܕܬܨܛܒܐ ܒܗ ܥܠܬܗ. ܘܡ̣ܢ ܗܪܟܐ ܝ̣ܕܝ̣ܥܐ. ܕܨܒܝܢܐ ܥܠܬܢܐ ܗ̱ܘ ܕܥܠܬܢܗ̇ ܕܥܠܬܐ. ܘܠܘ ܥܠܬܐ ܕܥܠܬܢܐ. ܗܐ ܓܝܪ ܗܘܢܐ ܡ̣ܢ ܢܦܫܐ ܡܠܝ̣ܠܬܐ ܟܝܢܐܝܬ ܢܒܗ. ܐܦܠܐ ܬܘܒ ܟܐܢܐ ܠܡܐܡܪ. ܕܟܕ ܠܘ ܥܠܬܢܐ ܗ̱ܘ ܕܨܒܝܢ ܢܦܫܐ ܗܘܢܐ. ܡܬܡܪܕܘ̣ ܡܬܡܪܕܐ ܢܦܫܐ ܘܡ̣ܢ ܩܛܝ̣ܪ ܘܟܕ ܠܐ ܨܒܝܐ ܢܒܗ ܡܢܗ̇ ܗܘܢܐ. ܒܗ̇ܝ ܕܡܨܛܒܝܘ ܡܨܛܒܝܐ ܒܗ ܒܬܪ ܫܟܝ̣ܚܘܬܗ. ܘܠܗܕܐ ܩܕܡܝܘܬܐ. ܘܠܗܕܐ ܒܬܪܝܘܬܐ. ܠܘ ܙܒܢܢܝܬܐ ܙܕܩ ܠܡܣܬܟܠܘܬܗܝܢ. ܐܠܐ ܩܕܡܝܘܬܐ ܘܒܬܪܝܘܬܐ ܕܥܠܬܐ ܘܥܠܬܢܐ. ܐܝܟ ܙܘܥܐ ܕܨܒܥܐ ܘܥܙܩܬܐ. ܐܡ̇ܪ ܐܢ̱ܬ ܓܝܪ ܕܐܬܬܙܝ̣ܥܬ݀ ܨܒܥܐ. ܘܟܢ ܐܬܬܙܝ̣ܥܬ݀ ܥܙܩܬܐ ܘܟܢ ܐܬܬܙܝ̣ܥܬ݀ ܨܒܥܐ. ܘܐܦܢ ܬܪ̈ܬܝܗܝܢ ܐܟܚܕܐ ܡܬܬܙܝ̈ܥܢ ܒܙܒܢܐ. ܒܗ ܒܙܢܐ ܡܕܝܢ ܐܡܪܝܢܢ. ܕܐܒܐ ܓܢܝ̣ܙܐ ܟܝܢܐܝܬ ܐܘܠܕ ܠܒܪܐ ܣܓܝ̣ܕܐ. ܘܐܦܩ ܠܪܘܚܐ ܩܕܝܫܐ ܠܥܠ ܡ̣ܢ ܙܒ̈ܢܐ ܘܥܕ̈ܢܐ. ܘܡܨܛܒܝܘ ܐܨܛܒܝ̣ ܒܗܘܢ. ܘܡ̣ܢ ܗܪܟܐ ܓܠܝܐ ܕܨܒܝܢܗ ܕܐܒܐ ܠܒܪܐ ܘܠܪܘܚܐ ܢܩܦ. ܘܠܘ ܒܪܐ ܘܪܘܚܐ ܠܨܒܝܢܐ ܕܐܒܐ ܐܟܡܐ ܕܣܦܣܛܘ ܐܪ̈ܝܘܢܘ ܘܡܩܕܘ̈ܢܝܢܘ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܝ̣ܠܝ̣ܕܘܬܗ ܕܒܪܐ ܠܘ ܡܕܡ ܗ̣ܝ ܐ̱ܚܪܝܢ ܣܛܪ ܡ̣ܢ ܗ̇ܝ ܕܡ̣ܢ ܐܒܐ ܗ̱ܘ ܠܗ. ܗ̇ܝ ܕܐܝܬܘܗܝ ܗܘܐ ܘܐܝܬܘܗܝ. ܘܢܗܘܐ ܐܝܬܘܗܝ ܗܟܘܬ ܘܢܦܘܩܘܬܗ ܕܪܘܚܐ. ܒܕܓܘܢ ܗ̇ܝ ܕܐܝܬܘܗܝ ܒܪܐ. ܗ̣ܝ ܗ̣ܝ ܗ̇ܝ ܕܐܬܝ̣ܠܕ. ܘܗ̇ܝ ܕܐܝܬܘܗܝ ܪܘܚܐ. ܗ̣ܝ ܗ̣ܝ ܗ̇ܝ ܕܢܦܩ. ܘܡ̣ܢ ܗܪܟܐ ܝ̣ܕܝ̣ܥܐ ܕܠܘ ܠܘܬ ܫܟܝ̣ܚܘܬ ܕܬܢܝܢܘܬ ܫܟܝ̣ܚܘܬܐ ܕܗ̇ܘ ܕܫܟܝ̣ܚ ܡܘܒܠܐ ܡܠܬܐ ܗ̇ܝ ܕܟܕ ܐܝܬܝܗܘܢ ܒܪܐ ܘܪܘܚܐ. ܗ̇ܘ ܡ̇ܢ ܐܬܝܠܕ. ܗ̇ܘ ܕܝܢ ܕܢܦܩ. ܒܗܝ ܕܫܘ̈ܝܬ݀ ܫܟܝ̣ܚܘ̈ܬܐ ܐܢܝܢ ܒܡܬܘܡܝܘܬܐ ܐܝܬܘܬ ܟܠ ܚܕ ܡܢܗܘܢ ܘܝ̣ܠܝ̣ܕܘܬܗ ܘܢܦܘܩܘܬܗ. ܘܠܐ ܣܟ ܩܕܝ̣ܡܐ ܚܕܐ ܠܚܒܪܬܗ̇ ܒܕܟܠܗܝܢ ܡܬܘ̈ܡܝܢ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܟܝܢܐ ܐܠܗܝܐ ܟܝܢܐ ܗ̱ܘ ܓܘܢܝܐ. ܘܠܩܢܘ̈ܡܘܗܝ ܡܫܚ̈ܠܦܐ ܠܐ ܝ̣ܠܝ̣ܕܘܬܐ ܘܝ̣ܠܝ̣ܕܘܬܐ ܢܩ̈ܦܢ. ܒܕܓܘܢ ܠܐ ܦܐܝܐ ܠܡܐܡܪ. ܕܐܢ ܠܐ ܝ̣ܠܝ̣ܕܘܬܐ ܕܝ̣ܠܝܬܐ ܗ̱ܝ ܕܟܝܢܐ ܐܠܗܝܐ. ܝ̣ܠܝ̣ܕܘܬܐ ܠܘ ܕܝ̣ܠܝܬܗ ܙܕܩ ܕܬܗܘܐ. ܐܟܡܐ ܕܠܐ ܦܐܝܐ ܠܡܐܡܪ. ܕܐܢ ܠܐ ܡܠܝ̣ܠܘܬܐ ܕܝ̣ܠܝܬܐ ܗ̱ܝ ܕܚܝܘܬܐ. ܡܠܝ̣ܠܘܬܐ ܠܘ ܕܝܠܝܬܗ̇ ܙܕܩ ܕܬܗܘܐ ܘܡ̣ܢ ܗܪܟܐ ܡܫܬܟܚ ܒܪܢܫܐ ܟܕ ܡܠܝ̣ܠܐ ܗ̱ܘ ܕܠܐ ܩܢܐ ܟܝܢܐ ܚܝܘܬܢܝܐ ܗ̇ܝ ܕܫܟܝ̣ܪܐ. ܒܗܝ ܕܟܝܢܐ ܚܝܘܬܢܝܐ ܟܝܢܐ ܗ̱ܘ ܓܘܢܝܐ. ܘܠܐܕܫܘ̈ܗܝ ܡܫܚ̈ܠܦܐ ܘܡܠܝ̣ܠܘܬܐ ܘܠܐ ܡܠܝ̣ܠܘܬܐ ܢܩ̈ܦܢ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܠܐ ܝ̣ܠܝ̣ܕܘܬܐ ܠܘ ܕܝ̣ܠܝܬܐ ܗ̱ܝ ܕܐܒܐ. ܐܝܟܢܐ ܕܪܘܚܐ ܟܕ ܠܐ ܝ̣ܠܝ̣ܕܐ ܗ̱ܘ ܐܒܐ ܗ̱ܘ. ܐܠܐ ܠܐ ܝ̣ܠܝ̣ܕܘܬܐ ܠܐܒܐ ܐܟܚܕܐ ܘܠܪܘܚܐ ܫܘܝܐܝܬ ܢܩܝܦܐ. ܕܝ̣ܠܝܬܗ ܓܝܪ ܕܐܒܐ ܝܠܘܕܘܬܐ ܗ̱ܝ ܘܠܘ ܠܐ ܝ̣ܠܝ̣ܕܘܬܐ. ܘܕܪܘܚܐ ܬܘܒ ܢܦܘܩܘܬܐ. ܘܠܘ ܠܐ ܝ̣ܠܝ̣ܕܘܬܐ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܒܐܡܝ̣ܢܘ ܡܘܠܕ ܐܒܐ ܠܒܪܐ ܘܡܦܩ ܠܪܘܚܐ. ܟܐܡܬ݀ ܒܐܡܝ̣ܢܘ ܡ̣ܢ ܐܒܐ ܗ̱ܘ ܠܒܪܐ ܘܠܪܘܚܐ ܗ̇ܝ ܕܐܝܬܝܗܘܢ ܗܘܘ܆ ܘܐܝܬܝܗܘܢ ܘܢܗܘܘܢ ܐܝܬܝܗܘܢ. ܒܙܢܐ ܗ̇ܘ ܕܒܫܪܝܐ ܕܣܥܝܐ ܬܪܝܢܐ ܐܡ̣ܪܢܢ. ܘܡ̣ܢ ܗܪܟܐ ܘܠܐ ܚܕܐ ܫܟܝ̣ܪܘܬܐ ܢܩܦܐ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ ܕܠܘ ܟܠ ܕܒܟܝܢܐ ܗ̱ܘ ܥܠܬܐ ܠܥܠܬܢܐ ܡܕܡ. ܐܠܨܐ ܕܡܫܚ̈ܠܦܝ ܒܟܝܢܐ ܢܗܘܘܢ ܡ̣ܢ ܚܕ̈ܕܐ ܗ̣ܘ ܘܥܠܬܗ. ܗܐ ܓܝܪ ܢܘܪܐ ܥܠܬܐ ܗ̱ܝ ܟܝܢܝܬܐ ܕܚܡܝܡܘܬܐ. ܐܠܐ ܚܕ ܗ̣ܘ ܟܝܢܐ ܠܬܪ̈ܬܝܗܝܢ܇ ܒܗ̇ ܒܕܡܘ̣ܬܐ. ܡܕܝܢ ܚܕ ܗ̣ܘ ܟܝܢܐ ܠܐܒܐ ܥܠܬܐ. ܘܠܒܪܐ ܘܠܪܘܚܐ ܥܠܬܢܘ̈ܗܝ.

 

 

 

ܫܪܝܐ ܕܣܥܝܐ ܫܒܝܥܝܐ

 

ܐܡܪܝܢܢ. ܕܟܝܢܐ ܐܘ ܓܘܢܝܐ ܗ̱ܘ. ܘܡܬܩܪܐ ܟܝܢܐ ܦܫܝ̣ܛܐܝܬ. ܐܘ ܡܢܬܝܐ ܗ̱ܘ ܘܡܬܩܪܐ ܩܢܘܡܐ. ܒܕܓܘܢ ܐܒܐ ܐܒܐ ܗ̱ܘ ܕܟܝܢܐ ܡܢܬܝܐ ܐܘܟܝ̣ܬ ܕܩܢܘܡ ܒܪܐ. ܕܐ̱ܚܪܢܐ ܗ̱ܘ ܡ̣ܢ ܟܝܢܐ ܡܢܬܝܐ ܐܘܟܝ̣ܬ ܩܢܘܡ ܐܒܐ. ܘܡ̣ܢ ܗܪܟܐ ܘܠܐ ܚܕܐ ܫܟܝ̣ܪܘܬܐ ܓܕܫܐ. ܒܗ̇ܝ ܕܠܘ ܫܘ̈ܝܝ ܒܩܢܘ̈ܡܐ ܐܝܬܝܗܘܢ ܐܒܐ ܘܒܪܐ܆ ܐܠܐ ܫܘ̈ܝܝ ܒܟܝܢܐ ܒܠܚܘܕ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܗܪܟܐ ܗ̇ܝ ܕܒܪܢܝ ܒܕܘܟܬ݀ ܗ̇ܝ ܕܝܠܕܢܝ ܢܣܒܗ̇ ܫܠܘܡܘܢ. ܘܝ̣ܕܝ̣ܥܐ ܗܕܐ ܡ̣ܢ ܬܪܬܝܢ ܚܕܐ ܡ̇ܢ ܡ̣ܢ ܗ̇ܝ ܕܡ̣ܢ ܩܕܡ ܦܬܓܡܐ ܗܢܐ ܐܡ̣ܪ. ܕܐܢܐ ܚܟܡܬܐ ܒܪܝܬ ܥܪܝ̣ܡܘܬܐ. ܘܒܪܝܬܐ ܠܐ ܡܨܝܐ ܕܬܗܘܐ ܒܪܘܝܬܐ. ܘܕܬܪܬܝܢ܆ ܡ̣ܢ ܗ̇ܝ ܕܒܬܪ ܦܬܓܡܐ ܗܢܐ ܐܡ̣ܪ. ܥܕܠܐ ܢܗܘܘܢ ܬܗܘ̈ܡܐ ܐܬܝܠܕܬ. ܘܩܕܡ ܪ̈ܡܬܐ ܐܬܒܛܢܬ. ܘܐܠܘ ܒܪܝ̣ܬܐ ܗܘܬ݀ ܚܟܡܬܐ ܐܠܗܝܬܐ. ܐܝܟܢܐ ܐܡܪܐ ܗܘܬ݀ ܕܐܬܝܠܕܬ ܘܐܬܒܛܢܬ. ܗ̇ܝ ܓܝܪ ܕܪܡܐ ܢܡܠܠ ܡܐܟ̈ܬܐ ܠܐ ܫܟܝ̣ܪܐ ܐܠܐ ܡܠܘܢ ܡܝܬܪܐ. ܐܝܢ ܕܡܐܟܐ ܢܡܠܠ ܪ̈ܡܬܐ ܣܓܝ ܫܟܝ̣ܪܐ.

 

 

 

ܦܘܢܝܐ ܕܣܗܕܘܬܐ ܬܪܝܢܝܬܐ

 

ܐܡܪܝܢ ܕܗ̇ܝ ܕܠܐ ܡܫܟܚ ܒܪܐ ܥܒܕ ܡܕܡ ܡ̣ܢ ܨܒܘܬ ܢܦܫܗ.ܐܠܐ ܡܕܡ ܕܚܙܐ ܠܐܒܐ ܕܥܒܕ ܠܘ ܠܡܚܝ̣ܠܘܬܗ ܕܒܪܐ ܡܫܘܕܥܐ. ܐܠܐ ܠܗ̇ܝ ܕܡ̣ܢ ܠܘ ܡܫܟ̈ܚܢܝܬܐ ܗ̣ܝ ܕܨܒܝܢܐ ܡܕܡ ܢܫܬܟܚ ܠܒܪܐ܆ ܗ̇ܘ ܐܝܢܐ ܕܠܘ ܡܫܠܡ ܫܠܡ ܠܨܒܝܢܗ ܕܐܒܐ. ܒܗ̇ܝ ܕܟܠܗܝܢ ܕܐܒܐ ܕܒܪܐ ܐܢܝܢ ܣܛܪ ܡ̣ܢ ܝܠܘܕܘܬܐ ܘܒܗܦܟܐ. ܒܕܓܘܢ ܐܝܟܢܐ ܡܨܝܐ ܕܨܒܝܢܐ ܡܕܡ ܐܘ ܡܥܒܕܢܘܬܐ ܬܫܬܟܚ ܠܒܪܐ. ܗ̇ܝ ܐܝ̇ܕܐ ܕܠܘ ܗ̣ܝ ܟܕ ܗ̣ܝ ܐܦ ܠܐܒܐ ܫܟܝ̣ܚܐ.

 

 

 

ܦܘܢܝܐ ܕܣܗܕܘܬܐ ܬܠܝܬܝܬܐ

 

ܐܡܪܝܢܢ ܕܗ̇ܝ ܕܠܐ ܗܘܐ ܕܐܥܒܕ ܨܒܝܢܝ. ܐܠܐ ܨܒܝܢܐ ܕܡ̇ܢ ܕܫܕܪܢܝ. ܠܗ̇ܝ ܕܠܝܬ ܠܗ ܠܒܪܐ ܨܒܝܢܐ ܡܕܡ ܕܝ̣ܠܢܝܐ ܐܝܢܐ ܕܠܘ ܗܘܝܘ ܟܕ ܗ̣ܘ ܐܦ ܠܐܒܐ ܡܫܘܕܥܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܬܪܟܢ ܐܡ̣ܪ. ܕܗ̇ܢܘ ܨܒܝܢܗ ܕܐܒܝ. ܕܟܠ ܕܚܙܐ ܠܒܪܐ ܘܡܗܝܡܢ ܒܗ. ܢܗܘܘܢ ܠܗ ܚܝ̈ܐ ܕܠܥܠܡ. ܘܐܢܐ ܐܩܝ̣ܡܝ̣ܘܗܝ ܒܝܘܡܐ ܐ̱ܚܪܝܐ. ܘܐܠܘ ܨܒܝܢܐ ܐ̱ܚܪܢܐ ܣܛܪ ܡ̣ܢ ܗܢܐ ܐܝܬ ܗܘܐ ܠܒܪܐ ܡܫܬܟܚ ܗܘܐ. ܕܠܘ ܨܒܐ ܕܢܗܘܘܢ ܚܝ̈ܐ ܕܠܥܠܡ ܠܡ̇ܢ ܕܡܗܝܡܢ ܒܗ. ܘܐܦܠܐ ܨܒ̇ܐ ܕܢܩܝ̣ܡܝ̣ܘܗܝ ܒܝܘܡܐ ܐ̱ܚܪܝܐ. ܘܡܢܘ̣ ܣܟܠܐ ܐܝܢܐ ܕܠܘܬ ܗܕܐ ܟܠܗ̇ ܫܢܝܘܬܐ ܢܦܩ.

 

 

 

ܦܘܢܝܐ ܕܣܗܕܘܬܐ ܪܒܝܥܝܬܐ

 

ܐܡܪܝܢܢ ܗ̇ܝ ܕܢܕܥܘܢܟ ܠܟ ܫܪܝܪܐ ܒܠܚܘܕܝܟ ܐܠܗܐ. ܠܥܩܘܪܝܐ ܕܗ̇ܢܘܢ ܕܠܘ ܐܠܗ̈ܐ ܐܢܘܢ ܒܫܪܪܐ܇ ܦܬܟܪ̈ܐ ܐܡ̇ܪ ܐ̱ܢܐ ܕܥܡ̈ܡܐ ܐܡܝ̣ܪܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܠܘܬ ܠܗ̇ ܘܠܗ̇ܘ ܕܫܕܪܬ ܝܫܘܥ ܡܫܝܚܐ. ܟܐܡܬ݀ ܚܕ ܗ̣ܘ ܒܠܚܘܕܘܗܝ ܟܝܢܐ ܐܠܗܝܐ ܠܐܒܐ ܐܦ ܠܒܪܐ. ܘܐܠܘ ܠܐ ܕܗ̇ܢܘ ܣܘܟܠܗ̇ ܚܬܝ̣ܬܐ ܕܡܠܬܐ. ܐܝܟܢܐ ܦܐܝܐ ܗܘܬ݀ ܠܡܐܡܪ܆ ܕܢܕܥܘܢܟ ܠܟ ܒܠܚܘܕܝܟ ܐܠܗܐ܇ ܘܠܐܚܪܝܢ ܥܡܟ. ܐܢ ܓܝܪ ܐ̱ܚܪܝܢ ܐܝܬ ܥܡܗ ܗ̇ܝ ܕܠܐ ܫܘܐ ܠܗ ܒܟܝܢܐ ܐܝܟ ܕܨܒܪܝ̣ܢ ܐܪ̈ܝܢܘ.

 

 

 

ܦܘܢܝܐ ܕܣܗܕܘܬܐ ܚܡܝܫܝܬܐ

 

ܐܡܪܝܢܢ ܕܠܗ̇ܝ ܕܡܢܐ ܐܡ̇ܪ ܐܢ̱ܬ ܠܝ ܛܒܐ. ܠܘ ܗ̇ܘ ܕܐܝܟ ܕܒܒܪܢܫܐ ܫܚܝ̣ܡܐ ܒܗ ܚܐܪ ܗܘܐ ܐܡܪܗ̇ ܒܪܐ. ܝ̣ܕܝ̣ܥܐ ܗܕܐ ܡ̇ܢ ܗ̇ܝ ܕܠܝܬ ܐ̱ܢܫ ܛܒܐ ܐܘܣܦ ܐܡ̣ܪ. ܘܡ̣ܢ ܗ̇ܝ ܕܗ̣ܘ ܗ̇ܘ ܕܠܘܬܗ ܡܠܬܐ. ܠܘ ܕܒܪܐ ܗ̱ܘ ܟܝܢܝܐ ܕܐܒܐ ܗ̣ܘ ܦܪܘܩܢ ܝ̇ܕܥ ܗܘܐ ܠܗ ܐܦܠܐ ܡܘܕܐ ܗܘܐ ܒܗ.

 

 

 

ܦܘܢܝܐ ܕܣܗܕܘܬܐ ܫܬܝܬܝܬܐ

 

ܐܡܪܝܢܢ ܕܫܡܐ ܣܓܝ̣ܕܐ ܕܐܠܗܐ ܒܟܬܒ̈ܐ ܩܕܝ̈ܫܐ. ܐܝܬ ܐܡܬܝ ܕܥܠ ܐܒܐ ܕܝ̣ܠܢܐܝܬ ܡܬܢܣܒ. ܐܝܟ ܕܩܕܡ ܐܠܗܐ ܒܡܫܝ̣ܚܐ ܡܡܠܠܝ̣ܢܢ. ܘܐܝܬ ܐܡܬܝ ܕܥܠ ܒܪܐ ܕܝ̣ܠܢܐܝܬ ܐܝܟ ܕܡܣܟܝܢܢ ܠܣܒܪܐ ܒܪܝܟܐ ܘܠܓܠܝܢܐ ܕܐܠܗܐ ܪܒܐ ܘܡܚܝܢܢ ܝܫܘܥ ܡܫܝܚܐ. ܘܐܝܟ ܗ̇ܝ ܕܡܪܝ ܘܐܠܗܝ. ܘܐܝܬ ܐܡܬܝ ܕܥܠ ܪܘܚܐ ܩܕܝܫܐ ܕܝ̣ܠܢܐܝܬ ܐܝܟ ܕܐܠܗܢ ܪܘܚܐ ܗ̱ܘ. ܘܐܝܟ ܗ̇ܝ ܕܡ̣ܢ ܡܪܝܐ ܪܘܚܐ. ܒܕܓܘܢ ܠܐ ܐܠܨܐ ܡ̣ܢ ܗ̇ܝ ܕܐܡ̣ܪ ܡܪܢ. ܕܗܝܡܢܘ ܒܐܠܗܐ ܘܒܝ ܗܝܡܢܘ. ܕܗ̣ܘ ܠܐ ܢܗܘܐ ܐܠܗܐ. ܟܕ ܐܦ ܥܠܘܗܝ ܫܪܝܪ ܟܘܢܝܐ ܗ̱ܘ ܕܐܠܗܐ ܐܟܡܐ ܕܚܘܝ̣ܢܢ. ܐܦ ܓܝܪ ܘܡ̣ܢ ܩܢܘ̈ܡܐ ܠܘܓܝ̈ܩܝܐ ܡܬܝܕܥܐ ܗܕܐ ܩܪܝ̣ܚܐܝܬ. ܕܦܪܘܛܐܣܝܣ ܗ̇ܝ ܡܢܬܝܬܐ܆ ܟܕ ܣܝܡܐ ܡܕܡ ܥܠ ܡܕܡ܇ ܠܐ ܐܠܨܐ ܕܬܪܝ̣ܡ ܡ̣ܢ ܗܠܝܢ ܕܫܪܟܐ ܗ̇ܘ ܡܐ ܕܥܠ ܗ̇ܘ ܡܕܡ ܣܡܬ݀. ܕܐܝܟ ܐܝܟܢ ܟܕ ܐܡܪܝܢܢ ܡܕܡ ܒܪܢܫܐ ܟܬܘܒܐ. ܠܐ ܐܠܨܐ ܕܗ̇ܢܘܢ ܕܫܪܟܐ ܠܐ ܢܗܘܘܢ ܟܬܘ̈ܒܐ.

 

 

 

ܦܘܢܝܐ ܕܣܗܕܘܬܐ ܫܒܝܥܝܬܐ

 

ܐܡܪܝܢܢ ܕܒܪܐ ܡ̇ܢ ܒܗ̇ܝ ܕܒܪܢܫܐ ܗ̱ܘ ܐܡ̣ܪ ܕܠܐ ܝ̇ܕܥ ܠܝܘܡܐ ܐܘ ܠܫܥܬܐ ܐܝܟ ܫܪܟܐ ܕܒܢܝ̈ܢܫܐ. ܟܕ ܛܒ ܒܗ̇ܝ ܕܐܠܗܐ ܗ̱ܘ ܡ̣ܢ ܐܢܢܩܝ̣ ܝ̇ܕܥ ܐܝܟ ܕܐܦ ܐܒܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܡ̣ܢ ܩܕܡܝܗ̇ ܕܡܠܬܐ ܐܡ̣ܪ. ܕܠܐ ܐ̱ܢܫ ܝ̇ܕܥ. ܒܕܓܘܢ ܐܦ ܗ̣ܘ ܥܡܗܘܢ ܕܒܢܝ̈ܢܫܐ ܐܫܘܝ̣ ܢܦܫܗ ܒܫܘܐܠܐ ܗܢܐ. ܕܠܐ ܚܕ ܝܘܬܪܢ ܐܝܬ ܗܘܐ ܠܗ̇ܢܘܢ ܕܫܐܠܘܗܝ. ܐܠܘ ܐܬܦܢܝ̣ ܠܗܘܢ ܗ̇ܘ ܡܐ ܕܫܐܠܘ ܡܛܠܬܗ. ܐܠܐ ܡܠܘܢ ܣܘܓܦܢܐ. ܒܗ̇ܝ ܕܐܠܘ ܝ̣ܕܥ ܟܠ ܐ̱ܢܫ ܫܥܬ݀ ܩܨܗ. ܘܝ̣ܕܥܘ ܬܘܒ ܒܢܝ̈ܢܫܐ ܗ̇ܢܘܢ ܕܒܝܘ̈ܡܬܗܘܢ ܗܘܝܐ ܩܝܡܬܐ ܕܐܡܬܝ ܗܘܝܐ. ܟܒܪ ܕܠܐ ܩܢܛܐ ܒܫܘܡܠܝ ܚܫ̈ܐ ܡܬܟܬܡܝ̣ܢ ܗܘܘ. ܟܕ ܬܟܝ̣ܠܝܢ ܥܠܗ̇ܝ ܕܠܚܪܬܐ ܢܬܘܒܘܢ ܘܢܣܚܘܢ ܘܢܬܕܟܘܢ ܡ̣ܢ ܚܛܗܝ̈ܗܘܢ. ܒܗ̇ܝ ܕܡܩܒܠܬܐ ܗ̱ܝ ܬܝܒܘܬܐ ܐܡܬܝ ܕܗܘܝܐ.. ܘܦܬܝ̣ܚ ܗ̣ܘ ܬܪܥܗ̇ ܒܟܠܙܒܢ. ܘܣܘܓܐܐ ܕܦܘ̈ܢܝܐ ܐ̱ܚܪ̈ܢܐ ܐܡܝ̣ܪܝܢ ܠܡܠܦܢ̈ܐ ܩܕܝ̈ܫܐ ܒܗܢܐ ܫܘܐܠܐ. ܘܡܛܠ ܗ̇ܝ ܕܠܐ ܬܐܪܟ ܡܠܬܐ ܫܒܩܢ ܐܢܘܢ.

 

 

 

ܦܘܢܝܐ ܕܣܗܕܘܬܐ ܬܡܝܢܝܬܐ

 

ܦܘܢܝܐ ܓܝܪ ܕܫܘܐܠܐ ܗܢܐ ܒܗ ܟܕ ܒܗ ܚܪܝ̣ܙ. ܟܐܡܬ݀ ܕܗ̣ܘ ܡܪܝܐ ܒܪܐ ܒܥܐ ܡ̣ܢ ܐܒܐ ܕܢܫܡܥܝ̣ܘܗܝ. ܠܘ ܒܗ̇ܝ ܕܠܐ ܡܨܐ ܗ̣ܘ ܕܡܫܠܛܐܝܬ ܢܩܝ̣ܡܝ̣ܘܗܝ ܠܗ̇ܘ ܕܡ̣ܢ ܟܕܘ ܣܪܝ̣ ܗܘܐ. ܐܠܐ ܡܛܠܗ̇ܝ ܕܠܐ ܢܣܒܪܘܢ ܙܥܘܪ̈ܝ ܗܝܡܢܘܬܐ܆ ܕܒܚܝܠܐ ܕܠܘ ܐܠܗܝ ܣ̇ܥܪ ܗܠܝܢ ܕܣ̇ܥܪ. ܗ̇ܝ ܕܐܦ ܐܡܪܘܗ̇ ܕܒܒܥܠܙܒܘܒ ܪܝܫܐ ܕܕܝ̈ܘܐ ܡܦܩ ܕܝ̈ܘܐ.

 

 

 

ܦܘܢܝܐ ܕܣܗܕܘܬܐ ܬܫܝܥܝܬܐ

 

ܒܗܝ ܓܝܪ ܕܐܒܐ ܕܫܕܪܢܝ ܗ̣ܘ ܝܗܒ ܠܝ ܦܘܩܕܢܐ ܡܢܐ ܐܡܪ. ܠܫܘܝܘܬ ܨܒܝܢܗ ܕܝܠܗ ܘܕܐܒܐ ܫܘܕܥ. ܘܬܘܒ ܒܗ̇ܝ ܕܐܦ ܒܪܢܫܐ ܗ̱ܘ ܡܫܡܠܝܐ. ܠܐ ܫܟܝ̣ܪܐ ܗܘܬ݀ ܠܗ ܕܢܐܡܪ ܕܡܬܦܩܕܢܐ ܗ̱ܘ ܕܐܠܗܐ.

 

 

 

ܦܘܢܝܐ ܕܣܗܕܘܬܐ ܥܣܝ̣ܪܝܬܐ

 

ܕܐܦܢ ܡ̇ܢ ܗܪܟܐ ܗ̇ܝ ܕܐܒܝ ܪܒ ܗ̣ܘ ܡܢܝ ܐܡܝ̣ܪܐ. ܐܠܐ ܒܕܘܟ ܐ̱ܚܪܝܢ. ܐܢܐ ܘܐܒܝ ܚܕ ܚܢܢ ܐܡܝ̣ܪܐ. ܘܕܚܕ ܡܕܡ ܘܗ̣ܘ ܟܕ ܗ̣ܘ ܒܗ ܟܕ ܒܗ ܒܙܢܐ ܢܗܘܐ ܡ̣ܢ ܡܬܡܨ̈ܝܢܝܬܐ ܗ̱ܝ. ܒܕܓܘܢ ܪܒ ܡ̣ܢ ܒܪܐ ܐܒܐ܆ ܒܗ̇ܝ ܕܥܠܬܐ ܗ̱ܘ ܕܒܪܐ. ܫܘܐ ܠܗ ܕܝܢ܆ ܒܗ̇ܝ ܕܚܕ ܗ̣ܘ ܐܦ ܠܗ ܐܦ ܠܗ̇ܘ ܟܝܢܐ ܚܕܢܝܐ ܕܐܠܗܘܬܐ. ܗ̣ܘ ܗܟܘܬ ܘܠܪܘܚܐ. ܘܐܢܗܘ ܬܘܒ ܕܒܦܚܡܐ ܕܐ̱ܢܫܘܬܐ ܢܣܒ ܠܗ̇ܝ ܕܪܒ ܠܘ ܠܐ ܒܝܬܝܐ.

 

 

 

ܦܘܢܝܐ ܕܣܗܕܘܬܐ ܕܝ̄ܐ

 

ܕܒܗ̇ܝ ܕܡܫܕܪ ܐ̱ܢܐ ܠܟܘܢ ܡ̣ܢ ܠܘܬ ܐܒܝ. ܠܫܘܝܘܬ ܨܒܝܢܐ ܕܐܒܐ ܘܕܒܪܐ ܘܕܪܘܚܐ ܫܘܕܥ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܫܘܪܝܗ̇ ܕܡܠܬܐ ܡܐ ܕܝܢ ܕܐܬܐ ܐܡ̣ܪ ܒܕܓܘܢ ܡܛܠ ܗ̇ܝ ܕܠܐ ܐ̱ܢܫ ܢܣܒܪ ܕܡ̣ܢ ܕܝܠܗ ܐܬܐ ܪܘܚܐ ܘܠܘ ܒܨܒܝܢܐ ܕܐܒܐ ܐܦ ܕܒܪܐ܆ ܐܘܣܦ ܐܡ̣ܪ. ܗ̇ܘ ܕܐܢܐ ܡܫܕܪ ܐ̱ܢܐ ܠܟܘܢ ܡ̣ܢ ܠܘܬ ܐܒܝ.

 

 

 

ܦܘܢܝܐ ܕܣܗܕܘܬܐ ܕܝܒ̄

 

ܐܡܪܝܢܢ ܕܢܝܫܗ ܕܫܠܝܚܐ ܒܡܠܬܐ ܗܕܐ ܐܝܬܘܗܝ. ܕܢܫܘܕܥ ܠܢ ܡܛܠ ܓܡܝ̣ܪܘܬܐ ܐܝ̇ܕܐ ܕܥܬܝ̣ܕܐ ܕܬܗܘܐ ܠܟܝܢܐ ܐ̱ܢܫܝܐ ܒܝܕ ܕܡܝܘܬܐ ܕܒܐܠܗܐ ܠܚܪܬܐ. ܟܕ ܒܛܠ ܟܠ ܪܝܫ ܘܟܠ ܫܘܠܛܢ ܘܟܠ ܚܝܠܝ̣̈ܢ. ܟܐܡܬ݀ ܟܠ ܦܘܪ̈ܢܣܐ ܕܠܐ ܐܠܗܝ. ܘܡܛܠ ܕܕܡܝܘܬܐ ܕܕܐܝܟ ܗܕܐ ܒܝܕ ܡܨܥܝܐ ܡܨܝܐ ܕܬܗܘܐ. ܘܡܨܥܝܐ ܡܫܘܬܦܐ ܙܕܩ ܕܢܗܘܐ ܠܬܪ̈ܝܗܘܢ ܣܟ̈ܐ ܡܥܒ̈ܕܐ. ܗ̣ܘ ܗܢܐ ܡܨܥܝܐ ܡܫܝܚܐ ܗ̱ܘ. ܕܡܫܘܬܦ ܐܦ ܠܟܝܢܐ ܐ̱ܢܫܝܐ ܒܐܢܫܘܬܗ. ܘܠܗ̇ܘ ܐܠܗܝܐ ܒܐܠܗܘܬܗ. ܘܡ̣ܢ ܗܪܟܐ ܝ̣ܕܝ̣ܥܐ ܕܕܡܝܘܬܐ ܕܐܝܟ ܗܕܐ ܠܘܩܕܡ ܡ̇ܢ ܒܩܢܘܡ ܒܪܐ ܐܠܨܐ ܕܬܗܘܐ. ܒܥܠܬ݀ ܡܬܒܪܢܫܢܘܬܐ. ܐܝܟ ܕܐܦ ܗ̣ܘ ܫܠܝܚܐ ܒܕܘܟ ܐ̱ܚܪܝ̣ܢ ܡܐܪܙ ܠܗ̇ ܠܗܕܐ ܘܐܡ̇ܪ. ܐܝܟܐ ܕܠܝܬ ܝܘܕܝܐ ܘܠܐ ܚܢܦܐ. ܓܙܘܪܬܐ ܘܥܘܪܠܘܬܐ. ܒܪܒܪܝܐ ܘܣܩܘܬܝܐ. ܥܒܕܐ ܒܪ ܚܐܪ̈ܐ. ܐܠܐ ܟܠ ܘܒܟܠ. ܡܫܝܚܐ ܐܝ̣ܛܐ ܗ̣ܘ ܩܢܘܡ ܒܪܐ܆ ܠܗ̇ܢܘܢ ܕܒܗ ܐܬܕܡܝ̣ܘ ܒܐܒܐ ܡܕܡܐ ܟܕ ܡܩܪܒ. ܘܗ̇ܢܘ ܐ̱ܪܙܐ ܕܗ̇ܝ ܕܡܫܠܡ ܡܠܟܘܬܐ ܠܐܠܗܐ ܐܒܐ. ܘܕܗ̇ܝ ܬܘܒ ܕܡܐ ܕܐܫܬܥܒܕ ܠܗ ܟܠ܆ ܗܝܕܝܢ ܗ̣ܘ ܒܪܐ ܢܫܬܥܒܕ ܠܐܒܐ. ܘܢܗܘܐ ܐܠܗܐ ܟܠ ܒܟܠ.

 

 

 

ܦܘܢܝܐ ܕܣܗܕܘܬܐ ܕܝܓ̄

 

ܐܡܪܝܢܢ ܕܗ̇ܝ ܕܒܥܘܬܐ ܘܬܟܫܦܬܐ ܩܪܒ ܒܪܐ. ܠܐܢܫܘܬܗ ܠܚܡܐ ܘܠܘ ܠܐܠܗܘܬܗ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܕܡ̈ܥܐ ܐܡܪܗ̇ ܫܠܝܚܐ ܕܗܘܬ݀ ܒܥܘܬܐ ܗܕܐ. ܘܓܠܝܐ ܕܠܟܝܢܐ ܐܠܗܝܐ ܠܝܬ ܕܡ̈ܥܐ. ܒܕܓܘܢ ܐܠܘܠܐ ܡܒܪܢܫ ܗܘܐ ܩܢܘܡ ܒܪܐ. ܟܒܪ ܐܝܬ ܗܘܐ ܠܗܘܢ ܠܐܪ̈ܝܢܘ ܕܢܙܥܪܘܢ ܠܒܪܐ ܡ̣ܢ ܐܒܐ. ܘܟܕ ܐ̱ܢܫܘܬܐ ܐܝܬ ܒܡܨܥܬܐ ܘܠܐ ܣܟ.

 

 

 

ܦܘܢܝܐ ܕܣܗܕܘܬܐ ܕܝܕ̄

 

ܐܡܪܝܢܢ ܕܗ̇ܝ ܕܡܨܠܐ ܪܘܚܐ ܚܠܦܝܢ ܠܐܒܐ܇ ܠܫܘܝܘܬ ܨܒܝܢܐ ܕܝܠܗ ܘܕܐܒܐ ܡܫܘܕܥܐ.ܐܝܟ ܕܐܦ ܡܛܠ ܒܪܐ ܚܘܝ̣ܢܢ. ܘܗ̇ܝ ܕܒܬܢ̈ܚܬܐ ܠܚܝܘܣܬܢܘܬܗ ܕܥܠܝܢ ܘܠܪܚܡܬ݀ ܐ̱ܢܫܘܬܗ ܡܫܘܕܥܐ. ܘܠܐ ܙܕܩ ܠܡܬܢܗ ܣܓܝ. ܒܥܠܬ݀ ܗ̇ܝ ܕܡܛܠ ܪܘܚܐ ܒܪܬ݀ ܩܠܐ ܡܡܟܟܬܐ ܕܐܝܟ ܗܕܐ ܐܡܝ̣ܪܐ. ܒܗ̇ܝ ܕܐܦ ܘܡܛܠ ܐܒܐ ܣܘܓܐܐ ܕܐܝܟ ܗܠܝܢ ܡܫܬܟ̈ܚܢ ܕܐܡܝ̣ܪ̈ܢ ܒܥܬܝ̣ܩܬܐ. ܐܝܟ ܗ̇ܝ ܕܐܬܬܘܚ ܘܐܬܬܘܝ̣. ܘܪܓܙ ܘܐܬܚܡܬ݀ ܘܫܪܟܐ.

 

 

 

ܫܠܡܬ݀ ܫܬܐܣܬܐ ܬܠܝܬܝܬܐ

 

 

 

 

 

 

 

 

     #1 

 

ܫܬܐܣܬܐ ܪܒܝܥܝܬܐ ܡܛܠ ܡܬܒܪܢܫܢܘܬܗ ܕܐܠܗܐ ܡܠܬܐ. ܘܒܗ ܐܝܬ ܩܦ̈ܠܐܐ ܫܬܐ. ܩܦܠܐܘܢ ܩܕܡܝܐ ܡܛܠ ܡܬܡܨܝܢܘܬܗ̇ ܕܡܬܒܪܢܫܢܘܬܐ ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘ̈ܫܒܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܢܦܫܐ ܐ̱ܢܫܝܬܐ. ܒܗܝ ܕܩܝܡܬ݀ ܠܝܬܗ ܗ̣ܝ ܘܡܒܪܝܬܐ. ܘܝܕܥܐ ܗ̣ܝ ܠܗ̇. ܘܡܬܝܕܥܐ ܗ̣ܝ ܡܢܗ̇. ܐܟܡܐ ܕܥܬܝ̣ܕܝ̣ܢܢ ܠܡܚܘܝܘ. ܒܝܬܝܘܬܐ ܡܕܡ ܩܢܝܐ ܒܟܝܢܗ̇ ܠܘܬ ܟܝܢܐ ܐܠܗܝܐ. ܘܕܗ̇ܘ ܕܒܝܬܝ ܠܗ̇ܘ ܕܒܝܬܝ ܠܗ ܓܡܝ̣ܪܐܝܬ ܢܬܒܝܬܐ ܘܠܗ ܢܩܦ. ܠܘ ܡ̣ܢ ܠܘ ܡܫܟܚܢ̈ܝܬܐ ܗ̱ܝ. ܘܡܛܠ ܕܟܝ̈ܢܐ ܓܘܢܝ̈ܐ ܒܠܥܕ ܗ̇ܝ ܕܢܬܝܩܢܘܢ ܩܢܘܡܐܝܬ ܠܐ ܡܨܝܢ ܠܡܗܘܐ ܒܣܘܥܪܢܐ. ܠܩܢܘܡܐ ܗ̱ܝ ܒܝܬܐܝܬ ܗ̇ܝ ܕܠܗ̇ܘ ܕܠܗ ܒܝܬܝ ܢܩܦ. ܠܚܕ ܡܕܝܢ ܡ̣ܢ ܩܢܘ̈ܡܐ ܕܬܠܝ̣ܬܝܘܬܐ ܩܕܝ̣ܫܬܐ ܠܘ ܡ̣ܢ ܠܐ ܡܬܡܨܝܢܝ̣ܬܐ ܗ̱ܝ ܕܠܢܦܫܐ ܡܕܡ ܡܠܝ̣ܠܬܐ ܢܫܬܘܬܦ ܒܢܩܝ̣ܦܘܬܐ ܟܝܢܝܬܐ ܘܝܬܢܝܬܐ ܕܗ̣ܝ ܗ̣ܝ ܚܘܝܕܐ. ܘܒܡܨܥܝܘܬܗ̇ ܕܢܦܫܐ ܗ̇ܝ ܡܠܝ̣ܠܬܐ. ܐܦ ܠܦܓܪܗ̇ ܢܫܬܘܬܦ. ܐܘܟܝ̣ܬ ܗ̣ܘ ܠܗ̇ܘ ܒܛܝܒܘܬܗ ܢܫܘܬܦܝ̣ܘܗܝ. ܐܝܟܢܐ ܕܥܡ ܒܪܢܫܐ ܡܫܡܠܝܐ ܬܗܘܐ ܗ̣ܝ ܚܕܝܘܬܐ. ܐܝܟܢܐ ܕܐܡ̣ܪ ܐ̱ܢܫ ܡ̣ܢ ܚܟܝ̣̈ܡܐ ܕܠܘܬܢ. ܕܐܠܗܐ ܥܡ ܒܣܪܐ܆ ܒܝܕ ܢܦܫܐ ܡܨܥܝܬܐ. ܕܠܐܠܗܘܬܐ ܡܡܨܥܐ ܘܠܥܒܝܘܬܐ ܕܒܣܪܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܟܠ ܚܕ ܡ̣ܢ ܩܢܘ̈ܡܐ ܕܬܠܝܬܝܘܬܐ ܩܕܝ̣ܫܬܐ. ܡܨܐ ܗ̣ܘ ܚܝܠܐ ܕܟܠܡܕܡ ܡܬܡܨܝܢܐ. ܘܚܕܝܘܬܐ ܡܬܡܨܝܢܝ̣ܬܐ ܗ̱ܝ ܐܝܟ ܕܐܬܚܘܝܬ݀. ܡܬܟܢܫܐ ܕܚܕ ܡ̣ܢ ܩܢܘ̈ܡܐ ܕܬܠܝ̣ܬܝܘܬܐ ܩܕܝܫܬܐ. ܡܨܐ ܗ̣ܘ ܚܝܠܐ ܠܡܬܚܝܕܘ ܥܡ ܚܕ ܡ̣ܢ ܩܢܘ̈ܡܐ ܕܐ̱ܢܫܘܬܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܗ̇ܝ ܕܚܕ ܡ̣ܢ ܩܢܘ̈ܡܐ ܕܐܠܗܘܬܐ. ܠܚܕ ܡ̣ܢ ܩܢܘ̈ܡܐ ܕܐ̱ܢܫܘܬܐ ܢܬܚܝܕ. ܛܝܒܘܬܐ ܗ̱ܝ ܪܒܬܐ܆ ܡܢܗ ܕܐܠܗܐ ܥܠ ܟܝܢܐ ܐ̱ܢܫܝܐ. ܘܐܠܘܠܐ ܡܬܡܨܝܢܝ̣ܬܐ ܗܘܬ݀ ܚܕܝܘܬܐ ܕܐܝܟ ܗܕܐ. ܡܫܬܟܚܐ ܗܘܬ݀ ܛܝܒܘܬܐ ܪܒܬܐ ܕܠܐ ܡܬܡܨܝܢܝ̣ܬܐ ܗ̱ܝ ܣܥܘܪܘܬܗ̇ ܠܐܠܗܐ ܫܘܒܚܐ ܠܛܝܒܘܬܗ ܗ̇ܝ ܕܫܟܝ̣ܪܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܚܕܝܘܬܐ ܟܕ ܛܝܒܘܬܐ ܗ̇ܝ ܪܒܬܐ܆ ܘܠܘ ܠܐ ܡܬܡܨܝܢܝ̣ܬܐ ܗ̱ܝ ܐܝܟ ܕܐܬܚܘܝܬ݀. ܐܢ ܐܬܟܠܝܬ݀܇ ܠܘ ܡ̣ܢ ܙܢܐ ܕܫܦܝ̣ܥܘܬܐ ܡܬܟܠܝܐ ܗܘܬ݀. ܐܠܐ ܡܠܘܢ܆ ܡ̣ܢ ܙܢܐ ܕܚܣܘܟܬܢܘܬܐ. ܘܕܐܠܗܐ ܫܘܒܚܐ ܠܛܝܒܘܬܗ. ܠܗܠ ܗ̣ܘ ܡ̣ܢ ܟܠ ܙܢܐ ܕܩܠܘܛܘܬܐ ܓܠܝܐ. ܚܕܝܘܬܐ ܡܕܝܢ ܡ̣ܢ ܣܥܘܪ̈ܘܬܐ ܗܝ ܦܐܝ̈ܬ ܠܐܠܗܐ.

 

 

 

ܡܚܘܝܢܘܬܐ ܕܚܡܫ

 

ܐܡܪܝܢܢ ܕܬܪܝܢ ܐܢܘܢ ܙܢܝ̈ ܣܥܘܪ̈ܘܬܐ ܐܝܠܝܢ ܕܥܠ ܐܠܗܐ ܫܘܒܚܐ ܠܛܝܒܘܬܗ. ܫܟܝ̣ܪ ܩܘܛܪܓܗܝܢ. ܚܕ ܡ̇ܢ ܙܢܐ ܕܣܥܘܪ̈ܘܬܐ ܗ̇ܢܝܢ ܕܡ̣ܢ ܗܘܠܐ ܐܢܝܢ ܠܐ ܡܫܟܚܢܝ̣ܬܐ. ܐܝܟ ܗ̇ܝ ܕܐ̱ܚܪܢܐ ܕܕܡܐ ܠܗ ܒܟܠܡܕܡ ܢܒܪܐ. ܘܐܝܟ ܗ̇ܝ ܕܡ̣ܢ ܬܪܝܢ ܘܬܪܝܢ ܚܡܫܐ ܢܫܡܠܐ ܒܠܥܕ ܬܘܣܦܬܐ. ܕܬܪܝܢ ܕܝܢ܇ ܙܢܐ ܕܣܥܘܪ̈ܘܬܐ ܗ̇ܢܝܢ ܕܒܟܝܢܐ ܒܝ̣̈ܫܢ. ܐܝܟ ܗ̇ܝ ܕܒܪܝ̣ܬܐ ܡܕܡ ܢܒܪܐ܇ ܗ̇ܝ ܐܝܕܐ ܕܟܠܢܐܝܬ ܡ̣ܢ ܛܒܬܐ ܓܠܝ̣ܙܐ. ܐܘ ܕܒܝ̣ܫܬܗ̇ ܥܠܒܐ ܠܛܒܬܗ̇. ܘܟܕ ܚܕܝܘܬܐ܆ ܘܕܠܐ ܚܕܐ ܗ̱ܝ ܡ̣ܢ ܗܠܝܢ ܬܪܝܢ ܙܢܝ̈ܐ. ܠܘ ܠܐ ܦܐܐ ܐܦܠܐ ܫܟܝ̣ܪ. ܩܘܛܪܓܗ̇ ܥܠ ܐܠܗܐ ܫܘܒܚܐ ܠܛܝܒܘܬܗ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܝܘܒ. ܐܢܐ ܝ̇ܕܥ ܐ̱ܢܐ ܕܦܪܘܩܝ ܚܝ ܗ̣ܘ ܘܒܣܘܦܐ ܥܠ ܐܪܥܐ ܢܬܓܠܐ.

 

 

 

ܣܗܕܘܬܐ ܕܬܪܬܝܢ

 

ܕܘܝܕ. ܟܘܪܣܝܟ ܐܠܗܐ ܠܥܠܡ ܥܠܡܝܢ. ܫܒܛܐ ܦܫܝ̣ܛܐ ܫܒܛܐ ܕܡܠܟܘܬܟ. ܡܛܠܗܢܐ ܡܫܚܟ ܐܠܗܐ ܐܠܗܟ ܡܫܚܐ ܕܚܕܘܬܐ ܝܬܝ̣ܪ ܡ̣ܢ ܚܒܪ̈ܝܟ.

 

 

 

ܣܗܕܘܬܐ ܕܬܠܬ

 

ܐܫܥܝܐ. ܗܐ ܒܬܘܠܬܐ ܬܒܛܢ ܘܬܐܠܕ ܒܪܐ. ܘܢܬܩܪܐ ܫܡܗ ܥܡܢܘܐܝܠ. ܕܐܝܬܘܗܝ ܥܡܢ ܐܠܗܢ.

 

 

 

ܣܗܕܘܬܐ ܕܐܪܒܥ

 

ܗ̣ܘܟܕ ܗ̣ܘ. ܡܛܠ ܕܝܠܕܐ ܐܬܝ̣ܠܕ ܠܢ. ܘܒܪܐ ܐܬܝ̣ܗܒ ܠܢ. ܘܗܘܐ ܫܘܠܛܢܗ ܥܠ ܟܬܦܗ. ܘܐܬܩܪܝ̣ ܫܡܗ ܕܘܡܪܐ ܘܡܠܘܟܐ ܐܠܗܐ ܓܢ̱ܒܪܐ ܕܥܠܡ̈ܐ. ܘܐܒܐ ܕܥܠܡܐ ܕܥܬܝ̣ܕ. ܫܠܝ̣ܛܐ ܕܫܠܡܐ. ܠܡܣܓܝܘ ܫܘܠܛܢܗ. ܘܠܫܠܡܗ ܠܝܬ ܣܟܐ.

 

 

 

ܣܗܕܘܬܐ ܕܚܡܫ

 

ܒܪܘܝܟ. ܗ̇ܢܘ ܐܠܗܢ ܘܠܐ ܢܬܚܫܒ ܐ̱ܚܪܢܐ ܠܘܬܗ. ܐܫܟܚ ܟܠ ܐܘܪܚܐ ܕܝ̣ܕܥܬܐ. ܘܝܗܒܗ̇ ܠܝܥܩܘܒ ܥܒܕܗ ܘܠܐܝܣܪܐܝܠ ܪܚܡܗ. ܘܒܬܪܟܢ ܥܠ ܐܪܥܐ ܐܬܚܙܝ̣. ܘܥܡ ܒܢܝ̈ܢܫܐ ܐܬܗܦܟ.

 

 

 

ܢܝܫܐ ܕܬܠܬܐ ܡܛܠ ܣܗ̈ܕܘܬܐ ܒܪ̈ܝܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܩܨܡܐ ܕܐܬܝ̣ܗܒ ܠܐܓܘܣܛܘܣ ܕܒܝܬ ܩܛܐܒܝ̣ܢܘܣ. ܟܕ ܨܒܐ ܗܘܐ ܕܢܐܠܦ ܡܢܘ̣ ܡܡܠܟ ܒܬܪܗ. ܛܠܝܐ ܥܒܪܝܐ ܡܬܩܪܐ ܐܠܗܐ ܡܫܝܚܐ ܕܡܡܠܟ ܠܛܘܒ̈ܬܢܐ. ܘܟܕ ܗܟܢܐ ܡܬܘܡܝܐ. ܘܠܒܝܬ ܡܥܡܪܐ ܕܝܠܗ ܢܫܒܘܩ ܘܢܐܬܐ. ܗܦܟ ܐܙ̇ܠ ܡ̣ܢ ܥܘܡܪܐ ܕܝܠܢ.

 

 

 

ܣܗܕܘܬܐ ܕܬܪܬܝܢ

 

ܣܘܠܘܢ ܦܝܠܠܘܣܘܦܐ. ܠܚܪܬܐ ܐܡܬܝ ܕܗ̣ܘ ܥܠ ܐܪܥܐ ܢܬܚܙܐ ܫܝ̣ܛܐܝܬ. ܘܡܛܠ ܫܘܪ̈ܥܬܐ ܦܓܪܐ ܢܬܥܛܦ. ܘܒܬܚܘ̈ܡܐ ܠܐ ܥܕܝ̣̈ܠܐ ܕܐܠܗܘܬܐ܆ ܠܚܒܠܐ ܕܚܫ̈ܐ ܢܒܛܠ. ܘܡ̣ܢ ܗܪܟܐ ܠܥܡܐ ܠܐ ܡܗܝܡܢܐ ܚܣܡܐ ܢܐܚܘܕ. ܘܟܕ ܠܘܬ ܪܘܡܐ ܐܝܟ ܡܚܝܒܐ ܢܬܠܘܢܝܗܝ ܢܝ̣ܚܐܝܬ ܘܡܟܝ̣ܟܐܝܬ ܠܟܠ ܠܘܬܗ ܢܟܢܫ.

 

 

 

ܣܗܕܘܬܐ ܕܬܠܬ

 

ܩܨܡܐ ܕܐܬܝ̣ܗܒ ܡ̣ܢ ܐܦܘܠܘܢ ܒܗܝܟܠܐ ܕܩܘܕܝ̣ܩܘܣ ܐܡܬܝ ܕܐܙܕܥܙܥ ܠܡܣܬܚܦܘ ܟܕ ܐܡܪܝܢ ܠܗ. ܐܬܢܒܐ ܘܐܡ̣ܪ ܠܢ ܢܒܝܐ ܕܟܝܐ ܘܝܗܘܒܐ ܕܩܨܡܐ. ܓܢ̱ܒܪܐ ܘܐܚܝ̣ܕ ܟܠ܆ ܡܠܟܐ ܐܦܘܠܘܢ. ܡܢܐ ܘܕܡܢܘ̣ ܢܗܘܐ ܗܝܟܠܐ ܗܢܐ. ܘܗ̣ܘ ܐܡ̣ܪ. ܗܠܝܢ ܡ̇ܢ ܕܥܒܕܝ̣ܬܘܢ܆ ܠܘܬ ܡܝܬܪܘܬܐ ܘܨܒܬܐ ܚܝܪ̈ܢ. ܐܢܐ ܕܝܢ ܐܡ̇ܪ ܐ̱ܢܐ ܬܠܝ̣ܬܝܘܬܐ ܚܕ ܗ̣ܘ ܐܠܗܐ ܡܪܝܡܐ ܒܠܚܘܕܘܗܝ. ܗܘ ܕܡܠܬܗ ܠܐ ܡܬܚܒܠܢܐ܆ ܒܛܠܝ̣ܬܐ ܫܒܪܬܐ ܕܠܐ ܡܢܣܝܐ ܒܙܘܘܓܐ ܢܬܒܛܢ. ܘܒܕܡܘ̣ܬܐ ܕܢܘܪܐ ܒܥܠܡܐ ܢܪܗܛ. ܘܠܟܠ ܢܨܘܕ. ܘܠܐܒܘܗܝ ܩܘܪܒܢܐ ܢܩܪܒ. ܕܝܠܗ ܢܗܘܐ ܒܝܬܐ ܗܢܐ. ܡܪܝܐ ܕܝܢ ܫܡܐ ܕܝܠܗ. ܐܡܪܝܢ ܠܗ. ܕܟܝܐ ܘܝܗܘܒܐ ܕܩܨ̈ܡܐ. ܓܢ̱ܒܪܐ ܘܡܠܟܐ ܕܟܠ ܐܦܘܠܘܢ. ܐܡ̇ܪ. ܠܐ ܗ̇ܘ ܕܫܕܪܢܝ ܕܐܡܪܘܩ ܫܪܪܐ. ܠܐ ܝܕܥܬ ܡܢܐ ܐܡܪܬ. ܐܠܐ ܘܫܢܢܐ ܡܬܝ̣ܚܬܐ ܕܠܥܠ ܡ̣ܢ ܫܡܝܐ܆ ܕܝܠܗ ܗ̣ܝ.

 

 

 

ܦܣܘܩܐ ܬܪܝܢ ܕܩܦܠܐܘܢ ܩܕܡܝܐ ܕܫܬܐܣܬܐ ܪܒܝ̣ܥܝܬܐ ܡܛܠ ܬܪܥܝ̣ܬܐ ܟܦܪܬ ܒܡܬܡܨܝܢܘܬ ܡܬܒܪܢܫܢܘܬܐ ܕܐܠܗܐ ܡܠܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ ܕܗܠܝܢ. ܣܥܝܐ ܩܕܡܝܐ

 

ܐܡܪܝܢ ܕܚܕܝܘܬܐ ܡ̣ܢ ܗܠܝܢ ܕܠܘ ܡܫܟ̈ܚܢ ܗ̣ܝ. ܒܗ̇ܝ ܕܬܪ̈ܝܗܘܢ ܗ̇ܢܘܢ ܕܥܡ ܚܕ̈ܕܐ ܡܬܚܝܕܝ̣ܢ. ܐܘ ܐܝܟ ܕܐܝܬܝܗܘܢ ܡ̣ܢ ܩܕܡ ܚܕܝܘܬܐ ܡܟܬܪܝ̣ܢ ܘܒܬܪ ܚܕܝܘܬܐ. ܐܘ ܡܬܚܒܠܘ ܡܬܚܒܠܝܢ. ܘܐ̱ܚܪܢܐ ܬܠܝܬܝܐ ܡ̣ܢ ܚܘܒܠܗܘܢ ܗܘܐ. ܐܘ ܚܕ ܡܢܗܘܢ ܐܝܟ ܕܐܝܬܘܗܝ ܡܟܬܪ. ܘܗ̇ܘ ܐ̱ܚܪܢܐ ܡܬܚܒܠ. ܘܗ̇ܘ ܩܕܡܝܐ ܠܘ ܚܕܝܘܬܐ ܗܘ. ܒܗ̇ܝ ܕܟܕ ܬܪ̈ܝܗܘܢ ܐܟܡܐ ܕܐܝܬܝܗܘܢ ܗܘܘ ܡܟܬܪܝ̣ܢ. ܐܝܟܐ ܗ̱ܝ ܚܕܝܘܬܐ ܘܐܝ̇ܢܘ ܫܘܘܕܥܗ̇. ܘܗ̣ܘ ܗܢܐ ܐܝܟ ܦܪܙܠܐ ܘܩܝܣܐ. ܕܡܢܗܘܢ ܟܘܪܣܝܐ ܡܬܪܟܒ. ܘܓܠܝܐ ܕܡܫܘܬܦܘܬܗܘܢ ܡܫܘܬܦܘܬܐ ܗ̱ܝ ܕܢܩܝ̣ܦܘܬܐ ܒܪܢܝܬܐ ܘܠܘ ܕܚܕܝܘܬܐ. ܘܗ̇ܘ ܕܬܪܝܢ ܬܘܒ ܠܘ ܚܕܝܘܬܐ ܗ̱ܘ. ܐܠܐ ܗܘܝܐ ܘܚܘܒܠܐ. ܒܗ̇ܝ ܕܚܘܒܠܐ ܕܬܪ̈ܝܗܘܢ. ܥܠܬܐ ܕܗܘܝܐ ܕܐ̱ܚܪܢܐ ܬܠܝ̣ܬܝܐ ܗܘܐ. ܘܗ̣ܘ ܗܢܐ ܐܝܟ ܕܒܫܐ ܘܚܠܐ ܕܡ̣ܢ ܚܒܘܟܝܗܘܢ ܐܟܣܘܡܠܝ ܗܘܐ. ܘܓܠܝܐ ܕܠܘ ܚܕܝܘܬܐ ܗ̱ܘ ܚܘܠܛܢܗܘܢ. ܐܠܐ ܡܘܙܓܐ ܘܒܘܠܒܠܐ. ܗ̣ܘ ܗܟܘܬ ܘܗ̇ܘ ܕܬܠܬܐ ܬܘܒ ܠܘ ܚܕܝܘܬܐ ܗ̱ܘ. ܒܗ̇ܝ ܕܚܕ ܡܢܗܘܢ ܠܠܝܬܝܘܬܐ ܫܪܟ. ܘܗ̇ܘ ܕܠܝܬܘܗܝ܆ ܐܝܟܢܐ ܢܬܚܝܕ ܥܡ ܗ̇ܘ ܕܐܝܬܘܗܝ. ܘܗ̣ܘ ܗܢܐ ܐܝܟ ܐܐܪ ܕܠܢܘܪܐ ܡܫܬܚܠܦ. ܘܓܠܝܐ ܕܠܘ ܠܢܘܪܐ ܐܐܪ ܡܬܚܝܕ ܗܝܕܝܟ. ܐܠܐ ܡ̣ܢ ܢܘܪܐ ܡܬܚܒܠ ܘܠܟܝܢܗ ܗܦܟ. ܡܠܬܐ ܡܕܝܢ ܕܚܕܝܘܬܐ ܡܠܬܐ ܗܝ ܒܛܠܬܐ ܘܠܘ ܡܫܟܚܢܝ̣ܬܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܚܕܝܘܬܐ ܐܢ ܐܝܬܝܗ̇. ܐܘ ܐܢܢܩܝܬܐ ܗ̱ܝ ܐܘ ܠܘ ܐܢܢܩܝܬܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܝܕ ܬܪܬܝܢ. ܚܕܐ ܡ̇ܢ ܗ̇ܝ ܕܐܠܘ ܐܢܢܩܝܬܐ ܗܘܬ݀ ܚܕܝܘܬܐ ܠܟܝܢܐ ܐܘ ܠܩܢܘܡܐ ܐܠܗܝܐ. ܡܫܬܟܚ ܗܘܐ ܟܝܢܐ ܩܢܘܡܐ ܐܠܗܝܐ ܕܣܢܝ̣ܩ ܚܣܝ̣ܪܐ ܗ̱ܘ. ܘܟܠ ܕܚܣܝ̣ܪܐ ܗ̱ܘ܆ ܠܘ ܐܠܗܐ ܗ̱ܘ. ܕܬܪܬܝܢ ܕܝܢ ܗ̇ܝ ܕܐܠܘ ܐܢܢܩܝܬܐ ܗܘܬ݀ ܚܕܝܘܬܐ. ܐܠܨܐ ܗܘܬ݀ ܕܠܐ ܡܬܘܡ ܡܬܥܪܛܠ ܗܘܐ ܡܢܗ̇ ܟܝܢܐ ܐܘ ܩܢܘܡܐ ܐܠܗܝܐ. ܒܕܓܘܢ ܐܘ ܟܝܢܐ ܘܩܢܘܡܐ ܐܠܗܝܐ ܡܫܪܝܢܐ ܗܘܐ ܐܝܟ ܕܐܦ ܗ̇ܘ ܕܥܡܗ ܐܬܚܝܕ܆ ܡܬܘܡܝܐ ܗܘܐ ܐܝܟ ܕܐܦ ܗ̣ܘ ܟܝܢܐ ܐܘ ܩܢܘܡܐ ܗ̇ܘ ܐܠܗܝܐ. ܘܬܪ̈ܝܗܘܢ ܫܟܝ̣ܪܝ̣ܢ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܐܠܘ ܠܢ ܐܢܢܩܝܬܐ ܗܘܬ݀ ܚܕܝܘܬܐ ܠܟܝܢܐ ܐܘ ܩܢܘܡܐ ܐܠܗܝܐ. ܠܐ ܣܢܝ̣ܩ ܗܘܐ ܟܝܢܐ ܐܘ ܩܢܘܡܐ ܗ̇ܘ ܥܠܝܗ̇ ܕܚܕܝܘܬܐ. ܘܗ̇ܘ ܕܠܐ ܣܢܝ̣ܩ ܥܠ ܡܕܡ ܡ̣ܢ ܠܘ ܡܫܟܚܢ̈ܝܬܐ ܗ̱ܝ ܕܢܩܢܝܘܗܝ. ܘܟܕ ܬܪ̈ܝܗܘܢ ܦܫܚܝ̈ܗܘܢ ܕܦܘܠܓܝ̈ܗ̇ ܕܚܕܝܘܬܐ ܫܟܝ̣ܪܝ̣ܢ. ܡ̣ܢ ܗܠܝܢ ܕܠܐ ܐܝܬܝܗܘܢ ܗ̣ܝ ܚܕܝܘܬܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܚܕܝܘܬܐ ܐܢ ܡܬܡܨܝܢܝ̣ܬܐ ܗ̱ܝ ܠܬܠܬܝ̈ܗܘܢ ܩܢܘ̈ܡܐ ܕܗ̇ܘ ܚܕ ܟܝܢܐ ܕܐܠܗܐ ܕܐܡܪܝܬܘܢ ܡܬܡܨܝܢܝ̣ܬܐ ܙܕܩ ܕܬܗܘܐ. ܒܕܓܘܢ ܐܘ ܬܠܬܝ̈ܗܘܢ ܐܟܚܕܐ ܙܕܩ ܕܢܬܚܝܕܘܢ ܘܢܬܒܪܢܫܘܢ܆ ܐܘ ܠܐ ܚܕ ܡܢܗܘܢ. ܘܬܪ̈ܝܗܘܢ ܦܫܚܘ̈ܗܝ ܕܦܘܠܓܐ܆ ܡܒܛܠܢ̈ܐ ܐܢܘܢ ܕܗ̇ܘ ܡܐ ܕܡܘܕܝܬܘܢ. ܚܕܝܘܬܐ ܡܕܝܢ ܕܡܬܡܨܝܢܝ̣ܬܐ ܐܬܬܕܝ̣ܢܬ݀ ܐܝܟ ܪܥܝܢܟܘܢ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܐܠܘ ܐܬܚܝܕ ܐܠܗܐ ܥܡ ܒܪܢܫܐ. ܡܫܬܟܚ ܕܐܣܬܝܟ ܠܗ ܒܗ. ܘܟܕ ܐܠܗܐ ܫܘܒܚܐ ܠܛܝܒܘܬܗ܇ ܠܐ ܡܣܝܟܐ ܗ̱ܘ ܒܟܝܢܗ. ܡ̣ܢ ܠܐ ܡܬܡܨܝܢ̈ܝܬܐ ܗ̱ܝ ܠܗ ܗ̇ܝ ܕܥܡ ܡܣܝܟܐ ܢܬܚܝܕ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܩܕܡܝܐ

 

ܐܡܪܝܢܢ ܕܒܦܘܠܓܟܘܢ ܗ̇ܘ ܬܠܝ̣ܬܝ ܦܫ̈ܚܐ܆ ܠܘ ܐܝܟ ܩܢܘܢܐ ܠܘܓܝܩܝܐ ܐܬܚܫܚܬܘܢ. ܒܗ̇ܝ ܕܠܡܦܪܫܬܐ ܠܐ ܡܪܢܝܬܐ. ܐܝܟ ܕܠܡܪܢܝܬܐ ܢܣܒܬܘܢܗ̇. ܟܐܡܬ݀ ܐܝܟ ܗ̇ܘ ܕܠܐ ܡܨܐ ܕܢܗܘܐ ܦܫܚܐ ܐ̱ܚܪܢܐ ܪܒܝ̣ܥܝܐ ܣܛܪ ܡ̣ܢ ܗܠܝܢ ܕܡܢܝܬܘܢ. ܗ̇ܘ ܕܠܘ ܠܐ ܡܨܐ. ܒܗ̇ܝ ܕܐܡܪܝܢܢ ܕܗ̇ܢܘܢ ܕܡܬܚܝܕܝܢ. ܐܘܟܝ̣ܬ ܩܢܘܡܐ ܐܠܗܝܐ ܘܗ̇ܘ ܐ̱ܢܫܝܐ. ܒܟܝܢܝ̈ܗܘܢ ܡ̇ܢ ܕܝ̣ܠܢܝ̈ܐ܆ ܐܝܟ ܕܐܝܬܝܗܘܢ ܡܟܬܪܝ̣ܢ. ܒܠܥܕ ܚܘܒܠܐ ܘܒܘܠܒܠܐ. ܐܘ ܫܘܚܠܦܐ ܘܫܘܓܢܝܐ. ܘܒܦܘܚܡܗܘܢ ܐ̱ܚܝܢܝܐ. ܘܒܡܥܒܕܢܘܬܐ ܕܩܢܘܡܐ ܐܠܗܝܐ ܒܗ̇ܘ ܐ̱ܢܫܝܐ. ܘܡܬܬܥܒܕܢܘܬܐ ܕܗ̇ܘ ܐ̱ܢܫܝܐ ܡ̣ܢ ܗ̇ܘ ܐܠܗܝܐ. ܠܘ ܐܝܟ ܕܐܝܬܝܗܘܢ ܗܘܘ ܡ̣ܢ ܩܕܡ ܚܕܝܘܬܐ ܦܝܫܝ̣ܢ. ܘܡ̣ܢ ܗܪܟܐ ܝ̣ܕܝ̣ܥܐ ܕܗ̇ܘ ܕܡܬܚܕܬ݀ ܒܬܪ ܚܕܝܘܬܐ ܠܘ ܚܘܒܠܐ ܗ̱ܘ ܘܒܘܠܒܠܐ. ܐܠܐ ܫܘܚܠܦܐ ܘܫܘܓܢܝܐ. ܘܫܘܚܠܦܐ ܬܘܒ ܘܫܘܓܢܝܐ ܠܘ ܕܟܝܢܐ ܐܘ ܕܒܟܝܢܐ. ܐܠܐ ܕܦܘܚܡܐ ܘܐ̱ܚܝܢܘܬܐ ܠܘܬ ܡܕܡܝܬܐ. ܕܠܒܪ ܗ̣ܝ ܡ̣ܢ ܟܝܢܐ. ܘܗܟܢܐ ܡܬܗܘܢܢܐ ܚܕܝܘܬܐ ܢܛܪܬ݀ ܐܘܣܝ̈ܐܣ. ܘܐܦܢ ܪܡܬ݀ ܡ̣ܢ ܗܘ̈ܢܐ ܗ̣ܝ. ܬܚܘܝ̣ܬܐ ܕܝܢ ܠܗ̇ܝ ܕܡܬܐܡܪܐ. ܚܕܝܘܬܗ̇ ܕܢܦܫܐ ܡܠܝ̣ܠܬܐ ܥܡ ܦܓܪܐ ܐ̱ܢܫܝܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܩܢܘܡܐ ܐܠܗܝܐ. ܐܢܢܩܝܬܐ ܗܘܬ݀ ܠܗ ܚܕܝܘܬܐ܆ ܒܠܥܕ ܣܢܝ̣ܩܘܬܗ ܕܥܠ ܚܕܝܘܬܐ. ܗܐ ܓܝܪ ܐܠܗܐ ܫܘܒܚܐ ܠܛܝܒܘܬܗ ܡܨܐ ܚܝܠܐ ܗ̱ܘ ܘܝܕܘܥܐ ܗ̱ܘ ܐܢܢܩܐܝܬ. ܒܠܥܕ ܗ̇ܝ ܕܢܐܡܪ ܕܣܢܝ̣ܩ ܥܠܝܗܘܢ. ܘܐܠܐ ܗ̇ܝ ܫܟܝ̣ܪܘܬܐ ܕܗܪܬܡܢ ܟܢܫܬܘܢ܆ ܐܦ ܗܪܟܐ ܡܬܟܢܫܐ. ܘܬܘܒ ܐܡܪܝܢܢ ܕܐܢܢܩܝܬܐ ܗ̱ܝ ܠܗ ܚܕܝܘܬܐ܆ ܟܕ ܗ̣ܘ ܩܢܘܡܐ ܗ̇ܘ ܕܥܡܗ ܐܬܚܝܕ ܡܫܬܟܚ. ܒܕܓܘܢ ܠܐ ܐܠܨܐ ܡܫܪܝܢܘܬܗ ܕܝܠܗ܆ ܐܦܠܐ ܡܬܘܡܝܘܬܗ ܕܩܢܘܡܐ ܗ̇ܘ. ܗܐ ܓܝܪ ܗ̣ܘ ܐܠܗܐ ܫܘܒܚܐ ܠܛܝܒܘܬܗ ܐܢܢܩܐܝܬ ܝ̇ܕܥ ܫܟܝ̣ܚܘܬܗ ܕܥܠܡܐ ܗܢܐ܆ ܒܪܡ ܠܐ ܟܕ ܫܟܝ̣ܚ. ܒܗ̇ܝ ܕܡ̣ܢ ܩܕܡ ܕܢܫܬܟܚ. ܠܘ ܕܫܟܝ̣ܚ ܝ̇ܕܥ ܗܘܐ ܠܗ. ܐܠܐ ܕܥܬܝ̣ܕ ܠܡܫܬܟܚܘ. ܘܬܘܒ ܐܡܪܝܢܢ ܘܐܢ ܢܗܘܐ ܕܢܫܦ ܕܠܘ ܐܢܢܩܝܬܐ ܗܘܬ݀ ܠܗ ܚܕܝܘܬܐ܆ ܐܦܠܐ ܣܢܝ̣ܩ ܗܘܐ ܥܠܝܗ̇. ܐܠܐ ܡܛܠ ܡܢܐ ܐܡ̣ܪܬܘܢ ܕܟܠ ܕܠܐ ܣܢܝ̣ܩ ܥܠ ܡܕܡ܆ ܡ̣ܢ ܠܘ ܡܫܟܚܢ̈ܝܬܐ ܗ̱ܝ ܕܢܩܢܝܘܗܝ. ܗܕܐ ܓܝܪ ܒܥܬܐ ܗ̱ܝ. ܘܐܝ̇ܟܘ ܐܦܘܕܝܟܣܝܣ ܕܥܠܝܗ̇. ܗܐ ܗ̣ܘ ܐܠܗܐ ܫܘܒܚܐ ܠܛܝܒܘܬܗ. ܟܕ ܠܘ ܐܢܢܩܝܬܐ ܗܘܬ݀ ܠܗ ܒܪܝ̣ܬܗ ܕܥܠܡܐ ܗܢܐ. ܐܦܠܐ ܣܢܝ̣ܩ ܗܘܐ ܥܠܝܗ̇܆ ܒܪܝܗܝ ܟܕ ܨܒܐ. ܘܒܗ̇ ܒܕܡܘ̣ܬܐ ܡܕܝܢ ܘܐܬܚܝܕ ܟܕ ܨܒܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܐܦ ܚܕܝܘܬܐ ܨܒܘܬܐ ܗ̱ܝ ܡܬܡܨܝܢܝ̣ܬܐ ܠܬܠܬܝ̈ܗܘܢ ܐܟܚܕܐ ܩܢܘ̈ܡܐ ܕܬܠܝ̣ܬܝܘܬܐ. ܐܠܐ ܠܩܢܘܡ ܡܠܬܐ ܝܬܝܪ ܒܝܬܝܐ܆ ܗ̣ܝ ܚܕܝܘܬܐ ܒܝܕ ܬܪܬܝܢ. ܚܕ ܡ̇ܢ ܗ̇ܝ ܕܐܝܟ ܕܐܡ̣ܪܢܢ ܒܡܠܬܐ ܢܨܝ̣ܒܬܐ ܐܘܟܝ̣ܬ ܒܡܠܝ̣ܠܘܬܐ ܟܝܢܝܬܐ ܕܗ̣ܝ ܗ̣ܝ ܗܘܢܐ. ܡܫܘܬܦ ܒܪܢܫܐ ܠܐܠܗܐ. ܘܟܕ ܡܠܬܐ ܗ̣ܝ ܗ̣ܝ ܥܠܬ݀ ܒܝܬܝܘܬܐ ܕܒܪܢܫܐ ܠܐܠܗܐ. ܙܕܩܐܝܬ ܕܩܢܘܡ ܡܠܬܐ ܕܗ̣ܘ ܒܪܐ ܣܓܝ̣ܕܐ܇ ܗܘܬ݀ ܚܕܝܘܬܐ ܗܕܐ ܕܝ̣ܠܢܐܝܬ. ܘܟܕ ܒܗ ܒܗܢܐ ܩܢܘܡܐ ܐܫܬܡܠܝ̣ ܗ̣ܘ ܗܢܐ ܢܝܫܐ. ܐܬܟܠܝ̣ ܡ̣ܢ ܬܪ̈ܝܗܘܢ ܩܢܘ̈ܡܐ ܗܠܝܢ ܕܫܪܟܐ. ܕܬܪܬܝܢ܆ ܗ̇ܝ ܕܚܕܝܘܬܐ ܟܕ ܒܝܕ ܝ̣ܠܝ̣ܕܘܬܐ ܡܫܪܝܢܝ̣ܬܐ ܡܨܝܐ ܗܘܬ݀ ܕܬܬܒܕܩ̈ܝ. ܟܐܢܐܝܬ ܠܩܢܘܡܐ ܗ̇ܘ ܗ̇ܘ ܕܝ̣ܠܝ̣ܕܘܬܐ ܡܬܘܡܝܬܐ ܗܘܬ݀ ܕܝ̣ܠܝܬܗ܆ ܢܩܦܬ݀ ܚܕܝܘܬܐ. ܘܗܟܢܐ ܗ̣ܝ ܕܝ̣ܠܝܬܐ ܦܐܝܘܬ ܡܛܣܟܐܝܬ ܙܕܩܗ̇ ܢܛܪܬ݀. ܘܡ̣ܢ ܗ̇ܝ ܕܐܝܬܝܗ̇ ܠܐ ܢܦܩܬ݀.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܐܠܘ ܓܘܫܡܐ ܗ̣ܘܐ ܐܠܗܐ ܫܘܒܚܐ ܠܛܝܒܘܬܗ. ܐܘ ܓܕܫܐ. ܡܚܝܕܘܬܗ ܕܥܡ ܡܣܝܟܐ. ܐܝܟ ܢܩܝ̣ܦܘܬܐ ܕܗܕܡ̈ܐ ܥܡ ܚܕ̈ܕܐ ܕܡܢܗܘܢ ܦܓܪ ܚܝܘܬܐ ܡܬܠܚܡ. ܐܘ ܢܩܝ̣ܦܘܬܐ ܕܐܕܫܐ ܥܡ ܗܘܠܐ ܕܡܢܗܘܢ ܓܘܫܡܐ ܡܬܪܟܒ. ܘܟܕ ܠܘ ܓܘܫܡܐ ܗ̱ܘ ܐܦܠܐ ܓܕܫܐ. ܠܐ ܐܠܨܐ ܠܗ ܠܡܣܬܝܟܘ ܒܚܕܝܘܬܗ ܕܥܡ ܡܣܝܟܐ. ܗܐ ܓܝܪ ܢܦܫܐ ܡܠܝ̣ܠܬܐ ܟܕ ܥܡ ܦܓܪܐ ܡܚܝܕܐ. ܕܡܣܝܟ ܒܐܬܪܐ. ܠܘ ܡܣܝܟܬܐ ܗ̱ܝ ܐܦ ܗ̣ܝ ܒܐܬܪܐ ܒܥܠܬ݀ ܡܣܝܟܘܬܗ ܕܗ̇ܘ ܒܗ̇ܝ ܕܐܠܘ ܐܣܬܝܟܬ݀܆ ܐܬܦܠܓܬ݀. ܐܬܓܫܡܬ݀܆ ܐܬܚܒܠܬ݀. ܘܡ̣ܢ ܟܝܢܗ ܢܦܩܬ݀ ܗ̇ܝ ܕܫܟܝ̣ܪܐ.

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܪܒܝܥܝܬܐ ܡܛܠ ܗ̇ܝ ܕܡ̣ܢ ܟܕܘ ܗܘܬ݀ ܚܕܝܘܬܐ ܒܡܪܢ ܡܫܝܚܐ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܫܘܪܪ ܫܬܐܣܬܐ ܐܝ̇ܕܐ ܕܥܠܝܗ̇ ܡܫܬܟ̈ܠܠܢ ܡܚܘܝܢ̈ܘܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ ܕܗ̣ܝ ܗ̣ܝ ܬܟܝ̣ܒܘܬ ܣܗܕ̈ܘܬܐ

 

ܐܡܪܝܢܢ ܕܬܪܝܢ ܐܢܘܢ ܙܢܝ̈ܐ ܕܣܗܕܘܬܐ ܬܟܝ̣ܒܬܐ. ܚܕ ܡ̇ܢ ܗ̇ܘ ܕܢܗܘܘܢ ܗ̇ܢܘܢ ܕܬܟܝ̣ܒܐܝܬ ܣܗܕܝ̣ܢ. ܕܚܙܐܘܗܝ ܠܗ̇ܘ ܡܐ ܕܡܛܠܬܗ ܣܗܕܝ̣ܢ. ܕܬܪܝܢ ܕܝܢ܆ ܗ̇ܘ ܕܠܐ ܢܗܘܘܢ ܕܚܙܐܘܗܝ ܠܗ̇ܘ ܕܡܢܗܘܢ ܢܣܬܗܕ. ܐܠܐ ܕܡ̣ܢ ܐ̱ܚܪ̈ܢܐ ܡ̣ܢ ܐ̱ܚܪ̈ܢܐ. ܥܕܡܐ ܕܬܬܝܒܠ ܣܗܕܘܬܐ ܠܘܬ ܗ̇ܢܘܢ ܕܡܚܙܐ ܚܙܐܘܗܝ ܠܗ̇ܘ ܕܡܣܬܗܕ. ܘܟܠ ܚܕ ܡ̣ܢ ܗܠܝܢ ܙܢܝ̈ܐ ܒܝܕ ܬܪܝܢ ܩܢܘ̈ܢܐ ܡܫܬܡܠܐ ܫܘܪܪܗ. ܚܕ ܡ̇ܢ ܕܒܡܢܝܢܐ ܡܫܪܬܚܐ ܢܗܘܘܢ ܩܢܘ̈ܡܐ ܗ̇ܢܘܢ ܕܣܗܕܝܢ܇ ܗ̇ܘ ܐܝܢܐ ܕܠܐ ܢܬܡܨܘܢ ܥܡܗ ܥܠ ܗ̇ܝ ܕܢܫܠܡܘܢ ܥܠ ܟܕܒܘܬܐ. ܐܘ ܕܢܚܫܠܘܢ ܥܡ ܚܕ̈ܕܐ ܐ̱ܪܙܐ. ܡܛܠ ܗ̇ܝ ܕܢܕܓܠܘܢ ܘܢܐܡܪܘܢ ܗ̇ܘ ܡܐ ܕܠܐ ܚ̣ܙܘ ܐܘ ܠܐ ܫܡ̣ܥܘ. ܐܝܟ ܗ̇ܝ ܕܟܕ ܢܚܙܐ ܥܡ̈ܡܐ ܡܫܚ̈ܠܦܐ ܕܡ̣ܢ ܐܬܪ̈ܘܬܐ ܐܢܘܢ ܡܫܚ̈ܠܦܐ. ܘܒܠܫܢ̈ܐ ܡܡܠܠܝ̣ܢ ܡܫܚ̈ܠܦܐ ܕܟܠܗܘܢ ܐܟܚܕܐ ܣܗܕܝܢ܇ ܕܚ̣ܙܘ ܐܘ ܕܫܡ̣ܥܘ ܡ̣ܢ ܗ̇ܢܘܢ ܕܚ̣ܙܘ. ܕܐܝܬ ܒܥܠܡܐ ܓܙܪܬܐ ܡܕܡ ܪܒܬܐ ܕܫܡܗ̇ ܩܘܦܪܘܣ. ܕܠܐ ܦܘܠܓ ܡܩܒܠܝ̣ܢܢ ܣܗܕܘܬܗܘܢ. ܘܡܬܪܟܢܝ̣ܢܢ ܠܡܗܝܡܢܘܬܗܘܢ ܕܠܐ ܦܘܪܬܟ. ܩܢܘܢܐ ܕܝܢ ܕܬܪܝܢ܆ ܕܡܬܪܓܫܢܐ ܢܗܘܐ ܘܠܘ ܡܬܗܘܢܢܐ ܗ̣ܘ ܡܣܬܗܕܢܐ. ܘܐܠܐ ܠܐ ܡܩܒܠܬܐ ܗܘܝܐ ܡ̣ܢ ܗܘܢܐ ܣܗܕܘܬܐ ܕܥܠܘܗܝ. ܒܗ̇ܝ ܕܐܢܗܘ ܕܟܠܗܘܢ ܒܢܝ̈ܢܫܐ ܕܒܟܠܗ̇ ܐܪܥܐ ܢܬܟܢܫܘܢ ܐܟܚܕܐ ܘܢܣܗܕܘܢ ܕܥܠܡܐ ܗܢܐ ܡܫܪܝܢܐ ܗ̱ܘ. ܐܘ ܕܢܦܫܐ ܠܐ ܡܝܘܬܬܐ ܗ̱ܝ. ܐܘ ܕܐܠܗܐ ܚܕ ܗ̣ܘ. ܠܐ ܣܟ ܡܬܕܢܝܐ ܢܦܫܐ ܠܦܝܣܗܘܢ. ܐܠܘܠܐ ܒܝܕ ܐܦܘܕܝ̣̈ܟܣܝ̣ܣ ܢܫܬܪܪ̈ܢ ܒܥ̈ܬܐ ܕܐܝܟ ܗܠܝܢ. ܒܕܓܘܢ ܐܡܪܝܢܢ܇ ܕܒܙܢܐ ܗ̇ܘ ܬܪܝܢܐ ܕܬܟܝ̣ܒܘܬ ܣܗܕ̈ܘܬܐ ܝ̣ܕܥܢܢ ܘܐܫܬܪܪܢܢ܇ ܕܡ̣ܢ ܟܕܘ ܗܘܬ݀ ܚܕܝܘܬܐ ܕܐܠܗܐ ܡܠܬܐ ܥܡ ܩܢܘܡܐ ܡܕܡ ܐ̱ܢܫܝܐ ܒܡܫܝܚܐ ܡܪܢ. ܟܐܡܬ݀ ܫܡ̣ܥܢܢ ܡ̣ܢ ܥܡ̈ܡܐ ܡܫܚ̈ܠܦܐ ܕܡ̣ܢ ܐܬܪ̈ܘܬܐ ܡܫܚ̈ܠܦܐ ܕܒܠܫ̈ܢܐ ܠܥܙܝ̣ܢ ܡܫܚ̈ܠܦܐ. ܕܣܗܕܘ ܕܫܡ̣ܥܘ ܐܦ ܗ̣ܢܘܢ ܡ̣ܢ ܐ̱ܚܪ̈ܢܐ܇ ܘܐ̱ܚܪ̈ܢܐ ܡ̣ܢ ܐ̱ܚܪ̈ܢܐ. ܘܗܟܢܐ ܥܕܡܐ ܕܐܬܝܒܠܬ݀ ܣܗܕܘܬܐ ܠܘܬ ܥܡ̈ܡܐ ܐ̱ܢܫܝ̈ܢ ܥܒܪ̈ܝܐ ܘܝܘ̈ܢܝܐ ܘܪ̈ܘܡܝܐ ܘܣܘܪ̈ܝܝܐ ܘܐܪ̈ܡܢܝܐ. ܕܚܙܐܘܗܝ ܠܡܪܢ ܒܥܠܡܐ܇ ܘܫܡܥܘ̣ܗܝ ܕܐܡ̣ܪ ܥܠ ܢܦܫܗ ܕܒܪܗ ܗ̣ܘ ܕܐܠܗܐ܆ ܘܒܪܗ ܕܐ̱ܢܫܐ ܐܝܟ ܕܟܬܝ̣ܒ ܒܐܘܢܓܠܝܘܢ ܕܝܠܗ ܣܓܝ̣ܕܐ. ܘܣܥܪ ܬܕܡܪ̈ܬܐ ܬܡܝ̣̈ܗܬܐ ܐܝܟ ܕܠܫܘܪܪ ܡܠܬܗ. ܘܒܗ ܢܒܝ̈ܘܬܐ ܕܢܒܝ̈ܐ ܕܡ̣ܢ ܩܕܝ̣ܡ ܡ̣ܢ ܚܝܠܐ ܠܡܥܒܕܢܘܬܐ ܢܦܩ̈ܝ. ܘܒܙܢܝ̈ܐ ܡܕܡ ܐܬܚܙܝ̣ ܒܥܠܡܐ܆ ܘܫܢܝ̣ ܡ̣ܢ ܥܠܡܐ. ܗ̇ܢܘܢ ܐܝܠܝܢ ܕܠܐ ܡܬܘܡ ܒܪܢܫܐ ܐ̱ܢܫ ܒܗܘܢ ܐܬܚܙ̣ܝ. ܘܗܟܢܐ ܗܘܬ݀ ܠܢ ܝ̣ܕܥܬܐ ܡܪܢܝܬܐ ܕܡܚܪܪܐ ܡ̣ܢ ܟܠ ܦܘܠܓܐ ܘܦܘܫܟܐ. ܕܗ̇ܘ ܕܐܝܟ ܗܢܐ ܗܘܝܘ̣ ܗ̇ܘ ܕܡܣܬܟܐ ܗܘܐ ܕܢܐܬܐ. ܘܗܘܝܘ ܟܕ ܗ̣ܘ ܐܠܗܐ ܘܒܪܢܫܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܪܒܝ̣ܥܝܬܐ. ܡܛܠ ܬܪܥܝ̣ܬܐ ܕܗ̇ܢܘܢ ܕܡܙܝܦܝ̣ܢ ܠܬܟܝ̣ܒܘܬ ܣܗܕ̈ܘܬܐ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܕܗܠܝܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܟܠ ܚܕ ܡ̣ܢ ܗ̇ܢܘܢ ܣܗ̈ܕܐ ܕܝ̣ܠܢܐܝܬ ܠܘ ܠܐ ܡܨܝܐ ܕܢܟܕܒ. ܘܐܠܐ ܠܐ ܐܣܬܢܩܬܘܢ ܥܠ ܣܗܕ̈ܘܬܐ ܕܐ̱ܚܪ̈ܢܐ ܥܡܗ. ܘܟܕ ܟܠ ܚܕ ܡܢܗܘܢ ܒܠܚܘܕܘܗܝ ܡܨܐ ܠܡܟܕܒܘ. ܐܦ ܟܠܗܘܢ ܡܨܝܢ ܠܡܟܕܒܘ܇ ܘܐܝܟܢܐ ܠܐ. ܘܗܐ ܟܕ ܥܠ ܟܠ ܚܕ ܡ̣ܢ ܟܘ̈ܫܝܐ ܫܪܝ̣ܪܐ ܦܪܘܛܐܣܝ̣ܣ ܗܕܐ ܕܐܡܪܐ ܕܐܘܟܡܐ ܐܝܬܘܗܝ. ܡ̣ܢ ܐܠܨ̈ܬܐ ܥܠ ܟܠܗܘܢ ܬܫܪ ܕܐܘܟܡ̈ܐ ܐܢܘܢ. ܘܡ̣ܢ ܗܪܟܐ ܒܛܠܬ݀ ܠܗ̇ ܣܗܕܘܬܐ ܬܟܝ̣ܒܬܐ ܘܠܐ ܫܘܝܐ ܠܡܬܗܝܡܢܘ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܒܪܢܫܐ ܡܬܪܡܐ ܠܡܕܓܠܘ. ܟܕ ܨܒܝܢܐ ܡܕܡ ܕܨܠܐܷ ܠܕܓܠܘܬܐ ܡܫܬܟܚ ܒܗ. ܘܕܒܨܒܝܢܐ ܕܐܝܟ ܗܢܐ ܠܘ ܡ̣ܢ ܠܐ ܡܬܡܨܝܢ̈ܝܬܐ ܗ̱ܝ ܕܒܟܠܗܘܢ ܒܢܝ̈ܢܫܐ ܢܫܬܟܚ܆ ܓܠܝܐ. ܘܕܗ̣ܝ ܡܬܡܨܝܢܘܬܐ ܕܐܝܟ ܗܕܐ ܡܣܠܝܘ ܡܣܠܝܐ ܠܣܗܕܘܬܐ ܬܟܝ̣ܒܬܐ. ܘܠܐ ܡܩܒܠܬܐ ܥܒܕܐ ܠܗ̇܆ ܠܐ ܐ̱ܢܫ ܡܨܐ ܠܡܟܦܪ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܟܕܒܘܬܐ ܡ̇ܢ ܟܕ ܥܠ ܟܠ ܚܕ ܡ̣ܢ ܒܢܝ̈ܢܫܐ ܡܬܡܨܝܢܐܝܬ ܡܬܩܛܪܓܐ. ܐܠܨܐ ܕܐܦ ܥܠ ܟܠܗܘܢ ܬܬܩܛܪܓ. ܘܐܢܗܘ ܕܬܐܡܪܘܢ ܐܝܟ ܕܐܦ ܡܥܕܝ̣ܢ ܐܢ̱ܬܘܢ. ܕܬܪܝܢ ܐܘ ܬܠܬܐ ܐܘ ܥܣܪܐ ܐܦܢ ܡܨܝܢ ܕܢܕܓܠܘܢ. ܐܠܐ ܡܐܐ ܐܘ ܐܠܦܐ ܐܘ ܪܒܘܬܐ ܠܐ ܡܨܝܢ. ܐܠܨܐ ܠܟܘܢ ܕܐܦܘܕܝ̣ܟܣܝ̣ܣ ܬܩܝ̣ܡܘܢ ܥܠ ܗܟܢ. ܘܕܗ̣ܝ ܗܕܐ ܠܐ ܡܬܬܝܬܝܐ ܠܟܘܢ ܓܠܝܐ. ܒܗ̇ܝ ܕܟܠ ܡܢܝܢܐ ܕܬܝܬܘܢ ܡܬܡܨܝܢܝ̣ܬܐ ܗ̱ܝ ܟܕܒܘܬܐ ܥܠ ܟܠ ܚܕ ܡ̣ܢ ܗ̇ܢܘܢ ܕܒܗ ܕܝ̣ܠܢܐܝܬ. ܡܕܝܢ ܘܥܠ ܟܠܗ ܐܟܚܕܐ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܕܗ̇ܘ ܕܠܐ ܝ̣ܕܝ̣ܥ. ܠܐ ܟܐܢܐ ܕܢܚܪܘܩ ܥܠܘܗܝ ܕܫܪܝ̣ܪ. ܘܓܠܝܐ ܕܠܣܘܓܐܐ ܕܗ̇ܢܘܢ ܕܡ̣ܢ ܙܒܢܐ ܕܡܫܝ̣ܚܐ܆ ܘܥܕܡܐ ܠܙܒܢܐ ܗܢܐ. ܠܘ ܚܬܝ̣ܬܐܝܬ ܝ̇ܕܥܝ̣ܢܢ. ܐܝܟܢܐ ܡܕܝܢ ܢܗܝܡܢ ܠܗ̇ܘ ܡܐ ܕܣܗ̣ܕܘ.

 

 

 

ܣܥܝܐ ܚܡܝܫܝܐ

 

ܐܡܪܝܢ ܕܗܐ ܡܓܘ̈ܫܐ ܠܦܘܬ ܣܓܝܐܘܬܗܘܢ. ܘܟܠܗܘܢ ܐܬܪ̈ܘܬܐ ܕܡܕܢܚ ܓܪܒܝ ܣܗܕܝ̣ܢ ܠܙܪܘܕܫܬ ܢܒܝܗܘܢ. ܕܬܕܡܪ̈ܬܐ ܪܘܪ̈ܒܬܐ ܣ̇ܥܪ ܗܘܐ. ܕܦܫܝ̣ܩܬܗܝܢ܆ ܗ̇ܝ ܕܒܓܘ ܓܘܙܠܬܐ ܪܒܬܐ ܕܢܘܪܐ ܥܐܠ ܗܘܐ ܘܝܬܒ ܘܡܠܦ ܗܘܐ ܠܫܡܘ̈ܥܘܗܝ. ܒܕܓܘܢ ܐܢ ܣܗܕܘܬܐ ܬܟܝ̣ܒܬܐ ܡܬܗܝܡܢܢܝ̣ܬܐ ܗ̱ܝ. ܢܒܝܐ ܙܕܩ ܕܬܩܒܠܘܢܝܗܝ ܠܙܪܘܕܫܬ ܡܓܘܫܐ. ܘܗܐ ܠܘ ܗܟܢܐ.

 

 

 

ܣܥܝܐ ܫܬܝܬܝܐ

 

ܐܡܪܝܢ ܕܟܠ ܬܘܢܝܐ ܕܥܠ ܨܒܘܬܐ ܡܕܡ ܕܒܙܒܢܐ ܕܥܒ̣ܪ ܡܬܐܡܪܐ ܕܗܘܬ݀. ܠܘ ܠܐ ܡܨܝܐ ܕܢܣܒܪ ܥܠܘܗܝ. ܕܡ̣ܢ ܒܪܢܫܐ ܐ̱ܢܫ ܒܥܠܬ݀ ܚܫܐ ܐܘ ܢܝ̣ܫܐ ܡܕܡ ܐܙܕܪܥ. ܐܝ̣ܛܐ ܐܬܛܒܒ ܠܘܬ ܣܓܝ̈ܐܐ. ܘܗܟܢܐ ܡ̣ܢ ܣܓܝ̈ܐܐ ܠܣܓܝ̈ܐܐ܆ ܥܕܡܐ ܕܐܬܝܒܠ ܠܘܬܢ. ܘܟܕ ܗܕܐ ܡܬܡܨܝܢܘܬܐ ܠܟܠ ܬܘܢܝܐ ܕܥܠ ܨܒܘܬܐ ܕܒܙܒܢܐ ܕܥܒܪ ܢܩܦܐ. ܡܨܝܐ ܕܐܦ ܗ̣ܘ ܗܢܐ ܬܘܢܝܐ ܡ̣ܢ ܕܐܝܟ ܗܠܝܢ ܢܗܘܐ. ܘܡ̣ܢ ܗܪܟܐ ܠܐ ܐܠܨܐ ܠܡܩܒܠܘܬܗ.

 

 

 

ܣܥܝܐ ܫܒܝܥܝܐ

 

ܐܡܪܝܢ ܕܟܕ ܒܝܕ ܬܟܝ̣ܒܘܬ ܣܗܕ̈ܘܬܐ. ܐܦܠܐ ܐܢ ܡܬܘܡ ܗܘܐ ܒܥܠܡܐ ܡܫܝ̣ܚܐ ܡܨܝܬܘܢ ܕܬܫܪܪܘܢ. ܐܝܟܢܐ ܡܨܝܬܘܢ ܠܡܫܪܪܘ ܕܐܡ̣ܪ ܥܠ ܢܦܫܗ ܙܦܠܢ ܘܣܥ̣ܪ ܙܦܠܢ. ܘܐܝ̇ܕܐ ܗ̱ܝ ܠܟܘܢ ܐܘܪܚܐ ܐ̱ܚܪܬܐ ܕܡܚܘܝܢܘܬܐ. ܥܠ ܗ̇ܝ ܕܟܠܗܝܢ ܗܠܝܢ ܕܪ̈ܫܝ̣ܡܢ ܒܐܘܢܓܠܝܘܢ ܡܗܘܐ ܗܘܝ̈. ܒܗ̇ܝ ܕܒܥܬܐ ܗܕܐ ܫܡܥܢܝܬܐ ܗ̱ܝ ܘܠܘ ܡܬܗܘܢܢܝ̣ܬܐ. ܘܟܠ ܒܥܬܐ ܕܠܘ ܡܬܗܘܢܢܝ̣ܬܐ ܗ̱ܝ. ܠܐ ܡܨܝܐ ܕܒܡܚܘܝܢܘܬܐ ܚܘܫܒܝܬܐ ܬܩܘܡ ܐܦܘܕܝ̣ܟܣܝ̣ܣ ܕܥܠܝܗ̇.

 

 

 

ܢܝܫܐ ܕܬܪܝܢ ܡܛܠ ܫܪܝܐ ܕܥܣܝ̈ܐ ܗܠܝܢ ܐܟܚܕܐ. ܐܝܟ ܕܡ̣ܢ ܠܘܬܢ

 

ܐܡܪܝܢܢ ܕܝ̣ܕܥܬܐ ܗ̇ܝ ܕܡ̣ܢ ܬܟܝ̣ܒܘܬ ܣܗܕ̈ܘܬܐ ܠܢ ܗܘܝܐ܇ ܝ̣ܕܥܬܐ ܗ̱ܝ ܐܢܢܩܝܬܐ. ܒܗ̇ܝ ܕܝ̣ܕܥܬܐ ܐܢܢܩܝܬܐ ܕܡ̣ܢ ܬܟܝ̣ܒܘܬ ܣܗܕ̈ܘܬܐ ܗ̇ܝ ܗ̣ܝ ܕܐܦܢ ܡܚܘܝܢ̈ܘܬܐ ܡܒܛܠܢ̈ܝܬܐ ܘܬܚܘ̈ܝܬܐ ܣܘܓܐܐ ܣܩܘܒ̈ܠܝܬܐ ܡܬܬܝ̈ܬܝܢ ܠܒܘܛܠܗ̇. ܠܐ ܣܟ ܡܬܪܡܐ ܠܡܬܦܠܓܘ ܥܠܝܗ̇ ܗ̇ܘ ܕܐܕܪܟܗ̇. ܐܝܟ ܝ̣ܕܥܬܢ ܕܗܘܐ ܒܥܠܡܐ ܚܟܝܡܐ ܐ̱ܢܫ ܕܫܡܗ ܐܪܝ̣ܣܛܘܛܠܝ̣ܣ. ܒܕܓܘܢ ܘܐܦܢ ܪܒܘ̣ ܡܚܘ̈ܝܢܘܢ ܘܬܚܘ̈ܝܢ ܡܫܬܡܪ̈ܢ ܕܠܐ ܗܘܐ ܒܥܠܡܐ ܗܢܐ ܐܪܝ̣ܣܛܘܛܠܝ̣ܣ. ܠܐ ܣܟ ܡܬܪܡܝܢܢ ܠܡܬܦܠܓܘ ܥܠ ܝ̣ܕܥܬܢ ܕܗܘܐ ܒܥܠܡܐ ܚܟܝ̣ܡܐ ܐܪܝ̣ܣܛܘܛܠܝ̣ܣ. ܒܗ̇ ܒܕܡܘ̣ܬܐ ܡܕܝܢ ܢܣܒܢ ܢܣܝܢ ܣܥܝܝ̈ܟܘܢ ܒܗܘܢܝ̈ܢ. ܕܠܐ ܡܬܘܡ ܡܨܝܢ ܠܡܦܫܟܘܬܢ ܥܠ ܗ̇ܝ ܕܡܫܝ̣ܚܐ ܡܪܢ ܐܬܚܙܝ ܒܥܠܡܐ ܘܐܡ̣ܪ ܥܠ ܢܦܫܗ ܙܦܠܢ. ܘܣܥ̣ܪ ܙܦܠܢ. ܘܟܕ ܠܗ̇ ܠܗܕܐ ܡ̣ܢ ܬܟܝ̣ܒܘܬ ܣܗܕ̈ܘܬܐ ܩܒܠܢܢ. ܡ̣ܢ ܗܘܢܐ ܐܬܗܕܝ̣ܢܢ ܠܘܬ ܗ̇ܝ ܕܐܠܘ ܠܐ ܫܪܝ̣ܪ ܗܘܐ ܐܦܠܐ ܬܕܡܪ̈ܬܐ ܥܠ ܐܝܕܘ̈ܗܝ ܐܣܬܥܪ̈ܝܢ ܗܘܝ̈. ܘܡ̣ܢ ܗܪܟܐ ܐܫܬܪܪܢܢ ܕܝ̣ܕܥܬܐ ܗܕܐ ܕܡ̣ܢ ܬܟܝ̣ܒܘܬ ܣܗܕ̈ܘܬܐ ܐܕܪܟܢܢ܇ ܝ̣ܕܥܬܐ ܗ̱ܝ ܐܢܢܩܝܬܐ. ܘܡܛܠ ܗܕܐ ܠܐ ܫܘ̈ܝܝ ܠܦܘܢܝܐ ܐܝܬܝܗܘܢ ܡܢܢ ܣܥܝܝ̈ܟܘܢ. ܒܗ̇ܝ ܕܦܘܢܝܝ̈ܗܘܢ ܐܝܟܢ ܕܗ̣ܘ ܡܬܩܢܝܢܝ̣ܬܐ ܗ̱ܝ ܝ̣ܕܥܬܗܘܢ. ܘܕܒܝܕ ܝ̣ܕܥܬܐ ܡܬܩܢܝܢܝ̣ܬܐ ܢܫܪܪ ܠܝ̣ܕܥܬܢ ܐܢܢܩܝܬܐ܆ ܫܟܝ̣ܪܐ. ܒܕ ܗ̇ܝ ܕܒܗܦܟܐ ܗ̣ܝ ܫܪܝܪܐ. ܟܐܡܬ݀ ܕܒܝܕ ܝܕܥܬܐ ܐܢܢܩܝܬܐ ܬܫܬܪܪ ܝ̣ܕܥܬܐ ܡܬܩܢܝܢܝ̣ܬܐ.

 

 

 

 

 

 

     #1 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܪܒܝܥܝܬܐ. ܡܛܠ ܫܘܘ̈ܕܥܐ ܕܝ̣ܠܢܝ̈ܐ ܕܒܬܟܝ̣ܒܘܬ ܣܗܕ̈ܘܬܐ ܡܫܪܪܝ̣ܢ ܡܬܒܪܢܫܢܘܬܗ ܕܐܠܗܐ ܡܠܬܐ. ܘܡܛܠ ܫܪܝܐ ܕܣܩܘܒܠܝܘܬ ܡ̈ܠܐ ܕܠܘܩܒܠܗܘܢ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠܬܗܘܢ ܕܝܠܗܘܢ ܕܫܘܘ̈ܕܥܐ ܕܐܝܬܝܗܘܢ ܬܪܝܢ. ܢܒܝܘ̈ܬܐ ܕܡ̣ܢ ܩܕܝ̣ܡ ܘܬܕܡܪ̈ܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܗܕ̈ܘܬܐ ܢܒܝܝ̈ܬܐ. ܣܗܕܘܬܐ ܩܕܡܝܬܐ

 

ܗ̇ܝ ܕܪܝܫ ܐܒܗ̈ܬܐ ܝܥܩܘܒ ܕܐܡ̣ܪ. ܠܐ ܢܥܢܕ ܫܒܛܐ ܡ̣ܢ ܝܗܘܕܐ܆ ܘܡܒܕܩܢܐ ܡ̣ܢ ܒܝܬ ܪ̈ܓܠܘܗܝ. ܥܕܡܐ ܕܢܐܬܐ ܡ̇ܢ ܕܝܠܗ ܗ̣ܝ. ܘܠܗ ܢܣܟܘܢ ܥܡ̈ܡܐ܇ ܘܐܠܘ ܠܐ ܡܪܢ ܗܘܝܘ ܗ̇ܘ ܕܡܣܬܟܐ ܗܘܐ. ܠܐ ܙܕܩ ܗܘܐ ܕܒܛܠܬ݀ ܡ̣ܢ ܐܝܣܪܐܝܠ ܡܠܟܘܬܐ ܕܥܠܝܗ̇ ܡܫܘܕܥ ܫܒܛܐ. ܐܦܠܐ ܢܒܝܐ ܕܗܘܝܘ ܡܒܕܩܢܐ. ܘܟܕ ܠܝܬ ܠܗܘܢ ܠܐ ܡܠܟܐ ܐܦܠܐ ܢܒܝܐ. ܡ̣ܢ ܟܕܘ ܐܬܐ ܠܗ ܗ̇ܘ ܕܡܣܬܟܐ ܗܘܐ. ܘܟܕ ܗܘܝܘ ܫܪܝ̣ܪܐܝܬ܆ ܐܠܨܐ ܕܐܦ ܣܗܕܘܬܐ ܫܪܝ̣ܪܬܐ ܬܗܘܐ. ܟܐܡܬ݀ ܕܒܪܗ ܗ̣ܘ ܕܐܠܗܐ. ܘܒܪܗ ܕܐ̱ܢܫ. ܒܗ̇ܝ ܕܐܠܘ ܟܕܒ ܗܘܐ܆ ܠܘ ܗܘܝܘ ܗܘܐ ܗ̇ܘ ܕܡܣܬܟܐ.

 

 

 

ܣܗܕܘܬܐ ܕܬܪܬܝܢ

 

ܗ̇ܝ ܕܘܝܕ ܕܐܡ̣ܪ. ܦܠܓܘ ܢܚ̈ܬܝ ܒܝܢܬܗܘܢ ܘܥܠ ܠܒܘܫܝ ܐܪܡܝ̣ܘ ܦܣ̈ܐ. ܘܗ̣ܝ ܗܕܐ ܢܒܝܘܬܐ ܘܠܐ ܣܟ ܥܠ ܦܘܫܩܐ ܣܢܝ̣ܩܐ. ܒܗ̇ܝ ܕܐܝܟ ܕܐܝܬܝܗ̇ ܐܫܬܡܫܬ݀ ܒܙܩܝ̣ܦܘܬܗ ܕܡܪܢ. ܐܟܡܐ ܕܗ̣ܝ ܬܟܝ̣ܒܘܬ ܣܗܕ̈ܘܬܐ ܡܫܪܪܐ.

 

 

 

ܣܗܕܘܬܐ ܕܬܠܬ

 

ܗ̇ܝ ܕܐܫܥܝܐ ܕܐܡ̣ܪ. ܗܐ ܒܬܘܠܬܐ ܬܒܛܢ ܘܬܐܠܕ ܒܪܐ܆ ܘܢܬܩܪܐ ܫܡܗ ܥܡܢܘܐܝܠ. ܘܗܕܐ ܬܘܒ ܢܒܝܘܬܐ ܗ̱ܝ ܓܠܝ̣ܬܐ.

 

 

 

ܣܗܕܘܬܐ ܕܐܪܒܥ

 

ܗ̇ܝ ܕܐܪܡܝܐ ܕܐܡ̣ܪ. ܗܐ ܝܘ̈ܡܬܐ ܐܬܝܢ ܐܡ̇ܪ ܡܪܝܐ. ܘܐܩܝ̣ܡ ܠܕܒܝܬ ܐܝܣܪܐܝܠ ܘܠܕܒܝܬ ܝܗܘܕܐ ܕܝܬܝܩܝ ܚܕܬܐ. ܠܐ ܐܝܟ ܗ̇ܝ ܕܝܬܝ̣ܩܝ ܕܐܩܝܡܬ ܥܡ ܐܒܗܝ̈ܗܘܢ ܒܝܘܡܐ ܕܐܚܕܬ ܒܐܝܕܝ̈ܗܘܢ. ܘܐܦܩܬ ܐܢܘܢ ܡ̣ܢ ܐܪܥܐ ܕܡܨܪܝܢ. ܘܗܐ ܗ̇ܝ ܕܝܬܝ̣ܩܝ̣ ܚܕܬܐ ܕܒܝܕ ܡܫܝ̣ܚܐ ܠܗ̇ܢܘܢ ܕܗܝܡܢܘ ܡ̣ܢ ܒܢܝ̈ ܐܝܣܪܐܝܠ. ܘܡ̣ܢ ܟܠܗܘܢ ܥܡ̈ܡܐ ܐܬܬܩܝ̣ܡܬ݀.

 

 

 

ܣܗܕܘܬܐ ܕܚܡܫ

 

ܗ̇ܝ ܕܕܢܝܐܝܠ ܕܐܡ̣ܪ ܠܗ ܡܠܐܟܐ ܕܡܪܝܐ. ܕܫܒܥܝ̣ܢ ܫܒܘ̈ܥܝܢ ܢܬܬܢܝ̣ܚܘܢ ܥܠ ܥܡܟ. ܘܒܬܪ ܩܠܝ̣ܠ܆ ܘܠܡܐܬܐ ܡܫܝ̣ܚܐ ܡܠܟܐ ܫܒܘ̈ܥܐ ܫܒܥܐ. ܘܫܒܘ̈ܥܐ ܫܬܝܢ ܘܬܪܝܢ. ܘܒܬܪ ܫܒܘ̈ܥܐ ܫܬܝܢ ܘܬܪܝܢ܇ ܢܬܩܛܠ ܡܫܝ̣ܚܐ ܘܠܐ ܐܝܬ ܠܗ̇. ܘܩܪܝ̣ܬܐ ܕܩܘܕ̈ܫܐ ܬܬܚܒܠ. ܥܡ ܡܠܟܐ ܕܐܬܐ. ܘܓܠܝܐ ܕܫܢܝ̈ܐ ܕܥܒܕܝ̣ܢ ܗܠܝܢ ܫܒܘ̈ܥܐ ܒܨܝ̣ܪ̈ܢ ܡ̣ܢ ܐܠܦ ܫܢܝ̈ܢ. ܘܗܐ ܡ̣ܢ ܡܫܝ̣ܚܐ ܘܥܕܡܐ ܠܝܘܡܐ܆ ܩܪܝ̣ܒܘܬܐ ܕܐܠܦ ܘܡܐܬܝܢ ܘܫܒܥܝܢ ܘܐܪܒܥ ܫܢܝ̣̈ܢ. ܫܒ̇ܩ ܐ̱ܢܐ ܫܢܝ̈ܐ ܗܠܝܢ ܕܡ̣ܢ ܕܢܝܐܝܠ ܥܕܡܐ ܠܡܫܝ̣ܚܐ. ܘܠܐ ܐܬܐ ܡܫܝ̣ܚܐ ܐ̱ܚܪܢܐ. ܘܡ̣ܢ ܗܪܟܐ ܐܠܨܐܝܬ ܝ̣ܕܥܢܢ ܕܗܘܝܘ ܡܫܝ̣ܚܐ ܫܪܝ̣ܪܐ ܗ̇ܘ ܕܣܒܪܘ ܢܒܝ̈ܐ ܡܐܬܝܬܗ. ܘܕܗ̣ܘ ܡܫܝ̣ܚܐ ܠܘ ܒܪܢܫܐ ܗ̱ܘ ܫܚܝ̣ܡܐ. ܐܦܠܐ ܐܝܟ ܚܕ ܡ̣ܢ ܢܒܝ̈ܐ. ܡܠܘ̈ܗܝ ܣܗ̈ܕܢ. ܘܕܡܠܘ̈ܗܝ ܫܪܝ̣ܪ̈ܢ܆ ܝ̣ܕܝ̣ܥܐ ܡ̣ܢ ܗ̇ܝ ܕܐܠܘܠܐ ܫܪܝ̣ܪ̈ܢ ܗܘܝ̈܇ ܠܘ ܗܘܝܘ ܗܘܐ ܗ̇ܘ ܕܐܣܬܒܪܬ݀ ܡܐܬܝܬܗ. ܘܟܕ ܗܘܝܘ ܒܫܪܪܐ. ܡ̣ܢ ܐܠܨ̈ܬܐ ܫܪܝ̣ܪ̈ܢ ܡܠܘ̈ܗܝ.

 

 

 

ܢܝܫܐ ܬܪܝܢܐ ܡܛܠ ܬܕܡܪ̈ܬܐ ܬܡܝ̣̈ܗܬܐ ܕܡܫܘ̈ܕܥܢ ܡܬܒܪܢܫܢܘܬܗ ܕܐܠܗܐ ܡܠܬܐ ܩܕܡܝܬ݀ ܥܘܬܕܐ

 

ܐܡܪܝܢܢ ܕܬܕܡܘܪܬܐ ܣܥܘܪܘܬܐ ܡܕܡ ܐܝܬܝܗ̇. ܕܡܫܚܠܦܐ ܡ̣ܢ ܥܝ̈ܕܐ ܕܟܝܢܐ. ܘܗ̇ܝ ܕܐܝܟ ܗܕܐ ܠܐܠܗܐ ܒܠܚܘܕ ܡܨܝܐ ܕܒܪܘܝܗ ܗ̣ܘ ܕܟܝܢܐ. ܘܗ̣ܘ ܐܠܗܐ܆ ܐܝܬ ܐܡܬܝ ܕܒܐܝ̈ܕܝ ܡܨܥܝܐ ܡܕܡ ܣܥ̇ܪ ܠܗ܇ ܐܝܟ ܬܕܡܪ̈ܬܐ ܕܣ̇ܥܪ ܒܐܝ̈ܕܝ ܩܕܝ̈ܫܐ. ܐܘ ܡܢܗ ܘܠܗ. ܐܝܟ ܒܪܝ̣ܬܗ ܕܠܥܠܡܐ ܗܢܐ ܡ̣ܢ ܠܐ ܡܕܡ. ܒܕܓܘܢ ܟܕ ܒܪܢܫܐ ܐ̱ܢܫ ܢܐܡܪ ܡܠܬܐ ܡܕܡ. ܘܢܒܥܐ ܡ̣ܢ ܐܠܗܐ ܕܐܢ ܗ̣ܘ ܕܫܪܝ̣ܪ ܢܣܥܘܪ ܒܐܝ̈ܕܘܗܝ ܬܕܡܘܪܬܐ ܡܕܡ. ܐܝ̣ܛܐ ܢܣܥܪܝܗ̇ ܠܗܕܐ ܐܠܗܐ ܒܐܝ̈ܕܘܗܝ. ܐܢܢܩܐܝܬ ܟܠܢܫ ܝ̇ܕܥ ܕܡ̣ܢ ܐܠܗܐ ܡܡܠܠ ܘܣ̇ܥܪ ܒܪܢܫܐ ܗ̱ܘ. ܗ̇ܘ ܡܐ ܕܡܡܠܠ ܘܣ̇ܥܪ. ܒܗ̇ܝ ܕܐܠܗܐ ܠܘ ܡܫܪܪܢܐ ܗ̱ܘ ܕܕܓܠܘܬܐ ܚܣ. ܘܗ̣ܝ ܗܕܐ ܐܝܟ ܗ̇ܝ. ܕܟܕ ܢܗܘܐ ܝܬܝ̣ܒ ܡܠܟܐ ܐ̱ܢܫ ܥܠ ܟܘܪܣܝ ܪܒܘܬܗ. ܘܢܦܘܩ ܛܠܝܐ ܐ̱ܢܫ ܘܢܐܡܪ ܕܐܢܐ ܒܪܗ ܐܝܬܝ ܕܡܠܟܐ. ܘܟܕ ܚܙܐ ܠܗ̇ܢܘܢ ܕܡܛܝܒܝ̣ܢ ܕܡܬܦܫܟܝ̣ܢ ܥܠ ܡܠܬܗ. ܢܐܡܪ ܠܡܠܟܐ. ܕܐܢܗܘ ܕܫܪܝ̣ܪ ܐ̱ܢܐ ܒܡܠܬܝ ܐܘܬܒܝܢܝ ܥܡܟ ܥܠ ܬܪܘܢܘܣ ܕܝܠܟ. ܘܗ̣ܘ ܡܠܟܐ ܕܠܐ ܬܘܗܝ ܢܣܡܟܝ̣ܘܗܝ ܥܡܗ. ܐܢܢܩܐܝܬ ܟܠܗܘܢ ܗ̇ܢܘܢ ܕܡܛܝܒܝ̣ܢ ܡܗܝܡܢܝ̣ܢ ܕܒܪܗ ܗ̣ܘ ܗ̇ܘ ܕܡܠܟܐ. ܒܗ̇ ܒܕܡܘ̣ܬܐ ܡܕܝܢ ܘܡܪܢ ܡܫܝ̣ܚܐ. ܟܕ ܐܝܟ ܒܪܢܫܐ ܒܥܠܡܐ ܐܬܚܙܝ. ܘܕܡܘ̣ܬܐ ܕܥܒܕܐ ܢܣ̣ܒ. ܘܐܡ̣ܪ ܕܡ̣ܢ ܠܥܠ ܗ̣ܘ. ܘܡ̣ܢ ܥܘܒ ܐܒܐ ܢܦ̣ܩ ܘܐܬܐ ܠܥܠܡܐ. ܘܬܕܡܪ̈ܬܐ ܬܡܝ̣̈ܗܬܐ ܥܡܗܝܢ ܕܡ̈ܠܐ ܗܠܝܢ ܒܐܝ̈ܕܘܗܝ ܐܣܬܥܪ̈ܝ. ܐܠܨܐܝܬ ܝ̣ܕܥܢܢ ܕܒܪܗ ܗ̣ܘ ܕܐܠܗܐ ܕܒܪܗ ܕܐ̱ܢܫܐ ܗܘܐ. ܘܟܕ ܗܠܝܢ ܗܟܢܐ ܐܢܝܢ܆ ܠܙܢܝ̈ܐ ܓܢܣܢܝ̈ܐ ܕܬܕܡܪ̈ܬܐ ܗ̇ܢܝܢ ܒܐܝ̈ܕܘܗܝ ܐܣܬܥܪ̈ܝܢ ܙܕܩ ܠܢ ܠܡܡܢܐ. ܘܐܝܬܝܗܝܢ ܬܠܬܐ ܓܢܣܝ̣̈ܢ.

 

 

 

ܓܢܣܐ ܩܕܡܝܐ

 

ܝ̣ܠܝ̣ܕܘܬܗ ܕܡ̣ܢ ܫܒܪܬܐ ܒܬܘܠܬܐ. ܐܘܟܝ̣ܬ ܡ̣ܢ ܛܠܝ̣ܬܐ ܕܠܐ ܡܢܣܝܐ ܒܙܘܘܓܐ.

 

 

 

ܬܕܡܘܬܐ ܕܬܪܬܝܢ

 

ܗ̇ܝ ܕܟܕ ܒܪܢܫܐ ܗ̣ܘܐ ܡܫܡܠܝܐ. ܠܐ ܡܬܘܡ ܩܪܒܬ݀ ܠܗ ܚܛܝ̣ܬܐ. ܠܐ ܒܚܘܫܒܐ ܐܦܠܐ ܒܡܡܠܠܐ. ܐܦܠܐ ܒܣܘܥܪܢܐ.

 

 

 

ܬܕܡܘܪܬܐ ܕܬܠܬ

 

ܫܘܚܠܦ ܕܡܘ̣ܬܗ ܕܒܛܘܪ ܬܒܘܪ ܘܡܡܠܠܗ ܕܥܡ ܡܘܫܐ ܘܐܠܝܐ.

 

 

 

ܬܕܡܘܪܬܐ ܕܐܪܒܥ

 

ܡܩܕܡܘܬ ܝ̣ܕܥܬܗ ܠܗ̇ܝ ܕܥܬܝ̣ܕܐ ܗܘܬ݀ ܕܬܗܘܐ. ܐܝܟ ܗ̇ܝ ܕܫܪܐܘܗܝ ܠܗܝܟܠܐ ܗܢܐ ܘܠܬܠܬܐ ܝܘܡܝ̈ܢ ܡܩܝ̣ܡ ܐ̱ܢܐ ܠܗ. ܘܐܝܟ ܗ̇ܝ ܕܐܡ̣ܪ ܠܫܡܥܘܢ ܕܡ̣ܢ ܩܕܡ ܕܢܩܪܐ ܬܪܢܘܓܠܐ ܬܠܬ ܙܒܢܝ̣̈ܢ ܬܟܦܘܪ ܒܝ. ܘܗܟܢܐ ܗ̣ܘܐ. ܘܫܪܟܐ ܕܐ̱ܚܪ̈ܢܝܬܐ.

 

 

 

ܬܕܡܘܪܬܐ ܕܚܡܫ

 

ܩܝܡܬܗ ܕܡ̣ܢ ܒܝܬ ܡܝ̈ܬܐ ܡ̣ܢ ܒܬܪ ܬܠܬܐ ܝܘܡܝ̈ܢ ܕܡܝ̣ܬ ܘܐܬܩܒܪ.

 

 

 

ܬܕܡܘܪܬܐ ܕܫܬ

 

ܡܣܩܬܗ ܕܠܫܡܝܐ ܠܥܝ̣ܢ ܟܠܗܘܢ ܬܠܡܝ̈ܕܘܗܝ.

 

 

 

ܬܕܡܘܪܬܐ ܕܫܒܥ

 

ܡܥܠܬܗ ܕܠܘܬ ܬܠܡܝ̈ܕܘܗܝ. ܟܕ ܬܪ̈ܥܐ ܐܚܝ̣ܕܝܢ.

 

 

 

ܓܢܣܐ ܬܪܝܢܐ

 

ܙܢܐ ܕܬܕܡܪ̈ܬܐ ܗ̇ܢܝܢ ܕܠܒܪ ܡ̣ܢ ܝܬܗ ܐܬܚܙܝܝ̈ܢ. ܘܗ̣ܘ ܗܢܐ ܓܢܣܐ܆ ܠܬܪܝܢ ܙܢܝ̣̈ܢ ܡܬܦܠܓ.

 

 

 

ܙܢܐ ܩܕܡܝܐ

 

ܬܕܡܪ̈ܬܐ ܗ̇ܢܝܢ ܕܠܗ ܢܩܦ̈ܝ. ܘܐܝܬܝܗܝܢ ܚܡܫ.

 

 

 

ܬܕܡܘܪܬܐ ܩܕܡܝܬܐ

 

ܡܠܐܟܐ ܕܐܠܗܐ ܕܐܬܐ ܠܘܬ ܪ̈ܥܘܬܐ ܒܠܠܝܐ ܘܬܫܒܘܚܬܗ ܕܡܪܝܐ ܐܢܗܪܬ݀ ܥܠܝܗܘܢ. ܘܕܚܠܘ ܕܚܠܬܐ ܪܒܬܐ ܘܐܡ̣ܪ ܠܗܘܢ ܡܠܐܟܐ ܠܐ ܬܕܚܠܘܢ. ܗܐ ܓܝܪ ܡܣܒܪ ܐ̱ܢܐ ܠܟܘܢ ܚܕܘܬܐ ܪܒܬܐ ܕܬܗܘܐ ܠܟܠܗ ܥܠܡܐ. ܐܬܝ̣ܠܕ ܠܟܘܢ ܓܝܪ ܝܘܡܢܐ ܦܪܘܩܐ ܕܐܝܬܘܗܝ ܡܪܝܐ ܡܫܝ̣ܚܐ ܒܡܕܝ̣ܢ̱ܬܗ ܕܕܘܝܕ. ܘܗܕܐ ܠܟܘܢ ܐܬܐ. ܡܫܟܚܝ̣ܬܘܢ ܥܘܠܐ ܕܟܪܝ̣ܟ ܒܥܙܪܘܪ̈ܐ ܘܣܝ̣ܡ ܒܐܘܪܝܐ. ܘܡ̣ܢܫܠܝ ܐܬܚܙܝ̣ܘ ܥܡ ܡܠܐܟܐ ܚܝܠܘ̈ܬܐ ܣܓܝ̈ܐܐ ܕܫܡܝ̈ܐ. ܟܕ ܡܫܒܚܝ̣ܢ ܠܐܠܗܐ ܘܐܡܪܝܢ. ܬܫܒܘܚܬܐ ܘܫܪܟܐ.

 

 

 

ܬܕܡܘܪܬܐ ܕܬܪܬܝܢ

 

ܡܐܬܝ̣ܬܐ ܕܡܓܘ̈ܫܐ ܡ̣ܢ ܡܕܢܚܐ ܠܣܓܕܬܗ ܘܩܘܪ̈ܒܢܐ ܕܩܪܒܘ ܠܗ ܐܝܟ ܕܠܡܪܐ ܘܡܠܟܐ. ܘܟܘܟܒܐ ܕܡܗܕܐ ܗܘܐ ܠܗܘܢ. ܘܚܠܡܐ ܕܚ̣ܙܘ ܕܠܐ ܢܗܦܟܘܢ ܠܘܬ ܐܝܪܘܕܝܣ.

 

 

 

ܬܕܡܘܪܬܐ ܕܬܠܬ

 

ܡܚܬܬܐ ܕܪܘܚܐ ܩܕܝܫܐ ܥܠܘܗܝ ܒܕܡܘ̣ܬ ܓܘܫܡܐ ܕܝܘܢܐ. ܘܩܠܐ ܕܗܘܐ ܡ̣ܢ ܫܡܝܐ ܕܐܡ̇ܪ ܐܢ̱ܬ ܗ̣ܘ ܒܪܝ ܚܒܝ̣ܒܐ ܒܟ ܐܨܛܒܝ̣ܬ.

 

 

 

ܬܕܡܘܪܬܐ ܕܐܪܒܥ

 

ܚܫܘܟܐ ܕܗܘܐ ܥܠ ܟܠܗ̇ ܐܪܥܐ ܒܙܩܝ̣ܦܘܬܗ. ܡ̣ܢ ܫܬܫܥܝ̈ܢ ܥܕܡܐ ܠܫܥ̈ܐ ܬܫܥ. ܘܨܪܝܐ ܕܐܦܝ̈ ܬܪܥܐ ܕܗܝܟܠܐ ܠܬܪܝܢ. ܡ̣ܢ ܠܥܠ ܥܕܡܐ ܠܬܚܬ. ܘܙܘܥܗ̇ ܕܐܪܥܐ ܘܡܨܛܪܝܢܘܬ ܟܐܦ̈ܐ.

 

 

 

ܬܕܡܘܪܬܐ ܕܚܡܫ

 

ܡܬܦܬܚܢܘܬ ܩܒܪ̈ܐ. ܘܩܝܡܬܐ ܘܡܦܩܬܐ ܕܦܓܪ̈ܐ ܣܓܝ̈ܐܐ ܕܩܕܝ̣̈ܫܐ ܕܫܟܝ̣ܒܝ̣ܢ ܗܘܘ. ܘܡܥܠܬܗܘܢ ܕܠܐܘܪܫܠܡ ܘܡܬܚܙܝܢܘܬܗܘܢ ܕܠܣܓܝ̈ܐܐ. ܒܬܪ ܩܝܡܬܗ.

 

 

 

ܙܢܐ ܬܪܝܢܐ ܕܓܢܣܐ ܬܪܝܢܐ

 

ܬܕܡܪ̈ܬܐ ܗ̇ܢܝܢ ܕܗ̣ܘ ܣܥ̣ܪ ܐܢܝܢ. ܘܟܕ ܣܓܝ̈ܐܢ ܥܣܪܝܢ ܡܢܗܝܢ ܡܢܝܢ.

 

 

 

ܬܕܡܘܪܬܐ ܩܕܡܝܬܐ

 

ܗ̇ܝ ܕܫܚܠܦ ܡܝ̈ܐ ܠܚܡܪܐ ܒܩܛܢܐ ܕܓܠܝ̣ܠܐ

 

 

 

ܬܕܡܘܪܬܐ ܕܬܪܬܝܢ

 

ܡܕܟܝܢܘܬܗ̇ ܕܠܓܪ̈ܒܐ.

 

 

 

ܬܕܡܘܪܬܐ ܕܬܠܬ

 

ܡܚܠܡܢܘܬܗ ܕܠܥܒܕܗ ܕܩܢܛܪܘܢܐ ܒܟܦܪܢܚܘܡ.

 

 

 

ܬܕܡܘܪܬܐ ܕܐܪܒܥ

 

ܡܚܠܡܢܘܬܗ ܕܠܚܡܬܗ ܕܦܛܪܘܣ.

 

 

 

ܬܕܡܘܪܬܐ ܕܚܡܫ

 

ܡܦܩܢܘܬܗ ܕܠܠܓܝܘܢ ܒܐܬܪܐ ܕܓܕܪ̈ܝܐ.

 

 

 

ܬܕܡܘܪܬܐ ܕܫܬ

 

ܡܐܣܝܢܘܬܗ ܕܠܡܫܪܝܐ ܗ̇ܘ ܕܫܒܘܗܝ ܡ̣ܢ ܬܛܠܝ̣ܠܐ ܒܢܨܪܬ݀.

 

 

 

ܬܕܡܘܪܬܐ ܕܫܒܥ

 

ܡܩܝ̣ܡܢܘܬܗ ܕܠܒܪܬ݀ ܝܘܐܪܫ.

 

 

 

ܬܕܡܘܪܬܐ ܕܬܡܢܐ

 

ܡܐܣܝܢܘܬܗ ܕܠܗ̇ܝ ܕܪܕܐ ܗܘܐ ܕܡܗ̇.

 

 

 

ܬܕܡܘܪܬܐ ܕܬܫܥ

 

ܡܐܣܝܢܘܬܗ ܕܠܗ̇ܘ ܕܚܪܫ ܘܥܘܝ̣ܪ ܘܐܝܬ ܠܗ ܕܝܘܐ.

 

 

 

ܬܕܡܘܪܬܐ ܕܥܣܪ

 

ܡܐܣܝܢܘܬܗ ܕܠܗ̇ܘ ܕܝܒܝ̣ܫܐ ܐܝܕܗ.

 

 

 

ܬܕܡܘܪܬܐ ܕܝ̄ܐ

 

ܡܩܝ̣ܡܢܘܬܗ ܕܠܒܪܗ̇ ܕܐܪܡܠܬܐ.

 

 

 

ܬܕܡܘܪܬܐ ܕܝܒ̄

 

ܡܚܠܡܢܘܬܗ ܕܠܡܫܪܝܐ ܐ̱ܚܪܢܐ.

 

 

 

ܬܕܡܘܪܬܐ ܕܝܓ̄

 

ܡܣܒܥܢܘܬܗ ܡ̣ܢ ܚܡܫܐ ܠܚܡܝ̈ܢ ܠܚܡܫܐ ܐܠܦܝ̈ܢ. ܘܝ̣ܬܪ ܬܪܥܣܪ ܩܘܦܝ̣̈ܢܝ̣ܢ.

 

 

 

ܬܕܡܘܪܬܐ ܕܝܕ̄

 

ܡܣܓܝܢܘܬܗ ܕܠܗܠܝܢ ܫܒܥܐ ܠܚܡܝ̈ܢ.

 

 

 

ܬܕܡܘܪܬܐ ܕܝܗ̄

 

ܗ̇ܝ ܕܦܬܚ ܠܣܡܝܐ ܛܝ̣ܡܝ.

 

 

 

ܬܕܡܘܪܬܐ ܕܝܘ̄

 

ܗ̇ܝ ܕܦܬܚ ܠܣܡܝܐ ܐ̱ܚܪܢܐ ܕܡ̣ܢ ܟܪܣ ܐܡܗ.

 

 

 

ܬܕܡܘܪܬܐ ܕܝܙ̄

 

ܡܚܠܡܢܘܬܗ ܕܠܗ̇ܘ ܕܗܘܐ ܠܗ ܒܪ ܐܓܪܐ.

 

 

 

ܬܕܡܘܪܬܐ ܕܝܚ̄

 

ܡܚܠܡܢܘܬܗ ܕܠܗ̇ܘ ܕܟܢܝ̣ܫ ܗܘܐ ܡܝ̈ܐ.

 

 

 

ܬܕܡܘܪܬܐ ܕܝ̄ܛ

 

ܡܢܚܡܢܘܬܗ ܕܠܠܥܙܪ.

 

 

 

ܬܕܡܘܪܬܐ ܕܟܟ̄

 

ܡܘܒܫܢܘܬܗ ܕܠܬܬܐ ܒܙܒܢ ܐܕܪ. ܫܒ̇ܩ ܐ̱ܢܐ ܡܫܝܢܢܘܬܗ ܕܠܓܠܠܘ̈ܗܝ ܕܝܡܐ. ܣܓܝ̈ܐܬܐ ܐ̱ܚܪ̈ܢܝܬܐ ܕܟܬܝ̣̈ܒܢ ܘܕܠܐ ܟܬܝ̣̈ܒܢ.

 

 

 

ܓܢܣܐ ܬܠܝܬܝܐ

 

ܬܕܡܪ̈ܬܐ ܗ̇ܢܝܢ ܕܒܫܡܗ ܡ̣ܢ ܒܬܪ ܕܐܣܬܠܩ ܐܣܬܥܪ̈ܝܢ ܘܡܣܬܥܪ̈ܢ. ܘܗ̣ܘ ܗܢܐ ܓܢܣܐ ܬܘܒ܆ ܠܬܪܝܢ ܙܢܝ̈ܐ ܡܬܦܠܓ.

 

 

 

ܙܢܐ ܩܕܡܝܐ

 

ܬܕܡܪ̈ܬܐ ܗ̇ܢܝܢ ܡܬܪ̈ܓܫܢܝܬܐ ܘܐܝܬܝܗܝܢ ܬܡܢܥܣܪ̈ܐ.

 

 

 

ܬܕܡܘܪܬܐ ܩܕܡܝܬܐ

 

ܡܠܐܟ̈ܐ ܬܪܝܢ ܠܒܝ̣̈ܫܝ ܚܘܪ̈ܐ ܕܐܬܚܙܝ̣ܘ ܠܫܠܝ̣̈ܚܐ ܥܕܢ ܣܘܠܩܗ ܕܡܪܢ܇ ܘܐܡ̣ܪܘ ܠܗܘܢ. ܓܒܪ̈ܐ ܓܠܝ̣̈ܠܝܐ ܡܢܐ ܩܝ̇ܡܝܢ ܐܢ̱ܬܘܢ ܘܚܝܪܝܢ ܒܫܡܝܐ. ܗܢܐ ܝܫܘܥ ܕܐܣܬܠܩ ܡܢܟܘܢ ܠܫܡܝܐ. ܗܟܢܐ ܢܐܬܐ܆ ܐܟܡܐ ܕܚܙܝܬܘܢܝܗܝ ܕܣܠܩ ܠܫܡܝܐ.

 

 

 

ܬܕܡܘܪܬܐ ܕܬܪܬܝܢ

 

ܩܠܐ ܕܗܘܐ ܡ̣ܢ ܫܡܝܐ܆ ܐܝܟ ܕܪܘܚܐ ܥܙܝ̣ܙܬܐ. ܘܐܬܡܠܝ̣ ܗܘܐ ܡܢܗ ܟܠܗ ܒܝܬܐ ܗ̇ܘ ܕܒܗ ܝܬܒܝ̣ܢ ܗܘܘ ܫܠܝ̈ܚܐ. ܘܐܬܚܙܝ̣ܘ ܠܗܘܢ ܠܫܢ̈ܐ ܕܡܬܦܠܓܝ̣ܢ ܗܘܘ ܐܝܟ ܢܘܪܐ. ܘܝ̣ܬܒܘ ܥܠ ܚܕ ܚܕ ܡܢܗܘܢ. ܘܐܬܡܠܝ̣ܘ ܟܠܗܘܢ ܒܪܘܚܐ ܕܩܘܕܫܐ. ܘܐܩ̣ܦܘ ܠܡܡܠܠܘ ܒܠܫܢ ܠܫܢ. ܐܝܟܢܐ ܕܢܬܕܡܪܘܢ ܗ̇ܢܘܢ ܕܫܡܥܝ̣ܢ ܘܢܐܡܪܘܢ ܚܕ ܠܚܕ. ܕܗܠܝܢ ܟܠܗܘܢ ܕܡܡܠܠܝܢ. ܠܐ ܗܐ ܓܠܝ̣̈ܠܝܐ ܐܢܘܢ. ܐܝܟܢܐ ܚܢܢ ܫܡܥܝ̣ܢܢ ܐ̱ܢܫ ܐ̱ܢܫ ܠܫܢܗ ܕܒܗ ܝ̣ܠܝ̣ܕܝ̣ܢܢ. ܦܪ̈ܬܘܝܐ. ܡܕܝ̈ܐ. ܐܠܢܝ̈ܐ. ܣܘܪ̈ܝܝܐ. ܝܘ̈ܕܝܐ. ܩܦܕܘ̈ܩܝܐ. ܦܘܢܛܝ̈ܐ. ܐܣܝ̈ܝܐ. ܦܪ̈ܘܓܝܐ. ܦܡܦܘ̈ܠܝܐ. ܡܨܪ̈ܝܐ. ܠܘ̈ܒܝܐ. ܩܘܪ̈ܝ̣ܢܝܐ. ܪ̈ܘܡܝܐ. ܩܪ̈ܝܛܝܐ. ܥܪ̈ܒܝܐ. ܘܗܢܐ ܟܠܗ ܬܡܗܘ ܒܗܘܢ ܐ̱ܢܫ̈ܐ ܕܢܐܡܪܘܢ. ܗܠܝܢ ܡܐܪܝ̣ܬܐ ܐܫܬܝ̣ܘ ܘܪܘܝ̣ܘ.

 

 

 

ܬܕܡܘܪܬܐ ܕܬܠܬ

 

ܬܠܬܐ ܐܠܦܝ̣̈ܢ ܢܦ̈ܫܢ ܕܗܝܡܢܘ ܘܥܡ̣ܕܘ ܒܚܕ ܝܘܡܐ ܒܟܪܘܙܘܬܗ ܕܫܡܥܘܢ. ܘܐܡܝ̣ܢܝ̣ܢ ܗܘܘ ܒܝܘܠܦܢܐ ܕܫܠܝ̣̈ܚܐ. ܘܡܫܬܘܬܦܝ̣ܢ ܗܘܘ ܒܨܠܘܬܐ ܘܒܩܨܝܐ ܕܐܘܟܪܣܛܝܐ.

 

 

 

ܬܕܡܘܪܬܐ ܕܐܪܒܥ

 

ܚܓܝ̣ܪܐ ܗ̇ܘ ܕܡ̣ܢ ܟܪܣ ܐܡܗ ܕܡ̣ܢ ܐ̱ܚܪ̈ܢܐ ܡܬܛܥܢ ܗܘܐ ܘܡܬܬܝܬܐ ܘܡܬܬܣܝ̣ܡ ܒܬܪܥܐ ܕܗܝܟܠܐ ܕܡܬܩܪܐ ܫܦܝ̣ܪܐ. ܠܡܫܐܠ ܙܕܩܬܐ. ܘܐܡ̣ܪ ܠܗ ܫܡܥܘܢ. ܕܗܒܐ ܘܣܐܡܐ ܠܝܬ ܠܝ. ܐܠܐ ܡܕܡ ܕܐܝܬ ܠܝ ܝ̇ܗܒ ܐ̱ܢܐ ܠܟ. ܒܫܡܗ ܕܡܪܢ ܝܫܘܥ ܡܫܝ̣ܚܐ ܢܨܪܝܐ ܩܘܡ ܗܠܟ. ܘܐܚܕܗ ܒܐܝܕܗ ܕܝܡܝܢܐ ܘܐܩܝ̣ܡܗ. ܘܒܗ̇ ܒܫܥܬܐ ܫܪ̣̈ܝ ܪ̈ܓܠܘܗܝ ܘܥܩܒܘ̈ܗܝ. ܘܫܘܪ ܘܩܡ ܗܠܟ. ܘܥܠ ܥܡܗܘܢ ܠܗܝܟܠܐ ܟܕ ܡܗܠܟ ܘܡܫܘܪ ܘܡܫܒܚ ܠܐܠܗܐ. ܘܐܫܬܘܕܥܘܗܝ ܟܠܗ ܥܡܐ ܕܗܘܝܘ ܗ̇ܘ ܚܕܘܪܐ ܕܝܬܒ ܗܘܐ ܟܠܝܘܡ ܘܫܐܠ ܙܕܩܬܐ. ܘܬܡܗܘ ܘܐܬܕܡܪܘ ܥܠ ܡܕܡ ܕܗܘܐ. ܘܚܡܫܐ ܐܠܦܝ̈ܢ ܓܒܪ̈ܝܢ ܗܝܡܢܘ ܒܟܪܘܙܘܬܗ ܕܫܡܥܘܢ ܒܗܝܟܠܐ ܕܫܠܝܡܘܢ. ܟܕ ܐܡ̣ܪ ܠܗܘܢ ܕܠܘ ܒܚܝܠܢ ܐܘ ܒܫܘܠܛܢ ܥܒܕܢ ܕܢܗܠܟ ܗܢܐ ܚܓܝ̣ܪܐ܇ ܐܠܐ ܒܫܡܗ ܕܝܫܘܥ ܗ̇ܘ ܕܐܢ̱ܬܘܢ ܩܛܠܬܘܢ.

 

 

 

ܬܕܡܘܪܬܐ ܕܚܡܫ

 

ܚܢܢܝܐ ܗ̇ܘ ܕܛܫ̣ܝ ܡ̣ܢ ܕܡܝ̈ܗ̇ ܕܩܪܝ̣ܬܐ ܘܦܪܣܝܗ ܫܡܥܘܢ. ܘܡ̣ܢ ܕܚܠܬܗ ܢܦ̣ܠ ܘܡܝܬ. ܘܟܕ ܐܬܬ݀ ܐܢ̱ܬܬܗ. ܐܡ̣ܪ ܠܗ̇ ܫܡܥܘܢ. ܐܡ̣ܪܝ ܠܝ ܐܢ ܒܗܠܝܢ ܕܡܝ̈ܐ ܙܒܢܬܘܢ ܩܪܝ̣ܬܐ. ܘܟܕ ܕܓܠܬ݀܆ ܐܡ̣ܪ ܠܗ̇ ܫܡܥܘܢ. ܗܐ ܪ̈ܓܠܝܗܘܢ ܕܩܒܘܪ̈ܘܗܝ ܕܒܥܠܟܝ ܒܬܪܥܐ ܘܗ̣ܢܘܢ ܢܦܩܘܢܟܝ. ܘܒܗ̇ ܒܫܥܬܐ ܢܦܠܬ݀ ܩܕܡ ܪ̈ܓܠܝܗܘܢ ܘܡܝ̣ܬܬ݀.

 

 

 

ܬܕܡܘܪܬܐ ܕܫܬ

 

ܟܪ̈ܝܗܐ ܕܡܬܬܦܩܝ̣ܢ ܗܘܘ ܒܫܘ̈ܩܐ ܘܡܬܪܡܝܢ ܒܥܪ̈ܣܬܐ. ܕܐܡܬܝ ܕܢܗܘܐ ܐܬܐ ܫܡܥܘܢ. ܐܦܢ ܛܠܢܝ̣ܬܗ ܬܓܢ ܥܠܝܗܘܢ܆ ܡܬܐܣܝܢ. ܘܗܟܢܐ ܐܝܠܝܢ ܕܗܘܝܢ ܗܘܝ̈ ܠܗܘܢ ܪ̈ܘܚܐ ܛܢ̈ܦܬܐ܆ ܡܬܚܠܡܝ̣ܢ ܗܘܘ.

 

 

 

ܬܕܡܘܪܬܐ ܕܫܒܥ

 

ܐܬܘ̈ܬܐ ܘܬܕܡܪ̈ܬܐ ܕܡܣܬܥܪ̈ܢ ܗܘܝ̈ ܒܐܝ̈ܕܝ ܐܣܛܦܢܘܣ. ܘܕܠܐ ܡܫܟܚܝ̣ܢ ܗܘܘ ܠܡܩܡ ܠܘܩܒܠ ܚܟܡܬܐ ܘܪܘܚܐ ܕܡܡܠܠܐ ܗܘܬ݀ ܒܗ. ܐ̱ܢܫ̈ܐ ܗ̇ܢܘܢ ܕܕܪܫܝ̣ܢ ܗܘܘ ܥܡܗ ܡ̣ܢ ܟܢܘܫܬܐ ܕܠܝܒܪ̈ܛܝ̣ܢܘ. ܩܘܪ̈ܝ̣ܢܝܐ ܘܐܠܟܣܢܕܪ̈ܝܐ ܘܩܝ̣ܠܝ̣̈ܩܝܐ ܘܐܣܝܝ̈ܐ. ܘܟܕ ܡܚܪܩܝ̣ܢ ܗܘܘ ܫܢܝ̈ܗܘܢ ܥܠܘܗܝ. ܚܪ ܒܫܡܝܐ ܘܚ̣ܙܐ ܬܫܒܘܚܬܐ ܕܐܠܗܐ ܘܠܝܫܘܥ ܟܕ ܩܐܡ ܡ̣ܢ ܝܡܝ̣ܢܐ ܕܐܠܗܐ. ܘܟܕ ܐܣܗܕ ܣܗܕܘܬܐ ܗܕܐ ܐܚܕܘܗܝ ܘܐܦܩܘܗܝ ܠܒܪ ܡ̣ܢ ܡܕܝܢ̱ܬܐ ܘܪܓܡܘܗܝ. ܘܩܥܐ ܒܩܠܐ ܪܡܐ ܘܐܡ̣ܪ. ܡܪܢ ܠܐ ܬܩܝ̣ܡ ܠܗܘܢ ܗܕܐ ܚܛܝ̣ܬܐ ܘܫܟ̣ܒ.

 

 

 

ܬܕܡܘܪܬܐ ܕܬܡܢܐ

 

ܐܬܘ̈ܬܐ ܕܥܒ̇ܕ ܗܘܐ ܦܝܠܝܦܘܣ ܟܕ ܢܚܬ ܠܡܕܝܢ̱ܬܐ ܕܫܡܪ̈ܝܐ. ܘܡܟܪܙ ܠܗܘܢ ܥܠ ܡܫܝ̣ܚܐ. ܘܪ̈ܘܚܐ ܛܢ̈ܦܬܐ ܕܢܦ̈ܩܢ ܗܘܝ̈. ܘܡܫܪ̈ܝܐ ܘܡܚܓܪ̈ܐ ܕܡܬܐܣܝܢ ܗܘܘ.

 

 

 

ܬܕܡܘܪܬܐ ܕܬܫܥ

 

ܡܠܐܟܐ ܕܡܪܝܐ ܕܡܠܠ ܥܡ ܦܝ̣ܠܝܦܘܣ. ܘܫܕܪܗ ܠܬܝܡܢܐ ܒܐܘܪܚܐ ܡܕܒܪܝܬܐ ܕܢܚܬܐ ܡ̣ܢ ܐܘܪܫܠܡ ܠܓܙܐ. ܘܦܓܥܗ ܕܒܡܗܝܡܢܐ ܗ̇ܘ ܕܐܝܬܘܗܝ ܗܘܐ ܫܠܝ̣ܛܐ ܕܩܢܕܩ ܡܠܟܬܐ ܕܟܘ̈ܫܝܐ ܘܬܘܠܡܕܗ ܘܥܡܕܗ ܕܝܠܗ ܕܡܗܝܡܢܐ.

 

 

 

ܬܕܡܘܪܬܐ ܕܣܥܪ

 

ܘܚܙܘܐ ܕܐܬܚܙܝ̣ ܠܦܘܠܘܣ ܟܕ ܐܙ̇ܠ ܗܘܐ ܠܕܪܡܣܘܩ ܕܢܪܕܘܦ ܠܡܗܝ̈ܡܢܐ. ܘܓܗܘܪܘܬ ܥܝܢܘ̈ܗܝ ܡ̣ܢ ܢܘܗܪܐ ܕܐܙܠܓ ܥܠܘܗܝ. ܘܩܠܐ ܕܫܡ̣ܥ ܕܐܡ̇ܪ ܗܘܐ ܠܗ ܫܐܘܠ ܫܐܘܠ ܡܢܐ ܪܕܦ ܐܢ̱ܬ ܠܝ. ܘܫܪܟܐ. ܘܟܕ ܫܐܠ ܕܡ̇ܢ ܐܢ̱ܬ ܡܪܝ. ܡܪܢ ܐܡ̣ܪ܇ ܐܢܐ ܐ̱ܢܐ ܝܫܘܥ ܢܨܪܝܐ ܗ̇ܘ ܕܐܢ̱ܬ ܪܕܦ ܐܢ̱ܬ. ܘܬܫܕܪܬܗ ܕܠܘܬ ܬܠܡܝ̣ܕܐ ܕܫܡܗ ܚܢܢܝܐ. ܘܚ̣ܙܘ ܬܘܒ ܕܐܬܚܙܝ ܠܗ ܠܚܢܢܝܐ. ܟܕ ܣܡ ܐܝܕܗ ܥܠ ܦܘܠܘܣ ܐܬܦܬܚ̈ܝ ܥܝܢܘ̈ܗܝ ܟܕ ܢܦܠ ܡܢܗܝܢ ܡܕܡ ܕܕܡܐ ܠܩܠܦ̈ܐ. ܘܬܘܠܡܕܗ ܘܥܡܕܗ ܘܡܬܠܡܕܢܘܬܗ ܕܠܥܡ̈ܡܐ ܘܡܠܟ̈ܐ ܘܒܢܝ̈ ܐܝܣܪܐܝܠ ܥܠ ܝܫܘܥ ܕܗܘܝܘ ܒܪܗ ܕܐܠܗܐ. ܘܒܬܪ ܕܪܕܘܦܐ ܗܘܐ ܡܪܝ̣ܪܐ. ܟܪܘܙܐ ܗܘܐ ܫܪܝܪܐ ܕܕܚܠܬܐ ܕܟܪ̈ܣܛܝܢܐ.

 

 

 

ܬܕܡܘܪܬܐ ܕܝ̄ܐ

 

ܢܘܚܡܗ̇ ܕܬܠܡܝ̣ܕܬܐ ܕܫܡܗ̇ ܛܒܝ̣ܬܐ ܒܝܘܦܝ ܡܕܝܢ̱ܬܐ ܥܠ ܐܝܕܝ̈ ܫܡܥܘܢ. ܟܕ ܩܥܕ ܥܠ ܒܘܪ̈ܟܘܗܝ ܘܨܠܝ̣. ܘܐܬܦܢܝ̣ ܠܘܬ ܫܠܕܐ ܘܐܡ̣ܪ ܛܒܝ̣ܬܐ ܩܘܡܝ. ܗܝܕܝܢ ܦܬܚܬ݀ ܥܝܢܝ̈ܗ̇. ܘܟܕ ܚܙܬܗ ܠܫܡܥܘܢ܆ ܝܬܒܬ݀ ܘܐܘܫܛ ܠܗ̇ ܐܝܕܗ ܘܐܩܝ̣ܡܗ̇܇ ܘܩܪܐ ܠܩܕܝ̈ܫܐ ܘܠܐܪ̈ܡܠܬܐ ܘܝܗܒܗ̇ ܠܗܘܢ ܟܕ ܚܝܐ. ܘܐܬܝܕܥܬ݀ ܗܕܐ ܒܟܠܗ̇ ܡܕܝܢ̱ܬܐ. ܘܣܓܝ̈ܐܐ ܗܝܡܢܘ ܒܡܪܢ.

 

 

 

ܬܕܡܘܪܬܐ ܕܝܒ̄

 

ܚܙܘܐ ܕܚܙܐ ܩܘܪܢܝܠܝܘܣ ܩܢܛܪܘܢܐ ܕܡ̣ܢ ܐܝܛܐܠܝܩܝ ܣܦܝ̣ܪܐ ܒܩܣܪܝܐ ܡܕܝ̣ܢ̱ܬܐ܇ ܠܡܠܐܟܐ ܕܐܠܗܐ ܓܠܝܐܝܬ܆ ܒܬܫܥ̈ܫܥܝܢ ܒܐܝܡܡܐ ܘܐܡ̣ܪ. ܫܕܪ ܠܝܘܦܝ ܘܐܝܬܐ ܠܫܡܥܘܢ ܟܐܦܐ. ܕܫܪܐ ܒܒܝܬܗ ܕܫܡܥܘܢ ܒܘܪܣܝܐ ܥܠ ܝܕ ܝܡܐ. ܘܚܙܘܐ ܕܚܙܐ ܫܡܥܘܢ ܟܕ ܣܠܩ ܠܐܓܪܐ ܕܢܨܠܐ ܒܫܬܫܥܝ̈ܢ. ܫܡܝ̈ܐ ܟܕ ܦܬܝ̣ܚܝܢ. ܘܡܐܢܐ ܕܐܣܝ̣ܪ ܒܐܪܒܥ ܩܪ̈ܢܢ. ܘܫܐܒ ܗܘܐ ܡ̣ܢ ܫܡܝܐ ܥܠ ܐܪܥܐ. ܘܒܗ ܚܝ̈ܘܬܐ ܪ̈ܒܝ̣ܥܝܬ݀ ܪ̈ܓܠܐ ܘܪ̈ܚܫܐ ܘܦܪܚܬܐ. ܘܩܠܐ ܐܬܐ ܠܗ ܕܐܡ̇ܪ ܫܡܥܘܢ ܩܘܡ ܟܘܣ ܘܐܟܘܠ. ܐܙܪ ܗ̇ܝ ܕܟܠܗܘܢ ܗ̇ܢܘܢ ܕܠܐ ܕܟܝܢ܆ ܒܗܝܡܢܘܬܐ ܗ̱ܘ ܡܬܕܟܝܢ.

 

 

 

ܬܕܡܘܪܬܐ ܕܝܓ̄

 

ܫܫ̈ܠܬܐ ܬܪܬܝܢ ܕܢܦܠܝ̈ ܡ̣ܢ ܐܝܕܝ̈ ܫܡܥܘܢ ܟܕ ܚܒܝ̣ܫ ܒܝܬ ܐܣܝ̣ܪ̈ܐ. ܘܡܠܐܟܐ ܕܐܬܚܙܝ̣ ܠܗ ܘܐܡ̣ܪ. ܐܣܘܪ ܚܨܝ̈ܟ ܘܣܐܢ ܛܠܪ̈ܝܟ ܘܐܬܥܛܦ ܬܟܣܝ̣ܬܟ ܘܬܐ ܒܬܪܝ. ܘܢܦܩ ܘܐܙ̇ܠ ܗܘܐ ܒܬܪܗ. ܘܟܕ ܥܒ̣ܪܘ ܡܛܪܬܐ ܩܕܡܝܬܐ ܕܠܠܝܐ ܘܕܬܪܬܝܢ ܐܬܘ ܥܕܡܐ ܠܬܪܥܐ ܕܦܪܙܠܐ. ܘܐܬܦܬܚ ܠܗܘܢ ܡ̣ܢ ܨܒܘܬ ܢܦܫܗ.

 

 

 

ܬܕܡܘܪܬܐ ܕܝܕ̄

 

ܠܘܛܬܐ ܕܠܛ ܦܘܠܘܣ ܠܚܪܫܐ ܕܫܡܗ ܒܪ ܫܘܡܐ ܕܡܬܬܪܓܡ ܐܠܘܡܐܣ. ܘܐܡ̣ܪ ܠܗ ܕܗܫܐ ܐܝܕܗ ܕܡܪܝܐ ܥܠܝܟ܇ ܘܬܗܘܐ ܣܡܐ. ܘܒܗ̇ ܒܫܥܬܐ ܢܦܠ ܥܠܘܗܝ ܥܡܛܢܐ ܘܚܫܘܟܐ. ܘܡܬܟܪܟ ܗܘܐ ܘܒܥܐ ܕܡܢܘ̣ ܢܐܚܘܕ ܒܐܝܕܗ.

 

 

 

ܬܕܡܘܪܬܐ ܕܗ̄

 

ܣܓܝ̣ܦܐ ܗ̇ܘ ܕܡ̣ܢ ܟܪܣ ܐܡܗ ܕܡܡܬܘܡ ܠܐ ܗܠܟ ܗܘܐ. ܗ̇ܘ ܕܐܡ̣ܪ ܠܗ ܦܘܠܘܣ ܒܩܠܐ ܪܡܐ ܒܠܘܣܛܪܐ ܡܕܝܢ̱ܬܐ ܠܟ ܐܡ̇ܪ ܐ̱ܢܐ ܒܫܡܗ ܕܡܪܢ ܝܫܘܥ ܡܫܝܚܐ ܩܘܡ ܥܠ ܪ̈ܓܠܝܟ. ܘܫܘܪ ܩܡ ܘܗܠܟ. ܘܟܢܫܐ ܕܚ̣ܙܘ ܡܕܡ ܕܥܒ̣ܕ ܦܘܠܘܣ ܐܪܝ̣ܡܘ ܩܠܗܘܢ ܒܠܫܢܗ ܕܐܬܪܐ ܘܐܡܪܝܢ܇ ܕܐܠܗ̈ܐ ܐܬܕܡܝ̣ܘ ܒܒܢܝ̈ܢܫܐ ܘܢܚ̣ܬܘ ܠܘܬܢ. ܘܐܝܬܝ̣ܘ ܬܘܪ̈ܐ ܕܢܕܒܚܘܢ ܠܗܘܢ.

 

 

 

ܬܕܡܘܪܬܐ ܕܝܘ̄

 

ܥܠܝܡܬܐ ܗ̇ܝ ܩܨܘܡܬܐ ܒܦܝ̣ܠܝ̣ܦܘܣ ܡܕܝܢ̱ܬܐ ܕܐܝܬܝܗ̇ ܩܘܠܘܢܝܐ. ܕܩܥܝܐ ܗܘܬ݀ ܒܬܪ ܦܘܠܘܣ ܘܗ̇ܢܘܢ ܕܥܡܗ ܘܐܡܪܐ ܕܗܠܝܢ ܐ̱ܢܫ̈ܐ ܥܒܕܘ̈ܗܝ ܐܢܘܢ ܕܐܠܗܐ ܡܪܝܡܐ. ܘܡܣܒܪܝ̣ܢ ܠܟܘܢ ܐܘܪܚܐ ܕܚܝ̈ܐ. ܘܐܬܬܦܝ̣ܪ ܦܘܠܘܣ ܘܐܡ̣ܪ ܠܗ̇ ܠܪܘܚܐ ܗ̇ܝ. ܦܩ̇ܕ ܐ̱ܢܐ ܠܟܝ ܒܫܡܗ ܕܝܫܘܥ ܡܫܝܚܐ ܕܬܦܩܝ̣ܢ ܡܢܗ̇. ܘܒܗ̇ ܒܫܥܬܐ ܢܦܩܬ݀.

 

 

 

ܬܕܡܘܪܬܐ ܕܝܙ̄

 

ܙܘܥܐ ܪܒܐ ܕܗܘܐ ܒܒܝܬ ܐܣܝ̣ܪ̈ܐ܇ ܟܪ ܕܚܒܝ̣ܫܝ̣ܢ ܗܘܘ ܦܘܠܘܣ ܘܫܝ̣ܠܐ.

 

ܘܢܝܕܐ ܕܫܬܐܣ̈ܐ ܘܡܬܦܬܚܢܘܬ ܬܪ̈ܥܐ. ܘܗ̇ܝ ܕܟܕ ܚܙܐ ܢܛܪ ܒܝܬ ܐܣܝ̣ܪ̈ܐ ܗܠܝܢ܆ ܫܘܪ ܘܥܠ ܟܕ ܪܐܬ ܘܢܦ̣ܠ ܥܠ ܪ̈ܓܠܝܗܘܢ ܕܫܠܝ̈ܚܐ ܘܐܡ̣ܪ ܠܗܘܢ ܡܪܝ܆ ܡܢܐ ܘܠܐ ܠܝ ܠܡܥܒܕ ܐܝܟ ܕܐܚܐ. ܐܡܪܝܢ ܠܗ. ܗܝܡܢ ܒܡܪܢ ܝܫܘܥ ܡܫܝܚܐ܆ ܘܬܚܐ ܐܢ̱ܬ ܘܒܝܬܟ. ܘܒܪ ܫܥܬܗ ܗܝܡܢ ܘܥܡܕ ܗ̣ܘ ܘܟܠܗܘܢ ܒܢܝ̈ ܒܝܬܗ.

 

 

 

ܬܕܡܘܪܬܐ ܕܝܚ̄

 

ܚܝ̈ܠܐ ܪܘܪ̈ܒܐ ܕܥܒ̇ܕ ܗܘܐ ܐܠܗܐ ܒܐܣܝܐ ܒܐܝܕܗ ܕܦܘܠܘܣ. ܐܝܟܢܐ ܕܐܦ ܡ̣ܢ ܢܚܬܐ ܕܥܠ ܓܘܫܡܗ. ܣܘܕܪ̈ܐ ܐܘ ܪ̈ܘܩܥܐ ܡܝܬܝܢ ܗܘܘ ܘܣܝܡܝ̣ܢ ܥܠ ܟܪ̈ܝܗܐ ܘܡܬܚܠܡܝ̣ܢ ܗܘܘ. ܐܦ ܫܐܕ̈ܐ ܢܦܩܝ̣ܢ ܗܘܘ. ܐܦ ܓܝܪ ܘܐ̱ܢܫ̈ܐ ܫܚܝ̣̈ܡܐ ܡܘܕܝܢ ܗܘܘ ܥܠ ܫܐܕ̈ܐ ܟܕ ܐܡܪܝܢ ܡܘܡܝܢܢ ܠܟܘܢ ܒܫܡܗ ܕܝܫܘܥ ܗ̇ܘ ܕܡܟܪܙ ܦܘܠܘܣ. ܐܝܟܢܐ ܕܐܦ ܫܐܕܐ ܢܐܡܪ ܠܗܘܢ. ܕܠܝܫܘܥ ܡܫܬܘܕܥ ܐ̱ܢܐ. ܘܠܦܘܠܘܣ ܝ̇ܕܥ ܐ̱ܢܐ. ܐܢ̱ܬܘܢ ܕܝܢ ܡ̇ܢ ܐܢ̱ܬܘܢ.

 

 

 

ܙܢܐ ܬܪܝܢܐ ܕܓܢܣܐ ܬܠܝܬܝܐ

 

ܬܕܡܪ̈ܬܐ ܗ̇ܢܝܢ ܡܬܗܘܢܢ̈ܝܬܐ ܘܐܝܬܝܗܝܢ ܫܒܥ.

 

 

 

ܬܕܡܘܪܬܐ ܩܕܡܝܬܐ

 

ܡܨܠܚܢܘܬܗ̇ ܕܗܕܐ ܣܒܪܬܐ ܐܟܣܢܝܬܐ ܕܓܡܝ̣ܪܐ ܒܠܚܘܕ ܡܨܝܢ ܠܡܣܬܟܠܘܬܗ̇. ܕܗ̣ܝ ܗ̣ܝ ܬܘܕܝܬܐ ܕܒܐܒܐ ܘܒܒܪܐ ܘܒܪܘܚܐ ܩܕܝܫܐ. ܘܡܬܒܪܢܫܢܘܬܐ ܕܚܕ ܡ̣ܢ ܩܢܘ̈ܡܐ ܕܬܠܝ̣ܬܝܘܬܐ ܕܗܘܝܘ ܩܢܘܡ ܒܪܐ. ܥܠ ܐܝ̈ܕܝ ܐ̱ܢܫ̈ܐ ܬܡܝ̣̈ܡܐ ܘܐܘܡܢ̈ܐ ܫܚܝ̣̈ܡܐ. ܒܗ̇ܝ ܕܣܘܓܐܗܘܢ ܐܦܠܐ ܣܦܪܐ ܝ̇ܕܥܝ̣ܢ ܗܘܘ. ܘܨܝ̈ܕܐ ܗ̣ܘܘ ܕܢܘ̈ܢܐ ܘܠܘ̣ܠܪ̈ܐ ܘܥܒܕܝ̈ ܫܐܪ̈ܝܐ.

 

 

 

ܬܕܡܘܪܬܐ ܕܬܪܬܝܢ

 

ܡܨܠܚܢܘܬܗ̇ ܕܗܕܐ ܣܒܪܬܐ ܒܠܥܕ ܗ̇ܝ ܕܗ̇ܢܘܢ ܕܡܟܪܙܝ̣ܢ ܠܗ̇ ܫܘܘ̈ܕܝܐ ܢܫܬܘܕܘܢ ܥܠܡܢܝ̈ܐ ܠܗ̇ܢܘܢ ܕܡܗܝܡܢܝ̣ܢ ܐܟܡܐ ܕܒܐܘܪܝܬܐ ܐܡܝ̣ܪܐ ܕܐܢܗܘ ܕܬܛܪ ܦܘܩ̈ܕܢܐ ܢܬܒܪܟܘܢ ܦܐܪ̈ܝ ܟܪܣܟ ܘܐܪܥܟ ܘܒܥܝ̣ܪܟ ܘܒܩܪ̈ܝ ܬܘܪ̈ܝܟ ܘܓܙܪ̈ܝ ܥܢ̈ܟ ܘܣܠܟ ܘܐܨܘܬܟ. ܘܬܘܙܦ ܘܠܐ ܬܐܙܦ. ܘܪܝܫܐ ܬܗܘܐ ܘܠܐ ܕܘܢܒܬܐ. ܘܫܪܟܐ. ܐܠܐ ܐܡ̣ܪ. ܕܒܐܘܠܨܢܐ ܣܓܝܐܐ ܘܠܐ ܠܡܥܠ ܠܡܠܟܘܬܐ ܕܐܠܗܐ. ܒܗ̇ܝ ܕܡ̣ܢ ܡܪܗܘܢ ܝ̣ܠܦܘ. ܕܥܬܝ̣ܪܐ ܒܡܠܟܘܬܐ ܐܝܟ ܓܡܠܐ ܒܚܪܘܪ ܡܚܛܐ. ܘܗ̇ܝ ܕܡ̇ܢ ܕܠܐ ܣܢܐ ܠܐܒܐ ܘܠܐܡܐ ܘܠܐܚܐ ܘܠܒܪܐ. ܘܠܐ ܢܣܝ̣ܡ ܡܘܬܗ ܩܕܡ ܥܝܢܘ̈ܗܝ ܕܗܘܝܘ ܨܠܝ̣ܒܗ ܘܢܐܬܐ ܒܬܪܝ܆ ܠܐ ܫܘܐ ܠܝ. ܘܣܓܝ̈ܐܬܐ ܕܐܝܟ ܗܠܝܢ.

 

 

 

ܬܕܡܘܪܬܐ ܕܬܠܬ

 

ܡܨܠܚܢܘܬܗ̇ ܕܗܕܐ ܣܒܪܬܐ܆ ܘܒܠܥܕ ܣܝܦܐ ܘܬܟܬܘܫܐ ܕܥܡ ܟܦܘܪ̈ܐ. ܐܦܠܐ ܩܛܠܐ ܕܗ̇ܢܘܢ ܕܡܬܡܪܕܝ̣ܢ. ܐܝܟܢܐ ܕܬܬܐܡܪ ܕܟܕ ܡ̣ܢ ܡܘܬܐ ܘܫܒܝܐ ܩܢ̣ܛܘ ܥܡ̈ܡܐ ܩܒܠܘܗ̇. ܘܐܝܟܢܐ ܒܣܝܦܐ ܘܬܟܬܘܫܐ ܗܘܝܐ ܗܘܬ݀܆ ܘܡܪܢ ܐܡ̣ܪ. ܕܟܠܗܘܢ ܗ̇ܢܘܢ ܕܢܣ̣ܒܘ ܣܝ̈ܦܐ܆ ܒܣܝ̈ܦܐ ܢܡܘܬܘܢ. ܘܗ̇ܝ ܕܐܢ ܢܡܚܝܟ ܐ̱ܢܫ ܥܠ ܦܟܟ ܕܝܡܝ̣ܢܐ. ܐܗܦܟ ܠܗ ܗ̇ܘ ܐ̱ܚܪܢܐ. ܘܐܢ ܢܣܒ ܡܪܛܘܛܟ ܗܒ ܠܗ ܐܦ ܟܘ̣ܬܝ̣ܢܟ. ܘܐܢ ܢܫܚܪܟ ܡܝ̣ܠܐ ܙܠ ܥܡܗ ܬܪܝܢ ܘܫܪܟܐ ܕܐ̱ܚܪ̈ܢܝܬܐ.

 

 

 

ܬܕܡܘܪܬܐ ܕܐܪܒܥ

 

ܡܟܪܙܢܘܬܗܘܢ ܕܬܠܡܝ̣̈ܕܐ ܠܣܒܪܬܐ. ܗܕܐ ܒܠܥܕ ܚܫܐ ܥܠܡܢܝܐ. ܐܘ ܝܘܬܪܢܐ ܩܢܝܢܝܐ ܐܘ ܢܝܚܐ ܦܓܪܢܝܐ. ܐܠܐ ܡܠܘܢ ܫܢ̈ܕܐ ܡܫܚ̈ܠܦܐ ܣܝܒܪܘ ܒܗ̇ ܘܡܛܠܬܗ̇ ܘܐܣܘܪ̈ܐ ܘܢܓ̈ܕܐ ܣܒ̣ܠܘ ܘܒܡܘ̈ܬܐ ܡܪܝ̣ܪ̈ܐ ܫܠܡܘ ܚܝܝ̈ܗܘܢ. ܐܝܟܢܐ ܕܚܕ ܡܢܗܘܢ ܡ̣ܢ ܟܢܦܐ ܕܗܝܟܠܐ ܢܫܬܕܐ. ܐ̱ܚܪܢܐ ܕܝܢ ܒܬܪ ܪܝܫܗ ܢܙܕܩܦ. ܐ̱ܚܪܢܐ ܕܝܢ ܗܕܡ ܗܕܡ ܢܬܦܣܩ. ܐ̱ܚܪܢܐ ܕܝܢ ܕܒܢܘܪܐ ܢܬܬܘܩܕ. ܐ̱ܚܪܢܐ ܕܝܢ ܒܓܙܪܬܐ ܫܗܝܬܐ ܢܬܬܪܡܐ.

 

 

 

ܬܕܡܘܪܬܐ ܕܚܡܫ

 

ܡܨܠܚܢܘܬܗ̇ ܕܗܕܐ ܣܒܪܬܐ ܒܙܒܢܐ ܐܝܢܐ ܕܒܗ ܝܬܝ̣ܪ ܡ̣ܢ ܕܒܟܠܗܘܢ ܙܒ̈ܢܐ ܟܗܝ̣ܢܐ ܗܘܬ݀ ܒܪܝ̣ܬܐ. ܒܝܘܠܦܢ̈ܐ ܢܒܝܝ̈ܐ ܘܗ̇ܢܘܢ ܦܝ̣ܠܠܘܣܘ̈ܦܝܐ. ܠܘܓܝܩܝ ܐܡ̇ܪ ܐ̱ܢܐ ܘܝ̣ܕܥܬܐ ܕܟܝܢ̈ܝܬܐ. ܘܕܒܬܪ ܟܝܢܝ̈ܬܐ ܘܡܬܐܡܱ̈ܛܐ ܘܛܠܝ̣ܣ̈ܡܛܐ ܘܐܣܝܘܬܐ. ܘܚܪܫܘܬܐ ܘܫܪܟܐ.

 

 

 

ܬܕܡܘܪܬܐ ܕܫܬ

 

ܗ̇ܝ ܕܠܘ ܒܡܕܒܪܐ ܘܡܨܥܬ݀ ܐ̱ܢܫ̈ܐ ܒܪܝ̣ܪ̈ܐ ܥܡܪ̈ܝ ܒܡܫܟ̈ܢܐ ܣܥܪ̈ܝܐ. ܐܘ ܒܩܘܪ̈ܝܐ ܘܟܦܪ̈ܘܢܐ ܒܠܚܘܕ ܐܟܪܙܘܗ̇ ܠܗܕܐ ܣܒܪܬܐ ܗ̇ܢܘܢ ܕܐܟܪܙܘܗ̇. ܐܠܐ ܘܒܡܕܝ̣̈ܢܬܐ ܪܘܪ̈ܒܬܐ ܘܡܫܡ̈ܗܬܐ. ܐܢܛܝܘܟܝܐ ܠܡܐܡܪ ܘܪܘܡܝ̣ ܪܒܬܐ. ܘܡܨܪܝܢ. ܘܐܬܝ̣ܢܐܣ ܡܕܝ̣ܢܬ݀ ܚܟܝ̈ܡܐ ܘܫܪܟܐ ܕܕܘܟ̈ܝܬܐ ܐܪ̈ܝ̣ܫܟܝܬܐ.

 

 

 

ܬܕܡܘܪܬܐ ܕܫܒܥ

 

ܗ̇ܝ ܕܠܘ ܐ̱ܢܫ̈ܐ ܒܠܚܘܕ ܦܫܝ̣̈ܛܐ ܩܒܠܘܗ̇ ܠܣܒܪܬܐ ܗܕܐ ܡ̣ܢ ܫܘܪܝܐ. ܐܠܐ ܘܗ̇ܢܘܢ ܕܡܪܡܝ̣ܢ ܗܘܘ ܒܝ̣ܕܥܬܐ ܕܢܡܘܣܐ ܘܢܒܝ̈ܐ ܘܚܟܡܬ݀ ܒܪ̈ܝܐ. ܐܝܟܢܐ ܕܓܡܠܐܝܠ ܐ̱ܢܫ ܣܦܪܐ ܡܗܝ̣ܪܐ ܘܦܪܝ̣ܫܐ ܡܝܩܪܐ ܘܡܠܦ ܢܡܘܣܐ ܢܪܬܐ ܠܣܩܘܪ̈ܝܗܘܢ ܕܫܠܝ̣̈ܚܐ ܘܢܐܡܪ. ܕܡ̣ܢ ܩܕܡ ܙܒܢܐ ܩܡ ܐ̱ܢܫ ܕܫܡܗ ܬܘܕܐ. ܘܐܡ̣ܪ ܥܠ ܢܦܫܗ ܕܡܕܡ ܗ̣ܘ ܪܒ. ܘܐܙܠܘ ܒܬܪܗ ܐܪܒܥܡܐܐ ܓܒܪ̈ܝܢ. ܘܗ̣ܘ ܐܬܩܛܠ܆ ܘܗ̇ܢܘܢ ܐܬܒܕܪܘ. ܘܬܘܒ ܩܡ ܝܗܘܕܐ ܐ̱ܢܫ ܓܠܝ̣ܠܝܐ܆ ܘܐܣܛܝ̣ ܒܬܪܗ ܥܡܐ ܣܓܝܐܐ ܘܗ̣ܘ ܡܝ̣ܬ܆ ܘܗ̇ܢܘܢ ܐܬܦܠܗܕܘ. ܒܕܓܘܢ ܐܦ ܗܠܝܢ ܐܢ ܐ̱ܢܫܝܬܐ ܗ̱ܝ ܡܚܫܒܬܗܘܢ܆ ܡܫܬܪܝܢ ܘܒܛܠܝ̣ܢ. ܘܐܢܕܝܢ ܐܠܗܝܬܐ ܗ̱ܝ܆ ܠܐ ܡܛܝܐ ܒܐܝܕܝ̈ܟܘܢ ܕܬܒܛܠܘܢܗ̇. ܘܝܘܣܝܦܘܣ ܬܘܒ ܚܟܝ̣ܡܐ ܥܒܪܝܐ ܗ̇ܘ ܕܡܬܐܡܪ ܕܗܘܝܘ ܩܝܦܐ ܗ̇ܘ ܕܐܬܢܒܝ̣ ܕܚܕ ܓܒܪܐ ܢܡܘܬ ܘܠܐ ܟܠܗ ܥܡܐ. ܐܟܬܒ ܒܡܐܡܪ̈ܘܗܝ ܕܣܝ̣ܡܝ̣ܢ ܠܗ ܥܠ ܕܘܒܪܗܘܢ ܕܝܘ̈ܕܝܐ. ܕܓܒܪܐ ܚܕ ܚܟܝ̣ܡܐ ܫܡܗ ܝܫܘܥ: ܐܝܬ ܗܘܐ ܒܙܒ̈ܢܐ ܗܠܝܢ. ܐܢ ܘܠܐ ܠܢ ܕܓܒܪܐ ܢܩܪܝܘܗܝ. ܡܫܝ̣ܚܐ ܐܝܬܘܗܝ ܗܘܐ ܗܢܐ. ܘܠܗ ܦܝ̣ܠܛܘܣ ܨܠܒ ܒܣܗܕܘܬܐ ܕܪ̈ܝ̣ܫܘܗܝ ܕܥܡܐ. ܘܐܬܚܙܝ̣ ܠܬܠܡܝ̣̈ܕܘܗܝ ܒܬܪ ܬܠܬܐ ܝܘܡܝ̣̈ܢ ܟܕ ܚܝ. ܢܒܝ̈ܐ ܓܝܪ ܕܐܠܗܐ ܗܠܝܢ ܘܪ̈ܒܘ̣ ܕܐܝܟ ܗܠܝܢ ܐܡ̣ܪܘ ܥܠܘܗܝ ܬܡܝ̣̈ܗܬܐ. ܘܕܐܝܟ ܗܠܝܢ ܬܘܒ ܟܬܒ ܦܠܝܓܘܢ ܗ̇ܘ ܡܟܬܒ ܙܒ̈ܢܐ ܒܡܐܡܪܗ ܗ̇ܘ ܕܬܠܬܥܣܪ. ܘܐܘܪܣܝܢܘܣ ܒܡܐܡܪܗ ܕܚܡܫܐ. ܘܓܐܠܝܢܘܣ ܐܣܝܐ ܒܚܪܬܗ ܕܟܬܒܐ ܕܟܘܢܫܐ ܕܢܡܘ̈ܣܐ ܦܠܛܘܢܝ̈ܩܝܐ ܘܕܝܘܢܢܘܣܝܘܣ ܦܝܠܠܘܣܘܦܐ ܪܝܫܐ ܕܕܝܢ̈ܐ ܕܐܪܝܘܣ ܦܐܓܘܣ ܒܐܬܝ̣ܢܐܣ. ܠܥܝ̣ܢ ܟܠܗܘܢ ܐܬܝ̣̈ܢܝܐ ܗܝܡܢ ܘܥܡ̣ܕ ܗ̣ܘ ܘܟܠܗ ܒܝܬܗ. ܘܟܬܒ̈ܐ ܣܡ ܥܠ ܫܘܪܪܗ̇ ܕܬܘܕܝ̣ܬܐ ܗܕܐ.

 

 

 

ܢܘܗܪܐ ܘܫܘܪܪܐ

 

ܘܙܕܩ ܠܡܕܥ ܕܬܕܡܪ̈ܬܐ ܗ̇ܢܝܢ ܕܣܥܪ ܡܪܢ. ܘܗ̇ܢܝܢ ܕܫܠܝ̣̈ܚܐ ܒܫܡܗ ܣܥ̣ܪܘ. ܘܥܕܡܐ ܠܝܘܡܢܐ ܡ̣ܢ ܩܕܝ̈ܫܐ ܠܘ ܒܠܚܘܕ ܟܕ ܚܐܝ̣ܝ̣ܢ ܐܠܐ ܘܒܬܪ ܡܘܬܝ̈ܗܘܢ. ܡ̣ܢ ܓܪ̈ܡܝܗܘܢ ܡܣܬܥܪ̈ܢ. ܣܓܝ̈ܐܢ ܐܢܝܢ ܡ̣ܢ ܡܢܝܢܐ ܘܓܠܝܐ ܕܟܠܗܝܢ ܥܠ ܫܪܝ̣ܪܘܬܗ̇ ܕܬܘܕܝ̣ܬܐ ܗܕܐ ܕܒܬܠܝ̣ܬܝܘܬܐ ܩܕܝ̣ܫܬܐ. ܘܕܡ̣ܢ ܟܕܘ ܗܘܬ݀ ܚܕܝܘܬܐ ܐܘܟܝܬ ܡܬܒܪܢܫܢܘܬܐ ܕܐܠܗܐ ܡܠܬܐ ܡܫܘ̈ܕܥܢ. ܒܗ̇ܝ ܕܒܘܪܘܬܐ ܗ̱ܝ ܘܟܦܘܪܘܬܐ ܪܒܬܐ ܠܡܪܢܐ ܥܠ ܐܠܗܐ ܫܘܒܚܐ ܠܛܝܒܘܬܗ. ܕܒܐܝ̈ܕܝܐ ܐܘ ܒܫܡܐ ܕܗ̇ܘ ܕܠܐ ܫܪܝ̣ܪܐ ܘܡܛܠ ܗ̇ܝ ܕܬܟܫܪ ܟܕܒܘܬܐ ܘܬܨܠܚ ܛܘܥܝܝ ܒܥܠܡܐ܆ ܬܕܡܘܪܬܐ ܡܬܘܡ ܢܣܥܘܪ.

 

 

 

 

 

 

 

 

     #1 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܪܒܝ̣ܥܝܬܐ. ܡܛܠ ܬܪܥܝ̣ܬܐ ܣܩܘܒܠܝܬܐ ܡܒܛܠܢܝ̣ܬܗܘܢ ܕܫܘܘ̈ܕܥܐ ܕܒܝܕ ܣܥܘܪܘܬ ܬܕܡܪ̈ܬܐ ܡܫܪܪܝܢ ܡܬܒܪܢܫܢܘܬܐ. ܘܗ̣ܝ ܗܕܐ ܠܫܒܥ ܐܪ̈ܣܝܣ ܡܬܦܠܓܐ. ܐܪܣܝܣ ܩܕܡܝܬܐ ܕܗ̇ܢܘܢ ܕܟܦܪܝ̣ܢ ܒܣܥܘܪܘܬ ܬܕܡܪ̈ܬܐ ܣܟ. ܘܒܗ ܐܝܬ ܢܝ̈ܫܐ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܐܠܘ ܡܬܡܨܝܢܝ̣ܬܐ ܗܘܬ݀ ܣܥܘܪܘܬ ܬܕܡܪ̈ܬܐ. ܬܪܬܝܢ ܡܫܬܟ̈ܚܢ ܗܘܝ̈ ܗܘ̈ܠܐܣ. ܐܠܨܝܬܐ ܘܡܬܡܨܝܢܝ̣ܬܐ. ܘܠܝܬ ܗܘܐ ܗܘܠܐ ܠܘ ܡܫܟܚܢܝ̣ܬܐ. ܘܟܕ ܐܝܬ. ܠܘ ܡܬܡܨܝܢܝ̣ܬܐ ܗ̱ܝ ܣܥܘܪܘܬ ܬܕܡܪ̈ܬܐ. ܕܐܝܟ ܐܝܟܢ ܐܢ ܒܪܢܫܐ ܟܐܦܐ ܡܨܐ ܗܘܐ ܠܡܗܘܐ. ܘܟܐܦܐ ܒܪܢܫܐ. ܘܣܘܣܝܐ ܦܪܚܬܐ. ܘܦܪܚܬܐ ܣܘܣܝܐ. ܒܐܝܠܝܢ ܘܐܝܟܢܐ ܡܨܝܢ ܗܘܝܢ ܠܡܦܪܫ ܒܝܬ ܗܘܠܐ ܡܬܡܨܝܢܝ̣ܬܐ ܘܗ̇ܝ ܠܘ ܡܫܟܚܢܝ̣ܬܐ. ܘܟܕ ܐܢܢܩܐܝܬ ܦܪܫܝ̣ܢܢ܆ ܡ̣ܢ ܠܐ ܡܬܡܨܝܢܝ̣ܬܐ ܗ̱ܝ ܣܥܘܪܘܬ ܬܕܡܪ̈ܬܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܣܥܘܪܘܬ ܬܕܡܪ̈ܬܐ. ܐܘ ܡ̣ܢ ܗܘܠܐ ܗ̱ܝ ܐܠܨܝܬܐ. ܐܘ ܡ̣ܢ ܗܘܠܐ ܡܬܡܨܝܢܝ̣ܬܐ. ܐܘ ܡ̣ܢ ܗܘܠܐ ܠܘ ܡܫܟܚܢܝ̣ܬܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܡܥܒܕܢ̈ܘܬܐ ܐܠܨܝ̈ܬܐ. ܘܟܕ ܢܨܒܐ ܥܒܘܕܐ ܘܟܕ ܠܐ ܢܨܒܐ ܗܘ̈ܝܢ. ܘܐܝܟܢܐ ܬܕܡܪ̈ܬܐ ܢܬܡܢ̈ܝܢ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܡܥܒܕܢ̈ܘܬܐ ܡܬܡܨܝܢ̈ܝܬܐ ܐܟܡܐ ܕܡܨ̈ܝܢ ܕܢܗܘ̈ܝܢ. ܡܨ̈ܝܢ ܬܘܒ ܕܠܐ ܢܗܘ̈ܝܢ ܒܦܚܡܐ ܕܟܠ ܐ̱ܢܫ ܡܨܐ ܠܡܥܒܕ ܗ̇ܘ ܠܐ ܠܡܥܒܕܗ̇ ܐܝܟܢܐ ܬܕܡܘܪܬܐ ܐܬܬܕܝ̣ܢܝ. ܗ̣ܘ ܗܟܘܬ ܘܗ̇ܘ ܕܬܠܬܐ ܠܐ ܫܪܝ̣ܪ. ܒܗ̇ܝ ܕܐܠܘ ܡܥܒܕܢ̈ܘܬܐ ܠܘ ܡܫܟܚܢ̈ܝܬܐ. ܡܬܘܡ ܡܣܬܥܪ̈ܢ ܗܘܝ̈. ܡܫܟܚܢ̈ܝܬܐ ܗܘܝ̈ ܘܠܘ ܡܫܟܚܢ̈ܝܬܐ ܘܕܠܘ ܡܫܟ̈ܚܢܝܢ܆ ܗ̣ܘ ܟܝܢܗܝܢ ܣ̇ܗܕ. ܘܟܕ ܬܠܬܝ̈ܗܘܢ ܦܫܚܘ̈ܗܝ ܕܦܘܠܓܐ ܠܐ ܫܪܝ̣ܪܝܢ. ܐܦ ܣܥܘܪܘܬ ܬܕܡܪ̈ܬܐ ܠܐ ܫܪܝ̣ܪܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܐܠܘ ܣܥܘܪܘܬ ܬܕܡܪ̈ܬܐ ܡܬܡܨܝܢܝ̣ܬܐ ܗܘܬ݀. ܠܐ ܦܝܫܐ ܠܢ ܝ̣ܕܥܬܐ ܐܢܢܩܝܬܐ ܡܬܘܡ. ܒܗ̇ܝ ܕܟܕ ܚ̇ܙܐ ܗܘܐ ܐ̱ܢܫ ܠܒܪܗ ܠܐ ܙܕܩ ܗܘܐ ܕܐܢܢܩܐܝܬ ܢܗܝܡܢ ܕܗܘܝܘ ܒܪܗ. ܒܗ̇ܝ ܕܡܨܝܐ ܕܐܠܗܐ ܐܪܝ̣ܡܗ ܠܒܪܗ. ܘܐ̱ܚܪܢܐ ܒܕܘܟܬܗ ܐܟܘܬܗ ܒܪܐ. ܘܬܘܒ ܟܕ ܚܙܐ ܗܘܐ ܐ̱ܢܫ ܠܡܝ̈ܐ ܕܝܡ̈ܡܐ. ܠܐ ܙܕܩ ܗܘܐ ܠܗ ܕܐܢܢܩܐܝܬ ܢܚܪܘܩ ܗܘܐ ܥܠܝܗܘܢ ܕܡܝ̈ܐ ܐܢܘܢ. ܒܗ̇ܝ ܕܡܨܝܐ ܕܕܡܐ ܐܢܘܢ ܬܛܝ̣ܪܐ. ܘܐܠܗܐ ܕܡܘ̣ܬ ܡܝ̈ܐ ܡܚܘܐ ܐܢܘܢ ܠܢ. ܘܟܕ ܗܠܝܢ ܘܕܐܝܟ ܗܠܝܢ ܫܟܝ̣ܪ̈ܢ. ܐܦ ܣܥܘܪܘܬ ܬܕܡܪ̈ܬܐ ܫܟܝ̣ܪܐ ܘܠܐ ܫܪܝܪܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܐܝܟ ܕܡ̣ܢ ܠܘܬܢ. ܫܪܝܐ ܩܕܡܝܐ

 

ܐܡܪܝܢܢ ܕܣܥܘܪܘܬ ܬܕܡܪ̈ܬܐ ܠܘ ܠܡܥܒܕܢ̈ܘܬܐ ܗ̇ܢܝܢ ܐܡܪܝܢܢ. ܕܒܟܝܢܗܝܢ ܠܐ ܡܬܡܨ̈ܝܢܝܢ. ܐܝܟ ܗ̇ܝ ܕܒܪܢܫܐ ܫܘܥܐ ܠܐ ܡܪܓܫܢܐ ܢܗܘܐ ܟܕ ܒܪܢܫܐ ܡܟܬܪ ܡܪܓܫܢܐ. ܐܦܠܐ ܕܣܘܣܝܐ ܦܪܚܬܐ ܢܗܘܐ ܓܦܢܝܬܐ ܬܪܝܢܬ݀ ܪ̈ܓܠܐ. ܟܕ ܣܘܣܝܐ ܡܟܬܪ ܪܒܝ̣ܥܝ ܪ̈ܓܠܐ. ܐܠܐ ܠܗ̇ܢܝܢ ܕܟܝܢܐ ܩܢ̈ܝܢ ܡܬܡܨܝܢܐ. ܐܠܐ ܠܘ ܐܝܟ ܕܒܣܘܓܐܐ ܥܝܕܢܐܝܬ ܗܘ̈ܝܢ. ܐܝܟܢܐ ܕܒܪܢܫܐ ܫܘܥܐ ܢܗܘܐ ܠܐ ܡܪܓܫܢܐ. ܘܬܒܛܠ ܥܡ ܡܪܓܫܢܘܬܗ܆ ܐܦ ܚܝܠܘ̈ܗܝ ܐ̱ܚܪ̈ܢܐ ܚܝܘܬܢܝ̈ܐ ܘܟܝܢܝ̈ܐ ܘܐ̱ܢܫܝ̈ܐ. ܘܡ̣ܢ ܗܪܟܐ ܡܬܝܕܥܐ ܕܠܐ ܡܬܬܪܝ̣ܡܐ ܗܘܠܐ ܠܘ ܡܫܟܚܢܝ̣ܬܐ ܡ̣ܢ ܟܝܢܐ ܕܣܘܥܪ̈ܢܐ ܒܥܠܬ݀ ܣܥܘܪܘܬ ܬܕܡܪ̈ܬܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܣܥܘܪܘܬ ܬܕܡܪ̈ܬܐ. ܠܘ ܡ̣ܢ ܙܢܐ ܗ̱ܝ ܕܗܘܠܐ ܐܠܨܝܬܐ. ܐܦܠܐ ܡ̣ܢ ܙܢܐ ܕܗܘܠܐ ܠܘ ܡܫܟܚܢܝ̣ܬܐ. ܐܠܐ ܡ̣ܢ ܙܢܐ ܕܗܘܠܐ ܡܬܡܨܝܢܝ̣ܬܐ. ܒܪܡ ܗ̇ܝ ܕܠܘ ܐܝܟ ܕܒܣܘܓܐܐ ܥܝܕܢܐܝܬ ܗܘܝܐ ܐܝܟ ܕܐܡ̣ܪܢܢ. ܘܗ̇ܝ ܕܐܡ̣ܪܬܘܢ ܕܡܬܡܨܝܢܝ̣ܬܐ ܫܘܝܐ ܠܘܬܗ̇ ܗ̇ܝ ܕܬܗܘܐ ܘܕܠܐ ܬܗܘܐ ܒܦܚܡܐ ܕܟܠܢܫ. ܠܐ ܫܪܝܪܐ ܡܢܟܘܢ. ܒܗ̇ܝ ܕܒܟܝܢܗ̇ ܒܠܚܘܕ ܕܩܢܝܐ ܗܕܐ ܫܘܝܘܬܐ. ܘܠܘ ܒܦܚܡܐ ܕܟܠܢܫ. ܗܐ ܓܝܪ ܗ̇ܝ ܕܢܪܝ̣ܡ ܐ̱ܢܫ ܡ̣ܢ ܐܪܥܐ ܟܐܦܐ ܕܡܐܐ ܠܝ̣ܛܪ̈ܝ̣ܢ܇ ܠܥܠܝܡܐ ܒܪ ܥܣܪܝܢ ܫܢܝ̣̈ܢ ܝܬܝܪ ܡܨܝܐ ܡ̣ܢ ܕܠܣܒܐ ܒܪܐ ܡܐܐ ܘܥܣܪܝܢ. ܒܕܓܘܢ ܟܕ ܡ̣ܢ ܣܒܐ ܕܐܝܟ ܗܢܐ ܣܥܘܪܘܬܐ ܕܐܝܟ ܗܕܐ ܬܬܚܙܐ. ܒܫܪܪܐ ܕܬܕܡܘܪܬܐ ܗ̱ܝ. ܘܕܣܥܘܪܘܬ ܬܕܡܪ̈ܬܐ ܡ̣ܢ ܗܢܐ ܗ̱ܝ ܙܢܐ ܓܠܝܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ܇ ܕܣܥܘܪ̈ܘܬܐ ܗ̇ܢܝܢ ܕܡܢܝܬܘܢ. ܐܦܢ ܡܬܡܨܝܢ̈ܝܬܐ ܐܢܝܢ ܒܟܝܢܝ̈ܗܝܢ. ܘܒܦܚܡܐ ܕܠܘܬ ܐܠܗܐ ܫܘܒܚܐ ܠܛܝܒܘܬܗ. ܐܠܐ ܐܢܢܩܐܝܬ ܝ̇ܕܥܝܢܢ ܕܠܘ ܥܝܕܢܝ̈ܬܐ ܐܢܝܢ. ܐܦܠܐ ܡ̣ܢ ܗ̇ܢܝܢ ܕܐܝܟ ܕܒܣܘܓܐܐ ܐܘ ܐܝܟ ܕܒܫܘܝܘ ܗܘ̈ܝܢ. ܘܡܛܠ ܗܕܐ ܠܐ ܣܟ ܒܛܠܐ ܝ̣ܕܥܬܢ ܐܢܢܩܝܬܐ ܒܥܠܬ݀ ܡܬܡܨܝܢܘܬܗܝܢ. ܘܐܢܢܩܐܝܬ ܬܘܒ ܝ̇ܕܥܝ̣ܢܢ ܕܟܕ ܗܘ̈ܝܢ܆ ܬܕܡܪ̈ܬܐ ܐܢܝܢ.

 

 

 

ܐܪܣܝܣ ܬܪܝܢܝ̣ܬܐ ܕܗ̇ܢܘܢ ܕܐܡܪܝܢ ܕܐܦܢ ܡܬܡܨܝܢܝ̣ܬܐ ܗ̱ܝ ܣܥܘܪܘܬ ܬܕܡܪ̈ܬܐ ܐܠܐ ܡܨܝܐ ܕܠܘ ܡ̣ܢ ܐܠܗܐ ܢܣܬܥܪ̈ܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܢܦܫܗ ܕܗ̇ܘ ܕܣ̇ܥܪ ܬܕܡܪ̈ܬܐ ܘܡܘܙܓܗ. ܡܦܪܫ ܦܪܝ̣ܫܝ̣ܢ ܡ̣ܢ ܢܦ̈ܫܬܐ ܘܡܘ̈ܙܓܐ ܕܒܢܝ̈ܢܫܐ ܕܫܪܟܐ. ܒܕܓܘܢ ܠܘ ܠܐ ܡܨܝܐ ܕܣܥܘܪܘܬ ܬܕܡܪ̈ܬܐ ܕܝ̣ܠܝܬܐ ܬܗܐ ܠܢܦܫܐ ܗ̇ܝ ܘܡܘܙܓܐ ܗ̇ܘ. ܘܡ̣ܢ ܗܪܟܐ ܠܐ ܐܠܨܐ ܕܐܠܗܐ ܢܗܘܐ ܣܥܘܪܗܝܢ ܕܬܕܡܪ̈ܬܐ ܗ̇ܢܝܢ ܕܒܐܝ̈ܕܝ ܗ̇ܘ ܡܣܬܥܪ̈ܢ. ܗܐ ܓܝܪ ܐܟܡܐ ܕܠܐܕܫܗ̇ ܕܢܦܫܐ ܡܠܝ̣ܠܬܐ ܕܝ̣ܠܝܬܐ ܗ̱ܝ ܗ̇ܝ ܕܬܓܚܟ. ܡܨܝܐ ܕܠܩܢܘܡܗ̇ ܕܢܦܫܐ ܡܕܡ ܕܝ̣ܠܝܬܐ ܬܗܘܐ. ܗ̇ܝ ܕܬܬܘܦ ܠܢܦܫܐ ܕܫܢܝܬ݀ ܡ̣ܢ ܦܓܪܗ̇ ܐܟܡܐ ܕܢܬܦܐ ܡܓܢܝܛܝܣ ܠܦܪܙܠܐ. ܘܬܩܦܝ̣ܗ̇ ܠܗ ܒܪ ܕܪܝܫ܇ ܘܢܚܐ ܡܝ̣ܬܐ ܗ̇ܘ. ܘܗܟܢܐ ܗ̇ܢܝܢ ܐ̱ܚܪ̈ܢܝܬܐ.

 

 

 

ܣܥܝܐ ܕܬܪܝܢ

 

ܐܡܪܝܢ ܘܐܦܢ ܠܘ ܕܝ̣ܠܝܬܐ ܬܗܐ ܣܥܘܪܘܬ ܬܕܡܪ̈ܬܐ ܕܢܦܫܐ ܘܡܘܙܓܐ ܕܣܥܘܪܗܝܢ. ܐܠܐ ܚܝܠܝ̈ܗܘܢ ܕܣܡ̈ܡܢܐ ܬܡܝ̣̈ܗܐ ܐܢܘܢ ܘܕܡܝ̣ܪ̈ܐ. ܣܓܝ̈ܐܐ ܘܡܠܝܝ̈ ܬܗܪ̈ܐ. ܒܕܓܘܢ ܡܨܝܐ ܕܐ̱ܢܫ ܒܪܢܫܐ ܣܡܐ ܡܕܡ ܢܫܟܚ ܕܕܝ̣ܠܝܬܐ ܩܢܐ ܣܥܘܪܘܬ ܬܕܡܪ̈ܬܐ ܒܝܕ ܡܐܟܘܠܬܐ ܐܘ ܒܝܕ ܓܫܦܐ ܢܐܟܘܠ ܡܢܗ ܘܢܘܟܠ ܬܘܒ ܠܬܠܡܝ̣̈ܕܘܗܝ. ܘܗܟܢܐ ܐܦ ܗ̣ܘ ܐܦ ܗ̇ܢܘܢ ܬܕܡܪ̈ܬܐ ܢܣܥܪܘܢ ܘܢܫܡܠܘܢ ܨܒܝܢܗܘܢ.

 

 

 

ܣܥܝܐ ܕܬܠܬܐ

 

ܐܡܪܝܢ ܕܐܦܢ ܠܘ ܒܚܫܚܬܐ ܕܒܣܡ̈ܡܢܐ ܗܘܝܐ ܣܥܘܪܘܬ ܬܕܡܪ̈ܬܐ. ܐܠܐ ܡܨܝܐ ܕܡ̣ܢ ܕܝ̈ܘܐ ܘܫܐܕ̈ܐ ܬܗܘܐ. ܐܝܟ ܕܠܡܛܥܝܢܘܬܐ ܕܒܢܝ̈ܢܫܐ. ܐܦ ܓܝܪ ܘܐܬܐܡܪܬ݀ ܗܕܐ ܕܒܒܥܠܙܒܘܒ ܪܝܫܐ ܕܕܝ̈ܘܐ ܡܦܩ ܕܝ̈ܘܐ. ܘܟܕ ܡܬܐܡܪܐ ܕܣܥܪ̈ܝ ܬܕܡܪ̈ܬܐ ܐܠܗܝ̈ܬܐ ܡܠܛ ܠܝܛܝ̣ܢ. ܘܡܣܠܝܘ ܡܣܠܝܢ ܠܫܐܕ̈ܐ. ܘܐܝܟܢܐ ܢܣܬܝܥܘܢ ܡܢܗܘܢ. ܡܦܢܝܢ ܘܐܡܪܝܢ. ܕܗܢܝܐܝ̣ܬ ܡܩܒܠܝܢ ܫܐܕ̈ܐ ܠܠܘܛܬܐ ܘܡܣܬܠܝܢܘܬܐ܆ ܡ̣ܢ ܗ̇ܢܘܢ ܕܢܝ̣ܫܗܘܢ ܡܫܡܠܝܢ ܘܨܒܝܢܗܘܢ ܡܫܡܫܝ̣ܢ.

 

 

 

ܣܥܝܐ ܕܐܪܒܥܐ

 

ܐܡܪܝܢ ܕܟܠܕܝ̈ܐ ܟܠܗܘܢ ܨܒܝ̈ܐ ܡܘܕܝܢ ܕܟܘܟ̈ܒܐ ܚܝ̈ܐ ܐܢܘܢ ܘܡܠܝ̣̈ܠܐ. ܘܐܝܬ ܐܡܬܝ ܕܥܡ ܐ̱ܢܫܝ̈ܢ ܡܡܠܠܝ̣ܢ. ܘܥܠ ܣܥܘܪ̈ܘܬܐ ܬܡܝ̣̈ܗܬܐ ܠܗܘܢ ܡܚܝܠܝܢ. ܘܣܘܥܪ̈ܢܐ ܕܥܬܝ̣ܕܝ̣ܢ ܠܡܗܘܐ ܠܗܘܢ ܓܠܝܢ. ܘܠܦܘܬ ܪܥܝܢܐ ܗܢܐ ܠܘ ܡ̣ܢ ܐܠܗܐ ܐܢܝܢ ܬܕܡܪ̈ܬܐ ܟܠܗܝܢ. ܒܕܓܘܢ ܡܨܝܐ ܕܗ̇ܘ ܕܚܝܠܐ ܕܐܝܟ ܗܢܐ ܩܢܐ. ܢܐܡܪ ܥܠ ܢܦܫܗ ܟܠ ܡܐ ܕܨܒܐ. ܘܢܣܗ̈ܕܢ ܠܗ ܬܕܡܪ̈ܬܐ ܣܗܕܘܬ ܫܘܩܪܐ. ܒܕܠܘ ܡ̣ܢ ܐܠܗܐ ܗܘ̈ܝܢ.

 

 

 

ܣܥܝܐ ܕܚܡܫܐ

 

ܐܡܪܝܢ ܕܐܣܛܪ̈ܘܢܘܡܘ ܟܠܗܘܢ ܢܣܝ̣ܘ. ܕܠܡܫܬܘܪܝܢܘܬ ܟܘܟ̈ܒܐ ܘܚܘܪ̈ܝܗܘܢ ܕܒܚ̈ܕܕܐ ܣܘܥܪ̈ܢܐ ܬܡܝ̣̈ܗܐ ܢܩܦܝ̣ܢ ܒܥܠܡܐ ܗܢܐ. ܒܕܓܘܢ ܠܘ ܠܐ ܡܨܝܐ ܡܫܬܘܪܝܢܘܬܐ ܡܕܡ ܕܐܝܟ ܗܕܐ ܓܕܫܬ݀ ܠܐܢ̱ܬܬܐ ܒܬܘܠܬܐ ܒܠܥܕ ܙܘܘܓܐ ܢܩܦ. ܘܡܢܗ̇ ܕܡܫܬܘܪܝܢܘܬܐ ܗ̇ܝ ܐܦ ܚܝܠܐ ܡܕܡ ܡܨܝܐ ܕܐܫܬܟܢ ܠܗܘ ܝܠܕܐ ܠܡܕܥ ܟܘܟ̈ܒܐ ܘܙܘܥܝ̈ܗܘܢ ܘܚܝܠܝ̈ܗܘܢ. ܘܟܠ ܐܡܬܝ ܕܝ̇ܕܥ ܕܬܕܡܘܪܬܐ ܡܨܝܐ ܕܬܩܦ܆ ܒܥܗ̇ ܘܐܫܟܚܗ̇. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܡܪܝܬܘܢ. ܕܒܬܪ ܬܠܬܝܢ ܫܢܝ̣̈ܢ ܫܪܝ̣ ܡܫܝܚܐ ܠܡܣܥܪ ܬܕܡܪ̈ܬܐ ܘܠܘ ܒܐܡܝ̣ܢܘ.

 

 

 

ܣܥܝܐ ܕܫܬܐ

 

ܐܡܪܝܢ ܕܦܝܠܠܘܣܘ̈ܦܐ ܟܠܗܘܢ ܫܠܡܘ ܕܠܟܠ ܡܘܙܠܬܐ ܗܘܢܐ ܐܝܬ ܡܒܪܝܐ. ܘܢܦܫܐ ܡܠܝ̣ܠܬܐ ܘܢܦܫܐ ܚܝܘܬܢܝܬܐ. ܒܕܓܘܢ ܡܨܝܐ ܕܣܥܘܪܗܝܢ ܕܬܕܡܪ̈ܬܐ ܗ̇ܢܝܢ ܒܐܝ̈ܕܝ ܗ̇ܘ ܕܣ̇ܥܪ ܐܢܝܢ܇ ܡܕܡ ܡ̣ܢ ܕܐܝܟ ܗܠܝܢ ܘܠܘ ܐܠܗܐ ܢܗܘܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ܇ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܕܝ̣ܠܝ̈ܬܐ ܠܟܝܢܝ̈ܗܘܢ ܕܣܘܥܪ̈ܢܐ ܡܥܕ̈ܢ ܠܡܩܦ. ܒܕܓܘܢ ܠܟܠ ܕܝ̣ܠܝܬܐ ܐܝܕܐ ܕܠܩܢܘܡܐ ܡܕܡ ܫܟܝ̣ܚܐ. ܙܕܩ ܕܐܦ ܠܟܠܗܘܢ ܩܢܘ̈ܡܐ ܬܫܬܟܚ. ܒܗ̇ܝ ܕܚܕ ܗ̣ܘ ܠܟܠܗܘܢ ܟܝܢܐ. ܘܡܛܠ ܗܕܐ ܐܠܘ ܬܕܡܘܪܬܐ ܒܝܕ ܕܝ̣ܠܝܬܐ ܕܢܦܫܐ ܘܡܘܙܓܐ ܕܗ̇ܘ ܕܣ̇ܥܪ ܗܘܝܐ ܗܘܬ݀. ܙܕܩ ܗܘܐ ܕܒܐܝ̈ܕܝ ܟܠܗܘܢ ܡܫܘ̈ܬܦܝ ܒܐܕܫܐ ܡܣܬܥܪܐ ܗܘܬ݀ ܒܗ̇ܝ ܕܚܕ ܗ̣ܘ ܠܗܘܢ ܟܝܢܐ ܕܢܦܫܐ ܡܠܝ̣ܠܬܐ ܘܕܡܘܙܓܐ ܐ̱ܢܫܝܐ. ܘܗܐ ܠܘ ܗܟܢܐ ܬܕܡܘܪܬܐ ܡܕܝܢ ܠܘ ܒܝܕ ܕܝ̣ܠܝܬܐ ܕܢܦܫܐ ܐܘ ܕܡܘܙܓܐ ܗ̇ܘܝܐ.

 

 

 

ܫܪܝܐ ܬܪܝܢܐ

 

ܐܡܪܝܢܢ ܕܡܥܒܕܢ̈ܘܬܗܘܢ ܕܣܡ̈ܡܢܐ ܟܝܢܝ̈ܬܐ ܐܢܝܢ ܘܠܘ ܨܒܝܢܝ̈ܬܐ. ܒܕܓܘܢ ܐܠܘ ܬܕܡܪ̈ܬܐ ܒܝܕ ܐܘܟܠܐ ܕܣܡܐ ܗܘܝܐ ܗܘܬ݀ ܙܕܩ ܗܘܐ ܕܟܕ ܨܒ̇ܐ ܗܘܐ ܘܟܕ ܠܐ ܨܒ̇ܐ ܗܘܐ ܗ̇ܘ ܕܐܟܠܗ ܠܣܡܐ ܗ̇ܘ. ܬܕܡܘܪܬܐ ܒܐܝ̈ܕܘܗܝ ܡܣܬܥܪܐ ܗܘܬ݀ ܘܗܐ ܠܘ ܗܟܢܐ. ܒܗ̇ܝ ܕܟܕ ܨܒܝܢ ܩܕܝ̈ܫܐ ܣܥܪܝ̣ܢ ܬܕܡܪ̈ܬܐ ܘܠܘ ܟܕ ܠܐ ܨܒܝܢ. ܗܐ ܓܝܪ ܗ̇ܘ ܕܐܟܠܗ ܠܡܫܒܚܬܐ. ܘܟܕ ܨܒܐ ܘܟܕ ܠܐ ܨܒܐ. ܡܪܬܐ ܣܘܡܩܬܐ ܡܬܢܦܨܐ ܡܢܗ ܘܗܟܢܐ ܗܠܝܢ ܕܫܪܟܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܒܗ̇ܝ ܕܬܘܕܝܬܐ ܕܚܕ ܐܠܗܐ ܗ̇ܘ ܕܒܡܠܬܗ ܘܪܘܚܗ ܒܪܐ ܟܠܗܝܢ ܐܝܠܝܢ ܕܡܬܚܙ̈ܝܢ ܘܕܠܐ ܡܬܚܙ̈ܝܢ. ܘܕܢܣܢܐ ܠܥܠܡܐ ܘܢܩܢܐ ܢܦܫܢ. ܘܡ̣ܢ ܒܝ̈ܫܬܐ ܢܙܕܗܪ ܡܠܦܝ̣ܢ ܠܢ ܣܥܪ̈ܝ ܬܕܡܪ̈ܬܐ. ܡܫܬܪܪܝ̣ܢܢ ܕܡ̣ܢ ܐܠܗܐ ܗ̱ܝ ܣܥܘܪܘܬ ܬܕܡܪ̈ܬܗܘܢ ܘܠܘ ܡ̣ܢ ܫܐܕ̈ܐ. ܒܗ̇ܝ ܕܫܐܕ̈ܐ ܠܘ ܥܠ ܗ̇ܝ ܕܢܗܕܘܢ ܐܘ ܥܠ ܡܝܬܪ̈ܬܐ ܢܚܦܛܘܢ ܒܛܝ̣ܠ ܠܗܘܢ. ܐܠܐ ܥܠ ܗ̇ܝ ܕܒܗܦܟܐ.

 

 

 

ܫܪܝܐ ܕܣܥܝܐ ܪܒܝܥܝܐ ܘܚܡܝܫܝܐ ܘܫܬܝܬܝܐ

 

ܐܡܪܝܢܢ ܕܒܫܬܐܣܬܐ ܚܡܝ̣ܫܝܬܐ ܥܬܝ̣ܕܝ̣ܢܢ ܠܡܚܘܝܘ ܕܟܘܟ̈ܒܐ ܘܡܘܙܠܬܐ ܣܛܪ ܡ̣ܢ ܣܥܘܪ̈ܘܬܐ ܗ̇ܢܝܢ ܟܝܢܝ̈ܬܐ ܘܥܝܕܐ. ܩܝܛܐ ܠܡܐܡܪ ܘܣܬܘܐ ܘܫܪܟܐ. ܘܠܐ ܡܕܡ ܡܨܝܢ ܠܡܣܥܪ.

 

 

 

ܐܪܣܝܣ ܕܬܠܬ ܕܗ̇ܢܘܢ ܕܐܡܪܝܢ ܕܐܦܢ ܐܠܗܐ ܗ̱ܘ ܣܥܘܪܗܝܢ ܕܬܕܡܪ̈ܬܐ ܗ̇ܢܝܢ. ܐܠܐ ܡܨܝܐ ܕܠܘ ܡܛܠ ܗ̇ܝ ܕܫܪܪ ܡܠܬ݀ ܗ̇ܘ ܕܒܐܝ̈ܕܘܗܝ ܡܣܬܥܪ̈ܢ ܣ̇ܥܪ ܐܢܝܢ. ܐܠܐ ܡܛܠ ܥܠܬܐ ܐ̱ܚܪܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܟܠܗܘܢ ܣܥܘܪ̈ܘܬܐ. ܒܫܘܪܝ ܒܪܝ̣ܬܗܝܢ ܒܙܢܐ ܕܬܕܡܘܪܬܐ ܗܘܝ̈ ܡ̣ܢ ܐܠܗܐ ܫܘܒܚܐ ܠܛܝܒܘܬܗ. ܘܟܕ ܐܬܥܦܦܝ̈ܢ܆ ܥܝܕܢܝ̈ܬܐ ܗܘܝ̈ ܘܢܦܩ̈ܝ ܡ̣ܢ ܗ̇ܝ ܕܒܪܝ̣ܫܝ̣ܬ ܟܕ ܢܘ̣ܛܦܬ݀ ܓܒܪܐ ܒܡܪܒܥܐ ܢܫܝܐ ܐܬܬܪܡܝ̣ ܒܓܘ ܬܫܥܐ ܝܪ̈ܚܝܢ ܒܪܢܫܐ ܡܫܡܠܝܐ ܐܬܬܗܘܝ̣. ܘܓܠܝܐ ܕܙܢܐ ܗܢܐ ܒܫܘܪܝܐ ܬܕܡܘܪܬܐ ܪܒܬܐ ܐܬܬܕܝ̣ܢܬ݀. ܐܝ̣ܛܐ ܟܕ ܐܬܥܦܦ ܘܐܫܬܪܬܚ. ܙܢܐ ܗ̣ܘܐ ܥܝܕܢܝܐ ܘܠܘ ܕܡܝ̣ܪܐ. ܒܗ̇ ܒܕܡܘ̣ܬܐ ܡܨܝܐ ܕܠܣܥܘܪ̈ܘܬܐ ܗܠܝܢ ܕܬܕܡܪ̈ܬܐ ܠܢ ܡܣܬܒܪ̈ܢ. ܐܠܘ ܡܛܠ ܗ̇ܝ ܕܢܫܪܪ ܡܠܬ݀ ܗ̇ܘ ܕܒܐܝ̈ܕܘܗܝ ܡܣܬܥܪ̈ܢ ܣ̇ܥܪ ܐܢܝܢ. ܐܠܐ ܣܥܘܪ̈ܘܬܐ ܐܢܝܢ ܫܪ̈ܘܝܬܐ. ܕܥܝܕܢܝ̈ܬܐ ܥܬܝ̣ܕ ܗ̣ܘ ܕܢܥܒܕ ܐܢܝܢ ܗ̣ܘ ܐܠܗܐ ܫܘܒܚܐ ܠܛܝܒܘܬܗ. ܟܕ ܡܥܦܦ ܗܘܝܗܝܢ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ ܠܗܘܝܗ ܕܫܡܫܐ ܒܪܝ̣ܫ ܡܠܘܫܐ ܕܐܡܪܐ ܥܠܬܐ ܥܒ̣ܕ ܕܗܘܝܐ ܕܪܒܝ̣ܥܐ ܘܠܗܘܝܗ ܒܪܝ̣ܫ ܣܪܛܢܐ ܥܠܬ݀ ܩܝܛܐ. ܘܗܟܢܐ ܗܠܝܢ ܕܫܪܟܐ. ܒܕܓܘܢ ܡܨܝܐ ܕܐܦ ܠܗܘܝܐ ܕܡܢܬܐ ܡܕܡ ܡ̣ܢ ܡܘܙܠܬܐ ܬܡܝ̣ܢܝܬܐ. ܒܪܝܫܗ ܕܐܡܪܐ. ܥܠܬܐ ܕܣܥܘܪܘܬܐ ܡܕܡ ܥܒ̣ܕ. ܘܠܗܘܝܐ ܕܡܢܬܐ ܐ̱ܚܪܬܐ ܒܪܝܫ ܣܪܛܢܐ ܥܠܬ݀ ܣܥܘܪܘܬܐ ܐ̱ܚܪܬܐ. ܘܡܛܠ ܕܗܘܝܗ ܕܫܡܫܐ ܒܪܝܫ ܐܡܪܐ ܟܠ ܫܢ̱ܬܐ ܡܫܬܡܠܐ. ܠܘ ܣܥܘܪܘܬܐ ܕܡܝ̣ܪܬܐ ܡܣܬܒܪܐ ܗ̇ܝ ܕܠܗܢܐ ܢܩܦܐ. ܐܠܐ ܥܝܕܢܝܬܐ. ܗ̇ܝ ܕܝܢ ܕܠܗܘܝܐ ܕܡܢܬܐ ܡܕܡ ܡ̣ܢ ܡܘܙܠܬܐ ܬܡܝ̣ܢܝܬܐ ܒܪܝܫ ܐܡܪܐ ܐܘ ܒܕܘܟ ܐ̱ܚܪܝܢ ܢܩܦܐ. ܡܛܠ ܕܒܟܠ ܬܠܬܝܢ ܘܫܬܐ ܐܠܦܝ̈ܐ ܕܫܢܝ̈ܐ ܚܕܐ ܙܒܢ̱ܬܐ ܗܘܝܐ. ܐܝܟ ܬܕܡܘܪܬܐ ܪܒܬܐ ܡܣܬܒܪܐ. ܟܕ ܠܘ ܬܕܡܘܪܬܐ ܗ̱ܝ. ܒܕܓܘܢ ܡܨܝܐ ܕܬܬܐܡܪ ܕܣܥܘܪܘܬܐ ܗ̇ܝ ܠܘ ܐܝܟ ܕܠܫܘܪܪ ܡܠܬܗ ܕܗ̇ܘ ܕܒܐܝ̈ܕܘܗܝ ܡܣܬܥܪܐ: ܣ̇ܥܪ ܠܗ̇ ܐܠܗܐ. ܐܠܐ ܡܛܠ ܕܗܟܢܐ ܒܪܗ̇ ܠܒܪܝ̣ܬܐ ܗܕܐ ܘܗܟܢܐ ܬܒܥܐ ܫܦܝ̣ܪܘܬ ܡܛܟܣܘܬܗ.

 

 

 

ܣܥܝܐ ܕܬܠܬܐ

 

ܐܡܪܝܢ ܕܫܡܫܐ ܟܕ ܚܫܟ ܒܙܒܢ ܙܩܝ̣ܦܘܬܐ. ܡܨܝܐ ܕܒܪܢܫܐ ܐ̱ܢܫ ܒܣܟܝ̈ܗ̇ ܕܥܡܪܬܐ ܐܡ̣ܪ ܥܠ ܢܦܫܗ ܕܒܪܐ ܗ̱ܘ ܕܐܠܗܐ ܐܘ ܕܢܒܝܐ ܗ̱ܘ ܘܒܥܐ ܡ̣ܢ ܐܠܗܐ ܕܢܫܪܪ ܡܠܬܗ ܟܕ ܡܚܫܟ ܠܗ ܠܫܡܫܐ ܘܒܥܓܠ ܫܡܠܝܗ̇ ܐܠܗܐ ܠܗܕܐ ܒܥܒܕܐ. ܒܕܓܘܢ ܚܫܟܗ ܕܫܡܫܐ ܠܘ ܡܛܠ ܙܩܝ̣ܦܘܬܐ ܗܘܐ ܐܠܐ ܡܛܠ ܫܘܪܪ ܡܠܬܗ ܕܗ̇ܘ ܒܪܢܫܐ ܐ̱ܚܪܢܐ. ܗ̣ܘ ܗܟܘܬ ܘܟܕ ܡܝ̣ܬܐ ܐ̱ܢܫ ܢܚܡ. ܡܨܝܐ ܕܒܪܢܫܐ ܐ̱ܢܫ ܐ̱ܚܪܢܐ ܫܐܠ ܡ̣ܢ ܐܠܗܐ ܕܢܢܚܡܝ̣ܘܗܝ ܠܡܝ̣ܬܐ ܗ̇ܘ. ܒܕܓܘܢ ܢܚܡܗ. ܐܝܟ ܕܠܦܘܢܝ ܫܐܠܬܗ ܕܗ̇ܘ. ܘܠܐ ܠܫܘܪܪ ܡܠܬܗ ܕܗܢܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ܇ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܣܥܘܪ̈ܘܬܐ ܗ̇ܢܝܢ ܕܒܫܘܪ̈ܝܗܝܢ ܒܙܢܐ ܕܬܕܡܘܪܬܐ ܗܘܝ̈ ܐܝ̣ܛܐ ܟܕ ܐܬܥܦܦ̈ܝ ܗܘܝ̈ ܥܝܕܢܝ̈ܬܐ. ܣܥܘܪ̈ܘܬܐ ܐܢܝܢ ܟܝܢܝ̈ܬܐ ܕܠܐ ܡܬܘܡ ܨܒܝܢܐ ܥܠܝܗܝܢ ܡܫܬܠܛ. ܐܝܟ ܝܘܒܠܐ ܕܚܝ̈ܘܬܐ ܘܡܘܥܝ̣ܬܐ ܕܢܨ̈ܒܬܐ ܘܡܪܘܝܢܘܬ ܚܡܪܐ. ܣܥܘܪ̈ܘܬܐ ܕܝܢ ܗ̇ܢܝܢ ܕܬܕܡܪ̈ܬܐ ܡܬܡܢ̈ܝܢ ܡܢܢ. ܨܒܝܢܝ̈ܬܐ ܡܕܡ ܐܝܬܝܗܝܢ. ܘܡ̣ܢ ܚܐܪܘܬܐ ܡܬܦܪܢܣܢ. ܘܓܠܝܐ ܕܛܒ ܦܪ̈ܝ̣ܫܢ ܡ̣ܢ ܚܕܕ̈ܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܘ ܡܛܠ ܗ̇ܝ ܕܣܒܝ̣ܣܐܝܬ ܡܬܟܝ̈ܢܢ ܣܥܘܪ̈ܘܬܐ ܠܘ ܬܕܡܪ̈ܬܐ ܡܬܬܕܝ̣̈ܢܢ. ܐܦܠܐ ܡܛܠ ܗ̇ܝ ܕܚܕܐ ܠܟܡܐ ܟܕ ܓܕܫܐ ܬܕܡܘܪܬܐ ܡܣܬܒܪܐ. ܗܐ ܓܝܪ ܒܪܢܫܐ ܐ̱ܢܫ ܐܢܗܘ ܕܟܠ ܝܘܡܐ ܥܣܪܐ ܣܡܝ̈ܐ ܕܡ̣ܢ ܟܪ̈ܣܬ݀ ܐܡܗ̈ܬܗܘܢ ܢܦܬܚ. ܬܕܡܪ̈ܬܐ ܪܘܪ̈ܒܬܐ ܡܬܬܘܕ̈ܝܢ ܣܥܘܪ̈ܘܬܗ. ܘܐܢܗܘ ܕܟܕ ܐܠܦ ܫܢܝ̈ܢ ܚܕܐ ܙܒܢ ܟܕ ܢܘܪܐ ܒܒܝܬܐ ܡܕܡ ܬܦܠ܆ ܠܟܠܗ̇ ܡܕܝܢ̱ܬܐ ܬܘܩܕ. ܠܘ ܬܕܡܘܪܬܐ ܡܣܬܒܪܐ ܗܕܐ. ܒܕ ܗ̇ܢܘ ܟܝܢܗ̇ ܕܢܘܪܐ ܟܐܡܬ݀ ܡܘܩܕܢܘܬܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ. ܕܗ̇ܘ ܡ̇ܢ ܕܣ̇ܒܪ ܕܬܕܡܘܪܬܐ ܠܘ ܡܛܠ ܗ̇ܘ ܕܓܠܝܐܝܬ ܫܟܝ̣ܚ ܘܡܠܦ ܬܐܘܪ̈ܝܐܣ ܫܪܝܪ̈ܬܐ. ܘܣܥܘܪ̈ܘܬܐ ܡܝܬܪ̈ܬܐ ܡܣܬܥܪܐ ܡ̣ܢ ܐܠܗܐ. ܐܠܐ ܡܛܠ ܓܒܪܐ ܐܝܢܐ ܕܟܣܐ ܘܠܐ ܝ̣ܕܝ̣ܥ ܘܠܐ ܡܬܚܙܐ ܘܠܐ ܡܫܬܡܥܐ ܡܠܬܗ܆ ܠܐ ܫܘܐ ܠܦܘܢܝܐ. ܒܗ̇ܝ ܕܠܚܘܫܒܗ ܫܚܝ̣ܡܐ ܝܬܝܪ ܡ̣ܢ ܚܘܫܒܗ ܡܠܝ̣ܠܐ ܡܗܝܡܢ ܘܠܗܓܓܗ ܝܬܝܪ ܡ̣ܢ ܕܠܪܓܫܗ.

 

 

 

ܐܪܣܝܣ ܕܐܪܒܥ ܕܗ̇ܢܘܢ ܕܐܡܪܝܢ܇ ܕܐܦܢ ܐܠܗܐ ܐܝܟ ܕܠܫܘܪܪ ܡܠܬܗ ܕܗ̇ܘ ܕܒܐܝ̈ܕܘܗܝ ܡܣܬܥܪ̈ܢ ܬܕܡܪ̈ܬܐ ܣ̇ܥܪ ܐܢܝܢ. ܐܠܐ ܡܛܠܡܢܐ ܐܡ̣ܪܬܘܢ. ܕܫܪܝ̣ܪܐ ܙܕܩ ܕܢܗܘܐ ܗ̇ܘ ܕܡܫܪܪ ܐܠܗܐ ܡܠܬܗ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܡܥܕ ܠܡܫܪܪܘ ܡܠܬܐ ܕܗ̇ܘ ܕܠܐ ܫܪܝܪ. ܒܥܠܬ݀ ܗ̇ܝ ܕܨܒ̇ܐ ܠܡܢܣܝܘ ܠܗ̇ܢܘܢ ܕܡܚܡܣܢܝ̣ܢ. ܘܒܝܕ ܚܘܡܣܢܗܘܢ ܝܬܝ̣ܪܐ ܡܥܦܦ ܐܦ ܐܓܪܗܘܢ. ܐܝܟ ܗ̇ܝ ܕܣܥ̣ܪ ܠܘܬ ܐܝܘܒ. ܕܐܫܠܛܗ ܠܣܛܢܐ ܠܡܓܡܪ ܒܗ ܨܒܝܢܗ. ܐܝܟܢܐ ܕܐܠܘ ܩܕܡ ܐܡ̣ܪ ܣܛܢܐ ܠܐܝܘܒ. ܕܨܚܐ ܠܐܠܗܐ. ܘܐܠܐ ܒܫܘܚ̈ܢܐ ܒܝ̈ܫܐ ܬܫܬܚܢܢ. ܘܟܕ ܠܐ ܡܬܬܦܝ̣ܣ ܗܘܐ ܠܗ. ܡ̣ܢ ܐܢܢܩܝ̣ ܕܠܥܒܕܐ ܢܦܩܐ ܗܘܬ݀ ܡܠܬܗ. ܒܗ̇ܝ ܕܡ̣ܢ ܟܕܘ ܩܒܠ ܗܘܐ ܐܠܗܐ ܦܘܩܕܢܐ ܥܠ ܗܟܢ. ܘܐܝܟ ܬܕܡܪ̈ܬܐ ܕܡܣܬܥܪ̈ܢ ܠܚܪܬܐ ܒܐܝ̈ܕܝ ܐܢܛܝܟܪܝܣܛܘܣ. ܘܡܛܠܗܕܐ ܐܡܝ̣ܪܐ܆ ܕܒܨܝ̣ܪ ܩܠܝ̣ܠ ܐܦ ܠܓܒܝ̈ܐ ܡܛܥܐ. ܒܕܓܘܢ ܐܦܢ ܗܢܐ ܢܐܡܪ ܥܠ ܢܦܫܗ ܕܒܪܐ ܗ̱ܘ ܕܐܠܗܐ. ܘܐܠܗܐ ܣ̇ܥܪ ܒܐܝ̈ܕܘܗܝ ܬܕܡܘܪܬܐ ܠܐ ܙܕܩ ܕܐܝܟ ܫܪܝܪܐ ܢܩܒܠܝ̣ܘܗܝ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ ܟܕ ܡܒܣܐ ܒܥܡܐ ܡܕܡ ܕܝܬܩܝ ܚܕܬܐ ܡܩܝ̣ܡ ܠܗܘܢ. ܐܝܟ ܗ̇ܝ ܕܐܪܡܝܐ. ܕܗܐ ܝܘ̈ܡܬܐ ܐܬܝܢ ܐܡ̇ܪ ܡܪܝܐ. ܘܐܩܝ̣ܡ ܠܕܒܝܬ ܐܝܣܪܐܝܠ ܘܠܕܒܝܬ ܝܗܘܕܐ ܕܝܬܝܩܝ ܚܕܬܐ ܘܒܬܪ ܩܠܝ̣ܠ ܐܡ̇ܪ. ܡܛܠ ܕܗ̣ܢܘܢ ܒܛܠܘ ܕܝܬܝܩܝ ܕܝܠܝ. ܐܦ ܐܢܐ ܒܣܝܬ ܒܗܘܢ ܐܡ̇ܪ. ܘܬܘܒ ܟܕ ܨܒ̇ܐ ܠܡܛܥܝܘ ܥܡܐ ܡܕܡ ܐܝܟ ܕܐܡܝ̣ܪܐ ܒܐܫܥܝܐ. ܕܠܡܢܐ ܐܛܥܝ̣ܬܢܝ ܡܪܝܐ ܡ̣ܢ ܕܚܠܬܟ. ܢܒܝ̈ܐ ܕܓ̈ܠܐ ܡܫܕܪ ܠܘܬ ܥܡܐ ܗ̇ܘ. ܘܣܗܕܐ ܗܘܐ ܠܡܠܬܗܘܢ ܕܢܒܝ̈ܐ ܗܠܝܢ܇ ܐܝܟ ܗ̇ܝ ܕܒܚܙܩܝ̣ܐܝܠ. ܕܓܒܪܐ ܡ̣ܢ ܐܝܣܪܐܝܠ ܟܕ ܢܣܩ ܕܚܠܬܗ ܥܠ ܠܒܗ ܘܬܘܩܠܬܐ ܕܥܡܗ ܢܣܝ̣ܡ ܠܘܩܒܠ ܐܦܘ̈ܗܝ. ܘܢܐܬܐ ܠܘܬ ܢܒܝܐ ܠܡܫܐܠܘܬܗ. ܐܢܐ ܡܪܝܐ ܐܗܘܐ ܠܗ ܣܗܕܐ ܘܐܬܠ ܪܘܓܙܝ ܥܠ ܓܒܪܐ ܗ̇ܘ. ܘܒܬܪ ܩܠܝ̣ܠ ܐܡ̇ܪ. ܘܢܒܝܐ ܟܕ ܢܛܥܐ ܘܢܡܠܠ ܡܠܬܐ. ܐܢܐ ܡܪܝܐ ܐܛܥܝ̣ܬܗ ܠܢܒܝܐ ܗ̇ܘ ܘܫܪܟܐ. ܘܟܕ ܡܛܠ ܡܒܣܝܢܘܬܐ ܕܐܠܗܐ ܒܥܡܐ ܡܕܡ. ܐܘ ܡܛܠ ܗ̇ܝ ܕܨܒ̇ܐ ܠܡܛܥܝܘܬܗ. ܬܕܡܪ̈ܬܐ ܡܕܡ ܢܣܥܘܪ ܐܝܟ ܕܠܫܘܪܪ ܡܠܬܗ ܕܡܛܥܝܢܐ ܗ̇ܘ. ܠܐ ܙܕܩ ܕܫܪܝ̣ܪܐ ܢܕܘܢܝ̣ܘܗܝ ܘܢܩܒܠܝ̣ܘܗܝ ܠܗ̇ܘ ܕܐܝܟ ܗܢܐ. ܘܡ̣ܢ ܗܠܝܢ ܐܬܚܘܝ̣ ܕܠܘ ܟܠ ܕܡܫܪܪ ܐܠܗܐ ܡܠܬܗ ܫܪܝܪܐ ܗ̱ܘ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܘܕܗ̇ܘ ܬܪܝܢܐ ܐܟܚܕ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܚܢܢ ܡ̇ܢ ܒܝܕ ܡܚܘܝܢ̈ܘܬܐ ܚܘܫܒܝ̈ܬܐ ܐܕܪܟܢܢ ܚܕܢܝܘܬ ܟܝܢܐ ܘܬܠܝ̣ܬܝܘܬ ܩܢܘ̈ܡܐ ܕܐܠܗܐ ܫܘܒܚܐ ܠܛܝܒܘܬܗ. ܘܠܗ̇ܝ ܕܠܘ ܠܐ ܡܫܟܚܐ ܕܩܢܘܡ ܡܠܬܐ ܢܬܒܪܢܫ ܘܢܦܪܘܩ ܠܓܒܝ̣ܠܬܗ ܡ̣ܢ ܥܒܕܘܬܐ ܕܚܛܝ̣ܬܐ. ܘܒܝܕ ܢܒܝ̈ܘܬܐ ܘܬܕܡܪ̈ܬܐ ܬܘܣܦܬܐ ܕܫܘܪܪܐ ܩܢܝܢܢ ܥܠ ܗ̇ܘ ܡܐ ܕܒܚܘܫܒܐ ܐܦܘܕܝܐܩܛܝܩܝܐ ܐܕܪܟܢܢ. ܒܕܓܘܢ ܟܠ ܬܕܡܘܪܬܐ ܐܝܕܐ ܕܥܠ ܐܝ̈ܕܝ ܐܝܢܐ ܕܗܠܝܢ ܕܣܩܘܒ̈ܠܝܢ ܡܠܦ ܡܣܬܥܪܐ܆ ܡ̣ܢ ܐܢܢܩܝ̣ ܝ̇ܕܥܝ̣ܢܢ܇ ܕܐܘ ܕܐܝܟ ܕܠܢܣܝܢܐ ܐܘ ܕܐܝܟ ܕܠܒܣܝܢܐ ܐܘ ܡܕܡ ܐ̱ܚܪܝܢ ܒܙܢܐ ܕܡܫܬܒܩܢܘܬܐ ܕܡ̣ܢ ܐܠܗܐ ܗܘܝܐ. ܘܗܟܢܐ ܠܘ ܐܝܟ ܕܠܫܪܝܪܐ ܡܩܒܠܝ̣ܢܢ ܠܗ̇ܘ ܕܐܝܟ ܗܢܐ.

 

 

 

ܐܪܣܝܣ ܕܚܡܫ ܕܗ̇ܢܘܢ ܕܐܡܪܝܢ ܕܐܦܢ ܫܪܝܪܐ ܙܕܩ ܘܕܢܗܘܐ ܗ̇ܘ ܕܐܠܗܐ ܡܫܪܪ ܡܠܬܗ ܒܝܕ ܬܕܡܪ̈ܬܐ. ܐܠܐ ܐܝܕܐ ܣܢܝ̣ܩܘܬܐ ܐܝܬ ܗܘܐ ܥܠ ܡܬܒܪܢܫܢܘܬܐ ܟܕ ܒܢܝ̈ܢܫܐ ܗ̇ܘ ܡܐ ܕܒܪܐ ܒܗܘܢ ܒܠܚܘܕ ܡܨܝܢ ܗ̣ܘܘ ܠܡܣܥܪ ܐܘ ܕܠܡܐ ܐܠܗܐ ܠܐ ܡܨܐ ܗܘܐ ܕܒܠܥܕ ܗܟܢ ܐܘ ܒܝܕ ܐ̱ܢܫ ܡ̣ܢ ܢܒܝ̈ܐ ܢܗܕܐ ܗܘܐ ܠܒܢܝ̈ܢܫܐ. ܣܥܝܐ ܩܕܡܝܐ

 

ܐܡܪܝܢܢ ܕܒܪܢܫܐ ܒܪܝܬܗ ܗ̣ܘ ܕܐܠܗܐ ܗ̣ܘ ܗܟܘܬ ܘܥܒܕܘ̈ܗܝ. ܒܕܓܘܢ ܟܕ ܢܒܪܐ ܐܠܗܐ ܒܒܪܢܫܐ ܥܒܕܐ ܡܕܡ. ܐܠܨܐܝܬ ܣ̇ܥܪ ܠܥܒܕܐ ܗܘ̇ ܒܪܢܫܐ ܗ̱ܘ. ܘܟܕ ܠܐ ܢܒܪܐ ܒܗ ܐܠܨܐܝܬ ܠܐ ܡܫܟܚ ܠܡܣܥܪܗ. ܘܟܕ ܗܠܝܢ ܗܟܢܐ ܐܢܝܢ. ܐܝܟܢܐ ܦܐܝܐ ܠܐܠܗܐ ܡܠܬܐ. ܕܩܢܘܡܐܝܬ ܢܐܬܐ ܗܘܐ ܠܘܬ ܒܢܝ̈ܢܫܐ. ܘܢܚܦܛ ܐܢܘܢ ܥܠ ܗ̇ܘ ܡܐ ܕܠܐ ܡܨܝܢ. ܟܐܡܬ݀ ܕܢܣܥܪܘܢ ܡܕܡ ܕܠܐ ܒܪܐ ܒܗܘܢ. ܘܕܠܐ ܢܣܥܪܘܢ ܡܕܡ ܕܒܪܐ ܒܗܘܢ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܗ̇ܘ ܡܐ ܕܝܕܥ ܐܠܗܐ ܗܘܝܗ ܐܠܨܐܝܬ ܗܘܐ. ܘܗ̇ܘ ܡܐ ܕܝ̇ܕܥ ܐܠܗܐ ܕܠܐ ܗܘܝܗ ܐܠܨܐܝܬ ܠܐ ܗܘܐ. ܒܕܓܘܢ ܐܝܢܐ ܗ̱ܘ ܝܘܬܪܢܐ ܡ̣ܢ ܗ̇ܝ ܕܢܬܒܪܢܫ ܗܘܐ ܐܠܗܐ. ܘܢܐܡܪ ܠܒܢܝ̈ܢܫܐ. ܕܣܥܘ̣ܪܘ ܙܦܠܢ. ܘܠܐ ܬܣܥܪܘܢ ܙܦܠܢ. ܟܕ ܝ̇ܕܥ ܕܠܐ ܡܨܝܢ ܡܣܥܪ. ܐܠܐ ܒܠܚܘܕ ܗ̇ܘ ܡܐ ܕܗ̣ܘ ܝ̇ܕܥ ܦܐܝܐ ܗܕܐ ܠܚܟܡܬܐ ܐܠܗܝܬܐ ܐܠܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܟܠ ܥܒܕܐ ܐ̱ܢܫܝܐ. ܛܒܐ ܢܗܐ ܐܘ ܒܝ̣ܫܐ. ܒܝܕ ܥܠܬܐ ܗܘܐ. ܒܕܓܘܢ ܐܘ ܫܘܝܐ ܠܥܠܬܗ ܗ̇ܝ ܕܬܗܘܐ ܘܗ̇ܝ ܕܠܐ ܬܗܘܐ. ܐܘ ܗ̇ܝ ܕܬܗܘܐ ܝܬܝܪ ܒܝܬܝܐ ܠܗ̇܆ ܡ̣ܢ ܗ̇ܝ ܕܠܐ ܬܗܘܐ. ܐܘ ܗ̇ܝ ܕܠܐ ܬܗܘܐ ܝܬܝܪ ܒܝܬܝܐ ܠܗ̇. ܡ̣ܢ ܗ̇ܝ ܕܬܗܘܐ. ܘܠܙܢܐ ܗ̇ܘ ܩܕܡܝܐ ܠܐ ܡܨܐ ܠܡܩܦ ܗܘܕܝܐ. ܒܕܠܐ ܡܨܐ ܒܪܢܫܐ ܠܡܣܥܪܗ. ܒܗ̇ܝ ܕܐܢܗܘ ܕܣܥܪܗ܇ ܟܕ ܥܠܬܐ ܠܐ ܡܢܬܥܐ ܣܥܘܪܘܬܗ. ܡܫܬܟܚ ܥܒܕܐ ܗ̇ܘ ܕܣܛܪ ܡ̣ܢ ܥܠܬܐ ܗܘܐ ܗ̇ܝ ܕܫܟܝ̣ܪܐ. ܒܗ̇ܝ ܕܐܡ̣ܪܢܢ ܕܟܠ ܥܒܕܐ ܐ̱ܢܫܝܐ ܒܝܕ ܥܠܬܐ ܕܟܠ ܥܒܕܐ ܐ̱ܢܫܝܐ ܒܝܕ ܥܠܬܐ. ܐܦܠܐ ܬܘܒ ܠܙܢܐ ܬܪܝܢܐ ܡܨܐ ܠܡܩܦ ܗܘܕܝܐ. ܒܗ̇ܝ ܕܥܒܕܐ ܐܝܢܐ ܕܗ̇ܝ ܕܠܐ ܢܗܘܐ. ܐܠܨܐܝܬ ܡܣܬܥܪ. ܘܟܕ ܡܬܗܕܐ ܣܥܘܪܗ ܘܟܕ ܠܐ ܡܬܗܕܐ. ܗܟܘܬ ܘܠܙܢܐ ܬܠܝܬܝܐ ܬܘܒ ܠܐ ܡܨܐ ܠܡܩܦ ܗܘܕܝܐ. ܒܗܝ ܕܥܒܕܐ ܐܝܢܐ ܕܗ̇ܝ ܕܠܐ ܢܗܘܐ ܝܬܝܪ ܒܝܬܝܐ ܠܗ ܡ̣ܢ ܗ̇ܝ ܕܢܗܘܐ ܐܠܨܐܝܬ ܠܐ ܡܣܬܥܪ. ܘܟܕ ܡܬܗܕܐ ܒܪܢܫܐ ܘܟܕ ܠܐ ܡܬܗܕܐ. ܡ̣ܢ ܗܠܝܢ ܝ̣ܕܝ̣ܥܐ܆ ܕܕܠܐ ܦܐܪ̈ܐ ܗ̣ܘ ܗܘܕܝܐ. ܗܟܘܬ ܘܡܬܒܪܢܫܢܘܬܐ ܕܥܠܬܢܝܬܗ ܗ̣ܝ. ܐܝ̣ܩܝ̣ ܐܠܨܐ ܕܬܗܘܐ. ܒܗ̇ܝ ܕܠܐ  ܡܕܡ ܐܝܬ ܐܝ̣ܩܝ̣ ܡ̣ܢ ܗܠܝܢ ܕܠܘܬ ܐܠܗܐ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܕܣܥܘܪ̈ܘܬܐ ܟܠܗܝܢ. ܐܘ ܝ̣ܕܝ̣ܥܐ ܠܢ ܡܝܬܪܘܬܗܝܢ. ܐܘ ܝ̣ܕܝ̣ܥܐ ܠܢ ܫܟܝ̣ܪܘܬܗܝܢ. ܐܘ ܠܐ ܝ̣ܕܝ̣ܥܐ ܠܢ ܡܝܬܪܘܬܗܝܢ܆ ܐܦܠܐ ܫܟܝ̣ܪܘܬܗܝܢ. ܘܐܢ ܝܕܝ̣ܥܐ ܠܢ ܡܝܬܪܘܬܗܝܢ܆ ܡܣܥܪ ܣܥܪܝ̣ܢܢ ܠܗܝܢ. ܘܐܦܢ ܠܐ ܢܬܗܕܐ ܠܘܬܗܝܢ. ܘܐܢ ܝܕܝ̣ܥܐ ܠܢ ܫܟܝ̣ܪܘܬܗܝܢ ܠܐ ܣܟ ܣܥܪܝܢܢ ܠܗܝܢ ܗܟܘܬ ܒܠܥܕ ܡܗܕܝܢܐ. ܘܐܢ ܠܐ ܝܕܝ̣ܥܐ ܠܢ ܠܐ ܡܝܬܪܘܬܗܝܢ ܐܦܠܐ ܫܟܝ̣ܪܘܬܗܝܢ. ܐܢܗܘ ܕܐܢܢܩܝܐ ܠܢ ܣܥܘܪܘܬܗܝܢ ܐܝܟ ܣܘܩܐ ܕܐܐܪ ܠܡܐܡܪ ܐܠܨܐܝܬ ܣܥܪܝ̣ܢܢ ܠܗܝܢ܇ ܘܟܕ ܢܬܗܕܐ ܘܟܕ ܠܐ ܢܬܗܕܐ. ܘܐܢܗܘ ܕܠܐ ܐܢܢܩܝܐ ܠܢ ܣܥܘܪܘܬܗܝܢ܇ ܠܐ ܣܢܝ̣ܩܝ̣ܢܢ ܥܠܝܗܝܢ ܣܟ. ܘܐܝܟܢܐ ܦܐܝܐ ܠܡܗܝܡܢܘ ܕܐܬܒܪܢܫ ܐܠܗܐ ܠܡܗܕܝܘܬܢ ܠܘܬ ܣܥܘܪܘܬܐ ܐܝ̇ܕܐ ܕܠܐ ܣܢܝ̣ܩܝ̣ܢܢ ܥܠܝܗ̇. ܘܗܟܢܐ ܠܘܬ ܦܘܠܓ̈ܐ ܗܠܝܢ ܠܝܬ ܝܘܬܪܢܐ ܒܗܘܕܝܐ. ܐܦܠܐ ܒܡܬܒܪܢܫܢܘܬܗ ܕܥܠܬܢܝܬܗ ܗ̣ܝ ܕܗܘܕܝܐ.

 

 

 

ܣܥܝܐ ܕܚܡܫܐ

 

ܐܡܪܝܢ ܐܠܘ ܝܘܬܪܢܐ ܐܝܬ ܗܘܐ ܒܗܘܕܝܐ ܗ̇ܘ ܕܒܝܕ ܡܬܒܪܢܫܢܘܬܐ. ܗ̣ܘ ܗ̇ܘ ܗܘܕܝܐ ܐܘ ܒܦܚܡܐ ܗ̣ܘܐ ܕܠܘܬ ܐܠܗܐ ܐܘ ܒܦܚܡܐ ܕܠܘܬ ܒܢܝ̈ܢܫܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܡܫܬܟܚ ܐܠܗܐ ܕܓܠܝ̣ܙ ܗܘܐ ܡ̣ܢ ܝܘܬܪܢܐ ܡܕܡ. ܡ̣ܢ ܩܕܡ ܡܬܒܪܢܫܢܘܬܐ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܝܘܬܪܢܐ ܗ̱ܘ ܐܘ ܗܢܝܐܘܬܐ ܗ̱ܘ ܕܢܦܫܐ ܐܘ ܕܦܓܪܐ ܐܘ ܕܟܢܝ̣ܫܘܬ ܬܪ̈ܝܗܘܢ. ܐܘ ܕܚܘܩܝܐ ܕܠܙܬܐ ܡ̣ܢ ܢܦܫܐ ܐܘ ܡ̣ܢ ܦܓܪܐ ܐܘ ܡ̣ܢ ܟܢܝ̣ܫܘܬ ܬܪ̈ܝܗܘܢ. ܘܐܠܗܐ ܡܨܐ ܗܘܐ ܠܡܩܢܝܘܬܗܘܢ ܠܒܢܝ̈ܢܫܐ ܬܪ̈ܝܗܘܢ ܙܢܝ̈ܐ ܕܝܘܬܪ̈ܢܐ ܗܠܝܢ. ܒܠܥܕ ܗ̇ܝ ܕܢܗܕܐ ܐܢܘܢ ܠܘܬ ܣܥܘܪ̈ܘܬܐ ܐܝܠܝܢ ܕܒܥܠܬܗܝܢ ܢܫܬܘܘܢ ܠܝܘܬܪ̈ܢܐ ܗ̇ܢܘܢ. ܘܟܕ ܗܕܐ ܡܨܝܐ܆ ܐܝ̣ܩܝ̣ ܡܫܬܟܚ ܗܘܕܝܐ. ܘܡܛܠ ܗܕܐ ܐܦ ܘܡܬܒܪܢܫܢܘܬܐ ܕܡܛܠ ܗܘܕܝܐ.

 

 

 

ܣܥܝܐ ܫܬܝܬܝܐ

 

ܐܡܪܝܢܢ ܕܬܗܘܐ ܕܠܐ ܡܫܬܘܝܢ ܗܘܘ ܒܢܝ̈ܢܫܐ ܠܝܘܬܪ̈ܢܐ ܗ̇ܢܘܢ. ܕܠܐ ܒܥܠܬ݀ ܣܥܘܪ̈ܘܬܐ ܐܝܠܝܢ ܕܒܝܕ ܗܘܕܝܐ ܝܠܦܝ̣ܢ ܗܘܘ ܠܗܝܢ. ܨܘܡܐ ܠܡܐܡܪ܇ ܐܘ ܨܠܘܬܐ ܘܙܕܩܬܐ. ܐܘ ܡܣܪܩܘܬܐ. ܐܘ ܕܒܛܒܬܐ ܢܙܟܝܗ̇ ܠܒܝܫܬܐ ܠܐ ܒܒܝܫܬܐ. ܐܠܐ ܡܨܐ ܗ̣ܘܐ ܕܒܫܘܠܛܢܐ ܘܦܘܩܕܢܐ ܐܘܟܝ̣ܬ ܨܒܝܢܐ ܒܠܚܘܕ ܢܗܕܐ ܗܘܐ ܠܒܢܝ̈ܢܫܐ ܠܘܬ ܗܠܝܢ. ܐܘ ܒܝܕ ܚܕ ܡ̣ܢ ܥܒܕܘ̈ܗܝ ܢܒܝ̈ܐ. ܐܟܡܐ ܕܐܦ ܙܒ̈ܢܬܐ ܣܓܝ̈ܐܬܐ ܗܕܝ̣ ܐܢܘܢ. ܘܡܛܠ ܗܕܐ ܠܐ ܦܐܝܐ ܗܘܬ݀ ܠܗ ܐܦܠܐ ܣܢܝ̣ܩ ܗܘܐ ܠܡܬܢܚܬܘ ܒܚܕܝܘܬܐ ܕܥܡ ܟܝܢܐ ܫܝ̣ܛܐ ܘܚܫܘܫܐ.

 

 

 

ܣܥܝܐ ܫܒܝܥܝܐ

 

ܐܡܪܝܢ ܕܗ̇ܝ ܕܐܡܪܝܢ ܐܢ̱ܬܘܢ ܐܝܟ ܕܒܣܘܓܐܐ ܒܟܬܒܝ̈ܟܘܢ ܕܐܬܒܪܢܫ ܐܠܗܐ ܡܠܬܐ܆ ܐܝܟܢܐ ܕܒܝܕ ܡܘܬܗ ܢܚܪܪ ܡ̣ܢ ܡܘܬܐ ܠܐܕܡ ܘܠܟܠܗܘܢ ܝܠܕܘ̈ܗܝ. ܘܐܡܝ̣ܬܗ ܠܡܘܬܐ ܒܡܘܬܗ. ܘܗܘܐ ܐܡܪܐ ܘܕܒܚܐ. ܘܫܩ̣ܠ ܠܚܛܝ̣ܬܗ ܘܥܠܡܐ. ܡ̈ܠܐ ܐܢܝܢ ܣܦܝ̣̈ܩܬ݀ ܡ̣ܢ ܣܘ̈ܟܠܐ. ܒܗ̇ܝ ܕܠܐ ܠܐܕܡ ܚܙܝܢܢ ܕܚܝܐ. ܐܦܠܐ ܠܝܠܕܘ̈ܗܝ ܕܠܐ ܡܝܬܝ̣ܢ. ܘܐܢܗܘ ܬܘܒ ܕܡ̣ܢ ܟܕܘ ܫܩܠܗ̇ ܠܚܛܝ̣ܬܐ ܘܣܟܟܗ̇ ܒܙܩܝ̣ܦܗ. ܘܚܪܪ ܡ̣ܢ ܥܒܕܘܬܗ̇ ܠܥܠܡܐ ܡ̣ܢ ܣܟܗ̇. ܬܠܬ ܫܟܝ̣ܪ̈ܘܬܐ ܓܕ̈ܫܢ. ܚܕܐ ܡ̇ܢ ܗ̇ܝ ܕܢܫܬܘܘܢ ܡܟܝܠ ܩܛܘܠܐ ܘܩܛܝ̣ܠܐ ܘܥܠܘܒܐ ܘܥܠܝ̣ܒܐ. ܘܛܢܦܐ ܘܛܒܐ. ܒܕܠܝܬ ܚܛܝ̣ܬܐ. ܕܬܪܬܝܢ ܕܝܢ ܗ̇ܝ ܕܗܒܠܐ ܢܗܘ̈ܝܢ ܡܟܝ̣ܠ ܨܠܘ̈ܬܐ ܘܙܕ̈ܩܬܐ ܘܨܘ̈ܡܐ ܘܫܪܟܐ. ܒܗ̇ܝ ܕܐܦܢ ܠܐ ܢܣܬܥܪܘܢ܆ ܠܘ ܒܚܛܝ̣ܬܐ ܡܬܚܝܒܝ̣ܢ ܗ̇ܢܘܢ ܕܡܢܗܘܢ ܡܗܡܝܢ. ܕܬܠܬ. ܗ̇ܝ ܕܬܫܬܪܐ ܡܠܬܐ ܗ̇ܝ ܕܐܡܪܝܢ ܐܢ̱ܬܘܢ ܕܟܠܡܕܡ ܐܬܕܡܝ̣ ܠܢ ܡܫܝ̣ܚܐ ܣܛܪ ܡ̣ܢ ܚܛܝ̣ܬܐ. ܘܐܝܟܢܐ ܕܠܐ ܚܛܝ̣ܬܐ ܢܗܘܐ ܐܝܢܐ ܕܟܠܗܘܢ ܚܛܗܘ̈ܗܝ ܕܥܠܡܐ ܒܩܢܘܡܗ ܢܣܒ. ܘܕܟܝ̣ ܐܢܘܢ ܠܒܢܝ̈ܢܫܐ ܡܢܗܘܢ. ܘܟܕ ܗܟܢܐ ܕܠܐ ܫܬܐܣܬܐ ܐܢܝܢ ܥ̈ܠܬܐ ܗ̇ܢܝܢ ܕܡܛܠܬܗܝܢ ܐܡܪܝܬܘܢ ܕܗܘܬ݀ ܡܬܒܪܢܫܢܘܬܐ. ܐܦ ܗ̣ܝ ܡܬܒܪܢܫܢܘܬܐ ܐܟܘܬܗܝܢ ܕܠܐ ܫܬܐܣܬܐ ܐܠܨܐ ܕܬܗܘܐ ܘܠܐ ܫܪܝܪܬܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܒܪܢܫܐ ܡ̇ܢ ܫܪܝ̣ܪܐܝܬ ܕܒܪܝ̣ܬܐ ܗ̱ܘ ܕܐܠܗܐ. ܐܝܢ ܥܒܕܘ̈ܗܝ ܠܘ ܟܝܢܐܝܬ ܒܪܝܢ ܒܗ. ܐܠܐ ܠܨܒܝܢܗ ܘܠܫܠܝ̣ܛܘܬ ܒܝܬܗ ܫܪܝ̣ܟܝܢ. ܘܥܠ ܗܢܐ ܪܥܝܢܐ ܒܗܠܝܢ ܕܒܬܪܟܢ ܡܠܝܐܝܬ ܥܬܝ̣ܕܝ̣ܢܢ ܠܡܡܠܠܘ ܒܝܕ ܐܠܗܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܒܫܪܪܐ ܕܗ̇ܘ ܡܐ ܕܝ̇ܕܥ ܐܠܗܐ ܗܘܝܗ ܐܠܨܐܝܬ ܗܘܐ. ܘܗ̇ܘ ܡܐ ܕܝ̇ܕܥ ܐܠܗܐ ܠܐ ܗܘܝܗ ܐܠܨܐܝܬ ܠܐ ܗܘܐ. ܐܠܐ ܒܢܝ̈ܢܫܐ ܠܦܘܬ ܝܨܪܗܘܢ ܘܡܨܛܠܝܢܘܬ ܨܒܝܢܗܘܢ ܕܠܣܥܘܪ̈ܘܬܐ ܡܝܬܪ̈ܬܐ ܘܫܟܝ̣ܪ̈ܘܬܐ ܡܬܦܪܥܝ̣ܢ ܒܘܣܡܐ ܐܘ ܫܘܢܩܐ ܒܥܠܡܐ ܕܥܬܝ̣ܕ. ܒܕܓܘܢ ܝܘܬܪܢܐ ܕܡ̣ܢ ܡܬܒܪܢܫܢܘܬܐ ܗܢܐ ܗ̱ܘ. ܕܢܬܗܕܘܢ ܗܘܘ ܒܢܝ̈ܢܫܐ ܠܘܬ ܝ̣ܕܥܬܐ ܕܗ̇ܝ ܕܐܝܕܐ ܗ̱ܝ ܣܥܘܪܘܬܐ ܡܝܬܪܬܐ. ܘܐܝܕܐ ܗ̱ܝ ܣܥܘܪܘܬܐ ܫܟܝ̣ܪܬܐ. ܐܝܟܢܐ ܕܒܝܕ ܡܨܥܝܘܬ ܝ̣ܕܥܬܐ ܗܕܐ. ܢܓܥܨܘܢ ܡ̣ܢ ܫܟܝ̣ܪ̈ܬܐ ܘܠܐ ܢܬܬܢܝ̣ܚ ܨܒܝܢܗܘܢ ܒܗܝܢ ܘܢܨܛܒܘܢ ܒܡܝܬܪ̈ܬܐ ܘܢܣܒܟܘܢ ܒܗܝܢ. ܘܗܟܢܐ ܢܫܬܘܘܢ ܠܒܘܣܡܐ ܘܢܓܗܘܢ ܡ̣ܢ ܬܫܢܝ̣ܩܐ. ܘܕܥ ܕܠܐ ܐ̱ܢܫ ܡ̣ܢ ܗܠܝܢ ܕܝܠܢ ܐܟܡܐ ܕܙܕܩ ܐܬܡܨܝ̣ ܠܡܩܡ ܠܘܩܒܠ ܣܥܝܐ ܗܢܐ. ܘܠܡܣܬܪܗ ܒܕ ܚܣܝ̣ܢܐܝܬ ܡܕܠܩܒ ܬܪܥܝ̣ܬܢ. ܕܒܚܐܪܘܬܐ ܘܫܠܝ̣ܛܘܬ ܒܝܬܐ. ܘܒܝܬ ܡܪܕܐ ܕܗ̇ܢܘܢ ܕܡܪܝ̣ܡܝܢ ܠܫܠܝ̣ܛܘܬ ܒܝܬܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ܇ ܕܦܘܠܓܐ ܗ̇ܘ ܕܒܗ ܐܬܚܫܚܬܘܢ ܠܘܬ ܡܥܒܕܢ̈ܘܬܐ ܟܝܢܝ̈ܬܐ ܒܠܚܘܕ ܡܫܪ. ܣܛܪ ܡ̣ܢ ܕܒܗܠܝܢ ܨܒܝܢܝ̈ܬܐ ܥܠܬܐ ܡܕܝܢ ܕܥܒܕܐ ܐ̱ܢܫܝܐ ܗ̣ܘ ܨܒܝܢܝܐ ܗ̱ܘ ܐ̱ܢܫܝܐ ܒܠܚܘܕ. ܘܕܨܒܝܢܐ ܡܨܐ ܘܫܠܝ̣ܛ ܕܒܠܥܕ ܥܠܬܐ ܕܡܢܬܥܐ ܢܣܥܘܪ ܣܘܥܪܢܐ ܐܝܢܐ ܕܗ̇ܘ ܕܢܨܒܐ. ܡ̣ܢ ܠܥܠ ܒܕܘܟ̈ܝܬܐ ܣܘܓܐܐ ܚܘܝ̣ܢܢ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܗܘܢܐ ܐ̱ܢܫܝܐ ܠܐ ܣܦܩ ܠܡܕܪܟܘ ܠܟܠܗܝܢ ܗܠܝܢ ܕܐܝܬܝܗܝܢ ܐܝܟ ܕܐܝܬܝܗܝܢ. ܘܐܦܢ ܒܡܢܬܐ ܡܕܪܟ ܠܗܝܢ. ܘܐܠܐ ܠܐ ܦܪܝ̣ܫܝ̣ܢ ܗܘܘ ܒܢܝ̈ܢܫܐ ܡ̣ܢ ܚܕ̈ܕܐ ܒܝ̣ܕܥܬܐ. ܒܕܓܘܢ ܐܠܨܐܝܬ ܡܣܬܢܩ ܒܪܢܫܐ ܥܠ ܬܐܪܐ ܠܡܩܢܐ ܡܢܗ ܝ̣ܕܥܬܐ ܚܬܝ̣ܬܬܐ ܕܗܠܝܢ ܕܙܕܩ ܠܗ ܠܡܕܥ ܐܢܝܢ ܘܠܡܣܥܪ. ܘܟܕ ܬܐܪܐ ܕܐܝܟ ܗܢܐ ܗ̣ܘ ܐܠܗܐ ܫܘܒܚܐ ܠܛܝܒܘܬܗ ܢܗܘܐ. ܝܬܝ̣ܪ ܡܪܢܝܬܐ ܐܝܬ ܠܗ̇ ܕܬܗܘܐ ܝ̣ܕܥܬܐ ܗ̇ܝ ܕܡܬܩܢܝܐ. ܘܡ̣ܢ ܗܪܟܐ ܥܠܬ݀ ܣܢܝ̣ܩܘܬܐ ܕܓܢܣܐ ܐ̱ܢܫܝܐ ܥܠ ܕܡܬܒܪܢܫܢܘܬܐ ܕܐܠܗܐ ܡܠܬܐ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܐܦ ܐܠܗܐ ܫܘܒܚܐ ܠܛܝܒܘܬܗ ܡܨܐ ܗܘܐ ܕܒܠܥܕ ܕܘܒܪ̈ܐ ܡܝܬܪ̈ܐ ܡܩܢܐ ܗܘܐ ܠܒܢܝ̈ܢܫܐ ܝܘܬܪ̈ܢܐ ܡܕܡ ܢܦܫܢܝ̈ܐ ܟܝ̣ܬ ܘܦܓܪ̈ܢܝܐ. ܐܠܐ ܗ̇ܝ ܕܒܝܕ ܥܡ̈ܠܐ ܡܕܡ ܠܕܐܝܟ ܗܠܝܢ ܝܘܬܪ̈ܢܐ ܢܫܬܘܘܢ ܗܘܘ ܝܬܝ̣ܪ ܠܚܡܐ ܗܘܬ݀ ܠܚܟܡܬܗ. ܘܗܕܐ ܡ̇ܢ ܡ̣ܢ ܩܨ ܬܠܬ. ܚܕܐ ܡ̇ܢ ܕܠܐ ܢܫܬܘܐ ܗܘܐ ܛܒܐ ܠܒܝ̣ܫܐ. ܘܡܗܝܡܢܐ ܠܟܦܘܪܐ. ܕܬܪܬܝܢ ܢܦܫܢܝ̈ܐ ܘܦܓܪ̈ܢܝܐ ܒܥܠܬ݀ ܥܒܕ̈ܐ ܛܒ̈ܐ. ܠܘ ܒܫܦܝ̣ܪܘܬ ܡܛܟܣܘܬܐ ܩܐܡ ܗܘܐ ܥܠܡܐ ܗܢܐ. ܒܗ̇ܝ ܕܣܓܝ̈ܐܐ ܡ̣ܢ ܩܢܛܐ ܕܫܘܢܩܐ ܕܥܬܝ̣ܕ. ܝܬܝܪ ܡ̣ܢ ܕܣܝܦܐ ܕܐܚܝ̣̈ܕܝ ܥܠܡܐ ܡܙܕܗܪܝ̣ܢ ܡ̣ܢ ܒܝ̈ܫܬܐ. ܕܬܠܬ ܗ̇ܝ ܕܗ̣ܝ ܗܕܐ ܝܬܝܪ ܒܝܬܝܐ ܗܘܬ݀ ܠܛܝܒܘܬܗ ܕܐܠܗܐ ܕܥܠܝܢ. ܟܕ ܫܘ̈ܝܝ ܠܛܒ̈ܬܐ ܥܒ̇ܕ ܠܢ. ܘܠܘ ܕܐܝ̣ܩܝ̣ ܘܟܕ ܠܐ ܫܘܝܢܢ ܡܬܝܗ̈ܒܢ ܠܢ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ ܕܗ̇ܝ ܕܒܫܘܠܛܢܐ ܘܒܦܘܩܕܢܐ ܢܗܕܐ ܗܘܐ ܐܠܗܐ ܠܒܢܝ̈ܢܫܐ. ܠܐ ܡܬܬܝܬܝܐ ܗܘܬ݀. ܐܠܐ ܟܕ ܛܒ̈ܐ ܒܟܝܢܐ ܘܠܐ ܡܫܬܪ̈ܓܠܝ ܠܘܬ ܒܝܫܬܐ ܒܪܐ ܗܘܐ ܐܢܘܢ. ܒܕܓܘܢ ܗ̇ܘ ܕܗܕܐ ܐܡ̇ܪ܆ ܚܝܠܐ ܩܢܝܐ ܡܠܬܗ. ܕܡܠܬܐ ܕܗ̇ܘ ܕܐܡ̇ܪ. ܕܠܡܢܐ ܠܘ ܒܢܝ̈ܢܫܐ ܒܪܐ ܐܢܘܢ ܐܠܗܐ ܠܒܢܝ̈ܢܫܐ. ܒܗ̇ܝ ܕܒܪܢܫܐ ܗ̇ܘ ܗ̣ܘ ܕܠܘ ܟܝܢܝ̈ܬܐ ܐܢܝܢ ܟܠܗܝܢ ܡܥܒܕܢ̈ܘܬܗ. ܐܠܐ ܐܦ ܘܨܒܝܢܝ̈ܬܐ ܕܒܝܕܗܝܢ ܣܢܝ̣ܩ ܥܠ ܗܘܕܝܐ ܕܒܝܕ ܡܗܕܝܢܐ. ܘܗ̇ܝ ܕܒܝܕ ܚܕ ܡ̣ܢ ܥܒܕܘ̈ܗܝ ܢܒܝ̈ܐ ܙܕܩ ܗܘܐ ܠܗ ܠܡܗܕܝܘ ܐܡܪܝܢܢ. ܕܟܘܪܗܢܐ ܡ̇ܢ ܠܦܘܬ ܥܣܩܘܬܗ. ܥܠ ܐܣܝܐ ܕܝܬܝ̣ܪ ܒܚܝ̣ܪ ܡܣܬܢܩ. ܘܟܕ ܣܓܕܬ݀ ܨܠܡ̈ܐ ܝܬܝ̣ܪ ܡ̣ܢ ܟܠܗܘܢ ܟܘܪ̈ܗܢܝ ܢܦܫܐ ܩܫܝܐ. ܒܗ̇ܝ ܕܠܒܪ̈ܝܬܐ ܝܬܝܪ ܡ̣ܢ ܕܠܒܪܘܝܗܝܢ ܦܠܚܐ. ܟܐܢܐܝܬ ܥܠ ܐܣܝܐ ܕܝܬܝ̣ܪ ܡ̣ܢ ܟܠܗܘܢ ܐܣܘ̈ܬܐ ܕܪܘܚ ܐܣܬܢܩܬ݀. ܕܗܘܝܘ ܒܪܢܫܐ ܗ̇ܘ ܕܥܡܗ ܐܬܚܝܕ ܐܠܗܐ ܡܠܬܐ. ܘܟܝܢܐܝܬ ܘܩܢܘܡܐܝܬ ܒܗ ܐܬܚܘܝ̣. ܘܐܠܘܠܐ ܩܕܡܘ ܐܫܬܕܪܘ ܢܒܝ̈ܐ ܣܘܓܐܐ. ܘܠܐ ܣܦܩܘ ܠܡܗܕܝܘ ܘܠܡܦܢܝܘ ܠܒܢܝ̈ܢܫܐ ܡ̣ܢ ܛܥܝܘܬܐ ܕܣܓܕܬ݀ ܨܠܡ̈ܐ. ܘܐܦܢ ܠܘ ܠܟܠܗܘܢ. ܐܠܐ ܠܐܘܡܬܐ ܙܥܘܪܬܐ ܕܐܝ̣ܣܪ̈ܠܝܐ. ܗ̇ܝ ܕܝܬܝܪ ܡ̣ܢ ܟܠ ܐܡܘ̈ܢ ܩܪܝ̣ܒܐ ܗܘܬ݀ ܠܐܠܗܐ. ܘܗܟܢܐ ܟܠܗ ܐܬܢܟܪܝܬ݀܆ ܐܝܟܢܐ ܕܢܬܐܡܪ ܠܘܬܗ̇ ܡ̣ܢ ܐܠܗܐ ܒܝܕ ܐܫܥܝܐ. ܕܒܢܝ̈ܐ ܪܒܝܬ ܘܪܡܪܡ̇ܪܡܬ ܘܗ̣ܢܘܢ ܐܥܠܝ̣ܘ ܒܝ. ܘܒܝܕ ܗܘܫܥ. ܕܪܚܡ ܡܪܝܐ ܠܒ̈ܢܝ ܐܝܣܪܐܝܠ ܘܗ̣ܢܘܢ ܐܙܠܘ ܒܬܪ ܐܠܗ̈ܐ ܐ̱ܚܪ̈ܢܐ. ܘܣܓܝ̈ܐܬܐ ܕܩܫ̈ܝܢ ܡ̣ܢ ܗܠܝܢ. ܘܗܐ ܒܝܕ ܡܬܒܪܢܫܢܘܬܐ ܕܐܠܗܐ ܡܠܬܐ ܣܘܓܐܐ ܕܥܡ̈ܡܐ ܡܫܚ̈ܠܦܐ ܘܥܫܝ̣̈ܢܐ ܗ̇ܢܘܢ ܕܐܦܠܐ ܐܢ ܐܝܬ ܐܠܗܐ ܡܫܬܘܕܥܝ̣ܢ ܗܘܘ܆ ܐܫܬܘܕܥܘܗܝ ܘܒܩܘܫܬܐ ܘܒܫܪܪܐ ܠܗ ܦܠܚܝ̣ܢ. ܟܒܪ ܐܝܬ ܗܘܐ ܠܡܪ̈ܘܗܝ ܕܣܥܝܐ ܗܢܐ ܘܐܡܘܪ̈ܘܗܝ ܠܡܬܗܓܓܘ ܡܕܡ ܕܐܝܟ ܗܟܢ. ܘܡܟܝܠ ܠܡܬܒܠܡܘ ܙܕܩ ܠܗܘܢ.

 

 

 

ܗܦܟܬܐ

 

ܐܡܪܝܢ. ܡܕܝܢ ܐܝܟ ܗ̇ܘ ܕܠܐ ܡܨܐ ܗܘܐ ܐܠܗܐ ܠܡܗܕܝܘܬܗܘܢ ܠܒܢܝ̈ܢܫܐ ܒܝܕ ܚܕ ܡ̣ܢ ܢܒܝ̈ܐ ܐܡܪܝܬܘܢ.

 

 

 

ܗܦܟܬܐ

 

ܐܡܪܝܢܢ ܕܠܐ ܐܡ̣ܪܢܢ ܕܠܐ ܡܨܐ ܗܘܐ ܐܠܐ ܕܗܟܢܐ ܫܦܪܬ݀ ܠܗ. ܘܠܗ ܠܣܘܥܪܢܐ ܠܘܬ ܣܗܕܘܬܐ ܐܝܬܝ̣ܢܢ. ܗܐ ܓܝܪ ܡܨܐ ܗܘܐ ܐܠܗܐ. ܕܒܝܕ ܢܘܗܪܐ ܡܕܡ ܝܬܢܝܐ ܢܦܪܢܣ ܗܘܐ ܠܥܠܡܐ ܗܢܐ ܐܟܡܐ ܕܒܝܘ̈ܡܬܐ ܗܠܝܢ ܬܠܬܐ ܕܫܘܪܝܗ ܕܥܠܡܐ. ܐܘ ܒܝܕ ܟܘܟܒܐ ܡܕܡ. ܐܠܐ ܫܡܫܐ ܫܦܪ ܠܗ ܠܡܒܪܐ. ܘܠܝܬ ܕܢܐܡܪ ܠܗ ܡܛܠ ܡܢܐ.

 

 

 

ܫܪܝܐ ܕܣܥܝܐ ܫܒܝܥܝܐ

 

ܐܡܪܝܢܢ ܕܡܘܬܐ ܒܬܪܝܢ ܙܢܝ̈ܐ ܡܬܐܡܪ ܒܟܬܒ̈ܐ ܩܕܝ̈ܫܐ. ܚܕ ܡ̇ܢ ܦܘܪܫܢܐ ܕܢܦܫܐ ܡ̣ܢ ܦܓܪܐ܆ ܘܡܬܩܪܐ ܡܘܬܐ ܟܝܢܝܐ. ܕܬܪܝܢ ܕܝܢ ܦܘܪܫܢܐ ܕܢܦܫܐ ܡ̣ܢ ܐܠܗܐ ܘܡܬܩܪܐ ܡܘܬܐ ܕܚܛܝ̣ܬܐ. ܒܕܓܘܢ ܠܙܢܐ ܗܢܐ ܬܪܝܢܐ ܕܡܘܬܐ܆ ܐܡܪܝܢܢ ܕܐܡܝ̣ܬܗ ܡܫܝ̣ܚܐ ܒܡܘܬܗ. ܘܐܚܝ̣ ܡܢܗ ܠܓܢܣܐ ܐܕܡܝܐ. ܗ̇ܘ ܕܐܦ ܐܕܡ ܡܬܩܪܐ. ܘܠܘܩܒܠ ܗ̇ܝ ܕܫܩܠ ܠܚܛܝ̣ܬܗ ܕܥܠܡܐ ܐܡܪܝ̣ܢܢ. ܕܗ̣ܘ ܫܩܠܐ ܕܐܝܟ ܗܢܐ ܬܪܝܢܐܝܬ ܡܬܐܡܪ. ܚܕ ܡ̇ܢ ܐܝܟ ܗܝ ܕܢܚܙܐ ܐ̱ܢܫ ܠܟܢܬܗ ܕܛܥܝ̣ܢ ܝܘܩܪܐ ܡܕܡ. ܢܫܩܘܠ ܡܢܗ ܛܥܢܗ ܘܚܠܦܘܗܝ ܢܛܥܢܝ̣ܘܗܝ. ܘܗ̇ܘ ܕܬܪܝܢ ܐܝܟ ܗ̇ܝ ܕܢܠܦܝܘܗܝ ܕܘܒܪܐ ܡܕܡ ܡܘܬܪܢܐ ܠܘܬ ܗ̇ܝ ܕܢܣܝ̣ܡ ܛܥܢܗ ܥܡܝ̣ܠܐ ܗ̇ܘ ܘܢܬܬܢܝ̣ܚ. ܘܓܠܝܐ ܕܒܙܢܐ ܗܢܐ ܬܪܝܢܐ ܐܡܪܝܢܢ ܕܫܩܠ ܠܚܛܝ̣ܬܗ ܕܥܠܡܐ ܡܪܢ. ܘܡ̣ܢ ܗܪܟܐ ܬܘܒ ܠܐ ܐܠܨܐ ܠܡܬܪܥܝܘ ܕܡ̣ܢ ܟܠܗܘܢ ܒܢܝ̈ܢܫܐ ܫܩܠܗ̇: ܐܠܐ ܡ̣ܢ ܗ̇ܢܘܢ ܒܠܚܘܕ ܕܩܒܠܘ ܠܣܒܪܬܗ. ܘܐܫܬܡܥܘ ܠܦܘܩ̈ܕܢܘܗܝ ܘܐܬܕܒܪܘ ܒܕܘܒܪ̈ܘܗܝ. ܘܐܬܥܕܪܘ ܒܐܣܝܘܬܗ ܕܪܘܚ.

 

 

 

 

 

 

 

 

     #1 

 

ܐܪܣܝܣ ܕܫܬ ܗ̇ܝ ܕܝܘ̈ܕܝܐ ܕܐܡܪܝܢ ܕܢܡܘܣܐ ܡܘܫܝܐ ܠܥܠ ܙܕܩ ܠܡܟܬܪܘ. ܘܐܠܘ ܡܫܝܚܐ ܗܘܐ ܫܪܝ̣ܪܐ ܗ̇ܘ ܕܐܬܐ ܘܠܐ ܫܚܠܦܗ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܢܡܘܣܐ ܗ̇ܘ ܕܡ̣ܢ ܐܠܗܐ ܒܝܕ ܡܘܫܐ ܐܬܝ̣ܗܒ. ܐܠܘ ܗ̣ܘ ܐܠܗܐ ܒܪ ܕܪܝܫ ܗܦܟ ܚܠܦܗ ܒܢܡܘܣܐ ܗ̇ܘ ܕܒܝܕ ܡܫܝ̣ܚܐ ܐܬܬܫܠܡ. ܐܘ ܟܕ ܠܐ ܚܫܚܐ ܗܘܐ ܚܠܦܗ. ܐܘ ܐܦܢ ܠܘ ܚܫܚܐ ܗܘܐ. ܐܠܐ ܐܝܟܢ ܕܗ̣ܘ ܫܦܪ ܠܗ ܚܘܠܦܗ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܡܫܬܟܚ ܐܠܗܐ ܕܣܝܘܡܐ ܗ̱ܘ ܕܢܡܘܣܐ ܐܝܢܐ ܕܠܚܪܬܐ ܥܬܝ̣ܕ ܠܡܣܠܝܘܬܗ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܡܫܬܟܚ ܐܠܗܐ ܫܘܒܚܐ ܠܛܝܒܘܬܗ ܕܠܚܫܚܐ ܐܝܟ ܕܠܠܐ ܚܫܚܐ ܒܛܠܗ ܗ̇ܝ ܕܫܟܝ̣ܪܐ. ܘܟܕ ܬܪ̈ܝܗܘܢ ܦܫܚܘ̈ܗܝ ܕܦܘܠܓܐ ܫܟܝ̣ܪܝܢ܆ ܐܠܨܐ ܕܐܦ ܚܘܠܦܗ ܕܢܡܘܣܐ ܡܘܫܝܐ ܒܢܡܘܣܐ ܐ̱ܚܪܢܐ ܫܟܝ̣ܪܐ ܘܠܐ ܡܬܡܨܝܢܐ ܢܗܘܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܢܡܘܣܐ ܗ̇ܘ ܕܒܝܕ ܡܫܝ̣ܚܐ ܐܬܬܫܠܡ. ܐܘ ܡܝܬܪܐ ܗ̱ܘ ܡ̣ܢ ܢܡܘܣܐ ܡܘܫܝܐ. ܐܘ ܫܘܐ ܠܗ ܒܡܝܬܪܘܬܐ. ܐܘ ܒܨܝ̣ܪ ܡܢܗ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܠܨܐ ܗܘܬ݀ ܕܡ̣ܢ ܫܘܪܝܐ ܐܬܝ̣ܗܒ ܗܘܐ. ܒܕܠܝܬ ܠܘܬ ܐܠܗܐ ܚܣܘܟܬܢܘܬܐ ܡܬܘܡ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܐܝ̣ܩܝ̣ ܡܫܬܟܚ ܚܘܠܦܗ ܕܡܕܡ ܒܡܕܡ ܐ̱ܚܪܝܢ ܕܐܟܘܬܗ ܗ̣ܘ ܒܢܬܥܐ ܕܡܝܬܪܘܬܐ. ܘܐܠܗܐ ܠܐ ܡܕܡ ܣ̇ܥܪ ܐܝ̣ܩܝ̣. ܘܗ̇ܘ ܕܬܠܬܐ ܬܘܒ ܠܐ ܫܪܝܪ. ܒܗܝ ܕܫܟܝ̣ܪܐ ܥܠ ܐܠܗܐ ܠܡܚܠܦܘܬܗ ܠܗ̇ܘ ܕܡܝܬܪ. ܘܡ̣ܢ ܗܠܝܢ ܝ̣ܕܝ̣ܥܐ. ܕܚܘܠܦܗ ܕܢܡܘܣܐ ܡܘܫܝܐ ܡ̣ܢ ܗܘܠܐ ܗ̣ܘ ܠܘ ܡܫܟܚܢܝ̣ܬܐ.

 

 

 

ܣܥܝܐ ܕܬܠܬܐ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ ܒܕܘܟ̈ܝܬܐ ܣܓܝ̈ܐܬܐ ܒܐܘܪܝܬܐ ܐܡ̣ܪ ܕܢܡܘܣܐ ܗ̱ܘ ܗܢܐ ܠܥܠܡ ܠܕܪ̈ܝܟܘܢ ܒܟܠܗ ܒܝܬ ܡܥܡܪܟܘܢ. ܒܕܓܘܢ ܟܠ ܡ̇ܢ ܕܠܢܡܘܣܐ ܐܝܢܐ ܕܡ̣ܢ ܐܠܗܐ ܐܬܐܡܪ ܥܠܘܗܝ ܕܠܥܠܡ ܢܟܬܪ܆ ܢܗܡܘܣ ܠܡܫܪܝܗ ܘܠܡܚܠܦܘܬܗ ܕܠܩܘܒܠܐ ܗ̱ܘ ܕܐܠܗܐ. ܘܟܠ ܕܕܠܩܘܒܠܐ ܗ̱ܘ ܕܐܠܗܐ ܠܘ ܡ̣ܢ ܐܠܗܐ ܗ̱ܘ. ܘܟܠ ܕܗܟܢܐ ܗ̱ܘ܇ ܛܥܝܘܬܐ ܗ̱ܝ ܠܡܩܒܠܢܘܬܗ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܐܠܘ ܡܫܝ̣ܚܐ ܗܘܐ ܫܪܝ̣ܪܐ ܗ̇ܘ ܕܐܬܐ. ܙܕܩ ܗܘܐ ܕܟܠܗܝܢ ܢܒܝ̈ܘܬܐ ܕܥܠܘܗܝ܆ ܠܡܥܒܕܢܘܬܐ ܢܦܩ̈ܝ ܗܘܝ̈. ܘܟܕ ܠܐ ܢܦܩ̈ܝ܇ ܠܘ ܗܘܝܘ. ܘܕܠܘ ܟܠܗܝܢ ܢܦܩ̈ܝ. ܝ̣ܕܝ̣ܥܐ ܡ̣ܢ ܗ̇ܝ ܕܠܐ ܛܘܪ̈ܐ ܪܩܕܘ ܐܝܟ ܐܝ̈ܠܐ. ܐܦܠܐ ܪ̈ܡܬܐ ܐܝܟ ܐܝܟ ܐܡܪ̈ܐ ܕܥܢ̈ܐ. ܐܦܠܐ ܢܗܪ̈ܘܬܐ ܚܕܝ̣ܘ ܠܐܘܪܫܠܡ ܕܗ̣ܝ ܗ̣ܝ ܡܕܝܢ̱ܬܗ ܕܐܠܗܢ. ܐܝܟ ܕܐܡ̣ܪ ܕܘܝܕ. ܘܐܝܟ ܕܐܡ̣ܪ ܙܟܪܝܐ. ܕܒܗ ܒܝܘܡܐ ܗ̇ܘ. ܢܦܩܘܢ ܡܝ̈ܐ ܚܝ̈ܐ ܡ̣ܢ ܐܘܪܫܠܡ ܦܠܓܗܘܢ ܠܝܡܐ ܡܕܢܚܝܐ. ܘܦܠܓܗܘܢ ܠܝܡܐ ܡܥܪܒܝܐ܇ ܩܝܛܐ ܘܣܬܘܐ. ܐܦܠܐ ܬܘܒ ܥܡܪ ܕܐܒܐ ܥܡ ܐܡܪܐ. ܐܘ ܢܡܪܐ ܥܡ ܓܕܝܐ ܕܐܪܝܐ ܘܬܘܪܐ ܐܟܚܕܐ ܪܥܘ. ܘܬܘܪܬܐ ܘܕܒܐ ܐܟܚܕܐ ܪ̈ܥܝ. ܐܘ ܐܪܝܐ ܬܒܢܐ ܐܝܟ ܬܘܪܐ ܐܟ̣ܠ. ܐܘ ܐܫܬܥܝ̣ ܝܠܘܕܐ ܒܚܪܡܢܐ. ܐܘ ܒܚܘ̣ܪܐ ܕܐܣܦܣ ܐܘܫܛ ܐܝܕܗ ܚܣܝܠܐ. ܐܝܟ ܕܐܬܢܒܝ̣ ܐܫܥܝܐ ܗ̇ܘ ܢܒܝܐ ܒܪ ܐܡܘܨ.

 

 

 

ܣܥܝܐ ܚܡܝܫܝܐ

 

ܐܡܪܝܢ ܝ̣ܕܝ̣ܥܐ ܕܠܐ ܦܐܐ ܫܪܝܗ ܕܢܡܘܣܐ܆ ܡ̣ܢ ܗ̇ܝ ܕܐܡ̣ܪ ܪܒܟܘܢ. ܕܠܐ ܐܬܝ̣ܬ ܕܐܫܪܐ ܢܡܘܣܐ. ܐܠܐ ܕܐܡܠܐ. ܘܡ̣ܢ ܗܪܟܐ ܒܬܠܬ ܫܟܝ̣ܪ̈ܘܢ ܢܦܠ. ܚܕܐ ܡ̇ܢ ܕܐܘܕܝ̣ ܕܠܘ ܡܛܠܗ̇ܝ ܕܢܫܪܝܘܗܝ ܠܢܡܘܣܐ ܐܬܐ. ܘܟܕ ܫܪܝܗܝ܆ ܐܫܬܟܚ ܕܠܗ̇ܘ ܡܐ ܕܠܐ ܐܬܐ ܕܢܣܥܘܪ ܣܥ̣ܪ. ܗ̇ܝ ܕܫܟܝ̣ܪܐ. ܕܬܪܬܝܢ ܕܝܢ ܕܐܡ̣ܪ ܕܠܐ ܫܪܝܗܝ. ܘܟܕ ܫܪܝܗܝ܆ ܐܫܬܟܚܬ݀ ܣܥܘܪܘܬܗ ܕܣܩܘܒܠܝܐ ܠܡܠܬܗ܆ ܗ̇ܝ ܕܫܟܝ̣ܪܐ. ܕܬܠܬ ܗ̇ܝ ܕܐܢܗܘ ܕܦܐܐ ܗܘܐ ܫܪܝܗ ܕܢܡܘܣܐ. ܠܐ ܐܡ̇ܪ ܗܘܐ ܕܠܐ ܐܬܝ̣ܬ ܕܐܫܪܐ ܢܡܘܣܐ. ܘܟܕ ܫܪܝܗܝ ܡܫܬܟܚ ܕܗ̇ܘ ܡܐ ܕܠܐ ܦܐܐ ܣܥܪ. ܗ̇ܝ ܕܫܟܝ̣ܪܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ܇ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܢܡܘܣܐ ܡ̇ܢ ܟܠ ܠܬܘܪܨܐ ܗ̱ܘ ܡܬܬܣܝ̣ܡ ܡ̣ܢ ܐܠܗܐ ܠܦܘܬ ܙܢܐ ܕܙܠܝ̣ܡܘܬܐ܆ ܐܦ ܙܢܐ ܕܝܠܗ ܕܬܘܪܨܐ ܙܕܩ ܕܢܗܘܐ. ܒܕܓܘܢ ܠܗ̇ܢܘܢ ܡ̇ܢ ܕܒܙܒܢ. ܟܕ ܫܒܪܝ ܗܘܐ ܣܘܟܠܗܘܢ. ܘܫܪܘܝ ܗܘܐ ܗܘܢܗܘܢ܆ ܢܡܘܣܐ ܕܒܟܠ ܡܕܡ ܓܘܫܡܢܝܐ ܗܘܐ ܐܬܝ̣ܗܒ. ܟܕ ܕܝܢ ܒܩܘܡܬܐ ܗܘܐ ܡܫܡܠܝܬܐ. ܗܝܕܝܢ ܠܢܡܘܣܐ ܕܝܬܝܪ ܓܡܝ̣ܪܐ ܘܪܘܚܢܝܐ ܐܫܬܘܝ̣. ܒܕܓܘܢ ܢܡܘܣܐ ܗ̇ܘ ܩܕܡܝܐ ܚܫܚܐ ܗܘܐ ܠܦܘܬ ܩܛܐܣܛܐܣܝ̣ܣ ܗ̇ܝ ܩܕܡܝܬܐ. ܠܐ ܚܫܚܐ ܕܝܢ ܠܦܘܬ ܩܛܐܣܛܐܣܝ̣ܣ ܗܕܐ ܐ̱ܚܪܝܬܐ. ܘܡ̣ܢ ܗܪܟܐ ܘܠܐ ܚܕܐ ܫܟܝ̣ܪܘܬܐ ܓܕܫܐ: ܒܗ̇ܝ ܕܠܘ ܟܠ ܬܘܪܣܝܐ ܠܟܠ ܩܘܡܬܐ ܚܫܚ. ܐܦܠܐ ܟܠ ܕܘܒܪܐ ܠܟܠ ܟܘܪܗܢܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܢܡܘܣܐ ܗ̇ܘ ܕܒܝܕ ܡܫܝ̣ܚܐ ܐܬܝ̣ܗܒ ܡܝܬܪ ܡ̣ܢ ܗ̇ܘ ܕܒܝܕ ܡܘܫܐ ܐܬܝ̣ܗܒ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܢܡܘܣܐ ܗ̇ܘ ܩܕܡܝܐ ܟܐܢܘܬܐ ܡܠܦ. ܐܝܟ ܗ̇ܝ ܕܥܝܢܐ ܚܠܦ ܥܝܢܐ ܘܫܪܟܐ. ܢܡܘܣܐ ܕܝܢ ܗܢܐ ܬܪܝܢܐ ܛܝܒܘܬܐ. ܐܝܟ ܗ̇ܝ ܕܡ̇ܢ ܕܢܣ̇ܒ ܟܘܬܝ̣ܢܟ܆ ܗܒ ܠܗ ܐܦ ܡܪܛܘܛܟ. ܘܕܡܝܘ̣ܬܐ ܕܒܐܠܗܐ. ܐܝܟ ܗ̇ܝ ܕܗܘܘ ܓܡܝ̣ܪ̈ܐ ܐܝܟ ܕܐܦ ܐܒܘܟܘܢ ܕܒܫܡܝܐ. ܘܕܛܝܒܘܬܐ ܛܒ ܡܝܬܪܐ ܡ̣ܢ ܟܐܢܘܬܐ ܓܠܝܐ. ܘܠܘܩܒܠ ܗ̇ܝ ܕܐܡ̣ܪܘ. ܕܙܕܩ ܗܘܐ ܡܕܝܢ ܕܡ̣ܢ ܠܩܘܕܡܝܢ ܐܬܝ̣ܗܒ ܗܘܐ. ܘܠܐ ܐܬܚܣܟ ܗܘܐ. ܐܡܪܝܢܢ. ܕܠܐ ܐܬܝ̣ܗܒ ܒܕܠܐ ܥܗܢܝ̣ܢ ܗܘܘ ܠܡܩܒܠܘܬܗ ܐܝܟ ܕܐܡ̣ܪܢܢ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝ̣ܢܢ ܕܗ̇ܝ ܕܠܥܠܡ. ܐܝܬ ܐܡܬܝ ܕܥܠ ܙܒܢܐ ܕܛܒ ܡܬܝ̣ܚ ܘܐܦܢ ܠܘ ܕܠܐ ܣܘܦ ܗ̣ܘ ܡܫܘܕܥܐ ܒܟܬܒ̈ܐ ܩܕܝ̣̈ܫܐ. ܐܝܟ ܕܐܡܝ̣ܪܐ ܒܐܫܥܝܐ. ܕܚܪ̈ܒܬܐ ܕܡ̣ܢ ܥܠܡ. ܘܚܪ̈ܒܬܐ ܗ̇ܢܝܢ ܡ̣ܢ ܐܢܢܩܝ̣ ܕܒܢܝܢܝ̈ܗܝܢ ܡ̣ܢ ܩܕܡܝܗܝܢ ܢܗܘܘܢ. ܒܕܓܘܢ ܠܘ ܕܠܐ ܫܘܪܝ ܐܢܝܢ. ܘܟܕ ܗ̇ܝ ܕܠܥܠܡ ܥܠ ܡܕܡ ܕܠܘ ܕܠܐ ܫܘܪܝ ܗ̣ܘ ܐܬܩܛܪܓܬ݀. ܠܐ ܫܟܝ̣ܪܐ ܐܢܗܘ ܕܐܦ ܥܠ ܢܡܘܣܐ ܕܠܘ ܕܠܐ ܫܘܠܡ ܗ̣ܘ ܬܬܩܛܪܓ. ܘܬܘܒ ܐܡܪܝܢܢ܇ ܕܩܘܪ̈ܒܢܝܟܘܢ ܘܫܪ̈ܓܝܟܘܢ ܝܘܕܝ̈ܐ: ܕܥܠ ܟܠ ܚܕ ܚܕ ܡܢܗܘܢ ܕܝ̣ܠܢܐܝܬ ܐܡ̣ܪ ܐܠܗܐ ܕܢܡܘܣܐ ܗ̱ܘ ܠܟܘܢ ܘܠܕܪ̈ܝܟܘܢ ܠܥܠܡ. ܟܕ ܡ̣ܢ ܟܕܘ ܒܛܠܘ. ܒܕܠܐ ܡܨܝܬܘܢ ܠܡܫܡܠܝܘܬܗܘܢ ܠܒܪ ܡ̣ܢ ܡܫܟܢ ܙܒܢܐ. ܐܝܟܢܐ ܣܪܒܝ̣ܬܘܢ ܠܡܚܘܝܘ ܕܗ̇ܝ ܕܠܥܠܡ ܒܟܠ ܕܘܟ ܥܠ ܠܐ ܣܘܦ ܘܠܐ ܫܘܠܡܐ ܡܫܘܕܥܐ. ܘܬܘܒ ܐܡܪܝ̣ܢܢ ܕܫܒܬܐ ܟܕ ܚܕܐ ܗ̱ܝ ܗ̣ܝ ܡ̣ܢ ܢܡܘ̈ܣܐ ܗ̇ܢܘܢ ܕܠܥܠܡ ܙܕܩ ܕܢܬܢܛܪܘܢ. ܐܝܟܢܐ ܫܪܗ̇ ܐܠܗܐ ܟܕ ܐܡ̣ܪ ܠܝܫܘܥ ܒܪܢܘܢ ܘܠܗ̇ܢܘܢ ܕܥܡܗ. ܕܒܝܘܡܐ ܕܒܫܒܥܐ ܩܕܡܘ ܒܨܦܪܐ܆ ܘܐܬܟܘܪܟܘܗ̇ ܠܐܪܝ̣ܚܘ ܫܒܥ ܙܒܢܝ̈ܢ ܘܫܪܟܐ. ܘܐܝܟܢܐ ܡܨܝܬܘܢ ܕܬܐܡܪܘܢ ܕܠܘ ܡܫܬܪܝܘ ܐܫܬܪܝܬ݀ ܫܒܬܐ ܡ̣ܢ ܐܠܗܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܗ̇ܝ ܕܛܘܪ̈ܐ ܪܩܕܘ ܐܝܟ ܐܝ̈ܠܐ ܘܫܪܟܐ ܕܗ̇ܢܝܢ ܐ̱ܚܪ̈ܢܝܬܐ ܦܪ̈ܘܛܐܣܝܣ ܐܢܝܢ ܠܐ ܦܪ̈ܘܣܕܝܘܪܝܣܡܢܝܬܐ. ܘܡܛܠ ܗܕܐ ܐܠܨܐ ܕܡܢܬܝ̈ܬܐ ܢܗܘ̈ܝܢ ܘܠܘ ܟܠܢܝ̈ܬܐ. ܒܕܓܘܢ ܐܡܪܝ̣ܢܢ. ܕܠܐ ܐܡ̣ܪܘ ܢܒܝ̈ܐ ܕܟܠܗܘܢ ܛܘܪ̈ܐ ܒܟܠܗܘܢ ܙܒ̈ܢܐ ܢܪܩܕܘܢ. ܐܦܠܐ ܕܟܠܗܘܢ ܕܐܒ̈ܐ ܥܠ ܟܠܗܘܢ ܐܡܪ̈ܐ ܢܥܡܪܘܢ. ܘܗܟܢܐ ܗܠܝܢ ܐ̱ܚܪ̈ܢܝܬܐ. ܒܕܓܘܢ ܡܬܘܡ ܡܕܡ ܕܐܝܟ ܗܟܢ ܓܕܫ. ܐܘ ܟܠܝܘܡ ܓܕܫ ܘܚܢܢ ܠܐ ܚܙܝܢܢ. ܐܝܟܢܐ ܫܪܝ̣ܪܐ ܕܢܐܡܪ ܕܠܐ ܗܘܝ̈ ܦܣܘܩܐܝܬ. ܘܗܢܐ ܡ̇ܢ ܦܘܢܝܐ ܓܘܫܡܢܝܐ ܠܦܘܬ ܓܘܫܡܢܝܘܬ ܗܘܢܗܘܢ ܕܝܘ̈ܕܝܐ. ܠܦܘܬ ܕܝܢ ܪܥܝܢܐ ܩܛܝ̣ܢܐ ܘܚܬܝ̣ܬܐ ܕܡܠܦܢܐ ܕܥܕܬܐ ܠܘ ܗܢܐ ܗ̱ܘ ܦܘܢܝܐ. ܐܠܐ ܕܛܘܪ̈ܐ ܡ̇ܢ ܘܪ̈ܡܬܐ܆ ܠܡܠܟ̈ܐ ܘܚܟܝ̣̈ܡܐ. ܗ̇ܢܘܢ ܕܠܐ ܡܬܬܙܝ̣̈ܥܢܐ ܡ̣ܢ ܬܘܕ̈ܝܬܗܘܢ ܡܣܬܒܪܝ̣ܢ ܗܘܘ. ܘܣܒܪܬܐ ܗܕܐ ܐܙܝ̣ܥܬ݀ ܐܢܘܢ ܡܫܘܕܥܝ̣ܢ. ܘܢܗܪ̈ܘܬܐ ܠܡܦܢ̈ܘܬܐ ܗ̇ܢܝܢ ܕܒܗܝܢ ܚܕܝܐ ܘܕܝܨܐ ܥܕܬܐ ܩܕܝܫܬܐ ܕܗ̣ܝ ܗ̣ܝ ܡܕܝܢ̱ܬܗ ܕܡܠܟܐ ܪܒܐ ܡܫܘܕܥܝ̣ܢ. ܘܕܐܒܐ ܘܢܡܪܐ ܘܐܪܝܐ ܘܕܒܐ ܘܚܪܡܢܐ ܘܐܣܦܣ. ܠܒܢܝ̈ܢܫܐ ܗ̇ܢܘܢ ܕܟܕ ܥܢ̈ܬܐ ܡܕܡ ܘܡܐܟ̈ܝܢܐ ܗܘܘ. ܒܬܘܕܝ̣ܬܐ ܗܕܐ ܡܫܝܢܘܬܐ ܕܦܐܝܐ ܩܢܘ. ܘܥܡ ܐܡܪܐ ܘܓܕܝܐ ܘܥܓܠܐ ܘܬܘܪܐ ܕܐܝܬܝܗܘܢ ܐ̱ܢܫ̈ܐ ܬܡܝ̣̈ܡܐ ܘܦܫܝ̣̈ܛܐ ܐܬܥܢܝ̣ܘ. ܘܒܦܓܪܗ ܘܕܡܗ ܕܦܪܘܩܢ ܐܟܚܕܐ ܐܫܬܘܬܦܘ ܡܫܘܕܥܝܢ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܚܡܫܐ ܣܘ̈ܟܠܐ ܐܝܬ ܠܡܣܬܟܠܘ ܡ̣ܢ ܗ̇ܝ ܕܐܡ̣ܪ ܡܪܢ. ܕܠܐ ܐܬܝ̣ܬ ܕܐܫܪܐ ܠܢܡܘܣܐ ܐܠܐ ܕܐܡܠܐ. ܘܟܠ ܚܕ ܡܢܗܘܢ ܕܝ̣ܠܢܐܝܬ ܣ̇ܦܩ ܠܡܕܚܐ ܠܫܟܝ̣ܪ̈ܘܬܐ ܬܠܬ ܕܟܢܫܬܘܢ. ܚܕ ܡ̇ܢ ܕܐܡ̣ܪ ܕܢܝܫܐ ܕܡܐܬܝ̣ܬܝ ܠܘ ܕܐܫܪܝܘܗܝ ܠܢܡܘܣܐ ܡܘܫܝܐ ܐܝܬܘܗܝ. ܐܠܐ ܕܢܡܘܣܐ ܕܝܬܝ̣ܪ ܡܫܡܠܝ ܐܫܠܡ ܠܒܢܝ̈ܢܫܐ ܘܐܦܢ ܡܩܦ ܢܦܩ ܒܬܪ ܐܝܬ ܠܫܘܪܪܗ ܕܢܡܘܣܐ ܗܢܐ ܚܕܬܐ ܕܡܛܠܬܗ ܐܬܝ̇ܬ܆ ܫܪܝܗ ܕܗ̇ܘ ܥܬܝ̣ܩܐ. ܒܕܓܘܢ ܫܪܝܗ ܕܢܡܘܣܐ ܡܘܫܝܐ ܢܩܦܝܐ ܗ̱ܘ ܕܢܝܫܗ̇ ܕܡܐܬܝ̣ܬܝ. ܘܕܢܩܦܝܐ ܐ̱ܚܪܝܢ ܗ̣ܘ ܡ̣ܢ ܡܬܢܩܦܢܐ ܗ̣ܝ ܠܘܓܝܩܝ ܡܪܬܝܐ. ܕܬܪܝܢ ܕܝܢ ܥܠ ܩܢܘܡܗ ܠܡ ܐܡ̣ܪ ܕܠܐ ܐܬܝ̇ܬ ܕܐܫܪܝܘܗܝ܆ ܐܠܐ ܕܒܩܢܘܡܝ ܐܡܠܝܘܗܝ. ܐܝ̣ܛܐ ܒܝܕ ܗ̇ܘ ܕܡܟܬܪ ܫ̇ܪܐ ܐ̱ܢܐ ܠܗ. ܕܬܠܬܐ. ܐܡܪܝܢܢ ܕܡ̣ܢ ܟܕܘ ܚܘܝ̣ܢܢ ܕܢܡܘܣܐ ܡܫ̣ܝܚܝܐ ܝܬܝ̣ܪ ܓܡܝ̣ܪ ܟܕ ܠܗ̇ܘ ܕܚܣܝ̣ܪ ܢܩܦ ܠܗ ܠܘ ܡܫܪܐ ܫ̇ܪܐ ܠܗ ܓܠܝܐ. ܕܐܪܒܥܐ. ܐܡܪܝܢܢ ܕܢܡܘܣܐ ܦܫܝ̣ܛܐܝܬ. ܓܘܢܝ ܡ̣ܢ ܢܡܘܣܐ ܡܘܫܝܐ. ܒܕܓܘܢ ܡܪܢ ܠܘ ܡܛܠ ܢܡܘܣܐ ܡܘܫܝܐ ܐܡ̣ܪ ܕܠܐ ܐܬܝ̇ܬ ܕܐܫܪܝܘܗܝ. ܐܠܐ ܡܛܠ ܢܡܘܣܐ ܦܫܝ̣ܛܐܝܬ. ܟܐܡܬ݀ ܕܠܐ ܐܬܝ̇ܬ ܡܛܠܗ̇ܝ ܕܕܠܐ ܢܡܘܣ ܐܥܒܕ ܠܒܢܝ̈ܢܫܐ. ܐܠܐ ܕܢܡܘܣܐ ܕܝܬܝ̣ܪ ܡܫܡܠܝ ܐܫܠܡ ܠܗܘܢ. ܕܚܡܫܐ ܐܡܪܝܢܢ ܕܢܡܘܣܐ ܡܪܢܝܐ ܗܠܝܢ ܥܣܪܐ ܦܬܓܡܝ̣̈ܢ ܐܝܬܘܗܝ ܕܡ̣ܢ ܩܕܡ ܕܢܚܛܐ ܥܡܐ ܒܥܓܠܐ ܐܬܬܣܝ̣ܡܘ. ܘܐܝܬܝܗܘܢ ܗܠܝܢ ܐ ܐܢܐ ܐ̱ܢܐ ܡܪܝܐ ܐܠܗܟ ܒ ܠܐ ܢܗܘܘܢ ܠܟ ܐܠܗܝ̈ܢ ܐ̱ܚܪ̈ܢܝܢ ܓ ܠܐ ܬܐܡܐ ܒܫܡܗ ܕܡܪܝܐ ܐܠܗܟ ܒܕܓܠܘܬܐ ܕ ܐܬܕܟܪ ܝܘܡܐ ܕܫܒܬܐ ܠܡܩܕܫܘܬܗ ܗ ܝܩܪ ܠܐܒܘܟ ܘܠܐܡܟ ܘ ܠܐ ܬܩܛܘܠ ܙ ܠܐ ܬܓܘܪ ܚ ܠܐ ܬܓܢܘܒ ܛ ܠܐ ܬܣܗܕ ܣܗܕܘܬܐ ܕܓܠܬܐ ܝ ܠܐ ܬܐܪܓ ܡܕܡ ܕܚܒܪܟ. ܘܗܠܝܢ ܐ̱ܚܪ̈ܢܐ ܬܢܝܢ ܢܡܘܣܐ ܐܢܘܢ ܕܡ̣ܢ ܒܬܪ ܕܪܓܙ ܐܠܗܐ ܥܠܝܗܘܢ ܐܣ̣ܪ ܐܢܘܢ ܒܗܘܢ. ܐܟܙܢܐ ܕܦܘܪܫ ܡܐܟ̈ܠܬܐ ܘܕܒ̈ܚܐ ܘܫܪܟܐ. ܒܕܓܘܢ ܡܫܝ̣ܚܐ ܠܐ ܡܕܡ ܡ̣ܢ ܗܠܝܢ ܥܣܪܐ ܦܬܓ̈ܡܐ ܒܛܠ ܣܛܪ ܡ̣ܢ ܫܒܬܐ. ܘܐܝܟ ܕܒܫܪܪܐ ܐܦܠܐ ܠܫܒܬܐ ܒܛܠ. ܐܠܐ ܐܦ ܠܟܠܗܘܢ ܝܘ̈ܡܬܐ ܐܟܘܬܗ̇ ܩܕܫ. ܐܦ ܓܝܪ ܘܡ̣ܢ ܩܕܝ̣ܡ ܐܒܐ ܒܛܠܗ̇ ܗܘܐ ܒܙܒܢܗ ܕܝܫܘܥ ܒܪܢܘܢ ܐܝܟ ܕܐܡ̣ܪܢܢ. ܐܝܢ ܠܢܡܘ̈ܣܐ ܗ̇ܢܘܢ ܕܠܦܘܬ ܒܝ̣ܫܘܬܗܘܢ ܐܝܟ ܡܘ̈ܒܠܐ ܝܩܝ̣ܪ̈ܬܐ ܥܠܝܗܘܢ ܐܬܬܣܝ̣ܡܘ܆ ܒܛܠ ܐܢܘܢ. ܘܠܒܘܛܠܗ ܕܙܢܐ ܗܢܐ ܩܕܡ ܕܐܡ̇ܪ. ܡܛܠ ܕܠܐ ܨܒܝܬ ܒܕܒ̈ܚܐ. ܐܦܠܐ ܒܝܩ̈ܕܐ ܫܠܡ̈ܐ ܐܬܪܥܝܬ. ܘܬܘܒ ܐܡ̣ܪ ܒܝܕ ܐܫܥܝܐ. ܠܡܢܐ ܗܘܝܢ ܠܝ ܣܘܓܐܐ ܕܕܒܚܝ̈ܟܘܢ ܐܡ̇ܪ ܡܪܝܐ. ܣܒܥܬ ܝܩ̈ܕܐ ܕܕܒ̈ܚܐ ܘܬܪܒܐ ܕܐܡܪ̈ܐ. ܘܒܕܡܐ ܕܬܘܪ̈ܐ ܠܐ ܨܒ̇ܐ ܐ̱ܢܐ. ܘܟܕ ܬܐܬܘܢ ܬܚܙܘܢ ܐܦܝ̈. ܡܢܘ̣ ܒܥܐ ܗܠܝܢ ܡ̣ܢ ܐܝܕܝ̈ܟܘܢ܆ ܠܡܕܫ ܕܪ̈ܝ. ܠܐ ܬܘܣܦܘܢ ܬܝܬܘܢ ܠܝ ܣܡܝܕܐ. ܩܘܪܒܢܐ ܗ̱ܘ ܣܪܝ̣ܩܐ. ܘܡܣܠܝ ܗ̣ܘ ܠܝ܇ ܪܝܫ ܝܪ̈ܚܝܟܘܢ ܘܫܒܝ̈ܟܘܢ ܘܝܘܡܐ ܪܒܐ. ܠܐ ܡܩܒܠܝ̣ܢ ܠܝ ܨܘܡܝ̈ܟܘܢ. ܘܒܛܠܢܝ̈ܟܘܢ ܘܥܕܥܐܕܝ̈ܟܘܢ ܣܢܬ݀ ܢܦܫܝ. ܘܬܘܒ ܐܡ̣ܪ ܒܝܕ ܐܪܡܝܐ. ܠܡܢܐ ܡܝܬܝܢ ܐܢ̱ܬܘܢ ܠܝ ܠܒܘ̣ܢܬܐ ܡ̣ܢ ܫܒܐ. ܘܩܝܢܘܡܐ ܡ̣ܢ ܐܪܥܐ ܪܚܝ̣ܩܬܐ. ܝܩܕܝ̈ܟܘܢ ܠܐ ܡܩܒܠܝ̣ܢ ܠܝ. ܘܕܒܚܝ̈ܟܘܢ ܠܐ ܒܣܡܘ ܠܝ.

 

 

 

ܐܪܣܝܣ ܕܫܒܥ ܗ̇ܝ ܕܡܫܠܡܢ̈ܐ ܕܐܡܪܝܢ ܕܡܫܝ̣ܚܐ ܗܘܝܘ ܗ̇ܘ ܕܡܣܬܟܐ ܗܘܐ. ܡܠܬܗ ܐܬܢܒܝ̣ܘ ܢܒܝ̈ܐ ܫܪܝ̣ܪܐܝܬ. ܒܪܡ ܕܝܢ ܠܘ ܐܠܗܐ ܗ̱ܘ. ܐܦܠܐ ܒܪܗ ܕܐܠܗܐ. ܐܠܐ ܢܒܝܗ ܒܠܚܘܕ ܕܐܠܗܐ ܘܥܒܕܗ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܐܢܗܘ ܕܬܠܝ̣ܬܝܘܬܐ ܥܠ ܐܠܗܐ ܡܟܢܐ ܠܡܬܩܛܪܓܘ. ܗ̇ܝ ܕܚܕ ܠܐ ܙܕܩ ܬܬܩܛܪܓ ܥܠܘܗܝ. ܘܟܕ ܗ̇ܝ ܕܚܕ ܐܠܗܐ ܡܬܬܘܕܐ ܡܢܢ ܘܡܢܟܘܢ ܘܡ̣ܢ ܝܘ̈ܕܝܐ ܘܡ̣ܢ ܡܓܘ̈ܫܐ. ܬܠܝ̣ܬܝܘܬܐ ܠܐ ܡܨܝܐ ܕܬܬܩܛܪܓ ܥܠ ܐܠܗܐ. ܘܡܛܠ ܗܕܐ ܟܦܘ̣ܪܝܐ ܗ̱ܝ. ܬܠܬܐ ܓܝܪ ܠܘ ܚܕ ܐܢܘܢ. ܐܦܠܐ ܚܕ ܬܠܬܐ ܗ̱ܘ. ܡܫܚܠܦܝ̣ܢ ܐܢܘܢ ܡ̣ܢ ܚܕ̈ܕܐ. ܘܡܛܠ ܗܕܐ ܡ̣ܢ ܠܘ ܡܫܟܚܢ̈ܝܬܐ ܗ̱ܝ ܠܗܘ ܠܡܬܟܢܫܘ ܐܟܚܕܐ ܒܚܕ ܗ̇ܘ ܕܣܝ̣ܡ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܗ̇ܝ ܕܠܡܘܕܝܘ ܐܒܐ ܐܠܗܐ. ܒܪܐ ܐܠܗܐ. ܪܘܚܐ ܐܠܗܐ. ܣܓܝ̣ܐܘܬ ܐܠܗ̈ܐ ܐܝܬܝܗ̇. ܘܕܠܗ̇ ܠܗܕܐ ܟܠܗܘܢ ܢܒܝ̈ܐ ܩܕ̈ܡܝܐ ܘܐ̱ܚܪ̈ܝܐ. ܐܦ ܗ̣ܘ ܡܫܝ̣ܚܐ ܙܛܡܘܗ̇ ܓܠܝܐ. ܘܡܛܠ ܗܕܐ ܟܠ ܕܒܗ̇ ܒܗܕܐ ܬܪܥܝ̣ܬܐ ܢܦܠ܆ ܕܠܩܘܒܠܐ ܗ̱ܘ ܕܢܒܝ̈ܐ. ܐܦ ܕܝܠܗ ܕܡܫܝ̣ܚܐ. ܘܬܪܥܝ̣ܬܐ ܕܣܩܘܒܠܝܐ ܠܢܒܝ̈ܐ ܘܠܡܫܝ̣ܚܐ. ܐܝܟܢܐ ܫܪܝ̣ܪܬܐ ܡܨܝܐ ܕܬܗܘܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܡܫܝ̣ܚܐ ܙܒܢܝܐ ܗ̱ܘ ܘܒܪܝܐ ܘܡܣܝܟܐ ܘܡܬܡܨܝܢܝ ܐܝܬܘܬܐ ܘܠܘ ܐܠܨܝ ܐܝܬܘܬܐ. ܘܓܘܫܡܐ ܘܠܘ ܠܐ ܓܫܘܡ. ܘܕܟܠܗܝܢ ܗܠܝܢ ܠܘ ܕܝ̣ܠܝ̈ܬܐ ܐܢܝܢ ܕܐܠܗܐ ܫܘܒܚܐ ܠܛܝܒܘܬܗ ܓܠܝܐ. ܒܕܓܘܢ ܟܠ ܕܡܕܡ ܡ̣ܢ ܗܠܝܢ ܒܗ ܫܟܝ̣ܚ܆ ܠܘ ܐܠܗܐ ܗ̱ܘ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܕܫܬܐܣܬܐ ܪܒܬܐ ܕܥܠܝܗ̇ ܡܫܪܪܝ̣ܢ ܐܢ̱ܬܘܢ ܐܠܗܘܬܗ ܕܡܫܝ̣ܚܐ. ܗ̣ܝ ܚܕܝܘܬܐ ܕܐܠܗܘܬܐ ܥܡ ܐ̱ܢܫܘܬܐ ܐܝܬܝܗ̇. ܘܟܕ ܚܕܝܘܬܐ ܦܫܝ̣ܛܐܝܬ ܠܐ ܡܬܡܨܝܢܝ̣ܬܐ ܐܝܬܝܗ̇ ܐܝܟ ܕܐܬܚܘܝ̣ ܡ̣ܢ ܠܥܠ. ܐܦܠܐ ܡܫܝ̣ܚܐ ܐܠܗܐ ܗ̱ܘ.

 

 

 

ܣܥܝܐ ܚܡܝܫܝܐ

 

ܐܡܪܝܢ ܕܝ̣ܠܝ̣ܕܘܬܐ ܡܥܒܕܢܘܬܐ ܗ̱ܝ. ܕܒܝܕ ܥܒܘܕܐ ܘܡܩܒܠܢܐ ܡܫܬܡܠܝܐ܆ ܟܕ ܠܚ̈ܕܕܐ ܢܩܦܘܢ. ܒܣܘܥܪ̈ܢܐ ܡ̇ܢ܆ ܐܝܟ ܕܟܪܐ ܘܢܩܒܬܐ ܕܡ̣ܢ ܫܘܬܦܘܬܗܘܢ ܝܠܕܐ ܡܬܝ̣ܠܕ. ܒܣܘ̈ܟܠܐ ܕܝܢ܆ ܐܝܟ ܦܪܘܛܘܬܐ ܪܒܬܐ ܘܦܪܘܛܘ̣ܬܐ ܙܥܘܪܬܐ܆ ܕܡ̣ܢ ܢܩܝ̣ܦܘܬܗܝܢ ܣܘܢܦܪܝܣܡܐ ܡܬܝ̣ܠܕ. ܒܕܓܘܢ ܐܢ ܡܬܡܨܝܢܝ̣ܬܐ ܗܘܬ݀ ܠܐܠܗܐ. ܗ̇ܝ ܕܠܡܫܝ̣ܚܐ ܢܘܠܕ ܗܘܐ. ܡ̣ܢ ܐܢܢܩܝ̣ ܕܒܝܕ ܫܘܬܦܘܬܗ ܘܢܩܝ̣ܦܘܬܗ ܕܠܐܚܪܝܢ ܗܘܝܐ ܗܘܬ݀ ܠܗ ܗܕܐ. ܘܕܗ̣ܝ ܬܪܥܝ̣ܬܐ ܕܐܝܟ ܗܕܐ ܟܦܘܪܘܬܐ ܗ̱ܝ ܓܠܝ̣ܬܐ.

 

 

 

ܣܥܝܐ ܫܬܝܬܝܐ

 

ܐܡܪܝܢ ܕܐܢܗܘ ܕܡܛܠ ܗ̇ܝ ܕܗ̣ܘ ܐܡ̣ܪ ܥܠ ܢܦܫܗ ܕܒܪܐ ܗ̱ܘ ܕܐܠܗܐ܆ ܙܕܩ ܕܒܪܐ ܟܝܢܝܐ ܘܐܠܗܐ ܢܬܬܘܕܐ. ܡܕܝܢ ܘܫܠܝ̣̈ܚܘܗܝ ܬܘܒ ܒܢܝ̈ܐ ܟܝܢܝ̈ܐ ܕܐܠܗܐ ܘܐܠܗ̈ܐ ܢܬܬܘܕܘܢ. ܒܗ̇ܝ ܕܐܦ ܡܛܠܬܗܘܢ ܐܡ̣ܪ ܕܒܢܝ̈ܐ ܐܢܘܢ ܕܐܠܗܐ ܟܪ ܕܐܡ̣ܪ ܠܗܘܢ. ܕܣ̇ܠܩ ܐ̱ܢܐ ܠܡ ܠܘܬ ܐܒܝ ܘܐܒܘܟܘܢ. ܘܠܘ ܫܠܝ̣̈ܚܐ ܒܠܚܘܕ. ܐܠܐ ܐܦ ܐܢ̱ܬܘܢ ܟܠܟܘܢ. ܒܗ̇ܝ ܕܐܦ ܠܟܘܢ ܐܡ̣ܪ ܐܝܟ ܕܐܡܪܝ̣ܬܘܢ. ܕܐܒܘܟܘܢ ܩܪܘ ܠܐܠܗܐ܆ ܟܕ ܡܨܠܝܢ ܐܢ̱ܬܘܢ ܘܐܡܪܝ̣ܬܘܢ܇ ܐܒܘܢ ܕܒܫܡܝܐ.

 

 

 

ܣܥܝܐ ܫܒܝܥܝܐ

 

ܐܡܪܝܢ ܐܠܘ ܡܛܠ ܗ̇ܝ ܕܥܠܘܗܝ ܩܕܡܘ ܐܬܢܒܝ̣ܘ ܢܒܝ̈ܐ܇ ܐܡܪܝܢ ܐܢ̱ܬܘܢ ܕܐܠܗܐ ܗ̱ܘ. ܗܐ ܠܐ ܐ̱ܢܫ ܡ̣ܢ ܢܒܝ̈ܐ ܐܡ̣ܪ ܕܡܫܝܚܐ ܗ̇ܘ ܕܥܬܝ̣ܕ ܕܢܐܬܐ ܐܠܗܐ ܗ̣ܘ ܐܘ ܒܪ ܐܠܗܐ. ܐܠܐ ܡܠܟܐ ܒܠܚܘܕ. ܘܐܠܐ ܙܕܩ ܗܘܐ ܕܠܗ̇ ܠܗܕܐ ܬܪܥܝ̣ܬܐ ܩܢܝܢ ܗܘܘ ܐܦ ܝܘܕܝ̈ܐ ܥܠ ܡܫܝ̣ܚܐ ܗ̇ܘ ܕܡܣܟܝܢ ܠܡܐܬܝ̣ܬܗ. ܘܗܐܠܘ ܗܟܢܐ. ܘܐܠܘ ܬܘܒ ܒܗ̇ܝ ܕܠܘ ܡ̣ܢ ܙܘܘܓܐ ܐܬܝ̣ܠܕ ܡܫܬܘܕܥܝ̣ܢ ܐܢ̱ܬܘܢ ܕܐܠܗܐ ܗ̱ܘ. ܗܐ ܐܦ ܐܕܡ ܠܐ ܡ̣ܢ ܓܒܪܐ ܐܦܠܐ ܡ̣ܢ ܐܢ̱ܬܬܐ ܐܬܝ̣ܠܕ. ܘܗܕܐ ܝܬܝܪ ܕܡܝ̣ܪܐ ܡ̣ܢ ܗ̇ܝ ܕܡ̣ܢ ܐܢ̱ܬܬܐ ܒܠܥܕ ܓܒܪܐ ܢܬܝ̣ܠܕ ܐ̱ܢܫ. ܘܐܠܘ ܬܘܒ ܒܗ̇ܝ ܕܬܕܡܪ̈ܬܐ ܬܡܝ̣̈ܗܬܐ ܣܥܪ. ܗܐ ܐܦ ܡܘܫܐ ܝܬܝ̣ܪ ܡܢܗܝܢ ܣܥ̣ܪ. ܘܡܨܐ ܗܘܐ ܐܠܗܐ ܕܒܐܝ̣̈ܕܝ ܟܠܢܫ ܕܝܬܝ̣ܪ ܡܢܗܝܢ ܢܣܥܘܪ ܐܝܟ ܕܐܦ ܗ̣ܘ ܡܫܝܚܐ ܐܡ̣ܪ. ܐܝܟܢܐ ܠܐ ܘܗܐ ܐܠܝ̣ܫܥ ܠܘ ܒܠܚܘܕ ܟܕ ܚܝ. ܐܠܐ ܘܡ̣ܢ ܒܬܪ ܕܡܝ̣ܬ ܐܚܝ̣ ܡܝ̣ܬܐ܆ ܗ̇ܘ ܕܓܫܦ ܒܓܪ̈ܡܘܗܝ. ܘܗܕܐ ܝܬܝܪ ܕܡܝ̣ܪܐ. ܘܐܠܘ ܬܘܒ ܒܗ̇ܝ ܕܠܐ ܝ̣ܕܥ ܚܛܝܬܐ. ܗܐ ܐܦ ܝܘܚܢܢ ܡܥܡܕܢܐ ܝܬܝ̣ܪܐܝܬ ܠܐ ܝ̣ܕܥ ܚܛܝ̣ܬܐ. ܘܒܬܘܠܐ ܗܘܐ ܘܢܙܝ̣ܪܐ ܟܠܢܝܐ. ܘܐܠܘ ܬܘܒ ܒܗ̇ܝ ܕܐܣܬܠܩ ܠܫܡܝܐ. ܗܐ ܐܦ ܚܢܘܟ ܘܐܠܝܐ ܐܬܥܠܝ̣ܘ. ܘܚܐܝ̣ܝ̣ܢ ܥܕܟܝܠ ܘܠܐ ܛܥܡܘ ܡܘܬܐ. ܘܐܠܘ ܬܘܒ ܒܗ̇ܝ ܕܐܡܪܝ̣ܢܢ ܕܡܠܬܗ ܗ̣ܘ ܕܐܠܗܐ ܘܪܘܚܗ. ܗܐ ܐܦ ܟܠܗܝܢ ܒܪ̈ܝܬܐ܆ ܒܡܠܬܗ ܕܐܠܗܐ ܘܒܪܘܚܗ ܗܘܝ̈.

 

 

 

ܣܥܝܐ ܬܡܝܢܝܐ

 

ܐܡܪܝܢ ܕܡܚܡܕ ܢܒܝܐ ܗ̱ܘ ܘܫܠܝ̣ܚܐ ܕܐܠܗܐ. ܘܐܠܗܐ ܐܡ̣ܪ ܒܦܘܡܗ. ܕܡܟܦܪ ܟܦܪܘ ܐܝܠܝܢ ܕܐܘܕܝ̣ܘ ܒܬܠܝ̣ܬܝܘܬܐ. ܘܐܡ̣ܪ ܬܘܒ ܕܐܠܗܐ ܚܕ ܗ̣ܘ. ܠܐ ܝܠܕ ܐܦܠܐ ܝ̣ܠܝ̣ܕ. ܐܦܠܐ ܫܘܐ ܠܗ ܐ̱ܚܪܢܐ. ܘܕܢܒܝܐ ܗ̱ܘ ܫܪܝ̣ܪܐ ܘܫܠܝ̣ܚܐ ܕܐܠܗܐ ܡܚܡܕ. ܝ̣ܕܝ̣ܥܐ ܡ̣ܢ ܬܠܬ. ܚܕ ܡ̇ܢ ܡ̣ܢ ܬܕܡܪ̈ܬܐ ܕܣܥܪ. ܕܬܪܬܝܢ ܕܝܢ ܡ̣ܢ ܙܢܘ̈ܗܝ ܘܕܘܒܪ̈ܘܗܝ. ܕܬܠܬ ܕܝܢ܆ ܡ̣ܢ ܗ̇ܝ ܕܩܕܡܘ ܐܬܢܒܝ̣ܘ ܥܠܘܗܝ ܢܒܝ̈ܐ ܕܡ̣ܢ ܩܕܝ̣ܡ. ܘܡ̣ܢ ܬܕܡܪ̈ܬܗ ܡ̇ܢ܆ ܗܢܐ ܩܘ̣ܪܐܐܢ ܕܐܝܬ ܒܗ ܕܘܒܪ̈ܐ ܕܢܒܝ̈ܐ ܟܠܗܘܢ ܡ̣ܢ ܐܕܡ ܘܥܕܡܐ ܠܙܒܢܗ. ܘܢܡܘ̈ܣܐ ܘܕܝ̣̈ܢܐ ܟܐܢ̈ܐ ܣܘܓܐܐ. ܘܚܟ̈ܡܬܐ ܡܦܬܟ̈ܬܐ ܒܠܟܣܝ̣ܣ ܣܩܝ̣ܠܬܐ ܐܝ̇ܕܐ ܕܠܐ ܐ̱ܢܫ ܡ̣ܢ ܦܘ̣ܐܝ̣̈ܛܐ ܡܗܝ̣ܪ̈ܐ ܕܐܪ̈ܒܝܐ ܐܬܡܨܝ̣ ܠܡܟܬܒܘ. ܘܐܦܢ ܚܕ ܦܬܓܡܐ ܕܕܡܐ ܠܦܬܓܡܘ̈ܗܝ. ܘܕܡ̣ܢ ܦܘܡ ܓܒܪܐ ܕܠܐ ܝܕܥ ܣܦܪܐ܇ ܡܕܡ ܕܐܝܟ ܗܢܐ ܢܬܡܠܠ. ܬܕܡܘܪܬܐ ܗ̱ܝ ܪܒܬܐ. ܘܡ̣ܢ ܬܕܡܪ̈ܬܗ ܬܘܒ ܗ̇ܝ ܕܫܘܕܥ ܥܠ ܥܬܝ̣̈ܕܬܐ. ܘܐܡ̣ܪ ܕܥܬܝ̣ܕܝ̣ܢ ܪ̈ܘܡܝܐ ܠܡܙܕܟܝܘ ܒܣܘ̈ܦܝܗ̇ ܕܐܪܥܐ. ܘܐܡ̣ܪ ܬܘܒ ܠܥܡܗ ܕܥܬܝ̣ܕܝ̣ܢ ܠܡܡܠܟܘ ܡ̣ܢ ܡܕܢܚܐ ܠܡܥܪܒܐ܆ ܘܠܡܥܬܪ. ܘܗܟܢܐ ܗܘܐ. ܘܗ̇ܝ ܕܢܒܥܘ ܡܝ̈ܐ ܡ̣ܢ ܒܝܬ ܨܒ̈ܥܬܗ. ܘܗ̇ܝ ܕܚܫܟ ܣܗܪܐ. ܘܟܐܦܐ ܕܫܐܠܬ݀ ܒܫܠܡܗ. ܘܗ̇ܝ ܕܣܒܥ ܟܢܫܐ ܡ̣ܢ ܡܐܟܘܠܬܐ ܒܨܝ̣ܪܬܐ ܘܒܘܓܢܗ ܕܩܝܣܐ ܠܘܬܗ. ܘܩܒܘ̣ܠܝܗ̇ ܕܓܡܠܐ ܨܐܝܕܘܗܝ. ܘܣܗܕܘܬܗ ܕܥܪܒܐ ܡܛܘܝܐ. ܘܥܢܢܐ ܕܡܛܠܠܐ ܗܘܬ݀ ܥܠܘܗܝ ܡ̣ܢ ܩܕܡ ܕܢܬܐܒܐ. ܡ̣ܢ ܙܢܘ̈ܗܝ ܕܝܢ ܘܕܘܒܪ̈ܘܗܝ ܗ̇ܝ ܕܠܐ ܡܬܘܡ ܕܓܠ. ܘܗ̇ܝ ܕܠܐ ܣܟ ܐܣܟܠ. ܘܗ̇ܝ ܕܠܐ ܣܟ ܥܪܩ ܡ̣ܢ ܩܕܡ ܒܥܠܕ̈ܒܒܘܗܝ. ܘܗ̇ܝ ܕܣܓܝ ܚܝܘܣܬܢ ܗܘܐ ܥܠ ܐܘܡܬܗ. ܘܗ̇ܝ ܕܣܓܝ ܫܦܝ̣ܥ ܗ̣ܘܐ. ܘܗ̇ܝ ܕܠܐ ܪܚܡ ܗܘܐ ܩܢܝܘܬܐ ܥܠܡܢܝܬܐ. ܒܗ̇ܝ ܕܩܘܪ̈ܫܝܐ ܐܫܬܘܕܝ̣ܘ ܠܗ ܥܘܬܪܐ ܘܐܢ̱ܬܬܐ ܘܪܝ̣ܫܢܘܬܐ. ܐܢܗܘ ܕܠܐ ܢܬܢܒܐ܆ ܘܠܐ ܩܒܠ. ܘܗ̇ܝ ܕܥܡ ܪ̈ܡܐ ܪܡ ܗܘܐ. ܘܥܡ ܡܟܝ̣̈ܟܐ ܢܝ̣ܚ ܗܘܐ ܘܡܟܝ̣ܟ. ܘܡ̣ܢ ܗ̇ܝ ܕܩܕܡܘ ܐܬܢܒܝ̣ܘ ܢܒܝ̈ܐ ܩܕ̈ܡܝܐ ܥܠܘܗܝ. ܒܗ̇ܝ ܕܐܡ̣ܪ ܐܠܗܐ ܒܩܘܪܐܐܢ ܗܟܢܐ. ܗ̇ܢܘܢ ܕܢܩܦܝ̣ܢ ܠܫܠܝ̣ܚܐ ܢܒܝܐ ܕܠܐ ܝܕܥ ܣܦܪܐ. ܗ̇ܘ ܕܡܫܟܚܝ̣ܢ ܠܗ ܕܟܬܝ̣ܒ ܨܝܕܝܗܘܢ ܒܐܘܪܝܬܐ ܘܒܐܘܢܓܠܝܘܢ. ܘܐܡ̣ܪ ܬܘܒ ܡܛܠ ܡܫܝ̣ܚܐ ܕܐܡ̣ܪ ܠܥܡܗ. ܕܡܣܒܪ ܐ̱ܢܐ ܠܟܘܢ ܫܠܝ̣ܚܐ ܕܐܬܐ ܒܬܪܝ. ܫܡܗ ܐܚܡܕ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ܇ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܒܙܢܐ ܐ̱ܚܪܢܐ ܘܐ̱ܚܪܢܐ ܠܘ ܠܐ ܡܨܝܐ ܕܚܕ ܘܬܠܬܐ ܥܠ ܚܕ ܗ̇ܘ ܕܣܝ̣ܡ ܢܬܩܛܪܓܘܢ. ܒܕܓܘܢ ܚܕ ܡ̇ܢ ܥܠ ܟܝܢܐ ܕܐܠܗܐ ܡܬܩܛܪܓ. ܬܠܬܐ ܕܝܢ܆ ܥܠ ܩܢܘ̈ܡܘܗܝ ܕܝܠܗ ܕܚܕ ܐܠܗܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܘ ܬܠܬܐ ܐܠܗ̈ܐ.ܐܠܐ ܚܕ ܐܠܗܐ ܒܬܠܬܐ ܩܢܘ̈ܡܐ ܡܘܕܝܢܢ. ܡܚܪܡܝ̣ܢܢ ܕܝܢ ܘܡܣܠܝܢܢ ܬܘܒ ܒܟܠ ܕܬܠܬܐ ܐܠܗ̈ܐ ܡܘܕܐ ܘܠܘ ܡ̣ܢ ܟܪ̈ܣܛܝܢܐ ܚܫܝ̣ܒ ܠܘܬܢ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ. ܕܡܫܝ̣ܚܐ ܒܗ̇ܝ ܕܙܒܢܝܐ ܗ̱ܘ ܘܒܪܝܐ ܘܡܣܝܟܐ ܘܡܬܡܨܝܢܐ ܘܓܘܫܡܐ ܒܪܢܫܐ ܗ̱ܘ. ܘܒܗ̇ܝ ܕܡܬܘܡܝܐ ܗ̱ܘ ܘܠܐ ܒܪܝܐ ܘܠܐ ܡܣܝܟܐ ܘܐܠܨܝܐ ܘܠܐ ܓܫܘܡ ܐܠܗܐ ܗ̱ܘ. ܒܗ̇ܝ ܕܐܠܗܐ ܡܫܡܠܝܐ ܡܬܬܘܕܐ ܗ̣ܘ ܡܫܝ̣ܚܐ ܡ̣ܢ ܟܪ̈ܣܛܝܢܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܡ̣ܢ ܠܥܠ ܒܝܕ ܣܘܓܐܬ݀ ܡܚܘ̈ܝܢܘܬܐ ܫܪܪܢܢ. ܕܚܕܝܘܬܐ ܠܘ ܠܐ ܡܬܡܨܝܢܝ̣ܬܐ ܗ̱ܝ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܕܗܢܐ ܒܘܚܢܐ ܒܪܬ݀ ܩܠܝܐ ܗܘܐ ܘܠܘ ܚܘܫܒܝܐ. ܒܗ̇ܝ ܕܐܢܗܘ ܕܠܘܬܟܘܢ ܝ̣ܠܝ̣ܕܘܬܐ ܗ̇ܝ ܒܠܚܘܕ ܡܬܩܪܝܐ܆ ܕܒܝܕ ܬܪܝܢ ܡܫܬܡܠܝܐ. ܠܘܬܢ ܕܝܠܢ ܠܘ ܗܟܢܐ. ܐܠܐ ܝ̣ܠܝ̣ܕܘܬܐ ܩܪܝܢܢ ܬܘܒ ܘܠܫܟܝ̣ܚܘܬ ܟܠ ܥܠܬܢܐ ܕܫܘܐ ܒܟܝܢܐ ܠܥܠܬܗ. ܒܕܓܘܢ ܐܡܪܝܢܢ ܕܡܠܬܐ ܝܠܕܐ ܗ̱ܝ ܕܢܦܫܐ. ܘܙܠܝ̣ܩܐ ܝܠܕܐ ܗ̱ܘ ܕܫܡܫܐ ܘܒܗܢܐ ܙܢܐ ܐܡܪܝܢܢ ܕܒܪܐ ܝ̣ܠܝ̣ܕ ܡ̣ܢ ܐܒܐ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ ܕܟܠ ܒܪܐ. ܐܘ ܒܪܐ ܗ̱ܘ ܟܝܢܝܐ ܕܐܒܘܗܝ܆ ܐܘ ܒܪܐ ܗ̱ܘ ܛܝܒܘܬܢܝܐ. ܘܡܫܝ̣ܚܐ ܡ̇ܢ ܒܪܐ ܗ̱ܘ ܟܝܢܝܐ ܕܐܒܐ. ܫܠܝ̈ܚܐ ܕܝܢ ܘܫܪܟܐ ܕܙܕܝ̣̈ܩܐ܆ ܒܢܝ̈ܐ ܐܢܘܢ ܒܛܝܒܘܬܐ ܕܐܠܗܐ. ܘܒܗ̇ ܒܗܕܐ ܒܪܬ݀ ܩܠܐ ܟܐܡܬ݀ ܕܐܒܐ ܢܬܩܪܐ ܐܠܗܐ. ܠܘ ܒܠܚܘܕ ܡܫܝ̣ܚܐ ܐܬܚܫܚ ܕܠܐ ܒܥܝܕ. ܐܠܐ ܐܦ ܣܘܓܐܐ ܕܢܒܝ̈ܐ ܩܕ̈ܡܝܐ ܐܬܚܫܚܘ ܒܗ ܐܝܟ ܗ̇ܝ ܕܐܡܝ̣ܪܐ ܒܐܫܥܝܐ ܡ̣ܢ ܦܘܡ ܡܪܝܐ. ܕܒܢܝ̈ܐ ܪܒܝܬ ܘܪܡܪܡܬ ܘܗ̣ܢܘܢ ܐܥܠܝ̣ܘ ܒܝ. ܘܐܝܟ ܗ̇ܝ ܕܗܫܐ ܡܪܝ ܐܒܘܢ ܐܢ̱ܬ. ܣܓܝ̈ܐܬܐ ܕܐܝܟ ܗܠܝܢ.

 

 

 

ܫܪܝܐ ܕܣܥܝܐ ܫܒܝܥܝܐ

 

ܐܡܪܝܢܢ ܕܢܒܝܘܬܐ ܐܝܟ ܕܒܣܘܓܐܐ ܪܡܙܐ ܐܢܝܢ. ܘܟܕ ܡܠܟܐ ܩܪܐܘܗܝ ܢܒܝ̈ܐ ܠܡܫܝ̣ܚܐ. ܠܐ ܐܠܨܐ ܕܐܠܗܐ ܠܐ ܢܗܘܐ. ܒܗ̇ܝ ܕܣܘܟܠܐ ܕܡܠܟܐ ܘܕܐܠܗܐ ܠܐ ܣܩܘܒ̈ܠܝ̣ܝ̣ܢ. ܘܠܘܩܒܠ ܗ̇ܝ ܕܐܡ̣ܪܘ. ܕܙܕܩ ܗܘܐ ܕܝܘܕܝ̈ܐ ܠܗ̇ ܠܬܪܥܝ̣ܬܐ ܩܢܝܢ ܗܘܘ ܥܠ ܡܫܝ̣ܚܗܘܢ ܗ̇ܘ ܕܡܣܟܝܢ. ܐܡܪܝܢܢ܆ ܕܐܟܡܐ ܕܒܟܠܗܝܢ ܦܕܘ ܝܘ̈ܕܝܐ܇ ܐܦ ܒܗܕܐ ܬܘܒ ܛܥܘ. ܐܝܟ ܕܐܬܢܒܝ̣ ܥܠܝܗܘܢ ܐܫܥܝܐ ܘܐܡ̣ܪ. ܕܡܫܡܥ ܬܫܡܥܘܢ ܘܠܐ ܬܣܬܟܠܘܢ. ܘܡܚܙܐ ܬܚܙܘܢ ܘܠܐ ܬܕܥܘܢ. ܐܬܥܒܝ̣ ܠܗ ܓܝܪ ܠܒܗ ܕܥܡܐ ܗܢܐ܆ ܘܐܕܢܝ̈ܗܘܢ ܣܟܪܘ. ܘܥܝܢܝ̈ܗܘܢ ܥܡܨܘ. ܘܠܘܩܒܠ ܗ̇ܝ ܕܐܦ ܐܕܡ ܠܘ ܡ̣ܢ ܙܘܘܓܐ ܐܬܝ̣ܠܕ ܐܡܪܝܢܢ. ܕܠܐܠܗܘܬܗ ܕܡܫܝ̣ܚܐ ܠܘ ܒܗܕܐ ܒܠܚܘܕ ܝ̣ܕܥܢܢ. ܐܠܐ ܘܒܡܚܘ̈ܝܢܘܬܐ ܐ̱ܚܪ̈ܢܝܬܐ ܕܡ̣ܢ ܠܥܠ ܐܬܥܗܕܢܢ. ܘܥܡ ܗܠܝܢ ܐܕܡ ܡ̇ܢ ܒܙܒܢܐ ܗ̇ܘ ܕܠܐ ܓܒܪܐ ܐܝܬ ܗܘܐ ܐܦܠܐ ܐܢ̱ܬܬܐ܆ ܐܬܝ̣ܠܕ ܒܠܥܕ ܙܘܘܓܐ. ܡܫܝ̣ܚܐ ܕܝܢ ܒܙܒܢܐ ܐܝܢܐ ܕܓܒܪ̈ܐ ܘܢܫ̈ܐ ܕܠܐ ܣܘ̣ܦ ܐܝܬ ܗܘܘ. ܘܬܘܒ ܐܕܡ ܡ̇ܢ ܒܗ̇ܝ ܕܠܘ ܡ̣ܢ ܙܘܘܓܐ ܐܬܝ̣ܠܕ. ܠܐ ܒܡܕܡ ܝܬܝ̣ܪ ܐܘ ܕܡܝ̣ܪ ܡ̣ܢ ܣܘܣܝܐ ܩܕܡܝܐ ܕܐܬܒܪܝ̣ ܒܥܠܡܐ. ܘܡ̣ܢ ܬܘܪܐ ܩܕܡܝܐ. ܘܡ̣ܢ ܚܡܪܐ ܩܕܡܝܐ. ܘܡ̣ܢ ܫܪܟܐ ܕܟܠ ܚܕ ܚܕ ܡ̣ܢ ܐܕܫ̈ܐ ܕܚܝ̈ܘܬܐ. ܘܬܘܒ ܐܕܡ ܡ̇ܢ ܐܦܢ ܠܘ ܡ̣ܢ ܙܘܘܓܐ ܐܬܝ̣ܠܕ ܐܠܐ ܠܘ ܠܐ ܚܟܡܗ ܠܙܘܘܓܐ. ܝܘܚܢܢ ܡܥܡܕܢܐ ܐܦܢ ܠܐ ܚܟܡܗ ܠܙܘܘܓܐ ܐܠܐ ܠܘ ܒܠܥܕ ܙܘܘܓܐ ܐܬܝ̣ܠܕ. ܘܦܘܪܫܢܐ ܓܠܐܷ ܠܦܪ̈ܘܫܐ. ܘܠܘܩܒܠ ܗ̇ܝ ܕܐܦ ܚܢܘܟ ܘܐܠܝܐ ܐܣܬܠܩܘ ܠܫܡܝܐ ܘܠܐ ܥܕܟܝ̣ܠ ܡܝ̣ܬܘ. ܐܡܪܝܢܢ. ܕܠܘ ܗܟܢܐ ܟܬܝ̣ܒ ܡܛܠܬܗܘܢ. ܐܠܐ ܡܛܠ ܚܢܘܟ ܡ̇ܢ ܟܬܝ̣ܒ. ܕܫܦܪ ܚܢܘܟ ܠܐܠܗܐ ܘܠܝܬܘܗܝ. ܡܛܠ ܕܢܣܒܗ ܐܠܗܐ. ܘܡܛܠ ܐܠܝܐ ܟܬܝ̣ܒ ܕܣܠܩ ܐܠܝܐ ܒܥܠܥܠܐ ܠܫܡܝܐ. ܘܠܐ ܟܬܝ̣ܒ ܕܠܐ ܡܐܬ. ܐܘ ܕܥܬܝ̣ܕ ܕܢܐܬܐ ܠܚܪܬܐ ܟܕ ܚܝ. ܘܥܡ ܗܠܝܢ ܬܘܒ ܐܡܪܝܢܢ. ܕܣܘܠܩܗ ܕܐܠܝܐ ܠܢܒܝܘܬܗ ܫܪܪ. ܘܣܘܠܩܗ ܕܡܫܝ̣ܚܐ ܠܐܠܗܘܬܗ. ܐܝܟ ܕܐܦ ܬܕܡܪ̈ܬܗ ܕܡܘܫܐ ܘܕܢܒܝ̈ܐ ܐ̱ܚܪ̈ܢܐ ܠܢܒܝܘܬܗ ܫܪܪ̈ܝܢ. ܘܬܕܡܪ̈ܬܗ ܕܡܫܝ̣ܚܐ ܠܐܠܗܘܬܗ. ܒܗ̇ܝ ܕܗܠܝܢ ܡ̇ܢ ܢܒܝ̈ܐ ܐܡ̣ܪܘ ܕܐܝܬܝܗܘܢ. ܘܡܫܝ̣ܚܐ ܕܐܠܗܐ ܗ̱ܘ ܘܒܪ ܐܠܗܐ ܐܟܡܐ ܕܟܬܝ̣ܒ ܒܐܘܢܓܠܝܘܢ. ܘܠܘܩܒܠ ܗ̇ܝ ܕܐܡܪܝܢ ܕܡܛܠ ܗ̇ܝ ܕܒܪܝ̣ܬܐ ܗ̱ܘ ܕܐܠܗܐ ܡܫܝ̣ܚܐ܇ ܐܡܪܝܢܢ ܕܡܠܬܗ ܗ̣ܘ ܕܐܠܗܐ ܘܪܘܚܗ. ܐܡܪܝܢܢ ܕܐܠܘ ܫܪܝ̣ܪ ܗܘܐ ܣܥܝܟܘܢ ܗܢܐ. ܙܕܩ ܗܘܐ ܠܟܘܢ ܕܐܦ ܠܟܠ ܬܘܪܐ ܘܠܟܠ ܬܘܠܥܐ ܘܠܟܠ ܒܪܝ̣ܬܐ ܗܕܝ̣ܪܬܐ ܘܨܥܝ̣ܪܬܐ ܘܕܟܝ̣ܬܐ ܘܛܡܐܬܐ. ܡܠܬܐ ܕܐܠܗܐ ܘܪܘܚܗ ܩܪܝܢ ܐܢ̱ܬܘܢ. ܘܟܕ ܠܘ ܗܟܢܐ܆ ܐܠܐ ܠܗ ܕܝ̣ܠܢܐܝܬ ܒܫܘ̈ܡܗܐ ܗܠܝܢ ܡܟܢܝܢ ܐܢ̱ܬܘܢ. ܝ̣ܕܝ̣ܥܐ ܕܡܛܠ ܗ̇ܝ ܕܡܠܬܗ ܗ̣ܘ ܕܐܠܗܐ ܕܐܬܒܣܪ. ܩܪܝܗܝ ܗܟܢܐ ܟܬܒܟܘܢ.

 

 

 

ܫܪܝܐ ܕܣܥܝܐ ܬܡܝܢܝܐ

 

ܐܡܪܝܢܢ ܕܬܕܡܪ̈ܬܐ ܗ̇ܢܝܢ ܕܡܢܝܬܘܢ ܠܘ ܟܠܟܘܢ ܫܠܡܝ̣ܢ ܐܢ̱ܬܘܢ ܠܫܪܝ̣ܪܘܬܗܝܢ. ܗܐ ܓܝܪ ܫܝ̈ܥܝܐ ܡܢܟܘܢ ܐܡܪܝܢ ܕܘܠܐ ܚܕܐ ܬܕܡܘܪܬܐ ܐܝܬ ܠܗ ܣܛܪ ܡ̣ܢ ܟܬܒܐ ܐܠܗܝܐ ܕܐܬܡܠܠ ܒܦܘܡܗ ܟܕ ܣܦܪܐ ܠܐ ܝ̇ܕܥ ܗܘܐ. ܘܡܛܠ ܗܢܐ ܐܡܪܝܢܢ. ܕܦܟܪ ܐܠܕܝܢ ܪܐܙܝ̣ ܐܡ̣ܪ ܒܟܬܒܐ ܡܘܚܨܠ. ܕܡ̣ܢ ܬܠܬܐ ܙܢܝ̈ܐ ܡܫܬܪܪܝ̣ܢܢ ܐܝܙܓܕܘܬܗ. ܚܕܐ ܡ̇ܢ ܕܐܡ̣ܪ ܕܐܝܙܓܕܗ ܐ̱ܢܐ ܕܐܠܗܐ. ܘܫܪܪܬ݀ ܡܠܬܗ ܬܕܡܘܪܬܗ ܕܗ̣ܝ ܗ̣ܝ ܩܘܪܐܐܢ. ܕܬܪܝܢ ܕܝܢ ܡ̣ܢ ܙܢܘ̈ܗܝ ܘܕܘܒܪ̈ܘܗܝ ܡܝܬܪ̈ܐ܆ ܗ̇ܢܘܢ ܕܟܠ ܚܕ ܡܢܗܘܢ. ܐܦܢ ܠܐ ܡܫܘܕܥ ܥܠ ܢܒܝܘܬܐ ܒܕܝ̣ܠܝܘܬܗ. ܐܠܐ ܟܢܝ̣ܫܘܬܗܝܢ ܐܠܨܐܝܬ ܡܫܘܕܥܝ̣ܢ ܕܠܐ ܡܨܝܢ ܠܡܫܬܟܚܘ. ܐܠܐ ܠܢܒܝ̈ܐ. ܘܠܗܢܐ ܙܢܐ ܕܫܘܘܕܥܐ ܓܒܐ ܓܐܚܛ ܘܫܦܪ ܠܓܙܠܝ̣ ܒܟܬܒܐ ܕܡܘ̣ܢܩܕ. ܕܬܠܬܐ ܕܝܢ܆ ܡ̣ܢ ܗ̇ܝ ܕܩܕܡܘ ܐܬܢܒܝ̣ܘ ܥܠܘܗܝ ܢܒܝ̈ܐ ܒܟܬܒܝ̈ܗܘܢ ܫܡܝ̈ܢܝܐ. ܒܕܓܘܢ ܐܡܪܝܢܢ܇ ܐܠܘ ܟܬܒܐ ܗ̇ܘ ܬܕܡܘܪܬܐ ܗܘܐ. ܐܝܟܢܐ ܓܒܪ̈ܐ ܗܠܝܢ ܡܝܬܪ̈ܐ ܕܡܢܟܘܢ ܠܘ ܠܗ ܓܒܝܢ ܗܘܘ ܠܘܬ ܫܘܪܪ ܢܒܝܘܬܗ. ܐܠܐ ܠܙܢܘ̈ܗܝ ܘܕܘܒܪ̈ܘܗܝ. ܘܕܕܘܒܪ̈ܘܗܝ ܗܠܝܢ ܕܡܢܝܬܘܢ ܠܘ ܡܫܘ̈ܕܥܢܐ ܐܢܘܢ ܕܢܒܝܘܬܐ. ܝ̣ܕܝ̣ܥܐ ܡ̣ܢ ܗ̇ܝ ܕܠܣܓܝ̈ܐܐ ܡ̣ܢ ܡܠܟ̈ܐ ܟܐܢ̈ܐ ܕܠܘ ܢܒܝ̈ܐ ܐܢܘܢ ܫܟܝ̣ܚܝܢ. ܘܬܘܒ ܐܠܘ ܡ̣ܢ ܦܘܡ ܓܒܪܐ ܦܪܣܝܐ ܐܘ ܗܘܢܝܐ. ܐܘ ܡ̣ܢ ܡ̇ܢ ܕܠܐ ܐܬܥܢܝ̣ ܥܡ ܐ̱ܢܫܝ̈ܢ ܝܕܥܝ̈ ܟܬܒ̈ܐ ܡ̣ܢ ܥܡ̈ܡܐ ܐ̱ܚܪ̈ܢܐ ܐܬܡܠܠ ܗܘܐ ܟܬܒܐ ܗ̇ܘ ܒܫܪܪܐ ܗܝܕܝܟ ܬܕܡܘܪܬܐ ܗܘܐ. ܐܟܡܐ ܕܡܠܠ ܫܠܝ̣̈ܚܐ ܒܠܫܢ̈ܐ ܡܫܚ̈ܠܦܐ ܕܠܐ ܝ̇ܕܥܝ̣ܢ ܗܘܘ ܟܕ ܐܓܢܬ݀ ܥܠܝܗܘܢ ܪܘܚܐ ܕܩܘܕܫܐ ܒܕܡܘܬ ܠܫܢ̈ܐ ܕܢܘܪܐ ܟܕ ܟܢܝ̣ܫܝ̣ܢ ܗܘܘ ܒܥܠܝ̣ܬܐ ܗ̇ܝ ܨܗܝܘܢܝܬܐ. ܘܠܘܩܒܠ ܗ̇ܝ ܕܫܘܕܥ ܥܠ ܥܬܝ̣̈ܕܬܐ. ܐܡ̣ܪ ܕܥܬܝ̣ܕܝ̣ܢ ܠܡ ܪ̈ܘܡܝܐ ܠܡܙܕܟܝܘ ܘܥܡܗ ܠܡܙܟܐ. ܐܡܪܝܢܢ ܕܟܠܗܘܢ ܗ̇ܢܘܢ ܕܨܒܝܢ ܠܡܓܪܓܘ ܒܢܝ̈ ܦܠܚܘܬܗܘܢ ܠܩܪܒܐ܆ ܫܘܘ̈ܕܝܐ ܕܐܝܟ ܗܠܝܢ ܡܫܬܘܕܝܢ ܠܗܘܢ. ܘܐܢ ܡܫܬܡܠܝܢ ܡܫܬܪܪܝ̣ܢ. ܘܐܢ ܠܐ܆ ܐܡܪܝܢ ܕܠܐ ܥܕܟܝܠ ܡܛܐ ܙܒܢܗܘܢ. ܘܠܘܩܒܠ ܗ̇ܝ ܕܐܡܪܝ̣ܬܘܢ ܕܡܥܗܕ ܫܡܗ ܒܐܘܪܝܬܐ ܘܒܐܘܢܓܠܝܘܢ. ܐܡܪܝܢܢ ܕܠܗ̇ ܠܗܕܐ ܡ̣ܢ ܩܘܪܐܐܢ ܫܡܥܬܘܢ. ܘܩܘܪܐܐܢ ܡ̇ܢ ܒܫܘܪܪ ܢܒܝܘܬܗ ܡܫܬܪܪ. ܘܐܢܗܘ ܕܢܒܝܘܬܗ ܒܩܘܪܐܐܢ ܗܦܟܐ ܡܫܬܪܪܐ܆ ܚܘܕܪܐ ܓܕܫ. ܕܐܝܟ ܐܝܟܢ. ܐܝܟ ܙܢܐ ܕܬܪܝܢܐ ܣܢܝ̣ܩ ܥܠ ܩܕܡܝܐ. ܘܩܕܡܝܐ ܣܢܝ̣ܩ ܥܠ ܬܪܝܢܐ ܘܗܟܢܐ ܒܐܝ̣ܕܐ ܒܐܝ̣ܕܐ. ܗ̇ܢܘ ܪܥܝܢܗ̇ ܕܡܠܬܐ ܗܕܐ. ܘܬܘܒ ܐܠܘ ܡܥܗܕ ܗܘܐ ܒܐܘܪܝܬܐ ܘܒܐܘܢܓܠܝܘܢ ܫܡܗ ܠܐ ܟܣܐ ܗܘܐ.

 

 

 

ܗܦܟܬܐ

 

ܐܡܪܝܢ ܕܡܚܒܠܘ ܚܒܠܬܘܢ ܘܫܚܠܦܬܘܢ ܠܟܬܒ̈ܐ ܘܐܪܝ̣ܡܬܘܢ ܫܡܗ. ܘܕܫܚܠܦܬܘܢ ܠܟܬܒ̈ܐ ܝ̣ܕܝ̣ܥܐ ܡ̣ܢ ܗ̇ܝ ܕܠܟܬܒ̈ܐ ܕܥܬܝ̣ܩܬܐ ܫܬ ܡܦ̈ܩܬܐ ܐܝܬ ܠܘܬܟܘܢ ܕܡ̣ܢ ܝܘܢܝܐ ܠܣܘܪܝܝܐ. ܗ̇ܝ ܕܫܒܥܝ̣ܢ. ܘܗ̇ܝ ܕܐܩܘ̣ܠܐܣ. ܘܗ̇ܝ ܕܣܘܡܟܘܣ. ܘܗ̇ܝ ܕܬܐܘܕܘܛܘܢ. ܘܗ̇ܝ ܕܐܫܬܟܚܬ݀ ܒܚܨܒܐ ܒܐܝ̣ܪܝ̣ܚܘ. ܘܗ̇ܝ ܕܐܫܬܟܚܬ݀ ܒܚܨܒܐ ܒܢܝܩܘܦܘܠܝܣ. ܘܗܕܐ ܡܦܩܬܐ ܦܫܝ̣ܛܬܐ ܕܒܐܝ̣̈ܕܝ ܣܘܪ̈ܝܝܐ. ܗ̇ܝ ܕܐܩܘܠܐܣ ܘܗ̇ܝ ܕܣܘܡܐܟܘܣ ܗ̣ܝ. ܗ̇ܢܘܢ ܕܝܬܝ̣ܪ ܡ̣ܢ ܗ̇ܝ ܕܢܬܪܨܘܢ ܠܟܬܒ̈ܐ ܚܒܠܘ ܐܢܘܢ. ܐܝܟ ܕܐܡ̣ܪ ܦܝܠܠܘܟܣܝܢܘܣ ܕܡܒܘܓ ܘܠܟܬܒ̈ܐ ܬܘܒ ܕܚܕܬܐ܆ ܬܠܬ ܡܦ̈ܩܢ ܐܝܬ ܠܘܬ ܣܘܪ̈ܝܝܐ. ܗܕܐ ܦܫܝ̣ܛܬܐ. ܘܐ̱ܚܪܬܐ ܚܪܩܠܝܬܐ ܘܐ̱ܚܪܬܐ ܩܪܩܦܝܬܐ. ܘܟܬܒ̈ܐ ܕܡܠܦܢ̈ܐ ܬܘܒ ܡܢܗܘܢ ܡ̇ܢ ܡܬܪܨܝ̣ܢ ܠܝܥܩܘܒ ܐܘܪܗܝܐ. ܡܢܗܘܢ ܕܝܢ ܠܐ. ܒܕܓܘܢ ܥܡ ܟܠܗ̇ ܗܢܐ ܫܘܚܠܦܐ ܕܫܟܝ̣ܚ ܒܟܬܒܝ̈ܗܘܢ. ܐܝܟܢܐ ܡܨܝܬܘܢ ܕܬܟܦܪܘܢ ܘܬܐܡܪܘܢ ܕܠܐ ܫܚܠܦܢܢ ܘܚܒܠܢܢ ܠܟܬܒ̈ܐ.

 

 

 

ܦܘܢܝܐ

 

ܐܡܪܝܢܢ ܕܟܠ ܟܬܒܐ ܕܡ̣ܢ ܠܫܢܐ ܠܠܫܢܐ ܡܬܬܥܒܪ ܙܒܢ̈ܬܐ܆ ܡ̣ܢ ܐܢܢܩܝ̣ ܕܫܘܚܠܦܐ ܡܕܡ ܒܪܬ݀ ܩܠܝܐ ܢܫܬܟܚ ܒܗ. ܘܥܡܗ ܕܫܘܚܠܦܐ ܗܢܐ. ܐܠܘ ܒܟܬܒܐ ܡܕܡ ܡ̣ܢ ܗܠܝܢ ܡܦ̈ܩܬܐ ܕܡܢܝܬܘܢ ܫܟܝ̣ܚ ܗܘܐ ܫܡܗ ܕܢܒܝܟܘܢ ܘܒܐܚܪ̈ܢܐ ܠܐ. ܟܒܪ ܐܝܬ ܗܘܐ ܠܟܘܢ ܕܬܐܡܪܘܢ ܕܐܪܝ̣ܡܬܘܢ ܫܡܗ. ܘܟܕ ܘܠܐ ܒܚܕܐ ܡܢܗܝܢ ܫܟܝ̣ܚ. ܐܦܠܐ ܗ̇ܝ ܕܡܬܐܡܪܐ ܡܢܟܘܢ ܫܪܝ̣ܪܐ.

 

 

 

 

 

 

 

     #1 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܪܒܝ̣ܥܝܬܐ ܡܛܠ ܗ̇ܝ ܕܚܕܝܘܬܐ ܗ̇ܝ ܟܝܢܝܬܐ ܘܩܢܘܡܝܬܐ ܗ̇ܝ ܕܗܘܬ݀ ܒܡܪܢ. ܘܠܘ ܕܡܨܛܒܝܢܘܬܐ ܒܠܚܘܕ. ܘܒܗ ܐܝܬ ܦܣܘ̈ܩܐ ܫܬܐ. ܦܣܘܩܐ ܩܕܡܝܐ ܡܛܠ ܢܘܗܪ̈ܐ ܕܒ̈ܢܬ ܩ̈ܠܐ ܐܝܠܝܢ ܕܥܠܝܗܝܢ ܗ̣ܝ ܣܢܝ̣ܩܘܬܐ ܪܒܬܐ ܒܒܘ̈ܚܢܐ ܗܠܝܢ. ܩܕܡܝܬ݀ ܡܛܠ ܐܘܣܝܐ ܕܓܕܫܐ

 

ܥܠ ܗܠܝܢ ܒܠܘܓܝܩܝ ܐܠܦܢܢ. ܐܠܐ ܗܪܟܐ ܙܕܩ ܠܡܕܥ ܕܦܝ̣ܠܠܘ̈ܣܘܦܐ ܒܪ̈ܝܐ ܠܐ ܡܩܛܪܓܝ̣ܢ ܫܡܐ ܕܐܘܣܝܐ ܥܠ ܐܠܗܐ ܫܘܒܚܐ ܠܛܝܒܘܬܗ. ܒܗ̇ܝ ܕܐܡܪܝܢ ܕܐܘܣܝܐ ܐܝܬܝܗ̇. ܗ̇ܝ ܕܟܕ ܡܬܪܢܝܐ ܕܫܟܝ̣ܚܐ ܒܡܥܒܕܢܘܬܐ. ܠܘ ܒܗ̇ܘ ܕܣܝ̣ܡ ܐܝܬܝܗ̇. ܘܐܦܢ ܠܐ ܬܗܘܐ ܕܫܟܝ̣ܚܐ ܒܡܥܒܕܢܘܬܐ. ܐܠܗܐ ܡܕܝܢ ܕܐܡܝ̣ܢܐܝܬ ܐܝܬܘܗܝ ܗܘܐ ܘܐܝܬܘܗܝ ܘܢܗܘܐ ܐܝܬܘܗܝ. ܐܝܟܢܐ ܡܨܝܐ ܕܢܬܐܡܪ ܡܛܠܬܗ ܕܟܕ ܢܫܬܟܚ ܒܡܥܒܕܢܘܬܐ. ܠܘ ܒܗ̇ܘ ܕܣܝ̣ܡ ܐܝܬܘܗܝ. ܘܐܦܢ ܠܐ ܢܗܘܐ ܐܝܬܘܗܝ ܒܡܥܒܕܢܘܬܐ. ܠܘܬܢ ܕܝܢ ܕܝܠܢ ܟܕ ܐܘܣܝܐ ܠܗ̇ܘ ܗ̣ܘ ܐܡܪܝܢܢ ܕܠܘ ܒܗ̇ܘ ܕܣܝ̣ܡ ܐܝܬܘܗܝ ܘܩܐܡ ܠܝܬܗ ܗ̣ܘ ܒܠܥܕ ܬܘܣܦܬܐ ܐ̱ܚܪܬܐ. ܟܐܢܐܝܬ ܥܠ ܐܠܗܐ ܫܘܒܚܐ ܠܛܝܒܘܬܗ ܢܦܠ ܫܡܐ ܕܐܘܣܝܐ. ܡܫܠܡܢ̈ܐ ܕܝܢ ܐܘܣܝܐ ܠܗ̇ܘ ܕܓܘܫܡܐ ܗ̱ܘ. ܐܘ ܡܢܬ ܓܘܫܡܐ ܒܠܚܘܕ. ܘܒܐܬܪܐ ܗ̱ܘ ܕܐܡܪܝ̣ܢ. ܘܡܛܠ ܗܕܐ ܐܠܗܐ ܫܘܒܚܐ ܠܛܝܒܘܬܗ. ܟܕ ܠܘ ܡܕܡ ܕܐܝܟ ܗܟܢ ܗ̣ܘ. ܠܘ ܐܘܣܝܐ ܗ̱ܘ ܠܘܬܗܘܢ. ܩܕܝܫܐ ܕܝܢ ܕܝܘܢܢܘܣܝܘܣ ܒܩܦܠܐܘܢ ܩܕܡܝܐ ܕܡܐܡܪܐ ܕܬܠܬܐ ܟܕ ܐܡ̇ܪ. ܠܡܡܪܚܘ ܠܡܐܡܪ ܐܘ ܠܡܚܫܒܘ ܡܕܡ ܥܠ ܐܠܗܘܬܐ ܓܢܝ̣ܙܬܐ ܘܡܥܠܝܬ݀ ܡ̣ܢ ܐܘܣܝܐ. ܠܘ ܒܚܕ ܡ̣ܢ ܗܠܝܢ ܪ̈ܥܝܢܐ ܕܐܬܐܡܪܘ. ܐܡ̇ܪ ܕܠܐ ܐܝܬܘܗܝ ܐܠܗܐ ܐܘܣܝܐ. ܐܠܐ ܐܟܡ̇ܢ ܕܠܐ ܐܝܬܘܗܝ ܐܝܟ ܚܕܐ ܡ̣ܢ ܗܠܝܢ ܐܘܣܝ̈ܐܣ ܕܠܢ ܡܬܕܪ̈ܟܢ. ܘܝ̣ܕܝ̣ܥܐ ܗܕܐ ܕܗܟܢܐ ܗ̱ܝ ܡ̣ܢ ܗ̇ܝ ܕܒܬܪ ܩܠܝ̣ܠ ܐܘܣܝܐ ܩܪܝܗܝ ܘܐܡ̣ܪ. ܐܘܣܝܐ ܡܥܠܝܬ݀ ܡ̣ܢ ܐܘܣܝܐ. ܘܗܘܢܐ ܠܐ ܡܬܗܘܢܢܐ. ܘܡܠܬܐ ܠܐ ܡܬܡܠܠܢܝ̣ܬܐ. ܓܕܫܐ ܕܝܢ ܐܝܬܘܗܝ ܗ̇ܘ ܕܒܐܚܪܝܢ ܘܠܘ ܒܝܬܗ ܘܡܩܝܡ.

 

 

 

ܡܛܠ ܟܝܢܐ ܘܩܢܘܡܐ

 

ܐܝܟ ܡܫܠܡܢܘܬܐ ܕܝܠܢ ܥܕܬܢܝ̈ܐ. ܟܠ ܐܘܣܝܐ ܟܝܢܐ. ܘܟܠ ܟܝܢܐ ܐܘܣܝܐ. ܒܗ̇ܝ ܕܟܝܢܐ ܥܠ ܓܕ̈ܫܐ ܠܐ ܡܬܩܛܪܓ ܠܘܬܢ. ܐܠܐ ܓܕ̈ܫܐ ܒܟܝܢܐ ܡܩܝܡܝ̣ܢ. ܠܘܬ ܒܪ̈ܝܐ ܕܝܢ ܟܠ ܐܘܣܝܐ ܟܝܢܐ. ܘܠܘ ܟܠ ܟܝܢܐ ܐܘܣܝܐ. ܡܛܠ ܕܐܦ ܓܕ̈ܫܐ ܒܟܝܢܝܘܬܗܘܢ ܡ̣ܢ ܚܕ̈ܕܐ ܡܫܚܠܦܝ̣ܢ ܠܘܬܗܘܢ. ܘܗ̣ܘ ܟܝܢܐ ܠܘܬܢ ܘܠܘܬ ܒܪ̈ܝܐ. ܐܘ ܓܘܢܝܐ ܐܝܬܘܗܝ. ܐܘ ܕܟܠ ܚܕ. ܘܟܝܢܐ ܕܟܠ ܚܕ ܩܢܘܡܐ ܡܬܩܪܐ. ܘܡܛܠ ܗܕܐ ܠܐ ܡܨܐ ܟܝܢܐ ܒܠܥܕ ܩܢܘܡܐ ܠܡܗܘܐ ܒܡܥܒܕܢܘܬܐ. ܐܠܐ ܒܗܘܢܐ ܒܠܚܘܕ. ܩܢܘ̈ܡܐ ܕܝܢ ܣܓܝ̈ܐܐ ܠܘ ܠܐ ܡܨܝܢ ܕܒܚܕ ܟܝܢܐ ܓܘܢܝܐ ܕܐܚ̇ܕ ܠܗܘܢ ܢܬܩܝܡܘܢ.

 

 

 

ܡܛܠ ܝܬܐ

 

ܝܬܐ ܕܝܢ ܐܝܬܝܗ̇ ܐܝܟ ܪܥܝܢܐ ܥܕܬܢܝܐ ܗ̣ܘ ܫܘܡܠܝܐ ܐܘܣܝܝܐ ܕܡܕܡ. ܘܡܛܠ ܗܕܐ ܥܠ ܟܝ̈ܢܐ ܓܘܢܝ̈ܐ. ܒܕܠܘ ܒܡܥܒܕܢܘܬܐ ܫܟܝ̣ܚܝ̣ܢ. ܘܗܟܢܐ ܠܘ ܒܡܕܡ ܦܪܝ̣ܫܝ̣ܢ ܩܢܘܡܐ ܘܝܬܐ.

 

 

 

ܡܛܠ ܐܝܬܝܐ

 

ܠܟܠ ܟܝܢܐ ܡܬܘܡܝܐ ܐܝܬܝܐ ܩܪܝܐ ܡܠܬܐ ܥܕܬܢܝܬܐ. ܘܡܛܠ ܗܕܐ ܥܠ ܐܠܗܐ ܫܘܒܚܐ ܠܫܡܗ ܒܠܚܘܕ ܢܦܠܐ ܒܪܬ݀ ܩܠܐ ܕܐܝܬܝܐ. ܘܥܠ ܗ̇ܢܘܢ ܕܕܓܠܐܝܬ ܡܬܬܘܕܝܢ ܡܬܘܡܝ̈ܐ. ܬܪ̈ܝܝ ܐܝܬܝ̈ܐ ܘܣܓܝ̈ܐܝ ܐܝܬܝ̈ܐ. ܠܘ ܒܪ̈ܝܐ ܕܝܢ ܟܠ ܡܕܡ ܕܐܝܬܘܗܝ܆ ܐܝܬܝܐ ܗ̱ܘ. ܡܬܘܡܝܐ ܢܗܘܐ ܐܘ ܡܫܪܝܢܐ.

 

 

 

ܡܛܠ ܐܝܬܘܬܐ

 

ܠܘܬܢ ܐܝܬܘܬܗ ܕܡܕܡ. ܗ̣ܝ ܐܘܣܝܐ ܕܝܠܗ ܗ̣ܝ. ܠܘܬ ܒܪ̈ܝܐ ܕܝܢ ܐܝܬܘܬܐ ܠܘ ܠܐܘܣܝܗ ܕܡܕܡ ܡܫܘܕܥܐ ܐܠܐ ܠܫܟܝ̣ܚܘܬܗ.

 

 

 

ܡܛܠ ܡܢܝܘܬܐ

 

ܗܕܐ ܒܪܬ݀ ܩܠܐ ܠܘ ܣܓܝ ܫܟܝ̣ܚܐ ܒܟܬܒ̈ܐ ܥܕܬܢܝ̈ܐ. ܘܠܘ ܒܪ̈ܝܐ ܠܗ ܠܗ̇ܘ ܡܐ ܕܐܝܬܘܗܝ ܟܝܢܗ ܕܡܕܡ. ܐܘܟܝ̣ܬ ܕܡܘܢ ܕܗ̣ܘ ܕܐܝܬܘܗܝ ܡܫܘܕܥܐ.

 

 

 

ܡܛܠ ܦܪܨܘܦܐ

 

ܦܪܨܘܦܐ ܐܝܬܘܗܝ܆ ܡܢܬܐ ܥܠܝܬܐ ܕܐܘܣܝܐ ܝ̣ܚܝ̣ܕܝܬܐ ܘܚܝܬܐ ܕܒܗ ܡܛܟܣܐ ܟܢܝ̣ܫܘܬܐ ܟܝܢܝܬܐ ܕܪ̈ܓܫܐ ܐܪܒܥܐ. ܘܥܠ ܒܪܢܫܐ ܡܪܢܐܝܬ ܡܬܩܛܪܓ. ܐܝܟ ܕܐܡ̣ܪ ܐܪܝ̣ܣܛܘܛܠܝ̣ܣ ܒܫܡܥܐ ܟܝܢܝܐ. ܕܒܒܢܝ̈ܢܫܐ ܒܠܚܘܕ ܡܬܩܪܐ ܦܪܨܘܦܐ ܡܛܠ ܬܪܝ̣ܨܘܬ ܩܘܡܬܐ. ܠܘܬ ܥܕܬܢܝ̈ܐ ܕܝܢ ܥܠ ܟܠ ܐܣܟܡܐ ܫܟܝ̣ܚܐ ܦܪܨܘܦܐ ܡܬܩܛܪܓ. ܐܝܟ ܕܐܡܝ̣ܪܐ ܒܐܘܢܓܠܝܘܢ. ܕܦܪܨܘܦܐ ܠܡ ܕܫܡܝܐ ܘܕܐܪܥܐ ܝܕܥܝ̣ܬܘܢ. ܘܥܠ ܠܐ ܓܫܝ̣̈ܡܐ ܠܘ ܡܪܢܐܝܬ ܡܬܩܛܪܓ. ܘܠܗ̇ܝ ܕܐܡ̣ܪ ܡܪܢ. ܕܡܠܐܟܝ̈ܗܘܢ ܒܟܠ ܙܒܢ ܚܙܝܢ ܦܪܨܘܦܗ ܕܐܒܝ. ܦܫܩܗ̇ ܩܕܝܫܐ ܣܐܘܝ̣ܪܐ ܒܡܐܡܪܐ ܕܚܡܫܝܢ ܘܐܪܒܥܐ ܕܐܦܝܬܪܘܢܝܘܢ ܘܐܡ̣ܪ. ܐܝܢܐ ܦܪܨܘܦܐ ܢܗܘܐ ܠܗ̇ܘ ܕܕܠܐ ܐܣܟܡܐ ܘܕܠܐ ܦܓܪܐ. ܐܘ ܐܝܟܢܐ ܢܬܚܙܐ ܗ̇ܘ ܠܐ ܡܬܚܙܝܢܐ. ܐܠܐ ܥܝܕܐ ܐܝܬ ܠܗ ܠܟܬܒܐ ܩܕܝܫܐ ܕܠܣܥܘܪܘܬܐ ܕܠܘܬܢ ܢܩܪܐ ܦܪܨܘܦܐ ܕܐܠܗܐ. ܐܝܟ ܗ̇ܝ ܕܟܬܝ̣ܒܐ ܠܡܙܡܪܢܐ. ܠܐ ܬܗܦܟ ܐܦܝ̈ܟ ܡܢܝ. ܘܐܢܗܪ ܐܦܝ̈ܟ ܥܠ ܥܒܕܝ̈ܟ. ܚܙܝܢ ܗܟܝܠ ܡܠܐܟ̈ܐ ܗ̄ ܡܫܬܘܕܥܝ̣ܢ ܕܕܐܝܟ ܐܝܕܐ ܐܝܬܝܗ̇ ܣܥܘܪܘܬܐ ܘܝܨܝ̣ܦܘܬܐ ܕܐܠܗܐ ܕܥܠ ܫܒܪ̈ܐ. ܘܢܛܪܝ̣ܢ ܠܗܘܢ ܥܡ ܢܛܘܪܬܐ ܐܟܝ̣ܦܬܐ ܘܥܝܪܬܐ. ܘܒܓܪܡܐܛܝ̣ܩܝ̣ ܬܘܒ ܫܝ̣ܠܐܝܬ ܘܝ̣ܙܝ̣ܦܐܝܬ  ܡܬܐܡܪ ܦܪܨܘܦܐ. ܐܝܟ ܐܪܥܐ ܘܐܪܥܢܐ ܘܐܪܥܢܝܐ.

 

 

 

ܡܛܠ ܝܘܩܢܐ

 

ܝܘܩܢܐ ܥܠ ܓܘܫ̈ܡܐ ܣܘ̣ܟܠܐ ܕܦܪܨܘܦܐ ܩܢܐ. ܘܥܠ ܠܐ ܓܫܝ̣̈ܡܐ ܠܕܝ̣ܠܝܘ̣ܬ ܨܘܪܬܐ ܕܟܠ ܚܕ ܡ̣ܢ ܩܢܘ̈ܡܐ ܡܫܘܕܥ. ܐܝܟ ܗ̇ܝ ܕܐܒܐ ܡ̇ܢ ܒܝܠܘܕܘܬܐ ܡܬܝܩܢ. ܘܒܪܐ ܒܝ̣ܠܝ̣ܕܘܬܐ. ܘܪܘܚܐ ܒܢܦܘܩܘܬܐ.

 

 

 

ܡܛܠ ܕܝ̣ܠܝܬܐ

 

ܕܝ̣ܠܝܬܐ ܠܘܬ ܥܕܬܢܝ̈ܐ ܠܘ ܒܠܚܘܕ ܠܐܕ̈ܫܐ ܢܩܦܐ. ܐܠܐ ܐܦ ܘܠܟܠ ܚܕ ܡ̣ܢ ܩܢܘ̈ܡܐ ܐܝܟ ܕܐܡ̣ܪܢܢ. ܠܘܬ ܒܪ̈ܝܐ ܕܝܢ ܠܓܢ̈ܣܐ ܘܠܐܕ̈ܫܐ ܒܠܚܘܕ ܢܩܦܐ.

 

 

 

ܡܛܠ ܚܝܠܐ

 

ܚܝܠܐ ܡ̇ܢ ܐܝܬܘܗܝ ܪܝ̣ܫܝܬܐ ܕܡܥܒܕܢܘܬܐ ܠܟܠܗܘܢ ܗ̇ܢܘܢ ܕܡܟܢܝ̣ܢ ܠܡܥܒܕܘ.

 

 

 

ܡܛܠ ܨܒܝܢܐ

 

ܨܒܝܢܐ ܐܝܬܘܗܝ ܝܐܝ̣ܒܘܬ ܚܝܠܐ ܕܗ̇ܘ ܕܚܝ. ܠܘܬ ܩܢܝܘܬܐ ܐܘܟܝ̣ܬ ܕܚܕ ܡ̣ܢ ܬܪ̈ܝܗܘܢ ܦܫܚܝ̈ܗ̇ ܕܐܢܛܝ̣ܦܐܣܝ̣ܣ ܟܐܡܬ݀ ܕܗ̇ܝ ܕܢܥܒܕ ܐܘ ܕܠܐ ܢܥܒܕ.

 

 

 

ܡܛܠ ܫܘܠܛܢܐ

 

ܫܘܠܛܢܐ ܐܝܬܘܗܝ܇ ܚܝܠܐ ܡܫܥܒܕܢܐ ܕܨܒܝܢܐ. ܘܕܡܟܢ ܠܡܥܨܐ ܐܦ ܠܟܝܢܐ ܒܡܕܡ ܡ̣ܢ ܡܥܒܕܢܘܬܗ. ܘܐܦܢ ܠܘ ܒܟܠܗܝܢ. ܕܐܝܟ ܐܝܟܢ. ܡܟܢ ܒܪܢܫܐ ܠܡܨܡ. ܘܐܦܢ ܨܒܝܢܐ ܗܟܘܬ ܘܠܡܫܗܪ ܘܠܡܬܥܫ. ܘܠܐ ܡܟܢ ܠܡܒܛܠܘ ܙܘܥܝ̈ ܡܘܚܗ. ܐܦ ܦܫܛܐ ܘܩܦܣܐ ܕܠܒܗ. ܐܘ ܡܥܒܕܢ̈ܘܬ ܟܒܕܗ.

 

 

 

ܡܛܠ ܐܣܟܡܗ ܘܕܡܘ̣ܬܐ

 

ܥܠ ܗܠܝܢ ܒܩܛܝܓܘܪ̈ܝܐܣ ܐܠܦ̣ܢܢ.

 

 

 

ܡܛܠ ܛܘܦܣܐ

 

ܛܘܦܣܐ ܐܝܬܘܗܝ ܕܡܝ̣ܘܬܐ ܡܢܬܝܬܐ ܕܓܘܫܡܐ ܒܓܘܫܡܐ. ܐܝܟ ܕܗ̇ܝ ܕܢܐܡܪ ܕܝܪܝ̣ܥܬܐ ܛܘܦܣܐ ܗ̱ܝ ܕܦܠܓܘܬ ܫܡܝܐ. ܘܒܪܬܐ ܕܟܠܗ̇ ܫܡܝܐ. ܐܘ ܕܓܘܫܡܐ ܠܐ ܓܫܘܡ. ܐܝܟ ܗ̇ܝ ܕܢܐܡܪ ܕܢܦܫܐ ܟܕ ܡܫܢܝܐ ܡ̣ܢ ܦܓܪܐ. ܛܘܦܣܐ ܗ̱ܝ ܕܡܠܐܟܐ ܐܢ ܙܕܝ̣ܩܬܐ ܗ̱ܝ.ܐܘ ܕܫܐܕܐ ܐܢ ܥܘܠܬܐ ܗ̱ܝ. ܐܘ ܕܠܐ ܓܫܘܡ ܒܓܘܫܡܐ. ܐܝܟ ܗ̇ܝ ܕܢܐܡܪ ܕܢܦܫܐ ܛܘܦܣܐ ܗ̱ܝ ܕܢܘܪܐ ܒܐܡܝ̣ܢܘܬ ܙܘܥܝ̈ܗ̇. ܘܕܡܘ̣ܬܐ ܡܢܬܝܬܐ ܐܡܝ̣ܪܐ. ܟܐܡܬ݀ ܐܝܟ ܕܡܝܘ̣ܬ ܛܠܠܐ ܠܓܘܫܡܐ.

 

 

 

ܡܛܠ ܗܘܝܐ ܘܗܘܝ̈ܐ ܘܗܘܝܐ

 

ܗܘܝܐ ܐܝܬܘܗܝ ܡܛܟܣܘܬܐ ܕܡܦܩܬܐ ܕܣܘܥܪ̈ܢܐ ܡ̣ܢ ܚܝܠܐ ܠܡܥܒܕܢܘܬܐ. ܘܗܘܝ̈ܐ ܡܬܩܪܝܢ ܟܝ̈ܢܐ ܩܕ̈ܡܝܐ ܘܡܩܝ̈ܡܐ. ܐܝܟ ܫܡܝܐ ܘܐܣܛܘܟ̈ܣܐ. ܘܗܘܝܐ ܡܬܐܡܪ ܠܟܠ ܟܝܢܐ ܕܠܘ ܡܬܘܡܝܐ ܗ̱ܘ. ܐܠܐ ܡܗܘܐ ܗܘܐ. ܘܒܪܝܐ ܒܠܚܘܕ ܡܬܚܫܚܝ̣ܢ ܒܒܪܬ݀ ܩܠܐ ܗܕܐ. ܐܝܟ ܕܐܡ̣ܪ ܐܪܝ̣ܣܛܘܛܠܝ̣ܣ ܕܩܕܡܢܢ ܚܘܝ̣ܢܢ ܕܠܐ ܗܘ̈ܝܬܐ ܐܝܬܝܗܝܢ ܟܠܗܝܢ ܡܢܘ̈ܬܗ ܕܥܠܡܐ. ܕܚܕܐ ܡܢܗܝܢ ܐܝܬܘܗܝ ܝܡܐ. ܒܐܕܫܐ ܒܪܡ ܘܠܘ ܒܡܢܝܢܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܪܒܝ̣ܥܝܐ ܕܫܬܐܣܬܐ ܪܒܝ̣ܥܝܬܐ܆ ܡܛܠ ܗ̇ܝ ܕܡܪܢ ܡܫܝ̣ܚܐ ܚܕ ܗ̣ܘ ܟܝܢܐ ܡ̣ܢ ܬܪܝܢ ܟܝܢܝ̣̈ܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܢܗܘ ܕܐܠܘ ܠܘ ܚܕ ܗ̣ܘ ܟܝܢܐ ܡܪܢ܆ ܕܗ̣ܘ ܟܕ ܗ̣ܘ ܡ̣ܢ ܒܪܝ̣ܫܝ̣ܬ ܕܠܐ ܒܣܪܐ ܡ̣ܢ ܐܒܐ ܝ̣ܠܝ̣ܕ. ܘܒܚܪܬ݀ ܙܒ̈ܢܐ ܒܒܣܪ ܡ̣ܢ ܡܪܝܡ. ܬܪܝܢ ܗܘܝܢ ܝ̣ܠܝ̣̈ܕܐ. ܘܡܛܠ ܗܕܐ ܐܦ ܬܪܝܢ ܘܒܢܝ̈ܐ. ܘܕܠܐ ܐ̱ܢܫ ܡ̣ܢ ܟܪ̈ܝܣܛܝܢܐ ܬܪܝܢ ܒܢܝ̈ܐ ܐܡ̇ܪ ܠܡܪܢ܆ ܓܠܝܐ. ܘܟܕ ܬܪܝܢܘ̣ܬ ܟܝ̈ܢܐ ܠܘܬ ܬܪܝܢܘܬ ܒܢܝ̈ܐ ܡܘܒܠܐ. ܚܕ ܗ̣ܘ ܟܝܢܐ ܡܪܢ ܘܠܘ ܬܪܝܢ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܡܪܢ ܡܫܝ̣ܚܐ ܟܕ ܐܠܗܐ ܡ̣ܢ ܟܠܗܘܢ ܟܪ̈ܣܛܝܢܐ ܡܬܬܘܕܐ. ܠܐ ܙܕܩ ܕܢܬܡܢܘܢ ܒܗ ܬܪܝܢ ܟܝ̈ܢܐ ܐܘ ܩܢܘ̈ܡܐ. ܒܗ̇ܝ ܕܗ̣ܝ ܗܕܐ. ܠܘܬ ܗ̇ܝ ܕܬܪܝܢ ܟܝܢ̈ܐ ܘܐܪܒܥܐ ܩܢܘ̈ܡܐ ܢܗܐ ܐܠܗܗܘܢ ܕܟܪ̈ܣܛܝܢܐ ܡܘܒܠܐ ܗ̇ܝ ܕܫܟܝ̣ܪܐ. ܘܟܕ ܚܕ ܗ̣ܘ ܟܝܢܐ ܕܐܠܗܐ ܒܬܠܬܐ ܩܢܘ̈ܡܐ. ܚܕ ܗ̣ܘ ܐܦ ܟܝܢܐ ܘܩܢܘܡܐ ܕܡܫܝ̣ܚܐ.

 

 

 

ܗܦܟܬܐ

 

ܐܡܪܝܢ ܕܟܝܢܐ ܘܩܢܘܡܐ ܐ̱ܢܫܝܐ ܠܘ ܐܠܗܐ ܗ̱ܘ ܒܟܝܢܐ ܐܠܐ ܒܛܝܒܘܬܐ ܒܠܚܘܕ.

 

 

 

ܦܘܢܝܐ

 

ܐܡܪܝܢܢ ܕܬܪܝܢ ܐܠܗܝ̣̈ܢ ܡܕܝܢ ܡܫܬܟܚܝ̣ܢ ܠܟܘܢ. ܚܕ ܒܟܝܢܐ ܘܐ̱ܚܪܢܐ ܒܛܝܒܘܬܐ. ܘܡ̣ܢ ܗܪܟܐ ܠܘܬ ܣܓܝܐܘܬ ܐܠܗ̈ܐ ܕܚܢܦܝܬܐ ܗ̱ܝ.

 

 

 

ܗܦܟܬܐ

 

ܐܡܪܝܢ ܡܕܝܢ ܐܝܟ ܗ̇ܘ ܕܡܣܪܩܝ̣ܢ ܐܢ̱ܬܘܢ ܡ̣ܢ ܟܝܢܐ ܘܩܢܘܡܐ ܠܗ̇ܘ ܕܢܣܒ ܐܠܗܐ ܡܠܬܐ ܡ̣ܢ ܙܪܥܗ ܕܕܘܝܕ. ܘܐܝܟܢܐ ܡܨܝܢ ܐܢ̱ܬܘܢ ܕܬܚܘܘܢ ܠܢ ܐ̱ܢܫܘܬܐ ܓܠܝ̣ܙܬ݀ ܡ̣ܢ ܟܝܢܐ ܘܩܢܘܡܐ.

 

 

 

ܦܘܢܝܐ

 

ܐܡܪܝܢܢ. ܕܐ̱ܢܫܘܬܐ ܡ̇ܢ ܟܕ ܡܢܬܐ ܗ̱ܝ ܕܟܘܠܐ ܟܝܢܝܐ ܕܡܫܝ̣ܚܐ ܐܝܟ ܬܪܥܝ̣ܬܐ ܕܟܠܩܝ̣ܕܘ̈ܢܝܐ. ܘܕܟܠܐ ܦܪܨܘܦܝܐ ܘܒܪܘܬܢܝܐ ܐܝܟ ܬܪܥܝ̣ܬܐ ܕܢܣܛܘܪ̈ܝܢܘ. ܗܟܘܬ ܘܟܝܢ ܐܠܗܘܬܗ ܕܡܠܬܐ܆ ܠܐ ܙܕܩ ܕܕܝ̣ܠܢܐܝܬ ܘܡܦܪܫܐܝܬ ܢܬܡܢܘܢ ܟܝܢܝ̈ܗܘܢ. ܐܝܟܢܐ ܕܬܪܝܢܘܬܐ ܠܐ ܬܥܘܠ. ܘܐܠܐ ܙܕܩ ܗܘܐ ܕܐܦ ܟܝܢܝ̈ܗ̇ ܘܩܢܘ̈ܡܝܗ̇ ܕܟܠܗܘܢ ܗܕܡܘ̈ܗܝ ܕܦܓܪܐ ܦܫܝ̣̈ܛܐ ܘܐܘܪ̈ܓܢܝܐ. ܘܡ̣ܢ ܗܪܟܐ ܠܘ ܒܠܚܘܕ ܬܪܝܢ ܟܝ̈ܢܐ ܘܩܢܘ̈ܡܐ ܡܫܬܟܚ ܗܘܐ ܡܫܝ̣ܚܐ. ܐܠܐ ܘܝܬܝ̣ܪ ܡ̣ܢ ܚܡܫܝܢ ܗ̇ܝ ܕܫܟܝ̣ܪܐ. ܘܬܘܒ ܐܡܪܝܢܢ. ܕܐܟܡܐ ܕܚܢܢ ܠܐ ܡܨܝܢܢ ܠܡܚܘܝܘ ܐ̱ܢܫܘܬܐ ܓܠܝ̣ܙܬ݀ ܡ̣ܢ ܟܝܢܐ ܘܩܢܘܡܐ. ܗܟܘܬ ܐܦܠܐ ܐܢ̱ܬܘܢ ܟܠܩܝ̣̈ܕܘܢܝܐ ܡܨܝܢ ܐܢ̱ܬܘܢ ܕܬܚܘܘܢ ܐ̱ܢܫܘܬܐ ܓܠܝ̣ܙܬ݀ ܡ̣ܢ ܩܢܘܡܐ. ܒܕܓܘܢ ܐܠܨܐ ܠܟܘܢ ܕܬܪܝܢ ܩܢܘ̈ܡܝ̣ܢ܇ ܘܠܘ ܚܕ ܬܘܕܘܢܝܗܝ ܠܡܪܝܐ. ܗܟܘܬ ܐܦܠܐ ܐܢ̱ܬܘܢ ܢܣܛܘܪ̈ܝܢܘ܆ ܡܨܝܢ ܐܢ̱ܬܘܢ ܕܬܚܘܘܢ ܐ̱ܢܫܘܬܐ ܓܠܝ̣ܙܬ݀ ܡ̣ܢ ܦܪܨܘܦܐ ܘܒܪܘܬܐ ܘܡܫܝ̣ܚܘܬܐ. ܒܕܓܘܢ ܐܠܨܐ ܠܟܘܢ ܕܬܪܝܢ ܦܪ̈ܨܘܦܝ̣ܢ ܘܬܪܝܢ ܒܢܝ̣̈ܢ ܘܬܪܝܢ ܡܫܝ̣ܚܝ̣̈ܢ ܬܘܕܘܢܝܗܝ ܠܡܪܝܐ.

 

 

 

ܗܦܟܬܐ

 

ܐܡܪܝܢ ܕܢܦܫܐ ܠܡ ܘܦܓܪܐ. ܒܗ̇ܝ ܕܬܪ̈ܝܗܘܢ ܒܪ̈ܝܐ ܘܡܫܪ̈ܝܢܐ ܐܢܘܢ. ܚܕ ܟܝܢܐ ܘܩܢܘܡܐ ܡܬܩܪܝܢ. ܠܒܪܢܫܐ. ܐܠܗܘܬܐ ܕܝܢ ܘܐ̱ܢܫܘܬܐ ܒܗ̇ܝ ܕܡ̇ܢ ܒܪܘܝܬܐ ܗ̱ܝ܇ ܗ̇ܝ ܕܝܢ ܒܪܝ̣ܬܐ. ܘܗ̇ܝ ܡܬܘܡܝܬܐ܆ ܘܗ̇ܝ ܡܫܪܝܢܝ̣ܬܐ. ܠܘ ܚܕ ܟܝܢܐ ܘܩܢܘܡܐ ܡܬܩܪ̈ܝܢ.

 

 

 

ܦܘܢܝܐ

 

ܐܡܪܝܢܢ. ܕܡܕܝܢ ܠܒܪܢܫܐ ܘܠܬܘܪܐ. ܘܠܐܛܪܘܓܐ ܘܒܠܘܛܐ. ܘܠܐܱܙܡܪܓܕܐ ܘܦܪܙܠܐ. ܚܕ ܩ̣ܪܘ ܟܝܢܐ. ܗ̇ܝ ܕܠܐ ܐ̱ܢܫ ܡ̣ܢ ܒܪ̈ܝܐ ܐܘ ܓܘܝ̈ܐ ܐܬܪܥܝ̣ ܕܐܝܟ ܗܕܐ. ܘܬܘܒ ܐܡܪܝ̣ܢܢ ܕܐܟܡܐ ܕܢܦܫܐ ܘܦܓܪܐ ܒܗ̇ܝ ܕܒܪ̈ܝܐ ܐܢܘܢ ܡܫܘܬܦܝ̣ܢ. ܒܗ̇ ܒܕܡܘ̣ܬܐ ܘܐܠܗܐ ܘܒܪܢܫܐ ܒܗ̇ܝ ܕܐܝܬܝܗܘܢ ܘܩܝ̈ܡܝ ܠܝܬܗܘܢ ܐܝܬܝܗܘܢ܆ ܡܫܘܬܦܝ̣ܢ ܠܚܕ̈ܕܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ. ܕܗ̇ܝ ܕܐܬܚܝܕܘ ܟܝ̈ܢܐ ܠܚܕ̈ܕܐ ܠܗ̇ܝ ܕܚܕ ܡܕܡ ܗܘܐ ܡ̣ܢ ܟܢܝ̣ܫܘܬ ܬܪ̈ܝܗܘܢ ܡܫܘܕܥܐ. ܒܕܓܘܢ ܗ̇ܘ ܚܕ ܡܕܡ ܠܐ ܡܨܝܐ ܕܫܡܝܐ ܢܗܘܐ ܒܠܚܘܕ ܒܠܥܕ ܡܫܬܡܗܢܐ ܘܐܠܐ ܡܫܬܟܚ ܠܗ ܡܫܝ̣ܚܐ ܕܠܘ ܡܕܡ ܗ̣ܘ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܫܡܐ ܢܗܘܐ ܡܫܘܕܥܢܐ ܕܣܘܥܪܢܐ. ܒܕܓܘܢ ܗ̣ܘ ܗ̇ܘ ܣܘܥܪܢܐ. ܐܘ ܐܘܣܝܐ ܐܝܬܘܗܝ ܐܘ ܓܕܫܐ. ܘܟܕ ܠܐ ܡܨܝܐ ܕܓܕܫܐ ܢܗܘܐ. ܫܪܝ̣ܟܐ ܕܐܘܣܝܐ ܢܗܘܐ. ܒܕܓܘܢ ܗ̣ܝ ܐܘܣܝܐ ܐܘ ܓܘܢܝܬܐ ܗ̱ܘ ܐܘ ܕܟܠܚܕ. ܘܠܐ ܡܨܝܐ ܕܓܘܢܝܬܐ ܬܗܘܐ. ܘܐܠܐ ܡܫܬܟܚ ܠܗ ܡܫܝ̣ܚܐ ܕܥܠ ܐܕܫ̈ܐ ܣܓܝ̈ܐܐ ܘܥܠ ܩܢܘ̈ܡܐ ܣܓܝ̈ܐܐ ܡܬܩܛܪܓ ܗ̇ܝ ܕܫܟܝ̣ܪܐ. ܒܗ̣ܝ ܕܐܠܨܐ ܗܘܬ݀ ܗܝܕܝܟ. ܕܟܠ ܚܕ ܡ̣ܢ ܟܝ̈ܢܐ ܕܐܕܫ̈ܐ ܗܠܝܢ. ܐܘ ܟܠܚܕ ܡ̣ܢ ܩܢܘ̈ܡܐ ܗܠܝܢ ܡܢܗ ܘܠܗ ܡܫܝܚܐ ܡܬܩܪܐ ܗܘܐ. ܒܗ̇ܝ ܕܐܘܣܝܐ ܓܘܢܝܬܐ ܗ̇ܝ ܗ̣ܝ ܕܫܡܗ̇ ܘܬܚܘܡܗ̇ ܗ̇ܝ ܕܠܐ ܫܪܝ̣ܪܐ. ܫܪܝ̣ܟܐ ܡܕܝܢ ܕܐܘܣܝܐ ܕܟܠ ܚܕ ܬܗܘܐ ܐܘܣܝܐ ܗ̇ܝ. ܘܕܐܘܣܝܐ ܕܟܠܚܕ ܠܘ ܡܕܡ ܗ̣ܝ ܐ̱ܚܪܝܢ ܣܛܪ ܡ̣ܢ ܟܝܢܐ ܘܩܢܘܡܐ ܝ̣ܚܝ̣ܕܝܐ ܓܠܝܐ. ܡܫܝܚܐ ܡܕܝܢ ܟܕ ܡܕܡ ܗ̣ܘ ܘܠܘ ܠܐ ܡܕܡ. ܘܟܕ ܐܘܣܝܐ ܗ̱ܘ ܘܠܘ ܓܕܫܐ. ܘܟܕ ܕܟܠ ܚܕ ܗ̣ܘ ܘܠܘ ܓܘܢܝܐ. ܚܕ ܗ̣ܘ ܠܗ ܟܝܢܐ ܘܩܢܘܡܐ.

 

 

 

ܡܚܘܝܢܘܬܐ ܕܐܪܒܥ

 

ܐܢ ܟܝ̈ܢܐ ܐܢܘܢ ܗ̇ܢܘܢ ܕܐܬܚܝܕܘ܆ ܐܠܨܐ ܕܟܝܢܝܬܐ ܬܗܐ ܚܕܝܘܬܗܘܢ. ܒܗ̇ܝ ܕܐܠܘ ܠܘ ܟܝܢܝܬܐ ܗ̱ܝ ܚܕܝܘܬܐ܆ ܐܠܐ ܩܢܘܡܝܬܐ ܐܘ ܦܪܨܘܦܝܬܐ. ܠܘ ܟܝ̈ܢܐ ܐܢܘܢ ܕܐܬܚܝܕܘ ܠܚܕ̈ܕܐ. ܐܠܐ ܩܢܘ̈ܡܐ ܒܠܚܘܕ ܐܘ ܦܪ̈ܨܘܦܐ܇ ܗ̇ܝ ܕܫܟܝ̣ܪܐ. ܒܗ̇ܝ ܕܠܐ ܐ̱ܢܫ ܡ̣ܢ ܟܪ̈ܣܛܝܢܐ ܡܓܡܕ ܠܡܐܡܪ. ܕܩܢܘ̈ܡܐ ܐܘ ܦܪ̈ܨܘܦܐ ܒܠܥܕ ܟܝ̈ܢܐ ܐܬܚܝܕܘ.

 

 

 

ܡܚܘܝܢܘܬܐ ܕܚܡܫ

 

ܐܡܪܝܢܢ ܐܠܘ ܩܢܘܡܝܬܐ ܗ̱ܝ ܚܕܝܘܬܐ ܐܦ ܦܪܨܘܦܝܬܐ ܘܠܘ ܟܝܢܝܬܐ ܡܫܬܟܚܝ̣ܢ ܩܢܘ̈ܡܐ ܘܦܪ̈ܨܘܦܐ ܕܒܠܥܕ ܟܝܢܝ̈ܗܘܢ ܐܬܚܝܕܘ ܠܚ̈ܕܕܐ. ܘܕܠܐ ܡܬܡܨܝܢܝ̣ܬܐ ܗ̱ܝ ܗܕܐ. ܝ̣ܕܝ̣ܥܐ ܡ̣ܢ ܗ̇ܝ ܕܩܢܘ̈ܡܐ ܘܦܪ̈ܨܘܦܐ ܒܟܝܢܝ̈ܗܘܢ ܐܢܘܢ ܩܢܘ̈ܡܐ ܘܦܪ̈ܨܘܦܐ. ܘܠܐ ܡܬܘܡ ܡ̣ܢ ܚܕ̈ܕܐ ܡܬܦܪܫܝ̣ܢ ܘܡ̣ܢ ܗܪܟܐ ܡܬܟܢܫܐ ܕܐܢ ܩܢܘܡܝܬܐ ܗ̱ܝ ܐܘ ܦܪܨܘܦܝܬܐ ܗ̱ܝ ܚܕܝܘܬܐ. ܐܠܨܐܝܬ ܐܦ ܟܝܢܝܬܐ ܗ̱ܝ. ܘܟܕ ܟܝܢܝܬܐ ܗ̱ܝ. ܓܠܝܐ ܕܥܠ ܟܝ̈ܢܐ ܗ̣ܘ ܡܬܩܛܪܓܐ ܗ̇ܝ ܕܚܕ. ܠܐ ܡܟܝ̣ܠ ܬܪܝܢ ܙܕܩ ܕܢܬܡܢܘܢ ܟܝ̈ܢܐ ܟܪ ܕܚܕܝܘܬܐ ܐܝܬ ܐܝܟܢ ܕܗ̣ܘ܇ ܕܟܝ̈ܢܐ ܐܘ ܕܩܢܘ̈ܡܐ ܐܘ ܕܦܪ̈ܨܘܦܐ. ܚܕ ܗ̣ܘ ܡܕܝܢ ܘܩܢܘܡܐ ܕܡܪܢ ܡܫܝ̣ܚܐ.

 

 

 

ܡܚܘܝܢܘܬܐ ܕܫܬ

 

ܐܡܪܝܢܢ ܕܐܢܗܘ ܕܟܝ̈ܢܐ ܡ̣ܢ ܒܬܪ ܚܕܝܘܬܐ ܬܪܝܢ ܐܟܡܐ ܕܐܦ ܡ̣ܢ ܩܕܡ ܚܕܝܘܬܐ ܬܪܝܢ. ܠܐ ܡܟܝ̣ܠ ܐܬܚܝܕܘ ܟܝ̈ܢܐ ܠܚ̈ܕܕܐ܇ ܗ̇ܝ ܕܫܟܝ̣ܪܐ ܠܦܘܬ ܬܪܥܝ̣ܬܐ ܓܘܢܝܬܐ ܕܟܠܗܘܢ ܟܪ̈ܣܛܝܢܐ.

 

 

 

ܗܦܟܬܐ

 

ܐܡܪܝܢ ܕܒܩܢܘ̈ܡܝܗܘܢ ܐܘ ܒܦܪ̈ܨܘܦܝܗܘܢ ܐܬܚܝܕܘ ܟܝ̈ܢܐ ܠܚ̈ܕܕܐ ܘܠܘ ܒܟܝܢܝ̈ܗܘܢ.

 

 

 

ܦܘܢܝܐ

 

ܐܡܪܝܢܢ ܕܡܠܬܐ ܗ̱ܝ ܫܛܘܪܬܐ ܗܕܐ ܘܠܐ ܫܘܝܐ ܠܡܬܡܥܘ. ܟܐܡܬ݀ ܕܬܬܐܡܪ ܕܟܝ̈ܢܐ ܠܘ ܒܟܝܢܝ̈ܗܘܢ ܐܬܚܝܕܘ ܠܚ̈ܕܕܐ. ܘܥܡ ܗܠܝܢ ܩܕܡܢܢ ܚܘܝ̣ܢܢ ܕܡ̣ܢ ܠܐ ܡܬܡܨܝܢܝ̣ܬܐ ܗ̱ܝ ܕܩܢܘ̈ܡܐ ܐܘ ܦܪ̈ܨܘܦܐ ܒܠܥܕ ܟܝ̈ܢܐ ܥܡ ܚܕ̈ܕܐ ܢܬܚܝܕܘܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܕܓܪܝܓܘܪܝܘܣ ܥܒܕ ܬܕܡܪ̈ܬܐ ܡ̣ܢ ܗܝܡܢܘܬܐ ܕܒܡܢܘ̈ܬܐ ܕܒܐܝ̣ܕܐ ܒܐܝ̣ܕܐ. ܐܡ̣ܪ ܓܝܪ ܗܟܢܐ. ܐܦ ܐܝܬܘܗܝ ܐܠܗܐ ܫܪܝܪܐ. ܗ̇ܘ ܠܐ ܒܣܪܢܐ ܕܒܒܣܪܐ ܐܬܓܠܝ̣. ܡܫܠܡܢܐ ܒܡܫܡܠܝܘܬܐ ܫܪܝ̣ܪܬܐ ܘܐܠܗܝܬܐ. ܠܐ ܬܪܝܢ ܦܪ̈ܨܘܦܐ. ܘܠܐ ܬܪܝܢ ܟܝ̈ܢܐ. ܐܦܠܐ ܓܝܪ ܠܐܪܒܥܐ ܣܓܕܝ̣ܢܢ ܐܡܪܝܢܢ. ܠܐܠܗܐ ܘܠܒܪܐ ܕܐܠܗܐ ܘܠܒܪܢܫܐ ܘܠܪܘܚܐ ܩܕܝܫܐ. ܘܥܠܗܝܢ ܡܚܪܡܝ̣ܢܢ ܠܐܝܠܝܢ ܕܗܟܢܐ ܡܪܫܥܝ̣ܢ. ܘܒܪܢܫܐ ܒܬܫܒܘܚܬܐ ܐܠܗܝܬܐ ܣܝܡܝ̣ܢ.

 

 

 

ܣܗܕܘܬܐ ܕܬܪܬܝܢ

 

ܕܩܕܝܫܐ ܐܝܘܠܝܘܣ ܡ̣ܢ ܐܝܠܝܢ ܕܠܘܬ ܗ̇ܢܘܢ ܕܠܘܩܒܠ ܡܬܓܫܡܢܘܬܐ ܐܠܗܝܬܐ ܡܬܟܬܫܝ̣ܢ ܒܥܠܬܐ ܕܗ̇ܝ ܕܒܪ ܟܝܢܐ. ܐܡ̣ܪ ܗܟܢܐ. ܘܠܐ ܚܕ ܦܘܪܫܐ ܕܡܠܬܐ ܘܕܦܓܪܗ ܒܟܬܒ̈ܐ ܐܠܗܝ̈ܐ ܣܝ̣ܡ. ܐܠܐ ܐܝܬܘܗܝ ܚܕ ܟܝܢܐ ܚܕ ܩܢܘܡܐ. ܚܕܐ ܡܥܒܕܢܘܬܐ. ܚܕ ܦܪܨܘܦܐ. ܟܠܗ ܐܠܗܐ. ܟܠܗ ܒܪܢܫܐ܆ ܗ̣ܘ ܟܕ ܗ̣ܘ. ܡܛܠ ܓܝܪ ܕܚܕ ܘܗ̇ܘ ܕܡܥܒܕ܆ ܚܕܐ ܐܝܬܝܗ̇ ܐܦ ܡܥܒܕܢܘܬܗ ܘܙܘܥܐ ܡܥܒܕܢܐ.

 

 

 

ܣܗܕܘܬܐ ܕܬܠܬ

 

ܕܩܕܝܫܐ ܐܬܐܢܐܣܝܘܣ ܡ̣ܢ ܐܓܪܬܐ ܕܠܘܬ ܝܘܒܝܢܝܐܢܘܣ ܡܠܟܐ ܐܡ̣ܪ ܗܟܢܐ. ܚܕ ܗܟܝܠ ܘܠܐ ܠܡܘܕܝܘ ܘܠܡܐܡܪ. ܟܝܢܐ ܘܩܢܘܡܐ ܕܡܠܬܐ ܕܡܒܣܪ. ܕܐܬܒܪܢܫ ܡܫܡܠܝܐܝܬ. ܘܗ̇ܘ ܕܗܕܐ ܠܐ ܐܡ̇ܪ. ܢܨܐ ܥܡ ܐܠܗܐ ܐܝܬܘܗܝ. ܘܡܬܟܬܫ ܥܡ ܐܒܗ̈ܬܐ ܩܕܝ̈ܫܐ.

 

 

 

ܣܗܕܘܬܐ ܕܐܪܒܥ

 

ܕܝܠܗ ܕܩܕܝܫܐ ܐܬܐܢܐܣܝܘܣ ܡ̣ܢ ܣܝܡܐ ܕܥܠ ܡܬܒܣܪܢܘܬܗ ܕܡܠܬܐ ܐܡ̣ܪ ܗܟܢܐ. ܡܘܕܝܢܢ ܕܐܝܬܘܗܝ ܒܪܗ ܕܐܠܗܐ ܘܐܠܗܐ ܒܪܘܚ. ܒܪܗ ܕܝܢ ܕܐ̱ܢܫܐ ܒܒܣܪ. ܠܘ ܬܪܝܢ ܟܝ̈ܢܐ ܠܗ̇ܘ ܕܚܕ ܒܪܐ. ܚܕ ܡܣܬܓܕܢܐ ܘܚܕ ܠܐ ܡܣܬܓܕܢܐ. ܐܠܐ ܚܕ ܟܝܢܐ ܕܐܠܗܐ ܡܠܬܐ ܕܡܒܣܪ ܘܡܣܬܓܕ ܥܡ ܒܣܪܗ ܒܚܕܐ ܣܓܕܬܐ. ܘܠܐ ܬܪܝܢ ܒܢܝ̈ܐ. ܚܕ ܡ̇ܢ ܒܪܗ ܕܐܠܗܐ ܫܪܝܪܐ ܘܡܣܬܓܕܢܐ. ܐ̱ܚܪܢܐ ܕܝܢ ܒܪܢܫܐ ܕܡ̣ܢ ܡܪܝܡ ܠܐ ܡܣܬܓܕܢܐ. ܕܒܛܝܒܘܬܐ ܗܘܐ ܒܪܐ ܕܐܠܗܐ܆ ܐܝܟ ܒܢܝ̈ܢܫܐ.

 

 

 

ܣܗܕܘܬܐ ܕܚܡܫ

 

ܕܩܕܝܫܐ ܦܪܘܩܠܘܣ ܐܦܣܩܘܦܐ ܕܩܘܣܛܢܛܝܢܘܦܘܠܝܣ. ܡ̣ܢ ܐܓܪܬܐ ܕܠܘ ܐܪ̈ܡܢܝܐ. ܐܡ̣ܪ ܗܟܢܐ. ܐܝܟܢܐ ܓܝܪ ܕܠܚܘܕܝܘܬܐ ܠܐ ܡܬܦܣܩܐ ܠܬܪܬܝܢ ܠܚܘܕܝ̈ܘܬܐ. ܐܢ ܓܝܪ ܠܗܠܝܢ ܡܬܦܠܓܐ܆ ܠܐ ܐܝܬܝܗ̇ ܠܚܘܕܝܘܬܐ. ܐܠܐ ܬܪܝܢܘܬܐ. ܗܟܢܐ ܘܗ̇ܘ ܕܚܕ ܗ̣ܘܐ ܒܚܕܝܘܬܐ ܡܥܠܝܬܐ. ܠܐ ܡܬܦܣܩ ܠܬܪܝܢ. ܗ̇ܝ ܓܝܪ ܕܢܣܒ ܡܙܥܩܐ܆ ܠܠܐ ܫܘܚܠܦܐ ܕܟܝܢܐ. ܗ̇ܝ ܕܝܢ ܕܗ̣ܘܐ܆ ܠܚܕܝܘܬܐ ܫܪܝܪܬܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܪܒܝ̣ܥܝܬܐ. ܡܛܠܗ̇ܝ ܕܐܢ ܚܕ ܗ̣ܘ ܩܢܘܡܗ ܕܡܪܢ ܡܫܝܚܐ. ܐܠܨܐ ܕܐܦ ܟܝܢܗ ܚܕ ܢܗܘܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܢ ܚܕ ܗ̣ܘ ܩܢܘܡܗ ܕܡܪܢ ܡܫܝ̣ܚܐ. ܐܠܨܐ ܕܐܦ ܟܝܢܗ ܚܕ ܢܗܘܐ. ܒܗ̇ܝ ܕܩܢܘܡܗ ܠܘ ܡܕܡ ܗ̣ܘ ܐ̱ܚܪܝܢ. ܐܠܐ ܗ̣ܘ ܟܝܢܗ ܥܡ ܬܘܣܦܬܐ ܕܕܝ̣ܠܝܬܐ ܡܝܩܢܢܝ̣ܬܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܡ̣ܢ ܒܬܪ ܚܕܝܘܬܐ ܟܕ ܠܘ ܩܢܘܡܐ ܐ̱ܚܪܢܐ ܡܬܡܢܐ ܥܡ ܩܢܘܡܗ ܕܡܠܬܐ ܐܠܗܐ. ܐܠܨܐ ܕܐܦܠܐ ܟܝܢܐ ܐ̱ܚܪܢܐ ܥܡ ܟܝܢܗ ܢܬܡܢܐ. ܒܗ̇ܝ ܕܒܣܪܐ ܕܐܬܢܣܒ ܐܘܟܝܬ ܪܝ̣ܫܝܬܐ ܗ̇ܝ ܕܡ̣ܢ ܙܪܥܗ ܕܐܒܪܗܡ ܘܕܕܘܝܕ ܐܟܡܐ ܕܠܐ ܓܠܝ̣ܙܐ ܡ̣ܢ ܟܝܢܐ. ܐܦ ܡ̣ܢ ܩܢܘܡܐ ܓܠܝ̣ܙܐ. ܒܕܓܘܢ ܐܢ ܟܝܢܐ ܡܬܡܢܐ܆ ܐܦ ܩܢܘܡܐ ܢܬܡܢܐ. ܘܐܢ ܩܢܘܡܐ ܠܐ ܡܬܡܢܐ܆ ܐܦܠܐ ܟܝܢܐ ܙܕܩ ܠܡܬܡܢܝܘ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܗ̇ܝ ܕܒܪܘܝܐ ܘܠܐ ܡܪܟܒܐ ܘܠܐ ܡܬܚܙܝܢܐ ܘܠܐ ܣܢܝ̣ܩܐ ܘܠܐ ܚܫܘܫܐ. ܟܕ ܕܝ̣ܠܝ̈ܬܐ ܐܢܝܢ ܕܟܝܢܐ ܐܠܗܝܐ. ܠܐ ܡܨܝܐ ܕܢܐܡܪ ܕܠܐ ܡܫܪ̈ܢ ܥܠ ܩܢܘܡܗ ܕܐܠܗܐ ܡܠܬܐ. ܗ̣ܘ ܗܟܘܬ ܘܣܩܘܒ̈ܠܝܬܗܝܢ ܟܕ ܕܝ̣ܠܝ̈ܬܐ ܐܢܝܢ ܕܟܝܢܐ ܐ̱ܢܫܝܐ. ܠܐ ܡܨܝܐ ܕܠܐ ܢܫܪ̈ܢ ܥܠ ܩܢܘܡ ܒܪܢܫܐ ܡܫܠܡܢܐ ܗ̇ܘ ܕܥܡܗ ܐܬܚܝܕ ܐܠܗܐ ܡܠܬܐ. ܒܕܓܘܢ ܐܢ ܡܬܡܨܝܢܝ̣ܬܐ ܗ̱ܝ ܟܢܝ̣ܫܘܬܗܝܢ ܒܚܕ ܩܢܘܡܐ. ܡܬܡܨܝܢܝ̣ܬܐ ܙܕܩ ܕܬܗܘܐ ܐܦ ܒܚܕ ܟܐܢܐ ܒܙܢܐ ܐ̱ܚܪܢܐ ܘܐ̱ܚܪܢܐ. ܘܐܢ ܠܐ ܡܬܡܨܝܢܝ̣ܬܐ ܗ̱ܝ ܟܢܝ̣ܫܘܬܗܝܢ ܒܚܕ ܟܝܢܐ ܒܙܢܐ ܐ̱ܚܪܢܐ ܘܐ̱ܚܪܢܐ. ܐܠܨܐ ܕܐܦܠܐ ܡܬܡܨܝܢܝ̣ܬܐ ܬܗܘܐ ܒܚܕ ܩܢܘܡܐ ܒܙܢܐ ܐ̱ܚܪܢܐ ܘܐ̱ܚܪܢܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܟܝܢܐ ܕܠܐ ܩܢܘܡܐ ܡ̣ܢ ܠܐ ܡܬܡܨܝܢ̈ܝܬܐ ܗ̱ܝ ܠܡܫܬܟܚܘ ܒܡܥܒܕܢܘܬܐ ܒܡܥܒܕܢܘܬܐ. ܐܠܐ ܟܒܪ ܒܗܘܢܐ ܒܠܚܘܕ ܐܝܟ ܓܢ̈ܣܐ ܘܐܕܫ̈ܐ ܕܓܘܢܝ̈ܐ ܐܢܘܢ. ܒܕܓܘܢ ܗ̣ܢܘܢ ܬܪܝܢ ܟܝ̈ܢܐ ܕܒܡܫܝ̣ܚܐ ܡܘܕܝܬܘܢ. ܐܢ ܒܡܥܒܕܢܘܬܐ ܐܢܘܢ. ܡ̣ܢ ܐܢܢܩܝ̣ ܕܐܦ ܬܪܝܢ ܩܢܘ̈ܡܐ ܢܗܘܘܢ. ܘܗܐ ܠܘ ܗܟܢܐ ܡܘܕܝܢ ܐܢ̱ܬܘܢ. ܒܗ̇ܝ ܕܢܣܛܘ̣ܪܝܢܝܬܐ ܗ̱ܝ ܬܪܥܝ̣ܬܐ ܗܕܐ.

 

 

 

ܡܚܘܝܢܘܬܐ ܕܚܡܫ

 

ܐܡܝܢܢ ܕܕܐܝܢܐ ܡ̣ܢ ܟܝ̈ܢܐ ܐܝܬܘܗܝ ܗ̇ܘ ܚܕ ܩܢܘܡܐ ܕܐܡܪܝ̣ܢ ܐܢ̱ܬܘܢ. ܕܟܝܢܐ ܐܠܗܝܐ ܐܘ ܕܗ̇ܘ ܐ̱ܢܫܝܐ. ܘܕܕܐܝܢܐ ܡܢܗܘܢ ܕܬܬܠ܆ ܡܣܬܦܩܘ ܡܣܬܦܩ ܗ̇ܘ ܐ̱ܚܪܢܐ ܡ̣ܢ ܩܢܘܡܐ.

 

 

 

ܢܝܫܐ ܬܪܝܢܐ ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ ܕܒܥܬܐ ܗܕܐ

 

ܐܡܪܝܢܢ. ܕܣܗܕ̈ܘܬܐ ܗ̇ܢܝܢ ܚܡܫ ܕܒܦܣܘܩܐ ܬܪܝܢܐ. ܡܫܪܪܘ ܡܫܪܪ̈ܢ ܠܒܥܬܐ ܗܕܐ. ܘܓܘܢܝܐ ܚܫܚܘܬܗܝܢ ܒܒܘܚܢܐ ܕܥܡ ܬܪܬܝܢ ܣܝ̣̈ܥܬܐ ܕܟܠܩܝ̣̈ܕܘܢܝܐ ܐܡ̇ܪ ܐ̱ܢܐ ܘܕܢܣܛܘܪ̈ܝܐ. ܒܗ̇ܝ ܕܡܠܦܢ̈ܐ ܗܠܝܢ ܩܕܝ̈ܫܐ ܕܡܢܗܘܢ ܐܝܬܝܢ ܐܢܝܢ ܠܣܗܕ̈ܘܬܐ ܗ̇ܢܝܢ. ܠܘܬ ܬܪ̈ܬܝܗܝܢ ܐܟܚܕܐ ܡܩܒܠܝ̣ܢ ܐܢܘܢ. ܒܕ ܩܕܝ̣ܡܝ̣ܢ ܗܘܘ ܘܠܣܘܢܗܕܘܣ ܗ̇ܝ ܕܒܐܦܣܘܣ. ܘܠܗ̇ܝ ܕܒܟܠܩܝ̣ܕܘܢܐ. ܘܗܠܝܢ ܕܝܢ ܕܒܦܣܘܩܐ ܗܢܐ ܡܝܬܝܢܢ ܠܘܬ ܡܟܣܢܘܬ ܕܟܠܩܝ̣ܕܘ̈ܢܝܐ ܕܝ̣ܠܢܐܝܬ ܥܗ̈ܢܢ ܒܗ̇ܝ ܕܐܡܘܪ̈ܝܗܝܢ ܠܘ ܠܐ ܡܩܒܠܝ̣ܢ ܠܘܬ ܢܣܛܘܪ̈ܝܢܘ. ܒܕܓܘܢ ܠܣܗܕܘܬܐ ܗ̇ܝ ܕܚܡܫ ܕܗܪܬܡܢ܆ ܐܦ ܠܗܕܐ ܡܩܦܝ̣ܢܢ.

 

 

 

ܣܗܕܘܬܐ ܕܫܬ

 

ܕܩܕܝܫܐ ܩܘܪܝܠܠܘܣ ܡ̣ܢ ܐܓܪܬܐ ܕܠܘܬ ܐܩܘܩ ܐܦܣܩܘܦܐ ܕܡܝ̣ܠܝ̣ܛܝ̣ܢܝ̣ ܐܡ̣ܪ ܗܟܢܐ. ܡܛܠ ܗܕܐ ܗܟܝܠ܆ ܟܕ ܠܗܠܝܢ ܕܡܢܗܝܢ ܐܝܬܘܗܝ܇ ܗ̇ܘ ܚܕ ܘܒܠܚܘܕܘܗܝ܇ ܒܪܐ ܘܡܪܝܐ ܝܫܘܥ ܡܫܝ̣ܚܐ. ܐܝܟ ܕܒܚܘܫܒܐ ܡܩܒܠܝ̣ܢܢ. ܕܬܪܝܢ ܡ̇ܢ ܟܝ̈ܢܐ ܕܐܬܚܝܕܘ ܐܡܪܝܢܢ. ܡ̣ܢ ܒܬܪ ܕܝܢ ܚܕܝܘܬܐ܆ ܐܟܡܢ ܕܒܛܠ ܠܗ ܡ̣ܢ ܟܕܘ ܦܣܩܐ ܕܠܬܪܝܢ. ܚܕ ܡܗܝܡܢܝ̣ܢܢ ܕܐܝܬܘܗܝ ܟܝܢܐ ܗ̇ܘ ܕܒܪܐ. ܐܝܟ ܕܚܕ ܒܪܡ ܕܡܒܪܢܫ ܘܡܒܣܪ.

 

 

 

ܣܗܕܘܬܐ ܕܫܒܥ

 

ܗ̣ܘ ܟܕ ܗ̣ܘ ܩܕܝܫܐ ܒܗ̇ ܒܐܓܪܬܐ ܒܬܪ ܐ̱ܚܪ̈ܢܝܬܐ ܗܟܢܐ. ܚܕ ܗ̣ܘ ܓܝܪ ܫܪܝܪܐܝܬ ܟܝܢܗ ܕܡܠܬܐ. ܝ̇ܕܥܝ̣ܢܢ ܕܝܢ ܕܡܒܣܪ ܘܡܒܪܢܫ. ܐܝܟܢܐ ܕܡ̣ܢ ܟܕܘ ܩܕܡܢܢ ܐܡ̣ܪܢܢ.

 

 

 

ܣܗܕܘܬܐ ܕܬܡܢܐ

 

ܗ̣ܘ ܟܕ ܗ̣ܘ ܩܕܝܫܐ ܒܐܓܪܬܐ ܩܕܡܝܬܐ ܕܠܘܬ ܣܘܩܢܣܘܣ ܗܟܢܐ. ܐܡܬܝ ܗܟܝܠ ܕܡܬܪܢܝܢܢ ܗܕܐ. ܘܠܐ ܡܕܡ ܡܣܓܦܝ̣ܢܢ ܠܪܗܛܐ ܕܥܡ ܚܕ̈ܕܐ ܕܠܚܕܝܘܬܐ ܕܡ̣ܢ ܬܪܝܢ ܟܝ̈ܢܐ ܐܡܪܝܢܢ ܕܗܘܐ. ܒܬܪ ܕܝܢ ܚܕܝܘܬܐ܆ ܠܐ ܡܦܠܓܝ̣ܢܢ ܠܗܘܢ ܠܟܝ̈ܢܐ ܡ̣ܢ ܚܕ̈ܕܐ. ܘܠܐ ܠܬܪܝܢ ܒܢܝ̈ܐ ܦܣܩܝ̣ܢܢ ܠܗ̇ܘ ܚܕ ܘܠܐ ܡܬܦܠܓܢܐ. ܐܠܐ ܚܕ ܒܪܐ ܐܡܪܝܢܢ. ܘܐܝܟܢܐ ܕܐܒܗ̈ܬܐ ܐܡ̣ܪܘ܆ ܚܕ ܟܝܢܐ ܕܐܠܗܐ ܡܠܬܐ ܕܡܒܣܪ.

 

 

 

ܣܗܕܘܬܐ ܕܬܫܥ

 

ܗ̣ܘ ܟܕ ܗ̣ܘ ܩܕܝܫܐ. ܒܐܓܪܬܐ ܕܠܘܬ ܐܘܠܘܓܝܘܣ ܗܟܢܐ. ܟܕ ܡܬܬܘܕܝܐ ܚܕܝܘܬܐ. ܠܐ ܡܟܝ̣ܠ ܡܬܦܠܓܝ̣ܢ ܡ̣ܢ ܚܕ̈ܕܐ ܗܠܝܢ ܕܐܬܚܝܕܘ. ܐܠܐ ܚܕ ܡܟܝܠ ܒܪܐ. ܘܟܝܢܗ ܚܕ. ܐܟܡ̇ܢ ܕܐܬܓܫܡ ܡܠܬܐ.

 

 

 

ܣܗܕܘܬܐ ܕܥܣܪ

 

ܗ̣ܘ ܟܕ ܗ̣ܘ ܩܕܡܝܐ. ܚܪܡܐ ܕܚܡܫܐ ܗܟܢܐ. ܡ̇ܢ ܕܡܡܪܚ ܕܢܐܡܪ ܒܪܢܫܐ ܕܥܡܪ ܒܗ ܐܠܗܐ ܡܫܝ̣ܚܐ. ܘܠܐ ܝܬܝ̣ܪܐܝܬ ܕܐܠܗܐ ܐܝܬܘܗܝ ܒܫܪܪܐ. ܐܝܟ ܒܪܐ. ܚܕ ܐܦ ܒܟܝܢܐ. ܐܟܡ̇ܢ ܕܗܘܐ ܡܠܬܐ ܒܣܪܐ ܘܐܫܬܘܬܦ ܒܗ̇ ܒܕܡܘ̣ܬܢ ܒܕܡܐ ܘܒܒܣܪܐ. ܚܪܡܐ ܢܗܘܐ.

 

 

 

ܣܗܕܘܬܐ ܕܝ̄ܐ

 

ܕܩܕܝܫܐ ܬܐܘܕܘܛܐ ܐܦܣܩܘܦܐ ܕܐܢܩܘܪܐ. ܡ̣ܢ ܬܘܪܓܡܐ ܕܒܝܬ ܝܠܕܐ ܕܐܡܪܗ ܩܕܡ ܣܘܢܗܕܘܣ ܩܕܡܝܬܐ ܕܒܐܦܣܘܣ ܗܟܢܐ. ܐܝܟܢܐ ܐܬܡܣܟܢ ܡܛܠܬܢ. ܢܐܡܪܘܢ ܠܢ ܗ̇ܢܘܢ ܕܡ̣ܢ ܐܠܗܐ ܡܦܠܓܝ̣ܢ ܠܐܢܫܘܬܐ. ܘܠܗ̇ܘ ܕܐܬܚܝܕ܆ ܡܦܪܫܝ̣ܢ ܒܥܘܗܕܢܐ ܕܟܝ̈ܢܐ. ܐܝܠܝܢ ܕܬܪܝܢ ܐܡܪܝܢ ܠܗ ܠܡܫܝ̣ܚܐ. ܘܗ̇ܝ ܕܚܕ ܒܦܘܪܣܐ ܒܠܚܘܕ܆ ܐܝܟ ܕܠܡܦܩ ܒܪܘܚܐ ܡܝܬܝܢ.

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܪܒܝ̣ܥܝܬܐ. ܡܛܠ ܗ̇ܝ ܕܐܢ ܚܕ ܗ̣ܘ ܒܪܐ ܘܡܪܝܐ ܘܦܪܨܘܦܐ ܗ̣ܘ ܡܪܢ ܡܫܝܚܐ. ܚܕ ܬܘܒ ܟܝܢܐ ܘܩܢܘܡܐ ܐܠܨܐ ܕܢܗܘܐ. ܘܒܗ ܐܝܬ ܢܝܫܐ ܚܕ ܡܛܠ ܡܚܘܝܢ̈ܘܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܗ̇ܘ ܕܚܕ ܒܪܐ ܘܚܕ ܡܪܝܐ ܘܚܕ ܦܪܨܘܦܐ. ܟܕ ܠܘ ܓܕܫܐ ܗ̱ܘ. ܐܦܠܐ ܐܘܣܝܐ ܓܘܢܝܬܐ ܐܝܟ ܕܐܡ̣ܪܢܢ ܡ̣ܢ ܐܢܢܩܝ̣ ܕܐܘܣܝܐ ܝ̣ܚܝ̣ܕܝܬܐ ܢܗܘܐ. ܘܕܐܘܣܝܐ ܝ̣ܚܝ̣ܕܝܬܐ ܢܗܘܐ. ܘܕܐܘܣܝܐ ܝ̣ܚܝ̣ܕܝܬܐ ܚܕܐ ܗ̱ܝ ܒܟܝܢܐ ܘܒܩܢܘܡܐ ܠܐ ܐ̱ܢܫ ܡܨܐ ܠܡܟܦܪ. ܚܕ ܗ̣ܘ ܡܕܝܢ ܟܝܢܐ ܘܩܢܘܡܐ ܗ̣ܘ ܡܫܝܚܐ ܡܪܢ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܕܐܝܢܐ ܡ̣ܢ ܩܢܘ̈ܡܐ ܬܪ̈ܝܗܘܢ ܐܝܬܘܗܝ ܗ̇ܘ ܚܕ ܦܪܨܘܦܐ ܕܐܡ̇ܪ ܐܢ̱ܬ ܕܗ̇ܘ ܐܠܗܝܐ܆ ܐܘ ܕܗ̇ܘ ܐ̱ܢܫܝܐ. ܘܕܕܐܝܢܐ ܡܢܗܘܢ ܕܬܬܠ܆ ܡܣܬܦܩ ܠܗ ܗ̇ܘ ܐ̱ܚܪܢܐ ܡ̣ܢ ܦܪܨܘܦܐ. ܘܐܝܟܢܐ ܡܨܝܐ ܕܬܗܘܐ ܗܕܐ. ܘܦܪܨܘܦܐ ܡܫܘܕܥܢܐ ܗ̱ܘ ܕܩܢܘܡܐ ܐܝܟ ܬܪܥܝ̣ܬܟ. ܘܡ̣ܢ ܗܪܟܐ ܐܠܨܐ. ܕܐܢ ܬܪܝܢ ܐܝܬܝܗܘܢ ܩܢܘܡܘ̈ܗܝ ܕܡܪܢ. ܬܪܝܢ ܢܗܘܘܢ ܐܦ ܦܪ̈ܨܘܦܘܗܝ. ܘܗܐ ܠܘ ܗܟܢܐ ܡܘܕܐ ܐܢ̱ܬ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܠܐܝܢܐ ܡ̣ܢ ܬܪܝܢ ܩܢܘ̈ܡܐ ܐܡ̣ܪ ܦܛܪܘܣ ܕܐܢ̱ܬ ܗ̣ܘ ܡܫܝ̣ܚܐ ܒܪܐ ܕܐܠܗܐ. ܘܐܝܢܐ ܡܢܗܘܢ ܕܬܐܡܪ܆ ܡܣܬܪܩ ܠܗ ܗ̇ܘ ܐ̱ܚܪܢܐ ܡ̣ܢ  ܒܪܘܬܐ ܗ̇ܝ ܕܫܟܝ̣ܪܐ. ܘܐܢ ܬܐܡܪ ܕܠܬܪ̈ܝܗܘܢ ܐܟܚܕܐ. ܠܐ ܡܬܗܘܢܢܝ̣ܬܐ ܗ̱ܝ ܗܕܐ. ܒܕܠܐ ܐ̱ܢܫ ܐܡ̇ܪ ܠܬܪܝܢ ܐܟܚܕܐ ܕܐܢ̱ܬ ܐܝܬܝܟ. ܐܘ ܕܐܢ̱ܬ ܐܡ̣ܪܬ. ܐܠܐ ܕܐܢ̱ܬܘܢ ܐܝܬܝܟܘܢ. ܘܐܢ̱ܬܘܢ ܐܡ̣ܪܬܘܢ. ܘܟܕ ܬܪܝܢܘܬܐ ܕܟܝ̈ܢܐ ܘܩܢܘ̈ܡܐ ܠܘܬ ܫܟܝ̣ܪ̈ܘܬܐ ܕܐܝܟ ܗܠܝܢ ܡܘܒܠܐ. ܚܕ ܗ̣ܘ ܟܝܢܗ ܕܡܪܢ ܘܚܕ ܐܦ ܩܢܘܡܗ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܐܢܗܘ ܕܗ̇ܘ ܕܝ̣ܠܝ̣ܕ ܡܬܘܡܐܝܬ ܡ̣ܢ ܐܒܐ. ܘܗ̇ܘ ܕܝ̣ܠܝ̣ܕ ܡܫܪܝܢܐܝܬ ܡ̣ܢ ܡܪܝܡ ܟܕ ܠܚܕܐ ܐܘܝܘܬܐ ܘܚܕܝܘܬܐ ܐܬܘ. ܚܕ ܒܪܐ ܡ̣ܢ ܬܪܝܢܘܬ ܒܪ̈ܘܬܢܘܬܗܘܢ ܗܘܐ. ܒܠܥܕ ܗ̇ܝ ܕܢܘܒܕ ܟܠ ܚܕ ܒܪܘܬܗ. ܐܝܟܢܐ ܡ̣ܢ ܬܪܝܢܘܬ ܟܝܢܝ̈ܗܘܢ ܘܩܢܘܡܝ̈ܗܘܢ. ܟܕ ܠܚܕܐ ܐܘܝܘܬܐ ܘܚܕܝܘܬܐ ܐܬܘ܆ ܠܘ ܚܕ ܟܝܢܐ ܘܩܢܘܡܐ ܗܘܐ. ܒܠܥܕ ܗ̇ܝ ܕܢܘܒܕ ܟܠ ܚܕ ܡܢܗܘܢ ܟܝܢܗ ܘܩܢܘܡܗ ܘܐܝܟܢܐ ܗ̇ܝ ܡ̇ܢ ܡܬܡܨܝܢܝ̣ܬܐ ܗܘܬ݀. ܗܕܐ ܕܝܢ ܠܐ ܡܬܡܨܝܢܝ̣ܬܐ.

 

 

 

ܡܚܘܝܢܘܬܐ ܕܚܡܫ

 

ܐܡܪܝܢܢ. ܐܢܗܘ ܕܚܕܝܘܬܐ ܕܗܘܬ݀ ܚܕܝܘܬܐ ܗ̱ܝ ܕܨܒܝܢܐ ܒܠܚܘܕ. ܘܠܘ ܕܟܝܢܐ ܘܩܢܘܡܐ ܬܘܒ. ܐܟܡܐ ܕܡܝܬܝܢ ܐܢ̱ܬܘܢ ܠܘܬ ܬܚܘܝ̣ܬܐ. ܗ̇ܝ ܕܟܠܗܘܢ ܐܟܚܕܐ ܐܡܝ̣ܢܝ̣ܢ ܗܘܘ ܒܚܕܐ ܢܦܫ. ܙܕܩ ܗܘܐ ܕܚܕܝܘܬܐ ܥܠ ܟܠܗܘܢ ܗ̇ܢܘܢ ܕܚܕܐ ܫܠܡܘܬܐ ܘܨܒܝܢܐ ܗܘܐ ܗܘܐ ܠܗܘܢ ܢܦܠܐ ܗܘܬ݀. ܘܗܐ ܠܘ ܗܟܢܐ. ܒܗ̇ܝ ܕܢܦܫ ܦܛܪܘܣ ܐܠܘ ܡܚܝܕܐ ܗܘܬ݀ ܠܢܦܫ ܦܘܠܘܣ. ܘܢܦܫ ܦܘܠܘܣ ܡܚܝܕܐ ܠܦܓܪ ܦܛܪܘܣ. ܙܕܩ ܗܘܐ ܠܦܓܪ ܦܛܪܘܣ ܡܚܝܕܐ ܗܘܬ݀ ܠܦܓܪ ܦܘܠܘܣ. ܗ̇ܝ ܕܠܐ ܫܪܝ̣ܪܐ. ܒܗ̇ܝ ܕܠܘܬ ܗ̇ܝ ܕܠܚܕ ܦܓܪܐ ܬܪܬܝܢ ܢܦ̈ܫܢ ܢܗܘ̈ܝܢ ܡܘܒܠܐ ܗ̇ܝ ܕܫܟܝ̣ܪܐ. ܒܗ̇ܝ ܕܚܕܐ ܢܦܫܐ ܝܕܥ ܠܝܬܗ ܟܠܢܫ ܘܠܘ ܬܪܬܝܢ ܐܘ ܣܓܝ̈ܐܬܐ.

 

 

 

ܡܚܘܝܢܘܬܐ ܕܫܬ

 

ܐܡܪܝܢܢ ܐܠܘ ܗ̇ܝ ܚܕܝܘܬܐ. ܚܕܝܘܬܐ ܗܘܬ݀ ܕܨܒܝܢܐ ܘܠܘ ܕܟܝܢܐ ܘܩܢܘܡܐ. ܐܠܨܐ ܗܘܬ݀ ܕܐܦ ܥܠ ܐܒܐ ܘܪܘܚܐ ܗ̣ܝ ܗ̇ܝ ܕܢܚܬ ܡ̣ܢ ܫܡܝܐ ܘܐܬܓܫܡ ܡ̣ܢ ܪܘܚܐ ܩܕܝܫܐ ܘܡ̣ܢ ܡܪܝܡ ܒܬܘܠܬܐ ܡܬܛܪܓܐ ܗܘܬ݀. ܒܗ̇ܝ ܕܠܐ ܡܨܝܐ ܕܢܐܡܪ ܕܐܒܐ ܘܪܘܚܐ ܠܐ ܨܒܘ ܡܬܒܣܪܢܘܬܗ ܕܒܪܐ ܘܡܬܒܪܢܫܢܘܬܗ. ܘܕܠܐ ܐ̱ܢܫ ܕܐܝܟ ܗܠܝܢ ܨܒܪ. ܓܠܝܐ.

 

 

 

ܡܚܘܝܢܘܬܐ ܕܫܒܥ

 

ܐܡܪܝܢܢ ܐܠܘ ܫܠܡܘܬܐ ܕܨܒܝܢܐ ܚܕܝܘܬܐ ܗܘܬ݀. ܐܠܨܐ ܕܬܠܬܝ̈ܗܘܢ ܩܢܘ̈ܡܝܗ̇ ܕܐܠܗܘܬܐ ܥܡ ܟܠܗܘܢ ܢܒܝ̈ܐ ܘܫܠܝ̣̈ܚܐ ܘܐ̱ܢܫ̈ܐ ܩܕܝ̣̈ܫܐ ܘܡܝܬܪ̈ܐ ܡܬܚܝܕܝ̣ܢ ܗܘܘ. ܗ̇ܝ ܕܠܐ ܫܪܝܪܐ.

 

 

 

ܡܚܘܝܢܘܬܐ ܕܬܡܢܐ

 

ܐܡܪܝܢܢ ܐܠܘ ܫܠܡܘܬܐ ܕܨܒܝܢܐ ܚܕܝܘܬܐ ܗܘܬ݀. ܐܝܢܐ ܣܘܟܠܐ ܐܘ ܕܘܡܝܐ ܐܝܬ ܗܘܐ ܠܗ̇ܝ ܕܡܠܬܐ ܒܣܪܐ ܗܘܐ ܘܐܓܢ ܒܢ.

 

 

 

ܡܚܘܝܢܘܬܐ ܕܬܫܥ

 

ܐܡܪܝܢܢ ܕܚܕܝܘܬܐ ܕܨܒܝܢܐ. ܚܕܝܘܬܐ ܗ̱ܝ ܐܫܝ̣ܠܬܐ. ܒܫܡܐ ܒܠܚܘܕ ܘܠܘ ܒܣܘܥܪܢܐ.

 

ܘܠܘ ܬܪܝܢܘܬܐ ܕܒܢܝ̈ܐ ܡܘܒܠܐ. ܘܠܗ̇ ܠܗܕܐ ܣܗܕ ܢܪܣܝ ܡܠܦܢܗܘܢ ܕܢܣܛܘܪ̈ܝܢܘ. ܒܡܐܡܪܐ ܕܥܘ̣ܢܝ̣ܬܗ. ܒܪܝ̣ܟ ܕܫܪܐ ܘܒܛܠ܆ ܕܐܡ̣ܪ. ܒܫܡܐ ܡܨܝܐ ܕܢܩܪܐ ܐܢܘܢ ܚܕ ܒܐܝ̣ܬܘܬܐ. ܟܕ ܠܐ ܛܥܐ ܦܘܪ̈ܫܢܝܗܘܢ ܐܝܢܐ ܕܩܪܐ. ܒܗܕܐ ܬܢܘܝ ܩܪܝܬ ܐܦ ܐܢܐ ܬܪܝܢ ܚܕ ܚܘܒܐ. ܒܪ ܐܠܗܐ ܘܒܪ ܐ̱ܢܫܘܬܐ ܚܕ ܦܪܨܘܦܐ. ܘܕܠܘ ܚܕܝܘܬܐ ܕܒܫܡܐ ܘܠܘ ܒܣܘܥܪܢܐ ܐܟܪܙܘ ܠܢ ܡܠܦܢ̈ܐ ܩܕܝ̣̈ܫܐ. ܐܦܠܐ ܬܪܝܢ ܒܢܝ̈ܐ܆ ܓܠܝܐ. ܘܒܗ ܒܗܢܐ ܡܦܫܩܘܬܐ ܙܕܩ ܠܡܬܕܡܪܘ. ܐܝܟܢܐ ܗܪܟܐ ܡ̇ܢ ܚܕܝܘܬܐ ܕܒܫܡܐ ܒܠܚܘܕ ܘܒܚܘܒܐ ܐܡ̇ܪ. ܘܒܗܢܐ ܡܐܡܪܐ ܬܘܒ ܚܕܝܘܬܐ ܕܟܝܢܐ ܡܟܪܙ ܟܕ ܩܥܐ. ܚܕ ܩܪܐ ܐ̱ܢܐ ܠܟܝܢ ܟܣܝܐ ܘܦܓܪܐ ܕܡܢܢ. ܘܟܕ ܛܒ ܗܟܢ ܠܐ ܡܙܓ ܐ̱ܢܐ ܟܣܝܐ ܒܓܠܝܐ.

 

 

 

ܦܣܘܩܐ ܚܡܝܫܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܪܒܝ̣ܥܝܬܐ ܡܛܠܗ̇ܝ ܕܝ̇ܠܕܬ݀ ܐܠܗܐ ܗ̇ܝ ܒܬܘܠܬܐ ܩܕܝܫܬܐ܆ ܘܡܛܠܗ̇ܝ ܕܒܥܠܬ݀ ܚܕܝܘܬܐ ܐܦ ܥܠ ܐܠܗܐܡܚܝ̈ܠܘܬܐ ܐ̱ܢܫܝ̈ܬܐ ܡܬܐܡܪ̈ܢ ܒܟܬܒ̈ܐ ܩܕܝ̈ܫܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܡܫܝ̣ܚܐ ܐܠܗܐ ܐܝܬܘܗܝ ܘܡܬܩܪܐ ܠܘܬ ܟܠܗܘܢ ܟܪ̈ܣܛܝܢܐ. ܘܕܡܫܝ̣ܚܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ ܟܠܗܘܢ ܡܘܕܝܢ. ܡܬܟܢܫ ܣܘܢܦܪܝܣܡܐ ܒܙܢܐ ܩܕܡܝܐ ܕܐܣܟܡܐ ܬܠܝܬܝܐ ܕܐܠܗܐ ܐܬܝ̣ܠܕ ܡ̣ܢ ܐܢ̱ܬܬܐ ܘܚܫ ܘܐܨܛܠܒ. ܘܡ̣ܢ ܗܪܟܐ ܝ̣ܕܝ̣ܥܐ ܠܟܠܢܫ ܕܟܠ ܡ̇ܢ ܕܡܘܕܐ ܒܡܫܝ̣ܚܐ ܕܐܠܗܐ ܗ̱ܘ. ܠܝܬ ܠܗ ܠܡܫܬܐܠܘ ܡ̣ܢ ܗ̇ܝ ܕܢܐܡܪ ܕܐܠܗܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ. ܘܐܢ ܡ̣ܢ ܗܕܐ ܡܨܛܡܥܪ. ܐܦ ܡ̣ܢ ܗ̇ܝ ܝܬܝ̣ܪܐܝܬ ܙܕܩ ܠܗ ܠܡܨܛܡܥܪܘ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܟܠ ܡܕܡ ܕܬܪܝܢܘܬܐ ܥܐܠܐ ܒܣܘܟܠܗ. ܘܠܘ ܟܝܢܐ ܗ̱ܘ ܦܫܝ̣ܛܐ. ܐܠܐ ܡܪܟܒܐ. ܟܐܢܐܝܬ ܟܠ ܩܘܛܪܓܐ ܕܥܠ ܚܕܐ ܡ̣ܢ ܡܢܘ̈ܬܗ ܩܕܡܝܬ݀ ܘܡܪܢܐܝܬ ܢܦܠ. ܐܦ ܥܠ ܗ̇ܝ ܐ̱ܚܪܬܐ ܙܕܩ ܕܢܦܠ ܐ̱ܚܪܝܬ݀ ܘܐܫܝ̣ܠܐܝܬ. ܟܐܡܬ݀ ܒܡܠܬܐ ܒܠܚܘܕ. ܕܐܝܟ ܐܝܟܢ. ܐܢܕܪܝܢܛܐ ܡ̇ܢ ܓܝܪ ܒܥܠܬ݀ ܨܘܪܬܗ ܐܢܕܪܝܢܛܐ ܡܬܩܪܐ. ܘܒܥܠܬ݀ ܗܘܠܐ ܕܝܠܗ ܢܚܫܐ. ܘܠܐ ܫܟܝ̣ܪܐ ܠܡܐܡܪ ܕܗܢܐ ܢܚܫܐ ܐܢܕܪܝܢܛܐ ܐܝܬܘܗܝ. ܘܗܢܐ ܐܢܕܪܝܛܐ ܢܚܫܐ ܐܝܬܘܗܝ. ܒܗ̇ ܒܕܡܘ̣ܬܐ ܘܡܪܢ ܡܫܝ̣ܚܐ. ܟܕ ܒܪܢܫܐ ܗ̱ܘ ܡܫܠܡܢܐ ܘܐܠܗܐ ܡܫܠܡܢܐ. ܠܘ ܠܒܪ ܡ̣ܢ ܡܚܫܒܬܐ ܐܝܬܝܗ̇ ܕܢܐܡܪ ܕܗܢܐ ܐܠܗܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ ܟܕ ܩܕܡܐܝ̣ܬ ܘܡܪܢܐܝܬ ܠܘܬ ܒܪܢܫܐ ܗ̇ܘ ܡܫܠܡܢܐ ܚܝܪܐ ܕܡܠܬܐ. ܐܫܝ̣ܠܐܝܬ ܕܝܢ ܘܒܒܪܬ݀ ܩܠܐ ܒܠܚܘܕ ܠܘܬܗ ܕܐܠܗܐ ܗ̇ܘ ܕܥܡܗ ܡܚܝܕ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܐܢ ܫܪܬ݀ ܠܡܪܢ ܕܢܐܡܪ. ܡ̣ܢ ܩܕܡ ܕܢܗܘܐ ܐܒܪܗܡ ܐܢܐ ܐܝܬܝ ܗܘܝܬ. ܟܕ ܛܒ ܐܠܗܘܬܗ ܗܘܬ݀ ܡ̣ܢ ܩܕܡ ܐܒܪܗܡ ܘܠܘ ܐ̱ܢܫܘܬܗ. ܐܦ ܠܢ ܬܫܪ ܗ̇ܝ ܕܢܐܡܪ ܕܐܠܗܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ. ܟܕ ܛܒ ܒܪܢܫܐ ܗ̇ܘ ܕܥܡܗ ܐܬܚܝܕ ܐܠܗܐ܆ ܗܘܝܘ ܕܗܠܝܢ ܣܒܠ ܡܪܢܐܝܬ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܐܢ ܫܪܬ݀ ܠܡܪܢ ܕܢܐܡܪ ܕܠܐ ܐ̱ܢܫ ܣܠܩ ܠܫܡܝܐ. ܐܠܐ ܐܢ ܗ̇ܘ ܕܢܚܬ ܡ̣ܢ ܫܡܝܐ ܒܪܗ ܕܐ̱ܢܫܐ. ܟܕ ܛܒ ܐܠܗܘܬܗ ܗ̣ܝ ܕܢܚܬܬ݀ ܡ̣ܢ ܫܡܝܐ ܘܠܘ ܐ̱ܢܫܘܬܗ. ܘܗܕܐ ܒܥܠܬ݀ ܚܕܝܘܬܐ. ܐܦ ܠܢ ܫܪܝ̣ܪܐ ܕܢܐܡܪ ܐܠܗܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ. ܟܕ ܒܪܢܫܐ ܗܘܝܘ ܕܗܠܝܢ ܣܒܠ ܟܝܢܐܝܬ܆ ܘܠܘ ܐܠܗܐ ܒܟܝܢܗ.

 

 

 

ܡܚܘܝܢܘܬܐ ܕܚܡܫ

 

ܐܢ ܫܪܝܪܐ ܠܫܠܝ̣ܚܐ ܦܘܠܘܣ ܕܢܐܡܪ. ܕܒܪܢܫܐ ܠܡ ܩܕܡܝܐ ܥܦܪܢܐ ܕܡ̣ܢ ܐܪܥܐ. ܒܪܢܫܐ ܕܬܪܝܢ ܡܪܝܐ ܡ̣ܢ ܫܡܝܐ. ܟܕ ܛܒ ܐܦ ܒܪܢܫܐ ܕܬܪܝܢ ܥܦܪܢܐ ܗ̱ܘ ܕܡ̣ܢ ܐܪܥܐ. ܫܪܝ̣ܪܐ ܐܦ ܠܢ ܕܢܐܡܪ. ܕܡܪܝܐ ܡ̣ܢ ܫܡܝܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ ܟܕ ܡܛܠܬܗ ܕܒܪܢܫܐ ܗ̇ܘ ܥܦܪܢܐ ܕܡ̣ܢ ܐܪܥܐ܇ ܕܐܬܟܢܝ̣ ܡܪܝܐ ܡ̣ܢ ܫܡܝܐ ܐܡܪܝܢܢ.

 

 

 

ܡܚܘܝܢܘܬܐ ܕܫܬ

 

ܐܡܪܝܢܢ ܐܢܗܘ ܕܥܝܕܐ ܐܝܬ ܠܟܬܒ̈ܐ ܩܕܝ̣̈ܫܐ ܕܐܝܟ ܕܒܣܘܓܐܐ ܐܦ ܥܠ ܢܦܫܐ ܢܩܛܪܓܘܢܗ ܠܡܘܬܐ ܒܥܠܬ݀ ܚܕܝܘܬܗ̇ ܕܥܡ ܦܓܪܐ. ܟܕ ܛܒ ܝܕܥܝ̣ܢ ܕܠܐ ܡܝܘܬܬܐ ܗ̱ܝ ܢܦܫܐ. ܐܝܟ ܗ̇ܝ ܕܒܐܘܪܝܬܐ. ܦܪܘܫ ܠܡ ܩܘܪ̈ܝܐ ܠܒܝܬ ܓܘܣܐ. ܕܢܗܘܐ ܥܪܩ ܠܬܡܢ ܟܠ ܩܛܘܠܐ. ܐܝܢܐ ܕܢܩܛܘܠ ܢܦܫܐ ܡ̣ܢ ܫܠܝܐ. ܘܐܝܟ ܗ̇ܝ ܕܕܘܝܕ ܕܒܦܪܙܠܐ ܥܠܬ݀ ܢܦܫܗ. ܘܐܝܟ ܗ̇ܝ ܕܥܠ ܕܡܐ ܕܢܦ̈ܫܬܗܘܢ ܐܙܠܘ ܓܒܪ̈ܐ. ܘܐ̱ܚܪ̈ܢܝܬܐ ܣܓܝ̈ܐܬܐ. ܠܘ ܠܒܪ ܡ̣ܢ ܥܝܕܐ ܕܪܘܚܐ ܘܚܝܠܐ ܕܟܬܒ̈ܐ ܩܕܝ̣̈ܫܐ ܫܢܙܝ̣ܢܢ ܟܐ ܐܡܪܝܢܢ ܕܐܠܗܐ ܒܒܣܪ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ.

 

 

 

ܡܚܘܝܢܘܬܐ ܕܫܒܥ

 

ܐܡܪܝܢܢ ܐܢܗܘ ܕܠܐ ܫܟܝ̣ܪܐ ܕܢܐܡܪ ܕܗܢܐ ܝܕܘܥܐ ܚܘܪܐ ܐܝܬܘܗܝ. ܟܕ ܛܒ ܢܦܫܐ ܗ̣ܝ ܗ̣ܝ ܕܝܕܥܐ ܕܠܘ ܦܓܪܐ. ܘܦܓܪܐ ܗܘܝܘ ܕܚܘܪ ܘܠܘ ܢܦܫܐ. ܒܗ̇ ܒܕܡܘܬܐ ܠܐ ܫܟܝ̣ܪܐ ܕܢܐܡܪ ܕܐܠܗܐ ܐܬܝ̣ܠܕ ܡ̣ܢ ܒܬܘܠܬܐ ܘܚܫ ܘܐܨܛܠܒ. ܟܕ ܒܪܢܫܐ ܗ̇ܘ ܕܥܡܗ ܡܚܝܕ܇ ܗܘܝܘ ܕܗܠܝܢ ܣܒܠ܆ ܘܠܘ ܗ̣ܘ.

 

 

 

ܡܚܘܝܢܘܬܐ ܕܬܡܢܐ

 

ܐܡܪܝܢܢ ܕܟܪ̈ܣܛܝܢܐ ܟܠܗܘܢ ܡܘܕܝܢ܇ ܕܥܠܬ݀ ܡܬܒܪܢܫܢܘܬܗ ܕܐܠܗܐ ܡܠܬܐ ܗ̣ܘ ܦܘܪܩܢܗܘܢ ܕܒܢܝ̈ܢܫܐ ܡ̣ܢ ܥܒܕܘܬܐ ܕܡܘܬܐ ܕܒܚܛܝ̣ܬܐ ܘܣܛܢܐ ܐܝܬܘܗܝ ܗܘܐ. ܘܐܠܘ ܒܝܕ ܡܘܬܗ ܕܒܪܢܫܐ ܐܟܪܙܘ ܗܘܘ ܠܒܢܝ̈ܢܫܐ ܟܬܒ̈ܐ ܩܕܝ̣̈ܫܐ ܕܗܘܐ ܠܗܘܢ ܦܘܪܩܢܐ ܕܐܝܟ ܗܢܐ. ܟܒܪ ܣܓܝ̈ܐܐ ܒܥܠܬ݀ ܦܫܝ̣ܩܘܬܗ̇ ܕܥܠܬܐ ܠܘ ܣܓܝ ܡ̣ܢ ܚܛܗ̈ܐ ܡܙܕܗܪܝ̣ܢ ܗܘܘ. ܐܦܠܐ ܐܟܡܐ ܕܙܕܩ ܛܝܒܘܬܗ ܡܩܒܠܝ̣ܢ ܗܘܘ ܕܗ̇ܘ ܕܗܕܐ ܠܘܬܗܘܢ ܣܥܪ. ܒܕܓܘܢ ܡ̣ܢ ܐܠܨ̈ܬܐ ܗܘܬ݀ ܠܗܘܢ ܕܢܟܪܙܘܢ. ܒܙܢܐ ܐܝܢܐ ܕܠܐ ܣܩܘܒܠܝ ܠܫܪܪܐ ܕܒܡܘܠܕܗ ܠܡ ܕܒܒܣܪ ܕܐܠܗܐܘܒܚܫܘ̈ܗܝ ܨܒܝܢܝ̈ܐ ܕܒܒܣܪ ܘܒܡܘܬܗ ܕܒܒܣܪ ܐܬܦܪܩܬܘܢ. ܘܗܟܢܐ ܟܕ ܡܬܒܩܝܢ ܕܒܙܢܐ ܐܝܢܐ ܕܛܒ ܥܛܠ ܘܕܡܝ̣ܪ ܘܕܠܐ ܒܥܝܕ ܐܬܦܪܩܘ. ܚܝ̈ܐ ܢܚܘܢ ܙܗܝ̣ܪ̈ܐ. ܘܛܝܒܘܬܗ ܢܩܒܠܘܢ ܕܗ̇ܘ ܕܠܘܬ ܟܠܗ ܗܢܐ ܣܘܪܩܐ ܬܚܬܝ̣ ܝܬܗ ܡܛܠܬܗܘܢ. ܐܝܟ ܕܐܡ̣ܪ ܫܠܝܚܐ. ܕܐܝܟܐ ܕܣܓܝܬ݀ ܚܛܝܬܐ܆ ܬܡܢ ܐܬܝܬܪܬ݀ ܛܝܒܘܬܐ. ܘܡ̣ܢ ܗܠܝܢ ܐܬܚܘܝ̣ ܕܗܕܐ ܐܘܪܚܐ ܝܬܝ̣ܪ ܡܗܢܝܐ ܗܘܬ݀ ܠܘܬ ܫܘܡܠܝܐ ܕܢܝܫܗ̇ ܕܡܕܒܪܢܘܬܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܦܘܠܘܣ ܒܕܩܘܪ̈ܝ̣ܢܬܝܐ ܩܕܡܝܬܐ. ܐܠܘ ܓܝܪ ܝܕܥܘܗ̇ ܟܐܡܬ݀ ܠܛܝܒܘܬܐ. ܠܘ ܠܡܪܗ̇ ܕܬܫܒܘܚܬܐ ܙܩܦܝ̣ܢ ܗܘܘ.

 

 

 

ܣܗܕܘܬܐ ܕܬܪܬܝܢ

 

ܗ̣ܘ ܟܕ ܗ̣ܘ ܒܗ̇ܝ ܕܓܠܛܝ̈ܐ. ܟܕ ܡܛܐ ܕܝܢ ܫܘܠܡܗ ܕܙܒܢܐ. ܫܕܪ ܐܠܗܐ ܠܒܪܗ ܘܗܘܐ ܡ̣ܢ ܐܢ̱ܬܬܐ. ܘܗܘܐ ܬܚܝܬ ܢܡܘܣܐ. ܕܠܐܝܠܝܢ ܕܬܚܝܬ ܢܡܘܣܐ ܐܢܘܢ ܢܙܒܢ.

 

 

 

ܣܗܕܘܬܐ ܕܬܠܬ

 

ܗ̣ܘ ܟܕ ܗ̣ܘ ܒܗ̇ܝ ܕܐܦܣܝ̈ܐ. ܡܛܠ ܗܢܐ ܠܡ ܐܡܝܪ. ܕܣܠܩ ܠܫܡܝܐ ܘܫܒܐ ܫܒܝ̣ܬܐ: ܘܝܗܒ ܡܘܗ̈ܒܬܐ ܠܒܢܝ̈ܢܫܐ. ܕܣܠܩ ܕܝܢ ܡܢܐ ܗ̱ܝ. ܐܠܐ ܐܢ ܕܐܦ ܢܚܬ ܠܘܩܕܡ ܠܬܚܬܝ̈ܬܗ̇ ܕܐܪܥܐ. ܗ̇ܘ ܕܢܚܬ ܗܘܝܘ ܗ̇ܘ ܕܐܦ ܣܠܩ. ܠܥܠ ܡ̣ܢ ܟܠܗܘܢ ܫܡܝ̈ܐ ܕܢܫܠܡ ܟܠ.

 

 

 

ܣܗܕܘܬܐ ܕܐܪܒܥ

 

ܗ̣ܘ ܟܕ ܗ̣ܘ ܒܗ̇ܝ ܕܠܘܬ ܦܝܠܝ̈ܦܝܣܝܐ. ܗܕܐ ܠܡ ܐܬܪܥܘ ܒܢܦܫܟܘܢ. ܗ̇ܝ ܕܐܦ ܝܫܘܥ ܡܫܝܚܐ. ܗ̇ܘ ܕܟܕ ܐܝܬܘܗܝ ܒܕܡܘ̣ܬܐ ܕܐܠܗܐ. ܠܐ ܗܘܐ ܚܛܘ̣ܦܝܐ ܚܫܒܗ̇ ܠܗܕܐ ܕܐܝܬܘܗܝ ܦܚܡܐ ܕܐܠܗܐ. ܐܠܐ ܢܦܫܗ ܣܪܩ ܘܕܡܘ̣ܬܐ ܕܥܒܕܐ ܢܣܒ. ܘܗ̣ܘܐ ܒܕܡܘ̣ܬܐ ܕܒܢܝ̈ܢܫܐ. ܘܒܐܣܟܡܐ ܐܫܬܟܚ ܐܝܟ ܒܪܢܫܐ. ܘܡܟܟ ܢܦܫܗ. ܘܐܫܬܡܥ ܥܕܡܐ ܠܡܘܬܐ. ܡܘܬܐ ܕܝܢ ܕܙܩܝ̣ܦܐ.

 

 

 

ܣܗܕܘܬܐ ܕܚܡܫ

 

ܗ̣ܘ ܟܕ ܗ̣ܘ ܒܕܩܘܠܣܝ̈ܐ. ܗ̇ܘ ܕܗܘܝܘ ܕܡܘ̣ܬܐ ܕܐܠܗܐ ܕܠܐ ܡܬܚܙܐ. ܘܒܘܟܪܐ ܕܟܠܗܝܢ ܒܪ̈ܝܬܐ. ܘܒܗ ܐܬܒܪܝ̣ ܟܠܡܕܡ ܕܒܫܡܝܐ ܘܒܐܪܥܐ. ܟܠ ܕܡܬܚܙܐ ܘܟܠ ܕܠܐ ܡܬܚܙܐ. ܐܢ ܡܘ̈ܬܒܐ ܘܐܢ ܡܪ̈ܘܬܐ. ܘܐܢ ܐܪ̈ܟܐܣ ܘܐܢ ܫܘܠܛܢ̈ܐ. ܟܠ ܡܕܡ ܒܐܝܕܗ ܘܒܗ ܐܬܒܪܝ̣. ܘܗܘܝܘ ܕܡ̣ܢ ܩܕܡ ܟܠ. ܘܟܠܡܕܡ ܒܗ ܩܐܡ. ܘܗܘܝܘ ܪܝ̣ܫܐ ܕܦܓܪܐ ܕܥܕܬܐ. ܕܐܝܬܘܗܝ ܪܝܫܐ ܕܒܘܟܪ̈ܐ ܕܡ̣ܢ ܒܝܬ ܡܝ̣̈ܬܐ. ܕܢܗܘܐ ܩܕܡܝ ܒܟܠ.

 

 

 

ܣܗܕܘܬܐ ܕܫܬ

 

ܗ̣ܘ ܟܕ ܗ̣ܘ ܒܕܩܘܠܣܝ̈ܐ.ܕܒܗ ܠܡ ܥܡܪ ܟܠܗ ܡܘܠܝܐ ܕܐܠܗܘܬܐ ܓܘܫܡܢܐܝܬ. ܘܒܗ ܐܦ ܐܢ̱ܬܘܢ ܡܫܬܡܠܝܢ ܐܢ̱ܬܘܢ. ܕܗ̣ܘ ܐܝܬܘܗܝ ܪܝܫܐ ܕܟܠܗܝܢ ܐܪ̈ܟܐܣ ܘܫܘܠܛܢ̈ܐ.

 

 

 

ܣܗܕܘܬܐܕܫܒܥ

 

ܗ̣ܘ ܟܕ ܗ̣ܘ ܒܗܝ ܕܠܘܬ ܛܝܡܬܐܘܣ ܩܕܡܝܬܐ. ܪܒ ܗ̣ܘ ܐ̱ܪܙܐ ܕܟܐܢܘܬܐ. ܕܐܬܓܠܝ̣ ܒܒܣܪ. ܘܐܙܕܕܩ ܒܪܘܚ. ܘܐܬܚܙܝ̣ ܠܡܠܐܟ̈ܐ. ܘܐܬܟܪܙ ܒܝܬ ܥܡ̈ܡܐ. ܘܐܬܗܝܡܢ ܒܥܠܡܐ. ܘܐܣܬܠܩ ܒܫܘܒܚܐ. ܘܥܠ ܝܡܝ̣ܢܐ ܕܟܘܪܣܝܗ ܕܐܠܗܐ ܝ̣ܬܒ.

 

 

 

ܣܗܕܘܬܐ ܕܬܡܢܐ

 

ܗ̣ܘ ܟܕ ܗ̣ܘ ܒܗ̇ܝ ܕܠܘܬ ܛܝ̣ܛܘܣ ܟܕ ܠܡ ܡܣܟܝܢܢ ܠܣܒܪܐ ܒܪܝ̣ܟܐ. ܘܠܓܠܝܢܐ ܕܬܫܒܘܚܬܗ ܕܐܠܗܐ ܪܒܐ ܘܡܚܝܢܢ ܝܫܘܥ ܡܫܝ̣ܚܐ. ܕܗ̣ܘ ܝܗܒ ܢܦܫܗ ܚܠܦܝܢ ܕܢܦܪܩܢ ܡ̣ܢ ܟܠ ܥܘܠܐ.

 

 

 

ܣܗܕܘܬ ܕܬܫܥ

 

ܗ̣ܘ ܟܕ ܗ̣ܘ ܒܗ̇ܝ ܕܠܘܬ ܥܒܪ̈ܝܐ. ܒܟܠ ܡܢܘ̈ܢ ܘܒܟܠ ܕܡܘ̈ܢ ܡܠܠ ܐܠܗܐ ܥܡ ܐܒܗܝ̈ܢ ܒܢ̈ܒܝܐ ܡ̣ܢ ܩܕܝ̣ܡ. ܘܒܗܠܝܢ ܝܘ̈ܡܬܐ ܐ̱ܚܪ̈ܝܐ ܡܠܠ ܥܡܢ ܒܒܪܗ. ܕܠܗ ܣܡ ܝܪܬܐ ܕܟܠ ܡܕܡ. ܘܒܗ ܥܒܕ ܠܥܠܡ̈ܐ. ܘܗܘܝܘ ܨܡܚܐ ܕܫܘܒܚܐ ܘܨܠܡܐ ܕܐܝ̣ܬܘܬܗ. ܘܐܚܝ̣ܕ ܟܠ ܒܚܝܠܐ ܕܡܠܬܗ. ܘܒܗ ܥܒܕ ܕܘܟܝܐ ܕܚܛܗܝ̈ܢ. ܘܝ̣ܬܒ ܡ̣ܢ ܝܡܝܢܐ ܕܪܒܘܬܐ ܒܡܪ̈ܘܡܐ.

 

 

 

ܣܗܕܘܬܐ ܕܥܣܪ

 

ܗ̣ܘ ܟܕ ܗ̣ܘ ܒܗ̇ ܟܕ ܒܗ̇. ܗ̣ܘ ܓܝܪ ܐܠܗܐ ܒܛܝܒܘܬܗ. ܚܠܦ ܟܠܢܫ ܛܥܡ ܡܘܬܐ. ܝܐܐ ܗܘܐ ܠܗ ܠܗ̇ܘ ܕܟܠ ܒܐܝ̣ܕܗ. ܘܟܠ ܡܛܠܬܗ. ܘܒܢܝ̈ܐ ܣܓܝ̈ܐܐ ܐܥܠ ܠܬܫܒܘܚܬܐ. ܕܠܪܝ̣ܫܐ ܕܚܝܝ̈ܗܘܢ ܒܚܫܗ ܢܓܡܪܝ̣ܘܗܝ ܗܦܟܬܐ ܐܡܪܝܢ ܕܠܘ ܗܟܢܐ ܗ̱ܘ ܦܬܓܡܐ. ܐܠܐ ܗ̣ܘ ܓܝܪ ܣܛܪ ܡ̣ܢ ܐܠܗܐ. ܚܠܦ ܟܠܢܫ ܛܥܡ ܡܘܬܐ ܦܘܢܝܐ ܐܡܪܝܢܢ. ܕܒܟܠܗܘܢ ܨܚܚ̈ܐ ܕܠܘܬ ܝܘܢܝ̈ܐ ܘܪ̈ܘܡܝܐ ܘܣܘܪ̈ܝܝܐ ܣܛܪ ܡܢܟܘܢ. ܘܐܪ̈ܡܢܝܐ ܘܐܝ̣ܓܘ̈ܦܛܝܐ ܘܐܝ̣ܒܪ̈ܝܐ ܘܐܠܢܝ̈ܐ ܘܣܩܘ̈ܬܝܐ ܘܟܘ̈ܫܝܐ ܗ̣ܘ ܐܠܗܐ ܟܬܝ̣ܒ. ܘܕܟܠܗܘܢ ܗܠܝܢ ܢܟܕܒܘܢ܇ ܘܐܢ̱ܬܘܢ ܒܠܚܘܕܝܟܘܢ ܬܫܪܘܢ. ܣܓܝ ܣܟܠܐ ܠܡܣܒܪܘ. ܘܐܢ ܢܐܫܦ ܕܒܟܠܗܘܢ ܨܚܚ̈ܐ ܐܟܡܐ ܕܒܨܚܚܟܘܢ ܗ̣ܘ ܗ̣ܘ ܦܬܓܡܐ. ܒܗ̇ܝ ܕܐܘܣܦ ܐܡ̣ܪ ܫܠܝܚܐ. ܕܝܐܐ ܗܘܐ ܠܗ̇ܘ ܕܟܠ ܒܐܝܕܗ ܘܡܛܠܬܗ ܡܢܐ ܬܥܒܕܘܢ. ܘܒܗ̇ܝ ܬܘܒ ܕܒܘܟܪܐ ܕܟܠܗܝܢ ܒܪ̈ܝܬܐ. ܐܝܬܘܗܝ ܪܝܫܐ ܕܒܘܟܪ̈ܐ ܕܡ̣ܢ ܒܝܬ  ܡܝ̣̈ܬܐ. ܕܢܗܘܐ ܩܕܡܝ ܒܟܠ. ܕܠܡܐ ܐܦ ܗܢܐ ܣܛܪ ܡ̣ܢ ܐܠܗܐ ܗ̱ܘ.

 

 

 

ܣܗܕܘܬܐ ܕܝ̄ܐ

 

ܩܕܝܫܐ ܐܝܘܢܢܘܣܝܘܣ ܡ̣ܢ ܩܦܠܐܘܢ ܕܬܪܝܢ ܕܡܐܡܪܐ ܕܬܠܬܐ. ܦܪܝ̣ܫܬܐ ܕܝܢ ܐܝܬܝܗ̇ ܕܥܒܕܐ ܐܠܗܝܐ ܘܦܐܐ ܠܛܒܘܬܐ ܕܠܘܬܢ. ܗ̇ܝ ܕܡܢܢ ܐܟܘܬܢ ܢܬܬܟܝ̣ܢ ܟܠܢܐܝܬ ܘܫܪܝ̣ܪܐܝܬ ܡܠܬܐ ܡܥܠܝ ܡ̣ܢ ܐܘܣܝܐ. ܘܢܣܥܘܪ ܘܢܚܫ ܟܠܗܝܢ ܐܝܠܝܢ ܕܐܝܬܝܗܝܢ ܦܪ̈ܝ̣ܫܬܐ ܘܝ̣ܕܝ̣̈ܥܬܐ ܘܕܥܒܕ̈ܐ ܐܠܗܝ̈ܐ ܘܕܐ̱ܢܫܘܬܐ ܕܝܠܗ.

 

 

 

ܣܗܕܘܬܐ ܕܝܒ̄

 

ܩܕܝܫܐ ܓܪܝܓܘܪܝܘܣ ܥܒܕ ܬܕܡܪ̈ܬܐ. ܡ̣ܢ ܡܐܡܪܐ ܕܥܠ ܡܬܓܫܡܢܘܬܐ ܘܗܝܡܢܘܬܐ. ܡ̇ܢ ܕܐܡ̇ܪ ܕܐ̱ܚܪܢܐ ܗ̱ܘ ܗ̇ܘ ܕܚܫ. ܘܐ̱ܚܪܢܐ ܗ̇ܘ ܕܠܐ ܚܫ. ܘܠܐ ܡܘܕܐ ܠܗ ܠܠܐ ܚܫܘܫܐ ܐܠܗܐ ܡܠܬܐ ܕܒܒܣܪܐ ܕܝܠܗ ܚܫ ܠܐ ܡܫܬܚܠܦܢܐܝܬ ܐܝܟ ܕܟܬܝ̣ܒ ܢܗܘܐ ܚܪܡ.

 

 

 

ܣܗܕܘܬܐ ܕܝܓ̄

 

ܕܩܕܝܫܐ ܐܝܘܠܝܘܣ ܡ̣ܢ ܐܝܠܝܢ ܕܠܘܬ ܡܬܓܫܡܢܘܬܐ ܐܠܗܝܬܐ ܡܬܟܬܫܝ̣ܢ. ܒܥܠܬܐ ܕܗ̇ܝ ܕܒܪ ܟܝܢܐ. ܘܒܬܘܠܬܐ ܡ̇ܢ ܟܕ ܡ̣ܢ ܫܘܪܝܐ ܠܒܣܪܐ ܝܠܕܬ݀. ܠܡܠܬܐ ܝܠܕܬ݀. ܘܐܝܬܝܗ̇ ܝ̇ܠܕܬ݀ ܐܠܗܐ. ܐܘ ܝܘܕܝ̈ܐ ܟܕ ܠܦܓܪܐ ܨܠܒܘ ܠܐܠܗܐ ܨܠܒܘ. ܐܦܠܐ ܓܝܪ ܚܕ ܦܘܪܫܐ ܘܦܘܠܓܐ ܕܐܠܗܐ ܡܠܬܐ ܘܕܦܓܪܗ ܒܟܬܒ̈ܐ ܩܕܝ̈ܫܐ ܣܝ̣ܡ.

 

 

 

ܣܗܕܘܬܐ ܕܝܕ̄

 

ܕܩܕܝܫܐ ܐܬܐܢܣܝܘܣ. ܡ̣ܢ ܡܐܡܪܐ ܕܥܠ ܡܬܒܣܪܢܘܬܗ ܕܐܠܗܐ ܡܠܬܐ. ܡܘܕܝܢܢ ܕܒܪܗ ܕܐܠܗܐ ܗ̇ܘ ܕܐܝܬܘܗܝ ܡ̣ܢ ܩܕܡ ܥܠܡ̈ܐ ܘܡܬܘܡܐܝܬ. ܕܐܬܝ̣ܠܕ ܡܬܘܡܝܐܝܬ ܡ̣ܢ ܐܒܐ. ܒܚܪܬܗܘܢ ܕܝܢ ܕܙܒ̈ܢܐ. ܡܛܠ ܦܘܪܩܢܢ܆ ܡ̣ܢ ܡܪܝܡ ܐܬܝ̣ܠܕ ܒܒܣܪ. ܐܝܟܢܐ ܕܫܠܝ̣ܚܐ ܐܠܗܝܐ ܡܠܦ ܠܢ ܘܐܡ̇ܪ. ܟܕ ܐܬܐ ܕܝܢ ܡܘܠܝܗ ܕܙܒܢܐ ܫܕܪ ܐܠܗܐ ܠܒܪܗ ܘܗ̣ܘܐ ܡ̣ܢ ܐܢ̱ܬܬܐ. ܘܐܝܬܘܗܝ ܗ̣ܘ ܟܕ ܗ̣ܘ ܐܠܗܐ ܐܟܚܕܐ. ܘܒܪܗ ܕܐܠܗܐ ܒܪܘܚ܆ ܒܗ ܕܝܢ ܕܐ̱ܢܫ̈ܐ ܒܒܣܪ. ܠܘ ܬܪܝܢ ܟܝܢ̈ܐ ܗ̇ܘ ܚܕ ܒܪܐ.

 

 

 

ܣܗܕܘܬܐ ܕܝܗ̄

 

ܗ̣ܘ ܟܕ ܗ̣ܘ ܡ̣ܢ ܡܐܡܪܐ ܗ̇ܘ ܕܡܛܠ ܕܢܚܗ ܕܒܒܣܪ ܕܡܠܬܐ ܐܠܗܐ. ܡܛܠ ܗܕܐ ܒܪܗ ܕܐܠܗܐ ܗ̣ܘ ܒܪܗ ܕܐ̱ܢܫܐ ܡܛܠ ܕܒܢܘ̈ܗܝ ܕܒܪܢܫܐ ܗ̇ܢܘ ܕܐܕܡ܇ ܒܢܝ̈ܐ ܕܐܠܗܐ ܢܗܘܘܢ. ܡܠܬܐ ܓܝܪ ܗ̇ܘ ܕܡ̣ܢ ܐܒܐ ܡ̣ܢ ܠܥܠ. ܐܬܝ̣ܠܕ ܩܕܡ ܥܠܡ̈ܐ ܠܐ ܡܬܡܠܠܢܐܝܬ ܘܠܐ ܡܬܦܫܩܢܐܝܬ ܘܠܐ ܡܬܩܕܡܢܐܝܬ ܘܠܐ ܡܬܕܪܟܢܐܝܬ ܘܡܬܘܡܐܝܬ. ܗ̣ܘ ܟܕ ܗ̣ܘ ܒܪܐ ܕܐܠܗܐ ܒܙܒ̈ܢܐ ܐ̱ܚܪ̈ܝܐ ܡܬܝ̣ܠܕ ܡ̣ܢ ܠܬܚܬ ܡ̣ܢ ܒܬܘܠܬܐ ܩܕܝܫܬܐ ܡܪܝܡ.

 

 

 

ܣܗܕܘܬܐ ܕܝܘ̄

 

ܕܩܕܝܫܐ ܐܢܛܝܘܟܘܣ ܐܦܣܩܘܦܐ ܕܩܘܣܛܢܛܝܢܘܦܘܠܝܣ ܡ̣ܢ ܫܪ̈ܒܐ ܕܥܒܝ̣ܕܝ̣ܢ ܠܗ ܡܛܠ ܝ̇ܠܕܬ݀ ܐܠܗܐ ܡܪܝܡ. ܗ̇ܘ ܕܐܬܡܠ ܒܚܒ̈ܠܐ ܕܠܐ ܟܘ̣ܬܡ̈ܬܐ ܝܠܕܬ݀ ܠܢ ܡܪܝܡ ܦܪܘܩܐ. ܗ̇ܝ ܝ̇ܠܕܬ݀ ܚܝ̈ܐ ܘܝܠܕܬ݀ ܫܘܦܪܐ. ܘܝܠܕܬ݀ ܪܒܘܬܐ. ܗ̇ܝ ܕܠܒܝ̣ܫܬ݀ ܢܘܗܪܐ. ܘܠܒܝ̣ܫܬ݀ ܣܒܪܐ. ܘܝ̇ܠܕܬ݀ ܐܠܗܐ.

 

 

 

ܣܗܕܘܬܐ ܕܝܙ̄

 

ܕܩܕܝܫܐ ܓܪܝܓܘܪܝܘܣ ܕܢܘܣܐ. ܡ̣ܢ ܐܓܪܬܐ ܕܠܘܩܒܠ ܗ̇ܢܘܢ ܕܟܪܝ̣ܗܝܢ ܒܗܠܝܢ ܕܐܦܘܠܝܢܐܪܝܘܣ. ܠܡܐ܆ ܐ̱ܚܪܢܐ ܝܫܘܥ ܡܣܒܪܝ̣ܢܢ. ܠܡܐ܆ ܟܬܒ̈ܐ ܐ̱ܚܪ̈ܢܐ ܣܝܡܝ̣ܢܢ. ܠܡܐ܆ ܠܩܕܝ̣ܫܬܐ ܒܬܘܠܬܐ ܝ̇ܠܕܬ݀ ܐܠܗܐ ܐܡܪܚ ܐ̱ܢܫ ܡܢܢ܆ ܕܐܦ ܝ̇ܠܕܬ݀ ܒܪܢܫܐ ܢܐܡܪܝܗ̇. ܗ̇ܝ ܕܫܡܥܝ̣ܢܢ ܐ̱ܢܫܝ̈ܢ ܡܢܗܘܢ ܕܕܠܐ ܚܘܣܢ ܐܡܪܝܢ.

 

 

 

ܣܗܕܘܬܐ ܕܝܚ̄

 

ܕܩܕܝܫܐ ܓܪܝܓܘܪܝܘܣ ܕܢܐܙܝ̣ܢܙܘ ܡ̣ܢ ܡܐܡܪܐ ܕܥܠ ܝܠܕܗ ܕܒܒܣܪ ܕܡܪܢ ܘܦܪܘܩܢ. ܗ̇ܘ ܕܠܐ ܒܣܪܐ ܡܬܒܣܪ. ܡܠܬܐ ܡܬܥܒܐ. ܠܐ ܡܬܚܙܝܢܐ ܡܬܚܙܐ. ܠܐ ܡܬܓܫܫܢܐ ܡܬܓܫܫ. ܗ̇ܘ ܕܠܐ ܙܒܢܐ ܡܫܪܐ. ܒܪܗ ܕܐܠܗܐ ܒܪܗ ܕܐ̱ܢܫܐ ܗܘܐ. ܝܫܘܥ ܡܫܝ̣ܚܐ ܐܬܡܠܠ ܘܝܘܡܢܐ. ܗ̣ܘ ܟܕ ܗܘ ܘܠܥܠܡܝܢ.

 

 

 

ܣܗܕܘܬܐ ܕܝ̄ܛ

 

ܗ̣ܘ ܟܕ ܗ̣ܘ. ܒܗ ܟܕ ܒܗ. ܟܕ ܕܝܢ ܝ̣ܠܝ̣ܕܘܬܐ ܕܐܠܗܐ ܫܡ̇ܥ ܐܢ̱ܬ ܘܒܬܘܠܬܐ ܘܥܙܪܘܪ̈ܐ܆ ܘܟܠܗܝܢ ܗܠܝܢ ܕܡܦܩܢܐ ܦܓܪܢܝܐ ܠܐ ܒܡܕܡ ܬܒܗܬ. ܠܝܬ ܓܝܪ ܡܕܡ ܕܛܡܐܐ ܗ̇ܘ ܕܥܡܗ ܡܬܥܢܐ ܐܠܗܐ. ܐܦܢ ܠܟ ܢܬܚܙܐ. ܘܠܐ ܫܩܠ ܡܠܘܢ ܡ̣ܢ ܛܡܐܘܬܢ܆ ܐܝܟܢܐ ܕܐܦܠܐ ܫܡܫܐ ܡ̣ܢ ܗܠܝܢ ܕܥܒܪ ܥܠܝܗܝܢ ܟܕ ܗܠܝܢ ܕܝܠܗ ܪܗܛ. ܐܘ ܝ̇ܗܒ ܡ̣ܢ ܕܟܝܘܬܗ.

 

 

 

ܣܗܕܘܬܐ ܕܟܟ̄

 

ܗ̣ܘ ܟܕ ܗ̣ܘ ܒܗ̇ܘ ܕܬܪܝܢ ܕܡܛܠ ܒܪܐ: ܗܫܐ ܐܬܢܣܒܢܢ ܘܐܬܦܪܩܢܢ ܒܚܫܘ̈ܗܝ ܕܠܐ ܚܫܘܫܐ.

 

 

 

ܣܗܕܘܬܐ ܕܟ̄ܐ

 

ܗ̣ܘ ܟܕ ܗ̣ܘ. ܒܗ̇ܘ ܕܥܠ ܐܬܐܢܐܣܝܘܣ ܪܒܐ. ܘܒܗܘܢ ܒܚܫ̈ܐ ܪܘܪ̈ܒܐ ܕܡܛܠܬܢ ܕܐܠܗܐ.

 

 

 

ܣܗܕܘܬܐ ܕܟܒ̄

 

ܗ̣ܘ ܟܕ ܗ̣ܘ ܒܦܠܓܘܬܐ ܕܬܪܬܝܢ. ܒܡܐܡܪܐ ܕܐܪܒܥܝܢ ܘܬܠܬ ܕܠܘܬ ܩܠܝܕܘܢܝܘܣ. ܐܢ ܐ̱ܢܫ ܠܘ ܝܠܕܬ݀ ܐܠܗܐ ܠܡܪܝܡ ܡܣܒܪ܆ ܣܛܪ ܡ̣ܢ ܐܠܗܘܬܐ ܐܝܬܘܗܝ.

 

 

 

ܣܗܕܘܬܐ ܕܟܓ̄

 

ܗ̣ܘ ܟܕ ܗ̣ܘ ܒܦܠܓܘܬܐ ܕܬܪܬܝܢ ܒܡܐܡܪܐ ܕܥܠ ܝܘܠܝܢܘܣ. ܕܦܪܘܩܐ ܡ̇ܢ ܘܡܪܝܐ ܕܟܠ. ܒܪܘܝܐ ܟܝ̣ܬ ܕܗܢܐ ܟܠ ܘܡܠܚܐ. ܗ̇ܘ ܒܪܐ ܘܡܠܬܐ. ܘܡܩܪܒܢܐ ܘܪ̈ܝܫܟܗܢܐ. ܘܫܘܐ ܒܡܘܬܒܐ ܕܐܒܐ ܪܒܐ. ܗ̇ܘ ܕܚܠܦܝܢ ܗ̇ܢܘܢ ܕܐܫܝ̣ܛܢܢ ܨܠܡܗ. ܘܠܘܬ ܥܦܪܐ ܐܙܠܢܢ. ܘܠܐ ܝ̣ܕܥܢܢ ܐ̱ܪܙܐ ܪܒܐ ܕܡܙܘܓܘܬܐ. ܠܘ ܒܠܚܘܕ ܠܕܡܘ̣ܬܐ ܕܥܒܕܐ ܐܬܢܚܬ. ܐܠܐ ܘܥܠ ܨܠܝ̣ܒܐ ܣܠܩ. ܘܠܚܛܝ̣ܬܐ ܕܝܠܝ ܥܡܗ ܐܣܩ ܕܬܡܘܬ.

 

 

 

ܣܗܕܘܬܐ ܕܟܕ̄

 

ܩܕܝܫܐ ܡܪܝ ܐܦܪܝܡ ܡܠܦܢܐ ܣܘܪܝܝܐ ܡ̣ܢ ܡܐܡܪܐ ܕܥܪܘܒܬܐ ܕܚܫܐ. ܕܪܥܗ ܪܒܐ ܕܒܪܘܝܐ܆ ܩܢܝܐ ܕܒܙܚܐ ܐܘܫܛ ܠܗ. ܙܪܬܐ ܕܡܬܚܬ݀ ܠܫܡܝܐ ܒܨܨ̈ܐ ܩܒܥܘܗ̇ ܥܠ ܩܝܣܐ. ܐܠܗܐ ܓܝܪ ܒܡܫܝ̣ܚܗ. ܐܬܩܢ ܘܒܪܐ ܒܪ̈ܝܬܐ. ܐܝܕܝ̈ܐ ܕܓܒܠܝ̈ܗܝ ܠܐܕܡ܆ ܡ̣ܢ ܒܢܘ̈ܗܝ ܕܐܕܡ ܐܬܩܒܥ̈ܝ. ܩܡ ܐܠܗܐ ܒܝܬ ܕܝ̣ܢܐ܆ ܘܒܠܥ ܦܟܐ ܡ̣ܢ ܥܒܕܐ. ܚܢܢ ܠܐ ܡܨܝܐ ܡܫܡܥܬܢ܆ ܡܠܬܐ ܙܥܘܪܬܐ ܕܬܣܝܒܪ. ܐܠܗܐ ܬܠܐܷ ܥܠ ܩܝܣܐ. ܘܩܛܝ̣ܪ ܐܒܠܐ ܠܒܪ̈ܝܬܐ. ܚܢܢ ܫܬܝܐ ܠܢ ܡܐܪܝ̣ܬܐ܆ ܘܪܟܝ̣ܒܐ ܠܢ ܪܡܘܬܐ.

 

 

 

ܣܗܕܘܬܐ ܕܟܗ̄

 

ܕܣܘܢܗܕܘܣ ܩܕܝܫܬܐ ܕܒܢܝ̣ܩܝܐ. ܐܠܗܐ ܫܪܝ̣ܪܐ ܕܡ̣ܢ ܫܪܝ̣ܪܐ ܐܠܗܐ. ܝ̣ܠܝ̣ܕܐ ܘܠܐ ܥܒܝ̣ܕܐ. ܘܫܘܐ ܒܐܘܣܝܐ ܠܐܒܘܗܝ ܕܒܐܝܕܗ ܗܘܐ ܟܠ. ܗ̇ܘ ܕܡܛܠܬܢ ܒܢܝ̈ܢܫܐ ܘܡܛܠ ܦܘܪܩܢܢ ܢܚܬ ܡ̣ܢ ܫܡܝܐ. ܘܐܬܓܫܡ ܡ̣ܢ ܪܘܚܐ ܩܕܝܫܐ ܘܡ̣ܢ ܡܪܝܡ ܒܬܘܠܬܐ ܝ̇ܠܕܬ݀ ܐܠܗܐ ܘܗܘܐ ܒܪܢܫܐ. ܘܐܨܛܠܒ ܚܠܦܝܢ ܒܝܘ̈ܡܝ ܦܘܢܛܝܘܣ ܦܝܠܛܘܣ. ܘܚܫ ܘܡܝ̣ܬ ܘܐܬܩܒܪ ܘܩܡ ܐܝܟ ܕܨܒ̣ܐ.

 

 

 

ܣܗܕܘܬܐ ܕܟܘ̄

 

ܕܡܪܝ ܐܝܘܐܢܢܝܣ ܐܦܣܩܘܦܐ ܕܩܘܣܛܢܛܝܢܘܦܘܠܝܣ ܡ̣ܢ ܡܐܡܪܐ ܕܒܝܬ ܝܠܕܐ. ܚܠܦ ܕܝܢ ܫܡܫܐ܆ ܠܫܡܫܐ ܕܙܕܝ̣ܩܘܬܐ ܠܐ ܡܣܬܝܟܢܐܝܬ ܝܠܕܬ݀ ܒܬܘܠܬܐ. ܘܠܐ ܬܒܥܐ ܕܐܝܟܢܐ. ܐܝܟܐ ܓܝܪ ܕܐܠܗܐ ܨܒܐ܆ ܡܙܕܟܐ ܠܗ ܛܟܣܐ ܕܟܝܢܐ.

 

 

 

ܣܗܕܘܬܐ ܕܟܙ̄

 

ܗ̣ܘ ܟܕ ܗ̣ܘ ܒܡܐܡܪܐ ܕܥܠ ܚܫܐ ܦܪܘܩܝܐ. ܡܢܘ̣ ܕܠܐ ܢܬܗܪ ܟܕ ܚܙܐ ܠܐܠܗܐ ܕܒܪܝ̣ܟ ܘܡܨܠܐ. ܘܗܠܝܢ ܡ̇ܢ ܠܘܩܒܠ ܟܠܗܘܢ ܬܪ̈ܝܝ ܟܝ̈ܢܐ ܐܟܚܕܐ. ܠܘܩܒܠ ܕܝܢ ܟܠܩܝ̣̈ܕܘܢܝܐ ܕܝ̣ܠܢܐܝܬ ܗ̇ܝ ܕܩܕܝܫܐ ܩܘܪܝ̣ܠܘܣ. ܚ̣ܪܡܐ ܕܬܪܥܣܪ ܐܡܪܝܢܢ. ܡ̇ܢ ܕܠܐ ܡܘܕܐ ܕܡܠܬܐ ܕܡ̣ܢ ܐܠܗܐ ܚܫ ܒܒܣܪܐ. ܘܗܘܐ ܒܘܟܪܐ ܕܡ̣ܢ ܒܝܬ ܡܝ̣̈ܬܐ. ܐܟܡ̇ܢ ܕܚܝ̈ܐ ܘܡܚܝܢܐ ܐܝܬܘܗܝ ܐܝܟ ܐܠܗܐ܇ ܚ̣ܪܡܐ ܢܗܘܐ.

 

 

 

 

 

 

 

 

     #1 

 

ܦܣܘܩܐ ܫܬܝܬܝܐ ܕܩܦܠܐܘܢ ܪܒܝ̣ܥܝܐ ܕܫܬܐܣܬܐ ܪܒܝ̣ܥܝܬܐ ܡܛܠ ܬܪܥܝ̣ܬܐ ܕܬܪ̈ܝܝ ܟܝ̈ܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܐܝܟ ܕܡ̣ܢ ܠܘܬܗܘܢ. ܣܥܝܐ ܩܕܡܝܐ

 

ܐܡܪܝܢ ܕܢܛܝ̣ܪܝ̣ܢ ܐܪܐ ܫܘܘ̈ܕܥܐ ܕܫܘܚܠܦܐ ܟܝܢܝܐ ܐܘ ܠܐ ܢܛܝ̣ܪܝ̣ܢ. ܘܐܢ ܠܐ ܢܛܝ̣ܪܝ̣ܢ܆ ܗܐ ܡܘܙܓܐ ܘܚܘܠܛܢܐ ܘܒܘܠܒܠܐ. ܘܐܢ ܢܛܝ̣ܪܝ̣ܢ܆ ܐܝܟܢܐ ܠܘ ܬܪܝܢ ܟܝܢܝ̈ܢ. ܘܠܬܪܝܢܘܬܐ ܕܟܝ̈ܢܐ܆ ܬܪܝܢܘܬܐ ܕܩܢܘ̈ܡܐ ܐܠܨܐܝܬ ܢܩܦܐ. ܒܗ̇ܝ ܕܡ̣ܢ ܠܘ ܡܫܟܚܢ̈ܝܬܐ ܗ̱ܝ ܠܡܫܬܟܚܘ ܟܝܢܐ ܕܠܐ ܩܢܘܡܐ ܒܡܥܒܕܢܘܬܐ. ܬܪܝܢ ܐܢܘܢ ܡܕܝܢ ܟܝܢܘ̈ܗܝ ܕܒܪܐ ܬܪܝܢ ܐܦ ܩܢܘܡܘ̈ܗܝ.

 

 

 

ܣܥܝܐ ܕܬܪܝܢ

 

ܐܡܪܝܢ ܕܒܫܘܝܘܬ ܐܘܣܝܐ ܐܪܐ ܐܡܪܝܢ ܐܢ̱ܬܘܢ ܚܕ ܟܝܢܐ. ܐܘ ܠܘ ܒܫܘܝܘܬ ܐܘܣܝܐ. ܘܐܢ ܒܫܘܝܘ̣ܬ ܐܘܣܝܐ. ܡܕܝܢ ܒܣܪܐ ܫܘܐ ܒܐܘܣܝܐ ܠܡܠܬܐ ܘܡܠܬܐ ܫܘܐ ܒܐܘܣܝܐ ܠܐܒܐ ܘܠܪܘܚܐ. ܡܬܟܢܫܐ ܕܒܣܪܐ ܫܘܐ ܒܐܘܣܝܐ ܠܐܒܐ ܘܠܪܘܚܐ܆ ܗ̇ܝ ܕܫܟܝ̣ܪܐ. ܘܐܢ ܠܘ ܒܫܘܝܘܬܐ ܐܘܣܝܐ. ܐܝܟܢܐ ܠܘ ܬܪܝܢ ܟܝܢ̈ܐ. ܘܟܕ ܬܪܝܢ ܟܝ̈ܢܐ܆ ܐܝܟܢܐ ܠܘ ܐܦ ܬܪܝܢ ܩܢܘ̈ܡܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܐܠܗܐ ܡܠܬܐ ܒܗ̇ܝ ܕܗ̣ܘ ܐܝܬܘܗܝ ܘܒܟܝܢܗ ܝ̣ܠܝ̣ܕ ܡ̣ܢ ܡܪܝܡ. ܐܘ ܠܘ ܒܗ̇ܝ ܕܗ̣ܘ ܐܝܬܘܗܝ ܐܦܠܐ ܒܟܝܢܗ. ܘܐܢܗܘ ܕܒܗ̇ܝ ܕܗ̣ܘ ܐܝܬܘܗܝ ܘܒܟܝܢܗ. ܡܕܝܢ ܡ̣ܢ ܡܪܝܡ ܩܢܐ ܠܗ ܫܘܪܝܐ ܐܠܗܐ ܡܠܬܐ܆ ܗ̇ܝ ܕܫܟ̣ܝܪܐ. ܘܐܢܗܘ ܕܠܘ ܒܗ̇ܝ ܕܗ̣ܘ ܐܝܬܘܗܝ܇ ܐܦܠܐ ܒܟܝܢܗ. ܡܕܝܢ ܠܘ ܠܗ ܝܠܕܬ݀ ܡܪܝܡ. ܒܗ̇ܝ ܕܡ̣ܢ ܠܓܘ ܡܫܟܚܢ̈ܝܬܐ ܗ̇ܝ ܕܢܬܦܪܫ ܡܠܬܐ ܡ̣ܢ ܟܝܢܗ. ܐܝܟܢܐ ܕܠܡܠܬܐ ܡ̇ܢ ܬܐܠܕ ܡܪܝܡ. ܘܠܟܝܢܗ ܕܡܠܬܐ ܠܐ ܬܐܠܕ. ܘܡ̣ܢ ܗܪܟܐ ܡܬܟܢܫܐ ܕܡܪܝܡ ܠܘ ܝܠܕܬ݀ ܐܠܗܐ ܗ̱ܝ.

 

 

 

ܣܥܝܐ ܪܒܝܥܝܐ

 

ܐܡܪܝܢ. ܗܢܐ ܚܕ ܟܝܢܐ ܕܡܘܕܝܢ ܐܢ̱ܬܘܢ ܠܢ ܫܘܐ. ܐܘ ܠܐܒܐ ܘܪܘܚܐ. ܘܐܢ ܠܢ ܫܘܐ܇ ܓܠܝ̣ܙ ܡܕܝܢ ܡ̣ܢ ܐܠܗܘܬܐ. ܗ̇ܝ ܕܫܟܝ̣ܪܐ. ܘܐܢ ܠܐܒܐ ܘܪܘܚܐ܆ ܓܠܝ̣ܙ ܡܕܝܢ ܡ̣ܢ ܐ̱ܢܫܘܬܐ. ܗ̇ܝ ܕܫܟܝ̣ܪܐ. ܘܟܕ ܬܪ̈ܬܝܗܝܢ ܫܟܝ̣ܪ̈ܢ܆ ܫܟܝܪܐ ܐܦ ܘܗ̇ܝ ܕܚܕ ܟܝܢܐ ܢܘܕܝܘܗܝ ܠܡܪܢ ܡܫܝܚܐ.

 

 

 

ܣܥܝܐ ܡܝܫܝܐ

 

ܐܡܪܝܢ ܒܪ ܟܝܢܗ ܕܐܒܐ ܝܠܕܬ݀ ܡܪܝܡ. ܐܘ ܒܪ ܟܝܢܗ̇ ܕܝܠܗ̇. ܘܐܢ ܒܪ ܟܝܢܗ ܕܐܒܐ ܝܠܕܬ݀. ܡܕܝܢ ܠܘ ܒܪܢܫܐ ܡܫܠܡܢܐ ܝܠܕܬ݀. ܘܡ̣ܢ ܗܪܟܐ ܥܐܠܐ ܬܪܥܝ̣ܬܐ ܕܗܓܓܝ̈ܐ ܗ̇ܝ ܕܫܟܝ̣ܪܐ. ܘܐܢ ܒܪ ܟܝܢܗ̇ ܝܠܕܬ݀. ܡܕܝܢ ܠܘ ܐܠܗܐ ܝܠܕܬ݀. ܘܡ̣ܢ ܗܪܟܐ ܡܬܟܢܫܐ ܕܠܘ ܝܠܕܬ݀ ܐܠܗܐ ܗ̱ܝ.

 

 

 

ܣܥܝܐ ܫܬܝܬܝܐ

 

ܐܡܪܝܢ ܐܢܗܘ ܕܡܫܝ̣ܚܐ ܫܘܐ ܠܐܒܐ ܝܠܘܕܗ. ܘܠܡܪܝܡ ܝܠܕܬܗ. ܘܐܒܐ ܘܡܪܝܡ ܬܪܝܢ ܟܝ̈ܢܐ ܘܩܢܘ̈ܡܐ ܐܢܘܢ. ܐܝܟܢܐ ܡܫܝ̣ܚܐ ܠܘ ܬܪܝܢ ܟܝ̈ܢܐ ܘܩܢܘ̈ܡܐ ܢܗܘܘܢ.

 

 

 

ܣܥܝܐ ܫܒܝܥܝܐ

 

ܐܡܪܝܢ ܕܐܠܗܘܬܗ ܕܡܪܢ ܘܐ̱ܢܫܘܬܗ ܐܢܗܘ ܕܡܢܗܝܢ ܘܠܗܝܢ ܡܩܝ̈ܡܢ ܘܠܘ ܒܐܚܪ̈ܢܐ ܐܝܟ ܓܕ̈ܫܐ. ܐܝܟܢܐ ܠܘ ܬܪܬܝܢ ܐܘܣܝ̈ܐܣ ܘܬܪܝܢ ܩܢܘ̈ܡܝ̣ܢ ܢܗܘܘܢ ܟܠܡܕܡ ܓܝܪ ܐܘܣܝܐ ܐܝܬܘܗܝ ܐܘ ܓܕܫܐ. ܘܗ̇ܘ ܕܠܘ ܐܘܣܝܐ ܐܝܬܘܗܝ܆ ܓܕܫܐ ܐܝܬܘܗܝ. ܘܗ̇ܘ ܕܠܘ ܓܕܫܐ ܐܝܬܘܗܝ܆ ܐܘܣܝܐ ܐܝܬܘܗܝ ܘܡ̣ܢ ܐܠܨ̈ܬܐ.

 

 

 

ܣܥܝܐ ܬܡܝܢܝܐ

 

ܐܡܪܝܢ ܐܢ ܒܠܐ ܚܫܘܫܘܬܗ ܕܐܠܗܐ ܡܠܬܐ܆ ܠܐ ܟܬܪ ܒܣܪܐ ܠܐ ܚܫܘܫܐ. ܐܝܟܢܐ ܡܠܬܐ ܒܚܫܘܫܘܬܗ ܕܒܣܪܐ ܗ̣ܘܐ ܚܫܘܫܐ. ܙܟܘܬܐ ܓܝܪ ܠܐܠܗܐ ܡܠܬܐ ܝܬܝ̣ܪ ܦܐܝܐ ܗܘܬ݀. ܟܐܡܬ݀ ܕܢܬܦܝ̣ܘܗܝ ܠܒܣܪܐ ܠܘܬ ܠܐ ܚܫܘܫܘܬܗ ܘܠܘ ܕܡܢܗ ܕܒܣܪܐ ܢܬܚܣܢ ܗ̣ܘܐ ܗ̇ܘ ܟܝܢܐ ܡܥܠܝܐ ܘܢܚܫ ܗܘܐ ܒܚܫܘܫܘܬܗ. ܘܒܩܨܬ݀ ܗܕܐ ܗ̇ܝ ܕܒܪܢܫܐ ܐܬܐܠܗ ܦܐܝܘ̣ܬ ܙܕܩܐܝܬ ܐܡܪܝܢܢ. ܝܬܝ̣ܪ ܡ̣ܢ ܗ̇ܝ ܕܐܠܗܐ ܐܬܒܪܢܫ. ܐܠܐ ܕܒܪܢܫܐ ܢܣܒ ܒܠܚܘܕ.

 

 

 

ܣܥܝܐ ܬܫܝܥܝܐ

 

ܐܡܪܝܢ ܐܢ ܐܠܗܐ ܐܬܝ̣ܠܕ ܡ̣ܢ ܐܢ̱ܬܬܐ ܘܐܬܚܙܝ̣ ܒܒܣܪ. ܘܐܬܢܣܝ̣ ܒܒܣܪ. ܘܨܡ ܘܚܫ ܘܐܨܛܠܒ ܘܡܝ̣ܬ ܘܩܡ ܒܒܣܪ. ܐܝܟܢܐ ܗ̱ܘ ܠܟܘܢ ܒܡܫܝ̣ܚܐ ܡܬܚܙܝܢܐ ܘܠܐ ܡܬܚܙܝܢܐ. ܘܚܫܘܫܐ ܘܠܐ ܚܫܘܫܐ. ܘܡܝܘܬܐ ܘܠܐ ܡܝܘܬܐ. ܟܕ ܠܐܠܗܐ ܡܠܬܐ ܘܠܒܣܪܐ ܐܟܚܕܐ ܡܬܚܙ̈ܝܢܐ ܘܚܫܘ̈ܫܐ ܘܡܝܘ̈ܬܐ ܣܝܡܝ̣ܢ ܐܢ̱ܬܘܢ. ܠܗ̇ܘ ܡ̇ܢ ܒܒܣܪ. ܠܗܘ ܕܝܢ ܒܟܝܢܗ ܐܝܟ ܕܐܡܪܝܢ ܐܢ̱ܬܘܢ.

 

 

 

ܣܥܝܐ ܥܣܝܪܝܐ

 

ܐܡܪܝܢ ܐܢ ܩܘܝ ܐܠܗܐ ܡܠܬܐ ܗ̇ܘ ܡܐ ܕܐܝܬܘܗܝ ܗ̣ܘܐ. ܘܠܐ ܩܢܐ ܫܘܚܠܦܐ ܒܝܬܗ. ܐܘ ܫܘܓܢܝܐ ܒܟܝܢܗ: ܒܬܪ ܚܕܝܘܬܐ. ܘܠܐ ܚܫܘܫܐ ܐܝܬܘܗܝ ܗ̣ܘܐ ܡ̣ܢ ܩܕܡ ܚܕܝܘܬܐ. ܐܝܟܢܐ ܡܕܝܢ ܫܪܝܪܐ ܕܣܟ ܒܚܕ ܡ̣ܢ ܙܢܝ̣̈ܢ ܬܐܡܪܘܢܝܗܝ ܕܚܫ ܒܒܣܪ ܐܘ ܒܙܢܐ ܐ̱ܚܪܢܐ.

 

 

 

ܣܥܝܐ ܕܚܕܥܣܪ

 

ܐܡܪܝܢ ܐܢܓܝܪ ܚܕ ܗ̣ܘ ܟܝܢܐ ܗ̣ܘ ܟܕ ܗ̣ܘ. ܗ̇ܘ ܕܝ̇ܕܥ ܠܝܘܡܐ ܐ̱ܚܪܝܐ ܘܒܣܪܐ ܐܬܝܠܕ ܡ̣ܢ ܐܢ̱ܬܬܐ. ܘܐܬܚܙܝ̣ ܘܐܬܢܣܝ̣ ܘܨܡ ܘܚܫ ܘܐܨܛܠܒ ܘܡܝ̣ܬ ܘܩܡ ܒܟܝܢܗ ܘܠܫܥܬܐ. ܘܗ̇ܘ ܕܠܐ ܝ̇ܕܥ ܡܫܬܟܚ ܠܗ ܗ̇ܘ ܚܕ ܟܝܢܐ ܕܠܗܠܝܢ ܕܝ̇ܕܥ ܠܐ ܝ̇ܕܥ܆ ܗ̇ܝ ܕܫܟܝ̣ܪܐ.

 

 

 

ܣܥܝܐ ܕܝܒ̄

 

ܐܡܪܝܢ. ܐܢ ܡܘܬܐ ܦܘܪܫܢܐ ܗ̱ܘ ܕܢܦܫܐ ܡ̣ܢ ܦܓܪܐ. ܘܐܠܗܘܬܐ ܠܐ ܦܓܪܐ ܐܝܬܝܗ̇ ܐܦܠܐ ܐܬܦܪܫܬ݀ ܡ̣ܢ ܢܦܫܐ: ܐܝܟܢܐ ܡܨܝܐ ܕܬܬܐܡܪ ܒܚܕ ܡ̣ܢ ܙܢܝ̣̈ܢ ܕܐܠܗܐ ܡܝ̣ܬ.

 

 

 

ܣܥܝܐ ܕܝܓ̄

 

ܐܡܪܝܢ ܐܢ ܗ̇ܝ ܕܐ̱ܢܫ ܒܨܒܝܢܐ ܢܩܢܐ ܠܐܢܫ ܐܝܟ ܢܦܫܗ ܡܨܝܐ ܗ̱ܝ. ܐܝܟ ܗ̇ܝ. ܕܓܒܪ̈ܐ ܐܚܒܘ ܢܫܝ̈ܟܘܢ ܐܝܟ ܕܠܦܓܪ̈ܝܟܘܢ. ܘܕܒܟܝܢܐ ܬܗܘܐ ܗܕܐ ܠܐ ܡܨܝܐ. ܐܝܟܢܐ ܡ̣ܢ ܚܕܝܘܬܐ ܕܠܐ ܡܬܡܨܝܢܝ̣ܬܐ ܗ̱ܝ ܝ̇ܠܦܝܢ ܐܢ̱ܬܘܢ ܘܡܠܦܝ̣ܢ ܐܢ̱ܬܘܢ.

 

 

 

ܣܥܝܐ ܕܝܕ̄

 

ܐܡܝܢ ܕܒܟܝܢܐ ܗ̱ܘ ܐܪܐ ܡܫܝ̣ܚܐ ܐܠܗܐ ܡܫܠܡܢܐ. ܘܒܪܢܫܐ ܡܫܠܡܢܐ. ܐܘ ܠܘ ܒܟܝܢܐ ܬܪ̈ܝܗܘܢ. ܐܘ ܒܟܝܢܐ ܐܠܗܐ. ܘܠܘ ܒܟܝܢܐ ܬܪ̈ܝܗܘܢ ܐܘ ܒܟܝܢܐ ܐܠܗܐ. ܘܠܘ ܒܟܝܢܐ ܒܪܢܫܐ. ܐܘ ܒܟܝܢܐ ܒܪܢܫܐ: ܘܠܘ ܒܟܝܢܐ ܐܠܗܐ. ܘܐܢ ܒܟܝܢܐ ܗ̱ܘ ܬܪ̈ܝܗܘܢ. ܡܕܝܢ ܠܘ ܐܠܗܐ ܗ̱ܘ ܡܫܝ̣ܚܐ܆ ܐܦܠܐ ܒܪܢܫܐ ܗ̇ܝ ܕܫܟܝ̣ܪܐ. ܘܫܟܝ̣ܪܘܬܐ ܬܘܒ ܕܗܠܝܢ ܬܪܝܢ ܦܫܚܘ̈ܗܝ ܕܦܘܠܓܐ܆ ܠܟܠܢܫ ܓܠܝܢ.

 

 

 

ܣܥܝܐ ܕܝܗ̄

 

ܐܡܪܝܢ ܐܢܗܘ ܕܗ̇ܘ ܕܡܦܪܫ ܟܝܢܘ̈ܗܝ ܕܡܫܝܚܐ܇ ܬܪܝܢ ܐܡ̇ܪ ܒܢܝ̈ܐ. ܚܕ ܕܐܒܐ ܘܚܕ ܕܡܪܝܡ. ܓܠܝܐ ܕܗ̇ܘ ܕܠܐ ܡܦܪܫ ܟܝܢܘ̈ܗܝ ܕܡܫܝܚܐ. ܚܕ ܒܪܐ ܐܡ̇ܪ ܥܦܝ̣ܦܐ. ܗ̣ܘ ܟܕ ܗ̣ܘ ܕܐܒܐ ܘܕܡܪܝܡ. ܘܟܕ ܬܪܝܢܘܬܐ ܡܬܬܪܝ̣ܡܐ. ܐܝܟܢܐ ܡܨܝܐ ܕܬܦܘܫ ܥܦܝ̣ܦܘܬܐ. ܥܦܝ̣ܦܘܬܐ ܓܝܪ ܒܬܪܝܢܘܬܐ ܡܣܬܟܠܐ ܘܡܬܝܕܥܐ.

 

 

 

ܣܥܝܐ ܕܝܘ̄

 

ܐܡܪܝܢ ܐܢ ܐܠܗܐ ܡܠܬܐ ܡ̣ܢ ܩܕܡ ܒܣܪܐ ܚܕ ܟܝܢܐ ܘܩܢܘܡܐ. ܘܒܬܪ ܒܣܪܐ ܗܟܘܬ ܚܕ ܟܝܢܐ ܘܩܢܘܡܐ. ܡܢܐ ܡܕܝܢ ܗܘܝܗܝ ܠܟܝܢܐ ܘܩܢܘܡܐ ܕܒܣܪܐ. ܐܘ ܕܠܡܐ ܕܠܐ ܟܝܢܐ ܘܩܢܘܡܐ ܐܝܬܘܗܝ ܒܣܪܐ܆ ܗ̇ܝ ܕܠܐ ܡܨܝܐ. ܘܐܢ ܡܨܝܐ܆ ܠܘܬ ܗܓܓܘܬܐ ܡܘܒܠܐ. ܗ̇ܝ ܕܝܬܝܪ ܫܟܝ̣ܪܐ.

 

 

 

ܣܥܝܐ ܕܝܙ̄

 

ܐܡܪܝܢ ܐܝܬ ܐܪܐ ܐܠܗܐ ܐ̱ܚܪܢܐ ܠܟܪ̈ܣܛܝܢܐ ܣܛܪ ܡ̣ܢ ܡܫܝ̣ܚܐ܇ ܐܘ ܠܐ ܐܝܬ. ܘܐܢ ܐܝܬ܆ ܗܐ ܣܓܝܐܘܬ ܐܠܗ̈ܐ. ܘܐܢ ܠܝܬ܆ ܡܕܝܢ ܟܠ ܚܕ ܡ̣ܢ ܐܒܐ ܘܪܘܚܐ ܐܘ ܠܘ ܐܠܗܐ ܗ̱ܘ܆ ܐܘ ܐܦ ܗ̣ܘ ܡ̣ܢ ܐܢ̱ܬܬܐ ܐܬܝ̣ܠܕ܇ ܘܚܫ ܘܡܝ̣ܬ. ܘܓܠܝܐ ܕܬܪ̈ܬܝܗܝܢ ܫܟܝ̣ܪ̈ܢ. ܘܗ̇ܝ ܕܡ̣ܢ ܗܕܐ ܫܟܝ̣ܪܘܬܐ ܡܦܨܝܐ ܗ̇ܝ ܗ̣ܝ ܕܢܐܡܪ. ܕܡܫܝܚܐ ܠܘ ܐܠܗܐ ܗ̱ܘ ܒܟܝܢܐ. ܐܠܐ ܒܪܢܫܐ ܕܥܡܪ ܒܗ ܐܠܗܐ. ܟܐܡܬ݀ ܐܠܗܐ ܒܪܢܫܐ ܢܣܒ. ܘܒܗ ܐܝܟ ܕܒܗܝܟܠܐ ܥܡܪ ܒܚܕܝܘܬܐ ܕܨܒܝܢܐ ܘܕܚܘܒܐ ܒܠܚܘܕ.

 

 

 

ܣܥܝܐ ܕܝܚ̄

 

ܐܢ ܥܡܢܘܐܝܠ ܐܠܗܐ ܐܝܬܘܗܝ ܡܫܠܡܢܐ. ܘܒܪܢܫܐ ܡܫܠܡܢܐ. ܘܒܬܘܠܬܐ ܠܐܠܗܐ ܝܠܕܬ݀. ܠܒܪܢܫܐ ܐܪܐ ܡܢܘ̣ ܝܠܕܗ. ܘܟܒܪ ܬܐܡܪ ܕܐܒܐ. ܘܡ̣ܢ ܗܪܟܐ ܬܫܬܟܚ ܕܡܫܡܠܝܐܝܬ ܠܟܝܢ̈ܐ ܘܕܝ̣ܠܝ̈ܬܗܘܢ ܡܒܠܒܠ ܐܢ̱ܬ. ܘܠܗ̇ܘ ܕܠܐ ܐܡܐ ܐܡܐ ܣܐܡ ܐܢ̱ܬ. ܘܠܗ̇ܘ ܕܠܐ ܐܒܐ ܐܒܐ.

 

 

 

ܣܥܝܐ ܕܝ̄ܛ

 

ܐܡܪܝܢ ܐܢ ܠܐ ܗ̣ܘܐ ܝܠܕܬ݀ ܒܪܢܫܐ ܗ̱ܝ ܒܬܘܠܬܐ. ܐܦܠܐ ܝܠܕܬ݀ ܡܫܝ̣ܚܐ. ܒܗ̇ܝ ܕܡܫܝ̣ܚܐ ܒܪܢܫܐ ܗ̱ܘ ܡܫܠܡܢܐ. ܘܐܢ ܠܘ ܝܠܕܬ݀ ܡܫܝܚܐ ܗ̱ܝ. ܐܦܠܐ ܝܠܕܬ݀ ܐܠܗܐ ܗ̱ܝ. ܒܗ̇ܝ ܕܡܫܝ̣ܚܐ ܐܠܗܐ ܗ̱ܘ ܡܫܠܡܢܐ. ܘܡ̣ܢ ܗܪܟܐ ܟܕ ܠܗ̇ܝ ܕܝܠܕܬ݀ ܒܪܢܫܐ ܘܝܠܕܬ݀ ܡܫܝ̣ܚܐ ܡܪܝܡܝ̣ܢ ܐܢ̱ܬܘܢ܆ ܠܗ̇ܝ ܕܝܠܕܬ݀ ܐܠܗܐ ܗ̱ܝ ܡܪܝ̣ܡܝܢ ܐܢ̱ܬܘܢ ܕܠܐ ܒܝ̣ܕܥܬܐ.

 

 

 

ܣܥܝܐ ܕܥܣܪܝܢ

 

ܐܡܪܝܢ ܐܢܗܘ ܕܐܒܗ̈ܬܐ ܩܕܝ̈ܫܐ ܫܝܚ̄. ܒܪ ܟܝܢܐ ܕܐܒܐ ܐܡܪܘܗܝ ܠܒܪܐ. ܘܐܚܪܡܘ ܠܟܠ ܕܡ̣ܢ ܐܘܣܝܐ ܐ̱ܚܪܬܐ ܡܘܕܐ ܠܗ. ܐܝܟܢܐ ܠܘ ܬܚܝܬ ܚܪܡܗܘܢ ܥܐܠܝܢ ܐܢ̱ܬܘܢ. ܟܕ ܠܒܪ ܟܝܢܐ ܕܐܒܐ܆ ܡ̣ܢ ܡܪܝܡ ܐܡܪܝܢ ܐܢ̱ܬܘܢ ܠܗ ܕܐܬܝܠܕ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܟܬܒܐ ܠܡ ܕܝ̣ܠܝ̣ܕܘܬܗ ܕܝܫܘܥ ܡܫܝܚܐ. ܒܪܗ ܕܕܘܝܕ ܒܪܗ ܕܐܒܪܗܡ. ܐܠܘ ܐܠܗܐ ܗ̱ܘ ܒܪܗ ܕܕܘܝܕ ܘܕܐܒܪܗܡ ܘܟܠ ܐܒܐ ܩܕܝ̣ܡ ܠܒܪܗ. ܡܫܬܟܚ ܠܗ ܕܘܝܕ ܐܦ ܐܒܪܗܡ ܕܩܕܝ̣ܡܝ̣ܢ ܠܐܠܗܐ ܗ̇ܝ ܕܫܟܝ̣ܪܐ.

 

 

 

ܣܗܕܘܬܐ ܕܒ̄

 

ܒܗ ܟܕ ܒܗ. ܛܠܝܐ ܕܝܢ ܡܬܚܝܠ ܗܘܐ ܘܪܒܐ ܗܘܐ. ܘܡܬܡܠܐ ܗܘܐ ܚܟܡܬܐ ܘܛܝܒܘܬܐ ܕܐܠܗܐ ܐܝܬ ܗܘܬ݀ ܥܠܘܗܝ. ܐܡܪܝܢ ܠܗܢܐ ܝܠܕܬ݀ ܡܪܝܡ. ܘܐܠܘ ܐܠܗܐ ܗ̣ܘܐ ܐܝܟܢܐ ܡܬܚܝܠ ܗ̣ܘܐ ܒܬܪ ܡܚܝ̣ܠܘܬܐ. ܘܪܒܐ ܗܘܐ ܒܬܪ ܙܥܘܪܘܬܐ. ܘܡܬܡܠܐ ܗ̣ܘܐ ܚܟܡܬܐ ܒܬܪ ܗ̇ܝ ܕܓܠܝ̣ܙ ܗܘܐ ܡܢܗ̇. ܠܘ ܓܝܪ ܕܝ̣ܠܝ̈ܬܐ ܕܐܠܗܐ ܐܢܝܢ ܗܠܝܢ ܐܠܐ ܕܒܪܢܫܐ.

 

 

 

ܣܗܕܘܬܐ ܕܬܠܬ

 

ܒܗ ܟܕ ܒܗ̇. ܕܒܪ ܠܡ ܝܫܘܥ ܠܬܪܥܣܪܬܗ. ܘܫܪܝ̣ ܕܢܐܡܪ ܠܗܘܢ. ܕܗܐ ܣܠܩܝ̣ܢܢ ܠܐܘܪܫܠܡ. ܘܢܬܡܠܝ̈ܢ ܟܠܗܝܢ ܕܟܬܝ̣̈ܒܢ ܒܢ̈ܒܝܐ ܥܠ ܒܪܗ ܕܐ̱ܢܫܐ. ܢܫܬܠܡ ܓܝܪ ܠܥܡ̈ܡܐ. ܘܢܒܙܚܘܢ ܒܗ ܘܢܪܩܘܢ ܒܐܦܘ̈ܗܝ ܘܢܢܓܕܘܢܝܗܝ ܘܢܩܛܠܘܢܝܗܝ. ܘܠܝܘܡܐ ܕܬܠܬܐ ܢܩܘܡ. ܚ̇ܙܝܢ ܐܢ̱ܬܘܢ ܐܝܟܢܐ ܡܪܢ ܥܠ ܒܪܗ ܕܐ̱ܢܫܐ ܐܘܟܝ̣ܬ ܥܠ ܟܝܢܗ ܐ̱ܢܫܝܐ ܣܐܡ ܠܚܫ̈ܐ ܒܡܠܦܢܘܬܗ ܕܠܘܬ ܬܠܡܝ̣̈ܕܘܗܝ. ܘܐܢ̱ܬܘܢ ܡ̣ܢ ܐܘܪܚܐ ܕܝܠܗ ܐܣܛܝ̣ܬܘܢ. ܘܗܠܝܢ ܕܡܫܚ̈ܠܦܢ ܡ̣ܢ ܢܝܫܐ ܕܡܠܘ̈ܗܝ ܠܟܘܢ ܓܒܝܬܘܢ.

 

 

 

ܣܗܕܘܬܐ ܕܐܪܒܥ

 

ܒܗ ܟܕ ܒܗ. ܫܪܘ ܠܡ ܗܝܟܠܐ ܗܢܐ ܘܠܬܠܬܐ ܝܘܡܝ̈ܢ ܡܩܝ̣ܡ ܐ̱ܢܐ ܠܗ. ܐܡܪܝܢ ܚܙܝܢ ܐܢ̱ܬܘܢ. ܐܝܟܢܐ ܗܝܟܠܐ ܩܪܐ ܠܗ ܠܦܓܪܗ. ܘܐܢ̱ܬܘܢ ܟܕ ܡܢܢ ܫܡܥܝ̣ܢ ܐܢ̱ܬܘܢ ܗܕܐ. ܐܝܟ ܗ̇ܝ ܕܡܕܡ ܢܘܟܪܝܐ ܡܠܦܝ̣ܢܢ ܡܩܛܪܓܝ̣ܢ ܐܢ̱ܬܘܢ.

 

 

 

ܣܗܕܘܬܐ ܕܚܡܫ

 

ܦܪܟܣܝܣ. ܝܫܘܥ ܠܡ ܕܡ̣ܢ ܢܨܪܬ. ܓܒܪܐ ܕܡ̣ܢ ܐܠܗܐ ܐܬܚܙܝ̣ ܠܘܬܟܘܢ ܒܚܝ̈ܠܐ ܘܒܐܬܘ̈ܬܐ ܘܒܓܒܪ̈ܘܬܐ. ܐܝܠܝܢ ܕܐܠܗܐ ܥܒܕ ܒܐܝܕܗ ܒܝܢܬܟܘܢ܆ ܐܟܡܐ ܕܐܦ ܐܢ̱ܬܘܢ ܝ̇ܕܥܝ̣ܢ ܐܢ̱ܬܘܢ. ܘܐܢܗܘ ܕܫܪܝ̣ܪܐܝܬ ܓܒܪܐ ܗ̱ܘ ܕܐܠܗܐ ܣܥܪ ܒܐܝ̣ܕܗ ܗܠܝܢ. ܘܠܘ ܒܦܢܛܣܝܐ. ܐܝܟܢܐ ܐܠܗܐ ܢܗܐ ܒܟܝܢܐ ܗ̣ܘ ܗܢܐ. ܥܠ ܐܠܗܐ ܠܐ ܢܦܠ ܫܡ ܓܒܪܐ ܐܘ ܐܢ̱ܬܬܐ. ܐܦܠܐ ܐܠܗܐ ܒܐܝ̈ܕܝ ܐܠܗܐ ܣܥܪ ܚܝ̈ܠܐ. ܒܕ ܐܢܗܘ ܕܐܠܗܐ ܗ̱ܘ ܗ̇ܘ ܕܣܥܪ. ܗ̣ܘ ܒܠܚܘܕܘܗܝ ܣܦܩ ܠܡܣܥܪ.

 

 

 

ܣܗܕܘܬܐ ܕܫܬ

 

ܒܗ ܟܕ ܒܗ. ܫܪܝܪܐܝܬ ܢܕܥ ܟܠܢܫ. ܕܡܪܝܐ ܘܡܫܝ̣ܚܐ ܥܒܕܗ ܐܠܗܐ܇ ܠܗܢܐ ܝܫܘܥ ܕܐܢ̱ܬܘܢ ܙܩܦܬܘܢ.. ܐܡܪܝܢ ܐܝܟܢܐ ܡܟܝ̣ܠ ܒܟܝܢܐ ܘܠܘ ܒܛܝܒܘܬܐ ܐܝܬܘܗܝ ܝܫܘܥ ܡܪܝܐ ܘܡܫܝ̣ܚܐ. ܟܕ ܐܠܗܐ ܥܒܕܗ ܗܟܢܐ. ܗ̇ܘ ܓܝܪ ܕܒܟܝܢܐ ܠܐ ܣܟ ܡܬܐܡܪ ܕܡܬܥܒܕ. ܒܕܠܐ ܥܒܝ̣ܕܐ ܗ̱ܘ ܒܟܝܢܐ ܐܠܗܐ ܫܘܒܚܐ ܠܛܝܒܘܬܗ.

 

 

 

ܣܗܕܘܬܐ ܕܫܒܥ

 

ܒܗ ܟܕ ܒܗ. ܒܫܡܗ ܕܝܫܘܥ ܢܨܪܝܐ ܗ̇ܘ ܕܐܢ̱ܬܘܢ ܙܩܦܬܘܢ ܗ̇ܘ ܕܐܩܝ̣ܡ ܐܠܗܐ ܡ̣ܢ ܒܝܬ ܡܝ̈ܬܐ. ܐܡܪܝܢ ܐܢܗܘ ܕܒܟܝܢܐ ܗ̱ܘ ܐܠܗܐ ܝܫܘܥ ܗ̇ܘ ܕܐܙܕܩܦ ܘܐܠܗܐ ܐܩܝ̣ܡܗ. ܘܠܘ ܒܛܝܒܘܬܐ. ܐܝܟܢܐ ܡܫܟܚ ܐܠܗܐ ܕܢܡܘ̣ܬ ܟܕ ܡܝܘܬܐ ܗ̱ܘ ܒܟܝܢܗ.

 

 

 

ܣܗܕܘܬܐ ܕܬܡܢܐ

 

ܒܗ ܟܕ ܒܗ. ܗ̇ܘ ܕܐܠܗܐ ܡܫܚܗ ܒܪܘܚܐ ܕܩܘܕܫܐ ܘܒܚܝܠܐ. ܘܗܘܝܘ ܕܡܬܟܪܟ ܗ̣ܘܐ ܘܡܐܣܐ ܗ̣ܘܐ ܠܗ̇ܢܘܢ ܕܐܬܢܟܝ̣ܘ ܡ̣ܢ ܒܝܫܐ. ܡܛܠ ܕܐܠܗܐ ܥܡܗ ܗ̣ܘܐ. ܐܡܪܝܢ ܕܐܠܗܐ ܡܫܡܠܝܐ ܗ̱ܘ ܒܟܝܢܐ. ܘܠܐ ܣܢܝ̣ܩ ܠܡܫܬܡܠܝܘ ܒܝܕ ܡܫܝ̣ܚܘܬܐ. ܕܚܣܝ̣ܪܐ ܗ̱ܝ ܓܝܪ ܗܕܐ. ܘܐܦܠܐ ܐܠܗܐ ܥܡ ܐܠܗܐ ܡܨܐ ܗܘܐ ܠܡܗܘܐ. ܘܐܠܐ ܡܫܬܟܚ ܠܢ ܐܠܗܐ ܡܣܝܥܢܐ ܘܐܠܗܐ ܐ̱ܚܪܢܐ ܡܣܬܝܥܢܐ.

 

 

 

ܣܗܕܘܬܐ ܕܬܫܥ

 

ܒܗ ܟܕ ܒܗ. ܘܦܩܕܢ ܕܢܟܪܙ ܘܢܣܗܕ ܠܥܡܐ܆ ܕܗܘܝܘ ܕܐܬܦܪܫ ܡ̣ܢ ܐܠܗܐ ܕܝ̇ܢܐ ܕܚܝ̈ܐ ܘܕܡܝ̣̈ܬܐ. ܐܡܪܝܢ ܓܝܪ ܕܗ̇ܘ ܕܒܟܝܢܐ ܗ̱ܘ ܘܠܘ ܒܛܝܒܘܬܐ ܐܠܗܐ. ܐܝܟܢܐ ܢܬܦܪܫ ܠܗ ܡ̣ܢ ܗ̇ܘ ܕܫܘܐ ܠܗ. ܘܐܟܘܬܗ ܒܟܝܢܐ ܗ̱ܘ ܘܠܘ ܒܛܝܒܘܬܐ ܐܠܗܐ. ܐܝܟܢܐ ܕܢܗܘܐ ܕܝ̇ܢܐ ܕܙܦܠܢ ܘܙܦܠܢ.

 

 

 

ܣܗܕܘܬܐ ܕܥܣܪ

 

ܦܘܠܘܣ ܒܗ̇ܝ ܕܠܘܬ ܪ̈ܘܡܝܐ. ܐܢ ܠܡ ܬܘܕܐ ܒܦܘܡܟ ܕܡܪܝܐ ܗ̱ܘ ܝܫܘܥ. ܘܬܗܝܡܢ ܒܠܒܟ ܕܐܠܗܐ ܐܩܝ̣ܡܗ ܡ̣ܢ ܒܝܬ ܡܝ̈ܬܐ ܬܚܐ.. ܐܡܪܝܢ. ܚܙܝܢ ܐܢ̱ܬܘܢ ܐܝܟܢܐ ܒܗ̇ܝ ܕܒܦܘܡܟ ܒܠܚܘܕ ܬܘܕܐ ܕܡܪܝܐ ܗ̱ܘ ܝܫܘܥ. ܠܗ̇ܝ ܕܒܛܝܒܘܬܐ ܗ̱ܘ ܡܪܝܐ ܪܡܙ ܫܠܝܚܐ ܚܟܝ̣ܡܐ. ܘܒܗ̇ܝ ܕܬܗܝܡܢ ܒܠܒܟ ܘܫܪܟܐ ܠܟܝܢܗ ܐ̱ܢܫܝܐ ܘܩܢܘܡܗ ܡܫܘܕܥ.

 

 

 

ܣܗܕܘܬܐ ܕܝ̄ܐ

 

ܗ̣ܘ ܟܕ ܗ̣ܘ. ܒܗ̇ܝ ܕܠܘܬ ܐܦܣܝ̈ܐ. ܕܐܠܗܗ ܠܡ ܕܡܪܢ ܝܫܘܥ ܡܫܝܚܐ. ܐܒܐ ܕܬܫܒܘܚܬܐ. ܐܡܪܝܢ ܐܝܟܢܐ ܢܗܘܐ ܐܠܗܐ ܐܠܗܐ ܕܗ̇ܘ ܕܒܟܝܢܐ ܘܠܘ ܒܛܝܒܘܬܐ ܐܠܗܐ ܗ̱ܘ.

 

 

 

ܣܗܕܘܬܐ ܕܝܒ̄

 

ܗ̣ܘ ܟܕ ܗ̣ܘ ܒܗ̇ ܟܕ ܒܗ̇. ܘܡܢܐ ܗ̱ܝ ܠܡ ܝܬܝ̣ܪܘܬܐ ܕܪܒܘܬܐ ܕܚܝܠܗ܇ ܒܢ ܒܐܝܠܝܢ ܕܡܗܝܡܢܝ̣ܢ܇ ܐܝܟ ܡܥܒܕܢܘܬܐ ܕܬܘܩܦܐ ܕܚܝܠܗ ܕܥܒܕ ܒܡܫܝ̣ܚܐ܇ ܘܐܩܝ̣ܡܗ ܡ̣ܢ ܒܝܬ ܡܝ̈ܬܐ܇ ܘܐܘܬܒܗ ܡ̣ܢ ܝܡܝ̣ܢܗ ܒܫܡܝܐ܇ ܠܥܠ ܡ̣ܢ ܟܠܗܝܢ ܐܪ̈ܟܐܣ ܘܫܘܠܛܢ̈ܐ܇ ܘܚܝ̈ܠܐ ܘܡܪ̈ܘܬܐ܇ ܘܠܥܠ ܡ̣ܢ ܟܠ ܫܡ ܕܡܫܬܡܗ. ܠܐ ܒܠܚܘܕ ܒܥܠܡܐ ܗܢܐ܆ ܐܠܐ ܐܦ ܒܕܥܬܝ̣ܕ. ܘܫܥܒܕ ܟܠ ܡܕܡ ܬܚܝܬ ܪ̈ܓܠܘܗܝ. ܐܡܪܝܢ ܐܢܗܘ ܕܐܠܗܐ ܫܘܒܚܐ ܠܛܝܒܘܬܗ ܡ̣ܢ ܥܠܡ ܘܡܬܘܡܐܝܬ ܠܥܠ ܗ̣ܘ ܡ̣ܢ ܐܪ̈ܟܐܣ ܘܫܘܠܛܢ̈ܐ. ܘܟܠ ܡܫܥܒܕ ܠܗ. ܐܝܟܢܐ ܘܡ̣ܢ ܒܬܪ ܕܩܡ ܡ̣ܢ ܒܝܬ ܡܝ̣̈ܬܐ ܗܘܬ݀ ܠܗ ܗ̣ܝ ܗܕܐ. ܐܘ ܐܝܟܢܐ ܠܐ ܝ̣ܕܝ̣ܥܐ ܕܟܝܢܐ ܘܩܢܘܡܐ ܐ̱ܢܫܝܐ ܐܝܬܘܗܝ ܗ̇ܘ ܕܠܗܕܐ ܟܠܗ̇ ܪܒܘܬܐ ܐܫܬܘܝ̣. ܒܝܕ ܢܩܝ̣ܦܘܬܐ ܨܒܝܢܝܬܐ ܕܐܠܗܐ ܡܠܬܐ.

 

 

 

ܣܗܕܘܬܐ ܕܝܓ̄

 

ܗ̣ܘ ܟܕ ܗ̣ܘ ܒܗ̇ܝ ܕܠܘܬ ܛܝܡܬܐܘܣ ܕܬܪܬܝܢ. ܐܬܕܟܪ ܠܝܫܘܥ ܡܫܝܚܐ܆ ܕܩܡ ܡ̣ܢ ܒܝܬ ܡܝ̈ܬܐ. ܘܐܝܬܘܗܝ ܡ̣ܢ ܙܪܥܗ ܕܕܘܝܕ. ܐܡܪܝܢ ܕܗܐ ܓܠܝܐܝܬ ܡܚܘܐ ܫܠܝܚܐ. ܕܗ̇ܘ ܕܩܡ ܡ̣ܢ ܒܝܬ ܡܝ̣̈ܬܐ. ܠܘ ܗ̇ܘ ܗ̣ܘ ܕܡ̣ܢ ܐܠܗܐ ܐܒܐ ܝ̣ܠܝ̣ܕ. ܐܠܐ ܗ̇ܘ ܕܡ̣ܢ ܙܪܥܗ ܐܝܬܘܗܝ ܕܕܘܝܕ.

 

 

 

ܣܗܕܘܬܐ ܕܝܕ̄

 

ܗ̣ܘ ܟܕ ܗ̣ܘ. ܒܗ̇ܝ ܕܠܘܬ ܥܒܪ̈ܝܐ. ܠܐ ܗܘܐ ܓܝܪ ܡ̣ܢ ܡܠܐܟ̈ܐ ܢܣܒ. ܐܡܪܝܢ ܚܙܝܢ ܐܢ̱ܬܘܢ ܐܝܟܢܐ ܢܗܝ̣ܪܐܝܬ ܡܚܘܐ ܗܪܟܐ ܫܠܝ̣ܚܐ ܠܗ̇ܝ ܕܢܣܒ. ܘܐܢ̱ܬܘܢ ܟܕ ܠܗ̇ܝ ܕܢܣ̣ܒ ܒܣܪܐ ܐܘ ܒܪܢܫܐ ܡܣܠܝܢ ܐܢ̱ܬܘܢ܆ ܘܠܗ̇ܝ ܕܐܬܒܣܪ ܘܐܬܒܪܢܫ ܚܣܝ̣ܢܐܝܬ ܐܚܝ̣ܕܝܢ ܐܢ̱ܬܘܢ. ܘܠܐ ܝܕܥܝ̣ܢ ܐܢ̱ܬܘܢ ܕܗ̣ܝ ܗܕܐ ܠܘܬ ܚܒܝ̣ܟܘܬܐ ܘܒܘܠܒܠܐ ܕܟܝ̈ܢܐ ܡܘܒܠܐ.

 

 

 

ܣܗܕܘܬܐ ܕܝܗ̄

 

ܩܕܝܫܐ ܓܪܝܓܘܪܝܘܣ ܐܦܣܩܘܦܐ ܕܢܐܙܝ̣ܢܙܘ. ܒܦܠܓܘܬܐ ܐ̱ܚܪܝܬܐ ܒܡܐܡܪܐ ܕܐܪܒܥܝܢ ܘܬܠܬܐ ܕܠܘܩܒܠ ܐܪ̈ܣܝܣ. ܐܢ ܐ̱ܢܫ ܡܠܠ ܬܪܝܢ ܒܢܝ̈ܐ܇ ܚܕ ܡ̇ܢ ܗ̇ܘ ܕܡ̣ܢ ܐܠܗܐ ܘܐܒܐ܇ ܐ̱ܚܪܢܐ ܕܝܢ ܗ̇ܘ ܕܡ̣ܢ ܡܪܝܡ܆ ܐܠܐ ܚܕܘ ܗ̣ܘ ܟܕ ܗ̣ܘ܆ ܘܡ̣ܢ ܣܝ̣ܡܬ݀ ܒܢܝ̈ܐ ܢܦܠ. ܗ̇ܝ ܕܡܠܝ̣ܟܐ ܠܗ̇ܢܘܢ ܕܬܪܝ̣ܨܐܝܬ ܡܗܝܡܢܝܢ. ܟܝ̈ܢܐ ܡ̇ܢ ܓܝܪ ܬܪܝܢ ܐܠܗܐ ܘܒܪܢܫܐ. ܡܛܠ ܕܐܦ ܢܦܫܐ ܘܦܓܪܐ. ܒܢܝ̈ܐ ܕܝܢ ܠܘ ܬܪܝܢ ܘܠܐ ܐܠܗ̈ܐ. ܐܡܪܝܢ ܡܟܝ̣ܠ ܚܕܐ ܡ̣ܢ ܬܪܬܝܢ ܐܠܨܐ ܠܟܘܢ. ܕܐܘ ܗܪܛܝ̣ܩܐ ܘܕܠܘ ܬܪܝ̣ܨܐܝܬ ܡܘܕܐ ܗܢܐ ܡܠܦܢܐ ܬܐܡܪܘܢ܆ ܐܘ ܕܬܪܝܢ ܟܝܢܝ̣̈ܢ ܚܕ ܒܪܐ ܬܘܕܘܢܝܗܝ ܠܡܪܢ ܡܫܝ̣ܚܐ. ܐܝܟ ܕܐܦ ܗ̣ܘ ܐܘܕܝ̣.

 

 

 

ܣܗܕܘܬܐ ܕܝܘ̄

 

ܗ̣ܘ ܟܕ ܗ̣ܘ ܩܕܝܫܐ. ܒܗ ܟܕ ܒܗ ܒܡܐܡܪܐ ܒܬܪ ܩܠܝ̣ܠ. ܘܐܢ ܙܕܩ ܕܩܠܝ̣ܠܐܝܬ ܢܐܡܪ. ܐ̱ܚܪܬܐ ܡ̇ܢ ܘܐ̱ܚܪܬܐ. ܗܠܝܢ ܕܡܢܗܝܢ ܦܪܘܩܢ܇ ܐܢܗܘ ܕܠܘ ܗ̣ܝ ܟܕ ܗ̣ܝ ܗ̇ܝ ܕܠܐ ܡܬܚܙܐ ܠܗ̇ܝ ܕܡܬܚܙܐ܇ ܘܗ̇ܝ ܕܠܐ ܙܒܢܐ ܠܗ̇ܝ ܕܬܚܝܬ ܙܒܢܐ. ܠܘ ܐ̱ܚܪܢܐ ܕܝܢ ܘܐ̱ܚܪܢܐ ܠܐ ܬܗܘܐ. ܬܪ̈ܬܝܗܝܢ ܓܝܪ ܚܕ ܒܡܘܙܓܐ. ܟܕ ܐܠܗܐ ܡ̇ܢ ܐܬܒܪܢܫ܆ ܒܪܢܫܐ ܕܝܢ ܐܬܐܠܗ ܒܒܬܘܠܬܐ. ܐܘ ܐܝܟܢ ܕܐ̱ܢܫ ܢܫܡܗ. ܐܡܪܝܢ ܕܗܐ ܓܠܝܐܝܬ ܗܢܐ ܡܠܦܢܐ ܡܡܠܠ ܐܠܗܝ̈ܬܐ ܡܠܦ ܕܒܪܢܫܐ ܐܬܐܠܗ. ܘܐܝܟܢܐ ܐܢ̱ܬܘܢ ܟܕ ܠܗ̇ ܠܗܕܐ ܡܢܢ ܫܡܥܝܢ ܐܢ̱ܬܘܢ. ܐܝܟ ܗ̇ܝ ܕܡܓܕܦܝ̣ܢܢ ܡܚܣܕܝ̣ܢ ܐܢ̱ܬܘܢ.

 

 

 

ܦܣܘܩܐ ܫܒܝܥܝܐ ܕܩܦܠܐܘܢ ܪܒܝ̣ܥܝܐ ܕܫܬܐܣܬܐ ܪܒܝ̣ܥܝܬܐ. ܡܛܠ ܣܬܘܪܝܗ̇ ܕܬܪܥܝ̣ܬܐ ܗ̇ܝ ܕܬܪ̈ܝܝ ܟܝ̈ܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܢܛܝ̣ܪܝ̣ܢ ܫܘܘ̈ܕܥܐ ܕܫܘܚܠܦܐ ܟܝܢܝܐ. ܐܡܪܝܢ ܡܕܝܢ ܬܪܝܢ ܐܢܘܢ ܟܝ̈ܢܐ. ܐܡܪܝܢܢ ܕܠܐ ܐܠܨܐ. ܒܗ̇ܝ ܕܐܦ ܢܦܫܐ ܘܦܓܪܐ ܟܕ ܢܛܝ̣ܪܝ̣ܢ ܒܗܘܢ ܫܘܘ̈ܕܥܐ ܕܫܘܚܠܦܐ ܟܝܢܝܐ. ܘܬܪܝܢ ܐܢܘܢ ܟܝ̈ܢܐ ܡܫܚ̈ܠܦܐ. ܓܫܝ̣ܡܐ ܘܠܐ ܓܫܝ̣ܡܐ. ܚܕ ܗ̣ܘ ܟܝܢܐ ܐ̱ܢܫܝܐ ܡ̣ܢ ܟܢܝ̣ܫܘܬ ܬܪ̈ܝܗܘܢ ܘܠܘ ܬܪܝܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܘ ܒܫܘܝܘܬ ܐܘܣܝܐ ܚܕ ܟܝܢܐ. ܐܡܪܝܢ ܡܕܝܢ ܬܪܝܢ ܐܢܘܢ ܟܝ̈ܢܐ ܘܠܘ ܚܕ. ܐܡܪܝܢܢ ܕܬܪܝܢ ܡ̇ܢ ܒܪܡ ܠܘ ܦܫܝ̣ܛܐܝܬ. ܐܠܐ ܚܕ ܡ̣ܢ ܬܪܝܢ. ܐܝܟܢܐ ܕܠܘ ܚܘܫܒܐ ܫܚܝ̣ܡܐ ܘܕܣܦܝ̣ܩ ܡ̣ܢ ܣܘܟܠܐ ܬܗܐ ܗ̣ܝ ܚܕܝܘܬܐ. ܡ̣ܢ ܬܪܝܢ ܕܝܢ܇ ܒܗ̣ܝ ܕܥܦܝ̣ܦܐ ܗ̱ܘ ܘܠܘ ܦܫܝ̣ܛܐ. ܒܠܥܕ ܡܘܙܓܐ ܘܒܘܠܒܠܐ. ܡܛܠ ܕܢܛܝ̣ܪܝ̣ܢ ܫܘܘ̈ܕܥܐ ܕܫܘܚܠܦܐ ܟܝܢܝܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܠܘ ܒܗ̇ܝ ܕܗ̣ܘ ܐܝܬܘܗܝ ܘܒܟܝܢܗ ܝ̣ܠܝ̣ܕ ܐܠܗܐ ܡܠܬܐ ܡ̣ܢ ܡܪܝܡ. ܐܠܐ ܒܗ̇ܝ ܕܐܬܒܣܪ ܘܐܬܒܪܢܫ. ܐܡܪܝܢ ܕܡ̣ܢ ܠܐ ܡܬܡܨܝܢܝ̣ܬܐ ܗ̱ܝ. ܕܡܠܬܐ ܢܬܝܠܕ ܘܟܝܢܗ ܠܐ ܢܬܝܠܕ. ܒܕܠܐ ܡܫܟܚ ܠܡܬܦܪܫܘ ܡܠܬܐ ܡ̣ܢ ܟܝܢܗ. ܠܐ ܒܗܘܢܐ ܐܦܠܐ ܒܣܘܥܪܢܐ. ܐܡܪܝܢܢ ܕܠܘ ܗܟܢܐ ܐܡܪܝܢܢ. ܟܐܡܬ݀ ܕܡܠܬܐ ܒܠܥܕ ܟܝܢܗ ܐܬܝܠܕ. ܐܠܐ ܕܡܠܬܐ ܠܘ ܒܟܝܢܗ. ܐܠܐ ܒܒܣܪ ܐܬܝܠܕ. ܘܐܝܟܢܐ ܠܐ ܡܨܝܐ ܗܕܐ. ܗܐ ܓܝܪ ܓܘܫܡܐ. ܠܘ ܒܗ̇ܝ ܕܗ̣ܘ ܐܝܬܘܗܝ ܘܒܟܝܢܗ ܡܬܚܙܝܢܐ ܗ̱ܘ. ܐܠܐ ܒܡܨܥܝܘܬ ܓܘܢܐ ܕܩܢܐ ܘܒܝܕ ܐܐܪ ܫܦܝܐ ܘܢܗܝ̣ܪܐ. ܘܥܡ ܗܕܐ ܠܐ ܡܬܐܡܪ ܕܐܝܟܢܐ ܡܨܝܐ ܕܓܘܫܡܐ ܢܬܚܙܐ ܘܟܝܢܗ ܠܐ ܢܬܚܙܐ. ܘܐܢ ܡܬܐܡܪܐ ܣܘ̣ܦܝ̣ܣܛܝ̣ܩܐܝܬ ܘܒܙܢܐ ܕܡܛܥܝܢܘܬܐ ܡܬܐܡܪܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܗܘܐ ܚܕ ܟܝܢܐ. ܠܘ ܦܫܝ̣ܛܐ ܗ̱ܘ. ܐܠܐ ܥܦܝ̣ܦܐ. ܟܐܡܬ݀ ܐܠܗ ܒܪܢܫ. ܒܕܓܘܢ ܒܐܠܗܘܬܗ ܡ̇ܢ܆ ܠܐܒܐ ܘܠܪܘܚܐ ܫܘܐ. ܘܒܐܢܫܘܬܗ ܠܢ ܒܢܝ̈ܢܫܐ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ ܒܪ ܟܝܢܗ ܕܐܒܐ ܒܒܣܪ ܟܐܡܬ݀ ܟܕ ܗܘܐ ܒܪܢܫܐ܆ ܝ̣ܠܕܬܗ ܡܪܝܡ.. ܒܕܓܘܢ ܗ̇ܘ ܕܡ̣ܢ ܡܪܝܡ ܐܬܝܠܕ܇ ܒܗ̇ܝ ܕܒܪ ܟܝܢܐ ܗ̱ܘ ܕܐܒܐ ܐܠܗܐ ܗ̱ܘ ܡܫܠܡܢܐ. ܘܒܗ̇ܝ ܕܐܬܒܪܢܫ܆ ܒܪܢܫܐ ܗ̱ܘ ܡܫܠܡܢܐ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ. ܕܡܫܝܚܐ ܡܪܢ ܟܕ ܚܕ ܗ̣ܘ ܟܝܢܐ ܥܦܝ̣ܦܐ ܡ̣ܢ ܬܪܝܢ ܟܝܢܝ̣̈ܢ ܐܠܗܝܐ ܘܐ̱ܢܫܝܐ. ܒܗ̇ܝ ܕܐܠܗܐ ܗ̱ܘ ܠܐܒܐ ܝܠܘܕܗ ܫܘܐ. ܘܒܗ̇ܝ ܕܒܪܢܫܐ ܠܡܪܝܡ ܝܠܕܬܗ.

 

 

 

ܫܪܝܐ ܕܣܥܝܐ ܫܒܝܥܝܐ

 

ܐܡܪܝܢܢ ܕܐܠܗܘܬܐ ܘܐ̱ܢܫܘܬܐ ܕܡܢܗܝܢ ܡܫܝܚܐ. ܒܫܪܪܐ ܕܐܘܣܝ̈ܐܣ ܐܢܝܢ ܘܠܘ ܓܕ̈ܫܐ. ܒܪܡ ܡܛܠ ܗ̇ܝ ܕܠܘ ܠܐ ܡܚܝܕܝ̣ܢ. ܚܕܐ ܐܘܣܝܐ ܡܬܐܡܪܐ. ܟܐܡܬ݀ ܥܦܝ̣ܦܬܐ ܘܠܘ ܦܫܝ̣ܛܬܐ. ܠܗ̇ܘ ܕܡ̣ܢ ܟܢܝ̣ܫܘܬ ܬܪ̈ܬܝܗܝܢ.

 

 

 

ܫܪܝܐ ܕܣܥܝܐ ܬܡܝܢܝܐ

 

ܐܡܪܝܢܢ ܕܠܐ ܒܣܪܐ ܢܦܩ ܡ̣ܢ ܚܫܘܫܘܬܗ. ܐܦܠܐ ܡܠܬܐ ܐܘܒܕ ܠܐ ܚܫܘܫܘܬܗ. ܐܠܐ ܡܛܠ ܚܕܝܘܬܐ ܟܠܗܝܢ ܗܠܝܢ ܕܟܠ ܚܕ ܡܢܗܘܢ ܐܦ ܥܠ ܗ̇ܘ ܐ̱ܚܪܢܐ ܣܡܘ ܐܒܗ̈ܬܐ ܩܕܝ̈ܫܐ ܐܟܡܐ ܕܐܬܬܫܠܡܘ ܡ̣ܢ ܫܠܝ̣̈ܚܐ ܩܕܝ̣̈ܫܐ. ܡܣܒܪܝܢܢ ܠܡ ܠܟܘܢ ܒܗ̇ܘ ܕܡ̣ܢ ܒܪܝ̣ܫܝ̣ܬ. ܗ̇ܘ ܕܚܙܝܢܝܗܝ ܒܥܝܢܝ̈ܢ ܘܓܫܢܝܗܝ ܒܐܝ̈ܕܝܢ ܐܡ̇ܪ ܝܘܚܢܢ. ܘܙܟܘܬܐ ܗ̇ܝ ܕܐܡ̣ܪܬܘܢ ܕܠܐܠܗܘܬܐ ܝܬܝ̣ܪ ܦܐܝܐ ܗܘܬ݀. ܠܘ ܠܐ ܗܘܬ݀ ܒܪܡ ܒܬܪ ܩܝܡܬܐ.

 

 

 

ܫܪܝܐ ܕܣܥܝܐ ܬܫܝܥܝܐ

 

ܐܡܪܝܢܢ ܕܗ̇ܝ ܕܒܒܣܪ ܗ̣ܝ ܡܫܘܕܥܐ ܕܐܠܗܐ ܠܘ ܒܟܝܢܗ ܡܬܚܙܝܢܐ ܗ̱ܘ ܐܘ ܚܫܘܫܐ ܐܘ ܡܝܘܬܐ ܘܠܐ ܡܝܘܬܐ. ܗܟܢܐ ܡܘܕܝܢܢ ܒܕܗܟܢܐ ܝ̣ܠܦܢܢ ܡ̣ܢ ܡܠܦܢ̈ܐ ܒܚܝ̣ܪ̈ܐ. ܕܠܐ ܡܬܚܙܝܢܐ ܡܬܚܙܐ. ܘܠܐ ܡܬܓܫܫܢܐ ܡܬܓܫܫ. ܘܗ̇ܘ ܕܠܐ ܐܡܐ ܕܠܐ ܐܒܐ ܗ̇ܘ ܡܠܦ ܡܡܠܠ ܐܠܗܝ̈ܬܐ.

 

 

 

ܫܪܝܐ ܕܣܥܝܐ ܥܣܝܪܝܐ

 

ܐܡܪܝܢܢ. ܕܐܠܗܐ ܡܠܬܐ. ܒܗ̇ܝ ܕܐܝܬܘܗܝ ܗܘܐ ܡ̣ܢ ܩܕܡ ܚܕܝܘܬܐ ܠܐ ܚܫܘܫܐ. ܒܗ̇ ܒܕܡܘ̣ܬܐ ܘܒܬܪ ܚܕܝܘܬܐ ܩܘܝ̣ ܠܐ ܚܫܘܫܐ. ܕܚܫ ܕܝܢ ܡܬܐܡܪ ܒܒܣܪ. ܒܗ̇ܝ ܕܕܝܠܗ ܥܒܕܗ ܠܒܣܪܐ ܒܚܕܝܘܬܐ.

 

 

 

ܫܪܝܐ ܕܣܥܝܐ ܕܚܕܥܣܪ

 

ܐܡܪܝܢܢ ܕܡܪܢ ܒܥܦܝ̣ܦܘܬ ܙܢܘ̈ܗܝ. ܟܐܡܬ݀ ܒܐܠܗܘܬܗ ܘܒܐܢܫܘܬܗ. ܠܘ ܠܐ ܝܕܥ ܗܘܐ ܠܝܘܡܐ ܘܠܫܥܬܐ. ܐܠܐ ܡܛܠ ܥ̈ܠܬܐ ܐܡܪܗ̇ ܠܗܕܐ. ܚܕܐ ܡ̇ܢ ܒܕܠܝܬ ܗ̣ܘܐ ܠܗܘܢ ܝܘܬܪܢܐ ܐܠܘ ܝܕܥܘܗܝ ܠܝܘܡܐ ܘܠܫܥܬܐ ܗ̇ܢܘܢ ܕܫܐܠܘܗܝ. ܕܬܪܬܝܢ ܕܝܢ ܕܣܘܓܦܢܐ ܪܒܐ ܗܘܐ ܗ̣ܘܐ ܠܗ̇ܢܘܢ ܕܒܝܘ̈ܡܬܗܘܢ ܗܘܝܐ ܗܘܬ݀ ܩܝܡܬܐ. ܒܩܨܬ݀ ܗ̇ܝ ܕܒܪ̈ܓܝܓܬܐ ܣܓܝ̈ܐܬܐ ܐܝܟ ܕܒܣܝܢܐ ܡܬܦܠܦܠܝ̣ܢ ܗ̣ܘܘ. ܟܕ ܬܟܝ̣ܠܝ̣ܢ ܥܠ ܗ̇ܝ ܕܠܚܪܬܐ ܢܬܘܒܘܢ. ܡܛܠ ܡܬܘܡ ܡܣܬܠܝܐ ܬܝܒܘܬܐ.

 

 

 

ܫܪܝܐ ܕܣܥܝܐ ܕܬܪܥܣܪ.

 

ܐܡܪܝܢܢ ܕܐܠܗܐ ܒܟܝܢܗ. ܠܐ ܡܝ̣ܬ ܐܦܠܐ ܡܐܬ. ܐܠܐ ܠܡܘܬܗ ܕܦܓܪܐ ܕܝܠܗ ܥܒܕܗ. ܒܗ̇ܝ ܕܐܦ ܦܓܪܐ ܕܝܠܗ ܗ̣ܘ.

 

 

 

ܫܪܝܐ ܕܣܥܝܐ ܕܝܓ̄

 

ܕܟܠܗܝܢ ܗܠܝܢ ܕܠܒܪܢܫܐ ܠܐ ܡܨ̈ܝܢ܆ ܠܐܠܗܐ ܠܘ ܠܐ ܡܬܡܨܝܢ̈ܝܬܐ ܐܢܝܢ. ܦܘܡܗ ܓܝܪ ܕܩܕܝܫܐ ܐܡܪܗ̇ ܠܗܕܐ. ܩܕܝ̣ܫܐ ܐܝܘܐܢܢܝܣ ܡܪܬܐ ܠܟ ܥܠ ܗܕܐ ܟܕ ܐܡ̇ܪ. ܐܝܟܐ ܠܡ ܕܐܠܗܐ ܨܒܐ ܡܙܕܟܐ ܠܗ ܛܟܣܐ ܕܟܝܢܐ.

 

 

 

ܫܪܝܐ ܕܣܥܝܐ ܕܝܕ̄

 

ܐܡܪܝܢܢ ܕܒܟܝܢܐ ܗ̱ܘ ܡܫܝ̣ܚܐ ܐܠܗܐ ܡܫܠܡܢܐ. ܘܒܪܢܫܐ ܡܫܠܡܢܐ. ܟܝܢܐ ܕܝܢ ܒܪܡ ܥܦܝ̣ܦܐ ܕܡ̣ܢ ܬܪܝܢ ܟܝܢܝ̣̈ܢ ܐܠܗܝܐ ܘܐ̱ܢܫܝܐ.

 

 

 

ܫܪܝܐ ܕܣܥܝܐ ܕܝܗ̄

 

ܐܡܪܝܢܢ ܕܬܪܝܢܘܬܐ ܡ̇ܢ ܡܬܬܪܝ̣ܡܐ܆  ܡܛܠ ܕܬܫܬܪܪ ܚܕܝܘܬܐ. ܥܦܝ̣ܦܘܬܐ ܕܝܢ ܠܐ ܒܛܠܐ. ܡܛܠ ܠܐ ܚܒܝ̣ܟܘܬܐ ܕܟܝ̈ܢܐ ܕܡܢܗܘܢ ܬܒܥܐ ܠܗ̇ܘ ܕܠܝܬ ܠܗ ܦܚܡܐ ܐܘ ܕܘܡܝܐ. ܗܐ ܐܝܬ ܠܟ ܢܦܫܟ ܐܦ ܦܓܪܟ. ܕܡܢܗܘܢ ܐܢ̱ܬ ܡ̇ܢ ܕܗ̣ܘ ܕܐܝܬܝܟ. ܚܕ ܟܝܢܐ ܐܢ̱ܬ ܘܩܢܘܡܐ܆ ܐܢ ܒܪܢܫܐ.

 

 

 

ܫܪܝܐ ܕܣܥܝܐ ܕܝܘ̄

 

ܐܡܪܝܢܢ ܕܐܠܗܐ ܡܠܬܐ ܡ̣ܢ ܩܕܡ ܒܣܪܐ ܚܕ ܟܝܢܐ ܘܩܢܘܡܐ ܦܫܝ̣ܛܐ. ܒܬܪ ܒܣܪܐ ܕܝܢ ܠܘ ܦܫܝ̣ܛܐ ܐܠܐ ܚܕ ܟܝܢܐ ܥܦܝ̣ܦܐ ܘܩܢܘܡܐ ܡܪܟܒܐ. ܘܕܥ ܕܠܗܢܐ ܫܘܐܠܐ ܫܐܠܗ ܡܠܟܐ ܗܪܩܠܝ̣ ܠܐܬܐܢܐܣܝܘܣ ܦܛܪܝܪܟܐ ܕܐܪ̈ܬܕܘܟܣܘ ܒܡܒܘܓ ܡܕܝܢ̱ܬܐ ܟܕ ܐܡ̇ܪ ܕܗ̇ܘ ܕܡܝ̣ܬ. ܒܪ ܟܝܢܐ ܗ̣ܘܐ ܕܐܒܐ ܐܘ ܠܐ. ܘܦܛܪܝܪܟܐ ܦܢܝ̣ ܕܒܪ ܟܝܢܐ ܕܐܒܐ ܒܒܣܪ ܡܝ̣ܬ. ܟܕ ܒܟܝܢܗ ܠܐ ܡܝܘܬܐ ܗ̱ܘ. ܐܡ̇ܪ ܠܗ ܡܠܟܐ. ܡܕܝܢ ܚܘܐ ܠܝ ܒܣܪܐ ܕܠܐ ܟܝܢܐ ܘܡܗܝܡܢ ܐ̱ܢܐ ܚܕ ܟܝܢܐ. ܦܛܪܝܪܟܐ ܕܝܢ ܐܘ ܡܛܠ ܕܚܠܬܐ ܐܘ ܡܛܠ ܡܚܝ̣ܠܘܬܐ ܚܝܒܘܬܐ ܚܘܝ̣. ܘܙܕܩ ܠܗ ܕܢܐܡܪ. ܕܐܦ ܐܢ̱ܬ ܐܘ ܡܠܟܐ ܚܘܐ ܠܝ ܒܣܪܐ ܕܠܐ ܩܢܘܡܐ ܐܘ ܕܠܐ ܦܪܨܘܦܐ. ܘܡܗܝܡܢ ܐ̱ܢܐ ܐܦ ܐܢܐ ܬܪܝܢ ܟܝ̈ܢܐ܇ ܒܚܕ ܩܢܘܡܐ. ܐܘ ܬܪܝܢ ܟܝ̈ܢܐ ܘܬܪܝܢ ܩܢܘ̈ܡܐ ܒܚܕ ܦܪܨܘܦܐ.

 

 

 

ܫܪܝܐ ܕܣܥܝܐ ܕܝܙ̄

 

ܐܡܪܝܢܢ ܕܠܝܬ ܐܠܗܐ ܐ̱ܚܪܢܐ ܠܟܪ̈ܣܛܝܢܐ ܕܡܫܚܠܦ ܒܟܝܢܐ ܡ̣ܢ ܡܫܝ̣ܚܐ. ܒܗ̣ܝ ܕܚܕ ܗ̣ܘ ܐܠܗܗܘܢ ܕܟܪ̈ܣܛܝܢܐ ܒܟܝܢܐ. ܩܢܘ̈ܡܐ ܕܝܢ ܬܠܬܐ ܘܠܘ ܚܕ. ܘܕܥ ܕܠܗ ܠܗܢܐ ܫܘܐܠܐ ܡܛܥܝܢܐ ܫܐܠܗ ܐܠܝܐ ܩܐܬܘܠܝ̣ܩܐ ܕܢܣܛܘܪ̈ܝܢܘ ܠܐܝܓܢܐܛܝܘܣ ܐܦܣܩܘܦܐ ܕܓܙܪܬܐ ܟܕ ܐܡ̇ܪ ܕܐܝܬ ܐܪܐ ܐܠܗܐ ܐ̱ܚܪܢܐ ܠܟܪ̈ܣܛܝܢܐ ܣܛܪ ܡ̣ܢ ܗ̇ܘ ܕܝܠܕܬ݀ ܡܪܝܡ ܐܘ ܠܐ. ܘܗ̣ܘ ܐܦܣܩܘܦܐ ܡܛܠ ܕܠܐ ܢܦܠ ܒܣܓܝܐܘܬ ܐܠܗ̈ܐ ܚܒ ܡ̣ܢ ܦܘܢܝܐ ܘܐܡ̣ܪ. ܫܒܘܩ ܠܢ ܐܘ ܐܒܐ ܡ̣ܢ ܗܠܝܢ ܦܟܪ̈ܐ. ܘܙܕܩ ܗ̣ܘܐ ܠܗ ܠܐܦܣܩܘܦܐ ܕܐܗܦܟ ܗ̣ܘܐ ܒܫܘܐܠܗ ܠܩܐܬܘܠܝ̣ܩܐ ܗ̇ܘ. ܕܐܝܬ ܐܪܐ ܐܘ ܐܒܐ ܐܠܗܐ ܐ̱ܚܪܢܐ ܣܛܪ ܡ̣ܢ ܐܒܐ ܠܟܪ̈ܣܛܝܢܐ ܐܘ ܠܐ. ܘܐܢ ܐܝܬ܆ ܗܐ ܣܓܝܐܘܬ ܐܠܗ̈ܐ. ܘܐܢ ܠܝܬ ܚܕ ܗ̣ܘ ܡܕܝܢ ܩܢܘܡܐ ܕܐܠܗܐ. ܐܝܟ ܕܐܦ ܚܕ ܗ̣ܘ ܟܝܢܗ. ܘܕܠܘ ܟܪܣܛܝܢܝܬܐ ܗ̱ܝ ܬܘܕܝܬܐ ܗܕܐ ܓܠܝܐ. ܘܕܠܫܘܐܠܐ ܫܩܝ̣ܦܝܐ ܒܫܘܐܠܐ ܐ̱ܚܪܢܐ ܫܩܝ̣ܦܝܐ ܐܟܘܬܗ ܢܒܛܠܝ̣ܘܗܝ. ܐܘܟܝ̣ܬ ܣܟܬܐ ܒܣܟܬܐ ܢܦܩ ܡ̣ܢ ܡܪܢ ܝ̣ܠܦܢܢ. ܟܕ ܒܫܘܐܠܐ ܕܡܥܡܘܕܝ̣ܬܗ ܕܝܘܚܢܢ܆ ܠܫܘܐܠܐ ܗ̇ܘ ܕܒܐܝܢܐ ܫܘܠܛܢܐ ܥܒ̇ܕ ܗܠܝܢ ܫܪܐ ܘܒܛܠ.

 

 

 

ܫܪܝܐ ܕܣܥܝܐ ܕܝܚ̄

 

ܐܡܪܝܢܢ ܕܒܬܘܠܬܐ ܠܐܠܗܐ ܕܡܒܣܪ ܘܡܒܪܢܫ ܝܠܕܬ݀. ܘܐܒܐ ܠܗ ܠܗܢܐ ܟܕ ܠܐ ܡܒܣܪ ܘܡܒܪܢܫ.

 

 

 

ܫܪܝܐ ܕܣܥܝܐ ܕܝ̄ܛ

 

ܐܡܪܝܢܢ ܕܚܢܢ ܘܠܐ ܒܚܕܐ ܡ̣ܢ ܗܠܝܢ ܒܢ̈ܬ ܩ̈ܠܐ ܬܠܬ ܟܦܪܝ̣ܢܢ. ܐܠܐ ܡܘܕܝܢܢ ܕܠܒܪܢܫܐ ܡܫܡܠܝܐ ܘܐܠܗܐ ܡܫܡܠܝܐ ܕܗܘܝܘ ܡܫܝ̣ܚܐ ܝܠܕܬ݀ ܒܬܘܠܬܐ. ܒܕܓܘܢ ܫܪܝ̣ܪܐ ܠܢ ܠܡܐܡܪܗ̇ ܝܠܕܬ݀ ܒܪܢܫܐ ܘܝܠܕܬ݀ ܡܫܝ̣ܚܐ ܘܝܠܕܬ݀ ܐܠܗܐ ܐܟܚܕܐ. ܡܛܠ ܕܟܠܗܘܢ ܗ̣ܘ ܗ̣ܘ ܦܪܘܩܢ. ܕܝ̣ܠܢܐܝܬ ܕܝܢ ܝܠܕܬ݀ ܐܠܗܐ ܡܟܢܝܢ ܠܗ̇. ܐܝܟ ܕܡ̣ܢ ܡܢܬܐ ܕܡܝܬܪܐ܇ ܠܦܘܬ ܗ̇ܘ ܡܐ ܕܐܫܠܡܘ ܠܢ ܐܒܗ̈ܬܐ ܩܕܝ̈ܫܐ. ܐܢ̱ܬܘܢ ܕܝܢ ܐܢܗܘ ܕܡ̣ܢ ܡܢܬܐ ܕܒܨܝ̣ܪܐ ܐܘ ܕܡܨܥܝܐ ܫܦܪܐ ܠܟܘܢ ܕܬܩܪܘܢܗ̇ ܡܢܐ ܠܢ.

 

 

 

ܫܪܝܐ ܕܣܥܝܐ ܕܥܣܪܝܢ

 

ܐܡܪܝܢܢ ܕܠܒܪ ܟܝܢܐ ܕܐܒܐ ܠܘ ܦܫܝ̣ܛܐܝܬ ܐܡܪܝܢܢ ܕܐܬܝܠܕ ܡ̣ܢ ܡܪܝܡ ܐܠܐ ܒܒܣܪ. ܘܟܕ ܚܕ ܗ̣ܘ ܟܕ ܗ̣ܘ ܟܝܢܐ ܘܩܢܘܡܐ ܕܡ̣ܢ ܬܪܝܢ ܟܝܢܝ̈ܢ ܘܩܢܘ̈ܡܝ̣ܢ. ܒܐܠܗܘܬܗ ܡ̇ܢ ܒܪ ܟܝܢܐ ܗ̱ܘ ܕܐܒܐ. ܒܐ̱ܢܫܘܬܗ ܕܝܢ ܒܪ ܟܝܢܐ ܕܡܪܝܡ. ܐܝܟܢܐ ܕܐܦ ܕܘܝܕ ܠܡܐܡܪ ܟܕ ܚܕ ܗ̣ܘ ܟܝܢܐ ܘܩܢܘܡܐ. ܒܢܦܫܗ ܡ̇ܢ ܒܪ ܟܝܢܐ ܗ̱ܘ ܕܠܐ ܓܫܝ̣̈ܡܐ ܘܠܐ ܡܬܚܙ̈ܝܢܐ. ܘܒܦܓܪܗ ܕܝܢ ܒܪ ܟܝܢܐ ܕܓܫܝ̣̈ܡܐ ܘܡܬܚܙ̈ܝܢܐ. ܘܐܒܗ̈ܬܐ ܫܝܚ̄ ܐܚܪܡܘ ܠܟܠ ܕܠܩܢܘܡ ܒܪܐ ܒܐܠܗܘܬܗ ܘܠܘ ܒܐܢܫܘܬܗ ܡ̣ܢ ܐܘܣܝܐ ܐ̱ܚܪܬܐ ܣܛܪ ܡ̣ܢ ܐܘܣܝܐ ܕܐܒܐ ܡܘܕܐ ܠܗ. ܐܝܟ ܐܪܝܘܣ ܕܐܡܪܚ ܘܠܘ ܒܪ ܟܝܢܐ ܕܐܒܐ ܐܘܕܝܗ ܠܒܪ ܒܐܠܗܘܬܗ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܕܘܝܕ ܘܐܒܪܗܡ ܩܕܝ̣ܡܝ̣ܢ ܠܐܠܗܐ ܡܒܣܪܐ. ܘܩܕܝ̣ܡ ܗ̣ܘ ܐܠܗܐ ܫܘܒܚܐ ܠܛܝܒܘܬܗ ܡ̣ܢ ܩܕܡ ܡܬܒܣܪܢܘܬܗ.

 

 

 

ܦܘܢܝܐ ܕܣܗܕܘܬܐ ܕܬܪܬܝܢ

 

ܐܡܪܝܢܢ ܕܐܠܗܐ ܫܘܒܚܐ ܠܡܘܟܟܗ. ܒܒܣܪ ܣܒܠ ܡܚܝ̈ܠܘܬܐ ܗܠܝܢ. ܐܝܟ ܕܐܡ̣ܪ ܦܘܠܘܣ. ܕܟܕ ܐܝܬܘܗܝ ܦܚܡܐ ܠܐܠܗܐ ܐܒܐ ܢܦܫܗ ܣܪܩ ܘܫܪܟܐ.

 

 

 

ܦܘܢܝܐ ܕܣܗܕܘܬܐ ܕܬܠܬ

 

ܐܡܪܝܢܢ. ܕܚܢܢ ܚܕ ܒܪܐ ܝܕܥܝ̣ܢܢ. ܗ̣ܘ ܟܕ ܗ̣ܘ ܕܐܠܗܐ ܘܕܐ̱ܢܫ̈ܐ ܡܛܠ ܚܕܝܘܬܐ. ܘܐܢ ܠܘܬܟܘܢ ܕܝܠܟܘܢ ܐ̱ܚܪܝܢ ܗ̣ܘ ܒܪܗ ܕܐܠܗܐ ܘܐ̱ܚܪܢܐ ܒܗ ܕܐ̱ܢܫܐ. ܗܒܘ ܬܪܝܢ ܒܢܝ̈ܐ ܘܐܓܗܘ. ܡܠܘܢ ܕܝܢ ܐܬܢܟܪܘ ܠܝܘܠܦܢܐ ܕܐܒܗ̈ܬܐ ܩܕܝ̈ܫܐ.

 

 

 

ܦܘܢܝܐ ܕܣܗܕܘܬܐܕܐܪܒܥ

 

ܐܡܪܝܢܢ ܕܒܫܘܝܘܬ ܫܡܐ ܕܗܝܟܠܐ ܗ̇ܘ ܫܠܝܡܘܢܝܐ ܩܪܝܗܝ ܠܦܓܪܗ ܗܝܟܠܐ ܗ̣ܘ ܦܪܘܩܢ. ܐܝܟ ܕܐܦ ܕܘܝܕ. ܠܡܢܢܐ ܗ̇ܘ ܕܐܬܬܪܣܝ̣ ܒܗ ܒܢܝ̈ ܐܝܣܪܐܝܠ ܒܡܕܒܪܐ ܠܚܡܐ ܕܡܠܐܟ̈ܐ ܩܪܝܗܝ. ܟܕ ܒܫܪܪܐ ܠܘ ܠܚܡܐ ܗܘ ܡܢܢܐ.

 

 

 

ܦܘܢܝܐ ܕܣܗܕܘܬܐ ܕܚܡܫ

 

ܐܡܪܝܢܢ ܕܐܠܘܠܐ ܐܠܗܐ ܡܫܠܡܢܐ ܘܒܪܢܫܐ ܡܫܠܡܢܐ ܡܘܕܝܢ ܗܘܝܢ ܠܡܪܢ܆ ܡܫܬܡܪ ܗ̣ܘܐ ܥܠܝܢ ܣܥܝܟܘܢ ܗܢܐ. ܘܟܕ ܒܪܢܫܐ ܗ̱ܘ ܡܫܠܡܢܐ. ܐܝܟܢܐ ܠܘ ܓܒܪܐ ܦܐܐ ܠܗ ܠܡܫܬܡܝܘ.

 

 

 

ܦܘܢܝܐ ܕܣܗܕܘܬܐ ܕܫܬ

 

ܐܡܪܝܢܢ ܕܒܫܪܪܐ ܐܠܗܐ ܡܠܬܐ ܒܚܘܝܕܗ ܕܥܡ ܒܣܪܐ ܡܪܝܐ ܘܡܫܝ̣ܚܐ ܥܒܕܗ ܠܒܣܪܐ ܗ̇ܘ ܕܥܡܗ ܐܬܚܝܕ. ܘܕܠܘ ܒܛܝܒܘܬܐ ܗ̱ܘ ܐܠܗܐ ܒܣܪܐ ܗܘ ܐܡܪܝܢܢ. ܡܛܠ ܗ̇ܝ ܕܠܘ ܕܠܘ ܬܪܝܢ ܐܠܗܝ̈ܢ ܢܫܬܟܚܘܢ ܠܢ. ܚܕ ܒܟܝܢܐ ܘܐ̱ܚܪܢܐ ܒܛܝܒܘܬܐ. ܐܦܠܐ ܓܝܪ ܐ̱ܢܫ ܡ̣ܢ ܐܒܗ̈ܬܐ ܗ̣ܝ ܗܕܐ ܠܢ ܐܠܦ. ܘܩܕܝܫܐ ܓܪܝܓܘܪܝܘܣ ܗ̇ܘ ܡܡܠܠ ܐܠܗܝ̈ܬܐ. ܪܥܡܐܝܬ ܡܣܠܐ ܠܟܠ ܕܒܛܝܒܘܬܐ ܐܡ̇ܪ ܠܗ̇ ܠܚܕܝܘܬܐ ܘܠܘ ܒܐܘܣܝܐ ܘܟܕ ܐܡ̇ܪ ܒܡܐܡܪܐ ܕܐܪܒܥܝܢ ܘܬܠܬܐ. ܒܦܠܓܘܬܗ ܐ̱ܚܪܝܬܐ ܗܟܢܐ ܐܢ ܐ̱ܢܫ ܐܝܟ ܕܒܢܒܝܐ ܐܡ̇ܪ ܕܒܛܝܒܘܬܐ ܐܥܒܕ. ܐܠܐ ܠܘ ܕܒܐܘܣܝܐ ܐܬܬܠܘܬ ܟܝ̣ܬ ܘܐܟܚܕܐ ܐܬܓܒܠ܆ ܢܗܘܐ ܣܦܝ̣ܩܐ ܡ̣ܢ ܡܥܒܕܢܘܬܐ ܛܒܬܐ. ܡܠܘܢ ܕܝܢ ܡܠܝܐ ܡ̣ܢ ܗ̇ܝ ܕܠܩܘ̣ܒܠܐ.

 

 

 

ܦܘܢܝܐ ܕܣܗܕܘܬܐ ܕܫܒܥ

 

ܐܡܪܝܢܢ ܕܐܦ ܠܟܘܢ ܚܕܐ ܡ̣ܢ ܬܪܬܝܢ ܐܠܨܐ ܠܟܘܢ. ܕܠܡܫܝ̣ܚܐ ܡ̇ܢ ܕܒܫܪܪܐ ܚܫ ܘܐܨܛܠܒ ܘܡܝ̣ܬ ܐܠܗܐ ܬܘܕܘܢܝܗܝ ܐܘ ܠܘ ܐܠܗܐ. ܘܐܢ ܐܠܗܐ܆ ܗܐ ܟܕ ܠܐ ܨܒܝܢ ܐܢ̱ܬܘܢ ܗ̇ܝ ܕܐܡܪܝ̣ܢܢ ܐܡܪܝܢ ܐܢ̱ܬܘܢ. ܘܐܢ ܠܘ ܐܠܗܐ. ܗܐܡܬܢܟܪܝܘ ܐܬܢܟܪܝ̣ܬܘܢ ܡ̣ܢ ܟܪܣܛܝܢܘܬܐ.

 

 

 

ܦܘܢܝܐ ܕܣܗܕܘܬܐ ܕܬܡܢܐ

 

ܐܡܪܝܢܢ ܐܢܗܘ ܕܐܠܗܐ ܥܡ ܐܠܗܐ ܠܐ ܡܨܐ ܠܡܗܘܐ. ܐܝܟܢܐ ܕܠܐ ܢܫܬܟܚ ܐܠܗܐ ܡܣܝܥܢܐ ܘܐܠܗܐ ܡܣܬܥܝܢܐ. ܗ̣ܘ ܗܟܘܬ ܘܐܠܗܐ ܕܒܟܝܢܐ ܠܐ ܡܨܐ ܠܡܗܘܐ ܥܡ ܐܠܗܐ ܕܒܛܝܒܘܬܐ. ܐܝܟܢܐ ܕܠܘ ܐܠܗܐ ܡܫܡܠܝܐ ܘܐܠܗܐ ܚܣܝ̣ܪܐ ܢܫܬܟܚ. ܒܗ̇ܝ ܕܗ̇ܘ ܕܒܟܝܢܐ ܝܬܝ̣ܪ ܡܫܡܠܝ. ܘܗ̇ܘ ܕܒܛܝܒܘܬܐ ܝܬܝ̣ܪ ܚܣܝ̣ܪ.

 

 

 

ܦܘܢܝܐ ܕܣܗܕܘܬܐ ܕܬܫܥ

 

ܐܡܪܝܢܢ ܕܗ̇ܝ ܕܐܬܦܪܫ ܒܪܐ ܡ̣ܢ ܐܒܐ ܕܢܗܘܐ ܕܝܢܐ ܕܚܝ̈ܐ ܘܕܡܝ̣̈ܬܐ. ܠܘ ܚܣܝ̣ܪܘܬܐ ܡܥܠܐ ܒܐܠܗܘܬܗ. ܐܟܡܐ ܕܐܦܠܐ ܗ̇ܝ ܕܐܬܝܠܕ ܒܪܐ ܡ̣ܢ ܐܒܐ ܘܕܥܠܬܗ ܗ̣ܘ.

 

 

 

ܦܘܢܝܐ ܕܣܗܕܘܬܐ ܕܥܣܪ

 

ܐܡܪܝܢܢ ܕܫܠܝ̣ܚܐ ܐܠܗܝܐ ܒܗ̇ܝ ܕܬܘܕܐ ܒܦܘܡܟ ܠܐܠܗܘܬܗ ܕܡܪܢ ܡܫܪܪ. ܘܒܗ̇ܝ ܕܬܗܝܡܢ ܒܠܒܟ ܠܐܢܫܘܬܗ. ܘܠܘ ܟܝ̈ܢܐ ܘܩܢܘ̈ܡܐ ܡܦܪܫ ܒܬܪ ܚܕܝܘܬܐ. ܘܐܠܐ ܠܘ ܐܝܟ ܕܥܠ ܚܕ ܡܩܛܪܓ ܗ̣ܘܐ ܐܟܚܕܐ ܠܬܪ̈ܝܗܘܢ ܩܘܛܪ̈ܓܐ ܗܠܝܢ.

 

 

 

ܦܘܢܝܐ ܕܣܗܕܘܬܐ ܕܝ̄ܐ

 

ܐܡܪܝܢܢ ܕܗ̣ܝ ܗܕܐ ܣܗܕܘܬܐ܆ ܠܟܦܪ̈ܝ ܒܐܢܫܘܬܗ ܕܡܪܢ ܡܚܝܒܐ. ܘܠܘ ܠܢ ܗ̇ܢܘܢ ܕܒܪܢܫܐ ܡܫܠܡܢܐ ܘܐܠܗܐ ܡܫܠܡܢܐ ܝ̇ܕܥܝ̣ܢܢ ܠܗ. ܘܠܗ̇ܝ ܕܐܠܗܐ ܒܟܝܢܐ ܘܐܠܗܐ ܒܛܝܒܘܬܐ ܡ̣ܢ ܟܕܘ ܚܘܝ̣ܢܢ ܫܟܝ̣ܪܘܬܗ̇. ܟܐܡܬ݀ ܕܠܘܬ ܬܪܝܢܘ̣ܬ ܐܠܗ̈ܐ ܡܘܒܠܐ.

 

 

 

ܦܘܢܝܐ ܕܣܗܕܘܬܐ ܕܝܒ̄

 

ܐܡܪܝܢܢ ܕܒܫܪܪܐ ܕܟܝܢܐ ܘܩܢܘܡܐ ܐ̱ܢܫܝܐ ܗܘܝܘ ܗ̇ܘ ܕܠܟܠܗ ܗ̇ܝ ܪܒܘܬܐ ܐܫܬܘܝ̣. ܐܠܐ ܒܬܪ ܚܕܝܘܬܐ ܠܐ ܙܕܩ ܠܡܡܢܐ ܟܝ̈ܢܐ ܘܩܢܘ̈ܡܐ ܕܠܐ ܬܒܛܠ ܚܕܝܘܬܐ. ܡܠܬܐ ܓܝܪ ܕܬܪܝܢܘܬܐ ܡܒܛܠܢܝ̣ܬܐ ܗ̱ܝ ܕܚܕܝܘܬܐ.

 

 

 

ܦܘܢܝܐ ܕܣܗܕܘܬܐ ܕܝܓ̄

 

ܐܡܪܝܢܢ ܕܒܫܪܪܐ ܗ̇ܘ ܕܩܡ ܡ̣ܢ ܒܝܬ ܡܝ̈ܬܐ ܗܘܝܘ ܗ̇ܘ ܕܡ̣ܢ ܙܪܥܗ ܕܕܘܝܕ. ܐܠܐ ܡܛܠ ܚܕܝܘܬܐ ܕܥܡ ܐܠܗܐ ܡܠܬܐ. ܐܦ ܥܠܘܗܝ ܕܐܠܗܐ ܡܠܬܐ ܡܫܪܐ ܗ̇ܝ ܕܩܡ ܡ̣ܢ ܒܝܬ ܡܝ̈ܬܐ ܐܝܟ ܕܐܡ̣ܪ ܫܠܝ̣ܚܐ ܕܗ̇ܘ ܕܡ̣ܢ ܩܕܡ ܟܠ܆ ܗܘܐ ܒܘܟܪܐ ܕܡ̣ܢ ܒܝܬ ܡܝ̣̈ܬܐ܆ ܐܝܟܢܐ ܕܢܗܘܐ ܩܕܡܝ ܒܟܠ.

 

 

 

ܦܘܢܝܐ ܕܣܗܕܘܬܐ ܕܝܕ̄

 

ܐܡܪܝܢ ܕܚܢܢ ܡ̇ܢ ܒܗ̇ܝ ܕܐܡܪܝܢܢ ܕܐܬܒܣܪ. ܐܦ ܠܗ̇ܝ ܕܢܣܒ ܒܣܪܐ ܡܫܪܪܝ̣ܢܢ ܒܣܘܟܠܐ. ܡܛܠ ܕܟܠ ܕܡܬܒܣܪ ܒܣܪܐ ܢܣ̇ܒ. ܐܢ̱ܬܘܢ ܕܝܢ ܒܗ̇ܝ ܕܐܬܒܣܪ ܡܫܪܪܝ̣ܢ ܐܢ̱ܬܘܢ. ܡܛܠ ܕܠܘ ܕܢܣ̇ܒ ܒܣܪܐ ܡܬܒܣܪ ܘܡܬܚܝܕ ܥܡܗ. ܘܡ̣ܢ ܗܪܟܐ ܕܠܩܘܒܠܐ ܡܫܬܟܚܝ̣ܢ ܐܢ̱ܬܘܢ ܕܐܘܢܓܠܝܘܢ ܕܐܡ̇ܪ. ܡܠܬܐ ܒܣܪܐ ܗ̣ܘܐ. ܘܕܗܝܡܢܘܬܐ ܕܫܝܚ̄ ܕܐܡܪܐ ܕܐܬܓܫܡ ܘܗܘܐ ܒܪܢܫܐ.

 

 

 

ܦܘܢܝܐ ܕܣܗܕܘܬܐ ܕܝܗ̄

 

ܐܡܪܝܢܢ ܕܟܝ̈ܢܐ ܡ̇ܢ ܬܪܝܢ ܐܡ̇ܪ ܡܠܦܢܐ ܠܗ̇ܢܘܢ ܕܡܢܗܘܢ ܗ̇ܘ ܚܕ ܟܝܢܐ ܕܐܠܗܐ ܡܒܣܪܐ. ܘܠܘ ܕܒܬܪ ܚܕܝܘܬܐ ܟܝ̈ܢܐ ܡܦܪܫ. ܘܝ̣ܕܝ̣ܥܐ ܗܕܐ ܡ̣ܢ ܬܚܘܝ̣ܬܐ ܕܢܦܫܐ ܘܦܓܪܐ ܕܐܝܬܝ̣. ܘܐܠܐ ܙܕܩ ܗ̣ܘܐ ܕܐܦ ܟܠ ܚܕ ܡ̣ܢ ܩܢܘ̈ܡܐ ܐ̱ܢܫܝ̈ܐ ܬܪܝܢ ܟܝ̈ܢܐ ܘܬܪܝܢ ܩܢܘ̈ܡܐ ܢܬܐܡܪ ܗ̣ܘܐ ܗ̇ܝ ܕܫܟܝ̣ܪܐ. ܘܙܕܩ ܗܘܐ ܕܐܦ ܗ̣ܘ ܡܪܢ ܬܠܬܐ ܟܝ̈ܢܐ ܘܬܠܬܐ ܩܢܘ̈ܡܐ ܢܬܬܘܕܐ ܗ̣ܘܐ ܗ̇ܝ ܕܝܬܝ̣ܪ ܫܟܝ̣ܪܐ. ܟܝ̈ܢܐ ܐܡ̇ܪ ܐ̱ܢܐ ܘܩܢܘܡܐ ܕܢܦܫܐ. ܘܟܝܢܐ ܘܩܢܘܡܐ ܕܦܓܪܐ.

 

 

 

ܦܘܢܝܐ ܕܣܗܕܘܬܐ ܕܝܘ̄

 

ܐܡܪܝܢܢ ܕܗ̇ܝ ܕܒܪܢܫܐ ܐܬܐܠܗ܆ ܬܪܝܢܐܝܬ ܕܐܠܗܐ ܕܐܠܗܘܬܐ. ܘܟܝܢܐ ܘܩܢܘܡܐ ܡܬܢܣܒܐ. ܚܕ ܡ̇ܢ ܕܗ̣ܝ ܡܬܐܠܗܢܘܬܗ ܕܒܪܢܫܐ ܗܘܬ݀. ܥܡܗ̇ ܕܗ̇ܝ ܕܐܣܬܒܪܬ݀ ܒܬܘܠܬܐ ܡ̣ܢ ܡܠܐܟܐ. ܘܐܡܪܬ݀ ܗܐ ܐܢܐ ܐܡܬܗ ܕܡܪܝܐ ܢܗܘܐ ܠܝ ܐܝܟ ܡܠܬܟ. ܘܕܬܪܝܢ. ܕܗ̣ܝ ܡܬܐܠܗܢܘܬܗ ܕܒܪܢܫܐ ܒܬܪ ܥܡܕܐ ܗܘܬ݀ ܟܐܡܬ݀ ܟܕ ܢܚܬ ܥܠܘܗܝ ܪܘܚܐ ܩܕܝܫܐ. ܘܡܛܠ ܗܕܐ ܡ̣ܢ ܗ̇ܘ ܙܒܢܐ ܐܬܡܨܝ̣ ܠܡܣܥܪ ܬܕܡܪ̈ܬܐ. ܘܠܗ̇ܘ ܙܢܐ ܩܕܡܝܐ ܡܩܒܠܐ ܥܕܬܐ ܩܕܝܫܬܐ. ܘܠܗ ܡܐܪܙ ܡܠܦܢܐ. ܘܐܦ ܚܢܢ ܫܠܡܝ̣ܢܢ ܘܡܘܕܝܢܢ. ܙܢܐ ܕܝܢ ܗ̇ܘ ܬܪܝܢܐ ܬܪܥܝ̣ܬܐ ܗ̱ܝ ܡܣܠܝܬܐ. ܘܡܕܚܩ ܕܚܩܐ ܠܗ̇ ܥܕܬܐ ܩܕܝܫܬܐ. ܘܡܥܪܩ ܥܪܩܝ̣ܢܢ ܡܢܗ̇ ܐܝܟ ܕܡ̣ܢ ܣܡܐ ܩܛܘܠܐ. ܘܕܠܗ̇ ܒܝܬܝܐ ܘܡܚܝܢܐ ܬܪܥܝ̣ܬܟܘܢ܆ ܝ̣ܕܝ̣ܥܐ ܡ̣ܢ ܗ̇ܝ ܕܣܓܝ ܡܬܥܣܩܝ̣ܢ ܐܢ̱ܬܘܢ ܒܗ̇ܝ ܕܝܠܕܬ݀ ܐܠܗܐ ܬܩܪܘܢܗ̇ ܠܒܬܘܠܬܐ. ܐܟܡ̇ܢ ܕܟܕ ܝ̣ܠܕܬܗ ܠܒܪܗ̇ ܠܝܬ ܗܘܬ݀ ܗܝܕܝܟ ܚܕܝܘܬܐ ܕܥܡ ܐܠܗܐ ܡܠܬܐ. ܘܐܢ ܐܝܬ ܗܘܬ݀ ܐܝܟܢܐ ܠܘ ܝܠܕܬ݀ ܐܠܗܐ ܗ̱ܝ.

 

 

 

 

 

 

     #1 

 

ܩܦܠܐܘܢ ܕܚܡܫܐ ܕܫܬܐܣܬܐ ܪܒܝ̣ܥܝܬܐ. ܡܛܠܗ̇ܝ ܕܟܕ ܢܛܝ̣ܪܝ̣ܢ ܫܘܘ̈ܕܥܐ ܕܫܘܚܠܦܐ ܟܝܢܝܐ. ܚܕ ܟܝܢܐ ܡ̣ܢ ܬܪܝܢ ܟܝܢܝ̈ܢ ܡܘܕܝܐ ܥܕܬܐ ܩܕܝܫܬܐ ܕܝܥܩܘ̈ܒܝܐ. ܘܠܘ ܟܕ ܐܬܡܙܓܘ ܟܝ̈ܢܐ ܒܚܕܕ̈ܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܗ̇ܢܘܢ ܕܥܡ ܚܕܕ̈ܐ ܡܬܡܙܓܝ̣ܢ܇ ܡ̣ܢ ܐܢܢܩܝ̣ ܕܒܟܠܗܘܢ ܐܟܚܕܐ ܥܒܘܕܘܬܐ ܘܚܫܘܫܘܬܐ ܬܫܬܟܚ. ܘܠܘ ܒܚܕ ܡܢܗܘܢ ܕܝ̣ܠܢܐܝܬ. ܒܗ̇ܝ ܕܗ̇ܘ ܕܠܐ ܚܐܫ ܐܦܠܐ ܡܫܬܚܠܦ ܠܐ ܡܬܡܙܓ. ܘܟܝܢܐ ܐܠܗܝܐ. ܟܕ ܪܡ ܗ̣ܘ ܡ̣ܢ ܫܘܚܠܦܐ ܕܒܐܘܣܝܐ. ܡ̣ܢ ܠܘ ܡܫܟܚܢ̈ܝܬܐ ܗ̱ܝ ܕܥܡ ܐ̱ܚܪܝܢ ܢܬܡܙܓ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܗ̇ܘ ܕܡܚܝ̣ܠ ܘܬܚܘܒ ܡ̣ܢ ܗ̇ܘ ܕܚܝܠܬܢ ܘܬܩܝ̣ܦ ܡܬܬܥܒܕ ܘܚܐܫ. ܘܟܝܢܐ ܐܠܗܝܐ. ܟܕ ܚܝܠܬܢ ܒܟܠ ܗܘ ܬܩܝ̣ܦ ܡ̣ܢ ܟܠ. ܘܙܟܐ ܠܟܠ. ܡ̣ܢ ܠܘ ܡܫܟܚܢ̈ܝܬܐ ܗ̱ܝ. ܕܡ̣ܢ ܐ̱ܚܪܢܐ ܢܬܬܥܒܕ ܘܢܚܫ. ܘܡܛܠ ܗܕܐ ܐܠܐ ܡܟܢ ܠܡܫܬܓܢܝܘ. ܒܝܕ ܗܕܐ ܬܘܒ ܐܦܠܐ ܡܬܡܙܓ.

 

 

 

ܗܦܟܬܐ

 

ܐܡܪܝܢ ܕܠܘ ܟܕ ܠܟܝܢܐ ܐ̱ܢܫܝܐ ܐܬܚܝܕ ܟܝܢܐ ܐܠܗܝܐ ܡܢܗ ܐܫܬܚܠܦ ܘܥܡܗ ܐܬܡܙܓ. ܐܡܪܝܢ ܪ̈ܝܫܢܝܗ̇ ܕܗܪܣܝ̣ܣ ܗܕܐ. ܕܐܝܬܝܗܘܢ ܐܘܐܠܢܛܝܢܘܣ ܘܐܦܘܠܝܢܐܪܝܘܣ ܘܐܘܛܘܟܐ. ܐܠܐ ܕܠܦܓܪܐ ܫܡܝܢܐ. ܗ̇ܘ ܕܠܘ ܒܪ ܟܝܢܐ ܗ̱ܘ ܕܦܓܪܢ ܐ̱ܢܫܝܐ ܦܠܐ ܕܡ̣ܢ ܒܬܘܠܬܐ ܐܬܢܣܒ܆ ܐܫܬܚܠܦ ܟܝܢܐ ܐܠܗܝܐ. ܘܗܟܢܐ ܚܕ ܟܝܢܐ ܡܡܙܓܐ ܗ̣ܘܐ.

 

 

 

ܦܘܢܝܐ

 

ܐܡܪܝܢܢ ܕܠܠܐ ܡܬܡܨܝܢܘܬ ܫܘܚܠܦܐ ܕܟܝܢܐ ܐܠܗܝܐ ܡ̣ܢ ܟܕܘ ܫܪܪܢܗ̇ ܗܪܟܐ ܡ̣ܢ ܠܥܠ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܡܘܙܓܐ ܘܒܘܠܒܠܐ܆ ܠܓܘܫ̈ܡܐ ܘܓܕܫܝ̈ܗܘܢ ܢܩܝ̣ܦܝ̣ܢ ܒܝܬܐܝܬ. ܘܟܝܢܐ ܐܠܗܝܐ ܟܕ ܠܐ ܓܘܫܡܐ ܗ̱ܘ ܐܦܠܐ ܓܕܫܐ. ܡ̣ܢ ܠܐ ܡܬܡܨܝܢ̈ܝܬܐ ܗ̱ܝ ܡܬܡܙܓܢܘܬܗ ܕܥܡ ܓܘܫ̈ܡܐ ܘܓܕ̈ܫܐ.

 

 

 

ܗܦܟܬܐ

 

ܐܡܪܝܢ ܘܡܢܐ ܟܠܝܐ ܕܥܡ ܢܦܫܐ ܡܠܝ̣ܠܬܐ ܢܐܡܪ ܕܗܘܬ݀ ܡܬܡܙܓܢܘܬܗ ܗܕܐ. ܕܐܦ ܗ̣ܝ ܠܐ ܓܫܝ̣ܡܬܐ ܗ̱ܝ.

 

 

 

ܦܘܢܝܐ

 

ܐܡܪܝܢܢ ܕܠܐ ܐ̱ܢܫ ܡ̣ܢ ܩܕ̈ܡܝܐ ܐܘ ܐ̱ܚܪ̈ܝܐ ܥܠ ܠܐ ܓܫܝ̣̈ܡܐ ܩܛܪܓܗ ܠܡܘܙܓܐ. ܘܬܘܒ ܐܡܪܝܢܢ ܕܡܒܥܢܝ̈ܗ̇ ܕܗܕܐ ܐܪܣܝ̣ܣ ܡܟܦܪ ܟܦܪܝܢ ܒܢܦܫܐ ܡܠܝ̣ܠܬܐ. ܐܠܐ ܕܢܦܫܐ ܚܝܘܬܢܝܬܐ ܘܗ̇ܝ ܢܨܒܬܢܝܬܐ. ܕܚܝ̈ܠܐ ܐܢܘܢ ܓܘܫ̈ܡܢܝܐ ܐܘܟܝ̣ܬ ܓܕ̈ܫܐ. ܐܡܪܝܢ ܕܢܣܒ ܡܪܢ. ܘܡܛܠܗܕܐ ܬܘܒ ܡܬܐܠܨܝ̣ܢ ܕܢܐܡܪܘܢ ܕܐܠܗܘܬܐ ܡܠܝܬ݀ ܠܗ ܕܘܟܬ݀ ܗܘܢܐ. ܒܗ̇ܝ ܕܠܢܦܫܐ ܚܝܘܬܢܝܬܐ ܘܠܗ̇ܝ ܢܨܒܬܢܝܬܐ ܠܝܬ ܗܘܢܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܐܢ ܟܝܢܐ ܐܠܗܝܐ ܐܫܬܚܠܦ ܘܐܬܡܙܓ ܒܦܓܪܐ ܫܡܝܢܐ. ܐܘ ܒܡܘܢ ܕܗ̣ܒ ܦܓܪܐ. ܘܚܕ ܟܝܢܐ ܡܡܙܓܐ ܡ̣ܢ ܬܪ̈ܝܗܘܢ ܗ̣ܘܐ. ܐܠܨܐ ܐ̱ܢܫܝܐ ܐܦܠܐ ܫܡܝܢܐ ܗ̇ܝ ܕܫܟܝ̣ܪܐ. ܘܗ̇ܘ ܩܕܡܝܐ܆ ܡܛܠ ܕܐܫܬܚܠܦ ܠܗ ܟܝܢܐ ܐܠܗܝܐ ܘܠܐ ܦܫ ܗ̇ܘ ܡܐ ܕܐܝܬܘܗܝ ܗ̣ܘܐ. ܘܗ̇ܘ ܕܬܪܝܢ. ܡܛܠ ܕܟܝܢܐ ܐ̱ܢܫܝܐ ܡ̣ܢ ܢܦܫܐ ܡܠܝ̣ܠܬܐ ܘܦܓܪܐ ܡܪܟܒ. ܘܗ̇ܘ ܦܓܪܐ ܕܐܡܪܝܢ ܓܠܝ̣ܙ ܗ̣ܘ ܡ̣ܢ ܢܦܫܐ ܡܠܝ̣ܠܬܐ. ܘܗ̇ܘ ܕܬܠܬܐ ܬܘܒ. ܡܛܠ ܕܠܟ̈ܝܢܐ ܫܡܝ̈ܢܐ ܟܠܗܘܢ ܚܘܕܪܢܝܐ ܗ̱ܘ ܐܣܟܡܐ. ܘܦܓܪܐ ܗ̇ܘ ܡܪܢܝܐ. ܝ̣ܕܝ̣ܥܐ ܕܐܣܟܡܐ ܩܢܐ ܗ̣ܘܐ ܐ̱ܢܫܝܐ. ܘܒܗܕܡ̈ܐ ܐ̱ܢܫܝ̈ܐ ܡܠܡܕ ܗ̣ܘܐ ܘܡܣܟܡ.

 

 

 

ܢܝܫܐ ܬܪܝܢܐ ܡܛܠ ܣܗܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܩܕܝܫܐ ܐܬܐܢܐܣܝܘܣ.

 

ܐܢ ܐ̱ܢܫ ܠܒܣܪܗ ܕܡܪܢ ܡ̣ܢ ܠܥܠ ܐܡ̇ܪ. ܘܠܘ ܡ̣ܢ ܒܬܘܠܬܐ ܩܕܝ̣ܫܬܐ ܡܪܝܡ. ܐܘ ܕܐܫܬܚܠܦܬ݀ ܐܠܗܘܬܐ ܠܒܣܪܐ. ܐܘ ܕܐܬܒܠܒܬ݀ ܐܘ ܐܫܬܓܢܝܬ݀. ܠܗܢܐ ܡܚܪܡܐ ܥܕܬܐ ܩܕܝܫܬܐ ܩܐܬܘܠܝܩܐ.

 

 

 

ܣܗܕܘܬܐ ܕܬܪܬܝܢ

 

ܕܩܕܝܫܐ ܡܪܝ ܐܝܘܐܢܢܝܣ ܡ̣ܢ ܡܐܡܪܐ ܕܥܠ ܒܝܬ ܝܠܕܐ. ܟܕ ܐܝܬܘܗܝ ܓܝܪ ܐܠܗܐ܆ ܗ̣ܘܐ ܒܪܢܫܐ. ܠܐ ܗ̣ܘܐ ܓܝܪ ܟܕ ܫܢ̣ܝ ܡ̣ܢ ܗ̇ܝ ܕܢܗܘܐ ܐܝܬܘܗܝ ܐܠܗܐ. ܠܘ ܓܝܪ ܒܫܘܢܝܐ ܕܐܠܗܘܬܐ ܗ̣ܘܐ ܗܘܐ ܒܪܢܫܐ. ܘܠܐ ܒܬܪܒܝ̣ܬܐ ܕܡ̣ܢ ܒܪܢܫܐ ܗ̣ܘܐ ܐܠܗܐ. ܐܠܐ ܟܕ ܐܝܬܘܗܝ ܡܠܬܐ ܐܠܗܐ. ܡܛܠ ܠܐ ܚܫܘܫܘܬܐ ܒܣܪܐ ܗܘܐ. ܟܕ ܟܬܪ ܟܝܢܗ ܠܐ ܡܫܬܚܠܦܢܐ ܣܗܕܘܬܐ ܕܬܠܬ ܕܩܕܝܫܐ ܣܐܘܝ̣ܪܐ ܒܡܐܡܪܐ ܩܕܡܝܐ ܕܟܬܒܐ ܩܕܡܝܐ ܕܐܦܝܬܪܘܢܝܘܢ. ܡܛܠ ܕܝܢ ܕܐܬܒܣܪ ܘܐܬܒܪܢܫ܆ ܘܕܠܐ ܫܘܚܠܦܐ ܩܘܝ̣ ܗ̇ܘ ܡܕܡ ܕܐܝܬܘܗܝ ܗ̣ܘܐ. ܗ̣ܘ ܟܕ ܗ̣ܘ ܘܡܘܬܐ ܛܥܡ. ܡܒܣܪ ܗ̣ܘܐ ܓܝܪ. ܘܠܐ ܡܝܘܬܐ ܡܩܘܐ. ܒܗ̇ܝ ܕܠܐ ܡܩܒܠܢܐ ܕܚܫ̈ܐ ܐܝܬܘܗܝ ܒܟܝܢܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܪܒܝܥܝܬܐ. ܡܛܠ ܬܪܥܝ̣ܬܐ ܫܟܝ̣ܪܬܐ ܕܐܘܛܘ̈ܟܝܐܢܘ. ܗ̇ܢܘܢ ܕܡܘܙܓܐ ܘܫܘܚܠܦܐ ܡܥܠܝܢ ܕܟܝܢܐ ܐܠܗܝܐ. ܘܒܗ ܐܝܬ ܕܟܝܢܐ ܐܠܗܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ. ܣܥܝܐ ܩܕܡܝܐ.

 

ܐܡܪܝܢ ܐܢ ܐܬܚܝܕ ܟܝܢܐ ܐܠܗܝܐ ܥܡ ܗ̇ܘ ܐ̱ܢܫܝܐ. ܠܘ ܗ̣ܘ ܟܕ ܗ̣ܘ ܩܘܝ̣. ܘܐܠܐ ܠܐ ܐܬܚܝܕ. ܘܟܕ ܠܘ ܗ̣ܘ ܟܕ ܗ̣ܘ ܩܘܝ܆ ܡ̣ܢ ܐܢܢܩܝ̣ ܕܐܫܬܚܠܦ ܘܐܬܡܙܓ ܥܡ ܗ̇ܘ ܕܥܡܗ ܐܬܚܝܕ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܟܝܢܐ ܐܠܗܝܐ ܟܕ ܐܬܚܝܕ ܥܡ ܟܝܢܐ ܐ̱ܢܫܝܐ. ܐܘ ܗ̣ܘ ܟܕ ܗ̣ܘ ܟܬܪ. ܐܘ ܠܘ ܗ̣ܘ ܟܕ ܗ̣ܘ. ܘܐܢ ܗ̣ܘ ܟܕ ܗ̣ܘ ܟܬܪ. ܐܝܟܐ ܗ̱ܘ ܫܘܘܕܥܐ ܕܚܕܝܘܬܐ. ܘܐܢ ܠܘ ܗ̣ܘ ܟܕ ܗ̣ܘ ܟܬܪ. ܡ̣ܢ ܐܢܢܩܝ̣ ܕܐܫܬܚܠܦ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܡܠܬܐ ܠܘ ܒܣܪܐ ܗ̱ܘ. ܐܦܠܐ ܒܣܪܐ ܡܠܬܐ. ܒܕܓܘܢ ܐܢ ܡܠܬܐ ܒܣܪܐ ܗܘܐ. ܟܕ ܡܠܬܐ ܟܬܪ. ܘܒܣܪܐ ܠܘ ܡܠܬܐ ܗ̱ܘ. ܡܬܟܢܫܐ ܕܡܠܬܐ ܠܘ ܡܠܬܐ ܗ̱ܘ܆ ܗ̇ܝ ܕܫܟܝ̣ܪܐ. ܒܗ̇ܝ ܕܠܘܬ ܡܪܝܡܢܘܬܐ ܕܡܕܡ ܡ̣ܢ ܝܬܗ ܡܘܒܠܐ. ܘܡ̣ܢ ܗܠܝܢ ܝ̣ܕܝ̣ܥܐ. ܕܗ̇ܝ ܕܡܠܬܐ ܒܣܪܐ ܗܘܐ. ܠܐ ܡܨܝܐ ܕܬܫܪ. ܐܠܐ ܥܡ ܫܘܪܪܐ ܕܡܘܙܓܐ ܘܫܘܚܠܦܐ.

 

 

 

ܢܝܫܐ ܬܪܝܢܐ ܡܛܠ ܣܗܕܘܬܗܘܢ ܟܬܒܝܬܐ

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܐܪܒܥܝܢ ܘܬܠܬܐ. ܕܠܘܩܒܠ ܐܪܣܝ̣ܣ. ܒܦܠܓܘܬܐ ܐ̱ܚܪܝܬܐ. ܐܢܗܘ ܕܠܘ ܗ̣ܝ ܟܕ ܗ̣ܝ ܗ̇ܝ ܕܠܐ ܡܬܚܙܐ ܠܗ̇ܝ ܕܡܬܚܙܐ. ܘܗ̇ܝ ܕܠܐ ܙܒܢܐ ܠܗ̇ܝ ܕܬܚܝܬ ܙܒܢܐ. ܠܘ ܐ̱ܚܪܢܐ ܕܝܢ ܘܐ̱ܚܪܢܐ ܠܐ ܬܗܘܐ. ܬܪ̈ܬܝܗܝܢ ܓܝܪ ܚܕ ܒܡܘܙܓܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܪܒܝ̣ܥܝܬܐ ܡܛܠ ܣܬܘܪܝܐ ܕܬܪܥܝ̣ܬܐ ܗܕܐ ܒܝ̣ܫܬܐ ܕܐܘܛܘ̈ܟܝܢܘ. ܘܒܗ ܐܝܬ ܢܝ̈ܫܐ ܬܪܝܢ ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘ̈ܫܒܝܐ. ܫܪܝܐ ܕܣܥܝܐ ܩܕܡܝܐ.

 

ܐܡܪܝܢܢ ܕܡ̣ܢ ܠܥܠ ܚܘܝ̣ܢܢ. ܕܚܕܝܘܬܐ ܢܩܝ̣ܦܘܬܐ ܗ̱ܝ ܕܟܝ̈ܢܐ ܠܚܕ̈ܕܐ. ܒܠܥܕ ܫܘܚܠܦܐ ܕܐܘܣܝܝܘܬܗܘܢ. ܐܝܟ ܢܦܫܐ ܕܡܬܚܝܕܐ ܠܦܓܪܐ ܒܠܥܕ ܗ̇ܝ ܕܢܫܬܚܠܦ ܟܝܢܐ ܕܢܦܫܐ ܠܟܝܢ ܦܓܪܐ. ܐܘ ܟܝܢܐ ܕܦܓܪܐ ܠܟܝܢ ܢܦܫܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܫܘܘܕܥܐ ܕܚܕܝܘܬܐ ܠܘ ܒܫܘܚܠܦܐ ܕܐܘܣܝܐ ܡܬܚܘܐ. ܐܠܐ ܒܣܥܘܪ̈ܘܬܐ ܬܡܝ̣̈ܗܬܐ ܕܥܒܪ̈ܢ ܠܗܘܢܐ ܐ̱ܢܫܝܐ. ܕܡ̣ܢ ܗ̇ܘ ܦܓܪܐ ܩܕܝ̣ܫܐ ܐܬܚܙܝܝ̈ܢ. ܘܒܣܗܕܘܬܗ ܕܐܒܐ ܘܡܓܢܢܘܬܗ ܕܪܘܚܐ ܩܕܝ̣ܫܐ ܥܠܘܗܝ ܕܦܪܘܩܐ ܕܟܠܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܗ̇ܝ ܕܢܗܘܐ ܡܕܡ ܡܕܡ ܐ̱ܚܪܢܐ. ܐܘ ܥܡ ܫܘܚܠܦܐ ܕܒܐܘܣܝܐ ܗܘܐ. ܐܝܟ ܕܗ̇ܝ ܕܢܗܘܐ ܐܐܪ ܡܝ̈ܐ ܘܡܝ̈ܐ ܐܐܪ. ܐܘ ܠܘ ܥܡ ܫܘܚܠܦܐ ܕܒܐܘܣܝܐ. ܘܗ̣ܘ ܗܢܐ ܙܢܐ. ܐܘ ܥܡ ܫܘܚܠܦܐ ܕܙܢܝ̈ܐ ܗܠܝܢ ܕܒܐܘܣܝܐ ܡܬܩܝܡܝ̣ܢ. ܒܦܓܪܐ ܡ̇ܢ܆ ܐܝܟ ܗ̇ܝ ܕܢܐܡܪ ܕܗܘܐ ܓܘܫܡܐ ܚܘܪܐ. ܘܒܢܦܫܐ ܐܝܟ ܗ̇ܝ ܕܢܐܡܪ ܗܘܬ݀ ܢܦܫܐ ܚܟܝ̣ܡܬܐ. ܐܘ ܠܘ ܥܡ ܫܘܚܠܦܐ ܕܙܢܝ̈ܐ ܗܠܝܢ ܕܒܐܘܣܝܐ ܡܬܩܝܡܝ̣ܢ. ܐܠܐ ܥܡ ܫܘܚܠܦܐ ܕܦܘ̈ܚܡܐ ܘܐ̱ܚܝܢܘ̈ܬܐ ܒܪ̈ܢܝܬܐ ܕܡ̣ܢ ܓܢܣܐ ܕܩܛܝ̣ܓܘܪܝܐ ܕܠܘܬ ܡܕܡ ܐܝܟ ܗ̇ܝ ܕܐܡܝ̣ܪܐ ܠܕܘܝܕ. ܡܪܝܐ ܒܝܬ ܡܥܡܪܐ ܗܘܝܬ ܠܢ ܠܕܪܕܪ̈ܝܢ.ܘܐܝܟ ܗ̇ܝ ܕܐܡܝ̣ܪܐ ܕܗܘܐ ܗܒܝܠ ܪܥܝܐ ܕܥܪ̈ܒܐ. ܒܕܓܘܢ ܐܡܪܝܢܢ ܕܗ̇ܝ ܕܡܠܬܐ ܒܣܪܐ ܗ̣ܘܐ. ܠܘ ܠܫܘܚܠܦܐ ܕܒܐܘܣܝܐ ܡܫܘܕܥܐ. ܡܛܠ ܬܪܬܝܢ. ܚܕܐ ܡ̇ܢ ܕܟܝܢܐ ܐܠܗܝܐ ܠܐ ܡܫܬܚܠܦܢܐ ܗ̱ܘ. ܘܕܬܪܬܝܢ ܗ̣ܝ ܡܠܬܗ ܐܠܗܐ ܠܐ ܣܒܠ ܫܘܚܠܦܐ. ܒܗ̇ܝ ܕܗ̇ܘ ܕܡܐܓܢ ܐ̱ܚܪܢܐ ܗ̱ܘ ܡ̣ܢ ܗ̇ܘ ܕܒܗ ܡܐܓܢ. ܐܦܠܐ ܬܘܒ ܫܘܚܠܦܐ ܕܒܓܕ̈ܫܐ ܡܛܠ ܕܐܠܗܐ ܫܘܒܚܐ ܠܛܝܒܘܬܗ ܠܐ ܡܩܒܠܢܐ ܗ̱ܘ ܕܓܕ̈ܫܐ. ܫܪܝ̣ܟܐ ܡܕܝܢ ܕܠܫܘܚܠܦܐ ܗ̇ܘ ܕܐ̱ܚܝܢܘܬܐ ܕܗ̣ܝ ܗ̣ܝ ܚܕܝܘܬܐ ܕܐܠܗܐ ܡܠܬܐ ܥܡ ܒܣܪܐ ܡܫܘܕܥܐ. ܗ̇ܝ ܕܡܠܬܐ ܒܣܪܐ ܗ̣ܘܐ. ܟܐܡܬ݀ ܠܢܣܝ̣ܒܘܬܐ ܕܒܣܪܐ ܗ̇ܘ ܕܡܠܬܐ ܚܝܕ ܠܗ. ܘܗ̣ܝ ܗܕܐ ܢܣܝ̣ܒܘܬܐ ܠܘ ܐܝܟ ܢܣܝ̣ܒܘܬܐ ܕܐܘܡܢܘܬܐ ܐܡܪܝܢܢ. ܐܟܙܢܐ ܕܐܦ ܗܒܝܠ ܐܘܣܦ ܢܣܒ ܪܥܝܘܬܐ. ܐܘ ܐܝܟ ܬܘܣܦܬܐ ܕܐܝܩܪܐ. ܐܝܟ ܕܟܬܝ̣ܒ. ܘܐܬܗܝܡܢ ܫܡܘܐܝܠ ܕܢܗܘܐ. ܢܒܝܐ ܠܡܪܝܐ ܒܟܠܗ ܐܝܣܪܐܝܠ. ܐܠܐ ܒܚܕܝܘܬܐ ܟܝܢܝܬܐ ܘܩܢܘܡܝܬܐ. ܐܝܟ ܕܙܒ̈ܢܬܐ ܐܦܘܕܝܟܣܐ ܥܒܕܢܢ. ܘܬܘܒ ܐܡܪܝܢܢ ܕܐܟܙܢܐ ܕܡܪܢ ܠܘܛܬܐ ܗ̣ܘܐ. ܟܕ ܠܐ ܐܝܬܘܗܝ ܬܚܝܬ ܠܘܛܬܐ. ܕܠܗ̇ܢܘܢ ܕܬܚܝܬ ܠܘܛܬܐ ܢܐܬܪ. ܘܐܝܟ ܗ̇ܝ ܕܐܡ̣ܪ ܦܘܠܘܣ ܡܛܠ ܢܦܫܗ. ܕܗܘܝܬ ܠܗ̇ܢܘܢ ܕܬܚܝܬ ܢܡܘܣܐ. ܐܝܟ ܕܬܚܝܬ ܢܡܘܣܐ. ܟܕ ܠܐ ܐܝܬܝ ܐܢܐ ܬܚܝܬ ܢܡܘܣܐ. ܕܠܗ̇ܢܘܢ ܕܬܚܝܬ ܢܡܘܣܐ ܐܬܪ. ܗܟܢܐ ܐܦ ܡܠܬܐ ܒܣܪܐ ܗܘܐ ܠܐ ܡܫܬܚܠܦܢܐܝܬ ܥܡ ܗ̇ܝ ܕܩܘܝ̣ ܐܠܗܐ. ܡܛܠ ܕܠܢ ܒܣܪ̈ܢܐ ܠܐ ܡܬܚܠܦ̈ܢܐ ܢܥܒܕ ܠܢ ܠܘܬ ܚܛܝ̣ܬܐ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕܘܬܗܘܢ ܟܬܒܝܬܐ

 

ܐܡܪܝܢܢ ܕܩܕܝܫܐ ܓܪܝܓܘܪܝܘܣ ܟܕ ܠܘܩܒܠ ܗ̇ܢܘܢ ܕܣܕܩܝ̣ܢ ܟܝ̈ܢܐ ܘܩܢܘ̈ܡܐ ܣܕܪ ܡܠܬܐ. ܐܟܡܐ ܕܗ̣ܘ ܦܣܘܩܐ ܗ̇ܘ ܡܫܘܕܥ. ܠܚܕܝܘܬܐ ܡܘܙܓܐ ܩܪܐ. ܐܟܡ̇ܢ ܕܝܬܝ̣ܪ ܡܫܪܪܬܐ ܢܚܘܝܗ̇ ܟܐܡܬ݀ ܟܝܢܝܬܐ ܘܩܢܘܡܝܬܐ. ܘܠܘ ܦܪܨܘܦܝܬܐ ܒܠܚܘܕ. ܐܟܡܐ ܕܐ̱ܢܫܝ̣̈ܢ ܐܣܒܪܘ. ܘܬܘܒ ܐܡܪܝܢܢ. ܕܥܝܕܐ ܐܝܬ ܠܗ ܠܡܠܦܢܐ ܗܢܐ ܕܠܚܕܝܘܬܐ ܐܝܟ ܕܒܣܘܓܐܐ ܡܘܙܓܐ ܢܩܪܝܗ̇. ܐܘ ܡܛܠ ܕܠܐ ܒܛܝ̣ܠ ܠܗ ܥܠ ܒܢ̈ܬ ܩ̈ܠܐ ܐܠܐ ܥܠ ܪ̈ܥܝܢܐ ܒܠܚܘܕ. ܐܘ ܡܛܠ ܡܫܠܛܘܬܗ ܕܥܠ ܡ̈ܠܐ ܒܫܘܝܘܬ ܫܡܐ ܡܬܚܫܚ. ܐܘ ܡܛܠ ܗ̇ܝ ܕܟܕ ܨܒܐ ܕܝܬܝܪ̣ ܚܣܝ̣ܢܐܝܬ ܢܫܪܪܝܗ̇ ܠܬܪܥܝ̣ܬܐ ܗܕܐ ܕܥܠܝܗ̇ ܡܡܠܠ. ܒܓܒܐ ܕܣܩܘܒܠܝ ܡܡܠܠ. ܒܓܒܐ ܕܣܩܘܒܠܝ ܫܢܙܐ ܡܠܬܗ. ܗܐ ܓܝܪ ܠܚܕܝܘܬܐ ܕܢܦܫܐ ܘܕܦܓܪܐ ܡܘܙܓܐ ܩܪܐ ܟܕ ܐܡ̇ܪ ܒܡܐܡܪܐ ܕܥܠ ܒܝܬ ܝܠܕܐ. ܠܐ ܕܝܢ ܥܕܟܝܠ ܐܝܬ ܗܘܐ ܡܘܙܓܐ ܕܡ̣ܢ ܬܪ̈ܝܗܘܢ. ܐܦܠܐ ܚܘܠܛܢܐ ܡܕܡ ܕܗܠܝܢ ܕܣܩܘܒ̈ܠܝܢ. ܘܓܠܝܐ ܕܠܘ ܡܚܠܛ ܚܠܝ̣ܛܐ ܐܦܠܐ ܡܙܝ̣ܓܐ ܢܦܫܐ ܥܡ ܦܓܪܐ ܐܘ ܗܘܢܐ ܥܡ ܪܓܫܬܐ. ܐܠܐ ܒܠܚܘܕ ܕܡܠܚܘܬܐ ܘܡܬܡܠܚܢܘܬܐ ܗ̱ܝ ܚܕܝܘܬܗܘܢ ܐܝܟ ܐܠܦܪܐ ܕܐܠܦܐ.

 

 

 

ܩܦܠܐܘܢ ܫܬܝܬܝܐ ܕܫܬܐܣܬܐ ܪܒܝ̣ܥܝܬܐ ܡܛܠ ܗ̇ܝ ܕܠܘ ܠܟܝܢ ܡܠܬܐ ܐܫܬܚܠܦ ܦܓܪܐ ܒܬܪ ܚܕܝܘܬܐ. ܐܦܠܐ ܐܟܘܬܗ ܠܐ ܡܣܝܟܐ ܘܠܐ ܚܫܘܫܐ ܗܘܐ ܡ̣ܢ ܩܕܡ ܩܝܡܬܐ ܐܝܟ ܕܐܡܪܝܢ ܝܘܠܝܢܝ̈ܣܛܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܫܘܪܪܗ̇ ܕܬܪܥܝ̣ܬܐ ܗܕܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܢ ܠܐ ܒܪܝܐ ܗ̱ܘ ܦܓܪܗ ܕܡܪܢ. ܡ̣ܢ ܐܢܢܩܝ̣ ܕܐܘ ܡܬܘܡܝܐ ܗ̱ܘ. ܐܘ ܕܠܐ ܥܕܟܝ̣ܠ ܐܬܒܪܝ̣. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܡ̣ܢ ܡܪܝܡ ܩܢܐ ܫܘܪܝܐ. ܗܟܘܬ ܘܗ̇ܘ ܕܬܪܝܢ ܠܐ ܫܪܝ̣ܪ. ܘܐܠܐ ܒܛܠܐ ܠܗ̇ ܟܠܗ̇ ܡܕܒܪܢܘܬܐ. ܘܟܕ ܡ̣ܢ ܗ̇ܝ ܕܠܐ ܒܪܝܐ ܫܟܝ̣ܪ̈ܘܬܐ ܕܐܝܟ ܗܠܝܢ ܓܕ̈ܫܢ. ܠܘ ܠܐ ܒܪܝܐ ܗ̱ܘ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܐܢ ܠܘ ܒܪ ܟܝܢܢ ܗ̣ܘ ܦܓܪܗ ܕܡܪܢ. ܐܟܡܢ ܕܠܟܝܢ ܡܠܬܐ ܐܫܬܚܠܦ ܒܝܕ ܚܕܝܘܬܐ. ܚܕܐ ܡ̣ܢ ܬܪܬܝܢ ܐܠܨܐ. ܕܐܘ ܠܐ ܓܫܝ̣ܡܐ ܘܠܐ ܡܬܚܙܝܢܐ ܗ̣ܘܐ ܐܟܘܬܗ ܕܡܠܬܐ. ܐܘ ܕܠܠܝܬܝܘܬܐ ܘܓܠܝ̣ܙܘܬܐ ܫܪܟ. ܘܟܕ ܬܪ̈ܬܝܗܝܢ ܫܟܝ̣ܪ̈ܢ. ܡܬܟܢܫܐ ܕܒܪ ܟܝܢܢ ܗ̣ܘ ܦܓܪܗ ܕܡܪܢ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܐܢ ܦܓܪܗ ܕܐܠܗܐ ܐܠܗܐ ܗ̱ܘ ܒܟܝܢܐ. ܡܕܝܢ ܐܠܗܐ ܕܐܠܗܐ ܗ̱ܘ ܒܟܝܢܐ ܗ̇ܝ ܕܫܟܝ̣ܪܐ.

 

 

 

ܗܦܟܬܐ

 

ܐܢ ܦܓܪܗ ܕܐܠܗܐ ܠܘ ܐܠܗܐ ܗ̱ܘ ܒܟܝܢܐ. ܡܕܝܢ ܒܛܝܒܘܬܐ ܗ̱ܘ ܐܠܗܐ. ܘܐܢ ܗܕܐ ܫܦܪܐ ܠܟ ܠܡܢܐ ܪܫܐ ܐܢ̱ܬ ܠܢܣܛܘܪܝܘܣ. ܟܕ ܗܠܝܢ ܕܝܠܗ ܡܘܕܐ ܐܢ̱ܬ.

 

 

 

ܦܘܢܝܐ

 

ܐܡܪܝܢܢ ܕܐܠܗܐ ܐܠܗܐ ܗ̱ܘ ܒܟܝܢܐ. ܘܦܓܪܐ ܦܓܪܐ ܗ̱ܘ ܒܟܝܢܐ ܕܠܐ ܫܘܚܠܦܐ. ܘܡܛܠ ܚܕܝܘܬܐ ܚܕ ܟܝܢܐ ܐܡܪܝܢܢ ܕܐܠܗܐ ܕܡܒܣܪ. ܐܝܟܢܐ ܕܠܗܠ ܢܗܘܐ ܡ̣ܢ ܬܪ̈ܬܝܗܝܢ ܗܠܝܢ ܫܟܝ̣ܪ̈ܘܬܐ. ܟܐܡܬ݀ ܡ̣ܢ ܗ̇ܝ ܕܠܦܓܪܐ ܐܠܗܐ ܢܘܕܝܘܗܝ ܒܟܝܢܐ. ܘܢܢܟܪܝܘܗܝ ܡ̣ܢ ܟܝܢܗ ܐܟܘܬܟܘܢ. ܘܡ̣ܢ ܗ̇ܝ ܕܬܪܝܢ ܐܠܗܝ̈ܢ ܢܐܡܪ ܚܕ ܒܟܝܢܐ ܘܐ̱ܚܪܢܐ ܒܛܝܒܘܬܐ ܐܝܟ ܢܣܛܘܪܝܘܣ. ܘܗܟܢܐ ܠܘ ܠܟܐ ܘܠܟܐ ܡ̣ܢ ܐܘܪܚܐ ܡܠܟܝܬܐ ܡܣܛܝܢܢ. ܟܕ ܒܥܩ̈ܒܬܐ ܕܐܒܗ̈ܬܐ ܩܕܝ̈ܫܐ ܪܕܝܢܢ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܐܢ ܡܠܬܐ ܘܦܓܪܐ ܚܕ ܐܢܘܢ ܟܝܢܐ ܒܙܢܐ ܕܡܘܙܓܐ ܘܫܘܚܠܦܐ ܐܝܟ ܕܐܡܪܝܢ ܐܢ̱ܬܘܢ. ܘܠܘ ܚܕ ܡ̣ܢ ܬܪܝܢ ܥܡ ܢܛܝ̣ܪܘܬ ܫܘܘ̈ܕܥܐ ܕܫܘܚܠܦܐ ܟܝܢܝܐ. ܚܕܐ ܡ̣ܢ ܬܪܬܝܢ ܐܠܨܐ. ܕܐܘ ܡܠܬܐ ܓܘܫܡܐ ܢܗܘܐ ܐܝܟ ܦܓܪܐ. ܐܘ ܦܓܪܐ ܠܐ ܓܫܘ̣ܡ ܐܝܟ ܡܠܬܐ. ܘܬܪ̈ܬܝܗܝܢ ܫܟܝ̣ܪ̈ܢ.

 

 

 

ܡܚܘܝܢܘܬܐ ܕܚܡܫ

 

ܐܡܪܝܢܢ ܐܢܗܘ ܕܠܐ ܚܫܘܫܐ ܘܠܐ ܡܝܘܬܐ ܐܝܬܘܗܝ ܗ̣ܘܐ ܦܓܪܗ ܕܡܪܢ ܡ̣ܢ ܩܕܡ ܩܝܡܬܐ. ܐܟܡܐ ܕܐܦ ܡ̣ܢ ܒܬܪ ܩܝܡܬܐ. ܠܐ ܡܕܝܢ ܩܡ. ܘܐܝܟܢܐ ܢܩܘܡ ܡ̣ܢ ܡܝ̈ܬܐ ܗ̇ܘ ܕܠܐ ܡܝ̣ܬ. ܘܐܢ ܡܫܝ̣ܚܐ ܠܐ ܡܝܬ ܘܠܐ ܩܡ. ܣܪܝ̣ܩܐ ܗ̱ܝ ܟܪܘܙܘܬܢ ܐܝܟ ܕܐܡ̣ܪ ܦܘܠܘܣ.

 

 

 

ܗܦܟܬܐ

 

ܒܨܒܝܢܐ ܐܡܪܝܢܢ ܕܚܫ ܘܡܝ̣ܬ ܘܩܡ. ܘܠܘ ܒܟܝܢܐ. ܒܗ̇ܝ ܕܐܠܘܠܐ ܨܒܝܢܝ̈ܐ ܗ̣ܘܘ ܚܫܘ̈ܗܝ ܐܠܐ ܟܝܢܝ̈ܐ. ܡܫܬܟܚ ܗ̣ܘܐ ܟܕ ܠܐ ܨܒܐ ܗ̣ܘܐ ܚܫ ܘܡܝ̣ܬ. ܒܗ̇ܝ ܕܙܢܝ̈ܐ ܟܝܢܝ̈ܐ ܐܢܢܩܝ̈ܐ ܐܢܘܢ ܘܠܐ ܡܫܬܥܒܕܝ̣ܢ ܠܫܠܝ̣ܛܘܬ ܒܝܬܐ. ܘܡ̣ܢ ܗܪܟܐ ܒܫܟܝ̣ܪܘܬܐ ܕܚܫ̈ܐ ܩܛܝ̣ܪ̈ܝܐ ܢܦܠ ܐܠܨܐܝܬ ܗ̇ܘ ܕܚܫ̈ܐ ܟܝܢܝ̈ܐ ܡܘܕܐ.

 

 

 

ܦܘܢܝܐ

 

ܐܡܪܝܢܢ ܕܡܛܥܐ ܛܥܝܢ ܐܢ̱ܬܘܢ ܒܗ̇ܘ ܡܐ ܕܐܬܗܓܓܬܘܢ. ܟܕ ܠܙܢܝ̈ܐ ܩܛܝ̣ܪ̈ܝܐ ܥܠ ܙܢܝ̈ܐ ܟܝܢܝ̈ܐ ܕܣܩܘܒ̈ܠܝܝܢ ܠܗܘܢ ܩܛܪܓܬܘܢ ܘܐܝܟ ܗ̇ܘ ܕܠܐܘܟܡܘܬܐ ܥܠ ܚܘܪܘܬܐ ܘܠܟܘܪܗܢܐ ܥܠ ܚܘܠܡܢܐ ܐܬܚܙܝܬܘܢ ܕܡܩܛܪܓܝܢ ܐܢ̱ܬܘܢ. ܘܬܘܒ ܐܡܪܝܢܢ ܐܠܘ ܟܠ ܟܝܢܝܐ ܩܛܝ̣ܪܝܐ ܗܘܐ. ܡܫܬܟܚ ܐܠܗܐ ܫܘܒܚܐ ܠܛܝܒܘܬܗ ܕܡ̣ܢ ܩܛܝ̣ܪ ܗܘܬ݀ ܗ̇ܝ ܕܛܒܐ ܢܗܘܐ. ܘܟܕ ܠܐ ܨܒܐ ܡܪܚܡܢܐ ܗ̱ܘ ܘܥܠ ܟܠ ܦܪܝ̣ܣܐ ܒܛܝ̣ܠܘܬܗ. ܘܬܘܒ ܐܡܪܝܢܢ ܕܨܒܝܢܝܐ ܠܘ ܣܩܘܒܠܝܐ ܗ̱ܘ ܕܟܝܢܐ. ܒܗ̇ܝ ܕܐܝܟ ܕܒܣܘܓܐܐ ܠܚܕ̈ܕܐ ܢܩܦܝ̣ܢ. ܘܥܡ ܚܕ̈ܕܐ ܡܫܬܟܚܝ̣ܢ ܘܡܬܐܘܝܢ. ܒܕܓܘܢ ܗ̣ܘ ܦܪܘܩܢ. ܟܕ ܨܒܐ ܘܫܦܪ ܠܗ. ܐܫܠܡ ܦܓܪܗ ܠܡܣܒܠ ܚܫ̈ܐ ܟܝܢܐܝܬ.

 

 

 

ܡܚܘܝܢܘܬܐ ܕܫܬ

 

ܐܡܪܝܢܢ ܐܢ ܐܝܟ ܡܠܬܟܘܢ ܨܒܝܢܐܝܬ ܘܠܘ ܟܝܢܐܝܬ ܡܝ̣ܬ. ܠܐ ܐܬܦܪܫܬ݀ ܢܦܫܗ ܡ̣ܢ ܦܓܪܗ. ܒܗ̇ܝ ܕܡܘܬܐ ܟܝܢܝܐ ܦܘܪܫܢܐ ܗ̱ܘ ܕܢܦܫܐ ܡ̣ܢ ܦܓܪܐ. ܘܐܢ ܢܦܫܗ ܠܐ ܐܬܦܪܫܬ݀ ܡ̣ܢ ܦܓܪܗ. ܚܝ ܗ̣ܘܐ ܒܒܣܪ. ܘܐܢܗܘ ܕܒܒܣܪ ܚܝ ܗ̣ܘܐ. ܘܒܐܠܗܘܬܗ ܗܟܘܬ ܠܐ ܡܝܘܬܐ ܗ̱ܘ. ܒܐܝܢܐ ܐܪܐ ܙܢܐ ܡܝ̣ܬ ܡܘܬܐ ܗ̇ܘ ܨܒܝܢܝܐ ܕܐܡܪܝܢ ܐܢ̱ܬܘܢ. ܟܕ ܠܐ ܒܒܣܪ ܐܦܠܐ ܒܐܠܗܘܬܗ ܡܝ̣ܬ.

 

 

 

ܡܚܘܝܢܘܬܐ ܕܫܒܥ

 

ܐܡܪܝܢܢ ܐܢܗܘ ܕܟܕ ܠܐ ܣܢܝ̣ܩ ܗ̣ܘܐ ܥܠ ܣܝܒܪܬܐ. ܘܠܐ ܚܫܘܫܐ ܘܠܐ ܡܝܘܬܐ ܗܘܐ ܒܟܝܢܗ. ܚܘܝ̣ ܕܣܢܝ̣ܩ ܥܠ ܣܝܒܪܬܐ. ܘܕܚܫ ܘܡܝ̣ܬ ܐܝܟ ܕܒܦܢܛܣܝܐ ܘܗܓܓܘܬܐ ܘܠܘ ܒܫܪܪܐ. ܒܕܓܘܢ ܐܘ ܡ̣ܢ ܗ̇ܢܘܢ ܕܟܦ̣ܪܘ ܒܗ ܨܒܐ ܕܢܚܘܐ ܠܐ ܣܢܝ̣ܩܘܬܗ ܘܠܐ ܚܫܘܫܘܬܗ ܘܠܐ ܡܝܘܬܘܬܗ. ܐܢ ܡ̣ܢ ܗ̇ܢܘܢ ܕܗܝܡܢܘ ܒܗ. ܘܗ̇ܘ ܩܕܡܝܐ ܠܐ ܫܪܝ̣ܪ ܒܗ̇ܝ ܕܐܠܘ ܐܫܬܪܪܘ ܠܐ ܚܫܘܫܘܬܗ ܛܟ ܗܝܡܢܘ ܒܗ ܘܠܐ ܐܒ̣ܕܘ ܡ̣ܢ ܐܘܪܚܗ. ܘܗ̇ܘ ܕܬܪܝܢ ܬܘܒ ܠܐ ܫܪܝ̣ܪ. ܒܗ̇ܝ ܕܐܝܟܢܐ ܦܐܐ ܗ̣ܘܐ ܠܗ ܠܡܛܥܝܘ ܠܗ̇ܢܘܢ ܕܝܠܗ. ܘܐܘܪܚܐ ܕܠܘܬ ܟܦܘܪܘܬܐ ܢܕܪܘܫ ܠܗܘܢ. ܘܕܟܕ ܠܐ ܡܝܘܬܐ ܗ̱ܘ. ܢܚܘܐ ܐܢܘܢ ܕܡܝ̣ܬ. ܘܟܕ ܬܪ̈ܝܗܘܢ ܠܐ ܫܪܝ̣ܪܝܢ. ܐܦܠܐ ܗ̇ܝ ܕܒܦܢܛܣܝܐ ܚܘ̣ܝ ܕܚܫ ܘܡܝ̣ܬ ܟܕ ܠܐ ܚܐܫ ܘܠܐ ܡܝ̣ܬ ܫܪܝܪܐ.

 

 

 

ܡܚܘܝܢܘܬܐ ܕܬܡܢܐ

 

ܐܡܪܝܢܢ ܐܠܘܠܐ ܡܣܝܟܐ ܗܘܐ ܕܦܓܪܗ ܕܡܪܢ. ܐܝܟܢܐ ܒܥܠܡܐ ܗܢܐ ܕܡܣܝܟܐ ܗ̣ܘ ܐܬܥܪܝ̣. ܠܐ ܡܣܝܟܐ ܓܝܪ ܒܡܣܝܟܐ ܠܐ ܡܨܐ ܠܡܬܥܪܝܘ. ܘܬܘܒ ܐܠܘܠܐ ܡܣܝܟܐ ܗܘܐ. ܠܘ ܬܠܝ̣ܬܝ ܩܝ̈ܡܐ ܗܘܐ. ܘܐܠܘ ܠܘ ܬܠܝ̣ܬܝ ܩܝ̈ܡܐ ܗܘܐ܆ ܓܘܫܡܐ ܠܐ ܗܘܐ. ܘܐܠܘ ܠܘ ܓܘܫܡܐ ܗܘܐ. ܐܦܠܐ ܦܓܪܐ ܗܘܐ ܘܐܝܟܢܐ ܦܓܪܐ ܩܪܝܬܘܢ ܠܗ. ܘܬܘܒ ܐܠܘܠܐ ܡܣܝܟܐ ܗܘܐ. ܐܝܟܢܐ ܒܟܪܣܗ̇ ܕܡܪܝܡ ܡܬܐܡܪ ܕܐܬܒܛܢ ܕܝ̣ܠܢܐܝܬ. ܘܠܘ ܒܟܠ ܟܪܣ ܕܟܠ ܢܫܝ̣̈ܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܕܡܫܪܪ̈ܢ ܗ̇ܝ ܕܡ̣ܢ ܩܕܡ ܩܝܡܬܐ ܚܫܘܫܐ ܘܡܝܘܬܐ ܘܡܬܚܒܠܢܐ ܗܘܐ ܒܟܝܢܐ ܦܓܪܗ ܕܦܪܘܩܢ. ܣܗܕܘܬܐ ܩܕܡܝܬܐ

 

ܩܕܝܫܐ ܐܬܐܢܐܣܝܘܣ ܡ̣ܢ ܡܐܡܪܐ ܕܥܠ ܬܠܝ̣ܬܝܘܬܐ ܩܕܝܫܬܐ ܘܡܬܒܣܪܢܘܬܐ ܕܡܠܬܐ. ܡ̣ܢ ܐܝܟܐ ܐܬܡܠܟ ܠܟܘܢ ܕܒܣܪܐ ܠܐ ܒܪܝܐ ܬܐܡܪܘܢ. ܡܕܝܢ ܐܘ ܠܗ̇ ܠܐܠܗܘܬܐ ܕܡܠܬܐ ܕܢܦܠܬ݀ ܘܐܫܬܚܠܦܬ݀ ܠܒܣܪܐ ܡܫܬܪܓܪܓܝ̣ܢ ܐܢ̱ܬܘܢ. ܐܘ ܠܡܕܒܪܢܘܬܐ ܕܚܫܐ ܘܡܘܬܐ ܘܩܒܘܪܬܐ ܗܓܓܘܬܐ ܡܣܒܪܝܢ ܐܢ̱ܬܘܢ.

 

 

 

ܣܗܕܘܬܐ ܕܬܪܬܝܢ

 

ܗ̣ܘ ܟܕ ܗ̣ܘ ܒܐܓܪܬܐ ܕܠܘܬ ܐܦܝܩܛܝܩܘܣ. ܐܝ̇ܕܐ ܫܝܘܠ ܓܣܬ݀ ܕܢܬܐܡܪ ܕܒܪ ܟܝܢܐ ܗ̱ܘ ܕܐܠܗܘܬܗ ܕܡܠܬܐ ܦܓܪܐ ܕܡ̣ܢ ܡܪܝܡ. ܐܘ ܕܗ̣ܘ ܡܠܬܐ ܐܫܬܚܠܦ ܠܒܣܪܐ ܘܓܪ̈ܡܐ.

 

 

 

ܣܗܕܘܬܐ ܕܬܠܬ

 

ܕܩܕܝܫܐ ܐܦܝܦܐܢܝܣ ܕܩܘܦܪܘܣ. ܡ̣ܢ ܟܬܒܐ ܕܠܘܩܒܠ ܐܪ̈ܣܝ̣ܣ. ܒܕܓܘܢ ܟܕ ܚܟܡܬܐ ܐܝܬܘܗܝ܆ ܘܐܠܗܐ ܠܐ ܚܫܘܫܐ ܐܝܬܘܗܝ: ܘܝ̣ܕܥ ܕܒܝܕ ܚܫ̈ܐ ܦܪܩ ܠܗ̇ܢܘܢ ܕܩܢܝܢ ܚܫ̈ܐ ܕܒܣܪܐ. ܠܐ ܐܝܙܓܕܐ ܫܕܪ. ܐܦܠܐ ܡܠܐܟܐ. ܘܠܐ ܠܢ̈ܒܝܐ ܐܝܟ ܕܡ̣ܢ ܩܕܡܘܗܝ. ܐܠܐ ܗ̣ܘ ܡܪܝܐ ܐܬܐ. ܘܟܕ ܢܣܒܗ ܠܚܫܘܫܐ ܒܗ ܚܫ ܫܪܝ̣ܪܐܝܬ. ܟܕ ܐܠܗܘܬܗ ܠܐ ܚܫܘܫܬܐ ܟܬܪܬ݀.

 

 

 

ܣܗܕܘܬܐ ܕܐܪܒܥ

 

ܩܕܝܫܐ ܐܝܘܐܢܢܝܣ ܡ̣ܢ ܡܐܡܪܐ ܕܐܪܒܥܐ ܕܦܘܫܩܐ ܕܐܓܪܬܐ ܕܠܘܬ ܥܒܪ̈ܝܐ. ܠܗ̇ܘ ܕܡܟ ܩܠܝ̣ܠ ܡ̣ܢ ܡܠܐܟ̈ܐ. ܚܙܝܢܢ ܠܝܫܘܥ ܡܛܠ ܚܫܐ ܕܡܘܬܐ. ܘܒܬܪܟܢ ܬܘܒ ܘܗܠܝܢ ܡܝܬܪ̈ܬܐ ܒܬܫܒܘܚܬܐ ܘܒܐܝ̣ܩܪܐ ܡܟܠܠ. ܚܙܝܬ ܐܝܟܢܐ ܟܠܗܝܢ ܠܗ ܠܚܡ. ܗ̇ܝ ܓܝܪ ܕܩܠܝ̣ܠ. ܠܡܢܘ̣ ܐ̱ܚܪܢܐ ܠܚܡܐ. ܐܠܐ ܠܗ ܠܗ̇ܘ ܕܬܠܬܐ ܝܘܡܝ̈ܢ ܒܠܚܘܕ ܗܘܐ ܒܫܝܘܠ. ܘܠܘ ܠܢ ܗܠܝܢ ܕܣܓܝܐܝܬ ܡܬܬܚܕܝ̣ܢܢ.

 

 

 

ܣܗܕܘܬܐ ܕܚܡܫ

 

ܩܕܝܫܐ ܦܪܘܩܠܘܣ ܡ̣ܢ ܦܘܫܩܐ ܕܐܓܪܬܐ ܕܠܘܬ ܩܘܠܣܝ̈ܐ. ܡܚܝܗܝ ܡܘܬܐ ܠܡܫܝܚܐ. ܐܠܐ ܡܫܝܚܐ ܟܕ ܒܠܥ܆ ܠܚܪܬܐ ܗ̣ܘ ܩܛܠܗ ܒܦܓܪܐ ܡܝܘܬܐ ܡܬܒܛܠ ܗܘܐ. ܗ̇ܘ ܕܡܣܒܪ ܗܘܐ ܕܠܝܬܘܗܝ ܡܝܘܬܐ.

 

 

 

ܣܗܕܘܬܐ ܕܫܬ

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܒܐܓܪܬܐ ܕܠܘܬ ܩܠܝܕܘܢܝܘܣ. ܡܣܝܟܐ ܒܒܣܪ. ܘܠܐ ܡܣܝܟܐ ܒܐܠܗܘܬܐ. ܗ̣ܘ ܟܕ ܗ̣ܘ ܐܪܥܢܝܐ ܘܫܡܝܢܐ. ܡܬܚܙܝܢܐ ܘܡܬܝܕܥܢܐ. ܘܡܬܬܚܕܢܐ ܘܠܐ ܡܬܬܚܕܢܐ.

 

 

 

ܣܗܕܘܬܐ ܕܫܒܥ

 

ܩܕܝܫܐ ܒܣܝܠܝܘܣ. ܕܗ̣ܘ ܡܪܝܐ ܠܫܘܪܪܐ ܕܡܬܒܪܢܫܢܘܬܐ ܫܪܝܪܬܐ ܠܘ ܒܡܣܒܪܢܘܬܐ ܩܒܠ ܠܚܫ̈ܐ ܟܝܢܝ̈ܐ ܕܒܣܪܐ.

 

 

 

ܣܗܕܘܬܐ ܕܬܡܢܐ

 

ܡܪܝ ܐܦܪܝܡ ܡܠܦܢܐ ܣܘܪܝܝܐ. ܡ̣ܢ ܡܐܡܪܐ ܕܥܠ ܝܠܕܗ ܕܒܘܟܪܐ. ܐܠܗܐ ܚܙܐ ܗ̣ܘܐ ܕܠܥܒܝ̣̈ܕܐ ܣܓܕܢܢ. ܠܒܫ ܦܓܪܐ ܥܒܝ̣ܕܐ ܕܒܥܝܕܢ ܐܣܝܢ. ܘܒܗܢܐ ܒܪܝܐ ܒܪܘܝܢ ܐܚܝܢ.

 

 

 

ܣܗܕܘܬܐ ܕܬܫܥ

 

ܕܩܕܝܫܐ ܩܘܪܝܠܘܣ ܡ̣ܢ ܫܪܒܐ ܕܨܝܕ ܥܘܕܠܐ ܕܐܢܕܪܐܐܣ ܕܒܚܪܡܐ ܕܬܪܥܣܪ. ܕܝܠܗ ܓܝܪ ܐܝܟ ܕܐܡܪܬ ܥܒܕ ܠܗܘܢ ܠܚܫܘ̈ܗܝ ܕܦܓܪܐ ܕܝܠܗ. ܗܕܐ ܓܝܪ ܡܬܚܙܝܐ ܗܘܬ݀ ܘܠܦܛܪܘܣ ܐܠܗܝܐ ܕܐܡ̇ܪ. ܡܫܝܚܐ ܗܟܝܠ ܚ̣ܫ ܚܠܦܝܢ ܒܒܣܪ. ܐ̱ܚܪܬܐ ܗ̣ܝ ܕܝܢ ܡܠܬܐ ܗ̇ܝ ܕܒܒܣܪ ܢܬܐܡܪ ܕܚܫ. ܘܐ̱ܚܪܬܐ ܒܗ̇ ܒܕܡܘ̣ܬܐ ܗ̇ܝ ܕܢܬܐܡܪ ܕܚ̣ܫ ܒܟܝܢܐ ܕܐܠܗܘܬܗ. ܡܛܠ ܕܝܢ ܕܐܝܬܘܗܝ ܐܟܚܕܐ ܗ̣ܘ ܟܕ ܗ̣ܘ ܐܠܗܐ ܘܒܪܢܫܐ. ܠܐ ܚܫܘܫܐ ܡ̇ܢ ܒܗ̇ܝ ܕܠܚܡܐ ܠܟܝܢܐ ܐܠܗܝܐ܆ ܚܫܘܫܐ ܕܝܢ ܒܗ̇ܝ ܕܐ̱ܢܫܘܬܐ. ܡܢܐ ܥܕܠܝܐ: ܐܢ ܒܗ̇ܝ ܕܡܟܢ ܠܡܚܫ ܢܬܐܡܪ ܕܚ̣ܫ. ܟܕ ܒܗ̇ܝ ܕܠܐ ܝ̇ܕܥ ܠܡܚܫ ܩܘܝ̣ ܠܐ ܚܫܘܫܐ.

 

 

 

ܣܗܕܘܬܐ ܕܥܣܪ

 

ܗ̣ܘ ܟܕ ܗ̣ܘ ܕܐܪܒܬܥܣܪ ܕܠܘܩܒܠ ܝܘܠܝܢܘܣ. ܣܝ̣ܡ ܗ̣ܘܐ ܓܝܪ ܒܩܒܪܐ ܓܘܫܡܐ ܩܕܝ̣ܫܐ܆ ܡܝ̣ܬܐ ܘܕܠܐ ܢܦܫܐ.

 

 

 

ܬܘܣܦܬܐ ܕܢܘܗܪܐ ܘܫܘܪܪܐ

 

ܙܕܩ ܠܡܕܥ ܕܚܒܠܐ ܒܙܢܝ̈ܐ ܣܓܝ̈ܐܐ ܡܬܐܡܪ ܒܟܬܒ̈ܐ ܩܕܝ̣̈ܫܐ. ܒܙܢܐ ܕܚܛܝ̣ܬܐ. ܘܒܙܢܐ ܕܡܣܡ ܒܪܝ̣ܫܐ܆ ܐܝܟ ܗ̇ܝ ܕܡ̇ܢ ܕܡܚܒܠ ܗܝܟܠܗ ܕܐܠܗܐ ܟܐܡܬ݀ ܒܚܛܝ̣ܬܐ. ܡܚܒܠ ܠܗ ܐܠܗܐ ܒܡܣܡ ܒܪܝܫܐ. ܘܒܙܢܐ ܕܫܪܝܐ ܕܐܣܛܘܟܣܐ. ܐܝܟ ܗ̇ܝ ܕܐܢ̱ܬ ܕܝܢ ܐܠܗܐ܆ ܐܚܬ ܐܢܘܢ ܠܓܘܒܐ ܕܚܒܠܐ. ܘܒܙܢܐ ܕܡܣܡܥܠܘ̣ܬܐ܆ ܐܝܟ ܗ̇ܝ ܕܡܚܒܠܝ̣ܢ ܠܡ ܦܪ̈ܨܘܦܝܗܘܢ. ܐܝܟ ܕܢܬܚܙܘܢ ܠܒܢܝ̈ܢܫܐ ܕܨܝܡܝ̣ܢ. ܘܒܙܢܐ ܕܚܫ̈ܐ ܕܥܕܝܢ ܥܠ ܦܓܪܐ. ܟܦܢܐ ܐܡ̇ܪ ܐ̱ܢܐ ܘܨܗܝܐ ܘܥܡܠܐ ܘܨܪܝܐ ܘܡܚܘ̣ܬܐ. ܐܝܟ ܗ̇ܝ ܕܐܦܢ ܒܪܢܫܢ ܒܪܝܐ ܡܬܚܒܠ. ܐܠܐ ܗ̇ܘ ܕܠܓܘ ܡܬܚܕܬ. ܘܒܙܢܐ ܕܡܘܬܐ ܕܐܝܬܘܗܝ ܦܘܪܫܢܐ ܕܢܦܫܐ ܡ̣ܢ ܦܓܪܐ. ܐܝܟ ܗ̇ܝ ܕܐܝܟܢܐ ܠܐ ܕܚܠܬ ܠܡܚܒܠܘ ܠܡܫܝ̣ܚܗ ܕܡܪܝܐ. ܘܐܒܗ̈ܬܐ ܩܕܝ̈ܫܐ ܟܕ ܡܬܚܒܠܢܐ ܩܪܝܢ ܠܗ ܠܦܓܪܗ ܕܡܪܢ ܡ̣ܢ ܩܕܡ ܩܝܡܬܐ. ܠܘ ܒܗܠܝܢ ܬܠܬܐ ܙܢܝ̈ܐ ܩܕ̈ܡܝܐ ܩܪܝܢ ܠܗ ܚܣ. ܒܗ̇ܝ ܕܠܐ ܚܛܝ̣ܬܐ ܣܥܪ ܐܦܠܐ ܒܡܣܡ ܒܪܝܫܐ ܢܦܠ. ܐܦܠܐ ܡܢܘ̈ܬܐ ܕܦܓܪܗ ܐܬܦܪ̈ܩܝܢ ܒܩܒܪܐ. ܐܝܟ ܗ̇ܝ ܕܠܐ ܝܗܒܬ ܠܚܣܝܟ ܕܢܚܙܐ ܚܒܠܐ. ܐܠܐ ܒܗܠܝܢ ܬܠܬܐ ܙܢܝ̈ܐ ܐ̱ܚܪ̈ܝܐ ܒܠܚܘܕ. ܒܗ̇ܝ ܕܫܝܘܬܗ ܐܣܬܡܥܠܬ݀ ܘܟܦܢ ܘܨܗܝ̣ ܘܠܐܝ̣ ܘܐܬܒܙܥ̈ܝ ܐܝܕܘ̈ܗܝ ܘܪ̈ܓܠܘܗܝ ܒܨܨ̈ܐ. ܘܕܦܢܗ ܐܬܬܪܥܬ݀. ܘܢܦܫܗ ܐܬܦܪܫܬ݀ ܡ̣ܢ ܦܓܪܗ ܒܙܩܝ̣ܦܐ. ܟܕ ܐܠܗܘܬܗ ܠܐ ܡ̣ܢ ܢܦܫܗ ܐܦܠܐ ܡ̣ܢ ܦܓܪܗ ܐܬܦܪܫܬ݀. ܗ̇ܢܘ ܚܝܠܐ ܕܟܬܒ̈ܐ ܩܕܝ̈ܫܐ.

 

 

 

ܢܝܫܐ ܬܠܝܬܝܐ ܡܛܠ ܣܗܕ̈ܘܬܐ ܟܬܒܝ̈ܬܐ ܕܡܫܪܪ̈ܢ ܗ̇ܝ ܕܠܐ ܚܫܘܫܐ ܘܠܐ ܡܝܘܬܐ ܘܠܐ ܡܬܚܒܠܢܐ ܥܒܕܗ ܡܪܢ ܠܦܓܪܗ ܒܬܪ ܩܝܡܬܐ. ܣܗܕܘܬܐ ܩܕܡܝܬܐ

 

ܦܘܠܘܣ. ܐܦܢ ܝ̣ܕܥܢ ܒܒܣܪ ܠܡܫܝ̣ܚܐ ܐܠܐ ܡ̣ܢ ܗܫܐ ܠܐ ܝ̇ܕܥܝ̣ܢܢ. ܘܠܗ̇ ܠܗܕܐ ܡܦܫܩ ܩܕܝܫܐ ܐܝܘܐܢܢܝܣ. ܘܐܡ̇ܪ. ܕܚܝܠܐ ܕܡܠܬܗ ܕܫܠܝ̣ܚܐ ܗ̇ܢܘ. ܕܐܦܢ ܠܡ ܚܫܘܫܐ ܝ̣ܕܥܢܝܗܝ ܠܡܫܝܚܐ. ܐܠܐ ܗܕܐ ܠܐ ܬܘܒ. ܘܠܘ ܕܣܡܗ ܠܒܣܪܐ ܘܗܫܐ ܠܐ ܐܝܬܘܗܝ ܥܡ ܦܓܪܐ܇ ܚܣ. ܐܡܝ̣ܪ ܓܝܪ ܕܗܢܐ ܝܫܘܥ ܕܐܣܬܠܩ ܡܢܟܘܢ ܠܫܡܝܐ ܗܟܢܐ ܢܐܬܐ. ܗ̇ܢܘ ܕܝܢ ܥܡ ܦܓܪܐ.

 

 

 

ܣܗܕܘܬܐ ܕܬܪܬܝܢ

 

ܩܕܝܫܐ ܐܬܐܢܐܣܝܘܣ ܡ̣ܢ ܦܘܫܩܐ ܕܬܫܒܚܬ݀ ܬܫܒ̈ܚܬܐ. ܐܡܬܝ ܕܝܢ ܕܠܒܫ ܦܓܪܐ ܠܐ ܡܬܚܒܠܢܘܬܐ. ܘܗܢܐ ܡܝܘܬܐ ܠܐ ܡܝܘܬܘܬܐ.

 

 

 

ܣܗܕܘܬܐ ܕܬܠܬ

 

ܡܦܝܠܘܟܝܘܣ ܕܐܝܩܢܘܢ. ܒܡܐܡܪܐ ܕܐܡܝ̣ܢ ܐܡܝ̣ܢ ܐܡ̇ܪ ܐ̱ܢܐ ܠܟܘܢ. ܕܗ̇ܘ ܕܫܡܥ ܠܡܠܬܝ ܘܡܗܝܡܢ. ܟܕ ܓܝܪ ܠܐ ܚܫܘܫܐ ܘܠܐ ܡܝܘܬܐ ܡ̣ܢ ܒܬܪ ܩܝܡܬܐ ܗܘ̣ܐ ܦܓܪܐ ܡܛܠ ܫܘܬܦܘܬܐ ܕܨܝܕܝ. ܠܐ ܡܬܦܠܓܢܐ ܐܝܬܘܗܝ ܒܝ̣. ܘܐܫܬܘܝ̣ ܠܡܘܬܒܐ.

 

 

 

ܣܗܕܘܬܐ ܕܐܪܒܥ

 

ܬܐܘܦܝܠܠܘܣ ܕܐܠܟܣܢܕܪܝܐ. ܡ̣ܢ ܡܐܡܪܐ ܕܐܡܝ̣ܪ ܠܗ ܥܠ ܡܠܬܐ ܕܡܬܟܪܟ ܗ̣ܘܐ ܝܫܘܥ ܒܟܠܗ ܓܠܝ̣ܠܐ. ܡܪܝܐ ܐܡܠܟ ܘܓܐܝܘܬܐ ܠܒܫ. ܡܛܠ ܓܝܪ ܕܫܩܠ ܦܓܪܐ ܡܬܚܒܠܢܐ܆ ܓܐܝܘܬܐ ܠܒܫ ܟܕ ܐܩܝ̣ܡܗ ܠܘ ܡܬܚܒܠܢܐ܆ ܐܠܐ ܠܐ ܡܬܚܒܠܢܐ.

 

 

 

ܣܗܕܘܬܐ ܕܚܡܫ

 

ܕܐܦܝܦܐܢܝܘܣ ܕܩܘܦܪܘܣ. ܒܐܓܪܬܐ ܕܥܠ ܝ̣ܠܝ̣ܕܘܬܗ ܕܡܪܢ. ܘܠܗ̇ܘ ܒܣܪܢܐ ܥܒܕܗ ܠܐ ܡܬܚܒܠܢܐ. ܘܠܗ̇ܘ ܦܓܪܢܐ ܪܘܚܢܐ. ܘܠܗ̇ܘ ܡܝܘܬܐ ܠܐ ܡܝܘܬܐ.

 

 

 

ܣܗܕܘܬܐ ܕܫܬ

 

ܩܕܝܫܐ ܐܝܘܐܢܢܝܣ ܒܦܘܫܩܐ ܕܗ̇ܝ ܕܠܐ ܐܫܬܐ ܡ̣ܢ ܝܠܕܐ ܕܓܦܬܐ܆ ܥܕܡܐ ܕܚܕܬܐ ܚܕܬܐܝܬ ܐܫܬܝܘܗܝ. ܡܢܐ ܐܝܬܝܗ̇ ܗܕܐ ܕܚܕܬܐ ܚܕܬܐܝܬ. ܗ̇ܝ ܕܐܝܬܝܗ̇ ܠܥܠ ܡ̣ܢ ܥܝܕܐ. ܠܘ ܟܕ ܦܓܪܐ ܚܫܘܫܐ ܐܝܬ ܠܝ. ܐܠܐ ܠܐ ܡܝܘܬܐ ܡܟܝ̣ܠ ܘܠܐ ܡܬܚܒܠܢܐ. ܘܕܠܐ ܣܢܝ̣ܩ ܥܠ ܣܝܒܪܬܐ. ܠܘ ܗܟܝ̣ܠ ܡܛܠ ܣܘܢܩܢܐ ܐܟܠ ܘܐܫܬܝ̣. ܡ̣ܢ ܒܬܪ ܩܝܡܬܐ ܠܐ ܓܝܪ ܣܢܝ̣ܩ ܗ̣ܘܐ ܡܟܝ̣ܠ ܦܓܪܐ ܥܠ ܗܠܝܢ.

 

 

 

ܣܗܕܘܬܐ ܕܫܒܥ

 

ܩܘܪܝܠܘܣ. ܒܐܓܪܬܐ ܕܠܘܬ ܐܩܩ ܕܣܩܘܬܦܘܠܝܣ. ܒܩܝܡܬܗ ܓܝܪ ܕܡ̣ܢ ܒܝܬ ܡܝ̈ܬܐ. ܫܠܚܗ ܠܚܒܠܐ. ܘܥܡܗ ܠܟܠܗܝܢ ܕܡܢܗ̇.

 

 

 

ܬܘܣܦܬܐ ܕܢܘܗܪܐ ܘܫܘܪܪܐ ܘܙܘܗܪܐ

 

ܙܕܩ ܠܡܕܥ ܕܦܓܪܐ ܗ̇ܘ ܡܪܢܝܐ ܐܦܢ ܡܕܡ ܡ̣ܢ ܕܝ̣ܠܝ̈ܬܐ ܕܡܠܬܐ ܗ̇ܘ ܕܥܡܗ ܐܬܚܝܕ ܩܢܐ. ܡ̣ܢ ܫܘܪܝܗ̇ ܡ̇ܢ ܕܚܕܝܘܬܐ. ܐܝܟ ܗ̇ܝ ܕܢܙܟܝܘܗܝ ܠܥܠܡܐ ܘܠܐ ܢܙܕܟܐ ܡ̣ܢ ܚܫܘ̈ܗܝ. ܘܕܠܐ ܢܬܓܫܦ ܗ̣ܘܐ ܡ̣ܢ ܙܢܐ ܡܕܡ ܚܛܝ̣ܬܢܝܐ ܡܬܘܡ. ܘܡ̣ܢ ܒܬܪ ܩܝܡܬܐ ܬܘܒ. ܐܝܟ ܗ̇ܝ ܕܠܐ ܚܫܘܫܐ ܘܠܐ ܡܬܚܒܠܢܐ ܘܠܐ ܡܝܘܬܐ. ܘܠܐ ܣܢܝ̣ܩ ܥܠ ܣܝܒܪܬܐ ܢܗܘܐ. ܐܠܐ ܠܘ ܠܟܠܗܝܢ ܕܝ̣ܠܝ̈ܬܐ ܕܟܝܢܐ ܐܠܗܝܐ ܙܕܩ ܠܡܣܒܪܘ ܕܩܢܐ. ܠܐ ܡܬܡܨܝܢܝ̣ܬܐ ܗ̱ܝ ܓܝܪ ܗܕܐ ܥܡ ܢܛܝ̣ܪܘܬܐ ܘܠܐ ܒܠܝ̣ܠܘ̣ܬܐ ܕܟܝ̈ܢܐ. ܒܕܓܘܢ ܠܘ ܠܐ ܒܪܝܐ ܗܘ̣ܐ. ܐܦܠܐ ܠܐ ܡܣܝܟܐ. ܐܦܠܐ ܡܬܘܡܝܐ. ܐܦܠܐ ܠܐ ܓܫܘܡ. ܐܦܠܐ ܠܐ ܡܬܚܙܝܢܐ. ܐܦܠܐ ܫܘܐ ܒܐܘܣܝܐ ܠܡܠܬܐ ܗ̇ܘ ܕܐܬܚܝܕ ܠܗ. ܐܠܐ ܐܝܟ ܕܐܝܬܘܗܝ ܗ̣ܘܐ ܒܟܝܢܗ ܡ̣ܢ ܩܕܡ ܩܝܡܬܐ. ܒܪܝܐ ܘܡܣܝܟܐ ܘܙܒܢܝܐ. ܘܓܘܫܡܐ ܘܡܬܚܙܝܢܐ. ܘܐ̱ܚܪܢܐ ܒܐܘܣܝܐ ܠܡܠܬܐ ܗ̇ܘ ܕܐܬܚܝܕ ܠܗ. ܘܐܦܢ ܚܕ ܗ̣ܘ ܥܡܗ ܒܟܢܝ̣ܫܘܬܐ ܐܘܟܝ̣ܬ ܚܕܝܘܬܐ. ܐܠܐ ܠܘ ܒܫܘܝܘܬ ܐܘܣܝܐ. ܗܟܢܐ ܐܦ ܘܒܬܪ ܩܝܡܬܐ ܟܬܪ. ܟܠ ܓܝܪ ܕܠܘ ܗܟܢܐ ܢܘܕܐ. ܥܡ ܒܐܠܝ̈ ܐܘܣܝ̈ܐܣ ܡܬܚܝܒ. ܘܒܫܘܚܠܦܐ ܘܫܘܓܢܝܐ ܕܟܝ̈ܢܐ ܢܦܠ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܪܒܝ̣ܥܝܬܐ. ܡܛܠ ܬܪܥܝ̣ܬܐ ܕܝܘܠܝܢܝ̈ܣܛܐ ܗ̇ܢܘܢ ܕܐܦ ܦܢܛܣܝ̈ܣܛܐ ܘܗܓܓ̈ܝܐ ܘܓܪܓܘܪ̈ܝܢܐ ܡܬܩܪܝܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ. ܣܥܝܐ ܩܕܡܝܐ

 

ܐܡܪܝܢ ܕܡܠܬܐ ܠܐ ܡܣܝܟܐ ܟܬܪ ܒܬܪ ܚܕܝܘܬܐ. ܠܘ ܠܐ ܡܬܦܪܫܢܝ̣ܬܐ ܡܨܝܐ ܗܘܬ݀ ܕܬܗܘܐ ܗ̣ܝ ܚܕܝܘܬܗ ܕܥܡ ܡܠܬܐ. ܒܗ̇ܝ ܕܠܐ ܡܣܝܟܐ ܗ̇ܘ ܗ̣ܘ ܕܠܐ ܡܬܚܒܫ ܒܐܬܪܐ. ܒܕܓܘܢ ܟܕ ܡܠܬܐ ܠܘ ܒܐܬܪܐ ܢܗܘܐ. ܡ̣ܢ ܐܠܨ̈ܬܐ ܕܠܐ ܢܗܘܐ ܥܡܗ ܒܣܪܐ ܗ̇ܘ ܕܠܘ ܐܟܘܬܗ ܠܐ ܡܣܝܟܐ ܗ̱ܘ. ܘܗܟܢܐ ܡܫܬܪܐ ܠܗ̇ ܚܕܝܘܬܐ. ܘܟܕ ܚܕܝܘܬܐ ܠܐ ܡܬܦܪܫܢܝ̣ܬܐ ܗ̱ܝ܆ ܐܦ ܒܣܪܐ ܐܟܘܬܗ ܕܡܠܬܐ ܠܐ ܡܣܝܟܐ ܗ̣ܘܐ ܒܝܕ ܚܕܝܘܬܐ. ܘܟܠ ܕܠܐ ܡܣܝܟܐ ܗ̱ܘ ܠܐ ܒܪܢܫܐ ܗ̱ܘ. ܘܟܠ ܠܐ ܒܪܝܐ ܡܬܘܡܝܐ. ܘܟܠ ܡܬܘܡܝܐ ܠܐ ܚܫܘܫܐ. ܘܟܠ ܠܐ ܚܫܘܫܐ ܠܐ ܡܬܚܒܠܢܐ. ܘܟܠ ܠܐ ܡܬܚܒܠܢܐ܆ ܠܐ ܣܢܝ̣ܩ ܥܠ ܣܝܒܪܬܐ. ܘܟܠ ܕܕܝ̣ܠܝ̈ܬܐ ܕܐܝܟ ܗܠܝܢ ܩܢܐ ܠܘ ܒܪ ܟܝܢܢ ܗ̣ܘ ܕܠܐ ܩܢܝܢܢ ܠܗܝܢ. ܒܕܓܘܢ ܗ̣ܘ ܦܪܘܩܢ ܟܕ ܡܕܡ ܡ̣ܢ ܕܝ̣ܠܝ̈ܬܐ ܕܟܝܢܢ ܒܗ ܐܬܚܙܝ̣. ܝ̣ܕܝ̣ܥܐ ܕܐܝܟ ܕܒܦܢܛܣܝܐ ܚܘܝ̣ ܐܢܝܢ ܠܚܙܝܘ̈ܗܝ ܘܠܘ ܒܫܪܪܐ. ܟܐܡܬ݀ ܠܗ̇ܝ ܕܐܟܠ ܘܐܫܬܝ̣ ܘܠܐܝ ܘܚ̣ܫ ܘܡܝ̣ܬ ܘܫܪܟܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܐܢ ܦܓܪܗ ܕܡܪܢ ܒܪܝܐ ܗ̱ܘ ܒܬܪ ܚܕܝܘܬܐ. ܘܐܠܗܐ ܡܬܬܘܕܐ ܘܡܣܬܓܕ ܡܢܟܘܢ. ܡܕܝܢ ܬܪܝܢ ܐܠܗ̈ܐ ܠܟܘܢ ܡܫܬܟܚܝ̣ܢ. ܚܕ ܒܪܝܐ܆ ܘܐ̱ܚܪܢܐ ܠܐ ܒܪܝܐ. ܘܡܫܬܟܚܝ̣ܢ ܐܢ̱ܬܘܢ ܘܣܓܕܝܢ ܗ̇ܝ ܕܫܟܝ̣ܪܐ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܐܢ ܡܫܝܚܐ ܒܪ ܟܝܢܐ ܗ̱ܘ ܕܐܒܐ. ܘܐܒܐ ܠܘ ܒܪ ܟܝܢܢ ܗ̣ܘ. ܘܡܬܟܢܝܐ ܕܡܫܝܚܐ ܠܘ ܒܪ ܟܝܢܢ ܡܘܕܝܢ ܐܢ̱ܬܘܢ ܠܗ. ܘܟܕ ܒܪ ܟܝܢܢ ܗ̣ܘ. ܘܐܝܟܢܐ ܐܢ̱ܬܘܢ ܒܪ ܟܝܢܢ ܡܘܕܝܢ ܐܢ̱ܬܘܢ ܠܗ. ܘܟܕ ܒܪ ܟܝܢܗ ܗ̣ܘ ܕܐܒܐ ܘܠܘ ܒܪ ܟܝܢܢ. ܐܝܟ ܐܒܐ ܟܠܗ ܒܟܠܗ ܟܐܡܬ݀ ܒܡܠܬܐ ܘܒܒܣܪܐ. ܡܬܘܡܝܐ ܗ̱ܘ ܘܠܐ ܡܣܝܟܐ. ܘܠܐ ܚܫܘܫܐ ܘܠܐ ܡܬܚܒܠܢܐ ܥܡܗ̇ ܕܚܕܝܘܬܐ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܕܡܫܝܚܐ ܡܪܢ. ܐܢ ܒܪ ܟܝܢܢ ܗ̣ܘ ܒܪܢܫܐ ܗ̱ܘ ܒܟܝܢܐ ܘܠܘ ܐܠܗܐ ܐܟܘܬܢ. ܘܐܢ ܒܪ ܟܝܢܗ ܗ̣ܘ ܕܐܒܐ. ܐܠܗܐ ܗ̱ܘ ܘܠܘ ܒܪܢܫܐ ܒܟܝܢܐ. ܘܟܕ ܩܝ̣ܢܕܘܢܘܣ ܕܗ̇ܝ ܕܒܪܢܫܐ ܫܚܝ̣ܡܐ ܘܠܘ ܐܠܗܐ ܢܘܕܝܘܗܝ. ܗܢܐ ܙܢܐ ܬܪܝܢܐ ܗ̣ܘ ܫܪܝ̣ܪ ܘܡܝܬܪ. ܐܝܟܢܐ ܠܐ. ܘܗܐ ܐܦ ܡܢܟܘܢ. ܠܐ ܚܫܘܫܐ ܘܠܐ ܡܬܚܒܠܢܐ ܘܠܐ ܡܝܘܬܐ ܐܝܟ ܐܠܗܐ ܒܬܪ ܩܝܡܬܐ ܡܬܬܘܕܐ.

 

 

 

ܣܥܝܐ ܚܡܝܫܝܐ

 

ܐܡܪܝܢ ܦܓܪܗ ܕܡܠܬܐ ܗ̣ܘ ܩܢܘܡܗ ܕܡܠܬܐ ܐܝܬܘܗܝ. ܐܘ ܠܘ ܗ̣ܘ. ܘܐܢ ܗ̣ܘ ܩܢܘ̣ܡܗ ܕܡܠܬܐ ܐܝܬܘܗܝ. ܘܐܢ ܠܘ ܗ̣ܘ܇ ܡܕܝܢ ܩܢܘܡܐ ܐ̱ܚܪܢܐ. ܘܐܢ ܩܢܘܡܐ ܗ̱ܘ ܐ̱ܚܪܢܐ ܠܡܢܐ ܡܬܪܫܐ ܢܣܛܘܪܝܘܣ.

 

 

 

ܣܥܝܐ ܫܬܝܬܝܐ

 

ܐܡܪܝܢ ܕܟܠܗܘܢ ܡܠܦܢ̈ܐ ܫܠܡܘ ܕܡܪܢ ܦܓܪܗ ܕܐܕܡ ܡ̣ܢ ܩܕܡ ܕܢܚܛܐ ܠܒܫ. ܒܕܓܘܢ ܐܟܡܐ ܕܦܓܪܗ ܕܐܕܡ ܠܐ ܡܝܘܬܐ ܐܬܒܪܝ̣ ܒܟܝܢܐ. ܘܒܗ̇ ܒܕܡܘ̣ܬܐ ܘܦܓܪܗ ܕܡܪܢ ܠܐ ܡܝܘܬܐ ܗ̱ܘ ܒܟܝܢܗ. ܘܕܠܐ ܡܝܘܬܐ ܐܬܒܪܝ̣ ܐܕܡ܆ ܝ̣ܕܝ̣ܥܐ ܡ̣ܢ ܗ̇ܝ ܕܐܠܘ ܡܝܘܬܐ ܐܬܒܪܝ̣ ܗܘܐ ܒܟܝܢܐ. ܠܘ ܒܙܢܐ ܕܓܙܪ ܕܝ̣ܢܐ ܡܬܓܙܡ ܗ̣ܘܐ ܠܗ ܡܘܬܐ ܐܢ ܢܚܛܐ. ܗ̇ܘ ܓܝܪ ܕܒܟܝܢܐ ܡܝܘܬܐ ܗ̱ܘ. ܘܐܢ ܢܚܛܐ ܘܐܢ ܠܐ ܢܚܛܐ ܡܡܬ ܡܐܬ ܡ̣ܢ ܐܢܢܩܝ̣.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܦܝܠܠܘܟܣܝܢܘܣ ܕܡܒܘܓ. ܡܠܬܐ ܐܠܗܐ܆ ܗ̇ܘ ܦܓܪܐ ܘܢܦܫܐ ܘܗܘܢܐ ܕܐܕܡ ܩܕܡ ܥܒܪ ܦܘܩܕܢܐ ܩܒܠ. ܘܒܕܓܘܢ ܠܐ ܡܫܥܒܕ ܗ̣ܘܐ ܠܚܫ̈ܐ ܘܠܣܘܢ̈ܩܢܐ. ܘܡܛܠ ܕܠܘ ܡ̣ܢ ܙܘܘܓܐ ܐܬܝ̣ܠܕ. ܒܕܓܘܢ ܡܚܪܪ ܗ̣ܘܐ ܡ̣ܢ ܚܫ̈ܐ ܘܟܦܢܐ ܘܨܗܝܐ ܘܫܢܬܐ ܘܟܘܪܗܢܐ ܘܫܪܟܐ ܕܥܩܬܐ ܘܕܚܠܬܐ. ܐܠܐ ܠܗܠܝܢ ܒܨܒܝܢܗ ܡܩܒܠ ܗ̣ܘܐ ܠܗܘܢ ܡܛܠܬܢ. ܘܟܝܢܐܝܬ ܠܐ ܢܨܝ̣ܒܝ̣ܢ ܗܘܘ ܒܦܓܪܗ ܘܒܢܦܫܗ. ܐܠܐ ܡܕܒܪܢܐܝܬ ܣܒܠ ܗܘܐ ܠܗܘܢ. ܘܐܠܘ ܒܟܝܢܗ ܢܨܝ̣ܒܝ̣ܢ ܗܘܘ. ܩܛܝ̣ܪܐܝܬ ܡܩܒܠ ܗܘܐ ܠܗܘܢ. ܘܡ̣ܢ ܠܓܘ ܡܬܬܥܝ̣ܪܝܢ ܗܘܘ ܒܗ. ܘܝ̣ܕܝ̣ܥܐ ܕܡܕܒܪܢܐܝܬ ܩܒܠ ܐܢܘܢ. ܡ̣ܢ ܗ̇ܝ ܕܠܐ ܟܬܝ̣ܒ ܕܒܬܪ ܕܟܦܢ ܐܟܠ. ܘܠܐ ܒܬܪ ܕܠܐܝ̣ ܘܨܗܝ̣ ܕܐܬܬܢܝ̣ܚ ܘܐܫܬܝ̣. ܚܢܢ ܒܬܪ ܕܟܦܢܝ̣ܢܢ ܐܟܠܝ̣ܢܢ. ܘܡ̣ܢ ܗ̇ܝ ܕܠܒܪ ܡ̣ܢ ܛܟܣܐ ܩܒܠ ܐܢܘܢ. ܐܝܟ ܗ̇ܝ ܕܗܘܬ݀ ܕܘ̣ܥܬܗ ܐܝܟ ܫܷ̈ܠܬܐ ܕܕܡܐ. ܗ̇ܝ ܕܠܝܬܝܗ̇ ܒܟܝܢܐ ܐ̱ܢܫܝܐ. ܘܠܐ ܐܬܬܥܝ̣ܪ ܡ̣ܢ ܢܩܫܐ ܕܓ̈ܠܠܐ. ܘܐܠܘ ܕܟܝܢܐ ܗ̣ܘܘ. ܡܛܠܬܗ ܣܒܠ ܗ̣ܘܐ ܠܗܘܢ ܠܘ ܡܛܠܬܢ.

 

 

 

ܣܗܕܘܬܐ ܕܬܪܬܝܢ

 

ܡܘܫܐ ܒܪ ܟܐܦܐ. ܦܓܪܐ ܗ̇ܘ ܕܐܝܬ ܗ̣ܘܐ ܠܗ  ܠܐܕܡ ܩܕܡ ܕܢܐܪܓ ܘܢܚܛܐ. ܗ̣ܘ ܐܬܒܣܪ ܡܪܢ. ܘܐܦܢ ܐܬܚܙܝ̣ܘ ܒܩܢܘܡܗ ܚܫ̈ܐ ܕܓܙܪ ܕܝ̣ܢܐ. ܠܘ ܓܝܪ ܒܓܒܝ̣ܠܬܗ ܗ̣ܘܘ. ܐܠܐ ܒܨܒܝܢܗ ܡܩܒܠ ܗ̣ܘܐ ܠܗܘܢ. ܘܥܠ ܗܕܐ ܠܘ ܒܟܠܙܒܢ ܡܬܢܣܐ ܗ̣ܘܐ ܒܗܘܢ. ܘܒܕܓܘܢ ܠܫܢܬܗ ܘܟܦܢܗ ܘܨܗܝܗ ܘܠܐܷܘܬܗ ܘܚܫܗ܆ ܥܕܢ̈ܐ ܬܚܡ ܠܗܘܢ.

 

 

 

ܣܗܕܘܬܐ ܕܬܠܬ

 

ܡ̣ܢ ܬܫܥܝ̣ܬܐ ܕܡܪܝ ܒܪܨܘܡܐ. ܬܕܡܘܪܬܐ ܕܬܡܢܝ̣ܢ ܘܚܕܐ. ܦܓܪܗ ܕܡܫܝ̣ܚܐ ܐܝܟ ܦܓܪܐ ܗ̱ܘ ܕܐ̱ܢܫܐ. ܘܡ̣ܢ ܫܠܝܐ ܩܥܐ ܕܝܘܐ ܒܐܢ̱ܬܬܐ ܚܕܐ. ܕܐܢ ܦܓܪܗ ܕܝܫܘܥ ܐܝܟ ܦܓܪܐ ܗ̱ܘ ܕܐ̱ܢܫܐ. ܐܝܢܐ ܟܝ ܒܪܢܫܐ ܕܩܨܨ ܦܓܪܗ ܘܝܗܒܗ ܡܐܟܘܠܬܐ ܠܚܒܪ̈ܘܗܝ. ܐܢܕܝܢ ܐܝܟ ܕܡܐ ܗ̇ܘ ܕܒܝܬ ܐܕܡ ܕܡ ܒܘܟܪܐ ܨܠܝ̣ܒܐ ܐܝܢܐ ܗ̱ܘ ܕܡܐ ܕܒܝܬ ܐܕܡ. ܕܡܚܣܐ ܚܛܗ̈ܐ.

 

 

 

 

 

 

     #1 

 

ܦܣܘܩܐ ܬܠܝܬܝܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܪܒܝ̣ܥܝܬܐ. ܡܛܠ ܣܬܘܪܝܐ ܕܬܪܥܝ̣ܬܐ ܗܓܓܝܬܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܐܠܘܠܐ ܡܬܡܨܝܢܝ̣ܬܐ ܗܘܬ݀ ܚܕܝܘܬܗ ܕܗ̇ܘ ܕܡܣܝܟ ܘܡܬܥܪܐ ܒܐܬܪܐ܇ ܥܡ ܗ̇ܘ ܕܠܐ  ܡܣܝܟ ܘܠܐ ܡܬܥܪܐ ܒܐܬܪܐ ܐܠܨܐ ܗܘܬ݀ ܕܐܦܠܐ ܦܓܪܐ ܐ̱ܢܫܝܐ ܥܡ ܢܦܫܐ ܡܠܝ̣ܠܬܐ ܡܬܚܝܕ ܗ̣ܘܐ ܡܬܘܡ. ܒܗ̇ܝ ܕܐܟܡܐ ܕܦܓܪܐ ܒܬܠܝ̣ܬܝܘܬ ܩܝ̈ܡܐ ܡܣܝܟ ܘܒܐܬܪܐ ܡܬܬܚܕ. ܢܦܫܐ ܡܒܪܝܬܐ ܗ̱ܝ  ܡܢܗܘܢ ܕܩܝܡ̈ܐ ܘܠܐ ܡܬܬܚܕܢܝ̣ܬܐ ܗ̱ܝ ܒܐܬܪܐ. ܘܟܕ ܚܕܝܘܬܐ ܕܢܦܫܐ ܥܡ ܦܓܪܐ ܠܘ ܠܐ ܡܬܡܨܝܢܝ̣ܬܐ ܗ̱ܝ. ܒܗ̇ ܒܕܡܘ̣ܬܐ ܘܚܕܝܘܬܐ ܕܐܠܗܐ ܡܠܬܐ ܥܡ ܢܦܫܐ ܘܒܐܝ̈ܕܝܗ̇ ܥܡ ܦܓܪܐ ܐܟܡܐ ܕܠܡܡܠܠ ܐܠܗܝ̈ܬܐ ܫܦܪܐ. ܠܘ ܡܬܡܨܝܢܝ̣ܬܐ ܗ̱ܝ. ܘܐܟܡܐ ܕܠܐ ܐܠܨܐ ܡ̣ܢ ܕܘܝܪܗ̇ ܕܢܦܫܐ ܡܠܝ̣ܠܬܐ ܥܡ ܐܘܣܝ̈ܐܣ ܗ̇ܢܝܢ ܕܠܐ ܡܬܡܨܐ ܦܓܪܐ ܠܡܬܡܛܝܘ ܠܘܥܕܗܝܢ. ܫܪܝܐ ܘܒܘܛܠܐ ܕܚܕܝܘܬܗ ܕܥܡܗ̇. ܗ̣ܘ ܗܟܘܬ ܠܐ ܐܠܨܐ ܡ̣ܢ ܠܐ ܡܬܦܪܫܢܘܬܗ ܕܐܠܗܐ ܡܠܬܐ ܡ̣ܢ ܐܒܐ ܘܪܘܚܐ܆ ܡܬܦܪܫܢܘܬܗ ܕܡ̣ܢ ܢܦܫܐ ܘܦܓܪܐ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܠܟܝܢ ܒܪܝܐ. ܠܘ ܒܗ̇ܝ ܕܒܪܝܐ ܗ̱ܘ ܐܠܗܐ ܡܢܗ ܘܠܗ ܐܡܪܝܢܢ. ܐܦܠܐ ܒܗ̇ܝ ܕܐܫܬܚܠܦ ܠܗ ܘܠܐ ܒܪܝܐ ܗܘܐ ܒܚܕܝܘܬܗ ܕܥܡ ܠܐ ܒܪܝܐ. ܗܕܐ ܓܝܪ ܠܐ ܡܬܡܨܝܢܝ̣ܬܐ ܗ̱ܝ. ܐܠܐ ܒܗ̇ܝ ܕܥܡ ܠܐ ܒܪܝܐ ܐܬܚܝܕ. ܒܠܥܕ ܗ̇ܝ ܕܫܘܚܠܦܐ ܢܚܫ ܒܟܝܢܗ ܐܠܗܐ ܡܢܢ ܡܬܩܪܐ ܘܐܝܬܘܗܝ. ܘܠܘܩܒܠ ܗ̇ܝ ܕܐܡܪܝܢ ܕܡܕܝܢ ܠܒܪܝ̣ܬܐ ܣܓܕܝܢ ܐܢ̱ܬܘܢ. ܐܡܪܝܢܢ. ܕܐܠܘܠܐ ܐܬܚܝܕܬ݀ ܒܪܝ̣ܬܐ ܗ̇ܝ ܥܡ ܠܐ ܒܪܝܐ ܗ̇ܘ. ܠܐ ܣܟ ܡܢܢ ܐܣܬܓܕܬ݀.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܒܪ ܟܝܢܐ ܗ̱ܘ ܕܐܒܐ ܦܪܘܩܢ ܒܐܠܗܘܬܗ. ܘܒܪ ܟܝܢܢ ܕܝܠܢ ܒܐܢܫܘܬܗ. ܡܛܠ ܕܥܦܝ̣ܦܐ ܗ̱ܘ ܐܠܗܐ ܘܒܪܢܫܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܕܬܪ̈ܝܗܘܢ ܩܝ̣ܢܕܘ̈ܢܘ ܕܬܪ̈ܬܝܗܝܢ ܗܠܝܢ ܗܪ̈ܣܝ̣ܣ ܒܒܝܫܬܐ ܫܘܝܢ ܐܢܘܢ. ܟܐܡܬ݀ ܗ̇ܝ ܕܒܪܢܫܐ ܫܚܝ̣ܡܐ ܢܘܕܝܘܗܝ ܠܦܪܘܩܢ. ܘܗ̇ܝ ܕܐܠܗܐ ܠܐ ܡܒܣܪܐ. ܒܗ̇ܝ ܕܬܪ̈ܬܝܗܝܢ ܡܒܛܠܢ̈ܝܬܐ ܐܢܝܢ ܕܥܠܬ݀ ܦܘܪܩܢܢ. ܐܘܟܝ̣ܬ ܕܡܕܒܪܢܘܬܐ ܗ̇ܝ ܕܒܒܣܪ. ܘܬܘܕܝܬܐ ܫܪܝ̣ܪܬܐ ܗ̇ܝ ܗ̣ܝ ܕܒܪ ܟܝܢܐ ܕܝܠܢ ܒܐܢܫܘܬܐ ܢܘܕܝܘܗܝ. ܘܒܪ ܟܝܢܐ ܕܐܒܐ ܒܐܠܗܘܬܐ.

 

 

 

ܫܪܝܐ ܕܣܥܝܐ ܚܡܝܫܝܐ

 

ܐܡܪܝܢܢ. ܕܦܓܪܐ ܟܕ ܡܢܗ ܘܠܗ ܡܬܢܣܒ. ܒܠܥܕ ܡܬܗܘܢܢܘܬܐ ܕܚܕܝܘܬܐ. ܩܢܘܡܐ ܗ̱ܘ ܘܟܝܢܐ ܐ̱ܚܪܢܐ ܣܛܪ ܡ̣ܢ ܩܢܘܡܐ ܘܟܝܢܐ ܕܡܠܬܐ. ܟܕ ܕܝܢ ܥܡ ܚܕܝܘܬܐ ܡܬܢܣܒ. ܚܕ ܩܢܘܡܐ ܘܟܝܢܐ ܡ̣ܢ ܬܪ̈ܝܗܘܢ ܩܢܘ̈ܡܐ ܘܟܝ̈ܢܐ ܡܬܗܘܢܢ. ܘܐܠܐ ܠܘ ܚܕܝܘܬܐ ܗ̱ܝ ܗ̇ܝ ܕܡ̣ܢ ܟܢܝ̣ܫܘܬ ܬܪ̈ܝܗܘܢ. ܢܣܛܘܪ ܕܝܢ ܡܬܪܫܐ܆ ܒܗ̇ܝ ܕܬܪܝܢ ܩܢܘ̈ܡܐ ܘܟܝ̈ܢܐ ܡܢܐ. ܘܥܡ ܚܕܝܘܬܐ܆ ܐܟܡܐ ܕܠܘ ܥܡ ܚܕܝܘܬܐ.

 

 

 

ܫܪܝܐ ܕܣܥܝܐ ܫܬܝܬܝܐ

 

ܐܡܪܝܢܢ ܕܠܘ ܟܠܗܘܢ ܡܠܦܢ̈ܐ ܫܠܡܘ ܕܡܪܢ ܠܦܓܪܗ ܕܐܕܡ ܡ̣ܢ ܩܕܡ ܕܢܚܛܐ ܠܒܫ. ܐܠܐ ܩܕܝܫܐ ܒܣܝܠܝܘܣ ܘܓܪܝܓܘܪܝܘܣ ܘܐܝܘܐܢܢܝܣ ܘܐܡܦܝܠܘܟܝܘܣ. ܘܡ̣ܢ ܣܘܪ̈ܝܝܐ ܝܥܩܘܒ ܕܣܪܘܓ ܘܝܥܩܘܒ ܕܐܘܪܗܝ ܐܡܪܝܢ ܕܦܓܪܗ ܕܐܕܡ ܩܕܡ ܕܢܚܛܐ ܠܐ ܣܢܝ̣ܩ ܗܘܐ ܥܠ ܬܘܪܨܐ. ܒܕܓܘܢ ܡܫܝ̣ܚܐ ܠܦܓܪܐ ܗ̇ܘ ܕܚܛܐ ܠܒܫ. ܘܒܚܫܘ̈ܗܝ ܠܘܬ ܠܐ ܚܫܘܫܘܬܐ ܐܥܒܪܗ. ܘܒܡܘܬܗ ܠܐ ܡܝܘܬܘܬܐ ܠܗ ܫܟܢ. ܘܒܩܝܡܬܗ ܐܩܝ̣ܡܗ ܡ̣ܢ ܡܦܘܠܬܐ. ܘܐܠܐ ܗ̇ܘ ܕܠܐ ܚ̣ܫ ܘܠܐ ܡܝ̣ܬ ܘܠܐ ܢܦܠ. ܡܘܢ ܣܢܝ̣ܩ ܗ̣ܘܐ ܕܢܩܒܠ ܠܐ ܚܫܘܫܘܬܐ ܘܠܐ ܡܝܘܬܘܬܐ ܘܩܝܡܬܐ. ܐܝܬ ܗܘܝ̈ ܠܗ ܓܝܪ ܗܠܝܢ. ܘܕܗ̣ܘ ܗܢܐ ܪܥܝܢܐ ܚܬܝ̣ܬ܆ ܝ̣ܕܝ̣ܥܐ ܡ̣ܢ ܬܪܬܝܢ. ܚܕܐ ܡ̇ܢ ܕܡܠܦܢ̈ܐ ܕܗܟܢܐ ܐܘܕܝ̣ܘ ܡܪܡܝ̣ܢ ܒܝ̣ܕܥܬܐ ܡ̣ܢ ܗ̇ܢܘܢ ܕܠܘ ܗܟܢܐ ܐܘܕܝ̣ܘ. ܘܐܦܢ ܟܠܗܘܢ ܐܪ̈ܬܕܘܟܣܘ ܐܝܬܝܗܘܢ. ܕܬܪܬܝܢ ܕܝܢ ܡ̣ܢ ܗ̇ܝ ܕܐܡ̣ܪ ܦܘܠܘܣ ܒܐܓܪܬܐ ܕܠܘܬ ܪ̈ܘܡܝܐ. ܕܫܕܪ ܐܠܗܐ ܠܒܪܗ ܒܕܡܘ̣ܬܐ ܕܒܣܪܐ ܕܚܛܝ̣ܬܐ܆ ܡܛܠܬܗ̇ ܕܚܛܝ̣ܬܐ ܒܒܣܪܗ. ܘܠܘܩܒܠ ܗ̇ܝ ܕܐܡܪܝܢ ܕܐܕܡ ܠܐ ܡܝܘܬܐ ܐܬܒܪܝ̣ ܐܡܪܝܢܢ. ܕܡܘܬܐ ܒܬܪܝܢ ܙܢܝ̈ܐ ܡܬܐܡܪ. ܐܟܡܐ ܕܡ̣ܢ ܠܥܠ ܐܡ̣ܪܢܢ ܡܘܬܐ ܟܝܢܝܐ ܕܐܝܬܘܗܝ ܦܘܪܫܢܐ ܕܢܦܫܐ ܡ̣ܢ ܦܓܪܐ. ܘܡܘܬܐ ܕܚܛܝ̣ܬܐ ܕܐܝܬܘܗܝ ܦܘܪܫܢܐ ܕܢܦܫܐ ܡ̣ܢ ܐܠܗܐ. ܒܕܓܘܢ ܐܕܡ ܒܙܢܐ ܗ̇ܘ ܩܕܡܝܐ ܠܘ ܠܐ ܡܝܘܬܐ ܐܬܒܪܝ̣. ܡܛܠ ܕܒܪܢܫܐ ܐܬܒܪܝ̣. ܘܟܠ ܒܪܢܫܐ ܡܝܘܬܐ. ܘܒܙܢܐ ܗ̇ܘ ܬܪܝܢܐ ܠܘ ܡܝܘܬܐ ܐܬܒܪܝ̣ ܡܛܠ ܕܚܛܝ̣ܬܐ ܠܘ ܒܟܝܢܐ ܡܬܒܪܝܐ. ܐܠܐ ܨܒܝܢܐ ܫܠܝ̣ܛ ܥܠ ܚܫ̈ܐ. ܐܟܡܐ ܕܡܨܐ ܕܢܚܛܐ ܗܟܘܬ ܘܡܨܐ ܕܠܐ ܢܚܛܐ. ܘܐܠܘܠܐ ܒܙܢܐ ܗܢܐ ܬܪܝܢܐ ܠܐ ܡܝܘܬܘܬܐ ܐܬܒܪܝ̣. ܡܫܬܟܚ ܠܗ ܐܠܗܐ ܫܘܒܚܐ ܠܛܝܒܘܬܗ ܕܠܐ ܐܫ̣ܪ ܗ̇ܝ ܕܐܡ̣ܪ ܠܗ ܕܒܝܘܡܐ ܕܬܐܟܘܠ ܡܢܗ ܡܡܬ ܬܡܘ̣ܬ. ܒܗ̇ܝ ܕܐܟܠ ܘܠܐ ܡܝ̣ܬ ܡܘܬܐ ܗ̇ܝ ܟܝܢܝܐ ܒܝܘܡܐ ܕܐܟܠ ܡܢܗ. ܝ̣ܕܝ̣ܥܐ ܡܕܝܢ ܕܠܡܘܬܐ ܗ̇ܘ ܬܪܝܢܐ ܡܝ̣ܬ. ܐܝܟ ܕܐܡ̣ܪ ܠܗ ܐܠܗܐ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܩܕܝܫܐ ܦܝܠܠܘܟܣܝܢܘܣ. ܐܦܢ ܟܝܢܝ̈ܐ ܠܐ ܩܪܐ ܠܚܫ̈ܐ ܦܪ̈ܘܩܝܐ ܐܝܟ ܫܪܟܐ ܕܡܠܦܢ̈ܐ ܝܘ̈ܢܝܐ ܘܣܘܪ̈ܝܝܐ. ܐܠܐ ܠܘ ܒܦܢܛܣܝܐ ܐܡ̇ܪ ܕܣܒܠ ܐܢܘܢ. ܐܘ ܠܘ ܒܫܪܪܐ ܐܟܡܐ ܕܐܢ̱ܬܘܢ ܐܡܪܝܢ ܐܢ̱ܬܘܢ. ܒܕܘܟ̈ܝܬܐ ܓܝܪ ܣܓܝ̈ܐܬܐ ܚܫ̈ܐ ܨܒܝܢܝ̈ܐ ܘܫܪܝ̣ܪ̈ܐ ܘܠܐ ܥܕܝ̣̈ܠܐ ܩܪܐ ܠܗܘܢ.

 

 

 

ܦܘܢܝܐ ܕܣܗܕܘܬܐ ܕܬܪܬܝܢ

 

ܐܡܪܝܢܢ ܕܗ̣ܘ ܡܘܫܐ ܒܪ ܟܐܦܐ. ܐܦܢ ܐܡ̇ܪ ܕܚܫ̈ܐ ܕܓܙܪ ܕܝ̣ܢܐ ܠܘ ܒܓܒܝ̣ܠܬܗ ܗܘܘ. ܐܠܐ ܕܒܫܪܪܐ ܣܒܠ ܐܢܘܢ ܨܒܝܢܐܝܬ ܐܡ̇ܪ. ܘܠܘ ܒܗ̇ ܒܗܓܓܘܬܐ ܐܝܟ ܕܐܢ̱ܬܘܢ ܐܡܪܝܢ ܐܢ̱ܬܘܢ. ܟܐܡܬ݀ ܕܚܘܝ̣ ܕܣܒܠ܆ ܟܕ ܠܐ ܣܒܠ.

 

 

 

ܦܘܢܝܐ ܕܣܗܕܘܬܐ ܬܠܝܬܝܬܐ

 

ܐܡܪܝܢܢ ܕܩܕܝܫܐ ܡܪܝ ܒܪܨܘܡܐ.  ܠܘ ܗ̣ܘ ܐܟܬܒܗ̇ ܠܬܫܥܝ̣ܬܗ܇ ܐܟܡ̇ܢ ܕܢܣܒܪ ܕܗܟܢܐ ܡܘܕܐ ܗ̣ܘܐ. ܐܠܐ ܫܡܘܐܝܠ ܬܠܡܝ̣ܕܗ. ܘܡܨܝܐ ܕܟܕ ܫܕܪܗ ܩܕܝܫܐ ܠܐܪܡܢܝܐ ܐܟܡܐ ܕܗ̣ܘ ܡܬܢܐ ܒܐܬܐ ܕܬܫܥܝܢ ܘܚܡܫ ܐܬܚܒܠ ܬܡܢ ܒܝܘܠܦܢܐ ܕܗܓܓܘܬܐ. ܡܛܠ ܕܣܓܝ̈ܐܐ ܡ̣ܢ ܐܪ̈ܡܢܝܐ ܐܚܝ̣ܕܝ̣ܢ ܗ̣ܘܘ ܒܝܘܠܦܢܐ ܕܝܘܠܝܢܐ. ܘܥܕܡܐ ܠܝܘܡܢܐ. ܐܡܪܝܢ ܓܝܪ ܕܥܡܗ̇ ܕܚܕܝܘܬܐ ܦܓܪܐ ܡܫܡܠܝܐ ܐܬܩܝܡ. ܘܠܐ ܪܒܐ ܒܐܝ̣ܕܐ ܒܐܝ̣ܕܐ ܘܠܐ ܚܫܘܫܐ ܘܠܐ ܡܬܚܒܠܢܐ ܘܠܐ ܡܝܘܬܐ ܘܠܐ ܒܪܝܐ ܘܠܐ ܡܣܬܝܟܢܐ ܗ̣ܘܐ. ܘܚܘܝ̣ ܕܐܬܓܙܪ ܟܕ ܠܐ ܐܬܓܙܪ. ܘܚܘܝ̣ ܕܐܟܠ ܟܕ ܠܐ ܐܟܠ. ܒܗ̇ܝ ܕܐܟܡܐ ܕܐܟܠ ܠܘܬ ܐܒܪܗܡ ܗܟܘܬ ܐܟܠ ܟܕ ܐܬܗܦܟ ܥܡܢ. ܘܐܡܪܝܢ ܬܘܒ ܕܠܐ ܗܘܐ ܠܗ ܬܕܟܝ̣ܬܐ. ܡܛܠ ܕܒܢܘܪܐ ܕܐܠܗܘܬܗ ܡܬܛܠܩܐ ܗܘܬ݀ ܡܐܟܘܠܬܗ ܘܫܪܟܐ ܕܐ̱ܚܪ̈ܢܝܬܐ. ܘܒܙܒܢܐ ܕܐܬܐܢܐܣܝܘܣ ܦܛܪܝܪܟܐ ܕܝܠܢ ܘܐܗܢܝܣ ܩܬܘܠܝ̣ܩܗܘܢ. ܟܕ ܐܬܘ ܠܡܨܥܬܐ ܘܒܚܢܘ ܘܚ̣ܙܘ ܚܬܝ̣ܬܘܬ ܝܘܠܦܢܢ. ܐܬܚܝܕܘ ܠܢ. ܘܥܒܕ ܟܬܒܐ ܡܚܝܕܢܐ. ܘܬܘܒ ܒܬܪ ܙܒܢܐ ܠܘ ܙܥܘܪ ܗܦܟܘ ܡ̣ܢ ܕܪܝܫ ܠܝܘܠܦܢܐ ܥܬܝ̣ܩܐ ܕܝܘܠܝܢܐ. ܘܠܘܩܒܠ ܗ̇ܝ ܕܩܥܐ ܕܝܘܐ ܙܦܠܢ. ܐܡܪܝܢܢ ܕܠܘ ܫܐܕ̈ܐ ܐܢܘܢ ܕܡܠܦܝ̣ܢ ܥܠ ܦܓܪܗ ܕܡܫܝ̣ܚܐ. ܐܦܠܐ ܙܕܩ ܕܢܫܡܥ ܐܢܘܢ. ܦܓܪܗ ܓܝܪ ܕܡܫܝܚܐ ܠܕܝܠܢ ܕܡܐ ܗ̣ܘܐ. ܘܐܫܬܘܬܦ ܠܢ ܒܒܣܪܐ ܘܕܡܐ ܐܝܟ ܕܐܡ̣ܪ ܦܘܠܘܣ.

 

 

 

ܢܝܫܐ ܬܠܝܬܝܐ ܡܛܠ ܚܘܬܡܐ ܕܫܬܐܣܬܐ ܗܕܐ ܒܡܫܘܕܥܢܘܬܐ ܕܗܪ̈ܣܝܣ ܗ̇ܢܝܢ ܕܒܫܡܐ ܟܚܝ̣ܕܐ ܕܟܪܣܛܝܢܘܬܐ ܐܬܩܪ̈ܝ̣ܝܢ

 

ܡܛܠ ܕܐܟܡܐ ܕܐܬܡܨܝܬ݀ ܡܠܬܐ ܠܘܩܒܠ ܐܪ̈ܣܝܣ ܗ̇ܢܝܢ ܕܒܝܕ ܣܥܝ̈ܐ ܡܕܡ. ܘܐܦܢ ܦܚܝ̣̈ܚܐ ܗܠܝܢ ܕܝܠܗܝܢ ܩܝܡܝ̈ܢ. ܫܪ̈ܝܐ ܐܣܪܚܬ݀. ܙܕܩ ܕܒܡܫܘܕܥܢܘܬܐ ܕܟܠܚܕܐ ܚܕܐ ܡܢܗܝܢ. ܘܕܗ̇ܘ ܡܐ ܕܒܗ ܥܡ ܫܪܪܐ ܢܨܝܐ ܢܚܬܡܝܗ̇ ܠܫܬܐܣܬܐ ܗܕܐ. ܐܝܟܢܐ ܕܟܕ ܝ̣ܕܝ̣̈ܥܬܐ ܢܗܘ̈ܝܢ܆ ܒܙܗܝ̣ܪܘ̣ ܢܬܥܪ̈ܩܢ.

 

 

 

ܗܪܣܝܣ ܩܕܡܝܬܐ

 

ܗ̇ܝ ܕܣܝܡܘܢ ܚܪܫܐ. ܗܢܐ ܡܬܚܙܐ ܗ̣ܘܐ ܒܚܪ̈ܫܘܗܝ. ܠܝܘܕܝ̈ܐ ܡ̇ܢ ܒܕܡܘ̣ܬ ܐܒܐ. ܘܠܫܡܪ̈ܝܐ ܐܝܟ ܒܪܐ. ܘܠܥܡ̈ܡܐ ܐܝܟ ܪܘܚܐ. ܘܟܦܪ  ܒܩܝܡܬܐ ܕܡܝ̈ܬܐ.

 

 

 

ܗܪܣܝܣ ܕܬܪܬܝܢ

 

ܕܡܢܕܪܘܣ. ܗܢܐ ܬܠܡܝ̣ܕܗ ܗ̣ܘܐ ܕܣܝ̣ܡܘܢ ܚܪܫܐ. ܘܠܗ̇ܢܘܢ ܕܥ̇ܡܕܝܢ ܡܢܗ܆ ܕܡܝܬܪܝ̣ܢ ܡ̣ܢ ܡܠܐܟ̈ܐ ܐܡ̇ܪ ܗܘܐ.

 

 

 

ܗܪܣܝܣ ܕܬܠܬ

 

ܕܣܘܛܪܝܢܝܢܘܣ. ܗܢܐ ܐܡ̇ܪ ܗ̣ܘܐ ܕܫܒܥܐ ܡܠܐܟ̈ܐ ܥܒܕܘ ܠܥܠܡܐ. ܘܠܗܘܢ ܐܡ̣ܪ ܐܠܗܐ. ܢܥܒܕ ܐ̱ܢܫܐ ܒܨܠܡܢ ܘܒܕܡܘ̣ܬܢ. ܘܗ̣ܢܘܢ ܣܡܘܗܝ ܠܢܡܘܣܐ. ܘܠܙܘܘܓܐ ܡ̣ܢ ܒܝܫܐ ܐܡܪܝܢ. ܘܟܕ ܠܡ ܕܝ̈ܘܐ ܡܥܕܪܝ̣ܢ ܠܒܢܝ̈ܢܫܐ ܒܝ̈ܫܐ. ܐܬܐ ܦܪܘܩܐ ܕܢܥܕܪ ܠܗܠܝܢ ܛܒ̈ܐ.

 

 

 

ܗܪܣܝܣ ܕܐܪܒܥ

 

ܕܒܣܝܠܝܕܝܣ. ܗܢܐ ܫܪܝ̣ ܒܗܪܣܝܣ ܕܦܠܚܝ̈ ܚܘܝܐ. ܕܡܫܬܡܗܝ̣ܢ ܓܢܣܠܝ̈ܩܘ. ܘܫܡܝ̈ܐ ܫܣܗ̄. ܣܐܡ ܐܝܟ ܝܘ̈ܡܬܐ ܕܫܢܬܐ. ܘܣܡ ܠܐܠܗܐ ܫܡܐ ܡ̣ܢ ܒܕܝܐ ܕܡܪܟܒ ܡ̣ܢ ܥܣܪ ܐܬܘ̈ܬܐ ܘܣܠ̣ܩ ܫܣܗ̄. ܡܢܝܢܐ ܕܡܬܩܪܐ ܐܒܪܐܣܐܟܝܣ. ܘܐܡ̇ܪ ܕܗ̇ܢܘ ܫܡܐ ܓܢܝ̣ܙܐ ܕܐܠܗܐ. ܘܢܡܘܣܐ ܨܚܢܐ ܓܠܝܐܝܬ ܐܡ̇ܪ ܕܢܗܘܐ ܡܫܡܠܝܢܢ.

 

 

 

ܗܪܣܝܣ ܕܚܡܫ

 

ܕܐܒܝܘ̈ܢܝܐ ܕܡܬܦܫܩܝ̣ܢ ܡ̣ܢ ܥܒܪ̈ܝܐ ܡܣܟܢ̈ܐ. ܒܗ̇ܝ ܕܡܟܐܝܬ ܘܡܣܟܢܐܝܬ ܡܗܝܡܢܝ̣ܢ ܗ̣ܘܘ ܒܡܫܝ̣ܚܐ. ܡ̣ܢ ܡܪܝܡ ܓܝܪ ܘܝܘܣܦ ܐܡܪܝܢ ܗ̣ܘܘ ܕܫܩܠ ܫܘܪܝܐ.

 

 

 

ܗܪܣܝܣ ܕܫܬ

 

ܕܩܪܝܢܬܘܣ. ܗܢܐ ܐܡ̇ܪ ܗ̣ܘܐ ܕܐܠܦ ܫܢܝ̣̈ܢ ܗܘܝܢܢ ܡܫܡܠܝܢܢ ܪ̈ܓܝ̣ܓܬܐ ܒܐܪܥܐ ܠܘܬ ܐܘܪܫܠܡ ܡ̣ܢ ܒܬܪ ܩܝܡܬܐ. ܘܡ̣ܢ ܡܠܐܟ̈ܐ ܐܡ̣ܪ ܕܗܘܐ ܥܠܡܐ. ܘܡ̣ܢ ܬܪܒܝ̣ܬܐ ܘܕܘܪܓܐ ܕܕܘܒܪܐ ܐܡ̣ܪ ܕܐܬܝܠܕ ܡܫܝܚܐ.

 

 

 

ܗܪܣܝܣ ܕܫܒܥ

 

ܕܘܠܢܛܝܢܘܣ. ܗܢܐ ܐܡ̇ܪ ܗܘܐ. ܕܡ̣ܢ ܫܡܝܐ ܐܝܬܝ̣ ܡܪܢ ܦܓܪܐ. ܘܐܝܟ ܕܒܣܝ̣ܠܘܢܐ ܥܒܪ ܒܒܬܘܠܬܐ.

 

 

 

ܗܪܣܝܣ ܕܬܡܢܐ

 

ܕܩܪܕܘܢ. ܗܢܐ ܐܝܬܝ̈ܐ ܣܓܝ̈ܐܐ ܐܡ̇ܪ ܗ̣ܘܐ. ܘܟܦܪ ܗ̣ܘܐ ܒܩܝܡܬܐ ܕܡܝ̈ܬܐ.

 

 

 

ܗܪܣܝܣ ܕܬܫܥ

 

ܡܪܩܘܣ. ܗܢܐ ܒܫܡܗ̈ܐ ܣܓܝ̈ܐܐ ܡܛܥܐ ܗ̣ܘܐ. ܟܕ ܒܠܫܢܐ ܥܒܪܝܐ ܡܬܚܫܚ ܗܘܐ. ܐܝܟ ܕܠܕܘܡܪܐ ܕܣܓܝ̈ܐܐ.

 

 

 

ܗܪܣܝܣ ܕܥܣܪ

 

ܕܡܪܩܝܘܢ. ܗܢܐ ܠܘ ܒܪ ܥܒܘܕܐ ܡܘܕܐ ܗܘܐ ܠܡܫܝ̣ܚܐ. ܐܦܠܐ ܕܡ̣ܢ ܡܪܝܡ ܐܬܝܠܕ. ܘܟܦ̇ܪ ܗ̣ܘܐ ܒܩܝܡܬܐ ܘܕܝ̣ܢܐ. ܘܬܠܬܐ ܐܝ̣ܬܝ̈ܐ ܝ̣ܠܝ̣̈ܕܐ ܠܐ ܣܐܡ. ܚܕ ܡ̇ܢ ܛܒܐ ܕܐܝܬܘܗܝ ܓܢܝ̣ܙܐ ܘܐܬܪܗ ܒܪܘܡܐ. ܘܗܘܝܘ ܐܒܘܗܝ ܕܡܪܢ ܝܫܘܥ ܡܫܝ̣ܚܐ. ܘܕܬܪܝܢ ܥܒܘܕܐ ܕܐܝܬܘܗܝ ܟܐܢܐ. ܘܐܬܪܗ ܒܡܨܥܬܐ. ܕܬܠܬܐ ܗܘܠܐ ܕܐܝܬܝܗ̇ ܒܝ̣ܫܬܐ ܘܐܬܪܗ̇ ܒܥܘܡܩܐ. ܘܟܕ ܨܒܐ ܠܡ ܥܒܘܕܐ ܕܢܙܟܐ ܠܒܝܫܬܐ. ܢܣܒܗ̇ ܠܗܘܠܐ ܘܒܪܐ ܠܟܠ ܡܕܡ. ܘܡ̣ܢ ܗ̇ܘ ܕܕܟܐ ܥܒܕ ܫܡܝܐ ܘܐܣܛܘܟ̈ܣܐ ܘܦܪܕܝܣܐ. ܘܡ̣ܢ ܦܪܕܝܣܐ ܫܩܠ ܩܘܠܥܐ ܘܒܪܝܗܝ ܠܐܕܡ. ܘܡ̣ܢ ܟܝܢܗ ܐܪܡܝ̣ ܒܗ ܢܦܫܐ. ܘܡ̣ܢ ܫܘܟܬܐ ܥܒܕ ܠܫܝܘ̣ܠ ܘܠܛܪܐܛܐܪܘܣ. ܘܡܨܚܐ ܠܥܒܘܕܐ ܡܛܠ ܕܐܡ̇ܪ ܕܐܦ ܗ̣ܘ ܒܝܫܐ ܗ̱ܘ ܐܝܟ ܗܘܠܐ. ܗܟܘܬ ܘܠܢܒܝ̈ܐ. ܘܡ̣ܢ ܐܘܢܓܠܝ̣̈ܣܛܐ ܠܠܘܩܐ ܒܠܚܘܕ ܡܩܒܠ. ܘܕܝܬܩܝ ܚܕܬܐ ܡ̣ܢ ܛܒܐ ܐܡ̇ܪ ܕܐܬܝܗܒܬ݀. ܘܥܬܝ̣ܩܬܐ ܡ̣ܢ ܟܐܢܐ ܕܩܪܐ ܠܗ ܥܒܘܕܐ. ܢܚܬ ܕܝܢ ܡܪܢ ܝܫܘܥ ܡܫܝܚܐ ܒܪ ܛܒܐ. ܕܢܚܪܪ ܡ̣ܢ ܫܘܥܒܕܐ ܕܥܒܘܕܐ ܠܐܝܠܝܢ ܕܡܗܝܡܢܝ̣ܢ ܒܗ. ܘܐܣܬܒܪ ܕܗ̣ܘܐ ܒܪܢܫܐ. ܟܕ ܡ̣ܢ ܒܪܢܫܐ ܠܐ ܢܣܒ ܡܕܡ. ܘܚܫ ܟܕ ܠܐ ܚܫ.

 

 

 

ܐܪܣܝܣ ܕܝ̄ܐ

 

ܗ̇ܝ ܕܐܝܩܪ̈ܝܛܝܛܐ ܒܝܕ ܐ̱ܢܫ ܕܫܡܗ ܛܝܛܝܢܘܣ ܕܡ̣ܢ ܒܝܬ ܢܗܪ̈ܝܢ. ܗܢܐ ܐܡ̇ܪ ܗ̣ܘܐ ܥܠܡ̈ܐ ܕܠܐ ܡܬܚܙܝܢ ܐܝܟ ܘܠܢܛܝܢܘܣ ܘܠܙܘܘܓܐ ܕܙܢܝܘܬܐ ܩܪܐ. ܘܣܡ ܐܘܢܓܠܝܘܢ ܕܡܬܩܪܐ ܕܝܐܛܣܐܪܘܢ ܗ̇ܢܘ ܕܡܚ̈ܠܛܐ. ܒܕ ܦܣܩ ܠܝܘܒܠܐ ܕܫܪ̈ܒܬܐ. ܘܠܟܠܗܝܢ ܐܝܠܝܢ ܕܡܚܘ̈ܝܢ ܕܡ̣ܢ ܙܪܥܗ ܕܕܘܝܕ ܐܝܬܘܗܝ ܡܫܝܚܐ ܘܚܠܦ ܬܘܒ ܠܫܠܝ̣ܚܐ.

 

 

 

ܐܪܣܝܣ ܕܝܒ̄

 

ܕܡܘܢܛܘܣ. ܗܢܐ ܥܒܕ ܗ̣ܘܐ ܢܦܫܗ ܦܪܩܠܛܐ. ܘܗܘܝ̈ ܠܗ ܢܫ̈ܐ ܦܪܣܩܝܠܐ ܘܡܟܣܡܠܐ. ܗܠܝܢ ܕܢܒܝ̈ܬܐ ܡܫܬܡ̈ܗܢ ܗܘܝ̈. ܠܦܦܘܙܐ ܓܝܪ ܡܕܝܢ̱ܬܐ ܘܠܛܝ̣ܡܘܢ ܡܕܝ̈ܢܬܐ ܕܒܐܣܝܐ ܐܘܪܫܠܡ ܩܪܐ ܐܢܝܢ. ܘܬܡܢ ܡܠܦ ܗ̣ܘܐ ܐ̱ܪ̈ܙܐ ܢܕܝ̣̈ܕܐ. ܠܚܪܬܐ ܕܝܢ ܗ̣ܢܘܢ ܒܐܝܕܝ̈ܗܘܢ ܩܛܠܘ ܢܦܫܗܘܢ.

 

 

 

ܐܪܣܝܣ ܕܝܓ̄

 

ܕܒܪܕܝܨܢ. ܗܢܐ ܬܠܬܐ ܟܝ̈ܢܐ ܪܘܪ̈ܒܐ ܐܡ̣ܪ. ܗܘܢܐ ܘܚܝܠܐ ܘܬܪܥܝ̣ܬܐ. ܘܐܪܒܥܐ ܐܝܬܝ̈ܐ. ܢܘܪܐ ܘܡܝ̈ܐ ܘܢܘܗܪܐ ܘܪܘܚܐ. ܘܡ̣ܢ ܗܠܝܢ ܗܘܘ ܐܝܬܝ̈ܐ ܘܥܠܡ̈ܐ ܫܣ̄. ܘܗ̇ܘ ܕܡܠܠ ܥܡ ܡܘܫܐ ܘܢܒܝ̈ܐ. ܪܝܫ ܡܠܐܟ̈ܐ ܐܝܬܘܗܝ ܘܠܘ ܐܠܗܐ. ܘܕܡܪܝܡ ܠܘ ܓܘܫܡܐ ܕܡܐܬ ܝܠܕܬ݀. ܐܠܐ ܢܦܫܐ ܢܗܝ̣ܪܬܐ ܕܐܣܬܟܡܬ݀ ܒܐܣܟܡ ܒܣܪܐ. ܘܐܡ̇ܪ ܬܘܒ ܕܡܠܐܟ̈ܐ ܘܟܘܟ̈ܒܐ ܬܩܢܘ̣ܗܝ ܠܒܪܢܫܐ. ܡܠܐܟ̈ܐ ܝܗܒܘ ܢܦܫܐ ܘܫܒܥܐ ܟܘܟ̈ܒܐ ܗܕ̈ܡܐ. ܘܐܡ̇ܪ ܕܐܟܡܐ ܕܫܠܚܐ ܣܗܪܐ ܢܘܗܪܗ̇ ܘܥܐܠܐ ܟܠ ܝܪܚܐ ܚܕܐ ܙܒܢ ܨܝܕ ܫܡܫܐ. ܗܟܢܐ ܐܦ ܐܡܐ ܕܚܝ̈ܐ ܫܠܚܐ ܠܒܘܫܗ̇ ܘܥܠܐ ܠܘܬ ܐܒܐ ܕܚܝ̈ܐ ܟܠ ܝܪܚܐ ܚܕܐ ܙܒܢ. ܘܡܫܬܘܬܦ ܥܡܗ̇ ܘܝܠܕܐ ܫܒܥ ܙܒܢܝ̈ܢ. ܘܐܡ̇ܪ ܕܒܫܥܬܐ ܕܒܝ̣ܠ ܐܬܝ̣ܠܕ ܡܫܝܚܐ. ܘܒܫܥܬܐܕܐܪܝܣ ܐܨܛܠܒ. ܘܒܫܥܬܐ ܬܘܒ ܕܒܝ̣ܠ ܐܬܢܚܡ. ܘܟܦܪ ܒܩܝܡܬܐ. ܘܠܙܘܘܓܐ ܨܘܠܠܐ ܩܪܐ.

 

 

 

ܐܪܣܝܣ ܕܝܕ̄

 

ܐܘܪܝܓܢܝܣ ܗܢܐ ܐܡܪܝܢ ܥܠܘܗܝ ܕܒܬܠܝ̣ܬܝܘܬܐ ܠܘ ܚܠܝ̣ܡܐܝܬ ܡܗܝܡܢ ܗ̣ܘܐ. ܘܒܩܝܡܬܐ ܕܦܓܪ̈ܐ ܟܦܪ ܗ̣ܘܐ ܐܝܢ ܥܬܝ̣ܪ ܗ̣ܘܐ ܒܡܠܬܐ ܕܡܠܦܢܘܬܐ ܘܦܘ̈ܫܩܐ ܣܓܝ̈ܐܐ ܥܒܕ ܕܥܬܝ̣ܩܬܐ ܘܕܚܕܬܐ. ܐܝܟܢܐ ܕܣܓܝ̈ܐܐ ܡ̣ܢ ܡܠܦܢ̈ܐ ܕܥܕܬܐ ܥܕܡܐ ܠܙܒܢܗ ܕܡܪܝ ܐܝܘܐܢܢܝܣ. ܐܦ ܗ̣ܘ ܡܪܝ ܐܝܘܐܢܢܝܣ ܡ̣ܢ ܡܟܬܒܢܘ̈ܗܝ ܥܬܪܝ̣ܢ ܗ̣ܘܘ ܘܝܬܪܝ̣ܢ. ܟܐܡܬ݀ ܟܕ ܠܘܪܕܐ ܩܛܦܝ̣ܢ ܗ̣ܘܘ ܘܠܣܢܝܐ ܡܘܩܕܝ̣ܢ.

 

 

 

ܐܪܣܝܣ ܕܝܗ̄

 

ܗ̇ܝ ܕܗܠܩ̈ܣܢܐ. ܗܠܝܢ ܐܡܪܝܢ ܗ̣ܘܘ ܕܠܝܬ ܚܘܝܒܐ ܠܗ̇ܘ ܕܟܦܪ ܒܦܘܡܗ܇ ܐܢ ܒܠܒܗ ܡܘܕܐ ܘܐܝܬ ܠܗܘܢ ܠܡ ܟܬܒܐ ܕܗ̇ܘ ܕܫܡܥ ܠܗ ܫܘܒܩܢܐ ܕܚܛܗ̈ܐ ܡܩܒܠ. ܘܗܠܝܢ ܡܣܠܝܢ ܠܟܬܒ̈ܐ ܕܫܠܝ̣̈ܚܐ.

 

 

 

ܐܪܣܝܣ ܕܝܘ̄

 

ܗ̇ܝ ܕܢܘܐܛܝܣ. ܗܢܐ ܐܡܪ ܗܘܐ ܕܠܝܬ ܫܘܒܩܢܐ ܠܗ̇ܢܘܢ ܕܚܛܝܢ ܒܬܪ ܡܥܡܘܕܝܬܐ. ܘܐܬܩܪܝ ܪܝܫܐ ܕܗ̇ܢܘܢ ܕܡܬܩܪܝܢ ܩܐܬܪ̈ܘ. ܘܠܗܢܐ ܟܕ ܡܟܣ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܐܡܪ.  ܚܘܐ ܠܝ ܕܟܝܘܬܟ ܘܡܩܒܠ ܐ̱ܢܐ ܩܫܝܘܬܟ. ܗܫܐ ܕܝܢ ܕܚܠ ܐ̱ܢܐ. ܕܠܐ ܟܕ ܢܒܥ ܐܢ̱ܬ ܫܘ̈ܚܢܐ܆ ܬܐܥܠ ܠܐ ܡܬܐܣܝܢܘܬܐ. ܘܠܗܠܝܢ ܡ̇ܢ ܐܡܪ ܗ̣ܘ ܩܕܝܫܐ. ܒܗܝ ܕܐܦ ܗ̣ܘ ܢܐܒܛܝܣ ܐܝܟ ܕܡܬܐܡܪܐ. ܟܦܪ ܒܪܕܘܦܝܐ ܗ̇ܘ ܕܩܡ ܥܠ ܟܪ̈ܣܛܝܢܐ ܡ̣ܢ ܕܘܩܝܘܣ ܒܫܢܬ ܬܩܣ̄ ܕܝܘ̈ܢܝܐ.

 

 

 

ܐܪܣܝܣ ܕܫܒܥܣܪ̈ܐ

 

ܕܣܐܒܠܝܘܣ. ܗܢܐ ܐܡܪ ܗܘܐ. ܕܚܕ ܐܝܬܝܗ̇ ܩܢܘܡܐ ܬܠܝܬܝܘܬܐ ܩܕܝܫܬܐ. ܘܗ̣ܘ ܟܕ ܗ̣ܘ ܩܢܘܡܐ. ܒܥܬܝܩܬܐ ܐܝܟ ܐܒܐ ܣܐܡ ܢܡܘܣܐ. ܘܒܚܕܬܐ ܐܝܟ ܒܪܐ ܕܐܬܒܪܢܫ. ܘܒܕܡܘܬ ܪܘܚܐ ܩܕܝܫܐ ܡܠܠ ܒܫܠܝ̈ܚܐ.

 

 

 

ܐܪܣܝܣ ܕܝܚ̄

 

ܕܝܘܐܦܛܘܣ ܡܨܪܝܐ. ܗܢܐ ܐܝܟ ܝܘܕܝ̈ܐ ܡܠܦ ܗܘܐ. ܘܐܠܦ ܫܢܝ̈ܢ ܡܐܟܠܐ ܘܡܫܬܝܐ ܐܡܪ ܕܗܘܐ ܥܠ ܐܪܥܐ ܠܩܕܝ̈ܫܐ.

 

 

 

ܐܪܣܝܣ ܕܝ̄ܛ

 

ܕܦܘܠܐ ܫܡܝܫܛܝܐ. ܗܢܐ ܒܪܢܫܐ ܫܚܝܡܐ ܐܡܪ ܗܘܐ ܠܡܫܝܚܐ. ܘܕܠܛܝܒܘܬܐ ܐܠܗܝܬܐ ܐܫܬܘܝ. ܘܡ̣ܢ ܡܪܝܡ ܥܒܕ ܫܘܪܝܐ. ܘܢܫ̈ܐ ܕܒܝ̈ܩܢ ܗܘܝ̈ ܠܗ ܕܫܦܝܪ̈ܢ. ܘܡܙܡܪ̈ܢ ܗܘܝ̈ ܥܠ ܫܡܗ. ܘܐܝܟ ܗ̇ܘ ܕܠܐ ܡܣܠܐ ܗܘܐ ܠܙܢܝܘܬܐ.

 

 

 

ܐܪܣܝܣ ܕܟܟ̄

 

ܕܡܐܢܝ. ܗܢܐ ܫܡܗ ܢܦܫܗ ܡܫܝܚܐ ܘܪܘܚܐ ܩܕܝܫܐ. ܘܬܪܝܢ ܐܝܬܝ̈ܐ ܐܡܪ ܗܘܐ ܛܒܐ ܘܒܝܫܐ. ܟܐܡܬ ܐܠܗܐ ܘܗܘܠܐ. ܘܗ̣ܝ ܠܡ ܗܘܠܐ ܟܕ ܐܫܬܓܫܬ݀܆ ܩܡܘ ܒܢܝ̈ܗ̇ ܠܘܩܒܠ ܚܕ̈ܕܐ. ܫܐܕ̈ܐ ܘܢܘܪܐ ܘܡܝ̈ܐ ܘܦܬܟܪ̈ܐ. ܘܪܕܦܝܢ ܗܘܘ ܘܡܬܪܕܦܝܢ ܡ̣ܢ ܚܕ̈ܕܐ. ܥܕܡܐ ܕܡܛܘ ܠܘܬ ܫܡܝ̈ܐ ܐܬܪܐ ܕܢܘܗܪܐ. ܐܠܗܐ ܕܝܢ ܛܒܐ ܟܕ ܕܚܠ ܕܠܐ ܢܡܙܓܘܢ ܚܫܘܟܘܬܗܘܢ ܒܛܒܬܐ ܘܒܢܘܗܪܐ. ܐܣܪ ܐܢܘܢ ܬܡܢ. ܘܫܩܠ ܩܠܝܠ ܡ̣ܢ ܢܘܪܐ ܘܫܕܐ ܠܘܬܗ̇ ܕܗܘܠܐ ܒܕܡܘܬ ܒܠܘܥܐ. ܘܗ̣ܝ ܟܕ ܒܠܥܬܗ ܐܬܐܣܪܬ݀ ܒܗ ܘܡܛܠ ܗܢܐ ܠܡ ܐܬܡܨܝ ܐܠܗܐ ܕܢܒܪܟܝܘܗܝ ܠܥܠܡܐ. ܠܐܕܡ ܕܝܢ ܘܠܚܘܐ ܡ̣ܢ ܣܩܠܐ ܫܠܝܛܐ ܕܗܘܠܐ ܐܡܪ ܕܗܘܘ ܘܡ̣ܢ ܢܒܪܘܐܝܠ. ܠܫܡܫܐ ܕܝܢ ܘܠܣܗܪܐ ܐܠܦ̈ܐ ܐܡܪ ܕܐܝܬܝܗܘܢ ܕܢܣܒܝܢ ܠܢܦ̈ܫܬܐ ܕܒܢܝ̈ܢܫܐ ܘܠܟܠܗ̇ ܛܒܬܐ ܕܐܬܚܠܛܬ݀ ܒܗܘܠܐ. ܘܡܣܦܩܝܢ ܠܐܬܪܐ ܕܢܘܗܪܐ. ܥܕܡܐ ܕܟܠܗ̇ ܢܘܗܪܐ ܢܓܗܐ ܡ̣ܢ ܡܘܙܓܐ ܕܥܡ ܒܝܫܬܐ. ܘܗܝܕܝܢ ܡܫܠܡ ܠܗ̇ ܐܠܗܐ ܠܗܘܠܐ ܠܢܘܪܐ ܥܡ ܢܦ̈ܫܬܐ ܐܝܠܝܢ ܕܠܐ ܗܝܡܢ̈ܘ ܒܗ ܒܡܐܢܝ. ܘܠܙܘܘܓܐ ܡ̣ܢ ܒܝܫܐ ܐܡܪ ܕܐܝܬܘܗܝ. ܘܒܩܝܡܬܐ ܕܡܝ̈ܬܐ ܟܦܪ. ܘܫܘܢܝܐ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ ܡܘܕܐ. ܘܠܐܣܛܘܟ̈ܣܐ ܡܢܦ̈ܫܐ ܝܕܥ ܠܗܘܢ. ܗܟܘܬ ܘܠܙܪ̈ܥܐ ܘܢܨ̈ܒܬܐ. ܘܠܡܪܢ ܕܠܐ ܢܦܫܐ ܘܦܓܪܐ ܐܡܪ. ܐܠܐ ܠܡ ܒܦܢܛܣܝܐ ܐܡܪ ܕܐܬܚܙܝ ܘܚܫ ܘܥܒܕ ܟܠ ܡܕܡ. ܘܥܣܪܝܢ ܘܚܡܫܐ ܐܠܗܝ̈ܢ ܐܡܪ ܕܐܝܬ. ܘܐܝܬ ܠܗܘܢ ܬܪܬܥܣܪ̈ܐ ܢܫܝ̈ܢ.

 

 

 

ܐܪܣܝܣ ܕܟ̄ܐ

 

ܕܐܪܝܘܣ. ܗܢܐ ܠܒܪܐ ܕܐܠܗܐ ܒܪܝ̣ܬܐ ܣܐܡ ܠܗ. ܘܐܡ̇ܪ ܕܡ̣ܢ ܩܕܡ ܕܢܒܪܐ ܐܠܗܐ ܐܒܐ ܠܟܠܗܝܢ ܒܪ̈ܝܬܐ. ܒܪܝܗܝ ܠܒܪܐ. ܘܒܗ ܒܪܐ ܟܠܡܕܡ. ܒܕܓܘܢ ܠܘ ܒܪ ܟܝܢܐ ܕܐܒܐ ܡܘܕܐ ܠܒܪܐ. ܗܟܘܬ ܐܦܠܐ ܠܪܘܚܐ ܩܕܝܫܐ. ܗܟܘܬ ܘܠܡܠܬܐ ܕܡܬܒܪܢܫܢܘܬܐ ܒܚܘ̈ܟܡܐ ܐ̱ܚܪ̈ܢܐ ܕܘܕ ܘܐܡ̣ܪ. ܕܦܓܪܐ ܕܠܐ ܢܦܫܐ ܫܩܠ ܐܠܗܐ ܡܠܬܐ. ܘܕܗ̣ܝ ܐܠܗܘܬܐ ܡܠܝܬ݀ ܕܘܟܬ݀ ܢܦܫܐ. ܣܪܚ ܕܝܢ ܐܦ ܠܛܟܣܐ ܕܬܫܒܘܚܬܐ ܕܠܬܠܝ̣ܬܝܘܬܐ ܡܬܩܪܒܐ ܒܥܕܬܐ ܟܕ ܐܠܦ ܗܟܢܐ. ܬܫܒܘܚܬܐ ܠܐܒܐ ܒܝܕ ܒܪܐ ܒܪܘܚܐ ܕܩܘܕܫܐ. ܐܝܢ ܠܩܪܝܬܐ ܕܥܠ ܡܥܡܘܕܝ̣ܬܐ ܗܘܝܐ ܐܝܟ ܕܐܠܦ ܡܪܢ. ܠܐ ܐܡܪܚ ܕܢܫܚܠܦ ܡܛܠ ܓܠܝܘܬܐ ܕܪܘܫܥܐ.

 

 

 

ܐܪܣܝܣ ܕܟܒ̄

 

ܕܥܘܕܝ ܛܢܦܐ. ܗܢܐ ܓܝܪ ܬܫܥܝܢ ܘܐܪܒܥܐ ܓܠܝܘ̈ܢܐ ܘܦܪ̈ܟܣܘܬܐ ܥܒܕ. ܘܒܗܘܢ ܐܠܦ. ܐܒܐ ܕܚܝ̈ܐ ܘܐܡܐ ܕܚܝ̈ܐ. ܘܒܢܝ̈ܐ ܣܓܝ̈ܐܐ. ܘܪ̈ܘܚܐ ܡ̣ܢ ܡܠܐܟ̈ܐ ܥܒܘܕܐ ܗ̱ܘ ܕܡܠܐܟ̈ܐ. ܘܕܬܚܝܬ ܚܠܩܐ ܗ̱ܘ ܐܠܗܐ. ܘܐܦ ܕܡܫܬܪܐ ܘܡܬܒܛܠ ܠܚܪܬܐ ܥܡ ܫܘܬܦܘ̈ܗܝ. ܘܕܐܠܗܐ ܙܩܘܦܗ ܗ̣ܘ ܡܫܝܚܐ. ܘܕܡܫܝ̣ܚܐ ܒܪܝ̣ܬܐ ܗ̱ܘ. ܘܕܢܚܬ ܒܪܐ ܒܪ̈ܩܝ̣ܥܐ ܟܠܗܘܢ ܘܠܐ ܝܕܥܘܗܝ ܥܡܘܪ̈ܝܗܘܢ. ܘܕܦܓܪܗ ܕܡܪܢ ܫܡܝܢܐ ܗ̱ܘ. ܘܕܒܠܥ ܒܠܘ̣ܟܝܬܐ ܘܠܐ ܒܠܥ. ܘܕܐܬܬܠܝ̣ ܒܩܝܣܐ ܘܠܐ ܐܬܬܠܝ̣. ܘܕܡ̣ܢ ܐܝ̣ܬܝ̈ܐ ܗܘܝ̈ ܒܪ̈ܝܬܐ. ܘܕܒܝ̣ܫܬܐ ܚܠܝ̣ܛܐ ܗ̱ܝ ܒܟܝܢܐ. ܘܕܐܣܬܝܒܘ ܡܠܐܟ̈ܐ ܒܓܘܪܐ. ܘܕܦܓܪܢ ܡ̣ܢ ܒܝܫܐ ܗ̱ܘ. ܘܕܠܝܬ ܩܝܡܬܐ. ܘܕܡ̣ܢ ܟܕܘ ܐܙܝ̣̈ܠܢ ܢܦ̈ܫܬܐ ܠܕܝ̣ܢܐ. ܘܕܛܡܐܐ ܗ̱ܘ ܙܘܘܓܐ. ܘܬܠܬ ܡܐܐ ܘܫܬܝܢ ܪ̈ܩܝ̣ܥܝܢ ܣ̇ܐܡ. ܕܢܘܪ̈ܢܐ ܒܦܪܨܘܦ ܐܠܗܐ ܗܘܝܢ. ܘܕܐܡ̣ܪ ܐܠܗܐ ܠܚܘܐ ܕܒܛܢܝ ܡܢܝ. ܥܕܠܐ ܢܐܬܘܢ ܢܫܬܘܬܦܘܢ ܒܟܝ ܫܠܝ̣̈ܛܐ. ܘܬܘܒ ܕܒܛܢܝ ܡܢܝ ܥܕܠܐ ܢܐܬܘܢ ܥܒܘܕܘ̈ܗܝ ܕܐܕܡ ܨܝܕܝܟܝ.

 

 

 

ܐܪܣܝܣ ܕܟܓ̄

 

ܕܡܩܕܘܢܝܘܣ. ܗܢܐ ܠܒܪܐ ܡ̇ܢ ܒܪ ܟܝܢܐ ܕܐܒܐ ܐܡ̇ܪ. ܠܪܘܚܐ ܩܕܝܫܐ ܕܝܢ܆ ܘܠܐ ܣܟ. ܕܡܛܠܬܗ ܐܡ̣ܪ ܩܕܝܫܐ ܓܪܝܓܘܪܝܘܣ ܕܢܐܙܝ̣ܢܙܘ. ܣܓܝ̈ܐܬܐ. ܘܐܠܗ̈ܐ ܣܓܝ̈ܐܐ. ܘܕܚܕ ܡܢܐ ܕܝܢ ܬܐܡܪ ܐܡܪܝܢ. ܡܛܠ ܪܘܚܐ ܩܕܝܫܐ. ܡ̣ܢ ܐܝܟܐ ܡܥܠ ܐܢ̱ܬ ܠܢ ܐܠܗܐ ܐܟܣܢܝܐ ܘܕܠܐ ܟܬܝ̣ܒ. ܗܕܐ ܡ̣ܢ ܟܕܘ܆ ܘܗ̇ܢܘܢ ܕܨܝܕ ܒܪܐ ܢܝܚܝ̣ܢ.

 

 

 

ܐܪܣܝܣ ܕܟܕ̄

 

ܕܐܘܢܘܡܝܘܣ. ܗܢܐ ܓܝܪ ܐܡ̇ܪ ܗ̣ܘܐ. ܕܩܕܡ ܟܠܡܕܡ ܠܒܪܐ ܥܒܕ ܐܠܗܐ. ܘܗ̣ܘ ܒܪܐ ܥܒܕ ܠܪܘܚܐ ܩܕܝܫܐ ܩܕܡ ܟܠܗܘܢ ܬܘܩܢ̈ܐ. ܘܫܚܠܦ ܬܘܒ ܘܠܗ̇ܝ ܕܬܠܬ ܙܒܢܝ̣̈ܢ ܒܩܪܝܬܐ ܕܬܠܝ̣ܬܝܘܬܐ ܢܬܚܫܚ. ܐܠܐ ܠܗ̇ܢܘܢ ܕܥܡܕܝ̣ܢ ܒܫܡ ܡܘܬܗ ܕܝܫܘܥ ܒܠܚܘܕ ܕܡܥܡܕ ܗ̣ܘܐ. ܟܕ ܡ̣ܢ ܪܝܫܗ ܘܥܕܡܐ ܠܚܕܝܗ ܒܡܝ̈ܐ ܨܒܥܝ̣ܢ ܗ̣ܘܘ ܘܠܡܢܘ̈ܬܐ ܐ̱ܚܪ̈ܢܝܬܐ ܐܟܡ̇ܢ ܕܠܐ ܕܟܝ̈ܢ ܫܒܩܝ̣ܢ ܗ̣ܘܘ ܠܗܝܢ. ܘܐܡܪܚ ܬܘܒ ܕܢܐܡܪ. ܕܠܝܬ ܡܕܡ ܡ̣ܢ ܐܠܗܝ̈ܬܐ ܕܛܥܐ ܠܗ. ܐܠܐ ܟܠ ܡܕܡ ܚܟܡ ܘܠܗ ܠܟܝܢܐ ܐܠܗܝܐ. ܘܗܟܢܐ ܠܡ ܝܕܥ ܠܗ ܠܐܠܗܐ ܐܟܡܐ ܕܗ̣ܘ ܠܗ ܝܕܥ.

 

 

 

ܐܪܣܝܣ ܕܟܗ̄

 

ܕܐܦܘܠܝܢܪܝܘܣ. ܗܢܐ ܟܕ ܠܟܝܢܐ ܕܬܠܝ̣ܬܝܘܬܐ ܕܚܕ ܐܝܬܘܗܝ ܡܫܪܪ. ܘܕܪ̈ܓܐ ܕܝܢ ܣܐܡ. ܟܕ ܐܡ̇ܪ ܥܠ ܐܒܐ ܗ̇ܝ ܕܪܒ. ܥܠ ܒܪܐ ܕܝܢ ܗ̇ܝ ܕܝܬܝ̣ܪ. ܘܥܠ ܪܘܚܐ ܗ̇ܝ ܕܣܓܝ. ܐܘ ܕܐܬܒܣܪ ܡܠܬܐ ܐܡ̇ܪ. ܘܕܢܣܒ ܢܦܫܐ. ܐܠܐ ܠܘ ܗ̇ܝ ܡܠܝ̣ܠܬܐ. ܐܠܐ ܗ̇ܝ ܢܨܒܬܢܝܬܐ ܘܚܝܘܬܢܝܬܐ. ܗܘܢܐ ܕܝܢ ܐܡ̇ܪ ܕܠܐ ܢܣܒ. ܐܠܐ ܗ̣ܘ ܐܠܗܐ ܡܠܝ̣ ܕܘܟܬ݀ ܗܘܢܐ. ܒܕܘܟܐ ܕܝܢ ܐ̱ܚܪܢܐ ܥܠ ܟܠܗ̇ ܬܠܝ̣ܬܝܘܬܐ ܣܐܡ ܠܗ̇ ܠܡܕܒܪܢܘܬܐ ܒܕܡܘ̣ܬ ܣܒܠܝܘܣ. ܘܕܦܓܪܗ ܕܡܪܢ ܫܡܝܢܐ ܗ̱ܘ ܐܡ̇ܪ. ܘܚܕ ܟܝܢܐ ܡܡܙܓܐ ܐܡ̇ܪ ܕܒܪܐ. ܘܡܐܟܠܐ ܘܡܫܬܝܐ ܘܙܘܘܓܐ ܐܡ̇ܪ ܡ̣ܢ ܒܬܪ ܩܝܡܬܐ. ܘܐܠܦܐ ܡܙܡܘܪ̈ܐ ܥܒܕ ܟܕ ܐܡ̇ܪ ܕܝܬܝ̣ܪ ܡ̣ܢ ܗܠܝܢ ܕܕܘܝܕ ܫܦܝ̣ܪܝ̣ܢ.

 

 

 

ܐܪܣܝܣ ܕܟܘ̄

 

ܕܐܘܣܒܝܘܣ ܐ̱ܢܫ ܐܘܪܗܝܐ. ܗܢܐ ܗ̣ܘܘ ܠܗ ܬܠܡܝ̣̈ܕܐ ܐ̱ܢܫܝ̈ܢ ܣܒ̈ܐ. ܗܠܝܢ ܕܠܚܠܡ̈ܐ ܘܡܥܒܕܢ̈ܘܬܐ ܕܫܐܕ̈ܐ ܓܠܝ̈ܢܐ ܕܪܘܚܐ ܩܪܝܢ ܗ̣ܘܘ. ܘܐܡܪܝܢ ܕܐܝܠܝܢ ܕܐܬܝܢ ܠܘܬܗܘܢ܆ ܡܩܒܠܝ̣ܢ ܡܘܗܒܬܐ ܕܪܘܚܐ. ܕܐܦܠܐ ܠܡ ܐܢ ܥܡ ܢܫ̈ܐ ܢܕܡܟܘܢ܆ ܢܗܘܘܢ ܡܪܓܫܝ̣ܢ. ܘܕܠܐ ܡܘܬܪ ܦܓܪܐ ܕܫܩܝ̣ܠܝ̣ܢܢ ܡܕܡ.

 

 

 

ܐܪܣܝܣ ܕܟܙ̄

 

ܗ̇ܝ ܕܐܘܛܘܟܐ. ܗܢܐ ܒܪ ܬܪܥܝ̣ܬܗܘܢ ܐܬܚܙܝ̣ ܕܘܠܢܛܝܢܘܣ ܘܕܐܦܘܠܝܢܐܪܝܘܣ. ܒܕܓܘܢ ܠܘ ܡܕܡ ܐ̱ܢܫܝܐ ܐܡ̇ܪ ܕܢܣܒ ܐܠܗܐ ܡܠܬܐ ܡ̣ܢ ܒܬܘܠܬܐ. ܐܠܐ ܠܡ ܗ̣ܘ ܐܫܬܚܠܦ ܘܗ̣ܘܐ ܒܣܪܐ. ܘܡܛܠ ܗܕܐ ܠܘ ܒܪ ܟܝܢܢ ܐܡ̇ܪ ܗ̣ܘܐ ܠܦܓܪܗ ܕܡܪܢ. ܘܚܕ ܟܝܢܐ ܡܡܙܓܐ ܘܡܫܓܢܝܐ ܐܡ̇ܪ ܗ̣ܘܐ ܠܡܫܝܚܐ.

 

 

 

ܐܪܣܝܣ ܕܟܚ̄

 

ܗ̇ܝ ܕܝܘܠܝܢܐ ܗܓܓܝܐ ܗ̇ܘ ܕܐܠܝܩܪܢܣܘܣ. ܗܢܐ ܠܦܓܪܗ ܕܡܪܢ ܐܡ̇ܪ ܗ̣ܘܐ ܕܡܢܗ̇ ܕܚܕܝܘܬܐ ܐܫܬܚܠܦ ܠܟܝܢܐ ܐܠܗܝܐ. ܘܡܛܠܗܕܐ ܠܘ ܒܪ ܟܝܢܢ ܗ̣ܘ. ܘܠܟܠܗ̇ ܡܕܒܪܢܘܬܐ ܒܦܢܛܣܝܐ ܐܡ̇ܪ ܕܫܡܠܝܗ̇ ܡܪܢ ܒܥܠܡܐ ܘܠܘ ܒܫܪܪܐ.

 

 

 

ܐܪܣܝܣ ܕܟ̄ܛ

 

ܗ̇ܝ ܕܛܪ̈ܝܬܝܛܐ. ܗܠܝܢ ܓܝܪ ܐܡܪܝܢ. ܕܟܕ ܥܠ ܟܠ ܚܕ ܡ̣ܢ ܩܢܘ̈ܡܐ ܡܢܗ ܘܠܗ ܫܪܝ̣ܪ ܕܟܝܢܐ ܐܝܬܘܗܝ ܘܐܠܗܐ ܐܝܬܘܗܝ. ܡܕܝܢ ܬܠܬܐ ܟܝ̈ܢܐ ܘܬܠܬܐ ܐܠܗ̈ܐ ܐܝܬܝܗ̇ ܬܠܝ̣ܬܝܘܬܐ ܐܟܡܐ ܕܐܦ ܬܠܬܐ ܩܢܘ̈ܡܐ.

 

 

 

ܐܪܣܝܣ ܕܬܠܬܝܢ

 

ܗ̇ܝ ܕܐܣܛܦܐܢܐ ܒܪܨܘܕܐܝ̈ܠܐ. ܗܢܐ ܐܡ̣ܪ ܕܐܝܬ ܫܘܠܡܐ ܠܬܫܢܝ̣ܩܐ. ܘܕܠܘ ܠܥܠܡ ܥܠܡܝܢ ܡܫܬܢܩܝ̣ܢ ܪ̈ܫܝ̣ܥܐ. ܒܢܘܪܐ ܡܬܕܟܝܢ. ܘܗܟܢܐ ܐܦ ܫܐܕ̈ܐ ܡܬܚܢܢܝ̣ܢ. ܘܟܠܡܕܡ ܠܟܝܢܐ ܐܠܗܝܐ ܗܦܟ ܐܝܟ ܕܐܡ̣ܪ ܦܘܠܘܣ ܕܢܗܘܐ ܐܠܗܐ ܟܠ ܒܟܠ. ܘܟܬܒܐ ܐܟܬܒ ܡܛܠ ܫܘܪܪܐ ܕܗܕܐ ܬܪܥܝ̣ܬܐ. ܘܒܫܡܗ ܕܐܝܪܐܬܐܘܣ ܪܒܗ ܕܩܕܝ̣ܫܐ ܕܝܘܢܢܘܣܝܘܣ ܩܪܝܗܝ. ܟܐܡܬ݀ ܐܝܟ ܕܗ̇ܘ ܕܕܝܠܗ ܗ̣ܘ ܟܐܡܬ݀ ܕܩܕܝ̣ܫܐ ܐܝܪܐܬܘܣ. ܐܦ ܣܓܝ̈ܐܐ ܗܟܢܐ ܡܣܒܪܝ̣ܢ.

 

 

 

ܬܘܣܦܬܐ ܕܢܘܗܪܐ

 

ܘܙܕܩ ܠܡܕܥ܇ ܕܟܠܗܝܢ ܬܘܕ̈ܝܬܐ ܕܡܢܝܢܢ ܐܪ̈ܣܝܣ ܐܢܝܢ ܕܝܬܝ̣ܪ ܫܟܝܪ̈ܢ. ܒܗ̇ܝ ܕܠܟ̈ܝܢܐ ܡܫܚ̈ܛܢ. ܘܝܘܠܦܢܐ ܚܢܦܝܐ ܒܕܘܓܡܐ ܟܪܣܛܝܢܝܐ ܚ̈ܠܛܢ. ܘܡܛܠ ܗܕܐ ܐܠܗܐ ܫܘܒܚܐ ܠܛܝܒܘܬܗ. ܐܝܟ ܕܡ̣ܢ ܫܪ̈ܫܐ ܥܩܪ ܐܢܝܢ. ܗܠܝܢ ܕܝܢ ܬܘܕ̈ܝܬܐ ܐ̱ܚܪ̈ܢܝܬܐ ܕܝܘܡܢ ܟܗܝ̣̈ܢܢ ܒܥܠܡܐ. ܟܕ ܒܗܠܝܢ ܕܡܛܠ ܬܠܝ̣ܬܝܘܬܐ. ܘܢܛܝ̣ܪܘܬ ܟܝܢ̈ܐ ܕܡܢܗܘܢ ܡܫܝ̣ܚܐ ܕܠܐ ܫܘܚܠܦܐ ܘܡܘܙܓܐ. ܟܠܗܝܢ ܐܟܚܕܐ ܫܦܝ̣ܪ ܡܬܪ̈ܥܝܢ. ܡܛܠ ܟܘܢܝ̈ܐ ܕܝܠܗ̇ ܕܚܕܝܘܬܐ ܥܡ ܚܕ̈ܕܐ ܐܬܚܪ̈ܝܝܢ ܒܠܚܘܕ. ܒܕܓܘܢ ܡܢܗܘܢ ܡ̇ܢ ܟܝܢܝܬܐ ܘܩܢܘܡܝܬܐ ܐܘܕܝܘܗ̇ ܠܚܕܝܘܬܐ. ܘܐܝܬܝܗܘܢ ܝܥܩܘ̈ܒܝܐ ܣܘܪ̈ܝܝܐ ܘܐܝ̣ܓܘ̈ܦܛܝܐ ܘܟܘ̈ܫܝܐ ܘܢܐܒܐܕܝܣ. ܘܐܪ̈ܡܢܝܐ ܕܝܢ ܐܦܢ ܒܡܕܡ ܠܘܬ ܗܠܝܢ ܕܝܘܠܝܢܐ ܨܠܝܢ ܐܠܐ ܠܘ ܟܠܢܐܝܬ. ܡܢܗܘܢ ܕܝܢ ܠܐ ܟܝܢܝܬܐ ܐܦܠܐ ܩܢܘܡܝܬܐ ܐܠܐ ܦܪܨܘܦܝܬܐ ܒܠܚܘܕ. ܘܕܐܝܬܝܗܘܢ ܢܣܛܘܪ̈ܝܢܘ ܕܝ̣ܠܢܐܝܬ. ܘܡܢܗܘܢ ܐܘܪܚܐ ܡܕܡ ܡܨܥܝܬܐ ܒܝܬ ܗܠܝܢ ܬܪܬܝܢ ܐܘܪ̈ܚܢ ܒܓܘ. ܘܚܕܝܘܬܐ ܩܢܘܡܝܬܐ ܘܠܘ ܟܝܢܝܬܐ ܐܡ̣ܪܘ. ܘܐܝܬܝܗܘܢ ܝܘ̈ܢܝܐ ܘܪ̈ܘܡܝܐ ܘܡܠܟܝ̈ܐ ܣܘܪ̈ܝܝܐ. ܘܡܪ̈ܘܢܝܐ ܣܘܪ̈ܝܝܐ. ܘܐܝܒܪ̈ܝܐ. ܘܪ̈ܘܣܝܐ ܘܐܠܢܝ̈ܐ. ܘܪ̈ܘܡܝܐ ܡ̇ܢ ܐܘܟܝ̣ܬ ܦܪ̈ܢܓܝܐ ܦܪܝ̣ܫܝ̣ܢ ܐܢܘܢ ܡ̣ܢ ܗܠܝܢ ܐ̱ܚܪ̈ܢܐ. ܒܗ̇ܝ ܕܠܪܘܚܐ ܩܕܝܫܐ ܡ̣ܢ ܐܒܐ ܘܡ̣ܢ ܒܪܐ ܐܡܪܝܢ ܕܢܦܩ. ܘܡܪ̈ܘܢܝܐ ܦܪܝ̣ܫܝ̣ܢ ܡ̣ܢ ܟܠܗܘܢ. ܒܗ̇ܝ ܕܚܕ ܨܒܝܢܐ ܘܚܕܐ ܡܥܒܕܢܘܬܐ ܠܬܪ̈ܝܗܘܢ ܟܝ̈ܢܐ ܐܡܪܝܢ. ܘܠܘ ܬܪܝܢ ܨܒܝܢܝ̈ܢ ܘܬܪܬܝܢ ܡܥܒܕܢ̈ܘܢ. ܐܦ ܓܝܪ ܘܟܠܗܘܢ ܝܘ̈ܢܝܐ ܚܕ ܨܒܝܢܐ ܘܚܕܐ ܡܥܒܕܢܘܬܐ ܡܘܕܝܢ ܗ̣ܘܘ ܥܕܡܐ ܠܙܒܢܐ ܕܡܟܣܝܡܘܣ ܐ̱ܢܫ ܕܝܪܝܐ. ܘܬܐܘܕܘܪܝܩܝ ܚܪܢܝܐ ܘܝܘܚܢܢ ܕܡܣܩܝܢܘܣ. ܢܣܛܘܪ̈ܝܢܐ ܕܝܢ ܒܗ̇ܝ ܕܬܪܝܢ ܨܒܝ̈ܢܐ ܢܐܡܪܘܢ ܐܘ ܠܐ ܢܐܡܪܘܢ. ܥܠ ܬܪ̈ܝܗܘܢ ܩܦ̈ܣܐ ܡܚܓܪܝ̣ܢ. ܒܕܠܐ ܫܟܝ̣ܚ ܒܡܕܡ ܡ̣ܢ ܟܬܒ̈ܐ ܩܕ̈ܡܝܐ ܕܝܠܗܘܢ ܡܕܡ ܕܐܝܟ ܗܟܢ. ܘܠܣܓܝ̈ܐܐ ܡ̣ܢ ܝܕܘ̈ܥܝܗܘܢ. ܫܡܥܢܢ ܕܚܕ ܨܒܝܢܐ ܐܡܪܝܢ ܕܬܪ̈ܝܗܘܢ ܟܝ̈ܢܐ ܘܩܢܘ̈ܡܐ.

 

 

 

ܫܠܡܬ݀ ܫܬܐܣܬܐ ܪܒܝܥܝܬܐ

 

 

 

 

 

 

     #1 

 

ܫܬܐܣܬܐ ܚܡܝܫܝܬܐ

 

ܡܛܠ ܝܕܥܬܐ ܕܐܘܣܝ̈ܐܣ ܫܡܝܢ̈ܝܬܐ. ܕܐܝܬܝܗܘܢ ܡܠܐܟ̈ܐ ܒܡܫܚܠܦܘܬܐ ܕܬܓܡܝ̈ܗܘܢ. ܘܒܗ ܩܦ̈ܠܐܐ ܚܡܫܐ. ܩܦܠܐܘܢ ܩܕܡܝܐ ܡܛܠ ܫܘܝܘܬܗܘܢ ܕܡܠܐܟ̈ܐ. ܘܒܗ ܦܣܘ̈ܩܐ ܬܪܝܢ.

 

ܦܣܘܩܐ ܩܕܡܝܐ

 

 ܡܛܠ ܫܘܪܪ ܫܟܝܚܘܬܗܘܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ

 

ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܕܟܠ ܡܕܡ ܕܠܘ ܠܐ ܡܫܟܚܢܝ̣ܬܐ ܗ̱ܝ ܫܟܝ̣ܚܘܬܗ. ܐܘ ܐܠܨܝ ܐܝܬܘܬܐ ܐܝܬܘܗܝ ܒܝܬܗ܆ ܘܐܝܬܘܗܝ ܐܠܗܐ ܫܘܒܚܐ ܠܛܝܒܘܬܗ. ܐܘ ܡܬܡܨܝܢܝ ܐܝܬܘܬܐ ܐܝܬܘܗܝ ܘܒܝܬܗ. ܘܗ̣ܘ ܗܢܐ. ܐܘ ܓܘܫܡܐ ܗ̱ܘ. ܐܘ ܒܓܘܫܡܐ ܫܪܐ. ܐܘ ܠܐ ܓܘܫܡܐ ܗ̱ܘ ܐܦܠܐ ܒܓܘܫܡܐ ܫܪܐ. ܘܗ̇ܘ ܩܕܡܝܐ ܐܠܨܐܝܬ ܝ̇ܕܥ ܟܠܢܫ ܫܟܝ̣ܚܘܬܗ. ܗ̣ܘ ܗܟܘܬ ܘܗ̇ܘ ܕܬܪܝܢ ܕܐܝܬܘܗܝ ܓܕܫܐ. ܘܗ̇ܘ ܕܬܠܬܐ.ܐܘ ܡܐܣܪ ܐܣܝ̣ܪ ܥܡ ܓܘܫܡܐ ܐܘܪܓܢܝܐ. ܘܡܚܝܕ ܥܡܗ ܒܚܕܝܘܬܐ ܟܝܢܝܬܐ ܘܩܢܘܡܝܬܐ܆ ܘܐܝܬܝܗ̇ ܢܦܫܐ ܡܠܝ̣ܠܬܐ. ܐܘ ܠܘ ܗܟܢܐ܆ ܘܗ̣ܘ ܗܢܐ ܐܘ ܛܒܐ ܗ̱ܘ ܘܡܬܩܪܐ ܡܠܐܟܐ. ܐܘ ܒܝ̣ܫܐ ܗ̱ܘ܆ ܘܡܬܩܪܐ ܫܐܕܐ. ܘܟܕ ܒܟܠܗܘܢ ܗܠܝܢ ܦܘ̈ܠܓܐ܇ ܠܝܬ ܡܕܡ ܕܠܐ ܡܬܡܨܝܢܝ̣ܬܐ ܗ̱ܝ ܫܟܝ̣ܚܘܬܗ. ܘܐܘܣܝܐ ܕܡܠܐܟ̈ܐ ܚܕܐ ܗ̱ܝ ܡܢܗܘܢ ܕܦܘܠܓ̈ܐ܆ ܠܘ ܠܐ ܡܬܡܨܝܢܝ̣ܬܐ ܗ̱ܝ ܫܟܝ̣ܚܘܬܗ̇.

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܟܠ ܡܕܡ ܐ ܐܘ ܛܒܐ ܗ̱ܘ ܟܠܢܝܐ ܒ ܐܘ ܒܝܫܐ ܗ̱ܘ ܟܠܢܝܐ ܓ ܐܘ ܛܒܬܐ ܥܠܒܐ ܒܗ ܠܒܝܫܬܐ ܕ ܐܘ ܒܝܫܬܐ ܥܠܒܐ ܒܗ ܠܛܒܬܐ ܗ ܘܫܘܝܐ ܒܗ ܛܒܬܐ ܠܒܝܫܬܐ. ܘܗ̇ܘ ܩܕܡܝܐ ܗܘܝܘ ܐܠܗܐ ܫܘܒܚܐ ܠܛܝܒܘܬܗ. ܘܗ̇ܘ ܕܬܪܝܢ ܠܐ ܡܬܡܨܝܢܝ̣ܬܐ ܗ̱ܝ ܫܟܝ̣ܚܘܬܗ. ܒܗ̇ܝ ܕܟܕ ܐܠܗܐ ܗ̱ܘ ܒܠܚܘܕ ܒܪܘܝܐ ܘܛܒܐ ܗ̱ܘ ܟܠܢܝܐ. ܡ̣ܢ ܠܐ ܡܬܡܨܝܢܝ̣ܬܐ ܗ̱ܝ ܕܒܪܝ̣ܬܐ ܢܒܪܐ ܟܠܢܐܝܬ ܒܝܫܐ. ܘܗ̇ܘ ܕܬܠܬܐ ܗ̣ܢܘܢ ܐܢܘܢ ܡܠܐܟ̈ܐ. ܘܗ̇ܘ ܕܐܪܒܥܐ ܫܐܕ̈ܐ. ܘܗ̇ܘ ܕܚܡܫܐ ܒܢܝ̈ܢܫܐ. ܘܟܕ ܒܪܢܫܐ ܕܫܘܝܐ ܒܗ ܛܒܬܐ ܠܒܝܫܬܐ ܫܟܝ̣ܚ ܗ̣ܘ. ܐܠܨܐ ܕܐܦ ܡܠܐܟܐ ܕܥܠܒܐ ܒܗ ܛܒܬܐ ܠܒܝܫܬܐ ܢܗܘܐ ܫܟܝ̣ܚ ܡ̣ܢ ܛܒܐ. ܘܐܠܐ ܡܫܬܟܚܐ ܛܒܬܐ ܕܡܬܟܠܝܐ ܡ̣ܢ ܛܒܐ. ܗ̇ܝ ܕܫܟܝ̣ܪܐ ܡܚܘܝܢܘܬܐ ܕܬܠܬ ܐܡܪܝܢܢ. ܕܒܪܢܫܐ ܡ̣ܢ ܬܪܝܢ ܟܝܢܝ̣̈ܢ ܡܪܟܒ. ܠܐ ܓܫܝ̣ܡܐ ܘܓܫܝ̣ܡܐ. ܘܠܟܝܢܗ ܓܫܝ̣ܡܐ. ܟܝ̈ܢܐ ܣܓܝ̈ܐܐ ܡܫܟܚܝ̣ܢܢ ܕܒܝܬܝ̣ܝ̣̈ܢ. ܚܝ̈ܘܬܐ ܠܡܐܡܪ ܘܢܨ̈ܒܬܐ ܘܐܣܛܘ̈ܟܣܐ. ܐܠܨܐ ܡܕܝܢ ܕܐܦ ܠܟܝܢܗ ܠܐ ܓܘܫܡܢܝܐ. ܟܝ̈ܢܐ ܐ̱ܚܪ̈ܢܐ ܢܗܘܘܢ ܕܒܝܬܝ̣ܝ̣̈ܢ ܕܐܝܬܝܗܘܢ ܡܠܐܟ̈ܐ.

 

ܡܚܘܝܢܘܬܐ ܕܐܪܒܥ:

 

ܠܡܢܗܘܢ ܡ̇ܢ ܕܗܠܝܢ ܕܚܝ̣ܝ̣ܢ ܡܫܟܚܝ̣ܢܢ ܕܟܠܢܐܝܬ ܓܠܝ̣ܙܝ̣ܢ ܡ̣ܢ ܦܘܪܫܢܐ ܕܫܪܪܐ ܡ̣ܢ ܕܓܠܘܬܐ. ܐܟܙܢܐ ܕܚܝ̈ܘܬܐ ܟܠܗܝܢ ܠܐ ܡܠܝ̣̈ܠܬܐ. ܠܡܢܗܘܢ ܕܝܢ ܡܫܟܚܝ̣ܢܢ ܕܥܡ ܡܚܫܒܬܐ ܡܫܟܚܝ̣ܢ ܠܡܕܪܟܘ ܠܦܘܪܫܢܐ ܕܐܝܟ ܗܢܐ. ܘܐܝܬܝܗܘܢ ܒܢܝ̈ܢܫܐ. ܒܕܓܘܢ ܡ̣ܢ ܐܠܨܐ ܕܬܗܘܐ ܒܪܝ̣ܬܐ ܐ̱ܚܪܬܐ ܕܣܛܪ ܡ̣ܢ ܚܘܫܒܐ ܡܕܪܟܐ ܠܦܘܪܫܢܐ ܗܢܐ. ܕܐܝܬܝܗܘܢ ܡܠܐܟ̈ܐ. ܡܛܠ ܕܟܪ ܕܡܨܥܝܐ܆ ܡ̣ܢ ܐܢܢܩܝ̣ ܕܣܟ̈ܐ ܢܗܘܘܢ. ܘܟܕ ܒܪܢܫܐ ܡܨܥܝܐ ܗ̱ܘ. ܘܚܕ ܡ̇ܢ ܣܟܐ ܩܢܐ ܗ̇ܘ ܕܚܝ̈ܘܬܐ ܠܐ ܡܠܝ̣̈ܠܬܐ. ܐܢܢܩܐܝܬ ܣܟܐ ܐ̱ܚܪܢܐ ܙܕܩ ܕܢܗܘܐ ܠܗ ܕܡܝܬܪ ܡܢܗ ܕܐܝܬܝܗܘܢ ܡܠܐܟ̈ܐ ܕܒܟܠ ܡܕܡ ܡܠܝ̣ܠܝܢ. ܒܕܠܩܘ̣ܒܠܐ ܕܚܝ̈ܘܬܐ ܠܐ ܡܠܝ̣̈ܠܬܐ ܕܠܐ ܣܟ ܡܫܘ̈ܬܦܢ ܠܡܠܝ̣ܠܘܬܐ. ܘܫܝ̣̈ܛܢ ܡܢܗ.

 

 

 

ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ.

 

ܐܘܪܝܬܐ. ܣܒܠܬܐ ܕܚܙܐ ܝܥܩܘܒ. ܘܡܠܐܟ̈ܐ ܕܐܠܗܐ ܣܠܩܝ̣ܢ ܘܢܚܬܝ̣ܢ ܒܗ̇. ܘܬܘܒ ܡܫܪܝܬܐ ܕܡܠܐܟܘ̈ܗܝ ܕܡܪܝܐ ܦܓܥܬ݀ ܒܝܥܩܘܒ. ܘܬܘܒ ܐܬܚܙܝ̣ܘ ܡܠܐܟ̈ܐ ܠܗܓܪ ܘܠܐܒܪܗܡ ܘܠܠܘܛ ܒܕܡܘ̣ܬܐ ܐ̱ܢܫܝܬܐ.

 

ܣܗܕܘܬܐ ܕܬܪܬܝܢ :

 

ܐܝܘܒ. ܐܬܘ ܡܠܐܟ̈ܐ ܩܕܡ ܡܪܝܐ. ܘܬܘܒ ܐܦ ܒܡܠܐܟܘ̈ܗܝ ܢܣܝ̣ܡ ܬܡܗܐ. ܘܬܘܒ ܘܠܘܬ ܡ̇ܢ ܡ̣ܢ ܡܠܐܟ̈ܐ ܬܬܦܢܐ. ܘܬܘܒ. ܒܪܐ ܐܟܚܕܐ ܟܘܟ̈ܒܝ ܫܦܪܐ ܘܟܠܗܘܢ ܒܢܝ̈ ܡܠܐܟ̈ܐ ܝܒܒܘ.

 

ܣܗܕܘܬܐ ܕܬܠܬ:

 

ܕܘܝܕ. ܒܨܪܬܝܗܝ ܩܠܝ̣ܠ ܡ̣ܢ ܡܠܐܟ̈ܐ. ܘܬܘܒ ܡܛܠ ܕܠܡܠܐܟܘ̈ܗܝ ܢܦܩܕ ܥܠܝܟ. ܘܬܘܒ. ܣܓܘܕܘ ܠܗ ܟܠܗܘܢ ܡܠܐܟܘ̈ܗܝ. ܘܬܘܒ. ܥܒܕ ܡܠܐܟܘ̈ܗܝ ܪܘܚ. ܘܡܫܡ̈ܫܢܘܗܝ ܢܘܪ ܝܩܕܐ. ܘܬܘܒ. ܫܒܚܘܗܝ ܟܠܗܘܢ ܡܠܐܟܘ̈ܗܝ. ܫܒܚܘܗܝ ܟܠܗܘܢ ܚܝܠܘ̈ܬܗ. ܘܬܘܒ. ܪܟܒ ܥܠ ܟܪ̈ܘܒܐ ܘܦܪܚ. ܘܬܘܒ. ܝܬܒ ܥܠ ܟܪ̈ܘܒܐ ܐܬܓܠܝ. ܘܬܘܒ. ܝܬܒ ܥܠ ܟܪ̈ܘܒܐ ܬܙܘܥ ܐܪܥܐ.

 

ܣܗܕܘܬܐ ܕܚܡܫ:

 

ܣܦܪ ܡܠܟ̈ܐ. ܘܐܘܫܛ ܡܠܐܟܐ ܐܝܕܗ ܥܠ ܐܘܪܫܠܡ ܠܡܚܒܠܘܬܗ̇. ܘܬܘܒ. ܘܡܠܐܟܐ ܕܩܛܠ ܡܐܐ ܘܬܡܢܝ̣ܢ ܘܚܡܫܐ ܐܠܦܝ̣̈ܢ ܒܡܫܪܝ̣ܬܗ ܕܐܬܘܪܝܐ.

 

ܣܗܕܘܬܐ ܕܐܪܒܥ:

 

ܕܢܝܐܝܠ. ܘܡܠܐܟܐ ܕܛܠܐ ܕܢܚܬ ܥܠ ܛܠܝ̈ܐ ܠܐܬܘܢܐ. ܘܬܘܒ. ܘܡܠܐܟܐ ܕܐܡ̣ܪ ܦܣܘܩ ܐܝܠܢܐ. ܘܬܘܒ. ܘܐܠܗܝ ܫܕܪ ܡܠܐܟܗ.

 

ܣܗܕܘܬܐ ܕܫܬ:

 

ܐܘܢܓܠܝܘܢ. ܡܠܐܟܐ ܕܐܬܚܙܝ̣ ܠܙܟܪܝܐ ܘܠܡܪܝܡ ܘܠܝܘܣܦ. ܘܠܪ̈ܥܘܬܐ. ܘܬܘܒ. ܘܡ̣ܢ ܗܫܐ ܬܚܙܘܢ ܫܡܝܐ ܕܦܬܝ̣ܚܝ̣ܢ. ܘܡܠܐܟ̈ܐ ܕܐܠܗܐ ܕܣܠܩܝ̣ܢ ܘܢܚܬܝ̣ܢ. ܘܫܪܟܐ ܕܐ̱ܚܪ̈ܢܝܬܐ ܣܓܝ̈ܐܬܐ.

 

ܣܗܕܘܬܐ ܕܫܒܥ:

 

ܦܪܟܣܝܣ. ܘܐܫܬܟܚܘ ܬܪܝܢ ܓܒܪ̈ܝ̣ܢ. ܩܝܡܝ̣ܢ ܠܘܬܗܘܢ ܒܠܒܘ̈ܫܐ ܚܘܪ̈ܐ. ܘܬܘܒ. ܘܡܠܠ ܡܠܐܟܐ ܕܡܪܝܐ ܥܡ ܦܝܠܠܝܦܘܣ ܘܐܡ̣ܪ ܠܗ. ܘܐ̱ܚܪ̈ܢܝܬܐ ܣܓܝ̈ܐܬܐ.

 

ܣܗܕܘܬܐ ܕܬܡܢܐ:

 

ܦܘܠܘܣ. ܠܐ ܚܝ̈ܐ ܘܠܐ ܡܘܬܐ. ܘܠܐ ܡܠܐܟ̈ܐ. ܘܬܘܒ. ܘܗܘܝܢ ܬܐܛܪܘܢ ܠܥܠܡܐ ܠܡܠܐܟ̈ܐ ܘܠܒܢܝ̈ܢܫܐ. ܘܬܘܒ. ܘܠܐ ܗܘܐ ܡ̣ܢ ܡܠܐܟ̈ܐ ܢܣܒ. ܘܐ̱ܚܪ̈ܢܝܬܐ ܕܕܡ̈ܝܢ.

 

 

 

ܦܣܘܩܐ ܬܪܝܢܐ ܕܫܬܐܣܬܐ ܚܡܝܫܝܬܐ

 

 

 

ܡܛܠ ܬܪܥܝ̣ܬܐ ܕܟܦܪ̈ܝ ܒܫܟܝ̣ܚܘܬܐ ܕܡܠܐܟ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ.

 

ܣܥܝܐ ܩܕܡܝܐ :

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܠܐ ܓܘܫܡܐ ܗ̱ܘ. ܐܦܠܐ ܓܕܫܐ. ܐܦܠܐ ܐܘܣܝܐ ܡܕܡ ܕܐܣܝ̣ܪܐ ܥܡ ܓܘܫ̈ܡܐ ܐܝܟ ܢܦܫܐ ܡܠܝ̣ܠܬܐ. ܒܕܓܘܢ ܐܢ ܡܕܡ ܐ̱ܚܪܝܢ ܐܝܬ ܕܠܕܝ̣̈ܠܝܬܐ ܕܟܝܢܗ ܡܫܘܬܦ ܟܐܡܬ݀ ܡܠܐܟܐ. ܡܫܬܟܚ ܠܗ ܒܪܘܝܐ܆ ܕܡܫܘܬܦ ܒܟܝܢܐ ܠܕܣܛܪ ܡܢܗ. ܗ̇ܝ ܕܫܟܝ̣ܪܐ. ܒܗ̇ܝ ܕܐܠܨܐ ܕܐܘ ܒܪܘܝܐ ܡܬܡܨܝܢܐ ܢܗܘܐ ܐܝܟ ܡܠܐܟܐ. ܐܘ ܡܠܐܟܐ ܐܠܨܝ ܐܝܬܘܬܐ ܐܝܟ ܒܪܘܝܐ܆ ܗ̇ܝ ܕܠܐ ܡܨܝܐ.

 

ܣܥܝܐ ܬܪܝܢܐ:

 

ܐܡܪܝܢ ܕܓܘܫܡܐ ܘܓܕܫܘ̈ܗܝ ܐܢܢܩܐܝܬ ܡ̣ܢ ܪܓܫܬܐ ܡܬܕܪ̈ܟܢܐ ܗ̣ܘܘ. ܘܠܐܠܗܐ ܫܘܒܚܐ ܠܛܝܒܘܬܗ ܗܘܢܐ ܐܕܪܟܗ ܒܥܠܬ݀ ܣܢܝ̣ܩܘܬܗ ܕܓܘܫܡܐ ܘܓܕܫܘ̈ܗܝ ܥܠ ܡܗܘܝܢܐ. ܘܠܢܦܫܐ ܡܠܝ̣ܠܬܐ ܗܟܘܬ ܗܘܢܐ ܐܕܪܟܗ̇ ܒܥܠܬ݀ ܣܢܝ̣ܩܘܬܗ ܕܐܘܪܓܢܘܢ ܗܢܐ ܐ̱ܢܫܝܐ ܒܡܕܪ̈ܟܢܘܬܗ ܗܘܢܢ̈ܝܬܐ. ܡܠܐܟ̈ܐ ܕܝܢ ܟܕ ܠܐ ܡܗܘ̈ܝܢܐ ܐܢܘܢ ܐܦܠܐ ܐܣܝ̣ܪ̈ܝ ܥܡ ܡܕܡ ܡ̣ܢ ܓܘܫ̈ܡܐ ܒܙܢܐ ܕܢܦܫܐ. ܐܦܠܐ ܓܘ̈ܫܡܐ. ܐܦܠܐ ܓܕ̈ܫܐ. ܠܐ ܡ̣ܢ ܗܘܢܐ ܡܬܕܪܟܝ̣ܢ. ܐܦܠܐ ܡ̣ܢ ܪܓܫܬܐ. ܘܟܠ ܡܕܡ ܕܠܐ ܗܘܢܐ ܐܦܠܐ ܪܓܫܐ ܣܗܕܝ̣ܢ ܠܫܟܝ̣ܚܘܬܗ܆ ܠܘ ܡ̣ܢ ܗܠܝܢ ܕܐܝܬܝܗܘܢ ܐܝܬܘܗܝ.

 

ܣܥܝܐ ܬܠܝܬܝܐ:

 

ܐܡܪܝܢ ܕܣܓܝ̈ܐܐ ܡ̣ܢ ܡܠܦܢ̈ܐ ܫܠܡܘ ܕܡܠܐܟ̈ܐ ܩܕܝ̣ܡܝ̣ܢ ܠܗܘܝܐ ܕܫܡܝܐ ܘܕܐܪܥܐ ܘܕܫܪܟܐ ܕܗܘܝ̈ܐ ܟܠܗܘܢ ܓܘܫ̈ܡܢܝܐ. ܘܡ̣ܢ ܗܕܐ ܐܠܨܐ ܕܠܘ ܒܙܒܢܐ ܢܗܘܘܢ ܕܒܪܝܢ. ܒܗ̇ܝ ܕܙܒܢܐ ܡܫܘ̣ܚܬܐ ܗ̱ܘ ܕܙܘܥܐ ܫܡܝܢܐ. ܘܟܕ ܠܝܬ ܗ̣ܘܐ ܫܡܝܐ ܐܦܠܐ ܙܘܥܐ ܡܨܐ ܗ̣ܘܐ ܠܡܗܘܐ. ܘܡܛܠ ܗܕܐ ܐܦܠܐ ܙܒܢܐ. ܒܕܓܘܢ ܐܢ ܐܝܬܝܗܘܢ ܡܠܐܟ̈ܐ ܠܐ ܦܪܝ̣ܫܝ̣ܢ ܡ̣ܢ ܒܪܘܝܐ ܠܐ ܒܙܒܢܐ ܐܦܠܐ ܒܐܬܪܐ. ܐܦܠܐ ܒܫܟܝ̣ܚܘܬܐ ܐܦܠܐ ܒܓܠܝ̣ܙܘܬܐ. ܐܦܠܐ ܒܓܘܫܡܢܝܘܬܐ. ܡܛܠ ܕܠܘ ܓܘܫ̈ܡܐ ܐܢܘܢ. ܐܦܠܐ ܒܠܐ ܓܫܝ̣ܡܘܬܐ ܡܛܠ ܕܐܦ ܐܠܗܐ ܠܐ ܓܫܝ̣ܡܐ ܗ̱ܘ. ܘܡ̣ܢ ܗܠܝܢ ܐܠܨܐ܆ ܕܐܘ ܐܠܗܐ ܫܘܒܚܐ ܠܛܝܒܘܬܗ ܟܝܢܐ ܡܠܐܟܝܐ ܢܗܐ ܠܗ. ܐܘ ܡܠܐܟ̈ܐ ܟܝܢܐ ܕܐܠܗܐ ܢܗܘܘܢ ܐܝܬ ܠܗܘܢ. ܘܬܪ̈ܬܝܗܝܢ ܫܟܝܪ̈ܢ. ܘܟܕ ܡܬܗܘܢܢܘܬ ܫܟܝ̣ܚܘܬܐ ܕܡܠܐܟ̈ܐ ܠܘܬ ܫܟܝ̣ܪ̈ܘܬܐ ܕܐܝܟ ܗܠܝܢ ܡܘܒܠܐ. ܠܐ ܡܟܝ̣ܠ ܐܝܬܝܗܘܢ ܡܠܐܟ̈ܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܗ̇ܝ ܕܠܐ ܢܗܘܐ ܡܠܐܟܐ ܓܘܫܡܐ. ܐܦܠܐ ܓܕܫܐ. ܐܦܠܐ ܐܘܣܝܐ ܐܣܝ̣ܪܬ݀ ܥܡ ܓܘܫܡܐ. ܙܢܝ̈ܐ ܐܢܘܢ ܐܦܘܦܛܝ̣̈ܩܝܐ. ܘܠܐ ܐܠܨܐ ܡ̣ܢ ܡܫܘܬܦܘܬܐ ܕܬܪܝܢ ܣܘܥܪ̈ܢܝ̣ܢ ܒܙܢܐ ܡܕܡ ܡܪܝ̣ܡܢܝܐ ܐܘ ܒܙܢܝ̈ܐ ܣܓܝ̈ܐܐ ܡܪ̈ܝܡܢܝܐ ܡܫܘܬܦܘܬܗܘܢ ܬܘܒ ܒܟܝܢܐ. ܐܘ ܒܙܢܝ̈ܐ ܟܝܢܝ̈ܐ. ܘܐܠܐ ܙܕܩ ܗܘܐ ܕܓܘܢܐ ܚܘܪܐ ܘܐܘܟܡܐ ܟܕ ܟܠ ܚܕ ܡܢܗܘܢ ܠܘ ܣܘܡܩܐ ܗ̱ܘ. ܕܚܘܪܐ ܐܘܟܡܐ ܢܗܘܐ ܐܝܬܘܗܝ ܗ̣ܘܐ ܘܐܘܟܡܐ ܚܘܪܐ. ܒܗ̇ ܒܕܡܘ̣ܬܐ ܡܕܝܢ ܘܐܠܗܐ ܫܘܒܚܐ ܠܛܝܒܘܬܗ ܘܡܠܐܟܐ ܘܐܦܢ ܡܫܘܬܦܝ̣ܢ ܒܠܐ ܓܫܝ̣ܡܘܬܐ ܘܠܐ ܓܕܫܢܝܘܬܐ ܘܠܐ ܐܣܝ̣ܪܘܬܐ ܕܥܡ ܦܓܪܐ. ܐܠܐ ܠܐ ܙܕܩ ܕܟܠ ܚܕ ܡܢܗܘܢ ܗ̇ܘ ܐ̱ܚܪܢܐ ܢܗܘܐ. ܐܠܐ ܘܐܦܠܐ ܐܢܗܘ ܕܒܙܢܝ̈ܐ ܡܕܡ ܩܛܦܛܝ̣̈ܩܐ ܢܫܬܘܬܦܘܢ ܬܪܝܢ ܣܘܥܪ̈ܢܝ̣ܢ ܐܠܨܐ ܕܟܠܚܕ ܡܢܗܘܢ ܗ̇ܘ ܐ̱ܚܪܢܐ ܢܗܘܐ. ܗܐ ܓܝܪ ܒܪܢܫܐ ܘܣܘܣܝܐ ܐܦܢ ܐܟܚܕܐ ܡܫܘܬܦܝܢ ܒܚܝܘܬܐ. ܐܠܐ ܐܠܨܐܝܬ ܠܐ ܒܪܢܫܐ ܣܘܣܝܐ ܗ̱ܘ. ܐܦܠܐ ܣܘܣܝܐ ܒܪܢܫܐ. ܘܡܛܠ ܗܕܐ ܬܪܬܝܢ ܩܛܐܦܣܝ̣ܣ. ܠܐ ܡܟܢ̈ܫܢ ܣܘܢܪܝ̣ܣܡܐ ܒܐܣܟܡܐ ܬܪܝܢܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܠܘ ܚܕܐ ܗ̱ܝ ܐܘܪܚܐ ܕܡܕܪܟܢܘܬ ܗܘܢܐ ܠܡܬܗܘ̈ܢܢܐ. ܐܝܟܢܐ ܕܒܗ̇ ܟܕ ܒܗ̇ ܒܗ̇ܝ ܐܘܪܚܐ ܟܕ ܠܐ ܢܬܕܪܟ ܡܕܡ. ܢܚܪܘܩ ܥܠܘܗܝ ܕܠܐ ܐܝܬܘܗܝ. ܘܡܛܠ ܗܕܐ ܐܡܪܝܢܢ ܕܐܦܢ ܒܙܢܐ ܗ̇ܘ ܕܐܣܝ̣ܪܘܬܐ ܕܥܡ ܦܓܪܐ ܠܐ ܡܬܕܪܟܢܐ ܗ̱ܘ ܡܠܐܟܐ. ܒܙ̈ܢܝܐ ܐ̱ܚܪ̈ܢܐ ܕܣܛܪ ܡ̣ܢ ܗܟܢ ܠܘ ܠܐ ܡܬܕܪܟܢܐ ܗ̱ܘ. ܟܐܡܬ݀ ܒܡܚܘ̈ܝܢܘܬܐ ܗ̇ܢܝܢ ܐܪܒܥ ܕܒܗܝܢ ܫܪܪܢܢ ܫܟܝ̣ܚܘܬܗܘܢ ܕܡܠܐܟ̈ܐ ܘܒܐܚܪ̈ܢܝܬܐ ܣܓܝ̈ܐܬܐ ܕܠܐ ܐܬܥܗܕܢܢ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܗܢܐ ܣܥܝܐ ܗ̣ܘ ܟܕ ܗ̣ܘ ܚܝܠܐ ܕܣܥܝܐ ܩܢܐ ܩܕܡܝܐ. ܒܕܓܘܢ ܐܡܪܝܢܢ ܕܡܛܠ ܡܢܐ ܐܡ̣ܪܬܘܢ. ܕܒܪܘܝܐ ܘܡܠܐܟܐ ܟܕ ܠܐ ܡܬܦܪܫܝ̣ܢ ܡ̣ܢ ܚܕܕ̈ܐ. ܠܐ ܒܙܒܢܐ ܐܦܠܐ ܒܐܬܪܐ. ܐܦܠܐ ܒܫܟܝ̣ܚܘܬܐ ܐܦܠܐ ܒܓܠܝ̣ܙܘܬܐ. ܐܦܠܐ ܒܓܫܝ̣ܡܘܬܐ. ܐܦܠܐ ܒܠܐ ܓܫܝ̣ܡܘܬܐ. ܙܕܩ ܕܣܟ ܠܐ ܢܬܦܪܫܘܢ. ܘܠܡܢܐ ܠܘ ܒܐܝ̣ܬܘܬܗ ܐܠܨܐܝܬ ܢܬܦܪܫ ܒܪܘܝܐ ܡ̣ܢ ܡܠܐܟܐ܆ ܕܡܬܡܨܝܢܝ̣ܬܐ ܗ̱ܝ ܐܝܬܘܬܗ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ

 

ܕܫܬܐܣܬܐ ܚܡܝܫܝܬܐ

 

ܡܛܠ ܗ̇ܝ ܕܒܕܐܝܟ ܗܠܝܢ ܡܚܘ̈ܝܢܘܬܐ ܡܫܪܪܝܢ ܦܝܠܠܘ̈ܣܘܦܐ ܒܪ̈ܝܐ ܫܟܝ̣ܚܘܬܗܘܢ ܕܡܠܐܟ̈ܐ ܕܠܗܘܢ ܩܪܝܢ ܗܘ̈ܢܐ ܒܟܬܒܝ̈ܗܘܢ.

 

ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢ ܕܟܕ ܚܕ ܗ̣ܘ ܒܪܘܝܐ ܣܓܝ̣ܕܐ. ܐܦ ܥܠܬܢܗ ܚܕ ܙܕܩ ܕܢܗܘܐ. ܘܗ̣ܘ ܗܢܐ. ܐܘ ܐܘܣܝܐ ܐܝܬܘܗܝ ܐܘ ܓܕܫܐ. ܘܠܐ ܡܨܝܐ. ܕܓܕܫܐ ܢܗܘܐ. ܘܐܠܐ ܡܫܬܟ̈ܚܢ ܗܘܝ̈ ܐܘܣܝ̈ܐܣ ܕܥܠ ܗ̇ܘ ܓܕܫܐ ܣܢܝ̣̈ܩܢ ܒܗܘܝܗܝܢ. ܟܕ ܓܕܫܐ ܥܠ ܐܘܣܝܐ ܣܢܝ̣ܩ ܒܩܘܝܡܗ܆ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܐܘܣܝܐ ܢܗܘܐ ܥܠܬܢܗ. ܘܡܛܠ ܕܠܐܘܣܝܐ ܚܡܫܐ ܐܢܘܢ ܦܘ̈ܠܓܐ. ܓܘܫܡܐ ܐܡ̇ܪ ܐ̱ܢܐ. ܘܗܘܠܐ ܘܐܕܫܐ. ܘܢܦܫܐ ܡܠܝ̣ܠܬܐ. ܘܗܘܢܐ ܡܬܦܪܫܢܐ ܐܘܟܝ̣ܬ ܡܠܐܟܐ. ܘܠܐ ܡܨܝܐ ܕܓܘܫܡܐ ܢܗܘܐ ܥܠܬܢܗ ܕܒܪܘܝܐ. ܒܗ̇ܝ ܕܡ̣ܢ ܗܘܠܐ ܘܐܕܫܐ ܡܪܟܒ. ܒܕܓܘܢ ܡܫܬܟܚ ܒܪܘܝܐ ܕܥܠܬܐ ܗ̱ܘ ܠܬܪܝܢ ܥܠܬܢܝ̣̈ܢ ܐܟܚܕܐ. ܗ̇ܝ ܕܠܐ  ܡܨܝܐ. ܐܦܠܐ ܬܘܒ ܡܨܝܐ ܕܗܘܠܐ ܬܗܘܐ ܥܠܬܢܗ. ܘܐܠܐ ܡܫܬܟܚܐ ܗܘܠܐ ܕܟܕ ܡܩܒܠܢܝ̣ܬܐ ܗ̱ܝ ܒܟܝܢܐ. ܕܐܦ ܥܒܘܕܬܐ ܬܗܐ ܒܟܝܢܐ ܠܐܘܣܝ̈ܐܣ ܕܫܪܟܐ܆ ܗ̇ܝ ܕܠܐ ܡܨܝܐ ܐܦܠܐ ܬܘܒ ܡܨܝܐ ܕܐܕܫܐ ܢܗܐ ܥܠܬܢܗ. ܡܛܠ ܕܐܕܫܐ ܠܐ ܡܨܐ ܠܡܗܘܐ ܒܠܥܕ ܗܘܠܐ. ܐܦܠܐ ܬܘܒ ܢܦܫܐ ܡܠܝ̣ܠܬܐ ܡܨܝܐ ܕܬܗܘܐ ܥܠܬܢܗ. ܒܗ̇ܝ ܕܡܫܬܟܚܝ̣ܢ ܗ̣ܘܘ ܟܠܗܘܢ ܓܘܫܡܐ ܕܥܠܬܢ̈ܐ ܐܢܘܢ ܕܢܦܫܐ. ܘܡ̣ܢ ܗܪܟܐ ܐܠܨܐ ܗܘܬ݀ ܕܠܐ ܬܣܬܢܩ ܢܦܫܐ ܥܠ ܐܣܪܗ̇ ܕܥܡ ܦܓܪܐ܆ ܒܗ̇ܝ ܕܥܠܬܢܐ ܥܠ ܥܠܬܐ ܣܢܝ̣ܩ. ܘܠܘ ܥܠܬܐ ܥܠ ܥܠܬܢܐ. ܘܐܠܘܠܐ ܣܢܝ̣ܩ ܗܘܬ݀ ܠܗ ܠܐ ܐܬܐܣܪܬ݀ ܥܡܗ. ܫܪܝ̣ܟܐ ܡܕܝܢ ܕܗܘܢܐ ܡܬܦܪܫܢܐ ܕܗܘܝܘ ܡܠܐܟܐ. ܗ̣ܘ ܢܗܘܐ ܐܝܬܘܗܝ ܥܠܬܢܐ ܩܕܡܝܐ ܕܥܠܬܐ ܩܕܡܝܬܐ. ܘܡ̣ܢ ܗܪܟܐ ܐܠܨܐ ܕܐܢܢܩܐܝܬ ܢܗܘܐ ܐܝܬܘܗܝ ܘܫܟܝ̣ܚ. ܐܝܟ ܕܐܦ ܥܠܬܗ ܕܐܝܬܘܗܝ ܐܠܗܐ ܫܘܒܚܐ ܠܫܡܗ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢ. ܕܙܘ̈ܥܐ ܫܡܝ̈ܢܐ ܠܐ ܫܘܪܝܐ ܩܢܝܢ܆ ܐܦܠܐ ܫܘܠܡܐ. ܒܕܓܘܢ ܠܐ ܡܣܝܟܝ̣ܢ. ܘܠܐ ܡܨܝܐ ܕܚܝܠܐ ܓܘܫܡܢܝܐ ܢܗܐ ܥܠܬܗܘܢ. ܒܗ̇ܝ ܕܟܠ ܚܝܠܐ ܓܘܫܡܢܝܐ ܡܣܝܟܐ ܗ̱ܘ ܒܣܘܝܟܗ ܕܓܘܫܡܐ. ܘܕܡܣܝܟܐ ܥܠܬܐ ܢܗܐ ܕܠܐ ܡܣܝܟܐ ܠܐ ܡܨܝܐ. ܐܦܠܐ ܬܘܒ ܡܨܝܐ ܕܐܠܗܐ ܫܘܒܚܐ ܠܫܡܗ ܢܗܐ ܥܠܬܐ ܕܙܘ̈ܥܐ ܗܠܝܢ. ܘܐܠܐ ܡܫܬܟܚ ܕܥܠܬܐ ܗ̱ܘ ܠܝܬܝ̣ܪ ܡ̣ܢ ܚܕ܆ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܥܠܬ݀ ܙܘܥܐ ܕܟܠ ܚܕܐ ܡ̣ܢ ܡܘܙ̈ܠܬܐ ܗܘܢܐ ܢܗܐ ܡܬܦܪܫܢܐ ܕܚܝܠܐ ܩܢܐ ܠܐ ܡܣܬܝܟܢܐ. ܐܘܟܝ̣ܬ ܡܠܐܟܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢ ܕܥܠܬܗܝܢ ܕܢܦ̈ܫܬܐ ܡܠܝ̣̈ܠܬܐ ܠܐ ܡܨܝܐ ܕܓܘܫܡܢܝܘܬܗ ܕܓܘܫܡܐ ܬܗܘܐ. ܘܐܠܐ ܐܠܨܐ ܗܘܬ݀ ܕܟܠ ܓܘܫܡܐ ܥܠܬܐ ܢܗܘܐ ܗ̣ܘܐ ܕܢܦܫܐ. ܐܦܠܐ ܡܨܝܐ ܕܓܕܫܐ ܢܗܘܐ. ܒܗ̇ܝ ܕܓܕܫܐ ܐܠܐ ܒܓܘܫܡܐ ܠܐ ܡܨܐ ܠܡܗܘܐ. ܘܐܠܘ ܓܕܫܐ ܥܡ ܓܘܫܡܐ ܥܠܬܐ ܗ̣ܘܐ ܕܢܦܫܐ. ܡܫܬܟܚ ܗ̣ܘܐ ܕܓܘܫܡܐ ܥܠܬܐ ܗ̱ܘ ܕܢܦܫܐ܇ ܘܡ̣ܢ ܟܕܘ ܒܛܠܢܝܗܝ. ܫܪܝ̣ܟܐ ܡܕܝܢ ܕܥܠܬ݀ ܢܦܫܐ ܠܐ ܓܘܫܡܐ ܢܗܘܐ ܐܦܠܐ ܓܕܫܐ. ܐܦܠܐ ܡܨܝܐ ܕܒܪܘܝܐ ܢܗܐ ܥܠܬܗܝܢ ܕܢܦ̈ܫܬܐ ܡܠܝ̣̈ܠܬܐ. ܘܐܠܐ ܡܫܬܟܚ ܕܥܠܬܐ ܗ̱ܘ ܠܝܬܝ̣ܪ ܡ̣ܢ ܚܕ. ܫܪܝ̣ܟܐ ܡܕܝܢ ܕܥܠܬ݀ ܢܦ̈ܫܬܐ ܡܠܝ̣̈ܠܬܐ ܗܘܢܐ ܢܗܐ ܡܬܦܪܫܢܐ ܐܘܟܝ̣ܬ ܡܠܐܟܐ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢ ܕܟܠܗܝܢ ܝܕ̈ܥܬܐ ܕܡܫܬܟ̈ܚܢ ܠܢܦ̈ܫܬܐ ܡܠܝ̣̈ܠܬܐ. ܡ̣ܢ ܐܢܢܩܝ̣ ܕܥ̈ܠܬܐ ܠܐ ܡܨܝܐ ܕܓܕܫܐ ܐܘ ܓܘܫ̈ܡܐ ܢܗܘ̈ܝܢ. ܒܕܠܐ ܡܕܪ̈ܟܢܐ ܐܢܘܢ ܒܗ̇ܝ ܕܓܕ̈ܫܐ ܘܓܘܫ̈ܡܐ ܐܢܘܢ. ܫܪܝ̣ܟܐ ܡܕܝܢ ܕܐܘܣܝ̈ܐܣ ܠܐ ܓܫܝ̣̈ܡܬܐ ܢܗܘ̈ܝܢ ܡܢܗܪ̈ܢܝܬܐ ܕܢܦ̈ܫܬܐ ܡܠܝ̣̈ܠܬܐ. ܒܗ̇ܝ ܕܒܟܠ ܡܕܡ ܡܒܪ̈ܝܢ ܡ̣ܢ ܦܘܪܟܠܐ ܕܥܡ ܥܡܘܛܘܬܐ ܗܘܠܢܝܬܐ ܕܓܘ̈ܫܡܐ. ܕܗܢܝܢ ܐܝܬܝܗܘܢ ܗܘ̈ܢܐ ܡܬܦܪ̈ܫܢܐ ܐܘܟܝ̣ܬ ܡܠܐܟ̈ܐ.

 

ܡܚܘܝܢܘܬܐ ܕܚܡܫ:

 

ܐܡܪܝܢ. ܕܓܘܫ̈ܡܐ ܡ̣ܢ ܗܘܠܐ ܘܐܕܫ̈ܐ ܡܪܟܒܝ̣ܢ. ܘܡ̣ܢ ܐܠܨ̈ܬܐ ܕܬܠܝ̣ܬܝܘܬܐ ܐ̱ܚܪܢܐ ܢܗܐ ܗ̇ܘ ܕܐܣ̇ܪ ܠܬܪ̈ܝܗܘܢ ܥܡ ܚܕ̈ܕܐ. ܘܗ̇ܘ ܬܠܝ̣ܬܝܐ ܠܐ ܡܨܝܐ ܕܓܘܫܡܐ ܐܘ ܓܕܫܐ ܢܗܐ. ܘܐܠܐ ܡܫܬܟܚ ܠܗ ܓܘܫܡܐ ܐܘ ܓܕܫܐ ܕܗ̣ܘ ܠܗ ܣܢܝ̣ܩ ܗ̇ܝ ܕܫܟܝ̣ܪܐ. ܐܦܠܐ ܬܘܒ ܡܨܝܐ ܕܒܪܘܝܐ ܢܗܐ ܗ̇ܘ ܐܣܘ̣ܪܐ ܬܠܝܬܝܐ. ܘܐܠܐ ܥܠܬܢ̈ܐ ܡܫܪ̈ܬܚܐ ܡܫܬܟܚܝ̣ܢ ܠܗ ܗ̇ܝ ܕܫܟܝ̣ܪ. ܫܪܝ̣ܟܐ ܡܕܝܢ ܕܗܘܢܐ ܡܬܦܪܫܢܐ ܢܗܘܐ ܐܣܘ̣ܪܐ ܗ̇ܘ ܐܘܟܝ̣ܬ ܡܠܐܟܐ.

 

ܡܚܘܝܢܘܬܐ ܕܫܬ:

 

ܐܡܪܝܢ ܕܥܠܬ݀ ܫܟܝ̣ܚܘܬܐ ܕܡܘܙ̈ܠܬܐ. ܐܘ ܓܘܫܡܐ ܗ̱ܘ. ܐܘ ܠܘ ܓܘܫܡܐ. ܘܠܐ ܡܨܝܐ ܕܓܘܫܡܐ ܢܗܘܐ. ܒܗ̇ܝ ܕܐܠܨܐ ܗܝܕܝܟ. ܕܐܘ ܐܚܘ̣ܕܐ ܢܗܐ ܥܠܬ݀ ܡܬܬܚܕܢܐ܆ ܐܘ ܡܬܬܚܕܢܐ ܥܠܬ݀ ܐܚܘ̣ܕܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܡܫܬܟܚ ܐܚܘ̣ܕܐ ܕܩܕܝ̣ܡ ܠܫܟܝ̣ܚܘܬܗ ܕܡܬܬܚܕܢܐ. ܘܫܟܝ̣ܚܘܬܗ ܕܡܬܬܚܕܢܐ܆ ܥܡܗ̇ ܗ̣ܝ ܕܓܠܝ̣ܙܘܬ ܣܦܝ̣ܩܘܬܐ. ܒܕܓܘܢ ܐܢ ܐܫܬܟܚ ܐܚܘ̣ܕܐ ܟܕ ܠܝܬ ܡܬܬܚܕܢܐ. ܐܫܬܟܚܬ݀ ܐܠܨܐܝܬ ܣܦܝ̣ܩܘܬܐ. ܘܟܕ ܫܟܝ̣ܚܘܬ ܣܦ̣ܝܩܘܬܐ ܠܐ ܡܨܝܐ. ܐܠܨܐ ܕܠܐ ܢܗܘܐ ܐܚܘܕܐ ܥܠܬ݀ ܡܬܬܚܕܢܐ ܣܟ. ܗܟܘܬ ܘܗ̇ܘ ܕܬܪܝܢ ܠܐ ܫܪܝ̣ܪ. ܒܗ̇ܝ ܕܐܚܘܕܐ ܝܬܝ̣ܪ ܡܥܠܝ ܘܡܝܬܪ ܡ̣ܢ ܡܬܬܚܕܢܐ ܕܒܓܘܗ. ܘܡܛܠ ܗܕܐ ܠܐ ܡܨܝܐ ܕܥܠܬܢܐ ܢܗܐ ܕܗ̇ܘ ܕܡܐܟ ܘܡܬܚܬܝ. ܫܪܝ̣ܟܐ ܡܕܝܢ ܕܥܠܬ݀ ܡܘܙ̈ܠܬܐ ܐܘܣܝܐ ܬܗܐ ܠܐ ܓܫܝ̣ܡܬܐ. ܘܠܐ ܡܨܝܐ ܕܐܠܗܐ ܢܗܐ ܥܠܬܗܝܢ ܒܩܨܬ݀ ܡܫܪܬܚܘ̣ܬ ܥܠܬܢ̈ܐ ܕܠܐ ܡܨܝܐ. ܘܠܝܬ ܐܠܐ ܐܢ ܗܘ̈ܢܐ ܡܬܦܪ̈ܫܢܐ ܐܘܟܝ̣ܬ ܡܠܐܟ̈ܐ.

 

ܡܚܘܝܢܘܬܐ ܕܫܒܥ:

 

ܐܡܪܝܢ ܕܙܘܥܐ ܫܡܝܢܐ ܨܒܝܢܝܐ ܗ̱ܘ. ܘܡܛܠ ܗܕܐ ܐܠܨܐ ܕܐܝܟ ܕܠܒܥܬܐ ܕܫܘܡܠܝܐ ܡܕܡ ܡܪܢܝܐ ܢܗܘܐ. ܒܗ̇ܝ ܕܗ̇ܘ ܕܠܘ ܫܘܡܠܝܐ ܗ̱ܘ ܡܪܢܝܐ. ܐܠܐ ܐܫܝ̣ܠܐ ܘܗܓܓܢܝܐ ܠܘ ܠܥܠܡ ܡܟܬܪܐ ܒܥܬܗ. ܐܠܐ ܥܡ ܢܣܝܢܐ ܒܛܠܐ. ܒܕܓܘܢ ܗ̣ܝ ܗ̇ܝ ܒܥܬܐ ܕܫܘܡܠܝܐ ܗ̇ܘ ܡܪܢܝܐ. ܐܘ ܡ̣ܢ ܓܘܫ̈ܡܐ ܗܘܝܐ. ܐܘ ܠܘ ܡ̣ܢ ܓܘܫ̈ܡܐ. ܘܗ̇ܘ ܩܕܡܝܐ ܠܐ ܫܪܝ̣ܪ. ܒܗ̇ܝ ܕܐܢ ܐܣܛܘܟܣܢܝܐ ܗ̱ܘ ܓܘܫܡܐ ܗ̇ܘ. ܥܠ ܫܡܝ̈ܢܐ ܣܢܝ̣ܩ ܗ̣ܘ ܠܡܫܬܡܠܝܘ. ܘܐܢ ܫܡܝܢܐ ܗ̱ܘ. ܐܝܟܢܐ ܗ̣ܘ ܥܠܘܗܝ ܢܣܬܢܩ ܠܡܫܬܡܠܝܘ. ܘܙܕܩ ܗ̣ܘܐ ܬܘܒ ܕܠܚܕܐ ܦܢܝܬܐ ܢܬܬܙܝ̣ܥܘܢ ܗ̣ܘܘ ܫܡܝ̈ܢܐ ܟܠܗܘܢ. ܟܕ ܒܚ̈ܕܕܐ ܨܒܝܢ ܗ̣ܘܘ ܠܡܬܕܡܝܘ ܒܫܘܡܠܝܐ. ܫܪܝ̣ܟܐ ܡܕܝܢ ܕܡ̣ܢ ܐܘܣܝܐ ܡܕܡ ܡܒܪܝܬܐ ܘܠܐ ܓܫܝ̣ܡܬܐ ܕܐܝܬܘܗܝ ܗܘܢܐ܆ ܒܥܝܐ ܟܠ ܡܘܙܠܬܐ ܠܡܩܛܦ ܫܘܡܠܝܐ ܒܡܨܥܝܘܬ ܙܘܥܗ̇. ܟܐܡܬ݀ ܒܝܕ ܟܠ ܙܘܥܐ ܕܡܬܚܕܬ݀. ܢܛܚܐ ܒܡܕܡ ܚܕܬܐ. ܘܫܘܟܢܐ ܡܕܡ ܙܠܓܢܝܐ. ܡ̣ܢ ܗܘܢܐ ܡܬܦܪܫܢܐ ܡܫܡܠܝ ܒܟܠ. ܥܠ ܢܦܫܗ ܕܡܘܙܠܬܐ ܕܢܚ. ܐܟܡܐ ܕܠܘܬܢ ܕܝܠܢ ܡ̣ܢ ܙܘܥܐ ܚܡܝ̣ܡܘܬܐ ܡܬܝܠܕܐ. ܘܫܦܝܘܬ ܐܐܪ ܥܠܬܐ ܗܘܝܐ ܕܡܒܗܩܘܬ ܙܠܝ̣̈ܩܐ ܫܡܫܢܝ̈ܐ. ܝ̣ܕܝ̣ܥܐ ܡܕܝܢ ܕܐܠܘܠܐ ܗܘܢܐ ܐܘܟܝ̣ܬ ܡܠܐܟܐ. ܐܦܠܐ ܡܘܙܠܬܐ ܗܟܢܐ ܣܒܝ̣ܣܐܝܬ ܐܬܬܙܝ̣ܥܬ݀.

 

ܢܘܗܪܐ ܥܕܬܢܝܐ:

 

ܚܢܢ ܐܚܝ̈ ܒܢܝ̈ܗ̇ ܕܥܕܬܐ ܩܕܝ̣ܫܬܐ. ܠܘ ܒܝܕ ܡܚܘܝܢ̈ܘܬܐ ܗܠܝܢ ܕܦܪ̈ܘܛܐܣܝܣ ܩܢ̈ܝܢ ܠܐ ܡܬܩܒܠܢ̈ܝܬܐ ܠܘܬܢ܆ ܐܫܬܪܪܢܢ ܫܟܝ̣ܚܘܬ ܡܠܐܟ̈ܐ. ܐܠܐ ܒܝܕ ܡܚܘܝܢ̈ܘܬܐ ܗ̇ܢܝܢ ܕܒܫܘܪܝ ܩܦܠܐܘܢ ܐܬܥܗܕܢ ܐܢܝܢ. ܘܒܝܕ ܣܗܕ̈ܘܬܐ ܕܓܒܪ̈ܐ ܓܡܝ̣ܪ̈ܐ ܘܩܕܝ̣̈ܫܐ ܕܚܙܝ̈ܐ ܗ̣ܘܘ ܕܛܣܝ̣̈ܣ ܥܠܝ̈ܬܐ. ܠܘܬܢ ܓܝܪ ܕܝܠܢ. ܠܘ ܕܚܕ ܒܠܚܘܕ ܥܠܬܢܐ ܥܠܬܐ ܗ̱ܘ ܐܠܗܐ ܒܪܘܝܐ ܕܟܠ. ܐܠܐ ܘܕܟܠܗܝܢ ܗܠܝܢ ܕܐܝܬܝܗܝܢ. ܐܦܠܐ ܬܘܒ ܡܛܠ ܝܬܗܘܢ ܐܬܒܪܝ̣ܘ ܫܡܝܐ ܘܡܬܬܙܝ̣ܥܝ̣ܢ. ܐܠܐ ܐܟܡܐ ܕܐܣܛܘ̈ܟܣܐ ܕܠܘܬܢ. ܙܘܥܐ ܩܢܘ ܬܪܝ̣ܨܐ ܒܟܝܢܐ. ܗ̣ܘ ܗܟܘܬ ܘܫܡܝܐ ܙܘܥܐ ܩܢܘ ܚܘܕܪܢܝܐ ܒܟܝܢܐ. ܘܬܪ̈ܝܗܘܢ ܒܪܡܙܐ ܒܪܝܝܐ.

 

 

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܚܡܝܫܝܬ

 

 ܡܛܠ ܡܢܝܢܗܘܢ ܕܬܓ̈ܡܐ ܡܠܐܟܝ̈ܐ ܘܡܢܗܪ̈ܢܘܬܗܘܢ ܘܡܬܢܗܪ̈ܢܘܬܗܘܢ ܘܟܘܢܝܝ̈ܗܘܢ. ܘܒܗ ܐܝܬ ܦܣܘ̈ܩܐ ܐܪܒܥܐ. ܦܣܘܩܐ ܩܕܡܝܐ ܡܛܠ ܡܢܝܢܐ ܕܬܓܡܝ̈ܗܘܢ ܐܝܟ ܡܫܠܡܢܘܬܐ ܥܕܬܢܝܬܐ. ܘܒܗ ܐܝܬ ܢܝ̈ܫܐ ܬܪܝܢ.

 

ܢܝܫܐ ܩܕܡܝܐ

 

ܡܛܠ ܐܝܟܢܝܘܬ ܡܛܟܣܘܬܗܘܢ ܕܬܓ̈ܡܐ

 

ܬܠܬ ܓܝܪ ܥܕ̈ܬܐ ܫܡܝܢ̈ܝܬܐ ܝܕܥܐ ܡܠܬܐ ܕܬܐܘܠܘܓܝܐ܆ ܘܒܟܠ ܥܕܬܐ ܬܠܬܐ ܬܓ̈ܡܐ ܐܘܟܝ̣ܬ ܛܟ̈ܣܐ. ܘܗܟܢܐ ܬܠܬܐ ܟܕ ܥܠ ܬܠܬܐ ܡܬܥܦܦܝ̣ܢ܆ ܬܫܥܐ ܓܡܪܝ̣ܢ. ܘܬܓܡܐ ܡ̇ܢ ܩܕܡܝܐ ܕܥܕܬܐ ܩܕܡܝܬܐ ܘܥܠܝܬܐ. ܒܙܒܢ ܡ̇ܢ ܠܡܘ̈ܬܒܐ ܣܐܡ ܩܕܝܫܐ ܕܝܢܢܘܣܝܘܣ ܟܕ ܡ̣ܢ ܡܐܪܙܢܘܬܐ ܗ̇ܝ ܕܡ̣ܢ ܚܙܩܝܐܝܠ ܡܬܗܕܐ. ܕܐܡ̣ܪ ܡܘܬܒܐ ܩܕܡܝܐ ܕܥܠܘܗܝ ܐܬܚܙܝ̣ ܐܠܗܐ. ܒܙܒܢ ܕܝܢ ܠܣܪ̈ܦܐ ܣ̇ܐܡ ܟܕ ܠܡܫܠܡܢܘܬܐ ܗ̇ܝ ܕܡ̣ܢ ܐܫܥܝܐ ܢܩܦ ܕܐܡ̣ܪ. ܕܣܪ̈ܦܐ ܩܕܝ̈ܫܐ ܡܬܚܙܝܢ ܕܩܝܡܝ̣ܢ ܠܚܕܪ ܐܠܗܐ. ܘܠܗܢܐ ܪܥܝܢܐ ܬܪܝܢܐ ܫܠܡܝ̣ܢ ܣܘܓܐܐ ܕܡܠܦܢ̈ܐ. ܘܐܡܪܝܢܢ ܕܠܐ ܪܚܝ̣ܩܐ ܠܡܣܒܪܘ. ܕܐܦ ܠܣܪ̈ܦܐ ܩܕܝ̈ܫܐ ܡܘܬܒ̈ܐ ܩܪܐ ܚܙܩܝܐܝܠ. ܒܙܢܐ ܗ̇ܘ ܕܥܠܝܗܘܢ ܝܬܝ̣ܒ ܗ̇ܘ ܪܐ ܕܟܠܐ ܘܒܗܘܢ ܡܬܓܡܪ ܨܒܝܢܗ. ܐܦ ܓܝܪ ܘܕܥܠ  ܟܪ̈ܘܒܐ ܝܬܒ ܠܐ ܐܡܐܢ ܕܢܐܡܪ ܕܘܝܕ ܟܕ ܒܗܢܐ ܢܝܫܐ ܚܐܪ ܟܪ ܕܐܡ̣ܪ ܝܬܒ ܟܪ̈ܘܒܐ ܐܬܓܠܝ. ܘܡ̣ܢ ܗܪܟܐ ܝ̣ܕܝ̣ܥܐ ܕܠܦܘܬ ܬܪ̈ܬܝܗܝܢ ܡܫܠܡܢ̈ܘܬܐ. ܣܪ̈ܦܐ ܐܢܘܢ ܒܛܟܣܐ ܩܕܡܝܐ. ܐܝ̣ܛܐ ܟܪ̈ܘܒܐ܆ ܐܝ̣ܛܐ ܡܘܬܒ̈ܐ. ܘܬܓܡܐ ܡ̇ܢ ܩܕܡܝܐ ܕܥܕܬܐ ܡܨܥܝܬܐ ܗ̇ܘ ܕܪܒܝ̣ܥܝܐ ܕܛܟ̈ܣܐ ܟܕ ܡ̣ܢ ܠܥܠ ܡܬܡܢܝܢ. ܐܝܬܘܗܝ ܬܓܡܐ ܗ̇ܘ ܕܡܪ̈ܘܬܐ. ܘܬܓܡܐ ܡܨܥܝܐ ܕܥܕܬܐ ܡܨܥܝܬܐ ܗ̇ܘ ܕܚܡܝܫܝܐ ܗ̱ܘ ܕܛܟ̈ܣܐ܆ ܬܓܡܐ ܗ̇ܘ ܕܚܝܠܘ̈ܬܐ ܐܝܬܘܗܝ. ܘܬܓܡܐ ܐ̱ܚܪܝܐ ܕܥܕܬܐ ܡܨܥܝܬܐ ܗ̇ܘ ܕܫܬܝܬܝܐ ܗ̱ܘ ܕܛܟ̈ܣܐ. ܬܓܡܐ ܗ̇ܘ ܕܫܘܠܛܢ̈ܐ ܐܝܬܘܗܝ. ܘܬܓܡܐ ܩܕܡܝܐ ܕܥܕܬܐ ܐ̱ܚܪܝܬܐ ܗ̇ܘ ܕܫܒܝܥܝܐ ܗ̱ܘ ܕܛܟ̈ܣܐ܆ ܬܓܡܐ ܗ̇ܘ ܕܪ̈ܝ̣ܫܢܘܬܐ ܐܝܬܘܗܝ. ܘܬܓܡܐ ܡܨܥܝܐ ܕܥܕܬܐ ܐ̱ܚܪܝܬܐ ܗ̇ܘ ܕܬܡܝ̣ܢܝܐ ܗ̱ܘ ܕܛܟ̈ܣܐ܆ ܬܓܡܐ ܗ̇ܘ ܕܪ̈ܝܫܝ ܡܠܐܟ̈ܐ ܐܝܬܘܗܝ. ܘܬܓܡܐ ܐ̱ܚܪܝܐ ܕܥܕܬܐ ܐ̱ܚܪܝܬܐ ܗ̇ܘ ܬܫܝ̣ܥܝܐ ܗ̱ܘ ܕܛܟ̈ܣܐ܆ ܬܓܡܐ ܗ̇ܘ ܕܡܠܐܟ̈ܐ ܐܝܬܘܗܝ. ܘܗܟܢܐ ܡܣܬܟܠܐ ܡܛܟܣܘܬܗܘܢ ܕܬܓ̈ܡܐ ܫܡܝ̈ܢܐ. ܘܐܦܢ ܒܟܬܒܐ ܕܪܒܐ ܕܝܘܢܢܘܣܝܘܣ ܒܕܘܟ ܕܘܟ ܐ̱ܚܪܢܐܝܬ ܣܝ̣ܡܝ̣ܢ. ܛܟܣܐ ܥܠܝܐ ܘܩܕܝ̣ܫܐ ܕܣܪ̈ܦܐ. ܬܪܝܢܐ ܟܪ̈ܘܒܐ. ܬܠܝܬܝܐ ܡܘܬܒ̈ܐ. ܪܒܝܥܝܐ ܡܪ̈ܘܬܐ. ܚܡܝܫܝܐ ܚܝܠܘ̈ܬܐ. ܫܬܝܬܝܐ ܫܘܠܛܢ̈ܐ. ܫܒܝܥܝܐ ܪ̈ܝ̣ܫܢܘܬܐ. ܬܡܝܢܝܐ ܪ̈ܒܝ ܡܠܐܟ̈ܐ. ܬܫܝܥܝܐ ܡܠܐܟ̈ܐ.

 

 

 

ܢܝܫܐ ܬܪܝܢܐ ܡܛܠ ܗ̇ܝ ܕܐܝܟܢܐ ܐܦ ܒܥܬܝ̣ܩܬܐ ܐܬܛܦܣܝ̈ܢ ܥܕ̈ܬܐ ܬܠܬ ܫܡܝܢ̈ܝܬܐ ܥܡ ܥܕܬܐ ܪܒܝܥܝܬܐ ܗܕܐ ܕܝܠܢ

 

ܘܗܟܢܐ ܐܦ ܡܘܫܐ ܗ̇ܘ ܐܠܗܝܐ. ܒܟܐܦ̈ܐ ܕܣܡ ܒܦܪܝ̣ܣܐ ܕܕܝ̣ܢܐ. ܕܗܘܝܘ ܦܕܬܐ ܠܗܠܝܢ ܛܦܣ. ܟܕ ܒܣܕܪܐ ܡ̇ܢ ܩܕܡܝܐ ܣܡ ܣܘܡܩܐ ܘܙܪܓܐ ܘܒܪܩܐ. ܘܒܣܕܪܐ ܬܪܝܢܐ܆ ܨܕܝ̣ܕ ܐܘ ܣܦ̣ܝܠܐ ܘܢܩܥܬܐ. ܒܣܕܪܐ ܕܝܢ ܬܠܝܬܝܐ. ܩܘܢܟܝܢܘܢ ܘܩܪܟܕܢܐ ܘܥܝ̣ܢܥܓܠܐ ܘܒܣܕܪܐ ܗ̇ܘ ܪܒܝܥܝܐ ܕܐܘܣܦ ܣ̣ܡ ܒܗ. ܬܪܫܝ̣ܫ ܘܒܪܘܠܐ ܘܝܫܦܗ. ܠܥܕܬܐ ܗܕܐ ܪܒܝܥܝܬܐ ܘܐܪܥܢܝܬܐ ܕܝܠܢ ܨܪ ܕܒܗ̇ ܐܝܬ ܪ̈ܝܫܝ ܟܗ̈ܢܐ ܘܟܗ̈ܢܐ ܘܡܫܡ̈ܫܢܐ. ܘܗܟܢܐ ܒܡܢܝܢܐ ܝ̣ܕܝ̣ܥܐ ܡܣܬܝܟ ܡܢܝܢܐ ܕܬܓܡܝ̈ܗܘܢ ܕܪ̈ܘܚܢܐ ܐܘܟܝ̣ܬ ܕܐܕܫܝ̈ܗܘܢ. ܠܩܢܘ̈ܡܝܗܘܢ ܕܝܢ ܕܟܡܐ ܐܢܘܢ. ܐܠܗܐ ܗ̱ܘ ܒܠܚܘܕ ܝܕܥ. ܘܗ̇ܝ ܕܟܬܒܐ ܩܕܝ̣ܫܐ ܕܕܢܝܐܝܠ ܢܒܝܐ ܡܫܠܡ ܠܢ ܕܐܝܬܝܗܘܢ ܐܠܦ ܐܠܦܝ̣̈ܢ ܘܪܒܘ̣ ܪ̈ܒܘܢ. ܠܣܓܝܐܘܬܗܘܢ ܒܠܚܘܕ ܐܝܟ ܕܡ̣ܢ ܡܫܪܬܚܘܬܐ ܠܐ ܡܬܚܡܬܐ ܡܫܘܕܥܐ. ܘܠܐ ܗܘܐ ܠܡܢܝܢܗܘܢ ܡܬܚܡܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܚܡܝܫܝܬܐ

 

ܡܛܠ ܫܘܡܗ̈ܐ ܕܫܡܝ̈ܢܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܗ̇ܝ ܕܡ̣ܢ ܐܝܟܐ ܢܣܝ̣ܒܝ̣ܢ ܟܘܢܝܝ̈ܗܘܢ

 

ܙܕܩ ܠܡܕܥ ܕܫܘܡܗܐ ܗ̇ܘ ܕܣܪ̈ܦܐ ܠܘܬ ܥܒܪ̈ܝܐ. ܠܡܚܡܢܘ̣ܬܐ ܘܠܡܘܩܕܢܘܬܐ ܡܫܘܕܥ. ܘܒܗܢܐ ܡ̇ܢ ܟܘܢܝܐ ܐܬܩܪܝ̣ܘ ܗ̇ܢܘܢ ܕܒܬܓܡܐ ܗܢܐ ܒܩܨܬ݀ ܬܪܬܝܢ ܕܒܗܠܝܢ ܐܠܗܝ̈ܬܐ ܒܝܕ ܣܘܓܐܬ݀ ܩܪܝ̣ܒܘܬܗܘܢ ܘܒܝܬܝܘܬܗܘܢ. ܕܬܪܬܝܢ ܕܝܢ ܡܛܠ ܢܬܘܦܘܬܗܘܢ ܕܠܗ̇ܢܘܢ ܕܠܬܚܬ ܡܢܗܘܢ. ܐܝܟܢܐ ܕܒܐܝܕܝ̈ܗܘܢ ܢܬܥܠܘܢ ܠܘܬ ܗܠܝܢ ܐܠܗܝ̈ܬܐ. ܬܪ̈ܝܗܘܢ ܓܝܪ ܗܠܝܢ ܙܢܝ̈ܐ. ܕܝ̣ܠܝ̈ܬܐ ܐܢܘܢ ܕܚܡܝ̣ܡܘܬܐ. ܘܗ̇ܝ ܕܬܬܙܝ̣ܥ܆ ܘܗ̇ܝ ܕܬܬܘܦ. ܟܪܘܒܐ ܕܝܢ ܗ̣ܘ ܗܟܘܬ ܒܒܪܬ݀ ܩܠܐ ܥܒܪܝܬܐ ܠܡܫܪܬܚܘܬ ܝ̣ܕܥܬܐ ܘܐܫܝ̣ܕܘܬ ܚܟܡܬܐ ܡܫܘܕܥ. ܐܟܡ̇ܢ ܕܒܗܘܢ ܡܬܓܡܪ ܨܒܝܢܗ̇ ܕܐܠܗܘܬܐ. ܐܝܟ ܗ̇ܝ ܕܡܫܡܫܢܘ̈ܗܝ ܕܥܒ̇ܕܝܢ ܨܒܝܢܗ. ܘܫܘܡܗܐ ܗ̇ܘ ܕܡܪ̈ܘܬܐ܇ ܡ̣ܢ ܡܥܠܝܘܬܐ ܠܐ ܥܒܕܢܝܬܐ. ܘܡܚܪܪܐ ܡ̣ܢ ܟܠ ܡܬܚܬܝ̈ܘܬܐ ܢܣܝ̣ܒ. ܘܫܘܡܗܐ ܗ̇ܘ ܕܚܝܠܘ̈ܬܐ܆ ܡ̣ܢ ܓܢ̱ܒܪܘܬܐ ܡܕܡ ܕܟܪܢܝܬܐ ܡܠܐ ܡܙܕܥܙܢܝ̣ܬܐ. ܕܒܟܠܗܝܢ ܡܥܒܕܢ̈ܘܬܐ ܡܕܡ̈ܝܬ݀ ܒܐܠܗܐ ܡܝܬܝ. ܘܫܘܡܗܐ ܗ̇ܘ ܕܫܘܠܛܢ̈ܐ ܡ̣ܢ ܫܦܝ̣ܪܘܬ ܡܛܟܣܘܬܐ ܕܒܩܘ̈ܒܠܐ ܕܙܠܓ̈ܐ ܐܠܗܝ̈ܐ. ܘܕܠܘ ܛܪܘܢܐܝܬ ܡܬܚܫܚܝ̣ܢ ܠܘܬ ܗ̇ܢܘܢ ܕܡܢܗܘܢ ܡܐܟܝ̣ܢ ܢܣܝ̣ܒ. ܒܗ̇ܝ ܕܛܪܘܢܐ ܐܫܝ̣ܠܐܝܬ ܘܠܘ ܡܪܢܐܝܬ ܡܬܟܢܐ ܫܠܝ̣ܛܐ. ܘܫܘܡܗܐ ܕܪ̈ܝ̣ܫܢܘܬܐ. ܡ̣ܢ ܗ̇ܝ ܕܠܘܬ ܪܝܫܝ̣ܬܐ ܡܥܠܝܬ݀ ܡ̣ܢ ܪܝܫܝ̣ܬܐ ܦܢܝܢ ܟܝܬ̣ ܗ̣ܢܘܢ ܟܠܢܐܝܬ ܘܡܫܒܠܝ̣ܢ ܐܦ ܠܐܚܪ̈ܢܐ܆ ܪܝܫܢܘܬ ܟܗܢܐܝܬ. ܘܒܗ̇ ܐܝܟ ܕܡܨܝܐ ܡܬܛܦܣܝ̣ܢ. ܘܫܘܡܗܐ ܗ̇ܘ ܕܪ̈ܝܫܝ ܡܠܐܟ̈ܐ. ܗ̣ܘ ܗܟܘܬ ܡܢܗ̇ ܕܪܝ̣ܫܘܬ ܟܗܢܘܬܐ ܢܣܝ̣ܒ. ܐܝܟ ܕܐܦ ܫܘܡܗܐ ܕܪ̈ܝܫܢܘܬܐ ܪܝܫܢܐ ܗ̱ܘ ܕܪ̈ܝ̣ܫܝ ܡܠܐܟ̈ܐ. ܐܟܡܐ ܕܬܓܡܐ ܕܪ̈ܝ̣ܫܝ ܡܠܐܟ̈ܐ܆ܪܝܫܢܐ ܗ̱ܘ ܕܡܠܐܟ̈ܐ. ܘܫܘܡܗܐ ܗ̇ܘ ܕܡܠܐܟ̈ܐ. ܡ̣ܢ ܡܫܬܕܪܢܘܬܐ ܘܡܬܦܩܕܢܘܬܐ ܘܡܫܡܫܢܘܬܐ ܢܣܝ̣ܒ ܠܘܬ ܚܟܝ̈ܡܐ ܕܥܒܪ̈ܝܐ.

 

 

 

ܢܝܫܐ ܬܪܝܢܐ ܡܛܠ ܗ̇ܝ ܕܡ̣ܢ ܡ̇ܢ ܐܬܝܒܠܬ݀ ܡܫܠܡܢܘܬܐ ܕܫܘܡܗܝ̈ܗܘܢ

 

ܗ̣ܢܘܢ ܗܠܝܢ ܫܘ̈ܡܗܐ ܡܢܗܘܢ ܕܡܬܐܪ̈ܙܢܐ ܐܠܗܝ̈ܐ ܢܒܝ̈ܐ ܟܝ̣ܬ ܘܫܠܝ̈ܚܐ ܐܬܝ̣ܕܥܘ ܒܥܕܬܐ ܩܕܝܫܬܐ. ܝܫܘܥ ܒܪܢܘܢ ܓܝܪ ܠܗ̇ܢܘܢ ܕܚܙܐ ܪ̈ܒܝ ܚܝ̈ܠܐ ܩܪܐ ܐܢܘܢ. ܕܘܝܕ ܕܝܢ ܡܠܐܟ̈ܐ ܘܡܫܡ̈ܫܢܐ. ܐܫܥܝܐ ܬܘܒ ܣܪ̈ܦܐ. ܟܢܝ̣ ܐܢܘܢ. ܘܚܙܩܝܐܝܠ ܟܪ̈ܘܒܐ ܘܡܘܬܒ̈ܐ. ܕܢܝܐܝܠ ܕܝܢ ܫܠܝ̣ܛܢ̈ܐ. ܘܦܘܠܘܣ ܡܘܬܒ̈ܐ ܘܡܪ̈ܘܬܐ. ܘܐܪ̈ܟܐܣ ܘܫܠܝ̈ܛܢܐ ܘܚܝ̈ܠܐ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܐܝܟܢܐ ܟܕ ܡܠܐܟ̈ܐ ܚܕ ܐܢܘܢ ܬܓܡܐ ܡ̣ܢ ܬܫܥܐ ܬܓܡܝ̈ܢ. ܟܠܗܘܢ ܬܓܡ̈ܐ ܒܫܡܐ ܓܘܢܝܐ ܡܠܐܟ̈ܐ ܡܬܩܪܝܢ

 

ܐܝܟ ܕܒܣܘܓܐܐ ܠܟܠܗܘܢ ܬܓܡ̈ܐ ܓܘܢܐܝܬ ܡܠܐܟ̈ܐ ܩܪܐ ܟܬܒܐ ܩܕܝܫܐ. ܐܝܟ ܗ̇ܝ ܕܒܪܟܘ ܠܡܪܝܐ ܟܠܗܘܢ ܡܠܐܟܘ̈ܗܝ. ܘܐܝܟ ܗ̇ܝ ܕܥܒܕ ܡܠܐܟܘ̈ܗܝ ܪܘܚ. ܘܗ̣ܝ ܗܕܐ ܠܘ ܡ̇ܢ ܟܕ ܒܬܓܡܐ ܗ̇ܘ ܬܚܬܝܐ ܡܛܟܣܝ̣ܢ. ܟܠܡܐ ܕܒܟܝܢܐ ܩܢܝܢ. ܠܗܢܐ ܐܦ ܗ̇ܢܘܢ ܕܠܥܠ ܩܢܝܢ. ܒܠܥܕ ܗܦܟܐ. ܒܗ̇ܝ ܕܥܠܝ̈ܐ ܝܬܝ̣ܪ ܡܫܡܠܝܢ ܡ̣ܢ ܬܚܬܝ̈ܐ. ܒܕܓܘܢ ܥܠܝ̈ܐ ܡ̇ܢ ܠܐ ܥܕܝ̣ܠܐ ܠܗܘܢ ܕܒܟܘܢܝܐ ܕܬܚܬܝ̈ܐ ܢܬܟܢܘܢ. ܝܬܝܪ ܕܝܢ ܥܕܝ̣ܠܐ ܘܫܟܝ̣ܪܐ ܠܬܚܬܝ̈ܐ ܟܕ ܒܟܘܢܝܐ ܕܥܠܝ̈ܐ ܢܬܟܢܘܢ. ܘܠܐ ܩܢܝܢ ܗ̇ܘ ܕܥܠܝ̈ܐ ܩܢܝܢ. ܘܠܗܕܐ ܕܐܬܐܡܪܬ݀ ܕܘܡܝܐ ܐܝܬ ܠܡܣܒ ܘܛܘܦܣܐ ܡ̣ܢ ܥܕܬܐ ܗܕܐ ܬܚܬܝܬܐ ܕܝܠܢ. ܕܪܝܫ ܟܗ̈ܢܐ ܡ̇ܢ ܟܕ ܫܠܝ̣ܛ ܠܡܓܡܪ ܟܠܗܝܢ ܣܥܘܪ̈ܘܬܐ ܕܩܫܝ̈ܫܐ ܘܡܫܡ̈ܫܢܐ. ܠܐ ܫܟܝ̣ܪܐ ܐܢ ܩܫܝ̣ܫܐ ܘܡܫܡܫܢܐ ܢܬܩܪܐ. ܗܐ ܓܝܪ ܦܛܪܘܣ ܟܕ ܪܝܫܐ ܗ̣ܘܐ ܕܫܠܝ̣̈ܚܐ. ܐܘܟܝ̣ܬ ܪܝܫܐ ܕܪ̈ܝܫܝ ܟܗ̈ܢܐ ܘܦܛܪܝܪܟܘܣ. ܩܫܝܫܐ ܩܪܐ ܢܦܫܗ ܘܐܡ̣ܪ. ܒ̇ܥܐ ܐ̱ܢܐ ܡ̣ܢ ܩܫܝ̈ܫܐ ܕܒܟܘܢ ܐܢ̇ܐ ܩܫܝܫܐ ܚܒܪܟܘܢ. ܘܦܘܠܘܣ ܬܘܒ ܟܕ ܫܠܝ̣ܚܐ ܗ̣ܘܐ ܕܥܡ̈ܡܐ ܘܪܝ̣ܫ ܟܗ̈ܢܐ. ܡܫܡܫܢܐ ܫܡܗ ܝܬܗ ܘܐܡ̣ܪ. ܐܢ ܡܫܡ̈ܫܢܐ ܐܢܘܢ ܕܡܫܝ̣ܚܐ. ܝܬܝ̣ܪ ܡܢܗܘܢ ܐܢ̣ܐ.

 

ܗܦܟܬܐ:

 

ܐܡܪܝܢ ܠܐ ܡܕܝܢ ܙܕܩ ܗ̣ܘܐ ܕܫܘܠܛܢ̈ܐ ܘܪ̈ܝ̣ܫܢܘܬܐ ܘܪ̈ܝܫܝ ܡܠܐܟ̈ܐ ܘܡܠܐܟ̈ܐ ܕܬܚܬܝ̣ܝ̣̈ܢ ܡ̣ܢ ܚܝܠܘ̈ܬܐ ܕܚܝܠܘ̈ܬܐ ܢܬܩܪܘܢ. ܘܕܐܬܩܪܝ̣ܘ  ܝ̣ܕܝ̣ܥܐ ܡ̣ܢ ܗ̇ܝ ܕܡܪܝܐ ܕܚܝܠܘ̈ܬܐ ܐܡܝ̣ܪܐ. ܘܚܝܠܘ̈ܬܐ ܕܫܡܝ̈ܐ ܢܬܬܙܝ̣ܥܘܢ. ܘܒܪܟܘ ܠܡܪܝܐ ܟܠܗܘܢ ܚܝܠܘ̈ܬܗ. ܘܐܝܟܢܐ ܬܘܒ ܟܗܢܐ ܐܪܥܢܝܐ ܕܡܬܚܬܝ ܡ̣ܢ ܡܠܐܟܐ܆ ܡܠܐܟܐ ܐܬܩܪܝ̣. ܐܝܟ ܕܐܡ̣ܪ ܡܠܐܟܝ ܢܒܝܐ. ܕܡܠܐܟܗ ܕܡܪܝܐ ܐܚܝ̣ܕ ܟܠ ܐܝܬܘܗܝ.

 

ܦܘܢܝܐ:

 

ܐܡܪܝܢ ܕܬܓ̈ܡܐ ܟܠܗܘܢ ܪ̈ܘܚܢܐ ܚܝܠܘ̈ܬܐ ܐܬܩܪܝ̣ܘ. ܒܥܠܬ݀ ܗ̇ܝ ܕܘܠܐ ܚܕ ܬܓܡܐ ܡܢܗܘܢ ܐܝܬ. ܕܠܘ ܚܝܠܐ ܡܕܡ ܡܥܒܕܢܝܐ ܠܦܘܬ ܡܫܘ̣ܚܬܗ ܩܢܐ. ܘܟܗܢܐ ܐܪܥܢܐ ܡܠܐܟܐ ܐܬܩܪܝ̣ ܒܥܠܬ݀ ܡܣܒܗܘܬܐ ܕܒܡܠܐܟ̈ܐ. ܒܗ̇ܝ ܕܐܦ ܗ̣ܘ ܐܟܘܬܗܘܢ. ܡ̣ܢ ܗ̇ܢܘܢ ܕܠܥܠ ܡܢܗ ܡܬܢܗܪ ܘܡܬܐܪܙ ܘܡܬܓܡܪ. ܘܠܗ̇ܢܘܢ ܕܠܬܚܬ ܡܢܗ ܡܢܗܪ ܘܡܐܪܙ ܘܓܡ̇ܪ. ܐܢܓܝܪ ܕܡܝܘܬܐ ܕܒܐܠܗܐ ܟܡܐ ܕܡܨܝܐ ܠܒܪܢܫܐ. ܠܟܘܢܝܐ ܕܐܠܗܐ ܡܫܘܝܐ. ܐܝܟ ܗ̇ܝ ܕܐܠܗ ܐܠܗܝ̈ܢ. ܘܐܠܗ ܦܪܥܘܢ. ܠܐ ܪܒܐ ܨܒܘܬܐ ܐܢ ܐܦ ܕܡܝܘܬܐ ܕܒܡܠܐܟܐ ܠܟܘܢܝܐ ܕܡܠܐܟܐ ܬܫܘܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܪܝܢܐ

 

ܕܫܬܐܣܬܐ ܚܡܝܫܝܬܐ ܡܛܠ ܡܐܪܙܢܘܬܗܘܢ ܕܠܚܕ̈ܕܐ. ܘܒܗ ܐܝܬ ܢܝ̈ܫܐ ܐܪܒܥܐ. ܢܝܫܐ ܩܕܡܝܐ ܡܛܠ ܗ̇ܝ ܕܟܠ ܬܓܡܐ ܠܗܘ ܕܠܬܚܬ ܡܢܗ ܡܐܪܙ

 

ܙܕܩ ܠܡܕܥ܆ ܕܬܓܡܐ ܗ̇ܘ ܥܠܝܐ ܕܣܪ̈ܦܐ. ܥܠܘܗܝ ܠܘܩܕܡ ܢܛܚܝ̣ܢ ܕܢܚ̈ܐ ܘܨܡ̈ܚܐ ܘܓܠܝܢ̈ܐ ܐܠܗܝ̈ܐ. ܡܢܗ̇ ܕܪܝ̣ܫܘ̣ܬ ܐܠܗܘܬܐ ܠܘ ܒܝܕ ܡܨܥܝܐ. ܐܝܟ ܫܪܟܐ ܕܬܓ̈ܡܐ. ܐܦܠܐ ܒܛܘ̈ܦܣܐ ܒܗܘܪ̈ܐ ܐܟܡܐ ܕܥܠܝܢ. ܐܝ̣ܛܐ ܡ̣ܢ ܣܪ̈ܦܐ ܡܬܢܗܪܝ̣ܢ ܟܪ̈ܘܒܐ. ܘܡ̣ܢ ܟܪ̈ܘܒܐ ܡܘܬܒ̈ܐ. ܘܡ̣ܢ ܡܘܬܒ̈ܐ ܡܪ̈ܘܬܐ. ܘܡ̣ܢ ܡܪ̈ܘܬܐ ܚܝܠܘ̈ܬܐ. ܘܡ̣ܢ ܚܝܠܘ̈ܬܐ ܫܘܠܛܢ̈ܐ. ܘܡ̣ܢ ܫܘܠܛܢ̈ܐ ܪ̈ܝ̣ܫܢܘܬܐ. ܘܡ̣ܢ ܪ̈ܝܫܢܘܬܐ ܪ̈ܝܫܝ ܡܠܐܟ̈ܐ. ܘܡ̣ܢ ܪ̈ܝܫܝ ܡܠܐܟ̈ܐ ܡܠܐܟ̈ܐ. ܘܡ̣ܢ ܡܠܐܟ̈ܐ܆ ܗ̇ܢܘܢ ܕܡܫܬܘܝܢ ܠܡܬܐܪܙܘ ܡܢܢ ܐܪ̈ܥܢܐ. ܢܒܝ̈ܐ ܐܡ̇ܪ ܐ̱ܢܐ ܘܫܠܝ̈ܚܐ ܘܓܡܝ̣ܪ̈ܐ. ܘܗܟܢܐ ܠܦܘܬ ܣܓܝܐܘܬܐ ܕܡܨܥܝ̈ܐ ܘܙܥܘܪܘܬܗܘܢ ܡܬܬܚܬܐ ܘܡܬܥܠܐ ܕܪܓܐ ܕܗ̇ܢܘܢ ܕܡܬܐܪܙܝ̣ܢ. ܟܕ ܟܠ ܡܘܗܒܬܐ ܛܒܬܐ ܘܟܠ ܫܘܟܢܐ ܡܫܡܠܝܐ ܡ̣ܢ ܠܥܠ ܐܝܬܘܗܝ ܕܢܚܬ܆ ܡ̣ܢ ܐܒܐ ܕܢܘܗܪ̈ܐ. ܒܠܥܕ ܡܨܝܐ ܥܠ ܣܪ̈ܦܐ. ܘܒܡܨܥܝܘܬܗܘܢ ܥܠ ܟܪ̈ܘܒܐ. ܘܗܟܢܐ ܒܐܝܕܐ ܒܐܝܕܐ ܥܕܡܐ ܕܡܬܡܛܐ ܫܘܟܢܐ ܐܦ ܠܘܬ ܗ̇ܢܘܢ ܬܚܬܝ̈ܐ. ܝ̣ܕܝ̣ܥܐ ܡ̣ܢ ܗ̇ܝ ܕܐܬܢܒܝ̣ ܕܘܝܕ ܥܠ ܐ̱ܪܙܐ ܕܣܘܠܩܗ ܕܡܪܢ ܕܠܫܡܝܐ ܘܐܡ̣ܪ. ܕܐܪܝ̣ܡܘ ܬܪ̈ܥܐ ܪ̈ܝܫܝܟܘܢ. ܐܝܟ ܗ̇ܘ ܕܡܦܩܕ ܦܩܕܐ ܗܘܬ݀ ܥܕܬܐ ܡܨܥܝܬܐ ܠܬܚܬܝܬܐ ܗ̣ܝ ܗܕܐ. ܘܗ̣ܝ ܡܫܐܠܐ ܗܘܬ݀ ܕܡܢܘ ܗܢܐ ܡܠܟܐ ܕܬܫܒܘܚܬܐ. ܘܗ̇ܝ ܡܐܪܙܐ ܗܘܬ݀ ܠܗ̇ ܕܡܪܝܐ ܗ̱ܘ ܥܫܝ̣ܢܐ ܘܓܢ̱ܒܪܐ. ܐܝ̣ܛܐ ܟܕ ܠܘܬ ܗ̇ܝ ܡܨܥܝܬܐ ܐܬܡܛܝ̣. ܦܩܕܐ ܗܘܬ݀ ܠܗ̇ ܗ̇ܝ ܥܠܬܐ ܐܪܝ̣ܡܘ ܬܪ̈ܥܐ ܪ̈ܝܫܝܟܘܢ ܕܢܥܘܠ ܡܠܟܐ ܕܐܝܩܪ̈ܐ. ܘܗ̇ܝ ܡܗܦܟܐ ܗܘܬ݀ ܘܐܝܟ ܗ̇ܘ ܕܬܢܝܢܘܬ ܡܫܐܠܐ ܗܘܬ݀ ܠܗ̇ ܠܗ̇ܝ ܥܠܝܬܐ ܕܡܢܘ̣ ܗܢܐ ܡܠܟܐ. ܘܗ̇ܝ ܡܐܪܙܐ ܗܘܬ݀ ܠܗ̇܆ ܕܡܪܝܐ ܚܝܠܬܢܐ. ܘܗܘܝܘ ܡܠܟܐ ܡܝܩܪܐ. ܐܡܬܝ ܕܝܢ ܕܠܘܬ ܥܕܬܐ ܗ̇ܝ ܥܠܝܬܐܡܛܐ. ܗ̣ܝ ܗܕܐ ܕܠܐ ܡܨܝܐ ܡܢܗ̇ ܕܐܠܗܘܬܐ ܡܬܐܪܙܐ ܟܕ ܡܫܐܠܐ ܐܝܟ ܕܐܡ̣ܪ ܐܫܥܝܐ. ܕܡܢܘ̣ ܗܢܐ ܕܐܬܐ ܡ̣ܢ ܐܕܘܡ. ܘܣܘܡܩܝ̈ܢ ܢܚܬܘ̈ܗܝ ܡ̣ܢ ܒܘ̣ܨܪ. ܘܗ̣ܘ ܡܪܝܐ ܡܦܢܐ. ܕܐܢܐ ܡܪܝܐ ܡܡܠܠ ܐ̱ܢܐ ܙܕܝܩܘܬܐ ܘܕܝ̣ܢܐ ܕܦܘܪܩܢܐ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܡܠܐܟ̈ܐ ܟܕ ܡ̣ܢ ܚܕ̈ܕܐ ܡܬܐܪܙܝܢ ܒܡܨܥܝܘܬܗܘܢ ܡܬܝܒܠܐ ܠܘܬܢ ܡܬܐܪܙܢܘܬܐ

 

ܝ̣ܕܝ̣ܥܐ ܕܡܠܐܟ̈ܐ ܟܕ ܠܚܕܕ̈ܐ ܡܐܪܙܝ̣ܢ ܒܐܝܕܝ̈ܗܘܢ ܡܬܡܛܝܐ ܠܘܬܢ ܡܬܐܪܙܢܘܬܐ ܡ̣ܢ ܐܪܒܥ ܣܗܕ̈ܘܢ.

 

ܣܗܕܘܬܐ ܩܕܡܝܬܐ:

 

ܗ̇ܝ ܕܙܟܪܝܐ ܕܐܡ̣ܪ. ܘܢܦܩ ܡܠܐܟܐ ܕܡܡܠܠ ܒܝ. ܘܡܠܐܟܐ ܐ̱ܚܪܢܐ ܐܬܐ ܠܐܘܪܥܗ ܘܐܡ̣ܪ ܠܗ. ܗܪܛ ܘܐܡ̣ܪ ܠܥܠܝܡܐ ܗ̇ܘ ܐܓܘܪ̈ܣܐ ܬܬܒ ܐܘܪܫܠܡ. ܡ̣ܢ ܣܘܓܐܐ ܕܒܢܝ̈ܢܫܐ ܘܕܒܥܝ̣ܪܐ ܕܒܓܘܗ̇. ܘܗܕܐ ܓܠܝܐܝܬ ܡܫܘܕܥܐ ܕܡܠܐܟ̈ܐ ܡ̣ܢ ܚܕ̈ܕܐ ܡܬܐܪܙܝ̣ܢ ܘܠܓܡܝ̣ܪ̈ܐ ܕܒܢܝ̈ܢܫܐ ܡܐܪܙܝ̣ܢ.

 

ܣܗܕܘܬܐ ܕܬܪܬܝܢ:

 

ܗ̣ܘ ܙܟܪܝܐ ܐܡ̣ܪ. ܘܥܢܐ ܡܠܐܟܗ ܕܡܪܝܐ ܘܐܡ̣ܪ. ܡܪܝܐ ܚܝܠܬܢܐ. ܥܕ ܐܡܬܝ ܠܐ ܡܪܚܡ ܐܢ̱ܬ ܥܠ ܐܘܪܫܠܡ ܘܥܠ ܡܕܝ̈ܢܬܐ ܕܝܗܘܕܐ ܕܪܓܙܬ ܥܠܝܗܝܢ ܫܒܥܝܢ ܫܢܝ̣̈ܢ. ܘܥܢܐ ܡܪܝܐ ܠܡܠܐܟܐ ܕܡܡܠܠ ܒܝ ܡ̈ܠܐ ܫܦܝܪ̈ܬܐ ܘܦܬܓܡ̈ܐ ܕܒܘܝܐܐ. ܘܐܡ̣ܪ ܠܝ ܡܠܐܟܐ ܕܡܡܠܠ ܒܝ ܐܟܪܙ ܘܐܡ̣ܪ. ܗܟܢܐ ܐܡ̇ܪ ܡܪܝܐ ܚܝܠܬܢܐ. ܛܢܬ ܒܐܘܪܫܠܡ ܘܫܪܟܐ. ܘܗܕܐ ܡܘܕܥܐ. ܕܒܝܕ ܡܨܥܝܘܬܐ ܕܡܠܐܟ̈ܐ ܡܬܐܪܙܝܢ ܢܒܝ̈ܐ ܐ̱ܪ̈ܙܐ ܐܠܗܝ̈ܐ.

 

ܣܗܕܘܬܐ ܕܬܠܬ:

 

ܗ̇ܝ ܕܚܙܩܝܐܝܠ ܕܐܡ̣ܪ. ܕܫܘܒܚܗ ܕܐܠܗܐ ܕܐܝܣܪܐܝܠ. ܣܠܩ ܡ̣ܢ ܟܪܘܒܐ ܕܩ̇ܐܡ ܗ̣ܘܐ ܥܠ ܙܘܝ̣ܬܐ ܕܒܝܬܐ. ܘܩ̣ܪܐ ܠܓܒܪܐ ܕܠܒܝ̣ܫ ܒܘ̣ܨܐ. ܘܐܣܪ ܚܨ̈ܐ ܕܣܦܝ̣ܠܐ ܒܚܨܘ̈ܗܝ. ܘܐܡ̣ܪ ܠܗ ܡܪܝܐ. ܥܒܪ ܒܓܘ ܡܕܝܢ̱ܬܐ ܐܘܪܫܠܡ. ܘܪܫܘܡ ܪܘܫܡܐ ܥܠ ܒܝܬ ܥܝܢܝ̈ܗܘܢ ܕܓܒܪ̈ܐ ܕܡܬܬܢܝ̣ܚܝ̣ܢ ܘܡܬܕܢܩܝ̣ܢ ܥܠ ܟܠܗܝܢ ܛܢܦ̈ܘܬܐ ܘܒܝ̈ܫܬܐ ܕܡܬܥܒ̈ܕܢ ܒܓܘܗ̇. ܘܠܗ̇ܢܘܢ ܕܥܡܗ ܐܢܘܢ. ܐܡ̣ܪ ܠܗܘܢ ܠܥܢܝ̈. ܥܒ̣ܪܘ ܒܓܘ ܡܕܝܢ̱ܬܐ ܒܬܪܝ ܘܚܪܘܒܘ ܘܫܪܟܐ. ܚ̇ܙܐ ܐܢ̱ܬ ܐܝܟܢܐ ܗ̣ܝ ܡܐܪܙܢܘܬܐ ܡ̣ܢ ܫܘܒܚܗ ܕܐܠܗܐ ܠܟܪܘܒܐ ܕܐܝܬܘܗܝ ܡ̣ܢ ܥܕܬܐ ܥܠܝܬܐ ܢܦܩܬ݀. ܘܡ̣ܢ ܟܪܘܒܐ ܠܗ̇ܘ ܕܠܒܝ̣ܫ ܒܘ̣ܨܐ ܕܐܝܬܘܗܝ ܡ̣ܢ ܥܕܬܐ ܡܨܥܝܬܐ. ܘܡ̣ܢ ܗܢܐ ܠܗ̇ܢܘܢ ܕܥܡܗ ܐܘܟܝ̣ܬ ܒܬܪܘܗܝ ܕܐܝܬܝܗܘܢ ܥܕܬܐ ܬܚܬܝܬܐ.

 

ܣܗܕܘܬܐ ܕܐܪܒܥ:

 

ܗ̇ܝ ܕܐܣܛܦܢܘܣ ܕܐܡ̣ܪ ܒܡ̈ܠܐ ܕܝܠܗ ܗܟܢܐ. ܢܣܒܬܘܢ ܠܡ ܢܡܘܣܐ. ܒܦܘܩܕܢܐ ܕܡܠܐܟ̈ܐ ܘܠܐ ܢܛܪܬܘܢܝܗܝ. ܐܡܪܝܢܢ ܕܗܕܐ ܡܠܬܐ ܡܫܘܕܥܐ. ܕܒܝܕ ܡܨܥܝܘܬܐ ܕܡܠܐܟ̈ܐ ܐܬܝ̣ܗܒ ܢܡܘܣܐ ܡ̣ܢ ܐܠܗܐ ܠܒ̈ܢܝ ܐܝܣܪܐܝܠ.

 

ܗܦܟܬܐ:

 

ܐܡܪܝܢ ܐܢܗܘ ܕܒܢܝ̈ܢܫܐ ܕܠܐ ܡܨܝܢ ܠܡܬܐܪܙܘ ܡܢܗ̇ ܕܐܠܗܘܬܐ. ܐܠܐ ܒܝܕ ܡܨܥܝܘܬܐ ܕܡܠܐܟ̈ܐ. ܐܝܟܢܐ ܡܬܗܝܡܢܐ ܗ̇ܝ ܕܐܡܝ̣ܪܐ. ܘܐܡ̣ܪ ܡܪܝܐ ܠܡܘܫܐ ܙܦܠܢ ܘܙܦܠܢ. ܘܗ̇ܝ ܕܕܢܝܐܝܠ ܕܐܡ̣ܪ. ܚܙܐ ܗܘܝܬ ܟܘܪ̈ܣܘܬܐ ܕܡܬܬܣܝ̣ܡܝ̣ܢ ܘܥܬܝ̣ܩ ܝܘ̈ܡܬܐ ܝ̇ܬܒ. ܘܡܝ̣ܟܐ ܐܡ̣ܪ. ܕܚܙܝܬ ܠܡܪܝܐ ܕܝ̇ܬܒ ܥܠ ܟܘܪܣܝܐ. ܘܥܡܘܣ ܐܡ̣ܪ ܕܚܙܝܬ ܠܡܪܝܐ ܕܝ̣ܬܒ ܥܠ ܡܕܒܚܐ ܘܥܠ ܫܘܪܐ ܪܡܐ. ܘܐܫܥܝܐ ܐܡ̣ܪ ܕܠܡܠܟܐ ܡܪܝܐ ܚܝܠܬܢܐ ܚܙܝ̈ ܥܝ̈ܢܝ. ܘܐܪܡܝܐ ܐܡ̣ܪ. ܘܗ̣ܘܐ ܥܠܝ ܦܬܓܡܗ ܕܡܪܝܐ ܠܡܐܡܪ. ܘܬܘܒ ܐܡܪܝܢ ܐܠܘ ܗ̇ܢܘܢ ܡܨܥܝ̈ܐ ܒܡܨܥܝܘܬܐ ܕܗ̇ܢܘ ܕܠܥܠ ܡܢܗܘܢ ܒܩܘܪܒܐ ܡܬܐܪܙܝ̣ܢ ܐܝܟܢܐ ܡ̣ܢ ܣܪ̈ܦܐ ܐܡܝ̣ܪܐ ܕܐܬܕܟܝ̣ ܐܫܥܝܐ.

 

ܦܘܢܝܐ:

 

ܐܡܪܝܢܢ ܕܗ̇ܝ ܕܐܡ̣ܪ ܡܪܝܐ ܠܡܘܫܐ. ܠܐ ܡܕܠܩܒܐ ܠܗ̇ܝ ܕܒܝܕ ܡܠܐܟܐ ܐܡ̣ܪ ܡܪܝܐ ܠܡܘܫܐ ܗ̇ܘ ܡܐ ܕܐܡ̣ܪ. ܠܐ ܕܝܢ ܦܫܩܗ ܡܘܫܐ ܠܫܪܒܐ ܐܝܟ ܕܐܝܬܘܗܝ. ܒܥܠܬ݀ ܗ̇ܝ ܕܠܐ ܕܠܝ̣ܠܐܝܬ ܢܨܛܠܘܢ ܗ̣ܘܘ ܐܝܣܪ̈ܠܝܐ ܠܡܦܠܚ ܠܡܠܐܟ̈ܐ ܐܠܘ ܐܡ̣ܪ ܗ̣ܘܐ ܠܗܘܢ ܕܐܡ̣ܪ ܠܝ ܡܠܐܟܐ. ܘܠܘܩܒܠ ܗ̇ܝ ܕܢܒܝ̈ܐ ܕܐܡ̣ܪ ܟܠ ܚܕ ܡܢܗܘܢ ܕܚܙܗ̇ ܠܐܠܗܘܬܐ. ܐܡܪܝܢܢ ܕܚܙܬܐ ܗܕܐ ܠܡܬܗܓܓܢܘܬܐ ܕܫܘܒܚܗ ܕܐܠܗܐ ܡܫܘܕܥܐ. ܘܠܘ ܠܡܬܐܪ̈ܙܢܘܬܐ ܕܒܠܥܕ ܡܨܥܝܐ. ܘܠܘܩܒܠ ܗ̇ܝ ܕܐܡ̣ܪ ܐܪܡܝܐ ܕܗܘܐ ܥܠܝ ܦܬܓܡܗ ܕܡܪܝܐ ܐܡܪܝܢܢ ܕܒܕܘܟ̈ܝܬܐ ܣܓܝ̈ܐܬܐ ܐܡܝ̣ܪܐ ܒܐܪܡܝܐ ܕܗܘܐ ܦܬܓܡܐ ܥܠ ܐܪܡܝܐ ܡ̣ܢ ܩܕܡ ܡܪܝܐ. ܘܗ̇ܝ ܕܡ̣ܢ ܩܕܡ ܡܪܝܐ ܠܡܬܐܪܙܢܘܬܐ ܕܒܝܕ ܡܨܥܝܐ ܐܝܢܐ ܕܩܕܡ ܡܪܝܐ ܗ̱ܘ ܡܫܘܕܥܐ. ܘܠܘܩܒܠ ܗ̇ܝ ܕܐܝܟܢܐ ܡ̣ܢ ܣܪܦܐ ܐܬܕܟܝ̣ ܐܫܥܝܐ ܐܡܪܝܢܢ. ܕܗ̇ܝ ܕܒܝܕ ܓܡܘܪܬܐ ܐܬܕܟܝ̣ ܡܫܘܕܥܐ. ܕܡ̣ܢ ܣܪ̈ܦܐ ܐܬܝܒܠ ܕܘܟܝܐ ܠܘܬܗ ܕܢܒܝܐ. ܒܕܓܘܢ ܗ̣ܘ ܢܒܝܐ ܠܗܘܢ ܕܥܡܗ ܥܝܢ ܠܕܝ̣ܠܝܬܐ ܣܪܦܝܬܐ ܕܐܝܬܝܗ̇ ܡܘܩܕܢܘܬܐ܆ ܣܪܦܐ ܟܢܝܗ. ܘܐܦܢ ܡܠܐܟܐ ܗܘ̣ܐ ܘܠܘ ܣܪܦܐ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܒܕܐܝܟ ܐܝܠܝܢ ܡܗܕܝܢ ܠܒܢܝ̈ܢܫܐ

 

ܗ̣ܢܘܢ ܡܠܐܟ̈ܐ ܡܢܗܪܝ̣ܢ ܘܡܐܪܙܝ̣ܢ ܠܒܢܝ̈ܢܫܐ. ܐܘ ܟܕ ܥܠ ܕܘܟܝܐ ܡܚܦܛܝ̣ܢ. ܐܝܟ ܗ̇ܝ ܕܫܪܝ̣ ܡܣܐܢܝ̈ܟ ܡ̣ܢ ܪ̈ܓܠܝܟ ܕܐܬܐܡܪܬ݀ ܠܝܫܘܥ ܗ̇ܘ ܕܢܘܢ. ܐܘ ܟܕ ܠܐܘܪܚܐ ܕܫܪܪܐ ܘܕܦܘܪܩܢܐ ܡܗܕܝܢ. ܐܝܟ ܗ̇ܝ ܕܠܘܬ ܩܘܪܢܝ̣ܠܝܘܣ. ܫܕܪ ܠܡ ܠܘܬ ܦܛܪܘܣ ܘܫܪܟܐ. ܐܘ ܟܕ ܠܪܒܘܬ ܦܐܝܘܬܐ ܕܡܥܠܝܘܬܐ ܐܠܗܝܬܐ ܡܒܕܩܝ̣ܢ. ܐܝܟ ܕܠܘܬ ܐܫܥܝܐ ܥܠ ܟܘܪܣܝܐ ܘܠܘܬ ܚܙܩܝܐܝܠ ܥܠ ܡܪܟܒܬܐ. ܘܠܘܬ ܕܢܝܐܝܠ ܐܝܟ ܥܬܝ̣ܩ ܝܘ̈ܡܬܐ. ܐܘ ܟܕ ܐ̱ܪ̈ܙܐ ܠܐ ܡܬܡܠܠܢ̈ܐ ܡܫܘܕܥܝ̣ܢ. ܐܟܙܢܐ ܕܠܦܘܠܘܣ ܟܕ ܐܬܥܠܝ̣ ܠܫܡܝܐ ܕܬܠܬܐ. ܐܘ ܟܕ ܠܥܬܝ̣̈ܕܬܐ ܩܕܡܝ̣ܢ ܡܘܕܥܝ̣ܢ. ܐܝܟ ܗ̇ܝ ܕܠܐܫܥܝܐ ܕܗܐ ܒܬܘܠܬܐ ܬܒܛܢ ܘܫܪܟܐ.

 

 

 

ܢܝܫܐ ܪܒܝܥܝܐ ܡܛܠܗ̇ܝ ܕܐܪܐܟܕ ܐܬܛܟܣܘ ܐܬܢܗܪܘ ܬܓ̈ܡܐ ܫܡܝ̈ܢܐ. ܐܘ ܟܕ ܐܬܢܗܪܘ ܘܐܬܛܟܣܘ

 

ܘܗܠܝܢ ܡ̇ܢ ܗܟܢܐ. ܡܛܠ ܗ̇ܝ ܕܐܢ ܐܪܐ ܛܘܟܣܗܘܢ ܕܬܓ̈ܡܐ ܪ̈ܘܚܢܝܐ. ܗܘܝܘ ܥܠܬ݀ ܡܬܢܗܪ̈ܢܘܬܗܘܢ. ܐܘ ܡܬܢܗܪܢܘܬܗܘܢ ܥܬܠ ܛܘܟܣܗܘܢ. ܩܕܝܫܐ ܬܐܘܠܘܓܘܣ ܒܡܐܡܪܐ ܕܥܠ ܡܥܡܘܕܝ̣ܬܐ ܡܬܦܫܟ ܟܕ ܐܡ̇ܪ ܕܠܐ ܝ̇ܕܥ. ܠܐ ܝ̇ܕܥ ܐ̱ܢܐ ܐܝ̇ܕܐ ܐܡܪ. ܘܩܕܝܫܐ ܕܝܘܢܢܘܣܝܘܣ ܬܪ̈ܬܝܗܝܢ ܐܡ̇ܪ. ܘܐܡܪܝܢܢ ܕܠܘ ܠܦܘܬ ܛܟܣܐ ܡܨܝܐ ܕܬܗܘܐ ܡܬܢܗܪܢܘܬܐ. ܐܝܟ ܩܢܘܢܐ ܡܠܝ̣ܠܐ. ܘܐܠܐ ܙܕܩ ܗ̣ܘܐ. ܕܐܘ ܟܠܗܘܢ ܐܟܚܕܐ ܒܟܠܗܘܢ ܬܓ̈ܡܐ ܡܬܛܟܣܝ̣ܢ ܗ̣ܘܘ. ܐܘ ܟܠܗܘܢ ܐܟܚܕܐ ܐܦܠܐ ܒܚܕ ܡ̣ܢ ܬܓ̈ܡܐ ܒܥܠܬ݀ ܫܘܝܘܬܗܘܢ ܒܓܠܝ̣ܙܘܬܐ ܕܡ̣ܢ ܥܠܬܐ ܡܢܬܥܢܝ̣ܬܐ ܕܡܥܠܝܘܬܐ ܐܘ ܕܡܬܚܬܝܘܬܐ. ܘܬܪ̈ܬܝܗܝܢ ܫܟܝ̣ܪ̈ܢ. ܫܪܝ̣ܟܐ ܡܕܝܢ ܕܟܠܚܕ ܡܢܗܘܢ ܠܦܘܬ ܙܠܓ̈ܐ ܕܩܒܠ ܡ̣ܢ ܐܒܐ ܕܢܘܗܪ̈ܐ. ܒܥܠܬ݀ ܥܗܢܘܬܐ ܟܝܢܝܬܐ ܕܩܢܐ ܗܘܐ ܒܒܪܝܬܗ. ܐܫܬܘܝ̣ ܠܕܪܓܐ ܡܕܡ ܕܠܗ ܒܝܬܝ ܗ̣ܘܐ. ܘܬܘܒ ܐܡܪܝܢܢ. ܐܠܘܠܐ ܠܦܘܬ ܡܬܢܗܪܢܘܬܐ ܗ̣ܘܐ ܛܘܟܣܐ. ܠܐ ܙܕܩ ܗ̣ܘܐ ܕܒܬܪ ܣܝܡ ܐܝܕܐ ܡܬܛܟܣܝܢ ܗ̣ܘܘ ܡܫܡ̈ܫܢܐ ܒܛܟܣܝ̈ܗܘܢ. ܘܟܗ̈ܢܐ ܒܬܓܡܝ̈ܗܘܢ. ܘܪ̈ܝܫܝ ܟܗ̈ܢܐ ܒܟܘܪ̈ܣܘܬܗܘܢ. ܐܠܐ ܕܟܕ ܩܕܡܝ̣ܢ ܡܬܛܟܣܝ̣ܢ ܗ̣ܘܘ. ܐܝܛܐ ܡܫܬܟܢܐ ܗܘܬ݀ ܠܗܘܢ ܡܬܢܗܪܢܘܬܐ ܗ̇ܝ ܕܫܟܝ̣ܪܐ. ܒܗ̇ܝ ܕܟܕ ܡܫܬܡܠܝܢ ܡܬܥܠܝܢ. ܗܕܐ ܗ̇ܝ ܚܬܝ̣ܬܘܬܐ ܕܗ̇ܘ ܡܐ ܕܐܕܪܟܢܢ ܒܐܦܘܕܝ̣ܟܣܝ̣ܣ. ܘܐܦܢ ܠܒܪ ܟܐܦܐ ܗ̇ܝ ܕܒܗܦܟܐ ܫܦܪܐ.

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܚܡܝܫܝܬܐ

 

ܡܛܠܗ̇ܝ ܕܠܘ ܒܠܚܘܕ ܠܓܡܝ̣ܪ̈ܐ ܕܒܢ ܡܗܕܝܢ ܘܡܦܪܢܣܝ̣ܢ ܪ̈ܘܚܢܐ. ܐܠܐ ܘܠܟܠܗܘܢ ܟܝ̈ܢܐ ܕܒܪ̈ܝܬܐ ܟܠܗܝܢ. ܘܒܗ ܐܝܬ ܢܝ̈ܫܐ ܐܪܒܥܐ. ܢܝܫܐ ܩܕܡܝܐ ܡܛܠ ܗ̇ܝ ܕܠܟܠ ܚܕ ܡ̣ܢ ܩܢܘ̈ܡܐ ܐ̱ܢܫܝ̈ܐ. ܩܢܘܡܐ ܢܩܝ̣ܦ ܡܠܐܟܝܐ ܕܠܗ ܡܗܕܐ ܘܝ̣ܕܝ̣ܥܐ ܗܕܐ ܡ̣ܢ ܚܡܫ ܣܗܕ̈ܘܢ.

 

ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܠܐ ܬܒܣܘܢ ܥܠ ܚܕ ܡ̣ܢ ܗܠܝܢ ܙܥܘܪ̈ܐ. ܕܡܠܐܟܝ̈ܗܘܢ ܒܟܠܙܒܢ ܚܙܝܢ ܦܪܨܘܦܗ ܕܐܒܝ ܕܒܫܡܝܐ.

 

ܣܗܕܘܬܐ ܕܬܪܬܝܢ:

 

ܦܪܟܣܝܣ. ܐܡܪܘ ܗ̇ܢܘܢ ܕܟܢܝ̣ܫܝ̣ܢ ܗ̣ܘܘ ܒܒܝܬܐ ܕܡܪܝܡ ܐܡܗ ܕܡܪܩܘܣ ܠܛܠܝ̣ܬܐ ܕܢܦܩܬ݀ ܕܬܥܢܝܘܗܝ ܠܫܡܥܘܢ. ܟܒܪ ܡܠܐܟܗ ܗ̣ܘ ܕܫܡܥܘܢ.

 

ܣܗܕܘܬܐ ܕܬܠܬ:

 

ܦܘܠܘܣ. ܦܩܕ ܡܛܠ ܐܢ̱ܬܬܐ ܕܬܗܘܐ ܠܗ̇ܘ ܬܚܦܝ̣ܬܐ ܡܛܠ ܡܠܐܟܐ.

 

ܣܗܕܘܬܐ ܕܐܪܒܥ:

 

ܝܥܩܘܒ ܫܠܝܚܐ ܐܡ̣ܪ ܕܡܠܐܟܐ ܗ̇ܘ ܕܡܬܪܣܐ ܗ̣ܘܐ ܠܝ. ܘܡܠܐܟܐ ܗ̇ܘ ܕܕܒܪܢܝ ܡ̣ܢ ܛܠܝܘܬܝ.

 

ܣܗܕܘܬܐ ܕܚܡܫ:

 

ܕܘܝܕ. ܡܫܪܝ̣ܬܐ ܕܡܠܐܟܘ̈ܗܝ ܕܡܪܝܐ ܚܕܝ̣ܪܐ ܠܕܚ̈ܠܘܗܝ ܘܡܦܨܐ ܠܗܘܢ.

 

ܗܦܟܬܐ:

 

ܐܡܪܝܢ ܕܗܠܝܢ ܣܗܕ̈ܘܬܐ ܠܗ̇ܝ ܕܥܡ ܡܗܝ̈ܡܢܐ ܒܠܚܘܕ ܐܝܬ ܡܠܐܟ̈ܐ ܡܫܘܕ̈ܥܢ. ܘܐܝܟܢܐ ܐܡ̣ܪܬܘܢ ܕܥܡ ܟܠܢܫ ܐܝܬ.

 

ܦܘܢܝܐ:

 

ܐܡܪܝܢܢ ܕܬܠܬ ܐܢܘܢ ܡܠܐܟܐ ܘܫܐܕܐ ܘܒܪܢܫܐ. ܘܓܠܝܐ ܕܨܒܝܢܐ ܕܡܠܐܟܐ ܣܩܘܒܠܐܝܬ ܣܝ̣ܡ. ܠܘܩܒܠ ܨܒܝܢܐ ܕܫܐܕܐ. ܘܗ̣ܘ ܒܪܢܫܐ ܒܪ ܚܐܪ̈ܐ ܘܫܠܝ̣ܛ ܒܝܬܗ. ܒܕܓܘܢ ܐܢ ܠܨܒܝܢ ܡܠܐܟܐ ܢܩܦ ܨܒܝܢܗ. ܡܙܕܟܐ ܠܗ ܫܐܕܐ ܘܡܒܥܕ. ܡܛܠ ܕܬܪܝܢ ܝܬܝܪ ܚܝܠܬܢܝ̣̈ܢ ܡ̣ܢ ܚܕ ܠܐ ܦܝܫܐ ܠܗ ܡܢܬܐ ܒܩܢܘܡܐ ܗ̇ܘ. ܐܢܕܝܢ ܠܨܒܝܢ ܫܐܕܐ ܢܩܦ ܨܒܝܢܗ. ܗܟܘܬ ܡܙܕܟܐ ܠܗ ܡܠܐܟܐ ܗ̇ܘ ܘܡܒܥܕ. ܘܫܐܕܐ ܡܫܬܠܛ ܥܠ ܦܘܪܢܣܐ ܕܩܢܘܡܐ ܗ̇ܘ. ܘܬܚܠܘܦ ܗ̇ܝ ܕܢܗܕܐ ܡܛܥܐ. ܘܚܠܦ ܗ̇ܝ ܕܢܐܚܐ ܡܘܒܕ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܦܪܥܘܢ ܕܐܡ̣ܪ ܕܕܝܠܝ ܗ̣ܘ ܢܗܪܐ ܘܐܢܐ ܥܒܕܬܗ. ܘܫܠܝ̣ܛܐ ܕܨܘܪ ܕܐܬܬܪܝ̣ܡ ܠܒܗ ܘܐܡ̣ܪ ܕܐܠܗܐ ܐ̱ܢܐ. ܘܡܘܬܒܐ ܕܐܠܗܐ ܝܬܒܬ ܒܠܒܐ ܕܝܡ̈ܡܐ. ܘܡ̣ܢ ܗ̇ܝ ܕܢܒܘܟܕܢܨܪ ܕܐܡ̣ܪ. ܐܣܩ ܠܥܠ ܡ̣ܢ ܟܘܟ̈ܒܐ ܕܒܫܡܝܐ. ܘܠܥܠ ܡ̣ܢ ܥܢܢ̈ܐ ܐܣܝ̣ܡ ܟܘܪܣܝ. ܘܓܠܝܐ ܕܠܘ ܗܢܐ ܟܠܗ ܫܢܐܝܝ̈ܢ ܗܘܘ ܒܢܝ̈ܢܫܐ ܗܠܝܢ. ܕܡ̈ܠܐ ܕܐܝܟ ܗܠܝܢ ܥܠ ܟܝܢܗܘܢ ܥܒܝܐ ܘܬܐܛܪܢܝܐ ܢܡܠܠܘܢ ܗ̣ܘܘ. ܐܠܘܠܐ ܕܪ̈ܘܚܐ ܒܝ̈ܫܬܐ ܕܠܗܘܢ ܢܩܝ̣̈ܦܢ ܗܘܝ̈. ܒܗܘܢ ܡܠܠܝ̈. ܘܡ̣ܢ ܗܠܝܢ ܝ̣ܕܝ̣ܥܐ ܕܠܟܠ ܩܢܘܡܐ ܡܠܐܟܐ ܐܝܬ ܕܢܩܝ̣ܦ ܠܗ ܘܡܢܛܪ ܒܫܘܪܝ ܗܘܝܗ. ܐܝܛܐ ܟܕ ܠܗ̇ܝ ܕܕܠܩܘܒܠܐ ܨܒܝܢܗ ܢܩܦ܆ ܡܣܛܐ ܡܢܗ ܡܠܐܟܐ. ܘܫܐܕܐ ܐܚܕ ܫܘܠܛܢܗ. ܐܟܡܐ ܕܒܬܠܡܝ̣ܕ ܙܐܦܐ ܣܟܪܝܘܛܐ ܗ̇ܘ ܐܣܬܥܪܬ݀.

 

 

 

ܢܝܫܐ ܬܪܝܢܐ ܡܛܠ ܗ̇ܝ ܕܐܦ ܠܟܠ ܥܡܡܝ̈ܢ ܘܐܡܘ̈ܢ ܫܠܝ̣ܛܐ ܢܩܝ̣ܦ ܪܘܚܢܐ ܕܡܕܒܪ ܠܗ. ܛܒܐ ܐܘ ܒܝܫܐ.

 

ܘܗܕܐ ܡ̇ܢ ܝ̣ܕܝ̣ܥܐ. ܡ̣ܢ ܗ̇ܝ ܕܐܡ̣ܪ ܡܘܫܐ. ܕܐܩܝ̣ܡ ܬܚܘܡܐ ܕܥܡ̈ܡܐ ܐܝܟ ܡܢܝܢܐ ܕܡܠܐܟܘ̈ܗܝ ܕܐܠܗܐ. ܘܡ̣ܢ ܗ̇ܢܝܢ ܕܐܡܝ̣ܪ̈ܢ ܒܕܢܝܐܝܠ. ܐܫܬܡܥ̈ܝ ܡܠܝ̈ܟ. ܘܐܢܐ ܐܬܝܬ ܒܡܠܝ̈ܟ. ܘܫܠܝ̣ܛܐ ܕܡܠܟܘܬܐ ܕܦܪܣ ܩܡ ܠܘܩܒܠ ܥܣܪܝܢ ܘܚܕ ܝܘܡ. ܘܗܐ ܡܝ̣ܟܐܝܠ ܚܕ ܡ̣ܢ ܪܘܪ̈ܒܢܐ ܩܕ̈ܡܝܐ ܐܬܐ ܠܡܥܕܪܘܬܢܝ. ܘܐܫܬܘܚܪܬ ܬܡܢ ܠܘܩܒܠ ܫܠܝ̣ܛܐ ܕܦܪܣ. ܘܒܬܪ ܩܠܝ̣ܠ ܐܡ̣ܪ. ܗܫܐ ܐܗܦܟܟ ܠܡܥܒܕ ܩܪܒܐ ܥܡ ܫܠܝ̣ܛܐ ܕܦܪܣ. ܘܐܢܐ ܢܦܩܬ ܘܗܐ ܫܠܝ̣ܛܐ ܕܝܘ̈ܢܝܐ ܐܬܐ. ܘܠܝܬ ܕܡܥܕܪ ܗ̣ܘܐ ܠܝ ܒܗܠܝܢ ܟܠܗܝܢ܆ ܐܠܐ ܐܢ ܡܝ̣ܟܐܝܠ ܫܠܝ̣ܛܟܘܢ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܐܦ ܥܠ ܐܪܒܥܐ ܐܣܛܘ̈ܟܣܐ ܡܠܐܟ̈ܐ ܐܝܬ ܩܝܘ̈ܡܐ ܕܡܙܝ̣ܥܝ̣ܢ ܠܗܘܢ ܐܝܟ ܕܠܝܘܬܪܢܐ ܐܘ ܐܝܟ ܕܠܣܘܓܦܢܐ ܒܙܒܢ ܡܪܕܘܬܐ

 

ܐ̱ܢܫܝ̈ܢ ܐܡܪܝܢ ܕܐܦ ܥܠ ܐܪܥܐ ܘܢܗܪ̈ܘܬܐ ܪܘܪ̈ܒܐ ܘܝܡ̈ܡܐ. ܘܥܠ ܪ̈ܘܚܐ. ܘܥܠ ܢܘܪܐ. ܩܝܘ̈ܡܐ ܐܝܬ ܡܠܐܟ̈ܐ ܕܡܦܪܢܣܝ̣ܢ ܠܗܘܢ. ܘܡܫܪܪܝ̣ܢ ܬܪܥܝܬܗܘܢ ܒܝܕ ܬܠܬ. ܚܕܐ ܡ̇ܢ ܡ̣ܢ ܗ̇ܝ ܕܐܡ̣ܪ ܕܘܝܕ ܡܛܠ ܡܪܕܘܬܐ ܕܒܡܨܪܝܢ. ܕܐܗܦܟ ܢܗܪ̈ܘܬܗܘܢ ܠܕܡܐ. ܘܪ̈ܕܝܗܘܢ ܕܠܐ ܢܫܬܘܢ ܡܝ̈ܐ. ܘܫܕܪ ܥܠܝܗܘܢ ܚܠܘܛܐ ܘܐܘܪ̈ܕܥܐ ܘܩܡܨܐ ܘܙܚܠܐ ܘܓܠܝ̣ܕܐ ܘܒܪܕܐ ܘܝܩܕܢܐ. ܘܒܬܪ ܟܠܗܝܢ ܐܡ̣ܪ ܠܚܡܬܐ ܘܪܘܓܙܐ ܘܐܘܠܨܢܐ ܕܐܝܟ ܗܢܐ ܒܝܕ ܡܠܐܟܐ ܒܝ̣ܫܐ ܫܕܪ. ܐܡܪܝܢ ܕܡ̣ܢ ܗܕܐ ܝ̣ܕܝ̣ܥܐ ܕܠܟܠ ܐܣܛܘܟܣܐ ܡܠܐܟܐ ܕܝ̣ܠܢܝܐ ܐܝܬ ܗ̣ܘܐ ܕܡܙܝ̣ܥ ܗ̣ܘܐ ܠܗ ܠܘܬ ܒܝ̈ܫܬܐ ܗܠܝܢ: ܒܪܡܙܐ ܕܒܪܘܝܐ.

 

ܣܗܕܘܬܐ ܕܬܪܬܝܢ:

 

ܗ̇ܝ ܕܐܡܝ̣ܪܐ ܒܕܢܝܐܝܠ. ܕܡܠܐܟܐ ܕܝܢ ܕܛܠܐ. ܢܚܬ ܥܡ ܚܢܢܝܐ ܘܥܙܪܝܐ ܘܡܝ̣ܫܐܝܠ ܠܓܘ ܐܬܘܢܐ ܕܢܘܪܐ. ܘܕܚܩܗ̇ ܠܫܠܗܒܝ̣ܬܐ ܕܢܘܪܐ ܡ̣ܢ ܐܬܘܢܐ. ܐܡܪܝܢܢ ܕܗܕܐ ܡܠܬܐ ܣܗܕܐ ܕܐܦ ܡܠܐܟܐ ܐܝܬ ܠܗ ܕܡܦܪܢܣ ܠܗ ܒܪܡܙܐ ܕܒܪܘܝܐ.

 

ܣܗܕܘܬܐ ܕܬܠܬ:

 

ܗ̇ܝ ܕܐܡܝ̣ܪܐ ܒܐܘܢܓܠܝܘܢ. ܕܡܠܐܟܐ ܠܡ ܢܚܬ ܗ̣ܘܐ ܘܡܙܝ̣ܥ ܠܡܝ̈ܐ ܗܠܝܢ. ܐܡܪܝܢܢ ܐܢܗܘ ܕܙܘܥܐ ܗ̇ܘ ܙܥܘܪܐ ܕܡܝ̈ܐ ܗܠܝܢ ܒܨܝ̣ܪ̈ܐ ܒܝܕ ܡܠܐܟܐ ܗܘܐ ܗ̣ܘܐ. ܐܝܟܢܐ ܙܘ̈ܥܐ ܗܠܝܢ ܙܝ̣̈ܥܐ ܘܬܡܝ̣̈ܗܐ ܕܢܗܪ̈ܘܬܐ ܪܘܪ̈ܒܐ ܘܕܝܡ̈ܡܐ ܠܘ ܒܝܕ ܡܠܐܟ̈ܐ ܡܫܬܡܠܝܢ.

 

 

 

ܢܝܫܐ ܪܒܝ̣ܥܝܐ ܡܛܠ ܗ̇ܝ ܕܐܦ ܠܟܠܚܕܐ ܡ̣ܢ ܡܘܙ̈ܠܬܐ. ܡܠܐܟܐ ܐܝܬ ܕܡܦܪܢܣ ܠܗ̇

 

ܘܠܗ̇ ܠܗܕܐ ܒܥܬܐ ܒܝܕ ܬܠܬ ܣܗܕ̈ܘܢ ܡܫܪܪܝ̣ܢ ܠܗ̇ ܐ̱ܢܫܝ̈ܢ ܘܐܡܪܝܢ.

 

ܣܗܕܘܬܐ ܩܕܡܝܬܐ:

 

ܗ̇ܝ ܕܡ̣ܢ ܟܠ ܐ̱ܢܫ ܫܡܝܐ ܘܕܒܫܡܝܐ ܘܕܡ̣ܢ ܫܡܝܐ ܡܬܩܪܝܢ ܡܠܐܟ̈ܐ. ܐܝܟ ܗ̇ܝ ܕܕܘܝܕ. ܫܒܚܘ ܠܡܪܝܐ ܡ̣ܢ ܫܡܝܐ ܫܒܚܘܗܝ ܒܡܪ̈ܘܡܐ. ܫܒܚܘܗܝ ܟܠܗܘܢ ܡܠܐܟܘ̈ܗܝ ܫܒܚܘܗܝ ܟܠܗܘܢ ܚܝܠܘ̈ܬܗ. ܘܗ̇ܝ ܕܕܢܝܐܝܠ. ܕܗܐ ܓܒܪܐ ܓܒܪܐܝܠ. ܦܪܚ ܡܦܪܦ ܘܐܬܐ ܡ̣ܢ ܫܡܝܐ. ܘܗ̇ܝ ܕܒܐܘܢܓܠܝܘܢ ܕܐܙܠܘ ܡܠܐܟ̈ܐ ܠܫܡܝܐ. ܘܡܠܐܟ̈ܐ ܕܒܫܡܝܐ ܚܕܝܢ ܥܠ ܚܛܝܐ ܕܬܐܒ. ܘܐܠܘܠܐ ܕܠܫܡܝܐ ܢܩܝ̣ܦܝ̣ܢ ܗ̣ܘܘ ܡܠܐܟ̈ܐ. ܠܘ ܗܢܐ ܟܠܗ ܦܘܚܡܐ ܩܢܝܢ ܗ̣ܘܘ ܠܘܬܗܘܢ ܒܟܬܒ̈ܐ ܩܕܝ̈ܫܐ.

 

ܣܗܕܘܬܐ ܕܬܪܬܝܢ:

 

ܗ̇ܝ ܕܚܟܝ̣̈ܡܐ ܒܪ̈ܝܐ. ܐܡܪܝܢ ܓܝܪ ܕܐܠܘܠܐ ܠܟܠ ܫܡܝܐ ܬܓܡܐ ܡ̣ܢ ܡܠܐܟ̈ܐ ܡܕܒܪ ܗ̣ܘܐ. ܐܝܟܢܐ ܬܫܥܐ ܗ̣ܘܘ ܬܓ̈ܡܐ ܕܪ̈ܘܚܢܐ. ܐܝܟ ܕܐܦ ܬܫܥ ܐܣܦܝ̣ܪ̈ܐ ܕܡܘܙ̈ܠܬܐ. ܘܠܐ ܝܬܝܪ ܘܠܐ ܒܨܝ̣ܪܐ.

 

ܣܗܕܘܬܐ ܕܬܠܬ:

 

ܗ̇ܝ ܕܐܣܛܪ̈ܘܠܘܓܘ. ܐܡܪܝܢ ܓܝܪ ܕܠܟܠ ܓܝ̣ܓܠܐ ܡ̣ܢ ܗܠܝܢ ܬܫܥ ܕܫܡܝܐ. ܬܓܡܐ ܡ̣ܢ ܗܠܝܢ ܬܫܥܐ ܕܪ̈ܘܚܢܐ ܢܩܝ̣ܦ ܘܡܕܒܪ. ܘܝܕܝ̣ܥܐ ܗܕܐ ܡ̣ܢ ܗ̇ܝ ܕܓܝܓܠܐ ܗ̇ܝ ܥܠܝܬܐ ܠܐ ܡܟܘܟܒܬܐ. ܒܚܪܝ̣ܦܘܬ ܙܘܥܗ̇ ܠܡܘܩܕܢܘܬܗܘܢ ܕܣܪ̈ܦܐ ܡܚܘܝܐ. ܘܓܝ̣ܓܠܐ ܕܥܡ ܗܕܐ ܒܣܓܝܐܘܬ ܘܟܘܟ̈ܒܝܗ̇ ܠܣܓܝܐܘܬ ܥܝ̈ܢܐ ܕܟܪ̈ܘܒܐ ܡܫܘܕܥܐ. ܘܓܝ̣ܓܠܐ ܕܥܡ ܗܕܐ ܐܝܬܝܗ̇ ܕܩܪܘܢܘܣ. ܒܡܫܘܚܪܘܬ ܙܘܥܗ̇ ܘܡܝܬܒܘܬܗ̇ ܠܐܪܙ ܟܘܢܝܗܘܢ ܕܡܘܬܒܐ ܡܦܫܩܐ. ܘܓܝ̣ܓܠܐ ܕܥܡ ܗܕܐ ܕܐܝܬܝܗ̇ ܕܙܘܣ. ܒܗ̇ܝ ܕܡܪܐ ܐܠܗ̈ܐ ܐܬܩܪܝ̣ ܙܘܣ ܠܒܝܬܝܘܬܗ̇ ܕܥܡ ܡܪ̈ܘܬܐ ܨܝܪܐ. ܘܓܝ̣ܓܠܐ ܕܥܡ ܗܕܐ ܕܐܝܬܝܗ̇ ܕܐܪܝܣ. ܒܗ̇ܝ ܕܚܝܠܐ ܠܐ ܡܙܕܟܝܢܐ ܘܬܘܩܦܐ ܠܐ ܡܬܚܣܢܢܐ ܕܐܪܝܣ ܗ̣ܘ. ܠܫܘܡܗܐ ܕܚܝ̈ܠܘܬܐ ܡܐܪܙܐ. ܘܓܝ̣ܓܠܐ ܕܥܡ ܗܕܐ ܕܐܝܬܝܗ̇ ܕܫܡܫܐ. ܒܗ̇ܝ ܕܫܡܫܐ ܟܘܟܒܐ ܗ̱ܘ ܕܡܠܟ̈ܐ ܘܫܠܝ̣̈ܛܢܐ. ܠܬܓܡܐ ܕܫܠܝ̈ܛܢܐ ܡܒܕܩܐ. ܘܓܝܓܠܐ ܕܥܡ ܗܕܐ ܕܐܝܬܝܗ̇ ܕܒܠܬܝ. ܠܥܠܬ݀ ܢܩܒܬܢܝܘܬ ܟܘܢܝܐ ܕܪ̈ܝ̣ܫܢܘܬܐ ܓܠܝܐ. ܐܦ ܓܝܪ ܘܦܘܠܘܣ ܠܦܐܝܘܬܗ̇ ܕܗܕܐ ܦܪܕܝܣܐ ܩܪܐ ܟܕ ܐܬܥܠܝ̣ ܘܥܝܢ ܒܗ̇ ܬܗܪ̈ܐ ܠܐ ܡܬܡܠܠܢ̈ܐ ܕܫܘܦܪ̈ܐ. ܘܝ̣ܕܝ̣ܥܐ ܗܕܐ ܐܡܪܝܢ ܡ̣ܢ ܗ̇ܝ ܕܬܠܝܬܝܬܐ ܗ̱ܝ ܓܝܓܠܐ ܗܕܐ ܟܕ ܡܬܡܢܝܐ ܐܝܟ ܕܡ̣ܢ ܠܘܬܢ. ܘܗ̇ܝ ܕܣܗܪܐ ܘܗ̇ܝ ܕܐܪܡܝܣ ܘܗ̇ܝ ܕܒܠܬܝ ܟܪ ܕܐܬܡܛܝ̣. ܘܓܝ̣ܓܠܐ ܕܥܡ ܗܕܐ ܕܐܝܬܝܗ̇ ܕܐܪܡܝܣ. ܒܗ̇ܝ ܕܥܠܝܐ ܡ̣ܢ ܓܝ̣ܓܠ ܣܗܪܐ ܕܐܝܬܘܗܝ ܟܘܟܒ ܐܝܙ̈ܓܕܐ ܐܘܟܝ̣ܬ ܡܠܐܟ̈ܐ. ܬܓܡܐ ܕܪ̈ܝܫܝ ܡܠܐܟ̈ܐ ܐܬܩܪܝ̣ ܬܓܡܐ ܡܕܒܪܢܗ̇. ܘܡ̣ܢ ܗܠܝܢ ܝ̣ܕܝ̣ܥܐ ܕܐܦ ܣܗܪܐ ܕܠܬܚܬ ܗ̣ܘ ܡ̣ܢ ܟܠܗܘܢ. ܒܗ̇ܝ ܕܟܘܟܒܐ ܗ̱ܘ ܕܐܝܙ̈ܓܕܐ ܘܛܒܠܪ̈ܐ ܕܐܝܟ ܕܒܣܘܓܐܐ. ܡܠܐܟ̈ܐ ܡܬܩܪܝܢ ܒܟܬܒ̈ܐ. ܠܥܠܬܐ ܕܡܛܠܬܗ̇ ܗ̇ܢܘܢ ܕܒܬܓܡܐ ܬܚܬܝܐ ܐܝܬܝܗܘܢ܆ ܡܠܐܟ̈ܐ ܐܬܩܪܝ̣ܘ ܡܘܕܥܐ.

 

ܢܘܗܪܐ:

 

ܐܡܪܝܢ ܐܠܘܠܐ ܬܓ̈ܡܐ ܪ̈ܘܚܢܐ ܠܓܘ̈ܫܡܐ ܫܡܝ̈ܢܐ ܢܩܝ̣ܦܝ̣ܢ ܗ̣ܘܘ ܒܝܬܐܝܬ ܠܘ ܗܟܢܐ ܡܬܢܛܪܐ ܗܘܬ݀ ܡܛܟܣܘܬܐ ܕܣܝܡܗܘܢ ܘܡܢܝܢܗܘܢ ܘܟܘܢܝܝ̈ܗܘܢ ܘܡܥܒܕܢ̈ܘܬܗܘܢ.

 

 

 

 

 

 

 

     #1 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܚܡܝܫܝܬܐ

 

ܡܛܠ ܒܪܝ̣ܬܗܘܢ ܕܡܠܐܟ̈ܐ ܘܟܝܢܝ̈ܗܘܢ ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܒܪܝ̣ܬܗܘܢ ܕܝ̣ܠܢܐܝܬ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܗ̇ܝ ܕܩܕܝ̣ܡܐ ܐܪܐ ܒܪܝܬܗܘܢ ܠܕܡܬܪ̈ܓܫܢܐ ܐܘ ܠܐ

 

 

 

ܐܡܪܝܢܢ. ܕܬܪܝܢ ܪ̈ܥܝܢܐ ܡܫܚ̈ܠܦܐ ܗܘ̣ܘ ܠܡܠܦܢ̈ܐ ܕܥܕܬܐ ܡܛܠ ܒܪܝ̣ܬܗܘܢ ܕܡܠܐܟ̈ܐ. ܒܗ̇ܝ ܕܡܢܗܘܢ ܡ̇ܢ ܐܡ̣ܪܘ. ܕܩܕܝ̣ܡܐ ܒܪܝ̣ܬܗܘܢ ܕܡܠܐܟ̈ܐ܆ ܠܒܪܝܬܐ ܕܥܠܡܐ ܗܢܐ ܡܬܪܓܫܢܐ. ܘܗܠܝܢ ܡ̇ܢ܆ ܐܟܙܢܐ ܕܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܘܩܕܝܫܐ ܓܪܝܓܘܪܝܘܣ ܕܢܘܣܐ. ܘܩܕܝܫܐ ܐܝܘܐܢܢܝܣ ܟܪܘܣܘܣܛܘܡܘܣ ܘܝܘܚܢܢ ܒܘܨܪܝܐ. ܘܝܥܩܘܒ ܐܘܪܗܝܐ. ܘܬܐܘܠܘܓܘܣ ܡ̇ܢ ܐܡ̇ܪ ܒܡܐܡܪܐ ܕܒܝܬ ܝܠܕܐ ܗܟܢܐ. ܩܕܡܝܬ݀ ܡ̇ܢ ܡܬܪܢܐ܆ ܚܝܠܘ̈ܬܐ ܡܠܐܟܝ̈ܐ ܘܫܡܝ̈ܢܐ. ܘܗ̣ܝ ܡܚܫܒܬܐ ܥܒܕܐ ܐܝܬܝܗ̇ ܗܘܬ݀. ܘܒܬܪ ܩܠܝ̣ܠ ܬܘܒ ܐܡ̣ܪ. ܡܛܠ ܓܝܪ ܕܗܠܝܢ ܩܕ̈ܡܝܬܐ ܫܦܝ̣ܪܐܝܬ ܗܘܝ̈ ܠܗ. ܥܠܡܐ ܬܪܝܢܐ ܡܬܚܫܒ. ܗܘܠܢܝܐ ܘܡܬܚܙܝܢܐ. ܘܕܗܢܐ ܐܝܬܘܗܝ ܩܘܝܡܐ ܘܡܘܙܓܐ ܕܡ̣ܢ ܫܡܝܐ ܘܡ̣ܢ ܐܪܥܐ. ܘܡ̣ܢ ܗܠܝܢ ܕܒܡܨܥܬܐ. ܘܓܪܝܓܘܪܝܘܣ ܕܢܘܣܐ ܐܡ̣ܪ ܒܡܐܡܪܐ ܕܡܦܩ ܒܪܘܚܐ ܕܚܠܦ ܒܣܝܠܝܘܣ ܗܟܢܐ. ܐܝܬ ܗܘܬ݀ ܘܩܛܣܛܣܝܣ ܡܕܡ. ܕܩܫܝܫܐ ܡ̣ܢ ܝ̣ܠܝ̣ܕܘܬܗ ܘܗܘܝܗ ܕܥܠܡܐ ܗܢܐ. ܘܕܦܐܝܐ ܗܘܬ݀ ܠܚܝܠܘ̈ܬܐ ܕܠܥܠ ܡ̣ܢ ܥܠܡܐ. ܘܗ̣ܘ ܟܕ ܗ̣ܘ ܐܡ̇ܪ ܒܡܐܡܪܐ ܡܪܬܝܢܐ. ܡܛܠ ܠܡ ܓܝܪ ܕܒܪܝ̣ܬܐ ܗ̇ܝ ܡܬܝܕܥܢܝ̣ܬܐ ܩܕܡܝܬܐ ܐܬܩܝܡܬ݀. ܘܟܠ ܚܕ ܡ̣ܢ ܚܝ̈ܠܐ ܡܠܐܟܝ̈ܐ ܠܦܘܬ ܩܘܝܡܐ ܕܗܢܐ ܟܠ܆ ܡܥܒܕܢܘܬܐ ܡܕܡ ܐܬܝܗܒܬ݀ ܠܗ ܡ̣ܢ ܫܘܠܛܢܐ ܗ̇ܘ ܕܠܟܠ ܡܕܒܪ. ܘܡܪܝ ܐܝܘܐܢܢܝܣ ܐܡ̇ܪ ܒܦܘܫܩܐ ܕܟܬܒܐ ܕܐܝܘܒ. ܕܡܛܠ ܗܕܐ ܝ̣ܕܝ̣ܥܐ ܕܡܠܐܟ̈ܐ ܩܕܡ ܥܠܡܐ ܗ̣ܘܘ. ܕܒܩܠܐ ܪܡܐ ܫܒܚܘ. ܗ̇ܝ ܕܐܝܬܝܗ̇ ܕܡܢܗ̇ ܕܚܙܬܐ ܬܡܗܘ. ܘܝܘܚܢܢ ܒܘܨܪܝܐ ܐܡ̣ܪ ܒܩܘܪܒܗ. ܒܓܗܢܬܐ ܕܥܠ ܦܪܣܐ ܗܟܢܐ. ܪ̈ܘܚܐ ܠܐ ܗܘܠܢܝ̈ܬܐ ܕܒܩܫܝ̣ܫܘܬ ܗܘܝܐ ܡܝܩܪ̈ܢ. ܘܝܥܩܘܒ ܕܐܘܪܗܝ ܐܡ̣ܪ ܒܐܓܪܬܗ ܕܠܘܬ ܝܘܚܢܢ ܗܟܢܐ. ܕܩܕܝ̣ܡܐ ܒܪܝ̣ܬܗ ܕܐܟܠܩܪܨܐ ܘܕܡܠܐܟ̈ܐ ܡܬܚ̈ܐ ܘܛܘܪ̈ܐ ܣܓܝ̈ܐܐ ܘܠܐ ܡܬܐܡܪ̈ܢܐ ܠܒܪܝ̣ܬܗ ܕܥܠܡܐ ܗܢܐ܆ ܐܡܪܝܢܢ. ܕܟܡܐ ܕܝܢ ܩܕܝ̣ܡܐ܆ ܠܝܬ ܠܢ ܕܢܦܣܘܩ. ܠܐ ܓܝܪ ܡܬܩܪܝܢ ܡܬܚ̈ܐ ܗ̇ܢܘܢ ܙܒ̈ܢܐ. ܘܗܠܝܢ ܡ̇ܢ ܗܟܢܐ. ܡܢܗܘܢ ܕܝܢ ܕܡܠܦܢ̈ܐ ܕܥܕܬܐ ܠܘ ܗܟܢܐ ܐܡ̣ܪܘ. ܐܠܐ ܕܐܟܚܕܐ ܐܬܒܪܝ̣ܘ. ܘܡܠܐܟ̈ܐ ܡܬܝܕ̈ܥܢܐ܆ ܘܓܘܫ̈ܡܐ ܘܟܠܗܘܢ ܡܬܪ̈ܓܫܢܐ. ܘܐܝܬܝܗܘܢ ܡܪܝ ܐܦܪܝܡ ܡܠܦܢܐ ܣܘܪܝܝܐ ܒܦܘܫܩܐ ܣܘܥܪܢܝܐ ܕܒܪܝ̣ܬܐ. ܘܐܦܝܦܐܢܝܘܣ ܕܩܘܦܪܘܣ ܒܟܬܒܐ ܗ̇ܘ ܕܝܘܒܠܐ. ܘܡܪܝ ܝܥܩܘܒ ܕܣܪܘܓ ܒܡܐܡܪܐ ܗ̇ܘ ܕܥܠ ܫܬܬ݀ ܝܘ̈ܡܐ. ܗܠܝܢ ܓܝܪ ܐܡ̣ܪ. ܕܡܘܫܐ ܡ̇ܢ ܒܗ̇ܝ ܕܐܡ̣ܪ. ܒܪܝ̣ܫܝ̣ܬ ܒܪܐ ܐܠܗܐ ܝܬ ܫܡܝܐ ܘܝܬ ܐܪܥܐ. ܠܐܱܟܚܕܢܝܘܬ ܒܪܝܬܐ ܕܡܬܝܕ̈ܥܢܐ ܘܕܡܬܪ̈ܓܫܢܐ ܫܘܕܥ. ܒܫܡܝܐ ܡ̇ܢ ܠܡܠܐܟ̈ܐ܆ ܘܒܐܪܥܐ ܠܓܘܫ̈ܡܐ. ܚܢܢ ܕܝܢ ܠܬܪܥܝ̣ܬܐ ܗ̇ܝ ܩܕܡܝܬܐ ܢܩܦܝ̣ܢܢ ܘܠܗ̇ ܡܫܪܪܝ̣ܢܢ ܒܝܕ ܫܬ ܡܚܘ̈ܝܢܘܬܐ.

 

ܡܚܘܝܢܘܬܐ ܩܕܡܝܬܐ:

 

ܐܡܪܝܢܢ ܕܡܠܐܟ̈ܐ ܡ̇ܢ. ܒܗ̇ܝ ܕܠܐ ܓܫܝ̣̈ܡܐ ܐܢܘܢ ܘܠܐ ܗܘܠܢܝ̈ܐ ܝܬܝܪ ܡ̣ܢ ܟܝ̈ܢܐ ܓܫܝ̣̈ܡܐ ܘܗܘܠܢܝ̈ܐ܇ ܒܝܬܝ̣ܝ̣̈ܢ ܘܡܚܝܢܝ̣ܢ ܠܟܝܢܐ ܐܠܗܝܐ. ܒܕܓܘܢ ܐܟܡܐ ܕܟܝܢܐ ܐܠܗܐ ܩܕܝ̣ܡ ܠܟܝ̈ܢܐ ܡܬܪ̈ܓܫܢܐ. ܒܗ̇ ܒܕܡܘܬܐ ܘܡܠܐܟ̈ܐ ܕܠܗ ܡܚܝܢܝ̣ܢ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܡܠܐܟ̈ܐ ܡܫܡ̈ܫܢܐ ܐܢܘܢ ܕܐܠܗܘܬܐ. ܐܝܟ ܕܐܡܪܝܢ ܟܬܒ̈ܐ. ܒܕܓܘܢ ܐܟܡܐ ܕܐܠܗܘܬܐ ܩܕܝ̣ܡܐ ܠܟܝ̈ܢܐ ܡܬܚܙ̈ܝܢܐ. ܗ̣ܘ ܗܟܘܬ ܘܡܫܡ̈ܫܢܝܗ̇.

 

ܡܚܘܝܢܘܬܐ ܕܬܠܬ:

 

ܗ̇ܝ ܕܐܡ̣ܪ ܐܝܘܒ ܕܟܕ ܒܪܐ ܐܠܗܐ ܟܘܟ̈ܒܝ ܫܦܪܐ. ܟܠܗܘܢ ܒܢܝ̈ ܡܠܐܟ̈ܐ ܝܒܒܘ ܘܫܒܚܘܗܝ. ܘܐܠܘܠܐ ܕܩܕܝ̣ܡܝܢ ܗ̣ܘܘ ܡܩܝܡܝ̣ܢ ܡ̣ܢ ܩܕܡ ܕܢܗܘܘܢ ܟܘܟ̈ܒܐ. ܐܝܟܢܐ ܝܒܒܘ ܘܫܒܚܘ ܟܕ ܐܬܒܪܝ̣ܘ.

 

ܡܚܘܝܢܘܬܐ ܕܐܪܒܥ:

 

ܗ̇ܝ ܕܐ̣ܡܪ ܡܘܫܐ ܒܪ ܟܐܦܐ. ܕܥܠܡܐ ܗܢܐ ܡܛܠ ܐܕܡ ܐܬܒܪܝ̣. ܘܐܕܡ ܡܛܠ ܕܢܬܡܠܐ ܥܠܡܐ ܕܠܥܠ ܐܬܒܪܝ̣ ܐܝܟ ܕܐܡܪܝܢ ܟܬܒ̈ܐ. ܘܐܠܘ ܠܐ ܩܕܝ̣ܡ ܗ̣ܘܐ ܘܡܩܝܡ ܥܠܡܐ ܕܠܥܠ ܡ̣ܢ ܩܕܡ ܗܢܐ. ܐܝܟܢܐ ܗܢܐ ܡܠܗ̇ ܠܚܣܝ̣ܪܘܬܗ.

 

ܡܥܝܪܢܘܬܐ:

 

ܕܥ ܕܡܚܘܝܢܘܬܐ ܗܕܐ ܪܒܝ̣ܥܝܬܐ ܘܗ̇ܝ ܕܩܕܡܝܗ̇ ܡܚܝ̈ܠܢ. ܒܕܡܨܝܐ ܕܬܬܐܡܪ. ܕܡܠܐܟ̈ܐ ܡ̇ܢ ܟܕ ܩܕܝ̣ܡܝ̣ܢ ܗ̣ܘܘ ܘܒܪܝܢ ܒܝܘܡܐ ܩܕܡܝܐ ܥܡ ܫܡܝܐ ܘܐܪܥܐ. ܘܟܕ ܐܬܒܪܝ̣ܘ ܟܘܟ̈ܒܐ ܒܝܘܡܐ ܕܐܪܒܥܐ. ܝܒܒܘ. ܘܐܕܡ ܕܐܬܒܪܝ̣ ܒܝܘܡܐ ܕܫܬܐ ܡܠܝܗ̇ ܠܚܣܝ̣ܪܘܬܗܘܢ ܘܡ̣ܢ ܗܪܟܐ ܠܐ ܐܠܨܐ ܕܡ̣ܢ ܩܕܡ ܫܡܝܐ ܘܐܪܥܐ ܢܗܘܘܢ ܡܠܐܟ̈ܐ. ܐܠܐ ܥܡܗܘܢ. ܒܪܡ ܡ̣ܢ ܩܕܡ ܟܘܟ̈ܒܐ ܘܐܕܡ.

 

ܡܚܘܝܢܘܬܐ ܕܚܡܫ:

 

ܐܡܪܝܢܢ ܕܡܠܦܢ̈ܐ ܗ̇ܢܘܢ ܕܒܟܝ̣ܪܘܬ ܒܪܝ̣ܬܐ ܕܡܠܐܟ̈ܐ. ܘܠܩܝܫܝܘܬ ܒܪܝܬܐ ܕܓܘܫ̈ܡܐ ܐܘܕܝ̣ܘ. ܝܬܝܪ ܡܪܡܝ̣ܢ ܒܝ̣ܕܥܬܐ ܘܒܡܕܪܟܢܘܬܐ ܕܬܐܘܪ̈ܝܐܣ ܐܠܗܝ̈ܬܐ܆ ܡ̣ܢ ܗ̇ܢܘܢ ܕܐܟܚܕܢܝܘܬ ܒܪܝ̣ܬܐ ܕܡܬܚܙ̈ܝܢܐ ܘܠܐ ܡܬܚܙ̈ܝܢܐ ܐܘܕܝ̣ܘ. ܘܡܛܠܗܕܐ ܠܗܘܢ ܐܠܨܐ ܕܢܩܦ. ܘܠܗ̇ܘ ܡܐ ܕܐܘܕܝ̣ܘ ܢܘܕܐ.

 

ܡܚܘܝܢܘܬܐ ܕܫܬ:

 

ܐܡܪܝܢܢ ܕܗ̇ܢܘܢ ܕܩܕܝ̣ܡܘܬ ܒܪܝ̣ܬܐ ܕܡܠܐܟ̈ܐ ܐܘܕܝ̣ܘ. ܒܝܕ ܡܚܘܝܢ̈ܘܬܐ ܚܘܫܒܝ̈ܬܐ ܫܪܪܘ ܬܪܥܝ̣ܬܗܘܢ. ܗ̇ܢܘܢ ܕܝܢ ܐ̱ܚܪ̈ܢܐ܆ ܒܙܢܐ ܕܡܣܒܪܢܘܬܐ ܒܠܚܘܕ ܐܕܪܟܘ. ܕܗ̇ܝ ܕܝܬ ܫܡܝܐ ܠܡܠܐܟ̈ܐ ܡܫܘܕܥܐ. ܘܗ̇ܝ ܕܝܬ ܐܪܥܐ ܠܓܘܫ̈ܡܐ. ܘܓܠܝܐ ܕܠܘ ܒܐܡܝ̣ܢܘ ܡܫܪܐ ܡܣܒܪܢܘܬܐ. ܘܫܡܝܐ ܬܘܒ ܟܕ ܐܦ ܗ̣ܘ ܗܘܠܢܝܐ ܗ̇ܘ ܐܝܟ ܐܪܥܐ. ܐܝܟܢܐ ܠܠܐ ܗܘܠܢܝ̈ܐ ܡܫܘܕܥ.

 

ܗܦܟܬܐ:

 

ܐܡܪܝܢ ܕܫܡܝܐ ܐܬܪܐ ܗ̱ܘ ܕܡܠܐܟ̈ܐ. ܘܡܛܠܗܕܐ ܠܐ ܡܨܝܐ ܗܘܬ݀ ܕܢܬܒܪܘܢ ܡܠܐܟ̈ܐ ܩܕܡ ܐܬܪܗܘܢ. ܒܕܓܘܢ ܐܟܚܕܐ ܐܬܒܪܝ̣ܘ ܐܦ ܗ̣ܢܘܢ ܐܦ ܐܬܪܗܘܢ.

 

ܦܘܢܝܐ:

 

ܐܡܪܝܢܢ ܕܡܠܐܟ̈ܐ ܟܕ ܠܐ ܓܫܝ̣̈ܡܐ ܐܢܘܢ. ܠܐ ܣܢܝ̣ܩܝ̣ܢ ܥܠ ܐܬܪܐ ܕܒܗ ܢܗܘܘܢ. ܘܡ̣ܢ ܗܪܟܐ ܝ̣ܕܝ̣ܥܐ ܕܫܡܝܐ ܡܛܠ ܡܠܚܡܘܬܗ ܕܥܠܡܐ ܗܢܐ ܘܦܐܝܘܬܗ ܐܬܒܪܝ̣. ܘܠܘ ܡܛܠ ܡܠܐܟ̈ܐ.

 

ܗܦܟܬܐ:

 

ܐܡܪܝܢ ܕܡܕܓܠܝ̣ܢ ܡܕܝܢ ܟܬܒ̈ܐ ܘܡܠܦܢ̈ܐ ܕܒܫܡܝܐ ܐܡܪܝܢ ܕܐܝܬܝܗܘܢ ܡܠܐܟ̈ܐ.

 

ܦܘܢܝܐ:

 

ܐܡܪܝܢܢ ܕܗ̣ܝ ܗܕܐ ܐܫܝ̣ܠܐܝܬ ܘܠܘ ܡܪܢܐܝܬ ܡܬܐܡܪܐ ܥܠܝܗܘܢ ܒܟܬܒ̈ܐ.ܐܟܡܐ ܕܐܦ ܥܠ ܐܠܗܐ ܫܘܒܚܐ ܠܛܝܒܘܬܗ ܡܬܐܡܪܐ. ܕܫܡܝܐ ܟܘܪܣܝܗ ܘܐܪܥܐ ܟܘ̣ܒܫܗ. ܘܐܢ ܢܗܘܐ ܕܢܫܦ ܕܠܘ ܐܫܝ̣ܠܐܝܬ. ܐܦܠܐ ܠܘ ܡܪܢܐܝܬ. ܐܠܐ ܒܡܢܐ ܡܚܘܝܬܘܢ ܕܡܛܠ ܗܢܐ ܫܡܝܐ ܓܘܫܡܢܝܐ ܕܥܡ ܐܪܥܐ ܐܬܒܪܝ̣ ܒܝܘܡܐ ܩܕܡܝܐ ܐܡܪܝܢ ܟܬܒ̈ܐ ܕܐܝܬܝܗܘܢ ܒܗ ܡܠܐܟ̈ܐ. ܥܠ ܗܕܐ ܓܝܪ ܒܥܬܐ ܘܠܐ ܚܕܐ ܡܚܘܝܢܘܬܐ ܐܝܬ ܡܫܪܪܢܝ̣ܬܐ. ܘܗ̇ܝ ܕܫܪܝܪܐ ܗܕܐ ܗ̱ܝ ܕܠܬܓܡܝ̈ܗܘܢ ܘܕܘܝܪܗܘܢ ܪܘܚܢܝܐ ܕܡܥܠܝ ܡ̣ܢ ܟܠ ܐܬܪ ܘܕܘܟܐ܆ ܩܪܐ ܟܬܒܐ܆ ܫܡܝܐ ܕܡܠܐܟ̈ܐ. ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܕܢܘܣܐ ܒܡܦܩ ܒܪܘܚܐ ܕܚܠܦ ܫܬܬ݀ ܝܘ̈ܡܐ ܕܒܣܝܠܝܘܣ ܗܟܢܐ. ܗܠܝܢ ܡܠܝܢ ܗ̣ܘܘ ܠܐܘܣܝܐ ܕܥܠܡܐ ܠܐ ܡܬܚܙܝܢܐ. ܘܝܥܩܘܒ ܕܣܪܘܓ ܐܡ̣ܪ ܒܡܐܡܪܐ ܕܥܠ ܫܬܬ݀ ܝܘ̈ܡܐ ܕܐܝܬ ܠܡܠܐܟ̈ܐ ܫܡܝܐ ܕܒܗ ܥܡܪܝ̣ܢ ܕܐܝܬܘܗܝ ܢܗܝܪܐ ܘܩܛܝܢܐ ܘܪܘܚܢܐ ܘܕܠܐ ܓܫܘܡ. ܘܓܠܝܐ ܕܫܡܝܐ ܗ̇ܘ ܕܥܡ ܐܪܥܐ ܐܬܒܪܝ ܠܘ ܠܐ ܡܬܚܙܝܢܐ ܗ̱ܘ. ܐܦܠܐ ܠܐ ܓܫܘܡ. ܘܡܘܫܐ ܒܪ ܟܐܦܐ ܐܡ̇ܪ. ܕܥܠ ܫܡܝܐ ܕܡܠܐܟ̈ܐ ܠܐ ܐܡ̣ܪ ܡܘܫܐ ܡܕܡ. ܐܝܟܢܐ ܕܐܦܠܐ ܥܠ ܡܠܐܟ̈ܐ ܐܡ̣ܪ.

 

ܗܦܟܬܐ:

 

ܐܡܪܝܢ ܒܡܠܬܗ ܕܡܪܝܐ ܐܬܥܒܕܘ ܫܡܝܐ. ܘܒܪܘܚܐ ܕܦܘܡܗ ܟܠܗܘܢ ܚܝܠܘ̈ܬܗ. ܐܡ̇ܪ ܟܬܒܐ. ܘܐܠܘ ܡܠܐܟ̈ܐ ܡ̣ܢ ܩܕܡ ܫܡܝܐ ܒܪܝܢ ܗ̣ܘܘ. ܠܘ ܒܬܪ ܥܘܗܕܢ ܒܪܝ̣ܬܗ ܡܬܛܟܣ ܗ̣ܘܐ ܥܘܗܕܢ ܒܪܝ̣ܬܗܘܢ.

 

ܦܘܢܝܐ:

 

ܐܡܪܝܢܢ ܕܠܘ ܡܛܠ ܫܡܝܐ ܗܢܐ ܓܘܫܡܢܝܐ ܡܡܠܠ ܗܪܟܐ. ܐܠܐ ܡܛܠ ܗ̇ܘ ܠܐ ܓܘܫܡܢܝܐ ܕܐܡܪܢܢ. ܘܐܢ ܢܗܘܐ ܕܢܫܦ ܕܡܛܠ ܗܢܐ ܫܡܝܐ ܓܘܫܡܢܝܐ ܡܡܠܠ. ܐܠܐ ܡܛܠ ܡܢܐ ܠܐ ܡܨܝܐ ܕܢܐܡܪ. ܕܡܛܠܗ̇ܝ ܕܒܡܨܥܝܘܬ ܒܪܝ̣ܬܐ ܕܫܡܝܐ ܗܢܐ ܓܘܫܡܢܝܐ ܘܡܬܪܓܫܢܐ. ܢܫܘܕܥ ܠܢ ܒܪܝܬܐ ܕܟܝܢܐ ܠܐ ܓܫܝ̣ܡܐ ܘܡܬܝܕܥܢܐ ܩܕܡ ܣܡ ܥܘܗܕܢ ܒܪܝ̣ܬܗ ܕܫܡܝܐ. ܘܬܘܒ ܐܡܪܝܢܢ ܕܐܠܘ ܩܕܡܝܘܬܐ ܘܒܬܪܝܘܬܐ ܕܒܒܪܬ݀ ܩܠܐ ܠܩܕܡܝܘܬܐ ܘܒܬܪܝܘܬܐ ܕܒܣܘܥܪܢܐ ܡܫܘ̈ܕܥܢ ܗܘܝ̈. ܙܕܩ ܗ̣ܘܐ ܕܡܠܐܟ̈ܐ ܒܬܪ ܒܪܝ̣ܬܐ ܕܫܡܝܐ ܒܪܝܢ ܗ̣ܘܘ. ܘܡܛܠ ܕܐ̱ܚܪܝܐ ܐܬܛܟܣ ܥܘܗܕܢ ܒܪܝܬܗܘܢ ܡ̣ܢ ܕܒܪܝܬܗ ܗ̇ܝ ܕܫܟܝ̣ܪܐ.

 

ܗܦܟܬܐ:

 

ܐܡܪܝܢ ܕܙܒܢܐ ܡܫܘ̣ܚܬܐ ܗ̱ܘ ܕܙܘܥܐ ܕܫܡܝܐ. ܘܐܠܘ ܡ̣ܢ ܩܕܡ ܫܡܝܐ ܒܪܝܢ ܡܠܐܟ̈ܐ. ܠܐ ܙܒܢܝ̈ܐ ܐܢܘܢ. ܘܟܠ ܕܠܐ ܙܒܢܝܐ ܗ̱ܘ ܡܬܘܡܝܐ ܗ̱ܘ. ܡܠܐܟ̈ܐ ܡܕܝܢ ܡܬܘ̈ܡܝܐ ܐܢܘܢ ܒܐܝ̣ܬܘܬܗܘܢ. ܘܠܘ ܗܘܝܘ ܐܠܗܐ ܒܠܚܘܕܘܗܝ ܡܬܘܡܝܐ ܕܠܐ ܫܪܝ̣ ܘܠܐ ܡܫܠܡ. ܐܝܟ ܕܡܘܕܝܐ ܥܕܬܐ ܩܕܝ̣ܫܬܐ ܗ̇ܝ ܕܫܟܝ̣ܪܐ.

 

ܦܘܢܝܐ:

 

ܐܡܪܝܢܢ ܕܠܘ ܟܠ ܩܕܡܝܘܬܐ ܘܐ̱ܚܪܝܘܬܐ ܒܙܒܢܐ ܙܕܩ ܕܬܗܘܐ. ܘܐܠܐ ܐܦ ܡܢܘ̈ܬܐ ܕܙܒܢܐ ܒܙܒܢܐ ܩܕܝ̣̈ܡܢ ܗܘܝ̈ ܠܚ̈ܕܕܐ. ܘܐ̱ܚܪ̈ܝܢ ܡ̣ܢ ܚܕܕ̈ܐ. ܘܡܫܬܟܚ ܗ̣ܘܐ ܠܟܠ ܙܒܢܐ ܙܒܢܐ. ܘܠܠܐ ܣܘܦ ܡܫܬܠܫܠܐ ܗܘܬ݀ ܡܠܬܐ ܗ̇ܝ ܕܫܟܝ̣ܪܐ. ܗܟܘܬ ܡܕܝܢ ܘܡܠܐܟ̈ܐ. ܠܘ ܥܡܗ ܕܟܝܢܐ ܐܠܗܝܐ ܐܝܬܝܗܘܢ ܒܐܝ̣ܬܘܬܗܘܢ ܘܒܪܝ̣ܬܗܘܢ. ܐܠܐ ܛܒ ܐ̱ܚܪ̈ܝܝܢ ܡܢܗ. ܘܐܦܢ ܠܘ ܒܙܒܢܐ. ܐܝܟ ܕܐܦ ܡܢܘ̈ܬܐ ܕܙܒܢܐ ܕܠܘ ܥܡ ܚܕ̈ܕܐ ܐܢܝܢ. ܐܠܐ ܐ̱ܚܪ̈ܝܝܢ ܡ̣ܢ ܚܕ̈ܕܐ. ܘܐܦܢ ܠܘ ܒܙܒܢܐ.

 

ܗܦܟܬܐ:

 

ܐܡܪܝܢ ܡܕܝܢ ܐܡܬܝ ܐܬܒܪܝ̣ܘ ܟܕ ܠܝܬ ܗ̣ܘܐ ܡܬܚܡܘܬܐ ܙܒܢܝܬܐ.

 

ܦܘܢܝܐ:

 

ܐܡܪܝܢܢ ܕܐܬܒܪܝ̣ܘ ܡܠܐܟ̈ܐ܆ ܒܡܬܚܡܘܬܐ ܐܝ̇ܕܐ ܕܠܘ ܙܒܢܝܬܐ ܗ̱ܝ. ܡܛܠ ܕܠܘ ܟܠ ܡܬܚܡܘܬܐ ܒܙܒܢܐ. ܒܕܓܘܢ ܗ̇ܝ ܕܐܡܬܝ. ܐܫܝ̣ܠܐܝܬ ܘܠܘ ܡܪܢܐܝܬ ܡܬܩܛܪܓܐ ܥܠ ܡܠܐܟ̈ܐ ܒܗ̇ܝ ܕܠܘ ܙܒܢܝ̈ܐ ܐܢܘܢ. ܐܝܟ ܕܐܦ ܗ̇ܝ ܕܐܝܟܐ ܥܠܝܗܘܢ ܟܕ ܥܠܝܗܘܢ܆ ܒܗ̇ܝ ܕܠܘ ܐܬܪ̈ܢܝܐ ܐܢܘܢ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܡܛܠ ܡܢܐ ܐܪܐ ܒܪܐ ܐܠܗܐ ܠܡܠܐܟ̈ܐ

 

ܐܡܪܝܢܢ. ܡܛܠ ܗ̇ܝ ܕܢܫܘܬܦ ܐܢܘܢ ܒܛܝܒܘܬܗ. ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܒܡܐܡܪܐ ܕܥܠ ܒܝܬ ܝܠܕܐ. ܡܛܠ ܕܠܐ ܣܦܩܐ ܗܘܬ݀ ܠܛܒܘܬܗ ܕܐܠܗܐ ܗܕܐ ܕܬܬܙܝ̣ܥ ܒܠܚܘܕ ܬܐܘܪܝܐ ܕܝܠܗ. ܐܠܐ ܙܕܩ ܗ̣ܘܐ ܕܬܫܬܦܥ ܛܒܬܐ ܘܬܪܕܐ܆ ܐܝܟܢܐ ܕܝܬܝ̣ܪ ܣܓܝ̈ܐܐ ܢܗܘܘܢ ܐܝܬܝܗܘܢ ܗ̇ܢܘܢ ܕܡܬܥܕܪܝ̣ܢ. ܗܕܐ ܓܝܪ ܐܝܬܝܗ̇ ܗܘܬ݀ ܕܛܒܘܬܐ ܪܝܫܝܬܐ. ܩܕܡܝܬ݀ ܡ̇ܢ ܡܬܪܢܐ ܚܝܠܘ̈ܬܐ ܡܠܐܟܝ̈ܐ ܘܫܡܝ̈ܢܐ. ܘܗ̣ܝ ܡܚܫܒܬܐ ܥܒܕܐ ܐܝܬܝܗ̇ ܗܘܬ݀ ܕܒܡܠܬܐ ܡܬܡܠܐ ܗ̣ܘܐ ܘܒܪܘܚܐ ܡܫܬܡܠܐ. ܘܗܟܢܐ ܐܬܩܝܡܘ ܢܨܝ̈ܚܐ ܬܪ̈ܝܢܐ܆ ܡܫܡ̈ܫܢܐ ܕܢܨܝ̣ܚܘܬܐ ܩܕܡܝܬܐ.

 

 

 

ܦܣܘܩܐ ܬܪܝܢܐ ܕܩܥܠܐܘܢ ܬܠܝܬܝܐ ܕܫܬܐܣܬܐ ܚܡܝܫܝܬܐ

 

ܡܛܠ ܟܝܢܗܘܢ ܕܡܠܐܟ̈ܐ. ܘܒܗ ܐܝܬ ܢܝ̈ܫܐ ܚܡܫܐ. ܢܝܫܐ ܩܕܡܝܐ ܡܛܠ ܗ̇ܝ ܕܡܢܐ ܗ̱ܘ ܟܝܢܗܘܢ ܕܡܠܐܟ̈ܐ

 

 

 

ܐܡܪܝܢܢ. ܕܡܠܐܟ̈ܐ ܡ̇ܢ ܒܗ̇ܝ ܕܦܫܝ̣̈ܛܐ ܐܢܘܢ ܘܠܘ ܡܪ̈ܟܒܐ. ܠܘ ܒܝܕ ܬܚܘܡܐ ܡܬܝܕܥܝ̣ܢ. ܒܗ̇ܝ ܕܟܠ ܬܚܘܡܐ ܡ̣ܢ ܓܢܣܐ ܘܫܘܚܠܦܐ ܡܪܟܒ. ܠܗ̇ܘ ܕܝܢ ܕܠܐ ܓܢܣܐ ܐܝܬ ܐܦܠܐ ܫܘܚܠܦܐ ܐܝܢܐ ܬܚܘ̣ܡܐ ܢܗܘܐ. ܫܪܝ̣ܟܐ ܡܕܝܢ ܕܒܝܕ ܪܘܫܡܐ ܐܝܢܐ ܕܡ̣ܢ ܢܩ̈ܦܝܐ ܐܦܘܦܛܝ̈ܩܝܐ ܡܪܟܒ ܢܬܝܕܥܘܢ. ܐܝܟ ܗ̇ܝ ܕܢܐܡܪ. ܕܟܝܢܗܘܢ ܕܡܠܐܟ̈ܐ. ܐܕܫܐ ܗ̱ܘ ܩܐܡ ܠܢܦܫܗ ܕܡܒܪܝ ܘܠܐ ܚܒܝܟ ܥܡ ܗܘܠܐ. ܘܡܛܠ ܗܕܐ ܠܐ ܓܫܘܡ ܗ̣ܘ. ܒܗ̇ܝ ܕܟܠ ܓܘܫܡܐ ܡ̣ܢ ܗܘܠܐ ܘܐܕܫܐ ܡܪܟܒ. ܘܡܛܠܗܕܐ ܠܘ ܒܐܬܪܐ ܗ̱ܘ. ܘܡܛܠ ܗܕܐ ܠܘ ܡܬܚܙܝܢܐ ܗ̱ܘ ܐܦܠܐ ܡܬܓܫܫܢܐ. ܡܛܠ ܕܟܠ ܕܡܬܚܙܐ ܘܡܬܓܫܫ ܒܐܬܪܐ ܡܬܚܙܐ ܘܡܬܓܫܫ. ܘܡܛܠ ܗܕܐ ܬܘܒ ܠܐ ܡܬܪܓܫܢܐ ܗ̱ܘ. ܐܠܐ ܡܬܝܕܥܢܐ ܒܠܚܘܕ. ܡ̣ܢ ܢܦܫܐ ܡܠܝ̣ܠܬܐ ܕܐܦ ܗ̣ܝ ܠܐ ܡܬܪܓܫܢܝ̣ܬܐ ܗ̱ܝ. ܐܠܐ ܐܘܣܝܐ ܡܬܝܕܥܢܝ̣ܬܐ. ܐܝܟ ܕܥܬܝ̣ܕܝ̣ܢܢ ܠܡܚܘܝܘ. ܡܬܚܘܐ ܕܝܢ ܬܘܒ ܟܝܢܗܘܢ ܕܡܠܐܟ̈ܐ. ܘܒܝܕ ܬܚܘܝ̣ܬܐ ܘܕܘܡܝܐ ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܝܠܕܐ. ܐܢ ܪ̈ܘܚܐ ܡܬܝܕ̈ܥܢܝܬܐ. ܐܘ ܢܘܪܐ ܡܕܡ ܠܐ ܗܘܠܢܝܬܐ ܘܕܠܐ ܓܫܘܡ. ܐܘ ܟܝܢܐ ܡܕܡ ܐ̱ܚܪܢܐ. ܕܣܓܝ ܝܬܝܪ ܩܪܝ̣ܒ ܠܗܠܝܢ ܕܐܬܐܡܪܘ ܙܕܩ ܠܡܣܒܪܘ ܠܗܠܝܢ. ܘܕܠܘ ܓܘܫ̈ܡܐ ܐܢܘܢ ܡܠܐܟ̈ܐ܆ ܗ̣ܘ ܟܕ ܗ̣ܘ ܓܪܝܓܘܪܝܘܣ ܣܗܕ ܒܡܐܡܪܐ ܕܬܪܝܢ ܕܥܠ ܬܐܠܘܓܝܐ ܟܕ ܐܡ̇ܪ. ܐܢ ܡ̇ܢ ܡܠܐܟܝܐ. ܡ̣ܢ ܐܝܟܐ ܠܡܠܐܟ̈ܐ ܓܘܫ̈ܡܐ. ܘܐܝܠܝܢ ܗܠܝܢ. ܘܩܕܝܫܐ ܩܘܪܝܠܘܣ ܐܡ̇ܪ ܒܡܟܬܒܢܘܬܐ ܕܠܘܩܒܠ ܕܝܘܕܘܪܘܣ ܘܬܐܘܕܘܪܘܣ ܗܟܢܐ. ܡܠܐܟ̈ܐ ܓܝܪ ܐܝܬܝܗܘܢ ܪ̈ܘܚܐ. ܘܡ̣ܢ ܫܡܝܐ. ܠܘ ܓܘܫ̈ܡܐ ܡܛܠ ܗܕܐ. ܘܗܟܢܐ ܟܕ ܠܐ ܓܫܝ̈ܡܐ ܐܢܘܢ ܒܕܡ̈ܘܬܐ ܡܫܚ̈ܠܦܬܐ ܕܓܘܫܡܢܝ̈ܢ ܗܓܓܢܐܝܬ ܠܡܓܝ̣ܪ̈ܬܐ ܐܬܚܙܝ̣ܘ ܘܡܬܚܙܝܢ. ܠܐܠܝ̣ܫܥ ܡ̇ܢ܆ ܒܕܡܘ̣ܬ ܡܪܟܒܬܐ ܘܪ̈ܟܫܐ. ܘܠܒܠܥܡ ܐܝܟ ܓܒܪܐ ܕܫܡܝ̣ܛ ܣܝܦܗ. ܘܠܓܕܥܘܢ ܐܝܟ ܓܒܪܐ ܕܐܚܝ̣ܕ ܚܘܛܪܐ. ܘܠܕܢܝܐܝܠ ܐܝܟ ܓܒܪܐ ܕܠܒܝ̣ܫ ܠܒܘ̈ܫܐ ܕܐܝܩܪܐ. ܘܚܨܘ̈ܗܝ ܚܙܝ̣ܩܝ̣ܢ ܒܕܗܒܐ ܕܐܘܦܝ̣ܪ. ܘܓܘܫܡܗ ܐܝܟ ܬܪܫܝ̣ܫ ܘܐܦܘ̈ܗܝ ܐܝܟ ܚܙܘܐ ܕܒܪܩܐ. ܘܥܝܢܘ̈ܗܝ ܐܝܟ ܠܡܦܐܕ̈ܐ ܕܢܘܗܪܐ. ܘܕܪ̈ܥܘܗܝ ܐܝܟ ܢܚܫܐ ܕܡܒܪܩ. ܘܩܠܐ ܕܦܬܓܡܘ̈ܗܝ ܐܝܟ ܚܝܠܝ̈ܢ ܣܓܝ̈ܐܝܢ ܘܦܪܚ. ܘܠܘܬ ܩܒܪܐ ܡܪܢܝܐ. ܟܕ ܠܒܝܫܝܢ ܠܒܘ̈ܫܐ ܚܘܪ̈ܐ.

 

 

 

ܢܝܫܐ ܬܪܝܢܐ ܡܛܠ ܡܣܝܒܘܬܗܘܢ ܕܡܠܐܟ̈ܐ

 

ܐܡܪܝܢܢ ܕܡܠܐܟ̈ܐ ܡܣܝ̈ܟܐ ܐܢܘܢ ܒܟܝܢܐ. ܒܗ̇ܝ ܕܒܪ̈ܝܐ ܐܢܘܢ ܘܒܗ̇ܝ ܕܠܘܬ ܬܚܘܡܐ ܡܕܡ ܩܝܡܐ ܝ̣ܕܥܬܗܘܢ. ܘܠܘ ܠܟܠܗܝܢ ܕܐܝܬܝܗܝܢ ܐܝܟ ܕܐܝܬܝܗܝܢ ܝ̇ܕܥܝܢ. ܕܐܠܗܐ ܗ̱ܝ ܓܝܪ ܗܕܐ ܒܠܚܘܕܘܗܝ. ܘܝ̣ܕܝ̣ܥܐ ܗܕܐ ܡ̣ܢ ܐܦܘܕܝܟܣܝܣ ܗ̇ܝ ܕܡܫܪܪܐ ܠܐ ܡܬܕܪܟܢܘܬܗ ܕܟܝܢܐ ܐܠܗܝܐ. ܘܐܠܘ ܡܠܐܟ̈ܐ ܟܠ ܡܕܡ ܕܐܝܬܘܗܝ ܝ̇ܕܥܝ̣ܢ. ܐܦ ܠܗ ܠܐܠܗܐ ܐܝܟ ܕܐܝܬܘܗܝ ܝ̇ܕܥܝܢ. ܘܡ̣ܢ ܗܪܟܐ ܡܬܟܢܫܐ ܕܠܘ ܠܐ ܡܬܕܪܟܢܐ ܗ̱ܘ ܐܠܗܐ ܗ̇ܝ ܕܫܟܝ̣ܪܐ. ܘܕܠܐ ܡܬܕܪܟ ܟܝܢܐ ܐܠܗܝܐ ܡ̣ܢ ܡܠܐܟ̈ܐ. ܣ̇ܗܕ ܩܕܝܫܐ ܐܝܘܐܢܢܝܣ ܒܡܐܡܪܐ ܕܥܠ ܠܐ ܡܬܕܪܟܢܘܬܗ ܕܐܠܗܐ ܟܕ ܐܡ̇ܪ. ܠܗ̇ܘ ܕܠܐ ܡܬܕܪܟ ܡ̣ܢ ܟܪ̈ܘܒܐ. ܠܗ̇ܘ ܕܠܐ ܡܬܚܙܐ ܡ̣ܢ ܣܪ̈ܦܐ. ܠܗ̇ܘ ܕܠܐ ܡܬܝ̣ܕܥ. ܠܐ ܡ̣ܢ ܐܪ̈ܟܐܣ ܘܠܐ ܡ̣ܢ ܫܘܠܛܢ̈ܐ. ܘܠܐ ܡ̣ܢ ܚܝ̈ܠܐ. ܘܬܘܒ ܐܡܪܝܢܢ. ܕܐܦܠܐ ܠܗ ܠܐܪܙܐ ܕܡܬܒܪܢܫܢܘܬܗ ܕܡܠܬܐ ܝ̇ܕܥܝܢ ܗ̣ܘܘ. ܐܝܟ ܕܐܡ̣ܪ ܦܘܠܘܣ. ܕܬܬܝ̣ܕܥ ܠܡ ܗܕܐ ܠܐܪ̈ܟܐܣ ܘܠܫܠܝ̣̈ܛܢܐ ܕܫܡܝ̈ܐ. ܒܝ̣ܕܥܬܐ ܕܚܟܡܬܗ ܕܐܠܗܐ ܡܠܝܬ݀ ܦܘܪ̈ܫܢܐ. ܘܡ̣ܢ ܗܠܝܢ ܝ̣ܕܝ̣ܥܐ ܕܣܓܝ̈ܐܬܐ ܐܢܝܢ ܗ̇ܢܝܢ. ܠܐ ܡܣܝ̈ܟܐ ܕܝܢ ܐܝܬܝܗܘܢ. ܒܙܢܐ ܕܣܘܝܟܐ ܐܬܪܢܝܐ. ܡܛܠ ܕܓܘܫܡܐ ܒܠܚܘܕ ܘܠܘ ܠܐ ܓܫܘܡ ܒܐܬܪܐ ܡܣܬܝܟ. ܘܗ̇ܝ ܕܐܡ̣ܪ ܒܪ ܟܐܦܐ ܕܒܕܘܟܬܐ ܪܘܚܢܝܬܐ ܘܕܠܐ ܓܫܘܡ ܡܣܝܟܝ̣ܢ. ܡܠܬܐ ܗ̱ܝ ܠܐ ܡܬܗܘܢܢܝ̣ܬܐ. ܒܗ̇ܝ ܕܕܘܟܬܐ ܠܘ ܡܕܡ ܗ̣ܝ ܐ̱ܚܪܝܢ. ܐܠܐ ܫܛܝ̣ܚܘܬܐ ܓܘܝܬܐ ܕܓܘܫܡܐ ܗ̇ܘ ܕܚܒܫ ܕܢܩܝ̣ܦܐ ܠܫܛܝ̣ܚܘܬܐ ܒܪܝܬܐ ܕܓܘܫܡܐ ܗ̇ܘ ܕܡܬܚܒܫ. ܠܗܘ ܕܝܢ ܕܠܐ ܓܫܘܡ ܗ̣ܘ܆ ܐܝܕܐ ܫܛܝ̣ܚܘܬܐ ܬܗܘܐ ܗ̇ܝ ܕܚܒܫܐ ܐܘ ܕܡܬܚܒܫܐ. ܘܟܠ ܕܗܟܢܐ ܗ̱ܘ ܓܠܝܐ ܕܠܐ ܡܬܟܠܝܢܐ ܗ̱ܘ ܡ̣ܢ ܐܣ̈ܐ ܘܓܘܫ̈ܡܐ ܛܡܝ̣̈ܡܐ. ܐܠܐ ܠܐ ܡܬܥܘܟܢܐܝܬ ܬܫܡܫܬܗ ܓܡܪ ܠܦܘܬ ܪܡܙܐ ܗ̇ܘ ܕܠܗ ܡܫܡܪ. ܘܗ̇ܝ ܕܐܡ̣ܪ ܩܕܝܫܐ ܒܣܝܠܠܝܘܣ ܒܐܓܪܬܐ ܗ̇ܝ ܕܠܘܬ ܐܡܦܝܠܘܟܝܘܣ. ܕܟܠ ܚܕ ܡ̣ܢ ܗܠܝܢ ܚܝ̈ܠܐ ܐ̱ܚܪ̈ܢܐ. ܕܡܣܝܟܐ ܐܝܬܘܗܝ ܡܬܗܝܡܢ. ܡܠܐܟܐ ܓܝܪ ܗ̇ܘ ܕܩ̇ܐܡ ܗ̣ܘܐ ܥܠ ܩܘܪܢܝܠܝܘܣ. ܠܝܬܘܗܝ ܗ̣ܘܐ ܐܟܚܕܐ ܠܘܬ ܦܝܠܠܝܦܘܣ. ܘܠܐ ܗ̇ܘ ܕܡ̣ܢ ܡܕܒܚܐ ܡܡܠܠ ܗ̣ܘܐ ܠܙܟܪܝܐ. ܒܗ ܒܙܢܐ ܐܦ ܒܫܡܝܐ ܩܘܡܐ ܕܝܠܗ ܡܫܡܠܐ ܗ̣ܘܐ. ܠܗ̇ܝ ܕܠܐ ܣܦܩ ܡܠܐܟܐ ܠܡܕܪܟܘ ܘܠܡܬܢܩܦܘ ܐܟܚܕܐ ܠܟܠܗܝܢ ܕܐܝܬܝܗܝܢ ܡܫܘܕܥܐ. ܐܠܐ ܟܕ ܠܨܒܘܬܐ ܡܕܡ ܢܬܢܩܦ ܕܝ̣ܠܢܐܝܬ܆ ܡܦܫ ܦܐܫ ܡ̣ܢ ܢܩܝ̣ܦܘܬܐ ܕܥܡ ܐ̱ܚܪܢܐ. ܕܐܠܗܐ ܗ̱ܝ ܓܝܪ ܗ̇ܝ ܕܐܟܚܕܐ ܥܡ ܟܠܡܕܡ ܢܗܘܐ. ܠܗܢܐ ܪܥܝܢܐ ܡܐܪܙ ܡܠܦܢܐ ܒܡܠܬܗ ܘܠܘ ܠܣܘܝܟܐ ܕܘܟܬܢܝܐ ܕܗ̇ܘ ܕܠܐ ܒܕܘܟ ܡܨܐ ܠܡܗܘܐ.

 

 

 

ܢܝܫܐ ܬܠܝܬܝܐ : ܡܛܠ ܗ̇ܝ ܕܠܐ ܡܝܘ̈ܬܐ ܘܠܐ ܡܬܚܒ̈ܠܢܐ ܐܝܬܝܗܘܢ ܒܟܝܢܐ ܡܠܐܟ̈ܐ

 

ܐܡܪܝܢܢ ܕܡܘܬܐ ܡ̇ܢ ܦܘܪܫܢܐ ܗ̱ܘ ܕܢܦܫܐ ܡ̣ܢ ܦܓܪܐ. ܘܚܒܠܐ ܦܘܪܫܢܐ ܗ̱ܘ ܕܐܕܫܐ ܡܕܡ ܕܝ̣ܠܢܝܐ ܡ̣ܢ ܗܘܠܐ. ܘܚܘܠܦܐ ܕܐܕܫܐ ܐ̱ܚܪܢܐ ܒܕܘܟܬ݀ ܗ̇ܘ ܕܐܬܠܝܬܝ̣ ܘܐܬܚܒܠ. ܘܡܠܐܟܐ ܡ̇ܢ ܟܕ ܠܐ ܦܓܪܐ ܩܢܐ ܐܦܠܐ ܗܘܠܐ. ܠܐ ܡܝܘܬܐ ܗ̱ܘ ܐܦܠܐ ܡܬܚܒܠܢܐ.

 

ܗܦܟܬܐ:

 

ܐܡܪܝܢ ܐܢܗܘ ܕܡܠܐܟ̈ܐ ܬܘܒ ܠܐ ܡܝܘ̈ܬܐ ܘܠܐ ܡܬܚܒ̈ܠܢܐ ܐܢܘܢ ܐܝܟ ܕܐܦ ܐܠܗܐ ܫܘܒܚܐ ܠܛܝܒܘܬܗ. ܐܝܟܢܐ ܬܫܪ ܡܠܬ ܦܘܠܘܣ ܕܐܡ̇ܪ. ܗ̇ܘ ܕܠܗ ܒܠܚܘܕܘܗܝ ܐܝܬ ܠܐ ܡܝܘܬܘܬܐ ܒܟܝܢܐ. ܘܥܡܪ ܒܢܘܗܪܐ ܠܐ ܡܬܩܪܒܢܐ.

 

ܦܘܢܝܐ:

 

ܐܡܪܝܢܢ ܕܟܠ ܡܕܡ ܕܐܝܬܘܗܝ. ܐܘ ܡ̣ܢ ܝܬܗ ܗ̣ܝ ܠܗ ܗ̇ܝ ܕܢܗܘܐ ܐܝܬܘܗܝ. ܐܘ ܠܘ ܡ̣ܢ ܝܬܗ܆ ܐܠܐ ܡ̣ܢ ܥܠܬܗ. ܘܗ̇ܘ ܩܕܡܝܐ ܗܘܝܘ ܟܝܢܐ ܐܠܗܝܐ ܒܠܚܘܕܘܗܝ. ܘܠܐ ܡܫܘܬܦ ܠܗ ܒܗ̇ ܡܕܡ ܐ̱ܚܪܝܢ ܡ̣ܢ ܒܪ̈ܝܬܐ ܡܬܘܡ. ܐܟܡܐ ܕܒܐܦܘܕܝ̣ܟܣܝ̣ܣ ܚܘܝ̣ܢܢ ܕܐܠܨܝ ܐܝܬܘܬܐ ܒܝܬܗ ܚܕ ܙܕܩ ܕܢܗܘܐ ܒܠܚܘܕܘܗܝ. ܘܠܗ ܠܗܢܐ ܢܝܫܐ ܡܐܪܙ ܫܠܝܚܐ ܒܡܠܬܗ ܗ̇ܝ ܕܠܗ ܒܠܚܘܕܘܗܝ ܐܝܬ ܠܐ ܡܝܘܬܘܬܐ. ܟܐܡܬ݀ ܩܕܡܝܬ݀ ܘܡܪܢܐܝܬ ܘܝܬܝ̣ܪ ܒܝܬܐܝܬ. ܗܠܝܢ ܕܝܢ ܐ̱ܚܪ̈ܢܐ. ܐܦܢ ܠܐ ܡܝܘ̈ܬܐ ܐܢܘܢ. ܐܠܐ ܠܘ ܩܕܡܝܬ݀ ܘܡܪܢܐܝܬ ܘܝܬܝܪ ܒܝܬܐܝܬ ܕܐܟܘܬܗ ܕܗ̇ܘ ܚܕ ܒܠܚܘܕܘܗܝ.

 

 

 

ܢܝܫܐ ܪܒܝܥܝܐ ܡܛܠܗ̇ܝ ܕܫܠܝ̣̈ܛܝ ܒܝܬܗܘܢ ܐܝܬܝܗܘܢ ܡܠܐܟ̈ܐ ܘܚܐܪܘܬܐ ܩܢܝܢ. ܘܢܡܘܣܐܝܬ ܡܬܕܒܪܝܢ. ܘܡܬܡܨܝܢܝ̣ܬܐ ܩܢܝܢ ܠܗܝ ܕܢܙܕܕܩܘܢ ܘܠܗ̇ܝ ܕܢܚܛܘܢ ܘܠܘ ܟܝܢܝܬܐ

 

ܕܫܠܝ̣̈ܛܝ ܒܝܬܗܘܢ ܐܝܬܝܗܘܢ ܡܠܐܟ̈ܐ. ܝܕܝܥܐ ܡ̣ܢ ܡܚܘܝܢ̈ܘܬܐ ܚܘܫܒܝ̈ܬܐ. ܘܣܗܕ̈ܘܬܐ ܟܬܒܝ̈ܬܐ.

 

ܡܚܘܝܢܘܬܐ ܩܕܡܝܬܐ:

 

ܐܡܪܝܢܢ ܕܡܥܒܕܢ̈ܘܬܐ ܟܝܢܝ̈ܬܐ ܠܗ̇ܢܘܢ ܕܠܐ ܡܢܦܫܝ̣ܢ ܝܬܝ̣ܪ ܒܝܬܐܝܬ ܢܩܝ̣̈ܦܢ. ܐܟܡܐ ܕܠܡܓܢܛܝܣ ܢܬܘܦܘܬ ܦܪܙܠܐ. ܐܝ̣ܛܐ ܠܡܢܦ̈ܫܐ ܕܠܐ ܚܝ̣ܝ̣ܢ. ܐܝܟ ܬܪܣܝ̣ܬܐ ܘܬܪܒܝ̣ܬܐ ܘܡܘܠܕܐ ܠܢܨ̈ܒܬܐ. ܐܝܛܐ ܠܚܝ̈ܐ ܘܡܥܒܕܢ̈ܘܬܐ ܟܝܢܝ̈ܬܐ. ܘܗ̇ܢܝܢ ܨܒܝܢܝ̈ܬܐ ܒܥܠܬ݀ ܪܓܬܗܝܢ. ܐܝܢ ܟܝܢܝܘܬܗܘܢ ܝܬܝܪ ܥܠܒܐ ܠܚܐܪܘܬܗܘܢ ܒܥܠܬ݀ ܬܐܛܪܢܝܘܬ ܗܘܠܢܝܘܬܗܘܢ ܘܠܐ ܡܫܡܠܝܘܬ ܡܕܪܟܢܘܬܗܘܢ. ܐܝܛܐ ܠܚܝ̈ܐ ܡܠܝ̣̈ܠܐ ܐܘܟܝ̣ܬ ܠܒܢܝ̈ܢܫܐ ܗܟܘܬ ܬܪ̈ܬܝܗܝܢ ܫܟܝ̣̈ܚܢ. ܒܪܡ ܕܝܢ ܚܐܪܘܬܗܘܢ ܝܬܝ̣ܪ ܙܟܝܐ ܠܟܝܢܝܘܬܗܘܢ. ܒܗ̇ܝ ܕܡܙܝ̣ܥܢܝ̣ܬܗܘܢ ܘܡܕܪܟܢܝ̣ܬܗܘܢ ܙܠܓܐ ܗ̱ܝ ܡ̣ܢ ܙܠܝܩܐ ܓܘܢܝܐ. ܘܫܪܓܐ ܡ̣ܢ ܕܠܩܐ ܟܠܢܝܐ. ܘܝܕܝܥܐ ܗܕܐ ܡ̣ܢ ܗ̇ܝ ܕܣܓܝ̈ܐܐ ܡ̣ܢ ܨܒܝ̈ܢܐ ܠܣܓܝ̈ܐܐ ܡ̣ܢ ܨܒܝܢܝ̈ܐ ܠܣܓܝ̈ܐܐ ܡ̣ܢ ܚܐܦ̈ܐ ܬܟܣܝ̣ܢ. ܒܗ̇ܢܘܢ ܐܡ̇ܪ ܐ̱ܢܐ ܕܟܦܢܝ̣ܢ ܘܠܐ ܡܬܬܪܣܝܢ. ܘܡܬܥܪܛܠܝ̣ܢ ܘܠܐ ܡܬܟܣܝܢ. ܘܨܗܝܢ ܘܠܐ ܡܬܩܝ̣ܢ܆ ܘܠܚܫ̈ܐ ܡܫܢܩܝ̣ܢ. ܟܕ ܡܫܬܢܓܝ̣ܢ ܘܡܬܢܘܓܝ̣ܢ. ܘܡܬܝܐܝ̣ܒܝ̣ܢ ܘܠܐ ܡܣܬܝܒܝ̣ܢ. ܐܠܐ ܠܘ ܒܟܠ. ܒܥܠܬ݀ ܐܣܛܟܣܢܝܘܬ ܠܘܚܡܐ ܘܗܠܢܝܘܬ ܩܘܝܡܐ. ܡܠܐܟ̈ܐ ܕܝܢ ܒܗ̇ܝ ܕܚܝ̈ܐ ܡܠܝ̈ܠܐ ܡܒܪ̈ܝܝ ܒܟܠ ܐܢܘܢ. ܘܠܐ ܓܫ̈ܦܝ ܒܡܕܡ ܡ̣ܢ ܗ̇ܢܘܢ ܕܠܒܝܬ ܬܚܬܝ̣ܢ ܡܫܬܪܓܠܝܢ. ܟܠܗܝܢ ܡܥܒܕܢ̈ܘܬܗܘܢ ܘܟܠܗܘܢ ܙܘܥܝ̈ܗܘܢ ܨܒܝܢܝ̈ܐ ܘܚܐܪ̈ܝܐ ܘܠܘ ܟܝܢܝ̈ܐ ܙܕܩ ܕܢܗܘܘܢ. ܘܗ̇ܢܘ ܐ̱ܪܙܐ ܕܗ̇ܝ ܕܡܬܐܡܪܐ. ܕܚܐܪܘܬܐ ܒܪܬ݀ ܙܘܓܐ ܗ̱ܝ ܕܡܠܝ̣ܠܘܬܐ. ܘܠܚܕ̈ܕܐ ܥܦܝ̈ܩܢ ܘܡܥܪ̈ܙܠܢ ܒܫܘܝܘܬ ܢܬܥܐ. ܐܝܟܢܐ ܕܟܠ ܡܠܝ̣ܠܐ ܫܠܝ̣ܛ ܒܝܬܐ ܢܗܐ. ܘܟܠ ܫܠܝܛ ܒܝܬܐ܆ ܡܠܝ̣ܠܐ.

 

ܡܚܘܝܢܘܬܐ ܕܬܪܬܝܢ:

 

ܣܛܢܐ ܡ̇ܢ ܚܕ ܡ̣ܢ ܡܠܐܟ̈ܐ ܐܝܬܘܗܝ ܗ̣ܘܐ. ܘܐܠܘܠܐ ܫܠܝ̣ܛ ܒܝܬܗ ܗ̣ܘܐ. ܠܘ ܡܣܡ ܒܪܝܫܐ ܕܡܦܘܠܬܐ ܕܡ̣ܢ ܕܪܓܗ ܘܐܝܩܪܗ ܚ̣ܫ ܗ̣ܘܐ. ܡܣܡ ܒܪܝܫܐ ܓܝܪ ܠܣܟܠܘ̈ܬܐ ܨܒܝܢܝ̈ܬܐ ܢܩܦ. ܘܠܘ ܠܗ̇ܢܝܢ ܟܝܢܝ̈ܬܐ. ܘܐܠܐ ܡܢܘ ܕܥܕܠ ܠܢܘܪܐ ܟܕ ܡܣܓܦܐ. ܐܘ ܠܪܓܠܬܐ ܡܠܐܷܝܝܬܐ ܟܕ ܓܪܦܐ. ܘܗܠܝܢ ܡ̇ܢ ܡܚܘܝܢ̈ܘܬܐ ܚܘܫܒܝ̈ܬܐ. ܣܗܕ̈ܘܬܐ ܕܝܢ ܟܬܒܝ̈ܬܐ ܗ̇ܢܝܢ.

 

ܣܗܕܘܬܐ ܩܕܡܝܬܐ:

 

ܩܕܝܫܐ ܕܝܢܢܘܣܝܘܣ ܒܩܦܠܐܘܢ ܕܫܬܐ ܕܡܐܡܪܐ ܕܬܪܝܢ ܗܟܢܐ. ܐܠܘ ܓܝܪ ܐܬܬܚܕ ܐ̱ܢܫ ܡܢܗܘܢ ܡ̣ܢ ܒܝ̣ܫܘܬܐ. ܡ̣ܢ ܡܠܚܡܘܬܐ ܡ̇ܢ ܫܡܝܢܝ̣ܬܐ ܘܠܐ ܚܒܝ̣ܟܬܐ ܕܗܘ̈ܢܐ ܕܐܘܣܝ̈ܐܣ ܐܠܗܝ̈ܬܐ ܢܦܠ ܗ̣ܘܐ܆ ܠܘܬ ܡܦܘܠܬܐ ܕܝܢ ܚܫܘܟܬܐ ܕܣܝ̈ܥܬܐ ܡܪ̈ܘܕܘܬܐ ܡܫܬܪܓܠ ܗ̣ܘܐ.

 

ܣܗܕܘܬܐ ܕܬܪܬܝܢ:

 

ܩܕܝܫܐ ܒܣܝܠܠܝܘܣ ܒܐܓܪܬܐ ܕܠܘܬ ܐܡܦܝܠܘܟܝܘܣ ܗܟܢܐ. ܫܠܝ̣̈ܛܝ ܒܝܬܗܘܢ ܐܝܬܝܗܘܢ ܚܝܠܘ̈ܬܐ ܫܡܝ̈ܢܐ. ܘܫܘܝܘܬ ܢܬܥܐ ܐܝܬ ܠܗܘܢ ܠܘܬ ܡܝܬܪܘܬܐ ܘܒܝܫܬܐ. ܡܛܠ ܗܢܐ ܣܢܝ̣ܩܝ̣ܢ ܥܠ ܥܘܕܪܢܐ ܕܪܘܚܐ.

 

ܣܗܕܘܬܐ ܕܬܠܬ:

 

ܩܕܝܫܐ ܓܪܝܓܘܪܝܘܣ ܒܡܐܡܪܐ ܕܝܠܕܐ. ܦܝܣܐ ܕܝܢ ܥܒܕ ܠܝ. ܕܠܘ ܠܐ ܡܬܬܙܝ̣̈ܥܢܐ. ܐܠܐ ܥܣܩܝ̈ ܠܡܬܬܙܥܘ. ܘܐܣܒܪ ܠܗܠܝܢ ܕܐܡ̇ܪ.

 

ܗܦܟܬܐ:

 

ܐܡܪܝܢ ܐܢܗܘ ܕܡܠܐܟ̈ܐ ܫܠ̣ܝ̈ܛܝ ܒܝܬܗܘܢ. ܡܕܝܢ ܠܘ ܒܟܝܢܐ ܛܒ̈ܐ ܘܩܕܝ̈ܫܐ ܐܢܘܢ. ܒܗ̇ܝ ܕܫܠܝ̣ܛ ܒܝܬܗ ܗ̇ܘ ܗ̣ܘ. ܕܐܟܡܐ ܕܡܨܐ ܠܡܗܘܐ ܛܒܐ܆ ܡܨܐ ܕܠܐ ܢܗܘܐ. ܘܐܟܡܐ ܕܡܨܐ ܕܢܗܘܐ ܩܕܝܫܐ. ܡܨܐ ܬܘܒ ܕܠܐ ܢܗܘܐ.

 

ܦܘܢܝܐ:

 

ܐܡܪܝܢܢ ܕܚܕ ܒܠܚܘܕܘܗܝ ܐܝܬܘܗܝ ܛܒܐ ܘܩܕܝܫܐ ܒܟܝܢܐ ܐܠܗܐ ܫܘܒܚܐ ܠܛܝܒܘܬܗ. ܡܠܐܟ̈ܐ ܕܝܢ ܠܦܘܬ ܡܕܪܟܢܘܬܗܘܢ ܕܠܛܒܐ܆ ܡܬܝܐܝ̣ܒܝ̣ܢ ܠܗ. ܘܠܦܘܬ ܝܐܝ̣ܒܘܬܗܘܢ ܢܛܚܝܢ ܘܫܟ̇ܢܝܢ ܥܠܝܗܘܢ ܫܘ̈ܟܢܐ ܕܛܒܘܬܐ ܡ̣ܢ ܢܒܥܐ ܗ̇ܘ ܕܠܐ ܓ̇ܐܙ. ܘܐܟܡܐ ܕܠܐ ܫܘܝܢ ܒܡܕܪܟܢܘܬܗܘܢ. ܒܕܓܘܢ ܗ̇ܢܘܢ ܕܝܬܝܪ ܩܪܝ̣ܒܝܢ܆ ܝܬܝܪ ܡܕܪܟܝܢ. ܘܡܛܠ ܗܕܐ ܝܬܝܪ ܡܬܝܐܝ̣ܒܝܢ. ܘܡܛܠ ܗܕܐ ܝܬܝܪ ܡܬܛܒܬܢܝܢ ܒܡܬܢܗܪܢܘܬܐ. ܘܠܗ̇ ܠܗܕܐ ܡܫܪܪ ܩܕܝܫܐ ܒܣܝܠܝܘܣ ܒܡܐܡܪܐ ܕܬܠܬܐ ܕܠܘܩܒܠ ܐܘܢܘܡܝܘܣ ܟܕ ܐܡ̇ܪ. ܫܘܠܛܢ̈ܐ ܠܡ ܘܪ̈ܝܫܢܘܬܐ. ܘܫܪܟܐ ܡ̣ܢ ܚܦܝ̣ܛܘܬܐ ܘܚܘܪܐ ܕܐܠܗܐ ܐܝܬ ܠܗܘܢ ܩܕܝܫܘܬܐ. ܘܠܘ ܒܟܝܢܐ ܡܬܐܡܪܝܢ ܩܕܝ̈ܫܐ. ܟܕ ܕܝܢ ܡܬܝܐܝ̣ܒܝܢ ܠܛܒ̈ܬܐ ܐܝܟ ܠܚܡܘܬܐ ܕܚܘܒܐ ܕܠܘܬ ܐܠܗܐ܆ ܒܡܫܘ̣ܚܬܐ ܢܣ̇ܒܝܢ ܩܕܝܫܘܬܐ. ܘܬܘܒ ܗ̣ܘ ܟܕ ܗ̣ܘ ܐܡ̇ܪ ܒܡܐܡܪܐ ܕܥܠ ܬܠܝܬܝܘܬܐ ܗܟܢܐ. ܗ̇ܢܘܢ ܕܝܢ ܥܠܝ̈ܐ܆ ܠܦܘܬ ܡܫܘ̣ܚܬܐ ܕܛܟܣܐ ܕܟܠܚܕ ܚܕ ܡܢܗܘܢ. ܢܣܒܝ̣ܢ ܡ̣ܢ ܪܘܚܐ ܩܕܝܫܐ ܩܕܝܫܘܬܐ ܠܩܢܘܡܗܘܢ. ܘܡ̣ܢ ܗܠܝܢ ܐܬܚܘܝ̣ ܗܠܝܢ ܕܠܘ ܒܟܝܢܐ ܩܢܝܢ ܛܒܘܬܐ ܐܠܐ ܒܚܐܪܘܬܐ ܐܝ̇ܕܐ ܕܡܬܦ ܢܬܦܐ ܠܗܘܢ ܛܝܒܘܬܐ. ܘܐܦܢ ܗܟܢܐ. ܐܠܐ ܠܐ ܡܨܛܠܝ̈ܢܐ ܐܢܘܢ ܠܘܬ ܒܝܫܬܐ. ܘܗܕܐ ܒܝܕ ܬܪܬܝܢ. ܡܛܠ ܝܬܝ̣ܪܘܬ ܡܕܪܟܢܘܬܗܘܢ ܕܠܛܒܐ. ܘܡܛܠ ܗ̇ܝ ܕܒܢܣܝܢܐ ܕܒܟܢܬܗܘܢ ܗ̇ܘ ܕܡܛܠ ܢܨܝ̣ܚܘܬܗ ܟܘܟܒ ܢܘܓܗܐ. ܕܚܫܘܟܐ ܡܛܠ ܪܡܘܬܗ ܘܗܘܐ ܘܡܬܐܡܪ. ܘܠܗ̇ ܠܗܕܐ ܡܫܪܪ ܩܕܝܫܐ ܬܐܘܠܘܓܘܣ ܟܕ ܐܡ̇ܪ. ܠܐ ܡܬܬܙܝ̣̈ܥܢܐ ܠܘܬ ܒܝܫܬܐ. ܘܕܒܠܚܘܕ ܡܬܬܙܝ̣ܥܢܘܬܐ ܕܛܒܬܐ ܐܝܬ ܠܗܘܢ. ܒܗ̇ܝ ܕܠܘܬ ܐܠܗܐ ܐܝܬܝܗܘܢ. ܘܪ̈ܝܫܝܬܐ ܡ̣ܢ ܐܠܗܐ ܡܬܢܗܪܝܢ. ܗܠܝܢ ܓܝܪ ܕܗܪܟܐ܆ ܕܡܬܢܗܪܢܘܬܐ ܬܪܝܢܝܬܐ. ܘܟܕ ܫܠܝ̣̈ܛܝ ܒܝܬܐ ܐܝܬܝܗܘܢ ܐܝܬ ܠܗܘܢ ܗ̇ܘ ܕܠܗ ܐܚܝ̣ܕܝ̣ܢ ܘܒܗ ܡܬܕܒܪܝܢ. ܒܕܢܡܘܣܐ ܟܘܪܐ ܗ̱ܘ ܕܒܘܚܪܢ ܚܐܪܘܬܐ. ܕܠܗ ܠܗܢܐ ܢܡܘܣܐ ܟܕ ܢܛܪܝ̣ܢ. ܦܘܪ̈ܥܢܐ ܕܒܝܬܝܘܬܐ ܕܠܘܬ ܐܠܗܐ܆ ܒܐܥ̈ܦܐ ܒܥܘܒܝ̈ܗܘܢ ܡܩܒܠܝ̣ܢ. ܐܢܕܝܢ ܢܗܡܘܢ ܟܕ ܥܨܝܢ ܐܘ ܡܬܬܪܡܛܝ̣ܢ. ܘܗ̇ܘ ܡܐ ܕܠܐ ܦܣܝ̣ܣ ܠܗܘܢ ܣܥܪܝܢ ܐܟܣܘܪ̈ܝ̣ܣܬܝ̣ܢܐ ܡ̣ܢ ܫܒܒܘܬ ܐܠܗܘܬܐ ܗܘܝܢ ܢܘܗܪܐ ܘܟܕ ܗ̇ܢܘ ܪܥܝܢܐ ܬܪܝ̣ܨ ܫܘܒܚܐ ܕܥܕܬܐ ܩܕܝܫܬܐ. ܐܘܪܝܓܢܝܣ ܗ̇ܘ ܬܡܝܗܐ. ܠܘ ܗܟܢܐ ܡܬܪܥܐ. ܐܠܐ ܕܒܟܠܙܒܢ ܡܦܘܠܬܐ ܘܡܬܦܢܝܢܘܬܐ. ܘܡܦܘܠܬܐ ܕܡܢܕܪܝܫ ܗܘܝܐ ܠܗܘ̈ܢܐ ܫܡܝ̈ܢܐ ܐܡ̇ܪ ܒܡܐܡܪܐ ܩܕܡܝܐ ܕܥܠ ܪ̈ܝܫܢܘܬܐ. ܕܐܡܬܝ ܕܡ̣ܢ ܒܬܪ ܫܘܠܡܐ ܗ̇ܘ ܕܙܕܩ ܠܟܠܗܘܢ. ܒܟܠ ܚܕ ܡ̣ܢ ܥܠܡ̈ܐ ܢܗܘܘܢ ܠܗܘܢ ܕܘ̈ܒܐ ܬܘܒ ܘܡܦܘܠܝ̈ܬܐ.

 

 

 

ܢܝܫܐ ܚܡܝܫܝܐ ܡܛܠܗ̇ܝ ܕܫܘ̈ܝܝ ܒܟܝܢܐ ܐܝܬܝܗܘܢ ܡܠܐܟ̈ܐ ܐܘ ܦܪ̈ܝܫܝ ܒܟܝܢܐ

 

ܐܡܪܝܢܢ ܕܡܠܦܢ̈ܐ ܗ̇ܢܘܢ ܕܦܪ̈ܝ̣ܫܝ ܒܟܝܢܐ ܡܘܕܝܢ ܠܡܠܐܟ̈ܐ ܣܓܝܐܝܢ ܒܡܢܝܢܐ ܡ̣ܢ ܗ̇ܢܘܢ ܫܘ̈ܝܝ ܒܟܝܢܐ ܝ̇ܕܥܝܢ ܠܗܘܢ. ܗܐ ܓܝܪ ܩܕܝܫܐ ܕܝܢܘܣܝܘܣ ܐܪܝܘܦܐܓܝܛܘܣ. ܐܘܣܝ̈ܐܣ ܩܪܐ ܠܗܘܢ. ܘܡܬܘܕܝܘܣ ܐܡ̇ܪ ܒܡܐܡܪܐ ܕܥܠ ܩܝܡܬܐ. ܕܐ̱ܚܪܢܐ ܗ̱ܘ ܓܝܪ ܓܢܣܐ ܕܡܠܐܟ̈ܐ ܘܐ̱ܚܪܢܐ ܕܫܘܠܛܢ̈ܐ. ܘܩܘܪܝܠܠܘܣ ܐܡ̇ܪ ܒܡܐܡܪܐ ܕܟܕ̄ ܕܬܫܡܫܬܐ ܕܪܘܚܐ. ܕܟܘܟܒܐ ܡ̣ܢ ܟܘܟܒܐ ܡܝܬܪ ܒܫܘܒܚܐ. ܐܡ̇ܪ ܐ̱ܢܐ ܕܝܢ܆ ܕܐܦ ܠܘܬܗܘܢ ܕܡܠܐܟ̈ܐ ܩܕܝ̈ܫܐ ܫܘܚܠܦܐ ܣܓܝܐܐ ܗ̇ܘ ܕܫܒܝ̣ܚܘܬܐ ܫܟܝ̣ܚ. ܐܠܐ ܕܝܢ ܟܠܗܘܢ܆ ܠܘܬ ܡܫܘ̣ܚܬܐ ܗ̇ܝ ܕܐܝܬܝܗܘܢ ܒܗ̇܆ ܪܡܝܢ ܗ̣ܘܘ ܒܕܪ̈ܓܝܗܘܢ. ܘܡܪܝ ܐܦܪܝܡ ܒܡܕܪ̈ܫܐ ܕܥܠ ܗܝܡܢܘܬܐ. ܘܟܝܢܝ̈ܗܘܢ ܕܥܝܪ̈ܐ ܢܘܪܐ ܘܪܘܚܐ ܐܡ̇ܪ ܒܡܐܡܪܐ ܗ̇ܘ ܕܬܠܬܐ ܕܠܘܩܒܠ ܐܘܢܘܡܝܘܣ. ܕܚܕ ܟܝܢܐ ܐܢܘܢ. ܘܕܪܒ ܐܝܩܪܐ ܕܚܕ ܡܢܗܘܢ ܡ̣ܢ ܚܕ܇ ܠܦܘܬ ܙܢܐ ܕܬܫܡܫܬܗ. ܘܗܝ ܕܡܬܚܙܝܐ ܠܝ ܗܕܐ ܗ̱ܝ. ܕܟܠܗܘܢ ܡܠܐܟ̈ܐ ܫܘܝܢ ܐܢܘܢ ܐܟܚܕܐ ܒܟܝܢܐ ܓܢܣܢܝܐ. ܗ̇ܢܘ ܕܝܢ ܒܗ̇ܝ ܕܡܬܝܕ̈ܥܢܐ. ܘܠܘ ܡܬܪ̈ܓܫܢܐ ܐܢܘܢ. ܘܒܗ̇ܝ ܕܠܐ ܡܝܘ̈ܬܐ ܐܢܘܢ. ܘܒܗ̇ܝ ܕܪ̈ܘܚܐ ܐܢܘܢ ܕܬܫܡܫܬܐ. ܘܒܗ̇ܝ ܕܠܘ ܠܟܠ ܡܠܝܢ ܐܝܟ ܐܠܗܐ. ܬܓ̈ܡܐ ܕܝܢ ܬܫܥܐ. ܒܟܝܢܐ ܕܦܪܝ̣ܫܝ̣ܢ ܡ̣ܢ ܚܕ̈ܕܐ. ܘܡܛܠ ܗܕܐ ܟܠܗܘܢ ܫܘ̈ܝܝ ܒܟܝܢܐ ܒܚܕ ܬܓܡܐ ܐܬܟܢܫܘ܆ ܟܕ ܒܩܢܘ̈ܡܐ ܡ̇ܢ ܦܪܝ̣ܫܝ̣ܢ܆ ܒܐܕ̈ܫܐ ܫܘܝܢ. ܒܕܓܘܢ ܬܓ̈ܡܐ ܡ̇ܢ ܫܘ̈ܝܝ ܒܓܢܣܐ ܐܢܘܢ ܘܦܪ̈ܝ̣ܫܝ ܒܟܝܢܐ. ܗ̇ܢܘܢ ܕܝܢ ܕܒܟܠܚܕ ܡ̣ܢ ܬܓ̈ܡܐ ܫܘ̈ܝܝ ܒܟܝܢܐ ܐܢܘܢ܆ ܘܦܪ̈ܝ̣ܫܝ ܒܩܢܘܡܐ. ܦܝܠܠܘ̈ܣܘܦܐ ܕܝܢ ܒܪ̈ܝܐ: ܠܟܠܚܕ ܡ̣ܢ ܗܘ̈ܢܐ ܐܘܟܝ̣ܬ ܡܠܐܟ̈ܐ. ܦܪ̈ܝ̣ܫܝ ܒܟܝܢܐ ܐܡܪܝܢ. ܒܗ̇ܝ ܕܐܡܪܝܢ ܕܦܘܪܫܢܐ ܩܢܘܡܝܐ ܐܠܐ ܒܝܕ ܗܘܠܐ ܠܐ ܡܨܐ ܠܡܗܘܐ. ܒܕܓܘܢ ܗ̇ܘ ܕܠܐ ܗܘܠܢܝܐ ܗ̱ܘ܆ ܒܩܢܘܡܗ ܠܚܘܕܝܐ. ܕܝ̣ܠܢܐܝܬ ܡܬܚܫܒܐ ܐܕܫܢܝܘܬܗ. ܘܗܪܟܐ ܡܠܬܐ ܐܝܬ ܕܛܒ ܫܛܝ̣ܚܐ ܘܦܬܝܐ. ܘܠܐ ܣܢܝ̣ܩܝ̣ܢܢ ܥܠܝܗ̇ ܒܦܪܓܡܛܝܐ ܗܕܐ.

 

 

 

 

 

 

 

 

     #1 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܚܡܝܫܝܬܐ

 

ܡܛܠ ܦܚܡܗܘܢ ܕܡܠܐܟ̈ܐ ܠܘܬ ܒܢܝ̈ܢܫܐ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠܗ̇ܝ ܕܡܠܐܟ̈ܐ ܡܝܬܪܝܢ ܡ̣ܢ ܓܡܝ̣ܪ̈ܐ ܕܒܢܝ̈ܢܫܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ.

 

ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܡܠܐܟ̈ܐ ܢܘܪ̈ܢܝܐ ܐܢܘܢ ܘܢܘܗܪ̈ܢܝܐ ܘܥܠܝ̈ܐ. ܘܒܢܝ̈ܢܫܐ ܘܐܦܢ ܢܗܘܘܢ ܕܓܡܝ̣ܪܝܢ. ܐܪ̈ܥܢܝܐ ܘܚܫܘ̈ܟܝܐ ܘܬܚܬܝ̈ܐ ܐܢܘܢ. ܘܕܗܠܝܢ ܩܕ̈ܡܝܐ ܡܝܬܪܝܢ܆ ܓܠܝܐ.

 

ܡܚܘܝܢܘܬܐ ܬܪܝܢܝܬܐ:

 

ܐܡܪܝܢܢ ܕܡܠܐܟ̈ܐ ܡܗܕ̈ܝܢܐ ܐܢܘܢ ܕܢܒܝ̈ܐ ܘܫܠܝ̈ܚܐ ܘܟܠܗܘܢ ܓܡܝ̣ܪ̈ܐ. ܘܕܡܗܕܝܢܐ ܡܝܬܪ ܡ̣ܢ ܡܗܕܝܢܐ ܓܠܝܐ.

 

ܡܚܘܝܢܘܬܐ ܬܠܝܬܝܬܐ:

 

ܐܡܪܝܢܢ ܕܡܠܐܟ̈ܐ ܡܨܥܝ̈ܐ ܐܢܘܢ ܒܝܬ ܐܠܗܐ ܠܒܢܝ̈ܢܫܐ. ܒܕܓܘܢ ܐܟܡܐ ܕܐܠܗܐ ܡܢܗܘܢ܆ ܗ̣ܢܘܢ ܡ̣ܢ ܒܢܝ̈ܢܫܐ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ ܕܡܠܐܟ̈ܐ ܡܒܪܝܢ ܡ̣ܢ ܚܡܬܐ ܘܪܓܬܐ ܘܗܓܓܐ. ܕܐܝܬܝܗܘܢ ܚܝ̈ܠܐ ܡܚܦܝ̈ܐ ܕܙܠܓ̈ܐ ܐܠܗܝ̈ܐ ܡ̣ܢ ܥܝܢܝ̈ܢ ܡܬܝܕ̈ܥܢܝܬܐ. ܓܡܝܪ̈ܐ ܕܝܢ ܘܐܦܢ ܡܬܕܟܝܘ ܡܬܕܟܝܢ ܡܢܗܘܢ. ܐܠܐ ܠܘ ܟܠܢܐܝܬ ܡܨܝܢ ܠܡܬܚܪܪܘ ܡ̣ܢ ܢܝ̣ܪܗܘܢ. ܟܡܐ ܕܥܡ ܦܓܪܐ ܥܢܝܢ. ܘܡܛܠ ܗܕܐ ܡܠܐܟ̈ܐ ܡܝܬܪ̈ܐ ܙܕܩ ܕܢܗܘܘܢ ܛܒ ܡܢܗܘܢ.

 

ܡܚܘܝܢܘܬܐ ܕܚܡܫ:

 

ܐܡܪܝܢܢ ܕܦܓܪܐ ܒܝܕ ܢܩܝ̣ܦܘܬܐ ܕܢܦ̈ܫܬܐ ܡܠܝ̣̈ܠܬܐ ܡܫܬܡܠܝܢ. ܘܢܦ̈ܫܬܐ ܒܢܩܝܦܘܬܐ ܕܡܠܐܟ̈ܐ ܘܒܝܬܝܘܬܗܘܢ ܡܬܓܡܪ̈ܢ. ܘܗ̇ܘ ܕܒܗ ܡܬܓܡܪ ܡܕܡ. ܐܠܨܐ ܕܛܒ ܡܝܬܪ ܡ̣ܢ ܗ̇ܘ ܡܕܡ ܕܢܗܘܐ.

 

ܡܚܘܝܢܘܬܐ ܕܫܬ:

 

ܐܡܪܝܢܢ ܕܡܠܐܟ̈ܐ ܐܝܙ̈ܓܕܐ ܐܢܘܢ ܡ̣ܢ ܐܠܗܐ ܠܘܬ ܢܒܝ̈ܐ. ܘܢܒܝ̈ܐ ܐܝܙܓܕ̈ܐ ܐܢܘܢ ܠܘܬ ܩܘܛܢܐ܆ ܡܠܐܟܐ ܡ̣ܢ ܢܒܝܐ ܡܝܬܪ.

 

ܡܚܘܝܢܘܬܐ ܕܫܒܥ:

 

ܐܡܪܝܢܢ ܕܡܠܐܟ̈ܐ ܥܣ̈ܩܝ ܠܡܬܬܙܥܘ ܐܝܬܝܗܘܢ ܠܘܬ ܒܝܫܬܐ. ܐܝܟ ܕܐܡ̣ܪ ܬܐܘܠܘܓܘܣ. ܒܢܝ̈ܢܫܐ ܕܝܢ ܕܠܝ̣̈ܠܝ ܠܘܬ ܫܘܪ̈ܥܬܐ. ܘܕܗ̇ܘ ܩܕܡܝܐ ܡܝܬܪ ܓܠܝܐ.

 

ܡܚܘܝܢܘܬܐ ܕܬܡܢܐ:

 

ܐܡܪܝܢܢ ܕܐ̱ܢܫܘܬܗ ܕܡܪܢ ܒܨܝ̣ܪܐ ܡ̣ܢ ܡܠܐܟ̈ܐ. ܐܝܟ ܕܐܡ̣ܪ ܕܘܝܕ ܘܦܫܩܗ̇ ܠܡܠܬܗ ܕܦܘܠܘܣ. ܘܟܕ ܐ̱ܢܫܘܬ ܡܪܢ ܗܟܢܐ. ܡܢܐ ܗ̇ܢܘܢ ܐ̱ܚܪ̈ܢܐ.

 

ܡܚܘܝܢܘܬܐ ܕܬܫܥ:

 

ܐܡܪܝܢܢ ܕܡܠܐܟ̈ܐ ܠܐ ܡܝܘ̈ܬܐ ܐܢܘܢ ܘܠܐ ܡܬܚܒ̈ܠܢܐ. ܘܒܢܝ̈ܢܫܐ ܡܝܘ̈ܬܐ ܐܢܘܢ ܘܡܬܚܒ̈ܠܢܐ. ܘܐܟܡܐ ܕܡܝܬܪ ܠܐ ܡܬܚܒܠܢܐ ܡ̣ܢ ܡܬܚܒܠܢܐ. ܗܟܢܐ ܡܝܬܪ ܡܠܐܟܐ ܡ̣ܢ ܒܪܢܫܐ.

 

ܡܚܘܝܢܘܬܐ ܕܥܣܪ:

 

ܐܡܪܝܢܢ ܕܡܠܐܟ̈ܐ ܫܡܝ̈ܢܐ ܘܕܒܫܡܝܐ ܘܕܡ̣ܢ ܫܡܝܐ ܡܬܐܡܪܝܢ ܒܟܬܒ̈ܐ ܩܕܝ̈ܫܐ. ܒܕܓܘܢ ܕܡܝܐ. ܕܡܘܙ̈ܠܬܐ ܐܝܟ ܦܓܪ̈ܐ ܢܗܘ̈ܝܢ ܠܗܘܢ. ܘܟܘܟ̈ܒܐ ܐܝܟ ܠܒܘ̈ܬܐ. ܘܗ̣ܢܘܢ ܡܠܐܟ̈ܐ ܐܝܟ ܢܦ̈ܫܬܐ ܡܠܝ̣̈ܠܬܐ. ܒܕܓܘܢ ܐܟܡܐ ܕܓܘܫܡܐ ܡܘܙܠܬܢܝܐ ܡܝܬܪ ܡ̣ܢ ܓܘܫܡܐ ܐ̱ܢܫܝܐ. ܗ̣ܘ ܗܟܘܬ ܘܡܠܐܟܐ ܡ̣ܢ ܢܦܫܐ.

 

ܢܘܗܪܐ ܘܫܘܪܪܐ:

 

ܘܡܢܘ ܢܬܦܠܓ ܘܠܐ ܢܗܝܡܢ. ܕܦܓܪܐ ܒܦܚܡܐ ܕܫܡܝܐ. ܐܝܟ ܦܪܕܬܐ ܗ̱ܘ ܕܚܪܕܠܐ ܒܦܚܡܐ ܕܟܠܗ̇ ܡܬܥܡܪܢܝ̣ܬܐ. ܐܘ ܐܝܟ ܛܘܦܬܐ ܡ̣ܢ ܝܡܐ ܐܘܩܝܢܝܐ. ܘܡܛܠ ܗܕܐ ܐܠܨܐ ܕܐܦ ܢܦܫܐ ܡܠܝ̣ܠܬܐ ܒܦܚܡܐ ܕܡܠܐܟܐ ܕܡܘ̣ܬ ܫܪܓܐ ܬܗܐ ܕܡܛܦܛܦ ܒܦܚܡܐ ܕܐܣܦܝ̣ܪ ܫܡܫܐ.

 

 

 

ܢܝܫܐ ܬܪܝܢܐ: ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܩܕܝܫܐ ܕܝܘܢܢܘܣܝܘܣ ܒܩܦܠܐܘܢ ܩܕܡܝܐ ܕܡܐܡܪܐ ܕܬܪܝܢ ܕܥܠ ܪܝ̣ܫܘܬ ܟܗܢܘܬܐ ܥܕܬܢܝܬܐ ܗܟܢܐ. ܐܦ ܗ̣ܘ ܝܫܘܥ ܗ̇ܘ ܗܘܢܐ ܪܝܫ ܐܠܗܘܬܐ ܘܡܥܠܝ ܡ̣ܢ ܐܝܬܘܬܐ. ܗ̇ܘ ܪܝ̣ܫܝ̣ܬܐ ܘܐܘܣܝܐ ܘܚܝܠܐ ܪܝܫ ܐܠܗܘܬܐ. ܕܟܠܗ̇ ܪܝ̣ܫܘܬ ܟܗܢܘܬܐ ܘܩܕܝܫܘܬܐ ܘܡܐܠܗܢܘܬܐ. ܠܐܘܣܝ̈ܐܣ ܛܘܒܬܢܝ̈ܬܐ ܘܕܡܝܬܪ̈ܢ ܡܢܢ܆ ܝܬܝܪ ܢܗܝܪܐܝܬ ܘܝܬܝܪ ܝܕܘܥܬܢܐܝܬ ܡܢܗܪ.

 

ܣܗܕܘܬܐ ܕܬܪܬܝܢ:

 

ܓܪܝܓܘܪܝܘܣ ܬܐܘܠܘܓܘܣ ܒܐܓܪܬܐ ܕܬܪܬܝܢ ܕܠܘܬ ܩܠܝܕܘܢܝܘܣ ܗܟܢܐ. ܐܘ ܠܐ ܝ̇ܕܥܝܬܘܢ ܕܗ̇ܘ ܕܠܘܬ ܡܕܡ ܡܬܐܡܪ ܡܫܡܠܝܐ. ܠܘܬ ܐ̱ܚܪܢܐ ܠܘ ܡܫܡܠܝܐ ܗ̱ܘ. ܐܝܟ ܪܡܬܐ ܠܘܬ ܛܘܪܐ. ܘܦܪܕܬܐ ܕܚܪܕܠܐ ܠܘܬ ܓܘܡܐ. ܘܡܕܡ ܐ̱ܚܪܢܐ ܡ̣ܢ ܗܠܝܢ ܙܥܘܪ̈ܐ ܠܪܘܪ̈ܒܐ. ܐܘ ܡ̣ܢ ܒܢܝ̈ ܓܢܣܐ ܡܬܐܡܪ. ܐܢܕܝܢ ܨܒܐ ܐܢ̱ܬ ܡܠܐܟܐ ܠܘܬ ܐܠܗܐ. ܘܠܘܬ ܡܠܐܟܐ ܒܪܢܫܐ.

 

ܣܗܕܘܬܐ ܕܬܠܬ:

 

ܐܝܘܐܢܢܝܣ ܒܡܐܡܪܐ ܕܐܪܒܥܐ ܒܦܘܫܩܐ ܕܐܓܪܬܐ ܕܠܘܬ ܛܝܡܬܐܘܣ ܐܡ̇ܪ ܐܢ ܡܬܬܕܝ̣ܢܝ̣ܢ ܠܘܬ ܡܠܐܟ̈ܐ ܚܛܝ̈ܐ ܐܢܘܢ ܐܦ ܗ̣ܢܘܢ ܙܕܝ̈ܩܐ.

 

ܣܗܕܘܬܐ ܕܐܪܒܥ:

 

ܗ̣ܘ ܟܕ ܗ̣ܘ ܒܡܐܡܪܐ ܕܬܪܝܢ ܕܥܠ ܠܐ ܡܬܕܪܟܢܘܬܗ ܕܐܠܗܐ܆ ܗܟܢܐ. ܡ̣ܢ ܟܠܗ̇ ܒܪܝ̣ܬܐ ܗܕܐ ܡܬܚܙܝܢܝ̣ܬܐ. ܚܕ ܡܠܐܟܐ ܒܠܚܘܕܘܗܝ ܚܝܠܬܢ ܗ̣ܘ. ܡܠܘܢ ܕܝܢ ܐܦ ܣܓܝ ܡܝܩܪ ܡܢܗ̇. ܐܢ ܓܝܪ ܠܚܕ ܓܒܪܐ ܙܕܝܩܐ ܥܠܡܐ ܟܠܗ ܠܐ ܫܘܐ ܐܝܟ ܕܐܡ̣ܪ ܦܘܠܘܣ. ܕܐܝܠܝܢ ܠܡ ܕܥܠܡܐ ܠܐ ܫܘܐ ܠܗܘܢ. ܣܓܝ ܕܝܢ ܡܝܬܪܝ̣ܢ ܘܡܝܩܪܝ̣ܢ ܡܠܐܟ̈ܐ ܡ̣ܢ ܙܕܝ̈ܩܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܚܡܝܫܝܬܐ

 

ܡܛܠ ܬܪܥܝ̣ܬܐ ܕܡܝܬܪܘܬܐ ܡܘܕܝܐ ܕܒܢܝ̈ܢܫܐ ܓܡܝܪ̈ܐ ܛܒ ܡ̣ܢ ܡܠܐܟ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝ̈ܐ ܕܗ̇ܢܘܢ ܕܒܗܕܐ ܬܪܥܝ̣ܬܐ ܐܚܝ̣ܕܝܢ.

 

ܣܥܝܐ ܩܕܡܝܐ

 

ܐܡܪܝܢ ܕܒܪܢܫܐ ܒܨܠܡܗ ܗ̣ܘ ܕܐܠܗܐ ܘܒܕܡܘ̣ܬܗ ܒܪܐ ܐܝܟ ܕܐܡ̣ܪ ܟܬܒܐ. ܘܡܛܠ ܡܠܐܟ̈ܐ܆ ܠܐ ܡܕܡ ܕܐܝܟ ܗܟܢ ܐܡ̣ܪ. ܘܓܠܝܐ ܕܗ̇ܘ ܕܒܨܠܡ ܐܠܗܐ ܗ̱ܘ ܝܬܝܪ ܡܝܬܪ ܡ̣ܢ ܗ̇ܘ ܕܠܘ ܗܟܢܐ.

 

ܣܥܝܐ ܬܪܝܢܐ:

 

ܐܡܪܝܢ ܕܠܒܢܝ̈ܢܫܐ ܡ̇ܢ ܐܝܟ ܕܒܣܘܓܐܐ ܒܢܝ̈ܐ ܕܐܠܗܐ ܩܪܐ ܟܬܒܐ. ܐܝܟ ܗ̇ܝ ܕܐܒܘܟ ܕܚܙܐ ܒܟܣܝܐ. ܘܐܝܟ ܗ̇ܝ ܕܟܕ ܬܨܠܘܢ ܐܡ̣ܪܘ ܐܒܘܢ ܕܒܫܡܝܐ. ܘܣܓܝ̈ܐܬܐ ܕܐܝܟ ܗܟܢ. ܡܛܠ ܡܠܐܟ̈ܐ ܕܝܢ ܘܠܐ ܡܕܡ ܕܐܝܟ ܗܟܢ ܟܬܝ̣ܒ. ܘܓܠܝܐ ܕܗ̇ܘ ܕܒܪܐ ܕܐܠܗܐ ܫܘܐ ܠܡܬܩܪܝܘ. ܡܝܬܪ ܡ̇ܢ ܗ̇ܘ ܕܠܘ ܗܟܢܐ.

 

ܣܥܝܐ ܬܠܝܬܝܐ:

 

ܐܡܪܝܢ ܕܐ̱ܪܙ ܡܬܒܪܢܫܢܘܬܗ ܕܐܠܗܐ ܡܠܬܐ ܒܝܕ ܒܢܝ̈ܢܫܐ ܐܬܝ̣ܕܥ ܠܡܠܐܟ̈ܐ. ܘܗ̇ܘ ܕܥܠܬܐ ܗܘܐ ܕܝ̣ܕܥܬܐ ܠܟܢܬܗ. ܡ̣ܢ ܐܢܢܩܝ̣ ܕܡܝܬܪ ܡܢܗ.

 

ܣܥܝܐ ܪܒܝܥܝܐ:

 

ܐܡܪܝܢ ܕܒܪܢܫܐ ܡ̇ܢ ܟܕ ܠܚܝ̈ܠܐ ܣܩܘܒ̈ܠܝܐ ܕܥܡܗ ܒܪܝܢ ܙܟܐ. ܚܡܬܐ ܠܡܐܡܪ ܘܪܓܬܐ ܘܗܓܓܐ. ܠܐܠܗܐ ܡܬܡܨܐ ܠܡܫܦܪ. ܡܠܐܟ̈ܐ ܕܝܢ ܠܘ ܥܡ ܕܐܝܟ ܗܠܝܢ ܡܬܟܬܫܝܢ܆ ܠܐܠܗܐ ܫ̇ܦܪܝܢ. ܘܕܗ̇ܘ ܕܥܡ ܥܡ̈ܠܐ ܪܘܪ̈ܒܐ ܘܢܣܝܘ̈ܢܐ ܠܐܠܗܐ ܡܬܩܪܒ܆ ܝܬܝܪ ܡܝܬܪ ܡ̣ܢ ܗ̇ܘ ܕܠܘ ܗܟܢܐ܆ ܓܠܝܐ.

 

ܣܥܝܐ ܚܡܝܫܝܐ:

 

ܐܡܪܝܢ ܕܒܪܢܫܐ ܡ̇ܢ ܟܕ ܣܘܓܐܐ ܕܦܘ̈ܫܟܐ ܥܡܗ ܥܗܪܝܢ. ܒܗ̇ܝ ܕܠܘ ܗ̇ܘ ܡܐ ܕܡܠܐܟ̈ܐ ܡ̣ܢ ܟܝܢܐ ܐܠܗܝܐ. ܘܓܘܫ̈ܡܐ ܫܡܝ̈ܢܐ ܘܙܘ̈ܥܝ ܟܘܟ̈ܒܐ. ܘܟܝ̈ܢܐ ܐܣܛܘܟ̈ܣܢܝܐ ܐܕܪܟ. ܘܥܡ ܗܠܝܢ ܡܘܕܐ ܕܚܕ ܗ̣ܘ ܐܠܗܐ ܒܪܘܝܐ ܕܟܠ ܕܡܠܬܐ ܩܢܐ ܘܪ̈ܘܚܐ ܩܢܘ̈ܡܝܐ. ܡܠܐܟ̈ܐ ܕܝܢ ܟܕ ܝܬܝ̣ܪ ܡܫܡܠܝܐܝܬ ܡܕܪܟܝ̣ܢ ܠܗܘܢ ܠܣܘ̈ܟܠܐ ܗܠܝܢ ܡܘܕܝܢ ܒܐܠܗܐ. ܘܗ̇ܘ ܕܟܕ ܠܐ ܚܙܐ ܡܘܕܐ. ܛܒ ܡܝܬܪ ܡ̣ܢ ܗ̇ܘ ܕܟܕ ܚܙܐ ܡܘܕܐ܆ ܡܪܢ ܣܗܕ ܕܐܡ̣ܪ. ܛܘܒܝܗܘܢ ܠܐܝܠܝܢ ܕܠܐ ܚܙܐܘܘܢܝ ܘܗܝܡ̣ܢܘ ܒܝ.

 

ܣܥܝܐ ܫܬܝܬܝܐ:

 

ܐܡܪܝܢ ܕܠܡܠܐܟ̈ܐ ܡ̣ܢ ܗܘܢܐ ܐܝܬ ܒܠܥܕ ܚܡܬܐ ܘܪܓܬܐ. ܘܠܚܝ̈ܘܬܐ ܠܐ ܡܠܝ̣̈ܠܬܐ ܚܡܬܐ ܐܝܬ ܘܪܓܬܐ ܒܠܥܕ ܗܘܢܐ. ܠܒܪܢܫܐ ܕܝܢ ܐܝܬ ܗܘܢܐ ܐܝܬ ܐܦ ܚܡܬܐ ܘܪܓܬܐ. ܒܕܓܘܢ ܐܟܡܐ ܕܟܕ ܡܫܠܛ ܚܡܬܗ ܘܪܓܬܗ ܥܠ ܗܘܢܗ. ܫܝ̣ܛ ܡ̣ܢ ܚܝ̈ܘܬܐ ܠܐ ܡܠܝ̣̈ܠܬܐ ܗܘܐ. ܐܝܟ ܕܐܡ̣ܪ ܟܬܒܐ ܕܒܪܢܫܐ ܒܐܝܩܪܗ ܠܐ ܐܬܒܝܢ ܐܠܐ ܐܫܬܠܡ ܠܚܝܘܬܐ ܘܐܬܕܡܝ̣ ܠܗ̇. ܒܗ̇ ܒܕܡܘ̣ܬܐ ܟܕ ܡܫܠܛ ܗܘܢܗ ܥܠ ܚܡܬܗ ܘܪܓܬܗ. ܕܡܝܬܪ ܘܡܝܩܪ ܡ̣ܢ ܡܠܐܟ̈ܐ ܐܠܨܐ ܕܢܗܘܐ.

 

ܦܘܫܟܐ ܘܫܪܝܐ:

 

ܐܡܪܝܢ ܐܢܗܘ ܕܡܬܐܡܪܐ ܕܠܘ ܫܝ̣ܛ ܡ̣ܢ ܚܝܘܬܐ ܗ̣ܘܐ ܗܝܕܝܟ ܒܪܢܫܐ ܐܡ̣ܪ ܟܬܒܐ. ܐܠܐ ܒܠܚܘܕ ܕܡܬܕܡܐ ܠܗ̇. ܐܡܪܝܢܢ ܕܐܦܢ ܠܐ ܓܠܗ̇ ܠܗܕܐ ܟܬܒܐ. ܐܠܐ ܝ̣ܕܝ̣ܥܐ ܕܗܟܢܐ ܗ̱ܝ. ܡ̣ܢ ܗ̇ܝ ܕܚܝ̈ܘܬܐ ܠܐ ܡܬܘܡ ܐܬܝ̈ܢ ܠܕܝ̣ܢܐ. ܘܡܓܗ̈ܝܢ ܡ̣ܢ ܬܫܢܝ̣ܩܐ. ܗ̇ܝ ܕܝܢ ܕܚܛܐ ܠܘ ܗܟܢܐ. ܐܠܐ ܠܐܒܕܢܐ ܕܠܥܠܡ ܡܫܬܠܡ. ܘܓܠܝܐ ܕܗ̇ܘ ܕܗܟܢܐ. ܣܓܝ ܫܝ̣ܛ ܡ̣ܢ ܒܥܝ̣ܪܐ.

 

ܣܗܕܘܬܐ ܟܬܒܝܬܐ:

 

ܡ̣ܢ ܓܠܝܢܐ ܕܝܘܚܢܢ. ܐܡ̣ܪ ܓܝܪ ܗ̣ܘ ܩܕܝܫܐ. ܘܟܕ ܫܡܥܬ ܘܚܙܝܬ. ܢܦܠܬ ܠܡܣܓܕ ܩܕܡ ܪ̈ܓܠܘܗܝ ܕܡܠܐܟܐ ܗ̇ܘ ܕܡܚܘܐ ܗ̣ܘܐ ܠܝ ܗܠܝܢ.  ܘܐܡ̣ܪ ܠܝ. ܚܙܝ ܠܐ. ܟܢܬܐ ܕܝܠܟ ܐܝܬܝ. ܘܕܐܚ̈ܐ ܕܝܠܟ ܢܒܝ̈ܐ. ܘܕܗܠܝܢ ܕܢܛܪܝܢ ܠܡ̈ܠܐ ܕܟܬܒܐ ܗܢܐ. ܠܐܠܗܐ ܣܓܘܕ. ܐܡܪܝܢ ܕܗܕܐ ܣܗܕܘܬܐ ܓܠܝܐܝܬ ܡܚܘܝܐ. ܕܠܐ ܡܝܬܪ ܡܠܐܟܐ ܡ̣ܢ ܒܪܢܫܐ ܓܡܝ̣ܪܐ. ܐܠܐ ܟܢܬܗ ܗ̣ܘ ܐܟܘܬܗ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܠܘܬܢ. ܫܪܝܐ ܕܣܥܝܐ ܩܕܡܝܐ ܘܬܪܝܢܐ

 

ܠܗܠܝܢ ܬܪܝܢ ܣܥܝ̈ܐ ܩܕܝܫܐ ܐܝܘܐܢܢܝܣ ܒܦܘܫܩܐ ܕܐܓܪܬܐ ܕܠܘܬ ܩܘܠܣܝ̈ܐ ܡܠܝܐܝܬ ܫܪܐ ܟܕ ܐܡ̇ܪ. ܕܐܝܟܐ ܕܣܓܝ ܐܝܬܝܗ̇ ܡܣܟܢܘܬܐ ܬܟܝ̣ܠܐܝܬ ܡܚܘܐ ܟܬܒܐ ܐܝܩܪܐ. ܐܝܟܐ ܕܝܢ ܕܪܒܐ ܐܝܬܘܗܝ ܟܝܢܐ ܠܐ ܡܟܝܠ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܠܘ ܒܢܝ̈ܢܫܐ ܐܘܕܥܘ ܐ̱ܪܙ ܡܬܒܪܢܫܢܘܬܐ. ܐܠܐ ܒܗ̇ܝ ܕܡ̣ܢ ܒܢܝ̈ܢܫܐ ܗܘܬ݀ ܢܣܝ̣ܒܘܬܐ ܕܒܣܪܐ. ܒܗܘܢ ܒܒܢܝ̈ܢܫܐ ܝܕܥܘܗ̇. ܟܕ ܛܒ ܗ̣ܢܘܢ ܗܕܝ̣ܘ ܘܢܗܪ ܘܓܠ̣ܘ ܠܒܢܝ̈ܢܫܐ ܪܒܘܬܗ ܕܐ̱ܪܙܐ ܐܟܡܐ ܕܠܡܪܝܡ ܘܪ̈ܥܘܬܐ ܘܝܘܣܦ ܘܫܪܟܐ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ. ܐܠܘ ܗ̇ܘ ܕܒܥܡ̈ܠܐ ܩܢܐ ܗ̣ܘܐ ܡܝܬܪܘܬܐ ܡܕܡ܆ ܡܝܬܪ ܗ̣ܘܐ ܡ̣ܢ ܗ̇ܘ ܕܠܘ ܗܟܢܐ. ܙܕܩ ܗܘܐ. ܕܗ̇ܘ ܕܒܥܣܪܐ ܝܘܡܝ̈ܢ ܚܕ ܫܘܐܠܐ ܠܡܚܣܢ ܫܪܐ. ܕܝܬܝܪ ܡܝܬܪ ܡ̣ܢ ܗ̇ܘ ܕܒܚܕܐ ܫܥܐ ܥܣܪܐ ܫܘ̈ܐܠܝܢ ܡܬܡܨܐ ܠܡܫܪܐ. ܘܙܕܩ ܗ̣ܘܐ ܕܡܢܕܝܐ ܐܝܢܐ ܕܒܕܘܥܬܐ ܕܐܦܘ̈ܗܝ ܣܒܥ ܠܚܡܐ ܘܬܟܣܝ̣ܬܐ. ܕܝܬܝܪ ܥܬܝ̣ܪ ܡ̣ܢ ܡܠܟܐ ܕܐܪܥܐ. ܘܟܠܗܝܢ ܫܟܝ̣ܪ̈ܢ. ܘܓܠܝܐ ܕܒܪܢܫܐ ܒܦܚܡܐ ܕܡܠܐܟܐ. ܐܝܟ ܓܒܪܐ ܗ̱ܘ ܒܝܫ ܡܘܙܓܐ ܘܡܟܪܗܐ. ܒܦܚܡܐ ܕܫܦܝܪ ܡܘܙܓܐ ܘܡܫܪܪܐ. ܒܕܓܘܢ ܗ̇ܘ ܡ̇ܢ ܒܝܕ ܓܕ̈ܕܐ ܢܛܪ ܚܘܠܡܢܗ. ܗܢܐ ܕܝܢ ܦܫܝ̣ܩܐܝܬ. ܘܡܛܠ ܗܕܐ ܠܐ ܙܕܩ ܕܠܗܘ ܢܩܪܐ ܡܝܬܪܐ.

 

ܫܪܝܐ ܕܣܥܝܐ ܚܡܝܫܝܐ:

 

ܐܡܪܝܢܢ ܕܗ̇ܘ ܕܥܝܢ ܒܓܠܐ ܡܥܝܢ ܠܫܪܪܐ ܘܡܕܪܟ ܠܗ ܘܡܗܝܡܢ ܒܗ. ܝܬܝܪ ܡܝܬܪ ܡ̣ܢ ܗ̇ܘ ܕܠܘ ܗܟܢܐ. ܘܛܘܒܐ ܗ̇ܘ ܕܡ̣ܢ ܡܪܢ ܠܗ̇ܢܘܢ ܕܚܙܐܘܗܝ ܘܗܝܡ̣ܢܘ ܒܗ ܐܬܝܗܒ. ܒܦܚܡܐ ܕܗ̇ܢܘܢ ܕܚܙܐܘܗܝ ܘܠܐ ܗܝܡ̣ܢܘ ܒܗ ܐܬܬܣܪܚ. ܘܠܘ ܒܦܚܡܐ ܕܗ̇ܢܘܢ ܕܚܙܐܘܗܝ ܘܗܝܡ̣ܢܘ. ܘܐܠܐ ܙܕܩ ܗܘܐ ܕܟܠ ܚܕ ܡܢܢ. ܡܠܘܢ ܕܝܢ ܘܡ̣ܢ ܙܥܘܪ̈ܐ ܕܡܗܝ̈ܡܢܐ ܕܡܝܬܪ ܝܬܝܪ ܡ̣ܢ ܫܠܝ̈ܚܐ ܩܕܝ̈ܫܐ ܢܗܘܐ ܒܐܥ̈ܦܐ ܣܓܝ̈ܐܐ ܗ̇ܝ ܕܫܟܝ̣ܪܐ.

 

ܫܪܝܐ ܕܣܥܝܐ ܫܬܝܬܝܐ:

 

ܐܡܪܝܢܢ ܕܡܢܬܐ ܡܠܝ̣ܠܬܐ ܕܒܒܪܢܫܐ܆ ܠܐ ܫܒܩܐ ܠܗ ܕܢܗܘܐ ܫܝܛ ܡ̣ܢ ܒܥܝܪܐ. ܘܐܦܢ ܢܫܠܛ ܥܠ ܗܘܢܗ܆ ܚܡܬܗ ܘܪܓܬܗ. ܘܗ̣ܘ ܗܟܘܬ ܘܡܢܬܐ ܗܘܠܢܝܬܐ ܕܒܗ ܠܐ ܫ̇ܒܩܐ ܠܗ ܕܡܝܬܪ ܡ̣ܢ ܡܠܐܟܐ ܢܗܘܐ. ܘܐܦܢ ܢܫܠܛ ܥܠ ܚܡܬܗ ܘܪܓܬܗ ܗܘܢܗ. ܘܗܟܢܐ ܡܨܥܝܐ ܡܕܡ ܐܝܬܘܗܝ ܒܪܢܫܐ ܐܝܟܢ ܕܗ̣ܘ ܡܨܥܬ݀ ܬܪ̈ܝܗܘܢ ܓܒ̈ܐ. ܘܠܘܩܒܠ ܬܘܢܝܐ ܗ̇ܘ ܕܬܫܢܝ̣ܩܐ ܠܥܠܡܝ̣ܢܝܐ ܐܡܪܝܢܢ. ܕܗ̇ܘ ܕܐܝܬܘܗܝ ܘܐܦܢ ܒܫܘܢܩܐ ܢܗܘܐ ܐܝܬܘܗܝ. ܡܝܬܪ ܗ̣ܘ ܡ̣ܢ ܗ̇ܘ ܕܠܠܝܬܝܘܬܐ ܫܪܟ. ܘܠܒܪܢܫܐ ܡ̇ܢ ܘܐܦܢ ܒܘܝܐܐ ܐ̱ܚܪܢܐ ܠܐ ܢܗܘܐ ܠܗ ܒܬܫܢܝ̣ܩܗ ܗܘ ܣܛܪ ܡ̣ܢ ܗ̇ܝ ܕܢܬܚܫܒ ܕܡܪܚܡܢ ܗ̣ܘ ܘܡܪܚܦܢ ܡܪܝܐ ܘܠܐ ܠܥܠܡ ܢܛܪ ܪܘܓܙܗ. ܘܢܣܟܐ ܠܛܝܒܘܬܗ. ܘܐܦܢ ܠܐ ܢܗܐ ܫܘܠܡܐ ܠܬܫܢܝ̣ܕܗ. ܣܦܩ ܠܗ ܒܘܝܐܐ ܗܢܐ.

 

 

 

 

 

ܩܦܠܐܘܢ ܕܚܡܫܐ ܕܫܬܐܣܬܐ ܚܡܝܫܝܬܐ

 

ܡܛܠ ܬܪ̈ܥܝܬܐ ܕܗܘܝ̈ ܠܒܪ̈ܝܐ ܡܛܠ ܡܠܐܟ̈ܐ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܬܐܘܪ̈ܝܐܣ ܕܦܝܠܠܘ̈ܣܘܦܐ܆ ܡܛܠ ܡܠܐܟ̈ܐ.

 

ܬܐܘܪܝܐ ܩܕܡܝܬܐ

 

 

 

ܐܡܪܝܢܢ ܕܥܠܬܐ ܩܕܡܝܬܐ ܐܘܟܝ̣ܬ ܫܪܪܐ ܩܕܡܝܐ ܐܠܗܐ ܫܘܒܚܐ ܠܐܝܬܘܬܗ܆ ܟܕ ܦܫܝ̣ܛܐ ܗܘܢܐ ܡܒܪܝܐ ܡܨܐ ܠܡܗܘܐ ܥܠܬܐ. ܘܗ̇ܘ ܒܠܚܘܕܘܗܝ ܗܘܝܘ ܥܠܬܢܗ ܒܠܥܕ ܡܨܥܝܐ. ܘܐ̱ܢܫ ܡ̣ܢ ܐܪ̈ܝܢܘ ܟܕ ܡܬܦܠܣܦ ܐܡ̇ܪ. ܕܗ̣ܘ ܗ̇ܘ ܗܘܢܐ ܥܠܬܢܐ ܩܕܡܝܐ ܐܝܬܘܗܝ ܒܪܐ ܡܠܬܐ ܕܒܪܝܫ ܒܪ̈ܝܬܗ ܡܪܝܐ ܒܪܝܗܝ. ܘܕܒܡܠܬܐ ܬܘܒ ܥܕܬܢܝܬܐ ܗܘܢܐ ܡܬܩܪܐ ܒܪܐ. ܣܗܕ ܩܕܝܫܐ ܕܝܘܢܢܘܣܝܘܣ. ܒܩܦܠܐܘܢ ܩܕܡܝܐ ܕܥܠ ܪܝ̣ܫܘܬ ܟܗܢܘܬܐ ܥܕܬܢܝܬܐ. ܟܕ ܐܡ̇ܪ. ܕܐܦ ܗ̣ܘ ܝܫܘܥ ܗ̇ܘ ܗܘܢܐ ܪܝܫ ܐܠܗܘܬܐ ܘܫܪܟܐ. ܗܠܝܢ ܐܡ̣ܪ ܐܪܝܢܐ ܗ̇ܘ. ܐܝܛܐ ܗ̣ܘ ܗܘܢܐ ܥܠܬܢܐ ܩܕܡܝܐ ܟܕ ܐܬܚܫܒ. ܐܠܨܝܘܬ ܐܝܬܘܬܗ ܒܥܠܬܗ. ܗ̣ܝ ܡܚܫܒܬܗ ܗܕܐ ܥܠܬܐ ܗܘܬ݀ ܕܗܘܢܐ ܐ̱ܚܪܢܐ ܬܪܝܢܐ ܕܐܝܬܘܗܝ ܬܓܡܐ ܕܣܪ̈ܦܐ܇ ܐܝܟ ܡܫܠܡܢܘܬܐ ܥܕܬܢܝܬܐ. ܘܟܕ ܐܬܚܫܒ ܡܬܡܨܝܢܘܬ ܐܝܬܘܬܗ ܒܝܬܗ܆ ܗ̣ܝ ܡܚܫܒܬܗ ܗܕܐ ܐ̱ܚܪܬܐ܆ ܥܠܬܐ ܗܘܬ݀ ܕܫܟܝ̣ܚܘܬ ܡܘܙܠܬܐ ܥܠܝܬܐ ܠܐ ܡܟܘܟܒܬܐ. ܘܗܟܢܐ ܗܘܢܐ ܬܪܝܢܐ ܟܕ ܐܫܬܟܚ. ܡܚܫܒܬܗ ܕܒܐܠܨܝܘܬ ܐܝܬܘܬܗ ܒܥܠܬܗ. ܥܒܕܐ ܘܥܠܬܐ ܗܘܬ݀ ܕܫܟܝ̣ܚܘܬ ܗܘܢܐ ܐ̱ܚܪܢܐ ܬܠܝܬܝܐ. ܕܐܝܬܘܗܝ ܬܓܡܐ ܕܟܪ̈ܘܒܐ. ܘܡܚܫܒܬܗ ܕܒܡܬܡܨܝܢܘܬ ܐܝܬܘܬܗ ܒܝܬܗ. ܥܒܕܐ ܘܥܠܬܐ ܗܘܬ݀ ܕܫܟܝ̣ܚܘܬ ܡܘܙܠܬܐ ܣܓܝܐܬ݀ ܟܘܟ̈ܒܐ. ܘܗܟܢܐ ܒܐܝܕܐ ܒܐܝܕܐ. ܥܕܡܐ ܕܐܫܬܘܫܛ ܝܘܒܠܐ ܠܘܬ ܗܘܢܐ ܡܥܒܕܢܐ. ܕܐܝܬܘܗܝ ܬܓܡܐ ܕܡܠܐܟ̈ܐ. ܘܠܘܬ ܡܘܙܠܬ݀ ܣܗܪܐ. ܐܝܛܐ ܡܚܫܒܬܐ ܕܗܢܐ ܗܘܢܐ ܬܚܬܝܐ ܒܐܠܨܝܘܬ ܐܝܬܘܬܗ ܒܥܠܬܗ ܥܠܬܐ ܗܘܬ݀ ܕܫܟܝ̣ܚܘܬ ܐܕܫܐ. ܘܡܚܫܒܬܗ ܕܒܡܬܡܨܝܢܘܬ ܐܝܬܘܬܗ ܒܝܬܗ ܥܠܬܐ ܗܘܬ݀ ܕܫܟܝ̣ܚܘܬ ܗܘ̈ܠܐ. ܘܗܟܢܐ ܐܬܩܝܡܘ ܡܬܘܡܐܝܬ ܬܪ̈ܝܗܘܢ ܥܠܡ̈ܐ. ܡܬܝܕܥܢܐ ܟܝܬ ܘܡܬܪܓܫܢܐ. ܘܙܘ̈ܥܐ ܫܡܝ̈ܢܐ ܫܟܢܘ ܘܡܫܟܢܝ̣ܢ ܥܗܢ̈ܘܬܐ ܠܗܘܠܐ. ܘܡ̣ܢ ܗܘܢܐ ܡܥܒܕܢܐ ܘܬܚܬܝܐ ܢܛܚܝ̣ܢ ܥܠܝܗ̇ ܐܕܫ̈ܐ ܡܦܬܟ̈ܐ ܘܐܣܟ̈ܡܐ ܡܫܚ̈ܠܦܐ.

 

ܬܐܘܪܝܐ ܬܪܝܢܝܬܐ:

 

ܐܡܪܝܢ ܕܗ̣ܢܘܢ ܗܠܝܢ ܗܘ̈ܢܐ ܡܬܘܡܝ̈ܐ ܐܢܘܢ. ܒܗ̇ܝ ܕܐܠܘ ܡܫܪ̈ܝܢܐ ܘܙܒܢܝ̈ܐ ܗܘܘ܆ ܗܘܠܢܝ̈ܐ ܗ̣ܘܘ ܘܗܐ ܠܘ ܗܟܢܐ.

 

ܬܐܘܪܝܐ ܬܠܝܬܝܬܐ:

 

ܐܡܪܝܢ ܕܗ̣ܢܘܢ ܗܠܝܢ ܗܘ̈ܢܐ ܠܥܠܡܝ̣ܢ̈ܝܐ ܐܢܘܢ. ܒܗ̇ܝ ܕܐܠܘ ܡܫܠܡܢ̈ܐ ܘܡܫܬܪ̈ܝܢܐ ܗ̣ܘܘ܆ ܡܪ̈ܟܒܐ ܗ̣ܘܘ. ܘܗܐ ܠܘ ܗܟܢܐ. ܒܗ̇ܝ ܕܟܠ ܕܡܪܟܒ ܡܫܬܪܐ.

 

ܬܐܘܪܝܐ ܪܒܝܥܝܬܐ:

 

ܐܡܪܝܢ ܕܟܠܚܕ ܡ̣ܢ ܗܘ̈ܢܐ ܒܟܝܢܐ ܦܪܝ̣ܫ ܡ̣ܢ ܟܢܬܗ. ܒܗ̇ܝ ܕܣܓܝܐܘܬܐ ܕܩܢܘ̈ܡܐ ܒܚܕ ܟܝܢܐ ܘܐܕܫܐ ܒܥܠܬ݀ ܗܘܠܐ܆ ܗܘܝܐ. ܘܟܪ ܕܠܝܬ ܗܘܠܐ܆ ܗ̣ܘ ܟܝܢܐ ܐܘܟܝܬ ܐܕܫܐ ܒܚܕ ܒܠܚܘܕ ܩܢܘܡܐ ܡܫܬܟܚ. ܐܝܟ ܕܐܦ ܫܡܫܐ ܘܣܗܪܐ.

 

ܬܐܘܪܝܐ ܚܡܝܫܝܬܐ:

 

ܟܠ ܚܕ ܡ̣ܢ ܡܠܐܟ̈ܐ ܗ̣ܘ ܠܗ ܝܕܥ. ܒܗ̇ܝ ܕܡܬܦܪܫܢܐ ܗ̱ܘ ܘܡܒܪܝܐ ܘܠܝܬ ܠܗ ܗܘܠܐ ܗ̇ܝ ܕܩܝܡܐ ܒܐܦܘ̈ܗܝ ܘܡܚܦܝܐ ܠܗ ܡܢܗ.

 

ܬܐܘܪܝܐ ܫܬܝܬܝܬܐ:

 

ܟܠ ܚܕ ܡ̣ܢ ܗܘ̈ܢܐ ܠܟܠܗܝܢ ܗܠܝܢ ܕܐܝܬܝܗܝܢ ܒܙܢܐ ܟܠܢܝܐ ܘܠܐ ܡܫܬܚܠܦܢܐ ܝ̇ܕܥ. ܒܗ̇ܝ ܕܦܫܝ̣ܛܐ ܗ̱ܘ. ܘܡܛܠ ܗܕܐ ܚܕ ܦܚܡܐ ܫܘܝܐ ܩܢܐ ܠܘܬ ܟܠܗܝܢ ܡܬܝܕ̈ܥܢܝܬܐ.

 

ܬܐܘܪܝܐ ܫܒܝܥܝܬܐ:

 

ܗ̣ܢܘܢ ܗܠܝܢ ܗܘ̈ܢܐ ܥ̈ܠܬܐ ܐܢܝܢ ܕܥܠܡܐ ܗܢܐ ܡܬܪܓܫܢܐ. ܒܗ̇ܝ ܕܓܘܫܡܐ ܠܐ ܡܨܐ ܠܡܗܘܐ ܥܠܬ݀ ܓܘܫܡܐ. ܐܦܠܐ ܓܕܫܐ. ܐܦܠܐ ܐܠܗܐ ܫܘܒܚܐ ܠܛܝܒܘܬܗ ܡܛܠ ܕܠܚܕ ܗ̣ܘ ܒܠܚܘܕ ܥܠܬܢܐ ܩܕܡܝܐ܆ ܥܠܬܐ.

 

ܬܐܘܪܝܐ ܬܡܝܢܝܬܐ:

 

ܗ̣ܢܘܢ ܗܠܝܢ ܗܘ̈ܠܐ ܠܐ ܡܕܪܟܝ̣ܢ ܡܕܡ ܡ̣ܢ ܡܢܬܝ̈ܐ. ܒܗ̇ܝ ܕܡܕܪܟܢܘܬ ܡܢܬܝ̈ܐ. ܒܝܕ ܐܘܪ̈ܓܢܐ ܓܘܫܡܢܝ̈ܐ ܕܐܝܬܝܗܘܢ ܪ̈ܓܫܐ ܓܘܝ̈ܐ ܘܒܪ̈ܝܐ ܗܘܝܐ.

 

ܬܐܘܪܝܐ ܬܫܝܥܝܬܐ:

 

ܗ̣ܢܘܢ ܗܘ̈ܢܐ ܡܒܪ̈ܝܐ ܘܡܬܦܪ̈ܫܢܐ ܡ̣ܢ ܗܘܠܐ ܘܠܐ ܓܫܝ̣̈ܡܐ. ܘܠܐ ܡܬܚܙ̈ܝܢܐ ܘܠܐ ܐܬܪ̈ܢܝܐ ܐܢܘܢ.

 

ܬܐܘܪܝܐ ܥܣܝܪܝܬܐ:

 

ܗܠܝܢ ܗܘ̈ܢܐ. ܟܠܗܘܢ ܫܘܡܠܝܝ̈ܗܘܢ ܡܬܡܨ̈ܝܢܐ. ܒܡܥܒܕܢܘܬܐ ܫܟܝ̣ܚܝܢ ܠܗܘܢ. ܘܠܝܬ ܠܗܘܢ ܡܕܡ ܒܚܝܠܐ. ܡܛܠ ܕܠܝܬ ܠܗܘܢ ܗܘܠܐ.

 

ܬܐܘܪܝܐ ܕܚܕܥܣܪ̈ܐ:

 

ܗ̣ܘ ܗܘܢܐ ܘܡܥܒܕܢܐ ܘܬܚܬܝܐ ܕܣܗܪܐ ܥܠܬܐ ܗ̱ܘ ܕܢܦ̈ܫܬܢ ܡܠܝ̣̈ܠܬܐ ܘܕܟܠܗܘܢ ܫܘܡܠܝܝ̈ܗܘܢ.

 

ܬܐܘܪܝܐ ܕܬܪܬܥܣܪ̈ܐ:

 

ܗ̣ܢܘܢ ܗܠܝܢ ܗܘ̈ܢܐ ܬܫܥܐ ܣܛܪ ܡ̣ܢ ܗܘܢܐ ܥܠܬܢܐ ܩܕܡܝܐ. ܗܘ̈ܢܐ ܐܢܘܢ ܟܠܢܝ̈ܐ ܕܟܠ ܚܕܐ ܚܕܐ ܡ̣ܢ ܡܘܙ̈ܠܬܐ. ܘܐܝܬ ܗܘ ܐܦ ܗܘ̈ܢܐ ܐ̱ܚܪ̈ܢܐ ܕܝ̣ܠܢܝ̈ܐ ܠܓܝ̈ܓܠܐ ܗ̇ܢܝܢ ܕܠܓܘ ܡ̣ܢ ܟܠ ܚܕܐ ܡ̣ܢ ܡܘܙ̈ܠܬܐ ܐܝܬ. ܕܐܝܬܝܗܝܢ ܓܝܓ̈ܠܐ ܥܓܘ̈ܠܬܐ ܘܛܥܘ̈ܢܬܐ. ܘܢܦ̣ܝ̈ܩܬ݀ ܩܢܛܪ̈ܘ ܘܫܪܟܐ ܕܗ̇ܢܝܢ ܕܡ̣ܢ ܙܘܥܝ̈ܗܝܢ ܡܫܚ̈ܠܦܐ ܕܡ̣ܢ ܡܥܪܒܐ. ܘܡܫܘܚܪ̈ܐ ܘܡܣܪ̈ܗܒܐ ܡܫܬܘܕܥܝ̣ܢܢ ܠܗܝܢ.

 

ܬܐܘܪܝܐ ܕܬܠܬܥܣܪ̈ܐ:

 

ܟܠ ܚܕܐ ܡ̣ܢ ܡܘܙ̈ܠܬܐ. ܡܛܠ ܕܘܡܝܐ ܕܒܗܘܢܗ̇ ܡܬܬܙܝ̣ܥܐ. ܟܕ ܠܗ ܡܬܝܐܝܒܐ. ܘܡܛܠ ܕܗ̣ܢܘܢ ܗܘ̈ܢܐ ܦܪ̈ܝ̣ܫܝ ܒܟܝܢܐ ܐܝܬܝܗܘܢ. ܐܦ ܙܘܥܝ̈ܗܝܢ ܕܡܘ̈ܙܠܬܐ ܦܪ̈ܝ̣ܫܐ ܗܘܘ ܘܡܫܚ̈ܠܦܐ. ܘܬܐܘܡܝܣܛܘܣ ܐ̱ܢܫ ܐܡ̣ܪ. ܕܒܚܕ ܙܢܐ ܫܘܝܐ ܘܠܐ ܡܫܚܠܦܐ ܕܙܘܥܐ. ܡܨܝܐ ܗܘܬ݀ ܡܘܙܠܬܐ ܠܡܫܡܠܝܘ ܢܝܫܗ̇ ܕܐܝܬܘܗܝ ܡܦܩܢܐ ܕܣܝ̈ܡܐ ܡ̣ܢ ܚܝܠܐ ܠܘܬ ܡܥܒܕܢܘܬܐ. ܐܠܐ ܡܛܠ ܕܡܦܬܟܘܬ ܙܘ̈ܥܐ ܡܗܢܝܘ ܡܗܢܝܐ ܗܘܬ݀ ܠܩܘܝܡܗ ܕܥܠܡܐ ܗܢܐ ܕܗܘܝܐ ܘܩܘܒܠܐ܆ ܕܡܫܚܠܦܐܝܬ ܬܬܙܝ̣ܥ܆ ܓܒܬ݀ ܠܗ̇ ܡܘܙܠܬܐ. ܘܦܐܪܝܦܐܛܝܩܘܣ ܐ̱ܢܫ ܡܙܝܦ ܠܗ ܠܪܥܝܢܐ ܗܢܐ ܒܡܠܬܐ ܐܝܕܐ ܕܠܘ ܣܓܝ ܚܝܠܬܢܝܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܚܡܝܫܝܬܐ

 

ܡܛܠ ܦܠܝܪܘܦܘܪ̈ܝܐܣ ܕܥܒ̇ܕܝܢ ܗ̇ܢܘܢ ܕܐܡܪܝܢ ܕܠܡܠܐܟ̈ܐ ܒܡܨܥܝܘܬ ܣܓܕܬ݀ ܨܠܡ̈ܐ ܦܠܚܝ̣ܢ. ܦܠܝܪܘܦܘܪܝܐ ܩܕܡܝܬܐ

 

ܗܢܕ̈ܘܝܐ ܐܡܪܝܢ ܕܠܟܠ ܦܢܝ̣ܬܐ ܡ̣ܢ ܦܢ̈ܝܬܐ ܕܥܠܡܐ. ܘܠܟܠ ܥܡܐ ܡ̣ܢ ܥܡ̈ܡܐ ܕܒܢܝ̈ܢܫܐ܆ ܡܠܐܟܐ ܐܝܬ ܪܘܚܢܐ ܕܡܕܒܪ ܠܗ. ܒܕܓܘܢ ܦܐܝܐ ܠܟܠ ܥܡܐ ܕܠܡܠܐܟܐ ܗ̇ܘ ܕܠܗ ܡܕܒܪ ܢܦܠܘܚ ܘܢܝܩܪ ܘܢܣܓܘܕ. ܘܗ̇ܘ ܗܘܢܐ ܠܗ̇ܘ ܕܠܥܠ ܡܢܗ ܢܦܠܘܚ. ܘܗܟܢܐ ܥܕܡܐ ܕܬܬܝܒܠ ܗ̣ܝ ܣܓܕܬܐ ܠܘܬ ܗܘܢܐ ܗ̇ܘ ܕܩ̇ܐܡ ܩܕܡ ܪܒܘܬܐ ܗ̇ܝ ܒܪܝܬ݀ ܟܠ. ܘܗ̣ܘ ܠܗܘ ܐܟܡܐ ܕܘܠܐ ܢܫܒܚ ܘܢܩܠܣ ܘܢܪܡܪܡ ܘܢܩܕܫ ܕܠܐ ܫܠܘܐ. ܘܡܛܠ ܕܗ̣ܘ ܗܘܢܐ ܪܘܚܢܝܐ ܗ̱ܘ ܘܠܐ ܡܬܚܙܝܢܐ. ܙܕܩܐܝܬ ܨܠܡܐ ܠܗ ܐܬܬܩܢ ܘܐܬܬܨܝܪ. ܐܝܟܢܐ ܕܦܫܝ̣ܩܐܝܬ ܡ̣ܢ ܟܠܢܫ ܢܬܝ̣ܕܥ. ܘܟܠ ܠܘܬܗ ܢܨܘܒ ܘܥܘܗܕܢܗ ܠܐ ܢܬܢܫܐ.

 

ܦܠܝܪܘܦܘܪܝܐ ܕܬܪܬܝܢ:

 

ܐܡܪܝܢ ܕܐܠܨܐ ܟܠܢܫ ܝ̇ܕܥ ܕܨܠܡܐ ܥܒܝ̣ܕ ܒܐܝ̈ܕܝܐ. ܡ̣ܢ ܟܐܦܐ ܕܦܣܝ̣ܠܐ. ܐܘ ܩܝܣܐ ܕܓܠܝ̣ܦ. ܐܘ ܢܚܫܐ ܕܢܣܝܟ. ܟܕ ܠܐ ܚܝ ܘܠܐ ܡܪܓܫ. ܠܐ ܡܨܐ ܠܡܗܘܐ ܥܠܬ݀ ܝܘܬܪܢܐ ܐܘ ܚܘܣܪܢܐ ܨܒܝܢܐܝܬ ܠܡܕܡ ܡ̣ܢ ܒܪ̈ܝܐ. ܘܣܓܕܬ݀ ܨܠܡ̈ܐ ܡ̣ܢ ܩܕܡ ܛܘܦܢܐ ܫܟܝ̣ܚܐ ܗܘܬ݀ ܒܥܠܡܐ. ܘܥܕܡܐ ܠܝܘܡܢܐ ܗܐ ܫܟܝ̣ܚܐ. ܘܐܠܘܠܐ ܕܠܪܘܚܢܐ ܡܕܡ ܡܘܬܪܢܐ ܐܝܬܝܗ̇ ܣܓܕܬܐ ܗ̇ܝ ܒܡܨܥܝܘܬܗ ܕܨܠܡܐ ܗ̇ܘ. ܐܝܟܢܐ ܡܬܬܛܥܝܢ ܗܘܘ ܒܢܝ̈ܢܫܐ ܝܕܘ̈ܥܐ. ܟܠܗ ܗܢܐ ܡܬܚܐ ܒܛܘܥܝܝ ܕܐܝܟ ܗܕܐ ܕܐܦܠܐ ܥܠ ܫܒܪ̈ܐ ܘܒܘܪ̈ܐ ܡܬܚܦܝܐ. ܫܪܝ̣ܟܐ ܡܕܝܢ ܕܗ̇ܘ ܕܠܨܠܡܐ ܦܠܚ܇ ܠܪܘܚܢܐ ܛܒܐ ܦ̇ܠܚ܆ ܘܠܘ ܠܫܐܕܐ. ܒܗ̇ܝ ܕܫܐܕܐ ܐܦܢ ܪܘܚܢܐ ܗ̱ܘ. ܐܠܐ ܒܝܫܐ ܗ̱ܘ ܘܡܣܓܦܢܐ ܘܠܐ ܫܘܐ ܠܡܬܦܠܚܘ.

 

ܦܠܝܪܘܦܘܪܝܐ ܕܬܠܬ:

 

ܐܡܪܝܢ ܕܗ̇ܘ ܕܢܣܒܪ ܒܪܢܫܐ ܡܐܟܐ ܘܥܦܪܢܐ ܕܫܘܐ ܠܡܦܠܚ ܠܐܠܗܐ ܗ̇ܘ ܕܐܦܠܐ ܡܠܐܟ̈ܐ ܣ̇ܦܩܝܢ ܠܡܩܕܫܘܬܗ ܐܟܡܐ ܕܡܬܬܚܝ̣ܒܐ ܠܗ. ܚܘܝܒܐ ܗ̱ܘ ܘܫܛܝܘܬܐ. ܐܠܐ ܙܕܩ ܠܗ ܠܒܪܢܫܐ ܕܠܡܠܐܟܐ ܗ̇ܘ ܕܠܗ ܩܪܝ̣ܒ ܢܦܠܘܚ. ܘܗ̇ܘ ܠܗ̇ܘ ܕܠܥܠ ܡܢܗ. ܘܗܟܢܐ ܒܐܝܕܐ ܒܐܝܕܐ ܡ̣ܢ ܚܕ ܠܚܕ ܢܫܘܫܛܘܢ ܬܫܒ̈ܚܬܐ ܘܩܘ̈ܠܣܐ ܘܪܘܡܪ̈ܡܐ ܒܩ̈ܠܐ ܢܨܝ̈ܚܐ. ܗܘܠܢܝ̈ܐ ܡ̇ܢ ܗܘܠܢܐܝܬ. ܘܪ̈ܘܚܢܐ ܪܘܚܢܐܝܬ. ܐܝܟܢܐ ܕܐܦ ܓܒܪܐ ܐ̱ܢܫ ܒܘܪܐ ܘܬܚܘ̣ܒܐ ܘܨܪܝ̣ܟܐ. ܐܢ ܢܐܡܪ ܕܐܢܐ ܠܐ ܡܫ̇ܡܫ ܐ̱ܢܐ. ܐܠܐ ܠܡܠܟ ܡܠܟ̈ܐ. ܕܒܫܪܪܐ ܕܒܟܠܗܘܢ ܚܝܘ̈ܗܝ ܡܬܕܘܐ ܘܠܐ ܡܬܡܛܐ ܠܢܝܫܗ. ܐܠܐ ܦܐܝܐ ܠܗ ܕܠܗ̇ܘ ܕܠܥܠ ܡܢܗ ܢܫܡܫ: ܘܗ̇ܘ ܠܐܚܪܢܐ. ܘܗܟܢܐ ܒܐܝܕܐ ܒܐܝܕܐ ܥܕܡܐ ܕܬܫܬܘܫܛ ܗ̣ܝ ܬܫܡܫܬܐ ܠܘܬܗ ܕܡܠܟ ܡܠܟ̈ܐ. ܗ̣ܘ ܗܟܘܬ ܘܗ̇ܘ ܕܩܢܐ ܓܢܬܐ ܙܥܘܪܬܐ. ܘܐܢ ܢܐܡܪ ܕܐܢܐ ܠܐ ܡܫܩܐ ܐ̱ܢܐ ܗܕܐ ܓܢܬܝ. ܐܠܐ ܡ̣ܢ ܦܪܬ ܪܒܐ. ܒܕܓܘܢ ܐܘ ܠܐ ܣܟ ܗܘܝܐ ܠܗ ܗܕܐ. ܐܘ ܐܢ ܗ̣ܘ ܗܘܐ܆ ܡܬܓܪܦܘ ܡܬܓܪܦܐ ܠܗ̇ ܓܢܬܗ. ܘܦܐܕ ܣܒܪܗ.

 

ܦܠܝܪܘܦܘܪܝܐ ܕܐܪܒܥ:

 

ܐܡܪܝܢ ܐܢܗܘ ܕܠܟܠ ܥܡܐ ܡܠܐܟܐ ܐܝܬ ܕܡܕܒܪ. ܘܝܨܦ ܕܛܒ̈ܬܗ. ܐܝܟܢܐ ܠܐ ܦܐܝܐ ܕܠܗ ܠܗܢܐ ܢܦܠܘܚ ܥܡܐ ܗ̇ܘ ܘܢܩܒܠ ܛܝܒܘܬܗ.

 

ܦܠܝܪܘܦܘܪܝܐ ܕܚܡܫ:

 

ܐ̱ܚܪ̈ܢܐ ܐܡܪܝܢ ܕܟܠ ܓܒܪܐ ܓܡܝ̣ܪܐ ܘܡܝܬܪܐ ܕܡ̇ܐܬ ܗ̣ܘܐ ܒܙܒ̈ܢܐ ܩܕ̈ܡܝܐ ܨܠܡܐ ܡܬܬܩܝ̣ܡ ܗ̣ܘܐ ܠܗ. ܐܝܟܢܐ ܕܒܝܕ ܨܠܡܐ ܗ̇ܘ ܠܐ ܡܬܛܥܐ ܗ̣ܘܐ ܫܡܗ. ܘܐܦ ܐ̱ܚܪ̈ܢܐ ܢܬܡܪܘܢ ܗ̣ܘܘ ܒܗ.

 

ܦܠܝܪܘܦܘܪܝܐ ܕܫܬ:

 

ܐ̱ܚܪ̈ܢܐ ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܘܡܠܐܟ̈ܐ ܓܘܫ̈ܡܐ ܐܢܘܢ ܩܛܝ̣̈ܢܐ ܘܢܗܝ̣ܪ̈ܐ ܘܐܣܟܡ̈ܐ ܩܢܝܢ ܬܡܝ̣̈ܗܐ ܘܡܥܠܝ̈ܐ. ܒܕܓܘܢ ܠܟܠܚܕ ܡܢܗܘܢ ܐܣܟܡܐ ܡܕܡ ܕܕܡܐ ܠܗ ܐܬܬܨܝ̣ܪ. ܐܝܟܢܐ ܕܒܗ ܢܬܝ̣ܕܥ ܘܢܣܬܓܕ.

 

ܦܠܝܪܘܦܘܪܝܐ ܕܫܒܥ:

 

ܐ̱ܚܪ̈ܢܐ ܐܡܪܝܢ ܕܠܟܠ ܚܕ ܡ̣ܢ ܕܪ̈ܓܐ ܬܠܬܡܐܐ ܘܫܬܝܢ ܕܡܘܙܠܬܐ ܡܠܐܟܐ ܐܝܬ ܕܝ̣ܠܢܝܐ ܕܡܥܒܕ ܒܗ. ܘܗ̣ܝ ܗ̇ܝ ܡܥܒܕܢܘܬܐ ܒܡܥܠܬܗ ܕܫܡܫܐ ܕܠܗ̇ܘ ܕܪܓܐ. ܘܒܚܘܪܗ ܕܥܡ ܟܘܟ̈ܒܐ ܐ̱ܚܪ̈ܢܐ ܡܬܓܠܝܐ. ܘܡܛܠ ܕܒܓܘ ܐܠܦܝ̈ܐ ܣܓܝ̈ܐܐ ܕܫܢܝ̈ܐ ܡܬܟܝܢ ܠܫܡܫܐ ܚܘܪܐ ܡܕܡ ܡܥܒܕܢܐ ܕܣܥܘܪܘܬܐ ܡܕܡ ܬܡܝ̣ܗܬܐ ܘܡܘܬܪܢܝ̣ܬܐ. ܚܟܝ̈ܡܐ ܩܕ̈ܡܝܐ ܟܕ ܡܕܡ ܕܐܝܟ ܗܢܐ ܓܕܫ ܗ̣ܘܐ. ܨܠܡܐ ܥܠ ܕܡܘ̣ܬܗ ܕܕܪܓܐ ܘܚܘܪܐ ܗ̇ܘ ܡܬܩܢܝ̣ܢ ܗ̣ܘܘ. ܘܗܟܢܐ ܗ̇ܢܘܢ ܕܒܬܪܗܘܢ ܟܕ ܠܨܠܡܐ ܗ̇ܘ ܣܓܕܝܢ ܘܡܝܩܪܝ̣ܢ. ܝܘܬܪ̈ܢܐ ܗ̇ܢܘܢ ܕܝ̣ܠܢܝ̈ܐ܆ ܡ̣ܢ ܡܠܐܟܐ ܡܕܒܪܢܐ ܕܕܪܓܐ ܗ̇ܘ ܩܛܦܝ̣ܢ. ܘܗܢܘ ܥܒܕܐ ܕܡܪ̈ܝ ܛܠܝܣ̈ܡܐܛܐ.

 

ܬܘܢܝܐ:

 

ܙܕܩ ܠܡܕܥ ܕܝܘ̈ܢܝܐ ܡ̇ܢ ܡ̣ܢ ܩܕܡ ܙܒܢܗ ܕܐܠܟܣܢܕܪܘܣ ܗܝܟ̈ܠܐ ܣܓܝ̈ܐܐ ܘܢܘ̈ܣܐ ܒܢܘ ܥܠ ܫܡܐ ܕܚܝܠܘ̈ܬܐ ܪ̈ܘܚܢܐ. ܘܢܗܝ̣ܪ̈ܐ ܫܡܝ̈ܢܐ. ܘܐܩܝ̣ܡܘ ܒܗܘܢ ܟܘܡܪ̈ܐ ܘܡܫܡ̈ܫܢܐ ܘܬܫܡ̈ܫܬܐ ܘܨܠܘ̈ܬܐ ܒܗܘܢ ܡܫܡܠܝܢ ܗ̣ܘܘ. ܘܢܕܪ̈ܐ ܠܗܘܢ ܢܕܪܝ̣ܢ ܗ̣ܘܘ. ܒܕܓܘܢ ܗܝܟܠܐ ܡܕܡ ܒܢܘ ܠܥܠܬܐ ܩܕܡܝܬܐ ܐܘܟܝ̣ܬ ܠܐܠܗܐ ܓܢܝ̣ܙܐ. ܘܗܝܟܠܐ ܠܥܠܬܢܐ ܩܕܡܝܐ. ܘܗܝܟܠܐ ܠܢܦܫܐ ܘܗܝܟܠܐ ܠܐܕܫܐ ܐܘܟܝ̣ܬ ܨܘܪܬܐ. ܠܟܠܗܘܢ ܗܠܝܢ ܗܝܟ̈ܠܐ܆ ܚܘܕܪ̈ܢܝܐ ܥܒ̣ܕܘ. ܘܠܩܪܘܢܘܣ ܗܝܟܠܐ ܥܒ̣ܕܘ ܐܟܣܝܓܘܢܘܢ. ܘܠܙܘܣ ܛܪܝܓܘܢܘܢ. ܘܠܐܪܝܣ ܐܪܝ̣ܟܐ. ܘܠܫܡܫܐ ܛܛܪܐܓܘܢܘܢ. ܘܠܐܦܪܘܕܝܛܝ ܛܪܝ̣ܓܘܢܘܢ ܕܐܝܬ ܒܓܘܗ ܛܛܪܐܓܘܢܘܢ. ܘܠܐܪܡܝ̣ܣ ܛܪܝܓܘܢܘܢ ܕܐܝܬ ܒܓܘܗ ܣܘܪܛܐ. ܘܠܣܗܪܐ ܬܡܝܢܝ ܓܘܢܘ̈ܬܐ. ܘܥܠ ܟܠ ܚܕ ܡ̣ܢ ܐܣܟܡ̈ܐ ܗܠܝܢ ܪ̈ܥܝܢܐ ܩܢܝܢ ܣܓܝ̈ܐܐ ܕܠܐ ܥܪܐ ܠܢ ܙܒܢܐ ܠܡܥܗܕܘܬܗܘܢ.

 

ܐܦܘܕܝܟܣܝܣ ܥܕܬܢܝܬܐ:

 

ܘܠܘܩܒܠ ܟܠܗܝܢ ܗܠܝܢ ܦܠܝܪܘܦܘܪ̈ܝܐܣ ܐܡܪܝܢܢ. ܕܠܗ̇ܝ ܕܐܝܬ ܐܠܗܐ ܒܪܘܝܐ ܕܗܢܐ ܟܠ ܒܨܒܝܢܐ ܘܠܘ ܒܟܝܢܐ. ܕܡܡܝ̣ܬ ܘܡܚܐ. ܘܡܡܣܟܢ ܘܡܥܬܪ. ܒܝܕ ܡܚܘܝܢ̈ܘܬܐ ܚܘܫܒܝ̈ܬܐ ܘܟܬܒܝ̈ܬܐ ܐܫܬܪܪܢܢ. ܠܗ̇ܝ ܕܝܢ ܕܡܠܐܟ̈ܐ ܡܫܠܛܝ̣ܢ ܥܠ ܦܢ̈ܝܬܐ ܘܥܡ̈ܡܐ. ܒܝܕ ܪܡܙܐ ܡܕܡ ܒܗܘܪܐ ܡ̣ܢ ܟܬܒܐ ܝܠܦ̣ܢܢ. ܘܕܢܫܒܘܩ ܗ̇ܘ ܡܐ ܕܒܝܕ ܐܦܘܕܝ̣ܟܣܝ̣ܣ ܐܠܨܝܬ݀ ܩܘܒܠܐ ܐܕܪܟܢܢ ܫܪܝ̣ܪܘܬܗ̇. ܘܢܦܠܘܚ ܠܗ̇ܘ ܡܐ ܕܪܡܙܢܐܝܬ ܐܬܬܫܠܡܢܝܗܝ ܣܓܝ ܣܟܠܐ ܘܫܟܝ̣ܪܐ.

 

 

 

 

 

 

 

     #1 

 

ܫܬܐܣܬܐ ܫܬܝܬܝܬܐ

 

ܡܛܠ ܟܗܢܘܬܐ ܗܕܐ ܐܪܥܢܝܬܐ.

 

ܘܒܗ ܐܝܬ ܩܦ̈ܠܐܐ ܬܪܝܢ. ܩܦܠܐܘܢ ܩܕܡܝܐ ܡܛܠ ܬܓܡܝ̈ܗ̇. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠ ܡܢܝܘܬܗ̇ ܘܦܘ̈ܠܓܝܗ̇. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܪ̈ܘܫܡܝܗ̇ ܕܟܗܢܘܬܐ ܘܪܝܫܘܬ ܟܗܢܘܬܐ

 

 

 

ܠܟܗܢܘܬܐ ܡ̇ܢ ܐܦܢ ܣܓܝ̈ܐܐ ܣܓܝܐܝܬ ܪܫܡܘܗ̇. ܚܢܢ ܦܣܝ̣ܩܐܝܬ ܐܡܪܝܢܢ ܕܟܗܢܘܬܐ ܐܝܬܝܗ̇܆ ܣܥܘܪܘܬܐ ܕܡܗܕܝܐ ܠܒܢܝ̈ܢܫܐ ܠܘܬ ܕܡܝܘܬܐ ܕܒܐܠܗܐ. ܟܡܐ ܕܡܨܝܐ ܠܟܝܢܐ ܐ̱ܢܫܝܐ. ܒܡܨܥܝܘܬ ܕܡܝܘܬܐ ܕܒܐܘܣܝ̈ܐܣ ܡܬܝܕ̈ܥܢܝܬܐ. ܒܬܪ̈ܬܝܗܝܢ ܐܟܚܕܐ ܡܢܘ̈ܬܗ̇ ܕܢܦܫܐ. ܒܡܕܪܟܢܘܬܐ ܐܡ̇ܪ ܐ̱ܢܐ ܕܬܐܘܪ̈ܝܐܣ ܡܪ̈ܢܝܬܐ ܘܒܡܨܛܒܬܢܘܬܐ ܕܥܝ̈ܕܐ ܐܝܠܝܢ ܕܠܪ̈ܘܚܢܐ ܒܝܬܝ̣ܝ̣̈ܢ. ܘܒܡܨܥܝܘܬܐ ܕܕܡܝܘܬܐ ܕܒܐܘܣܝ̈ܐܣ ܡܬܝܕ̈ܥܢܝܬܐ ܐܡ̣ܪܢܢ. ܐܝܟ ܕܐܦ ܡ̣ܢ ܪܒܐ ܕܝܘܢܢܘܣܝܘܣ ܗ̇ܘ ܕܡ̣ܢ ܟܠ ܐ̱ܪܙܢܝ ܐܬܗܕܝ̣ܢܢ ܕܐܡ̣ܪ. ܕܡܢܗ̇ ܟܕ ܠܘܬ ܡܥܒܕܢܘܬܐ ܩܕܝܫܬܐ ܕܟܗܢܘܬܐ ܐܬܝܢܢ܇ ܗܘܝܢܢ ܒܩܘܪܒܐ ܕܐܘܣܝ̈ܐܣ ܕܠܥܠ ܡܢܢ. ܒܕܡܝܘܬܐ ܕܐܝܟ ܚܝܠܢ. ܕܒܟܘܬܪܐ ܠܐ ܡܫܬܚܠܦܢܐ ܕܣܘܬܬܗܝܢ ܩܕܝܫܐ.

 

ܪܘܫܡܐ ܐ̱ܚܪܢܐ:

 

ܘܬܘܒ ܟܕ ܠܬܚܘ̣ܡܐ ܘܠܘ ܠܡܬܬܚܡܢܐ ܡܫܚܠܦܝ̣ܢܢ܆ ܐܡܪܝܢܢ. ܕܟܗܢܘܬܐ ܐܝܬܝܗ̇ ܐܘܪܚܐ ܕܡܥܒܪܐ ܠܒܢܝ̈ܢܫܐ ܡ̣ܢ ܕܘܒܪ̈ܐ ܒܥܝ̣ܪ̈ܝܐ ܠܘܬ ܕܘܒܪ̈ܐ ܡܠܐܟܝ̈ܐ܆ ܟܡܐ ܕܡܨܝܐ. ܒܡܨܥܝܘܬܐ ܕܗܘ̈ܠܐܣ ܓܘܫܡܢܝ̈ܬܐ ܕܒܗ̇ܝ ܨܝܪܐ ܛܘܦܣܐ ܕܗ̇ܢܝܢ ܕܠܐ ܓܘܫ̈ܡܢܝ̣ܢ. ܡܫܚܐ ܐܡ̇ܪ ܐ̱ܢܐ ܡܒܣܡܐ. ܘܠܚܡܐ ܫܡܝܢܐ. ܘܚܡܪܐ ܡܚܝܢܐ. ܘܒܪܬ݀ ܩܠܐ ܓܒܝ̣ܠܬ݀ ܒܩܝ̣ܢܬܐ ܐܝܕܐ ܕܒܫܡܥܗ̇ ܡܬܬܥܝ̣ܪܐ ܐܝܟ ܕܡ̣ܢ ܫܢܬܐ ܢܦܫܐ ܘܡܥܗܕܐ ܐܬܪܗ̇ ܩܕܡܝܐ. ܘܗܟܢܐ ܟܕ ܡ̣ܢ ܢܝ̣ܪ ܗܘܠܐ ܡܬܚܪܪܐ. ܘܡ̣ܢ ܐܣܘܪ̈ܝܗ̇ ܡܫܬܡܪܐ. ܠܐ ܡܬܥܘܟܢܐܝܬ ܒܐܘܣܝ̈ܐܣ ܫܡܝܢ̈ܝܬܐ ܐܝܟ ܒܝܬܝܬܐ ܒܟܢܘ̈ܬܗ̇ ܡܬܚܒܟܐ.

 

ܪܘܫܡܐ ܕܪܝ̣ܫܘܬ ܟܗܢܘܬܐ:

 

ܘܟܕ ܟܗܢܘܬܐ ܡ̣ܢ ܗܕܐ ܐܝܬܝܗ̇. ܪܝ̣ܫܘܬ ܟܗܢܘܬܐ ܐܝܬܝܗ̇܆ ܣܥܘܪܘܬܐ ܐܝܕܐ ܕܝܬܝܪ ܡܫܡܠܝܐ ܩܢܝܐ ܠܚܝܠܐ ܡܗܕܝܢܐ ܘܡܥܒܪܢܐ ܗ̇ܘ ܕܐܬܐܡܪ. ܐܝܟܢܐ ܕܐܦ ܠܐܚܪ̈ܢܐ ܡܠܝܐ ܠܡܫܟܢܘ ܚܝܠܐ ܐܝܢܐ ܕܒܗ܆ ܐܦ ܗ̇ܢܘܢ ܠܐܚܪ̈ܢܐ ܢܗܕܘܢ ܘܢܥܒܪܘܢ ܐܘܟܝܬ ܢܢܗܪܘܢ. ܘܠܘܬ ܕܡܝܘܬܐ ܕܐܬܐܡܪܬ݀ ܢܝܬܘܢ ܐܢܘܢ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܠܟܡܐ ܐܕܫܝ̈ܢ ܡܬܦܠܓܐ ܟܗܢܘܬܐ ܦܫܝ̣ܛܬܐ

 

ܟܗܢܘܬܐ ܓܝܪ ܗ̇ܝ ܕܝܬܝܪ ܦܫܝ̣ܛܐ ܘܓܘܢܝܐ. ܐܘ ܫܡܝܢܝܬܐ ܗ̱ܝ܆ ܐܝܟ ܗ̇ܝ ܕܡܠܐܟ̈ܐ. ܐܘ ܐܪܥܢܝܬܐ. ܘܗ̣ܝ ܗܕܐ: ܐܘ ܢܡܘܣܝܬܐ ܗ̱ܝ ܐܘ ܥܕܬܢܝܬܐ. ܘܟܗܢܘܬܐ ܢܡܘܣܝܬܐ ܡ̣ܢ ܐܠܗܐ ܒܝܕ ܡܘܫܐ ܠܚܕ ܡ̣ܢ ܫܒ̈ܛܐ ܕܒܢܝ̈ ܐܝܣܪܐܝܠ ܐܫܬܟܢܬ݀. ܟܗܢܘܬܐ ܕܝܢ ܥܕܬܢܝܬܐ܆ ܗܟܘܬ ܡܢܗ ܕܐܠܗܐ ܒܝܕ ܡܬܒܪܢܫܢܘܬܗ ܕܐܠܗܐ ܡܠܬܐ܆ ܠܟܠ ܥܡܡܝ̈ܢ ܐܬܝܗܒܬ݀. ܐܟܡܢ ܕܝܬܝܪ ܦܪܝ̣ܣܬܐ ܘܠܐ ܚܣܘܟܬܢܝ̣ܬܐ ܬܗܘܐ ܗ̣ܝ ܛܝܒܘܬܐ ܠܟܠܗܘܢ ܡܠܝ̣̈ܠܐ. ܒܡܨܥܝܘܬܐ ܕܗ̇ܘ ܕܝܬܝ̣ܪ ܡܥܠܝ. ܕܐܝܬܘܗܝ ܗ̣ܘ ܒܪܐ ܘܡܠܬܗ ܕܐܒܐ. ܒܗ̇ܝ ܕܡܘܫܐ ܐܝܟ ܥܒܕܐ. ܘܠܘ ܐܝܟ ܒܪܐ ܐܬܗܝܡܢ. ܥܠ ܐ̱ܪ̈ܙܐ ܐܠܗܝ̈ܐ. ܘܟܗܢܘܬܐ ܗ̇ܝ ܫܡܝܢܝ̣ܬܐ܆ ܝܬܝ̣ܪ ܒܝܬܝܬܐ ܩܢܝܐ ܠܡܬܡܨܝܢܘܬ ܕܡܝܘܬܐ ܕܒܐܠܗܐ. ܒܗ̇ܝ ܕܠܘ ܥܡ ܬܚܦܝ̣ܬܐ ܗܘܠܢܝܬܐ. ܐܘܟܝܬ ܥܢܢܐ ܕܩܝܡܐ ܒܐܦܝ̈ ܚܙ̈ܝܬܐ ܗܘܢܢ̈ܝܬܐ ܥܢܐ ܟܝܢܗܘܢ ܡܒܪܝܐ ܕܡܠܐܟ̈ܐ. ܟܗܢܘܬܐ ܕܝܢ ܗ̇ܝ ܢܡܘܣܝܬܐ ܝܬܝܪ ܒܗܘܪܬܐ ܘܪܚܝ̣ܩܬܐ ܩܢܝܐ ܗܘܬ݀ ܠܡܬܡܨܝܢܘܬ ܕܡܝܘܬܐ ܕܒܐܠܗܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܬܚܘ̈ܡܐ ܘܙܘܗܪ̈ܐ ܓܘܫ̈ܡܢܝܐ ܐܬܝܗܒܬ݀ ܘܐܬܩܝ̣ܡܬ݀ ܕܐܝܬܝܗܘܢ ܕܡ̈ܐ ܚܝܘ̈ܬܢܝܐ ܘܫܠܚ ܠܒܘ̈ܫܐ ܡܕܡ ܫܚܝ̣̈ܡܐ ܘܥܛܦ ܐ̱ܚܪ̈ܢܐ ܝܩܝ̣ܪ̈ܐ ܒܕܘܟܬܗܘܢ. ܟܘܬܝ̣ܢܐ ܐܡ̇ܪ ܐ̱ܢܐ ܕܡ̣ܢ ܒܘܨܐ. ܘܦܪܙܘܡܐ ܒܙܓ̈ܐ ܕܕܗܒܐ ܘܫܪܟܐ ܒܠܥܕ ܗ̇ܝ ܕܥܘܗܕܢܐ ܕܡܕܡ ܗܘܢܢܝܐ ܘܡܬܝܕܥܢܐ ܕܒܝܬܝ ܠܟܝܢܐ ܐܠܗܝܐ ܗ̇ܘ ܕܒܗ ܡܬܝܨܦܐ ܕܡܝܘܬܐ ܕܬܗܘܐ. ܒܡܫܠܡܢܘܬܗ̇ ܐܬܬܝܬܝ̣. ܗܕܐ ܕܝܢ ܕܝܠܢ ܥܕܬܢܝܬܐ܆ ܓܠܝܐ ܕܡܨܥܝܬܐ ܡܕܡ ܐܝܬܝܗ̇. ܒܝܬ ܬܪ̈ܝܗܘܢ ܗܠܝܢ ܣܟ̈ܐ ܡܒܥ̈ܕܐ ܕܬܪ̈ܬܝܗܝܢ ܟܗܢ̈ܘܬܐ ܗܠܝܢ. ܒܗ̇ܝ ܕܐܝܟ ܕܐܬܐܡܪܬ݀ ܒܐܘܣܝ̈ܐܣ ܗܘܠܢܝ̈ܬܐ. ܠܣܘ̈ܟܠܐ ܕܠܐ ܗܘܠܢܝ̣ܝ̣̈ܢ ܡܛܦܣܐ. ܘܠܗ̇ ܠܗܕܐ ܡܫܘܕܥ ܪܒܐ ܕܝܘܢܢܘܣܝܘܣ ܟܕ ܐܡ̇ܪ. ܐܝܬܝܗ̇ ܓܝܪ ܕܐܚܝ̣ܕܐ ܫܘܬܦܐܝܬ ܒܡܨܥܬܐ ܕܬܪ̈ܝܗܘܢ ܪ̈ܝܫܐ ܕܗ̇ܝ ܟܝܬ ܫܡܝܢܝ̣ܬܐ܆ ܘܕܗ̇ܝ ܢܡܘܣܝܬܐ. ܟܕ ܒܗ̇ܝ ܡ̇ܢ ܡܫܘܬܦܐ܆ ܒܝܕ ܬܐܘܪ̈ܝܐܣ ܝܕܘܥܬܢܝ̈ܬܐ. ܒܗ̇ܝ ܕܝܢ܆ ܡܛܠ ܕܒܫܘܘ̈ܕܥܐ ܡܬܪ̈ܓܫܢܐ ܡܬܦܬܟܐ ܘܒܐܝܕܝ̈ܗܘܢ ܡܬܥܠܝܐ ܩܕܝܫܐܝܬ ܠܘܬ ܐܠܗܐ. ܐܝܬ ܓܝܪ ܘܦܘܠܓܐ ܐ̱ܚܪܢܐ ܕܟܗܢܘܬܐ ܐܘܟܝܬ ܟܘܡܪܘܬܐ ܚܢܦܝܬܐ. ܘܡܛܠ ܕܠܘ ܕܡܝܘܬܐ ܕܒܐܠܗܐ ܡܟܗܢܐ. ܐܠܐ ܠܫܐܕ̈ܐ ܗ̣ܘ ܦܠܚܐ ܒܡܨܥܝܘܬ ܨܠܡ̈ܐ ܦܬܟܪ̈ܝܐ. ܠܐ ܒܡܕܡ ܡܫܘܬܦܐ ܠܟܗܢ̈ܘܬܐ ܗܠܝܢ ܕܡܢܝܢܢ ܘܣܥܘܪܘܬܐ ܡܕܡ ܕܓܠܬ݀ ܫܡܐ ܗ̱ܝ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܫܬܝܬܝܬܐ

 

ܡܛܠ ܕܝ̣ܠܝܘܬ ܣܥܘܪܘܬܐ ܕܬܓ̈ܡܐ ܥܕܬܢܝ̈ܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܗ̇ܝ ܕܥܠ ܐܝܠܝܢ ܒܛܝܠ ܠܟܠ ܚܕ ܡ̣ܢ ܛܟ̈ܣܐ ܬܠܬܐ ܥܕܬܢܝ̈ܐ

 

 

 

ܡܛܠ ܓܝܪ ܕܕܡܝܘܬܐ ܕܗܪܟܐ ܡܬܝܨܦܐ. ܡܬܥܠܝܢܘܬܐ ܗ̱ܝ ܕܗ̇ܘ ܕܒܨܝ̣ܪ ܠܘܬ ܒܝܬܝܘܬܐ ܕܗ̇ܘ ܕܡܝܬܪ ܟܡܐ ܕܡܨܝܐ ܗ̣ܝ ܡܬܥܠܝܢܘܬܐ ܕܐܝܟ ܗܕܐ ܒܝܕ ܬܠܬ ܗܘܝܐ. ܒܝܕ ܕܘܟܝܐ ܕܙܢܝ̈ܐ ܒܣܝ̣ܪ̈ܐ ܕܢܘܟܪ̈ܝ̣ܝ̣ܢ ܠܡܬܕܡܝܢܐ ܡ̣ܢ ܝܬܗ ܕܡܕܡܝܢܐ. ܘܒܝܕ ܡܬܢܗܪܢܘܬܐ ܕܡ̣ܢ ܒܬܪ ܕܘܟܝܐ. ܐܝܛܐ ܒܝܕ ܡܬܪܫܡܢܘܬܐ ܕܒܨܘܪ̈ܬܐ ܡܝܬܪ̈ܬܐ ܕܡܬܕܡܝܢܐ ܕܗ̣ܝ ܗ̣ܝ ܓܡܝ̣ܪܘܬܐ. ܘܠܗ ܠܪܥܝܢܐ ܗܢܐ ܡܐܪܙ ܡܝܬܪܐ ܐ̱ܢܫ ܡ̣ܢ ܒܪ̈ܝܐ. ܕܓܡܝ̣ܪܘܬܐ ܡ̇ܢ ܒܝܕ ܬܠܬ ܗܘܝܐ. ܒܝܕ ܡܣܛܝܢܘܬܐ ܕܡ̣ܢ ܟܠ ܙܢܐ ܠܐ ܐܠܗܝܐ. ܘܒܝܕ ܡܪܕܝ̣ܬܐ ܕܒܫܒܝܠ ܐܠܗܐ. ܘܒܝܕ ܡܘܢܥܐ ܕܠܘܬܗ ܕܐܠܗܐ. ܘܣܥܘܪܘܬܐ ܡ̇ܢ ܗ̇ܝ ܩܕܡܝܬܐ. ܒܝܕ ܡܫܡ̈ܫܢܐ ܡܬܕܒܪܐ. ܘܡܛܠܗܕܐ ܡܕܟ̈ܝܢܐ ܐܫܬܡܝ̣ܘ ܡܫܡ̈ܫܢܐ. ܗ̇ܝ ܕܝܢ ܕܬܪܬܝܢ܆ ܒܝܕ ܟܗ̈ܢܐ ܡܬܡܠܝܐ. ܘܡܛܠܗܕܐ ܡܢܗܪ̈ܢܐ ܐܬܟܢܝ̣ܘ ܟܗ̈ܢܐ ܡܫܬܡܠܝܐ. ܘܡܛܠܗܕܐ ܓܡܘܪ̈ܐ ܐܬܩܪܝ̣ܘ ܪ̈ܝ̣ܫܝ ܟܗ̈ܢܐ. ܘܗܟܢܐ ܬܠܬܐ ܗ̣ܘܘ ܬܓ̈ܡܐ ܕܥܕܬܐ ܪܒܝܥܝܬܐ ܘܐܪܥܢܝܬܐ. ܡܫܡ̈ܫܢܐ ܐܡ̇ܪ ܐ̱ܢܐ ܘܟܗ̈ܢܐ ܘܪ̈ܝ̣ܫܝ ܟܗ̈ܢܐ. ܐܝܟ ܕܐܦ ܬܠܬܐ ܬܓܡܝ̣̈ܢ ܕܟܠܚܕܐ ܡ̣ܢ ܥܕ̈ܬܐ ܕܒܫܡܝܐ.

 

 

 

ܢܝܫܐ ܬܪܝܢܐ: ܡܛܠ ܗ̇ܝ ܕܐܝܠܝܢ ܐܢܘܢ ܗ̇ܢܘܢ ܕܡܬܕܟܝܢ ܘܡܬܢܗܪܝܢ ܘܡܬܓܡܪܝܢ

 

ܬܠܬܐ ܐܢܘܢ ܛܟ̈ܣܐ ܕܗ̇ܢܘܢ ܕܪܓܝ̣ܓܝܢ ܠܡܬܦܪܩܘ. ܘܡܛܠ ܗܕܐ ܠܗ̇ܝ ܕܢܬܕܟܘܢ ܝ̇ܨܦܝ̣ܢ. ܛܟܣܐ ܡ̇ܢ ܩܕܡܝܐ܆ ܗ̇ܘ ܕܬܝ̈ܒܐ ܘܐܝܬܝܗܘܢ ܗ̇ܢܘܢ ܕܡ̣ܢ ܒܬܪ ܕܐܬܕܟܝ̣ܘ ܚܕܐ ܙܒܢ ܘܐܬܢܗܪܘ. ܬܘܒ ܥܠ ܬܝܘ̣ܒܗܘܢ ܗܦ̣ܟܘ. ܒܥܠܬ݀ ܡܚܝ̣ܠܘܬܐ ܒܝܬܝܬܐ. ܘܟܕ ܠܘܬ ܚܝ̈ܐ ܩܕ̈ܡܝܐ ܗ̇ܢܘܢ ܕܐܬܪܚܩܘ ܡܢܗܘܢ ܡܬܩܪܝܢ܆ ܒܝܕ ܡܠܦܢܘܬܐ ܡܦܢܝܢܝ̣ܬܐ ܬܘܒ ܡܬܕܟܝܢ. ܡ̣ܢ ܢܘܓܪܐ܆ ܘܐܝܬܝܗܘܢ ܬܝ̈ܒܐ ܪ̈ܒܐ. ܐܘ ܚܕܬܐܝܬ. ܘܐܝܬܝܗܘܢ ܬܝ̈ܒܐ ܙܥܘܪ̈ܐ. ܘܥܠ ܫܕܬܗܘܢ ܗܦܟܝ̣ܢ. ܛܟܣܐ ܕܝܢ ܬܪܝܢܐ ܐܝܬܘܗܝ܆ ܗ̇ܘ ܕܡܬܬܥܒ̈ܕܢܐ. ܘܗ̣ܢܘܢ ܗܠܝܢ ܬܪܝܢܐܝܬ ܐܝܬܝܗܘܢ. ܒܗ̇ܝ ܕܐܘ ܡ̣ܢ ܫܐܕ̈ܐ ܡܬܢܣܝܢ. ܐܘ ܡ̣ܢ ܚܫ̈ܐ ܒܣܪ̈ܢܝܐ ܘܪ̈ܓܝܓܬܐ ܛܡ̈ܐܬܐ ܘܬܪ̈ܝܗܘܢ ܗܠܝܢ ܡ̣ܢ ܒܬܪ ܕܐܬܕܟܝ̣ܘ ܚܕܐ ܙܒܢ ܘܥܡ̣ܕܘ. ܘܗ̣ܢܘܢ ܗܠܝܢ ܒܝܕ ܡ̈ܠܐ ܡܚܝܠܢ̈ܝܬܐ ܡܬܚܠܡܝ̣ܢ. ܘܠܐ ܬܘܒ ܫܦܠܐܝܬ ܡ̣ܢ ܣܘܪ̈ܕܐ ܣܩܘܒ̈ܠܝܐ ܡܬܕܚܠܝ̣ܢ ܘܡܬܕܠܚܝ̣ܢ܆ ܘܛܟܣܐ ܬܘܒ ܬܠܝܬܝܐ ܕܗ̇ܢܘܢ ܕܡܬܕܟܝܢ ܐܝܬܘܗܝ܆ ܗ̇ܘ ܕܡܬܬܪ̈ܬܝܢܐ. ܘܐܝܬܝܗܘܢ ܗ̇ܢܘܢ ܕܠܐ ܡܫܘ̈ܬܦܐ ܘܠܐ ܡܬܐܪ̈ܙܢܐ ܐܢܘܢ ܒܟܠܗ ܫܘܡܠܝܐ ܕܪܝ̣ܫܘܬ ܟܗܢܘܬܐ. ܘܐܦܠܐ ܩܢܝܢ ܝܬܐ ܐܠܗܝܬܐ ܗ̇ܝ ܕܒܝ̣ܠܝ̣ܕܘܬܐ ܕܒܐܠܗܐ. ܐܠܐ ܥܕܟܝܠ ܡ̣ܢ ܟܬܒ̈ܐ ܐܒܗܝ̈ܐ ܐܘܟܝ̣ܬ ܐܠܗܝ̈ܐ ܡܬܬܘܠܕܝ̣ܢ ܘܡܬܓܒܠܝ̣ܢ ܒܨܘܠܡ̈ܐ ܥܒܕܝ̈ ܚܝ̈ܐ. ܘܡܛܠܗܕܐ ܬܠܬܝ̈ܗܘܢ ܗܠܝܢ ܛܟ̈ܣܐ ܫܡܥܐ ܒܠܚܘܕ ܕܟܬܒ̈ܐ ܐܠܗܝ̈ܐ ܦܣܝ̣ܣ ܠܗܘܢ. ܐܝܛܐ ܡܬܬܦܩܝ̣ܢ ܡ̣ܢ ܡܫܡ̈ܫܢܐ. ܐܟܡܢ ܕܠܐ ܣܦܩܐ ܐܢܘܢ ܠܡܬܓܘܝܘ ܘܠܡܚܙܐ ܠܐܪ̈ܙܐ ܡܥܠܝ̈ܐ ܘܐܠܗܝ̈ܐ. ܓܗܪ̈ܢ ܓܝܪ ܚܙܝ̈ܬܗܘܢ ܡ̣ܢ ܚܙܬܗܘܢ. ܥܕ ܡܬܕܟܝܢ ܡ̣ܢ ܛܝ̣̈ܛܐ ܡܚܫܢܝ̈ܗܝܢ ܐܘܟܝܬ ܡܫܟܢܝ̈ܗܝܢ. ܘܟܕ ܡܬܕܟ̈ܝܢܐ ܡ̣ܢ ܗܠܝܢ ܘܕܐܝܟ ܗܠܝܢ ܐܝܬܝܗܘܢ. ܓܠܝܐ ܕܡܬܢܗܪ̈ܢܐ ܗܠܝܢ ܐܢܘܢ ܕܐܬܕܟܝ̣ܘ. ܘܡܬܓܡܪ̈ܢܐ ܗ̇ܢܘܢ ܕܐܬܢܗܪܘ. ܒܕܓܘܢ ܐܟܡܐ ܕܠܐ ܡܟܢܐ ܡܬܢܗܪܢܘܬܐ ܒܠܥܕ ܡܬܕܟܝܢܘܬܐ. ܐܦܠܐ ܡܬܓܡܪܢܘܬܐ ܒܠܥܕ ܡܬܢܗܪܢܘܬܐ ܡܟܢܐ.

 

 

 

ܢܝܫܐ ܬܠܝܬܝܐ: ܡܛܠ ܗ̇ܝ ܕܐܝܟܢܐ ܐ̱ܢܫܝ̈ܢ ܬܠܬ ܥܕ̈ܬܐ ܒܬܫܥܐ ܬܓ̈ܡܐ ܡܢܐܘܘܗ̇ ܠܥܕܬܐ ܗܕܐ ܕܝܠܢ ܐܪܥܢܝܬܐ

 

ܘܐ̱ܢܫܝ̈ܢ ܡ̇ܢ ܡ̣ܢ ܗܠܝܢ ܕܝܠܢ ܐܡܪܝܢ. ܕܥܕ̈ܬܐ ܫܡܝܢ̈ܝܬܐ ܟܕ ܟܠܗܝܢ ܐܟܚܕܐ ܡܬܝܕ̈ܥܢܝܬܐ ܐܢܝܢ. ܘܗܕܐ ܕܝܠܢ ܐܪܥܢܝܬܐ ܡܬܪܓܫܢܝ̣ܬܐ ܗ̱ܝ ܐܠܨܐ ܕܐܦ ܗܪܟܐ ܠܘܬܢ ܐܟܡܐ ܕܐܦ ܗܪܬܡܢ. ܬܠܬ ܢܗܘ̈ܝܢ ܥܕ̈ܬܐ ܒܬܫܥܐ ܬܓ̈ܡܐ. ܘܗܟܢܐ ܟܕ ܡܬܦܪܣܝ̣ܢ. ܥܕܬܐ ܥܠܝܬܐ ܘܩܕܡܝܬܐ ܒܬܠܬܐ ܬܓܡܝ̣̈ܢ ܕܦܛܪܝܪ̈ܟܘ ܘܡܝ̣ܛܪ̈ܘܦܘܠܝܛܐ ܘܐܦܣܩܘ̈ܦܐ ܡܢܝܢ. ܘܥܕܬܐ ܬܘܒ ܡܨܥܝܬܐ ܘܬܪܝܢܝ̣ܬܐ ܒܬܠܬܐ ܬܓܡܝ̣̈ܢ ܕܩܫܝ̈ܫܐ ܘܡܫܡ̈ܫܢܐ ܘܐܦܘܕܝܩ̈ܢܘ ܣܝܡܝ̣ܢ. ܘܥܕܬܐ ܬܘܒ ܐ̱ܚܪܝܬܐ ܘܬܠܝ̣ܬܝܬܐ ܒܬܠܬܐ ܬܓܡܝ̈ܢ ܕܩܪ̈ܘܝܐ ܘܡܙܡܪ̈ܢܐ ܘܡܘܡ̈ܝܢܐ ܚܫܒܝ̣ܢ. ܚܢܢ ܕܝܢ ܡܛܠ ܕܠܬܐܘܪ̈ܝܐܣ ܗܠܝܢ ܐ̱ܪ̈ܙܢܝܬܐ ܡܢܗ ܕܪܒܐ ܕܝܘܢܢܘܣܝܘܣ ܐܬܬܫܠܡܢ ܐܢܝܢ. ܘܗ̣ܘ ܚܕܐ ܒܠܚܘܕ ܥܕܬܐ ܐܪܥܢܝܬܐ ܒܬܠܬܐ ܛܟܣܝ̈ܢ ܐܠܦ. ܠܗ ܙܕܩܐܝܬ ܢܩܦܝ̣ܢܢ ܘܒܥܩ̈ܒܬܗ ܪܕܝܢܢ.

 

ܗܦܟܬܐ:

 

ܐܡܪܝܢ. ܡܕܝܢ ܐܢܗܘ ܕܠܘ ܬܓ̈ܡܐ ܐܢܘܢ ܡܢܗܘܢ ܘܠܗܘܢ ܗܠܝܢ ܫܬܐ ܐ̱ܚܪ̈ܢܐ ܕܡܢܝܢܢ ܐܝܟܢܐ ܒܥܕܬܐ ܡܛܟܣܝ̣ܢ.

 

ܦܘܢܝܐ:

 

ܐܡܪܝܢܢ ܕܐܦܢ ܐܝܟ ܬܓ̈ܡܐ ܡܛܟܣܝ̣ܢ. ܐܠܐ ܗܠܝܢ ܬܠܬܐ ܥܠܝ̈ܐ ܚܕ ܗ̣ܘ ܠܗܘܢ ܫܘܟܢܐ ܗ̇ܘ ܓܡܘܪܐ. ܘܠܐ ܒܡܕܡ ܡ̣ܢ ܚܕ̈ܕܐ ܒܙܢܐ ܕܫܘܟܢܐ ܡܝܬܪܝ̣ܢ. ܘܝ̣ܕܝ̣ܥܐ ܗܕܐ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܗ̇ܝ ܕܐܟܡܐ ܕܚܕ ܐܦܣܩܘܦܐ ܠܐ ܡܨܐ ܦܛܪܝܪܟܐ ܠܡܣܪܚܘ. ܒܗ̇ ܒܕܡܘ̣ܬܐ. ܘܐܦܠܐ ܦܛܪܝܪܟܐ ܒܠܚܘܕܘܗܝ ܐܦܣܩܘܦܐ ܡܨܐ ܠܡܣܪܚܘ. ܕܬܪܬܝܢ ܕܝܢ܆ ܡ̣ܢ ܗ̇ܝ ܕܒܙܒܢ ܟܠܗܘܢ ܐܟܚܕܐ ܒܚܕ ܟܘܢܝܐ ܐܦܣܩܘ̈ܦܐ ܡܬܩܪܝܢ ܗ̣ܘܘ ܐܟܡܐ ܕܣ̇ܗܕܝܢ ܟܬܒ̈ܐ. ܘܗܟܢܐ ܟܕ ܟܢܘ̈ܬܐ ܐܢܘܢ ܫܘ̈ܝܝ ܒܫܘܟܢܐ. ܠܚܕ ܡܢܗܘܢ ܕܣ̇ܦܩ ܠܡܡܠܝܘ ܠܓܘܐ܆ ܫܘܥܒܕܐ ܕܡܫܬܡܥܢܘܬܐ ܡܓܥܠܝ̣ܢ. ܘܗ̇ܢܘܢ ܐ̱ܚܪ̈ܢܐ ܩܪ̈ܘܝܐ ܐܡ̇ܪ ܐ̱ܢܐ ܘܡܙܡܪ̈ܢܐ. ܘܡܘܡ̈ܝܢܐ. ܠܘ ܒܣܝܡ ܐܝ̇ܕܐ ܡܫܬܡܠܝܢ. ܐܠܐ ܡܦܣܢܘܬܐ ܒܠܚܘܕ ܡܬܝܗܒܐ ܠܗܘܢ ܕܗ̇ܘ ܡ̇ܢ ܢܩܪܐ. ܗ̇ܘ ܕܝܢ ܢܙܡܪ܇ ܗ̇ܘ ܕܝܢ ܢܘܡܐ ܠܗ̇ܢܘܢ ܕܥܡ̇ܕܝܢ. ܘܐܦܘܕܝܐܩ̈ܢܘ ܡ̇ܢ ܘܐܦܢ ܡܬܬܣܪܚܝ̣ܢ܇ ܐܠܐ ܐܝܟ ܐܝܠܝܢ ܕܡܬܩܕܡܝ̣ܢ ܡܬܪܫܡܝ̣ܢ ܠܡܩܒܠܘ ܫܘܟܢܐ ܕܡܫܡܫܢܘܬܐ ܡܬܩܪܒܝܢ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܫܬܝܬܝܬܐ

 

ܡܛܠ ܫܘܡ̈ܠܝܐ ܐܝܠܝܢ ܕܒܝܕ ܪܝܫܘܬ ܟܗܢܘܬܐ ܡܬܡܠܝܢ. ܘܒܗ ܐܝܬ ܥܘܬܕܐ ܘܦܣܘ̈ܩܐ ܚܡܫܐ. ܩܕܡܝܬ݀ ܥܘܬܕܐ

 

ܐܡܪܝܢܢ ܕܒܡܢܝܢܐ ܚܡܝܫܝܐ ܡܣܬܝܟܝ̣ܢ ܫܘܡ̈ܠܝܐ ܕܐܝܟ ܗܠܝܢ. ܚܕ ܡ̇ܢ ܓܢܣܐ ܗ̇ܘ ܕܫܘܡܠܝܐ ܕܒܝܕ ܟܝܪ̈ܘܛܘܢܝܐܣ ܐܘܟܝܬ ܕܒܣܝܡ ܐܝܕܐ. ܕܬܪܝܢ ܕܝܢ ܗ̇ܘ ܕܡܘܪܘܢ ܐܠܗܝܐ. ܕܬܠܬܐ ܕܝܢ ܗ̇ܘ ܕܡܘܠܕܐ ܕܡ̣ܢ ܕܪܝܫ ܕܡ̣ܢ ܡܝ̈ܐ ܘܪܘܚܐ ܐܘܟܝ̣ܬ ܡ̣ܢ ܥܡܕܐ. ܕܐܪܒܥܐ ܕܝܢ܆ ܗ̇ܘ ܕܩܨܝܐ ܕܬܫܡܫܬܐ ܐܝܕܐ ܕܡܫܬܡܠܝܐ ܥܠ ܗ̇ܢܘܢ ܕܒܡܫܝܚܐ ܫ̇ܟܒܝܢ.

 

 

 

ܦܣܘܩܐ ܩܕܡܝܐ ܕܩܦܠܐܘܢ ܬܪܝܢܐ

 

ܕܫܬܐܣܬܐ ܫܬܝ̣ܬܝܬܐ ܡܛܠ ܫܘܡܠܝܐ ܕܒܝܕ ܟܝܪ̈ܘܛܘܢܝܐܣ ܘܒܗ ܐܝܬ ܢܝ̈ܫܐ ܫܬܐ. ܢܝܫܐ ܩܕܡܝܐ ܡܛܠ ܫܘܡܠܝܐ ܪܝܫܟܗܢܝܐ

 

ܐܟܡܐ ܓܝܪ ܕܟܠܗ̇ ܪܝ̣ܫܘܬ ܟܗܢܘܬܐ ܘܟܗܢܘܬܐ ܐܢ ܕܒܫܡܝܐ ܘܐܢ ܕܒܐܪܥܐ. ܒܝܫܘܥ ܪܝܫ ܟܘܡܪ̈ܐ ܕܫܪܪܐ ܡܬܓܡܪܐ. ܒܗ̇ ܒܕܡܘ̣ܬܐ ܘܚܝܠܐ ܕܪܝܫ ܟܗ̈ܢܐ ܐܠܗܝܐ ܕܠܘܬܢ ܒܟܠܗܝܢ ܟܘܠܝ̈ܘܬܐ ܟܗܢܝ̈ܬܐ ܕܥܠ ܐܪܥܐ ܥܒܪ. ܡܠܘܢ ܕܝܢ ܚܝܠܐ ܐܠܗܝܐ ܒܐܝ̈ܕܘܗܝ ܠܘܬ ܟܠܗܘܢ ܛܟ̈ܣܐ ܕܬܚܘ̣ܬܘܗܝ ܡܬܡܛܐ. ܘܡܛܠ ܗܕܐ ܒܠܥܕ ܫܘܟܢܐ ܗ̇ܘ ܕܒܡܨܥܝܘܬܗ ܡܥܕ ܠܡܬܟܢܫܘ܆ ܘܠܐ ܐ̱ܢܫ ܡ̣ܢ ܗ̇ܢܘܢ ܕܬܚܘ̣ܬܘܗܝ ܡܟܢ ܠܡܫܡܠܝܘ ܐܘ ܠܡܓܫܦ ܒܡܕܡ ܡ̣ܢ ܐ̱ܪ̈ܙܐ ܡܥܠܝ̈ܐ ܘܐܠܗܝ̈ܐ. ܗܐ ܓܝܪ ܐܠܘܠܐ ܡܘܪܘܢ ܐܠܗܝܐ ܗ̇ܘ ܕܕܝ̣ܠܢܐܝܬ ܡ̣ܢ ܪ̈ܝܫܟܗܢܐ ܡܫܬܡܠܐ. ܐܦܠܐ ܠܟܗܢܐ ܕܢܩܨܐ ܐܘܟܪܣܛܝܐ ܡܦܣ ܗ̣ܘܐ. ܒܡܘܪܘܢ ܓܝܪ ܡܫܬܡܠܐ ܡܕܒܚܐ ܗ̇ܘ ܕܥܠܘܗܝ ܐ̱ܪ̈ܙܐ ܡܫܬܡܠܝܢ. ܘܕܝ̣ܠܝ̈ܬܐ ܡ̇ܢ ܕܫܘܡܠܝܗ ܬܡܢܐ ܡܫܟܚܝ̣ܢܢ. ܚܕܐ ܡ̇ܢ ܐܡܘܠܘ ܓܝܐ ܕܩܪܐ. ܟܕ ܡܚܘܐ ܬܘܕܝܬܗ ܚܠܝ̣ܡܬܐ ܘܕܓܥܨ ܡ̣ܢ ܐܪ̈ܝܛܝܩܘ. ܘܕܡܣܗܕ ܥܠܘܗܝ ܐܠܗܐ ܘܡܠܐܟ̈ܐ ܘܟܢܘ̈ܬܗ. ܕܟܡܐ ܕܡܠܐ ܠܐ ܢܒܨܪ ܡ̣ܢ ܗܠܝܢ ܕܦܐܝ̈ܢ ܠܩܝܘܡܘܬܗ. ܕܬܪܬܝܢ܆ ܗ̇ܝ ܕܠܐ ܡܬܬܣܪܚ ܒܠܥܕ ܬܪܝܢ ܐܘ ܬܠܬܐ ܐܦܣܩܘ̈ܦܐ ܐܝܟ ܡܠܦܢܘܬܐ ܡܪܢܝܬܐ ܕܐܡ̇ܪ. ܕܐܝܟܐ ܬܪܝܢ ܐܘ ܬܠܬܐ ܟܢܝ̣ܫܝ̣ܢ ܒܫܡܝ܆ ܬܡܢ ܐ̱ܢܐ ܒܝܢܬܗܘܢ. ܘܒܗܕܐ ܡܫܬܪܪܐ ܕܟܕ ܡܢܗ ܕܐܠܗܐ ܥܬܪ. ܠܗ̇ܢܘܢ ܐ̱ܚܪ̈ܢܐ ܡܥܬܪ. ܕܬܠܬ܆ ܗ̇ܝ ܕܐܦܣܩܘ̈ܦܐ ܟܕ ܪܡܝܢ ܢܦ̈ܫܬܗܘܢ ܩܕܡܘܗܝ. ܬܒܥܝ̣ܢ ܡܢܗ ܠܡܫܠܡܘ̣ ܢܦܫܗ ܠܡܪܥܐ ܡܪܥܝ̣ܬܗ ܕܡܫܝܚܐ. ܘܕܠܘ ܡ̣ܢ ܕܝܠܗ ܗܡܣ ܠܡܬܩܪܒܘ܆ ܘܕܐܪܒܥ܆ ܐܘܢܓܠܝܘܢ ܗ̇ܘ ܕܡܬܩܪܐ ܥܠܘܗܝ ܩܪܝܢܐ ܕܫܡܥܘܢ ܪܝܫܐ ܕܫܠܝ̈ܚܐ. ܘܒܗܕܐ ܬܪܬܝܢ ܡܬܝܕ̈ܥܢ. ܚܕܐ ܡ̇ܢ ܕܬܫܡܫܬܗ  ܡܬܗܝܡܢ ܕܫܡܥܘܢ. ܘܐܟܘܬܗ ܟܐܦܐ ܕܥܠܝܗ̇ ܡܬܒܢܝܐ ܥܕܬܐ܆ ܡܫܬܘܐ ܠܡܗܘܐ. ܘܐ̱ܚܪܬܐ ܕܐܟܘܬܗ ܡܘܕܐ ܕܐܢ̱ܬ ܗ̣ܘ ܡܫܝܚܐ ܒܪܗ ܕܐܠܗܐ ܚܝܐ. ܕܚܡܫ܆ ܐܘܢܓܠܝܘܢ ܐ̱ܚܪܢܐ ܕܩܪܐ ܗ̣ܘ ܩܪܝܐ ܗ̇ܘ ܕܪܥܝܐ ܛܒܐ. ܘܒܗܕܐ ܡܚܘܐ ܕܛܘܦܣܐ ܐܚܝ̣ܕ ܕܡܫܝܚܐ ܒܥܕܬܗ. ܘܕܫܬ܆ ܐܘܢܓܠܝܘܢ ܕܡܬܦܬܚ ܠܥܠ ܡ̣ܢ ܪܝܫܗ ܒܥܕܢܐ ܕܪܘܚܦܐ. ܕܡܫܘܕܥ ܕܡܢܗ ܕܝܫܘܥ ܗ̇ܘ ܕܦܫܛ ܐܝܕܐ ܒܙܒܢܐ ܕܣܘܠܩܗ ܘܒܪܟ ܠܬܠܡܝ̈ܕܘܗܝ ܡܫܬܡܠܐ. ܕܫܒܥ܆ ܡܘܪܢܝܬܐ ܗ̇ܝ ܕܢܣܒ. ܗ̇ܝ ܕܡܫܘܕܥܐ ܫܘܠܛܢܗ. ܕܬܡܢܐ܆ ܗ̇ܝ ܕܡܙܕܝܚ ܡ̣ܢ ܐܦܣܩܘ̈ܦܐ ܥܠ ܟܘܪܣܝܐ ܟܕ ܩܥܝܢ ܫܘܐ ܫ̇ܘܐ ܫ̇ܘܐ. ܘܠܪܒܘܬ ܕܪܓܐ ܡܫܘܕܥܐ. ܩܕܝܫܐ ܕܝܢ ܕܝܘܢܘܣܝܘܣ ܚܕܐ ܒܠܚܘܕ ܣ̇ܐܡ ܕܝ̣ܠܝܬܐ ܦܪܝܫܬܐ ܕܪ̈ܝ̣ܫܝ ܟܗ̈ܢܐ. ܠܣܝܡܐ ܩܕܝܫܐ ܕܡ̈ܠܐ ܚܝ̈ܬܐ ܕܥܠ ܪܝܫܗ.

 

 

 

ܢܝܫܐ ܬܪܝܢܐ: ܡܛܠ ܫܘܡܠܝܐ ܟܗܢܝܐ

 

ܩܕܡܝܬ݀ ܐܬܐܡܪܬ݀ ܕܟܗܢܘܬܐ ܥܠܗ̇ܝ ܕܢܚܙܘܢ ܘܢܫܬܘܬܦܘܢ ܠܡܐܪ̈ܙܘܬܐ ܩܕܝ̈ܫܬܐ. ܕܒܝܕ ܥܡܕܐ ܘܢܣܝ̣ܒܘܬܐ ܕܐ̱ܪ̈ܙܐ. ܗ̇ܢܘܢ ܕܡ̣ܢ ܟܕܘ ܩܕܡܘ ܐܬܕܟܝ̣ܘ܆ ܒܛܝ̣ܠ ܠܗ̇. ܘܠܪܝܫܘܬ ܟܗܢܘܬܐ ܬܘܒ ܐܦ ܗ̣ܝ ܒܛܝ̣ܠܘܬܐ ܬܘܒ ܐܦ ܗ̣ܝ ܒܛܝ̣ܠܘܬܐ ܕܥܠܗ̇ܝ ܕܝܬܝܪ ܪܒܐ ܕܐܝܬܝܗ̇ ܓܡܘܪܘܬܐ ܟܘܠܝܬ݀ ܙܢܐ ܩܢܝܐ ܬܘܒ. ܡܛܠ ܗܕܐ ܘܠܐ ܚܕܐ ܕܝ̣ܠܝܬܐ ܦܪܝܫܬܐ ܡܫܬܟܚܐ ܠܟܗ̈ܢܐ ܒܡܫܬܡܠܝܢܘܬܗܘܢ. ܐܠܐ ܟܠܗܝܢ ܐ̱ܪ̈ܙܢܝܬܐ ܕܥܠܝܗܘܢ ܡܫܬܡ̈ܫܢ. ܗ̣ܢܝܢ ܟܕ ܗ̣ܢܝܢ܇ ܐܦ ܥܠ ܪܝܫ ܟܗ̈ܢܐ ܥܡ ܐ̱ܚܪ̈ܝܬܐ ܕܝܬܝܪ ܡܫܬܡ̈ܫܢ. ܒܕܓܘܢ ܒܢܝܫܐ ܗ̇ܘ ܕܡܛܠ ܐ̱ܪ̈ܙܢܝܬܐ ܓܘܢܝ̈ܬܐ ܡܬܢܗܪ̈ܢ ܗ̇ܢܝܢ ܕܟܗ̈ܢܐ. ܘܠܘ ܗܪܟܐ ܒܕܠܘ ܕܝ̣ܠܢܝ̈ܬܐ ܡܕܡ ܘܦܪ̈ܝܫܬܐ ܐܢܝܢ. ܘܙܕܩ ܠܡܕܥ ܕܒܫܘܪܝ ܣܒܪܬܐ ܐܟܡܐ ܕܡܠܦ ܟܬܒܐ ܕܩܠܝܡܝܣ. ܐܦ ܩܫܝ̈ܫܬܐ ܡ̣ܢ ܢܫ̈ܐ ܡܝܬܪ̈ܬܐ ܘܢܟ̈ܦܬܐ ܘܕܚ̈ܠܬܢ ܐܠܗܐ. ܒܬܪ ܕܡܪ̈ܡܠܢ ܗܘܝ̈܆ ܡܬܬܣܪ̈ܚܢ ܗܘܝ̈ ܒܥܕܬܐ. ܘܠܓܘ ܒܡܕܒܚܐ ܒܬܪ ܩܫܝ̈ܫܐ ܒܓܒܐ ܕܣܡܠܐ ܩܝ̈ܡܢ ܗܘܝ̈. ܒܥܕܢܐ ܕܩܨܝܐ ܕܐܘܟܪܣܛܝܐ.

 

 

 

ܢܝܫܐ ܬܠܝܬܝܐ: ܡܛܠ ܫܘܡܠܝܐ ܡܫܡܫܢܝܐ

 

ܠܛܟܣܐ ܕܝܢ ܕܡܫܡܫܢܐ. ܚܕܐ ܐܝܬ ܕܝ̣ܠܝܬܐ ܦܪܝ̣ܫܬܐ ܒܡܫܬܡܠܝܢܘܬܗ. ܕܐܝܬܝܗ̇ ܩܥܕܐ ܕܥܠ ܚܕܐ ܒܘܪܟܐ. ܒܗ̇ܝ ܕܠܚܕܐ ܒܠܚܘܕ ܡܬܩܪܒܢܘܬܐ ܕܗ̇ܢܘܢ ܕܡܬܕܟܝܢ ܡܟܗܢ. ܘܡܛܠ ܗ̇ܝ ܬܘܒ ܕܒܡܢܬܐ ܩܢܐ ܠܡܬܩܪܒܢܘܬܐ ܡܫܥܒܕܬܐ. ܘܠܘ ܡܫܡܠܝܬܐ ܐܘ ܕܝܬܝܪ ܡܫܡܠܝܐ. ܐܝܟ ܟܗ̈ܢܐ ܘܪ̈ܝܫܟܗܢܐ. ܘܐܟܡܐ ܕܩܫܝ̈ܫܬܐ܆ ܒܗ̇ ܒܕܡܘ̣ܬܐ ܘܡܫܡ̈ܫܢܝܬܐ ܡܬܬܣܪ̈ܚܢ ܗܘܝ̈ ܒܥܕܬܐ. ܘܠܓܘ ܒܡܕܒܚܐ ܒܣܬܪ ܐܦܘܕ̈ܝܐܩܢܘ ܩܝ̈ܡܢ ܗܘܝ̈ ܒܩܘܪܒ ܩܘܪܒܢܐ ܐܝܟ ܕܐܡ̣ܪ ܩܠܝܡܝܣ. ܘܝܥܩܘܒ ܐܘܪܗܝܐ ܐܡ̇ܪ ܕܡܫܡܫܢܝ̣ܬܐ ܟܠ ܟܠܗ ܫܘܠܛܢܐ ܒܡܕܒܚܐ ܠܝܬ ܠܗ̇܆ ܐܠܐ ܕܬܟܢܘܫ ܘܬܢܗܪ ܢܗܝܪ̈ܐ ܠܒܪ ܡܢܗ. ܐܝܟܐ ܕܐܦ ܡܬܬܣܪܚܐ. ܘܠܐ ܫܠܝ̣ܛܐ ܕܬܓܫܘܦ ܒܡܕܒܚܐ. ܐܠܐ ܡ̣ܢ ܦܪܕܝ̣ܣܩܐ ܬܣܒ ܐ̱ܪ̈ܙܐ ܘܬܬܠ ܠܢܫ̈ܐ ܐܘ ܠܫܒܪ̈ܐ. ܟܕ ܠܐ ܢܗܘܐ ܩܫܝܫܐ ܐܘ ܡܫܡܫܢܐ. ܘܟܕ ܡܬܛܝ̈ܒܢ ܢܫ̈ܐ ܡܫܡ̈ܠܝܬܐ ܕܥܡ̈ܕܢ ܬܡܫܘܚ ܐܢܝܢ. ܘܬܡܫܘܚ ܐܦ ܛܝܒܘܬܐ ܠܗ̇ܢܝܢ ܕܟܪ̈ܝܗܢ.

 

 

 

ܢܝܫܐ ܪܒܝܥܝܐ: ܡܛܠ ܐ̱ܪ̈ܙܢܝܬܐ ܕܓܘܢܝ̈ܢ ܠܟܠܗܝܢ ܟܝܪ̈ܘܛܘܢܝܐܣ

 

ܘܗ̣ܢܝܢ ܗܠܝܢ܆ ܥܣܪ ܡܫܟܚܝ̣ܢܢ ܠܗܝܢ ܕܐܝܬܝܗܝܢ. ܚܕ ܡ̇ܢ ܡܬܩܪܒܢܘܬܐ ܕܩܕܡ ܐ̱ܪ̈ܙܐ ܐܠܗܝ̈ܐ. ܕܡܫܘܕܥܐ ܠܗ̇ܝ ܕܩܕܡ ܗ̇ܘ ܕܗܘܐ ܕܒܚܐ ܚܠܦܝܢ ܡܩܒܠ ܠܗܘܢ ܠܫܘ̈ܟܢܐ. ܕܬܪܬܝܢ܆ ܩܥܕܐ ܕܥܠ ܒܘܪ̈ܟܐ ܕܡܫܘܕܥ ܠܡܬܩܪܒܢܘܬܐ ܡܫܥܒܕܬܐ ܕܡܫܥܒܕ ܠܗ ܠܐܠܗܐ ܗ̇ܘ ܕܡܩܪܒ ܠܗ̇ܘ ܕܩܕܝܫܐܝܬ ܡܬܩܪܒ. ܕܬܠܬ܆ ܟܪܘܙܘܬܐ ܕܡܫܘܕܥܐ ܕܡܢܗ̇ ܕܐܠܗܘܬܐ ܐܝܬܝܗ̇ ܓܒܝܬܗ ܘܩܪܝܬܗ ܒܡܨܥܝܘܬܐ ܕܪܝܫ ܟܗ̈ܢܐ. ܕܐܪܒܥ܆ ܪܘܚܦܐ ܕܒܬܪ̈ܬܝܗܝܢ ܐܝܕܝ̈ܐ ܕܨܐܪ ܠܗ̇ܝ ܕܦܫܛ ܐܝܕܘ̈ܗܝ ܥܠ ܬܠܡܝ̈ܕܘܗܝ ܗ̣ܘ ܡܪܝܐ ܒܙܒܢ ܣܘܠܩܗ ܘܒܪܟ ܐܢܘܢ. ܘܗ̇ܝ ܕܬܠܬ ܙܒܢܝ̣̈ܢ ܐܪܙܬ݀ ܬܠܝܬܝܘܬܐ ܩܕܝܫܬܐ. ܕܚܡܫ܆ ܣܝܡ ܐܝܕܐ. ܕܡܫܘܕܥ ܠܗ̇ܝ ܕܡ̣ܢ ܡܪܝܐ ܠܘܬ ܡܘܫܐ ܐܬܐܡܪܬ݀ ܕܐܓܢ ܐܝ̣ܕܝ ܥܠܝܟ. ܘܗ̇ܝ ܕܝܡܝܢܐ ܐܪܙ ܝܡܝ̣ܢܝܘܬ ܫܘܚܠܦܗ ܘܚܘܝܠܗ. ܕܫܬ܆ ܪܘܚܦܐ ܕܒܐܝ̣ܕܐ ܕܣܡܠܐ. ܕܡܒܕܩ ܕܚܘ̣ܩܝܐ ܘܕܚܝܐ ܕܚܝܠܘ̈ܬܐ ܕܠܩܘܒܠܐ. ܕܫܒܥ܆ ܚܬܡܐ ܕܨܠܝܒܐ. ܕܡܫܘܕܥ ܗ̇ܝ ܕܡ̣ܢ ܟܕ ܡܝ̣ܬ ܠܚܫ̈ܐ ܫܟܝ̣ܪ̈ܐ ܗ̣ܘ ܗ̇ܘ ܕܐܬܩܪܒ. ܕܬܡܢܐ ܥܘܛܦܐ ܕܡܠܐܟ̈ܐ ܕܝ̣ܠܢܝ̈ܐ. ܕܡܫܘܕܥ ܠܬܫܡܫܬܐ ܕܝ̣ܠܢܝܬܐ ܕܗ̇ܘ ܕܐܫܬܡܠܝ̣. ܕܬܫܥ܆ ܟܪܘܙܘܬܐ ܕܗ̇ܝ ܕܐܬܬܣܪܚ: ܕܐܝܬܝܗ̇ ܣܗܕܘܬܐ ܕܪ̈ܝܫܟܗܢܐ ܕܡ̣ܢ ܟܕܘ ܩܒܠܗ̇ ܠܡܘܗܒܬܐ ܗ̇ܘ ܕܐܬܓܒ̣ܝ. ܕܥܣܪ܆ ܫܠܡܐ ܕܡܬܝ̣ܗܒ ܠܗ ܡ̣ܢ ܟܢܘ̈ܬܗ. ܐܟܡ̇ܢ ܕܗܘܐ ܒܝܬܝܐ ܠܐܪ̈ܙܐ ܐܟܘܬܗܘܢ. ܕܚܕܥܣܪ̈ܐ ܢܣܝ̣ܒܘܬܐ ܕܐ̱ܪ̈ܙܐ. ܗ̇ܝ ܕܡܫܘܕܥܐ ܠܗ̇ܝ ܕܠܟܠ ܚܕ ܠܦܘܬ ܡܫܘܚܬܗ ܡܫܘܬܦܐ ܒܛܒܘܬܗ̇ ܗ̣ܝ ܛܝܒܘܬܐ.

 

 

 

ܢܝܫܐ ܚܡܝܫܝܐ: ܡܛܠ ܗ̇ܝ ܕܐܪܐ ܡ̣ܢ ܡܪܝܐ ܐܬܬܫܠܡܘ ܫܠܝ̈ܚܐ ܫܘܡ̈ܠܝܐ ܗܠܝܢ ܬܠܬܐ ܘܠܘ ܐܫܠܡܘ. ܐܘ ܡ̣ܢ ܕܝܠܗܘܢ.

 

ܐܡܪܝܢܢ ܕܡܢܗ ܕܦܪܘܩܐ ܩܒܠܘ ܫܠܝ̈ܚܐ ܘܠܢ ܐܫܠܡܘ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܟܕ ܫܕܪ ܐܢܘܢ ܬܪܝܢ ܬܪܝܢ ܘܝܗܒ ܠܗܘܢ ܫܘܠܛܢܐ ܥܠ ܟܘܪ̈ܗܢܐ ܘܪ̈ܘܚܐ ܒܝ̈ܫܬܐ ܘܐܡ̣ܪ. ܕܓܪ̈ܒܐ ܕܟܘ ܘܫܪܟܐ. ܡܫܡ̈ܫܢܐ ܐܘܟܝܬ ܡܕܟ̈ܝܢܐ ܥܒܕ ܐܢܘܢ. ܘܟܕ ܢܦܚ ܒܗܘܢ ܘܐܡ̣ܪ ܩܒܠܘ ܪܘܚܐ ܩܕܝܫܐ. ܘܐܘܣܦ ܗ̇ܝ ܕܐܢ ܬܫܒܩܘܢ ܠܐܢܫ ܚܛܗ̈ܐ ܢܫܬܒܩܘܢ ܠܗ. ܩܫܝ̈ܫܐ ܥܒܕ ܐܢܘܢ ܘܟܕ ܐܪܝܡ ܐܝܕܘ̈ܗܝ ܘܒܪܟ ܐܢܘܢ ܒܥܕܢ ܣܘܠܩܗ. ܐܦܣܩܘ̈ܦܐ ܥܒܕ ܐܢܘܢ.

 

 

 

ܢܝܫܐ ܫܬܝܬܝܐ: ܡܛܠ ܫܘܡܠܝܐ ܡܢܝ̣ܚܢܐ ܕܕܝܪ̈ܝܐ

 

ܬܓܡܐ ܡ̇ܢ ܓܝܪ ܕܕܝܪ̈ܝܐ. ܠܒܪ ܗ̣ܘ ܡ̣ܢ ܬܓ̈ܡܐ ܟܠܗܘܢ ܟܗ̈ܢܝܐ. ܐܝܟ ܕܡܠܦ ܪܒܐ ܕܝܘܢܘܣܝܘܣ ܟܕ ܐܡ̇ܪ. ܕܠܗ̇ܢܘܢ ܕܡܛܟܣܝ̣ܢ ܡܢܝ̣̈ܚܢܐ܆ ܬܪ̈ܥܐ ܦܪܫܝ̣ܢ ܠܗܘܢ. ܘܒܗܘܢ ܡܫܬܡܠܝܢ ܘܠܘܬܗܘܢ ܩܝܡܝ̣ܢ. ܠܘ ܐܝܟ ܕܠܢܛܘܪܘܬܗܘܢ. ܐܠܐ ܡܛܠ ܡܛܟܣܘܬܐ. ܒܕܓܘܢ ܟܕ ܡܟܣ ܠܕܝܡܘܦܝܠܘܣ ܡܢܝ̣ܚܢܐ ܐܡ̇ܪ. ܕܫܘܪܬ ܥܠ̣ܬ ܠܒܝܬ ܓܢܝ̣̈ܙܬܐ. ܟܕ ܠܐ ܡܦܣ ܠܟ ܘܠܩܕܘ̈ܫܩܘܕܫܝܢ ܚܡܠܬ. ܘܬܘܒ ܐܡ̣ܪ ܠܗ ܟܕ ܠܗ. ܕܐܢ̱ܬ ܒܝܕ ܡܨܥܝܘܬܐ ܕܡܫܡ̈ܫܢܐ܆ ܡܐ ܕܢܗܘܐ ܙܒܢܐ ܡܢܗܘܢ ܬܬܝܠܦ ܙܕܩܐܝܬ ܗܠܝܢ ܐܠܗܝ̈ܬܐ. ܒܕܓܘܢ ܟܕ ܡܬܚܬܝܢ ܡܢܝ̣̈ܚܢܐ ܡ̣ܢ ܡܫܡ̈ܫܢܐ ܒܗ̇ܝ ܕܒܐܝܕܝ̈ܗܘܢ ܡܬܐܪܙܝ̣ܢ. ܘܪܡܝ̣ܢ ܡ̣ܢ ܥܡܐ. ܒܗ̇ܝ ܕܡܕܟܝܢ ܒܟܠܗ ܚܝܠܗܘܢ. ܒܟܠܗ̇ ܕܟܝܘܬܐ ܘܡܨܠܠܘܬܐ ܓܡܝ̣ܪܬܐ. ܛܝܒܘܬܐ ܡܫܡܠܝܢܝ̣ܬܐ ܠܩܪܝܬܐ ܡܕܡ ܡܟܗܢܢܝ̣ܬܐ ܐܫܘܝܬ݀ ܐܢܘܢ. ܠܐ ܗܘܐ ܪܝܫܬ݀ ܟܗܢܝܬܐ. ܗ̣ܝ ܓܝܪ ܥܠ ܛܟ̈ܣܐ ܟܗ̈ܢܝܐ ܒܠܚܘܕ ܗܘܝܐ. ܐܠܐ ܟܗܢܝܬܐ ܡ̣ܢ ܟܗ̈ܢܐ. ܘܡܢܝ̣̈ܚܢܐ ܡ̇ܢ ܐܬܩܪܝ̣ܘ ܡܛܠ ܢܝ̣ܚܘܬܐ ܘܡܟܝܟܘܬܐ. ܕܡܛܠܬܗܝܢ ܐܦ ܡܘܫܐ ܡܢܝ̣ܚܢܐ ܐܬܩܪܝ̣ ܕܐܠܗܐ. ܝ̣ܚܝ̣̈ܕܝܐ ܕܝܢ ܡܛܠ ܚܝ̈ܐ ܠܐ ܦܠܝ̈ܓܐ ܘܚܕܢܝ̈ܐ ܕܓܒܘ ܠܡܚܐ ܒܗܘܢ. ܘܕܝܪ̈ܝܐ ܡܛܠ ܕܘܝܪܐ ܕܥܡ ܐܠܗܐ. ܘܐ̱ܪ̈ܙܢܝܬܐ ܡ̇ܢ ܕܫܘܡܠܝܗܘܢ ܐܝܬܝܗܘܢ ܗܠܝܢ ܐܝܟ ܕܒܢܩܝ̣ܦܘܬܐ. ܐ ܗ̇ܝ ܕܢܫܐܠܝ̣ܘܗܝ ܟܗܢܐ. ܐܢ ܟ̇ܦܪ ܒܟܠܗܝܢ ܐܪ̈ܣܝܣ ܫܟܝ̣ܪ̈ܬܐ. ܘܡܩܒܠ ܡܫܪܪܐܝܬ ܠܗܝܡܢܘܬܐ ܠܐ ܡܨܛܠܝܢܝ̣ܬܐ ܕܡ̣ܢ ܫܠܝ̈ܚܐ ܩܕܝ̈ܫܐ ܐܬܟܪܙܬ݀. ܘܕܠܘ ܒܠܚܘܕ ܒܚܝ̈ܐ ܦܠܝ̈ܓܐ ܕܐܝܬܝܗܘܢ ܐܡ̈ܢܐ ܥܠܡܢܝ̈ܐ ܠܐ ܚܝܐ. ܐܠܐ ܐܦܠܐ ܡܬܗܓܓܘ ܡܬܗܓܓ ܒܗܘܢ. ܘܟܕ ܡܘܕܐ ܚܘܝ̣ܚܐܝܬ. ܒ ܪܫܡ  ܠܗ ܒܛܘܦܣܐ ܕܨܠܝ̣ܒܐ ܒܫܡܐ ܕܬܠܝܬܝܘܬܐ. ܐܟܡܐ ܕܗܘܐ ܠܗ ܡܟܝܠ ܐܡܪܐ ܚܠܦ ܕܐܒܐ. ܓ ܐܝܛܐ ܬܘܒ ܡܘܣܦ ܡܫܪܪ ܡܘܕܝܢܘܬܗ ܟܕ ܝܗܒ ܝܡܝܢܗ ܘܐܡ̇ܪ ܬܠܝܬܐܝܬ. ܐܢܐ ܨܒܝܬ ܕܐܬܩܪܒ ܠܐܠܗܐ. ܕ ܐܝܛܐ ܡܣܦܪ ܠܗ ܘܫܕܐ ܡܢܗ ܠܣܥܪܐ ܡܝ̣ܬܐ. ܟܕ ܠܫܕܝܐ ܕܥܝ̈ܕܐ ܚܝܘ̈ܬܢܝܐ ܡܝ̣̈ܬܝ ܡ̣ܢ ܐܠܗܐ ܡܐܪܙ ܒܗܟܢ. ܗ ܐܝܛܐ ܡܫܠܚ ܠܗ ܠܒܘܫܗ ܥܬܝ̣ܩܐ. ܐܘܟܝ̣ܬ ܠܒܪܢܫܐ ܥܬܝܩܐ ܕܡܬܚܒܠ ܒܪ̈ܓܝܓܬܐ ܕܛܘܥܝܝ. ܘ ܘܡܠܒܫ ܠܗ ܚܕܬܐ ܟܐܡܬ݀ ܠܒܪܢܫܐ ܕܡܬܚܕܬ݀ ܒܨܠܡܐ ܕܗ̇ܘ ܕܒܪܝܗܝ. ܙ ܘܐܣ̇ܪ ܠܗ ܙܘܢܝ ܐܪܙ ܚܙܩܝܐ ܕܙܕܝܩܘܬܐ. ܚ ܘܣ̇ܐܡ ܠܗ ܟܘܣܝ̣ܬܐ. ܐܪܙ ܟܠܝ̣ܠܐ ܕܟܘ̈ܒܐ ܘܣܢܘܪܬܐ ܕܦܘܪܩܢܐ. ܛ ܘܡܥܛܦ ܠܗ ܫܕܝܐ ܐܘܟܝܬ ܦܪܝ̣ܣܐ ܕܫܘܒܚܐ. ܝ ܐܝܛܐ ܡܫܝ̣ܓ ܠܗ ܪ̈ܓܠܘܗܝ. ܐܪܙ ܕܘܟܝܐ ܕܡ̣ܢ ܨܐܝ̈ܘܬܐ ܒܣܪ̈ܢܝܬܐ. ܝܐ ܘܡܐܣܢ ܠܗ ܣܐܘܢܐ ܐܪܙ ܛܘܝܒܗ ܕܐܘܢܓܠܘܢ. ܝܒ ܐܝܛܐ ܣܐܡ ܒܘܪܟܐ ܠܐܪ̈ܒܥܦܢܝܢ. ܩܘܒܠܛܝܒܘܬܐ ܕܐܚ̈ܐ ܗ̇ܢܘܢ ܕܩܒܠܘܗܝ. ܝܓ ܐܝܛܐ ܡܬܬܣܝ̣ܡ ܠܗ ܨܠܝܒܐ ܥܠ ܟܬܦܗ. ܟܐܡܬ݀ ܕܫܒܩ ܠܥܠܡܐ ܘܫܩܠ ܨܠܝܒܗ ܘܢܩܦ ܡ̣ܢ ܟܕܘ ܠܡܪܗ. ܝܕ ܐܝܛܐ ܝ̇ܗܒܝܢ ܠܗ ܫܠܡܐ ܐ̱ܪܙ ܗ̇ܝ ܕܐܬܒܝܬܝ̣ ܠܗܘܢ. ܕܝܪܝܐ ܕܝܢ ܟܕ ܡܫܬܡܠܐ ܠܐ ܩܥܕ ܐܦܠܐ ܥܠ ܚܕܐ ܡ̣ܢ ܒܘܪ̈ܟܘܗܝ. ܐܠܐ ܩ̇ܐܡ ܒܠܚܘܕ ܩܕܡ ܟܗܢܐ ܗ̇ܘ ܕܒܝܕ ܩܪܝܬܐ ܩܕܝܫܬܐ ܡܫܡܠܐ ܠܗ. ܒܗ̇ܝ ܕܠܐ ܐܝܬܘܗܝ ܡܩܪܒܢܐ ܕܐ̱ܚܪ̈ܢܐ. ܐܠܐ ܕܡܢܗ ܘܠܗ ܩ̇ܐܡ ܒܩܘܡܐ ܝܚܝ̣ܕܝܐ ܘܩܕܝܫܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܫܬܝܬܝܬܐ

 

ܡܛܠ ܫܘܡܠܝܐ ܕܡܘܪܘܢ ܐܠܗܝܐ. ܘܒܗ ܐܝܬ ܢܝ̈ܫܐ ܚܡܫܐ. ܢܝܫܐ ܩܕܡܝܐ ܡܛܠ ܗ̇ܝ ܕܡܢܘ ܡܘܪܘܢ. ܘܠܡܢܘ ܨ̇ܐܪ. ܘܡ̣ܢ ܐܝܟܐ ܡܝܬܝ ܟܘܢܝܗ

 

ܡܘܪܘܢ ܓܝܪ ܐܠܗܝܐ ܐܝܟ ܕܡܫܠܡ ܪܒܐ ܕܝܘܢܘܣܝܘܣ. ܪܘܟܒܐ ܐܝܬܘܗܝ ܕܡ̣ܢ ܗܘ̈ܠܐܣ ܒܣܝ̣̈ܡܬ݀ ܪܝܚܐ. ܐܘܟܝ̣ܬ ܐܝܢܘ̈ܝܬܐ ܗܢܝ̈ܐܬܐ. ܘܠܝܫܘܥ ܗ̇ܘ ܕܡܠܐ ܒܦܘ̈ܠܓܐ ܡܬܝܕ̈ܥܢܐ ܠܡܕܥܐ ܕܝܠܢ ܡ̣ܢ ܗܢܝܐܘܬܐ ܐܠܗܝܬܐ ܨ̇ܐܪ ܘܡܛܦܣ. ܐܝܟ ܕܐܦ ܗ̣ܘ ܟܘܢܝܗ ܗ̇ܘ ܕܡ̣ܢ ܗܪܘܡܬܢܝܘܬܐ ܢܣܝ̣ܒ ܒܝܘܢܝܐ ܡܫܘܕܥ.

 

ܡܛܠ ܗ̇ܝ ܕܡ̣ܢ ܐܝܟܐ ܐܬܝܒܠܬ݀ ܡܫܠܡܢܘܬܗ.

 

ܘܗ̣ܝ ܡ̇ܢ ܡܫܠܡܢܘܬܐ ܘܚܘܫܚܐ ܕܒܗ̇܆ ܡ̣ܢ ܙܒܢܐ ܕܡܬܓܠܝܢܘܬܗ ܕܐܠܗܐ ܥܠ ܡܘܫܐ. ܒܛܘܪܐ ܗ̇ܘ ܣܝܢܝܐ ܢܣܒܬ݀ ܫܘܪܝܐ. ܟܕ ܐܡܪ ܠܗ. ܣܒ ܠܟ ܗܒܒܐ ܕܡܘܪܘܢ ܓܒܝܐ ܚܡܫܡܐܐ ܡܬܩܴ̈ܠܐ. ܘܕܩܝ̣ܢܘܡܘܢ ܗܢܝ̣ ܪܝܚܐ ܡܐܬܝܢ ܡܬܩܴ̈ܠܐ. ܘܡܫܚܐ ܕܙܝܬܐ ܗܡܝܢܐ. ܘܥܒܕܝܗܝ ܡܫܚܐ ܕܡܫܝ̣ܚܘܬܐ ܩܕܝܫܬܐ. ܘܬܡܫܘܚ ܡܢܗ ܠܡܫܟܢܐ ܕܣܗܕܘܬܐ. ܘܠܩܐܒܘܬܐ ܕܣܗܕܘܬܐ. ܘܠܡܢܪܬܐ ܘܠܠܩܢܐ ܘܠܟܢܗ̇. ܘܠܡܕܒܚܐ ܕܝܩ̈ܕܐ ܫܠܡ̈ܐ ܘܩܕܫ ܐܢܘܢ ܘܢܗܘܘܢ ܩܕܝ̣ܫܝ̣ܢ. ܘܟܠ ܕܢܓܫܘܦ ܒܗܘܢ ܢܬܩܕܫ. ܘܡܫܘܚ ܠܐܗܪܘܢ ܘܠܒܢܘ̈ܗܝ. ܘܩܕܫ ܐܢܘܢ ܠܡܟܗܢܘ ܠܝ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܡܛܠ ܡܢܐ ܚܕܐ ܙܒܢ ܒܫܢ̱ܬܐ ܡܬܩܕܫ ܘܗܕܐ ܒܝܘܡ ܚܡܫܐ ܐ̱ܪ̈ܙܐ

 

ܚܕܐ ܙܒܢ ܒܫܢ̱ܬܐ ܡܬܩܕܫ. ܡܛܠ ܗ̇ܝ ܕܚܕܐ ܙܒܢ ܐܦ ܥܡܕ ܒܪܢܫܐ. ܘܒܟܠܝܘܡ ܡܬܒܣܡ ܒܢܣܝ̣ܒܘܬܐ ܕܐ̱ܪ̈ܙܐ ܐܠܗܝ̈ܐ. ܒܕܓܘܢ ܗ̇ܘ ܡܐ ܕܠܘ ܥܦܝ̣ܦܬܐ ܗ̱ܝ ܡܫܬܡܠܝܢܘܬܐ ܕܒܗ܆ ܚܕܐ ܠܟܡܐ ܡܫܬܡܠܐ. ܗ̇ܘ ܕܝܢ ܕܣܒܝ̣ܣܬܐ ܗ̱ܝ ܣܒܝ̣ܣܐܝܬ. ܘܬܘܒ ܡܛܠ ܗ̇ܝ ܕܩܕܘܫܩܘ̈ܕܫܝܢ ܐܝܬܘܗܝ. ܘܚܕܐ ܙܒܢ ܒܫܢ̱ܬܐ ܥ̇ܐܠ ܗ̣ܘܐ ܟܗܢܐ ܒܙܒܢ ܠܩܕܘܫܩܘ̈ܕܫܝܢ ܓܘܝܐ. ܟܕ ܒܗܕܐ ܡܫܘܕܥ ܗ̣ܘܐ ܐܠܗܐ ܫܘܒܚܐ ܠܛܝܒܘܬܗ. ܡܥܠܝܘܬܗ ܕܐܬܪܐ ܗ̇ܘ. ܘܠܐ ܕܠܝ̣ܠܘܬ ܡܬܕܪܟܢܘܬܗ. ܗ̣ܘ ܗܟܘܬ ܘܡܘܪܘܢ ܐܠܗܝܐ. ܒܗ̇ܝ ܕܐ̱ܪܙ ܐܠܗܘܬܐ ܛܥܝ̣ܢ. ܘܒܝܘܡܐ ܡ̇ܢ ܗܢܐ ܕܝ̣ܠܢܝܐ ܕܝ̣ܠܢܐܝܬ ܡܫܬܡܠܐ. ܒܗ̇ܝ ܕܒܗ ܐܫܠܡ ܦܪܘܩܢ ܐ̱ܪ̈ܙܐ ܣܓܝ̈ܐܐ ܠܬܠܡܝ̈ܕܘܗܝ. ܟܕ ܥܬܝܕ ܗ̣ܘܐ ܠܡܨܛܠܒܘ̣ ܥܠ ܐܦܝ̈ ܦܘܪܩܢܢ. ܘܬܘܒ ܐ̱ܪܙ ܐܢ̱ܬܬܐ ܗ̇ܝ ܕܡܫܚܬ݀ ܒܡܫܚܐ ܡܒܣܡܐ ܪ̈ܓܠܘܗܝ܆ ܒܗ ܒܝܘܡܐ ܗܢܐ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܡܛܠܡܢܐ ܡ̣ܢ ܬܪܝܢ ܡܫܚܢܝ̈ܢ ܡܬܪܟܒ ܒܠܐܣܡܘܢ ܘܙܝܬܐ

 

ܐܡܪܝܢܢ ܕܡܘܪܘܢ ܠܗ ܠܝܫܘܥ ܦܪܘܩܢ ܨ̇ܐܪ. ܐܝܟ ܕܩܕܡܬ݀ ܐܬܐܡܪܬ݀. ܘܒܕܓܘܢ ܐܟܡܐ ܕܐܦ ܡܪܢ ܡ̣ܢ ܬܪܝܢ ܡ̣ܢ ܐܠܗܘܬܐ ܘܡ̣ܢ ܐ̱ܢܫܘܬܐ. ܗ̣ܘ ܗܟܘܬ ܘܡܘܪܘܢ. ܟܕ ܒܠܐܣܡܘܢ ܡ̇ܢ ܒܗ̇ܝ ܕܠܘ ܒܟܠܕܘܟ ܡܨܐ ܠܡܫܬܟܚܘ. ܐܠܐ ܒܚܕ ܒܠܚܘܕ ܐܬܪܐ ܐܒܐܝܓܘܦܛܘܣ ܕܝ̣ܠܢܐܝܬ. ܠܐܠܗܘܬܐ ܓܢܝ̣ܙܬܐ ܡܫܘܕܥ. ܙܝܬܐ ܕܝܢ ܒܗ̇ܝ ܕܒܟܠܕܘܟ ܕܠܝ̣ܠܐܝܬ ܡܫܬܟܚ ܠܐܢܫܘܬܐ ܡܫܘܕܥ. ܡܢܗ ܕܝܢ ܘܠܘ ܡ̣ܢ ܡܫܚܐ ܐ̱ܚܪܢܐ ܡܬܪܟܒ. ܒܥܠܬ݀ ܗ̇ܝ ܕܗ̣ܘ ܝܬܝܪ ܡ̣ܢ ܟܠܗܘܢ ܡܫ̈ܚܢܐ ܥܘܗܕܢܐ ܩܢܐ ܡܩܠܣܐ ܒܟܬܒ̈ܐ ܩܕܝ̈ܫܐ. ܐܢܐ ܠܡ ܐܝܟ ܙܝܬܐ ܡܫܒܚܐ ܒܒܝܬܗ ܕܐܠܗܐ. ܐܦ ܓܝܪ ܘܡܫܚܐ ܗ̇ܘ ܩܕܡܝܐ ܡܢܗ ܐܬܪܟܒ. ܣܒ ܠܡ ܡܫܚܐ ܕܙܝܬܐ ܐܡ̣ܪ ܐܠܗܐ.

 

 

 

ܢܝܫܐ ܪܒܝܥܝܐ ܡܛܠܗܝ̇ ܕܫܘ̈ܝܝ ܒܛܟܣܐ ܐܝܬܝܗܘܢ ܡܘܪܘܢ ܘܐ̱ܪ̈ܙܐ ܡܚܝ̈ܢܐ ܐܘ ܡܫܚܠܦܝܢ

 

ܩܕܝܫܐ ܕܝܘܢܘܣܝܘܣ ܫܘܐ ܒܛܟܣܐ ܣ̇ܐܡ ܠܗ ܠܡܘܪܘܢ ܐܠܗܝܐ ܥܡ ܐ̱ܪ̈ܙܐ ܡܚ̈ܝܢܐ ܟܕ ܐܡ̇ܪ. ܐܝܬܝܗ̇ ܡ̇ܢ ܗܟܝܠ ܐܝܟܢܐ ܕܐܡܪܬ. ܥܒܝ̣ܕܘܬ ܫܘܡܠܝܐ ܩܕܝܫܬܐ ܗܕܐ܆ ܕܗܫܐ ܡܫܬܟܚܐ ܡܢܢ܆ ܡ̣ܢ ܛܘܟܣܐ. ܘܚܝܠܐ ܡܫܡܠܝܢܐ ܕܗ̇ܢܝܢ ܪܝܫܬ݀ ܟܗܢܝ̈ܬܐ. ܡܛܠܡܢܐ ܡܗܕܝܢܝ̣̈ܢ ܐܠܗܝ̈ܐ܆ ܐܝܟ ܕܠܫܘܝܬ݀ ܒܛܟܣܐ܇ ܠܫܘܡܠܝܐ ܐܠܗܝܐ ܕܟܢܘܫܝܐ ܐܘܟܝ̣ܬ ܩܘܪܒܐ. ܘܕܗ̣ܘ ܗܟܘܬ ܡܬܛܟܣܐ ܛܟܣܘܗ̇. ܐܝܟ ܕܒܣܘܓܐܐ ܒܝܕ ܝܘܩ̈ܢܐ ܩܕܝ̈ܫܐ ܘܨܒ̈ܬܐ ܐ̱ܪ̈ܙܢܝܐ. ܘܒܕܘܟ ܐ̱ܚܪܝܢ ܗ̣ܘ ܩܕܝܫܐ ܠܐܘܟܪܣܛܝܐ ܝܬܝ̣ܪ ܡܫܡܠܝܬܐ ܐܡ̇ܪ ܠܗ̇ ܡ̣ܢ ܫܪܟܐ ܕܫܘܡ̈ܠܝܐ. ܐܡ̣ܪ ܠܗ̇ ܡ̣ܢ ܫܪܟܐ ܕܫܘܡ̈ܠܝܐ. ܐܡ̣ܪ ܓܝܪ ܒܩܦܠܐܘܢ ܕܬܠܬܐ ܕܡܐܡܪܐ ܕܬܪܝܢ. ܐܢܗܘ ܗܟܝܠ ܕܟܠ ܚܕ ܡ̣ܢ ܫܘܡܠܝ̈ܐ ܕܪܝ̣ܫܘܬ ܟܗܢܘܬܐ. ܟܕ ܠܐ ܡܫܡܠܝܐ ܐܝܬܘܗܝ ܠܐ ܡܫܡܠܐ ܠܫܘܬܦܘܬܐ ܘܟܘܢܫܐ ܕܝܠܢ  ܕܠܘܬ ܚܕ. ܒܕܓܠܝ̣ܙ ܡ̣ܢ ܗ̇ܝ ܕܢܗܘܐ ܫܘܡܠܝܐ ܡܛܠ ܠܐ ܡܫܡܠܝܘܬܗ. ܫܘܡܠܝܐ ܕܝܢ ܘܣܟܐ ܠܟܠܗܘܢ ܐܝܬܝܗ̇܆ ܫܘܬܦܘܬܐ ܕܗ̇ܘ ܕܡܫܬܡܠܐ ܥܡ ܐ̱ܪ̈ܙܐ ܕܪܝܫܘܬ ܐܠܗܘܬܐ. ܐ̱ܚܪ̈ܢܐ ܕܝܢ ܐ̱ܚܪ̈ܝܐ ܐܡܪܝܢ. ܐܠܘܠܐ ܡܘܪܘܢ ܡܥܠܝ ܗ̣ܘܐ܇ ܐܝܟܢܐ ܡ̣ܢ ܒܠܥܕܘ̈ܗܝ ܠܐ ܩܘܪܒܐ ܡܬܩܪܒ ܗ̣ܘܐ. ܐܦܠܐ ܚܕܐ ܡ̣ܢ ܟܝܪ̈ܘܛܘܢܝܐܣ ܡܫܬܡܠܝܐ ܗܘܬ݀. ܘܐܝܟܢܐ ܡ̇ܢ ܚܕܐ ܙܒܢ ܒܫܢ̱ܬܐ ܡܬܩܕܫ ܗ̣ܘܐ ܐܝܟ ܩܕܘܫܩܘ̈ܕܫܝܢ. ܘܐ̱ܪ̈ܙܐ ܟܠܝܘܡ ܡܫܬܡܠܝܢ. ܐܝܟ ܐܬܪܐ ܕܠܒܪ ܡ̣ܢ ܩܕܘܫܩܘ̈ܕܫܝܢ. ܘܐܝܟܢܐ ܬܘܒ ܪ̈ܝܫܟܗܢܐ ܡ̇ܢ ܗ̇ܘ ܕܝܬܝܪ ܪܡ. ܗ̣ܘ ܒܠܚܘܕܘܗܝ ܡܟܢ ܠܡܫܡܠܝܘܬܗ. ܠܐܪ̈ܙܐ ܕܝܢ ܟܠ ܡ̇ܢ ܕܗ̣ܘ ܡ̣ܢ ܟܗ̈ܢܐ. ܘܐܝܟܢܐ ܬܘܒ ܐܡܪܝܢ ܠܘ ܝܬܝܪ ܡܥܠܝ. ܘܗܐ ܐ̱ܪܙ ܐܠܗܘܬܗ ܐܟܚܕܐ ܘܐ̱ܢܫܘܬܗ ܕܡܪܢ ܨ̇ܐܪ. ܘܐ̱ܪ̈ܙܐ ܡܚ̈ܝܢܐ ܐ̱ܪܙ ܐ̱ܢܫܘܬܗ ܒܠܚܘܕ ܕܦܪܘܩܢ. ܟܐܡܬ݀ ܕܦܓܪܗ ܘܕܡܗ.

 

 

 

ܢܝܫܐ ܚܡܝܫܝܐ ܡܛܠ ܐ̱ܪ̈ܙܝ ܫܘܡܠܝܗ ܕܡܘܪܘܢ

 

ܐܡܪܝܢܢ ܕܗ̇ܝ ܕܬܠܬ ܓܘ̈ܕܐ ܡܩܝ̣ܡܝ̣ܢܢ ܒܫܘܡܠܝܗ. ܐ̱ܪܙ ܬܠܬ ܥܕ̈ܬܐ ܕܒܫܡܝܐ. ܘܗ̇ܝ ܕܬܪܬܝܢ ܬܫܡ̈ܫܬܐ ܠܬܪ̈ܬܝܗܝܢ ܕܝܬܝ̈ܩܐܣ ܡܫܘ̈ܕܥܢ. ܘܟܪܘܟܝܐ ܩܕܡܝܐ. ܠܢܒܝܘܬܐ ܕܐܬܟܪܟܬ݀ ܥܡܘܛܐܝܬ ܒܥܠܡܐ ܡܫܘܕܥܐ. ܒܚܘܝܕܐ ܡ̇ܢ ܕܬܪ̈ܝܗܘܢ ܡܫ̈ܚܐ ܒܩܣܛܐ ܒܫܘܪܝ ܬܫܡܫܬܐ ܬܪܝܢܝܬܐ ܠܒܛܢܗ̇ ܕܒܬܘܠܬܐ ܨ̇ܐܪ. ܘܥܘܢܝ̣ܬܐ ܕܫܘܒܚܐ ܠܐܠܗܐ ܒܡܪ̈ܘܡܐ ܠܝܠܕܐ. ܟܪܘܟܝܐ ܕܝܢ ܘܡܦܩܬܐ ܕܡ̣ܢ ܒܝܬ ܓܙܐ. ܠܗܘܦܟܗ ܕܡܪܢ ܒܥܠܡܐ ܨ̇ܐܪ. ܘܩܥܬܐ ܩܕܡܝܬܐ ܕܣܘܦܝܐ ܠܙܥܩܬܐ ܕܥܠ ܝܘܪܕܢܢ ܪܫܡܐ. ܘܗ̇ܝ ܕܬܪܬܝܢ ܠܗܝ ܕܒܛܘܪ ܙܝ̈ܬܐ. ܘܡܬܓܠܝܢܘܬܐ ܕܡܘܪܘܢ ܥܠ ܡܕܒܚܐ܆ ܠܗ̇ܝ ܕܡܪܢ ܕܐܫܬܠܚ ܡ̣ܢ ܢܚ̈ܬܘܗܝ ܒܙܩܝ̣ܦܐ ܪܫܡܐ. ܘܡܬܬܣܝ̣ܡܢܘܬ ܡܘܪܘܢ ܥܠ ܛܒܠܝ̣ܬܐ܆ ܐ̱ܪܙ ܨܠܝ̣ܒܘܬܗ ܕܡܫܝܚܐ. ܨܠܘ̈ܬܐ ܕܝܢ ܘܨܠܝ̈ܒܐ ܕܥܠ ܡܘܪܘܢ. ܐ̱ܪܙ ܡܘܬܗ ܘܡܚܬܬܗ ܕܠܫܝܘܠ ܡܒܕܩܝ̣ܢ. ܘܡܬܬܪܝ̣ܡܢܘܬܗ̇ ܕܩܣܛܐ ܡ̣ܢ ܦܬܘܪܐ ܐ̱ܪܙ ܩܝܡܬܐ. ܘܡܣܩܬܐ ܕܠܒܐܡܐ܆ ܐ̱ܪܙ ܣܘܠܩܐ ܕܠܫܡܝܐ. ܘܙܘܝܚܐ ܒܘܪܟܐ ܕܠܫܠܝ̈ܚܐ. ܘܡܚܬܬܗ ܕܡ̣ܢ ܒܐܡܐ܆ ܡܚܬܬܐ ܕܪܘܚܐ ܦܪܩܠܝܛܐ. ܘܡܪ̈ܘܚܐ ܬܪܥܣܪ ܠܙܘܓܐ ܕܣܪ̈ܦܐ ܫܬܝ̣̈ܬܝܝ ܓܦ̈ܐ ܡܫܘܕܥܝܢ. ܘܦܝܪ̈ܡܐ ܬܘܒ ܬܪܥܣܪ܆ ܠܬܪܥܣܪ ܫܠܝ̈ܚܐ ܗ̇ܢܘܢ ܕܦܚ ܪܝܚ ܟܪܘܙܘܬܗܘܢ ܒܥܠܡܐ ܪܫܡܝ̣ܢ. ܘܬܪܥܣܪ ܢܗܝܪ̈ܐ ܠܗ̇ ܟܕ ܠܗ̇ ܠܡܠܦܢܘܬܗܘܢ ܗ̇ܝ ܕܒܗ̇ ܬܒܝܠ ܐܬܢܗܪܬ݀ ܡܫܘܕܥܝ̣ܢ.

 

 

 

 

 

 

 

     #1 

 

ܦܣܘܩܐ ܬܠܝܬܝܐܐ ܕܩܦܠܐܘܢ ܬܪܝܢܐ ܕܫܬܐܣܬܐ ܫܬܝܬܝܬܐ

 

ܡܛܠ ܫܘܡܠܝܐ ܗ̇ܘ ܕܒܡܢܗܪܢܘܬܐ ܐܘܟܝܬ ܥܡܕܐ. ܘܒܗ ܐܝܬ ܢܝ̈ܫܐ ܚܡܫܐ. ܢܝܫܐ ܩܕܡܝܐ ܡܛܠ ܗ̇ܝ ܕܡܢܘ ܫܘܡܠܝܐ ܕܒܥܡܕܐ ܘܕܒܕܐܝܟ ܐܝܠܝܢ ܡܬܩܢܐ

 

ܫܘܡܠܝܐ ܡ̇ܢ ܕܒܝܕ ܥܡܕܐ ܐܝܬܘܗܝ܆ ܒܝܬܝܘܬܐ ܕܠܘܬ ܐܠܗܐ. ܒܝܕ ܫܘܢܝܐ ܕܡ̣ܢ ܚܝ̈ܐ ܛܦܝ̣̈ܦܐ ܘܚܫ̈ܐ ܒܣܪ̈ܢܝܐ. ܘܐܟܡܐ ܕܒܨܡ̈ܚܐ ܕܙܠܝ̣̈ܩܐ ܫܡܫܢܝ̈ܐ ܒܒ̈ܒܬܐ ܢܣܝ̣̈ܣܬܐ. ܠܘ ܕܠܐ ܩܝ̣ܢܕܘܢܘܣ ܗ̣ܝ ܠܡܐܨܕܘ. ܒܗ̇ ܒܕܡܘ̣ܬܐ ܘܒܠܥܕ ܢܘܟܪܝܘܬܐ ܕܡ̣ܢ ܚܫ̈ܐ ܕܐܝܟ ܗܠܝܢ ܠܘܬ ܒܝܬܝܘܬܐ ܕܐܝܟ ܗܕܐ ܠܡܬܩܪܒܘ. ܠܐ ܠܐ ܙܗܝ̣ܪܐ. ܡܛܠ ܗܕܐ ܘܢܡܘܣܐ ܠܥܘܙܝܐ ܐ̱ܢܫ ܘܠܩܘܪܚ ܘܠܢܕܒ ܘܐܒܝܗܘ ܕܒܕܘܟ̈ܝܬܐ ܠܐ ܕܟܝܐܝܬ ܓܫܦܘ܇ ܐܣܠܝ̣. ܘܗܝܡܢܘܬܐ ܡ̇ܢ ܕܐܝܬܝܗ̇. ܫܠܡܘܬܐ ܕܢܦܫܐ ܡܠܝ̣ܠܬܐ ܠܗ̇ܢܝܢ ܕܒܝܕ ܚܘܫܒܐ ܐܘ ܡ̣ܢ ܟܬܒܐ. ܐܕܪܟܬ݀ ܐܘ ܫܡܥܬ݀ ܘܐܬܬܪܬ݀. ܥܠܬܐ ܗ̇ܝ ܕܝܐܝ̣ܒܘܬܐ ܕܠܘܬ ܒܝܬܝܘܬܐ ܕܐܬܐܡܪܬ݀. ܘܒܝܬܝܘܬܐ ܥܠܬܐ ܗ̱ܝ ܕܢܛܘܪܘܬ ܦܘܩ̈ܕܢܐ. ܘܢܛܘܪܘܬ ܦܘܩ̈ܕܢܐ ܥܠܬܐ ܗ̱ܝ ܕܡܬܬܚܒܢܘܬܐ ܕܗ̇ܘ ܕܐܚܒ ܡܢܗ ܕܗ̇ܘ ܕܐܬܬܚܒ. ܐܝܟ ܕܗ̣ܘ ܡܪܝܐ ܐܡ̣ܪ. ܕܗ̇ܘ ܕܡܚܒ ܠܝ ܡܠܬܝ ܢܛܪ. ܘܐܒܝ ܢܚܒܝ̣ܘܗܝ. ܘܗܟܢܐ ܙܕܩ ܠܡܣܬܟܠܘܬܗ̇ ܠܫܫܠܬܐ ܕܫܘܡܠܝܐ ܕܐܝܟ ܗܢܐ. ܕܪܝܫܐ ܡ̇ܢ ܘܥܠܬ݀ ܥ̈ܠܬܐ ܠܗܝܡܢܘܬܐ ܩܢܐ. ܫܘܠܡܐ ܕܝܢ ܘܥܠܬܢܐ ܠܪܚܡܬܐ ܕܡ̣ܢ ܐܠܗܐ.

 

 

 

ܢܝܫܐ ܬܪܝܢܐ ܡܛܠ ܗ̇ܝ ܕܒܟܡܐ ܘܐܝܠܝܢ ܟܘ̈ܢܝܐ ܡܬܟܢܐ ܗ̣ܘ ܫܘܡܠܝܐ ܗܢܐ

 

ܒܬܠܬܐ ܟܘ̈ܢܫܐ ܡܬܟܢܐ. ܩܕܡܝܬ݀ ܡ̇ܢ܆ ܥܡܕܐ ܘܡܥܡܘܕܝܬܐ. ܒܗ̇ܝ ܕܒܡܚܬܬܐ ܕܒܡܝ̈ܐ. ܘܫܝܓܬܐ ܕܡ̣ܢ ܟܘܬܡ̈ܬܐ ܢܦܫܢܝ̈ܬܐ ܐܘܟܝ̣ܬ ܚܛܗ̈ܐ ܡܬܛܦܣܐ. ܕܬܪܝܢ ܕܝܢ ܡܢܗܪܢܘܬܐ ܒܗ̇ܝ ܕܟܕ ܡ̣ܢ ܚܫܘܟܘܬܐ ܕܠܐ ܝ̣ܕܥܬܐ ܡܣܛܐ ܗ̇ܘ ܕܥܡܕ܆ ܠܘܬ ܡܬܢܗܪܢܘܬܐ ܕܒܝ̣ܕܥܬܐ ܕܐܠܗܐ ܡܬܩܪܒ. ܕܬܠܬܐ ܕܝܢ ܡܘܠܕܐ ܕܡ̣ܢ ܕܪܝܫ. ܡ̣ܢ ܦܚܡܐ ܕܠܘܬ ܡܘܠܕܐ ܩܕܡܝܐ ܕܡ̣ܢ ܐܢ̱ܬܬܐ. ܘܐܟܡܐ ܕܒܝܕ ܡܘܠܕܐ ܗ̇ܘ ܩܕܡܝܐ ܗ̇ܝ ܕܢܗܘܐ ܦܫܝ̣ܛܐܝܬ ܐܫܬܟܢܬ݀ ܠܢ. ܒܗܕܐ ܕܬܪܬܝܢ ܕܡ̣ܢ ܡܝ̈ܐ ܘܪܘܚܐ ܗ̇ܝ ܕܫܦܝܪ ܢܗܘܐ. ܘܒܗܘ̇ ܕܡܝܬܪ ܢܬܕܡܐ.

 

 

 

ܢܝܫܐ ܬܠܝܬܝܐ ܡܛܠܗ̇ܝ ܕܡܛܠ ܡܢܐ ܡ̣ܢ ܡܝ̈ܐ ܘܪܘܚܐ ܥܒܕܗ̇ ܡܪܢ ܠܡܥܡܘܕܝܬܐ

 

ܒܗ̇ܝ ܕܡܝ̈ܐ ܡ̇ܢ ܛܒ ܡ̣ܢ ܬܠܬܐ ܐܣܛܘ̈ܟܣܐ ܐ̱ܚܪ̈ܢܐ ܠܨܐܝܘܬܐ ܕܓܘܫ̈ܡܐ ܡܥܕܝ̣ܢ ܠܡܚܠܠܘ. ܪܘܚܐ ܕܝܢ ܡܕܟܝܢܝ̣ܬܐ ܗ̱ܝ ܕܨܐܘܬ ܢܦܫܐ. ܒܝܕ ܟܦܘܪܝܐ ܕܒܣܛܢܐ ܘܥܒܕܘ̈ܗܝ.

 

ܢܝܫܐ ܪܒܝܥܝܐ ܡܛܠ ܙܢܝ̈ܐ ܕܡܥܡܘ̈ܕܝܬܐ

 

ܬܡܢܝܐ ܓܝܪ ܐܝܬܝܗܘܢ ܙܢܝ̈ܐ ܗܠܝܢ. ܚܕ ܡ̇ܢ ܙܢܐ܆ ܗ̇ܝ ܕܒܛܘܦܢܐ ܕܕܟܝܬ݀ ܠܥܠܡܐ ܡ̣ܢ ܥܘܠܐ. ܕܬܪܝܢ܇ ܕܒܝܕ ܝܡܐ ܘܥܢܢܐ. ܕܒܗ̇ ܥܡ̣ܕܘ ܐܝܣܪ̈ܠܝܐ ܐܝܟ ܕܐܡ̣ܪ ܦܘܠܘܣ. ܕܬܠܬܐ. ܗ̇ܝ ܢܡܘܣܝܬܐ ܕܒܝܕ ܡܘܫܐ ܕܡܬܩܪܝܐ ܕܕܘܟܝ̈ܐ. ܕܐܪܒܥܐ܆ ܗ̇ܝ ܕܝܘܚܢܢ ܕܒܡܝ̈ܐ ܒܠܚܘܕ ܠܬܝܒܘܬܐ. ܕܚܡܫܐ ܗ̇ܝ ܕܡܪܢ ܕܐܝܬܝܗ̇ ܣܝ̣ܡܬ݀ ܒܢܝ̈ܐ ܒܡܝ̈ܐ ܘܒܪܘܚܐ. ܕܫܬܐ ܗ̇ܝ ܕܣܗ̈ܕܐ. ܣܓܝ̈ܐܐ ܓܝܪ ܡܢܗܘܢ܆ ܒܕܡܐ ܒܠܚܘܕ ܕܨܘܪ̈ܝܗܘܢ ܥܡܕܘ. ܕܫܒܥܐ܆ ܗ̇ܝ ܕܕܡ̈ܥܐ. ܒܗܝܢ ܓܝܪ ܡܬܕܟܐ ܗ̣ܘܐ ܕܘܝܕ. ܟܕ ܒܕܡܥܘ̈ܗܝ ܬܫܘܝ̣ܬܗ ܡܡܣܐ. ܕܬܡܢܝܐ܆ ܗ̇ܝ ܕܒܢܘܪܐ ܕܥܠܝܗ̇ ܐܡ̣ܪ ܬܐܘܠܘܓܘܣ. ܕܓܕܫܐ ܕܬܡܢ. ܒܢܘܪܐ ܥܡܕܝ̣ܢ. ܡܥܡܘܕܝܬܐ ܐ̱ܚܪܝܬܐ ܗ̇ܝ ܕܝܬܝܪ ܥܡܝ̣ܠܐ.

 

 

 

ܢܝܫܐ ܚܡܝܫܝܐ ܡܛܠ ܐ̱ܪ̈ܙܝ ܫܘܡܠܝܗ ܕܥܡܕܐ

 

ܗ̇ܝ ܓܝܪ ܕܠܘܬ ܐ̱ܢܫ ܕܐܬܐܪܙ ܢܐܬܐ ܗ̇ܘ ܕܨܒܐ ܠܡܥܡܕ ܘܡܦܝ̣ܣ ܠܗ ܕܢܗܕܝܘܗܝ. ܘܢܗܘܐ ܠܗ ܩܝܘܡܐ ܒܡܬܩܪܒܢܘܬܗ ܠܪܬܚܗ ܕܠܘܬ ܚܝ̈ܐ ܠܐ ܥܕܝ̈ܠܐ ܘܡܝܬܪ̈ܐ ܡܫܘܕܥܐ. ܘܗ̇ܝ ܕܡܩܒܠ ܥܠܘܗܝ ܗ̣ܘ ܥܪܒܐ ܩܝܘܡܘܬܐ ܕܐܝܟ ܗܕܐ. ܠܣܘܝ̣ܚܘܬܗ ܕܠܦܘܪܩܢ ܗ̇ܘ ܡܫܘܕܥܐ. ܘܡܬܟܬܒܢܘܬܐ ܕܫܡܗ ܕܥܡܝ̣ܕܐ܆ ܠܗ̇ܝ ܕܥܡ ܒܢܝ̈ܐ ܕܐܠܗܐ ܡܬܡܢܐ ܡܫܘܕܥܐ ܘܡܬܟܬܒܢܘܬܐ ܕܫܡܗ ܕܡܗܕܝܢܐ. ܠܗ̇ܝ ܕܠܐ ܡܗܡܐ ܡ̣ܢ ܡܫܒܠܘܬܗ ܕܗ̇ܘ ܡܫܪܪܐ. ܘܡܫܬܠܚܢܘܬܗ ܕܠܡܐܢ̈ܐ ܘܚܫ̈ܠܬܐ ܠܗ̇ܝ ܕܡܫܬܠܚ ܠܒܪܢܫܐ ܥܬܝܩܐ ܡܫܘܕܥܐ. ܘܡܘܡܝܢܘܬܐ ܠܫܘܪܪܗ ܕܫܘܘܕܝܐ ܡܚܘܝܐ. ܘܚܬܡܐ ܕܒܨܠܝܒܐ ܬܠܬ ܙܒܢܝ̈ܢ ܠܩܕܝ̣ܡܘܬ ܪܘܫܡܐ ܡܫܘܕܥ. ܘܗ̇ܝ ܕܡܬܦܢܐ ܠܡܥܪܒܐ ܘܕܚܐ ܒܐܝ̈ܕܘܗܝ܆ ܠܕܚܝܐ ܕܟܠܗܘܢ ܚܝ̈ܠܐ ܚܫܘ̈ܟܝܐ ܡܫܘܕܥܐ. ܘܡܬܦܢܝܢܘܬܐ ܕܠܡܕܢܚܐ ܠܫܘܢܝܐ ܕܡ̣ܢ ܚܫܘܟܐ ܠܢܗܝܪܐ ܡܘܕܥܐ. ܘܡܫܝ̣ܚܘܬܐ܆ ܠܐܓܘ̈ܢܐ ܪܘܪ̈ܒܐ ܕܥܡ ܣܛܢܐ ܡܫܘܕܥܐ. ܐܝܟ ܕܐܦ ܐܬܠܝ̈ܛܐ ܘܕܪܪ̈ܐ ܡܬܦܪܣܝܢ ܘܒܝܕ ܡܫܝܚܘܬܐ ܡܫܬܪ̈ܥܢܐ ܗܘܝܢ ܡ̣ܢ ܗ̇ܢܘܢ ܕܡܩܪܒܝܢ. ܘܢܦܚ ܟܗܢܐ ܒܡܝ̈ܐ ܕܢܩܒܠܘܢ ܪܘܚܐ ܕܩܘܕܫܐ. ܘܐܫܕ ܥܠ ܡܝ̈ܐ ܡܘܪܘܢ܆ ܛܘܦܣܐ ܕܪܘܚܐ ܕܐܠܗܐ ܕܡܪܚܦܐ ܗܘܬ݀ ܥܠ ܐܦܝ̈ ܡܝ̈ܐ. ܘܓܡܥܐ ܕܒܐܘܙܢܐ ܬܠܬ ܙܒܢܝ̣̈ܢ ܠܩܒܘܪܬܐ ܬܠܝ̣ܬܝܬ݀ ܝܘ̈ܡܐ ܕܡܪܝܐ ܨ̇ܐܪ. ܐܝܟ ܕܐܡ̣ܪ ܦܘܠܘܣ. ܕܐܝܠܝܢ ܕܥܡܕܝܢ ܒܡܫܝܚܐ܆ ܒܡܘܬܗ ܗ̣ܘ ܥܡܕܝ̣ܢ. ܘܣܝܡܐ ܕܐܝܕܗ ܕܟܗܢܐ ܥܠ ܪܝܫܗ ܠܗ̇ܝ ܕܐܫܠܡܘ ܠܢ ܐܒܗ̈ܬܐ ܕܝܘܚܢܢ ܣܡ ܐܝܕܗ ܥܠ ܪܝܫܗ ܕܡܪܢ. ܘܐܦܢ ܒܐܘܢܓܠܝܘܢ ܠܐ ܟܬܝ̣ܒܐ. ܘܗ̇ܝ ܕܥܡܕ ܦܠܢ ܒܫܡ ܐܒܐ ܘܒܪܐ ܘܪܘܚܐ܆ ܠܦܘܩܕܢܗ ܕܡܪܢ ܡܡܠܝܐ ܕܐܡ̣ܪ. ܦܘܩܘ ܬܠܡܕܘ ܘܐܥܡܕܘ ܥܡ̈ܡܐ ܘܫܪܟܐ. ܘܡܣܩܬܗ ܕܡ̣ܢ ܐܘܙܢܐ܆ ܠܩܝܡܬܐ ܡܫܘܕܥܐ. ܘܠܒܘ̈ܫܐ ܚܘܪ̈ܐ. ܠܐܣ̈ܛܠܐ ܢܗܝܪ̈ܬܐ ܕܠܐ ܡܬܚܒܠܢܘܬܐ ܡܛܦܣܝ̣ܢ. ܘܐܘܪܪ̈ܐ ܕܚܙܩܝܢ ܠܗ ܒܪܝܫܗ܆ ܠܚܐܪܘܬܐ ܕܩܒܠ ܡܫܘܕܥ. ܘܢܗܝܪ̈ܐ ܕܐܬܝܢ ܩܕܡܘܗܝ. ܠܗ̇ܝ ܕܡ̣ܢ ܟܕܘ ܐܬܢܗܪ ܡܘܕܥܝ̣ܢ. ܘܒܣ̈ܡܐ ܕܡܬܬܥܛܪܝܢ܆ ܠܕܘܒܪ̈ܐ ܩܕܝ̈ܫܐ ܕܥܬܝܕ ܕܢܩܪܒ ܠܐܠܗܐ ܘܡܢܝ̣ܚ ܠܗ ܨܝܪܝ̣ܢ. ܘܬܫܡܫܬܐ ܕܐܬܐ ܒܗ̇ ܠܗܝܟܠܐ܆ ܠܚܕܘܬܐ ܕܡܠܐܟ̈ܐ ܡܒܕܩܐ. ܘܡܥܠܬܗ ܕܠܩܕܘܫ ܩܘܕ̈ܫܝܢ. ܠܡܬܩܪܒܢܘܬܗ ܕܠܘܬ ܐܝܠܢܐ ܕܚܝ̈ܐ܇ ܕܡܢܗ ܐܬܓܠܙ ܘܐܬܓܙܝ̣ ܐܕܡ ܡܫܘܕܥܐ. ܘܢܣܝ̣ܒܘܬܐ ܕܐ̱ܪ̈ܙܐ܆ ܠܗ̇ܝ ܕܗܕܡܐ ܗ̣ܘܐ ܠܗ ܕܡܫܝܚܐ ܨܝܪܐ. ܘܠܐ ܡܬܬܫܝ̣ܓܢܘܬܗ ܫܒܥܐ ܝܘܡܝ̈ܢ. ܠܠܐ ܡܣܛܝܢܘܬܐ ܕܚܝܠܐ ܟܣܝܐ ܩܒܠ ܡܘܕܥܐ.

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܫܬܝܬܝܬܐ

 

ܡܛܠ ܫܘܡܠܝܐ ܕܩܘܪܒ ܩܘܪܒܢܐ ܐܘܟܝ̣ܬ ܩܨܝܐ ܕܐܘܟܪܣܛܝܐ. ܘܒܗ ܐܝܬ ܢܝ̈ܫܐ ܥܣܪܐ. ܢܝܫܐ ܩܕܡܝܐ ܡܛܠ ܗ̇ܝ ܕܡܢܘ ܫܘܡܠܝܐ ܕܒܐܪ̈ܙܐ ܡܚ̈ܝܢܐ ܘܕܒܟܡܐ ܟܘ̈ܢܝܐ ܡܬܟܢܐ ܘܡܛܠ ܡܢܐ

 

ܗ̣ܘ ܓܝܪ ܫܘܡܠܝܐ ܗܢܐ ܡܬܪܫܡ ܕܐܝܬܘܗܝ܆ ܫܘܬܦܘܬܐ ܕܠܘܬ ܐܠܗܐ ܘܐܠܗܝ̈ܬܐ. ܒܡܨܥܝܘܬܐ ܕܫܘܬܦܘܬܐ ܕܒܦܓܪܐ ܘܟܣܐ ܕܒܛܝܒܘܬܐ ܘܠܘ ܒܟܝܢܐ. ܒܣܪܐ ܐܢܘܢ ܘܕܡܐ܆ ܘܠܐܠܗܐ ܡܠܬܐ ܐܫܬܘܬܦܘ ܒܚܕܝܘܬܐ. ܘܒܫܬܐ ܟܘ̈ܢܝ̣ܝ̣ܢ ܡܬܟܢܐ. ܚܕ ܡ̇ܢ ܟܢܘܫܝܐ. ܡܛܠ ܕܡܟܢܫ ܠܚܝ̈ܐ ܦܠܝ̣̈ܓܐ ܕܒܢ܆ ܠܘܬ ܚܕܝܘܬܐ ܕܥܡ ܗܠܝܢ ܐܠܗܝ̈ܬܐ. ܕܬܪܝܢ ܕܝܢ ܫܘܬܦܘܬܐ. ܡܛܠ ܕܒܢܣܝ̣ܒܘܬܗܘܢ ܕܐ̱ܪ̈ܙܐ ܗܘܝܢܢ ܗܕܡ̈ܐ ܕܡܫܝܚܐ. ܕܬܠܬ܆ ܩܘܪܒܐ. ܡܛܠ ܕܒܗ ܐܬܩܪܒܘ ܠܚܕ̈ܕܐ ܘܠܐܠܗܐ܇ ܥܡܐ ܘܥܡ̈ܡܐ. ܕܐܪܒܥܐ ܕܗ̣ܘ ܠܗ ܩܪܒ ܠܐܒܘܗܝ ܩܘܪܒܢܐ ܚܠܦܝܢ. ܕܚܡܫܐ ܐ̱ܪ̈ܙܐ ܡܛܠ ܗ̇ܝ ܕܐ̱ܪܙܢܐܝܬ ܐܓܥܠܗ ܡܪܝܐ ܠܬܠܡܝ̈ܕܘܗܝ ܒܥܠܝ̣ܬܐ. ܕܫܬܐ ܓܡܝ̣ܪܘܬ ܓܡܝܪ̈ܘܬܐ. ܡܛܠ ܕܗ̇ܢܘܢ ܕܡܫܬܡܠܝܢ. ܒܡܬܢܗܪܢܘܬܐ ܘܡܬܟܗܢܢܘܬܐ ܒܗ ܡܬܓܡܪܝܢ ܠܚܪܬܐ. ܘܡܬܩܪܐ ܬܘܒ ܐܢܐܦܘܪܐ ܘܠܘ ܚܬܝ̣ܬܐܝܬ. ܒܗ̇ܝ ܕܐܢܐܦܘܪܐ ܫܡܐ ܗ̱ܝ ܕܡܢܐ ܗ̇ܘ ܕܡܬܟܣܝܢ ܒܗ ܐ̱ܪ̈ܙܐ. ܘܠܘ ܕܝܠܗܘܢ ܕܐ̱ܪ̈ܙܐ. ܘܬܚܘܝ̣ܬܐ ܗ̱ܝ ܕܟܐܦܐ ܗ̇ܝ ܕܣܝ̣ܡܐ ܗܘܬ݀ ܥܠ ܬܪܥ ܩܒܪܐ ܡܪܢܝܐ.

 

 

 

ܢܝܫܐ ܬܪܝܢܐ ܡܛܠ ܗ̇ܝ ܕܠܚܡܐ ܟܕ ܠܐ ܒܣܪܢܝ ܘܚܡܪܐ ܠܐ ܕܡܢܝ. ܐܝܟܢܐ ܦܓܪܐ ܘܕܡܐ ܡܬܩܪܝܢ

 

ܐܡܪܝܢܢ ܐܟܡܐ ܕܟܝܢܗ ܐ̱ܢܫܝܐ ܕܡܪܝܐ ܟܕ ܠܘ ܒܟܝܢܐ. ܐܠܐ ܡܛܠ ܚܕܝܘܬܐ ܕܥܡ ܟܝܢܐ ܐܠܗܝܐ. ܐܠܗܐ ܐܝܬܘܗܝ ܘܡܬܩܪܐ. ܒܗ̇ ܒܕܡܘ̣ܬܐ ܘܠܚܡܐ ܗܢܐ ܘܚܡܪܐ. ܟܕ ܠܘ ܒܟܝܢܐ ܐܢܘܢ ܦܓܪܐ ܘܕܡܐ. ܐܠܐ ܡܛܠ ܛܝܒܘܬܐ ܕܪܘܚܐ ܕܥܠܝܗܘܢ ܡܐܓܢܐ܆ ܦܓܪܐ ܘܕܡܐ ܕܡܫܝܚܐ ܡܬܩܪܝܢ.

 

ܗܦܟܬܐ:

 

ܐܡܪܝܢ ܐܢ ܠܚܡܐ ܘܚܡܪܐ ܡܛܠ ܛܝܒܘܬܐ ܕܪܘܚܐ. ܦܓܪܐ ܐܢܘܢ ܘܕܡܐ ܕܐܠܗܐ. ܘܦܓܪܐ ܘܕܡܐ ܕܐܠܗܐ ܡܛܠ ܚܕܝܘܬܐ ܕܥܡ ܐܠܗܐ܆ ܐܠܗܐ ܐܢܘܢ. ܡܕܝܢ ܠܚܡܐ ܗܢܐ ܘܚܡܪܐ ܐܠܗܐ ܐܢܘܢ. ܘܐܝܟܢܐ ܡܬܩܒܠܐ ܗܕܐ.

 

ܦܘܢܝܐ:

 

ܐܡܪܝܢܢ ܐܠܘ ܒܟܝܢܐ ܐܡܪܝܢ ܗܘܝܢ ܠܠܚܡܐ ܘܚܡܪܐ ܦܓܪܐ ܘܕܡܐ. ܘܒܟܝܢܐ ܬܘܒ ܠܦܓܪܐ ܘܕܡܐ ܐܠܗܐ. ܟܒܪ ܫܪܝܪܐ ܗ̣ܘܐ ܟܘܢܫܟܘܢ. ܘܟܕ ܠܘ ܗܟܢܐ. ܐܠܐ ܠܠܚܡܐ ܡ̇ܢ ܘܠܚܡܪܐ ܦܓܪܐ ܘܕܡܐ ܐܡܪܝܢܢ ܡܛܠ ܛܝܒܘܬܐ ܕܪܘܚܐ. ܘܠܦܓܪܐ ܘܕܡܐ ܕܐܠܗܐ ܐܡܪܝܢܢ ܠܘ ܒܟܝܢܐ. ܐܠܐ ܡܛܠ ܚܕܝܘܬܐ ܕܥܡ ܐܠܗܐ܆ ܠܐ ܫܪܝܪ ܟܘܢܫܟܘܢ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܡܛܠ ܡܢܐ ܟܕ ܨܝܡܝ̣ܢܢ ܡܫܬܘܬܦܝ̣ܢܢ ܒܐܪ̈ܙܐ. ܘܫܠܝ̈ܚܐ  ܡ̣ܢ ܒܬܪ ܕܐܟ̣ܠܘ ܐܡܪܐ ܐܫܬܘܬܦܘ

 

ܐܡܪܝܢܢ ܕܠܐ ܙܕܩ ܠܡܩܕܡܘ ܩܕܡ ܫܘܬܦܘܬܐ ܕܒܐܪ̈ܙܐ. ܫܘܬܦܘܬܐ ܕܡܕܡ ܐ̱ܚܪܝܢ. ܡܛܠ ܦܪܝ̣ܫܘܬ ܐܝܩܪܐ ܕܒܩܕܡܝܘܬܐ ܡܬܦܪܫ ܠܐܪ̈ܙܐ. ܘܫܠܝ̈ܚܐ ܡ̇ܢ ܟܕ ܠܢܡܘܣܐ ܩܕܡܝܐ ܫܡܠܝ̣ܘ ܘܒܛܠܘܗܝ. ܐܝܛܐ ܡ̣ܢ ܫܘܬܦܘܬܐ ܕܒܐܪ̈ܙܐ ܫܪܝ̣ܘ ܒܕܘܒܪ̈ܐ ܚܕ̈ܬܐ ܕܓܡܝ̣ܪܘܬܐ.

 

 

 

ܢܝܫܐ ܪܒܝܥܝܐ ܡܛܠܗ̇ܝ ܕܐܪܐ ܐܟܠ ܡܪܢ ܡ̣ܢ ܦܓܪܐ ܗ̇ܘ ܕܐܡ̣ܪ ܕܗ̇ܢܘ ܦܓܪܝ ܣܒܘ ܐܟܘܠܘ ܡܢܗ. ܘܐܫܬܝ̣ ܬܘܒ ܡ̣ܢ ܚܡܪܐ ܕܟܢܝܗ ܕܡܗ

 

ܐܡܪܝܢܢ ܕܐܟ̣ܠ ܘܐܫܬܝ̣ ܡ̣ܢ ܦܓܪܐ ܗ̇ܘ ܘܕܡܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܡ̣ܪ. ܕܠܐ ܐܫܬܐ ܡ̣ܢ ܗܫܐ ܡ̣ܢ ܗܢܐ ܝܠܕܐ ܕܓܦܬܐ. ܘܠܗܕܐ ܫܠܡ ܡܪܝ ܐܦܪܝܡ ܘܡܪܝ ܐܝܘܐܢܢܝܣ.

 

 

 

ܢܝܫܐ ܚܡܝܫܝܐ ܡܛܠ ܗ̇ܝ ܕܚܡܝ̣ܥܐ ܗ̣ܘܐ ܐܪܐ ܠܚܡܐ ܗ̇ܘ ܐܘ ܦܛܝ̣ܪܐ. ܘܚܡܪܐ ܗ̇ܘ ܬܘܒ ܡܙܝ̣ܓ ܗܘܐ ܐܘ ܠܐ

 

ܐܡܪܝܢܢ ܕܠܐ ܐ̱ܢܫ ܡ̣ܢ ܫܠܝ̈ܚܐ ܘܬܠܡܝܕܝ̈ܗܘܢ ܗܕܐ ܐܫܠܡ. ܠܐ ܗ̇ܝ ܕܕܡܝܐ ܕܟܕ ܒܐܡܪܐ ܫܡܠܝܗ ܠܢܡܘܣܐ ܗ̇ܘ ܩܕܡܝܐ ܘܒܛܠܗ. ܐܝܟܢܐ ܒܡܕܡ ܡ̣ܢ ܗܠܝܢ ܕܢܡܘܣܐ ܡܫܠܡ ܗ̣ܘܐ ܐܦ ܠܕܝܬܝܩܝ ܚܕܬܐ. ܥܬܝ̈ܩܬܐ ܠܡ ܥܒܪ̈ܝ ܠܗܝܢ ܐܡ̇ܪ ܫܠܝܚܐ. ܘܕܡܙܝ̣ܓ ܗ̣ܘܐ ܚܡܪܐ ܗ̇ܘ܆ ܝܕܝܥܐ ܡ̣ܢ ܗ̇ܝ ܕܠܝܬ ܥܝܕܐ ܠܡܬܚܫܚܘ ܒܟܠܗ ܐܬܪܐ ܗ̇ܘ ܣܟ. ܒܚܡܪܐ ܠܐ ܡܙܝ̣ܓܐ܆ ܡܛܠ ܗܕܐ ܐܦ ܚܢܢ܆ ܡ̣ܢ ܚܡܝ̣ܥܐ ܘܡܠܚܐ ܘܡܫܚܐ ܘܚܡܪܐ ܕܡܙܝ̣ܓ ܥܒܕܝܢܢ ܠܗܘܢ ܠܐܪ̈ܙܐ. ܒܕܠܐ ܒܡܕܡ ܚܣܝ̣ܪ ܗ̣ܘܐ ܦܓܪܐ ܗ̇ܘ ܦܪܘܩܝܐ. ܡ̣ܢ ܢܦܫܐ ܗ̣ܘܐ ܓܝܪ ܡܠܝ̣ܠܬܐ. ܕܛܘܦܣܗ̇ ܨܐܪ ܚܡܝܪܐ ܒܝܕ ܙܘܥܘ̈ܗܝ. ܘܡ̣ܢ ܐܣܛܘ̈ܟܣܐ ܐܪܒܥܐ ܦܓܪܗ ܩܕܝܫܐ܆ ܩܡܚܐ ܡܕܝܢ ܐܝܟ ܐܪܥܐ. ܘܡܝ̈ܐ ܐܝܟ ܡܝ̈ܐ. ܘܡܫܚܐ ܐܝܟ ܐܐܪ. ܘܡܠܚܐ ܐܝܟ ܢܘܪܐ. ܘܚܡܪܐ ܡ̇ܢ ܠܚܝܘܬܐ ܡܫܘܕܥ. ܘܡܝ̈ܐ ܠܡܝ̣ܬܘܬܗ. ܐܟܡܐ ܕܐܦ ܗܠܝܢ ܕܡ̣ܢ ܕܦܢܗ ܪܕܘ ܒܙܩܝܦܐ.

 

ܗܦܟܬܐ:

 

ܐܡܪܝܢܢ ܦܪ̈ܢܓܝܐ ܘܐܪ̈ܡܢܝܐ ܕܒܚܡܝ̣ܪܐ ܡܣܝܘܬܐ ܡܕܡ ܘܚܡܘܨܘܬܐ ܐܝܬ. ܘܚܡܪܐ ܕܡܙܝ̣ܓ ܥܓܠ ܡܬܚܒܠ. ܘܡܛܠ ܗܕܐ ܠܐ ܦܐܐ ܠܡܬܚܫܚܘ ܒܗܘܢ ܠܘܬ ܐ̱ܪ̈ܙܐ.

 

ܦܘܢܝܐ:

 

ܐܡܪܝܢܢ ܕܟܕ ܒܡܫܘܚܬܐ ܗܘܝܐ ܗ̣ܝ ܚܡܝ̣ܡܘܬܐ. ܛܥܡܐ ܕܝܬܝܪ ܗܢܝ̣ ܩ̇ܢܐ. ܘܚܡܪܐ ܬܘܒ ܟܕ ܥܡܗ̇ ܕܡܬܡܙܓܢܘܬܗ ܕܒܡܝ̈ܐ ܗܘܐ ܠܚܫܚܬܐ. ܝܬܝܪ ܗܢܝܐܐ ܘܠܐ ܡܟܝܢܐ ܗ̇ܘܐ. ܚܡܝ̣ܥܐ ܡܕܝܢ ܘܚܡܪܐ ܡܙܝ̣ܓܐ ܟܕ ܒܡܫܘܚܬܐ ܢܗܘܘܢ. ܘܠܐ ܡܬܩܝ̣ܢ. ܝܬܝܪ ܡܝܬܪܝ̣ܢ ܘܡܫܡܠܝܢ ܘܗܢܝܐܝܢ ܡ̣ܢ ܦܛܝ̣ܪܐ. ܘܠܐ ܡܙܝ̣ܓܐ. ܘܪܚܝ̣ܩܝܢ ܡ̣ܢ ܡܣܝܘܬܐ ܘܚܒܠܐ.

 

 

 

ܢܝܫܐ ܫܬܝܬܝܐ ܡܛܠ ܚܡܫܐ ܩܦ̈ܠܐܐ ܕܡܬܦܠܓ ܩܘܪܒ ܩܘܪܒܢܐ. ܩܦܠܐܘܢ ܩܕܡܝܐ

 

ܬܐܘܠܘܓܝܐ. ܘܐܝܬܘܗܝ ܡ̣ܢ ܫܘܪܝܐ ܥܕܡܐ ܠܓܗܢܬܐ ܗ̇ܝ ܕܒܬܪ ܩܕܝܫ ܩܕܝܫ. ܕܬܪܝܢ ܡܬܒܪܢܫܢܘܬܐ ܥܕܡܐ ܥܕܡܐ ܠܓܗܢܬܐ ܗ̇ܝ ܕܡܛܠܗܕܐ ܡܩܪܒܝ̣ܢܢ ܠܟ. ܕܬܠܬܐ ܥܘܗܕܢܐ ܕܗ̇ܢܘܢ ܕܚܐܝ̣ܝ̣ܢ ܘܕܡܝ̣ܬܝ̣ܢ ܥܕܡܐ ܠܨܠܘܬܐ ܕܐܒܘܢ ܕܒܫܡܝܐ. ܕܐܪܒܥܐ ܥܠ ܐܦܝ̈ ܗ̇ܝ ܕܢܫܬܘܐ ܠܡܫܬܘܬܦܘ. ܕܚܡܫܐ ܩܘܒܠܛܝܒܘܬܐ ܥܠ ܐܦܝ̈ ܗ̇ܝ ܕܡ̣ܢ ܟܕܘ ܐܫܬܘܬܦܢܢ.

 

 

 

ܢܝܫܐ ܫܒܝܥܝܐ ܡܛܠܗ̇ܝ ܕܟܠܗܝܢ ܨܠܘ̈ܬܐ ܠܘܬ ܐܒܐ ܡܬܥܠܝ̈ܢ ܒܩܘܪܒ ܩܘܪܒܢܐ܆ ܣܛܪ ܡ̣ܢ ܬܪܬܝܢ

 

ܗܠܝܢ ܕܝܢ ܬܪܬܝܢ ܐܝܬܝܗܝܢ܆ ܗ̇ܝ ܕܟܕ ܡܬܥܗܕܝܢܢ ܗܟܝܠ ܡܪܝܐ ܠܡܘܬܐ ܕܝܠܟ. ܘܗ̇ܝ ܐ̱ܚܪܝܬܐ ܕܐܠܗܐ ܗ̇ܘ ܪܒܐ ܘܬܡܝ̣ܗܐ. ܗܠܝܢ ܕܝܢ ܐ̱ܚܪ̈ܢܝܬܐ ܟܠܗܝܢ ܕܠܘܬ ܐܒܐ ܡܬܥܠܝ̈ܢ܆ ܗ̣ܘ ܣܘܟܠܗܝܢ ܡܫܘܕܥ. ܘܐܦܢ ܗ̇ܝ ܕܟܕ ܥܬܝܕ ܗ̣ܘܐ ܕܢܩܒܠ ܡܛܠ ܒܪܐ ܐܡܪܐ. ܐܠܐ ܒܙܢܐ ܕܬܘܢܝܐ ܘܠܘ ܕܨܠܘܬܐ ܘܬܟܫܦܬܐ.

 

 

 

ܢܝܫܐ ܬܡܝܢܝܐ ܡܛܠ ܐ̱ܪ̈ܙܝ ܫܘܡܠܝܗܘܢ ܕܐ̱ܪ̈ܙܐ ܩܕܝ̈ܫܐ

 

ܡܙܡܘܪ̈ܐ ܕܒܫܘܪܝܐ ܡܙܕܡܪܝܢ ܡ̣ܢ ܓܘܐ. ܠܚܕܐ ܫܠܡܘܬܐ ܕܨܒܝܢܐ ܕܟܠܗ ܡܘܠܝܐ ܕܥܕܬܐ ܡܫܘܕܥܝ̣ܢ. ܘܙܘܡܪ̈ܐ ܘܗ̈ܘܠܠܐ ܕܩܕܡ ܟܬܒ̈ܐ ܩܕܝ̈ܫܐ ܕܡܘ̣ܬ ܫܝ̣ܦܘܪ̈ܐ ܡܥܝ̣ܪܝܢ ܠܥܡܐ ܠܡܫܡܥ ܣܘ̈ܟܠܐ ܐܠܗܝ̈ܐ. ܘܩܪܝܢܐ ܕܟܬܒ̈ܐ ܩܕܝ̈ܫܐ ܕܥܬܝ̣ܩܬܐ ܘܕܚܕܬܐ ܐ̱ܪܙ ܦܘܪܩܢܢ ܡܦܫܩ. ܘܗ̇ܝ ܕܐܡܪ̇ ܡܫܡܫܢܐ ܙܠܘ ܗܠܝܢ ܕܐܫܬܪܝ̣ܘ. ܡܦܩܬܐ ܗ̱ܝ ܕܬܠܬܐ ܐܩ̈ܡܐ ܗ̇ܢܘܢ ܕܠܐ ܣܦܩܝ̣ܢ ܕܢܕܝ̣ܩܘܢ ܒܐܪ̈ܙܐ. ܒܗ̇ܝ ܕܢܣܝ̣̈ܣܬܐ ܩܢܝܢ ܥܕܟܝܠ ܠܥܝ̈ܢܐ ܕܬܪ̈ܥܝܬܗܘܢ. ܘܒܫܡܥܐ ܕܟܬܒ̈ܐ ܩܕܝ̈ܫܐ ܒܠܚܘܕ ܡܣܬܡܣܡܝ̣ܢ ܥܕ ܢܬܕܟܘܢ ܘܢܬܚܠܡܘܢ. ܘܐܝܬܝܗܘܢ ܬܝܒ̈ܐ ܘܡܬܬܥܒ̈ܕܢܐ ܘܡܬܬܪ̈ܬܝܢܐ. ܘܟܪܘܟܝܐ ܕܐ̱ܪ̈ܙܐ ܒܗܝܟܠܐ ܠܟܪܘܟܝܗ ܕܡܪܝܐ ܒܥܠܡܐ ܘܗܘܦܟܗ ܒܝܬ ܒܢܝ̈ܢܫܐ ܟܕ ܡܫܡܠܐ ܠܡܕܒܪܢܘܬܗ ܦܪܘܩܝܬܐ ܡܫܘܕܥ. ܘܒܣ̈ܡܐ ܕܡܬܬܥܛܪܝܢ ܠܫܘ̈ܟܢܐ ܪ̈ܘܚܢܝܐ ܡܒܕܩܝܢ. ܡܘܕܝܢܘܬܐ ܕܗܝܡܢܘܬܐ ܠܡܫܪܪܘܬܗ ܕܓܘܐ ܘܠܐ ܡܨܛܠܝܢܘܬܗ ܡ̣ܢ ܥܩ̈ܒܬܐ ܫܠܝ̈ܚܬܐ ܡܫܘܕܥܐ. ܘܗ̇ܝ ܕܐܡ̣ܪ ܚܣܝܐ ܡܘܫܐ ܒܪ ܟܐܦܐ ܕܡ̣ܢ ܩܕܡ ܣܘܢܗܕܘܣ ܕܒܢܝܩܝܐ. ܠܝܬ ܗ̣ܘܐ ܡܕܡ ܡܬܐܡܪ ܗ̣ܘܐ ܒܬܪ ܦܝܪܡܐ ܕܒܣ̈ܡܐ. ܐܠܐ ܒܩܘܪܒܐ ܡܫܪܐ ܗ̣ܘܐ ܟܗܢܐ. ܠܘ ܒܚܬܝܬܘܬܐ ܐܡܪܗ. ܒܗ̇ܝ ܕܩܕܝܫܐ ܕܝܘܢܘܣܝܘܣ ܡܐܪܙ ܕܡܬܐܡܪ ܗ̣ܘܐ ܡܕܡ ܕܐܝܟ ܗܟܢ. ܟܕ ܐܡ̇ܪ ܒܩܦܠܐܘܢ ܕܬܠܬܐ ܕܡܐܡܪܐ ܕܐܪܒܥܐ. ܟܕ ܡܬܬܘܕܝܐ ܠܘܩܕܡ ܡ̣ܢ ܟܠܗ ܡܘܠܝܐ ܕܥܕܬܐ ܡܡܠܠܘܬ ܫܘܒܚܐ ܩܬܘܠܝܩܝ. ܘܫܠܡܐ ܕܡܬܝ̣ܗܒ ܡ̣ܢ ܟܗܢܐ. ܠܥܡܐ ܠܗ̇ܝ ܕܡܪܢ ܕܐܡ̣ܪ ܫܝܢܐ ܕܝܠܝ ܝ̇ܗܒ ܐ̱ܢܐ ܠܟܘܢ. ܫܠܡܐ ܕܝܠܝ ܫ̇ܒܩ ܐ̱ܢܐ ܠܟܘܢ. ܘܡܛܠ ܕܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܫܠܡܐ ܗ̇ܘ ܕܝܗܒܬ ܘܢܣܒܬ ܐܡ̇ܪ. ܡܛܠ ܗܕܐ ܐܦ ܥܡܐ ܗܦܟܝ̣ܢ ܦܪܥܝ̣ܢ ܠܗ ܠܟܗܢܐ܆ ܗ̇ܝ ܕܥܡ ܪܘܚܐ ܕܝܠܟ. ܘܫܪܟܐ ܕܨܠܘ̈ܬܐ ܓܗܢ̈ܬܐ ܟܝܬ ܘܦܫܝ̣̈ܛܬܐ ܟܠ ܚܕܐ ܗ̣ܝ ܕܢܝ̣ܚܐܝܬ ܡܫܘܕܥܐ ܐ̱ܪܙܗ̇.

 

 

 

ܢܝܫܐ ܬܫܝܥܝܐ ܡܛܠ ܗ̇ܝ ܕܟܡܐ ܐܢܘܢ ܨܠܝ̈ܒܐ ܕܡܬܬܨܝ̣ܪܝܢ ܥܠ ܐ̱ܪ̈ܙܐ

 

ܕܥ ܕܬܡܢܬܥܣܪ ܨܠܝ̈ܒܐ ܐܝܬܝܗܘܢ ܕܡܬܪܫܡܝ̣ܢ ܥܠ ܐ̱ܪ̈ܙܐ ܒܬܠܬ ܙܒܢ̈ܬܐ. ܙܒܢ̱ܬܐ ܩܕܡܝܬܐ ܐܝܟܐ ܕܐܡ̇ܪ ܟܕ ܢܣܒ ܠܚܡܐ. ܬܠܬܐ ܥܠ ܦܓܪܐ ܘܬܠܬܐ ܥܠ ܕܡܐ. ܙܒܢ̱ܬܐ ܕܬܪܬܝܢ ܐܝܟܐ ܕܐܡ̇ܪ ܕܟܕ ܡܐܓܢ. ܗܟܘܬ ܬܠܬܐ ܥܠ ܦܓܪܐ ܘܬܠܬܐ ܥܠ ܕܡܐ. ܙܒܢ̱ܬܐ ܕܬܠܬ. ܐܝܟ ܕܩܨܐ ܘܪܫܡ ܒܗ̇ ܒܕܡܘ̣ܬܐ.

 

 

 

ܢܝܫܐ ܥܣܝܪܝܐ ܡܛܠ ܐܡܝܢ ܗ̇ܝ ܕܡܬܐܡܪܐ ܟܕ ܕܐܡ̇ܪ ܟܗܢܐ ܐܘܕܝ ܘܒܪܟ ܘܫܪܟܐ

 

ܚܣܝܐ ܡܘܫܐ ܐܡ̇ܪ. ܕܐܝܟܐ ܕܐܡ̇ܪ ܟܗܢܐ ܘܡܬܝ̣ܗܒ ܠܫܘܒܩܢܐ ܕܚܛܗ̈ܐ ܘܠܚܝ̈ܐ ܕܠܥܠܡ. ܠܐ ܙܕܩ ܕܢܥܢܐ ܥܡܐ ܐܡܝܢ. ܘܐܡܪܝܢܢ ܕܒܪܬ݀ ܩܠܐ ܕܐܡܝܢ ܠܘ ܚܕ ܣܘܟܠܐ ܩܢܝܐ. ܒܕܓܘܢ ܐܡܝܢ ܗ̇ܝ ܕܡܬܐܡܪܐ ܒܗܕܐ ܕܘܟܬܐ ܠܘ ܗ̇ܝ ܐܡܝܢ ܐܝܬܝܗ̇ ܕܒܬܪ ܨܠܘ̈ܬܐ ܡܬܐܡܪܐ ܟܐܡܬ݀ ܕܗܟܢܐ ܢܗܘܐ. ܐܠܐ ܐܡܝܢ ܗ̇ܝ ܕܫܪܪܐ ܡܣܟܠܐ. ܟܐܡܬ݀ ܕܫܪܪܐ ܐܡܪܬ ܐܘ ܟܗܢܐ ܗܟܢܐ ܥܒܕ ܡܪܝܐ. ܢܣܒ ܠܚܡܐ ܘܚܡܪܐ ܘܐܘܕܝ ܘܒܪܟ ܘܫܪܟܐ. ܡܟܝܠ ܐܝܟ ܗܢܐ ܪܥܝܢܐ. ܠܘ ܠܐ ܦܐܝܐ ܕܬܬܐܡܪ ܐܡܝܢ ܒܗܠܝܢ ܬܪܬܝܢ ܕܘܟ̈ܝܢ.

 

 

 

ܦܣܘܩܐ ܚܡܝܫܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܫܬܝܬܝܬܐ

 

ܡܛܠ ܬܫܡܫܬܐ ܐܝܕܐ ܕܡܫܬܡܠܝܐ ܥܠ ܗ̇ܢܘܢ ܕܒܡܫܝܚܐ ܫܟ̇ܒܝܢ. ܘܒܗ ܐܝܬ ܢܝ̈ܫܐ ܬܡܢܝܐ. ܢܝܫܐ ܩܕܡܝܐ ܡܛܠ ܗ̇ܝ ܕܡܫܚܠܦܐ ܗ̱ܘ ܙܢܐ ܕܫܘܢܝܐ ܕܡܗܝ̈ܡܢܐ ܘܕܠܐ ܡܗܝ̈ܡܢܐ

 

ܡܗܝ̈ܡܢܐ ܡ̇ܢ ܗ̇ܢܘܢ ܕܡܬܐܪ̈ܙܢܐ ܗ̣ܘܘ ܕܡܘܠܟܢ̈ܐ ܐܠܗܝ̈ܐ ܒܙܒܢ ܚܝܝ̈ܗܘܢ. ܟܕ ܫܟ̇ܒܝܢ܆ ܥܡ ܣܒܪܐ ܚܠܝ̣ܡܐ. ܚܘܝ̣ܚܐܝܬ ܡܬܪܓܪܓܝ̣ܢ ܠܡܦܛܪ ܡ̣ܢ ܚܝ̈ܐ ܗܠܝܢ ܬܥܝ̈ܫܐ. ܘܠܡܩܢܐ ܙܢܝ̈ܐ ܛܘܒ̈ܬܢܐ ܕܠܗܘܢ ܐܬܡܠܟܘ. ܝܬܝܪܐܝܬ ܟܕ ܠܐ ܡܟܬܡ̈ܐ ܐ̱ܢܫܝ̈ܢ ܢܗܘܘܢ ܒܪ̈ܓܝܓܬܐ ܦܓܪ̈ܢܝܬܐ. ܟܐܡܬ݀ ܕܒܬܐܘܪܝܐ ܐܟܚܕܐ ܘܒܣܥܘܪܘܬܐ ܢܗܘܘܢ ܓܡܝ̣ܪ̈ܐ ܘܡܝܬܪ̈ܐ ܐܘܟܝܬ ܡܗܝ̣ܪ̈ܐ ܘܙܗܝ̣ܪ̈ܐ. ܠܐ ܡܗܝܡ̈ܢܐ ܕܝܢ ܒܕܡܚܝ̣ܠ ܒܗܘܢ ܣܒܪܐ ܕܐܝܟ ܗܢܐ. ܐܘ ܠܐ ܟܠ ܟܠܗ ܩܢܝܢ ܠܗ. ܒܥܩܬܐ ܠܐ ܡܬܒܝܢܢܝ̣ܬܐ ܘܠܙܬܐ ܠܐ ܡܬܒܝܐܢܝ̣ܬܐ ܗܘܝܢ. ܝܬܝܪܐܝܬ ܟܕ ܠܪ̈ܓܝܓܬܐ ܕܚܫܝ̈ ܒܣܪܐ ܢܗܘܘܢ ܫܒܝܢ. ܘܗܟܢܐ ܐܝܟ ܗ̇ܢܘܢ ܕܠܗ̇ܘ ܡܐ ܕܩܢܝܢ ܡܘܒܕܝܢ ܘܡܕܡ ܐ̱ܚܪܝܢ ܠܐ ܡܩܕܝܢ܆ ܒܝܫ ܒܝܫ ܚܐܫܝܢ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܐܝܟܢܐ ܒܙܒܢܐ ܕܫܠܝ̈ܚܐ ܒܥܕ̈ܬܐ ܡܬܠܘܝܢ ܗ̣ܘܘ ܡܗܝ̈ܡܢܐ. ܝܘܡܢܐ ܕܝܢ ܟܠ ܟܪ ܕܡܬܛܝܒ

 

ܒܫܘܪܝܗ̇ ܓܝܪ ܕܣܒܪܬܐ. ܒܩܨܬ݀ ܙܥܘܪܘܬ ܡܢܝܢܐ ܕܡܗܝ̈ܡܢܐ. ܘܐܡܝ̣ܢܘܬ ܟܢܘܫܝ̣ܗܘܢ ܕܒܚܕ ܕܘܟܐ. ܒܥܕ̈ܬܐ ܡܬܠܘܝܢ ܗ̣ܘܘ ܡܗܝ̈ܡܢܐ. ܐܝܟ ܕܐܡ̣ܪ ܩܕܝܫܐ ܕܝܘܢܘܣܝܘܣ. ܝܬܝܪܐܝܬ ܒܥܠܬ݀ ܥܘܫܢܗܘܢ ܕܚܢ̈ܦܐ ܣܘܓܐܬ݀ ܡܗܠܢܘܬܗܘܢ ܕܠܐܪ̈ܙܐ ܕܟܪ̈ܣܛܝܢܐ. ܒܣܬܪܐ ܨܒ̇ܝܢ ܗ̣ܘܘ ܫܠܝ̈ܚܐ ܘܬܠܡܝܕܝ̈ܗܘܢ ܠܡܫܡܠܝܘܬܗܘܢ. ܘܡܛܠܗܕܐ ܕܐܦ ܡܫܪܐ ܫܪܝܢ ܗ̣ܘܘ ܘܡܦܩܝ̣ܢ ܠܡܬܬܪ̈ܬܝܢܐ. ܒܥܕܢܐ ܕܫܘܡܠܝܐ ܕܬܫܡܫܬܐ ܐ̱ܪܙܢܝܬܐ. ܝܘܡܢܐ ܕܝܢ ܡܛܠ ܕܒܣܦܐ ܐܬܡܠܝ̣ ܥܠܡܐ ܡ̣ܢ ܡܗܝ̈ܡܢܐ. ܘܚܢ̈ܦܐ ܡ̇ܢ ܘܐܦܢ ܒܨܝ̣ܪܝ̣ܢ. ܐܠܐ ܐܦ ܐܬܥܝܕܘ ܘܐܫܬܝܢܘ ܠܘܬ ܫܡܥܐ ܘܚܙܬܐ ܕܐ̱ܪ̈ܙܝܢ. ܠܐ ܡܬܐܠܨܝ̣ܢܢ ܠܡܠܘܝܘ ܐ̱ܪܙܢܐܝܬ ܒܥܕ̈ܬܢ ܥܢܝ̈ܕܝܢ. ܐܠܐ ܒܠܚܘܕ ܠܟܗ̈ܢܐ ܠܩܕܡ ܡܕܒܚܐ ܡܥܠܝ̣ܢܢ ܠܡܫܠܡܘ ܐܝܟ ܕܠܫܘܘܕܥ ܟܘܬܪ ܬܫܡܫܬܗܘܢ. ܘܡ̣ܢ ܒܬܪ ܡܘܬܝ̈ܗܘܢ. ܘܚܣܝܐ ܝܥܩܘܒ ܕܐܘܪܗܝ ܐܡ̇ܪ ܕܟܒܪ ܠܟܢܘ̈ܫܝܐ ܕܝܠܗܘܢ ܕܡܗܝ̈ܡܢܐ ܩܪܐ ܡܠܦܢܐ ܥܕ̈ܬܐ ܘܠܘ ܠܕܘܟ̈ܝܬܐ ܘܒܢ̈ܝܢܐ. ܘܕܠܐ ܫܪܝܪܐ ܡܣܒܪܢܘܬܐ ܗܕܐ. ܝ̣ܕܝ̣ܥܐ ܡ̣ܢ ܡܠܬܗ ܕܝܠܗ ܕܩܕܝܫܐ ܕܝܘܢܘܣܝܘܣ ܕܐܡ̇ܪ. ܕܐܢܗܘ ܡ̇ܢ ܕܡ̣ܢ ܛܟܣܐ ܟܗܢܝܐ ܐܝܬܘܗܝ ܗ̣ܘܐ ܗ̇ܘ ܕܫܟܒ. ܪܡܐ ܠܗ ܩܕܡ ܡܕܒܚܐ ܐܠܗܝܐ. ܐܢܕܝܢ ܒܕܝܪ̈ܝܐ ܚܣܝ̈ܐ. ܐܘ ܒܥܡܐ ܩܕܡܝܐ ܡܛܟܣ ܗ̣ܘܐ ܠܘܬ ܐܝܪܐܛܝܘܢ ܡܝܩܪܐ ܪܡܐ ܠܗ. ܩܕܡ ܡܥܠܢܐ ܕܟܗ̈ܢܐ. ܘܓܠܝܐ ܕܡܕܒܚܐ ܘܐܝܪܐܛܝܘܢ ܒܒܢ̈ܝܢܐ ܡܥܕܝ̣ܢ ܠܡܗܘܐ. ܐܘܟܝܬ ܒܥܕ̈ܬܐ ܕܡܫܟ̈ܠܢ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܐܝܟܢܐ ܟܕ ܒܫܘܪܝܐ ܡ̣ܢ ܟܕܘ ܡܫܝ̣ܚܝ̣ܢ ܡܗܝ̈ܡܢܐ. ܐܦ ܒܫܘܢܝܐ ܬܢܝܢܘܬ ܡܬܡܫܚܝ̣ܢ

 

ܐܡܪܝܢܢ ܕܐܟܡܐ ܕܒܚܝ̈ܐ ܕܬܢܢ ܡ̣ܢ ܫܐܕ̈ܐ ܡܬܬܩܪܒܝ̣ܢܢ. ܘܒܝܕ ܡܫܝ̣ܚܘܬܢ ܕܒܡܫܚܐ ܠܡܫܬܪܥܢܘܬܢ ܕܡ̣ܢ ܪ̈ܓܝܓܬܐ ܒܣܪ̈ܢܝܬܐ ܡܛܦܣܝ̣ܢܢ. ܒܗ̇ ܒܕܡܘ̣ܬܐ ܘܐܦ ܘܡ̣ܢ ܒܬܪ ܫܘܢܝܢ. ܝܬܝܪܐܝܬ ܡܢܗܘܢ ܕܚܝܠܘ̈ܬܐ ܒܝ̈ܫܐ ܕܚܫܘܟܐ ܬܟܬܘ̈ܫܐ ܘܕܪ̈ܐ ܠܩܘܒܠܢ ܡܣܬܕܪܝ̣ܢ. ܘܒܝܕ ܡܫܝ̣ܚܘܬܐ ܬܢܝܢܝܬܐ ܠܠܐ ܡܬܠܒܟܢܘܬܢ ܕܡܢܗܘܢ ܨܝܪܝ̣ܢܢ. ܘܟܕ ܗ̇ܢܘ ܐ̱ܪܙܗ̇ ܕܡܫܝܚܘܬܐ ܕܬܪܬܝܢ. ܒܙܒܢܢ ܗܢܐ ܥܠ ܟܗ̈ܢܐ ܒܠܚܘܕ ܕܠܥܠ ܡ̣ܢ ܡܐܢܝ̈ ܥܘܦܝܗܘܢ ܡܬܬܪܡܐ ܡܫܚܐ ܘܥܠ ܥܠܡܝ̈ܐ ܥܦܪܐ ܕܘܟܬ݀ ܡܫܚܐ.

 

 

 

ܢܝܫܐ ܪܒܝܥܝܐ ܡܛܠܗ̇ܝ ܕܟܕ ܟܠܗܘܢ ܗ̇ܢܘܢ ܕܗܝܡ̣ܢܘ ܒܡܪܢ ܡܘܬܐ ܐܘܟܝܬ ܫܘܢܩܐ ܠܐ ܛܥܡܝ̣ܢ. ܠܡܢܐ ܡܬܒܥܝܐ ܨܠܘܬܐ ܕܥܠ ܡܗܝ̈ܡܢܐ

 

ܐܡܪܝܢܢ ܡ̇ܢ ܡܢܗܘܢ ܡܗܝ̈ܡܢܐ ܟܝܬ ܘܢܟ̈ܦܐ ܐܝܬܝܗܘܢ. ܟܐܡܬ݀ ܡܫܡ̈ܠܝܐ ܒܬܐܘܪܝܐ ܘܒܣܥܘܪܘܬܐ. ܘܠܗܠܝܢ ܙܢܐ ܡܕܡ ܪܘܙܢܝܐ ܗ̇ܘ ܒܬܪ ܫܘܢܝܗܘܢ܆ ܒܩܘܪܒ ܩܘܪ̈ܒܢܐ ܘܨܠܘ̈ܬܐ ܕܚܠܦܝܗܘܢ ܠܐܠܗܐ ܡܬܩܪܒܝ̣ܢ. ܡܢܗܘܢ ܕܝܢ ܟܕ ܒܗܝܡܢܘܬܐ ܡ̇ܢ ܐܘܟܝܬ ܒܬܐܘܪܝܐ ܚܠܝ̣ܡܝ̣ܢ. ܡ̣ܢ ܕܘܒܪ̈ܐ ܕܝܢ ܡܝܬܪ̈ܐ ܒܨܝ̣ܪ ܩܠܝܠ ܡܣܟܢܝ̈ܢ ܒܩܨܬ݀ ܡܚܝ̣ܠܘܬܐ ܕܟܝܢܐ ܐ̱ܢܫܝܐ. ܘܡܛܠ ܗܕܐ ܘܠܐ ܐ̱ܢܫ ܡ̣ܢ ܗ̇ܢܘܢ ܕܒܢܝ̈ܢܫܐ ܗ̣ܘܘ ܥܠ ܐܪܥܐ ܐܝܬ ܕܕܟܐ ܡ̣ܢ ܨܐܬܐ ܕܚܛܝ̣ܬܐ. ܐܠܐ ܐܢ ܚܕ ܡܪܝܐ ܒܪܢܫܐ ܝܫܘܥ ܡܫܝܚܐ. ܠܗܘܢ ܠܗܠܝܢ ܬܪܝܢܐܝܬ ܡܗܢܝܐ ܨܠܘܬܐ. ܚܕܐ ܡ̇ܢ ܕܟܕ ܚܙܝܢ ܕܡ̣ܢ ܟܢܘ̈ܬܗܘܢ ܒܛܝ̣ܠܐܝܬ ܡܣܬܝܥܝܢ. ܚܦܝܛܐܝܬ ܡܬܝܐܝ̣ܒܝ̣ܢ ܠܒܝܬܝܘܬܐ ܕܠܘܬ ܐܠܗܐ܆ ܘܠܘ ܒܦܣܩ ܣܒܪܐ ܢܦܠܝܢ. ܕܬܪܝܢ ܕܝܢ ܒܙܢܐ ܐܝܢܐ ܕܝܬܝܪ ܦܝܠܠܘܣܘܦܝ ܘܩܛܝ̣ܢ. ܟܐܡܬ݀ ܒܢܦܫܗ ܕܟܗܢܐ ܟܕ ܬܪ̈ܬܝܗܝܢ ܨܘܪ̈ܬܐ. ܕܗ̇ܘ ܕܡܢܗ ܒܥܐ. ܘܕܗ̇ܘ ܕܚܠܦܘܗܝ ܒܥܐ ܡܬܬܨܝܪ̈ܢ. ܒܝܬܝܘܬܐ ܡܕܡ ܗܘܝܐ ܠܢܦܫܗ ܕܚܛܝܐ ܠܘܬܗ ܕܐܠܗܐ ܫܘܒܚܐ ܠܛܝܒܘܬܗ. ܘܦܪܗܣܝܐܝܬ ܡܬܗܕܝܐ ܠܘܬ ܐܘܢܗ̇. ܘܠܪ̈ܓܝܓܬܐ ܕܠܗܝܢ ܫܒܝܐ ܗܘܬ݀ ܛܥܝܐ ܘܠܘܬ ܪܓܬܐ ܕܡܥܠܝܐ ܘܦܢܝܐ ܐܬܝܐ. ܠܗ̇ܢܘܢ ܕܝܢ ܕܐܦ ܡ̣ܢ ܗܝܡܢܘܬܐ ܐܦ ܡ̣ܢ ܥܒܕ̈ܐ ܨܪܝ̣ܟܝ̣ܢ. ܐܦܠܐ ܐܢ ܟܠܗܘܢ ܢܒܝ̈ܐ ܘܫܠܝ̈ܚܐ ܘܙܕܝ̈ܩܐ ܚܠܦܝܗܘܢ ܫܐܠܝܢ ܘܡܨܠܝܢ ܡܗܢܝܢ. ܘܐܝܟܢܐ ܢܣܥܘܢ ܠܡܨܠܝܘ. ܘܟܕ ܠܗ̇ܝ ܕܫܐܠܝܢ ܐܢ̱ܬܘܢ ܘܠܐ ܢܣܒܝܢ ܐܢ̱ܬܘܢ ܡܛܠ ܕܒܝܫܐܝܬ ܫܐܠܝܢ ܐܢ̱ܬܘܢ ܫ̇ܡܥܝܢ. ܘܚܙܝܢ ܐܢ̱ܬܘܢ ܠܫܐܘܠ ܕܠܐ ܡܕܡ ܗܢܝܬܗ ܨܠܘܬ ܫܡܘܐܝܠ. ܐܦܠܐ ܠܥܒܪ̈ܝܐ ܗ̇ܝ ܕܢܒܝ̈ܐ.

 

 

 

ܢܝܫܐ ܚܡܝܫܝܐ ܡܛܠܗ̇ܝ ܕܐܢܗܘ ܕܟܠܢܫ ܠܦܘܬ ܥܡܠܗ ܐܓܪܗ ܡܢܐ ܡܗܢܝܐ ܨܠܘܬܐ ܠܗ̇ܘ ܕܥ̇ܢܕ

 

ܐܡܪܝܢܢ ܕܒܫܪܪܐ. ܠܐ ܐ̱ܢܫ ܡ̣ܢ ܗ̇ܢܘܢ ܕܙܪܥܝܢ ܚ̈ܐ ܙܝܙ̈ܢܐ ܚܨܕ. ܐܦܠܐ ܐ̱ܢܫ ܡ̣ܢ ܙܪ̈ܥܝ ܙܝ̈ܙܢܐ ܚ̈ܛܐ. ܐܠܐ ܐܝܟ ܕܩܕܡܢܢ ܐܡ̣ܪܢܢ ܨܠܘܬܐ ܠܣܒܪܗ ܒܠܚܘܕ ܕܗ̇ܘ ܕܫܟܒ ܡܚܝܠܐ. ܐܢ ܡ̣ܢ ܓܘܕܐ ܕܡܗܝ̈ܡܢܐ ܩܢ̈ܝܝ ܣܒܪܐ ܐܝܬܘܗܝ. ܐܝܟ ܗ̇ܘ ܕܒܝܡܐ ܡܬܡܚܫܠ ܐܢ ܡ̣ܢ ܗ̇ܢܘܢ ܗ̣ܘ ܕܡܨܝܢ ܠܡܣܚܐ. ܟܕ ܢܚܙܐ ܐ̱ܢܫܝ̈ܢ ܕܒܛܝ̣ܠ ܠܗܘܢ ܥܠ ܥܘܕܪܢܗ. ܒܛܝ̣ܠܐܝܬ ܣܚܐ ܘܠܐ ܡ̇ܗܡܐ ܡ̣ܢ ܗ̇ܝ ܕܢܙܝ̣ܥ ܐܝܕܝ̈ܐ ܐܦ ܪ̈ܓܠܐ. ܘܗܟܢܐ ܟܕ ܡܘܓܐ ܡܢܗ ܠܦܣܩ ܣܒܪܐ ܡܬܕܠܐ.

 

 

 

ܢܝܫܐ ܫܬܝܬܝܐ ܡܛܠ ܗ̇ܝ ܕܥܬܝܪ̈ܐ ܕܡܦܩܕܝܢ ܠܡܬܦܠܓܘ ܢܟܣܝ̈ܗܘܢ ܥܠ ܣܢܝ̈ܩܐ ܒܬܪ ܡܘܬܝ̈ܗܘܢ. ܐܪܐ ܡܬܗܢܝܢ ܒܡܕܡ

 

ܐܡܪܝܢܢ ܕܥܬܝܪܐ ܐܝܢܐ ܕܡ̇ܐܬ. ܐܢܗܘ ܕܡܛܠ ܪܚܡܬܗ ܣܓܝܐܬܐ ܕܠܡܪ̈ܗܛܐ. ܠܐ ܐܬܡܨ̣ܝ ܠܡܙܕܩܘ. ܐܠܐ ܐܬܪܢܝ̣ ܕܒܙܒܢܐ ܐܝܢܐ ܕܠܐ ܡܨܐ ܠܡܬܗܢܝܘ ܒܗܘܢ ܘܠܡܩܢܐ ܐܢܘܢ. ܟܐܡܬ݀ ܒܬܪ ܡܘܬܗ ܢܬܝܗܒܘܢ ܠܣܢܝ̈ܩܐ. ܠܗܢܐ ܘܠܐ ܚܕ ܝܘܬܪܢܐ ܡܨܐ ܠܡܗܘܐ ܡ̣ܢ ܙܕܩ̈ܬܐ ܕܡܬܝܗ̈ܒܢ ܚܠܦܘܗܝ ܡܛܠ ܬܪܬܝܢ. ܚܕܐ ܡ̇ܢ ܡܛܠ ܢܦܫܗ ܒܪܚܡܬܐ ܥܠܡܢܝܬܐ ܝܬܝܪ ܡܫܠܗܒܐ ܡܓܝܓܐ ܕܝܢ ܘܦܟܝ̣ܗܐ ܡ̣ܢ ܝܐܝ̣ܒܘܬܐ ܕܠܘܬ ܐܠܗܐ ܘܐܠܗܝ̈ܬܐ. ܕܬܪܬܝܢ ܕܝܢ܇ ܡܛܠ ܕܠܘ ܕܝܠܗ ܐܢܘܢ ܡܪ̈ܗܛܐ ܕܡܬܦܠܓܝܢ ܗܝܕܝܟ. ܐܢܗܘ ܕܝܢ ܕܠܘ ܒܗܢܐ ܢܝܫܐ. ܐܠܐ ܟܕ ܒܚܝܘ̈ܗܝ ܩܕܡ ܙܕܩ ܠܦܘܬ ܡܟܢܘܬܗ. ܐܝܛܐ ܠܗ̇ܘ ܡܐ ܕܫܪܟ ܠܗ ܘܝܬܪ ܡ̣ܢ ܣܘܢܩܢ ܝ̇ܪܬܘܗܝ ܡܦܩܕ ܕܢܬܦܠܓ ܠܣܢܝ̈ܩܐ. ܟܕ ܡܣܒܪ ܠܡܣܬܝܥܘ ܒܨܠܘ̈ܬܗܘܢ ܘܒܬܟܫ̈ܦܬܗܘܢ ܕܚܠܦܘܗܝ ܠܘܬ ܫܘܘܙܒܐ ܘܦܘܪܩܢܐ ܕܚܝܘ̈ܗܝ. ܕܠܗܢܐ ܠܘ ܡܘܬܪ̈ܢ ܙܕ̈ܩܬܐ. ܡܠܝ̣ܣܛܐ ܟܕ ܠܐ ܢܗܘܐ ܕܫܢܝ̣ܓ ܒܪܚܡܬ݀ ܢܟ̈ܣܐ ܐܝܟ ܗ̇ܘ ܩܕܡܝܐ. ܒܗ̇ܝ ܕܐܠܗܐ ܫܘܒܚܐ ܠܛܝܒܘܬܐ ܠܬܪ̈ܥܝܬܐ ܕܐܢ ܘܒܬܐܪ̈ܬܐ ܚ̇ܐܪ.

 

 

 

ܢܝܫܐ ܫܒܝܥܝܐ ܕܡܢܐ ܗ̇ܝ ܕܒܘܟܪ̈ܐ ܟܬܝ̣ܒܝ̣ܢ ܒܫܡܝܐ ܘܡܢܐ ܬܘܒ ܥܘ̈ܒܐ ܕܐܒܪܗܡ ܘܐܝܣܚܩ ܘܕܝܥܩܘܒ

 

ܒܘܟܪ̈ܐ ܡ̇ܢ ܡܠܐܟ̈ܐ ܕܩܕܝ̣ܡܝܢ ܘܒܟܝ̣ܪ̈ܝ̣ܝ̣ܢ ܒܒܪܝܬܗܘܢ ܡ̣ܢ ܩܕܡ ܒܪܝ̣ܬܢ. ܘܥܕܬܗܘܢ ܘܟܢܘܫܝܗܘܢ. ܘܥܘ̈ܒܐ ܗ̇ܢܘܢ ܕܠܗܘܢ ܡܣܟܝܢܢ ܠܡܬܡܢܥܘ. ܐܘ̈ܢܐ ܐܢܘܢ ܐܠܗܝ̈ܐ ܘܛܘܒ̈ܬܢܐ ܕܡܩܒܠܝܢ ܠܟܠܗܝܢ ܕܡܝܝ̈ ܠܐܠܗܐ. ܘܕܝܬܝܪ ܢܗܝܪܐܝܬ ܐܡܪ. ܕܘܝܪ̈ܐ ܐܢܘܢ ܪ̈ܘܚܢܝܐ ܕܥܡ ܪ̈ܘܚܬܐ ܕܪ̈ܝ̣ܫܝ ܐܒܗ̈ܬܐ ܗ̇ܢܘܢ ܘܟܠܗܘܢ ܩܕܝ̈ܫܐ ܕܫܪܟܐ.

 

 

 

ܢܝܫܐ ܬܡܝܢܝܐ ܡܛܠܗ̇ܝ ܕܒܐܝܢܐ ܙܢܐ ܝ̇ܬܪܝ̣ܢܢ ܡ̣ܢ ܩܒܪ̈ܐ ܕܩܕܝ̈ܫܐ ܕܡܢܗܘܢ ܡܬܒܪܟܝ̣ܢܢ

 

ܐܡܪܝܢܢ ܕܢܦܫܐ ܡܠܝ̣ܠܬܐ܆ ܟܕ ܡܢܗ ܕܦܓܪܐ ܡܓܗܝܐ. ܠܦܘܬ ܚܝܠܐ ܕܕܘܪܫܐ ܕܩܢܬ݀ ܥܡܗ ܕܦܓܪܐ. ܝܬܝܪ ܢܗܝܪܐܝܬ ܡܬܓܡܪܐ ܒܬܐܘܪ̈ܝܐܣ ܐܠܗܝ̈ܬܐ. ܒܗ̇ܝ ܕܗ̇ܘ ܕܐܝܟ ܥܢܢܐ ܡܟܡܗܢܝܬܐ ܡܥܡܛ ܗ̣ܘܐ. ܡ̣ܢ ܟܕܘ ܐܬܬܪܝ̣ܡ. ܘܡܛܠ ܕܐܣܪܗ̇ ܕܥܡ ܦܓܪܐ ܐܣܪܐ ܗ̱ܘ ܕܪܚܡܬܐ ܐܝ̇ܕܐ ܕܡ̣ܢ ܟܠ ܫܢ̈ܓܢ ܚܣܝ̣ܢܐ. ܒܐܡܝ̣ܢܘ ܚܘܪܐ ܡܕܡ ܗܘܐ ܠܗ̇ ܠܘܬ ܦܓܪ ܗ̇ܘ ܕܣܡܬܗ܆ ܟܪ ܕܣܡܬܗ. ܒܕܓܘܢ ܟܕ ܠܘܬܗ ܕܩܒܪܐ ܢܘܣܐ ܕܦܓܪܐ ܗ̇ܘ ܨܝܒܝ̣ܢܢ. ܦܓܥܐ ܡܕܡ ܗܘܐ ܠܢܦܫܢ܆ ܥܡ ܢܦܫܐ ܗ̇ܝ ܓܡܝ̣ܪܬܐ. ܘܒܣܘܓܐܬ݀ ܙܠܓ̈ܐ ܐܠܗܝ̈ܐ ܕܩܢܬ݀ ܢܦܫܐ ܗ̇ܝ ܡ̣ܢ ܫܒܒܘܬ ܐܠܗܘܬܐ ܘܡܠܐܟ̈ܐ܆ ܢܦܫܢ ܡܬܬܨܝ̣ܪܐ ܕܡܘ̣ܬ ܡܚܙܝ̣ܬܐ. ܘܗܟܢܐ ܢ̇ܛܚܝܢܢ ܥܠܝܢ ܫܘ̈ܟܢܐ ܘܡܫܬܟܢܝܢ ܠܢ ܒܘܪ̈ܟܬܐ ܒܡܨܥܝܘܬܗ ܕܩܒܪܐ ܩܕܝܫܐ܆ ܕܩܕܝܫܐ ܗ̇ܘ܀

 

 

 

ܫܠܡܬ݀ ܫܬܐܣܬܐ ܫܬܝܬܝܬܐ

 

 

 

 

 

 

 

     #1 

 

 

 

ܫܬܐܣܬܐ ܫܒܝܥܝܬܐ

 

ܡܛܠ ܪ̈ܘܚܐ ܒܝ̈ܫܬܐ ܐܘܟܝ̣ܬ ܫܐܕ̈ܐ. ܘܒܗ ܐܝܬ ܩܦ̈ܠܐܐ ܬܪܝܢ. ܩܠܐܘܢ ܩܕܡܝܐ ܡܛܠ ܡܢܝܘܬܗܘܢ. ܘܕܐܢ ܐܝܬܝܗܘܢ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܬܪ̈ܥܝܬܐ ܡܫܚ̈ܠܦܬܐ ܕܗܘܝ̈ ܠܒܢܝ̈ܢܫܐ ܥܠ ܫܐܕ̈ܐ. ܘܒܗ ܐܝܬ ܢܝ̈ܫܐ ܫܬܐ. ܢܝܫܐ ܩܕܡܝܐ ܡܛܠ ܪܘܫܡܗܘܢ ܘܥܠܬ݀ ܡܦܘܠܬܗܘܢ

 

ܐܡܪܝܢܢ ܕܫܐܕܐ ܐܝܬܘܗܝ܆ ܟܝܢܐ ܠܐ ܓܫܝ̣ܡܐ ܒܪܝܐ ܘܡܠܝ̣ܠܐ. ܗ̇ܘ ܕܟܕ ܐܬܒܩܝ̣ ܒܢܨܝ̣ܚܘܬܐ ܕܟܝܢܗ ܘܬܘܩܦܐ ܕܚܝܠܗ. ܐܫܬܩܠ ܘܐܫܬܥܠܝ ܠܘܩܒܠ ܐܠܗܐ ܒܪܘܝܗ. ܘܐܡ̣ܪ ܐܝܟ ܕܐܡ̣ܪ ܟܬܒܐ ܕܠܫܡܝܐ ܐܣܩ ܘܠܥܠ ܡ̣ܢ ܥܢ̈ܢܐ ܘܟܘ̈ܟܒܐ ܐܣܝ̣ܡ ܟܘܪܣܝ. ܘܐܗܘܐ ܕܡܐ ܐ̱ܢܐ ܠܡܪܝܡܐ. ܒܕܓܘܢ ܠܝ̣ܓܐܝܬ ܓܙܪ ܕܝ̣ܢܐ ܕܡܦܘܠܬܐ ܩܒܠ. ܥܡ ܟܢܘ̈ܬܗ ܗ̇ܢܘܢ ܕܐܟܘܬܗ ܐܬܪܥܝ̣ܘ ܘܠܨܒܝܢܗ ܫܠܡܘ. ܘܡܛܠ ܗܕܐ ܚܫܘܟܐ ܚܠܦ ܢܘܗܪܐ ܗ̣ܘܐ ܥܡ ܫܚܪܗ. ܘܒܝܕ ܗ̇ܝ ܕܣܛܐ܆ ܣܛܢܐ ܐܬܩܪܝ̣. ܘܒܗ̇ܝ ܕܐܫܬܘܕܝ. ܫܐܕܐ. ܘܡܛܠ ܕܡܚܫܒܬܐ ܕܣܩܘܒܠܝܐ ܠܡܕܪܟܢܘܬܐ ܫܪܝܪܬܐ ܕܗܘܢܐ ܐܬܪܢܝ. ܕܝܘܐ ܐܬܟܢܝ̣ ܟܐܢܐܝܬ. ܘܒܥܠܬ݀ ܗ̇ܝ ܕܐܡ̣ܪ ܠܪܝܫ ܓܢܣܢ. ܕܡܛܠ ܕܠܐ ܬܗܘܘܢ ܐܠܗ̈ܐ ܐܠܗܐ ܟܠܟܘܢ ܡ̣ܢ ܡܐܟܘܠܬܐ ܕܦܐܪ̈ܐ ܐܟܠܩܪܨܐ ܐܫܬܡܗ. ܘܡܢܣܝܢܐ ܬܘܒ܆ ܒܩܨܬ݀ ܗ̇ܝ ܕܒܗ ܡܬܒܚܪܐ ܡܚܡܣܢܢܘܬܐ ܕܓܒܪ̈ܐ ܐܠܗܝ̈ܐ. ܐܟܙܢܐ ܕܐܝܘܒ ܘܫܪܟܐ. ܘܒܥܠܙܒܘܒ ܬܘܒ ܐܫܬܡܗ ܒܝܕ ܗ̇ܝ ܕܒܕܡܘ̣ܬ ܩܪܚܐ ܐܘܟܝܬ ܟܘܟܝ̣ܬܐ ܠܘܩܒܠ ܪܘܡܐ ܡܪܚܐܝܬ ܡܬܬܪܝ̣ܢ. ܘܡܫܠܡܢ̈ܐ ܡ̇ܢ ܐܡܪܝܢ ܕܡܛܠܗ̇ܝ ܕܐܡ̣ܪ ܐܠܗܐ ܠܣܛܢܐ. ܕܢܦܠ ܢܣܓܘܕ ܠܐܕܡ. ܟܕ ܚܕܬܐܝܬ ܐܬܒܪܝ̣ ܒܨܠܡ ܐܠܗܐ. ܘܗ̣ܘ ܐܫܬܐܠ ܘܠܐ ܐܫܦ. ܢܦܠ ܥܡ ܟܠܗ ܝܗܠܗ. ܘܡܪܝ ܝܥܩܘܒ ܕܣܪܘܓ ܬܘܒ ܡܕܡ ܕܕܡܐ ܗܟܢ ܐܡ̣ܪ ܡܣܠܐ ܠܗ ܠܡܐܡܪܐ ܗܢܐ ܐܝܟ ܕܡ̣ܢ ܠܥܠ ܐܡ̣ܪܢܢ.

 

 

 

ܢܝܫܐ ܬܪܝܢܐ ܡܛܠ ܗ̇ܢܘܢ ܕܓܘܫ̈ܡܐ ܩܛܝ̣̈ܢܐ ܘܐܐܪ̈ܝܐ ܐܡܪܝܢ ܕܐܝܬܝܗܘܢ ܫܐܕ̈ܐ

 

ܐ̱ܢܫܝ̈ܢ ܡ̇ܢ ܐܡܪܝܢ ܕܓܘܫ̈ܡܐ ܐܢܘܢ ܩܛܝ̣̈ܢܐ ܘܐܐܪ̈ܝܐ ܫܐܕ̈ܐ. ܘܡܨܝܢ ܠܡܣܬܟܡܘ ܒܟܠ ܐܣܟܡܝ̈ܢ. ܘܠܡܥܠ ܒܒܢܝ̈ܢܫܐ ܘܒܥܝ̣ܪܐ. ܘܠܡܓܫܡ ܠܐܐܪ ܘܠܡܢܕܘ ܛܘܪ̈ܐ. ܘܠܡܣܥܪ ܣܥܘܪ̈ܘܬܐ ܕܝܬܝܪ ܬܡܝ̣̈ܗܢ ܘܥܒܪ̈ܢ ܠܚܝܠܐ ܐ̱ܢܫܝܐ. ܘܡܝܬܝܢ ܬܚܘܝ̣ܬܐ ܘܐܡܪܝܢ. ܐܢܗܘ ܕܐܐܪ ܗܢܐ ܡܬܬܣܝ̣ܩܢܐ ܒܟܠܗܘܢ ܗܕܡܝ̣̈ܢ ܓܘܝ̈ܐ ܘܓܝܕܝ̈ܢ ܘܘܪ̈ܝ̣ܕܝ̣ܢ ܘܫܪ̈ܝܢܝ̣ܢ ܘܫܪ̈ܝܬܢ ܡܨܐ ܠܡܥܠ. ܘܠܦܘܬ ܐܝܢܝܘܬܗ ܡܫܓܢܐ ܡܘ̣ܙܓܢ. ܘܡܫ̈ܒܐ ܬܘܒ ܥܙܝ̈ܙܐ ܡܕܝ̈ܢܬܐ ܟܝ̣ܬ ܪܘܪ̈ܒܬܐ ܙܒܢܝ̈ܢ ܣܓܝ̈ܐܢ ܣܬܪܘ. ܘܠܗ̈ܓܐ ܕܡ̣ܢ ܓܘ ܐܪܥܐ. ܛܘܪ̈ܐ ܘܪ̈ܡܬܐ ܡܪܥܠܝ̣ܢ ܒܢ̈ܝܕܐ. ܘܪ̈ܘܚܐ ܠܝܡܐ ܪܒܐ ܡܒܥܪܪܝܢ. ܠܘ ܠܐ ܡܬܗܝܡܢܐ܆ ܕܚܝܘܬܐ ܡܕܡ ܐܐܪܝܬܐ ܐܘܟܝܬ ܫܐܕܐ ܣܥܘܪ̈ܘܬܐ ܕܛܒ ܥܫܝ̈ܢܢ ܡ̣ܢ ܗܠܝܢ ܢܬܡܨܐ ܠܡܣܥܪ. ܘܗ̣ܢܘܢ ܗܠܝܢ ܕܗܕܐ ܡܬܪܥܝܢ܇ ܡܚܝܠܝ̣ܢ ܬܪܥܝܬܗܘܢ ܒܗ̇ܝ ܕܐܡ̣ܪ ܩܕܝܫܐ ܐܘܓܪܝܣ. ܕܓܘܫ̈ܡܐ ܩܛܝ̈ܢܐ ܕܕܝ̈ܘܐ܇ ܓܘܢܐ ܡܩܒܠܝܢ ܘܐܣܟܡܐ. ܐܠܐ ܡ̣ܢ ܡܪܓܫܢܘܬܢ ܕܝܠܢ ܥܪܩܝܢ. ܒܗ̇ܝ ܕܠܐ ܕܡ̇ܐ ܗ̣ܘ ܡܘܙܓܐ ܒܕܡܘ̣ܬܐ܆ ܠܡܘܙܓܐ ܕܦܓܪܐ ܕܪ̈ܓܫܐ ܡܐ ܓܝܪ. ܕܠܐܢܫܝ̈ܢ ܨܒ̇ܝܢ ܡܬܚܙܝܘ. ܒܕܡܘ̣ܬܐ ܕܦܓܪܐ ܕܪ̈ܓܫܐ ܡܬܚܙܝܢ. ܒܕܠܐ ܡܚܘܝܢ ܓܘܫܡܝ̈ܗܘܢ ܩܛܝ̈ܢܐ.

 

 

 

ܢܝܫܐ ܬܠܝܬܝܐ ܡܛܠ ܬܪܥܝ̣ܬܐ ܕܗ̇ܢܘܢ ܕܢܦ̈ܫܬܐ ܐ̱ܢܫܝ̈ܬܐ ܕܚܛܝ̈ܐ ܐܡܪܝܢ ܕܐܝܬܝܗܘܢ ܫܐܕ̈ܐ

 

ܐ̱ܚܪ̈ܢܐ ܕܝܢ ܐܡܪܝܢ ܕܡ̣ܢ ܠܐ ܡܬܡܨܝܢ̈ܝܬܐ ܗ̱ܝ ܕܐܠܗܐ ܫܘܒܚܐ ܠܛܝܒܘܬܗ ܒܪܝ̣ܬܐ ܡܕܡ ܢܒܪܐ ܗ̣ܘܐ ܕܗܢܐ ܟܠܗ ܡܣܓܦܝܐ. ܐܠܐ ܢܦ̈ܫܬܐ ܐ̱ܢܫܝ̈ܬܐ. ܟܕ ܠܪ̈ܓܝܓܬܐ ܒܣܪ̈ܢܝܬܐ ܢܩܦ̈ܝ ܘܒܚܫܝ̈ ܗܘܠܐ ܐܬܬܥ̈ܡܛܝ. ܟܕ ܡ̣ܢ ܦܓܪ̈ܝܗܝܢ ܒܩܛܝ̣ܪܐ ܐܬܦܪ̈ܫܝ. ܢܘܟܪ̈ܝܬܐ ܦܫ̈ܝ ܡ̣ܢ ܚܒܘܟܝܐ ܕܒܓܘ̈ܕܐ ܡܠܐܟܝ̈ܬܐ. ܘܗܟܢܐ ܠܦܓܪ̈ܐ ܕܒܢܝ̈ܢܫܐ ܘܕܚܝ̈ܘܬܐ ܫܓ̈ܫܢ ܙܒܢ ܙܒܢ ܠܡܩܦ ܠܗܘܢ. ܘܠܡܓܡܪ ܒܗܘܢ ܚܫܝ̈ܗܘܢ. ܠܘ ܕܝܢ ܒܟܠ ܦܓܪ ܗܐ ܣܥܪ̈ܢ. ܐܠܐ ܒܦܓܪ̈ܐ ܗ̇ܢܘܢ ܕܒܝܬܝܘܬܐ ܡܕܡ ܩܢܝܢ ܠܘܬ ܨܒܝܢܗܝܢ. ܘܕܡܝܘܬܐ ܕܒܦܓܪ̈ܝܗܝܢ ܩܕ̈ܡܝܐ ܕܐܬܚܒܠܘ. ܡܚܝܠܝ̣ܢ ܕܝܢ ܬܪܥܝ̣ܬܗܘܢ. ܗ̇ܢܘܢ ܕܗܕܐ ܡܬܪܥܝܢ ܘܐܡܪܝܢ. ܕܦܓܪܐ ܗ̇ܘ ܕܕܡܝܘܬܐ ܕܩܢܝܐ ܠܢܦܫܐ ܫܢܝܬܐ ܕܠܗ ܫܓܫܐ ܐܘܟܝܬ ܠܫܐܕܐ. ܗܘܝܘ ܒܝܬܐ ܗ̇ܘ ܕܟܢܝ̣ܫ ܘܚܡܝ̣ܡ ܘܡܨܒܬ ܕܐܡ̣ܪ ܡܪܢ. ܘܫܒܥ ܪ̈ܘܚܐ ܗ̇ܢܝܢ ܐ̱ܚܪ̈ܢܝܬܐ ܟܢܘ̈ܬܗ̇ ܐܢܝܢ ܕܢܦܫܐ ܗ̇ܝ. ܘܐܡܪܝܢ ܬܘܒ ܕܐܠܘܠܐ ܢܦ̈ܫܬܐ ܗ̣ܘܘ ܐ̱ܢܫܝ̈ܬܐ ܕܐܫܬܘ̈ܬܦܝ ܠܪ̈ܓܝܓܬܐ ܦܓܪ̈ܢܝܬܐ. ܗ̣ܢܘܢ ܫܐܕ̈ܐ. ܠܐ ܣܟ ܡܬܬܢܝ̣ܚܝ̣ܢ ܗ̣ܘܘ ܟܕ ܡܫܡܠܝܢ ܗܘܝܢ ܠܗܝܢ. ܐܦܠܐ ܡܓܪܓܝ̣ܢ ܗ̣ܘܘ ܠܢ ܘܡܚܬܚܬܝ̣ܢ ܠܡܫܬܪܓܠܘ ܒܗܝܢ. ܗܐ ܓܝܪ ܒܒܢܝ̈ܢܫܐ ܐܡܪܝܢ ܕܚܙܝܢܢ ܣܓܝ̈ܐܐ. ܡ̣ܢ ܗ̇ܢܘܢ ܕܪ̈ܚܡܝ ܚܫ̈ܐ ܗܘܘ. ܟܕ ܬܚܒܝܢ ܡ̣ܢ ܗ̇ܝ ܕܢܫܡܠܘܢ ܐܢܘܢ ܒܥܠܬ݀ ܟܘܪܗܢܐ ܐܘ ܣܝܒܘܬܐ. ܢܝܚܐ ܪܒܐ ܩܢܝܢ ܘܒܘܝܐܐ: ܟܕ ܚܙܝܢ ܠܐܚܪ̈ܢܐ ܕܡܫܬܘܬܦܝܢ ܒܗܘܢ ܒܚܫ̈ܐ ܘܪܚܡܝܢ ܠܡܬܥܢܝܘ ܥܡܗܘܢ. ܘܡܠܒܛܝܢ ܠܗܘܢ ܠܘܬ ܚܫܚܬܐ.

 

 

 

ܢܝܫܐ ܪܒܝܥܝܐ ܡܛܠ ܬܪܥܝ̣ܬܐ ܕܗ̇ܢܘܢ ܕܐܡܪܝܢ ܕܠܫܐܕ̈ܐ ܡ̇ܢ ܐܣܛܘܟ̈ܣܐ ܐܪܒܥܐ ܕܘܟܬ݀ ܦܓܪܐ ܡܡܠܝܢ

 

ܐܡܪܝܢ ܓܝܪ ܕܐܟܙܢܐ ܕܠܓܘ̈ܫܡܐ ܫܡܝ̈ܢܐ. ܒܥܠܬ݀ ܡܥܠܝܘܬܗܘܢ ܘܢܗܝܪܘܬܗܘܢ ܘܠܐ ܚܫܘܫܘܬܗܘܢ. ܡܠܐܟ̈ܐ ܛܒ̈ܐ ܘܡܥܠܝ̈ܐ ܢܩܝ̣ܦܝ̣ܢ. ܒܗ̇ ܒܕܡܘ̣ܬܐ ܠܐܣܛܘܟ̈ܣܐ ܐܪܒܥܐ ܒܥܠܬ݀ ܡܐܟܘܬܗܘܢ ܘܚܫܘܫܘܬܗܘܢ ܘܡܚܫܢܘܬܗܘܢ. ܫܐܕ̈ܐ ܒܝ̈ܫܐ ܘܚܫܘ̈ܫܐ ܘܡܚ̈ܫܢܐ ܢܩܝ̣ܦܝܢ. ܘܕܠܢܘܪܐ ܡ̇ܢ ܫܐܕ̈ܐ ܢܩܝ̣ܦܝ̣ܢ. ܝܕܝܥܐ ܡ̣ܢ ܗ̇ܝ ܕܟܠܗܘܢ ܟܬܒ̈ܐ ܩܕܝ̈ܫܐ ܡܠܦܝܢ. ܕܒܢܘܪܐ ܡܫܬܢܩܝ̣ܢ ܚܛܝ̈ܐ ܒܐܝ̈ܕܝ ܫܐܕ̈ܐ. ܘܕܒܐܬܪܐ ܬܘܒ ܐܝܬܝܗܘܢ ܫܐܕ̈ܐ. ܝ̣ܕܝ̣ܥܐ ܡ̣ܢ ܗ̇ܝ ܕܐܡ̣ܪ ܦܘܠܘܣ ܒܗ̇ܝ ܕܐܦܣܝ̈ܐ. ܐܝܟ ܥܠܡܝܘܬܗ ܕܥܠܡܐ ܗܢܐ. ܘܐܝܟ ܨܒܝܢܗ ܕܪܝܫ ܫܘܠܛܢܐ ܕܐܐܪ ܕܪܘܚܐ ܗܕܐ ܕܡܬܚܦܛܐ ܒܒܢܝ̈ܐ ܕܠܐ ܡܬܛܦܝ̣ܣܢܘܬܐ. ܘܡ̣ܢ ܗ̇ܝ ܕܫ̇ܡܥܝ̣ܢܢ ܠܟܬܒ̈ܐ ܩܕܝ̈ܫܐ ܕܐܡܪܝܢ ܕܚܝܠܘ̈ܬܐ ܒܝ̈ܫܐ ܒܐܐܪ ܟܡܝ̣ܢܝ̣ܢ. ܘܥܡ ܢܦ̈ܫܬܐ ܕܒܢܝ̈ܢܫܐ ܒܙܒܢ ܫܘܢܝܝ̈ܗܝܢ ܩܪܒܐ ܥܒܕܝܢ. ܘܕܒܡܝ̈ܐ ܬܘܒ ܫܐܕ̈ܐ ܥܡ̇ܕܝܢ. ܝܕܝܥܐ ܡ̣ܢ ܗ̇ܝ ܕܫܡܥܝ̣ܢܢ ܠܟܬܒܐ ܕܐܡ̇ܪ. ܕܟܕ ܥܡܕ ܡܪܢ. ܠܪܝܫܗ ܕܬܢܝ̣ܢܐ ܡܬܝܕܥܢܐ ܕܒܡܝ̈ܐ ܚܠܝ̣ܕ ܗ̣ܘܐ ܪܨܨ. ܘܕܒܐܪܥܐ ܬܘܒ ܫܐܕ̈ܐ ܐܝܬ. ܝܕܝܥܐ ܡ̣ܢ ܗ̇ܝ ܕܐܡ̣ܪ ܕܘܝܕ. ܕܒܢܝ̈ ܐܪܥܐ ܘܒܢܝ̈ܢܫܐ.

 

 

 

ܢܝܫܐ ܚܡܝܫܝܐ. ܡܛܠ ܬܪܥܝ̣ܬܐ ܕܗ̇ܢܘܢ ܕܐܡܪܝܢ ܕܪ̈ܓܫܐ ܓܘܝ̈ܐ ܗ̇ܢܘܢ ܐܢܘܢ ܕܫܐܕ̈ܐ

 

ܐܡܪܝܢ ܓܝܪ ܚܟܝ̈ܡܐ ܕܠܒܪ. ܕܬܠܬܐ ܐܢܘܢ ܚܝ̈ܠܐ ܕܒܢ. ܡܠܝ̣ܠܘܬܐ ܘܚܝܠܐ ܘܪܓܬܐ. ܘܟܠ ܚܕ ܡܢܗܘܢ ܟܕ ܢܥܫܢ. ܡܫܬܥܒܕܘ ܡܫܬܥܒܕܝܢ ܠܗ ܗܠܝܢ ܐ̱ܚܪ̈ܢܐ. ܘܠܘܬܗ ܡܬܢܬܦܝܢ. ܪܓܬܐ ܡܕܝܢ ܟܕ ܥܗܪܐ. ܠܘܬ ܗ̇ܝ ܕܒܗ̇ ܬܗܪܘܓ ܡܚܫܒܬܐ ܡܬܕܢܝܐ. ܘܗܟܢܐ ܟܕ ܗ̣ܘ ܚܘܫܒܐ ܗ̇ܘ ܠܘܬ ܠܘܚ ܦܢܛܣܝܐ ܥ̇ܒܪ. ܡܬܪܓܫܢܐ ܡܕܡ ܘܩܢܘܡܝܐ ܗܘܐ ܪܓܝܓܐ ܗ̇ܘ ܕܐܬܪܢܝ̣. ܒܗ̇ ܒܕܡܘ̣ܬܐ ܘܚܡܬܐ ܟܕ ܦܩܪܐ. ܘܡ̣ܢ ܗܪܟܐ ܡܬܬܝܬܝܢ ܒܢܝ̈ܢܫܐ ܠܡܣܒܪܘ. ܕܫܐܕ̈ܐ ܡܚܬܚܬܝ̣ܢ ܠܗܘܢ ܥܠ ܪ̈ܓܝܓܬܐ. ܘܫܐܕ̈ܐ ܬܘܒ ܕܪ̈ܐ ܡܩܝ̣ܡܝ̣ܢ ܥܡܗܘܢ. ܘܡ̣ܢ ܫܩܝ̈ܦܐ ܗܡܣܝ̣ܢ ܠܡܫܕܐ ܐܢܘܢ. ܘܝܕܝܥܐ ܗܕܐ ܐܡܪܝܢ ܕܚܘ̈ܫܒܐ ܐܢܘܢ ܥܠܬ݀ ܗܠܝܢ. ܡ̣ܢ ܗ̇ܝ ܕܟܕ ܒܫܠܝܐ ܗܘܐ ܒܪܢܫܐ ܝܚܝܕܐܝܬ ܒܐܬܪܐ ܕܪܚܝ̣ܩ ܡ̣ܢ ܥܘܡܪܐ ܕܒܢܝ̈ܢܫܐ. ܝܬܝܪܐܝܬ ܡܬܚܙܝܢ ܠܗ ܚܙܘܢ̈ܐ ܕܐܝܟ ܗܠܝܢ. ܒܥܠܬ݀ ܚܘܫܒܐ ܗ̇ܘ ܕܥܫܝܢܐܝܬ ܗܪܓ ܒܐܝܠܝܢ ܕܪܐܓ. ܐܝܟܢܐ ܕܙܒܢܝ̈ܢ ܣܓܝ̈ܐܢ ܐܦ ܠܘܬ ܚܡܬܐ ܘܒܥܪܝ̣ܪܘܬܐ ܢܐܬܐ ܒܥܠܬ݀ ܗ̇ܝ ܕܚܐܒ ܡ̣ܢ ܗ̇ܝ ܕܢܩܕܐ ܠܗ̇ܘ ܡܐ ܕܡܬܪܓܪܓ. ܘܙܒ̈ܢܬܐ ܬܘܒ ܡܬܚܫܒ ܠܡܘܒܕܘ ܝܬܗ ܒܡܘ̈ܬܐ ܡܫܚ̈ܠܦܐ ܒܥܠܬ݀ ܐܘܠܨܢܐ ܗ̇ܘ ܕܒܗ ܡܬܕܘܐ. ܒܥܢܝܢܐ ܕܝܢ ܕܥܡ ܒܢܝ̈ܢܫܐ. ܒܨܪܝܢ ܗܓܓ̈ܐ ܕܐܝܟ ܗܠܝܢ ܒܩܨܬ݀ ܫܓܡܐ ܘܒܬܚܘܝ̣ܬܐ ܕܚܠܡ̈ܐ. ܬܘܒ ܝܬܝܪܐܝܬ ܡܚܝܠܝܢ ܬܪܥܝܬܗܘܢ ܗܕܐ.

 

 

 

ܢܝܫܐ ܫܬܝܬܝܐ. ܡܛܠ ܬܪܥܝ̣ܬܐ ܕܗܘܬ݀ ܠܡܓܘ̈ܫܐ ܘܠܡܢܝ̣̈ܢܝܐ ܡܛܠ ܫܐܕ̈ܐ

 

ܐܡܪܝܢ ܓܝܪ ܕܠܥܠܡܐ ܬܪܝܢ ܐܢܘܢ ܐܠܗ̈ܐ ܗ̇ܘ ܚܕ ܡܢܗܘܢ ܛܒܐ ܗ̱ܘ ܘܡܪܚܡܢܐ ܘܫܦܝ̣ܥܐ. ܘܗ̇ܘ ܐ̱ܚܪܢܐ ܒܝܫܐ ܘܡܣܓܦܢܐ ܘܩܠܘܛܐ. ܘܠܛܒܐ ܡ̇ܢ ܚܝܠܘ̈ܬܐ ܐܝܬ ܛܒ̈ܐ ܕܐܝܬܝܗܘܢ ܡܠܐܟ̈ܐ. ܘܠܒܝ̣ܫܐ ܬܘܒ ܚܝܠܘ̈ܬܐ ܐܝܬ ܒܝ̈ܫܐ ܕܐܝܬܝܗܘܢ ܫܐܕ̈ܐ. ܘܡܢܝ̣̈ܢܝܐ ܬܘܒ ܡܕܡ ܐܡܪܝܢ ܐܠܗ̈ܐ ܘܥܒܘ̈ܕܐ ܕܥܠܡܐ. ܚܕ ܡ̣ܢ ܢܘܗܪܐ ܟܠܢܝܐ. ܘܐܝܬ ܠܗ ܡܥܕܪ̈ܢܐ ܐ̱ܚܪ̈ܢܐ ܢܗܝ̣ܪ̈ܐ ܕܝܬܝܪܝܢ ܘܒܨܝ̣ܪܝ̣ܢ ܡ̣ܢ ܚܕ̈ܕܐ ܘܒܡܚܝ̣ܠܘܬܐ ܕܐܝܬܝܗܘܢ ܡܠܐܟ̈ܐ. ܘܐ̱ܚܪܢܐ ܚܫܘܟܐ ܟܠܢܝܐ܆ ܘܐܝܬ ܠܗ ܡܥܕܪ̈ܢܐ ܐ̱ܚܪ̈ܢܐ ܚܫܘ̈ܟܝܐ ܕܝܬܝ̣ܪܝܢ ܘܒܨܝ̣ܪܝܢ ܡ̣ܢ ܚܕܕ̈ܐ ܒܪܒܘܬܐ ܘܒܙܥܘܪܘܬܐ. ܘܒܚܝܠܐ ܘܒܡܚܝ̣ܠܘܬܐ ܕܐܝܬܝܗܘܢ ܫܐܕ̈ܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܫܒܝܥܝܬܐ

 

ܡܛܠ ܫܘܪܪ ܫܟܝ̣ܚܘܬܗܘܢ ܕܫܐܕ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ. ܕܒܪܢܫܐ ܡ̇ܢ ܟܕ ܚܝ̈ܐ ܝܚܝ̈ܕܝܐ ܡܬܥܢܘܐ. ܘܡ̣ܢ ܫܓ̈ܡܐ ܥܠܡܢܝ̈ܐ ܡܬܒܗܠ ܘܗ̇ܘܐ ܒܫܠܝܐ. ܘܡܬܕܪܫ ܒܥܡ̈ܠܐ ܗ̇ܢܘܢ ܕܡ̇ܬܚܒܝ̣ܢ ܠܚܝ̈ܠܐ ܦܓܪ̈ܢܝܐ. ܨܘܪ̈ܬܐ ܡܕܡ ܡܠܝ̣̈ܠܬܐ ܚܙܐ. ܕܠܘܬ ܡܦܘܠܬܐ ܡܠܟ̈ܢ ܠܗ ܒܝܕ ܡ̈ܠܐ ܡܕܥܢ̈ܝܬܐ. ܒܕܓܘܢ ܗ̇ܢܘܢ ܗܠܝܢ ܨܘܪ̈ܬܐ ܐܘ ܠܐ ܡܬܘܡ ܐܝܬܝܗܝܢ. ܐܘ ܒܚܘܫܒܐ ܒܠܚܘܕ ܫܚܝ̣ܡܐ ܐܝܬܝܗܝܢ ܐܘ ܒܣܘܥܪܢܐ. ܘܗ̇ܘ ܩܕܡܝܐ ܠܐ ܫܪܝܪ. ܘܐܠܐ ܙܕܩ ܗ̣ܘܐ ܕܥܠ ܟܠܗܝܢ ܨܘܪ̈ܬܐ ܕܡ̈ܡܠܠܢ ܘܠܘ ܡܬܚܙ̈ܝܢ ܢܣܒܪ ܗ̣ܘܐ ܕܠܐ ܐܝܬܝܗܝܢ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܘܐܠܐ ܗܟܘܬ ܙܕܩ ܗ̣ܘܐ܆ ܕܠܟܠܗܝܢ ܨܘܪ̈ܬܐ ܕܐܝܟ ܗܠܝܢ ܕܒܚܘܫܒܐ ܐܢܝܢ ܫܚܝ̣ܡܐ ܡܣܒܪܝܢ ܗܘܝܢ ܕܐܦ ܗ̣ܝ ܫܟܝܪܐ. ܫܪܝ̣ܟ ܡܕܝܢ ܗ̇ܘ ܕܬܠܬܐ ܕܗܘܝܘ ܓܢܣܐ ܕܫܐܕ̈ܐ. ܕܐܝܬܝܗܘܢ ܠܘ ܚܘ̈ܫܒܐ ܫܚܝ̣ܡ̈ܐ ܐܠܐ ܣܘܥܪ̈ܢܐ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܡܚܫ̈ܒܬܐ ܗܠܝܢ ܒܝ̈ܫܬܐ ܕܣܠܩ̈ܢ ܥܠ ܥܘܗܕܢܐ. ܘܡ̈ܠܐ ܗܠܝܢ ܣܩܘܒ̈ܠܝܬܐ ܕܡܬܝܠܕ̈ܢ ܒܢܦܫܐ ܐܘ ܗ̣ܘ ܒܪܢܫܐ ܐܝܬܘܗܝ ܥܠܬܗܝܢ. ܐܘ ܐ̱ܚܪܢܐ ܕܣܛܪ ܡܢܗ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܙܒܢܝ̈ܢ ܣܓܝ̈ܐܢ ܠܐ ܡܨܛܒܐ ܒܗܝܢ ܒܪܢܫܐ. ܘܡܬܟܬܫ ܠܡܕܚܐ ܐܢܝܢ ܡܢܗ. ܫܪܝܟܐ ܡܕܝܢ ܕܐ̱ܚܪܝܢ ܗ̣ܘ ܥܠܬܗܝܢ. ܘܗ̣ܘ ܗ̇ܘ ܐ̱ܚܪܢܐ ܠܘ ܐܠܗܐ ܐܦܠܐ ܡܠܐܟ̈ܐ ܐܝܬܝܗܘܢ. ܒܗ̇ܝ ܕܛܒ̈ܐ ܐܢܘܢ. ܘܛܒܐ ܥܠ ܛܒ̈ܬܐ ܘܠܘ ܥܠ ܒܝ̈ܫܬܐ ܡܚܦܛ. ܫܪܝܟܐ ܡܕܝܢ ܕܒܝܫܐ ܗ̱ܘ ܥܠܬ݀ ܒܝ̈ܫܬܐ ܗ̇ܢܝܢ. ܕܠܗ ܩܪܝܢܢ ܫܐܕܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢܢ ܕܡܢܣ̈ܝܢܐ ܐ̱ܢܫܝ̈ܢ ܢܣܝ̣ܘ ܠܡܬܐܪܙܢܘܬܐ ܛܠܝ̈ܐ ܒܪܝܪ̈ܐ. ܕܣܦܝ̣ܩ ܚܘܫܒܗܘܢ ܡ̣ܢ ܫܓ̈ܡܐ ܥܠܡܢܝ̈ܐ. ܘܗ̣ܢܘܢ ܛܠܝ̈ܐ ܨܘܪ̈ܬܐ ܡܕܡ ܡܫܚ̈ܠܦܬܐ ܚܙܝܢ ܒܗܝܢ ܒܡܚܙ̈ܝܬܐ ܘܥܠ ܣܘܥܪ̈ܢܐ ܟܣܝ̈ܐ ܡܫܐܠܝܢ ܠܗܝܢ ܘܗ̣ܢܝܢ ܓܠܝ̈ܢ ܠܗ. ܘܓܠܝܐ ܕܠܘ ܡܕܡ ܐ̱ܚܪܝܢ ܐܝܬܝܗܘܢ ܫܐܕ̈ܐ. ܐܠܐ ܗ̣ܢܝܢ ܗܠܝܢ ܨܘܪ̈ܬܐ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ ܕܒܝܕ ܣܗܕ̈ܘܬܐ ܬܟܝ̈ܒܬܐ ܐܫܬܪܪܢܢ ܕܟܘܡܪ̈ܐ ܐ̱ܢܫܝ̈ܢ ܘܩܨܘ̈ܡܐ ܡ̣ܢ ܦܬܟܪ̈ܐ ܗ̇ܢܘܢ ܕܠܗܘܢ ܡܫܡܫܝ̣ܢ ܘܦܠܚܝ̣ܢ܇ ܣܘܥܪ̈ܢܐ ܣܓܝ̈ܐܐ ܟܣܝ̈ܐ ܘܓܢܝ̣̈ܙܐ ܝ̇ܠܦܝܢ ܘܡܬܐܪܙܝܢ. ܒܕܓܘܢ ܐܡܪܝܢܢ ܕܡܐܪܙܢܗܘܢ ܡ̣ܢ ܠܘ ܦܬܟܪܐ ܗ̇ܘ ܐܝܬܘܗܝ ܡܛܠ ܕܠܐ ܡܢܦܫܐ ܗ̱ܘ. ܘܠܐ ܡܪܓܫܢܐ ܘܠܐ ܡܠܝ̣ܠܐ. ܐܦܠܐ ܐܠܗܐ ܫܘܒܚܐ ܠܛܝܒܘܬܗ ܐܘ ܡܠܐܟ̈ܐ. ܒܗ̇ܝ ܕܒܣܥܘܪ̈ܘܬܐ ܢܕܝ̈ܕܬܐ ܡܫܬܡ̈ܠܝܢ ܡܬܐܪ̈ܙܢܘܬܐ ܗ̇ܢܝܢ ܕܠܐ ܪܚܡ ܠܗܝܢ ܡܪܝܐ܇ ܐܦܠܐ ܡܠܐܟܘ̈ܗܝ ܩܕܝ̈ܫܐ. ܐܝܟ ܗ̇ܝ ܕܢܦܣܩܘܢ ܒܣܝ̈ܦܐ ܐ̱ܢܫ̈ܐ ܢܦܫܗܘܢ. ܐܟܡܐ ܕܚܢ̈ܦܐ ܐ̱ܢܫܝ̈ܢ ܒܛܘܪܐ ܕܩܐܪܝܐ. ܘܐܝܟ ܙܢܝ̈ܘܬܐ ܘܛܢܦ̈ܘܬܐ ܕܡܣܬܥܪ̈ܢ. ܐܝܟ ܕܠܢܝܚܗ̇ ܕܐܦܪܘܕܝ̣ܛܝ̣. ܘܐܝܟ ܚܢ̈ܐ ܙܩܝ̈ܦܐ ܕܡܬܬܠܝܢ ܗ̣ܘܘ ܒܩ̈ܕܠܐ ܘܥܠ ܟܣܣ̈ܬܐ. ܘܐܝܟ ܩܛܘܠܘܬ ܐܟܣ̈ܢܝܐ ܕܠܘܬ ܛܐܘܪ̈ܘ. ܘܚܘܒܠ ܛܠܝ̈ܐ ܘܒܘܣܒܣܗܘܢ. ܘܙܡܪ̈ܐ ܘܪ̈ܦܣܐ ܫܢ̈ܚܐ ܘܫܪܟܐ ܕܫܟܝܪ̈ܘܬܐ ܐ̱ܚܪ̈ܢܝܬܐ. ܘܟܕ ܠܐ ܦܬܟܪܐ ܗ̇ܘ ܐܦܠܐ ܐܠܗܐ ܫܘܒܚܐ ܠܛܝܒܘܬܗ ܐܦܠܐ ܡܠܐܟ̈ܐ ܐܝܬܝܗܘܢ ܝܗܘ̈ܒܐ ܕܩܨ̈ܡܐ ܗܠܝܢ. ܫܪܝܟܐ ܕܕܝܘܐ ܡܕܡ ܐܘܟܝܬ ܫܐܕܐ ܢܩܝ̣ܦ ܠܨܠܡܐ ܗ̇ܘ ܘܗ̣ܘ ܒܗ ܡܡܠܠ. ܘܠܡܢܝ̣̈ܚܢܘܗܝ ܡܐܪܙ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܚܘܝܐ ܥܪܝ̣ܡ ܗ̣ܘܐ ܡ̣ܢ ܟܠܗ̇ ܚܝܘܬܐ. ܐܡܪܝܢܢ ܕܚܘܝܐ ܡ̇ܢ ܟܕ ܚܝܘܬܐ ܗ̱ܘ ܠܐ ܡܠܝ̣ܠܬܐ. ܡ̣ܢ ܠܐ ܡܫܟܚܢ̈ܝܬܐ ܗ̱ܝ ܕܡ̈ܠܐ ܕܐܝܟ ܗܠܝܢ ܥܡ ܐܡܐ ܕܓܘܐ ܢܡܠܠ ܗ̣ܘܐ. ܘܩܪܨܐ ܕܒܪܘܝܗ ܢܐܟܘܠ ܗ̣ܘܐ. ܝ̣ܕܝ̣ܥܐ ܡܕܝܢ ܕܣܛܢܐ ܒܐܣܟܡ ܚܘܝܐ ܐܨܛܠܡ. ܘܕܐܝܟ ܗܠܝܢ ܡܠܠ ܘܣܥܪ.

 

ܣܗܕܘܬܐ ܕܬܪܬܝܢ:

 

ܐܝܘܒ. ܘܐܡ̣ܪ ܡܪܝܐ ܠܣܛܢܐ. ܒܠܚܘܕ ܢܦܫܗ ܛܪ.

 

ܣܗܕܘܬܐ ܕܬܠܬ:

 

ܡܘܫܐ. ܠܫܐܕ̈ܐ ܕܠܐ ܗ̣ܘܘ ܐܠܗ̈ܐ.

 

ܣܗܕܘܬܐ ܕܐܪܒܥ:

 

ܕܘܝܕ. ܘܣܛܢܐ ܢܩܘܡ ܡ̣ܢ ܝܡܝ̣ܢܗܘܢ.

 

ܣܗܕܘܬܐ ܕܚܡܫ:

 

ܗ̣ܘ ܟܕ ܗ̣ܘ. ܘܡ̣ܢ ܪܘܚܐ ܕܫܝܕܐ ܒܛܗܪܐ.

 

ܣܗܕܘܬܐ ܕܫܬ:

 

ܙܟܪܝܐ. ܣܛܢܐ ܢܓܥܘܪ ܒܟ ܡܪܝܐ.

 

ܣܗܕܘܬܐ ܕܫܒܥ:

 

ܐܘܢܓܠܝܘܢ. ܚܙܝܬܗ ܠܡ ܠܣܛܢܐ ܕܢܦ̣ܠ ܐܝܟ ܒܪܩܐ ܡ̣ܢ ܫܡܝܐ. ܘܐܬܐ ܐܪܟܘܢܗ ܕܥܠܡܐ ܗܢܐ ܘܒܝ ܡܕܡ ܠܝܬ ܠܗ. ܐܪܟܘܢܗ ܕܥܠܡܐ ܗܢܐ ܕܝܢ ܗ̣ܘ. ܘܙܠܘ ܠܟܘܢ ܡܢܝ ܠܝ̈ܛܐ ܠܢܘܪܐ ܗ̇ܝ ܕܡܛܝܒܐ ܠܐܟܠܩܪܨܐ ܘܠܡܠܐܟܘ̈ܗܝ. ܘܒܒܥܠܙܒܘܒ ܪܝܫܐ ܕܕܝ̈ܘܐ ܡܦܩ ܕܝ̈ܘܐ. ܘܩܪܒ ܡܢܣܝܢܐ ܠܡܢܣܝܘܬܗ.

 

ܣܗܕܘܬܐ ܕܬܡܢܐ:

 

ܦܘܠܘܣ. ܐܠܐ ܗ̇ܘ ܡܕܡ ܕܡܕܒܚܝ̣ܢ ܚܢ̈ܦܐ܆ ܠܫܐܕ̈ܐ ܗ̣ܘ ܕܒܚ̇ܝܢ ܘܠܐ ܠܐܠܗܐ. ܠܐ ܕܝܢ ܨܒܐ ܐ̱ܢܐ ܕܬܗܘܘܢ ܫܘ̈ܬܦܐ ܠܫܐܕ̈ܐ.

 

ܣܗܕܘܬܐ ܕܬܫܥ:

 

ܗ̣ܘ ܟܕ ܗ̣ܘ ܫܠܝܚܐ. ܐܘ ܐܝܕܐ ܫܠܡܘܬܐ ܐܝܬ ܠܫܝܚܐ ܥܡ ܣܛܢܐ. ܐܘ ܐܝ̇ܕܐ ܫܠܡܘܬܐ ܐܝܬ ܠܡܫܝܚܐ ܥܡ ܣܛܢܐ. ܐܘ ܐܝ̇ܕܐ ܐܘܝܘܬܐ ܐܝܬ ܠܕܗܝܡܢ ܥܡ ܕܠܐ ܗܝܡܢ. ܐܝܕܐ ܕܝܢ ܐܘܝܘܬܐ ܐܝܬ ܠܗܝܟܠܗ ܕܐܠܗܐ ܥܡ ܕܫܐܕ̈ܐ.

 

ܣܗܕܘܬܐ ܕܥܣܪ:

 

ܓܪܝܓܘܪܝܘܣ ܬܐܘܠܘܓܘܣ. ܗ̇ܘ ܕܡܛܠ ܢܨܝ̣ܚܘܬܗ ܟܘܟܒ ܢܘܓܗܐ܆ ܕܚܫܘܟܐ ܡܛܠ ܪܡܘܬܗ ܘܗ̣ܘܐ ܘܡܬܐܡܢ. ܘܚܝܠܘ̈ܬܐ ܡܪ̈ܘܕܐ ܕܬܚܘܬܘܗܝ. ܒܪܘܝܐ ܕܒܝܫܬܐ ܒܥܪܘܩܝܐ ܕܡ̣ܢ ܛܒܬܐ. ܐܦ ܠܢ ܡܙܡ̈ܢܢܐ.

 

ܣܗܕܘܬ ܕܚܕܥܣܪ̈ܐ:

 

ܐܘܓܪܝܣ. ܫܐܕ̈ܐ ܐܝܠܝܢ ܕܥܡ ܗܘܢܐ ܡܬܟܬܫܝܢ. ܡܬܩܪܝܢ ܦܪܚܬܐ. ܚܝܘܬܐ ܕܝܢ ܐܝܠܝܢ ܕܠܚܡܬܐ ܡܕܠܚܝ̣ܢ. ܒܥܝ̣ܪܐ ܕܝܢ܆ ܐܝܠܝܢ ܕܠܪܓܬܐ ܡܕܝܠܝ̣ܢ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܫܒܝܥܝܬܐ

 

ܡܛܠ ܬܪܥܝ̣ܬܐ ܟܦܪܬ݀ ܒܫܟܝ̣ܚܘܬ ܫܐܕ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܐܠܘ ܐܝܬܝܗܘܢ ܗ̣ܘܘ ܫܐܕ̈ܐ. ܐܘ ܡܠܝ̣̈ܠܐ ܗ̣ܘܘ. ܐܘ ܠܐ ܡܠܝ̣̈ܠܐ. ܘܐܠܘ ܡܠܝ̣̈ܠܐ ܗ̣ܘܘ. ܡܕܪܟܢܘܬܐ ܗܘܢܢܝܬܐ ܩܢܝܢ ܗ̣ܘܘ. ܘܡ̣ܢ ܗܪܟܐ ܠܐ ܙܕܩ ܗ̣ܘܐ ܕܠܕܓܠܘܬܐ ܐܝܟ ܫܪܪܐ ܐܚܝ̣ܕܝܢ ܗ̣ܘܘ. ܘܠܒܝܫܬܐ ܐܝܟ ܛܒܬܐ. ܚܢܢ ܕܝܢ ܒܢܝ̈ܢܫܐ ܗ̣ܝ ܗܕܐ ܥܒܝ̣ܬܐ ܕܡܚܦܝܐ ܥܝܢܝ̈ܢ ܡܬܝܕ̈ܥܢܝܬܐ. ܘܠܐ ܫ̇ܒܩܐ ܠܗܝܢ ܠܡܚܙܐ ܗܠܝܢ ܕܐܝܬܝܗܝܢ ܐܝܟ ܕܐܝܬܝܗܝܢ. ܘܗܟܢܐ ܚܛܝܢܢ ܒܡܢܬܐ ܬܐܘܪܝ̣ܛܝ̣ܩܝܬܐ. ܘܒܣܥܘܪܘܬܐ ܬܘܒ ܚܛܝܢܢ ܒܥܠܬ݀ ܚܝ̈ܠܐ ܗܠܝܢ ܦܓܪ̈ܢܝܐ ܕܢܨܝ̣ܒܝܢ ܒܢ ܟܝܢܐܝܬ. ܫܐܕ̈ܐ ܕܝܢ ܟܕ ܚܛܝܢ ܘܡܚܛܝܢ ܠܢ ܒܠܥܕ ܚܝܠܐ ܡܕܡ ܟܝܢܝܐ ܕܠܗܘܢ ܐܠܨܐ. ܘܐܦܠܐ ܬܘܒ ܡܕܪܟܝ̣ܢ ܠܗ ܠܫܪܪܐ ܐܝܟ ܕܐܝܬܘܗܝ. ܒܥܠܕ ܗ̇ܝ ܕܬܗܘܐ ܠܗܘܢ ܥܠܬܐ ܕܟܠܝܐ ܡ̣ܢ ܡܕܪܟܢܘܬܐ ܚܬܝ̣ܬܬܐ. ܝܕܝܥܐ ܕܡܠܝ̣̈ܠܐ ܠܐ ܐܝܬܝܗܘܢ. ܘܐܠܘ ܬܘܒ ܠܐ ܡܠܝ̈ܠܐ ܐܝܬܝܗܘܢ ܗ̣ܘܘ. ܠܐ ܙܕܩ ܗ̣ܘܐ ܠܢܒܝ̈ܐ ܟܠܗܘܢ ܘܫܠܝ̈ܚܐ ܕܢܙܗܪܘܢ ܗܘܘ ܠܒܢܝ̈ܢܫܐ. ܘܢܦܩܕܘܢ ܐܢܘܢ ܕܢܣܢܘܢ ܠܫܐܕ̈ܐ ܘܠܐ ܢܫܠܡܘܢ ܠܨܒܝܢܗܘܢ. ܒܗ̇ܝ ܕܗ̇ܘ ܕܠܐ ܡܠܝ̣ܠ ܘܠܐ ܚܟܡ: ܘܠܐ ܪܚܡܬܗ ܡܕܡ ܗ̣ܝ܆ ܐܦܠܐ ܣܢܐܬܗ. ܘܡ̣ܢ ܗܠܝܢ ܝܕܝܥܐ. ܕܠܐ ܡܠܝ̣̈ܠܐ ܠܐ ܐܝܬܝܗܘܢ. ܘܟܕ ܠܐ ܡܠܝ̣̈ܠܐ ܠܐ ܐܝܬܝܗܘܢ܆ ܐܦܠܐ ܡܠܝ̈ܠܐ. ܒܫܪܪܐ ܕܠܐ ܐܝܬܝܗܘܢ.

 

ܣܥܝܐ ܬܪܝܢܐ:

 

ܐܡܪܝܢ ܕܗܐ ܚܙܝܢܢ ܠܚܪ̈ܫܐ ܘܠܟܠܗܘܢ ܗ̇ܢܘܢ ܕܠܫܐܕ̈ܐ ܡܣܒܪܝܢ ܕܡܫܡܫܝܢ. ܕܡܬܕܘܝܢ ܒܡܣܟܢܘܬܐ ܘܡܬܛܪܦܝܢ ܒܟܦܢܐ ܘܫܠܝܚܘܬܐ. ܘܫܝ̣ܛܝ̣ܢ ܒܝܬ ܒܢܝ̈ܢܫܐ. ܘܐܠܘ ܐܝܬܝܗܘܢ ܗ̣ܘܘ ܫܐܕ̈ܐ ܘܡܨܝܢ ܗ̣ܘܘ ܠܡܗܢܝܘ ܘܠܡܙܡܝܘ. ܙܕܩ ܗ̣ܘܐ ܠܡܢܝ̣̈ܚܢܝܗܘܢ ܝܬܝܪ ܡ̣ܢ ܟܠܢܫ ܟܗܝ̈ܢܐ ܘܥܬܝܪ̈ܐ ܘܡܝܩܪ̈ܐ ܥ̇ܒܕܝܢ ܗܘܘ. ܘܗܐ ܠܘ ܗܟܢܐ. ܠܐ ܡܕܝܢ ܐܝܬܝܗܘܢ.

 

ܣܥܝܐ ܬܠܝܬܝܐ:

 

ܐܡܪܝܢ ܐܠܘ ܐܝܬܝܗܘܢ ܗ̣ܘܘ ܫܐܕ̈ܐ ܠܐ ܡܬܩܒܠܢ̈ܝܬܐ ܗܘܝ̈ ܢܒܝ̈ܘܬܐ ܕܢܒܝ̈ܐ. ܒܕܠܐ ܡܬܡܨܝܢ ܗ̣ܘܘ ܒܢܝ̈ܢܫܐ ܠܡܦܪܫ ܒܝܬ ܢܒܝ̈ܐ ܫܪܝܪ̈ܐ ܕܡ̣ܢ ܐܠܗܐ ܡܫܬܕܪܝܢ ܗ̣ܘܘ. ܘܒܝܬ ܢܒܝ̈ܐ ܕܓ̈ܠܐ ܕܡ̣ܢ ܫܐܕ̈ܐ. ܘܟܕ ܟܠ ܢܒܝܐ ܕܡܬܢܒܐ ܘܬܕܡܘܪܬܐ ܡܕܡ ܣܥܪ ܠܫܘܪܪܐ ܕܢܒܝܘܬܗ. ܕܡ̣ܢ ܐܠܗܐ ܗ̱ܘ ܐܫܬܠܚ ܢܒܝܐ ܗ̇ܘ ܟܠܢܫ ܡܘܕܐ ܘܡܗܝܡܢ. ܠܐ ܡܕܝܢ ܐܝܬܝܗܘܢ ܫܐܕ̈ܐ. ܘܐܠܐ ܙܕܩ ܗ̣ܘܐ ܠܒܢܝ̈ܢܫܐ ܠܡܬܦܫܟܘ ܥܠ ܢܒܝܐ ܗ̇ܘ ܕܕܠܡܐ ܫܐܕܐ ܗ̱ܘ ܗ̇ܘ ܕܣܥܪ ܠܗ̇ ܠܬܕܡܘܪܬܐ ܒܐܝ̈ܕܘܗܝ ܘܠܘ ܐܠܗܐ. ܠܐ ܕܝܢ ܡܬܦܫܟܝ̣ܢ. ܡܛܠ ܕܟܝܢܐܝܬ ܝ̇ܕܥܝܢ ܘܐܦܢ ܠܘ ܒܝܘܠܦܢܐ ܕܠܐ ܐܝܬܝܗܘܢ ܫܐܕ̈ܐ.

 

ܣܥܝܐ ܪܒܝܥܝܐ:

 

ܐܡܪܝܢ ܕܗܐ ܚܙܝܢܢ ܠܟܪ̈ܣܛܝܢܐ ܟܠܗܘܢ ܘܠܝܘ̈ܕܝܐ ܘܠܡܫܠܡܢ̈ܐ. ܕܐܡܝܢܐܝܬ ܠܝܛܝ̣ܢ ܘܡܣܠܝܢ ܠܫܐܕ̈ܐ. ܘܐܠܘ ܐܝܬܝܗܘܢ ܗ̣ܘ ܫܐܕ̈ܐ ܠܘ ܠܐ ܡܣܓܦܝܢ ܗ̣ܘܘ ܘܠܡܨܥܪ̈ܢܝܗܘܢ. ܘܗܐ ܠܐ ܡܕܡ ܕܐܝܟ ܗܟܢ ܚܙܝܢܢ. ܘܐܦܢ ܠܝ̈ܠܝ ܐܝܡܡ ܠܗܘܢ ܠܝܛܝ̣ܢܢ ܘܒܝܫܐܝܬ ܐܡܪܝܢܢ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ. ܕܫܐܕ̈ܐ ܡ̇ܢ ܡܠܝ̈ܠܐ ܐܝܬܝܗܘܢ. ܘܡܕܪܟܢܘܬܐ ܩܢܝܢ ܗܘܢܢܝܬܐ. ܐܠܐ ܠܘ ܡܫܡܠܝܐܝܬ. ܘܡܛܠ ܗܕܐ ܪ̈ܢܝܐ ܣܩܘܒ̈ܠܝܝ ܠܫܪܪܐ ܡܬܪܢܝܢ. ܘܗܢܝܐܘܬܐ ܡܕܡ ܗܓܓܢܝܬܐ ܘܕܓܠܬܐ ܟܕ ܡܦܠܝ̣ܢ ܠܢ ܗܘܝܐ ܠܗܘܢ. ܘܠܘܩܒܠ ܗ̇ܝ ܕܐܡ̣ܪܘ ܕܚܢܢ ܒܢܝ̈ܢܫܐ ܒܥܠܬ݀ ܗܘܠܐܷ ܘܚܝ̈ܠܐ ܦܓܪ̈ܢܝܐ ܚܛܝܢܢ ܒܬܐܘܪܝܐ ܘܒܣܥܘܪܘܬܐ. ܫܐܕ̈ܐ ܕܝܢ ܟܕ ܠܐ ܗܘܠܢܝ̣ܝ̣̈ܢ. ܠܐ ܙܕܩ ܗܘܐ ܠܗܘܢ ܠܡܚܛܐ ܘܠܡܚܛܝܘ ܐܠܘ ܡܠܝ̣̈ܠܝ̣ܢ ܗ̣ܘܘ. ܐܡܪܝܢ. ܕܗܕܐ ܡܠܬܐ ܠܩܛܐܦܣܝܣ ܟܠܢܝܬܐ ܒܝܬܝܐ ܗ̱ܝ ܕܐܡܪܐ ܕܟܠ ܡܠܝܠܐ ܗܘܠܢܝܐ ܡܟܢܘܬܐ ܕܗ̇ܝ ܕܢܚܛܐ ܘܢܚܛܐ ܩܢܐ. ܘܕܗ̣ܝ ܗܕܐ ܩܛܦܣܝܣ ܠܘ ܟܠܢܝܬܐ ܥܠ ܢܦܫܗ̇ ܗܦܟܐ ܠܘܓܝ̣ܩܝ̣ ܡܠܦܢܐ. ܒܕܓܘܢ ܠܐ ܫܪܝܪܐ ܕܢܗܦܟ ܘܢܐܡܪ܇ ܕܟܠ ܕܡܟܢܘܬܐ ܕܗ̇ܝ ܕܢܚܛܐ ܘܢܚܛܐ ܩܢܐ. ܡܠܝܠܐ ܗܘܠܢܝܐ ܙܕܩ ܕܢܗܘܐ. ܫܐܕܐ ܡܕܝܢ ܟܕ ܡܠܝ̣ܠ. ܘܐܦܢ ܠܐ ܗܘܠܢܝ. ܠܘ ܠܐ ܡܬܡܨܝܢܝ̣ܬܐ ܗ̱ܝ ܠܗ ܡܟܢܘܬܐ ܕܗ̇ܝ ܕܢܚܛܐ ܘܢܚܛܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܫܐܕ̈ܐ ܟܕ ܒܝ̈ܫܐ ܐܢܘܢ. ܠܗ̇ܝ ܕܢܒܐܫܘܢ ܒܠܚܘܕ ܡܨܝܢ. ܘܐܦܠܐ ܠܗܕܐ ܡܫܠܛܐܝܬ ܘܐܝܟ ܕܨܒܝܢ. ܐܠܐ ܒܝܕ ܡܫܬܒܩܢܘܬܐ ܕܡ̣ܢ ܐܠܗܐ. ܒܕܓܘܢ ܘܐܦܢ ܢܨܒܘܢ ܠܡܛܐܒܘ ܠܡܛܐܒܢܝ̈ܗܘܢ܆ ܠܐ ܡܬܡܨܝܢ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܠܫܪܝܐ ܗܢܐ ܒܢܝܫܐ ܬܪܝܢܐ ܕܐܪܣܝܣ ܬܪܝܢܝ̣ܬܐ ܕܦܣܘܩܐ ܕܫܬܐܣܬܐ ܪܒܝܥܝܬܐ ܦܪܥܢܢ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܩܕܡܢܢ ܐܡ̣ܪܢܢ. ܕܒܠܥܕ ܡܫܬܒܩܢܘܬܐ ܕܡ̣ܢ ܐܠܗܐ ܘܡܦܣܢܘܬܐ ܕܡܢܗ ܠܐ ܡܕܡ ܡܨܝܢ ܠܡܣܥܪ. ܘܝ̣ܕܝ̣ܥܐ ܗܕܐ ܡ̣ܢ ܢܣܝܘܢܗ ܕܐܝܘܒ ܘܡ̣ܢ ܗ̇ܝ ܕܐܦܠܐ ܥܠ ܚܙܝܪ̈ܐ ܣܥܝܢ ܗ̣ܘܘ. ܐܠܘܠܐ ܐܬܦܣܣ ܠܗܘܢ.

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܫܒܝܥܝܬܐ

 

ܡܛܠ ܟܝܢܗܘܢ ܒܝܫܐ ܕܫܐܕ̈ܐ. ܘܡܛܠ ܡܕܪܟܢܘܬܗܘܢ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܙܢܝ̈ܐ ܕܒܝܫܘܬܗܘܢ ܘܒܗ ܐܝܬ ܢܝ̈ܫܐ ܐܪܒܥܐ. ܢܝܫܐ ܩܕܡܝܐ ܡܛܠ ܗ̇ܝ ܕܒܟܝܢܐ ܐܬܒܪܝܘ ܒܝ̈ܫܐ. ܐܘ ܒܚܐܪܘܬܗܘܢ ܠܘܬ ܒܝܫܬܐ ܐܨܛܠܝ̣ܘ

 

ܐܡܪܝܢܢ ܕܩܕܡܢܢ ܫܪܪܢܢ ܒܐܦܘܕܝܟܣܝܣ ܕܒܪܘܝܐ ܚܕ ܗ̣ܘ ܐܠܗܐ ܫܘܒܚܐ ܠܛܝܒܘܬܗ. ܘܗ̣ܘ ܗܢܐ ܦܫܝ̣ܛܐܝܬ ܛܒܐ ܗ̱ܘ ܒܟܝܢܐ. ܘܕܛܒܐ ܒܟܝܢܐ ܒܪܝܬܐ ܒܝܫܬ݀ ܒܟܝܢܐ ܢܒܪܐ ܡ̣ܢ ܠܐ ܡܬܡܨܝܢܝ̣ܬܐ ܗ̱ܝ. ܡܠܝ̣ܣܛܐ ܟܕ ܗ̣ܘ ܛܒܐ ܐܦ ܚܟܝܡܐ ܒܟܝܢܐ ܢܗܘܐ. ܘܫܐܕܐ ܗ̇ܘ ܟܕ ܒܝܫܐ ܗ̱ܘ ܘܒܪܝܬܐ ܗ̱ܘ ܕܐܠܗܐ. ܐܠܨܐ ܕܒܫܠܝ̣ܛܘܬ ܒܝܬܗ ܘܚܐܪܘܬܗ ܐܨܛܠܝ̣ ܠܗ̇ ܠܒܝܫܬܐ ܘܠܘ ܒܟܝܢܐ ܒܝܫܐ ܐܬܒܪܝ̣. ܘܡ̣ܢ ܗܠܝܢ ܝܕܝܥܐ ܬܘܒ ܕܐܦܠܐ ܛܒܐ ܒܟܝܢܐ ܐܬܒܪܝ. ܘܐܠܐ ܠܐ ܐܬܡܨܝ̣ ܗ̣ܘܐ ܠܡܨܛܠܝܘ ܠܒܝܫܬܐ.

 

ܗܦܟܬܐ:

 

ܐܡܪܝܢ ܘܟܕ ܠܐ ܛܒܐ ܐܦܠܐ ܒܝܫܐ ܒܟܝܢܐ ܐܬܒܪܝ̣. ܡܢܐ ܡܕܝܢ ܐܬܒܪܝ̣ ܒܟܝܢܐ.

 

ܦܘܢܝܐ:

 

ܐܡܪܝܢܢ ܕܟܝܢܐ ܡܕܡ ܡܩܒܠܢܐ ܕܛܒܬܐ ܘܕܒܝܫܬܐ ܒܚܐܪܘܬܐ ܕܨܒܝܢܐ ܐܬܒܪܝ ܡ̣ܢ ܐܠܗܐ.

 

ܗܦܟܬܐ:

 

ܐܡܪܝܢ ܐܢܗܘ ܕܗ̇ܝ ܕܛܒܐ ܒܟܝܢܐ ܒܪܝܗܝ ܗ̣ܘܐ ܐܠܗܐ. ܝܬܝܪ ܦܐܝܐ ܗܘܬ݀ ܠܛܒܘܬܗ. ܐܝܟܢܐ ܠܘ ܛܒܐ ܒܟܝܢܐ. ܐܠܐ ܡܩܒܠܢܐ ܕܛܒܬܐ ܘܕܒܝܫܬܐ ܒܪܝܗܝ.

 

ܦܘܢܝܐ:

 

ܐܡܪܝܢܢ ܕܣܥܘܪ̈ܘܬܐ ܟܝܢܝ̈ܬܐ ܠܒܪ̈ܝܐ ܠܐ ܡܠܝ̣̈ܠܐ ܘܠܐ ܡܪ̈ܓܫܢܐ. ܕܐܠܗܐ ܗ̱ܝ ܓܝܪ ܗܕܐ ܡܫܡܠܝܘܬܐ ܒܠܚܘܕܘܗܝ. ܕܥܡ ܗ̇ܝ ܕܡܠܝ̣ܠ ܛܒܐ ܗ̱ܘ ܒܟܝܢܐ. ܠܘܬܢ ܕܝܢ ܕܝܠܢ ܒܢܝ̈ܢܫܐ. ܘܐܦܢ ܟܕ ܡܠܝ̣ܠܝ̣ܢܢ ܚܝ̈ܠܐ ܡܕܡ ܟܝܢܝ̈ܐ ܒܢ ܡܥܒܕܝ̣ܢ. ܗ̣ܢܘܢ ܗܠܝܢ ܚܝ̈ܠܐ܆ ܚܝ̈ܠܐ ܐܢܘܢ ܕܢܨ̈ܒܬܐ ܘܚܝ̈ܘܬܐ ܕܡ̣ܢ ܐܠܗܐ ܫܘܒܚܐ ܠܛܝܒܘܬܗ ܠܢ ܐܫܬܟܢܘ ܐܝܟ ܕܠܐܝܩܪ ܟܝܢܢ. ܘܠܘ ܕܡܠܝ̣ܠܘܬܢ ܐܢܘܢ. ܘܡܛܠ ܗܕܐ ܒܡܚܝ̣ܠܘܬܗܘܢ ܕܗܠܝܢ ܚܝ̈ܠܐ ܡܬܓܡܪܝܢܢ: ܐܢ ܡܬܓܡܪܝ̣ܢܢ. ܘܒܬܘܩܦܗܘܢ ܚܣܪܝ̣ܢܢ. ܟܕ ܚ̇ܣܪܝܢܢ. ܘܠܒܥܝ̣ܪܐ ܘܠܢܨܒܬܐ ܝܬܝܪ ܡ̣ܢ ܕܠܒܢܝ̈ܢܫܐ ܡܬܕܡܝܢܢ. ܘܬܘܒ ܐܡܪܝܢܢ ܕܗ̇ܘ ܕܗܕܐ ܡܗܦܟ ܘܐܡ̇ܪ. ܠܘ ܡܕܡ ܐ̱ܚܪܝܢ ܐܡ̇ܪ. ܐܠܐ ܕܡܛܠ ܡܢܐ ܠܘ ܫܐܕܐ ܒܪܝܗܝ ܐܠܗܐ ܠܫܐܕܐ. ܘܝܕܝܥܐ ܗܕܐ ܡ̣ܢ ܗ̇ܝ ܕܐܠܘ ܛܒܐ ܒܟܝܢܐ ܗ̣ܘܐ ܫܐܕܐ ܠܘ ܫܐܕܐ ܗܘܐ. ܘܕܫܘܐܠܐ ܗ̱ܘ ܣܪܝ̣ܩܐ ܫܘܐܠܐ ܗܢܐ ܓܠܝܐ. ܒܗ̇ܝ ܕܠܐ ܐ̱ܢܫ ܐܡ̇ܪ ܕܡܛܠ ܡܢܐ ܠܐ ܒܪܝܗܝ ܐܠܗܐ ܠܒܪܢܫܐ ܠܐ ܒܪܢܫܐ. ܘܠܬܘܪܐ ܠܐ ܬܘܪܐ.

 

 

 

ܢܝܫܐ ܬܪܝܢܐ ܡܛܠ ܗ̇ܝ ܕܐܝܬ ܐܬܪܐ ܠܡܬܦܢܝܢܘܬܗܘܢ. ܘܕܐܢ ܡܬܦܢܝܢ ܡܬܚܢܢܝܢ ܐܘ ܠܐ

 

ܕܡܬܚܢܢܝ̣ܢ ܫܐܕ̈ܐ ܐܢ ܡܬܦܢܝܢ ܠܐ ܐ̱ܢܫ ܡܨܐ ܠܡܟܦܪ ܟܕ ܡܣܬܟܠ ܠܟܐܢܘܬܗ ܕܐܠܗܐ ܫܘܒܚܐ ܠܛܝܒܘܬܗ. ܘܠܠܐ ܡܬܬܟܝ̣ܠܢܘܬ ܪ̈ܚܡܘܗܝ. ܘܠܗ̇ܝ ܕܠܐ ܐܠܡ ܠܥܠܡ ܐܦܠܐ ܠܥܠܡ ܢܛܪ ܪܘܓܙܗ. ܘܫ̇ܡܥ ܬܘܒ ܠܒܪܬ݀ ܩܠܐ ܡܪܢܝܬܐ ܕܐܡܪܐ. ܕܟܠ ܕܫܐܠ ܢܣ̇ܒ. ܘܠܗ̇ܘ ܕܒܥܐ ܡܬܝܗܒ ܠܗ. ܐܝܢ ܦܘܫܟܐ ܕܝܬܝܪ ܥܛܠ. ܠܗ̇ܝ ܕܐܢ ܐܪܐ ܐܝܬ ܐܬܪܐ ܠܡܬܦܢܝܢܘܬܗܘܢ ܐܘ ܠܐ ܢܩܦ. ܘܐ̱ܢܫܝ̈ܢ ܡ̇ܢ ܡ̣ܢ ܐ̱ܚܪ̈ܝܐ ܕܡܢܗܘܢ ܐܝܘܐܢܢܝܣ ܕܕܪܐ ܘܐ̱ܚܪ̈ܢܐ ܐܡܪܝܢ. ܕܗܢܐ ܫܘܐܠܐ ܡ̣ܢ ܫܘ̈ܐܠܐ ܗ̇ܢܘܢ. ܕܙܕܩ ܠܢ ܕܢܨܡܬ ܠܘܬ ܒܥܬܐ ܕܥܠܝܗܘܢ. ܒܕܠܘ ܕܝܠܢ ܗ̣ܝ ܕܢܕܥ ܐܢܘܢ. ܟܬܝܒ ܓܝܪ ܕܪܘܪ̈ܒܢ ܡܢܟ ܠܐ ܬܥܩܒ. ܘܕܬܩܝ̣̈ܦܢ ܡܢܟ ܠܐ ܬܒܥܐ. ܐ̱ܚܪ̈ܢܐ ܕܝܢ ܐܟܙܢܐ ܕܐܣܛܦܢܐ ܒܪ ܨܘܕ ܐܝ̈ܠܐ ܘܫܪܟܐ ܐܡܪܝܢ ܕܡܬܦܢܝܢ ܫܐܕ̈ܐ ܘܡܬܚܢܢܝ̣ܢ. ܘܥܠ ܫܕܬܗܘܢ ܗܦ̇ܟܝܢ. ܘܡܠܐܟ̈ܐ ܡ̣ܢ ܕܪܝܫ ܗܘܝܢ. ܒܠܥܕ ܗ̇ܝ ܕܡܚܘܝܢܘܬܐ ܡܕܡ ܚܘܫܒܝܬܐ ܐܘ ܣܗܕܘܬܐ ܟܬܒܝܬܐ ܥܠ ܫܘܪܪ ܬܘܕܝܬܗܘܢ ܢܩܝ̣ܡܘܢ. ܚܢܢ ܕܝܢ ܟܕ ܠܗܘܢܐ ܕܟܬܒ̈ܐ ܩܕܝ̈ܫܐ ܢܩܦܝ̣ܢܢ ܐܡܪܝܢܢ. ܕܫܐܕ̈ܐ ܡ̇ܢ ܠܦܘܬ ܟܝܢܗܘܢ ܠܘ ܠܐ ܡܬܬܙܝ̈ܥܢܐ ܐܢܘܢ ܠܘܬ ܛܒܬܐ ܕܐܝܬܝܗ̇ ܡܬܦܢܝܢܘܬܐ ܕܠܘܬ ܐܠܗܐ. ܒܗ̇ܝ ܕܫܠܝ̣̈ܛܝ ܒܝܬܐ ܐܝܬܝܗܘܢ. ܘܐܟܡܐ ܕܡܨܝܢ ܕܢܬܦܢܘܢ܆ ܡܨܝܢ ܕܠܐ ܢܬܦܢܘܢ. ܘܠܘ ܒܟܝܢܐ ܒܟܝ̈ܢܐ ܒܝ̈ܫܐ ܘܠܐ ܡܬܦܢ̈ܝܢܐ ܐܢܘܢ. ܐܟܡܐ ܕܩܕܡܢܢ ܐܡ̣ܪܢܢ. ܠܐ ܕܝܢ ܡܬܬܙܝ̣ܥܝ̣ܢ ܠܘܬ ܛܒܬܐ܇ ܐܘܟܝܬ ܠܐ ܡܬܕܢܝܢ ܠܡܬܦܢܝܘ. ܒܥܠܬ݀ ܗ̇ܝ ܕܗ̣ܝ ܣܢܐܬܗܘܢ ܕܠܐܠܗܐ ܘܐܠܗܝ̈ܬܐ. ܢܘܡܝ ܒܗܘܢ ܐܚܕܬ݀. ܘܐܟܣܝܣܝܬܐ ܗܘܬ݀܆ ܘܠܟܝܢܝܬܐ ܐܣܒܗܬ݀܇ ܘܐܦܢ ܡ̣ܢ ܨܒܝܢܐ ܢܣܒܬ݀ ܪܝ̣ܫܝ̣ܬܐ. ܘܡ̣ܢ ܗܪܟܐ ܠܐ ܡܬܡܨܝܢܝ̣ܬܐ ܗܘܬ݀ ܠܗܘܢ ܡܬܦܢܝܢܘܬܐ. ܘܐܠܨܝܬܐ ܠܐ ܡܬܦܢܝܢܘܬܐ. ܐܟܡܐ ܓܝܪ ܕܐ̱ܢܫ ܡܢܢ ܟܕ ܫܢܝ̈ܐ ܠܐ ܙܥܘܪ ܒܚܫܘܟܐ ܢܗܘܐ ܘܢܬܪܒܐ. ܐܢ ܢܓܕܫ ܒܫܡܝܐ ܘܢܐܨܕ. ܥܓܠ ܡܬܢܣ̈ܣܢ ܚܙ̈ܝܬܗ. ܘܠܐ ܡܬܟܠܝܢܐܝܬ ܥ̇ܪܩ. ܘܒܥܘ̈ܡܩܐ ܚܫܘ̈ܟܝܐ ܚܠܕ ܘܡܬܗܢܐ. ܗ̣ܘ ܗܟܘܬ ܘܫܐܕ̈ܐ. ܟܕ ܠܢܘܗܪ̈ܐ ܕܙܠܓ̈ܐ ܐܠܗܝ̈ܐ ܠܐ ܡܣܝܒܪܝܢ. ܒܚܫܘܟܐ ܠܐ ܡܬܡܠܚܢܐ ܗܢܝܐܘܬܐ ܒܝܬܝܬܐ ܩܢܝܢ. ܘܗܟܢܐ ܠܐ ܡܬܦܢ̈ܝܢܐ ܠܥܠ ܡܟܬܪܝܢ. ܘܐܦܢ ܠܘ ܟܝܢܝܬܐ ܗ̱ܝ ܠܗܘܢ ܠܐ ܡܬܦܢܝܢܘܬܐ. ܐܡܝܪ ܓܝܪ ܕܥܝܕܐ ܡܐ ܕܥܬܩ܆ ܟܝܢܐ ܗ̱ܘ ܕܬܪܝܢ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܐܪܐ ܫܘ̈ܝܝ ܒܒܝܫܬܐ ܐܝܬܝܗܘܢ ܫܐܕ̈ܐ. ܐܘ ܝܬܝܪܝܢ ܒܗ̇ ܚܕ ܡ̣ܢ ܚܕ ܘܒܨܝ̣ܪܝܢ

 

ܐܡܪܝܢܢ ܐܠܘ ܚܕ ܗ̣ܘ ܓܢܣܐ ܕܫܐܕ̈ܐ. ܟܒܪ ܡܬܐܡܪܐ ܗܘܬ݀ ܕܫܘܝܐ ܗ̱ܝ ܒܝܫܘܬܐ ܕܟܠܗܘܢ. ܗ̣ܘ ܗܟܘܬ ܘܐܠܘ ܒܟܝܢܐ ܗ̣ܘܘ ܒܝ̈ܫܐ ܘܠܘ ܒܨܒܝܢܐ. ܘܕܠܘ ܚܕ ܐܢܘܢ ܓܢܣܐ܆ ܝ̣ܕܝ̣ܥܐ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܡܠܬܗ ܕܡܪܢ ܕܐܡ̣ܪ. ܗܢܐ ܓܝܪ ܓܢܣܐ ܠܐ ܢܦܩ ܐܠܐ ܐܢ ܒܨܘܡܐ ܘܒܨܠܘܬܐ. ܘܒܗܕܐ ܫܘܕܥ. ܕܓܢ̈ܣܐ ܐܢܘܢ ܡܫܚ̈ܠܦܐ. ܕܬܪܬܝܢ ܕܝܢ܆ ܡ̣ܢ ܡܠܬܗ ܕܛܘܒܢܐ ܦܘܠܘܣ ܕܐܡ̣ܪ. ܕܬܟܬܘܫܢ ܠܐ ܗ̣ܘܐ ܥܡ ܒܣܪܐ ܘܕܡܐ. ܐܠܐ ܥܡ ܐܪ̈ܟܐܣ ܘܫܠܝ̈ܛܢܐ. ܘܐܚܝ̣̈ܕܝ ܥܠܡܐ ܗܢܐ ܕܚܫܘܟܐ. ܘܒܗܕܐ ܚܘܝ̣ ܕܡ̣ܢ ܬܓ̈ܡܐ ܡܫܚ̈ܠܦܐ ܕܡܠܐܟ̈ܐ. ܘܠܘ ܡ̣ܢ ܚܕ ܒܠܚܘܕ ܬܓܡܐ ܢܦ̣ܠܘ ܫܐܕ̈ܐ. ܘܕܠܘ ܬܘܒ ܒܟܝܢܐ ܐܝܬܝܗܘܢ ܒܝ̈ܫܐ ܩܕܡܬ݀ ܐܬܚܘܝܬ݀. ܫܐܕ̈ܐ ܡܕܝܢ ܟܕ ܡܫܚܠܦܝܢ ܐܢܘܢ ܡ̣ܢ ܚܕ̈ܕܐ ܒܓܢܣܐ. ܐܦ ܒܒܝܫܘܬܐ܆ ܡܫܚ̈ܠܦܐ ܐܠܨܐ ܕܢܗܘܘܢ ܘܝܬܝܪ̈ܐ ܘܒܨܝܪ̈ܐ. ܘܗܪܟܐ ܡܥܩܒܐ ܡܠܬܐ ܡܒܚܢܢܝ̣ܬܐ. ܕܫܐܕ̈ܐ ܡ̇ܢ ܟܕ ܡ̣ܢ ܬܓ̈ܡܐ ܡܫܚ̈ܠܦܐ ܢܦ̣ܠܘ. ܣܛܢܐ ܪܝܫܢܗܘܢ܆ ܡ̣ܢ ܐܝܢܐ ܗ̱ܘ ܬܓܡܐ. ܘܐܡܪܝܢܢ ܕܥܠ ܗܕܐ ܘܠܐ ܐ̱ܢܫ ܡ̣ܢ ܡܠܦܢ̈ܐ ܚܙܝܢܢ ܕܩܪܝ̣ܚܐܝܬ ܐܡ̣ܪ. ܐܠܐ ܟܕ ܫܡܥܝ̣ܢܢ ܠܟܬܒܐ ܕܐܝܟ ܕܥܠ ܚܕ ܩܢܘܡܐ ܡܡܠܠ ܘܐܡ̇ܪ ܕܐܫܬܕܝ̣ ܡ̣ܢ ܒܝܢܬ ܟܪ̈ܘܒܐ. ܡܣܒܪܝ̣ܢܢ ܕܡ̣ܢ ܟܪ̈ܘܒܐ ܗ̣ܘܐ ܣܛܢܐ. ܒܗ̇ܝ ܕܐܝܟ ܕܥܠ ܚܕ ܩܢܘܡܐ ܕܝ̣ܠܢܐܝܬ. ܥܠ ܗ̇ܘ ܕܪܝܫܐ ܗ̱ܘ ܒܠܚܘܕ ܦܐܐ ܠܡܡܠܠܘ. ܘܠܘ ܥܠ ܟܠ ܚܕ ܚܕ ܡ̣ܢ ܗ̇ܢܘܢ ܕܬܚܝܬ ܪܝܫܐ. ܘܗܢܐ ܡ̇ܢ ܫܘܘܕܥܐ ܗ̱ܘ. ܘܐܦܢ ܠܘ ܚܝܠܬܢܐ.

 

 

 

ܢܝܫܐ ܪܒܝܥܝܐ ܡܛܠ ܗ̇ܝ ܕܐܢ ܒܛܝ̣ܠܘܬܐ ܐܠܗܝܬܐ ܚܒܫܬ݀ ܠܟܠ ܗ̣ܝ. ܐܝܟܢܐ ܠܐ ܡܬܐܣܝܢܝ̣ܬܐ ܗ̱ܝ ܒܝܫܘܬܗܘܢ ܕܫܐܕ̈ܐ

 

ܐܡܪܝܢܢ ܕܡܠܦܢ̈ܐ ܩܕܝ̈ܫܐ ܬܪܝܢܬ݀ ܙܢܝ̈ܐ ܝ̇ܕܥܝܢ ܠܗ̇ ܠܒܛܝ̣ܠܘܬܐ ܕܥܠ ܗ̇ܝ ܕܢܗܘܘܢ ܐܝܬܝܗܘܢ ܗܠܝܢ ܕܐܝܬܝܗܘܢ. ܕܬܪܬܝܢ ܕܝܢ ܒܛܝ̣ܠܘܬܐ. ܒܕܓܘܢ ܟܠܗܘܢ ܗ̇ܢܘܢ ܕܚܐܪܐܝܬ ܡ̇ܥܒܕܝܢ ܒܨܒܝܢܐ ܕܫܠܝ̣ܛܘܬ ܒܝܬܐ. ܠܗ̇ܝ ܡ̇ܢ ܕܢܗܘܘܢ ܐܝܬܝܗܘܢ ܦܫܝ̣ܛܐܝܬ܆ ܡ̣ܢ ܒܛܝ̣ܠܘܬܐ ܐܠܗܝܬܐ ܐܝܬ ܠܗܘܢ ܠܗ̇ܝ ܕܝܢ ܕܫܦܝܪ ܢܗܘܘܢ ܐܝܬܝܗܘܢ܆ ܐܦܢ ܡܢܗ̇ ܕܒܛܝ̣ܠܘܬܐ ܐܠܗܝܬܐ ܐܝܬ ܠܗܘܢ. ܐܠܐ ܟܕ ܨܒܝܢܗܘܢ ܛܒܐ ܠܘܬ ܐܠܗܐ ܘܐܠܗܝ̈ܬܐ ܡܒܝܬܐ ܠܗܘܢ܆ ܗܝܕܝܢ ܡܫܬܘܝܢ ܠܗ̇ ܠܒܛܝ̣ܠܘܬܐ. ܐܢܕܝܢ ܡ̣ܢ ܨܒܝܢܐ ܕܐܝܟ ܗܢܐ ܢܬܓܠܙܘܢ ܘܨܒܝܢܐ ܕܣܩܘܒܠܝ ܢܗܘܐ ܠܗܘܢ. ܡܢܗ̇ ܕܒܛܝ̣ܠܘܬܐ ܗ̇ܝ ܬܪܝܢܝܬܐ ܗܘܝܢ ܐܟܣܘܪ̈ܝ̣ܣܬܝ̣ܢܐ ܟܐܢܐܝܬ. ܫܐܕ̈ܐ ܡܕܝܢ ܟܕ ܫܠܝ̣̈ܛܝ ܒܝܬܐ ܐܢܘܢ ܘܨܒܝܢܐܝܬ ܘܚܐܪܐܝܬ ܡܥܒܕܝܢ. ܠܗ̇ܝ ܕܢܗܘܘܢ ܐܝܬܝܗܘܢ ܡ̣ܢ ܒܛܝ̣ܠܘܬܐ ܐܠܗܝܬܐ ܩܢܝܢ. ܡ̣ܢ ܒܛܝ̣ܠܘܬܐ ܕܝܢ ܬܪܝܢܝܬܐ ܕܗ̇ܝ ܕܫܦܝܪ ܢܗܘܘܢ ܐܝܬܝܗܘܢ ܐܬܓܠܙܘ. ܒܕܗ̣ܢܘܢ ܠܗܘܢ ܡ̣ܢ ܒܝܬܝܘܬܗ̇ ܢܟܪܝ̣ܘ. ܘܗܟܢܐ ܗ̣ܝ ܒܛܝ̣ܠܘܬܐ܆ ܒܕܡܘܬ ܓܦܬܐ ܗ̇ܝ ܕܐܬܬܪܥ ܣܝܓܗ̇. ܘܐܟܠܗ̇ ܚܙܝ̣ܪܐ ܕܥܒܐ. ܘܚܝ̈ܘܬܐ ܕܒܪܐ ܪ̈ܥܝ̣ܝ̣ܗ̇. ܘܒܒܝܠ ܗ̇ܝ ܕܟܕ ܣܘܓܐܐ ܐܣܬܡܣܡܬ݀ ܘܠܐ ܐܬܐܣܝܬ݀ ܐܫܬܒܩܬ݀ ܠܗܘܢ ܫܒܩܬ݀. ܘܡ̣ܢ ܗܠܝܢ ܐܬܚܘܝܬ݀. ܘܒܙܢܐ ܗ̇ܘ ܩܕܡܝܐ ܕܒܛܝ̣ܠܘܬܐ܆ ܒܛܝ̣ܠ ܠܗ ܠܐܠܗܐ ܥܠ ܫܐܕ̈ܐ. ܒܙܢܐ ܕܝܢ ܗ̇ܘ ܬܪܝܢܐ ܕܒܛܝ̣ܠܘܬܐ܆ ܘܠܐ ܣܟ ܒܛܝ̣ܠ ܠܗ ܠܐܠܗܐ ܥܠܝܗܘܢ.

 

ܗܦܟܬܐ:

 

ܐܡܪܝܢ ܘܠܡܢܐ ܠܘ ܒܩܛܝ̣ܪܐ ܕܒܪ ܐܠܗܐ ܠܨܒܝܢܗܘܢ ܠܘܬ ܒܝܬܝܘܬܐ ܕܠܘܬܗ. ܐܝܟܢܐ ܕܫܦܝܪ ܢܗܘܘܢ ܐܝܬܝܗܘܢ. ܗܕܐ ܓܝܪ ܝܬܝܪ ܦܐܝܐ ܗܘܬ݀ ܠܐܠܗܐ. ܒܗ̇ܝ ܕܠܐ ܨܒܐ ܒܒܝܫܬܐ. ܐܦܠܐ ܬܘܒ ܚ̇ܐܒ ܡ̣ܢ ܗ̇ܝ ܕܢܫܚܠܦܝܗ̇ ܠܒܝܫܬܐ ܠܘܬ ܛܒܬܐ.

 

ܦܘܢܝܐ:

 

ܐܡܪܝܢܢ. ܐܠܘ ܐܠܗܐ ܫܘܒܚܐ ܠܛܝܒܘܬܗ ܒܩܛܝ̣ܪܐ ܕܒܪ ܗ̣ܘܐ ܠܨܒܝܢܗܘܢ ܕܫܐܕ̈ܐ ܠܘܬ ܨܒܝܢܗ ܕܝܠܗ. ܡܒܛܠ ܒܛܠ ܗ̣ܘܐ ܠܗ ܨܒܝܢܗܘܢ ܕܫܐܕ̈ܐ. ܘܗܝܕܝܢ ܠܘ ܡܠܝ̈ܠܐ ܕܡܥܒܕܝ̣ܢ ܨܒܝܢܐܝܬ ܗܘܝܢ ܗ̣ܘܘ. ܐܠܐ ܡܠܝ̈ܠܐ ܕܩܛܝ̣ܪܐܝܬ ܘܠܘ ܨܒܝܢܐܝܬ ܡܬܕܒܪܝܢ܆ ܗ̇ܝ ܕܫܟܝܪܐ. ܒܗ̇ܝ ܕܒܐܦܘܕܝ̣ܟܣܝ̣ܣ ܚܘܝ̣ܢܢ ܕܟܠ ܡܠܝ̣ܠܐ. ܨܒܝܢܐܝܬ ܘܠܘ ܟܝܢܐܝܬ. ܐܦܠܐ ܩܛܝ̣ܪܐܝܬ ܡܥܒܕ. ܗ̇ܘ ܡܐ ܕܡܥܒܕ ܡ̣ܢ ܛܒܬܐ ܘܒܝܫܬܐ.

 

ܗܦܟܬܐ:

 

ܐܡܪܝܢ ܝܕܥ ܗ̣ܘܐ ܐܪܐ ܐܠܗܐ ܫܘܒܚܐ ܠܛܝܒܘܬܗ. ܕܒܒܝܫܘܬܐ ܠܐ ܡܬܐܣܝܢܝ̣ܬܐ ܥܬܝ̣ܕܝ̣ܢ ܠܡܬܟܪܗܘ ܫܐܕ̈ܐ܆ ܐܘ ܠܐ ܝܕܥ ܗ̣ܘܐ. ܘܐܢ ܝܕܥ ܗ̣ܘܐ ܠܡܢܐ ܒܪܐ ܐܢܘܢ. ܘܐܢ ܠܐ ܝ̇ܕܥ ܗ̣ܘܐ ܐܝܟܢܐ ܡܬܬܘܕܐ ܕܠܟܠ ܡܕܡ ܩܕܡ ܝ̇ܕܥ. ܘܗܐ ܠܟܘܪܗܢܗܘܢ ܠܐ ܡܬܐܣܝܢܐ ܕܫܐܕ̈ܐ ܠܐ ܝ̣ܕܥ.

 

ܦܘܢܝܐ:

 

ܐܡܪܝܢܢ ܕܩܕܡ ܝ̣ܕܥ ܐܠܗܐ ܠܡܦܘܠܬܐ ܗ̇ܝ ܕܥܬܝ̣ܕܐ ܗܘܬ݀ ܕܬܓܕܫ ܠܫܐܕ̈ܐ. ܐܠܐ ܟܕ ܠܫܟܝ̣ܚܘܬܗܘܢ ܒܓܠܝ̣ܙܘܬܗܘܢ ܦܚܡ. ܠܗ̇ܝ ܕܢܗܘܘܢ ܐܝܬܝܗܘܢ ܝܬܝܪ ܦܩܚܝܬܐ ܕܢ ܠܗܘܢ ܡ̣ܢ ܗ̇ܝ ܕܠܐ ܢܗܘܘܢ ܐܝܬܝܗܘܢ. ܒܗ̇ܝ ܕܐܝܬܘܬܐ ܐܝܟܢ ܕܗ̣ܝ ܛܒܬܐ ܡܕܡ ܐܝܬܝܗ̇. ܘܓܠܝ̣ܙܘܬܐ ܒܝܫܬܐ ܗ̱ܝ ܦܫܝ̣ܛܐܝܬ. ܘܡܛܠ ܗܕܐ ܒܪܐ ܐܢܘܢ. ܘܐܠܘܠܐ ܨܒܝܢܐܝܬ ܐܫܬܪܓܠܘ ܡܬܥܦܦܐ ܗܘܬ݀ ܠܗܘܢ ܛܒܬܐ ܗ̇ܝ ܕܢܗܘܘܢ ܐܝܬܝܗܘܢ. ܒܗ̇ܝ ܕܫܦܝܪ ܢܗܘܘܢ ܐܝܬܝܗܘܢ. ܒܕܓܘܢ ܠܛܒܬܐ ܗ̇ܝ ܕܢܗܘܘܢ ܐܝܬܝܗܘܢ ܡ̣ܢ ܐܠܗܐ ܩܢܐܘܘܗ̇. ܠܒܝܫܬܐ ܕܝܢ ܗ̇ܝ ܕܠܘ ܫܦܝܪ ܢܗܘܘܢ ܐܝܬܝܗܘܢ. ܠܘ ܡ̣ܢ ܐܠܗܐ ܐܠܐ ܡ̣ܢ ܨܒܝܢܗܘܢ ܚܐܪܝܐ. ܘܥܠ ܫܘܪܪ ܪܥܝܢܐ ܗܢܐ ܒܘ̈ܚܢܐ ܐ̱ܚܪ̈ܢܐ ܡܬܬܝܬܝܢ ܒܫܬܐܣܬܐ ܚܕܥܣܝܪܝܬܐ. ܘܗ̇ܝ ܕܡ̣ܢ ܐ̱ܢܫܝ̈ܢ ܡ̣ܢ ܗܠܝܢ ܕܝܠܢ ܡܬܐܡܪܐ. ܕܡܛܠ ܗ̇ܝ ܕܒܗܘܢ ܬܬܒܚܪ ܡܚܡܣܢܢܘܬܐ ܕܓܒܪ̈ܐ ܟܐܢ̈ܐ. ܒܪܐ ܐܢܘܢ ܐܠܗܐ ܠܫܐܕ̈ܐ. ܠܐ ܣܟ ܫܦܪܐ ܠܝ. ܒܗ̇ܝ ܕܠܘܬ ܗ̇ܝ ܕܗ̣ܘ ܐܠܗܐ ܒܝ̈ܫܐ ܒܟܝܢܐ ܗ̇ܝ ܕܗ̣ܘ ܐܠܗܐ ܒܝ̈ܫܐ ܒܟܝܢܐ ܒܪܐ ܐܢܘܢ ܡܛܠܬܗ̇ ܕܥܠܬܐ ܗܕܐ ܡܘܒܠܐ ܡܠܬܐ ܗܕܐ ܗ̇ܝ ܕܣܓܝ ܫܟܝ̣ܪܐ. ܒܕܡ̣ܢ ܨܒܝܢܐ ܘܫܠܝ̣ܛܘܬ ܒܝܬܐ ܡܢܟܪܝܐ ܠܗܘܢ ܠܫܐܕ̈ܐ. ܘܠܐܠܗܐ ܫܘܒܚܐ ܠܛܝܒܘܬܗ܇ ܒܪܘܝܐ ܡܘܕܝܐ ܠܗ ܕܒܝܫܬܐ. ܬܪܥܝ̣ܬܐ ܕܣܩܘܒܠܝܐ ܠܫܪܪܐ.

 

ܗܦܟܬܐ:

 

ܡܘܣܦܝ̣ܢ. ܬܘܒ ܘܐܡܪܝܢ. ܕܨܒܐ ܒܗܘܢ ܐܪܐ ܐܠܗܐ. ܐܘ ܠܐ ܨܒ̇ܐ. ܘܐܢ ܨܒ̇ܐ ܠܡܢܐ ܡܬܥܕܠܝܢ. ܘܐܢ ܠܐ ܨܒ̇ܐ. ܐܝܟܢܐ ܚܣܢ ܨܒܝܢܗܘܢ ܟܕ ܒܪ̈ܝܐ ܐܢܘܢ. ܠܨܒܝܢܐ ܕܐܠܗܐ ܕܒܪܘܝܐ ܗ̱ܘ. ܒܪܘܝܐ ܓܝܪ ܝܬܝܪ ܚܝܠܬܢ ܙܕܩ ܕܢܗܘܐ.

 

ܦܘܢܝܐ:

 

ܐܡܪܝܢܢ ܕܐܢܗܘ ܕܐܠܗܐ ܫܘܒܚܐ ܠܛܝܒܘܬܗ ܠܐ ܨܒܐ ܒܡܘܬܗ ܕܚܛܝܐ ܐܝܟ ܕܐܡܝ̣ܪ. ܒܡܘܬܗ ܕܚܛܝܐ ܘܡܚܛܝܢܐ ܐܝܟܢܐ ܢܨܒܐ. ܡܘܬܐ ܕܝܢ ܗܪܟܐ ܠܗ̇ܘ ܕܚܛܝܬܐ ܙܕܩ ܠܡܣܬܟܠܘ. ܘܠܘܩܒܠ ܗ̇ܝ ܕܐܡ̣ܪܘ. ܕܐܝܟܢܐ ܡܕܝܢ ܚܣܢ ܨܒܝܢܗܘܢ ܠܨܒܝܢ ܐܠܗܐ ܒܪܘܝܗܘܢ ܐܡܪܝܢܢ. ܕܐܠܘ ܒܩܛܝ̣ܪܐ ܨܒ̇ܐ ܗ̣ܘܐ ܐܠܗܐ ܠܡܕܒܪ ܐܢܘܢ ܠܘܬ ܛܒܬܐ ܘܠܐ ܡܬܕܪܟܝܢ ܗ̣ܘܘ ܘܥܨܝܢ. ܟܒܪ ܡܬܐܡܪܐ ܗܘܬ݀ ܗ̇ܝ ܕܚܣܢ ܨܒܝܢܗܘܢ ܠܨܒܝܢ ܒܪܘܝܗܘܢ. ܘܟܕ ܠܘ ܗܟܢܐ ܐܠܐ ܠܨܒܝܢܗܘܢ ܐܫܪܟܗ ܠܕܘܒܪܗܘܢ. ܘܠܐ ܣܟ ܡܨܝܐ ܕܬܬܝ̣ܗܒ ܚܣܝ̣ܢܘܬܐ ܠܨܒܝܢܗܘܢ. ܘܡܬܚܣܢܢܘܬܐ ܠܨܒܝܢ ܒܪܘܝܗܘܢ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܫܒܝܥܝܬܐ

 

ܡܛܠ ܡܫܬܘܕܥܢܘܬܗܘܢ ܕܫܐܕ̈ܐ ܘܢܝܚܗܘܢ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܗ̇ܝ ܕܡܫܬܘܕܥܝܢ ܐܪܐ ܠܒܪܘܝܗܘܢ

 

ܕܡܫܬܘܕܥܝ̣ܢ ܡ̇ܢ ܠܒܪܘܝܗܘܢ ܝܕܝܥܐ܆ ܡ̣ܢ ܗ̇ܝ ܕܡܠܝ̣̈ܠܐ ܐܢܘܢ. ܘܝ̇ܕܥܝܢ ܕܡܬܡܨ̈ܝܢܐ ܐܢܘܢ. ܘܟܠ ܡܬܡܨܝܢܐ. ܠܘ ܡ̣ܢ ܝܬܗ ܗ̣ܝ ܠܗ ܗ̇ܝ ܕܢܗܘܐ ܐܝܬܘܗܝ܆ ܐܠܐ ܡ̣ܢ ܥܠܬܗ. ܘܡܠܘ̈ܗܝ ܬܘܒ ܕܣܛܢܐ ܥܡ ܪܝ̣ܫܝ̣ܬܐ ܕܓܢܣܢ ܒܦܪܕܝܣܐ ܡܫܘܕ̈ܥܢ ܕܡܫܬܘܕܥܝܢ ܠܐܠܗܐ. ܘܗ̇ܝ ܕܬܘܒ ܕܡܐ ܠܢ ܘܠܟ ܝܫܘܥ ܢܨܪܝܐ ܘܫܪܟܐ. ܘܗ̇ܝ ܬܘܒ ܕܒܦܪܟܣܝܣ. ܕܗܠܝܢ ܐ̱ܢܫ̈ܐ ܥܒܕܘ̈ܗܝ ܐܢܘܢ ܕܐܠܗܐ ܡܪܝܡܐ. ܘܗ̇ܝ ܬܘܒ ܕܠܝܫܘܥ ܡܫܬܘܕܥ ܐ̱ܢܐ ܘܠܦܘܠܘܣ ܝ̇ܕܥ ܐ̱ܢܐ. ܘܫܪܟܐ ܕܐ̱ܚܪ̈ܢܝܬܐ ܣܗ̈ܕܢ ܕܠܘ ܠܐ ܝ̇ܕܥܝܢ ܠܗ ܠܐܠܗܐ ܫܘܒܚܐ ܠܛܝܒܘܬܗ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܡܢܚܝܢ ܗ̣ܘܘ ܒܡܪܘܕܘܬܐ ܗ̇ܝ ܕܒܗ̇ ܐܝܬܝܗܘܢ. ܡܢܐ ܟ̇ܠܐ ܗ̣ܘܐ ܠܗܘܢ ܠܡܬܦܢܝܘ܆ ܒܢܝ̈ܢܫܐ ܓܝܪ ܐܦܢ ܙܒܢܝ̈ܢ ܣܓܝ̈ܐܢ ܣܥܪܝܢ ܗ̇ܘ ܡܐ ܕܠܐ ܨܒܝܢ. ܐܝܟ ܕܐܡ̣ܪ ܫܠܝܚܐ. ܕܠܘ ܗ̇ܘ ܡܐ ܕܨܒ̇ܐ ܐ̱ܢܐ ܕܐܥܒܕ ܠܗ ܗ̣ܘ ܥܒ̇ܕ ܐ̱ܢܐ. ܘܗ̣ܝ ܗܕܐ ܓܕܫܐ ܠܗܘܢ ܒܥܠܬ݀ ܚܝ̈ܠܐ ܟܝܢܝ̈ܐ ܕܢܨܝ̣ܒܝ̣ܢ ܒܗܘܢ ܘܥܡ ܢܦܫܐ ܡܠܝ̣ܠܬܐ ܣܩܘܒܠܐܝܬ ܣܝ̣ܡܝ̣ܢ. ܠܫܐܕ̈ܐ ܕܝܢ ܟܕ ܠܐ ܡܕܡ ܕܐܝܟ ܗܟܢ ܫܟܝܚ. ܒܥܠܬ݀ ܪܘܚܢܘܬܗܘܢ ܘܠܐ ܦܓܪܢܘܬܗܘܢ ܐܠܘܠܐ ܪܥܝܢ ܗ̣ܘܘ ܒܒܝܫܬܐ ܠܐ ܥܢܝܢ ܗ̣ܘܘ ܥܡܗ̇ ܘܒܗ̇.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܐܪܐ ܡܚ̇ܒܝܢ ܐܢܘܢ ܠܚܕ̈ܕܐ ܐܘ ܠܐ

 

ܕܠܐ ܟܝܬ ܡܚ̇ܒܝܢ ܠܚ̈ܕܕܐ ܝ̣ܕܝ̣ܥܐ ܡ̣ܢ ܗ̇ܝ ܕܒܒܢܝ̈ܢܫܐ ܬܘܒ ܗ̇ܢܘܢ ܕܡܐܢ̈ܐ ܐܢܘܢ ܕܐܒܕܢܐ ܘܐܘܪ̈ܓܢܐ ܕܫܐܕ̈ܐ. ܓܠܝ̣ܙܝ̣ܢ ܐܢܘܢ ܡ̣ܢ ܩܝܡܐ ܘܚܘܒܐ ܘܪ̈ܚܡܐ ܘܫܝܢܐ ܐܝܟ ܕܐܡ̣ܪ ܫܠܝܚܐ. ܒܕܓܘܢ ܥܠ ܫܘܡܠܝ ܫܟܝܪ̈ܘܬܐ ܘܡܛܥܝܢܘܬܐ ܕܒܢܝ̈ܢܫܐ ܘܡܦܠܢܘܬܗܘܢ ܘܡܟܝܢܘܬܗܘܢ ܐܦܢ ܐܘܝܢ ܐܢܘܢ ܥܡ ܚܕ̈ܕܐ ܫܐܕ̈ܐ. ܘܠܐ ܦܠܝܓܝܢ܇ ܐܝܟ ܕܐܡ̣ܪ ܡܪܢ. ܕܐܠܘ ܣܛܢܐ ܗ̣ܘ ܥܠܘܗܝ ܡܬܦܠܓ ܗ̣ܘܐ ܠܐ ܩܝܡܐ ܗܘܬ݀ ܡܠܟܘܬܗ. ܐܠܐ ܓܠܝ̣ܙܝܢ ܐܢܘܢ ܡ̣ܢ ܚܘܒܐ ܕܥܡ ܚܕ̈ܕܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܫܒܝܥܝܬܐ

 

ܡܛܠ ܗ̇ܝ ܕܐܝܟܢܐ ܡܬܬܩܪܒܝ̣ܢܢ ܡ̣ܢ ܫܐܕ̈ܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܗ̇ܝ ܕܐܝܟܢܐ ܢܓܕܝܢ ܠܢ ܠܘܬ ܣܥܘܪ̈ܘܬܐ ܫܟܝܪ̈ܬܐ

 

ܐܡܪܝܢܢ ܕܬܠܬܐ ܐܢܘܢ ܪ̈ܝܫܐ ܕܩܕܝ̣ܡܝ̣ܢ ܠܣܥܘܪ̈ܘܬܐ ܐ̱ܢܫܝ̈ܬܐ. ܚܕ ܡ̇ܢ ܡܕܪܟܢܘܬܐ ܕܗ̇ܘ ܕܡܗܢܐ ܘܕܗ̇ܘ ܕܡܙܡܐ. ܕܬܪܝܢ ܕܝܢ܆ ܡܨܛܠܝܢܘܬܗ ܕܪܥܝܢܐ ܠܘܬ ܩܢܝܘܬܐ ܕܗ̇ܘ ܕܡܗܢܐ. ܘܕܚܝܐ ܘܕܚܘ̣ܩܝܐ ܕܗ̇ܘ ܕܡܙܡܐ. ܕܬܠܬܐ ܕܝܢ܆ ܡܬܡܨܝܢܘܬ ܚܝܠܐ ܕܐܘܪ̈ܓܢܐ ܦܓܪ̈ܢܝܐ ܐܘܟܝܬ ܗܕ̈ܡܐ ܠܘܬ ܫܘܡܠܝܐ ܕܩܢܝܘܬܐ ܗ̇ܝ ܘܕܚܝܐ. ܘܓܠܝܐ ܕܣܛܢܐ ܠܘ ܕܙܢܐ ܗܢܐ ܬܠܝܬܝܐ ܗ̇ܘܐ ܥܠܬܐ ܠܘܬ ܡܦܘܠܬܢ. ܒܗ̇ܝ ܕܐܠܘ ܠܐ ܡܨܛܠܝܢܘܬܗ ܕܪܥܝܢܐ ܠܘܬ ܩܢܝܘܬܐ ܕܗܢܝܐܘܬܐ ܡܕܡ. ܘܙܢܘܩܝܐ ܕܠܙܬܐ. ܠܐ ܣܟ ܐܬܬܙܝ̣ܥ ܚܝܠܐ ܦܓܪܢܝܐ ܠܘܬ ܫܘܡܠܝܐ ܕܣܥܘܪܘܬܐ ܗ̇ܝ. ܐܦܠܐ ܬܘܒ ܕܙܢܐ ܬܪܝܢܐ ܗܘܐ ܥܠܬܐ ܠܘܬ ܡܦܘܠܬܢ. ܒܗ̇ܝ ܕܐܠܘܠܐ ܡܕܪܟܢܘܬܗ ܕܪܥܝܢܐ. ܠܙܢܐ ܕܣܥܘܪܘܬܐ ܗ̇ܝ ܠܐ ܣܟ ܐܨܛܠܝ̣ ܠܡܩܢܝܗ̇ ܐܘ ܠܡܕܚܝܗ̇. ܫܪܝܟܐ  ܡܕܝܢ ܕܠܙܢܐ ܗ̇ܘ ܩܕܡܝܐ ܗ̣ܘܐ ܥܠܬܐ ܣܛܢܐ ܠܘܬ ܡܦܘܠܬܢ. ܟܐܡܬ ܟܕ ܢܗܘܐ ܒܪܢܫܐ ܕܠܝܬ ܥܠ ܒܠܗ ܡܕܡ ܡ̣ܢ ܗܢܝ̈ܐܘܬܐ ܗ̇ܢܝܢ ܕܡܦ̈ܠܢ ܠܗ ܒܚܛܝ̣ܬܐ. ܗ̣ܘ ܣܛܢܐ ܡܥܗܕ ܠܗ ܘܡܣܩ ܐܢܘܢ ܥܠ ܒܠܗ ܕܒܪܢܫܐ. ܘܐܝܟ ܕܡܨܪ ܨ̇ܐܪ ܐܢܝܢ ܩܕܡ ܥܝܢܘ̈ܗܝ. ܐܝܛܐ ܡܨܛܠܐ ܠܗܝܢ ܪܥܝܢܐ. ܘܡܬܬܙܝ̣ܥܝ̣ܢ ܚܝܠܝ̈ ܦܓܪܐ ܠܘܬ ܩܢܝܘܬܗܝܢ. ܘܠܗܢܐ ܢܝܫܐ ܢܫܪܪܝܢ ܝܚܝ̈ܕܝܐ ܒܚܝ̣ܪ̈ܐ ܕܒܩܢܘܡܗܘܢ ܢܣܝ̣ܘ ܠܩܪ̈ܒܐ ܫܐܕܢܝ̈ܐ ܒܙܢܝ̈ܐ ܡܫܚ̈ܠܦܐ.

 

 

 

ܢܝܫܐ ܬܪܝܢܐ ܡܛܠܗܝ ܕܫܐܕ̈ܐ ܠܐ ܡܨܝܢ ܠܡܦܠܘ ܠܒܢܝ̈ܢܫܐ ܐܠܐ ܒܡܨܥܝܘܬܐ ܕܚܝ̈ܠܐ ܢܦܫܢܝ̈ܐ ܟܝܬ ܘܦܓܪ̈ܢܝܐ

 

ܐܡܪܝܢܢ ܕܒܢܝ̈ܢܫܐ ܡ̇ܢ ܠܘ ܒܫܘܝܘܬ ܙܢܐ ܘܢܙܠܐ ܪܐܓ̇ܝܢ ܗ̇ܘ ܡܐ ܕܪܐܓ̇ܝܢ. ܘܥܪܩܝ̣ܢ ܡ̣ܢ ܗ̇ܘ ܡܐ ܕܥܪܩܝܢ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܠ̇ܗܘ ܡܐ ܕܪܐܓ ܗܢܐ. ܘܡܣܢܐ ܣ̇ܢܐ ܠܗ ܗ̇ܘ ܐ̱ܚܪܢܐ ܘܒܗܦܟܐ. ܗܐ ܓܝܪ ܚܙܝܢܢ ܐ̱ܢܫܝ̈ܢ ܕܗܢܐ ܟܠܗ ܪ̈ܚܡܝ ܟܣܦܐ ܐܝܬܝܗܘܢ. ܐܝܟܢܐ ܕܠܐ ܡܬܘܡ ܪܐܓ̇ܝܢ ܠܡܬܦܪܦܥܘ ܒܡܐܟ̈ܠܬܐ ܗܢܝ̈ܐܬܐ ܐܘ ܒܫܩ̈ܝܐ. ܐܘ ܠܡܙܕܠܠܘ ܒܠܒܘ̈ܫܐ. ܐܘ ܠܡܫܬܪܬܚܘ ܒܙܘ̈ܘܓܐ. ܐܘ ܠܡܬܓܝܐܝܘ ܒܪܝ̣ܫܢܘܬܐ. ܐ̱ܚܪ̈ܢܐ ܕܝܢ ܠܪܚܡܬ݀ ܟܪܣܐ ܗܢܐ ܟܠܗ ܡܥܒܕ ܕܝܢ. ܐܝܟܢܐ ܕܥܠ ܡܕܡ ܐ̱ܚܪܝܢ ܠܐ ܣܟ ܢܫܐܠܘܢ. ܐ̱ܚܪ̈ܢܐ ܕܝܢ ܒܚܫܐ ܕܫܪܝ̣ܚܘܬܐ ܗܢܐ ܟܠܗ ܟܪܝܗܝܢ. ܐܝܟܢܐ ܕܟܠܗ̇ ܩܢܝܘܬܗܘܢ ܒܥܠܬܗ ܢܦܪܚܘܢ. ܘܥܠ ܚܝܝ̈ܗܘܢ ܬܘܒ ܢܒܣܪܘܢ. ܘܐ̱ܚܪ̈ܢܐ ܥܠ ܐ̱ܚܪ̈ܢܝܬܐ ܒܛܝ̣ܠ ܠܗܘܢ ܕܝ̣ܠܢܐܝܬ. ܒܕܓܘܢ ܟܕ ܨܒܐ ܣܛܢܐ ܠܡܚܛܝܘ ܒܪܢܫܐ ܐ̱ܢܫ ܡܡܢܐ ܡܢܐ ܙܢܝ̈ ܗܢܝ̈ܐܘܬܐ ܕܡ̣ܢ ܚܫܐ ܡܕܡ ܕܠܗ ܨܠܐܷ ܒܪܢܫܐ ܗ̇ܘ ܟܝܢܐܝܬ. ܘܟܡܐ ܕܡܢܫܐ ܢܫܐ ܠܗܝܢ. ܬܘܒ ܡܣܩ ܐܢܝܢ ܥܠ ܥܘܗܕܢܗ. ܘܡܛܠ ܗܕܐ ܣܒ̈ܐ ܝܚܝ̈ܕܝܐ. ܟܕ ܡ̣ܢ ܚܫܐ ܕܙܢܝܘܬܐ ܨܒܝܢ ܠܡܐܣܝܘ ܠܐܚ̈ܐ. ܨܘܡܐ ܐܡܝ̣ܢܐ ܡܬܚܡܝ̣ܢ ܥܠܝܗܘܢ. ܘܡ̣ܢ ܗ̇ܝ ܕܢܚܫܡܘܢ ܐܘ ܕܢܫܬܘܢ ܡܝ̈ܐ ܒܥܕܢ ܫܢܬܐ ܟܠܝܢ ܠܗܘܢ. ܐܟܡ̇ܢ ܕܢܡܚܠܘܢ ܚܝܠܝ̈ܗܘܢ ܟܝܢܝ̈ܐ ܘܢܫܬܗܐ ܩܪܒܐ ܕܥܡܗܘܢ. ܘܠܗܢܐ ܢܝܫܐ ܡܫܘܕܥ ܛܘܒܢܐ ܦܛܪܘܣ ܒܩܬܘܠܝܩܝ ܕܝܠܗ ܟܕ ܐܡ̇ܪ. ܐܬܦܪܩܘ ܡ̣ܢ ܟܠܗܝܢ ܪ̈ܓܝܓܬܐ ܕܦܓܪܐ. ܗܠܝܢ ܕܥܒ̈ܕܢ ܩܪܒܐ ܠܘܩܒܠ ܢܦܫܐ. ܘܠܗ ܬܘܒ ܡܬܢܐ ܟܬܒܐ ܕܦܪܕܝܣܐ ܡܛܠ ܐܒܐ ܡܩܪܝܣ ܕܚܙܐ ܠܫܐܕܐ ܗ̇ܘ ܕܬܠܐ ܗ̣ܘܐ ܒܗ ܒܡܐܢܐ ܟܒܪ ܐܒܒܢ̈ܐ ܡܫܚ̈ܠܦܐ. ܘܟܕ ܫܐܠܗ ܥܠ ܥܠܬܐ܆ ܦܢܝ̣ ܕܠܗܠܝܢ ܛܥܝ̣ܢ ܐ̱ܢܐ ܘܥܐܠ ܐ̱ܢܐ ܠܘܬ ܐܚ̈ܐ. ܐܝܟܢܐ ܕܠܟܠ ܚܕ ܡܢܗܘܢ ܒܗ̇ܘ ܡܐ ܕܪܐܓ ܐܚܬܚܬܝ̣ܘܗܝ. ܘܟܕ ܗܢܐ ܠܐ ܫܦܪ ܠܗ ܠܐܚܐ. ܡܩܪܒ ܐ̱ܢܐ ܠܗ ܐ̱ܚܪܢܐ. ܘܗܟܢܐ ܐ̱ܚܪܢܐ ܘܐ̱ܚܪܢܐ. ܥܕܡܐ ܕܐܦܠܝ̣ܘܗܝ.

 

 

 

ܢܝܫܐ ܬܠܝܬܝܐ ܡܛܠ ܗ̇ܝ ܕܒܡܢܐ ܦܪܝ̣ܫܝ̣ܢ ܙܪ̈ܥܐ ܐܠܗܝ̈ܐ ܕܒܢ ܡܬܬܙܝ̣ܥܝ̣ܢ ܡ̣ܢ ܗ̇ܢܘܢ ܫܐܕܢܝ̈ܐ.

 

ܐܡܪܝܢܢ ܕܡܠܦܢ̈ܐ ܒܚܝ̣ܪ̈ܐ. ܝܬܝܪܐܝܬ ܝܚܝ̈ܕܝܐ ܓܡܝ̣ܪ̈ܐ. ܡܠܦܢ̈ܘܬܐ ܦܬܝ̣̈ܟܬܐ ܐܝܬ ܠܗܘܢ ܥܠܘܗܝ ܕܢܝܫܐ ܗܢܐ. ܚܢܢ ܕܝܢ ܟܕ ܠܗ̇ܝ ܕܡܡܫܚܐ ܚܢܝܢܢ ܐܡܪܝܢܢ. ܕܒܪܢܫܐ ܡ̣ܢ ܬܪܝܢ ܡܪܟܒ ܢܦܫܐ ܐܡ̇ܪ ܐ̱ܢܐ ܘܦܓܪܐ. ܘܕܢܦܫܐ ܡ̇ܢ ܠܥܠܡ ܡܟܬܪܐ. ܠܩܕܡܝܢ ܡܚܘܝܢܢ ܒܝܕ ܐܠܗܐ ܕܡܗܕܐ. ܘܕܦܓܪܐ ܥܓܠ ܡܫܬܪܐ: ܟܠܢܫ ܡ̣ܢ ܕܝܠܗ ܝ̇ܕܥ ܒܠܥܕ ܝܘܠܦܢܐ. ܒܕܓܘܢ ܟܠ ܙܘܥܐ ܐܝܢܐ ܕܥܠ ܡܝܬܪܘܬܗ̇ ܕܢܦܫܐ ܒܬܐܘܪܝܐ ܟܝܬ ܘܒܣܥܘܪܘܬܐ ܡܓܪܓ ܠܢ. ܘܐܦܢ ܗ̣ܝ ܗܕܐ ܡܝܬܪܘܬܐ ܒܝܕ ܛܘܪܦܗ. ܕܦܓܪܐ ܡܬܩܢܝܐ. ܠܗ ܠܗܘ ܙܘܥܐ ܕܠܐ ܦܘܠܓ. ܐܠܗܝܐ ܙܕܩ ܕܢܫܬܘܕܥܝ̣ܘܗܝ. ܙܘܥܐ ܕܝܢ ܐܝܢܐ ܕܥܠ ܢܝܚܗ ܕܦܓܪܐ ܠܐ ܡܩܘܝܢܐ ܡܠܒܛ ܠܢ. ܝܬܝܪܐܝܬ ܟܕ ܗ̣ܘ ܢܝܚܐ ܗ̇ܘ ܒܝܕ ܡܬܐܝܢܢܘܬܗ̇ ܕܢܦܫܐ ܒܐܝܢܝ̈ܘܬܐ ܒܥܝ̣ܪ̈ܝܬܐ ܘܕܝ̣ܠܝ̈ܬܐ ܒܥܪܝ̣ܪ̈ܝܬܐ ܡܬܩܢܐ. ܠܗ ܠܗ̇ܘ ܙܘܥܐ ܕܠܐ ܦܘܠܓ ܫܐܕܢܝܐ ܙܕܩ ܠܡܘܕܝܘܬܗ.

 

ܗܦܟܬܐ:

 

ܐܡܝܢ ܐܢܗܘ ܕܙܒܢܝ̈ܢ ܣܓܝ̈ܐܢ ܣܛܢܐ ܒܡܠܐܟ ܢܘܗܪܐ ܡܥܕ ܠܡܬܕܡܝܘ. ܘܝܡܝܢܐܝܬ ܠܡܓܢܒ ܐܦ ܠܓܒܝ̈ܐ. ܘܥܠ ܡܝܬܪܘܬܐ ܕܢܦܫܐ ܘܛܘܪܦ ܦܓܪܐ ܢܚܦܛ ܐܝܟ ܕܠܡܛܥܝܘ. ܠܐ ܡܕܡ ܡܘܬܪ ܦܘܪܫܢܐ ܕܐܡ̣ܪܬܘܢ.

 

ܦܘܢܝܐ:

 

ܐܡܪܝܢܢ ܕܟܠ ܕܗܘܢܐ ܩܢܐ ܓܒܪܢܝܐ. ܟܕ ܒܢܝܫܗ̇ ܕܨܒܘܬܐ ܚ̇ܐܪ. ܠܐ ܣܟ ܡܬܬܛܥܐ. ܗܐ ܓܝܪ ܟܕ ܚܙܝܢܢ ܬܪܝܢ ܡ̣ܢ ܒܢܝ̈ܢܫܐ ܕܐܟܚܕܐ ܨܝܡܝ̣ܢ ܘܡܨܠܝܢ. ܐܠܐ ܚܕ ܡܢܗܘܢ ܓܢ̣ܝܙܐܝܬ. ܗ̇ܘ ܕܝܢ ܐ̱ܚܪܢܐ ܓܠܝܐܝܬ ܟܕ ܡܬܢܦܚ ܬܘܒ ܘܡܫܬܒܗܪ ܘܡܫܬܩܠ ܐܝܟܢܐ ܠܐ ܝ̇ܕܥܝ̣ܢܢ ܕܗ̇ܘ ܕܓܢܝ̣ܙܐܝܬ ܗܠܝܢ ܣܥܪ. ܥܠ ܡܝܬܪܘܬܐ ܕܢܦܫܗ ܒܛܝ̣ܠ ܠܗ. ܘܗ̇ܘ ܕܚܬܝܪܐܝܬ ܡܣܬܡܥܠ܆ ܡܛܠ ܗ̇ܝ ܕܒܫܘܒܚܐ ܣܪܝܩܐ ܟܪܝ̣ܗ ܠܗܠܝܢ ܡܬܪܡܐ. ܘܗܟܢܐ ܚܬܝ̣ܬܐܝܬ ܡܫܬܪܪܝ̣ܢܢ ܕܗ̇ܘ ܡ̇ܢ ܙܘܥܐ ܗ̱ܘ ܐܠܗܝܐ ܙܘܥܗ. ܗ̇ܘ ܕܝܢ ܐ̱ܚܪܢܐ ܫܐܕܢܝܐ ܘܡܛܠ ܕܫܘܒܚܐ ܣܪܝܩܐ ܒܝܕ ܣܥܘܪ̈ܘܬܐ ܣܪ̈ܝܩܬܐ ܡܬܬܝܬܐ. ܠܘ ܣܓܝ ܐܣܠܝ̣ܘܗܝ ܣܒ̈ܐ ܓܡܝܪ̈ܐ. ܐܠܐ ܐܫܦܘ ܘܐܡ̣ܪܘ. ܕܐܚܐ ܡ̇ܢ ܘܐܦܢ ܒܫܘܪܝܐ ܡܛܠ ܫܘܒܚܐ ܢܬܥܢܘܐ. ܐܠܐ ܠܚܪܬܐ ܐܝܟ ܕܒܣܘܓܐܐ ܡܛܠ ܓܡܝ̣ܪܘܬܐ ܕܢܦܫܗ ܘܡܛܠ ܐܠܗܐ ܡܬܝܬܪ ܒܡܝܬܪ̈ܬܐ.

 

ܚܘܬܡܐ ܕܡܠܬܐ ܕܥܠ ܫܐܕ̈ܐ:

 

ܙܕܩ ܠܡܕܥ ܕܐ̱ܢܫܝ̈ܢ ܡ̇ܢ ܝܬܝܪܐܝܬ ܡܫܠܡܢ̈ܐ ܐܡܪܝܢ ܕܪ̈ܘܚܢܐ ܡ̇ܢ ܡܢܗܘܢ ܥܠܝ̈ܐ ܐܢܘܢ ܘܒܫܡܝܐ ܡܕܝܪܝ̣ܢ ܘܐܝܬܝܗܘܢ ܡܠܐܟ̈ܐ. ܡܢܗܘܢ ܕܝܢ ܬܚܬܝ̈ܐ ܐܢܘܢ. ܘܒܥܠܡܐ ܕܗܘܝܐ ܘܚܘܒܠܐ ܡܕܝܪܝ̣ܢ. ܘܗ̣ܢܘܢ ܗܠܝܢ ܐܘ ܒܝ̈ܫܐ ܐܢܘܢ ܐܘ ܟܦܘܪ̈ܐ ܘܡܣܓ̈ܦܢܐ ܕܒܢܝ̈ܢܫܐ ܘܡܬܩܪܝܢ ܫܐܕ̈ܐ. ܡܢܗܘܢ ܕܝܢ ܛܒ̈ܐ ܐܢܘܢ ܘܡܗܝ̈ܡܢܐ ܘܡܥܕܪ̈ܢܐ ܕܒܢܝ̈ܢܫܐ ܘܡܬܩܪܝܢ ܕܝ̈ܘܐ ܡܗܝ̈ܡܢܐ. ܘܣܓܝ̈ܐܐ ܬܘܒ ܡ̣ܢ ܦܫܝ̣̈ܛܐ ܘܥܡ̈ܡܐ ܕܟܪ̈ܣܛܝܢܐ ܝܬܝܪܐܝܬ ܐܪ̈ܡܢܝܐ. ܓܢ̱ܒܪ̈ܐ ܛܪ̈ܩܐ ܩܪܝܢ ܠܕܐܝܟ ܗܠܝܢ܇ ܘܐܡܪܝܢ. ܕܡܚܙܐ ܚ̣ܙܘ ܐܢܘܢ ܟܕ ܟܢܝ̣ܫܝ̣ܢ ܥܠ ܥܝ̈ܢܬܐ ܘܢܘܗܪ̈ܘܬܐ ܘܒܥܒ̈ܐ ܥܒܝ̣̈ܛܐ ܟܕ ܚܕܝܢ ܘܥܒ̇ܕܝܢ ܚܓ̈ܐ. ܘܠܐܢܫܝ̈ܢ ܡ̣ܢ ܗ̇ܢܘܢ ܕܚ̣ܙܘ ܐܢܘܢ ܡܥܕܪܘ ܥܕܪܘ. ܘܠܐܚܪ̈ܢܐ ܕܒܠܥܕ ܝ̣ܕܥܬܐ ܬܕܟܝ̣ܬܐ ܐܘ ܬܦܫܘܪܬܐ ܣܦܩܘ. ܟܪ ܕܐܝܬܝܗܘܢ ܒܝܫܐܝܬ ܣܓܦܘ. ܚܢܢ ܕܝܢ ܐܡܪܝܢܢ ܕܠܐ ܐ̱ܢܫ ܡ̣ܢ ܡܠܦܢ̈ܐ ܕܥܕܬܐ ܡܕܡ ܕܐܝܟ ܗܢܐ ܐܠܦ. ܠܐ ܕܐܝܬܝܗܘܢ܆ ܐܦܠܐ ܕܠܐ ܐܝܬܝܗܘܢ. ܘܡܛܠܗܕܐ ܠܐ ܡܬܪܡܝܢܢ ܠܡܗܝܡܢܘܬ ܫܟܝ̣ܚܘܬܐ ܕܕܝ̈ܘܐ ܕܐܝܟ ܗܠܝܢ. ܐܦܠܐ ܡܫܪܪܝܢܢ ܠܐ ܫܟܝ̣ܚܘܬܗܘܢ. ܐܠܐ ܠܗ̇ ܠܝ̣ܕܥܬܐ ܐܠܗܝܬܐ ܡܫܪܟܝ̣ܢܢ ܝܕܥܬܗܘܢ.

 

 

 

ܫܠܡܬ݀ ܫܬܐܣܬܐ ܫܒܝܥܝܬܐ

 

 

 

 

 

 

 

 

 

 

     #1 

 

 

 

ܕܫܬܐܣܬܐ ܬܡܝܢܝܬܐ

 

ܫܬܐܣܬܐ ܬܡܝܢܝܬܐ ܡܛܠ ܡܠܬܐ ܕܥܠ ܢܦܫܐ ܡܠܝ̣ܠܬܐ. ܘܒܗ ܐܝܬ ܦܪܘܡܝܘܢ ܘܩܦ̈ܠܐܐ ܬܡܢܝܐ ܘܒܦܪܘܡܝܘܢ ܡ̇ܢ ܬܪܝܢ ܐܝܬ ܢܝ̈ܫܐ. ܢܝܫܐ ܩܕܡܝܐ ܡܛܠ ܬܪ̈ܥܝܬܐ ܕܗܘܝ̈ ܠܩܕ̈ܡܝܐ ܥܠܝܗ̇ ܕܢܦܫܐ ܐ̱ܢܫܝܬܐ

 

ܐܡܪܝܢܢ ܕܐܢܢܩܐܝܬ ܝ̇ܕܥܝܢܢ. ܕܗ̣ܘ ܗ̇ܘ ܡܕܡ ܕܡܛܠܬܗ ܐܡ̇ܪ ܟܠ ܒܪܢܫܐ ܕܐܢܐ ܠܘ ܠܐ  ܡܕܡ ܗ̣ܘ. ܐܠܐ ܡܕܡ ܗ̣ܘ ܕܝܬܝܪ ܡ̣ܢ ܟܠܡܕܡ ܓܠܐܷ ܘܝ̣ܕܝ̣ܥ ܠܟܠ ܒܪܢܫܐ. ܡܠܦܢܐ ܢܗܘܐ ܗ̣ܘ ܗ̇ܘ ܒܪܢܫܐ ܐܘ ܒܘܪܐ. ܐܠܐ ܚܟܝ̈ܡܐ ܡ̇ܢ ܥܠ ܡܢܝܘܬܗ ܕܝܠܗ ܕܗ̇ܘ ܡܕܡ ܐܬܦܠܓܘ. ܒܕܓܘܢ ܐ̱ܢܫܝ̈ܢ ܕܝܢ ܐܡ̣ܪܘ ܕܓܕܫܐ ܗ̱ܘ ܕܒܓܘܫܡܐ ܗ̱ܘ ܐܦܠܐ ܓܕܫܐ ܒܓܘܫܡܐ. ܘܗ̇ܢܘܢ ܡ̇ܢ ܐܡ̣ܪܘ. ܕܗ̣ܘ ܗܢܐ ܗܝܟܠܐ ܦܓܪܢܝܐ ܐܝܬܘܗܝ. ܘܗܠܝܢ ܡ̇ܢ ܣܘܓܐܐ ܕܡܫܠܡܢ̈ܐ ܘܕܠܝ̣̈ܠܐ ܡ̣ܢ ܟܪ̈ܣܛܝܢܐ. ܟܕ ܡܫܪܪܝ̣ܢ ܬܪܥܝ̣ܬܗܘܢ ܒܗ̇ܝ ܕܐܡ̣ܪ ܕܘܝܕ ܡܛܠ ܝܘܣܦ ܕܒܦܪܙܠܐ ܥܠܬ݀ ܢܦܫܗ. ܘܡܢܗܘܢ ܐܡ̣ܪܘ ܕܠܐ ܗ̣ܘܐ ܠܐ ܓܘܫܡܐ ܐ̱ܚܪܢܐ ܕܒܗ ܚܒܝ̣ܫ. ܘܗ̣ܢܘܢ ܗܠܝܢ ܡܢܗܘܢ ܡ̇ܢ ܐܡ̣ܪܘ ܕܟܢܘܫܝܐ ܕܐܪܒܥܐ ܟܘ̈ܡܘ ܐܝܬܘܗܝ. ܡܢܗܘܢ ܕܝܢ ܐܡ̣ܪ ܕܠܐ ܐܠܐ ܐܢ ܕܡܐ ܒܠܚܘܕܘܗܝ ܐܝܬܘܗܝ. ܐܝܟ ܕܐܡ̣ܪ ܡܘܫܐ. ܕܢܦܫܐ ܕܟܠ ܒܣܪ ܕܡܐ ܗ̱ܝ. ܐ̱ܚܪ̈ܢܐ ܕܝܢ ܐܡ̣ܪܘ ܕܠܐ ܐܠܐ ܪܘܚܐ ܗ̇ܝ ܕܣ̇ܠܩܐ ܡ̣ܢ ܠܒܐ ܠܘܬ ܡܘܚܐ ܐܝܬܘܗܝ. ܘܡ̣ܢ ܗܠܝܢ ܐܝܬܘܗܝ ܐܩܪܠܛܘܣ. ܐ̱ܚܪ̈ܢܐ ܕܝܢ ܐܡ̣ܪܘ ܕܦܪܕܐ ܐܘܟܝܬ ܡܢܬܐ ܕܠܐ ܡܬܦܠܓܐ ܡ̣ܢ ܡܢܘ̈ܬܐ ܕܠܒܐ ܐܝܬܘܗܝ. ܘܡ̣ܢ ܗܠܝܢ ܐܝܬܘܗܝ ܕܝܡܘܩܪܐܛܝܣ. ܐ̱ܚܪ̈ܢܐ ܕܝܢ ܐܡ̣ܪܘ ܕܠܐ. ܐܠܐ ܗܕܡ̈ܐ ܫܪܝܪ̈ܐ ܕܒܒܪܢܫܐ ܗ̇ܢܘܢ ܕܡ̣ܢ ܙܪܥܐ ܩܢܝܢ ܪܝ̣ܫܝ̣ܬܐ. ܐܟܙܢܐ ܕܓܪ̈ܡܐ ܘܓܝ̈ܕܐ ܘܘܪ̈ܝ̣ܕܐ ܘܫܪ̈ܝܢܐ ܘܫܪܟܐ ܕܗ̇ܢܘܢ. ܕܟܕ ܡܢܬܐ ܡܢܗܘܢ ܡܬܦܣܩܐ. ܠܐ ܬܘܒ ܡܨܝܐ ܕܬܗܦܘܟ ܒܗܦܟܐ ܕܒܣܪܐ ܘܫܘܡܢܐ ܕܕܡܐ ܗ̱ܘ ܪܝ̣ܫܝ̣ܬܗܘܢ. ܘܠܘ ܙܪܥܐ. ܘܡܛܠ ܗܕܐ ܟܕ ܒܨܪܝ̣ܢ ܬܘܒ ܡܬܬܘܣܦܝ̣ܢ ܗ̣ܢܘܢ ܐܢܘܢ ܢܦܫܗ. ܐ̱ܚܪ̈ܢܐ ܕܝܢ ܐܡ̣ܪܘ ܕܠܐ: ܐܠܐ ܗܕܡ̈ܐ ܡܪ̈ܢܝܐ ܟܐܡܬ ܠܒܐ ܘܟܒܕܐ ܘܡܘܚܐ ܗ̣ܢܘܢ ܐܢܘܢ ܢܦܫܐ. ܐ̱ܚܪ̈ܢܐ ܕܝܢ ܐܡ̣ܪܘ ܕܐܐܪ ܗ̣ܘ܇ ܐܟܙܢܐ ܕܐܢܟܣܝܡܝܢܘܣ. ܐ̱ܚܪ̈ܢܐ ܕܝܢ ܐܡ̣ܪܘ ܕܢܘܪܐ ܐܝܬܝܗ̇܆ ܐܟܙܢܐ ܕܐܪܐܩܠܝܛܘܣ. ܘܗܠܝܢ ܡ̇ܢ ܟܠܗܘܢ ܗ̇ܢܘܢ ܕܓܘܫܡܐ ܕܚܒܝ̣ܫ ܒܦܓܪܐ ܐܘܕܝܘܗ̇ ܠܢܦܫܐ. ܗ̇ܢܘܢ ܕܝܢ ܕܓܕܫܐ ܐܡܪܘܗ̇. ܡܢܗܘܢ ܡ̇ܢ ܐܡ̣ܪܘ ܕܗ̣ܘ ܡܘܙܓܗܘܢ ܘܡܡܫܚܘܬܗܘܢ ܕܐܣܛܘ̈ܟܣܐ ܐܝܬܝܗ̇ ܢܦܫܐ. ܐܟܙܢܐ ܕܐܠܟܣܢܕܪܘܣ ܐܦܪܘܕܝܣܝܐ. ܡܢܗܘܢ ܕܝܢ ܐܪܡܘܢܝܐ ܕܡܠܚܡܘܬܗܘܢ ܕܐܣܛܘܟ̈ܣܐ ܩܪܐܘܘܗ̇ ܠܢܦܫܐ. ܐܪܝܣܛܘܛܠܝܣ ܕܝܢ ܘܟܠܗܘܢ ܒܢܝ̈ ܓܒܗ. ܘܐܦ ܟܠܗܘܢ ܟܪ̈ܝܣܛܝܢܐ. ܥܡ ܕܠܝ̈ܠܐ ܡ̣ܢ ܡܫܠܡܢ̈ܐ ܡܘܕܝܢ ܕܢܦܫܐ ܠܐ ܓܫܝ̣ܡܬܐ ܐܝܬܝܗ̇ ܐܦܠܐ ܓܕܫܐ. ܘܐܝܟ ܕܒܐܘܪܓܢܘܢ ܒܦܓܪܐ ܡܬܚܫܚܐ. ܘܠܐ ܡܝܬܐ ܐܦܠܐ ܒܛܠܐ ܒܒܘܛܠܗ ܕܦܓܪܐ. ܘܒܬܐܘܪ̈ܝܐܣ ܐܠܗܝ̈ܬܐ ܡܬܓܡܪܐ ܘܡܬܒܣܡܐ. ܘܐܢ ܡܢܗܝܢ ܡܬܓܠܙܐ ܚܣܝ̣ܪܬܐ ܦܝܫܐ ܘܠܥܠܡ ܡܫܬܢܩܐ. ܘܠܐ ܩܕܝ̣ܡܐ ܠܦܓܪܐ ܒܒܪܝܬܗ̇. ܘܠܐ ܡܫܢܝܐ ܡ̣ܢ ܦܓܪܐ ܠܦܓܪܐ. ܒܗܠܝܢ ܓܝܪ ܐܦܢ ܫܠܡܝ̣ܢ ܦܪ̈ܝܦܐܛܝܩܘ ܠܥܕܬܢܝ̈ܐ. ܐܠܐ ܠܘ ܒܟܠܗܝܢ ܬܐܘܪ̈ܝܐܣ ܕܥܠ ܢܦܫܐ ܬܪܝܨܐܝܬ ܡܘܕܝܢ. ܗܐ ܓܝܪ ܐܪܝܣܛܘܛܠܝܣ ܐܡ̇ܪ ܕܢܦܫܐ ܠܟܠܢܝ̈ܬܐ ܒܠܚܘܕ ܡܕܪܟܐ ܘܠܘ ܠܡܢܬܝ̈ܬܐ. ܘܐܡ̇ܪ ܬܘܒ ܕܢܦܫܐ ܡ̣ܢ ܗܘܢܐ ܡܥܒܕܢܐ ܐܘܟܝܬ ܡܕܒܪܢܐ ܕܚܘܓܬ݀ ܣܗܪܐ. ܕܗ̣ܘ ܫܠܝ̣ܛ ܒܥܠܡܐ ܕܗܘܝܐ ܘܚܘܒܠܐ܆ ܩܢܝܐ ܫܟܝ̣ܚܘܬܐ ܘܠܘ ܡ̣ܢ ܐܠܗܐ. ܘܐܡ̇ܪ ܬܘܒ ܕܟܕ ܚܕܐ ܙܒܢ̱ܬܐ ܡܬܦܪܫܐ ܡ̣ܢ ܦܓܪܐ ܐܠܐ ܬܘܒ ܢܩܦܐ ܠܗ ܟܐܡܬ ܒܩܝܡܬܐ. ܘܠܘ ܗܟܢܐ ܡܘܕܝܐ ܥܕܬܐ ܩܕܝܫܬܐ. ܘܗ̣ܢܝܢ ܗܠܝܢ ܬܪ̈ܥܝܬܐ ܪ̈ܥܝ̣ܥܬܐ ܒܕܘܟ̈ܝܬܗܝܢ ܡܣܬܬܪ̈ܢ.

 

 

 

ܢܝܫܐ ܬܪܝܢܐ ܡܛܠ ܪܘܫܡܗ̇ ܕܢܦܫܐ ܠܦܘܬ ܬܪ̈ܝܗܘܢ ܪ̈ܥܝܢܐ ܕܒܪ̈ܝܐ ܘܕܥܕܬܢܝ̈ܐ

 

ܐܪܝܣܛܘܛܠܝܣ ܡ̇ܢ ܪܫܡ ܠܗ̇ ܠܢܦܫܐ ܡܠܝ̣ܠܬܐ ܘܐܡ̇ܪ ܕܐܝܬܝܗ̇ ܐܢܛܘܠܘܝܟܝܐ ܐܘܟܝ̣ܬ ܫܘܡܠܝܐ ܩܕܝܫܐ ܕܓܘܫܡܐ ܟܝܢܝܐ ܘܐܘܪܓܢܝܐ ܕܚܝ ܒܚܝܠܐ. ܘܫܘܡܠܝܐ ܡ̇ܢ ܐܡ̣ܪ. ܐܝܟ ܨܘܪܬܐ ܠܐ ܗܘܠܢܝܬܐ ܐܠܐ ܐܘܣܝܐ ܩܝܡܬ݀ ܠܝܬܗ̇. ܘܩܕܡܝܐ ܐܡ̣ܪ܆ ܒܦܚܡܐ ܕܫܘܡ̈ܠܝܐ ܐ̱ܚܪ̈ܢܐ ܐ̱ܚܪ̈ܝܐ ܕܗܘܝܢ ܠܒܪܢܫܐ ܡ̣ܢ ܒܬܪܟܢ ܐܟܙܢܐ ܕܝܕ̈ܥܬܐ ܘܐܘܡܢ̈ܘܬܐ. ܘܟܝܢܐ ܐܡ̣ܪ. ܐܟܡ̇ܢ ܕܢܦܪܫܝ̣ܘܗܝ ܠܦܓܪܐ. ܡ̣ܢ ܫܪܟܐ ܕܓܘܫ̈ܡܐ ܐܘܡܢܝ̈ܐ. ܐܟܙܢܐ ܕܐܢܕܪܝܢܛܐ ܘܥܪܣܐ ܘܫܪܟܐ. ܘܐܘܪܓܢܝܐ ܐܡ̣ܪ. ܒܗ̇ܝ ܕܐܝܟ ܕܒܐܘܪܓܢܘܢ ܡܥܒܕܐ ܢܦܫܐ ܒܦܓܪܐ. ܘܒܐܝ̈ܕܘܗܝ ܡܬܬܓܪܐ ܡܝܬܪ̈ܬܐ. ܘܕܚܝ ܒܚܝܠܐ ܐܡ̣ܪ ܒܗ̇ܝ ܕܠܓܘܫܡܗ ܕܙܪܥܐ ܩܕܡܝܬ݀ ܢܩܦܐ ܢܦܫܐ. ܗ̇ܝ ܕܗܝܕܝܟ ܒܚܝܠܐ ܗ̣ܘ ܚܝܐ ܘܠܘ ܒܡܥܒܕܢܘܬܐ. ܡܠܦܢܐ ܕܝܢ ܕܥܕܬܐ. ܐܦܢ ܣܓܝܐܝܬ ܪܫܡܘܗ̇. ܐܠܐ ܪܘܫܡܐ ܗ̇ܘ ܕܩܕܝܫܐ ܓܪܝܓܘܪܝܘܣ ܕܢܘܣܐ. ܝܬܝܪ ܡ̣ܢ ܟܠܗܘܢ ܪ̈ܘܫܡܐ ܐܫܬܟܚ ܕܡܬܝܬܪ ܥܡ ܩܦܝ̣ܣܘܬܗ. ܐܡ̣ܪ ܓܝܪ ܒܡܐܡܪܐ ܗ̇ܘ ܕܠܘܬ ܡܩܪ̈ܚܐ. ܕܢܦܫܐ ܐܝܬܝܗ̇܆ ܟܝܢܐ ܪܘܚܢܝܐ ܥܒܝ̣ܕܐ ܚܝܐ ܝܕܘܥܬܢܐ܇ ܗ̇ܘ ܕܡܚܪܪ ܡ̣ܢ ܗܘܠܐ ܗܕܐ ܓܘܫܡܢܝܬܐ. ܘܕܒܐܘܪܓܢܘܢ ܕܪ̈ܓܫܝ ܓܘܫܡܐ܆  ܡܚܘܝܐ ܡܥܒܕܢܘܬܐ ܕܚܝܠܐ ܕܚܝܘܬܗ̇. ܐܡܪܝܢܢ ܕܗܢܐ ܪܘܫܡܐ ܐܦܢ ܡܝܬܪ. ܐܠܐ ܬܘܣܦܬܐ ܕܠܐ ܐܠܨܐ ܗܘܬ݀ ܥܠܝܗ̇ ܐܝܬܝ̣ ܒܗ ܗ̣ܘ ܡܠܦܢܐ. ܒܗ̇ܝ ܕܐܡ̣ܪ ܕܗ̇ܘ ܕܡܚܪܪ ܡ̣ܢ ܗܘܠܐ ܗܕܐ ܓܘܫܡܢܝܬܐ. ܗ̣ܝ ܓܝܪ ܒܪܬ݀ ܩܠܐ ܕܪܘܚܢܝܐ ܕܐܡ̣ܪ ܠܘ ܡܕܡ ܐ̱ܚܪܝܢ ܡܫܘܕܥܐ. ܐܠܐ ܐܢ ܠܡܚܪܪܘܬܗܘܢ ܕܡ̣ܢ ܗܘܠܐ ܗܕܐ ܓܘܫܡܢܝܬܐ. ܒܕܓܘܢ ܠܐ ܣܢܝ̣ܩ ܗ̣ܘܐ ܥܠ ܥܘܗܕܢܐ ܕܗܕܐ.

 

 

 

ܩܦܠܐܘܢ ܩܕܡܝܐ ܕܫܬܐܣܬܐ ܬܡܝܢܝܬܐ

 

ܡܛܠ ܓܫܝ̣ܡܘܬܗ̇ ܕܢܦܫܐ ܡܠܝ̣ܠܬܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܗ̇ܝ ܕܠܐ ܓܫܝ̣ܡܬܐ ܗ̱ܝ ܢܦܫܐ. ܐܦܠܐ ܒܓܘܫܡܐ ܫܪܝܐ ܐܝܟ ܓܕܫܐ. ܐܠܐ ܡܢܗ̇ ܘܠܗ̇ ܡܩܝܡܐ. ܐܝܟ ܫܪܟܐ ܕܐܘܣܝ̈ܐܣ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ ܡܚܘܝܢܘܬܐ ܩܕܡܝܬܐ

 

ܐܡܪܝܢܢ. ܕܢܦܫܐ ܡܠܝ̣ܠܬܐ ܝܕܘܥܬܐ ܗ̱ܝ ܕܟܝ̈ܢܐ ܟܠܢܝ̈ܐ. ܘܐܠܘ ܓܘܫܡܐ ܗܘܬ݀ ܡܫܘܚܬܐ ܡܕܡ ܘܪܒܘܬܐ ܕܝ̣ܠܢܝܬܐ ܘܐܣܟܡܐ ܩܢܝܐ ܗܘܬ݀. ܘܐܠܨܐ ܗܘܬ݀ ܕܐܦ ܠܟܝ̈ܢܐ ܗ̇ܢܘܢ ܟܠܢܝ̈ܐ ܡܬܝܕ̈ܥܢܝܗ̇ ܡܫܘܚܬܐ ܡܕܡ ܘܪܒܘܬܐ ܕܝ̣ܠܢܝܬܐ ܘܐܣܟܡܐ ܢܗܘܘܢ ܗ̣ܘܘ. ܗ̇ܝ ܕܠܐ ܡܨܝܐ. ܒܗ̇ܝ ܕܠܟܝܢܐ ܟܠܢܝܐ ܐܠܘ ܪܒܘܬܐ ܕܝ̣ܠܢܝܬܐ ܐܝܬ ܗܘܬ݀. ܐܝܟܢܐ ܡܫܪ ܗ̣ܘܐ ܥܠ ܟܝ̈ܢܐ ܡܢܬܝ̈ܐ ܕܪ̈ܒܘܬܐ ܩܢܝܢ ܡܫܚ̈ܠܦܬܐ. ܕܐܝܟ ܐܝܟܢ. ܐܠܘ ܠܒܪܢܫܐ ܓܘܢܝܐ ܐܘܟܝ̣ܬ ܠܐܕܫܐ. ܪܒܘܬܐ ܐܝܬ ܗܘܬ݀ ܕܬܪܬܝܢ ܐܡܝ̣̈ܢ. ܐܝܟܢܐ ܫܘܝܐܝܬ ܡܫܘܬܦܝ̣ܢ ܗ̣ܘܘ ܒܗ ܩܢܘ̈ܡܐ ܩܢ̈ܝܝ ܪ̈ܒܘܬܐ ܡܫܚ̈ܠܦܬܐ ܕܚܕܐ ܐܡ̇ܪ ܐ̱ܢܐ ܐܡܬܐ. ܘܕܬܪܬܝܢ ܐܡܝ̣̈ܢ ܘܕܬܠܬ ܐܡܝ̣̈ܢ ܘܫܪܟܐ. ܘܟܕ ܠܟܝܢܐ ܟܠܢܝܐ ܡܬܝܕܥܢܗ̇ ܕܢܦܫܐ ܠܐ ܡܨܝܐ ܕܬܗܘܐ ܪܒܘܬܐ ܡܕܡ. ܐܦܠܐ ܠܢܦܫܐ ܝܕܘܥܬܗ ܡܨܝܐ ܕܬܗܘܐ. ܘܟܠ ܕܓܠܝ̣ܙ ܡ̣ܢ ܪܒܘܬܐ ܕܝ̣ܠܢܝܬܐ܆ ܠܘ ܓܘܫܡܐ ܗ̱ܘ. ܢܦܫܐ ܡܕܝܢ ܠܐ ܓܫܝ̣ܡܬܐ ܗ̱ܝ. ܐܝܟ ܕܐܦ ܡܬܝܕ̈ܥܢܝܗ̇ ܕܐܝܬܝܗܘܢ ܟܝ̈ܢܐ ܟܠܢܝ̈ܐ܆ ܠܐ ܓܫܝ̈ܡܐ ܐܢܘܢ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܐܠܘ ܢܦܫܐ ܡܠܝ̣ܠܬܐ ܒܓܘܫܡܐ ܡܕܡ ܫܪܝܐ ܗܘܬ݀ ܒܠܒܐ ܠܡܐܡܪ ܐܘ ܒܡܘܚܐ ܘܒܗ ܡܩܝܡܐ ܗܘܬ݀. ܐܠܨܐ ܕܟܠ ܡܐ ܕܗ̣ܝ ܠܗ̇ ܝܕܥܐ ܗܘܬ݀. ܐܦ ܠܓܘܫܡܐ ܗ̇ܘ ܕܒܗ ܩܢܝܐ ܗܘܬ݀ ܩܘܝܡܐ ܕܝܬܐ ܝ̇ܕܥܐ ܗܘܬ݀. ܘܗܐ ܠܘ ܗܟܢܐ ܒܗ̇ܝ ܕܐܡܝ̣ܢܐܝܬ ܟܠ ܐ̱ܢܫ ܗ̣ܘ ܠܗ ܝܕܥ. ܘܠܘ ܒܐܡܝ̣ܢܐܝܬ ܝ̇ܕܥ ܐܘ ܣܠܩ ܥܠ ܒܠܗ ܠܒܗ. ܐܘ ܡܘܚܗ. ܐܘ ܡܕܡ ܐ̱ܚܪܝܢ ܡ̣ܢ ܗܕܡ̈ܘ. ܢܦܫܐ ܡܕܝܢ ܠܘ ܒܓܘܫܡܐ ܫܪܝܐ. ܐܠܐ ܩܝܡܬ݀ ܠܝܬܗ̇ ܗ̣ܝ ܐܝܟ ܐܘܣܝܐ ܠܐ ܓܫܝ̣ܡܬܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢܢ ܕܢܦܫܐ ܡܠܝ̣ܠܬܐ. ܠܐ ܣܢܝ̣ܩܐ ܡܥܒ̈ܕܢܘܬܗ̇ ܥܠ ܓܘܫܡܐ. ܒܗ̇ܝ ܕܡܕܪܟܘ ܡܕܪܟܐ ܗ̣ܝ ܠܗ̇ ܘܠܓܘܫܡܐ ܕܐܝܬܘܗܝ ܐܘܪܓܢܘܢ ܕܝܠܗ̇. ܘܐܠܘ ܒܝܕ ܓܘܫܡܐ ܐܕܪܟܬ݀. ܠܗ ܠܗ̇ܘ ܓܘܫܡܐ ܬܘܒ ܒܝܕ ܓܘܫܡܐ ܐ̱ܚܪܢܐ ܐܠܨܐ ܗܘܬ݀ ܠܗ̇ ܠܡܕܪܟܘ. ܘܠܗ̇ܘ ܐ̱ܚܪܢܐ ܒܝܕ ܐ̱ܚܪܢܐ. ܘܗܟܢܐ ܠܠܐ ܣܘܦ ܡܫܬܠܫܠܐ ܗܘܬ݀ ܡܠܬܐ ܗ̇ܝ ܕܫܟܝ̣ܪܐ. ܘܟܠ ܕܠܐ ܣܢܝ̣ܩ ܒܡܥܒܕܢܘܬܗ ܥܠ ܓܘܫܡܐ. ܐܦܠܐ ܒܩܘܝܡܐ ܕܝܬܗ ܣܢܝ̣ܩ ܥܠ ܓܘܫܡܐ. ܒܗ̇ܝ ܕܡܥܒܕܢܘܬܐ ܕܡܕܡ ܒܝܕ ܩܘܝܡܐ ܕܝܬܗ ܥܠ ܓܘܫܡܐ ܣܢܝ̣ܩ ܗ̣ܘܐ. ܐܦ ܡܥܒܕܢܘܬܐ ܥܠ ܓܘܫܡܐ ܐܠܨܐܝܬ ܣܢܝ̣ܩܐ ܗܘܬ݀. ܘܚܢܢ ܚܘܝ̣ܢܢ ܕܢܦܫܐ ܡܠܝ̣ܠܬܐ ܠܐ ܣܢܝܩܐ ܒܡܕܡ ܡ̣ܢ ܡܥܒܕܢ̈ܘܬܗ̇ ܟܐܡܬ݀ ܒܡܕܪܟܢܘܬܐ ܕܝܬܗ̇ ܘܕܓܘܫܡܐ ܐܘܪܓܢܘܢ ܕܝܠܗ̇ ܥܠ ܓܘܫܡܐ. ܡܕܝܢ ܘܐܦܠܐ ܒܩܘܝܡܐ ܕܝܬܗ̇ ܥܠ ܓܘܫܡܐ ܣܢܝ̣ܩܐ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ ܐܠܘ ܢܦܫܐ ܡܠܝ̣ܠܬܐ ܓܘܫܡܐ ܗܘܬ݀ ܐܘ ܒܓܘܫܡܐ ܩܢܝܐ ܗܘܬ݀ ܩܘܝܡܐ ܕܝܬܐ. ܐܠܨܐ ܗܘܬ݀ ܕܒܡܚܝ̣ܠܘܬܗ ܕܦܓܪܐ ܡܡܚܠܐ ܗܘܬ݀. ܘܒܥܘܫܢܗ ܡܬܥܫܢܐ ܗܘܬ݀. ܘܗܐ ܠܘ ܗܟܢܐ. ܒܗ̇ܝ ܕܟܡܐ ܕܡܘܚܐ ܡܡܚܠܘ ܡܡܚܠ ܒܝܕ ܚܘܫܒܐ ܝܬܝܪܐ. ܢܦܫܐ ܡܥܫܢ ܥܫܢܐ ܘܡܬܓܡܪܐ. ܘܬܘܒ ܗܘܢܐ ܗ̇ܘ ܕܐܝܬܘܗܝ ܚܝܠܐ ܩܕܡܝܐ ܕܢܦܫܐ ܡܠܝ̣ܠܬܐ ܡ̣ܢ ܒܬܪ ܐܪܒܥܝܢ ܫܢܝ̈ܢ ܡܫܪܐ ܠܡܫܬܡܠܝܘ. ܟܕ ܦܓܪܐ ܡܫ̇ܪܐ ܠܡܚܣܪ ܘܠܡܬܚܒ. ܐܝܟ ܕܐܡ̣ܪ ܐܠܗܝܐ ܦܘܠܘܣ. ܡܛܠ ܗܢܐ ܠܐ ܡܐܢܐ ܠܢ. ܐܦ ܓܝܪ ܗܘܝܐ. ܘܐܠܘ ܩܘܝܡܗ ܕܝܬܗ ܒܪܢܫܐ ܒܪܝܐ ܡܬܚܒܠ. ܐܠܐ ܕܡ̣ܢ ܠܓܘ ܡܬܚܕܬ݀ ܝܘܡ ܡ̣ܢ ܝܘܡ. ܢܦܫܐ ܡܕܝܢ ܠܐ ܓܘܫܡܐ ܗ̱ܝ ܐܦܠܐ ܒܓܘܫܡܐ ܫܪܝܐ.

 

ܡܚܘܝܢܘܬܐ ܕܚܡܫ:

 

ܐܡܪܝܢܢ ܕܚܝܠܐ ܓܘܫܡܢܝܐ ܐܦ ܗ̣ܘ ܓܘܫܡܐ ܡܫܦܠ ܘܡܘܚܠ ܒܣܒܝ̣ܣܘܬ ܣܥܘܪ̈ܘܬܐ. ܘܢܦܫܐ ܡܠܝ̣ܠܬܐ ܝܬܝܪ ܡܬܚܝܠܐ ܟܡܐ ܕܣܒܝ̣ܣܐܝܬ ܣܥܪܐ. ܢܦܫܐ ܡܕܝܢ ܠܐ ܓܘܫܡܐ ܗ̱ܝ ܐܦܠܐ ܓܘܫܡܢܝܬܐ ܘܝ̣ܕܝ̣ܥܐ ܗ̇ܝ ܕܐܬܐܡܪܬ݀ ܕܚܝܠܐ ܚܙܘܝܐ ܚܝܠܐ ܗ̱ܘ ܓܘܫܡܢܝܐ. ܟܡܐ ܕܒܡܬܚܙ̈ܝܢܐ ܣܓܝ̈ܐܐ ܘܪ̈ܚܝ̣ܩܐ ܚ̇ܐܪ܆ ܡܘܦܐ ܘܡܬܛܠܩ. ܘܗܟܢܐ ܚܝܠܐ ܡܙܝ̣ܥܢܐ ܘܫܪܟܐ. ܢܦܫܐ ܕܝܢ ܡܠܝ̣ܠܬܐ ܟܡܐ ܕܒܡܬܝܕ̈ܥܢܐ ܣܓܝ̈ܐܐ ܘܕܡܥܠܝܢ ܡܢܗ̇ ܗܪܓܐ ܝܬܝܪ ܡܬܓܡܪܐ ܘܡܬܚܝܠܐ. ܘܡܬܠܒܒܐ ܥܠ ܡܕܪܟܢܘܬܐ. ܘܗ̣ܘ ܗܟܘܬ ܗ̇ܘ ܕܩ̇ܪܐ ܐܦܢ ܡܫܦܠ ܡ̣ܢ ܣܘܓܐܐ ܕܩܪܝܢܐ. ܐܠܐ ܢܦܫܗ ܝܬܝܪ ܥܫܢܐ ܒܝ̣ܕܥܬܐ ܕܩܪܝܢܐ ܘܬܢܝܐ ܘܣܘܟܠܐ.

 

ܡܚܘܝܢܘܬܐ ܕܫܬ:

 

ܐܡܪܝܢܢ ܕܚܝܠܐ ܓܘܫܡܢܝܐ ܠܐ ܡܨܐ ܠܡܕܪܟܘ ܠܡܚܝ̣ܠܐ܆ ܒܬܪ ܚܝܠܬܢܐ. ܗܐ ܓܝܪ ܗ̇ܘ ܕܚ̇ܐܪ ܘܚܙܐ ܠܐܣܦܝ̣ܪܐ ܕܫܡܫܐ ܟܕ ܥܛܦ ܚ̇ܐܪ ܒܫܪܓܐ ܠܐ ܣܟ ܚܙܐ ܠܗ. ܗ̣ܘ ܗܟܘܬ. ܘܗ̇ܘ ܕܫܡܥ ܩܠ ܪܥܡܐ. ܠܐ ܣܟ ܫܡܥ ܩܠ ܕܒܒܐ ܒܗ̇ ܒܗ̇ܝ ܫܥܬܐ. ܢܦܫܐ ܕܝܢ ܡܠܝ̣ܠܬܐ ܠܘ ܗܟܢܐ. ܐܠܐ ܟܡܐ ܕܠܝܕ̈ܥܬܐ ܥܫܝ̈ܢܬܐ ܘܥܣ̈ܩܬܐ ܡܕܪܟܐ ܝܬܝܪ ܡܬܦܫ̈ܩܢ ܠܗ̇ ܝܕ̈ܥܬܐ ܗ̇ܢܝܢ ܡܚܝ̣̈ܠܬܐ ܘܦܫܝ̣̈ܩܬܐ. ܢܦܫܐ ܡܕܝܢ ܠܐ ܓܘܫܡܐ ܗ̱ܝ ܐܦܠܐ ܒܓܘܫܡܐ ܩܢܝܐ ܩܘܝܡܐ ܕܝܬܐ.

 

ܡܚܘܝܢܘܬܐ ܕܫܒܥ:

 

ܐܡܪܝܢܢ. ܕܡܕܪܟܝ̣ܢܢ ܛܘܪܐ ܡ̣ܢ ܝܩܘܢܕܐ. ܘܝܡܐ ܡ̣ܢ ܙܝܘܓ. ܘܓܠܝܐ ܕܠܐ ܫܟܝ̣̈ܚܢ ܒܣܘܥܪ̈ܢܐ ܨܘܪ̈ܬܐ ܗܠܝܢ. ܐܠܐ ܒܚܘܫܒܐ ܒܠܚܘܕ. ܒܕܓܘܢ ܗ̣ܘ ܗ̇ܘ ܡܐ ܕܒܗ ܫܟܝ̣̈ܚܢ ܨܘܪ̈ܬܐ ܗܠܝܢ. ܐܘ ܓܘܫܡܐ ܗ̱ܘ. ܐܘ ܚܝܠܐ ܓܘܫܡܢܝܐ. ܐܘ ܠܐ ܓܘܫܡܐ ܐܦܠܐ ܚܝܠܐ ܓܘܫܡܢܝܐ. ܘܠܐ ܡܨܝܐ ܕܓܘܫܡܐ ܢܗܘܐ ܐܘ ܚܝܠܐ ܓܘܫܡܢܝܐ. ܒܗ̇ܝ ܕܡܬܚ̈ܐ ܗܠܝܢ ܪܘܪ̈ܒܐ. ܐܝܟܢܐ ܒܓܘܫܡܐ ܙܥܘܪܐ. ܘܒܚܝܠܐ ܓܘܫܡܢܝܐ ܕܒܢ ܚܒܝ̣ܫ ܡܫܬܟܚܝ̣ܢ. ܘܐܢ ܡܨܝܢ ܗ̣ܘܘ ܠܡܫܬܟܚܘ. ܘܡܫܬܟܚܝ̣ܢ ܗ̣ܘܘ ܓܘܫ̈ܡܐ ܙܥܘܪ̈ܐ ܕܫܘܝܢ ܠܓܘܫ̈ܡܐ ܪܘܪ̈ܒܐ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܗ̇ܘ ܡܐ ܕܒܗ ܫܟܝ̣̈ܚܢ ܨܘܪ̈ܬܐ ܗ̇ܢܝܢ ܠܐ ܓܘܫܡܐ ܗ̱ܘ. ܐܦ ܓܘܫܡܢܝܐ. ܕܗ̣ܝ ܗ̣ܝ ܢܦܫܐ ܡܠܝ̣ܠܬܐ.

 

ܡܚܘܝܢܘܬܐ ܕܬܡܢܐ:

 

ܐܡܪܝܢܢ ܕܐܢܢܩܐܝܬ ܝ̇ܕܥܝ̣ܢܢ ܕܐܘܟܡܘܬܐ ܣܩܘܒܠܝܐ ܠܚܘܪܘܬܐ. ܘܐܠܘܠܐ ܕܐܟܚܕܐ ܐܫܬܟ̈ܚܝܢ ܬܪ̈ܬܝܗܝܢ ܒܚܘܫܒܢ ܠܐ ܣܟ ܐܬܡܨܝܢܢ ܠܡܚܪܩ ܚܘܪܩܢܐ ܗܢܐ. ܘܟܕ ܡ̣ܢ ܠܐ ܡܬܡܨܝܢܝ̣ܬܐ ܗ̱ܝ ܠܣܩܘ̈ܒܠܝܐ ܕܐܟܚܕܐ ܢܫܬܟܚܘܢ ܒܚܕ ܗ̇ܘ ܕܣܝ̣ܡ ܓܘܫܡܢܝܐ. ܟܐܡܬ݀ ܠܐ ܡܨܝܐ ܕܚܕ ܓܘܫܡܐ ܒܕ ܙܒܢܐ. ܐܘܟܡܐ ܘܚܘܪܐ ܢܗܘܐ ܐܟܚܕܐ. ܐܦܠܐ ܩܪܝ̣ܪܐ ܘܚܡܝ̣ܡܐ. ܐܠܨܐ ܕܗ̇ܘ ܡܐ ܕܒܗ ܐܟܚܕܐ ܡܫܬܟܚܝ̣ܢ ܣܩܘ̈ܒܠܝܐ ܙܒܢ ܚܘܪܩܢܐ ܕܥܠܝܗܘܢ. ܠܐ ܓܘܫܡܐ ܗ̱ܘ ܐܦܠܐ ܚܝܠܐ ܓܘܫܡܢܝܐ ܕܠܗ ܩܪܝܢܢ ܢܦܫܐ ܡܠܝܠܬܐ.

 

ܡܚܘܝܢܘܬܐ ܕܬܫܥ:

 

ܐܡܪܝܢܢ ܐܠܘ ܓܘܫܡܐ ܗܘܬ݀ ܢܦܫܐ ܡܠܝ̣ܠܬܐ. ܠܘ ܠܐ ܡܨܝܐ ܗܘܬ݀ ܕܒܡܢܬܐ ܡܢܗ̇ ܝ̣ܕܥܬܐ ܕܡܬܝܕܥܢܐ ܡܕܡ ܩܝܡܐ ܗܘܬ݀. ܘܒܡܢܬܐ ܐ̱ܚܪܬܐ܇ ܠܐ ܝ̣ܕܝ̣ܥܬܐ ܕܝܠܗ ܕܡܬܝܕܥܢܐ ܗ̱ܘ. ܘܡܫܬܟܚ ܗ̣ܘܐ ܒܪܢܫܐ ܒܚܕ ܙܒܢܐ. ܕܝ̇ܕܘܥܐ ܗ̱ܘ ܘܠܐ ܝ̇ܕܘܥܐ ܕܝܠܗ ܟܕ ܕܝܠܗ ܕܚܕ ܡܬܝܕܥܢܐ܆ ܗ̇ܝ ܕܫܟܝܪܐ.

 

ܡܚܘܝܢܘܬܐ ܕܥܣܪ:

 

ܐܡܪܝܢܢ ܕܨܘܪܬܐ ܡܕܡ ܟܕ ܒܓܘܫܡܐ ܡܕܡ ܡܬܬܨܝ̣ܪܐ. ܡܟܠܐ ܟܠܝܐ ܕܒܗ̇ ܒܕܘܟܬܐ ܗ̇ܝ ܕܝܠܗ̇. ܨܘܪܬܐ ܐ̱ܚܪܬܐ ܬܬܨܝ̣ܪ. ܒܢܦܫܐ ܕܝܢ ܡܠܝ̣ܠܬܐ ܠܘ ܗܟܢܐ. ܐܠܐ ܟܕ ܨܘܪܬ݀ ܡܬܝܕܥܢܐ ܡܕܡ ܒܗ̇ ܡܬܬܨܝ̣ܪܐ. ܗܝܕܝܢ ܝܬܝܪܐܝܬ ܥܗܢܬ݀ ܠܩܘܒܠܐ ܕܨܘܪ̈ܬܐ ܐ̱ܚܪ̈ܢܝܬܐ ܡܬܝܕ̈ܥܢܝܬܐ ܒܗ̇ ܢܬܬܨܝ̣ܪ̈ܢ. ܒܠܥܕ ܗ̇ܝ ܕܨܘܪܬܐ ܗ̇ܝ ܕܩܕܡܝܬܐ ܬܬܠܚܐ ܡܢܗ̇. ܘܡ̣ܢ ܗܠܝܢ ܡܬܝܕܥܐ ܚܬܝ̣ܬܐܝܬ ܕܢܦܫܐ ܠܐ ܓܫܝܡܬܐ ܗ̱ܝ.

 

ܡܚܘܝܢܘܬܐ ܕܚܕܥܣܪ̈ܐ:

 

ܐܡܪܝܢܢ ܕܟܠ ܒܪܢܫܐ ܐܠܨܐܝܬ ܝ̇ܕܥ ܕܗܘܝܘ ܗ̇ܘ ܕܡ̣ܢ ܩܕܡ ܥܣܪܝܢ ܫܢܝ̣̈ܢ ܐܝܬܘܗܝ ܗ̣ܘܐ ܘܠܘ ܐ̱ܚܪܢܐ ܗ̣ܘܐ. ܘܓܘܫܡܐ ܘܡܢܘ̈ܬܗ. ܠܘ ܗ̣ܢܘܢ ܟܕ ܗ̣ܢܘܢ ܐܝܬܝܗܘܢ ܒܗ̇ܝ ܕܡܬܦܘܫܫܘ ܡܬܦܘܫܫܝ̣ܢ ܒܝܕ ܬܪܬܝܢ ܚܡܝ̈ܡܘܬܐ ܕܡ̣ܢ ܠܒܪ ܘܡ̣ܢ ܠܓܘ. ܘܐ̱ܚܪ̈ܢܝܬܐ ܡܢܘ̈ܬܐ ܒܕܘܟܬ݀ ܗ̇ܢܝܢ ܩܕ̈ܡܝܬܐ ܡܬܬܘ̈ܣܦܢ ܒܝܕ ܬܘܪܣܝܐ. ܢܦܫܐ ܡܕܝܢ ܕܗ̣ܝ ܗ̣ܝ ܟܕ ܗ̣ܝ. ܠܘ ܓܘܫܡܐ ܗ̱ܝ ܕܠܘ ܗܘܝܘ ܟܕ ܗ̣ܘ.

 

ܡܚܘܝܢܘܬܐ ܕܬܪܬܥܣܪ̈ܐ:

 

ܐܡܪܝܢܢ. ܕܟܠܗܘܢ ܗܕܡܝ̈ ܦܓܪܐ. ܓܘܝ̈ܐ ܘܒܪ̈ܝܐ. ܕܡܘ̣ܬ ܐܘܪ̈ܓܢܐ ܐܝܟ ܕܠܚܫܚܬܐ ܡܕܡ ܐܬܒܪܝ̣ܘ. ܘܡܛܠ ܗܕܐ ܐܡ̇ܪ ܒܪܢܫܐ ܕܪܝܫܐ ܕܝܠܝ ܘܥܝܢܐ ܕܝܠܝ ܘܠܒܐ ܕܝܠܝ ܘܟܒܕܐ ܕܝܠܝ ܘܫܪܟܐ. ܒܕܓܘܢ ܐܠܨܐ ܕܗ̣ܘ ܗ̇ܘ ܕܕܝܠܗ ܐܢܘܢ ܗܕܡ̈ܐ ܗܠܝܢ ܐܘܪ̈ܓܢܐ. ܠܘ ܡܕܡ ܡܢܗܘܢ ܐܝܬܘܗܝ ܐܦܠܐ ܟܠܗܘܢ. ܢܦܫܐ ܡܕܝܢ ܡܠܝ̣ܠܬܐ ܠܘ ܡܕܡ ܡ̣ܢ ܗܕ̈ܡܐ ܓܘܫ̈ܡܢܝܐ ܐܘ ܚܝ̈ܠܐ ܓܘܫ̈ܡܢܝܐ ܐܝܬܝܗ̇. ܐܠܐ ܐܘܣܝܐ ܐܝܬܝܗ̇ ܠܐ ܓܫܝܡܬܐ ܘܩܝܡܬ݀ ܠܝܬܗ̇.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܬܘ ܢܒܪܐ ܐ̱ܢܫܐ ܒܨܠܡܢ ܐܝܟ ܕܡܘ̣ܬܢ. ܐܡ̇ܪ ܐ̱ܢܐ ܕܗ̇ܘ ܕܒܨܠܡ ܐܠܗܐ ܐܬܒܪܝ̣ ܘܒܕܡܘ̣ܬܗ. ܡ̣ܢ ܐܠܨ̈ܬܐ ܕܠܐ ܓܫܝ̣ܡܐ ܢܗܘܐ. ܐܝܟ ܕܐܦ ܗ̣ܘ ܐܠܗܐ ܫܘܒܚܐ ܠܛܝܒܘܬܗ ܕܠܐ ܓܫܘܡ ܗ̣ܘ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܨܗܝܐ ܗ̱ܝ ܠܟ ܢܦܫܝ ܐܠܗܐ ܚܝܐ ܐܡܬܝ ܐܬܐ ܘܐܚܙܐ ܐܦܝ̈ܟ. ܐܡ̇ܪ ܐ̱ܢܐ ܐܠܗܐ ܫܘܒܚܐ ܠܛܝܒܘܬܗ. ܟܕ ܠܐ ܓܘܫܡ ܗ̣ܘ. ܐܦ ܗ̇ܘ ܕܠܗ ܡܟܢ ܠܡܚܙܐ. ܠܐ ܓܫܘܡ ܐܠܨܐ ܕܢܗܘܐ. ܒܗ̇ܝ ܕܐܠܘ ܠܓܘܫ̈ܡܐ ܡܬܚܙܐ ܗ̣ܘܐ. ܓܘܫܡܐ ܗ̣ܘܐ.

 

ܣܗܕܘܬܐ ܕܬܠܬ:

 

ܐܘܢܓܠܝܘܢ. ܪܘܚܐ ܡ̇ܢ ܡܛܝܒܐ. ܦܓܪܐ ܕܝܢ ܟܪܝ̣ܗ. ܐܡܪܝܢܢ ܐܢ ܪܘܚܐ ܐܘܟܝ̣ܬ ܢܦܫܐ ܠܘ ܠܐ ܓܫܘܡ ܐܝܬܝܗ̇ ܐܝܟܢܐ ܢܫܬܚܠܦ ܗ̣ܘܐ ܨܒܝܢܗ̇ ܡ̣ܢ ܨܒܝܢ ܦܓܪܐ ܕܓܘܫܡܐ ܗ̱ܘ.

 

ܣܗܕܘܬܐ ܕܐܪܒܥ:

 

ܦܘܠܘܣ. ܡܛܠ ܕܝ̇ܕܥܝ̣ܢܢ ܗܟܝܠ ܘܡܦܣܝ̣ܢܢ. ܟܡܐ ܕܒܦܓܪܐ ܫܪܝܢܢ. ܥܢܝ̣ܕܝ̣ܢܢ ܡ̣ܢ ܡܪܢ. ܡܛܠ ܗܢܐ ܬܟܝ̣ܠܝ̣ܢܢ ܘܡܣܘܚܝ̣ܢܢ ܕܢܥܢܕ ܡ̣ܢ ܦܓܪܐ ܘܢܗܘܐ ܠܘܬ ܡܪܢ. ܐܡ̇ܪ ܐ̱ܢܐ ܐܠܘ ܢܦܫܐ ܦܓܪܐ ܗܘܬ݀. ܐܝܟܢܐ ܒܦܓܪܐ ܫܪܝܐ ܗܘܬ݀.

 

ܣܗܕܘܬܐ ܕܚܡܫ:

 

ܗ̣ܘ ܟܕ ܗ̣ܘ. ܝ̇ܕܥ ܐ̱ܢܐ ܓܒܪܐ ܒܡܫܝܚܐ. ܐܢ ܒܦܓܪ ܕܝܢ ܘܐܢ ܕܠܐ ܦܓܪ. ܠܐ ܝ̇ܕܥ ܐ̱ܢܐ. ܐܠܗܐ ܗ̱ܘ ܝܕܥ. ܕܐܬܚܛܦ ܥܕܡܐ ܠܫܡܝܐ ܕܬܠܬܐ. ܐܡ̇ܪ ܐ̱ܢܐ ܐܠܘ ܒܪܢܫܐ ܒܟܘܠܝܘܬܗ ܦܓܪܐ ܗ̣ܘܐ. ܐܝܟܢܐ ܡܬܐܡܪܐ ܗܘܬ݀ ܗ̇ܝ. ܕܐܢ ܒܦܓܪ ܘܐܢ ܕܠܐ ܦܓܪ.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ. ܐܬܕܟܪܘ ܠܐܝܠܝܢ ܕܐܠܝ̣ܨܝ̣ܢ. ܐܝܟ ܐ̱ܢܫܐ ܕܒܣܪܐ ܠܒܝ̣ܫܝܢ ܐܢ̱ܬܘܢ. ܐܡ̇ܪ ܐ̱ܢܐ ܐܠܘ ܢܦܫܐ ܒܣܪܢܝܬܐ ܗܘܬ݀. ܐܝܟܢܐ ܠܒܣܪܐ ܠܒܫ ܗ̣ܘܐ. ܐ̱ܚܪܢܐ ܗ̱ܘ ܓܝܪ ܠܒܘܫܐ. ܘܐ̱ܚܪܢܐ ܗ̱ܘ ܠܒܘܫܐ.

 

ܣܗܕܘܬܐ ܕܫܒܥ:

 

ܬܐܘܠܘܓܘܣ ܒܡܐܡܪܐ ܕܡܦܩ ܒܪܘܚܐ. ܠܗܕܐ ܕܝܢ ܠܘܬ ܢܦܫܐ ܗ̱ܘ ܫܩܠܛܥܢܐ. ܗ̇ܝ ܕܡ̣ܢ ܐܠܗܐ ܘܐܠܗܝ̈ܬܐ. ܘܒܫܦܝܪܘܬ ܛܘܗܡܐ ܕܡ̣ܢ ܠܥܠ ܡܫܘܬܦܐ. ܘܠܘܬ ܗ̇ܘ ܡܣܪܗܒܐ. ܘܐܦܢ ܥܡ ܗ̇ܘ ܕܒܨܝ̣ܪ ܐܬܐܣܪܬ݀.

 

ܣܗܕܘܬܐ ܕܬܡܢܐ:

 

ܐܘܓܪܝܣ. ܥܘܬܪܗ̇ ܕܢܦܫܐ ܝ̣ܕܥܬܐ ܗ̱ܝ ܕܪܘܚ. ܡܣܟܢܘܬܗ̇ ܕܝܢ܆ ܠܐ ܝ̣ܕܥܬܐ. ܐܡ̇ܪ ܐ̱ܢܐ ܐܠܘ ܓܘܫܡܐ. ܐܘ ܚܝܠܐ ܓܘܫܡܢܝܐ ܐܝܬܝܗ̇ ܗܘܬ݀ ܢܦܫܐ. ܠܘ ܝ̣ܕܥܬܐ ܗܘܬ݀ ܥܘܬܪܗ̇. ܐܠܐ ܡܣܩܡܘܬ ܡܘܙܓܐ ܘܫܘܦܪܐ ܕܐܣܟܡܐ. ܘܚܙܝܐ ܕܡܬܚܙ̈ܝܢܐ ܪ̈ܓܝܓܐ. ܘܫܡܥܐ ܕܙܡܪ̈ܐ ܡܠܚܡܐ. ܘܣܘܩܐ ܕܪ̈ܝܚܢܐ ܗܢܝ̈ܐܐ. ܘܛܥܡܬܐ ܕܛܥܘ̈ܡܐ ܒܣܝ̈ܡܐ. ܘܓܫܬܐ ܕܡܬܓܫ̈ܫܢܐ ܪ̈ܦܝܐ ܘܫܥܝ̣̈ܥܐ. ܐܘ ܦܢܛܣܝ̈ܐܣ ܕܝܠܗܘܢ. ܘܓܠܝܐ ܕܗܠܝܢ ܥܘܬܪ̈ܐ ܐܢܘܢ ܕܦܓܪܐ ܘܠܘ ܕܢܦܫܐ. ܢܦܫܐ ܡܕܝܢ ܐ̱ܚܪܬܐ ܗ̱ܝ ܡ̣ܢ ܦܓܪܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܡܝܢܝܬܐ

 

ܡܛܠ ܬܪܥܝ̣ܬܐ ܕܗ̇ܢܘܢ ܕܓܘ̈ܫܡܐ ܡܘܕܝܢ ܠܗ̇ ܠܢܦܫܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ ܕܗܠܝܢ. ܣܥܝܐ ܩܕܡܝܐ

 

 

 

ܐܡܪܝܢ ܕܒܪܢܫܐ ܡ̇ܢ ܟܕ ܐܡ̇ܪ ܕܚܙܝܬ ܘܫܡܥ̇ܬ ܘܐܡܪܬ ܘܝܕܥ̇ܬ ܘܐܬܚܫܒ̇ܬ. ܘܪܓ̇ܬ ܘܐܬܚܡ̇ܬܬ ܘܥܠܬ ܠܡܫܟܢܐ ܘܢܦܩ̇ܬ ܡܢܗ. ܐܢܢܩܐܝܬ ܝܕܥ ܕܚ̣ܙܐ ܘܫܡ̣ܥ ܘܫܪܟܐ. ܒܕܓܘܢ ܐܠܨܐ ܕܐܦ ܗ̣ܘ ܠܗ ܐܢܢܩܐܝܬ ܝܕܥ. ܘܐܠܐ ܐܝܟܢܐ ܡܨܐ ܗ̣ܘܐ ܕܢܩܛܪܓ ܗ̇ܘ ܡܐ ܕܠܐ ܝ̇ܕܥ܆ ܗ̇ܝ ܕܚ̣ܙܐ ܘܫܡܥ ܘܫܪܟܐ. ܘܐܠܘ ܒܪܢܫܐ ܡܕܡ ܐ̱ܚܪܝܢ ܣܛܪ ܡ̣ܢ ܦܓܪܐ ܘܡܢܘ̈ܬܗ ܐܝܬܘܗܝ ܗ̣ܘܐ. ܙܕܩ ܗ̣ܘܐ ܕܐܢܢܩܐܝܬ ܝ̇ܕܥ ܗ̣ܘܐ ܠܗ. ܘܟܕ ܠܐ ܡܕܡ ܐ̱ܚܪܝܢ ܐܢܢܩܐܝܬ ܝܕܥ ܒܪܢܫܐ ܗ̣ܘ ܡܢܗ. ܣܛܪ ܡ̣ܢ ܦܓܪܗ. ܠܘ ܡܕܡ ܗ̣ܝ ܐ̱ܚܪܝܢ ܢܦܫܐ ܣܛܪ ܡ̣ܢ ܦܓܪܐ. ܦܓܪܗ ܡܕܝܢ ܚܝܐ ܕܟܠ ܒܪܢܫܐ܆ ܗܘܝܘ ܢܦܫܗ. ܘܠܘ ܡܕܡ ܗ̣ܝ ܐ̱ܚܪܝܢ ܕܠܐ ܓܫܘܡ ܢܦܫܐ. ܒܕܠܘ ܐܢܢܩܐܝܬ ܝܕܥ ܒܪܢܫܐ ܡܕܡ ܕܠܐ ܓܫܘܡ ܗ̣ܘ. ܘܗ̣ܘ ܠܗ ܐܢܢܩܐܝܬ ܝ̇ܕܥ.

 

ܣܥܝܐ ܬܪܝܢܐ:

 

ܐܡܪܝܢ ܕܒܪܢܫܐ ܡ̇ܢ ܐܡ̇ܪ ܕܝܬܒܬ ܘܩܡ̇ܬ. ܘܐܙܠܬ ܠܫܘܩܐ. ܘܥܠܬ ܠܥܕܬܐ. ܘܣܠܩ̇ܬ ܠܐܓܪܐ. ܘܐܬܦܫܛܬ ܘܓܢܝ̇ܬ ܒܣܡܟܐ. ܘܓܠܝܐ ܕܡܛܠ ܢܦܫܗ ܐܡ̇ܪ ܗܠܝܢ ܟܠܗܝܢ ܘܠܘ ܡܛܠ ܡܕܡ ܐ̱ܚܪܝܢ. ܘܐܠܘ ܢܦܫܐ ܠܘ ܓܘܫܡܐ ܗܘܬ݀. ܟܠܗܘܢ ܡܐܡܪ̈ܐ ܗܠܝܢ ܕܓܠܝܢ ܗ̣ܘܘ. ܒܗ̇ܝ ܕܠܓܘܫ̈ܡܐ ܒܠܚܘܕ ܘܠܘ ܠܠܐ ܓܫܘܡ ܠܚܡܝ̣ܢ. ܠܐ ܓܫܘܡ ܓܝܪ ܠܘ ܒܐܬܪܐ ܡܬܬܚܡ. ܟܐܡܬ݀ ܒܫܘܩܐ ܐܘ ܒܥܕܬܐ ܐܘ ܒܐܓܪܐ. ܘܟܕ ܡܐܡܪ̈ܐ ܗܠܝܢ ܐܢܢ̈ܩܝܝ ܫܪܪܐ ܐܝܬܝܗܘܢ. ܢܦܫܐ ܠܘ ܠܐ ܓܫܘܡ ܐܝܬܝܗ̇ ܐܠܐ ܓܘܫܡܐ.

 

ܣܥܝܐ ܬܠܝܬܝܐ:

 

ܐܡܪܝܢ ܐܠܘ ܢܦܫܐ ܠܐ ܓܫܘܡ ܗܘܬ݀. ܘܐܝܟ ܕܠܡܕܒܪܢܘܬܗ ܕܦܓܪܐ ܐܬܐܣܪܬ݀ ܥܡܗ. ܐܝܟ ܐܠܦܪܐ ܒܐܠܦܐ. ܠܘ ܠܐ ܡܨܝܐ ܗܘܬ݀ ܠܗ̇ ܕܬܪܦܐ ܠܦܓܪܐ ܡܕܡ ܐܝܢܐ ܕܙܒܢܐ ܡܕܡ ܕܒܪܬܗ. ܘܠܐܚܪܝܢ ܢܩܦܐ ܗܘܬ݀ ܕܬܕܒܪܝ̣ܘܗܝ. ܒܕܓܘܢ ܐܠܨܐ ܗܘܬ݀ ܠܢ ܠܡܬܦܫܟܘ ܟܕ ܚܙܝܢ ܗܘܝܢ ܝܘܡܢܐ ܠܦܓܪ ܦܛܪܘܣ. ܐܝܛܐ ܠܡܚܪ ܬܘܒ ܚܙܝܢ ܗܘܝܢ ܠܗ. ܕܐܪܐ ܗ̣ܘ ܐܝܬܘܗܝ ܦܛܪܘܣ ܗ̇ܘ ܕܚܙܝܢܝܗܝ ܐܬܡܠܝ. ܐܘ ܠܘ ܗܘܝܘ. ܒܗ̇ܝ ܕܐܠܘ ܐܪܦܝܬܗ ܢܦܫܐ ܗ̇ܝ ܕܡܕܒܪܐ ܗܘܬ݀ ܠܗ ܘܠܐܚܪܝܢ ܢܩܦܬ݀ ܠܘ ܗ̣ܘ ܦ̇ܐܫ ܗ̣ܘܐ. ܘܟܕ ܠܐ ܡܬܘܡ ܦܘܫܟܐ ܕܐܝܟ ܗܢܐ ܢܩܦ ܠܝܕܥܬܢ. ܠܘ ܡܕܡ ܐ̱ܚܪܝܢ ܢܦܫܐ ܕܥܡ ܦܓܪܐ ܐܣܝܪܐ. ܐܠܐ ܦܓܪܐ ܗܘܝܘ ܢܦܫܐ.

 

ܣܥܝܐ ܪܒܝܥܝܐ:

 

ܐܡܪܝܢ ܕܒܪܢܫܐ ܡܬܬܚܡ ܕܐܝܬܘܗܝ ܚܝܘܬܐ ܡܠܝ̣ܠܬܐ ܡܝܘܬܬܐ. ܘܠܚܝܘܬܐ ܡ̇ܢ ܬܪܝܢ ܐܢܘܢ ܚܝ̈ܠܐ ܡܕܪܟܢܐ ܘܡܙܝ̣ܥܢܐ. ܘܓܠܝܐ ܕܗ̣ܢܘܢ ܓܝܕ̈ܐ ܠܘܬ ܗܕܡ̈ܐ ܡܬܝܒܠܝܢ. ܘܡܠܝ̣ܠܘܬܐ ܕܗ̣ܝ ܗ̣ܝ ܡܚܫܒܬܐ ܒܥܘܒܐ ܡܨܥܝܐ ܕܡܘܚܐ ܫܪܝܐ. ܘܟܕ ܣܛܪ ܡ̣ܢ ܗܠܝܢ ܚܝ̈ܠܐ ܘܠܐ ܚܕ ܚܝܠܐ ܐ̱ܚܪܢܐ ܠܢ ܫܟܝܚ. ܘܒܗܘܢ ܡܫܡܠܝܐ ܐ̱ܢܫܘܬܢ. ܘܗ̣ܢܘܢ ܚܝ̈ܠܐ ܟܠܗܘܢ ܒܓܘܫ̈ܡܐ ܩܛܝ̈ܢܐ ܕܐܝܬܝܗܘܢ ܪ̈ܘܚܐ ܡܩܝܡܝ̣ܢ. ܐܝܟ ܨܘܪ̈ܬܐ ܗܘܠܢܝ̈ܬܐ ܕܗ̇ܘ ܕܣܝ̣ܡ ܐܝܬ ܠܗܘܢ ܗܘܠܐ. ܐܝܟܢܐ ܡܬܗܝܡܢܐ ܕܢܦܫܐ ܡܕܡ ܗ̣ܝ ܐ̱ܚܪܝܢ ܕܠܐ ܓܫܘܡ. ܘܡܒܪܝ ܡ̣ܢ ܗܘܠܐ ܣܛܪ ܡ̣ܢ ܗܠܝܢ ܚܝ̈ܠܐ ܗܘܠܢܝ̈ܐ ܕܒܓܘܫ̈ܡܐ ܡܩܝܡܝ̣ܢ. ܘܐܢ ܐܝܬܝܗ̇ ܐܝܟܐ ܐܝܬܝܗ̇. ܘܐܢܗܘ ܕܡܢܢ ܗ̣ܝ ܐܘ ܡܢܬܐ ܡܢܢ ܐܘ ܚܢܢ ܗ̣ܝ ܐܝܬܝܢ. ܐܝܟܢܐ ܠܐ ܝ̇ܕܥܝ̣ܢܢ ܚܢܢ ܠܢ ܐܘ ܠܡܢܬܢ ܐܘ ܠܗ̇ܘ ܕܡܢܢ. ܘܡ̣ܢ ܗܠܝܢ ܗܘܠܢܝ̈ܐ ܕܒܓܘ̈ܫܡܐ ܫܪܝܢ ܘܡܩܝܡܝ̣ܢ ܘܡܙܝ̣ܓܝ̣ܢ.

 

ܣܥܝܐ ܚܡܝܫܝܐ:

 

ܐܡܪܝܢ ܕܒܪܢܫܐ ܡ̇ܢ. ܘܐܦܢ ܠܣܘܥܪ̈ܢܐ ܣܓܝ̈ܐܐ ܠܘ ܚܬܝ̣ܬܐܝܬ ܝ̇ܕܥ. ܐܠܐ ܗ̣ܘ ܠܗ ܝܬܝܪ ܚܬܝ̣ܬܐܝܬ ܘܕܠܐ ܦܘܠܓ ܘܦܘܫܟ ܘܦܘܪܬܟ ܝܕܥ. ܘܐܠܘ ܗܠܝܢ ܬܪܝܢ ܚܝ̈ܠܐ܆ ܡ̣ܢ ܡܘܚܐ ܒܝܕ ܘܐܠܘ ܢܦܫܗ ܐܘܣܝܐ ܠܐ ܓܫܝ̣ܡܬܐ ܘܡܒܪܝܬܐ ܐܝܬܝܗ̇ ܗܘܬ݀܆ ܠܘ ܒܐܬܪܐ ܗܘܬ݀. ܐܦܠܐ ܠܘ ܡ̣ܢ ܥܠܡܐ. ܐܦܠܐ ܠܒܪ ܡܢܗ. ܐܦܠܐ ܕܩܪܝ̣ܒ ܠܥܠܡܐ. ܐܦܠܐ ܕܪܚܝ̣ܩ ܡܢܗ. ܐܠܨܐ ܗܘܬ݀ ܕܟܠ ܒܪܢܫܐ ܗ̣ܘ ܠܗ ܗܟܢܐ ܝ̇ܕܥ ܗܘܐ. ܟܐܡܬ݀ ܕܠܘ ܒܐܬܪܐ ܗ̱ܘ. ܘܠܐ ܠܓܘ ܡ̣ܢ ܥܠܡܐ ܘܠܐ ܠܒܪ ܡܢܗ. ܘܟܕ ܘܠܐ ܐ̱ܢܫ ܗ̣ܝ ܗܕܐ ܥܠ ܢܦܫܗ ܡܣܒܪ. ܘܐܢ ܡܣܒܪ ܥܡ ܫܢܝ̈ܐ ܡܬܡܢܐ. ܠܘ ܠܐ ܓܫܝܡܬܐ ܗ̱ܝ ܢܦܫ ܟܠ ܒܪܢܫ.

 

ܣܥܝܐ ܫܬܝܬܝܐ:

 

ܐܡܪܝܢ ܕܦܓܪܐ ܡܕܪܟ ܠܡܢܬܝ̈ܐ ܘܠܟܠܢܝ̈ܐ. ܘܡܛܠܗܕܐ ܐܠܨܐ ܕܗ̣ܘ ܢܗܘܐ ܒܪܢܫܐ ܘܗ̣ܘ ܢܗܘܐ ܢܦܫܐ ܕܢܩܝ̣ܦܐ ܗܘܬ݀ ܠܦܓܪܐ ܘܐܣܝ̣ܪܐ ܥܡܗ ܐܝܟ ܕܐܡܪܝܬܘܢ. ܐܝܩܝ ܗܘܬ݀ ܫܟܝ̣ܚܘܬܗ ܘܡ̣ܢ ܝܬܝ̣ܪܘ ܒܠܥܕ ܣܢܝ̣ܩܘܬܐ ܕܥܠܝܗ̇ ܘܕܠܡܢܬܝ̈ܐ ܡ̇ܢ ܡܕܪܟ ܦܓܪܐ ܒܪ̈ܓܫܘܗܝ ܠܐ ܐ̱ܢܫ ܟܦܪ. ܘܕܟܠ ܕܠܡܢܬܝܐ ܗ̱ܘ. ܡ̣ܢ ܐܢܢܩܝ ܕܐܦ ܠܒܪܢܫܐ ܕܓܘܢܝܐ ܗ̱ܘ ܢܕܪܟ. ܒܗ̇ܝ ܕܐܠܘܠܐ ܠܒܪܢܫܐ ܐܕܪܟ. ܐܦܠܐ ܠܗܢܐ ܒܪܢܫܐ ܡܨܐ ܗ̣ܘܐ ܠܡܕܪܟܘ. ܪܓܫܐ ܡܕܝܢ ܕܚܝܠܐ ܗ̱ܘ ܐܟܡܐ ܕܠܡܢܬܝ̈ܐ ܡܕܪܟ ܒܗ̇ ܒܕܡܘ̣ܬܐ ܘܠܟܠܢܝ̈ܐ ܡܕܪܟ. ܘܡ̣ܢ ܗܠܝܢ ܝ̣ܕܝ̣ܥܐ ܕܒܪܢܫܐ ܠܘ ܡܕܡ ܗ̣ܘ ܐ̱ܚܪܝܢ ܣܛܪ ܡ̣ܢ ܦܓܪܐ ܘܡܢܘ̈ܬܗ ܘܚܝ̈ܠܘܗܝ.

 

ܣܥܝܐ ܫܒܝܥܝܐ:

 

ܐܡܪܝܢ ܐܠܘ ܢܦܫܐ ܠܐ ܓܫܝ̣ܡܐ ܗܘܬ݀ ܐܦܠܐ ܓܕܫܐ. ܙܕܩ ܗ̣ܘܐ ܕܒܠܥܕ ܗ̇ܝ ܕܬܓܫܘܦ ܒܦܓܪܐ܆ ܬܥܒܕ ܒܗ ܘܬܙܝ̣ܥܝ̣ܘܗܝ. ܘܐܠܘ ܗܕܐ ܡܨܝܐ ܗܘܬ݀ ܠܗ̇. ܙܕܩ ܗ̣ܘܐ ܕܐܟܡܐ ܕܠܦܓܪܗ̇ ܒܠܥܕ ܓܫܦܐ ܡܙܝ̣ܥܐ ܕܐܦ ܠܫܪܟܐ ܕܦܓܪ̈ܐ ܒܠܥܕ ܓܫܦܐ ܡܙܝܥܐ ܗܘܬ݀ ܘܡܥܒܕܐ ܒܗܘܢ. ܒܗ̇ܝ ܕܟܠܗܘܢ ܦܓܪ̈ܐ ܫܘܝܢ ܐܢܘܢ ܒܩܘܒܠܐ ܕܥܗܢܘܬܐ ܡܬܬܙܝ̣ܥܢܘܬܐ ܘܡܬܬܥܒܕܢܘܬܐ. ܘܗܐ ܠܘ ܗܟܢܐ. ܢܦܫܐ ܡܕܝܢ ܟܕ ܒܠܥܕ ܓܫܦܐ ܠܐ ܡܨܝܐ ܕܬܣܥܘܪ ܣܥܘܪ̈ܘܬܗ̇. ܠܘ ܕܠܐ ܓܫܘܡ ܗ̣ܝ. ܐܘ ܚܝܠܐ ܓܘܫܡܢܝܐ. ܐܠܐ ܓܘܫܡܐ ܗ̱ܝ ܐܘ ܓܘܫܡܢܝܬܐ. ܒܗ̇ܝ ܕܓܘܫ̈ܡܐ ܒܠܚܘܕ ܘܓܕ̈ܫܐ ܕܒܗܘܢ ܡܟܢܝ̣ܢ ܠܡܓܫܦ ܒܓܘܫ̈ܡܐ ܘܠܘ ܠܐ ܓܫܝ̈ܡܐ.

 

ܣܥܝܐ ܬܡܝܢܝܐ:

 

ܐܡܪܝܢ ܕܟܠܗܘܢ ܚܟܝ̈ܡܐ ܫܠܡܘ. ܕܒܪܢܫܐ ܚܝܘܬܐ ܗ̱ܘ ܡܠܝ̣ܠܬܐ. ܘܟܠ ܕܚܝܘܬܐ ܗ̱ܘ ܓܘܫܡܐ ܗ̱ܘ. ܡܛܠ ܕܓܘܫܡܐ ܡܢܦܫܐ ܓܢܣܐ ܗ̱ܘ ܕܚܝܘܬܐ. ܘܚܝܘܬܐ ܐܕܫܗ ܗ̣ܝ. ܘܟܕ ܒܪܢܫܐ ܓܘܫܡܐ ܗ̱ܘ. ܠܘ ܒܪܢܫܐ ܗ̱ܘ. ܢܦܫܐ ܡܕܝܢ ܐܢ ܒܪܢܫܐ ܗ̱ܝ. ܐܘ ܡܢܬܐ ܡ̣ܢ ܒܪܢܫܐ܆ ܓܘܫܡܐ ܗ̱ܝ ܘܠܘ ܠܐ ܓܫܘܡ.

 

 

 

ܢܝܫܐ ܬܪܝܢܐ ܡܛܠ ܫܪܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܠܐ ܫܪܝܪܐ ܦܪܘܛܣܝܣ ܗ̇ܝ ܕܐܡ̣ܪܬܘܢ. ܕܠܐ ܡܕܡ ܐ̱ܚܪܝܢ ܐܢܢܩܐܝܬ ܝܕܥ ܒܪܢܫܐ ܗ̣ܘ ܡܢܗ ܣܛܪ ܡ̣ܢ ܦܓܪܗ. ܒܗ̇ܝ ܕܒܪܢܫܐ ܐܢܢܩܐܝܬ ܝܕܥ ܕܗ̣ܘ ܗܢܐ ܦܓܪܐ ܠܘ ܗ̣ܘ ܡܢܗ ܡܬܬܙܝ̣ܥ ܒܠܥܕ ܡܙܝ̣ܥܢܐ ܐ̱ܚܪܢܐ. ܘܐܠܐ ܙܕܩ ܗ̣ܘܐ ܕܐܦ ܡ̣ܢ ܒܬܪ ܡܘܬܐ ܢܬܬܙܝ̣ܥ ܗ̣ܘܐ ܘܗܐ ܠܘ ܗܟܢܐ. ܘܠܗ ܠܗ̇ܘ ܡܙܝ̣ܥܢܐ ܒܠܐ ܡܠܝ̣̈ܠܐ ܡ̇ܢ ܢܦܫܐ ܓܘܫܡܢܝܬܐ ܕܒܒܘܛܠܗ ܕܦܓܪܐ ܒܛܠܐ ܐܡܪܝܢܢ. ܘܒܡܠܝ̣̈ܠܐ ܕܝܢ ܢܦܫܐ ܠܐ ܓܫܝܡܬܐ ܕܠܐ ܒܛܠܐ ܒܒܘܛܠܗ ܕܦܓܪܐ ܡܘܕܝܢܢ ܠܗ̇.. ܟܕ ܡܫܬܪܪܝ̣ܢܢ ܒܝܕ ܡܚܘܝܢ̈ܘܬܐ ܗ̇ܢܝܢ ܕܡ̣ܢ ܟܕܘ ܐܝܬܝ̣ܢܢ. ܘܐ̱ܚܪ̈ܢܝܬܐ ܕܥܬܝ̣ܕܝ̣ܢܢ ܠܡܝܬܝܘ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܢܦܫܐ ܠܐ ܓܫܝܡܬܐ ܡܛܠ ܚܕܝܘܬܗ̇ ܕܥܡ ܓܘܫܡܐ. ܩܘܛܪ̈ܓܐ ܗܠܝܢ ܓܘܫ̈ܡܢܝܐ܆ ܗ̣ܝ ܥܠܝܗ̇ ܡܩܛܪܓܐ. ܘܐܦܢ ܠܐ ܠܚܡܝ̣ܢ ܠܟܝܢܗ̇. ܐܠܐ ܡܛܠ ܚܕܝܘܬܐ. ܐܝܟ ܕܒܓܕ̈ܫܐ ܠܚ̈ܡܝܐ ܠܗ̇ ܗܘܝܢ. ܒܕܓܘܢ ܟܕ ܐܡܪ ܒܪܢܫܐ ܕܝܬܒܬ ܘܩܡ̇ܬ. ܗ̣ܝ ܢܦܫܗ ܗ̣ܝ ܡܠܝܠܬܐ ܕܐܡܪܐ. ܕܦܓܪܝ ܠܡ ܝ̣ܬܒ ܘܩܡ. ܘܐܙܠ ܠܫܘܩܐ ܘܥܠ ܠܥܕܬܐ. ܘܫܪܟܐ. ܘܝ̣ܕܝ̣ܥܐ ܗܕܐ ܕܫܪܝܪܐ. ܡ̣ܢ ܗ̇ܝ ܕܒܚܝܘܬܐ ܡ̇ܢ ܠܐ ܡܠܝ̣ܠܬܐ. ܗ̇ܘ ܕܝ̣ܬܒ ܘܩܡ ܘܐܙܠ. ܘܥܠ ܒܠܚܘܕܐܝܬ. ܘܠܐ ܐܝܬ ܒܗ̇ ܕܐܡ̇ܪ ܕܝܬܒܬ ܘܩܡ̇ܬ ܘܐܙܠ̱ܬ ܘܥܠܬ. ܒܒܪܢܫܐ ܕܝܢ ܬܪ̈ܝܗܘܢ ܐܝܬ. ܘܐܠܘ ܢܦܫܐ ܠܐ ܓܫܝܡܬܐ ܠܐ ܐܝܬܝܗ̇ ܗܘܬ݀. ܙܕܩ ܗ̣ܘܐ ܕܫܘܝܢ ܗ̣ܘܘ ܡܠܝ̈ܠܐ ܘܠܐ ܡܠܝ̈ܠܐ܇ ܗ̇ܝ ܕܫܟܝܪܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܠܟܠ ܢܦܫܐ ܒܝܬܝܘܬܐ ܕܝ̣ܠܢܝܬܐ ܐܝܬ ܠܗ̇ ܠܘܬ ܦܓܪܗ̇ ܕܝܠܢܝܐ. ܒܥܠܬ݀ ܫܘܝܘܬ ܫܘܝ̣ܚܘܬܐ ܘܐܟܚܕܢܝܘܬ ܒܪܝܬܗܘܢ ܕܥܡ ܗܕܐ. ܘܒܥܠܬ݀ ܗ̇ܝ ܕܒܪܝ̣ܬܗ ܕܥܡ ܗܕܐ. ܘܒܥܠܬ݀ ܗ̇ܝ ܕܒܪܝ̣ܬܗ ܕܦܓܪܐ ܥܠܬܐ ܗ̱ܝ ܕܒܪܝ̣ܬܗ̇ ܕܢܦܫܐ. ܥܠܬܐ ܕܝܢ ܐܡ̇ܪ ܐ̱ܢܐ ܠܘ ܗ̇ܝ ܥܒܘܕܬܐ. ܐܠܐ ܥܠܬܐ ܡܩܒܠܢܝ̣ܬܐ. ܒܗ̇ܝ ܕܟܡܐ ܕܦܓܪܐ ܠܐ ܡܬܒܪܐ. ܐܦܠܐ ܢܦܫܐ ܡܬܒܪܝܐ. ܒܕܓܘܢ ܠܗ ܠܦܓܪܗ̇ ܕܝܠܢܝܐ ܟܠ ܢܦܫܐ ܝܐܝ̣ܒܐ ܠܡܩܦ ܘܠܡܕܒܪܘܬܗ ܟܝܢܐܝܬ. ܘܠܐ ܡܬܡܨܝܢܐ ܗ̱ܘ ܠܗ̇ ܦܘܪܫܢܐ ܕܡܢܗ ܟܡܐ ܕܥܗܢ ܠܩܘܒܠܗ̇ ܘܫܢܓܬܐ ܐܘܣܝܝܬܐ ܠܘܬ ܐܣܪܐ ܕܥܡܗ ܩܢܝܐ. ܘܡ̣ܢ ܗܪܟܐ ܝ̣ܕܝ̣ܥܐ ܕܦܪܘܛܣܛܠܝܣ ܗ̇ܝ ܕܐܡܪܐ ܕܡܬܡܨܝܢܝ̣ܬܐ ܗܘܬ݀ ܠܢܦܫܐ ܕܠܦܓܪܗ̇ ܕܝ̣ܠܢܝܐ ܬܪܦܐ ܘܠܐܚܪܝܢ ܬܩܦ. ܦܪܘܛܣܛܠܝܣ ܗ̣ܝ ܣܘܦܝܣܛܝܩܝܬܐ ܘܠܐ ܫܪܝܪܬܐ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܚܝܠܐ ܗ̇ܘ ܕܫܪܐ ܒܥܘܒܐ ܡܨܥܝܐ ܕܡܘܚܐ ܠܘ ܚܝܠܐ ܡܠܝ̣ܠܐ ܘܚܫܘܒܬܢܐ ܐܝܬܘܗܝ. ܐܠܐ ܚܝܠܐ ܡܬܗܓܓܢܐ ܗ̇ܘ ܕܐܦ ܘܗܡ ܡܬܩܪܐ. ܘܠܚܝ̈ܘܬܐ ܠܐ ܡܠܝ̣̈ܠܬܐ ܬܘܒ ܫܟܝ̣ܚ. ܘܗܘܝܘ ܚܝܠܐ ܗ̇ܘ ܕܒܗ ܝ̇ܕܥ ܥܪܒܐ ܕܕܐܒܐ ܒܥܠܕܒܒܐ ܗ̱ܘ. ܘܒܪܢܫܐ ܗ̇ܘ ܕܡܬܪܣܐ ܠܗ ܪܚܡܐ. ܚܝܠܐ ܡܕܝܢ ܡܠܝ̣ܠܐ ܘܚܫܘܒܬܢܝܐ ܠܘ ܒܦܓܪܐ ܘܗܕ̈ܡܐ ܡܩܝܡ. ܐܠܐ ܒܢܦܫܐ ܡܠܝ̣ܠܬܐ ܘܠܐ ܓܫܝܡܬܐ ܕܡܢܗ̇ ܘܠܗ̇ ܡܩܝܡܐ.

 

ܫܪܝܐ ܕܣܥܝܐ ܚܡܝܫܝܐ:

 

ܐܡܪܝܢܢ ܐܠܘ ܒܪܢܫܐ ܟܝܢܐ ܡܕܡ ܦܫܝ̣ܛܐ ܕܠܐ ܓܫܘܡ ܒܟܠܝܘܬܗ ܐܝܬܘܗܝ ܗ̣ܘܐ. ܙܕܩ ܗ̣ܘܐ ܠܗ ܕܗ̣ܘ ܠܗ ܐܟܡܐ ܕܐܡ̣ܪܬܘܢ ܝ̇ܕܥ ܗ̣ܘܐ. ܘܟܕ ܠܘ ܗܟܢܐ. ܐܠܐ ܟܝܢܐ ܗ̱ܘ ܡܪܟܒܐ ܕܡ̣ܢ ܬܪܝܢ ܟܝܢܝ̣̈ܢ ܓܘܫܡܐ ܘܠܐ ܓܫܘܡ. ܠܐ ܐܠܨܐ ܠܗ ܝ̣ܕܥܬܐ ܗ̇ܝ ܕܐܡ̣ܪܬܘܢ.

 

ܫܪܝܐ ܕܣܥܝܐ ܫܬܝܬܝܐ:

 

ܐܡܪܝܢܢ ܕܠܐ ܫܪܝܪܐ ܗ̇ܝ ܕܐܡ̣ܪܬܘܢ. ܕܐܠܘܠܐ ܠܒܪܢܫܐ ܓܘܢܝܐ ܐܕܪܟ ܪܓܫܐ. ܐܦܠܐ ܠܗܢܐ ܒܪܢܫܐ ܡܨܐ ܗ̣ܘܐ ܠܡܕܪܟܘ. ܘܝ̣ܕܝ̣ܥܐ ܗܕܐ ܡ̣ܢ ܬܪܬܝܢ. ܚܕܐ ܡ̇ܢ ܕܪܓܫܐ ܡ̇ܢ ܒܥܠܬ݀ ܙܢܝ̈ܐ ܡܬܪ̈ܓܫܢܐ ܕܫܟܝ̣ܚܝ̣ܢ ܠܗܢܐ ܒܪܢܫܐ ܡܬܡܨܐ ܠܡܕܪܟܘܬܗ ܕܐܝܬܝܗܘܢ ܓܘ̈ܢܐ ܘܐܣܟܡ̈ܐ ܘܪ̈ܒܘܬܐ ܘܫܪܟܐ. ܘܠܒܪܢܫܐ ܡ̇ܢ ܓܘܢܝܐ. ܟܕ ܘܠܐ ܡܕܡ ܕܐܝܟ ܗܟܢ ܫܟܝ̣ܚ. ܐܝܟܢܐ ܡܨܐ ܗ̣ܘ ܠܡܕܪܟܘܬܗ. ܕܬܪܬܝܢ ܕܝܢ ܐܠܘ ܟܕ ܠܗܢܐ ܒܪܢܫܐ ܡܕܪܟ ܗ̣ܘܐ ܪܓܫܐ. ܐܦ ܠܒܪܢܫܐ ܓܘܢܝܐ ܡܕܪܟ ܗ̣ܘܐ. ܐܠܨܐ ܗ̣ܘܬ ܕܟܠ ܐܡܬܝ ܕܠܣܘܩܪܐܛܝܣ ܢܕܪܟ ܗ̣ܘܐ ܕܐܦ ܠܕܝܡܘܩܪܐܛܝܣ ܘܐܝܦܦܘܩܪܐܛܝܣ ܘܦܠܐܛܘܢ ܘܫܪܟܐ ܕܗ̇ܢܘܢ ܕܒܒܪܢܫܐ ܓܘܢܝܐ ܡܬܚܒܫܝ̣ܢ ܢܕܪܟ ܗ̣ܘܐ. ܘܗܐ ܠܘ ܗܟܢܐ. ܪܓܫܐ ܡܕܝܢ ܠܗܢܐ ܒܪܢܫܐ ܒܠܚܘܕ ܡܕܪܟ. ܗܘܢܐ ܕܝܢ ܕܚܝܠܐ ܗܘ ܕܢܦܫܐ ܠܐ ܓܫܝ̣ܡܬܐ ܠܒܪܢܫܐ ܓܘܢܝܐ. ܟܐܡܬ݀ ܠܟܠܗܘܢ ܒܢܝ̈ܢܫܐ ܒܚܕܐ ܫܘܝܘܬܐ ܡܕܪܟ. ܟܕ ܡܪܝ̣ܡ ܡܢܗܘܢ ܠܙܢܝ̈ܐ ܟܠܗܘܢ ܡܬܪ̈ܓܫܢܐ ܕܡܢܬܝܝ̈ܢ.

 

ܫܪܝܐ ܕܫܥܝܐ ܫܒܝܥܝܐ:

 

ܐܡܪܝܢܢ ܕܠܘ ܚܕ ܦܘܡܐ ܫܘܝܐ ܩܢܝܢ ܦܓܪ̈ܐ ܟܠܗܘܢ ܠܘܬ ܟܠ ܚܕܐ ܡ̣ܢ ܢܦ̈ܫܬܐ. ܒܥܠܬ݀ ܗ̇ܝ ܕܩܕܡܢܢ ܚܘܝ̣ܢܢ. ܠܒܝܬܝܘܬܐ ܕܝ̣ܠܢܝܬܐ ܕܩܢܝܐ ܟܠ ܢܦܫܐ ܠܘܬ ܦܓܪܗ̇. ܕܝ̣ܠܢܝܐ ܗ̇ܘ ܕܠܗ ܘܥܡܗ ܘܡܛܠܬܗ ܐܬܒܪܝܬ݀. ܘܡܛܠܗܕܐ ܠܐ ܐܠܨܐ ܕܐܟܡܐ ܕܠܦܓܪܗ̇ ܒܝܬܝܐ ܒܠܥܕ ܓܫܦܐ ܡܙܝ̣ܥܐ. ܕܐܦ ܠܦܓܪ̈ܐ ܐ̱ܚܪ̈ܢܐ ܢܘܟܪ̈ܝܐ. ܒܠܥܕ ܓܫܦܐ ܬܙܝ̣ܥ. ܘܐ̱ܢܫܝ̈ܢ ܡ̇ܢ ܐܡ̣ܪܘ. ܕܠܦܓܪܗ̇ ܡ̇ܢ ܒܠܥܕ ܓܫܦܐ ܡܙܝ̣ܥܐ. ܘܠܦܓܪ̈ܐ ܐ̱ܚܪ̈ܢܐ܆ ܟܕ ܦܓܪܗ̇ ܒܗܘܢ ܓܫܦ ܡܙܝ̣ܥܐ ܠܗܘܢ. ܚܢܢ ܕܝܢ ܐܡܪܝܢܢ. ܕܙܒܢܝ̈ܢ ܣܓܝ̈ܐܢ ܟܕ ܥܫܢܐ ܘܬܩܦܐ ܗ̣ܝ ܢܦܫܐ. ܐܦ ܠܦܓܪ̈ܐ ܐ̱ܚܪ̈ܢܐ ܘܢܘܟܪ̈ܝܐ ܘܓܘ̈ܫܡܐ ܒܠܥܕ ܓܫܦܐ ܡܬܡܨܝܐ ܕܬܙܝ̣ܥ. ܐܝܟ ܓܡܝܪ̈ܐ ܡܐܚ̈ܝܝ ܡܝ̈ܬܐ ܘܡܦ̈ܩܝ ܕܝ̈ܘܐ. ܘܡܚ̈ܬܝ ܡܛܪܐ ܘܫܪܟܐ ܕܬܡܝ̣̈ܗܬܐ.

 

ܫܪܝܐ ܕܣܥܝܐ ܬܡܝܢܝܐ:

 

ܐܡܪܝܢܢ ܕܩܕܡܢܢ ܐܡ̣ܪܢܢ ܕܒܪܢܫܐ ܡ̣ܢ ܬܪܝܢ ܟܝܢܝ̈ܢ ܡܪܟܒ ܡܬܚܙܝܢܐ ܘܠܐ ܡܬܚܙܝܢܐ. ܡܛܠܗܕܐ ܓܘܫܡܐ ܘܠܐ ܓܫܘܡ. ܒܙܢܐ ܐ̱ܚܪܢܐ ܘܐ̱ܚܪܢܐ ܐܟܚܕܐ ܥܠܘܗܝ ܡܬܩܛܪܓܝܢ ܫܪܝܪܐܝܬ. ܘܬܘܒ ܐܡܪܝܢܢ. ܕܚܝܘܬܐ ܡ̇ܢ ܡܬܩܛܪܓܐ ܥܠܘܗܝ܆ ܒܗ̇ܝ ܕܦܓܪܐ ܩܢܐ ܓܘܫܡܢܝܐ ܐܝܟ ܫܪܟܐ ܕܚܝ̈ܘܬܐ. ܡܠܝ̣ܠܐ ܕܝܢ܆ ܒܗ̇ܝ ܕܢܦܫܐ ܩܢܐ ܠܐ ܓܫܝ̣ܡܬܐ. ܐܝܟ ܫܪܟܐ ܕܟܝ̈ܢܐ ܠܐ ܓܫܝ̈ܡܐ ܠܡܐܡܪ ܘܫܪܟܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܡܝܢܝܬܐ

 

ܡܛܠ ܣܬܘܪܝܐ ܕܬܪܥܝ̣ܬܐ ܐܝ̇ܕܐ ܕܐܪܡܘܢܝܐ ܐܘܟܝ̣ܬ ܡܠܚܡܘܬܐ ܕܡܘܙܓܗܘܢ ܕܐܣܛܘ̈ܟܣܐ ܐܡܪܐ ܕܐܝܬܝܗ̇ ܢܦܫܐ ܐ̱ܢܫܝܬܐ. ܘܒܗ ܐܝܬ ܢܝܫܐ ܚܕ: ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ. ܕܦܓܪܐ ܡ̣ܢ ܟܢܝ̣ܫܘܬܐ ܕܐܪܒܥܐ ܐܣܛܘ̈ܟܣܐ ܡܪܟܒ. ܘܡܛܠ ܕܚܝ̈ܠܐ ܩܢܝܢ ܣܩܘܒ̈ܠܝܐ. ܡ̣ܢ ܐܢܢܩܝ ܕܚܝܠܐ ܡܕܡ ܐ̱ܚܪܢܐ ܣܛܪ ܡܢܗܘܢ ܢܗܘܐ. ܕܠܗ ܐܟܚܕܐ ܩܛܝ̣ܪܐܝܬ ܡܟܢܫ ܘܒܚ̈ܕܕܐ ܡܥܪܙܠ. ܘܩܛܝ̣ܪܐܝܬ ܡ̇ܢ ܐܡ̣ܪܢܢ. ܒܗ̇ܝ ܕܟܝܢܐܝܬ ܥܪ̈ܘܩܐ ܐܢܘܢ ܡ̣ܢ ܚܕ̈ܕܐ ܘܥܛܘ̈ܝܐ ܕܚܕ̈ܕܐ. ܘܠܘ ܒܝܬܝ̈ܐ ܘܡܩܝ̈ܡܢܐ ܕܚܕ̈ܕܐ. ܚܡܝܡܘܬܐ ܐܡ̇ܪ ܐ̱ܢܐ ܘܩܪܝܪܘܬܐ. ܘܪܛܝ̣ܒܘܬܐ ܘܝܒܝ̣ܫܘܬܐ. ܘܡܟܢܫܢܗܘܢ ܡ̇ܢ ܠܘ ܗ̣ܘ ܡܘܙܓܐ ܐܝܬܘܗܝ. ܒܗ̇ܝ ܕܡܘܙܓܐ ܒܬܪ ܟܢܘܫܝ̣ܗܘܢ ܗܘܐ. ܘܥܠܬܐ ܩܕܡܝܬܐ ܙܕܩ ܕܬܗܘܐ ܘܠܘ ܐ̱ܚܪܝܬܐ. ܫܪܝ̣ܟܐ ܡܕܝܢ ܕܚܝܠܐ ܗ̇ܘ ܐ̱ܚܪܢܐ ܥܠܬ݀ ܟܢܘܫܝ̣ܗܘܢ. ܕܠܗ ܩܪܝܢܢ ܢܦܫܐ. ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܕܢܘܣܐ. ܕܟܝ̈ܢܐ ܣܩܘܒ̈ܠܝܐ ܣܢܝ̣ܩܝܢ ܥܠ ܗ̇ܘ ܕܨܡܕ ܘܡܟܢܫ. ܘܬܘܒ ܐܡ̣ܪ. ܕܡ̣ܢ ܐܝܡܟܐ ܐܨܛܡܕ ܓܘܫܡܐ. ܟܕ ܒܟܝܢܐ ܡܟܢ ܠܡܬܒܕܪܘ. ܐܠܐ ܡ̣ܢ ܢܦܫܐ.

 

ܗܦܟܬܐ:

 

ܐܡܪܝܢ ܕܡܛܠܡܢܐ ܠܐ ܡܨܝܐ ܕܢܐܡܪ ܕܐܠܗܐ ܫܘܒܚܐ ܠܛܝܒܘܬܗ ܗܘܝܘ ܥܠܬ݀ ܟܢܘܫܝ̣ܗܘܢ ܕܣܩܘܒ̈ܠܝܐ ܗܠܝܢ. ܘܠܘ ܢܦܫܐ. ܘܕܠܐ ܡܨܝܐ ܕܬܗܘܐ ܢܦܫܐ ܥܠܬ݀ ܟܢܘܫܝ̣ܗܘܢ܆ ܝ̣ܕܝ̣ܥܐ ܡ̣ܢ ܗ̇ܝ ܕܢܦܫܐ ܥܠܬܢܝܬܐ ܗ̱ܝ ܕܡܘܙܓܐ. ܗ̇ܝ ܕܥܠܬܢܐ ܗ̱ܘ ܕܟܢܘܫܝ̣ܗܘܢ ܕܐܣܛܘ̈ܟܣܐ ܐܝܟ ܪܥܝܢܟܘܢ. ܘܐܠܘ ܥܠܬܐ ܗܘܬ݀ ܕܟܢܘܫܝ̣ܗܘܢ. ܩܕܡܝܬܐ ܗܘܬ݀ ܒܗܘܝܗ̇ ܘܠܘ ܐ̱ܚܪܬܐ ܒܬܪܝܢ ܕܪ̈ܓܐ.

 

ܦܘܢܝܐ:

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܠܘ ܥܠܬܐ ܗ̱ܘ ܕܥܠܬܢܐ ܒܠܚܘܕ. ܐܠܐ ܕܥ̈ܠܬܐ ܘܥ̈ܠܬܢܐ ܐܟܚܕܐ. ܒܕܓܘܢ ܗ̣ܘ ܣܓܝ̣ܕܐ ܥܠܬܐ ܗ̱ܘ ܕܗܘܝܗ̇ ܕܢܦܫܐ ܕܥܠܬܐ ܗ̱ܝ ܕܟܢܘܫܝ̣ܗܘܢ ܕܚܝ̈ܠܐ ܣܩܘܒ̈ܠܝܐ ܕܐܣܛܘ̈ܟܣܐ. ܘܠܘܩܒܠ ܗ̇ܝ ܕܐܡ̣ܪܘ ܕܢܦܫܐ ܐ̱ܚܪܝܐ ܒܗܘܝܗ̇ ܡ̣ܢ ܟܢܘܫܝ̣ܗܘܢ ܕܐܣܛܘ̈ܟܣܐ ܒܬܪܝܢ ܕܪ̈ܓܐ ܐܡܪܝܢܢ ܕܠܘ ܚܕ ܩܢܘܡܐ ܐܝܬܝܗ̇ ܢܦܫܐ ܐܠܐ ܩܢܘ̈ܡܐ ܣܓܝ̈ܐܐ. ܒܕܓܘܢ ܢܦܫ ܝܠܘܕܐ ܐܝܬܝܗ̇ ܥܠܬ݀ ܟܢܘܫܝ̣ܗܘܢ ܕܐܣܛܘ̈ܟܣܐ ܒܦܓܪ ܝܬܗ̇. ܘܗܟܢܐ ܒܐܝܕܐ ܒܐܝܕܐ ܥܕܡܐ ܕܡܬܥܠܝܐ ܗ̣ܝ ܥܠܬܘܬܐ ܗܕܐ ܕܟܢܘܫܝ̣ܗܘܢ ܕܐܣܛܘ̈ܟܣܐ ܣܩܘܒ̈ܠܝܐ ܘܡܬܡܙܓܢܘܬܗܘܢ ܕܥܡ ܚܕ̈ܕܐ. ܠܘܬ ܐܠܗܐ ܫܘܒܚܐ ܠܛܝܒܘܬܗ. ܗ̇ܘ ܕܓܒܠ ܠܒܪܢܫܐ ܩܕܡܝܐ ܘܢܦܚ ܒܐܦܘ̈ܗܝ ܢܫܡܬܐ ܕܚܝ̈ܐ ܐܝܟ ܕܐܡ̣ܪ ܟܬܒܐ ܩܕܝܫܐ. ܘܣܗܕ ܗ̇ܘ ܥܬܝܪ ܒܐܠܗܝ̈ܬܐ ܓܪܝܓܘܪܝܘܣ ܟܕ ܐܡ̇ܪ. ܡ̣ܢ ܗܘܠܐ ܡ̇ܢ܆ ܦܓܪܐ ܢܣܒ. ܡܢܗ ܕܝܢ ܚܝ̈ܐ ܣܡ. ܗ̇ܢܘܢ ܕܢܦܫܐ ܝܕܘܥܬܢܝܬܐ. ܘܝܘܩܢܐ ܕܐܠܗܐ ܝ̇ܕܥܐ ܡܠܬܐ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܓܫܘܫܐ ܡ̣ܢ ܐܢܢܩܝ̣ ܕܬܚܫ ܘܬܫܬܚܠܦ ܐܝܢܝܘܬܗ܆ ܡ̣ܢ ܐܝ̇ܢܝܘܬ ܡܬܓܫܫܢܐ. ܒܕܓܘܢ ܐܘ ܗ̣ܝ ܗ̇ܝ ܐܝܢܝܘܬܗ ܩܕܡܝܬܐ ܕܓܫܘܫܐ ܐܝܬܝܗ̇ ܡܕܪܟܢܝ̣ܬܗ ܕܐܝܢܝܘܬ ܡܬܓܫܫܢܐ. ܐܘ ܠܘ ܗ̣ܝ ܐܠܐ ܗ̇ܝ ܐܝܢܝܘܬܐ ܬܪܝܢܝܬܐ ܕܡܬܚܕܬܐ ܠܗ ܒܝܕ ܫܘܓܢܝܗ ܕܡ̣ܢ ܡܬܓܫܫܢܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܝܢܝܘܬܐ ܗ̇ܝ ܩܕܡܝܬܐ ܡ̣ܢ ܟܕܘ ܒܛܠܬ݀ ܠܗ̇. ܘܡܕܪܟܢܐ ܢܛܝ̣ܪܐ ܙܕܩ ܕܢܗܘܐ ܥܡܗ̇ ܕܡܕܪܟܢܘܬܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܡܕܡ ܡ̣ܢ ܗ̇ܘ ܡܐ ܕܕܡܐ ܠܗ ܠܐ ܚ̇ܐܫ. ܐܦܠܐ ܡܫܬܓܢܐ. ܘܡܕܪܟܢܘܬܐ ܒܝܕ ܚܫܐ ܘܫܘܓܢܝܐ ܗܘܐ. ܐܝܟ ܕܐܡ̣ܪܢܢ. ܫܪܝܟܐ ܡܕܝܢ ܕܡܕܪܟܢܗ̇ ܕܐܝܢܝܘܬܗ ܕܡܬܓܫܫܢܐ ܠܘ ܡܘܙܓܗ ܕܓܫܘܫܐ ܐܝܬܘܗܝ. ܐܠܐ ܡܕܡ ܐ̱ܚܪܝܢ ܕܒܡܨܥܝܘܬ ܫܘܓܢܝܗ̇ ܘܚܫܘܫܘܬܗ ܕܡܘܙܓ ܓܫܘܫܐ. ܡܕܪܟ ܠܐܝܢܝܘܬ ܡܬܓܫܫܢܐ ܕܠܗ ܩܪܝܢܢ ܢܦܫܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢܢ ܕܙܒܢܝ̈ܢ ܣܓܝ̈ܐܢ. ܡܘܙܓܐ ܠܨܒܘܬܐ ܡܕܡ ܡܨܛܠܐ ܘܡܫܬܪܓܪܓ. ܘܢܦܫܐ ܡܟܠܐ ܟܠܝܐ ܠܗ ܡ̣ܢ ܫܘܡܠܝ ܢܝܫܗ. ܒܒܢܝ̈ܢܫܐ ܡ̇ܢ܆ ܡܛܠ  ܢܝܫܐ ܡܕܡ ܐ̱ܢܫܝܐ ܒܛܘܚܐ ܕܡ̣ܢ ܢܩܦܐ ܢܫܝܐ. ܘܡܣܡܥܠܘܬܐ ܕܡ̣ܢ ܡܐܟ̈ܠܬܐ ܘܫܪܟܐ. ܒܚܝ̈ܘܬܐ ܕܝܢ ܡܛܠ ܢܝܫܐ ܡܕܡ ܟܝܢܝܐ. ܐܝܟ ܗ̇ܝ ܕܐܡܐ ܡ̇ܢ ܙܒܢܝ̈ܢ ܣܓܝ̈ܐܢ ܟܕ ܡ̣ܢ ܟܦܢܐ ܡܬܕܘܢܐ ܘܡܬܕܘܝܐ܆ ܠܝܠܕ̈ܐ ܬܪ̈ܣܝܬܐ ܡܥܬܕܐ. ܢܦܫܐ ܡܕܝܢ ܠܘ ܡܘܙܓܐ ܗ̱ܝ. ܐܦܠܐ ܡܘܙܓܐ ܢܦܫܐ.

 

ܢܘܗܪܐ:

 

ܙܕܩ ܠܡܕܥ ܕܗ̣ܢܝܢ ܗܠܝܢ ܬܠܬ ܡܚܘܝܢ̈ܘܬܐ ܡܫܪܪ̈ܢ ܕܟܠ ܢܦܫܐ ܠܘ ܡܘܙܓܐ ܗ̱ܝ.ܘܟܕ ܟܠ ܢܦܫܐ ܡܘܙܓܐ ܠܐ ܐܝܬܝܗ̇܆ ܡ̣ܢ ܐܠܨ̈ܬܐ ܕܢܦܫܐ ܡܠܝ̣ܠܬܐ ܕܥܠܝܗ̇ ܗ̣ܝ ܡܠܬܐ܆ ܡܘܙܓܐ ܠܐ ܬܗܘܐ.

 

 

 

 

 

 

 

 

 

 

 

 

 

 

    

 

     #1 

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠ ܦܘܪ̈ܫܢܝܗ̇ ܕܢܦܫܐ ܡܠܝ̣ܠܬܐ. ܘܒܗ ܐܝܬ ܦܪܘܡܝܘܢ ܘܦܣܘ̈ܩܐ ܬܫܥܐ. ܦܪܘܡܝܘܢ ܡܛܠ ܬܪ̈ܥܝܬܐ ܡܫܚ̈ܠܦܬܐ ܕܗܘܝ̈ ܠܐܢܫܝ̈ܢ ܡܛܠ ܦܘܪ̈ܫܢܝܗ̇ ܕܢܦܫܐ. ܬܪܥܝܬܐ ܩܕܡܝܬܐ

 

 

 

ܐܪܝܣܛܘܛܐܛܠܝܣ ܡ̇ܢ ܥܡ ܟܠܗ̇ ܦܠܓܐ ܦܗܪܦܐܛܝܩܝܬܐ ܐܡܪܝܢ ܕܚܕ ܗ̣ܘ ܟܝܢܐ ܠܢܦ̈ܫܬܐ ܟܠܗܝܢ ܐ̱ܢܫܝ̈ܬܐ. ܘܡܛܠ ܗܕܐ ܠܘ ܒܟܝܢܐ ܘܐܕܫܐ ܡܫܚ̈ܠܦܢ ܡ̣ܢ ܚܕ̈ܕܐ܇ ܐܠܐ ܒܡܢܝܢܐ ܒܠܚܘܕ. ܟܐܡܬ݀ ܒܙܢܝ̈ܐ ܡܕܡ ܓܕܫܢܝ̈ܐ ܕܡܩܦ ܢܩ̇ܦܝܢ ܠܗܝܢ. ܐܟܙܢܐ ܕܚܪܝ̣ܦܘܬ ܡܕܥܐ ܘܦܛܥܘܬܐ. ܘܪܒܘܬ ܢܦܫܐ ܘܫܝ̣ܛܘܬܐ ܘܒܥܪܝ̣ܪܘܬܐ ܘܡܫܝܢܘܬܐ. ܘܢܟܦܘܬܐ ܘܙܠܝ̣ܠܘܬܐ. ܘܫܪܟܐ. ܘܗ̣ܢܘܢ ܫܘܚ̈ܠܦܐ ܠܫܘܚ̈ܠܦܐ ܡܘܙܓܝ̈ܐ ܢܩ̇ܦܝܢ. ܒܗ̇ܝ ܕܦܓܪܐ ܐܘܪܓܢܘܢ ܗ̣ܘ ܕܢܦܫܐ. ܘܠܦܘܬ ܡܝܬܪܘܬܐ ܘܒܝܫܘܬܐ ܕܐܘܪܓܢܘܢ܆ ܗ̣ܘ ܥܒܕܐ ܡܫܬܡܠܐ. ܘܐܦܢ ܛܒ ܡܗܝ̣ܪ ܢܗܐ ܗ̣ܘ ܐܘܡܢܐ. ܒܕܓܘܢ ܡܪ̈ܬܢܐ ܡ̇ܢ܆ ܚܪ̈ܝ̣ܦܝ ܡܕܥܐ ܐܢܘܢ ܘܕܠܝ̈ܠܝ ܠܫܘܢܝܐ ܕܡ̣ܢ ܪܥܝܢܐ ܠܪܥܝܢܐ. ܕܡܢܝ̈ܐ ܕܝܢ ܦܨܝ̈ܚܐ ܘܫܦܝܪ̈ܐ ܘܡܫܝ̈ܢܐ. ܦܠܓܡܢ̈ܐ ܕܝܢ ܥܒܝܝ̈ ܣܘܟܠܐ ܘܡܬܝ̣̈ܢܐ. ܡܠܐܱܢܟܘܠܝ̈ܩܝܐ ܥܡܝ̈ܩܐ ܘܐܟܬܢ̈ܐ ܘܠܐ ܕܠܝ̈ܠܝ ܠܫܘܓܢܝܐ. ܘܐܟܡܐ ܕܙܢܝ̈ܐ ܕܡܘ̈ܙܓܐ ܗܠܝܢ. ܕܠܐ ܣܘܦ ܐܢܘܢ. ܘܗ̣ܝ ܗܕܐ ܬܪܥܝ̣ܬܐ ܝܬܝܪ ܡ̣ܢ ܟܠܗܝܢ ܬܪ̈ܥܝܬܐ ܒܝܬܝܐ ܠܬܪ̈ܥܝܬܐ ܕܡܠܦܢ̈ܐ ܥܕܬܢܝ̈ܐ.

 

ܬܪܥܝܬܐ ܬܪܝܢܝܬܐ:

 

ܐ̱ܚܪ̈ܢܐ ܕܝܢ ܐܡܪܝܢ܆ ܕܢܦ̈ܫܬܐ ܟܠܗܝܢ ܕܚܝ̈ܘܬܐ ܠܐ ܡܠܝ̣̈ܠܬܐ ܘܕܒܢܝ̈ܢܫܐ. ܫܘܝܬ݀ ܒܟܝܢܐ ܐܢܝܢ. ܡܫܚ̈ܠܦܢ ܕܝܢ ܒܥܠܬ݀ ܫܘܚܠܦܐ ܕܗܕܡ̈ܐ ܐܘܪ̈ܓܢܝܐ ܕܦܓܪ̈ܝܗܝܢ. ܒܕܓܘܢ ܐܠܘ ܫܪܟܐ ܕܚܝ̈ܘܬܐ ܡܘܚܐ ܩܢ̈ܝܢ ܗܘܝ̈ ܐܝܟ ܡܘܚܗ ܕܒܪܢܫܐ. ܘܠܫܢܐ ܐܝܟ ܠܫܢܗ. ܐܟܘܬܗ ܡܬܚܫ̈ܒܢ ܗܘܝ̈ ܘܡܗܘ̈ܢܢ ܗܘܝ̈ ܘܡܡ̈ܠܠܢ.

 

ܬܪܥܝܬܐ ܬܠܝܬܝܬܐ:

 

ܐ̱ܚܪ̈ܢܐ ܕܝܢ ܬܘܒ ܐܡܪܝܢ܆ ܕܢܦܫܐ ܐ̱ܢܫܝܬܐ ܓܢܣܐ ܗ̱ܝ. ܘܬܚܘ̣ܬܝܗ̇ ܐܕܫ̈ܐ ܐܝܬ ܣܓܝ̈ܐܐ ܕܢܦ̈ܫܬܐ ܐ̱ܢܫܝ̈ܬܐ ܕܦܪ̈ܝ̣ܫܢ ܡ̣ܢ ܚܕ̈ܕܐ ܒܟܝܢܐ. ܘܟܠ ܐܕܫܐ ܡܢܗܝܢ. ܡ̣ܢ ܐܕܫܐ ܡܕܡ ܕܐܘܣܝ̈ܐܣ ܠܐ ܓܫܝ̈ܡܬܐ ܘܫܡܝܢ̈ܝܬܐ ܐܝܬܘܗܝ. ܕܠܗܝܢ ܩܪܝܢ ܟܝ̈ܢܐ ܡܫܡ̈ܠܝܐ. ܘܬܚܝܬ ܟܠ ܐܕܫܐ ܩܢܘ̈ܡܐ ܐܝܬ ܘܣܘܓܐܐ ܕܢܦ̈ܫܬܐ ܡܠܝ̣̈ܠܬܐ. ܒܕܓܘܢ ܟܠ ܐܕܫܐ ܡ̣ܢ ܢܦ̈ܫܬܐ ܡܠܝ̣̈ܠܬܐ. ܡܕܡܐ ܕܡܐ ܠܐܘܣܝܐ ܥܠܬܗ ܒܡܝܬܪܘܬܐ ܘܒܘܪܘܬܐ. ܘܡܫܝܢܘܬܐ ܘܪܘܓܙܐ ܘܫܪܟܐ. ܘܡܛܠ ܗܕܐ ܩܢܘܡܐ ܕܢܦ̈ܫܬܐ ܐܝܠܝܢ ܕܡ̣ܢ ܚܕ ܐܢܝܢ ܐܕܫܐ܆ ܚܘܒܐ ܡܕܡ ܕܒܟܝܢܝ̈ܗܝܢ ܥܙܝ̣ܠ ܠܘܬ ܚܕ̈ܕܐ ܩܢ̈ܝܢ. ܘܗ̇ܢܝܢ ܕܠܘ ܗܟܢܐ ܐܢܝܢ ܠܐ ܣܟ ܥܡ ܚܕ̈ܕܐ ܡܫܬܘ̈ܝܢ ܐܦܠܐ ܡܬܐܘ̈ܝܢ. ܗܐ ܓܝܪ ܚܙܝܢܢ ܒܢܝ̈ܢܫܐ ܣܓܝ̈ܐܐ ܥܘܕ̈ܝܝܐ ܕܗܢܐ ܟܠܗ ܡܚ̇ܒܝܢ ܠܚܕܕ̈ܐ. ܕܠܐ ܢܘܪܐ ܐܦܠܐ ܣܝܦܐ ܦܪܫܝ̣ܢ ܠܗܘܢ ܡ̣ܢ ܚܕ̈ܕܐ. ܘܚܙܝܢܢ ܬܘܒ ܬܪܝܢ ܐܚ̈ܐ ܘܐܒܐ ܘܒܪܐ ܕܡܢܩܐ ܢܩܝܢ ܠܒܪ ܚܕ̈ܕܐ. ܐܦ ܓܝܪ ܘܒܪ̈ܚܡܬܐ ܥܠܡܢܝ̈ܬܐ ܢܣܝ̣ܢܗ̇ ܐܡܪܝܢ ܠܗܕܐ. ܕܙܒܢܝ̈ܢ ܣܓܝ̈ܐܢ. ܟܕ ܠܒܪܬ݀ ܙܘܓܗ ܫܦܝܪܬ݀ ܚܙܘܐ ܘܥܬܝܪܬܐ ܘܡܝܩܪܬ݀ ܛܘܗܡܐ. ܘܡܘܠܕܢܝܬ ܒܢܝ̈ܐ ܗܕܝܪ̈ܐ ܣܢܐ ܓܒܪܐ. ܠܢܘܟܪܝܬܐ ܫܟܝ̣ܪܬܐ ܘܡܢܕܝܬܐ ܘܫܝ̣ܛܬ݀ ܓܢܣܐ ܪܚ̇ܡ. ܘܒܫܢܓܬܗ̇ ܡܫܬܠܗܒ. ܐ̱ܚܪ̈ܢܐ ܕܝܢ ܠܟܘ̈ܫܝܬܐ. ܘܐ̱ܚܪ̈ܢܐ ܠܐܚܪ̈ܢܝܬܐ ܘܐ̱ܚܪ̈ܢܝܬܐ ܠܐܚܪ̈ܢܐ. ܘܡܛܠ ܕܒܙܢܝ̈ܐ ܒܪ̈ܝܐ ܘܦܓܪ̈ܢܝܐ. ܘܠܐ ܚܕܐ ܒܝܬܝܘܬܐ ܐܝܬ ܠܕܐܝܟ ܗܠܝܢ ܥܡ ܚܕ̈ܕܐ. ܡ̣ܢ ܐܢܢܩܝ. ܕܒܙܢܝ̈ܐ ܓܘ̈ܝܐ ܘܢܦܫܢܝ̈ܐ ܒܝܬܝܝ̈ܢ ܠܚܕ̈ܕܐ ܟܐܡܬ݀ ܕܡ̣ܢ ܚܕ ܐܢܘܢ ܐܕܫܐ. ܘܚܕ ܠܗܘܢ ܟܝܢܐ ܘܐܒܐ ܘܥܠܬܐ.

 

ܬܪܥܝܬܐ ܪܒܝܥܝܬܐ:

 

ܐ̱ܚܪ̈ܢܐ ܕܝܢ ܐܡܪܝܢ ܕܟܠܗܝܢ ܢܦ̈ܫܬܐ ܐ̱ܢܫܝ̈ܬܐ ܦܪܝܫܬ݀ ܒܟܝܢܐ ܐܢܝܢ ܡ̣ܢ ܚܕ̈ܕܐ. ܘܠܝܬ ܒܝܢܬܗܝܢ ܫܘܝܘܬܐ ܟܝܢܝܬܐ ܡܬܘܡ. ܘܐܦܢ ܕܡ̈ܝܢ ܠܚܕ̈ܕܐ ܒܙܢܝ̈ܐ ܡܕܡ ܓܕܫܢܝ̈ܐ ܡܝܬܪܘܬܐ ܠܡܐܡܪ ܘܫܪܟܐ. ܐܠܐ ܕܡܝܘܬܐ ܕܒܙܢܝ̈ܐ ܓܕܫܢܝ̈ܐ. ܠܘ ܒܟܠܕܘܟ ܥܠ ܫܘܝܘܬܐ ܕܟܝܢܐ ܡܫܘܕܥܐ. ܒܕܓܘܢ ܟܠ ܢܦܫܐ ܕܟܠ ܒܪܢܫܐ ܟܝܢܐ ܗ̱ܘ ܕܝ̣ܠܢܝܐ ܘܐܕܫܐ ܕܒܗ ܟܕ ܒܗ ܒܩܢܘܡܗ ܝܚܝܕܝܐ ܒܠܚܘܕ ܫܟܝ̣ܚܐ ܐܕܫܢܝܘܬܗ. ܐܟܡܐ ܕܒܓܘܫ̈ܡܐ ܫܡܝ̈ܢܐ܆ ܫܡܫܐ ܘܣܗܪܐ. ܘܒܐܪ̈ܥܢܐ ܦܘܢܝܟܘܣ ܦܪܚܬܐ ܗܢܕܘܝܬܐ.

 

 

 

 

 

ܦܣܘܩܐ ܩܕܡܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠ ܗ̇ܝ ܕܫܘ̈ܝܬ݀ ܒܟܝܢܐ ܐܢܝܢ ܢܦ̈ܫܬܐ ܟܠܗܝܢ ܐ̱ܢܫܝ̈ܬܐ. ܘܒܗ ܐܝܬ ܢܝܫܐ ܚܕ ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܢܦ̈ܫܬܐ ܐ̱ܢܫܝ̈ܬܐ ܐܠܘ ܒܟܝܢܐ ܦܪ̈ܝܫܢ ܗܘܝ̈ ܡ̣ܢ ܚܕ̈ܕܐ. ܗ̣ܘ ܦܘܪܫܢܗܝܢ ܕܒܟܝܢܐ. ܒܫܘܚ̈ܠܦܐ ܗܘܐ ܗ̣ܘܐ ܐܘܣܝܝ̈ܐ. ܕܐܝܬܝܗܘܢ ܡܩܝ̈ܡܐ ܕܐܕܫ̈ܐ ܘܡܦܠܓܢ̈ܐ ܕܓܢ̈ܣܐ. ܘܐܠܘ ܫܘܚ̈ܠܦܐ ܕܐܝܟ ܗܠܝܢ ܩܢ̈ܝܢ ܗܘܝ̈ ܢܦ̈ܫܬܐ ܡ̣ܢ ܓܢܣܐ ܘܫܘܚ̈ܠܦܐ ܡܪ̈ܟܒܢ ܗܘܝ̈. ܘܟܕ ܦܫܝ̈ܛܬܐ ܘܠܐ ܡܪ̈ܟܒܬܐ ܐܢܝܢ. ܠܘ ܒܫܘܚ̈ܠܦܐ ܐܘܣܝܝ̈ܐ ܦܪ̈ܝܫܢ ܡ̣ܢ ܚܕ̈ܕܐ. ܘܡܛܠ ܗܕܐ ܠܘ ܦܪ̈ܝܫܬ݀ ܒܟܝܢܐ ܐܢܝܢ ܢܦ̈ܫܬܐ ܐ̱ܢܫܝ̈ܬܐ ܠܐ ܫܘ̈ܝܬ݀ ܒܟܝܢܐ ܐܘܟܝܬ ܚܕ ܗ̣ܘ ܠܗܝܢ ܟܝܢܐ.

 

ܡܚܘܝܢܘܬܐ ܬܪܝܢܝܬܐ:

 

ܐܡܪܝܢ ܐܠܘ ܒܟܝܢܐ ܦܪ̈ܝܫܢ ܗܘܝ̈ ܡ̣ܢ ܚܕ̈ܕܐ ܢܦ̈ܫܬܐ ܐ̱ܢܫܝ̈ܬܐ. ܙܕܩ ܗ̣ܘܐ ܕܐܦ ܟܠܗܘܢ ܩܢܘ̈ܡܐ ܐ̱ܢܫܝ̈ܐ ܦܪ̈ܝ̣ܫܝ ܒܟܝܢܐ ܐܝܬܝܗܘܢ ܗ̣ܘܘ܆ ܗ̇ܝ ܕܫܟܝ̣ܪܐ. ܒܗ̇ܝ ܕܣܛܪ ܡ̣ܢ ܚܝܘܬܐ ܘܡܠܝ̣ܠܘܬܐ ܕܒܗܝܢ ܟܠܗܝܢ ܐܟܚܕܐ ܫܘܝܢ. ܘܠܐ ܚܕ ܡܕܡ ܐ̱ܚܪܝܢ ܐܘܣܝܝܐ ܐܝܬ ܠܗܘܢ ܕܒܗ ܡ̣ܢ ܚܕ̈ܕܐ ܦܪܝ̣ܫܝ̣ܢ. ܐܠܐ ܒܙܢܝ̈ܐ ܒܠܚܘܕ ܓܕܫܢܝ̈ܐ ܕܡ̣ܢ ܠܒܪ ܠܟܝܢܗܘܢ ܢܩܝ̣ܦܝ̣ܢ. ܘܟܕ ܩܢܘܡܝ̈ܗܘܢ ܕܒܢܝ̈ܢܫܐ ܫܘ̈ܝܝ ܒܟܝܢܐ ܐܝܬܝܗܘܢ. ܐܠܨܐ ܕܐܦ ܢܦ̈ܫܬܗܘܢ ܫܘ̈ܝܬ݀ ܒܟܝܢܐ ܢܗܘ̈ܝܢ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠ ܬܪܥܝ̣ܬܐ ܗ̇ܝ ܕܦܪ̈ܝܫܬ݀ ܒܟܝܢܐ ܡܘܕܝܐ ܠܢܦ̈ܫܬܐ ܐ̱ܢܫܝ̈ܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ ܕܗܠܝܢ. ܣܥܝܐ ܩܕܡܝܐ

 

ܐܡܪܝܢ ܕܒܪܢܫܐ ܐ̱ܢܫ. ܡܫܢܐ ܡ̣ܢ ܡܘܙܓܐ ܚܡܝ̣ܡܐ ܠܘܬ ܡܘܙܓܐ ܩܪܝ̣ܪܐ ܘܡܬܓܢܐ ܡ̣ܢ ܪܛܝ̣ܒܐ ܠܝܒܝ̣ܫܐ. ܘܙܘܥܘ̈ܗܝ ܢܦܫܢܝ̈ܐ ܗ̣ܢܘܢ ܟܕ ܗ̣ܢܘܢ ܕܠܐ ܫܘܢܝ ܘܫܘܓܢܝ ܡܩܘܝܢ. ܘܐܠܘ ܙܘ̈ܥܐ ܢܦܫܢܝ̈ܐ ܠܡܘ̈ܙܓܐ ܢܩܝ̣ܦܝ̣ܢ ܗ̣ܘܘ. ܥܡܗܘܢ ܙܕܩ ܗ̣ܘܐ ܕܡܫܬܚܠܦܝܢ ܗ̣ܘܘ. ܘܟܕ ܠܘ ܗܟܢܐ ܐܟܘܬܗܘܢ ܡܫܬܓܢܝ̣ܢ. ܡܫܬܪܪܝ̣ܢܢ ܕܙܘ̈ܥܐ ܢܦܫܢܝ̈ܐ ܕܡܫܚܠܦܝ̣ܢ܇ ܠܟܝ̈ܢܐ ܡܫܚ̈ܠܦܐ ܕܢܦ̈ܫܬܐ ܦܪ̈ܝ̣ܫܬ݀ ܒܟܝܢܐ ܐܝܬܝܗܝܢ. ܘܕܡܘ̈ܙܓܐ ܡ̇ܢ ܡܫܬܚܠܦܝ̣ܢ ܒܠܥܕ ܗ̇ܝ ܕܫܘܚܠܦܐ ܒܙܘ̈ܥܝ ܢܦܫܐ ܢܥܒܕܘܢ. ܝ̣ܕܝ̣ܥܐ ܡ̣ܢ ܗ̇ܝ ܕܡܪܬܢܐ ܐ̱ܢܫ ܚܪܝ̣ܦ ܙܘ̈ܥܐ. ܙܒܢܝ̈ܢ ܣܓܝ̈ܐܢ ܐܫܬܐ ܐܡܦܝܡܝܪܝܢܘܣ ܠܗ ܓܕܫܐ. ܘܟܢܫ ܡܝ̈ܐ ܘܦܠܓܡܐ. ܘܗ̣ܝ ܚܪܝ̣ܦܘܬ ܙܘܥܘ̈ܗܝ ܠܐ ܣܟ ܡܫܬܓܢܝܐ. ܘܐ̱ܚܪ̈ܢܐ ܬܘܒ ܦܠܓܡ̈ܢܐ܆ ܐܫܬܐܛܪܝܛܘܣ ܗܘܝܐ ܠܗܘܢ. ܘܦܪܢܝܛܝܣ. ܘܩܐܘܣܘܣ. ܘܗ̣ܝ ܫܛܘܪܘܬܗܘܢ ܠܐ ܣܟ ܡܫܢܝܐ.

 

ܣܥܝܐ ܬܪܝܢܐ:

 

ܐܡܪܝܢ ܕܚܙܝܢܢ ܬܪܝܢ ܒܢܝ̈ܢܫܐ ܕܡܫܚܠܦܝ̣ܢ ܒܪܘܟܒܗܘܢ ܦܓܪܢܝܐ ܘܣܘܩܡܗܘܢ ܡܘܙܓܝܐ. ܘܡܕܡܐ ܕܡ̇ܝܢ ܒܙܘܥܝ̈ܗܘܢ ܢܦܫܢܝ̈ܐ. ܘܐ̱ܚܪ̈ܢܐ ܬܘܒ ܡܕܡܐ ܕܡ̇ܝܢ ܒܙ̈ܢܝ ܦܓܪܐ ܘܡܫܚܠܦܝ̣ܢ ܒܙ̈ܢܝ ܢܦܫܐ. ܘܡܛܠ ܗܕܐ ܐܫܬܪܪܢܢ ܕܙܘ̈ܥܐ ܢܦܫܢܝ̈ܐ ܠܘ ܠܙܢܝ̈ܐ ܡܘܙܓܝ̈ܐ ܢܩ̇ܦܝܢ. ܐܠܐ ܠܗܘܢ ܠܟܝ̈ܢܐ ܡܫܚ̈ܠܦܐ ܕܢܦ̈ܫܬܐ ܢܩܝ̣ܦܝܢ.

 

ܣܥܝܐ ܬܠܝܬܝܐ:

 

ܐܡܪܝܢ ܕܗܕ̈ܡܐ ܦܓܪ̈ܢܝܐ ܐܘܪ̈ܓܢܐ ܐܢܘܢ ܕܢܦܫܐ ܠܘܬ ܫܘܡܠܝܐ ܕܣܥܘܪ̈ܘܬܐ ܡܫܚ̈ܠܦܬܐ. ܘܕܡܝܬܪܘܬܐ ܘܒܝ̣ܫܘܬܐ ܕܐܘܡܢܐ ܓܠܝܐ. ܡ̣ܢ ܗ̇ܝ ܕܣܘܓܐܐ ܕܢܓܪ̈ܐ ܡܗܝܪ̈ܐ ܚܙܝܢܢ ܕܒܥܫܦܐ ܘܡܣܪܐ ܘܡܩܪܐ ܕܠܐ ܚ̇ܫܚܝܢ ܣܥܘܪ̈ܘܬܐ ܕܠܐ ܦܐܝ̈ܢ ܡܫܡܠܝܢ. ܘܡܛܠ ܗܕܐ ܠܐ ܙܕܩ ܠܢ ܕܠܐ ܡܗܝ̣ܪܘܬܐ ܢܚܣܕܝ̣ܘܗܝ ܠܢܓܪܐ ܗ̇ܘ. ܘܗܟܢܐ ܬܘܒ ܘܡܛܠ ܢܦ̈ܫܬܐ ܐܡܪܝܢܢ. ܕܠܘ ܒܫܘܚ̈ܠܦܐ ܕܪ̈ܘܟܒܐ ܘܡܘ̈ܙܓܐ ܕܗܕ̈ܡܐ ܦܓܪ̈ܢܝܐ ܦܪ̈ܝܫܢ ܡ̣ܢ ܚܕ̈ܕܐ. ܐܝܟܢܐ ܕܩܢܘܡܝܐ ܢܗܐ ܦܘܪܫܢܗܝܢ. ܐܠܐ ܠܟܠ ܢܦܫܐ ܟܝܢܐ ܐܝܬ ܠܗ̇ ܕܝ̣ܠܢܝܐ ܕܒܗ ܦܪܝܫܐ ܡ̣ܢ ܚܒܪܬܗ̇.

 

ܣܥܝܐ ܪܒܝܥܝܐ:

 

ܐܡܪܝܢ ܕܚܙܝܢܢ ܠܡܢܗܘܢ ܕܛܠܝ̈ܐ ܙܥܘܪ̈ܐ. ܕܛܒ̈ܐ ܐܢܘܢ ܘܡܪ̈ܚܡܢܐ ܘܫܦܝ̣̈ܥܐ. ܘܢܟܘ̈ܦܬܢܐ ܘܡܫܬܡ̈ܥܢܐ ܘܡܫܬܥܒ̈ܕܢܐ. ܘܠܡܢܗܘܢ ܕܒܝ̣̈ܫܐ ܐܢܘܢ ܘܛܠܘ̈ܡܐ ܘܩܠܘ̈ܛܐ ܘܟܪ̈ܘܡܬܢܐ. ܘܥܨܝܝ̈ܐ ܘܡܪ̈ܘܕܐ. ܒܕܓܘܢ ܗ̣ܢܘܢ ܫܘܚ̈ܠܦܐ ܗܠܝܢ. ܐܘ ܒܥܠܬ݀ ܫܘܚ̈ܠܦܐ ܡܘܙܓܝ̈ܐ ܐܢܘܢ. ܐܘ ܒܥܠܬ݀ ܥܝܕܐ ܘܕܘܪܫܐ ܘܡܪܕܘܬܐ ܕܡ̣ܢ ܬܪ̈ܐܐ. ܐܘ ܒܥܠܬ݀ ܫܘܚ̈ܠܦܝܗܝܢ ܟܝܢܝ̈ܐ ܕܢܦ̈ܫܬܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܥܠܬܐ ܥܒܘܕܬܐ ܗ̣ܝ ܢܦܫܐ ܐܝܬܝܗ̇ ܘܗܕܡ̈ܐ ܐܘܪ̈ܓܢܐ ܐܢܘܢ. ܒܕܓܘܢ ܐܢܗܘ ܕܐܘܪ̈ܓܢܐ ܠܐ ܢܗܘܘܢ ܥܗ̈ܢܐ ܠܨܒܝܢܗ ܕܥܒܘܕܐ. ܠܐ ܙܕܩ ܕܗܠܝܢ ܕܕܠܩܘܒܠܐ ܡ̣ܢ ܕܝܠܗܘܢ ܢܣܥܪܘܢ. ܟܐܡܬ݀ ܟܕ ܡܪܚܡܢܘܬܐ ܕܨܒܝܐ ܒܗ̇ ܢܦܫܐ ܠܐ ܡܫܬܡܠܝܐ ܒܝܕ ܠܐ ܥܗܢܘܬܐ ܕܐܘܪܓܢܘܢ ܦܓܪܢܝܐ. ܐܦܠܐ ܛܠܘܡܘܬܐ ܕܠܐ ܨܒܝܐ ܒܗ̇ ܢܦܫܐ ܙܕܩ ܗ̣ܘܐ ܕܬܫܬܡܠܐ. ܐܠܐ ܓܠܝ̣ܙܘܬܐ ܒܠܚܘܕ ܕܡܪܚܡܢܘܬܐ ܘܕܛܠܘܡܘܬܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܡܛܠ ܕܛܠܝ̈ܐ ܗ̇ܢܘܢ ܠܐ ܥܕܟܝܠ ܐܬܥܢܝ̣ܘ ܥܡ ܟܢܘ̈ܬܐ. ܐܦܠܐ ܐܬܪܕܝ̣ܘ ܡ̣ܢ ܬܪ̈ܐܐ. ܫܪܝ̣ܟܐ ܡܕܝܢ ܕܗ̇ܘ ܕܬܠܬܐ ܫܪܝܪ. ܗ̇ܢܘ ܕܝܢ ܕܢܦ̈ܫܬܐ ܐ̱ܢܫܝ̈ܬܐ ܦܪ̈ܝܫܬ݀ ܒܟܝܢܐ ܐܢܝܢ. ܘܡܛܠ ܗܕܐ ܐܦ ܙܘܥܝ̈ܗܝܢ ܡܫܚܠܦܝܢ.

 

ܣܥܝܐ ܚܡܝܫܝܐ:

 

ܐܡܪܝܢ ܕܚܙܝܢܢ ܠܢܦ̈ܫܬܐ ܐ̱ܢܫܝ̈ܬܐ ܕܦܪ̈ܝܫܢ ܡ̣ܢ ܚܕ̈ܕܐ ܒܙܢܝ̈ܐ ܐܝܠܝܢ ܕܠܐ ܣܟ ܡܨܝܢܢ ܠܡܡܠܠܘܬܗܘܢ ܐܘ ܠܡܦܚܡܘܬܗܘܢ ܒܫܘܚ̈ܠܦܐ ܡܘܙܓܝ̈ܐ. ܐܝܟ ܗ̇ܝ ܕܚܙܝܢܢ ܠܐܢܫܝ̈ܢ ܡ̇ܢ ܕܠܝܕ̈ܥܬܐ ܦܝܠܠܘܣܘ̈ܦܝܬܐ ܝܬܝܪ ܬܩܢܐܝܬ ܝܠܝ̣ܦܝܢ. ܘܡ̣ܢ ܝ̣ܕܥܬܐ ܕܓܪܡܛܝܩܝ ܕܝܬܝܪ ܦܫܝ̣ܩܐ ܚܝܒܝܢ. ܘܐ̱ܚܪ̈ܢܐ ܬܘܒ ܒܗ̇ ܟܕ ܒܗ̇ ܒܝ̣ܕܥܬܐ ܝܚܝܕܝܬܐ ܠܡܕܡ ܡ̣ܢ ܫܘ̈ܐܠܝܗ̇ ܫܩܝ̣̈ܦܝܐ ܕܠܝ̣ܠܐܝܬ ܡܣܬܟܠܝܢ ܘܫܪܝܢ ܘܠܫܘ̈ܐܠܐ ܐ̱ܚܪ̈ܢܐ ܦܫܝ̈ܛܐ ܘܫܚܝ̣̈ܡܐ ܥܛܠܐܝܬ ܡܕܪܟܝ̣ܢ. ܐܦ ܓܝܪ ܐܢ̇ܐ ܩܢܘܡܝ ܚܙܝܬ ܒܪܢܫܐ ܐ̱ܢܫ ܕܠܟܬܒܐ ܕܡܝܓܝܣܛܝ ܕܦܛܘܠܘܡܐܘܣ ܚܬܝ̣ܬܐܝܬ ܫܪܐ ܗ̣ܘܐ. ܘܡ̣ܢ ܚܘܫܒܢܐ ܕܨܘܡܐ ܘܕܐܪܒܥ ܥܣܪ̈ܐ ܚ̇ܐܒ ܗ̣ܘܐ. ܘܠܐܚܪܢܐ ܗܟܘܬ ܚܙܝܬ ܕܠܙܢܝ̈ܐ ܟܠܗܘܢ ܕܐܣܟܡ̈ܐ ܐܪܒܥܐ ܕܣܘܠܘܓܝ̈ܣܡܘ ܫܦܝܪ ܡܪܟܒ ܗ̣ܘܐ ܘܣܘܢܦܗܪ̈ܣܡܛܐ ܡܘܠܕ ܗ̣ܘܐ ܡ̣ܢ ܦܫܝ̈ܛܐ ܘܡܚ̈ܠܛܐ. ܘܡܬܚܘ̈ܝܢܝܐ ܘܠܐ ܡܬܚܘ̈ܝܢܝܐ. ܘܠܡܫܘܕܥܢܘܬܗ ܕܫܡܐ ܥܠ ܡܫܬܡܗܢܐ ܒܬܠܝ̣ܬܝܘܬ ܙܢܝ̈ܐ ܕܐܚܘܕܘܬܐ ܐܘ ܒܝܬܝܘܬܐ ܘܢܩܝ̣ܦܘܬܐ܆ ܠܐ ܣܟ ܡܣܬܟܠ ܗ̣ܘܐ. ܘܕܒܥܠܬ݀ ܫܘܚܠܦܐ ܕܡܘܙܓܐ ܠܫܘܚܠܦܐ ܕܐܝܟ ܗܢܐ ܢܣܒܪ܆ ܣܓܝ ܪܚܝ̣ܩܐ. ܫܪܝܟܐ ܡܕܝܢ ܕܢܘܕܐ ܕܟܝܢܗ̇ ܕܝ̣ܠܢܝܐ ܕܢܦܫܐ ܗ̇ܝ ܠܙܢܐ ܕܝ̣ܠܢܝܐ ܕܝ̣ܕܥܬܐ ܗ̇ܝ ܕܥܗܢܐ ܗܘܬ݀. ܘܠܙܢܐ ܐ̱ܚܪܢܐ ܠܐ.

 

ܣܥܝܐ ܫܬܝܬܝܐ:

 

ܐܡܪܝܢ ܕܚܙܝܢܢ ܠܡܢܗܝܢ ܕܚܝ̈ܘܬܐ ܕܡܣܓ̈ܦܢܝܬܐ ܘܪ̈ܚܡܬ݀ ܠܚܘ̣ܕܝܘܬܐ ܐܢܝܢ. ܐܝܟ ܙܢܐ ܕܐܪܝܐ ܘܕܐܒܐ. ܠܡܢܗܝܢ ܕܝܢ ܕܡܘܬܪ̈ܢܝܬܐ ܘܪ̈ܚܡܬ݀ ܐܘܝܘܬܐ ܐܢܝܢ. ܐܟܙܢܐ ܕܥܢ̈ܐ ܘܬܘܪ̈ܐ ܘܚܡܪ̈ܐ. ܐ̱ܚܪ̈ܢܝܬܐ ܕܝܢ ܨܢܝ̣̈ܥܬܐ ܐܢܝܢ ܐܟܙܢܐ ܕܩܘ̈ܦܐ ܘܬܥ̈ܠܐ. ܘܐ̱ܚܪ̈ܢܝܬܐ ܦܫܝ̈ܛܬܐ ܐܟܙܢܐ ܕܥܪ̈ܒܐ. ܘܐ̱ܚܪ̈ܢܝܬܐ ܥܠ ܟܘܢܫ ܬܪ̈ܣܝܬܐ ܘܕܢܣܐܢܘܢ ܡܐܟ̈ܠܬܐ ܒܝܬ ܩܦܣ̈ܐ ܒܛܝ̣ܠ ܠܗܝܢ ܐܟܙܢܐ ܕܕܒܘܪ̈ܝܬܐ ܘܫܘ̈ܫܡܢܐ. ܘܐ̱ܚܪ̈ܢܝܬܐ ܝܬܝܪ ܡ̣ܢ ܣܘܢܩܢܐ ܝܘܡܢܝܐ ܠܐ ܡܕܡ ܚ̇ܡܠܝܢ ܐܝܟ ܙܢܐ ܕܝܘ̈ܢܐ. ܘܐ̱ܚܪ̈ܢܝܬܐ ܠܣܛܝ̈ܬܐ ܐܢܝܢ ܐܟܙܢܐ ܕܒܘܙܝ̣ܩܐ ܘܢܨܐ. ܘܐ̱ܚܪ̈ܢܝܬܐ ܓܢܒ̈ܬܐ ܐܢܝܢ ܐܟܙܢܐ ܕܩܪ̈ܩܣܐ. ܓܢ̈ܒܢ ܓܝܪ ܛܒ̈ܥܐ ܛܒ̈ܐ ܘܥܣ̈ܩܬܐ ܘܕܝ̣ܢܪ̈ܐ. ܘܐ̱ܚܪ̈ܢܝܬܐ ܢܟ̈ܦܬܐ ܐܢܝܢ ܐܟܙܢܐ ܕܫܘܦܢܝ̣̈ܢܐ ܕܠܙܘܘܓܐ ܬܪܝܢܐ ܠܐ ܣܟ ܩ̇ܪܒܝܢ. ܘܐ̱ܚܪ̈ܢܝܬܐ ܗܢܐ ܟܠܗ ܫܪ̈ܝܚܢ. ܕܥܕܡܐ ܠܚܡܫܝܢ ܙܘܘܓܝ̈ܢ ܒܚܕܐ ܫܥܐ ܢܥܒ̈ܕܢ. ܐܟܙܢܐ ܕܨܦܪ̈ܐ. ܒܗ̇ ܒܕܡܘ̣ܬܐ ܘܠܒܢܝ̈ܢܫܐ ܐܡܪܝܢ ܕܚܙܝܢܢ ܠܗܘܢ ܕܡܫܚܠܦܝ̣ܢ ܒܗܘܢ ܒܙܢܝ̈ܐ ܗܠܝܢ. ܒܗ̇ܝ ܕܡܢܗܘܢ ܡ̇ܢ ܚܪ̈ܡܐ ܘܡܣܓ̈ܦܢܐ ܐܢܘܢ. ܡܢܗܘܢ ܕܝܢ ܬܡܝ̈ܡܐ ܘܡܘܬܪ̈ܢܐ. ܘܡܢܗܘܢ ܪ̈ܚܡܝ ܫܠܝܐ ܘܡܢܗܘܢ ܪ̈ܚܡܝ ܫܓܡܐ. ܘܐ̱ܚܪ̈ܢܐ ܨܢܝ̣ܥܝ̣ܢ. ܘܐ̱ܚܪ̈ܢܐ ܦܫܝ̣ܛܝ̣ܢ. ܘܐ̱ܚܪ̈ܢܐ ܝܥܢܝ̣ܢ. ܘܐ̱ܚܪ̈ܢܐ ܣܦ̈ܩܢ ܠܗܘܢ ܐܦܣܢ̈ܝܬܗܘܢ. ܘܐ̱ܚܪ̈ܢܐ ܠܣܛܝܝ̈ܢ ܘܐ̱ܚܪ̈ܢܐ ܓܢܒܝ̈ܢ. ܐܟܡܐ ܡܕܝܢ ܕܚܝ̈ܘܬܐ ܦܪ̈ܝܫܬ݀ ܒܟܝܢܐ ܐܢܝܢ. ܒܗ̇ ܒܕܡܘ̣ܬܐ ܘܒܢܝ̈ܢܫܐ ܕܕܡܝܢ ܠܗܝܢ ܒܙܢܝ̈ܗܘܢ ܦܪ̈ܝ̣ܫܝ ܒܟܝܢܐ ܙܕܩ ܠܗܘܢ. ܘܟܕ ܦܓܪ̈ܐ ܕܟܠܗܘܢ ܒܢܝ̈ܢܫܐ ܚܕ ܐܢܘܢ ܐܕܫܐ ܘܟܝܢܐ. ܐܠܨܐ ܕܢܦ̈ܫܬܗܘܢ ܟܝ̈ܢܐ ܢܗܘ̈ܝܢ ܡܫܚ̈ܠܦܐ. ܢܦ̈ܫܬܐ ܡܕܝܢ ܐ̱ܢܫܝ̈ܬܐ ܦܪܝܫܬ݀ ܐܢܝܢ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܡܢܗܘܢ ܕܡܘ̈ܙܓܐ ܩܕ̈ܡܝܐ ܐܢܘܢ ܘܟܝܢܝ̈ܐ. ܘܐܝܬܝܗܘܢ ܗܠܝܢ ܕܡ̣ܢ ܫܘܪܝ ܓܒܝ̣ܠܬܐ ܪ̈ܝ̣ܫܝܬܐ ܐܢܘܢ ܘܥ̈ܠܬܐ ܕܪܘܟܒܐ ܗܢܐ ܐܘܪܓܢܝܐ. ܡܢܗܘܢ ܕܝܢ ܐ̱ܚܪ̈ܝܐ ܐܢܘܢ ܘܓܕ̈ܫܢܝܐ. ܘܐܝܬܝܗܘܢ ܗܠܝܢ ܕܡ̣ܢ ܥܝܕ̈ܐ ܘܩܘ̈ܡܬܐ ܘܐܬܪ̈ܘܬܐ ܘܟܘܪ̈ܗܢܐ ܡܬܩܢܝܢ. ܘܓܠܝܐ ܕܙܘ̈ܥܐ ܢܦ̈ܫܢܝܐ ܕܠܐ ܡܫܢܝܢ ܐܘ ܡܫܬܓܢܝ̣ܢ ܢܩܦܝ̣ܢ. ܘܠܘ ܠܗܠܝܢ ܐ̱ܚܪ̈ܝܐ ܘܓܕܫܢܝ̈ܐ ܕܡܫܢ̈ܝܢܐ ܘܡܫܬܓ̈ܢܝܢܐ ܐܢܘܢ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܙܢܝ̈ܐ ܢܦܫܢܝ̈ܐ ܠܪ̈ܘܟܒܐ ܘܡܘ̈ܙܓܐ ܕܗܕܡ̈ܐ ܡܪ̈ܢܝܐ ܘܓܘܝ̈ܐ ܢܩܝ̣ܦܝ̣ܢ ܘܠܘ ܠܗܕܡ̈ܐ ܒܪ̈ܝܐ. ܒܕܓܘܢ ܗ̇ܢܘܢ ܬܪܝܢ ܒܢܝ̈ܢܫܐ ܕܐܡ̣ܪܬܘܢ ܕܡܕܡܐ ܕܡܝܢ ܠܚܕ̈ܕܐ ܒܙܘܥܝ̈ܗܘܢ. ܘܡܫܚܠܦܝ̣ܢ ܒܪ̈ܘܟܒܝܗܘܢ ܘܡܘܙܓܝ̈ܗܘܢ. ܡܨܝܐ ܕܗܕܡܝ̈ܗܘܢ ܒܪ̈ܝܐ ܒܠܚܘܕ ܕܠܐ ܕܡܝܢ. ܐܠܐ ܗܠܝܢ ܓܘܝ̈ܐ ܠܒܐ ܠܡܐܡܪ ܘܡܘܚܐ ܘܟܒܕܐ. ܠܘ ܠܐ ܕܡܝܢ ܠܚ̈ܕܕܐ ܒܗ̇ܢܘܢ ܕܒܝܬܝܝ̈ܢ ܙܘܥܝ̈ܗܘܢ ܠܚܕ̈ܕܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܡܨܥܬ݀ ܢܦܫܐ ܠܦܓܪܐ ܐܣܪܐ ܐܝܬ ܟܝܢܝܐ. ܘܫܘ̈ܝܝ ܫܘܝ̣ܚܘܬܐ ܐܝܬܝܗܘܢ. ܘܕܝ̣ܠܢܝ̈ܐ ܐܢܘܢ ܕܚܕ̈ܕܐ ܘܠܐ ܡܫܬܚ̈ܠܦܢܐ ܡ̣ܢ ܚܕܕ̈ܐ. ܟܐܡܬ݀ ܠܐ ܡܨܝܐ ܕܗܕܐ ܢܦܫܐ ܕܦܓܪܐ ܐ̱ܚܪܝܢ ܬܗܘܐ ܢܦܫܐ. ܐܦܠܐ ܗܢܐ ܦܓܪܐ ܕܢܦܫܐ ܐ̱ܚܪܬܐ ܢܗܘܐ ܦܓܪܐ. ܘܠܘ ܗܟܢܐ ܗ̱ܘ ܢܓܪܐ ܘܐܘܪ̈ܓܢܐ ܕܝܠܗ. ܡܛܠ ܗܕܐ ܠܐ ܟܐܢܐ ܠܡܦܚܡܘܬܗܘܢ ܒܚܕ̈ܕܐ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܡܠܬܐ ܐܣܪܐ ܟܝܢܝܐ. ܘܢܩܝܦܘܬܐ ܢܨܝ̣ܒܬܐ ܕܐܝܬ ܒܝܬ ܢܦܫܐ ܠܦܓܪܐ ܡܥܒܕܘ ܡܥܒܕܝ̣ܢ ܒܚܕ̈ܕܐ. ܘܡܬܬܥܒܕܝ̣ܢ ܡ̣ܢ ܚܕ̈ܕܐ. ܘܠܘ ܗܟܢܐ ܐܘܪ̈ܓܢܐ ܘܐܘܡܢ̈ܐ. ܠܐ ܓܝܪ ܐܘܪܓܢܘܢ ܫܘܓܢܝܐ ܡܨܐ ܠܡܥܒܕ ܒܝܬܗ ܕܐܘܡܢܐ. ܐܦܠܐ ܐܘܡܢܐ ܒܐܘܪܓܢܘܢ ܟܝܢܐܝܬ. ܐܠܐ ܟܒܪ ܨܒܝܢܐܝܬ ܢܬܩܢܝ̣ܘܗܝ. ܦܘܪ̈ܫܢܐ ܡܕܝܢ ܢܦܫܢܝ̈ܐ ܕܙܢܝ̈ܐ ܕܛܠܝ̈ܐ ܗܠܝܢ. ܠܦܘܪ̈ܫܢܐ ܡܘܙܓܝ̈ܐ ܢܩܝܦܝܢ. ܗ̇ܢܘܢ ܐܝܠܝܢ ܕܠܗ ܠܟܝܢܐ ܐܕܫܢܝܐ ܕܢܦܫܐ ܒܩܢܘ̈ܡܐ ܐܛܘ̈ܡܝܐ ܡܝܩܢܝ̣ܢ. ܘܡ̣ܢ ܚܕ̈ܕܐ ܠܗܘܢ ܠܩܢܘ̈ܡܐ ܡܫܚܠܦܝ̣ܢ. ܫܘܚܠܦܐ ܐܡ̇ܪ ܐ̱ܢܐ ܓܕܫܢܝܐ. ܐܟܙܢܐ ܕܡܪܚܡܢܘܬܐ ܘܛܠܘܡܘܬܐ ܘܫܪܟܐ. ܘܠܘ ܫܘܚܠܦܐ ܐܘܣܝܝܐ.

 

ܫܪܝܐ ܕܣܥܝܐ ܚܡܝܫܝܐ:

 

ܐܡܪܝܢܢ ܕܗ̇ܝ ܕܠܐ ܢܬܡܨܐ ܚܢܢ ܠܡܦܚܡܘ ܠܙܢܝ̈ܐ ܡܕܡ ܢܦܫܢܝ̈ܐ܆ ܒܙܢܝ̈ܐ ܡܕܡ ܡܘܙܓܝ̈ܐ. ܠܐ ܡܫܘܕܥܐ ܠܗ̇ܝ ܕܠܝܬ ܠܗܘܢ ܦܚܡܐ ܥܡ ܚܕ̈ܕܐ ܗ̇ܢܘܢ ܬܪ̈ܝܗܘܢ ܛܘܦ̈ܣܐ ܕܙܢܝ̈ܐ. ܡܛܠ ܕܠܘ ܠܟܠܗܝܢ ܕܐܝܬܝܗܝܢ ܐܝܟ ܕܐܝܬܝܗܝܢ ܝ̇ܕܥܝܢܢ. ܐܠܐ ܟܡܐ ܕܡܟܢܝ̣ܢܢ ܘܡܨܝܢܢ ܠܡܕܥ. ܘܡܛܠ ܗܕܐ ܠܐ ܙܕܩ ܕܢܚܪܘܩ ܕܟܠ ܡܐ ܕܠܐ ܝ̇ܕܥܝ̣ܢܢ ܠܗ. ܠܐ ܐܝܬܘܗܝ. ܘܥܡ ܗܠܝܢ ܬܘܒ ܐܡܪܝܢܢ ܐܠܘ ܗ̇ܝ ܕܒܪܢܫܐ ܐ̱ܢܫ ܢܗܘܐ ܡܣܬܟܠ ܠܪ̈ܥܝܢܐ ܡܥܠܝ̈ܐ ܕܦܝܠܠܘܣܘܦܝܐ ܘܠܪ̈ܥܝܢܐ ܒܪܬ݀ ܩܠܝ̈ܐ ܕܓܪܡܛܝܩܝ ܠܐ ܢܣܬܟܠ. ܘܐ̱ܚܪܢܐ ܒܗܦܟܐ ܕܗܕܐ ܢܗܘܐ ܠܫܘܚ̈ܠܦܐ ܟܝܢܝ̈ܐ ܘܐܘܣ̈ܝܝܐ ܕܢܦ̈ܫܬܗܘܢ ܡܫܘܕܥܐ ܗܘܬ݀. ܙܕܩ ܗ̣ܘܐ ܠܢ ܠܡܣܒܪܘ. ܟܕ ܚܙܝܢ ܗܘܝܢ ܒܪܢܫܐ ܐ̱ܢܫ ܕܡ̣ܢ ܕܒܨܐ ܕܕܒܘܪܝܬܐ ܡܝ̣ܬ. ܘܐ̱ܚܪܢܐ ܕܡ̣ܢ ܢܘܟܬܬܐ ܕܐܟܕܢܐ ܠܐ ܡܝ̣ܬ. ܕܡܫܚ̈ܠܦܝ ܒܟܝܢܐ ܐܘܟܝܬ ܒܐܘܣܝܐ ܐܝܬܝܗܘܢ ܦܓܪ̈ܝܗܘܢ. ܗ̇ܝ ܕܫܟܝܪܐ. ܡܛܠ ܕܚܕ ܐܢܘܢ ܒܟܝܢܐ ܘܐܘܣܝܐ ܐܘܟܝ̣ܬ ܒܐܕܫܐ ܟܠܗܘܢ ܦܓܪ̈ܐ ܐ̱ܢܫܝ̈ܐ ܘܒܫܘܚ̈ܠܦܐ ܓܕܫܢܝ̈ܐ ܒܠܚܘܕ ܦܪܝ̣ܫܝ̣ܢ. ܗܟܢܐ ܡܕܝܢ ܐܦ ܘܢܦ̈ܫܬܗܘܢ.

 

ܫܪܝܐ ܕܣܥܝܐ ܫܬܝܬܝܐ:

 

ܐܡܪܝܢܢ ܕܫܘܚ̈ܠܦܐ ܕܙܢܝ̈ܐ ܗܠܝܢ ܕܐܡ̣ܪܬܘܢ ܐܦܢ ܒܚܝ̈ܘܬܐ ܠܐ ܡܠܝ̣̈ܠܬܐ. ܥܠ ܫܘܚ̈ܠܦܐ ܐܘܣܝܝ̈ܐ ܕܟܝܢܝ̈ܗܝܢ ܐܕܫܢܝ̈ܐ ܡܫܘܕܥܝ̣ܢ. ܐܠܐ ܠܘ ܗܟܢܐ ܐܦ ܒܒܢܝ̈ܢܫܐ. ܒܗܝ ܕܒܒܢܝ̈ܢܫܐ ܡ̇ܢ܆ ܨܒܝܢܐ ܫܠܝ̣ܛ ܗ̣ܘ ܥܠܝܗܘܢ ܕܚܫ̈ܐ ܗܠܝܢ ܠܡܣܦܘܬܗܘܢ ܘܠܡܒܨܪܘܬܗܘܢ. ܘܐܠܘ ܫܘܚ̈ܠܦܐ ܗ̣ܘܘ ܐܘܣܝܝ̈ܐ ܠܘ ܡܩܒ̈ܠܢܐ ܗ̣ܘܘ ܕܬܘܣܦܬܐ ܘܒܘܨܪܐ. ܐܟܡܐ ܕܐܦ ܒܚܝ̈ܘܬܐ. ܗܐ ܓܝܪ ܠܐ ܕܐܒܐ ܚܪܡܘܬܗ ܡܨܐ ܠܡܫܒܩ. ܐܦܠܐ ܥܪܒܐ ܡܫܝܢܘܬܗ. ܐܦܠܐ ܬܘܒ ܨܦܪܐ ܫܪܝ̣ܚܘܬܗ̇ ܬܟܣܐ. ܐܦܠܐ ܫܘܦܢܝ̣ܢܐ ܢܟܦܘܬܗ ܡܘܒܕ. ܘܡ̣ܢ ܗܠܝܢ ܝ̣ܕܝ̣ܥܐ ܕܙܢܝ̈ܐ ܕܐܝܟ ܗܠܝܢ ܦܘܪ̈ܫܢܐ ܐܢܘܢ ܐܘܣܝܝ̈ܐ ܕܟܠܚܕ ܡ̣ܢ ܐܕܫ̈ܐ ܕܚܝ̈ܘܬܐ ܠܐ ܡܠܝ̣̈ܠܬܐ. ܘܦܘܪ̈ܫܢܐ ܓܕܫܢܝ̈ܐ ܕܟܠܚܕ ܡ̣ܢ ܩܢܘ̈ܡܐ ܐ̱ܢܫܝ̈ܐ. ܕܠܡܘܙܓܝ̈ܗܘܢ ܢܩܝ̣ܦܝܢ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠ ܦܘܪܫܢܗܘܢ ܕܩܢܘ̈ܡܐ ܐ̱ܢܫܝ̈ܐ ܠܦܘܬ ܚܝ̈ܐ ܬܠܝ̈ܬܝܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܦܘܪ̈ܫܢܐ ܕܒܙܢܐ ܕܚܝܠܢ ܡܠܝ̣ܠܐ. ܘܒܗ ܐܝܬ ܬܐܘܪ̈ܝܐܣ ܬܪܬܝܢ. ܬܐܘܪܝܐ ܩܕܡܝܬܐ ܡܛܠܬܗܘܢ ܕܙܢܝ̈ܐ ܡܫܚ̈ܠܦܐ ܕܡܠܝ̣ܠܘܬܐ

 

ܐܡܪܝܢܢ ܕܬܠܬܐ ܐܢܘܢ ܚܝ̈ܠܐ ܕܒܢ. ܡܠܝ̣ܠܘܬܐ ܘܚܡܬܐ ܘܪܓܬܐ. ܘܡܠܝܘܬܐ ܡ̇ܢ܆ ܗ̣ܝ ܐܝܬܝܗ̇ ܡܕܪܟܢܘܬܢ ܗܘܢܢܝܬܐ ܘܡܘܚܐ ܗ̱ܘ ܩܠܝܬܗ̇. ܘܗ̣ܝ ܗܕܐ ܬܪܝܢܐܝܬ ܐܝܬܝܗ̇. ܟܝܢܝܬܐ ܘܡܬܩܢܝܢܝܬܐ. ܘܟܝܢܝܬܐ ܡ̇ܢ܆ ܐܝܟ ܗ̇ܝ ܕܝ̇ܕܥܝ̣ܢܢ ܕܬܪܝܢ ܦܠܓܐ ܗ̱ܘ ܕܐܪܒܥܐ. ܘܟܠܐ ܪܒ ܡ̣ܢ ܡܢܬܐ. ܘܚܕ ܓܘܫܡܐ ܒܚܕ ܙܒܢܐ ܒܬܪܝܢ ܕܘܟ̈ܝܢ ܠܐ ܡܨܐ ܠܡܗܘܐ. ܘܗܠܝܢ ܡ̇ܢ ܘܫܪܟܐ ܕܐܝܟ ܗܠܝܢ ܡܕܪ̈ܟܢܘܬܐ. ܐܦܢ ܠܟܠܗܘܢ ܒܢܝ̈ܢܫܐ ܫܟܝ̣ܚܝ̣ܢ. ܐܠܐ ܓܠܝܐ ܕܠܘ ܫܘܝܐܝܬ. ܘܡܬܩܢܝܢܝܬܐ ܡ̇ܢ ܠܬܪܬܝܢ ܡܬܦܠܓܐ. ܠܝܕ̈ܥܬܐ ܚܘܫܒܝ̈ܬܐ ܘܟܬܒܝ̈ܬܐ. ܘܠܐܘܡܢ̈ܘܬܐ ܕܒܗܝܢ ܫܦܝܪ ܚܝܐ ܐ̱ܢܫ ܒܥܠܡܐ ܗܢܐ. ܘܡ̣ܢ ܒܢܝ̈ܢܫܐ ܡ̇ܢ ܐܝܬ ܗ̣ܘ ܐ̱ܢܫܝ̈ܢ ܕܒܬܪ̈ܝܗܘܢ ܙܢܝ̈ܐ ܗܠܝܢ ܡܫܡܠܝܢ ܘܓܡܝ̣ܪܝܢ. ܘܐܝܬܝܗܘܢ ܚܕ ܚܕ̈ܢܐ. ܘܐܝܬ ܗ̣ܘ ܕܒܬܪ̈ܝܗܘܢ ܚܣܝ̣ܪܝܢ ܘܒܨܝ̣ܪܝܢ. ܘܐܝܬܝܗܘܢ ܣܓܝ̈ܐܐ. ܘܐܝܬ ܕܒܝܕ̈ܥܬܐ ܡ̇ܢ ܡܝܬܪܝ̣ܢ ܘܒܐܘܡܢ̈ܘܬܐ ܒܘܪ̈ܝ̣ܢ. ܘܐܝܬ ܕܒܐܘܡܢ̈ܘܬܐ ܡܗܝ̣ܪܝܢ ܘܒܝܕ̈ܥܬܐ ܗܕܝܘ̈ܛܝ̣ܢ. ܘܐܝܬܝܗܘܢ ܡܨܥܝ̈ܐ. ܘܕܪ̈ܓܐ ܡ̇ܢ ܕܝܕ̈ܥܬܐ ܡܬܩܢ̈ܝܢܝܬܐ ܐܦܢ ܣܓܝ̈ܐܝܢ. ܐܠܐ ܒܬܠܬܐ ܙܢܝ̈ܐ ܡܬܚܒܫܝ̣ܢ.

 

ܙܢܐ ܩܕܡܝܐ:

 

ܡܢܗܘܢ ܡ̇ܢ ܕܒܢܝ̈ܢܫܐ. ܒܟܠܗܝܢ ܝܕ̈ܥܬܐ ܐܟܚܕܐ ܡܗܝ̣ܪܝ̣ܢ ܘܐܝܬܝܗܘܢ ܚܕ ܚܕ̈ܢܐ. ܡܢܗܘܢ ܕܝܢ ܒܟܠܗܝܢ ܒܘܪ̈ܝ̣ܢ ܘܐܝܬܝܗܘܢ ܣܓܝ̈ܐܐ. ܘܡܢܗܘܢ ܡ̇ܢ ܒܡܢܗܝܢ ܡܝܬܪܝܢ ܘܒܡܢܗܝܢ ܒܘܪܝ̣ܢ. ܘܗ̣ܢܘܢ ܗܠܝܢ ܕܪ̈ܓܐ ܡܦܬܟ̈ܐ ܐܢܘܢ. ܒܗܝ ܕܐ̱ܢܫܝ̈ܢ ܡ̇ܢ ܠܝܘܠܦܢ̈ܐ ܥܣ̈ܩܐ ܝܬܝܪ ܦܫܝ̣ܩܐܝܬ ܝܠܦܝ̣ܢ. ܘܠܗ̇ܢܘܢ ܦܫܝ̣̈ܩܐ ܥܣܩܐܝܬ. ܐܝܟ ܗ̇ܘ ܕܚܙܝܬ ܕܠܟܠܗܘܢ ܟܬܒ̈ܐ ܕܥܬܝ̣ܩܬܐ ܘܕܚܕܬܐ ܘܕܡܠܦܢ̈ܐ ܚܬܝ̣ܬܐܝܬ ܡܩܪܐ ܗ̣ܘܐ ܘܠܪ̈ܥܝܢܝܗܘܢ ܢܗܝܪܐܝܬ ܡܦܫܩ ܗ̣ܘܐ. ܘܡ̣ܢ ܣܝܘܡܘܬ ܡܠܬܐ ܕܒܐܓܪܬܐ ܚ̇ܐܒ ܗ̣ܘܐ. ܘܚܙܝܬ ܐ̱ܚܪܢܐ ܒܗܦܟܐ ܕܗܢܐ. ܘܚܙܝܬ ܐ̱ܚܪܢܐ ܕܠܟܠܗܘܢ ܟܬܒ̈ܐ ܚܬܝ̣ܬܐܝܬ  ܡܫܠܡ ܗ̣ܘܐ ܩܪܝܢܗܘܢ ܠܬܠܡܝ̈ܕܐ. ܘܟܕ ܗ̣ܘ ܩܪܝܢܐ ܡܕܡ ܐܘ ܡܐܡܪܐ ܩ̇ܪܐ ܗ̣ܘܐ ܒܥܕܬܐ. ܒܕܘܟ̈ܝܬܐ ܣܓܝ̈ܐܬܐ ܡܬܬܩܠ ܗ̣ܘܐ ܘܦ̇ܐܕ.

 

ܙܢܐ ܬܪܝܢܐ ܕܪ̈ܓܐ ܕܝܕ̈ܥܬܐ ܡܬܩܢ̈ܝܢܝܬܐ

 

ܘܡܢܗܘܢ ܬܘܒ ܕܒܢܝ̈ܢܫܐ ܐܝܬ ܗ̣ܘ ܕܩܠܝ̣ܠܐܝܬ ܝ̇ܠܦܝܢ ܘܡܫܘܚܪܐܝܬ ܛܥܝܢ. ܐܘ ܣܟ ܠܐ ܛܥܝܢ. ܘܗ̇ܢܘ ܕܪܓܐ ܕܝܬܝܪ ܡܥܠܝ. ܘܐܝܬ ܗ̣ܘ ܐ̱ܚܪܢܐ ܕܡܫܘܚܪܐܝܬ ܝ̇ܠܦܝ̣ܢ ܘܩܠܝ̣ܠܐܝܬ ܛܥܝܢ. ܘܗ̇ܢܘ ܕܪܓܐ ܕܝܬܝܪ ܡܬܚܬܝ. ܘܐܝܬ ܗ̣ܘ ܐ̱ܚܪ̈ܢܐ ܕܩܠܝ̣ܠܐܝܬ ܝ̇ܠܦܝ̣ܢ. ܘܩܠܝܠܐܝܬ ܛܥܝܢ. ܘܐ̱ܚܪ̈ܢܐ ܕܡܫܘܚܪܐܝܬ ܝ̇ܠܦܝܢ. ܘܡܫܘܚܪܐܝܬ ܛܥܝܢ. ܘܬܪ̈ܝܗܘܢ ܗܠܝܢ ܕܪ̈ܓܐ ܡܨܥܝ̈ܐ ܐܢܘܢ. ܐܠܐ ܗܢܐ ܐ̱ܚܪܝܐ ܡܝܬܪ ܗ̣ܘ ܡ̣ܢ ܗ̇ܘ ܕܩܕܡܘܗܝ. ܝܬܝܪܐܝܬ ܟܕ ܒܚܦܝ̣̈ܛܐ ܡܫܬܟܚ.

 

ܙܢܐ ܬܠܝܬܝܐ ܕܕܪ̈ܓܐ ܕܝܕ̈ܥܬܐ ܡܬܩܢ̈ܝܢܝܬܐ

 

ܡܢܗܘܢ ܡ̇ܢ ܕܒܢܝ̈ܢܫܐ ܚܬܝ̣ܬܐܝܬ ܡܣܬܟܠܝܢ ܗ̇ܘ ܡܐ ܕܝ̇ܠܦܝܢ. ܡܢܗܘܢ ܕܝܢ ܠܘ ܚܬܝ̣ܬܐܝܬ. ܘܗ̇ܢܘܢ ܕܚܬܝ̣ܬܐܝܬ ܝ̇ܠܦܝܢ. ܐܘ ܡܨܝܢ ܠܡܘܣܦܘ ܥܠ ܗ̇ܘ ܡܐ ܕܝ̣ܠܦܘ ܐܘܟܝܬ ܥܠ ܟܟܪ̈ܐ ܕܩܒܠܘ. ܐܘ ܠܐ ܡܨܝܢ. ܘܗ̇ܢܘܢ ܕܠܘ ܚܬܝ̣ܬܐܝܬ ܡܣܬܟܠܝ̣ܢ ܗ̇ܘ ܡܐ ܕܝ̇ܠܦܝܢ. ܐܘ ܟܠܢܐܝܬ ܠܐ ܡܣܬܟܠܝ̣ܢ. ܐܘ ܒܨܝ̣ܪܐܝܬ ܡܣܬܟܠܝܢ. ܐܘ ܒܙܢܐ ܕܣܩܘܒܠܝ ܡܣܬܟܠܝܢ. ܘܡ̣ܢ ܟܠܗܘܢ܆ ܗܢܐ ܐ̱ܚܪܝܐ ܫܟܝ̣ܪ ܘܣܢܐ ܘܥܣܩ ܠܐܣܝܘܬܐ. ܒܗ̇ܝ ܕܥܡ ܗ̇ܝ ܕܓܠܝ̣ܙܝ̣ܢ ܡ̣ܢ ܝܕܥܬܐ ܚܬܝ̣ܬܬܐ ܘܡܪܢܝܬܐ. ܝܕܥܬܐ ܐ̱ܚܪܬܐ ܕܣܩܘܒܠܝܐ ܠܗ̇ܝ ܡܪܢܝܬܐ ܩܢܝܢ.

 

 

 

ܬܐܘܪܝܐ ܬܪܝܢܝܬܐ. ܡܛܠ ܥ̈ܠܬܗܘܢ ܕܙܢܝ̈ܐ ܡܫܚ̈ܠܦܐ ܕܚܝܠܐ ܡܠܝ̣ܠܐ ܕܒܢ. ܥܠܬܐ ܩܕܡܝܬܐ

 

ܐܡܪܝܢܢ ܕܠܡܘܚܐ ܡ̇ܢ ܬܠܬ ܐܝܬ ܟܪ̈ܣܬܐ. ܩܘܕܡܢܝܬܐ ܗ̇ܝ ܕܒܗ̇ ܗܘܝܐ ܦܢܛܣܝܐ. ܘܡܨܥܝܬܐ ܗ̇ܝ ܕܒܗ̇ ܗܘܝܐ ܡܚܫܒܬܐ. ܘܒܣܬܪܝܬܐ ܗ̇ܝ ܕܒܗ̇ ܗܘܐ ܥܘܗܕܢܐ. ܘܗ̣ܝ ܟܪܣܐ ܩܘܕܡܢܝܬܐ ܪܛܝ̣ܒܐ ܙܕܩ ܕܢܗܘܐ ܡܘܙܓܗ̇ ܥܡ ܝܒܝ̣ܫܘܬܐ ܒܨܝ̣ܪܬܐ. ܐܝܟܢܐ ܕܦܫܝ̣ܩܐܝܬ ܬܩܒܠ ܠܨܘܪ̈ܬܐ ܕܡܬܪ̈ܓܫܢܐ ܕܒܗ̇ ܐܝܟ ܕܡܘܚܐ ܡܬܪ̈ܫܡܢ. ܒܝܕ ܪܛܝ̣ܒܘܬܐ. ܘܥܣܩܐܝܬ ܢܬܠܚ̈ܝܢ ܡܢܗ̇ ܒܥܠܬ݀ ܝܒܝ̣ܫܘܬܐ ܡܡܫܚܬܐ. ܘܡܛܠ ܗܕܐ ܝܕ̈ܥܬܐ ܕܒܩܘܡܬܐ ܛܠܝܝܬܐ ܡܬܝܠܦ̈ܢ: ܝܬܝܪ ܡܝܬܪ̈ܢ. ܒܗ̇ܝ ܕܪ̈ܘܚܐ ܡܘܚ̈ܝܬܐ ܒܛܠܝܘܬܐ ܒܥܠܬ݀ ܪܛܝ̣ܒܘܬܗܝܢ ܕܠܝ̣ܠܐܝܬ ܡܩܒ̈ܠܢ ܠܨܘܪ̈ܬܐ ܗ̇ܢܝܢ. ܐܝܛܐ ܟܡܐ ܕܪܒܝܐ ܩܘܡܬܐ ܣܓܝܐ ܝܒܝ̣ܫܘܬܐ ܗ̇ܝ ܕܐܦܢ ܥܣܩܐܝܬ ܡܩܒܠܐ ܠܨܘܪ̈ܘܬܐ ܐ̱ܚܪ̈ܢܝܬܐ. ܐܠܐ ܠܗ̇ܢܝܢ ܕܡ̣ܢ ܟܕܘ ܐܬܬܨܝܪ̈ܝܢ ܒܡܘܚܐ ܠܐ ܝܗܒܐ ܠܗܝܢ ܠܡܬܠܚܝܘ. ܪ̈ܘܚܐ ܕܝܢ ܕܒܟܪܣܐ ܡܨܥܝܬܐ܆ ܡܘܙܓܐ ܕܚܡܝܡ ܙܕܩ ܕܢܗܘܐ ܠܗܝܢ. ܒܗ̇ܝ ܕܡܚܫܒܬܐ ܒܝܕ ܣܘܠܓܣ̈ܐ ܗܘܝܐ. ܘܣܘܠܓܣ̈ܐ ܙܘ̈ܥܐ ܐܢܘܢ. ܘܙܘ̈ܥܐ ܡ̣ܢ ܚܡܝܡܘܬܐ ܗܘܝܢ ܘܚܡܝ̣ܡܘܬܐ ܡܘܠܕܝܢ. ܘܗ̣ܝ ܚܡܝܡܘܬܐ ܗ̣ܝ ܗܟܘܬ ܡܡܫܚܬܐ ܙܕܩ ܕܬܗܘܐ. ܒܗ̇ܝ ܕܐܠܘ ܬܩܦܬ݀܆ ܙܘ̈ܥܐ ܥܒܕܐ ܠܐ ܡܛܟ̈ܣܐ ܒܡܚܫܒܬܐ. ܘܐܠܘ ܙܥܪܬ݀܆ ܠܐ ܡܬܬܙܝ̣ܥܢܘܬܐ ܘܫܛܘܪܘܬܐ ܥܒ̇ܕܐ. ܘܪ̈ܘܚܐ ܬܘܒ ܕܒܟܪܣܐ ܒܣܬܪܝܬܐ. ܨܠܝ̈ܬ݀ ܠܝܒܘܫܘܬܐ ܡܥܕ ܠܡܬܢܛܪܘ ܥܘܗܕܢܐ.

 

ܥܠܬܐ ܬܪܝܢܝܬܐ:

 

ܐܡܪܝܢܢ ܕܒܫܒܝ̣ܠܐ ܗ̇ܘ ܕܒܝܬ ܟܪܣܐ ܩܘܕܡܢܝܬܐ ܘܟܪܣܐ ܡܨܥܝܬܐ. ܓܘܫܡܐ ܡܕܡ ܕܡܐ ܠܬܘܠܥܐ ܐܝܬ ܘܒܙܒܢ ܙܒܢ ܡܬܦܫܛ ܘܡܬܩܛܢ. ܘܡܬܦܬܚ ܗ̣ܘ ܫܒܝܠܐ. ܘܪܕܝܐ ܪܘܚܐ ܡ̣ܢ ܟܪܣܐ ܩܘܕܡܢܝܬܐ ܠܗ̇ܝ ܡܨܥܝܬܐ. ܘܡܬܝܒ̈ܠܢ ܨܘܪ̈ܬܐ ܡ̣ܢ ܦܢܛܣܝܐ ܠܡܚܫܒܬܐ. ܘܒܙܒܢ ܙܒܢ ܡܬܩܦܣ ܘܡܬܥܒܐ ܘܣ̇ܟܪ ܠܗ ܠܫܒܝ̣ܠܐ. ܘܡܙܕܓܪܐ ܪܘܚܐ ܡ̣ܢ ܪܕܝܐ. ܘܡܬܟܠܝ̈ܢ ܨܘܪ̈ܬܐ ܡ̣ܢ ܝܘܒܠܐ. ܒܕܓܘܢ ܟܠ ܒܪܢܫܐ ܕܩܪܝܪ ܡܘܙܓ ܡܘܚܗ. ܘܥܒܝܐ ܒܐܘܣܝܗ. ܥܛܠܐܝܬ ܡܬܬܙܝ̣ܥ ܘܡܬܩܛܢ ܒܗ ܓܘܫܡܐ ܗܢܐ ܬܘܠܥܢܝܐ. ܘܡܛܠ ܗܕܐ ܡܫܘܚܪܐܝܬ ܡܣܬܟܠ. ܘܒܨܝ̣ܪܐܝܬ ܡܬܢܗܪ ܘܡܬܝ̣ܢܐܝܬ ܡܦܢܐ. ܘܗ̇ܘ ܕܚܡܝܡ ܡܘܙܓ ܡܘܚܗ. ܡܣܪܗܒܐܝܬ ܡܣܬܟܠ ܘܡܦܢܐ.

 

ܥܠܬܐ ܬܠܝܬܝܬܐ:

 

ܐܡܪܝܢܢ. ܕܐܣܟܡܐ ܡܝܬܪܐ ܘܟܝܢܝܐ ܕܪܝܫܐ ܗ̇ܘ ܗ̣ܘ ܕܠܘ ܚܬܝ̣ܬܬܐ ܬܗܘܐ ܐܣܦܝ̣ܪܢܝܘܬܗ. ܐܠܐ ܐܝܟ ܗ̇ܘ ܕܢܗܘܐ ܟܒܝ̣ܫ ܥܠ ܬܪ̈ܝܗܘܢ ܣܛܪ̈ܘܗܝ ܕܡ̣ܢ ܝܡܝܢܐ ܘܣܡܠܐ. ܐܝܟܢܐ ܕܚܘܓܬܐ ܡܕܡ ܡ̣ܢ ܩܘܕܡܐ ܠܗ ܬܗܘܐ. ܘܐ̱ܚܪܬܐ ܡ̣ܢ ܒܣܬܪܐ ܕܙܥܘܪܝܐ ܡ̣ܢ ܗ̇ܝ ܩܘܕܡܢܝܬܐ. ܒܗ̇ܝ ܕܩܘܕܡܢܝܬܐ ܠܬܪܬܝܢ ܟܪ̈ܣܬܐ ܡܬܦܠܓܐ. ܘܠܘ ܗܟܢܐ ܒܣܬܪܝܬܐ. ܒܕܓܘܢ ܐܢ ܚܘܓܬܐ ܗ̇ܝ ܩܘܕܡܢܝܬܐ ܡܬܓܠܙܐ. ܦܢܛܣܝܐ ܡܙܕܡܝܐ. ܐܢ ܕܝܢ ܗ̇ܝ ܒܣܬܪܝܬܐ܆ ܥܘܗܕܢܐ ܡܣܬܓܦ. ܐܢܕܝܢ ܬܪ̈ܬܝܗܝܢ܆ ܬܪ̈ܝܗܘܢ. ܘܦܢܛܣܝܐ ܘܥܘܗܕܢܐ.

 

ܥܠܬܐ ܪܒܝܥܝܬܐ:

 

ܐܡܪܝܢܢ ܕܪܝܫܐ ܘܦܓܪܐ. ܐܘ ܬܪ̈ܝܗܘܢ ܢܗܘܘܢ ܪܘܪ̈ܒܝܢ. ܐܘ ܬܪ̈ܝܗܘܢ ܢܗܘܘܢ ܙܥܘܪܝܢ. ܐܘ ܪܝܫܐ ܡ̇ܢ ܢܗܘܐ ܙܥܘܪܐ. ܦܓܪܐ ܕܝܢ ܪܒܐ. ܐܘ ܒܗܦܟܐ. ܘܒܗ̇ܘ ܩܕܡܝܐ ܡ̇ܢ ܐܦ ܡܘܚܐ ܐܦ ܠܒܐ ܚܝܠܬܢ̈ܐ ܗܘܝܢ. ܘܡܫܡܠܝܐ ܗܘܐ ܒܗܘܢ ܒܪܢܫܐ. ܘܒܗ̇ܘ ܕܬܪܝܢ ܚܣܝ̣ܪܐ ܒܬܪ̈ܝܗܘܢ ܗܘܐ ܒܪܢܫܐ. ܘܒܗ̇ܘ ܕܬܠܬܐ. ܠܒܐ ܡ̇ܢ ܚܝܠܬܢܐ ܗܘܐ ܘܣܓܝ ܚܡܝܡܘܬܐ. ܘܡܘܚܐ ܙܥܘܪܐ ܘܒܨܝ̣ܪ ܩܪܝܪܘܬܐ. ܘܡܛܠܗܕܐ ܕܠܝ̣ܠ ܠܡܬܚܡܬܘ. ܘܠܡܪܓܙ ܗܘܐ ܒܪܢܫܐ ܗ̇ܘ. ܘܒܗ̇ܘ ܕܐܪܒܥܐ ܠܒܐ ܡ̇ܢ ܙܥܘܪܐ ܗܘܐ. ܘܡܘܚܐ ܪܒܐ ܒܥܠܬ݀ ܝܬܝ̣ܪܘܬܐ ܕܗܘܠܐ. ܘܡܛܠܗܕܐ ܠܘ ܡܨ̈ܠܠܐ ܘܢܗܝܪ̈ܐ ܗܘܝܢ ܚܝܠܘ̈ܗܝ ܡܕܪ̈ܟܢܝܐ. ܕܡܘܬ ܫܪܓܐ ܡܕܡ ܒܡܕܡ ܡ̣ܢ ܒ̈ܬܐ ܕܫܛܚ̈ܐ ܘܪ̈ܘܝ̣ܚܐ. ܘܓܠܝܐ ܕܒܒ̈ܬܐ ܙܥܘܪ̈ܐ ܕܐܠܝ̣ܨܝܢ ܛܒ ܡܢܗܪ. ܒܕܓܘܢ ܒܪܢܫܐ ܗ̇ܘ. ܙܥܘܪ ܣܘܟܠܐ. ܘܚܠܫ ܠܒܐ ܗܘܐ.

 

 

 

ܢܝܫܐ ܬܪܝܢܐ ܡܛܠ ܦܘܪ̈ܫܢܐ ܕܒܙܢܐ ܕܚܝܠܢ ܚܡܬܢܐ

 

ܘܚܝܠܐ ܡ̇ܢ ܚܡܬܢܐ. ܗܘܝܘ ܗ̇ܘ ܕܒܗ ܘܒܐܝ̈ܕܘܗܝ ܡܬܡܨܝܢܢ ܠܡܩܢܐ ܗ̇ܘ ܡܐ ܕܡܗܢܐ ܐܘ ܡܣܬܒܪ ܕܡܗܢܐ ܠܚܝܘܬܢܝܘܬܢ. ܘܠܡܕܚܐ ܗ̇ܘ ܡܐ ܕܡܙܡܐ. ܐܘ ܡܣܬܒܪ ܕܡܗܢܐ ܐܘܢܗ ܡ̇ܢ ܐܝܬܘܗܝ܆ ܠܒܐ. ܘܠܗ ܠܠܒܐ ܬܪܬܝܢ ܐܝܬ ܟܪ̈ܣܬܐ ܪܘܪ̈ܒܬܐ ܡ̣ܢ ܝܡܝܢܐ ܘܡ̣ܢ ܣܡܠܐ. ܘܒܚܠܝ̣ܠܐ ܗ̇ܘ ܣܡܠܝܐ ܡܬܝ̣ܠܕ ܓܘܫܡܐ ܐܐܪܝܐ ܘܩܛܝ̣ܢܐ ܘܪܘܚܢܝܐ. ܘܡܢܗ ܒܝܕ ܫܪ̈ܝܢܐ܆ ܠܟܠܗ ܦܓܪܐ ܡܬܝܒܠ. ܘܚܝܠ ܚܝܘܬܐ ܘܚܡܝ̣ܡܘܬܐ ܟܝܢܝܬܐ ܠܗܕ̈ܡܐ ܡܫܟܢ. ܘܒܗ ܒܗܢܐ ܚܝܠܐ ܗܘܝܐ ܚܕܘܬܐ ܘܥܩܬܐ ܘܚܡܬܐ. ܒܕܓܘܢ ܗ̣ܝ ܚܡܝ̣ܡܘܬܐ. ܐܢ ܥܫܝܢܬܐ ܗ̇ܘܝܐ܆ ܫܦܠܘܬܐ. ܘܐܢ ܡܡܫܚܬܐ ܚܝܠܬܢܘܬܐ ܝ̇ܗܒܐ ܕܗ̣ܝ ܡܩܠܣܐ. ܗ̣ܘ ܗܟܘܬ ܘܚܦܝ̣ܛܘܬܐ ܘܬܪܡܘܛܘܬܐ ܘܣܘܪܗܒܐ ܘܫܘܘܚܪܐ ܕܒܡ̈ܠܐ ܘܣܘܥܪ̈ܢܐ. ܘܗ̣ܘ ܗܢܐ ܚܝܠܐ ܐܦ ܠܚܝ̈ܘܬܐ ܒܥܪܝ̣ܪ̈ܝܬܐ ܝܬܝܪ ܥܫܝܢܐܝܬ ܫܟܝ̣ܚ ܒܕܠܐ ܡܬܬܟܣ ܒܗܝܢ ܡ̣ܢ ܚܝܠܐ ܡܠܝ̣ܠܐ ܐܟܡܐ ܕܒܢ. ܒܕܓܘܢ ܟܕ ܗ̣ܘ ܠܒܐ ܘܡܘܚܐ ܡܡܫ̈ܚܐ ܗܘܝܢ. ܗ̣ܢܝܢ ܗܠܝܢ ܣܥܘܪ̈ܘܬܐ ܝܬܝܪ ܦܐܝܐܝܬ ܡܫܬܟܚܝܢ. ܐܢܕܝܢ ܠܐ ܡܡܫ̈ܚܐ ܗ̇ܘܝܐ. ܡܪܚܘܬܐ ܥܒܕܐ. ܘܐܢ ܡܚܝ̣ܠܬܐ ܒܝܬܝ̣ܪܘܬܐ ܘܒܨܝ̣ܪܘܬܐ܆ ܡܪܚܘܬܐ ܘܬܚܘܒܘܬܐ ܥܒ̇ܕܝܢ. ܘܙܒܢܝ̈ܢ ܣܓܝ̈ܐܢ ܟܕ ܡܘܚܐ ܡܛܟܣܐ ܘܡܡܫܚܐ ܗ̇ܘܐ. ܘܐܦܢ ܠܒܐ ܡܚܝ̣ܠܐ ܗ̇ܘܐ. ܣܥܘܪ̈ܘܬܐ ܕܐܬܠܝ̣̈ܣܐ ܝ̇ܗܒ ܠܗܘܢ ܠܫܦ̈ܠܐ ܠܡܫܡܠܝܘ ܒܡܕܒܪܢܘܬܐ. ܐܢܕܝܢ ܠܐ ܡܡܫܚܐ ܢܗܘܐ ܗ̣ܘ ܡܘܚܐ. ܙܒܢܝ̈ܢ ܣܓܝ̈ܐܢ ܐܦ ܗ̇ܢܘܢ ܕܝܬܝܪ ܢܚܫܝ̣ܪ̈ܬܢܝܢ. ܐܝܟ ܚܠܫ̈ܐ ܢܦ̇ܠܝܢ ܘܡܙܕܟܝܢ. ܘܥܠܬ݀ ܒܠܝ̣ܠܘܬ ܕܘܒܪܐ ܕܒܩܐܪܣܐ. ܘܙܒܢܝ̈ܢ ܬܘܒ ܣܓܝ̈ܐܢ. ܐܦ ܠܡܛܟ̈ܣܝ ܗܘܢܐ. ܠܒܐ ܕܥܫܝ̣ܢ ܠܘܬ ܠܐ ܡܛܟܣܘܬܐ ܘܒܥܪܝ̣ܪܝܘܬܐ ܡܦܩ ܐܢܘܢ.

 

 

 

ܢܝܫܐ ܬܠܝܬܝܐ. ܡܛܠ ܦܘܪ̈ܫܢܐ ܕܒܙܢܐ ܕܚܝܠܢ ܪܝܘܓܬܢܐ

 

ܘܚܝܠܐ ܡ̇ܢ ܪܓܘܓܐ ܕܒܢ ܗ̇ܘ ܕܟܒܕܐ ܗ̱ܝ ܪܝ̣ܫܝ̣ܬܗ. ܐܘ ܒܡܬܐܟܠܢ̈ܝܬܐ ܗ̇ܘܐ ܐܘ ܒܡܫܬܬܝܢ̈ܝܬܐ ܐܘ ܒܡܫܬܘܬܦܢ̈ܝܬܐ. ܘܙܕܩ ܠܡܕܥ. ܕܗ̣ܘ ܦܓܪܐ ܐܘ ܪܒܐ ܗܘܐ ܐܘ ܙܥܘܪܐ. ܗܟܘܬ ܘܐܣܛܘܡܟܐ ܐܘ ܪܒܬܐ ܗ̇ܘܝܐ ܐܘ ܙܥܘܪܬܐ. ܘܗ̣ܝ ܡܪܓܫܢܘܬܐ ܕܒܟܦܢܐ. ܒܝܕ ܡܢܬܐ ܡܕܡ ܕܡܪܬܐ ܐܘܟܡܬܐ ܟܝܢܝܬܐ. ܗ̇ܝ ܕܡ̣ܢ ܛܚܠܐ ܒܦܘܡܗ̇ ܕܐܣܛܘܟܣܐ ܒܝܕ ܫܒܝ̣ܠܐ ܕܒܝܢܬܗܘܢ ܡܫܬܦܥܐ ܘܡܢܟܬܐ ܘܡܚܬܚܬܐ ܠܗ܆ ܗ̇ܘܝܐ. ܒܕܓܘܢ ܐܢܗܘ ܕܗ̣ܘ ܦܓܪܐ ܪܒܐ ܢܗܘܐ. ܘܐܣܛܘܡܟܐ ܗܟܘܬ ܪܒܬܐ. ܘܫܒܝ̣ܠܐ ܗ̇ܘ ܪܘܝ̣ܚܐ. ܗܝܕܝܢ ܝܬܝܪ ܥܫܝ̣ܢܐ ܗܘܐ ܟܦܢܐ. ܐܢ ܕܝܢ ܒܗܦܟܐ ܕܗܟܢ ܢܗܘܘܢ. ܒܨܝ̣ܪ ܗܘܐ ܟܦܢܐ. ܐܢܕܝܢ ܡܨܥܝ̈ܐ ܡܨܥܝܐ. ܒܗ̇ ܒܕܡܘ̣ܬܐ ܘܐܝܢܝ̈ܘܬܗ̇ ܕܟܒܕܐ ܘܪܒܘܬܗ̇ ܘܙܥܘܪܘܬܗ̇ ܘܪܘܝ̣ܚܘܬ ܘܪ̈ܝ̣ܕܐ ܕܢܦܩ̣ܝܢ ܡ̣ܢ ܐܘܣܝܐ ܕܝܠܗ̇ ܘܐܠܝ̣ܨܘܬܗܘܢ ܘܐܝܢܝ̈ܘܬܐ ܕܬܘܪ̈ܣܝܐ ܘܫܩ̈ܝܐ ܦܫܝ̣̈ܛܐ ܘܡܪ̈ܟܒܐ. ܥ̈ܠܬܐ ܐܢܘܢ ܕܥܘܫܢܗ ܕܟܦܢܐ ܘܡܚܝ̣ܠܘܬܗ. ܘܙܕܩ ܠܡܕܥ. ܕܗ̇ܢܘܢ ܕܦܠܓܡܐ ܛܠܘܫܐ ܥܠܒ ܥܠ ܐܣܛܘܡ̈ܟܝܗܘܢ. ܠܡܐܟ̈ܠܬܐ ܚܪ̈ܝ̣ܦܬܐ ܘܨܪ̈ܘܦܘܬܐ ܘܚܪ̈ܘܩܬܐ ܪܐܓܝ̣ܢ. ܘܗ̇ܢܘܢ ܕܝܒܝܫܘܬܐ ܥܠܒܐ ܥܠ ܐܣܛܘܡ̈ܟܝܗܘܢ. ܠܡܐܟ̈ܠܬܐ ܕܗܝ̈ܢܬܐ ܘܚܠܝ̈ܬܐ ܪܐܓܝ̣ܢ. ܘܗܟܢܐ ܦܚܡ ܗܠܝܢ ܕܫܪܟܐ. ܦܘܪ̈ܫܢܐ ܕܝܢ ܕܒܢܝ̈ܢܫܐ ܒܪܓܬ݀ ܫܘܬܦܘܬܐ ܗܘܝܢ. ܒܥܠܬ݀ ܗ̇ܝ ܕܡܘܙܓܐ ܕܚܡܝ̣ܡ ܘܪܛܝ̣ܒ ܟܠܢܐܝܬ ܒܝܬܝ ܠܗ̇. ܩܪܝܪܐ ܕܝܢ ܘܝܒܝ̣ܫܐ ܟܠܢܐܝܬ ܣܩܘܒܠܝ ܠܗ̇. ܚܡܝ̣ܡܐ ܕܝܢ ܘܝܒܝ̣ܫܐ. ܘܩܪܝܪܐ ܘܪܛܝ̣ܒܐ ܒܡܢܬܐ ܒܝܬܝܝ̈ܢ ܘܒܡܢܬܐ ܣܩܘܒ̈ܠܝܝܢ. ܘܡܛܠ ܗܕܐ ܡܨܥܝܝ̈ܢ.

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠ ܗ̇ܝ ܕܟܕ ܚܕܐ ܗ̱ܝ ܢܦܫܐ ܒܟܠ ܚܕ ܡ̣ܢ ܒܢܝ̈ܢܫܐ ܣܥܘܪ̈ܘܬܐ ܣܓܝ̈ܐܬ݀ ܦܘܪ̈ܫܢܐ ܣܥܪܐ. ܘܒܗ ܐܝܬ ܚܕ ܢܝܫܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܢܦܫܐ ܡܠܝ̣ܠܬܐ ܠܘ ܡܕܡ ܐ̱ܚܪܝܢ ܗ̣ܝ. ܐܠܐ ܗ̇ܘ ܡܐ ܕܠܘܬܗ ܡܚܝ̣ܪ ܢܝܫܗ. ܗ̇ܘ ܕܐܡ̇ܪ ܐܢ̣ܐ. ܘܕܗ̣ܘ ܗܢܐ ܚܕ ܗ̣ܘ ܘܠܘ ܣܓܝ̈ܐܐ. ܗ̣ܘ ܗܘܢܐ ܩܕܡܝܐ ܘܟܝܢܐ ܣܗܕ. ܒܕ ܚܕ ܝܕܥ ܗ̣ܘ ܠܗ ܟܠ ܒܪܢܫ ܕܩܢܐ ܡܥܒܕܢ̈ܘܬܐ ܦܪ̈ܝܫܬܐ.

 

ܡܚܘܝܢܘܬܐ ܬܪܝܢܝܬܐ:

 

ܐܡܪܝܢܢ ܕܚܟܡܬܐ ܕܝܐܬܐܣܝܣ ܗ̣ܝ ܢܦܫܢܝܬܐ ܕܠܘܬ ܕܚܝܐ ܕܗ̇ܘ ܣܩܘܒܠܝܐ ܗ̇ܘܝܐ. ܘܪܓܬܐ ܬܘܒ ܕܝܐܬܣܝ̣ܣ ܗ̣ܝ ܢܦܫܢܝܬܐ ܕܠܘ ܬܒܥܬܐ ܕܗ̇ܘ ܕܒܝܬܝ ܗ̇ܘܝܐ. ܘܡ̣ܢ ܐܢܢܩܝ ܕܢܕܪܟ ܗ̇ܘ ܕܕܚܐ ܕܠܡܢܐ ܕܚܐ. ܘܕܢܕܪܟ ܬܘܒ ܗ̇ܘ ܕܪܐܓ. ܕܠܐܝܢܐ ܪܐܓ. ܘܡ̣ܢ ܗܠܢ ܝ̣ܕܝ̣ܥܐ ܕܚܕ ܗ̣ܘ ܗ̇ܘ ܕܡܕܪܟ ܘܕܚܐ ܘܪܐܓ. ܘܠܘ ܐ̱ܚܪܢܐ ܐ̱ܚܪܢܐ. ܘܐܠܐ ܙܕܩ ܗ̣ܘܐ ܕܟܠ ܚܕ ܡ̣ܢ ܚܝ̈ܠܐ ܗܠܝܢ ܡܢܗ ܘܠܗ ܢܫܬܟܚ ܗ̣ܘܐ ܒܒܪܢܫܐ. ܟܐܡܬ݀ ܚܡܬܐ ܘܪܓܬܐ ܒܠܥܕ ܡܕܪܟܢܘܬܐ. ܗ̇ܝ ܕܫܟܝ̣ܪܐ.

 

ܡܚܘܝܢܘܬܐ ܬܠܝܬܝܬܐ:

 

ܐܡܪܝܢܢ ܐܠܘ ܗ̇ܘ ܕܡܕܪܟ ܗ̣ܘܐ ܒܒܪܢܫܐ ܐ̱ܚܪܢܐ ܗ̣ܘܐ܆ ܡ̣ܢ ܗ̇ܝ ܕܡܬܚܡܬ݀ ܗ̣ܘܐ ܐ̱ܚܪܢܐ. ܘܗ̇ܘ ܕܡܕܪܟ ܗ̣ܘܐ ܘܡܬܚܡܬ݀ ܗ̣ܘܐ ܐ̱ܚܪܢܐ ܗ̣ܘܐ ܡ̣ܢ ܗ̇ܘ ܕܪܐܓ. ܘܠܘ ܗ̣ܘ ܟܕ ܗ̣ܘ ܡܕܪܟ ܗ̣ܘܐ ܘܡܬܚܡܬ݀ ܘܪܐܓ. ܙܕܩ ܗ̣ܘܐ ܕܟܕ ܒܬܐܘܪ̈ܝܐܣ ܡܬܥܡܩ ܗ̣ܘܐ ܒܪܢܫܐ. ܠܐ ܢܦܘܫ ܗ̣ܘܐ ܡ̣ܢ ܗ̇ܝ ܕܢܪܓܙ ܘܢܐܪܓ. ܘܗܟܘܬ ܘܟܕ ܪܓܙ ܗ̣ܘܐ. ܠܐ ܙܕܩ ܗ̣ܘܐ ܡ̇ܢ ܗ̇ܝ ܕܢܦܘܫ ܡ̣ܢ ܗ̇ܝ ܕܬܐܘܪ̈ܝܣܐ ܢܥܒܕ ܗ̣ܘܐ ܘܢܐܪܓ. ܒܗ̇ ܒܕܡܘ̣ܬܐ ܘܟܕ ܠܪܓܬܐ ܡܕܡ ܡܫܬܒܐ ܗ̣ܘܐ ܘܠܐ ܢܬܚܡܬ݀. ܘܗܐ ܠܘ ܗܟܢܐ. ܒܗ̇ܝ ܕܙܒܢܝ̈ܢ ܣܓܝ̈ܐܢ ܚܙܝܢܢ ܠܗ̇ܢܘܢ ܕܪܓܙܝ̣ܢ ܕܟܠܢܐܝܬ ܡ̣ܢ ܡܚܫܒܬܐ ܘܪܓܬܐ ܡܬܓܠܙܝ̣ܢ. ܗܟܘܬ ܘܗ̇ܢܘܢ ܕܪܐܓܝܢ ܕܒܛܠܐ ܡܠܝ̣ܠܘܬܗܘܢ ܘܡܫܬܗܝܐ ܚܡܬܗܘܢ. ܫ̇ܒܩ ܐ̱ܢܐ ܗ̇ܢܘܢ ܕܟܕ ܠܓܘ ܡ̣ܢ ܣܬܪ̈ܝ ܚܟܡܬܐ ܐܠܗܝܬܐ ܡܕܝ̣ܩ ܗܘܢܗܘܢ. ܠܟܠܗ̇ ܥܒܝܘܬܗܘܢ ܗܘܠܢܝܬܐ. ܘܚܝܠܝ̈ܗܘܢ ܚܝܘ̈ܬܢܐ ܡܛܥܐ ܛܥܝܢ. ܘܡ̣ܢ ܗܠܝܢ ܝ̣ܕܝ̣ܥܐ ܗ̱ܝ ܕܚܕܐ ܗ̱ܝ ܢܦܫܐ ܕܚܝ̈ܠܐ ܡܫܚ̈ܠܦܐ ܩܢܝܐ. ܘܒܐܝܢܐ ܡܢܗܘܢ ܕܡܬܥܢܝܐ ܘܡܬܥܢܘܝܐ ܡ̣ܢ ܗܠܝܢ ܕܫܪܟܐ ܡܗܡܝܐ.

 

ܡܚܘܝܢܘܬܐ ܪܒܝܥܝܬܐ:

 

ܐܡܪܝܢܢ ܕܟܕ ܡܕܡ ܡ̣ܢ ܡܬܕܪ̈ܟܢܐ ܡܕܪܟܝ̣ܢܢ. ܗ̣ܝ ܡܕܪܟܢܘܬܢ ܗ̣ܝ. ܥܠܬܐ ܗ̇ܘܝܐ ܡܙܝ̣ܥܢܝ̣ܬܐ ܕܚܡܬܢ ܘܡܥܝ̣ܪܢܝ̣ܬܐ ܕܪܓܬܢ. ܘܐܠܘ ܐܘܣܝܐ ܗ̇ܝ ܕܡܕܪܟܐ ܗܘܬ݀ ܒܢ. ܐ̱ܚܪܬܐ ܗܘܬ݀ ܡ̣ܢ ܐܘܣܝܐ ܗ̇ܝ ܕܪܓܙܐ. ܘܡ̣ܢ ܐܘܣܝܐ ܗ̇ܝ ܕܪܐܓܐ. ܙܕܩ ܕܡܕܪܟܢܘܬܐ ܗ̇ܝ ܠܐ ܪܘܓܙܐ ܡܥܒܕܐ ܗܘܬ݀ ܐܦܠܐ ܪܓܬܐ. ܘܟܕ ܡܥܒܕܐ܆ ܚܕܐ ܗ̱ܝ ܐܘܣܝܐ ܗ̇ܝ ܠܬܠܬܝ̈ܗܘܢ ܚܝ̈ܠܐ ܗܠܝܢ ܩܢܝܐ.

 

ܡܚܘܝܢܘܬܐ ܚܡܝܫܝܬܐ:

 

ܐܡܪܝܢܢ ܕܒܪܢܫܐ ܐܝܬܘܗܝ܆ ܓܘܫܡܐ ܡܢܦܫܐ ܡܪܓܫܢܐ ܕܡܬܬܙܝܥ ܨܒܝܢܐܝܬ. ܘܡ̣ܢ ܗܪܟܐ ܐܠܨܐ ܕܗ̇ܘ ܕܡܪܓܫ ܗ̣ܘ ܢܗܘܐ ܗ̇ܘ ܕܡܬܬܙܝܥ. ܘܗ̇ܘ ܕܡܬܬܙܝܥ ܗܘܝܘ ܗ̇ܘ ܕܨܒܐ. ܘܗ̣ܘ ܨܒܝܢܐ ܐܢܗܘ ܕܢܬܘܦܐ ܗ̱ܘ ܪܓܬܐ ܗ̱ܘ. ܘܐܢܗܘ ܕܕܚܘܝܐ ܗ̱ܘ ܚܡܬܐ.

 

ܗܦܟܬܐ:

 

ܐܡܪܝܢ ܕܚܙܝܢܢ ܠܢܦܫܐ ܗ̇ܝ ܕܠܬܘܪܣܝܐ ܡܦܪܢܣܐ ܕܫܟܝ̣ܚܐ ܒܢܨܒܬܐ ܕܓܠܝ̣ܙܐ ܡ̣ܢ ܢܦܫܐ ܡܠܝ̣ܠܬܐ ܘܗ̇ܝ ܚܝܘܬܢܝܬܐ. ܘܚܙܝܢܢ ܬܘܒ ܠܢܦܫܐ ܪܓܬܢܝܬܐ ܘܠܗ̇ܝ ܚܡܬܢܝܬܐ ܕܫܟܝ̈ܚܢ ܒܚܝܘܬܐ ܕܓܠܝ̣ܙܐ ܡ̣ܢ ܡܠܝ̣ܠܘܬܐ. ܐܝܛܐ ܚܙܝܢܢ ܠܗܝܢ ܠܗܠܝܢ ܬܠܬ ܕܫܟܝ̈ܚܢ ܠܒܪܢܫܐ. ܘܡܛܠܗܕܐ ܝ̇ܕܥܝܢܢ. ܕܟܠܚܕܐ ܡ̣ܢ ܗܠܝܢ ܢܦ̈ܫܬܐ ܬܠܬ ܐܘܣܝ̈ܐܣ ܐܝܬܝܗ̇ ܕܝ̣ܠܢܝܬܐ ܠܝܬܗ̇. ܘܐܦܢ ܐܟܚܕܐ ܐܫܬܟ̈ܚܢ ܒܒܪܢܫܐ.

 

ܦܘܢܝܐ:

 

ܐܡܪܝܢܢ ܕܒܫܪܪܐ ܕܢܦܫܐ ܕܢܨܒܬܐ ܦܪܝ̣ܫܬ݀ ܒܐܘܣܝܐ ܐܝܬܝܗ̇. ܡ̣ܢ ܢܦܫܐ ܕܚܝܘܬܐ ܘܕܒܪܢܫܐ. ܘܗ̇ܝ ܕܚܝܘܬܐ ܡ̣ܢ ܗ̇ܝ ܕܢܨܒܬܐ ܘܒܪܢܫܐ. ܘܗ̇ܝ ܕܒܪܢܫܐ ܡ̣ܢ ܗ̇ܝ ܕܢܨܒܬܐ ܘܚܝܘܬܐ. ܐܠܐ ܒܒܪܢܫܐ ܡ̇ܢ ܠܘ ܢܦܫܐ ܗ̇ܝ ܕܢܨܒܬܐ ܘܢܦܫܐ ܗ̇ܝ ܠܘ ܢܦܫܐ ܗ̇ܝ ܕܢܨܒܬܐ ܘܢܦܫܐ ܗ̇ܝ ܕܚܝܘܬܐ ܥܡ ܢܦܫܐ ܡܠܝ̣ܠܬܐ ܫܟܝ̣̈ܚܢ. ܐܠܐ ܗ̣ܝ ܢܦܫܐ ܐ̱ܢܫܝܬܐ ܘܡܠܝ̣ܠܬܐ ܒܝܕ ܡܫܡܠܝܘܬܗ̇. ܠܗܘܢ ܠܚܝ̈ܠܐ ܗܠܝܢ ܕܢܨܒܬܐ ܘܚܝܘܬܐ ܒܐܘܣܝܐ ܐܘܟܝܬ ܟܝܢܐ ܕܝܠܗ̇ ܩܢܝܐ. ܘܕܚܕܐ ܢܦܫܐ ܚܝ̈ܠܐ ܡܫܚ̈ܠܦܐ ܬܩܢܐ ܠܐ ܫܟܝ̣ܪܐ.

 

 

 

 

 

 

 

 

 

 

 

     #1 

 

 

 

ܦܣܘܩܐ ܚܡܝܫܝܫ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠܗ̇ܝ ܕܗܕܡܐ ܡܪܢܝܐ ܦܫܝܛܐܝܬ ܠܒܐ ܐܝܬܘܗܝ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܕܙܪܥܐ ܡ̇ܢ܆ ܓܘܫܡܐ ܗ̱ܘ ܕܡ̣ܢ ܐܪ̈ܒܥܬܝܗܘܢ ܟܝ̈ܢܐ ܡܪܟܒ. ܐܠܐ ܢܘܪܢܝܘܬܐ ܘܐܐܪܝܘܬܐ ܝܬܝ̣ܪ ܥܠܒ̈ܢ ܒܗ. ܘܝ̣ܕܝ̣ܥܐ ܗܕܐ ܡ̣ܢ ܪܘܥܬܢܝܘܬܗ. ܘܡ̣ܢ ܗ̇ܝ ܕܒܩܪܝܪܘܬܐ ܡܫܬܪܐ. ܒܕܓܘܢ ܗ̣ܘ ܐܠܗܐ ܫܪܝܪܐ ܘܓܒܘܠܐ ܡܪܢܝܐ. ܡ̣ܢ ܡܢܘ̈ܬܐ ܐܪ̈ܥܢܝܬܐ ܘܡܝܢܝ̈ܬܐ ܕܥܒ̈ܝܢ܆ ܠܗܕܡ̈ܐ ܪܟܒ. ܘܡ̣ܢ ܗ̇ܢܝܢ ܐܐܪ̈ܝܬܐ ܘܢܘܪ̈ܢܝܬܐ ܠܪ̈ܘܚܐ ܥܒܕ܇ ܕܡܪ̈ܟܒܬܐ ܗܘܝ̈ ܠܚܝ̈ܠܐ. ܘܡܛܠ ܕܡܢܘ̈ܬܐ ܗ̇ܢܝܢ ܠܗܓܢܝ̈ܬܐ ܕܠܝ̣̈ܠܬ݀ ܠܦܘܫܫܐ ܐܢܝܢ. ܒܡܨܥܬ݀ ܡܢܘ̈ܬܐ ܗ̇ܢܝܢ ܥܒ̈ܝܬܐ ܐܫܪܝ̣ ܐܢܝܢ. ܘܠܗܝܢ ܠܥܒ̈ܝܬܐ܆ ܕܡܘ̣ܬ ܫܘܪܐ ܠܩܛܝ̈ܢܬܐ ܐܚܕܪ ܘܒܓܘܗܝܢ ܠܗܝܢ ܣܬܪ. ܘܕܗܕܡܐ ܡ̇ܢ ܕܒܗ ܙܢܝ̈ܐ ܕܐܝܟ ܗܠܝܢ ܡܬܚܙܝܢ܇ ܗ̣ܘ ܠܒܐ ܐܝܬܘܗܝ. ܓܠܝܐ. ܘܡܛܠܗܕܐ ܐܘܡܢ̈ܝ ܨܪ̈ܝܐ ܐܡ̣ܪܘ ܘܫܦܝܪ ܐܡ̣ܪܘ. ܕܩܕܡܝܗܘܢ ܕܗܕܡ̈ܐ ܒܗܘܝܐ ܘܡܬܬܙܝ̣ܥܢܘܬܐ. ܘܐ̱ܚܪܝܗܘܢ ܒܚܘܒܠܐ ܘܫܠܝܐ܆ ܗ̣ܘ ܠܒܐ ܐܝܬܘܗܝ. ܠܒܐ ܡܕܝܢ ܗܘܝܘ ܗܕܡܐ ܡܪܢܝܐ ܘܩܕܡܝܐ. ܘܒܗ ܡܬܐܣܪܐ ܩܕܡܝܬ ܢܦܫܐ. ܘܒܡܨܥܝܘܬܗ ܠܘܬ ܗܕܡ̈ܐ ܕܫܪܟܐ ܥܒܪܝܢ ܚܝܠܝ̈ܗ̇ ܘܡܥܒܕܢ̈ܘܬܗ̇.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ. ܕܦܓܪܐ ܒܝܕ ܚܡܝ̣ܡܘܬܐ ܗܘܐ ܘܡܬܝ̣ܠܕ. ܘܚܡܝܡܘܬܐ ܡ̣ܢ ܗܝܕܝܢ ܡܬܚܝܠܐ ܘܡܫܬܡܠܝܐ ܟܕ ܒܚܕܐ ܕܘܟܬܐ ܡܨܛܡܕܐ. ܘܕܕܘܟܬ݀ ܨܡܝ̣ܕܘܬܗ̇ ܗ̣ܘ ܠܒܐ ܐܝܬܘܗܝ܆ ܓܠܝܐ. ܠܒܐ ܡܕܝܢ ܗܘܝܘ ܗܕܡܐ ܩܕܡܝܐ ܘܡܪܢܝܐ ܘܪܝ̣ܫܝ̣ܬܐ ܕܚܝ̈ܐ ܕܟܠܗܘܢ ܗܕ̈ܡܐ ܕܫܪܟܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢܢ ܕܢܦܫܐ ܚܝܘܬܢܝܬܐ ܡܪܓܫܢܝ̣ܬܐ ܗ̱ܝ ܘܡܬܬܙܝ̣ܥܬ݀ ܨܒܝܢܐܝܬ. ܒܕܓܘܢ ܟܕ ܗ̣ܝ ܗܕܐ ܢܦܫܐ ܒܪܘܚܐ ܕܒܠܒܐ ܬܬܐܣܪ. ܡ̣ܢ ܐܠܨ̈ܬܐ ܕܡܪܓܫܢܝ̣ܬܐ ܕܩܢܝܐ ܙܘܥܐ ܨܒܝܢܝܐ ܬܗܘܐ. ܘܡ̣ܢ ܗܪܟܐ ܡܫܬܪܪܐ ܕܠܒܐ ܢܒܥܐ ܢܗܘܐ ܕܡܕܪܟܢܘܬܐ ܘܚܝܠܐ ܡܙܝ̣ܥܢܐ. ܘܒܛܠܐ ܬܪܥܝ̣ܬܐ ܓܠܝܢܘܝܬܐ ܕܐܡܪܐ. ܕܢܒܥܐ ܕܡܕܪܟܢܘܬܐ ܘܙܘܥܐ ܨܒܝܢܝܐ ܡܘܚܐ ܐܝܬܘܗܝ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ ܕܪܓܫܬܐ ܘܙܘܥܐ ܒܝܕ ܚܡܝ̣ܡܘܬܐ ܗܘܝܢ. ܘܡ̣ܢ ܩܪܝܪܘܬܐ ܒܛܠܝ̣ܢ. ܘܟܕ ܠܒܐ ܚܡܝܡܐ ܗ̱ܘ. ܘܡܘܚܐ ܩܪܝ̣ܪܐ. ܠܒܐ ܙܕܩ ܝܬܝܪܐܝܬ ܕܢܒܥܐ ܢܗܐ ܕܪܓܫܬܐ ܘܙܘܥܐ ܘܠܘ ܡܘܚܐ.

 

ܡܚܘܝܢܘܬܐ ܕܚܡܫ:

 

ܐܡܪܝܢܢ ܕܟܠ ܒܪܢܫܐ ܟܠ ܗ̣ܘ ܠܗ ܡܚܘܐ ܘܐܡ̇ܪ ܕܐܢܐ. ܠܘܬ ܠܒܗ ܚ̇ܐܪ. ܘܡ̣ܢ ܗܪܟܐ ܝ̣ܕܝ̣ܥܐ ܕܗ̇ܘ ܕܗܘܝܘ ܒܪܢܫܐ. ܓܘܝܐ ܘܫܪܝܪܐ ܒܠܒܐ ܥܡܪ.

 

ܡܚܘܝܢܘܬܐ ܕܫܬ:

 

ܐܡܪܝܢܢ ܕܠܒܐ ܡ̇ܢ ܒܡܨܥܬܗ ܕܦܓܪܐ ܩܢܐ ܣܝܡܐ. ܐܝܟܢܐ ܕܠܟܠܗܘܢ ܗܕ̈ܡܐ ܣܟܢܝ̈ܐ ܒܚܕܐ ܫܘܝܘܬܐ ܢܬܝܒܠܘܢ ܡܢܗ ܚܝ̈ܠܐ ܡܚܝ̈ܢܐ. ܐܝܟ ܕܐܦ ܡܠܟܐ ܕܟܕ ܒܡܨܥܬ݀ ܐܬܪ̈ܘܬܐ ܕܐܘܚܕܢܗ ܝ̇ܬܒ. ܠܟܠܗܘܢ ܣܘ̈ܦܐ ܘܦܢ̈ܝܬܐ ܕܬܚܝܬ ܫܘܠܛܢܗ ܒܚܕܐ ܫܘܝܘܬܐ ܢܗܘܐ ܩܪܝ̣ܒ. ܠܒܐ ܡܕܝܢ ܗܘܝܘ ܗܕܡܐ ܡܪܢܝܐ ܘܡܠܟ ܗܕܡ̈ܐ ܘܠܘ ܡܘܚܐ ܕܒܣܟܐ ܡܛܟܣ.

 

ܡܚܘܝܢܘܬܐ ܕܫܒܥ:

 

ܐܡܪܝܢ ܕܡܠܬܐ ܗܕܐ ܢܦܘܩܬܐ. ܝܬܝܪ ܡ̣ܢ ܟܠܗܝܢ ܕܝ̣ܠܝ̈ܬܐ ܘܫܘܘ̈ܕܥܐ. ܝ̇ܗܒܐ ܐܬܐ ܕܢܦܫܢ ܡܠܝ̣ܠܬܐ ܘܐ̱ܢܫܝܬܐ. ܘܟܕ ܗ̣ܝ ܡܠܬܐ ܢܦܘܩܬܐ ܠܩܠܐ ܩܢܝܐ ܗܘܠܐ. ܘܩܠܐ ܒܝܕ ܡܦܩܗ̇ ܕܢܫܡܬܐ ܒܝܕ ܠܒܐ ܡܫܬܡܠܐ. ܒܗ̇ܝ ܕܟܕ ܒܗ̇ ܒܢܫܡܬܐ ܒܣܝ̣ܡܬܐ ܡܬܪܘܚ ܠܒܐ. ܡ̣ܢ ܚܡܝܡܘܬܗ ܣܝܛܐ ܘܡܬܬܢܢܐ ܗ̣ܝ ܢܫܡܬܐ ܘܡܛܠܗܕܐ ܡܦܩ ܠܗ̇. ܘܐ̱ܚܪܬܐ ܒܕܘܟܬܗ̇ ܢܬܦ. ܘܟܕ ܩܠܐ ܒܝܕ ܠܒܐ ܡܫܬܡܠܐ. ܘܡܠܬܐ ܢܦܘܩܬܐ ܒܝܕ ܩܠܐ ܗ̇ܘܝܐ. ܘܢܦܫܐ ܡܠܝ̣ܠܬܐ ܒܝܕ ܡܠܬܐ ܢܦܘܩܬܐ ܝܬܝܪܐܝܬ ܡܬܒܕܩܐ. ܝ̣ܕܝ̣ܥܐ ܕܐܘܪܓܢܘܢ ܕܢܦܫܐ ܡܠܝ̣ܠܬܐ ܗ̣ܘ ܠܒܐ ܝܬܝܪ ܡ̣ܢ ܡܘܚܐ ܙܕܩ ܕܢܗܘܐ.

 

ܗܦܟܬܐ:

 

ܘܓܐܠܝܢܘܣ ܡ̇ܢ ܐܣܝܐ ܡܗܦܟ ܥܠ ܐܪܝܣܛܘܛܠܝܐ ܘܐܡ̇ܪ ܕܩܠܐ ܠܘ ܡ̣ܢ ܠܒܐ ܡܬܬܝܬܐ. ܐܠܐ ܡ̣ܢ ܡܘܚܐ. ܒܗ̇ܝ ܕܐܘܪܓܢܘܢ ܕܩܠܐ܆ ܓܓܪܬܐ ܐܝܬܝܗ̇. ܘܗ̣ܝ ܗܕܐ ܡ̣ܢ ܬܠܬܐ ܚܣܚܘ̈ܣܐ ܡܪܟܒܐ. ܘܗ̣ܢܘܢ ܗܠܝܢ ܚܣܚܘ̈ܣܐ ܒܝܕ ܥܘܩܒܪ̈ܬܐ ܡܬܬܙܝ̣ܥܝ̣ܢ. ܘܥܘܩܒܪ̈ܬܐ ܒܝܕ ܓܝܕ̈ܐ ܡܬܝܒܠ ܠܘܬܗܘܢ ܚܝ̣ܠ ܙܘܥܐ ܘܓܝ̈ܕܐ ܡ̣ܢ ܡܘܚܐ ܝܥܝܢ. ܐܬܚܘܝܬ݀ ܡܕܝܢ ܕܥܒܘܕܗ ܕܩܠܐ ܗ̣ܘ ܡܘܚܐ ܘܠܘ ܐܒܐ ܐܝܬܘܗܝ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܬܘܒ ܕܒܪܢܫܐ ܠܥܘܩܒܪܬ݀ ܟܪܣܐ ܦܫܛ ܘܙܪܒ ܟܕ ܡ̇ܙܥܩ. ܘܠܘ ܠܠܒܐ. ܘܡ̣ܢ ܗ̇ܝ ܬܘܒ ܕܟܕ ܠܚܕܝܐ ܕܚܝܘܬܐ ܨܪܐ ܐ̱ܢܫ ܘܠܠܒܐ ܩܦܣ ܡܢܫܠܝ. ܠܐ ܒܛܠ ܩܠ ܚܝܘܬܐ ܗ̱ܝ. ܘܐܢ ܠܩܪܩܦܬܐ ܨܪܐ ܐ̱ܢܫ ܘܒܡܘܚܐ ܓܫܦ ܠܝ̣ܓܐܝܬ ܒܛܠ ܩܠܗ̇ ܕܚܝܘܬܐ ܗ̇ܝ.

 

ܦܘܢܝܐ:

 

ܐܡܪܝܢܢ ܕܠܐ ܐ̱ܢܫ ܟܦܪ ܕܩܠܐ ܒܝܕ ܡܦܩܬܗ̇ ܕܢܫܡܬܐ ܗ̇ܘܐ. ܘܡܦܩܬܗ̇ ܕܢܫܡܬܐ ܒܝܕ ܠܒܐ ܗ̇ܘܝܐ. ܒܕܓܘܢ ܥܠܬܗ ܥܒܘܕܬܐ ܕܩܠܐ ܗ̣ܘ ܠܒܐ ܐܝܬܘܗܝ ܘܗܠܝܢ. ܘܗܠܝܢ ܙܢܝ̈ܐ ܕܐܝܬܝ̣ܬܘܢ. ܠܗ̇ܝ ܕܡܘܚܐ ܡܥܕܪܢܐ ܗ̱ܘ ܠܘܬ ܗܘܝܗ ܕܩܠܐ ܡܫܘܕܥܝ̣ܢ. ܘܒܗܟܢ ܠܐ ܣܟ ܡܕܠܩܒܝ̣ܢܢ ܠܟܘܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܩܫܝ̣ ܡܪܝܐ ܠܒܗ ܕܦܪܥܘܢ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܠܡܢܐ ܐܪܓܙ ܚܛܝܐ ܠܐܠܗܐ. ܘܐܡ̇ܪ ܒܠܒܗ ܕܠܐ ܬܒܥ.

 

ܣܗܕܘܬܐ ܕܬܠܬ:

 

ܗ̣ܘ ܟܕ ܗ̣ܘ. ܓܒܪܐ ܥܡ ܚܒܪܗ ܒܣܦ̈ܘܬܐ ܡܦܠܓ̈ܬܐ. ܒܠܒܐ ܘܒܠܒܐ ܡܡܠܠܝܢ.

 

ܣܗܕܘܬܐ ܕܐܪܒܥ:

 

ܗ̣ܘ ܟܕ ܗ̣ܘ ܐܡ̇ܪ ܥܘ̈ܠܐ ܒܠܒܗ ܕܠܝܬ ܐܠܗܐ.

 

ܣܗܕܘܬܐ ܕܚܡܫ:

 

ܗ̣ܘ ܟܕ ܗ̣ܘ ܡܡܠܠ ܩܘܫܬܐ ܒܠܒܗ ܘܠܐ ܢܟܘܠܬܢ ܒܠܫܢܗ.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ. ܦܘܩܕܢܘ̈ܗܝ ܕܡܪܝܐ ܬܪܝ̣ܨܝ̣ܢ ܘܡܚܕܝܢ ܠܒܐ.

 

ܣܗܕܘܬܐ ܕܫܒܥ:

 

ܗ̣ܘ ܟܕ ܗ̣ܘ. ܪܓܬܐ ܕܠܒܗ ܝܗܒܬ ܠܗ.

 

ܣܗܕܘܬܐ ܕܬܡܢܐ:

 

ܗ̣ܘ ܟܕ ܗ̣ܘ. ܢܚܐ ܠܒܗܘܢ ܠܥܠܡ.

 

ܣܗܕܘܬܐ ܕܬܫܥ:

 

ܗ̣ܘ ܟܕ ܗ̣ܘ. ܠܒܝ ܐܬܗܦܟ ܘܚܝܠܝ ܫܒܩܢܝ.

 

ܣܗܕܘܬܐ ܕܥܣܪ:

 

ܗ̣ܘ ܟܕ ܗ̣ܘ. ܦܘܡܝ ܢܡܠܠ ܚܟܡܬܐ ܘܪܢܝܗ ܕܠܒܝ ܣܘܟܠܐ.

 

ܣܗܕܘܬܐ ܕܝ̄ܐ:

 

ܐܘܢܓܠܝܘܢ. ܐܘ ܚܣܝ̣ܪ̈ܝ ܪܥܝܢܐ ܘܝܩܝ̣ܪ̈ܝ ܠܒܐ ܠܡܗܝܡܢܘ. ܒܟܠܗܝܢ ܐܝܠܝܢ ܕܡܠܠܘ ܢܒܝ̈ܐ.

 

ܣܗܕܘܬܐ ܕܝܒ̄:

 

ܗ̣ܘ ܟܕ ܗ̣ܘ. ܛܘܒܝܗܘܢ ܠܐܝܠܝܢ ܕܕܟܝܢ ܒܠܒܗܘܢ ܕܗ̣ܢܘܢ ܕܢܚܙܘܢ ܠܐܠܗܐ.

 

ܣܗܕܘܬܐ ܕܝܓ̄:

 

ܦܘܠܘܣ. ܐܠܐ ܐܣܬܪܩܘ ܡܚܫ̈ܒܬܗܘܢ. ܘܐܬܚܫܟ ܠܒܗܘܢ. ܘܠܐ ܡܣܬܟܠ.

 

ܣܗܕܘܬܐ ܕܝܕ̄:

 

ܗ̣ܘ ܟܕ ܗ̣ܘ. ܘܠܐ ܝ̇ܕܥ ܐܢ̱ܬ ܕܒܣܝ̣ܡܘܬܗ ܕܐܠܗܐ ܠܬܝܒܘܬܐ ܗ̱ܘ ܡܝܬܝܐ ܠܟ. ܐܠܐ ܡܛܠ ܩܫܝܘܬ ܠܒܟ ܕܠܐ ܬܐܒ. ܣ̇ܐܡ ܐܢ̱ܬ ܠܟ ܣܝ̣ܡܬܐ ܕܪܘܓܙܐ ܠܝܘܡܐ ܕܪܘܓܙܐ.

 

ܣܗܕܘܬܐ ܕܝܗ̄:

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܠܢ ܕܝܢ ܠܘܬ ܒܪܢܫܐ ܡܛܫܝܐ ܕܒܠܒܐ ܗ̱ܘ ܟܠܗ ܫܩܠܛܥܢܐ ܘܐܣܝܘܬܐ.

 

ܣܗܕܘܬܐ ܕܝܘ̄:

 

ܐܘܓܪܝܣ. ܗܘܢܐ ܐܝܟ ܡܠܬܗ ܕܫܠܝܡܘܢ ܒܠܒܐ ܫܪܐ. ܒܘܝܢܐ ܕܝܢ܆ ܒܡܘܚܐ.

 

ܢܘܗܪܐ:

 

ܐܡܪܝܢܢ ܕܟܠܗܝܢ ܣܗܕ̈ܘܬܐ ܗܠܝܢ ܡܫܪܪ̈ܢ. ܕܗܕܡܐ ܡܪܢܝܐ. ܘܐܘܪܓܢܘܢ ܩܕܡܝܐ ܕܒܗ ܐܣܝ̣ܪܝܢ ܚܝ̈ܠܐ ܡܦܬܟ̈ܐ ܕܒܢ ܡܠܝ̣ܠܘܬܐ ܐܡ̇ܪ ܐ̱ܢܐ ܘܚܡܬܐ ܘܪܓܬܐ ܗ̣ܘ ܠܒܐ ܐܝܬܘܗܝ.

 

ܗܦܟܬܐ:

 

ܐܡܪܝܢ ܕܒܒܘ̈ܚܢܐ ܡܠܝ̣̈ܠܝܐ ܕܐܝܟ ܗܠܝܢ ܠܘ ܣܓܝ ܥܠ ܣܗܕ̈ܘܬܐ ܟܬܒܝ̈ܬܐ ܙܕܩ ܠܡܬܬܟܠܘ. ܡܛܠ ܕܟܬܒܐ ܡ̇ܢ ܙܒܢܝ̈ܢ ܣܓܝ̈ܐܢ ܡܛܠ ܢܝ̣ܫܐ ܡܕܡ. ܒܙܢܐ ܪܗܝ̣ܛܪܝܐ. ܠܗܘ ܕܠܐ ܐܝܬܘܗܝ ܐܝܟ ܗ̇ܘ ܕܐܝܬܘܗܝ ܣ̇ܐܡ ܠܗ. ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܕܢܘܣܐ ܒܡܐܡܪܐ ܕܥܠ ܬܘܩܢܗ ܕܒܪܢܫܐ. ܐܦ ܠܟܬܒܐ ܐ̱ܢܫܝ̈ܢ ܥܠ ܗܕܐ ܡܝܬܝܢ ܠܢ. ܕܡܣܗܕ ܕܒܠܒܐ ܐܝܬܘܗܝ ܗܘܢܐ. ܠܘ ܕܠܐ ܥܘܩܒܐ ܢܩܒܠܝܗ̇ ܠܡܠܬܐ. ܗ̇ܘ ܓܝܪ ܕܕܠܒܐ ܐܬܥ̣ܗܕ܆ ܘܕܟܘ̈ܠܝܬܐ ܐܬܕܟܪ ܟܕ ܐܡ̇ܪ. ܒܚܪ ܠܒܐ ܘܟܘܠܝ̈ܬܐ ܐܠܗܐ. ܒܕܓܘܢ ܐܘ ܒܬܪ̈ܝܗܘܢ ܐܘ ܒܠܐ ܚܕ ܡܢܗܘܢ ܢܚܒܫܝ̣ܘܗܝ ܠܗܘܢܐ.

 

ܦܘܢܝܐ:

 

ܐܡܪܝܢܢ ܕܗ̣ܘ ܡܠܦܢܐ ܠܘܩܒܠ ܗ̇ܢܘܢ ܕܗܘܠܢܝܐ ܘܚܝܠܐ ܓܘܫܡܢܝܐ ܕܒܠܒܐ ܡܩܝ̣ܡ ܕܝ̣ܠܢܐܝܬ ܡܘܕܝܢ ܠܗ ܠܗܘܢܐ ܐܣܪܚܗ̇ ܠܗܦܟܬܐ ܗܕܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܘܣܦ ܐܡ̣ܪ. ܕܟܝܢܐ ܓܝܪ ܡܬܝܕܥܢܐ ܘܠܐ ܒܥܘܡ̈ܩܘܗܝ ܕܦܓܪܐ ܪܚܡ ܠܡܗܘܐ. ܘܠܐ ܒܣܓܝܐܘܬ ܒܣܪܐ ܡܬܕܚܐ ܠܒܐ. ܚܢܢ ܕܝܢ ܟܕ ܠܬܪܥܝ̣ܬܐ ܗܕܐ ܡ̣ܢ ܟܕܘ ܙܝܦܢܢ. ܘܠܗ̇ܝ ܕܩܝܡܬ݀ ܠܝܬܗ̇ ܗ̣ܝ ܢܦܫܐ ܐ̱ܢܫܝܬܐ ܘܠܐ ܓܫܝܡܬܐ ܫܪܪܢܢ. ܠܐ ܡܬܬܚܕܝ̣ܢܢ ܒܗܕܐ ܗܦܟܬܐ. ܘܡܛܠ ܕܢܦܫܐ ܡܠܝ̣ܠܬܐ ܡܐܣܪ ܐܣܝ̣ܪܐ ܥܡ ܦܓܪܐ. ܒܗ ܒܗܢܐ ܦܣܘܩܐ ܫܪܪܢܢ ܕܐܝܢܐ ܗ̱ܘ ܗܕܡܐ ܡܪܢܝܐ ܗ̇ܘ ܕܩܕܡܝܬ݀ ܡܨܛܠܡ. ܘܒܗ ܡ̣ܢ ܩܕܡ ܕܒܗܕ̈ܡܐ ܐ̱ܚܪ̈ܢܐ ܬܬܐܣܪ ܢܦܫܐ ܡܬܐܣܪܐ. ܘܒܡܨܥܝܘܬܗ ܠܘܬ ܟܠܗܘܢ ܗܕܡ̈ܐ ܕܫܪܟܐ ܥܒܪ ܚܝܠܐ ܕܡܥܒܕܢܘܬܗ̇.

 

ܗܦܟܬܐ:

 

ܐܡܪܝܢ ܕܗ̣ܘ ܩܕܝܫܐ ܒܗ ܒܡܐܡܪܐ ܐܡ̣ܪ. ܐܦܠܐ ܡܛܠ ܪܬܚܐ ܕܕܡܐ ܕܚܕܪ̈ܝ ܠܒܐ܇ ܕܒܣܘܥܪ̈ܢܐ ܚܡܬܢܝ̈ܐ܇ ܒܠܒܐ ܢܣܬܒܪ ܕܐܝܬܘܗܝ ܡܘܬܒܗ ܕܗܘܢܐ܇ ܘܐܝܟܢܐ ܐܢ̱ܬܘܢ ܐܡܪܝܢ ܐܢ̱ܬܘܢ ܕܒܠܒܐ ܐܣܝ̣ܪ ܗܘܢܐ.

 

ܦܘܢܝܐ:

 

ܐܡܪܝܢܢ ܕܗ̣ܘ ܡܠܦܢܐ ܠܗܦܟܬܐ ܗܕܐ ܠܘܩܒܠ ܗ̇ܢܘܢ ܕܡܣܒܪܝ̣ܢ ܕܒܠܒܐ ܒܠܚܘܕ ܡܬܚܘܝܐ ܡܥܒܕܢܘܬܗ ܕܗܘܢܐ ܘܠܘ ܠܘܬ ܟܠܗܘܢ ܗܕ̈ܡܐ ܥܒܪܐ܆ ܐܣܪܚܗ̇. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܘܣܦ ܐܡ̣ܪ. ܕܗܘܢܐ ܕܝܢ܆ ܫܘܝܐܝܬ ܢܣܒܪ ܕܡܬܩܪܒ܇ ܠܟܠܚܕܐ ܡ̣ܢ ܡܢܘ̈ܬܐ܇ ܐܝܟ ܡܠܬܐ ܠܐ ܡܬܦܫܩܢܝ̣ܬܐ ܕܡܙܘܓܐ. ܚܢܢ ܕܝܢ ܟܕ ܡܘܕܝܢܢ ܕܒܡܨܥܝܘܬܗ ܕܠܒܐ ܐܘܟܝܬ ܕܪܘܚܐ ܕܒܥܘܒܗ ܣܡܠܝܐ ܠܘܬ ܟܠܗܘܢ ܗܕܡ̈ܐ ܥܒܪܐ ܣܥܘܪܘܬܗ̇. ܠܘ ܣܩܘܒܠܐܝܬ ܣܝ̣ܡܝ̣ܢܢ ܠܘܬ ܪܥܝܢܗ ܕܡܠܦܢܐ.

 

 

 

ܦܣܘܩܐ ܫܬܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܦܣܘܩܐ ܫܬܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝ̣ܢܝܬܐ ܡܛܠ ܬܪܥܝ̣ܬܐ ܐܘܣܝܝܬܐ ܕܠܡܘܚܐ ܡܘܕܝܐ ܗܕܡܐ ܡܪܢܝܐ ܕܒܗ ܐܣܝܪ ܗܘܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܐ ܕܡܝܬܐ ܠܗܘܢ ܓܐܠܝܢܘܣ ܒܟܬܒܗ ܗ̇ܘ ܕܕܝܐܓܢܘܣܛܝܩܝ. ܣܥܝܐ ܩܕܡܝܐ

 

ܐܡܪ ܕܡܘܚܐ ܥܩܪܐ ܗ̱ܘ ܕܓܝܕ̈ܐ. ܘܓܝ̈ܕܐ ܐܘܪ̈ܓܢܐ ܐܢܘܢ ܕܝܘܒܠ ܡܕܪܟܢܘܬܐ ܠܘܬ ܗܕܡ̈ܐ. ܘܗ̇ܘ ܕܥܩܪܐ ܗ̱ܘ ܕܐܘܪ̈ܓܢܐ ܕܡܕܪܟܢܘܬܐ ܐܦ ܢܒܥܐ ܙܕܩ ܕܢܗܘܐ ܕܚܝ̣ܠ ܡܕܪܟܢܘܬܐ ܗܘܢܢܝܬܐ ܕܒܪܢܫܐ. ܘܕܡܘܚܐ ܡ̇ܢ ܥܩܪܐ ܗ̱ܘ ܕܓܝ̈ܕܐ. ܝ̣ܕܝ̣ܥܐ ܡ̣ܢ ܗ̇ܝ ܕܓܝ̈ܕܐ ܣܓܝ̈ܐܐ ܒܡܘܚܐ ܡܫܬܟܚܝ̣ܢ. ܘܒܠܒܐ ܠܝܬ ܐܠܐ ܐܢ ܚܕ ܓܝܕܐ. ܘܗܢܐ ܙܥܘܪܐ. ܘܕܓܝ̈ܕܐ ܡ̇ܢ ܐܘܪ̈ܓܢܐ ܐܢܘܢ ܕܝܘܒܠ ܡܕܪܟܢܘܬܐ. ܝ̣ܕܝ̣ܥܐ ܡ̣ܢ ܗ̇ܝ ܕܟܕ ܡܬܦܪܣ ܓܝܕܐ ܡܕܡ ܘܡܬܐܣܪ܆ ܒܛܠܐ ܪܓܫܬܐ ܘܙܘܥܐ ܡ̣ܢ ܗܕܡ̈ܐ ܗ̇ܢܘܢ ܕܠܬܚܬ ܡ̣ܢ ܐܣܪܐ. ܘܠܐ ܒܛܠܝܢ ܡ̣ܢ ܗ̇ܢܘܢ ܕܠܥܠ ܡ̣ܢ ܐܣܪܐ. ܘܒܗܕܐ ܬܘܒ ܡܫܬܪܪܐ ܗ̇ܝ ܕܡܘܚܐ ܐܟܡܐ ܕܥܩܪܐ ܗ̱ܘ ܕܓܝ̈ܕܐ. ܘܢܒܥܐ ܗ̱ܘ ܐܦ ܕܚܝ̣ܠ ܡܕܪܟܢܘܬܐ.

 

ܣܥܝܐ ܬܪܝܢܐ:

 

ܐܡܪ ܐܠܘ ܪܓܫܬܐ ܘܡܬܬܙܝ̣ܥܢܘܬܐ ܡ̣ܢ ܠܒܐ ܠܘܬ ܡܘܚܐ ܡܬܝܒ̈ܠܢ ܗܘܝ̈. ܙܕܩ ܗ̣ܘܐ ܕܟܕ ܐܣ̇ܪܝܢ ܗܘܝܢ ܠܓܝܕܐ ܒܚܘܛܐ ܚܝ̣ܨܐܝܬ. ܕܦܝܫܐ ܗܘܬ݀ ܪܓܫܬܐ ܥܡ ܙܘܥܐ. ܒܓܒܐ ܗ̇ܘ ܕܠܒܐ. ܘܒ̈ܛܠܢ ܗܘܝ̈ ܡ̣ܢ ܓܒܐ ܕܡܘܚܐ. ܘܗܐ ܒܗܦܟܐ ܕܗܟܢ ܡܫܟܚܝ̣ܢܢ. ܘܡܛܠܗܕܐ ܡܫܬܪܪܝ̣ܢܢ ܕܡ̣ܢ ܡܘܚܐ ܠܘܬ ܠܒܐ ܡܬܝܒܠܝ̣ܢ ܚܝ̈ܠܝ ܪܓܫܬܐ ܘܙܘܥܐ. ܘܠܘ ܡ̣ܢ ܠܒܐ ܠܘܬ ܡܘܚܐ.

 

ܣܥܝܐ ܬܠܝܬܝܐ:

 

ܐܡ̇ܪ ܕܟܠܗܘܢ ܦܝܠܠܘܣܘ̈ܦܐ ܘܐܣܘ̈ܬܐ ܫܠܡܘ. ܕܚܝܠܐ ܕܪܓܫܬܐ ܘܚܝܠܐ ܕܙܘܥܐ. ܒܝܕ ܪܘܚܐ ܩܛܝ̣ܢܬܐ ܕܪܕܝܐ. ܒܓܝ̈ܕܐ ܡܬܡܛܝܢ ܠܘܬ ܗܕܡ̈ܐ. ܘܒܡܘܚܐ ܡ̇ܢ ܕܘܟ̈ܝܬܐ ܐܝܬ ܥܦܝ̣̈ܦܬܐ ܕܒܗܝܢ ܡܬܝܠܕܐ ܪܘܚܐ ܕܐܝܟ ܗܕܐ. ܘܒܠܒܐ ܠܐ ܐܝܬ. ܘܝ̣ܕܝ̣ܥܐ ܡ̣ܢ ܗ̇ܝ ܕܚܠܝ̣ܠܗ ܝܡܝܢܝܐ ܡ̣ܢ ܕܡܐ ܡܠܐܷ. ܘܗ̇ܘ ܣܡܠܝܐ ܟܕ ܡܨܛܪܐ܆ ܫ̈ܠܬܐ ܕܕܡܐ ܡܫܬܟܚܝ̣ܢ ܒܗ. ܡܘܚܐ ܡܕܝܢ ܗܘܝܘ ܪܝ̣ܫܝ̣ܬܐ ܕܬܪ̈ܝܗܘܢ ܚܝ̈ܠܐ ܕܪܓܫܬܐ ܘܕܙܘܥܐ.

 

ܣܥܝܐ ܪܒܝܥܝܐ:

 

ܐܡ̇ܪ ܓܝܪ ܕܗܘܢܐ ܡܝܬܪܐ ܗ̇ܘ ܕܟܠܗܘܢ ܚܝ̈ܠܐ ܘܡܛܠ ܗܕܐ ܐܦ ܐܬܪܗ ܡܝܬܪܐ ܡ̣ܢ ܟܠܗܘܢ ܐܬܪ̈ܘܬܐ ܥܠܝܗܘܢ ܗ̣ܘ. ܡܘܚܐ ܡܕܝܢ ܕܥܠܝܐ ܗ̱ܘ. ܐܬܪܐ ܙܕܩ ܕܢܗܘܐ ܠܗܘܢܐ ܕܡܝܬܪܐ ܗ̱ܘ. ܘܡܛܠܗܕܐ ܟܐܢܐܝܬ ܐܡܝ̣ܪܐ. ܕܪܝܫܐ܆ ܦܘܪܟܣܐ ܗ̱ܘ ܕܪ̈ܓܫܐ. ܘܐܟܡܐ ܕܡܠܟܐ ܒܦܘܠܘܛܝܢ ܪܡܬܐ ܝ̇ܬܒ. ܗ̣ܘ ܗܟܘܬ ܘܗܘܢܐ ܡܠܟܐ ܒܡܘܚܐ ܫܪܐ. ܘܟܪܝ̣ܟܝ̣ܢ ܠܗ ܡ̣ܢ ܟܠ ܓܒܝ̈ܢ ܪ̈ܓܫܐ ܐܝܟ ܡܫܡ̈ܫܢܐ. ܘܬܘܒ ܐܟܡܐ ܕܪܝܫܐ ܠܘܬ ܦܓܪܐ. ܦܚܡܐ ܕܫܡܝܐ ܠܘܬ ܐܪܥܐ ܩܢܐ. ܘܫܡܝܐ ܡܥܡܪܐ ܗ̱ܘ ܕܪ̈ܘܚܢܐ. ܗ̣ܘ ܗܟܘܬ ܘܡܘܚܐ ܡܥܡܪܐ ܙܕܩ ܕܢܗܘܐ ܕܗܘܢܐ ܕܪܘܚܢܐ ܗ̱ܘ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ ܐܝܟ ܕܡ̣ܢ ܦܪ̈ܗܦܐܛܝܩܘ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܠܘ ܡܛܠܗ̇ܝ ܕܓܝܕ̈ܐ ܣܓܝ̈ܐܐ ܫܟܝ̣ܚܝ̣ܢ ܒܡܘܚܐ ܘܒܨܝ̣ܪ̈ܐ ܒܠܒܐ܆ ܙܕܩ ܠܡܣܒܪܘ ܕܒܡܘܚܐ ܐܝܬܘܗܝ ܥܩܪܗܘܢ ܕܓܝ̈ܕܐ ܘܠܘ ܠܒܐ. ܗܐ ܓܝܪ ܦܪܕܬܐ ܕܙܪܥܐ ܕܡܢܗ ܡܬܝܠܕ ܫܒܘ̣ܩ ܐܝܠܢܐ. ܣܓܝ ܒܐܥ̈ܦܐ ܥܦܝ̣ܦܝ̣ܢ ܥܢܩܝ̈ܗ̇. ܘܥܒܝܢ ܥܢܦܝ̈ܗ̇ ܘܚܝܠܬܢܝ̣̈ܢ ܣܘ̈ܟܝܗ̇ ܘܦܪ̈ܝ̣ܣܝ̣ܢ ܛܪ̈ܦܝܗ̇. ܡܢܗ̇ ܕܦܪܕܬܐ ܗ̇ܝ ܕܥܩܪܐ ܗ̱ܝ. ܘܒܡܝܢܝܢܓܣ ܬܘܒ ܕܦܪܝܣܐ ܬܚܝܬ ܡܘܚܐ ܝܬܝܪ ܣܓܝ̈ܐܝܢ ܡܢ̈ܝܢܐ ܕܫܪ̈ܝܢܐ ܡ̣ܢ ܕܒܠܒܐ. ܒܕܓܘܢ ܙܕܩ ܗ̣ܘܐ ܕܢܐܡܪ. ܕܣܘܟܗ ܕܐܝܠܢܐ ܗܘܝܘ ܥܩܪܗ. ܘܡܝܢܝܢܓܣ ܬܘܒ ܗ̣ܝ ܗ̣ܝ ܥܩܪܗܘܢ ܕܫܪ̈ܝܢܐ ܗ̇ܝ ܕܫܟܝ̣ܪܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢ ܕܪܘܚܐ ܠܒܢܝܬܐ ܛܒ ܣܓܝ ܚܡܝܡܐ. ܘܡ̣ܢ ܩܪܝ̣ܪܘܬܗ ܕܡܘܚܐ ܡܬܚܫܚܐ. ܘܡܬܝܠܕܝܢ ܒܗ̇ ܚܝ̈ܠܝ ܪܓܫܬܐ ܘܡܬܬܙܝ̣ܥܢܘܬܐ. ܘܟܕ ܒܝܕ ܐܣܪܐ ܐܘ ܣܟܪܐ ܡܬܟܠܝܐ ܡܫܬܠܗܒܐ ܘܡܬܒܠܒܠܐ ܘܠܐ ܡܬܝܠܕܝܢ ܒܗ̇ ܚܝ̈ܠܐ ܗܠܝܢ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܗ̣ܘ ܗܢܐ ܣܥܝܐ ܡܓܠܙ ܓܠܙ ܠܗ ܠܠܒܐ ܕܬܗܘܐ ܒܗ ܪܘܚܐ ܡܬܘܡ. ܘܗ̣ܘ ܓܠܝܢܘܣ ܒܟܠܗܘܢ ܡܟܬܒܢ̈ܘܬܗ ܡܘܕܐ ܕܠܒܐ ܢܒܥܐ ܗ̱ܘ ܕܚܝܠܐ ܚܝܘܬܢܐ. ܘܫܠܡ ܕܪܘܚܐ ܡܘܚܝܬܐ܆ ܡ̣ܢ ܠܒܐ ܠܘܬ ܡܘܚܐ ܣܠܩܬ݀܇ ܘܗܪܬܡܢ ܦܫܪܐ ܡܕܡ ܩܒܠܬ݀܇ ܘܪܘܚܐ ܗܘܬ݀ ܢܦܫܢܝܬܐ ܛܥܘܢܬܐ ܕܚܝ̈ܠܝ ܪܓܫܬܐ ܘܙܘܥܐ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܡܚܘܝܢ̈ܘܬܐ ܗ̇ܢܝܢ ܚܘܫܒܝ̈ܬܐ ܕܐܝܬܝ̣ܢܢ ܠܘܬ ܫܘܪܪ ܬܪܥܝ̣ܬܢ. ܠܘ ܒܝܕ ܡ̈ܠܐ ܦܐܘܝܛܝ̈ܩܝܬܐ ܕܐܝܟ ܗܠܝܢ ܡܫܬܪ̈ܝܢ.

 

ܢܘܗܪܐ:

 

ܐܡܪܝܢܢ ܕܟܠܗܘܢ ܫܠܡܘ. ܕܪܘܚܐ ܚܝܘܬܢܝܬܐ ܗ̇ܝ ܕܒܠܒܐ ܡܬܝܠܕܐ. ܟܕ ܠܘܬ ܡܘܚܐ ܘܟܒܕܐ ܡܬܝܒܠܐ. ܘܦܫܪܐ ܡܩܒܠܐ. ܬܪ̈ܬܝܗܝܢ ܪ̈ܘܚܐ ܐ̱ܚܪ̈ܢܝܬܐ. ܢܦܫܢܝܬܐ ܐܡ̇ܪ ܐ̱ܢܐ ܘܟܝܢܝܬܐ ܡܢܗ̇ ܡܬܝ̈ܠܕܢ. ܘܗ̣ܝ ܗ̣ܝ ܗܘܠܐ ܕܝܠܗܝܢ. ܒܕܓܘܢ ܡܢܗܘܢ ܡ̇ܢ ܐܡ̣ܪܘ ܕܚܝ̈ܠܐ ܟܠܗܘܢ ܢܦܫܢܝ̈ܐ ܠܡܐܡܪ ܘܟܝܢܝ̈ܐ ܩܕܝ̣ܡܝ̣ܢ ܫܟܝ̣ܚܝܢ ܒܪܘܚܐ ܚܝܘܬܢܝܬܐ ܡ̣ܢ ܩܕܡ ܕܬܬܝܒܠ ܠܘܬ ܡܘܚܐ ܘܟܒܕܐ. ܐܠܐ ܗ̇ܢܝܢ ܡܥܒܕܢ̈ܘܬܐ ܕܚܝ̈ܠܐ ܗܠܝܢ ܠܐ ܡܨܝܢ ܠܡܬܦܪܣܝܘ. ܐܠܐ ܡ̣ܢ ܒܬܪ ܦܫܪܐ ܕܡܩܒ̈ܠܢ ܒܡܘܚܐ ܘܒܟܒܕܐ. ܘܗܕܐ ܗ̱ܝ ܬܪܥܝ̣ܬܐ ܕܦܝܠܠܘܣܘ̈ܦܐ. ܐ̱ܚܪ̈ܢܐ ܕܝܢ ܐܣܘ̈ܬܐ ܐܡܪܝܢ ܕܠܐ ܡܬܘܡ ܫܟܝ̣ܚ ܒܪܘܚܐ ܚܝܘܬܢܝܬܐ ܡ̣ܢ ܩܕܡ ܗ̇ܝ ܕܬܬܡܛܐ ܘܬܩܢܐ ܦܫܪܐ ܒܡܘܚܐ ܘܒܟܒܕܐ ܡܕܡ ܡ̣ܢ ܚܝ̈ܠܐ܆ ܣܛܪ ܡ̣ܢ ܚܝ̈ܠܐ ܚܝܘ̈ܬܢܝܐ ܒܠܚܘܕ. ܘܕܗ̣ܝ ܗ̇ܝ ܬܪܥܝ̣ܬܐ ܩܕܡܝܬܐ ܫܪܝܪܐ. ܝܕܝܥܐ ܡ̣ܢ ܗ̇ܝ ܕܩܕܡܢܢ ܫܪܪܢܢ. ܕܢܦܫܐ ܡܠܝ̣ܠܬܐ ܒܟܝ̣ܪܐܝܬ ܒܪܘܚܐ ܠܒܢܝܬܐ ܡܬܐܣܪܐ. ܘܟܕ ܢܦܫܐ ܡܠܝ̣ܠܬܐ ܡܫܬܟܚܐ ܡ̣ܢ ܐܢܢܩܝ ܕܐܦ ܚܝܘܬܐ ܬܫܬܟܚ. ܒܗ̇ܝ ܕܡ̣ܢ ܠܐ ܡܫܟܚܢ̈ܝܬܐ ܗ̱ܝ. ܕܐܕܫܐ ܒܠܥܕ ܓܢܣܐ ܢܫܬܟܚ. ܘܟܕ ܚܝܘܬܐ ܡܫܬܟܚܐ܇ ܡ̣ܢ ܐܢܢܩܝ ܕܐܦ ܪܓܫܬܐ ܘܙܘܥܐ ܢܫܬܟܚܘܢ ܕܐܝܬܝܗܘܢ ܦܘܪ̈ܟܣܐ ܡܩܝ̈ܡܢܐ ܕܝܠܗ̇ ܕܚܝܘܬܐ. ܘܡ̣ܢ ܗܠܝܢ ܡܬܝܕܥܐ ܕܥܡܗ̇ ܕܗ̇ܝ ܕܡܬܐܣܪܐ ܢܦܫܐ ܡܠܝ̣ܠܬܐ ܥܡ ܪܘܚܐ ܚܝܘܬܢܝܬܐ. ܐܦ ܚܝ̈ܠܝ ܪܓܫܬܐ ܘܙܘܥܐ ܘܬܘܪܣܝܐ ܡܫܬܟܚܝܢ ܒܗ̇ ܒܪܘܚܐ. ܘܐܦܢ ܡܥܒܕܢ̈ܘܬܗܘܢ ܕܚܝ̈ܠܐ ܗܠܝܢ. ܥܠ ܡܘܚܐ ܘܟܒܕܐ ܣܢܝ̣̈ܩܢ ܠܘܬ ܫܘܡܠܝܗܝܢ ܘܡܬܓܠܝܢܘܬܗܝܢ.

 

ܢܘܗܪܐ:

 

ܕܥ ܕܟܠܗܘܢ ܗܠܝܢ ܚܝ̈ܠܐ ܘܡܥܒܕܢ̈ܘܬܐ ܕܡܢܝܢܢ. ܚܝ̈ܠܐ ܐܢܘܢ ܦܓܪ̈ܢܝܐ ܘܡܥܒܕܢ̈ܘܬܐ ܦܓܪ̈ܢܝܬܐ. ܘܐܘܪ̈ܓܢܐ ܐܢܘܢ ܕܚܝܠܐ ܡܬܝܕܥܢܐ ܐܘܟܝ̣ܬ ܚܝܠܐ ܕܒܢ. ܗ̇ܘ ܕܐ̱ܚܪܢܐ ܗ̱ܘ ܡܢܗܘܢ. ܒܗ̇ܝ ܕܗܠܝܢ ܡ̇ܢ ܐܦ ܠܚܝ̈ܘܬܐ ܕܠܐ ܡܠܝ̣̈ܠܢ ܫܟܝ̣̈ܚܢ. ܚܡܬܐ ܐܡ̇ܪ ܐ̱ܢܐ ܘܡܫܝܢܘܬܐ. ܘܚܕܘܬܐ ܘܥܩܬܐ. ܘܪ̈ܓܫܐ ܓܘ̈ܝܐ ܟܝܬ ܘܒܪ̈ܝܐ. ܘܚܝ̈ܠܐ ܟܝܢܝ̈ܐ ܕܡܘܠܕܐ ܘܬܘܪܣܝܐ ܘܬܪܒܝ̣ܬܐ. ܗܘܢܐ ܕܝܢ ܡ̣ܢ ܓܘܫ̈ܡܐ܆ ܠܢ ܒܠܚܘܕܝܢ ܫܟܝ̣ܚ. ܘܗ̇ܝ ܕܡܐܣܪ ܐܣ̣ܝܪ ܗܘܢܐ ܕܒܢ ܒܪܘܚܐ ܚܝܘܬܢܝܬܐ ܕܒܠܒܐ ܫܪܪܢܢ. ܠܐ ܬܣܬܟܠܝܗ̇ ܕܡܡܙܓ ܡܙܝ̣ܓ ܥܡܗ̇ ܐܘ ܒܗ̇ ܫܪܝܐ ܐܡ̣ܪܢܢ܇ ܚܣ. ܗܕܐ ܬܪܥܝ̣ܬܐ ܗ̱ܝ ܕܗ̇ܢܘܢ ܕܠܐ ܣܝܡܝ̣ܢ ܕܝ̣ܢܗ ܕܐܠܗܐ ܩܕܡ ܥܝܢܝ̈ܗܘܢ. ܘܕܥܡܗ ܕܦܓܪܐ ܡܓܡܕܝ̣ܢ ܠܡܡܬܘܬܗ̇ ܠܗܝ ܠܐ ܡܝܘܬܬܐ ܕܒܨܠܡ ܐܠܗܐ ܒܪܝܐ.

 

 

 

ܦܣܘܩܐ ܫܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܦܣܘܩܐ ܫܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝ̣ܢܝܬܐ ܡܛܠ ܕܪ̈ܓܝܗ̇ ܕܢܦܫܐ ܡܠܝ̣ܠܬܐ ܒܝܕ̈ܥܬܐ ܘܝܘܠܦܢ̈ܐ ܣܛܪ ܡ̣ܢ ܗܠܝܢ ܕܡ̣ܢ ܠܥܠ ܐܬܥܗܕܢܢ ܘܐܝܬܝܗܘܢ ܐܪܒܥܐ

 

 

 

ܕܪܓܐ ܩܕܡܝܐ ܐܝܬܘܗܝ ܗ̇ܘ ܕܡܬܩܪܐ ܗܘܢܐ ܗܘܠܢܝܐ. ܐܟܙܢܐ ܕܢܦ̈ܫܬܐ ܕܛܠܝ̈ܐ. ܕܓܠܝ̣̈ܙܢ ܡ̣ܢ ܟܠܗܝܢ ܝܕ̈ܥܬܐ ܘܝܘܠܦܢ̈ܐ. ܐܠܐ ܒܚܝܠܐ ܩܢ̈ܝܢ ܩܘܒܠܗܘܢ.

 

ܕܪܓܐ ܬܪܝܢܐ:

 

ܐܝܬܘܗܝ ܗ̇ܘ ܕܡܬܩܪܐ ܗܘܢܐ ܐܟܣܝ̣ܣܝܐ. ܗ̇ܘ ܕܟܝܢܐ ܗ̱ܘ. ܘܒܠܥܕ ܝܘܠܦܢܐ ܡܫܬܟܚ ܠܒܢܝ̈ܢܫܐ ܐܝܟ ܗ̇ܝ ܕܢܕܥ ܕܟܠܐ ܪܒ ܡ̣ܢ ܡܢܬܐ ܘܫܪܟܐ. ܘܒܡܨܥܝܘܬܗ ܕܗܘܢܐ ܗܢܐ ܟܠܗܝܢ ܝܕ̈ܥܬܐ ܡܬܝܠܦܢ̈ܝܬܐ ܡܬܩܢ̈ܝܢ. ܘܒܗ ܒܗܢܐ ܗܘܢܐ ܘܐܦܢ ܟܝܢܐ ܗ̱ܘ ܐܠܐ ܠܘ ܫܘܝܐܝܬ ܡܫܘܬܦܝ̣ܢ ܒܗ ܒܢܝ̈ܢܫܐ ܟܠܗܘܢ. ܒܗ̇ܝ ܕܡܢܗܘܢ ܡ̇ܢ ܝܕ̈ܥܬܐ ܣܓܝ̈ܐܬܐ ܟܝܢܝ̈ܬܐ ܝ̇ܕܥܝ̣ܢ. ܡܢܗܘܢ ܕܝܢ ܠܘ ܣܓܝ̈ܐܬܐ. ܘܐ̱ܚܪ̈ܢܐ ܬܘܒ ܦܫܝ̣ܩܐܝܬ ܝܠܦܝ̣ܢ ܘܡܬܬܓܪܝ̣ܢ ܠܝܕ̈ܥܬܐ ܡܬܩܢ̈ܝܢܝܬܐ. ܒܡܨܥܝܘܬܗܝܢ ܕܝܕ̈ܥܬܐ ܟܝܢܝ̈ܬܐ܆ ܐ̱ܚܪ̈ܢܐ ܕܝܢ ܠܘ ܦܫܝ̣ܩܐܝܬ. ܗܐ ܓܝܪ ܒܪܢܫܐ ܐ̱ܢܫ ܥܡܗ̇ ܕܗ̇ܝ ܕܡܬܚܫܒ ܕܚܝܠܐ ܡܩܒܠܢܐ ܬܘܒ ܕܢܦܫܐ ܠܐ ܗܘܠܢܝܬܐ ܗ̱ܝ. ܠܝ̣ܓܐܝܬ ܡܫܬܪܪ ܕܢܦܫܐ ܠܐ ܡܝܘܬܬܐ ܗ̱ܝ. ܐ̱ܚܪ̈ܢܐ ܕܝܢ ܠܘ ܠܝ̣ܓܐܝܬ ܐܠܐ ܒܬܪ ܙܒܢܐ. ܒܕܓܘܢ ܗ̣ܝ ܗܕܐ ܡܕܪܟܢܘܬܐ ܐܟܡܐ ܕܡܨܝܐ ܕܒܣ̈ܡܐ ܐ̱ܚܪ̈ܝܐ ܕܒܨܝ̣ܪܘܬܐ ܬܗܘܐ. ܐܝܟܢܐ ܕܠܐ ܡܕܡ ܢܣܬܟܠ ܐ̱ܢܫ. ܒܗ̇ ܒܕܡܘ̣ܬܐ ܡܨܝܐ ܕܒܣܟ̈ܐ ܐ̱ܚܪ̈ܝܐ ܕܝܬܝܪܘܬܐ ܬܗܘܐ. ܐܝܟܢܐ ܕܠܟܠܡܕܡ ܒܠܥܕ ܬܚܦܝ̣ܬܐ ܢܕܥ ܐ̱ܢܫ. ܘܗ̇ܢܘ ܕܪܓܐ ܕܢܒܝ̈ܐ ܘܓܡܝܪ̈ܐ ܘܦܝܠܠܘܣܘ̈ܦܐ ܐܠܗܝ̈ܐ.

 

ܕܪܓܐ ܬܠܝܬܝܐ ܐܝܬܘܗܝ ܗ̇ܘ ܕܡܬܩܪܐ ܗܘܢܐ ܕܒܡܥܒܕܢܘܬܐ. ܐܝܟܢܐ ܕܟܠܗܝܢ ܝܕ̈ܥܬܐ ܡܬܩܢ̈ܝܢܝܬܐ ܬܩܢܐܝܬ ܝܕܝ̈ܥܬܐ ܢܗܘ̈ܝܢ. ܒܪܡ ܕܝܢ ܠܐ ܢܗܘ̈ܝܢ ܕܡܛܝ̈ܒܢ ܐܟܚܕܐ ܒܗܘܢܐ. ܐܠܐ ܟܕ ܢܨܒܐ ܗܘܢܐ܆ ܕܢܛܝܒ ܐܢܝܢ܆ ܕܠܐ ܥܘܟܪ ܡܬܛܝ̈ܒܢ ܠܗ. ܒܠܥܕ ܬܥܫܐ ܕܒܥܡܝܩܘܬ ܡܚܫ̈ܒܬܐ.

 

 

 

ܕܪܓܐ ܪܒܝܥܝܐ ܐܝܬܘܗܝ ܗܘܢܐ ܗ̇ܘ ܕܒܗ ܐܟܚܕܐ ܟܠܗܝܢ ܝܕ̈ܥܬܐ ܟܝܢܝ̈ܬܐ ܟܝܬ ܘܡܬܩܢ̈ܝܢܝܬܐ ܫܟܝ̈ܚܢ ܒܡܥܒܕܢܘܬܐ ܡܫܡܠܝܐܝܬ ܘܡܬܩܪܐ ܗܘܢܐ ܡܬܐܓܪܐ. ܘܠܗ ܠܗܢܐ ܕܪܓܐ. ܟܕ ܡܫܬܘܝܐ ܢܦܫܐ. ܡ̣ܢ ܟܕܘ ܗܘܝܐ ܕܐܬܡܢܥܬ݀ ܠܣܟܐ ܐ̱ܚܪܝܐ ܘܥܠܝܐ ܕܪ̈ܓܝ ܢܦ̈ܫܬܐ ܐ̱ܢܫܝ̈ܬܐ. ܘܦܣܥܬ݀ ܠܘܬ ܕܪܓܐ ܩܕܡܝܐ ܘܬܚܬܝܐ ܕܡܠܐܟ̈ܐ.

 

ܢܘܗܪܐ:

 

ܙܕܩ ܠܡܕܥ܆ ܕܪܓܫܐ ܡ̇ܢ ܒܪܝܐ. ܥܡ ܗܘܠܐ ܕܝ̣ܠܢܝܬܐ. ܘܟܕ ܡܛܝܒ ܡܬܪܓܫܢܐ܆ ܡܨܐ ܕܢܕܪܟܝ̣ܘܗܝ. ܐܟܙܢܐ ܕܥܝܢܐ ܘܐܕܢܐ ܘܫܪܟܐ. ܪܓܫܐ ܕܝܢ ܓܘܝܐ. ܥܡ ܗܘܠܐ ܡܕܡ ܦܫܝ̣ܛܬܐ. ܘܟܕ ܠܐ ܢܗܘܐ ܕܡܛܝܒ ܡܬܪܓܫܢܐ ܡܨܐ ܕܢܕܪܟܝ̣ܘܗܝ. ܐܟܙܢܐ ܕܦܢܛܣܝܐ ܘܗܓܓܐ ܘܫܪܟܐ. ܗܘܢܐ ܕܝܢ ܒܠܚܘܕܘܗܝ. ܒܠܥܕ ܗܘܠܐ ܡܕܪܟ ܠܡܬܕܪ̈ܟܢܘܗܝ. ܘܟܕ ܠܐ ܗܘܠܢܝ̈ܐ ܠܗܘܠܢܝ̈ܐ ܥܒܕ܆ ܡܕܪܟ ܠܗܘܢ ܐܟܙܢܐ ܕܡ̣ܢ ܣܘܩܪܐܛܝܣ ܘܦܠܐܛܘܢ ܘܫܪܟܐ ܕܩܢܘ̈ܡܐ ܗܘܠܢܝ̈ܐ. ܨܘܪܬܐ ܡܕܡ ܠܐ ܗܘܠܢܝܬܐ ܕܐܝܬܝܗ̇ ܐ̱ܢܫܘܬܐ܆ ܡܕܪܟ. ܘܟܕ ܠܗܘܠܢܝ̈ܐ ܐܝܟ ܠܐ ܗܘܠܢܝ̈ܐ ܚܙܐ. ܟܡܐ ܡܕܝܢ ܠܗ̇ܢܘܢ ܕܒܟܝܢܐ ܠܐ ܗܘܠܢܝܝ̈ܢ ܡܟܢ ܠܡܚܙܐ. ܐܢܗܘ ܕܠܘ ܒܛܝ̣̈ܛܐ ܗܘܠܢܝ̈ܐ ܢܚܫ̈ܟܢ ܚܙܝ̈ܬܗ. ܠܢܦ̈ܫܬܐ ܐܡ̇ܪ ܐ̱ܢܐ ܘܡܠܐܟ̈ܐ. ܐܦ ܓܝܪ ܘܡ̣ܢ ܛܘܒ̈ܬܢܐ ܚܙ̈ܝܝ ܠܐܠܗܐ ܡܨܐ ܠܡܗܘܐ ܐܢ ܓܕܢ.

 

ܢܘܗܪܐ:

 

ܘܗ̣ܢܝܢ ܗܠܝܢ ܝܕ̈ܥܬܐ ܡܬܩܢܝܢ̈ܝܬܐ ܕܐܬܡܢ̈ܝܝܢ. ܐܘ ܒܝܕ ܕܘܪܫܐ ܘܥܡܠܐ ܘܨܘܠܠܗ ܕܗܘܢܐ ܡܬܩܢ̈ܝܢ. ܐܟܙܢܐ ܕܠܢܒܝ̈ܐ ܕܗܘܢܐ ܡܬܩܢ̈ܝܢ. ܐܟܙܢܐ ܕܠܢܒܝ̈ܐ ܘܠܫܠܝ̈ܚܐ ܘܝܚܝ̈ܕܝܐ ܓܡܝ̣ܪ̈ܐ ܘܢܙܝ̣ܪ̈ܐ. ܐܘ ܒܝܕ ܪ̈ܘܟܒܐ ܕܦܪ̈ܘܛܐܣܝܣ ܫܪܝܪ̈ܬܐ ܒܙܢܐ ܐܦܘܕܝܟܣܝܣܝܐ. ܐܟܙܢܐ ܕܠܦܝܠܠܘܣܘ̈ܦܐ ܗ̇ܢܘܢ ܘܠܘ ܐܫܝ̣̈ܠܐ ܐܘܟܝ̣ܬ ܠܡܠܦܢ̈ܐ ܩܕܝ̈ܫܐ. ܘܠܗ̇ ܠܗܕܐ ܡܐܪܙ ܩܕܝܫܐ ܐܘܓܪܝܣ ܟܕ ܐܡ̇ܪ. ܚܙܬܐ ܕܗܘ̈ܢܐ ܐܝܟ ܕܐܝܬܝܗ̇. ܐܘ ܗܘܢܐ ܕܟܝܐ ܚܙܐ܆ ܐܘ ܡܠܬܐ ܕܚܟܝ̈ܡܐ ܡܫܘܕܥܐ. ܗ̇ܘ ܕܝܢ ܕܓܠܝ̣ܙ ܡ̣ܢ ܬܪ̈ܬܝܗܝܢ ܠܘܬ ܥܕܠܝܐ ܫܪܟ ܕܡܟܬܒܢܐ.

 

 

 

 

 

ܦܣܘܩܐ ܬܡܝܢܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝܢܝܬܐ

 

ܦܣܘܩܐ ܬܡܝܢܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܕܝ̣ܠܝ̈ܬܐ ܐ̱ܢܫܝ̈ܬܐ ܘܒܗ ܐܝܬ ܢܝ̈ܫܐ ܚܡܫܐ. ܢܝܫܐ ܩܕܡܝܐ ܡܛܠ ܚܫ̈ܐ ܕܝ̣ܠܢܝܝ̈ܢ ܠܒܪܢܫܐ. ܡܛܠ ܡܬܕܡܪܢܘܬܐ

 

ܗܕܐ ܗ̱ܝ ܗ̇ܝ ܕܗܘܝܐ܆ ܟܕ ܢܚܙܐ ܐ̱ܢܫ ܐܘ ܢܫܡܥ ܐܘ ܢܬܚܫܒ ܨܒܘܬܐ ܡܕܡ ܐܝܕܐ ܕܠܐ ܝ̇ܕܥ ܥܠܬܗ̇. ܘܡܛܠ ܗܕܐ ܚܫܘܫܘܬܐ ܡܕܡ ܕܝ̣ܠܢܝܬܐ ܗܘܝܐ ܒܢܦܫܗ. ܗ̇ܝ ܐܝ̇ܕܐ ܕܕܘܡܪܐ ܡܬܩܪܝܐ. ܘܟܕ ܣܓܝ ܥܫܢܐ ܗ̣ܝ ܚܫܘܫܘܬܐ ܗܕܐ܆ ܬܡܗܐ ܡܬܩܪܝܐ.

 

ܡܛܠ ܓܚܘܟܘܬܐ:

 

ܟܕ ܓܝܪ ܡܪܓܫ ܒܪܢܫܐ ܒܗܢܝܐܘܬܐ ܡܕܡ. ܗ̣ܘ ܗܟܘܬ ܕܝܐܬܗܣܝܣ ܡܕܡ ܕܝ̣ܠܢܝܬܐ ܗܘܝܐ ܒܢܦܫܐ. ܥܕܡܐ ܠܗ̇ܝ ܕܢܫܬܦܥܘܢ ܘܢܫܬܪܘܢ ܡܥܒܪ̈ܢܘܗܝ ܕܦܓܪܐ ܘܟܒܪܐ ܬܘܒ ܬܬܢܕܢܕ ܘܬܬܛܪܛܥ. ܘܠܗܓܐ ܡܕܡ ܡܢܗ̇ ܢܫܬܡܪ ܘܢܬܕܚܐ ܠܘܬ ܥܘܩܒܪ̈ܬܐ ܕܐܦ̈ܐ ܘܢܦܫܘܛ ܐܢܝܢ ܥܕܡܐ ܠܗ̇ܝ ܕܢܬܦܬܚ ܦܘܡܐ. ܘܢܬܦܥܪ ܚܟܐ ܒܦܫܛܗܝܢ ܘܗ̇ܘܐ ܓܘܚܟܐ. ܐܦ ܓܝܪ ܘܒܗܢܝܐܘܬܐ ܬܘܒ ܡܬܦܬܝܢ ܘܡܫܬܪܝܢ ܡܥܒܪ̈ܢܐ ܕܦܓܪܐ. ܐܠܐ ܒܓܘܚܟܐ ܡ̇ܢ܇ ܗ̣ܝ ܡܚܫܒܬܐ ܝܬܝܪܐܝܬ ܡܥܒܕܐ ܒܛܘܪܛܥܐ ܗ̇ܘ ܟܒܕܢܝܐ. ܘܕܚܝܐ ܕܠܗܓܐ ܗ̇ܘ ܕܠܐܦܝ ܦܘܡܐ ܡܬܦܪܣ ܟܝܢܐ ܠܡܦܘܫܫܘܬܗ. ܒܗܢܝܐܘܬܐ ܕܝܢ ܚܡܝܡܘܬܐ ܒܠܚܘܕ ܡܡܫܚܬܐ ܡܬܦܫܛܐ ܠܘܬ ܒܪܝܘܬܐ ܕܗܕܐ ܘܫܪܝܐ ܘܡܪܦܝܐ ܠܗܘܢ ܒܝܕ ܪܛܝ̣ܒܘܬܐ ܢܨܝ̣ܒܬܐ. ܘܡܛܠܗܕܐ ܗܢܝܐܘܬܐ ܠܒܪܢܫܐ ܘܠܚܝ̈ܘܬܐ ܠܐ ܡܠܝ̣̈ܠܬܐ ܐܟܚܕܐ ܡܨܝܐ ܕܬܗܘܐ. ܓܘܚܟܐ ܕܝܢ ܠܒܪܢܫܐ ܒܥܠܬ݀ ܕܝ̣ܠܢܝܘܬ ܡܚܫܒܬܐ.

 

ܡܛܠ ܒܟܝܐ:

 

ܒܟܝܐ ܕܝܢ ܗ̇ܘܐ܆ ܟܕ ܡܪܓܫ ܒܪܢܫܐ ܒܠܙܬܐ ܡܕܡ. ܘܡܬܩܦܣܐ ܚܡܝܡܘܬܐ ܠܐܦܝ̈ ܠܓܘ. ܘܡܬܥܨܪ ܕܡܐ ܠܒܢܝܐ. ܗ̣ܘ ܗܟܘܬ ܐܦ ܡܘܚܐ ܡܬܥܨܪ. ܘܡܬܕܚܝܐ ܪܛܝ̣ܒܘܬܐ ܕܒܥܘܡ̈ܩܘܗܝ. ܒܝܕ ܡܥܒܪ̈ܢܐ ܕܫܬܐܣܬܗ ܠܘܬ ܥܝ̈ܢܐ. ܟܕ ܥܡܨܐ ܕܬܡܪ̈ܐ ܒܝܕ ܛܘ̈ܦܐ ܢܓܕ ܠܗ̇ ܠܪܛܝ̣ܒܘܬܐ. ܘܡܛܠ ܕܒܥܩܬܐ ܬܘܒ ܩܦܝ̣ܣܘܬܐ ܕܐܝܟ ܗܕܐ ܠܚܡܝ̣ܡܘܬܐ ܗ̇ܘܝܐ. ܐܠܐ ܒܒܟܝܐ ܡܚܫܒܬܐ ܝܬܝܪܐܝܬ ܡܚܫܐ ܠܗ̇ ܠܢܦܫܐ ܘܡܠܙܐ ܠܗ ܠܦܓܪܐ ܥܕܡܐ ܠܗ̇ܝ ܕܢܬܥܨܪܘܢ ܗܕܡܘ̈ܗܝ ܡܪ̈ܢܝܐ. ܘܡܛܠܗܕܐ ܥܩܬܐ ܠܡܠܝ̣̈ܠܐ ܘܠܠܐ ܡܠܝ̣̈ܠܐ ܗ̇ܘܝܐ. ܒܟܝܐ ܕܝܢ ܠܡܠܝ̣̈ܠܐ ܒܠܚܘܕ.

 

ܡܛܠ ܒܗܬܬܐ:

 

ܟܕ ܓܝܪ ܢܬܚܫܒ ܒܪܢܫܐ. ܕܡܪܓܫܘ ܐܪܓܫ ܒܗ ܟܢܬܗ. ܕܣܘܥܪܢܐ  ܡܕܡ ܫܟܝ̣ܪܐ ܣܥܪ. ܐܘ ܡܠܬܐ ܕܠܐ ܦܐܝܐ ܐܡ̣ܪ. ܒܩܢܛܐ ܡܕܡ ܗ̇ܘܐ ܒܫܘܪܝܐ. ܐܝܛܐ ܗ̣ܘ ܠܗ ܡܠܒܒ. ܐܝܟ ܗ̇ܘ ܕܠܐ ܪܒܐ ܣܟܠܘܬܗ ܘܡܛܠ ܗܕܐ ܒܪ ܕܪܝܫ ܡܬܦܫܛܐ ܚܡܝ̣ܡܘܬܗ ܠܐܦܝ̈ ܠܒܪ ܘܡܣ̈ܡܩܢ ܐܦܘ̈ܗܝ ܒܥܠܬ݀ ܒܣܪܢܝܘܬܗܝܢ ܘܡܦܪܣܥܘܬ ܦܘܪ̈ܘ ܕܝܠܗܝܢ. ܡ̣ܢ ܕܡܐ ܗ̇ܘ ܕܥܡܗ̇ ܕܚܡܝܡܘܬܐ ܡܬܢܓܕ ܘܡܬܢܬܦ ܒܝܕ ܙܘܥܐ. ܒܕܚܠܬܐ ܕܝܢ ܡܛܠ ܕܝܬܝܪ ܩܫܐ ܩܢܛܐ. ܡܬܦܣܩ ܠܗ ܣܒܪܐ ܡ̣ܢ ܠܘܒܒܐ ܕܐܝܟ ܗܢܐ. ܘܡܛܠܗܕܐ ܒܐܡܝ̣ܢܘ ܠܐܦܝ̈ ܠܓܘ ܟܡܢܐ ܚܡܝܡܘܬܐ ܘܥܪܩܐ. ܘܥܡܗ̇ ܐܦ ܕܡܐ. ܘܗܟܢܐ ܡܫܬܢܐ ܓܘܢܐ ܕܗ̇ܢܘܢ ܕܗܕܐ ܚ̇ܐܫܝ̣ܢ. ܠܠܐ ܡܠܝ̣̈ܠܐ ܕܝܢ ܒܗܬܬܐ ܠܐ ܗ̇ܘܝܐ ܐܠܐ ܕܚܠܬܐ ܒܠܚܘܕ ܒܥܠܬ݀ ܗ̇ܝ ܕܓܠܝ̣ܙܝܢ ܡ̣ܢ ܡܚܫܒܬܐ ܗ̇ܝ ܡܠܒܒܢܝ̣ܬܐ ܘܢܬܘܦܬܐ ܕܚܡܝܡܘܬܐ ܘܕܕܡܐ ܠܐܦܝ̈ ܠܒܪ.

 

ܡܛܠ ܟܘܚܕܐ:

 

ܟܕ ܓܝܪ ܢܬܚܫܒ ܒܪܢܫܐ ܕܐܢܗܘ ܕܢܣܥܘܪ ܣܘܥܪܢܐ ܡܕܡ ܫܟܝ̣ܪܐ ܡܣܬܠܐ ܡ̣ܢ ܒܢܝ̈ܢܫܐ ܘܡܬܓܢܐ. ܘܐܦܢ ܠܐ ܡܨܝܢ ܕܢܗܪܘܢܝܗܝ. ܗܝܕܝܢ ܡܬܟܠܐ ܘܢܙܕܓܪ ܚܐܦܗ ܡܢܗ̇ ܕܣܥܘܪܘܬܐ ܗ̇ܝ. ܘܗ̣ܝ ܥܠܬܐ ܗ̇ܝ ܟܠܘܝܬܗ ܟܘܚܕܐ ܡܬܩܪܝܐ. ܦܪܝܫܐ ܕܝܢ ܕܚܠܬܐ ܡ̣ܢ ܟܘܚܕܐ. ܡܛܠ ܕܒܕܚܠܬܐ. ܡ̣ܢ ܣܘܓܦܢܐ ܕܝܬܝܪ ܩܫܐ ܡܙܕܗܪ ܒܪܢܫܐ. ܒܟܘܚܕܐ ܕܝܢ ܡ̣ܢ ܓܘܢܝܐ ܒܠܚܘܕ ܡܙܕܗܪ. ܒܠܐ ܡܠܝ̈ܠܐ ܕܝܢ ܠܐ ܫܟܝ̣ܚ ܟܘܚܕܐ܇ ܟܕ ܐܦܠܐ ܠܢܡܘܣܐ ܡܫܥܒ̈ܕܢ.

 

 

 

ܢܝܫܐ ܬܪܝܢܐ ܡܛܠ ܙܢܝ̈ܐ ܕܡܫܘܕ̈ܥܢܘܬܐ. ܡܛܠ ܡܠܬܐ ܢܦܘܩܬܐ

 

ܐܡܪܝܢܢ ܕܒܪܢܫܐ ܐܠܘ ܒܠܚܘܕܘܗܝ ܗ̣ܘܐ ܒܥܠܡܐ ܩܢܘܡܐ ܝܚܝܕܝܐ. ܘܕܒܩܐܛܣܛܐܣܝܣ ܟܝܢܝܬܐ ܒܠܚܘܕ ܡܬܗܦܟ ܗ̣ܘܐ܆ ܣܓܝ ܒܝܫܐܝܬ ܚ̇ܝܐ ܗ̣ܘܐ. ܐܘ ܠܐ ܣܟ ܐܬܡܨܝ̣ ܠܡܐܚܐ. ܒܗ̇ܝ ܕܬܘܪ̈ܣܝܐ ܘܠܒܘ̈ܫܐ ܟܝܢܝ̈ܐ. ܐܠܘܠܐ ܒܐܘܡܢܘܬܐ ܢܬܬܩܢܘܢ ܠܐ ܣܟ ܥ̇ܗܢܝܢ ܠܩܘܝܡܐ ܕܟܝܢܗ. ܘܟܕ ܚܕ ܒܪܢܫܐ ܒܠܚܘܕܘܗܝ ܠܐ ܡܨܐ ܠܡܐܟܪܘ ܘܠܡܛܚܢ ܘܠܡܥܪܨ ܘܠܡܢܚܬܡܘ ܘܠܡܙܩܪ ܘܠܡܚܛ. ܘܠܡܒܢܐ ܘܠܡܦܣܠ ܘܠܡܢܓܪܘ ܘܠܡܩܝܢܝܘ ܘܠܡܚܫܠ. ܘܫܪܟܐ ܕܐ̱ܚܪ̈ܢܝܬܐ ܣܓܝ̈ܐܬܐ ܠܡܣܥܪ. ܐܠܨܐܝܬ ܐܣܬܢܩܘ ܒܢܝ̈ܢܫܐ ܥܠ ܣܘܝܥܐ ܕܡ̣ܢ ܚܕ̈ܕܐ. ܘܗ̣ܘ ܣܘܝܥܐ ܒܝܕ ܡܫܘܕܥܢܘܬܐ ܗ̇ܘܐ. ܘܗ̣ܝ ܡܫܘܕܥܢܘܬܐ ܒܒ̈ܢܬ ܩ̈ܠܐ ܝܬܝܪ ܢܗܝܪܬܐ ܘܥܬܝܪܬܐ ܗ̇ܘܝܐ. ܒܕܓܘܢ ܟܕ ܥܗܢܘܬܐ ܡ̣ܢ ܟܝܢܐ ܢܣ̣ܒܘ. ܐܬܦܪܣܘ ܘܠܟܠ ܟܝܢܐ ܘܡܥܒܕܢܘܬܐ ܕܠܐ ܙܒܢܐ ܫܡܐ ܪܟܒܘ. ܘܠܟܠ ܡܥܒܕܢܘܬܐ ܕܥܡ ܙܒܢܐ ܡܠܬܐ. ܘܒܐܣܪ̈ܐ ܦܐܝ̈ܐ ܠܫܡܗ̈ܐ ܥܡ ܡ̈ܠܐ ܥܪܙܠܘ. ܘܗܟܢܐ ܡܠܬܐ ܢܦܘܩܬܐ ܠܚܡܘ. ܒܝܕ ܕܚܝܐ ܘܢܦܩܐ ܕܪܘܚܐ ܕܡ̣ܢ ܪܐܬܐ ܘܢܩܫܗ̇ ܕܒܐܪܐܛܐܪ̈ܐܣ. ܘܣܘܟܡܐ ܕܠܫܢܐ ܘܫܢ̈ܐ ܘܣܦܘ̈ܬܐ ܒܕܡܘ̣ܬܐ ܡܫܚܠܦܬܐ. ܘܕܗ̣ܝ ܗܕܐ ܡܠܬܐ ܠܘ ܗ̇ܝ ܗ̣ܝ ܕܒܬܚܘܡܐ ܕܒܪܢܫܐ ܡܬܢܣܒܐ܆ ܝ̣ܕܝ̣ܥܐ ܡ̣ܢ ܗ̇ܝ ܕܗܕܐ ܒܛܠܐ ܒܠܥܕ ܒܘܛܠܐ ܕܟܝܢܐ ܐ̱ܢܫܝܐ. ܐܟܡܐ ܕܒܦܐܩ̈ܐ ܘܗ̇ܢܘܢ ܕܫܠܝܢ. ܘܡ̣ܢ ܗ̇ܝ ܬܘܒ ܕܗ̇ܝ ܡ̇ܢ܆ ܐܘܣܝܝܬܐ ܗ̱ܝ ܘܠܟܠ ܥܡܡܝ̈ܢ ܗ̣ܝ ܟܕ ܗ̣ܝ. ܘܡܩܝ̣ܡܢܝܬܐ ܗ̱ܝ ܕܟܝܢܐ ܐ̱ܢܫܝܐ. ܗܕܐ ܕܝܢ ܓܕܫܢܝܬܐ. ܘܠܘ ܠܟܠ ܐܡܘ̈ܢ ܘܫܪ̈ܒܢ ܗ̣ܝ ܟܕ ܗ̣ܝ. ܘܡ̣ܢ ܟܝܢܐ ܡܬܩܝܡܐ ܨܒܝܢܐܝܬ. ܘܡ̣ܢ ܗ̇ܝ ܬܘܒ ܕܠܐ ܡܠܝ̈ܠܐ ܡܨܝܢ ܠܡܡܠܠܘ ܒܗ̇ ܐܟܙܢܐ ܕܒܒܓܐ.

 

ܡܛܠ ܡܫܘܕܥܢܘܬܐ ܪܡܙܢܝܬܐ:

 

ܐܝܬ ܠܗ ܓܝܪ ܠܒܪܢܫܐ ܥܗܢܘܬܐ ܟܝܢܐܝܬ. ܕܐܟܡܐ ܕܠܟܠ ܟܝܢܐ ܘܥܒܕܐ ܒܪܬ݀ ܩܠܐ ܡܪܟܒ. ܕܐܦ ܒܐܣܟܡܐ ܡܕܡ ܕܝ̣ܠܢܝܐ ܢܫܘܕܥܝ̣ܘܗܝ. ܒܝܕ ܥܝܢܘ̈ܗܝ ܘܣܦ̈ܘܬܗ ܘܨܒܥ̈ܬܗ. ܡܠܘܢ ܕܝܢ ܒܝܕ ܟܠܗܘܢ ܗܕܡܘ̈ܗܝ ܗ̇ܢܘܢ ܕܨܒܝܢܐܝܬ ܡܬܬܙܝ̣ܥܝܢ. ܟܕ ܫܠܡܘܬܐ ܒܝܬ ܠܗ ܠܟܢܘ̈ܬܗ ܬܗܘܐ ܐܟܡܐ ܕܐܦ ܡܢܝ̈ܐ ܒܨܒ̈ܥܬܗܘܢ ܡܬܚܫܚܝ̣ܢ. ܘܠܟܠ ܡܢܝܢܐ ܕܡܘ̣ܬܐ ܕܝ̣ܠܢܝܬܐ ܡܛܦܣܝ̣ܢ. ܐܦ ܓܝܪ ܘܚܪ̈ܫܐ ܒܗ ܒܗܢܐ ܙܢܐ ܕܡܫܘܕܥܢܘܬܐ ܣܘܓܐܐ ܕܫܡܗ̈ܐ ܘܡ̈ܠܐ ܡܫܘܕܥܝ̣ܢ. ܘܗܢܐ ܡ̇ܢ ܙܢܐ ܐܦܢ ܡܟܢ ܠܡܫܘܕܥܘ. ܐܠܐ ܡܫܘܕܥܢܘܬܐ ܕܒܝܕ ܡܠܬܐ ܝܬܝܪ ܥܬܝܪܐ ܘܢܗܝܪܐ ܘܕܠܝ̣ܠܐ.

 

ܡܛܠ ܟܬܘܒܘܬܐ:

 

ܐܟܡܐ ܓܝܪ ܕܠܟܠ ܣܘܟܠܐ ܒܪܬ݀ ܩܠܐ ܐܬܡܨܝ̣ ܠܡܪܟܒܘ ܒܪܢܫܐ. ܒܗ̇ ܒܕܡܘ̣ܬܐ ܐܦ ܨܘܪܬܐ ܡܕܡ ܕܝ̣ܠܢܝܬܐ ܠܟܠ ܚܘܫܒ ܐܬܡܨܝ̣ ܠܡܨܪ. ܘܡܛܠ ܕܣܘ̈ܟܠܐ ܠܘܬ ܠܐ ܣܘܦ ܡܨܝܢ ܡܦܗܐ. ܘܕܨܘܪ̈ܬܐ ܕܠܐ ܣܘܦ ܢܛܘܪ ܒܪܢܫܐ ܒܗܓܓܗ ܘܥܘܗܕܢܗ܇ ܠܐ ܡܨܝܐ ܗܘܬ݀. ܐܬܦܪܣܘ ܒܢܝ̈ܢܫܐ ܘܐܬܘ̈ܬܐ ܦܫܝ̣̈ܛܬܐ ܛܦܣܘ ܒܦܚܡܐ ܕܣܘ̈ܟܠܐ ܘܫܡܗ̈ܐ ܦܫܝ̈ܛܐ. ܘܡܢܗܘܢ ܦܫܝ̣ܩܐܝܬ ܐܝܟ ܕܡ̣ܢ ܐܣܛܘ̈ܟܣܐ ܪ̈ܘܟܒܐ ܟܬܝ̈ܒܬܢܝܐ ܕܠܐ ܣܘܦ ܪܟܒܘ. ܘܡܛܠܗܕܐ ܟܐܢܐܝܬ ܠܗܝܢ ܠܐܬܘ̈ܬ ܐܣܛܘ̈ܟܣܝܐ ܟܢܝ̣ܘ.

 

 

 

ܢܝܫܐ ܬܠܝܬܝܐ ܡܛܠ ܐܘܡܢܘܬܐ

 

ܐܘܡܢܘܬܐ ܡ̇ܢ ܡܬܬܚܡܐ ܕܐܝܬܝܗ̇܆ ܐܟܣܝܣ ܢܦܫܢܝܬܐ. ܕܒܐܝ̈ܕܝܗ̇ ܡܬܡܨܐ ܒܪܢܫܐ ܠܡܬܚܫܚܘ ܒܗ̇ܘ ܕܣܝ̣ܡ ܕܝ̣ܠܢܝܐ ܡܛܠ ܢܝܫܐ ܡܕܡ ܕܝ̣ܠܢܝܐ ܠܦܘܬ ܨܒܝܢܐ ܗ̇ܘ ܕܡ̣ܢ ܚܘܫܒܐ ܡܬܗܕܐ ܐܟܡܐ ܕܡܟܢ. ܘܡ̣ܢ ܗܠܝܢ ܝ̣ܕܝ̣ܥܐ ܕܠܗ̇ ܠܗܕܐ ܡܟܢܘܬܐ ܬܪܝܢ ܐܢܘܢ ܪ̈ܝܫܐ. ܥܒܘܕܐ ܘܐܘܪܓܢܘܢ. ܘܥܒܘܕܐ ܡ̇ܢ ܗܘܝܘ ܚܘܫܒܐ ܐܘܟܝ̣ܬ ܚܝܠܐ ܡܬܗܓܓܢܐ ܐܝܬܘܗܝ. ܐܘܪܓܢܘܢ ܕܝܢ܆ ܗ̣ܢܘܢ ܗܕܡ̈ܐ ܦܓܪ̈ܢܝܐ. ܘܡܛܠ ܗܕܐ ܐܠܘܠܐ ܢܬܩܕܡ ܒܡܚܫܒܬܐ. ܐܦ ܐܟܡܐ ܕܙܕܩ ܡܨܐ ܠܡܬܬܩܢܘ ܒܡܥܒܕܢܘܬܐ. ܘܒܗ̇ ܒܡܚܫܒܬܐ ܝܬܝܪܐܝܬ ܘܒܨܝܪܐܝܬ ܡ̣ܢ ܚܕ̈ܕܐ ܡܗܝ̣ܪܝ̣ܢ ܐܘܡܢ̈ܐ܇ ܘܠܘ ܒܗܕܡ̈ܐ. ܘܐܦܢ ܕܘܪܫܐ ܥܗܢܝܐ ܕܗܕ̈ܡܐ ܝܬܝܪ ܡܥܕܪ ܠܘܬ ܫܟܚܬܗ̇ ܕܣܥܘܪܘܬܗ. ܐܦ ܓܝܪ ܘܡܕܡ ܡ̣ܢ ܚܝ̈ܘܬܐ ܕܠܐ ܡܠܬܐ ܒܐܘܡܢ̈ܘܬܐ ܬܡܝ̣̈ܗܬܐ ܡܗܝܪ̈ܢ܇ ܘܝܬܝܪ ܡ̣ܢ ܒܢܝ̈ܢܫܐ ܒܗܝܢ ܡܝܬܪ̈ܢ. ܐܟܙܢܐ ܕܕܒܘܪ̈ܝܬܐ ܒܬܘܩܢ ܩܘ̣ܩ̈ܝܬܐ ܫܬܝ̣̈ܬܝܬ݀ ܓܘܢܘ̈ܬܐ. ܘܓܘܓܝ ܒܙܩܘܪܐ. ܒܪܡ ܕܝܢ ܠܘ ܒܝܕ ܡܚܫܒܬܐ ܘܚܐܪܘܬܐ. ܐܠܐ ܡ̣ܢ ܚܐܦܐ ܟܝܢܝܐ ܗܘܬ݀ ܠܗܝܢ ܡܬܡܨܝܢܘܬܐ ܕܐܝܟ ܗܕܐ.

 

 

 

ܢܝܫܐ ܪܒܝܥܝܐ. ܡܛܠ ܗ̇ܘ ܡܐ ܕܫܦܝܪ ܘܗ̇ܘ ܡܐ ܕܫܟܝ̣ܪ

 

ܠܒܪܢܫܐ ܡ̇ܢ ܓܝܪ ܕܝ̣ܠܢܐܝܬ ܐܝܬ ܠܗ ܠܡܕܢ ܒܬܐܪܬܗ. ܕܗܢܐ ܡ̇ܢ ܥܒܕܐ ܫܦܝܪ ܘܦܐܐ ܘܝܐܐ ܘܡܝܩܪ. ܗ̇ܘ ܕܝܢ ܕܫܟܝ̣ܪ ܘܣܢܐ ܘܫܝ̣ܛ ܘܨܥܝ̣ܪ. ܘܕܒܟܝܢܐ ܫܦܝ̣ܪܝܢ ܣܘܥܪ̈ܢܐ ܘܫܟܝ̣ܪܝܢ܇ ܐܘ ܒܫܠܡܘܬܐ ܕܒܢܝ̈ܢܫܐ ܡܬܩܪܝܢ ܗܠܝܢ ܡ̇ܢ ܫܦܝܪ̈ܐ. ܗܠܝܢ ܕܝܢ ܫܟܝܪ̈ܐ ܒܬܪܟܢ ܡܚܘܝܢܢ ܒܝܕ ܐܠܗܐ. ܘܡ̣ܢ ܚܝ̈ܘܬܐ ܡ̇ܢ ܐܦܢ ܐܝܬ ܕܠܐ ܣܥܪ̈ܢ ܡܕܡ ܗ̇ܢܝܢ ܕܫܟܝ̣ܪ̈ܢ. ܘܐܦܢ ܡܟܢ̈ܢ. ܘܐܝܟ ܐܪܝܐ ܕܡܕܪܫ ܘܡܠܦ ܕܠܐ ܡܗܪ ܠܡܪܒܝܢܗ. ܗ̣ܝ ܗܕܐ ܠܘ ܟܝܢܐܝܬ ܗ̣ܝ ܠܗ. ܐܠܐ ܒܩܛܝ̣ܪܐ ܡܬܩܢܝܐ. ܒܪܢܫܐ ܕܝܢ ܠܘ ܗܟܢܐ. ܐܠܐ ܡ̣ܢ ܕܝܠܗ ܠܗܠܝܢ ܡ̇ܢ ܕܫܦܝܪ̈ܢ ܡܬܝܐܝܒ. ܘܡ̣ܢ ܗܠܝܢ ܕܫܟܝ̣ܪ̈ܢ ܐܦ̈ܐ ܡܦܢܐ. ܐܢ ܠܐ ܡ̣ܢ ܚܝܘܬܢܝܘܬܐ ܢܙܕܟܐ ܘܐܝ̣ܩܪ ܐ̱ܢܫܘܬܗ ܢܘܒܕ.

 

 

 

ܢܝܫܐ ܚܡܝܫܝܐ ܡܛܠ ܥܘܗܕܢܐ ܕܣܘܥܪ̈ܢܐ ܕܥܒ̣ܪܘ

 

ܐ̱ܢܫܝ̈ܢ ܡ̇ܢ ܐܡܪܝܢ ܕܠܘ ܕܝ̣ܠܝܬܐ ܗ̱ܘ ܕܒܪܢܫܐ ܥܘܗܕܢܐ ܕܗ̱ܘ ܡܐ ܕܥܒܪ ܒܗ̇ܝ ܕܐܦ ܠܚܝ̈ܘܬܐ ܕܠܐ ܡܠܬܐ ܫܟܝ̣ܚ ܥܘܗܕܢܐ. ܗܐ ܓܝܪ ܚܡܪܐ ܟܕ ܒܟܐܦܐ ܡܕܡ ܚܕܐ ܙܒܢ ܡܬܬܩܠ. ܟܠ ܐܡܬܝ ܕܥܠܝܗ̇ ܥܒ̇ܪ ܡܣܛܐ ܡܢܗ̇. ܘܐܠܘܠܐ ܕܒܥܘܗܕܢܗ ܢܛܝ̣ܪܐ ܗܘܬ݀ ܬܘܩܠܬܐ ܗ̇ܝ ܩܕܡܝܬܐ. ܐܝܟܢܐ ܡܙܕܗܪ ܗ̣ܘܐ ܡܢܗ̇ ܒܬܪܟܢ. ܘܗ̇ܝ ܕܫܪܝܪܐ ܗܕܐ ܗ̱ܝ ܕܫܟܝ̣ܚ ܠܗܝܢ ܥܘܗܕܢܐ.ܐܠܐ ܠܘ ܡܫܡܠܝܐܝܬ ܐܟܡܐ ܕܠܒܪܢܫܐ.

 

ܢܘܗܪܐ:

 

ܚܝܠܐ ܕܝܢ ܚܫܘܒܬܢܐ ܘܐܦܢ ܕܝ̣ܠܢܐܝܬ ܠܒܪܢܫܐ ܫܟܝ̣ܚ. ܐܠܐ ܫܘܚܠܦܐ ܗ̱ܘ ܐܘܣܝܝܐ. ܘܠܘ ܕܝ̣ܠܝܬܐ ܓܕܫܢܝܬܐ. ܘܡܛܠ ܗܕܐ ܠܘ ܥܡ ܕܝ̣ܠܝ̈ܬܐ ܡܢܝܢܝܗܝ. ܗ̣ܝ ܓܝܪ ܗܕܐ ܫܬܐܣܬܐ ܐܝܟ ܕܐܝܬܝܗ̇. ܒܗ ܘܡܛܠܬܗ ܬܐܘܪ̈ܝܣܐ ܥܒܕܐ.

 

 

 

 

 

ܦܣܘܩܐ ܬܫܝܥܝܐ ܕܩܦܠܐܘܢܬܪܝܢܐ ܕܫܬܐܣܬܐ ܬܡܝܢܝܬܐ

 

ܡܛܠ ܬܚܘ̈ܝܬܐ ܕܐܝܬܝ̣ܘ ܚܟܝ̈ܡܐ ܠܢܦܫܐ ܡܠܝܠܬܐ ܒܦܚܡܗ̇ ܕܥܡ ܦܓܪܐ ܘܡܢܘ̈ܬܗ. ܘܒܗ ܐܝܬ ܛܘ̈ܦܣܐ ܫܒܥܐ. ܛܘܦܣܐ ܩܕܡܝܐ

 

ܐܡ̣ܪܘ. ܕܢܦܫܐ ܕܡܘ̣ܬܐ ܗ̱ܝ ܕܡܠܟܐ. ܘܦܓܪܐ ܐܘܚܕܢܐ ܕܡܠܟܘܬܗ. ܘܠܗܢܐ ܡܠܟܐ ܣܦܪ̈ܐ ܐܝܬ ܠܗ ܘܦܠܚ̈ܐ ܘܐܝܓܡܘ̈ܢܐ ܕܐܝܬܝܗܘܢ ܪ̈ܓܫܐ ܓܘܝ̈ܐ ܘܒܪ̈ܝܐ. ܘܐܟܡܐ ܓܝܪ ܕܡܠܟܐ ܒܡܨܥܝܘܬܐ ܕܗܠܝܢ ܥܬܪ ܘܡܬܬܢܝܚ. ܒܗ̇ ܒܕܡܘ̣ܬܐ ܘܢܦܫܐ ܒܡܨܥܝܘܬܐ ܕܪ̈ܓܫܐ ܥܬܪܐ ܝ̣ܕܥܬܐ ܕܫܪܪܐ ܠܡܬܗܕܝܘ ܒܗ. ܘܝ̣ܕܥܬܐ ܕܛܒܬܐ ܠܡܣܥܪܗ̇. ܪ̈ܓܫܐ ܓܝܪ ܟܕ ܡܕܪܟܝ̣ܢ ܠܡܬܪ̈ܓܫܢܐ ܗܝܕܝܢ ܗܘܢܐ ܚܝܠܐ ܩܕܡܝܐ ܕܢܦܫܐ. ܡܕܪܟ ܠܫܘܬܦܘ̈ܬܗܘܢ ܘܠܦܘܪ̈ܫܢܝܗܘܢ. ܘܗܟܢܐ ܡ̣ܢ ܡܢܬܝ̈ܐ ܝܕ̈ܥܬܐ ܟܠܢܝ̈ܬܐ ܘܠܐ ܗܘܠܢܝ̈ܬܐ ܡܬܬܓܪܐ ܢܦܫܐ. ܘܐܟܡܐ ܓܝܪ ܕܡܠܟܐ ܟܕ ܫܦܝܪ ܡܦܪܢܣ ܠܗ̇ܢܘܢ ܕܬܚܝܬ ܐܝܕܗ ܐܝܟܢܐ ܕܠܘ ܣܓܝ ܢܬܡܚܠܘܢ ܘܢܬܡܣܟܢܘܢ ܘܠܐ ܢܬܡܨܘܢ ܠܡܦܠܚ ܘܠܡܬܠ ܠܗ ܓܙܝ̣ܬܐ ܘܡܟܣܐ ܘܫܪܟܐ ܕܙܕ̈ܩܐ. ܒܗ̇ ܒܕܡܘ̣ܬܐ ܐܦ ܢܦܫܐ ܙܕܩ ܠܗ̇ ܠܡܦܪܢܣܘܬܗ ܠܦܓܪܐ ܕܠܘ ܣܓܝ ܢܘܚܠ ܘܢܐܒܕ ܘܬܬܦܪܫ ܡܢܗ ܢܦܫܐ ܡ̣ܢ ܩܕܡ ܕܬܬܬܓܪ ܘܬܩܢܐ ܒܡܨܥܝܘܬܗ ܬܐܓܘܪܬܐ ܬܪܝܢܬ݀ ܙܢܐ ܕܬܘܪܝܐ ܘܣܥܘܪܘܬܐ. ܘܠܗ̇ ܠܗܕܐ ܡܫܘܕܥ ܛܘܒܢܐ ܦܘܠܘܣ ܟܕ ܫܠܚ ܠܗ ܠܛܝܡܘܬܐܘܣ ܬܠܡܝܕܗ ܕܚܡܪܐ ܩܠܝ̣ܠ ܐܫܬܝ ܡܛܠ ܐܣܛܘܡܟܟ. ܘܐܟܡܐ ܬܘܒ ܕܠܐ ܙܕܩ ܠܗ ܠܡܠܟܐ ܕܢܫܒܘܩ ܠܒ̈ܢܝ ܦܠܚܘܬܗ ܕܢܥܬܪܘܢ ܣܓܝ ܒܡܪ̈ܗܛܐ ܘܥܒ̈ܕܐ ܘܪ̈ܟܘ̣ܒܐ ܘܙܝ̈ܢܐ ܕܠܡܐ ܢܡܪܕܘܢ ܥܠܘܗܝ ܘܢܘܒܕܘܢܝܗܝ. ܒܗ̇ ܒܕܡܘ̣ܬܐ ܐܦ ܠܗ̇ ܠܢܦܫܐ ܠܐ ܙܕܩ ܠܗ̇ ܕܬܫܒܘܩ ܠܚܝ̈ܠܐ ܦܓܪ̈ܢܝܐ ܕܢܬܚܝܠܘܢ ܣܓܝ ܕܠܡܐ ܟܕ ܢܫܡܢܘܢ ܢܒܥܛܘܢܗ̇ ܘܠܐܒܕܢܐ ܬܫܪܟ. ܐܠܐ ܬܐܨܦ ܕܒܟܠܡܕܡ ܗ̣ܝ ܬܙܟܐ ܘܠܐ ܒܡܕܡ ܬܙܕܟܐ. ܟܕ ܐܦܣܘ̣ܢ̈ܝܬܐ ܒܠܚܘܕ. ܐܝܟ ܕܠܩܘܝܡܗܘܢ ܫܒܩܐ ܠܗܘܢ ܠܚܝ̈ܠܐ ܦܓܪ̈ܢܝܐ.

 

ܛܘܦܣܐ ܬܪܝܢܐ:

 

ܐܡ̣ܪ ܕܢܦܫܐ ܐܝܟ ܡܠܟܐ. ܘܗܘܢܐ ܬܪܝܢܗ ܘܨܒܐ ܒܛܒ̈ܬܗ. ܘܪܓܬܐ ܡܝܓܝܪܣܗ. ܘܚܡܬܐ ܢܛܪ ܬܪܥܗ. ܘܡܛܠ ܕܐܝܬ ܐܡܬܝ ܕܗ̣ܘ ܡܝܓܝܪܣܐ ܚܪܥܐ ܢܗܘܐ ܘܢܟܝ̣ܠܐ. ܘܙܒܢܝ̈ܢ ܣܓܝ̈ܐܢ ܦܛܒܓ̈ܐ ܡܬܩܢ ܕܝܬܝܪ ܗܢܝ̈ܐܝܢ ܘܪܓܝ̣ܓܝܢ. ܘܒܗܘܢ ܣܡܐ ܣ̇ܐܡ ܕܡܘܬܐ. ܐܦ ܢܛܪ ܬܪܥܐ ܬܘܒ ܙܒܢܝ̈ܢ ܣܓܝ̈ܐܢ ܠܪ̈ܚܡܘܗܝ ܕܡܠܟܐ ܡܗܪ. ܘܠܐ ܡܦܣ ܠܗܘܢ ܠܡܬܩܪܒܘ ܠܬܪܥ ܦܠܘܛܝܢ. ܡܩܪܒ ܕܝܢ ܘܡܒܝܬܐ ܠܣܐܢ̈ܐ ܘܚܪ̈ܥܐ ܕܡ̣ܢ ܥܢܝܢܗܘܢ ܩܝ̣ܢܕܘܢܘܣ ܓܕܫ ܠܗ ܠܡܠܟܐ. ܙܒܢܝ̈ܢ ܕܝܢ ܬܘܒ ܣܓܝ̈ܐܢ ܐܦ ܩܪ̈ܨܘܗܝ ܐܟܠܝ̣ܢ ܕܬܪܝܢܗ ܕܡܠܟܐ܆ ܡܝܓܝܪܣܐ ܘܢܛܪ ܬܪܥܐ ܥܕ ܠܐ ܫܠܡ ܨܒܝܢܗܘܢ ܘܡܛܠ ܗܕܐ ܙܕܩ ܠܗ ܠܡܠܟܐ ܢܦܫܐ ܕܥܝ̣ܪܐܝܬ ܢܬܕܒܪ. ܘܠܨܒܝܢܝ̈ܗܘܢ ܕܗ̇ܢܘܢ ܕܠܗ ܡܫܡܫܝܢ ܢܒܚܘܪ. ܘܠܐ ܢܗܡܐ ܕܢܫܬܠܛܘܢ ܒܗ ܘܢܫܡܠܘܢ ܨܒܝܢܗܘܢ ܒܝܫܐ.

 

ܛܘܦܣܐ ܬܠܝܬܝܐ:

 

ܐܡܪܘ ܕܢܦܫܐ ܡܠܟܐ ܗ̱ܝ ܘܦܓܪܐ ܡܕܝܢ̱ܬܗ. ܘܪ̈ܓܫܐ ܦܠܚܘ̈ܗܝ. ܘܗܕܡ̈ܐ ܦܠܚܘ̈ܗܝ. ܘܚܡܬܐ ܘܪܓܬܐ ܒܥܠܕ̈ܒܒܐ ܕܡܬܟܬܫܝ̣ܢ ܥܡܗ ܠܡܚܛܦ ܡܢܗ ܡܠܟܘܬܗ. ܒܕܓܘܢ ܐܢ ܢܬܬܥܝ̣ܪ ܘܢܬܟܬܫ ܥܡܗܘܢ. ܘܢܫܥܒܕ ܐܢܘܢ ܠܗ. ܘܢܡܚܠ ܐܢܘܢ. ܬܩܢܐ ܠܗ ܡܠܟܘܬܗ ܘܒܗܠ. ܘܠܐ ܡܫܬܠܛܝ̣ܢ ܥܠܘܗܝ. ܘܡܚܠܨܝ̣ܢ ܐܬܪ̈ܘܬܗ ܘܡܘܒܕܝ̣ܢ ܦܠܚܘ̈ܗܝ ܘܠܗ ܩ̇ܛܠܝܢ.

 

ܛܘܦܣܐ ܪܒܝܥܝܐ:

 

ܐܡ̣ܪ ܕܢܦܫܐ ܠܦܪܫܐ ܕܡܝܐ. ܕܪܟܒ ܠܡܦܩ ܠܨܝܕܐ. ܘܪܓܬܐ ܣܘܣܝܗ ܘܚܡܬܐ ܟܠܒܗ. ܒܕܓܘܢ ܐܢ ܗ̣ܘ ܨܝܕܐ ܡܗܝ̣ܪܐ ܢܗܘܐ ܒܐܘܡܢܘܬ ܨܝܕܐ. ܘܣܘܣܝܗ ܡܕܪܫܐ ܘܡܫܬܥܒܕܢܐ. ܘܟܠܒܗ ܡܠܦܐ. ܕܠܝ̣ܠܐܝܬ ܨܝܕܐ ܗ̇ܘܐ ܒܐܝ̈ܕܘܗܝ ܗ̇ܘ ܡܐ ܕܨܒܐ. ܐܢܕܝܢ ܠܐ ܡܢܣܝܐ ܐ̱ܢܫ ܢܗܘܐ ܗ̣ܘ ܦܪܫܐ. ܘܣܘܣܝܗ ܠܐ ܡܕܪܫܐ ܘܡܪܕ ܥܠ ܦܓܘܕܬܐ ܘܐܦܣܪܐ. ܘܟܠܒܗ ܠܐ ܢܬܪܟܢ ܠܨܒܝܢܗ. ܗܝܕܝܢ ܟܕ ܒܗܝ̣ܬ ܗܦܟ ܣܪܝܩܐ ܘܣܦܝ̣ܩܐ. ܐܢ ܠܘ ܡ̣ܢ ܫܩܝ̣ܦܐ ܢܬܬܪܡܐ ܡ̣ܢ ܣܘܣܝܗ. ܟܐܡܬ݀ ܠܫܝܘܠ ܬܚܬܝܬܐ ܒܕܘܝܪܐ ܕܥܡ ܫܐܕ̈ܐ.

 

ܛܟܣܐ ܚܡܝܫܝܐ:

 

ܐܡܪܘ ܕܚܙܝܐ ܕܗܘܢܐ ܠܚܙܝܐ ܕܥܝܢܐ ܕܡܐ. ܘܗ̣ܝ ܗܕܐ ܕܡܝܘܬܐ ܒܐܪܒܥܐ ܙܢܝ̈ܐ ܗ̇ܘܝܐ.

 

ܙܢܐ ܩܕܡܝܐ:

 

ܐܟܡܐ ܕܥܝܢܐ ܠܗ̇ܢܘܢ ܕܝܬܝܪ ܢܗܝ̣ܪܝܢ ܐܟܙܢܐ ܕܫܡܫܐ ܠܐ ܡܨܝܐ ܕܠܡܚܙܐ ܒܕܓܗܪܐ. ܗܟܘܬ ܘܗܘܢܐ ܠܗ̇ܢܘܢ ܕܝܬܝܪ ܢܗܝ̣ܪܝܢ ܐܟܙܢܐ ܕܐܠܗܐ ܫܘܒܚܐ ܠܛܝܒܘܬܗ ܠܐ ܡܬܡܨܐ ܠܡܚܙܐ ܒܕܓܗܪ ܡܢܗ.

 

ܙܢܐ ܬܪܝܢܐ:

 

ܐܟܙܢܐ ܕܐܐܪ ܒܥܠܬ݀ ܨܠܝ̣ܠܘܬܗ ܠܐ ܡܨܝܐ ܠܡܚܙܐ. ܒܗ̇ ܒܕܡܘ̣ܬܐ ܘܗܘܢܐ ܠܗ̇ܢܘܢ ܕܝܬܝܪ ܩܪܝ̣ܒܝ̣ܢ ܠܗ. ܐܟܙܢܐ ܕܡܠܐܟ̈ܐ ܘܢܦ̈ܫܬܐ ܐ̱ܢܫܝ̈ܬܐ ܠܐ ܡܨܐ ܠܡܚܙܐ.

 

ܙܢܐ ܬܠܝܬܝܐ:

 

ܐܟܡܐ ܕܥܝܢܐ ܐܢܗܘ ܕܠܐ ܡܙܝ̣ܥܐ ܒܒܬܗ̇ ܬܟܝ̣ܒܐܝܬ ܠܐܦܝ̈ ܡܬܚܙܝܢܐ ܘܡܟܢܫܐ ܗ̣ܝ ܠܗ̇. ܠܐ ܡܬܡܨܝܐ ܠܡܚܙܐ ܚܬܝ̣ܬܐܝܬ ܠܗ̇ܢܘܢ ܕܪܚܝ̣ܩܝܢ. ܒܗ̇ ܒܕܡܘ̣ܬܐ ܘܗܘܢܐ ܐܢ ܠܐ ܢܬܬܙܝ̣ܥ ܬܟܝ̣ܒܐܝܬ ܠܐܦܝ̈ ܡܬܝܕܥܢܐ. ܘܢܟܢܫ ܗ̣ܘ ܠܗ ܡ̣ܢ ܦܗܝܐ ܕܥܡ ܪ̈ܓܫܐ. ܠܐ ܡܬܡܨܐ ܠܡܚܙܝܗ.

 

ܙܢܐ ܪܒܝܥܝܐ:

 

ܐܟܡܐ ܕܥܝܢܐ ܠܐ ܡܬܡܨܝܐ ܕܬܚܙܐ ܐܠܐ ܒܢܗܝ̣ܪܘܬܗ ܕܐܐܪ. ܒܗ̇ ܒܕܡܘ̣ܬܐ ܘܗܘܢܐ ܠܐ ܡܬܡܨܐ ܠܡܚܙܐ. ܐܠܐ ܒܝܕ ܢܗܝܪܘܬܐ ܕܪ̈ܘܚܢܐ. ܘܐܡܐ ܕܢܗܝܪܐ ܪܒܐ ܘܓܘܫܡܢܝܐ ܫܡܫܐ ܐܝܬܘܗܝ. ܐܝܛܐ ܣܗܪܐ ܕܡܢܗ ܡܩܒܠ ܢܘܗܪܐ. ܐܝܟܐ ܢܘܪܐ. ܗ̣ܘ ܗܟܘܬ ܘܢܗܝܪܐ ܪܒܐ ܕܠܐ ܓܫܘܡ ܐܠܗܐ ܫܘܒܚܐ ܠܛܝܒܘܬܗ ܐܝܬܘܗܝ. ܐܝܛܐ ܡܠܐܟ̈ܐ ܕܡܢܗ ܡܩܒܠܝܢ ܢܘܗܪܐ. ܐܝܛܐ ܢܦ̈ܫܬܐ ܐ̱ܢܫܝ̈ܬܐ ܕܫܢ̈ܝܝܢ ܡ̣ܢ ܦܓܪ̈ܐ.

 

ܛܘܦܣܐ ܫܬܝܬܝܐ:

 

ܩܕܝܫܐ ܡܪܝ ܐܦܪܝܡ ܒܡܐܡܪܐ ܕܪܝܫܗ ܓܒܪܐ ܕܨܗܐ ܠܝ̣ܕܥܬܐ. ܠܗܘܢܐ ܡ̇ܢ܆ ܕܘܡܝܐ ܕܐܠܗܐ ܣ̇ܐܡ. ܕܒܡܘܚܐ ܕܕܘܡܝܐ ܗ̱ܘ ܕܫܡܝܐ ܥܡܪ. ܘܡܫܡܫܝܢ ܠܗ ܦܢܛܣܝܐ ܘܥܘܗܕܢܐ. ܘܚܝܠܐ ܕܦܪܫ ܒܝܬ ܩܘܫܬܐ ܠܙܐܦܐ ܘܒܝܬ ܣܢܝܐ ܠܫܦܝܪܐ. ܐܝܟ ܡܠܐܟ̈ܐ ܪ̈ܘܚܢܝܐ. ܒܗ̇ܝ ܕܐܦ ܗ̣ܢܘܢ ܪ̈ܘܚܢܝܝܢ. ܘܠܡܕܥܐ ܒܕܘܡܝܐ ܕܡܠܟܐ ܣ̇ܐܡ. ܕܒܗܝܟܠ ܠܒܐ ܡܙܕܝܚ. ܘܣܘܟܠܐ ܘܒܘܝܢܐ ܐܝܟ ܐܝܙ̈ܓܕܐ ܪܗܛܝܢ ܩܘܕܡܘܗܝ. ܘܪܥܝܢܐ ܘܬܐܪܬܐ ܒܚܠܒܐ ܕܝܐܦܪܐܓܡܐ ܐܘܟܝܬ ܚܙܘܩܐ ܐܡ̇ܪ ܕܫܪܝܢ.

 

ܛܘܦܣܐ ܫܒܝܥܝܐ:

 

ܗ̣ܘ ܟܕ ܗ̣ܘ ܡܠܦܢܐ ܒܗ ܒܡܐܡܪܐ ܠܦܓܪܐ ܒܡܫܟܢ ܙܒܢܐ ܡܕܡܐ ܘܐܡ̇ܪ. ܕܚܠܒܐ ܚܙܘܩܐ ܬܪܥܐ ܗ̱ܘ ܒܣܪܢܝܐ ܕܒܝܬ ܩܘܕܫܐ ܠܩܕܘܫ̈ܩܘܕܫܝܢ ܦܪܫ. ܘܠܓܘ ܡܢܗ܇ ܒܠܒܐ ܩܕܘܫ ܩܘܕ̈ܫܝܢ ܫܪܝܐ ܢܦܫܐ ܐܝܟ ܕܒܩܐܒܘܬܐ. ܘܪܐܬܐ ܕܡܛܠܠܐ ܥܠ ܠܒܐ. ܐܝܟ ܟܪ̈ܘܒܐ ܕܬܪܝܢ ܓܦܝ̈ܗܘܢ. ܣܘܩܐ ܘܢܫܡܬܐ ܐܝܟ ܥܛܪܐ ܕܒܣ̈ܡܐ. ܘܐܟܡܐ ܕܒܩܕܘܫ̈ܩܘܕܫܝܢ ܠܝܬ ܫܩܝܐ ܐܦܠܐ ܬܘܪܝܐ. ܗ̣ܘ ܗܟܘܬ ܐܦܠܐ ܒܠܒܐ ܘܒܪܐܬܐ. ܐܠܐ ܣܘܩܐ ܒܠܚܘܕ. ܘܟܒܕܐ ܐܝܟ ܦܬܘܪܐ ܕܠܚܡ ܐܦ̈ܐ. ܘܫܒܥܐ ܚܝ̈ܠܐ ܟܝܢܝ̈ܐ ܕܐܝܬܝܗܘܢ ܬܠܬܐ ܡܫܡ̈ܫܢܐ. ܡܘܠܕܢܐ ܐܡ̇ܪ ܐ̱ܢܐ ܘܡܬܪܣܝܢܐ ܘܡܪܒܝܢܐ. ܘܐܪܒܥܐ ܡܫܡ̈ܫܢܐ ܢܬܘܦܐ ܐܡ̇ܪ ܐ̱ܢܐ. ܘܐܚܘܕܐ ܘܦܫܘܪܐ ܘܕܚܘܝܐ. ܐܝܟ ܡܢܪܬܐ ܕܫܒܥܐ ܫܪ̈ܓܝ̣ܢ. ܘܫܠܦܘܚܬܐ ܐܝܟ ܠܩܢܐ. ܕܣܝ̣ܡܐ ܩܕܡ ܬܪܥܐ ܕܡܫܟܢܙܒܢܐ. ܘܐܣܛܘܡܟܐ ܐܝܟ ܡܕܒܚܐ ܕܕܒ̈ܚܐ ܕܠܐ ܕܥܟܐ ܢܘܪܗ̇ ܠܓܡܪ. ܘܛܚܠܐ ܐܝܟ ܙܘ̈ܝܬܐ ܕܕܪܐܬܐ ܕܠܒܪ ܐܬܪܐ ܕܡܪܬܐ ܘܕܩܛܡܐ ܐܘܟܝܬ ܩܩܠܬܐ ܕܡܩܒܠ ܕܡܐ ܝܩܝ̣ܕܐ ܐܘܟܝܬ ܡܪܬܐ ܐܘܟܡܬܐ. ܘܫܩ̈ܐ ܐܝܟ ܥܡܘ̈ܕܐ ܕܡܫܟܢܙܒܢܐ. ܪ̈ܓܠܐ ܣܡܟܝ̈ܗܘܢ. ܘܟܣܣ̈ܐ ܩܘܒܥܝ̈ܗܘܢ. ܘܒܣܪ̈ܬܐ ܐܝܟ ܦܪܣܐ ܕܣܘܣܓܘܢܐ ܘܕܐܣܦܝܢܝܩܐ. ܘܡܫܟܐ ܐܝܟ ܝܪ̈ܝ̣ܥܬܐ ܕܡ̣ܢ ܣܥܪܐ.

 

 

 

 

 

 

 

 

 

 

     #1 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܒܪܝܬܗ̇ ܕܢܦܫܐ ܡܠܝ̣ܠܬܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠܗ̇ܝ ܕܡܫܪܝܢܝ̣ܬܐ ܗ̱ܝ ܢܦܫܐ ܘܥܡ ܦܓܪܐ ܒܪܝܐ܇ ܘܠܘ ܡܬܘܡܝܬܐ ܗ̱ܝ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܠܘ ܢܦܫܐ ܡܠܝ̣ܠܬܐ ܡܬܘܡܝܬܐ ܗܘܬ݀. ܘܩܕܝ̣ܡܐ ܗܘܬ݀ ܠܦܓܪܐ. ܐܘ ܚܕܐ ܗܘܬ݀ ܢܦܫܐ. ܐܘ ܢܦ̈ܫܬܐ ܣܓܝ̈ܐܬܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܨܐ ܕܟܕ ܗ̣ܝ ܢܦܫܐ ܠܦܓܪ̈ܐ ܣܓܝ̈ܐܐ ܢܩܦܬ݀. ܐܘ ܚܕܐ ܐܝܟ ܕܐܝܬܝܗ̇ ܦܫܬ݀. ܐܘ ܡܬܦܠܓܘ ܠܡܢܘ̈ܬܐ ܐܬܦܠܓܬ݀ ܘܣܓܝܬ݀. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܙܕܩ ܗ̣ܘܐ ܕܚܕܐ ܢܦܫܐ ܗܘܝܐ ܗܘܬ݀ ܠܟܠܗܘܢ ܒܢܝ̈ܢܫܐ. ܘܐܠܨܐ ܗܘܬ݀ ܕܠܟܠܡܐ ܕܚܕ ܒܪܢܫܐ ܝ̇ܕܥ ܗ̣ܘܐ. ܐܦ ܟܠܗܘܢ ܒܢܝ̈ܢܫܐ ܝܕܥܝ̣ܢ ܗ̣ܘܘ ܗ̇ܝ ܕܫܟܝܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܡܛܠ ܕܦܘܠܓܐ ܕܠܡܢܘ̈ܬܐ ܠܓܘܫ̈ܡܐ ܒܠܚܘܕ ܡܨܐ ܠܡܗܘܐ ܕܡܪܟܒܝ̣ܢ. ܘܠܘ ܠܠܐ ܓܫܝ̈ܡܐ ܕܦܫܝ̣ܛܝ̣ܢ. ܗ̣ܘ ܗܟܘܬ ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܗ̇ܢܝܢ ܐܘ ܒܐܘܣܝܐ ܦܪ̈ܝܫܢ ܗܘܝ̈ ܡ̣ܢ ܚܕ̈ܕܐ. ܐܘ ܒܓܕ̈ܫܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܫܪܪܢܢ ܕܢܦ̈ܫܬܐ ܡܠܝ̣̈ܠܬܐ ܫܘ̈ܝܬ݀ ܒܐܘܣܝܐ ܐܢܝܢ܇ ܘܠܘ ܦܪ̈ܝܫܬ݀ ܒܟܝܢܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ ܡܛܠ ܕܓܕ̈ܫܐ ܡܦܪ̈ܫܢܐ ܠܗܘܠܐ ܡܨܝܢ ܠܡܩܦ. ܘܠܘ ܠܠܐ ܗܘܠܢܝ̈ܐ. ܢܦܫܐ ܡܕܝܢ ܠܘ ܡܬܘܡܝܬܐ ܗ̱ܝ. ܐܦܠܐ ܩܕܡ ܦܓܪܐ ܒܪܝܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܐܠܘ ܩܕܝ̣̈ܡܢ ܗܘܝ̈ ܢܦ̈ܫܬܐ ܠܦܓܪ̈ܐ ܗܠܝܢ. ܐܘ ܠܦܓܪ̈ܐ ܐ̱ܚܪ̈ܢܐ ܐܣܝ̣ܪ̈ܢ ܗܘܝ̈. ܐܘ ܠܘ ܗܟܢܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܥܬܝ̣ܕܝ̣ܢܢ ܠܡܚܘܝܘ ܒܝܕ ܐܠܗܐ. ܠܐ ܡܬܡܨܝܢܘܬ ܫܘܢܝܐ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܐܢ ܫܟܝ̈ܚܢ ܗܘܝ̈ ܠܗܝܢ ܗܝܕܝܟ ܝܕ̈ܥܬܐ ܐܝ̣ܩܝ̣ ܡܬܐܣܪ̈ܢ ܗܘܝ̈ ܥܡ ܦܓܪ̈ܐ. ܘܓܠܝ̈ܙܢ ܗܘܝ̈ ܡ̣ܢ ܝܕ̈ܥܬܐ ܡܫܬܟ̈ܚܢ ܗܘܝ̈ ܕܐܝܩܝ ܒܪ̈ܝܢ܆ ܒܟܝܢܗܘܢ ܕܣܘܥܪ̈ܢܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܢܦ̈ܫܬܐ ܐ̱ܢܫܝ̈ܬܐ ܡܩܒܠܢ̈ܝܬܐ ܐܢܝܢ ܕܙܢܝ̈ܐ ܡܫܪ̈ܝܢܐ. ܐܝܟ ܗ̇ܝ ܕܡܫܪ̈ܝܢ ܘܝܕ̈ܥܢ ܣܘܓܐܐ ܕܗ̇ܢܝܢ ܕܠܐ ܝܕ̈ܥܢ ܗܘܝ̈. ܘܕܡܩܒܠܢܐ ܕܙܢܝ̈ܐ ܡܫܪ̈ܝܢܐ. ܡܫܪܝܢܐ ܙܕܩ ܕܢܗܘܐ ܝ̣ܕܝ̣ܥܐ ܡ̣ܢ ܗ̇ܝ ܕܐܠܘ ܩܘܒܠܐ ܕܡܫܪܝܢܘܬܐ ܠܡܬܘ̈ܡܝܐ ܫܟܝ̣ܚ ܗ̣ܘܐ. ܫܘܐ ܒܡܬܘܡܝܘܬܐ ܗ̣ܘܐ ܡܫܪܝܢܐ ܥܡ ܡܬܘܡܝܐ܆ ܗ̇ܝ ܕܫܟܝ̣ܪܐ. ܢܦܫܐ ܡܕܝܢ ܐ̱ܢܫܝܬܐ. ܟܕ ܡܩܒܠܢܝ̣ܬܐ ܗ̱ܝ ܕܙܢܝ̈ܐ ܡܫܪ̈ܝܢܐ ܐܦ ܗ̣ܝ ܡܫܪܝܢܝܬܐ ܙܕܩ ܕܬܗܘܐ.

 

 

 

ܗܦܟܬܐ

 

ܐܡܪܝܢ ܕܗ̇ܝ ܕܡܩܒܠܢܝ̣ܬܐ ܬܗܘܐ ܢܦܫܐ ܒܡܥܒܕܢܘܬܐ ܠܙܢܝ̈ܐ ܡܫܪ̈ܝܢܐ܆ ܡܫܪܝܢܝ̣ܬܐ ܐܝܬܝܗ̇. ܘܠܘ ܗ̇ܝ ܕܒܚܝܠܐ ܬܗܐ ܡܩܒܠܢܝ̣ܬܗܘܢ.

 

 

 

ܦܘܢܝܐ

 

ܐܡܪܝܢܢ ܐܠܘ ܙܢܝ̈ܐ ܡܫܪ̈ܝܢܐ ܒܡܬܘܡܝܘܬܐ ܡܨܝܢ ܗ̣ܘܘ ܡܫܬܟܚܘ. ܗܝܕܝܢ ܡܨܝܐ ܗܘܬ݀ ܕܬܗܘܐ ܢܦܫܐ ܡܩܒܠܢܝ̣ܬܗܘܢ ܒܚܝܠܐ ܡܬܘܡܐܝܬ. ܘܟܕ ܠܐ ܡܨܝܢ ܠܡܫܬܟܚܘ ܡܫܪ̈ܝܢܐ ܒܡܬܘܡܝܘܬܐ. ܘܐܠܐ ܠܘ ܡܫܪ̈ܝܢܐ ܗ̣ܘܘ. ܐܦܠܐ ܢܦܫܐ ܡܨܝܐ ܕܬܗܘܐ ܡܩܒܠܢܝ̣ܬܗܘܢ ܒܚܝܠܐ ܡܬܘܡܐܝܬ. ܘܡܛܠ ܗܕܐ ܐܦܠܐ ܡܬܘܡܝܬܐ ܡܨܝܐ ܕܬܗܘܐ ܢܦܫܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܐܠܘ ܢܦ̈ܫܬܐ ܐ̱ܢܫܝ̈ܬܐ ܡܬܘ̈ܡܝܢ ܗܘܝ̈. ܕܡܫܘܬܦ ܗ̣ܘܐ ܐܠܗܐ ܫܘܒܚܐ ܠܛܝܒܘܬܗ. ܕܡܫܘܬܦ ܗ̣ܘܐ ܠܗܝܢ ܒܡܬܘܡܝܘܬܐ ܘܦܪܝ̣ܫ ܗ̣ܘܐ ܡܢܗܝܢ ܒܙܢܝ̈ܐ ܐ̱ܚܪ̈ܢܐ. ܘܗ̣ܢܘܢ ܗܠܝܢ ܙܢܝ̈ܐ. ܐܢ ܐܘܣܝ̣ܝ̣̈ܢ. ܡܫܬܟܚ ܒܪܘܝܐ ܕܡ̣ܢ ܓܢܣܐ ܘܦܘܪ̈ܫܢܐ ܡܪܟܒ. ܘܐܢ ܓܕܫܢܝ̣ܝ̣̈ܢ܆ ܡܫܬܟܚ ܕܡܩܒܠܢܐ ܗ̱ܘ ܕܓܕ̈ܫܐ ܘܡܫܬܚܠܦܢܐ. ܘܬܪ̈ܝܗܘܢ ܫܟܝ̣ܪܝܢ. ܢܦ̈ܫܬܐ ܡܕܝܢ ܐ̱ܢܫܝ̈ܬܐ ܡܫܪ̈ܝܢܝܬܐ ܘܠܘ ܡܬܘܡܝ̈ܬܐ ܐܢܝܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܓܒ̣ܠ ܐܠܗܐ ܠܐܕܡ ܘܢܦ̣ܚ ܒܐܦܘ̈ܗܝ ܢܫܡܬܐ ܕܚܝ̈ܐ.

 

 

 

ܣܗܕܘܬܐ ܕܬܪܬܝܢ

 

ܐܝܘܒ. ܐܦ ܛܝ̣ܢܐ ܕܐܪܥܐ ܢܣܒܬ. ܘܓܒܠܬ ܚܝܘܬܐ ܡܠܝ̣ܠܬܐ. ܘܣܡܬܗ̇ ܥܠ ܐܪܥܐ.

 

 

 

ܣܗܕܘܬܐ ܕܬܠܬ

 

ܙܟܪܝܐ ܢܒܝܐ. ܒܪܐ ܐܠܗܐ ܪܘܚܗ ܕܒܪܢܫܐ ܒܓܘܗ.

 

 

 

ܣܗܕܘܬܐ ܕܐܪܒܥ

 

ܐܘܢܓܠܘܢ. ܐܒܝ ܥܕܡܐ ܠܗܫܐ ܥܒܕ. ܐܦ ܐܢܐ ܥܒ̇ܕ ܐ̱ܢܐ. ܐ̱ܢܫܝ̈ܢ ܥܠ ܢܦ̈ܫܬܐ ܕܟܠܝܘܡ ܡܬܒܪ̈ܝܢ ܢܣܒܝ̣ܢ ܠܗ̇ ܠܡܠܬܐ ܗܕܐ. ܚܢܢ ܕܝܢ ܐܡܪܝܢܢ ܕܠܘ ܕܝ̣ܠܢܐܝܬ ܡܫܘܕܥܐ ܠܪܥܝܢܐ ܗܢܐ ܒܗ̇ܝ ܕܐܦ ܥܠ ܪ̈ܥܝܢܐ ܐ̱ܚܪ̈ܢܐ ܣܓܝ̈ܐܐ ܡܨܝܐ ܕܬܬܢܣܒ.

 

 

 

ܣܗܕܘܬܐ ܕܚܡܫ

 

ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܡܠܬܐ ܕܐܘܢܓܠܝܘܢ. ܕܚܠ ܐ̱ܢܐ ܘܕܠܡܐ ܚܘܫܒܐ ܡܕܡ ܕܠܐ ܘܠܝ̣ܬܐ ܢܥܘܠ. ܐܝܟ ܗ̇ܘ ܕܢܦܫܐ ܒܕܘܟܬܐ ܐ̱ܚܪܬܐ ܚܝܬ݀܆ ܘܟܢ ܒܦܓܪܐ ܗܢܐ ܐܬܐܣܪܬ݀.

 

 

 

ܣܗܕܘܬܐ ܕܫܬ

 

ܓܪܝܓܘܪܝܘܣ ܕܢܘܣܐ. ܒܡܐܡܪܐ ܕܥܠ ܬܘܩܢܗ ܕܒܪܢܫܐ. ܡܛܠ ܗܟܝܠ ܕܒܬܪ̈ܬܝܗܝܢ ܡܣܒܪܢܘܬܐ܇ ܬܚܝܬ ܥܕܠܝܐ ܗ̱ܝ ܡܠܬܐ܆ ܘܕܗ̇ܢܘܢ ܕܐܝܟ ܕܒܫܘ̈ܥܝܬܐ ܐܡܪܝܢ܇ ܕܩܕܝ̣̈ܡܢ ܒܥܠܡܐ ܢܦ̈ܫܬܐ ܒܛܟܣܐ ܡܕܡ ܝܚܝܕܝܐ. ܘܗ̇ܢܘܢ ܕܐ̱ܚܪ̈ܝܬܐ ܡ̣ܢ ܒܬܪ ܦܓܪܐ ܡܣܒܪܝܢ ܕܡܬܬܩ̈ܢܢ.

 

 

 

ܣܗܕܘܬܐ ܕܫܒܥ

 

ܩܕܝܫܐ ܣܐܘܝܪܐ ܒܐܓܪܬܐ ܕܠܘܬ ܣܝܘܠܘܣ ܐܣܩܪܝܢܕܐ ܐܡ̇ܪ. ܠܐ ܢܦܫܐ ܡܠܝ̣ܠܬܐ ܩܕܡ ܩܕܡ ܓܘܫܡܐ ܡܬܒܪܝܐ܆ ܘܠܐ ܩܕܡ ܢܦܫܐ ܦܓܪܐ ܡܬܓܒܠ.

 

 

 

ܣܗܕܘܬܐ ܕܬܡܢܐ

 

ܚܣܝܐ ܝܥܩܘܒ ܐܘܪܗܝܐ. ܒܐܓܪܬܐ ܕܠܘܬ ܝܘܚܢܢ ܕܐܠܝܬܪܒ. ܠܥܘܩܒܐ ܐܘܟܝܬ ܡܣܒܪܢܘܬܐ ܕܝܠܝ. ܗܕܐ ܐܝܬܝܗ̇ ܒܦܣܝ̣̈ܩܬܐ. ܕܠܐ ܢܦܫܐ ܩܕܝ̣ܡܐ ܒܒܪܝܬܗ̇ ܠܦܓܪܐ܆ ܘܐܦܠܐ ܬܘܒ ܦܓܪܐ ܠܢܦܫܐ ܩܕܝ̣ܡ ܒܒܪܝܬܗ. ܗ̇ܝ ܓܝܪ ܕܡܕܡ ܕܐܝܟ ܗܟܢ ܡܬܪܥܐ ܐ̱ܢܫ܇ ܣܟ ܡܣܠܝ̈ܬܐ ܕܐܢ ܐܢܐ ܕܐܝܬܝܗ̇.

 

 

 

ܢܘܗܪܐ

 

ܙܕܩ ܠܡܕܥ ܕܟܠܗܘܢ ܡܠܦܢ̈ܐ ܕܥܕܬܐ ܫܠܡܘ. ܕܢܦ̈ܫܬܐ ܐ̱ܢܫܝ̈ܬܐ ܠܘ ܡܬܘܡܝ̈ܬܐ ܐܢܝܢ. ܐܠܐ ܡܫܪ̈ܝܢܝܬܐ. ܒܪܡ ܕܝܢ ܐܬܦܠܓܘ ܡܛܠ ܙܒܢܐ ܕܒܪܝ̣ܬܗܝܢ. ܒܗ̇ܝ ܕܩܕܝܫܐ ܡܪܝ ܐܦܪܝܡ ܘܡܪܝ ܝܥܩܘܒ ܘܦܝܠܠܘܟܣܝܢܘܣ ܕܡܒܘܓ ܘܬܐܘܕܘܪܝܛܐ ܕܩܘܪܘܣ ܐܡܪܝܢ. ܕܩܕܡܝܬ݀ ܡ̇ܢ ܦܓܪ̈ܐ ܡܬܓܒܠܝܢ. ܐܝܛܐ ܡܬܒܪ̈ܝܢ ܒܗܘܢ ܢܦ̈ܫܬܐ. ܐܡ̣ܪ ܓܝܪ ܦܝܠܠܘܟܣܝܢܘܣ. ܒܦܘܫܩܐ ܕܐܘܢܓܠܝܘܢ ܘܒܕܓܘܢ ܘܐܦ ܟܬܒܐ ܐܠܗܝܐ܆ ܟܕ ܝ̇ܕܥ ܠܗ̇ ܠܗܕܐ ܒܕܘܟ ܡ̇ܢ ܓܝܪ ܠܗ̇ܝ ܕܠܕܟܪܐ ܝܠܕܐ ܗܘܬ݀܆ ܐܪܒܥܝܢ ܝܘܡܝ̈ܢ. ܠܗ̇ܝ ܕܝܢ ܕܠܢܩܒܬܐ ܬܡܢܝܢ ܝܘܡܝ̈ܢ ܕܬܬܒ ܥܠ ܕܡܐ ܕܟܝܐ ܦ̇ܩܕ ܗ̣ܘܐ. ܐܝܟ ܐܝ̇ܕܐ ܕܒܝܘ̈ܡܬܐ ܗ̇ܢܘܢ ܟܠܗܘܢ. ܠܦܓܪܐ ܡܝ̣ܬܐ ܗ̇ܘ ܕܣܛܪ ܡ̣ܢ ܢܦܫܐ ܛܥܝ̣ܢܐ ܗܘܬ݀. ܐܘܪܝܓܢܝܣ ܕܝܢ ܕܩܕܝ̣̈ܡܢ ܢܦ̈ܫܬܐ ܒܒܪܝܬܗܝܢ ܡ̣ܢ ܦܓܪ̈ܐ ܡܘܕܐ. ܐܠܐ ܠܘ ܚܢܦܐܝܬ ܐܝܟ ܕܡܬܚܣܕ. ܒܕܚܢ̈ܦܐ ܡܬܘܡܝܘܬܐ ܝ̇ܗܒܝ̣ܢ ܠܢܦ̈ܫܬܐ ܘܠܐ ܐܡܪܝܢ ܕܒܪ̈ܝܢ ܣܟ. ܡܠܦܢ̈ܐ ܕܝܢ ܝܘܢܝ̈ܐ ܐܪ̈ܬܕܘܟܣܘ. ܐܟܙܢܐ ܕܒܣܝܠܠܝܘܣ ܘܓܪܝܓܘܪܝܘܣ. ܠܗܠܝܢ ܬܪܬܝܢ ܬܪ̈ܥܝܢ ܡܣܠܝܢ ܘܕܐܟܚܕܐ ܒܪ̈ܝܢ ܐܡܪܝܢ. ܘܕܬܪܥܝ̣ܬܗܘܢ ܡܪܢܝܐ܆ ܡܚܘܝܢ̈ܘܬܐ ܕܐܝܬܝ̣ܢܢ ܣܗ̈ܕܢ.

 

 

 

ܬܘܣܦܬܐ ܕܢܘܗܪܐ

 

ܐܦ ܓܝܪ ܘܡܛܠ ܡܦܘܚܝ̣ܬܐ ܕܢܦ̣ܚ ܐܠܗܐ ܒܐܦܘ̈ܗܝ ܕܐܕܡ. ܟܕ ܓܒܠܗ ܡ̣ܢ ܥܦܪܐ ܐܬܦܠܓܘ ܡܠܦܢ̈ܐ ܩܕܝ̈ܫܐ. ܒܗ̇ܝ ܕܓܪܝܓܘܪܝܘܣ ܬܐܘܠܘܓܘܣ ܐܡ̇ܪ. ܕܢܦܫܐ ܡܠܝ̣ܠܬܐ ܐܝܬܝܗ̇ ܗܘܬ݀. ܐܡ̣ܪ ܓܝܪ ܕܗ̣ܝ ܢܦܫܐ ܡ̣ܢ ܗ̇ܝ ܕܠܐ ܐܝܬܝܗ̇ ܗܘܬ݀. ܠܘܬ ܗ̇ܝ ܕܬܗܘܐ ܐܝܬܝܗ̇܆ ܒܝܕ ܡܦܘܚܝ̣ܬܐ ܐܬܬ݀. ܛܝܒܘܬܐ ܪܘܚܢܝܬܐ ܐܟܚܕܐ ܐܬܪܡܝܬ݀ ܒܗ̇ ܒܚܝܘܬܐ. ܒܗ̇ ܓܝܪ ܚܐܝ̣ܢܢ ܘܡܬܬܙܝ̣ܥܝ̣ܢܢ ܘܐܝܬܝܢ. ܘܩܕܝܫܐ ܩܘܪܝܠܠܘܣ ܐܡ̣ܪ ܕܪܘܚܐ ܩܕܝܫܐ ܐܝܬܝܗ̇ ܗܘܬ݀ ܡܦܘܚܝ̣ܬܐ ܠܗ̇ܝ ܐܡ̣ܪ ܓܝܪ. ܡܦܘܚܝ̣ܬܐ ܐܠܗܝܬܐ܆ ܠܐ ܗܘܐ ܕܗ̣ܝ ܐܝܬܝܗ̇ ܕܢܦܫܐ ܐܡܪܝܢܢ. ܡܩܘܝܐ ܗܘܬ݀ ܓܝܪ ܠܐ ܡܫܬܚܠܦܢܝ̣ܬܐ ܐܟܡ̇ܢ ܕܡ̣ܢ ܐܠܗܐ ܢܦܩܬ݀. ܐܠܐ ܫܘܬܦܘܬܐ ܐܝܬܝܗ̇ ܒܪܘܚܐ ܩܕܝܫܐ. ܕܐܬܬܣܝ̣ܡܬ݀ ܡ̣ܢ ܫܘܪܝܐ ܒܢܦܫܐ ܐܠܗܝܬܐ. ܥܠ ܗܕܐ ܒܨܠܡ ܐܠܗܐ ܗܘܬ݀ ܚܝܘܬܐ ܡܠܝ̣ܠܬܐ. ܠܗܕܐ ܕܝܢ ܡܫܝܚܐ ܟܕ ܡܚܕܬ܆ ܢܦܚ ܒܬܠܡܝ̈ܕܘܗܝ. ܩܕܝܫܐ ܣܐܘܝܪܐ ܕܝܢ ܟܕ ܨܒܐ ܠܡܚܘܝܘ ܕܠܝܬ ܣܩܘܒܠܝܘܬܐ ܒܡ̈ܠܐ ܕܬܪ̈ܝܗܘܢ ܗܠܝܢ ܡܠܦܢ̈ܐ ܩܕܝ̈ܫܐ ܐܡ̣ܪ. ܕܗ̇ܢܘܢ ܕܫܐܠ ܠܩܘܪܝܠܘܣ ܡܣܒܪܝ̣ܢ ܗ̣ܘܘ ܕܗ̣ܝ ܡܦܘܚܝ̣ܬܐ ܟܕ ܐܫܬܚܠܦܬ݀܆ ܗܘܬ݀ ܢܦܫܐ ܠܒܪܢܫܐ. ܘܠܘ ܕܡ̣ܢ ܡܦܘܚܝ̣ܬܐ ܐܬܒܪܝܬ݀ ܐܝܟܢܐ ܕܒܐܝ̈ܕܝܐ ܦܓܪܐ. ܘܠܘܩܒܠ ܠܐ ܝ̣ܕܥܬܗܘܢ ܕܗ̇ܢܘܢ ܐܡ̣ܪ. ܕܠܘ ܡܦܘܚܝ̣ܬܐ ܗܘܬ݀ ܢܦܫܐ. ܕܠܐ ܫܘܚܠܦܐ ܐܘ ܐܫܝ̣ܕܘܬܐ ܐܘ ܚܫܐ ܥܠ ܐܘܣܝܐ ܐܠܗܝܬܐ ܢܣܒܪܘܢ. ܐܠܐ ܘܡ̣ܢ ܡܦܘܚܝ̣ܬܐ ܗܘܬ݀ ܢܦܫܐ ܗܢܘ̄ ܕܪܘܚܐ ܥܒܕ ܠܢܦܫܐ. ܐܟܡܐ ܕܥܒܕ ܠܚܝܠܘ̈ܬܐ ܫܡܝ̈ܢܐ. ܡܕܝܢ ܓܪܝܓܘܪܝܘܣ ܥܦܝ̣ܦܐ ܐܡ̇ܪ ܕܐܝܬܘܗܝ ܚܝܠܗ̇ ܕܡܦܘܚܝ̣ܬܐ ܕܝܗܒܬ݀ ܢܫܡܬܐ ܘܪܘܚܐ ܩܕܝܫܐ. ܗܠܝܢ ܘܣܓܝ̈ܐܬܐ ܕܐܝܟ ܗܠܝܢ ܐܡ̣ܪ ܩܕܝܫܐ ܣܐܘܝܪܐ ܒܐܓܪܬܐ ܕܠܘܬ ܦܛܪܐ ܕܝܪܝܐ. ܚܢܢ ܕܝܢ ܐܡܪܝܢܢ. ܕܩܕܝܫܐ ܩܘܪܝܠܠܘܣ ܐܠܘ ܡܬܪܥܐ ܗ̣ܘܐ ܕܡ̣ܢ ܡܦܘܚܝ̣ܬܐ ܗܘܬ݀ ܢܦܫܐ. ܐܝܟܢܐ ܐܡ̇ܪ ܗ̣ܘܐ ܕܡ̣ܢ ܒܬܪ ܕܥܒܕ ܐܠܗܐ ܥܦܪܐ ܡ̣ܢ ܐܪܥܐ ܘܢܦܫܗ ܒܢܦܫܐ ܡܠܝ̣ܠܬܐ ܘܝܕܘܥܬܢܝ̣ܬܐ. ܡܛܠ ܕܙܕܩ ܗ̣ܘܐ ܕܡܫܘܬܦܐ ܠܪܘܚܐ ܩܕܝܫܐ. ܢܗܘܐ. ܢܦܚ ܒܗ ܪܘܚܐ ܕܚܝ̈ܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܬܪܥܝܬܐ ܕܗ̇ܢܘܢ ܕܡܬܘܡܝܬܐ ܡܘܕܝܢ ܠܗ̇ ܠܢܦܫܐ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘ̈ܫܒܝܐ. ܣܥܝܐ ܩܕܡܝܐ

 

ܐܡܪܝܢ ܕܙܘ̈ܥܐ ܡܘܙܠܬܢܝ̈ܐ ܕܠܐ ܣܘܦ ܐܢܘܢ ܘܕܠܐ ܒܘܛܠ ܐܟܡܐ ܕܡܫܪܪܐ ܦܝܠܠܘܣܘܦܝܐ. ܘܡܛܠ ܗܕܐ ܙܕܩ ܕܐܦ ܦܓܪ̈ܐ ܐ̱ܢܫܝ̈ܐ ܕܠܐ ܣܘܦ ܢܗܘܘܢ. ܘܐܠܘ ܢܦ̈ܫܬܐ ܐ̱ܢܫܝ̈ܬܐ ܡܬܘ̈ܡܝܬܐ ܠܐ ܐܝܬܝܗܝܢ ܗܘܝ̈. ܐܠܐ ܥܡ ܦܓܪ̈ܐ ܡܬܒܪ̈ܝܢ ܗܘܝ̈. ܙܕܩ ܗܘܐ ܕܐܦ ܗ̣ܢܝܢ ܕܠܐ ܣܘܦ ܗܘ̈ܝܢ ܐܟܡܐ ܕܐܦ ܦܓܪ̈ܐ. ܘܡܛܠ ܕܠܐܡ ܡܩܒܠܢ̈ܝܬܐ ܕܚܒܠܐ ܐܝܬܝܗܝܢ ܐܟܡܐ ܕܡܬܚܘܝܐ. ܐܠܨܐ ܗܘܬ݀ ܕܡܢܝܢܐ ܡܕܡ ܕܠܐ ܣܘܦ ܕܢܦ̈ܫܬܐ ܐܟܚܕܐ ܒܡܥܒܕܢܘܬܐ ܡܫܬܟܚ ܗ̣ܘܐ ܗ̇ܝ ܕܫܟܝ̣ܪܐ. ܒܗ̇ܝ ܕܟܠ ܡܢܝܢܐ ܠܐ ܡܣܝܟܐ ܡ̣ܢ ܐܢܢܩܝ ܕܦܠܓܗ ܡܣܝܟܐ ܢܗܘܐ. ܘܐܠܐ ܡܫܬܟܚ ܦܠܓܗ ܕܫܘܐ ܠܟܠܗ ܗ̇ܝ ܕܠܐ ܡܨܝܐ. ܘܟܠ ܕܡ̣ܢ ܬܪܝܢ ܕܡܣܝܟܝ̣ܢ ܡܪܟܒ. ܡ̣ܢ ܐܢܢܩܝ ܕܡܣܝܟܐ ܢܗܘܐ. ܘܟܕ ܡܢܝܢܐ ܠܐ ܡܣܝܟܐ ܒܡܥܒܕܢܘܬܐ ܠܐ ܡܨܐ ܠܡܫܬܟܚܘ. ܐܦܠܐ ܡܨܝܐ ܕܥܡ ܦܓܪ̈ܐ ܡܬܒܪ̈ܝܢ ܢܦ̈ܫܬܐ. ܐܠܐ ܩܕܝ̣̈ܡܢ ܠܗܝܢ ܘܡܬܘ̈ܡܝܢ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܢܦܫܐ ܡܠܝ̣ܠܬܐ ܠܥܠܡܝ̣ܢܝܬܐ ܐܘܟܝܬ ܕܠܐ ܫܘܠܡ. ܐܟܡܐ ܕܥܬܝ̣ܕܐ ܠܡܬܚܘܝܘ. ܡܕܝܢ ܘܐܦ ܡܬܘܡܝܬܐ ܙܕܩ ܕܬܗܘܐ ܐܘܟܝ̣ܬ ܕܠܐ ܫܘܪܝ ܒܗ̇ܝ ܕܐܠܘ ܟܝܢܐ ܡܩܒܠܢܐ ܕܠܝܬܝܘܬܐ ܩܢܝܐ ܗܘܬ݀ ܡ̣ܢ ܩܕܡ ܗܘܝܗ̇. ܠܐ ܡܕܡ ܟܠܐ ܗ̣ܘܐ ܕܐܦ ܡ̣ܢ ܒܬܪ ܗܘܝܗ̇ ܠܗ̇ ܠܠܝܬܝܘܬܐ ܡܩܒܠܐ ܗܘܬ݀. ܘܟܕ ܠܐ ܡܩܒܠܢܐ ܗ̱ܘ ܟܝܢܗ ܕܠܝܬܝܘܬܐ ܒܬܪ ܗܘ̇ܝܗ̇. ܘܟܝܢܗ̇ ܗ̣ܘ ܟܕ ܗ̣ܘ ܐܝܬܘܗܝ ܒܐܡܝ̣ܢܘ. ܐܠܨܐ ܕܒܐܡܝ̣ܢܘ܆ ܘܡܡܬܘܡ ܠܐ ܡܩܒܠܢܐ ܢܗܐ ܕܠܝܬܝܘܬܐ ܗ̣ܘ ܟܝܢܗ̇. ܢܦܫܐ ܡܕܝܢ ܡܠܝ̣ܠܬܐ ܡܬܘܡܝܬܐ ܗ̱ܝ. ܘܠܐ ܐܝܬ ܗ̣ܘܐ ܐܡܬܝ ܕܠܐ ܐܝܬܝܗ̇ ܗܘܬ݀.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܒܫܬܐܣܬܐ ܬܪܝܢܝܬܐ ܫܪܪܢܢ ܕܙܘ̈ܥܐ ܡܘܙܠܬܢܝ̈ܐ ܠܘ ܕܠܐ ܣܘܦ ܐܢܘܢ. ܐܦܠܐ ܠܐ ܡܨܝܢ ܕܢܫܠܘܢ ܘܢܒܛܠܘܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢ ܕܢܦܫܐ ܡܠܝ̣ܠܬܐ. ܟܝܢܐ ܡܩܒܠܢܐ ܕܠܝܬܝܘܬܐ ܩܢܝܐ. ܡ̣ܢ ܩܕܡ ܗܘܝܗ̇ ܘܡ̣ܢ ܒܬܪ ܗܘܝܗ̇. ܠܐ ܕܝܢ ܡܩܒܠܐ ܠܝܬܝܘܬܐ ܒܬܪ ܗܘܝܗ̇. ܠܘ ܒܥܠܬ݀ ܟܝܢܗ܇ ܐܠܐ ܒܥܠܬ݀ ܥܠܬܐ ܥܒܘܕܬܗ̇ ܘܢܛܘܪܬܗ̇ ܕܐܝܬܘܗܝ ܐܠܗܐ ܫܘܒܚܐ ܠܛܝܒܘܬܗ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܡܝܢܝܬܐ ܡܛܠ ܬܪܥܝ̣ܬܐ ܐܘܪܝܓܢܝܬܐ ܗ̇ܝ ܕܩܕܡܝܘܬܐ ܒܠܥܕ ܡܬܘܡܝܘܬܐ ܝܗܒܐ ܠܒܪܝܬܗ̇ ܕܢܦܫܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ ܕܗܠܝܢ. ܣܥܝܐ ܩܕܡܝܐ

 

ܐܡܪܝܢ ܕܐܠܘ ܫܪܝܪܐ ܗ̱ܝ ܕܒܪܗ̇ ܐܠܗܐ ܠܒܪܝܬܐ ܘܫܠܡ ܒܝܘܡܐ ܫܬܝܬܝܐ. ܫܪܝܪܐ ܘܗ̇ܝ ܕܠܢܦ̈ܫܬܐ ܡܠܝ̣̈ܠܬܐ ܬܘܒ ܡ̣ܢ ܟܕܘ ܒܪܐ ܐܢܝܢ ܘܫܠܡ ܒܝܘܡܐ ܫܬܝܬܝܐ. ܘܠܐ ܬܘܒ ܒܪܐ ܐܘ ܒܪܐ ܡܢܗܝܢ ܡܕܡ ܒܬܪ ܝܘܡܐ ܫܬܝܬܝܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܒܫܘܪܝܐ ܡ̇ܢ ܒܪܐ ܐܠܗܐ ܒܪ̈ܝܬܐ ܡ̣ܢ ܠܐ ܡܕܡ. ܘܝܘܡܢܐ ܠܘ ܡ̣ܢ ܠܐ ܡܕܡ. ܐܠܐ ܡ̣ܢ ܒܪܢܫܐ ܒܪܢܫܐ. ܘܡ̣ܢ ܒܥܝ̣ܪܐ ܒܥܝ̣ܪܐ. ܘܡ̣ܢ ܬܡܣܘܬܐ ܒܩܐ. ܘܢܦ̈ܫܬܐ ܡܠܝ̣̈ܠܬܐ ܟܕ ܡ̣ܢ ܠܐ ܡܕܡ ܐܢܝܢ. ܡ̣ܢ ܫܘܪܝܐ ܒܪ̈ܝܢ. ܘܠܐ ܬܘܒ ܗܫܐ ܡܬܒܪ̈ܝܢ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܕܒܪܢܫܐ ܡ̣ܢ ܐܣܛܘܟ̈ܣܐ ܘܡ̣ܢ ܢܦܫܐ ܡܠܝ̣ܠܬܐ ܡܪܟܒ. ܐܟܡܐ ܡܕܝܢ ܕܐܣܛܘܟ̈ܣܐ ܡܩܕܡܝ̣ܢ ܡܩܝܡܝ̣ܢ ܒܒܪܝܬܗܘܢ ܡ̣ܢ ܩܕܡ ܪܘܟܒܗ ܕܒܪܢܫܐ. ܒܗ̇ ܒܕܡܘ̣ܬܐ ܘܢܦܫܐ ܩܕܝ̣ܡܐ ܡܩܝܡܐ ܒܒܪܝܬܗ̇ ܡ̣ܢ ܩܕܡ ܪܘܟܒܗ ܕܒܪܢܫܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܟܬܒܐ ܩܕܝܫܐ ܕܐܘܪܝܬܐ܆ ܬܘܢܝܐ ܕܓܘܫ̈ܡܐ ܒܠܚܘܕ ܡܝܬܐ ܒܫܬܬ݀ ܝܘ̈ܡܐ ܘܠܘ ܕܠܐ ܓܫܝ̈ܡܐ ܒܕܓܘܢ ܠܓܘ̈ܫܡܐ ܒܪܐ ܐܠܗܐ ܘܫܠܡ ܒܝܘܡܐ ܫܬܝܬܝܐ. ܘܠܘ ܠܢܦ̈ܫܬܐ ܡܠܝ̣̈ܠܬܐ ܕܠܐ ܓܫܝ̈ܡܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܓܘܫ̈ܡܐ ܚܕ ܡ̣ܢ ܚܕ ܒܪܐ. ܠܢܦ̈ܫܬܐ ܕܝܢ ܡܠܝ̣̈ܠܬܐ ܒܕܠܐ ܓܘܫ̈ܡܢܝܢ ܒܐܡܝ̣ܢܘ ܡ̣ܢ ܠܐ ܡܕܡ ܒܪܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܒܪܢܫܐ ܠܘ ܡ̣ܢ ܐܣܛܘܟ̈ܣܐ ܘܢܦܫܐ ܡܪܟܒ ܪܘܟܒܐ ܩܪܝ̣ܒܐ. ܐܠܐ ܡ̣ܢ ܦܓܪܐ ܕܡ̣ܢ ܐܣܛܘܟ̈ܣܐ ܡܪܟܒ܆ ܘܡ̣ܢ ܢܦܫܐ. ܐܟܡܐ ܡܕܝܢ ܕܦܓܪܐ ܠܐ ܩܕܝ̣ܡ ܠܒܪܢܫܐ. ܐܦܠܐ ܢܦܫܐ ܩܕܝ̣ܡܐ ܠܗ. ܘܡܛܠ ܗܕܐ ܐܦܠܐ ܠܦܓܪܐ ܕܥܡܗ̇ ܗ̣ܘ ܩܕܝ̣ܡܐ.

 

 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܬܡܝܢܝܬܐ ܡܛܠ ܫܘܢܝܐ ܕܢܦ̈ܫܬܐ ܡ̣ܢ ܦܓܪ̈ܝܗܝܢ. ܘܒܗ ܐܝܬ ܦܪܘܡܝܘܢ ܘܦܣܘ̈ܩܐ ܬܪܝܢ. ܦܪܘܡܝܘܢ ܡܛܠ ܬܪ̈ܥܝܬܐ ܕܗܘܝ̈ ܠܐܢܫܝ̈ܢ ܥܠ ܗܟܢ. ܬܪܥܝ̣ܬܐ ܩܕܡܝܬܐ

 

ܦܠܐܛܘ̈ܢܝܩܘ ܡ̇ܢ ܐ̱ܢܫܝ̈ܢ ܐܡܪܝܢ. ܕܩܕܝ̈ܡܢ ܡܩܝ̈ܡܢ ܢܦ̈ܫܬܐ ܡ̣ܢ ܩܕܡ ܦܓܪ̈ܐ. ܘܟܕ ܠܕܘܝܪܐ ܕܥܡ ܗܘܠܐ ܪ̈ܓܝ ܢܩܦ̈ܝ ܠܗ ܘܐܬܚܝܕ̈ܝ ܥܡܗ̇. ܘܐܝܟ ܕܒܐܘܪܓܢܘܢ ܒܗ̇ ܚܫܝ̈ܗܝܢ ܡܠܝ̣̈. ܘܡܛܠ ܕܦܓܪܐ ܠܘ ܟܝܢܐ ܩܢܐ ܡܩܘܝܢܐ. ܟܕ ܗ̣ܘ ܡܬܚܒܠ܆ ܠܦܓܪܐ ܐ̱ܚܪܝܢ ܡܫܢܝܐ. ܘܡ̣ܢ ܗܢܐ ܠܐܚܪܢܐ܆ ܥܕܡܐ ܕܦܟܗܝ̣ܢ ܚܫܝ̈ܗ̇. ܘܣܒܥܐ ܘܓܥܨܐ ܡ̣ܢ ܢܩܝܦ̣ܘܬܐ ܫܝ̣ܛܬܐ ܕܐܝܟ ܗܕܐ. ܗܝܕܝܢ ܡܫܢܝܐ. ܘܠܐ ܬܘܒ ܢܩܦܐ ܠܦܓܪܐ. ܐܠܐ ܒܕܘܝܪܗ̇ ܩܕܡܝܐ ܗܘܝܐ ܘܥܠ ܫܕܬܗ̇ ܦܢܝܐ.

 

 

 

ܬܪܥܝܬܐ ܕܬܪܬܝܢ

 

ܐ̱ܚܪ̈ܢܐ ܐܡܪܝܢ ܕܗ̣ܝ ܢܦܫܐ ܟܕ ܠܦܓܪܐ ܡܬܢܩܦܐ. ܐܢܗܘ ܕܗ̇ܘ ܦܓܪܐ ܡܘܙܓܐ ܢܗܘܐ ܠܗ ܡܝܬܪܐ. ܟܐܡܬ݀ ܕܠܐ ܢܗܘܘܢ ܠܗ ܚܝ̈ܠܐ ܥܗܪ̈ܐ ܪ̈ܐܓܝ ܪ̈ܓܝܓܬܐ ܒܣܪ̈ܢܝܬܐ. ܐܝܟ ܗ̇ܘ ܕܠܗܠܝܢ ܕܡܝܬܪ̈ܢ ܬܐܪܓ ܗ̣ܝ ܢܦܫܐ܆ ܒܝܕ ܦܓܪܐ ܗ̇ܘ ܡܬܕܪܫܐ. ܒܕܓܘܢ ܟܕ ܗܢܐ ܢܬܚܒܠ. ܠܦܓܪܐ ܐ̱ܢܫܝܐ ܕܡܝܬܪ ܡܢܗ ܡܫܢܝܐ. ܘܡ̣ܢ ܐ̱ܚܪܢܐ ܠܐܚܪܢܐ ܕܝܬܝܪ ܡܝܬܪ. ܘܗܟܢܐ ܒܐܝܕܐ ܒܐܝܕܐ ܥܕܡܐ ܕܡܬܓܡܪܐ ܘܥܡ ܡܠܐܟ̈ܐ ܡܕܝܪܐ. ܐܢܕܝܢ ܡܘܙܓܐ ܒܥܝ̣ܪܝܐ ܢܗܐ ܠܗ ܠܦܓܪܐ ܗ̇ܘ ܕܠܗ ܢܩܦܐ. ܝܬܝܪ ܡܫܬܠܗܒܐ ܒܪܓܬ݀ ܪ̈ܓܝܓܬܐ ܒܣܪ̈ܢܝܬܐ ܘܗܢܝ̈ܐܘܬܐ ܗܘܠܢܝ̈ܬܐ. ܒܕܓܘܢ ܟܕ ܗܢܐ ܡܬܚܒܠ܆ ܠܦܓܪܐ ܕܝܬܝܪ ܚܝܘܬܢ ܡ̣ܢ ܗ̇ܘ ܡܫܢܝܐ. ܘܡ̣ܢ ܗܢܐ ܠܐܚܪܢܐ ܕܝܬܝܪ ܒܥܝ̣ܪܝ. ܘܡ̣ܢ ܗܢܐ ܠܐܝܢܐ ܕܝܬܝܪ ܠܐ ܡܪܓܫܢ. ܘܡ̣ܢ ܗܢܐ ܠܐܝܢܐ ܕܝܬܝܪ ܠܐ ܡܢܦܫ. ܟܐܡܬ݀ ܡ̣ܢ ܒܪܢܫܐ ܠܚܝܘܬܐ ܠܐ ܡܠܝ̣ܠܬܐ ܚܙܝ̣ܪܐ ܠܡܐܡܪ ܐܘ ܟܠܒܐ. ܐܘ ܐܪܝܐ ܐܘ ܕܐܒܐ ܐܘ ܨܦܪܐ ܐܘ ܢܫܪܐ ܠܦܘܬ ܒܝܬܝܘܬ ܟܝܢܗ̇. ܘܡ̣ܢ ܦܓܪ ܚܝܘܬܐ ܠܢܨܒܬܐ. ܘܡ̣ܢ ܢܨܒܬܐ ܠܢܘܪܐ ܐܘ ܠܡܝ̈ܐ ܐܘ ܠܟܐܦܐ ܐܝܟ ܕܡܬܢܐ ܩܕܝܫܐ ܓܪܝܓܘܪܝܘܣ ܕܢܘܣܐ ܘܡܚܣܕ ܠܬܪܥܝ̣ܬܐ ܫܟܝ̣ܪܬܐ ܕܐܝܟ ܗܕܐ ܟܕ ܐܡ̇ܪ. ܕܐܡܪܝܢ ܕܐ̱ܢܫ ܡ̣ܢ ܚܟܝ̈ܡܐ ܕܒܗܘܢ ܐܡ̣ܪ ܕܓܒܪܐ ܗ̣ܘܐ ܗ̣ܘ ܟܕ ܗ̣ܘ. ܘܦܓܪܐ ܕܐܢ̱ܬܬܐ ܡ̣ܢ ܒܬܪܟܢ ܐܬܥܛܦ. ܘܥܡ ܦܪܚܬܐ ܦܪܚܬܐ ܠܥܠ ܘܢܨܒܬܐ ܝ̣ܥܐ. ܘܚܝ̈ܐ ܕܒܡܝ̈ܐ ܗ̣ܘܘ ܠܗ.

 

 

 

ܬܪܥܝܬܐ ܕܬܠܬ

 

ܐ̱ܚܪ̈ܢܐ ܐܡܪܝܢ. ܕܐܟܡܐ ܕܢܦܫܐ ܡܝܬܪܬܐ ܟܕ ܡ̣ܢ ܦܓܪܐ ܠܦܓܪܐ ܡܬܥܠܝܐ ܘܡܫܢܝܐ. ܠܚܪܬܐ ܠܕܘܝܪܐ ܛܘܒܬܢܐ ܕܥܡ ܡܠܐܟ̈ܐ ܡܫܬܘܝܐ. ܢܦܫܐ ܫܟܝ̣ܪܬܐ ܟܕ ܠܒܝܬ ܬܚܬܝ̣ܢ ܡܫܬܪܓܠܐ܆ ܡ̣ܢ ܦܓܪܐ ܠܦܓܪܐ ܡܫܢܝܐ. ܘܠܚܪܬܐ ܠܕܘܝܪܐ ܕܥܡ ܫܐܕ̈ܐ ܫܪܟܐ. ܘܠܥܠܡ ܥܠܡܝܢ ܥܡܗܘܢ ܡܬܕܘܝܐ.

 

 

 

ܬܪܥܝܬܐ ܕܐܪܒܥ

 

ܐ̱ܚܪ̈ܢܐ ܕܝܢ ܐܡܪܝܢ ܕܢܦܫܐ ܗ̇ܝ ܫܟܝ̣ܪܬܐ ܟܕ ܡ̣ܢ ܦܓܪܐ ܠܦܓܪܐ ܕܒܨܝ̣ܪ ܘܫܝ̣ܛ ܡܫܢܝܐ. ܠܚܪܬܐ ܠܠܝܬܝܘܬܐ ܘܠܚܒܠܐ ܫܪܟܐ ܘܚܒܠܐ ܕܐܝܟ ܗܢܐ܆ ܗܘܝܘ ܐܒܕܢܐ ܐ̱ܚܪܝܐ. ܘܠܗ̇ ܠܐܪܣܝܣ ܗܕܐ ܡܬܢܐ ܗ̣ܘ ܓܪܝܓܘܪܝܘܣ ܟܕ ܐܡ̇ܪ. ܐܠܐ ܒܝܕ ܪܚܡܬܐ ܕܠܘܬ ܚܫ̈ܐ܆ ܡ̣ܢ ܡܠܝ̣̈ܠܐ ܠܘܬ ܠܐ ܡܠܝ̣̈ܠܐ. ܥܒܪܐ. ܡ̣ܢ ܗ̇ܘ ܕܝܢ ܠܘܬ ܠܐ ܡܪܓܫܢܘܬܐ ܕܢܨ̈ܒܬܐ ܡܫܢܝܐ. ܠܠܐ ܡܪܓܫܢܐ ܕܝܢ܆ ܫܒܒܐ ܐܝܬܘܗܝ ܠܐ ܢܦܫܢܐ. ܠܗܢܐ ܕܝܢ ܠܐ ܡܩܝܡܘܬܐ ܕܒܩ̈ܐ. ܐܝܟܢܐ ܕܟܢܝ̣ܫܐܝܬ ܒܝܕ ܢܩܝ̣ܦܘܬܐ܆ ܠܘܬ ܗ̇ܘ ܕܠܐ ܐܝܬܘܗܝ ܡܫܢܝܐ ܠܗܘܢ ܢܦܫܐ.

 

 

 

ܬܪܥܝܬܐ ܕܚܡܫ

 

ܐ̱ܚܪ̈ܢܐ ܐܡܪܝܢ ܕܢܦ̈ܫܬܐ ܐ̱ܢܫܝ̈ܬܐ ܡܨ̈ܝܢ ܠܡܫܢܝܘ ܡ̣ܢ ܦܓܪ̈ܐ ܐ̱ܢܫܝ̈ܐ܆ ܠܦܓܪ̈ܐ ܕܚܝ̈ܘܬܐ ܠܐ ܡܠܝ̣̈ܠܬܐ: ܘܒܗܦܟܐ. ܐܠܐ ܠܦܓܪ̈ܝ ܢܨ̈ܒܬܐ ܘܡܐܛܠܝ̈ܩܘ ܘܐܣܛܘ̈ܟܣܐ܆ ܠܐ ܣܟ ܡܨ̈ܝܢ ܠܡܫܢܝܘ.

 

 

 

ܬܪܥܝܬܐ ܕܫܬ

 

ܐ̱ܚܪ̈ܢܐ ܐܡܪܝܢ ܕܢܦܫܐ ܐ̱ܢܫܝܬܐ ܟܕ ܠܦܓܪܐ ܐ̱ܢܫܝܐ ܢܩܦܐ. ܐܢܗܘ ܕܡܝܬܪܘܬܐ ܣܥܪܐ ܒܗ܆ ܠܒܘܣܡܐ ܕܒܦܓܪܐ ܕܛܒ ܡܥܠܝ ܡ̣ܢ ܦܓܪܗ̇ ܩܕܡܝܐ܆ ܡ̣ܢ ܐܠܗܐ ܡܫܬܘܝܐ. ܐܢܕܝܢ ܠܘ ܗܟܢܐ. ܐܠܐ ܒܚܛܗ̈ܐ ܡܬܟܬܡܐ. ܠܦܓܪܐ ܕܝܬܝܪ ܫܝ̣ܛ. ܐܝܟ ܕܠܫܘܢܩܗ̇ ܡܫܬܢܝܐ. ܟܐܡܬ݀ ܠܦܓܪܐ ܕܓܝܣܐ ܘܠܣܛܝܐ ܕܡܬܩܛܠ. ܐܘ ܕܓܢܒܐ ܕܡܬܦܣܩܐ ܐܝܕܗ. ܐܘ ܕܙܢܝܐ ܕܡܬܢܓܕ ܘܡܣܬܪܩ. ܐܘ ܕܚܡܪܐ ܘܕܓܡܠܐ ܕܡܬܛܥܢܝ̣ܢ.

 

 

 

ܦܣܘܩܐ ܩܕܡܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܗ̇ܝ ܕܠܐ ܡܬܡܨܝܢܝܬܐ ܗ̱ܝ ܫܘܢܝ̈ܗܝܢ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܒܡܚܘܝܢ̈ܘܬܐ ܚܣܝ̣̈ܢܬܐ ܕܐܬܩܕܡ̈ܝ. ܫܪܪܢܢ ܕܢܦ̈ܫܬܐ ܡܠܝ̣̈ܠܬܐ ܥܡܗܘܢ ܕܦܓܪ̈ܐ ܡܬܒܪ̈ܝܢ. ܠܐ ܩܕܡܝܗܘܢ܆ ܐܦܠܐ ܒܬܪܗܘܢ. ܒܕܓܘܢ ܟܕ ܦܓܪܐ ܡܕܡ ܒܬܒܪܐ ܘܢܦܫܐ ܕܝ̣ܠܢܝܬܐ ܐܟܚܕܐ ܥܡܗ ܡܬܒܪܝܐ. ܐܢܗܘ ܕܡܨܝܐ ܗܘܬ݀ ܕܢܦܫܐ ܐ̱ܚܪܬܐ ܡ̣ܢ ܦܓܪܐ ܐ̱ܚܪܢܐ ܕܐܬܚܒܠ ܠܦܓܪܐ ܗ̇ܘ ܚܕܬܐ ܕܗܘܐ ܢܩ̇ܦܐ ܗܘܬ݀. ܡܫܬܟ̈ܚܢ ܗܘܝ̈ ܬܪܬܝܢ ܢܦ̈ܫܢ ܠܚܕ ܦܓܪܐ܆ ܗ̇ܝ ܕܫܟܝܪܐ. ܒܕܟܠ ܐ̱ܢܫ ܚܕܐ ܝ̇ܕܥ ܠܗ ܢܦܫܐ ܘܠܘ ܝܬܝܪ ܡ̣ܢ ܚܕܐ. ܫܘܢܝܐ ܡܕܝܢ ܕܢܦܫܐ ܡ̣ܢ ܦܓܪܐ ܠܦܓܪܐ܆ ܠܐ ܡܬܡܨܝܢܐ ܗ̱ܘ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܐܢܗܘ ܕܡ̣ܢ ܐܠܨ̈ܬܐ ܗ̱ܝ ܠܢܦܫܐ ܕܬܩܦ ܠܦܓܪ ܐ̱ܚܪܝܢ ܟܕ ܡ̣ܢ ܦܓܪܗ̇ ܩܕܡܝܐ ܡܫܢܝܐ. ܐܘ ܡܨܝܐ ܕܬܦܘܫ ܙܒܢܐ ܡܕܡ ܟܕ ܡ̣ܢ ܦܓܪܗ̇ ܡܫܢܝܐ. ܐܘ ܠܐ ܡܨܝܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܝ̣ܩܝ̣ ܦܝܫܐ ܒܗ̇ܘ ܙܒܢܐ ܕܓܠܝ̣ܙܐ ܡ̣ܢ ܢܩܝ̣ܦܘܬܐ. ܘܠܝܬ ܐܝ̣ܩܝ̣ ܒܟܝܢܐ ܕܣܘܥܪ̈ܢܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܐܠܨܐ ܗܘܬ݀ ܕܫܘ̈ܝܝ ܒܡܢܝܢܐ ܗܘܝܢ ܗ̣ܘܘ ܗ̇ܢܘܢ ܕܡܬܝܠܕܝܢ܆ ܠܗ̇ܢܘܢ ܕܡܬܚܒܠܝ̣ܢ ܘܐܒܕܝ̣ܢ ܟܐܡܬ݀ ܙܕܩ ܗ̣ܘܐ ܕܥܡܗ̇ ܕܗ̇ܝ ܕܡ̇ܐܬ ܗ̣ܘܐ ܦܓܪܐ ܡܕܡ. ܦܓܪܐ ܐ̱ܚܪܢܐ ܡܩܒܠܢܐ ܕܢܦܫܐ ܗ̇ܝ ܢܬܝ̣ܠܕ ܗ̣ܘܐ. ܘܗܐ ܠܘ ܗܟܢܐ. ܒܗ̇ܝ ܕܒܛܘ̈ܦܢܐ ܗ̇ܢܘܢ ܟܠܢܝ̈ܐ. ܕܡܬܦܣܩ ܒܗܘܢ ܝܘܒܠܐ ܐܝܟܢܐ ܢܐܡܪ ܐ̱ܢܫ ܕܒܡܢܝܢܐ ܕܗ̇ܢܘܢ ܕܐܒܕܝܢ. ܐ̱ܚܪ̈ܢܐ ܒܕܘܟܬܗܘܢ ܒܗ ܒܙܢܐ ܡܬܝܠܕܝܢ. ܘܡ̣ܢ ܗܕܐ ܡܬܚܘܝܐ ܠܐ ܡܬܡܨܝܢܘܬ ܫܘܢܝܗܝܢ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܐܠܘ ܢܦ̈ܫܬܢ ܗܠܝܢ܇ ܩܕܡ ܦܓܪ̈ܝܢ ܗܠܝܢ ܠܦܓܪ̈ܐ ܐ̱ܚܪ̈ܢܐ ܢܩܝ̣̈ܦܢ ܗܘܝ̈. ܐܝܟܢܐ ܠܐ ܡܥܗܕܝ̣ܢ ܗܘܝܢ ܡܕܡ ܡ̣ܢ ܕܘܒܪ̈ܐ ܗܠܝܢ ܩܕ̈ܡܝܐ. ܘܐܦܢ ܠܘ ܠܟܠܗܘܢ. ܐܠܐ ܠܡܕܡ ܡܢܗܘܢ ܐܝܟܢܐ ܠܐ ܡܥܗܕܝ̣ܢ ܗܘܝܢ. ܘܐܝܟܢܐ ܬܘܒ ܠܐ ܐܠܨܐ ܗܘܬ݀ ܠܢ ܠܡܥܗܕܘ ܡܕܡ ܡ̣ܢ ܕܐܝܟ ܗܟܢ. ܘܗܐ ܚܙܝܢܢ ܕܗ̇ܘ ܕܡܐܐ ܙܒܢܝ̈ܢ ܬܢܐ ܠܩܪܝܢܐ ܡܕܡ. ܥܣܩܐܝܬ ܛܥܐ ܠܗ. ܘܗ̇ܘ ܕܡܐܬܝܢ ܝܬܝܪ ܥܣܩܐܝܬ. ܘܗ̇ܘ ܕܐܠܦ ܬܘܒ ܝܬܝܪ. ܡܕܝܢ ܢܦܫܐ ܡܕܡ ܡܠܝ̣ܠܬܐ ܕܡܬܚܐ ܕܫܒܥܝܢ ܫܢܝ̣̈ܢ ܐܘ ܕܬܡܢܝܢ. ܠܦܓܪܐ ܡܕܡ ܦܪܢܣܬ݀ ܘܡܢܗ ܫܢܝܬ݀ ܐܝܟܢܐ ܛܥܝܐ ܗܘܬ݀ ܠܗ ܟܠܢܐܝܬ. ܘܟܕ ܢܦܫܐ ܡܠܝ̣ܠܬܐ ܠܐ ܡܕܡ ܕܐܝܟ ܗܟܢ ܝ̇ܕܥܐ ܐܘ ܡܥܗܕܐ. ܠܐ ܣܟ ܢܩܝ̣ܦܐ ܗܘܬ݀ ܠܦܓܪܐ ܐ̱ܚܪܝܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܕܘܝܕ. ܨܗܝܐ ܗ̱ܝ ܠܟ ܢܦܫܝ ܐܠܗܐ ܚܝܐ. ܐܡܬܝ ܐܬܐ ܘܐܚܙܐ ܐܦܝ̈ܟ.

 

 

 

ܣܗܕܘܬܐ ܕܬܪܬܝܢ

 

ܫܠܝܡܘܢ. ܦܓܪܐ ܠܡ ܗܦܟ ܠܐܪܥܐ ܘܪܘܚܐ ܦܢܝܐ ܠܘܬ ܡܪܝܐ ܕܝܗܒܗ̇.

 

 

 

ܣܗܕܘܬܐ ܕܬܠܬ

 

ܐܘܢܓܠܝܘܢ. ܟܕ ܕܝܢ ܡܝ̣ܬ ܠܥܙܪ܆ ܐܘܒܠܘ̣ܗܝ ܡܠܐܟ̈ܐ ܠܥܘܒܗ ܕܐܒܪܗܡ.

 

 

 

ܣܗܕܘܬܐ ܕܐܪܒܥ

 

ܐܣܛܦܐܢܘܣ ܟܕ ܡܬܪܓܡ. ܡܪܢ ܝܫܘܥ ܩܒܠ ܪܘܚܝ.

 

 

 

ܣܗܕܘܬܐ ܕܚܡܫ

 

ܦܘܠܘܣ. ܪܓܝܓ ܐ̱ܢܐ ܕܐܦܛܪ ܕܥܡ ܡܫܝܚܐ ܐܗܘܐ.

 

 

 

ܣܗܕܘܬܐ ܕܫܬ

 

ܓܪܝܓܘܪܝܘܣ ܕܢܘܣܐ ܒܡܐܡܪܐ ܕܥܠ ܬܘܩܢܗ ܕܒܪܢܫܐ ܗ̇ܢܘܢ ܕܩܝܡܝ̣ܢ ܒܗ̇ܝ ܡܠܬܐ ܩܕܡܝܬܐ. ܘܕܩܫܝ̣ܫ ܡ̣ܢ ܚܝ̈ܐ ܕܒܒܣܪܐ. ܕܘܒܪܐ ܕܢܦ̈ܫܬܐ ܐܡܪܝܢ܆ ܠܐ ܡܬܕܡܐ ܠܝ ܕܕܟܝܢ ܡ̣ܢ ܝܘܠܦܢ̈ܐ ܕܚܢܦܘܬܐ. ܐܝܠܝܢ ܕܡܛܠ ܫܘܢܝܐ ܕܢܦܫܐ ܕܡ̣ܢ ܦܓܪܐ ܠܦܓܪܐ܆ ܐܝܟ ܕܒܫܘܥ̈ܝܬܐ ܕܡ̈ܠܐ ܐܡܝ̣ܪ̈ܢ ܠܗܘܢ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܡܝܢܝܬܐ ܡܛܠ ܬܪܥܝ̣ܬܐ ܕܗ̇ܢܘܢ ܕܫܘܢܝܐ ܡܘܕܝܢ ܕܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ ܕܗܠܝܢ ܘܗܦܟ̈ܬܗܘܢ ܕܠܘܩܒܠ ܡܚܘܝܢ̈ܘܬܢ. ܣܥܝܐ ܩܕܡܝܐ

 

ܐܡܪܝܢ ܕܢܦ̈ܫܬܐ ܡܠܝ̣̈ܠܬܐ. ܡܛܠܗ̇ܝ ܕܢܬܓܡܪ̈ܢ. ܘܡܝܬܪ̈ܬܐ ܣܘܢܝܦܛܪ̈ܘܢܝ̄ ܕܬܐܘܪܝܐ ܠܡܐܡܪ ܘܕܣܥܘܪܘܬܐ ܢܬܬܓܪ̈ܢ܆ ܡܬܒܪ̈ܝܢ ܘܥܡ ܦܓܪ̈ܐ ܡܬܐܣܪ̈ܢ. ܒܕܓܘܢ ܟܕ ܦܓܪܐ ܡܕܡ ܕܢܦܫܐ ܡܕܡ ܢܫܬܪܐ ܡ̣ܢ ܩܕܡ ܗ̇ܝ ܡܫܡܠܝܘܬܐ ܕܦܐܝܐ ܡ̣ܢ ܩܕܡ ܗ̇ܝ ܡܫܡܠܝܘܬܐ ܕܦܐܝܐ ܠܟܝܢܗ̇. ܡ̣ܢ ܐܢܢܩܝ ܕܠܦܓܪܐ ܐ̱ܚܪܢܐ ܬܩܦ. ܘܡ̣ܢ ܗܢܐ ܠܐܚܪܢܐ܇ ܥܕܡܐ ܕܬܬܓܡܪ ܘܠܐ ܬܘܒ ܬܣܬܢܩ ܥܠ ܐܣܪܐ ܕܥܡ ܦܓܪܐ. ܘܕܢܦܫܐ ܒܠܥܕ ܦܓܪܐ ܠܐ ܡܨܝܐ ܕܬܙܕܕܩ ܐܦܠܐ ܕܬܬܟܬܡ܆ ܟܠܟܘܢ ܣ̇ܗܕܝܢ ܐܢ̱ܬܘܢ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܢܦܫܐ ܟܕ ܟܝܢܐ ܩܢܝܐ ܢܗܝܪܐ ܠܐ ܗܘܠܢܝܐ ܘܡܥܠܝܐ. ܗܘܐ ܐܣܪܗ̇ ܕܥܡ ܗܘܠܐ ܚܫܘܟܬܐ ܘܥܒܝ̣ܬܐ ܘܫܝ̣ܛܬܐ. ܙܢܐ ܡܕܡ ܕܫܘܢܩܐ ܐܝܬܘܗܝ ܠܗ̇ ܡ̣ܢ ܐܢܢܩܝ. ܒܕܓܘܢ ܐܠܘܠܐ ܕܩܕܡ̈ܝ ܚܛܝ̈ ܠܐ ܡܬܘܡ ܡܬܓܪܡ ܗ̣ܘܐ ܥܠܝܗܝܢ ܡ̣ܢ ܡܪܝܡܐ. ܓܙܪ ܕܝ̣ܢܐ ܕܐܣܪܐ ܕܐܝܟ ܗܢܐ. ܡܟܝܠ ܐܢ ܒܐܣܪܐ ܩܕܡܝܐ ܕܥܡ ܦܓܪܐ ܩܕܡܝܐ. ܡܬܡܨܝܐ ܕܬܦܪܘܥ ܚܘܒܬܗ̇ ܘܬܬܪܥܐ ܥܡܗ ܥܕ ܗ̣ܝ ܒܐܘܪܚܐ. ܐܬܚܪܪܬ݀ ܡ̣ܢ ܐܣܪܐ. ܘܐܠܐ ܡ̣ܢ ܦܓܪܐ ܗ̇ܘ܆ ܠܦܓܪܐ ܐ̱ܚܪܢܐ ܡܫܬܠܡܐ. ܘܡ̣ܢ ܗ̇ܘ ܐ̱ܚܪܢܐ ܠܐܚܪܢܐ. ܗܟܢܐ ܠܐ ܢܦܩܐ ܡ̣ܢ ܬܡܢ܆ ܥܕܡܐ ܕܦܪܥܐ ܫܡܘܢܐ ܐ̱ܚܪܝܐ ܐܝܟ ܡܠܬܐ ܐܘܢܓܠܝܬܐ.

 

 

 

ܗܦܟܬܐ ܥܠ ܡܚܘܝܢܘܬܢ ܩܕܡܝܬܐ

 

ܐܡܪܝܢ ܡܛܠ ܡܢܐ ܐܡ̣ܪܬܘܢ. ܕܟܕ ܟܠ ܒܪܢܫܐ ܚܕܐ ܝܕܥ ܠܗ ܢܦܫܐ. ܠܐ ܡܨܝܐ ܕܢܗܘ̈ܝܢ ܠܗ ܬܪܬܝܢ ܢܦ̈ܫܬܐ. ܗ̇ܝ ܓܝܪ ܕܝ̇ܕܥܐ ܗ̣ܝ ܠܗ̇. ܗ̣ܝ ܢܦܫܐ ܐܝܬܝܗ̇. ܒܕܓܘܢ ܟܠܚܕܐ ܡ̣ܢ ܢܦ̈ܫܬܐ ܗ̇ܢܝܢ ܬܪܬܝܢ ܕܠܚܕ ܦܓܪܐ ܢܩܝ̣̈ܦܢ. ܗ̣ܝ ܠܗ̇ ܚܕܐ ܝܕܥܐ. ܘܗܟܢܐ ܘܟܕ ܝܬܝܪ ܡ̣ܢ ܬܪܬܝܢ ܢܗܘ̈ܝܢ.

 

 

 

ܗܦܟܬܐ ܕܥܠ ܡܚܘܝܢܘܬܢ ܬܪܝܢܝܬܐ

 

ܐܡܪܝܢ ܕܡܛܠܡܢܐ ܐܡ̣ܪܬܘܢ ܕܠܐ ܡܨܝܐ ܕܠܐ ܦܓܪܐ ܬܦܘܫ ܢܦܫܐ ܡܬܚܐ ܡܕܡ. ܒܗ̇ܝ ܕܠܝܬ ܐܝ̣ܩܝ̣ ܒܟܝܢܐ ܕܣܘܥܪ̈ܢܐ. ܘܗܐ ܠܬܐܡܝܣܛܝܘܣ ܗ̇ܘ ܕܐܡ̣ܪ. ܕܢܦ̈ܫܬܐ ܕܝܠܘ̈ܕܐ ܘܕܒܪܝ̣ܪ̈ܐ ܡܬܚܒܠܘ ܡܬܚܒ̈ܠܢ ܥܡ ܚܘ̣ܒܠ ܦܓܪ̈ܝܗܝܢ. ܒܗ̇ܝ ܕܒܥܠܬ݀ ܓܠܝ̣ܙܘܬܗܝܢ ܕܡ̣ܢ ܡܝܬܪ̈ܬܐ ܐܝ̣ܩܝ̣ ܗܘܐ ܩܘܝܡܗܝܢ ܘܠܝܬ ܐܝ̣ܩܝ̣ ܒܟܝܢܐ ܕܣܘܥܪ̈ܢܐ. ܐܝܟ ܣܪܘܒܐ ܘܒܓܘܠܐ ܚܫܒܬܘܢܝܗܝ. ܘܠܘܩܒܠ ܗ̇ܝ ܕܐܡ̣ܪܢܢ ܕܙܕܩ ܗ̣ܘܐ ܕܫܘ̈ܝܝ ܒܡܢܝܢܐ ܗܘܝܢ ܗ̣ܘܘ ܗ̇ܢܘܢ ܕܡܬܝܠܕܝܢ ܘܗ̇ܢܘܢ ܕܐܒܕܝ̣ܢ ܐܡܪܝܢ. ܕܡܢܘ ܡܢܐ ܐܢܘܢ ܡܡܢܐ ܘܠܘ ܕܫܘܝܢ ܐܫܟܚ ܐܢܘܢ. ܘܠܘܩܒܠ ܬܘܢܝܐ ܗ̇ܘ ܕܛܘܦܢ̈ܐ ܐܡܪܝܢ. ܕܐܦܢ ܗ̇ܢܘܢ ܕܐܒܕܝܢ ܣܓܝܐܝܢ. ܐܠܐ ܘܗ̇ܢܘܢ ܕܡܬܝܠܕܝܢ ܬܘܒ ܣܓܝܐܝܢ. ܚܝ̈ܘܬܐ ܠܡܐܡܪ ܝܡܡܝ̈ܬܐ. ܘܗ̇ܢܝܢ ܫܘ̈ܥܝܬܐ. ܘܒܩ̈ܐ ܘܫܪܟܐ ܕܦܓܪ̈ܐ ܫܝ̣̈ܛܐ ܗ̇ܢܘܢ ܕܐܠܘܠܐ ܠܐܣܪܐ ܕܥܡܗܘܢ ܫܘ̈ܝܢ ܗܘܝ̈ ܢܦ̈ܫܬܐ ܗ̇ܢܘܢ ܐܦܠܐ ܒܛܘܦܢܐ ܐܒ̇ܕܝܢ ܗ̣ܘܘ ܦܓܪ̈ܝܗܘܢ ܬܡܝ̣̈ܗܐ ܕܐ̱ܢܫܝ̈ܐ.

 

 

 

ܗܦܟܬܐ ܕܥܠ ܡܚܘܝܢܘܬܢ ܬܠܝܬܝܬܐ

 

ܐܡܪܝܢ ܕܠܘ ܡܛܠܗ̇ܝ ܕܠܐ ܡܥܗܕܐ ܢܦܫܐ ܠܕܘܒܪܐ ܗ̇ܘ ܩܕܡܝܐ. ܙܕܩ ܠܡܣܒܪܘ ܕܠܐ ܢܩܝ̣ܦܐ ܗܘܬ݀ ܠܦܓܪܐ ܐ̱ܚܪܢܐ ܡ̣ܢ ܩܕܡ ܦܓܪܐ ܗܢܐ. ܗ̣ܘ ܓܝܪ ܢܫܝܢܐ ܕܐܝܟ ܗܢܐ ܒܥܠܬ݀ ܛܒܝ̣ܥܘܬܗ̇ ܕܒܪܢܝܗ ܕܦܓܪܐ ܗܢܐ ܓܕܫܐ ܠܗ̇. ܐܘ ܕܠܡܐ ܗ̇ܢܘܢ ܕܡܬܛܒܥܝ̣ܢ ܒܝܡ̈ܡܐ ܘܢܦܠܝ̣ܢ ܒܢܘܪ̈ܬܐ. ܟܕ ܒܟܠܗ ܚܝܠܗܘܢ ܝ̇ܨܦܝܢ ܘܡܬܦܪܣܝ̣ܢ ܐܒܗ̈ܬܐ ܘܐܡܗ̈ܬܐ ܘܐܚ̈ܐ ܘܐܬܪ̈ܘܬܐ ܘܒ̈ܬܐ ܗܟܢܐ ܡܕܝܢ ܐܦ ܗܪܟܐ.

 

 

 

ܗܦܟܬܐ ܕܥܠ ܣܗܕ̈ܘܬܢ ܟܬܒܝ̈ܬܐ

 

ܐܡܪܝܢ ܕܗܘܐ ܐܣܪܐ ܬܪܝܢܐ ܘܬܠܝܬܝܐ ܘܫܪܟܐ. ܫܘܢܩܐ ܡܕܡ ܐܝܬܘܗܝ ܕܢܦܫܐ ܗ̇ܝ ܕܡܫܢܝܐ ܡ̣ܢ ܦܓܪܐ ܠܦܓܪܐ ܡܛܠ ܩܢܝܢ ܡܝܬܪ̈ܬܐ. ܐܟܡܐ ܕܐܦ ܬܐܓܪ̈ܐ ܠܘ ܒܠܥܕ ܥܡܠܐ ܘܬܥܫܐ ܘܛܘܪܦܐ ܚܙܩ ܡ̣ܢ ܐܬܪܐ ܠܐܬܪܐ ܠܡܬܬܓܪܘ ܘܠܡܥܬܪ ܘܡܛܠ ܗܕܐ ܕܘܝܕ ܘܐܣܛܦܐܢܘܣ ܘܦܘܠܘܣ ܨܗܝܢ ܗ̣ܘܘ ܘܪܓܝ̣ܓܝܢ ܘܡܬܟܫܦܝ̣ܢ ܠܐܠܗܐ ܕܠܐ ܬܘܒ ܢܩ̈ܦܢ ܪ̈ܘܚܬܗܘܢ ܠܦܓܪ̈ܐ ܐ̱ܚܪ̈ܢܐ. ܘܢܬܕܘ̈ܝܢ ܪ̈ܘܚܬܗܘܢ ܠܦܓܪ̈ܐ ܐ̱ܚܪ̈ܢܐ. ܘܢܬܕܘ̈ܝܢ ܒܐܣܘܪ̈ܐ ܘܦܘܪ̈ܟܠܐ. ܘܫܠܝܡܘܢ ܬܘܒ ܠܐ ܐܡ̣ܪ ܕܠܐ ܡܫܢ̈ܝܢ ܢܦ̈ܫܬܐ ܡ̣ܢ ܦܓܪ̈ܐ ܠܦܓܪ̈ܐ. ܐܠܐ ܐܡ̇ܪ ܕܪܘܚܐ ܦܢܝܐ ܠܘܬ ܡܪܗ̇. ܘܡܨܝܐ ܕܒܬܪ ܫܘܢܝܗ̇ ܕܡ̣ܢ ܦܓܪ ܠܦܓܪ. ܗ̣ܘ ܗܟܘܬ ܘܠܢܦܫܗ ܕܠܥܙܪ ܒܬܪ ܥܒܘܪܝܗ̇ ܕܡ̣ܢ ܦܓܪ ܠܦܓܪ ܡܨܝܐ ܕܐܘܒܠܘܗ̇ ܡܠܐܟ̈ܐ ܠܥܘܒܗ ܕܐܒܪܗܡ. ܘܡܛܠ ܡܠܝ̈ܗܘܢ ܕܓܪܝܓܘܪܝܘܣ ܘܓܪܝܓܘܪܝܘܣ ܐܡ̇ܪܝܢ ܕܠܐ ܡܬܩܒ̈ܠܢ. ܒܗ̇ܝ ܕܒܠܥܕ ܡܚܘܝܢ̈ܘܬܐ ܐܦܘܕܝܟܣܝ̣ܣ̈ܝܬܐ ܐܡ̣ܪܘ ܗ̇ܘ ܡܐ ܕܐܡ̣ܪܘ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܘܦܘ̈ܢܝܐ ܕܣܥܝ̈ܐ ܘܗܦ̈ܟܬܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܐܠܘ ܡܛܠ ܕܬܬܓܡ̣ܪ ܥܒܪܐ ܗܘܬ݀ ܢܦܫܐ ܡ̣ܢ ܦܓܪ ܠܦܓܪ. ܠܐ ܙܕܩ ܗ̣ܘܐ ܕܡܡܬܘܡ ܡ̣ܢ ܦܓܪܐ ܡܝܬܪܐ ܠܦܓܪܐ ܨܥܝ̣ܪܐ ܡܫܢܝܐ ܗܘܬ݀ ܢܦܫܐ. ܘܗܐ ܠܘ ܗܟܢܐ ܐܡܪܝܬܘܢ. ܐܝܟ ܕܐܦ ܠܦܓܪ̈ܝ ܟܠܒ̈ܐ ܘܚܙܝ̣ܪ̈ܐ ܥܒܪ̈ܢ ܢܦ̈ܫܬܐ ܐ̱ܢܫܝ̈ܬܐ ܡܘܕܝܢ ܐܢ̱ܬܘܢ. ܘܐܝ̇ܕܐ ܓܡܝ̣ܪܘܬܐ ܡܟܢܐ ܕܬܗܘܐ ܠܗܝܢ ܒܦܓܪ̈ܐ ܫܝ̣̈ܛܐ ܕܐܝܟ ܗܠܝܢ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܒܡܚܘܝܢ̈ܘܬܐ ܚܣܝ̣̈ܢܬܐ ܫܪܪܢܢ ܠܐ ܡܬܡܨܝܢܘܬ ܗܘܝܗܝܢ ܕܢܦ̈ܫܬܐ ܡ̣ܢ ܩܕܡ ܦܓܪ̈ܐ. ܒܕܓܘܢ ܗ̇ܘ ܕܠܐ ܐܝܬܘܗܝ ܐܝܟܢܐ ܢܚܛܐ. ܘܡܣܡ ܒܪܝܫܐ ܕܫܘܢܩܐ ܥܠܘܗܝ ܢܬܓܙܪ.

 

 

 

ܦܘܢܝܐ ܕܗܦܟܬܐ ܩܕܡܝܬܐ

 

ܐܡܪܝܢܢ ܐܠܘ ܢܦܫܐ ܗ̣ܝ ܠܗ̇ ܒܠܚܘܕ ܝ̇ܕܥܐ ܗܘܬ݀ ܘܠܡܕܡ ܐ̱ܚܪܝܢ ܠܐ ܡܟܢܐ ܗܘܬ݀ ܕܬܕܥ. ܡܬܩܒܠܐ ܗܘܬ݀ ܗ̣ܝ ܡܠܬܐ ܗ̇ܝ. ܘܐܝܟܢܐ ܡܬܗܝܡܢܐ ܕܬܪܬܝܢ ܢܦ̈ܫܢ ܢܫܬܘ̈ܬܦܢ ܒܕܘܒܪ̈ܐ ܕܦܓܪܐ ܡܕܡ ܝܚܝܕܝܐ ܘܠܐ ܢܫܬܘܕ̈ܥܢ ܠܚܕ̈ܕܐ.

 

 

 

ܦܘܢܝܐ ܕܗܦܟܬܐ ܬܪܝܢܝܬܐ

 

ܐܡܪܝܢܢ ܕܒܝܕ ܡܚܘܝܢ̈ܘܬܐ ܚܣܝ̣̈ܢܬܐ ܡܫܪܪܝ̣ܢܢ ܒܝܕ ܐܠܗܐ ܕܢܦܫܐ ܠܐ ܡܩܒܠܢܝ̣ܬܐ ܗ̱ܝ ܕܚܒܠܐ. ܘܡܛܠܗܕܐ ܠܐ ܡܬܬܦܝ̣ܣܝ̣ܢܢ ܠܨܒܪܐ ܬܐܘܡܝܣܛܘܝܐ. ܘܡܢܘ ܐܡ̇ܪ ܕܢܦ̈ܫܬ ܝܠܘ̈ܕܐ ܘܒܪܝ̣ܪ̈ܐ ܐܝܩܝ ܦܝ̈ܫܢ. ܘܠܐ ܡܬܢܗܪ̈ܢ ܒܨܡ̈ܚܐ ܐܠܗܝ̈ܐ ܕܥܠ ܟܠ. ܕܠܐ ܟܠܘ ܕܢܚܝ̣ܢ. ܢܦ̈ܫܬܐ ܓܝܪ ܚܛܝ̈ܬܐ ܒܥܠܬ݀ ܡܟܬܡܘ̣ܬܗܝܢ ܠܐ ܡܟܢܢ ܠܡܬܬܙܠܓܘ. ܗ̇ܢܝܢ ܕܝܢ ܕܠܐ ܚܛܝ̈. ܡܢܐ ܟܠܐ ܠܗܝܢ ܠܡܬܬܨܡܚܘ. ܘܠܘܩܒܠ ܗ̇ܝ ܕܐܡ̣ܪܘ ܕܣܓܝ̈ܐܢ ܚܝ̈ܘܬܐ ܕܡܬܝ̈ܠܕܢ ܒܛܘ̈ܦܢܐ ܐܡܪܝܢܢ ܕܒܬܪ ܩܠܝܠ ܡܚܘܝܢܢ ܠܐ ܡܬܡܨܝܢܘܬ ܫܟܝ̣ܚܘܬܐ ܕܢܦ̈ܫܬܐ ܡܠܝ̣̈ܠܬܐ ܠܠܐ ܡܠܝ̈ܠܐ.

 

 

 

ܦܘܢܝܐ ܕܗܦܟܬܐ ܬܠܝܬܝܬܐ

 

ܐܡܪܝܢܢ ܕܠܘ ܒܐܡܝ̣ܢܘ ܫܓ̣ܝܡܐ ܘܡܛܒܥܐ ܢܦܫܐ ܒܪܢܝܗ ܕܦܓܪܐ ܗܢܐ. ܟܕ ܙܒܢܝ̈ܢ ܣܓܝ̈ܐܢ ܡܫܟܚ ܟܠܚܕ ܡܢܢ ܢܦܫܗ ܕܣܦܝ̣ܩܐ ܘܒܗܝ̣ܠܐ ܡ̣ܢ ܟܠ ܪܢܝܐ. ܘܒܨܒ̈ܘܬܐ ܕܠܐ ܐܢܢ̈ܩܝܢ ܡܬܚܫܒܐ. ܘܐܠܘ ܠܦܓܪܐ ܐ̱ܚܪܢܐ ܡܬܘܡ ܢܩܝ̣ܦܐ ܗܘܬ݀. ܐܝܟܢܐ ܠܐ ܡܥܗܕܐ ܗܘܬ݀.

 

 

 

ܦܘܢܝܐ ܕܗܦ̈ܟܬܐ ܕܥܠ ܣܗܕ̈ܘܬܐ ܟܬܒܝ̈ܬܐ

 

ܐܡܪܝܢܢ ܕܢܒܝ̈ܐ ܘܫܠܝ̈ܚܐ ܘܟܠܗܘܢ ܓܡܝ̣ܪ̈ܐ ܗ̇ܢܘܢ ܕܣܘܓܐܐ ܕܣܘܥܪ̈ܢܐ ܘܪ̈ܥܝܢܐ ܟܣܝ̈ܐ ܐܠܦܘ ܠܒܢܝ̈ܢܫܐ. ܐܠܘ ܡܕܡ ܕܐܝܟ ܗܟܢ ܫܪܝܪ ܗ̣ܘܐ. ܐܝܟܢܐ ܟܕ ܝ̇ܕܥܝܢ ܗ̣ܘܘ ܠܗ. ܠܐ ܡܒܕܩܝܢ ܗ̣ܘܘ ܠܒܢܝ̈ܢܫܐ. ܘܡܪܬܝܢ ܗ̣ܘܘ ܠܗܘܢ. ܕܐܬܚܦܛܘ ܠܡ ܥܠ ܩܢܝܢ ܡܝܬܪ̈ܬܐ ܕܠܐ ܢܫܬܢ̈ܩܢ ܢܦܫ̈ܬܟܘܢ ܒܥܒܘܪܝܐ ܕܡ̣ܢ ܦܓܪ ܠܦܓܪ. ܐܠܐ ܐܡ̣ܪܘ ܐܟܚܕܐ ܟܠܗܘܢ. ܕܥܒ̣ܕܘ ܦܐܪ̈ܐ ܕܫܘܝܢ ܠܬܝܒܘܬܐ. ܕܠܐ ܐܝܟ ܝܥܪܐ ܒܢܘܪܐ ܬܐܩܕܘܢ ܘܫܪܟܐ.

 

 

 

 

 

 

     #1 

 

ܩܦܠܐܘܢ ܚܡܝܫܝܐ ܕܫܬܐܣܬܐ ܬܡܝܢܝܬܐ. ܡܛܠ ܢܦ̈ܫܬܐ ܕܚܝ̈ܘܬܐ ܠܐ ܡܠܝ̈ܠܬܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܗ̇ܝ ܕܓܠܝ̈ܙܢ ܐܢܝܢ ܚܝ̈ܘܬܐ ܠܐ ܡܠܝ̈ܠܬܐ ܡ̣ܢ ܢܦܫܐ ܡܠܝܠܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܠܘ ܢܦ̈ܫܬܐ ܡܠܝ̣̈ܠܬܐ ܩܢ̈ܝܢ ܗܘܝ̈ ܚܝ̈ܘܬܐ ܠܐ ܡܠܝ̣̈ܠܬܐ. ܫܘܝܬ݀ ܒܟܝܢܐ ܐܝܬܝܗܝܢ ܗܘܝ̈ ܠܒܢܝ̈ܢܫܐ. ܘܟܕ ܦܪܝ̣ܫܬ݀ ܒܟܝܢܐ ܘܐܕܫܐ ܐܝܬܝܗܝܢ܆ ܠܐ ܩܢ̈ܝܢ ܢܦ̈ܫܬܐ ܡܠܝ̣̈ܠܬܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܐܠܘ ܡܠܝ̣̈ܠܬܐ ܗܘܝ̈ ܚܝ̈ܘܬܐ ܠܐ ܡܠܝ̣̈ܠܬܐ ܠܘ ܠܐ ܓܠܝܢ ܗ̣ܘܘ ܒܗܝܢ ܫܘܘ̈ܕܥܐ ܕܡܠܝ̣ܠܘܬܐ. ܘܟܕ ܠܐ ܓܠܝܢ ܒܗܝܢ܆ ܠܐ ܡܠܝ̈ܠܢ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܐܠܘ ܡܠܝ̣̈ܠܢ ܗܘܝ̈. ܠܢܡܘܣܐ ܡܫܥܒ̈ܕܢ ܗܘܝ̈. ܘܟܕ ܠܐ ܡܫܥܒ̈ܕܢ܆ ܠܐ ܡܠܝ̈ܠܢ.

 

 

 

ܢܝܫܐ ܬܪܝܢܐ. ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܕܘܝܕ. ܠܐ ܬܗܘܘܢ ܐܝܟ ܣܘܣܝܐ ܘܐܝܟ ܟܘܕܢܝܐ ܕܠܐ ܚܟܝ̣ܡܝ̣ܢ܆ ܕܒܦܓܘܕܬܐ ܡܟܒܫܝܢ ܠܗܘܢ ܡ̣ܢ ܛܠܝܘܬܗܘܢ.

 

 

 

ܣܗܕܘܬܐ ܕܬܪܬܝܢ

 

ܗ̣ܘ ܟܕ ܗ̣ܘ. ܒܪܢܫܐ ܒܐܝܩܪܗ ܠܐ ܐܬܒܝܢ. ܐܠܐ ܐܫܬܠܡ ܠܒܥܝ̣ܪܐ ܘܐܬܕܡܝ̣ ܠܗ̇.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܡܝܢܝܬܐ. ܡܛܠ ܬܪܥܝ̣ܬܐ ܕܗ̇ܢܘܢ ܕܫܟܝ̣ܚܘܬ ܢܦܫܐ ܡܠܝܠܬܐ ܡܙܕܩܝܢ ܠܚܝ̈ܘܬܐ ܠܐ ܡܠܝ̣̈ܠܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܗܘܢ ܚܘܫܒܝܐ. ܘܬܚܘ̈ܝܬܐ ܟܝܢܝ̈ܬܐ ܕܡܝܬܝܢ ܣܥܝܐ

 

ܐܡܪܝܢ ܕܡܢܗܝܢ ܕܚܝ̈ܘܬܐ ܗܠܝܢ ܣܥܘܪ̈ܘܬܐ ܚܙܝܢܢ ܕܡܣܬܥܪ̈ܢ. ܗ̇ܢܝܢ ܐܝܠܝܢ ܕܟܒܪ ܡ̣ܢ ܡܝܬܪ̈ܐ ܘܡܗܝ̣ܪ̈ܐ ܕܡܠܝ̈ܠܐ ܡܨ̈ܝܢ ܠܡܣܬܥܪܘ. ܘܡܛܠܗܕܐ ܐܫܬܪܪܢܢ ܕܠܐ ܓܠܝ̣̈ܙܢ ܡ̣ܢ ܢܦ̈ܫܬܐ ܡܠܝ̣̈ܠܬܐ. ܘܗ̣ܢܝܢ ܣܥܘܪ̈ܘܬܐ ܗ̇ܢܝܢ ܬܡܝ̈ܗܬܐ. ܐܝܟ ܕܡ̣ܢ ܡܫܪܬܚܘܬܐ ܬܚܘ̈ܝܢ ܡܬܚܘ̈ܝܢ.

 

 

 

ܬܚܘܝܬܐ ܩܕܡܝܬܐ

 

ܐܡܪܝܢ ܕܥܘܩܒܪܐ ܕܘܢܒܗ ܡܠܠ ܒܫܛܝ̣ܦܬܐ ܐܠܝ̣ܨܬ݀ ܩܕܠܐ ܕܡܫܚܐ ܘܡܠܟܚ ܠܗ. ܘܓܠܝܐ ܕܣܥܘܪܘܬܐ ܗܕܐ ܠܐ ܡܬܦܪܢܣܐ. ܐܠܐ ܒܝܕ ܝ̣ܕܥܬܐ ܕܐܪܒܥ ܦܪ̈ܘܛܐܣܝܣ. ܚܕܐ ܡ̇ܢ ܕܣܢܝ̣ܩ ܥܠ ܡܫܚܐ. ܕܬܪܬܝܢ ܕܪܝܫܗ ܠܐ ܥ̇ܐܠ. ܕܬܠܬ ܕܕܘܢܒܗ ܡܨܐ ܠܡܥܠ. ܕܐܪܒܥ ܕܒܝܕ ܡܕܒܪܢܘܬܐ ܕܐܝܟ ܗܕܐ ܡܫܬܡܠܝܐ ܪܓܬܗ.

 

 

 

ܬܚܘܝܬܐ ܕܬܪܬܝܢ

 

ܐܡܪܝܢ ܕܕܒܘܪ̈ܝܬܐ ܡ̇ܢ ܒܢ̈ܝܢ ܒ̈ܬܐ ܫܬܝ̣̈ܬܝܝ ܙܘ̈ܝܬܐ. ܒܗ̇ܝ ܕܒܗ ܒܐܣܟܡܐ ܗܢܐ ܬܪܬܝܢ ܡܘܬܪ̈ܢܘܬܐ ܡܫܬܟ̈ܚܢ ܒܠܥܕ ܐܣܟܡ̈ܐ ܐ̱ܚܪ̈ܢܐ. ܒܗ̇ܝ ܕܐܣܟܡ̈ܐ ܡ̇ܢ ܡܢܗܘܢ ܡܡܠܐ ܡܠܝܢ ܠܟܠܗ ܐܬܪܐ ܕܒܗ ܥܡ ܚܕ̈ܕܐ ܡܨܛܡܕܝ̣ܢ. ܐܟܙܢܐ ܕܛܪ̈ܝܓܘܢܘ ܘܛܛܪ̈ܐܓܘܢܗ. ܐܠܐ ܒܥܠܬ݀ ܐܠܝ̣ܨܘܬ ܙܘܝ̈ܬܗܘܢ ܠܐ ܥܪܝܢ ܗܘܠܐ ܣܓܝܐܬܐ. ܡܢܗܘܢ ܕܝܢ ܘܐܦܢ ܪ̈ܘܝܚܢ ܙܘܝ̈ܬܗܘܢ ܒܪܡ ܠܐ ܡܬܡܠܐ ܡܢܗܘܢ ܐܬܪܐ ܕܒܗ ܥܡ ܚܕ̈ܕܐ ܡܨܛܡܕܝ̣ܢ. ܐܠܐ ܐܬܪ̈ܘܬܐ ܣܦܝ̣̈ܩܐ ܣܘܓܐܐ ܦܝܫܝ̣ܢ ܒܝܢܬܗܘܢ. ܐܣܟܡܐ ܕܝܢ ܫܬܝ̣ܬܝ ܙܘ̈ܝܬܐ ܬܪܬܝܢ ܗܠܝܢ ܚܣܝ̣ܪ̈ܘܬܐ ܒܗ ܡܬܡܠܝ̈ܢ. ܪܘܝ̣ܚܘܬܐ ܟܝܬ ܕܙܘ̈ܝܬܐ ܘܡܠܝܘܬ ܐܬܪܐ ܒܟܠܝܘܬܗ. ܘܐܠܘ ܝ̣ܕܥܬܐ ܕܝܬܝܪ ܩܛܝ̣ܢܐ ܠܐ ܩܢ̈ܝܢ ܗܘܝ̈. ܐܝܟܢܐ ܐܣܟܡܐ ܕܐܝܟ ܗܢܐ ܓܒ̈ܝܢ ܗܘܝ̈. ܘܟܕ ܒܪܢܫܐ ܒܠܥܕ ܟܢܘ̣ܢܬܐ ܠܐ ܡܬܡܨܐ ܕܚܕ ܒܝܬܐ ܐܟܣܝ̈ܓܘܢܘܢ ܫܘܐ ܐܠܥ̈ܐ ܠܡܒܥܐ. ܟܠܚܕܐ ܡܢܗܝܢ ܣܘܓܐܐ ܕܒ̈ܬܐ ܕܐܝܟ ܗܠܝܢ ܒܠܥܕ ܟܢܘ̣ܢܬܐ. ܐܘ ܡܫܘܚܬܐ ܒܢܝܐ. ܐܝܬ ܓܝܪ ܘܬܡܝ̣̈ܗܬܐ ܣܓܝ̈ܐܬܐ ܠܕܒܘܪ̈ܝܬܐ ܒܫܘܥܒܕܗܝܢ ܕܠܡܠܟܗܝܢ ܘܙܢܝ̈ܐ ܐ̱ܚܪ̈ܢܐ ܕܒܟܬܒܐ ܕܚܝ̈ܘܬܐ ܡܬܡܢܝܢ.

 

 

 

ܬܚܘܝܬܐ ܕܬܠܬ

 

ܐܡܪܝܢ ܕܫܘܫܡܢܐ ܡܬܟܫܪ ܒܙܒܢ ܩܝܛܐ ܠܡܚܡܠ ܥܒܘܪܐ ܒܬܘܢܗ. ܘܐܠܘ ܠܐ ܝ̇ܕܥ ܗ̣ܘܐ ܗܢܐ ܟܠܗ ܠܡܟܢܫܢܘܬܗ ܒܙܒܢܐ ܕܡܨܐ ܗ̣ܘܐ ܥܠ ܟܘܢܫܗ ܘܐܦܢ ܠܐ ܣܢܝ̣ܩ ܗ̣ܘܐ ܥܠܘܗܝ ܒܗ ܒܗ̇ܘ ܙܒܢܐ ܕܩ̇ܐܡ. ܘܥܡ ܗܕܐ ܬܠܬ ܬܘܒ ܬܕܡܪ̈ܬܐ ܬܡܝ̣̈ܗܬܐ ܡܬܚܙ̈ܝܢ ܒܗܘܢ ܒܫܘܫ̈ܡܢܐ. ܚܕܐ ܡ̇ܢ ܕܟܕ ܡܪܓܫܝ̣ܢ ܒܬܠܝ̣ܠܘܬ ܐܪܥܐ ܕܒܝܬ ܩܦܣܝ̈ܗܘܢ. ܠܬܪܬܝܢ ܡܢܘ̈ܢ ܦܣܩܝ̣ܢ ܠܗ̇ ܠܦܪܕܬܐ ܒܗ̇ܝ ܕܝ̇ܕܥܝܢ ܕܟܕ ܠܐ ܡܬܦܣܩܐ܆ ܝܥܝܐ ܘܡܬܚܒܠܐ. ܘܟܕ ܡܬܦܣܩܐ ܠܐ ܝܥܝܐ. ܕܬܪܬܝܢ ܕܟܕ ܕܢܚܐ ܫܡܫܐ ܒܚܦܝ̣ܛܘܬܐ ܪܒܬܐ ܡܦܩܝ̣ܢ ܠܗܘܢ ܠܙܪ̈ܥܘܢܐ ܕܐܬܬܪܝ̣ܘ ܘܡܢܓܒܝ̣ܢ ܠܗܘܢ. ܕܬܠܬ ܗ̇ܝ ܕܟܕ ܡܣܪܗܒܝ̣ܢ ܠܡܥܠܘ̣ ܐܣܢܐ ܒܢܩܥܝ̈ܗܘܢ ܡܛܪܐ ܢܚܬܝ̣ܢ ܒܬܪ ܝܘ̈ܡܬܐ ܘܪ̈ܘܚܐ ܢܫ̈ܒܢ. ܘܗܠܝܢ ܣܦ̈ܩܢ ܠܡܫܪܪܘܬܗ̇ ܠܝ̣ܕܥܬܐ ܬܡܝ̣ܗܬܐ ܕܩܢܝܐ ܚܝܘܬܐ ܫܝ̣ܛܬܐ ܘܙܥܘܪܬܐ.

 

 

 

ܬܚܘܝܬܐ ܕܐܪܒܥ

 

ܐܡܪܝܢ ܕܓܘܓܝ ܙܩܘܪܐ ܡܕܡ ܡܨܝ̣ܕܬܢܝܐ ܒܙܢܐ ܕܝܬܝܪ ܕܡܝ̣ܪ ܘܩܛܝ̣ܢ ܙܩܪܐ. ܐܟܡ̇ܢ ܕܒܗ ܬܨܘܕ ܕܒܒ̈ܐ ܠܬܘܪܣܝܗ̇. ܘܐܠܘܠܐ ܐܬܚܫܒܬ݀ ܩܕܡܝܬ݀ ܕܐܝܟܢܐ ܙܕܩ ܕܬܗܘܐ ܡܨܝ̣ܕܬܐ ܕܐܝܟ ܗܕܐ. ܘܐܝܟܢܐ ܡܬܦܪܟܠܝܢ ܒܗ̇ ܕܒܒ̈ܐ ܠܐ ܣܟ ܙܩܪܐ ܗܘܬ݀ ܠܗ.

 

 

 

ܬܚܘܝܬܐ ܕܚܡܫ

 

ܐܡܪܝܢ ܕܚܡܪܐ ܘܓܡܠܐ ܟܕ ܒܐܘܪܚܐ ܡܕܡ ܐܝ̇ܕܐ ܕܠܐ ܣܟ ܪܕܘ ܒܗ̇ ܒܠܠܝܐ ܕܚܫܘܟ ܪܕܝܢ. ܒܙܒܢ̱ܬܐ ܬܪܝܢܝ̣ܬܐ ܟܕ ܒܗ̇ ܪܕܝܢ ܠܐ ܣܟ ܡܬܬܘܫܝ̣ܢ. ܐܝܟܢܐ ܕܐܦ ܬܐܓܪ̈ܐ ܟܕ ܛܥܝܢ ܠܐܘܪܚܐ. ܠܗܘ ܠܚܡܪ̈ܐ ܐܘ ܠܓܡ̈ܠܐ ܡܥܒܪܝ̣ܢ ܩܕܡܝܗܘܢ ܘܠܗܘܢ ܢܩܦܝ̣ܢ ܘܡܬܗܕܝܢ. ܘܬܘܒ ܒܪܢܫܐ ܡ̣ܢ ܩܪܐ ܠܩܪܐ ܒܠܥܕ ܐܬܘ̈ܬܐ ܠܐ ܡܬܡܨܐ ܠܡܐܙܠ. ܘܟܘܪ̈ܟܘܬܐ ܘܦܝܠܪ̈ܓܐ ܘܣܢܘ̈ܢܝܬܐ ܡ̣ܢ ܣܘ̈ܦܐ ܠܣܘ̈ܦܝܗ̇ ܕܐܪܥܐ ܐܙܠ̱ܝܢ ܘܐܬܝܢ ܘܠܐ ܛܥܝܢ ܒܝܬ ܡܥܡܪܗܘܢ.

 

 

 

ܬܚܘܝܬܐ ܕܫܬ

 

ܐܡܪܝܢ ܕܬܥܠܐ ܟܕ ܟ̇ܦܢ. ܡܬܪܡܐ ܥܠ ܚܨܗ. ܘܢܫܡܬܗ ܢܬܦ ܘܡܬܢܦܚ. ܘܟܕ ܣܒܪ̈ܢ ܦܪ̈ܚܬܐ ܕܡܝ̣ܬ ܠܗ. ܫܟ̈ܢܢ ܥܠܘܗܝ ܕܢܐܟܠܢܝ̈ܗܝ܆ ܫ̇ܘܪ ܘܚܛܦ ܠܗܝܢ. ܘܬܘܒ ܟܕ ܡܬܠܙܙ ܡ̣ܢ ܒܩ̈ܐ ܘܚܝ̣ܦܝ. ܢܣ̇ܒ ܒܦܘܡܗ ܡܢܬܐ ܡ̣ܢ ܓܠܕܐ ܕܚܝܘܬܐ ܡܝ̣ܬܬܐ. ܘܐܙܠ ܣ̇ܐܡ ܐܝܕܘ̈ܗܝ ܘܪ̈ܓܠܘܗܝ ܒܡܝ̈ܐ ܘܗܟܢܐ ܒܩܠܝ̣ܠ ܩܠܝ̣ܠ ܥܡ̇ܕ. ܘܟܕ ܡܪܓܫܝ̣ܢ ܒܩ̈ܐ ܘܚܝ̣ܦܝ ܗܠܝܢ ܒܡܝ̈ܐ. ܡܣܬܠܩܝܢ ܠܐܦܝ̈ ܠܥܠ. ܘܗܢܐ ܟܠܗ ܥܡ̇ܕ ܘܗ̇ܢܘܢ ܣܠܩܝܢ ܥܕܡܐ ܕܡܬܟܢܫܝܢ ܟܠܗܘܢ ܒܗ̇ܝ ܡܢܬܐ ܕܓܠܕܐ. ܗܝܕܝܢ ܟܕ ܪܡܐ ܠܗ̇ ܢܦ̇ܩ. ܘܗܢܐ ܡ̇ܢ ܦܘܪܣܐ ܗ̱ܘ. ܕܟܒܪ ܗ̇ܢܘܢ ܕܣܓܝ ܚܟܝ̣ܡܝ̣ܢ ܒܒܢܝ̈ܢܫܐ ܠܐ ܡܨܝܢ ܠܡܥܒܕ ܐܟܘܬܗ.

 

 

 

ܬܚܘܝܬܐ ܕܫܒܥ

 

ܐܡܪܝܢ ܕܚܘܘ̈ܬܐ ܟܕ ܡܡܚܠ ܚܙܝܗܝܢ ܒܫܘܡܪܐ ܡܬܐܣ̈ܝܢ. ܘܓ̈ܠܐ ܟܕ ܐܟܠܝܢ ܚܘܝܐ ܒܨܬ ܪܐܛܘ̣ܪܝܐ ܡܬܦܨܝܢ ܡ̣ܢ ܢܟܝܢܐ. ܘܟܟܘܫܬܐ ܒܡܐܟܘܠܬܐ ܕܦܝ̣ܓܢܐ ܚܣܢܐ ܠܗ ܠܚܘܝܐ ܘܩܛܠܐ ܠܗ. ܡܛܠ ܕܚܘܝܐ ܠܐ ܡܣܝܒܪ ܠܪܝܚ ܦܝܓܢܐ. ܘܡܟܢܫܐ ܠܕܗܒܐ ܘܣܐܡܐ ܘܛܒ̈ܥܐ ܘܡܫܬܥܝܐ ܒܗܘܢ. ܘܟܕ ܡܬܢܣܒܝ̣ܢ ܡܢܗ̇. ܡܬܢܩܡܐ ܡ̣ܢ ܢܣܘܒܗܘܢ. ܟܕ ܡܬܠܚܐ ܡܐܢܘ̈ܗܝ ܘܬܫܘ̈ܝܬܗ. ܘܟܠܒ̈ܐ ܡ̣ܢ ܟܕ ܡܬܬܘ̈ܠܥܢ ܟܪ̈ܣܬܗܘܢ ܫܒ̈ܠܬ݀ ܚ̈ܛܐ ܐܟܠܝܢ ܘܡܬܐܣܝܢ. ܘܐ̱ܚܪ̈ܢܝܬܐ ܣܥܘܪ̈ܘܬܐ ܐܘܣܝܝ̈ܬܐ ܕܡܢܗܝܢ ܝ̣ܠܦܘ ܐܢܝܢ ܒܢܝ̈ܢܫܐ.

 

 

 

ܬܚܘܝܬܐ ܕܬܡܢܐ

 

ܐܡܪܝܢ ܕܩܘܦܕܐ ܩܕܡܐ ܝ̇ܕܥܐ ܠܢܫܒܐ ܕܪ̈ܘܚܐ. ܘܡܛܠܗܕܐ ܬܪܝܢ ܢܦܐܫܝ̈ܢ ܥܒ̇ܕܐ ܠܚܘܠܢܗ̇. ܘܟܠ ܪܘܚܐ ܕܝ̇ܕܥܐ ܕܥܬܝ̣ܕܐ ܕܬܫܒ. ܩܕܡܐ ܣܟܪܐ ܠܚܪܘܪܐ ܕܠܩܘܒܠܗ̇. ܘܦܬܚܐ ܠܐܚܪܢܐ. ܘܡܬܐܡܪܐ ܕܓܒܪܐ ܐ̱ܢܫ ܕܩܢܐ ܗ̣ܘܐ ܩܘܦܕܐ ܒܒܘܙܛܝܐ ܡܠܘܘܐ ܪܒܐ ܟܢܫ ܒܥܠܬܗ̇. ܟܕ ܡܢܗ̇ ܝ̇ܠܦ ܗ̣ܘܐ ܘܡܫܘܕܥ ܠܒܢܝ̈ܢܫܐ ܕܐܝܕܐ ܪܘܚܐ ܡܛܝܒܐ ܕܬܫܒ. ܘܗܐ ܡܩܕܡܘ̣ܬ ܝ̣ܕܥܬܐ ܗ̣ܝ ܕܟܠܗܘܢ ܚܟܝ̈ܡܐ ܚܝܒܝ̣ܢ ܡܢܗ̇.

 

 

 

ܬܚܘܝܬܐ ܕܬܫܥ

 

ܐܡܪܝܢ ܕܣܢܘ̈ܢܝܬܐ ܬܡܝ̣ܗܐܝܬ ܒܢܝ̈ܢ ܩܢܝ̈ܗܝܢ ܒܛܝ̣ܢܐ ܘܩܝ̈ܣܐ. ܘܟܕ ܚܣܪ ܠܗܝܢ ܛܝ̣ܢܐ ܣܚ̈ܝܢ ܒܡܝ̈ܐ ܡܬܥܪ̈ܦܠܢ ܒܥܦܪܐ. ܘܗܟܢܐ ܛܝ̣ܢܐ ܓܒ̈ܠܢ ܬܠܝ̈ܢ ܒܓܦܝ̈ܗܝܢ ܠܚܫܚܬܗܝܢ. ܘܬܪܒܝ̣ܬܐ ܫܦܝܪܬܐ ܡܪ̈ܒܝܢ ܦܪ̈ܘܓܝܗܝܢ. ܘܡܠܦ̈ܢ ܠܗܝܢ ܕܠܒܪ ܡ̣ܢ ܩܢܐ ܢܚܪ̈ܝܢ.

 

 

 

ܬܚܘܝܬܐ ܕܥܣܪ

 

ܐܡܪܝܢ ܕܚܓܠܐ ܗܢܐ ܟܠܗ ܥܪܝ̣ܡ. ܕܟܕ ܩܪܒ ܨܝܕܐ ܟܪ ܕܐܝܬ ܠܗ ܦܪ̈ܘܓܐ. ܡܬܝ̣ܢܐܝܬ ܡܫܘܪ ܩܕܡܘܗܝ ܕܨܝܕܐ ܠܦܢܝ̣ܬܐ ܐ̱ܚܪܬܐ ܡ̣ܢ ܦܪ̈ܘܓܘܗܝ. ܘܗܟܢܐ ܟܕ ܡܪܚܩ ܨܝܕܐ ܡ̣ܢ ܦܪ̈ܘܓܐ܆ ܥܪܩ ܗ̣ܘܐ ܡ̣ܢ ܩܕܡܘܗܝ.

 

 

 

ܬܚܘܝܬܐ ܕܝ̄ܐ

 

ܓܪܕܐ ܝ̇ܕܥ ܕܡܛܠ ܦܚ̈ܠܬܗ ܡܬܬܨܝ̣ܕ ܒܗ̇ܝ ܕܠܐܣܝܘܬܐ ܚܫ̈ܚܢ. ܒܕܓܘܢ ܟܕ ܡܬܪܕܦ. ܦܣܩ ܠܗܝܢ ܡܢܗ ܘܫܕܐ. ܐܢܕܝܢ ܡܬܕܪܟ. ܡܬܪܡܐ ܥܠ ܚܨܗ ܠܡܚܘܝܘ ܟܐܡܬ݀ ܕܠܝܬ ܠܗ ܐܫܟ̈ܐ.

 

 

 

ܬܚܘܝܬܐ ܕܝܒ̄

 

ܐܡܪܝܢ ܕܥܪܕܬܐ ܟܕ ܝܠܕܐ ܕܟܪܐ. ܐܬܐ ܐܒܘܗܝ ܘܦܣܩ ܦܚ̈ܠܬܗ. ܕܠܐ ܢܗܘܐ ܠܗ ܫܦܝܐ ܒܪܓܬ݀ ܢܩ̈ܒܬܐ. ܥܠܗܕܐ ܐܡܐ ܟܕ ܝ̇ܠܕܐ ܕܟܪܐ. ܡܥܪܩܐ ܘܡܛܫܝܐ ܠܗ ܥܕ ܢܐܪܒ. ܘܡܢܘ̣ ܕܢܐܡܪ ܕܠܘ ܒܝܕ ܗܘܢܐ ܩܛܝ̣ܢܐ ܗܠܝܢ ܡ̣ܢ ܕܐܝܟ ܗܠܝܢ ܡܣܬܥܪ̈ܢ.

 

 

 

ܬܚܘܝܬܐ ܕܝܓ̄

 

ܐܡܪܝܢ ܕܢܫܪܐ ܟܕ ܨܒ̇ܐ ܕܢܒܩܝܗ̇ ܠܫܘܬܦܬܗ ܐܢ ܓܝܪܬܐ ܗ̱ܝ ܐܘ ܠܐ. ܡܐ ܕܝ̇ܠܕܐ. ܠܒܟ ܠܒ̈ܢܝܗ̇ ܠܘܩܒܠ ܙܠܝ̣̈ܩܝ ܫܡܫܐ. ܘܐܢܗܘ ܕܡܩܬܝܢ ܚܝܪܗܘܢ ܐܟܘܬܗ. ܫܒܩ ܠܗ ܚܕ ܡܢܗܘܢ. ܐܢܕܝܢ ܡܬܢܟܝܢ܆ ܠܐܡܗܘܢ ܓܝܪܬܐ ܡܩܦܚ ܠܗ̇. ܘܠܗܘܢ ܡ̣ܢ ܩܢܗ ܫܕܐ. ܢܫܪܐ ܕܝܢ ܡ̣ܢ ܒܢܘ̈ܗܝ ܗܟܢܐ ܡܬܝܩܪ. ܕܐܡܬܝ ܕܡܬܡܚܠ ܡ̣ܢ ܣܝܒܘܬܐ. ܥܠ ܐܒܪ̈ܝܗܘܢ ܫ̇ܩܠܝܢ ܠܗ ܘܡܣܡܟܝ̣ܢ ܠܗ. ܘܠܐܝܟܐ ܕܨܒܐ ܡܫܢܝܢ ܠܗ.

 

 

 

ܬܚܘܝܬܐ ܕܝܕ̄

 

ܐܡܪܝܢ ܕܩܪܩܣܐ ܕܗ̣ܘ ܩܪܘܢܐ. ܚܕ ܙܘܘܓܐ ܐܝܬ ܠܗ. ܘܐܡܬܝ ܕܡܝܬܐ ܫܘܬܦܬܗ܆ ܠܐ ܬܘܒ ܠܐܚܪܬܐ ܡܬܢܩܦ. ܗܟܢܐ ܐܦ ܗ̣ܝ ܢܩܒܬܐ. ܘܒܢܝ̈ܗܘܢ ܬܘܒ ܟܕ ܣܐܒܝܢ ܐܒܗܝ̈ܗܘܢ. ܛܥܢܝ̣ܢ ܠܗܘܢ ܥܠ ܐܒܪ̈ܝܗܘܢ. ܘܡܣܡܟܝ̣ܢ ܠܗܘܢ ܡ̣ܢ ܟܠ ܓܒܝ̣̈ܢ. ܟܕ ܐܙܠ̱ܝܢ ܒܢܝܚܐ. ܘܡܛܝܒܝ̣ܢ ܠܗܘܢ ܐܦ ܡܐܟܘܠܬܐ.

 

 

 

ܢܝܫܐ ܬܪܝܢܐ. ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܘܒܪܡ ܕܡܟܘܢ ܕܢܦ̈ܫܬܟܘܢ ܐܬܒܥ ܡ̣ܢ ܝܕ ܟܠ ܚܝܘܬܐ ܐܬܒܥܝ̣ܘܗܝ. ܘܡ̣ܢ ܐܝ̇ܕܐ ܕܐ̱ܢܫ̈ܐ. ܐܡܪܝܢ ܐܠܘܠܐ ܢܦܫܐ ܡܠܝ̣ܠܬܐ ܐܝܬ ܗܘܬ݀ ܠܚܝܘܬܐ. ܐܝܟܢܐ ܕܡܐ ܕܒܪܢܫܐ ܡܬܬܒܥܐ ܗܘܬ݀. ܐܟܡܐ ܕܐܦ ܒܪܢܫܐ ܡܬܬܒܥ ܕܡܐ ܕܒܪܢܫܐ ܟܢܬܗ.

 

 

 

ܣܗܕܘܬܐ ܕܬܪܬܝܢ

 

ܕܘܝܕ. ܟܠܗܘܢ ܠܟ ܗ̣ܘ ܡܣܟܝܢ ܕܬܬܠ ܠܗܘܢ ܡܐܟܘܠܬܐ ܒܙܒܢܗܘܢ. ܒܕܓܘܢ ܐܡܪܝܢ ܐܠܘܠܐ ܗܘܢܐ ܐܝܬ ܗ̣ܘܐ ܠܗܘܢ ܕܡܣܬܟܠ ܕܐܠܗܐ ܗ̱ܘ ܫܘܒܚܐ ܠܛܝܒܘܬܗ. ܐܝܟܢܐ ܡܣܟܝܢ ܗ̣ܘܘ ܠܗ ܐܝܟܢܐ ܕܢܬܪܣܐ ܐܢܘܢ.

 

 

 

ܣܗܕܘܬܐ ܕܬܠܬ

 

ܐܫܥܝܐ. ܝ̣ܕܥ ܠܡ ܬܘܪܐ ܩܢܝܗ. ܘܚܡܪܐ ܐܘܪܝܐ ܕܡܪܗ. ܒܕܓܘܢ ܐܡܪܝܢ ܕܬܪܝܢ ܐܢܘܢ ܙܢܝ̈ܗ̇ ܕܡܕܪܟܢܘܬܐ. ܚܕ ܡ̇ܢ ܗ̇ܝ ܕܪ̈ܓܫܐ. ܕܡܪܓܫܢܘܬܐ ܡܬܩܪܐ. ܘܐ̱ܚܪܢܐ ܗ̇ܘ ܕܗܘܢܐ. ܕܝ̣ܕܥܬܐ ܡܬܩܪܐ. ܘܗܐ ܢܒܝܐ ܠܗ̇ܝ ܕܗܘܢܐ ܩܛܪܓܗ̇ ܥܠ ܬܘܪܐ ܟܝܬ ܘܚܡܪܐ. ܝ̣ܕܝ̣ܥܐ  ܡܕܝܢ ܕܗܘܢܐ ܐܝܬ ܠܗܘܢ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܡܝܢܝܬܐ ܡܛܠ ܣܬܘܪܝܗ̇ ܕܬܪܥܝ̣ܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪܝܐ ܕܣܥܝܐ ܗ̇ܘ. ܘܬܚܘ̈ܝܬܐ ܗ̇ܢܝܢ

 

ܐܡܪܝܢܢ ܕܣܥܘܪ̈ܘܬܐ ܗܘܢܢ̈ܝܬܐ ܘܡܠܝ̣̈ܠܬܐ ܗ̇ܢܝܢ ܐܝܬܝܗܝܢ. ܕܒܝܕ ܚܐܪܘܬܐ ܘܫܠܝ̣ܛܘܬ ܒܝܬܐ ܡܣܬܥܪ̈ܢ ܨܒܝܢܐܝܬ. ܘܟܕ ܣܥܘܪ̈ܘܬܐ ܗ̇ܢܝܢ ܕܣܕܪܬܘܢ ܡ̣ܢ ܚܝ̈ܘܬܐ ܗ̇ܢܝܢ ܕܡܢܝܬܘܢ ܟܝܢܐܝܬ ܘܠܘ ܨܒܝܢܐܝܬ ܡܣܬܥܪ̈ܢ. ܠܘ ܗܘܢܐ ܗ̱ܘ ܡܠܝ̣ܠܐ ܥܠܬܗܝܢ. ܐܠܐ ܗ̣ܘ ܐܠܗܐ ܫܘܒܚܐ ܠܛܝܒܘܬܗ܇ ܠܟܠ ܚܕܐ ܡ̣ܢ ܚܝ̈ܘܬܐ ܚܝܠܐ ܡܕܡ ܕܝ̣ܠܢܝܐ ܘܟܝܢܐ ܫܟܢ. ܕܒܝܕܗ̇ ܒܠܚܘܕ ܚܕܐ ܣܥܘܪܘܬܐ ܦܫܝ̣ܛܬܐ ܡܬܡܨܝܐ ܕܬܣܥܘܪ܆ ܒܠܥܕ ܗ̇ܝ ܕܠܩܘܒܠܐ. ܐܝܟ ܢܬܘܦܘܬ ܦܪܙܠܐ ܠܡܓܢܛܝܣ. ܠܒܪܢܫܐ ܕܝܢ܆ ܠܘ ܗܟܢܐ܆ ܐܠܐ ܗܘܢܐ ܡܠܝ̣ܠܐ ܫܟܢ܇ ܗ̇ܘ ܕܒܐܝ̈ܕܘܗܝ ܣܥܘܪ̈ܘܬܐ ܡܦܬܟ̈ܬܐ ܘܣܩܘܒ̈ܠܝܬܐ ܡܨܐ ܠܡܓܡܪ ܐܝܟܢܐ ܕܨܒ̇ܐ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕ̈ܘܬܐ ܗ̇ܢܝܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܚܝܘܬܐ ܕܡ ܢܦܫܐ ܡܬܬܒܥܐ. ܠܘ ܡܛܠܗ̇ܝ ܕܟܕ ܝ̇ܕܥܐ ܗܘܬ݀ ܠܣܟܠܘܬܐ ܐܠܐ ܐܙܕܗܪܬ݀ ܡܢܗ̇. ܐܠܐ ܐܝܟܢܐ ܕܓܘܢܝܐ ܢܗܘܐ ܗ̣ܘ ܢܡܘܣܐ ܥܠ ܟܠܗܘܢ ܡܣܟ̈ܠܢܐ. ܘܡ̣ܢ ܗܪܟܐ ܝܬܝܪܐܝܬ ܢܙܕܗܪܘܢ ܒܢܝ̈ܢܫܐ ܡ̣ܢ ܗ̇ܝ ܕܢܣܟܠܘܢ.

 

 

 

ܦܘܢܝܐ ܕܣܗܕܘܬܐ ܬܪܝܢܝܬܐ

 

ܐܡܪܝܢܢ ܕܗܕܐ ܠܟܠܢܝܘܬ ܒܛܝ̣ܠܘܬܗ ܕܐܠܗܐ ܫܘܒܚܐ ܠܛܝܒܘܬܗ ܥܠ ܟܠܗܝܢ ܒܪ̈ܝܬܗ ܡܫܘܕܥܐ. ܘܠܘ ܕܡܬܚܫܒܝ̣ܢ ܠܐ ܡܠܝ̣̈ܠܐ ܕܐܠܗܐ ܗ̱ܘ ܡܬܪܣܝܢܗܘܢ.

 

 

 

ܦܘܢܝܐ ܕܣܗܕܘܬܐ ܬܠܝܬܝܬܐ

 

ܐܡܪܝܢܢ ܕܝ̣ܕܥܬܐ ܗܪܟܐ ܐܫ̣ܝܠܐܝܬ ܘܝ̣ܙܝ̣ܦܐܝܬ ܐܬܩܛܪܓܬ݀ ܥܠ ܠܐ ܡܠܝ̣̈ܠܐ. ܐܟܡܐ ܕܐܦ ܫܡ ܒܪܢܫܐ ܥܠ ܗ̇ܘ ܕܨܝ̣ܪ ܒܐܣܬܐ.

 

 

 

ܩܦܠܐܘܢ ܫܬܝܬܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܩܘܝܡܗܝܢ ܕܢܦ̈ܫܬܐ ܡܠܝ̈ܠܬܐ ܒܬܪ ܚܘܒܠܐ ܕܦܓܪ̈ܝܗܝܢ. ܘܒܗ ܐܝܬ ܦܣܘܩܐ ܚܕ. ܡܛܠܗ̇ܝ ܕܠܐ ܡܝܘܬܬܐ ܗ̱ܝ ܢܦܫܐ. ܐܦܠܐ ܐܒ̇ܕܐ ܒܐܒܕܢ ܦܓܪܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܥܘܬܕܐ

 

ܙܕܩ ܠܡܕܥ ܕܗ̣ܝ ܒܥܬܐ ܗܕܐ. ܝܬܝܪ ܡ̣ܢ ܟܠܗܝܢ ܒܥ̈ܬܐ ܕܟܠܗܘܢ ܦܣܘ̈ܩܐ ܕܟܠܗܘܢ ܩܦ̈ܠܐܐ ܕܟܠܗܝܢ ܫܬܐܣ̈ܐ ܥܕܬܢܝ̈ܐ܆ ܐܢܢܩܝܐ ܝ̣ܕܥܬܗ̇. ܒܗ̇ܝ ܕܐܠܘܠܐ ܬܫܬܪܪ ܠܐ ܡܝܘܬܘܬܗ̇ ܕܢܦܫܐ ܒܬܪ ܡܘܬܗ ܕܦܓܪܐ. ܐܝܩܝ ܡܫܬܟ̈ܚܢ ܢܒܝܘ̈ܬܐ ܕܢܒܝ̈ܐ. ܘܟܪܘܙܘܬܗܘܢ ܕܫܠܝ̈ܚܐ. ܘܫܢܕܝ̈ܗܘܢ ܕܣܗ̈ܕܐ. ܘܚܟܡܬܗܘܢ ܕܚܟܝ̈ܡܐ. ܡܠܝ̣ܣܛܐ ܕܝܢ ܗ̣ܝ ܡܬܒܪܢܫܢܘܬܐ ܕܐܠܗܐ ܡܠܬܐ. ܒܗ̇ܝ ܕܒܚܝ̈ܐ ܗܠܝܢ ܬܢܢܝ̈ܐ ܘܬܢܝܢ̈ܝܐ. ܛܒ ܝܬܝ̣ܪܝܢ ܣܟ̈ܠܐ. ܘܥܬܝܪܝܢ ܠ̈ܠܐ. ܘܚܬܝ̣ܪܝ̣ܢ ܒܠܝ̣̈ܠܐ. ܘܙܥܘܪܝܢ ܗ̇ܢܘܢ ܕܡܗܝ̣ܪܝܢ. ܘܒܨܝ̣ܪܝܢ ܗ̇ܢܘܢ ܕܡܝܬܪܝ̣ܢ. ܘܟܡܝ̣ܪܝܢ ܗ̇ܢܘܢ ܕܕܡܝ̣ܪܝܢ. ܘܠܘ ܠܐ ܓܢܝ̣ܚܐ ܗܘܬ݀ ܨܒܘܬܐ ܐܢܗܘ ܕܠܝܬ ܗܘܬ݀ ܩܛܣܛܣܝܣ ܐ̱ܚܪܬܐ ܕܒܚܝ̈ܐ ܚܕ̈ܬܐ. ܡܛܠܗܕܐ ܒܟܠܗ̇ ܡܬܡܨܝܢܘܬܐ ܡ̇ܢ ܗ̇ܝ ܕܐܝܟ ܚܝܠܐ ܠܐ ܙܕܩ ܠܡܒܨܪܘ ܒܡܝܬܝܢܘܬܐ ܕܡܚܘ̈ܝܢܘܬܐ ܐܦܘܕܟ̈ܣܝ̣ܝ̣ܬܐ ܘܕܣܛܪ ܥܠ ܫܘܪܪܗ̇.

 

 

 

ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܢܦܫܐ ܠܐ ܡܩܒܠܢܝ̣ܬܐ ܗ̱ܝ ܕܚܒܠܐ. ܒܗ̇ܝ ܕܐܠܘ ܡܩܒܠܢܝ̣ܬܗ ܗܘܬ݀. ܙܕܩ ܗ̣ܘܐ ܕܠܐ ܡܩܝܡܬܐ ܦܝܫܐ ܗܘܬ݀ ܒܬܪ ܚܒܠܗ̇ ܗ̇ܝ ܕܠܐ ܡܨܝܐ. ܟܐܡܬ݀ ܕܐܝܬܘܬܐ ܬܗܘܐ ܠܗ ܠܡܕܡ ܡ̣ܢ ܒܬܪ ܗ̇ܝ ܕܠܠܝܬܝܘܬܐ ܫܪܟ. ܒܗ̇ܝ ܕܚܝܠܐ ܡܩܒܠܢܐ ܕܡܕܡ܇ ܫܟܝ̣ܚܐ ܙܕܩ ܕܢܦܘܫ ܥܡ ܫܟܝ̣ܚܘܬܗ ܕܗ̇ܘ ܡܕܡ. ܓܘܫ̈ܡܐ ܕܝܢ ܡܬܚܒܠܝܢ. ܒܗ̇ܝ ܕܡܢܬܗܘܢ ܗܘܠܢܝܬܐ܆ ܗ̣ܝ ܗ̣ܝ ܡܩܒܠܢܝܬܐ ܕܚܒܠܗܘܢ. ܗ̇ܝ ܕܠܐ ܒܛܠܐ ܐܦܠܐ ܡܬܚܒܠܐ ܒܚܒܠܗܘܢ. ܢܦܫܐ ܡܕܝܢ ܟܕ ܠܐ ܗܘܠܢܝܬܐ ܗ̱ܝ ܠܐ ܡܩܒܠܢܝܬܗ ܗ̣ܝ ܕܚܒܠܐ.

 

 

 

ܡܚܘܝܢܝܬܐ ܬܪܝܢܝܬܐ

 

ܐܡܪܝܢܢ ܐܠܘ ܢܦܫܐ ܡܬܚܒܠܐ ܗܘܬ݀. ܐܘ ܡܛܠ ܫܟܝ̣ܚܘܬܐ ܕܥܛܘܝܗ̇ ܡܬܚܒܠܐ ܗܘܬ݀ ܐܘ ܡܛܠ ܓܠܝ̣ܙܘܬܐ ܕܡܩܝܡܢܗ̇. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܢ ܥܛܘܝܐ ܗ̇ܘ ܫܟܝ̣ܚ ܗ̣ܘܐ ܥܠ ܫܟܝ̣ܚܘܬܗ̇ ܕܢܦܫܐ ܐܝܟܢܐ ܠܐ ܚܒܠܗ̇. ܘܐܢ ܠܐ ܫܟܝ̣ܚ ܗ̣ܘܐ ܘܒܬܪܟܢ ܗ̣ܘܐ. ܗ̣ܘ ܗܢܐ ܐܘ ܓܘܫܡܐ ܗ̱ܘ ܐܘ ܓܕܫܐ܆ ܐܝܟܢܐ ܢܬܡܨܐ ܠܡܚܒܠܘ ܠܢܦܫܐ ܕܚܝܠܬܢܝܐ ܡ̣ܢ ܓܘܫܡܐ ܘܡ̣ܢ ܓܕܫܐ. ܘܐܢ ܠܐ ܓܫܝ̣ܡܐ ܗ̱ܘ. ܫܘܐ ܒܟܝܢܐ ܙܕܩ ܕܢܗܘܐ ܠܢܦܫܐ. ܘܡܛܠܗܢܐ ܠܐ ܡܨܐ ܕܢܚܒܠܝ̣ܗ̇. ܘܗ̇ܘ ܕܬܪܝܢ ܬܘܒ ܠܐ ܫܪܝܪ ܒܗ̇ܝ ܕܥܠܬܗ̇ ܥܒܘܕܬܐ ܕܢܦܫܐ ܐܠܗܐ ܗ̱ܘ ܕܐܝܬܘܗܝ ܗ̣ܘܐ ܘܐܝܬܘܗܝ ܘܢܗܘܐ ܐܝܬܘܗܝ. ܓܘܫ̈ܡܐ ܕܝܢ ܘܐܦܢ ܗ̣ܘ ܐܠܗܐ ܗ̱ܘ ܡܩܝܡܢܗܘܢ. ܐܠܐ ܒܥܠܬ݀ ܗܘܠܐ ܕܚܝܠܐ ܩܢܝܐ ܕܩܘܒܠ ܚܒܠܐ ܡܬܚܒܠܝܢ. ܢܦܫܐ ܡܕܝܢ ܟܕ ܠܐ ܗܘܠܢܝܬܐ ܗ̱ܝ ܐܦܠܐ ܡܬܚܒܠܢܝ̣ܬܐ ܗ̱ܝ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܩܕܡ ܐܬܚܘܝ̣ ܕܢܦܫܐ ܠܐ ܓܘܫܡܐ ܗ̱ܝ ܐܦܠܐ ܓܕܫܐ. ܘܗ̇ܘ ܕܗܟܢܐ ܗ̱ܘ ܠܐ ܪܚܝ̣ܩ ܡ̣ܢ ܓܘܫ̈ܡܐ ܐܦܠܐ ܩܪܝ̣ܒ ܠܗܘܢ. ܐܦܠܐ ܠܓܘ ܡܢܗܘܢ ܡܬܐܡܪ ܕܐܝܬܘܗܝ. ܐܦܠܐ ܠܒܪ ܡܢܗܘܢ. ܘܐܫܬܪܪ ܬܘܒ ܕܦܓܪܐ ܒܦܚܡܐ ܕܢܦܫܐ. ܐܝܟ ܐܘܪܓܢܘܢ ܒܦܚܡܐ ܕܐܘܡܢܐ. ܘܐܝܟ ܐܠܦܐ ܒܦܚܡܐ ܕܐܠܦܪܐ. ܘܐܝܟ ܡܪܟܒܬܐ ܒܦܚܡܐ ܕܗܢܝܘܟܐ. ܘܐܝܟ ܦܘܠܘܛܝܢ ܒܦܚܡܐ ܕܡܠܟܐ. ܘܕܠܐ ܐܠܨܐ ܡ̣ܢ ܚܘܒܠܗ ܕܐܘܪܓܢܘܢ ܐܘ ܕܐܠܦܐ ܐܘ ܕܡܪܟܒܬܐ ܐܘ ܕܦܘܠܘܛܝܢ܇ ܚܘܒܠܗ ܕܐܘܡܢܐ ܐܘ ܕܐܠܦܪܐ ܐܘ ܕܗܢܝܘܟܐ ܐܘ ܕܡܠܟܐ ܓܠܝܐ. ܢܦܫܐ ܡܕܝܢ ܠܐ ܡܝܬܐ ܒܡܘܬܗ ܕܦܓܪܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܢܦܫܐ ܒܗ̇ܝ ܕܚܝܬܐ ܗ̱ܝ ܘܝ̇ܕܘܥܬܐ ܘܡܨܝܐ ܚܝܠܐ܆ ܡܕܒܪܐ ܠܗ ܠܦܓܪܐ. ܘܐܠܘ ܒܥܠܬ݀ ܫܟܝ̣ܚܘܬܗ ܕܦܓܪܐ ܐܝܬܝܗ̇ ܗܘܬ݀ ܠܗ̇ ܚܝܘܬܐ ܘܝ̇ܕܘܥܘܬܐ ܘܡܬܡܨܝܢܘܬ ܚܝܠܐ. ܡܫܬܟܚ ܗ̣ܘܐ ܦܓܪܐ ܕܝ̇ܗܘܒܐ ܗ̣ܘܐ ܕܚܝ̈ܐ ܠܗ̇ܝ ܕܗ̣ܘ ܒܗ̇ ܚܝ ܟܐܡܬ݀ ܠܢܦܫܐ܆ ܗ̇ܝ ܕܫܟܝܪܐ.

 

 

 

ܡܚܘܝܢܘܬܐ ܕܚܡܫ

 

ܐܡܪܝܢܢ ܐܠܘ ܢܦܫܐ ܡܝܬܐ ܗܘܬ݀ ܒܡܘܬܗ ܕܦܓܪܐ. ܙܕܩ ܗ̣ܘܐ ܕܒܡܚܝ̣ܠܘܬܗ ܕܦܓܪܐ ܐܦ ܗ̣ܝ ܡܡܚܠܐ ܗܘܬ݀. ܘܕܠܐ ܡܡܚܠܐ. ܝ̣ܕܝ̣ܥܐ ܡ̣ܢ ܐܪܒܥ. ܚܕܐ ܡ̇ܢ ܕܕܘܪܫܐ ܝܬܝܪܐ ܕܒܝܘܠܦ̈ܢܐ ܡܡܚܠ ܠܗ ܠܦܓܪܐ ܘܡܥܫܢ ܠܢܦܫܐ. ܕܬܪܬܝܢ ܕܝܢ ܕܢܙܝ̣ܪܘܬܐ ܘܚܣܝ̣ܠܘܬܐ ܕܡ̣ܢ ܪ̈ܓܝܓܬܐ ܕܒܣܪܐ. ܡܒܨܪ̈ܢ ܠܦܓܪܐ ܘܡܢܗܪ̈ܢ ܠܢܦܫܐ. ܕܬܠܬ܆ ܕܒܫܢܬܐ ܡ̇ܐܬ ܦܓܪܐ ܘܒܛܠܝ̣ܢ ܪ̈ܓܫܘܗܝ. ܘܡܬܬܥܝ̣ܪܐ ܢܦܫܐ ܘܣܘܥܪ̈ܢܐ ܟܣܝ̈ܐ ܘܓܢܝ̣̈ܙܐ ܒܝܕ ܚܠܡܐ ܚܙܝܐ. ܕܐܪܒܥ܆ ܕܒܩܘܡܬܐ ܕܦܠܓ̈ܝ ܫܢܐ ܡܫܪܐ ܦܓܪܐ ܠܡܬܚܒ ܘܢܦܫܐ ܕܬܥܫܢ. ܐܝܟ ܕܗ̣ܘ ܢܣܝܢܐ ܣ̇ܗܕ. ܡܕܝܢ ܟܕ ܠܐ ܡܡܚܠܐ ܒܡܚܝ̣ܠܘܬܗ܆ ܐܦܠܐ ܡܝܬܐ ܒܡܘܬܗ.

 

 

 

ܡܚܘܝܢܘܬܐ ܕܫܬ

 

ܐܡܪܝܢܢ ܕܡܘܬܐ ܠܘ ܚܘܒܠܗܝܢ ܕܡܢܘ̈ܬܐ ܦܓܪ̈ܢܝܬܐ ܡܫܘܕܥ. ܒܗ̇ܝ ܕܡ̇ܐܬ ܒܪܢܫܐ. ܘܗܢܝܢ ܡܢܘ̈ܬܗ ܟܠܗܝܢ ܫܟܝ̣̈ܚܢ. ܐܠܐ ܚܢܘܩܝܗ̇ ܗ̣ܘܘ ܒܠܚܘܕ ܐܘ ܕܘܥܟܗ̇ ܕܚܡܝ̣ܡܘܬܐ ܟܝܢܝܬܐ. ܘܕܚܡܝ̣ܡܘܬܐ ܓܕܫܐ ܗ̱ܝ ܓܠܝܐ. ܘܕܓܕܫܐ ܡܚܝ̣ܠ ܡ̣ܢ ܓܘܫܡܐ ܒܕ ܠܘ ܩ̇ܐܡ ܠܝܬܗ ܗ̣ܘ ܐܟܘܬܗ: ܐܠܐ ܒܗ ܩ̇ܐܡ. ܟܠܢܫ ܣܗܕ. ܘܕܓܘܫܡܐ ܡܚܝ̣ܠ ܡ̣ܢ ܢܦܫܐ܆ ܝ̣ܕܝ̣ܥܐ ܡ̣ܢ ܐܪܒܥ. ܚܕܐ ܡ̇ܢ ܕܦܓܪܐ ܥܠ ܐܬܪܐ ܣܢܝ̣ܩ ܒܩܘܝܡܗ ܘܠܘ ܗܟܢܐ ܢܦܫܐ. ܕܬܪܬܝܢ ܕܦܓܪܐ ܒܗ̇ܝ ܕܡܪܟܒܐ ܗ̱ܘ ܥܠ ܡܢܘ̈ܬܗ ܣܢܝ̣ܩ ܠܡܗܘܐ܇ ܘܠܘ ܗܟܢܐ ܢܦܫܐ. ܕܬܠܬ ܒܗ̇ܝ ܕܡܬܬܥܒܕܢܘܬܗ ܕܦܓܪܐ ܡ̣ܢ ܢܦܫܐ܆ ܝܬܝܪܐ ܡ̣ܢ ܡܥܒܕܢܘܬܗ ܕܒܗ̇. ܕܐܪܒܥ ܕܦܓܪܐ ܒܬܪ ܡܘܬܐ ܦܝܫܝ̣ܢ ܒܗ ܙܢܘ̈ܗܝ ܓܘܫܡܢܝ̈ܐ ܘܓܕܫܢܝ̈ܐ. ܘܠܐ ܡܨܝܢ ܕܢܛܪܘܢܝܗܝ ܕܠܐ ܚܒܠ. ܒܕܢܦܫܐ ܒܠܚܘܕܝܗ̇ ܡܟܢܐ ܗܘܬ݀ ܕܬܛܪ̣ܝܘܗܝ. ܘܟܕ ܓܕܫܐ ܕܡܚܝ̣ܠ ܡ̣ܢ ܓܘܫܡܐ ܕܡܚܝ̣ܠ ܡ̣ܢ ܢܦܫܐ ܗܘܝܘ ܗ̇ܘ ܕܒܛܠ ܠܘܬ ܡܘܬܐ. ܐܝܟܢܐ ܡܒܛܠܢܗ̇ ܡܨܐ ܕܢܗܘܐ ܕܢܦܫܐ. ܡܕܝܢ ܠܐ ܡܝܬܐ ܒܡܘܬܗ ܕܦܓܪܐ.

 

 

 

ܡܚܘܝܢܘܬܐ ܕܫܒܥ

 

ܐܡܪܝܢܢ ܕܢܦܫܐ ܠܐ ܡܬܟܪܗܐ ܒܟܘܪܗܢܗ ܕܦܓܪܐ. ܘܡܛܠ ܗܕܐ ܐܦܠܐ ܒܡܘܬܗ ܡܝܬܐ. ܘܕܠܐ ܡܬܟܪܗܐ ܒܟܘܪܗܢܗ܆ ܝ̣ܕܝ̣ܥܐ ܡ̇ܢ ܕܒܘܚܪܢܐ ܬܟܬܘܫܐ ܗ̱ܘ ܕܟܝܢܐ ܘܟܘܪܗܢܐ ܐܟܡܐ ܕܢܣܝ̣ܘ ܐܣܘ̈ܬܐ. ܒܕܓܘܢ ܗܢܐ ܟܝܢܐ. ܐܘ ܡܘܙܓܐ ܗ̱ܘ ܕܦܓܪܐ. ܐܘ ܢܦܫܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܟܕ ܡܘܙܓܐ ܕܦܓܪܐ ܗܘܝܘ ܕܡܣܬܪܚ ܘܡܡܚܠ. ܐܝܟܢܐ ܗ̣ܘ ܥܡܗ ܢܨܐ. ܫܪܝ̣ܟܐ ܡܕܝܢ ܕܗ̣ܝ ܢܦܫܐ ܐܝܬܝܗ̇ ܟܝܢܐ. ܘܕܠܐ ܡܬܟܪܗܐ܆ ܝ̣ܕܝ̣ܥܐ ܡ̣ܢ ܗ̇ܝ ܕܐܠܘ ܟܪܝܗܐ ܗܘܬ݀ ܘܡܚ̣ܝܠܐ ܐܝܟܢܐ ܡܬܡܨܝܐ ܗܘܬ݀ ܕܬܙܟܐ ܠܥܠܬܗ ܥܫܝܢܬܐ ܕܟܘܪܗܢܐ. ܢܦܫܐ ܡܕܝܢ ܗ̣ܝ ܟܕ ܗ̣ܝ ܡܬܟܬܫܐ ܥܠ ܩܘܝܡܗ ܕܦܓܪܐ ܟܕ ܡܫܪܐ ܕܢܬܚܒܠ. ܐܝܟܢܐ ܗ̣ܝ ܒܚܒܠܗ ܡܬܚܒܠܐ.

 

 

 

ܡܚܘܝܢܘܬܐ ܕܬܡܢܐ

 

ܐܡܪܝܢܢ ܐܠܘܠܐ ܦܝܫܐ ܢܦܫܐ ܒܬܪ ܡܘܬܗ ܕܦܓܪܐ. ܡܫܬܟܚ ܠܗ ܒܪܢܫܐ ܕܣܓܝ ܫܝ̣ܛ ܘܓܠܝ̣ܙ ܡ̣ܢ ܢܝܚܐ ܡ̣ܢ ܫܪܟܐ ܕܚܝ̈ܘܬܐ. ܒܗ̇ܝ ܕܒܗܘܢܐ ܦܪܝܫ ܗ̣ܘ ܡܢܗܝܢ. ܘܗ̣ܘ ܗܘܢܐ ܐܘ ܒܗܠܝܢ ܕܥܒ̣ܪ̈ܝ ܡܬܚܫܒ. ܐܘ ܒܗܠܝܢ ܕܩܝ̈ܡܢ. ܐܘ ܒܗܠܝܢ ܕܥܬܝ̈ܕܢ. ܘܗܠܝܢ ܕܥܒ̣ܪ̈ܝ ܐܢ ܒܝ̣̈ܫܢ ܗܘܝ̈܆ ܬܘܬܐ ܡܬܡܠܐ. ܘܐܢ ܛܒ̈ܢ ܗܘܝ̈܆ ܡܬܟܡܪ ܥܠ ܕܠܐ ܦܫ̈ܝ. ܘܗܠܝܢ ܕܩܝ̈ܡܢ ܬܘܒ ܐܢ ܒܝ̈ܫܢ ܡܬܬܥܝ̣ܩ. ܘܐܢ ܛܒ̈ܢ ܬܘܒ ܐܢ ܒܝ̈ܫܢ ܡܬܬܥܝ̣ܩ. ܘܐܢ ܛܒ̈ܢ ܗܟܘܬ ܒܪܢܝܐ ܡܬܒܪܡ. ܒܝܕ ܗ̇ܝ ܕܩܢܛ ܡ̣ܢ ܗ̇ܝ ܕܕܠܡܐ ܢܬܓܠܙ ܡܢܗܝܢ. ܘܒܝܕ ܗ̇ܝ ܕܠܝܬܝ̣ܪ ܛܒ̈ܢ ܡܢܗܝܢ ܡܬܝܐܝܒ. ܘܒܗܠܝܢ ܕܥܬܝ̣̈ܕܢ ܬܘܒ ܟܕ ܡܬܚܫܒ ܝܬܝܪ ܡܬܕܢܩ ܒܣܒܝ̣ܪ̈ܘܬܐ. ܟܕ ܕܚܠ ܕܠܡܐ ܠܘ ܐܝܟ ܪܓܬܗ ܢܬܬܝ̈ܬܝܢ ܠܗ. ܚܝ̈ܘܬܐ ܕܝܢ ܐ̱ܚܪ̈ܢܝܬܐ ܟܕ ܡ̣ܢ ܗܘܢܐ ܓܠܝ̣̈ܙܢ. ܡܚܪܪ̈ܢ ܛܒ ܡ̣ܢ ܠܙ̈ܬܐ ܕܐܝܟ ܗܠܝܢ. ܘܡ̣ܢ ܗܠܝܢ ܝ̣ܕܝ̣ܥܐ. ܕܐܢ ܠܝܬ ܩܐܛܣܛܐܣܝܣ ܐ̱ܚܪܬܐ ܠܢܦܫܐ ܒܬܪ ܦܓܪܐ. ܐܝܟܐ ܕܡܬܩܦܠܝܢ ܡܢܗ̇ ܕܘܘ̈ܢܐ ܘܥܩ̈ܬܐ ܘܬܢ̈ܚܬܐ. ܡܫܬܟܚ ܠܗ ܒܪܢܫܐ ܕܫܝ̣ܛ ܡ̣ܢ ܚܝ̈ܘܬܐ ܕܠܐ ܡܠܬܐ. ܘܟܕ ܡܝܬܪ ܡܢܗܝܢ܆ ܡ̣ܢ ܐܠܨ̈ܬܐ ܕܠܐ ܡܝܘܬܬܐ ܗ̱ܝ ܢܦܫܗ.

 

 

 

ܡܚܘܝܢܘܬܐ ܕܬܫܥ

 

ܐܡܪܝܢܢ ܕܒܪܢܫܐ ܡ̇ܢ ܐܘ ܡܛܠ ܗ̇ܝ ܕܢܐܬܪ ܘܢܬܗܢܐ ܐܬܒܪܝ. ܐܘ ܡܛܠ ܗ̇ܝ ܕܢܚܣܪ ܘܢܣܬܓܦ. ܐܘ ܡܛܠ ܗ̇ܝ ܕܠܐ ܢܐܬܪ ܘܢܬܗܢܐ ܐܦܠܐ ܕܢܚܣܪ ܘܢܣܬܓܦ. ܘܗ̇ܘ ܕܬܪܝܢ ܠܐ ܫܪܝܪ ܒܥܠܬ݀ ܫܦܝ̣ܥܘܬ ܛܒܘܬܗ ܕܒܪܘܝܐ. ܘܗ̇ܘ ܕܬܠܬ ܬܘܒ ܠܐ ܫܪܝܪ. ܒܗ̇ܝ ܕܐܦ ܐܢ ܠܐ ܐܬܒܪܝ̣. ܗܢܐ ܙܢܐ ܫܟܝܚ ܗ̣ܘܐ ܠܗ. ܘܡܛܠܗܕܐ ܐܝܩܝ ܗܘܝܐ ܗܘܬ݀ ܒܪܝ̣ܬܗ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܗ̇ܘ ܩܕܡܝܐ ܫܪܝܪ. ܘܟܕ ܒܥܠܡܐ ܗܢܐ ܘܠܐ ܚܕ ܢܝܚܐ ܡܪܢܝܐ ܘܡܩܘܝܢܐ ܐܝܬ. ܝܕܝܥܐ ܕܡܛܠܗ̇ܝ ܕܒܥܠܡܐ ܐ̱ܚܪܢܐ ܘܪܘܚܢܝܐ ܢܐܬܪ ܘܢܬܗܢܐ ܒܪܢܫܐ ܕܐܬܒܪܝ̣.

 

 

 

ܡܚܘܝܢܘܬܐ ܕܥܣܪ

 

ܐܡܪܝܢܢ ܕܟܠܗܘܢ ܗܘ̈ܢܐ ܕܟܠܗܘܢ ܒܢܝ̈ܢܫܐ ܣܗܕܝ̣ܢ. ܕܟܡܐ ܕܒܨܝ̣ܪ ܢܗܘܐ ܥܢܐ ܒܪܢܫܐ ܥܡ ܪ̈ܓܝܓܬܐ ܦܓܪ̈ܢܝܬܐ. ܝܬܝܪ ܗܘܐ ܡܫܡܠܝ ܒܢܦܫܗ. ܘܒܗܦܟܐ. ܘܡܛܠܗܕܐ ܟܕ ܚܙܝܢ ܠܗ̇ܝ ܕܒܬܘܠ ܘܢܙܝ̣ܪ ܘܡܣܡܥܠ. ܘܠܐ ܪܚܡ ܫܘܒܚܐ ܘܥܪܩ ܡ̣ܢ ܪܝ̣ܫܢܘܬܐ. ܘܣܢܐ ܥܘܬܪܐ. ܘܡܘܪܒܘ̣ ܡܘܪܒܝܢ ܠܗ ܘܡܩܠܣܝܢ. ܘܕܢܬܥܕܪܘܢ ܒܚܝ̣ܠ ܨܠܘ̈ܬܗ ܡܬܪܓܪܓܝܢ. ܘܐܝܟ ܥܒ̈ܕܐ ܩܕܡ ܡܪ̈ܝܗܘܢ. ܘܐܦܢ ܡܠܟ̈ܐ ܢܗܘܘܢ ܩܕܡܘܗܝ ܡܬܓܪܓܚܝܢ. ܘܐܦܝ̈ܗܘܢ ܒܥܦܪ ܪ̈ܓܠܘܗܝ ܡܦܠܦܠܝܢ. ܠܡܬܒܪܟܘ. ܐܝܟܢܐ ܕܐܦ ܡܛܥ̈ܝܢܐ ܐ̱ܢܫܝ̈ܢ ܒܐܣܟܡܐ ܕܓܠܐ܇ ܟܕ ܒܪܝܐܝܬ ܡܕܡ ܡ̣ܢ ܙܢܝ̈ܐ ܗܠܝܢ ܗ̣ܢܘܢ ܒܗܘܢ ܛܝܫܝ̣ܢ܇ ܐܝܩܪܐ ܠܢܦܫܗܘܢ ܡ̣ܢ ܩܘܛܢܐ ܩܢܝܢ. ܘܐܠܘܠܐ ܚܝ̈ܠܐ ܐ̱ܚܪ̈ܢܐ ܘܢܝܚ̈ܐ ܥܬܝ̣ܕܝ̣ܢ ܗ̣ܘܘ ܠܡܗܘܐ ܠܒܪܢܫܐ ܗ̇ܘ ܡ̣ܢ ܒܬܪ ܡܘܬܗ. ܐܝܟܢܐ ܗܟܢܐ ܛܘܒܬܢ ܒܟܠ ܚܫܒܝ̣ܢ ܗ̣ܘܘ ܠܗ ܒܢܝ̈ܢܫܐ. ܘܦܪܘܛܐܣܝܣ ܗܕܐ ܕܗܟܢܐ ܡ̣ܢ ܟܠܗܘܢ ܒܢܝ̈ܢܫܐ ܠܐ ܡܬܦܫܟܢܐܝܬ ܡܬܬܘܕܝܐ. ܡ̣ܢ ܐܠܨ̈ܬܐ ܕܐܢܢܩܝܬ݀ ܫܪܪܐ ܬܗܘܐ. ܢܦܫܐ ܡܕܝܢ ܠܐ ܡܝܬܐ ܒܡܘܬܗ ܕܦܓܪܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܐܡ̣ܪ ܐܠܗܐ ܠܡܘܫܐ. ܐܢܐ ܐ̱ܢܐ ܐܠܗܗ ܕܐܒܪܗܡ ܘܕܐܝܣܚܩ ܘܕܝܥܩܘܒ. ܘܕܦܓܪ̈ܝܗܘܢ ܕܗܠܝܢ ܒܗ̇ܘ ܙܒܢܐ: ܡܚܒܠܝܢ ܗ̣ܘܘ ܓܠܝܐ. ܘܐܠܘ ܢܦ̈ܫܬܗܘܢ ܬܘܒ ܡܚܒ̈ܠܢ ܗܘܝ̈. ܕܡܢܘ ܗ̣ܘܐ ܐܠܗܐ ܐܠܗܐ.

 

 

 

ܣܗܕܘܬܐ ܕܬܪܬܝܢ

 

ܐܘܢܓܠܝܘܢ. ܠܐ ܬܕܚܠܘܢ ܡ̣ܢ ܐܝܠܝܢ ܕܩ̇ܛܠܝܢ ܦܓܪܐ܆ ܠܢܦܫܐ ܕܝܢ ܠܡܩܛܠ ܠܐ ܡܫܟܚܝܢ. ܘܐܠܘ ܡܝܘܬܬܐ ܗܘܬ݀ ܢܦܫܐ ܐܝܟܢܐ ܠܐ ܡܫܟܚܝܢ ܗ̣ܘܘ ܠܡܩܛܠܗ̇.

 

 

 

ܣܗܕܘܬܐ ܕܬܠܬ

 

ܒܗ ܟܕ ܒܗ. ܝܘܡܢܐ ܥܡܝ ܬܗܘܐ ܒܦܪܕܝܣܐ. ܘܐܠܘ ܢܦܫܗ ܕܓܝܣܐ ܡܡܬ ܡܝܬܐ ܗܘܬ݀ ܒܡܘܬܐ ܕܦܓܪܗ. ܐܝܟܢܐ ܡܪܝܐ ܒܦܪܕܝܣܐ ܡܨܝܐ ܗܘܬ݀ ܕܬܫܢܐ ܒܗ̇ܘ ܝܘܡܐ.

 

 

 

ܣܗܕܘܬܐ ܕܐܪܒܥ

 

ܦܘܠܘܣ ܒܗ̇ܝ ܕܩܘܪ̈ܝܢܬܝܐ ܕܬܪܬܝܢ. ܝ̇ܕܥܝܢܢ ܓܝܪ ܕܐܢ ܒܝܬܢ ܕܒܐܪܥܐ ܗܢܐ ܕܦܓܪܐ ܢܫܬܪܐ. ܐܠܐ ܐܝܬ ܠܢ ܒܢܝܢܐ ܕܡ̣ܢ ܐܠܗܐ ܕܠܐ ܥܒܝ̣ܕ ܒܐܝ̈ܕܝܐ.

 

 

 

 

 

 

 

 

     #1 

 

ܩܦܠܐܘܢ ܫܒܝܥܝܐ ܕܫܬܐܣܬܐ ܬܡܝܢܝܬܐ ܡܛܠ ܝ̣ܕܥܬܗ̇ ܕܢܦܫܐ ܡ̣ܢ ܒܬܪ ܦܘܪܫܢܗ̇ ܕܡ̣ܢ ܦܓܪܐ. ܘܒܗ ܐܝܬ ܦܣܘ̈ܩܐ ܐܪܒܥܐ. ܦܣܘܩܐ ܩܕܡܝܐ ܡܛܠܗ̇ܝ ܕܡܕܥ ܝ̇ܕܥܐ ܢܦܫܐ ܠܟܠܗܘܢ ܣܘܥܪ̈ܢܐ ܟܘܠܢܝ̈ܐ ܘܡܢܬܝ̈ܐ ܡ̣ܢ ܒܬܪ ܦܘܪܫܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢ ܕܩܕܡ ܐܫܬܪܪ ܕܢܦܫܐ ܐܘܣܝܐ ܠܐ ܓܫܝ̣ܡܬܐ ܘܡܕܒܪܢܝ̣ܬܐ ܕܦܓܪܐ ܐܝܬܝܗ̇. ܒܕܓܘܢ ܐܘ ܒܡܨܥܝܘܬܗ ܕܦܓܪܐ ܡܕܪܟܐ ܠܗ ܠܦܓܪܐ ܐܘ ܠܘ ܒܡܨܥܝܘܬܗ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܦܓܪܐ ܐܠܘ ܡܨܐ ܗ̣ܘܐ ܠܡܕܪܟܘ ܚܣܝ̣ܪ̈ܘܬܗ܆ ܠܐ ܣܟ ܡܣܬܢܩ ܗ̣ܘܐ ܥܠ ܡܕܒܪܢܘܬܗ̇ ܕܢܦܫܐ. ܫܪܝ̣ܟܐ ܕܗ̇ܘ ܕܬܪܝܢ ܫܪܝܪ. ܒܕܓܘܢ ܐܟܡܐ ܕܟܕ ܥܡ ܦܓܪܐ ܗ̱ܝ ܠܘ ܒܡܨܥܝܘܬܗ ܡܕܪܟܐ ܗ̇ܘ ܡܐ ܕܡܕܪܟܐ. ܒܗ̇ ܒܕܡܘ̣ܬܐ ܘܟܕ ܡܬܦܪܫܐ ܡܢܗ. ܗ̣ܝ ܒܗ̇ ܡܕܪܟܐ ܡܬܕܪ̈ܟܢܝܗ̇. ܢܛܝ̣ܪܐ ܡܕܝܢ ܝ̣ܕܥܬܗ̇ ܕܢܦܫܐ ܘܡ̣ܢ ܒܬܪ ܦܘܪܫܢܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܕܢܦܫܐ ܟܕ ܥܡ ܦܓܪܐ ܐܣܝ̣ܪܐ܆ ܐܢܢܩܐܝܬ ܝܕܥܐ ܕܒܥܝܢܐ ܚܙܝܐ. ܘܒܐܕܢܐ ܫܡܥܐ ܘܫܪܟܐ. ܒܕܓܘܢ ܐܠܘ ܕܒܡܨܥܝܘܬܗ̇ ܕܥܝܢܐ ܝ̇ܕܥܐ ܗܘܬ݀ ܕܥܝܢܐ ܚܙܝܐ. ܙܕܩ ܗ̣ܘܐ ܕܒܡܨܥܝܘܬ ܥܝܢܐ ܐ̱ܚܪܬܐ ܓܘܫܡܢܝܬܐ ܝ̇ܕܥܐ ܗܘܬ݀ ܠܥܝܢܐ. ܘܠܗ̇ܝ ܐ̱ܚܪܬܐ ܒܐܚܪܬܐ. ܘܗܟܢܐ ܠܠܐ ܣܘܦ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܠܘ ܒܡܨܥܝܘܬܗ ܕܦܓܪܐ ܡܕܪܟܐ ܠܡܬܕܪ̈ܟܢܘܗܝ. ܘܡܛܠܗܕܐ ܘܟܕ ܠܐ ܢܗܐ ܦܓܪܐ ܡܕܪܟܘ̣ ܡܕܪܟܐ ܠܗ̇ܢܝܢ ܕܡܟܢܐ ܕܬܕܪ̈ܟܝ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܕܟܕ ܦܣܩ ܒܪܢܫܐ. ܕܣܘܩܪܐܛܝܣ ܡ̇ܢ ܕܡܢܬܝܐ ܗ̱ܘ ܐܦܢ ܒܦܓܪܗ ܚܙܐ. ܠܒܪܢܫܐ ܕܟܠܢܝܐ ܗ̱ܘ܇ ܠܘ ܒܦܓܪܗ ܚ̇ܙܐ. ܐܠܐ ܒܗܘܢܗ. ܘܗܘܢܐ ܡ̇ܢ ܟܕ ܠܟܠܢܝܐ ܚܙܐ ܘܝ̇ܕܥ ܡ̣ܢ ܐܢܢܩܝ ܕܐܦ ܠܡܢܬܝܐ ܕܬܚܝܬ ܗ̇ܘ ܟܠܢܝܐ ܢܦܠ ܢܚܙܐ ܘܢܕܥ. ܘܐܠܘ ܠܡܢܬܝܐ ܗ̇ܘ ܒܝܕ ܦܓܪܐ ܚ̇ܙܐ ܗ̣ܘܐ. ܙܕܩ ܗ̣ܘܐ ܕܐܦ ܠܦܓܪܐ ܗ̇ܘ ܕܐܦ ܗ̣ܘ ܡܢܬܝܐ ܗ̱ܘ ܒܝܕ ܦܓܪܐ ܐ̱ܚܪܢܐ ܢܚܙܐ ܗ̣ܘܐ ܘܠܗ̇ܘ ܐ̱ܚܪܢܐ ܒܝܕ ܐ̱ܚܪܢܐ. ܘܗܟܢܐ ܠܠܐ ܣܘܦ܆ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܠܘ ܒܝܕ ܦܓܪܐ ܝ̇ܕܥܐ ܢܦܫܐ ܗܠܝܢ ܕܝ̇ܕܥܐ. ܘܡܛܠܗܕܐ ܠܐ ܐܒܕܐ ܝ̣ܕܥܬܗ̇ ܒܐܒܕܢܗ ܕܦܓܪܐ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܕܢܦܫܐ ܟܕ ܥܡ ܦܓܪܐ ܐܣܝ̣ܪܐ ܐܢܢܩܐܝܬ ܗ̣ܝ ܠܗ̇ ܝ̇ܕܥܐ. ܘܠܦܓܪܐ ܐܘܪܓܢܘܢ ܕܝܠܗ. ܘܠܫܪܟܐ ܕܨܒܘ̈ܬܐ. ܒܕܓܘܢ ܐܘ ܒܡܨܥܝܘܬܐ ܕܐܘܪܓܢܘܢ ܓܘܫܡܢܝܐ ܝ̇ܕܥܐ ܗܠܝܢ ܕܝ̇ܕܥܐ ܐܘ ܠܘ ܒܡܨܥܝܘܬܗ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܠܐܘܪܓܢܘܢ ܕܝܠܗ̇ ܐܢ ܒܡܨܥܝܘܬܗ ܐܘܪܓܢܘܢ ܐ̱ܚܪܢܐ ܡܕܪܟܐ ܠܘܬ ܠܐ ܣܘܦ ܫܪܟܐ ܡܠܬܐ ܗ̇ܝ ܕܫܟܝܪܐ. ܫܪܝ̣ܟܐ ܡܕܝܢ ܕܠܐܘܪܓܢܘܢ ܕܝܠܗ̇ ܒܠܥܕ ܐܘܪܓܢܘܢ ܡܕܪܟܐ ܟܕ ܥܡܗ ܐܣܝ̣ܪܐ. ܒܗ̇ ܒܕܡܘ̣ܬܐ ܡܕܝܢ ܘܟܕ ܡܬܦܪܫܐ ܡܕܪܟܐ ܠܗ ܠܐܘܪܓܢܘܢ ܕܝܠܗ̇ ܘܠܟܠܗܘܢ ܕܡܝܘ̈ܗܝ. ܢܦܫܐ ܡܕܝܢ ܒܬܪ ܦܘܪܫܢܐ ܠܟܠܗܝܢ ܝܕ̈ܥܬܐ ܟܠܢܝ̈ܬܐ ܘܡܢܬܝ̈ܬܐ ܡܕܪܟܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܘܡܝ̣ܬ ܐܦ ܥܬܝܪܐ ܘܐܬܩܒܪ. ܘܟܕ ܡܫܬܢܩ ܒܫܝܘܠ܆ ܐܪܝܡ ܥܝܢܘ̈ܗܝ ܘܚ̣ܙܐ ܠܐܒܪܗܡ ܡ̣ܢ ܪܘܚܩܐ ܘܠܠܥܙܪ ܒܥܘܒܗ ܘܐܪܝܡ ܩܠܗ ܘܐܡ̣ܪ. ܐܡܪܝܢܢ ܐܠܘܠܐ ܢܛܝ̣ܪܐ ܗܘܬ݀ ܝ̣ܕܥܬܗ̇ ܕܢܦܫܐ. ܐܝܟܢܐ ܡܪܝ̣ܡ ܗ̣ܘܐ ܥܝܢܘ̈ܗܝ ܥܬܝܪܐ ܘܚܙܐ ܘܐܡ̇ܪ. ܟܕ ܚܙܝ̈ܬܗ ܘܠܫܢܗ ܡ̣ܢ ܟܕܘ ܒܛܠܘ ܗ̣ܘܘ.

 

 

 

ܣܗܕܘܬܐ ܕܬܪܬܝܢ

 

ܦܛܪܘܣ ܫܠܝܚܐ. ܡܛܠ ܕܐܦ ܡܫܝܚܐ ܚܕܐ ܙܒܢ ܡܝ̣ܬ. ܙܕܝܩܐ ܚܠܦ ܚܛܝ̈ܐ ܕܢܩܪܒܘܢ ܠܐܠܗܐ. ܘܡܝ̣ܬ ܒܦܓܪ ܘܚܝܐ ܒܪܘܚ. ܘܐܟܪܙ ܠܢܦ̈ܫܬܐ ܐܝܠܝܢ ܕܐܚܝ̣̈ܕܢ ܗܘܝ̈ ܒܫܝܘܠ. ܐܡܪܝܢܢ ܕܟܪܘܙܘܬܐ ܠܐܝܠܝܢ ܕܝ̇ܕܥܝ̣ܢ ܘܡܣܬܟܠܝܢ ܗܘܝܐ. ܘܠܘ ܠܐܝܠܝܢ ܠܐ ܝ̇ܕܥܝܢ ܘܠܐ ܡܬܒܝܢܝ̣ܢ.

 

 

 

ܣܗܕܘܬܐ ܕܬܠܬ

 

ܐܕܝ ܫܠܝܚܐ ܒܡܠܦܢܘܬܗ ܕܒܐܘܪܗܝ. ܠܐ ܓܝܪ ܒܛܠܐ ܡܚܫܒܬܐ ܕܢܦܫܐ ܘܠܐ ܝ̣ܕܥܬܐ. ܡܛܠ ܕܨܠܡܐ ܐܝܬܝܗ̇ ܕܐܠܗܐ ܠܐ ܡܝܘܬܐ.

 

 

 

ܣܗܕܘܬܐ ܕܐܪܒܥ

 

ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܩܒܘܪܬܐ ܩܣܪܝܘܣ ܐܚܘܗܝ ܡܬܛܦܝ̣ܣ ܐ̱ܢܐ ܠܡܠܝ̈ܗܘܢ ܕܚܟܝ̈ܡܐ. ܕܟܠ ܢܦܫܐ ܛܒܬܐ ܘܪܚܡܬ݀ ܐܠܗܐ. ܥܡܗ̇ ܕܟܕ ܡܫܬܪܝܐ ܡ̣ܢ ܦܓܪܐ ܕܥܡܗ ܐܣܝ̣ܪܐ. ܡܓܗܝܐ ܡ̣ܢ ܗܪܟܐ. ܡܚܕܐ ܡ̇ܢ ܟܕ ܒܡܪܓܫܢܘܬܐ ܘܬܐܘܪܝܐ ܗ̇ܘܝܐ ܕܛܒܬܐ ܗ̇ܝ ܕܡܩܘܝܐ ܠܗ̇. ܒܗ̇ܝ ܕܗ̇ܘ ܕܡܚܫܟ ܗ̣ܘܐ ܐܬܕܘܝ ܘܐܬܬܣܝ̣ܡ. ܐܘ ܠܐ ܝ̇ܕܥ ܐ̱ܢܐ ܗ̇ܝ ܕܐܦ ܘܠܐ ܠܡܐܡܪ. ܗ̇ܢܘ ܕܝܢ ܗܢܝܐܘܬܐ ܡܕܡ ܬܡܝ̣ܗܬܐ ܡܬܗܢܝܐ ܘܪܘܙܐ.

 

 

 

ܣܗܕܘܬܐ ܕܚܡܫ

 

ܗ̣ܘ ܟܕ ܗ̣ܘ ܒܡܐܡܪܐ ܕܥܠ ܥܘܦܝܐ ܕܐܒܘܗܝ. ܕܬܪܬܝܢ ܕܝܢ ܟܕ ܡܦܝ̣ܣ ܐ̱ܢܐ܆ ܕܐܦܠܐ ܗܫܐ ܫܒܩ ܠܢ ܪܥܝܐ ܛܒܐ ܗ̇ܘ ܕܣ̇ܐܡ ܢܦܫܗ ܚܠܦ ܥܪ̈ܒܐ. ܐܠܐ ܘܩܪܝ̣ܒ ܘܪܥܐ ܘܡܗܕܐ. ܘܝ̇ܕܥ ܠܕܝܠܗ ܘܡܬܝ̣ܕܥ ܡ̣ܢ ܕܝܠܗ.

 

 

 

ܣܗܕܘܬܐ ܕܫܬ

 

ܓܪܝܓܘܪܝܘܣ ܕܢܘܣܐ ܒܡܐܡܪܐ ܕܥܠ ܡܝܠܝܛܘܣ ܕܐܢܛܝܘܟܝܐ. ܢܨܠܐ ܗܟܝܠ ܟܠܢ ܐܟܚܕܐ ܪ̈ܝܫܢܐ ܘܡܫܥ̈ܒܕܐ. ܓܒܪ̈ܐ ܘܢܫ̈ܐ ܣܒ̈ܐ ܘܥܠܝ̈ܡܐ. ܘܠܗ ܠܛܘܒܢܐ ܡܝܠܝܛܘܣ ܢܣܒ ܫܘܬܦܐ ܒܨܠܘ̈ܬܢ. ܡܛܠ ܕܦܪܗܣܝܐ ܪܒܬܐ ܩܢܐ ܗܫܐ. ܘܪܬܚ ܒܚܘܒܐ ܕܠܘܬܢ.

 

 

 

ܣܗܕܘܬܐ ܕܫܒܥ

 

ܡܬܘܕܐܘܣ ܕܐܠܘܡܦܘܣ ܒܡܐܡܪܐ ܕܩܝܡܬܐ. ܦܩܘܕ ܐܠܗܐ ܚܝܠܟ ܘܐܥܫܢ ܐܠܗܐ ܠܗܢܐ ܕܥܬܕܬ ܠܢ. ܡܕܝܢ ܢܦ̈ܫܬܐ ܐܢܝܢ ܕܡܬܟܫ̈ܦܢ ܘܡܬܚܢ̈ܢܢ ܠܐܠܗܐ ܕܢܩܒ̈ܠܢ ܐܘܪܓܢܘܢ ܕܦܓܪ̈ܝܗܝܢ. ܕܗ̣ܘܐ ܡܐܢܐ ܕܚܟܡܬܗ̇ ܘܡܫܡܫܢܗ̇ ܚܦܝ̣ܛܐܝܬ. ܘܠܘ ܐ̱ܚܪܢܐ ܣܛܪ ܡܢܗ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܫܒܝܥܝܐ ܕܫܬܐܣܬܐ ܬܡܝܢܝܬܐ. ܡܛܠ ܬܪܥܝ̣ܬܐ ܕܗ̇ܢܘܢ ܕܐܡܪܝܢ ܕܢܦܫܐ ܠܐ ܡܕܪܟܐ ܠܫܪ̈ܒܐ ܡܢܬܝ̈ܐ ܠܐ ܟܕ ܥܡ ܦܓܪܐ ܐܣܝܪܐ ܐܦܠܐ ܒܬܪ ܫܪܝܐ. ܐܠܐ ܠܟܠܢܝ̈ܐ ܒܠܚܘܕ ܘܠܠܐ ܓܫܝ̣̈ܡܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ ܕܗܠܝܢ. ܣܥܝܐ ܩܕܡܝܐ

 

ܐܡܪܝܢ ܕܟܠܗܘܢ ܒܢܝ̈ܢܫܐ ܐܢܢܩܐܝܬ ܝ̇ܕܥܝ̣ܢ ܕܡܬܚܙ̈ܝܢܐ ܡ̇ܢ ܒܝܕ ܥܝܢܐ ܡܬܕܪܟܝ̣ܢ ܘܠܘ ܒܝܕ ܐܕܢܐ ܐܘ ܡܕܡ ܐ̱ܚܪܝܢ. ܘܡܫܬܡ̈ܥܢܐ ܒܝܕ ܐܕܢܐ ܘܠܘ ܒܝܕ ܥܝܢܐ ܐܘ ܗܕܡܐ ܐ̱ܚܪܢܐ. ܘܡܬܛܥ̈ܡܢܐ ܒܝܕ ܠܫܢܐ ܒܠܚܘܕ. ܢܦܫܐ ܟܕ ܠܐ ܓܫܝ̣ܡܬܐ ܗ̱ܝ ܘܡܕܡ ܕܐܝܟ ܗܠܝܢ ܗܕܡ̈ܐ ܠܐ ܩܢܝܐ ܒܟܝܢܗ̇. ܐܝܟܢܐ ܒܡܬܪ̈ܓܫܢܝܗܘܢ ܡܟܢܐ ܕܬܪܓܫ ܠܐ ܥܡ ܦܓܪܐ. ܐܦܠܐ ܒܬܪ ܫܪܝܐ.

 

 

 

ܣܥܝܐ ܬܪܝܢܐ

 

ܐܡܪܝܢ ܕܢܣܝ̈ܢܐ ܐܘܣܝܝ̈ܐ ܡ̇ܠܦܝܢ ܠܢ ܕܟܕ ܡܕܡ ܡ̣ܢ ܗܕ̈ܡܐ ܡܬܢܟܐ܆ ܐܦ ܡܥܒܕܢܘܬܗ ܡܬܢܟܝܐ. ܘܓܠܝܐ ܗܕܐ ܒܪ̈ܓܫܐ ܒܪ̈ܝܐ. ܘܒܓܘܝ̈ܐ ܬܘܒ ܝ̣ܕܝ̣ܥܐ. ܕܟܕ ܟܪܣܐ ܩܘܕܡܢܝܬܐ ܕܡܘܚܐ ܡܬܢܟܝܐ. ܦܢܛܣܝܐ ܒܛܠܐ ܐܘ ܡܫܬܓܫܐ. ܘܟܕ  ܗ̇ܝ ܡܨܥܝܬܐ܆ ܡܚܫܒܬܐ. ܘܟܕ ܗ̇ܝ ܒܣܬܪܢܝܬܐ܆ ܥܘܗܕܢܐ. ܒܕܓܘܢ ܢܦܫܐ ܐܝ̇ܕܐ ܕܟܠܢܐܝܬ ܡܢܗܘܢ ܕܗܕܡ̈ܐ ܗܠܝܢ ܓܠܝ̣ܙܐ ܡ̣ܢ ܐܢܢܩܝ ܕܐܦ ܡ̣ܢ ܡܥܒܕܢ̈ܘܬܗܘܢ ܬܬܓܠܙ ܒܚܝ̈ܐ ܕܗܪܟܐ ܘܗܪܬܡܢ.

 

 

 

ܣܥܝܐ ܬܠܝܬܝܐ

 

ܐܡܪܝܢ ܐܠܘ ܡܕܪܟܢܐ ܕܡܬܪ̈ܓܫܢܐ ܗܠܝܢ ܗ̣ܝ ܢܦܫܐ ܡܠܝ̣ܠܬܐ ܐܝܬܝܗ̇ ܗܘܬ݀. ܘܚܝ̈ܘܬܐ ܠܐ ܡܠܝ̈ܠܬܐ ܡܕܪ̈ܟܢ ܠܡܬܪ̈ܓܫܢܐ. ܐܠܨܐ ܗܘܬ݀ ܕܐܦ ܠܗܠܝܢ ܬܘܒ ܢܦ̈ܫܬܐ ܐܝܬ ܗܘܝ̈ ܡܠܝ̣̈ܠܬܐ. ܗ̇ܝ ܕܫܟܝ̣ܪܐ. ܢܦܫܐ ܡܕܝܢ ܡܠܝܠܬܐ ܠܐ ܡܪܓܫܐ ܒܡܬܪ̈ܓܫܢܐ. ܠܐ ܩܕܡ ܫܪܝܐ. ܐܠܐ ܒܬܪ ܫܪܝܐ.

 

 

 

ܣܥܝܐ ܪܒܝܥܝܐ

 

ܐܡܪܝܢ ܕܟܕ ܡܕܪܟܝ̣ܢܢ ܠܐܣܦܝ̣ܪܐ. ܡ̣ܢ ܐܢܢܩܝ ܕܕܡܘ̣ܬܗ̇ ܡܬܪܫܡܘ ܬܬܪܫܡ ܒܡܕܪܟܢܗ. ܘܡ̣ܢ ܠܐ  ܡܬܡܨܝܢܝ̣ܬܐ ܗ̱ܝ ܕܬܫܬܟܚ ܕܡܘ̣ܬܗ̇ ܕܐܣܦܝ̣ܪܐ ܐܠܐ ܒܐܬܪܐ. ܘܐܬܪܐ ܣܟܐ ܗ̱ܘ ܓܘܝܐ ܕܓܘܫܡܐ ܗ̇ܘ ܕܚ̇ܒܫ. ܢܦܫܐ ܡܕܝܢ ܡܠܝܠܬܐ. ܟܕ ܠܐ ܓܫܝ̣ܡܬܐ ܗ̱ܝ ܠܐ ܡܨܝܐ ܕܢܗܘܐ ܒܗ̇ ܐܬܪܐ ܠܕܡܘ̣ܬܗ̇ ܕܐܣܦܝ̣ܪܐ. ܘܡܛܠܗܕܐ ܐܦܠܐ ܡܟܢܐ ܕܬܕܪܟܝܗ̇.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܐܦܢ ܡܬܚܙ̈ܝܢܐ ܒܝܕ ܥܝܢܐ ܡܬܕܪܟܝ̣ܢ. ܘܡܫܬܡ̈ܥܢܐ ܒܝܕ ܐܕܢܐ ܘܫܪܟܐ. ܐܠܐ ܢܦܫܐ ܗ̱ܝ ܗ̇ܝ ܕܒܝܕ ܐܘܪ̈ܓܢܐ ܗܠܝܢ ܗܕܡܝ̈ܐ ܡܕܪܟܐ ܐܢܘܢ. ܒܕܓܘܢ ܟܕ ܡܬܪ̈ܓܫܢܐ ܗܠܝܢ ܡܬܕܪ̈ܟܢܐ ܗܘܝܢ ܠܢܦܫܐ. ܠܥܠܡ ܦܝܫܐ ܒܗ̇ ܝ̣ܕܥܬܗܘܢ. ܘܐܦܢ ܐܘܪ̈ܓܢܐ ܢܬܚܒܠܘܢ. ܐܝܟ ܗ̇ܘ ܕܒܝܕ ܣܦܝ̣ܢܬܐ ܠܓܙܪܬܐ ܥܐܠ. ܡ̣ܢ ܟܕܘ ܗ̇ܘܐ ܕܥܠ ܠܗ̇ ܘܐܦܢ ܣܦܝ̣ܢܬܐ ܬܘܒ ܠܐ ܬܗܘܐ. ܗ̣ܘ ܗܟܘܬ ܘܗ̇ܘ ܕܠܚܘܪܘܬܐ ܚܙܐ ܡ̣ܢ ܟܕܘ ܚ̣ܙܗ̇ ܘܝ̇ܕܥ ܠܗ̇ ܘܐܦܢ ܢܥܡܨ ܥܝܢܘ̈ܗܝ.

 

 

 

ܫܪܝܐ ܕܣܥܝܐ ܬܪܝܢܐ

 

ܐܡܪܝܢܢ ܕܗܐ ܐܦ ܟܬܘܒܐ ܟܕ ܡܬܬܒܪ ܚܨܪܗ ܡܬܢܟܝܐ ܟܬܝܒܬܗ. ܘܡܛܠ ܗܕܐ ܠܐ ܙܕܩ ܕܢܐܡܪ ܕܚܨܪܐ ܗ̱ܘ ܟܬܘܒܐ ܘܠܘ ܒܪܢܫܐ.

 

 

 

ܫܪܝܐ ܕܣܥܝܐ ܬܠܝܬܝܐ

 

ܐܡܪܝܢܢ ܕܠܘ ܡܛܠܗ̇ܝ ܕܡܫܘ̈ܬܦܢ ܚܝ̈ܘܬܐ ܠܐ ܡܠܝ̈ܠܬܐ ܢܗܘ̈ܝܢ ܠܗܝܢ. ܗܐ ܓܝܪ ܚܘܪܘܬܐ ܘܐܘܟܡܘܬܐ ܡܫܘ̈ܬܦܢ ܠܚܕ̈ܕܐ ܒܟܝܢܐ ܓܢܣܢܝܐ ܕܓܘܢܐ. ܘܠܐ ܐܠܨܐ ܕܣܚܝܚܬ݀ ܠܚܙܬܐ ܬܗܘܐ ܐܘܟܡܘܬܐ ܐܝܟ ܚܘܪܘܬܐ. ܘܡܛܠܗܕܐ ܥܠܬܐ ܬܘܒ ܡܬܟܢܫ ܣܘܢܦܪܝܣܡܐ ܒܐܣܟܡܐ ܬܪܝܢܐ. ܡ̣ܢ ܬܪܬܝܢ ܦܪ̈ܘܛܣܝܣ ܩܛܐܦܛܝ̈ܩܝܬܐ.

 

 

 

ܫܪܝܐ ܕܣܥܝܐ ܪܒܝܥܝܐ

 

ܐܡܪܝܢܢ ܐܠܘ ܡܬܕܪܟܢܘܬܗ̇ ܕܐܣܦܝ̣ܪܐ ܒܝܕ ܡܬܪܫܡܢܘܬ ܕܡܘ̣ܬܗ̇ ܒܐܬܪܐ ܗܘܝܐ ܗܘܬ݀. ܙܕܩ ܗ̣ܘܐ ܕܐܦܠܐ ܠܐܣܦܝܪܐ ܟܠܢܝܬܐ ܘܠܓܘܫܡܐ ܟܠܢܝܐ ܡܕܪܟܐ ܗܘܬ݀ ܢܦܫܐ ܡܠܝܠܬܐ. ܘܓܠܝܐ ܕܠܐ ܡܨܝܢ ܐܢ̱ܬܘܢ ܕܬܟܦܪܘܢܗ̇ ܠܗܕܐ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܫܒܝܥܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܗ̇ܝ ܕܐܝܟܐ ܘܐܝܟܢܐ ܗܘ̈ܝܢ ܢܦ̈ܫܬܐ ܡܠܝ̈ܠܬܐ ܡ̣ܢ ܒܬܪ ܫܪܝܐ ܕܡ̣ܢ ܦܓܪ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܠܬܐ ܡܢܗܪܢܝܬܐ ܕܒܥܬܐ ܗܕܐ

 

ܒܪܬ݀ ܩܠܐ ܓܝܪ ܗ̇ܝ ܕܐܝܟܐ ܟܕ ܦܚܡܗ ܕܓܘܫܡܐ ܠܘܬ ܐܬܪܗ ܡܫܘܕܥܐ. ܡܐ ܕܠܐ ܪܕܝܐ ܠܡܫܐܠܘ̣ ܡܛܠ ܢܦܫܐ ܠܐ ܓܫܝ̣ܡܬܐ ܕܠܘ ܒܐܬܪܐ ܡܨܝܐ ܕܬܗܘܐ. ܕܐܝܟܐ ܗ̇ܘܝܐ ܟܐܡܬ݀ ܒܐܝܢܐ ܐܬܪܐ. ܐܠܐ ܐܢ ܗ̇ܘ ܕܡܫܐܠ. ܒܗ̇ܝ ܕܐܝܟܐ ܠܘ ܠܐܬܪܗ̇ ܨܒܐ ܕܢܫܬܘܕܥ. ܐܠܐ ܕܥܡ ܐܝܠܝܢ ܡܕܝܪܐ ܠܘ ܣܓܝ ܡ̣ܢ ܩܘܫܬܐ ܣܛܐ ܒܫܘܐܠܗ. ܒܕܓܘܢ ܐܡܪܝܢܢ ܕܟܠܗܘܢ ܡܠܦܢ̈ܐ ܩܕܝ̈ܫܐ ܫܠܡܘ. ܕܢܦܫܐ ܟܕ ܡܫܬܪܝܐ ܡ̣ܢ ܦܓܪܐ. ܡܠܐܟ̈ܐ ܐܦ ܫܐܕ̈ܐ ܨܝ̇ܒܝ̣ܢ ܘܐܬܝܢ ܠܐܘܪܥܗ̇. ܘܠܐܝܢܐ ܓܒܐ ܡܢܗܘܢ ܕܒܝܬܝܐ܆ ܠܗܘܢ ܢܩܦܐ ܘܥܡܗܘܢ ܡܕܝܪܐ ܥܕܡܐ ܠܝܘܡܐ ܕܩܝܡܬܐ. ܕܒܗ ܥܡ ܦܓܪܐ ܫܘܬܦܗ̇ ܠܒܘܣܡܐ ܡܫܡܠܝܐ ܐܘ ܠܫܘܢܩܐ ܬܩܒܠ. ܘܡܛܠ ܕܒܥܠܬ݀ ܐܣܪܗ̇ ܕܥܡ ܦܓܪܐ ܙܢܝ̈ܐ ܡܕܡ ܗܘܠܢܝ̈ܐ ܒܗ̇ ܐܟܣܝ̣ܣ ܩܢܘ. ܠܐ ܕܡܝ̣ܪܐ ܐܢ ܢܦ̈ܫܬܐ ܙܕܝ̈ܩܬܐ. ܒܦܪܕܝܣܐ ܗ̇ܘ ܕܡܢܗ ܢܦܩ ܐܕܡ ܢܕܝܪ̈ܢ ܥܡ ܡܠܐܟ̈ܐ. ܘܦܘܪܓܝܐ ܡܕܡ ܓܘܫܡܢܝܐ ܡ̣ܢ ܕܘܝܪܐ ܗ̇ܘ ܢܩܛܦ̈ܢ. ܘܗ̇ܢܝܢ ܚܛܝ̈ܬܐ ܒܫܝܘܠ ܬܚܬܝܬܐ ܐܘܟܝ̣ܬ ܒܓܘ̈ܡܨܐ ܚܫܘ̈ܟܝܐ ܕܐܪܥܐ. ܥܡ ܕܝ̈ܘܐ ܢܬܕܘ̈ܝܢ. ܘܡܛܠ ܕܒܥܬܐ ܗܕܐ ܠܘ ܚܘܫܒܝܬܐ ܗ̱ܝ ܐܠܐ ܫܡܥܢܝܬܐ܆ ܒܝܕ ܣܗܕ̈ܘܬܐ ܒܠܚܘܕ ܟܬܒܝ̈ܬܐ ܡܫܪܪܝ̣ܢܢ ܠܗ̇.

 

 

 

ܢܝܫܐ ܬܪܝܢܐ. ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܩܕܝܫܐ ܕܝܘܢܢܘܣܝܘܣ ܐܪܝܘܦܐܓܝܛܝܐܣ ܒܐܓܪܬܐ ܕܠܘܬ ܕܝܡܘܦܠܘܣ ܒܪ ܩܝܡܐ. ܘܗܠܝܢ ܡܝܬܪ̈ܐ ܡ̇ܢ܆ ܒܢܝ̈ ܘܥܕܐ ܘܒܢܝ̈ ܠܘܝ̣ܬܐ ܕܡܠܐܟ̈ܐ ܬܢܢ܆ ܘܠܗܠ. ܘܝ̇ܪܬܝܢ ܥܡܗܘܢ ܐܘ̈ܢܐ ܛܘܒ̈ܬܢܐ ܒܥܠܡܐ ܗ̇ܘ ܕܠܐ ܡܬܚܒܠ. ܘܗܘܝܢ ܥܡ ܐܠܗܐ ܠܥܠܡ ܥܠܡܝܢ. ܗ̇ܝ ܕܐܦ ܪܒܐ ܘܡܥܠܝܐ. ܝܬܝܪ ܡ̣ܢ ܟܠܗܝܢ ܛܒ̈ܬܐ܆ ܗ̇ܢܘܢ ܕܝܢ ܐ̱ܚܪ̈ܢܐ܆ ܢܦܠܝܢ ܥܠ ܫܠܡܐ ܐܠܗܝܐ ܗ̇ܘ ܕܝܠܗܘܢ. ܘܗܪܟܐ ܬܘܒ ܐܦ ܡ̣ܢ ܒܬܪ ܡܘܬܗܘܢ. ܡ̣ܢ ܫܐܕ̈ܐ ܒܥܪܝ̣ܪ̈ܝܐ ܡܫܬܟܚܝܢ.

 

 

 

ܣܗܕܘܬܐ ܕܬܪܬܝܢ

 

ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܦܨܚܐ܇ ܒܝܕ ܦܓܪܐ ܡ̇ܢ. ܒܗ̇ܝ ܕܚܒ̈ܠܐ ܕܡ̣ܢ ܡܘܬܐ ܠܐ ܩܒܠ. ܫܪܬ݀ ܠܗ̇ܘ ܕܐܚܝ̣ܕ ܗ̣ܘܐ ܐܘܚܕܢܗ ܕܡܘܬܐ. ܒܝܕ ܢܦܫܐ ܕܝܢ܆ ܬܪܨܬ݀ ܐܘܪܚܐ ܠܓܝܣܐ ܠܘܬ ܡܥܠܬܐ ܕܦܪܕܝܣܐ.

 

 

 

ܣܗܕܘܬܐ ܕܬܠܬ

 

ܩܕܝܫܐ ܐܬܐܢܐܣܝܘܣ ܒܬܫܥܝ̣ܬܐ ܕܥܠ ܐܒܐ ܐܢܛܘܢܝܘܣ. ܟܕ ܥܬܝܕ ܗ̣ܘܐ ܗܟܝܠ ܠܡ ܒܙܒܢ ܐܒܐ ܐܢܛܘܢܝܘܣ ܠܡܐܟܠ ܠܚܡܐ. ܩܡ ܕܢܨܠܐ ܒܥܕܢܐ ܕܬܫܥ̈ܫܥܝܢ. ܘܐܪܓܫ ܗ̣ܘܐ ܕܐܬܥܠܝ̣ ܡܕܥܗ ܘܣܒܪ ܕܠܒܪ ܡ̣ܢ ܦܓܪܗ ܐܝܬܘܗܝ ܗ̣ܘܐ. ܐܠܐ ܚܙܐ ܗ̣ܘܐ ܠܢܦܫܗ ܕܒܐܐܪ ܡܬܥܠܐ ܗ̣ܘܐ. ܘܠܘܬ ܐܠܗܐ ܡܫܢܐ ܗ̣ܘܐ. ܟܕ ܡܠܐܟ̈ܐ ܡܫܝ̈ܢܐ ܘܪ̈ܚܡܝ ܐ̱ܢܫܐ܆ ܐܙܠ̱ܝܢ ܗ̣ܘܘ ܩܕܡܘܗܝ ܘܡܠܘܝܢ ܠܗ. ܘܟܕ ܡܢܬܐ ܡ̣ܢ ܡܪܕܝ̣ܬܗ ܪܕܐ. ܚܙܐ ܐ̱ܚܪ̈ܢܐ ܫܓܝ̈ܫܐ ܘܚܪ̈ܡܐ ܘܒܥܪܝ̣ܪ̈ܝܐ. ܕܚܪܝ̣ܦܐܝܬ ܘܕܚܝ̣ܠܐܝܬ ܚܙܝܢ. ܕܐܬܘ ܘܩܡ̣ܘ ܠܩܘܒܠܗ ܒܐܐܪ. ܘܥ̇ܒܕܝ̣ܢ ܠܗ ܡܥܟܪ̈ܢܐ. ܘܟܠܝܢ ܗ̣ܘܘ ܠܗ ܡ̣ܢ ܗ̇ܝ ܕܢܥܒܪ. ܘܐܡܪܝܢ ܗ̣ܘܘ ܠܗ ܕܐܚܕܝ̣ܢܢ ܠܟ ܐܟܡ̇ܢ ܕܚܝܒܐ ܐܝܬܝܟ ܕܗܠܝܢ ܕܝܠܢ ܘܟܕ ܠܣܘܥܪ̈ܢܘܗܝ ܕܩܕܡ ܕܝܪܝܘܬܗ ܡܒܣܝܢ ܗ̣ܘܘ. ܡܠܐܟ̈ܐ ܐܡܪܝܢ ܗ̣ܘܘ ܕܠܒܘܨܪ̈ܘܗܝ ܟܠܗܘܢ ܩܕ̈ܡܝܐ. ܥܛܐ ܐܢܘܢ ܡܪܝܐ ܒܛܝܒܘܬܗ ܒܝܕ ܥܡ̈ܠܐ ܕܕܝܪܝܘܬܗ. ܗܝܕܝܢ ܥܪܩܘ ܗ̇ܢܘܢ ܘܐܝܟ ܬܢܢܐ ܐܬܛܠܩܘ.

 

 

 

ܣܗܕܘܬܐ ܕܐܪܒܥ

 

ܩܕܝܫܐ ܐܘܓܪܝܣ. ܢܦܫܐ ܦܠܘܚܬܐ ܕܒܛܝܒܘܬܗ ܕܐܠܗܐ ܐܨܠܚܬ݀. ܘܡ̣ܢ ܦܓܪܐ ܫܢܝܬ݀ ܒܗ̇ܢܘܢ ܐܬܪ̈ܘܬܐ ܕܝ̣ܕܥܬܐ ܗ̇ܘܝܐ. ܐܝܟܐ ܕܐܒܪ̈ܐ ܕܠܐ  ܚܫܘܫܘܬܗ̇ ܢܡܢܥܘܢܗ̇.

 

 

 

ܣܗܕܘܬܐ ܕܚܡܫ

 

ܩܕܝܫܐ ܣܐܘܝܪܐ ܒܐܓܪܬܐ ܕܠܘܬ ܬܐܘܡܐ ܕܓܪܡܢܝܩܝ. ܡ̣ܢ ܒܬܪ ܕܡܬܦܪܫܐ ܢܦܫܐ ܡ̣ܢ ܦܓܪܐ. ܒܬܪ ܫܘܢܝܐ ܕܡ̣ܢ ܗܪܟܐ. ܦܓܥܝ̣ܢ ܒܗ̇ ܚܝܠܘ̈ܬܐ ܡܠܐܟܝ̈ܐ ܘܛܒ̈ܐ. ܘܣܝ̈ܥܬܐ ܕܫܐܕ̈ܐ ܒܝ̈ܫܐ. ܐܝܟܢܐ ܕܠܦܘܬ ܡܥܒܕܢ̈ܘܬܐ ܕܥܒܕ̈ܐ ܗܠܝܢ ܕܣܥܪܬ݀. ܐܘ ܒܝ̈ܫܐ ܐܘ ܛܒ̈ܐ. ܠܦܘܬ ܐܬܪ̈ܘܬܐ ܕܙܕܩܝ̣ܢ. ܐܘ ܗܠܝܢ ܐܘ ܗ̇ܢܘܢ ܢܩܒܠܘܢܗ̇ ܕܬܬܢܛܪ ܥܕܡܐ ܠܝܘܡܐ ܐ̱ܚܪܝܐ. ܗ̇ܘ ܕܒܗ ܩܝܡܝ̣ܢܢ ܟܠܢ ܐܘ ܠܕܝ̣ܢܐ ܐܘ ܠܚܝ̈ܐ ܕܠܥܠܡ. ܐܘ ܠܫܠܗܒܝܬܐ ܕܢܘܪܐ ܕܠܐ ܕܥܟܐ. ܐܘ ܠܡܠܟܘܬܐ ܕܫܡܝܐ ܕܠܝܬ ܠܗ̇ ܫܘܠܡܐ ܡܬܬܘܒܠܝ̣ܢܢ.

 

 

 

ܣܗܕܘܬܐ ܕܫܬ

 

ܝܥܩܘܒ ܕܐܘܪܗܝ ܒܡܐܡܪܐ ܕܥܠ ܬܘܩܢܗ ܕܒܪܢܫܐ. ܢܦܫܐ ܕܝܢ ܡܫܢܝܐ ܠܘܬ ܢܦ̈ܫܬܐ ܕܙܕܝ̈ܩܐ܆ ܐܢ ܙܕܝ̣ܩܬܐ ܗ̱ܝ. ܐܘ ܠܘܬ ܢܦ̈ܫܬܐ ܕܪ̈ܫܝܥܐ ܘܥܡ ܫܚܪ̈ܐ ܕܫܐܕ̈ܐ ܡܪ̈ܘܕܐ. ܐܢ ܪܫܝ̣ܥܬܐ ܗ̱ܝ. ܟܠܚܕܐ ܐܝܟ ܦܣܩܐ ܕܢܦܩ ܥܠܝܗ̇ ܡ̣ܢ ܐܠܗܐ ܥܕ ܡܛܐ ܙܒܢܐ ܕܩܝܡܬܐ ܕܟܠܗ ܓܢܣܐ. ܘܕܝ̣ܢܐ ܘܦܘܪܥܢܐ ܟܐܢܐ. ܘܗ̇ܘ ܕܡܬܬܚܝ̣ܒ ܠܟܠܢܫ ܐܝܟ ܥܒܕܘ̈ܗܝ.

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܫܒܝ̣ܥܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܗ̇ܝ ܕܗܢܝ̈ܐܘܬܐ ܪ̈ܘܚܢܝܬܐ ܕܗܘ̈ܝܢ ܠܢܦܫܐ ܡ̣ܢ ܒܬܪ ܫܪܝܐ܆ ܝܬܝܪ ܡܥܠܝ̈ܢ ܘܥܫܝ̈ܢܢ ܡ̣ܢ ܗܢܝ̈ܐܘܬܐ ܗܠܝܢ ܦܓܪ̈ܢܝܬܐ ܘܪ̈ܓܝܓܬܐ ܒܣܪ̈ܢܝܬܐ. ܘܒܗ ܐܝܬ ܢܝܫܐ ܚܕ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܥܘܬܕܐ

 

ܣܓܝ̈ܐܐ ܓܝܪ ܡ̣ܢ ܒܢܝ̈ ܥܠܡܐ ܡܠܝ̣ܣܛܐ ܕܝܢ ܟܠܗܘܢ ܠܐ ܪ̈ܕܝܐ. ܣ̇ܒܪܝܢ ܕܠܝܬ ܗܢܝܐܘܬܐ ܐܠܐ ܗ̇ܝ ܓܘܫܡܢܝܬܐ. ܐܦܠܐ ܛܘܒܬܢܘܬ ܒܘܣܡܐ ܐܠܐ ܗ̇ܝ ܗܘܠܢܝܬܐ. ܘܡܛܠ ܗܕܐ ܠܐ ܨܝ̇ܡܝܢ ܐܘ ܡܨܠܝܢ ܐܘ ܡܪܚܡܝ̣ܢ ܐܘ ܣܟ ܠܐܠܗܐ ܡܦܝ̣ܣܝ̣ܢ. ܐܠܐ ܕܠܐ ܢܚܣܪ ܠܗܘܢ ܡܕܡ ܡ̣ܢ ܪ̈ܓܝܓܬܐ ܗ̇ܢܝܢ ܕܒܡܐܟܠܐ ܘܡܫܬܝܐ ܘܙܘܘ̈ܓܐ ܘܫܪܟܐ. ܒܗܝܢ ܥܠܡܐ ܘܒܗ̇ܘ ܕܥܬܝܕ. ܘܕܪܚܝ̣ܩ ܡ̣ܢ ܩܘܫܬܐ ܣܒܪܐ ܕܐܝܟ ܗܢܐ ܘܫܢܝܐ ܗ̱ܘ. ܡܚܘܝܢ̈ܘܬܐ ܗܠܝܢ ܣܦ̈ܩܢ ܠܡܫܪܪܘ.

 

 

 

ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܠܘ ܗܢܝ̈ܐܘܬܐ ܡܪ̈ܢܝܬܐ ܗܠܝܢ ܗܘܠܢܝ̈ܬܐ ܗܘܝ̈ ܙܕܩ ܗ̣ܘܐ ܕܓܡܠܐ ܗ̇ܘ ܕܒܐܥ̈ܦܐ ܣܓܝ̈ܐܐ ܝܬܝܪ ܡ̣ܢ ܒܪܢܫܐ ܐܟܠ. ܘܕܐܒܐ ܗ̇ܘ ܕܝܬܝܪ ܡܢܗ ܡܟܢ ܠܡܬܢܩܦܘ ܘܠܡܐܟܝܘ. ܘܨܦܪܐ ܕܝܬܝܪ ܡܢܗ ܡܟܢܐ ܠܡܙܕܘܓܘ܇ ܕܡܝܬܪܝܢ ܗ̣ܘܘ ܘܡܥܠܝܢ ܡ̣ܢ ܒܪܢܫܐ. ܘܟܕ ܠܘ ܗܟܢܐ ܐܠܐ ܣܓܝ ܫܝ̣ܛܝ̣ܢ ܘܠܗ ܠܗܢܝ̈ܐܘܬܐ ܗ̱ܝ ܦܓܪ̈ܢܝܬܐ. ܐܠܐ ܒܐܚܪ̈ܢܝܬܐ ܠܐ ܗܘܠܢܝ̈ܬܐ.

 

 

 

ܡܚܘܝܢܘܬܐ ܕܬܪܬܝܢ

 

ܐܡܪܝܢܢ ܐܠܘ ܡܐܟ̈ܠܬܐ ܘܡܫܬܝ̈ܐ ܘܙܘܘ̈ܓܐ ܡܫܡܠܝ̈ܢܐ ܗܘܘ ܕܒܪܢܫܐ. ܙܕܩ ܗ̣ܘܐ ܕܟܡܐ ܕܣܓܝ ܥܡܗܘܢ ܡܬܥܢܐ ܗ̣ܘܐ ܒܪܢܫܐ ܝܬܝܪ ܡܫܬܡܠܐ ܗ̣ܘܐ. ܘܗܐ ܠܘ ܗܟܢܐ. ܒܗ̇ܝ ܕܚܙܝܢܢ ܠܟܠܗܘܢ ܗ̇ܢܘܢ ܕܒܕܐܝܟ ܗܟܢ ܝܘ̈ܡܬܗܘܢ ܦܪܚܘ. ܕܠܒܥܝ̣ܪܐ ܝܬܝܪ ܡ̣ܢ ܕܠܒܢܝ̈ܢܫܐ ܐܬܕܡܝ̣ܘ. ܘܣܓܝ ܢܦ̣ܠܘ ܡ̣ܢ ܕܪܓ ܡܚܫܒܬܐ ܕܗ̣ܝ ܗ̣ܝ ܚܝܠܗ̇ ܩܕܡܝܐ ܕܐ̱ܢܫܘܬܐ.

 

 

 

ܡܚܘܝܢܘܬܐ ܕܬܠܬ

 

ܐܡܪܝܢܢ ܐܠܘ ܗܢܝ̈ܐܘܬܐ ܡܪ̈ܢܝܬܐ ܗܠܝܢ ܡܬܪ̈ܓܫܢܝܬܐ ܗܘܝ̈. ܙܕܩ ܗ̣ܘܐ ܕܒܪܢܫܐ ܝܬܝܪ ܚܣܝ̣ܪ ܗ̣ܘܐ ܘܒܨܝ̣ܪ ܡ̣ܢ ܚܝ̈ܘܬܐ ܕܠܐ ܡܠܬܐ. ܒܗ̇ܝ ܕܠܒܪܢܫܐ ܡ̇ܢ ܚܝܠܐ ܐܝܬ ܟܠܘ̣ܝܐ܆ ܗܘܢܐ ܗ̇ܘ ܕܒܐܡܝ̣ܢܘ̣ ܙܓ̇ܪ ܠܗ ܘܚ̇ܓܪ ܡ̣ܢ ܛܦܝ̣ܠܘܬܐ. ܐܘ ܒܝܕ ܟܘܚܕܐ. ܐܘ ܒܝܕ ܕܚܠܬܐ ܕܡ̣ܢ ܡܣܡܒܪܝܫܐ ܥܠܡܝ̣ܢܝܐ ܐܘ ܥܠܡܢܝܐ. ܚܝ̈ܘܬܐ ܕܝܢ ܡܚܪܪ̈ܢ ܡ̣ܢ ܕܐܝܟ ܗܢܐ ܟܠܘ̣ܝܐ. ܘܡܛܠ ܗܕܐ ܕܡܝܬܪ̈ܢ ܡ̣ܢ ܒܪܢܫܐ ܙܕܩ ܗ̣ܘܐ ܕܢܗܘ̈ܝܢ. ܘܟܕ ܣܓܝ ܒܣܝ̣ܪ̈ܢ ܡܢܗ܆ ܐܦ ܗܢܝ̈ܐܘܬܗܝܢ ܒܣܝ̣ܪ̈ܬܐ ܘܒܨܝ̣ܪ̈ܬܐ ܙܕܩ ܕܢܗܘ̈ܝܢ ܡ̣ܢ ܗܢܝܐܘܬܗ.

 

 

 

ܗܦܟܬܐ

 

ܐܡܪܝܢ ܗܢܝ̈ܐܘܬܐ ܫܪܝܪ̈ܬܐ ܗܠܝܢ ܗܘܠܢܝ̈ܬܐ ܐܢܝܢ. ܘܐܟܡܐ ܕܒܪܢܫܐ ܡܝܬܪ ܡ̣ܢ ܚܝ̈ܘܬܐ ܒܗ̇ ܒܕܡܘ̣ܬܐ ܘܗܢܝ̈ܐܘܬܗ ܡܝܬܪ̈ܢ ܡ̣ܢ ܕܗ̇ܢܝܢ. ܘܐܝ̇ܕܐ ܕܡܝܘ̣ܬܐ ܐܝܬ ܠܡܐܟ̈ܠܬܗ ܘܡܫܬܝܘ̈ܗܝ ܘܡܫܟܒܘ̈ܗܝ ܘܬܟܣ̈ܝܬܗ ܒܕܗ̇ܢܝܢ.

 

 

 

ܦܘܢܝܐ

 

ܐܡܪܝܢܢ ܕܟܠܚܕ ܠܦܘܬ ܟܝܢܗ ܩܛܦ ܗܢܝܐܘܬܗ. ܘܡܛܠܗܕܐ ܠܐ ܣܟ ܒܨܝ̣ܪܐ ܗܢܝܐܘܬܐ ܕܩܛܦܐ ܚܒܫܘܫܬܐ ܡ̣ܢ ܪܝܚ ܙܒܠܐ. ܡ̣ܢ ܗ̇ܝ ܕܩܛܦ ܒܪܢܫܐ ܡ̣ܢ ܪܝ̣ܚ ܘܪܕܐ. ܗܟܘܬ ܘܗܢܝܐܘܬܐ ܕܗܘܝܐ ܠܪ̈ܟܫܐ ܡ̣ܢ ܥܣܒܐ ܗ̇ܘ ܢܝ̣ܣܢܝܐ. ܟܒܪ ܠܐ ܙܥܘܪܝܐ ܡ̣ܢ ܗ̇ܝ ܕܒܪܢܫܐ ܒܦܛܒܓ̈ܐ ܡܦܬܟ̈ܐ. ܗܟܘܬ ܘܣܥܪܐ ܚܕܬܐ ܘܐܒܪ̈ܐ ܚܕ̈ܬܐ ܕܠܒ̈ܫܢ ܚܝ̈ܘܬܐ ܘܦܪ̈ܚܬܐ. ܟܕ ܠܗܠܝܢ ܥܬܝ̈ܩܐ ܡܪ̈ܛܢ ܫܕ̈ܝܢ ܛܟ ܠܐ ܙܥܘܪ ܒܘܣܡܗܝܢ ܕܒܗܟܢ. ܡ̣ܢ ܒܘܣܡܐ ܕܒܪܢܫܐ ܒܬܟܣ̈ܝܬܗ. ܘܡ̣ܢ ܗܠܝܢ ܝ̣ܕܝ̣ܥܐ ܕܒܗ ܒܙܢܐ ܗܢܐ ܕܗܢܝܐܘܬܐ ܫܘܝܢ ܒܪܢܫܐ ܘܚܝ̈ܘܬܐ. ܡܠܘܢ ܕܝܢ ܣܘܒܠܗܝܢ ܕܚܝ̈ܘܬܐ ܝܬܝܪ ܡ̣ܢ ܒܪܢܫܐ. ܘܐܠܨܐ ܕܙܢܐ ܐ̱ܚܪܢܐ ܕܗܢܝܐܘܬܐ ܐ̱ܚܪܬܐ ܣܛܪ ܡ̣ܢ ܗ̇ܝ ܬܗܘܐ ܠܗ ܠܒܪܢܫܐ ܙܕܩܐ ܕܡܝܬܪ̈ܬܗ.

 

 

 

ܡܚܘܝܢܘܬܐ ܕܐܪܒܥ

 

ܐܡܪܝܢܢ ܗ̣ܢܘܢ ܗܠܝܢ ܗܢܝ̈ܐܘܬܐ ܦܓܪ̈ܢܝܬܐ. ܠܘ ܗܢܝ̈ܐܘܬܐ ܐܢܝܢ ܒܫܪܪܐ. ܐܠܐ ܥ̈ܠܬܐ ܡܣܛܝܢ̈ܝܬܐ ܕܚܫ̈ܐ ܒܠܚܘܕ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܟܠܡܐ ܕܥܫܢ ܚܫܐ ܕܡ̣ܢ ܟܦܢܐ. ܗܝܕܝܢ ܝܬܝܪ ܥܫܢܐ ܗܢܝܐܘܬܐ ܕܡ̣ܢ ܡܐܟܠܐ. ܗ̣ܘ ܗܟܘܬ ܘܟܡܐ ܕܥܫܢ ܚܫܐ ܕܡ̣ܢ ܥܪܛܠܝܘܬܐ. ܗܢܐ ܟܠܗ ܥܫܢܐ ܗܢܝܐܘܬܐ ܕܡ̣ܢ ܬܟܣܝ̣ܬܐ. ܒܗ̇ ܒܕܡܘ̣ܬܐ. ܘܟܡܐ ܕܬܩ̇ܦܐ ܠܙܬܐ ܕܡܐܢܝ̈ ܙܪܥܐ ܡ̣ܢ ܣܓܝܐܘܬܗ ܕܡܠܘܘܐ ܘܚܪܝ̣ܦܘܬܗ ܝܬܝܪ ܬܩ̇ܦܐ ܗܢܝܐܘܬܐ ܕܡ̣ܢ ܣܘܦܩܗ ܒܙܘܘܓܐ. ܘܟܕ ܙܢܝ̈ܐ ܕܐܝܟ ܗܠܝܢ ܠܘ ܗܢܝ̈ܐܘܬܐ ܐܢܝܢ ܡܪ̈ܢܝܬܐ. ܒܗ̇ܝ ܕܐܠܘܠܐ ܚܫ̈ܐ ܗܠܝܢ. ܐܦܠܐ ܗ̣ܢܝܢ ܡܢܝ̣̈ܚܢ ܗܘܝ̈. ܐܝܟܢܐ ܐܬܪ ܕܥܪܩܘ ܕܘܘ̈ܢܐ ܘܥܩ̈ܬܐ ܘܬܢ̈ܚܬܐ. ܕܐܝܟ ܗܠܝܢ ܗܢܝ̈ܐܘܬܐ ܙܕܩ ܠܡܒܥܐ. ܗܢܝܐܘܬܐ ܡܕܝܢ ܐ̱ܢܫܝܬܐ ܐ̱ܚܪܬܐ ܗ̱ܝ ܡ̣ܢ ܗܠܝܢ. ܘܠܐ ܒܡܕܡ ܕܡܝܐ ܠܗܝܢ. ܒܕܡܥܠܝܐ ܛܒ ܡܢܗܝܢ. ܘܒܗܘܢܐ ܘܠܘ ܒܪ̈ܓܫܐ ܡܬܩܢܝܐ. ܒܕܝ̣ܕܥܬܐ ܗ̱ܝ ܕܠܦܘܬ ܦܐܝܘܬܗ ܕܡܬܝܕܥܢܐ ܦܐܝܐ.

 

 

 

ܡܚܘܝܢܘܬܐ ܕܚܡܫ

 

ܐܡܪܝܢܢ ܕܝ̣ܕܥܬܐ ܐܢܢܩܝܬܐ ܣܗܕܐ. ܕܪܘܙܐ ܗ̇ܘ ܕܡܠܐܟ̈ܐ ܒܟܣܝܘܬܗܘܢ. ܝܬܝܪ ܡܥܠܝ ܡ̣ܢ ܪܘܙܐ ܗ̇ܘ ܕܒܥܝ̣ܪܐ ܒܟܣܬܗܘܢ ܘܒܟܪ̈ܣܬܗܘܢ. ܘܓܠܝܐ ܕܠܡܠܐܟ̈ܐ ܠܝܬ ܒܘܣܡܐ ܗ̇ܘ ܕܒܪ̈ܓܫܐ. ܘܐܠܘ ܠܝܬ ܗ̣ܘܐ ܒܘܣܡܐ ܐ̱ܚܪܢܐ ܣܛܪ ܡ̣ܢ ܗܢܐ ܪܓܫܢܝܐ. ܡܫܬܟ̈ܚܢ ܗܘܝ̈ ܚܝ̈ܘܬܐ ܕܠܐ ܡܠܬܐ ܝܬܝܪ ܓܡܝ̣ܪ̈ܢ ܘܡܫܡ̈ܠܝܢ ܡ̣ܢ ܡܠܐܟ̈ܐ܆ ܗ̇ܝ ܕܫܟܝ̣ܪܐ. ܒܪܢܫܐ ܡܕܝܢ ܟܕ ܡܨܥܝܐ ܡܕܡ ܕܐܝܬܘܗܝ ܒܝܬ ܡܠܐܟ̈ܐ ܠܚܝ̈ܘܬܐ. ܐܦ ܒܘܣܡܘ̈ܗܝ ܪ̈ܡܝ ܡ̣ܢ ܕܚܝ̈ܘܬܐ ܙܕܩ ܕܢܗܘܘܢ. ܘܒܨܝ̣ܪ̈ܝ ܡ̣ܢ ܕܡܠܐܟ̈ܐ.

 

 

 

ܡܚܘܝܢܘܬܐ ܕܫܬ

 

ܐܡܪܝܢܢ ܕܗ̣ܢܘܢ ܗܠܝܢ ܕܐܡܪܝܢ ܕܠܝܬ ܗܢܝܐܘܬܐ ܐܠܐ ܗܕܐ ܓܘܫܡܢܝܬܐ. ܟܕ ܚܙܝܢ ܠܒܪܢܫܐ ܐ̱ܢܫ ܕܡܫܛ ܫܛܗ̇ ܘܐܬܢܙܪ. ܘܒܕܟܝܘܬܐ ܘܩܕܝܫܘܬܐ ܐܬܥܢܝ̣ ܛܘܒܐ ܠܗ ܝ̇ܗܒܝܢ ܘܡܘܪܒܝ̣ܢ ܠܗ. ܘܕܡܠܐܟ ܒܣܪܐ ܗ̱ܘ ܡܢܨܪܝܢ ܠܗ. ܘܐܠܘ ܐܝܬ ܠܝܬ ܗܘܬ݀ ܗܢܝܐܘܬܐ ܣܛܪ ܡ̣ܢ ܓܘܫܡܢܝܬܐ. ܠܡܒܟܐ ܙܕܩ ܗ̣ܘܐ ܠܗܘܢ ܠܕܐܝܟ ܗ̇ܘ܆ ܘܠܡܬܬܢܚܘ ܥܠܘܗܝ. ܐܟܡ̇ܢ ܕܡ̣ܢ ܗܕܐ ܡܓܠܙ ܓܠܙ ܗ̣ܘ ܠܗ ܘܐ̱ܚܪܬܐ ܠܐ ܡܩܕܐ܇ ܘܗܐ ܠܘ ܗܟܢܐ. ܘܠܗ ܠܗܢܐ ܢܝܫܐ ܪܡܙ ܫܠܝܚܐ ܐܠܗܝܐ ܦܘܠܘܣ ܟܕ ܐܡ̇ܪ. ܕܐܢ ܒܗܠܝܢ ܗ̣ܘ ܚܝ̈ܐ ܒܠܚܘܕ ܡܣܒܪܝ̣ܢܢ ܒܡܫܝܚܐ. ܕܘܝܢܢ ܗ̣ܘ ܡ̣ܢ ܟܠܗܘܢ ܒܢܝ̈ܢܫܐ.

 

 

 

ܡܚܘܝܢܘܬܐ ܕܫܒܥ

 

ܐܡܪܝܢܢ ܐܠܘ ܗܢܝ̈ܐܘܬܐ ܗ̇ܢܝܢ ܒܣܪ̈ܢܝܬܐ ܡܥܠܝܢ ܗܘܝ̈ ܘܡܝܬܪ̈ܢ. ܙܕܩ ܗ̣ܘܐ ܕܡܫܬܒܗܪܘ ܡܫܬܒܗܪ ܗ̣ܘܐ ܒܗܝܢ܇ ܗ̇ܘ ܕܡܫܡܠܝܐܝܬ ܩܢܐ ܗ̣ܘܐ ܠܗܝܢ. ܘܗܐ ܠܘ ܗܟܢܐ. ܒܗ̇ܝ ܕܠܐ ܐ̱ܢܫ ܡ̣ܢ ܡܗܘ̈ܢܐ ܚܙܝܢܢ ܕܐܫܬܒܗܪ ܕܣܓܝ ܐܟ̣ܠ ܐܘ ܐܫܬܝ̣ ܐܘ ܚܟܡ. ܐܠܐ ܐܦ ܘܡܒܗܬ݀ ܒܗܬܝ̣ܢ ܣܥܘܪ̈ܝܗܝܢ ܒܗܝܢ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܒܢ̈ܬ݀ ܩ̈ܠܐ ܕܣܥܪܐ ܗ̇ܢܝܢ ܐܢܝܢ ܕܐܣܘܛܘܬܐ ܘܠܥܒܘܬܐ ܘܫܪܝ̣ܚܘܬܐ ܘܪܓܘܙܬܢܘܬܐ ܡܫܘܕ̈ܥܢ. ܘܡ̣ܢ ܗ̇ܝ ܬܘܒ ܕܠܐ ܐ̱ܢܫ ܩܕܡ ܟܢܫܐ ܚܟܡ ܡܟܝ̣ܪܬܗ. ܘܐܦܢ ܠܐ ܟܠܐܷ ܡ̣ܢ ܢܡܘܣܐ ܕܢܚܟܡܝܗ̇. ܘܐܠܘ ܠܐ ܕܪ̈ܓܝܓܬܐ ܗܠܝܢ ܟܠܗܝܢ ܒܨܝ̣ܪ̈ܢ ܗܘܝ̈ ܘܒܣܝ̣ܪ̈ܢ. ܘܫܝ̣̈ܛܢ ܘܫܛܝ̈ܢ. ܘܣܢ̈ܝܢ ܘܣܪ̈ܝܢ. ܠܐ ܗܟܢܐ ܡܬܟܦܪ̈ܢ ܗܘܝ̈ ܘܡܬܛܡܪ̈ܢ. ܘܒܓܢܝ̣ܙܘܬܐ ܐ̱ܪܙܢܐܝܬ ܡܣܬܥܪ̈ܢ.

 

 

 

ܡܚܘܝܢܘܬܐ ܕܬܡܢܐ

 

ܐܡܪܝܢ ܕܗ̇ܢܘܢ ܕܥܡܪܝ̣ܢ ܒܣܘ̈ܦܝ ܬܒܝܠ ܐܟܙܢܐ ܕܟܘ̈ܫܝܐ ܕܒܩܠܝ̣ܡܐ ܩܕܡܝܐ. ܘܣܪ̈ܡܐܛܐ ܗ̇ܢܘܢ ܕܠܓܘ ܡ̣ܢ ܐܠܢܝ̈ܐ ܕܒܩܠܝ̣ܡܐ ܫܒܝܥܝܐ. ܒܥܠܬ݀ ܡܚܝ̣ܠܘܬ ܚܝܠܗܘܢ ܚܫܘܒܬܢܐ ܘܒܨܝ̣ܪܘܬ ܗܘܢܗܘܢ. ܫܝ̣̈ܛܐ ܐܢܘܢ ܠܘܬ ܟܠܗܘܢ ܒܢܝ̈ܢܫܐ ܘܡ̇ܐܟܝܢ ܘܠܥܒܕܘܬܐ ܒܠܚܘܕ ܚܫܚܝ̣ܢ. ܘܐܦܢ ܒܗ̇ܝ ܕܢܐܟܠܘܢ ܘܢܫܬܘܢ ܘܢܚ̣ܟܡܘܢ ܘܢܢܘܡܘܢ ܠܐ ܣܟ ܒܨܝ̣ܪܝܢ. ܥܡܘܪ̈ܐ ܕܝܢ ܕܩܠܝ̣ܡܐ ܕ. ܒܗ̇ܝ ܕܚܟܝ̣ܡܝܢ ܘܡܗܘܢܝܢ ܘܢܝܚܝܢ ܘܡܫܝܢܝܢ. ܡܥܠܝ̈ܐ ܘܡܝܬܪ̈ܐ ܡ̣ܢ ܟܠܢܫ ܡܬܬܘܕܝܢ. ܘܗ̣ܝ ܗܕܐ ܡܫܘܕܥܐ ܕܡܫܡܠܝܘܬܗ ܕܒܪܢܫܐ ܒܝܕ̈ܥܬܐ ܫܪܝܪ̈ܬܐ ܘܣܥܘܪ̈ܘܬܗ ܡܝܬܪ̈ܬܐ ܗ̇ܘܝܐ. ܘܠܘ ܒܪ̈ܓܝܓܬܐ ܦܓܪ̈ܢܝܬܐ.

 

 

 

ܡܚܘܝܢܘܬܐ ܕܬܫܥ

 

ܐܠܘ ܙܢܐ ܐ̱ܚܪܢܐ ܕܗܢܝܐܘܬܐ ܠܝܬ ܗ̣ܘܐ ܣܛܪ ܡ̣ܢ ܗ̇ܘ ܕܐܘܟܠܐ ܘܫܩܝܐ ܘܚܟܘܡܝܐ. ܠܐ ܙܕܩ ܗ̣ܘܐ ܕܗ̇ܘ ܕܒܐܫܬܥܢܝܐ ܡܕܡ ܩܘܦܣܢܝܐ ܡܫܬܓܡ ܗ̣ܘ ܘܡܬܥܢܐ ܕܢܚܡܣܢ ܥܠ ܟܦܢܐ ܘܨܗܝܐ ܘܐܠܨܝ̈ܬܐ ܐ̱ܚܪ̈ܢܝܬܐ ܐܟܡܐ ܕܙܒܢܝ̈ܢ ܣܓܝ̈ܐܢ ܠܣܓܝ̈ܐܐ ܓܕܫܐ. ܘܟܕ ܗܢܐܘܬܐ ܕܡ̣ܢ ܐܘܟܠܐ ܘܫܩܝܐ ܘܚܟܘܡܝܐ. ܒܦܚܡܐ ܕܗܢܝܐܘܬܐ ܐܫܬܥܢܝܝܬܐ ܒܨܝ̣ܪܬܐ ܡܬܚܘܝܐ. ܟܡܐ ܡܕܝܢ ܒܦܚܡܐ ܕܗܢܝܐܘܬܐ ܕܡ̣ܢ ܝ̣ܕܥܬܐ ܕܐܘܣܝ̈ܐܣ ܢܗܝ̣ܪܬ݀ ܒܟܠ ܕܡܠܐܟ̈ܐ ܘܕܬܠܝܬܝܘܬܐ ܩܕܝܫܬܐ. ܠܐ ܡܕܡ ܙܕܩ ܕܬܬܚܫܒ. ܘܕܐܝܟ ܫܥܘ̣ܬܐ ܡ̣ܢ ܢܘܪܐ ܡܬܦܫܪܐ. ܘܐܝܟ ܥܘ̣ܪܐ ܡ̣ܢ ܩܕܡ ܪܘܚܐ ܡܬܬܕܪܝܐ.

 

 

 

ܡܚܘܝܢܘܬܐ ܕܥܣܪ

 

ܐܡܪܝܢܢ ܐܠܘܠܐ ܗܢܝܐܘܬܐ ܐ̱ܚܪܬܐ ܣܛܪ ܡ̣ܢ ܗ̇ܝ ܕܒܛܥܡܬܐ ܘܓܫܬܐ ܐܝܬ ܗ̣ܘܐ. ܐܝܟܢܐ ܠܠܙܬܐ ܕܡ̣ܢ ܟܦܢܐ ܡܣܝܒܪ ܗ̣ܘܐ ܟܠܒܐ ܘܠܨܝܕܐ ܠܘܬ ܡܪܗ ܛܥܢ ܗ̣ܘܐ. ܘܝܘܢܐ ܠܡܐܟܘܠܬܐ ܕܡ̣ܢ ܟܕܘ ܐܟܠܬ݀ ܩܕܡ ܦܪ̈ܘܓܝܗ̇ ܡܬܝ̣ܒܐ ܗܘܬ݀. ܘܚܝ̈ܘܬܐ ܐ̱ܚܪ̈ܢܝܬܐ ܡܛܠܗ̇ܝ ܕܢܦܪ̈ܩܢ ܝܠܕܝ̈ܗܝܢ ܡ̣ܢ ܩܝ̣ܢܕܘ̈ܢܘ ܡܫܝ̣̈ܡܢܐ. ܡܒܠܥ ܒ̇ܠܥܝ̣ܢ ܒܓܐܪ̈ܐ ܘܠܐ ܥܪܩܝ̣ܢ. ܘܢܚܫܝ̣ܪ̈ܬܢܐ ܐ̱ܚܪ̈ܢܐ ܡܛܠܗ̇ܝ ܕܢܫܬܒܚܘܢ ܘܠܐ ܢܬܓܢܘܢ. ܘܐܦܢ ܝ̇ܕܥܝܢ ܕܡܝܬܝ̣ܢ ܠܐ ܡܗܦܟܝ̣ܢ ܐܦ̈ܐ ܒܐܬܠܝ̣̈ܣܘܬܐ. ܘܟܕ ܗܢܝ̈ܐܘܬܐ ܗܠܝܢ ܗܓܓ̈ܢܝܬܐ ܡܙܟܐ ܙܟܝܢ ܠܗ̇ܝ ܕܛܥܡܬܐ ܘܓܫܬܐ. ܡܢܐ ܙܕܩ ܠܡܣܒܪܘ ܡܛܠ ܗܢܝ̈ܐܘܬܐ ܗ̇ܢܝܢ ܗܘܢܢ̈ܝܬܐ ܕܡܪ̈ܢܝܢ.

 

 

 

ܗܦܟܬܐ

 

ܐܡܪܝܢ ܐܢܗܘ ܕܗܢܝ̈ܐܘܬܐ ܗ̇ܢܝܢ ܗܘܢܢ̈ܝܬܐ ܝܬܝܪ ܥܫܝ̣̈ܢܢ ܡ̣ܢ ܗ̇ܢܝܢ ܪ̈ܓܫܢܝܬܐ. ܐܝܟܢܐ ܡ̣ܢ ܠܒܘܫܐ ܠܒܫܝ̣ܢܢ ܘܡ̣ܢ ܐܘܟܠܐ ܕܐܟܠܝ̣ܢܢ. ܘܡ̣ܢ ܙܢܝ̈ܐ ܐ̱ܚܪ̈ܢܐ ܦܓܪ̈ܢܝܐ ܕܣ̇ܥܪܝ̣ܢܢ ܝܬܝܪ ܡܬܗܢܝܢܢ ܡ̣ܢ ܕܒܣܘܓܐܐ ܕܝܕ̈ܥܬܐ ܕܚ̇ܟܡܝ̣ܢܢ. ܘܡ̣ܢ ܪܓܬܐ ܡܕܡ ܡܬܪܓܫܢܝܬܐ ܟܕ ܡܬܓܠܙܝ̣ܢܢ ܝܬܝܪ ܚܐܫܝ̣ܢܢ. ܘܡ̣ܢ ܝܘܠܦܢ̈ܐ ܣܓܝ̈ܐܐ ܕܠܐ ܝ̇ܕܥܝ̣ܢܢ ܠܐ ܡܣܬܓܦܝ̣ܢܢ.

 

 

 

ܦܘܢܝܐ

 

ܐܡܪܝܢܢ ܕܗ̣ܝ ܗܕܐ ܠܐ ܡܕܪܟܢܘܬܐ ܕܒܗܢܝܐܘܬܐ ܗܘܢܢܝܬܐ ܘܠܙܬܐ ܓܕܫܐ ܠܢܦܫܐ. ܒܥܠܬ݀ ܦܓܪܐ ܗ̇ܘ ܕܟܠܐ. ܗܐ ܓܝܪ ܗ̇ܘ ܕܒܟܘܪܗܢܐ ܡܕܡ ܡܪܬܢܝܐ ܚܫܝ̣ܫ. ܡ̣ܢ ܣܘܓܐܐ ܕܡܐܟ̈ܠܬܐ ܗܢܝ̈ܐܬܐ ܘܚܠܝ̈ܬܐ ܓܥܨ. ܘܡܪܝܪ̈ܬܐ ܠܗܝܢ ܚܒܫ. ܐܝܟ ܕܐܦ ܐ̱ܢܫ ܡ̣ܢ ܚܟܝ̈ܡܐ ܦܘܐܝ̣ܛܐܝܬ ܐܡ̣ܪ. ܕܡܪܝܪ ܕܒܫܐ ܐܝܟܢ ܢܐܡܪ ܐܝܢܐ ܕܛܥܡܗ. ܐܢ ܡܪܬܢܐ ܒܝܫ ܡܘܙܓܐ ܠܐ ܢܗܐ ܦܘܡܗ. ܐܦ ܓܝܪ ܘܗ̇ܘ ܕܓܪܒ ܡܢܬܫܘ ܡܢܬܫ ܗܕܡܘ̈ܗܝ ܘܠܐ ܡܪܓܫ. ܘܗ̇ܘ ܕܬܢܘܒ ܣ̇ܐܛ ܘܠܐ ܡ̇ܐܛ ܡ̣ܢ ܩܕܡ ܢܘܪܐ. ܘܐܟܡܐ ܕܡܘ̈ܙܓܐ ܕܐܝܟ ܗܠܝܢ ܟܘܪ̈ܗܢܐ ܟܕ ܡܣܛܝܢ. ܗܝܕܝܟ ܢܦܠܐ ܡܪܓܫܢܘܬܐ ܒܗܢܝ̈ܐܘܬܐ ܗܠܝܢ ܘܚܫ̈ܐ. ܒܗ̇ ܒܕܡܘ̣ܬܐ. ܘܟܕ ܥܢܢ ܦܓܪܐ ܡܬܩܦܠܐ ܗܝܕܝܢ ܡܕܪܟܐ ܢܦܫܐ ܗܢܝ̈ܐܘܬܗ̇ ܡܬܗܘܢܢ̈ܝܬܐ ܘܚܫܝ̈ܗ̇. ܘܕܠܐ ܝ̣ܕܥܬܐ ܟܘܪܗܢܐ ܗ̱ܝ ܠܢܦܫܐ. ܩܕܝܫܐ ܐܘܓܪܝܣ ܡܫܪܪ ܟܕ ܐܡ̇ܪ. ܥܘܬܪܗ̇ ܕܢܦܫܐ ܝ̣ܕܥܬܐ ܗ̱ܝ ܕܪܘܚ. ܡܣܟܢܘܬܗ̇ ܕܝܢ ܠܐ ܝ̣ܕܥܬܐ. ܐܢܕܝܢ ܠܐ ܝ̣ܕܥܬܐ ܓܠܝ̣ܙܘܬܐ ܗ̱ܝ ܕܝ̣ܕܥܬܐ. ܝ̣ܕܝ̣ܥܐ ܗ̱ܝ ܕܩܕܝ̣ܡ ܗ̣ܘ ܥܘܬܪܐ ܠܡܣܟܢܘܬܐ. ܘܚܘܠܡܢ ܢܦܫܐ ܠܟܘܪܗܢܗ̇.

 

 

 

ܩܦܠܐܘܢ ܬܡܝܢܝܐ ܕܫܬܐܣܬܐ ܬܡܝܢܝܬܐ ܡܛܠ ܚܙ̈ܘܢܐ ܘܓܠܝ̈ܢܐ ܕܕܝܩܐ ܢܦܫܐ ܡܠܝ̣ܠܬܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܚܠܡ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܚܠܡ̈ܐ ܕܓ̈ܠܐ

 

ܩܕܡܝܬ݀ ܝܕܥܬ݀ ܢܦܫܐ ܕܚܝܠܐ ܡܬܗܓܓܢܐ ܕܒܡܨܥܬ݀ ܡܘܚܐ ܫܪܐ. ܥܒܕܐ ܐܝܬ ܠܗ ܟܝܢܐܝܬ ܠܡܪܟܒܘ ܨܘܪ̈ܬܐ ܥܡ ܚܕ̈ܕܐ ܘܠܡܫܪܐ ܐܢܝܢ. ܘܒܙܒܢ ܫܢܬܐ ܝܬܝܪ ܥܫܢܐ ܡܥܒܕܢܘܬܗ. ܒܗ̇ܝ ܕܡܬܒܠܗܝܢ ܚܝ̈ܠܐ ܓܘ̈ܝܐ ܡ̣ܢ ܫܓܡܐ ܕܡ̣ܢ ܠܒܪ. ܘܗ̣ܢܘܢ ܡ̇ܢ ܪ̈ܘܟܒܘܗܝ ܘܫܪ̈ܝܘܗܝ ܒܙܒܢ ܫܪܝܪ̈ܐ ܗܘܝܢ. ܒܙܒܢ ܕܝܢ ܕܓ̈ܠܐ. ܘܠܕܓ̈ܠܐ ܡ̇ܢ܆ ܐܪܒܥ ܐܢܝܢ ܥ̈ܠܠܢ. ܚܕܐ ܡ̇ܢ ܕܟܕ ܡܪܓܫ ܐ̱ܢܫ ܒܡܬܪܓܫܢܐ  ܡܕܡ ܒܥܝ̣ܪܘܬܗ ܘܦܝܫܐ ܕܡܘ̣ܬܗ ܒܠܘܚ ܗܓܓܐ. ܟܕ ܕܡ̇ܟ܆ ܗ̣ܝ ܗ̇ܝ ܕܡܘ̣ܬܐ ܡ̣ܢ ܗܓܓܐ ܠܪܓܫܐ ܡܫܘܬܦܐ ܗ̇ܘ ܕܦܢܛܣܝܐ ܡܬܩܪܐ ܥܒ̇ܪ ܘܡܬܪܓܫ. ܕܬܪܬܝܢ ܕܝܢ ܕܗ̣ܘ ܚܝܠܐ ܚܫܘܒܬܢܐ ܟܕ ܕܡܘ̣ܬܐ ܡܕܡ ܡܪܟܒ ܒܨܘܪ̈ܬܐ ܕܣܘܥܪ̈ܢܐ ܐܝܡܡܝ̈ܐ ܗ̣ܝ ܗ̣ܝ ܕܡܘ̣ܬܐ ܒܗܓܓܐ ܡܬܪܫܡܐ. ܘܒܙܒܢ ܫܢܬܐ ܠܘܬ ܦܢܛܣܝܐ ܥܒ̇ܪܐ ܘܡܬܪܓܫܐ. ܕܬܠܬܐ ܕܝܢ ܗ̇ܘ ܕܟܕ ܡܫܬܓܢܐ ܡܘܙܓܐ ܕܪܘܚܐ ܗ̇ܝ ܕܛܥܝ̣ܢܐ ܠܚܝܠܐ ܡܬܗܓܓܢܐ. ܐܦ ܡܥܒܕܢ̈ܘܬܗ̇ ܡܫܬܓ̈ܢܝܢ ܒܕܓܘܢ ܐܢ ܚܡܝܡܘܬܐ ܥܠܝܗ̇ ܥܠܒܐ܆ ܢܘܪ̈ܘܬܐ ܘܬܢܘܪ̈ܐ ܘܐܬܘ̈ܢܐ ܘܫܠܗܒܝ̈ܬܐ ܚܙܐ. ܘܐܢ ܩܪܝܪܘܬܐ ܥܠܒܐ܆ ܒܪܕܐ ܘܬܠܓܐ ܘܓܠܝ̣ܕܐ ܘܙܪ̈ܝ̣ܒܝܬܐ ܚ̇ܙܐ. ܘܐܢ ܒܡܠܝܘܬܐ ܚܫܝ̣ܫ܇ ܐܝܟ ܗ̇ܘ ܕܡܥܝ̈ܐ ܡܠܝܝ̈ ܙܒܠܐ ܚ̇ܙܐ ܕܣܝ̣ܡܝ̣ܢ ܠܥܠ ܡܢܗ. ܘܐܢ ܥܬܝ̣ܕ ܠܡܕܥܬܘ܆ ܐܝܟ ܗ̇ܘ ܕܒܡܝ̈ܐ ܨܒܝܢ ܕܢܨܒܥܘ̣ܢܝܗܝ ܚ̇ܙܐ. ܕܐܪܒܥ ܕܝܢ ܡܥܒܕܢܘܬܐ ܣܩܘܒܠܝܬܐ ܚܙ̈ܘܐ ܗ̇ܢܘܢ ܕܐܝܟ ܕܒܣܘܓܐܐ ܐܦ ܒܚܠܡ̈ܐ ܝ̇ܨܦܝ̣ܢ ܠܡܛܥܝܘ. ܘܠܟܠ ܚܕ ܡ̣ܢ ܗܠܝܢ ܙܢܝ̈ܐ ܡ̣ܢ ܕܘܒܪܐ ܡܩܕܡܐ ܡܨܐ ܐ̱ܢܫ ܠܡܫܬܘܕܥܘ ܘܠܡܚܪܩ ܕܠܐ ܫܪܝܪ.

 

 

 

ܢܝܫܐ ܬܪܝܢܐ ܡܛܠ ܚܠܡ̈ܐ ܫܪܝܪ̈ܐ

 

ܐܡܪܝܢܢ ܕܟܠܗܘܢ ܣܘܥܪ̈ܢܐ ܕܗ̣ܘܘ ܘܐܝܬܝܗܘܢ ܘܗܘܝܢ. ܝ̇ܕܝ̣ܥܝܢ ܐܢܘܢ ܠܐܠܗܐ ܫܘܒܚܐ ܠܛܝܒܘܬܗ. ܘܟܠܗܘܢ ܣܘܥܪ̈ܢܐ ܕܗ̣ܘܘ ܘܐܝܬܝܗܘܢ܆ ܝ̣ܕܝ̣ܥܝܢ ܠܡܠܐܟ̈ܐ. ܘܡܕܡ ܡ̣ܢ ܗܠܝܢ ܕܗ̣ܘܘ ܘܐܝܬܝܗܘܢ܆ ܝ̣ܕܝ̣ܥܝܢ ܠܢܦ̈ܫܬܐ ܡܠܝ̈ܠܬܐ ܕܐܫܬܪ̈ܝ̣ܝ̣ܢ ܡ̣ܢ ܦܓܪ̈ܝܗܝܢ. ܘܢܦ̈ܫܬܐ ܗ̇ܢܝܢ ܕܠܐ ܥܕܟܝܠ ܫܢܝ̣ܝ̣̈ܢ ܐܝܬ ܠܗܝܢ ܒܟܝܢܐ ܡܟܢܘܬܐ ܕܒܝܬܝܘܬܐ ܘܩܪܝ̣ܒܘܬܐ ܠܘܬ ܐܠܗܐ ܫܘܒܚܐ ܠܛܝܒܘܬܗ ܘܠܘܬ ܡܠܐܟ̈ܐ ܘܠܘܬ ܢܦ̈ܫܬܐ ܟܢܘ̈ܬܗܝܢ. ܡܬܟܠܝ̈ܢ ܕܝܢ ܡ̣ܢ ܐܡܝ̣ܢܘܬܐ ܕܒܝܬܝܘܬܐ ܕܐܝܟ ܗܕܐ ܒܥܠܬ݀ ܐܣܪܐ ܦܓܪܢܝܐ. ܒܕܓܘܢ ܟܕ ܒܗܝ̣ܠܘܬܐ ܡܕܡ ܒܨܝ̣ܪܬܐ ܒܙܒܢ ܫܢܬܐ ܠܗ̇ ܗ̇ܘܝܐ܆ ܐܢܗܘ ܕܠܘ ܣܓܝ ܫܒܝܐ ܘܨܠܝܐ ܒܬܪ̈ܘܗܝ ܕܦܓܪܐ. ܡܬܩܪܒܘ ܡܬܩܪܒܐ ܠܐܘܣܝ̈ܐܣ ܗ̇ܢܝܢ ܪ̈ܘܚܢܝܬܐ ܒܝܬܝܬܗ̇ ܘܡܬܚܠܛܐ ܒܓܘܕܝ̈ܗܝܢ. ܘܡܬܬܨܝ̣ܪܐ ܒܨܘܪ̈ܬܗܝܢ. ܘܡܬܪ̈ܫܡܢ ܒܗ̇ ܝܕ̈ܥܬܐ ܗ̇ܢܝܢ ܕܠܗ̇ ܘܠܦܓܪܗ̇ ܒܝ̈ܬܝܢ܇ ܘܒܗܝܢ ܗܪܓܐ ܒܥܝ̣ܪܘܬܐ. ܐܝܟ ܪܒ ܫܩܘ̈ܬܐ ܗ̇ܘ ܕܥܨܪ ܠܡ ܣܓܘܠܐ ܒܟܣܗ ܕܦܪܥܘܢ ܚܙܐ. ܘܢܚܬܘܡܐ ܕܛܥܝ̣ܢ ܣܠܐ ܐܫܬܪܓܪܓ. ܘܐܒܐ ܗ̇ܘ ܐܫܝ̣ܠܐ ܕܡܪܝܐ. ܕܫܩܘܠ ܠܡ ܠܛܠܝܐ ܘܠܐܡܗ ܘܥܪܘܩ ܠܡܨܪܝܢ. ܘܫܪܟܐ ܕܐ̱ܚܪ̈ܢܝܬܐ. ܘܡܛܠ ܕܚܝܠܐ ܗ̇ܘ ܡܬܗܓܓܢܐ ܟܝܢܐ ܩܢܐ ܡܕܡܝܢܐ ܕܣܘ̈ܟܠܐ ܒܣܘܥܪ̈ܢܐ. ܒܕܓܘܢ ܗ̣ܝ ܕܡܝܘܬܐ ܗ̇ܝ. ܐܢ ܡܫܡܠܝܬܐ ܗ̱ܝ ܠܐ ܣܟ ܡܣܬܢܩ ܗ̇ܘ ܚܠܡܐ ܥܠ ܦܫܪܐ. ܡܛܠ ܕܠܣܘܟܠܗܘܢ ܕܣܘܥܪ̈ܢܐ ܐܝܟ ܕܐܝܬܝܗܘܢ ܘܥܬܝ̣ܕܝܢ ܠܡܗܘܐ܆ ܚܙܐ ܗ̇ܘ ܕܚ̇ܙܐ. ܐܢܕܝܢ ܠܘ ܡܫܡܠܝܬܐ ܗ̱ܝ܇ ܐܠܐ ܒܡܕܡ ܡ̣ܢ ܙܢܝ̈ܐ. ܐܝܟ ܗ̇ܝ ܕܢܬܚܙܐ ܡܕܡ ܒܨܘܪܬ ܣܩܘܒܠܝܗ. ܒܥܠܬ݀ ܕܡܝܘܬܐ ܓܢܣܢܝܬܐ ܕܐܝܬ ܒܝܢܬܗܘܢ. ܐܘ ܐܝܟ ܗ̇ܝ ܕܢܬܚܙܐ ܢܩܦܝܐ ܒܕܘܟܬ݀ ܡܬܢܩܦܢܐ. ܘܗ̇ܘ ܩܕܡܝܐ ܐܝܟ ܒܟܝܐ ܕܡܬܦܫܩ ܒܒܘ̣ܬܐ. ܘܗ̇ܘ ܕܬܪܝܢ܆ ܐܝܟ ܬܘܪ̈ܐ ܫܡܝ̣̈ܢܐ ܕܡܫܘܕܥܝܢ ܥܠ ܫܢܝ̈ܐ ܕܣܒܥܐ. ܘܗ̇ܢܘܢ ܒܓܝܪ̈ܐ ܥܠ ܫܢܝ̈ܐ ܕܟܦܢܐ. ܘܗܢܐ ܡ̣ܢ ܐܢܢܩܝ ܥܠ ܦܫܪܐ ܣܢܝ̣ܩ. ܘܦܫܪܐ ܡ̇ܢ ܐܝܬܘܗܝ܆ ܝ̣ܕܥܬܐ ܕܕܡܝܘܬܐ ܕܒܝܬ ܨܘܪ̈ܬܐ ܡܬܗܓܓܢ̈ܝܬܐ ܠܣܘ̈ܟܠܐ ܗܘܢܢܝ̈ܐ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܡܝܢܝܐ ܕܫܬܐܣܬܐ ܬܡܝ̣ܢܝܬܐ. ܡܛܠ ܓܠܝܢܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܓܠܝ̈ܢܐ ܕܓ̈ܠܐ ܘܥ̈ܠܬܗܘܢ

 

ܐܡܪܝܢܢ ܕܗ̣ܢܝܢ ܗܠܝܢ ܥ̈ܠܬܐ ܐܪܒܥܢ ܕܡܢܝܢܢ ܠܚܠܡ̈ܐ ܟܕ̈ܒܐ. ܐܝܬܝܗܝܢ ܐܦ ܥ̈ܠܬܐ ܕܓܠܝ̈ܢܐ ܕܓ̈ܠܐ. ܘܗ̇ܝ ܩܕܡܝܬܐ ܡ̇ܢ܆ ܐܝܟ ܗ̇ܝ ܕܟܕ ܒܡܬܚܙ̈ܝܢܐ ܘܡܫܬܡ̈ܥܢܐ ܘܡܬܬܣܝ̣̈ܩܢܐ ܘܡܬܛܥ̈ܡܢܐ ܘܡܬܓܫ̈ܫܢܐ ܕܝܬܝܪ ܚܝܠܬܢܝ̈ܢ ܢܬܥܢܐ ܪܓܫܐ ܒܪܝܐ. ܐܦܢ ܢܣܛܘܢ ܗ̣ܢܘܢ ܡܬܪ̈ܓܫܢܐ. ܐܠܐ ܕܡܘ̣ܬܗܘܢ ܒܗܓܓܐ ܦܝܫܐ. ܘܡ̣ܢ ܗܓܓܐ ܠܦܢܛܣܝܐ ܥܒܪܐ. ܘܗܟܢܐ ܥܝ̣ܢ ܒܓܠܐ ܡܬܪܓܫܐ. ܐܝܟ ܗ̇ܝ ܕܒܡܥܒܕܢܘܬܐ ܐܝܬܝܗ̇. ܘܗ̣ܝ ܗܕܐ ܙܒܢܝ̈ܢ ܣܓܝ̈ܐܢ. ܓܕܫܐ ܠܗ̇ܢܘܢ ܕܒܣܗܪܐ ܡܐܨܕܝܢ ܒܛܝ̣ܠܐܝܬ. ܒܕܓܘܢ ܒܟܠܕܘܟ ܣܗܪ̈ܐ ܣܓܝ̈ܐܐ ܚܙܝܢ. ܗ̣ܘ ܗܟܘܬ ܘܗ̇ܢܘܢ ܕܩܝ̈ܢܬܐ ܡܕܡ ܩܝ̣ܬܪ̈ܝܬܐ ܘܢܥ̈ܡܬܐ ܟܢܪ̈ܝܬܐ ܙܒܢܐ ܡܬܝ̣ܚܐ ܫ̇ܡܥܝ̣ܢ. ܘܐܦܢ ܢܫܠܘܢ ܩܝ̣ܬܪ̈ܐ ܘܟܢܪ̈ܐ ܗܠܝܢ.  ܗ̣ܘ ܫܡܥܐ ܠܗܝܢ ܠܩܝ̈ܢܬܐ ܗܠܝܢ ܐܝܟ ܗ̇ܝ ܕܡܬܩܝܬܪ̈ܢ ܫܡܥ. ܘܗܟܢܐ ܗܠܝܢ ܐ̱ܚܪ̈ܢܐ. ܘܗ̇ܝ ܕܬܪܬܝܢ ܬܘܒ ܠܗ̇ܢܘܢ ܕܒܡܕܒܪ̈ܐ ܚܘ̣ܪ̈ܒܐ ܘܒܐܘܪ̈ܚܬܐ ܫܗܪ̈ܝܬܐ ܪܕܝܢ ܣܓܝܐܝܬ ܓܕܫܐ. ܟܕ ܗ̣ܝ ܡܚܫܒܬܗܘܢ ܒܦܢܛܣܝܐ ܡܬܓܫܡܐ. ܘܗ̇ܝ ܕܬܠܬ܆ ܠܫܢܝ̈ܐ ܗ̇ܢܘܢ ܕܒܦܪܢܝܛܝܣ. ܘܠܠܝܬܪ̈ܓܘܝܐ ܣܓܝܐܝܬ ܓܕܫܐ. ܘܗ̇ܝ ܕܐܪܒܥ܆ ܠܝܚܝ̈ܕܝܐ ܥܡܪ̈ܝ ܠܚܘܕܐܝܬ.

 

 

 

ܢܝܫܐ ܬܪܝܢܐ ܡܛܠ ܓܠܝ̈ܢܐ ܫܪܝܪ̈ܐ ܘܥ̈ܠܬܗܘܢ

 

ܐܡܪܝܢܢ ܕܢܦܫܐ ܡܠܝ̣ܠܬܐ ܟܕ ܝܬܝܪ ܚܝܠܬܢܝ̣ܬܐ ܬܗܘܐ ܒܚܝܠܗ̇ ܬܐܘܪܝܛܝܩܝܐ ܐܝܟܢܐ ܕܠܐ ܢܬܡܨܘܢ ܫܓ̈ܡܐ ܥܠܡܢܝ̈ܐ ܠܡܟܠܝܗ̇ ܡ̣ܢ ܡܕܝ̣ܩܢܘܬܐ ܕܠܓܘ ܡ̣ܢ ܣܬܪ̈ܐ ܪ̈ܘܚܢܝܐ. ܘܦܫܝ̣ܩܐܝܬ ܬܗܘܐ ܠܗ̇ ܗ̇ܝ ܕܬܥܡܨ ܪ̈ܓܫܐ ܘܠܒܪ ܡ̣ܢ ܥܠܡܐ ܘܦܓܪܐ ܬܗܘܐ. ܗ̣ܘ ܗ̇ܘ ܙܢܐ ܕܒܙܒܢ ܫܢܬܐ ܐܡ̣ܪܢܢ ܕܗ̇ܘܐ ܠܫܓܝ̣̈ܡܝ ܒܙܢܝ̈ܐ ܦܓܪ̈ܢܝܐ. ܒܙܒܢ ܥܝ̣ܪܘܬܐ ܠܓܡܝ̣ܪ̈ܐ ܕܢܦܫܐ ܚܠܝ̣ܨܬܐ ܐܝܟ ܕܐܡ̣ܪܢܢ ܩܢܝܢ ܗܘܐ. ܘܠܣܘܥܪ̈ܢܐ ܕܗ̣ܘܘ ܘܕܐܝܬܝܗܘܢ ܘܕܗܘܝܢ ܡ̣ܢ ܥܠܡܐ ܡܬܝܕܥܢܐ ܝ̇ܠܦܝܢ ܣܘܟܠܝ̈ܗܘܢ. ܘܟܕ ܗ̣ܢܘܢ ܣܘ̈ܟܠܐ ܒܠܘܚ ܦܢܛܣܝܐ ܡܬܓܫܡܝܢ. ܡܬܪܓܫܢܐܝܬ ܡܬܕܪܟܝ̣ܢ ܒܕܓܘܢ ܗ̣ܝ ܕܡܝܘܬܐܕܒܝܬ ܣܘ̈ܟܠܐ ܠܣܘܥܪ̈ܢܐ ܗ̇ܘܝܐ ܐܢ ܡܫܡܠܝܬܐ ܗ̱ܝ. ܗ̣ܘ ܓܠܝܢܐ ܗ̇ܘ܆ ܠܐ ܣܟ ܡܣܬܢܩ ܥܠ ܦܘܫܩܐ. ܐܝܟ ܓܠܝ̈ܢܐ ܗ̇ܢܘܢ ܕܠܡܘܫܐ ܡܬܚܙܝܢ ܗ̣ܘܘ. ܘܠܗܘܢ ܠܣܘܥܪ̈ܢܐ ܥܝ̣ܢ ܒܓܠܐ ܡܫܘܕܥܝ̣ܢ ܗ̣ܘܘ. ܙܠ ܠܡ ܠܘܬ ܦܪܥܘܢ ܙܦܠܢ ܘܙܦܠܢ. ܘܠܘ ܒܛܘ̈ܦܣܐ ܡܬܡܠܠ ܗ̣ܘܐ ܥܡܗ. ܘܐܝܟ ܗ̇ܝ ܕܒܦܪܟܣܝ̣ܣ. ܕܡܠܠ ܠܡ ܡܠܐܟܗ ܕܡܪܝܐ ܥܡ ܦܝܠܝܦܘܣ ܘܐܡ̣ܪ ܠܗ. ܩܘܡ ܙܠ ܠܬܝܡܢܐ. ܒܐܘܪܚܐ ܡܕܒܪܝܬܐ ܕܢܚܬܐ ܡ̣ܢ ܐܘܪܫܠܡ ܠܓܐܙܐ. ܘܣܓܝ̈ܐܬܐ ܕܐܝܟ ܗܠܝܢ ܐܢܕܝܢ ܠܘ ܡܫܡܠܝܬܐ ܗ̱ܝ. ܡ̣ܢ ܐܠܨ̈ܬܐ ܥܠ ܦܘܫܩܐ ܡܣܬܢܩ ܓܠܝܢܐ ܗ̇ܘ. ܐܝܟ ܚܙ̈ܘܢܐ ܕܚܙܩܝܐܝܠ ܘܕܢܝܐܝܠ. ܕܚܝܘܬܐ ܠܡ ܦܠܢܝܬ. ܥܠ ܡܠܟܘܬܐ ܦܠܢܝܬ ܡܫܘܕܥܐ. ܘܫܪܟܐ ܕܗܠܝܢ ܕܕܡ̈ܝܢ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܡܝܢܝܐ ܕܫܬܐܣܬܐ ܬܡܝܢܝܬܐ ܡܛܠ ܢܦ̈ܫܬܐ ܓܡܝܪ̈ܬܐ ܕܢܒܝ̈ܐ ܘܕܫܠܝ̈ܚܐ ܘܐܒܗ̈ܬܐ. ܘܒܗ ܐܝܬ ܢܝ̈ܫܐ ܐܪܒܥܐ. ܢܝܫܐ ܩܕܡܝܐ ܡܛܠ ܐܝܟܢܝܘܬ ܣܢܝܩܘܬܐ ܕܒܢܝ̈ܢܫܐ ܥܠ ܢܒܝ̈ܐ ܘܫܠܝ̈ܚܐ ܘܗ̣ܝ ܗܕܐ ܒܝܕ ܬܪܬܝܢ ܥ̈ܠܠܢ. ܥܠܬܐ ܩܕܡܝܬܐ

 

ܐܡܪܝܢܢ ܕܓܡܝ̣ܪܘܬܐ ܕܒܪܢܫܐ ܠܘ ܡܕܡ ܐ̱ܚܪܝܢ ܗ̣ܝ. ܐܠܐ ܗ̇ܝ ܕܢܕܥ ܠܫܪܪܐ ܡܛܠ ܝܬܗ. ܘܠܛܒܬܐ ܡܛܠܗ̇ܝ ܕܢܣܥܪܝܗ̇. ܘܙܢܐ ܗ̇ܘ ܩܕܡܝܐ ܒܝܕ ܡܫܡܠܝܘܬܗ ܕܚܝܠܐ ܬܐܘܪܝ̣ܛܝܩܝܐ ܗܘܐ. ܐܟܡ̇ܢ ܕܥܗܢܐ ܢܗܘܐ ܠܗ̇ܝ ܕܢܬܬܨܝܪ̈ܢ ܒܗ ܨܘܪ̈ܬܐ ܕܗܘܝ̈ܐ ܟܠܗܘܢ ܐܝܟ ܕܐܝܬܝܗܘܢ ܟܐܡܬ݀ ܕܠܟܠ ܡܕܡ ܕܐܝܬܘܗܝ܆ ܐܝܟ ܗ̇ܘ ܕܐܝܬܘܗܝ ܘܝܕܥ ܠܗ ܘܠܗ̇ܘ ܕܠܐ ܐܝܬܘܗܝ܆ ܐܝܟ ܗ̇ܘ ܕܠܐ ܐܝܬܘܗܝ. ܘܙܢܐ ܗ̇ܘ ܬܪܝܢܐ. ܒܝܕ ܥܘܫܢܗ ܕܚܝܠܐ ܣܥܘܪܝܐ ܗܘܐ. ܐܟܡ̇ܢ ܕܢܬܡܨܐ ܠܡܗܦܟܘ ܐܦ̈ܐ. ܡ̣ܢ ܥܠܡܐ ܗܢܐ ܘܪ̈ܓܝܓܬܗ ܡܫܬܪ̈ܝܢܝܬܐ. ܘܠܡܐܚܐ ܪܘܚܢܐܝܬ ܟܡܐ ܕܡܨܝܐ ܠܦܓܪ̈ܢܐ. ܘܠܡܬܒܣܡܘ ܒܗܢܝ̈ܐܘܬܐ ܡܬܝܕ̈ܥܢܝܬܐ ܘܡܟܬܪ̈ܢܝܬܐ. ܘܡܛܠ ܕܒܪܢܫܐ ܠܐ ܣ̇ܦܩ ܕܢܬܗܕܐ ܡ̣ܢ ܕܝܠܗ ܠܕܐܝܟ ܗܠܝܢ ܐܠܨܐܝܬ ܐܣܬܢܩ ܥܠ ܡܗܕܝܢܐ ܕܗܘܝܘ ܢܒܝܐ ܐܘ ܫܠܝܚܐ ܐܘ ܓܡܝ̣ܪܐ ܐ̱ܢܫ ܘܡܠܦܢܐ ܠܩܘܫܬܝܢܝܐ ܡ̣ܢ ܐܒܗ̈ܬܐ.

 

 

 

ܥܠܬܐ ܬܪܝܢܝܬܐ

 

ܐܡܪܝܢܢ ܕܒܢܝ̈ܢܫܐ ܡܢܗܘܢ ܡ̇ܢ ܚܣܝ̣ܪ̈ܐ ܐܢܘܢ ܒܬܪ̈ܝܗܘܢ ܚܝ̈ܠܐ ܗܠܝܢ ܢܦܫܢܝ̈ܐ. ܬܐܘܪ̈ܝ̣ܛܝܩܝܐ ܐܡ̇ܪ ܐ̱ܢܐ ܘܦܪ̈ܩܛܝܩܝܐ ܘܡܢܗܘܢ ܡܫܡ̈ܠܝܐ ܐܢܘܢ ܒܬܪ̈ܝܗܘܢ. ܡܢܗܘܢ ܕܝܢ ܡܨܥܝ̈ܐ. ܘܕܚܣܝ̣ܪ̈ܐ ܡ̇ܢ ܘܡܨܥܝ̈ܐ ܒܝܕ  ܡܫܡ̈ܠܝܐ ܕܐܝܬܝܗܘܢ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ ܡܫܬܡܠܝܢ܆ ܓܠܝܐ. ܘܕܠܐ  ܡܣܬܦܩ ܥܠܡܐ ܡ̣ܢ ܐ̱ܢܫ ܡ̣ܢ ܕܐܝܟ ܗܠܝܢ܆ ܝ̣ܕܝ̣ܥܐ ܒܝܕ ܬܪܬܝܢ. ܚܕܐ ܡ̇ܢ ܕܗܐ ܚܙܝܢܢ ܠܒܢܝ̈ܢܫܐ ܕܫܘܚܠܦܐ ܪܒܐ ܐܝܬ ܒܝܢܬܗܘܢ. ܒܝ̣ܕܥܬܗܘܢ ܘܒܣܥܘܪ̈ܘܬܗܘܢ ܥܕܡܐ ܠܗ̇ܝ ܕܚܙܝܢܢ ܒܪܢܫܐ ܐ̱ܢܫ ܕܗܢܐ ܟܠܗ ܣܪܝ̣ܩ ܘܣܦܝ̣ܩ ܡ̣ܢ ܝܕܥܬܐ ܘܫܒܐ ܠܪܓܬܐ. ܕܒܕܡܘ̣ܬܐ ܒܠܚܘܕ ܒܪܢܝܬܐ ܦܪܝ̣ܫ ܡ̣ܢ ܬܘܪܐ ܐܘ ܚܡܪܐ. ܘܐ̱ܚܪ̈ܢܐ ܚܙܝܢܢ ܕܡܨܥܐܝܬ ܐܝܬ ܠܗܘܢ ܠܕܐܝܟ ܗܠܝܢ. ܘܐ̱ܚܪ̈ܢܐ ܬܘܒ ܕܝܬܝܪ ܡܥܠܝܢ. ܘܡ̣ܢ ܐܢܢܩܝ ܕܢܗܘܐ ܒܗܘܢ ܒܪܢܫܐ ܐ̱ܢܫ ܕܠܟܠܗܘܢ ܥܒܪ ܒܡܝܬܪܘܬܐ ܬܐܘܪܝܛܝܩܝܬܐ ܟܝܬ ܘܣܥܘܪܘܬܐ. ܘܗܘܝܘ ܢܒܝܐ ܐܘ ܫܠܝܚܐ ܐܘ ܐܒܐ ܪܘܚܢܝܐ. ܕܒܗ ܘܒܐܝ̈ܕܘܗܝ ܗ̇ܢܘܢ ܐ̱ܚܪ̈ܢܐ ܡܫܬܡܠܝܢ. ܕܬܪܬܝܢ ܕܝܢ ܗ̇ܝ ܕܝ̇ܕܥܝ̣ܢܢ ܕܓܘܫܡܐ ܓܢܣܐ ܗ̱ܘ ܕܐܝܬ ܠܗ ܬܠܬܐ ܐܕ̈ܫܐ. ܚܝܘܬܐ ܘܢܨܒܬܐ ܘܐܣܛܘ̈ܟܣܐ. ܘܝ̇ܕܥܝ̣ܢܢ ܬܘܒ ܕܒܗܠܝܢ ܬܠܬܐ܆ ܚܝܘܬܐ ܡܝܬܪܐ. ܘܒܚܝܘܬܐ ܒܪܢܫܐ ܡܝܬܪ ܡ̣ܢ ܫܪܟܐ ܕܚܝ̈ܘܬܐ. ܣܘܣܝܐ ܠܡ ܘܐܪܝܐ ܘܬܘܪܐ. ܘܡܛܠ ܕܬܚܝܬ ܒܪܢܫܐ ܫܪ̈ܒܬܐ ܐܝܬ ܡܫܚ̈ܠܦܬܐ. ܟܘܫܝ̈ܐ ܘܗܢܕ̈ܘܝܐ ܘܝܘ̈ܢܝܐ ܘܪ̈ܘܡܝܐ ܘܒܪܒܪ̈ܝܐ. ܘܐܠܢܝ̈ܐ ܘܗܘ̈ܢܝܐ. ܘܓܠܝܐ ܕܗ̇ܢܘܢ ܕܒܩܠܝ̣ܡܐ ܪܒܝ̣ܥܝܐ ܝܬܝܪ ܡ̣ܢ ܟܠܗܘܢ ܡܝܬܪܝ̣ܢ. ܘܡܛܠ ܕܗ̇ܢܘܢ ܕܒܩܠܝܡܐ ܗܢܐ ܥܠܒܝ̣ܢ ܠܚܕ̈ܕܐ ܒܡܝܬܪ̈ܬܐ. ܡ̣ܢ ܐܠܨ̈ܬܐ ܕܢܫܬܟܚ ܒܟܠܗܘܢ ܒܪܢܫܐ ܐ̱ܢܫ ܗ̇ܘ ܕܝܬܝܪ ܡ̣ܢ ܟܠܗܘܢ ܡܫܡܠܝ ܘܣܦܩ ܕܐܦ ܠܐܚܪ̈ܢܐ ܢܫܡܠܐ. ܘܗܘܝܘ ܡܗܕܝܢܐ ܡܪܢܝܐ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܒܕܐܝܟ ܐܝܠܝܢ ܡܗܕܝܢ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ

 

ܐܡܪܝܢܢ ܕܬܪܝܢ ܐܢܘܢ ܟܘܪ̈ܗܢܐ ܕܢܦ̈ܫܬܐ. ܚܕ ܡ̇ܢ ܪܚܝ̣ܩܘܬܐ ܕܡ̣ܢ ܐܠܗܐ ܘܐܠܗܝ̈ܬܐ܆ ܘܐ̱ܚܪܢܐ ܩܪܝ̣ܒܘܬܐ ܕܠܘܬ ܗܘܠܐ ܘܗܘܠܢܝ̈ܬܐ. ܘܡܛܠ ܕܢܒܝ̈ܐ ܘܫܠܝ̈ܚܐ ܘܐܒܗ̈ܬܐ ܐܣܘ̈ܬܐ ܐܢܘܢ ܕܢܦ̈ܫܬܐ. ܡ̣ܢ ܕܐܝܟ ܗܠܝܢ ܚܫ̈ܐ ܡܣܡܣܡܝ̣ܢ ܠܗܘܢ ܠܒܢܝ̈ܢܫܐ. ܘܗ̣ܝ ܗܕܐ ܡܗܕܝܢܘܬܐ ܗܝܕܝܟ ܗܘܝܐ ܠܗܘܢ ܡܫܡܠܝܬܐ. ܟܕ ܡܬܡܨ̈ܝܢ ܢܦ̈ܫܬܗܘܢ ܠܡܦܢܝܘ ܠܢܦ̈ܫܬܐ ܐ̱ܚܪ̈ܢܝܬܐ. ܡ̣ܢ ܗܘܠܐ ܘܗܘܠܢܝ̈ܬܐ ܠܘܬ ܐܠܗܐ ܘܐܠܗܝ̈ܬܐ. ܘܟܕ ܗܢܘ ܢܝܫܐ ܕܥܒܕܗܘܢ. ܡ̣ܢ ܝܬܝܪ̈ܬܐ ܗ̱ܝ ܠܗܘܢ ܕܢܕܥܘܢ. ܠܐܘܡܢ̈ܘܬܐ ܐ̱ܚܪ̈ܢܝܬܐ ܐܣܝܘܬܐ ܠܡܐܡܪ ܘܓܐܘܡܝܛܪܝܐ ܘܐܪܝܬܡܐܛܝܩܝ ܘܫܪܟܐ ܕܐ̱ܚܪ̈ܢܝܬܐ. ܕܠܐ ܥ̈ܐܠܢ ܒܢܝ̣ܫܗܘܢ. ܐܠܐ ܐܦ ܫܓ̈ܡܢ ܠܗܘܢ ܐܘܡܢ̈ܘܬܐ ܗܠܝܢ. ܘܟܠܝ̈ܢ ܐܢܘܢ ܠܗܘܢ ܡ̣ܢ ܗ̇ܝ ܕܡܫܡܠܝܐܝܬ ܒܗܠܝܢ ܐܠܗܝ̈ܬܐ ܢܬܓܘܘܢ.

 

 

 

ܢܝܫܐ ܬܠܝܬܝܐ ܡܛܠ ܕܝܠܝ̈ܬܐ ܕܢܦ̈ܫܬܗܘܢ ܕܢܒܝ̈ܐ ܘܕܫܠܝ̈ܚܐ ܘܕܐܒܗ̈ܬܐ ܓܡܝܪ̈ܐ ܘܡܠܦܢ̈ܐ ܒܚܝ̣ܪ̈ܐ ܘܐܝܬܝܗܝܢ ܐܪܒܥ. ܕܝܠܝܬܐ ܩܕܡܝܬܐ

 

ܢܦܫܗ ܕܢܒܝܐ ܐܘ ܕܫܠܝܚܐ ܐܘ ܕܚܕ ܡ̣ܢ ܓܡܝ̣ܪ̈ܐ. ܟܕ ܡܬܬܨܡܚܐ ܒܨܡ̈ܚܐ ܐܠܗܝ̈ܐ ܘܡܬܬܙܠܓܐ ܒܙܠܓ̈ܐ ܫܡܝ̈ܢܐ. ܡܬܥܫܢܘ ܡܬܥܫܢܐ ܘܡܬܢܝܪܐ ܒܠܐ ܗܘܠܢܝܘܬܗ̇. ܘܡܫܬܠܛܘ̣ ܡܫܬܠܛܐ ܒܥܠܡܐ ܗܢܐ ܕܗܘܝܐ ܘܚܘܒܠܐ. ܘܡܫܬܡܥܝ̣ܢ ܠܗ̇ ܐܣܛܘܟ̈ܣܐ. ܘܡܫܬܝ̈ܢܢ ܥܡܗ̇ ܚܝ̈ܘܬܐ ܗ̇ܢܝܢ ܒܥܪܝ̣ܪ̈ܝܬܐ ܘܡܐܟܝܢ̈ܝܬܐ. ܐܪ̈ܝܘܬܐ ܐܡ̇ܪ ܐ̱ܢܐ ܘܕܐܒ̈ܐ ܘܕܒ̈ܐ ܘܫܪܟܐ. ܘܗܟܢܐ ܬܕܡܪ̈ܬܐ ܬܡܝ̣̈ܗܬܐ ܕܠܐ ܒܥܝܕ ܣܥܪܐ. ܘܗ̣ܢܝܢ ܣܗ̈ܕܢ ܠܗ̇ ܕܡ̣ܢ ܐܠܗܐ ܐܫܬܟܢ ܠܗ̇ ܚܝܠܐ ܕܐܝܟ ܗܢܐ ܚܣܝ̣ܢܐ.

 

 

 

ܕܝܠܝܬܐ ܬܪܝܢܝܬܐ

 

ܢܦܫܐ ܕܚܕ ܡ̣ܢ ܗܠܝܢ ܓܡܝ̣ܪ̈ܐ ܦܪܝܫܬܐ ܙܕܩ ܕܬܗܘܐ. ܡ̣ܢ ܫܪܟܐ ܕܢܦ̈ܫܬܐ ܐ̱ܚܪ̈ܢܝܬܐ ܒܡܫܡܠܝܘܬܐ ܕܒܬܐܘܪܝܐ ܘܣܥܘܪܘܬܐ. ܒܟܡܝܘܬܐ ܟܝܬ ܘܒܐܡܝ̣ܢܘܬܐ. ܒܟܡܝܘܬܐ ܡ̇ܢ ܒܗ̇ܝ ܕܬܐܘܪ̈ܝܐܣ ܡܫܪ̈ܬܚܬܐ ܙܕܩ ܠܗ̇ ܕܬܕܥ ܡ̣ܢ ܗܠܝܢ ܐܠܗܝ̈ܬܐ. ܘܒܐܝܢܝܘܬܐ ܕܝܢ ܒܗ̇ܝ ܕܝ̣ܕܥܬܗ̇ ܡܪܢܝܬܐ ܘܪܚܝ̣ܩܬ݀ ܡ̣ܢ ܙܐܦܐ ܕܫܐܝ̣ܠܘܬܐ ܙܕܩ ܕܬܗܘܐ.

 

 

 

ܕܝܠܝܬܐ ܬܠܝܬܝܬܐ

 

ܗ̇ܢܘܢ ܙܠܓ̈ܐ ܕܨܡܚܝ̣ܢ ܥܠܝܗܝܢ ܕܢܦ̈ܫܬܗܘܢ ܕܓܡܝ̣ܪ̈ܐ. ܥܛܦܝ̣ܢ ܡܢܗܘܢ ܙܠܓ̈ܐ ܐ̱ܚܪ̈ܢܐ ܥܠ ܢܦ̈ܫܬܗܘܢ ܕܗ̇ܢܘܢ ܕܡܬܬܦܝ̣ܣܝ̣ܢ ܠܡܠܦܢ̈ܘܬܗܘܢ ܘܡܬܢܗܪܝܢ ܒܗܝܢ. ܐܝܟ ܐܝܬܐ ܠܡܐܡܪ. ܨܡ̈ܚܐ ܗ̇ܢܘܢ ܕܡ̣ܢ ܫܡܫܐ. ܥܠ ܡܚܙܝ̣ܬܐ ܡܕܡ. ܐܘ ܡܝ̈ܐ ܨܠܝ̣̈ܠܐ. ܐܘ ܓܘܫ̈ܡܐ ܐ̱ܚܪ̈ܢܐ ܕܟܝ̈ܐ ܨܡܚܝ̣ܢ. ܘܡܢܗܘܢ. ܥܠ ܐܣ̈ܐ ܕܠܘܩܒܠܗܘܢ ܥ̇ܛܦܝ̣ܢ. ܫܡܫܐ ܡܕܝܢ ܗ̣ܘ ܐܠܗܐ ܫܘܒܚܐ ܠܛܝܒܘܬܗ ܘܡܠܐܟ̈ܐ. ܘܡܚܙܝ̣ܬܐ ܗ̣ܢܘܢ ܓܡܝܪ̈ܐ. ܘܐܣ̈ܐ ܗ̇ܢܘܢ ܕܠܗܘܢ ܡܬܬܠܡܕܝ̣ܢ.

 

 

 

ܕܝܠܝܬܐ ܪܒܝܥܝܬܐ

 

ܘܗ̣ܢܘܢ ܡ̇ܢ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ. ܟܕ ܡ̣ܢ ܐܠܗܐ ܩܢܝܢ ܠܛܘܒܬܢܘܬܐ ܗܕܐ ܕܡܫܬܡܠܝܢܘܬܐ. ܟܠܗܘܢ ܗ̇ܢܘܢ ܕܠܗܘܢ ܢܩܦܝ̣ܢ. ܐܦ ܗ̣ܢܘܢ ܒܛܘܒܬܢܘܬܗܘܢ ܡܫܬܘܬܦܝ̣ܢ ܘܡܢܗܘܢ ܘܒܝܕܗܘܢ ܡܫܬܡܠܝܢ.

 

 

 

ܢܝܫܐ ܪܒܝܥܝܐ ܡܛܠ ܬܪ̈ܥܝܬܐ ܕܗܘܝ̈ ܠܒܢܝ̈ܢܫܐ ܡܛܠ ܬܕܡܪ̈ܬܐ ܕܒܐܝ̈ܕܝ ܓܡܝܪ̈ܐ ܡܣܬܥܪ̈ܢ

 

ܬܪܬܝܢ ܐܢܝܢ ܬܪ̈ܥܝܬܐ ܗ̇ܢܝܢ ܕܗܘ̈ ܠܒܢܝ̈ܢܫܐ ܥܠܘܗܝ ܕܢܝܫܐ ܗܢܐ. ܚܕܐ ܡ̇ܢ ܕܗ̇ܢܘܢ ܕܐܚܝ̣ܕܝܢ ܒܢܡܘ̈ܣܐ ܐܠܗܝ̈ܐ ܘܒܢܒܝ̈ܐ. ܘܡܘܕܝܢ ܕܟܠܗܝܢ ܬܕܡܪ̈ܬܐ ܡ̣ܢ ܐܠܗܐ ܒܐܝ̈ܕܝ ܗ̇ܢܘܢ ܕܨܒܐ ܒܗܘܢ ܡܪܝܐ ܡܣܬܥܪ̈ܢ. ܘܒܗ̇ ܒܬܪܥܝ̣ܬܐ ܗܕܐ ܫܘܝܢ ܐܢܘܢ ܝܘܕܝ̈ܐ ܘܡܫܝ̈ܚܝܐ ܘܡܫܠܡܢ̈ܐ. ܕܬܪܬܝܢ ܕܝܢ ܬܪܥܝ̣ܬܐ ܕܦܝܠܠܘܣܘ̈ܦܐ ܒܪ̈ܝܐ. ܘܗ̣ܢܘܢ ܗܠܢ ܠܐܪܒܥܐ ܙܢܝ̈ܐ ܡܦܠܓܝ̣ܢ ܠܬܕܡܪ̈ܬܐ. ܙܢܐ ܩܕܡܝܐ ܡܬܡܨܝܢܘܬ ܓܡܝܪ̈ܐ ܥܠ ܗ̇ܝ ܕܢܬܟܠܘܢ ܡ̣ܢ ܣܝܒܪܬܐ ܐܘܟܝܬ ܢܨܘܡܘܢ ܡܬܚܐ ܕܛܒ ܡܬܝ̣ܚ. ܕܬܪܬܝܢ ܕܝܢ ܕܣܥܘܪ̈ܘܬܐ ܕܝܬܝܪ ܥܫܝ̣̈ܢܢ ܘܚܝܠܬܢܝ̈ܢ. ܟܕ ܗ̣ܢܘܢ ܡܚܝܠܝ̣ܢ ܢܣܥܪܘܢ. ܕܬܠܬܐ ܕܝܢ ܥܠ ܥܬܝ̈ܕܬܐ ܢܩܕܡܘܢ ܢܕܥܘܢ ܘܢܘܕܥܘܢ. ܕܐܪܒܥܐ ܕܝܢ ܕܢܫܥܒܕܘܢ ܠܡ ܠܐܣܛܘܟ̈ܣܐ ܘܠܚܝ̈ܘܬ ܒܥܪܝ̣ܪ̈ܝܬܐ. ܘܠܙܢܐ ܗ̇ܘ ܩܕܡܝܐ ܡܫܪܪܝ̣ܢ ܘܐܡܪܝܢ ܕܒܪܢܫܐ ܡ̇ܢ ܟܕ ܡܬܟܪܗ ܟܘܪܗܢܐ ܡܕܡ ܚܡܝ̣ܡܐ ܙܒܢܐ ܡܕܡ ܢܓܝܪܐ ܡܟܬܪ ܘܠܐ ܡܣܬܝܒܪ. ܒܥܠܬ݀ ܗ̇ܝ ܕܚܡܝܡܘܬܐ ܟܝܢܝܬܐ ܒܕܝܚܗ ܕܟܘܪܗܢܐ ܫܓܝ̣ܡܐ. ܘܡܛܠܗܕܐ ܥܠ ܬܘܪܣܝܐ ܠܐ ܡܣܬܢܩܐ. ܒܗ̇ܝ ܒܕܡܘ̣ܬܐ ܘܓܡܝܪܐ ܟܕ ܡܫܬܓܡܐ ܢܦܫܗ ܒܥܘܗܕܢܐ ܕܬܐܘܪ̈ܝܐܣ ܐܠܗܝ̈ܬܐ. ܡܬܢܬܦܐ ܥܡܗ ܘܚܡܝܡܘܬܐ ܟܝܢܝܬܐ. ܘܗܟܢܐ ܙܒܢܐ ܢܓܝ̣ܪܐ ܡܟܬܪ ܘܥܠ ܣܝܒܪܬܐ ܠܐ ܡܣܬܢܩ. ܘܠܙܢܐ ܬܪܝܢܐ ܡܫܪܪܝ̣ܢ ܘܐܡܪܝܢ. ܕܙܒܢܝ̈ܢ ܣܓܝ̈ܐܢ ܚܙܝܢܢ. ܕܟܕ ܡܬܚܡܬ݀ ܒܪܢܫܐ. ܐܘ ܟܕ ܚܕܐ ܣܥܘܪ̈ܘܬܐ ܕܝܬܝܪ ܥܫܝ̈ܢܢ ܡܢܗ ܣ̇ܥܪ. ܘܟܕ ܩܢܛ ܘܙܐܥ ܐܘ ܡܬܬܥܝ̣ܩ ܟܠܢܐܝܬ ܡܘܦܐ ܚܝܠܗ. ܒܗ̇ ܒܕܡܘ̣ܬܐ ܡܕܝܢ ܘܓܒܪܐ ܓܡܝ̣ܪܐ. ܟܕ ܒܪܘܙܐ ܗ̇ܘ ܐܠܗܝܐ ܐܝܟ ܕܒܝܡܐ ܡܬܛܒܥ. ܠܐ ܕܡܝ̣ܪܐ. ܐܢ ܣܥܘܪ̈ܘܬܐ ܕܬܩܝ̣̈ܦܢ ܡܢܗ ܢܣܥܘܪ. ܐܘ ܡܪܕܐ ܥܣܪܐ ܝܘܡܝ̈ܢ ܒܚܕ ܝܘܡܐ ܢܗܠܟ. ܘܠܙܢܐ ܬܠܝܬܝܐ ܡܫܪܪܝ̣ܢ ܘܐܡܪܝܢ. ܕܠܝܬ ܒܪܢܫܐ ܕܠܐ ܢܣܝ̣ ܒܢܦܫܗ ܕܒܙܒܢ ܫܢܬܐ ܚܠܡ̈ܐ ܚܙܐ ܕܙܒܢܝ̈ܢ ܣܓܝ̈ܐܢ ܠܐ ܦܪܝܫܝܢ ܡ̣ܢ ܢܒܝܘܬܐ ܒܫܪܪܗܘܢ. ܘܗ̣ܝ ܗܕܐ ܒܥܠܬ݀ ܗ̇ܝ ܕܟܕ ܡܬܒܗܠܐ ܢܦܫܐ ܙܒܢ ܫܢܬܐ ܡ̣ܢ ܫܓ̈ܡܐ ܥܠܡܢܝ̈ܐ ܡܬܚܝܕܐ ܒܥܠܡ ܪ̈ܘܚܢܐ. ܘܡܬܐܪܙܐ ܡܢܗܘܢ ܡܛܠ ܥܬܝ̈ܕܬܐ. ܒܕܓܘܢ ܠܐ ܕܡܝ̣ܪܐ. ܐܢ ܢܦܫܗ ܕܓܡܝ̣ܪܐ ܒܥܠܬ݀ ܡܫܡܠܝܘܬܗ̇ ܐܦ ܒܙܒܢ ܥܝ̣ܪܘܬܐ ܬܩܢܐ ܗ̇ܘ ܕܐ̱ܚܪ̈ܢܐ ܒܙܒܢ ܫܢܬܐ. ܘܠܙܢܐ ܗ̇ܘ ܪܒܝܥܝܐ ܡܫܪܪܝܢ ܘܐܡܪܝܢ. ܕܗܐ ܚܙܝܢܢ ܚܘ̈ܫܒܐ ܕܒܢ ܕܡܫܚܠܦܘ ܡܫܚܠܦܝ̣ܢ ܦܓܪ̈ܝܢ. ܒܕܓܘܢ ܠܐ ܕܡܝ̣ܪܐ. ܐܢ ܚܘ̈ܫܒܐ ܕܓܡܝܪ̈ܐ. ܐܦ ܠܓܘܫ̈ܡܝܗܘܢ ܕܐܣܛܘܟ̈ܣܐ ܘܕܚܝ̈ܘܬܐ ܠܐ ܡܠܝ̈ܠܬܐ ܢܫܚܠܦܘܢ. ܘܢܫܥܒܕܘܢ ܐܢܘܢ ܠܨܒܝܢܗܘܢ. ܐܟܡܐ ܕܚܘ̈ܫܒܝܢ ܠܓܘ̈ܫܡܝܢ. ܘܬܘܒ ܐܡܪܝܢܢ ܕܣܥܘܪ̈ܘܬܐ ܢܘܟܪ̈ܝܬ݀ ܠܥܝܕܐ ܐܘܟܝܬ ܬܕܡܪ̈ܬܐ ܡ̣ܢ ܬܠܬ ܥ̈ܠܠܢ ܡܣܬܥܪ̈ܢ ܒܥܠܡܐ ܗܢܐ. ܚܕܐ ܡ̇ܢ ܕܗ̣ܝ ܢܦܫܐ ܡܠܝܠܬܐ ܒܟܝܢܗ̇ ܬܗܘܐ ܩܢܝܐ ܕܝ̣ܠܝܬܐ ܕܣܥܘܪܘܬ ܬܕܡܪ̈ܬܐ ܛܒ̈ܬܐ ܘܡܘܬܪ̈ܢܝܬܐ ܐܢ ܢܦܫܐ ܗ̱ܝ ܕܢܒܝܐ. ܐܘ ܕܒܝ̈ܫܬܐ ܘܡܣܓ̈ܦܢܝܬܐ ܐܢ ܢܦܫܐ ܗ̱ܝ ܕܚܪܫܐ. ܕܬܪܬܝܢ ܕܝܢ ܬܕܡܪ̈ܬܐ ܗ̇ܢܝܢ ܕܒܡܨܥܝܘܬ ܚܝ̈ܠܐ ܐܣܛܘܟ̈ܣܝܐ ܡܣܬܥܪ̈ܢ. ܐܝܟ ܢܬܘܦܘܬ ܡܓܢܝܛܝܣ ܠܦܪܙܠܐ. ܕܬܠܬ ܕܝܢ ܗ̇ܢܝܢ ܕܒܡܨܥܝܘܬ ܚܝ̈ܠܐ ܡܘܙܠܬܢܝ̈ܐ ܡܣܬܥܪ̈ܢ. ܐܟܙܢܐ ܕܛܠܝ̈ܣܡܐܛܐ.

 

 

 

ܫܠܡܬ݀ ܫܬܐܣܬܐ ܬܡܝܢܝܬܐ

 

 

 

 

 

 

 

 

     #1 

 

ܫܬܐܣܬܐ ܬܫܝܥܝܬܐ

 

ܡܛܠ ܫܠܝ̣ܛܘܬ ܒܝܬܐ ܘܚܐܪܘܬܐ ܕܐܝܬ ܠܟܝܢܐ ܐ̱ܢܫܝܐ. ܘܡܛܠ ܒܥ̈ܬܐ ܕܙܕܩ ܕܢܬܩܕ̈ܡܢ ܥܠܝܗ̇ ܕܒܥܬܐ ܗܕܐ. ܘܡܛܠ ܚܠܩܐ ܘܚܪܩܐ܇ ܘܡܛܠ ܩܨܐ. ܘܒܗ ܐܝܬ ܥܘܬܕܐ ܘܩܦ̈ܠܐܐ ܚܡܫܐ. ܩܕܡܝܬ ܥܘܬܕܐ

 

ܬܪܝܢ ܐܢܘܢ ܪ̈ܥܝܢܐ ܓܢܣܢܝ̈ܐ. ܕܗ̣ܘܘ ܠܒܢܝ̈ܢܫܐ ܥܠ ܒܥܬܐ ܗܕܐ. ܡܢܗܘܢ ܓܝܪ ܡܒܛܠܘ̣ ܒܛܠܘܗ̇ ܠܚܐܪܘܬܐ ܘܫܠܝ̣ܛܘܬ ܒܝܬܐ ܐ̱ܢܫܝܬܐ. ܡܢܗܘܢ ܕܝܢ ܡܫܪܪܘ ܫܪܪܘܗ̇. ܘܡܒܛܠܢܝ̈ܗ̇ ܡ̇ܢ ܠܐܪܒܥ ܣܝ̣̈ܥܢ ܐܬܦܫܚܘ.

 

ܣܝܥܬܐ ܩܕܡܝܬܐ:

 

ܐܡܪܬ݀ ܕܟܠ ܣܥܘܪܘܬܐ ܥܠ ܥܠܬܐ ܣܢܝ̣ܩܐ ܒܗܘܝܗ̇. ܒܗ̇ܝ ܕܐܝ̣ܩܝ̣ ܘܒܐܛܘܡܐܛܘܢ ܠܐ ܡܕܡ ܐܣܬܥܪ ܐܘ ܡܣܬܥܪ ܒܥܠܡܐ. ܒܕܓܘܢ ܟܕ ܡܬܛܝܒܐ ܥܠܬܐ ܡܗܘܝܢܝ̣ܬܗ̇ ܕܡܥܒܕܢܘܬܐ. ܘܢܩܦ ܠܗ̇ ܚܝܠܐ ܐܘܟܝܬ ܡܬܡܨܝܢܘܬܐ ܕܗ̇ܘ ܕܒܐܝ̈ܕܘܗܝ ܡܣܬܥܪܐ ܐܢܢܩܐܝܬ ܡܣܬܥܪܐ. ܘܐܠܐ ܐܢܢܩܐܝܬ ܠܐ ܡܣܬܥܪܐ. ܘܟܕ ܟܠ ܡܕܡ ܐܢܢܩܐܝܬ ܡܣܬܥܪ ܐܘ ܟܠ ܡܕܡ ܐܢܢܩܐܝܬ ܡܣܬܥܪ ܐܘ ܠܐ ܡܣܬܥܪ. ܐܝܟܐ ܗ̱ܝ ܚܐܪܘܬܐ ܐ̱ܢܫܝܬܐ ܗ̇ܝ ܕܐܡܪܝܬܘܢ ܕܡܨܝܐ ܕܬܣܥܘܪ ܘܕܠܐ ܬܣܥܘܪ.

 

ܣܝܥܬܐ ܬܪܝܢܝܬܐ:

 

ܐܡܪܬ݀ ܕܥܠܬܐ ܡܗܘܝܢܘܬܗ̇ ܕܡܥܒܕܢܘܬܐ ܐ̱ܢܫܝܬܐ ܒܝܕ ܬܪ̈ܝܗܘܢ ܚܝ̈ܠܐ. ܕܒܪܘܝܐ ܟܝܬ ܘܕܒܪܢܫܐ ܗܘܝܐ. ܘܗ̣ܝ ܣܝ̣ܥܬܐ ܗܕܐ ܠܐ ܡܬܚܡܨܐ ܐܦܠܐ ܡܨܛܡܥܪܐ ܕܬܐܡܪ. ܕܡܣܬܝܥܘ ܠܡ ܡܣܬܝܥ ܚܝ̣ܠ ܒܪܘܝܐ ܒܚܝ̣ܠ ܒܪܢܫܐ. ܘܠܝܬ ܣܥܘܪܘܬ ܡܕܒܪܢܘܬܐ ܐ̱ܢܫܝܬܐ.

 

ܣܝܥܬܐ ܬܠܝܬܝܬܐ:

 

ܐܡܪܬ ܕܗ̇ܝ ܕܢܙܝ̣ܥ ܒܪܢܫܐ ܐܝܕܗ ܘܢܣܒ ܡܕܡ ܡ̣ܢ ܐܠܗܐ ܗ̱ܝ ܠܗ. ܒܪܡ ܕܝܢ ܗ̣ܘ ܙܢܗ ܕܙܘܥܐ܆ ܡ̣ܢ ܕܝܠܗ ܗ̣ܘ ܠܗ܇ ܘܠܘ ܡ̣ܢ ܐܠܗܐ. ܘܙܢܐ ܡ̇ܢ ܕܙܘܥܐ ܐܡܪܝܢ. ܠܫܘܚܠܦܐ ܕܐܝܬ ܒܝܬ ܗ̇ܘ ܕܐܝܟ ܡܪܐ ܢܙܝ̣ܥ ܐܝܕܗ ܘܢܣܒ ܕܝܠܗ. ܠܗ̇ܘ ܕܐܝܟ ܓܢܒܐ ܢܙܝ̣ܥ ܐܝܕܗ ܘܢܚܠܨ ܕܠܐ ܕܝܠܗ. ܗ̣ܘ ܗܟܘܬ ܐܡܪܝܢ ܕܡܟܢܘܬ ܫܘܬܦܘܬܐ ܡ̣ܢ ܐܠܗܐ ܐܬܒܪܝܬ݀ ܒܒܪܢܫܐ. ܐܝܢ ܗ̣ܘ ܙܢܐ ܕܫܘܬܦܘܬܐ ܢܡܘܣܝܬܐ ܟܝܬ ܘܓܝܪܬܐ. ܠܘ ܡ̣ܢ ܐܠܗܐ ܗ̱ܝ ܠܗ. ܐܠܐ ܡ̣ܢ ܕܝܠܗ ܘܡ̣ܢ ܗܪܟܐ ܐܡܪܝܢ ܕܟܐܢܐܝܬ ܡܫܬܘܐ ܒܪܢܫܐ ܠܦܘܪ̈ܥܢܐ ܛܒ̈ܐ ܟܝܬ ܘܒܝ̈ܫܐ.

 

ܣܝܥܬܐ ܪܒܝܥܝܬܐ:

 

ܐܡܪܬ݀ ܕܠܝܬ ܠܒܪܢܫܐ ܡܬܡܨܝܢܘܬܐ ܡܬܘܡ ܥܠ ܡܕܡ ܡ̣ܢ ܡܥܒܕܢ̈ܘܬܐ ܕܒܐܝ̈ܕܘܗܝ ܡܣܬܥܪ̈ܢ ܐܠܐ ܟܠܡܕܡ ܒܒܛܝ̣ܠܘܬܐ ܐܠܗܝܬܐ ܡܣܬܥܪ. ܒܕܓܘܢ ܟܕ ܨܒܐ ܐܠܗܐ ܕܬܗܘܐ ܡܥܒܕܢܘܬܐ ܡܕܡ. ܡܒܪܐ ܒܪܐ ܠܗ̇. ܘܒܪܐ ܬܘܒ ܒܒܪܢܫܐ ܚܝܠܐ ܡܕܡ ܕܢܩܝ̣ܦ ܠܗ̇ ܠܡܥܒܕܢܘܬܐ. ܐܝܟܢܐ ܕܢܣܒܪ ܒܪܢܫܐ ܕܗ̣ܘ ܠܗ ܣ̇ܥܪ ܠܗ̇ ܨܒܝܢܐܝܬ. ܟܕ ܒܫܪܪܐ ܠܘ ܗܘܝܘ ܣܥܘܪܗ ܐܠܐ ܗ̣ܝ ܒܛܝ̣ܠܘܬܐ ܐܠܗܝܬܐ. ܗܠܝܢ ܡ̇ܢ ܣܝ̈ܥܬܐ ܕܡܒ̈ܛܠܝ ܚܐܪܘܬܐ ܡܫܪܪ̈ܢܝܗ̇ ܕܝܢ܆ ܠܬܪܬܝܢ ܣܝ̣̈ܥܢ ܐܬܦܠܓܘ. ܚܕܐ ܡ̇ܢ ܗ̇ܝ ܕܦܪ̈ܝ̣ܫܐ ܡ̣ܢ ܡܫܠܡܢ̈ܐ ܕܡܬܩܪܝܢ ܡܥܬܙܝ̣̈ܠܝܐ ܕܠܟܠܗܝܢ ܣܥܘܪ̈ܘܬܐ ܐ̱ܢܫܝ̈ܬܐ ܠܗ̇ ܠܚܐܪܘܬܐ ܐ̱ܢܫܝܬܐ ܝ̇ܗܒܝ̣ܢ. ܘܡ̣ܢ ܒܛܝ̣ܠܘܬܐ ܡܢܟܪܝ̣ܢ ܠܗܝܢ. ܘܕܬܪܬܝܢ ܗ̣ܝ ܕܝܠܢ ܡܫܝ̈ܚܝܐ ܕܐܡܪܐ. ܕܐܦܢ ܛܒ̈ܬܐ ܒܚܐܪܘܬܢ ܡܣܬܥܪ̈ܢ ܡܢܢ. ܐܠܐ ܠܘ ܒܠܥܕ ܣܘܝܥܐ ܘܥܘܕܪܢܐ ܕܡ̣ܢ ܐܠܗܐ. ܘܗ̣ܘ ܗܟܘܬ ܐܦ ܒܝ̈ܫܬܐ ܐܦܢ ܡܢܢ ܡܣܬܥܪ̈ܢ. ܐܠܐ ܠܘ ܒܠܥܕ ܡ̣ܢ ܡܫܬܒܩܢܘܬܐ ܕܡ̣ܢ ܐܠܗܐ ܘܓܘܪܓܐ ܣܛܢܝܐ.

 

ܢܘܗܪܐ:

 

ܘܟܕ ܬܪ̈ܬܝܗܝܢ ܗܠܝܢ ܬܪ̈ܥܝܬܐ. ܟܐܡܬ݀ ܗ̇ܝ ܕܐܡܪܐ ܕܟܠ ܡܕܡ ܒܒܛܝ̣ܠܘܬܐ ܐܠܗܝܬܐ ܡܣܬܥܪ. ܘܠܝܬ ܠܒܪܢܫܐ ܡܬܡܨܝܢܘܬ ܚܝܠܐ ܐܘܟܝܬ ܚܐܪܘܬܐ ܕܢܣܥܘܪ ܘܕܠܐ ܢܣܥܘܪ. ܘܗ̇ܝ ܟܝܬ ܕܐܡ̇ܪܐ ܕܠܐ ܥܨܐ ܐܠܗܐ ܠܚܐܪܘܬܗ ܕܒܪܢܫܐ. ܐܠܐ ܟܠܗܝܢ ܡܥܒܕܢ̈ܘܬܗ ܚܐܪܐܝܬ ܘܨܒܝܢܐܝܬ ܘܫܠܝ̣ܛܘܬ ܒܝܬܐܝܬ ܡܢܗ ܡܣܬܥܪ̈ܢ. ܡܨܐ ܢܨ̈ܝܢ ܥܡ ܚܕ̈ܕܐ. ܚܣܝܐ ܠܥܙܪ ܒܪ ܣܒܬܐ. ܟܕ ܨܒܐ ܠܡܐܘܝܘܬܗܝܢ ܢܠܚܡ. ܕܕܡ ܡ̣ܢ ܫܟܝ̣ܪ̈ܘܬܐ ܕܟܠܚܕ ܡ̣ܢ ܓܒ̈ܐ ܡܟܢܫ ܒܣܘܠܘܓܝܣܘܬܐ ܢܡܕ܆ ܐܡ̣ܪ ܒܩܦܠܐܘܢ ܕܬܫܥܐ ܕܡܐܡܪܐ ܩܕܡܝܐ ܕܥܠ ܒܛܝ̣ܠܘܬܐ ܐܠܗܝܬܐ ܘܚܐܪܘܬܐ ܐ̱ܢܫܝܬܐ ܗܟܢܐ. ܡܛܠܗܢܐ ܘܟܕ ܠܟܠܗܝܢ ܒܒܛܝ̣ܠܘܬܗ ܛܘܒܬܢܝܬܐ ܡܕܒܪ ܘܡܦܪܢܣ܆ ܠܡܢܗܝܢ ܡ̇ܢ ܒܡܨܥܝܘܬܐ ܡܦܩ ܘܠܘܬܢ ܡܚܬ. ܘܗܠܝܢ ܡ̇ܢ ܕܒܡܨܥܝܘܬܐ ܐܝܬܝܗܝܢ܆ ܟܠܗܝܢ ܗܠܝܢ ܕܒܝܕ ܚܐܪܘܬܐ ܕܡܠܝ̣̈ܠܐ܆ ܠܘܬ ܚܕ̈ܕܐ ܘܥܕܡܐ ܠܐܚܪ̈ܝܐ ܕܒܗܘܢ ܡܝܒܠ. ܗܠܝܢ ܕܒܝܕ ܒܪܐ ܗ̇ܘ ܪܝܫܐ ܘܝܚܝܕܝܐ. ܒܪܘܚܐ ܩܕܝܫܐ ܡܦܪܢܣ. ܗܠܝܢ ܘܕܐܝܟ ܗܠܝܢ ܐܠܦ ܘܐܟܬܒ ܒܬܠܬܝ̈ܗܘܢ ܡܐܡܪ̈ܘܗܝ ܗ̣ܘ ܚܣܝܐ ܗܢܐ. ܘܡ̣ܢ ܐܠܗܐ ܬܘܒ ܐܡ̇ܪ ܕܐܝܬܝܗܘܢ ܟܠܗܘܢ ܩ̈ܛܠܐ ܘܩܪ̈ܒܐ ܘܛܘ̈ܒܥܐ ܘܝܩ̈ܕܢܐ. ܘܢܘܬܫ̈ܐ ܕܡ̣ܢ ܚܝ̈ܘܬܐ. ܘܕܘܒܨ̈ܐ ܕܡ̣ܢ ܐܫ̈ܕܬ݀ ܡܪܬܐ ܘܚܢܘ̈ܩܝܐ ܘܟܘܪ̈ܗܢܐ ܘܫܪܟܐ ܕܓܕ̈ܫܐ ܡܫܝ̣̈ܡܢܐ. ܘܐܡ̇ܪ ܕܐܦܢ ܒܝ̈ܫܬܐ ܡܣܬܒܪ̈ܢ ܐܠܐ ܠܘ ܒܝ̈ܫܬܐ ܐܢܝܢ. ܐܡ̣ܪ ܓܝܪ ܒܩܦܠܐܘܢ ܕܫܬܐ ܕܡܐܡܪܐ ܕܬܪܝܢ ܗܟܢܐ. ܗܠܝܢ ܟܠܗܝܢ ܘܐ̱ܚܪ̈ܢܐ. ܐܢ ܐܝܬ ܠܡܫܟܚܘ܆ ܡ̣ܢ ܐܠܗܐ ܐܝܬܝܗܘܢ. ܘܒܒܛܝ̣ܠܘܬܗ ܩܕܝܫܬܐ. ܗ̇ܘ ܕܗ̣ܘ ܒܠܚܘܕܘܗܝ ܡܡܝ̣ܬ ܘܡܐܚܐ. ܘܡܛܠ ܕܬܪ̈ܥܝܬܐ ܗܘܝ̈ ܡܫܚ̈ܠܦܬܐ ܥܠܝܗ̇ ܕܒܥܬܐ ܗܕܐ. ܐܠܨܬ݀ ܕܩܦ̈ܠܐܐ ܡܕܡ ܢܩܕܡ ܥܠܝܗ̇. ܡܛܠ ܒܥ̈ܬܐ ܕܐܠܨܐ ܝ̣ܕܥܬܗܝܢ ܠܘܬ ܝ̣ܕܥܬܗ̇ ܕܒܥܬܐ ܗܕܐ. ܐܝܛܐ ܦܐܝܘܬ ܡܛܟܣܐܝܬ ܠܘܬ ܣܥܘܪܘܬܗ̇ ܢܬܩܪܒ. ܘܒܝܕ ܐܠܗܐ ܠܚܛܝ̈ܗ̇ ܡ̣ܢ ܙܝ̈ܙܢܐ ܢܕܟܐ.

 

 

 

ܩܦܠܐܘܢ ܩܕܡܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܛܒܬܐ ܘܒܝܫܬܐ ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ. ܡܛܠ ܗ̇ܝ ܕܛܒܬܐ ܟܝܢܝܬܐ ܗ̱ܝ ܘܒܝܫܬܐ ܢܡܘܣܝܬܐ ܗ̱ܝ ܘܠܘ ܟܝܢܝܬܐ. ܐܠܐ ܓܠܝ̣ܙܘܬܐ ܒܠܚܘܕ ܕܐܝܬܘܬܐ ܐܘܟܝܬ ܠܐ ܡܕܡ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܛܒܬܐ ܒܗ̇ܝ ܕܛܒܬܐ ܗ̱ܝ ܡܘܬܪܢܝ̣ܬܐ ܗ̱ܝ. ܘܒܝܫܬܐ ܒܗ̇ܝ ܕܒܝܫܬܐ ܗ̱ܝ ܡܗܪܢܝ̣ܬܐ ܗ̱ܝ. ܘܐܠܘ ܒܝܫܬܐ ܒܟܝܢܗܘܢ ܕܣܘܥܪ̈ܢܐ ܫܟܝ̣ܚܐ ܗܘܬ݀. ܡܫܬܟܚ ܗ̣ܘܐ ܐܠܗܐ ܫܘܒܚܐ ܠܛܝܒܘܬܗ ܕܥܠܬܐ ܗ̱ܘ ܥܒܘܕܬܐ ܕܥܠܬܐ ܡܗܪܢܝ̣ܬܐ܆ ܗ̇ܝ ܕܫܟܝ̣ܪܐ. ܒܗ̇ܝ ܕܡܛܠܗ̇ܝ ܕܢܗܘܘܢ ܐܝܬܝܗܘܢ ܘܫܦܝܪ ܢܗܘܘܢ ܐܝܬܝܗܘܢ ܒܪܐ ܐܢܘܢ ܠܒܪ̈ܝܐ. ܘܠܘ ܡܛܠܗ̇ܝ ܕܠܘ ܫܦܝܪ ܢܗܘܘܢ ܐܝܬܝܗܘܢ ܛܒܬܐ ܡܕܝܢ ܒܪܝ̣ܬܐ ܗ̱ܝ ܟܝܢܝܬܐ ܗ̇ܝ ܕܒܟܝܢܗܘܢ ܕܣܘܥܪ̈ܢܐ ܢܨܝ̣ܒܐ. ܘܗ̣ܢܘܢ ܣܘܥܪ̈ܢܐ. ܟܕ ܠܐ ܢܡܘܣܐܝܬ ܡܣܬܥܪܝ̣ܢ. ܗ̇ܝ ܕܝܢ ܒܝܫܬܐ ܡܬܡܢܝܢ. ܡ̣ܢ ܢܡܘܣܐ ܒܪܡ ܘܠܘ ܡ̣ܢ ܟܝܢܐ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܫܟܝ̣ܚܘܬܗ ܕܟܠ ܣܘܥܪܢܐ ܐܝܬܘܬܐ ܗ̱ܝ. ܘܒܝܫܬܐ ܠܝܬܝܘܬܐ ܗ̱ܝ. ܘܐܠܘ ܒܝܫܬܐ ܒܟܝܢܗܘܢ ܕܣܘܥܪ̈ܢܐ ܫܟܝ̣ܚܐ ܗܘܬ݀. ܡܫܬܟܚ ܗ̣ܘܐ ܚܕ ܣܘܥܪܢܐ ܘܗ̣ܘ ܟܕ ܗ̣ܘ ܕܐܝܬܘܗܝ ܘܕܠܐ ܐܝܬܘܗܝ ܗ̇ܝ ܕܫܟܝ̣ܪܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢܢ ܕܐܝܬܘܬܗ ܕܟܠ ܣܘܥܪܢܐ ܛܒܬܐ ܗ̱ܝ ܒܦܚܡܗ. ܘܠܐ ܐܝܬܘܬܗ ܒܝܫܬܐ ܗ̱ܝ ܒܦܚܡܗ. ܘܐܠܘ ܒܝܫܬܐ ܫܟܝ̣ܚܐ ܗܘܬ݀ ܒܟܝܢܗ. ܡܫܬܟܚ ܗ̣ܘܐ ܗ̣ܘ ܟܕ ܗ̣ܘ ܒܦܚܡܐ ܝܚܝܕܝܐ ܕܛܒܐ ܗ̱ܘ ܘܒܝܫܐ܆ ܗ̇ܝ ܕܫܟܝ̣ܪܐ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ ܐܠܘ ܕܓܠܘܬܐ ܒܟܝܢܗ̇ ܒܝܫܬܐ ܗܘܬ݀. ܙܕܩ ܗ̣ܘܐ ܕܕܓܠܘܬܐ ܗ̇ܝ ܕܡܦܨܝܐ ܗܘܬ݀ ܠܩܕܝ̈ܫܐ ܡ̣ܢ ܬܫܢܝ̣̈ܕܐ ܕܚܢ̈ܦܐ ܗܟܘܬ ܒܝܫܬܐ ܗܘܬ݀ ܗ̇ܝ ܕܠܐ ܫܪܝܪܐ. ܘܐܠܘ ܬܘܒ ܒܝܫܬ݀ ܒܟܝܢܐ ܗܘܬ݀. ܐܝܟܢܐ ܐܦ ܒܫܘܘ̈ܕܝܐ ܐܠܗܝ̈ܐ ܡܫܬܟܚܐ ܗܘܬ݀. ܗܐ ܓܝܪ ܚܙܩܝܐ ܕܐܬܐܡܪ ܠܗ ܕܠܐ ܡ̇ܐܬ. ܠܘ ܒܠܚܘܕ ܠܐ ܡܝ̣ܬ. ܐܠܐ ܘܚܝ̈ܐ ܠܗ ܐܬܬܘܣܦܘ. ܘܢܝܢܘܐ ܕܡܬܗܦܟܐ ܗܘܬ݀ ܠܐ ܐܬܗܦܟܬ݀. ܘܣܓܝ̈ܐܬܐ ܐ̱ܚܪ̈ܢܝܬܐ. ܕܓܠܘܬܐ ܡܕܝܢ ܠܘ ܒܟܝܢܗ̇ ܒܝܫܐ. ܐܠܐ ܒܗ̇ܝ ܕܢܡܘܣܐ ܕܠܐ ܢܕܓܠ ܡܛܠ ܥ̈ܠܬܐ ܐ̱ܚܪ̈ܢܝܬܐ ܡܙܡܝܢ̈ܝܬܐ. ܗܝܕܝܢ ܒܝܫܬܐ ܡܬܩܪܝܐ.

 

ܡܚܘܝܢܘܬܐ ܕܚܡܫ:

 

ܐܡܪܝܢܢ ܐܠܘ ܩܛܠܐ ܒܟܝܢܗ ܒܝܫܐ ܗ̣ܘܐ. ܙܕܩ ܗ̣ܘܐ ܕܟܠ ܟܪ ܕܡܣܬܥܪ ܗ̣ܘܐ ܥܠܬܐ ܗ̇ܘܐ ܗ̣ܘܐ ܕܒܝܫܬܐ. ܘܗܐ ܠܘ ܗܟܢܐ. ܒܗ̇ܝ ܕܗ̇ܘ ܕܩܛܠ ܠܡܚܒܠܢܐ ܘܡܕܟܐ ܡ̣ܢ ܒܝܫܬܗ ܠܩܘܛܢܐ. ܐܠܘ ܒܝܫܬܐ ܣ̇ܥܪ ܗ̣ܘܐ. ܡܫܬܟܚ ܗ̣ܘܐ ܣܥܘܪܗ̇ ܕܛܒܬܐ ܕܠܘ ܛܒܬܐ ܣ̇ܥܪ. ܘܣܥܘܪܗ̇ ܕܒܝܫܬܐ ܠܘ ܒܝܫܬܐ ܣܥܪ ܗ̇ܝ ܕܫܟܝ̣ܪܐ. ܒܗ̇ܝ ܕܠܘܬ ܟܢܝ̣ܫܘܬܐ ܕܬܪ̈ܝܗܘܢ ܦܫ̈ܚܝܗ̇ ܕܐܢܛܝܦܐܣܝܣ ܡܘܒܠܐ ܡܟܠܢܘܬܐ ܕܐܝܟ ܗܕܐ. ܩܛܠܐ ܡܕܝܢ ܠܘ ܒܟܝܢܗ ܒܝܫ ܗ̣ܘ. ܐܠܐ ܟܕ ܠܐ ܢܡܘܣܐܝܬ ܡܣܬܥܪ ܒܝܫܬܐ ܡܬܩܪܐ. ܘܐܠܐ ܐܝܟܢܐ ܦܝ̣ܢܚܣ ܕܩܛܠ ܠܐ ܐܬܚܝܒ. ܐܠܐ ܡܠܘܢ ܡܪܥܝܢܐ ܗܘܐ ܕܐܠܗܐ ܛܒܐ ܘܪܚܡ ܛܒܬܐ. ܘܩܐܝܢ ܗ̇ܘ ܕܐܦ ܗ̣ܘ ܩܛܠ ܐܬܬܠܝ̣ܛ. ܘܕܙܐܥ ܘܢܐܕ ܒܐܪܥܐ ܐܬܬܣܝܡ ܒܪܝܫܗ.

 

ܡܚܘܝܢܘܬܐ ܕܫܬ:

 

ܐܡܪܝܢܢ ܐܠܘ ܙܘܥܐ ܕܙܢܝܘܬܐ ܒܟܝܢܐ ܒܝܫܐ  ܗ̣ܘܐ. ܐܝܟܢܐ ܥܠܝܡܬܐ ܒܬܘܠܬܐ ܕܡܬܚܛܦܐ ܗܘܬ݀ ܒܚܩܠܐ ܡ̣ܢ ܓܒܪܐ. ܕܬܗܘܐ ܠܗ ܐܢ̱ܬܬܐ ܠܗ̇ܘ ܕܚܛܦܗ̇ ܡܫܬܘܝܐ ܗܘܬ݀. ܘܡܙܕܕܩܐ ܡ̣ܢ ܐܠܗܐ. ܕܠܐ ܬܦܘܫ ܐܝܟ ܐܪܥܐ ܡܠܚܬܐ ܟܕ ܡܬܓܥܨܐ. ܘܟܕ ܒܫܪܪܐ ܗ̣ܝ ܘܗ̇ܘ ܐܟܚܕܐ ܐܫܬܘܬܦܘ ܒܣܘܥܪܢܐ ܕܓܘܪܐ. ܗ̇ܘ ܕܝ̣ܠܢܐܝܬ ܡ̣ܢ ܒܠܥܕܝܗ̇ ܡܣܬܠܐ ܘܡ̣ܢ ܢܡܘܣܐ ܡܬܬܕܝ̣ܢ. ܗ̣ܘ ܗܟܘܬ ܘܐܣܬܝܪ ܗ̇ܝ ܫܘܝܬ݀ ܠܡܠܬܐ. ܘܐܦܢ ܓܝܪܐܝܬ ܡܫܬܘܬܦܐ ܗܘܬ݀ ܒܙܘܘܓܐ ܛܢܦܐ ܕܥܡ ܚܢܦܐ ܐܪܛܚܫܫܬ. ܐܠܐ ܐܝܟ ܝܬܝܪ ܢܟܦܬܐ ܘܕܟܝ̣ܬܐ ܣܠܩ̈ܢ ܗܘܝ̈ ܨܠܘ̈ܬܗ̇ ܩܕܡ ܐܠܗܐ. ܘܕܠܡܐ ܬܬܐܡܪ ܕܗܠܝܢ ܠܘ ܨܒܝܢܐܝܬ ܡܬܕܢ̈ܝܢ ܗܘܝ̈ ܠܗ̇ ܠܨܒܘܬܐ. ܠܠܘܛ ܡ̇ܢ ܘܠܬܪ̈ܬܝܗܝܢ ܒܢ̈ܬܗ. ܘܠܬܡܪ ܗ̇ܝ ܕܚܦܝ̣ܛܐܝܬ ܒܦܠܫܬ݀ ܐܘܪ̈ܚܬܐ ܝܬܒܬ݀ ܘܒܝܗܘܕܐ ܚܡܘܗ̇ ܓܪܬ݀. ܡܢܐ ܐܝܬ ܠܡܐܡܪ ܚܛܝ̣ܬܐ ܡܕܝܢ ܐܘܟܝ̣ܬ ܒܝܫܬܐ ܠܘ ܒܟܝܢܗܘܢ ܕܙܘ̈ܥܐ ܘܣܘܥܪ̈ܢܐ ܫܟܝ̣̈ܚܐ. ܐܠܐ ܒܬܐܪ̈ܬܐ ܕܣܥܘܪ̈ܝܗܘܢ ܒܠܚܘܕ ܐܘܟܝܬ ܒܡܚܫ̈ܒܬܗܘܢ.

 

ܡܚܘܝܢܘܬܐ ܕܫܒܥ:

 

ܐܠܘ ܓܢܒܘܬܐ ܒܟܝܢܐ ܒܝܫܐ ܗ̣ܘܐ ܐܝܟܢܐ ܝܥܩܘܒ ܗ̇ܘ ܕܒܐܒܘܗܝ ܐܛܥܝ̣ ܘܒܘܪ̈ܟܬܗ ܓܢܒ ܐܬܒܪܟ. ܘܐܦ ܠܠܒܗ ܕܠܒܢ ܐܪܡܝܐ ܚܡܘܗܝ ܐܝܟ ܡܠܬܐ ܟܬܒܝܬܐ ܓܢܒ ܘܐܟܫܪ ܘܐܨܠܚ. ܘܐܢ̱ܬܬܗ ܕܗܢܐ ܪܚܝܠ ܬܘܒ ܠܨܠܡܘ̈ܗܝ ܕܝܠܗ ܕܠܒܢ ܐܒܘܗ̇ ܚܠܨܬ݀. ܘܒܥܒܝ̣ܛܐ ܣܡܬ݀ ܕܓܡܠܐ. ܘܕܓܠܬ݀ ܒܗ ܬܘܒ ܘܐܡܪܬ݀ ܕܒܐܘܪܚܐ ܗ̇ܝ ܠܡ ܕܢܫ̈ܐ ܘܠܐ ܡܨܝܐ ܕܬܩܘܡ. ܘܗܟܢܐ ܠܐ ܣܟ ܐܬܚܝܒܬ݀. ܘܚܢܢܝܐ ܘܐܢ̱ܬܬܗ ܒܝ̈ܫܝ ܓܕܐ ܕܡ̣ܢ ܛܝ̣ܡܝ ܩܪܝ̣ܬܗܘܢ ܛܫܝ̣ܘ. ܡܣܡܒܪܝ̣ܫܐ ܕܡܘܬܐ ܩܒ̣ܠܘ ܠܝ̣ܓܐܝܬ ܡ̣ܢ ܫܡܥܘܢ ܗ̇ܘ ܪܝܫ ܓܘܕܐ ܕܫܠܝܚܘܬܐ. ܘܐܝܟܢܐ ܬܘܒ ܦܐܝܐ ܗܘܬ݀ ܠܦܘܠܘܣ ܕܢܐܡܪ ܠܩܘܪ̈ܝܢܬܝܐ. ܕܐܝܟ ܓܒܪܐ ܚܪܥܐ ܒܢܟܠܐ ܓܢܒܬܟܘܢ. ܘܡ̣ܢ ܗܠܝܢ ܡܬܝܕܥܢܐ. ܕܒܝܫܬܐ ܠܘ ܒܟܝܢܗܘܢ ܘܙܘܥܗܘܢ ܗ̣ܝ ܕܣܘܥܪ̈ܢܐ.

 

 

 

ܢܝܫܐ ܬܪܝܢܐ. ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ.

 

ܐܝܘܒ. ܒܪܡ ܡܡܠܠܝ̈ ܣܪܝ̣ܩܘܬܐ ܐܢ̱ܬܘܢ. ܘܡܐܣ̈ܝܝ ܒܠܐ ܡܕܡ. ܐܡܪܝܢܢ ܕܗܐ ܢܗܝܪܐܝܬ ܡܚܘܐ ܕܒܝܫܬܐ ܗ̱ܝ ܕܥܕܝ̣ܠܬܐ ܗ̱ܝ. ܣܪܝܩܘܬܐ ܗ̱ܝ ܘܠܐ ܡܕܡ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܒܢܝ̈ܢܫܐ ܥܕܡܐ ܠܐܡܬܝ ܐܝܩܪܝ ܡܚܦܝܢ ܐܢ̱ܬܘܢ. ܘܪܚܡܝܢ ܐܢ̱ܬܘܢ ܣܪܝܩܘܬܐ.

 

ܣܗܕܘܬܐ ܕܬܠܬ:

 

ܗ̣ܘ ܟܕ ܗ̣ܘ ܘܕܒܝܫܐ ܬܬܒܥܐ ܚܛܝܬܗ ܘܠܐ ܬܫܬܟܚ. ܘܬܘܒ ܐܡ̇ܪ ܕܕܚܠܬܗ ܕܡܪܝܐ ܕܟܝܐ ܘܩܝܡܐ ܠܥܠܡ. ܘܬܘܒ ܐܡ̇ܪ ܕܙܕܝܩܘܬܗ ܩܝܡܐ ܠܥܠܡ ܥܠܡܝܢ. ܚ̇ܙܐ ܐܢ̱ܬ ܐܝܟܢܐ ܠܚܛܝ̣ܬܐ ܕܐܝܬܝܗ̇ ܒܝܫܬܐ. ܐܡ̇ܪ ܕܡܬܒܥܝܐ ܘܠܐ ܡܫܬܟܚܐ. ܘܙܕܝܩܘܬܐ ܕܐܝܬܝܗ̇ ܛܒܬܐ ܐܡ̇ܪ ܕܩܝܡܐ ܠܥܠܡ ܘܠܥܠܡܥܠܡܝܢ.

 

ܣܗܕܘܬܐ ܕܐܪܒܥ:

 

ܦܘܠܘܣ ܒܐܓܪܬܐ ܕܠܘܬ ܪ̈ܘܡܝܐ. ܠܝܬ ܓܝܪ ܦܘܪܫܢܐ. ܡܛܠ ܕܟܠܗܘܢ ܚܛܘ. ܘܚܣܝ̣ܪܝܢ ܡ̣ܢ ܬܫܒܘܚܬܐ ܕܐܠܗܐ. ܗܐ ܢܗܝܪܐܝܬ ܠܚܛܝ̣ܬܐ ܚܣܝ̣ܪܘܬܐ ܐܘ ܓܠܝ̣ܙܘܬܐ ܐܡ̇ܪ ܠܗ̇ ܗܢܐ ܫܠܝܚܐ ܐܠܗܝܐ.

 

ܣܗܕܘܬܐ ܕܚܡܫ:

 

ܗ̣ܘ ܟܕ ܗ̣ܘ ܒܗ̇ ܟܕ ܒܗ̇. ܥܕܡܐ ܓܝܪ ܠܢܡܘܣܐ ܚܛܝ̣ܬܐ ܟܕ ܐܝܬܝܗ̇ ܗܘܬ݀ ܒܥܠܡܐ. ܠܐ ܚܫܝ̣ܒܐ  ܗܘܬ݀ ܚܛܝ̣ܬܐ. ܡܛܠ ܕܠܝܬ ܗ̣ܘܐ ܢܡܘܣܐ. ܗܪܟܐ ܢܗܝ̣ܪܐܝܬ ܡܚܘܐ ܕܚܛܝܬܐ ܐܘܟܝܬ ܒܝܫܬܐ ܠܘ ܒܟܝܢܗܘܢ ܕܣܘܥܪ̈ܢܐ ܐܝܬܝܗ̇. ܐܠܐ ܢܡܘܣܝܬܐ ܗ̱ܝ ܒܠܚܘܕ. ܘܠܘ ܐܝܬܘܬܢܝܬܐ ܘܟܝܢܝܬܐ.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ ܒܕܩܘܪ̈ܝܢܬܝܐ ܩܕܡܝܬܐ. ܘܥܒܕܐ ܕܟܠܢܫ ܐܝܟܢܐ ܐܝܬܘܗܝ ܢܘܪܐ ܕܬܦܪܫܝ̣ܘܗܝ ܘܐܝܢܐ ܕܢܩܘܐ ܥܒܕܗ. ܗ̇ܘ ܕܒܢܐ ܐܓܪܗ ܡܩܒܠ. ܘܐܝܢܐ ܕܥܒܕܗ ܢܐܩܕ ܢܚܣܪ. ܗܪܟܐ ܛܒܬܐ ܡܩܘܝܢܝ̣ܬܐ ܗ̱ܝ ܘܚܛܝ̣ܬܐ ܕܐܝܬܝܗ̇ ܒܝܫܬܐ. ܕܠܝܠܬ݀ ܠܡܘܦܝܘ ܘܠܡܬܛܠܩܘ ܘܠܐ ܡܟܬܪܐ ܒܕܠܐ ܩܢܝܐ ܩܘܝܡܐ ܡܩܘܝܢܐ ܕܒܟܝܢܐ.

 

ܣܗܕܘܬܐ ܕܫܒܥ:

 

ܩܕܝܫܐ ܕܝܘܢܢܘܣܝܘܣ ܒܩܦܠܐܘܢ ܕܐܪܒܥܐ ܕܡܐܡܪܐ ܕܬܠܬܐ ܗܟܢܐ. ܠܐ ܡܕܡ ܡ̣ܢ ܐܝܠܝܢ ܕܐܝܬܝܗܝܢ ܐܝܬܘܗܝ ܡ̣ܢ ܒܝܫܬܐ. ܘܐܦܠܐ ܗ̣ܝ ܒܝܫܬܐ ܬܗܘܐ ܐܝܬܝܗ̇. ܐܢܗܘ ܕܐܦ ܗ̣ܝ ܠܗ̇ ܒܝܫܬܐ ܐܝܬܝܗ̇. ܘܐܢ ܠܐ ܗܘܬ݀ ܗܕܐ܇ ܠܘ ܒܟܠܡܕܡ ܒܝܫܬܐ ܐܝܬܝܗ̇ ܒܝܫܬܐ. ܐܠܐ ܩܢܝܐ ܡܢܬܐ ܡܕܡ ܛܒܬܐ. ܕܒܗ̇ ܐܝܬܝܗ̇ ܣܟ.

 

ܢܘܗܪܐ:

 

ܕܥ ܕܦܝܠܠܘܣܘ̈ܦܐ ܒܪ̈ܝܐ ܝܬܝܪ ܚܣܝ̣ܢܐܝܬ ܐܚܝ̣ܕܝܢ ܒܗ̇ܝ ܕܛܒܬܐ ܐܝܬܘܢܝܬܐ ܗ̱ܝ ܘܟܝܢܝܬܐ. ܘܒܝܫܬܐ ܓܠܝ̣ܙܘܬܐ ܗ̱ܝ ܘܟܝܢܝܬܐ. ܘܒܝܫܬܐ ܓܠܝ̣ܙܘܬܐ ܗ̱ܝ. ܘܠܐ ܐܝܬܘܬܐ ܩܢܝܐ ܐܦܠܐ ܟܝܢܐ. ܘܐܡܪܝܢ ܕܗܐ ܩܛܠܐ ܕܝܬܝܪ ܡ̣ܢ ܟܠ ܒܝ̈ܫܢ ܒܝܫ. ܟܕ ܦܪܫܝ̣ܢܢ ܠܙܢܝ̈ܐ ܫܟܝ̣ܚܘ̈ܬܢܝܐ ܕܒܗ ܡ̣ܢ ܙܢܝ̈ܐ ܓܠܝ̣ܙܘ̈ܬܢܝܐ. ܒܗܘܢ ܒܙܢܝ̈ܐ ܓܠܝܙܘ̈ܬܢܝܐ ܒܠܚܘܕ ܡܫܟܚܝ̣ܢܢ ܠܗ̇ ܠܒܝܫܬܐ. ܕܐܝܟ ܐܝܟܢ. ܗܐ ܓܝܪ ܗ̇ܝ ܕܢܬܡܨܐ ܚܝܠܐ ܗ̇ܘ ܕܩܛܠ ܠܡܩܛܠ. ܠܘ ܒܝܫܬܐ ܗ̱ܝ ܐܠܐ ܛܒܬܐ. ܒܗ̇ܝ ܕܫܘܡܠܝܐ ܗ̱ܘ ܚܝܠܐ ܗܢܐ ܕܪܘܟܒ ܗܕܡܘ̈ܗܝ ܘܡܘܙܓܗ. ܗ̣ܘ ܗܟܘܬ ܘܚܪܝ̣ܦܘܬܗ̇ ܕܣܦܣܪܐ ܬܘܒ ܠܘ ܒܝܫܬܐ ܗ̱ܝ ܐܠܐ ܛܒܬܐ. ܒܕܛܒܘܬܗ̇ ܕܣܦܣܪܐ ܠܘ ܡܕܡ ܗ̣ܝ ܐ̱ܚܪܝܢ ܐܠܐ ܚܪܝ̣ܦܘܬܗ̇. ܡܛܠܗܕܐ ܓܝܪ ܐܬܬܩܢܬ݀ ܕܬܦܣܘܩ ܠܡ ܘܠܘ ܕܠܐ ܬܦܣܘܩ. ܒܗ̇ ܒܕܡܘ̣ܬܐ ܘܗ̇ܝ ܕܡܩܒܠܢܐ ܢܗܘܐ ܕܦܣܩܐ ܗ̣ܘ ܗܕܡܐ ܩܕܠܢܝܐ ܐܘ ܡܕܡ ܐ̱ܚܪܝܢ. ܠܘ ܒܝܫܬܐ ܗ̱ܝ ܐܠܐ ܛܒܬܐ. ܒܗ̇ܝ ܕܐܠܘ ܐܝܟ ܟܐܦܐ ܐܘ ܐܝܟ ܦܪܙܠܐ ܗ̣ܘܐ. ܠܐ ܣܟ ܚܫܚ ܗ̣ܘܐ ܠܡܗܘܐ ܗܕܡ ܒܪܢܫܐ ܐܘ ܚܝܘܬܐ ܐ̱ܚܪܬܐ. ܘܟܕ ܙܢܝ̈ܐ ܗܠܝܢ ܟܠܗܘܢ ܫܟܝ̣ܚܘ̈ܬܢܝܐ ܛܒ̈ܬܐ ܐܢܘܢ ܘܫܘܡ̈ܠܝܐ. ܗ̣ܘ ܛܘܠܩ ܚܝܘ̈ܗܝ ܕܩܛܝ̣ܠܐ. ܘܫܪܝܐ ܕܚܕܝܘܬܐ ܘܡܠܚܡܘܬܐ ܕܦܓܪܗ ܒܠܚܘܕ ܐܝܬܝܗܘܢ ܒܝ̈ܫܬܐ. ܘܓܠܝܐ ܕܓܠܝ̣ܙܘ̈ܬܢܝܐ ܘܠܘ ܫܟܝܚܘ̈ܬܢܝܐ ܐܢܘܢ ܗܠܝܢ ܬܪ̈ܝܗܘܢ ܙܢܝ̈ܐ ܕܗ̣ܢܘܢ ܐܢܘܢ ܒܫܪܪܐ ܒܝ̈ܫܬܐ. ܘܩܕܝܫܐ ܕܝܘܢܢܘܣܝܘܣ ܒܣܓܝ̈ܐܬܐ ܡܫܪܪ ܠܗ̇ ܠܬܪܥܝ̣ܬܐ ܗܕܐ. ܐܡ̇ܪ ܓܝܪ ܒܗ ܒܩܦܠܐܘܢ ܕܐܡܝ̣ܪ. ܗ̇ܘ ܡܐ ܕܗܟܝܠ ܕܒܟܠ ܙܢܝ̣̈ܢ ܓܠܝ̣ܙ ܡ̣ܢ ܛܒܬܐ. ܘܠܐ ܒܕܘܟ ܐܝܬܘܗܝ ܗ̣ܘܐ. ܘܠܐ ܐܝܬܘܗܝ. ܘܠܐ ܗܘܐ. ܘܠܐ ܠܡܗܘܐ ܡܨܐ. ܕܐܝܟ ܐܝܟܢܐ. ܐ̱ܢܫ ܫܪܝ̣ܚܐ܇ ܐܦܢ ܓܠܝ̣ܙ ܡ̣ܢ ܛܒܬܐ ܒܝܕ ܪܓܬܐ ܒܥܝ̣ܪܝܬܐ܆ ܒܗܕܐ ܡ̇ܢ ܠܐ ܐܝܬܘܗܝ. ܘܠܐ ܠܐܝܠܝܢ ܕܐܝܬܝܗܝܢ ܪܐܓ. ܐܠܐ ܒܪܡ ܡܫܘܬܦ ܗ̣ܘ ܥܡ ܛܒܬܐ. ܒܗ ܒܕܘܡܝܐ ܒܗܘܪܐ ܕܚܕܝܘܬܐ ܘܕܪܚܡܬܐ. ܐܦ ܚܡܬܐ ܬܘܒ ܡܫܘܬܦܐ ܥܡ ܛܒܬܐ. ܒܗ̇ ܒܗ̇ܝ ܕܡܬܬܙܝܥܐ ܘܡܬܝܐܝ̣ܒܐ ܠܡܬܪܨܘ ܘܠܡܦܢܝܘ ܠܗܠܝܢ ܕܡܣܬܒܪ̈ܢ ܒܝ̈ܫܬܐ܇ ܠܘ ܗ̇ܝ ܕܡܣܬܒܪܐ ܕܫܦܝܪܐ. ܘܐܦ ܗ̣ܘ ܗ̇ܘ ܕܡܬܝܐܝܒ ܟܠ ܟܠܗ ܠܚܝ̈ܐ ܗ̇ܢܘܢ ܕܡܣܬܒܪܝܢ ܠܗ ܡܝܬܪ̈ܬܐ܇ ܒܗ̇ ܒܗ̇ܝ ܕܡܬܝܐܝܒ ܟܠ ܟܠܗ ܠܚܝ̈ܐ ܗ̇ܢܘܢ ܕܡܣܬܒܪܝܢ ܠܗ ܡܝܬܪ̈ܐ܇ ܒܗ̇ ܒܗ̇ܝ ܕܡܬܝܐܝܒ. ܘܠܘܬ ܚܝ̈ܐ ܡܝܬܪ̈ܐ ܚ̇ܐܪ. ܡܫܘܬܦ ܗ̣ܘ ܠܛܒܬܐ. ܠܐ ܐܘܣܝܐ ܬܗܘܐ ܐܝܬܝܗ̇܆ ܘܠܐ ܚܝ̈ܐ ܘܠܐ ܝܐܝ̣ܒܘܬܐ ܘܠܐ ܡܬܬܙܝ̣ܥܢܘܬܐ ܘܠܐ ܬܘܒ ܡܕܡ ܐ̱ܚܪܝܢ. ܗܠܝܢ ܣܓܝ̈ܐܬܐ ܕܐܝܟ ܗܠܝܢ ܐܡ̇ܪ ܗ̣ܘ ܡܠܦܢܐ ܩܕܝܫܐ ܗܢܐ܆ ܒܫܘܪܪܗ̇ ܕܒܥܬܐ ܗܕܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܬܪܥܝܬܐ ܣܩܘܒܠܝܬܐ ܗ̇ܝ ܕܟܝܢܝܬܐ ܘܠܘ ܢܡܘܣܝܬܐ ܐܦܠܐ ܓܠܝܙܘܬܢܝܬܐ ܡܘܕܝܐ ܠܗ̇ ܠܒܝܫܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝ̈ܐ ܚܘܫܒܝ̈ܐ ܡܩܝ̈ܡܢܝܗ̇ ܕܬܪܥܝ̣ܬܐ ܗܕܐ. ܣܥܝܐ ܩܕܡܝܐ.

 

ܐܡܪܝܢܢ ܕܠܙܬܐ ܟܕ ܒܝܫܬܐ ܗ̱ܝ ܐܠܘ ܩܘܝܡܐ ܟܝܢܝܐ ܠܐ ܩܢܝܐ ܗܘܬ݀ ܒܟܝܢܗܘܢ ܕܣܘܥܪ̈ܢܐ ܡܠܙ̈ܢܐ ܙܕܩ ܗ̣ܘܐ ܕܠܘ ܒܐܡܝ̣ܢܘ ܢܩܝ̣ܦܐ ܗܘܬ݀ ܠܙܬܐ ܠܗܘ̇ ܕܡ̇ܠܙ. ܘܕܒܐܡܝ̣ܢܘܬ ܢܩܝ̣ܦܐ. ܝܕܝܥܐ ܡ̣ܢ ܗ̇ܝ ܕܦܣܩܐ ܕܣܝܦܐ ܒܟܠܙܒܢ ܡܠܙܢܐ ܗ̱ܘ ܐܘܟܝܬ ܡܚܫܢܐ. ܗ̣ܘ ܗܟܘܬ ܘܝܩܕܢܐ ܕܡ̣ܢ ܢܘܪܐ. ܘܩܘܪܪܐ ܕܡ̣ܢ ܬܠܓܐ ܘܫܪܟܐ ܕܐ̱ܚܪ̈ܢܝܬܐ. ܠܙܬܐ ܡܕܝܢ ܟܕ ܒܝܫܬܐ ܗ̱ܝ ܟܝܢܝܬܐ ܗ̱ܝ ܘܐܝܬܘܬܢܝܬܐ ܗ̱ܝ. ܘܠܘ ܢܡܘܣܝܬܐ ܘܓܠܝ̣ܙܘܬܢܝܬܐ.

 

ܣܥܝܐ ܬܪܝܢܐ:

 

ܐܡܪܝܢ ܟܠ ܟܝܢܐ ܠܗ̇ܘ ܕܡܢܝ̣ܚ ܠܗ ܡܬܪܓܪܓ. ܘܡ̣ܢ ܗ̇ܘ ܕܡܛܪܦ ܠܗ ܥ̇ܪܩ. ܘܢܝܚܗ ܗܘܝܘ ܛܒܬܗ ܘܛܘܪܦܗ ܘܒܝܫܬܗ. ܘܐܠܘ ܛܘܪܦܐ ܕܐܝܬܘܗܝ ܒܝܫܬܐ ܠܐ ܡܕܡ ܐܝܬܘܗܝ ܗ̣ܘܐ. ܘܡ̣ܢ ܟܝܢܐ ܓܠܝ̣ܙ ܗ̣ܘܐ. ܐܝܟܢܐ ܒܪܢܫܐ ܡ̣ܢ ܠܐ ܡܕܡ ܥ̇ܪܩ ܗ̣ܘܐ. ܘܐܝܟܢܐ ܬܘܒ ܗ̇ܘ ܕܠܐ ܐܝܬܘܗܝ ܡܨܐ ܗ̣ܘܐ ܕܢܛܪܦܝ̣ܘܗܝ ܘܢܠܙܝ̣ܘܗܝ ܐܘܟܝܬ ܢܚܫܝ̣ܘܗܝ. ܒܝܫܬܐ ܡܕܝܢ ܠܘ ܠܐ ܐܝܬܝܗ̇ ܒܟܝܢܐ.

 

ܣܥܝܐ ܬܠܝܬܝܐ:

 

ܐܡܪܝܢ ܕܣܓܝ̈ܐܐ ܡ̣ܢ ܡܗܘ̈ܢܐ ܐܬܦܫܟܘ ܡܛܠ ܛܒܬܐ ܘܐܡ̣ܪܘ ܕܠܐ ܫܟܝ̣ܚܐ ܒܥܠܡܢ ܗܢܐ ܥܒܘܪܐ ܘܗܘܠܢܝܐ. ܐܠܐ ܟܠܡܕܡ ܕܛܒܬܐ ܡܣܬܒܪ ܠܢ. ܠܘ ܛܒܬܐ ܗ̱ܘ. ܐܠܐ ܓܠܝ̣ܙܘܬܐ ܒܠܚܘܕ ܕܒܝܫܬܐ ܘܚܘܪܪܐ ܕܡܢܗ̇. ܟܐܡܬ݀ ܗ̇ܘ ܕܙܕܝܩܐ ܡܣܬܒܪ ܠܘ ܙܕܝܩܘܬܐ ܦܠܚ. ܐܠܐ ܟܕ ܚܛܗ̈ܐ ܠܐ ܣܥܪ ܙܕܝܩܐ ܡܬܩܪܐ. ܗ̣ܘ ܗܟܘܬ ܘܗ̇ܘ ܕܣܒܪ ܕܒܗܢܝܐܘܬܐ ܕܐܘܟܠܐ ܘܫܩܝܐ ܘܙܘܘܓܐ ܛܒܬܐ ܡܫܟܚ. ܠܘ ܡܬܗܢܐ ܐܘ ܡܬܛܒܬܢ. ܐܠܐ ܒܠܚܘܕ ܡ̣ܢ ܠܙܬܐ ܕܟܦܢܐ ܘܨܗܝܐ ܘܝܬܝ̣ܪܘܬܐ ܙܪܥܢܝܬܐ ܡܓܗܐ. ܘܟܕ ܙܕܝܩܘܬܐ ܘܗܢܝܐܘܬܐ ܕܛܒ̈ܬܐ ܡܬܬܘܕ̈ܝܢ ܓܠܝ̣ܙ̈ܘܬܐ ܐܢܝܢ. ܡ̣ܢ ܐܢܢܩܝ ܕܚܛܝܬܐ ܘܠܙܬܐ ܕܒܝ̈ܫܬܐ ܡܬܩܪ̈ܝܢ܇ ܟܝܢܐ ܢܗܘܐ ܠܗܝܢ ܐܝܬܘܬܢܝܐ ܘܡܩܝܡܐ. ܒܗ̇ܝ ܕܓܠܝ̣ܙܘܬܐ ܥܡ ܓܠܝ̣ܙܘܬܐ ܠܐ ܣܟ ܢܨܝܐ. ܐܦܠܐ ܡܕܠܩ̈ܒܢ ܠܚܕ̈ܕܐ ܓܠܝ̈ܙܘܬܐ. ܒܝܫܬܐ ܡܕܝܢ ܟܝܢܝܬܐ ܗ̱ܝ ܘܠܘ ܢܡܘܣܝܬܐ ܒܠܚܘܕ. ܐܦܠܐ ܠܐ ܡܕܡ ܗ̣ܝ.

 

 

 

ܢܝܫܐ ܬܪܝܢܐ. ܡܛܠ ܣܗܕ̈ܘܬܐ ܟܬܒܝ̈ܬܐ ܡܩܝ̈ܡܢܝܗ̇ ܕܬܪܥܝܬܐ ܗܕܐ. ܣܗܕܘܬܐ ܩܕܡܝܬܐ

 

ܕܘܝܕ. ܘܐܢ ܐܝܬ ܥܘܠܐ ܒܐܝ̈ܕܝ. ܘܐܢ ܦܪܥܬ ܠܡ̇ܢ ܕܥܒܕ ܠܝ ܒܝܫܬܐ. ܐܡܪܝܢ ܐܠܘ ܥܘܠܐ ܡܕܡ ܠܐ ܐܝܬܘܗܝ ܗ̣ܘܐ. ܐܝܟܢܐ ܒܐܝ̈ܕܝܐ ܗܘܐ ܗ̣ܘܐ. ܘܐܠܘ ܬܘܒ ܒܝܫܬܐ ܠܐ ܡܕܡ ܗ̣ܝ. ܐܝܟܢܐ ܡܬܥܒܕܐ. ܡܕܡ ܓܝܪ ܡܬܥܒܕ. ܘܠܘ ܠܐ ܡܕܡ.

 

ܣܗܕܘܬܐ ܕܬܪܬܝܢ:

 

ܗ̣ܘ ܟܕ ܗ̣ܘ. ܚ̇ܙܐ ܐܢ̱ܬ ܕܐܝܬ ܥܘܠܐ ܘܪܘܫܥܐ. ܐܡܪܝܢ ܐܠܘ ܥܘܠܐ ܘܪܘܫܥܐ ܕܒܝ̈ܫܬܐ ܐܢܘܢ ܠܐ ܐܝܬܝܗܘܢ ܗ̣ܘܘ. ܐܝܟܢܐ ܐܡ̇ܪ ܗ̣ܘܐ ܕܘܝܕ ܕܐܝܬ ܥܘܠܐ ܘܪܘܫܥܐ.

 

ܣܗܕܘܬܐ ܕܬܠܬ:

 

ܐܘܢܓܠܝܘܢ. ܡ̣ܢ ܠܒܐ ܓܝܪ ܢܦ̈ܩܢ ܡܚ̈ܫܒܬܐ ܒܝ̈ܫܬܐ. ܕܓܘܪܐ ܘܕܩܛܠܐ ܘܕܙܢܝܘܬܐ ܘܒܝܫܘܬܐ ܘܓܢܒܘܬܐ ܘܣܗܕܘܬ ܫܘܩܪܐ ܘܓܘܕܦܐ. ܗܠܝܢ ܕܗ̣ܢܝܢ ܐܢܝܢ ܕܡܣܝ̈ܒܢ ܠܗ ܠܒܪܢܫܐ. ܐܡܪܝܢ ܐܠܘ ܗܠܝܢ ܟܠܗܝܢ ܡܕܡ ܠܐ ܐܝܬܝܗܝܢ ܗܘܝ̈ ܘܓܠܝ̈ܙܘܬܐ ܗܘܝ̈ ܦܫܝ̣ܛܐܝܬ ܐܝܟ ܡܠܬܟܘܢ. ܐܝܟܢܐ ܡ̣ܢ ܠܒܐ ܢܦ̈ܩܢ ܗܘܝ̈. ܗ̇ܘ ܓܝܪ ܕܠܐ ܡܕܡ ܗ̣ܘ ܘܠܐ ܥ̇ܐܠ ܘܠܐ ܢ̇ܦܩ.

 

ܣܗܕܘܬܐ ܕܐܪܒܥ:

 

ܦܘܠܘܣ. ܐܫܠܡ ܐܢܘܢ ܐܠܗܐ ܠܪ̈ܓܝܓܬܐ ܛܡ̈ܐܬܐ ܕܠܒܗܘܢ. ܐܝܟܢܐ ܕܢܨܥܪܘܢ ܦܓܪ̈ܝܗܘܢ ܒܗܝܢ. ܐܡܪܝܢ ܐܠܘ ܪ̈ܓܝܓܬܐ ܛܡ̈ܐܬܐ ܕܐܝܬܝܗܝܢ ܒܝ̈ܫܬܐ ܒܫܪܪܐ ܠܐ ܐܝܬܝܗܝܢ ܗܘܝ̈. ܐܝܟܢܐ ܡܬܬܫܠܡܝ̣ܢ ܗ̣ܘܘ ܠܗܝܢ ܒܢܝ̈ܢܫܐ. ܘܐܝܟܢܐ ܡܨܛܥܪܝ̣ܢ ܗ̣ܘܘ ܬܘܒ ܒܠܐ ܡܕܡ ܦܓܪ̈ܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪܝܐ ܕܣܥܝܝ̈ܗܘܢ ܚܘ̈ܫܒܝܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܦܣܩܐ ܕܣܝܦܐ ܒܗ̇ܝ ܕܠܣܒܝ̣ܣܘܬܐ ܦܓܪܢܝܬܐ ܓܠܙ ܡܠܙ. ܘܝܩܕܢܐ ܬܘܒ ܘܩܘܪܪܐ ܒܝܕ ܕܠܡܣܩܡܘܬܐ ܡܘܙܓܝܬܐ ܥ̇ܛܝܢ܆ ܡܚܫܝܢ. ܘܡ̣ܢ ܗܕܐ ܓܠܝܐ ܕܓܠܝ̈ܙܘܬܐ ܗ̇ܢܝܢ ܗ̣ܢܝܢ ܐܢܝܢ ܕܡܠܙ̈ܢ. ܘܠܘ ܙܢܝ̈ܐ ܫܟܝܚܘ̈ܬܢܝܐ ܕܫܟܝ̣ܚܝ̣ܢ ܒܣܝܦܐ ܘܢܘܪܐ ܘܬܠܓܐ. ܒܝܫܬܐ ܡܕܝܢ ܠܘ ܐܝܬܘܬܢܝܬܐ ܗ̱ܝ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܛܘܪܦܐ ܠܘ ܡܕܡ ܗܘܐ ܐ̱ܚܪܝܢ ܣܛܪ ܡ̣ܢ ܓܠܝ̣ܙܘܬܐ ܕܢܝܚܐ. ܘܥܪܘܩܝܐ ܕܡ̣ܢ ܛܘܪܦܐ ܗܘܝܘ ܨܘܒܐ ܕܠܘܬ ܢܝܚܐ. ܒܕܓܘܢ ܗ̇ܘ ܕܡܢܗ ܥܪܩ ܠܘ ܡܢܗ ܥܪܩ ܟܝܢܐܝܬ. ܐܠܐ ܠܘܬ ܢܝܚܐ ܨܐܒ ܒܠܚܘܕ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܠܐ ܐ̱ܢܫ ܡܛܠ ܛܒܬܐ ܬܦܫܟ ܘܐܡ̣ܪ ܕܠܐ ܐܝܬ ܒܥܠܡܐ ܗܢܐ. ܐܦܠܐ ܡܛܠ ܙܕܝܩܘܬܐ. ܐܠܐ ܡܛܠ ܗܢܝܐܘܬܐ ܐܡ̣ܪܘ ܐ̱ܢܫܝ̈ܢ ܕܠܐ ܐܝܬܝܗ̇ ܒܥܠܡܐ ܗܢܐ ܐܦܠܐ ܫܟܝ̣ܚܐ. ܘܐܦ ܚܢܢ ܗ̣ܝ ܗܕܐ ܐܡܪܢܢ ܒܫܬܐܣܬܐ ܬܡܝ̣ܢܝܬܐ ܒܪܡ ܕܝܢ ܒܙܢܐ ܡܪܬܝܢܐ. ܘܟܕ ܠܒܘܚܢܐ ܚܬܝ̣ܬܐ ܡܫܘܝܢܢ ܠܗ ܠܫܪܒܐ. ܐܠܨܐܝܬ ܐܝܬܘܢܝܐ ܡܕܡ ܡܫܟܚܝ̣ܢܢ ܠܗ̇ ܠܗܢܝܐܘܬܐ. ܘܐܠܘ ܗܢܝܐܘܬܐ ܕܡ̣ܢ ܐܘܟܠܐ ܘܫܩܝܐ ܘܚܟܘ̣ܡܝܐ. ܠܘ ܡܕܡ ܐ̱ܚܪܝܢ ܗܘܬ݀ ܣܛܪ ܡ̣ܢ ܚܘܪܪܐ ܘܕܚܝܐ ܕܠܙܬ݀ ܟܦܢܐ ܘܨܗܝܐ ܘܝܬܝܪܘܬܐ ܙܪܥܢܝܬܐ. ܙܕܩ ܗܘܐ ܕܫܘ̈ܝܬܐ ܢܗܘ̈ܝܢ ܗܘܝ̈ ܒܡܩܢܝܘܬ ܗܢܝܐܘܬܐ. ܟܠܚܕܐ ܐܟܚܕܐ ܡܬܐܟܠܢ̈ܝܬܐ ܘܡܫܬܬܝܢ̈ܝܬܐ ܘܡܬܚܟ̈ܡܢܝܬܐ. ܘܗܐ ܠܘ ܗܟܢܐ.

 

ܢܘܗܪܐ:

 

ܘܕܠܡܐ ܐ̱ܢܫ ܢܣܒܪ ܕܟܕ ܠܪ̈ܓܝܓܬܐ ܗܠܝܢ ܒܥܝ̣ܪ̈ܝܬܐ ܛܒ̈ܬܐ ܚ̇ܫܒܝ̣ܢܢ. ܥܠ ܩܢܝܢܗܝܢ ܠܫܡܘ̈ܥܐ ܡܚܦܛܝ̣ܢܢ ܘܡܠܒܛܝ̣ܢܢ܇ ܚܣ. ܐܠܐ ܠܦܘܬ ܟܝܢܗܝܢ ܘܐܝܬܘܬܗܝܢ ܛܒ̈ܬܐ ܡܢܝܢܢ ܠܗܝܢ ܘܐܦܢ ܚܫܚܬܐ ܠܐ ܢܡܘܣܝܬܐ ܕܒܗܝܢ ܪܒܬܐ ܘܡܘܒܕܢܝ̣ܬܐ ܕܢܦܫܐ ܐܝܟ ܕܐܦ ܗ̣ܘ ܩܕܝܫܐ ܕܝܘܢܢܘܣܝܘܣ ܘܟܠܗܘܢ ܡܠܦܢ̈ܐ ܠܩܛܠܐ ܘܫܪܝ̣ܚܘܬܐ ܘܚܡܬܐ ܠܘ ܒܝ̈ܫܬܐ ܟܝܢܝ̈ܬܐ ܚ̇ܫܒܝ̣ܢ܇ ܐܠܐ ܢܡܘ̈ܣܝܬܐ. ܠܗܕܐ ܓܝܪ ܣܝ̣ܡܝ̣ܢܢ ܠܡܫܪܪܘ ܒܝܕ ܐܦܘܕܝܟܣܝܣ. ܕܠܝܬ ܒܝܫܬܐ ܒܟܝܢܗܘܢ ܕܣܘܥܪ̈ܢܐ. ܐܠܐ ܟܠܡܕܡ ܕܥܒܕ ܐܠܗܐ ܛܒ ܘܫܦܝܪ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ ܘܬܪܝܢܝܬܐ

 

ܐܡܪܝܢܢ ܕܐܝܬܘܬܐ ܥܠ ܥܘܠܐ ܘܪܘܫܥܐ ܘܒܝܫܘܬܐ ܐܫܝ̣ܠܐܝܬ ܘܠܘ ܡܪܢܐܝܬ ܡܬܩܛܪܓܐ. ܘܐܠܐ ܥܘܠܐ ܟܕ ܓܘܫܡܐ ܠܐ ܐܝܬܘܗܝ. ܐܝܟܢܐ ܒܐܝܕܐ ܓܘܫܡܢܝܬܐ ܡܬܬܚܕ.

 

ܦܘܢܝܐ ܕܣܗܕܘܬܐ ܬܠܝܬܝܬܐ:

 

ܩܕܡܢܢ ܚܘܝ̣ܢܢ ܕܗ̣ܢܘܢ ܗܠܝܢ ܙܢܝ̈ܐ ܩܛܠܐ ܠܡܐܡܪ ܘܫܪܟܐ ܠܘ ܒܟܝܢܐ ܒܝ̈ܫܐ ܐܢܘܢ. ܐܠܐ ܟܕ ܒܬܐܪܬܐ ܒܝܫܬܐ ܘܣܪܝܩܬ݀ ܡ̣ܢ ܐܠܗܐ ܡܣܬܥܪܝ̣ܢ ܐܝܟ ܕܐܡ̣ܪ ܛܘܒܢܐ ܦܘܠܘܣ ܕܐܣܬܪܩܘ ܒܡܚܫ̈ܒܬܗܘܢ. ܘܐܬܚܫܚ ܠܒܗܘܢ ܕܠܐ ܡܣܬܟܠ. ܒܕܓܘܢ ܒܗ ܒܗܢܐ ܙܢܐ ܒܝ̈ܫܬܐ ܩ̇ܪܐ ܠܗܘܢ ܐܘܢܓܠܝܘܢ ܣܓܝܕܐ. ܘܝܕܝܥܐ ܗܕܐ ܡ̣ܢ ܗ̇ܝ ܕܐܡ̣ܪ. ܕܡ̣ܢ ܠܒܐ ܠܡ ܢܦ̈ܩܢ ܡܚܫ̈ܒܬܐ ܒܝ̈ܫܬܐ ܘܫܪܟܐ.

 

ܦܘܢܝܐ ܕܣܗܕܘܬܐ ܪܒܝܥܝܬܐ:

 

ܐܡܪܝܢܢ ܕܠܘ ܗܕܐ ܐܡܪܝܢܢ ܕܪ̈ܓܝܓܬܐ ܛܡ̈ܐܬܐ ܒܗ̇ܝ ܕܒܝ̈ܫܬܐ ܐܢܝܢ ܠܐ ܙܕܩ ܕܢܗܘ̈ܝܢ ܐܝܬܝܗܝܢ. ܐܠܐ ܕܗ̣ܢܝܢ ܪ̈ܓܝܓܬܐ ܒܗ̇ܝ ܕܐܝܬܝܗܝܢ. ܒܟܝܢܗܝܢ ܛܒ̈ܬܐ ܐܝܬܝܗܝܢ. ܘܡܛܠܗܕܐ ܐܝܬܝܗܘܢ. ܘܡܛܠܗ̇ܝ ܕܒܝܫܐܝܬ ܘܠܐ ܢܡܘܣܐܝܬ ܘܒܡܚܫܒܬܐ ܣܪܝ̣ܩܬ݀ ܡ̣ܢ ܛܒܬܐ ܡܣܬܥܪ̈ܢ܆ ܒܝ̈ܫܬܐ ܡܬܩܪ̈ܝܢ ܡ̣ܢ ܢܡܘܣܐ ܒܪܡ ܘܠܘ ܡ̣ܢ ܟܝܢܐ.

 

 

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܬܫܝܥܝܬܐ

 

ܡܛܠ ܒܛܝ̣ܠܘܬܐ ܐܠܗܝܬܐ ܗ̇ܝ ܕܓܘܢܐܝܬ ܠܟܠ ܣ̇ܥܪܐ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠܗ̇ܝ ܕܟܠܡܕܡ ܒܚܝܠܐ ܐܠܗܝܐ ܡ̣ܢ ܚܝܠܐ ܠܡܥܒܕܢܘܬܐ ܢܦ̇ܩ. ܣܛܪ ܡ̣ܢ ܒܘܨܪ̈ܐ ܐܝܠܝܢ ܕܡ̣ܢ ܚܐܪܘܬܢ ܟܕ ܡܬܥܨܝܐ ܡ̣ܢ ܩܛܝ̣ܪܗ ܕܟܝܢܐ ܡܣܬܥܪܝܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܕܥܠܬ݀ ܣܢܝ̣ܩܘܬܐ ܕܥܠ ܥܒܘܕܐ ܡܬܡܨܝܢܘܬܐ ܐܝܬܝܗ̇. ܘܗ̣ܝ ܗܕܐ ܓܘܢܝܬܐ ܗ̱ܝ ܠܟܠܗܘܢ ܡܬܡܨ̈ܝܢܐ. ܘܚܝܠܗ ܬܘܒ ܕܥܒܘܕܐ ܒܗ̇ܝ ܕܚܕ ܗ̣ܘ ܐܠܨܝ ܐܝܬܘܬܐ ܚܕ ܦܚܡܐ ܫܘܝܐ ܩܢܐ ܠܘܬ ܟܠܗܘܢ ܡܬܡܨ̈ܝܢܐ. ܒܕܓܘܢ ܥܠ ܥܒܘܕܘܬܐ ܕܡܕܡ ܡ̣ܢ ܡܬܡܨ̈ܝܢܐ ܡܨܐ. ܐܠܨܐܝܬ ܐܦ ܥܠ ܥܒܘܕܘܬܐ ܕܟܠܗܘܢ ܙܕܩ ܕܢܬܡܨܐ. ܘܐܠܘ ܡܕܡ ܐ̱ܚܪܝܢ ܐܝܬ ܗ̣ܘܐ. ܕܡܢܗ ܘܠܗ ܡܨܐ ܗ̣ܘܐ ܥܠ ܥܒܘܕܘܬܐ. ܐܘ ܐܠܨܝܐ ܗ̇ܘܐ ܐܘ ܡܬܡܨܝܢܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܨܝ ܐܝܬܘܬܐ ܚܕ ܗ̣ܘ ܟܝܢܐ ܬܠܝ̣ܬܝ ܩܢܘ̈ܡܐ ܐܝܟ ܕܚܘܝ̣ܢܢ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܗ̇ܘ ܡܬܡܨܝܢܐ. ܟܕ ܒܗ̇ܝ ܕܢܗܘܐ ܐܝܬܘܗܝ ܥܠ ܐܠܨܝ ܐܝܬܘܬܐ ܣܢܝܩ. ܐܠܨܐ ܕܒܡܥܒܕܢ̈ܘܬܗ ܬܘܒ ܥܠܘܗܝ ܢܣܬܢܩ. ܒܕܫܬܐܣܬܐ ܕܡܥܒܕܢ̈ܘܬܗ ܗ̱ܝ. ܫܟܝ̣ܚܘܬܗ ܗ̣ܝ. ܡܥܒܕܢܐ ܡܕܝܢ ܦܫܝ̣ܛܐ ܗ̱ܘ ܐܠܨܝ ܐܝܬܘܬܐ ܐܝܬܘܗܝ ܕܟܠܡܕܡ. ܒܡܨܥܝܐ ܐܘ ܕܠܐ ܡܨܥܝܐ. ܘܒܝܕ ܡܨܥܝܐ ܡ̇ܢ. ܐܘ ܒܝܕ ܡܠܐܟ̈ܐ ܕܪ̈ܘܚܐ ܐܢܘܢ ܕܬܫܡܫܬܐ. ܐܘ ܒܝܕ ܟܝ̈ܢܐ ܕܓܘ̈ܫܡܐ ܫܡܝ̈ܢܐ ܐܘ ܡܘ̈ܙܓܐ ܐܣܛܘܟ̈ܣܢܝܐ ܐܘ ܢܨܒܬܢܝ̈ܐ. ܐܘ ܕܚܝ̈ܘܬܐ ܠܐ ܡܠܝ̈ܠܬܐ. ܐܘ ܒܝܕ ܚܐܪܘܬܐ ܘܫܠܝ̣ܛܘܬ ܒܝܬܐ. ܐܟܡܐ ܕܥܬܝ̣ܕܝ̣ܢܢ ܠܡܫܪܪܘ ܒܝܕ ܐܠܗܐ. ܘܕܠܐ ܡܨܥܝܐ܆ ܐܝܟ ܚܝܠܐ ܕܟܠܗܘܢ ܒܪ̈ܝܐ ܒܫܘܪܝ ܒܪܝܬܐ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܡܬܡܨܝܢܘܬܐ ܗ̇ܝ ܕܐܟܚܕܐ ܒܟܠܗܘܢ ܡܬܡܨ̈ܝܢܐ ܫܘܝܐܝܬ ܫܟܝ̣ܚܐ. ܘܥܠ ܡܗܘܝܢܐ ܡܣܢܩܐ ܠܗܘܢ ܒܗܘܝܗܘܢ. ܐܘ ܥܠ ܡܗܘܝܢܐ ܕܝ̣ܠܢܝܐ ܡܣܢܩܐ ܠܗܘܢ. ܐܘ ܥܠ ܡܗܘܝܢܐ ܠܘ ܕܝ̣ܠܢܝܐ ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܡܗܘܝܢܐ ܐܠܘܠܐ ܢܬܝܩܢ ܩܢܘܡܐܝܬ ܠܐ ܡܨܐ ܠܡܗܘܝܘ. ܘܐܝܟܢܐ ܥܠ ܗ̇ܘ ܕܠܐ ܡܨܐ ܠܡܗܘܝܘ ܢܣܬܢܩ ܗ̇ܘ ܕܡܬܬܗܘܐ. ܫܪܝ̣ܟܐ ܡܕܝܢ ܕܥܠ ܡܗܘܝܢܐ ܕܝ̣ܠܢܝܐ ܡܣܬܢܩ ܘܗ̣ܘ ܗܢܐ ܠܐ ܡܨܝܐ ܕܡܬܡܨܝܢܐ ܢܗܘܐ. ܒܗ̇ܝ ܕܡܬܡܨܝܢܐ ܟܕ ܒܗܘܝܗ ܥܠ ܐܠܨܝܐ ܣܢܝ̣ܩ ܐܦ ܒܡܗܘܝܢܘܬܗ ܬܘܒ ܐܠܨܐܝܬ ܥܠܘܗܝ ܡܣܬܢܩ. ܒܕܫܬܐܣܬܐ ܕܡܗܘܝܢܘܬܗ ܗ̣ܘ ܗܘܝܗ ܗ̣ܘ ܐܝܟ ܕܐܡ̣ܪܢܢ. ܫܪܝ̣ܟܐ ܡܕܝܢ ܕܐܠܨܝܐ ܢܗܘܐ ܗ̣ܘ ܡܗܘܝܢܐ. ܘܗ̣ܘ ܗܢܐ ܐܘ ܒܝܕ ܡܨܥܝܐ ܡܗܘܐ ܐܘ ܠܘ ܒܝܕ ܡܨܥܝܐ ܐܝܟ ܕܐܡ̣ܪܢܢ. ܘܡ̣ܢ ܗܠܝܢ ܡܫܬܪܪܐ ܕܟܠܗܝܢ ܡܥܒܕܢ̈ܘܬܐ ܗ̇ܢܝܢ ܕܡܢܢ ܚܐܪܐܝܬ ܡܣܬܥܪ̈ܢ. ܒܝܕ ܒܛܝ̣ܠܘܬܐ ܐܠܗܝܬܐ ܡܣܬܥܪ̈ܢ. ܗ̇ܝ ܕܒܠܥܕܝܗ̇ ܘܠܐ ܚܕܐ ܡ̣ܢ ܗܠܝܢ ܕܗܘܝ̈.

 

ܡܚܘܝܢܘܬܐ ܕܬܠܬ:

 

ܘܗ̣ܝ ܗܕܐ ܥܠ ܫܬܐܣܬ݀ ܦܝܠܠܘܣܘ̈ܦܐ ܒܢܝܐ. ܐܡܪܝܢܢ ܕܟܠ ܥܠܬܢܐ ܒܦܚܡܐ ܕܝܬܗ ܡܬܡܨܝܢܐ ܗ̱ܘ. ܘܒܦܚܡܐ ܕܥܠܬܗ ܐܠܨܝܐ ܗ̱ܘ ܒܥܠܬܗ. ܒܕܓܘܢ ܥܠܬܐ ܕܗ̇ܝ ܕܢܬܬܗܘܐ ܡܬܡܨܝܢܐ ܗ̣ܝ ܡܬܡܨܝܢܘܬܗ ܗ̣ܝ ܕܒܥܬܗ ܥܠܬܐ ܐܡ̇ܪ ܐ̱ܢܐ ܡܩܒܠܢܝ̣ܬܐ. ܘܠܘ ܥܒܘܕܬܐ. ܘܥܠܬܐ ܕܗ̇ܝ ܕܢܗܘܐ ܗ̣ܝ ܐܠܨܝܘܬܗ ܗ̣ܝ ܕܒܥܠܬܗ. ܘܥܠܬܐ ܕܟܠܗܘܢ ܡܬܡܨ̈ܝܢܐ܆ ܐܠܗܐ ܗ̱ܘ ܫܘܒܚܐ ܠܛܝܒܘܬܗ. ܣܥܘܪ̈ܘܬܐ ܡܕܝܢ ܗ̇ܢܝܢ ܕܡܢܢ ܒܢܝ̈ܢܫܐ ܒܝܕ ܚܐܪܘܬܢ ܡܣܬܥܪ̈ܢ. ܘܗ̇ܢܝܢ ܬܘܒ ܕܡ̣ܢ ܡܢܦ̈ܫܐ ܘܠܐ ܡܢܦ̈ܫܐ ܘܚܝ̈ܐ ܘܠܐ ܚܝ̈ܐ ܡܣܬܥܪ̈ܢ ܡܢܗ ܕܐܠܗܐ ܫܘܒܚܐ ܠܛܝܒܘܬܗ ܡܣܬܥܪ̈ܢ.

 

 

 

ܢܝܫܐ ܬܪܝܢܐ ܡܛܠ ܣܗ̈ܕܘܬܐ ܟܬܒܝ̈ܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܡܘܫܐ ܡ̣ܢ ܦܘܡ ܡܪܝܐ. ܐܢܐ ܡܡܝ̣ܬ ܐ̱ܢܐ ܘܐܢܐ ܡܐܚܐ ܐ̱ܢܐ. ܐܢܐ ܡܚܐ ܐ̱ܢܐ ܘܐܢܐ ܡܐܣܐ ܐ̱ܢܐ. ܘܠܝܬ ܕܦ̇ܠܛ ܡ̣ܢ ܐܝ̈ܕܝ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܡ̣ܢ ܫܡܝܐ ܐܕܝ̣ܩ ܡܪܝܐ. ܘܚ̣ܙܐ ܠܟܠܗܘܢ ܒܢܝ̈ܢܫܐ. ܘܡ̣ܢ ܡܘܬܒܗ ܚܙܐ. ܠܟܠܗܘܢ ܥܡܘܪ̈ܝܗ̇ ܕܐܪܥܐ. ܕܓܒ̣ܠ ܐܟܚܕܐ ܠܒܗܘܢ ܘܡܬܒܝܢ ܒܟܠܗܘܢ ܥܒܕܝ̈ܗܘܢ. ܡܠܟܐ ܠܐ ܡܬܦܪܩ ܒܣܘܓܐܐ ܕܚܝܠܐ. ܐܦܠܐ ܓܢ̱ܒܪܐ ܡܬܦܨܐ ܒܣܘܓܐܐ ܕܚܝܠܗ. ܕܓܠ ܗ̣ܘ ܦܘܪܩܢܗ ܕܣܘܣܝܐ ܕܒܣܘܓܐܐ ܕܚܝܠܗ ܠܐ ܡܦܨܐ ܠܪܟܒܗ. ܥܝܢܘ̈ܗܝ ܕܡܪܝܐ ܥܠ ܙܕܝ̈ܩܐ ܕܡܣܟܝܢ ܠܛܝܒܘܬܗ. ܕܢܦܨܐ ܢܦ̈ܫܬܗܘܢ ܡ̣ܢ ܡܘܬܐ. ܘܢܚܐ ܐܢܘܢ ܒܟܦܢܐ.

 

ܣܗܕܘܬܐ ܕܬܠܬ:

 

ܗ̣ܘ ܟܕ ܗ̣ܘ ܛܒ ܗ̣ܘ ܡܪܝܐ ܘܪ̈ܚܡܘܗܝ ܥܠ ܟܠܗܘܢ ܥܒܕܘ̈ܗܝ.

 

ܣܗܕܘܬܐ ܕܐܪܒܥ:

 

ܚܟܡܬܐ ܪܒܬܐ. ܘܐܦܠܐ ܓܝܪ ܐܠܗܐ ܐܝܬ ܣܛܪ ܡܢܟ ܗ̇ܘ ܕܒܛܝ̣ܠ ܠܗ ܥܠ ܟܠ. ܘܬܘܒ. ܟܕ ܓܝܪ ܟܐܢܐ ܐܝܬܝܟ. ܟܠܡܕܡ ܡܕܒܪ ܐܢ̱ܬ. ܘܬܘܒ. ܘܗ̇ܝ ܕܥܠ ܟܠ ܫܠܝ̣ܛ ܐܢ̱ܬ. ܕܥܠ ܟܠ ܬܚܘܣ ܥܒܕܐ ܠܟ.

 

ܣܗܕܘܬܐ ܕܚܡܫ:

 

ܐܘܢܓܠܝܘܢ. ܟܠ ܒܐܝܕܗ ܗܘܐ. ܘܒܠܥܕܘܗܝ ܐܦܠܐ ܚܕܐ ܗܘܬ݀. ܡܕܡ ܕܗܘܐ. ܒܗ ܚܝ̈ܐ ܗܘܐ. ܘܚܝ̈ܐ ܐܝܬܝܗܘܢ ܢܘܗܪܐ ܕܒܢܝ̈ܢܫܐ. ܘܗ̣ܘ ܢܘܗܪܐ ܒܚܫܘܟܐ ܡܢܗܪ. ܘܚܫܘܟܐ ܠܐ ܐܕܪܟܗ.

 

ܣܗܕܘܬܐ ܕܫܬ:

 

ܒܗ ܟܕ ܒܗ. ܐܝܟܢܐ ܕܬܗܘܘܢ ܒܢܘ̈ܗܝ ܕܐܒܘܟܘܢ ܕܒܫܡܝܐ ܗ̇ܘ ܕܡܕܢܚ ܫܡܫܗ ܥܠ ܛܒ̈ܐ ܘܥܠ ܒܝ̈ܫܐ. ܘܡܚܬ ܡܛܪܗ ܥܠ ܟܐܢ̈ܐ ܘܥܠ ܥܘ̈ܠܐ.

 

ܣܗܕܘܬܐ ܕܫܒܥ:

 

ܦܘܠܘܣ ܐܟܡ̇ܢ ܕܡܢܗ ܟܠ. ܘܒܗ ܘܒܐܝ̈ܕܘܗܝ. ܘܒܗ ܐܦ ܚܐܝ̣ܢܢ ܘܡܬܬܙܝ̣ܥܝ̣ܢܢ.

 

ܣܗܕܘܬܐ ܕܬܡܢܐ:

 

ܩܕܝܫܐ ܕܝܘܢܢܣܝܘܣ ܒܩܦܠܐܘܢ ܕܐܪܒܥܐ ܕܡܐܡܪܐ ܕܬܠܬܐ ܗ̇ܘ ܕܠܥܠ ܡ̣ܢ ܟܠ ܩܘܡܐ ܘܙܘܥܐ. ܕܡܛܠܬܗ ܗ̣ܘ ܟܠ ܩܘܡܐ ܘܙܘܥܐ. ܘܡܢܗ ܘܒܗ ܘܒܐܝ̈ܕܘܗܝ ܘܡܛܠܬܗ. ܡܢܗ ܓܝܪ ܘܒܐܝ̈ܕܘܗܝ ܐܝܬܝܗ̇ ܟܠ ܐܘܣܝܐ. ܘܟܠ ܚܝ̈ܐ ܕܗܘܢܐ ܘܕܢܦܫܐ ܘܕܟܠ ܟܝܢܐ. ܘܒܬܪ ܩܠܝܠ. ܘܟܠ ܚܝܠܐ ܘܟܠ ܪܓܫܬܐ. ܘܟܠ ܡܠܬܐ ܘܟܠ ܣܘܟܠܐ ܘܟܠ ܓܫܬܐ ܘܟܠ ܚܟܡܬܐ.

 

ܣܗܕܘܬܐ ܕܬܫܥ:

 

ܗ̣ܘ ܟܕ ܗ̣ܘ ܩܕܝܫܐ ܒܩܦܠܐܘܢ ܕܚܕܥܣܪ ܕܝܠܗ ܕܡܐܡܪܐ. ܡܬܦܪܣ ܓܝܪ ܥܠ ܟܠ. ܘܡܫܘܬܦ ܒܗ ܠܟܠ ܐܝܟ ܕܒܝܬܝ ܠܗ. ܘܡܒܥ ܠܗܘܢ ܗ̣ܘ ܠܗ ܒܫܦܝ̣ܥܘܬܐ ܕܡܦܪܝܢܘܬܗ ܡܫܝܢܢܝ̣ܬܐ. ܘܡܟܬܪ ܡܛܠ ܡܥܠܝܘܬܐ ܕܚܕܝܘܬܗ. ܟܠܗ ܠܘܬ ܟܠܗ ܘܒܟܠܗ. ܟܕ ܡܚܝܕ ܗ̣ܘ ܠܗ ܡܥܠܝܐܝܬ.

 

ܣܗܕܘܬܐ ܕܥܣܪ:

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܚܡܫܐ. ܐܘ ܒܡܠܬ ܡܕܡ ܘܒܛܟܣܐ܇ ܐܝܟܢܐ ܕܐܬܩܝܡ ܗܢܐ ܟܠ ܡ̣ܢ ܒܪܝ̣ܫܝܬ ܘܐܬܡܙܓ. ܘܐܟܚܕܐ ܐܬܐܣܪ. ܘܐܬܬܙܝ̣ܥ ܦܐܝܐܝܬ ܐܝܟ ܕܠܗ̇ܘ ܕܐܙܝ̣ܥܗ ܒܠܚܘܕܘܗܝ ܝܕܝܥܐ. ܘܗܟܢܐ ܦܢܐ ܡܬܬܙܝ̣ܥ ܘܗܦܟ ܡܬܗܕܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܫܝܥܝܬܐ

 

ܡܛܠ ܬܪܥܝ̣ܬܐ ܣܩܘܒܠܝܬܐ ܕܗ̇ܢܘܢ ܕܐܡܪܝܢ ܕܠܘ ܒܒܛܝ̣ܠܘܬܐ ܐܘܟܝܬ ܒܚܝܠܐ ܐܠܗܝܐ ܡܣܬܥܪ ܟܠ ܡܕܡ. ܘܗ̣ܝ ܗܕܐ ܬܪܥܝ̣ܬܐ ܠܚܡܫ ܐܪ̈ܣܝܣ ܐܬܦܠܓܬ݀. ܐܪܣܝܣ ܩܕܡܝܬܐ ܦܝܠܠܘܣܘ̈ܦܐ ܦܪ̈ܝܦܐܛܝܩܘ ܕܐܡܪܝܢ ܕܚܕ ܗ̣ܘ ܒܠܚܘܕ ܥܠܬܢܐ ܥܠܬܐ ܐܠܗܐ. ܘܥܠܬܢ̈ܐ ܐ̱ܚܪ̈ܢܐ ܚܕ ܡ̣ܢ ܚܕ ܡܬܬܗܘܝܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܐܠܗܐ ܗ̇ܘ ܦܫܝ̣ܛ ܒܟܠ ܐܠܘ ܡܗܘܝܢܐ ܗܘܐ ܕܬܪܝܢ ܥܠܬܢ̈ܐ. ܡ̣ܢ ܐܠܨ̈ܬܐ ܢܩܦܐ ܗܘܬ݀ ܬܪܝܢܘܬܐ ܠܣܘ̈ܟܠܐ ܕܡܗܘܝܢܘܬܗ. ܒܕܓܘܢ ܗ̣ܢܘܢ ܗܠܝܢ ܬܪ̈ܝܗܘܢ ܣܘ̈ܟܠܐ. ܐܘܡܢ̈ܘܬܐ ܗ̣ܘܘ ܕܟܝܢܗ. ܐܘ ܢܩܦܝ̈ܬܐ ܕܡ̣ܢ ܠܒܪ ܐܘ ܚܕ ܡܢܗܘܢ ܡܢܬܐ. ܘܗ̇ܘ ܐ̱ܚܪܢܐ ܢܩܦܝܐ. ܘܗ̇ܘ ܩܕܡܝܐ ܘܗ̇ܘ ܕܬܪܝܢ ܠܐ ܫܪܝܪܝܢ. ܒܗ̇ܝ ܕܠܘܬ ܪܘܟܒܐ ܕܟܝܢܗ ܦܫܝ̣ܛܐ ܡܘܒܠܝܢ ܗ̇ܝ ܕܫܟܝܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܣܘܟܠܐ ܕܡܬܢܩܦܢܘܬܗ ܕܠܚܕ ܡܢܗܘܢ. ܐ̱ܚܪܝܢ ܗ̣ܘ ܡ̣ܢ ܣܘܟܠܐ ܕܡܬܢܩܦܢܘܬܗ ܕܠܗ̇ܘ ܐ̱ܚܪܢܐ. ܒܕܓܘܢ ܗ̣ܢܘܢ ܗܠܝܢ ܬܪ̈ܝܗܘܢ ܣܘ̈ܟܠܐ܆ ܐܘ ܡܢܘ̈ܬܐ ܐܢܘܢ ܕܟܝܢܗ ܐܘ ܢܩܦܝ̈ܬܐ ܕܡ̣ܢ ܠܒܪ. ܘܗܟܢܐ ܗ̣ܝ ܗ̇ܝ ܡܠܬܐ ܩܕܝܫܬܐ ܢܩܦܐ ܘܠܠܐ ܣܘܦ ܡܫܬܠܫܠܐ ܗ̇ܝ ܕܫܟܝ̣ܪܐ. ܒܪܘܝܐ ܡܕܝܢ ܦܫܝܛܐ ܕܚܕ ܗ̣ܘ ܒܠܚܘܕ ܥܠܬܐ ܘܠܘ ܕܝܬܝܪ ܡ̣ܢ ܚܕ. ܘܥܠܬܢ̈ܐ ܐ̱ܚܪ̈ܢܐ ܚܕ ܡ̣ܢ ܚܕ ܘܠܘ ܡܢܗ ܡܬܬܗܘܝܢ.

 

ܣܥܝܐ ܬܪܝܢܐ:

 

ܐܡܪܝܢ ܐܠܘ ܡܨܝܢ ܗ̣ܘܘ ܠܡܫܬܟܚܘ ܡ̣ܢ ܒܪܘܝܐ ܒܙܢܐ ܠܚܘܕܝܐ ܘܦܫܝ̣ܛܐ ܐܠܦ ܘܒܝܬ ܘܐܠܦ ܠܐ ܐܝܬܝܗ̇ ܒܝܬ ܘܐܦܠܐ ܒܝܬ ܐܠܦ. ܡܫܬܟܚܐ ܗܘܬ݀ ܐܠܦ ܕܒܚܕ ܙܢܐ ܘܗ̣ܘ ܟܕ ܗ̣ܘ ܕܡܬܬܗܘܝܐ ܗܘܬ݀ ܗ̇ܝ ܕܫܟܝ̣ܪܐ. ܒܗ̇ܝ ܕܟܕ ܦܫܝܛܐ ܗ̱ܘ ܡܗܘܝܢܐ ܠܐ ܡܨܝܐ ܕܢܗܘܘܢ ܒܗ ܙܢܝ̈ܐ ܡܫܚ̈ܠܦܐ ܕܒܗܘܢ ܠܥܠܬܢ̈ܐ ܡܫܚ̈ܠܦܐ ܢܗܘܐ. ܒܪܘܝܐ ܡܕܝܢ ܕܚܕ ܗ̣ܘ ܒܠܚܘܕ ܥܠܬܢܐ ܥܠܬܐ. ܗ̇ܘ ܕܐܦ ܗ̣ܘ ܦܫܝܛܐ ܗ̱ܘ ܘܠܝܬ ܒܗ ܣܟ ܪܘܟܒܐ ܕܢܩܦܐ ܗܘܬ݀ ܡܢܗ ܕܦܫܝܛܐ ܘܠܐ ܡܬܬܗܘܝܐ ܠܗ ܣܓܝܐܘܬܐ.

 

ܣܥܝܐ ܬܠܝܬܝܐ:

 

ܐܡܪܝܢ ܕܡ̣ܢ ܐܠܨ̈ܬܐ ܕܕܡܝܘܬܐ ܡܕܡ ܘܒܝܬܝܘܬܐ ܬܗܘܐ ܒܝܬ ܟܠ ܥܠܬܐ ܠܥܠܬܢܗ̇. ܒܕܓܘܢ ܐܠܘ ܗ̇ܘ ܕܚܕ ܗ̣ܘ ܦܫܝܛܐ ܕܠܝܬ ܠܗ ܪܘܟܒܐ ܕܥܠܬܢ̈ܐ ܡܫܚ̈ܠܦܐ ܡܨܐ ܗ̣ܘܐ ܕܢܗܘܐ ܥܠܬܢܐ ܡ̣ܢ ܐܠܨ̈ܬܐ ܡܕܡܐ ܕܡܐ ܗ̣ܘܐ ܠܡܫܚ̈ܠܦܐ. ܘܗܟܢܐ ܡܫܬܟܚ ܗ̣ܘܐ ܕܗ̣ܘ ܡܢܗ ܡܫܚܠܦ. ܘܕܟܕ ܚܕ ܗ̣ܘ ܠܘ ܚܕ ܗ̣ܘ܆ ܗ̇ܝ ܕܫܟܝܪܐ.

 

ܣܥܝܐ ܪܒܝܥܝܐ:

 

ܐܡܪܝܢ ܕܡ̣ܢ ܐܠܨ̈ܬܐ ܚܙܝܢܢ ܠܡܥܒܕܢܘܬܗ̇ ܕܢܘܪܐ ܕܡܫܚܠܦܐ ܡ̣ܢ ܡܥܒܕܢܘܬܗܘܢ ܕܡܝ̈ܐ. ܐܫܬܘܕܥܢܢ ܕܢܘܪܐ ܡܫܚܠܦܐ ܒܟܝܢܐ ܡ̣ܢ ܡܝ̈ܐ. ܘܐܠܘ ܒܪܘܝܐ ܕܡܥܒܕܢ̈ܘܬܐ ܡܫܚ̈ܠܦܬܐ ܡܨܐ ܗ̣ܘܐ ܕܢܗܘܐ ܡܥܒܕܢܐ. ܡܫܬܟܚ ܗ̣ܘܐ ܕܠܘ ܒܟܠܡܕܡ ܗ̣ܘ ܠܗ ܒܝܬܗ ܕܡܐ. ܘܡ̣ܢ ܗܪܟܐ ܡܬܟܢܫܐ ܕܦܫܝܛܐ ܠܘ ܦܫܝܛܐ ܗ̱ܘ ܗ̇ܝ ܕܫܟܝ̣ܪܐ. ܒܪܘܝܐ ܡܕܝܢ ܟܕ ܦܫܝܛܐ ܗ̱ܘ. ܕܚܕ ܗ̣ܘ ܒܠܚܘܕ ܥܠܬܢܐ ܥܠܬܐ ܒܠܥܕ ܡܨܥܝܐ. ܘܕܗ̇ܢܘܢ ܐ̱ܚܪ̈ܢܐ ܣܓܝ̈ܐܐ ܘܡܫܚ̈ܠܦܐ ܥܠܬܐ ܗ̣ܘ ܒܝܕ ܡܨܥܝܘܬܐ ܕܡܨܥܝܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܠܚܘܕܝܘܬܐ ܡ̇ܢ ܫܪܝܪܐ ܥܠܝܗ̇ ܕܦܠܓܐ ܗ̱ܝ ܕܬܪܝܢ ܘܬܘܠܬܐ ܕܬܠܬܐ ܘܪܘܒܥܐ ܕܐܪܒܥܐ. ܒܕܓܘܢ ܐܡܪܝܢܢ ܕܗ̣ܢܘܢ ܗܠܝܢ ܣܘ̈ܟܠܐ ܡ̣ܢ ܐܠܨ̈ܬܐ ܕܡܫܚܠܦܝܢ ܡ̣ܢ ܚܕ̈ܕܐ. ܘܗܟܢܐ ܠܗ̇ ܠܗܝ ܫܟܝ̣ܪܘܬܐ ܕܟܢܫܬܘܢ ܡܟܢܫܝ̣ܢܢ. ܘܣܓܝܐܘܬܐ ܠܟܝܢܗ̇ ܕܠܚܘܕܝܘܬܐ ܡܩܦܝ̣ܢܢ ܗ̇ܝ ܕܫܟܝ̣ܪܐ. ܘܟܕ ܡܠܬܐ ܗܕܐ ܒܛܠܬܐ ܗ̱ܝ. ܒܗ̇ ܒܕܡܘ̣ܬܐ ܘܗ̇ܝ ܕܐܡ̣ܪܬܘܢ. ܟܐܡܬ݀ ܟܕ ܣܘ̈ܟܠܐ ܗܠܝܢ ܡܫܚ̈ܠܦܐ ܠܐ ܡܟܢܝܢ ܠܡܥܒܕ ܣܓܝܐܘܬܐ ܒܟܝܢܗ̇ ܕܠܚܘܕܝܘܬܐ. ܐܦܠܐ ܣܘ̈ܟܠܐ ܗ̇ܢܘܢ ܕܐܢ̱ܬܘܢ ܟܢܫܬܘܢ ܡܟܢܝܢ ܠܡܥܒܕ ܣܓܝܐܘܬܐ ܒܟܝܢܐ ܦܫܝܛܐ ܕܒܪܘܝܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܟܕ ܡܫܬܟ̈ܚܢ ܡ̣ܢ ܥܠܬܐ ܐܠܦ ܘܒܝܬ܇ ܘܒܝܬ ܠܐ ܐܝܬܝܗ̇ ܐܠܦ. ܗ̇ܝ ܕܡܬܟܢܝܐ ܗܕܐ ܗ̱ܝ ܟܐܡܬ݀ ܕܒܗ ܒܙܒܢܐ ܝܚܝܕܝܐ ܡܬܬܗܘܝܐ ܗܘܬ݀ ܡܢܗ̇ ܕܥܠܬܐ ܦܫܝܛܬܐ ܐܠܦ ܡܬܬܗܘܝܐ ܗܘܬ݀ ܡܢܗ̇ ܠܐ ܐܠܦ ܟܐܡܬ݀ ܒܝܬ. ܘܠܘ ܕܠܐ ܡܬܬܗܘܝܐ ܡܢܗ̇ ܐܠܦ. ܦܪܝܫܐ ܗܘܬ݀ ܓܝܪ ܦܪܘܛܐܣܝܣ ܗ̇ܝ ܕܐܡ̇ܪܐ ܕܡܬܬܗܘܝܐ ܡܢܗ̇ ܐܠܦ. ܡ̣ܢ ܦܪܘܛܐܣ ܗ̇ܝ ܕܐܡ̇ܪܐ ܕܠܐ ܡܬܬܗܘܝܐ ܡܢܗ̇ ܐܠܦ. ܘܫܟܝ̣ܪܘܬܐ ܒܝܕ ܙܠܝ̣ܡܘ̣ܬ ܟܘܢܫܟܘܢ ܐܬܟܢܫܬ݀. ܘܠܘ ܡܢܗ ܕܪܘܟܒܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܥܠܬܐ ܒܗ̇ܝ ܕܥܠܬܐ ܗ̱ܝ ܡܥܒܕܢܝ̣ܬܐ ܗ̱ܝ ܕܗܘܝܐ. ܘܥܠܬܢܐ ܒܗ̇ܝ ܕܥܠܬܢܐ ܗ̱ܘ. ܡܩܒܠܢܐ ܗ̱ܘ ܕܗܘܝܐ. ܘܒܗܠܝܢ ܬܪܝܢ ܙܢܝ̈ܐ ܘܠܐ ܚܕܐ ܕܡܝܘܬܐ ܐܘ ܒܝܬܝܘܬܐ ܙܕܩ ܕܢܗܘܐ ܒܝܬ ܥܠܬܐ ܠܥܠܬܢܐ. ܘܡ̣ܢ ܗܪܟܐ ܠܐ ܢܩܦܐ ܫܟܝ̣ܪܘܬܐ ܕܟܢܫܬܘܢ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܠܘ ܒܡܚܡܢܘܬ ܢܘܪܐ ܘܡܩܪܢܘܬ ܡܝ̈ܐ ܡܫܬܘܕܥܝ̣ܢܢ ܫܘܚܠܦ ܟܝܢܝ̈ܗܘܢ. ܐܠܐ ܒܗ̇ܝ ܕܢܘܪܐ ܟܕ ܡܚܡܐ ܠܐ ܡܨܝܐ ܕܬܩܘܪܪ. ܘܡܝ̈ܐ ܟܕ ܡܩܘܪܪܝ̣ܢ ܠܐ ܡܨܝܢ ܕܢܚܡܘܢ. ܐܝܟܢܐ ܕܐܠܘ ܟܠܚܕ ܡܢܗܘܢ ܬܪ̈ܬܝܗܝܢ ܡܨܐ ܗ̣ܘܐ. ܠܐ ܣܟ ܦܪ̈ܝ̣ܫܝ ܒܟܝܢܐ ܠܗܘܢ ܕܝܢܝܢ ܗܘܝܢ. ܘܟܕ ܒܕܐܝܟ ܗܠܝܢ ܠܘ ܡܫܚܠܦܘܬ ܡܥܒܕܢ̈ܘܬܐ ܐܝܬܝܗ̇ ܕܡܫܘܕܥܐ ܥܠ ܣܓܝܐܘܬܐ ܕܟܝ̈ܢܐ. ܒܗ̇ ܒܕܡܘ̣ܬܐ ܘܠܘܬ ܒܪܘܝܐ. ܠܘ ܥܠ ܣܓܝܐܘܬܐ ܘܪܘܟܒܐ ܕܟܝܢܗ ܡܫܘܕܥܐ ܡܫܚܠܦܘܬ ܡܥܒܕܢ̈ܘܬܗܘܢ.

 

ܡܟܠܢܘܬܐ:

 

ܘܐ̱ܢܫ ܡ̣ܢ ܗܠܝܢ ܕܝܠܢ ܟܕ ܣܘܙܓܪܝܣܐ ܣܥܐ ܗ̣ܘܐ ܠܡܥܒܕ ܠܬܪܥܝ̣ܬܐ ܗܕܐ ܒܪܝܬܐ. ܕܠܐ ܠܡ ܪܚܝ̣ܩܐ ܡ̣ܢ ܪܥܝܢܐ ܥܕܬܢܝܐ.ܗ̇ܝ ܕܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܡܝܬܐ ܗ̣ܘܐ ܠܡܨܥܬܐ ܘܐܡ̇ܪ ܗ̣ܘܐ ܕܐܡ̣ܪ ܒܡܐܡܪܐ ܕܚܕܥܣܪ ܗܟܢܐ. ܗܢܐ ܟܠܗ ܠܡ ܝܬܝܪ ܦܐܝܘܬ ܪܒܘܬܐ ܗ̣ܝ ܠܥܠܬܐ ܩܕܡܝܬܐ ܕܠܐܠܗܘܬܐ ܡܨܥܝܬܐ ܠܡܐܬܐ ܥܠ ܒܪ̈ܝܬܐ. ܘܡܓܡܕ ܗ̣ܘܐ ܠܡܐܡܪ ܕܗܐ ܩܪܝ̣ܚܐܝܬ ܐܡ̇ܪ ܡܠܦܢܐ ܗܢܐ. ܕܐܠܗܘܬܐ ܗ̱ܘ ܪܝܫܐ ܐܠܗܐ ܘܠܘ ܕܒܪ̈ܝܬܐ. ܒܗ̇ܝ ܕܗ̇ܝ ܐܘ܆ ܒܕܘܟܬ݀ ܠܘ ܢܣܝ̣ܒܐ ܐܝܟ ܥܝܕܐ ܕܠܟܣܝܣ. ܕܠܘܬܗ ܕܗܢܐ ܟܕ ܦܝ̣ܣܐ ܥܒܕ ܗܘܝܬ ܐܡ̇ܪ ܗܘܝܬ. ܕܐܬܪܟܢ ܐܘ ܢܟܦܐ ܘܐܬܕܢܝ ܠܡܬܡܕܥܘ ܢܝܫܗ ܕܡܠܦܢܐ. ܕܗܕܐ ܡ̇ܠܦ ܠܟ ܐܘ ܠܝ ܐܦ ܠܟܠܗܘܢ ܗ̇ܢܘܢ ܕܗܘܢܐ ܕܡܫܝܚܐ ܩܢܝܢ ܫܠܝܚܐܝܬ ܠܡܐܡܪ. ܕܗܕܐ ܝܬܝܪ ܦܐܝܐ ܗܘܬ݀ ܠܐܠܗܐ ܐܒܐ ܕܠܡܫܘ̈ܬܦܝ ܒܟܝܢܐ ܠܘܩܕܡ ܢܗܘܐ ܗ̣ܘܐ ܥܠܬܐ ܟܝܢܐܝܬ. ܐܝܛܐ ܠܒܪ̈ܝܬܐ ܨܒܝܢܐܝܬ. ܘܠܘ ܕܒܪ̈ܝܬܐ ܠܘܩܕܡ. ܐܝܛܐ ܕܐܠܗܘܬܐ. ܘܕܗ̇ܢܘ ܢܝܫܗ ܗ̣ܘ ܒܕܩ. ܒܗ̇ܝ ܕܐܘܣܦ ܐܡ̣ܪ. ܘܒܝܕ ܐܠܗܘܬܐ ܡܨܥܝܬܐ ܘܫܪܟܐ.

 

 

 

 

 

 

 

 

 

     #1 

 

ܐܪܣܝܣ ܬܪܝܢܝܬܐ ܕܦܘܣܝܘ̈ܠܘܓܘ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܗܘܢ ܚܘܫܒܝܐ

 

ܐܡܪܝܢ ܕܐܟܡܐ ܕܢܨ̈ܒܬܐ ܘܚܝ̈ܘܬܐ ܒܝܕ ܡܘ̈ܙܓܐ ܟܝܢܝ̈ܐ ܡܬܝܠܕܝܢ ܘܡܬܪܒܝܢ ܘܡܥܒܕܢ̈ܘܬܗܘܢ ܡܥܒܕܝ̣ܢ. ܒܗ̇ ܒܕܡܘ̣ܬܐ ܘܩܢܘ̈ܡܐ ܐ̱ܢܫܝ̈ܐ. ܒܕܓܘܢ ܟܠ ܒܪܢܫܐ ܠܗ̇ܘ ܡܐ ܕܠܡܘܙܓܗ ܒܝܬܝ  ܘܚܢܐ ܣ̇ܥܪ. ܐܢ ܛܒܬܐ ܘܐܢ ܒܝܫܬܐ. ܘܐܦܢ ܠܐ ܢܨܒܐ. ܒܗ̇ܝ ܕܟܕ ܡ̣ܢ ܡܘܙܓܗ ܡ̣ܢ ܩܛܝ̣ܪ ܡܬܕܒܪ ܘܡܬܥܫܡ܆ ܠܘܬ ܟܠ ܣܥܘܪܘܬܐ ܐܝ̇ܕܐ ܕܗ̣ܝ ܡܬܬܝܬܐ. ܘܕܒܛܝ̣ܠܘܬܐ ܐܠܗܝܬܐ ܘܚܐܪܘܬܐ ܐ̱ܢܫܝܬܐ ܢܒܱ̈ܛܠܢ ܠܥܒܕܘ̈ܗܝ ܕܡܘܙܓܐ ܣܓܝ ܠܐ ܡܬܗܡܢܢܝ̣ܬܐ ܗ̱ܝ ܘܐܠܘ ܒܛܝ̣ܠܘܬܐ ܡܒܛܠܢܝ̣ܬܐ ܗܘܬ݀ ܕܥܝܕܘ̈ܗܝ ܕܟܝܢܐ. ܙܕܩ ܗܘܐ ܕܐܦ ܠܡܘܩܕܢܘܬܗ̇ ܕܢܘܪܐ ܡܒܛܠܐ ܗܘܬ݀. ܘܐܠܘ ܬܘܒ ܚܐܪܘܬܐ ܡܒܛܠܢܝ̣ܬܐ ܗܘܬ݀. ܙܕܩ ܗ̣ܘܐ ܕܘܠܐ ܚܕ ܚܛܝܐ ܒܥܠܡܐ ܐܝܬ ܗ̣ܘܐ. ܒܗ̇ܝ ܕܟܠܗܘܢ ܒܢܝ̈ܢܫܐ ܠܗ̇ ܠܚܐܪܘܬܐ ܐܝܟ ܕܐܡܪܝܢ ܐܢ̱ܬܘܢ ܩܢܝܢ. ܘܟܠܗܘܢ ܝ̇ܕܥܝܢ. ܕܚܛܗܐ ܒܝܫ ܗ̣ܘ ܘܠܐ ܙܕܩ ܕܢܣܬܥܪ ܘܠܐ ܦܐܐ. ܘܥܡܗ̇ ܝ̣ܕܥܬܐ ܕܗܕܐ ܟܠܗܘܢ ܣ̇ܥܪܝܢ ܠܗ ܘܓܠܝܐ ܕܠܘ ܡܕܡ ܐ̱ܚܪܝܢ ܐܠܐ ܡܘܙܓܐ ܢܓܕ ܠܗܘܢ ܠܘܬܗ.

 

 

 

ܢܝܫܐ ܬܪܝܢܐ ܡܛܠ ܫܪܝܗ ܕܣܥܝܐ ܗܢܐ

 

ܐܡܪܝܢܢ ܕܗ̣ܝ ܡܠܬ݀ ܡܘܙܓܐ ܡ̣ܢ ܫܪ̈ܫܝܗ̇ ܡܙܥܙܥܬܐ ܗ̱ܝ ܘܕܠܐ ܫܬܐܣܬܐ. ܒܗ̇ܝ ܕܗ̣ܢܘܢ ܐܣܛܘܟ̈ܣܐ ܟܕ ܒܚܕ̈ܕܐ ܡܬܡܙܓܝܢ. ܘܡ̣ܢ ܚܕ̈ܕܐ ܡܫܬܗ̈ܝܢ ܐܝܢܝ̈ܘܬܗܘܢ. ܕܕܡ ܐܝܢܝܘܬܐ ܡܕܡ ܡܨܥܝܬܐ ܕܗ̣ܝ ܗ̣ܝ ܡܘܙܓܐ ܐܝܟ ܕܐܡ̇ܪܝܬܘܢ ܡ̣ܢ ܡܬܡܙܓܢܘܬܗܘܢ ܬܫܬܟܚ. ܐܘ ܒܚܕܐ ܡܢܬ ܙܒܢܐ ܡܥܒܕܝ̣ܢ ܒܚܕ̈ܕܐ ܘܡ̣ܢ ܚܕ̈ܕܐ ܡܬܬܥܒܕܝ̣ܢ. ܐܘ ܒܙܒ̈ܢܐ ܡܫܚ̈ܠܦܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܡܫܗܝܢܐ ܥܫܝ̣ܢ ܡ̣ܢ ܡܫܬܗܝܢܐ ܙܕܩ ܕܢܗܘܐ. ܘܡܫܬܗܝܢܐ ܬܘܒ ܬܚܘ̣ܒ ܐܠܨܐ ܕܢܗܘܐ ܡ̣ܢ ܡܫܗܝܢܐ. ܘܐܠܘ ܒܚܕ ܙܒܢܐ ܫܗܝ̣ܘ ܠܚܕ̈ܕܐ ܘܐܫܬܗܝ̣ܘ ܡ̣ܢ ܚܕ̈ܕܐ. ܡܫܬܟܚ ܟܠܚܕ ܡܢܗܘܢ ܕܒܗ ܒܗ̇ܘ ܙܒܢܐ ܕܝܬܝܪ ܥܫܝ̣ܢ ܡ̣ܢ ܟܢܬܗ ܝܬܝܪ ܬܚܘܒ ܡܢܗ܆ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܗ̇ܘ ܕܡ̣ܢ ܟܕܘ ܐܡܚܠ ܘܬܚܒ ܘܐܫܬܗܝ̣. ܐܝܟܢܐ ܕܢܬܡܨܐ ܕܠܗ̇ܘ ܕܐܡܚܠܗ ܘܐܬܚܒܗ ܘܫܗܝܗ. ܢܡܚܠ ܘܢܬܚܒ ܘܢܫܗܐ. ܘܡ̣ܢ ܗܪܟܐ ܡܫܬܪܪ ܐܠܐ ܡܫܪܪܘܬ ܡܠܬ݀ ܡܘܙܓܐ. ܘܬܘܒ ܐܠܘ ܡܥܒܕܢܘܬܐ ܡ̣ܢ ܡܘ̈ܙܓܐ ܡܣܬܥܪ̈ܢ ܗܘܝ̈. ܙܕܩ ܗ̣ܘܐ ܐܣܛܘܟܣܐ ܡܝܢܝܐ ܒܗ̇ܝ ܕܦܫܝܛܐ ܗ̣ܘ ܘܠܐ ܡܫܗܝܐ ܩܪܝܪܘܬܗ ܒܚܡܝܡܘܬܐ ܡܬܘܡ. ܝܬܝܪ ܡܩܘܪܪ ܗ̣ܘܐ ܡ̣ܢ ܩܦܘܪ ܕܡܪܟܒܐ ܗ̱ܘ ܘܡܫܗܝܐ ܚܡܝܡܘܬܗ. ܘܗܐ ܠܘ ܗܟܢܐ. ܘܙܕܩ ܗ̣ܘܐ ܬܘܒ ܕܟܠ ܣܡܐ ܕܫܘܝܐ ܗܘܬ݀ ܚܡܝܡܘܬܗ ܠܚܡܝܡܘܬܗ̇ ܕܡܫܒܚܬܐ. ܕܐܦ ܗ̣ܘ ܠܡܪܬܐ ܣܘܡܩܬܐ ܢܢܨܦ ܗ̣ܘܐ ܘܗܐ ܠܘ ܗܟܢܐ. ܘܙܕܩ ܗ̣ܘܐ ܕܩܢܘ̈ܡܐ ܐ̱ܢܫܝ̈ܐ ܕܫܘܝܢ ܗ̣ܘܘ ܡܘܙܓܝ̈ܗܘܢ. ܕܐܦ ܡܥܒܕܢ̈ܘܬܗܘܢ ܫܘ̈ܝܢ ܗܘܝ̈. ܘܗܐ ܠܘ ܗܟܢܐ. ܘܥܡ ܗܠܝܢ. ܘܐܢ ܢܐܫܦ ܕܐܝܬ ܡܘܙܓܐ ܘܡܟܢ ܠܡܥܒܕܘ. ܐܠܐ ܐ̱ܚܪ̈ܢܝܬܐ ܐܢܝܢ ܡܥܒܕܢ̈ܘܬܐ ܡܘܙܓܝ̈ܬܐ ܘܐ̱ܚܪ̈ܢܝܬܐ ܗ̇ܢܝܢ ܕܨܒܝܢܝ̈ܬܐ. ܒܕܓܘܢ ܗܠܝܢ ܡܘܙܓܝ̈ܬܐ܆ ܡ̣ܢ ܡܘܙܓܐ ܡܬܦܪ̈ܢܣܢ. ܘܗ̇ܢܝܢ ܨܒܝܢܝ̈ܬܐ ܡ̣ܢ ܚܐܪܘܬܐ. ܘܬܪ̈ܬܝܗܝܢ ܡܐܣܪ ܐܣܝ̣ܪ̈ܢ ܒܫܫܠܬܐ ܕܒܛܝ̣ܠܘܬܐ ܐܠܗܝܬܐ ܗ̇ܝ ܕܕܠܐ  ܡܢܗ̇ ܘܠܐ ܡܘܙܓܐ ܠܡܗܘܐ ܡܨܐ ܐܘ ܠܡܗܘܝܘ ܐܦܠܐ ܚܐܪܘܬܐ.

 

 

 

ܡܟܠܢܘܬܐ

 

ܘܐ̱ܢܫ ܡ̣ܢ ܗܠܝܢ ܕܠܓܘ ܡ̣ܢ ܕܪ̈ܬܐ ܥܕܬܢܝ̈ܬܐ. ܟܕ ܠܬܪܥܝ̣ܬܐ ܗܕܐ ܗܡܣ ܗ̣ܘܐ ܠܡܩܝܡܘ ܗ̇ܝ ܕܫܠܝܚܐ ܦܘܠܘܣ ܡܝܬܐ ܗ̣ܘܐ ܠܣܗܕܘܬܐ ܘܐܡ̇ܪ ܗ̣ܘܐ ܕܐܡ̣ܪ. ܒܗ̇ܝ ܕܠܘܬ ܪ̈ܘܡܝܐ. ܕܠܐ ܗ̣ܘܐ ܓܝܪ ܠܛܒܬܐ ܕܨܒ̇ܐ ܐ̱ܢܐ ܕܐܥܒܕ ܥܒ̇ܕ ܐ̱ܢܐ܆ ܐܠܐ ܒܝܫܬܐ ܕܠܐ ܨܒ̇ܐ ܐ̱ܢܐ ܕܐܥܒܕ ܥܒ̇ܕ ܐ̱ܢܐ. ܠܐ ܗ̣ܘܐ ܐܢܐ ܥܒ̇ܕ ܐ̱ܢܐ. ܐܠܐ ܚܛܝܬܐ ܕܥܡܪܐ ܒܝ. ܕܠܘܬܗ ܕܗܢܐ ܟܝܢܝܐ ܬܡܝ̣ܗܐ ܐܡ̇ܪ ܗܘܝܬ. ܕܒܗܝܢ ܒܡ̈ܠܐ ܗܠܝܢ ܕܡܣܒܪ ܐܢ̱ܬ ܕܡܪܝܡ ܫܠܝܚܐ. ܐܦ ܠܒܛܝ̣ܠܘܬܐ ܐܦ ܠܚܐܪܘܬܐ. ܒܗܝܢ ܟܕ ܒܗܝܢ܆ ܠܗܝܢ ܟܕ ܠܗܝܢ ܡܫܪܪ ܥܡ ܬܘܣܦܬܐ ܕܥܘܗܕܢ ܚܫܝ̈ ܒܣܪܐ. ܐܢ ܢܟܦܐܝܬ ܬܬܡܕܥ. ܗܐ ܓܝܪ ܒܗ̇ܝ ܕܐܡ̣ܪ ܚ̇ܙܐ ܐ̱ܢܐ ܢܡܘܣܐ ܐ̱ܚܪܢܐ ܒܗܕܡܝ̈ ܠܚܫ̈ܐ ܕܒܣܪܐ ܟܝܢܝ̈ܐ ܘܡܘ̈ܙܓܝܐ ܫܘܕܥ. ܘܒܗ̇ܝ ܕܐܡ̣ܪ ܕܡܩܪܒ ܠܘܩܒܠ ܢܡܘܣܐ ܕܪܥܝܢܝ. ܠܚܐܪܘܬܐ ܐ̱ܢܫܝܬܐ ܘܫܠܝ̣ܛܘܬ ܒܝܬܐ ܡܠܝ̣ܠܬܐ ܘܪܥܝܢܝܬܐ ܫܪܪ. ܘܒܗ̇ܝ ܕܐܘܣܦ ܐܡ̣ܪ ܕܫܕܪ ܐܠܗܐ ܠܒܪܗ ܒܕܡܘ̣ܬܐ ܕܒܣܪܐ ܕܚܛܝ̣ܬܐ ܡܛܠܬܗ̇ ܕܚܛܝܬܐ. ܕܢܚܝܒܝܗ̇ ܠܚܛܝܬܐ ܒܒܣܪܗ. ܠܗ̇ ܠܒܛܝ̣ܠܘܬܐ ܐܠܗܝܬܐ ܕܥܠ ܟܠ ܢܗܪ.

 

 

 

ܐܪܣܝܣ ܬܠܝܬܝܬܐ ܕܐܣܛܪ̈ܘܢܘܡܘ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܗܘܢ ܚܘܫܒܝܐ

 

ܐܡܪܝܢ ܕܟܘܟ̈ܒܐ ܘܡܘܙ̈ܠܬܐ ܗ̣ܢܘܢ ܐܢܘܢ ܡܠܚܘ̈ܗܝ ܕܥܠܡܐ ܗܢܐ. ܘܒܗܘܢ ܘܒܝܕܗܘܢ ܡܣܬܥܪ̈ܢ ܡܥܒܕܢ̈ܘܬܐ ܟܠܗܝܢ ܐܕܫܢܝ̈ܬܐ ܘܩܢܘ̈ܡܝܬܐ ܕܡܠܝ̣̈ܠܐ ܘܕܠܐ ܡܠܝ̈ܠܐ. ܘܕܠܐ ܡܠܝ̈ܠܐ܆ ܐܝܟ ܗ̇ܝ ܕܚܙܝܢܢ ܠܢܗܪ̈ܘܬܐ ܕܒܡܠܝܘܬܗ ܕܣܗܪܐ ܫܦܥܝ̣ܢ. ܘܡܘ̈ܚܐ ܡܬܡܠܝܢ ܗܟܘܬ ܘܒܢ̈ܬ ܦܪ̈ܚܬܐ. ܘܝܡܐ ܡܬܓܠܠ. ܘܫܘܚ̈ܠܦܐ ܕܫܢ̱ܬܐ ܒܟܪܘܟܝܗ ܕܫܡܫܐ ܒܡܠܘ̈ܫܐ ܡܬܛܟܣܝܢ. ܘܪ̈ܘܚܐ ܒܫܘܢܝܗ ܕܐܪܡܝܣ ܡ̣ܢ ܙܘܕܝܘܢ ܠܐܚܪܢܐ. ܘܒܡܥܠܬܗ ܕܠܓܘ ܡ̣ܢ ܙܠܝ̣̈ܩܝ ܫܡܫܐ ܘܡܦܩܬܗ ܡܫܬܓ̈ܫܢ ܒܢܫܒܝ̈ܗܝܢ. ܘܕܡܠܝ̈ܠܐ ܡ̇ܢ܆ ܐܝܟ ܗ̇ܝ ܕܚܙܝܢܢ. ܕܟܠ ܒܪܢܫܐ ܟܕ ܡܪܐ ܕܢܚܗ ܠܘܬ ܪܘܡܗ ܡܬܥܠܐ ܘܒܛܒ̈ܐ ܛܒܐܝܬ ܚ̇ܐܪ. ܝܘܬܪ̈ܢܐ ܣܓܝ̈ܐܐ ܗܘܝܢ ܠܗ ܠܒܪܢܫܐ ܗ̇ܘ. ܘܟܕ ܡܪܐ ܕܢܚܗ ܡܬܚܪܟ. ܐܘ ܡܬܬܚܬܐ. ܐܘ ܒܒܝ̈ܫܐ ܒܝܫܐܝܬ ܚܐܪ. ܙܝܡܝ̈ܐܣ ܣܓܝ̈ܐܬܐ ܓܕ̈ܫܢ ܠܗ. ܘܡ̣ܢ ܗܠܝܢ ܐܡܪܝܢ ܝܕܥܢܢ ܕܡܥܒܕܢ̈ܘܬܐ ܟܠܗܝܢ ܡ̣ܢ ܟܘܟ̈ܒܐ ܡܣܬܥܪ̈ܢ ܒܥܠܡܢ ܗܢܐ ܘܠܘ ܒܒܛܝ̣ܠܘܬܐ ܐܘ ܒܚܐܪܘܬܐ ܐܠܐ ܒܚܠܩܐ ܘܒܓܕܐ.

 

 

 

ܢܝܫܐ ܬܪܝܢܐ ܡܛܠ ܫܪܝܗ ܕܣܥܝܐ ܗܢܐ

 

ܐܡܪܝܢܢ ܕܒܘܚܢܐ ܒܚܝ̣ܪܐ ܡܚܘܐ ܠܢ. ܕܡܨܝܐ ܕܬܪܝܢ ܣܘܥܪ̈ܢܝܢ ܐܟܚܕܐ ܢܗܘܘܢ ܘܐܟܚܕܐ ܢܒܛܠܘܢ. ܘܠܐ ܢܗܘܐ ܚܕ ܡܢܗܘܢ ܥܠܬܐ ܕܗ̇ܘ ܐ̱ܚܪܢܐ. ܐܠܐ ܐܘ ܬܪ̈ܝܗܘܢ ܥܠܬܢ̈ܐ ܢܗܘܘܢ ܕܚܕܐ ܥܠܬܐ. ܐܝܟ ܗܘܠܐ ܘܐܕܫܐ. ܕܟܠ ܐܡܬܝ ܕܚܕ ܡܢܗܘܢ ܡܫܬܟܚ. ܐܠܨܐܝܬ ܐܦ ܗ̇ܘ ܐ̱ܚܪܢܐ ܡܫܬܟܚ. ܟܕ ܛܒ ܠܐ ܗ̣ܘܐ ܥܠܬܐ ܗ̱ܝ ܕܐܕܫܐ. ܒܕܠܐ ܐܝܬܝܗ̇ ܡ̣ܢ ܩܕܡܘܗܝ. ܐܦܠܐ ܐܕܫܐ ܥܠܬܐ ܗ̱ܘ ܕܗܘܠܐ. ܒܕܠܐ ܐܝܬܘܗܝ ܡ̣ܢ ܩܕܡܝܗ̇. ܐܠܐ ܐܠܗܐ ܗ̱ܘ ܥܠܬ݀ ܬܪ̈ܝܗܘܢ. ܐܘ ܥܠܬܢ̈ܐ ܢܗܘܘܢ ܕܚܕܐ ܥܠܬܐ. ܐܦܠܐ ܕܚܕ̈ܕܐ. ܐܝܟ ܗ̇ܝ ܕܟܠ ܐܡܬܝ ܕܒܪܢܫܐ ܓܚܘܟܐ ܗ̱ܘ. ܣܘܣܝܐ ܨܗܘ̣ܠܐ ܗ̱ܘ. ܒܗ̇ ܒܕܡܘ̣ܬܐ ܘܗܪܟܐ ܐܡܪܝܢܢ. ܕܐܦܢ ܟܕ ܒܚܘܠܦܐ ܡܕܡ ܣܗܪܐ ܡܬܕܠܠ. ܝܡܐ ܡܬܓܠܠ. ܐܟܚܕܐ. ܐܠܐ ܠܘ ܚܘܠܦܗ ܕܣܗܪܐ ܥܠܬܐ ܗ̱ܘ ܕܫܘܚܠܦܗ ܕܝܡܐ. ܐܦܠܐ ܬܘܒ ܚܘܪܟܗ ܕܡܪܐ ܕܢܚܐ ܥܠܬܐ ܗ̱ܘ ܕܡܙܕܡܝܢܘܬܗ ܕܒܪܢܫܐ ܘܐܦܢ ܐܟܚܕܐ ܗܘܝܢ. ܐܠܐ ܐܠܗܐ ܗ̱ܘ ܥܠܬܐ ܕܚܘܠܦ ܣܗܪܐ ܘܫܘܚܠܦ ܝܡܐ ܘܚܘܪܟ ܟܘܟܒܐ ܘܡܡܝ̣ܬܢܗ ܕܒܪܢܫܐ. ܘܗܟܢܐ ܘܗܠܝܢ ܐ̱ܚܪ̈ܢܝܬܐ. ܗܐ ܓܝܪ ܬܪܝܢ ܬܘܪ̈ܝܢ ܕܒܦܕܢܐ ܕܒܪܝܢ. ܘܐܦܢ ܟܠܡܐ ܕܚܕ ܡܢܗܘܢ ܡܬܬܙܝ̣ܥ. ܐܦ ܗ̇ܘ ܐ̱ܚܪܢܐ ܡܬܬܙܝܥ ܘܟܕ ܫܠܐ ܫܠܐ. ܒܪܡ ܠܘ ܙܘܥܐ ܐܘ ܫܠܝܐ ܕܚܕ ܡܢܗܘܢ ܥܠܬܐ ܗ̱ܘ ܕܙܘܥܐ ܘܫܠܝܐ ܕܗ̇ܘ ܐ̱ܚܪܢܐ. ܐܠܐ ܐ̱ܚܪܝܢ ܗ̇ܘ ܕܠܬܪ̈ܝܗܘܢ ܐܟܚܕܐ ܡܙܝܥ ܘܡܫܠܐ.

 

 

 

ܐܪܣܝܣ ܪܒܝܥܝܬܐ ܕܡܢܝ̈ܢܝܐ. ܘܒܗ̇ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܗܘܢ ܚܘܫܒܝܐ

 

ܐܡܪܝܢ ܕܬܪܝܢ ܐܢܘܢ ܐܝܬܝ̈ܐ ܢܘܗܪܐ ܘܚܫܘܟܐ ܘܛܒ̈ܬܐ ܡ̣ܢ ܢܘܗܪܐ ܡܣܬܥܪ̈ܢ. ܘܒܝ̈ܫܬܐ ܡ̣ܢ ܚܫܘܟܐ. ܒܗ̇ܝ ܕܐܠܘ ܚܕ ܐܝܬܝܐ ܐܘܟܝܬ ܐܠܗܐ ܛܒܬܐ ܘܒܝܫܬܐ ܡܨܐ ܗ̣ܘܐ ܠܡܣܥܪ. ܗ̣ܘ ܗܢܐ ܐܘ ܛܒܐ ܗ̣ܘܐ ܐܘ ܒܝܫܐ ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܛܒܐ ܟܕ ܒܝܫܬܐ ܣܥܪ. ܘܒܝܫܬܐ ܛܒܬܐ ܠܐ ܐܝܬܝܗ̇. ܡܫܬܟܚ ܛܒܐ ܕܛܒܐ ܠܐ ܐܝܬܘܗܝ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܒܝܫܐ ܟܕ ܛܒܬܐ ܣܥܪ. ܘܛܒܬܐ ܒܝܫܬܐ ܠܐ ܐܝܬܝܗ̇. ܡܫܬܟܚ ܒܝܫܐ ܕܒܝܫܐ ܠܐ ܐܝܬܘܗܝ ܗ̇ܝ ܕܫܟܝ̣ܪܐ. ܘܡ̣ܢ ܗܪܟܐ ܝܕܝܥܐ ܐܡܪܝܢ ܕܠܘ ܒܚܕܐ ܒܛܝ̣ܠܘܬܐ ܡܬܦܪ̈ܢܣܢ ܣܥܘܪ̈ܘܬܐ ܒܥܠܡܐ ܗܢܐ. ܐܦܠܐ ܚܐܪܘܬܐ ܡܨܝܐ ܕܬܫܬܠܛ ܥܠ ܬܪ̈ܝܗܘܢ ܓܒܝ̈ܗ̇ ܕܐܢܛܝܦܐܣܝܣ ܛܒܬܐ ܐܡ̇ܪ ܐ̱ܢܐ ܘܠܐ ܛܒܬܐ.

 

 

 

ܢܝܫܐ ܬܪܝܢܐ ܡܛܠ ܫܪܝܗ ܕܣܥܝܐ ܗܢܐ

 

ܐܡܪܝܢܢ ܕܢܘܗܪܐ ܓܕܫܐ ܗ̱ܘ. ܘܒܓܘܫܡܐ ܩܢܐ ܩܘܝܡܐ. ܘܐܝܟܢܐ ܢܬܡܨܐ ܕܥܠܬܐ ܢܗܘܐ ܠܓܘܫܡܐ ܘܠܡܥܒܕܢ̈ܘܬܗ. ܗ̣ܘ ܗܟܘܬ ܘܒܝܫܬܐ ܓܠܝ̣ܙܘܬܐ ܗ̱ܝ ܐܟܡܐ ܕܚܘܝ̣ܢܢ. ܘܗ̇ܘ ܕܠܐ ܡܕܡ ܗܘܐ ܐܝܟܢܐ ܡܨܐ ܠܡܗܘܐ ܥܠܬܐ ܠܡܕܡ̈ܐ. ܘܐ̱ܢܫ ܡ̣ܢ ܥܬܝ̈ܩܐ ܐܪܥ ܗ̇ܘܐ ܠܬܪ̈ܝܝ ܐܝܬܝ̈ܐ ܘܡܚܝܒ ܗ̣ܘܐ ܠܗܘܢ ܘܐܡ̇ܪ. ܕܟܕ ܢܐܡܪ ܒܪܢܫܐ ܐ̱ܢܫ ܕܚܛܝܬ. ܐܘ ܡܫܪ ܐܘ ܡܕܓܠ. ܘܐܢ ܡܫܪ ܢܘܗܪܐ ܗ̱ܘ ܥܠܬ݀ ܫܪܝܪܘܬܗ. ܡܫܬܟܚ ܠܗ ܢܘܗܪܐ ܕܥܠܬܐ ܗ̱ܘ ܕܚܛܝ̣ܬܐ ܕܐܝܬܝܗ̇ ܒܝܫܬܐ ܗ̇ܝ ܕܫܟܝ̣ܪܐ. ܐܢ ܕܝܢ ܠܘ ܢܘܗܪܐ ܐܠܐ ܚܫܘܟܐ ܐܝܬܘܗܝ ܥܠܬ݀ ܫܪܝܪܘܬܗ܇ ܡܫܬܟܚ ܠܗ  ܚܫܘܟܐ ܕܥܠܬܐ ܕܫܪܪܐ ܕܐܝܬܘܗܝ ܛܒܬܐ ܗ̇ܝ ܕܫܟܝܪܐ. ܘܐܢ ܡܕܓܠ ܘܢܘܗܪܐ ܗ̱ܘ ܥܠܬ݀ ܕܓܠܘܬܗ. ܡܫܬܟܚ ܠܗ ܢܘܗܪܐ ܕܥܠܬܐ ܗ̱ܘ ܕܕܓܠܘܬܐ ܕܐܝܬܝܗ̇ ܒܝܫܬܐ. ܗ̇ܝ ܕܫܟܝ̣ܪܐ. ܐܢܕܝܢ ܠܘ ܢܘܗܪܐ. ܐܠܐ ܚܫܘܟܐ ܐܝܬܘܗܝ ܥܠܬ݀ ܕܓܠܘܬܗ܆ ܡܫܬܟܚ ܠܗ ܚܫܘܟܐ ܕܥܠܬܐ ܗ̱ܘ ܕܙܕܝܩܘܬܐ ܕܐܝܬܝܗ̇ ܛܒܬܐ ܐܘܟܝܬ ܕܗ̇ܝ ܕܟܕ ܠܐ ܚܛܐ܇ ܐܡ̣ܪ ܕܚܛܝܬ. ܗ̇ܝ ܕܫܟܝ̣ܪܐ. ܘܐܡܪܝܢܢ ܕܗ̣ܝ ܗܕܐ ܐܪܘܥܘܬܐ ܘܐܦܢ ܡܚܝܠܢܝ̣ܬܐ ܗ̱ܝ ܕܬܪܥܝ̣ܬܢ ܘܣܬܘܪܬܐ ܕܬܪܥܝ̣ܬܐ ܣܩܘܒܠܝܬܐ. ܐܠܐ ܠܐ ܫܦܪܐ ܠܢ ܒܕܣܘܦܝܣܛܝܩܝܬܐ ܗ̱ܝ. ܒܗ̇ܝ ܕܡܨܝܐ ܕܢܦܢܘܢ ܡܢܝܢܝ̈ܐ ܘܢܐܡܪܘܢ. ܕܥܒܘܕܗ̇ ܡ̇ܢ ܕܚܛܝ̣ܬܐ ܚܫܘܟܐ ܐܝܬܘܗܝ. ܘܕܗ̇ܝ ܕܢܘܕܐ ܐ̱ܢܫ ܒܚܛܝ̣ܬܗ ܟܕ ܡܫܪ ܢܘܗܪܐ ܐܝܬܘܗܝ. ܒܕܓܘܢ ܦܘܢܝܐ ܗ̇ܘ ܩܕܡܝܐ ܕܐܡ̣ܪܢܢ ܗܘܝܘ ܦܘܢܝܐ ܡܪܢܝܐ.

 

 

 

ܐܪܣܝܣ ܚܡܝܫܝܬܐ ܕܦܪ̈ܝܫܐ ܡ̣ܢ ܡܫܠܡܢ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ ܠܐ ܡܬܘܡ ܡܨܐ ܠܡܣܥܪ ܥܒܕ̈ܐ ܐܝܠܝܢ ܕܒܪܢܫܐ ܒܟܠܗܘܢ ܥܒܕܘ̈ܗܝ ܐܘ ܠܐܠܗܐ ܫܦܪ ܐܘ ܠܥܠܡܐ. ܟܐܡܬ݀ ܐܘ ܙܕܝܩܘܬܐ ܦܠܚ ܐܘ ܚܛܝܬܐ. ܘܟܕ ܠܐܠܗܐ ܐܠܗܐ ܐ̱ܚܪܢܐ ܠܐ ܐܝܬ ܕܠܗ ܢܫܦܪ. ܐܦܠܐ ܠܥܠܡܐ ܗܢܐ ܫܝ̣ܛܐ ܘܗܘܠܢܝܐ ܡܨܐ ܠܡܫܦܪ ܒܫܘܡܠܝ ܪ̈ܓܝܓܬܗ. ܡܛܠܗܕܐ ܟܐܢܐܝܬ ܐܡܪܝܢܢ. ܕܠܐ ܡܨܐ ܐܠܗܐ ܠܡܣܥܪ ܥܒܕ̈ܐ ܐܝܠܝܢ ܕܒܪܢܫܐ ܣܥܪ. ܒܚܐܪܘܬܗ ܡܕܝܢ ܣ̇ܥܪ ܒܪܢܫܐ ܟܠܡܐ ܕܣܥܪ ܐܢ ܛܒܬܐ ܘܐܢ ܒܝܫܬܐ. ܘܠܘ ܒܛܝ̣ܠܘܬܐ ܐܠܗܝܬܐ ܡܨܝܐ ܕܬܣܥܘܪ ܒܐܝ̈ܕܘܗܝ ܡܕܡ. ܘܐ̱ܢܫ ܡ̣ܢ ܕܝܠܢ ܟܕ ܠܣܥܝܐ ܗܢܐ ܡܫܪ. ܐܡ̇ܪ ܗ̇ܝ ܕܡܪܢ ܕܐܡ̣ܪ ܕܠܐ ܡܨܐ ܥܒܕܐ ܠܬܪܝܢ ܡܪ̈ܘܢ ܠܡܦܠܚ. ܒܕܓܘܢ ܠܐܠܗܐ ܟܕ ܡܪܐ ܐ̱ܚܪܢܐ ܠܐ ܐܝܬ ܠܐ ܡܨܐ ܠܡܣܥܪ ܗ̇ܘ ܡܐ ܕܥܒܕܐ ܐܘܟܝܬ ܒܪܢܫܐ ܣ̇ܥܪ.

 

ܣܥܝܐ ܬܪܝܢܐ:

 

ܐܡܪܝܢ ܕܟܠܗܝܢ ܗܠܝܢ ܕܣ̇ܥܪ ܒܪܢܫܐ ܒܚܐܪܘܬܗ ܣ̇ܥܪ. ܐܢ ܛܒܬܐ ܘܐܢ ܒܝܫܬܐ. ܒܗ̇ܝ ܕܐܢ ܐܦ ܒܛܝ̣ܠܘܬܐ ܠܗܝܢ ܠܗܠܝܢ ܕܗ̣ܘ ܣ̇ܥܪ ܣܥܪܐ. ܗ̣ܝ ܗ̇ܝ ܣܥܘܪܘܬܐ ܐܢ ܒܝܕ ܒܛܝ̣ܠܘܬܐ ܡܫܬܡܠܝܐ. ܒܛܠܐ ܠܗ̇ ܚܐܪܘܬܐ. ܘܐܢ ܒܝܕ ܚܐܪܘܬܐ ܡܫܬܡܠܝܐ ܒܛܠܐ ܠܗ̇ ܒܛܝ̣ܠܘܬܐ. ܘܟܕ ܐܢܢܩܐܝܬ ܝ̇ܕܥܝ̣ܢܢ ܕܐܝܬ ܠܢ ܚܐܪܘܬܐ ܕܨܒܝܢܐܝܬ ܗܠܝܢ ܕܓܒܝܐ ܣܥܪܐ. ܐܢܢܩܐܝܬ ܝ̇ܕܥܝ̣ܢܢ ܕܠܘ ܒܛܝ̣ܠܘܬܐ ܗ̱ܝ ܗ̇ܝ ܕܣܥܪܐ ܒܐܝܕܝ̈ܢ ܡܕܡ.

 

ܣܥܝܐ ܬܠܝܬܝܐ:

 

ܐܡܪܝܢ ܕܠܐ ܡܨܐ ܐܠܗܐ ܠܡܣܥܪ ܗ̇ܢܝܢ ܕܒܪܢܫܐ ܡܨܐ ܠܡܣܥܪ. ܒܗ̇ܝ ܕܣܘܓܐܐ ܕܣܥܘܪ̈ܘܬܗ ܕܒܪܢܫܐ ܒܝ̈ܫܬܐ ܐܢܝܢ ܘܐܠܗܐ ܒܝܫܬܐ ܠܐ ܣ̇ܥܪ. ܒܗ̇ܝ ܕܟܠ ܕܣ̇ܥܪ ܒܝܫܬܐ. ܐܘ ܟܕ ܠܐ ܝܕܥ ܣ̇ܥܪ. ܐܘ ܟܕ ܣܢܝܩ ܠܗ̇. ܟܐܡܬ ܕܢܝܚܐ ܪܓܬܢܝܐ ܐܘ ܝܘܬܪܢܐ ܒܗ̇ ܩܛܦ. ܘܐܠܗܐ ܟܕ ܠܝܬ ܣܟܐ ܠܝ̣ܕܥܬܗ. ܘܡܫܡܠܝ ܒܟܠ ܐܝܬܘܗܝ ܘܠܐ ܣܢܝ̣ܩܐ. ܠܐ ܡܨܐ ܠܡܣܥܪ ܒܝܫܬܐ. ܘܡ̣ܢ ܗܪܟܐ ܡܬܟܢܫܐ ܕܠܘ ܟܠܗܝܢ ܗܠܝܢ ܕܒܪܢܫܐ ܣ̇ܥܪ܆ ܡܨܐ ܠܡܣܥܪ. ܐܠܐ ܚܐܪܘܬܗ ܕܒܪܢܫܐ ܗ̣ܝ ܗ̣ܝ ܕܣܥܪܐ ܣܥܘܪ̈ܘܬܗ. ܘܐ̱ܢܫ ܡ̣ܢ ܕܝܢ ܟܕ ܡܫܪܪ ܕܠܣܥܝܐ ܗܢܐ. ܗ̇ܝ ܕܢܒܝܐ ܚܒܩܘܩ ܐܡ̇ܪ ܗ̣ܘܐ ܕܐܡ̣ܪ. ܕܟܝ̈ܢ ܐܢܝܢ ܥܝܢܝ̈ܟ ܘܠܐ ܚܙ̈ܝܢ ܒܝ̈ܫܬܐ. ܘܠܡܚܪ ܒܥܘܠܐ ܠܐ ܡܫܟܚ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܟܠܗܘܢ ܥܒܕܘ̈ܗܝ ܕܒܪܢܫܐ. ܕܒܗܘܢ ܠܐܠܗܐ ܐܘ ܠܥܠܡܐ ܫܦܪ. ܐܘ ܙܘ̈ܥܐ ܐܢܘܢ ܐܘ ܫܠܝ̈ܐ. ܘܐܠܗܐ ܫܘܒܚܐ ܠܛܝܒܘܬܗ ܟܕ ܥܒܘܕܐ ܗ̱ܘ ܕܒܪܢܫܐ. ܠܘ ܠܐ ܡܨܐ ܕܐܦ ܥܒܘܕܐ ܕܥܒܕܘ̈ܗܝ ܢܗܘܐ. ܐܝܢ ܒܪܢܫܐ ܡ̇ܢ ܒܗ̇ܝ ܕܗ̣ܘ ܡܛܠܬܗ ܣ̇ܥܪ ܠܥܒܕ̈ܐ ܗܠܝܢ܆ ܡܬܐܡܪ ܕܫܦܪܐ ܠܐܠܗܐ ܐܘ ܠܥܠܡܐ. ܐܠܗܐ ܕܝܢ ܟܕ ܠܘ ܡܛܠ ܝܬܗ ܣ̇ܥܪ ܗܠܝܢ. ܠܐ ܡܬܐܡܪ ܕܐܠܗܐ ܗ̣ܘ ܠܗ ܐܘ ܠܐܠܗܐ ܐ̱ܚܪܢܐ ܐܘ ܠܥܠܡܐ ܫܦܪ. ܘܕܕܚܛܗ̈ܐ ܡ̇ܢ ܐܝܬ ܐܡܬܝ ܕܥܠܬܐ ܗ̇ܘܐ ܐܠܗܐ܇ ܐܠܐ ܒܪܡ ܠܘ ܟܝܢܐܝܬ. ܐܠܗܐ ܓܝܪ ܠܐ ܡܢܣܝ ܒܒܝ̈ܫܬܐ. ܐܠܐ ܟܕ ܒܬܐܪ̈ܬܐ ܠܐ ܡܬܐܣܝܢ̈ܝܬܐ ܕܡܠܝ̈ܠܐ ܚ̇ܐܪ. ܘܠܐ ܨܒܐ ܠܡܥܨܐ ܚܐܪܘܬܗܘܢ ܡܗܡܐ ܚܝܪܗ ܡܢܗܘܢ. ܘܗܟܢܐ ܡܫܬܠܛܝ̣ܢ ܥܠܝܗܘܢ ܚܛܗ̈ܐ. ܘܗܕܐ ܗ̱ܝ ܡܫܬܒܩܢܘܬܐ ܕܡ̣ܢ ܐܠܗܐ. ܘܣܗܕܐ ܠܗܕܐ ܕܡܬܐܡܪܐ ܗ̇ܝ ܕܐܡܝ̣ܪܐ ܡܛܠ ܫܐܘܠ. ܕܐܨܠܚܬ݀ ܠܡ ܪܘܚܗ ܕܐܠܗܐ ܗ̇ܝ ܒܝܫܬܐ ܥܠ ܫܐܘܠ ܘܐܬܢܒܝ ܒܓܘ ܒܝܬܗ. ܘܕܐܠܗܐ ܐܬܩܪܝܬ݀ ܪܘܚܐ ܗܕܐ ܒܝܫܬܐ ܘܛܢܦܬܐ. ܒܗ̇ܝ ܕܒܪܝܬܐ ܗ̱ܝ ܕܐܠܗܐ ܐܝܟ ܫܪܟܐ ܕܒܪ̈ܝܬܐ. ܘܗ̇ܝ ܕܐܡ̣ܪ ܐܫܥܝܐ. ܕܝܗܒ ܠܗܘܢ ܐܠܗܐ ܪܘܚܐ ܡܕܥܪܢܝܬܐ. ܘܥܝ̈ܢܐ ܕܠܐ ܢܒܚܪܘܢ ܒܗܝܢ. ܘܐܕܢ̈ܐ ܕܠܐ ܢܫܡܥܘܢ. ܥܕܡܐ ܠܝܘܡܐ ܕܝܘܡܢܐ. ܘܗ̇ܝ ܕܫܠܝܚܐ ܬܘܒ. ܐܫܠܡ ܐܢܘܢ ܠܡ ܐܠܗܐ ܠܪ̈ܓܝܓܬܐ ܛܡ̈ܐܬܐ ܘܫܪܟܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ. ܕܠܐ ܐܡܪܝܢܢ ܕܗ̣ܝ ܒܛܝ̣ܠܘܬܐ ܡܢܗ̇ ܘܠܗ ܣܥܪܐ ܗܠܝܢ ܕܣܥܪܐ ܚܐܪܘܬܢ. ܘܐܦܠܐ ܚܐܪܘܬܐ ܡܢܗ̇ ܘܠܗ̇ ܣܥܪܐ ܗܠܝܢ ܕܣܥܪܐ ܒܛܝ̣ܠܘܬܐ ܕܚܐܪܘܬܐ ܣ̇ܥܪܐ ܠܗܝܢ ܠܣܥܘܪ̈ܘܬܐ ܡܠܝ̈ܠܬܐ. ܟܕ ܡܥܕܪܘ ܡܥܕܪܐ ܒܛܝ̣ܠܘܬܐ ܠܚܐܪܘܬܐ ܠܘܬ ܣܥܘܪ̈ܘܬܐ ܛܒ̈ܬܐ. ܘܟܕ ܗ̣ܝ ܚܐܪܘܬܐ ܡܦܢܝܐ ܐܦ̈ܐ ܡܢܗ̇ ܕܒܛܝ̣ܠܘܬܐ ܡܪܦܝܐ ܒܗ̇ ܐܝܕܝ̈ܐ ܘܗܟܢܐ ܠܘܬ ܒܝ̈ܫܬܐ ܡܫܬܪܓܠܐ. ܐܝܟ ܟܪܝܗܐ ܐ̱ܢܫ ܕܟܠܡܐ ܕܒܕܘܒܪ̈ܘܗܝ ܡܝܬܪ̈ܐ ܕܐܣܝܐ ܡܬܕܒܪ. ܠܘܬ ܚܘܠܡܢܐ ܡܫܬܘܫܛ. ܘܟܕ ܡܗܡܐ ܡ̣ܢ ܗ̇ܝ ܕܢܫܬܥܒܕ ܠܡܣܘܣܝܢܘܬܗ ܘܠܘܬ ܣܩܘܒ̈ܠܝܬܐ ܡܨܛܠܐ. ܗܝܕܝܢ ܡܬܥܦܦܝ̣ܢ ܚܫܘ̈ܗܝ. ܘܣ̇ܓܝܢ ܕܘܢܩܘ̈ܗܝ. ܘܡܛܠܗܕܐ ܠܐ ܦܐܝܐ ܕܢܐܡܪ. ܕܗ̣ܘ ܚܘܠܡܢܐ ܐܢܗܘ ܕܒܝܕ ܐܣܝܐ ܡܬܬܝܬܐ. ܒܛܠܬ݀ ܠܗ̇ ܡܫܬܡܥܢܘܬܗ ܕܟܪܝܗܐ. ܘܐܢ ܒܝܕ ܡܫܬܡܥܢܘܬܗ ܕܟܪܝܗܐ ܒܛܠܬ݀ ܠܗ̇ ܣܥܘܪܘܬܗ ܕܐܣܝܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܟܠܡܕܡ ܕܡ̣ܢ ܐܠܗܐ ܡܣܬܥܪ ܛܒܬܐ ܗ̱ܘ ܘܠܘ ܒܝܫܬܐ. ܐܝܟ ܕܐܡ̣ܪ ܒܪ ܣܝܪܟ. ܟܠܗܘܢ ܠܡ ܥܒܕܘ̈ܗܝ ܕܐܠܗܐ ܝܐܝܢ ܐܟܚܕܐ. ܘܟܠܗܘܢ ܒܨܒ̈ܘܬܗܘܢ ܐܬܒܪܝ̣ܘ. ܘܠܝܬ ܕܢܐܡܪ ܗܢܐ ܒܝܫ ܘܗܢܐ ܛܒ. ܒܕܓܘܢ ܐܢܗܘ ܕܐܡܪܝܢ ܐܢ̱ܬܘܢ. ܕܐܠܗܐ ܠܐ ܣܥܪ ܟܝܢܐܝܬ ܒܝܫܬܐ܆ ܐܦ ܚܢܢ ܗܕܐ ܐܡܪܝܢܢ ܕܐܠܗܐ ܠܐ ܡܢܣܝ ܒܒܝ̈ܫܬܐ. ܐܢܕܝܢ ܠܘ ܗܕܐ ܐܡ̇ܪܝܬܘܢ. ܐܠܐ ܕܐܦܠܐ ܡܛܠ ܛܒܬܐ ܪܒܬܐ ܒܝܫܬܐ ܙܥܘܪܬܐ ܣܥܪ܆ ܡܕܠܩܒܘ ܡܕܠܩܒܝ̣ܢܢ ܠܟܘܢ. ܡ̣ܢ ܚܘܫܒܐ ܘܡ̣ܢ ܟܝܢܐ ܘܡ̣ܢ ܟܬܒܐ. ܘܡ̣ܢ ܚܘܫܒܐ ܡ̇ܢ܆ ܒܗ̇ܝ ܕܐܡܪܝܢܢ ܕܒܝܫܬܐ ܙܥܘܪܬܐ ܡܛܠ ܛܒܬܐ ܪܒܬܐ ܛܒܬܐ܆ ܛܒܬܐ ܗ̱ܝ. ܘܡܛܠ ܗܕܐ ܐܠܨܐܝܬ ܡܣܬܥܪܐ ܡ̣ܢ ܐܠܗܐ. ܘܡ̣ܢ ܟܝܢܐ ܬܘܒ܆ ܐܝܟ ܗ̇ܝ ܕܚܙܝܢܢ ܙܒܢܝ̈ܢ ܣܓܝ̈ܐܢ. ܠܐܒܗ̈ܐ ܕܟܕ ܚܐܫܝܢ ܒܢܝ̈ܗܘܢ. ܠܐܣܘ̈ܬܐ ܡܗܝ̣ܪ̈ܐ ܟܕ ܩܕܡܝ̣ܢ ܕܝܩܝ̣ܢ. ܠܗܠܝܢ ܕܥܬܝ̈ܕܢ ܕܢܓܕ̈ܫܢ ܠܟܠܗ ܦܓܪܐ. ܠܗܠܝܢ ܡ̇ܢ ܡ̣ܢ ܡܢܘ̈ܬܐ ܦ̇ܣܩܝ̣ܢ. ܗܠܝܢ ܕܝܢ ܡܟܘܝܢ. ܠܗܠܝܢ ܕܝܢ ܡܡܣܝܢ ܠܗܠܝܢ ܕܝܢ ܓܙܪܝ̣ܢ܇ ܡܛܠ ܦܘܪܩܢܐ ܕܟܠܗ ܦܓܪܐ. ܐܦܢ ܬܗܘܐ ܕܐܡܗ̈ܬܐ ܘܡܪ̈ܒܝܢܝܬܐ ܟܕ ܩܪ̈ܝ̣ܒܢ ܘܚܙ̈ܝܢ ܐܦ ܒܟ̈ܝܢ ܚܢܝ̣ܓܐܝܬ. ܘܟܕ ܛܒ ܝ̇ܕ̈ܥܢ ܕܠܡܛܐܒܘ̣ ܣ̇ܥܪ ܗܠܝܢ ܐܣܝܐ ܘܠܘ ܠܡܒܐܫܘ. ܒܗ̇ ܒܕܡܘ̣ܬܐ ܡܕܝܢ ܘܐܠܗܐ ܐܣܝܐ ܕܟܠ ܟܐܒܝ̣̈ܢ ܐܢ ܩܢܘܡܐ ܡܕܡ ܐܘ ܥܡܐ. ܡܛܠ ܗ̇ܝ ܕܩܢܘ̈ܡܐ ܣܓܝ̈ܐܐ ܐܘ ܥܡ̈ܡܐ ܢܫܟܚ. ܘܐܝܬ ܐܡܬܝ ܬܘܒ ܕܟܕ ܡ̣ܢ ܫܪ̈ܫܝܗ̇ ܨܒ̇ܐ ܕܢܥܩܪܝܗ̇ ܠܒܝܫܬܐ ܠܣܘܓܐܗ̇ ܕܬܒܝܠ ܡܘܒܕ. ܐܟܡܐ ܕܒܛܘ̈ܦܢܐ ܘܡܘܬܢ̈ܐ ܘܝܩ̈ܕܢܐ ܘܫܪܟܐ. ܘܡ̣ܢ ܟܬܒܐ ܬܘܒ܆ ܒܝܕ ܣܓܝ̈ܐܬܐ. ܢܚܷ̈ܬܝ ܠܡ ܓܝܪ ܒܝ̈ܫܬܐ ܡ̣ܢ ܩܕܡ ܡܪܝܐ ܥܠ ܬܪ̈ܥܝܗ̇ ܕܐܘܪܫܠܡ ܐܡ̇ܪ ܡܝ̣ܟܐ. ܘܥܡܘܣ ܐܡ̇ܪ. ܐܘ ܕܠܡܐ ܗ̇ܘܝܐ ܒܝܫܬܐ ܒܡܕܝܢ̱ܬܐ ܕܡܪܝܐ ܠܐ ܥܒ̇ܕ ܠܗ̇. ܡܛܠ ܕܠܐ ܥܒ̇ܕ ܡܪܐ ܡܪ̈ܘܬܐ ܡܕܡ. ܐܠܐ ܐܢ ܓܠܐܴ ܐ̱ܪܙܗ ܠܥܒܕܘ̈ܗܝ ܢܒܝ̈ܐ. ܘܡܝ̣ܟܐ ܬܘܒ ܐܡ̣ܪ. ܐܡ̇ܪ ܡܪܝܐ ܗܐ ܡܬܚܫܒ ܐ̱ܢܐ ܒܝܫܬܐ ܥܠ ܫܪܒܬܐ ܗܕܐ. ܘܬܘܒ ܐܡ̣ܪ ܐܦ ܐܢܐ ܐܫܪܐ ܠܡܡܚܟ ܘܐܚܒܠܟ ܡܛܠ ܚܛܗܝ̈ܟ. ܘܐܝܘܒ ܐܡ̣ܪ. ܕܛܒ̈ܬܗ ܕܐܠܗܐ ܩܒܠܢ ܘܒܝ̈ܫܬܗ ܠܐ ܢܩܒܠ. ܘܬܘܒ ܐܡ̇ܪ ܡܛܥܐ ܠܥܡ̈ܡܐ ܘܡܒܕܪ ܠܗܘܢ. ܡܫܛܐ ܠܒܐ ܕܕܝܢܘ̈ܗܝ ܕܥܡܐ. ܘܡܛܥܐ ܠܗܘܢ ܒܬܘܫܐ ܕܠܐ ܐܘܪܚܐ. ܗܠܝܢ ܘܣܘܓܐܐ ܕܐܝܟ ܗܠܝܢ ܡܫܟܚ ܐ̱ܢܫ ܒܟܬܒ̈ܐ ܩܕܝ̈ܫܐ. ܕܒܗܘܢ ܦܝܣܐ ܥܒ̇ܕܝ̣ܢܢ ܠܒܝܬܝ̈ܐ. ܠܢܘܟܪ̈ܝܐ ܕܝܢ ܕܠܐ ܡܩܒܠܝ̣ܢ ܟܬܒ̈ܐ ܗܠܝܢ ܬܪܝܢ ܙܢܝ̈ܐ ܕܡܚܘܝܢ̈ܘܬܐ ܕܚܘܫܒܐ ܐܡ̇ܪ ܐ̱ܢܐ ܘܕܟܝܢܐ ܣ̇ܦܩܝ̣ܢ.

 

 

 

 

 

 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܨܒܝܢܐ ܐܠܗܝܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܗ̇ܝ ܕܒܛܒܬܐ ܘܙܕܝܩܘܬܐ ܒܠܚܘܕ ܨܒ̇ܐ ܐܠܗܐ ܘܠܘ ܒܒܝܫܬܐ ܘܚܛܗ̈ܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢ ܕܐܠܗܐ ܦܩܕ ܒܐܝ̣ܕܐ ܕܢܒܝ̈ܐ ܘܫܠܝ̈ܚܐ ܠܟܠܗܘܢ ܗ̇ܢܘܢ ܕܠܐ ܡܗܝܡܢܝ̣ܢ ܕܢܗܝܡܢܘܢ. ܘܟܠ ܡ̇ܢ ܕܢܦܩܘܕ ܡܕܡ. ܡ̣ܢ ܐܠܨ̈ܬܐ ܡܨܒܐ ܨܒ̇ܐ ܒܗ̇ܘ ܡܐ ܕܦܩܕ. ܐܠܗܐ ܡܕܝܢ ܡܨܒܐ ܨܒ̇ܐ ܕܢܗܝܡܢܘܢ ܒܗ ܟܠܗܘܢ ܟܦܘܪ̈ܐ.

 

ܡܚܘܝܢܘܬܐ ܕܬܪܬܝܢ:

 

ܗ̇ܝ ܕܢܨܒܐ ܒܟܦܘܪܝܐ ܘܛܠܘܡܝܐ ܘܫܪܝ̣ܚܘܬܐ ܠܐ ܝ̣ܕܥܬܐ ܗ̱ܝ. ܘܐܠܗܐ ܚܟܝ̣ܡ ܒܟܠ ܗ̣ܘ. ܡܕܝܢ ܠܐ ܨܒ̇ܐ ܒܡܕܡ ܡ̣ܢ ܣܢ̈ܝܬܐ ܟܝܢܐܝܬ. ܐܠܐ ܟܒܪ ܒܙܢܐ ܕܡܫܬܒܩܢܘܬܐ ܐܘ ܕܡܣܡ ܒܪܝܫܐ. ܘܡ̣ܢ ܗܪܟܐ ܒܛܒ̈ܬܐ ܕܢܩ̈ܦܢ ܨܒ̇ܐ܆ ܘܠܘ ܒܒܝ̈ܫܬܐ.

 

ܡܚܘܝܢܘܬܐ ܕܬܠܬ:

 

ܙܕܝܩܘܬܐ ܪܒܬܐ ܗܕܐ ܗ̱ܝ ܕܢܫܡܠܐ ܒܪܢܫܐ ܨܒܝܢܐ ܕܡܪܗ ܐܝܟ ܕܐܡܝ̣ܪ ܒܐܘܢܓܠܝܘܢ. ܒܕܓܘܢ ܐܢܗܘ ܕܨܒ̇ܐ ܐܠܗܐ ܒܟܦܘܪܝܗ ܕܟܦܘܪܐ ܘܚܛܝ̣ܬܗ ܕܚܛܝܐ. ܡܫܬܟܚܝ̣ܢ ܠܗܘܢ ܟܦܘܪ̈ܐ ܘܚܛܝ̈ܐ ܕܙܕܝ̈ܩܐ ܐܢܘܢ ܘܡܫܡ̈ܠܝܢܐ ܕܨܒܝܢܗ ܕܡܪܝܐ ܗ̇ܝ ܕܫܟܝ̣ܪܐ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ ܐܠܘ ܨܒܐ ܐܠܗܐ ܕܢܟܦܪܘܢ ܒܗ ܟܦܘܪ̈ܐ. ܘܕܢܫܬܪܚܘܢ ܫܪ̈ܝ̣ܚܐ. ܘܢܛܠܡܘܢ ܛܠܘ̈ܡܐ. ܘܒ̣ܪܐ ܒܗܘܢ ܟܐܡܬ ܒܟܝܢܗܘܢ ܠܟܦܘܪܘܬܐ ܘܫܪܝ̣ܚܘܬܐ ܘܛܠܘ̣ܡ̈ܝܐ. ܐܝܛܐ ܦܩܕ ܠܗܘܢ ܕܠܐ ܢܟܦܪܘܢ ܘܠܐ ܢܫܬܪܚܘܢ ܘܠܐ ܢܛܠܡܘܢ. ܡܫܬܟܚ ܠܗ ܕܐܠܨ ܠܗܘܢ ܕܢܥܒܕܘܢ ܗ̇ܘ ܡܐ ܕܠܐ ܡܨܝܢ ܕܢܥܒܕܘܢܝܗܝ. ܟܕ ܝܕܥ ܕܠܐ ܡܨܝܢ ܕܢܥܒܕܘܢܝܗܝ ܗ̇ܝ ܕܫܟܝܪܐ.

 

 

 

ܢܝܫܐ ܬܪܝܢܐ ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܕܘܝܕ. ܡܛܠ ܕܠܐ ܨܒܝܬ ܒܕܒ̈ܚܐ ܐܦܠܐ ܒܝܩ̈ܕܐ ܫܠܡ̈ܐ ܐܬܪܥܝ̣ܬ.

 

ܣܗܕܘܬܐ ܕܬܪܬܝܢ:

 

ܗ̣ܘ ܟܕ ܗ̣ܘ. ܒܕܒ̈ܚܐ ܘܒܩܘܪ̈ܒܢܐ ܠܐ ܨܒܝܬ. ܐܕܢ̈ܐ ܕܝܢ ܢܩܒܬ ܠܝ. ܘܬܘܒ ܠܡܥܒܕ ܨܒܝܢܟ ܐܠܗܐ ܨܒܝܬ.

 

ܣܗܕܘܬܐ ܕܬܠܬ:

 

ܐܫܥܝܐ. ܘܥܒܕܘ ܕܒܝܫ ܩܕܡܝ ܘܓܒܘ ܡܕܡ ܕܠܐ ܨܒܝܬ.

 

ܣܗܕܘܬܐ ܕܐܪܒܥ:

 

ܗܘܫܥ. ܕܒܚ̈ܐ ܕܓܢܝ̈ܬܐ ܡܕܒܚܝ̣ܢ. ܘܒܣܪܐ ܐܟܠܝܢ. ܘܡܪܝܐ ܠܐ ܨܒ̇ܐ ܒܗܘܢ.

 

ܣܗܕܘܬܐ ܕܚܡܫ:

 

ܝܘܐܝܠ ܐܦ ܐܢ ܬܣܩܘܢ ܠܝ ܝܩ̈ܕܐ ܫܠܡ̈ܐ. ܒܩܘܪ̈ܒܢܝܟܘܢ ܠܐ ܐܨܛܒܐ. ܘܒܫܘܦܪܐ ܕܡܛܦܡܝ̈ܟܘܢ ܠܐ ܐܚܘܪ.

 

ܣܗܕܘܬܐ ܕܫܬ:

 

ܡܝܟܐ. ܠܐ ܐܚ̇ܕ ܐܢ̱ܬ ܐܟܬܐ ܠܥܠܡ. ܡܛܠ ܠܡ ܕܒܛܝܒܘܬܐ ܨܒܝܬ.

 

ܣܗܕܘܬܐ ܕܫܒܥ:

 

ܡܠܐܟܝ. ܠܐ ܬܩܪܒܘܢ ܥܠ ܡܕܒܚܝ ܕܡܓܢ. ܠܐ ܨܒ̇ܐ ܐ̱ܢܐ ܒܟܘܢ ܐܡ̇ܪ ܡܪܝܐ ܚܝܠܬܢܐ.

 

ܣܗܕܘܬܐ ܕܬܡܢܐ:

 

ܐܪܡܝܐ. ܡܛܠ ܕܐܢ ܨܝ̇ܡܝ̣ܢ ܠܐ ܫ̇ܡܥ ܐ̱ܢܐ ܨܠܘܬܗܘܢ. ܘܐܢ ܡܣܩܝ̣ܢ ܝܩ̈ܕܐ ܘܩܘܪ̈ܒܢܐ ܠܐ ܨܒ̇ܐ ܐ̱ܢܐ ܒܗܘܢ.

 

ܣܗܕܘܬܐ ܕܬܫܥ:

 

ܚܙܩܝܐܝܠ ܠܐ ܨܒ̇ܐ ܐ̱ܢܐ ܒܡܘܬܗ ܕܚܛܝܐ ܐܡ̇ܪ ܡܪܐ ܡܪ̈ܘܬܐ. ܐܠܐ ܕܢܗܦܘܟ ܡ̣ܢ ܐܘܪܚܗ ܒܝܫܬܐ ܘܢܚܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܬܪܥܝܬܐ ܣܩܘܒܠܝܬܐ ܕܐܡ̇ܪܐ. ܕܐܟܡܐ ܕܒܛܒܬܐ ܨܒܐ ܐܠܗܐ ܘܒܙܕܝܩܘܬܐ. ܒܗ̇ ܒܕܡܘ̣ܬܐ ܘܒܒܝܫܬܐܘܒܚܛܗ̈ܐ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ ܕܡܪ̈ܝ ܬܪܥܝ̣ܬܐ ܗܕܐ. ܣܥܝܐ ܩܕܡܝܐ

 

ܐܡܠܐܝܢ ܕܐܠܗܐ ܒܪܝܗܝ ܠܒܪܢܫܐ ܘܠܥܒܕܘ̈ܗܝ. ܒܨܒܝܢܗ ܘܠܘ ܟܕ ܡ̣ܢ ܩܛܝ̣ܪܐ ܐܬܥܨܝ̣. ܘܟܠ ܕܡܕܡ ܒܪܐ ܒܨܒܝܢܗ. ܡܨܒܐ ܨܒ̇ܐ ܒܗ̇ܘ ܡܐ ܕܒ̇ܪܐ. ܐܠܗܐ ܡܕܝܢ ܟܕ ܒܨܒܝܢܗ ܒܪܝܗܝ ܠܚܛܝܐ ܘܠܚܛܗܘ̈ܝ. ܡܨܒܐ ܨܒ̇ܐ ܒܚܛܝܐ ܐܦ ܒܥܒܕܘ̈ܗܝ. ܐܟܡܐ ܕܐܦ ܡܨܒܐ ܨܒ̇ܐ ܒܙܕܝܩܐ ܘܒܥܒܕܘ̈ܗܝ.

 

ܣܥܝܐ ܬܪܝܢܐ:

 

ܐܡܪܝܢ ܕܐܠܗܐ ܟܕ ܩܕܡ ܗ̣ܘܐ ܘܝ̇ܕܥ ܕܚ̇ܛܐ ܐܕܡ ܒܥܒܪ ܦܘܩܕܢܐ. ܡ̣ܢ ܠܐ ܡܫܟܚܢ̈ܝܬܐ ܗܘܬ݀ ܠܗ ܠܐܕܡ ܕܠܐ ܢܚܛܐ. ܘܠܗ̇ ܬܘܒ ܠܗܕܐ ܠܐ ܡܫܟܚܢܘܬܐ ܝ̇ܕܥ ܗ̣ܘܐ ܐܠܗܐ ܐܝܟ ܝ̇ܕܥ ܟܠ. ܘܟܠ ܡ̇ܢ ܕܝ̇ܕܥ ܚܬܝ̣ܬܐܝܬ ܠܐ ܡܫܟܚܢܘܬܗ ܗܘܝܗ ܕܡܕܡ. ܠܐ ܡܨܝܐ ܕܢܒܥܝܘܗܝ ܐܢ ܡܗܘܢܐ ܗ̱ܘ. ܐܠܗܐ ܡܕܝܢ ܫܘܒܚܐ ܠܛܝܒܘܬܗ ܟܕ ܡܢܗ ܟܠ ܗܘܢܐ ܘܡܠܬܐ ܘܝ̣ܕܥܬܐ ܠܡܠܝ̈ܠܐ ܡܫܬܟܢ. ܐܝܟܢܐ ܙܕܩ ܠܡܣܒܪܘ ܥܠܘܗܝ ܕܨܒ̇ܐ ܗ̣ܘܐ ܕܠܐ ܢܚܛܐ ܐܕܡ. ܘܟܕ ܠܗ̇ܝ ܕܠܐ ܢܚܛܐ ܠܐ ܨܒ̇ܐ ܗ̣ܘܐ. ܡ̣ܢ ܐܠܨ̈ܬܐ ܕܠܗ̇ܝ ܕܢܚܛܐ ܨܒ̇ܐ ܗ̣ܘܐ. ܘܐܦܢ ܦܩ̣ܕ ܠܗ ܕܠܐ ܢܚܛܐ. ܘܡ̣ܢ ܗܠܝܢ ܡܫܬܪܪܐ ܗ̇ܝ ܕܡܨܒܐ ܨܒ̇ܐ ܐܠܗܐ ܒܚܛܝܐ ܘܒܚܛܗܘ̈ܗܝ. ܐܟܡܐ ܕܨܒ̇ܐ ܒܙܕܝܩܐ ܘܒܙܕܝ̈ܩܘܬܗ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܕܗܠܝܢ. ܣܗܕܘܬܐ ܩܕܡܝܬܐ

 

ܐܪܘܝܬܐ. ܘܩܫܝ̣ ܡܪܝܐ ܠܒܗ ܕܦܪܥܘܢ. ܘܠܐ ܫܡܥ ܐܢܘܢ. ܘܠܐ ܐܦܩ ܠܒܢܝ̈ ܐܝܣܪܐܝܠ. ܐܡܪܝܢ ܐܠܘܠܐ ܨܒܐ ܐܠܗܐ ܒܠܐ ܡܬܬܦܝ̣ܣܢܘܬܗ ܕܦܪܥܘܢ ܐܝܟܢܐ ܡܩܫܐ ܗ̣ܘܐ ܠܒܗ ܕܠܐ ܢܫܡܥ ܠܡܘܫܐ ܘܠܐܗܪܘܢ.

 

ܣܗܕܘܬܐ ܕܬܪܬܝܢ:

 

ܐܫܥܝܐ. ܐܢܐ ܐ̱ܢܐ ܡܪܝܐ ܘܠܝܬ ܬܘܒ ܕܓܒܠ ܢܘܗܪܐ ܘܒܪܐ ܚܫܘܟܐ. ܥܒ̣ܕ ܫܠܡܐ ܘܒܪܐ ܒܝܫܬܐ.

 

ܣܗܕܘܬܐ ܕܬܠܬ:

 

ܗ̣ܘ ܟܕ ܗ̣ܘ. ܠܡܢܐ ܛܥܝܬܢ ܡܪܝܐ ܡ̣ܢ ܐܘܪܚܟ. ܘܩܫܝ̣ܬ ܠܢ ܡ̣ܢ ܕܚܠܬܟ.

 

ܣܗܕܘܬܐ ܕܐܪܒܥ:

 

ܚܙܩܝܐܝܠ. ܘܢܒܝܐ ܟܕ ܢܛܥܐ ܘܢܡܠܠ ܡܠܬܐ ܐܢܐ ܡܪܝܐ ܐܛܥܝ̣ܬܗ ܠܢܒܝܐ ܗ̇ܘ. ܘܐܪܝ̣ܡ ܐܝܕܝ ܥܠܘܗܝ ܘܐܘܒܕܝ̣ܘܗܝ ܡ̣ܢ ܓܘ ܥܡܝ ܐܝܣܪܐܝܠ.

 

ܣܗܕܘܬܐ ܕܚܡܫ:

 

ܒܪ ܣܝܪܟ. ܡܪܝܐ ܒܪܐ ܟܠ ܛܒ ܒܝܫ. ܘܕܫܠܝ̣ܛ ܢܬܦܨܐ ܡ̣ܢ ܒܝܫܐ.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ. ܚܟܡܬܐ ܘܢܟܦܘܬܐ ܘܝ̣ܕܥܬܐ ܕܢܡܘܣܐ ܡ̣ܢ ܠܘܬ ܡܪܝܐ ܗ̱ܝ܆ ܚܘܒܐ ܘܐܘܪ̈ܚܬܐ ܕܥܒܕ̈ܐ ܛܒ̈ܐ ܡ̣ܢ ܠܘܬܗ ܐܢܝܢ. ܛܥܝܘܬܐ ܘܚܫܘܟܐ ܠܚܛܝ̈ܐ ܐܬܒܪܝ̣ܘ. ܘܥܡ ܐܝܠܝܢ ܕܡܬܪܒܝܢ ܒܒܝܫܬܐ. ܒܝܫܬܐ ܥܡܗܘܢ ܣܐܒܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܣܬܘܪܝܗ̇ ܕܬܪܥܝܬܐ ܗܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܟܕ ܚܐܪ̈ܐ ܘܫܠܝ̣̈ܛܝ ܒܝܬܐ ܒ̣ܪܐ ܐܢܘܢ ܠܒܢܝ̈ܢܫܐ ܐܟܡܐ ܕܥܬܝ̣ܕܝ̣ܢܢ ܠܡܫܪܪܘ. ܡܟܢܘܬܐ ܝܗܒ ܠܗܘܢ ܟܝܢܝܬܐ ܕܒܗ̇ ܢܬܡܨܘܢ ܠܡܥܒܕ ܕܛܒ ܘܕܒܝܫ. ܐܝܟܢܐ ܕܦܘܪ̈ܥܢܐ ܕܫܘܝܢ܇ ܟܐܢܐܝܬ ܢܩܒܠܘܢ. ܒܕܓܘܢ ܗ̇ܝ ܕܢܐܡܪ ܕܡܨܒܐ ܨܒ̇ܐ ܐܠܗܐ ܒܚܛܝܐ ܘܒܚܛܗܘ̈ܗܝ. ܡܠܬܐ ܗ̱ܝ ܣܪܝܩܬܐ ܘܒܛܠܬܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܢܛܘܪܘܬ ܦܘܩܕܢܐ ܟܕ ܛܒܬܐ ܗ̱ܝ. ܠܝܬܗ̇ ܡܬܒܥܝܐ. ܘܥܒܪ ܦܘܩܕܢܐ ܟܕ ܒܝܫܐ ܗ̱ܘ ܗܟܘܬ ܡܛܠܬܗ ܕܝܠܗ ܠܐ ܡܬܒܥܐ. ܘܡ̣ܢ ܗܪܟܐ ܝ̣ܕܝ̣ܥܐ ܕܗ̇ܝ ܕܢܐܡܪ ܕܨܒ̇ܐ ܗ̣ܘܐ ܐܠܗܐ ܕܢܚܛܐ ܐܕܡ ܡܛܠ ܕܝ̇ܕܥ ܗ̣ܘܐ ܕܠܐ ܡܫܟܚ ܗ̣ܘܐ ܕܠܐ ܢܚܛܐ. ܡܠܬܐ ܗ̱ܝ ܣܩܘܒܠܝܬܐ ܕܠܘܩܒܠ ܟܝܢܝ̈ܗܘܢ ܕܣܘܥܪ̈ܢܐ ܢܨܝܐ. ܘܬܘܒ ܐܡܪܝܢܢ ܕܗ̇ܝ ܕܐܡ̣ܪܬܘܢ ܕܟܠܡ̇ܢ ܕܝ̇ܕܥ ܠܐ ܡܫܟܚܢܘܬ ܗܘܝܗ ܕܡܕܡ ܠܐ ܡܨܝܐ ܕܢܒܥܝܘܗܝ. ܡܠܬܐ ܗ̱ܝ ܣܘܦܝܣܛܝܩܝܬܐ. ܒܗ̇ܝ ܕܗ̇ܘ ܡܕܡ ܐܢ ܛܒܐ ܗ̱ܘ. ܘܠܐ ܡܨܐ ܠܡܗܘܐ. ܡܒܥܐ ܒܥܝܢ ܠܗ ܡܗܘ̈ܢܐ. ܘܡܬܪܓܪܓܝܢ ܠܩܢܝܢܗ. ܐܠܐ ܠܐ ܡܬܟܬܫܝܢ ܐܘ ܝ̇ܨܦܝܢ ܠܡܩܢܝܗ. ܟܕ ܝ̇ܕܥܝܢ ܕܡ̣ܢ ܗܘܠܐ ܗ̱ܝ ܡܫܟܚܢܝ̣ܬܐ ܩܢܝܘܬܗ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܠܘ ܡܛܠܗ̇ܝ ܕܠܠܐ ܡܬܬܦܝ̣ܣܢܘܬܐ ܕܦܪܥܘܢ ܨܒܐ ܐܠܗܐ ܩܫܝ̣ ܠܒܗ. ܐܠܐ ܡܠܘܢ ܡܛܠ ܡܬܬܦܝ̣ܣܢܘܬܐ ܕܪ̈ܒܘܬܐ ܣܓܝ̈ܐܬܐ ܕܐܝܣܪ̈ܠܝܐ. ܐܗܡܝ̣ ܚܝܪܗ ܡ̣ܢ ܦܪܥܘܢ. ܘܠܒܪ ܡ̣ܢ ܚܘܕܪܗ̇ ܕܒܛܝ̣ܠܘܬܐ ܢܟܪܝܗ. ܘܗܟܢܐ ܐܬܩܫܝ̣ ܠܒܗ ܘܠܐ ܐܬܬܦܝ̣ܣ. ܡܬܬܦܝ̣ܣܢܘܬܐ ܡܕܝܢ ܗ̇ܝ ܡܫܪܬܚܬܐ ܐܝܬܝܗ̇ ܗܘܬ݀ ܕܡܬܒܥܝܐ ܠܡܪܝܐ ܘܠܘ ܠܐ ܡܬܬܦܝ̣ܣܢܘܬܐ. ܒܕܓܢ ܡܨܛܒܝܢܘܬܐ ܗ̇ܝ ܕܠܠܐ ܡܬܬܦܝ̣ܣܢܘܬܐ ܙܥܘܪܬ݀ ܒܡܢܝܢܐ ܘܝ̣ܚܝ̣ܕܝܬ݀ ܩܢܘܡܐ. ܐܝܟ ܕܒܓܕܫܐ ܐܣܬܥܪܬ݀ ܡ̣ܢ ܒܛܝ̣ܠܘܬܐ.

 

ܦܘܢܝܐ ܕܣܗܕܘܬܐ ܬܪܝܢܝܬܐ:

 

ܐܡܪܝܢܢ ܕܗܕܐ ܡܠܬܐ ܐܝܟ ܕܠܩܘܦܚܐ ܕܗ̇ܢܘܢ ܕܬܪܝܢ ܐܝܬܝ̈ܐ ܐܡܝ̣ܪܐ ܡ̣ܢ ܡܪܝܐ. ܠܘܬ ܗ̇ܢܘܢ ܕܠܐ ܣ̇ܦܩܝ̣ܢ ܠܡܣܬܟܠܘ ܚܬܝ̣ܬܘܬ ܒܘܚܢ̈ܐ. ܘܕܒܝܫܬܐ ܓܠܝ̣ܙܘܬܢܝܬܐ ܗ̱ܝ ܘܠܘ ܐܝܬܘܬܢܝܬܐ.

 

ܦܘܢܝܐ ܕܣܗܕܘܬܐ ܬܠܝܬܝܬܐ ܘܪܒܝܥܝܬܐ:

 

ܐܡܪܝܢܢ ܕܗ̇ܝ ܕܡܪܝܐ ܢܛܥܐ ܥܡܐ ܡܕܡ ܐܘ ܩܢܘܡܐ. ܐܘ ܢܩܫܐ ܠܒܐ. ܡܛܠ ܬܘܪܨܐ ܕܣܓܝ̈ܐܐ ܗ̇ܘܝܐ ܐܝܟ ܕܐܡ̣ܪܢܢ. ܒܕܓܘܢ ܬܘܪܨܐ ܗܘܝܘ ܕܡܬܒܥܐ ܡܪܢܐܝܬ. ܘܡܛܥܝܢܘܬܐ ܐܝܟ ܕܒܓܕܫܐ ܟܐܡܬ ܡܛܠܬܗ ܕܬܘܪܨܐ ܥܐܠܐ ܒܡܨܥܬܐ.

 

ܦܘܢܝܐ ܕܣܗܕܘܬܐ ܚܡܝܫܝܬܐ ܘܫܬܝܬܝܬܐ:

 

ܐܡܪܝܢܢ ܕܦܘܢܝܐ ܕܣܗܕܘܬܐ ܬܪܝܢܝܬܐ ܗ̣ܘ ܝܘ ܟܕ ܗ̣ܘ ܦܘܢܝܐ ܕܗܠܝܢ ܬܪܬܝܢ ܣܗ̈ܕܘܢ.

 

ܢܘܗܪܐ:

 

ܙܕܩ ܠܡܕܥ ܕܬܪ̈ܬܝܗܝܢ ܗܠܝܢ ܬܪ̈ܥܝܬܐ. ܗ̇ܝ ܡ̣ܢ ܬܪܝ̣ܨܬ݀ ܫܘܒܚܐ ܕܝܠܢ. ܘܗ̇ܝ ܣܩܘܒܠܝܬܐ ܕܗܠܝܢ ܐ̱ܚܪ̈ܢܐ. ܥܠ ܬܪܬܝܢ ܫܬܐܣܝ̈ܢ ܕܡܫܚ̈ܠܦܢ ܡ̣ܢ ܚܕ̈ܕܐ ܒܢ̈ܝܢ. ܒܗ̇ܝ ܕܚܢܢ ܡ̇ܢ ܐܡܪܝܢܢ. ܕܟܠܡܕܡ ܕܦܩܕ ܐܠܗܐ ܠܒܢܝ̈ܢܫܐ ܕܢܣܥܪܘܢܝܗܝ. ܡܨܒܐ ܨܒ̇ܐ ܒܗ ܒܗ̇ܘ ܡܕܡ. ܘܐܦܢ ܝ̇ܕܥ ܒܡܩܕܡܘܬ ܝ̣ܕܥܬܗ ܕܠܐ ܣ̇ܥܪܝܢ ܠܗ ܒܢܝ̈ܢܫܐ. ܘܟܠ ܡܕܡ ܕܦܩܕ ܐܠܗܐ ܕܠܐ ܢܣܥܪܘܢܝܗܝ܆ ܠܐ ܨܒ̇ܐ ܒܗ. ܘܐܦܢ ܝ̇ܕܥ ܒܡܩܕܡܘܬ ܝ̣ܕܥܬܗ ܕܣ̇ܥܪܝܢ ܠܗ. ܒܕܓܘܢ ܫܪܝܪܐ ܠܢ ܕܢܐܡܪ ܕܨܒ̣ܐ ܐܠܗܐ ܕܢܛܪ ܐܕܡ ܦܘܩܕܢܐ. ܘܐܦܢ ܝ̇ܕܥ ܗ̣ܘܐ ܕܠܐ ܢܛܪ. ܘܠܐ ܨܒܐ ܕܢܥܒܪ ܦܘܩܕܢܐ. ܘܐܦܢ ܝ̇ܕܥ ܗ̣ܘܐ ܕܥܒܪ. ܗ̇ܢܘܢ ܕܝܢ ܐ̱ܚܪ̈ܢܐ ܠܘ ܥܠ ܗܕܐ ܫܬܐܣܬܐ ܒܢܝܢ. ܐܠܐ ܐܡܪܝܢ ܕܟܠ ܡܕܡ ܕܝ̇ܕܥ ܐܠܗܐ ܕܥܬܝܕ ܠܡܗܘܐ܆ ܡܨܒܐ ܨܒ̇ܐ ܒܗ. ܘܐܦܢ ܦ̇ܩܕ ܕܠܐ ܢܣܥܪܘܢܝܗܝ ܒܢܝ̈ܢܫܐ. ܘܟܠܡܕܡ ܕܝ̇ܕܥ ܕܠܐ ܥܬܝܕ ܠܡܗܘܐ ܠܐ ܨܒ̇ܐ ܒܗ. ܘܐܦܢ ܦܩܕ ܕܢܣܥܪܘܢܝܗܝ ܒܢܝ̈ܢܫܐ. ܒܕܓܘܢ ܠܐ ܡܨܛܡܥܪܝ̣ܢ ܕܢܐܡܪܘܢ. ܕܨܒ̣ܐ ܐܠܗܐ ܕܢܥܒܪ ܐܕܡ ܦܘܩܕܢܐ. ܘܐܦܢ ܦܩܕ ܠܗ ܕܠܐ ܢܥܒܪ. ܘܠܐ ܨܒܐ ܕܢܛܪ ܦܘܩܕܢܐ. ܘܐܦܢ ܦܩܕ ܕܢܛܪܝ̣ܘܗܝ. ܘܠܚܣܝ̣ܢܘܬܗ̇ ܕܫܬܐܣܬܐ ܗ̇ܝ ܕܝܠܢ ܘܡܬܚܣܢܢܘܬܗ̇ ܕܗ̇ܝ ܕܗܠܝܢ. ܡܚܘܝܢ̈ܘܬܐ ܕܐܬܩܕ̈ܡܝܢ܆ ܣܦ̈ܩܢ ܠܡܫܪܪܘ.

 

 

 

 

 

 

 

 

 

     #1 

 

 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܬܫܝܥܝܬܐ

 

ܡܠܬܐ ܕܝ̣ܠܢܝܬܐ ܕܥܠ ܫܠܝ̣ܛܘܬ ܒܝܬܐ ܘܚܐܪܘܬܐ ܐ̱ܢܫܝܬܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܗ̇ܝ ܕܐܝܬ ܚܐܪܘܬܐ ܠܒܢܝ̈ܢܫܐ. ܘܠܘ ܒܚܘܪܩܢܐ ܣܥܪܝܢ ܣܥܘܪ̈ܘܬܗܘܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܠܘ ܠܘ ܚܐܪܐܝܬ ܣ̇ܥܪ ܗ̣ܘܐ ܒܪܢܫܐ ܣܥܘܪ̈ܘܬܗ ܨܒܝܢܝ̈ܬܐ. ܐܠܐ ܒܝܕ ܚܘܪܩܢܐ ܕܡ̣ܢ ܐܠܗܐ. ܐܝܟ ܕܐܡܪܝܢ ܢܡܘ̈ܣܝܐ ܕܡܫܠܡܢ̈ܐ. ܐܘ ܒܝܕ ܚܠܩܐ ܘܓܕܐ ܕܣܪܒܝ̣ܢ ܐܣܛܪ̈ܘܢܘܡܘ. ܬܪܬܝܢ ܒܠܚܘܕ ܡܫܬܟ̈ܚܢ ܗܘܝ̈ ܗܘ̈ܠܐܣ ܐܠܨܝܬܐ ܘܠܘ ܡܫܟܚܢ̣ܝܬܐ. ܘܠܐ ܦ̇ܐܫ ܗ̣ܘܐ ܐܬܪܐ ܠܗܘܠܐ ܡܬܡܨܝܢܝ̣ܬܐ. ܒܗ̇ܝ ܕܠܗ̇ܘ ܡܐ ܕܚܪܝ̣ܩ ܐܘ ܚܠܝ̣ܩ ܥܠܘܗܝ ܐܠܨܐܝܬ ܣ̇ܥܪ. ܘܠܗ̇ܘ ܡܐ ܕܠܐ ܚܪܝ̣ܩ ܐܘ ܚܠܝ̣ܩ ܥܠܘܗܝ ܠܐ ܡܫܟܚ ܠܡܣܥܪ. ܘܟܕ ܬܠܬ ܐܢܢ ܗܘ̈ܠܐܣ. ܐܠܨܝܬܐ܆ ܐܝܟ ܙܘܥܐ ܕܨܒܥܐ ܠܟܬܘܒܐ ܟܕ ܟ̇ܬܒ. ܘܠܘ ܡܫܟܚܢܝ̣ܬܐ. ܐܝܟ ܫܠܝܐ ܕܨܒܥܐ ܠܟܬܘܒܐ ܟܕ ܠܐ ܟ̇ܬܒ. ܘܡܬܡܨܝܢܝ̣ܬܐ ܐܟܘܬܗ̇ ܕܟܬܘܒܘܬܐ ܠܒܪܢܫܐ. ܝ̣ܕܝ̣ܥܐ ܕܗܠܝܢ ܡܬܡܨܝܢ̈ܝܬܐ ܚܐܪܐܝܬ ܘܫܠܝ̣ܛܘܬ ܒܝܬܐܝܬ ܡܢܗ ܕܒܪܢܫܐ ܡܣܬܥܪ̈ܢ. ܐܟܡܐ ܡܕܝܢ ܕܡܨܐ ܒܪܢܫܐ ܕܢܟܬܘܒ. ܗܟܘܬ ܘܡܨܐ ܕܠܐ ܢܟܬܘܒ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܐܠܘ ܚܪ̈ܝ̣ܩܢ ܐܘ ܚܠܝ̣̈ܩܢ ܗܘܝ̈ ܡܥܒܕܢ̈ܘܬܐ ܕܠܐ ܡܢܦ̈ܫܐ. ܒܗ̇ܝ ܕܐܟܡܐ ܕܢܘܪܐ ܠܐ ܡܨܝܐ ܕܠܐ ܬܚܡ. ܗܟܘܬ ܘܒܪܢܫܐ ܠܐ ܡܨܐ ܕܠܐ ܢܣܥܘܪ ܗ̇ܘ ܡܐ ܕܚܪܝ̣ܩ ܐܘ ܚܠܝ̣ܩ ܥܠܘܗܝ. ܘܟܕ ܐܢܢܩܐܝܬ ܝ̇ܕܥܝ̣ܢܢ ܠܦܘܪܫܢܐ ܓܠܝܐ ܕܐܝܬ ܒܝܬ ܣܥܘܪ̈ܘܬܐ ܐ̱ܢܫܝ̈ܬܐ ܠܡܥܒܕܢ̈ܘܬܐ ܠܐ ܚܝ̈ܬܐ ܐܢܢܩܐܝܬ ܬܘܒ ܝ̇ܕܥܝ̣ܢܢ. ܕܐܝܬ ܚܐܪܘܬܐ ܠܒܢܝ̈ܢܫܐ ܘܠܝܬ ܚܪܩܐ ܐܘ ܚܠܩܐ.

 

ܡܚܘܝܢܘܬܐ ܕܬܠܬ:

 

ܐܠܘ ܚܪܝ̣ܩ ܗ̣ܘܐ ܐܘ ܚܠܝ̣ܩ ܥܠ ܒܪܢܫܐ ܟܠܡܐ ܕܒܗ ܡܬܗܦܟ. ܘܠܝܬ ܗ̣ܘܐ ܠܗ ܚܝܠܐ ܥܠ ܬܪ̈ܝܗܘܢ ܦܫܚܝ̈ܗ̇ ܕܐܢܛܝܦܐܣܝܣ ܟܐܡܬ ܕܢܣܥܘܪ ܘܕܠܐ ܢܣܥܘܪ. ܐܝܢܐ ܝܘܬܪܢܐ ܐܝܬ ܗ̣ܘܐ ܒܡܪܬܝܢܘܬܐ ܕܢܒܝ̈ܐ ܘܕܫܠܝ̈ܚܐ ܘܕܐܒܗ̈ܬܐ. ܠܥܡ̈ܡܐ ܚܛܝ̈ܐ ܕܢܬܘܒܘܢ ܡ̣ܢ ܐܘܪ̈ܚܬܗܘܢ ܒܝ̈ܫܬܐ ܘܢܚܘܢ. ܟܕ ܐܢ ܚܪܝ̣ܩ ܥܠܝܗܘܢ ܕܢܬܦܢܘܢ܆ ܦܢܝܢ. ܘܐܢ ܢܬܬܪܬܘܢ ܘܐܢ ܠܐ ܢܬܬܪܬܘܢ. ܘܗܟܢܐ ܐܢ ܚܪܝ̣ܩ ܥܠܝܗܘܢ ܕܠܐ ܢܬܦܢܘܢ ܠܐ ܦܢܝܢ. ܘܐܢ ܢܬܬܪܬܘܢ ܘܐܢ ܠܐ ܢܬܬܪܬܘܢ. ܘܟܕ ܢܒܝ̈ܐ ܫܪܝܪ̈ܐ ܘܫܠܝ̈ܚܐ ܩܕܝ̈ܫܐ. ܘܐܒܗ̈ܬܐ ܬܪ̈ܝ̣ܨܝ ܫܘܒܚܐ. ܡ̣ܢ ܐܠܗܐ ܗ̱ܘ ܦܩܝ̣ܕܝ̣ܢ ܠܡܐܪܬܝܘ. ܘܐܠܗܐ ܠܐ ܣ̇ܥܪ ܡܕܡ ܐܝܩܝ. ܐܝܬ ܚܐܪܘܬܐ ܠܒܪܢܫܐ. ܘܠܐ ܚܪ̈ܝ̣ܩܢ ܥܠܘܗܝ ܣܥܘܪ̈ܘܬܗ.

 

ܡܚܘܝܢܘܬܐ ܕܐܪܒܥ:

 

ܐܡܪܝܢܢ. ܐܠܘ ܐܠܗܐ ܚܪܩ ܥܠ ܙܢܝܐ ܕܢܙܢܐ. ܘܦܩܕ ܠܗ ܒܐܝ̈ܕܝ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ ܕܠܐ ܢܙܢܐ. ܡܫܬܟܚ ܠܗ ܕܕܡ̇ܐ ܠܗ̇ܘ ܕܕܡ̇ܐ ܠܟܢܬܗ ܒܓܘ ܝܡܐ ܕܡܬܓܠܠ. ܘܡܙܗܪ ܠܗ ܕܠܐ ܢܬܬܠܠ ܗ̇ܝ ܕܫܟܝ̣ܪܐ. ܒܗ̇ܝ ܕܐܦܠܐ ܠܚܕ ܡܢܢ ܫܦܝܪܐ ܗܕܐ ܠܡܣܥܪ. ܚܐܪܐܝܬ ܡܕܝܢ ܣ̇ܥܪ ܒܪܢܫܐ ܗܠܝܢ ܕܣܥܪ. ܘܠܘ ܒܚܪܩܐ ܐܠܗܝܐ. ܘܗ̣ܘ ܙܢܝܐ ܐܟܡܐ ܕܡܨܐ ܕܢܙܢܐ܆ ܗ̣ܘ ܗܟܘܬ ܘܡܨܐ ܕܠܐ ܢܙܢܐ.

 

ܡܚܘܝܢܘܬܐ ܕܚܡܫ:

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܡܚܪܩ ܚܪܩ ܥܠ ܩܛܘܠܐ ܕܢܩܛܘܠ. ܐܝܛܐ ܟܕ ܩܛܠ. ܡܫܢܩ ܠܗ ܒܢܘܪܐ ܕܓܗܢܐ. ܡܫܬܟܚ ܠܗ ܐܠܗܐܕ܇ ܕܠܗ̇ܢܘܢ ܕܫܠܡܝ̣ܢ ܘܡܫܡܠܝܢ ܨܒܝܢ ܒܪܘܝܘܬܗ ܡܫܢܩ ܗ̇ܝ ܕܫܟܝܪܐ.

 

ܡܚܘܝܢܘܬܐ ܕܫܬ:

 

ܐܡܪܝܢܢ ܕܐܢܗܘ ܕܠܐ ܐ̱ܢܫ ܡܢܢ ܟܕ ܩܘܪ̈ܛܒܐ ܡܠܐ ܒܝܬ ܩܦܣܗ. ܥܫܡ ܠܗ ܠܡܫܡܫܢܗ ܠܡܦܩܘ ܬܐܢ̈ܐ. ܘܟܕ ܠܐ ܡܦܩ ܡܢܓܕ ܠܗ. ܘܐܢܗܘ ܕܗܕܐ ܣ̇ܥܪ܆ ܟܠܢܫ ܥܫܘܩܐ ܕܐܢ ܠܗ. ܐܝܟܢܐ ܐܠܗܐ ܫܘܒܚܐ ܠܛܝܒܘܬܗ ܡܬܗܝܡܢܐ ܥܠܘܗܝ܇ ܐܘ ܣܟ ܡܬܗܘܢܢܐ ܕܗܕܐ ܣ̇ܥܪ. ܟܐܡܬ ܕܚܪܩ ܥܠ ܒܝܫܐ ܠܡܐܒܫܘ. ܘܟܕ ܢܒܐܫ ܢܫܢܩܝ̣ܘܗܝ ܒܓܗܢܐ. ܘܐܢ ܠܐ ܢܫܢܩܝ̣ܘܗܝ. ܒܛܠܬ݀ ܠܗ̇ ܡܕܝܢ ܡܠܬ݀ ܓܗܢܐ. ܘܐܢ ܓܗܢܐ ܠܝܬ. ܐܦܠܐ ܦܪܕܝܣܐ ܘܡܠܟܘܬ ܫܡܝܐ ܐܝܬ. ܘܟܕ ܗܠܝܢ ܠܝܬ ܣܪܝ̣ܩܐ ܗ̱ܝ ܡܕܝܢ ܟܪܘܙܘܬܐ ܕܢܒܝ̈ܐ ܘܕܫܠܝ̈ܚܐ ܘܕܐܒܗ̈ܬܐ ܟܠܗܘܢ. ܘܟܕ ܡܠܬܐ ܡܪܝ̣ܡܢܝ̣ܬ ܚܐܪܘܬܐ ܠܘܬ ܫܟܝ̣ܪ̈ܘܬܐ ܕܐܝܟ ܗܠܝܢ ܡܘܒܠܐ. ܠܐ ܫܪܝܪܐ.

 

ܡܚܘܝܢܘܬܐ ܕܫܒܥ:

 

ܐܡܪܝܢܢ ܐܢܗܘ ܕܐܠܗܐ ܚܪܩ ܥܠ ܒܝ̈ܫܐ ܕܢܒܐܫܘܢ. ܘܥܠ ܛܒ̈ܐ ܕܢܛܐܒܘܢ. ܐܝܛܐ ܠܚܪܬܐ ܠܗܠܝܢ ܡ̇ܢ ܥܡ ܫܐܕ̈ܐ ܡܕܘܐ. ܠܗܠܝܢ ܕܝܢ ܥܡ ܡܠܐܟ̈ܐ ܡܐܘܐ. ܡܫܬܟܚ ܠܗ. ܕܠܗ̇ܢܘܢ ܕܐܟܚܕܐ ܨܒܝܢ ܒܪܘܝܘܬܗ ܫܡܠ̣ܝܘ. ܕܠܡܢܗܘܢ ܡ̇ܢ ܡܫܢܩ. ܠܡܢܗܘܢ ܕܝܢ ܡܒܣܡ܆ ܗ̇ܝ ܕܠܝܬܝܗ̇ ܕܟܐܢܘܬܐ. ܘܟܕ ܡܠܬ݀ ܚܘܪܩܢܐ ܠܘܬ ܟܐܢܘܬܗ ܕܐܠܗܐ ܟܐܢܐ ܡܘܒܠܐ ܠܐ ܫܪܝܪܐ.

 

ܡܚܘܝܢܘܬܐ ܕܬܡܢܐ:

 

ܐܡܪܝܢܢ ܐܢܗܘ ܕܛܒ̈ܐ ܒܝܕ ܚܘܪܩܢܐ ܛܒ̈ܬܐ ܣ̇ܥܪܝܢ. ܘܒܝ̈ܫܐ ܗܟܘܬ ܒܝܕ ܚܘܪܩܢܐ ܒܝ̈ܫܬܐ. ܠܡܢܐ ܗܠܝܢ ܡ̇ܢ ܢܬܩܠܣܘܢ܆ ܗܠܝܢ ܕܝܢ ܢܬܓܢܘܢ. ܟܕ ܠܘ ܒܨܒܝܢܗܘܢ ܣ̇ܥܪܝܢ ܗ̇ܘ ܡܐ ܕܣ̇ܥܪܝܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܘܗ̣ܢܝܢ ܗܠܝܢ ܒܬܡܢܝܐ ܙܢܝ̈ܐ ܡܣܬܝ̈ܟܢ. ܙܢܐ ܩܕܡܝܐ

 

ܣܗܕ̈ܘܬܐ ܡܫܘܕܥܢ̈ܝܬܐ ܕܡܠܝ̈ ܕܝ̣ܢܐ ܕܐܚܕ ܡܪܝܐ ܥܡ ܡܪ̈ܓܙܢܐ. ܐܝܟ ܕܐܡ̣ܪ ܐܫܥܝܐ ܡ̣ܢ ܦܘܡ ܡܪܝܐ. ܗܫܐ ܓܒܪ̈ܐ ܕܝܗܘܕܐ ܘܥܡܘܪ̈ܝܗ̇ ܕܐܘܪܫܠܡ ܕܘܢܘ ܒܝܢܝ ܠܟܪܡܝ. ܡܢܐ ܬܘܒ ܘܠܐ ܗ̣ܘܐ ܠܡܥܒܕ ܠܟܪܡܝ ܘܠܐ ܥܒܕܬ. ܕܣܟܝ̇ܬ ܕܢܥܒܕ ܥܢ̈ܒܐ ܘܥܒܕ ܚܪ̈ܘܒܐ. ܘܡܝ̣ܟܐ ܬܘܒ ܐܡ̣ܪ. ܥܡܝ ܡܢܐ ܥܒܕܬ ܠܟ. ܐܘ ܒܡܢܐ ܐܟܪܝ̇ܬ ܠܟ܇ ܐܣܗܕܝܢܝ. ܠܐ ܐܣܩܬܟ ܡ̣ܢ ܐܪܥܐ ܕܡܨܪܝܢ. ܘܡ̣ܢ ܥܒܕܘܬܐ ܦܪܩܬܟ. ܘܐܪܡܝܐ ܐܡ̣ܪ ܡܢܐ ܗ̱ܘ ܥܘܠܐ ܕܐܫܟܚ ܒܝ ܐܒܗܝ̈ܟܘܢ ܕܐܪܚܩܘ ܡܢܝ ܘܐܙܠܘ ܒܬܪ ܠܐ ܡܕܡ. ܒܕܓܘܢ ܐܡܪܝܢܢ ܐܢܗܘ ܕܗ̣ܘ ܡܪܝܐ ܚܪܩ ܥܠ ܟܪܡܐ ܕܢܥܒܕ ܚܪ̈ܘܒܐ ܘܠܘ ܥܢ̈ܒܐ. ܘܥܠ ܥܡܗ ܕܢܫܒܩܝ̣ܘܗܝ ܘܢܐܙܠ ܒܬܪ ܠܐ ܡܕܡ. ܐܝܟܢܐ ܡܢܗ ܕܟܪܡܐ ܥܢ̈ܒܐ ܘܠܘ ܚܪ̈ܘܒܐ ܡܣܟܐ ܗ̣ܘܐ. ܘܠܥܡܗ ܐܡ̇ܪ ܗ̣ܘܐ. ܒܡܢܐ ܐܟܪܝ̇ܬ ܠܟ. ܘܡܢܘ ܥܘܠܐ ܕܐܫܟ̣ܚܬܘܢ ܒܝ ܕܣܥ̣ܪܬܘܢ ܙܦܠܢ ܘܙܦܠܢ.

 

 

 

ܙܢܐ ܬܪܝܢܐ

 

ܣܗܕ̈ܘܬܐ ܡܫܘܕ̈ܥܢܝܬܐ ܕܥܕ̈ܠܝܐ ܕܡܬܬܝܬܝܢ ܒܬܪ ܥܘ̈ܠܐ. ܕܘܝܕ. ܠܡܢܐ ܐܪܓܙ ܚܛܝܐ ܠܐܠܗܐ. ܘܬܘܒ. ܐܢ ܚ̇ܙܐ ܗܘܝܬ ܓܢܒܐ ܥܡܗ ܪܗܛ ܗܘܝܬ. ܘܐܫܥܝܐ ܐܡ̣ܪ. ܐܘܝ ܠܝ ܥܘ̈ܠܐ ܐܥܠ̣ܝܘ. ܥܘ̈ܠܐ ܥܘܠܐ ܐܥܠ̣ܝܘ. ܘܗܘܫܥ ܐܡ̣ܪ ܡܛܠ ܕܐܝܟ ܬܘܪܬܐ ܕܡܪܕܬ݀ ܡ̣ܢ ܢܝ̣ܪܐ ܗܟܢܐ ܡܪܕܘ ܒܢܝ̈ ܐܝܣܪܐܝܠ. ܘܥܡܘܣ ܐܡ̣ܪ ܥܠ ܦܘܡ ܡܪܝܐ. ܘܐܡܚܝ̇ܬ ܪܝܚ ܣܪܝܘܬܟܘܢ ܒܐܦܝ̈ܟܘܢ ܘܠܐ ܗܦܟܬܘܢ ܠܘܬܝ. ܘܡܝ̣ܟܐ ܐܡ̣ܪ ܘܝ ܠܕܥܠܒ. ܘܐܪܡܝܐ ܐܡ̣ܪ. ܘܗܫܐ ܡܐ ܠܟܝ ܠܡܐܙܠ ܠܐܘܪܚܐ ܕܡܨܪܝܢ ܠܡܫܬܐ ܡܝ̈ܐ ܡ̣ܢ ܢܗܪ ܐܫܝܚܘܪ. ܒܕܓܘܢ ܐܡܪܝܢܢ ܐܠܘ ܗ̣ܘ ܐܠܗܐ ܚܪܩ ܗ̣ܘܐ ܥܠ ܚܛܝܐ ܕܢܪܓܙܝ̣ܘܗܝ. ܘܥܡ ܓܢܒܐ ܢܪܗܛ ܘܥܡ ܓܝܪܐ ܡܢܬܗ ܢܣܝ̣ܡ. ܘܥܠ ܥܘ̈ܠܐ ܕܢܥܠܘܢ. ܘܥܠ ܒܢܝ̈ ܐܝܣܪܐܝܠ ܕܢܡܪܕܘܢ. ܘܠܐ ܢܗܦܟܘܢ ܠܘܬ ܡܪܝܐ ܘܢܥܠܒܘܢ. ܘܥܠ ܗ̇ܝ ܫܛܝ̣ܬܐ ܕܬܪܕܐ ܒܐܘܪܚ ܡܨܪܝܢ ܘܬܬܪܓܪܓ ܠܡܝ̈ܐ ܫܝܚܘܪ̈ܝܐ ܠܡܫܬܚܪܘ ܒܫܘܚܪ ܥܡ̈ܡܐ. ܠܡܐ ܟܕ ܥܕ̈ܠܝܐ ܕܐܝܟ ܗܠܝܢ ܡܣܪܚ ܗ̣ܘܐ. ܠܐ ܐܡ̇ܪ ܗ̣ܘܐ ܠܗ ܠܗ ܚܛܝܐ ܗ̱ܘ܆ ܕܐܢ̱ܬ ܠܡ ܚܪܩܬ ܥܠܝ. ܘܥܡ ܓܝܪܐ ܡܢܬܟ ܣ̇ܐܡ ܗܘܝܬ. ܥܠܝ ܕܐܪܓܙܬܟ. ܘܗܐ ܐܡ̇ܪ ܐܢ̱ܬ ܠܝ ܠܡܢܐ ܐܪܓܙܬܢܝ. ܘܗܟܘܬ ܗ̇ܝ ܫܛܝ̣ܬܐ ܐܝܟܢܐ ܠܐ ܐܡ̇ܪܐ ܗܘܬ݀ ܠܗ. ܕܐܢ̱ܬ ܫܕܪܬܢܝ ܠܐܘܪܚ ܡܨܪܝܢ. ܘܗܫܐ ܡܫܐܠ ܐܢ̱ܬ ܠܝ ܕܡܐ ܠܟܝ ܠܡܐܙܠ ܠܐܘܪܚܐ ܕܡܨܪܝܢ. ܘܗܟܢܐ ܗ̇ܢܘܢ ܐ̱ܚܪ̈ܢܐ.

 

 

 

ܙܢܐ ܬܠܝܬܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܟܕ ܦܢܝܢ ܚܛܝ̈ܐ ܡ̣ܢ ܚܛܗܝ̈ܗܘܢ. ܐܦ ܓܙܪ ܕܝ̣ܢܐ ܦܢܐ ܡܢܗܘܢ. ܝܘܐܝܠ ܓܝܪ ܐܡ̣ܪ ܢܓܝ̣ܪܐ ܪܘܚܗ ܘܣܓܝܐܐ ܛܝܒܘܬܗ. ܘܡܗܦܟ ܒܝܫܬܐ. ܘܝܘܢܢ. ܘܚ̣ܙܐ ܐܠܗܐ ܥܒܕܝ̈ܗܘܢ ܕܬܒܘ ܡ̣ܢ ܐܘܪ̈ܚܬܗܘܢ ܒܝ̈ܫܬܐ. ܘܐܗܦܟ ܡܢܗܘܢ ܚܡܬܐ ܕܪܘܓܙܗ ܘܠܐ ܐܘܒܕ ܐܢܘܢ. ܘܐܪܡܝܐ. ܛܟ ܢܫܡܥܘܢ ܘܢܬܘܒܘܢ ܓܒܪ ܡ̣ܢ ܐܘܪܚܗ ܒܝܫܬܐ. ܘܐܫܠܐ ܡ̣ܢ ܕܐܬܚܫܒܬ ܠܡܥܒܕ ܠܗܘܢ. ܘܚܙܩܝܐܝܠ ܠܐ ܨܒ̇ܐ ܐ̱ܢܐ ܒܡܘܬܗ ܕܚܛܝܐ ܐܡ̇ܪ ܡܪܐ ܡܪ̈ܘܬܐ. ܐܠܐ ܕܢܗܦܘܟ ܡ̣ܢ ܐܘܪܚܗ ܒܝܫܬܐ ܘܢܚܐ. ܘܕܢܝܐܝܠ ܐܡ̣ܪ ܠܢܒܘܟܕܢܨܪ. ܡܛܠܗܢܐ ܡܠܟܝ ܢܫܦܪ ܥܠܝܟ. ܘܚܛܗܝ̈ܟ ܒܙܕ̈ܩܬܐ ܦܪܘܩ. ܘܥܘܠܘܬܟ ܒܡܪܚܡܢܘܬܐ ܕܡܚܝ̣̈ܠܐ. ܥܕܡܐ ܕܢܪܚܩ ܡܢܟ ܣܟܠܘ̈ܬܟ. ܒܕܓܘܢ ܐܡܪܝܢܢ ܐܢܗܘ ܕܡܚܪܩ ܚܪܝ̣ܩ ܟܠܡܕܡ ܕܡܬܬܝܬܐ ܥܠ ܒܪܢܫܐ ܘܐܠܨܐܝܬ ܗܘܐ. ܐܝܟܢܐ ܡܘܬܪܐ ܗܘܬ݀ ܬܝܒܘܬܐ ܠܢܝܢ̈ܘܝܐ. ܘܐܝܟܢܐ ܚܛܝܐ ܕܚܪܝ̣ܩ ܗ̣ܘܐ ܥܠܘܗܝ ܕܢܡܘܬ ܟܕ ܗܦܟ ܗ̣ܘܐ ܡ̣ܢ ܐܘܪܚܗ ܒܝܫܬܐ ܚܝܐ ܗ̣ܘܐ. ܘܡܢܐ ܬܘܒ ܡܗܢܝܐ ܗܘܬ݀ ܡܪܚܡܢܘܬܐ ܠܡܠܟܐ ܗ̇ܘ ܥܘܠܐ. ܟܠܡܕܡ ܓܝܪ ܕܚܪܝܩ ܡܗܘܐ ܗ̇ܘܐ ܐܢ ܬܐܒ ܒܪܢܫܐ ܘܐܢ ܠܐ ܬܐܒ. ܗ̇ܢܘ ܓܝܪ ܣܘܟܠܗ ܕܚܪܩܐ ܐܦ ܚܠܩܐ.

 

ܙܢܐ ܪܒܝܥܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܡܘܠܟܢ̈ܐ ܛܒ̈ܐ ܠܛܒ̈ܐ. ܘܦܘܪ̈ܥܢܐ ܒܝ̈ܫܐ ܠܒܝ̈ܫܐ. ܕܘܝܕ ܐܡ̣ܪ. ܐܢ ܢܛܪ ܐܢܘܢ ܢܬܦܪܥ ܣܓܝ. ܘܐܫܥܝܐ. ܐܢ ܬܬܦܝ̣ܣܘܢ ܘܬܫܡܥܘܢܢܝ܇ ܛܘܒܗ̇ ܕܐܪܥܐ ܬܐܟܠܘܢ. ܘܐܢ ܬܬܦܝ̣ܣܘܢ ܘܬܬܚܪܘܢ܆ ܒܚܪܒܐ ܬܬܐܟܠܘܢ. ܘܐܪܡܝܐ. ܘܝ ܠܪܫܝ̣ܥܐ ܒܝܫܐ. ܡܛܠ ܕܥܒܕ ܐܝܕܘ̈ܗܝ ܡܬܦܪܥ. ܘܬܘܒ ܡܛܠ ܕܝܘܡܐ ܕܬܒܥܬܐ ܒܠܒܝ. ܗܘܫܥ. ܘܢܬܒܥ ܠܝܥܩܘܒ ܐܘܪ̈ܚܬܗ. ܘܐܝܟ ܨܢܥ̈ܬܗ ܢܦܪܥܝ̣ܘܗܝ. ܥܘܒܕܝܐ. ܐܝܟ ܕܥܒܕܬ ܗܟܢܐ ܢܬܥܒܕ ܠܟ. ܘܦܘܪܥܢܟ ܢܗܦܘܟ ܥܠ ܪܝܫܟ. ܢܚܘܡ. ܬܒܥ ܡܪܝܐ ܡ̣ܢ ܣܢܐܘ̈ܗܝ. ܘܢܛܪ ܠܒܥܠܕ̈ܒܒܘܗܝ. ܐܘܢܓܠܝܘܢ. ܒܕܝ̣ܢܐ ܓܝܪ ܕܕܝܢܝ̣ܢ ܐܢ̱ܬܘܢ ܬܬܕܝ̣ܢܘܢ. ܘܒܟܝܠܬܐ ܕܡܟܝ̣ܠܝܢ ܐܢ̱ܬܘܢ ܡܬܬܟܝ̣ܠ ܠܟܘܢ. ܦܘܠܘܣ. ܡܬܦܪܥ ܟܠܢܫ ܒܦܓܪܗ ܗ̇ܘ ܡܕܡ ܕܣܥܝ̣ܪ ܠܗ. ܒܕܓܘܢ ܐܡܪܝܢܢ. ܕܐܢ ܠܘ ܒܨܒܝܢܗ ܫܦܪ ܠܐܠܗܐ ܙܕܝܩܐ. ܐܦܠܐ ܬܘܒ ܒܨܒܝܢܗ ܐܪܓܙܗ ܚܛܝܐ. ܐܠܐ ܒܝܕ ܚܘܪܩܢܐ ܕܐܬܚܪܩ ܥܠܝܗܘܢ ܡ̣ܢ ܐܠܗܐ܆ ܐܝܟܢܐ ܐܝܟ ܗ̇ܢܘܢ ܕܒܨܒܝܢܗܘܢ ܫܦ̣ܪܘ ܐܘ ܟܦ̣ܪܘ ܡܬܦܪܥܝܢ.

 

ܙܢܐ ܚܡܝܫܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܒܨܒܝܢܗܘܢ ܚܛܝܢ ܚܛܝ̈ܐ. ܘܠܝܬ ܠܗ ܠܐܠܗܐ ܨܒܝܢܐ ܒܚܛܗܝ̈ܗܘܢ ܕܘܝܕ ܓܝܪ ܐܡ̣ܪ. ܣܢܝܬ ܠܟܠ ܥܒܕܝ̈ ܫܘܩܪܐ. ܘܬܘܒܕ ܠܡ̈ܡܠܠܝ ܕܓܠܘܬܐ. ܘܐܫܥܝܐ. ܘܝ ܠܢܒܝ̈ܐ ܡܪ̈ܘܕܐ. ܕܥܒ̣ܕܘ ܬܪ̈ܥܝܬܐ ܘܠܐ ܡܢܝ. ܘܢܩܝ̣ܘ ܢܘ̈ܩܝܐ ܕܠܐ ܡ̣ܢ ܪܘܚܝ. ܗܘܫܥ. ܐܡܠ̣ܟܘ ܐܠܐ ܠܐ ܡܢܝ. ܘܐܫܬܠܛܘ ܘܠܐ ܐܘܕܥܘ̣ܢܝ. ܥܡܘܣ. ܣܢܝܬ ܘܣܠܝܬ ܥܕ̈ܥܐܕܝ. ܘܠܐ ܐܪܝ̣ܚ ܒܥܨܪ̈ܬܟܘܢ. ܐܪܡܝܐ. ܒܢܟܠܗܘܢ ܠܐ ܨܒ̣ܘ ܠܡܕܥܢܝ. ܦܘܠܘܣ ܡܛܠ ܕܒܣܝܡܘܬܗ ܕܐܠܗܐ ܠܬܝܒܘܬܐ ܗ̱ܘ ܩܪܝܐ ܠܟ. ܐܠܐ ܡܛܠ ܩܫܝܘܬ ܠܒܟ ܕܠܐ ܬܐܒ. ܣ̇ܐܡ ܐܢ̱ܬ ܣܝ̣ܡܬܐ ܕܪܘܓܙܐ ܠܝܘܡܐ ܕܪܘܓܙܐ. ܒܕܓܘܢ ܐܡܪܝܢܢ ܐܢܗܘ ܕܫܪܝܪܐܝܬ ܐܝܟ ܕܐܡ̣ܪ ܕܘܝܕ ܣܢܐ ܐܠܗܐ ܠܥܒ̈ܕܝ ܫܘܩܪܐ. ܐܝܟܢܐ ܚܪܩ ܥܠܝܗܘܢ ܕܢܬܪܥܘܢ ܬܪ̈ܥܝܬܐ ܒܝ̈ܫܬܐ ܘܢܢܩܘܢ ܢܘܩܝ̈ܐ ܘܢܡܠܟܘܢ ܘܢܥܕܥܕܘܢ ܘܠܐ ܢܕܥܘܢܝܗܝ ܘܠܐ ܢܬܘܒܘܢ. ܐܝܟܢܐ ܐܡ̇ܪ ܗ̣ܘܐ ܠܗܘܢ. ܕܥܒ̣ܕܘ ܬܪ̈ܥܝܬܐ ܘܠܐ ܡܢܝ ܘܢܩܝ̣ܘ ܢܘ̈ܩܝܐ ܘܠܐ ܡ̣ܢ ܪܘܚܝ. ܘܐܡܠ̣ܟܘ ܘܠܐ ܐܘܕܥܘܢܝ. ܘܣܢܝܬ ܘܐܣܠܝܬ ܥܕܥܐܕܝ̈ܗܘܢ ܘܠܐ ܨܒ̣ܘ ܠܡܕܥܢܝ. ܘܡܛܠ ܩܫܝܘ̣ܬ ܠܒܗܘܢ ܠܐ ܬܝ̇ܒܝܢ.

 

ܙܢܐ ܫܬܝܬܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܓܘܪܓܐ ܕܥܠ ܡܝܬܪ̈ܬܐ ܘܚܘܓܪܐ ܕܡ̣ܢ ܫܟܝ̣ܪ̈ܬܐ. ܕܘܝܕ ܐܡ̣ܪ. ܥܒܪ ܡ̣ܢ ܒܝܫܬܐ ܘܥܒܕ ܛܒܬܐ. ܒܥܝ̣ ܫܠܡܐ ܘܗܪܛ ܒܬܪܗ. ܒܪ ܐܣ̣ܝܪܐ. ܒܪܝ ܐܢ ܠܐ ܬܪܗܛ ܠܐ ܬܕܪܟ. ܘܐܢ ܠܐ ܬܒܥܐ ܠܐ ܬܫܟܚ. ܘܐܫܥܝܐ. ܣܚܘ ܘܐܬܕܟܘ. ܘܐܥܒܪ ܒܝ̈ܫܬܐ ܕܥܒܕܝ̈ܟܘܢ ܡ̣ܢ ܩܕܡܝ. ܘܗܘܫܥ. ܐܢ̱ܬ ܕܝܢ ܐܬܦܢܝ ܠܘܬ ܐܠܗܟ. ܘܛܝܒܘܬܐ ܘܕܝ̣ܢܐ ܛܪܘ. ܥܡܘܣ. ܒܥܘ ܛܒ̈ܬܐ ܘܠܐ ܒܝ̈ܫܬܐ ܕܬܐܚܘܢ. ܨܦܢܝܐ ܕܚܠܘ ܡ̣ܢ ܩܕܡ ܡܪܐ ܡܪ̈ܘܬܐ. ܡܛܠ ܕܩܪܝ̣ܒ ܗ̣ܘ ܝܘܡܗ ܕܡܪܝܐ. ܚܓܝ. ܡܟܝܠ ܫܥܒܕܘ ܠܒܘ̈ܬܟܘܢ ܡ̣ܢ ܝܘܡܐ ܗܢܐ ܘܠܗܠ. ܙܟܪܝܐ ܐ̱ܢܫ ܥܠ ܚܒܪܗ ܒܝܫܬܐ ܠܐ ܬܬܚܫܒܘܢ ܒܠܒܟܘܢ. ܡܠܐܟܝ. ܐܙܕܗܪܘ ܒܠܒܘ̈ܬܟܘܢ ܘܠܐ ܬܕܓܠܘܢ. ܐܪܡܝܐ. ܐܘܪܚܐ ܕܥܡ̈ܡܐ ܠܐ ܬܐܠܦܘܢ. ܘܡ̣ܢ ܐܬܘ̈ܬܐ ܕܫܡܝܐ ܠܐ ܬܕܚܠܘܢ. ܐܘܢܓܠܝܘܢ. ܠܐ ܬܩܢܘܢ ܠܐ ܕܗܒܐ ܘܠܐ ܣܐܡܐ. ܘܠܐ ܢܚܫܐ ܒܟܝܣܝ̈ܟܘܢ. ܘܠܐ ܬܪܡܠܐ ܠܐܘܪܚܐ. ܒܕܓܘܢ ܐܡܪܝܢܢ ܐܢܗܘ ܕܟܠܗܝܢ ܚܪ̈ܝ̣ܩܢ ܕܢܣܬܥܪ̈ܢ ܘܕܠܐ ܢܣܬܥܪ̈ܢ. ܐܝܟܢܐ ܠܘ ܐܝܩܝ ܡܫܬܟܚܝ̣ܢ ܠܘ̣̈ܒܛܐ ܘܚܘ̈ܦܛܐ ܕܐܝܟ ܗܠܝܢ.

 

ܙܢܐ ܫܒܝܥܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܒܨܠܘ̈ܬܐ ܡܥܕ̈ܢ ܠܡܬܦܢܝܘ ܫ̈ܐܠܬܐ. ܐܫܥܝܐ ܓܝܪ ܨܠܝ̣ ܘܐܡ̣ܪ. ܡܪܝܐ ܐܠܗܐ ܛܪ ܠܢ ܫܠܡܐ. ܡܪܝܐ ܐܠܗܢ ܩܢܝ̣ ܠܢ. ܘܝܘܢܢ ܨܠܝ̣ ܩܕܡ ܡܪܝܐ ܐܠܗܗ ܡ̣ܢ ܡܥܘ̈ܗܝ ܕܢܘܢܐ. ܘܦܩܕ ܡܪܝܐ ܐܠܗܐ ܠܢܘܢܐ ܘܦܠܛܗ ܠܝܘܢܢ ܠܝܒܫܐ. ܘܚܒܩܘܩ ܐܡ̣ܪ. ܒܪܘܓܙܐ ܪ̈ܚܡܝܟ ܐܬܕܟܪ. ܘܙܟܪܝܐ ܐܡ̣ܪ. ܬܘ ܢܐܙܠ ܘܢܨܠܐ ܩܕܡ ܡܪܝܐ. ܘܐܪܡܝܐ ܟܕ ܨܠܝ̣ ܐܡ̣ܪ. ܐܦܢܢ ܡܪܝܐ ܠܘܬܟ ܘܢܬܦܢܐ. ܚܕܬ ܝܘ̈ܡܬܢ ܐܝܟ ܕܡ̣ܢ ܩܕܝܡ. ܘܕܒܝܬ ܚܢܢܝܐ ܨܠܝ̣ܘ ܘܐܡ̣ܪܘ. ܡܪܝܐ ܠܐ ܬܒܗܬܢ ܘܫܪܟܐ. ܘܡܪܢ ܐܠܦ ܠܢ ܕܢܨܠܐ ܨܠܘܬܐ ܘܢܒܥܐ ܡܢܗ ܕܠܐ ܢܥܠ ܠܢ ܠܢܣܝܘܢܐ. ܐܠܐ ܢܦܨܐ ܠܢ ܡ̣ܢ ܒܝܫܐ. ܘܦܛܪܘܣ ܐܡ̣ܪ. ܐܢ ܐ̱ܢܫ ܟܪܝܗ ܢܟܢܫ ܠܟܗ̈ܢܐ ܘܢܨܠܘܢ ܥܠܘܗܝ ܘܢܬܚܠܡ. ܘܦܘܠܘܣ ܐܡ̣ܪ ܒ̇ܥܐ ܐ̱ܢܐ ܕܝܢ ܡ̣ܢ ܐܠܗܐ ܕܠܐ ܢܗܘܐ ܒܟܘܢ ܡܕܡ ܕܒܝܫ. ܒܕܓܘܢ ܐܡܪܝܢܢ ܐܢ ܟܠܗܝܢ ܚܪ̈ܝ̣ܩܢ ܐܘ ܚܠܝ̣̈ܩܢ ܛܒ̈ܬܐ ܘܒܝ̈ܫܬܐ. ܐܝܟܢܐ ܡܨܝܐ ܨܠܘܬܐ ܕܬܬܘܦ ܗ̇ܘ ܡܐ ܕܚܪܝ̣ܩ. ܘܬܕܚܐ ܗ̇ܘ ܡܐ ܕܚܙܝ̣ܩ. ܘܟܕ ܗܠܝܢ ܕܚܪ̈ܝ̣ܩܢ ܐܠܨܐܝܬ ܓܕ̈ܫܢ܇ ܐܢ ܢܨܠܐ ܘܐܢ ܠܐ ܢܨܠܐ. ܐܝܢܐ ܗ̱ܘ ܗܢܝܢܐ ܡ̣ܢ ܨܠܘܬܐ.

 

ܙܢܐ ܬܡܝܢܝܐ:

 

ܣܗܕ̈ܘܬܐ ܡܫܘܕܥܢ̈ܝܬܗ ܕܚܐܪܘܬܐ ܘܫܠܝ̣ܛܘܬ ܒܝܬܐ ܕܢܝ̣ܚܐܝܬ. ܐܡ̣ܪ ܓܝܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܬܠܬܐ ܕܡܦܩܒܪܘܚܐ. ܗܕܐ ܕܝܢ ܐܝܬܝܗ̇ ܗܘܬ݀ ܐܪܐ ܛܒܘܬܐ ܡܠܝ̣ܠܬܐ܆ ܕܬܥܒܕܝܗ̇ ܠܛܒܬܐ ܘܕܝܠܢ. ܐܝܟܢܐ ܕܠܘ ܒܟܝܢܐ ܒܠܚܘܕ ܡܙܕܪܥܐ. ܐܠܐ ܘܕܒܨܒܝܢܐ ܡܬܐܟܪܐ. ܘܒܙܘ̈ܥܐ ܕܠܬܪ̈ܝܗܘܢ ܓܒ̈ܐ ܘܕܡܫܠܛܘܬ ܒܝܬܐ. ܘܗ̣ܘ ܟܕ ܗ̣ܘ ܬܘܒ ܐܡ̣ܪ ܒܗ̇ܘ ܕܥܠ ܡܩܒܝ̈ܐ. ܡܪܐ ܡܫܠܛܐ ܕܚܫ̈ܐ ܐܝܬܘܗܝ ܚܘܫܒܢ. ܘܡܪܐ ܕܡܨܛܠܝܢܘܬܐ ܕܠܘܬ ܬܪ̈ܬܝܗܝܢ. ܡܝܬܪܘܬܐ ܐܡ̇ܪ ܐ̱ܢܐ ܘܒܝܫܘܬܐ. ܘܩܕܝܫܐ ܓܪܝܓܘܪܝܘܣ ܕܢܘܣܐ ܐܡ̣ܪ ܒܡܐܡܪܐ ܕܥܠ ܡܪܬܝܢܘܬܐ. ܗ̇ܘ ܕܐܦ ܦܘܪܥܢܐ ܛܒܐ ܣܡ ܠܗ̇ܢܘܢ ܕܒܐܓܘܢܐ ܨܒܝܢܝܐ ܡܬܕܒܪܝܢ ܒܡܝܬܪܘܬܐ. ܠܘ ܟܕ ܩܛܝ̣ܪܐ ܡܕܡ ܟܕܢ ܒܟܝܢܐ ܐ̱ܢܫܝܐ ܠܘܬ ܗ̇ܝ ܕܡܣܬܒܪܐ ܠܗܘܢ ܒܕܡܘ̣ܬ ܡܐܢܐ ܡܕܡ ܠܐ ܡܢܦܫܐ. ܕܕܠܐ ܒܨܒܝܢܗ ܡܬܕܒܪ. ܐܠܐ ܐܢܗܘ ܕܐ̱ܢܫ ܡܗܦܟ ܚܙܝܗ ܨܒܝܢܐܝܬ. ܡ̣ܢ ܢܘܗܪܐ ܕܟܝܢܐ ܘܨܚܝ̣ܚܐ. ܗ̣ܘ ܫܡܫܐ ܠܒܪ ܡ̣ܢ ܥܠܬܐ ܐܝܬܘܗܝ ܕܗ̇ܝ ܕܠܐ ܢܚܙܐ ܗ̇ܘ ܡ̇ܢ ܕܗ̣ܘ ܕܐܝܬܘܗܝ. ܘܩܕܝܫܐ ܐܘܓܪܝܣ ܐܡ̣ܪ ܒܛܝ̣ܠܘܬܐ ܕܐܠܗܐ ܒܬܪ ܚܐܪܘܬܗ ܕܨܒܝܢܐ ܪܕܝܐ. ܕܝ̣ܢܗ ܕܝܢ ܟܐܢܐ܆ ܒܬܪ ܕܘܒܪ̈ܐ ܕܢܦܫܐ. ܘܝܥܩܘܒ ܕܐܘܪܗܝ ܒܐܓܪܬܗ ܕܥܣܪܝܢ ܐܡ̣ܪ. ܘܐܦܢ ܟܝܬ ܕܘܒܪܗܘܢ ܕܒܢܝ̈ܢܫܐ ܗ̇ܘܐ ܠܒܪ ܡ̣ܢ ܨܒܝܢܗ܆ ܡܛܠ ܫܠܝ̣ܛܘܬ ܒܝܬܐ ܟܝܬ ܕܚܐܪܘܬܗܘܢ ܕܝܠܗܘܢ. ܘܡܛܠ ܗ̇ܝ ܕܠܐ ܨܒ̇ܐ ܗ̣ܘ ܕܢܕܒܪ ܐܢܘܢ ܒܩܛܝ̣ܪܐ ܨܒܝܢܐܝܬ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܬܪܥܝ̣ܬܐ ܣܩܘܒܠܝܬܐ ܕܡ̈ܒܛܠܝ ܚܐܪܘܬܐ ܕܐܡܪܝܢ ܕܡܚܪܩ ܚܪ̈ܝܩܢ ܡ̣ܢ ܐܠܗܐ ܣܥܘܪ̈ܘܬܐ ܐ̱ܢܫܝ̈ܬܐ ܟܠܗܝܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܐܠܘ ܒܪܢܫܐ ܒܚܐܪܘܬܗ ܣ̇ܥܪ ܗ̣ܘܐ ܣܥܘܪ̈ܘܬܗ. ܙܕܩ ܗ̣ܘܐ ܕܡܕܥ ܝ̇ܕܥ ܗ̣ܘܐ ܠܗܝܢ. ܘܟܢ ܡܬܡܨܐ ܗ̣ܘܐ ܠܡܣܥܪ ܐܢܝܢ. ܒܗ̇ܝ ܕܐܠܘ ܡܬܘܡ ܣܥܘܪܘܬܐ ܡܠܝ̣ܠܬܐ ܒܠܥܕ ܝ̣ܕܥܬܐ ܡܨܝܐ ܗܘܬ݀ ܕܬܣܬܥܪ. ܐܝܟܢܐ ܡܬܡܨܝܢ ܗܘܝܢ ܠܡܫܪܪܘ ܝ̣ܕܥܬܗ ܕܐܠܗܐ ܫܘܒܚܐ ܠܛܝܒܘܬܗ. ܘܕܠܐ ܝܕܥ ܒܪܢܫܐ ܣܥܘܪ̈ܘܬܗ܆ ܝܕܝܥܐ ܡ̣ܢ ܬܪܬܝܢ. ܚܕܐ ܡ̇ܢ ܕܗ̇ܘ ܕܕܡܝ̣ܟ. ܘܗ̇ܘ ܕܥܢܝ̣ܦ ܘܗ̇ܘ ܕܡܢܣܝ. ܣܘܓܐܐ ܕܙܘ̈ܥܐ ܡܬܬܙܝ̣ܥܝ̣ܢ ܒܗ ܒܠܥܕ ܝ̣ܕܥܬܐ. ܕܬܪܬܝܢ ܕܝܢ ܕܗ̇ܘ ܕܡܙܝ̣ܥ ܨܒܥܗ ܠܟܠܗܘܢ ܡܢܘ̈ܬ ܨܒܥܗ ܐܟܚܕܐ ܡܙܝܥ. ܘܐܠܘ ܗ̣ܘ ܗ̣ܘܐ ܡܙܝ̣ܥܢܐ ܕܨܒܥܗ. ܙܕܩ ܗ̣ܘܐ ܕܐܦ ܠܡܢܘ̈ܬܐ ܕܨܒܥܗ ܕܟܡܐ ܐܢܝܢ ܘܐܝܠܝܢ ܫܪ̈ܝܬܐ. ܘܥܘܩܒܪ̈ܬܐ ܘܓܝ̈ܕܐ ܘܘܪ̈ܝ̣ܕܐ ܘܫܪ̈ܝܢܐ ܘܐܣܪ̈ܐ ܘܓܪ̈ܡܐ ܘܒܣܪ̈ܬܐ ܘܡܫܟܐ ܕܨܒܥܗ. ܘܕܠܘ ܟܠ ܕܡܙܝܥ ܨܒܥܗ ܝ̇ܕܥ ܗܠܝܢ ܓܠܝܐ. ܘܟܕ ܠܐ ܝ̇ܕܥ ܠܐ ܡܨܐ ܕܢܙܝܥ ܗ̣ܘ ܡܢܗ ܨܒܥܗ. ܐܦܠܐ ܕܠܐ ܢܙܝܥ. ܐܠܐ ܗ̇ܘ ܕܒܪܗ̇ ܠܨܒܥܗ ܘܪܟܒܗ̇ ܬܡܝ̣ܗܐܝܬ ܗܘܝܘ ܐܦ ܕܡܙܝܥ ܠܗ̇. ܘܠܝܬ ܠܗ ܠܒܪܢܫܐ ܚܐܪܘܬܐ ܐܘ ܫܠܝ̣ܛܘܬ ܒܝܬܐ ܠܡܣܥܪ ܡܕܡ ܐܠܐ ܗ̇ܘ ܡܐ ܕܐܠܗܐ ܣܥܪ ܒܐܝ̈ܕܘܗܝ܆ ܗ̇ܘ ܗ̣ܘ ܡܣܬܥܪ. ܘܗܢܘ ܣܘܟܠܗ ܕܚܘܪܩܢܐ ܐܠܗܝܐ.

 

ܣܥܝܐ ܬܪܝܢܐ:

 

ܐܡܪܝܢ ܕܟܠܗܝܢ ܣܥܘܪ̈ܘܬܐ ܕܣܘܪܐܛܝܣ ܡܨܐ ܠܡܣܥܪ ܐܦ ܐܠܗܐ ܡܨܐ ܠܡܣܥܪ. ܒܗ̇ܝ ܕܡܨܐ ܟܠ ܗ̣ܘ. ܒܕܓܘܢ ܗ̣ܝ ܣܥܘܪܘܬܐ ܕܒܐܝ̈ܕܝ ܣܘܩܪܐܛܝܣ ܡܬܚܙܝܐ ܕܗܘܝܐ. ܐܘ ܒܝܕ ܬܪ̈ܝܗܘܢ ܚܝ̈ܠܐ ܕܐܠܗܐ ܫܘܒܚܐ ܠܛܝܒܘܬܗ ܘܕܣܘܩܪܐܛܝܣ ܡܬܥܒܕܐ. ܐܘ ܒܠܐܴ ܚܕ ܡܢܗܘܢ. ܐܘ ܒܚܕ ܡܢܗܘܢ ܕܝ̣ܠܢܐܝܬ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܠܘܬ ܗ̇ܝ ܕܠܐ ܣܦܩ ܟܠܚܕ ܡܢܗܘܢ ܕܝ̣ܠܢܐܝܬ ܠܡܣܥܪܗ̇ ܡܘܒܠܐ. ܘܡ̣ܢ ܗܪܟܐ ܬܚܘܒܘܬܐ ܕܡܬܩܛܪܓܐ ܥܠ ܚܝܠܐ ܐܠܗܝܐ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ ܒܗ̇ܝ ܕܡܒܛܠܢܐ ܕܟܠܚܕ ܡ̣ܢ ܚܝ̈ܠܐ ܗ̇ܘ ܐ̱ܚܪܢܐ ܗܘܐ. ܘܡ̣ܢ ܗܪܟܐ ܐܠܨܐ ܕܒܗ ܒܙܒܢܐ ܕܟܠܚܕ ܡܢܗܘܢ ܡܬܥܫܢ. ܒܗ ܥܕ ܒܗ ܐܟܚܕܐ ܬܚܒ܆ ܗ̇ܝ ܕܫܟܝ̣ܪܐ. ܘܟܕ ܬܪ̈ܝܗܘܢ ܦܫܚܘ̈ܗܝ ܕܦܘܠܓܐ ܐܬܒܛܠܘ. ܫܪܝ̣ܟ ܕܗ̣ܝ ܕܣܥܘܪܘܬܐ ܗ̇ܝ ܐܢ ܒܚܝ̣ܠ ܣܘܩܪܐܛܝܣ ܡܣܬܥܪܐ ܘܠܘ ܒܚܝ̣ܠ ܐܠܗܐ. ܡܫܬܟܚ ܠܗ ܐܠܗܐ ܕܠܘ ܡܨܐ ܟܠ ܗ̣ܘ ܗ̇ܝ ܕܫܟܝܪܐ. ܘܡ̣ܢ ܗܠܝܢ ܝ̣ܕܝ̣ܥܐ ܕܠܝܬ ܠܣܘܩܪܐܛܝܣ ܡܬܡܨܝܢܘܬܐ ܕܣܥܘܪܘܬܐ ܡܕܡ. ܘܠܗ̇ܘ ܕܠܝܬ ܡܬܡܨܝܢܘܬܐ. ܐܝ̇ܕܐ ܚܐܪܘܬܐ ܘܫܠܝ̣ܛܘܬ ܒܝܬܐ ܡܨܝܐ ܕܬܗܘܐ.

 

ܣܥܝܐ ܬܠܝܬܝܐ:

 

ܐܡܪܝܢ ܐܠܘ ܚܐܪܘܬܐ ܩܢܐ ܗ̣ܘܐ ܣܘܩܪܐܛܝܣ ܘܫܠܝ̣ܛ ܗ̣ܘܐ ܕܢܩܛܘܠ ܘܕܠܐ ܢܩܛܘܠ. ܐܘ ܬܪ̈ܝܗܘܢ ܐܟܚܕܐ ܨܒܝ̈ܢܐ ܕܝܠܗ ܘܕܐܠܗܐ ܡܫܬܡܠܝܢ܇ ܗ̇ܝ ܕܫܟܝܪܐ. ܒܗ̇ܝ ܕܠܘܬ ܗ̇ܝ ܕܢܩܛܘܠ ܘܕܠܐ ܢܩܛܘܠ ܐܟܚܕܐ ܒܚܕ ܙܒܢܐ ܡܘܒܠܐ ܡܠܬܐ ܗܕܐ. ܐܘ ܬܪ̈ܝܗܘܢ ܐܟܚܕܐ ܠܐ ܡܫܬܡܠܝܢ. ܗ̇ܝ ܕܐܦ ܗ̣ܝ ܫܟܝܪܐ. ܒܗ̇ܝ ܕܠܘܬ ܗ̇ܝ ܕܠܐ ܢܩܛܘܠ. ܘܠܐ ܕܠܐ ܢܩܛܘܠ ܡܘܒܠܐ. ܐܘ ܨܒܝܢ ܣܘܩܪܐܛܝܣ ܒܠܥܕ ܨܒܝܢ ܐܠܗܐ ܡܫܬܡܠܐ܆ ܗ̇ܝ ܕܫܟܝܪܐ. ܒܗ̇ܝ ܕܠܘܬ ܗ̇ܝ ܕܡ̣ܢ ܒܪܢܫܐ ܢܙܕܟܐ ܐܠܗܐ ܡܘܒܠܐ. ܫܪܝ̣ܟܐ ܡܕܝܢ ܕܨܒܝܢ ܐܠܗܐ ܕܝ̣ܠܢܐܝܬ ܡܫܬܡܠܐ. ܘܡ̣ܢ ܗܪܟܐ ܝܕܝܥܐ ܕܐܠܗܐ ܗ̱ܘ ܡܪܢܐܝܬ ܗ̇ܘ ܕܩܛܠ ܘܠܐ ܩ̇ܛܠ. ܘܠܝܬ ܠܗ ܠܣܘܩܪܐܛܝܣ ܫܘܠܛܢܐ ܥܠ ܡܕܡ ܡܬܘܡ. ܘܗܟܢܐ ܒܛܠܐ ܡܠܬ݀ ܚܐܪܘܬܐ.

 

ܣܥܝܐ ܪܒܝܥܝܐ:

 

ܐܡܪܝܢ ܕܟܠ ܣܥܘܪܘܬܐ ܨܒܝܢܝܬܐ. ܠܐ ܡܫܬܡܠܝܐ ܐܠܐ ܟܕ ܡܨܛܒܝܘ ܡܨܛܒܐ ܒܗ̇ ܣܥܘܪܗ̇. ܘܟܦܘܪܐ ܠܐ ܡܨܛܒܐ ܐܠܐ ܒܗܝܡܢܘܬܐ ܫܪܝܪܬܐ. ܘܟܕ ܚܙܝܢܢ ܕܒܗܝܡܢܘܬܐ ܫܪܝܪܬܐ ܡܨܛܒܐ ܘܚܠܦܝܗ̇ ܡܬܟܬܫ. ܘܠܐ ܡܫܬܟܢܐ ܠܗ. ܝ̇ܕܥܝ̣ܢܢ ܕܠܘ ܒܨܒܝܢܗ ܟܦܪ ܟܦܘܪܐ. ܐܠܐ ܐܠܗܐ ܗ̱ܘ ܕܡܨܛܒܐ ܒܟܦܘܪܘܬܗ ܘܡܫܪܪ ܠܗ̇ ܒܬܪܥܝ̣ܬܗ. ܘܕܐܠܗܐ ܗ̱ܘ ܗܢܐ ܘܠܘ ܣܛܢܐ ܐܡ̣ܪܢܢ. ܒܗ̇ܝ ܕܠܝܬ ܦܘܠܓܐ ܕܐܠܗܐ ܗ̱ܘ ܡܩܝܡܢܗ̇ ܕܗܝܡܢܘܬܐ. ܘܐܠܘ ܠܣܛܢܐ ܣܡ̣ܢܢ ܡܩܝܡܢܗ̇ ܕܟܦܘܪܘܬܐ. ܠܘܬ ܡܢܝ̣ܢܝܘܬܐ ܘܬܪܝܢܘܬ ܐܝܬܝ̈ܐ ܢܩܦܝ̣ܢܢ܇ ܗ̇ܝ ܕܫܟܝܪܐ. ܘܡ̣ܢ ܗܠܝܢ ܡܫܬܪܪܐ ܕܠܝܬ ܠܒܪܢܫܐ ܚܐܪܘܬܐ. ܠܐ ܥܠܗ̇ܝ ܕܢܗܝܡܢ܆ ܐܦܠܐ ܥܠܗ̇ܝ ܕܢܟܦܘܪ.

 

ܣܥܝܐ ܚܡܝܫܝܐ:

 

ܐܡܪܝܢ ܕܒܪܢܫܐ ܡ̇ܢ ܟܕ ܨܒܐ ܠܡܣܥܪ ܣܥܘܪܘܬܐ ܡܕܡ. ܐܘ ܡܨܐ ܠܡܒܛܠܘܬܗ̇. ܐܘ ܠܐ ܡܨܐ. ܘܐܢ ܠܐ ܡܨܐ. ܗܐ ܒܛܠܬ݀ ܚܐܪܘܬܗ. ܘܐܢ ܡܨܐ. ܐܘ ܒܝܕ ܥܠܬܐ ܡܒܛܠ ܠܗ̇. ܐܘ ܠܘ ܒܝܕ ܥܠܬܐ. ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܠܘܬ ܢܬܥܐ ܕܒܠܥܕ ܡܢܬܥܢܐ ܡܘܒܠ. ܗ̇ܝ ܕܫܟܝܪܐ. ܫܪܝ̣ܟܐ ܡܕܝܢ ܕܒܝܕ ܥܠܬܐ ܡܬܡܨܐ ܠܡܒܛܠܘܬܗ̇. ܒܕܓܘܢ ܐܠܗܐ ܕܟܠ ܐܡܬܝ ܕܥܠܬܐ ܗ̇ܝ ܡܬܟܝܢܐ. ܐܠܨܐܝܬ ܣ̇ܥܪ ܠܗ̇ ܘܐܦܢ ܢܨܒܐ ܕܠܐ ܢܣܥܪܝܗ̇. ܘܗܟܢܐ ܒܛܠܐ ܠܗ̇ ܚܐܪܘܬܗ ܐܘܟܝܬ ܫܠܝ̣ܛܘܬ ܒܝܬܗ ܥܠ ܗ̇ܝ ܕܢܣܥܘܪ ܘܠܐ ܢܣܥܘܪ.

 

ܣܥܝܐ ܫܬܝܬܝܐ:

 

ܐܡܪܝܢ ܕܟܠܡܕܡ ܕܝ̇ܕܥ ܐܠܗܐ ܕܥܬܝܕ ܕܢܣܬܥܪ ܒܐܝ̈ܕܝ ܣܘܩܪܐܛܝܣ ܐܠܘ ܡܨܐ ܗ̣ܘܐ ܣܘܩܪܐܛܝܣ ܕܠܐ ܢܣܥܪܝ̣ܘܗܝ. ܐܘ ܠܗ̇ܘ ܕܝ̇ܕܥ ܐܠܗܐ ܕܥܬܝܕ ܕܠܐ ܢܣܬܥܪ ܒܐܝ̈ܕܘܗܝ܆ ܐܠܘ ܡܨܐ ܗ̣ܘܐ ܕܢܣܥܪܝ̣ܘܗܝ. ܒܛܠܐ ܗܘܬ݀ ܡܩܕܡܘ̣ܬ ܝ̣ܕܥܬܗ ܕܐܠܗܐ. ܗ̇ܝ ܕܫܟܝܪܐ. ܘܗܟܢܐ ܦܚܡ ܠܢܒܝ̈ܘܬܐ ܟܠܗܝܢ ܕܢܒܝ̈ܐ ܕܡ̣ܢ ܩܕܝܡ ܕܐܠܘ ܫܠܝ̣ܛܝܢ ܗ̣ܘܘ ܒܢܝ̈ܢܫܐ ܒܚܐܪܘܬܗܘܢ ܕܠܐ ܢܣܥܪܘܢ ܐܢܝܢ. ܐܘ ܕܢܣܥܪܘܢ ܗ̣ܘܘ ܗ̇ܝ ܕܒܗܦܟܐ. ܟܠܗܝܢ ܡܬܒ̈ܛܠܢ ܗܘܝ̈ ܘܡܬܕܓ̈ܠܢ. ܘܟܕ ܡܠܬ݀ ܚܐܪܘܬܐ ܠܘ ܫܟܝܪ̈ܘܬܐ ܕܐܝܟ ܗܠܝܢ ܡܘܒܠܐ. ܠܝܬ ܠܒܪܢܫܐ ܚܐܪܘܬܐ ܐܘ ܫܠܝ̣ܛܘܬ ܒܝܬܐ ܥܠܗ̇ܝ ܕܢܣܥܘܪ ܘܕܠܐ ܢܣܥܘܪ. ܐܠܐ ܠܗ̇ܘ ܡܐ ܕܚܪܝ̣ܩ ܥܠܘܗܝ ܒܠܚܘܕ ܡܨܐ ܠܡܣܥܪ. ܟܕ ܠܘ ܗܘܝܘ ܫܪܝܪܐܝܬ ܗ̇ܘ ܕܣ̇ܥܪ. ܐܠܐ ܗ̣ܘ ܐܠܗܐ ܫܘܒܚܐ ܠܛܝܒܘܬܗ. ܕܒܠܚܘܕܘܗܝ ܐܝܬܘܗܝ ܡܨܐ ܚܝ̣ܠ ܟܠܡܕܡ. ܒܪܢܫܐ ܕܝܢ ܐܘܪܓܢܘܢ ܗ̣ܘ ܒܠܚܘܕ. ܕܒܗ ܡ̣ܢ ܐܠܗܐ ܡܣܬܥܪ ܗ̇ܘ ܡܐ ܕܡܣܬܥܪ.

 

 

 

ܢܝܫܐ ܬܪܝܢܐ. ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܘܗ̣ܢܝܢ ܗܠܝܢ ܒܬܡܢܝܐ ܙܢܝ̈ܐ ܡܣܬܝ̈ܟܢ. ܙܢܐ ܩܕܡܝܐ

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܟܠܡܕܡ ܡ̣ܢ ܐܠܗܐ ܗ̱ܘ ܗܘ̇ܐ. ܦܘܠܘܣ ܡܛܠ ܕܟܠ ܡܢܗ ܘܟܠ ܒܗ ܕܠܗ ܬܫܒ̈ܚܢ ܘܒܘܪ̈ܟܢ. ܘܬܘܒ ܗ̣ܘ ܟܕ ܗ̣ܘ ܒܕܩܘܪ̈ܝܢܬܝܐ ܩܕܡܝܬܐ. ܟܠܡܕܡ ܕܝܢ ܡ̣ܢ ܐܠܗܐ. ܕܘܢܘ ܒܝܢܝ̈ܟܘܢ ܠܢܦܫܟܘܢ. ܘܬܘܒ ܒܗ̇ ܟܕ ܒܗ̇. ܐܠܐ ܚܕ ܗ̣ܘ ܐܠܗܐ ܕܡܥܒܕ ܟܠ ܒܟܠܢܫ. ܗܠܝܢ ܥܡ ܫܪܟܐ ܕܐ̱ܚܪ̈ܢܝܬܐ ܕܐܝܬܝ̣ܢܢ ܒܢܝ̣ܫܐ ܬܪܝܢܐ ܕܦܣܘܩܐ ܩܕܡܝܐ ܕܩܦܠܐܘܢ ܬܪܝܢܐ ܕܗܕܐ ܫܬܐܣܬܐ. ܒܕܓܘܢ ܐܡܪܝܢ ܐܢ ܐܠܗܐ ܗ̱ܘ ܕܡܥܒܕ ܟܠ ܒܟܠ. ܐܝܠܝܢ ܐܢܝܢ ܣܥܘܪ̈ܘܬܗ̇ ܕܚܐܪܘܬܐ ܐ̱ܢܫܝܬܐ ܕܐܡ̇ܪܝܬܘܢ. ܟܠ ܓܝܪ܆ ܦܪܘܣܕܝܘܪܝܣܡܘܣ ܗܝ ܟܠܢܝܐ ܘܚܒܘܫܐ ܘܐܚܘܕܐ. ܘܠܒܪ ܡܢܗ ܘܠܐ ܡܕܡ ܡܨܐ ܠܡܗܘܐ. ܠܝܬ ܡܕܝܢ ܚܐܪܘܬܐ. ܐܠܐ ܟܠܡܕܡ ܒܐܠܗܐ ܘܡ̣ܢ ܐܠܗܐ ܐܝܟ ܕܐܡ̣ܪ ܫܠܝܚܐ.

 

ܙܢܐ ܬܪܝܢܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܛܒ̈ܬܐ ܡ̣ܢ ܐܠܗܐ ܐܢܝܢ ܘܒܝ̈ܫܬܐ ܡ̣ܢ ܣܛܢܐ. ܐܘܢܓܠܝܘܢ. ܕܡܝܐ ܡܠܟܘܬܐ ܕܫܡܝܐ. ܠܓܒܪܐ ܕܙܪܥ ܙܪܥܐ ܛܒܐ ܒܩܪܝ̣ܬܗ. ܘܟܕ ܕܡܟܘ ܐ̱ܢܫ̈ܐ܆ ܐܬܐ ܒܥܠܕܒܒܗ. ܘܙܪܥ ܙܝ̣ܙܢ̈ܐ ܒܝܢܬ ܚ̈ܛܐ ܘܐܙܠ. ܒܗ ܟܕ ܒܗ. ܗ̇ܘ ܕܝܢ ܕܥܒܕ ܫܪܪܐ܇ ܐܬܐ ܠܘܬ ܢܘܗܪܐ. ܕܢܬܝܕܥܘܢ ܥܒܕܘ̈ܗܝ ܕܒܐܠܗܐ ܥܒܝ̣ܕܝ̣ܢ. ܘܝܘܚܢܢ ܫܠܝܚܐ ܒܐܓܪܬܗ ܐܡ̣ܪ. ܠܘ ܐܝܟ ܩ̇ܐܝܢ ܕܐܝܬܘܗܝ ܗ̣ܘܐ ܡ̣ܢ ܘܒܝܫܐ ܘܩܛܠ ܠܐܚܘܗܝ. ܘܬܘܒ ܐܡ̣ܪ ܟܠ ܕܐܬܝܠܕ ܡ̣ܢ ܐܠܗܐ ܚܛܝܬܐ ܠܐ ܥܒܕ. ܒܗܕܐ ܡܬܦܪܫܝܢ ܒܢܘ̈ܗܝ ܕܐܠܗܐ ܡ̣ܢ ܒܢܘ̈ܗܝ ܕܣܛܢܐ. ܒܕܓܘܢ ܐܡܪܝܢ ܐܢ ܥܒܕ̈ܐ ܛܒ̈ܐ ܙܪ̈ܥܘܗܝ ܐܢܘܢ ܕܐܠܗܐ. ܘܥܒܕ̈ܐ ܒܝ̈ܫܐ. ܙܪ̈ܥܘܗܝ ܐܢܘܢ ܕܣܛܢܐ ܒܥܠܡܐ ܗܢܐ ܙܪܝ̣ܥܝ̣ܢ. ܐܝܠܝܢ ܐܢܘܢ ܙܪ̈ܥܝܗ̇ ܐܘܟܝܬ ܥܒܕܝ̈ܗ̇ ܕܚܐܪܘܬܐ ܐ̱ܢܫܝܬܐ ܕܐܡܪܝܢ ܐܢ̱ܬܘܢ. ܘܬܘܒ ܐܡܪܝܢ ܕܗ̇ܘ ܕܝ̣ܠܝ̣ܕ ܡ̣ܢ ܐܠܗܐ ܚܛܝܬܐ ܠܐ ܥܒܕ. ܘܗ̇ܘ ܕܝ̣ܠܝ̣ܕ ܡ̣ܢ ܣܛܢܐ ܙܕܝܩܘܬܐ ܠܐ ܥܒܕ. ܐܝܟ ܕܐܡ̣ܪ ܫܠܝܚܐ ܝܘܚܢܢ. ܚܐܪܘܬܐ ܡܕܝܢ ܗ̇ܝ ܕܬܪܬܝܢ ܡܟܢܐ ܕܬܥܒܕ ܐܝܟ ܡܠܬܟܘܢ܆ ܡ̣ܢ ܡ̇ܢ ܐܪܐ ܝ̣ܠܝ̣ܕܐ.

 

ܙܢܐ ܬܠܝܬܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܠܐ ܡܨܐ ܒܪܢܫܐ ܕܡ̣ܢ ܕܝܠܗ ܢܩܢܐ ܡܕܡ ܡܬܘܡ ܠܐ ܛܒܬܐ ܐܦܠܐ ܒܝܫܬܐ. ܐܪܡܝܐ. ܡܢܘ ܗܢܐ ܕܐܡ̣ܪ ܘܗ̣ܘܐ ܕܡܪܝܐ ܠܐ ܦܩܕ. ܘܡ̣ܢ ܦܘܡܗ ܕܥܠܝܐ ܠܐ ܢܦ̈ܩܢ ܛܒ̈ܬܐ ܘܒܝ̈ܫܬܐ. ܐܘܢܓܠܝܘܢ. ܠܐ ܡܫܟܚ ܒܪܢܫܐ ܠܡܣܒ ܡ̣ܢ ܨܒܘܬ ܢܦܫܗ ܡܕܡ. ܐܠܐ ܐܢ ܐܬܝ̣ܗܒ ܠܗ ܡ̣ܢ ܫܡܝܐ. ܒܗ ܟܕ ܒܗ. ܠܐ ܟܠܢܫ ܣܦܩ ܠܗ̇ ܠܡܠܬܐ܇ ܐܠܐ ܡ̇ܢ ܕܝ̣ܗܝ̣ܒ ܠܗ. ܠܟܘܢ ܗ̣ܘ ܝ̣ܗܝ̣ܒ ܠܡܕܥ ܐ̱ܪܙܐ ܕܡܠܟܘܬܐ ܕܫܡܝܐ ܠܗ̇ܢܘܢ ܕܝܢ ܠܐ ܝ̣ܗܝ̣ܒ. ܒܗ ܟܕ ܒܗ. ܕܬܬܒܘܢ ܕܝܢ ܡ̣ܢ ܝܡܝܢܝ ܘܡ̣ܢ ܣܡܠܝ܆ ܠܐ ܗ̣ܘܐ ܕܝܠܝ ܕܐܬܠ. ܐܠܐ ܠܐܝܠܝܢ ܕܐܬܛܝܒܬ݀ ܡ̣ܢ ܐܒܝ. ܦܘܠܘܣ. ܠܐ ܒܐܝ̈ܕܝ ܡ̇ܢ ܕܨܒܐ. ܘܠܐ ܒܐܝ̈ܕܝ ܡ̇ܢ ܕܪܗܛ. ܐܠܐ ܒܐܝ̈ܕܝ ܐܠܗܐ ܡܪܚܡܢܐ. ܒܕܓܘܢ ܐܡܪܝܢ. ܐܢܗܘ ܕܗ̇ܘ ܡܐ ܕܡܪܝܐ ܠܐ ܦܩܕ. ܠܐ ܡܨܐ ܒܪܢܫܐ ܕܢܐܡܪ ܕܢܗܘܐ. ܘܗ̇ܘ ܕܠܐ ܐܬܝ̣ܗܒ ܠܗ ܡ̣ܢ ܫܡܝܐ ܠܐ ܡܨܐ ܠܡܣܒ. ܘܠܝܬ ܡܕܡ ܒܐܝ̈ܕܝ ܡ̇ܢ ܕܨܒ̇ܐ. ܐܝ̇ܕܐ ܗ̱ܝ ܚܐܪܘܬܟܘܢ ܗ̇ܝ ܕܐܡ̇ܪܝܬܘܢ ܕܡܨܝܐ ܕܬܣܥܘܪ ܘܕܠܐ ܬܣܥܘܪ. ܘܬܣܒ ܘܕܠܐ ܬܣܒ.

 

ܙܢܐ ܪܒܝܥܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܠܘ ܒܨܒܝܢܗܘܢ ܚܛܝܢ ܚܛܝ̈ܐ. ܐܪܡܝܐ. ܘܐܝܟ ܕܠܐ ܡܫܟܚ ܗܢܕܘܝܐ ܕܢܫܚܠܦ ܡܫܟܗ. ܘܢܡܪܐ ܟܟ̈ܠܬܗ. ܐܦ ܐܢ̱ܬܘܢ ܠܐ ܡܫܟܚܝܢ ܐܢ̱ܬܘܢ ܠܡܛܐܒܘ. ܐܘܢܓܠܝܘܢ. ܠܡܐ ܠܩܛܝ̣ܢ ܡ̣ܢ ܟܘ̈ܒܐ ܥܢ̈ܒܐ. ܐܘ ܡ̣ܢ ܩܘܪ̈ܛܒܐ ܬܐܢ̈ܐ. ܠܐ ܡܫܟܚ ܐܝܠܢܐ ܛܒܐ ܦܐܪ̈ܐ ܒܝ̈ܫܐ ܠܡܥܒܕ. ܘܠܐ ܐܝܠܢܐ ܒܝܫܐ ܦܐܪ̈ܐ ܛܒ̈ܐ ܠܡܥܒܕ. ܦܘܠܘܣ. ܒܪܝܬܐ ܓܝܪ ܕܐܫܬܥܒܕܬ݀ ܠܣܪܝ̣ܩܘܬܐ ܠܐ ܒܨܒܝܢܗ̇. ܐܠܐ ܡܛܠ ܡ̇ܢ ܕܫܥܒܕܗ̇ ܥܠ ܣܒܪܐ. ܗ̣ܘ ܟܕ ܗ̣ܘ. ܚܒܫ ܓܝܪ ܐܠܗܐ ܠܟܠܢܫ ܒܠܐ ܡܬܬܦܝ̣ܣܢܘܬܐ. ܐܝܟܢܐ ܕܥܠ ܟܠܢܫ ܢܪܚܡ. ܒܕܓܘܢ ܐܡܪܝܢ ܐܢ ܚܛܝܐ ܐܝܟ ܗܢܕܘܝܐ ܗ̱ܘ ܘܐܝܟ ܢܡܪܐ. ܕܐܦܢ ܢܨܒܐ ܠܡܚܘܪܘ ܡܫܟܗ ܘܠܡܫܚܠܦܘ ܟܟ̈ܠܬܗ ܐܠܐ ܠܐ ܡܬܡܨܐ. ܐܝܟܐ ܗ̱ܝ ܚܐܪܘܬܗ. ܘܐܢܗܘ ܬܘܒ ܕܐܠܗܐ ܫܥܒܕܗ ܠܣܪܝ̣ܩܘܬܐ. ܘܚܒܫܗ ܒܠܐ ܡܬܬܦܝ̣ܣܢܘܬܐ. ܐܝܟܢܐ ܠܚܐܪܘܬܗ ܣܝܡܝ̣ܢ ܐܢ̱ܬܘܢ ܥܠܬ݀ ܣܪܝܩܘܬܗ ܘܠܐ ܡܬܬܦܝ̣ܣܢܘܬܗ.

 

ܙܢܐ ܚܡܝܫܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗܝ ܕܠܐ ܙܕܩ ܠܡܪܢܐ ܘܠܡܬܚܫܒܘ ܥܠ ܡܕܡ. ܒܗ̇ܝ ܕܗ̇ܘ ܡܐ ܕܥܬܝܕ ܠܡܗܘܐ ܗ̣ܘ ܗ̇ܘܐ. ܕܘܝܕ ܐܡ̣ܪ. ܐܢ ܡܪܝܐ ܠܐ ܢܛܪ ܩܪܝܬܐ. ܣܪܝܩܐܝܬ ܫ̇ܗܪܝ̣ܢ ܢܛܘܪ̈ܝܗ̇. ܒܪ ܣܝ̣ܪܟ. ܐܝܬ ܕܪܗܛ ܘܠܐܴܐ ܘܥ̇ܡܠ. ܘܒܟܠܗܘܢ ܗ̣ܘ ܡܫܬܘܚܪ. ܐܝܬ ܕܠܐܐ ܘܥܡܠ. ܘܚܣܝ̣ܪ ܦܓܪܗ. ܘܚܣܝ̣ܪ ܟܠ. ܘܝܬܝܪ ܡܣܟܢܘܬܐ. ܐܘܢܓܠܝܘܢ. ܠܐ ܗܟܝܠ ܬܐܨܦܘܢ ܕܡܚܪ. ܗ̣ܘ ܓܝܪ ܡܚܪ ܝ̇ܨܦ ܕܝܠܗ. ܒܗ ܟܕ ܒܗ ܠܐ ܬܐܨܦܘܢ ܐܝܟܢܐ ܐܘ ܡܢܐ ܬܡܠܠܘܢ. ܡܬܝܗܒ ܠܟܘܢ ܓܝܪ ܒܗ̇ܝ ܫܥܬܐ ܡܐ ܕܬܡܠܠܘܢ. ܠܐ ܗ̣ܘܐ ܐܢ̱ܬܘܢ ܡܡܠܠܝܢ. ܐܠܐ ܪܘܚܐ ܕܐܒܘܟܘܢ ܡܡܠܠܐ ܒܟܘܢ. ܒܗ ܟܕ ܒܗ. ܐܢܢܩܝ ܕܢܐܬܘܢ ܡܟܫܘ̈ܠܐ. ܘܝ ܕܝܢ ܠܓܒܪܐ ܕܒܐܝܕܗ ܢܐܬܘܢ ܡܟܫܘ̈ܠܐ. ܒܕܓܘܢ ܐܡܪܝܢ. ܐܠܘ ܒܝܕ ܚܐܪܘܬܗܘܢ ܣ̇ܥܪܝܢ ܗ̣ܘܘ ܒܢܝ̈ܢܫܐ ܗ̇ܘ ܡܐ ܕܣܥܪܝ̣ܢ ܘܡܡܠܠܝ̣ܢ ܗ̇ܘ ܡܐ ܕܡܡܠܠܝܢ. ܘܠܘ ܐܠܗܐ ܗ̣ܘ ܕܡܡܠܠ ܒܗܘܢ ܘܣ̇ܥܪ ܒܐܝܕܝ̈ܗܘܢ. ܗ̇ܘ ܡܐ ܕܠܐ ܝ̇ܕܥܝ̣ܢ ܐܦܠܐ ܣܠܩ ܥܠ ܒܠܗܘܢ. ܐܝܟܢܐ ܡܦܩܕ ܗ̣ܘܐ ܡܪܢ. ܕܠܐ ܬܐܨܦܘܢ. ܐܦ ܓܝܪ ܘܓܠܝܐܝܬ ܡܫܘܕܥ ܠܒܘܛܠܗ̇ ܕܚܐܪܘܬܐ ܒܗ̇ܝ ܕܐܡ̇ܪ ܠܐ ܗ̣ܘܐ ܐܢ̱ܬܘܢ ܡܡܠܠܝܢ. ܘܐܠܘ ܬܘܒ ܚܐܪܘܬܐ ܐܝܬܝܗ̇ ܗܘܬ݀ ܘܫܟܝ̣ܚܐ ܠܐܢܫ̈ܐ. ܐܝܟܢܐ ܠܐ ܡܬܢܛܪܐ ܗܘܬ݀ ܩܪܝܬܐ ܒܢܛܘܪܬܗ ܕܒܪܢܫܐ. ܘܠܐ ܥܬܪ ܗ̣ܘܐ. ܐܘ ܠܩܕܡܘܗܝ ܡܫܬܘܫܛ ܗ̣ܘܐ ܗ̇ܘ ܕܠܐܴܐ ܗ̣ܘܐ ܘܥܡܠ ܘܪܗܛ. ܘܟܕ ܡܪܝܐ ܗ̱ܘ ܗܘܝܘ ܕܒܨܒܝܢܗ ܘܚܝܠܗ ܟܠܡܕܡ ܩܢܐ ܫܘܡܠܝܐ. ܗܒܠܐ ܗ̱ܝ ܘܗܒܠ ܗܒܠܝ̣̈ܢ ܡܠܬ݀ ܚܐܪܘܬܐ ܕܡܬܬܘܕܝܐ ܡܢܟܘܢ.

 

ܙܢܐ ܫܬܝܬܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܝ ܕܡ̣ܢ ܫܘܪܝܐ ܕܡܘܠܕܗ. ܡܦܪܫ ܦܪܝ̣ܫ ܡ̣ܢ ܐܠܗܐ. ܟܠ ܒܪܢܫܐ ܠܥܒܕܐ ܐܝܢܐ ܕܥܬܝܕ ܠܡܓܡܪܗ. ܕܘܝܕ ܐܡ̣ܪ. ܐܬܦܪܫܘ ܥܘ̈ܠܐ ܡ̣ܢ ܟܪܣܐ. ܘܛܥܘ ܡ̣ܢ ܡܪܒܥܐ ܕܡܡܠܠܝܢ ܕܓܠܘܬܐ. ܘܬܘܒ ܕܓܒܠ ܐܟܚܕܐ ܠܒܗܘܢ. ܘܡܬܒܝܢ ܒܟܠܗܘܢ ܥܒܕܝ̈ܗܘܢ. ܐܫܥܝܐ. ܡ̣ܢ ܪܘܚܩܐ ܡܪܝܐ ܩܪܢܝ. ܘܡ̣ܢ ܡܪܒܥܗ̇ ܘܡ̣ܢ ܟܪܣܗ̇ ܕܐܡܝ ܕܟܪ ܫܡܝ. ܐܪܡܝܐ. ܥܕܠܐ ܐܨܘܪܟ ܒܟܪܣܐ ܕܝ̣ܕܥܬܟ. ܘܥܕܠܐ ܬܦܘܩ ܡ̣ܢ ܡܪܒܥܐ ܩܕܫܬܟ. ܬܘܒ ܐܢ ܡܫܟܚܝܢ ܐܢ̱ܬܘܢ ܠܡܒܛܠܘ ܕܘܒܪ̈ܝ ܕܐܝܡܡܐ ܘܕܘܒܪ̈ܝ ܕܠܠܝܐ ܕܠܐ ܢܗܘܘܢ ܐܝܡܡܐ ܘܠܠܝܐ ܒܙܒܢܗܘܢ ܐܦ ܩܝܡܝ ܕܡܠܟܬ ܠܕܘܝܕ ܥܒܕܝ ܢܬܒܛܠ. ܦܘܠܘܣ. ܠܗ̇ܢܘܢ ܕܝܢ ܕܩܕܡ ܬܚܡ܆ ܠܗܘܢ ܐܦ ܩܪܐ. ܘܠܐܝܠܝܢ ܕܩܪܐ܆ ܠܗܘܢ ܙܕܩ. ܠܐܝܠܝܢ ܕܩܕܡ ܣܡ ܕܢܗܘܘܢ ܩܪ̈ܝܐ. ܘܡ̣ܢ ܠܘܩܕܡ ܝ̣ܕܥ ܐܢܘܢ. ܘܪܫܡ ܐܢܘܢ ܒܕܡܘ̣ܬܐ ܕܨܘܪܬܐ ܕܒܪܗ. ܘܬܘܒ. ܗ̇ܘ ܡ̇ܢ ܕܦܪܫܢܝ ܡ̣ܢ ܟܪܣ ܐܡܝ. ܘܩܪܢܝ ܒܛܝܒܘܬܗ. ܕܢܓܠܐ ܒܪܗ ܒܝ ܕܐܣܒܪܝ̣ܘܗܝ ܒܥܡ̈ܡܐ. ܘܬܘܒ. ܐܝܟܢܐ ܕܩܕܡ ܓܒ̣ܢ ܒܗ. ܡ̣ܢ ܩܕܡ ܬܪ̈ܡܝܬܗ ܕܥܠܡܐ. ܕܢܗܘܐ ܩܕܝ̈ܫܐ ܕܠܐ ܡܘܡ ܩܕܡܘܗܝ. ܘܒܚܘܒܐ ܩܕܡ ܪܫܡܢ. ܒܕܓܘܢ ܐܡܪܝܢ. ܐܢܗܘ ܕܥܘ̈ܠܐ ܡ̣ܢ ܟܪܣܐ ܐܬܦܪܫܘ ܕܢܗܘܘܢ ܥܘ̈ܠܐ. ܘܩܪ̈ܝܐ ܡ̣ܢ ܠܘܩܕܡ ܐܬܪܫܡܘ ܕܢܗܘܘܢ ܩܪ̈ܝܐ. ܘܗܟܢܐ ܗ̇ܢܘܢ ܕܫܪܟܐ. ܡܢܘ̣ ܡ̇ܓܡܕ ܕܢܐܡܪ. ܕܐܠܘ ܨܒܘ ܥܘ̈ܠܐ ܗ̇ܢܘܢ ܕܡ̣ܢ ܟܪܣܐ ܐܬܦܪܫܘ ܕܢܗܘܘܢ ܥܘ̈ܠܐ. ܠܐ ܗܘ̣ܘ ܥܘ̈ܠܐ ܒܝܕ ܚܐܪܘܬܗܘܢ. ܐܘ ܢܐܡܪ ܬܘܒ ܕܩܪ̈ܝܐ ܗ̇ܢܘܢ ܒܝܕ ܫܠܝܛܘܬ ܒܝܬܗܘܢ ܕܒܗ̇ ܐܙܕܕܩܘ ܗܘ̣ܘ ܩܪ̈ܝܐ. ܘܡܢܘ̣ ܕܠܐ ܝ̇ܕܥ ܚܬܝ̣ܬܐܝܬ. ܕܗ̇ܘ ܕܗܕܐ ܡܣܒܪ. ܠܪܥܝܢܗܘܢ ܕܟܬܒ̈ܐ ܩܕܝ̈ܫܐ ܣܬܪ. ܘܠܘܩܒܠܗܘܢ ܡܨܐ ܢܨܐ.

 

ܙܢܝܐ ܫܒܝܥܝܐ:

 

ܣܗܕ̈ܘܬܐ ܡܫܘܕ̈ܥܢܝܬܐ ܕܗ̇ܘ ܕܗ̣ܝ ܛܝܒܘܬܐ ܐܠܗܝܬܐ ܠܐܝܠܝܢ ܕܨܒܝܐ ܕܗ̣ܝ ܛܝܒܘܬܐ ܐܠܗܝܬܐ ܠܐܝܠܝܢ ܕܨܒ̇ܝܐ ܚܐܢܐ ܘܡܒܝܬܝܐ ܠܗ̇. ܘܠܐܝܠܝܢ ܕܨܒ̇ܝܐ ܕܚܩܐ ܘܡܢܟܪܝܐ ܡܢܗ̇. ܣܛܪ ܡ̣ܢ ܥܒܕ̈ܐ ܚܐܪ̈ܘܬܢܝܐ. ܗ̣ܘ ܓܝܪ ܐܠܗܐ ܐܒܐ ܐܡ̣ܪ ܒܐܘܪܝܬܐ. ܐܚܘܢ ܠܡ̇ܢ ܕܐܚܘܢ. ܘܐܪܚܡ ܥܠ ܡ̇ܢ ܕܐܪܚܡ. ܘܕܘܝܕ ܐܡ̣ܪ. ܠܗܢܐ ܡܫܦܠ ܘܠܗܢܐ ܡܪܝ̣ܡ. ܒܪ ܣܝ̣ܪܟ. ܡܢܗܘܢ ܒܪܟ ܘܐܪܝ̣ܡ. ܘܡܢܗܘܢ ܩܕܫ ܘܥܕܡܐ ܠܘܬܗ ܡܛܝ̣ܘ. ܘܡܢܗܘܢ ܠܛ ܘܗܦܟ ܘܥܩ̣ܪ ܐܢܘܢ ܡ̣ܢ ܡܕܝܪ̈ܝܗܘܢ ܐܝܟ ܛܝ̣ܢܐ ܕܓܒܝ̣ܠ ܒܐܝܕܐ ܕܦܚܪܐ. ܗܟܢܐ ܐ̱ܢܫܐ ܒܐܝ̣ܕܐ ܕܒܪܝܗ. ܘܐܫܥܝܐ ܐܡ̣ܪ. ܡܪܝܐ ܡܙܓ ܒܓܘܗ̇ ܪܘܚܐ ܛܥܝܬܐ. ܘܐܛܥܝܗ ܠܡܨܪܝܐ ܒܟܠܗܘܢ ܥܒܕܘ̈ܗܝ. ܗܘܫܥ. ܐܩܪܐ ܠܐܝܠܝܢ ܕܠܐ ܗ̣ܘܘ ܥܡܝ܆ ܥܡܐ ܕܝܠܝ. ܘܠܠܐ ܐܬܪܚܡܬ݀. ܐܬܪܚܡܬ݀. ܐܪܡܝܐ. ܐܬܠ ܠܗܘܢ ܠܒܐ ܕܢܕܥܘܢܢܝ ܕܐܢܐ ܐ̱ܢܐ ܡܪܝܐ. ܚܙܩܝܐܝܠ. ܘܐܥܒܪ ܠܒܐ ܕܟܐܦܐ ܡ̣ܢ ܒܣܪܗܘܢ. ܘܐܬܠ ܠܗܘܢ ܠܒܐ ܘܢܗܠܟܘܢ ܒܦܘܩ̈ܕܢܝ. ܐܘܢܓܠܝܘܢ. ܘܐܬܘ ܗ̇ܢܘܢ ܕܚܕ ܥܣܪܐ ܫܥܝ̈ܢ܆ ܢܣܒܘ ܕܝ̣ܢܪ ܕܝ̣ܢܪ. ܘܟܕ ܐܬܘ ܩܕ̈ܡܝܐ ܐܣܒܪܘ ܕܝܬܝܪ ܫ̇ܩܠܝ̣ܢ. ܘܫܩ̣ܠܘ ܕܝ̣ܢܪ ܕܝܢܪ ܐܦ ܗ̣ܢܘܢ. ܘܬܘܒ. ܗܟܢܐ ܢܗܘܘܢ ܐ̱ܚܪ̈ܝܐ ܩܕ̈ܡܝܐ܆ ܘܩܕ̈ܡܝܐ ܐ̱ܚܪ̈ܝܐ. ܦܘܠܘܣ. ܐܦ ܪܦܩܐ ܟܕ ܥܡ ܚܕ ܐܒܘܢ ܐܝܣܚܩ ܐܝܬ ܗ̣ܘܐ ܠܗ̇ ܫܘܬܦܘܬܐ. ܥܕܠܐ ܢܬܝܠܕܘܢ ܒܢܝ̈ܗ̇. ܘܠܐ ܢܣܥܪܘܢ ܛܒܬܐ ܐܘ ܒܝܫܬܐ܆ ܩܕܡܬ݀ ܐܬܝܕܥܬ݀ ܓܒܝܘܬܗ ܕܐܠܗܐ. ܕܗ̣ܝ ܬܩܘܐ ܠܐ ܒܥܒܕ̈ܐ܇ ܐܠܐ ܒܝܕ ܡ̇ܢ ܕܩ̣ܪܐ. ܐܬܐܡܪ ܓܝܪ ܕܩܫܝܫܐ ܢܗܘܐ ܥܒܕܐ ܠܙܥܘܪܐ ܐܝܟ ܕܟܬܝ̣ܒ. ܕܠܝܥܩܘܒ ܪܚܡܬ ܘܠܥܝ̣ܣܘ ܣܢܝܬ. ܒܕܓܘܢ ܐܡܪܝܢ ܐܢܗܘ ܕܐܠܗܐ ܠܡ̇ܢ ܕܨܒ̇ܐ ܚܐܢ ܘܡܪܝ̣ܡ. ܘܠܡ̇ܢ ܕܨܒ̇ܐ ܠܐ. ܘܠܡ̇ܢ ܕܒܣܪܐ ܝܗܒ ܠܗ. ܘܠܡ̇ܢ ܕܠܐ ܨܒ̇ܐ ܪܘܚܐ ܛܥܝܬܐ ܡܙܓ ܒܓܘܗ. ܘܠܒܐ ܕܟܐܦܐ ܝܗܒ ܠܗ. ܘܟܕ ܨܒ̇ܐ ܠܡܢܐ ܗ̇ܘ ܕܚܕܐ ܫܥܐ ܒܠܚܘܕ ܦܠܚ ܥܡ ܗ̇ܘ ܕܬܪܥܣܪ̈ܬܐ ܫܥܝ̈ܢ ܦܠܚ ܡܫܘܐ ܐܓܪܗ. ܘܠܬܪܝܢ ܒܢܝ̈ܐ ܕܡ̣ܢ ܚܕ ܐܒܐ ܘܚܕܐ ܐܡܐ ܟܐܢ̈ܐ. ܒܠܥܕ ܗ̇ܝ ܕܚܕ ܡܢܗܘܢ ܛܒܬܐ ܢܣܥܘܪ ܘܗ̇ܘ ܐ̱ܚܪܢܐ ܒܝܫܬܐ. ܠܗܘ ܡ̇ܢ ܢܪܚܡ. ܘܠܗܢܐ ܢܣܢܐ. ܐܝܟܢܐ ܐܡܪܝܬܘܢ ܕܒܚܐܪܘܬܗ ܠܡ ܟܠ ܒܪܢܫܐ ܡܬܡܨܐ ܠܡܫܦܪ ܠܐܠܗܐ ܘܠܐ ܠܡܫܦܪ.

 

ܙܢܐ ܬܡܝܢܝܐ:

 

ܣܗܕ̈ܘܬܐ ܡܟܣܢ̈ܝܬܐ ܕܗ̇ܢܘܢ ܕܡ̇ܓܡܕܝ̣ܢ ܘܣܥܝܢ ܠܡܥܩܒܘ ܕܝ̣ܢܘ̈ܗܝ ܓܢܝ̣̈ܙܐ ܕܐܠܗܐ. ܘܠܡܕܥ ܥ̈ܠܬܐ ܕܚܘܪ̈ܩܢܘܗܝ ܠܐ ܡܬܕܪ̈ܟܢܐ. ܒܪ ܣܝܪܟ. ܕܩܫ̈ܝܢ ܡܢܟ ܠܐ ܬܒܥܐ. ܘܕܬܩܝ̣̈ܦܢ ܡܢܟ ܠܐ ܬܥܩܒ. ܒܡܐ ܕܐܫܠܛܘܟ ܐܣܬܟܠ. ܘܠܝܬ ܠܟ ܬܘܟܠܢܐ ܥܠ ܟܣ̈ܝܬܐ. ܘܒܫܪܟܐ ܕܥܒܕܘ̈ܗܝ ܠܐ ܬܬܥܣܩ. ܡܛܠ ܕܕܣܓܝ ܡܢܟ ܐܬܚܘܝ ܠܟ. ܐܫܥܝܐ. ܐܝܟ ܛܝ̣ܢܐ ܕܦܚܪܐ ܚܫܝ̣ܒܝ̣ܢ ܐܢ̱ܬܘܢ. ܕܠܡܐ ܐܡ̇ܪ ܥܒܕܐ ܠܥܒܘܕܐ ܛܒܐܝܬ ܠܐ ܥܒܕܬܢܝ. ܘܓܒܝ̣ܠܬܐ ܐܡ̇ܪܐ ܠܓܒܘܠܗ̇ ܕܚܟܝܡܐܝܬ ܠܐ ܓܒܠܬܢܝ. ܐܘܢܓܠܝܘܢ. ܐܘ ܠܐ ܫܠܝ̣ܛ ܐ̱ܢܐ ܕܡܕܡ ܕܨܒ̇ܐ ܐ̱ܢܐ ܐܥܒܕ ܒܕܝܠܝ. ܐܘ ܥܝܢܟ ܒܝܫܐ ܕܐܢܐ ܛܒ ܐ̱ܢܐ. ܦܘܠܘܣ ܡܕܝܢ ܥܠ ܡ̇ܢ ܕܨܒ̇ܐ ܗ̣ܘ ܡܪܚܡ. ܘܥܠ ܡ̇ܢ ܕܨܒ̇ܐ ܪܫܐ. ܡܢܘ ܓܝܪ ܕܢܩܘܡ ܠܘܩܒܠ ܨܒܝܢܗ. ܐܢ̱ܬ ܗܟܝܠ ܡ̇ܢ ܐܢ̱ܬ ܐܘ ܒܪܢܫܐ. ܕܦܬܓܡܐ ܠܐܠܗܐ ܝܗܒ ܐܢ̱ܬ. ܕܠܡܐ ܡܪܐ ܓܒܝ̣ܠܬܐ ܠܡ̇ܢ ܕܓܒܠܗ̇ ܠܡܢܐ ܗܟܢܐ ܓܒܠܬܢܝ. ܐܘ ܠܐ ܫܠܝ̣ܛ ܦܚܪܐ ܥܠ ܛܝ̣ܢܗ. ܕܡܢܗ̇ ܡ̣ܢ ܓܒܝ̣ܠܬܐ. ܢܥܒܕ ܡܐܢܐ ܚܕ ܠܐܝܩܪܐ ܘܚܕ ܠܨܥܪܐ. ܒܕܓܘܢ ܐܡܪܝܢ ܕܒܡܚܘ̈ܝܢܘܬܐ ܗ̇ܢܝܢ ܫܝܬ ܚܘܫܒܝ̈ܬܐ. ܘܒܙܢܝ̈ܐ ܗܠܝܢ ܫܒܥܐ ܕܣܗܕ̈ܘܬܐ ܟܬܒܝ̈ܬܐ ܩܝܡܢܢ ܬܪܥܝ̣ܬܢ. ܟܐܡܬ ܕܟܠ ܡܕܡ ܡܚܪܩ ܚܪܝ̣ܩ ܡ̣ܢ ܐܠܗܐ. ܘܠܝܬ ܠܒܪܢܫܐ ܫܠܝ̣ܛܘܬ ܒܝܬܐ ܠܡܣܥܪ ܡ̣ܢ ܕܝܠܗ ܡܕܡ. ܐܠܐ ܠܗ̇ܘ ܡܐ ܕܚܪܝ̣ܩ ܥܠܘܗܝ. ܠܗ̇ܘ ܗ̣ܘ ܒܠܚܘܕ ܡܨܐ ܠܡܣܥܪ. ܘܠܐ ܡܗܢܝܐ ܠܗ ܡܕܡ ܚܦܝ̣ܛܘܬܗ. ܐܦܠܐ ܡܐܟܝܐ ܠܗ ܬܪܡܘܛܘܬܗ. ܘܒܗܢܐ ܙܢܐ ܬܡܝܢܝܐ. ܫܪܝܢܢ ܟܠܗܝܢ ܗ̇ܢܝܢ ܡܠܝ̣̈ܟܢ ܕܐܡ̣ܪܬܘܢ. ܕܟܕ ܡܚܪܩ ܚܪܩ ܐܠܗܐ ܥܠ ܙܢܝܐ ܘܩܛܘܠܐ ܕܢܙܢܐ ܘܢܩܛܘܠ܇ ܠܡܢܐ ܫܕܪ ܢܒܝ̈ܐ ܘܫܠܝ̈ܚܐ ܘܐܡ̣ܪ ܕܠܐ ܢܙܢܘܢ ܘܠܐ ܢܩܛܠܘܢ. ܘܠܡܢܐ ܬܘܒ ܡܫܢܩ ܠܗܘܢ. ܘܐܝܟܢܐ ܬܘܒ ܡܪܡܐ ܠܐܢܫ ܒܝܡܐ ܕܡܬܓܠܠ ܘܡܙܗܪ ܠܗ ܕܠܐ ܢܬܬܠܠ. ܡܟܝܠ ܗ̇ܘ ܕܗܠܝܢ ܐܡ̇ܪ ܡ̣ܢ ܚܟܝܡܐ ܡܬܟܣܣ ܕܐܡ̇ܪ. ܕܩܫ̈ܝܢ ܡܢܟ ܠܐ ܬܒܥܐ. ܘܡ̣ܢ ܫܠܝܚܐ ܕܐܡ̇ܪ. ܕܐܢ̱ܬ ܡ̇ܢ ܐܢ̱ܬ ܕܦܬܓܡܐ ܠܐܠܗܐ ܝ̇ܗܒ ܐܢ̱ܬ. ܘܬܘܒ ܡܘܣܦ ܐܡ̇ܪ. ܐܘ ܥܘܡܩܐ ܕܥܘܬܪܐ ܘܚܟܡܬܐ ܘܡܕܥܐ ܕܐܠܗܐ. ܕܐ̱ܢܫ ܠܐ ܡܫ ܕܝ̣ܢܘ̈ܗܝ. ܘܐܘܪ̈ܚܬܗ ܠܐ ܡܬܥܩ̈ܒܢ. ܡܢܘ ܓܝܪ ܝ̣ܕܥ ܐܘܪ̈ܚܬܗ ܕܡܪܝܐ. ܐܘ ܡܢܘ ܗܘ̣ܐ ܠܗ ܒܥܠ ܡܠܟܐ.

 

 

 

 

 

 

 

     #1 

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܣܩܘܒܠܝܬܐ ܕܡܒ̈ܛܠܝ ܚܐܪܘܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܐܢܗܘ ܐܡܪܝܢܢ ܕܐܢܗܘ ܕܐܡܪܝܢ ܐܢ̱ܬܘܢ ܕܐܦܠܐ ܕܚܕܐ ܣܥܘܪܘܬܐ ܡ̣ܢ ܗ̇ܢܘܢ ܕܒܐܝ̈ܕܝ ܒܪܢܫܐ ܡܣܬܥܪ̈ܢ ܐܝܬܘܗܝ ܒܪܢܫܐ ܣܥܘܪܐ. ܠܐ ܫܪܝܪ ܣܥܝܟܘܢ. ܒܗ̇ܝ ܕܥܡܗ̇ ܕܗ̇ܝ ܕܠܚܐܪܘܬܐ ܐ̱ܢܫܝܬܐ ܡܪܝ̣ܡܝ̣ܢ ܐܢ̱ܬܘܢ. ܐܦ ܠܝ̣ܕܥܬܐ ܐ̱ܢܫܝܬܐ ܟܠܢܐܝܬ ܡܬܐܠܨ̣ܝܢ ܐܢ̱ܬܘܢ ܕܬܪܝ̣ܡܘܢ. ܗ̇ܝ ܕܫܟܝ̣ܪܐ ܠܘܬܢ ܘܠܘܬܟܘܢ. ܘܐܢܗܘ ܕܠܘ ܗܟܢܐ ܐܡܪܝܢ ܐܢ̱ܬܘܢ. ܐܠܐ ܕܣܥܘܪ̈ܘܬܐ ܗ̇ܢܝܢ ܒܠܚܘܕ ܕܠܐ ܝ̇ܕܥ ܐܢܝܢ ܠܐ ܐܝܬܘܗܝ ܣܥܘܪܐ. ܐܦܠܐ ܠܗܕܐ ܦܪܘܛܐܣܝܣ ܠܐ ܡܬܚܡܐܝܬ ܙܕܩ ܠܟܘܢ ܕܬܣܪܚܘܢܗ̇. ܒܗ̇ܝ ܕܟܕ ܒܝܬ ܣܥܘܪ̈ܘܬܐ ܗ̇ܢܝܢ ܕܝܕܥ ܐܢܝܢ ܒܪܢܫܐ. ܠܗ̇ܢܝܢ ܕܠܐ ܝ̇ܕܥ ܠܗ̇ܢܝܢ ܕܝ̇ܕܥ. ܒܕܓܘܢ ܠܬܪ̈ܬܝܗܝܢ ܗܘܝܘ ܣܥܘܪܐ. ܐܠܐ ܠܗ̇ܢܝܢ ܕܝܕܥ܆ ܡܪܢܐܝܬ. ܠܗ̇ܢܝܢ ܕܝܢ ܕܠܐ ܝ̇ܕܥ ܓܕܫܢܐܝܬ. ܕܐܝܟ ܐܝܟܢ ܠܟܠܝܘܬ ܨܒܥܗ ܡܕܥ ܝ̇ܕܥ ܟܠ ܒܪܢܫܐ. ܘܐܦܢ ܠܐ ܝ̇ܕܥ ܡܦܪܫܐܝܬ ܕܡ̣ܢ ܕܐܝܟ ܐܝܠܝܢ ܡܢܘ̈ܬܐ ܡܪܟܒܐ. ܒܕܓܘܢ ܠܗ̇ ܠܨܒܥܐ ܕܝ̇ܕܥ ܒܚܐܪܘܬܗ ܡܙܝܥ. ܠܡܢܘ̈ܬܗ̇ ܕܝܢ ܕܨܒܥܐ ܕܠܐ ܝ̇ܕܥ ܐܢܝܢ ܠܘ ܒܚܐܪܘܬܗ ܡܙܝܥ. ܐܠܐ ܡܛܠ ܐ̱ܚܝܢܘܬܐ ܕܒܝܬ ܟܠܐ ܠܡܢܘ̈ܬܐ. ܐܠܨܐܝܬ ܡܩܦ ܢܩ̇ܦܝܢ ܙܘܥܝ̈ܗܝܢ ܠܙܘܥܗ̇. ܐܝܟܢܐ ܕܐܢ ܢܨܒܐ ܟܐܡܬ ܒܪܢܫܐ ܕܢܙܝ̣ܥ ܨܒܥܗ. ܘܠܐ ܢܙܝܥ ܓܪܡܐ ܡܕܡ ܡ̣ܢ ܩܛܪ̈ܬܗ̇܆ ܠܐ ܢܬܡܨܐ. ܘܙܘ̈ܥܐ ܗ̇ܢܘܢ ܕܗ̇ܘ ܕܕܡܝ̣ܟ ܘܥܢܝ̣ܦ ܘܡܢܣܝ. ܠܘ ܨܒܝܢܝ̈ܐ ܐܢܘܢ. ܐܝܟܢܐ ܕܠܚܐܪܘܬܐ ܢܩܦܘܢ. ܐܠܐ ܟܝܢܝ̈ܐ ܡܕܡ ܘܩܛܝ̣ܪ̈ܝܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܗ̇ܝ ܕܐܠܗܐ ܫܘܒܚܐ ܠܛܝܒܘܬܗ. ܠܘ ܟܠܗܝܢ ܣܥܘܪ̈ܘܬܐ ܐ̱ܢܫܝ̈ܬܐ ܢܣܥܘܪ. ܠܘ ܥܠ ܬܚܘܒܘܬܗ ܡܫܘܕܥܐ. ܐܘ ܕܠܘ ܡܨܐ ܟܠ ܗ̣ܘ. ܗܕܐ ܓܝܪ ܥܠ ܗ̇ܢܘܢ ܕܟܝܢܐܝܬ ܘܠܘ ܨܒܝܢܐܝܬ ܘܡܠܝ̣ܠܐܝܬ ܣ̇ܥܪܝ̣ܢ ܫܪܝܪܐ. ܒܕܓܘܢ ܐܠܗܐ ܫܘܒܚܐ ܠܛܝܒܘܬܗ. ܠܗ̇ܢܝܢ ܕܨܒ̇ܐ ܣ̇ܥܪ. ܘܠܗ̇ܢܝܢ ܕܠܐ ܨܒ̇ܐ ܠܐ ܣ̇ܥܪ. ܘܐܦܢ ܡܨܐ ܚܝܠܗܝܢ. ܘܡ̣ܢ ܗܪܟܐ. ܘܠܐ ܚܕܐ ܬܚܘܒܘܬܐ ܥܠܘܗܝ ܡܬܩܛܪܓܐ. ܒܗ̇ܝ ܕܥܠܬ݀ ܗ̇ܝ ܕܠܐ ܢܣܥܘܪ. ܠܘ ܗ̇ܝ ܕܠܐ ܢܬܡܨܐ ܐܝܬܝܗ̇. ܐܠܐ ܗ̇ܝ ܕܠܐ ܨܒ̇ܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܐܦܢ ܨܒ̇ܐ ܕܠܐ ܢܩܛܘܠ ܣܘܩܪܐܛܝܣ. ܐܠܐ ܐܦܠܐ ܨܒ̇ܐ ܕܒܩܛܝ̣ܪܐ ܢܥܫܘܡ ܠܚܐܪܘܬܗ. ܥܠ ܗ̇ܝ ܕܠܐ ܢܩܛܘܠ. ܟܐܡܬ ܠܘ ܠܐ ܩܛܘܠܐ ܒܟܝܢܐ ܒܪܝܗܝ.  ܒܕܓܘܢ ܣܥܝܟܘܢ ܗܢܐ. ܥܠ ܗ̇ܝ ܕܠܝܬ ܚܐܪܘܬܐ ܒܢܐ. ܘܐܢܗܘ ܕܐܦ ܠܗ̇ܝ ܕܠܝܬ ܚܐܪܘܬܐ ܠܒܪܢܫܐ ܥܠܘܗܝ ܬܒܢܘܢ. ܒܡܚܘܝܢܘܬ ܚܘܕܪܐ ܐܘܟܝܬ ܕܝܠܝܠܘܣ ܢܦܠܝ̣ܢ ܐܢ̱ܬܘܢ ܗ̇ܝ ܕܫܟܝ̣ܪܐ. ܒܗ̇ܝ ܕܠܗ̇ܘ ܕܠܐ ܝܕܝܥ ܒܗ̇ܘ ܡܐ ܕܠܐ ܝܕܝܥ ܣܥܝܢ ܐܢ̱ܬܘܢ ܕܬܫܘܕܥܘܢ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܟܦܘܪܐ ܡ̇ܢ. ܟܕ ܡܣܒܪ ܕܟܦܘܪܘܬܗ ܗ̣ܝ ܗ̣ܝ ܗܝܡܢܘܬܐ ܬܪܝܨܬܐ. ܡܨܛܒܐ ܒܗ̇. ܒܕܓܘܢ ܐܝܟ ܕܡ̣ܢ ܨܝܕܘܗܝ ܒܗܝܡܢܘܬܐ ܡܨܛܒܐ ܘܠܘ ܒܟܦܘܪܘܬܐ. ܘܗ̣ܘ ܗ̇ܘ ܡܐ ܕܡܨܛܒܐ ܡܫܬܟܢ ܠܗ. ܟܐܡܬ ܟܦܘܪܘܬܐ ܗ̇ܝ ܕܡܣܬܒܪܐ ܠܗ ܗܝܡܢܘܬܐ ܗ̱ܝ ܫܪܝܪܬܐ.

 

ܗܦܟܬܐ:

 

ܐܡܪܝܢ ܕܝܘܚܢܢ ܫܠܝܚܐ ܐܡ̣ܪ ܒܩܐܬܘܠܝܩܝ ܕܝܠܗ. ܚܒܝ̈ܒܝ ܐܢ ܠܒܢ ܠܐ ܒܣܪ ܠܢ ܓܠܝ̈ܢ ܐܢܝܢ ܐܦܝ̈ܢ ܩܕܡ ܐܠܗܐ. ܘܟܠ ܡܕܡ ܕܫܐܠܝ̣ܢܢ ܢܣܒܝ̣ܢܢ. ܟܦܘܪܐ ܡܕܝܢ ܐܢܗܘ ܕܐܝܟ ܕܐܡ̣ܪܬܘܢ ܕܟܕ ܡܣܒܪ ܕܟܦܘܪܘܬܗ ܗ̣ܝ ܗ̣ܝ ܗܝܡܢܘܬܐ ܬܪܝܨܐ ܡܨܛܒܐ ܒܗ̇. ܡܕܝܢ ܠܒܗ ܠܐ ܒܣܪ ܠܗ. ܘܡܛܠܗܕܐ ܓܠܝ̈ܢ ܐܢܝܢ ܐܦܘ̈ܗܝ ܩܕܡ ܐܠܗܐ. ܘܡܛܠ ܗܕܐ ܬܘܒ ܟܠ ܡܐ ܕܫ̇ܐܠ ܢܣܒ. ܘܐܢ ܟܠܗܝܢ ܗܠܝܢ ܫܪܝܪ̈ܢ. ܠܡܢܐ ܡܣܬܠܝܐ ܟܦܘܪܘܬܐ ܟܕ ܟܠܗܝܢ ܛܒ̈ܬܐ ܒܐܝ̈ܕܝܗ̇ ܗܘ̈ܝܢ ܠܟܦܘܪ̈ܐ.

 

ܦܘܢܝܐ:

 

ܐܡܪܝܢܢ ܕܠܦܬܓܡܐ ܗܢܐ ܥܠ ܥܒܕ̈ܐ ܘܠܘ ܥܠ ܗܝܡܢܘܬܐ ܐܡܪܗ̇ ܫܠܝܚܐ ܩܕܝܫܐ. ܘܝ̣ܕܝ̣ܥܐ ܗܕܐ ܕܗܟܢܐ ܗ̱ܝ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܗ̇ܝ ܕܠܐ ܐ̱ܢܫ ܥܕ ܥܒܕܐ ܒܝܫܐ ܣ̇ܥܪ. ܛܠܘܡܝܐ ܠܡܐܡܪ. ܐܘ ܓܘܪܐ. ܐܘ ܩܛܠܐ. ܐܘ ܡܕܡ ܐ̱ܚܪܝܢ. ܠܒܗ ܠܐ ܒܣܪ ܠܗ ܟܕ ܡܣܒܪ ܕܥܒܕܐ ܛܒܐ ܣܥܪ. ܘܡܛܠ ܗܕܐ ܗ̇ܘ ܕܐܝܟ ܗܢܐ ܠܐ ܓܠܝ̈ܢ ܐܦܘ̈ܗܝ ܩܕܡ ܐܠܗܐ. ܘܐܢ ܫܐܠ ܠܐ ܢܣܒ ܡܛܠ ܕܒܝܫܐܝܬ ܫܐܠ ܐܝܟ ܕܐܡ̣ܪ ܟܬܒܐ. ܕܬܪܬܝܢ ܕܝܢ܆ ܡ̣ܢ ܗ̇ܝ ܕܗ̣ܘ ܫܠܝܚܐ ܢܗܪܗ̇ ܠܗܕܐ ܘܐܡ̣ܪ. ܡ̣ܢ ܕܢܛܪܝ̣ܢܢ ܦܘܩ̈ܕܢܘܗܝ. ܘܫܦܝܪ̈ܬܐ ܣܥܪܝ̣ܢܢ ܩܕܡܘܗܝ.

 

ܫܪܝܐ ܕܣܥܝܐ ܚܡܝܫܝܐ:

 

ܐܡܪܝܢܢ ܗ̇ܝ ܕܢܒܛܠ ܠܣܥܘܪܘܬܐ ܐܝ̇ܕܐ ܕܨܒ̣ܐ ܕܢܣܥܪܝܗ̇. ܠܘ ܡܕܡ ܗ̣ܝ ܐ̱ܚܪܝܢ ܣܛܪ ܡ̣ܢ ܨܒܝܢܗ ܡܒܛܠܝ̣ܢ ܐܢ̱ܬܘܢ ܣܘܦܝܣܛܐܝܬ. ܘܠܡܠܬܐ ܗ̇ܝ ܕܢܬܥܐ ܒܠܥܕ ܡܢܬܥܢܐ ܡ̣ܢ ܠܥܠ ܒܛܠܢܗ̇.

 

ܫܪܝܐ ܕܣܥܝܐ ܫܬܝܬܝܐ:

 

ܕܥ ܕܗܢܐ ܣܥܝܐ ܝܬܝܪ ܡ̣ܢ ܟܠܗܘܢ ܣܥܝ̈ܐ ܕܡܒܛܠܝ̈ ܚܐܪܘܬܐ ܚܣܝ̣ܢ. ܘܡܛܠ ܗܕܐ ܐ̱ܢܫ ܡ̣ܢ ܗܠܝܢ ܕܝܠܢ. ܟܕ ܚ̇ܐܒ ܗ̣ܘܐ ܡ̣ܢ ܫܪܝܗ ܘܡܬܠܙܙ ܗ̣ܘܐ ܐܡ̇ܪ ܗ̣ܘܐ. ܐܠܘܠܐ ܗܢܐ ܣܥܝܐ܆ ܕܝܠܢ ܗ̣ܘܬ ܙܟܘܬܐ ܡܫܡܠܝܬܐ. ܚܣܝܐ ܕܝܢ ܠܥܙܪ ܒܪ ܣܒܬܐ. ܒܩܦܠܐܘܢ ܫܬܝܬܝܐ ܕܡܐܡܪܐ ܬܠܝܬܝܐ ܕܥܠ ܒܛܝ̣ܠܘܬܐ ܟܕ ܨܒܐ ܠܡܫܪܐ ܗܢܐ ܐܡ̇ܪ. ܠܐ ܓܝܪ ܘܠܐ ܐ̱ܢܫ ܡ̣ܢ ܗ̇ܢܘܢ ܕܚܙܝܢ ܠܐܚܪ̈ܢܐ ܕܣ̇ܥܪܝܢ. ܐܝܬܝܗܘܢ ܥܠܬܐ ܕܗ̇ܘ ܡܐ ܕܐ̱ܚܪ̈ܢܐ ܣܥܪܝܢ. ܘܒܬܪ ܩܠܝܠ ܐܡ̇ܪ. ܗܟܢܐ ܕܝܢ. ܘܠܗ̇ܘ ܡܐ ܕܥܬܝܕ ܕܬܥܒܕ ܚܐܪܘܬܐ ܕܝܠܢ ܡܠܝ̈ܠܐ܆ ܩܕܡ ܚܙܐ. ܠܐ ܕܝܢ ܐܝܬܘܗܝ ܕܗܢܐ ܫܪܝܐ ܚܫܚ ܗ̣ܘܐ܆ ܐܠܘ ܠܗ̇ܝ ܕܐܠܗܐ ܗ̱ܘ ܥܠܬ ܣܥܘܪ̈ܘܬܐ ܕܣܘܩܪܐܛܝܣ. ܨܒܝܢ ܗ̣ܘܘ ܠܡܫܪܪܘ ܒܣܥܝܐ ܗܢܐ ܡܪ̈ܘܗܝ. ܘܓܠܝܐ ܕܠܘ ܗܕܐ ܨܒܝܢ ܒܣܥܝܐ ܗܢܐ ܡܪ̈ܘܗܝ. ܐܠܐ ܠܗ̇ܝ ܕܟܠܡܕܡ ܕܝ̇ܕܥ ܐܠܗܐ ܕܥܬܝܕ ܠܡܗܘܐ. ܡ̣ܢ ܐܢܢܩܝ ܗܘܐ. ܘܠܝܬ ܠܗ ܠܒܪܢܫܐ ܫܠܝ̣ܛܘܬ ܒܝܬܐ ܕܠܐ ܢܥܒܕܝ̣ܘܗܝ. ܘܐܠܐ ܒܛܠܐ ܠܗ̇ ܡܩܕܡܘ̣ܬ ܝ̣ܕܥܬܐ ܐܠܗܝܬܐ. ܘܟܕ ܒܗ ܒܢܝܫܐ ܗܢܐ ܐܝܟ ܕܒܡܢܬܐ ܓܫ̇ܦ ܗ̣ܘ ܚܣܝܐ ܥܗܝ̣ܕܐ. ܡܠܬܐ ܕܡܟܣܢܘܬܐ ܒܠܚܘܕ ܡܣܪܚ. ܘܠܘ ܫܪܝܐ ܐܦܘܕܝܩܛܝܩܝܐ ܟܕ ܐܡ̇ܪ. ܗ̇ܢܘܢ ܪ̈ܦܝܝ ܒܟܠ ܘܥܒܕܝ̈ ܒܝ̈ܫܬܐ. ܕܡܬܥܠܠܝܢ ܥ̈ܠܬܐ ܒܚܛܗ̈ܐ ܕܐܝܟ ܗܠܝܢ ܘܐܡܪܝܢ. ܕܡܛܠ ܗܢܐ ܒܝ̈ܫܬܐ ܣܥܪܝ̣ܢܢ. ܡܛܠ ܕܠܝܬ ܦܘܪܣܝܐ ܕܠܐ ܢܗܘܐ. ܗ̇ܘ ܡܐ ܕܩܕܡ ܐܠܗܐ ܝ̇ܕܥ ܥܒܕܝܢܢ ܘܠܡܢܐ ܠܘ ܛܒ̈ܬܐ ܐܘ ܐܢ̱ܬܘܢ. ܐܠܐ ܒܝ̈ܫܬܐ ܩܕܡ ܕܩ. ܠܗܠܝܢ ܕܒܚܐܪܘܬܟܘܢ ܠܐ ܚܣܝܐܝܬ ܚܒܠܝ̣ܢ ܐܢ̱ܬܘܢ. ܢܘ̣ܚܘ ܗܟܝܠ ܡ̣ܢ ܗܠܝܢ ܘܣܡܟܘ ܠܚܐܪܘܬܟܘܢ. ܠܗ̇ܝ ܕܠܐ ܚ̇ܣܢܝܢ ܬܪ̈ܥܐ ܕܫܝܘܠ ܐܢ ܬܨܒܘܢ ܘܫܪܟܐ. ܘܓܠܝܐ ܕܘܠܐ ܚܕܐ ܐܦܘܕܝܟܣܝܣ ܐܝܬ ܒܡܠܬܐ ܗܕܐ. ܐܠܐ ܡܟܣܢܘܬܐ ܒܠܚܘܕ ܘܟܘܘܢܐ ܐ̱ܚܪܢܐ ܕܝܢ ܡ̣ܢ ܐ̱ܚܪ̈ܢܝܝ ܫܘܒܚܐ. ܟܕ ܣܓܝ ܐܬܐܠܨ ܡܢܗ ܕܣܥܝܐ ܗܢܐ. ܠܘܬ ܫܟܝ̣ܪܘܬ ܬܘܕܝܬܐ ܢܦܩ ܘܐܡ̣ܪ. ܕܠܐ ܝ̇ܕܥ ܐܠܗܐ ܡܕܡ ܡ̣ܢ ܣܥܘܪ̈ܘܬܐ ܡܢܬܝ̈ܬܐ ܩܕܡ ܗܘܝܗܝܢ. ܚܢܢ ܕܝܢ ܟܕ ܠܫܛܝ̣ܚܘܬܐ ܝܬܝܪܬܐ ܕܡ̈ܠܐ ܒܦܬܓܡ̈ܐ ܙܥܘܪ̈ܐ ܩܦܣܝ̣ܢܢ܆ ܐܡܪܝܢܢ. ܕܚܐܪܘܬܐ ܐ̱ܢܫܝܬܐ ܐܘܟܝܬ ܫܠܝ̣ܛܘܬ ܒܝܬܐ. ܠܘ ܡܕܡ ܐ̱ܚܪܝܢ ܗ̣ܝ. ܣܛܪ ܡ̣ܢ ܗ̇ܝ ܕܢܕܥ ܒܪܢܫܐ ܗ̣ܘ ܒܗ. ܐܟܡܐ ܕܡܨܐ ܕܢܕܓܠ܆ ܡܨܐ ܕܠܐ ܢܕܓܠ. ܐܝܛܐ ܟܕ ܠܗ̇ܝ ܕܢܕܓܠ ܓܒܐ ܨܒܝܢܐܝܬ. ܡܕܓܠ. ܘܟܕ ܡܬܡܨܝܢܘܬ ܚܝܠܐ ܕܐܝܟ ܗܕܐ ܒܟܠܢܫ ܫܟܝܚܐ. ܘܟܠܢܫ ܝܕܥ ܐܠܨܐܝܬ ܕܩܢܐ ܠܗ̇ ܒܫܘܝܘ̣ܬ ܢܙܠܐ. ܐܝܟܢܐ ܡܨܝܐ ܕܬܬܐܡܪ. ܕܟܕ ܩܕܡ ܝ̇ܕܥ ܐܠܗܐ ܕܥܬܝܕ ܒܪܢܫܐ ܐ̱ܢܫ ܕܢܕܓܠ. ܠܐ ܡܬܡܨܐ ܕܠܐ ܢܕܓܠ. ܒܪܢܫܐ ܓܝܪ ܐܝܟ ܕܡ̣ܢ ܨܝܕܘܗܝ ܬܪ̈ܬܝܗܝܢ ܡܨܐ. ܘܠܗ̇ܝ ܐܝ̇ܕܐ ܕܒܚܐܪܘܬܗ ܣ̇ܥܪ. ܩܕܡ ܝ̇ܕܥ ܐܠܗܐ. ܘܠܘ ܠܗ̇ܘ ܡܐ ܕܩܕܡ ܝ̇ܕܥ ܐܠܗܐ. ܗ̣ܘ ܡ̣ܢ ܩܛܝ̣ܪ ܣܥܪ. ܟܕ ܠܐ ܩܢܐ ܚܝܠܐ ܕܗ̇ܝ ܕܕܠܩܘܒܠܐ ܢܣܥܘܪ. ܩܛܝ̣ܪܐ ܓܝܪ ܕܐܝܟ ܗܢܐ ܘܠܐ ܒܟܝܢܗ ܕܣܥܘܪܐ. ܐܦܠܐ ܒܟܝܢܗ ܕܡܣܬܥܪܢܐ ܫܟܝ̣ܚ. ܒܗ̇ܝ ܕܗ̇ܘ ܕܣ̇ܥܪ ܐܟܡܐ ܕܡܨܐ ܠܡܣܥܪ. ܗܟܘܬ ܘܗ̇ܝ ܕܠܩܘܒܠܐ ܡܨܐ. ܗ̣ܘ ܗܟܘܬ ܘܗ̇ܘ ܕܡܣܬܥܪ.

 

 

 

ܢܝܫܐ ܬܪܝܢܐ ܡܛܠ ܦܘܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܙܢܐ ܩܕܡܝܐ ܕܣܗܕܘܬܐ

 

ܐܡܪܝܢܢ ܕܩܕܡܢܢ ܫܪܪܢܢ ܐܦ ܚܢܢ ܕܟܠ ܡܕܡ ܡ̣ܢ ܐܠܗܐ ܗ̱ܘ. ܘܡ̣ܢ ܒܠܥܕܘܗܝ ܐܦܠܐ ܚܕܐ. ܐܠܐ ܡܢܗܝܢ ܡ̇ܢ ܕܣܥܘܪ̈ܘܬܐ ܒܡܨܥܝܘܬܐ ܕܚܐܪܘܬܢ ܡܣܬܥܪ̈ܢ. ܡܢܗܝܢ ܕܝܢ ܠܘ ܒܡܨܥܝܘܬܐ ܕܚܐܪܘܬܢ. ܐܠܐ ܐܘ ܡܢܗ ܕܐܠܗܐ ܒܠܥܕ ܡܨܥܝܘܬܐ. ܐܘ ܒܝܕ ܡܠܐܟ̈ܐ ܐܟܡܐ ܕܚܘܝ̣ܢܢ. ܒܕܓܘܢ ܗ̇ܝ ܕܟܠ ܡܕܡ ܡ̣ܢ ܐܠܗܐ. ܠܐ ܫܪܝܐ ܠܗ̇ ܠܚܐܪܘܬܢ. ܐܘ ܡܒܛܠܐ ܠܗ̇. ܒܗ̇ܝ ܕܐܦ ܚܐܪܘܬܢ ܚܕܐ ܗ̱ܝ ܡ̣ܢ ܣܥܘܪ̈ܘܬܐ ܗ̇ܢܝܢ ܕܡ̣ܢ ܐܠܗܐ ܐܫܬܟܢ̈ܝ ܠܢ.

 

ܦܘܢܝܐ ܕܙܢܐ ܬܪܝܢܐ ܕܣܗܕ̈ܘܬܐ:

 

ܐܡܪܝܢܢ ܕܗ̇ܝ ܕܡܬܐܡܪܐ ܕܛܒ̈ܬܐ ܡ̣ܢ ܐܠܗܐ ܐܢܝܢ. ܘܒܝ̈ܫܬܐ ܡ̣ܢ ܣܛܢܐ. ܠܘ ܠܗ̇ܝ ܕܒܩܛܝ̣ܪܐ ܕܒܪܝ̣ܢ ܠܒܢܝ̈ܢܫܐ ܐܠܗܐ ܘܣܛܢܐ. ܠܘܬ ܛܒܬܐ ܘܠܘܬ ܒܝܫܬܐ ܡܫܘܕܥܐ. ܐܠܐ ܠܗ̇ܝ ܕܡܥܕܪܘ ܡܥܕܪ ܐܠܗܐ ܠܘܬ ܛܒܬܐ ܠܗ̇ܢܘܢ ܕܒܨܒܝܢܗܘܢ ܛܒܐ ܦ̇ܠܚܝ̣ܢ ܠܗ ܘܕܚܠܝ̣ܢ ܡܢܗ. ܐܝܟ ܕܐܡ̣ܪ ܦܘܠܘܣ. ܕܝ̇ܕܥܝ̣ܢܢ ܕܝܢ ܕܐܝܠܝܢ ܕܡܚܒܝ̣ܢ ܠܐܠܗܐ. ܒܟܠܡܕܡ ܡܥܕܪ ܠܗܘܢ ܠܛܒܬܐ. ܗܟܘܬ ܘܣܛܢܐ. ܒܡ̈ܠܐ ܒܠܚܘܕ ܡܦܝ̣̈ܣܢܝܬܐ. ܘܡܠܟ̈ܐ ܘܡܘܠܟܢ̈ܐ ܡܬܡܨܐ ܠܡܛܥܝܘ ܘܠܘ ܛܪܘܢܐܝܬ. ܐܝܟ ܗ̇ܝ ܕܐܫܬܡܫܬ݀ ܡܢܗ ܠܘܬ ܐܡܐ ܕܓܘܐ. ܘܡ̣ܢ ܗܠܢ ܝ̣ܕܝ̣ܥܐ ܕܗ̇ܝ ܕܡܥܕܪܢܐ ܗ̱ܘ ܠܘܬ ܛܒܬܐ ܐܠܗܐ. ܘܠܘܬ ܒܝܫܐ ܣܛܢܐ. ܐܠܐ ܡܒܛܠܐ ܠܗ̇ ܠܚܐܪܘܬܐ ܐ̱ܢܫܝܬܐ.

 

ܦܘܢܝܐ ܕܙܢܐ ܬܠܝܬܝܐ ܕܣܗܕ̈ܘܬܐ:

 

ܐܡܪܝܢܢ ܕܚܐܪܘܬܐ ܐ̱ܢܫܝܬܐ ܐܝܬܝܗ̇܆ ܗ̇ܝ ܕܒܗ̇ ܐܟܡܐ ܕܡܨܝܢܢ ܠܡܣܥܪ ܥܒܕ̈ܐ ܛܒ̈ܐ ܕܙܕܝܩܘܬܐ. ܡܨܝܢܢ ܬܘܒ ܘܠܡܣܥܪ ܥܒܕ̈ܐ ܒܝ̈ܫܐ ܕܚܛܝ̣ܬܐ. ܘܠܘ ܗ̇ܝ ܕܒܗ̇ ܡܫܬܠܛܝ̣ܢܢ ܠܡܣܒ ܡ̣ܢ ܐܠܗܐ ܡܘܗ̈ܒܬܐ ܐܟܡܐ ܕܨܒܝܢܢ. ܗܕܐ ܓܝܪ ܠܨܒܝܢܗ ܕܝ̇ܗܘܒܐ ܫܪܝ̣ܟܐ. ܘܠܘ ܠܚܐܪܘܬܗ ܕܢܣܘܒܐ. ܒܕܓܘܢ ܗ̇ܝ ܕܠܐ ܢܬܡܨܐ ܒܪܢܫܐ ܠܡܣܒ ܡܕܡ. ܐܠܐ ܐܢ ܐܬܝ̣ܗܒ ܠܗ. ܠܐ ܫܪܝܐ ܠܗ̇ܝ ܕܢܬܡܨܐ ܠܡܥܒܕ ܥܒܕ̈ܐ ܕܒܗܘܢ ܢܫܬܘܐ ܠܡܬܝ̣ܗܒܘ ܠܗ ܡܘܗ̈ܒܬܐ ܛܒ̈ܬܐ ܐܘ ܠܐ ܢܫܬܘܐ. ܘܥܡ ܗܠܝܢ ܐܢ ܢܬܝܗ̈ܒܢ ܠܗ ܐܘ ܠܐ ܢܬܝܗ̈ܒܢ ܠܗ. ܠܘ ܡ̣ܢ ܚܐܪܘܬܗ ܐܢܝܢ ܠܗ. ܐܝܟܢܐ ܕܟܕ ܠܐ ܢܬܝܗ̈ܒܢ ܠܗ. ܢܐܡܪ ܕܠܝܬ ܠܗ ܚܐܪܘܬܐ. ܘܒܛܠܬ݀ ܠܗ̇ ܫܠܝ̣ܛܘܬ ܒܝܬܗ.

 

ܦܘܢܝܐ ܕܙܢܐ ܪܒܝܥܝܐ ܕܣܗܕ̈ܘܬܐ:

 

ܐܡܪܝܢ ܕܗ̇ܝ ܕܕܡܝ̣ ܢܒܝܐ ܠܚܛܝ̈ܐ ܠܗܢܕܘܝܐ ܘܠܢܡܪܐ. ܠܘ ܠܗ̇ܝ ܕܐܟܡܐ ܕܗ̇ܘ ܡ̇ܢ ܒܟܝܢܐ ܐܘܟܡܐ ܐܬܒܪܝ̣ ܗ̇ܘ ܕܝܢ ܟܟܠܝܐ. ܗܟܢܐ ܘܚܛܝܐ ܒܟܝܢܐ ܚܛܝܐ ܐܬܒܪܝ̣ ܡܫܘܕܥܐ. ܐܠܐ ܠܗ̇ܝ ܕܟܕ ܢܘܡܝ̣ ܢܣܒܝ̣ܢ ܒܟܘܢ ܒܝ̈ܫܬܐ ܐܘ ܒܢܝ̈ܐ ܕܥܒܪ̈ܝܐ. ܘܐܣܬܬܬܬܘܢ ܒܗܝܢ. ܐܝܟ ܗܝ ܕܒܟܝܢܐ ܗܟܢܐ ܒܝ̈ܫܐ ܐܬܒܪܝ̣ܬܘܢ ܐܬܕܡܝ̣ܬܘܢ. ܘܝ̣ܕܝ̣ܥܐ ܗܕܐ ܕܗܟܢܐ ܗ̱ܝ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܡܠܬܗ ܕܝܠܗ ܕܢܒܝܐ ܕܐܘܣܦ ܐܡ̣ܪ. ܡܛܠ ܕܝ̣ܠܦܬܘܢ ܒܝ̈ܫܬܐ. ܕܬܪܬܝܢ ܕܝܢ܆ ܡ̣ܢ ܗ̇ܝ ܕܟܠܗܘܢ ܡܗܘ̈ܢܐ܆ ܠܥܝܕܐ ܡܐ ܕܡܫܬܬܣ ܠܟܝܢܐ ܡܕܡܝܢ ܠܗ ܘܐܡܪܝܢ. ܕܥܝܕܐ ܡܐ ܕܥܬܩ܆ ܟܝܢܐ ܗ̱ܘ ܕܬܪܝܢ. ܘܗܟܢܐ ܬܘܒ ܙܕܩ ܠܡܣܬܟܠܘ ܗ̇ܝ ܕܟܘ̈ܒܐ ܘܩܘܪ̈ܛܒܐ. ܘܬܐܢ̈ܐ ܘܥܢ̈ܒܐ ܕܒܐܘܢܓܠܝܘܢ. ܘܡܛܠ ܡܠܬ݀ ܫܠܝܚܐ ܐܡܪܝܢܢ. ܕܗ̇ܝ ܕܣܪܝܩܘܬܐ ܘܡܟܢܘܬ ܚܫ̈ܐ ܣܩܘ̈ܒܠܝܐ ܘܚܣܝ̣ܪܘܬܐ. ܒܟܝܢܗ̇ ܕܗܕܐ ܒܪܝܬܐ ܬܚܬܝܬܐ ܕܝܠܢ ܗܘܝ̈. ܠܘ ܡ̣ܢ ܨܒܝܢܗ̇ ܐܢܘܢ ܠܗ̇. ܐܠܐ ܡ̣ܢ ܨܒܝܢܐ ܕܗ̇ܘ ܕܒܪܗ̇. ܘܠܘ ܡܫܡܠܝܬܐ ܘܕܟܝܬ݀ ܒܟܠ. ܡܢܗ ܕܫܠܝܚܐ ܛܘܒܢܐ ܙܕܩ ܠܢ ܠܡܐܠܦ. ܕܐܡ̇ܪ ܡܛܠ ܣܒܪܐ. ܐܝܟܢܐ ܕܥܠ ܟܠܢܫ ܢܪܚܡ. ܘܠܗ ܠܗܢܐ ܪܥܝܢܐ ܫܠܡܐ ܗ̇ܝ ܕܐܝܟܐ ܕܣܓܝܬ݀ ܚܛܝܬܐ ܬܡܢ ܐܬܝܬܪܬ݀ ܛܝܒܘܬܐ. ܒܕܓܘܢ ܡܟܢܘܬܐ ܕܗ̇ܝ ܕܢܬܡܨܐ ܠܡܙܕܕܩܘ ܘܠܡܚܛܐ ܚܢܢ ܡܠܝ̈ܠܐ. ܟܝܢܝܬܐ ܗ̱ܝ ܠܢ ܘܠܘ ܨܒܝܢܝܬܐ. ܐܝܟ ܕܐܦ ܗ̣ܝ ܗܕܐ ܠܐ ܡܟܢܘܬܐ ܠܠܐ ܡܠܝ̈ܠܐ ܟܝܢܝܬܐ ܗ̱ܝ ܠܢ ܘܠܘ ܨܒܝܢܝܬܐ. ܐܠܐ ܠܐ ܟܝܢܝܬܐ ܘܨܒܝܢܝܬܐ. ܗܢܘ ܡܕܝܢ ܚܝܠܐ ܕܗ̇ܝ ܕܠܐ ܒܨܒܝܢܗ̇ ܐܫܬܥܒܕܬ݀ ܒܪܝܬܐ ܠܣܪܝ̣ܩܘܬܐ. ܘܕܚܒܫ ܐܠܗܐ ܠܟܠܢܫ ܒܠܐ ܡܬܬܦܝ̣ܣܢܘܬܐ. ܟܐܡܬ ܕܡܟܢܘܬ ܡܫܬܥܒܕܢܘܬܐ ܕܠܣܪܝ̣ܩܘܬܐ ܘܠܠܐ ܡܬܬܦܝ̣ܣܢܘܬܐ ܟܝܢܝܬܐ ܗ̱ܝ ܠܢ ܘܡ̣ܢ ܐܠܗܐ. ܐܝܢ ܗ̇ܝ ܕܠܡܥܒܕܢܘܬܐ ܢܦܩܝܗ̇ ܠܗ̇ ܠܡܟܢܘܬܐ ܗܕܐ ܟܝܢܝܬܐ. ܐܘ ܠܐ ܢܦܩܝܗ̇ ܕܝ̣ܠܢܐܝܬ ܠܘ ܟܝܢܝܬܐ ܗ̱ܝ ܐܠܐ ܡ̣ܢ ܚܐܪܘܬܢ. ܐܝܟ ܗ̇ܝ ܕܢܐܡܪ ܕܗ̇ܝ ܕܢܗܘܐ ܡܟܢ ܒܪܢܫܐ ܠܡܙܢܝܘ ܟܝܢܝܬܐ ܗ̱ܝ ܠܗ ܘܠܘ ܡ̣ܢ ܨܒܝܢܗ. ܐܝܟ ܗ̇ܝ ܕܢܙܢܐ ܒܡܥܒܕܢܘܬܐ ܐܘ ܠܐ ܢܙܢܐ ܠܘ ܟܝܢܝܬܐ ܗ̱ܝ ܠܗ܇ ܐܠܐ ܨܒܝܢܝܬܐ. ܘܥܠܗܕܐ ܠܘ ܡܛܠܗܝ ܕܡܟܢܝ̣ܢܢ ܠܡܙܢܝܘ ܡܬܬܕܝ̣ܢܝ̣ܢܢ. ܐܠܐ ܡܛܠܗ̇ܝ ܕܡܙܢܝ̣ܢܢ. ܘܡ̣ܢ ܗܠܝܢ ܡܫܬܪܪܐ ܕܣܗܕ̈ܘܬܐ ܗܠܝܢ ܠܘ ܡܒܛܠܢܝ̈ܬܐ ܐܢܝܢ ܕܚܐܪܘܬܐ ܘܫܠܝ̣ܛܘܬ ܒܝܬܐ.

 

ܦܘܢܝܐ ܕܙܢܐ ܚܡܝܫܝܐ ܕܣܗܕ̈ܘܬܐ:

 

ܐܡܪܝܢܢ ܕܣܗܕ̈ܘܬܐ ܗܠܝܢ. ܠܗ̇ܝ ܕܠܐ ܢܬܬܟܠ ܐ̱ܢܫ ܥܠ ܚܝܠܗ. ܐܠܐ ܕܒܐܡܝ̣ܢܘ ܡ̣ܢ ܐܠܗܐ ܢܫܐܠ ܥܘܕܪܢܐ ܡܫܘ̈ܕܥܢ ܘܠܘ ܕܠܚܐܪܘܬܐ ܡܒ̈ܛܠܢ. ܗܐ ܓܝܪ ܗ̇ܘ ܕܐܬܬܒܪܬ݀ ܐܠܦܗ ܘܐܬܛܒܥ ܒܝܡܐ. ܡܛܠܗ̇ܝ ܕܐ̱ܚܪ̈ܢܐ ܡܕܠܝܢ ܠܗ ܡ̣ܢ ܛܘܒܥܐ ܘܡ̇ܦܩܝ̣ܢ ܠܗ ܡ̣ܢ ܛܘܒܥܐ ܘܡ̇ܦܩܝ̣ܢ ܠܗ ܡ̣ܢ ܨܡܪܬܐ ܟܕ ܡܘܫܛܝ̣ܢ ܠܗ ܐܝܕܐ. ܙܕܩ ܕܢܐܡܪ ܕܠܐ ܡܗܢܐ ܠܗ ܣܚܘܗ. ܘܙܘܥܐ ܕܐܝܕܘ̈ܗܝ ܘܕܪ̈ܓܠܘܗܝ. ܘܐܦܢ ܗ̇ܢܘܢ ܕܩܪܝ̣ܒܝ̣ܢ ܠܗ ܟܕ ܨܒ̇ܝܢ ܕܢܚܝܠܘܢ ܬܪܥܝ̣ܬܗ ܘܢܠܒܟܘܢܝܗܝ ܐܝܟܢܐ ܕܠܐ ܢܦܣܘܩ ܣܒܪܐ ܘܢܘܚܠ. ܢܐܡܪܘܢ ܠܗ. ܕܢܘܚ ܘܠܐ ܬܫܦܠ ܐܘ ܬܥܡܠ ܗܕܡܝ̈ܟ ܚܢܢ ܡ̇ܦܩܝ̣ܢܢ ܠܟ. ܠܐ ܬܪܢܐ ܐܘ ܬܐܨܦ. ܒܗ̇ܝ ܕܐܠܘܠܐ ܚܢܢ ܐܬܛܝܒܢ ܠܘܬܟ ܠܐ ܡܕܡ ܝܬܪ ܗܘܝܬ ܡ̣ܢ ܙܘܥܝ̈ܟ. ܗܟܢܐ ܡܕܝܢ ܘܠܣܘ̈ܟܠܐ ܕܡ̈ܠܐ ܐܠܗܝ̈ܬܐ ܙܕܩ ܠܢ ܠܡܣܬܟܠܘ.

 

ܦܘܢܝܐ ܕܙܢܐ ܫܬܝܬܝܐ ܕܣܗܕܘܬܐ:

 

ܐܡܪܝܢܢ. ܕܒܪܢܫܐ ܡ̇ܢ ܡ̣ܢ ܫܘܪܝ ܒܪܝܬܗ. ܘܐܦܢ ܐܟܡܐ ܕܡܨܐ ܕܢܥܘܠ. ܡܨܐ ܬܘܒ ܘܕܠܐ ܢܥܘܠ. ܐܠܐ ܡ̣ܢ ܐܢܢܩܝ. ܐܘ ܢܥܘܠ ܐܘ ܠܐ ܢܥܘܠ. ܒܕܠܐ ܡܫܟܚܐ ܕܬܪ̈ܝܗܘܢ ܦܫܚܝ̈ܗ̇ ܕܐܢܛܝܦܐܣܝܣ. ܐܟܚܕܐ ܢܫܪܘܢ ܐܘ ܢܕܓܠܘܢ. ܒܕܓܘܢ ܠܘ ܠܐ ܟܐܢܐ ܕܢܐܡܪ ܕܗ̇ܘ ܕܥܬܝܕ ܠܡܥܘܠܘ̣ ܠܗ̇ܝ ܕܢܥܘܠ܆ ܦܪܝܫ ܗ̣ܘ ܡ̣ܢ ܫܘܪܝܐ. ܘܗܟܢܐ ܗ̇ܘ ܕܥܬܝܕ ܕܠܐ ܢܥܘܠ. ܘܓܠܝܐ ܕܗ̣ܝ ܗܕܐ ܠܐ ܫܪܝܐ ܠܗ̇ܝ ܕܒܚܐܪܘܬܗ ܘܠܘ ܡ̣ܢ ܩܛܝ̣ܪ ܡܥܘܠ ܗ̇ܘ ܕܐܝܟ ܗܢܐ. ܐܟܡܐ ܕܙܒ̈ܢܬܐ ܣܓܝ̈ܐܬܐ ܐܡ̣ܪܢܢ. ܠܗܢܐ ܡܕܝܢ ܪܥܝܢܐ ܡܫܘܕܥܐ ܗܝ ܕܐܬܦܪܫܘ ܥܘ̈ܠܐ ܡ̣ܢ ܟܪܣܐ. ܘܡܛܠ ܣܗܕ̈ܘܬܐ ܗ̇ܢܝܢ ܐ̱ܚܪ̈ܢܝܬܐ ܐܡܪܝܢܢ ܕܡܢܬܝ̈ܬܐ ܐܢܝܢ. ܘܡܛܠܗܕܐ ܠܐ ܙܕܩ ܠܡܚܪܩ ܡܢܗܝܢ ܥܠ ܟܠܢܝܐ. ܗܕܐ ܓܝܪ ܗܝܡܢܘܬܐ ܗ̱ܝ ܗܘܦܘܓܘܓܝܬܐ. ܘܕܠܐ ܫܪܝܪܐ ܒܠܘܓܝܩܝ ܫܪܪܢܢ. ܕܐܝܟ ܐܝܟܢ. ܐܢܗܘ ܓܝܪ ܕܠܐܫܥܝܐ ܐܘ ܠܐܪܡܝܐ ܐܘ ܠܦܘܠܘܣ. ܐܘ ܠܐܢܫ ܐ̱ܚܪܝܢ ܡ̣ܢ ܢܒܝ̈ܐ ܐܘ ܫܠܝ̈ܚܐ. ܩܕܡ ܦܪܫ ܠܥܒܕܐ ܡܕܡ. ܡܛܠܗܕܐ ܠܐ ܙܕܩ ܕܢܦܣܘܩ ܕܐܦ ܠܟܠ ܒܪܢܫ ܩܕܡ ܦܪܫ ܐܠܗܐ ܠܥܒܕܐ ܐܝܢܐ ܕܗ̣ܘ. ܠܐ ܓܝܪ ܟܐܢܐ ܗܕܐ܆ ܠܐ.

 

 

 

ܦܘܢܝܐ ܕܙܢܐ ܫܒܝܥܝܐ ܘܬܡܝܢܝܐ ܕܣܗܕ̈ܘܬܐ ܐܟܚܕܐ:

 

ܐܡܪܝܢܢ ܕܚܢܢ ܡ̇ܢ ܟܕ ܠܚܐܪܘܬܐ ܐ̱ܢܫܝܬܐ ܡܫܪܪܝ̣ܢܢ ܠܐ ܐܡܪܝܢܢ ܕܠܐ ܫܠܝ̣ܛ ܐܠܗܐ ܫܘܒܚܐ ܠܛܝܒܘܬܗ ܠܡܣܥܪ ܒܓܒܝ̣ܠܬܗ ܗ̇ܘ ܡܐ ܕܨܒ̇ܐ. ܐܘ ܡܡܪܚܝ̣ܢܢ ܬܘܒ ܕܢܟܦܘܪ ܒܗ̇ܝ ܕܡܨܐ ܐܠܗܐ ܠܡܫܦܥܘ ܥܠ ܐ̱ܢܫܝ̈ܢ ܪ̈ܚܡܐ ܠܐ ܡܬܬܟܝ̣̈ܠܢܐ. ܘܠܐܚܪ̈ܢܐ ܢܓܠܘܙ. ܐܘ ܗܡܣܝ̣ܢܢ ܠܡܓܫ ܬܗܘܡܐ ܠܐ ܡܬܬܡܝ̣ܫܢܐ ܕܕܝ̣ܢܘ̈ܗܝ ܚܣ. ܐܠܐ ܗܕ ܒܠܚܘܕ ܐܡܪܝܢܢ. ܕܐܠܗܐ ܫܘܒܚܐ ܠܛܝܒܘܬܗ. ܚܐܪܘܬܐ ܘܟܝܬ ܫܠܝ̣ܛܘܬ ܒܝܬܐ ܫܟ̣ܢ ܠܒܪܢܫܐ ܒܒܪܝܬܗ. ܐܝܟܢܐ ܕܨܒܝܢܐܝܬ. ܘܠܘ ܡ̣ܢ ܩܛܝ̣ܪ ܢܣܥܘܪ ܗܠܝܢ ܕܣܥܪ. ܘܥܡ ܗܠܝܢ ܫܠܝ̣ܛ ܗ̣ܘ ܐܠܗܐ ܠܡܒܝܬܝܘ ܘܠܡܢܟܪܝܘ. ܘܠܡܚܪܙ. ܘܠܡܓܠܙ. ܠܐ ܡܒܛܠܐ ܠܗ̇ ܠܚܐܪܘܬܐ ܕܗ̇ܢܘܢ ܕܠܗܘܢ ܝ̇ܗܒ ܐܘ ܓܠܙ.

 

 

 

 

 

ܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܡܠܬܐ ܕܥܠ ܩܨܐ. ܘܒܗ ܐܝܬ ܥܘ̈ܬܕܐ ܬܪܝܢ ܘܦܣܘ̈ܩܐ ܫܬܐ. ܦܣܘܩܐ ܩܕܡܝܐ ܡܛܠ ܐܢܢܩܝܘܬ ܡܘܬܐ ܟܝܢܝܐ

 

ܐܡܪܝܢܢ ܕܗ̣ܝ ܪܝ̣ܫܝ̣ܬܐ ܕܓܢܣܢ܇ ܟܢܝ̣ܫܘܬܐ ܗ̱ܝ ܕܬܪܬܝܢ ܪ̈ܛܝ̣ܒܘܢ܆ ܕܙܪܥܐ ܟܝܬ ܓܒܪܢܝܐ ܗ̇ܘ ܕܢܘܪܢܝܘܬܐ ܘܐܐܪܝܘܬܐ ܝܬܝܪ ܥܠܒ̈ܢ ܒܗ. ܘܕܡܘ̣ܬܐ ܗ̱ܘ ܕܥܠܬܐ ܥܒܘܕܬܐ. ܘܕܕܡܐ ܟܦܣܢܝܐ ܗ̇ܘ ܕܡܝܢܝܘܬܐ ܘܐܪܥܢܝܘܬܐ ܝܬܝܪ ܥܠܒ̈ܢ ܒܗ. ܘܕܡܘ̣ܬܐ ܗ̱ܘ ܕܥܠܬܐ ܗܘܠܢܝܬܐ. ܘܢܘܪܢܝܘܬܐ ܡ̇ܢ ܘܐܪܥܢܝܘܬܐ. ܐܦܢ ܩܛܪ̈ܝܝܢ ܘܩܫ̈ܝܝܢ ܠܗ ܠܡܪܟܒܐ. ܐܠܐ ܠܘ ܠܘܬ ܡܫܘ̣ܚܬܐ ܐܝ̇ܕܐ ܕܠܐ ܡܬܦܘܫܫ ܘܡ̣ܢ ܗܠܝܢ ܝܕܝܥܐ ܕܗ̇ܝ ܕܐܠܗܐ ܢܗܘܐ ܡܨܐ ܠܡܬܠ ܘܠܡܓܠܙ ܡܢܗ ܡܕܡ. ܐܝܟ ܟܐܦ̈ܐ ܘܙܓܘ̣̈ܓܝܬܐ ܐܝܬܝ̈ܢܝܗܝ. ܠܐ. ܘܡܛܠܗܕܐ ܠܬܪܝܢ ܙܢܝ̈ܐ ܙܝܡܝ̈ܐܣ. ܡܩܒ̈ܠܢܐ ܒܟܝܢܐ ܗܘ̣ܘ ܦܓܪ̈ܝܢ. ܕܦܘ̣ܫܫ ܪܛܝ̣ܒܘܬܐ ܐܡ̇ܪ ܐ̱ܢܐ. ܗ̇ܝ ܕܡܢܗ̇ ܐܬܓܒܠܢܢ. ܘܕܡܣܝܘܬܗ̇ ܘܠܐ ܥܗܢܘܬܗ̇ ܠܘܬ ܩܘܝܡ ܚܝ̈ܐ. ܘܟܠܚܕ ܡ̣ܢ ܗܠܝܢ. ܐܘ ܡ̣ܢ ܥ̈ܠܬܐ ܕܡ̣ܢ ܠܒܪ ܗܘܐ. ܐܟܙܢܐ ܕܡ̣ܢ ܚܡܝܡܘܬܐ ܚܦܘܫܫܢܝ̣ܬܐ ܘܡܡܣܝܢܝ̣ܬܐ ܕܐܐܪ. ܐܘ ܡ̣ܢ ܥ̈ܠܬܐ ܕܡ̣ܢ ܠܓܘ. ܐܟܙܢܐ ܕܡ̣ܢ ܚܡܝܡܘܬܐ ܢܨܝ̣ܒܬܐ ܕܒܢ ܕܡܦܘܫܫܐ ܪܛܝ̣ܒܘܬܢ. ܘܚܡܝܡܘܬܐ ܢܘܟܪܝܬܐ ܕܡܬܝܠܕܐ ܡ̣ܢ ܬܪ̈ܣܝܬܢ ܒܝ̈ܫܬܐ. ܘܡܡܣܝܐ ܪܛܝ̣ܒܘܬܢ. ܘܟܠܗܝܢ ܗܠܝܢ ܥ̈ܠܬܐ ܕܐܟܚܕܐ. ܐܝܕܐ ܝ̇ܗ̈ܒܢ ܠܚܕ̈ܕܐ ܠܘܬ ܛܘܠܩܗ̇ ܕܪܛܝ̣ܒܘܬܐ ܘܥܘܫܢܗ̇ ܕܝܒܝ̣ܫܘܬܐ. ܐܦ ܓܝܪ ܘܡܢܗ ܕܫܘܪܝ ܗܘܝܢ. ܐܠܘܠܐ ܝܒܝ̣ܫܘܬܐ ܬܗܘܐ ܕܥܠܒܐ ܒܢ. ܐܦܠܐ ܠܡܕܡ ܡ̣ܢ ܣܥܘܪ̈ܘܬܢ ܐܬܚܝܠܢ ܠܡܣܥܪ. ܘܡܬܚܢܩܘ ܐܬܚܢܩܬ݀ ܬܘܒ ܗ̣ܝ ܚܡܝܡܘܬܢ ܢܨܝ̣ܒܬܐ ܡܢܗ̇ ܕܪܛܝ̣ܒܘܬܐ. ܘܗܟܢܐ ܗ̣ܘ ܛܘܠܩܐ ܗܢܐ ܕܐܢܢܩܝܐ ܘܡܥܕܪܢܐ ܗܘ̣ܐ ܠܩܘܝܡܢ. ܗ̣ܘ ܟܕ ܗ̣ܘ ܥܠܬܐ ܗܘ̣ܐ ܕܫܪܝܗ ܕܪܘܟܒܢ ܘܕܚܘܒܠܢ. ܒܗ̇ܝ ܕܒܐܝܕܐ ܒܐܝܕܐ ܟܕ ܡܫܬܘܫܛ ܗ̣ܘ ܛܘܠܩܐ ܠܠܝܬܝܘܬܐ ܡܫܪܟ ܠܗ̇ ܠܪܛܝ̣ܒܘܬܐ ܘܡܕܥܟ ܕܥ̇ܟܐ ܠܗ̇ ܚܡܝܡܘܬܐ ܢܨܝ̣ܒܬܐ ܡܠܝ̣ܣܛܐ ܕܝܢ ܗ̣ܝ ܗ̇ܘܝܐ ܥܠܬ݀ ܕܘܟܥܗ̇. ܒܝܕ ܗ̇ܝ ܕܡܛܠܩܐ ܗܘ̣ܠܗ̇. ܘܗ̇ܝ ܕܒܝܬܝܐ ܠܡܐܡܪ. ܗ̣ܝ ܠܗ̇ ܐܟܠܐ ܘܡܓܪܣܐ. ܐܝܟ ܕܐܦ ܙܠܝ̣ܩܐ ܫܪܓܢܝܐ. ܕܢܘܪܗ̇ ܡܛܠܩܐ ܗܘ̣ܠܗ̇ ܡܫܚܢܝܬܐ. ܘܠܛܘܠܩܗ̇ ܕܗܕܐ ܕܘܥܟܗ̇ ܢܩܦ. ܘܗܟܢܐ ܕܘܥܟܐ ܐܘܟܝܬ ܡܘܬܐ ܢܩܦ ܐܢܢܩܐܝܬ. ܘܐܘܪܚܐ ܗ̱ܘ ܕܠܐ ܐܝܬ ܠܡܫܬܐܠܘ̣ ܡܢܗ. ܘܐܠܘܠܐ ܐܣܬܝܥܬ݀ ܗ̣ܝ ܪܛܝ̣ܒܘܬܐ ܟܝܢܝܬܐ. ܒܪܛܝ̣ܒܘܬܐ ܗ̇ܝ ܕܡ̣ܢ ܬܘܪܣܝܐ ܥܠܝܗ̇ ܡܬܬܘܣܦܐ. ܘܡܡܠܝܐ ܠܗ̇ ܕܘܟܬ݀ ܗ̇ܘ ܡܐ ܕܡܢܗ̇ ܐܬܦܘܫܫ. ܐܦܠܐ ܐܬܡܨܝܬ݀ ܕܬܥܙܐ ܥܕܡܐ ܠܙܒܢܐ ܗܢܐ ܕܒܗ ܡܟܢ ܠܡܫܬܪܝܘ̣ ܗ̣ܘ ܪܘܟܒܐ ܟܝܢܐܝܬ. ܘܡܛܠ ܕܠܘ ܒܚܕܐ ܡܫܘܚܬܐ ܫܘܝ̣ܬܐ ܐܝܬܝܗ̇ ܗ̣ܝ ܪܛܝ̣ܒܘܬܐ ܟܝܢܝܬܐ. ܐܦܠܐ ܬܘܒ ܗ̣ܝ ܚܡܝܡܘܬܐ ܡܦܘܫܫܢܝ̣ܬܐ ܘܗ̇ܝ ܡܡܣܝܢܝܬܐ ܒܟܠܗܘܢ ܩܢܘ̈ܡܐ ܘܩܠܝ̣̈ܡܐ. ܘܡܛܠ ܗܕܐ ܚܝ̈ܐ ܕܐ̱ܢܫܝ̈ܢ ܡ̇ܢ ܐܪܝ̣ܟܝ̣ܢ. ܚܝ̈ܐ ܕܐ̱ܢܫܝ̈ܢ ܕܝܢ ܟܪܝܢ. ܐܝܟ ܕܡܬܢܐ ܐܣܩܠܝܒܝܐܕܝܣ ܕܗ̇ܢܘܢ ܕܒܣܟܝ̈ ܓܪܒܝܐ. ܒܓܘ ܥܣܪܝܢ ܫܢܝ̣̈ܢ ܒܣܝܒܘܬܐ ܥܡܝ̣ܩܬܐ ܥ̇ܐܠܝܢ. ܘܗܠܝܢ ܐܢܘܢ ܚܝܝ̈ܗܘܢ ܬܩܢ̈ܕܝܐ. ܘܗ̇ܢܘܢ ܕܒܣܟܝ̈ ܬܝܡܢܐ ܠܡܐܐ ܘܥܣܪܝܢ ܫܢܝ̈ܢ ܘܠܕܝܬܝܪ ܡܬܡܛܝܢ. ܡܨ̈ܥܝܐ ܕܝܢ ܡܨܥܐܝܬ܆ ܐܟܡܐ ܕܠܘܬܢ. ܐܝܟ ܕܐܡ̣ܪ ܕܘܝܕ. ܕܝܘܡܝ̈ܢ ܫܢܝ̣̈ܢ ܒܗܘܢ ܫܒܥܝܢ ܫܢܝ̈ܢ ܘܠܡܚܣܢ ܬܡܢܝܢ ܫܢܝ̈ܢ. ܘܐܦܢ ܠܣܓܝ̈ܐܐ ܡ̣ܢ ܗ̇ܢܘܢ ܕܒܕܪ̈ܝܢ ܚܙܝܢ ܕܝܬܝܪ ܡ̣ܢ ܡܐܐ ܫܢܝ̈ܢ ܚܝܘ. ܘܗܕܐ ܡ̇ܢ ܡܫܘ̣ܚܬܐ ܟܝܢܝܬܐ ܕܚܝ̈ܐ ܕܒܢܝ̈ܢܫܐ. ܘܠܘܬ ܫܘܡܠܝܗ̇ ܐܠܨܐܝܬ ܡܘܬܐ ܟܝܢܝܐ ܢܦܩ. ܗܠܝܢ ܕܝܢ ܡܘ̈ܬܐ ܐ̱ܚܪ̈ܢܐ ܕܒܝܕ ܥ̈ܠܬܐ ܐ̱ܚܪ̈ܢܝܬܐ ܕܡ̣ܢ ܠܒܪ ܓܕܫܝ̣ܢ. ܠܘ ܟܝܢܝ̈ܐ ܐܢܘܢ. ܘܐܝܟܢ ܕܗ̣ܘ ܘܐܦܢ ܠܐ ܡܬܚܡܝ̣ܢ ܠܐ ܡܫܬܚܠܦܢܐܝܬ. ܐܝܟ ܪܥܝܢܐ ܚܬܝ̣ܬܐ ܕܕܘܓܡܐ ܬܪܝܨ ܫܘܒܚܐ. ܐܠܐ ܠܘ ܒܠܥܕ ܝ̣ܕܥܬܐ ܕܐܠܗܐ ܘܦܘܩܕܢܗ ܗܘܝܢ.

 

ܗܦܟܬܐ:

 

ܐܡܪܝܢ ܟܕ ܪܛܝ̣ܒܘܬܐ ܕܡ̣ܢ ܬܘܪܣܝܐ. ܡܟܢܐ ܕܬܡܠܐ ܕܘܟܬ݀ ܗ̇ܘ ܡܐ ܕܡ̣ܢ ܪܛܝ̣ܒܘܬܐ ܗ̇ܝ ܟܝܢܝܬܐ ܡܬܦܘܫܫ ܘܡܬܒܨܪ. ܡܛܠܡܢܐ ܠܐ ܠܥܠܡ ܡܡܠܝܐ. ܐܝܟܢܐ ܕܠܥܠܡ ܢܚܐ ܗ̣ܘܐ ܒܪܢܫܐ ܘܠܐ ܢܡܘܬ ܗ̣ܘܐ. ܟܕ ܠܐ ܡܬܩܛܠ. ܐܘ ܒܡܘܬܐ ܐ̱ܚܪܢܐ ܓܕܫܢܝܐ ܠܐ ܡܫܠܡ ܗ̣ܘܐ.

 

ܦܘܢܝܐ:

 

ܐܡܪܝܢܢ ܕܠܘ ܒܟܠܡܕܡ ܕܡܝܐ ܪܛܝ̣ܒܘܬܐ ܗ̇ܝ ܕܡ̣ܢ ܬܘܪܣܝܐ ܡܬܝܙܦܐ. ܠܪܛܝ̣ܒܘܬܐ ܗܝ ܟܝܢܝܬܐ. ܒܗ̇ܝ ܕܢܘܟܪܝܬܐ ܗ̱ܝ ܘܥܠܘܠܬܐ. ܘܡܛܠܗܕܐ. ܘܐܦܢ ܡܬܡܨܝܐ ܕܡܢܬܐܝܬ ܬܚܣܟܝܗ̇ ܠܗ̇ܝ ܟܝܢܝܬܐ ܡ̣ܢ ܦܘ̣ܫܫܐ ܝܬܝܪܐ. ܘܠܐ ܫ̇ܒܩܐ ܠܗ̇ ܕܠܝ̣ܓܐܝܬ ܬܬܛܠܩ ܘܬܬܠܝܬܐ. ܐܠܐ ܠܐ ܡܬܡܨܝܐ ܕܠܓܡܪ ܬܟܠܐ ܡܢܗ̇ ܠܥܘ̣ܙ ܚܡܝܡܘܬܐ ܗ̇ܝ ܕܥܡܗ̇ ܥܙܝ̣ܠܐ ܘܡܥܪܙܠܐ ܘܒܗ̇ ܩܝܡܐ ܡܢܗ̇ ܕܫܘܝܘ̣ܬ ܫܘܝ̣ܚܘܬܐ. ܐܠܨܐܝܬ ܡܕܝܢ ܡܬܛܠܩܐ ܠܗ̇ ܪܛܝ̣ܒܘܬܐ ܗ̇ܝ ܟܝܢܝܬܐ ܒܩܠܝܠ ܩܠܝܠ. ܥܕܡܐ ܕܠܓܡܪ ܬܬܓܠܙ. ܘܥܡܗ̇ ܕܫܟܝ̣ܚܘܬ ܪܛܝ̣ܒܘܬܐ ܕܡ̣ܢ ܬܘܪܣܝܐ. ܘܗܟܢܐ ܐܢܢܩܐܝܬ ܡܘܬܐ ܢܩܦ.

 

 

 

ܥܘܬܕܐ ܐ̱ܚܪܢܐ. ܡܛܠ ܬܪ̈ܥܝܬܐ ܕܗܘܝ̈ ܠܒܢܝ̈ܢܫܐ ܡܛܠ ܩܨܐ

 

ܩܕܝܫܐ ܚܣܝܐ ܝܥܩܘܒ ܕܐܘܪܗܝ. ܟܕ ܡܛܠܬܗ̇ ܕܒܥܬܐ ܗܕܐ. ܡ̣ܢ ܝܘܚܢܢ ܐܣܛܘܢܪܐ ܐܫܬܐܠ. ܥܡܠܐ ܕܝܬܝܪ ܩܫܐ. ܘܫܘܐܠܐ ܕܝܬܝܪ ܥܣܩ. ܘܚܦܪܐ ܕܛܒ ܥܡܝ̣ܩ. ܘܡܕܐܬܐ ܕܠܥܠ ܡ̣ܢ ܚܝܠܐ ܩܪܗ̇. ܘܡܙܕܟܝܢܘܬܐ ܘܠܐ ܣܦܩܘܬܐ ܐܘܕܝ̣. ܒܗ̇ܝ ܕܠܘܬ ܡܕܪܟܢܘܬܐ ܕܕܝ̣̈ܢܐ ܕܐܠܗܐ ܘܠܘܬ ܡܠܬܐ ܕܒܛܝ̣ܠܘܬܐ ܕܥܠ ܟܠ ܡܬܚܐ. ܘܠܘܬ ܗܠܝܢ ܡܢܘ̣ ܣܦܩ. ܐܘ ܕܢܬܪܥܐ. ܐܘ ܕܢܡܠܠ ܐܘ ܕܢܦܫܩ ܐܡ̣ܪ. ܘܟܕ ܗܢܐ ܟܠܗ ܥܪܡܐ ܐܘܪܚܗ̇. ܐܠܨܐ ܠܢ ܕܒܝܕ ܦܘܠܓܐ ܢܫܦܝܗ̇. ܐܝܛܐ ܐܟܡܐ ܕܡ̣ܢ ܚܝܠܐ ܕܟܬܒ̈ܐ ܩܕܝ̈ܫܐ ܡܠܘܘܐ ܢܣܒܝ̣ܢܢ ܢܣܥܪܝܗ̇. ܒܕܓܘܢ ܐܡܪܝܢܢ ܕܬܪܬܝܢ ܬܪ̈ܥܝܢ ܕܣܩܘ̈ܒܠܝܢ ܗܘܝ̈ ܠܒܢܝ̈ܢܫܐ ܡܛܠ ܩܨܐ. ܚܕܐ ܡ̇ܢ ܗ̇ܝ ܕܐܡ̇ܪܐ ܕܡܩܕܡ ܡܬܚܡ ܩܨܐ ܕܚܝ̈ܐ ܕܟܠ ܒܪܢܫ. ܕܬܪܬܝܢ ܕܝܢ ܗ̇ܝ ܕܐܡ̇ܪܐ. ܕܠܐ ܡܩܕܡ ܡܬܚܡ ܗ̣ܘ ܩܨܐ. ܘܗ̇ܝ ܩܕܡܝܬܐ ܬܘܒ ܠܬܪܬܝܢ ܐܪ̈ܣܝܣ ܐܣܬܪܥܦܬ݀. ܚܕܐ ܡ̇ܢ ܗ̇ܝ ܕܐܡ̇ܪܐ. ܕܡ̣ܢ ܐܠܗܐ ܡܩܕܡܝ̣ܢ ܡܬܚܡܝ̣ܢ ܚܝ̈ܐ ܕܒܢܝ̈ܢܫܐ. ܬܘܚܡܐ ܠܐ ܡܬܗܦܟܢܐ ܘܠܐ ܡܫܬܚܠܦܢܐ. ܐܟܡܐ ܕܡܘܕܝܢ ܡܫܠܡܢ̈ܐ. ܘܐ̱ܚܪܬܐ ܗ̇ܝ ܕܐܡ̇ܪܐ. ܕܡ̣ܢ ܕܢܚܐ ܡܠܘܫܢܝܐ܇ ܘܓܕܐ ܟܘܟܒܢܝܐ ܐܘܟܝܬ ܚܠܩܐ. ܡܬܬܚܡܝ̣ܢ ܚܝ̈ܐ ܕܒܢܝ̈ܢܫܐ. ܡܢܗ ܕܫܘܪܝ ܡܘܠܕܗܘܢ. ܐܟܡܐ ܕܣ̇ܪܒܝ̣ܢ ܐܣܛܪ̈ܘܠܘܓܘ. ܘܗ̇ܝ ܕܬܪܬܝܢ ܬܘܒ ܠܬܪܬܝܢ ܬܪ̈ܥܝܢ ܐܬܦܠܓܬ݀. ܚܕܐ ܡ̇ܢ ܐܪܐܛܝܩܝܬܐ ܕܐܡ̇ܪܐ. ܕܒܣܘܩܒܠܐ ܘܟܘܝܢܐ. ܘܓܕܫܐ ܠܐ ܡܬܡܠܚܢܐ ܡ̇ܝܬܝ̣ܢ ܒܢܝ̈ܢܫܐ ܕܠܐ ܒܥܕܢܗܘܢ. ܘܐ̱ܚܪܬܐ ܐܪܬܕܘܟܣܝܬܐ ܕܐܡ̇ܪܐ. ܕܐܦܢ ܠܐ ܡܩܕܡܝ̣ܢ ܡܬܚܡܝ̣ܢ ܚܝ̈ܐ ܕܒܢܝ̈ܢܫܐ. ܒܪܡ ܕܝܢ ܠܘ ܕܠܐ ܒܥܕܢܗ ܡ̇ܐܬ ܒܪܢܫܐ. ܐܦܠܐ ܒܠܥܕ ܦܘܩܕܢܗ ܘܝ̣ܕܥܬܗ ܕܐܠܗܐ. ܘܗܕܐ ܗ̱ܝ ܬܪܥܝ̣ܬܐ ܕܡܠܦܢ̈ܐ ܒܚܝ̣ܪ̈ܐ ܕܥܕܬܐ ܩܕܝܫܬܐ. ܘܙܕܩ ܠܡܕܥ ܕܟܕ ܐܡܪܝܢܢ ܕܒܥܕܢܗ ܡ̇ܐܬ ܟܠ ܒܪܢܫܐ. ܠܘ ܒܙܢܐ ܕܨܒܪܝ̣ܢ ܡܫܠܡܢ̈ܐ ܘܣ̇ܪܒܝܢ ܐܣܛܪ̈ܘܠܘܓܘ ܐܡܪܝܢܢ. ܟܐܡܬ݀ ܕܠܟܠ ܒܪܢܫܐ. ܥܕܢܐ ܐܝܬ ܡܬܚܡܐ ܕܠܐ ܡܨܐ ܕܢܡܘܬ ܐܠܐ ܒܗ ܕܝ̣ܠܢܐܝܬ. ܐܠܐ ܕܒܥܕܢܐ ܐܝܢܐ ܕܒܗ ܝ̇ܕܥ ܐܠܗܐ ܕܦܩܚ ܠܗ ܠܒܪܢܫܐ ܕܢܡܘܬ ܘܠܐ ܢܚܐ. ܦ̇ܩܕ ܠܗ ܠܡܠܐܟ ܡܘܬܐ. ܒܪܡܙܐ ܟܣܝܐ. ܘܦܪܫ ܠܗ̇ ܠܢܦܫܐ ܡ̣ܢ ܦܓܪܐ. ܒܟܠ ܙܢܐ ܐܝܢܐ ܕܗ̣ܘ ܡܘܬܐ ܟܝܢܝܐ ܐܘ ܓܕܫܢܝܐ. ܘܠܗ ܠܗܢܐ ܢܝܫܐ ܫܘܕܥܬ݀ ܐܢ̱ܬܬܐ ܗ̇ܝ ܪܕܝ̣ܬܐ ܕܡ̣ܢ ܬܩܘܥ. ܟܕ ܡܦܝ̣ܣܐ ܠܗ ܠܡܠܟܐ ܕܘܝܕ. ܡܛܠ ܐܒܝܫܠܘܡ ܒܪܗ ܘܐܡ̇ܪܐ ܠܗ. ܕܐܝܟ ܡܝ̈ܐ ܚܢܢ ܕܡܬܐܫܕܝܢ ܒܐܪܥܐ ܘܠܐ ܡܬܟܢܫܝܢ. ܘܠܐ ܫܩܠ ܐܠܗܐ ܢܦܫܐ܆ ܥܕܡܐ ܕܡܬܚܫܒ ܡܚܫܒܬܐ ܕܠܐ ܢܛܥܐ ܡܢܗ ܐ̱ܢܫ. ܘܒܝܕ ܦܘܠܓܐ ܗܢܐ ܐܬܢܗܪ ܠܢ ܫܦܝܪ ܕܐܪܒܥ ܐܢܝܢ ܬܪ̈ܥܝܬܐ ܕܡܛܠ ܩܨܐ. ܚܕܐ ܡ̇ܢ ܒܝܬܝܬܐ ܘܕܝܠܢ. ܘܬܠܬ ܣܩܘܒ̈ܠܝܬܐ ܘܕܥܠܝܢ. ܘܡܛܠ ܗܕܐ ܐܠܨܐ ܠܢ. ܕܠܟܠ ܚܕܐ ܒܦܣܘܩܐ ܕܝ̣ܠܢܝܐ ܢܣܥܘܪ.

 

 

 

 

 

ܦܣܘܩܐ ܩܕܡܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠܗ̇ܝ ܕܒܥܕܢܗ ܡ̇ܐܬ ܟܠ ܒܪܢܫܐ ܒܦܘܩܕܢܗ ܕܐܠܗܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ. ܟܕ ܩܕܝ̣ܡܘܬ ܝ̣ܕܥܬܐ ܩܢܐ ܕܟܠܗܝܢ ܗܠܝܢ ܕܥܬܝ̈ܕܢ ܠܡܗܘܐ. ܘܛܒܐ ܗ̱ܘ ܒܟܝܢܐ. ܘܚܟܝܡܐ ܗ̱ܘ. ܘܡܨܐ ܚܝܠܐ. ܡ̣ܢ ܐܠܨ̈ܬܐ ܕܟܕ ܝ̇ܕܥ ܕܚܝ̈ܐ ܛܒ ܡ̣ܢ ܡܘܬܐ ܦܩܚܝ̣ܢ ܠܒܪܢܫܐ ܡܚܐ ܠܗ. ܘܟܕ ܝܕܥ ܕܡܘܬܐ ܛܒ ܡ̣ܢ ܚܝ̈ܐ ܦܩܚ ܠܗ ܡܡܝ̣ܬ ܠܗ. ܒܗ̇ܝ ܕܐܢ ܟܕ ܡܘܬܐ ܦܩܚ ܠܗ ܠܐ ܢܡܝ̣ܬܝ̣ܘܗܝ. ܘܟܕ ܚܝ̈ܐ ܦܩܚܝ̣ܢ ܠܗ ܠܐ ܢܐܚܝܘܗܝ. ܡܫܬܟܚ ܠܗ ܕܠܐ ܩܕܡ ܝ̇ܕܥ ܗ̇ܘ ܕܥܬܝܕ ܠܡܓܕܫ ܡܢܗ. ܐܘ ܟܕ ܝܕܥ. ܐܠܐ ܠܘ ܛܒܐ ܗ̱ܘ. ܘܡܛܠܗܕܐ ܠܐ ܡܫܟܢ ܗ̇ܝ ܕܦܩܚܐ ܘܥܕܪܐ. ܐܘ ܟܕ ܛܒܐ ܗ̱ܘ. ܐܠܐ ܠܘ ܚܟܝܡܐ ܗ̱ܘ. ܒܕܠܐ ܦܪܫ ܒܝܬ ܗ̇ܝ ܕܥܕܪܐ ܠܗ̇ܝ ܕܠܐ ܥܕܪܐ. ܐܘ ܟܕ ܚܟܝܡܐ ܗ̱ܘ ܘܦܪܫ. ܐܠܐ ܠܐ ܡܨܐ ܚܝܠܐ ܕܢܡܝ̣ܬ ܐܘ ܢܚܐ. ܘܟܕ ܟܠܗܘܢ ܫܟܝ̣ܪ̈ܢ. ܡܬܟܢܫܐ ܕܐܠܨܐܝܬ ܒܥܕܢܐ ܕܦܩܚ ܠܗ ܠܒܪܢܫܐ ܕܢܡܘܬ ܡ̇ܐܬ ܒܦܘܩܕܢܗ ܕܐܠܗܐ.

 

 

 

ܢܝܫܐ ܬܪܝܢܐ. ܡܛܠ ܣܗ̈ܕܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܐܢ ܐ̱ܢܫ ܢܡܚܐ ܠܐܢܫ ܘܢܡܘܬ. ܡܬܩܛܠܘ̣ ܢܬܩܛܠ. ܐܢܕܝܢ ܠܐ ܗ̣ܘܐ ܒܨܒܝܢܗ ܡܚܝܗܝ. ܐܠܐ ܐܠܗܐ ܫܠܡܗ ܒܐܝ̈ܕܘܗܝ܆ ܘܡܚܝܗܝ ܘܡܝ̣ܬ. ܐܬܠ ܠܟ ܕܘܟܬܐ. ܐܝܟܢܐ ܕܢܥܪܘܩ ܠܬܡܢ ܗ̇ܘ ܕܩܛܠ.

 

ܣܗܕܘܬܐ ܕܬܪܬܝܢ:

 

ܡܠܬ ܗ̇ܝ ܐܢ̱ܬܬܐ ܬܩܘ̣ܥܝܬܐ ܕܐܪܬܝܬ݀ ܠܕܘܝܕ ܡܛܠ ܐܒܝܫܠܘܡ.

 

ܣܗܕܘܬܐ ܕܬܠܬ:

 

ܐܘܢܓܠܝܘܢ. ܠܐ ܬܪܬܝܢ ܨܦܪ̈ܝ̣ܢ ܡܙܕܒ̈ܢܢ ܒܐܣܪ. ܘܚܕܐ ܡܢܗܝܢ ܒܠܥܕ ܐܒܘܟܘܢ. ܠܐ ܢ̇ܦܠܐ ܥܠ ܐܪܥܐ. ܕܝܠܟܘܢ ܕܝܢ ܐܦ ܡܢ̈ܐ ܕܪܝܫܟܘܢ ܟܠܗܝܢ ܡܢ̈ܝܢ ܐܢܝܢ. ܠܐ ܗܟܢܐ ܬܕܚܠܘܢ ܡ̣ܢ ܨܦܪ̈ܐ ܣܓܝ̈ܐܐ ܡܝܬܪܝܢ ܐܢ̱ܬܘܢ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܬܪܥܝ̣ܬܐ ܣܩܘܒܠܝܬܐ ܕܗ̇ܢܘܢ ܕܐܡܪܝܢ ܕܠܘ ܒܥܕܢܗ ܡ̇ܐܬ ܟܠ ܒܪܢܫܐ. ܐܦܠܐ ܒܦܘܩܕܢܐ ܕܐܠܗܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܐܢܗܘ ܕܐܦ ܐܢ̱ܬܘܢ ܐܝܟ ܕܐܦ ܡܫܠܡܢ̈ܐ ܡܘܕܝܢ ܡܘܕܝܢ ܐܢ̱ܬܘܢ. ܕܒܥܕܢܗ ܡ̇ܐܬ ܒܪܢܫܐ ܡ̣ܢ ܐܠܗܐ. ܘܠܐ ܡܨܐ ܕܕܠܐ ܒܥܕܢܗ ܢܡܘܬ. ܐܝܟܢܐ ܐܡܪܝܢ ܐܢ̱ܬܘܢ ܕܠܘ ܫܦܝܪ ܡܫ̇ܒܚܝ̣ܢ ܡܫܠܡܢ̈ܐ. ܐܠܐ ܡܨܒܪ ܨܒܪܝ̣ܢ. ܘܐܣܛܪܘܠܘܓܘ ܡܣܪܒ ܣ̇ܪܒܝܢ. ܘܗܐ ܐܦ ܐܢ̱ܬܘܢ ܥܕܢܐ ܡܬܚܡܐ ܘܩܨܐ ܝ̣ܕܝ̣ܥܐ ܡܥܠܝܢ ܐܢ̱ܬܘܢ. ܐܟܡܐ ܕܐܦ ܗ̇ܢܘܢ ܐܥܠ̣ܘ.

 

ܣܥܝܐ ܬܪܝܢܐ:

 

ܐܡܪܝܢ ܐܢܗܘ ܕܟܠܡܕܡ ܒܒܛܝ̣ܠܘܬܐ ܐܠܗܝܬܐ ܡܣܬܥܪ ܐܝܟܢܐ ܐܡܪܝܢ ܐܢ̱ܬܘܢ ܕܣܘܥܪ̈ܢܐ ܣܓܝ̈ܐܐ ܒܝܕ ܡܫܬܒܩܢܘܬܐ ܕܡ̣ܢ ܐܠܗܐ ܡܫܬܡܫܝ̣ܢ.

 

ܣܥܝܐ ܬܠܝܬܝܐ:

 

ܐܡܪܝܢ ܕܣܗܕܘܬܐ ܗ̇ܝ ܕܡ̣ܢ ܐܘܪܝܬܐ ܡܫܘܕܥܐ. ܕܩܛܘܠܐ ܐܝܢܐ ܕܒܨܒܝܢܗ ܩܛܠ. ܠܘ ܐܠܗܐ ܐܫܠܡܗ ܠܩܛܝ̣ܠܐ ܒܐܝ̈ܕܘܗܝ ܕܢܩܛܠܝܘܗܝ. ܘܐܝܟܢܐ ܐܡܪܝܢ ܐܢ̱ܬܘܢ. ܕܡ̣ܢ ܐܠܗܐ ܡܫܬܠܡ ܟܠ ܒܪܢܫܐ ܠܡܡܬ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܟܢܝ̣ܫܐܝܬ

 

ܐܡܪܝܢ ܕܟܬܒ̈ܐ ܣ̇ܗܕܝ̣ܢ. ܕܐܠܗܐ ܡܘܬܐ ܠܐ ܥܒܕ. ܘܠܐ ܨܒܐ ܒܡܘܬܗ ܕܚܛܝܐ. ܘܒܝܫܬܐ ܠܐ ܒܪܐ. ܐܦܠܐ ܥܘܠ. ܘܐܝܟܢܐ ܐܢ̱ܬܘܢ ܐܡܪܝܢ ܐܢ̱ܬܘܢ. ܕܐܠܗܐ ܡܡܝ̣ܬ ܠܒܢܝ̈ܢܫܐ. ܘܐܝ̇ܕܐ ܒܝܫܬܐ ܐܝܬ ܕܒܝܫܐ ܡ̣ܢ ܡܘܬܐ. ܘܐܡܪܝܢ ܐܢ̱ܬܘܢ ܬܘܒ ܕܡܫܠܡ ܠܒܪܢܫܐ ܛܠܝ̣ܡܐ ܒܐܝ̈ܕܝ ܛܠܘܡܐ ܕܢܒܐܫ ܠܗ ܘܢܩܛܠܝ̣ܘܗܝ. ܘܐܝܟܢܐ ܠܘ ܥܘܠܐ ܗ̱ܘ ܗܢܐ ܓܠܝܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܗܕܐ ܕܐܬܩܕܡܬ݀. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܩܕܡܢܢ ܚܘܝ̣ܢܢ. ܕܒܐܝܢܐ ܙܢܐ ܐܡܪܝܢܢ ܚܢܢ. ܕܒܥܕܢܗ ܡ̇ܐܬ ܒܪܢܫܐ. ܘܒܐܝܢܐ ܙܢܐ ܐܡܪܝܢ ܡܫܠܡܢ̈ܐ. ܘܒܐܝܢܐ ܙܢܐ ܐܣܛܪܘܠܘܓܘ. ܘܦܘܪܫܢܐ ܕܒܝܢܬ ܙܢܝ̈ܐ ܗܠܝܢ ܕܛܒ ܓܠܐܷ ܠܗ̇ܢܘܢ ܕܡܬܒܝܢܝ̣ܢ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܐܦ ܗ̣ܝ ܡܫܬܒܩܢܘܬܐ ܕܡ̣ܢ ܐܠܗܐ. ܡܢܗ̇ ܕܒܛܝ̣ܠܘܬܐ ܐܠܗܝܬܐ ܡܣܬܥܪܐ. ܘܡ̣ܢ ܗܪܟܐ ܡܬܟܢܫܐ ܕܟܠܡܕܡ ܒܒܛܝ̣ܠܘܬܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܩܕܡܢܢ ܚܘܝ̣ܢܢ. ܕܟܠܡܕܡ ܕܡ̣ܢ ܐܠܗܐ ܡܣܬܥܪ ܒܐܝ̈ܕܝܢ. ܐܘ ܒܡܨܥܝܘܬ ܚܐܪܘܬܢ ܘܨܒܝܢܢ ܡܣܬܥܪ. ܐܘ ܠܘ ܒܡܨܥܝܘܬ ܚܐܪܘܬܢ. ܘܐܠܗܐ ܫܘܒܚܐ ܠܛܝܒܘܬܗ. ܠܬܪ̈ܝܗܘܢ ܙܢܝ̈ܐ ܗܠܝܢ. ܒܗ ܒܦܬܓܡܐ ܗ̇ܘ ܫܘܕܥ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗ̈ܕܘܬܗܘܢ ܟܢܝܫܐܝܬ

 

ܐܡܪܝܢܢ ܕܡܘܬܐ ܗ̇ܘ ܕܐܠܗܐ ܠܐ ܒܪܝܗܝ ܐܦܠܐ ܥܒܕܗ. ܠܘ ܡܘܬܐ ܗܢܐ ܡܬܪܓܫܢܐ ܐܝܬܘܗܝ. ܐܠܐ ܡܘܬܐ ܡܬܝܕܥܢܐ ܕܚܛܝܬܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܗ̣ܘ ܢܒܝܐ ܐܘܣܦ ܐܡ̣ܪ. ܕܢܬܦܢܐ ܡ̣ܢ ܐܘܪܚܗ ܒܝܫܬܐ ܘܢܚܐ. ܘܕܡܘܬܐ ܡܬܪܓܫܢܐ ܠܘ ܒܝܫܬܐ ܗ̱ܘ. ܝ̣ܕܝ̣ܥܐ ܡ̣ܢ ܬܪܬܝܢ. ܚܕܐ ܡ̇ܢ܆ ܕܡ̣ܢ ܒܝ̈ܫܬܐ ܣܓܝ̈ܐܬܐ ܡܢܝ̣ܚ ܠܒܪܢܫܐ. ܘܕܬܪܬܝܢ ܕܝܢ܆ ܡ̣ܢ ܗ̇ܝ ܕܪ̈ܚܡܐ ܩܪܝܗܝ ܕܘܝܕ ܟܕ ܐܡ̇ܪ. ܡܛܠ ܕܛܒܝ̣̈ܢ ܪ̈ܚܡܝܟ ܡ̣ܢ ܚܝ̈ܐ. ܘܠܘܩܒܠ ܗ̇ܝ ܕܐܡ̣ܪܘ ܕܒܛܠܘ̣ܡܝܐ ܡܬܩܛܠܝܢ ܣܓܝ̈ܐܐ. ܐܡܪܝܢܢ ܕܠܘ ܟܠܡܕܡ ܕܠܐ ܡܕܪܟܝ̣ܢܢ ܥܠܬܗ܆ ܕܠܐ ܥܠܬܐ ܙܕܩ ܕܢܗܘܐ. ܒܕܓܘܢ ܡܨܝܐ ܕܠܘ ܛܠܝ̣ܡܐ ܗ̱ܘ ܗ̇ܘ ܕܡܢܢ ܛܠܝ̣ܡܐ ܡܣܬܒܪ.

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܗ̇ܝ ܕܠܐ ܡܩܕܡ ܡܬܚܡ ܡ̣ܢ ܐܠܗܐ ܩܨܗܘܢ ܕܒܢܝ̈ܢܫܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

ܐܡܪܝܢܢ ܐܢܗܘ ܕܩܕܡ ܬܚܡ ܐܠܗܐ ܩܨܐ ܕܟܠ ܒܪܢܫܐ. ܟܕ ܒܪܢܫܐ ܐ̱ܢܫ ܟܐܢܐ ܢܒܥܐ ܡ̣ܢ ܐܠܗܐ ܕܢܐܪܟܘܢ ܚܝܘ̈ܗܝ ܕܝܠܗ ܐܘ ܕܐ̱ܚܪܝܢ. ܐܘ ܡܨܐ ܐܠܗܐ ܗܝܕܝܟ ܠܡܦܢܝܘ ܫܐܠܬܗ ܕܟܐܢܐ ܗ̇ܘ܆ ܐܘ ܠܐ ܡܨܐ. ܘܐܢ ܡܨܐ܆ ܗܐ ܒܛܠܬ݀ ܠܗ̇ ܡܠܬ݀ ܬܘܚܡ ܚܝ̈ܐ ܐܘܟܝܬ ܩܨܐ. ܘܐܢ ܠܐ ܡܨܐ܆ ܡܫܬܟܚ ܠܗ ܐܠܗܐ ܕܠܘ ܟܠܗܝܢ ܡܬܡܨܝܢ̈ܝܬܐ ܡܨܐ ܗ̇ܝ ܕܫܟܝ̣ܪܐ. ܠܐ ܡܕܝܢ ܡܩܕܡ ܡܬܚܡ ܩܨܐ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܐܢܗܘ ܕܩܕܡ ܦܪܢܣ ܐܠܗܐ ܟܡܝܘܬܐ ܕܚܝ̈ܐ ܕܟܠ ܒܪܢܫ ܡ̣ܢ ܫܘܪܝܐ. ܐܘ ܣܦܩ ܗ̣ܘܐ ܕܡ̣ܢ ܒܬܪܟܢ ܢܦܪܣܝܗ̇܆ ܐܘ ܠܐ ܣ̇ܦܩ ܗ̣ܘܐ. ܘܐܢ ܣ̇ܦܩ ܗ̣ܘܐ. ܐܝܩܝ ܡܫܬܟܚܐ ܠܗ̇ ܡܩܕܡܘ̣ܬ ܡܬܚܡܘܬ ܚܝ̈ܐ܆ ܗ̇ܝ ܕܫܟܝ̣ܪܐ. ܒܗ̇ܝ ܕܐܠܗܐ ܚܟܝ̣ܡ ܒܟܠ܇ ܠܐ ܣܥܪ ܡܕܡ ܐܝܩܝ. ܘܐܢ ܠܐ ܣܦܩ ܗ̣ܘܐ ܕܒܬܪܟܢ ܢܦܪܣܝܗ̇. ܡܫܬܟܚ ܠܗ ܕܡ̣ܢ ܣܦܩܘܬܐ ܠܠܐ ܣܦܩܘܬܐ ܫܢܝ̣ ܘܐܫܬܓܢܝ̣܆ ܗ̇ܝ ܕܫܟܝ̣ܪܐ. ܘܡ̣ܢ ܗܠܝܢ ܡܫܬܪܪܐ ܕܠܐ ܡܩܕܡܝ̣ܢ ܡܬܚܡܝ̣ܢ ܚܝ̈ܐ ܐ̱ܢܫܝ̈ܐ. ܐܠܐ ܟܠ ܐܡܬܝ ܕܨܒܐ ܗ̇ܘ ܕܡܡܝ̣ܬ ܐܦ ܡܚܐ. ܡ̇ܐܬ ܒܪܢܫܐ. ܘܟܕ ܨܒ̇ܐ ܡܓܪ. ܘܟܕ ܨܒ̇ܐ ܡܟܪܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܒܐܘܪܝܬܐ. ܟܕ ܢܦܬܚ ܓܒܪܐ ܓܘܒܐ. ܐܘ ܢܚܦܘܪ ܓܒܪܐ ܒܐܪܐ ܘܠܐ ܢܟܣܐ ܐܢܘܢ. ܘܢܦܠ ܬܡܢ ܬܘܪܐ. ܐܘ ܚܡܪܐ. ܡܪܗ ܕܓܘܒܐ ܢܦܪܘܥ ܟܣܦܐ ܠܡܪ̈ܘܗܝ ܘܡܝ̣ܬܐ ܢܗܘܐ ܕܝܠܗ. ܘܐܡܪܝܢܢ ܕܗܕܐ ܓܠܝܐܝܬ ܡܚܘܝܐ. ܕܐܠܘ ܟܣܝ̣ ܐܢܘܢ ܓܒܪܐ ܠܓܘܒܐ ܐܘ ܠܒܐܪܐ ܠܐ ܢܦܠ ܒܗܘܢ ܬܘܪܐ ܐܘ ܚܡܪܐ. ܐܦܠܐ ܡܝܬ. ܘܐܠܘ ܡܬܚܡܝ̣ܢ ܗ̣ܘܘ ܚܝ̈ܐ. ܐܝܟܢܐ ܠܐ ܡܝܬܝ̣ܢ ܗ̣ܘܘ. ܘܐܢܗܘ ܕܡ̣ܢ ܐܢܢܩܝ ܡܝܬܝ̣ܢ ܗ̣ܘܘ. ܘܐܦܢ ܠܘ ܒܓܘܒܐ ܐܘ ܒܒܐܪܐ. ܐܠܐ ܒܙܢܐ ܐ̱ܚܪܢܐ ܕܡܘܬܐ. ܡܛܠܡܢܐ ܡܬܛܠܡ ܡܪܗ ܕܓܘܒܐ ܐܘ ܕܒܐܪܐ ܟܕ ܡܬܚܣܪ ܛܝ̣ܡܝ ܗ̇ܘ ܕܡ̣ܢ ܐܠܨ̈ܬܐ ܥܬܝ̣ܕ ܗ̣ܘܐ ܕܢܡܘܬ.

 

ܣܗܕܘܬܐ ܕܬܪܬܝܢ:

 

ܒܗ̇ ܟܕ ܒܗ̇. ܘܢܐܡܪܘܢ ܣܦܪ̈ܐ ܠܥܡܐ. ܡܢܘ ܓܒܪܐ ܕܒܢܐ ܒܝܬܐ ܚܕܬܐ ܘܠܐ ܚܕܬܗ. ܢܗܦܘܟ ܢܐܙܠ ܠܒܝܬܗ ܕܠܡܐ ܢܬܩܛܠ ܒܩܪܒܐ. ܘܓܒܪܐ ܐ̱ܚܪܢܐ ܢܚܕܬܝ̣ܘܗܝ. ܘܡܢܘ ܓܒܪܐ ܕܢܨܒ ܟܪܡܐ ܘܠܐ ܥܨܪ ܡܢܗ. ܢܗܦܘܟ ܢܐܙܠ ܠܒܝܬܗ. ܘܠܡܐ ܢܬܩܛܠ ܒܩܪܒܐ. ܘܓܒܪܐ ܐ̱ܚܪܢܐ ܢܥܨܪܝ̣ܘܗܝ. ܘܡܢܘ ܓܒܪܐ ܕܡܟܪ ܐܢ̱ܬܬܐ ܘܠܐ ܢܣܒܗ̇. ܢܗܦܘܟ ܢܐܙܠ ܠܒܝܬܗ. ܕܠܡܐ ܢܬܩܛܠ ܒܩܪܒܐ. ܘܓܒܪܐ ܐ̱ܚܪܢܐ ܢܣܒܝܗ̇. ܒܕܓܘܢ ܐܡܪܝܢܢ. ܐܠܘ ܡܩܕܡ ܗ̣ܘܐ ܘܡܬܚܡ ܩܨܐ ܕܗܠܝܢ ܒܢܝ̈ܢܫܐ. ܡܢܐ ܡܘܬܪܐ ܗܘܬ݀ ܠܗܘܢ ܗ̇ܝ ܕܢܬܒܘܢ ܒܒܝܬܗܘܢ ܘܠܐ ܢܐܙܠ̱ܘܢ ܒܩܪܒܐ. ܐܘ ܡܢܐ ܬܘܒ ܡܣܓܦܐ ܗܘܬ݀ ܠܗܘܢ ܡܐܙܠܬܗܘܢ ܕܠܩܪܒܐ.

 

ܣܗܕܘܬܐ ܕܬܠܬ:

 

ܒܗ̇ ܟܕ ܒܗ̇. ܘܡܐ ܕܒܢܐ ܐܢ̱ܬ ܒܝܬܐ ܚܕܬܐ. ܥܒܕ ܬܝܟ̈ܐ ܠܐܓܪܟ. ܕܠܐ ܢܦܠ ܡܢܗ ܐ̱ܢܫܐ ܘܢܗܘܐ ܕܡܐ ܒܒܝܬܟ. ܘܐܡܪܝܢܢ ܕܐܢܗܘܢ ܕܡܬܚܡ ܩܨܐ. ܐܝܟܢܐ ܡܨܐ ܠܡܟܠܐ ܬܝܟܐ ܡ̣ܢ ܡܘܬܐ. ܐܘ ܟܕ ܠܐ ܢܗܘܐ܆ ܥܠܬܐ ܡܨܐ ܠܡܗܘܐ ܕܡܘܬܐ.

 

ܣܗܕܘܬܐ ܕܐܪܒܥ:

 

ܒܗ̇ ܟܕ ܒܗ̇. ܛܝܒܘ ܠܟܘܢ ܩܘܪ̈ܝܐ ܠܒܝܬܓܘܣܐ ܕܢܗܘ̈ܝܢ ܠܟܘܢ. ܕܢܥܪܘܩ ܠܬܡܢ ܩܛܘܠܐ ܐܝܢܐ ܕܢܩܛܘܠ ܢܦܫܐ ܒܛܘܥܝܝ. ܘܗܘ̈ܝܢ ܠܟܘܢ ܗܠܝܢ ܩܘܪ̈ܝܐ ܠܒܝܬܓܘܣܐ. ܡ̣ܢ ܬܒܥ ܥܝܪܬܐ ܕܕܡܐ. ܘܠܐ ܢܬܩܛܠ ܩܛܘܠܐ. ܘܐܡܪܝܢܢ ܐܢܗܘ ܕܩܕܝ̣ܡ ܚܪܝ̣ܩ ܩܨܐ. ܡܢܐ ܡܘܬܪ ܒܝܬ ܓܘܣܐ ܕܩܛܘܠܐ ܒܗ̇ܢܝܢ ܩܘܪ̈ܝܐ. ܐܘ ܡܣܓܦ ܠܗ ܠܐ ܒܝܬܓܘܣܗ ܕܒܗܝܢ.

 

ܣܗܕܘܬܐ ܕܚܡܫ:

 

ܗ̇ܝ ܕܐܡ̣ܪ ܕܘܝܕ. ܐܘܣܦܬ ܝܘ̈ܡܬܐ ܥܠ ܝܘ̈ܡܬܗ ܕܡܠܟܐ. ܘܗ̇ܝ ܕܠܐ ܬܣܩܢܝ ܒܦܠܓܘܬ ܝܘ̈ܡܝ. ܘܡܠܘ̈ܗܝ ܕܫܠܝܡܘܢ ܕܐܡ̣ܪ. ܠܡ̈ܠܐ ܕܝܢ ܕܝܠܝ ܛܪ ܒܠܒܟ. ܐܝܟܢܐ ܕܢܘܓܪܐ ܕܙܒܢܐ ܘܫܢܝ̈ܐ ܕܚܝ̈ܐ ܢܘܣ̈ܦܢ ܠܟ. ܘܩܒܠ ܡܠܝ̈ ܘܢܣܓ̈ܝܢ ܠܟ ܫܢܝ̈ܐ ܕܚܝ̈ܐ. ܘܟܕ ܬܛܪ ܢܡܘܣܐ ܙܒܢܐ ܣܓܝ̈ܐܐ ܬܚܐ. ܘܕܐܝܟ ܗܠܝܢ ܬܘܒ ܗ̇ܝ ܕܝܩܪ ܠܐܒܘܟ ܘܠܐܡܟ. ܐܝܟܢܐ ܕܢܐܪܟܘܢ ܚܝܝ̈ܟ ܥܠ ܐܪܥܐ. ܒܕܓܘܢ ܐܡܪܝܢܢ ܐܢܗܘܢ ܕܡܬܚܡܐ ܗ̱ܘ ܩܨܐ. ܐܝܟܢܐ ܡܨ̈ܝܢ ܠܡܫܪܘ ܡ̈ܠܐ ܗܠܝܢ.

 

ܣܗܕܘܬܐ ܕܫܬ:

 

ܐܫܥܝܐ. ܘܗ̣ܘܐ ܦܬܓܡܗ ܕܡܪܝܐ ܥܠ ܐܫܥܝܐ ܢܒܝܐ ܠܡܐܡܪ. ܙܠ ܐܡ̣ܪ ܠܚܙܩܝܐ ܡܠܟܐ ܕܝܗܘܕܐ. ܗܟܢܐ ܐܡ̇ܪ ܡܪܝܐ ܐܠܗܗ ܕܕܘܝܕ ܐܒܘܟ. ܫܡܥܬ ܨܠܘܬܟ. ܘܚܙܝܬ ܕܡܥܝ̈ܟ. ܗܐ ܡܘܣܦ ܐ̱ܢܐ ܥܠ ܝܘ̈ܡܬܟ ܚܡܫܥܣܪ̈ܐ ܫܢܝ̈ܢ. ܘܡ̣ܢ ܐܝܕܘ̈ܗܝ ܕܡܠܟܐ ܕܐܬܘܪ ܐܦܨܝܟ ܘܠܡܕܝܢ̱ܬܐ ܗܕܐ. ܒܕܓܘܢ ܐܡܪܝܢܢ ܐܠܘ ܡܩܕܡ ܡܬܚܡ ܗ̣ܘܐ ܩܨܐ ܕܚܝܘ̈ܗܝ ܕܚܙܩܝܐ ܡܠܟܐ ܗܢܐ. ܐܝܟܢܐ ܫܢܝ̈ܐ ܗܠܝܢ ܡܬܬܘܣ̈ܦܢ ܥܠ ܝܘ̈ܡܬܗ.

 

ܣܗܕܘܬܐ ܕܫܒܥ:

 

ܐܪܡܝܐ. ܐܢ ܡ̣ܢ ܫܠܝܐ ܐܡܪ ܥܠ ܥܡܐ ܘܥܠ ܡܠܟܘܬܗ. ܠܡܥܪܩ ܘܠܡܣܬܪ ܘܠܡܣܚܦܘ ܘܠܡܘܒܕܘ. ܘܢܬܘܒ ܥܡܐ ܗ̇ܘ ܡ̣ܢ ܒܝܫܬܗ. ܐܗܦܟ ܡܢܗ ܒܝܫܬܐ ܕܐܬܚܫܒܬ ܠܡܥܒܕ ܠܗ. ܒܕܓܘܢ ܐܡܪܝܢܢ ܐܢ ܡܬܚܡܝ̣ܢ ܗ̣ܘܘ ܚܝ̈ܐ ܕܥܡܐ ܗ̇ܘ. ܐܝܟܢܐ ܟܕ ܬܐܒ ܗ̣ܘܐ ܡܨܐ ܗ̣ܘܐ ܠܡܚܐ ܒܬܪ ܕܚܪܝ̣ܩ ̣ܗܘܐ ܥܠܘܗܝ ܡ̣ܢ ܐܠܗܐ ܕܥܬܝܕ ܠܡܡܬ ܘܠܡܬܥܩܪܘ ܘܠܡܣܬܚܦܘ ܘܠܡܐܒܕ ܒܙܒܢܐ ܡܕܡ ܡܬܚܡܐ.

 

 

 

 

 

ܦܣܘܩܐ ܚܡܝܫܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܬܪܥܝܬܐ ܣܩܘܒܠܝܬܐ ܕܗ̇ܢܘܢ ܕܡܬܚܡܘܬ ܩܨܐ ܡܘܕܝܢ. ܘܒܗ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܗܘܢ ܚܘܫܒܝܐ

 

ܐܡܪܝܢ ܓܝܪ ܕܐܢ̱ܬܘܢ ܡܘܕܝܢ ܐܢ̱ܬܘܢ ܘܡܫܪܪܝ̣ܢ ܐܢ̱ܬܘܢ ܒܝܕ ܡܚܘܝܢ̈ܘܬܐ ܚܘܫܒܝ̈ܬܐ ܘܟܬܒܝ̈ܬܐ. ܕܠܐ ܡ̇ܐܬ ܒܪܢܫܐ ܕܠܐ ܒܥܕܢܗ. ܐܠܐ ܒܥܕܢܐ ܕܝ̇ܕܥ ܐܠܗܐ ܕܦܩܚ ܠܗ ܕܢܡܘܬ ܡ̇ܐܬ. ܒܕܓܘܢ ܐܢܗܘ ܕܩܕܡ ܝ̇ܕܥ ܐܠܗܐ ܕܦܩܚ ܠܗ ܕܢܡܘܬ ܡ̇ܐܬ. ܒܕܓܘܢ ܐܢܗܘ ܕܩܕܡ ܝ̇ܕܥ ܐܠܗܐ ܠܗ ܠܥܕܢܐ ܗ̇ܘ. ܐܝܟܢܐ ܠܘ ܡܬܚܡܐ ܙܕܩ ܕܢܗܘܐ ܗ̣ܘ ܗ̇ܘ ܥܕܢܐ. ܘܠܐ ܡܬܡܨܝܢܝ̣ܬܐ ܬܗܘܐ ܠܒܪܢܫܐ. ܗ̇ܝ ܕܡ̣ܢ ܩܕܡܘܗܝ ܐܘ ܡ̣ܢ ܒܬܪܘܗܝ ܢܡܘܬ. ܘܡܢܐ ܬܘܒ ܝܬܝܪܐ ܐܝܬܘܗܝ ܩܨܐ ܡܬܚܡܐ ܐܠܐ ܗܢܐ. ܐܘ ܕܠܡܐ ܐܡܪܝܢ ܐܢ̱ܬܘܢ. ܕܠܐ ܩܕܡ ܠܗ ܠܥܕܢܐ ܗ̇ܘ ܐܠܗܐ ܕܠܟܠ ܝܕܥ. ܗ̇ܝ ܕܟܦܘܪܘܬܐ ܗ̱ܝ ܓܠܝ̣ܬܐ. ܘܡ̣ܢ ܗܪܟܐ ܡܬܟܢܫܐ ܕܒܗ̇ ܒܡܩܕܡܘܬ ܝ̣ܕܥܬܐ ܐܠܗܝܬܐ ܡܬܚܡ ܩܨ ܟܠ ܒܪܢܫܐ. ܡܠܘܢ ܕܝܢ ܕܟܠ ܕܚܝ. ܘܠܐ ܗܟܢܐ ܒܠܚܘܕ. ܐܠܐ ܘܗ̣ܘ ܩܘܝܡܐ ܟܠܢܝܐ ܕܗܢܐ ܟܠ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܕܘܝܕ. ܐܘܕܥܝܢܝ ܡܢܝܢܐ ܕܝܘ̈ܡܝܢ. ܕܢܥܘܠ ܠܠܒܐ ܕܚܟܡܬܐ.

 

ܣܗܕܘܬܐ ܕܬܪܬܝܢ:

 

ܗ̣ܘ ܟܕ ܗ̣ܘ. ܕܗܐ ܒܡܫܘܚܬܐ ܝܗܒܬ ܝܘ̈ܡܝ. ܘܦܘܫܝ ܐܝܟ ܠܐ ܡܕܡ ܗ̣ܘ ܩܕܡܝܟ.

 

ܣܗܕܘܬܐ ܕܬܠܬ:

 

ܚܒܩܘܩ. ܡܛܠ ܕܚܙܘܐ ܠܙܒܢܗ ܗ̇ܘܐ. ܘܐܬܐ ܩܨܐ ܘܠܐ ܡܟܕܒ. ܘܐܢ ܡܘܚܪ ܠܐ ܬܬܩܛܥܝ ܠܟܘܢ.

 

ܣܗܕܘܬܐ ܕܐܪܒܥ:

 

ܚܙܩܝܐܝܠ. ܡܛܝ̣ ܩܨܐ ܥܠ ܐܪܥܐ ܕܐܝܣܪܐܝܠ. ܘܡܛܝ̣ ܣܘܦܐ ܥܠ ܐܪܒܥ ܟܢ̈ܦܝܗ̇ ܕܐܪܥܐ. ܡܟܝܠ ܡܛܝ̣ ܩܨܐ ܥܠܝܟܝ. ܘܐܫܘܕ ܥܠܝܟܝ ܪܘܓܙܝ.

 

ܣܗܕܘܬܐ ܕܚܡܫ:

 

ܡܝܟܐ. ܐܢ̱ܬ ܕܝܢ ܡܓܕܠܐ ܪܥܝܐ ܥܡܘܛܐ ܕܒܪܬ݀ ܨܗܝܘܢ ܙܒܢܟ ܡܛܝ̣.

 

ܣܗܕܘܬܐ ܕܫܬ:

 

ܕܢܝܐܝܠ. ܡܛܠ ܕܡܛܝ̣ ܩܨܐ ܠܙܒܢܗ. ܘܬܘܒ. ܘܠܡܬܒܝܢܘ ܥܕ ܥܕܢ ܩܨܐ. ܘܬܘܒ. ܘܒܥܕܢ ܩܨܐ ܢܬܟܬܫ ܥܡܗ. ܘܬܘܒ. ܘܢܛܪ ܩܘܕܫܗ. ܘܢܡܛܐ ܥܕܢ ܩܨܗ. ܘܬܘܒ. ܘܚܬܘܡ ܣܦܪܐ ܗܢܐ ܥܕ ܥܕܢ ܩܨܐ. ܘܬܘܒ. ܥܕܡܐ ܠܐܡܬܝ ܩܨܐ ܗܢܐ. ܘܬܘܒ. ܡܛܠ ܕܟܣܝܢ ܐܢܘܢ ܘܚܬܝ̣ܡܝ̣ܢ ܦܬܓܡ̈ܐ ܥܕ ܥܕܢ ܩܨܐ. ܘܬܘܒ. ܘܐܢ̱ܬ ܕܢܝܐܝܠ. ܙܠ ܠܩܨܐ ܢܘ̣ܚ. ܒܕܓܘܢ ܐܡܪܝܢ ܕܠܡܐ ܗܠܝܢ ܣܗܕ̈ܘܬܐ ܟܠܗܝܢ ܠܘ ܥܠ ܩܨܐ ܡܬܚܡܐ ܕܒܙܒܢܐ ܡܕܡ ܝ̣ܕܝ̣ܥܐ ܡܫܘ̈ܕܥܢ.

 

 

 

 

 

ܦܣܘܩܐ ܫܬܝܬܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܬܫܝܥܝܬܐ

 

ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܣܩܘܒܠܝܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪܝܐ ܕܣܥܝܗܘܢ ܚܘܫܒܝܐ

 

ܐܡܪܝܢܢ ܕܐ̱ܚܪܬܐ ܗ̱ܝ ܗ̇ܝ ܕܐܡܪܝܢܢ ܚܢܢ ܕܒܥܕܢܐ ܕܝ̇ܕܥ ܐܠܗܐ ܕܦܩܚ ܠܒܪܢܫܐ ܠܡܡܬ ܡܡܝ̣ܬ ܠܗ. ܘܐ̱ܚܪܬܐ ܗ̱ܝ ܗ̇ܝ ܕܐܡܪܝܢ ܐܢ̱ܬܘܢ. ܕܠܟܠ ܒܪܢܫܐ ܩܨܐ ܐܝܬ ܘܥܕܢܐ ܕܡ̣ܢ ܐܠܗܐ ܡܬܚܡ ܡ̣ܢ ܫܘܪܝ ܡܘܠܕܗ. ܗ̇ܘ ܕܒܗ ܥܬܝܕ ܕܢܡܘܬ ܘܠܐ ܡ̣ܢ ܩܕܡܘܗܝ ܐܦܠܐ ܡ̣ܢ ܒܬܪܘܗܝ. ܘܓܠܝܐ ܕܠܦܘ̣ܬ ܬܪܥܝ̣ܬܢ. ܠܘ ܠܐ ܡܨܐ ܐܠܗܐ ܠܡܘܣܦܘ ܥܠ ܚܝ̈ܐ ܘܠܡܒܨܪܘ ܐܟܡܐ ܕܣܗܕܝܢ ܟܬܒ̈ܐ ܩܕܝ̈ܫܐ. ܠܦܘܬ ܬܪܥܝ̣ܬܟܘܢ ܕܝܢ ܠܐ ܡܨܐ ܗ̇ܝ ܕܫܟܝܪܐ. ܘܗܟܢܐ ܬܘܒ ܐܡܪܝܢܢ. ܕܐܦܢ ܩܕܡ ܝ̇ܕܥ ܐܠܗܐ ܠܥܕܢܐ ܗ̇ܘ ܕܒܗ ܥܬܝܕ ܕܢܡܘ̣ܬ ܒܪܢܫܐ. ܐܠܐ ܗܕܐ ܡܩܕܡܘܬ ܝ̣ܕܥܬܐ. ܠܘ ܡܬܚ̈ܡܐ ܥܒܕܐ ܠܗܘܢ ܠܚܝ̈ܐ. ܒܗ̇ܝ ܕܡܨܐ ܐܠܗܐ ܕܟܕ ܢܫܦܪ ܠܗ ܒܪܢܫܐ ܐܘ ܢܒܥܐ ܡܢܗ. ܢܘܣܦ ܠܗ ܝܘ̈ܡܬܐ ܥܠ ܝܘ̈ܡܬܗ. ܐܝܟ ܕܐܡ̣ܪ ܕܘܝܕ ܕܐܘܣܦܬ ܝܘ̈ܡܬܐ ܥܠ ܝܘ̈ܡܬܗ ܕܡܠܟܐ. ܘܟܕ ܢܪܓܙܝ̣ܘܗܝ ܒܪܢܫܐ܆ ܢܒܨܪ ܝܘ̈ܡܬܐ ܕܛܠܝܘܬܗ. ܐܟܡܐ ܕܗ̣ܘ ܟܕ ܗ̣ܘ ܡܠܟܐ ܘܢܒܝܐ ܕܘܝܕ ܐܘܣܦ ܐܡ̣ܪ. ܘܡ̣ܢ ܗܠܝܢ ܝܕܝܥܐ ܕܗ̣ܝ ܡܬܡܨܝܢܘܬ ܚܝ̣ܠ ܐܠܗܐ. ܕܥܠ ܬܘܣܦܬܐ ܕܐܝܟ ܗܕܐ ܘܒܘܨܪܐ. ܠܐ ܫܒ̇ܩܐ ܠܗܘܢ ܠܚܝ̈ܐ ܐ̱ܢܫܝ̈ܐ ܕܢܬܬܚܡܘܢ.

 

 

 

ܢܝܫܐ ܬܪܝܢܐ. ܡܛܠ ܦܘ̈ܢܝܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܣܗܕܘܬܐ ܩܕܡܝܬܐ

 

ܐܡܪܝܢܢ ܕܠܘ ܗܕܐ ܐܡܪܝܢܢ ܕܠܝܬ ܡܢܝܢܐ ܕܝܘ̈ܡܬܐ ܠܚܝ̈ܐ ܐ̱ܢܫܝ̈ܐ. ܐܝܟܢܐ ܕܡ̣ܢ ܣܗܕܘܬܐ ܢܬܚܝܒ. ܐܠܐ ܐܡܪܝܢܢ. ܕܗ̣ܘ ܡܢܝ ܝܘ̈ܡܬܐ. ܠܘ ܡܬܚܡܐ ܗ̱ܘ ܡ̣ܢ ܫܘܪܝ ܡܘܠܕܐ. ܒܙܢܐ ܐܝܢܐ ܕܠܐ ܢܬܡܨܐ ܐܠܗܐ ܠܡܘܣܦܘ ܥܠܘܗܝ. ܐܘ ܠܡܒܨܪܘ ܡܢܗ. ܐܟܡܐ ܕܐܢ̱ܬܘܢ ܐܡܪܝܢ ܐܢ̱ܬܘܢ.

 

ܦܘܢܝܐ ܕܣܗܕܘܬܐ ܕܬܪܬܝܢ:

 

ܐܡܪܝܢܢ ܕܡܫܘ̣ܚܬܐ ܗܪܟܐ ܠܗ̇ܝ ܓܘܢܝܬܐ ܘܟܝܢܝܬܐ ܕܟܠܗܘܢ ܒܢܝ̈ܢܫܐ ܩ̇ܪܐ ܗ̣ܘ ܡܙܡܪܢܐ ܐܠܗܝܐ. ܠܗ̇ܝ ܕܐܦ ܒܕܘܟܬܐ ܐ̱ܚܪܬܐ ܩܪܝ̣ܚܐܝܬ ܡܚܘܐ ܠܗ̇ ܘܐܡ̇ܪ. ܕܝܘ̈ܡܝܢ ܫܢܝ̣̈ܢ ܒܗܘܢ ܫܒܥܝܢ ܫܢܝ̈ܢ. ܘܠܡܚܣܢ ܬܡܢܝܢ ܫܢܝ̈ܢ. ܘܓܠܝܐ ܕܐܦܠܐ ܗ̣ܝ ܗܕܐ ܡܫܘ̣ܚܬܐ ܡܬܚܡܬܐ ܗ̱ܝ ܠܟܠ ܒܪܢܫܐ. ܐܠܐ ܥܡ ܬܘܣܦܬܐ ܘܒܘܨܪܐ. ܠܦܘܬ ܗ̇ܘ ܡܐ ܕܨܒܝܢܐ ܐܠܗܝܐ ܬܒ̇ܥ.

 

ܦܘܢܝܐ ܕܗܠܝܢ ܐܪܒܥ ܣܗܕ̈ܘܢ ܐܟܚܕܐ:

 

ܐܡܪܝܢܢ ܕܒܟܠܗܘܢ ܦܬܓܡ̈ܐ ܗܠܝܢ ܢܒܝܝ̈ܐ ܠܘ ܠܫܘܠܡܐ ܕܚܝ̈ܐ ܡܫܘܕܥ ܩܨܐ. ܐܠܐ ܠܙܒܢܐ ܗ̇ܘ ܕܒܗ ܓܙܡܐ ܐܠܗܝܐ ܡ̣ܢ ܚܝܠܐ ܠܡܥܒܕܢܘܬܐ ܐܠܗܝܬܐ ܢܦܩ ܠܡܥܒܕܢܘܬܐ ܐܠܗܝܬܐ ܢܦ̇ܩ. ܥܠ ܗ̇ܢܘܢ ܕܠܐ ܬܝ̇ܒܝܢ. ܘܓܠܝܐ ܕܐܢܗܘ ܕܬܝ̇ܒܝܢ. ܠܘ ܠܐ ܡܨܝܐ ܕܢܥܒܪ ܡܢܗܘܢ ܩܨܐ ܕܐܝܟ ܗܢܐ. ܐܟܡܐ ܕܗ̣ܢܘܢ ܟܬܒ̈ܐ ܩܕܝ̈ܫܐ ܣܗܕܝ̣ܢ. ܡܠܘܢ ܕܝܢ ܕܐܪܡܝܐ ܕܐܡ̣ܪ ܡ̣ܢ ܦܘܡ ܡܪܝܐ. ܕܐܢ ܠܡ ܡ̣ܢ ܫܠܝܐ ܐܡܪ ܥܠ ܥܡܐ ܘܫܪܟܐ.. ܘܡ̣ܢ ܗܠܝܢ ܝ̣ܕܝ̣ܥܐ ܕܠܐ ܒܡܕܡ ܫܪ̈ܝܢ ܠܬܪܥܝܬܢ܆ ܣܗܕ̈ܘܬܐ ܗܠܝܢ. ܐܦܠܐ ܣܩܘܒܠܐܝܬ ܣܝ̣̈ܡܢ ܠܩܘܒܠܗ̇.

 

ܬܘܣܦܬܐ ܕܫܘܪܪܐ:

 

ܘܡܛܠ ܕܐܦ ܗ̇ܝ ܐ̱ܚܪܬܐ ܕܓܕ̈ܐ ܡܥܠܐ ܡܠܘ̈ܫܢܝܐ. ܘܚܠܩ̈ܐ ܓܒܠܐ ܡܘܠܕ̈ܢܝܐ. ܐ̱ܚܝܢܬܗ̇ ܗ̣ܝ ܕܗܕܐ ܕܐܣܬܬܪܬ݀. ܐܦ ܠܗ̇ ܠܘ ܕܠܐ ܣܥܘܪܘܬܐ ܙܕܩ ܠܢ ܕܢܪܦܝܗ̇. ܒܕܓܘܢ ܐܡܪܝܢܢ. ܐܢܗܘ ܕܒܕܢܚܐ ܡܠܘܫܢܝܐ ܡܬܩܕܡ ܘܡܬܬܚܡ ܩܨ ܟܠ ܒܪܢܫ. ܟܠܗܘܢ ܗ̇ܢܘܢ ܕܒܡܝ̈ܐ ܛܘ̈ܦܢܝܐ ܐܒ̣ܕܘ ܒܝܘ̈ܡܝ ܢܘܚ. ܐܪܐ ܟܝ ܒܚܕ ܙܘܕܝܘܢ ܘܡܢܬܐ ܘܦܘ̣ܕܝܬܐ ܘܬܪܝܢܝܬܐ ܘܬܠܝܬܐ ܘܫܪܟܐ ܐܬܝܠܕܘ. ܐܘ ܚܕ ܛܘܦܣܐ ܗܝ̣ܟܕܗܝܝܐ ܕܡܫܬܘܪܝܢܘܬܐ ܘܚܘܪܐ ܣܘܢܢܘܕܝܩܝܐ ܐܘ ܛܪܝܓܘܢܝܐ ܐܘ ܛܛܪܐܓܘܢܝܐ ܐܘ ܐܟܣܝܓܘܢܝܐ. ܐܘ ܕܝܐܡܛܪܘܢܝܐ ܐܘ ܐܟܣܝܓܘܢܝܐ. ܐܘ ܕܝܐܡܛܪܘܢܝܐ ܩܢܝܢ ܗ̣ܘܘ ܟܘܟ̈ܒܐ ܥܡ ܚܕ̈ܕܐ ܡܘܠܕܝ̈ܗܘܢ ܕܗܠܝܢ. ܘܡܢܘ ܢܗܝܡܢ ܠܗܕܐ. ܗ̣ܘ ܗܟܘܬ ܘܗ̇ܢܘܢ ܕܥܡ ܦܪܥܘܢ ܒܝܡܐ ܗ̇ܘ ܣܘܡܩܐ ܐܬܚܢܩܘ. ܘܟܠܗܘܢ ܗ̇ܢܘܢ ܕܥܡ ܣܢܚܪܝ̣ܒ ܒܚܕ ܠܠܝܐ ܘܒܚܕܐ ܫܥܐ. ܡ̣ܢ ܡܠܐܟܐ ܕܐܠܗܐ ܐܬܚܪܒܘ. ܗ̣ܘ ܗܟܘܬ ܘܐܡܘܪ̈ܐ ܟܠܗܘܢ ܗ̇ܢܘܢ ܕܡܘܫܐ ܘܝܫܘܥ ܒܪܢܘܢ. ܘܒܢܝ̈ ܐܝܣܪܐܝܠ ܚܪܒܘ. ܘܗ̣ܢܘܢ ܐܝܣܪ̈ܐܠܝܐ ܕܒܡܕܒܪܐ ܡܛܠ ܥܨܝܝܘܬܗܘܢ ܐܒ̣ܕܘ. ܐܘ ܐܦ ܗ̇ܢܘܢ ܫܒܥܝܢ ܐܠܦܝ̈ܢ ܕܚܪܒ ܡܠܐܟܐ ܕܐܠܗܐ ܒܝܘ̈ܡܝ ܕܘܝܕ ܡ̣ܢ ܥܡܐ ܒܝܘܡܐ ܚܕ. ܘܠܡܢܐ ܠܪܘܚܩܐ ܦܗܝܢܢ. ܪ̈ܒܘܬܐ ܗܠܝܢ ܕܒܝܘ̈ܡܬܢ ܒܚܕ ܝܘܡܐ ܒܒܠܐܢܝ ܐܬܚܪ̈ܒܝ ܒܦܘܡܐ ܕܣܝܦܐ. ܘܥܡ̈ܡܐ ܗ̇ܢܘܢ ܕܒܒܪܘܐܐ ܐܟܚܕܐ ܐܬܩܛܠܘ. ܘܗ̇ܢܘܢ ܕܒܐܬܘܪ. ܘܗ̇ܢܘܢ ܕܒܫܪܟܐ ܕܕܘܟ̈ܝܬܐ ܣܦܘ ܘܗܐ ܣܝܦܝ̣ܢ. ܒܚܕ ܝܘܡܐ ܘܫܥܬܐ ܐܘ ܡܢܬ ܫܥܬܐ ܝ̣ܠܝ̣ܕܝܢ ܗ̣ܘܘ. ܘܡ̣ܢ ܗܠܝܢ ܚܬܝ̣ܬܐܝܬ ܡܫܬܪܪܐ ܣܪܝ̣ܩܘܬ ܬܪܥܝܬܐ ܐܣܛܪܘܠܘܓܝܩܝܬܐ.

 

 

 

ܫܠܡܬ݀ ܫܬܐܣܬܐ ܬܫܝܥܝܬܐ

 

 

 

 

 

 

 

 

 

     #1 

 

 

 

 

 

ܫܬܐܣܬܐ ܥܣܝܪܝܬܐ

 

ܡܛܠ ܡܠܬܐ ܕܥܠ ܚܝܬ݀ ܡܝ̈ܬܐ ܐܘܟܝܬ ܩܝܡܬܐ ܕܦܓܪ̈ܐ. ܘܒܗ ܐܝܬ ܩܦ̈ܠܐܐ ܬܠܬܐ. ܩܦܠܐܘܢ ܩܕܡܝܐ ܡܛܠ ܡܬܬܗܘܝܢܘܬܐ ܕܗ̇ܘ ܕܐܬܠܝܬܝ. ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠܗ̇ܝ ܕܡܬܡܨܝܢܝܬܐ ܗ̱ܝ ܥܛܝ̣ܦܘܬ ܡܬܬܗܘܝܢܘܬܐ ܕܗ̇ܘ ܕܐܬܠܝܬܝ̣ ܘܒܗ ܐܝܬ ܢܝܫܐ ܚܕ ܡܛܠ ܡܚܘܝܢ̈ܘܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܕܗ̇ܘ ܕܐܝܬܘܗܝ. ܐܠܘܠܐ ܡܬܡܨܝܢܝ̣ܬܐ ܗܘܬ݀ ܠܗ ܐܝܬܘܬܐ. ܠܐ ܣܟ ܗܘܐ. ܒܕܓܘܢ ܗ̣ܝ ܗ̇ܝ ܡܬܡܨܝܢܘܬܐ܆ ܐܢ ܐܘܣܝܝܬܐ ܗ̱ܝ ܠܟܝܢܗ. ܠܐ ܙܕܩ ܕܬܫܢܐ ܡܢܗ. ܘܟܕ ܐܝܬܘܗܝ ܘܟܕ ܠܐ ܐܝܬܘܗܝ. ܟܝܢܗ ܚܝܠܐ ܡܠܝ̣ܠܐ ܐܝܬܘܗܝ. ܘܐܢ ܓܕܫܢܝܬܐ ܗ̱ܝ ܠܟܝܢܗ. ܗ̣ܝ ܡܟܢܘܬ ܩܘܒܠ ܟܝܢܗ ܠܡܬܡܨܝܢܘܬܐ ܗ̇ܝ ܓܕܫܢܝܬܐ. ܐܢ ܐܘܣܝܝܬܐ ܗ̱ܝ ܠܗ. ܠܐ ܙܕܩ ܕܬܫܢܐ ܡܢܗ. ܘܟܕ ܐܝܬܘܗܝ ܘܟܕ ܠܐ ܐܝܬܘܗܝ ܐܝܟ ܕܐܡ̣ܪܢܢ. ܘܐܢ ܓܕܫܢܝܬܐ ܗ̱ܝ. ܡ̣ܢ ܐܢܢܩܝ ܕܡܟܢܘܬܐ ܡܕܡ ܢܩܢܐ ܒܦܚܡܗ. ܘܗܟܢܐ ܗ̣ܘ ܦܘܠܓܐ ܗ̇ܘ ܩܕܡܝܐ ܥܛܦ. ܘܠܠܐ ܣܘܦ ܡܫܬܠܫܠܐ ܡܠܬܐ ܗ̇ܝ ܕܫܟܝ̣ܪܐ. ܘܫܪܝܪܐ ܗ̱ܝ ܕܐܘܣܝܝܬܐ ܗ̱ܝ ܠܗ̇ܘ ܕܐܝܬܘܗܝ ܡܬܡܨܝܢܘܬ ܐܝܬܘܬܐ. ܘܟܕ ܐܝܬܘܗܝ ܘܟܕ ܠܐ ܐܝܬܘܗܝ. ܗ̇ܘ ܕܐܝܬܘܗܝ. ܡܕܝܢ ܠܘ ܠܐ ܡܨܐ ܠܡܬܬܗܘܝܘ ܒܪܕܪܝܫ ܡ̣ܢ ܒܬܪ ܗ̇ܝ ܕܢܬܠܝܬܐ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܟܠ ܗܘܝܐ. ܡ̣ܢ ܐܠܨ̈ܬܐ ܡܟܢ ܗ̣ܘܐ ܠܡܗܘܐ ܡ̣ܢ ܩܕܡ ܕܢܗܘܐ. ܘܐܠܐ ܠܐ ܣܟ ܗܘܐ: ܗ̣ܘ ܗܟܘܬ ܘܡ̣ܢ ܒܬܪ ܕܗܘܐ ܘܐܬܠܝܬܝ̣. ܠܗ̇ ܠܡܟܢܘܬܐ ܗ̇ܝ ܙܕܩ ܠܗ ܕܢܩܢܐ. ܡܛܠ ܕܓܠܝ̣ܙܘܬܐ ܗ̇ܝ ܕܡ̣ܢ ܩܕܝ̣ܡ. ܠܐ ܒܡܕܡ ܦܪܝܫܐ ܡ̣ܢ ܓܠܝ̣ܙܘܬܐ ܗ̇ܝ ܕܒܬܪܟܢ. ܓܠܝ̈ܙܘܬܐ ܟܠܗܝܢ ܫܘ̈ܝܢ ܐܢܝܢ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܥܣܝܪܝܬܐ

 

ܡܛܠ ܬܪܥܝ̣ܬܐ ܕܗ̇ܢܘܢ ܕܠܐ ܡܬܡܨܝܢܝܬܐ ܕܝܢܝܢ ܠܥܛܝܦܘܬ  ܡܬܬܗܘܝܢܘܬܐ ܕܗ̇ܘ ܕܐܬܠܝܬܝ̣. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

 

 

ܐܡܪܝܢ ܕܡܬܡܨܝܢܘܬ ܚܝܠܐ ܐܝܬܘܬܢܝܐ. ܘܥܠ ܗ̇ܘ ܕܠܐ ܐܝܬܘܗܝ. ܟܐܡܬ݀ ܕܐܬܠܝܬܝ̣. ܐܝܟܢܐ ܡܨܝܐ ܕܬܬܩܛܪܓ. ܐܝܬܘܬܐ ܓܝܪ ܒܗ̇ܘ ܕܐܝܬܘܗܝ ܘܠܘ ܒܗ̇ܘ ܕܠܐ ܐܝܬܘܗܝ ܩܝܡܐ. ܠܐ ܡܕܝܢ ܫܪܝܪܐ ܕܢܚܪܘܩ ܗ̇ܘ ܕܠܐ ܐܝܬܘܗܝ ܡܟܢ ܠܡܬܬܗܘܝܘ ܡ̣ܢ ܕܪܝܫ.

 

ܣܥܝܐ ܬܪܝܢܐ:

 

ܐܡܪܝܢ ܐܠܘ ܡܬܡܨܝܢܝ̣ܬܐ ܗ̇ܝ ܥܛܝ̣ܦܘܬ ܡܬܬܗܘܝܢܘܬܗ ܕܗ̇ܘ ܕܐܬܠܝܬܝ̣. ܡܬܡܨܝܢܝܬܐ ܗܘܬ݀ ܐܦ ܗ̇ܝ ܕܠܗ ܠܙܒܢܐ ܗ̇ܘ ܩܕܡܝܐ ܕܒܗ ܗܘܐ ܡ̣ܢܩܕܝ̣ܡ. ܝ̇ܗܘܒܗ ܐܠܗܐ ܬܢܝܢܘܬ. ܒܕܓܘܢ ܟܕ ܢܗܘܝܘܗܝ ܐܠܗܐ ܠܙܒܢܐ ܗ̇ܘ ܩܕܡܝܐ. ܘܢܗܘܝܘܗܝ ܒܗ ܠܗ̇ܘ ܕܐܬܠܝܬܝ̣. ܗ̣ܝ ܗ̇ܝ ܡܬܬܗܘܝܢܘܬܐ ܒܙܒܢܐ ܗ̇ܘ ܩܕܡܝܐ ܘܠܘ ܒܗ̇ܘ ܬܪܝܢܐ ܗܘܝܐ. ܘܡܬܟܢܫܐ ܕܗ̇ܘ ܕܬܢܝܢܘܬ ܗܘܐ. ܠܘ ܬܢܝܢܘܬ ܗܘܐ ܗ̇ܝ ܕܫܟܝܪܐ.

 

ܣܥܝܐ ܬܠܝܬܝܐ:

 

ܐܡܪܝܢ ܕܟܕ ܡܗܘܐ ܐܠܗܐ ܠܗ̇ܘ ܕܐܬܠܝܬܝ̣. ܡܨܐ ܐܦ ܕܐ̱ܚܪܢܐ ܐܟܘܬܗ. ܕܒܟܠܡܕܡ ܠܗ ܕܡܐ ܢܗܘܐ. ܘܡ̣ܢ ܗܪܟܐ ܐܠܨܐ. ܕܚܕ ܦܚܡܐ ܫܘܝܐ ܢܗܐ ܠܬܪ̈ܝܗܘܢ. ܠܘܬ ܗ̇ܘ ܕܐܬܠܝܬܝ̣. ܒܕܓܘܢ ܐܘ ܬܪ̈ܝܗܘܢ ܢܗܘܘܢ ܗ̇ܘ ܕܐܬܠܝܬܝ̣܆ ܗ̇ܝ ܕܫܟܝ̣ܪܐ. ܒܗ̇ܝ ܕܠܚܕ ܬܪܝܢ ܥܒܕܐ. ܐܘ ܠܐ ܚܕ ܡܢܗܘܢ ܢܗܐ ܗ̇ܘ ܕܐܬܠܝܬܝ̣. ܗ̇ܝ ܕܫܪܝܪܐ ܘܡܫܪܪܐ ܠܠܐ ܡܬܡܨܝܢܘܬ ܡܬܬܗܘܝܢܘܬܐ ܕܗ̇ܘ ܕܐܬܠܝܬܝ̣. ܐܦܠܐ ܬܘܒ ܡܨܝܐ ܕܚܕ ܡܢܗܘܢ ܕܝ̣ܠܢܐܝܬ ܢܗܐ ܗ̇ܘ ܕܐܬܠܝܬܝ̣. ܣܛܪ ܡ̣ܢ ܗ̇ܘ ܐ̱ܚܪܢܐ. ܒܗ̇ܝ ܕܒܟܠ ܡܕܡ ܕܡ̈ܝܝ ܠܚܕ̈ܕܐ ܣܡ̣ܢ ܕܐܝܬܝܗܘܢ. ܘܐܢܗܘ ܕܬܐܡܪܘܢ ܕܚܕ ܡܢܗܘܢ ܕܝ̣ܠܢܐܝܬ ܐܝܬܘܗܝ ܗ̇ܘ ܕܐܬܠܝܬܝ̣. ܒܗ̇ܝ ܕܗ̣ܘ ܐܝܬܘܗܝ ܗ̇ܘ ܕܐܬܠܝܬܝ̣. ܘܗ̇ܘ ܐ̱ܚܪܢܐ ܕܡܐ ܠܗ ܐܝܬܘܗܝ ܘܠܘ ܗ̣ܘ. ܐܡܪܝܢܢ ܕܗܕܐ ܠܘ ܡܚܘܝܢܘܬܐ ܗ̱ܝ. ܐܠܐ ܥܘܦܦܗ̇ ܒܠܚܘܕ ܕܡܠܬܐ. ܐܝ̇ܕܐ ܕܠܗ̇ ܒܗ̇ ܨܒܝܢ ܐܢ̱ܬܘܢ ܕܬܫܪܪܘܢܗ̇܆ ܗ̇ܝ ܕܫܟܝ̣ܪܐ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܗ̇ܘ ܕܐܝܬܘܗܝ ܗ̣ܘܐ ܘܐܬܠܝܬܝ̣ ܟܐܡܬ݀ ܠܐ ܐܝܬܘܗܝ ܗ̣ܘܐ. ܠܘ ܒܟܠܡܕܡ ܠܐ ܐܝܬܘܗܝ. ܘܗܟܢܐ ܒܐܝܬܘܬܐ ܗܕܐ ܗܘܢܢܝܬܐ. ܐܝܬܘܬܐ ܕܡܬܡܨܝܢܘܬ ܗ̇ܘܝܐ ܕܐܦ ܗ̣ܝ ܡܬܗܘܢܢܝܬܐ ܗ̱ܝ ܡܬܩܝܡܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܠܘ ܟܠܡܕܡ ܕܗܘܐ ܥܠ ܙܒܢܐ ܣܢܝ̣ܩ ܕܢܗܘܐ. ܐܠܐ ܐܦ ܙܒܢܐ ܒܗܘܝܗ ܥܠ ܙܒܢܐ ܐ̱ܚܪܢܐ ܣܢܝ̣ܩ ܗ̣ܘܐ. ܘܗܐ ܐ̱ܚܪܢܐ ܥܠ ܐ̱ܚܪܢܐ ܘܗܟܢܐ ܠܠܐ ܣܘܦ܆ ܗ̇ܝ ܕܫܟܝ̣ܪܐ. ܘܡܛܠܗܕܐ ܠܐ ܣܢܝ̣ܩ ܐܠܗܐ ܫܘܒܚܐ ܠܛܝܒܘܬܗ ܠܘܬ ܡܗܘܝܢܘܬܐ ܕܗ̇ܘ ܕܐܬܠܝܬܝ̣܆ ܥܠ ܡܗܘܝܢܘܬܐ ܕܗ̇ܘ ܕܐܬܠܝܬܝ̣܆ ܥܠ ܡܗܘܝܢܘܬܐ ܕܙܒܢܐ ܗ̇ܘ ܩܕܡܝܐ ܕܒܗ ܐܗܘܝܗ ܡ̣ܢ ܠܩܘܕܡܝܢ. ܦܪܝ̣ܫܝܢ ܕܝܢ ܡ̣ܢ ܚܕ̈ܕܐ ܬܪ̈ܝܗܘܢ ܗܘܝ̈ܐ. ܒܗ̇ܝ ܕܗܘܝܐ ܗ̇ܘ ܩܕܡܝܐ. ܗܘܝܐ ܗ̣ܘܐ ܕܠܐ ܩܕܝ̣ܡ ܠܗ ܗܘܝܐ ܐ̱ܚܪܝܐ. ܘܗܘܝܐ ܗ̇ܘ ܬܢܝܢܐ ܗܘܝܐ ܗ̱ܘ ܒܬܪ ܗܘܝܐ ܐ̱ܚܪܢܐ ܘܡܛܠ ܗܕܐ ܟܐܢܐܝܬ ܗܘܝܐ ܗ̇ܘ ܩܕܡܝܐ ܒܪܝ̣ܬܐ ܐܘ ܡܘܠܕܐ ܡܬܩܪܐ. ܘܗܘܝܐ ܗ̇ܘ ܬܢܝܢܐ ܩܝܡܬܐ ܕܗ̇ܘ ܕܢܦܠ. ܐܘ ܚܘܕܬܐ ܕܗ̇ܘ ܕܒܠܝ̣. ܐܘ ܢܘܚܡܐ ܕܗ̇ܘ ܕܡܝܬ ܡܬܟܢܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܠܘ ܚܕ ܦܚܡܐ ܫܘܝܐ ܩܢܝܢ ܬܪ̈ܝܗܘܢ ܗܠܝܢ ܕܗܘ̣ܘ ܠܘܬ ܗ̇ܘ ܕܐܬܠܝܬܝ̣. ܘܐܦܢ ܕܡ̈ܝܝ ܠܚܕ̈ܕܐ ܐܝܬܝܗܘܢ ܒܐܣܟܡܐ ܘܕܡܘ̣ܬܐ. ܒܗ̇ܝ ܕܚܕ ܡܢܗܘܢ ܡ̣ܢ ܡܢܘ̈ܬܗ ܒܝܬܝ̈ܬܐ ܕܗ̇ܘ ܕܐܬܠܝܬܝ̣ ܪܟܒܗ ܘܐܗܘܝܗ ܐܠܗܐ. ܘܗ̇ܘ ܐ̱ܚܪܢܐ ܡ̣ܢ ܡܢܘ̈ܬܐ ܢܘܟܪ̈ܝܬܐ. ܒܕܓܘܢ ܠܘ ܒܟܠܡܕܡ ܕܡ̈ܝܝ ܠܚܕ̈ܕܐ ܐܝܬܝܗܘܢ. ܐܠܐ ܒܐܕܫܐ ܒܠܚܘܕ ܘܠܘ ܒܗܘܠܐ. ܘܠܘܩܒܠ ܡܠܬܐ ܗ̇ܝ ܕܫܟܝ̣ܪܘܬܐ ܕܟܢܫܘ ܐܡܪܝܢܢ. ܕܠܘ ܗܟܢܐ ܐܝܟ ܕܐܡ̣ܪܬܘܢ ܐܡܪܝܢܢ. ܟܐܡܬ݀ ܕܚܕ ܡܢܗܘܢ ܕܝ̣ܠܢܐܝܬ ܐܝܬܘܗܝ ܗ̇ܘ ܕܐܬܠܝܬܝ̣. ܒܗ̇ܝ ܕܗ̣ܘ ܐܝܬܘܗܝ ܗ̇ܘ ܕܐܬܠܝܬܝ̣. ܐܠܐ ܐܡܪܝܢܢ ܕܚܕ ܡܢܗܘܢ ܕܝ̣ܠܢܐܝܬ ܐܝܬܘܗܝ ܗ̇ܘ ܕܐܬܠܝܬܝ̣ ܐܬܬܗܘܝ̣. ܘܗܟܢܐ ܘܠܐ ܚܕܐ ܫܟܝ̣ܪܘܬܐ ܢܩܦܐ.

 

 

 

 

 

ܩܦܠܐܘܢ ܬܪܝܢܐ  ܕܫܬܐܣܬܐ ܥܣܝܪܝܬܐ

 

ܡܛܠ ܩܝܡܬܐ ܐܘܟܝܬ ܚܘܕܬܐ ܕܦܓܪ̈ܐ ܐ̱ܢܫܝ̈ܐ. ܘܒܗ ܐܝܬ ܦܣܘ̈ܩܐ ܬܠܬܐ. ܦܣܘܩܐ ܩܕܡܝܐ ܡܛܠ ܗ̇ܝ ܕܡ̣ܢ ܐܠܨ̈ܬܐ ܡܩܡ ܩ̇ܝܡܝܢ ܦܓܪ̈ܐ ܐ̱ܢܫܝ̈ܐ ܒܝܘܡ ܢܘܚܡܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܕܡ̣ܢ ܠܥܠ ܐܫܬܪܪ. ܕܐܠܗܐ ܫܘܒܚܐ ܠܛܝܒܘܬܗ. ܠܐ ܡܕܡ ܦܠܛ ܡ̣ܢ ܝ̣ܕܥܬܗ ܟܠܢܝܐ ܢܗܐ ܗ̇ܘ ܡܕܡ ܐܘ ܡܢܬܝܐ. ܘܐܬܚܘܝ̣ ܕܢܦܫܐ ܠܐ ܡܝܘܬܬܐ ܗ̱ܝ. ܘܐܬܚܘܝ̣ ܬܘܒ ܕܠܘ ܠܐ ܡܬܡܨܝܢܝܬܐ ܗ̱ܝ ܥܛܝ̣ܦܘܬ ܡܬܬܗܘܝܢܘܬܐ ܕܗ̇ܘ ܕܐܬܠܝܬܝ̣. ܒܕܓܘܢ ܡܢܘ̈ܬܐ ܕܦܓܪܐ ܟܕ ܠܐܣܛܘܟ̈ܣܐ ܢܫܬܪ̈ܝܢ ܘܢܙܕܪ̈ܩܢ. ܡܫܬܘܕܥܘ ܡܫܬܘܕܥ ܗ̣ܘ ܒܪܘܝܐ ܠܟܠܚܕܐ ܡܢܗܝܢ ܕܕܡܢܘ̣ ܐܝܬܝܗ̇ ܡܢܬܐ. ܘܡܨܐ ܠܡܠܚܡܘܬܗܝܢ ܒܪܕܪܝܫ ܥܡ ܚܕ̈ܕܐ. ܘܐܝܟ ܕܐܝܬܘܗܝ ܗ̣ܘܐ ܡ̣ܢܩܕܝܡ ܗ̣ܘ ܐܘܪܓܢܘܢ ܦܓܪܢܝܐ ܒܪ ܕܪܝܫ ܢܚܕܬܝ̣ܘܗܝ ܘܢܩܝ̣ܡܝ̣ܘܗܝ. ܘܡܛܠ ܕܒܚܝ̈ܐ ܬܢܢܝ̈ܐ ܢܦܫܐ ܥܡ ܦܓܪܐ ܐܟܚܕܐ ܐܬܚܝܒܘ ܐܘ ܐܙܕܕܩܘ. ܐܠܨܐܝܬ ܥܡ ܚܕ̈ܕܐ ܡ̣ܢܕܪܝܫ ܡܥܪܙܠ ܘܡܠܘܬ ܐܢܘܢ ܒܪܘܝܐ ܕܣܘܢܝܘܦܛܪܘܢܐܝܬ ܣ̇ܥܪ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ ܕܚܙܝܢܢ ܒܥܠܡܐ ܗܢܐ ܙܕܝܩܐ ܘܚܛܝܐ. ܘܚܙܝܢܢ ܕܡ̇ܐܬ ܟܠܚܕ ܡܢܗܘܢ ܒܠܥܕ ܗ̇ܝ ܕܢܬܦܪܥ ܒܥܠܡܐ ܗܢܐ ܦܘܪܥܢܐ ܕܫܘܐ ܠܗ ܐܢ ܕܛܒ ܘܐܢ ܕܒܝܫ. ܘܐܠܘܠܐ ܩܝܡܬܐ ܘܚܝ̈ܐ ܚܕ̈ܬܐ ܕܢܩܦܝ̣ܢ. ܐܝܟܢܐ ܕܒܗ ܟܠܚܕ ܢܩܕܐ ܐܓܪܐ ܕܗ̇ܘ ܡܐ ܕܣܥܝ̣ܪ ܠܗ. ܡܫܬܟܚܝܢ ܗ̣ܘܘ ܚܝ̈ܐ ܗܠܝܢ ܕܣܪܝ̣ܩܐܝܬ ܣܥܘܪ̈ܘܬܐ ܗܘܢܢ̈ܝܬܐ ܕܒܪܢܫܐ ܘܕܒܐܘܛܘܡܐܛܘܢ ܡܪܟܒ ܥܠܡܐ ܗܢܐ. ܘܟܕ ܟܠܗܝܢ ܫܟܝ̣ܪ̈ܢ ܡ̣ܢ ܒܪܘܝܐ ܚܟܝܡܐ. ܡ̣ܢ ܐܠܨ̈ܬܐ ܕܚܝ̈ܐ ܐܝܬ ܐ̱ܚܪ̈ܢܐ ܕܡ̣ܢ ܗܠܝܢ ܛܒ ܡܝܬܪܝ̣ܢ ܘܕܠܥܠܡ ܡܩܘܐ ܒܗܘܢ ܪܘܟܒܐ ܗܢܐ ܕܗܐ ܗܫܐ ܡܫܬܪܐ.

 

ܡܚܘܝܢܘܬܐ ܕܬܠܬ:

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܐܘ ܡܛܠ ܗ̇ܝ ܕܢܬܕܘܘܢ ܘܠܐ ܢܬܬܢܝ̣ܚܘܢ ܒܪܐ ܐܢܘܢ ܠܒܢܝ̈ܢܫܐ. ܐܘ ܡܛܠܗ̇ܝ ܕܠܐ ܢܬܕܘܘܢ ܘܠܐ ܢܬܬܢܝ̣ܚܘܢ ܒܪܐ ܐܢܘܢ ܠܒܢܝ̈ܢܫܐ. ܐܘ ܡܛܠ ܗܝ ܕܢܬܬܢܝ̣ܚܘܢ ܘܠܐ ܢܬܕܘܘܢ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܗܐ ܛܒܐ ܗ̱ܘ ܘܡܪܚܡܢܐ ܘܟܐܢܐ. ܘܗ̇ܘ ܕܗܟܢܐ ܗ̱ܘ ܠܐ ܡܨܝܐ ܕܥܠܬܐ ܢܗܘܐ ܕܕܘܝܘܬܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܐܦ ܟܕ ܢܬܒܪܘܢ ܠܐ ܡܬܕܘܝܢ ܗ̣ܘܘ ܐܦܠܐ ܡܬܬܢܝ̣ܚܝܢ. ܘܐܢܗܘ ܕܐܦ ܡ̣ܢ ܒܬܪ ܕܐܬܒܪܝ̣ܘ ܗܕܐ ܗ̇ܘܝܐ ܠܗܘܢ. ܐܝܩܝ ܡܫܬܟܚܐ ܒܪܝ̣ܬܗܘܢ܆ ܗ̇ܝ ܕܫܟܝ̣ܪܐ. ܫܪܝ̣ܟܐ ܡܕܝܢ ܕܗ̇ܘ ܕܬܠܬܐ ܫܪܝܪ. ܟܐܡܬ݀ ܕܡܛܠܗ̇ܝ ܕܢܬܬܢܝ̣ܚܘܢ ܒܪܐ ܐܢܘܢ ܐܠܗܐ ܠܒܢܝ̈ܢܫܐ. ܘܐܢܗܘ ܕܣܟ ܢܬܕܘܘܢ ܠܘ ܒܥܠܬ݀ ܒܪܘܝܐ ܡܬܕܘܝܢ. ܐܠܐ ܟܕ ܒܨܒܝܢܗܘܢ ܡܬܟܬܡܝ̣ܢ ܒܚܛܗ̈ܐ ܕܘܝܘܬܐ ܠܗܘܢ ܢܩܝ̣ܦܐ. ܒܕܓܘܢ ܐܡܪܝܢܢ ܕܗ̣ܘ ܗ̇ܘ ܢܝܚܐ ܕܡܛܠܬܗ ܐܬܒܪܝ̣ܘ. ܐܘ ܒܥܠܡܐ ܗܢܐ ܗܘܐ ܠܗܘܢ. ܐܘ ܒܥܠܡܐ ܕܥܬܝܕ. ܘܕܓܠܝ̣ܙ ܡ̣ܢ ܢܝܚܐ ܥܠܡܐ ܗܢܐ. ܘܕܢܝܚܘ̈ܗܝ ܠܘ ܢܝܚ̈ܐ ܐܢܘܢ ܫܪܝܪ̈ܐ. ܐܠܐ ܕܚܝܐ ܒܠܚܘܕ ܕܚܫ̈ܐ ܡ̣ܢ ܠܥܠ ܚܘܝ̣ܢܢ. ܫܪܝܟܐ ܡܕܝܢ ܕܐ̱ܚܪܢܐ ܥܠܡܐ ܐܝܬ ܗ̇ܘ ܕܥܬܝܕ ܕܒܗ ܡܩܕܝܢ ܫܘ̈ܝܝ ܠܢܝܚܐ ܢܝܚܝ̈ܗܘܢ. ܘܫܘ̈ܝܝ ܠܬܢ̈ܚܬܐ ܬܢܚ̈ܬܗܘܢ. ܘܕܩܝܡܬܐ ܠܘ ܡܕܡ ܐ̱ܚܪܝܢ ܡܫܘܕܥܐ ܓܠܝܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܡ̣ܪ ܐܠܗܐ ܒܝܕ ܡܘܫܐ. ܐܢܐ ܡܡܝ̣ܬ ܐ̱ܢܐ ܘܐܢܐ ܡܚܐ ܐ̱ܢܐ܆ ܐܢܐ ܡܚܐ ܐ̱ܢܐ. ܘܐܢܐ ܡܐܣܐ ܐ̱ܢܐ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܗܐ ܠܡܝ̈ܬܐ ܥܒ̇ܕ ܐܢ̱ܬ ܬܕܡܪ̈ܬܐ. ܘܓܢ̱ܒܪ̈ܐ ܢܩܘܡܘܢ ܘܢܘܕܘܢ ܠܟ. ܘܢܫܬܥܘܢ  ܕܒܩܒܪ̈ܐ ܛܝܒܘܬܟ.

 

ܣܗܕܘܬܐ ܕܬܠܬ:

 

ܐܫܥܝܐ. ܢܐܚܘܢ ܡܝ̣ܬܝ̈ܟ ܐܠܗܐ ܘܫܠܕܝ̈ܗܘܢ ܢܩܘ̈ܡܢ.

 

ܣܗܕܘܬܐ ܕܐܪܒܥ:

 

ܐܡ̣ܪ ܐܠܗܐ ܠܕܢܝܐܝܠ. ܙܠ ܠܩܨܐ ܢܘܚ. ܘܬܩܘܡ ܠܙܒܢܟ ܠܣܘܦ ܝܘ̈ܡܬܐ.

 

ܣܗܕܘܬܐ ܕܚܡܫ:

 

ܐܘܢܓܠܝܘܢ. ܐܝܟܢܐ ܕܐܒܐ ܡܩܝ̣ܡ ܡܝ̈ܬܐ ܘܡܚܐ ܠܗܘܢ. ܗܟܢܐ ܐܦ ܒܪܐ ܠܐܝܠܝܢ ܕܨܒ̇ܐ ܡܚܐ.

 

ܣܗܕܘܬܐ ܕܫܬ:

 

ܒܗ ܟܕ ܒܗ. ܐܬܝܐ ܫܥܬܐ. ܐܡܬܝ ܕܟܠܗܘܢ ܗ̇ܢܘܢ ܕܒܩܒܪ̈ܐ ܐܢܘܢ ܢܫܡܥܘܢ ܩܠܗ ܘܢܦܩܘܢ.

 

ܣܗܕܘܬܐ ܕܫܒܥ:

 

ܦܘܠܘܣ ܥܠ ܩܝܡܬܐ ܕܡܝ̈ܬܐ ܡܬܬܕܝ̣ܢ ܐ̱ܢܐ ܝܘܡܢܐ.

 

ܣܗܕܘܬܐ ܕܬܡܢܐ:

 

ܗ̣ܘ ܟܕ ܗ̣ܘ ܒܕܩܘܪ̈ܝܢܬܝܐ ܕܬܪܬܝܢ. ܒܟܠܙܒܢ ܓܝܪ ܡܝܬܘܬܗ ܕܝܫܘܥ ܒܦܓܪ̈ܝܢ ܫܩܝ̣ܠܝ̣ܢܢ. ܕܐܦ ܚܝܘ̈ܗܝ ܕܝܫܘܥ ܒܦܓܪ̈ܝܢ ܢܬܓܠܘܢ. ܐܢ ܓܝܪ ܚܝ̈ܐ ܠܡܘܬܐ ܡܫܬܠܡܝ̣ܢܢ܇ ܡܛܠ ܝܫܘܥ. ܗܟܢܐ ܐܦ ܚܝܘ̈ܗܝ ܕܝܫܘܥ ܢܬܓܠܘܢ ܒܦܓܪܢ.

 

 

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܥܣܝܪܝܬܐ

 

ܡܛܠ ܬܪܥܝ̣ܬܐ ܙܕܘܩܝܬܐ ܟܦܪܬ݀ ܒܩܝܡܬܐ ܕܦܓܪܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ ܕܗ̇ܢܘܢ ܕܒܬܪܥܝܬܐ ܗܕܐ ܐܚܝܕܝܢ. ܣܥܝܐ ܩܕܡܝܐ

 

ܐܡܪܝܢ ܕܦܓܪܐ ܟܝܢܐ ܩܢܐ ܕܚܡܝ̣ܡ ܘܪܛܝ̣ܒ. ܘܚܡܝܡܘܬܐ ܡܦܘܫܫܢܝܬܐ ܗ̱ܝ ܕܡܢܘ̈ܬܐ ܪ̈ܛܝ̣ܒܬܐ. ܒܕܓܘܢ ܡܨܝܐ ܕܡܢܘ̈ܬܐ ܠܗܓܢܝ̈ܬܐ ܕܡ̣ܢ ܐܘܣܝܐ ܕܗܕܡ̈ܐ ܕܝܬܝܪ ܪܛܝ̣ܒܝ̣ܢ ܡܬܦܘ̈ܫܫܢ. ܡܢܘ̈ܬܐ ܢܗܘ̈ܝܢ ܕܗܕܡ̈ܐ ܐ̱ܚܪ̈ܢܐ ܕܡ̣ܢ ܗ̇ܢܘܢ ܩܫܝܢ. ܒܕܓܘܢ ܒܝܘܡ ܢܘܚܡܐ ܡܢܘ̈ܬܐ ܗܠܝܢ ܥܛܪ̈ܢܝܬܐ. ܐܘ ܠܬܪ̈ܝܗܘܢ ܗܠܝܢ ܗܕܡ̈ܐ ܢܬܚܝ̈ܕܢ. ܐܘ ܠܚܕ ܡܢܗܘܢ ܕܝ̣ܠܢܐܝܬ. ܐܘ ܠܠܐ ܚܕ ܡܢܗܘܢ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܚܕܐ ܡܢܬܐ. ܐܝܟܢܐ ܠܬܪܝܢ ܗܕܡ̈ܐ ܬܗܐ ܡܢܬܐ. ܗܟܘܬ ܐܒܕܢܐ ܕܚܕ ܡ̣ܢ ܬܪ̈ܝܗܘܢ ܗܕܡ̈ܐ ܡܘܒܠ. ܫܪܝ̣ܟܐ ܡܕܝܢ ܕܗ̇ܘ ܕܬܠܬܐ ܫܪܝܪ. ܘܗܟܢܐ ܡܫܬܪܪܐ ܡܠܬܐ ܡܒܛܠܢܝ̣ܬܗ̇ ܕܩܝܡܬܐ. ܒܗ̇ܝ ܕܟܕ ܡܢܘ̈ܬܗܘܢ ܕܗܕܡ̈ܐ ܠܗܕ̈ܡܐ ܠܐ ܢܩܦܝ̣ܢ. ܠܐ ܩܝܡܝ̣ܢ. ܘܟܕ ܗܕܡ̈ܐ ܠܐ ܩܝܡܝ̣ܢ. ܐܦܠܐ ܦܓܪܐ ܕܡܢܗܘܢ ܡܪܟܒ܆ ܩ̇ܐܡ.

 

ܣܥܝܐ ܬܪܝܢܐ:

 

ܐܡܪܝܢ ܕܐܢ̱ܬܬܐ ܐܝ̇ܕܐ ܕܒܙܒܢ ܟܦܢܐ ܛܘܝܬ݀ ܝܠܕܗ̇ ܘܐܟܠܬܗ. ܡ̣ܢ ܐܢܢܩܝ ܕܡܢܘ̈ܬܐ ܕܦܓܪ ܝܠܕܗ̇. ܡܢܘ̈ܬܐ ܢܗܘ̈ܝܢ ܕܝܠܗ̇. ܡܛܠ ܕܟܠ ܬܘܪܣܝܐ ܡܕܡܐ ܙܕܩ ܕܢܬܕܡܐ ܒܡܬܬܪܣܝܢܐ. ܒܕܓܘܢ ܒܩܝܡܬܐ ܗ̇ܢܝܢ ܡܢܘ̈ܬܐ ܗܠܝܢ. ܐܢ ܠܦܓܪ ܒܪܗ̇ ܗܦ̈ܟܢ܆ ܐܒܕ ܠܗ ܦܓܪܗ̇ ܕܝܠܗ̇. ܘܐܢ ܠܦܓܪ ܕܝܠܗ̇ ܢܦܟ̈ܢ. ܐܒ̇ܕ ܠܗ ܦܓܪ ܝܠܕܗ̇. ܘܠܐ ܡܨܐ ܕܚܕܐ ܡܢܬܐ ܡܢܬܐ ܬܗܐ ܠܬܪܝܢ ܦܓܪ̈ܝܢ. ܒܕܡ̣ܢ ܠܐ ܡܬܡܨܝܢܝܬܐ ܗ̱ܝ ܫܟܝ̣ܚܘܬ ܚܕ ܓܘܫܡܐ ܒܚܕ ܙܒܢܐ ܒܬܪܬܝܢ ܕܘܟ̈ܝܢ. ܡ̣ܢ ܐܢܢܩܝ ܡܕܝܢ ܕܚܕ ܡ̣ܢ ܗܠܝܢ ܬܪܝܢ ܦܓܪ̈ܝܢ ܠܐ ܢܩܘܡ. ܘܟܕ ܚܕ ܠܐ ܢܩܘܡ. ܐܦܠܐ ܟܠܗܘܢ ܩ̇ܝܡܝܢ. ܡܛܠ ܕܫܘ̈ܝܝ ܒܟܝܢܐ ܐܢܘܢ ܟܠܗܘܢ. ܘܗܟܢܐ ܡܣܬܬܪܐ ܡܠܬ݀ ܢܘܚܡܐ.

 

ܣܥܝܐ ܬܠܝܬܝܐ:

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܟܕ ܠܐ ܢܩܝ̣ܡ ܦܓܪܐ ܡܕܡ. ܐܘ ܠܡܢܘ̈ܬܗ ܗ̇ܢܝܢ ܕܫܟܝ̈ܚܢ ܗܘܝ̈ ܠܗ ܟܕ ܥܢܕ ܡܩܝ̣ܡ. ܐܘ ܠܡܢܘ̈ܬܗ ܗ̇ܢܝܢ ܕܡ̣ܢ ܫܘܪܝ ܝ̣ܠܝ̣ܕܘܬܗ ܡܢܘ̈ܬܐ ܗܘܝ̈ ܠܗ. ܘܐܦܢ ܐܒ̣ܕ̈ܝ ܡܢܗ ܐܘ ܐܫܬܚ̈ܠܦܝ ܙܒܢ ܥܘܢܕܢܗ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܨܐ ܗܝܕܝܟ ܕܣܪܝ̣ܥܐ ܣܪܝ̣ܥܐ ܢܩܘܡ. ܘܦܫܝ̣ܓܐ ܦܫܝ̣ܓܐ. ܘܚܓܝ̣ܪܐ ܚܓܝ̣ܪܐ. ܘܟܪܝ̣ܡܐ ܟܪܝ̣ܡܐ. ܘܗܐ ܠܘ ܗܟܢܐ ܡܘܕܝܢ ܐܢ̱ܬܘܢ. ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܟܪܣܛܝܢܐ ܡܦܛܡܐ. ܟܕ ܢܟܦܘܪ ܘܢܬܒܓܪ ܘܢܡܘܬ ܘܢܬܬܘܒܠ ܠܓܗܢܐ. ܐܢܗܘܢ ܕܗ̇ܢܝܢ ܡܢܘ̈ܬܗ ܩܕ̈ܡܝܬܐ ܩܝ̈ܡܢ ܒܝܘܡ ܢܘܚܡܐ. ܡܫܬܟܚ ܠܗ ܐܠܗܐ ܕܠܡܢܘ̈ܬܗ ܗ̇ܢܝܢ ܕܠܐ ܐܫܬܘ̈ܬܦܝ ܠܟܦܘܪܘܬܐ܆ ܡܫܢܩ ܒܓܗܢܐ ܗ̇ܝ ܕܫܟܝ̣ܪܐ ܘܠܐ ܟܐܢܐ. ܘܟܕ ܬܪ̈ܝܗܘܢ ܦܫܚܘ̈ܗܝ ܕܦܘܠܓܐ ܠܐ ܫܪܝܪܝܢ. ܐܦ ܗ̇ܝ ܡܠܬ݀ ܢܘܚܡܐ ܕܥܠܝܗ̇ ܐܬܒܢܝ̣ܘ. ܘܡܢܗ̇ ܐܣܬܪܥܦܘ ܠܐ ܫܪܝܪܐ.

 

ܣܥܝܐ ܪܒܝܥܝܐ:

 

ܐܡܪܝܢ ܕܦܓܪܐ ܒܗ̇ܝ ܕܓܘܫ̈ܡܐ ܐܢܘܢ. ܥܠ ܐܬܪܐ ܣܢܝ̣ܩܝ̣ܢ ܕܢܗܘܘܢ ܒܗ ܟܕ ܡܬܢܚܡܝ̣ܢ. ܒܕܓܘܢ ܗ̣ܘ ܐܬܪܗܘܢ ܐܘ ܒܫܡܝܐ ܗܘܐ ܐܘ ܒܐܪܥܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܡܘܙ̈ܠܬܐ ܠܐ ܡܨ̈ܝܢ ܠܡܨܛܪܝܘ ܕܢܥܠܘܢ ܒܗܝܢ ܦܓܪ̈ܐ ܐ̱ܢܫܝ̈ܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܐܢ ܡ̣ܢܕܪܝܫ ܐܝܟ ܕܐܝܬܝܗܘܢ ܗ̣ܘܘ ܥܠ ܐܪܥܐ ܦܝܫܝ̣ܢ. ܘܒܗ̇ ܒܩܐܛܣܛܣܝܣ ܗ̇ܝ ܩܕܡܝܬܐ ܗܘܝܢ ܠܘ ܠܐ ܡܩܒ̈ܠܢܐ ܕܗܘܝܐ ܘܚܘܒܠܐ. ܘܡܛܠܗܕܐ ܐܠܨܐ ܠܗܘܢ. ܕܬܘܒ ܢܡܘܬܘܢ ܘܬܘܒ ܢܩܘܡܘܢ. ܘܬܘܒ ܢܢܘ̣ܡܘܢ ܘܬܘܒ ܢܬܢܚܡܘܢ. ܗܟܢܐ ܬܢܝܢܘܬ ܘܬܠܝ̣ܬܝܘܬ ܘܪܒܝ̣ܥܝܘܬ ܘܫܪܟܐ ܗ̇ܝ ܕܫܟܝ̣ܪܐ.

 

ܣܥܝܐ ܚܡܝܫܝܐ:

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ ܡܩܝ̣ܡ ܠܦܓܪ̈ܐ ܘܡܩܦ ܠܗܘܢ ܒܪܕܪܝܫ ܢܦ̈ܫܬܗܘܢ. ܐܘ ܡܛܠ ܕܢܫܢܩ ܐܢܝܢ ܒܗܘܢ. ܐܘ ܡܛܠ ܕܢܦܢܩ. ܐܘ ܡܛܠ ܕܠܐ ܢܫܢܩ ܐܦܠܐ ܢܦܢܩ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܠܐ ܦܐܝܐ ܠܛܝܒܘܬܗ ܕܛܒܐ ܐܠܗܐ. ܠܡܫܢܩܘ ܢܦܫܐ ܐܝ̇ܕܐ ܕܡ̣ܢ ܟܕܘ ܐܓܗܝܬ݀ ܡ̣ܢ ܦܓܪܐ ܡܢܬܥܢܐ ܕܩܠܝ̣ܠܘܬܗ̇. ܘܡܚܫܟܢܐ ܕܡܨܡܚܘܬܗ̇. ܗ̣ܘ ܗܟܘܬ ܘܗ̇ܘ ܕܬܪܝܢ ܠܐ ܫܪܝܪ. ܒܗ̇ܝ ܕܟܕ ܥܡ ܪ̈ܘܚܢܐ ܒܢܝ̈ ܟܝܢܗ̇ ܡܕܝܪܐ ܕܐܝܬܝܗܘܢ ܗܘ̈ܢܐ ܡܒܪ̈ܝܐ. ܝܬܝܪ ܡܠܝ̣ܠܬܐ ܗܘܝܐ ܗܢܝܐܘܬܗ̇. ܡ̣ܢ ܗܢܝܐܘܬܐ ܐܝ̇ܕܐ ܕܥܡ ܦܓܪܐ ܩܢܝܐ. ܘܗ̇ܘ ܕܬܠܬܐ ܬܘܒ ܠܐ ܫܪܝܪ. ܒܗ̇ܝ ܕܐܝܩܝ ܡܫܬܟܚܐ ܠܗ̇ ܢܩܝ̣ܦܘܬܐ ܗ̇ܝ ܬܢܝܢܝܬܐ. ܘܠܐ ܡܕܡ ܐܝܬ ܐܝܩܝ ܡ̣ܢ ܗ̇ܢܝܢ ܕܡ̣ܢ ܐܠܗܐ ܡܣܬܥܪ̈ܢ. ܘܡ̣ܢ ܗܠܝܢ ܝ̣ܕܝ̣ܥܐ ܠܐ ܡܬܡܨܝܢܘܬ ܢܩܝ̣ܦܘܬܐ ܬܢܝܢܝܬܐ. ܕܢܦܫܐ ܥܡ ܦܓܪܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ ܕܗܠܝܢ. ܣܗܕܘܬܐ ܩܕܡܝܬܐ

 

ܐܘܪܝܬܐ. ܐܢ ܒܢܡܘ̈ܣܝ ܬܗܠܟܘܢ. ܐܬܠ ܡܛܪ̈ܝܟܘܢ ܒܙܒܢܗܘܢ. ܘܐܪܥܐ ܬܬܠ ܥܱ̈ܠܠܬܗ̇. ܘܬܐܟܠܘܢ ܠܚܡܐ ܘܬܣܒܥܘܢ ܘܫܪܟܐ. ܘܐܢ ܠܐ ܬܫܡܥܘܢܢܝ ܐܦܩܘܕ ܥܠܝܟܘܢ ܬܗܪܐ ܘܓܪܒܐ ܘܩܠܦܝ̣ܬܐ. ܘܐܥܒܕ ܫܡܝ̈ܟܘܢ ܐܝܟ ܦܪܙܠܐ ܘܐܪܥܟܘܢ ܐܝܟ ܢܚܫܐ. ܐܡܪܝܢ ܐܠܘ ܥܠܡܐ ܐ̱ܚܪܢܐ ܐܝܬ ܗ̣ܘܐ. ܚܝ̈ܐ ܐ̱ܚܪ̈ܢܐ ܕܒܬܪ ܢܘܚܡܐ. ܠܘ ܦܘܪ̈ܥܢܐ ܕܥܠܡܐ ܗܢܐ ܒܠܚܘܕ ܡܫܬܘܕܐ ܗ̣ܘܐ ܐܠܗܐ ܠܢܛܪ̈ܝ ܢܣܡܘܣܗ ܘܠܥܒܪ̈ܝ ܥܠ ܢܡܘܣܐ.

 

ܣܗܕܘܬܐ ܕܬܪܬܝܢ:

 

ܐܝܘܒ. ܥܕܠܐ ܐܙܠ ܐܢ̇ܐ ܘܬܘܒ ܠܐ ܐܗܦܘܟ. ܐܡܪܝܢ ܐܠܘ ܗܘܐ ܗ̣ܘܐ ܢܘܚܡܐ. ܐܝܟܢܐ ܠܐ ܗܦܟ ܗ̣ܘܐ.

 

ܣܗܕܘܬܐ ܕܬܠܬ:

 

ܗ̣ܘ ܟܕ ܗ̣ܘ ܡܛܠ ܕܐܝܬ ܠܩܝܣܐ ܣܒܪܐ. ܡܛܠ ܕܐܢ ܡܬܦܣܩ ܬܘܒ ܡܚܠܦ. ܘܥܢܩܘ̈ܗܝ ܠܐ ܥܢ̈ܕܢ. ܘܓܒܪܐ ܕܫܟܒ ܠܐ ܩ̇ܐܡ.

 

ܣܗܕܘܬܐ ܕܐܪܒܥ:

 

ܗ̣ܘ ܟܕ ܗ̣ܘ ܐܢ ܡ̇ܐܬ ܓܒܪܐ ܕܠܡܐ ܚܝܐ.

 

ܣܗܕܘܬܐ ܕܚܡܫ:

 

ܗ̣ܘ ܟܕ ܗ̣ܘ. ܡܛܠ ܕܥܬܝܪܐ ܢܫܟܒ. ܘܬܘܒ ܠܐ ܡܘܣܦ ܠܡܩܡ.

 

ܣܗܕܘܬܐ ܕܫܬ:

 

ܫܠܝܡܘܢ. ܝܕܥܬ ܕܟܠ ܕܥܒ̣ܕ ܡܪܝܐ ܗ̣ܘ ܢܗܐ ܠܥܠܡ. ܐܡܪܝܢ ܕܡܪܝܐ ܥܒܕ ܙܘ̈ܥܝ ܡܘܙ̈ܠܬܐ. ܘܝܘ̣ܒܠ ܚܝ̈ܘܬܐ ܘܢܨ̈ܒܬܐ ܘܫܪܟܐ. ܘܟܕ ܗܠܝܢ ܠܥܠܡ ܗܘܝܢ ܩܝܡܬܐ ܐܡܬܝ ܗ̇ܘܝܐ. ܠܠܥܠܡ ܓܝܪ ܠܝܬ ܣܘܦܐ ܐܘ ܣܟܐ.

 

ܣܗܕܘܬܐ ܕܫܒܥ:

 

ܗ̣ܘ ܟܕ ܗ̣ܘ. ܚܝ̈ܐ ܝ̇ܕܥܝܢ ܕܡܝܬܝܢ. ܘܡܝ̈ܬܐ ܠܐ ܝ̇ܕܥܝܢ ܡܕܡ. ܡܛܠ ܕܐܬܛܥܝ̣ ܕܘܟܪܢܗܘܢ ܘܡܢܬܐ ܠܝܬ ܠܗܘܢ ܠܥܠܡ܆ ܒܟܠܡܐ ܕܡܬܥܒܕ ܬܚܝܬ ܫܡܝܐ.

 

ܣܗܕܘܬܐ ܕܬܡܢܐ:

 

ܗ̣ܘ ܟܕ ܗ̣ܘ. ܕܪܐ ܐܙܠ ܘܕܪܐ ܐܬܐ. ܘܐܪܥܐ ܠܥܠܡ ܩܝܡܐ.

 

ܣܗܕܘܬ ܕܬܫܥ:

 

ܦܘܠܘܣ. ܒܣܪܐ ܘܕܡܐ ܡܠܟܘܬܐ ܕܐܠܗܐ ܠܐ ܝ̇ܪܬܝܢ. ܐܡܪܝܢ ܐܢܗܘ ܕܩܝܡܬܐ ܫܪܝܪܐ. ܓܠܝܐ ܕܦܓܪ̈ܐ ܕܡ̣ܢ ܒܣܪܐ ܘܕܡܐ ܡܪܟܒܝ̣ܢ ܡܬܥܛܦܝܢ ܙܕܝ̈ܩܐ ܗ̇ܢܘܢ ܕܠܡܠܟܘܬܐ ܕܐܠܗܐ ܡܫܬܘܝܢ. ܟܐܡܬ݀ ܠܗܘܢ ܠܦܓܪ̈ܝܗܘܢ ܩܕ̈ܡܝܐ. ܘܐܢܗܘ ܕܒܣܪܐ ܘܕܡܐ ܡܠܟܘܬܐ ܕܐܠܗܐ ܠܐ ܝ̇ܪܬܝܢ. ܠܐ ܡܕܝܢ ܩܝܡܝ̣ܢ ܦܓܪ̈ܝܗܘܢ ܕܙܕܝ̈ܩܐ ܒܢܝ̈ ܡܠܟܘܬܐ. ܐܢ ܡܠܟܘܬܐ ܕܐܠܗܐ ܥܬܝ̣ܕܝܢ ܠܡܐܪܬ݀ ܗ̣ܢܘܢ ܟܐܢ̈ܐ ܘܙܕܝ̈ܩܐ.

 

ܣܗܕܘܬܐ ܕܥܣܪ:

 

ܗ̣ܘ ܟܕ ܗ̣ܘ. ܟܡܐ ܕܒܦܓܪܐ ܫܪܝܢܢ܆ ܥܢܝ̣ܕܝ̣ܢܢ ܡ̣ܢ ܡܪܢ. ܘܡܛܠ ܗܢܐ ܬܟܝ̣ܠܝ̣ܢܢ ܘܡܣܘܚܝ̣ܢܢ ܕܢܥܢܕ ܡ̣ܢ ܦܓܪܐ ܘܢܗܘܐ ܠܘܬ ܡܪܢ. ܐܡܪܝܢ ܐܢܗܘ ܕܦܓܪܐ ܓܠܙ ܠܢ ܡ̣ܢ ܗ̇ܝ ܕܢܗܘܐ ܥܡ ܡܪܢ. ܐܝܟܢܐ ܡ̣ܢܕܪܝܫ ܡܫܬܪܓܠܝ̣ܢܢ ܒܦܚܬܗ.

 

ܣܗܕܘܬܐ ܕܚܕܥܣܪ:

 

ܬܐܠܘܓܘܣ. ܐܝܟܢܐ ܕܠܡܚܣܢ ܐ̱ܢܫ܇ ܟܕ ܗ̣ܘ ܠܗ ܐܘ ܒܦܝܠܠܘܣܘܦܝܐ ܐܪܝ̣ܟܬܐ ܡܬܪܐܐ. ܘܦܣܩ ܒܩܠܝܠ ܩܠܝܠ ܠܫܦܝ̣ܪܘܬ ܛܘܗܡܗ̇ ܕܢܦܫܐ. ܘܠܢܗܝ̣ܪܘܬ ܚܙܘܗ̇. ܡ̣ܢ ܗ̇ܘ ܡܐܟܐ ܘܕܥܡ ܚܫܘܟܐ ܟܕܝܢ ܐܡܪܝܢ ܕܦܓܪܐ ܡ̇ܢ ܟܕ ܡܚܫܟܢܐ ܗ̱ܘ ܕܢܦܫܐ. ܐܝܟܢܐ ܦܐܝܐ ܠܒܪܘܝܐ ܚܟܝ̣ܡ ܒܟܠ ܘܛܒܐ ܕܒܪܕܪܝܫ ܢܥܡܛܝ̣ܗ̇ ܘܢܟܡܗܝܗ̇ ܒܗ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܥܣܝܪܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܟܦܪܬ݀ ܒܩܝܡܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝ̈ܐ ܗ̇ܢܘܢ. ܫܪܝܐ ܕܣܥܝܐ ܩܕܡܝܐ ܘܬܪܝܢܐ ܘܬܠܝܬܝܐ

 

ܐܡܪܝܢܢ ܕܠܒܪܢܫܐ ܡ̇ܢ ܬܪܝܢ ܐܢܘܢ ܙܢܝ̈ܐ ܕܗܕܡ̈ܐ. ܚܕ ܡ̇ܢ ܗܕܡ̈ܐ ܫܪܝܪ̈ܐ ܗ̇ܢܘܢ ܕܡ̣ܢ ܫܘܪܝܐ ܕܡܘܠܕܐ ܒܪܐ ܠܗܘܢ ܐܠܗܐ. ܘܡܙܩܪ ܙܩܪ ܐܢܘܢ ܒܚܕ̈ܕܐ. ܘܕܡܘ̣ܬܐ ܕܦܓܪܐ ܐ̱ܢܫܝܐ ܠܗܘܢ ܡܫܟܢ. ܘܙܢܐ ܐ̱ܚܪܢܐ ܕܗܕܡ̈ܐ ܗ̇ܢܘܢ ܠܘ ܡܪ̈ܢܝܐ. ܕܐ̱ܚܪܝܬ݀ ܡܠܐ ܒܗܘܢ ܠܐܬܪ̈ܘܬܐ ܣܦܝ̈ܩܐ ܕܒܝܢܬ ܙܩܘܪ̈ܐ ܕܗܕܡ̈ܐ ܫܪܝܪ̈ܐ. ܘܡ̣ܢ ܗܠܝܢ ܝ̣ܕܝ̣ܥܐ ܕܠܟܠ ܗܕܡܐ ܡܠܘܢ ܕܝܢ ܠܟܠ ܦܓܪܐ ܡܢܘ̈ܬܐ ܐܝܬ ܫܪܝܪ̈ܬܐ. ܗ̇ܢܝܢ ܕܠܘ ܡ̣ܢ ܬܘܪܣܝܐ ܩܢܐ ܐܢܝܢ. ܘܟܕ ܡܢܗܝܢ ܡܬܬܪܣܐ ܗܕܡܐ ܐܘ ܦܓܪܐ ܐ̱ܚܪܢܐ ܠܘ ܡܢܘ̈ܬܐ ܫܪܝܪ̈ܬܐ ܗܘ̈ܝܢ ܕܗܕܡܐ ܗ̇ܘ ܘܦܓܪܐ. ܐܠܐ ܡܢܘ̈ܬܐ ܫܪܝܪ̈ܬܐ ܡܪܟܒ ܠܗܕ̈ܡܐ ܘܦܓܪ̈ܐ ܕܗ̇ܢܘܢ ܕܡܬܢܚܡܝ̣ܢ. ܘܓܠܝܐ ܕܡܢܘ̈ܬܐ ܫܪܝܪ̈ܬܐ ܕܟܠ ܗܕܡ ܘܦܓܪ ܕܝܠܗ ܒܠܚܘܕܘܗܝ ܐܢܝܢ ܫܪܝܪ̈ܬܐ. ܘܠܗ̇ܢܘܢ ܕܡܢܗܝܢ ܡܬܬܪܣܝܢ ܠܘ ܫܪܝܪ̈ܬܐ. ܘܒܗܢܐ ܙܢܐ ܘܠܐ ܚܕܐ ܫܟܝ̣ܪܘܬܐ ܡ̣ܢ ܗ̇ܢܝܢ ܕܩܛܠܒܬܘܢ ܡܬܟܢܫܐ. ܗ̣ܘ ܗܟܘܬ ܘܟܪܣܛܝܢܐ ܡܦܛܡܐ ܕܟܦܪ ܘܐܬܒܓܪ ܘܡܝ̣ܬ. ܡ̣ܢ ܗܕܡܘ̈ܗܝ ܗ̇ܢܘܢ ܫܪܝܪ̈ܐ ܡܬܬܩܢ ܒܪܕܪܝܫ ܦܓܪܗ ܘܒܗܘܢ ܡܫܬܢܩ. ܒܗ̇ܝ ܕܗ̣ܢܘܢ ܟܕ ܗ̣ܢܘܢ ܐܝܬܝܗܘܢ ܗ̣ܘܘ ܠܗ ܕܠܐ ܬܘܣܦ ܒܘ̣ܨܪ. ܘܟܕ ܡܗܝܡܢܐ ܗ̣ܘܐ ܘܟܕ ܟܦܪ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܒܫܬܐܣܬܐ ܬܪܝܢܝܬܐ ܚܘܝ̣ܢܢ ܕܡܘܙ̈ܠܬܐ ܠܘ ܡܩܒܠܢ̈ܝܬܐ ܐܢܝܢ ܕܨܪܝܐ. ܒܕܓܘܢ ܒܝܘܡ ܢܘܚܡܐ ܟܕ ܡܨܛܪ̈ܝܢ܆ ܠܙܕܝ̈ܩܐ ܒܗܝܢ ܡܩܒ̈ܠܢ. ܘܠܥܠܡ ܢܫܪܘܢ ܒܗܝܢ. ܘܚܛܝ̈ܐ ܒܐܬܪ̈ܘܬܐ ܐܣܛܘ̈ܟܣܢܝܐ ܥܡ ܫܐܕ̈ܐ ܡܬܕܢܩܝ̣ܢ.

 

ܫܪܝܐ ܕܣܥܝܐ ܚܡܝܫܝܐ:

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܡܩܝ̣ܡ ܠܦܓܪ̈ܐ ܘܡܩܦ ܠܗܘܢ ܠܢܦ̈ܫܬܗܘܢ. ܐܝܟܢܐ ܕܠܫܘ̈ܝܝ ܠܦܘ̈ܢܩܐ ܣܘܢܝܘܦܛܪܢܐܝܬ ܢܦܢܩ. ܘܠܫܘ̈ܝܝ ܠܫܘ̈ܢܩܐ ܗܟܘܬ ܐܟܚܕܢܐܝܬ ܢܫܢܩ. ܘܐܟܡܐ ܕܐܟܚܕܐ ܥܡ ܚܕ̈ܕܐ ܢܦܫܐ ܘܦܓܪܐ ܐܙܕܕܩܘ ܐܘ ܐܬܟܬܡܘ. ܗ̣ܘ ܗܟܘܬ ܐܟܚܕܐ ܥܡ ܚܕ̈ܕܐ ܦܘܪܥܢܐ ܟܐܢܐ ܡܩܒܠܝܢ. ܗܕܐ ܓܝܪ ܬܒܥܐ ܚܟܡܬܐ ܐܠܗܝܬܐ.

 

 

 

ܢܝܫܐ ܬܪܝܢܐ. ܡܛܠ ܦܘ̈ܢܝܐ ܕܣܗܕ̈ܘܬܐ ܗܠܝܢ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܠܦܘܬ ܡܚܝ̣ܠܘܬ ܗܘܢܗܘܢ ܕܗ̇ܢܘܢ ܕܥܕܟܝܠ ܫܒܪ̈ܐ ܗ̣ܘܘ ܘܫܪ̈ܘܝܐ ܒܬܐܘܪ̈ܝܐܣ ܗ̇ܢܝܢ ܐܠܗܝ̈ܬܐ ܡܠ̣ܠ ܥܡܗܘܢ. ܘܡܕܡ ܕܡܨܝܢ ܗ̣ܘܘ ܕܢܕܥܘܢܝܗܝ ܐܫܬܘܕܝ̣ ܠܗܘܢ. ܘܠܘ ܡܕܡ ܕܠܐ ܡܨܝܢ ܗ̣ܘܘ ܠܡܕܪܟܘܬܗ. ܘܡܛܠܗܕܐ ܐܦܠܐ ܡܗܝܡܢܝ̣ܢ ܗ̣ܘܘ. ܐܠܘ ܡܕܡ ܢܘܟܪܝܐ ܠܗܘܢ ܡܠܟ.

 

 

 

ܦܘܢܝܐ ܕܣܗܕܘܬܐ ܬܪܝܢܝܬܐ ܘܬܠܝܬܝܬܐ ܘܪܒܝܥܝܬܐ ܘܚܡܝܫܝܬܐ:

 

ܐܡܪܝܢܢ ܕܢܨܝܚܐ ܐܝܘܒ. ܟܕ ܥܠ ܩܛܣܛܣܝܣ ܗ̇ܝ ܕܩܪܝ̣ܒܐ ܘܡܛܠ ܕܘܒܪ ܚܝ̈ܐ ܕܗܪܟܐ ܥܒܕ ܡܠܬܐ܆ ܕܐܝܟ ܗܠܝܢ ܡ̈ܠܐ ܐܡ̣ܪ. ܟܐܡܬ݀ ܬܘܒ ܠܐ ܐܗܦܘܟ ܗܫܐ ܩܪܝ̣ܒܐܝܬ. ܗ̣ܘ ܗܟܘܬ ܘܓܒܪܐ ܕܫܟܒ. ܠܘ ܐܝܟ ܩܝܣܐ ܕܥܡܗ̇ ܕܗ̇ܝ ܕܡܬܦܣܩ ܘܡܫܬܬܠ ܘܡܚܠܦ܆ ܩ̇ܐܡ. ܒܗ̇ ܒܕܡܘ̣ܬܐ ܗ̇ܝ ܕܡ̇ܐܬ ܠܘ ܠܝ̣ܓ ܠܝ̣ܓ ܚܝܐ. ܐܦܠܐ ܥܬܝܪܐ ܟܕ ܢܫܟܒ ܡܘܣܦ ܠܡܩܡ ܘܠܡܩܕܝܘ ܥܘܬܪܗ.

 

ܦܘܢܝܐ ܕܣܗܕܘܬܐ ܫܬܝܬܝܬܐ ܘܫܒܝܥܝܬܐ ܘܬܡܝܢܝܬܐ:

 

ܐܡܪܝܢܢ ܕܒܥܠܬ݀ ܡܦܘܠܬܐ ܕܢܦܠ ܫܠܝܡܘܢ ܘܐܫܬܒܝ̣ ܒܬܪ ܕܚ̈ܠܬܐ ܣܪ̈ܝܩܬܐ ܕܢܫܘ̈ܗܝ. ܘܕܒܚ ܠܐܠܗ̈ܐ ܕܥܡ̈ܡܐ ܕܠܐ ܗܘ̣ܘ ܐܠܗ̈ܐ. ܠܐ ܡܩܒ̈ܠܬܐ ܐܢܝܢ ܡܠܘ̈ܗܝ. ܐܦܠܐ ܠܦܘܢܝܐ ܡܫܬܘ̈ܝܢ.

 

ܦܘܢܝܐ ܕܣܗܕܘܬܐ ܬܫܝܥܝܬܐ:

 

ܐܡܪܝܢܢ ܕܒܣܪܐ ܘܕܡܐ ܠܪ̈ܓܝܓܬܐ ܒܣܪ̈ܢܝܬܐ ܘܚܫ̈ܐ ܦܓܪ̈ܢܝܐ ܩܪܐ ܫܠܝܚܐ ܐܠܗܝܐ. ܘܓܠܝܐ ܕܚܫ̈ܐ ܕܐܝܟ ܗܠܝܢ ܣܓܝ ܪܚܝ̣ܩܝ̣ܢ ܡ̣ܢ ܡܠܟܘܬܐ ܕܐܠܗܐ. ܘܐܠܐ ܐܝܟܢܐ ܢܒܛܠ ܠܩܝܡܬܐ ܕܦܓܪ̈ܐ ܗ̇ܘ ܕܥܠ ܩܝܡܬܐ ܕܦܓܪ̈ܐ ܡܬܬܕܝ̣ܢ ܗ̣ܘܐ. ܘܡܫܪܪ ܠܗ̇ ܒܟܪܘܙܘܬܗ ܡܠܝܬ݀ ܚܟܡܬܐ.

 

ܦܘܢܝܐ ܕܣܗܕܘܬܐ ܥܣܝܪܝܬܐ:

 

ܐܡܪܝܢܢ ܕܠܘ ܒܗ ܒܙܢܐ ܕܗܫܐ ܒܦܓܪܐ ܫܪܝܢܢ. ܐܦ ܒܬܪ ܩܝܡܬܐ ܒܗ ܫܪܝܢܢ. ܗܝܕܝܟ ܓܝܪ ܡܬܩܦܠܐ ܡܢܢ ܟܠܗ̇ ܥܒܝܘܬܐ ܗܕܐ ܗܘܠܢܝܬܐ. ܘܐܝܟ ܟܘܟ̈ܒܐ ܢܨܚܝ̣ܢ ܙܕܝ̈ܩܐ ܕܒܢ. ܡܛܠܗܕܐ ܒܚܝ̈ܐ ܗܠܝܢ. ܥܠܬܐ ܗ̱ܘ ܦܓܪܐ ܕܗ̇ܝ ܕܢܥܢܕ ܡ̣ܢ ܡܪܢ. ܐܝܟ ܕܐܡ̣ܪ ܫܠܝܚܐ. ܘܠܘ ܒܚܝ̈ܐ ܚܕ̈ܬܐ.

 

ܦܘܢܝܐ ܕܣܗܕܘܬܐ ܚܕܥܣܝܪܝܬܐ:

 

ܐܡܪܝܢܢ ܕܦܓܪܐ ܡ̇ܢ ܐܦܢ ܗܫܐ ܡܐܟܐ ܗ̱ܘ ܥܡ ܚܫܘܟܐ ܟܕܝ̣ܢ ܐܝܟ ܕܐܡ̣ܪ ܡܠܦܢܐ. ܐܠܐ ܒܬܪ ܢܘܚܡܐ. ܟܕ ܡ̣ܢ ܟܘܪ ܒܘܚܪܢܐ ܩܝܡܬܢܝܐ ܢܦܩ ܐܝܟ ܕܗܒܐ ܣܢܝ̣ܢܐ ܡܫܬܟܚ. ܘܝܬܝܪ ܒܝܬܝܐ ܗ̇ܘܐ ܗܝܕܝܟ ܘܥܗܢܐ ܠܢܩܝ̣ܦܘܬܗ̇ ܕܢܦܫܐ. ܒܕܓܘܢ ܗ̣ܘ ܡܠܦܢܐ ܡܛܠ ܚܝ̈ܐ ܕܗܪܟܐ ܬܐܘܪ̈ܝܣܐ ܥܒܕ ܘܠܘ ܡܛܠ ܚܝ̈ܐ ܚܕ̈ܬܐ ܘܐ̱ܚܪ̈ܝܐ.

 

 

 

 

 

 

 

 

 

     #1 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܥܣܝܪܝܬܐ

 

ܡܛܠ ܐܝܟܢܝܘܬܗܘܢ ܕܦܓܪ̈ܐ ܒܬܪ ܩܝܡܬܐ. ܘܒܗ ܐܝܬ ܦܣܘ̈ܩܐ ܚܡܫܬܥܣܪ. ܦܣܘܩܐ ܩܕܡܝܐ ܡܛܠ ܗ̇ܝ ܕܦܓܪܐ ܗ̇ܘ ܕܡ̇ܐܬ ܗ̣ܘ ܟܕ ܗ̣ܘ ܩܐܡ. ܘܠܘ ܐ̱ܚܪܢܐ

 

ܐܡܪܝܢܢ ܐܠܘ ܦܓܪܐ ܐ̱ܚܪܢܐ ܘܠܘ ܗ̇ܘ ܕܡܝ̣ܬ ܩ̇ܐܡ. ܠܘ ܩܝܡܬܐ ܗ̱ܝ ܗ̇ܝ ܕܡܣܬܒܪܐ ܐܠܐ ܒܪܝ̣ܬܐ ܚܕܬܐ. ܘܬܘܒ ܐܠܘ ܦܓܪܐ ܗ̇ܘ ܕܡܐܬ ܠܐ ܩ̇ܐܡ. ܐܘ ܡܛܠ ܗ̇ܝ ܕܠܐ ܡܬܡܨܝܢܝܬܐ ܗ̱ܝ ܠܟܝܢܗ ܗ̇ܝ ܕܢܩܘܡ ܠܐ ܩ̇ܐܡ. ܐܘ ܡܛܠܗ̇ܝ ܕܐܠܗܐ ܥܒܘܕܐ ܠܐ ܡܨܐ ܕܢܩܝ̣ܡܝ̣ܘܗܝ. ܘܕܬܪܬܝܢ ܫܟܝ̣ܪ̈ܢ܆ ܡ̣ܢ ܠܥܠ ܚܘܝ̣ܢܢ. ܦܓܪܐ ܡܕܝܢ ܕܡ̇ܐܬ ܗ̣ܘ ܟܕ ܗ̣ܘ ܩ̇ܐܡ܆ ܘܠܘ ܐ̱ܚܪܢܐ ܐܝܟ ܕܣܗܕ ܦܘܠܘܣ ܘܐܡ̇ܪ. ܕܥܬܝܕ ܗܢܐ ܕܡܐܬ܆ ܕܢܠܒܫ ܠܐ ܡܝܘܬܘܬܐ. ܘܗܢܐ ܕܡܬܚܒܠ܆ ܕܢܠܒܫ ܠܐ ܡܬܚܒܠܢܘܬܐ. ܘܬܘܒ ܐܡ̇ܪ ܕܥܬܝ̣ܕܝ̣ܢܢ ܟܠܢ ܠܡܩܡ ܩܕܡ ܒܐܡ ܕܡܫܝܚܐ. ܕܢܬܦܪܥ ܟܠܚܕ ܡܢܢ ܒܦܓܪܗ ܐܢ ܕܛܒ ܘܐܢ ܕܒܝܫ.

 

 

 

ܦܣܘܩܐ ܬܪܝܢܐ: ܡܛܠܗ̇ܝ ܕܠܘ ܦܓܪ̈ܐ ܪ̈ܘܚܢܝܐ ܘܐܐܪ̈ܝܐ ܩ̇ܝܡܝܢ

 

ܐܡܪܝܢܢ ܐܠܘ ܪ̈ܘܚܢܝܐ ܩܝܡܝ̣ܢ ܗ̣ܘܘ ܦܓܪ̈ܐ. ܠܐ ܓܫܝ̈ܡܐ ܗ̣ܘܘ. ܘܟܠ ܕܠܐ ܓܫܝ̣ܡܐ ܗ̱ܘ. ܠܘ ܦܓܪܐ ܗ̱ܘ. ܡܬܟܢܫܐ ܕܦܓܪܐ ܒܩܝܡܬܐ ܠܘ ܦܓܪܐ ܗ̱ܘ܆ ܗ̇ܝ ܕܫܟܝ̣ܪܐ. ܘܐܠܘ ܬܘܒ ܐܐܪ̈ܝܐ ܩܝܡܝ̣ܢ ܗ̣ܘܘ. ܠܘ ܗܠܝܢ ܦܓܪ̈ܐ ܗܘܝܢ ܗ̣ܘܘ. ܡܛܠ ܕܦܓܪ̈ܝܢ ܗܠܝܢ ܠܘ ܡ̣ܢ ܐܐܪ ܒܠܚܘܕ. ܐܠܐ ܡ̣ܢ ܐܪܒܥܐ ܐܣܛܘ̈ܟܣܐ ܡܪܟܒܝ̣ܢ. ܘܡ̣ܢ ܗܠܝܢ ܝ̣ܕܝ̣ܥܐ. ܕܦܓܪ̈ܐ ܐܝܟ ܕܐܝܬܝܗܘܢ ܩܝܡܝܢ. ܟܕ ܨܡܚܐ ܕܝܬܝܪ ܢܗܝ̣ܪ ܩܢܝܢ. ܘܠܐ ܡܬܚܒܠܢܘܬܐ.

 

ܗܦܟܬܐ:

 

ܐܡܪܝܢ ܕܦܘܠܘܣ ܣܗܕ ܕܦܓܪ̈ܐ ܪ̈ܘܚܢܝܐ ܩܝܡܝ̣ܢ ܟܕ ܐܡ̇ܪ ܕܡܙܕܪܥ ܦܓܪܐ ܢܦܫܢܝܐ ܘܩ̇ܐܡ ܦܓܪܐ ܪܘܚܢܝܐ. ܘܐܝܬ ܦܓܪ̈ܐ ܢܦܫܢܝ̈ܐ. ܘܐܝܬ ܦܓܪ̈ܐ ܪ̈ܘܚܢܝܐ. ܘܬܘܒ ܐܡ̣ܪ ܕܒܣܪܐ ܘܕܡܐ ܡܠܟܘܬܐ ܕܫܡܝܐ ܠܡܐܪܬ ܠܐ ܡܫܟܚܝ̣ܢ.

 

ܦܘܢܝܐ:

 

ܐܡܪܝܢܢ ܕܦܓܪܐ ܢܦܫܢܝܐ ܩܪܐ ܫܠܝܚܐ܆ ܠܗ̇ܘ ܕܡ̣ܢ ܚܝ̈ܠܐ ܢܦ̈ܫܢܝܐ ܡܬܩܝܡ. ܕܐܝܬܝܗܘܢ ܪ̈ܓܫܐ ܓܘܝ̈ܐ ܘܒܪ̈ܝܐ ܘܙܘܥܐ ܨܒܝܢܝܐ. ܘܚܝ̈ܠܐ ܟܝܢܝ̈ܐ ܕܒܗܘܢ ܡܬܝܠܕ ܘܡܬܬܪܣܐ ܘܡܬܪܒܐ. ܦܓܪܐ ܕܝܢ ܪܘܚܢܝܐ ܡܫܡܗ܆ ܠܦܓܪܐ ܗ̇ܘ ܕܠܘ ܡ̣ܢ ܚܝ̈ܠܐ ܕܪܘܚܐ ܩܕܝܫܐ. ܒܠܥܕ ܬܘܪܣܝܐ ܘܬܪܒܝ̣ܬܐ ܐܟܡܐ ܕܒܬܪ ܩܝܡܬܐ. ܣܓܝ̈ܐܐ ܡ̣ܢ ܓܡܝܪ̈ܐ ܟܕ ܡܥܡܨܝ̣ܢ ܪ̈ܓܫܐ ܣܛܪ ܡ̣ܢ ܬܘܪܣܝܐ ܝܘ̈ܡܬܐ ܠܐ ܙܥܘܪ ܚ̇ܐܝܢ. ܡܛܠ ܗܕܐ ܐܡ̣ܪ ܫܠܝܚܐ. ܕܐܝܬ ܦܓܪ̈ܐ ܢܦ̈ܫܢܝܐ ܐܝܟ ܦܓܪ̈ܐ ܕܟܠܢ. ܘܐܝܬ ܦܓܪ̈ܐ ܪ̈ܘܚܢܝܐ ܐܝܟ ܦܓܪ̈ܐ ܕܓܡܝ̣ܪ̈ܐ. ܘܬܘܒ ܐܡܪܝܢܢ. ܕܐܝܬ ܦܓܪ̈ܐ ܢܦܫܢܝ̈ܐ. ܐܝܟ ܟܠܗܘܢ ܦܓܪ̈ܐ ܕܡ̣ܢ ܩܕܡ ܩܝܡܬܐ. ܘܐܝܬ ܦܓܪ̈ܐ ܪ̈ܘܚܢܝܐ ܐܝܟ ܟܠܗܘܢ ܦܓܪ̈ܐ ܕܒܬܪ ܩܝܡܬܐ. ܒܙܢܐ ܗ̇ܘ ܕܐܝܟ ܡܠܐܟ̈ܐ ܡܢܗܘܢ ܘܠܗܘܢ ܩܝܡܝ̣ܢ. ܣܛܪ ܡ̣ܢ ܚܫ̈ܐ ܘܚܝ̈ܠܐ ܢܦܫܢܝ̈ܐ. ܘܠܘ ܒܙܢܐ ܗ̇ܘ ܕܠܐ ܓܘܫܡܢܝܘܬܐ ܘܪܥܝܢܐ ܗ̇ܘ ܕܒܣܪܐ ܘܕܡܐ ܡ̣ܢ ܠܥܠ ܢܗܪܢܝܗܝ. ܘܙܕܩ ܠܡܕܥ ܕܐܦܢ ܠܪܘܚܢܝܘܬܐ ܐܘܟܝܬ ܠܠܐ ܓܫܝ̣ܡܘܬܐ ܠܐ ܡܫܬܚܠܦ ܦܓܪܐ ܒܩܝܡܬܐ. ܐܠܐ ܐܦܠܐ ܒܥܒܝܘܬܐ ܗܕܐ ܘܝܩܝ̣ܪܘܬܐ ܡܟܬܪ. ܐܠܐ ܩܛܝ̣ܢܐ ܡܕܡ ܘܩܠܝ̣ܠܐ ܘܚܪܝ̣ܦ ܙܘ̈ܥܐ ܗ̇ܘܐ. ܒܕܡܬܩܦ̈ܠܢ ܡܢܗ ܡܢܘ̈ܬܐ ܗܠܝܢ ܕܡ̣ܢ ܓܘܫ̈ܡܐ ܐܪ̈ܥܢܝܐ ܕܐܝܬܝܗܘܢ ܬܘܪ̈ܣܝܐ. ܒܗ ܗܫܐ ܥ̇ܐܠܝܢ ܘܡܢܬܫܝ̣ܢ ܠܗ ܐܝܟ ܕܐܡ̣ܪ ܩܕܝܫܐ ܐܘܓܪܝܣ. ܕܝ̣ܢܐ ܐ̱ܚܪܝܐ ܕܕܝܢܐ ܟܐܢܐ ܠܘ ܚܘܠܦܐ ܕܦܓܪ̈ܐ ܥܒ̇ܕ. ܐܠܐ ܥܒܝܘܬܗܘܢ ܫܩܠ ܡ̣ܢ ܡܨܥܬܐ. ܟܕ ܡܠܘܬ ܠܗܘܢ ܚܝܠܐ ܐܝܟ ܕܢܫܟܚܘܢ ܢܓܪܘܢ ܒܝܪܬܘܬܐ. ܐܘ ܕܕܝ̣ܢܐ ܐܘ ܕܡܠܟܘܬܐ ܕܫܡܝܐ.

 

 

 

ܦܣܘܩܐ ܬܠܝܬܝܐ: ܡܛܠܗ̇ܝ ܕܠܐ ܡܕܡ ܡ̣ܢ ܗܕܡ̈ܐ ܚ̇ܣܪ ܡ̣ܢ ܦܓܪ̈ܐ ܒܩܝܡܬܐ

 

ܐܡܪܝܢ ܐ̱ܢܫܝ̈ܢ ܕܦܓܪ̈ܐ ܒܐܣܟܡܐ ܐܣܦܝ̣ܪܢܝܐ ܟܕ ܠܝܬ ܠܗܘܢ ܗܕܡ̈ܐ ܗܠܝܢ ܩܝܡܝ̣ܢ. ܒܗ̇ܝ ܕܡܝܬܪܐ ܕܐܣܟܡ̈ܐ. ܗ̣ܘ ܗܢܐ ܐܣܟܡܐ ܐܝܬܘܗܝ. ܘܒܗ̇ܝ ܬܘܒ ܕܠܝܬ ܚܫܚܘ̣ ܒܗܕܡ̈ܐ ܗܠܝܢ. ܡܛܠܗܕܐ ܠܐ ܩܝܡܝ̣ܢ. ܟܕ ܠܝܬ ܥܒܕܐ ܕܒܐܝ̈ܕܝܐ ܡܛܠܡܢܐ ܐܝܕܝ̈ܐ. ܘܟܕ ܠܝܬ ܗܠܟܐ ܕܡ̣ܢ ܕܘܟ ܠܕܘܟ܇ ܡܛܠܡܢܐ ܪ̈ܓܠܐ. ܘܟܕ ܠܝܬ ܙܘܘܓܐ܇ ܡܛܠܡܢܐ ܗܕܡ̈ܐ ܕܝܘܒܠܐ ܕܕܟܪ̈ܐ ܟܝܬ ܘܕܢܩ̈ܒܬܐ. ܘܟܕ ܢܦܫܐ ܗܝܕܝܟ ܗ̣ܝ ܥܝ̣ܢܒܓܠܐ ܟܠܡܕܡ ܡܕܪܟܐ. ܡܛܠ ܡܢܐ ܥܝ̈ܢܐ ܘܐܕ̈ܢܐ ܘܫܪܟܐ. ܘܟܕ ܠܝܬ ܡܐܟܘܠܬܐ ܡܛܠ ܡܢܐ ܟܪܣܐ ܘܟܒܕܐ ܘܡܥܝ̈ܐ ܘܫܪܟܐ. ܚܢܢ ܕܝܢ ܐܡܪܝܢܢ. ܐܠܘ ܒܐܣܟܡܐ ܐ̱ܚܪܢܐ ܩ̇ܐܡ ܦܓܪܐ܇ ܠܘ ܗ̣ܘ ܩ̇ܐܡ. ܐܠܐ ܐ̱ܚܪܢܐ ܕܣܛܪ ܡܢܗ ܗ̇ܝ ܕܠܐ ܫܪܝܪܐ. ܘܗܕܡ̈ܐ ܡ̇ܢ ܟܠܗܘܢ ܓܘ̈ܝܐ ܘܒܪ̈ܝܐ ܩ̇ܝܡܝ̣ܢ. ܒܪ̈ܝܐ ܡ̇ܢ ܡܛܠ ܨܒܬܐ. ܘܓܘܝ̈ܐ ܡܛܠ ܡܫܡܠܝܘܬܐ. ܐܝܟܢܐ ܕܗ̣ܘ ܦܓܪܐ ܒܟܠܝܘܬܗ ܢܩܒܠ ܦܘܪܥܢܐ ܕܫܘܐ.

 

ܗܦܟܬܐ:

 

ܐܡܪܝܢ ܕܦܘܠܘܣ ܐܡ̇ܪ ܡܐܟܘܠܬܐ ܕܟܪܣܐ ܘܟܪܣܐ ܕܡܐܟܘܠܬܐ. ܐܠܗܐ ܕܝܢ ܠܬܪ̈ܬܝܗܝܢ ܡܒܛܠ. ܘܡܪܝ ܝܥܩܘܒ ܕܒܛܢܢ ܐܡ̇ܪ ܒܡܐܡܪܐ ܕܥܠ ܚܪܬܐ. ܠܝܬ ܐܣܟܡܐ ܕܕܟܪ̈ܐ ܬܡܢ ܘܕܢܩ̈ܒܬܐ. ܕܠܘ ܠܚܫܚܬܐ ܕܟܐܒ̈ܐ ܦܢܐ ܟܝܢܢ ܬܡܢ. ܥܠܝ̈ܡܐ ܕܪܘܚܐ ܩܝ̈ܡܢ ܢܫ̈ܐ ܒܫܘܒܚܐ ܬܡܢ. ܘܠܐ ܐܝܬ ܚܘܝܐ ܕܠܚܫ ܢܟܠ ܐܝܟ ܩܕܡܝܐ.

 

ܦܘܢܝܐ:

 

ܐܡܪܝܢܢ ܕܒܗ̇ܝ ܕܟܪܣܐ ܠܡܥܒܕܢܘܬܐ ܕܟܪܣܐ ܐܪܙ ܫܠܝܚܐ. ܘܝ̣ܕܝ̣ܥܐ ܗܕܐ ܕܐܦ ܥܘܗܕܢܐ ܕܡܐܟܘܠܬܐ ܐܩܦ ܠܗ̇. ܒܕܓܘܢ ܡܥܒܕܢܘܬܐ ܕܟܪܣܐ ܕܐܝܬܝܗ̇ ܦܫܪܐ ܕܡܐܟܘܠܬܐ ܒܛܠܐ ܐܡ̣ܪ ܘܠܘ ܕܟܪܣܐ. ܘܡܪܝ ܝܥܩܘܒ ܬܘܒ ܐܣܟܡܐ ܕܕܟܪ̈ܐ ܘܢܩ̈ܒܬܐ ܠܣܥܘܪ̈ܘܬܐ ܙܘܘܓܝ̈ܬܐ ܘܠܚܫ̈ܐ ܕܪܓܬܐ ܩ̇ܪܐ. ܘܠܘ ܠܗܘܢ ܠܗܕ̈ܡܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܦ ܦܘܠܘܣ ܐܡ̣ܪ ܐܣܟܡܗ ܓܝܪ ܕܥܠܡܐ ܗܢܐ ܥܒܪ ܠܗ. ܘܓܠܝܐ ܕܠܗܘܦܟܐ ܥܠܡܢܝܐ ܩܪܐ ܗܪܟܐ ܐܣܟܡܐ. ܘܠܘ ܠܗ ܠܥܠܡܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܥܡܗ̇ ܕܡܠܬܐ ܗܕܐ ܟܕ ܡܢܗܪ ܠܗ̇ ܐܡ̇ܪ. ܕܐܝܠܝܢ ܕܐܝܬ ܠܗܘܢ ܢܫ̈ܐ܆ ܢܗܘܘܢ ܐܝܟ ܕܠܝܬ ܠܗܘܢ. ܘܐܝܠܝܢ ܕܒܟܝܢ ܐܝܟ ܠܐ ܒ̇ܟܝܢ. ܘܐܝܠܝܢ ܕܚܕܝܢ ܐܝܟ ܠܐ ܚ̇ܕܝܢ. ܘܐܝܠܝܢ ܕܙܒܢܝ̣ܢ ܐܝܟ ܠܐ ܡܩܕܝܢ. ܒܗ̇ ܒܕܡܘ̣ܬܐ ܡܕܝܢ ܘܐܦ ܩܕܝܫܐ ܝܥܩܘܒ ܐܣܟܡܐ ܕܕܟܪ̈ܐ ܘܢܩ̈ܒܬܐ ܠܚܫܚܬܗܘܢ ܕܗܕܡ̈ܐ ܗܠܝܢ ܟܢܝ̣ ܘܠܘ ܠܗܘܢ ܠܗܕܡ̈ܐ.

 

 

 

ܦܣܘܩܐ ܪܒܝܥܝܐ: ܡܛܠ ܗ̇ܝ ܕܒܩܘܡܬܐ ܡܫܡܠܝܬܐ ܒܪܬ݀ ܬܠܬܝܢ ܫܢܝ̈ܢ ܩ̇ܝܡܝܢ ܦܓܪ̈ܐ ܘܠܘ ܒܩܘ̈ܡܬܐ ܡܫܚ̈ܠܦܬܐ

 

ܐܡܪܝܢ ܕܥܠܡܐ ܗ̇ܘ ܐ̱ܚܪܢܐ ܒܟܠܡܕܡ ܡܫܡܠܝܐ ܗ̱ܘ ܘܠܐ ܓܫܦ ܒܗ ܙܢܐ ܡܕܡ ܕܚܣܝ̣ܪܘܬܐ ܣܟ. ܘܡܛܠ ܗܕܐ ܐܠܨܐ ܕܒܩܘܡܬܐ ܡܫܡܠܝܬܐ ܢܩܘܡܘܢ ܒܗ ܟܠܗܘܢ ܦܓܪ̈ܐ ܐܟܚܕܐ. ܘܕܩܘܡܬܐ ܒܪܬ݀ ܬܠܬܝܢ ܗ̣ܝ ܗ̣ܝ ܩܘܡܬܐ ܡܫܡܠܝܬܐ ܝ̣ܕܝ̣ܥܐ ܡ̣ܢ ܗ̇ܝ ܕܒܗ̇ ܩܝ̈ܡܢ ܡܥܒܕܢ̈ܘܬܐ ܟܠܗܝܢ ܦܓܪ̈ܢܝܬܐ. ܘܠܐ ܬܘܒ ܡܨ̈ܝܢ ܠܡܩܢܐ ܬܘܣܦܬܐ. ܐܠܐ ܡܒܨܪܘ ܡܫܪ̈ܝܢ ܕܢܬܒܨܪ̈ܢ. ܡܢܗ̇ ܘܠܗܠ. ܐܟܡܐ ܕܗ̣ܘ ܢܣܝܢܐ ܐܘܣܝܝܐ ܡܠܦ ܠܢ.

 

ܗܦܟܬܐ:

 

ܐܡܪܝܢ ܐܢܗܘ ܕܦܓܪܐ ܟܪܝܐ ܠܘ ܟܪܝܐ ܩ̇ܐܡ ܐܦܠܐ ܐܪܝܟܐ ܐܪܝܟܐ. ܐܦܠܐ ܬܘܒ ܛܠܝܐ ܛܠܝܐ. ܘܣܒܐ ܣܒܐ. ܠܘ ܗ̣ܢܘܢ ܟܕ ܗ̣ܢܘܢ ܦܓܪ̈ܐ ܩ̇ܝܡܝ̣ܢ. ܐܦܠܐ ܬܘܒ ܒܦܓܪܗ ܩܕܡܝܐ ܡܬܦܪܥ ܟܠܢܫ ܗ̇ܘ ܡܐ ܕܣܥܝ̣ܪ ܠܗ.

 

ܦܘܢܝܐ:

 

ܐܡܪܝܢܢ ܕܩܕܡܢܢ ܚܘܝ̣ܢܢ. ܕܗܕܡ̈ܐ ܡܪ̈ܢܝܐ ܕܦܓܪܐ ܗ̇ܢܘܢ ܫܪܝܪ̈ܐ ܐܢܘܢ ܕܡ̣ܢ ܡܘܠܕܐ ܠܗ ܡܬܒܪܝܢ. ܘܠܘ ܗ̇ܢܘܢ ܐ̱ܚܪ̈ܝܐ ܕܡ̣ܢ ܬܘܪܣܝܐ ܩܢܐ ܠܗܘܢ. ܒܕܓܘܢ ܒܝܘܡܐ ܕܩܝܡܬܐ. ܗ̇ܢܘܢ ܗܕܡ̈ܐ ܫܪܝܪ̈ܐ ܘܡܪ̈ܢܝܐ ܩܝܡܝܢ ܒܕܡܘ̣ܬܐ ܕܩܘܡܬܐ ܡܫܡܠܝܬܐ ܐܝܟ ܕܐܡ̣ܪܢܢ. ܘܒܗܘܢ ܡܬܦܪܥ ܟܠܢܫ ܕܛܒ ܘܕܒܝܫ.

 

 

 

ܦܣܘܩܐ ܚܡܝܫܝܐ: ܡܛܠ ܗ̇ܝ ܕܟܠ ܪܓܫܐ ܒܡܬܪܓܫܢܗ ܒܠܚܘܕ ܡܪܓܫ

 

ܐܡܪܝܢܢ ܕܟܠ ܪܓܫܐ ܒܡܬܪܓܫܢܗ ܕܝ̣ܠܢܐܝܬ ܡܪܓܫ. ܥܝܢܐ ܐܡ̇ܪ ܐ̱ܢܐ ܒܡܬܚܙ̈ܝܢܐ. ܘܐܕܢܐ ܒܡܫܬܡ̈ܥܢܐ. ܘܡܫܟܐ ܒܡܬܪ̈ܓܫܢܐ. ܣܛܪ ܡ̣ܢ ܡܪܝ̣ܚܢܘܬܐ ܕܒܛܠܐ ܣܥܘܪܘܬܗ̇. ܒܥܠܬ݀ ܒܘܛܠܐ ܕܦܘ̣ܫܫ ܓܘܫ̈ܡܐ. ܒܥܠܬ݀ ܒܘܛܠܐ ܕܗܘܝܐ ܘܚܘܒܠܐ. ܗ̣ܘ ܗܟܘܬ ܘܛܥܡܬܐ ܒܛܠܐ ܡܥܒܕܢܘܬܗ̇. ܒܕܠܝܬ ܬܡܢ ܬܘܪܣܝܐ ܦܓܪܢܝܐ. ܘܠܗ̇ܝ ܕܡܬܐܡܪܐ ܕܦܓܪܐ ܗܝܕܝܟ ܒܟܠܗܘܢ ܗܕܡܘ̈ܗܝ ܚܙܐ ܘܫܪܟܐ ܠܐ ܡܬܪܟܢܐ ܡܫܡܥܬܝ. ܦܘܠܘܣ ܓܝܪ ܐܠܗܝܐ ܐܡ̇ܪ. ܐܠܘ ܟܠܗ ܦܓܪܐ ܥܝ̈ܢܐ ܗ̣ܘܐ ܐܝܟܐ ܗܘܬ݀ ܡܫܡܥܬܐ. ܘܐܠܘ ܟܠܗ ܡܫܡܥܬܐ ܗ̣ܘܐ. ܐܝܟܐ ܡܪܝ̣ܚ ܗ̣ܘܐ. ܗܫܐ ܕܝܢ ܐܠܗܐ ܣܡ ܟܠܚܕ ܚܕ ܡ̣ܢ ܗܕܡ̈ܐ ܕܦܓܪܐ ܐܝܟܐ ܨܒܐ. ܐܡܪܝܢܢ ܐܢܗܘ ܕܒܥܠܡܐ ܗܢܐ ܕܗܘܝܐ ܘܚܘܒܠܐ. ܫܦܝܪܘܬ ܡܛܟܣܘܬܐ ܡܬܒܥܝܐ. ܒܥܠܡܐ ܗ̇ܘ ܕܒܐܥ̈ܦܐ ܡܥܠܝ ܟܡܐ ܝܬܝܪܐܝܬ ܬܬܒܥܐ.

 

 

 

ܦܣܘܩܐ ܫܬܝܬܝܐ: ܡܛܠܗ̇ܝ ܕܐܝܠܝܢ ܡ̣ܢ ܚܝ̈ܠܐ ܢܦܫܢܝ̈ܐ ܦ̇ܝܫܝܢ ܒܬܪ ܩܝܡܬܐ ܘܐܝܠܝܢ ܠܐ

 

ܐܡܪܝܢܢ ܕܡܠܝ̣ܠܘܬܐ ܡ̇ܢ ܠܘ ܒܠܚܘܕ ܡܦܫ ܦܝܫܐ. ܐܠܐ ܘܕܡܬܬܘܣܦܘ ܡܬܬܘܣܦܐ ܠܗ̇ ܠܢܦܫܐ ܡܠܝ̣ܠܬܐ܆ ܡ̣ܢ ܠܥܠ ܚܘܝ̣ܢܢ. ܚܡܬܐ ܕܝܢ ܘܪܓܬܐ ܡ̣ܢ ܢܦ̈ܫܬܐ ܡ̇ܢ ܙܕܝ̈ܩܬܐ ܡܒܛܠ ܒ̈ܛܠܢ. ܘܚܠܦ ܚܡܬܐ ܡܫܝܢܘܬܐ ܩܢ̈ܝܢ. ܘܚܠܦ ܪܓܬܐ ܢܦܫܢܝܬܐ ܘܦܓܪܢܝܬܐ. ܝܐܝ̣ܒܘܬܐ ܪܘܚܢܝܬܐ ܐܘܟܝܬ ܡܠܐܟܝܬܐ ܗܘܝܐ ܠܗܝܢ. ܡ̣ܢ ܢܦ̈ܫܬܐ ܕܝܢ ܥܘ̈ܠܬܐ. ܠܐ ܐܡ̇ܪ ܐ̱ܢܐ ܕܒ̈ܛܠܢ. ܐܠܐ ܬܘܒ ܣܓܝ ܣܓ̈ܝܢ ܘܥܗܪ̈ܢ. ܪ̈ܓܙܢ ܓܝܪ ܥܠ ܪ̈ܘܚܐ ܒܝ̈ܫܬܐ ܡܫܢܩܢ̈ܝܬܗܝܢ. ܘܪ̈ܐܓܢ ܚܣܝ̣ܢܐܝܬ ܠܪ̈ܓܝܓܬܐ ܗ̇ܢܝܢ ܦܓܪ̈ܢܝܬܐ ܕܐܬܓܠܙ̈ܝ ܡܢܗܝܢ. ܚܝ̈ܠܐ ܕܝܢ ܗ̇ܢܘܢ ܟܝܢܝ̈ܐ ܕܬܘܪܣܝܐ ܘܬܪܒܝ̣ܬܐ ܘܕܡܘܠܕܐ ܡ̣ܢ ܟܠܗܝܢ ܙܕܝ̈ܩܬܐ ܟܝܬ ܘܥܘ̈ܠܬܐ ܟܠܢܐܝܬ ܒ̈ܛܠܢ.

 

 

 

ܦܣܘܩܐ ܫܒܝܥܝܐ: ܡܛܠ ܗ̇ܝ ܕܠܘ ܒܙܢܝ̈ܐ ܓܕܫܢܝ̈ܐ ܕܒܗܘܢ ܡܬܝܩܢܝ̣ܢ ܩܢܘ̈ܡܐ ܗܪܟܐ ܓܘ̈ܢܐ ܠܡܐܡܪ ܘܕܡܘ̈ܬܐ ܡܫܚ̈ܠܦܬܐ ܡܬܦܪܫܝܢ ܩܢܘ̈ܡܐ ܡ̣ܢ ܚܕ̈ܕܐ ܒܥܠܡܐ ܕܥܬܝܕ

 

ܕܠܝܬ ܬܡܢ ܓܘ̈ܢܐ ܡܫܚ̈ܠܦܐ. ܦܘܠܘܣ ܣ̇ܗܕ ܟܕ ܐܡ̇ܪ. ܕܠܝܬ ܬܡܢ ܠܐ ܣܩܘܬܝܐ ܘܠܐ ܟܘܫܝܐ. ܒܕܓܘܢ ܦܓܪ̈ܐ ܕܙܕܝ̈ܩܐ ܒܫܘܒܚܐ ܒܠܚܘܕ ܘܢܨܝ̣ܚܘܬܐ ܕܝܬܝܪܐ ܘܒܨܝ̣ܪܐ ܡܬܦܪܫܝ̣ܢ ܡ̣ܢ ܚܕ̈ܕܐ. ܒܗ̇ܝ ܕܠܘ ܟܠܗܘܢ ܦܓܪ̈ܐ ܫܘܝܢ ܒܥܡܠܝ̈ܗܘܢ. ܐܝܟ ܕܐܦܠܐ ܟܠܗܝܢ ܢܦ̈ܫܬܐ ܫܘ̈ܝܢ ܒܬܐܘܪ̈ܝܐܣ ܕܝܠܗܝܢ. ܡܛܠܗܕܐ ܐܦܠܐ ܫܘܝܐ ܢܨܝܚܘܬܗܘܢ ܕܦܓܪ̈ܐ ܐܝܟ ܕܐܡ̣ܪ ܫܠܝܚܐ ܕܟܘܟܒܐ ܡ̣ܢ ܟܘܟܒܐ ܡܝܬܪ ܒܫܘܒܚܐ. ܘܩܕܝܫܐ ܐܘܓܪܝܣ ܐܡ̣ܪ ܕܟܘܟ̈ܒܐ ܒܫܘܒܚܐ ܦܪܝ̣ܫܝ̣ܢ ܚܕ ܡ̣ܢ ܚܕ. ܠܐ ܗ̣ܘܐ ܕܝܢ ܐܦ ܒܓܘܫ̈ܡܐ. ܡܛܠ ܕܫܘܝܢ ܐܢܘܢ.

 

 

 

ܦܣܘܩܐ ܬܡܝܢܝܐ: ܡܛܠ ܣܥܪܐ ܘܛܦܪ̈ܐ ܕܐܢ ܐܪܐ ܡܫܬܟܚܝܢ ܠܒܢܝ̈ܢܫܐ ܐܘ ܠܐ

 

ܐ̱ܢܫܝ̈ܢ ܐܡܪܝܢ ܕܣܥܪܐ ܘܛܦܪ̈ܐ ܡܛܠ ܕܗܕܡ̈ܐ ܐܢܘܢ ܡܝ̈ܬܐ. ܘܣܥܪܐ ܕܝ̣ܠܢܐܝܬ ܡܫܟܪܢܐ ܗ̱ܘ ܕܫܘܦܪܐ. ܘܛܦܪ̈ܐ ܟܕ ܝ̇ܪܒܝܢ̣ ܗܟܘܬ ܣܢܝܘܬܐ ܥܒ̈ܕܢ. ܡܛܠ ܗܕܐ ܠܐ ܡܫܬܟܚܝ̣ܢ ܒܩܝܡܬܐ ܠܐ ܣܥܪܐ ܐܦܠܐ ܛܦܪ̈ܐ. ܚܢܢ ܕܝܢ ܐܡܪܝܢܢ ܕܠܘ ܡܝ̈ܬܐ ܐܢܘܢ ܣܥܪܐ ܘܛܦܪ̈ܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܡܬܬܪܣܝܢ ܘܝ̇ܪܒܝ̣ܢ. ܘܐܦܢ ܠܐ ܡܪ̈ܓܫܢܐ ܐܢܘܢ ܐܠܐ ܠܐ ܡܝ̣ܬܝ̣ܢ. ܗܐ ܓܝܪ ܐܦ ܗܕܡܐ ܕܬܢܘܒ ܟܕ ܚܝ ܠܐ ܡܪܓܫ. ܘܡܛܠ ܣܥܪܐ ܐܡܪܝܢܢ ܕܠܘ ܠܟܠ ܗܕܡ ܡܫܟܪ. ܗܐ ܓܝܪ ܓܠܝ̣ܙܘܬܗ ܕܡ̣ܢ ܪܝܫܐ ܐܟܡܐ ܕܒܩܪܚܘܬܐ ܘܬܥܠܘܬܐ ܝܬܝܪ ܡܫܟܪܐ ܥܒܕ ܠܗ ܠܫܘܦܪܐ. ܘܛܦܪ̈ܐ ܟܕ ܝܪ̈ܒܢ ܣܢܝܘܬܐ ܥܒ̈ܕܢ. ܘܬܡܢ ܚܕܐ ܡܫܘ̣ܚܬܐ ܫܘܝ̣ܬܐ ܘܡܫܡܠܝܬܐ ܐܝܟ ܕܐܡ̣ܪܢܢ ܗܘܝܐ ܠܗ ܠܦܓܪܐ ܘܠܗܕܡܘ̈ܗܝ ܘܝ̣ܕܝ̣ܥܐ ܬܘܒ ܕܩ̇ܐܡ ܣܥܪܐ ܡ̣ܢ ܡܠܬܗ ܕܡܪܢ ܕܐܡ̣ܪ. ܕܐܦ ܡܢ̈ܐ ܕܪܝܫܟܘܢ ܡܢ̈ܝܢ ܐܢܝܢ. ܘܡܢܬܐ ܡ̣ܢ ܪܝܫܟܘܢ ܠܐ ܬܐܒܕ.

 

 

 

ܦܣܘܩܐ ܬܫܝܥܝܐ: ܡܛܠܗ̇ܝ ܕܐܪܐ ܥ̇ܒܪܝ̣ܢ ܒܫܘ̈ܥܐ ܛܡܝ̣̈ܡܐ ܦܓܪ̈ܐ ܒܬܪ ܩܝܡܬܐ ܐܘ ܠܐ

 

ܐܡܪܝܢܢ ܕܫܘ̈ܥܐ ܡܠܘܢ ܕܝܢ ܟܠܗܘܢ ܛܘܪ̈ܐ. ܒܗ̇ ܒܕܡܘ̣ܬܐ ܘܡܬܚܦܪ̈ܢܐ ܦܪܙܠܐ ܠܡܐܡܪ ܘܢܚܫܐ ܘܐܢܟܐ ܘܕܗܒܐ ܘܣܐܡܐ ܘܝܩܘ̈ܢܕܐ ܘܫܪܟܐ. ܠܘ ܒܪ̈ܝܬܐ ܟܝܢܝ̈ܬܐ ܐܢܘܢ. ܐܠܐ ܗ̣ܝ ܚܡܝܡܘܬܐ ܐܣܛܘܟܣܢܝܬܐ ܘܗ̇ܝ ܕܡ̣ܢ ܙܠܝ̈ܩܐ ܫܡܫܢܝ̈ܐ ܟܕ ܒܡܢܘ̈ܬܐ ܐܪ̈ܥܢܝܬܐ ܕܚܠܝ̣̈ܛܢ ܒܡܢܘ̈ܬܐ ܡܝܢܝ̈ܬܐ ܐܥܒܕܝ̈ܢ ܥܡ ܙܒܢܐ ܢܓܝ̣ܪܐ ܠܗܘܢ ܠܓܘܫ̈ܡܐ ܩܫܝ̈ܐ ܕܐܝܟ ܗܠܝܢ ܩ̣ܛܪ̈ܝܢ. ܒܕܓܘܢ ܒܩܝܡܬܐ ܟܠ ܓܘܫܡܐ ܠܐܣܛܘܟܣܗ ܗܦܟ ܡܫܬܪܐ ܘܡܫܬܗܐ ܗܝܕܝܟ ܚܐܦܗܘܢ ܕܐܣܛܘ̈ܟܣܐ ܘܠܐ ܬܘܒ ܡܥܒܕܝ̣ܢ ܒܚ̈ܕܕܐ ܘܡ̣ܢ ܚܕ̈ܕܐ ܡܬܬܥܒܕܝ̣ܢ. ܘܒܛܠ ܥܠܡܐ ܕܗܘܝܐ ܘܚܘܒܠܐ ܘܫܘܓܢܝܐ ܘܫܘܚܠܦܐ. ܐܝܟܢܐ ܡܬܐܡܪܐ ܕܫܘ̈ܥܐ ܡ̣ܢܕܪܝܫ ܩܛܪܝ̣ܢ. ܕܢܬܦܫܟ ܕܐܪܐ ܥܒܪܝ̣ܢ ܒܗܘܢ ܦܓܪ̈ܐ ܐ̱ܢܫܝ̈ܐ ܐܘ ܠܐ. ܗܢܐ ܓܝܪ ܫܘܐܠܐ ܐܝܟ ܕܣܒܪ ܐ̱ܢܐ ܠܐ ܪܕܝܐ ܗ̱ܘ. ܡܪܢ ܕܝܢ ܥܒܪ ܒܫܘ̈ܥܐ ܛܡܝ̣̈ܡܐ ܒܪܡ ܒܥܠܡܐ ܗܢܐ. ܘܐܝܟ ܐܠܗܐ ܣܥܪ ܬܗܪ̈ܐ.

 

 

 

ܦܣܘܩܐ ܥܣܝܪܝܐ: ܡܛܠܗ̇ܝ ܕܠܐ ܡܣܬܢܩܝ̣ܢ ܦܓܪ̈ܐ ܥܠ ܬܟܣܝ̣ܬܐ ܒܬܪ ܩܝܡܬܐ

 

ܐܡܪܝܢܢ ܕܬܟܣܝ̣ܬܗܘܢ ܗ̣ܘ ܙܝ̣ܘܐ ܘܗܕܪܐ ܒܠܚܘܕ ܕܩܢܘܡܝ̈ܗܘܢ ܗ̣ܝ. ܒܥܠܡܐ ܓܝܪ ܗܢܐ ܐܠܘܠܐ ܡ̣ܢ ܚܪܘܬܐ ܬܕܟܝ̣ܬܐ ܣܪܝ̣ܬܐ ܡܬܢܦܨܐ ܗܘܬ݀. ܘܡ̣ܢ ܩܢܝܐ ܕܓܒܪܘܬܐ ܘܡܪܒܥܐ ܢܫܝܐ ܬܦܫܘܪܬܐ ܠܐ ܡܣܬܦܩܐ ܗܘܬ݀. ܘܣܥܘܪܘܬܐ ܗ̇ܝ ܫܝ̣ܛܬܐ ܘܒܥܝ̣ܪܝܬܐ ܕܙܘܘܓܐ ܒܗܘܢ ܒܗܕܡ̈ܐ ܗܠܝܢ ܠܐ ܡܫܬܡܫܐ ܗܘܬ݀. ܐܦܠܐ ܥܠ ܟܘܣܝ ܦܘܪܣܝܐ ܡܣܬܢܩܝ̣ܢ ܗ̣ܘܘ ܒܢܝ̈ܢܫܐ ܗܪܟܐ ܐܟܡܐ ܕܐܦܠܐ ܐܕܡ ܘܚܘܐ ܩܕܡ ܥܒܪ ܦܘܩܕܢܐ. ܘܗܟܢܐ ܒܥܠܡܐ ܕܥܬܝܕ ܟܕ ܡܥܒܕܢ̈ܘܬܐ ܕܐܝܟ ܗܠܝܢ ܒ̈ܛܠܢ. ܠܐ ܡܣܬܢܩܝ̣ܢ ܒܢܝ̈ܢܫܐ ܥܠ ܟܘܣܝ ܦܘܪܣܝܗܘܢ. ܐܦܠܐ ܦܘܪܣܝܐ ܙܕܩ ܕܢܬܩܪܘܢ ܗܕܡ̈ܐ ܗܠܝܢ ܗܝܕܝܟ.

 

 

 

ܦܣܘܩܐ ܕܚܕܥܣܪ: ܡܛܠ ܗ̇ܝ ܕܐܝܟܐ ܡܬܟܢܫܝ̣ܢ ܦܓܪ̈ܐ ܒܝܘܡ ܢܘܚܡܐ

 

ܕܒܚܕܐ ܡ̇ܢ ܕܘܟܬܐ ܕܗ̣ܝ ܗ̣ܝ ܐܘܪܫܠܡ ܗܕܐ ܕܒܐܪܥܐ ܡܬܟܢܫܝ̣ܢ ܟܠܗܘܢ ܒܢܝ̈ܢܫܐ ܒܩܝܡܬܐ܆ ܣܘܓܐܐ ܕܡܠܦܢ̈ܐ ܩܕܝ̈ܫܐ ܐܫܠܡܘ ܠܢ. ܘܟܕ ܥܠ ܒܥܬܐ ܗܕܐ ܐܦܘܕܝܟܣܝܣ ܚܘܫܒܝܬܐ ܠܐ ܡܨܝܐ ܕܬܩܘܡ. ܠܗܘܢ ܠܡܠܦܢ̈ܐ ܙܕܩ ܠܢ ܠܡܩܦ ܘܠܡܫܠܡ. ܘܕܙܕܝ̈ܩܐ ܠܫܡܝܐ ܡܬܥܠܝܢ ܦܘܠܘܣ ܣܗܕ ܟܕ ܐܡ̇ܪ. ܕܗ̇ܝ ܐܘܪܫܠܡ ܥܠܝܬܐ ܚܐܪܬܐ ܗ̇ܝ ܕܐܝܬܝܗ̇ ܐܡܢ. ܘܕܐܬܩܪܒܬܘܢ ܠܛܘܪܐ ܕܨܗܝܘܢ. ܘܠܡܕܝܢ̱ܬܐ ܕܐܠܗܐ ܚܝܐ. ܘܠܐܘܪܫܠܡ ܕܒܫܡܝܐ. ܘܕܪ̈ܫܝ̣ܥܐ ܥܠ ܐܪܥܐ ܦܝܫܝ̣ܢ ܘܒܫܝܘܠ ܡܫܬܢܩܝ̣ܢ. ܕܘܝܕ ܣܗܕ ܟܕ ܐܡ̇ܪ. ܕܢܗܦܟܘܢ ܪ̈ܫܝ̣ܥܐ ܠܫܝܘܠ. ܘܟܠܗܘܢ ܥܡ̈ܡܐ ܕܛܥܝܢ ܠܐܠܗܐ.

 

 

 

ܦܣܘܩܐ ܕܬܪܥܣܪ: ܡܛܠ ܗ̇ܝ ܕܐܪܐ ܡܬܚܫܚܝܢ ܒܢܝ̈ܢܫܐ ܒܡܠܬܐ ܢܦܘܩܬܐ ܒܬܪ ܩܝܡܬܐ ܐܘ ܠܐ

 

ܩܕܡܢܢ ܚܘܝ̣ܢܢ ܕܦܓܪܐ ܒܡܫܡܠܝܘܬ ܡܢܘ̈ܬܗ ܩ̇ܐܡ ܒܢܘܚܡܐ. ܒܕܓܘܢ ܐܦ ܐܘܪ̈ܓܢܐ ܕܡܡܠܠܐ ܩ̇ܝܡܝ̣ܢ. ܘܕܠܐ ܒܛܠܝ̣ܢ ܡ̣ܢ ܢܦܫܐ ܚܘܫܒܝ̈ܗ̇ ܗܟܘܬ ܚܘܝ̣ܢܢ. ܒܕܓܘܢ ܠܐ ܪܚܝܩܐ ܐܢ ܒܝܕ ܡܡܠܠܐ ܡܬܪܓܫܢܐ ܢܒܕܩܘܢ ܒܢܝ̈ܢܫܐ ܠܚܕ̈ܕܐ ܚܘܫ̈ܒܐ ܐܝܠܝܢ ܕܒܢܦ̈ܫܬܗܘܢ ܢܒܗܝ̣ܢ. ܘܠܗ̇ ܠܗܕܐ ܡܫܪܪ ܩܕܝܫܐ ܐܘܓܪܝܣ ܟܕ ܐܡ̇ܪ. ܐܢܗܘ ܕܡ̈ܠܐ ܡܬܪ̈ܓܫܢܝܬܐ ܚܫ̈ܚܢ ܐܦ ܒܥܠܡܐ ܕܥܬܝܕ. ܐܦ ܚܟܝ̈ܡܘܗܝ ܕܥܠܡܐ ܗܢܐ ܢܐܪܬܘܢ ܡܠܟܘܬܐ ܕܫܡܝܐ. ܐ̱ܚܪ̈ܢܐ ܕܝܢ ܗܦܟܐܝܬ ܡܦܫܩܝ̣ܢ ܠܗ ܠܦܬܓܡܐ ܗܢܐ ܟܕ ܐܡܪܝܢ. ܕܢܝܫܗ ܕܡܠܦܢܐ ܗ̇ܢܘ. ܕܐܟܡܐ ܕܚܟܝ̣̈ܡܘܗܝ ܕܥܠܡܐ ܗܢܐ ܠܐ ܝ̇ܪܬܝ̣ܢ ܡܠܟܘܬܐ ܕܫܡܝܐ. ܒܗ̇ܝ ܕܐܫܛܝܗ̇ ܐܠܗܐ ܠܚܟܡܬܗܘܢ ܐܝܟ ܕܐܡ̣ܪ ܫܠܝܚܐ. ܒܗ̇ ܒܕܡܘ̣ܬܐ ܐܦܠܐ ܡ̈ܠܐ ܡܬܪ̈ܓܫܢܝܬܐ ܚܫ̈ܚܢ ܒܥܠܡܐ ܕܥܬܝܕ. ܐܝܟ ܗ̇ܝ ܕܬܬܐܡܪ ܐܢ ܓܡܠܐ ܥ̇ܐܠ ܒܚܪܘܪܐ ܕܡܚܛܐ. ܐܦ ܥܬܝܪܐ ܥ̇ܐܠ ܠܡܠܟܘܬܐ ܕܫܡܝܐ. ܚܢܢ ܕܝܢ ܐܡܪܝܢܢ ܕܝ̣ܕܝ̣ܥܐ ܕܠܐ ܫܪܝܪ ܦܘܫܩܐ ܗܢܐ. ܡ̣ܢ ܗ̇ܝ ܕܐܘܣܦ ܐܡ̣ܪ ܗ̣ܘ ܡܠܦܢܐ. ܐܢܕܝܢ ܕܟܝܘܬܗ ܕܗܘܢܐ ܡܫܬܘܝܐ ܠܚܙܬܐ ܕܥܠܡܐ ܕܥܬܝܕ. ܝ̣ܕܝ̣ܥܐ ܕܚܟܝ̈ܡܘܗܝ ܕܥܠܡܐ ܗܢܐ܆ ܡܒܥ̈ܕܐ ܠܐ ܢܗܘܘܢ ܡ̣ܢ ܝ̣ܕܥܬܐ ܕܐܠܗܐ. ܘܡ̣ܢ ܗܠܝܢ ܡܫܬܪܪܐ ܕܐܦ ܚܟܝ̈ܡܘܗܝ ܕܥܠܡܐ ܗܢܐ ܟܕ ܡܬܕܟܐ ܗܘܢܗܘܢ ܕܣܥܘܪ̈ܘܬܐ ܡܝܬܪ̈ܬܐ ܢܩܢܘܢ. ܠܐ ܡܬܓܠܙܝ̣ܢ ܡ̣ܢ ܡܠܟܘܬܐ ܕܫܡܝܐ ܐܦܠܐ ܡ̣ܢ ܝܕܥܬܐ ܕܐܠܗܐ ܒܗ̇ܝ ܕܗ̣ܝ ܗ̣ܝ ܡܪܢܐܝܬ ܡܠܟܘܬܐ ܕܫܡܝܐ. ܘܟܕ ܠܘ ܥܠ ܗܟܢ ܒܛܝ̣ܠ ܠܢ ܒܩܘܡܐ ܗܢܐ. ܐܠܐ ܥܠ ܚܘܫܚܐ ܕܒܡ̈ܠܐ ܡܬܪ̈ܓܫܢܝܬܐ. ܘܗ̣ܘ ܗܢܐ ܢܝܫܐ ܐܬܬܒܠܨ. ܠܐ ܙܕܩ ܠܢ ܠܡܘܪܟܘ.

 

 

 

ܦܣܘܩܐ ܕܬܠܬܥܣܪ: ܡܛܠ ܗ̇ܝ ܕܡܫܬܘܕܥܝ̣ܢ ܐܪܐ ܒܢܝ̈ܢܫܐ ܠܚܕ̈ܕܐ ܒܬܪ ܩܝܡܬܐ ܐܘ ܠܐ

 

ܐܡܪܝܢܢ ܕܢܦܫܐ ܡܠܝ̣ܠܬܐ ܠܐ ܡܘܒܕܐ ܝ̣ܕܥܬܗ̇. ܘܚܝ̈ܠܐ ܡܕܪ̈ܟܢܐ ܕܦܓܪܐ ܗܟܘܬ ܡܬܢܛܪܝܢ. ܣܛܪ ܡ̣ܢ ܚܝ̈ܠܐ ܒܨܝ̣ܪ̈ܐ ܕܒܛܠܝ̣ܢ. ܡܢܐ ܟܠܐ ܠܗܘܢ ܠܒܢܝ̈ܢܫܐ ܡ̣ܢ ܗ̇ܝ ܕܠܚ̈ܕܕܐ ܢܫܬܘܕܥܘܢ. ܐܝܢ ܡ̣ܢ ܙܢܝ̈ܐ ܕܪ̈ܚܡܬܐ ܕܥܠܡܐ ܗܢܐ ܕܐ̱ܚܝܢ̈ܐ ܠܡܐܡܪ ܡܘܠܕ̈ܢܐ ܘܐܚ̈ܐ ܘܩܪ̈ܝܒܐ ܘܫܘܬܦ̈ܐ ܟܠܢܐܝܬ ܡܬܥܪܛܠܝ̣ܢ. ܒܗ̇ܝ ܕܙܕܝ̈ܩܐ ܡ̇ܢ܆ ܒܪܚܡܬܐ ܐܠܗܝܬܐ ܒܠܚܘܕ ܡܬܚܙܩܝ̣ܢ. ܘܥܘ̈ܠܐ ܡ̣ܢ ܟܠ ܙܢܐ ܕܪܚܡܬܐ ܡܣܬܪܩܝܢ. ܘܡ̣ܢ ܐܘܢܬܐ ܠܐ ܡܣܬܦܩܝܢ܆ ܟܕ ܡܫܬܢܩܝܢ. ܘܕܡܫܬܘܕܥܝ̣ܢ ܠܚܕ̈ܕܐ ܒܢܝ̈ܢܫܐ܆ ܝ̣ܕܝ̣ܥܐ ܡ̣ܢ ܡܬܠܗ ܕܥܬܝܪܐ ܘܠܥܙܪ. ܘܡ̣ܢ ܗ̇ܝ ܕܐܡ̣ܪ ܡܪܝ ܝܥܩܘܒ. ܟܠܗܘܢ ܝ̇ܕܥܝ̣ܢ ܗܢܐ ܠܗܢܐ ܕܠܐ ܫܘܐܠܐ. ܕܡܢܘ̣ ܘܐܝܢܘ ܘܕܡ̣ܢ ܐܝܟܐ ܗ̱ܘ ܘܡܢܘ̣ ܐܝܬܘܗܝ.

 

 

 

ܦܣܘܩܐ ܕܐܪܒܥܬܣܪ: ܡܛܠ ܗ̇ܝ ܕܠܐ ܡܣܬܢܩܝܢ ܒܢܝ̈ܢܫܐ ܥܠ ܡܐܟܠܐ ܘܡܫܬܝܐ ܒܬܪ ܩܝܡܬܐ

 

ܐܡܪܝܢܢ ܕܬܘܪܣܝܐ ܡ̇ܢ ܡܛܠ ܬܪܬܝܢ ܡܬܒܥܐ. ܚܕܐ ܡ̇ܢ܆ ܡܛܠ ܬܪܒܝ̣ܬܐ. ܘܐ̱ܚܪܬܐ ܡܛܠ ܡܘ̣ܠܝܐ ܕܗ̇ܘ ܕܡܬܦܘܫܫ ܡ̣ܢ ܦܓܪܐ ܒܝܕ ܬܪ̈ܬܝܗܝܢ ܚܡܝܡ̈ܘܬܐ ܕܠܒܪ ܘܕܠܓܘ. ܘܒܝܕ ܙܘ̈ܥܐ ܢܦܫܢܝ̈ܐ ܟܝܬ ܘܦܓܪ̈ܢܝܐ. ܘܒܥܠܡܐ ܚܕܬܐ ܟܕ ܠܝܬ ܬܪܒܝ̣ܬܐ ܐܦܠܐ ܒܘܨܪܐ ܕܒܝܕ ܦܘ̣ܫܫܐ. ܒܕܠܘ ܥܠܡܐ ܗ̱ܘ ܕܗܘܝܐ ܘܚܘܒܠܐ ܥܠܡܐ ܗ̇ܘ. ܐܦܠܐ ܡܐܟܠܐ ܘܡܫܬܝܐ ܗܘܐ ܬܡܢ. ܘܠܗ̇ ܠܗܕܐ ܡܫܪܪ ܛܘܒܢܐ ܦܘܠܘܣ ܟܕ ܐܡ̇ܪ ܕܡܠܟܘܬܐ ܕܐܠܗܐ ܠܐ ܗܘܬ݀ ܡܐܟܠܐ ܐܘ ܡܫܬܝܐ. ܐܠܐ ܟܐܢܘܬܐ ܘܫܠܡܐ ܘܚܕܘܬܐ ܒܪܘܚܐ ܕܩܘܕܫܐ. ܘܩܕܝܫܐ ܐܘܓܪܝܣ ܕܐܡ̇ܪ. ܐܢܗܘ ܕܥܘܬܪܗ ܕܐܠܗܐ ܗ̇ܘ ܕܥܬܝܕ ܝ̣ܕܥܬܐ ܪܘܚܢܝܬܐ ܕܒܗ ܐܝܬܝܗ̇. ܢܒܗܬܘܢ ܐܝܠܝܢ ܕܒܚܟܐ ܘܟܪܣܐ ܡܣܝܟܝ̣ܢ ܠܗ̇ ܠܡܠܟܘܬܐ ܕܫܡܝܐ.

 

ܗܦܟܬܐ:

 

ܐܡܪܝܢ ܕܩܝܡܬܐ ܕܡ̣ܢ ܒܝܬ ܡܝ̈ܬܐ ܗܦܘܟܝܐ ܕܟܝܢܢ ܕܠܘܬ ܩܛܣܛܣܝܣ ܩܕܡܝܬܐ ܐܝܬܝܗ̇ ܐܝܟ ܕܐܡ̣ܪ ܩܕܝܫܐ ܣܐܘܝ̣ܪܐ ܒܐܓܪܬܐ ܕܠܘܬ ܩܣܪܝܐ ܗܘܦܛܝܣܐ. ܡܛܠ ܗܟܝܠ ܕܗ̣ܝ ܩܝܡܬܐ ܦܘܢܝܐ ܕܡ̣ܢܕܪܝܫ ܕܠܘܬ ܗ̇ܝ ܕܡ̣ܢ ܫܘܪܝܐ ܐܝܬܝܗ̇. ܒܕܓܘܢ ܐܡܪܝܢܢ ܕܐܟܡܐ ܕܡ̣ܢ ܫܘܪܝܐ ܡܐܟܠ ܐܟ̇ܠܝܢ ܗ̣ܘܘ ܒܦܪܕܝܣܐ ܐܕܡ ܘܚܘܐ ܡ̣ܢ ܩܕܡ ܥܒܪ ܦܘܩܕܢܐ. ܐܝܟ ܕܡܫܘܕܥ ܟܬܒܐ ܕܐܘܪܝܬܐ. ܕܡ̣ܢ ܟܠܗܘܢ ܐܝܠܢ̈ܐ ܡܐܟܠ ܬܐܟܠܘܢ ܘܫܪܟܐ. ܒܗ̇ ܒܕܡܘ̣ܬܐ ܘܡ̣ܢ ܒܬܪ ܩܝܡܬܐ ܡܐܟܠ ܐܟܠܝܢ ܒܢܝ̈ܢܫܐ ܘܡܬܒܣܡܝܢ ܡ̣ܢ ܦܐܪ̈ܝ ܦܪܕܝܣܐ. ܘܐܠܘܠܐ ܐܟ̇ܠܝܢ ܗ̣ܘܘ ܘܫܬܝܢ ܒܢܝ̈ܢܫܐ ܒܬܪ ܩܝܡܬܐ. ܐܦܠܐ ܡܫܝܚܐ ܐܟܠ ܗ̣ܘܐ ܘܐܫܬܝ̣ ܡ̣ܢ ܒܬܪ ܩܝܡܬܐ. ܘܟܕ ܐܟܠ ܘܐܫܬܝ̣. ܐܦ ܚܢܢ ܐܟܘܬܗ ܐܟܠܝܢܢ ܘܫܬܝܢܢ. ܒܗ̇ܝ ܕܐܝܟ ܦܓܪܗ ܗܘܝܢ ܦܓܪ̈ܝܢ ܐܝܟ ܕܐܡ̣ܪ ܦܘܠܘܣ. ܕܢܥܒܕ ܠܡ ܠܦܓܪ̈ܝܢ܆ ܒܢܝ̈ ܕܡܘ̣ܬܐ ܕܦܓܪܐ ܕܫܘܒܚܗ. ܘܬܘܒ ܐܠܘܠܐ ܐܝܬ ܗ̣ܘܐ ܡܐܟܠܐ ܘܫܩܝܐ ܬܡܢ. ܐܝܟܢܐ ܐܡ̣ܪ ܡܫܝܚܐ. ܠܬܠܡܝ̈ܕܘܗܝ. ܕܐܢܐ ܡܫܬܘܕܐ ܐ̱ܢܐ ܠܟܘܢ. ܐܝܟ ܕܐܫܬܘܕܝ̣ ܠܝ ܐܒܝ ܡܠܟܘܬܐ. ܕܬܐܟܠܘܢ ܘܬܫܬܘܢ ܥܠ ܦܬܘܪܐ ܕܡܠܟܘܬܐ ܕܝܠܝ. ܘܬܬܒܘܢ ܥܠ ܟܘܪ̈ܣܘܬܐ ܘܬܕܘܢܘܢ ܬܪܥܣܪ ܫܒ̈ܛܐ ܕܐܝܣܪܐܝܠ.

 

ܦܘܢܝܐ:

 

ܐܡܪܝܢܢ ܕܦܪܘܛܐܣܝܣ ܗ̇ܝ ܕܐܡ̇ܪܐ ܕܩܝܡܬܐ ܦܘܢܝܐ ܕܡ̣ܢܕܪܝܫ ܕܠܘܬ ܗ̇ܝ ܫܘܪܝܐ ܐܝܬܝܗ̇. ܠܐ ܡܬܚܡܬܐ ܗ̱ܝ ܘܠܐ ܦܪܘܣܕܝܘܪܝܣܡܝܬܐ ܘܡܛܠܗܕܐ ܡܢܬܐܝܬ ܘܠܘ ܟܠܢܐܝܬ ܙܕܩ ܕܬܫܪ. ܟܐܡܬ ܕܒܡܕܡ ܡ̣ܢ ܙܢܝ̈ܐ ܡܬܕܡܝܐ ܩܛܣܛܣܝܣ ܗ̇ܝ ܕܒܬܪ ܩܝܡܬܐ ܠܗ̇ܝ ܩܕܡܝܬܐ. ܒܫܘܒܚܐ ܐܡ̇ܪ ܐ̱ܢܐ ܘܙܝܘܐ ܕܦܓܪܐ. ܘܕܟܝܘܬܐ ܕܡ̣ܢ ܚܫ̈ܐ ܘܠܘ ܒܟܠܡܕܡ. ܘܡܪܢ ܡ̇ܢ ܠܘ ܡܛܠ ܕܣܢܝ̣ܩ ܗ̣ܘܐ ܥܠ ܬܘܪܣܝܐ ܐܟ̣ܠ ܡ̣ܢ ܒܬܪ ܩܝܡܬܐ ܘܐܫܬܝ̣. ܐܠܐ ܡܛܠ ܕܢܫܪܪ ܩܝܡܬܗ. ܘܢܕܚܘܩ ܠܡܣܒܪܢܘܬܐ ܦܢܛܣܝܝܬܐ ܡ̣ܢ ܬܠܡܝ̈ܕܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܡ̣ܪ ܠܗܘܢ. ܓܘܫܘܢܢܝ ܘܕܥܘ ܕܠܪܘܚܐ ܒܣܪܐ ܘܓܪ̈ܡܐ ܠܝܬ ܐܝܟ ܕܠܝ ܚܙܝܢ ܐܢ̱ܬܘܢ. ܘܠܘܩܒܠ ܗ̇ܝ ܕܬܐܟܠܘܢ ܘܬܫܬܘܢ ܥܠ ܦܬܘܪܐ ܕܡܠܟܘܬܝ. ܐܡܪܝܢܢ ܕܠܚܪܬܐ ܒܝܕ ܐܠܗܐ ܡܚܘܝܢܢ ܕܡܠܟܘܬܐ ܕܫܡܝܐ ܝ̣ܕܥܬܐ ܡܕܡ ܐܝܬܝܗ̇. ܡܕܝܢ ܐܦ ܐܘܟܠܗ̇ ܘܫܩܝܗ̇ ܝ̣ܕܥ̈ܬܢܝܐ ܘܠܘ ܓܘܫ̈ܡܢܝܐ ܙܕܩ ܕܢܗܘܘܢ.

 

 

 

ܦܣܘܩܐ ܕܚܡܫܬܥܣܪ: ܡܛܠܗ̇ܝ ܕܠܐ ܡܙܕܘܓܝܢ ܒܢܝ̈ܢܫܐ ܒܬܪ ܩܝܡܬܐ

 

ܐܡܪܝܢܢ ܕܬܪܝܢ ܐܢܘܢ ܢܝ̈ܫܐ ܕܡܫܬܡܠܝܢ ܒܙܘܘܓܐ. ܚܕ ܡ̇ܢ ܐܫܝܠܐ ܘܐ̱ܚܪܢܐ ܡܪܢܝܐ. ܘܐܫܝ̣ܠܐ ܡ̇ܢ ܐܝܬܘܗܝ. ܗܢܝܐܘܬܐ ܗ̇ܝ ܛܠܢܝܬܐ. ܕܒܥܓܠ ܡܫܬܪܝܐ ܘܒܛܠܐ. ܘܐܝܟ ܚܠܡܐ ܥܒܪܐ ܘܠܐ ܡܟܬܪܐ. ܡܪܢܝܐ ܕܝܢ ܐܝܬܘܗܝ܆ ܗ̣ܝ ܢܛܝ̣ܪܘܬ ܐܕܫܐ ܕܒܝܕ ܝܘܒܠܐ. ܕܒܝܕ ܙܘܘܓܐ ܗ̇ܘܝܐ. ܒܗ̇ܝ ܕܟܕ ܒܪܢܫܐ܇ ܠܘ ܩܢܘܡܐܝܬ ܡܨܐ ܠܡܬܢܛܪܘ ܕܠܐ ܚܒܠ. ܐܕܫܢܐܝܬ ܡܬܢܛܪ ܒܝܘܒܠܐ. ܒܥܠܡܐ ܕܝܢ ܕܥܬܝܕ. ܟܕ ܗܢܝܐܘܬܐ ܗ̇ܝ ܪܘܚܢܝܬܐ ܕܝܬܝܪ ܡܥܠܝܐ. ܘܚܝܠܬܢܝܐ ܡ̣ܢ ܗܕܐ ܚܝܘܬܢܝܬܐ ܐܝܟ ܕܡ̣ܢ ܠܥܠ ܚܘܝ̣ܢܢ ܗ̇ܘܝܐ. ܘܩܢܘ̈ܡܐ ܕܠܐ ܚܒܠ ܠܥܠܡ ܡܬܢܛܪܝܢ. ܒܕܠܐ ܡܫܬܠܛ ܥܠܝܗܘܢ ܡܘܬܐ. ܐܝܕܐ ܣܢܝܩܘܬܐ ܗ̇ܘܝܐ ܥܠ ܙܘܘܓܐ. ܘܟܕ ܒܥܠܡܐ ܗܢܐ ܫܓܡܢܝܐ ܘܫܝ̣ܛܐ. ܠܐ ܡܕܡ ܐܝܩܝ ܐܣܬܥܪ ܐܘ ܡܣܬܥܪ. ܒܥܠܡܐ ܗ̇ܘ ܡܪܢܝܐ ܘܡܛܟܣ ܒܟܠ. ܐܝܟܢܐ ܣܥܘܪܘܬܐ ܒܥܝ̣ܪܝܬܐ ܕܐܝܟ ܗܕܐ܇ ܕܐܦܠܐ ܗܢܝܐܘܬܐ ܗ̱ܝ. ܐܠܐ ܕܚܝܐ ܕܗ̇ܘ ܕܡܠܙ܆ ܐܝܟ ܕܐܬܚܘܝ܇ ܡܨܝܐ ܕܬܗܘܐ. ܘܠܗ̇ ܠܗܕܐ ܡܫܪܪ ܫܪܝܪܐ ܒܡܠܘ̈ܗܝ ܚܝ̈ܬܐ ܟܕ ܐܡ̇ܪ. ܕܒܩܝܡܬܐ ܡ̇ܢ ܠܐ ܡܙܕܘܓܝܢ܆ ܘܠܐ ܡܙܕܘ̈ܓܢ.

 

 

 

ܫܠܡܬ݀ ܫܬܐܣܬܐ ܥܣܝܪܝܬܐ

 

 

 

 

 

 

 

     #1 

 

ܫܬܐܣܬܐ ܚܕܥܣܝܪܝܬܐ

 

ܡܛܠ ܚܪܬܐ ܘܕܝ̣ܢܐ ܘܦܘܪܥܢܐ ܕܛܒ̈ܐ ܘܕܒܝ̈ܫܐ. ܘܒܗ ܐܝܬ ܩܦ̈ܠܐܐ ܫܬܐ. ܩܦܠܐܘܢ ܩܕܡܝܐ ܡܛܠ ܐܬܘ̈ܬܐ ܕܫܘܠܡܐ. ܘܒܗ ܦܣܘ̈ܩܐ ܫܒܥܐ. ܦܣܘܩܐ ܩܕܡܝܐ ܡܛܠܗ̇ܝ ܕܐܢ ܐܪܐ ܝ̣ܕܝ̣ܥ ܗ̣ܘ ܙܒܢܐ ܕܫܘܠܡܐ ܐܘ ܠܐ

 

 

 

 

 

ܕܠܝܘܡܐ ܗ̇ܘ ܘܠܫܥܬܐ ܗ̇ܝ ܠܐ ܐ̱ܢܫ ܝ̇ܕܥ. ܐܦܠܐ ܡܠܐܟ̈ܐ ܕܒܫܡܝܐ. ܐܠܐ ܐܒܐ ܒܠܚܘܕ. ܗ̣ܘ ܫܪܝܪܐ ܗܕܐ. ܘܟܕ ܠܐ ܐ̱ܢܫ ܝ̇ܕܥ. ܐܠܨܐ ܕܐܦܠܐ ܗ̣ܘ ܒܗ̇ܝ ܕܒܪܢܫܐ ܗ̱ܘ ܡܫܡܠܝܐ. ܒܗ̇ܝ ܕܝܢ ܕܐܠܗܐ ܗ̱ܘ. ܟܠܗܝܢ ܝܕܥ. ܐܦ ܓܝܪ ܘܠܬܠܡܝ̈ܕܘܗܝ ܟܕ ܨܒܘ ܠܡܬܐܪܙܘ ܡܢܗ ܕܐܝܟ ܗܠܝܢ܇ ܙܓܪ ܘܐܡ̣ܪ. ܠܐ ܗܘܬ݀ ܕܝܠܟܘܢ ܗܕܐ ܠܡܕܥ. ܙܒܢܐ ܐܘ ܙܒ̈ܢܐ. ܐܝܠܝܢ ܕܐܒܐ ܣ̣ܡ ܐܢܘܢ ܒܫܘܠܛܢܐ ܕܢܦܫܗ. ܘܟܕ ܗܠܝܢ ܗܟܢܐ ܐܢܝܢ. ܓܠܝܐ ܕܟܠܗܝܢ ܗܠܝܢ ܕܐܡܝ̣ܪ̈ܢ ܒܢܝ̣ܫܐ ܗܢܐ ܘܡܟ̈ܬܒܢ. ܘܙܒ̈ܢܐ ܘܥܕ̈ܢܐ ܘܫܢܝ̈ܐ ܡܬܚ̈ܡ. ܠܘ ܡ̣ܢ ܪܘܚܐ ܩܕܝܫܐ ܐܡܝ̣ܪ̈ܢ. ܘܡܛܠܗܕܐ ܣܓܝ̈ܐܬܐ ܡ̣ܢ ܡܟܬܒܢܘ̈ܬܐ ܕܒܗܢܐ ܢܝܫܐ܆ ܠܘ ܗܢܝܐܝܬ ܡܬܩܒ̈ܠܢ ܒܥܕܬܐ ܩܕܝܫܬܐ. ܐܝܟ ܓܠܝܢܗ ܕܝܘܚܢܢ. ܗ̇ܘ ܕܐܢ ܠܫܠܝܚܐ ܒܪ ܪܥܡܐ. ܐܘ ܠܝܘܚܢܢ ܐ̱ܚܪܢܐ܇ ܐܝܟ ܕܡܬܐܡܪܐ ܣܝ̣ܡ܆ ܐܠܗܐ ܗ̱ܘ ܒܠܚܘܕ ܝܕܥ. ܘܡ̣ܢ ܗܪܟܐ ܬܘܒ ܝ̣ܕܝ̣ܥܐ. ܕܗ̇ܝ ܕܡܬܐܡܪܐ ܕܒܫܘܠܡܗ ܠܡ ܕܐܠܦܐ ܫܒܝ̣ܥܝܐ܇ ܫܘܠܡܗ ܕܥܠܡܐ ܢܩܦ. ܨܒܪܐ ܗ̱ܘ ܕܡ̣ܢ ܙܪܥܐ ܐܣܛܪܘܠܘܓܝܩܝܐ ܐܬܒܛܢ ܘܐܬܚܒܠ ܘܐܬܝܠܕ. ܘܐܝܟܢܐ ܡܨܝܐ ܕܬܫܪ ܗܕܐ ܥܡ ܫܪܝܪܘܬ ܡܠܬܗ ܕܡܪܢ ܕܐܡ̣ܪ. ܗ̣ܘܘ ܡܛܝܒܝ̣ܢ. ܕܒܫܥܬܐ ܕܠܐ ܣ̇ܒܪܝܢ ܐܢ̱ܬܘܢ ܢܐܬܐ ܒܪܗ ܕܐ̱ܢܫܐ. ܒܕܓܘܢ ܗ̇ܘ ܕܠܗܠܝܢ ܡܬܪܡܐ. ܡ̣ܢ ܦܘܠܘܣ ܢܬܟܣܣ ܕܐܡ̇ܪ. ܕܬܘܒ ܗܦܟܬܘܢ ܠܟܘܢ ܥܠ ܗ̇ܢܘܢ ܐܣܛܘ̈ܟܣܐ ܡܪ̈ܥܐ ܘܡܣܟܢ̈ܐ. ܘܡ̣ܢܕܪܝܫ ܨܒܝܢ ܐܢ̱ܬܘܢ ܠܡܫܬܥܒܕܘ ܠܗܘܢ. ܝܘ̈ܡܐ ܘܝܪ̈ܚܐ ܘܙܒ̈ܢܐ ܘܫܢܝ̈ܐ ܢܛܪܝ̣ܢ ܐܢ̱ܬܘܢ. ܕܚ̇ܠ ܐ̱ܢܐ ܕܠܡܐ ܣܪܝ̣ܩܐܝܬ ܠܐܝ̣ܬ ܒܟܘܢ. ܘܬܘܒ ܐܡ̇ܪ. ܥܠ ܙܒ̈ܢܐ ܕܝܢ ܘܥܕ̈ܢܐ ܐܚܝ̈ ܠܐ ܣܢܝ̣ܩܝ̣ܢ ܐܢ̱ܬܘܢ ܠܡܟܬܒ ܠܟܘܢ. ܐܢ̱ܬܘܢ ܓܝܪ ܫܪܝܪܐܝܬ ܝ̇ܕܥܝܢ ܐܢ̱ܬܘܢ. ܕܝܘܡܗ ܕܡܪܢ ܐܝܟ ܓܢܒܐ ܒܠܠܝܐ ܗܟܢܐ ܐܬܐ.

 

ܗܦܟܬܐ:

 

ܐܡܪܝܢ ܐܠܘ ܠܘ ܒܫܘܠܡܗ ܕܐܠܦܐ ܫܒܝܥܝܐ ܫܘܠܡܗ ܕܥܠܡܐ ܗܢܐ. ܐܝܟܢܐ ܐܡ̣ܪ ܫܠܝܡܘܢ ܗܒ ܡܢܬܐ ܠܫܒܥܐ ܐܦ ܠܬܡܢܝܐ.

 

ܦܘܢܝܐ:

 

ܐܡܪܝܢܢ ܕܡܠܬܗ ܕܫܠܝܡܘܢ ܒܠܚܘܕ ܡܫܘܕܥܐ܆ ܕܒܫܒܘ̈ܥܐ ܡܬܚܡܝ̣ܢ ܝܘܡܘ̈ܗܝ ܕܥܠܡܐ. ܘܒܚܕ ܒܫܒܐ ܕܗܘܝܘ ܫܘܪܝܐ ܘܫܘܠܡܐ ܐܘܟܝ̣ܬ ܩܕܡܝܐ ܘܬܡܝ̣ܢܝܐ ܕܝܘ̈ܡܬܐ. ܡܫܪܐ ܥܠܡܐ ܚܕܬܐ ܘܪܘܚܢܝܐ.

 

ܗܦܟܬܐ:

 

ܐܡ̇ܪܝܢ ܐܢܗܘ ܕܗܟܢܐ ܠܐ ܡܬܕܪ̈ܟܢܐ ܐܢܘܢ. ܝܘܡܐ ܗ̇ܘ ܘܫܥܬܐ ܗ̇ܝ ܐܝܟܢܐ ܝܗܒ ܡܪܢ ܐܬܘ̈ܬܐ ܒܐܘܢܓܠܝܘܢ ܘܕܝܬܝܩܝ ܕܝܠܗ ܠܡܫܬܘܕܥܘܬܗܘܢ.

 

ܦܘܢܝܐ:

 

ܐܡܪܝܢܢ ܕܐܬܘ̈ܬܐ ܗܠܝܢ ܠܘ ܠܝܘܡܐ ܗ̇ܘ ܘܫܥܬܐ ܗ̇ܝ ܝ̣ܕܝ̣ܥܐܝܬ ܘܡܫܡܗܐܝܬ ܡܫܘܕ̈ܥܢ. ܐܠܐ ܕܩܪܒܘ ܒܠܚܘܕ. ܐܝܟ ܕܗ̣ܘ ܡܪܝܐ ܡܫܘܕܥ ܟܕ ܐܡ̇ܪ. ܡܐ ܕܚܙܝܬܘܢ ܗܠܝܢ ܕܗܘ̈ܝܢ. ܕܥܘ ܕܩܪܝ̣ܒܐ ܗ̱ܝ ܥܠ ܬܪܥܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܫܘܘ̈ܕܥܐ ܕܩܪܝ̣ܒܘܬ ܫܘܠܡܐ. ܘܒܗ ܐܝܬ ܥܘܬܕܐ ܘܢܝ̈ܫܐ ܐܪܒܥܐ. ܩܕܡܝܬ ܥܘܬܕܐ

 

ܐܡܪܝܢܢ ܡܛܠ ܐܬܘ̈ܬܐ ܕܫܘܠܡܐ ܗ̣ܘ ܡܪܝܐ ܒܐܘܢܓܠܝ̈ܐ ܕܝܠܗ ܦܬܝܐܝܬ ܫܘܕܥ ܡ̣ܢ ܩܕܡ ܕܢܚܫ ܘܢܩܘܡ ܡ̣ܢ ܡܝ̈ܬܐ. ܘܡ̣ܢ ܒܬܪ ܕܚ̣ܫ ܘܩ̣ܡ ܡ̣ܢ ܒܝܬ ܡܝ̈ܬܐ ܬܘܒ. ܟܕ ܐܬܚܙܝ̣ ܠܬܠܡܝ̈ܕܘܗܝ ܩܕܝ̈ܫܐ ܘܐܬܓܫܫ ܡ̣ܢ ܬܐܘܡܐ. ܟܕ ܒܥܘ ܡܢܗ ܕܢܘܕܥ ܐܢܘܢ ܐܬܘ̈ܬܐ ܕܫܘܠܡܐ ܕܥܠܡܐ ܗܢܐ ܐܘܕܥ ܐܢܘܢ. ܐܟܡܐ ܕܐܟܬܒ ܩܕܝܫܐ ܩܠܝܡܣ ܕܪܘܡܝ̣ ܘܡܠܠ ܡ̣ܢ ܦܘܡܗܘܢ ܕܝܠܗܘܢ ܕܫܠܝ̈ܚܐ. ܒܟܬܒܐ ܩܕܝܫܐ ܕܝܠܗ ܗ̇ܘ ܕܕܝܬܝܩܝ ܕܡܪܢ ܩܪܝܗܝ. ܘܡܛܠ ܕܐܬܘ̈ܬܐ ܗ̇ܢܝܢ ܕܒܐܘܢܓܠܝܘܢ ܐܡܝ̣ܢܐܝܬ ܒܥܕ̈ܬܐ ܡܬܩܪ̈ܝܢ ܘܡܬܕܪ̈ܫܢ ܠܐ ܣܢܝ̣ܩܝ̣ܢܢ ܠܡܥܦܦܘܬܗܝܢ ܬܢܢ. ܐܠܐ ܠܗܠܝܢ ܒܠܚܘܕ ܕܒܕܝܬܝܩܝ ܪ̈ܫܝ̣ܡܢ ܒܟܪ̈ܝܬܐ ܗܪܟܐ ܡܝܬܝܢܢ.

 

ܢܝܫܐ ܩܕܡܝܐ ܡܛܠ ܪ̈ܝܫܢܐ ܘܡܠܟ̈ܐ:

 

ܐܡ̣ܪ ܓܝܪ ܩܕܝܫܐ ܩܠܝܡܝܣ ܕܐܡ̣ܪܘ ܫܠܝ̈ܚܐ ܩܕܝ̈ܫܐ ܕܐܡ̣ܪ ܠܗܘܢ ܡܪܝܐ. ܕܡ̣ܢ ܒܬܪ ܟܦ̈ܢܐ ܘܡܘ̈ܬܢܐ ܘܒܘ̣̈ܠܒܠܐ ܗܠܝܢ ܕܒܥܡ̈ܡܐ܆ ܗܝܕܝܢ ܢܫܬܠܛܘܢ ܘܢܩܘܡܘܢ ܒܪܝܫܐ ܪ̈ܝܫܢܐ. ܪ̈ܚܡܝ ܟܣܦܐ. ܣܢ̈ܝܝ ܫܪܪܐ. ܩܛܠܝ̈ ܐܚܝ̈ܗܘܢ ܕܓ̈ܠܐ. ܣܢ̈ܝܝ ܡܗܝ̈ܡܢܐ. ܫܒܗܪ̈ܢܐ. ܪ̈ܚܡܝ ܕܗܒܐ. ܫܘ̈ܝܝ ܓܢܣܐ܆ ܐܠܐ ܠܐ ܫܘ̈ܝܝ ܒܬܪܥܝ̣ܬܐ. ܒ̇ܥܝܢ ܓܝܪ ܟܠ ܚܕ ܡܢܗܘܢ. ܕܚܝ̈ܐ ܕܚܒܪܗ ܢܘܒܕ. ܢܗܘܐ ܕܝܢ ܒܚܝܠܘ̈ܬܗܘܢ ܐܘܠܨܢܐ ܣܓܝܐܐ. ܘܥܪܘܩܝܐ ܘܐܫܝ̣ܕܘܬܐ ܕܕܡܐ. ܢܩܘܡ ܕܝܢ ܐܦ ܒܡܥܪܒܐ ܡܠܟܐ ܐ̱ܚܪܢܝܝ ܓܢܣܐ. ܪܝܫܢܐ ܕܨܢܝ̣ܥܘܬܐ. ܕܠܐ ܐܠܗ. ܩ̇ܛܠ ܒܢܝ̈ܢܫܐ. ܡܛܥܝܢܐ. ܪܚܡ ܕܗܒܐ. ܣܓܝ ܡܚܫ̈ܒܬܐ. ܒܝܫܐ ܣܢܐ ܡܗܝ̈ܡܢܐ. ܪܕܘܦܐ. ܢܫܬܠܛ ܕܝܢ ܐܦ ܥܠ ܥܡ̈ܡܐ ܒܪܒܪ̈ܝܐ. ܘܢܐܫܘܕ ܕܡܐ ܣܓܝܐܐ. ܗܝܕܝܢ ܢܣܬܠܐ ܟܣܦܐ. ܘܢܬܝܩܪ ܕܗܒܐ. ܬܗܘܐ ܕܝܢ ܒܟܠ ܡܕܝܢ̱ܬܐ ܘܐܬܪܐ ܒܙܬܐ ܘܦܪܕܐ ܕܓܝ̈ܣܐ ܘܫܘܦܥ ܕܡܐ ܘܚܛܘ̣̈ܦܝܐ ܘܚܪ̈ܒܘܬܐ.

 

 

 

ܢܝܫܐ ܬܪܝܢܐ ܡܛܠ ܐܬܘ̈ܬܐ ܕܒܫܡܝܐ ܘܗ̇ܢܝܢ ܕܥܠ ܐܪܥܐ.

 

ܗ̣ܘ ܗܟܘܬ ܐܡ̣ܪ ܕܐܡ̣ܪ ܠܗܘܢ ܗ̣ܘ ܫܪܝܪܐ. ܕܩܫܬܐ ܕܒܫܡܝܐ ܬܬܚܙܐ. ܘܩܪܢܐ ܘܠܡܦܐܕܐ. ܘܙܡܡ̈ܐ ܕܠܐ ܒܙܒܢܐ ܕܩ̈ܠܐ. ܘܛܘܪ̈ܛܥܐ ܕܝܡܐ ܘܓܥܬܐ ܕܐܪܥܐ. ܘܡܘܠܕ̈ܐ ܕܬܢܝ̈ܢܐ ܘܕܚܝܘܬ ܫܢܐ ܡ̣ܢ ܒܢܝ̈ܢܫܐ. ܘܛܠܝ̈ܬܐ ܕܡܙܕܘ̈ܓܢ ܚܕܬܐܝܬ. ܢܐܠܕ̈ܢ ܫܒܪ̈ܐ ܕܡܡܠܠܝ̣ܢ ܡ̈ܠܐ ܡܫܡ̈ܠܝܬܐ. ܘܡܘܕܥܝ̣ܢ ܙܒ̈ܢܐ ܐ̱ܚܪ̈ܝܐ. ܘܡܦܝ̣ܣܝ̣ܢ ܕܢܬܩܛܠܘܢ. ܘܚܙܬܗܘܢ ܬܗܘܐ ܐܝܟ ܕܗ̇ܢܘܢ ܕܥܠܝ̣ܠܝ̣ܢ ܒܫܢܝ̈ܐ. ܘܓܘܢܗܘܢ ܚܘܪ. ܐܦ ܢܫ̈ܐ ܢܐܠܕ̈ܢ ܫܒܪ̈ܐ ܪ̈ܒܝ̣ܥܝܝ ܪ̈ܓܠܐ. ܘܐ̱ܚܪ̈ܢܝܬܐ ܩܨܘ̈ܡܝܬܐ ܒܟܪܣܐ ܘܡ̈ܡܠܠܬ ܒܙܟܘܪ̈ܐ.

 

 

 

ܢܝܫܐ ܬܠܝܬܝܐ ܡܛܠ ܒܘܠܒܠܐ ܕܪ̈ܥܘܬܐ ܘܡܪ̈ܥܝܬܐ

 

ܢܩܘܡܘܢ ܓܝܪ ܪ̈ܥܘܬܐ ܥܘ̈ܠܐ. ܠܐ ܟܐܢ̈ܐ. ܡܒܣ̈ܝܢܐ. ܝܥ̈ܢܐ. ܪ̈ܚܡܝ ܗܢܝ̈ܐܘܬܐ. ܘܝܘܬܪ̈ܢܐ ܘܟܣܦܐ. ܣܓܝ̈ܐܝ ܡ̈ܠܐ. ܫܒܗܪ̈ܢܐ. ܡܫܬܥ̈ܠܝܢܐ. ܡܥܩ̈ܡܐ. ܣܦܝ̈ܦܐ. ܒܣܘ̈ܡܐ. ܣܪ̈ܝ̣ܩܝ ܫܘܒܚܐ ܕܣܩܘܒܠܐܝܬ ܩܝܡܝܢ ܠܘܩܒܠ ܐܘܪ̈ܚܬܐ ܕܐܘܢܓܠܝܘܢ. ܘܥܪܩܝ̣ܢ ܡ̣ܢ ܬܪܥܐ ܐܠܝ̣ܨܐ. ܘܠܐ ܡܬܐܒܠܝ̣ܢ ܥܠ ܚܛܗܝ̈ܗܘܢ. ܘܢܬܐܫܕܘܢ ܡܟܝܠ ܒܥܡ̈ܡܐ. ܠܐ ܗܝܡܢܘܬܐ. ܣܢܐܬ݀ ܐܚ̈ܐ. ܒܝܫܘܬܐ. ܡܪܝܪܘܬܐ. ܡܒܣܝܢܘܬܐ. ܛܢܢܐ. ܒܥܠܕܒܒܘܬܐ. ܚܪܝܢܐ. ܓܢܒ̈ܘܬܐ. ܥܠܝ̣̈ܒܘܬܐ. ܪ̈ܘܝܘܬܐ. ܐܣܘ̈ܛܘܬܐ. ܦܚܙ̈ܘܬܐ. ܫܪ̈ܝ̣ܚܘܬܐ. ܙܢܝ̈ܘܬܐ. ܘܢܣܬܠܘܢ ܡܢܗܘܢ ܓܒܝ̈ܐ ܕܝܠܝ ܘܩܕܝ̣̈ܫܝ ܐܡ̣ܪ ܡܪܝܐ. ܘܐܝܟ ܡܣܝ̈ܒܐ ܢܫܬܡܗܘܢ ܒܝܢܬܗܘܢ. ܗܠܝܢ ܕܝܢ ܐܝܬܝܗܘܢ. ܬܪ̈ܝܨܐ ܕܟܝ̈ܐ. ܫܚܝ̣̈ܩܐ. ܡܪ̈ܚܡܢܐ. ܢܝ̣̈ܚܐ. ܒܣܝ̈ܡܐ. ܥܡ ܗܠܝܢ ܕܝܢ ܢܬܕܠܚ̈ܢ ܡܠܟ̈ܘܬܐ. ܘܓܠܝ̣ܙܘܬ ܥ̈ܠܠܬܐ ܬܗܘܐ. ܘܢܐܚܕܘܢ ܒܢܝ̈ܢܫܐ ܒܝܬ ܩܦܣܝ̈ܗܘܢ. ܘܢܫܬܠܛܘܢ ܥܠ ܫܘ̈ܩܐ ܕܙܒܢܐ ܘܙܘܒܢܐ. ܘܢܬܐܠܨܘܢ ܣܓܝ̈ܐܐ. ܐܡܬܝ ܓܝܪ ܕܢܗܘ̈ܝܢ ܗܠܝܢ ܡܟܝܠ ܩܪܝ̣ܒܐ ܗ̱ܝ ܗ̇ܝ ܕܚܒܠܐ ܠܡܐܠܕ. ܡܛܠ ܕܐܬܡܠܝ̣ ܠܗ ܙܒܢܗ̇. ܗܝܕܝܢ ܢܐܬܐ ܒܪ ܐܒܕܢܐ.

 

 

 

ܢܝܫܐ ܪܒܝܥܝܐ ܡܛܠ ܐܒܕܢܐ ܕܐܬܪ̈ܘܬܐ ܒܙܒ̈ܢܐ ܐ̱ܚܪ̈ܝܐ

 

ܣܘܪܝܐ ܕܝܢ ܬܗܘܐ ܫܒܝ̣ܬܐ ܘܬܐܠܐܷ ܠܒܢܝ̈ܗ̇. ܩܝ̣ܠܝ̣ܩܝܐ ܬܪܝ̣ܡ ܨܘܪܗ̇ ܥܕܡܐ ܕܢܬܚܙܐ ܗ̇ܘ ܕܕܐܢ ܠܗ̇. ܬܩܘܡ ܡ̣ܢ ܟܘܪܣܝܐ ܕܫܘܒܚܗ̇ ܒܪܬܐ ܕܒܒܝܠ ܕܬܫܬܐ ܡܙܓܬܐ ܗ̇ܝ ܕܡܙܝ̣ܓܐ ܠܗ̇. ܩܦܕܘܩܝܐ ܠܘܩܝܐ ܠܘܩܐܢܝܐ. ܬܟܘܦ ܚܨܐ ܡܛܠ ܕܟܢ̈ܫܐ ܣܓܝ̈ܐܐ ܢܣܬܪܚܘܢ ܒܚܒܠܐ ܕܪܫܝ̣ܥܘܬܗܘܢ. ܗܝܕܝܢ ܢܬܦܬܚ̈ܢ ܡܫܪ̈ܝܬܐ ܕܒܪܒܪ̈ܝܐ. ܢܦ̈ܩܢ ܓܝܪ ܡܪ̈ܟܒܬܐ ܣܓܝ̈ܐܬܐ. ܐܝܟܢܐ ܕܢܟܣ̈ܝܢ ܠܐܪܥܐ ܕܐܪܡܢܝܐ ܟܠܗ̇. ܘܕܦܘܢܛܘܣ ܘܕܒܝܬܘܢܝܐ. ܦܝܣܝܕܝܐ ܒܐܪܥܐ ܬܣܬܚܦ. ܠܦܘܢܝ̣ܩܝ ܚܪܒܐ ܬܥܘܠ. ܝܗܘܕ ܬܠܒܫ ܐܒܠܐ. ܡܕܢܚܐ ܬܬܦܬܚ ܐܦ ܐܘܪ̈ܚܬܐ ܢܬܦܬܚ̈ܢ ܠܗ̇.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܒܪܐ ܕܐܒܕܢܐ ܘܫܘܘ̈ܕܥܘܗܝ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܦܘܫܩ ܫܡܗ. ܘܣܗܕ̈ܘܬܐ ܡܫܪܪ̈ܢܝܬܐ ܕܡܐܬܝܬܗ

 

ܐܢܛܝܟܪܝܣܛܘܣ ܐܘܟܝܬ ܣܩܘܒܠܝ ܠܡܫܝܚܐ ܡܬܩܪܐ ܗ̇ܘ ܡܛܥܝܢܐ ܘܒܪܐ ܕܐܒܕܢܐ. ܒܗ ܕܒܟܠܗܝܢ ܗܠܝܢ ܕܣ̇ܥܪ ܘܡܠܦ. ܕܠܩܘܒܠܐ ܡܬܚܙܐ ܕܐܘܪ̈ܚܬܗ ܡܚܝܢ̈ܝܬܐ ܕܦܪܘܩܢ. ܘܕܫܪܝܪܐܝܬ ܥܬܝ̣ܕ ܗ̣ܘ ܕܢܐܬܐ. ܐܝܟ ܕܠܒܘܩܝܐ ܕܡܗܝ̈ܡܢܐ. ܘܩܘܦܝܐ ܕܟܘܘܢܐ ܕܟܠܗܘܢ ܗ̇ܢܘܢ ܕܩܘܫܬܐ ܒܥܘܠܐ ܗܘܝܢ ܐܚܝ̣ܕܝܢ ܒܚܪܬ݀ ܙܒ̈ܢܐ. ܟܠܗܘܢ ܟܬܒ̈ܐ ܩܕܝ̈ܫܐ ܣ̇ܗܕܝܢ. ܕܡܢܗܘܢ ܗܠܝܢ ܚܡܫ ܣܗܕ̈ܘܢ ܒܠܚܘܕ ܡܝܬܝܢܢ.

 

ܣܗܕܘܬܐ ܩܕܡܝܬܐ:

 

ܐܘܢܓܠܝܘܢ. ܗܝܕܝܢ ܐܢ ܐ̱ܢܫ ܢܐܡܪ ܠܟܘܢ. ܗܐ ܗܪܟܐ ܗ̱ܘ ܡܫܝܚܐ. ܘܗܐ ܗܪܬܡܢ ܠܐ ܬܗܝܡܢܘܢ. ܢܩܘܡܘܢ ܓܝܪ ܡܫܝ̈ܚܐ ܕܓ̈ܠܐ. ܘܢܒܝ̈ܐ ܕܟܕܒܘܬܐ. ܘܢܬܠܘܢ ܐܬܘ̈ܬܐ ܘܬܕܡܪ̈ܬܐ. ܘܢܛܥܘܢ ܐܢ ܡܫܟܚܐ ܐܦ ܠܓܒܝ̈ܐ.

 

ܣܗܕܘܬܐ ܕܬܪܬܝܢ:

 

ܕܝܬܝܩܝ ܕܡܪܢ. ܗܝܕܝܢ ܢܐܬܐ ܒܪܐ ܕܐܒܕܢܐ ܗ̇ܘ ܣܩܘܒܠܝܐ. ܘܡܬܬܪܝ̣ܡ ܘܡܫܬܩܠ. ܟܕ ܥܒܕ ܐܬܘ̈ܬܐ ܘܚܝ̈ܠܐ ܣܓܝ̈ܐܐ. ܠܘ ܗ̇ܝ ܕܢܛܥܐ ܠܟܠܗ̇ ܐܪܥܐ ܘܢܬܚܝܠ ܙܒܢܐ. ܥܠ ܩܕܝ̈ܫܐ ܕܝܠܝ. ܛܘܒܝܗܘܢ ܠܐܝܠܝܢ ܕܡ̇ܣܒܪܝ̣ܢ ܒܝܘ̈ܡܬܐ ܗ̇ܢܘܢ. ܘܝܐ ܕܝܢ ܢܗܘܐ ܠܗ̇ܢܘܢ ܕܡܬܬܛܥܝܢ.

 

ܣܗܕܘܬܐ ܕܬܠܬ:

 

ܝܘܚܢܢ ܫܠܝܚܐ ܒܐܓܪܬܗ ܩܕܡܝܬܐ. ܒܢܝ̈ ܙܒܢܐ ܗ̱ܘ ܐ̱ܚܪܝܐ. ܘܐܝܟ ܡܕܡ ܕܫܡܥܬܘܢ ܕܐܬܐ ܡܫܝܚܐ ܕܓܠܐ.

 

ܣܗܕܘܬܐ ܕܐܪܒܥ:

 

ܗ̣ܘ ܟܕ ܗ̣ܘ ܝܘܚܢܢ ܒܐܓܪܬܗ ܕܬܪܬܝܢ. ܡܛܠ ܕܣܓܝ̈ܐܐ ܡܛܥ̈ܝܢܐ ܢܦܘܩ ܒܗ ܒܥܠܡܐ. ܐܝܠܝܢ ܕܠܐ ܡܘܕܝܢ ܕܝܫܘܥ ܡܫܝܚܐ ܐܬܐ ܒܒܣܪܐ. ܗܢܐ ܐܝܬܘܗܝ ܡܛܥܝܢܐ ܘܐܢܛܝܟܪܝܣܛܘܣ.

 

ܣܗܕܘܬܐ ܕܚܡܫ:

 

ܦܘܠܘܣ ܒܗ̇ܝ ܕܬܣܠܘܢܝ̈ܩܝܐ ܕܬܪܬܝܢ. ܡܛܠ ܕܐܢ ܠܐ ܬܐܬܐ ܠܘܩܕܡ ܡܪܕܘܬܐ. ܘܢܬܓܠܐ ܒܪܢܫܐ ܕܚܛܝ̣ܬܐ ܒܪܗ ܕܐܒܕܢܐ. ܗ̇ܘ ܕܠܩܘܒܠܐ ܗ̱ܘ ܘܡܫܬܥܠܐ ܥܠ ܟܠܢ ܡ̇ܢ ܕܡܬܩܪܐ ܐܠܗ ܘܕܚܠܐ. ܐܝܟܢܐ ܕܐܦ ܒܗܝܟܠܐ ܕܐܠܗܐ ܐܝܟ ܐܠܗܐ ܢܬܒ. ܘܒܬܪ ܩܠܝ̣ܠ ܬܘܒ ܐܡ̇ܪ. ܗܝܕܝܢ ܢܬܓܠܐ ܥܘܠܐ ܗ̇ܘ ܕܡܪܢ ܝܫܘܥ ܢܣܝ̣ܦܝ̣ܘܗܝ ܒܪܘܚ ܦܘܡܗ. ܘܢܒܛܠܝ̣ܘܗܝ ܒܓܠܝܢܐ ܕܡܐܬܝܬܗ.

 

 

 

ܢܝܫܐ ܬܪܝܢܐ ܡܛܠ ܓܢܣܗ ܘܐܬܪܗ

 

ܕܡ̣ܢ ܥܡܐ ܥܒܪܝܐ ܙܕܩ ܕܢܗܘܐ. ܗ̣ܘ ܒܪ ܐܒܕܢܐ. ܝ̣ܕܝ̣ܥܐ ܡ̣ܢ ܗ̇ܝ ܕܡܫܝܚܐ ܩܪܐ ܢܦܫܗ ܘܒܗ ܡܬܕܡܐ ܡܛܥܝܢܐܝܬ. ܘܕܡܫܝܚܐ ܡ̣ܢ ܥܒܪ̈ܝܐ ܗ̣ܘ ܟܠܗܘܢ ܥܡ̈ܡܐ ܡܫܪܪܝܢ. ܘܕܡ̣ܢ ܫܒܛܐ ܗ̱ܘ ܕܕܢ. ܡ̣ܢ ܢܒܝܘܬܗ ܕܝܥܩܘܒ ܪܝܫ ܐܒܗ̈ܬܐ܆ ܐܒܗ̈ܬܐ ܩܕܝ̈ܫܐ ܐܫܬܘܕܥܘ. ܕܐܡ̣ܪ. ܕܢ ܢܕܘܢ ܠܥܡܗ ܐܝܟ ܚܕ ܡ̣ܢ ܫܒ̈ܛܐ ܕܐܝܣܪܐܝܠ. ܢܗܘܐ ܕܢ ܚܘܝܐ ܕܥܠ ܐܘܪܚܐ. ܘܚܪܡܢܐ ܕܥܠ ܫܒܝ̣̈ܠܐ. ܕܢܟܬ ܠܣܘܣܝܐ ܒܥܩܒܗ. ܘܡܪܡܐ ܠܪܟܒܗ ܠܒܣܬܪܗ. ܠܦܘܪܩܢܟ ܣܟܝܬ ܡܪܝܐ. ܘܕܒܟܘܪܙܝ̣ܢ ܘܒܝܬ ܨܝܕܐ ܘܟܦܪܢܚܘܡ ܡܕܝ̈ܢܬܐ ܗ̇ܘܐ ܝܠܕܗ ܘܬܪܒܝ̣ܬܗ ܘܕܘܝܪܗ. ܡ̣ܢ ܡܚܣܕܢܘܬܗ ܕܡܪܢ ܕܠܗܝܢ܆ ܝ̣ܠܦܘ ܐ̱ܢܫܝ̈ܢ ܡ̣ܢ ܡܠܦܢ̈ܐ. ܘܝ ܠܟܝ ܟܘܪܙܝ̣ܢ ܐܡ̣ܪ. ܘܝܠܟܝ ܒܝܬ ܨܝܕܐ܆ ܘܐܢ̱ܬ ܟܦܪܢܚܘܡ ܗ̇ܝ ܕܥܕܡܐ ܠܫܡܝܐ ܐܬܬܪܝ̣ܡܬܝ܆ ܥܕܡܐ ܠܫܝܘܠ ܬܬܚܬܝܢ.

 

 

 

ܢܝܫܐ ܬܠܝܬܝܐ ܡܛܠ ܚܙܘܗ ܘܕܡܘ̈ܬܗ

 

ܐܡ̣ܪ ܓܝܪ ܡܪܢ. ܒܗ̇ ܒܕܝܬܝܩܝ ܕܝܠܗ. ܕܪܝܫܗ ܐܝܟ ܓܘܙܠܬܐ ܕܢܘܪܐ. ܥܝܢܗ ܕܝܡܝܢܐ ܡܙܝ̣ܓܐ ܒܕܡܐ. ܗ̇ܝ ܕܝܢ ܕܣܡܠܐ ܐܝܬܝܗ̇ ܙܡܪܬܐ. ܕܐܝܬ ܠܗ̇ ܬܪܬܝܢ ܒܒ̈ܬܐ. ܬܠܝ̣̈ܦܘܗܝ ܚܘܪ̈ܝ̣ܢ. ܣܦܬܗ ܗ̇ܝ ܬܚܬܝܬܐ ܪܒܐ. ܥܛܡܗ ܕܝܢ ܕܝܡܝܢܐ ܩܛܝ̣ܢܐ. ܪ̈ܓܠܘܗܝ ܦܬܝ̈ܢ. ܪܨܝ̣ܨܐ ܘܛܠܝ̣ܚܐ ܨܒܥܗ ܗ̇ܝ ܪܒܬܐ.

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܡܐܬܝܬܗ ܕܬܪܬܝܢ ܘܐ̱ܚܪܝܬܐ ܕܡܪܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܕܠܠܝܐ ܐܬܐ ܠܘܩܕܡ

 

ܘܗܕܐ ܡ̇ܢ ܡܫܬܪܪܐ ܒܝܕ ܬܪܬܝܢ. ܚܕܐ ܡ̇ܢ ܡ̣ܢ ܢܒܝܘܬܗ ܕܡܠܐܟܝ ܕܐܡ̣ܪ ܡ̣ܢ ܦܘܡ ܡܪܝܐ. ܗܐ ܡܫܕܪ ܐ̱ܢܐ ܠܟܘܢ ܠܐܠܝܐ ܢܒܝܐ. ܩܕܡ ܕܢܐܬܐ ܝܘܡܗ ܕܡܪܝܐ ܪܒܐ ܘܕܚܝ̣ܠܐ. ܕܢܦܢܐ ܠܒܐ ܕܐܒܗ̈ܐ ܥܠ ܒܢܝ̈ܐ. ܘܠܒܐ ܕܒܢܝ̈ܐ ܥܠ ܐܒܗܝ̈ܗܘܢ. ܥܕܠܐ ܐܬܐ ܘܐܡܚܝܗ̇ ܠܐܪܥܐ ܠܐܒܕܢ. ܕܬܪܬܝܢ ܕܝܢ ܡ̣ܢ ܐܘܢܓܠܝܘܢ. ܘܡܫܐܠܝܢ ܗ̣ܘܘ ܠܗ ܘܐܡܪܝܢ. ܡܢܐ ܗܟܝܠ ܐܡܪܝܢ ܣܦܪ̈ܐ. ܕܐܠܝܐ ܘܠܐ ܕܢܐܬܐ ܠܘܩܕܡ. ܐܡ̇ܪ ܠܗܘܢ. ܐܠܝܐ ܐܬܐ ܠܘܩܕܡ. ܕܟܠ ܡܕܡ ܢܬܩܢ.

 

ܗܦܟܬܐ:

 

ܐܡܪܝܢ ܕܡܠܬܗ ܕܡܪܢ ܠܗ̣ܝ ܪܡܙܐ ܕܝܘܚܢܢ ܡܥܡܕܢܐ ܗܘܝܘ ܐܠܝܐ ܗ̇ܘ ܕܥܬܝ̣ܕ ܗ̣ܘܐ ܕܢܐܬܐ ܠܘܩܕܡ. ܘܝ̣ܕܝ̣ܥܐ ܗܕܐ ܡ̣ܢ ܬܪܬܝܢ. ܚܕܐ ܡ̇ܢ ܡ̣ܢ ܗ̇ܝ ܕܐܦ ܡܛܠܬܗ ܐܬܐܡܪ ܒܐܘܢܓܠܝܘܢ ܕܗ̣ܘ ܢܐܙܠ ܩܕܡܘܗܝ. ܒܪܘܚܐ ܘܒܚܝܠܐ ܕܐܠܝܐ ܢܒܝܐ ܕܢܦܢܐ ܠܒܐ ܕܐܒܗ̈ܐ ܥܠ ܒܢܝ̈ܐ. ܕܬܪܬܝܢ ܕܝܢ ܡ̣ܢ ܡܠܬܗ ܕܡܪܢ ܕܐܡ̣ܪ ܠܬܠܡܝ̈ܕܘܗܝ. ܕܐܦ ܐܠܝܐ ܐܬܐ ܘܥܒܕܘ ܒܗ ܟܠ ܡܐ ܕܨܒܘ. ܘܟܕ ܗܠܝܢ ܗܟܢܐ ܐܢܝܢ. ܠܐ ܙܕܩ ܕܢܣܟܐ ܠܐܠܝܐ ܐ̱ܚܪܢܐ ܕܢܐܬܐ.

 

ܦܘܢܝܐ:

 

ܐܡܪܝܢܢ ܕܗ̇ܘ ܕܐܬܐ ܩܕܡ ܡܐܬܝܬܗ ܩܕܡܝܬܐ ܕܡܪܝܐ܆ ܛܘܦܣܗ ܗ̣ܘܐ ܕܐܠܝܐ. ܘܠܘ ܐܠܝܐ. ܘܗ̇ܘ ܕܥܬܝܕ ܕܢܐܬܐ ܩܕܡ ܡܐܬܝܬܗ ܬܪܝܢܝܬܐ ܕܡܪܝܐ. ܗ̣ܘ ܐܠܝܐ ܐܝܬܘܗܝ ܘܠܘ ܛܘܦܣܗ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܡܫܪܪ̈ܢܝܬܗ̇ ܕܡܐܬܝܬܗ ܬܪܝܢܝܬܐ ܕܡܪܝܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܡܐ ܕܐܬܐ ܕܝܢ ܒܪܗ ܕܐ̱ܢܫܐ ܒܫܘܒܚܗ. ܘܟܠܗܘܢ ܡܠܐܟܘ̈ܗܝ ܩܕܝܫܐ ܥܡܗ܆ ܗܝܕܝܢ ܢܬܒ ܥܠ ܬܪܘܢܘܣ ܕܫܘܒܚܗ. ܘܢܬܟܢܫܘܢ ܩܕܡܘܗܝ ܟܠܗܘܢ ܥܡ̈ܡܐ. ܘܢܦܪܫ ܐܢܘܢ ܚܕ ܡ̣ܢ ܚܕ. ܐܝܟ ܪܥܝܐ ܕܡܦܪܫ ܥܪ̈ܒܐ ܡ̣ܢ ܓܕܝ̈ܐ. ܘܢܩܝ̣ܡ ܥܪ̈ܒܐ ܡ̣ܢ ܝܡܝܢܗ ܘܓܕܝ̈ܐ ܡ̣ܢ ܣܡܠܗ.

 

ܣܗܕܘܬܐ ܕܬܪܬܝܢ:

 

ܦܛܪܘܣ ܒܐܓܪܬܗ ܩܕܡܝܬܐ. ܡܛܠܗܢܐ ܚܙܘܩܘ ܚܨ̈ܐ ܕܬܪ̈ܥܝܬܟܘܢ. ܘܐܬܬܥܝ̣ܪܘ ܓܡܝ̣ܪܐܝܬ. ܘܣܒܪܘ ܥܠ ܚܕܘܬܐ ܕܐܬܝܐ ܠܟܘܢ ܒܓܠܝܢܗ  ܕܡܪܢ ܝܫܘܥ ܡܫܝܚܐ.

 

ܣܗܕܘܬܐ ܕܬܠܬ:

 

ܦܘܠܘܣ ܒܗ̇ܝ ܕܬܣܠܘܢܝ̈ܩܝܐ ܩܕܡܝܬܐ. ܡܛܠ ܕܗ̣ܘ ܡܪܢ ܒܦܘܩܕܢܐ ܘܒܩܠܐ ܕܪܝܫ ܡܠܐܟ̈ܐ. ܘܒܩܪܢܐ ܐܠܗܐ ܢܚܬ ܡ̣ܢ ܫܡܝܐ.

 

ܣܗܕܘܬܐ ܕܐܪܒܥ:

 

ܝܘܚܢܢ ܒܐܓܪܬܗ ܩܕܡܝܬܐ. ܚܒܝ̈ܒܝ ܗܫܐ ܒܢܘ̈ܗܝ ܚܢܢ ܕܐܠܗܐ. ܘܠܐ ܐܬܓܠܝ̣ ܥܕܡܐ ܠܗܫܐ. ܡܢܐ ܥܬܝ̣ܕܝ̣ܢܢ ܕܢܗܘܐ. ܝ̇ܕܥܝ̣ܢܢ ܕܝܢ ܕܡܐ ܕܐܬܓܠܝ̣ ܒܕܡܘ̣ܬܗ ܗܘܝܢܢ. ܘܚܙܝܢܢ ܠܗ ܐܝܟ ܡܕܡ ܕܐܝܬܘܗܝ. ܘܟܠ ܐܝܢܐ ܕܐܝܬ ܠܗ ܥܠܘܗܝ ܗܢܐ ܣܒܪܐ܆ ܡܕܟܐ ܢܦܫܗ ܐܝܟ ܕܗ̣ܘ ܕܟܐ ܗ̣ܘ.

 

ܣܗܕܘܬܐ ܕܚܡܫ:

 

ܝܥܩܘܒ ܒܐܓܪܬܗ. ܩܪܒܬ݀ ܠܗ̇ ܓܝܪ ܡܐܬܝܬܗ ܕܡܪܢ. ܠܐ ܬܬܬܢܚܘܢ ܚܕ ܥܠ ܚܕ ܐܚܝ̈. ܕܠܐ ܬܬܕܝ̣ܢܘܢ. ܗܐ ܓܝܪ ܕܝ̣ܢܐ ܩܕܡ ܬܪܥܐ ܩ̇ܐܡ.

 

 

 

ܢܝܫܐ ܬܠܝܬܝܐ  ܡܛܠܗ̇ܝ ܕܠܘ ܥܠ ܐܪܥܐ ܗ̇ܘܝܐ ܡܐܬܝܬܗ ܬܪܝܢܝܬܐ ܕܡܪܝܐ

 

ܕܗܕܐ ܗܟܢܐ ܗ̱ܝ܆ ܝ̣ܕܝ̣ܥܐ ܡ̣ܢ ܗ̇ܝ ܕܐܡ̣ܪ ܡܪܢ ܒܐܘܢܓܠܝܘܢ ܕܝܠܗ ܣܓܝ̣ܕܐ. ܘܗܝܕܝܢ ܢܬܚܙܐ ܢܝܫܗ ܕܒܪܗ ܕܐ̱ܢܫܐ ܒܫܡܝܐ. ܘܗܝܕܝܢ ܢܪ̈ܩܕܢ ܟܠܗܝܢ ܫܪ̈ܒܬܐ ܕܐܪܥܐ. ܘܢܚܙܘܢ ܠܒܪܗ ܕܐ̱ܢܫܐ ܕܐܬܐ ܥܠ ܥܢܢ̈ܝ ܫܡܝܐ. ܥܡ ܚܝܠܐ ܘܫܘܒܚܐ ܣܓܝ̈ܐܐ. ܘܢܫܕܪ ܡܠܐܟܘ̈ܗܝ ܥܠ ܫܝ̣ܦܘܪܐ ܪܒܐ. ܘܢܟܢܫܘܢ ܠܓܒܝ̈ܐ ܕܝܠܗ ܡ̣ܢ ܐܪܒܥܬ݀ ܪ̈ܘܚܐ ܘܫܪܟܐ. ܘܗܠܝܢ ܡ̈ܠܐ ܠܘ ܠܗ̇ܝ ܕܥܠ ܐܪܥܐ ܕܪܟ ܗ̣ܘ ܡܪܝܐ ܡܫܘܕ̈ܥܢ. ܐܠܐ ܕܒܫܡܝܐ ܒܠܚܘܕ ܡܬܚܙܐ ܒܢܝ̣ܫܐ ܕܨܠܝܒܐ ܦܪܘܩܝܐ ܘܒܥ̈ܢܢܐ ܡܬܚܙܐ ܕܬܠܐ ܘܡܕܝܪ. ܒܩܠܝ̣ܠܘܬܐ ܗ̇ܝ ܕܠܟܝܢܗ ܡܥܠܝܐ ܦܐܝܐ. ܘܠܗ ܠܗܢܐ ܢܝܫܐ ܚܣܝܐ ܠܥܙܪ ܒܪܣܒܬܐ ܡܫܪܪ ܒܐܓܪܬܗ ܕܚܕܥܣܪ̈ܐ ܕܒܘܝܐܐ ܕܥܠ ܟܠܢܫ ܗܟܢܐ. ܕܫܪܟܐ ܕܝܢ ܟܒܪ ܡܫܐܠ ܐܢ̱ܬ. ܕܠܐܝܟܐ ܡܬܟܢܫܝ̣ܢܢ ܠܕܝ̣ܢܐ. ܠܐܬܪܐ ܗ̇ܘ ܫܡܝܢܐ ܘܕܠܥܠ. ܐܘ ܠܗܢܐ ܐܪܥܢܝܐ ܘܕܠܬܚܬ. ܠܘ ܓܝܪ ܠܐܘܪܫܠܡ ܐܪܥܢܝܬܐ. ܐܘ ܠܢܚܠܐ ܡܕܡ ܕܕܝܘܫܦܛ ܡܬܐܡܪ. ܐܝܟ ܒܝ̣ܫܘܬ ܬܫܒܘܚܬܐ ܗܘܠܢܝܬܐ ܕܝܘ̈ܕܝܐ܆ ܡܗܝܡܢܝ̣ܢܢ ܟܝܬ ܕܡܬܟܢܫܝ̣ܢܢ ܡܛܠ ܕܐܦܠܐ ܥܠ ܙܒܢܐ ܐܪܝܟܐ ܕܒܝܬ ܕܝ̣ܢܐ ܡܣܬܢܩܝ̣ܢܢ. ܐܝܟܢܐ ܕܐܦܠܐ ܥܠ ܩܛܝ̣ܓܪ̈ܢܐ. ܐܦܠܐ ܥܠ ܣܗ̈ܕܐ ܣܢܝ̣ܩ ܕܝܢܐ ܗ̇ܘ ܟܐܢܐ ܘܬܪܝ̣ܨܐ. ܘܐܦܠܐ ܣܢܐܓܪ̈ܐ ܘܢܦ̈ܩܝ ܪܘܚܐ܇ ܬܡܢ ܡܗܢܝܢ ܐܘ ܡܫܢܩܝ̣ܢ. ܐܠܐ ܐܝܟ ܕܒܪܦܦ ܥܝܢܐ. ܟܕ ܟܠܢ ܩ̇ܝܡܝ̣ܢܢ܇ ܗܠܝܢ ܡ̇ܢ ܠܚܝ̈ܐ ܕܠܥܠܡ܆ ܗܠܝܢ ܕܝܢ ܠܩܝܡܬܐ ܕܕܝ̣ܢܐ. ܗ̇ܢܘ ܠܫܘܢܩܐ ܕܠܥܠܡ.

 

 

 

ܢܝܫܐ ܪܒܝܥܝܐ ܡܛܠܗ̇ܝ ܕܡܢܐ ܗ̱ܝ ܗ̇ܝ ܕܐܡܪܬ݀ ܣܘܢܗܕܘܣ ܩܕܝܫܬܐ ܕܢܝܩܝܐ ܒܐܡܘܠܘܓܝܐ. ܘܬܘܒ ܐܬܐ ܒܫܘܒܚܐ ܠܡܕܢ ܠܚܝ̈ܐ ܘܠܡܝ̈ܬܐ

 

ܚܣܝܐ ܝܥܩܘܒ ܕܐܘܪܗܝ ܠܗܕܐ ܡܢܗܪ ܘܐܡ̇ܪ. ܕܣܓܝ̈ܐܐ ܡ̣ܢ ܕܗܝܕܝܢ ܕܚܐܝܝܢ ܦ̇ܝܫܝ̣ܢ ܘܠܐ ܛܥܡܝ̣ܢ ܡܘܬܐ. ܐܠܐ ܒܠܚܘܕ ܡܬܚܠܦܝ̣ܢ ܡ̣ܢ ܡܝܘܬܘܬܐ ܠܠܐ ܡܝܘܬܘܬܐ. ܘܡܬܚܛܦܝܢ ܘܡܬܬܘܒܠܝ̣ܢ ܠܩܕܡ ܒܐܡܐ ܕܕܝܢܐ ܡܫܝܚܐ. ܥܡ ܗܠܝܢ ܕܡܬܢܚܡܝ̣ܢ. ܐܝܟܢܐ ܕܢܗܘܐ ܕܝ̇ܢܐ ܕܚܝ̈ܐ ܘܕܡܝ̈ܬܐ. ܘܕܢܦܪܘܥ ܠܟܠܢܫ ܐܝܟ ܥܒܕܘ̈ܗܝ. ܘܝ̣ܕܝ̣ܥܐ ܗܕܐ ܕܗܟܢܐ ܗ̣ܝ ܡ̣ܢ ܗ̇ܝ ܕܐܡ̣ܪ ܦܘܠܘܣ. ܕܚܢܢ ܐܝܠܝܢ ܕܚܐܝ̣ܢܢ ܢܬܚܛܦ ܒܥ̈ܢܢܐ ܠܐܘܪܥܗ ܕܡܪܢ ܒܐܐܪ. ܘܡ̣ܢ ܗ̇ܝ ܬܘܒ ܕܐܡ̣ܪ ܕܠܘ ܟܠܢ ܢܕܡܟ. ܟܠܢ ܕܝܢ ܢܬܚܠܦ.

 

 

 

 

 

ܩܦܠܐܘܢ ܬܪܝܢܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܒܘ̈ܣܡܐ ܕܙܕܝ̈ܩܐ ܘܫܘܢܩܐ ܕܚܛܝ̈ܐ. ܘܒܗ ܐܝܬ ܦܣܘ̈ܩܐ ܐܪܒܥܐ. ܦܣܘܩܐ ܩܕܡܝܐ ܡܛܠܗ̇ܝ ܕܡܬܝܕ̈ܥܢܐ ܘܠܘ ܡܬܪ̈ܓܫܢܐ ܐܢܘܢ ܒܘ̈ܣܡܐ ܘܫܘ̈ܢܩܐ ܕܥܠܡܐ ܕܥܬܝܕ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܗܕ̈ܘܬܐ ܡܫܪܪ̈ܢܝܬܐ ܕܒܘܣܡܐ ܡܬܝܕܥܢܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܗܠܝܢ ܐܢܘܢ ܚܝ̈ܐ ܕܠܥܠܡ ܕܢܕܥܘܢܟ ܕܐܢ̱ܬ ܗ̣ܘ ܐܠܗܐ ܕܫܪܪܐ ܒܠܚܘܕܝܟ.

 

ܣܗܕܘܬܐ ܕܬܪܬܝܢ:

 

ܦܛܪܘܣ ܫܠܝܚܐ ܒܐܓܪܬܗ ܩܕܡܝܬܐ. ܐܦܢ ܒܗܢܐ ܙܒܢܐ ܩܠܝܠ ܡܬܬܥܝ̣ܩܝܢ ܐܢ̱ܬܘܢ. ܒܢܣܝܘ̈ܢܐ ܡܫܚ̈ܠܦܐ ܕܥܕܝܢ ܥܠܝܟܘܢ. ܐܝܟܢܐ ܕܒܘܚܪܢܐ ܕܗܝܡܢܘܬܟܘܢ ܢܬܚܙܐ ܕܡܝܬܪ ܡ̣ܢ ܕܗܒܐ ܣܢܝ̣ܢܐ ܕܐܬܒܩܝ̣ ܒܢܘܪܐ. ܠܬܫܒܘܚܬܐ ܘܠܐ ܠܐܝܩܪܐ ܘܠܩܘܠܣܐ. ܒܓܠܝܢܗ ܕܝܫܘܥ ܡܫܝܚܐ. ܗ̇ܘ ܕܠܐ ܚܙܝܬܘܢܝܗܝ ܘܡ̇ܚܒܝ̣ܢ ܐܢ̱ܬܘܢ ܠܗ. ܘܒܗܝܡܢܘܬܗ ܪܘܙܝ̣ܢ ܐܢ̱ܬܘܢ. ܒܚܕܘܬܐ ܡܫܒܚܬܐ ܕܠܐ ܡܬܡܠܠܐ. ܕܬܩܒܠܘܢ ܦܘܪܥܢܐ ܕܗܝܡܢܘܬܟܘܢ ܚܝ̈ܐ ܕܢܦ̈ܫܬܟܘܢ.

 

ܣܗܕܘܬܐ ܕܬܠܬ:

 

ܦܘܠܘܣ ܒܕܩܘܪ̈ܝܢܬܝܐ ܩܕܡܝܬܐ. ܡܙܕܪܥ ܦܓܪܐ ܢܦܫܢܝܐ ܘܩܐܡ ܦܓܪܐ ܪܘܚܢܝܐ. ܐܝܬ ܓܝܪ ܦܓܪܐ ܕܢܦܫ ܘܐܝܬ ܦܓܪܐ ܕܪܘܚ. ܗܟܢܐ ܐܦ ܟܬܝ̣ܒ. ܗܘ̣ܐ ܐܕܡ ܒܪܢܫܐ ܩܕܡܝܐ ܠܢܦܫ ܚܝܐ. ܘܐܕܡ ܐ̱ܚܪܝܐ ܠܪܘܚܐ ܚܝܬܐ. ܐܠܐ ܗܘ̣ܐ ܠܘܩܕܡ ܪܘܚܢܝܐ. ܐܠܐ ܢܦܫܢܝܐ ܘܗܝܕܝܢ ܪܘܚܢܝܐ.

 

ܣܗܕܘܬܐ ܕܐܪܒܥ:

 

ܗ̣ܘ ܟܕ ܗ̣ܘ ܒܕܩܘܪ̈ܝܢܬܝܐ ܕܬܪܬܝܢ. ܐܘܠܨܢܗ ܓܝܪ ܕܙܒܢܐ ܗܢܐ. ܟܕ ܛܒ ܙܥܘܪ ܘܩܠܝܠ. ܫܘܒܚܐ ܪܒܐ ܕܠܐ ܣܟܐ ܠܥܠܡ ܥܠܡܝܢ ܡܛܝܒ ܠܢ. ܕܠܐ ܚܕܝܢܢ ܒܗܠܝܢ ܕܡܬܚܙ̈ܝܢ. ܐܠܐ ܒܗܠܝܢ ܕܠܐ ܡܬܚܙ̈ܝܢ.

 

ܣܗܕܘܬܐ ܕܚܡܫ:

 

ܩܕܝܫܐ ܕܝܘܢܢܘܣܝܘܣ ܗ̇ܘ ܕܐܪܝܘܣ ܦܐܓܘܣ. ܘܗܠܝܢ ܡܝܬܪ̈ܐ ܡ̇ܢ ܒܢܝ̈ ܘܥܕܐ ܠܘܝ̣ܬܐ ܗܘܝܢ ܕܡܠܐܟ̈ܐ. ܬܢܢ ܘܠܗܠ. ܘܝ̇ܪܬܝ̣ܢ ܥܡܗܘܢ ܐܘ̈ܢܐ ܛܘܒ̈ܬܢܐ. ܒܥܠܡܐ ܗ̇ܘ ܕܠܐ ܡܬܚܒܠ. ܘܗܘܝܢ ܥܡ ܐܠܗܐ ܠܥܠܡ ܥܠܡܝܢ.

 

ܣܗܕܘܬܐ ܕܫܬ:

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܥܘܦܝܗ̇ ܕܓܘܪܓܘܢܝܐ ܚܬܗ. ܡܝܬܪ̈ܢ ܡ̇ܢ܆ ܫܦܝܪ ܝ̇ܕܥ ܐ̱ܢܐ. ܘܣܓܝ ܝܬܝܪ ܡܝܩܪ̈ܢ. ܐܝܠܝܢ ܕܗܫܐ ܠܟܝ ܩܪ̈ܝ̣ܒܢ. ܐܘ ܗܠܝܢ ܕܡܬܚܙ̈ܝܢ. ܪ̈ܘܒܐ ܕܗ̇ܢܘܢ ܕܡܥܕܥܕܝ̣ܢ. ܕܘܨܐ ܕܡܠܐܟ̈ܐ ܘܫܪܟܐ.

 

ܣܗܕܘܬܐ ܕܫܒܥ:

 

ܩܕܝܫܐ ܐܘܓܪܝܣ. ܐܢܗܘ ܕܒܡܬܛܥܡܢ̈ܝܬܐ ܠܝܬ ܕܚܠܐܷ ܡ̣ܢ ܕܒܫܐ ܘܡ̣ܢ ܟܟܪܝ̣ܬܐ. ܝܬܝܪ ܡ̣ܢ ܗܠܝܢ ܚܠܝܐ ܝܕܥܬܗ ܕܐܠܗܐ. ܝ̣ܕܝ̣ܥܐ ܗ̱ܝ ܕܠܝܬ ܡܕܡ ܡ̣ܢ ܟܠ ܕܒܐܪܥܐ ܗ̱ܘ ܕܝܗܒ ܗܢܝܐܘܬܐ ܠܢܦܫܐ. ܐܝܟ ܝ̣ܕܥܬܐ ܕܐܠܗܐ.

 

ܣܗܕܘܬܐ ܕܬܡܢܐ:

 

ܗ̣ܘ ܟܕ ܗ̣ܘ. ܐܢܗܘ ܕܡܠܟܘܬܐ ܕܫܡܝܐ ܬܐܘܪܝܐ ܕܗܘ̈ܢܐ ܐܝܬܝܗ̇. ܘܗ̣ܝ ܗܕܐ ܐܝܟ ܡܠܬܗ ܕܡܪܢ. ܒܓܘܢ ܐܝܬܝܗ̇. ܓܘܢ ܕܝܢ ܠܒܝ̣ܟ ܡ̣ܢ ܫܐܕ̈ܐ. ܫܦܝܪ ܡܬܐܡܪܐ ܕܦܠܫܬܝ̈ܐ ܐܪܥܐ ܕܡܘܠܟܢܐ ܠܒܝ̣ܟܝ̣ܢ.

 

 

 

ܡܛܠ ܣܗܕ̈ܘܬܐ ܡܫܪܪ̈ܝܢܬܐ ܕܫܘܢܩܐ ܡܬܝܕܥܢܐ. ܣܗܕܘܬܐ ܩܕܡܝܬܐ

 

ܘܡܛܠ ܕܗ̣ܝ ܒܥܬܐ ܕܐܝܟ ܗܕܐ ܡ̣ܢ ܐ̱ܪ̈ܙܢܝܬܐ ܗ̇ܢܝܢ ܕܠܐ ܡܬܦܪ̈ܣܢܝܬܐ ܙܕܩ ܕܢܩܘ̈ܝܢ ܗ̣ܝ. ܡܛܠ ܠܐ ܡܫܡ̈ܠܝܐ ܕܥܕܟܝܠ ܫܒܪ̈ܝܝܢ ܒܝ̣ܕܥܬܐ. ܘܥܠ ܚܠܒܐ ܒܠܚܘܕ ܣܢܝ̣ܩܝ̣ܢ. ܬܪܬܝܢ ܒܠܚܘܕ ܣܗܕ̈ܘܢ ܡܝܬܝܢܢ ܠܘܬ ܫܘܪܪܗ̇.

 

ܣܗܕܘܬܐ ܩܕܡܝܬܐ:

 

ܩܕܝܫܐ ܓܪܝܓܘܪܝܘܣ ܕܢܘܣܐ. ܒܚܪܬܗ ܕܡܐܡܪܐ ܕܡܪܬܝܢܘܬܐ ܥܠ ܗܠܝܢ ܐܦ ܗ̇ܝ ܕܚܣܝ̣ܪܐ. ܕܠܐ ܗ̣ܢܝܢ ܛܒ̈ܬܐ ܕܣܝ̣̈ܡܢ ܒܡܘ̈ܠܟܢܐ. ܠܐܝܠܝܢ ܕܛܒ ܫܦܝܪ ܚܝܘ. ܕܐܝܟ ܗܟܢ ܐܝܬܝܗܝܢ. ܐܝܟܢܐ ܕܬܚܝܬ ܡܟܬܒܢܘܬܐ ܕܡܠܬܐ ܢܐܬܝ̈ܢ. ܐܝܟܢܐ ܓܪ ܗ̇ܢܝܢ ܕܥܝܢܐ ܠܐ ܚܙܬ݀ ܘܐܕܢܐ ܠܐ ܫܡܥܬ݀. ܘܥܠ ܠܒܐ ܕܒܪܢܫܐ ܠܐ ܣܠܩ. ܘܐܦܠܐ ܬܘܒ ܚܝ̈ܐ ܟܐܒ̈ܬܢܐ ܕܐܝܠܝܢ ܕܚܛܘ. ܠܘܬ ܡܕܡ ܕܗܪܟܐ ܕܡܥܝ̣̈ܩܢ ܠܡܪܓܫܢܘܬܐ. ܐܦܢ ܢܗܘܐ ܕܫܘܝܘܬ ܫܘܡܗܐ ܐܝܬ ܠܗܝܢ. ܐܠܐ ܘܐܦܢ ܢܫܬܡܗ ܡܕܡ ܡ̣ܢ ܫܘ̈ܢܩܐ ܕܬܡܢ ܒܫܡܗ̈ܐ ܕܝ̣ܕܝ̣ܥܢ ܗܪܟܐ. ܠܘ ܒܙܥܘܪ̈ܝܬܐ ܐܝܬ ܠܗܘܢ ܫܘܚܠܦܐ. ܢܘܪܐ ܓܝܪ ܟܕ ܫܡܥ ܐܢ̱ܬ. ܐ̱ܚܪܝܢ ܡܕܡ ܡ̣ܢ ܗܕܐ ܕܬܣܬܟܠ ܝ̣ܠܦܬ. ܡ̣ܢ ܗ̇ܝ ܕܣܝ̣ܡ ܡܕܡ ܒܗ̇ܝ ܢܘܪܐ. ܗ̇ܘ ܕܒܗܕܐ ܠܐ ܐܝܬ. ܕܗ̇ܝ ܡ̇ܢ ܠܐ ܕܥܟܐ. ܠܗܕܐ ܕܝܢ ܐܦ ܣܓܝ̈ܐܬܐ ܡ̣ܢ ܢܣܝܢܐ ܐܫܬܟܚ̈ܝ ܡܕܥܟܢ̈ܝܬܐ. ܣܓܝ ܗ̣ܘ ܕܝܢ ܫܘܚܠܦܐ. ܒܝܬ ܗ̇ܝ ܕܠܐ ܕܥܟܐ. ܠܗܕܐ ܕܡܩܒܠܐ ܡܕܥܟܢܘܬܐ. ܡܕܝܢ ܡܕܡ ܐ̱ܚܪܝܢ ܐܝܬܝܗ̇ ܗ̇ܝ. ܘܠܘ ܗܕܐ ܗ̱ܝ. ܘܬܘܒ ܕܝܢ ܟܕ ܬܘܠܥܐ ܫܡܥ ܐܢ̱ܬ. ܠܐ ܒܝܕ ܫܘܝܘܬ ܟܘܢܝܐ. ܠܘܬ ܗܕܐ ܚܝܘܬܐ ܐܪܥܢܝܬܐ ܬܫܬܪܓܠ ܬܪܥܝ̣ܬܟ. ܬܘܣܦܬܐ ܓܝܪ ܗ̇ܝ ܕܠܐ ܡܝܬܐ. ܐ̱ܚܪܝܢ ܡܕܡ ܟܝܢܐ ܡ̣ܢ ܗܢܐ ܕܡܬܝ̣ܕܥ ܡܠܟܐ ܠܢ ܕܢܣܬܟܠ.

 

ܣܗܕܘܬܐ ܕܬܪܬܝܢ:

 

ܩܕܝܫܐ ܐܘܓܪܝܣ. ܐܢܗܘ ܕܡܠܟܘܬܐ ܕܫܡܝܐ. ܒܡܕܡ ܕܠܟܠ ܩܕܝ̣ܡ ܘܠܟܠ ܡܣܝܟ ܡܬܝܕܥܐ. ܐܦ ܫܘܢܩܐ ܕܐܝܠܝܢ ܕܡܬܝܕܥܝ̣ܢ ܒܡܕܡ ܕܕܠܩܘܒܠܐ ܗ̱ܘ ܢܬܝ̣ܕܥ.

 

ܗܦܟܬܐ:

 

ܐܡܪܝܢܢ ܕܦܘܠܘܣ ܐܡ̣ܪ ܕܥܬܝܕ ܕܢܬܦܪܥ ܟܠܢܫ ܒܦܓܪܗ ܠܦܘܬ ܗ̇ܘ ܡܐ ܕܣܥܝ̣ܪ ܠܗ ܐܢ ܕܛܒ ܘܐܢ ܕܒܝܫ. ܘܦܓܪܐ ܟܕ ܡܬܪܓܫܢܐ ܗ̱ܘ. ܡܬܪ̈ܓܫܢܐ ܙܕܩ ܕܢܗܘܘܢ ܐܦ ܦܘܪ̈ܥܢܝܗܘܢ. ܘܐܝܟܢܐ ܐܢ̱ܬܘܢ ܠܕܐܝܟ ܗܠܝܢ ܡܒܛܠܝ̣ܢ ܐܢ̱ܬܘܢ. ܘܡܬܝܕ̈ܥܢܐ ܒܠܚܘܕ ܡܫܪܪܝܢ ܐܢ̱ܬܘܢ ܠܗܘܢ ܕܐܝܬܝܗܘܢ. ܐܘ ܕܠܡܐ ܠܘ ܚܠܝ̣ܡܐܝܬ ܒܩܝܡܬܐ ܕܦܓܪ̈ܐ ܡܘܕܝܢ ܐܢ̱ܬܘܢ.

 

ܦܘܢܝܐ:

 

ܐܡܪܝܢܢ ܕܢܬܦܪܥ ܟܠܢܫ ܒܦܓܪܗ ܐܡ̇ܪ ܫܠܝܚܐ ܒܠܚܘܕ. ܘܠܘ ܕܢܬܦܪܥ ܦܘܪ̈ܥܢܐ ܡܬܪ̈ܓܫܢܐ. ܘܕܦܘܪ̈ܥܢܐ ܡܬܝܕ̈ܥܢܐ ܓܘܢܝܝ̈ܢ ܠܢܦܫܐ ܘܠܦܓܪܐ ܝ̣ܕܝ̣ܥܐ ܡ̣ܢ ܗ̇ܝ ܕܒܥܠܬ݀ ܐܣܪܐ ܐܠܨܐܝܬ ܒܒܘܣܡܝ̈ܗ̇ ܕܢܦܫܐ ܦܓܪܐ ܡܬܒܣܡ. ܘܒܫܘ̈ܢܩܝܗ̇ ܡܫܬܢܩ. ܘܐܢܗܘ ܕܒܥܠܡܐ ܕܗܪܟܐ ܟܕ ܒܥܒܝܘܬܗ ܘܒܪ̈ܓܝܓܬܗ ܥܢܐ ܦܓܪܐ ܕܐܝܟ ܗܠܝܢ ܚܐܫ. ܟܡܐ ܝܬܝܪܐܝܬ ܒܥܠܡܐ ܚܕܬܐ ܗ̇ܘ ܕܒܗ ܡܬܩܛܢ ܘܠܐܦܝ̈ ܠܥܠ ܡܬܡܨܐ ܠܡܬܓܕܝܘ. ܐܠܨܐ ܠܗ ܠܡܫܬܘܬܦܘ ܠܢܦܫܐ ܒܒܘ̈ܣܡܝܗ̇ ܘܒܚܫܝ̈ܗ̇. ܘܗܟܢܐ ܥܡܗ̇ ܡܬܦܪܥ ܦܘܪ̈ܥܢܐ ܡܬܝܕ̈ܥܢܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܚܕܥܣܝܪܝܬܐ

 

ܡܛܠܗ̇ܝ ܕܥܠܡܝ̈ܢܝܐ ܐܢܘܢ ܒܘܣܡܐ ܘܫܘܢܩܐ ܕܙܕܝ̈ܩܐ ܘܕܚܛܝ̈ܐ. ܘܕܠܐ ܫܘܠܡ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܕܡܒܛܠܘ ܡܒܛܠܐ ܙܕܝܩܘܬܐ ܕܡܣܬܥܪܐ ܐ̱ܚܪܝܬ݀܆ ܠܚܛܝܬܐ ܕܩܕܡܬ݀ ܐܣܬܥܪܬ݀. ܘܚܛܝܬܐ ܕܡܣܬܥܪܐ ܐ̱ܚܪܝܬ݀܆ ܠܙܕܝܩܘܬܐ ܕܩܕܡܬ݀ ܐܣܬܥܪܬ݀. ܒܗ̇ܝ ܕܐܠܘܠܐ ܡܬܒܛܠܐ ܗ̇ܝ ܩܕܡܝܬܐ ܒܫܟܝ̣ܚܘܬܗ̇ ܕܗ̇ܝ ܐ̱ܚܪܝܬܐ. ܡܫܬܟ̈ܚܢ ܬܪ̈ܬܝܗܝܢ ܣܩܘܒ̈ܠܝܬܐ ܕܐܟܚܕܐ ܡܬܟܢ̈ܫܢ ܒܚܕ ܗ̇ܘ ܕܣܝ̣ܡ ܒܗ ܟܕ ܒܗ ܒܙܒܢܐ ܗ̇ܝ ܕܫܟܝ̣ܪܐ. ܘܟܕ ܗ̇ܝ ܩܕܡܝܬܐ ܒܛܠܐ. ܐܠܨܐ ܕܗ̇ܝ ܐ̱ܚܪܝܬܐ ܬܦܘܫ. ܘܕܝܠܗ̇ ܗܘܐ ܦܘܪܥܢܐ. ܒܗ̇ܝ ܕܐܦ ܥܠܬܗ ܕܠܐ ܫܘܠܡ ܗ̣ܝ ܒܕܠܐ ܐܬܒܛܠܬ݀ ܒܐ̱ܚܪܬܐ ܕܒܬܪܗ̇ ܐܣܬܥܪܬ݀. ܘܡ̣ܢ ܗܠܝܢ ܡܫܬܪܪܐ ܥܠܡܝ̣ܢܝܘܬ ܦܘܪܥܢܐ ܕܗ̇ܢܘܢ ܕܒܙܕܝ̣ܩܘܬܗܘܢ ܡܝܬܝ̣ܢ. ܚܝ̈ܐ ܕܠܐ ܡܫܬܪܝܢ ܘܒܘܣܡܐ ܕܠܐ ܦܛܪ. ܘܥܠܡܝ̣ܢܝܘܬ ܦܘܪܥܢܐ ܕܗ̇ܢܘܢ ܕܒܚܛܗܝ̈ܗܘܢ ܡܝܬܝ̣ܢ ܫܘܢܩܐ ܕܠܐ ܫܘܠܡ.

 

ܡܚܘܝܢܘܬܐ ܬܪܝܢܝܬܐ:

 

ܐܡܪܝܢܢ ܕܙܕܝܩܘܬܐ ܕܩܕܡܬ݀ ܐܣܬܥܪܬ݀ ܐܘ ܡܨܝܐ ܚܝܠܐ ܕܬܒܛܠܝܗ̇ ܠܚܛܝܬܐ ܕܐܚܪܝܬ݀ ܡܣܬܥܪܐ. ܐܘ ܠܐ ܡܨܝܐ ܚܝܠܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܘ ܡܨܝܐ ܗܘܬ݀ ܚܝܠܐ ܗ̇ܝ ܩܕܡܝܬܐ ܕܬܒܛܠܝܗ̇ ܠܗ̇ܝ ܐ̱ܚܪܝܬܐ. ܠܐ ܣܟ ܐܫܬܟܚܬ݀ ܗ̇ܝ ܐ̱ܚܪܝܬܐ. ܒܗ̇ܝ ܕܟܕ ܡ̣ܢ ܩܕܡ ܕܡܫܬܟܚܐ ܗܘܬ݀. ܠܐ ܐܬܡܨܝܬ݀ ܚܝܠܐ ܕܬܟܠܝܗ̇ ܡ̣ܢ ܗ̇ܝ ܕܬܫܬܟܚ. ܐܝܟܢܐ ܒܬܪ ܕܐܫܬܟܚܬ݀ ܡܨܝܐ ܕܬܒܛܠܝܗ̇. ܫܪܝ̣ܟܐ ܡܕܝܢ ܕܗ̇ܘ ܕܬܪܝܢ ܫܪܝܪ. ܟܐܡܬ݀ ܕܙܕܝܩܘܬܐ ܕܐܬܩܕܡܬ݀ ܠܐ ܡܨܝܐ ܚܝܠܐ ܕܬܒܛܠܝܗ̇ ܠܚܛܝܬܐ ܕܐ̱ܚܪܝܬ݀ ܡܣܬܥܪܐ. ܘܡ̣ܢ ܗܪܟܐ ܐܠܨܐ ܕܡܬܥܛܝܘ ܬܬܥܛܐ ܗ̣ܝ ܙܕܝܩܘܬܐ ܩܕܡܝܬܐ ܥܡ ܚܛܝܬܐ ܐ̱ܚܪܝܬܐ. ܒܥܠܬ݀ ܠܐ ܡܬܡܨܝܢܘܬܐ ܕܐܟܚܕܢܝܘܬ ܫܟܝ̣ܚܘܬܐ ܕܣܩܘܒ̈ܠܝܐ. ܘܗܟܢܐ ܦܘܪܥܢܐ ܕܚܛܝܬܐ ܐ̱ܚܪܝܬܐ ܫܘܢܩܐ ܕܠܐ ܫܘܠܡ ܙܕܩ ܕܢܦܘ̣ܫ ܒܥܠܬ݀ ܠܐ ܡܬܒܛܠܢܘܬܗ̇ ܕܚܛܝܬܐ ܐ̱ܚܪܝܬܐ ܒܙܕܝܩܘܬܐ ܐ̱ܚܪܬܐ. ܘܗܟܢܐ ܦܚܡ ܘܐܦ ܠܙܕܝܩܘܬܐ ܕܡ̣ܢ ܒܬܪ ܚܛܝܬܐ ܡܣܬܥܪܐ ܕܐܝܬܘܗܝ ܦܘܪܥܢܗ̇܆ ܒܘܣܡܐ ܕܠܐ ܫܘܠܡ.

 

ܡܚܘܝܢܘܬܐ ܕܬܠܬ:

 

ܐܡܪܝܢܢ ܐܠܘ ܡܫܬܠܡ ܗ̣ܘܐ ܫܘܢܩܗ ܕܚܛܝܐ. ܐܝܟܢܐ ܕܡ̣ܢ ܓܗܢܐ ܠܡܠܟܘܬܐ ܢܥܘܠ ܗ̣ܘܐ. ܗ̣ܝ ܗܕܐ ܡܥܠܬܗ. ܐܘ ܠܦܘܬ ܫܘܝܘܬܗ ܗ̇ܘܝܐ ܗܘܬ݀. ܐܘ ܐܝܩܝ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܘ ܣܟ ܠܡܠܟܘܬܐ ܫܘܐ ܗܘܐ ܚܛܝܐ ܗ̇ܘ. ܠܓܗܢܐ ܠܐ ܥܠ ܡܬܘܡ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܐܠܗܐ ܠܐ ܣܥܪ ܡܕܡ ܐܝܩܝ. ܘܡ̣ܢ ܗܠܝܢ ܡܫܬܪܪܐ ܕܠܝܬ ܫܘܠܡܐ ܠܫܘܢܩܐ ܕܚܛܝ̈ܐ. ܘܡܛܠ ܗܕܐ ܐܦܠܐ ܬܘܒ ܫܘܠܡܐ ܠܒܘܣܡܐ ܕܙܕܝ̈ܩܐ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܘܢܐܙܠܘܢ ܗܠܝܢ ܠܬܫܢܝ̣ܩܐ ܕܠܥܠܡ܆ ܘܙܕܝ̈ܩܐ ܠܚܝ̈ܐ ܕܠܥܠܡ.

 

ܣܗܕܘܬܐ ܕܬܪܬܝܢ:

 

ܒܗ ܟܕ ܒܗ. ܗ̇ܢܘܢ ܕܢܘܪܗܘܢ ܠܐ ܕܥܟܐ. ܘܬܘܠܥܗܘܢ ܠܐ ܡܝܬܐ.

 

ܣܗܕܘܬܐ ܕܬܠܬ:

 

ܦܘܠܘܣ. ܗ̇ܢܘܢ ܕܒܕܝ̣ܢܐ ܢܬܦܪܥܘܢ ܐܒܕܢܐ ܕܠܥܠܡ.

 

ܗܦܟܬܐ:

 

ܐܡܪܝܢ ܕܗ̇ܝ ܕܠܥܠܡ ܠܘ ܒܟܠܕܘܟ ܠܠܐ ܫܘܠܡܐ ܡܘܕܥܐ. ܐܠܐ ܠܙܒܢܐ ܒܠܚܘܕ ܐܪܝ̣ܟܐ. ܐܝܟ ܗ̇ܝ ܕܐܡܝ̣ܪܐ ܒܐܘܪܝܬܐ. ܠܐ ܢܥܘܠ ܥܡܘܢܝܐ ܘܡܘܐܒܝܐ ܠܟܢܘܫܬܗ ܕܡܪܝܐ. ܐܦܠܐ ܠܕܪܐ ܥܣܝ̣ܪܝܐ ܢܥܠܘܢ ܠܟܢܘܫܬܗ ܕܡܪܝܐ ܠܥܠܡ. ܘܓܠܝܐ ܕܠܥܣܪܐ ܕܪ̈ܝ̣ܢ ܠܥܠܡ ܩܪܐ ܟܬܒܐ. ܘܟܕ ܣܘܓܐܐ ܕܐܝܟ ܗܠܝܢ ܡܫܬܟ̈ܚܢ ܒܟܬܒ̈ܐ ܩܕܝ̈ܫܐ. ܐܡܪܝܢ ܕܐܦ ܗܪܟܐ ܠܗ ܠܣܘܟܠܐ ܩܢܝܐ ܗ̇ܝ ܕܠܥܠܡ. ܘܠܘ ܥܠ ܠܐ ܫܘܠܡܐ ܡܫܘܕܥܐ.

 

ܦܘܢܝܐ:

 

ܐܡܪܝܢܢ ܕܒܥܠܡܐ ܕܥܬܝܕ. ܟܕ ܒܛܠܝ̣ܢ ܒܗ ܘܡܫܬܪ̈ܝܢ ܘܠܐ ܡܬܢܛܪܝܢ ܙܒ̈ܢܐ ܘܥܕ̈ܢܐ. ܒܗ̇ܝ ܕܠܙܕܝ̈ܩܐ ܡ̇ܢ ܚܕ ܐܝܡܡܐ ܠܐ ܣܘܦܢܝܐ ܕܡܦܪܓ ܒܢܘܗܪܐ ܓܐܝܐ ܡܫܬܟܚ. ܘܠܚܛܝ̈ܐ ܚܕ ܠܠܝܐ ܗܟܘܬ ܠܐ ܡܫܬܪܝܢܐ ܕܡܟ̣ܡܗ ܒܚܫܘܟܐ ܐܚ̇ܕ. ܠܐ ܡܨܝܐ ܕܙܒܢܐ ܕܐܪܝ̣ܟ ܐܘ ܕܟܪܐ ܥܠ ܙܒܢܐ ܡܬܩܛܪܓܝ̣ܢ. ܘܟܕ ܙܒܢܐ ܠܐ ܢܫܬܟܚ ܥܠ ܡܢܐ ܐܪܐ ܢܬܩܛܪܓܘܢ. ܠܥܠܡ ܡܕܝܢ ܥܠ ܚܕ ܛܘܪܐ ܡܬܝ̣ܚܐ ܘܠܐ ܡܬܦܣܩܢܐ ܡܫܘܕܥܐ ܒܥܠܡܐ ܕܥܬܝܕ. ܘܠܘ ܥܠ ܡܬܚܐ ܕܐܪܝ̣ܟ ܐܝܟ ܕܐܡ̣ܪܬܘܢ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܬܪܥܝܬܐ ܨܘܕܝܠܝܬܐ ܕܗ̇ܢܘܢ ܕܫܘܠܡܐ ܡܘܕܝܢ ܕܫܘܢܩܐ ܕܚܛܝ̈ܐ ܕܠܗ ܘܦܪ̈ܢܓܝܝܐ ܒܡܢܬܐ ܢܩ̇ܦܝܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܒܢܝ̈ܢܫܐ ܒܥܠܡܐ ܗܢܐ ܡ̣ܢ ܗܝܡܢܘܬܐ ܬܪܝܨܬܐ ܘܥܒܕ̈ܐ ܛܒ̈ܐ. ܒܝܕ ܥ̈ܠܬܐ ܕܟܠܝ̈ܢ ܡ̣ܢ ܩܢܝܢܗܝܢ܆ ܡ̣ܢ ܩܢܝܢܗܝܢ ܡܬܚܓܪܝ̣ܢ. ܘܒܥܠܡܐ ܕܥܬܝܕ ܟܕ ܥ̈ܠܬܐ ܗܠܝܢ ܡܬܩܦ̈ܠܢ. ܐܠܨܐܝܬ ܠܫܪܪܐ ܡܬܝܐܒܝ̣ܢ. ܘܒܛܒܬܐ ܡܨܛܒܝܢ. ܘܕܠܐ ܡܣܠܐ ܠܗܘܢ ܐܠܗܐ܇ ܥܡܗ̇ ܕܝܐܝ̣ܒܘܬܐ ܘܡܨܛܒܝܢܘܬܐ ܗܕܐ܆ ܝ̣ܕܝ̣ܥܐ. ܡ̣ܢ ܚܘܫܒܐ ܡ̇ܢ܆ ܒܗ̇ܝ ܕܛܒܐ ܗ̱ܘ ܘܡܪܚܡܢܐ. ܘܡ̣ܢ ܟܬܒܐ ܕܝܢ ܒܗ̇ܝ ܕܐܡ̣ܪ ܫܐܠܘ ܘܢܬܝܗܒ ܠܟܘܢ. ܘܠܐ ܬܚܡܗ ܠܦܘܩܕܢܐ ܗܢܐ ܒܥܠܡܐ ܗܢܐ. ܐܠܐ ܦܫܝ̣ܛܐܝܬ ܟܕ ܫܡܪܗ ܐܡܪܗ. ܘܡ̣ܢ ܗܪܟܐ ܡܫܬܪܪܐ ܕܡܩܒܠܘ ܡܩܒܠ ܐܠܗܐ ܬܝܒܘܬܗܘܢ ܕܚܛܝ̈ܐ ܐܦ ܒܥܠܡܐ ܕܥܬܝܕ. ܘܠܐ ܠܥܠܡ ܡܫܢܩ ܠܗܘܢ.

 

ܣܥܝܐ ܕܬܪܝܢ:

 

ܐܡܪܝܢ ܐܢܗܘ ܕܚܛܝܬܐ ܕܐ̱ܚܪܝܬ݀ ܡܣܬܥܪܐ. ܡܒܛܠܐ ܠܗ̇ ܠܙܕܝܩܘܬܐ ܕܩܕܡܬ݀ ܐܣܬܥܪܬ݀. ܡܫܬܟܚ ܗ̇ܘ ܕܛܒ̈ܬܐ ܣܓܝ̈ܐܬܐ ܦܠܚ. ܐܝܛܐ ܒܚܕܐ ܫܘ̣ܪܥܬܐ ܢܦܠ. ܕܐܟܘܬܗ ܕܗ̇ܘ ܕܘܠܐ ܚܕܐ ܛܒܬܐ ܦܠܚ. ܠܥܠܡ ܡܫܬܢܩ. ܗ̇ܝ ܕܫܟܝ̣ܪܐ ܒܗ̇ܝ ܕܠܘܬ ܠܐ ܟܐܢܘܬܗ ܕܕܝܢܐ ܡܘܒܠܐ. ܝ̣ܕܝ̣ܥܐ ܡܕܝܢ ܕܟܠ ܕܛܒܬܐ ܘܒܝܫܬܐ ܣܥܪ. ܦܘܪܥܢܐ ܛܒܐ ܘܒܝܫܐ ܡܩܒܠ. ܘܠܐ ܡܨܝܐ ܕܟܕ ܦܘܪܥܢܐ ܛܒܐ ܢܩܒܠ. ܐܝܛܐ ܦܘܪܥܢܐ ܒܝܫܐ ܢܩܒܠ. ܒܝܕ ܚܘܫܒܐ ܡ̇ܢ܆ ܒܗ̇ܝ ܕܒܬܪ ܪ̈ܚܡܐ. ܠܐ ܦܐܐ ܕܢܩܦ ܪܘܓܙܐ. ܘܒܝܕ ܟܬܒܐ ܕܝܢ ܒܗ̇ܝ ܕܫܠܝܚܐ ܐܡ̣ܪ ܕܠܐ ܗܦܟ ܐܠܗܐ ܒܡܘܗܒܬܗ. ܫܪܝ̣ܟܐ ܡܕܝܢ ܕܠܘܩܕܡ ܦܘܪܥܢܐ ܕܒܝܫܬܐ ܢܩܒܠ ܛܒܐ ܚܝ̈ܐ ܕܠܥܠܡ ܢܩܒܠ. ܗܕܐ ܓܝܪ ܦܐܝܐ ܠܛܒܘܬܗ ܕܐܠܗܐ. ܐܦ ܣܓܝ̈ܐܐ ܡ̣ܢ ܡܠܦܢ̈ܐ ܐܡܪܘܗ̇ ܐܝܟ ܕܡܬܚܘܝܐ.

 

ܣܥܝܐ ܬܠܝܬܝܐ:

 

ܐܡܪܝܢ. ܕܛܒܬܐ ܙܥܘܪܬܐ ܟܕ ܢܩܕܡ ܢܣܥܘܪ ܒܪܢܫܐ. ܐܝܛܐ ܚܛܗ̈ܐ ܪܘܪ̈ܒܐ ܢܣܥܘܪ. ܐܘ ܠܐ ܡܬܦܪܥ ܒܥܠܡܐ ܕܥܬܝܕ ܦܘܪܥܢܐ ܕܛܒܬܐ ܗ̇ܝ ܙܥܘܪܬܐ܆ ܐܘ ܡܬܦܪܥ. ܘܗ̇ܘ ܩܕܡܝܐ ܠܐ ܫܪܝܪ. ܒܝܕ ܚܘܫܒܐ ܡ̇ܢ܆ ܒܗ̇ܝ ܕܠܘܬ ܛܠܘܡܘܬܗ ܕܕܝ̇ܢܐ ܡܘܒܠܐ. ܘܒܝܕ ܟܬܒܐ ܕܝܢ ܒܗ̇ܝ ܕܗ̣ܘ ܡܪܢ ܐܡ̣ܪ ܕܐܦܠܐ ܗ̇ܘ ܕܟܣܐ ܕܩܪܝܪ̈ܐ ܡܫܩܐ ܡܘܒܕ ܐܓܪܗ. ܫܪܝ̣ܟܐ ܕܗ̇ܘ ܕܬܪܝܢ ܫܪܝܪ. ܟܐܡܬ݀ ܕܦܘܪܥܢܐ ܕܛܒܬܐ ܗ̇ܝ ܙܥܘܪܬܐ ܘܕܚܛܗ̈ܐ ܗ̇ܢܘܢ ܢܩܒܠ ܒܪܢܫܐ ܗ̇ܘ. ܘܟܕ ܠܐ ܡܨܝܐ ܕܡ̣ܢ ܡܠܟܘܬܐ ܠܓܗܢܐ ܢܬܬܘܒܠ ܒܝܕ ܥܠܬܐ ܕܐܬܐܡܪܬ݀. ܐܠܨܐ ܕܡ̣ܢ ܓܗܢܐ ܠܡܠܟܘܬܐ ܢܬܬܘܒܠ. ܘܗܟܢܐ ܫܘܠܡܐ ܢܩܦ ܠܫܘܢܩܗ.

 

ܣܥܝܐ ܪܒܝܥܝܐ:

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ. ܐܘ ܠܦܘܬ ܗ̇ܘ ܕܡܣܟܠ ܒܪܢܫܐ ܡܫܢܩ ܠܗ. ܐܘ ܝܬܝܪ ܡ̣ܢ ܡܐ ܕܐܣܟܠ. ܘܗ̇ܘ ܕܬܪܝܢ ܠܐ ܫܪܝܪ. ܒܝܕ ܚܘܫܒܐ ܡ̇ܢ. ܒܗ̇ܝ ܕܠܘܬ ܛܠܘܡܘܬܗ ܕܕܝ̇ܢܐ ܡܘܒܠ. ܘܒܝܕ ܟܬܒܐ ܕܝܢ܆ ܒܗ̇ܝ ܕܗ̣ܘ ܡܪܝܐ ܐܡ̣ܪ ܕܒܟܝܠܐ ܕܡܟܝ̣ܠܝܢ ܐܢ̱ܬܘܢ ܡܬܬܟܝ̣ܠ ܠܟܘܢ. ܡܕܝܢ ܗ̇ܘ ܩܕܡܝܐ ܫܪܝܪ. ܘܡ̣ܢ ܗܪܟܐ ܐܠܨܐ ܕܐܟܡܐ ܕܣܟܠܘ̈ܬܗ ܕܟܠ ܡܣܟܠܢܐ. ܡܣܝ̈ܟܬܐ ܐܢܝܢ. ܣܘܦܐ ܘܫܘܠܡܐ ܩܢ̈ܝܢ. ܕܐܦ ܫܘܢܩܘ̈ܗܝ ܡܣܝ̈ܟܐ ܢܗܘܘܢ. ܘܣܘܦܐ ܘܫܘܠܡܐ ܢܩܢܘܢ.

 

ܣܥܝܐ ܚܡܝܫܝܐ:

 

ܐܡܪܝܢ ܐܢ ܡܨܝܐ ܗܘܬ݀ ܚܛܝܬܐ. ܕܐ̱ܚܪܝܬ݀ ܡܣܬܥܪܐ ܕܬܥܛܐ ܠܙܕܝܩܘܬܐ ܕܩܕܡܬ݀ ܐܣܬܥܪܬ݀. ܟܕ ܢܣܝ̣ܡ ܒܪܢܫܐ ܐ̱ܢܫ ܥܣܪܝܢ ܡܢܘ̈ܢ ܕܙܕܝܩܘܬܐ ܩܕܡ ܣܥ̣ܪ. ܐܝܛܐ ܥܣܪ ܡܢܘ̈ܢ ܬܘܒ ܕܚܛܝܬܐ ܒܬܪܟܢ ܣܥܪ. ܒܕܓܘܢ ܗܠܝܢ ܥܣܪ ܕܚܛܝܬܐ. ܐܘ ܠܥܣܪܝܢ ܕܙܕܝܩܘܬܐ ܥܛܝ̈ܢ. ܐܘ ܠܥܣܪ ܡܢܗܝܢ ܒܠܚܘܕ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܠܘܬ ܫܘܝܘܬܐ ܕܥܣܪܝܢ ܘܥܣܪ ܡܘܒܠ ܗ̇ܝ ܕܫܟܝ̣ܪܐ. ܘܠܘܬ ܛܠܘܡܘܬܗ ܕܕܝܢܐ ܟܐܢܐ. ܬܘܒ ܗ̇ܝ ܕܝܬܝܪ ܫܟܝ̣ܪܐ. ܒܗ̇ܝ ܕܒܥܠܬ݀ ܥܣܪ ܡܢܘ̈ܬܢ ܕܚܛܝܬܐ. ܠܥܣܪܝܢ ܡܢܘ̈ܢ ܕܙܕܝܩܘܬܐ ܡܘܒܕ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܗܠܝܢ ܬܪܬܝܢ ܥܣܝܪ̈ܘܬܐ ܕܥܣܪܝܢ. ܚܕܐ ܡܟܢܘ̣ܬܐ ܫܘܝ̣ܬܐ ܩܢ̈ܝܢ ܠܘܬ ܡܬܥܛܝܢܘܬܐ. ܒܕܓܘܢ ܐܢ ܚܕܐ ܡܢܗܝܢ ܕܝ̣ܠܢܐܝܬ ܬܬܥܛܐ. ܢܬܥܐ ܓܕܫ ܒܠܥܕ ܡܢܬܥܢܐ ܗ̇ܝ ܕܫܟܝ̣ܪܐ. ܘܡ̣ܢ ܗܠܝܢ ܡܫܬܪܪܐ ܕܠܐ ܡܬܡܨܝܐ ܕܬܥܛܐ ܚܛܝ̣ܬܐ ܐ̱ܚܪܝܬܐ ܠܙܕܝܩܘܬܐ ܕܐܬܩܕܡܬ݀. ܘܡ̣ܢ ܗܪܟܐ ܠܦܘܪܥܢܐ ܛܒܐ ܘܒܝܫܐ ܡܫܬܘܐ ܒܪܢܫܐ. ܘܟܕ ܠܐ ܡܨܝܐ ܕܡ̣ܢ ܒܘܣܡܐ ܠܫܘܢܩܐ ܢܫܢܐ. ܫܪܝ̣ܟܐ ܗ̇ܝ ܕܡ̣ܢ ܫܘܢܩܐ ܠܒܘܣܡܐ ܢܥܒܪ. ܘܗܟܢܐ ܐܠܨܐܝܬ ܫܘܠܡ ܫܘܢܩܐ ܢܩܦ.

 

ܣܥܝܐ ܫܬܝܬܝܐ:

 

ܐܡܪܝܢ ܐܢܗܘ ܕܚܛܝܬܐ ܐ̱ܚܪܝܬܐ ܡܥܛܐ ܥܛܝܐ ܠܙܕܝܩܘܬܐ ܩܕܡܝܬܐ ܐܘ ܗ̣ܝ ܬܘܒ ܡܬܥܛܝܐ ܥܡܗ̇. ܐܘ ܟܕ ܥܛܝܐ ܠܗ̇ ܠܐ ܡܬܥܛܝܐ ܥܡܗ̇. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܘ ܐܟܚܕܐ ܥܛܝ̈ܢ ܠܚܕ̈ܕܐ ܘܡܬܥܛܝ̈ܢ ܠܚܕ̈ܕܐ. ܒܗ̇ܝ ܕܟܠ ܚܕܐ ܡܢܗܝܢ ܒܫܟܝ̣ܚܘܬܗ̇ ܥܛܝܐ ܠܗ̇ܝ ܐ̱ܚܪܬܐ. ܒܕܓܘܢ ܐܢܗܘ ܕܐܟܚܕܐ ܡܬܥܛܝ̈ܢ. ܐܠܨܐ ܕܐܦ ܐܟܚܕܐ ܢܫܬܟ̈ܚܢ. ܘܡ̣ܢ ܗܪܟܐ ܡܬܟܢܫܐ. ܕܒܗ ܟܕ ܒܗ ܒܙܒܢܐ ܕܒܗ ܟܠܚܕܐ ܡܢܗܝܢ ܫܟܝ̣ܚܐ. ܒܗ ܟܕ ܒܗ ܠܐ ܫܟܝ̣ܚܐ܆ ܗ̇ܝ ܕܫܟܝ̣ܪܐ. ܐܦܠܐ ܬܘܒ ܡܨܝܐ ܕܠܘ ܐܟܚܕܐ ܢܥܛܝ̈ܢ ܠܚܕ̈ܕܐ. ܒܗ̇ܝ ܕܗ̇ܝ ܕܡ̣ܢ ܟܕܘ ܐܬܥܛܝܬ݀ ܐܝܟܢܐ ܡܨܝܐ ܕܬܗܦܘܟ ܬܥܛܝܗ̇ ܠܗ̇ܝ ܕܥܛܬܗ̇. ܘܗ̇ܘ ܕܬܪܝܢ ܬܘܒ ܠܐ ܫܪܝܪ ܒܗ̇ܝ ܕܠܘܬ ܫܘܝܘܬ ܫܘܢܩܐ ܕܗ̇ܘ ܕܘܠܐ ܚܕܐ ܙܕܝ̣ܩܘ̣ ܦܠܚ. ܘܕܗ̇ܘ ܕܦܠܚܗ̇ ܡܘܒܠ ܗ̇ܝ ܕܫܟܝ̣ܪܐ. ܘܡ̣ܢ ܗܠܝܢ ܡܫܬܪܪܐ ܕܠܐ ܡܬܥܛܝܐ ܙܕܝܩܘܬܐ ܩܕܡܝܬܐ ܒܚܛܝܬܐ ܐ̱ܚܪܝܬܐ ܘܗܟܢܐ ܫܘܠܡܐ ܕܫܘܢܩܐ ܢܩܦ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܗܘܝܬ ܡܬܐܘܐ ܥܡ ܒܥܠܕܝ̣ܢܟ ܥܓܠ. ܥܕ ܥܡܗ ܐܢ̱ܬ ܒܐܘܪܚܐ. ܕܠܡܐ ܒܥܠܕܝ̣ܢܟ ܢܫܠܡܟ ܠܕܝ̇ܢܐ. ܘܕܝ̇ܢܐ ܢܫܠܡܟ ܠܓܒܝܐ. ܘܬܦܠ ܒܝܬ ܐܣܝܪ̈ܐ. ܘܐܡܝܢ ܐܡ̇ܪ ܐ̱ܢܐ ܠܟ ܕܠܐ ܬܦܘܩ ܡ̣ܢ ܬܡܢ ܥܕܡܐ ܕܬܬܠ ܫܡܘܢܐ ܐ̱ܚܪܝܐ. ܐܡܪܝܢ ܕܐܘܝܘܬܐ ܠܬܝܒܘܬܐ ܡܫܘܕܥܐ. ܘܐܘܪܚܐ ܠܥܠܡܐ ܗܢܐ. ܘܒܝܬ ܐܣܝܪ̈ܐ ܠܓܗܢܐ. ܘܫܡܘܢܐ ܐ̱ܚܪܝܐ ܠܫܘܢܩܐ ܕܚܠܦ ܚܛܗ̈ܐ. ܒܕܓܘܢ ܗܢܐ ܟܠܗ ܢܦܘܫ ܚܛܝܐ ܒܓܗܢܐ. ܥܕܡܐ ܕܠܗܢܐ ܢܦܪܘܥ ܐܝ̣ܛܐ ܢܦܘܩ ܐܝܟ ܕܗ̣ܘ ܡܪܝܐ ܡܫܪܪ.

 

ܣܗܕܘܬܐ ܕܬܪܬܝܢ:

 

ܒܗ ܟܕ ܒܗ. ܘܐܢܐ ܡܐ ܕܐܬܬܪܝ̣ܡܬ ܡ̣ܢ ܐܪܥܐ ܟܠܢܫ ܐܓܕ ܠܘܬܝ. ܐܡܪܝܢ ܕܗܕܐ ܡܬܬܪܝ̣ܡܢܘܬܐ ܠܘ ܠܣܘܠܩܗ ܩܕܡܝܐ ܡܫܘܕܥܐ. ܒܗ̇ܝ ܕܠܘ ܠܟܠ ܢܓܕ ܠܘܬܗ ܒܕܠܘ ܟܠܗܘܢ ܒܢܝ̈ܢܫܐ ܝܕܥܘ̣ܗܝ ܘܗܝܡ̣ܢܘ ܒܗ. ܫܪܝ̣ܟܐ ܡܕܝܢ ܕܠܡܬܬܪܝ̣ܡܢܘܬܗ ܕܬܪܬܝܢ ܘܐ̱ܚܪܝܬܐ ܡܫܘܕܥܐ. ܘܟܕ ܗܝܕܝܟ ܠܟܠܢܫ ܠܘܬܗ ܢܓܕ. ܐܝܠܝܢ ܐܢܘܢ ܗ̇ܢܘܢ ܕܠܥܠܡ ܡܫܬܢܩܝ̣ܢ ܘܠܐ ܢܩܦܝ̣ܢ ܠܗ.

 

ܣܗܕܘܬܐ ܕܬܠܬ:

 

ܛܘܒܢܐ ܦܘܠܘܣ. ܘܡܐ ܕܐܫܬܥܒܕ ܠܗ ܟܠ. ܗܝܕܝܢ ܗ̣ܘ ܒܪܐ ܢܫܬܥܒܕ ܠܗ̇ܘ ܕܫܥܒܕ ܠܗ ܟܠ. ܕܢܗܘܐ ܐܠܗܐ ܟܠ ܒܟܠ. ܐܡܪܝܢ ܐܢܗܘ ܕܠܘ ܫܘܠܡܐ ܢܩܦ ܕܫܘܢܩܐ ܕܟܠܗܘܢ ܚܛܝ̈ܐ ܡܠܝ̣̈ܠܐ ܫܐܕ̈ܐ ܟܝܬ ܘܒܢܝ̈ܢܫܐ. ܐܝܟܢܐ ܡܫܬܪܪܐ ܗܕܐ ܕܢܗܘܐ ܐܠܗܐ ܟܠ ܒܟܠ. ܐܠܐ ܒܬܪ ܕܒܫܘܢܩܐ ܢܬܕܟܐ ܟܠ ܡ̣ܢ ܚܛܗ̈ܐ. ܐܝܛܐ ܥܡ ܐܠܗܐ ܢܗܘܐ. ܘܓܒܐ ܗ̇ܘ ܕܐܠܗܐ ܢܙܟܐ.

 

ܣܗܕܘܬܐ ܕܐܪܒܥ:

 

ܗ̣ܘ ܟܕ ܗ̣ܘ. ܥܒܕܐ ܕܟܠ ܐ̱ܢܫ ܡܬܓܠܐ. ܝܘܡܐ ܓܝܪ ܗ̇ܘ ܓܠܐ ܠܗ. ܡܛܠ ܕܒܢܘܪܐ ܡܬܓܠܐ. ܘܥܒܕܗ ܕܟܠܢܫ ܐܝܟܢܐ ܐܝܬܘܗܝ ܢܘܪܐ ܬܦܪܫܝ̣ܘܗܝ. ܘܐܝܢܐ ܕܢܩܘܐ ܥܒܕܗ. ܗ̇ܘ ܕܒܢܐ ܐܓܪܗ ܡܩܒܠ. ܘܐܝܢܐ ܕܥܒܕܗ ܢܐܩܕ ܢܚܣܪ. ܗ̣ܘ ܕܝܢ ܢܫܬܘܙܒ.

 

ܣܗܕܘܬܐ ܕܚܡܫ:

 

ܓܪܝܓܘܪܝܘܣ ܬܐܘܠܘܓܘܣ ܐܡܬܝ ܕܒܢܘܪܐ ܡܬܬܕܝ̣̈ܢܢ ܗܠܝܢ ܕܝܠܢ܆ ܐܘ ܡܬܕܟ̈ܝܢ.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ. ܓܕܫܐ ܕܬܡܢ ܒܢܘܪܐ ܥܡܕܝ̣ܢ. ܒܡܥܡܘܕܝܬܐ ܐ̱ܚܪܝܬܐ. ܒܗ̇ܝ ܕܝܬܝܪ ܥܡܝ̣ܠܐ. ܘܝܬܝܪ ܐܪܝ̣ܟܐ. ܕܐܟ̇ܠܐ ܐܝܟ ܥܡܝ̣ܪܐ ܠܗܘܠܐ ܘܡܛܠܩܐ ܠܩܠܝ̣ܠܘܬܐ ܕܟܠܗ̇ ܒܝܫܘܬܐ.

 

ܣܗܕܘܬܐ ܕܫܒܥ:

 

ܓܪܝܓܘܪܝܘܣ ܕܢܘܣܐ ܒܡܐܡܪܐ ܕܡܪܬܝܢܘܬܐ. ܡܛܠ ܗܟܝܠ ܕܚܝܠܐ ܡܕܟܝܢܐ ܐܝܬ ܒܢܘܪܐ ܘܒܡܝ̈ܐ. ܐܝܠܝܢ ܕܒܡܝ̈ܐ ܐ̱ܪ̈ܙܢܝܐ ܠܨܐܘܬܐ ܕܒܝܫܬܐ ܐܫܝ̣ܓܘ܆ ܥܠ ܗ̇ܘ ܙܢܐ ܐ̱ܚܪܢܐ ܕܕܘܟܝܐ ܠܐ ܡܣܬܢܩܝ̣ܢ. ܗ̇ܢܘܢ ܕܝܢ ܕܠܐ ܥܡ̣ܕܘ ܒܗܢܐ ܕܘܟܝܐ܆ ܐܠܨܐܝܬ ܒܢܘܪܐ ܡܬܕܟܝܢ.

 

ܣܗܕܘܬܐ ܕܬܡܢܐ:

 

ܐܘܓܪܝܣ ܫܘܢܩܐ ܐܝܬܘܗܝ܆ ܟܪܝܘܬܐ ܕܒܝܕ ܢܘܪܐ. ܐܝ̇ܕܐ ܕܒܕܝ̣ܢܐ ܡܕܟܝܐ ܚܫܘܫܘܬܗ̇ ܕܢܦܫܐ.

 

ܣܗܕܘܬܐ ܕܬܫܥ:

 

ܗ̣ܘ ܟܕ ܗ̣ܘ. ܐܝܟܢܐ ܕܡܪܬܝܢܘܬܐ ܩܕܡܝܬܐ ܕܐܠܗܐ܆ ܒܝܫܘܬܐ ܦܪܫܬ݀ ܡ̣ܢ ܟܝܢܐ ܡܠܝ̣ܠܐ. ܗܟܢܐ ܗ̱ܘ ܕܝ̣ܢܗ ܟܐܢܐ ܕܐܠܗܐ ܡܓܡܪܢܐ ܕܣܟܐ ܕܟܠܗ̇ ܒܝܫܬܐ ܗ̇ܘܐ.

 

 

 

 

 

 

 

 

     #1 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܗܕܐ ܕܐܬܩܕܡܬ݀. ܘܬܘܢܝܐ ܕܬܪܥܝܬ ܒܪ̈ܝܐ ܥܠ ܗܢܐ ܢܝܫܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝ̈ܐ ܗ̇ܢܘܢ. ܫܪܝܐ ܩܕܡܝܐ

 

ܐܡܪܝܢܢ ܕܠܐ ܡܬܩܒܠܢܝ̣ܬܐ ܗ̇ܝ ܬܝܒܘܬܐ ܒܥܠܡܐ ܕܥܬܝܕ܆ ܡ̣ܢ ܡܬܠܗ ܕܥܬܝܪܐ ܝ̣ܕܝ̣ܥܐ. ܗ̇ܘ ܕܐܦܠܐ ܠܡܬܪܛܒܘ̣ ܠܫܢܗ. ܒܨܒܥ ܨܒܥ ܠܥܙܪ ܒܡܝ̈ܐ ܐܫܬܘܝ. ܘܠܘܩܒܠ ܗ̇ܝ ܕܐܡ̣ܪܘ ܕܛܒܐ ܗ̱ܘ ܘܡܪܚܡܢܐ ܐܠܗܐ. ܐܡܪܝܢܢ ܕܥܡ ܗܠܝܢ܆ ܐܦ ܟܐܢܐ ܗ̱ܘ. ܒܕܓܘܢ ܟܕ ܩܕܡ ܕܪܫ ܐܘܪܚܐ ܕܚܝ̈ܐ ܠܒܢܝ̈ܢܫܐ. ܘܫܘܕܥ ܐܢܘܢ ܕܐܢ ܠܐ ܢܗܦܟܘܢ ܡ̣ܢ ܐܘܪ̈ܚܬܗܘܢ ܒܝ̈ܫܬܐ ܠܥܠܡ ܡܫܬܢܩܝ̣ܢ. ܘܠܐ ܨܒܘ ܕܢܬܘܒܘܢ. ܟܐܢܐܝܬ ܡܫܢܩ ܠܗܘܢ ܠܥܠܡ ܐܝܟ ܕܩܕܡ ܐܡ̣ܪ ܠܗܘܢ. ܘܠܘܩܒܠ ܗ̇ܝ ܐ̱ܚܪܬܐ ܕܫܐܠܘ ܘܢܬܝܗܒ ܠܟܘܢ. ܐܡܪܝܢܢ ܕܠܗ̇ܢܘܢ ܕܒܥܠܡܐ ܗܢܐ ܐܢܘܢ ܐܡ̣ܪܗ̇ ܠܗܕܐ. ܘܐܝܟܢܐ ܠܘ ܒܥܠܡܐ ܗܢܐ ܬܚܡܗ̇.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܠܘ ܒܚܕ ܙܢܐ ܫܘܝܐ ܡܫܬܢܩܝ̣ܢ ܚܛܝ̈ܐ. ܐܟܡܐ ܕܐܦܠܐ ܒܚܕ ܙܢܐ ܫܘܝܐ ܡܬܒܣܡܝ̣ܢ ܙܕܝ̈ܩܐ. ܘܐܦܢ ܠܥܠܡ ܡܫܬܢܩܝ̣ܢ ܗܠܝܢ ܘܡܬܒܣܡܝ̣ܢ ܗܠܝܢ. ܘܝ̣ܕܝ̣ܥܐ ܗܕܐ ܡ̣ܢ ܚܘܫܒܐ ܡ̇ܢ܆ ܒܗ̇ܝ ܕܐܟܡܐ ܕܡܫܚܠܦܝܢ ܥܒܕ̈ܐ ܐܦ ܦܘܪ̈ܥܢܐ ܡܫܚ̈ܠܦܐ ܙܕܩ ܕܢܗܘܘܢ. ܘܡ̣ܢ ܟܬܒܐ ܕܝܢ܆ ܒܗ̇ܝ ܕܐܡ̣ܪ ܡܪܢ ܕܣܓܝܐܝܢ ܐܘܢ̈ܐ ܠܘܬ ܐܒܝ. ܒܕܓܘܢ ܐܡܪܝܢܢ ܕܗ̇ܘ ܕܛܒ̈ܬܐ ܣܓܝ̈ܐܬܐ ܣܥܪ. ܘܒܚܕܐ ܫܘܪܥܬܐ ܢܦܠ. ܒܘܣܡܐ ܕܡܙܝ̣ܓ ܒܫܘܢܩܐ ܡܕܡ ܒܨܝ̣ܪܐ ܡܬܦܪܥ ܠܥܠܡ. ܘܡ̣ܢ ܗܪܟܐ ܡܫܬܪܪܐ ܕܐܦܢ ܥܠܡܝ̣̈ܢܝܐ ܐܢܘܢ ܦܘܪ̈ܥܢܐ ܟܠܗܘܢ. ܐܠܐ ܒܙܢܐ ܕܝܠܗ ܕܒܘܣܡܐ ܘܫܘܢܩܐ ܦܪܝ̣ܫܝ̣ܢ ܘܠܐ ܫܘܝܢ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܡ̣ܢ ܗܠܝܢ ܕܐܬ̣ܐܡܪ̈ܝܢ ܡܬܝܕܥܐ ܕܗ̇ܘ ܕܛܒܬܐ ܙܥܘܪܬܐ ܣܥܪ. ܐܝܛܐ ܚܛܗ̈ܐ ܪܘܪ̈ܒܐ ܣܥ̣ܪ. ܦܘܪܥܢܐ ܕܫܘܐ ܠܗ ܡܩܒܠ ܠܥܠܡ. ܘܒܘܣܡܐ ܒܨܝ̣ܪܐ ܠܦܘ̣ܬ ܛܒܬܐ ܗ̇ܝ ܙܥܘܪܬܐ. ܕܚܒܝ̣ܟ ܒܫܘ̈ܢܩܐ ܪܘܪ̈ܒܐ ܠܦܘܬ ܚܛܗ̈ܐ ܗܠܝܢ ܪܘܪ̈ܒܐ. ܘܐܠܘ ܠܘ ܒܐܝܢܝܘܬܐ ܦܪܝ̣ܫܝ̣ܢ ܗ̣ܘܘ ܙܢܝ̈ܐ ܕܒܘ̈ܣܡܐ ܘܫܘ̈ܢܩܐ. ܐܠܨܐ ܗܘܬ݀ ܗ̇ܝ ܕܐܡ̣ܪܬܘܢ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܠܘ ܒܟܡܝܘܬܐ ܙܒܢܝܬܐ ܡܬܬܚܡ ܦܘܪܥܢܐ. ܐܠܐ ܒܐܝܢܝܘܬܐ ܙܢܢܝܬܐ ܒܠܚܘܕ ܡܬܦܚܡ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ. ܕܐܠܘܠܐ ܗܟܢܐ ܗ̣ܘܐ ܙܕܩ ܗ̣ܘܐ ܕܦܘܪܥܢܐ ܕܓܢܒܐ ܗ̇ܘ ܕܒܚܕܐ ܡܛܪܘܦܝ̣ܬܐ ܗܘܝܐ. ܒܨܝܪ ܢܗܘܐ ܗ̣ܘܐ ܣܓܝ ܡ̣ܢ ܦܘܪܥܢܐ ܕܗ̇ܘ ܕܒܟܠܗܘܢ ܝܘ̈ܡܬܗ ܡ̣ܢ ܪ̈ܒܝܬܐ ܘܩܨܨ̈ܐ ܚܝܐ. ܘܓܠܝܐ ܕܠܘ ܗܟܢܐ ܗ̱ܘ. ܐܠܐ ܫܘܢܩܗ ܕܓܢܒܐ ܝܬܝܪ ܩܫܐ ܡ̣ܢ ܗ̇ܘ ܕܡܪܒܐ. ܒܗ̇ܝ ܕܓܢܒܐ ܡܟܡܢ ܟܡ̇ܢ ܒܢܟܠܐ. ܘܐܝܬ ܐܡܬܝ ܕܩܛܠ ܘܡܘܒܕ ܐܝܟ ܕܐܡ̣ܪ ܡܪܢ. ܘܡܪܒܝܢܐ ܒܨܒܘ̣ܬ ܢܦܫܗ ܕܗ̇ܘ ܕܝܙܦ ܢܣܒ ܗ̇ܘ ܡܐ ܕܢܣ̇ܒ. ܘܠܘ ܟܠܢܐܝܬ ܓܠܝ̣ܙܐ ܣܥܘܪܘܬܗ ܡ̣ܢ ܝܘܬܪܢܐ ܕܗ̇ܘ ܕܝ̇ܙܦ. ܘܡܛܠܗܕܐ ܥܠ ܓܢܒܐ ܡ̇ܢ ܡܣܡ ܒܪܝܫܐ ܡܬܚܡ ܒܢܡܘ̈ܣܐ ܡܠܟܝ̈ܐ. ܥܠ ܗ̇ܝ ܕܡܪܒܐ ܠܐ. ܘܡ̣ܢ ܗܪܟܐ ܡܬܚܘܝܐ ܡܚܝ̣ܠܘܬܗ̇ ܕܡܠܬܐ ܗ̇ܝ ܕܐܡ̇ܪܐ ܕܐܟܡܐ ܕܣܟܠܘ̈ܬܐ ܡܣܝ̈ܟܬܐ ܐܢܝܢ. ܐܦ ܫܘ̈ܢܩܐ ܡܣܝ̈ܟܐ ܙܕܩ ܕܢܗܘܘܢ.

 

ܫܪܝܐ ܕܣܥܝܐ ܚܡܝܫܝܐ:

 

ܐܡܪܝܢܢ ܕܩܕܡܢܢ ܐܡ̣ܪܢܢ. ܕܠܘ ܒܟܡܝܘܬܗ̇ ܕܣܥܘܪܘܬܐ ܡܬܦܚܡ ܦܘܪܥܢܐ. ܐܠܐ ܒܐܝܢܝܘܬܗ̇. ܘܕܥܣܪ ܘܥܣܪܝܢ ܡ̇ܢ ܐܕܫ̈ܐ ܐܢܘܢ ܕܡܢܝܢܐ ܕܐܕܫܐ ܗ̇ܘ ܕܟܡܝܘܬܐ ܘܠܘ ܕܐܝܢܝܘܬܐ ܓܠܝܐ. ܘܕܥܠ ܐܝܢܝܘܬܐ ܢܬܩܛܪܓܘܢ܆ ܠܐ ܫܪܝܪܐ. ܘܥܡ ܗܠܝܢ ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܒܢܝܫܗ ܕܗ̇ܘ ܕܥܣܪ ܡܢܘ̈ܢ ܕܚܛܝܬܐ ܣܥܪ ܚ̇ܐܪ. ܒܗ̇ܝ ܕܐܢܗܘ ܕܒܬܪܥܝܬܐ ܪܫܝ̣ܥܬܐ ܣ̇ܥܪ ܐܢܝܢ. ܟܐܡܬ݀ ܟܕ ܡܣܒܪ ܕܗܒܠܐ ܐܢܝܢ ܗ̇ܢܝܢ ܥܣܪܝܢ ܡܢܘ̈ܢ ܕܙܕܝܩܘܬܐ ܕܩܕܡ ܣܥܪ. ܐܝܟ ܗ̇ܢܘܢ ܕܡܛܠܬܗܘܢ ܐܡ̣ܪ ܛܘܒܢܐ ܦܘܠܘܣ ܕܐܡܪܝܢ ܢܐܟܘܠ ܘܢܫܬܐ ܡܚܪ ܓܝܪ ܡܝܬܝ̣ܢܢ. ܗ̇ܘ ܕܐܝܟ ܗܢܐ. ܗ̣ܝ ܬܪܥܝ̣ܬܗ ܓܘܡܕܢܝܬܐ ܥܛܝܐ ܠܥܣܪܝܢ ܡܢܘ̈ܢ ܕܙܕܝܩܘܬܗ. ܘܠܘ ܥܣܪ ܡܢܘ̈ܢ ܕܚܛܝܬܗ. ܘܐܢܗܘ ܕܠܘ ܗܟܢܐ. ܐܠܐ ܟܕ ܡ̣ܢ ܚܐܦܗ ܕܟܝܢܐ ܐܙܕܟܝ̣. ܐܝܟ ܡܚܝ̣ܠܐ ܫܪܥ. ܘܡܘܕܐ ܒܣܟܠܘ̈ܬܗ. ܠܗܢܐ ܠܐ ܛܠܡ ܠܗ ܐܠܗܐ. ܐܠܐ ܦܘܪܥܢܐ ܡܕܡ ܕܒܬܪ̈ܬܝܗܝܢ ܡܫܘܬܦ ܒܐܝܢܝܘܬܗ ܐܝܟ ܕܐܡ̣ܪܢܢ ܠܗ ܡܛܝܒ.

 

ܫܪܝܐ ܕܣܥܝܐ ܫܬܝܬܝܐ:

 

ܐܡܪܝܢܢ ܐܠܘ ܣܥܝܟܘܢ ܗܢܐ ܫܪܝܪܐ ܗ̣ܘܐ. ܠܐ ܙܕܩ ܗ̣ܘܐ ܕܣܩܘܒ̈ܠܝܐ ܡܬܘܡ ܠܚܕ̈ܕܐ ܥܛܝܢ ܗ̣ܘܘ. ܘܡ̣ܢ ܚܕ̈ܕܐ ܡܬܥܛܝܢ ܗ̣ܘܘ. ܘܟܕ ܐܢܢܩܐܝܬ ܝ̇ܕܥܝ̣ܢܢ܇ ܕܚܡܝܡܘܬܐ ܠܩܪܝܪܘܬܐ ܥܛܝܐ ܘܡܢܗ̇ ܡܬܥܛܝܐ. ܗ̣ܘ ܗܟܘܬ ܘܚܘܪܘܬܐ ܘܐܘܟܡܘܬܐ ܕܐܝܢܝ̈ܘܬܐ ܐܢܝܢ ܓܘܫܡܢܝ̈ܬܐ. ܒܗ̇ ܒܕܡܘ̣ܬܐ ܘܙܕܝܩܘܬܐ ܘܚܛܝܬܐ ܕܐܝܢܝ̈ܘܬܐ ܐܢܝܢ ܠܐ ܓܘܫ̈ܡܢܝܬܐ ܐܘܟܝܬ ܢܦܫܢܝ̈ܬܐ. ܙܕܩ ܕܠܚܕ̈ܕܐ ܢܥܛܝ̈ܢ ܘܡ̣ܢ ܚܕ̈ܕܐ ܢܬܥܛܝ̈ܢ. ܘܣܥܝܟܘܢ ܗ̇ܘ ܟܕ ܥܡ ܗ̇ܢܝܢ ܕܐܢܢܩܐܝܬ ܝ̣ܕܝ̣̈ܥܢ ܢܨܐ. ܠܐ ܫܘܐ ܠܦܘܢܝܐ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗܕ̈ܘܬܐ ܗ̇ܢܝܢ ܟܬܒ̈ܝܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܗ̣ܝ ܗܕܐ ܡܠܬܐ ܡ̣ܢ ܐܘܢܓܠܝܘܢ ܣܓܝܕܐ. ܪܡܙܢܐܝܬ ܡܫܘܕܥܐ ܢܝ̣ܫܟܘܢ. ܕܒܗ ܟܕ ܒܗ ܒܐܘܢܓܠܝܘܢ ܐܝܬ ܡܠܬܐ ܐܝ̇ܕܐ ܕܩܪܝ̣ܚܐܝܬ ܡܫܘܕܥܐ ܥܠܡܝ̣ܢܝܘܬ ܫܘܢܩܐ. ܘܕܒܝܕ ܪܡܙܐ ܠܐ ܡܬܒܛܠܐ ܡܠܬܐ ܩܪܝ̣ܚܬܐ ܓܠܝܐ.

 

ܦܘܢܝܐ ܕܣܗܕܘܬܐ ܬܪܝܢܝܬܐ:

 

ܐܡܪܝܢܢ ܕܗ̇ܝ ܕܠܟܠܢܫ ܐܓܕ ܠܘܬܝ. ܠܗ̇ܝ ܡܫܘܕܥܐ. ܕܠܐ ܐ̱ܢܫ ܗܝܕܝܟ ܡܨܐ ܟܦܪ ܒܝ. ܟܕ ܐܬܐ ܐ̱ܢܐ ܒܫܘܒܚܐ ܪܒܐ ܕܐܒܝ ܥܡ ܡܠܐܟܝ̈ ܩܕܝ̈ܫܐ. ܘܡܬܬܪܝ̣ܡ ܐ̱ܢܐ. ܘܕܠܘ ܒܦܚܡܐ ܕܗܝܡܢܘܬܐ ܕܗܝܕܝܟ ܗܘܐ ܦܘܪܥܢܐ ܝ̣ܕܝ̣ܥܐ܆ ܡ̣ܢ ܗ̇ܝ ܕܐܠܘ ܗܟܢܐ ܗ̣ܘܐ. ܡܢܐ ܡܘܬܪܐ ܗܘܬ݀ ܡܬܒܪܢܫܢܘܬܗ ܕܡܠܬܐ ܐܠܗܐ ܡ̣ܢ ܩܕܡ ܡܐܬܝܬܗ ܕܬܪܬܝܢ. ܘܡ̣ܢ ܗܠܝܢ ܝ̣ܕܝ̣ܥܐ. ܕܟܠܚܕ ܠܦܘܬ ܗ̇ܘ ܡܐ ܕܗܪܟܐ ܣ̇ܥܪ ܡܬܦܪܥ. ܘܠܐ ܡܘܬܪܐ ܗܝܡܢܘܬܐ ܕܗܝܕܝܟ ܡܕܡ. ܐܦܠܐ ܡܒܨܪܐ ܡ̣ܢ ܫܘܢܩܐ.

 

ܦܘܢܝܐ ܕܣܗܕܘܬܐ ܕܬܠܬ:

 

ܐܡܪܝܢܢ ܕܗ̇ܝ ܕܢܗܘܐ ܐܠܗܐ ܟܠ ܒܟܠ. ܠܗ̇ܝ ܕܗܝܕܝܟ ܟܠ ܦܘܡ ܢܘܕܐ ܒܐܒܐ. ܘܢܗܝܡܢ ܒܒܪܐ. ܘܢܣܓܘܕ ܠܪܘܚܐ ܡܫܘܕܥܐ. ܘܕܗܝܡܢܘܬܐ ܕܗܝܕܝܟ ܠܐ ܡܨܝܐ ܕܬܒܨܪ ܡ̣ܢ ܫܘܢܩܐ ܩܕܡܢܢ ܚܘܝ̣ܢܢ.

 

ܦܘܢܝܐ ܕܣܗܕܘܬܐ ܕܐܪܒܥ:

 

ܐܡܪܝܢܢ ܕܠܗ̇ ܠܗܕܐ ܡܠܬܐ ܥܠ ܬܠܡܝ̈ܕܐ ܗ̇ܢܘܢ ܕܠܘ ܚܠܝ̣ܡܐܝܬ ܒܢܝܢ. ܥܠ ܫܬܐܣܬܐ ܕܗ̣ܝ ܗ̣ܝ ܡܫܝܚܐ ܐܡܪܗ ܫܠܝܚܐ. ܘܡܛܠܗܕܐ ܐܡ̣ܪ ܕܗ̇ܘ ܕܠܐ ܝܬܪ ܦܘܪܥܢܐ ܛܒܐ. ܡܛܠ ܕܟܠܢܫ ܐܝܟ ܥܡܠܗ ܐܓܪܗ ܡܩܒܠ. ܗ̣ܘ ܕܝܢ ܢܫܬܘܙܒ. ܒܗ̇ܝ ܕܠܘ ܥܠ ܫܬܐܣܬܗ ܕܣܩܘܒܠܝܐ ܠܡܫܝܚܐ ܣ̣ܡ ܒܢܝܢܗ. ܘܝ̣ܕܝ̣ܥܐ ܗܕܐ ܕܗܟܢܐ ܗ̱ܝ ܡ̣ܢ ܗ̇ܝ ܕܩܕܡ ܐܡ̣ܪ. ܕܫܬܐܣܬܐ ܓܝܪ ܐ̱ܚܪܬܐ ܣܛܪ ܡ̣ܢ ܗܕܐ ܕܣܝ̣ܡܐ ܐ̱ܢܫ ܠܐ ܡܫܟܚ ܠܡܣܡ. ܕܐܝܬܝܗ̇ ܝܫܘܥ ܡܫܝܚܐ. ܘܐܢ ܐ̱ܢܫ ܕܝܢ ܒܢܐ ܥܠ ܗܕܐ ܫܬܐܣܬܐ. ܕܗܒܐ ܐܘ ܣܐܡܐ. ܐܘ ܟܐܦ̈ܐ ܝܩܝ̣ܪ̈ܬܐ. ܐܘ ܩܝ̈ܣܐ. ܐܘ ܥܡܝ̣ܪܐ ܐܘ ܚܒܬܐ. ܥܒܕܐ ܕܟܠ ܐ̱ܢܫ ܡܬܓܠܐ.

 

ܦܘܢܝܐ ܕܣܗܕܘܬܐ ܕܚܡܫ:

 

ܐܡܪܝܢ ܕܠܕܗܝ ܕܡܬܕܟ̈ܝܢ ܠܡ ܐܘ ܡܬܦܫܟܢܝ̣ܬܐ ܐܣܪܚܗ̇ ܡܠܦܢܐ. ܘܡܛܠܗܕܐ ܠܐ ܙܕܩ ܠܢ ܠܡܬܬܟܠܘ ܥܠܝܗ̇.

 

ܦܘܢܝܐ ܕܣܗܕܘܬܐ ܕܫܬ:

 

ܗ̣ܘ ܗܟܘܬ ܐܡܪܝܢܢ. ܕܒܗ̇ܝ ܕܓܕܫܐ ܕܐܘܣܦ ܐܡ̣ܪ ܡܠܦܢܐ. ܐܝܟ ܕܒܡܣܒܪܢܘܬܐ ܘܠܘ ܓܪܝ̣ܡܐܝܬ ܐܫܠܡܗ̇ ܠܬܐܘܪܝܐ ܗܕܐ. ܘܡܛܠ ܗܕܐ ܠܘ ܚܬܝ̣ܬܬܐ ܡܬܬܕܝ̣ܢܐ ܠܢ.

 

ܦܘܢܝܐ ܕܣܗܕܘܬܐ ܕܫܒܥ:

 

ܐܡܪܝܢܢ ܕܡܛܠ ܗ̇ܢܘܢ ܕܥܡ ܗܝܡܢܘܬܐ ܫܪܝܪܬܐ ܘܥܒܕ̈ܐ ܛܒ̈ܐ ܚܙܩܘ. ܐܠܐ ܠܐ ܐܫܬܘܝ̣ܘ ܠܡܘܗܒܬܐ ܕܪܘܚܐ ܩܕܝܫܐ ܕܒܝܕ ܥܡܕܐ ܡܬܝܗܒܐ. ܘܡܛܠܗܕܐ ܒܥܠܡܐ ܕܥܬܝܕ ܒܢܘܪܐ ܐܝܟ ܕܒܡܝ̈ܐ ܥܡܕܝ̣ܢ ܘܡܬܦܪܩܝܢ. ܠܗܕܐ ܓܝܪ ܡ̣ܢ ܠܥܠ ܫܪܪܢܢ. ܟܪ ܕܙܢܝ̈ܐ ܡܫܚ̈ܠܦܐ ܕܡܥܡܘ̈ܕܝܬܐ ܡܢܝܢܢ.

 

ܦܘܢܝܐ ܕܣܗܕܘܬܐ ܕܬܡܢܐ ܘܕܬܫܥ:

 

ܐܡܪܝܢܢ ܕܢܦܫܐ ܦܪܘܫܬܐ ܟܕ ܒܢܘܪܐ ܐܘ ܕܝ̣ܢܐ ܕܥܬܝܕ ܡܬܚܫܒܐ ܡܣܬܪܕܐ ܘܡܫܬܢܩܐ ܘܟܪܝܐ ܠܗ̇. ܘܗܟܢܐ ܡܬܕܟܝܐ ܡ̣ܢ ܚܫܘܫܘܬܗ̇. ܘܟܦܪܐ ܒܟܠܗܝܢ ܪ̈ܓܝܓܬܐ. ܘܒܗܢܐ ܙܢܐ ܢܘܪܐ ܘܕܝ̣ܢܐ ܡܓܡܪ̈ܢܐ ܗܘܝܢ ܕܣܟܐ ܕܟܠܗ̇ ܒܝܫܬܐ. ܘܡܕܟ̈ܝܢܐ ܕܚܫܘܫܘܬܗ̇ ܕܢܦܫܐ ܒܥܠܡܐ ܗܢܐ. ܘܠܘ ܒܥܠܡܐ ܕܥܬܝܕ.

 

 

 

ܢܝܫܐ ܬܠܝܬܝܐ ܡܛܠܗ̇ܝ ܕܕܐܝܟ ܐܝ̇ܕܐ ܬܪܥܝ̣ܬܐ ܩܢܝܢ ܦܪ̈ܝܦܐܛܩܘ ܡܛܠ ܫܘܠܡܗ ܕܬܫܢܝܩܐ ܘܥܠܡܝ̣ܢܝܘܬܗ

 

ܐܡܪܝܢ ܕܬܪܝܢ ܐܢܘܢ ܚܝ̈ܠܐ ܠܢܦܫܐ ܡܠܝ̣ܠܬܐ܆ ܬܐܘܪ̈ܝܛܝܩܝܐ ܘܣܥܘܪ̈ܝܐ. ܘܡܛܠ ܗܕܐ ܒܦܚܡܗܘܢ ܙܕܩ ܠܡܬܗܘܢܢܘ̣ ܠܒܘܣܡܐ ܘܠܫܘܢܩܐ ܣܟܢܝܐ ܘܕܠܐ ܣܟ. ܘܠܦܘܬ ܚܝܠܐ ܬܐܘܪܝ̣ܛܩܝܐ ܐܪܒܥܐ ܗܘܝܢ ܕܪ̈ܓܐ. ܒܗ̇ܝ ܕܢܦܫܐ ܡܠܝ̣ܠܬܐ ܐܘ ܡܕܥ ܝܕܥܐ ܠܗܠܝܢ ܕܐܝܬܝܗܝܢ܆ ܐܘ ܠܐ ܝ̇ܕܥܐ ܠܗܝܢ. ܐܘ ܠܘ ܐܝܟ ܕܐܝܬܝܗܝܢ. ܘܐܢ ܐܝܟ ܕܐܝܬܝܗܝܢ ܝ̇ܕܥܐ ܠܗܝܢ. ܐܘ ܒܡܚܘ̈ܝܢܘܬܐ ܐܦܘܕܝܩܛܝ̈ܩܝܬܐ ܝ̇ܕܥܐ ܠܗܝܢ. ܐܘ ܒܝܕ ܡܫܠܡܢܘܬܐ ܩܒܠܬ݀ ܝܕ̣ܥܬܗܝܢ.

 

ܕܪܓܐ ܩܕܡܝܐ:

 

ܕܢܦܫܐ ܐܝ̇ܕܐ ܕܐܦܘܕܝܩܛܝܩܐܝܬ ܐܕܪܟܬܗ ܠܫܪܪܐ. ܐܡܪܝܢ ܕܗ̣ܝ ܗܕܐ ܠܥܠܡ ܒܒܘܣܡܐ ܠܐ ܡܫܬܪܝܢܐ ܘܡܬܛܒܬܢܐ. ܘܐܢܗܘ ܕܠܪ̈ܓܝܓܬܐ ܡܕܡ ܒܣܪ̈ܢܝܬܐ ܐܫܬܒܝܬ݀ ܒܐܣܪܗ̇ ܕܥܡ ܦܓܪܐ. ܡܬܚܐ ܡܕܡ ܡܫܬܢܩܐ ܟܕ ܡܫܬܢܓܐ ܒܢܘܪ ܝܐܝ̣ܒܘܬܐ ܐܝܛܐ ܕܥܟܐ ܡܢܗ̇ ܢܘܪܐ ܕܐܝܟ ܗܕܐ ܘܡܬܦܨܝܐ. ܘܗ̇ܝ ܕܐܝܟ ܗܕܐ ܟܡܐ ܕܒܝܡܐ ܡܥܪܡܐ ܕܝ̣ܕܥܬܗ ܕܐܠܗܐ ܡܬܛܒܥܐ. ܗܢܐ ܟܠܗ ܒܚܬܡܐ ܕܗܢܝܐܘܬܐ ܪܘܚܢܝܬܐ ܡܬܛܒܥܐ. ܘܗ̣ܘ ܛܘܒܥܐ ܕܐܝܟ ܗܢܐ ܒܝ̣ܕܥܬܐ ܒܠܚܘܕ ܕܗܘ̈ܢܐ ܒܗ̇ܝ ܕܥܠ ܡܗܘܝܢܐ ܕܝܬܝܪ ܡܫܡܠܝ ܘܓܡܝ̣ܪ ܣܢܝ̣ܩܝܢ ܗ̇ܘܐ. ܒܗ̇ܝ ܕܣܛܪ ܡ̣ܢ ܕܒܗܕܐ ܣܦܝ̣ܢܬܐ ܠܐ ܡܨܐ ܐ̱ܢܫ ܕܢܩܪܘܒ ܐܦܠܐ ܠܘܬ ܣܦܪ̈ܘܗܝ ܒܪ̈ܝܐ ܕܝܡܐ ܗܢܐ ܐܟܡܐ ܕܓܡܝ̣ܪ̈ܐ ܣܓܝ̈ܐܐ ܢܣܝ̣ܘ.

 

ܕܪܓܐ ܬܪܝܢܐ:

 

ܕܢܦܫܐ ܐܝ̇ܕܐ ܕܒܡܫܠܡܢܘܬܐ ܩܒܠܬ݀ ܝ̣ܕܥܬܗ ܕܫܪܪܐ. ܘܗ̣ܝ ܗܕܐ ܟܕ ܡ̣ܢ ܗ̇ܝ ܕܬܫܬܢܩ ܡܡܕܐ. ܒܘܣܡܐ ܡܕܡ ܐܫܝ̣ܠܐ ܘܛܠܢܝܐ ܩܢܝܐ.

 

ܕܪܓܐ ܬܠܝܬܝܐ:

 

ܕܢܦܫܐ ܐܝ̇ܕܐ ܕܠܘ ܐܝܟ ܕܐܝܬܝܗܝܢ ܝ̇ܕܥܐ ܠܗܠܝܢ ܕܐܝܬܝܗܝܢ. ܘܗ̣ܝ ܗܕܐ ܒܫܘܢܩܐ ܕܝܬܝܪ ܕܘܐ ܡܬܕܢܩܐ. ܘܡܬܕܘܝܐ ܠܥܠܡ ܥܠܡܝܢ. ܒܗ̇ܝ ܕܡܬܝܐܝ̣ܒܐ ܠܝ̣ܕܥܬܐ ܫܪܝܪܬܐ ܘܠܐ ܡܛܝܐ ܠܗ̇. ܘܠܝܬ ܠܗ̇ ܙܢܐ ܡܕܡ ܐ̱ܚܪܢܐ ܡܒܝܐܢܐ ܕܒܗ ܘܥܡܗ ܬܬܥܢܐ.

 

ܕܪܓܐ ܪܒܝܥܝܐ:

 

ܕܢܦܫܐ ܐܝ̇ܕܐ ܕܠܐ ܐܝܟ ܕܐܝܬܝܗܝܢ ܝ̇ܕܥܐ ܠܗܠܝܢ ܕܐܝܬܝܗܝܢ. ܐܦܠܐ ܐܝܟ ܕܠܐ ܐܝܬܝܗܝܢ. ܘܗ̣ܝ ܗܕܐ ܠܐ ܡܫܬܢܩܐ ܐܦܠܐ ܡܬܒܣܡܐ. ܘܐ̱ܢܫܝ̈ܢ ܡܢܗܘܢ ܕܢܦܫܐ ܕܐܝܟ ܗܕܐ ܐܢܗܘ ܕܩܕܡܬ݀ ܫܡܥܬ݀ ܒܐܣܪܗ̇ ܕܥܡ ܦܓܪܐ ܠܙܢܝ̈ܐ ܕܒܘ̈ܣܡܐ ܘܫܘ̈ܢܩܐ ܡ̣ܢ ܡܪܬܝܢܐ. ܟܕ ܡܬܦܪܫܐ ܡ̣ܢ ܦܓܪܐ. ܒܓܘܫܡܐ ܡܕܡ ܫܡܝܢܐ ܡܬܐܣܪܐ. ܘܒܡܨܥܝܘܬܗ ܡܬܦܢܛܣܐ ܒܘ̈ܣܡܐ ܡܕܡ ܕܛܘܦܣܐ ܩܢܝܢ ܕܒܘ̈ܣܡܐ ܦܓܪ̈ܢܝܐ. ܐܟܡܐ ܕܗܫܐ ܒܚܠܡ̈ܐ ܓܕܫܐ ܠܢ. ܘܡܛܠܗܕܐ ܐ̱ܢܫܝ̈ܢ ܡܐܟܠܐ ܘܡܫܬܝܐ ܘܙܘܘܓܐ ܐܟܪܙܘ ܒܥܠܡܐ ܚܕܬܐ ܟܕ ܫ̇ܛܪܝ̣ܢ܇ ܘܗܠܝܢ ܡ̇ܢ ܕܪ̈ܓܝܗ̇ ܕܢܦܫܐ ܡܠܝ̣ܠܬܐ ܠܦܘܬ ܚܝܠܗ̇ ܬܐܘܪܝܛܝܩܝܐ. ܠܦܘܬ ܕܝܢ ܚܝܠܗ̇ ܦܪܩܛܝܩܝܐ. ܬܠܬܐ ܡܫܬܟܚܝ̣ܢ ܠܗ̇ ܕܪ̈ܓܐ. ܒܗ̇ܝ ܕܐܘ ܥܒܕ̈ܐ ܛܒ̈ܐ ܩܢܝܐ ܐܘ ܒܝ̈ܫܐ. ܐܘ ܠܐ ܚܕ ܡܢܗܘܢ.

 

ܕܪܓܐ ܩܕܡܝܐ:

 

ܕܢܦܫܐ ܕܩܢܝܐ ܥܒܕ̈ܐ ܛܒ̈ܐ. ܐܡܪܝܢ ܕܗ̣ܝ ܗܕܐ ܢܦܫܐ ܐܢ ܠܐ ܩܢܝܐ ܬܐܘܪܝܐ ܫܪܝܪܬܐ. ܐܦܠܐ ܬܐܘܪܝܐ ܫܟܝ̣ܪܬܐ. ܠܐ ܡܬܒܣܡܐ ܐܦܠܐ ܡܫܬܢܩܐ.

 

ܕܪܓܐ ܬܪܝܢܐ:

 

ܕܢܦܫܐ ܐܝ̇ܕܐ ܕܩܢܝܐ ܥܒܕ̈ܐ ܒܝ̈ܫܐ ܟܐܡܬ ܕܫܒܝܐ ܠܪ̈ܓܝܓܬܐ ܒܣܪ̈ܢܝܬܐ. ܐܡܪܝܢ ܕܗ̣ܝ ܗܕܐ ܡܫܬܢܩܐ ܘܝܩܕܐ ܒܢܘܪ ܪܓܬܐ ܕܠܘܬ ܗ̇ܢܝܢ ܕܡܢܗܝܢ ܐܬܓܠܙܬ݀. ܘܟܕ ܡܬܒܝܢܐ ܗ̣ܝ ܒܗ̇ ܘܡܫܬܘܕܥܐ ܕܡ̣ܢ ܠܘ ܡܫܟܚܢܝ̣ܬܐ ܗ̱ܝ ܡܬܩܢܝܢܘܬܗ. ܦܟܗܐ ܝܐܝ̣ܒܘܬܗ̇ ܘܕܥܟܐ ܢܘܪ ܪܓܬܗ̇ ܘܗܟܢܐ ܡܬܦܪܩܐ.

 

ܕܪܓܐ ܬܠܝܬܝܐ:

 

ܕܢܦܫܐ ܐܝ̇ܕܐ ܕܓܠܝ̣ܙܐ ܡ̣ܢ ܥܒܕ̈ܐ ܛܒ̈ܐ ܘܒܝ̈ܫܐ. ܡܢܗܘܢ ܡ̇ܢ ܐܡܪܝܢ ܕܡܬܠܝܬܝܘ ܡܬܠܝܬܝܐ ܗ̣ܝ ܗܕܐ. ܐܢ ܐܦ ܡ̣ܢ ܝ̣ܕܥܬܐ ܓܠܝ̣ܙܐ. ܐܝܟ ܢܦ̈ܫܬܐ ܕܝܠܘ̈ܕܐ ܘܒܪܝ̣ܪ̈ܐ. ܘܐܢ ܩܢܝܐ ܝ̣ܕܥܬܐ ܫܪܝܪܬܐ܆ ܡܬܒܣܡܐ ܠܥܠܡ. ܘܐܢ ܝ̣ܕܥܬܐ ܕܕܠܩܘܒܠܐ ܩܢܝܐ ܡܫܬܢܩܐ ܠܥܠܡ.

 

 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܚܕܥܣܝܪܝܬܐ

 

 

 

ܡܛܠ ܦܚܡܐ ܕܗܝܡܢܘܬܐ ܠܘܬ ܥܒܕ̈ܐ ܘܥܘܪܙܠܗܘܢ ܘܦܘܪܩܗܘܢ ܕܡ̣ܢ ܚܕ̈ܕܐ. ܘܒܗ ܐܝܬ ܥܘܬܕܐ ܘܦܣܘ̈ܩܐ ܐܪܒܥܐ. ܥܘܬܕܐ

 

ܐܡܪܝܢܢ ܕܟܠ ܒܪܢܫܐ. ܐܘ ܡܗܝܡܢܐ ܗ̱ܘ. ܐܘ ܠܐ ܡܗܝܡܢܐ. ܘܟܠ ܚܕ ܡܢܗܘܢ. ܐܘ ܥܒܕ̈ܐ ܩܢܐ ܛܒ̈ܐ ܐܘ ܥܒܕ̈ܐ ܒܝ̈ܫܐ. ܘܗܟܢܐ ܐܪܒܥܐ ܡܫܬܟܚܝܢ ܕܪ̈ܓܐ ܠܦܘܬ ܪܥܝܢܐ ܥܕܬܢܝܐ. ܘܕܬܪܝܢ ܡܢܗܘܢ ܟܐܡܬ݀ ܡܗܝܡܢܐ ܕܩܢܐ ܥܒܕ̈ܐ ܛܒ̈ܐ ܒܘܣܡܐ ܕܠܐ ܦܛܪ ܘܪܘܙܐ ܕܠܐ ܥܒܪ. ܘܕܘܨܐ ܕܠܐ ܓܡܪ ܝ̇ܪܬ. ܘܟܦܘܪܐ ܕܡܟܬܡ ܒܥܒܕ̈ܐ ܒܝ̈ܫܐ ܫܘܢܩܐ ܕܠܐ ܡܘܦܐ ܡܬܦܪܥ. ܠܐ ܐ̱ܢܫ ܡܬܦܫܟ. ܐܝܢ ܡܛܠ ܗܠܝܢ ܬܪܝܢ ܐ̱ܚܪ̈ܢܐ ܬܪ̈ܥܝܬܐ ܡܫܚ̈ܠܦܬܐ ܗܘܝ̈ ܠܒܢܝ̈ܢܫܐ. ܒܗ̇ܝ ܕܡܢܗܘܢ ܐܡ̣ܪܘ ܕܡܗܝܡܢܐ ܕܡܟܬܡ ܠܐ ܡܫܬܢܩ. ܡܛܠ ܗܝܡܢܘܬܗ. ܐܦܠܐ ܡܬܒܣܡ ܡܛܠ ܡܟܬܡܘ̣ܬܗ. ܘܠܐ ܡܗܝܡܢܐ ܕܡܝܬܪ ܠܐ ܡܬܒܣܡ ܡܛܠ ܠܐ ܗܝܡܢܘܬܗ ܐܦܠܐ ܡܫܬܢܩ ܡܛܠ ܡܝܬܪܘܬܗ. ܐ̱ܚܪ̈ܢܐ ܕܝܢ ܠܐ ܝ̣ܕܥܬܐ ܕܗܠܝܢ ܐܘܕܝ̣ܘ. ܘܠܕܝ̣̈ܢܐ ܠܐ ܡܬܕܪ̈ܟܢܐ ܕܐܠܗܐ ܐܫܪܟܘܗ̇ ܠܒܥܬܐ ܕܐܝܟ ܗܕܐ. ܘܗ̣ܝ ܗܕܐ ܬܪܥܝ̣ܬܐ ܡ̣ܢ ܟܠܗܘܢ ܡܠܦܢ̈ܐ ܩܕܝ̈ܫܐ ܡܬܩܠܣܐ. ܐ̱ܚܪ̈ܢܐ ܕܝܢ ܐܡ̣ܪܘ. ܕܡܗܝܡܢܐ ܕܡܟܬܡ ܡܬܒܣܡܘ̣ ܡܬܒܣܡ ܘܠܐ ܡܣܓܦܐ ܠܗ ܡܟܬܡܘܬܗ. ܘܠܐ ܡܗܝܡܢܐ ܡܫܬܢܩܘ̣ ܡܫܬܢܩ ܘܠܐ ܡܘܬܪܐ ܠܗ ܡܝܬܪܘܬܗ. ܐ̱ܚܪ̈ܢܐ ܕܝܢ ܕܠܩܘܒܠܐ ܕܗܕܐ ܐܡ̣ܪܘ. ܟܐܡܬ݀ ܕܡܗܝܡܢܐ ܕܡܟܬܡ ܡܫܬܢܩܘ̣ ܡܫܬܢܩ ܘܠܐ ܡܘܬܪܐ ܠܗ ܗܝܡܢܘܬܗ. ܘܠܐ ܡܗܝܡܢܐ ܕܡܝܬܪ ܡܬܒܣܡܘ̣ ܡܬܒܣܡ ܘܠܐ ܡܣܓܦܐ ܠܗ ܠܐ ܗܝܡܢܘܬܗ. ܟܐܡܬ ܗܠܝܢ ܡ̇ܢ ܠܗܝܡܢܘܬܐ ܡܢ̇ܬܥܝܢ ܥܠ ܥܒܕ̈ܐ. ܗܠܝܢ ܕܝܢ ܠܥܒܕ̈ܐ ܥܠ ܗܝܡܢܘܬܐ ܘܕܬܪ̈ܬܝܗܝܢ ܐܪܝܛܝܩܝܢ. ܘܗ̇ܝ ܕܟܐܢܐ ܘܐܪܬܕܘܟܣܘ ܗܕܐ ܗ̱ܝ. ܕܐܦܠܐ ܚܕܐ ܡܢܗܝܢ ܒܠܥܕ ܚܒܪܬܗ̇ ܠܒܘܣܡܐ ܐܡ̇ܪ ܐ̱ܢܐ ܡܫܘܝܐ ܒܝܕ ܗܠܝܢ ܕܩܕܡܝܢ ܡܫܪܪܝ̣ܢܢ.

 

 

 

ܦܣܘܩܐ ܩܕܡܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠܗ̇ܝ ܕܗ̣ܝ ܟܢܝ̣ܫܘܬܐ ܣܘܢܝܘܦܛܪܘܢܝܬܐ ܕܗܝܡܢܘܬܐ ܘܥܒܕ̈ܐ ܡܘܬܪܐ. ܘܠܘ ܟܠܚܕܐ ܕܝ̣ܠܢܐܝܬ ܒܠܥܕ ܗ̇ܝ ܐ̱ܚܪܬܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢܘܬܐ ܚܘܫܒܝܬܐ ܡܫܪܪܪܢܝܬܗ̇ ܕܒܥܬܐ ܗܕܐ

 

 

 

ܐܡܪܝܢܢ ܕܒܪܢܫܐ ܡ̇ܢ ܒܗ̇ܝ ܕܡܠܝ̣ܠܐ ܗ̱ܘ ܡܬܬܕܝ̣ܢ ܘܡܩܒܠ ܦܘܪܥܢܐ ܕܛܒܬܐ ܘܕܒܝܫܬܐ ܘܠܡܠܝ̣ܠܘܬܗ ܡ̇ܢ ܟܕ ܬܪܝܢ ܐܢܘܢ ܚܝ̈ܠܐ. ܝܕܘܥܬܢܐ ܟܝܬ ܗ̇ܘ ܕܒܗ ܡܟܢ ܠܡܕܪܟܢܘܬܗ ܠܫܪܪܐ ܩܕܡܝܐ ܘܡܪܢܝܐ ܕܗܘܝܘ ܐܠܗܐ ܫܘܒܚܐ ܠܛܝܒܘܬܗ ܘܢܗܝܡܢ ܒܗ. ܘܣܥܘܪܝܐ ܗ̇ܘ ܕܒܗ ܡܟܢ ܠܡܫܬܘܕܥܘܬܗ̇ ܠܛܒܬܐ ܘܕܢܣܥܪܝܗ̇. ܒܕܓܘܢ ܟܠ ܕܒܚܕ ܡ̣ܢ ܗܠܝܢ ܬܪ̈ܝܗܘܢ ܙܢܝ̈ܐ ܚܣܝ̣ܪ. ܡ̣ܢ ܕܪܓ ܡܝܬܪܘܬܐ ܢܦܝ̣ܠ. ܘܟܠ ܕܡ̣ܢ ܕܪܓ ܡܝܬܪܘܬܐ ܢܦܝ̣ܠ. ܠܐ ܫܘܐ ܠܛܘܒܬܢܘܬܐ ܡܫܡܠܝܬܐ. ܡܬܟܢܫܐ ܐܝܟ ܕܒܐܣܟܡܐ ܩܕܡܝܐ. ܕܟܠ ܕܒܚܕ ܡ̣ܢ ܗܠܝܢ ܬܪ̈ܝܗܘܢ ܙܢܝ̈ܐ ܚܣܝ̣ܪ. ܠܐ ܫܘܐ ܠܛܘܒܬܢܘܬܐ ܡܫܡܠܝܬܐ.

 

ܗܦܟܬܐ:

 

ܐܡܪܝܢ ܐܢܗܘ ܕܗܝܡܢܘܬܐ ܗ̇ܝ ܗ̣ܝ ܕܢܕܥ ܠܐܠܗܐ ܘܢܗܝܡܢ ܒܗ. ܘܠܐ ܐ̱ܢܫ ܡ̣ܢ ܥܡ̈ܡܐ ܐܝܬ ܗ̇ܘ ܕܠܐ ܝ̇ܕܥ ܠܐܠܗܐ ܐܘ ܠܐ ܡܗܝܡܢ ܒܗ. ܡܛܠܡܢܐ ܠܚܢ̈ܦܐ ܘܝܘ̈ܕܝܐ ܘܡܫܠܡܢ̈ܐ ܠܐ ܡܗܝ̈ܡܢܐ ܩܪܝܢ ܐܢ̱ܬܘܢ.

 

ܦܘܢܝܐ:

 

ܐܡܪܝܢܢ ܕܗܠܝܢ ܐܦܢ ܝ̇ܕܥܝܢ ܕܐܝܬ ܐܠܗܐ ܘܡܗܝܡܢܝ̣ܢ ܒܗ. ܐܠܐ ܒܕܠܩܘܒܠܐ ܕܗ̇ܘ ܡܐ ܕܐܝܬܘܗܝ ܡܘܕܝܢ ܠܗ. ܒܗ̇ܝ ܕܠܪܘܚܗ ܩܕܝܫܐ ܗ̇ܘ ܕܒܗ ܚܝܐ ܘܝ̇ܗܒ ܚܝ̈ܐ ܡܬܝ̣ܕܥ ܕܐܝܬܘܗܝ. ܘܠܡܠܬܗ ܗ̇ܘ ܕܒܗ ܟܠܗܝܢ ܗܠܝܢ ܕܠܐ ܐܝܬܝܗܝܢ ܗܘܝ̈ ܠܘܬ ܗ̇ܝ ܕܢܗܘ̈ܝܢ ܐܝܬܝܗܝܢ ܐܝܬܝ̣ ܐܢܝܢ܇ ܠܘ ܩܢܘ̈ܡܐ ܡܩܝ̈ܡܐ ܡܘܕܝܢ ܠܗܘܢ. ܘܕܓܕ̈ܫܐ ܢܐܡܪܘܢ ܐܢܘܢ ܡ̣ܢ ܚܘܫܒܐ ܘܟܬܒܐ ܡܬܟܣܣܝ̣ܢ. ܘܟܕ ܟܠܡܕܡ ܐܘ ܐܘܣܝܐ ܐܝܬܘܗܝ ܐܘ ܓܕܫܐ. ܘܠܝܬ ܡܨܥܝܐ ܒܝܢܬܗܘܢ. ܘܗ̣ܢܘܢ ܥܠ ܚܕ ܡܢܗܘܢ ܠܐ ܡܣܬܡܟܝ̣ܢ. ܡܛܠܗܕܐ ܠܘܬ ܦܚܬܐ ܕܐܒܕܢܐ ܕܠܐ ܗܝܡܢܘܬܐ ܡܬܥܓܢܝ̣ܢ. ܘܟܐܢܐܝܬ ܠܐ ܡܗܝܡ̈ܢܐ ܡܬܩܪܝܢ. ܘܗܝܡܢܘܬܐ ܫܪܝܪܬܐ ܗ̇ܝ ܕܟܪ̈ܝܣܛܝܢܐ ܒܠܚܘܕ ܡܪܢܐܝܬ ܡܬܐܡܪܐ ܘܐܝܬܝܗ̇.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܣܓܝ̈ܐܐ ܢܐܡܪܘܢ ܠܝ ܒܗ̇ܘ ܝܘܡܐ ܡܪܝ܆ ܠܐ ܒܫܡܟ ܐܬܢܒܝ̣ܢ ܘܫܪܟܐ. ܘܗܝܕܝܢ ܐܘܕܐ ܠܗܘܢ. ܕܡܡܬܘܡ ܠܐ ܝ̣ܕܥܬܟܘܢ. ܐܪܚܩܘ ܡܢܝ ܥܒܕܝ̈ ܥܘܠܐ.. ܐܡܪܝܢܢ ܕܗ̣ܢܘܢ ܗܠܝܢ ܐܠܘܠܐ ܡܗܝ̈ܡܢܐ ܗ̣ܘܘ. ܐܝܟܢܐ ܒܫܡܗ ܕܡܪܢ ܢܬܢܒܝܢ ܗ̣ܘܘ. ܐܠܐ ܡܛܠܗ̇ܝ ܕܥܒܕܝ̈ ܥܘܠܐ ܗ̣ܘܘ ܟܦܪ ܒܗܘܢ ܡܪܝܐ ܘܠܐ ܡܕܡ ܐܘܬܪܬ݀ ܠܗܘܢ ܗܝܡܢܘܬܗܘܢ ܒܠܥܕ ܥܒܕ̈ܐ.

 

ܣܗܕܘܬܐ ܕܬܪܬܝܢ:

 

ܒܗ ܟܕ ܒܗ. ܘܗ̇ܢܝܢ ܣܟ̈ܠܬܐ ܢܣܒ̈ܝ ܠܡܦܐܕܝ̈ܗܝܢ. ܘܠܐ ܢܣܒ̈ܝ ܥܡܗܝܢ ܡܫܚܐ. ܒܕܓܘܢ ܐܡܪܝܢܢ. ܕܗ̣ܢܝܢ ܗܠܝܢ ܣܟ̈ܠܬܐ. ܐܠܘܠܐ ܡܗܝܡ̈ܢܬܐ ܗܘܝ̈. ܐܝܟܢܐ ܢܦܩ̈ܝ ܗܘܝ̈ ܠܐܘܪܥ ܚܬܢܐ ܕܗܘܝܘ ܡܫܝܚܐ ܒܫܪܪܐ. ܐܠܐ ܡܛܠ ܕܣܦܝ̣̈ܩܢ ܗܘܝ̈ ܡ̣ܢ ܡܫܚܐ ܐܘܟܝܬ ܥܒܕ̈ܐ ܛܒ̈ܐ܆ ܐܬܬܚܕ ܠܗ ܬܪܥܐ ܒܐܦܝ̈ܗܝܢ. ܘܐܬܐܡܪ ܠܗܝܢ ܐܡܝܢ ܐܡ̇ܪ ܐ̱ܢܐ ܠܟܝܢ ܕܠܐ ܝ̇ܕܥ ܐ̱ܢܐ ܠܟܝܢ.

 

ܣܗܕܘܬܐ ܕܬܠܬ:

 

ܝܘܚܢܢ ܫܠܝܚܐ. ܘܟܠ ܡܕܡ ܕܫ̇ܐܠܝ̣ܢܢ ܢܣܒܝ̣ܢܢ ܡܢܗ. ܡܛܠ ܕܢܛܪܝܢܢ ܦܘܩ̈ܕܢܘܗܝ. ܘܫܦܝܪ̈ܬܐ ܣ̇ܥܪܝ̣ܢܢ ܩܕܡܘܗܝ. ܘܗ̇ܢܘ ܦܘܩܕܢܗ ܕܢܗܝܡܢ ܒܫܡܐ ܕܒܪܗ ܝܫܘܥ ܡܫܝܚܐ ܘܢܚܒ ܚܕ ܠܚܕ.

 

ܣܗܕܘܬܐ ܕܐܪܒܥ:

 

ܝܥܩܘܒ ܫܠܝܚܐ. ܐܢ ܐ̱ܢܫ ܢܐܡܪ ܕܐܝܬ ܠܝ ܗܝܡܢܘܬܐ. ܘܥܒܕ̈ܐ ܠܝܬ ܠܗ. ܕܠܡܐ ܡܫܟܚܐ ܗܝܡܢܘܬܗ ܬܐܚܝܘܗܝ.

 

ܣܗܕܘܬܐ ܕܚܡܫ:

 

ܗ̣ܘ ܟܕ ܗ̣ܘ ܟܐ ܡܬܢܐ ܡܛܠ ܐܒܪܗܡ ܐܡ̣ܪ. ܚܙܐ ܐܢ̱ܬ ܗܝܡܢܘܬܗ ܣܝܥܬ݀ ܠܥܒܕܘ̈ܗܝ. ܘܡ̣ܢ ܥܒܕ̈ܐ ܗܝܡܢܘܬܗ ܐܬܓܡܪܬ݀.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ. ܗܝܡܢܘܬܐ ܕܠܐ ܥܒܕ̈ܐ ܡܝ̣ܬܬܐ ܗ̱ܝ.

 

ܣܗܕܘܬܐ ܕܫܒܥ:

 

ܗ̣ܘ ܟܕ ܗ̣ܘ. ܡܗܝܡܢ ܐܢ̱ܬ ܕܚܕ ܗ̣ܘ ܐܠܗܐ ܫܦܝܪ ܥܒܕ ܐܢ̱ܬ. ܐܦ ܫܐܕ̈ܐ ܡܗܝܡܢܝ̣ܢ ܘܪܥܠܝ̣ܢ.

 

 

 

ܦܣܘܩܐ ܬܪܝܢܐ: ܡܛܠ ܬܪܥܝܬܐ ܕܗ̇ܢܘܢ ܣ̇ܝܡܝ̣ܢ. ܥܠܬ ܛܘܒܬܢܘܬܐ ܕܠܥܠܡܝܢ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܗܝܡܢܘܬܐ ܝܬܝܪ ܥܫܝ̣ܢܐ ܡ̣ܢ ܟܦܘܪܘܬܐ. ܒܗ̇ܝ ܕܗ̇ܝ ܡ̇ܢ ܬܘܕܝܬܐ ܗ̱ܝ ܕܒܐܠܗܐ. ܗܕܐ ܕܝܢ ܠܐ ܬܘܕܝܬܐ ܕܒܗ. ܘܕܐܝܬܘܬܐ ܥܫܝ̣ܢܐ ܡ̣ܢ ܠܐ ܐܝܬܘܬܐ ܓܠܝܐ. ܘܟܕ ܠܟܦܘܪܘܬܐ ܕܡܚܝ̣ܠܐ. ܠܐ ܡܕܡ ܡ̣ܢ ܥܒܕ̈ܐ ܛܒ̈ܐ ܡܬܡܨܐ ܠܡܚܣܢ ܘܠܡܒܛܠܘܬܗ̇. ܟܡܐ ܝܬܝܪܐܝܬ ܠܗܝܡܢܘܬܐ ܕܚܝܠܬܢܝܐ. ܠܐ ܡܕܡ ܡ̣ܢ ܥܒܕ̈ܐ ܫܟܝ̣ܪ̈ܐ ܢܬܡܨܐ ܠܡܚܣܢܗ̇ ܘܠܡܒܛܠܘܬܗ̇. ܘܡ̣ܢ ܗܠܝܢ ܡܬܝܕܥܐ. ܕܠܐ ܡܕܡ ܡܣ̇ܓܦܝ̣ܢ ܥܒܕ̈ܐ ܫܟܝ̣ܪ̈ܐ ܕܚܛܝܬܐ܆ ܥܡ ܫܟܝ̣ܚܘܬܐ ܕܗܝܡܢܘܬܐ. ܒܕܓܘܢ ܟܠ ܡܗܝܡܢܐ ܐܢ ܙܕܝ̣ܩ ܘܐܢ ܚܛܝ. ܠܐ ܡܬܓܠܙ ܡ̣ܢ ܡܠܟܘܬܐ ܕܡܠܝ̣ܟܐ ܠܛܒ̈ܐ.

 

ܣܥܝܐ ܬܪܝܢܐ:

 

ܐܡܪܝܢ ܕܠܐ ܡܗܝܡܢܐ ܟܕ ܢܗܝܡܢ. ܦܘܪܥܢ ܗܝܡܢܘܬܗ ܐ̱ܚܪܝܬܐ. ܚܣܢ ܘܡܒܛܠ ܫܘܢܩ ܠܐ ܗܝܡܢܘܬܗ ܩܕܡܝܬܐ. ܐܝܟ ܕܐܡ̣ܪ ܦܛܪܘܣ ܛܘܒܢܐ ܕܬܩܒܠܘܢ ܦܘܪܥܢܐ ܕܗܝܡܢܘܬܟܘܢ܆ ܚܝ̈ܐ ܕܢܦ̈ܫܬܟܘܢ. ܘܕܫܘܢܩ ܠܐ ܗܝܡܢܘܬܐ ܝܬܝܪ ܚܣܝ̣ܢ ܘܥܫܝ̣ܢ ܡ̣ܢ ܫܘܢܩ ܓܝܪܘܬܐ ܓܠܝܐ. ܡ̣ܢ ܗ̇ܝ ܕܐܡ̣ܪ ܡܪܢ. ܕܟܠ ܚܛܗܝ̣̈ܢ ܘܓܘܕܦܝ̣̈ܢ ܢܫܬܒܩܘܢ ܠܒܢܝ̈ܢܫܐ. ܓܘܕܦܐ ܕܝܢ ܕܥܠ ܪܘܚܐ ܩܕܝܫܐ. ܠܐ ܢܫܬܒܩ ܠܒܢܝ̈ܢܐ. ܠܐ ܒܥܠܡܐ ܗܢܐ܆ ܘܠܐ ܒܥܠܡܐ ܕܥܬܝܕ. ܘܟܕ ܦܘܪܥܢ ܗܝܡܢܘܬܐ ܚܣܢ ܠܫܘܢܩ ܠܐ ܗܝܡܢܘܬܐ ܕܚܣܝ̣ܢ ܡ̣ܢ ܫܘܢܩ ܓܝܪܘܬܐ ܙܕܩ ܠܗ ܕܢܚܣܢܝܘܗܝ ܘܢܒܛܠܝ̣ܘܗܝ. ܘܡ̣ܢ ܗܠܝܢ ܡܫܬܪܪܐ ܕܡܗܝܡܢܐ ܓܝܪܐ ܠܐ ܡܫܬܢܩ ܡܛܠ ܓܝܪܘܬܗ. ܗܟܢܐ ܘܐܦܠܐ ܡܛܠ ܫܪܟܐ ܕܚܛܗܘ̈ܗܝ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܟܠܡ̇ܢ ܕܡܗܝܡܢ ܒܗ ܠܐ ܡܬܬܕܝ̣ܢ.

 

ܣܗܕܘܬܐ ܕܬܪܬܝܢ:

 

ܒܗ ܟܕ ܒܗ̇. ܟܠ ܡ̇ܢ ܕܡܗܝܡܢ ܒܗ ܠܐ ܢܐܒܕ. ܐܠܐ ܢܗܘܘܢ ܠܗ ܚܝ̈ܐ ܕܠܥܠܡ.

 

ܣܗܕܘܬܐ ܕܬܠܬ:

 

ܒܗ ܟܕ ܒܗ. ܡ̇ܢ ܕܫܡܥ ܡܠܬܝ ܘܡܗܝܡܢ ܠܡ̇ܢ ܕܫܕܪܢܝ ܐܝܬ ܠܗ ܚܝ̈ܐ ܕܠܥܠܡ.

 

ܣܗܕܘܬܐ ܕܐܪܒܥ:

 

ܒܗ ܟܕ ܒܗ. ܐܢ ܠܐ ܬܗܝܡܢܘܢ ܕܐܢܐ ܐ̱ܢܐ. ܬܡܘ̣ܬܘܢ ܒܚܛܗܝ̈ܟܘܢ.

 

ܣܗܕܘܬܐ ܕܚܡܫ:

 

ܦܘܠܘܣ. ܠܒܐ ܕܡܗܝܡܢ ܒܗ ܡܙܕܕܩ. ܘܦܘܡܐ ܕܡܘܕܐ ܒܗ ܚ̇ܝܐ.

 

ܣܗܕܘܬܐ ܕܫܬ:

 

ܗ̣ܘ ܟܕ ܗ̣ܘ. ܡܛܠ ܕܝ̇ܕܥܝ̣ܢܢ ܕܠܐ ܐ̱ܢܫ ܡܙܕܕܩ ܡ̣ܢ ܥܒܕ̈ܐ ܕܢܡܘܣܐ. ܐܠܐ ܒܗܝܡܢܘܬܐ ܕܝܫܘܥ ܡܫܝܚܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܚܕܥܣܝܪܝܬܐ

 

 ܡܛܠ ܣܬܘܪܝܗ̇ ܕܬܪܥܝܬܐ ܗܕܐ ܕܐܬܩܕܡܬ݀. ܘܒܗ ܐܝܬ ܢܝ̈ܫܐ ܕܣܥܝܝ̈ܗܘܢ ܚܘܫܒܝ̈ܐ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܠܘ ܠܐ ܚ̇ܣܢܝ̣ܢ ܥܒܕ̈ܐ ܛܒ̈ܐ ܠܟܦܘܪܘܬܐ. ܡܒܨܪܝ̣ܢ ܓܝܪ ܡ̣ܢ ܫܘܢܩܝ̈ܗ̇. ܒܗ̇ ܒܕܡܘ̣ܬܐ ܡܕܝܢ ܘܥܒܕ̈ܐ ܫܟ̣ܝܪ̈ܐ ܚ̇ܣܢܝ̣ܢ ܠܗܝܡܢܘܬܐ. ܟܕ ܡܒܨܪܝܢ ܡ̣ܢ ܒܘ̈ܣܒܝܗ̇. ܠܐ ܐܡܪ ܐ̱ܢܐ ܕܟܠܢܐܝܬ ܡܒܛܠܝ̣ܢ ܠܗܘܢ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܕܦܘܪܥܢ ܗܝܡܢܘܬܐ ܚܣܢ ܘܡܒܛܠ ܠܫܘܢܩ ܠܐ ܗܝܡܢܘܬܐ ܩܕܡܝܬܐ. ܘܠܘ ܠܫܘܢܩ ܓܝܪܘܬܐ ܐ̱ܚܪܝܬܐ ܕܒܬܪ ܗܝܡܢܘܬܐ. ܘܗܟܢܐ ܡܙܕܝܦ ܠܗ ܪܘܟܒܟܘܢ ܗ̇ܘ ܕܠܚܡܬܘܢܝܗܝ. ܘܡܫܬܪܪܐ ܗ̇ܝ ܕܠܘ ܠܐ ܡܬܬܕܝ̣ܢ ܘܡܫܬܢܩ ܡܗܝܡܢܐ ܓܝܪܐ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗܕ̈ܘܬܗܘܢ ܟܬܒܝ̈ܬܐ ܐܟܚܕܐ ܟܢܝܫܐܝܬ

 

ܐܡܪܝܢܢ ܕܗܝܡܢܘܬܐ ܡܫܡܠܝܬܐ ܗ̇ܝ ܗ̣ܝ ܕܢܗܝܡܢ ܐ̱ܢܫ ܒܬܪܥܝܬܐ ܘܢܘܕܐ ܒܠܫܢܐ. ܘܢܫܡܠܐ ܒܣܘܥܪܢܐ. ܘܡܢܐ ܗ̱ܝ ܗ̇ܝ ܕܢܫܡܠܐ ܒܣܘܥܪܢܐ. ܐܠܐ ܕܢܛܪ ܐ̱ܢܫ ܦܘܩ̈ܕܢܐ ܥܡ ܗܝܡܢܘܬܐ. ܒܕܓܘܢ ܐܡܪܝܢܢ ܕܣܗܕ̈ܘܬܐ ܗܠܝܢ ܟܠܗܝܢ ܡܛܠ ܗܝܡܢܘܬܐ ܐܝ̇ܕܐ ܕܡܫܡܠܝܐ ܒܥܒܕ̈ܐ ܛܒ̈ܐ ܐܡܝ̣ܪ̈ܢ. ܘܐܠܐ ܐܝܬܘ ܠܢ ܣܗܕܘܬܐ ܩܪܝ̣ܚܬܐ ܕܡܚܘܝܐ ܕܠܐ ܫܟܝܪܝܢ ܥܒܕ̈ܐ ܫܟܝܪ̈ܐ ܥܡ ܫܟܝ̣ܚܘܬܐ ܕܗܝܡܢܘܬܐ܆ ܘܢܗܝܡܢ.

 

 

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܬܪܥܝܬܐ ܕܗ̇ܢܘܢ ܕܠܥܒܕ̈ܐ ܒܠܥܕ ܗܝܡܢܘܬܐ ܣܝܡܝ̣ܢ ܥܠܬ݀ ܒܘܣܡܐ ܕܠܥܠܡ. ܘܒܗ ܐܝܬ ܢܝ̈ܫܐ ܬܪܝܢ ܢܝܫܐ ܩܕܡܝܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܐܘܢܓܠܝܘܢ. ܠܐ ܗ̣ܘܐ ܟܠ ܕܐܡ̇ܪ ܠܝ ܡܪܝ ܡܪܝ ܥ̇ܐܠ ܠܡܠܟܘܬܐ ܕܫܡܝܐ. ܐܠܐ ܡ̇ܢ ܕܥܒ̇ܕ ܨܒܝܢܗ ܕܐܒܝ ܕܒܫܡܝܐ ܐܡܪܝܢ. ܕܗܐ ܡܪܢ ܓܠܝܐܝܬ ܚܘܝ̣ ܕܒܝܕ ܥܒܕ̈ܐ. ܘܠܘ ܒܝܕ ܗܝܡܢܘܬܐ ܡܫܬܟܢܐ ܡܠܟܘܬܐ ܕܫܡܝܐ.

 

ܣܗܕܘܬܐ ܕܬܪܬܝܢ:

 

ܩܕܝܫܐ ܦܛܪܘܣ ܫܠܝܚܐ ܐܝܟ ܕܡܬܢܐ ܟܬܒܐ ܕܦܪܟܣܝܣ ܕܐܡ̣ܪ ܠܘܬ ܩܘܪܢܝܠܝܘܣ. ܕܐܠܗܐ ܠܐ ܐܝܬܘܗܝ ܢܣܒ ܒܐܦ̈ܐ. ܐܠܐ ܒܟܠܗܘܢ ܥܡ̈ܡܐ. ܐܝܢܐ ܕܕܚܠ ܡܢܗ ܘܦ̇ܠܚ ܟܐܢܘܬܐ܆ ܡܩܒܠ ܗ̣ܘ ܠܘܬܗ.

 

ܣܗܕܘܬܐ ܕܬܠܬ:

 

ܛܘܒܢܐ ܦܘܠܘܣ ܒܗ̇ܝ ܕܠܘܬ ܪ̈ܘܡܝܐ. ܢܦܪܘܥ ܠܡ ܬܫܒܘܚܬܐ ܘܐܝܩܪܐ ܘܫܠܡܐ. ܠܟܠ ܕܦܠܚ ܛܒ̈ܬܐ. ܠܝܘ̈ܕܝܐ ܠܘܩܕܡ ܘܠܚܢ̈ܦܐ. ܠܐ ܓܝܪ ܐܝܬ ܡܐܣܒ ܒܐܦ̈ܐ ܠܘܬ ܐܠܗܐ.

 

 

 

ܢܝܫܐ ܬܪܝܢܐ ܡܛܠ ܦܘ̈ܢܝܐ ܕܣܗܕ̈ܘܬܐ ܗܠܝܢ. ܦܘܢܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܗܕܐ ܣܗܕܘܬܐ ܠܘ ܠܗ̇ܝ ܕܒܠܥܕ ܗܝܡܢܘܬܐ ܡܨܝܐ ܠܡܐܪܬ݀ ܡܠܟܘܬܐ ܡܫܘܕܥܐ. ܐܠܐ ܠܗ̇ܝ ܕܥܡ ܗܝܡܢܘܬܐ ܟܕ ܥܒܕ̈ܐ ܢܗܘܘܢ. ܗܝܕܝܢ ܡܫܬܘܐ ܗ̇ܘ ܕܐܝܟ ܗܢܐ ܠܡܥܠ ܠܡܠܟܘܬܐ.

 

ܦܘܢܝܐ ܕܣܗܕܘܬܐ ܕܬܪܝܢ:

 

ܐܡܪܝܢܢ ܕܠܗܕܐ ܡܠܬܐ ܐܝܟ ܕܠܡܟܣܢܘܬܐ ܕܝܘܕܝ̈ܐ ܐܣܪܚܗ̇ ܩܕܝܫܐ ܦܛܪܘܣ. ܗ̇ܢܘܢ ܕܐܡܪܝܢ ܗ̣ܘܘ. ܕܠܝܘ̈ܕܝܐ ܒܠܚܘܕ ܡܩܒܠ ܐܠܗܐ ܕܢܬܦܪܩܘܢ ܒܗܝܡܢܘܬܐ ܕܒܡܫܝܚܐ. ܡܛܠ ܕܕܝܠܗ ܡܬܐܡܪܝܢ ܥܡܐ. ܒܕܓܘܢ ܐܡ̣ܪ. ܕܐܦ ܥܡ̈ܡܐ ܗ̇ܢܘܢ ܕܡܣܬܒܪܝܢ ܠܐ ܕܟܝ̈ܐ. ܘܒܝܕ ܢܡܘܣܐ ܚܘܫܒܝܐ ܘܠܘ ܟܬܒܝܐ ܡܘܫܝܐ ܕܚܠܝܢ ܡ̣ܢ ܐܠܗܐ ܘܦܠܚܝ̣ܢ ܟܐܢܘܬܐ ܘܡܗܝܡܢܝ̣ܢ ܒܒܪܗ ܕܐܠܗܐ ܐܝܟ ܕܐܦ ܩܘܪܢܝܠܝܘܣ ܡܩܒܠ ܠܗܘܢ ܐܠܗܐ. ܘܠܐ ܟܠܐ ܡܢܗܘܢ ܛܝܒܘܬܗ. ܘܡܛܠܗܕܐ ܐܘܣܦ ܬܘܒ ܐܡ̣ܪ. ܕܐܦ ܡܘܗܒܬܐ ܕܪܘܚܐ ܩܕܝܫܐ ܝ̇ܗܒ ܠܗܘܢ ܐܠܗܐ ܐܝܟ ܕܐܦ ܠܢ.

 

ܦܘܢܝܐ ܕܣܗܕܘܬܐ ܕܬܠܬ:

 

ܐܡܪܝܢܢ ܕܐܦ ܗܕܐ. ܗ̣ܘ ܟܕ ܗ̣ܘ ܚܝܠܐ ܕܗ̇ܝ ܩܢܝܐ. ܟܐܡܬ ܕܡܗܝܡܢܝ̣ܢ ܕܠܗ̇ܢܘܢ ܡ̣ܢ ܝܘ̈ܕܝܐ ܘܚܢ̈ܦܐ. ܦܪܥ ܐܠܗܐ ܬܫܒܘܚܬܐ ܘܐܝܩܪܐ ܘܫܠܡܐ. ܡܛܠ ܕܟܐܢܐ ܗ̱ܘ ܘܠܐ ܢܣܒ ܒܐܦ̈ܐ. ܘܡܛܠܗ̇ܝ ܬܘܒ ܕܨܒܐ ܕܟܠܗܘܢ ܒܢܝ̈ܢܫܐ ܢܬܦܪܩܘܢ. ܘܠܝ̣ܕܥܬܐ ܕܫܪܪܐ ܢܐܬܘܢ. ܘܝ̣ܕܝ̣ܥܐ ܗܕܐ ܗܟܢܐ ܡ̣ܢ ܗ̇ܝ ܕܗ̣ܘ ܟܕ ܗ̣ܘ ܛܘܒܢܐ ܐܘܣܦ ܐܡ̣ܪ ܒܐܓܪܬܐ ܕܠܘܬ ܥܒܪ̈ܝܐ ܕܠܐ ܗܝܡܢܘܬܐ ܕܝܢ܆ ܠܐ ܡܫܟܚ ܐ̱ܢܫ ܕܢܫܦܪ ܠܐܠܗܐ ܘܫܪܟܐ.

 

 

 

 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܦܘܚܡܐ ܕܗܝܡܢܘܬܐ ܘܥܒܕ̈ܐ ܠܘܬ ܦܘܪܥܢܐ ܕܥܠܡܐ ܕܥܬܝܕ. ܘܒܗ ܐܝܬ ܦܣܘ̈ܩܐ ܬܠܬܐ ܦܣܘܩܐ ܩܕܡܝܐ ܡܛܠ ܗ̇ܝ ܕܗܝܡܢܘܬܐ ܫܪܝܪܬܐ ܘܥܒܕ̈ܐ ܛܒ̈ܐ ܥ̈ܠܬܐ ܐܢܘܢ ܕܦܘܪ̈ܥܢܐ ܥܠܡܝ̈ܢܝܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘܝܢ̈ܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܐܠܘ ܗܝܡܢܘܬܐ ܘܥܒܕ̈ܐ ܠܘ ܥ̈ܠܬܐ ܗ̣ܘܘ ܕܒܘܣܡܐ. ܡܫܬܟܚ ܗ̣ܘܐ ܙܕܝܩܐ ܕܩܢ̣ܐ ܐܢܘܢ. ܘܚܛܝܐ ܕܓܠܝ̣ܙ ܡܢܗܘܢ. ܕܫܘܝܐܝܬ ܡܬܦܪܥܝ̣ܢ ܗ̇ܝ ܕܫܟܝ̣ܪܐ.

 

ܡܚܘܝܢܘܬܐ ܕܬܪܬܝܢ:

 

ܐܠܘ ܗܝܡܢܘܬܐ ܘܥܒܕ̈ܐ ܠܘ ܥ̈ܠܬܐ ܗ̣ܘܘ ܕܦܘܪܥܢܐ ܡܫܬܟܚܝ̣ܢ ܗ̣ܘܘ ܣܗ̈ܕܐ ܕܐܫܬܢܕܘ ܡܛܠ ܡܪܢ. ܘܚܢ̈ܦܐ ܕܫܢܕܘ ܐܢܘܢ. ܕܒܚܕܐ ܦܪܗܣܝܐ ܫܘܝܬܐ ܘܡ̇ܓܠܐ ܐܦ̈ܐ ܩܝܡܝ̣ܢ ܩܕܡ ܡܪܝܐ ܒܝܘܡܐ ܐ̱ܚܪܝܐ ܗ̇ܝ ܕܫܟܝ̣ܪܐ.

 

ܡܚܘܝܢܘܬܐ ܕܬܠܬ:

 

ܐܠܘ ܠܘ ܠܦܘܬ ܗܝܡܢܘܬܗ ܘܥܒܕܘ̈ܗܝ ܡܬܦܪܥ ܗ̣ܘܐ ܟܠ ܐ̱ܢܫ ܠܚܪܬܐ. ܡܫܬܟܚ ܗ̣ܘܐ ܐܠܗܐ ܫܘܒܚܐ ܠܛܝܒܘܬܗ ܕܐܝܩܝ ܣܥܪ ܗܠܝܢ ܕܣ̇ܥܪ ܠܚܪܬܐ ܗ̇ܝ ܕܫܟܝܪܐ.

 

ܣܗܕܘܬܐ ܕܐܪܒܥ:

 

ܐܠܘ ܠܘ ܠܦܘܬ ܗܝܡܢܘܬܐ ܘܥܒܕ̈ܐ ܦܪܥ ܐܠܗܐ ܠܒܢܝ̈ܢܫܐ ܠܚܪܬܐ. ܐܦܠܐ ܒ̇ܚܪ ܥܒܕܝ̈ܗܘܢ ܘܗܝܡܢܘܬܗܘܢ. ܘܡܛܠ ܗܕܐ ܐܦܠܐ ܕܐܢ ܐܢܘܢ. ܘܗܟܢܐ ܒܛܠܐ ܠܗ̇ ܡܐܬܝܬܗ ܕܬܪܬܝܢ ܕܡܪܝܐ ܗ̇ܝ ܕܫܟܝ̣ܪܐ.

 

 

 

ܢܝܫܐ ܕܬܪܝܢ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܗ̣ܘ ܐܠܗܐ ܥܠ ܦܘܡ ܡܘܫܐ. ܗܐ ܓܢܝ̣ܙ ܥܡܝ ܘܚܬܝ̣ܡ ܒܐܘܨܪ̈ܐ. ܕܝܠܝ ܗ̣ܘ ܦܘܪܥܢܐ ܕܐܦܪܘܥ ܐܢܘܢ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܡܛܠ ܒܙܬܐ ܕܡܣܟܢ̈ܐ ܘܐܢܩܬܐ ܕܒܝ̈ܫܐ. ܡܟܝܠ ܐܩܘܡ ܐܡ̇ܪ ܡܪܝܐ. ܘܐܥܒܕ ܦܘܪܥܢܐ ܓܠܝܐܝܬ.

 

 

 

ܗ̣ܘ ܟܕ ܗ̣ܘ. ܦܪܥܢܝ ܡܪܝܐ ܐܝܟ ܙܕܝܩܘܬܝ. ܘܐܝܟ ܕܟܝܘܬܐ ܕܐܝ̈ܕܝ ܩܕܡ ܥܝܢܘ̈ܗܝ.

 

ܣܗܕܘܬܐ ܕܬܠܬ:

 

ܐܘܢܓܠܝܘܢ. ܘܐܒܘܟ ܕܚ̇ܙܐ ܒܟܣܝܐ ܦ̇ܪܥ ܠܟ ܒܓܠܝܐ.

 

ܣܗܕܘܬܐ ܕܐܪܒܥ:

 

ܒܗ ܟܕ ܒܗ. ܒܟܝܠܬܐ ܕܡܟܝ̣ܠܝܢ ܐܢ̱ܬܘܢ ܡܬܬܟܝ̣ܠ ܠܟܘܢ.

 

ܣܗܕܘܬܐ ܕܚܡܫ:

 

ܦܛܪܘܣ. ܕܬܩܒܠܘܢ ܦܘܪܥܢܐ ܕܗܝܡܢܘܬܟܘܢ ܚܝ̈ܐ ܕܢܦ̈ܫܬܟܘܢ.

 

ܣܗܕܘܬܐ ܕܫܬ:

 

ܦܘܠܘܣ. ܘܟܠܢܫ ܐܝܟ ܥܡܠܗ ܐܓܪܗ ܡܩܒܠ.

 

ܣܗܕܘܬܐ ܕܫܒܥ:

 

ܝܥܩܘܒ. ܕܝ̣ܢܐ ܓܝܪ  ܗܘܐ ܕܠܐ ܪ̈ܚܡܐ ܥܠ ܗ̇ܘ ܕܠܐ ܥܒ̇ܕ ܪ̈ܚܡܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܬܪܥܝ̣ܬܐ ܣܩܘܒܠܝܬܐ ܕܗ̇ܢܘܢ ܕܐܡܪܝܢ ܕܠܘ ܒܝܕ ܥ̈ܠܬܐ ܗ̇ܘܐ ܦܘܪܥܢܐ ܐܠܐ ܡܓܢ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܐܢܢܩܐܝܬ ܝ̇ܕܥܝ̣ܢܢ ܕܐܠܨܝܬܐ ܗ̱ܝ ܠܟܠ ܒܪܢܫܐ. ܠܡܩܒܠܘ̣ ܛܝܒܘܬܐ ܕܗ̇ܘ ܕܛܝܒܘܬܐ ܥܡܗ ܣ̇ܥܪ. ܘܛܝܒ̈ܘܬܗ ܕܐܠܗܐ ܫܘܒܚܐ ܠܛܝܒܘܬܗ. ܗܢܐ ܟܠܗ ܣܓܝ̈ܐܢ ܥܠ ܒܪܢܫܐ. ܐܝܟ ܕܡܙܡܪ ܟܗ̈ܢܝܬܐ ܕܘܝܕ ܐܡ̇ܪ. ܕܣܓܝ̈ܐܢ ܐܢܝܢ ܕܥܒܕܬ ܡܪܝܐ. ܣܓܝ̈ܐܢ ܐܢܝܢ ܡ̣ܢ ܡܢܝܢܐ. ܐܝܟܢܐ ܕܒܟܠܗ ܙܒܢܗ. ܟܕ ܢܘܕܐ ܘܢܨܘܡ ܘܢܨܠܐ ܘܢܪܚܡ. ܠܐ ܡܬܡܨܐ ܕܢܦܪܘܥ ܚܘܒܬܐ ܕܚܕܐ ܛܝܒܘܬܐ ܘܐܦܢ ܙܥܘܪܬܐ ܡ̣ܢ ܗ̇ܢܝܢ. ܘܟܕ ܥܒܕܘ̈ܗܝ ܟܠܗܘܢ ܕܒܪܢܫܐ ܠܡܕܡ ܡ̣ܢ ܛܝܒ̈ܘܬܐ ܕܒܥܠܡܐ ܗܢܐ ܠܐ ܡܨܝܢ ܠܡܦܪܥ ܘܠܡܩܒܠܘ. ܐܝܟܢܐ ܥ̈ܠܬܐ ܕܦܘܪ̈ܥܢܐ ܐ̱ܚܪ̈ܢܐ ܘܕܛܝܒ̈ܘܬܐ ܐ̱ܚܪ̈ܢܝܬܐ ܒܥܠܡܐ ܕܥܬܝܕ ܡܨܝܢ ܠܡܗܘܐ. ܘܡ̣ܢ ܗܠܝܢ ܡܫܬܪܪܐ ܕܐܟܡܐ ܕܠܛܝܒ̈ܘܬܐ ܗܠܝܢ ܕܗܪܟܐ ܡܓܢ ܣ̇ܥܪ ܠܗܝܢ ܐܠܗܐ ܥܡ ܒܪܢܫܐ. ܗ̣ܘ ܗܟܘܬ ܘܠܗ̇ܢܝܢ ܕܒܥܠܡܐ ܕܥܬܝܕ. ܘܠܗܠܝܢ ܡܫܪܪ ܩܕܝܫܐ ܝܥܩܘܒ ܣܪܘܓܝܐ ܟܕ ܐܡ̇ܪ. ܣܓܝ ܫܩܠܬ ܟܕ ܛܠܡ ܐ̱ܢܐ ܠܟ ܝ̇ܗܘܒܐ. ܬܘܒ ܐܣܓܐ ܠܝ ܟܕ ܡܘܕܐ ܐ̱ܢܐ ܕܠܐ ܦ̇ܪܥ ܐ̱ܢܐ. ܠܟ ܫܦܝܪܐ ܕܬܬܠ ܡܓܢ ܘܠܐܚܪ̈ܢܐ ܠܐ. ܕܠܝܬ ܝ̇ܗܘܒܐ ܕܝ̇ܗܒ ܡܓܢ ܐܠܐ ܐܢ ܐܢ̱ܬ. ܘܫܪܟܐ.

 

ܣܥܝܐ ܬܪܝܢܐ:

 

ܐܡܪܝܢ ܐܠܘ ܗܝܡܢܘܬܐ ܘܥܒܕ̈ܐ ܥ̈ܠܬܐ ܗ̣ܘܘ ܕܦܘܪܥܢܐ. ܐܘ ܠܐ ܡܨܐ ܗ̇ܘܐ ܐܠܗܐ ܕܠܐ ܢܦܪܘܥ ܥܡ ܫܟܝ̣ܚܘܬܗܘܢ܆ ܐܘ ܡܨܐ ܗ̣ܘܐ ܕܠܐ ܢܦܪܘܥ ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܠܘܬ ܗ̇ܝ ܕܠܘ ܨܒܝܢܐܝܬ ܡܥܒܕ ܐܠܗܐ ܡܘܒܠ܆ ܗ̇ܝ ܕܫܟܝ̣ܪܐ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܟܕ ܠܐ ܦ̇ܪܥ ܐܘ ܛܠܘܡܐ ܡܬܐܡܪ ܕܐܝܬܘܗܝ ܐܘ ܠܘ ܛܠܘܡܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܐܠܗܐ ܟܐܢ ܗ̣ܘ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܗ̇ܘ ܕܓܠܙ ܠܗ̇ܘ ܕܫ̇ܘܐ. ܐܝܟܢܐ ܠܐ ܛܠܡ ܠܗ. ܘܟܕ ܟܠܗܘܢ ܗܠܝܢ ܦܘ̈ܠܓܐ ܫܟܝ̣ܪܝܢ. ܝ̣ܕܝ̣ܥܐ ܕܗܝܡܢܘܬܐ ܘܥܒܕ̈ܐ ܠܘ ܥ̈ܠܬܐ ܐܢܘܢ ܕܦܘܪܥܢܐ. ܐܦܠܐ ܒܝܕܗܘܢ ܡܫܬܘܐ ܒܪܢܫܐ ܠܡܬܒܣܡܘ. ܐܘ ܒܓܠܝ̣ܙܘܬܗܘܢ ܡܫܬܘܐ ܠܡܫܬܢܩܘ.

 

ܣܥܝܐ ܬܠܝܬܝܐ:

 

ܐܡܪܝܢ ܐܢܗܘ ܕܐܠܗܐ ܗ̱ܘ ܥܒܘܕܐ ܕܥܒܕ̈ܐ ܛܒ̈ܐ ܒܐܝ̈ܕܝ ܒܪܢܫܐ. ܐܟܡܐ ܕܐܡܝ̣ܪ ܒܐܘܢܓܠܝܘܢ. ܕܗ̇ܘ ܕܥ̇ܒܕ ܫܪܪܐ. ܐܬܐ ܠܘܬ ܢܘܗܪܐ. ܕܢܬܝܕܥܘܢ ܥܒܕܘ̈ܗܝ ܕܒܐܠܗܐ ܥܒܝ̣ܕܝܢ. ܐܝܟܢܐ ܥ̈ܠܬܐ ܗ̇ܘܝܢ ܕܦܘܪܥܢܐ ܕܒܪܢܫܐ ܚܠܦܝܗܘܢ ܒܘܣܡܐ. ܟܕ ܠܘ ܕܝܠܗ ܐܢܘܢ. ܐܦܠܐ ܗܘܝܘ ܣܥܘܪܗܘܢ. ܘܐܝܟܢܐ ܬܬܗܘܢܢܝ ܗܕܐ. ܕܐܠܗܐ ܢܥܒܕ ܥܒܕ̈ܐ. ܘܒܪܢܫܐ ܢܬܦܪܥ ܚܠܦܝܗܘܢ.

 

ܣܥܝܐ ܪܒܝܥܝܐ:

 

ܐܡܪܝܢ ܐܠܘ ܐܘܠܨܢ̈ܐ ܕܥܠܡܐ ܗܢܐ ܥ̈ܠܬܐ ܗ̣ܘܘ ܕܒܘܣܡܐ ܕܥܠܡܐ ܕܥܬܝ̣ܕ. ܡܫܬܟܚ ܗ̣ܘܐ ܗ̇ܘ ܕܡ̣ܢ ܩܛܠܐ ܡܦܨܐ ܗ̣ܘܐ ܠܣܗ̈ܕܐ. ܕܚܛܝ̣ܬܐ ܪܒܬܐ ܣ̇ܥܪ ܗ̣ܘܐ. ܒܗ̇ܝ ܕܡ̣ܢ ܛܒ̈ܬܐ ܪܘܪ̈ܒܬܐ ܕܒܥܠܡܐ ܕܥܬܝ̣ܕ ܓܠܙ ܗ̣ܘܐ ܠܗܘܢ. ܘܗ̇ܘ ܕܩܛܠ ܗ̣ܘܐ ܠܗܘܢ. ܙܕܩ ܗ̣ܘܐ ܕܢܬܩܠܣ. ܒܗ̇ܝ ܕܥܠܬ݀ ܛܒ̈ܬܐ ܪܘܪ̈ܒܬܐ ܗ̇ܘܐ ܗ̣ܘܐ ܠܗܘܢ. ܘܬܪ̈ܬܝܗܝܢ ܫܟܝ̣ܪ̈ܢ. ܐܘܠܨܢܝ̈ܗܘܢ ܡܕܝܢ ܕܣܗ̈ܕܐ ܠܘ ܥ̈ܠܬܐ ܐܢܘܢ ܕܒܘܣܡܝ̈ܗܘܢ ܕܒܥܠܡܐ ܕܥܬܝܕ.

 

 

 

ܢܝܫܐ ܬܪܝܢܐ. ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܐܫܥܝܐ. ܟܠܗ̇ ܓܝܪ ܙܕܝܩܘܬܢ ܐܝܟ ܐܘܪܩܥܬܐ ܕܟܦܣܢܝܬܐ ܩܕܡܝܟ. ܒܕܓܘܢ ܐܡܪܝܢ ܕܟܕ ܙܕܝܩܘܬܗ ܕܒܪܢܫܐ ܗܢܐ ܟܠܗ ܢܕܝ̣ܕܐ ܘܠܐ ܚܫܚܐ ܩܕܡ ܐܠܗܐ. ܐܝܟܢܐ ܡܨܝܐ ܕܬܗܘܐ ܥܠܬܐ ܕܛܒ̈ܬܐ ܗ̇ܢܝܢ ܪܘܪ̈ܒܬܐ ܕܒܥܠܡܐ ܕܥܬܝܕ. ܐܘ ܐܝܟܢܐ ܢܡܪܚ ܕܢܐܡܪ ܕܐܓܪ ܥܒܕܝ̈ܢ ܡܬܦܪܥܝ̣ܢܢ.

 

ܣܗܕܘܬܐ ܕܬܪܬܝܢ:

 

ܐܘܢܓܠܝܘܢ. ܐܓܪܐ ܕܦܥ̈ܠܐ ܕܚܕܥܣܪ̈ܐ ܫܥܝ̣̈ܢ ܡܫܘܕܥ ܕܠܘ ܥܒܕ̈ܐ ܐܢܘܢ ܥܠܬ݀ ܦܘܪܥܢܐ. ܘܐܠܐ ܐܝܟܢܐ ܗ̇ܢܘܢ ܐ̱ܚܪ̈ܝܐ ܥܡ ܗ̇ܢܘܢ ܩܕ̈ܡܝܐ ܕܣܒܠܘ ܝܘܩܪܗ ܕܝܘܡܐ ܘܚܘ̣ܡܗ ܡܫܬܘܝܢ ܗ̣ܘܘ.

 

ܣܗܕܘܬܐ ܕܬܠܬ:

 

ܒܗ ܟܕ ܒܗ. ܝܘܬܪܢܐ ܕܬܠܬܝܢ ܘܕܫܬܝܢ ܘܕܡܐܐ ܡܫܘܕܥ ܕܠܘ ܥܒܕ̈ܐ ܐܢܘܢ ܥ̈ܠܬܐ ܕܦܘܪܥܢܐ.

 

ܣܗܕܘܬܐ ܕܐܪܒܥ:

 

ܦܘܠܘܣ. ܒܛܝܒܘܬܗ ܗ̣ܘ ܓܝܪ ܐܬܦܪܩܢܢ ܒܗܝܡܢܘܬܐ ܘܠܐ ܗ̣ܘܐ ܡ̣ܢ ܥܒ̣ܕ̈ܐ ܕܠܐ ܐ̱ܢܫ ܢܫܬܒܗܪ.

 

 

 

ܢܝܫܐ ܬܠܝܬܝܐ ܡܛܠ ܗܕܣ̈ܐ ܐ̱ܚܪ̈ܢܐ ܕܗܕܣܝܢ ܗ̣ܢܘܢ ܗܠܝܢ ܒܗܢܐ ܢܝܫܐ

 

ܐܡܪܝܢ ܕܐܠܗܐ ܫܘܒܚܐ ܠܛܝܒܘܬܗ ܠܐ ܣܟ ܣܥܪ ܡܕܡ ܡܛܠ ܡܕܡ ܟܐܡܬ݀ ܡܛܠ ܥܠܬܐ. ܒܗ̇ܝ ܕܗ̣ܝ ܗ̇ܝ ܥܠܬܐ ܐܘ ܣܥܘܪܘܬܐ ܕܗ̇ܘ ܡܐ ܕܙܕܩ ܗ̣ܝ. ܐܘ ܡܒܛܠܢܘܬܐ ܕܗ̇ܘ ܡܐ ܠܐ ܕܙܕܩ ܐܘ ܙܕܩܐ ܠܗ ܠܐܠܗܐ܆ ܐܘ ܠܐ ܙܕܩܐ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܡܫܬܟܚ ܠܗ ܚܣܝ̣ܪܐ ܡ̣ܢ ܗ̇ܝ ܕܙܕܩܐ ܡ̣ܢ ܩܕܡ ܕܢܣܥܪܝܗ̇. ܘܒܗ̇ ܡܬܓܡܪ ܟܕ ܢܣܥܪܝܗ̇ ܗ̇ܝ ܕܫܟܝܪܐ. ܒܗ̇ܝ ܕܐܠܗܐ ܡܫܡܠܝܐ ܗ̱ܘ ܒܡܬܘܡܝܘܬܗ. ܘܗ̇ܘ ܕܬܪܝܢ ܬܘܒ ܠܐ ܫܪܝܪ. ܒܗ̇ܝ ܕܟܕ ܠܐ ܙܕܩܐ ܠܗ. ܐܝܟܢ ܡܬܪܡܐ ܕܢܣܥܪܝܗ̇. ܘܡܛܠܗܕܐ ܐܡܪܝܢ ܕܐܦܠܐ ܡܛܠ ܗܝܡܢܘܬܐ ܘܥܒܕ̈ܐ ܛܒ̈ܐ ܡܫܘܐ ܠܡܠܟܘܬܐ. ܒܝܕ ܥ̈ܠܬܐ ܕܐܬܐܡܪ̈ܝ. ܐܦܠܐ ܡܛܠ ܠܐ ܗܝܡܢܘܬܐ ܘܥܒܕ̈ܐ ܫܟܝ̣ܪ̈ܐ ܡܫܢܩ ܒܓܗܢܐ. ܘܕܠܐ ܡܫܢܩ ܝ̣ܕܝ̣ܥܐ ܡ̣ܢ ܗ̇ܝ ܕܠܐ ܐܢ ܡܫܢܩ ܝ̇ܬܪ. ܘܐܦܠܐ ܐܢ ܠܐ ܢܫܢܩ ܚ̇ܣܪ. ܘܟܕ ܗ̇ܝ ܕܠܐ ܢܫܢܩ ܠܘܬ ܡܪܚܡܢܘܬܗ ܘܛܒܘܬܗ ܡܘܒܠܐ. ܡ̣ܢ ܐܢܢܩܝ̣ ܕܠܐ ܢܫܢܩ. ܘܡܓܡܕܝ̣ܢ ܬܘܒ ܠܡܐܡܪ. ܕܐܦܠܐ ܗ̇ܘ ܡܐ ܕܦܩܚ ܠܒܢܝ̈ܢܫܐ ܡܫܟܢ ܠܗܘܢ. ܒܗ̇ܝ ܕܠܪܫܝ̣ܥܐ ܨܪܝ̣ܟܐ ܦܩܚ ܗ̣ܘܐ ܠܗ ܐܠܘܠܐ ܐܬܒܪܝ ܣܟ ܕܠܐ ܢܫܬܢܩ ܗ̣ܘܐ ܒܥܠܡܐ ܗܢܐ ܒܥܠܬ݀ ܨܪܝ̣ܟܘܬ. ܘܒܥܠܡܐ ܕܥܬܝܕ ܡܛܠ ܪܘܫܥܗ. ܘܦܩܚ ܗ̣ܘܐ ܬܘܒ ܠܟܠܗܘܢ ܒܢܝ̈ܢܫܐ ܐܠܘ ܡ̣ܢ ܫܘܪܝܐ ܠܡܠܟܘܬܐ ܕܫܡܝܐ ܐܫܬܘܝ̣ܘ. ܘܠܐ ܥܠ̣ܘ ܠܗ ܠܥܠܡܐ ܗܢܐ ܬܥܝ̣ܫܐ. ܘܟܕ ܗܠܝܢ ܟܠܗܝܢ ܦܩ̈ܚܢ ܘܠܐ ܣܥܪ ܡܕܡ ܡܛܠ ܥܠܬܐ.

 

ܬܘܢܝܐ:

 

ܘܬܘܒ ܐܡܪܝܢܢ ܒܙܢܐ ܣܘܕܢܝܐ. ܕܡܠܦܢܐ ܐ̱ܢܫ ܟܕ ܡܪܬܐ ܗ̣ܘܐ ܥܠ ܒܐܡܐ. ܘܡܫܬܘܕܐ ܡܠܟܘܬܐ ܠܛܒ̈ܬܐ ܡܛܠ ܛܒܘܬܗܘܢ. ܘܓܗܢܐ ܠܒܝ̣̈ܫܐ ܡܛܠ ܒܝܫܘܬܗܘܢ. ܩܪܒܬ݀ ܠܘܬܗ ܣܒܬܐ ܐ̱ܢܫ ܘܐܡ̇ܪܐ ܠܗ. ܕܬܠܬܐ ܠܡ ܒܢܝ̈ܐ ܐܝܬ ܗ̣ܘܐ ܠܝ. ܘܗ̇ܘ ܪܒܐ ܡܝ̣ܬ ܠܐ ܡܗܝܡܢܐ ܘܡܪܓܙܢܐ. ܘܗ̇ܘ ܡܨܥܝܐ ܡܝ̣ܬ ܡܗܝܡܢܐ ܘܟܐܢܐ. ܘܗ̇ܘ ܙܥܘܪܐ ܡܝ̣ܬ ܥܠ ܬܕܝ̈ܐ. ܐܝܟܐ ܐܪܐ ܐܘ ܐܝܟܢܐ ܗ̇ܘܐ ܟܠܚܕ ܡܢܗܘܢ ܒܥܠܡܐ ܕܥܬܝܕ. ܐܡ̇ܪ ܠܗ̇ ܡܠܦܢܐ ܕܗ̇ܘ ܪܒܐ ܒܓܗܢܐ ܡܫܬܢܩ. ܘܗ̇ܘ ܡܨܥܝܐ ܒܡܠܟܘܬܐ ܡܬܒܣܡ. ܘܗ̇ܘ ܙܥܘܪܐ ܠܐ ܡܫܬܢܩ ܡܛܠ ܕܠܐ ܐܥܘܠ ܐܦܠܐ ܡܬܒܣܡ ܡܛܠ ܕܠܐ ܐܙܕܕܩ. ܐܠܐ ܗ̇ܘܐ ܐܝܟܐ ܕܐܠܗܐ ܝ̇ܕܥ. ܒܗ̇ܝ ܕܣܓܝܐܝܢ ܐܘܢ̈ܐ ܠܘܬܗ. ܐܡ̇ܪܐ ܠܗ ܐܢ̱ܬܬܐ ܗ̇ܝ. ܘܠܡܢܐ ܐܪܐ ܠܐ ܐܚܝܗ ܐܠܗܐ ܠܒܪܝ ܙܥܘܪܐ. ܐܝܟܢܐ ܕܢܬܬܓܪ ܗ̣ܘܐ ܥܒܕ̈ܐ ܛܒ̈ܐ ܘܝ̇ܪܬ ܡܠܟܘܬܐ ܥܡ ܐܚܘܗܝ ܡܨܥܝܐ. ܐܡ̇ܪ ܠܗ̇ ܡܠܦܢܐ. ܡܛܠ ܕܩܕܡ ܝ̣ܕܥ ܐܠܗܐ. ܕܠܐ ܡܙܕܕܩ ܗ̣ܘܐ ܐܠܘ ܚܝܐ. ܐܠܐ ܡܠܘܢ ܡܥܘܠ ܗ̣ܘܐ ܘܓܗܢܐ ܝ̇ܪܬ ܗ̣ܘܐ. ܒܕܓܘܢ ܗ̇ܝ ܕܢܡܘܬ ܗ̣ܘܐ ܝܬܝܪ ܦܩܚܐ ܗܘܬ݀ ܠܗ ܡ̣ܢ ܗ̇ܝ ܕܢܚܐ ܘܡܛܠܗܢܐ ܐܡܝ̣ܬܗ. ܐܡ̇ܪܐ ܠܗ ܣܒܬܐ ܗ̇ܝ. ܘܐܝܟܢܐ ܠܐ ܐܬܚܫܒ ܚܘܫܒܐ ܗܢܐ܇ ܟܕ ܡܘܣܦ ܗ̣ܘܐ ܚܝ̈ܐ܆ ܠܒܝܫ ܓܕܐ ܒܪܝ ܪܒܐ. ܘܗܟܢܐ ܒܗܬ ܡܠܦܢܐ ܗ̇ܘ ܘܠܐ ܐܬܡܨܝ̣ ܠܡܦܢܝܘ̣ ܠܗ̇. ܘܡ̣ܢ ܗܠܝܢ ܝ̣ܕܝ̣ܥܐ ܐܡܪܝܢ ܕܠܐ ܣ̇ܥܪ ܐܠܗܐ ܡܕܡ ܡܛܠ ܥܠܬܐ. ܟܐܡܬ݀ ܡܛܠܗ̇ܝ ܕܗܟܢܐ ܦܩܚ ܐܘ ܗܟܢܐ ܙܕܩ.

 

 

 

 

 

 

 

 

     #1 

 

ܦܣܘܩܐ ܬܠܝܬܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܗܕܐ ܕܐܬܩܕܡܬ݀. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ. ܫܪܝܐ ܕܣܥܝܐ ܩܕܡܝܐ

 

ܐܡܪܝܢܢ ܕܒܫܪܪܐ ܣܓܝ̈ܐܢ ܐܢܝܢ ܘܠܥܠ ܡ̣ܢ ܡܢܝܢܐ ܛܝܒ̈ܘܬܗ ܕܐܠܗܐ ܕܥܠܝܢ. ܐܠܐ ܠܘ ܡܛܠܗ̇ܝ ܕܢܬܦܪܥ ܡܢܢ ܚܠܦܝܗܝܢ ܣ̇ܥܪ ܐܢܝܢ. ܠܐ ܣܢܝ̣ܩܐ ܗ̱ܘ ܓܝܪ ܐܠܗܐ. ܘܡܛܠܗܕܐ ܐܦܠܐ ܡܛܠܗ̇ܝ ܕܝ̇ܬܪ ܡ̣ܢ ܗܝܡܢܘܬܢ ܘܥܒܕܝ̈ܢ ܦ̇ܪܥ ܠܢ ܒܥܠܡܐ ܕܥܬܝܕ. ܐܠܐ ܚܢܢ ܗ̇ܘ ܡܐ ܕܙܪܥܝ̣ܢܢ ܒܥܠܡܐ ܗܢܐ. ܠܗ ܗ̣ܘ ܚܨܕܝ̣ܢܢ ܒܥܠܡܐ ܕܥܬܝܕ. ܟܕ ܐܠܗܐ ܫܘܒܚܐ ܠܛܝܒܘܬܗ. ܠܐ ܐܢ ܙܪܥܝ̣ܢܢ ܝ̇ܬܪ. ܐܦܠܐ ܐܢ ܠܐ ܙܪܥܝ̣ܢܢ ܐܘ ܒܝܫܐܝܬ ܙܪܥܝ̣ܢܢ ܚ̇ܣܪ. ܘܡ̣ܢ ܗܠܝܢ ܝ̣ܕܝ̣ܥܐ. ܕܠܗܝܡܢܘܬܐ ܘܥܒܕ̈ܐ ܛܒ̈ܐ ܕܡ̣ܢ ܒܪܢܫܐ ܡܣܬܥܪܝ̣ܢ. ܠܘ ܦܚܡܐ ܕܛܝܒ̈ܘܬܗ ܩܕ̈ܡܝܬܐ ܘܐ̱ܚܪ̈ܝܬܐ ܚ̇ܫܒ ܠܗܘܢ ܐܠܗܐ. ܐܠܐ ܠܛܒ̈ܐ ܡ̇ܢ ܡܛܠܗ̇ܝ ܕܒܝܬܝ̣ܝ̣̈ܢ ܠܛܒܬܐ܆ ܛܒܬܐ ܦ̇ܪܥ. ܘܠܒܝ̈ܫܐ ܒܝܫܬܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ. ܕܠܘ ܟܠ ܕܡܨܐ ܠܡܗܘܐ ܡ̣ܢ ܐܠܨ̈ܬܐ ܗ̇ܘܐ. ܘܐܠܐ ܐܝܟܢܐ ܡܫܪܐ ܗܘܬ݀ ܥܡܗܝܢ ܕܦܪ̈ܘܛܣܝܣ ܗܠܝܢ ܗ̇ܝ ܕܡܨܐ. ܒܕܓܘܢ ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܐܦܢ ܡܨܐ ܕܠܐ ܢܦܪܘܥ. ܐܠܐ ܠܘ ܠܐ ܦ̇ܪܥ. ܘܗܟܢܐ ܒܗ̇ܝ ܡ̇ܢ ܕܡܨܐ ܕܠܐ ܢܦܪܘܥ. ܨܒܝܢܐ ܣ̇ܥܪ. ܘܒܗ̇ܝ ܡ̇ܢ ܕܠܘ ܠܐ ܦܪܥ. ܟܐܢܐ ܗ̱ܘ ܘܠܘ ܛܠܘܡܐ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܩܕܡܢܢ ܫܪܪܢܢ ܠܚܐܪܘܬܐ ܘܫܠܝ̣ܛܘܬ ܒܝܬܐ ܐ̱ܢܫܝܬܐ ܘܛܒ̈ܬܐ ܟܠܗܝܢ ܕܒܝܕ ܒܛܝ̣ܠܘܬܐ ܐܠܗܝܬܐ ܒܐܝ̈ܕܝܢ ܡܣܬܥܪ̈ܢ. ܐܠܘ ܠܘ ܒܡܨܥܝܘܬ ܚܐܪܘܬܢ ܡܣܬܥܪ̈ܢ ܗܘܝ̈. ܟܒܪ ܫܪܝܪܐ ܗ̣ܘܐ ܣܥܝܟܘܢ. ܘܟܕ ܒܪܢܫܐ ܒܚܐܪܘܬܗ ܗ̣ܘ ܣ̇ܥܪ ܛܒ̈ܬܐ. ܘܡ̣ܢ ܒܛܝ̣ܠܘܬܐ ܡܬܥܕܪܘ ܡܬܥܕܪ ܒܠܚܘܕ. ܐܝܟ ܕܐܡ̣ܪ ܫܠܝܚܐ ܦܘܠܘܣ. ܕܐܝܠܝܢ ܕܡܚܒܝ̣ܢ ܠܐܠܗܐ. ܒܟܠܡܕܡ ܡ̇ܥܕܪ ܠܗܘܢ ܠܛܒܬܐ. ܟܐܢܐܝܬ ܦܘܪܥܢܐ ܕܥܒܕܘ̈ܗܝ ܕܝܠܗ ܡܬܦܪܥ ܘܠܘ ܕܥܒܕܘ̈ܗܝ ܕܐܠܗܐ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܒܬܐܪ̈ܬܗܘܢ ܕܒܢܝ̈ܢܫܐ ܚ̇ܐܪ ܘܕܐܢ ܠܗܘܢ. ܒܕܓܘܢ ܗ̇ܘ ܕܡ̣ܢ ܩܛܠܐ ܡܦܨܐ ܠܣܗ̈ܕܐ. ܟܕ ܠܘ ܡܒܐܫܢܘܬܗܘܢ ܡܬܚܫܒ. ܘܗ̇ܘ ܕܩܛܠ ܠܗܘܢ ܟܕ ܠܘ ܡܛܐܒܢܘܬܗܘܢ ܒܥܐ. ܟܐܢܐܝܬ ܟܠܚܕ ܡܢܗܘܢ ܦܐܪ̈ܝ ܨܒܝܢܗ ܩܛܦ.

 

 

 

ܢܝܫܐ ܬܪܝܢܐ ܡܛܠ ܦܘܢܝ̈ܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ

 

ܐܡܪܝܢܢ ܕܗ̣ܝ ܗܕܐ ܣܗܕܘܬܐ܆ ܠܫܝ̣ܛܘܬܐ ܕܟܝܢܢ ܒܠܚܘܕ ܡܫܘܕܥܐ. ܘܠܘ ܠܗ̇ܝ ܕܠܐ ܡܗܢܝܐ ܙܕܝܩܘܬܢ.

 

ܦܘܢܝܐ ܕܣܗܕܘܬܐ ܕܬܪܬܝܢ:

 

ܐܡܪܝܢܢ ܐܠܘ ܗ̇ܢܘܢ ܩܕܡܝ̈ܐ ܐܬܓܠܙܘ ܡ̣ܢ ܦܘܪܥܢܐ. ܘܗ̇ܢܘܢ ܐ̱ܚܪ̈ܝܐ ܐܫܬܘܝ̣ܘ ܟܒܪ ܐܝܬ ܗ̣ܘܐ ܠܟܘܢ ܕܬܐܡܪܘܢ ܕܥܒܕ̈ܐ ܠܘ ܥ̈ܠܬܐ ܐܢܘܢ ܕܦܘܪܥܢܐ. ܘܗܐ ܠܘ ܗܟܢܐ. ܒܕܓܘܢ ܗ̇ܢܘܢ ܩܕ̈ܡܝܐ ܐܓܪܐ ܕܦܘܠܚܢܗܘܢ ܩܒܠܘ. ܘܗ̇ܢܘܢ ܐ̱ܚܪ̈ܝܐ ܐܓܪܐ. ܐܠܐ ܒܛܝܒܘ̣ ܐܫܬܟܢ ܠܗܘܢ ܗ̇ܘ ܡܐ ܕܐܫܬܟܢ ܡܘܗܒܬ݀.

 

ܦܘܢܝܐ ܕܣܗܕܘܬܐ ܕܬܠܬ:

 

ܐܡܪܝܢܢ ܐܠܘܠܐ ܥܒܕ̈ܐ. ܐܦܠܐ ܥܦܝ̣ܦܘܬܐ ܕܦܘܪܥܢܐ ܗܘܬ݀. ܒܕܓܘܢ ܥܒܕ̈ܐ ܐܢܘܢ ܥ̈ܠܬܐ ܕܦܘܪܥܢܐ ܘܕܥܦܝ̣ܦܘܬ ܦܘܪܥܢܐ.

 

ܦܘܢܝܐ ܕܣܗܕܘܬܐ ܕܐܪܒܥ:

 

ܐܡܪܝܢ ܕܗܕܐ ܣܗܕܘܬܐ ܡܫܘܕܥܐ ܠܗ̇ܝ ܕܗܝܡܢܘܬܐ ܗܘܬ݀ ܥܠܬ݀ ܦܘܪܩܢܐ. ܘܐܝܟܢܐ ܐܢ̱ܬܘܢ ܕܠܐ ܥܠܬܐ ܡܘܕܝܢ ܐܢ̱ܬܘܢ ܠܦܘܪܩܢܐ ܐܦ ܠܦܘܪܥܢܐ.

 

 

 

ܢܝܫܐ ܬܠܝܬܝܐ. ܡܛܠ ܫܪ̈ܝܐ ܕܗܕܣ̈ܐ ܗ̇ܢܘܢ

 

ܐܡܪܝܢܢ ܕܐܠܗܐ ܫܘܒܚܐ ܠܛܝܒܘܬܗ ܠܐ ܡܬܘܡ ܦܐܫ ܡ̣ܢ ܗ̇ܝ ܕܢܣܥܘܪ ܗ̇ܝ ܕܢܣܥܘܪ ܗ̇ܝ ܕܙܕܩܐ ܒܙܒܢܗ̇. ܘܡܛܠܗܕܐ ܠܐ ܫܪܝܪܐ ܕܢܐܡܪ ܕܡ̣ܢܩܕܡ ܕܢܣܥܘܪ ܗ̇ܝ ܕܙܕܩܐ. ܒܗ̇ܝ ܕܗ̇ܝ ܕܙܕܩܐ ܒܙܒܢܗ̇ ܙܕܩܐ ܘܡ̣ܢ ܩܕܡ ܙܒܢܗ̇ ܠܐ ܣܟ ܙܕܩܐ. ܘܠܘܩܒܠ ܗ̇ܝ ܕܠܘ ܒܥܠܬ݀ ܗܝܡܢܘܬܐ ܘܥܒܕ̈ܐ ܡܫܘܐ ܠܡܠܟܘܬܐ. ܩܕܡܢܢ ܣܕܪܢܢ ܡܠܬܐ. ܘܠܘܩܒܠ ܗ̇ܝ ܕܗ̇ܝ ܕܠܐ ܢܫܢܩ ܠܘܬ ܡܪܚܡܢܘܬܗ ܡܘܒܠܐ. ܐܡܪܝܢܢ ܕܗ̇ܝ ܕܢܫܢܩ ܠܘܬ ܟܐܢܘܬܐ ܡܘܒܠܐ. ܘܟܕ ܬܪ̈ܬܝܗܝܢ ܫܘ̈ܝܢ܇ ܠܡܢܐ ܡܢܬܥܝ̣ܢ ܐܢ̱ܬܘܢ ܠܗ̇ܝ ܥܠܗܕܐ. ܘܕܡܛܠܡܢܐ ܚܢܢ ܠܗܕܐ ܥܠ ܗ̇ܝ ܡܢܬܥܝ̣ܢܢ܇ ܠܚܪܬܐ ܡܚܘܝܢܢ. ܘܠܘܩܒܠ ܗ̇ܝ ܕܠܘ ܗܠܝܢ ܕܦܩ̈ܚܢ ܣ̇ܥܪ ܐܡܪܝܢܢ. ܕܝ̣ܕܥܬܗ ܕܐܠܗܐ ܝܬܝܪ ܡܥܠܝܐ ܘܡܫܡܠܝܐ ܘܡܪܢܝܐ ܡ̣ܢ ܝ̣ܕܥܬܢ ܕܝܠܢ. ܒܕܓܘܢ ܗܠܝܢ ܕܦܩ̈ܚܢ. ܗ̇ܢܝܢ ܐܢܝܢ ܕܗ̣ܘ ܝ̇ܕܥ ܐܢܝܢ ܘܣ̇ܥܪ ܠܗܝܢ. ܘܠܘ ܗ̇ܢܝܢ ܕܚܢܢ ܝ̇ܕܥܝ̣ܢܢ ܘܠܐ ܣܥܪ ܠܗܝܢ. ܘܒܕܐܝܟ ܗܠܝܢ ܬܘܒ ܦܠܝܪܘܦܘܪܝܣܐ ܥܒܕܝ̣ܢܢ ܠܘܩܒܠ ܣܘܕܐ ܗ̇ܘ ܕܡܢܗܘܢ ܐܬܬܢܝ̣. ܟܐܡܬ݀ ܕܗ̇ܢܝܢ ܕܦܩ̈ܚܢ ܗܘܝ̈ ܠܗܠܝܢ ܬܠܬܐ ܒܢܝ̈ܗ̇ ܕܐܢ̱ܬܬܐ ܗ̇ܝ. ܗ̇ܢܝܢ ܐܢܝܢ ܕܐܠܗܐ ܝ̇ܕܥ ܐܢܝܢ ܘܣܥ̣ܪ. ܘܠܘ ܗ̇ܢܝܢ ܕܚܢܢ ܡܕܪܟܝ̣ܢܢ.

 

 

 

ܩܦܠܐܘܢ ܚܡܝܫܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܚܛܗ̈ܐ ܘܬܝܒܘܬܐ ܕܡܢܗܘܢ. ܘܒܗ ܐܝܬ ܦܣܘ̈ܩܐ ܚܡܫܐ. ܦܣܘܩܐ ܩܕܡܝܐ ܡܛܠ ܦܚܡܗܘܢ ܕܚܛܗ̈ܐ ܘܙܕܝܩ̈ܘܬܐ ܠܘܬ ܚܕ̈ܕܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠܗ̇ܝ ܕܡܩܒܠܢ̈ܐ ܐܢܘܢ ܚܛܗ̈ܐ ܘܙܕܝܩ̈ܘܬܐ ܘܗܝܡܢܘܬܐ ܕܝܬܝܪܘܬܐ ܘܕܒܨܝ̣ܪܘܬܐ

 

ܕܚܛܗ̈ܐ ܐܝܬ ܪܘܪ̈ܒܐ ܘܚܛܗ̈ܐ ܙܥܘܪ̈ܐ. ܝ̣ܕܝ̣ܥܐ ܡ̣ܢ ܡܠܬܗ ܕܡܪܢ ܕܐܡ̣ܪ. ܕܫܡܥܬܘܢ ܕܐܬܐܡܪ ܠܩܕ̈ܡܝܐ ܕܠܐ ܬܩܛܘܠ ܘܠܐ ܬܓܘܪ. ܐܢܐ ܕܝܢ ܐܡ̇ܪ ܐ̱ܢܐ. ܕܟܠ ܕܢܪܓܙ ܥܠ ܚܒܪܗ ܐܝ̣ܩܝ̣. ܡܚܝܒ ܗ̣ܘ ܠܕܝ̣ܢܐ. ܘܟܠ ܕܢܚܙܐ ܐܢ̱ܬܬܐ ܐܝܟ ܕܢܪܓܝܗ̇ ܡܚܕܐ ܓܪܗ̇ ܒܠܒܗ. ܘܟܠ ܕܢܐܡܪ ܠܐܚܘܗܝ ܪܩܐ ܡܚܝܒ ܗ̣ܘ ܠܟܢܘܫܬܐ. ܘܟܠ ܕܢܐܡܪ ܠܠܐ. ܡܚܝܒ ܗ̣ܘ ܠܓܗܢܐ ܕܢܘܪܐ. ܘܒܗܠܝܢ ܫܘܕܥ ܕܚܛܗ̈ܐ ܕܩܛܠܐ ܘܕܓܘܪܐ. ܘܕܗ̇ܝ ܕܢܐܡܪ ܠܐܚܐ ܠܠܐ. ܝܬܝܪ ܪܘܪ̈ܒܢ ܡ̣ܢ ܚܛܗ̈ܐ ܕܗ̇ܝ ܕܢܪܓܙ ܥܠ ܐܚܐ ܐܝ̣ܩܝ̣. ܘܢܐܪܓ ܒܠܒܐ ܐܢ̱ܬܬܐ. ܘܢܐܡܪ ܠܐܚܐ ܪܩܐ. ܘܕܙܕܝܩ̈ܘܬܐ ܐܝܬ ܬܘܒ ܪܘܪ̈ܒܬܐ ܘܙܕܝܩ̈ܘܬܐ ܙܥܘܪ̈ܝܬܐ. ܝ̣ܕܝ̣ܥܐ ܡ̣ܢ ܗ̇ܝ ܕܐܡ̣ܪ ܡܪܢ ܕܟܠ ܕܢܫܩܐ ܟܣܐ ܕܩܪܝܪ̈ܐ ܠܐ ܢܐܒܕ ܐܓܪܗ. ܘܒܗܕܐ ܪܡ̣ܙ. ܕܐܢܗܘ ܕܐܓܪ ܙܕܝܩܘܬܐ ܗܕܐ ܙܥܘܪܬܐ ܠܐ ܐܒ̇ܕ. ܐܝܟܢܐ ܐܓܪܐ ܕܙܕܝܩܘܬܐ ܕܝܬܝܪ ܪܒܐ ܡ̣ܢ ܗܕܐ ܢܐܒܕ. ܘܡ̣ܢ ܗ̇ܝ ܬܘܒ ܕܐܡ̣ܪ.ܐܢ ܠܐ ܬܬܝܬܪ ܟܐܢܘܬܟܘܢ ܡ̣ܢ ܕܣܦܪ̈ܐ ܘܫܪܟܐ. ܘܕܗܝܡܢܘܬܐ ܬܘܒ ܡܩܒܠܢܝ̣ܬܐ ܗ̱ܝ ܕܝܬܝܪܘܬܐ ܘܒܨܝ̣ܪܘܬܐ. ܝ̣ܕܝ̣ܥܐ ܡ̣ܢ ܗ̇ܝ ܕܐܡ̣ܪ ܡܪܢ ܡܛܠ ܩܢܛܪܘܢܐ ܗ̇ܘ. ܕܐܦܠܐ ܒܟܠܗ ܐܝܣܪܐܝܠ ܐܫܟܚܬ ܐܝܟ ܗܕܐ ܗܝܡܢܘܬܐ. ܘܡ̣ܢ ܗ̇ܝ ܕܐܡ̣ܪ ܐܢ ܬܗܘܐ ܒܟܘܢ ܗܝܡܢܘܬܐ ܐܝܟ ܦܪܕܬܐ ܕܚܪܕܠܐ. ܘܡ̣ܢ ܗ̇ܝ ܬܘܒ ܕܐܡ̣ܪ ܠܫܡܥܘܢ ܙܥܘܪ ܗܝܡܢܘܬܐ ܠܡܢܐ ܐܬܦܠܓܬ.

 

 

 

ܢܝܫܐ ܬܪܝܢܐ ܡܛܠ ܚܛܗ̈ܐ ܪܘܪ̈ܒܐ܆ ܘܗ̇ܢܘܢ ܙܥܘܪ̈ܐ

 

ܚܛܗ̈ܐ ܡ̇ܢ ܪܘܪ̈ܒܐ ܐܝܬܝܗܘܢ܆ ܗ̇ܢܘܢ ܕܡܛܠܬܗܘܢ ܐܡ̣ܪ ܡܪܢ. ܕܡ̣ܢ ܠܒܐ ܢܦܩܝ̣ܢ. ܘܠܒܪܢܫܐ ܡܣܝܒܝ̣ܢ. ܘܛܘܒܢܐ ܦܘܠܘܣ ܐܡ̣ܪ ܕܣܥܘܪ̈ܝܗܘܢ ܡܠܟܘܬܐ ܠܐ ܝ̇ܪܬܝܢ. ܘܐܝܬܝܗܘܢ ܟܦܘܪܝܐ. ܓܘܕܦܐ. ܩܛܠܐ. ܡܚܒܠܘܬܐ. ܡܫܟܒܐ ܕܟܪܝܐ. ܓܘܪܐ. ܙܢܝܘܬܐ. ܕܚܠܬ݀ ܦܬܟܪ̈ܐ. ܚܛܘ̣ܦܝܐ. ܓܢܒܘܬܐ. ܥܠܘ̣ܒܝܐ. ܪܘܝܘܬܐ. ܕܓܠܘܬܐ. ܣܗܕܘܬ ܫܘܩܪܐ. ܥܒܘܪܝܐ ܕܥܠ ܡܘ̈ܡܬܐ. ܚܛܗ̈ܐ ܕܝܢ ܙܥܘܪ̈ܐ ܐܝܬܝܗܘܢ܆ ܗ̇ܢܘܢ ܕܡܛܠܬܗܘܢ ܐܡ̣ܪ ܛܘܒܢܐ ܠܩܘܪ̈ܝܢܬܝܐ. ܕܚ̇ܠ ܐ̱ܢܐ ܓܝܪ ܕܠܡܐ ܐܬܐ ܠܘܬܟܘܢ܆ ܘܠܐ ܐܫܟܚܟܘܢ ܐܝܟ ܕܨܒ̇ܐ ܐ̱ܢܐ. ܘܐܫܬܟܚ ܠܟܘܢ ܐܟܡܐ ܕܠܐ ܨܒܝܢ ܐܢ̱ܬܘܢ. ܘܐܝܬܝܗܘܢ ܚܪܝܢܐ. ܚܣܡܐ. ܚܡܬܐ. ܨܘܚܝ̣ܬܐ. ܥܨܝܢܐ. ܡܐܟܠܩܪܨܐ. ܪܛܢܐ. ܚܬܝ̣ܪܘܬܐ. ܫܓܝ̣ܫܘܬܐ. ܡܐܝ̣ܢܘܬܐ. ܪܚܡܬ݀ ܦܘܪ̈ܓܝܐ. ܦܗܝܐ ܕܥܝ̈ܢܐ. ܓܘܚܟܐ ܒܛܝ̣ܠܐ. ܪܚܡܬ݀ ܝܘܬܪ̈ܢܐ. ܪܚܡܬ݀ ܟܣܦܐ. ܢܘܐܛܝ̈ܢܘ ܕܝܢ ܐܡܪܝܢ ܕܬܪܝܢ ܐܢܘܢ ܒܠܚܘܕ ܚܛܗ̈ܐ ܪܘܪ̈ܒܐ. ܟܦܘܪܝܐ ܡ̇ܢ܆ ܒܗ̇ܝ ܕܐܡ̣ܪ ܡܪܢ ܕܡ̇ܢ ܕܢܟܦܘܪ ܒܝ ܩܕܡ ܒܢܝ̈ܢܫܐ܆ ܢܬܟܦܪ ܒܗ ܩܕܡ ܐܒܐ ܘܡܠܐܟܘ̈ܗܝ. ܘܡ̣ܢ ܟܦܘ̣ܪܝܐ ܬܘܒ ܐܡܪܝܢ ܕܡܬܝܠܕ ܓܘܕܦܐ ܕܥܠ ܪܘܚܐ ܩܕܝܫܐ. ܗ̇ܘ ܕܚܛܗܗ ܚܛܗܐ ܗ̱ܘ ܠܐ ܡܫܬܒܩܢܐ ܠܐ ܒܥܠܡܐ ܗܢܐ ܘܠܐ ܒܥܠܡܐ ܕܥܬܝܕ ܐܝܟ ܕܐܡ̣ܪ ܡܪܢ. ܘܙܢܝܘܬܐ ܬܘܒ܆ ܒܗ̇ܝ ܕܐܡ̣ܪ ܛܘܒܢܐ ܦܘܠܘܣ. ܕܟܠ ܚܛܝ̣ܬܐ ܓܝܪ ܕܢܥܒܕ ܒܪܢܫܐ ܠܒܪ ܡ̣ܢ ܦܓܪܗ ܗ̣ܝ. ܡ̇ܢ ܕܡܙܢܐ ܕܝܢ܆ ܦܓܪܗ ܗ̣ܘ ܚܛܝܐ. ܘܒܕܘܟ ܐ̱ܚܪܝܢ ܐܡ̇ܪ ܕܙܢܝܘܬܐ ܐܦܠܐ ܡܫܬܡܗܘ̣ ܬܫܬܡܗ ܒܝܢܬܟܘܢ. ܘܕܠܘ ܗܠܝܢ ܒܠܚܘܕ ܐܝܬܝܗܘܢ ܚܛܗ̈ܐ ܪܘܪ̈ܒܐ. ܐܠܐ ܘܥܠܘܒܘܬܐ ܚܛܗܐ ܗ̱ܝ ܕܡ̣ܢ ܙܢܝܘܬܐ ܝܬܝܪ ܪܒ. ܩܕܝܫܐ ܓܪܝܓܘܪܝܘܣ ܟܕ ܡܟܣ ܐܡ̇ܪ. ܡܢܐ ܗ̱ܝ ܠܝ ܚܪܡܘܬܗ ܕܢܐܒܐܛܝܣ. ܗ̇ܘ ܕܠܥܠܘܒܘܬܐ ܡ̇ܢ ܕܚܠܬ݀ ܦܬܟܪ̈ܐ ܕܬܪܬܝܢ ܠܐ ܫܢܩ. ܙܢܝܘܬܐ ܕܝܢ ܗܟܢܐ ܡܪܝܪ ܐܝܬ ܚܝܒ܆ ܐܝܟ ܠܐ ܒܣܪܢܐ ܘܠܐ ܦܓܪܢܐ. ܘܡܛܠ ܕܐܦ ܠܙܘܘܓܐ ܬܪܝܢܐ ܡܣܠܐ ܗ̣ܘܐ ܗ̣ܘ ܢܘܐܛܝܣ. ܐܘܣܦ ܐܡ̣ܪ ܠܩܘܒܠܗ ܗ̣ܘ ܩܕܝܫܐ ܡܗܠܢܐܝܬ. ܘܠܐ ܠܐܪ̈ܡܠܬܐ ܕܛܠܝ̈ܢ ܡܙܘܓ ܐܢ̱ܬ. ܡܛܠ ܦܫܝ̣ܩܘܬ ܡܙܕܟܝܢܘܬܗ̇ ܕܩܘܡܬܐ. ܦܘܠܘܣ ܕܝܢ ܗܕܐ ܐܡܪܚ ܕܗ̇ܘ      …. ܝ̣ܕܝ̣ܥܐ ܕܐܝܬܝܟ ܡܠܦܢܐ. ܐܟܡ̇ܢ ܕܠܫܡܝܐ ܕܐܪܒܥܐ ܡܛܝܬ. ܘܠܦܪܕܝܣܐ ܐ̱ܚܪܢܐ. ܘܝܬܝܪ ܠܐ ܡܬܡܠܠܢ̈ܝܬܐ ܫܡܥܬ݀. ܘܚܘܕܪܐ ܕܝܬܝܪ ܪܒ ܒܐܘܢܓܠܝܘܢ ܚܒܫܬ.

 

 

 

ܢܝܫܐ ܬܠܝܬܝܐ ܡܛܠ ܙܕܝܩ̈ܘܬܐ ܪܘܪ̈ܒܬܐ ܘܙܥܘܪ̈ܝܬܐ

 

ܘܙܕܝܩ̈ܘܬܐ ܡ̇ܢ ܪܘܪ̈ܒܬܐ ܐܝܬܝܗܝܢ܆ ܗܠܝܢ ܬܠܬ ܕܡܟܬܪ̈ܢܝܬܐ ܩ̇ܪܐ ܐܢܝܢ ܛܘܒܢܐ ܦܘܠܘܣ. ܘܐܝܬܝܗܝܢ ܗܝܡܢܘܬܐ ܘܣܒܪܐ ܘܚܘܒܐ. ܟܕ ܟܠ ܚܕܐ ܡܢܗܝܢ ܡܫܡܠܝܐܝܬ ܬܗܘܐ. ܘܗܝܡܢܘܬܐ ܡ̇ܢ ܡܫܡܠܝܬܐ ܐܝܬܝܗ̇܆ ܗ̇ܝ ܕܥܡܗ̇ ܕܗ̇ܝ ܕܢܘܕܐ ܐ̱ܢܫ ܒܐܠܗܐ܆ ܢܗܝܡܢ ܬܘܒ ܕܫܪܝܪܝܢ ܡܘܠܟܢܘ̈ܗܝ ܘܓܙܡܘ̈ܗܝ. ܘܡܛܠܗܕܐ ܟܕ ܡ̣ܢ ܚܛܗ̈ܐ ܡ̇ܢ ܡܙܕܗܪ ܕܠܐ ܒܓܗܢܐ ܢܫܬܢܩ. ܛܒ̈ܬܐ ܣ̇ܥܪ ܕܒܡܠܟܘܬܐ ܢܬܒܣܡ. ܘܠܗ̇ ܠܗܝܡܢܘܬܐ ܕܐܝܟ ܗܕܐ܇ ܨܠܘܬܐ ܐܡܝ̣ܢܬܐ ܢܩܦܐ. ܘܬܪܝܨܘܬ ܡܡܠܠܐ. ܘܣܒܪܐ ܡ̇ܢ ܡܫܡܠܝܐ ܐܝܬܘܗܝ܆ ܗ̇ܘ ܕܠܗ ܢܩܦܝ̣ܢ. ܥܡܠܐ. ܛܘܪܦܐ. ܫܬܩܐ. ܨܘܡܐ. ܢܓܝ̣ܪܘܬ ܪܘܚܐ. ܡܣܝܒܪܢܘܬܐ. ܟܡܝ̣ܪܘܬܐ. ܡܣܡܥܠܘܬܐ. ܢܙܝ̣ܪܘܬܐ. ܟܢܝ̣ܫܘܬܐ. ܥܢܘܝܘ̣ܬܐ. ܪ̈ܚܡܐ. ܪܘܚܦܐ. ܘܐܝܟ ܕܒܣܟܐ ܟܠܗܝܢ ܣܥܘܪ̈ܘܬܐ ܗ̇ܢܝܢ ܕܡܣ̇ܒܪ ܒܪܢܫܐ ܕܐܥܝ̣ܦܐܝܬ ܡܥܕ ܠܡܬܦܪܥܘ̣ ܚܠܦܝܗܝܢ ܒܥܠܡܐ ܕܥܬܝܕ. ܚܘܒܐ ܕܝܢ ܡܫܡܠܝܐ. ܗ̇ܘ ܕܚܙܩܐ ܗ̱ܘ ܕܟܠܗ̇ ܓܡܝ̣ܪܘܬܐ ܐܝܬܘܗܝ܆ ܗ̇ܘ ܕܠܗ ܢܩ̈ܦܢ ܪܚܡܬ݀ ܐܠܗܐ. ܪܚܡܬ݀ ܐܚ̈ܐ. ܪܚܡܬ݀ ܐܟܣ̈ܢܝܐ. ܡܟܝ̣ܟܘܬ ܪܥܝܢܐ. ܒܣܝ̣ܡܘܬܐ. ܫܘܥܒܕܐ. ܢܝ̣ܚܘܬܐ. ܫܦܝ̣ܘܬ ܠܒܐ. ܘܟܕ ܟܠܚܕܐ ܡ̣ܢ ܗܠܝܢ ܡܫܡܠܝܬܐ ܬܗܘܐ܆ ܙܕܝܩܘܬܐ ܗ̱ܝ ܪܒܬܐ. ܓܠܝܐ ܕܟܕ ܠܐ ܡܫܡܠܝܬܐ ܬܗܘܐ܆ ܙܕܝܩܘܬܐ ܗ̱ܝ ܙܥܘܪܬܐ. ܐܦ ܓܝܪ ܘܟܠ ܚܕܐ ܡ̣ܢ ܡܝܬܪ̈ܬܐ ܗܠܝܢ ܕܐܬܡܢܝܝ̈ܢ ܟܕ ܒܠܚܘܕܝܗ̇ ܬܗܘܐ ܙܕܝܩܘܬܐ ܗ̱ܝ ܙܥܘܪܬܐ. ܐܦ ܓܝܪ ܘܡܪܝ̣ܡܢܘܬܐ ܕܟܠ ܚܕ ܡ̣ܢ ܚܛܗ̈ܐ ܪܘܪ̈ܒܐ. ܒܙܢܐ ܡ̇ܢ ܙܕܝܩܘܬܐ ܗ̱ܝ ܪܒܬܐ. ܒܙܢܐ ܕܝܢ ܙܕܝܩܘܬܐ ܗ̱ܝ ܙܥܘܪܬܐ. ܕܐܝܟ ܐܝܟܢ. ܗ̇ܘ ܕܟܕ ܡܬܠܙܙ ܡ̣ܢ ܪܓܬܐ ܒܥܝ̣ܪܝܬܐ ܘܚܣܢ ܠܗ̇ ܘܡܚܡܣܢ ܘܠܐ ܡܙܢܐ. ܙܕܝܩܘܬܐ ܗ̱ܝ ܪܒܬܐ ܙܕܝܩܘܬܗ. ܘܗ̇ܘ ܕܐܦܠܐ ܡܬܠܙܙ ܡ̣ܢ ܪܓܬܗ ܐܦܠܐ ܡܙܢܐ. ܓܠܝܐ ܕܙܕܝܩܘܬܐ ܗ̱ܝ ܙܥܘܪܬܐ ܙܕܝܩܘܬܗ. ܘܡܛܠܗܕܐ ܣܓܝ̈ܐܐ ܡ̣ܢ ܝܚܝ̈ܕܝܐ ܐܝܟ ܕܡܠܦܝ̣ܢ ܬܘܢܝܝ̈ܗܘܢ. ܠܘܬ ܐ̱ܢܫܝ̈ܢ ܡ̣ܢ ܒܢܝ̈ ܥܠܡܐ ܡܫܬܕܪܝܢ ܗ̣ܘܘ ܡ̣ܢ ܡܠܐܟ̈ܐ ܕܡܢܗܘܢ ܢܐܠܦܘܢ ܗ̣ܘܘ ܘܢܬܗܕܘܢ ܠܘܬ ܐܘܪܚ ܓܡܝ̣ܪܘܬܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠܗ̇ܝ ܕܬܝܒܘܬܐ ܡܩܒܠܬܐ ܗ̱ܝ ܘܥܛܝܬ݀ ܚܛܗ̈ܐ ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܡܚܘ̈ܝܢܘܬܐ ܚܘܫܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܡܚܘܝܢܘܬܐ ܩܕܡܝܬܐ

 

 

 

ܐܡܪܝܢܢ ܕܚܘܫܒ̈ܐ ܥܡ ܟܬܒ̈ܐ ܟܠܗܘܢ ܣ̇ܗܕܝ̣ܢ. ܕܡܪܚܡܢ ܗ̣ܘ ܘܡܪܚܦܢ ܡܪܝܐ. ܒܕܓܘܢ ܗ̣ܝ ܡܪܚܡܢܘܬܗ ܐܘ ܒܦܚܡܐ ܕܗ̇ܢܘܢ ܕܫܘܝܢ ܕܢܬܒܣܡܘܢ ܗܘܝܐ. ܐܘ ܒܦܚܡܐ ܕܗ̇ܢܘܢ ܕܫܘܝܢ ܕܢܫܬܢܩܘܢ. ܘܗ̇ܘ ܩܕܡܝܐ ܠܐ ܫܪܝܪ. ܒܗ̇ܝ ܕܦܘܪܥܢ ܐܓܪܐ ܠܗ̇ܘ ܕܫ̇ܘܐ. ܠܘ ܡܪܚܡܢܘܬܐ ܕܥܠܘܗܝ ܡܬܩܪܐ. ܐܠܐ ܐܦܠܐ ܬܘܒ ܬܘܣܦܬܐ ܕܦܘܪܥܢ ܐܓܪܗ. ܐܝܟ ܗ̇ܝ ܕܐܡܝ̣ܪܐ. ܕܒܟܝܠܐ ܪܩܝ̣ܥܐ ܘܢܙܝ̣ܠܐ ܢܬܦܪܥܘܢ ܒܥܘܒܝ̈ܗܘܢ. ܒܗ̇ܝ ܕܗ̇ܘ ܕܩܒܠ ܦܘܪܥܢ ܐܓܪܗ ܒܘܣܡܐ. ܐܝܟ ܠܐ ܣܢܝ̣ܩܐ ܡܕܡ ܗ̇ܘ ܠܡܕܡ ܐ̱ܚܪܝܢ. ܒܕܓܘܢ ܬܘܣܦܬܐ ܕܐܓܪܗ ܠܘ ܡܪܚܡܢܘܬܐ ܕܥܠܘܗܝ ܡܬܐܡܪܐ. ܐܠܐ ܛܝܒܘܬܐ ܒܠܚܘܕ. ܫܪܝ̣ܟܐ ܡܕܝܢ ܕܗ̇ܘ ܕܬܪܝܢ ܫܪܝܪ. ܟܐܡܬ݀ ܕܡܪܚܡܢܘܬܐ ܒܦܚܡܐ ܕܚܛܝ̈ܐ ܙܕܩ ܕܬܗܘܐ ܘܬܬܐܡܪ. ܗ̇ܢܘܢ ܕܒܝܕ ܚܛܗܝ̈ܗܘܢ ܫܘܝܢ ܕܢܫܬܢܩܘܢ. ܟܕ ܕܝܢ ܬܝܒܝ̣ܢ܆ ܗ̣ܝ ܬܝܒܘܬܗܘܢ ܥܠܬܐ ܗ̱ܝ ܕܪ̈ܚܡܐ ܢܗܘܘܢ ܥܠܝܗܘܢ. ܘܠܐ ܢܫܬܢܩܘܢ ܗ̇ܘܝܐ ܠܗܘܢ.

 

ܡܚܘܝܢܘܬܐ ܕܬܪܬܝܢ:

 

ܐܡܪܝܢܢ. ܕܟܬܒ̈ܐ ܟܠܗܘܢ ܣܗܕܝܢ. ܕܡܚܣܝܢܐ ܗ̱ܘ ܕܚܘ̈ܒܐ ܘܫܒܘܩܐ ܕܚܛܗ̈ܐ ܐܠܗܐ. ܘܟܕ ܗ̣ܝ ܡܚܣܝܢܘܬܗ ܫܟܝ̣ܪܐ ܒܦܚܡܐ ܕܗ̇ܢܘܢ ܕܠܐ ܐܣܟܠܘ ܬܗܘܐ. ܫܪܝ̣ܟܐ ܕܒܦܚܡܐ ܕܡܣܟ̈ܠܢܐ ܬܗܘܐ. ܟܕ ܢܬܘܒܘܢ ܡ̣ܢ ܣܟܠܘ̈ܬܗܘܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܕܘܝܕ. ܗ̣ܢܘܢ ܡܪܡܪܘܗܝ ܒܬܪ̈ܥܝܬܗܘܢ. ܘܐܬܡܟܟܘ ܒܥܘܠܗܘܢ. ܘܚ̣ܙܐ ܒܐܘܠܨܢܝ̈ܗܘܢ. ܘܫܡܥ ܒܥܘܬܗܘܢ. ܐܬܕܟܪ ܩܝܡܗ ܘܪܚܡ ܥܠܝܗܘܢ.

 

ܣܗܕܘܬܐ ܕܬܪܬܝܢ:

 

ܒܪ ܐܣܝܪܐ. ܫܒܘܩ ܡܐ ܕܒܠܒܟ. ܘܒܬܪܟܢ ܨܠܐ. ܘܟܠ ܚܛܗܝ̈ܟ ܢܫܬܒܩܘܢ ܠܟ.

 

ܣܗܕܘܬܐ ܕܬܠܬ:

 

ܗ̣ܘ ܟܕ ܗ̣ܘ. ܡܐ ܣܓܝܐܝܢ ܪ̈ܚܡܘܗܝ ܕܐܠܗܐ. ܕܫܒܩ ܠܐܝܠܝܢ ܕܬܝܒܝܢ ܠܘܬܗ.

 

ܣܗܕܘܬܐ ܕܐܪܒܥ:

 

ܐܫܥܝܐ. ܢܫܒܘܩ ܚܛܝܐ ܐܘܪܚܗ. ܘܓܒܪܐ ܥܘܠܐ ܬܪܥܝ̣ܬܗ. ܘܢܬܦܢܐ ܠܘܬܝ܆ ܘܐܪܚܡ ܥܠܘܗܝ.

 

ܣܗܕܘܬܐ ܕܚܡܫ:

 

ܚܙܩܝܐܝܠ. ܒܝ ܝ̣ܡܝ̣ܬ ܐܡ̇ܪ ܡܪܐ ܡܪ̈ܘܬܐ. ܕܠܐ ܨܒ̇ܐ ܐ̱ܢܐ ܒܡܘܬܗ ܕܡܝ̣ܬܐ ܚܛܝܐ. ܐܠܐ ܕܢܬܘܒ ܘܢܚܐ.

 

ܣܗܕܘܬܐ ܕܫܬ:

 

ܝܘܢܢ. ܘܚ̣ܙܐ ܐܠܗܐ ܥܒܕܝ̈ܗܘܢ. ܕܬܒܘ ܡ̣ܢ ܐܘܪ̈ܚܬܗܘܢ ܒܝ̈ܫܬܐ. ܘܐܗܦܟ ܡܢܗܘܢ ܚܡܬܐ ܕܪܘܓܙܗ.

 

ܣܗܕܘܬܐ ܕܫܒܥ:

 

ܐܘܢܓܠܝܘܢ. ܫܐܠܘ ܘܢܬܝܗܒ ܠܟܘܢ. ܒܥܘ ܘܬܫܟܚܘܢ. ܩܘ̣ܫܘ ܘܢܬܦܬܚ ܠܟܘܢ. ܟܠ ܓܝܪ ܕܫ̇ܐܠ ܢܣܒ ܘܕܒ̇ܥܐ ܡܫܟܚ. ܘܠܐܝܢܐ ܕܢܩܫ ܡܬܦܬܚ ܠܗ. ܘܬܘܒ ܕܠܐ ܐܬܝ̇ܬ ܕܐܩܪܐ ܠܙܕܝ̈ܩܐ. ܐܠܐ ܠܚܛܝ̈ܐ. ܘܠܐ ܣܢܝ̣ܩܝ̣ܢ ܚܠܝ̣̈ܡܐ ܥܠ ܐܣܝܐ. ܐܠܐ ܗ̇ܢܘܢ ܕܒܝܫ ܒܝܫ ܥܒܝ̣ܕܝ̣ܢ. ܘܬܘܒ. ܗܟܢܐ ܗ̇ܘܝܐ ܚܕܘܬܐ ܥܠ ܚܕ ܚܛܝܐ ܕܬܐܒ. ܘܬܘܒ. ܕܠܡܐ ܢܬܦܢܘܢ ܘܢܫܬܒܩܘܢ ܠܗܘܢ ܚܛܗܝ̈ܗܘܢ. ܘܬܘܒ. ܘܫܒܘܩ ܠܢ ܚܘ̈ܒܝܢ ܘܚܛܗܝ̈ܢ. ܐܝܟܢܐ ܕܐܦ ܚܢܢ ܫܒܩܢ ܠܚܝܒܝ̈ܢ. ܘܬܘܒ. ܐܢ ܬܫܒܩܘܢ ܠܐܢܫ ܚܛܗ̈ܐ ܢܫܬܒܩܘܢ ܠܗ. ܘܐܢ ܬܐܚܕܘܢ ܕܐ̱ܢܫ ܐܚܝ̣ܕܝ̣ܢ.

 

ܣܗܕܘܬܐ ܕܬܡܢܐ:

 

ܦܘܠܘܣ. ܒܕܩܘܪ̈ܝܢܬܝܐ ܕܬܪܬܝܢ. ܐܢ ܐ̱ܢܫ ܕܝܢ ܠܝ ܐܟܪܝ̣܆ ܠܐ ܗ̣ܘܐ ܠܝ ܐܟܪܝ̣. ܐܠܐ ܒܨܝ̣ܪ ܩܠܝܠ ܠܟܠܟܘܢ. ܕܠܐ ܬܐܩܪ ܡܠܬܐ ܥܠܝܟܘܢ. ܟܕܘ ܠܗܢܐ ܟܐܬܐ ܕܡ̣ܢ ܣܓܝ̈ܐܐ. ܘܡܟܝܠ ܐ̱ܚܪܢܝܐܝܬ ܘܠܐ ܕܬܫܒܩܘܢ ܠܗ. ܘܬܒܝܐܘܢܝܗܝ. ܕܠܡܐ ܒܟܪܝܘܬܐ ܝܬܝܪܬܐ ܢܬܒܠܥ ܠܗ. ܗ̇ܘ ܡ̇ܢ ܕܗܟܢܐ ܗ̱ܘ. ܡܛܠ ܗܢܐ ܒ̇ܥܐ ܐ̱ܢܐ ܡܢܟܘܢ. ܕܬܫܪܪܘܢ ܒܗ ܚܘܒܟܘܢ. ܘܠܗ̇ ܠܗܕܐ ܬܚܘܝ̣ܬܐ ܐܝܬܝ̣ ܩܕܝܫܐ ܓܪܝܓܘܪܝܘܣ ܒܐܪܘܥܘܬܐ ܕܠܘܩܒܠ ܢܒܐܛܝܣ ܟܕ ܐܡܪ. ܘܠܐ ܠܗܘ ܕܒܩܘܪܝܢܬܘܣ ܥܒܪ ܥܠ ܢܡܘܣܐ܆ ܦܘܠܘܣ ܕܝܢ ܘܚܘܒܐ ܚܘܝ̣ ܡܛܠ ܕܚ̣ܙܐ ܬܘܪܨܐ. ܘܥܠܬܐ ܕܠܐ ܢܬܒܠܥ ܡ̣ܢ ܥܩܬܐ ܗ̇ܘ ܕܐܝܟ ܗܢܐ ܟܕ ܐܬܥܝܛ ܒܠܐ ܡܡܫܚܘܬܐ ܕܟܘܘܢܐ.

 

ܣܗܕܘܬܐ ܕܬܫܥ:

 

ܝܥܩܘܒ ܫܠܝܚܐ. ܕܟܘ ܐܝܕܝ̈ܟܘܢ ܚܛܝ̈ܐ. ܩܕܫܘ ܠܒܘ̈ܬܟܘܢ ܦܠܝ̣̈ܓܝ ܢܦܫܐ. ܐܬܡܟܟܘ ܩܕܡ ܡܪܝܐ ܘܢܪܡܪܡܟܘܢ.

 

ܣܗܕܘܬܐ ܕܥܣܪ:

 

ܓܪܝܓܘܪܝܘܣ ܬܐܘܠܘܓܘܣ. ܠܗ̇ܢܘܢ ܕܪܒܐ ܗ̱ܝ. ܕܐܦܢ ܗ̇ܝ ܩܕܡܝܬܐ ܕܡܠܬܐ ܠܐ ܡܫܘܙܒܝ̣ܢ. ܗ̇ܝ ܕܡܕܡ ܠܐ ܢܚܛܘܢ. ܐܠܐ ܟܝܬ ܗ̇ܝ ܕܬܪܬܝܢ ܠܡܩܢܐ. ܕܟܕ ܚܛܝܢ ܢܬܦܢܘܢ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܬܪܥܝ̣ܬܐ ܣܩܘܒܠܝܬܐ ܕܢܐܘܛܝ̈ܢܘ ܗ̇ܢܘܢ ܕܠܐ ܡܩܒܠܝܢ ܬܝܒܘܬܐ ܒܬܪ ܥܡܕܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ ܚܘܫܒܝ̈ܐ. ܣܥܝܐ ܩܕܡܝܐ

 

ܐܡܪܝܢ ܕܗ̇ܝ ܕܢܩܒܠ ܬܝܒܘܬܐ ܟܠ ܐܡܬܝ ܕܗܘܝܐ. ܥܠܬܐ ܗܘܝܐ ܕܗ̇ܝ ܕܥܠ ܚܛܗ̈ܐ ܣܓܝ̈ܐܐ ܢܬܠܒܒܘܢ ܒܢܝ̈ܢܫܐ ܠܡܣܥܪ. ܒܗ̇ܝ ܕܐܡܪܝܢ ܕܢܚܛܐ ܘܢܫܡܠܐ ܪܓܬܢ ܘܒܬܪܟܢ ܢܬܘܒ. ܘܬܘܒ ܢܚܛܐ ܬܘܒ ܢܬܘܒ. ܘܗܟܢܐ ܐܦܠܐ ܡ̣ܢ ܚܛܗ̈ܐ ܪܘܪ̈ܒܐ ܡܬܘܡ ܡܬܚܣܟܝ̣ܢ. ܘܟܕ ܡܩܒܠܢܘܬ ܬܝܒܘܬܐ܆ ܐܬܪܐ ܝ̇ܗܒܐ ܠܫܘܪܬܚ ܫܘܪ̈ܥܬܐ. ܠܐ ܡܩܒܠܢܘܬܗ̇ ܡ̣ܢ ܫܘܪ̈ܥܬܐ. ܠܐ ܡܩܒܠܢܘܬܗ̇ ܡ̣ܢ ܫܘܪ̈ܥܬܐ ܣܓܝ̈ܐܬܐ ܟܠܝܐ. ܘܡܛܠ ܗܕܐ ܠܐ ܡܩܒܠܢܘܬ ܬܝܒܘܬܐ ܝܬܝܪ ܦܩܚܐ ܘܠܘܬ ܐܠܗܐ ܡܩܪܒܐ. ܛܒ ܡ̣ܢ ܗ̇ܝ ܕܢܩܒܠܝܗ̇.

 

ܣܥܝܐ ܬܪܝܢܐ:

 

ܐܡܪܝܢ ܕܝܬܝܪ ܡ̣ܢ ܟܠܗܝܢ ܥ̈ܠܬܐ ܡܕܟܝܢ̈ܝܬܐ ܕܡ̣ܢ ܟܘܬܡ̈ܬ݀ ܚܛܗ̈ܐ܆ ܡܥܡܘܕܝܬܐ ܐܝܬܝܗ̇. ܘܟܕ ܡܥܡܘܕܝܬܐ ܝܬܝܪ ܡ̣ܢ ܚܕܐ ܠܐ ܐܝܬ ܠܢ. ܒܡܢܐ ܐܪܐ ܢܬܕܟܘܢ ܗ̇ܢܘܢ ܕܡ̣ܢ ܒܬܪ ܡܥܡܘܕܝܬܐ ܒܚܛܗ̈ܐ ܡܬܟܬܡܝ̣ܢ.

 

ܣܥܝܐ ܬܠܝܬܝܐ:

 

ܐܡܪܝܢ ܐܠܘ ܬܝܒܘܬܐ ܥܛܘܝܬܐ ܗܘܬ݀ ܕܚܛܗ̈ܐ. ܡܬܕܓܠܘ̣ ܡܬܕܓ̈ܠܢ ܗܘܝ̈ ܡ̈ܠܐ ܟܠܗܝܢ ܕܟܬܒ̈ܐ ܩܕܡܝ̈ܐ. ܗ̇ܢܝܢ ܕܠܦܘ̣ܬ ܥܒ̇ܕ̈ܐ ܡܟܪܙܝ̣ܢܢ ܦܘܪ̈ܥܢܐ. ܒܗ̇ܝ ܕܗ̇ܘ ܕܒܟܠܗܘܢ ܝܘ̈ܡܬܗ܆ ܟܦܘܪܝܐ ܘܥܒܕ ܒܝ̈ܫܬܐ ܗ̣ܘܐ. ܐܝܛܐ ܒܫܘܠܡ ܚܝܘ̈ܗܝ ܬܒ. ܐܠܘܠܐ ܡܫܬܢܩ. ܐܝܟܢܐ ܬܫܪ ܗ̇ܝ ܕܒܟܝܠܬܐ ܕܡܟܝ̣ܠܝܢ ܐܢ̱ܬܘܢ ܢܬܬܟܝ̣ܠ ܠܟܘܢ ܘܚܒܪ̈ܬܗ̇. ܘܟܕ ܡܩܒܠܢܘܬ ܬܝܒܘܬܐ ܠܘܬ ܡܬܕܓܠܢܘܬܐ ܕܟܬܒ̈ܐ ܩܕܝ̈ܫܐ ܡܘܒܠܐ. ܫܟܝܪܐ ܘܠܐ ܫܪܝܪܐ.

 

ܣܥܝܐ ܪܒܝܥܝܐ:

 

ܐܡܪܝܢ ܐܠܘ ܬܝܒܘܬܐ ܡܩܒܠܬܐ ܗܘܬ݀. ܡܫܬܟܚܝ̣ܢ ܗ̣ܘܘ ܙܢܝ̈ܐ ܘܐܣܘ̈ܛܐ ܕܬܒܘ ܕܝܬܝܪ ܛܘ̣ܒ̈ܬܢܝܢ ܗ̣ܘܘ ܡ̣ܢ ܢܟ̈ܦܐ ܘܥܢ̈ܘܝܐ. ܒܗ̇ܝ ܕܗ̇ܢܘܢ ܡ̇ܢ ܒܬܪ̈ܝܗܘܢ ܥܠܡ̈ܐ ܡܩܕܡܝ̣ܢ ܢܝܚ̈ܐ. ܗܠܝܢ ܕܝܢ ܠܘ ܒܬܪ̈ܝܗܘܢ. ܐܠܐ ܒܗܘ ܕܥܬܝܕ ܒܠܚܘܕ. ܘܐܫܬܘܦ ܕܝܢ ܒܥܠܡܐ ܗܢܐ ܠܐ ܡܬܬܢܝ̣ܚܝܢ ܗ̣ܘܘ ܐܦܠܐ ܡܬܬܢܚܝ̣ܢ. ܐܠܐ ܓܠܝܐ ܕܬܢ̈ܚܬܐ ܘܕܘܘ̈ܢܐ ܣܓܝ̈ܐܐ ܣ̇ܒܠܝ̣ܢ. ܘܚܛܝ̈ܐ ܡܬܦܪܦܥܝ̣ܢ ܘܡܬܦܢܩܝ̣ܢ ܘܡܬܓܐܝܢ.

 

 

 

ܢܝܫܐ ܬܪܝܢܐ ܡܛܠ ܣܗܕ̈ܘܬܗܘܢ ܟܬܒܝ̈ܬܐ. ܣܗܕܘܬܐ ܩܕܡܝܬܐ

 

ܕܘܝܕ. ܐܣܓܐ ܐܫܝ̣ܓܝܢܝ ܡ̣ܢ ܥܘܠܝ. ܘܡ̣ܢ ܚܛܗ̈ܝ ܕܟܢܝ. ܘܪܘܣ ܥܠܝ ܒܙܘܦܐ ܘܐܬܕܟܐ. ܘܚܠܠܝܢܝ ܒܗ ܘܡ̣ܢ ܬܠܓܐ ܐܚܘܪ. ܒܕܓܘܢ ܐܡܪܝܢܢ ܕܟܕ ܡܫܝܓܢܐ ܡܚܘܪܢܐ. ܘܪܣܣܐ ܡܚܠܠܢܐ ܡܥܡܘܕܝܬܐ ܐܝܬܘܗܝ ܠܢ. ܘܗ̣ܝ ܗܕܐ ܚܕܐ ܗ̱ܝ. ܒܡܢ ܐܪܐ ܢܚܘܪ ܘܢܚܠܠ ܟܘܬܡ̈ܬܗ. ܗ̇ܘ ܕܚܕܐ ܙܒܢ ܩܒܠܗ̇ ܒܡܥܡܘܕܝܬܐ ܡ̣ܢ ܟܕܘ ܘܠܐ ܬܘܒ ܡܨܐ ܠܡܩܒܠܘܬܗ̇.

 

ܣܗܕܘܬܐ ܕܬܪܬܝܢ:

 

ܐܫܥܝܐ. ܣܚܘ ܘܐܬܕܟܘ. ܘܐܥܒܪܘ ܒܝ̈ܫܬܐ ܕܥܒܕܝ̈ܟܘܢ ܡ̣ܢ ܩܕܡ ܥܝܢܝ̈. ܘܐܢ ܢܗܘܘܢ ܚܛܗܝ̈ܟܘܢ ܐܝܟ ܙܚܘܪܝ̣ܬܐ ܐܝܟ ܬܠܓܐ ܢܬܚܘܪܘܢ. ܒܕܓܘܢ ܐܡܪܝܢ ܕܣܚܬܐ ܡܕܥܟܢܝ̣ܬܐ ܕܝܠܢ ܟܪ̈ܝܣܛܝܢܐ ܗ̣ܝ ܡܥܡܘܕܝܬܐ ܗ̱ܝ. ܘܗ̣ܝ ܗܕܐ ܚܕܐ ܗ̱ܝ. ܘܒܕܣܛܪ ܡܢܗ̇ ܠܐ ܐ̱ܢܫ ܡܨܐ ܠܡܬܕܟܝܘ̣.

 

ܣܗܕܘܬܐ ܕܬܠܬ:

 

ܐܘܢܓܠܝܘܢ. ܟܠ ܕܡܓܕܦ ܥܠ ܪܘܚܐ ܩܕܝܫܐ. ܠܐ ܢܫܬܒܩ ܠܗ. ܠܐ ܒܥܠܡܐ ܗܢܐ܆ ܐܦܠܐ ܒܥܠܡܐ ܕܥܬܝܕ. ܒܕܓܘܢ ܐܡܪܝܢ ܕܗ̣ܘ ܡܪܢ ܩܪܝ̣ܚܐܝܬ ܡܚܘܐ ܕܐܝܬ ܚܛܗܐ ܕܟܠܢܐܝܬ ܠܐ ܡܬܚܣܝܢܐ ܗ̱ܘ. ܘܐܝܟܢܐ ܐܢ̱ܬܘܢ ܠܟܠܗܘܢ ܚܛܗ̈ܐ ܕܒܟܠ ܙܒܢܐ ܘܙܢܐ ܡܣܬܥܪܝܢ ܡܚܣܝܢ ܐܢ̱ܬܘܢ.

 

ܣܗܕܘܬܐ ܕܐܪܒܥ:

 

ܝܘܚܢܢ ܫܠܝܚܐ ܒܩܬܘܠܝܩܝ ܕܝܠܗ. ܐܢ ܐ̱ܢܫ ܚܙܐ ܠܐܚܘܗܝ ܕܚ̇ܛܐ ܚܛܗܐ. ܢܫܐܠ ܘܡܬܝܗܒܝ̣ܢ ܠܗ ܚܝ̈ܐ. ܠܐܝܠܝܢ ܕܠܐ ܗ̣ܘܐ ܐܝܟ ܕܠܡܘܬܐ ܚܛܝܢ. ܐܝܬ ܓܝܪ ܚܛܗܐ ܕܡܘܬܐ ܠܐ ܗ̣ܘܐ ܥܠ ܗܢܐ ܐܡ̇ܪ ܐ̱ܢܐ ܕܢܒܥܐ ܐ̱ܢܫ. ܒܕܓܘܢ ܐܡܪܝܢ ܕܐܦ ܗ̣ܘ ܗܢܐ ܫܠܝܚܐ ܬܐܘܠܘܓܘܣ. ܥܠ ܚܛܗ̈ܐ ܠܐ ܡܫܬܒ̈ܩܢܐ ܡܥܝ̣ܪ ܠܢ ܘܡܠܦ.

 

ܣܗܕܘܬܐ ܕܚܡܫ:

 

ܦܛܪܘܣ ܫܠܝܚܐ ܒܩܬܘܠܝܩܝ ܕܝܠܗ. ܘܠܐ ܬܫܬܘܬܦܘܢ ܠܪ̈ܓܝܓܬܐ ܩܕܡܝ̈ܬܐ. ܐܝܠܝܢ ܕܪܐܓܝ̣ܢ ܗܘܝܬܘܢ ܕܠܐ ܒܝ̣ܕܥܬܐ. ܒܕܓܘܢ ܐܡܪܝܢ ܕܐܝܠܝܢ ܐܢܝܢ ܪ̈ܓܝܓܬܐ ܩܕܡܝ̈ܬܐ. ܐܠܐ ܗ̇ܢܝܢ ܕܡ̣ܢ ܩܕܡ ܕܢܗܝܡܢܘܢ ܘܢܥܡܕܘܢ ܡܫܬܘܬܦܝ̣ܢ ܗ̣ܘܘ ܒܗܝܢ.

 

ܣܗܕܘܬܐ ܕܫܬ:

 

ܦܘܠܘܣ. ܐܠܐ ܠܐ ܡܫܟܚܝ̣ܢ ܗ̇ܢܘܢ ܕܚܕܐ ܙܒܢ ܠܡܥܡܘܕܝܬܐ ܢܚܬܘ. ܘܛܥܡܘ ܡܘܗ̈ܒܬܐ ܕܡ̣ܢ ܫܡܝܐ. ܘܢܣܒܘ ܪܘܚܐ ܕܩܘܕܫܐ. ܘܛܥܡܘ ܡܠܬܐ ܕܐܠܗܐ. ܘܚܝܠܐ ܕܥܠܡܐ ܕܥܬܝܕ. ܕܬܘܒ ܢܚܛܘܢ. ܕܡ̣ܢ ܕܪܝܫ ܢܬܚܕܬܘܢ ܠܬܝܒܘܬܐ. ܒܕܓܘܢ ܐܡܪܝܢܢ. ܕܗ̣ܝ ܗܕܐ ܡܠܬܐ ܕܢܝ̣ܚܐܝܬ ܠܬܪܥܝܬܢ ܡܫܪܪܐ. ܘܟܕ ܠܗ ܠܝܘܠܦܢܐ ܗܢܐ ܦܘܠܝܐ ܡܟܪܙܝ̣ܢܢ ܘܐܡܪܝܢܢ. ܕܐܦܢ ܡܩܒܠܐ ܬܝܒܘܬܐ. ܐܠܐ ܠܘ ܒܬܪ ܡܥܡܘܕܝܬܐ. ܐܝܟܢܐ ܦܐܐ ܗܘ̣ܐ ܠܓܪܝܓܘܪܝܘܣ ܕܢܐܙܝ̣ܢܙܘ̣ ܟܕ ܫܡܥܗ̇ ܗ̣ܘܐ ܠܗܕܐ ܣܗܕܘܬܐ. ܕܢܐܡܪ ܗ̣ܘܐ ܐܝܟ ܗ̇ܘ ܕܠܢܐܒܛܝܣ. ܕܐܝܕܐ ܗ̱ܝ ܬܚܘܝ̣ܬܐ. ܐܘ ܚܘܐ܇ ܐܘ ܠܐ ܬܚܝܒ. ܐܢܕܝܢ ܡܬܦܫܟܐ ܬܙܟܐ ܪܚܡܬ݀ ܐ̱ܢܫܘܬܐ.

 

ܣܗܕܘܬܐ ܕܫܒܥ:

 

ܗ̣ܘ ܟܕ ܗ̣ܘ. ܠܐ ܬܛܥܘܢ. ܠܐ ܙܢܝ̈ܐ ܘܠܐ ܦܠܚܝ̈ ܦܬܟܪ̈ܐ. ܘܠܐ ܓܝܪ̈ܐ ܘܠܐ ܡܚܒ̈ܠܐ. ܘܠܐ ܫܟ̈ܒܝ ܥܡ ܕܟܪ̈ܐ. ܘܠܐ ܥܠܘ̈ܒܐ. ܘܠܐ ܓܢ̈ܒܐ. ܘܠܐ ܪ̈ܘܝܐ. ܘܠܐ ܡܨܥܪ̈ܢܐ. ܘܠܐ ܚܛܘ̈ܦܐ. ܗܠܝܢ ܡܠܟܘܬܐ ܕܐܠܗܐ ܠܐ ܝ̇ܪܬܝܢ. ܘܗܠܝܢ ܐܝܬ ܗܘܝ̈ ܒܐܢܫ ܐ̱ܢܫ ܡܢܟܘܢ. ܐܠܐ ܣܚܝܬܘܢ ܘܐܬܩܕܫܬܘܢ ܘܐܙܕܕܩܬܘܢ.

 

 

 

 

 

 

 

 

 

     #1 

 

ܦܣܘܩܐ ܪܒܝܥܝܐ ܕܩܦܠܐܘܢ ܚܡܝܫܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܣܬܘܪܝܗ̇ ܕܬܪܥܝ̣ܬܐ ܗܕܐ ܕܐܬܩܕܡܬ݀. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܫܪ̈ܝܐ ܕܣܥܝܝ̈ܗܘܢ. ܫܪܝܐ ܩܕܡܝܐ

 

ܐܡܪܝܢܢ ܕܬܝܒܘܬܐ ܥܛܝܬ݀ ܚܛܗ̈ܐ܆ ܠܘ ܗ̇ܝ ܕܚܘܝܬܘܢ. ܐܠܐ ܗ̇ܝ ܕܒܦܚܡܐ ܕܬܠܝ̣ܬܝܘܬ ܡܢܘ̈ܬܐ ܕܙܒܢܐ ܗ̇ܘܝܐ. ܟܐܡܬ݀ ܬܘܬܐ ܕܥܠ ܚܛܗ̈ܐ ܕܙܒܢܐ ܕܥܒܪ. ܘܟܦܘ̣ܪܝܐ ܕܒܚܛܗ̈ܐ ܒܙܒܢܐ ܕܩ̇ܐܡ. ܘܫܘܘܕܝܐ ܫܪܝܪܐ ܕܪܥܝܢܐ. ܕܠܐ ܬܘܒ ܢܣܥܘܪ ܐܢܘܢ ܠܚܛܗ̈ܐ ܒܙܒܢܐ ܕܥܬܝܕ. ܘܓܠܝܐ ܕܦܪܝ̣ܫܐ ܗܕܐ ܬܝܒܘܬܐ ܡ̣ܢ ܗ̇ܝ ܕܐܡ̣ܪܬܘܢ. ܘܕܠܐ ܡܩܒܠܢܘܬ ܬܝܒܘܬܐ ܝܬܝܪ ܡܪܚܩܐ ܡ̣ܢ ܐܠܗܐ. ܝ̣ܕܝ̣ܥܐ ܡ̣ܢ ܗ̇ܝ ܕܣܝܡܐ ܢܡܘܣܐ ܠܥܠ ܡ̣ܢ ܒܢܝ̈ܢܫܐ. ܘܫܪܝܐ ܒܦܣܩ ܣܒܪܐ ܠܬܘܪܨܐ.

 

ܫܪܝܐ ܕܣܥܝܐ ܬܪܝܢܐ:

 

ܐܡܪܝܢܢ ܐܠܘ ܒܝܕ ܡܥܡܘܕܝܬܐ ܒܠܚܘܕ ܗ̇ܘܐ ܗ̣ܘܐ ܕܘܟܝܐ ܕܡ̣ܢ ܚܛܗ̈ܐ ܟܒܪ ܫܪܝܪ ܗ̣ܘܐ ܣܥܝܟܘܢ. ܐܠܐ ܐܦ ܒܝܕ ܕܡܥ̈ܐ. ܒܓܘܪ̈ܓܚܐ. ܒܬܢ̈ܚܬܐ. ܒܚܢ̈ܓܬܐ. ܒܨܘ̈ܡܐ. ܒܨܠܘ̈ܬܐ. ܘܗ̇ܝ ܕܝܬܝܪ ܡ̣ܢ ܟܠܗܝܢ ܪܒܐ. ܒܕܡ̈ܐ ܣܗ̈ܕܝܐ ܡܟܢܝ̣ܢ ܠܡܬܡܪܩܘ̣ ܚܛܗ̈ܐ. ܘܟܕ ܠܗ̇ ܠܬܪܥܝ̣ܬܐ ܕܐܝܟ ܗܕܐ ܬܟܣ ܩܕܝܫܐ ܓܪܝܓܘܪܝܘܣ ܐܡ̇ܪ. ܘܠܐ ܠܕܘܝܕ ܡܩܒܠ ܐܢ̱ܬ ܕܬܐܒ. ܠܗ̇ܘ ܕܐܦ ܫܘܟܢܐ ܢܒܝܐ ܢܛܪܬ݀ ܬܝܒܘܬܐ ܘܠܐ ܠܦܛܪܘܣ ܗ̇ܘ ܪܒܐ. ܕܚܫ ܡܕܡ ܐ̱ܢܫܝܐ ܠܘܬ ܚܫܐ ܦܪܘܩܝܐ. ܝܫܘܥ ܕܝܢ ܩܒܠܗ. ܘܒܫܘܐܠܐ ܬܠܝܬܝܐ ܘܡܘܕܝܢܘܬܐ. ܐܣܝ ܟܦܘܪܝ̣ܐ ܬܠܝܬܝܐ. ܐܘ ܐܦܠܐ ܟܕ ܐܫܬܡܠܝ̣ ܒܝܕ ܕܡܐ ܡܩܒܠ ܐܢ̱ܬ ܠܗ. ܐܝܬܝܗ̇ ܓܝܪ ܐܦ ܗܕܐ ܕܡܫܩܠܘܬܐ ܕܝܠܟ.

 

ܫܪܝܐ ܕܣܥܝܐ ܬܠܝܬܝܐ:

 

ܐܡܪܝܢܢ ܕܐܦܢ ܠܦܘܬ ܥܒܕ̈ܐ ܣܩܡܘ ܦܘܪ̈ܥܢܐ ܟܬܒ̈ܐ ܩܕܝ̈ܫܐ. ܐܠܐ ܘܠܘܬ ܬܝܒܘܬܐ ܒܩ̈ܠܐ ܣܓܝ̈ܐܐ ܠܣܓܝ̈ܐܐ ܩܪܘ. ܘܫܘܒܩܢܐ ܡܠܟܘ. ܘܠܐ ܪܚܝ̣ܩܐ ܐܢ ܡܛܠ ܗ̇ܢܘܢ ܕܒܚܛܗܝ̈ܗܘܢ ܡܝܬܝ̣ܢ ܘܠܐ ܬܝܒܝܢ. ܐܡ̣ܪܘ ܟܬܒ̈ܐ ܕܠܦܘܬ ܥܒܕܝ̈ܗܘܢ ܒܝ̈ܫܐ ܡܬܦܪܥܝ̣ܢ ܘܠܘ ܡܛܠ ܗ̇ܢܘܢ ܕܬܝܒܝܢ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܥܠ ܚܠܐ ܗ̱ܘ ܒܢܐ ܣܥܝܐ ܗܢܐ. ܒܗ̇ܝ ܕܠܢܝܚ̈ܐ ܛܠܢܝ̈ܐ ܟܝܬ ܘܗܒܠܢܝ̈ܐ ܕܥܠܡܐ ܗܢܐ ܛܘܒܬܢܘܬܐ ܩܪܐ. ܘܒܗ̇ܝ ܬܘܒ ܕܚܕ ܦܘܪܥܢܐ ܫܘܝܐ ܐܡ̣ܪ ܠܙܕܝ̈ܩܐ ܕܠܐ ܣܟ ܚܛܘ ܘܠܬܝ̈ܒܐ. ܘܓܠܝܐ ܕܬܪ̈ܬܝܗܝܢ ܠܐ ܫܪܝܪ̈ܢ.

 

 

 

ܢܝܫܐ ܬܪܝܢܐ ܡܛܠ ܦܘܢܝ̈ܐ ܕܣܗܕ̈ܘܬܗܘܢ ܟܬܒܝ̈ܬܐ. ܦܘܢܝܐ ܕܣܗܕܘܬܐ ܩܕܡܝܬܐ ܘܬܪܝܢܝܬܐ

 

ܐܡܪܝܢܢ ܕܩܕܡܢܢ ܚܘܝ̣ܢܢ ܕܠܘ ܒܡܥܡܘܕܝܬܐ ܒܠܚܘܕ ܡܬܡܪ̈ܩܢ ܟܘܬܡ̈ܬܐ.

 

ܦܘܢܝܐ ܕܣܗܕܘܬܐ ܬܠܝܬܝܬܐ:

 

ܐܡܪܝܢܢ ܕܐܦܢ ܐܡܝ̣ܪܐ. ܕܓܘܕܦܐ ܕܥܠ ܪܘܚܐ ܩܕܝܫܐ ܠܐ ܡܫܬܒܩܢܐ ܗ̱ܘ. ܐܠܐ ܠܐ ܐܡܝ̣ܪܐ. ܕܐܦܠܐ ܒܬܪ ܬܝܒܘܬܐ.

 

ܦܘܢܝܐ ܕܣܗܕܘܬܐ ܪܒܝܥܝܬܐ:

 

ܐܡܪܝܢܢ ܕܚܛܗܐ ܕܡܘܬܐ ܗ̇ܘ ܕܒܗ ܡܐܬ ܒܪܢܫܐ ܒܠܥܕ ܬܝܒܘܬܐ. ܘܚܢܢ ܥܡ ܬܝܒܘܬܐ ܡܘܕܝܢܢ ܫܘܒܩܢܐ ܕܚܛܗ̈ܐ ܘܠܘ ܒܠܥܕܝܗ̇.

 

ܦܘܢܝܐ ܕܣܗܕܘܬܐ ܕܚܡܫ:

 

ܐܡܪܝܢܢ ܕܗܕܐ ܣܗܕܘܬܐ ܙܘܗܪܐ ܕܡ̣ܢ ܪ̈ܓܝܓܬܐ ܩܕܡܝ̈ܬܐ ܡܫܘܕܥܐ. ܘܠܘ ܠܐ ܫܘܒܩܢܐ.

 

ܦܘܢܝܐ ܕܣܗܕܘܬܐ ܕܫܬ:

 

ܐܡܪܝܢܢ ܕܗܕܐ ܣܗܕܘܬܐ ܠܗ̇ܝ ܕܥܛܠܐܝܬ ܘܠܘ ܕܠܝ̣ܠܐܝܬ ܚܛܝܢ ܡܗܝ̈ܡܢܐ ܒܬܪ ܥܡܕܐ ܡܫܘܕܥܐ. ܘܠܘ ܠܗ̇ܝ ܕܟܕ ܚܛܝܢ ܠܐ ܬܫܬܒܩ ܠܗܘܢ. ܐܝܟ ܕܡܠܦ ܢܐܒܛܝܣ. ܘܡܛܠܗܕܐ ܦܐܝܘ̣ܬ ܙܕܩܐܝܬ ܐܡ̣ܪ ܩܕܝܫܐ ܓܪܝܓܘܪܝܘܣ ܠܩܘܒܠܗ ܗܠܝܢ ܕܐܡ̣ܪ.

 

ܦܘܢܝܐ ܕܣܗܕܘܬܐ ܕܫܒܥ:

 

ܐܡܪܝܢܢ ܕܒܫܪܪܐ ܣܥܘܪ̈ܝܗܘܢ ܕܚܛܗ̈ܐ ܗ̇ܢܘܢ. ܐܢ ܠܐ ܢܬܘܒܘܢ܆ ܡܠܟܘܬܐ ܕܐܠܗܐ ܠܐ ܢܐܪܬܘܢ. ܐܢܕܝܢ ܬܝܒܝܢ܆ ܠܘ ܠܐ ܝ̇ܪܬܝܢ.

 

 

 

 

 

ܦܣܘܩܐ ܚܡܝܫܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠܗ̇ܝ ܕܡܘܕܝܢܘܬܐ ܥܠܬܐ ܗ̱ܝ ܪܒܬܐ ܕܡܬܠܚܝܢܘܬ ܚܛܗ̈ܐ. ܘܒܗ ܐܝܬ ܢܝ̈ܫܐ ܬܠܬܐ. ܢܝܫܐ ܩܕܡܝܐ ܡܛܠ ܡܚܘܝܢܘܬܐ ܚܘܫܒܝܬܐ ܡܫܪܪܢܝܬܗ̇ ܕܒܥܬܐ ܗܕܐ

 

ܐܡܪܝܢܢ ܕܒܪܢܫܐ ܡ̇ܢ ܒܗ̇ܝ ܕܡ̣ܢ ܢܦܫܐ ܘܦܓܪܐ ܡܪܟܒ. ܡ̣ܢ ܐܢܢܩܝ ܕܐܦ ܚܘܠܡܢܗ ܘܟܘܪܗܢܗ.  ܐܘ ܢܦܫܢܝ̈ܐ ܢܗܘܘܢ ܐܘ ܦܓܪ̈ܢܝܐ. ܘܐܟܡܐ ܕܚܘܠܡܢܐ ܦܓܪܢܝܐ ܒܝܕ ܐܣܝܐ ܐ̱ܢܫ ܦܓܪܢܝܐ ܕܒܚܝ̣ܪ ܒܝܕܥܬܐ ܕܡܘ̈ܙܓܝ ܩܢܘ̈ܡܐ ܘܩܘ̈ܡܬܐ. ܘܙܒ̈ܢܐ ܘܐܡ̈ܢܐ. ܘܥܝܕ̈ܐ. ܘܣܡܡ̈ܢܐ ܘܬܪ̈ܣܝܬܐ. ܘܟܘ̈ܝܐ ܘܓܙܪ̈ܐ ܡܟܢ ܠܡܗܘܐ. ܒܗ̇ ܒܕܡܘ̣ܬܐ ܘܚܘܠܡܢܐ ܢܦܫܢܝܐ. ܒܝܕ ܐܣܝܐ ܐ̱ܢܫ ܢܦܫܢܝܐ ܕܒܚܝ̣ܪ ܒܝ̣ܕܥܬܐ. ܕܙܢܝ̈ܐ ܘܚܫ̈ܐ ܘܕܘܒܪ̈ܐ ܘܨܒܝ̈ܢܐ ܕܩܢܘ̈ܡܐ ܘܩܘ̈ܡܬܐ. ܘܙܒ̈ܢܐ ܘܐܡܢ̈ܐ ܘܥܝܕ̈ܐ. ܘܡܪܬܝܢܘܬܐ ܘܦܘܫܩ̈ܐ ܕܡܠܝ̈ ܪܘܚܐ. ܘܠܘ̈ܒܒܐ ܘܟܘ̈ܘܢܐ ܘܓܙܡ̈ܐ ܡܟܢ ܠܡܗܘܐ. ܘܐܟܡܐ ܕܒܠܥܕ ܗ̇ܝ ܕܢܓܠܐ ܟܪܝܗܐ ܦܓܪܢܝܐ ܟܘܪܗܢܗ ܦܓܪܢܝܐ ܠܐܣܝܐ ܦܓܪܢܝܐ. ܘܒܠܥܕ ܗ̇ܝ ܕܢܫܡܠܐ ܒܥܒܕܐ. ܟܠܗܝܢ ܗܠܝܢ ܕܡܢܗ ܠܗ ܡܬܐܡܪ̈ܢ. ܠܐ ܡܨܐ ܠܡܬܚܠܡܘ. ܗ̣ܘ ܗܟܘܬ ܒܠܥܕ ܗ̇ܝ ܕܢܘܕܐ ܟܪܝܗܐ ܢܦܫܢܝܐ ܒܟܘܪܗܢܗ ܢܦܫܢܝܐ ܠܐܣܝܐ ܢܦܫܢܝܐ ܕܐܝܬܘܗܝ ܟܗܢܐ. ܘܒܠܥܕ ܗ̇ܝ ܕܢܫܡܠܐ ܒܥܒܕܐ ܗܠܝܢ ܟܠܗܝܢ ܕܡܢܗ ܠܗ ܡܬܐܡܪ̈ܢ. ܠܐ ܡܨܐ ܠܡܬܚܠܡܘ. ܘܡ̣ܢ ܗܠܝܢ ܟܠܗܝܢ ܦܪ̈ܘܛܐܣܝܣ ܡܬܟܢܫܐ. ܕܐܠܨܝܬܐ ܗ̱ܝ ܠܟܠܗܘܢ ܗ̇ܢܘܢ ܕܚܛܝܢ܆ ܕܢܘܕܘܢ ܒܚܛܗܝ̈ܗܘܢ. ܐܢ ܨܒܝܢ ܕܢܬܕܟܘܢ ܘܢܐܚܘܢ.

 

 

 

ܢܝܫܐ ܬܪܝܢܐ ܡܛܠ ܕܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܐܝܘܒ. ܐܢ ܚܛܝܬ ܕܠܐ ܒܨܒܝܢܝ ܐܬܢܟܦܬ ܡ̣ܢ ܣܘܓܐܐ ܕܠܙܬܐ ܕܥܡܐ. ܘܠܗܢܐ ܦܬܓܡܐ ܟܕ ܡܦܫܩ ܩܕܝܫܐ ܐܝܘܐܢܢܝܣ ܐܡ̇ܪ. ܚܙܐ ܐܢ̱ܬ ܠܢܦܫܐ ܡܝܬܪܬܐ ܕܐܝܘܒ. ܠܐ ܠܡ ܐܬܟܚܕܬ ܕܩܕܡ ܟܠܗ ܥܡܐ ܐܡܪ ܚܛܗܝ̈ ܕܠܐ ܒܨܒܝܢܐ. ܐܢܕܝܢ ܗ̇ܘ ܠܐ ܒܗܬ. ܟܡܐ ܝܬܝܪܐܝܬ ܙܕܩ ܠܢ ܕܗܕܐ ܢܣܥܘܪ. ܐܡ̣ܪ ܓܝܪ ܠܘܩܕܡ ܚܛܗܝ̈ܟ܆ ܐܝܟܢܐ ܕܬܙܕܕܩ.

 

ܣܗܕܘܬܐ ܕܬܪܬܝܢ:

 

ܕܘܝܕ. ܐܡܪܬ ܕܐܘܕܐ ܠܡܪܝܐ ܥܠ ܣܟܠܘ̈ܬܝ. ܘܐܢ̱ܬ ܫ̇ܒܩ ܐܢ̱ܬ ܠܝ ܟܠܗܘܢ ܚܛܗܝ̈. ܘܬܘܒ. ܡܛܠ ܕܐܚܘܝܟ ܣܟܠܘ̈ܬܝ ܘܐܬܕܟܐ ܡ̣ܢ ܚܛܗܝ̈. ܘܬܘܒ. ܚܛܗܝ̈ ܐܘܕܥܬܟ ܘܣܟܠܘ̈ܬܝ ܠܐ ܟܣܝܬ ܡܢܟ.

 

ܣܗܕܘܬܐ ܕܬܠܬ:

 

ܫܠܝܡܘܢ. ܒܡܬܠܘ̈ܗܝ. ܒܪܢܫܐ ܕܡܟܣܐ ܥܘܠܗ܆ ܠܐ ܢܨܠܚ. ܘܕܡܘܕܐ ܒܚܛܗܘ̈ܗܝ ܘܥ̇ܒܪ ܡܢܗܘܢ܆ ܡܫܬܘܙܒ.

 

ܣܗܕܘܬܐ ܕܐܪܒܥ:

 

ܒܪ ܐܣܝܪܐ. ܠܐ ܬܣܒ ܒܐܦܝ̈ ܢܦܫܟ. ܘܠܐ ܬܒܗܬ ܠܡܘܕܝܘ ܒܬܘܩ̈ܠܬܟ. ܬܘܒ. ܠܐ ܬܣܪܘܒ ܥܠ ܩܘܫܬܐ. ܘܡ̣ܢ ܣܟܠܘ̈ܬܟ ܐܬܟܠܝ. ܘܠܐ ܬܒܗܬ ܠܡܘܕܝܘ ܚܛܗܝ̈ܟ.

 

ܣܗܕܘܬܐ ܕܚܡܫ:

 

ܐܘܢܓܠܝܘܢ. ܘܢܦܩܐ ܗܘܬ݀ ܠܘܬܗ ܟܠܗ̇ ܟܘ̣ܪܐ ܝܗܘܕ. ܘܡܘܕܝܢ ܗ̣ܘܘ ܒܚܛܗܝ̈ܗܘܢ ܘܥ̇ܡܕܝܢ.

 

ܣܗܕܘܬܐ ܕܫܬ:

 

ܦܪܟܣܝܣ. ܘܣܓܝ̈ܐܐ ܡ̣ܢ ܐܝܠܝܢ ܕܗܝܡܢܘ܆ ܐܬܝܢ ܗ̣ܘܘ ܘܡܫܬܥܝܢ ܣܟܠܘ̈ܬܗܘܢ ܘܡܘܕܝܢ ܒܡܕܡ ܕܥ̇ܒܕܝܢ ܗ̣ܘܘ.

 

ܣܗܕܘܬܐ ܕܫܒܥ:

 

ܦܛܪܘܣ. ܫܠܝܚܐ ܒܐܓܪܬܐ ܩܬܘܠܝܩܝ ܕܝܠܗ. ܗܘܝܬܘܢ ܡܘܕܝܢ ܣܟܠܘ̈ܬܟܘܢ ܚܕ ܠܚܕ. ܘܗܘܝܬܘܢ ܡܨܠܝܢ ܚܕ ܥܠ ܚܕ. ܐܝܟܢܐ ܕܬܬܐܣܘܢ.

 

ܣܗܕܘܬܐ ܕܬܡܢܐ:

 

ܝܘܚܢܢ ܫܠܝܚܐ ܒܐܓܪܬܗ ܩܬܘܠܝܩܝ. ܐܢ ܡܘܕܝܢܢ ܒܚܛܗܝ̈ܢ. ܡܗܝܡܢ ܗ̣ܘ ܘܙܕܝܩ ܕܢܫܒܘܩ ܠܢ ܚܛܗܝ̈ܢ. ܘܢܕܟܝܢ ܡ̣ܢ ܟܠܗ ܥܘܠܢ.

 

ܣܗܕܘܬܐ ܕܬܫܥ:

 

ܓܪܝܓܘܪܝܘܣ ܬܐܠܘܓܘܣ ܒܡܐܡܪܐ ܕܬܠܬܐ. ܘܟܠܗ ܫܩܠܛܥܢܐ ܕܙܕܩ ܗ̣ܘܐ ܕܢܥ̣ܠ ܕܢܦܪܣܐ ܟܘܪ̈ܗܢܝܢ ܠܡܐܣ̈ܝܢܝܢ. ܗܢܐ ܟܠܗ ܐܟܡ̇ܢ ܕܢܥܪܘܩ ܡ̣ܢ ܐܣܝܘܬܐ ܡܥܠܝ̣ܢܢ. ܘܐܝܬܝܢ ܓܢ̱ܒܪ̈ܐ ܠܘܩܒܠ ܢܦܫܢ. ܘܝܕܘ̈ܥܬܢܐ ܠܘܩܒܠ ܚܘܠܡܢܢ. ܐܘ ܓܝܪ ܥܒܕܢܐܝܬ ܠܚܛܝܬܐ ܓܢܒܢܢ. ܐܝܟ ܡܕܡ ܚܫܐ ܡܛܫܝܐ ܕܢܦܫܐ ܛܫܝ̣ܢܗ̇. ܐܝܟ ܗ̇ܘ ܕܐܦ ܠܥܝܢܐ ܪܒܬܐ ܕܐܠܗܐ ܘܕܕܝ̣ܢܐ ܡܛܥܝܢܢ. ܐܝܟ ܡ̣ܢ ܒܢܝ̈ܢܫܐ ܢܬܛܫܐ. ܐܘ ܡܬܥܠܠܝ̣ܢܢ ܥ̈ܠܬܐ ܒܚܛܗ̈ܐ܇ ܟܕ ܡ̈ܠܐ ܣܢܐܓܪ̈ܬܐ ܠܚܫܝ̈ܢ ܡܫܟܚܝ̣ܢܢ. ܐܘ ܟܕ ܡܫܡ̈ܥܬܐ ܡܣܒܪܝ̣ܢܢ. ܒܙܢܐ ܕܐܣܦܣ ܚܪܫܬܐ܆ ܘܕܡܣܟܪܐ ܐܕܢܝ̈ܗ̇܆ ܡܬܚܪܝܢܢ ܕܠܐ ܢܫܡܥ ܩܠܐ ܕܠܚܘܫܐ ܘܕܠܐ ܢܬܩܪܒܘܢ ܠܢ ܣܡ̈ܡܢܐ ܕܚܟܡܬܐ. ܒܗܠܝܢ ܕܟܘܪܗܢܗ̇ ܕܢܦܫܐ ܡܬܐܣܐ.

 

 

 

ܢܝܫܐ ܬܪܝܢܐ ܡܛܠ ܣܡ̈ܡܢܐ ܡܐܣ̈ܝܢܐ ܕܚܛܝܬܐ. ܘܡܛܠܗ̇ܝ ܕܐܝܟܢܐ ܙܕܩ ܕܢܗܘܐ ܗ̇ܘ ܕܡܩܒܠ ܠܗ̇ ܠܡܘܕܝܢܘܬܐ. ܘܐܝܟܢܐ ܗ̇ܘ ܕܡܩܪܒ ܠܗ̇

 

ܬܠܬܐ ܐܢܘܢ ܓܢ̈ܣܐ ܟܠܢܝ̈ܐ ܕܩܢܘ̈ܢܐ. ܐܘܟܝܬ ܣܡ̈ܡܢܐ ܕܒܗܘܢ ܡܬܐܣܝܢ ܟܘܪ̈ܗܢܐ ܢܦܫܢܝ̈ܐ. ܡܪܚܡܢܘܬܐ ܘܨܘܡܐ ܘܨܠܘܬܐ. ܗ̇ܘ ܕܝܢ ܕܡܩܒܠ ܠܗ̇ ܠܡܘܕܝܢܘܬܐ܆ ܟܗܢܐ ܐܘ ܪ̈ܝܫܟܗܢܐ ܙܕܩ ܕܢܗܘܐ. ܒܕܠܗܘܢ ܐܬܝ̣ܗܒ ܫܘܠܛܢܐ ܕܗ̇ܝ ܕܐܢ ܢܫܒܩܘܢ ܠܐܢܫ ܚܛܗ̈ܐ܆ ܢܫܬܒܩܘܢ ܠܗ. ܘܐܢ ܢܐܚܕܘܢ ܕܐ̱ܢܫ ܐܚܝ̣ܕܝܢ. ܘܗ̣ܘ ܗܢܐ ܠܘ ܒܡ̈ܠܐ ܒܠܚܘܕ ܙܕܩ ܠܗ ܠܡܪܬܝܘ܆ ܐܠܐ ܐܦ ܘܒܥܒ̈ܕܐ ܛܒ̈ܐ. ܕܘܡܝܐ ܘܬܦܢܟܐ ܙܕܩ ܠܗ ܕܢܗܘܐ ܠܗ̇ܢܘܢ ܕܡܘܕܝܢ ܠܘܬܗ. ܐܝܟ ܕܐܡ̣ܪ ܡܪܢ ܕܗ̇ܘ ܕܥܒܕ ܘܡ̇ܠܦ܆ ܗܢܐ ܪܒܐ ܢܬܩܪܐ. ܘܡܠܦܢܐ ܐܡ̣ܪ܆ ܐܠܐ ܗ̇ܘ ܕܙܥܘܪ̈ܝܬܐ ܡ̇ܢ܆ ܡܛܠ ܡܝܬܪܘܬܐ ܡܡܠܠ. ܣܓܝ̈ܐܬܐ ܕܝܢ ܒܝܕ ܗܠܝܢ ܕܥܒܕ ܡܚ̇ܘܐ. ܘܫܘܪܪ ܗܝܡܢܘܬܐ ܠܡܠܬܗ ܒܝܕ ܕܘܒܪܗ ܡܘܣܦ. ܘܗܟܢܐ ܗܢܝܐܝܬ ܡܩܒܠܝܢ ܡܠܘ̈ܗܝ ܗ̇ܢܘܢ ܕܚܛܝܢ. ܘܠܐ ܢܗܐ ܙܥܝ̣ܦ ܘܚܡܬܢ ܠܘܩܒܠ ܗ̇ܢܘܢ ܕܚܛܝܢ. ܐܦܠܐ ܪܦܐ ܘܢܫܝ̣ܫ. ܒܗ̇ܝ ܕܬܪ̈ܬܝܗܝܢ ܠܐ ܡܩܠܣ̈ܢ. ܐܝܟ ܕܗ̣ܘ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܐܡ̣ܪ. ܕܒܗ̇ ܒܕܡܘ̣ܬܐ ܐܝܬܝܗ̇ ܒܝܫܬܐ. ܘܫܘܒܩܢܐ ܠܐ ܡܟܘܢܢܐ܆ ܘܡܬܥܕܠܢܘܬܐ ܕܠܐ ܫܘܒܩܢܐ. ܗ̇ܘ ܡ̇ܢ ܕܠܟܠܗܘܢ ܥܪ̈ܩܐ ܫܒܩ. ܗܕܐ ܕܝܢ ܕܒܬܩܝ̣ܦܘܬܐ ܬܟܣܐ. ܐܠܐ ܡܫܝܢܐܝܬ ܘܒܗܝ̣ܠܐܝܬ ܒܚܕܘܬܐ ܢܡܙܓܝܗ̇ ܠܥܩܬܐ. ܚܕܘܬܐ ܡ̇ܢ܆ ܡܛܠ ܬܝܒܘܬܐ ܕܗ̇ܘ ܕܚܛܐ ܕܐܬܩܕܡܘ. ܗ̇ܘ ܕܝܢ ܕܡܩܪܒ ܠܗ̇ ܠܡܘܕܝܢܘܬܐ. ܙܕܩ ܠܗ ܕܒܪܘܚܐ ܡܟܝܟܬܐ ܘܒܠܒܐ ܫܚܝ̣ܩܐ. ܢܐܬܐ ܠܘܬ ܟܗܢܐ ܐܘ ܪ̈ܝܫܟܗܢܐ ܡ̇ܢ ܕܗ̣ܘ ܕܢܨܒܐ. ܘܢܪܟܢ ܪܝܫܗ ܠܬܚܬ ܒܫܡܝܐ ܘܩܕܡܘܗܝ ܕܐܠܗܐ. ܘܥܠ ܣܒܪܐ ܕܫܘܒܩܢܐ ܡܘܕܐ ܐ̱ܢܐ ܕܣܥܪܬ ܙܦܠܢ ܘܙܦܠܢ ܘܡܫܬܘܕܐ ܐ̱ܢܐ ܩܕܡ ܐܠܗܐ ܕܠܐ ܬܘܒ ܐܣܥܘܪ ܗ̇ܘ ܡܐ ܕܗܫܐ ܡܘܕܐ ܐ̱ܢܐ. ܘܒ̇ܥܐ ܐ̱ܢܐ ܡܢܟ ܐܘ ܟܗܢܐ ܐܘ ܪ̈ܝܫܟܗܢܐ ܩܕܝܫܐ ܕܬܦܝ̣ܣ ܚܠܦܝ ܘܥܡܝ ܠܐܠܗܐ ܕܠܐ ܢܐܚܘܕ ܬܪܥܗ ܒܐܦܝ̈. ܐܠܐ ܢܩܒܠܢܝ ܐܝܟ ܕܠܓܝܣܐ ܘܡܟܣܐ ܘܚܛܝܬܐ. ܗܝܕܝܢ ܗ̣ܘ ܟܗܢܐ ܢܠܒܒܝ̣ܘܗܝ ܕܠܐ ܢܦܣܘܩ ܣܒܪܐ ܡ̣ܢ ܪ̈ܚܡܘܗܝ ܕܐܠܗܐ. ܘܢܐܡܪ ܠܗ ܡ̣ܢ ܟܬܒ̈ܐ. ܘܢܝܬܐ ܠܗ ܬܚܘܝ̣ܬܐ ܕܥܪܒܐ ܕܛܥ̣ܐ ܘܙܘܙܐ ܕܐܒ̣ܕ. ܘܕܒܪܐ ܐܣܘܛܐ ܘܕܡܟ̈ܣܐ ܘܙܢ̈ܝܬܐ ܕܐܙܕܕܩܘ. ܘܕܕܘܝܕ ܗ̇ܘ ܕܩ̣ܛܠ ܘܓܪ. ܘܟܕ ܒܟ̣ܐ ܡܪܝܪܐܝܬ ܘܥܠ ܣܩܐ ܘܩܛܡܐ ܝ̣ܬܒ ܘܠܐ ܐܟ̣ܠ ܘܠܐ ܐܫܬܝ̣. ܐܬܐܡܪ ܠܗ ܒܝܕ ܢܬܢ ܢܒܝܐ. ܕܐܥܒܪ ܐܠܗܐ ܣܟܠܘܬܟ ܠܐ ܬܡܘܬ. ܘܠܘ ܗܕܐ ܒܠܚܘܕ. ܐܠܐ ܘܠܫܘܟܢܐ ܕܢܒܝܘܬܐ ܐܫܬܘܝ̣. ܘܦܛܪܘܣ ܬܘܒ ܐܦܢ ܟܦ̣ܪ ܐܠܐ ܟܕ ܒܟܐ ܡܪܝܪܐܝܬ ܘܬܒ. ܩܠܝ̈ܕܐ ܐܬܗܝܡܢ ܕܡܠܟܘܬܐ ܕܫܡܝܐ. ܗܠܝܢ ܘܐ̱ܚܪ̈ܢܝܬܐ ܕܐܝܟ ܗܠܝܢ ܢܐܡܪ ܠܗ. ܘܢܚܘܐ ܠܗ ܕܐܟܡܐ ܕܦܓܪܐ ܒ̇ܠܥ ܓܐܪܐ. ܗܟܢܐ ܢܦܫܐ ܒ̇ܠܥܐ ܒܚܛܝܬܐ. ܐܝܟܢܐ ܡܕܝܢ ܕܐܠܘܠܐ ܬܫܬܡܛ ܗ̣ܝ ܠܘܠܝܬܐ. ܘܢܬܬܣܝ̣ܡ ܥܠ ܕܘܟܬܗ̇ ܡܠܓܡܐ ܡܕܡ. ܠܐ ܡܨܐ ܠܡܬܚܠܡܘ ܦܓܪܐ. ܗ̣ܘ ܗܟܘܬ ܐܠܘܠܐ ܢܥܩܪܝܗ̇ ܒܪܢܫܐ ܠܚܛܝ̣ܬܐ ܡ̣ܢ ܫܪ̈ܫܝܗ̇ ܡ̣ܢ ܢܦܫܐ. ܘܢܩܒܠ ܩܢܘܢܐ ܕܗܘܝܘ ܣܡܐ ܡܐܣܝܢܐ. ܠܐ ܡܨܝܐ ܕܬܬܚܠܡ ܢܦܫܐ. ܗܟܢܐ ܐܦ ܐܢ̱ܬ ܐܘ ܒܪܝ ܐܢܗܘ ܕܬܢܕ ܠܟ ܡ̣ܢ ܚܛܗ̈ܐ ܗܠܝܢ ܩܕ̈ܡܝܐ. ܘܠܐ ܬܗܦܘܟ ܥܠܝܗܘܢ ܐܝܟ ܟܠܒܐ ܥܠ ܬܝܘ̣ܒܗ. ܘܬܩܒܠ ܠܩܢܘܢܐ ܕܣ̇ܐܡ ܐ̱ܢܐ ܥܠܝܟ ܘܬܫܡܠܝܘܗܝ. ܐܢܐ ܥ̇ܪܒ ܐ̱ܢܐ ܩܕܡ ܐܠܗܐ. ܕܢܠܚܐ ܐ̱ܫܛܪܐ ܕܚܘ̈ܒܝܟ ܘܢܥܛܐ ܚܛܗܝ̈ܟ. ܘܠܐ ܢܬܕܟܪ ܠܟ ܒܝܘܡܐ ܕܕܝ̣ܢܐ ܚܕ ܡ̣ܢ ܒܘܨܪ̈ܐ ܕܣܥܪܬ. ܘܟܕ ܡܫܬܘܕܐ ܕܡܩܒܠ܆ ܣ̇ܐܡ ܥܠܘܗܝ ܩܢܘܢܐ ܕܥܗܢ ܠܗ. ܟܐܡܬ݀ ܐܢ ܡܪܐ ܢܟ̈ܣܐ ܗ̣ܘ܆ ܙܕ̈ܩܬܐ. ܘܐܢ ܚܠܝ̣ܡ ܒܦܓܪܗ܆ ܨܘܡܐ ܙܒܢܐ ܡܕܡ ܡܬܚܡܐ. ܘܨܠܘܬܐ ܒܒܘܪ̈ܟܐ ܝܕܝ̈ܥܐ ܟܠ ܝܘܡܐ. ܘܢܘܣܦ ܘܢܒܨܪ ܠܦܘܬ ܙܢܗ ܕܚܛܗܐ. ܘܗܝܕܝܢ ܢܩܝ̣ܡ ܬܫܡܫܬܐ ܕܬܝܒܘܬܐ ܒܦܣܝ̈ܩܬܐ ܐ̱ܪܙܢܐܝܬ. ܘܢܫܪܝܘܗܝ ܠܗ̇ܘ ܕܐܘܕܝ̣.

 

 

 

ܩܦܠܐܘܢ ܫܬܝܬܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܓܘܢܝܘܬ ܫܘܪ̈ܥܬܐ ܠܟܠܗܘܢ ܝܠܝ̈ܕܝ ܐ̱ܢܫܐܝܬ. ܘܒܗ ܐܝܬ ܥܘܬܕܐ ܘܦܣܘ̈ܩܐ ܬܪܝܢ. ܩܕܡܝܬ݀ ܥܘܬܕܐ

 

ܥܕܬܐ ܡ̇ܢ ܓܝܪ ܩܕܝܫܬܐ ܕܐܠܗܐ ܡܘܕܝܐ. ܕܠܝܬ ܒܪܝܐ ܕܠܐ ܚܣܝ̣ܪ. ܐܦܠܐ ܐܝܬ ܕܕܟܐ ܡ̣ܢ ܨܐܬܐ ܕܚܛܝܬܐ. ܡ̣ܢ ܗ̇ܢܘܢ ܕܒܢܝ̈ܢܫܐ ܗ̣ܘܘ ܥܠ ܐܪܥܐ܆ ܐܠܐ ܐܢ ܒܠܚܘܕܘܗܝ ܡܪܢ ܝܫܘܥ ܡܫܝܚܐ. ܐ̱ܚܪ̈ܢܐ ܕܝܢ ܐܡܪܝܢ ܕܡܫܬܘܝܢܘܬܐ ܕܠܓܠܝ̈ܢܐ ܐܠܗܝ̈ܐ. ܘܡܘܗ̈ܒܬܐ ܕܪܘܚܐ ܩܕܝܫܐ. ܠܐ ܡܬܡܨܝܢܘܬܐ ܕܥܠ ܗ̇ܝ ܕܢܚܛܘܢ ܘܢܫܪܥܘܢ ܡܫܟܢܢ ܠܢܒܝ̈ܐ ܟܝܬ ܘܠܫܠܝ̈ܚܐ ܘܠܐܒܗ̈ܬܐ ܩܕܝ̈ܫܐ. ܘܗ̣ܝ ܗܕܐ ܠܐ ܡܬܡܨܝܢܘܬܐ. ܒܝܕ ܐܪܒܥ ܥ̈ܠܠܢ ܐܡ̣ܪܘ ܕܗܘܝܐ. ܚܕܐ ܡ̇ܢ ܗ̇ܝ ܕܡ̣ܢ ܟܪܣܐ ܢܬܓܒܐ ܗ̣ܘ ܢܒܝܐ ܘܢܬܩܕܫ. ܐܟܙܢܐ ܕܫܡܘܐܝܠ ܘܐܪܡܝܐ. ܕܬܪܬܝܢ ܕܝܢ ܗ̇ܝ ܕܟܕ ܡܫܡܠܝܐܝܬ ܝ̇ܕܥ ܗ̣ܘ ܓܒܝܐ ܕܐܠܗܐ. ܦܘܪ̈ܥܢܐ ܕܢܛܝ̣ܪܝ̣ܢ ܠܩܕܝ̈ܫܐ. ܘܡܣܡܒܪ̈ܝܫܐ ܕܓܙܝ̣ܡܝ̣ܢ ܠܥܒܪ̈ܝ ܥܠ ܢܡܘܣܐ. ܝܬܝܪ ܙܗܝ̣ܪܐܝܬ ܢ̇ܛܪ ܗ̣ܘ ܠܗ ܡ̣ܢ ܗ̇ܝ ܕܒܡܕܡ ܢܫܪܥ. ܕܬܠܬܝܢ ܕܝܢ ܗ̇ܝ ܕܗ̣ܢܘܢ ܓܠܝ̈ܢܐ ܐܠܗܝ̈ܐ ܕܗܘܝܢ ܝܬܝܪܐܝܬ ܡܫܪܪܝ̣ܢ ܠܗ̇ ܠܝܕܥܬܗ ܗ̇ܝ ܡܫܡܠܝܬܐ. ܘܡܛܠܗܕܐ ܠܐ ܣܟ ܡܬܪܡܐ ܠܡܚܛܐ. ܕܐܪܒܥ ܕܝܢ ܗ̇ܝ ܕܥܡܗ̇ ܕܗ̇ܝ ܕܕܐܠ ܒܗ ܙܘܥܐ ܐܘ ܚܘܫܒܐ ܚܛܝ̣ܬܢܝܐ. ܠܐ ܡܬܬܗܡܐ ܡ̣ܢ ܒܛܝ̣ܠܘܬܐ ܐܠܗܝܬܐ. ܐܠܐ ܥܓܠ ܡܬܟܣܣ ܘܡܬܟܘܢ. ܘܗܟܢܐ ܡܬܟܠܐ ܡ̣ܢ ܫܘܪܥܬܐ. ܘܐ̱ܢܫܝ̈ܢ ܐܡܪܝܢ ܕܟܠܗܘܢ ܚܘ̈ܒܐ ܚܛܝ̈ܬܢܝܐ. ܡܬܬܙܝ̣ܥܝ̣ܢ ܒܓܒܝ̈ܐ ܕܐܠܗܐ. ܣܛܪ ܡ̣ܢ ܟܦܘܪܝܐ ܕܒܐܠܗܐ. ܣܛܪ ܡ̣ܢ ܟܦܘܪܝܐ ܕܒܐܠܗܐ. ܐ̱ܚܪ̈ܢܐ ܕܝܢ ܕܡܨܝܐ ܕܐܦ ܢܟܦܪܘܢ. ܡܛܠ ܕܚܠܬܐ. ܟܕ ܒܒܪܢܫܗܘܢ ܓܘܝܐ ܢܛܪܝܢ ܠܗ̇ ܠܗܝܡܢܘܬܐ ܘܡܣܬܪܝ̣ܢ.

 

 

 

 

 

ܦܣܘܩܐ ܩܕܡܝܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܗ̇ܝ ܕܠܐ ܐ̱ܢܫ ܡ̣ܢ ܠܒܝ̈ܫܝ ܒܣܪܐ ܐܝܬ ܕܡܚܪܪ ܡ̣ܢ ܒܘܨܪ̈ܐ ܐ̱ܢܫܝ̈ܐ. ܘܒܗ ܐܝܬ ܢܝܫܐ ܚܕ. ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܒܥܬܐ ܗܕܐ. ܣܗܕܘܬܐ ܩܕܡܝܬܐ

 

ܗ̇ܝ ܕܐܒܘܢ ܐܕܡ. ܕܥܡܗ̇ ܕܗ̇ܝ ܕܣܒܝ̣ܣܐܝܬ ܠܥܢܝܢܐ ܕܥܡ ܐܠܗܐ ܥܒܘܕܗ ܡܫܬܘܐ ܗ̣ܘܐ. ܗܢܐ ܟܠܗ ܐܬܬܛܥܝ̣ ܡ̣ܢ ܒܝܫܐ. ܕܠܘ ܒܠܚܘܕ ܥܠ ܦܘܩܕܢܐ ܕܗ̇ܘ ܕܒܪܝܗܝ ܥܒܪ. ܐܠܐ ܘܕܐܦ ܡܣܒܪܢܘܬܐ ܕܝܬܝܪ ܫܟܝ̣ܪܐ ܥܠܘܗܝ ܐܬܗܓܓ. ܘܕܠܡ ܡܛܠܗ̇ܝ ܕܚܣܡ ܒܗ. ܡ̣ܢ ܡܐܟܘܠܬܐ ܕܡ̣ܢ ܦܐܪܐ ܟܠܝܗܝ.

 

ܣܗܕܘܬܐ ܕܬܪܬܝܢ:

 

ܐܘܪܝܬܐ. ܘܐܡ̣ܪ ܐܗܪܘܢ ܠܡܘܫܐ. ܒ̇ܥܐ ܐ̱ܢܐ ܡܢܟ ܡܪܝ. ܠܐ ܬܚܫܘܒ ܥܠܝܢ ܚܛܗܐ ܥܠ ܕܐܣܟܠܢܢ. ܘܥܠ ܕܚܛܝܢ.

 

ܣܗܕܘܬܐ ܕܬܠܬ:

 

ܒܗ ܟܕ ܒܗ. ܘܐܡ̣ܪ ܡܪܝܐ ܠܡܘܫܐ. ܣܩ ܠܛܘܪܐ ܗܢܐ ܕܥܒܪ̈ܝܐ. ܘܚܙܝܗ̇ ܠܐܪܥܐ ܕܟܢܥܢ. ܕܝ̇ܗܒ ܐ̱ܢܐ ܠܒܢܝ̈ ܐܝܣܪܐܝܠ. ܚܙܝܗ̇ ܘܐܬܟܢܫ ܐܦ ܐܢ̱ܬ ܠܘܬ ܥܡܟ. ܐܝܟ ܕܐܬܟܢܫ ܐܦ ܐܢ̱ܬ ܠܘܬ ܥܡܟ. ܐܝܟ ܕܐܬܟܢܫ ܐܗܪܘܢ ܐܚܘܟ. ܥܠ ܕܡܪܡܪܬܘܢ ܡܠܬ ܦܘܡܝ ܒܡܕܒܪܐ ܕܨܝܢ. ܒܡܨܘܬܐ ܕܟܢܘܫܬܐ. ܘܠܐ ܩܕܫܬܘܢܢܝ ܒܡܝ̈ܐ ܠܥܝ̣ܢܝ̈ܗܘܢ.

 

ܣܗܕܘܬܐ ܕܐܪܒܥ:

 

ܥܒܝ̣ܕܬܐ ܥܕܝ̣ܠܬܐ ܗ̇ܝ ܕܕܘܝܕ ܒܕܒܝܬ ܐܘܪܝܐ. ܘܥܡ ܓܘܪܐ ܐܦ ܩܛܠܐ. ܟܕ ܠܣܓܝ̈ܐܐ ܓܠܝܐ ܘܝ̣ܕܝ̣ܥܐ ܬܨܛܡܬ ܠܢ ܗܫܐ. ܘܠܗ̇ܝ ܒܠܚܘܕ ܕܝܠܗ ܕܡܙܡܪܢܐ܆ ܕܠܒܥܬܐ ܕܣܝ̣ܡܐ ܠܢ ܠܡܫܪܪܘܬܗ̇ ܫ̣ܪܪ ܘܐܡ̣ܪ܇ ܢܐܡܪ. ܕܐܢܐ ܐܡܪܬ ܒܪܥܝ̣ܠܘܬܝ ܕܟܠ ܒܪܢܫ ܕܓܠ.

 

ܣܗܕܘܬܐ ܕܚܡܫ:

 

ܟܦܘܪܝܐ ܫܡܥܘܢܝܐ. ܣܦܩ ܠܡܙܗܪܘ ܠܗ̇ܢܘܢ ܕܩܡ̣ܘ ܕܠܐ ܢܦܠܘܢ.

 

ܣܗܕܘܬܐ ܕܫܬ:

 

ܦܘܠܘܣ ܒܕܪ̈ܘܡܝܐ. ܚܒܫ ܓܝܪ ܐܠܗܐ ܟܠܢܫ ܒܠܐ ܡܬܬܦܝ̣ܣܢܘܬܐ. ܕܥܠ ܟܠܢܫ ܢܪܚܡ.

 

ܣܗܕܘܬܐ ܕܫܒܥ:

 

ܩܕܝܫܐ ܕܝܘܢܢܘܣܝܘܣ ܒܩܦܠܐܘܢ ܕܫܒܥܐ ܕܡܐܡܪܐ ܕܬܪܝܢ. ܠܐܝܠܝܢ ܕܚܝܘ ܚܣܝܐܝܬ. ܚܝ̈ܐ ܢܗܝ̣ܪ̈ܐ ܘܐܠܗܝ̈ܐ ܡܬܝܗܒܝ̣ܢ܇ ܡ̣ܢ ܡܣܐܬܐ ܟܐܢܬܐ ܕܐܠܗܐ܇ ܠܦܘܬ ܕܫܘܝܢ. ܟܕ ܡܗܡܝܐ ܪܚܡܬ݀ ܐ̱ܢܫܘܬܗ̇ ܕܪܝܫܘܬ ܐܠܗܘܬܐ ܒܛܒܘܬܗ̇. ܡ̣ܢ ܛܘܠܫ̈ܐ ܕܗܘ̣ܘ ܒܗܘܢ. ܡ̣ܢ ܝܕ ܡܚܝ̣ܠܘܬܐ ܐ̱ܢܫܝܬܐ. ܡܛܠ ܕܠܐ ܐ̱ܢܫ ܐܝܬ ܐܝܟ ܕܐܡ̇ܪܝܢ ܟܬܒ̈ܐ ܕܟܐ ܡ̣ܢ ܨܐܬܐ.

 

ܣܗܕܘܬܐ ܕܬܡܢܐ:

 

ܩܕܝܫܐ ܓܪܝܓܘܪܝܘܣ ܬܘܠܘܓܘܣ ܒܡܐܡܪܐ ܕܥܠ ܢܘܗܪ̈ܐ. ܐܢܐ ܓܝܪ ܡ̇ܢ ܗܟܝܠ ܡܘܕܐ ܐ̱ܢܐ ܕܐܝܬܝ ܒܪܢܫܐ ܚܝܘܬܐ ܡܫܬܚܠܦܢܝ̣ܬܐ. ܘܡ̣ܢ ܟܝܢܐ ܕܕܐܒ. ܘܡܩܒܠ ܐ̱ܢܐ ܗܕܐ ܚܘܝ̣ܚܐܝܬ. ܘܣ̇ܓܕ ܐ̱ܢܐ ܠܗ̇ܘ ܕܝܗܒ. ܘܠܐܚܪ̈ܢܐ ܝ̇ܗܒ ܐ̱ܢܐ. ܘܩܕܡ ܪ̈ܚܡ̣ܐ ܡܥܠ ܐ̱ܢܐ ܪ̈ܚܡܐ܆ ܝ̇ܕܥ ܐ̱ܢܐ ܓܝܪ ܕܡܚܝ̣ܠܘܬܐ ܡܥܛܦ ܐ̱ܢܐ. ܘܕܐܝܟ ܕܡܟܝ̣ܠ ܐ̱ܢܐ ܡܬܬܟܝ̣ܠ ܠܝ.

 

ܬܘܣܦܬܐ ܕܫܘܪܪܐ:

 

ܘܠܡܢܐ ܒܒܢܝ̈ܢܫܐ ܬܥܫܝ̣ܢܢ. ܠܡܫܪܪܘ ܗ̇ܝ ܕܣܝ̣ܡܐ. ܟܕ ܐܦܠܐ ܗ̇ܢܘܢ ܡܒܪ̈ܝܝ ܡ̣ܢ ܚܫ̈ܐ ܦܓܪ̈ܢܝܐ. ܘܕܒܫܒܒܗ̇ ܕܐܠܗܘܬܐ ܡܕܝܪܝ̣ܢ ܒܟܘܠܝܘܬܗܘܢ ܡ̣ܢ ܫܘܪܥܬܐ ܐܡ̣ܕܘ. ܐܠܐ ܬܓܡܐ ܡ̇ܢ ܡܢܗܘܢ ܡܦܘܠܬܐ ܕܝܬܝܪ ܕܘܝܐ ܚܫ. ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܕܡ̣ܢ ܡܠܐܟ̈ܐ ܕܝܢ ܗ̇ܘ ܡ̇ܢ ܕܐܡܪܚ ܕܢܫܓܘܫ. ܘܕܠܥܠ ܡ̣ܢ ܫܘܠܛܢܗ ܢܬܬܪܝ̣ܡ. ܘܫܪܟܐ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܫܬܝܬܝܐ ܕܫܬܐܣܬܐ ܚܕܥܣܝܪܝܬܐ

 

ܡܛܠ ܬܪܥܝ̣ܬܐ ܕܗ̇ܢܘܢ ܕܠܐ ܡܬܡܨܝܢܝ̣ܬܐ ܕܝܢܝ̣ܢ ܠܫܘܪܥܬܐ ܕܗ̇ܢܘܢ ܕܡ̣ܢ ܟܕܘ ܐܬܢܦ̣ܚܘ ܒܪܘܚܐ ܩܕܝܫܐ. ܘܒܗ ܐܝܬ ܢܝ̈ܫܐ ܬܪܝܢ. ܢܝܫܐ ܩܕܡܝܐ ܡܛܠ ܣܥܝܝ̈ܗܘܢ. ܣܥܝܐ ܩܕܡܝܐ

 

ܐܡܪܝܢ ܐܠܘ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ܆ ܡܬܡܨܝܢܝ̣ܬܐ ܠܗ̇ܘ ܠܗܘܢ ܗ̇ܝ ܕܒܒܘܨܪ̈ܐ ܐ̱ܢܫܝ̈ܐ ܢܦܠܘܢ. ܝܬܝܪ ܕܘܝ̈ܐ ܗ̇ܘܝܢ ܗ̣ܘܘ ܡ̣ܢ ܒܢܝ̈ܢܫܐ ܫܚܝ̣̈ܡܐ ܘܥܘ̈ܠܐ. ܒܗ̇ܝ ܕܗ̇ܢܘܢ ܕܠܐ ܝ̇ܕܥܝ̣ܢ ܙܥܘܪ̈ܝܬܐ ܒܠܥܝ̣ܢ. ܘܗ̇ܢܘܢ ܕܝ̇ܕܥܝܢ ܪܘܪ̈ܒܬܐ ܘܝܬܝܪ ܩܫ̈ܝܬܐ. ܐܝܟ ܡܠܬܗ ܕܐܘܢܓܠܝܘܢ. ܘܕܓܡܝ̣ܪ̈ܐ ܡ̇ܢ ܝܬܝܪ ܡ̣ܢ ܥܘ̈ܠܐ ܢܬܕܘܘܢ. ܫܟܝܪܐ ܠܡܣܒܪܘ.

 

ܣܥܝܐ ܬܪܝܢܐ:

 

ܐܡܪܝܢ ܐܠܘ ܡܬܡܨܝܢܝ̣ܬܐ ܗ̱ܝ ܠܓܡܝ̣ܪ̈ܐ ܕܢܕܓܠܘܢ. ܐܝܟܢܐ ܙܕܩ ܗ̣ܘܐ ܠܡܗܝܡܢܘ ܡܠܝ̈ܗܘܢ. ܘܠܡܬܬܟܠܘ̣ ܥܠܝܗܘܢ. ܘܠܡܩܒܠܘ ܟܪܘܙܘܬܗܘܢ. ܘܟܕ ܕܠܐ ܦܘܠܓ ܡܬܬܦܝ̣ܣܝ̣ܢܢ ܠܗܘܢ. ܫܪܝܪ̈ܢ ܒܟܠܙܒܢ ܡܠܝ̈ܗܘܢ.

 

ܣܥܝܐ ܬܠܝܬܝܐ:

 

ܐܡܪܝܢ ܐܠܘ ܒܚܛܗ̈ܐ ܪܘܪ̈ܒܐ ܡܨܝܢ ܗ̣ܘܘ ܠܡܦܠ ܢܒܝ̈ܐ ܘܫܠܝ̈ܚܐ ܘܐܒܗ̈ܬܐ. ܠܡܘܬܐ ܡܫܬܠܡܝ̣ܢ ܗ̣ܘܘ ܡ̣ܢ ܢܡܘܣܐ ܘܕܩܛܠܐ ܕܗܠܝܢ ܠܐ ܫܦܪ ܠܐܠܗܐ ܝ̣ܕܝ̣ܥܐ ܡ̣ܢ ܗ̇ܝ ܕܐܡ̣ܪ ܐܠܝܐ ܠܘܬ ܐܠܗܐ. ܡܪܝ܆ ܠܢܒܝܝ̈ܟ ܩܛܠܘ. ܘܠܡܕܒ̈ܚܝܟ ܣܚܦܘ. ܘܐܢܐ ܗ̱ܘ ܒܠܚܘܕ ܐܫܬܚܪܬ. ܘܒ̇ܥܝܢ ܠܢܦܫܝ. ܘܡ̣ܢ ܗ̇ܝ ܕܓܢܝܗ̇ ܡܪܝܐ ܠܐܘܪܫܠܡ ܘܐܡ̣ܪ. ܐܘܪܫܠܡ ܐܘܪܫܠܡ ܩܛܠܬ݀ ܢܒܝ̈ܐ ܘܫܪܟܐ.

 

ܣܥܝܐ ܪܒܝܥܝܐ:

 

ܐܡܪܝܢ ܕܢܒܝ̈ܐ ܘܫܠܝ̈ܚܐ ܘܐܒܗ̈ܬܐ. ܡܟܠܐ ܟܠܝܢ ܠܒܢܝ̈ܢܫܐ ܡ̣ܢ ܚܛܗ̈ܐ ܒܟܪ̈ܘܙܘܬܗܘܢ. ܘܐܠܘ ܗ̣ܢܘܢ ܒܚܛܗ̈ܐ ܡܫܬܪܓܠܝ̣ܢ ܗ̣ܘܘ. ܗ̇ܝ ܕܡܪܢ ܫܠܡܐ ܗܘܬ݀ ܥܠܝܗܘܢ ܕܐܡ̣ܪ. ܘܝ ܠܟܘܢ ܣܦܪ̈ܐ ܘܦܪ̈ܝܫܐ. ܕܣܝܡܝ̣ܢ ܐܢ̱ܬܘܢ ܡܘܒ̈ܠܐ ܝܩܝܪ̈ܬܐ ܠܒܢܝ̈ܢܫܐ. ܘܐܢ̱ܬܘܢ ܕܝܢ ܒܨܒ̈ܥܬܟܘܢ ܠܐ ܩܪܒܝ̣ܢ ܐܢ̱ܬܘܢ ܠܗܝܢ.

 

 

 

ܢܝܫܐ ܬܪܝܢܐ ܡܛܠ ܫܪ̈ܝܐ ܕܣܥܝ̈ܐ ܗܠܝܢ. ܫܪܝܐ ܕܣܥܝܐ ܩܕܡܝܐ:

 

ܐܡܪܝܢܢ ܕܓܡܝܪ̈ܐ ܡ̇ܢ ܟܡܐ ܕܒܓܡܝ̣ܪܘܬܗܘܢ ܡܟܬܪܝ̣ܢ. ܝܬܝܪ ܡ̣ܢ ܟܠܗܘܢ ܒܢܝ̈ܢܫܐ ܛܘܒ̈ܬܢܝܝܢ. ܝܬܝܪ ܕܝܢ ܕܘܝ̈ܐ ܗܘܝܢ. ܟܕ ܡ̣ܢ ܕܪܓܐ ܕܪܒܘܬܗܘܢ ܢܦܠܝ̣ܢ. ܒܕܓܘܢ ܠܘ ܐܝܟ ܕܠܓܡܝ̣ܪ̈ܐ ܢܩܦܐ ܠܗܘܢ ܕܘܝܘܬܐ ܟܕ ܡܫܬܪܓܠܝܢ. ܐܠܐ ܐܝܟ ܕܠܚܣܝ̣ܪ̈ܐ. ܝܗܘܕܐ ܓܝܪ ܗ̇ܘ ܡܫܠܡܢܐ. ܟܕ ܐܬܦܪܬ ܠܘ ܐܝܟ ܫܠܝܚܐ ܕܘܝܘܬܐ ܗ̇ܝ ܠܗ ܓܕܫܬ݀. ܐܠܐ ܐܝܟ ܕܠܝܬܝܪ ܟܦܘܪܐ ܘܥܘܠܐ.

 

ܫܪܝܐ ܕܣܥܝܐ ܬܪܝܢܐ:

 

ܓܡܝܪ̈ܐ ܡ̇ܢ ܟܕ ܡܬܪܡܝܢ ܠܡܕܓܠܘ̣. ܥܓܠ ܡܬܦܪܣܝ̣ܢ. ܘܠܟܠܢܫ ܡܬܝܕܥܝܢ ܕܡ̣ܢ ܟܕܘ ܢܦ̣ܠܘ. ܘܡܛܠܗܕܐ ܠܐ ܡܬܩܒ̈ܠܢܝܬܐ ܗܘ̈ܝܢ ܡܠܝ̈ܗܘܢ.

 

ܫܪܝܐ ܕܣܥܝܐ ܬܠܝܬܝܐ:

 

ܢܒܝ̈ܐ ܡ̇ܢ ܗ̇ܢܘܢ ܕܥܕܝ̣ܠܝܢ ܡ̣ܢ ܐܠܗܐ ܘܡ̣ܢ ܒܢܝ̈ܢܫܐ ܩܛܘܠܝ̈ܗܘܢ. ܗܠܝܢ ܫܪܝܪ̈ܐ ܐܢܘܢ ܕܕܠܐ ܙܐܦܐ ܡܗܠܟܝ̣ܢ ܒܐܘܪܚܐ ܕܐܠܗܐ. ܘܠܘ ܗ̇ܢܘܢ ܕܡܣܛܝܘ ܐܣܛܝ̣ܘ ܡ̣ܢ ܫܒܝ̣ܠ ܫܪܪܐ. ܘܠܐܠܗܐ ܐܪܓܙܘ ܒܥܒܕܝ̈ܗܘܢ ܒܝ̈ܫܐ ܕܐܝܟ ܗܠܝܢ ܓܝܪ ܗ̣ܘ ܐܠܗܐ ܫܘܒܚܐ ܠܛܝܒܘܬܗ. ܠܐܒܕܢܐ ܐܫܠܡ ܐܢܘܢ. ܐܦ ܓܝܪ ܘܗ̣ܘ ܐܠܝܐ ܣܓܝ̈ܐܐ ܡ̣ܢ ܕܐܟܘܬܗܘܢ ܐܘܒܕܘ.

 

ܫܪܝܐ ܕܣܥܝܐ ܪܒܝܥܝܐ:

 

ܐܡܪܝܢܢ ܕܢܒܝ̈ܐ ܘܫܠܝ̈ܚܐ ܘܣܗ̈ܕܐ. ܟܡܐ ܕܐܦ ܗ̣ܢܘܢ ܒܢܦ̈ܫܬܗܘܢ ܙܗܝ̣ܪܝ̣ܢ ܡ̣ܢ ܫܘܪ̈ܥܬܐ. ܡܬܡܨܝܢ ܠܡܙܗܪܘ ܠܩܘ̣ܛܢܐ. ܐܢܕܝܢ ܐܝܟ ܒܢܝ̈ܢܫܐ ܚܫܘ̈ܫܐ ܢܦܠܘܢ. ܐܦ ܡ̣ܢ ܗ̇ܝ ܕܢܠܦܘܢ ܘܢܪܬܘܢ ܘܢܟܘܢܘܢ ܡܬܟܠܝܢ܀

 

 

 

 

 

 

 

 

     #1 

 

ܫܬܐܣܬܐ ܬܪܥܣܝܪܝܬܐ

 

ܦܪܕܝܣܐ ܕܥܕܝܢ ܘܫܪܟܐ ܕܬܐܪ̈ܝܐܣ ܕܠܗ ܠܩܘܡܐ ܗܢܐ ܒܝܬܝܝ̈ܢ. ܘܒܗ ܐܝܬ ܩܦ̈ܠܐܐ ܐܪܒܥܐ ܩܦܠܐܘܢ ܩܕܡܝܐ ܡܛܠ ܬܐܘܪܝܐ ܕܡܛܠ ܡܢܝܘܬܗ ܕܦܪܕܝܣܐ܆ ܘܒܗ ܐܝܬ ܦܣܘ̈ܩܐ ܐܪܒܥܐ. ܦܣܘܩܐ ܩܕܡܝܐ ܡܛܠܗ̇ܝ ܕܡܢܐ ܗ̱ܘ ܥܕܝܢ. ܘܡܢܐ ܦܪܕܝܣܐ. ܘܕܒܐܝ̇ܕܐ ܐܢܘܢ ܦܢܝ̣ܬܐ. ܘܒܗ ܐܝܬ ܥܘܬܕܐ ܘܢܝ̈ܫܐ ܬܪܝܢ. ܩܕܡܝܬ݀ ܥܘܬܕܐ

 

 

 

ܙܕܩ ܠܡܕܥ ܕܡܠܦܢ̈ܐ ܩܕܝ̈ܫܐ ܐܡܪܝܢ. ܕܥܕܝܢ ܐܝܬܘܗܝ. ܐܬܪܐ ܡܕܡ ܪܒܐ ܘܪܘܝ̣ܚܐ ܕܡܥܕܢ ܘܣܒܝ̣ܣ ܒܐܝ̈ܠܢܐ ܣܓܝ̈ܐܐ ܘܡܫܚ̈ܠܦܐ. ܒܡܕܢܚܝܗ̇ ܕܐܪܥܐ. ܘܒܡܨܥܬܗ ܕܗܢܐ ܐܝܬ ܐܬܪܐ ܡܕܡ ܗ̇ܘ ܐܝܢܐ ܕܐܝܬܘܗܝ ܓܐܐ ܘܦܐܐ ܘܗܕܝ̣ܪ ܘܪܓܝ̣ܓ ܠܚܙܬܐ. ܕܗܘܝܘ ܦܪܕܝܣܐ. ܘܐܟܙܢܐ ܕܐܬܪܐ ܕܥܕܝܢ ܝܬܝܪ ܡܝܬܪ ܡ̣ܢ ܟܠܗ̇ ܐܪܥܐ. ܗܟܢܐ ܘܦܪܕܝܣܐ ܝܬܝܪ ܡܝܬܪ ܡ̣ܢ ܟܠܗ ܐܬܪܐ ܕܥܕܝܢ.

 

 

 

ܢܝܫܐ ܩܕܡܝܐ ܡܛܠ ܣܗܕ̈ܘܬܐ ܡܫܪܪ̈ܢܝܬܗ̇ ܕܗ̇ܝ ܕܒܡܕܢܚܐ ܗ̱ܘ ܦܪܕܝܣܐ. ܣܗܕܘܬܐ ܩܕܡܝܬܐ

 

ܩܕܝܫܐ ܒܣܝܠܠܝܘܣ ܒܡܐܡܪܐ ܗ̇ܘ ܕܥܠ ܗ̇ܝ ܕܟܠܡܕܡ ܗܘܝܬܘܢ ܡܘܕܝܢ. ܡܛܠܗܢܐ ܠܡ ܚܘܪܐ ܕܚܙܬܐ ܕܨܠܝܒܐ ܠܡܕܢܚܐ ܥܒܕܝ̣ܢܢ. ܐܝܟܢܐ ܕܠܘܥܕܗ ܕܦܪܕܝܣܐ ܢܚܘ̣ܪ̈ܢ ܥܝܢܝ̈ܢ. ܘܒܗܕܐ ܢܒܥܐ ܐܬܪܢ ܩܕܡܝܐ.

 

ܣܗܕܘܬܐ ܕܬܪܬܝܢ:

 

ܒܡܐܡܪܐ ܕܥܠ ܐܒܘܢ ܕܒܫܡܝܐ. ܐܡܬܝ ܠܡ ܕܠܡܕܢܚܐ ܢܦܫܢ ܢܗܦܘܟ. ܠܘ ܒܠܚܘܕ ܕܬܡܢ ܐܝܬܘܗܝ ܐܠܗܐ ܠܐ ܡܬܚܙܝܢܐ. ܗ̇ܘ ܕܒܟܠܕܘܟ ܗ̣ܘ. ܘܠܘ ܒܚܕܐ ܡ̣ܢ ܡܢܘ̈ܬܐ ܐܡܝ̣ܢܐܝܬ ܡܬܕܪܟ. ܡܛܠ ܕܠܘ ܠܐ ܫܘܝܐܝܬ ܐܚܝ̣ܕ. ܐܠܐ ܐܟܡ̇ܢ ܕܒܡܕܢܚܐ. ܐܬܪܢ ܩܕܡܝܐ ܐܝܬܘܗܝ. ܠܚܝ̈ܐ ܕܝܢ ܐܡ̇ܪ ܐ̱ܢܐ ܕܒܦܪܕܝܣܐ ܕܡܢܗܘܢ ܢܦܠܢܢ. ܢܨܒ ܓܝܪ ܐܠܗܐ ܦܪܕܝܣܐ ܒܥܕܝܢ ܒܡܕܢܚܐ. ܡܐ ܗܟܝܠ ܕܠܘܬ ܡܕܢܚܐ ܚܘܪܢ ܢܬܠܐ. ܠܡܦܘܠܬܐ ܕܡ̣ܢ ܐܬܪ̈ܘܬܐ ܗ̇ܢܘܢ ܕܬܡܢ ܢܗܝܪ̈ܐ ܘܡܠܝܝ̈ ܛܘ̈ܒܐ ܒܡܕ̈ܥܝܢ ܢܣ̇ܒܝ̣ܢܢ. ܒܙܕܩܐ ܕܐܝܟ ܗܕܐ ܒܥܘܬܐ ܡܩܪܒܝ̣ܢܢ.

 

ܣܗܕܘܬܐ ܕܬܠܬ:

 

ܩܕܝܫܐ ܣܐܘܝܪܐ ܒܡܐܡܪܐ ܗ̇ܘ ܕܡܛܠܡܢܐ ܣܓܕܝܢܢ ܠܡܕܢܚܐ. ܡܛܠ ܠܡ ܣܓܕܝܢܢ ܒܡܕܢܚܐ ܐܝܬܘܗܝ ܗ̣ܘܐ. ܘܡ̣ܢ ܬܡܢ ܢܦܩܢܢ. ܘܡܣܟܝܢܢ ܕܠܐܬܪܢ ܩܕܡܝܐ ܢܗܦܘܟ.

 

 

 

ܢܝܫܐ ܬܪܝܢܐ ܡܛܠܗ̇ܝ ܕܐܡ̣ܪ ܩܕܝܫܐ ܡܪܝ ܐܦܪܝܡ ܕܡܚܕܪ ܚܕܝ̣ܪ ܦܪܕܝܣܐ ܠܟܠܗ̇ ܐܪܥܐ

 

ܐܡ̣ܪ ܓܝܪ ܗ̣ܘ ܩܕܝܫܐ ܒܚܕ ܡ̣ܢ ܡܕܪ̈ܫܘܗܝ ܗܟܢܐ. ܘܡܛܠ ܕܪܚܝ̣ܩܐ ܚܙܬܗ ܕܦܪܕܝܣܐ. ܘܠܐ ܐܝܬ ܠܗܝܢ ܡܬܚܐ ܠܥܝ̈ܢܐ ܕܢܡܛܝܢܝ̈ܗܝ. ܨܪܬܗ ܦܫܝ̣ܩܐܝܬ ܕܐܡܪܚܬ݀ ܕܠܝ̣ܠܐܝܬ. ܒܗ̇ܝ ܚܘܓܬܗ ܕܣܗܪܐ ܕܗ̇ܘܝܐ ܢܚܙܝܘܗܝ ܠܦܪܕܝܣܐ. ܕܗܟܢ ܟܪܝ̣ܟ ܐܦ ܗ̣ܘ. ܘܝܡܐ ܐܦ ܝܒܫܐ ܚܒܝ̣ܫܝ̣ܢ ܠܓܘ ܡܢܗ.

 

ܗܦܟܬܐ:

 

ܐܡܪܝܢܢ ܐܠܘ ܦܪܕܝܣܐ ܕܒܐܪܥܐ ܗ̣ܘܐ ܘܠܘ ܒܪܘܡܐ. ܐܝܟܢܐ ܐܡ̣ܪ ܦܘܠܘܣ. ܕܐܬܚܛܦ ܠܫܡܝܐ ܕܬܠܬܐ ܘܠܦܪܕܝܣܐ.

 

ܦܘܢܝܐ:

 

ܐܡܪܝܢܢ ܕܠܘ ܚܕ ܗ̣ܘ ܒܠܚܘܕ ܚܙܘܐ ܕܐܬܚܛܦ ܒܗ ܦܘܠܘܣ. ܐܠܐ ܣܓܝ̈ܐܐ. ܘܝ̣ܕܝ̣ܥܐ ܗܕܐ ܡ̣ܢ ܗ̇ܝ ܕܐܡ̣ܪ ܕܐܬܐ ܐ̱ܢܐ ܠܚܙ̈ܘܢܐ ܘܠܓܠܝܢܘ̈ܗܝ ܕܡܪܢ. ܒܕܓܘܢ ܡܨܝܐ ܕܟܕ ܐܬܚܛܦ ܠܫܡܝܐ. ܐܬܚܛܦ ܬܘܒ ܒܬܪܟܢ ܠܦܪܕܝܣܐ. ܘܐܢ ܢܫܦ ܘܢܫܠܡ. ܕܒܚܕܐ ܙܒܢ̱ܬܐ ܐܬܚܛܦ ܠܫܡܝܐ ܘܠܦܪܕܝܣܐ. ܐܠܐ ܡܛܠܡܢܐ ܠܐ ܡܨܝܐ ܕܢܐܡܪ. ܕܠܫܘܦܪܐ ܗ̇ܘ ܬܡܝ̣ܗܐ ܘܗܕܝ̣ܪ ܒܟܠ ܕܡܠܐܟ̈ܐ. ܐܘ ܕܟܘܟ̈ܒܐ ܕܗܪܬܡܢ܆ ܦܪܕܝܣܐ ܩܪܐ. ܘܕܠܘ ܒܫܡܝܐ ܗ̱ܘ ܦܪܕܝܣܐ. ܐܠܐ ܥܠ ܐܪܥܐ. ܝ̣ܕܝ̣ܥܐ ܡ̣ܢ ܣܗܕ̈ܘܬܐ ܟܬܒܝ̈ܬܐ ܗܠܝܢ ܕܐܝܬܝ̣ܢܢ. ܘܡ̣ܢ ܐ̱ܚܪ̈ܢܝܬܐ ܕܡܛܠ ܐܪܝ̣ܟܘܬܐ ܫܒܩܢ ܐܢܝܢ. ܘܕܥܠܝܐ ܐܪܥܗ ܕܦܪܕܝܣܐ. ܡ̣ܢ ܐܪܥܐ ܗܕܐ ܕܒܗ̇ ܫܒܥܐ ܗܠܝܢ ܩܠܝ̣̈ܡܐ. ܡܫܘܕܥ ܦܝܠܠܘܟܣܝܢܘܣ ܕܡܒܘܓ ܒܡܐܡܪܐ ܕܥܠ ܬܐܘܪܝܐ ܕܐܝܠܢܐ ܕܚܝ̈ܐ ܟܕ ܐܡ̇ܪ. ܦܪܕܝܣܐ ܠܡ ܐܬܢܨܒ ܡ̣ܢ ܐܠܗܐ. ܕܢܗܘܐ ܡܨܥܝܐ. ܘܡܢܗ ܘܠܥܠ ܫܡܝܐ. ܘܗܠܝܢ ܕܠܗ ܠܚ̈ܡܢ ܘܡܢܗ ܘܠܬܚܬ ܐܪܥܐ. ܘܐܝܠܝܢ ܕܠܗ̇ ܢܩ̈ܦܢ.

 

 

 

ܦܣܘܩܐ ܬܪܝܢܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠܗ̇ܝ ܕܥܦܝ̣ܦܐ ܗ̱ܘ ܦܪܕܝܣܐ ܪܘܚܢܝܐ ܘܓܘܫܡܢܝܐ. ܘܒܗ ܐܝܬ ܥܘܬܕܐ ܘܢܝ̈ܫܐ ܬܪܝܢ. ܩܕܡܝܬ ܥܘܬܕܐ

 

ܐܡܪܝܢܢ ܕܒܪܢܫܐ ܡ̇ܢ ܟܕ ܡ̣ܢ ܬܪܝܢ ܟܝ̈ܢܐ ܕܡܫܚܠܦܝ̣ܢ. ܪܘܚܢܝܐ ܘܓܘܫܡܢܝܐ ܡܪܟܒ. ܢܦܫܐ ܐܡ̇ܪ ܐ̱ܢܐ ܘܦܓܪܐ. ܡ̣ܢ ܐܠܨ̈ܬܐ ܕܐܦ ܫܘܡܠܝܗ ܥܦܝ̣ܦܐ ܢܗܘܐ. ܢܗܘܐ. ܟܐܡܬ݀ ܗܢܝ̈ܐܘܬܐ ܡܫܡܠܝܢ̈ܝܬܗ̇ ܕܢܦܫܐ. ܕܐܝܬܝܗܝܢ ܒܗ̇ܝ ܕܐܝܬܝܗܝܢ. ܘܗܢܝ̈ܐܘܬܐ ܡܫܡܠܝܢ̈ܝܬܗܘܢ ܕܪ̈ܓܫܐ ܦܓܪ̈ܢܝܐ. ܡܬܚܙܝ̈ܢܐ ܐܡ̇ܪ ܐ̱ܢܐ ܪ̈ܓܝܓܐ. ܘܡܫܬܡ̈ܥܢܐ ܗܢܝ̈ܐܐ. ܘܡܬܬܣܝ̣̈ܩܢܐ ܒܣܝ̈ܡܐ. ܘܙܢܐ ܗ̇ܘ ܩܕܡܝܐ. ܦܪܕܝܣܐ ܪܘܚܢܝܐ ܡܬܩܪܐ ܘܙܢܐ ܗ̇ܘ ܬܪܝܢܐ. ܦܪܕܝܣܐ ܓܘܫܡܢܝܐ.

 

 

 

ܢܝܫܐ ܩܕܡܝܐ ܡܛܠ ܣܗܕ̈ܘܬܐ ܟܬܒܝ̈ܬܐ ܡܫܪܪ̈ܢܝܬܗ̇ ܕܦܪܕܝܣܐ ܪܘܚܢܝܐ. ܣܗܕܘܬܐ ܩܕܡܝܬܐ

 

ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܒܡܐܡܪܐ ܕܥܠ ܝܠܕܐ܆ ܠܗܢܐ ܣܡ ܒܦܪܕܝܣܐ. ܡܘܢ ܕܗ̣ܘ ܕܐܝܬܘܗܝ ܗ̣ܘܐ ܗܢܐ ܦܪܕܝܣܐ. ܘܒܡܫܠܛܘܬ ܒܝܬܐ ܝܩܪܗ. ܐܝܟܢܐ ܕܬܗܘܐ ܛܒܬܐ ܠܘ ܒܨܝ̣ܪ ܕܗ̇ܘ ܕܓܒܐ. ܐܘ ܕܗ̇ܘ ܕܝܗܒ ܙܪ̈ܥܐ. ܐܟܪܐ ܕܢܨ̈ܒܬܐ ܠܐ ܡܝܘ̈ܬܐ. ܕܡܚܫ̈ܒܬܐ ܐܠܗܝ̈ܬܐ ܟܒܪ܇ ܘܕܗܠܝܢ ܕܝܬܝܪ ܦܫܝ̣̈ܛܢ. ܘܕܗܠܝܢ ܕܝܬܝܪ ܡܫܡ̈ܠܝܢ. ܥܪܛܠܝܐ ܒܦܫܝ̣ܛܘܬܐ ܘܒܚܝ̈ܐ ܕܠܐ ܐܘܡܢܘ. ܘܣܛܪ ܡ̣ܢ ܟܠ ܬܚܦܝ̣ܬܐ ܘܬܟܣܝ̣ܬܐ. ܕܐܝܟ ܗܢܐ ܓܝܪ ܦܐܐ ܗ̣ܘܐ ܕܢܗܘܐ ܐܝܬܘܗܝ ܗ̇ܘ ܕܡ̣ܢ ܫܘܪܝܐ.

 

ܣܗܕܘܬܐ ܕܬܪܬܝܢ:

 

ܓܪܝܓܘܪܝܘܣ ܕܢܘܣܐ ܒܡܐܡܪܐ ܕܥܠ ܬܘܩܢܗ ܕܒܪܢܫܐ. ܡܕܝܢ ܕܢܨܒܬܗ ܕܐܠܗܐ ܗ̇ܝ ܕܒܥܕܝܢ: ܒܘܣܡܐ ܕܝܢ ܗ̣ܝ ܥܕܝܢ ܡܬܦܫܩܐ. ܦܐܪܐ ܕܫܘܐ ܠܗ ܙܕܩ ܠܡܣܬܟܠܘ̣. ܘܕܠܐ ܢܬܦܠܓ ܕܒܝܕ ܗܢܐ ܡܬܬܪܣܐ ܒܪܢܫܐ. ܘܠܘ ܕܡ̣ܢ ܟܠ ܦܪܘܣ ܗܕܐ ܬܪܣܝ̣ܬܐ ܥܒܘܪܬܐ ܘܡܫܬܪܝܢܝ̣ܬܐ ܢܣܬܟܠܝ̣ܘܗܝ ܠܕܘܝܪܐ ܗ̇ܘ ܕܒܦܪܕܝܣܐ.

 

ܣܗܕܘܬܐ ܕܬܠܬ:

 

ܦܝܠܠܘܟܣܝܢܘܣ ܕܡܒܘܓ ܒܡܐܡܪܐ ܕܥܠ ܬܐܘܪܝܐ ܕܐܝܠܢܐ ܕܚܝ̈ܐ ܐܡܪ. ܬܐܘܪ̈ܝܐܣ ܪ̈ܘܚܢܝܬܐ ܐܝܬ ܠܗ ܠܦܪܕܝܣܐ.

 

ܢܝܫܐ ܕܐܪܒܥ:

 

ܚܣܝܐ ܝܥܩܘܒ ܐܘܪܗܝܐ ܒܡܐܡܪܐ ܕܥܠ ܬܐܘܠܘܓܝܐ ܐܡ̣ܪ. ܕܦܠܐܬܢܐܝܬ ܡܠܠ ܡܘܫܐ ܥܠ ܦܪܕܝܣܐ.

 

 

 

ܢܝܫܐ ܬܪܝܢܐ ܡܛܠ ܦܪܕܝܣܐ ܓܘܫܡܢܝܐ ܗ̇ܘ ܕܒܝܕ ܐܪܒܥ ܣܗܕ̈ܘܢ ܡܫܬܪܪ. ܣܗܕܘܬܐ ܩܕܡܝܬܐ

 

ܐܝܘܐܢܢܝܣ ܒܡܐܡܪܐ ܗ̇ܘ ܕܥܠ ܐܝܠܢܐ ܕܝ̣ܕܥܬܐ ܐܡ̇ܪ. ܕܚܙܬܗ ܠܡ ܥܝܢܗ ܕܐܕܡ ܠܦܪܕܝܣܐ. ܘܫܡܥܬܗ ܐܕܢܗ. ܘܣܠܩ ܥܠ ܠܒܗ.

 

ܣܗܕܘܬܐ ܕܬܪܬܝܢ:

 

ܩܕܝܫܐ ܩܘܪܝܠܠܘܣ ܒܦܘܫܩܐ ܕܐܫܥܝܐ ܐܡ̣ܪ. ܕܥܡܘܪܐ ܩܕܡܝܐ ܕܩ̣ܢܬ݀ ܝܗܘܕ ܠܐܕܡ ܡ̣ܢ ܒܬܪ ܕܢܦܩ ܡ̣ܢ ܦܪܕܝܣܐ.

 

ܣܗܕܘܬܐ ܕܬܠܬ:

 

ܩܕܝܫܐ ܣܐܘܝܪܐ ܒܡܐܡܪܐ ܕܟܒ̄ ܕܐܦܝܬܪ̈ܘܢܝܘ ܐܡ̇ܪ. ܠܦܪܕܝܣܐ ܥܝܢܗ ܕܐܕܡ ܚܙܬܗ ܘܐܕܢܗ ܫܡܥܬܗ. ܫܡܥ ܗ̣ܘܐ ܓܝܪ ܕܡ̣ܢ ܟܠ ܐܝܠܢ̈ܐ ܕܒܦܪܕܝܣܐ ܡܐܟܠ ܬܐܟܘܠ. ܘܕܗ̇ܘ ܚܕ ܐܝܠܢܐ. ܚܙܬܗ ܡ̇ܢ ܐܝܬܝܗ̇ ܗܘܬ݀ ܠܗ. ܡܐܟܘܠܬܐ ܕܝܢ ܕܡܢܗ܆ ܠܐ ܡܦܣܐ ܗܘܬ݀ ܠܗ.

 

ܣܗܕܘܬܐ ܕܐܪܒܥ:

 

ܝܘܚܢܢ ܝܚܝܕܝܐ ܒܡܐܡܪܐ ܕܥܠ ܥܠܬܐ ܕܥܠܡܐ ܗܢܐ ܐܡ̣ܪ. ܘܠܐ ܐ̱ܢܫ ܢܣܒܪ. ܕܐܝܠܢܐ ܕܒܦܪܕܝܣܐ ܠܐ ܗܘ̣ܘ ܦܓܪ. ܡܠܬܐ ܐܠܗܝܬܐ ܡܢܗܪܐ ܠܝ̣ܕܥܬܗ ܕܒܝܕ ܡܘܫܐ ܪܫܡܬ݀ ܥܘܡܪܗ ܕܦܪܕܝܣܐ. ܫܩܠܬ݀ ܠܡ ܚܘܐ ܦܐܪܐ ܘܐܟܠܬ݀ ܘܐܝܟܢܐ ܩܛܦܬ݀ ܡܕܡ ܕܠܐ ܡܬܓܫܫ. ܘܫܩܠܬ݀ ܡ̣ܢ ܡܕܡ ܕܪܘܚܢܝܐ ܗ̱ܘ. ܠܐ ܡܬܦܠܓܢܐ ܗ̱ܘ. ܡܛܠ ܡܫܠܡܢܘܬܐ ܕܩܢܘܡܗ.

 

ܗܦܟܬܐ:

 

ܐܡܪܝܢ ܕܚܕ ܗ̣ܘ ܦܪܕܝܣܐ ܗ̣ܘ ܪܘܚܐ ܩܕܝܫܐ ܕܒܡܘܫܐ ܡܠܠ ܡܠܦ. ܟܕ ܦܪܕܝܣܐ ܘܠܘ ܦܪ̈ܕܝܣܐ ܐܡ̇ܪ. ܘܕܗ̣ܘ ܗܢܐ ܓܘܫܡܢܝܐ ܗ̱ܘ ܗ̣ܝ ܬܫܥܝ̣ܬܐ ܕܥܠܘܗܝ ܡܒܕܩܐ. ܒܕܓܘܢ ܐܢ ܗܟܢܐ ܗ̱ܘ ܐܝܟ ܕܡܬܢܐ ܟܬܒܐ. ܠܡܢܐ ܪܘܚܢܝܐ ܙܕܩ ܕܢܣܬܟܠܝ̣ܘܗܝ. ܘܐܢ ܠܘ ܗܟܢܐ ܗ̱ܘ. ܐܠܐ ܒܕܡܘ̣ܬܐ ܓܘܫܡܢܝܬܐ ܡܬܠܗ ܡܘܫܐ ܘܒܛܘܦܣܐ ܓܘܫܡܢܝܐ ܡܬܪܓܫܢܐ ܦܠܬܗ ܟܕ ܪܘܚܢܝܐ ܗ̱ܘ. ܠܡܢܐ ܙܕܩ ܠܡܬܐܠܨܘ ܘܠܡܐܡܪ ܕܒܡܕܢܚܐ ܗ̱ܘ. ܐܘ ܠܘ ܗܟܢܐ. ܐܠܐ ܠܟܠܗ̇ ܐܪܥܐ ܟܪܝ̣ܟ. ܘܓܠܝܐ ܕܒܘ̈ܚܢܐ ܕܐܝܟ ܗܠܝܢ ܟܠܗܘܢ ܒܛܝ̣̈ܠܐ ܐܢܘܢ.

 

ܦܘܢܝܐ:

 

ܐܡܪܝܢܢ ܕܠܐ ܐ̱ܢܫ ܡ̣ܢ ܡܠܦܢ̈ܐ ܐܡ̣ܪ. ܕܦܪܕܝܣܐ ܓܘܫܡܢܝܐ ܠܐ ܐܬܒܪܝ̣ ܣܘܥܪܢܐܝܬ. ܐܘ ܕܡܬܠܐ ܗ̱ܘ ܒܠܚܘܕ ܘܦܠܐܬܐ ܫܪܒܗ ܕܦܪܕܝܣܐ. ܐܠܐ ܡܠܦܢ̈ܐ ܗ̇ܢܘܢ ܕܦܪܕܝܣܐ ܪܘܚܢܝܐ ܐܠܦܘ ܠܢ. ܗܕܐ ܒܠܚܘܕ ܫܘܕܥܘ. ܕܒܦܪܕܝܣܐ ܗ̇ܘ ܓܘܫܡܢܝܐ ܕܡ̣ܢ ܫܘܪܝܐ ܡܛܠ ܐܕܡ ܐܬܒܪܝ̣. ܐ̱ܪܙܐ ܡܕܡ ܕܒܘܣܡܐ ܗܘܢܢܝܐ ܕܠܗ ܩܪܝܢܢ ܦܪܕܝܣܐ ܪܘܚܢܝܐ. ܕܚܬܝ̣ܡ ܗ̣ܘܐ ܘܨܪܝ̣ܪ. ܐܘܟܝܬ ܓܢܝ̣ܙ ܗ̣ܘܐ ܘܛܡܝ̣ܪ. ܐܝܟ ܗ̇ܝ ܕܐܬܐܡܪܬ݀. ܕܡܫܟܢ ܙܒܢܐ ܗ̇ܘ ܕܒܙܒܢ ܠܥܕܬܐ ܗܕܐ ܕܝܘܡܢܐ ܡܛܦܣ ܗ̣ܘܐ. ܘܡܛܠܗܕܐ ܠܐ ܐܠܨܐ ܕܢܐܡܪ ܕܡܫܟܢܙܒܢܐ ܠܐ ܗܘ̣ܐ ܒܣܘܥܪܢܐ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠܗ̇ܝ ܕܒܐܝܢܐ ܡ̣ܢ ܗܠܝܢ ܫܬܐ ܝܘܡܝ̈ܢ ܐܬܒܪܝ̣ ܦܪܕܝܣܐ. ܘܕܡܛܠܡܢܐ ܐܬܒܪܝ. ܘܕܐܢ ܕܡ̇ܐ ܒܒܪܝܬܗ ܠܫܪܟܐ ܕܒܪ̈ܝܬܐ

 

ܕܒܐܝܢܐ ܕܝܢ ܝܘܡܐ ܒܪܝܗܝ ܐܠܗܐ ܠܦܪܕܝܣܐ. ܠܐ ܓܠܐ ܩܪܝ̣ܚܐܝܬ ܐܠܗܝܐ ܡܘܫܐ. ܟܕ ܟܠ ܚܕܐ ܚܕܐ ܡ̣ܢ ܒܪ̈ܝܬܐ ܕܒܐܝܢܐ ܝܘܡܐ ܐܬܬ݀ ܠܗܘܝܐ ܡܡܠܠ. ܐܠܐ ܗ̣ܘ ܗܘܢܗ ܕܣܘܥܪܢܐ ܣܗܕ. ܕܒܝܘܡܐ ܬܠܝܬܝܐ ܗ̇ܘ ܕܒܗ ܒܪܐ ܐܠܗܐ ܥܣܒܐ ܘܢܨ̈ܒܬܐ ܘܐܝ̈ܠܢܐ. ܒܗ ܟܕ ܒܗ ܐܦ ܠܦܪܕܝܣܐ ܗ̇ܘ ܕܠܘ ܡܕܡ ܗ̣ܘ ܐ̱ܚܪܝܢ ܣܛܪ ܡ̣ܢ ܐܬܪܐ ܕܗܕܝ̣ܪ ܒܢܨ̈ܒܬܐ ܘܐܝܠܢ̈ܐ ܒܪܝܗܝ. ܘܕܡܛܠ ܐܕܡ ܐܬܒܪܝ ܐܝܟ ܕܠܥܡܘܪܝܗ ܘܕܘܝܪܗ ܘܢܝܚܗ܆ ܠܐ ܐ̱ܢܫ ܡܬܦܫܟ.

 

ܗܦܟܬܐ:

 

ܐܡܪܝܢ ܐܢܗܘ ܕܦܪܕܝܣܐ ܒܝܘܡܐ ܬܠܝܬܝܐ ܐܬܒܪܝ̣ ܘܐܕܡ ܒܝܘܡܐ ܫܬܝܬܝܐ. ܐܝܟܢܐ ܡ̣ܢ ܒܬܪ ܥܘܗܕܢܐ ܕܒܪܝܬܗ ܕܐܕܡ ܐܝܬܝ̣ ܐܠܗܐ ܥܘܗܕܢܗ ܕܦܪܕܝܣܐ ܒܐܘܪܝܬܐ.

 

ܦܘܢܝܐ:

 

ܐܡܪܝܢܢ ܡܛܠ ܗ̇ܝ ܕܫܪܒܗ ܕܦܪܕܝܣܐ ܥܠ ܡܠܬܐ ܦܬܝ̣ܬܐ ܣܢܝ̣ܩ ܗ̣ܘܐ. ܡܛܠܗܕܐ ܠܚܪܬܐ ܒܬܪ ܫܘܠܡ ܒܪܝ̣ܬ ܒܪ̈ܝܬܐ ܟܠܗܝܢ ܐܝܬܝ̣ ܥܘܗܕܢܗ. ܘܕܒܟܝܢܗ ܡ̇ܢ ܡܕܡܐ ܕܡ̇ܐ ܦܪܕܝܣܐ ܠܫܪܟܐ ܕܒܪ̈ܝܬܐ. ܝ̣ܕܝ̣ܥܐ ܡ̣ܢ ܗ̇ܝ ܕܡ̣ܢ ܐܪܒܥܐ ܐܣܛܘ̈ܟܣܐ ܡܪܟܒ. ܘܡ̣ܢ ܗ̇ܝ ܕܢܨ̈ܒܬܗ ܘܐܝܠܢܘ̈ܗܝ. ܦܐܪ̈ܐ ܛܥܝ̣ܢܝ̣ܢ ܡܬܐܟܠܢ̈ܐ. ܘܒܦܩ̈ܚܐ ܘܛܪ̈ܦܐ ܡܗܕܪܝ̣ܢ. ܐܝܢ ܡܛܠ ܡܡܫܚܘ̣ܬ ܡܘܙܓܐ ܕܐܪܥܐ ܗ̇ܝ. ܘܨܠܝ̣ܠܘܬܗ ܕܐܐܪ ܗ̇ܘ ܘܫܦܝܘܬܗܘܢ ܕܡܝ̈ܐ ܗܠܝܢ. ܝܬܝܪ ܪ̈ܓܝܓܐ ܙܕܩ ܕܢܗܘܘܢ ܐܝܠܢܘ̈ܗܝ ܘܫܦܝܪ̈ܬܐ ܢܨ̈ܒܬܗ. ܘܗܢܝ̈ܐܐ ܦܐܪ̈ܘܗܝ. ܘܬܘܒ ܡܛܠܗ̇ܝ ܕܟܠܗ̇ ܫܢ̱ܬܐ ܗܪܬܡܢ ܚܕ ܡܘܙܓܐ ܫܘܝܐ ܘܬܐܕܢܝܐ ܩܢܐ. ܘܠܝܬ ܬܡܢ ܫܘܚ̈ܠܦܐ ܫܢ̱ܬܢܝ̈ܐ ܐܟܡܐ ܕܗܪܟܐ ܠܘܬܢ. ܠܐ ܣܟ ܓܝܙܝ̣ܢ ܦܐܪ̈ܐ ܘܛܪ̈ܦܐ ܡ̣ܢ ܐܝܠܢ̈ܐ ܗܠܝܢ. ܐܠܐ ܣܒܝ̣ܣܐܝܬ ܚܕ̈ܬܐ ܠܥܬܝ̈ܩܐ ܡܕܪܟܝ̣ܢ. ܐܟܡܐ ܕܒܡܕܡ ܕܡ̣ܢ ܐܝܠܢ̈ܐ ܠܘܬܢ. ܗܢܘ ܕܝܢ ܒܐܛܪ̈ܘܓܐ. ܘܕܡܛܠ ܐܝ̇ܕܐ ܥܠܬܐ ܡܣܩܡܐ ܗ̱ܘ ܡܘܙܓܐ ܕܐܬܪܐ ܗ̇ܘ. ܠܚܪܬܐ ܦܪܥܝ̣ܢܢ. ܒܝܕ ܡܠܬܐ ܟܝܢܝܬܐ.

 

ܗܦܟܬܐ:

 

ܐܡܪܝܢ ܐܢܗܘ ܕܦܪܕܝܣܐ ܡܛܠ ܕܘܝܪܗ ܕܐܕܡ ܐܬܒܪܝ̣. ܘܐܕܡ ܒܥܓܠ ܡܢܗ ܐܬܛܪܕ. ܐܪܐ ܟܝ ܐܝ̣ܩܝ̣ ܦܫ ܒܬܪ ܡܦܩܬܗ ܕܐܕܡ ܡܢܗ. ܘܣܪܝ̣ܩܐ ܘܣܦܝ̣ܩܐ. ܘܐܝܟܢܐ ܦܐܝܐ ܠܚܟܡܬܐ ܐܠܗܝܬܐ ܕܐܝܩܝ ܘܣܪܝ̣ܩܐ ܡܕܡ ܬܣܥܘܪ. ܝܬܝܪܐܝܬ ܐܝܟ ܦܪܕܝܣܐ ܕܝܬܝܪ ܡ̣ܢ ܟܠܡܕܡ ܓܘܫܡܢܝܐ ܦܐܐ ܘܓܐܐ ܘܫܒܝ̣ܚ ܘܗܕܝ̣ܪ ܐܝܟ ܕܐܡܪܝܢ ܐܢ̱ܬܘܢ.

 

ܦܘܢܝܐ:

 

ܐܡܪܝܢܢ ܕܠܘ ܐܝ̣ܩܝ̣ ܐܬܒܪܝ ܦܪܕܝܣܐ. ܘܐܦܢ ܒܥܓܠ ܢܦ̣ܩ ܡܢܗ ܐܕܡ ܘܐܟܣܘܪܝ̣ܣܬܝ̣ܢܐ ܗܘ̣ܐ. ܐܠܐ ܒܫܘܪܝܐ ܡ̇ܢ ܐܕܡ ܘܚܘܐ ܒܗ ܥܡ̣ܪܘ. ܘܒܬܪ ܡܦܩܬܗܘܢ ܢܦ̈ܫܬܐ ܕܙܕܝ̈ܩܐ ܐܟܙܢܐ ܕܐܒܗ̈ܬܐ ܗ̇ܢܘܢ ܕܠܐܠܗܐ ܫܦܪܘ. ܐܒܪܗܡ ܐܡ̇ܪ ܐ̱ܢܐ ܘܐܝܣܚܩ ܘܝܥܩܘܒ ܘܢܒܝ̈ܐ ܘܟܐܢ̈ܐ ܘܓܝܣܐ ܝܡܝܢܝܐ ܘܫܠܝ̈ܚܐ ܘܣܗ̈ܕܐ ܘܡܘܕ̈ܝܢܐ ܘܥܢ̈ܘܝܐ܆ ܒܗ ܕܝܪ̈ܝ ܘܐܦ ܡܕܝܪ̈ܢ. ܐܦ ܓܝܪ ܘܚܢܘܟ ܘܐܠܝܐ ܒܦܓܪ ܒܗ ܥܡܪܝ̣ܢ. ܗܠܝܢ ܡ̇ܢ܆ ܥܕܡܐ ܠܩܝܡܬܐ. ܒܬܪ ܩܝܡܬܐ ܕܝܢ܆ ܐܢܗܘ ܕܠܘ ܟܠܗܘܢ ܒܢܝ̈ܢܫܐ ܠܡܠܟܘܬܐ ܕܫܡܝܐ ܡܫܬܘܝܢ. ܐܦܠܐ ܟܠܗܘܢ ܬܘܒ ܠܫܘܢܩܐ ܫܘܠܝܐ ܘܫܐܕܢܝܐ ܐܘܟܝܬ ܠܚܫܘܟܐ ܒܪܝܐ ܡܫܬܠܡܝ̣ܢ. ܐܠܐ ܡܨܥܝ̈ܐ ܣܓܝ̈ܐ ܡܫܬܟܚܝܢ ܒܝܬ ܬܪ̈ܝܗܘܢ ܗܠܝܢ ܣܟ̈ܐ. ܠܐ ܪܚܝ̣ܩܐ ܐܢ ܒܢܝ̈ܢܫܐ ܐ̱ܢܫܝ̈ܢ܇ ܕܠܘ ܓܡܝ̣ܪ̈ܝ ܒܟܠ ܐܦܠܐ ܬܘܒ ܚܣܝ̣ܪ̈ܝ ܒܟܠ ܘܪ̈ܫܝܥܐ ܢܗܘܘܢ. ܠܕܘܝܪܐ ܥܠܡܝ̣ܢܝܐ ܕܒܦܪܕܝܣܐ ܢܫܬܘܘܢ. ܘܗ̇ܘ ܫܪܝܪܐ ܣܗܕ ܠܗ̇ܝ ܕܡܬܐܡܪܐ ܕܐܡ̣ܪ. ܕܐܘܢ̈ܐ ܗ̣ܘ ܦܪܕܝܣܐ ܢܗܘܐ.

 

 

 

ܚܣܝܐ ܡܘܫܐ ܒܪ ܟܐܦܐ ܐܡ̇ܪ ܕܣܪܝ̣ܩܐ ܘܣܦܝ̣ܩܐ ܦܐܫ ܦܪܕܝܣܐ ܒܬܪ ܩܝܡܬܐ. ܘܕܠܐ ܫܟܝܪܐ ܗܕܐ ܡܚܘܝܢ̈ܘܬܐ ܪ̈ܥܝ̣ܥܬܐ ܡܝܬܐ.

 

ܚܢܢ ܕܝܢ ܟܕ ܠܗ̇ ܠܒܛܝ̣ܠܘܬܐ ܚܟܝܡܬ݀ ܒܟܠ ܕܐܠܗܐ ܡ̣ܢ ܥܒܕ̈ܐ ܐܠܗܝ̈ܬܐ ܢܩܦܝ̣ܢܢ ܐܡܪܝܢܢ. ܕܠܝܬ ܡܕܡ ܐܝ̣ܩܝ̣ ܡ̣ܢ ܗܠܝܢ ܕܡ̣ܢ ܐܠܗܐ ܡܣܬܥܪ̈ܢ.

 

ܢܘܗܪܐ:

 

ܐܡܪܝܢܢ ܕܗ̇ܝ ܕܡܬܐܡܪܐ ܕܪܒܘܬܗ ܕܢܗܪܐ ܗ̇ܘ ܡܫܩܐ ܠܦܪܕܝܣܐ ܘܡܬܦܠܓ ܠܐܪܒܥܐ ܢܗܪ̈ܘܬܐ ܪܘܪ̈ܒܐ. ܗ̣ܝ ܡܫܘܕܥܐ ܠܪܒܘܬܗ ܘܪܘܝ̣ܚܘܬܗ ܕܦܪܕܝܣܐ. ܡܚܘܝܢܘܬܐ ܗ̱ܝ ܡܚܝ̣ܠܬܐ. ܒܗ̇ܝ ܕܐܠܘ ܐܪܥܗ ܕܦܪܕܝܣܐ ܗܢܐ ܟܠܗ ܪܒܐ ܗܘܬ݀. ܕܗ̇ܘ ܢܗܪܐ ܪܒܐ ܡܫܩܐ ܗ̣ܘܐ ܠܗ̇. ܙܕܩ ܗ̣ܘܐ ܕܠܐ ܡܕܡ ܝ̇ܬܪ ܗ̣ܘܐ ܡ̣ܢ ܗܠܝܢ ܘܢܦܩ ܗ̣ܘܐ ܡ̣ܢ ܦܪܕܝܣܐ. ܘܗܐ ܐܪܒܥܐ ܢܗܪ̈ܘܬܐ ܢܦܩܝ̣ܢ ܡܢܗ. ܢܗܪܐ ܓܝܪ ܪܒܐ ܟܕ ܥܒܪ ܒܕܘܟܬܐ ܡܕܡ ܘܡܫܩܐ ܠܗ̇. ܠܘ ܟܠܗ ܢܗܪܐ ܡܫܩܐ ܠܗ̇. ܐܠܐ ܡܢܬܐ ܡܢܗ̇. ܟܐܡܬ ܡܝ̈ܐ ܗ̇ܢܘܢ ܕܠܐ ܢܦܩܝܢ ܡܢܗ̇ ܕܕܘܟܬܐ ܗ̇ܝ ܒܠܚܘܕ. ܘܠܘ ܟܠܗܘܢ ܡܝ̈ܐ ܕܥܒܪܝ̣ܢ ܘܐܙܠ̱ܝܢ.

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܩܕܡܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠܗ̇ܝ ܕܐ̱ܚܪܬܐ ܗ̱ܝ ܡܠܟܘܬܐ ܕܫܡܝܐ ܘܐ̱ܚܪܬܐ ܦܪܕܝܣܐ

 

ܐܡܪܝܢܢ ܕܡܠܟܘܬܐ ܕܫܡܝܐ ܝ̣ܕܥܬܐ ܗ̱ܝ ܕܬܠܝܬܝܘܬܐ ܩܕܝܫܬܐ. ܘܡܬܘܡܝܬܐ ܗ̱ܝ ܘܪܘܚܢܝܬܐ ܘܫܡܝܢܝܬܐ. ܐܟܡܐ ܕܗ̣ܘ ܫܪܝܪܐ ܠܗ̇ܘ ܕܐܫܬܘܕܥ ܠܐܒܐ ܐܦ ܠܒܪܐ ܕܠܐ ܦܘܠܓ܆ ܩܠܝ̈ܕܝܗ̇ ܐܫܬܘܕܝ̣ ܠܡܬܠ. ܘܐܡ̣ܪ ܟܕ ܠܫܡܝܐ ܥܬܝܕ ܗ̣ܘܐ ܠܡܣܩ ܘܡ̣ܢ ܝܡܝܢ ܐܒܐ ܠܡܬܒ. ܕܐܙܠ ܐ̱ܢܐ ܕܐܛܝܒ ܠܟܘܢ ܐܬܪܐ. ܘܐܝܟܐ ܕܐܢܐ ܐܝܬܝ ܬܡܢ ܐܦ ܡܫܡܫܢܝ ܢܗܘܐ. ܘܐܡ̣ܪ ܬܘܒ ܡܠܟܘܬܐ ܕܫܡܝܐ ܗ̇ܝ ܕܡܛܝܒܐ ܡ̣ܢ ܩܕܡ ܬܪ̈ܡܝܬܗ ܕܥܠܡܐ. ܘܛܘܒܢܐ ܦܘܠܘܣ ܐܡ̣ܪ. ܕܝ̇ܕܥܝ̣ܢܢ ܓܝܪ ܕܐܢ ܒܝܬܢ ܕܒܐܪܥܐ ܗܢܐ ܕܦܓܪܐ ܡܫܬܪܐ. ܐܠܐ ܐܝܬ ܠܢ ܒܢܝܢܐ ܕܡ̣ܢ ܐܠܗܐ. ܒܝܬܐ ܕܠܐ ܥܒܝ̣ܕ ܒܐܝ̈ܕܝܐ ܒܫܡܝܐ ܠܥܠ. ܘܠܗ̇ ܠܚܟܡܬܐ ܕܐܠܗܐ ܗ̇ܝ ܕܡܟܣܝܐ ܗܘܬ݀. ܘܩܕܡ ܗ̣ܘܐ ܘܦܪܫܗ̇ ܐܠܗܐ ܡ̣ܢ ܩܕܡ ܥܠܡ̈ܐ ܠܫܘܒܚܐ ܕܝܠܢ. ܗ̇ܝ ܕܚܕ ܡ̣ܢ ܫܠܝ̈ܛܢܐ ܕܥܠܡܐ ܗܢܐ ܠܐ ܝܕܥܗ̇ ܟܕ ܡܡܠܠ ܒܐܪܙ. ܗ̣ܘ ܟܕ ܗ̣ܘ ܫܠܝܚܐ ܐܠܗܝܐ ܐܡ̣ܪ. ܕܥܝܢܐ ܠܐ ܚܙܬ݀ ܘܐܕܢܐ ܠܐ ܫܡܥܬ݀. ܘܥܠ ܠܒܐ ܕܒܪܢܫܐ ܠܐ ܣܠܩ. ܡܕܡ ܕܛܝܒ ܐܠܗܐ ܠܐܝܠܝܢ ܕܪܚܡܝ̣ܢ ܠܗ. ܘܝܘܚܢܢ ܝܚܝܕܝܐ ܐܡ̣ܪ ܒܡܐܡܪܐ ܩܕܡܝܐ ܕܥܠ ܥܠܡܐ ܚܕܬܐ. ܕܡܠܟܘܬܐ ܠܡ ܕܫܡܝܐ ܗ̇ܝ ܕܡܫܝܚܐ. ܠܐ ܗ̣ܘܐ ܬܚܝܬ ܪܩܝ̣ܥܐ. ܐܠܐ ܠܥܠ ܡ̣ܢ ܫܡܝܐ. ܐܝܟܐ ܕܛܟܣܝ̈ܣ ܘܚܝ̈ܠܐ ܩܝܡܝ̣ܢ. ܘܩܕܝܫܐ ܐܘܓܪܝܣ ܐܡ̣ܪ܇ ܐܢܗܘ ܕܡܠܟܘܬܐ ܕܫܡܝܐ. ܒܡܕܡ ܕܠܟܠ ܩܕܝ̣ܡ. ܘܠܟܠ ܡܣܝܟ ܡܬܝܕܥܐ. ܐܦ ܫܘܢܩܐ ܕܐܝܠܝܢ ܕܡܬܝܕܥܝܢ ܒܡܕܡ ܕܕܠܩܘܒܠܐ ܗ̱ܘ ܢܬܝܕܥ. ܘܗ̣ܘ ܟܕ ܗ̣ܘ ܬܘܒ ܐܡ̣ܪ. ܩܠܝ̣ܕܐ ܕܡܠܟܘܬܐ ܕܫܡܝܐ ܐܝܬܘܗܝ܆ ܡܘܗܒܬܐ ܕܪܘܚ. ܗ̇ܝ ܕܠܗܘܢܐ ܓܠܝܐ. ܬܐܘܪܝܐ ܕܦܘܠܚܢܐ ܪܘܚܢܐ ܘܠܣܘܟܠܐ ܕܒܟܝܢ̈ܐ. ܘܠܡ̈ܠܐ ܕܥܠ ܐܠܗܘܬܐ. ܘܗܠܝܢ ܡ̇ܢ ܡܠܟܘܬܐ ܕܫܡܝܐ. ܘܕܦܪܕܝܣܐ ܡ̇ܢ ܒܪܝܐ ܗ̱ܘ ܘܙܒܢܝܐ ܘܓܘܫܡܢܝܐ ܘܐܪܥܢܝܐ. ܗ̣ܘ ܡܘܫܐ ܥܡ ܟܠܗܘܢ ܢܒܝ̈ܐ ܘܡܠܦܢ̈ܐ ܣܦܩܝ̣ܢ ܠܡܚܘܝܘ.

 

 

 

ܗܦܟܬܐ:

 

ܐܡܪܝܢ ܐܢܗܘ ܕܦܪܕܝܣܐ ܥܦܝ̣ܦܐ ܗ̱ܘ ܠܘܬܟܘܢ. ܪܘܚܢܝܐ ܘܓܘܫܡܢܝܐ. ܘܦܪܕܝܣܐ ܪܘܚܢܝܐ ܠܒܘܣܡܐ ܗܘܢܢܝܐ ܗ̇ܘ ܕܒܬܐܘܪ̈ܝܐܣ ܐܠܗܝ̈ܬܐ ܗܘܐ ܠܗ̇ ܠܢܦܫܐ ܩܪܝܢ ܐܢ̱ܬܘܢ. ܘܡܠܟܘܬܐ ܕܫܡܝܐ ܠܗ ܟܕ ܠܗ ܠܒܘܣܡܐ ܝ̣ܕܥܬܢܝܐ ܘܗܘܢܢܝܐ ܡܟܢܝܢ ܐܢ̱ܬܘܢ ܕܦܪܕܝܣܐ ܪܘܚܢܝܐ ܗܘܝܘ ܡܠܟܘܬܐ ܕܫܡܝܐ. ܘܡܠܟܘܬܐ ܕܫܡܝܐ ܗ̣ܝ ܗ̣ܝ ܦܪܕܝܣܐ ܪܘܚܢܝܐ. ܐܠܐ ܐ̱ܚܪܢܐ ܣܝܡܝ̣ܢ ܐܢ̱ܬܘܢ ܠܦܪܕܝܣܐ ܪܘܚܢܝܐ ܘܐ̱ܚܪܬܐ ܠܡܠܟܘܬܐ ܕܫܡܝܐ.

 

ܦܘܢܝܐ:

 

ܐܡܪܝܢܢ ܕܐܦܢ ܦܪܕܝܣܐ ܪܘܚܢܝܐ ܒܘܣܡܐ ܗ̱ܘ ܕܗܘܢܐ ܕܒܝܕ ܬܐܪ̈ܝܐܣ ܘܡܠܟܘܬܐ ܕܫܡܝܐ ܗܟܘܬ ܘܒܘܣܡܐ ܕܗܘܢܐ ܕܒܝܕ ܝ̣ܕܥܬܐ ܕܗܘܝ̈ܐ ܟܝ̈ܢܐ ܠܡܐܡܪ ܐܣܛܘܟ̈ܣܢܝܐ ܦܫܝ̈ܛܐ ܘܩܕ̈ܡܝܐ. ܘܟܝ̈ܢܐ ܬܪ̈ܝܢܐ ܗ̇ܢܘܢ ܕܡܢܗܘܢ ܡܪܟܒܝ̣ܢ. ܢܨ̈ܒܬܐ ܠܡܐܡܪ ܘܚܝ̈ܘܬܐ ܘܟܘܟ̈ܒܐ ܘܡܘܙ̈ܠܬܐ ܘܙܘ̈ܥܐ ܟܝܢܝ̈ܐ ܟܝܬ ܘܨܒܝ̈ܢܝܐ ܕܗܢܐ ܟܠ. ܘܝ̣ܕܥܬܐ ܕܟܝ̈ܢܐ ܡܠܝ̣̈ܠܐ. ܢܦ̈ܫܬܐ ܠܡܐܡܪ ܐ̱ܢܫܝ̈ܬܐ ܘܛܟܣܝ̈ܣ ܕܡܠܐܟ̈ܐ. ܘܝ̣ܕܝ̣ܥܐ ܕܗܘܢܐ ܟܕ ܥܠ ܫܪܝܪܘܬܐ ܕܐܝܟ ܗܠܝܢ ܩ̇ܐܡ ܘܡܕܪܟ ܘܒܗܝܢ ܡܕܝܪ. ܒܘܣܡܐ ܠܘ ܙܥܘܪܐ ܩܢܐ. ܘܕܝܬܝܪ ܥܫܝ̣ܢܐ ܗܢܝܐܘܬܐ ܕܐܝܟ ܗܕܐ ܡ̣ܢ ܗܢܝܐܘܬܐ ܕܪ̈ܓܫܐ ܒܡܕܪܟܢܘܬܐ ܕܡܬܪ̈ܓܫܢܝܗܘܢ. ܗ̇ܢܘܢ ܕܠܬܪ̈ܬܝܗܝܢ ܢܣܝܘܗ̇܆ ܣ̇ܗܕܝ̣ܢ. ܘܗ̇ܢܘ ܦܪܕܝܣܐ ܪܘܚܢܝܐ. ܘܐܝܠܢܘ̈ܗܝ ܗܕܝ̣ܪ̈ܐ. ܘܦܐܪ̈ܘܗܝ ܫܦܝܪ̈ܐ ܘܛܪ̈ܦܘܗܝ ܬܗܝ̣ܪ̈ܐ ܘܫܒܛܘ̈ܗܝ ܕܡܝ̣ܪ̈ܐ. ܡܠܟܘܬܐ ܕܝܢ ܕܫܡܝܐ ܗ̇ܝ ܗ̣ܝ ܕܝܬܝܪ ܡܥܠܝܐ ܡ̣ܢ ܦܪܕܝܣܐ ܕܐܝܟ ܗܢܐ. ܟܐܡܬ ܝܕܥܬܐ ܕܟܝܢܐ ܠܚܘܕܝܐ ܘܐܠܗܝܐ ܕܒܬܠܝܬܝܘܬܐ ܕܩܢܘ̈ܡܐ ܡܬܝ̣ܕܥ. ܐܟܡܐ ܡܕܝܢ ܕܡܬܝܕܥܢܐ ܕܗܪܟܐ ܕܗܘܝܘ ܐܠܗܐ ܫܘܒܚܐ ܠܛܝܒܘܬܗ ܝܬܝܪ ܫܒܝ̣ܚ ܘܡܥܠܝ ܡ̣ܢ ܡܬܝܕ̈ܥܢܐ ܟܠܗܘܢ ܕܦܪܕܝܣܐ ܪܘܚܢܝܐ. ܐܦ ܗܢܝܐܘܬܐ ܕܒܗ ܝܬܝܪ ܡܥܠܝܬܐ ܡ̣ܢ ܗܢܝܐܘܬܐ ܕܗܪܬܡܢ ܙܕܩ ܕܬܗܘܐ. ܘܡ̣ܢ ܗܠܝܢ ܐܬܚܘܝ̣ ܕܐ̱ܚܪܬܐ ܗ̱ܝ ܡܠܟܘܬܐ ܕܫܡܝܐ ܘܐ̱ܚܪܢܐ ܦܪܕܝܣܐ ܪܘܚܢܝܐ. ܘܐܟܡܐ ܕܦܪܕܝܣܐ ܪܘܚܢܝܐ ܛܒ ܫܒܝ̣ܚ ܘܡܥܠܝ ܡ̣ܢ ܗ̇ܘ ܓܘܫܡܢܝܐ. ܒܗ̇ ܒܕܡܘ̣ܬܐ ܘܡܠܟܘܬܐ ܕܫܡܝܐ ܡܢܗ ܕܦܪܕܝܣܐ ܪܘܚܢܝܐ ܫܒܝܚܐ ܘܡܥܠܝܐ. ܘܒܡܨܥܝܘܬܗ ܟܝܬ ܕܦܪܕܝܣܐ ܪܘܚܢܝܐ ܡܬܡܨܝܐ ܢܦܫܐ ܠܡܬܥܠܝܘ ܘܠܡܐܪܬ݀ ܡܠܟܘܬܐ ܕܫܡܝܐ. ܐܝܟ ܕܐܡ̣ܪ ܩܕܝܫܐ ܐܘܓܪܝܣ ܕܐܝܟ ܗܟܢܐ ܗ̱ܝ ܝ̣ܕܥܬܐ ܕܟܠ ܕܗܘ̣ܐ. ܐܝܟܢܐ ܕܠܢܦܫܐ ܫܘܬܦܬܗ̇ ܬܡܢܥ܆ ܥܕܡܐ ܠܝ̣ܕܥܬܐ ܕܬܠܝܬܝܘܬܐ ܩܕܝܫܬܐ.

 

 

 

ܩܦܠܐܘܢ ܬܪܝܢܐܕܫܬܐܣܬܐ ܬܪܥܣܝܪܝܬܐ

 

ܡܛܠ ܐܝܠܢܐ ܕܚܝ̈ܐ ܘܐܝܠܢܐ ܕܝ̣ܕܥܬܐ ܕܛܒܬܐ ܘܕܒܝܫܬܐ ܘܡܛܠ ܚܘܝܐ ܕܐܛܥܝ̣. ܘܒܗ ܐܝܬ ܦܣܘ̈ܩܐ ܐܪܒܥܐ. ܦܣܘܩܐ ܩܕܡܝܐ ܡܛܠܗ̇ܝ ܕܡܢܘ ܐܝܠܢܐ ܕܚܝ̈ܐ

 

 

 

ܐܡܪܝܢܢ ܠܬܪ̈ܝܗܘܢ ܡ̇ܢ ܓܝܪ ܗܠܝܢ ܐܝܠܢ̈ܐ ܬܪܝܢܐܝܬ ܦܫܩܘ ܐܢܘܢ ܡܠܦܢ̈ܐ ܕܥܕܬܐ ܪܘܚܢܐܝܬ ܐܡ̇ܪ ܐ̱ܢܐ ܘܓܘܫܡܢܐܝܬ. ܘܐܝܠܢܐ ܪܘܚܢܝܐ ܕܚܝ̈ܐ ܐܡܪܝܢ ܕܐܝܬܘܗܝ. ܝܚܝܕܝܘܬܗ ܕܗܘܢܐ ܗ̇ܘ ܕܒܬܐܘܪܝܐ ܕܒܪܘܝܗ ܒܠܚܘܕ ܢܬܐܣܪ ܘܠܐ ܢܬܢܬܦ ܠܟܐ ܘܠܟܐ. ܐܟܡܐ ܕܐܦ ܡܠܐܟ̈ܐ ܩܕܝ̈ܫܐ ܐܝܬܝܗܘܢ. ܘܠܦܘܬ ܪܥܝܢܐ ܗܢܐ ܡܫܬܟܚܐ ܡܠܟܘܬܐ ܕܫܡܝܐ ܐܘܟܝܬ ܝܕܥܬܐ ܘܬܐܘܪܝܐ ܕܒܪܘܝܐ. ܕܡܢܬܐ ܗ̱ܝ ܡ̣ܢ ܦܪܕܝܣܐ ܘܒܗ ܡܚܒܫ ܚܒܝ̣ܫܐ ܗ̇ܝ ܕܫܟܝ̣ܪܐ ܘܠܐ ܚܬܝ̣ܬܐ. ܐܠܐ ܠܐܝܠܢܐ ܪܘܚܢܝܐ ܕܚܝ̈ܐ ܒܝ̣ܕܥܬܐ ܕܟܠܗܘܢ ܗܘܝ̈ܐ ܐܘܟܝܬ ܒܡܕܪܟܢܘܬܗ ܕܗܘܢܐ ܠܟܠܗܘܢ ܒܪ̈ܝܐ ܙܕܩ ܕܢܦܠܬܝ̣ܘܗܝ. ܘܠܡܠܟܘܬܐ ܕܫܡܝܐ. ܒܝ̣ܕܥܬܐ ܕܒܪܘܝܐ ܒܠܚܘܕ. ܐܟܡ̇ܢ ܕܗ̣ܝ ܝܬܝܪ ܡܥܠܝܐ. ܘܐܝܠܝܢ ܚܝ̈ܐ ܓܘܫܡܢܝܐ ܕܐܬܒܪܝ̣ ܡ̣ܢ ܐܠܗܐ ܣܘܥܪܢܐܝܬ ܘܐܝܬܘܗܝ ܐܝܟ ܚܕ ܡ̣ܢ ܟܝ̈ܢܐ ܕܢܨ̈ܒܬܐ ܣܓܝ̈ܐܐ ܡ̣ܢ ܡܠܦܢ̈ܐ ܐܘܕܝ̣ܘ. ܢܘܡܝܣܝܢܘܣ ܓܝܪ ܦܝܠܠܘܣܘܦܐ ܟܪܝܣܛܝܢܐ ܐܡ̇ܪ. ܕܠܐ ܬܗܘܐ ܠܗ ܡܐܟܘܠܬܐ ܡ̣ܢ ܐܝܠܢܐ ܗ̇ܘ ܕܚܝ̈ܐ܆ ܣܩܘܒܠܝܬܐ ܠܐܦܘܦܐܣܝܣ ܗ̇ܝ ܕܐܠܗܐ. ܟܐܡܬ݀ ܕܠܥܦܪܐ ܬܗܦܘܟ. ܘܡܪܝ ܝܥܩܘܒ ܕܣܪܘܓ ܐܡ̣ܪ ܒܡܐܡܪܐ ܕܥܠ ܡܦܩܬܗ ܕܐܕܡ ܕܡ̣ܢ ܦܪܕܝܣܐ. ܕܡܨܝܐ ܕܡܫܟܢ ܗ̣ܘܐ ܐܝܠܢܐ ܗ̇ܘ ܕܚܝ̈ܐ ܚܝ̈ܐ ܕܠܥܠܡ ܠܐܕܡ ܟܕ ܐܟ̇ܠ ܗ̣ܘܐ ܡܢܗ. ܘܦܝܠܠܘܟܣܝܢܘܣ ܕܡܒܘܓ ܐܡ̇ܪ. ܕܥܠ ܗܠܝܢ ܠܡ ܠܐ ܡܬܚܪܐ ܐ̱ܢܐ. ܡܛܠ ܕܡܗܝܡܢ ܐ̱ܢܐ. ܕܠܐܠܗܐ ܟܠܡܕܡ ܦܫܝ̣ܩ. ܘܗܠܝܢ ܡ̇ܢ ܗܟܢܐ ܐܫܟܚܢܢ ܠܡܠܦܢ̈ܐ ܕܐܡ̣ܪܘ. ܐܝܢ ܕܡܢܐ ܡ̣ܢ ܐܕܫܝ̈ ܐܝܠܢ̈ܐ ܐܝܬܘܗܝ ܗ̣ܘܐ ܐܝܠܢܐ ܗ̇ܘ. ܐܘ ܐܝܢܐ ܡ̣ܢ ܦܐܪ̈ܐ ܛܥܝ̣ܢ ܗ̣ܘܐ ܠܐ ܐ̱ܢܫ ܡܢܗܘܢ ܫܡܥܢܢ ܕܐܡ̣ܪ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܗ̇ܝ ܕܡܢܘ ܐܝܠܢܐ ܕܝܕܥܬܐ ܕܛܒܬܐ ܘܕܒܝܫܬܐ

 

 

 

ܒܗ̇ ܒܕܡܘ̣ܬܐ ܘܠܐܝܠܢܐ ܕܝ̣ܕܥܬܐ ܥܦܝ̣ܦܐܝܬ ܦܫܩܘܗܝ ܡܠܦܢ̈ܐ. ܘܐܝܠܢܐ ܪܘܚܢܝܐ ܕܝ̣ܕܥܬܐ ܐܡ̣ܪܘ ܕܐܝܬܘܗܝ܆ ܡܬܢܚܬܢܘܬܗ ܕܗܘܢܐ ܡ̣ܢ ܝ̣ܕܥܬܗ ܕܒܪܘܝܐ܆ ܠܘܬ ܝܕܥܬܐ ܕܒܪ̈ܝܬܐ. ܒܗ̇ܝ ܕܟܡܐ ܕܒܬܐܪܘܝܐ ܕܒܪܘܝܗ ܠܚܘܕ ܐܣܝ̣ܪ ܗ̣ܘܐ܆ ܒܛܒܬܐ ܥܢܐ ܗ̣ܘܐ. ܟܕ ܕܝܢ ܐܬܬܙܝܥ ܘܢܚܬ ܠܘܬ ܒܪ̈ܝܬܐ ܐܪܓܫ ܐܦ ܒܗ̇ܝ ܐ̱ܚܪܬܐ ܕܐܝܬܝܗ̇ ܒܝܫܬܐ. ܐ̱ܚܪ̈ܢܐ ܕܝܢ ܐܡ̣ܪܘ܇ ܕܐܝܠܢܐ ܕܝ̣ܕܥܬܐ ܕܛܒܬܐ ܘܕܒܝܫܬܐ ܛܘܦܣܐ ܗ̱ܘ ܕܢܡܘܣܐ ܡܘܫܝܐ ܗ̇ܘ ܕܒܗ ܛܒܬܐ ܡ̣ܢ ܒܝܫܬܐ ܘܕܟܝܐ ܡ̣ܢ ܛܡܐܐ ܡܬܦܪܫܝܢ. ܐ̱ܚܪ̈ܢܐ ܕܝܢ ܕܡܢܗܘܢ ܚܣܝܐ ܡܘܫܐ ܒܪ ܟܐܦܐ ܐܡܪܝܢ. ܕܐܝܠܢܐ ܗ̇ܘ ܕܝ̣ܕܥܬܐ ܗ̣ܝ ܬܐܘܪܝܐ ܕܥܠ ܐܠܗܘܬܐ ܐܝܬܘܗܝ. ܗ̇ܝ ܕܟܕ ܐܪܬܕܘܟܣܝܐܝܬ ܡܬܕܪܟܐ ܛܒܬܐ ܐܝܬܝܗ̇. ܘܟܕ ܐܪܝܛܝܩܐܝܬ܆ ܒܝܫܬܐ. ܐ̱ܚܪ̈ܢܐ ܕܝܢ ܐܡ̣ܪܘ܆ ܕܠܘ ܣܘܥܪܢܝܐ ܗ̱ܘ ܐܝܠܢܐ ܗܢܐ ܐܠܐ ܦܠܐܬܐ ܗ̱ܘ ܕܙܘܘܓܐ. ܕܡܢܗ ܟܠܐ ܐܢܘܢ ܐܠܗܐ ܟܕ ܐܡ̇ܪ. ܕܛܪܘ ܕܟܝܘܬܐ ܘܩܕܝܫܘܬܐ. ܘܕܠܐ ܚܬܝ̣ܬ ܪܥܝܢܐ ܗ̇ܘ ܩܕܡܝܐ ܝ̣ܕܝ̣ܥܐ ܡ̣ܢ ܗ̇ܝ. ܕܝ̣ܕܥܬܐ ܕܒܪܘܝܐ ܡܠܟܘܬܐ ܕܫܡܝܐ ܐܝܬܝܗ̇ ܐܝܟ ܪܥܝܢܐ ܕܟܠܗܘܢ ܡܠܦܢ̈ܐ ܩܕܝ̈ܫܐ. ܘܕܗ̣ܝ ܗܕܐ ܡܝܬܪܐ ܘܡܥܠܝܐ ܡ̣ܢ ܦܪܕܝܣܐ ܘܡ̣ܢ ܟܠܗܘܢ ܐܝܠܢܘ̈ܗܝ ܓܠܝܐ ܓܘܫܡܢܝܐ ܢܗܐ ܗ̣ܘ ܦܪܕܝܣܐ ܐܘ ܪܘܚܢܝܐ. ܗ̣ܘ ܗܟܘܬ ܘܐܝܠܢܘ̈ܗܝ. ܘܕܪܥܝܢܐ ܗ̇ܘ ܬܪܝܢܐ ܬܘܒ ܠܐ ܚܬܝܬ ܝ̣ܕܝܥܐ ܡ̣ܢ ܗ̇ܝ ܕܠܐ ܥܕܟܝܠ ܐܬܬܣܝܡ ܗ̣ܘܐ ܢܡܘܣܐ ܗ̇ܘ ܡܘܫܝܐ. ܘܐܝܟܢܐ ܡܬܦܩܕ ܗ̣ܘܐ ܐܕܡ ܠܡܛܪܗ ܡ̣ܢ ܩܕܡ ܕܢܬܝ̣ܗܒ ܗ̣ܘܐ. ܘܪܥܝܢܐ ܗ̇ܘ ܬܠܝܬܝܐ. ܗ̣ܘ ܟܕ ܗ̣ܘ ܗ̇ܘ ܩܕܡܝܐ ܐܝܬܘܗܝ ܘܐܟܘܬܗ ܗ̣ܘ ܕܠܐ ܫܘܚܠܦ. ܘܪܥܝܢܐ ܗ̇ܘ ܪܒܝܥܝܐ. ܐܢܗܘ ܕܫܪܝܪܐ ܗ̇ܝ ܕܒܬܘ̈ܠܐ ܗ̣ܘܘ ܐܕܡ ܘܚܘܐ ܟܕ ܢܦ̣ܩܘ ܡ̣ܢ ܦܪܕܝܣܐ ܐܦ ܗ̣ܘ ܠܐ ܚܬܝ̣ܬ. ܐܠܐ ܠܐ ܡܕܡ ܕܐܝܟ ܗܟܢ ܟܬܝ̣ܒ ܒܐܘܪܝܬܐ ܣܛܪ ܡ̣ܢ ܗ̇ܝ ܕܟܕ ܢܦ̣ܩܘ ܡ̣ܢ ܦܪܕܝܣܐ ܚܟܡ ܐܕܡ ܠܚܘܐ ܘܒܛܢܬ݀ ܘܝܠܕܬ݀. ܘܠܘ ܠܐ ܡܨܝܐ ܕܐܦ ܡ̣ܢ ܩܕܡ ܕܢܦܩܘܢ ܚܟܡܗ̇ ܘܠܐ ܒܛܢܬ݀. ܘܗ̣ܘ ܚܟܘ̣ܡܝܐ ܗܢܐ ܗܘ̣ܐ ܥܠܬ݀ ܛܪܘܕܝ̣ܗܘܢ. ܘܐܠܘܠܐ ܒܙܘܘܓܐ ܐܣܟ̣ܠܘ ܐܡܪܝܢ ܡܛܠܡܢܐ ܡܣܡܒܪܝܫܐ ܗ̇ܘ ܕܡܣܓܝܘ̣ ܐܣ̇ܓܐ ܟܐܒܝ̈ܟܝ ܘܒܛܢܝ̈ܟܝ ܘܒܥܩ̈ܬܐ ܬܐܠܕܝ̣ܢ ܒܢܝ̈ܐ ܐܬܓܙܪ ܥܠ ܚܘܐ. ܘܡܛܠܡܢܐ ܬܘܒ ܡ̣ܢ ܗܕܡ̈ܐ ܡܦܪ̈ܝܢܐ ܕܐܝܬܝܗܘܢ ܐܘܪ̈ܓܢܐ ܕܙܘܘܓܐ ܕܝ̣ܠܢܐܝܬ ܒܗܬܘ ܘܐܬܦܪܣܘ ܠܡܟܣܝܘܬܗܘܢ. ܐܝܟ ܕܠܦܘܪ̈ܣܝܐ ܘܡܦܪ̈ܣܝܢܐ ܕܣܟܠܘܬܗܘܢ. ܗܐ ܓܝܪ ܐܦ ܗ̇ܢܘܢ ܕܫܒܪ̈ܝܝܢ ܘܠܐ ܢܣܝܘ̣ܗܝ ܠܙܘܘܓܐ. ܐܦܠܐ ܪܓܬܗܘܢ ܒܗܘܢ ܥܕܡܫ ܐܬܬܙܝܥܬ݀܇ ܠܐ ܣܟ ܒܗܬܝܢ ܡ̣ܢ ܦܘܪܣܝܐ ܕܗܕܡ̈ܐ ܗܠܝܢ ܐܦܠܐ ܡܬܪܡܝܢ ܠܡܣܬܪܘܬܗܘܢ. ܒܙܒܢܢ ܗܢܐ ܒܗ̇ ܒܕܡܘ̣ܬܐ ܐܡܪܝܢ ܘܪ̈ܝ̣ܫܝ ܓܒܝ̣ܠܬܢ ܒܫܘܪܝܐ. ܘܗ̣ܢܘܢ ܫܘܘ̈ܕܥܐ ܕܐܝܟ ܗܠܝܢ ܠܪܥܝܢܐ ܗܢܐ ܐ̱ܚܪܝܐ܆ ܕܠܝܠ ܠܡܬܗܝܡܢܘ̣ ܥܒܕܝ̣ܢ. ܗ̇ܢܘܢ ܕܝܢ ܕܓܘܫܡܢܐܝܬ ܦܫܩܘ̣ܗܝ ܠܗ ܠܐܝܠܢܐ ܕܝ̣ܕܥܬܐ. ܡܢܗܘܢ ܡ̇ܢ ܐܡ̣ܪܘ ܕܚܛܝܬܐ ܗܘܬ݀ ܦܐܪܗ̇. ܘܠܗ̇ ܠܗܕܐ ܬܪܥܝ̣ܬܐ ܩܢܝܢ ܡܫܠܡܢ̈ܐ ܟܠܗܘܢ. ܘܐ̱ܢܫܝ̈ܢ ܡ̣ܢ ܗܠܝܢ ܕܝܠܢ ܟܕ ܢܩܦܝ̣ܢ ܠܗܘܢ ܐܡܪܝܢ ܕܫܪܝܪܐ ܬܪܥܝܬܐ ܗܕܐ. ܡ̣ܢ ܗ̇ܝ ܕܒܠܚܡܐ ܝܗܒ ܠܢ ܡܪܢ ܦܓܪܗ. ܐܝܟܢܐ ܕܒܗ̇ ܟܕ ܒܗ̇ ܢܦܪܥܝܗ̇ ܠܚܘܒܬܐ ܩܕܡܝܬܐ. ܐ̱ܚܪ̈ܢܐ ܕܝܢ ܐܡ̣ܪܘ. ܕܠܐ ܐܠܐ ܥܢܒܬܐ ܗܘܬ݀ ܦܐܪܗ̇ ܘܡܛܠ ܗܕܐ ܒܚܡܪܐ ܝܗܒ ܠܢ ܡܪܢ ܕܡܗ. ܘܕܠܐ ܚܬܝ̣ܬܝܢ ܪ̈ܥܝܢܐ ܗܠܝܢ ܬܪܝܢ ܐܡܪܝܢ ܐ̱ܢܫܝ̈ܢ. ܕܝ̣ܕܝ̣ܥܐ ܡ̣ܢ ܗ̇ܝ ܕܡܘܥܝܬ ܚ̈ܛܐ ܫܒܠܐ ܡܬܩܪܝܐ. ܘܗ̇ܝ ܕܥܢ̈ܒܐ ܓܦܬܐ ܘܠܘ ܐܝܠܢܐ. ܘܐܡܪܝܢܢ ܕܟܕ ܪܡܙܢܐܝܬ ܨܒ̇ܐ ܕܢܡܠܠ ܗ̇ܘ ܕܡܡܠܠ. ܠܐ ܪܒܐ ܨܒܘ̣ܬܐ ܐܢ ܠܫܒܠܐ ܐܘ ܠܓܦܬܐ ܐܝܠܢܐ ܢܟܢܐ. ܘܦܝܠܠܘܟܣܝܢܘܣ ܗ̇ܘ ܕܡܒܘܓ ܒܡܐܡܪܐ ܕܥܠ ܐܝܠܢܐ ܗ̇ܘ ܕܚܝ̈ܐ ܐܡ̣ܪ ܕܬܐܬܐ ܐܝܬܘܗܝ ܗ̣ܘܐ ܐܝܠܢܐ ܕܐܟ̣ܠܘ ܡܢܗ ܐܕܡ ܘܚܘܐ. ܘܐܡ̣ܪ ܕܫܪܝܪܐ ܗܕܐ ܡ̣ܢ ܗ̇ܝ ܕܒܪ ܫܥܬܗ ܕܐܟ̣ܠܘ ܘܐܬܦܪܣܝ̣ܘ. ܡܢܗ ܕܐܝܠܢܐ ܗ̇ܘ ܥܒܕܘ ܠܗܘܢ ܦܪ̈ܙܘܡܐ ܘܟܣܝ̣ܘ ܦܘܪܣܝܗܘܢ. ܘܠܗ̇ ܠܗܕܐ ܬܪܥܝ̣ܬܐ ܣܓܝ̈ܐܐ ܡ̣ܢ ܥܕܬܢܝ̈ܐ ܫܠܡܝ̣ܢ. ܘܫ̇ܡܥ ܗܘܝܬ ܠܬܐܪܝ ܕܐܡ̇ܪ ܗ̣ܘܐ ܕܫܘܝܬ݀ ܠܕܘܡܪܐ ܗ̇ܝ ܬܪܥܝ̣ܬܐ ܗܕܐ. ܕܐܝܟܢܐ ܐܠܗܐ ܫܘܒܚܐ ܠܛܝܒܘܬܗ ܒܝܕ ܡܐܟܘܠܬܐ ܫܝ̣ܛܬܐ ܕܐܝܟ ܗܕܐ ܨܒܐ ܗ̣ܘܐ ܠܡܢܣܝܘܬܗ̇ ܠܚܐܪܘܬܗ ܘܫܠܝ̣ܛܘܬ ܒܝܬܗ ܕܐܕܡ. ܟܕ ܐܡ̇ܪ ܠܗ ܕܟܠܡܕܡ ܐܟܘܠ ܐܠܐ ܬܐܢ̈ܐ ܒܠܚܘܕ ܠܐ ܬܐܟܘܠ. ܘܐܦܠܐ ܬܘܒ ܗܢܐ ܟܠܗ ܫܦܝܪ ܗ̣ܘܐ ܐܝܠܢܐ ܗ̇ܘ ܕܬܐܬܐ ܠܡܐܟܠ. ܐܦܠܐ ܬܘܒ ܪܓܬܐ ܗ̣ܘܐ ܠܥܝ̈ܢܐ ܘܪܓܝ̣ܓ ܠܡܚܪ ܒܗ ܐܝܟ ܕܐܡ̣ܪ ܡܛܠܬܗ ܟܬܒܐ ܝܬܝܪ ܡ̣ܢ ܫܪܟܐ ܕܐܝܠܢ̈ܐ. ܕܩܠܐ ܠܡܐܡܪ ܘܚܙܘܪ̈ܐ. ܘܟܘܡܬܪ̈ܐ ܘܓܘ̈ܙܐ ܘܫܪܟܐ. ܘܟܕ ܗܠܝܢ ܐܡ̇ܪ ܗ̣ܘܐ ܗ̣ܘ ܬܐܪܐ. ܡܦܪܓܠ ܗ̣ܘܐ ܕܪܘܚܢܐܝܬ ܠܡ ܐܘ ܒܪܝ ܐܣܬܟܠ ܠܕܐܝܟ ܗܠܝܢ. ܘܠܡܡܠܠ ܐܠܗܝ̈ܬܐ ܩܦ ܕܐܡ̇ܪ. ܬܐܘܪܝܐ ܓܝܪ ܐܝܬܝܗ̇ ܗܘܬ݀ ܢܨܒܬܐ ܐܝܟ ܬܐܘܪܝܐ ܕܝܠܝ. ܕܥܠܝܗ̇ ܕܢܣܩܘܢ ܠܐ ܙܗܝ̣ܪܐ. ܠܗ̇ܢܘܢ ܒܠܚܘܕ ܕܡܫܡܠܝܢ ܒܩܢܝܘܬܐ. ܠܐ ܛܒܐ ܕܝܢ ܠܗ̇ܢܘܢ ܕܥܕܟܝܠ ܝܬܝܪ ܦܫܝ̣ܛܝܢ ܘܒܪܓܬܐ ܝܬܝܪ ܠܥܒܝ̣ܢ. ܐܝܟܢܐ ܕܐܦܠܐ ܬܪܣܝ̣ܬܐ ܡܫܡܠܝܬܐ ܡܘܬܪܢܝܐ. ܠܗ̇ܢܘܢ ܕܪܟܝ̣ܟܝ̣ܢ ܥܕܟܝܠ ܘܣܢܝ̣ܩܝ̣ܢ ܥܠ ܚܠܒܐ ܘܟܕ ܠܗܠܝܢ ܦܬܓܡ̈ܐ ܬܢܐ ܗ̣ܘܐ ܘܡܬܒܣܡ. ܡܬܚܪܐ ܗܘܝܬ ܦܪܗܣܝܐܝܬ ܠܩܘܒܠܗ ܘܐܡ̇ܪ ܗܘܝܬ. ܕܐܦܢ ܐܘ ܡܪܝ ܡܢܗܘܢ ܕܡܠܦܢ̈ܐ ܩܕܝ̈ܫܐ ܪܘܚܢܐܝܬ ܦܫܩܘ̣ܗܝ ܐܦ ܠܦܪܕܝܣܐ ܐܦ ܠܐܝܠܢܐ. ܐܠܐ ܠܐ ܟܒܪ ܟܦ̣ܪܘ ܒܓܘܫܡܢܝܘܬܗܘܢ. ܐܝܟ ܕܐܢ̱ܬ ܪܡܙ ܐܢ̱ܬ. ܗ̣ܘ ܕܝܢ ܟܕ ܐܬܪܥܡ ܘܬܘܒ ܐܬܦܨܚ ܦܢܝ̣. ܕܠܘ ܟܠܟܘܢ ܥܪܝܢ ܐܢ̱ܬܘܢ ܠܗ̇ ܠܡܠܬܐ. ܘܫܠܝ̣ ܘܠܐ ܬܘܒ ܐܘܣܦ ܠܡܡܠܠܘ ܒܗܢܐ ܢܝܫܐ. ܐܠܐ ܒܬܐܘܪ̈ܝܐܣ ܐ̱ܚܪ̈ܢܝܬܐ ܐܫܬܓܡ.

 

 

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܪܥܣܝܪܝܬܐ

 

ܡܛܠܗ̇ܝ ܕܡܛܠܡܢܐ ܒܟܘ̈ܢܝܐ ܗܠܝܢ ܐܬܩܪܝ̣ܘ ܬܪ̈ܝܗܘܢ ܐܝܠܢ̈ܐ ܗܠܝܢ

 

ܐܡܪܝܢܢ ܕܠܘ ܡܛܠܗ̇ܝ ܕܚܝܠܐ ܡܕܡ ܟܝܢܝܐ ܩܢܐ ܗ̣ܘܐ ܕܝ̇ܗܘܒܘܬ ܝ̣ܕܥܬܐ ܕܦܘܪܫܢܐ ܕܛܒܬܐ ܡ̣ܢ ܒܝܫܬܐ ܠܗ̇ܢܘܢ ܕܡܢܗ ܡܬܬܪܣܝܢ ܗ̣ܘܘ ܐܬܩܪܝ ܐܝܠܢܐ ܕܝܕܥܬܐ ܕܛܒܬܐ ܘܕܒܝܫܬܐ ܐܝܠܢܐ ܗ̇ܘ. ܐܠܐ ܡܛܠܗ̇ܝ ܕܒܡܐܟܘܠܬܗ ܝܠܦܗ̇ ܒܢܣܝܢܐ ܐܕܡ ܠܗ̇ܝ ܕܟܡܐ ܛܒܐ ܗܘܬ݀ ܢܛܘܪܘܬ ܦܘܩܕܢܐ ܐܠܗܝܐ ܘܟܡܐ ܒܝܫ ܘܠܐ ܙܗܝ̣ܪ ܩܝܢܕܘܢܘܣ ܕܡ̣ܢ ܥܒܪ ܦܘܩܕܢܐ ܢܩܦ. ܗ̣ܘ ܗܟܘܬ ܘܐܝܠܢܐ ܗ̇ܘ ܕܚܝ̈ܐ ܠܘ ܡܛܠܗ̇ܝ ܕܟܝܢܐ ܕܝ̇ܗܘܒܘܬ ܠܐ ܡܝܘܬܘܬܐ ܠܐܟܘ̈ܠܘܗܝ ܩܢܐ ܗ̣ܘܐ ܐܬܩܪܝ̣ ܒܫܡܐ ܗܢܐ. ܐܠܐ ܡܛܠܗ̇ܝ ܕܒܛܝܒܘܬܐ ܐܠܗܝܬܐ ܡܫܬܟܢܝ̣ܢ ܗ̣ܘܘ ܚܝ̈ܠܐ ܠܐ ܡܝܘ̈ܬܐ ܠܗ̇ܢܘܢ ܕܡ̣ܢ ܐܝܠܢܐ ܗ̇ܘ ܕܝܕܥܬܐ ܚܣܠܝ̣ܢ ܗ̣ܘܘ ܢܦ̈ܫܬܗܘܢ ܘܚ̇ܣܟܝ̣ܢ. ܘܡܢܗ ܡܫܬܘܝܢ ܗ̣ܘܘ ܠܡܬܬܪܣܝܘ. ܘܠܗ̇ ܠܗܕܐ ܡܫܪܪ ܩܕܝܫܐ ܣܐܘܝܪܐ ܒܡܐܡܪܐ ܕܥܠ ܨܠܝܒܐ ܘܐܡ̇ܪ. ܕܠܗ̇ܘ ܐܝܠܢܐ ܐ̱ܚܪܝܐ ܐܝܠܢܐ ܕܚܝ̈ܐ ܐܡ̇ܪ ܐ̱ܢܐ܆ ܐܝܩܪܐ ܥܬܝܕ ܗ̣ܘܐ ܕܢܣܒܝܘܗܝ. ܐܠܘ ܢܛܪ ܢܡܘܣܐ ܘܠܐ ܐܙܕܟܝ̣ ܡ̣ܢ ܡܐܟܘܠܬܐ ܕܠܐ ܒܙܒܢܗ. ܘܦܝܠܠܘܟܣܝܢܘܣ ܕܡܒܘܓ ܐܡ̣ܪ ܡܛܠ ܐܝܠܢܐ ܕܝ̣ܕܥܬܐ ܕܠܘ ܡܛܠܗ̇ܝ ܕܐܟ̣ܠ ܡܢܗ ܐܕܡ ܡܝ̣ܬ. ܐܝܟ ܗ̇ܝ ܕܢܐܟܘܠ ܐ̱ܢܫ ܡܕܡ ܡ̣ܢ ܣܡ̈ܡܢܐ ܡܡܝ̣̈ܬܢܐ ܘܢܡܘܬ. ܘܐܠܐ ܐܝܟܢܐ ܠܘ ܒܪ ܫܥܬܗ ܡܝ̣ܬ. ܐܦܠܐ ܬܘܒ ܥܒܪ ܦܘܩܕܢܐ ܐܡܝ̣ܬܗ. ܘܐܠܐ ܕܘܝܕ ܕܥܒܪ ܬܠܬܐ ܦܘܩ̈ܕܢܐ ܐܝܟܢܐ ܠܐ ܡܝ̣ܬ. ܓܪ ܓܝܪ ܘܪܓܙ ܘܩܛܠ. ܐܠܐ ܗ̇ܝ ܕܗܝܡܢ ܠܡܠܟܗ ܕܒܝܫܐ ܘܐܬܪܓܪܓ ܠܡܗܘܐ ܐܠܗܐ. ܗ̣ܝ ܐܡܝ̣ܬܬܗ ܘܡ̣ܢ ܦܪܕܝܣܐ ܐܦܩܬܗ. ܐܝܟ ܕܐܦ ܠܣܛܢܐ ܗ̣ܝ ܗܕܐ ܣܟܠܘܬܐ ܡ̣ܢ ܫܡܝܐ ܐܦܠܬܗ.

 

 

 

ܚܢܢ ܕܝܢ ܠܡܘܬܐ ܕܐܝܟ ܗܢܐ ܕܡܘܬܐ ܗ̱ܘ ܟܝܢܝܐ ܕܐܝܬܘܗܝ ܦܘܪܫܢܐ ܕܢܦܫܐ ܡ̣ܢ ܦܓܪܐ ܡܣܬܟܠܝ̣ܢܢ. ܐܠܐ ܠܡܘܬܐ ܕܚܛܝܬܐ ܕܐܝܬܘܗܝ ܦܘܪܫܢܐ ܕܢܦܫܐ ܡ̣ܢ ܐܠܗܐ. ܒܕܓܘܢ ܐܡܪܝܢܢ ܕܬܪ̈ܬܝܗܝܢ ܗܠܝܢ ܐܟܚܕܐ ܗܘܝ̈ ܥ̈ܠܬܐ ܕܡܘܬܗ ܕܐܕܡ ܒܗ ܒܝܘܡܐ ܕܐܟܠ ܕܠܐ ܬܬܕܓܠ ܡܠܬܐ ܐܠܗܝܬܐ. ܘܗ̇ܝ ܕܥܒܪ ܥܠ ܦܘܩܕܢܐ. ܘܗ̇ܝ ܕܠܡܕܡ ܠܐ ܡܫܟܚܢܐ ܪܓ. ܘܚܣܝܐ ܡܘܫܐ ܒܪ ܟܐܦܐ ܡܛܠ ܐܝܠܢܐ ܕܚܝ̈ܐ ܐܡ̣ܪ. ܕܐܝܟ ܕܠܓܘܪܓܗ ܕܐܕܡ ܥܠ ܢܛܘܪܘܬ ܦܘܩܕܢܐ ܐܬܩܪܝ̣ ܐܝܠܢܐ ܗܢܐ ܕܚܝ̈ܐ. ܘܠܘ ܕܚܝ̈ܐ ܡܨܝܢ ܗ̣ܘܘ ܠܡܗܘܐ ܒܡܨܥܝܘܬܗ ܠܐܟܘ̈ܠܘܗܝ. ܟܐܡܬ ܕܓܙܡ ܠܗ ܐܠܗܐ ܠܐܕܡ ܘܐܡ̣ܪ ܠܗ. ܕܐܢ ܡ̇ܢ ܘܐܟ̇ܠ ܐܢ̱ܬ ܡ̣ܢ ܐܝܠܢܐ ܕܝ̣ܕܥܬܐ ܡ̇ܐܬ ܐܢ̱ܬ. ܐܢܕܝܢ ܠܐ ܐܟ̇ܠ ܐܢ̱ܬ ܡܢܗ܆ ܝܗܒ ܐ̱ܢܐ ܠܟ ܕܬܐܟܘܠ ܡ̣ܢ ܐܝܠܢܐ ܗܢܐ ܕܚܝ̈ܐ ܘܚܝܐ ܐܢ̱ܬ ܠܥܠܡ. ܘܝ̣ܕܝ̣ܥܐ ܗܕܐ ܐܡ̣ܪ ܡ̣ܢ ܗ̇ܝ ܕܣܩܘܒܠܐܝܬ ܣܝ̣ܡܝ̣ܢ ܠܘܩܒܠ ܚܕ̈ܕܐ ܣܘ̈ܟܠܐ ܕܬܪ̈ܝܗܘܢ. ܒܗ̇ܝ ܕܗ̇ܘ ܡ̇ܢ ܡܘܬܐ ܪܗܝ̣ܒܐ ܡܙܡܢ ܠܐܟܘܠܗ. ܗܢܐ ܕܝܢ ܚܝ̈ܐ ܪ̈ܚܝ̣ܩܝ ܡ̣ܢ ܚܒܠܐ.

 

ܕܠܩܘܒܠܗ ܡܦܫܩܢܐ ܗܢܐ ܐܡܪܝܢܢ ܕܠܘ ܠܥܠܡ ܠܐ ܡܬܐܟܠܢܐ ܗ̣ܘܐ ܦܐܪܐ. ܕܐܝܠܢܐ ܗ̇ܘ ܕܝ̣ܕܥܬܐ. ܐܝܟܢܐ ܕܟܠ ܐܡܬܝ ܕܐܟ̇ܠ ܗ̣ܘܐ ܡܢܗ ܐܕܡ ܡܐܬ ܗ̣ܘܐ ܘܡܬܓܠܙ ܡ̣ܢ ܡܐܟܘܠܬܐ ܕܐܝܠܢܐ ܕܚܝ̈ܐ. ܘܣ̇ܗܕ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܕܐܡ̇ܪ. ܐܠܐ ܛܒ ܗ̣ܘܐ ܡ̇ܢ ܟܕ ܒܫܦܝ̣ܪܘܬ ܙܒܢܐ ܡܬܐܟܠ ܗ̣ܘܐ. ܘܐܝܟܢܐ ܬܘܒ ܚܟܡܬܐ ܐܠܗܝܬܐ ܠܗ̇ܘ ܕܣܪܝ̣ܩ ܗ̣ܘܐ ܡ̣ܢ ܗ̇ܝ ܕܢܗܘܐ ܥܠܬ݀ ܚܝ̈ܐ ܐܝܠܢ ܚܝ̈ܐ ܡܟܢܝܐ ܗܘܬ݀.

 

 

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܬܪܝܢܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܚܘܝܐ ܕܐܛܥܝ̣ ܒܕܒܝܬ ܐܕܡ

 

 

 

ܐܡܪܝܢ ܕܟܠܗܘܢ ܡܠܦܢ̈ܐ ܕܥܕܬܐ ܫܠܡܘ. ܕܚܘܝܐ ܒܚܙܘܐ ܓܘܫܡܢܝܐ ܥܡ ܚܘܐ ܡܠܠ. ܡ̈ܠܐ ܡܛܥܝܢ̈ܝܬܐ ܘܡܛܫ̈ܝܬܐ. ܐܠܐ ܡܪܝ ܐܦܪܝܡ ܡ̇ܢ ܒܦܘܫܩܘ̈ܗܝ ܐܡ̇ܪ. ܕܫܐܠ ܠܡ ܣܛܢܐ ܡ̣ܢ ܐܠܗܐ ܕܬܬܝܗܒ ܡܠܬܐ ܠܚܘܝܐ ܘܡܦܣܢܘܬܐ ܠܡܢܣܝܘܬܗ̇ ܠܚܐܪܘܬܗܘܢ ܕܒܝܬ ܐܕܡ. ܐܝܟ ܕܐܦ ܫܐܠ ܕܢܬܝܗܒܘܢ ܠܗ ܩܢܝܢܘ̈ܗܝ ܕܐܝܘܒ. ܡܛܠ ܒܘܚܪܢܗ. ܘܕܡܥܕ ܗ̣ܘ ܐܠܗܐ ܠܡܬܠ ܐܦ ܠܠܐ ܡܠܝ̣̈ܠܐ ܡܠܬܐ. ܐܬܢܗ ܕܒܠܥܡ ܣܗܕܐ. ܩܘܪܝܠܠܘܣ ܕܝܢ ܒܡܐܡܪܐ ܕܬܠܬܐ ܕܠܘܩܒܠ ܝܘܠܝܢܘܣ ܐܡ̣ܪ. ܕܗ̣ܘ ܣܛܢܐ ܐܬܕܡܝ̣ ܠܚܘܝܐ. ܘܡܠܠ ܥܡ ܐܢ̱ܬܬܐ. ܘܗ̣ܘ ܐܝܬܘܗܝ ܕܐܬܬܠܝ̣ܛ ܒܦܪܨܘܦ ܚܘܝܐ. ܝܥܩܘܒ ܕܝܢ ܕܣܪܘܓ ܐܡ̣ܪ ܒܡܐܡܪܐ ܕܥܠ ܡܦܩܬܗ ܕܐܕܡ ܡ̣ܢ ܦܪܕܝܣܐ. ܕܣܛܢܐ ܠܡ ܥܠ ܒܚܘܝܐ ܘܡܠܠ ܥܡ ܐܢ̱ܬܬܐ. ܘܣܓܝ̈ܐܐ ܠܗܢܐ ܪܥܝܢܐ ܐ̱ܚܪܝܐ ܫ̇ܠܡܝ̣ܢ. ܥܠܬܐ ܕܝܢ ܕܗ̇ܝ ܕܡܛܠܬܗ̇ ܐܛܥܝ̣ ܣܛܢܐ ܠܕܒܝܬ ܐܕܡ. ܓܠܝܐ ܕܠܘ ܡܕܡ ܗ̣ܝ ܐ̱ܚܪܝܢ. ܐܠܐ ܗ̇ܝ ܕܚܣܡ ܒܗܘܢ ܘܒܕܘܝܪܐ ܗ̇ܘ ܛܘܒܬܢܝܐ ܕܠܗܘܢ ܐܬܝ̣ܗܒ. ܘܕܟܕ ܓܫܝ̣̈ܡܐ ܐܢܘܢ ܘܗܘܠܢܝ̈ܐ ܩܛܣܛܐܣܝܣ ܡܠܐܟܝܬܐ ܠܗܘܢ ܐܫܬܟܢܬ݀. ܘܗ̣ܘ ܟܕ ܪܘܚܢܐ ܗ̱ܘ ܘܠܐ ܡܝܘܬܐ. ܕܘܐ ܡ̣ܢ ܦܓܪ̈ܢܐ ܘܡܝܘ̈ܬܐ ܗܘܐ. ܠܚܘܝܐ ܕܝܢ ܕܝ̣ܠܢܐܝܬ ܓܒܐ ܠܗ ܐܘܪܓܢܘܢ ܠܘܬ ܡܛܥܝܢܘܬܐ. ܒܥܠܬ݀ ܗ̇ܝ ܕܐܟܡܐ ܕܗ̣ܘ ܒܝܕ ܢܟܠܗ ܥܛܘܝܐ ܗܘ̣ܐ ܕܚܝܘ̈ܗܝ. ܢܦܫܢܝ̈ܐ ܕܒܪܢܫܐ. ܒܗ̇ ܒܕܡܘ̣ܬܐ ܘܚܘܝܐ ܒܝܕ ܡܪܬܗ ܥܛܘܝܐ ܗ̱ܘ ܕܚܝܘ̈ܗܝ ܦܓܪ̈ܢܝܐ ܕܒܪܢܫܐ. ܒܕܡܘ̣ܬܐ ܕܝܢ ܕܒܪܢܫܐ ܐܬܚܙܝ ܠܗ̇ ܠܚܘܐ. ܕܠܐ ܦܢܛܣܝܐ ܚ̇ܫܒܐ ܗܘܬ݀ ܠܗ ܠܚܙܘܐ. ܟܕ ܡܦܣܐ ܗܘܬ݀ ܕܠܝܬ ܗ̣ܘܐ ܒܪܢܫܐ ܗܝܕܝܟ ܣܛܪ ܡ̣ܢ ܗ̇ܝ ܘܗ̇ܘ. ܐܦܠܐ ܬܘܒ ܒܚܙܬܐ ܬܡܝ̣ܗܬܐ ܐܬܚܙܝ ܡܛܠ ܕܠܐ ܬܬܪܗܒ. ܐܦܠܐ ܬܘܒ ܐܝܟ ܕܐܝܬܘܗܝ ܐܬܚܙܝ ܠܗ̇ ܡܛܠ ܕܠܐ ܡܬܚܙܝܢܐ ܗ̱ܘ. ܘܒܗ̇ܝ ܕܐܬܐܡܪ ܠܚܘܝܐ ܒܠܘܛܬܐ܆ ܕܥܠ ܟܪܣܟ ܬܗܠܟ. ܡܬܝܕܥܐ ܕܪ̈ܓܠܐ ܩܢܐ ܗ̣ܘܐ. ܐܪܒܥ ܘܠܘ ܬܪܬܝܢ. ܒܗ̇ܝ ܕܚܝܘܬܐ ܐܬܩܪܝ̣ܘ ܘܒܥܝ̣ܪܐ ܘܠܘ ܦܪܚܬܐ ܐܘ ܛܝܪܐ.

 

ܗܦܟܬܐ:

 

ܐܡܪܝܢ ܕܐܝܟܢܐ ܟܕ ܣܛܢܐ ܗܘܝܘ ܕܐܛܥܝ̣ ܠܐ ܐܬܬܠܝ̣ܛ. ܘܚܘܝܐ ܐܘܪܓܢܘܢ ܗ̣ܘܐ ܒܠܚܘܕ ܠܘܬ ܣܥܘܪܘܬ ܡܛܥܝܢܘܬܐ ܗܕܐ ܠܐ ܡܠܝ̣ܠܐܝܬ ܘܠܐ ܨܒܝܢܐܝܬ ܐܬܬܠܝ̣ܛ. ܐܘ ܕܠܡܐ ܠܘ ܛܠܘܡܝܐ ܗ̱ܘ ܩܪܝ̣ܚܐ ܓܙܪ ܕܝ̣ܢܐ ܗܢܐ.

 

ܦܘܢܝܐ:

 

ܐܡܪܝܢ ܕܚܘܝܐ ܡ̇ܢ ܐܬܬܠܝ̣ܛ ܡܛܠ ܡܪܕܘܬܐ ܕܒܝܬ ܐܕܡ ܕܢܚܙܘܢ ܘܢܕܥܘܢ. ܕܟܡܐ ܒܝܫ ܩܝ̣ܢܕܘܢܘܣ ܕܗ̇ܢܘܢ ܕܗܘܝܢ ܥܠܬ݀ ܣܟܠܘ̈ܬܐ ܠܐܚܪ̈ܢܐ. ܘܐܠܘ ܣܛܢܐ ܐܬܬܠܝ̣ܛ. ܒܝܕ ܠܐ ܓܫܝ̣ܡܘܬܗ܇ ܠܐ ܡܬܚܙܐ ܗ̣ܘܐ ܠܕܒܝܬ ܐܕܡ ܕܐܝܠܝܢ ܚܫ ܥܠ ܕܐܚܛܝ̣ ܐܢܘܢ. ܘܠܐ ܩܢܝܢ ܗ̣ܘܘ ܝܘܬܪܢܐ ܕܡܬܬܟܣܢܘܬܐ ܕܡ̣ܢ ܗ̇ܝ ܕܢܚܛܘܢ ܘܢܚܛܘܢ. ܘܬܘܒ ܠܘ ܡܛܠܗ̇ܝ ܕܠܐ ܐܕܟܪ ܟܬܒܐ ܕܐܬܬܠܝ̣ܛ ܣܛܢܐ. ܠܐ ܙܕܩ ܠܡܘܕܝܘ ܕܠܐ ܐܬܬܠܝ̣ܛ. ܒܕܠܘ ܠܟܠܗܘܢ ܕܝ̣ܢܘ̈ܗܝ ܓܢܝ̣̈ܙܐ ܕܒܪܘܝܐ ܐܟܚܕܐ ܟܢܝ̣ܫܐܝܬ ܣ̇ܦܩܝ̣ܢ ܟܬܒ̈ܐ ܠܡܒܕܩܘ. ܘܬܘܒ ܒܥܠܬ݀ ܗ̇ܝ ܕܥܠ ܟܠܡܕܡ ܓܫܘܡܢܐܝܬ ܡܣܬܘܕ ܟܬܒܐ ܒܩܘܡܐ ܗܢܐ. ܐܗܡܝ̣ ܡ̣ܢ ܥܘܗܕܢܐ ܕܠܘܛܬܗ ܪܘܚܢܝܬܐ ܕܣܛܢܐ ܪܘܚܢܐ. ܐܦܠܐ ܓܝܪ ܣ̇ܦܩܝ̣ܢ ܗ̣ܘܘ ܠܡܫܡܥ ܒܢܝ̈ ܕܪܐ ܗ̇ܘ ܘܣܓܝ̈ܐܐ ܡ̣ܢ ܗ̇ܢܘܢ ܕܒܬܪܗܘܢ܆ ܡܕܡ ܡ̣ܢ ܬܐܘܪ̈ܝܐܣ ܪ̈ܘܚܢܝܬܐ ܕܠܐ ܓܫܝ̣̈ܡܐ. ܘܠܘܩܒܠ ܗ̇ܝ ܕܐܡ̣ܪܘ ܕܛܠܘܡܝܐ ܗ̱ܝ ܠܘܛܬ݀ ܚܘܝܐ. ܒܕܠܘ ܒܚܐܪܘܬܗ ܐܛܥܝ̣. ܐܠܐ ܐ̱ܚܪܢܐ ܗ̱ܘ ܕܒܝܕܗ ܐܛܥܝ̣. ܐܡܪܝܢ ܐ̱ܢܫܝ̈ܢ. ܕܣܓܝ̈ܐܬܐ ܕܐܝܟ ܗܠܝܢ ܡܥܕ ܗ̣ܘ ܐܠܗܐ ܠܡܣܥܪ ܘܠܐ ܡܫܬܐܠ ܕܡܛܠܡܢܐ. ܗܐ ܓܝܪ ܒܥܝ̣ܪܐ ܕܕܡܟ ܗ̣ܘܐ ܥܡܗ̇ ܒܪܢܫܐ. ܡܬܪܓܡܐ ܗܘܬ݀ ܡ̣ܢ ܢܡܘܣܐ. ܘܗܐ ܬܘܒ ܚܝܘܬܐ ܘܒܥܝ̣ܪܐ ܘܦܪܚܬܐ ܣܦ̈ܝ ܒܛܘܦܢܐ ܟܕ ܠܐ ܚܛܝ̈. ܘܗܟܢܐ ܬܘܒ ܓܙܪ̈ܘܗܝ ܕܐܝܘܒ ܡܐܟܘܠܬܐ ܠܢܘܪܐ ܐܬܝ̣ܗܒܘ. ܘܐܦ ܠܠܓܝܘܢ ܐܬܦܣܣ ܠܡܚܢܩܘ ܒܝܡܐ ܠܚܙܝ̣ܪ̈ܐ. ܘܬܘܪ̈ܐ ܬܘܒ ܘܨܦܪ̈ܝܐ ܘܝܘ̈ܢܐ ܘܫܘܦܢܝ̣̈ܢܐ ܕܠܐ ܚܛܘ܇ ܡܬܩܛܠܝ̣ܢ ܥܠ ܐܦ̈ܝ ܐ̱ܚܪ̈ܢܐ ܕܚܛܘ. ܐ̱ܚܪ̈ܢܐ ܕܝܢ ܐܡܪܝܢ. ܕܠܛܗ ܐܠܗܐ ܠܚܘܝܐ ܐܝܟܢܐ ܕܢܚܫܝ̣ܘܗܝ ܠܣܛܢܐ ܒܕܘܝܘܬܐ ܕܐܘܪܓܢܗ. ܚ̇ܐܫ ܓܝܪ ܙܡܪܐ ܒܬܒܪ ܐܒܘܒܗ. ܘܪܟܒܐ ܒܦܟܪ ܣܘܣܝܗ. ܘܩܘܒܪܢܝܛܐ ܒܨܪܝ ܐܪܡܐܢܐ ܕܐܠܦܗ.

 

 

 

 

 

 

 

 

 

     #1 

 

ܩܦܠܐܘܢ ܬܠܝܬܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܐܝܟܢܝܘܬ ܚܝ̈ܐ ܗ̇ܢܘܢ ܕܒܦܪܕܝܣܐ ܘܒܗ ܐܝܬ ܦܣܘ̈ܩܐ ܬܪܝܢ. ܦܣܘܩܐ ܩܕܡܝܐ ܡܛܠܗ̇ܝ ܕܐܝܟ ܐܝܠܝܢ ܗܘܝܢ ܗ̣ܘܘ ܕܒܝܬ ܐܕܡ ܐܠܘܠܐ ܥܒ̣ܪܘ ܥܠ ܦܘܩܕܢܐ

 

 

 

ܐܡܪܝܢܢ ܕܗ̣ܢܘܢ ܡܠܦܢ̈ܐ ܩܕܝ̈ܫܐ ܣ̇ܦܩܝ̣ܢ ܠܡܚܘܝܘܬܗ̇ ܠܒܥܬܐ ܗܕܐ. ܐܡ̣ܪ ܓܝܪ ܩܕܝܫܐ ܬܐܘܠܘܓܘܣ ܒܡܐܡܪܐ ܕܥܠ ܚܕ ܒܫܒܐ ܚܕܬܐ. ܐܠܘ ܩܘܝ̣ܢ ܗܘܝܢ. ܗ̇ܘ ܡܐ ܕܐܝܬܝܢ ܗܘܝܢ. ܟܕ ܡܬܩܪܒܝ̣ܢ ܗܘܝܢ ܠܐܝܠܢܐ ܕܚܝ̈ܐ ܒܬܪ ܐܝܠܢܐ ܕܝ̣ܕܥܬܐ. ܘܡܢܐ ܗܘܝܢ ܗܘܝܢ. ܟܕ ܠܐ ܡܝܘ̈ܬܐ ܗܘܝܢ ܗܘܝܢ ܠܓܡܪ ܘܠܐܠܗܐ ܡܬܩܪܒܝ̣ܢ ܗܘܝܢ. ܘܦܝܠܠܘܟܣܝܢܘܣ ܕܡܒܘܓ ܐܡ̣ܪ. ܗܟܢܐ ܐܦ ܥܡܘ̣ܪܝܗ ܕܒܪܢܫܐ ܩܕܡܝܐ ܡ̣ܢ ܩܕܡ ܚܛܝܬܗ ܐܝܬܘܗܝ ܗ̣ܘܐ ܦܪܕܝܣܐ ܗ̇ܘ ܕܐܬܬܣܝܡ. ܘܩܒܠ ܒܗ ܐܦ ܦܘܩܕܢܐ ܦܫܝ̣ܩܐ ܘܕܠܝ̣ܠܐ. ܗ̇ܘ ܕܐܠܘ ܢܛܪܗ ܗ̣ܘܐ. ܡ̣ܢ ܦܪܕܝܣܐ ܠܫܡܝܐ ܡܬܥܠܐ ܗ̣ܘܐ. ܘܥܠ ܕܒܣܪ ܘܫܛ ܡܠܬܐ ܕܐܠܗܗ. ܠܘ ܒܠܚܘܕ ܡ̣ܢ ܐܬܪܐ ܕܫܡܝܐ ܐܬܓܠܙ ܗ̇ܘ ܕܠܗ ܚ̇ܐܪ ܗ̣ܘܐ. ܘܥܘܡܪܐ ܕܚܝ̈ܠܘܬܐ ܠܐ ܡܓܫ̈ܡܐ. ܐܠܐ ܐܦ ܡ̣ܢ ܦܪܕܝܣܐ ܗ̇ܘ ܕܐܝܬܘܗܝ ܐܬܪܐ ܡܨܥܝܐ ܐܫܬܕܝ̣ ܒܒܗܬܬܐ. ܘܢܚܬ ܥܡܪ ܥܡ ܚܝ̈ܘܬܐ ܘܒܥܝ̣ܪܐ. ܒܐܪܥܐ ܗܕܐ ܕܐܫܬܥܒܕܬ݀ ܠܚܛܝ̣ܬܐ. ܘܡܪܝ ܝܥܩܘܒ ܕܣܪܘܓ ܐܡ̣ܪ. ܒܪܝܗܝ ܗܟܝܠ ܡܪܝܐ ܠܐܕܡ. ܠܘ ܕܢܦܘܩ ܡ̣ܢ ܦܪܕܝܣܐ. ܐܠܐ ܕܢܫܬܠܛ ܒܗ. ܘܢܗܘܐ ܝ̇ܪܬܐ ܕܝܠܗ. ܘܡ̣ܢ ܚܝܠܐ ܕܡ̈ܠܐ ܗܠܝܢ ܡܣܬܟܠܝ̣ܢܢ. ܕܐܠܘ ܢܛܪܘ ܕܒܝܬ ܐܕܡ ܦܘܩܕܢܐ ܘܠܐ ܐܟܠܘ ܡ̣ܢ ܦܐܪܐ ܟܕ ܐܬܐܡܪ ܠܗܘܢ ܕܠܐ ܬܐܟܠܘܢ. ܡ̣ܢ ܒܬܪܟܢ ܡܬܦܣܣ ܗ̣ܘܐ ܠܗܘܢ ܕܢܐܟܠܘܢܝܗܝ ܒܙܒܢܗ. ܘܡ̣ܢ ܒܬܪ ܗܟܢ ܬܘܒ ܡܫܬܘܝܢ ܗ̣ܘܘ ܠܡܐܟܠ ܐܦ ܡ̣ܢ ܐܝܠܢܐ ܕܚܝ̈ܐ. ܘܡ̣ܢ ܒܬܪ ܗܟܢ ܬܘܒ ܡܫܬܘܝܢ ܗ̣ܘܘ ܠܡܬܥܠܝܘ ܠܘܬ ܕܘܝܪܐ ܕܥܡ ܐܠܗܐ ܘܠܡܐܪܬ݀ ܡܠܟܘܬܐ ܕܫܡܝܐ. ܘܐܢ ܥܠ ܡܠܬܐ ܕܝܬܝܪ ܢܗܝܪܐ ܣܢܝ̣ܩ ܐܢ̱ܬ ܩܪܘܝܐ ܫܡܥ. ܟܕ ܪܘܚܢܐ ܐ̱ܢܫ ܗܘܐ ܐܢ̱ܬ. ܘܠܘ ܣܓܝ ܦܓܪܢܐ. ܡ̣ܢ ܓܝܪ ܫܘܪܝܐ ܟܕ ܐܬܒܪܝ̣ܘ ܕܒܝܬ ܐܕܡ ܐܬܦܣܣ ܠܗܘܢ ܠܡܐܟܠ ܡ̣ܢ ܟܠܗܘܢ ܐܝܠܢ̈ܐ ܕܒܦܪܕܝܣܐ. ܟܐܡܬ݀ ܠܡܫܬܘܬܦܘ ܒܟܠܗܘܢ ܒܘܣܡ̈ܐ ܡܬܪ̈ܓܫܢܐ. ܣܛܪ ܡ̣ܢ ܚܕ ܒܘܣܡܐ ܪܓܫܢܝܐ ܗ̇ܘ ܕܡܢܗ ܐܬܟܠܝ̣ܘ ܥܕ ܙܒܢܐ ܕܗܘܝܘ ܐܝܠܢܐ ܕܝܕܥܬܐ. ܒܕܓܘܢ ܐܠܘ ܢܛܪܘܗܝ ܠܦܘܩܕܢܐ ܗܢܐ ܥܡ ܙܒܢܐ ܘܒܕܘܪܓܐ. ܐܦ ܚܫܚܬܐ ܕܒܗ ܬܘܒ ܡܬܦܣܣ ܗ̣ܘܐ ܠܘܢ. ܐܝܛܐ ܡܢܗܘܢ ܕܒܘ̈ܣܡܐ ܗܠܝܢ ܡܬܪ̈ܓܫܢܐ܆ ܠܘܬ ܒܘܣܡܐ ܡܬܝܕܥܢܐ ܕܒܡܕܪ̈ܟܢܘܬܐ ܗܘܢܢ̈ܝܬܐ ܕܗܘܝ̈ܐ ܟܠܗܘܢ ܓܫܝ̣̈ܡܐ ܘܠܐ ܓܫܝ̣̈ܡܐ ܡܬܕܪܓܝ̣ܢ ܗ̣ܘܘ ܟܐܡܬ݀ ܠܘܬ ܐܝܠܢܐ ܕܚܝ̈ܐ. ܐܝܛܐ ܡܢܗ ܕܗܢܐ ܕܪܓܐ܆ ܠܘܬ ܒܘܣܡܐ ܕܝ̣ܕܥܬܐ ܕܟܝܢܐ ܐܠܗܝܐ ܕܗ̣ܝ ܗ̣ܝ ܡܠܟܘܬܐܕܫܡܝܐ ܐܟܡܐ ܕܙܒ̈ܢܬܐ ܫܘܕܥܢܢ. ܡܣܬܠܩܝ̣ܢ ܗܘܝܢ ܘܡܬܥܠܝܢ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܬܠܝܬܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠܗ̇ܝ ܕܟܡܐ ܐܪܐ ܡܟܬܪܝ̣ܢ ܗ̣ܘܘ ܕܒܝܬ ܐܕܡ ܒܦܪܕܝܣܐ ܘܟܢ ܡܬܥܠܝܢ ܗ̣ܘܘ ܠܡܠܟܘܬܐ ܕܫܡܝܐ

 

 

 

ܐܡܪܝܢܢ ܕܗܢܐ ܟܠܗ ܡܟܬܪܝ̣ܢ ܗ̣ܘܘ ܒܦܪܕܝܣܐ ܥܕܡܐ ܕܡܦܪܝܢ ܗ̣ܘܘ ܘܣܓܝܢ ܐܝܟ ܕܐܬܐܡܪ ܠܗܘܢ ܡ̣ܢ ܐܠܗܐ. ܕܦܪܘ ܘܣܓܘ ܘܡܠܘ ܐܪܥܐ ܘܟܘ̣ܒܫܘܗ̇. ܘܟܕ ܗܘܝܢ ܗ̣ܘܘ ܒܢܝ̈ܢܫܐ ܣܓܝ̈ܐܐ ܐܝܟ ܡܢܝܢܐ ܕܣܛܢܐ ܘܚܝܠܘ̈ܬܗ ܕܢܦ̣ܠܘ ܡ̣ܢ ܫܡܝܐ. ܗܝܕܝܢ ܒܛܠ ܗ̣ܘܐ ܝܘܒܠܐ ܘܡܬܥܠܝܢ ܗ̣ܘܘ ܟܠܗܘܢ ܠܫܡܝܐ. ܘܠܗ̇ ܠܗܕܐ ܡܫܪܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ ܟܕ ܐܡ̇ܪ. ܕܢܬܡܠܐ ܙܕܩ ܥܠܡܐ ܕܠܥܠܡ ܘܓܪܝܓܘܪܝܘܣ ܕܢܘܣܐ ܐܡ̇ܪ ܬܘܒ ܒܡܐܡܪܐ ܕܥܠ ܬܘܩܢܗ ܕܒܪܢܫܐ. ܐܠܐ ܢܝܫܐ ܕܣܓܝܐܘܬܐ ܐܝܢܐ ܕܗ̣ܘ ܕܐܬܒܨܪ ܡ̣ܢ ܡܠܐܟ̈ܐ. ܘܥܒܕ ܗ̣ܘܐ ܕܠܐܢܫܘܬܐ ܡܪܒܐ ܠܡܢܝܢܐ ܗ̇ܘ ܕܡܬܚܡ ܗ̣ܘ ܡ̣ܢ ܬܪܥܝ̣ܬܗ ܕܗ̇ܘ ܕܥܒ̣ܕ. ܘܙܕܩ ܠܡܕܥ ܕܗ̣ܘ ܝܘܒܠܐ ܕܐܝܟ ܗܢܐ ܟܐܡܬ݀ ܕܡ̣ܢ ܩܕܡ ܥܒܪ ܦܘܩܕܢܐ ܒܠܥܕ ܙܘܘܓܐ ܡܥܕ ܗ̣ܘܐ ܠܡܗܘܐ. ܒܝܕ ܕܘܒܪܐ ܕܚܝܠܐ ܐܠܗܝܐ ܘܐܟܡܐ ܕܗ̣ܝ ܚܟܡܬܐ ܡܦܪܢܣܢܝܬ ܟܠ ܡܦܣܐ ܗܘܬ݀. ܘܣܗܕ ܠܗ̇ܝ ܕܡܬܐܡܪܐ ܝܥܩܘܒ ܕܣܪܘܓ ܕܐܡ̣ܪ. ܓܒܠܗ ܠܡ ܐܠܗܐ ܠܒܪܢܫܐ ܕܐܦ ܡܛܠܬܗ ܥܒܕܗ ܠܥܠܡܐ. ܟܕ ܐܬܓܒܠ ܥܡ̣ܪ ܒܦܪܕܝܣܐ. ܘܡܠܬܐ ܕܙܘܘܓܐ ܘܠܐ ܚܕܐ ܐܝܬ ܗ̣ܘܐ.

 

ܗܦܟܬܐ:

 

ܐܡܪܝܢ ܕܐܝܟܢܐ ܡܨܐ ܗ̣ܘܐ ܕܢܗܘܐ ܝܘܒܠܐ ܒܠܥܕ ܙܘܘܓܐ. ܘܐܢ ܢܫܦ ܕܡܨܐ ܗ̣ܘܐ ܠܡܗܘܐ ܒܝܕ ܚܝܠܐ ܐܠܗܝܐ ܗ̇ܘ ܕܐܦ ܠܟܐܦܐ ܡܫܟܚ ܠܡܥܒܕ ܠܡܦܪܝܘ. ܐܠܐ ܐܝ̇ܕܐ ܣܢܝ̣ܩܘܬܐ ܐܝܬ ܗܘܬ݀ ܥܠ ܒܪܝܬܐ ܕܗܕܡ̈ܐ ܡܙܕܘ̈ܓܢܐ ܠܗ̇ܢܘܢ ܕܠܘ ܠܡܙܕܘܓܘ ܡܬܒܪܝܢ. ܩܢܝܐ ܠܡܐܡܪ ܘܦܚ̈ܠܬܐ ܠܓܒܪ̈ܐ ܘܥܘ̣ܒܐ ܡܪܒܥܝܐ ܠܐܢ̱ܬܬܐ. ܐܘ ܕܠܡܐ ܡܕܡ ܐܝ̣ܩܝ̣ ܒܪܝܐ ܚܟܡܬܐ ܐܠܗܝܬܐ. ܐܘ ܕܠܡܐ ܐܡܪܝܢ ܗ̣ܘܘ ܗ̇ܢܘܢ ܩܢܘ̈ܡܝܐ ܩܕ̈ܡܝܐ ܒܡܚܫ̈ܒܬܗܘܢ ܘܥܡ ܚܕ̈ܕܐ. ܕܐܠܘ ܠܚܟܡܘ̣ܝܐ ܠܐ ܐܬܒܪܝܢ܇ ܠܡܢܐ ܐܘܪ̈ܓܢܐ ܗ̇ܢܘܢ ܕܚܟܘ̣ܡܝܐ ܝܬܝܪܐܝܬ ܟܕ ܡ̣ܢ ܪܓܬܐ ܡܬܠܙܙܝ̣ܢ ܗ̣ܘܘ. ܐܘ ܕܠܡܐ ܡܬܗܝܡܢܐ ܕܠܝܬ ܗ̣ܘܐ ܒܗܘܢ ܪܓܬܐ. ܒܗ̇ܢܘܢ ܕܒܩܘܡܬܐ ܓܡܝ̣ܪܬܐ ܘܒܟ ܫܘܡܠܝܘܬܐ ܕܗܕܡ̈ܐ ܟܠܗܘܢ ܡܪ̈ܢܝܐ. ܘܒܬܩܢܘܬܐ ܕܪ̈ܓܫܐ ܓܘܝ̈ܐ ܘܒܪ̈ܝܐ. ܘܐܪܒܥܐ ܗܠܝܢ ܟܘ̈ܡܘ ܐܬܒܪܝ̣ܘ.

 

ܦܘܢܝܐ:

 

ܐܡܪܝܢܢ ܕܫܘܐܠܐ ܫܩܝ̣ܦܝܐ ܗܢܐ ܡ̣ܢ ܕܝܠܢ ܠܐ ܣܟ ܡܨܝܢܢ ܠܡܬܩܪܒܘ̣ ܠܘܬܗ ܘܠܡܓܫܦ ܒܗ ܕܠܐ ܡ̣ܢ ܪܘܡܐ ܕܗܘܢܐ ܕܟܬܒ̈ܐ ܢܦܠ. ܐܠܐ ܗ̇ܘ ܡܐ ܕܫܡܥܢܢ ܡ̣ܢ ܡܠܦܢ̈ܐ ܩܕܝ̈ܫܐ ܒܠܚܘܕ ܐܡܪܝܢܢ ܒܦܘܢܝܐ ܗܢܐ. ܩܕܝܫܐ ܓܪܝܓܘܪܝܘܣ ܕܢܘܣܐ ܐܡ̣ܪ ܒܡܐܡܪܐ ܕܥܠ ܬܘܩܢܗ ܕܒܪܢܫܐ ܗܟܢܐ. ܐܢ ܕܝܢ ܙܪܒ ܐ̱ܢܫ ܟܕ ܒܥܐ ܢܝܫܐ ܕܗܘܝܗܝܢ ܕܢܦ̈ܫܬܐ. ܐܠܘܠܐ ܐܣܬܢܩ ܥܠ ܥܘܕܪܢܐ ܕܙܘܘܓܐ ܗ̣ܘ ܒܪܢܫܐ. ܢܫܐܠ ܠܩܘܒܠܗ ܐܦ ܚܢܢ. ܕܙܢܐ ܕܩܘܝܡܐ ܕܡܠܐܟ̈ܐ ܐܝܟܢܐ ܒܪ̈ܒܘܬܐ ܠܐ ܡܣܬܝܟܢ̈ܝܬܐ ܐܢܘܢ. ܘܡܪܝ ܝܥܩܘܒ ܐܡ̇ܪ ܒܡܐܡܪܐ ܕܥܠ ܡܦܩܬܗ ܕܐܕܡ ܡ̣ܢ ܦܪܕܝܣܐ. ܐܝܢܐ ܙܘܘܓܐ ܐܘܠܕ ܠܐܕܡ. ܐܝܠܝܢ ܚܒ̈ܠܐ ܡܚܐܘܗܝ ܕܐܦܩ ܠܚܘܐ. ܐܠܦ ܐܠܦܝ̈ܢ ܕܡܠܐܟ̈ܐ ܩܝܡܝ̣ܢ ܩܕܡܘܗܝ. ܘܐܦܠܐ ܚܕ ܡ̣ܢ ܗܠܝܢ ܗܘ̣ܐ ܡ̣ܢ ܝܘܒܠܐ. ܘܐܦܠܐ ܡ̣ܢ ܡܘܠܕܐ ܘܚܒ̈ܠܐ ܘܒܛܢܐ. ܡܕܝܢ ܣܓܝ ܝܬܝܪܐܝܬ ܥܒܕ ܗ̣ܘܐ ܒܢܝ̈ܢܫܐ ܣܛܪ ܡ̣ܢ ܙܘܘܓܐ. ܐܝܟܢܐ ܕܐܦ ܥܒܕ ܠܩܕ̈ܡܝܐ.

 

 

 

 

 

ܩܦܠܐܘܢ ܪܒܝܥܝܐ ܕܫܬܐܣܬܐ ܚܕܥܣܝܪܝܬܐ

 

 

 

ܡܛܠ ܦܘܫܩܐ ܕܡ̈ܠܐ ܗ̇ܢܝܢ ܕܒܐܘܪܝܬܐ ܡܝܬܝܢ ܥܠ ܫܪܒܗ ܕܦܪܕܝܣܐ. ܘܒܗ ܐܝܬ ܥܘܬܕܐ ܘܦܣܘ̈ܩܐ ܬܫܥܐ ܠܦܘܬ ܡܢܝܢܐ ܕܟܠ ܚܕ ܚܕ ܡ̣ܢ ܗ̇ܢܘܢ ܦܬܓܡ̈ܐ. ܩܕܡܝܬ ܥܘܬܕܐ

 

ܝܘܕܝ̈ܐ ܡ̇ܢ ܓܝܪ ܘܐ̱ܢܫܝ̈ܢ ܡ̣ܢ ܗ̇ܢܘܢ ܕܒܫܡܐ ܡܫܝ̈ܚܝܐ. ܓܘܫܡܢܐܝܬ ܒܠܚܘܕ ܡܩܒܠܝ̣ܢ ܠܡܣܬܟܠܘ ܠܟܬܒ̈ܐ ܘܠܐ ܡܬܕܢܝܢ ܠܡܗܝܡܢܘ̣ ܕܚܝܠܐ ܡܕܡ ܐ̱ܚܪܢܐ ܗܘܢܢܝܐ ܟܣܐ ܒܗܝܢ ܒܡ̈ܠܐ ܗܠܝܢ. ܘܡܛܠܗܕܐ ܡܣܠܝܘ̣ ܡܣܠܝܢ ܠܦܘ̈ܫܩܐ ܟܠܗܘܢ ܪ̈ܘܚܢܝܐ ܘܠܘܬ ܝܘ̈ܕܝܐ ܡ̇ܢ ܐܡܪܝܢܢ ܐܠܘ ܠܒܪܢܝܘܬܗܝܢ ܕܡ̈ܠܐ ܒܠܚܘܕ ܙܕܩ ܠܡܕܢ. ܐܝ̇ܕܐ ܗ̱ܝ ܐܣܬܐ ܕܡܛܠܬܗ̇ ܐܡ̣ܪ ܡܪܝܐ ܒܝܕ ܚܙܩܝܐܝܠ. ܕܗܐ ܝ̇ܗܒ ܐ̱ܢܐ ܡܛܪܐ ܕܓܪܦ. ܘܟܐܦ̈ܐ ܕܕܚܪܐ ܢܦ̈ܠܢ. ܘܪܘܚܐ ܕܥܠܥܠܐ. ܘܬܬܪܥ ܘܬܦܠ ܐܣܬܐ. ܘܢܬܐܡܪ ܠܟܘܢ ܐܝܟܐ ܗ̱ܘ ܛܪܝܐ ܕܛܪܝܬܘܢ. ܘܐܝ̇ܕܐ ܗ̱ܝ ܬܘܒ ܒܪܬܐ ܕܐܡ̣ܪ ܠܗ̇ ܡܪܝܐ ܗܟܘܬ ܒܝܕ ܚܙܩܝܐܝܠ. ܕܐܒܘܟܝ ܐܡܘܪܝܐ ܘܐܡܟܝ ܚܝ̣ܬܝܬܐ. ܘܡܘܠܕܢܝ̣ܬܟܝ ܒܝܘܡܐ ܕܝܠܕܬܟܝ ܠܐ ܦܣ̣ܩܬ݀ ܫܪܟܝ. ܘܒܡܝ̈ܐ ܠܐ ܐܣܚܝܬܟܝ. ܕܒܡܠܚܐ ܠܐ ܡܠܚܬܟܝ ܘܫܪܟܐ ܕܕܡ̈ܝܢ. ܘܐܝ̇ܢܘ ܬܘܒ ܢܫܪܐ ܪܒܐ ܕܪܘܪ̈ܒܝܢ ܓܦܘ̈ܗܝ ܘܐܪܝ̣ܟܝ̣ܢ ܓܠܦܢܘ̈ܗܝ ܘܡܠܝ̈ܢ ܛܦܪ̈ܘܗܝ ܘܥܒܝ̣ܛ ܡܠܓܗ. ܕܐܬܐ ܠܠܒܢܢ. ܘܡܢܐ ܗ̱ܝ ܢܨܒܬܐ ܕܥܠ ܡܝ̈ܐ ܝܥܬ݀. ܘܗܘܬ݀ ܓܦܬܐ ܡܪܥܬܐ ܡܟܝ̣ܟܬ݀ ܩܘܡܬܐ. ܘܐܝ̇ܢܘ ܬܘܒ ܐܪܝܐ ܕܓܦ̈ܐ ܕܢܫܪܐ ܐܝܬ ܠܗ ܐܝܬ ܕܐܡ̣ܪ ܕܢܝܐܝܠ. ܕܐܬܡܪܛܘ ܓܦܘ̈ܗܝ. ܘܥܠ ܪ̈ܓܠܘܗܝ ܐܝܟ ܒܪܢܫܐ ܩ̇ܐܡ. ܘܠܒܐ ܕܐ̱ܢܫܐ ܐܬܝܗܒ ܠܗ. ܘܕܒܐ ܕܬܠܬ ܐܠܥܝ̈ܢ ܒܦܘܡܗ̇. ܘܢܡܪܐ ܕܐܪܒܥܐ ܓܦܝ̣̈ܢ: ܘܐܪܒܥܐ ܪ̈ܝܫܝ̣ܢ. ܘܚܝܘܬܐ ܕܫܢ̈ܐ ܪܘܪ̈ܒܬܐ ܕܦܪܙܠܐ ܐܝܬ ܗ̣ܘܐ ܠܗ̇܆ ܘܩܪ̈ܢܬܐ ܥܣܪ. ܘܐܟ̇ܠܐ ܘܡܕܩܐ. ܘܡܕܡ ܕܡܘܬܪܐ ܒܪ̈ܓܠܝܗ̇ ܕܝܫܐ. ܘܠܡܢܐ ܬܘܒ ܬܟܣܝ̣ܬܐ ܕܣܩܐ ܘܦܘܪܣܝܐ ܕܦܓܪܗ ܕܐܫܥܝܐ. ܘܢܝ̣ܪܐ ܘܚܢܩ̈ܐ ܕܐܪܡܝܐ. ܘܐܢ̱ܬܬܗ ܓܝܪܬܐ ܕܗܘܫܥ. ܘܦܘܠܓܐ ܕܣܥܪܗ ܕܚܙܩܝܐܝܠ ܘܡܓܣܗ ܕܥܠ ܓܒܘ̈ܗܝ. ܘܐܝ̇ܕܐ ܗ̱ܝ ܐܢ̱ܬܬܐ ܕܫܡܗ̇ ܐܗܠܐ. ܘܗ̇ܝ ܐ̱ܚܪܬܐ ܕܫܡܗ̇ ܐܗܠܝܒܐ. ܗܠܝܢ ܘܣܓܝ̈ܐܬܐ ܕܐܝܟ ܗܠܝܢ. ܕܐܠܘ ܒܪܢܐܝܬ ܢܚܘ̣ܪ ܒܗܝܢ ܐ̱ܢܫ. ܘܠܐ ܚܕ ܪܥܝܢ ܒܗܝܢ ܡܫܟܚ. ܠܘܩܒܠ ܕܝܢ ܡܫܝ̈ܚܝܐ ܗ̇ܢܘܢ ܕܐܦ ܗ̣ܢܘܢ ܝܘ̣ܕܐܝܬ ܡܬܚܪܝܢ ܠܘܩܒܠ ܦܘ̈ܫܩܐ ܪ̈ܘܚܢܝܐ. ܥܡ ܗܠܝܢ ܕܐܡ̣ܪܢܢ: ܐܦ ܐ̱ܚܪ̈ܢܝܬܐ ܡܘܣܦܝ̣ܢܢ ܐܡܪܝܢܢ. ܕܟܒܪ ܬܓܡܕܘܢ ܠܡܣܪܒ ܕܠܘ ܦܐܝܐܝܬ ܦܫܩܗ ܡܪܢ ܠܚܘܝܐ ܢܚܫܝܐ ܗ̇ܘ ܕܡܘܫܐ ܒܬܐܘܪܝܐ ܕܙܩܝ̣ܦܗ ܟܕ ܐܡ̇ܪ. ܕܐܝܟܢܐ ܕܐܪܝ̣ܡ ܡܘܫܐ ܚܘܝܐ ܒܡܕܒܪܐ. ܗܟܢܐ ܥܬܝܕ ܠܡܬܬܪܡܘ̣ ܒܪܗ ܕܐ̱ܢܫܐ. ܘܠܡܝ̈ܐ ܗ̇ܢܘܢ ܕܐܫܬܘܕܝ̣ ܠܫܡܪܝܬܐ ܟܒܪ ܡܝ̈ܐ ܐܣܛܘܟ̈ܣܢܝܐ ܬܣܬܟܠܘܢ ܐܢܘܢ. ܘܠܩܠܝ̈ܕܐ ܕܝܗܒ ܠܫܡܥܘܢ ܟܒܪ ܩܠܝ̈ܕܐ ܕܦܪܙܠܐ ܐܘ ܡܕܡ ܐ̱ܚܪܝܢ ܓܘܫܡܢܐܝܬ ܐܡܪܝܢ ܐܢ̱ܬܘܢ. ܘܕܪܥܝܐ ܬܘܒ ܕܥܪ̈ܒܐ ܠܐ ܡܠܝ̣̈ܠܐ. ܗ̣ܘ ܡܪܝܐ ܐܡܪܝܬܘܢ. ܘܚܛܘ̈ܗܝ ܕܝܘܚܢܢ ܘܬܒܢܗ ܘܪܦܫܗ ܘܐܝܠܢܗ ܘܢܪܓܗ ܟܒܪ ܓܘܫ̈ܡܢܐ ܐܢܘܢ. ܘܦܘܠܘܣ ܬܘܒ ܐܝܟܢܐ ܒܬܪ̈ܬܝܗܝܢ ܕܝܬܝ̈ܩܘܗܝ ܦܫܩ ܐܢܝܢ ܠܬܪ̈ܬܝܗܝܢ ܢܫܘ̈ܗܝ ܕܐܒܪܗܡ. ܣܪܐ ܐܡ̇ܪ ܐ̱ܢܐ ܘܗܓܪ. ܘܡܛܠ ܟܐܦܐ ܗ̇ܝ ܕܡܪܕܝܐ ܗܘܬ݀ ܡܝ̈ܐ ܠܐܝܣܪ̈ܠܝܐ ܐܡ̣ܪ ܕܟܐܦܐ ܗ̇ܝ ܗܘܐ ܡܫܝܚܐ. ܕܙܕܩ ܕܢܬܐܡܪ̈ܢ ܩܕܡ ܦܘܫܩܗܘܢ ܕܦܬܓܡ̈ܐ ܕܣܘܕ ܦܪܕܝܣܐ ܦܪܥܢܢ. ܠܘܬ ܦܘܫܩܗܘܢ ܙܕܩ ܠܢ ܠܡܬܩܪܒܘ̣. ܘܡܛܠ ܕܦܘܫܩܗܘܢ ܗ̇ܘ ܣܘܥܪܢܝܐ ܐܘܟܝܬ ܓܘܫܡܢܝܐ ܛܒ ܕܢܝ̣ܚ ܘܩܪܝ̣ܚܐ ܘܠܐ ܥܡܘ̣ܛ. ܠܘ ܣܓܝ ܡܬܒܛܠ ܠܢ ܥܠܘܗܝ ܒܩܘܡܐ ܗܢܐ. ܐܠܐ ܒܠܚܘܕ ܠܦܘܫܩܐ ܗ̇ܘ ܪܘܚܢܝܐ ܩܦܝ̣ܣܐܝܬ ܣܥܪܝ̣ܢܢ.

 

 

 

 

 

ܦܣܘܩܐ ܩܕܡܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܦܘܫܩܐ ܕܦܬܓܡ̈ܐ ܡܫܘܕ̈ܥܢܝܗ̇ ܕܒܪܝܬ ܦܪܕܝܣܐ. ܩܕܡܝܬ ܓܘܫܡܐ

 

 

 

ܘܢܨܒ ܡܪܝܐ ܐܠܗܐ ܦܪܕܝܣܐ ܒܥܕܝܢ ܡ̣ܢ ܩܕܝ̣ܡ. ܘܣܡ ܬܡܢ ܠܐܕܡ ܕܓܒܠ. ܘܐܘܥܝ̣ ܡܪܝܐ ܐܠܗܐ ܡ̣ܢ ܐܪܥܐ. ܟܠ ܐܝܠܝܢ ܕܪܓܝ̣ܓ ܠܡܚܙܐ ܘܫܦܝܪ ܠܡܐܟܠ. ܘܐܝܠܢܐ ܕܚܝ̈ܐ ܒܡܨܥܬܗ ܕܦܪܕܝܣܐ. ܘܐܝܠܢܐ ܕܝ̣ܕܥܬܐ ܕܛܒܬܐ ܘܕܒܝܫܬܐ.

 

ܦܘܫܩܐ:

 

ܥܕܢ ܡ̣ܢ ܗ̇ܘ ܪܘܒܥܗ̇ ܕܐܪܥܐ ܕܒܗ ܗܠܝܢ ܩܠܝ̣̈ܡܐ ܡܛܟܣܝ̣ܢ. ܘܡܥ̣ܕܢ ܘܡܫܪܬܚ ܒܚܝ̈ܘܬܐ ܡܦܬܟ̈ܬܐ ܘܢܨ̈ܒܬܐ. ܘܒܗܘ̈ܠܐܣ ܐ̱ܚܪ̈ܢܝܬܐ ܕܓܐܝ̈ܢ ܘܦܐܝ̈ܢ ܘܗܕܝ̣ܪ̈ܢ ܘܫܒܝ̣̈ܚܢ ܐܝܬܘܗܝ. ܦܪܕܝܣܐ ܕܝܢ ܐܝܬܘܗܝ ܗ̣ܘ ܐܘܪܓܢܘܢ ܗܢܐ ܕܦܓܪܐ ܐ̱ܢܫܝܐ ܕܡܨܒܬ ܒܗܕܡ̈ܐ ܡܦܪ̈ܓܐ ܦܫܝ̈ܛܐ ܟܝܬ ܘܐܘܪ̈ܓܢܝܐ. ܡ̣ܢ ܩܕܝ̣ܡ ܡ̇ܢ ܓܝܪ ܐܡܪ ܕܒܪܝܗܝ ܠܦܪܕܝܣܐ ܗܢܐ. ܐܝܛܐ ܣܡ ܒܗ ܠܐܕܡ ܕܓܒܠ ܐܘܟܝܬ ܠܢܦܫܐ ܡܠܝ̣ܠܬܐ. ܒܗ̇ܝ ܕܐܦܢ ܫܘ̈ܝܝ ܫܘܝ̣ܚܘܬܐ ܐܢܘܢ ܢܦܫܐ ܘܦܓܪܐ. ܐܠܐ ܠܦܓܪܐ ܩܕܡܝܘܬܐ ܡܕܡ ܕܓܒܝ̣ܠܘܬܐ܇ ܘܟܢ ܐܣܪܐ ܗ̇ܘ ܕܢܦܫܐ ܡܠܝ̣ܠܬܐ ܢܩܦ. ܘܕܒܥܠܕ ܦܓܪܐ ܢܦܫܐ ܕܬܬܒܪܐ ܠܐ ܡܨܝܐ ܡ̣ܢ ܠܥܠ ܚܘܝܢܢ. ܘܐܝܠܢܐ ܡ̇ܢ ܪ̈ܓܝ̣ܓܝ ܠܡܚܙܐ ܐܘ ܫܦܝܪ̈ܝ ܠܡܐܟܠ܆ ܕܐܘܥܝ̣ ܡܪܝܐ ܐܠܗܐ ܡ̣ܢ ܐܪܥܐ. ܗ̣ܢܘܢ ܕܝܢ ܪ̈ܓܫܐ ܥܣܝܪ̈ܝܐ ܕܒܐܪܥ ܦܓܪܐ ܦܪܕܝܣܐ ܐܝܠܢܘ̈ܗܝ. ܘܐܝܠܢܐ ܡ̇ܢ ܕܚܝ̈ܐ ܗ̇ܘ ܚܝܠܐ ܚܫܘܒܬܢܝܐ ܘܗܘܢܢܝܐ ܐܝܬܘܗܝ. ܕܠܐܘܣܝ̈ܐܣ ܠܐ ܓܫܝ̣̈ܡܬܐ ܕܗ̣ܢܝܢ ܟܠܢܝ̈ܬܐ ܕܠܐ ܡܝ̈ܬܢ ܘܠܐ ܡܬܚܒ̈ܠܢ. ܐܡܝ̣ܢܐܝܬ ܚܝܝ̈ܢ ܡܕܪܟ. ܘܕܠܐܝܠܢܐ ܕܝܕܥܬܐ ܒܚܝܠܐ ܪܓܬܢܝܐ ܢܦܠܬܝ̣ܘܗܝ ܝܬܝܪ ܒܝܬܝܬܐ ܗܘܝܐ ܡܠܬܐ. ܒܗ̇ܝ ܕܗܢܐ ܟܕ ܢܡܘܣܐܝܬ ܡܣܬܥܪ ܡ̣ܢ ܒܢܘ̈ܗܝ ܕܥܠܡܐ ܗܢܐ ܥܠܡܢܐܝܬ ܘܠܘ ܪܘܚܢܐܝܬ ܪܥܝܢ ܠܡܚܐ܇ ܛܒܬܐ ܗ̱ܘ ܘܢܛܘܪܐ ܕܐܕܫܐ ܒܝܕ ܝܘܒܠܐ. ܘܥܠܬ݀ ܩܘܝܡܐ ܘܗܘܝܐ ܕܢܦ̈ܫܬܐ ܡܠܝ̈ܠܬܐ ܕܒܨܠܡܐ ܡܬܒܪ̈ܝܢ ܕܒܪܘܝܐ. ܘܒܗܝܢ ܡܬܡܠܐ ܥܠܡܐ ܕܠܥܠ. ܘܡܢܝܢܐ ܡܠܐܟܝܐ ܗ̇ܘ ܕܒܡܦܘܠܬܐ ܫܐܕܢܝܬܐ ܚܣܪ ܡܫܬܡܠܐ. ܟܕ ܕܝܢ ܠܐ ܢܡܘܣܐܝܬ ܘܠܐ ܡܠܝ̣ܠܐܝܬ ܡܣܬܥܪ. ܒܝܫܬܐ ܗ̱ܘ ܘܡܘܒܕܢܐ ܕܩܢܘܡܐ. ܘܥܠܬܐ ܕܒܝ̈ܫܬܐ ܣܓܝ̈ܐܬܐ. ܘܕܙܘܘܓܐ ܕܝ̣ܠܢܐܝܬ ܒܟܘܢܝܐ ܕܝ̣ܕܥܬܐ ܡܬܩܪܐ ܒܟܬܒ̈ܐ ܩܕܝ̈ܫܐ ܐܝܟ ܕܒܣܘܓܐܐ. ܡܢܗܘܢ ܕܟܬܒ̈ܐ ܩܕܝ̈ܫܐ ܝܕܝܥܐ. ܐܡܝ̣ܪ ܓܝܪ ܒܐܘܪܝܬܐ. ܘܟܠ ܐܢ̱ܬܬܐ ܕܝܕܥܬ݀ ܡܕܡܟܐ ܕܓܒܪܐ. ܘܒܐܘܢܓܠܝܘܢ. ܐܝܟܢܐ ܬܗܘܐ ܗܕܐ ܕܓܒܪܐ ܠܐ ܚܟܝ̣ܡ ܠܝ. ܘܕܡ̣ܢ ܙܘܘܓܐ ܫܪܝܬ݀ ܚܛܝܬܐ ܒܓܢܣܢ. ܣܗܕ ܕܘܝܕ ܕܐܡ̇ܪ. ܕܒܚ̈ܛܗܐ ܒܛܢܬܢܝ ܐܡܝ. ܘܗܠܝܢ ܡ̇ܢ ܗܟܢܐ ܐܢܝܢ. ܘܐܦܢ ܠܣܓܝ̈ܐܐ ܡ̣ܢ ܡܠܦܢ̈ܐ ܠܐ ܫ̇ܦܪܐ. ܘܒܡܨܥܬܐ ܐܢܘܢ ܕܦܪܕܝܣܐ ܦܓܪܐ. ܟܐܡܬ݀ ܒܠܒܐ ܬܪ̈ܝܗܘܢ ܗܠܝܢ ܐܝܠܢ̈ܐ ܚܝ̈ܠܐ. ܚܝܠܐ ܐܡ̇ܪ ܐ̱ܢܐ ܝ̇ܕܘܥܐ ܘܗ̇ܘ ܡܪܓܫܢܐ. ܡ̣ܢ ܠܥܠ ܦܬܝܐܝܬ ܚܘܝ̣ܢܢ܇ ܟܪ ܕܫܪܪܢܢ ܕܠܒܐ ܗܘܝܘ ܗܕܡܐ ܩܕܡܝܐ ܘܡܪܢܝܐ ܘܡܢܗ ܚܝ̈ܠܐ ܟܠܗܘܢ ܠܟܠܗ ܦܓܪܐ ܢܦܩܝ̣ܢ ܘܪܕܝܢ.

 

 

 

 

 

ܦܣܘܩܐ ܬܪܝܢܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܢܗܪܐ ܗ̇ܘ ܪܒܐ ܕܠܐܪܒܥܐ ܢܗܪ̈ܘܬܐ ܡܬܦܠܓ ܘܡܫܩܐ ܠܗ ܠܦܪܕܝܣܐ. ܩܕܡܝܬ ܓܘܫܡܐ

 

 

 

ܘܢܗܪܐ ܢܦܩ ܗ̣ܘܐ ܡ̣ܢ ܥܕܢ ܠܡܫܩܝܘܬܗ ܠܦܪܕܝܣܐ ܘܡ̣ܢ ܬܡܢ ܦܪܫ ܘܗ̇ܘܐ ܠܐܪܒܥܐ ܪ̈ܝܫܝ̣ܢ. ܫܡܗ ܕܚܕ ܦܝܫܘܢ. ܗ̇ܘ ܕܚܕܪ ܠܟܠܗ̇ ܐܪܥܐ ܕܚܘܝ̣ܠܐ ܕܬܡܢ ܕܗܒܐ. ܘܕܗܒܐ ܕܐܪܥܐ ܗ̇ܝ ܛܒ. ܬܡܢ ܒܪ̈ܘܠܝܝܐ ܘܟܐܦ̈ܐ ܕܒܪ̈ܘܠܐ. ܘܫܡܗ ܕܢܗܪܐ ܬܢܝܢܐ ܓܝܚܘܢ. ܗ̇ܘ ܕܚ̇ܕܪ ܠܟܠܗ̇ ܐܪܥܐ ܕܟܘܫ. ܘܫܡܗ ܕܢܗܪܐ ܬܠܝܬܝܐ ܕܩܠܬ݀. ܗ̇ܘ ܕܐܙܠ ܠܘܩܒܠ ܐܬܘܪ. ܘܢܗܪܐ ܕܐܪܒܥܐ ܗ̣ܘ ܦܪܬ.

 

ܦܫܘܩܐ:

 

ܢܗܪܐ ܕܢܦܩ ܡ̣ܢ ܥܕܢ. ܗ̣ܢܘܢ ܬܘܪ̈ܣܝܐ ܘܫܩ̈ܝܐ ܕܡ̣ܢ ܐܪܥܐ ܗܕܐ ܡܥܕܢܬܐ ܢܦܩܝ̣ܢ. ܘܡܬܪܣܝܢ ܘܡܫܩܝܢ ܠܦܪܕܝܣܐ ܦܓܪܐ ܐܝܬܘܗܝ. ܘܡܢܗ ܕܬܘܪܣܝܐ ܘܫܩܝܐ ܡܬܝܠܕܝܢ ܘܗ̇ܘܝܢ ܐܪܒܥܐ ܢܗܪ̈ܘܬܐ. ܐܘܟܝܬ ܪ̈ܘܚܐ ܩܛܝ̈ܢܬܐ. ܕܐܝܬܝܗܝܢ ܡܪ̈ܟܒܬܐ ܕܚܝ̈ܠܐ ܪ̈ܒܝܥܝܐ ܕܐܪܒܥܐ ܗܕܡ̈ܐ ܡܪ̈ܢܝܐ. ܘܦܝ̣ܫܘܢ ܡ̇ܢ ܐܝܬܘܗܝ ܪܘܚܐ ܢܦܫܢܝܬܐ ܕܡ̣ܢ ܡܘܚܐ ܡܫܪܝܐ ܘܒܓ̈ܝܕܐ ܠܘܬ ܗܕܡ̈ܐ ܡܪ̈ܓܫܢܐ ܘܡܬܬܙܝ̣̈ܥܝ ܨܒܝܢܐܝܬ ܪܕܝܐ. ܘܠܚܝ̈ܠܝ ܪ̈ܓܫܐ ܘܙܘܥܐ ܨܒܝܢܐ ܛܥܝ̣ܢܐ. ܘܕܡܛܠ ܨܠܝ̣ܠܘܬܗܘܢ ܘܫܦܝܘܬܗܘܢ ܕܗܒܐ ܛܒܐ ܘܒܪ̈ܘܠܝܝܐ ܐܘܟܝܬ ܡܪ̈ܓܢܝܬܐ ܕܢܗܝ̣ܪ̈ܢ. ܘܒܪ̈ܘܠܐ ܐܘܟܝܬ ܟܐܦ̈ܐ ܛܒ̈ܬܐ ܘܢܗܝܪ̈ܬܐ ܕܣܘ̈ܡܩܢ ܘܝܘܪ̈ܩܢ. ܘܒܓܘ̈ܢܐ ܐ̱ܚܪ̈ܢܐ ܓܐܝ̈ܐ ܡܣܕܪ̈ܢ ܐܬܩܪܝ̣ܘ ܪ̈ܓܫܐ ܓܠܝܐ. ܐܦ ܓܝܪ ܘܐܝܟ ܕܒܣܘܓܐܐ ܥܝܕܐ ܐܝܬ ܗ̣ܘܐ ܠܗ ܠܟܬܒܐ ܩܕܝܫܐ ܕܠܡܕܪ̈ܟܢܘܬܐ ܗܘܢܢ̈ܝܬܐ ܘܠܡ̈ܠܐ ܡܒܕܩܢ̈ܝܬܗܝܢ ܕܗܒܐ ܘܟܐܦ̈ܐ ܛܒ̈ܬܐ ܘܡܪ̈ܓܢܝܬܐ ܢܩܪܐ. ܐܝܟ ܗ̇ܝ ܕܐܡ̣ܪ ܕܘܝܕ. ܡܛܠ ܗܢܐ ܠܡ ܪܚܡܬ ܦܘܩ̈ܕܢܝܟ ܛܒ ܡ̣ܢ ܕܗܒܐ ܘܛܒ ܡ̣ܢ ܟܐܦ̈ܐ ܛܒ̈ܬܐ. ܘܡܪܢ ܕܐܡ̣ܪ ܠܐ ܬܪܡܘܢ ܡܪ̈ܓܢܝܬܟܘܢ ܩܕܡ ܚܙܝ̣ܪ̈ܐ. ܟܐܡܬ݀ ܡܠܝ̈ܟܘܢ ܩܕܡ ܦܛܥ̈ܐ. ܘܢܗܪܐ ܬܢܝܢܐ ܓܝ̣ܚܘܢ ܐܝܬܘܗܝ. ܪܘܚܐ ܟܝܢܝܬܐ ܕܡ̣ܢ ܟܒܕܐ ܡܫܪܝܐ. ܘܠܕܡܐ ܡܘܠܕܐ. ܘܥܠ ܟܠܗܝܢ ܐܪ̈ܥܬܐ ܒܣܪ̈ܢܝܬܐ ܒܝܕ ܘܪ̈ܝ̣ܕܐ ܠܗ ܡܓܝ̣ܚܐ. ܘܢܗܪܐ ܬܠܝܬܝܐ ܕܩܠܬ ܐܝܬܘܗܝ܇ ܪܘܚܐ ܡܘܠܕܢܝ̣ܬܐ ܕܡ̣ܢ ܦܚ̈ܠܬܐ ܡܫܪܝܐ ܘܠܚܝܠܐ ܪܓܬܢܝܐ ܛܥܝ̣ܢܐ. ܘܒܡܐܢܝ̈ ܙܪܥܐ ܕܐܝܬܝܗܘܢ ܡܥܒܪ̈ܢܐ ܐܠܝ̣̈ܨܐ ܡܬܕܩܠܐ ܐܝܟ ܕܒܥܪܒܠܐ ܘܥ̇ܒܪܐ. ܘܢܗܪܐ ܪܒܝܥܝܐ ܦܪܬ ܐܝܬܘܗܝ. ܪܘܚܐ ܚܝܘܬܢܝܬܐ ܕܡ̣ܢ ܠܒܐ ܡܫܪܝܐ ܘܒܫܪ̈ܝܢܐ ܠܘܬ ܟܠܗܘܢ ܗܕܡ̈ܐ ܐܟܚܕܐ ܪܕܝܐ. ܘܠܗ̇ܝ ܕܢܚܘܢ ܘܠܐ ܢܬܚܒܠܘܢ ܟܡܐ ܕܡܟܢܝ̣ܢ. ܘܕܢܬܬܪܣܘܢ ܘܢܪܓܫܘܢ ܘܢܬܬܙܝ̣ܥܘܢ ܘܢܦܪܘܢ ܠܗܘܢ ܡܫܟܢܐ. ܡܛܠ ܗܕܐ ܦܪܬ ܐܬܩܪܝ̣ ܢܗܪܐ ܐܘܟܝܬ ܚܝܠܐ ܗܢܐ. ܒܗ̇ܝ ܕܡܦܪܝܢܐ ܡܕܡ ܐܝܬܘܗܝ ܘܥܠܬܐ ܕܫܟܝ̣ܚܘܬܐ ܘܩܘܝܡܐ ܕܚܝ̈ܠܐ ܗܠܝܢ ܐ̱ܚܪ̈ܢܐ ܬܠܬܐ. ܗ̇ܘ ܓܝܪ ܕܠܐ ܚܝ܆ ܘܠܐ ܕܢܪܓܫ ܐܘ ܕܢܬܬܙܝܥ ܡܟܢ. ܘܒܝܕ ܗܕܐ ܬܘܒ ܡܝܬܪܐ ܘܡܥܠܝܐ ܕܢܗܪ̈ܘܬܐ ܐܬܩܪܝ̣ ܦܪܬ ܘܡܘ̈ܗܝ ܚܠܝ̣̈ܡܐ ܘܚܠܝ̈ܐ. ܐܝܟ ܕܐܦ ܚܝܠܐ ܚܝܘܬܢܝܐ ܒܦܚܡܐ ܕܚܝ̈ܠܐ ܐ̱ܚܪ̈ܢܐ. ܘܗ̇ܝ ܕܚܣܝܐ ܝܥܩܘܒ ܠܡܪܬܐ ܐܘܟܡܬܐ ܡܕܡܐ ܠܗ. ܘܠܗ̇ܢܘܢ ܬܠܬܐ ܐ̱ܚܪ̈ܢܐ ܒܟܘ̈ܡܘ. ܠܘ ܕܝܢ ܣܓܝ ܒܝܬܐܝܬ ܝ̇ܗܒ.

 

 

 

ܦܣܘܩܐ ܬܠܝܬܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܫܘܪܝ ܗܘܢܐ ܕܒܦܪܕܝܣܐ ܘܣܝܘܡܘܬ ܢܡܘܣܐ ܘܓܙܡܐ ܘܫܘܪܝ ܫܘܪܬܚ ܩܢܘ̈ܡܐ ܐ̱ܢܫܝ̈ܐ. ܩܕܡܝܬ ܓܘܫܡܐ

 

ܘܕܒܪܗ ܡܪܝܐ ܐܠܗܐ ܠܐܕܡ ܘܫܒܩܗ ܒܦܪܕܝܣܐ ܕܥܕܢ ܕܢܦܠܚܝ̣ܘܗܝ ܘܢܛܪܝ̣ܘܗܝ. ܘܦܩܕ ܡܪܝܐ ܠܐܕܡ ܘܐܡ̣ܪ ܠܗ. ܡ̣ܢ ܟܠܗܘܢ ܐܝܠܢ̈ܐ ܕܒܦܪܕܝܣܐ ܡܐܟܠ ܬܐܟܘܠ. ܘܡ̣ܢ ܐܝܠܢܐ ܕܝܕܥܬܐ ܕܛܒܬܐ ܘܕܒܝܫܬܐ ܠܐ ܬܐܟܘܠ ܡܢܗ. ܡܛܠ ܕܒܝܘܡܐ ܕܬܐܟܘܠ ܡܢܗ܇ ܡܘܬܐ ܬܡܘ̣ܬ. ܘܐܡ̣ܪ ܡܪܝܐ ܐܠܗܐ. ܠܐ ܫܦܝܪ ܕܢܗܘܐ ܐܕܡ ܒܠܚܘܕܘܗܝ. ܐܥܒܕ ܠܗ ܡܥܕܪܢܐ ܐܟܘܬܗ.

 

ܦܘܫܩܐ:

 

ܕܒܪܗ ܠܡ ܡܪܝܐ ܐܠܗܐ ܠܐܕܡ ܘܫܒܩܗ ܒܦܪܕܝܣܐ. ܟܐܡܬ݀ ܐܣ̣ܪܗ ܠܢܦܫܐ ܡܠܝ̣ܠܬܐ ܐܕܡ ܥܡܗ ܕܦܓܪܐ ܐ̱ܢܫܝܐ ܦܪܕܝܣܐ ܕܬܦܪܢܣܝ̣ܘܗܝ ܘܬܛܪܝ̣ܘܗܝ ܕܠܐ ܢܟܝܢ ܒܝܕ ܦܘܠܚܢܐ ܡܠܝ̣ܠܐ ܘܗܘܢܢܝܐ. ܘܡ̣ܢ ܟܠܗܘܢ ܐܝܠܢ̈ܐ ܕܒܦܪܕܝܣܐ. ܐܬܦܣܣ ܠܗ ܠܐܕܡ ܕܢܐܟܘܠ ܣܛܪ ܡ̣ܢ ܗ̇ܘ. ܟܐܡܬ݀ ܐܢ̱ܬܝ ܐܘ ܢܦܫܐ ܡܠܝ̣ܠܬܐ ܒܟܠܗܝܢ ܗܢܝ̈ܐܘܬܐ ܡܬܪ̈ܓܫܢܝܬܐ ܕܐܝܬܝܗܝܢ ܐܢܢܩܝ̈ܬܐ ܠܘܬ ܢܛܝ̣ܪܘܬ ܦܓܪܟܝ ܘܐܣܪܟܝ ܕܥܡܗ ܐܬܚܫܚܝ. ܣܛܪ ܡ̣ܢ ܕܒܗ̇ܝ ܒܥܝ̣ܪܝܬܐ ܕܠܘ ܐܢܢܩܝܬܐ ܗ̱ܝ ܠܘܬ ܢܛܝ̣ܪܘܬ ܒܝܬ ܡܥܡܪܟܝ ܘܥܡܘܪ̈ܝܟܝ. ܒܗ̇ܝ ܕܐܢܗܘ ܕܒܢܫ̈ܒܝܗ̇ ܬܬܦܪܟܠܝ̣ܢ ܘܒܓܠܘܬܗ̇ ܬܫܬܒܝܢ܇ ܡ̣ܢ ܐܠܗܐ ܬܬܦܪܫܝ̣ܢ. ܘܬܡܘܬܝܢ ܘܠܐ ܬܬܡܨܝܢ ܕܬܫܬܘܕܥܝܢܝܗܝ. ܒܗ̇ܝ ܕܒܕܡܘ̣ܬ ܥܢܢܐ ܥܪܦܠܝܬܐ ܩܕܡ ܚܙ̈ܝܬܟܝ ܩ̇ܝܡܐ. ܘܡ̣ܢ ܗܪܟܐ ܬܚܫܟܝ̣ܢ. ܘܟܕ ܒܐܝܩܪܟܝ ܠܐ ܬܬܒܝܢܝ̣ܢ܇ ܡ̣ܢ ܕܪܓ ܫܘܒܚܟܝ ܬܫܬܪܓܠܝ̣ܢ ܘܠܚܝܘܬܐ ܬܫܬܠܡܝ̣ܢ. ܟܐܡܬ ܠܬܪܝܢ ܡܪ̈ܘܢ ܬܗܘܝܢ. ܘܐܠܘ ܠܚܕ ܡܢܗܘܢ ܠܐ ܬܣܢܝܢ܆ ܠܗ̇ܘ ܐ̱ܚܪܢܐ ܠܐ ܬܬܡܨܝܢ ܕܬܫܬܥܒܕܝ̣ܢ. ܘܐܡ̣ܪ ܐܠܗܐ ܠܐ ܫܦܝܪ ܕܢܗܘܐ ܐܕܡ ܒܠܚܘܕܘܗܝ. ܐܢܗܘ ܓܝܪ ܕܡܛܠ ܗ̇ܝ ܕܡܬܡܠܐ ܥܠܡܐ ܕܠܥܠ ܐܬܒܪܝ ܒܪܢܫܐ. ܘܗ̇ܢܘܢ ܕܡܢܗ ܕܥܠܡܐ ܗ̇ܘ ܚܣ̣ܪܘ ܟܕ ܢܦܠܘ܇ ܩܢܘ̈ܡܐ ܗ̣ܘܘ ܣܓܝ̈ܐܐ܆ ܕܝܗ̈ܠܐ ܫܐܕܢܝ̈ܐ ܡܢܗܘܢ ܗܘ̣ܘ. ܐܝܟܢܐ ܫܦܝܪ ܐܘ ܡܨܝܐ ܕܚܕ ܒܠܚܘܕ ܩܢܘܡܐ ܕܢܦܫܐ ܐ̱ܢܫܝܬܐ ܢܡܠܐ ܕܘܟܬܗܘܢ ܠܐ ܕܘܟܬܢܝܬܐ ܕܗ̇ܢܘܢ ܣܓܝ̈ܐܐ. ܐܥܒܕ ܠܗ ܬܘܒ ܡܟܝܠ ܡܥܕܪܢܐ ܐܟܘܬܗ ܚܝ̈ܘܬܐ ܟܝܬ ܠܐ ܡܠܝ̈ܠܬܐ.

 

 

 

 

 

ܦܣܘܩܐ ܪܒܝܥܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܒܪܝ̣ܬܐ ܕܟܝ̈ܢܐ ܚܝ̈ܐ ܠܐ ܡܠܝ̣̈ܠܐ. ܩܕܡܝܬ ܓܘܫܡܐ

 

ܘܓܒܠ ܡܪܝܐ ܐܠܗܐ ܡ̣ܢ ܐܪܥܐ ܟܠܗ̇ ܚܝܘܬܐ ܕܕܒܪܐ. ܘܟܠܗ̇ ܦܪܚܬܐ ܕܫܡܝܐ. ܘܐܝܬܝ̣ ܐܢܘܢ ܠܘܬ ܐܕܡ ܕܢܚܙܐ ܡܢܐ ܩܪܐ ܠܗܘܢ. ܘܟܠ ܕܩ̇ܪܐ ܠܗܘܢ ܐܕܡ ܢܦܫܐ ܚܝܬܐ ܗ̇ܘ ܗ̣ܘ ܫܡܗ̇. ܘܩ̣ܪܐ ܐܕܡ ܫܡܗ̈ܐ ܠܟܠܗ̇ ܐܪܥܐ ܘܠܟܠܗ̇ ܦܪܚܬܐ ܕܫܡܝܐ ܘܠܟܠܗ̇ ܚܝܘܬܐ ܕܕܒܪܐ.

 

ܦܘܫܩܐ:

 

ܚܝܘܬܐ ܡ̇ܢ ܕܕܒܪܐ ܗ̣ܘ ܚܝܠܐ ܚܡܬܢܐ ܐܝܬܝܗ̇. ܦܪܚܬܐ ܕܫܡܝܐ ܡܬܪ̈ܢܝܢܘܬܐ ܘܗܓܓ̈ܐ ܘܦܢܛܣܝ̈ܐܣ ܕܒܗܘܢ ܟܕ ܫܠܐܷ ܒܪܢܫܐ ܐܘ ܕܡܝ̣ܟ. ܐܦ ܠܘ ܠܫܡܝܐ ܡܨܐ ܠܡܣܩ. ܘܒܐܐܪ ܠܡܕܝܪܘ܇ ܘܒܐܪ̈ܒܥܦܢܝܢ ܠܡܚܕܪ ܠܐ ܡܬܟܠܝܢܐܝܬ. ܘܒܥܝ̣ܪܐ ܐܝܬܝܗ̇ ܕܥܠ ܬܘܪܣܝܐ ܒܠܚܘܕ ܒܛܝ̣ܠ ܠܗ̇ ܥܡ ܡܫܗܝܢܘܬ ܚܡܬܐ. ܘܕܢܦܫܐ ܡܠܝܠܬܐ ܠܗܘܢ ܠܗܠܝܢ ܡܦܪܢܣܐ. ܘܝ̇ܕܥܐ ܠܗܘܢ ܘܫܡܗ̈ܐ ܩܪܝܐ ܓܠܝܐ.

 

 

 

 

 

ܦܣܘܩܐ ܚܡܝܫܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܐܝܟܢܝܘܬܐ ܕܡܫܪܬܚܘܬ ܩܢܘ̈ܡܐ ܘܢܩܝ̣ܦܘܬ ܣܓܝ̈ܐܘܬܐ ܩܕܡܝܬ ܓܘܫܡܐ

 

 

 

ܘܠܐܕܡ ܠܐ ܐܫܬܟܚ ܠܗ ܡܥܕܪܢܐ ܐܟܘܬܗ. ܘܐܪܡܝ̣ ܐܠܗܐ ܫܠܝܐ ܥܠ ܐܕܡ ܘܕܡܟ. ܘܢܣ̣ܒ ܚܕܐ ܡ̣ܢ ܐܠܥܘ̈ܗܝ ܘܐܘܚܕ ܒܣܪܐ ܚܠܦܝܗ̇. ܘܬܩܢ ܡܪܝܐ ܐܠܗܐ ܠܐܠܥܐ ܕܢܣܒ ܡ̣ܢ ܐܕܡ ܠܐܢ̱ܬܬܐ܆ ܘܐܝܬܝܗ̇ ܠܐܕܡ. ܘܐܡ̣ܪ ܐܕܡ. ܗܢܐ ܙܒܢܐ܆ ܓܪܡܐ ܡ̣ܢ ܓܪ̈ܡܝ. ܘܒܣܪܐ ܡ̣ܢ ܒܣܪܝ. ܗܕܐ ܬܬܩܪܐ ܐܢ̱ܬܬܐ. ܡܛܠ ܕܡ̣ܢ ܓܒܪܐ ܢܣܝ̣ܒܐ. ܡܛܠ ܗܕܐ ܕܢܫܒܘܩ ܓܒܪܐ ܠܐܒܘܗܝ ܘܠܐܡܗ ܘܢܩܦ ܠܐܢ̱ܬܬܗ. ܘܗܘ̣ܘ ܬܪ̈ܝܗܘܢ ܥܪ̈ܛܠܝܝܢ ܐܕܡ ܘܐܢ̱ܬܬܗ ܘܠܐ ܒ̇ܗܬܝܢ.

 

ܦܘܫܩܐ:

 

ܠܢܦܫܐ ܡ̇ܢ ܓܝܪ ܡܠܝ̣ܠܬܐ ܐܦܢ ܐܝܬ ܗ̣ܘܘ ܠܗ̇ ܡܥܕܪ̈ܢܐ ܣܘܓܐܐ. ܥܒܘܕܗ̇ ܐܡ̇ܪ ܐ̱ܢܐ ܕܐܝܬܘܗܝ ܐܝܬܝܐ ܓܢܝ̣ܙ ܡ̣ܢ ܗܘ̈ܢܐ. ܘܐܘܣܝ̈ܐܣ ܐ̱ܚܪ̈ܢܝܬܐ ܡܠܐܟܝ̈ܬܐ. ܐܠܐ ܡ̣ܢ ܒܢܝ̈ ܐܕܫܗ̇ ܘܠܐ ܥܕܡܫ ܐܝܬ ܗ̣ܘܐ ܠܗ̇ ܡܥܕܪܢܐ. ܒܕܓܘܢ ܟܕ ܙܒܢܐ ܙܥܘܪܐ ܫܠܝܬ݀ ܘܕܡܟܬ݀ ܘܢܚܬ݀ ܡ̣ܢ ܗܪܓܐ ܕܒܐܠܗܐ ܘܗܘܓܝܐ ܕܒܐܠܗܝ̈ܬܐ. ܘܡܢܬܐ ܡ̣ܢ ܦܓܪܗ̇ ܕܒܬ݀ ܘܫܚܬ݀. ܐܠܥܐ ܬܗܐ ܗܕܐ ܡܢܬܐ ܐܘ ܙܪܥܐ ܕܐܬܟܢܝ̣ ܐܠܥܐ. ܘܡܢܗ̇ ܕܡܢܬܐ ܗܕܐ ܩܢܘܡܐ ܐ̱ܚܪܢܐ ܕܦܓܪܐ ܡܬܩܢܢܐ ܕܟܠܐ ܬܩܢ. ܘܒܐܚܪܢܐ ܩܢܘܡ ܢܦܫܐ ܐܥܡܪܗ. ܡܠܝ̣ܣܛܐ ܕܝܢ ܒܗ ܐܥܡ̣ܪ. ܘܡܢܗ ܕܦܓܪܐ ܗ̇ܘ ܩܕܡܝܐ ܦܓܪܐ ܐ̱ܚܪܝܢ ܬܩܢ. ܘܠܘ ܗܘܬ ܡ̣ܢ ܐܪܥܐ. ܐܝܟܢܐ ܕܡ̣ܢ ܕܗܪܟܐ ܐܘܪܚܐ ܢܕܪܘܫ ܕܝܘܒܠܐ ܘܡܘܠܕܐ ܕܚܕ ܡ̣ܢ ܚܕ. ܟܐܡܬ݀ ܡ̣ܢ ܐܕܡ ܚܘܐ. ܘܡܢܗ ܘܡܢܗ̇ ܐ̱ܚܪܢܐ ܘܐ̱ܚܪܬܐ. ܘܡ̣ܢ ܗܕܐ ܘܡ̣ܢ ܗ̇ܝ ܗܟܘܬ ܗ̇ܢܘܢ ܘܗ̇ܢܝܢ ܕܫܪܟܐ. ܗܕܐ ܠܡ ܬܬܩܪܐ ܐܢ̱ܬܬܐ. ܡܛܠ ܕܡ̣ܢ ܓܒܪܐ ܢܣܝ̣ܒܐ. ܘܝ̣ܕܝ̣ܥܐ ܕܠܦܘܬ ܠܥܙܐ ܐܘܟܘܬ ܠܫܢܢܝܘܬܐ ܕܣܘܪ̈ܝܝܐ ܠܘ ܐܛܘܢܘܡܘܠܘܓܝܐ ܬܪܝܨܬܐ ܐܝܬܝܗ̇ ܢܣܝ̣ܒܘܬܐ ܗܕܐ. ܐܦܠܐ ܦܐܪܐ ܢܘܡܐ ܐܝܟ ܩܢܘܢ ܡܡܠܠܐ. ܐܝܕܐ ܓܝܪ ܒܝܬܝܘܬܐ ܐܘ ܕܘܡܝܐ ܠܒܪܬ ܩܠܐ ܕܐܢ̱ܬܬܐ ܠܘܬ ܫܡܐ ܕܓܒܪܐ. ܫܪܝ̣ܟܐ ܡܕܝܢ ܕܠܦܘܬ ܠܟܣܝ̣ܣ ܥܒܪܝܬܐ ܝܬܝܪ ܡܣܒܗܐܝܬ ܝܗܒ ܗ̇ܘ ܐܝ̣ܫ ܡܬܩܪܐ ܥܒܪܐܝܬ. ܘܐܢ̱ܬܬܐ ܐܝܫܐ. ܒܕܡ̣ܢ ܐܝܫ ܢܣܝ̣ܒܐ. ܢܫܒܘܩ ܠܡ ܓܒܪܐ ܠܐܒܘܗܝ ܘܠܐܡܗ ܘܢܩܦ ܠܐܢ̱ܬܬܗ. ܐܒܐ ܠܡ ܓܝܪ ܘܐܡܐ܆ ܥܠܬܐ ܐܢܘܢ ܕܫܟܝ̣ܚܘܬܗ ܕܓܒܪܐ. ܘܡܛܠܗܕܐ ܟܕ ܢܫܬܟܚ ܐܝ̇ܕܐ ܣܢܝ̣ܩܘܬܐ ܬܗܘܐ ܠܗ ܥܠܝܗܘܢ. ܐܠܐ ܠܐܢ̱ܬܬܗ ܐܠܨܐܝܬ ܢܩܦ ܐܝܟܢܐ ܕܐܝܟ ܢܡܘܣ ܟܝܢܐ ܡ̣ܢ ܟܢܝ̣ܫܘܬ ܬܪ̈ܝܗܘܢ܆ ܩܢܘܡܐ ܕܕܡܐ ܠܗܘܢ ܢܬܬܗܘܐ. ܘܢܗܘܘܢ ܬܪ̈ܝܗܘܢ ܚܕ ܒܣܪܐ. ܐܢܗܘ ܓܝܪ ܕܟܠ ܥܠܬܢܐ ܗܘܠܢܝܐ ܒܝܕ ܥܠܬܐ ܥܒܘܕܬܐ ܘܡܩܒܠܢܝ̣ܬܐ ܡܨܐ ܠܡܫܬܟܚܘ ܒܫܪܪܐ. ܕܬܪ̈ܝܗܘܢ ܚܕ ܐܢܘܢ ܥܠܬܐ ܡܫܡܠܝܬܐ. ܐܘܟܝܬ ܚܕ ܒܣܪ ܒܦܚܡܐ ܕܗܘܝܗ ܕܥܠܬܢܐ. ܘܟܠ ܚܕ ܡܢܗܘܢ ܟܐܡܬ݀ ܕܓܒܪܐ ܘܐܢ̱ܬܬܐ ܡܢܬܐ ܗ̇ܘܐ ܕܥܠܬܐ ܘܦܠܓܘܬ ܥܠܬܐ܇ ܘܠܘ ܥܠܬܐ ܡܫܡܠܝܬܐ. ܘܡܛܠܗܕܐ ܬܪ̈ܝܗܘܢ ܚܕ ܒܣܪ. ܘܗܘ̣ܘ ܬܪ̈ܝܗܘܢ ܥܪ̈ܛܠܝܝܢ ܘܠܐ ܒ̇ܗܬܝܢ. ܡܛܠ ܕܠܐ ܥܕܡܫ ܐܬܥܒܕܕܘ ܗ̣ܘܘ ܘܐܫܬܥܒܕܘ ܠܪܓܬܐ ܗ̇ܝ ܡܒܗܬܢܝܬܐ. ܐܟܡܐ ܕܐܦ ܠܫܒܪ̈ܐ ܘܫܒܪ̈ܬܐ ܓܕܫܐ.

 

 

 

 

 

ܦܣܘܩܐ ܫܬܝܬܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܙܢܐ ܕܡܫܬܒܝܢܘܬܗܘܢ ܕܠܪܓܬܐ ܩܕܡܝܬ ܓܘܫܡܐ

 

 

 

ܘܚܘܝܐ ܡ̇ܢ ܥܪܝ̣ܡ ܗ̣ܘܐ ܡ̣ܢ ܟܠܗ̇ ܚܝܘܬܐ ܕܕܒܪܐ ܕܥܒ̣ܕ ܡܪܝܐ ܐܠܗܐ. ܘܐܡ̣ܪ ܚܘܝܐ ܠܐܢ̱ܬܬܐ. ܕܫܪܝܪܐܝܬ ܐܡ̣ܪ ܡܪܝܐ ܐܠܗܐ ܕܠܐ ܬܐܟܠܘܢ ܡ̣ܢ ܟܠܗܘܢ ܐܝܠܢܝ̈ ܦܪܕܝܣܐ. ܘܐܡܪܬ݀ ܐܢ̱ܬܬܐ ܠܚܘܝܐ. ܕܡ̣ܢ ܦܐܪ̈ܝ ܐܝܠܢ̈ܐ ܕܒܦܪܕܝܣܐ ܟܠܗܘܢ ܢܐܟܘܠ. ܡ̣ܢ ܦܐܪ̈ܝ ܐܝܠܢܐ ܕܒܡܨܥܬܗ ܕܦܪܕܝܣܐ ܐܡ̣ܪ ܐܠܗܐ ܕܠܐ ܬܐܟܠܘܢ ܡܢܗ. ܘܠܐ ܬܬܩܪܒܘܢ ܠܗ ܕܠܐ ܬܡܘܬܘܢ. ܘܐܡ̣ܪ  ܚܘܝܐ ܠܐܢ̱ܬܬܐ ܠܐ ܡܡܬ ܬܡܘܬܘܢ. ܡܛܠ ܕܝ̇ܕܥ ܐܠܗܐ܇ ܕܒܝܘܡܐ ܕܐܟ̇ܠܝܬܘܢ ܡܢܗ ܡܬܦܬܚ̈ܢ ܥܝܢܝ̈ܟܘܢ. ܘܗܘܝܬܘܢ ܐܝܟ ܐܠܗ̈ܐ ܘܝܕ̈ܥܝ ܛܒܬܐ ܘܒܝܫܬܐ. ܘܚܙܬ݀ ܐܢ̱ܬܬܐ ܕܫܦܝܪ ܐܝܠܢܐ ܠܡܐܟܠ ܘܪܓܬܐ ܗ̱ܘ ܠܥܝ̈ܢܐ. ܘܪܓܝܓ ܐܝܠܢܐ ܠܡܚܪ ܒܗ. ܘܢܣܒܬ݀ ܡ̣ܢ ܦܐܪ̈ܘܗܝ ܘܐܟܠܬ݀ ܘܝܗܒܬ݀ ܐܦ ܠܒܥܠܗ̇ ܘܐܟܠ.

 

ܦܘܫܩܐ:

 

ܚܘܝܐ ܗ̇ܘ ܚܝܠܐ ܪܓܬܢܐ ܐܝܬܘܗܝ. ܘܕܗ̣ܘ ܗܢܐ ܝܬܝܪ ܡ̣ܢ ܚܝܠܐ ܚܡܬܢܐ ܥܪܝ̣ܡ ܝ̣ܕܝ̣ܥܐ ܡ̣ܢ ܗ̇ܝ ܕܗ̇ܘ ܕܡܬܒܥܪܪ ܒܚܡܬܐ ܒܠܥܕ ܒܘܝܢܐ ܡܬܪܡܐ ܠܡܬܢܩܝܘ. ܘܗ̇ܘ ܕܥ̇ܗܪ ܘܦ̇ܩܪ ܒܪܓܬܐ܆ ܡܬܪܢܐ ܥܪܝ̣ܡܐܝܬ ܕܐܝܟܢܐ ܢܬܦܪܣ ܠܡܩܕܝܘܬܗ ܠܡܬܪܓܪܓܢܐ. ܒܕܓܘܢ ܐܝܟ ܗ̇ܘ ܕܗ̣ܘ ܪܢܝܐ ܘܚܘܫܒܐ ܕܐܝܟ ܗܢܐ ܕܠ ܒܗ̇ ܒܐܢ̱ܬܬܐ ܘܡܠܟܗ̇ ܕܐܢ ܬܩܕܝܢ ܗ̇ܘ ܡܐ ܕܪܐܓܐ ܐܢ̱ܬܝ ܠܗ ܘܡܫܬܢܓܐ. ܠܘ ܒܠܚܘܕ ܠܐ ܬܡܘ̣ܬܝܢ ܥܡ ܫܘܬܦܟܝ. ܐܠܐ ܡܠܘܢ ܐܝܟ ܕܗ̣ܘ ܐܠܗܐ ܐܗܘܝ̣ܟܘܢ ܐܦ ܐܢ̱ܬܘܢ ܐܟܘܬܗ ܬܗܘܘܢ. ܟܕ ܡܘܠܕܝܢ ܐܢ̱ܬܘܢ. ܘܟܕ ܗܟܢܐ ܪܢܝܐ ܕܐܝܟ ܗܢܐ ܓܪܓܗ̇ ܘܠܒܛܗ̇ ܥܠ ܚܫܚܬܐ ܕܪܓܬܐ ܗ̇ܝ ܕܙܟܬܗ̇. ܐܦ ܠܘܬ ܓܒܪܐ ܩܪܒܬ݀ ܘܡܚܬܚܬܐ ܠܗ ܘܡܠܚܟܫܐ. ܥܕܡܐ ܕܒܚ̣ܫܬܗ ܐܝܟ ܡܓܪܓܢܝ̣ܬܐ ܘܠܘܬ ܗ̇ܝ ܕܢܐܪܓ ܗ̇ܝ ܕܪܓܬ݀ ܢܓܕܬܗ. ܘܕܢܚܐ ܚܝܘܬܢܐܝܬ ܘܒܥܝ̣ܪܐܝܬ ܥܒܕܬܗ. ܘܠܗ̇ܝ ܕܐܟܠܬ݀ ܘܐܟ̣ܠ܆ ܕܪܓܬ݀ ܘܪܓ ܙܕܩ ܠܡܣܬܟܠܘ. ܘܠܘ ܕܐܫܬܘܬܦܬ݀ ܘܐܫܬܘܬܦ. ܟܕ ܒܬܘ̈ܠܐ ܗ̣ܘܘ ܟܕ ܐܬܬܦܩܘ ܡ̣ܢ ܦܪܕܝܣܐ܆ ܘܠܘ ܡܙܘ̈ܓܐ܇ ܐܝܟ ܕܐܡܪܝܢ ܡܠܦܢ̈ܐ ܩܕܝ̈ܫܐ.

 

 

 

ܦܣܘܩܐ ܫܒܝܥܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܙܢܐ ܕܒܗܬܬܗܘܢ ܘܕܡܦܩ ܒܪܘܚܗܘܢ ܠܣ̇ܐܡ ܢܡܘܣܗܘܢ ܩܕܡܝܬ ܓܘܫܡܐ

 

 

 

ܘܐܬܦܬܚ̈ܝ ܥܝ̈ܢܐ ܕܬܪ̈ܝܗܘܢ ܘܝ̣ܕܥܘ ܕܥܪ̈ܛܠܝܝܢ ܐܢܘܢ. ܘܕܒܩܘ ܛܪ̈ܦܐ ܕܬܐܢ̈ܐ ܘܥܒ̣ܕܘ ܠܗܘܢ ܦܪ̈ܙܘܡܐ ܘܫܡܥܘ ܩܠܗ ܕܡܪܝܐ ܐܠܗܐ. ܒܓܘ ܐܝܠܢ̈ܐ ܕܒܦܪܕܝܣܐ ܠܦܢܝܗ ܕܝܘܡܐ ܘܐܬܛܫܝ̣ܘ ܐܕܡ ܘܐܢ̱ܬܬܗ ܡ̣ܢ ܩܕܡ ܐܠܗܐ. ܒܓܘ ܐܝܠܢ̈ܐ ܕܒܦܪܕܝܣܐ. ܘܩܪܐ ܡܪܝܐ ܐܠܗܐ ܠܐܕܡ ܘܐܡ̣ܪ ܠܗ ܐܝܟܐ ܐܢ̱ܬ ܐܕܡ. ܘܐܡ̣ܪ ܩܠܟ ܫܡܥܬ ܒܦܪܕܝܣܐ ܘܚܙܝܬ ܕܥܪܛܠܝ ܐ̱ܢܐ. ܘܐܡ̣ܪ ܠܗ ܡܪܝܐ. ܡܢܘ̣ ܚܘܝܟ ܕܥܪܛܠܝ ܐܢ̱ܬ. ܗܐ ܡ̣ܢ ܐܝܠܢܐ ܕܦܩܕܬܟ ܕܠܐ ܬܐܟܘܠ ܡܢܗ ܐܟܠܬ. ܘܐܡ̣ܪ ܐܕܡ. ܐܢ̱ܬܬܐ ܕܝܗܒܬ ܥܡܝ ܗ̣ܝ ܝܗܒܬ݀ ܠܝ ܡ̣ܢ ܐܝܠܢܐ ܘܐܟܠܬ. ܘܐܡ̣ܪ ܡܪܝܐ ܠܐܢ̱ܬܬܐ܇ ܡܢܘ ܗܢܐ ܕܥܒܕܬܝ. ܘܐܡܪܬ݀ ܐܢ̱ܬܬܐ ܚܘܝܐ ܐܛܥܝܢܝ ܘܐܟܠܬ.

 

ܦܘܫܩܐ:

 

ܡ̣ܢ ܒܬܪ ܓܝܪ ܕܐܨܛܠܝ̣ܘ ܠܪܓܬܐ ܒܗܬܘ ܒܠܐ ܡܠܝ̣ܠܘܬܐ ܕܚܫܘ. ܒܕܓܘܢ ܡܛܠ ܗ̇ܝ ܕܢܬܦܪܫܘܢ ܡ̣ܢ ܠܐ ܡܠܝ̈ܠܐ ܒܕܘܒܪ̈ܐ ܡܕܡ ܡܠܝ̣̈ܠܐ ܠܗܘܢ ܠܗܕܡ̈ܐ ܕܐܘܪ̈ܓܢܐ ܐܫܟ̣ܚܘ ܐܢܘܢ ܠܘܬ ܡܘܠܟܢܐ ܘܡܩܕܝܢܘܬܐ ܕܗ̇ܘ ܡܐ ܕܪܓܘ܆ ܕܝ̣ܠܢܐܝܬ ܐܬܦܪܣܘ ܠܡܣܬܪܘ ܒܐܝ̈ܕܝܐ ܘܒܛܪ̈ܦܐ ܘܒܡܘܢ ܕܗ̣ܘ. ܘܟܕ ܠܝܬܗܘܢ ܦܢܘ܇ ……… ܐܠܗܝ̈ܐ ܐܝܟ ܕܒܐܕ̈ܢܐ ܫܡܥܘ܇ ܥܠ ܫܪܟܐ ܕܐܝ̈ܠܢܐ ܕܒܦܪܕܝܣܐ ܐܘܟܝܬ ܪ̈ܓܝܓܬܐ ܕܦܓܪܐ ܦܢܘ. ܕܕܡ ܟܕ ܒܓܘܗܘܢ ܢܬܛܫܘܢ ܘܥܡܗܘܢ ܢܬܥܢܘܢ܆ ܠܗ̇ܝ ܒܥܝ̣ܪܝܬܐ ܢܛܥܘܢ. ܘܟܕ ܐܦܠܐ ܗܟܢܐ ܐܫܬܗܝܬ݀ ܡܢܗܘܢ. ܐܠܐ ܗܝܕܝܟ ܬܘܒ ܥܫܢܬ݀ ܒܗܘܢ ܗ̣ܝ ܬܐܘܪܝܐ ܐܠܗܝܬܐ. ܘܐܝܟ ܕܒܩܠܐ ܡܫܐܠܢܐ ܩܪܬܗ ܠܒܪܢܫܐ ܕܐܝܟܐ ܐܢ̱ܬ. ܠܘ ܟܕ ܠܐ ܝ̇ܕܥܐ ܕܐܝܟܘ. ܐܠܐ ܐܟܡ̇ܢ ܕܬܥܝ̣ܪܝ̣ܘܗܝ ܘܢܫܬܘܕܥ ܗ̣ܘ ܠܗ ܘܢܕܥ ܕܐܝܟܘ܇ ܘܐܕܝܟ ܐܝܠܝܢ ܕܚܫܘ. ܗ̣ܘ ܕܝܢ ܦܢܝ̣ ܗܠܝܢ ܕܦܢܝ. ܠܘ ܕܐܝܟܘ ܫܘܕܥ. ܘܐܝܟܢܐ ܠܗ̇ܘ ܕܠܐ ܟܣܐ ܡܢܗ ܡܕܡ ܗܕܐ ܢܫܘܕܥ ܗ̣ܘܐ. ܐܠܐ ܒܚܝܒܘܬܗ ܘܥܪܛܠܝܘܬܗ ܐܘܕܝ̣܆ ܗܝܕܝܢ ܗ̣ܘ ܡܪܝܐ ܢܗܝܪܐܝܬ ܓܠܗ̇ ܠܥܠܬܐ ܕܚܝܒܬܗ. ܗ̣ܘ ܕܝܢ ܥܠ ܪܦܝ̣ܬܐ ܘܫܪܝ̣ܬܐ ܒܪܬ݀ ܢܩܦܗ ܣܡܗ̇ ܠܥܠܬܐ ܕܡܙܕܟܝܢܘܬܐ ܕܡ̣ܢ ܪܓܬܐ. ܗܝܕܝܢ ܕܚܝܠܐ ܪܓܬܢܐ ܗ̇ܘ ܕܝܬܝܪ ܡ̣ܢ ܟܠܗܘܢ ܚܝ̈ܠܐ ܚܝܘܬܢܝ̈ܐ ܚܘܝܝ ܘܥܪܝ̣ܡ ܪܫܦ ܒܗ̇ ܘܓܪܓܗ̇ ܘܐܛܥܝܗ̇ ܢܦܩܬ݀ ܪܘܚܐ.

 

 

 

ܦܣܘܩܐ ܬܡܝܢܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܙܢܐ ܕܡܣܡ ܒܪܝܫܐ ܕܩܡܘ ܡ̣ܢ ܒܪܘܝܐ ܩܕܡܝܬ ܓܘܫܡܐ

 

 

 

ܘܐܡ̣ܪ ܡܪܝܐ ܠܚܘܝܐ ܥܠ ܕܥܒ̣ܕܬ ܗܕܐ ܠܝ̣ܛ ܐܢ̱ܬ ܡ̣ܢ ܟܠܗ̇ ܒܥܝ̣ܪܐ. ܘܥܠ ܟܪܣܟ ܬܗܠܟ. ܘܥܦܪܐ ܬܐܟܘܠ ܟܠ ܝܘ̈ܡܝ ܚܝܝ̈ܟ ܘܒܥܠܕܒܒܘܬܐ ܐܣܝ̣ܡ ܒܝܢܝܟ ܘܠܐܢ̱ܬܬܐ. ܘܒܝܬ ܙܪܥܗ̇ ܠܙܪܥܟ. ܘܗ̣ܘ ܢܕܘ̣ܫ ܪܝܫܟ܇ ܘܐܢ̱ܬ ܬܡܚܘܗܝ ܒܥܩܒܗ. ܘܠܐܢ̱ܬܬܐ ܐܡ̣ܪ. ܡܣܓܝܘ̣ ܐܣܓܐ ܟܐܒܝ̈ܟܝ ܘܒܛܢܝ̈ܟܝ. ܘܒܥܩ̈ܬܐ ܬܐܠܕܝ̣ܢ ܒܢܝ̈ܐ. ܘܥܠ ܒܥܠܟܝ ܬܬܦܢܝܢ܇ ܘܗ̣ܘ ܢܫܬܠܛ ܒܟܝ. ܘܠܐܕܡ ܐܡ̣ܪ. ܥܠ ܕܫܡܥܬ ܒܩܠܐ ܕܐܢ̱ܬܬܟ ܘܐܟܠܬ ܡ̣ܢ ܐܝܠܢܐ ܕܦܩܕܬܟ ܘܐܡܪܬ ܠܟ ܕܠܐ ܬܐܟܘܠ ܡܢܗ. ܠܝ̣ܛܐ ܗ̱ܝ ܐܪܥܐ ܡܛܠܬܟ. ܒܟܐܒ̈ܐ ܬܐܟܠܝܗ̇ ܟܠ ܝܘ̈ܡܝ ܚܝܝ̈ܟ. ܟܘ̈ܒܐ ܘܕܪܕܪ̈ܐ ܬܘܥܐ ܠܟ ܘܬܐܟܘܠ ܥܣܒܐ ܕܚܩܠܐ. ܘܒܕܘܥܬܐ ܕܐܦܝ̈ܟ ܬܐܟܘܠ ܠܚܡܐ. ܥܕܡܐ ܕܬܗܦܘܟ ܠܐܪܥܐ ܕܐܬܢܣܒܬ ܡܢܗ̇. ܡܛܠ ܕܥܦܪܐ ܐܢ̱ܬ ܘܠܥܦܪܐ ܬܗܦܘܟ.

 

ܦܘܫܩܐ:

 

ܐܡ̣ܪ ܡܪܝܐ. ܐܘܟܝܬ ܗܕܐ ܦܪܢܣܬ݀ ܚܟܡܬܐ ܐܠܗܝܬܐ. ܕܚܝܠܐ ܪܓܬܢܐ ܝܬܝܪ ܡ̣ܢ ܟܠܗܘܢ ܚܝ̈ܠܐ ܒܥܝ̣ܪ̈ܝܐ ܘܚܝܘܬܢܝ̈ܐ ܫܘܐ ܠܒܗܬܬܐ ܢܗܘܐ ܐܝܟ ܕܒܠܘ̣ܛܬܐ. ܘܡܛܠܗܕܐ ܒܪ̈ܓܝܓܬܐ ܣܓܝ̈ܐܬܐ ܕܠܐ ܟܘ̣ܚܕ ܡܬܚܫܚ ܒܪܢܫܐ ܒܡܐܟܠܐ ܠܡܐܡܪ ܘܒܡܫܬܝܐ ܘܒܡܕܪܟܢܘܬܐ ܘܫܡܥܐ. ܐܝܢ ܕܠܚܝܠܐ ܪܓܬܢܐ ܗ̇ܘ ܕܝܠܗ ܢܫܟܢ ܘܐܦܢ ܢܡܘܣܐܝܬ ܒܬܚܡܨܬܐ ܪܒܬܐ ܘܒܠܥܕ ܦܪܗܣܝܐ ܘܓܢܒܐܝܬ ܘܒܕܝ̣ܢܘ̣ܬ ܬܐܪܬܐ ܕܡܣܟܠܢܘܬܐ ܪܒܬܐ ܗ̇ܘܐ. ܘܡܛܠ ܗܕܐ ܐܝܟ ܗ̇ܘ ܕܥܠ ܟܪܣܗ̇ ܪܫܦ ܘܠܐܦܝ̈ ܠܬܚܬ ܡܩܬ ܚܝܪܗ. ܘܠܐ ܡܬܡܨܐ ܕܢܚܘܪ ܠܥܠ ܡܛܠ ܕܫܝ̣ܛܐ ܡܬܚܙܐ ܣܥܘܪܗ ܕܨܒܘܬܐ. ܘܕܒܢܩܒܬܐ ܝܬܝܪ ܢܨܝ̣ܒܐ ܬܚܡܨܬܐ ܕܐܝܟ ܗܕܐ. ܘܕܠܗ̇ ܝܬܝܪ ܡܨܥܪܐ ܪܓܬܐ ܐܝܟ ܒܥܠܕܒܒܬܐ ܓܠܝܐ. ܘܙܪܥܗ̇ ܡ̇ܢ ܕܐܢ̱ܬܬܐ ܐܘܟܝ̣ܬ ܒܪܢܫܐ. ܟܕ ܗܡܣ ܠܡܕܫ ܪܝܫܗ̇ ܕܪܓܬܐ ܘܝܨܦ ܠܡܬܘܬܗ̇. ܗ̣ܝ ܠܬܚܬ ܐܘܟܝܬ ܐܝܟ ܕܡ̣ܢ ܬܚܝܬ ܪ̈ܓܠܐ ܘܥܩܒܐ܆ ܡܒܠܥܐ ܠܗ ܘܡܕܒܨܐ ܒܝܕ ܚܘ̣ܬܚ̈ܬܐ. ܘܐܢ̱ܬ ܐܢ̱ܬܬܐ ܕܗܟܢܐ ܢܫܝ̣ܫܬܐ ܐܬܚܘܝ̣ܬܝ ܘܒܬܪ ܪܓܬܟܝ ܦܗܝܬܝ. ܗ̣ܝ ܗ̇ܝ ܗܢܝܐܘܬܐ ܕܫܒܬܟܝ. ܥܠܬ݀ ܚܫ̈ܐ ܘܠܙ̈ܬܐ ܠܟܝ ܬܗܘܐ. ܕܒܦܐܪ̈ܝ ܥܩ̈ܬܐ ܕܠܟܝ ܡܘܠܕܐ ܚܣܝ̣ܪܬܐ ܘܣܢܝ̣ܩܬܐ ܥܠ ܒܥܠܐ ܬܗܘܝܢ. ܘܟܕ ܡܡܠܝܢܝ̣ܬܐ ܐܢ̱ܬܝ ܕܣܢܝ̣ܩܘܬܗ܆ ܠܗ ܬܫܬܥܒܕܝ̣ܢ. ܘܚܐܪܘܬܐ ܘܠܐ ܚܕܐ ܬܗܘܐ ܠܟܝ ܥܠ ܝܬܟܝ. ܘܐܢ̱ܬ ܬܘܒ ܓܒܪܐ ܕܠܐ ܐܬܒܝܢܬ ܘܛܥܝܬ ܠܦܘܩܕܢܐ ܘܐܫܬܡܥܬ ܒܪܦܝܘܬܐ ܠܪܦܝ̣ܬܐ. ܘܐܫܬܘܝ̣ܬ ܥܡܗ̇ ܘܐܬܐܘܝ̣ܬ ܠܗ̇ ܘܒܩܠܗ̇ ܫܡܥܬ ܘܗܝܡܢܬܗ̇. ܢܣܬܦܩ ܐܬܪ ܗܘܦܟܟ ܡ̣ܢ ܢܝܚܐ. ܘܒܬܥܫܐ ܘܒܠܐܷܘܬܐ ܠܡܚܣܢ ܬܬܡܨܐ ܠܡܩܛܦ ܡܢܗ̇ ܘܪ̈ܓܝܓܬܐ ܗ̇ܢܝܢ ܕܒܡܘܠܝܗܝܢ ܡܣܒܪ ܐܢ̱ܬ ܕܫܦܝܪ ܗ̇ܘܐ ܐܢ̱ܬ܇ ܗ̣ܢܝܢ ܢܗܘ̈ܝܢ ܥܠܬܐ ܕܗܝ ܕܠܘ ܒܠܚܘܕ ܠܘ ܫܦܝܪ ܬܗܘܐ. ܐܠܐ ܘܕܣܟ ܠܐ ܬܗܘܐ. ܟܕ ܒܐܝܢܝܘܬܗܝܢ ܘܟܡܝܘܬܗܝܢ ܚܡܝܡܘܬܟ ܟܝܢܝܬܐ ܡܕܥ̈ܟܢ ܘܡܚܢ̈ܩܢ ܘܠܪܛܝ̣ܒܘܬܟ ܢܨܝ̣ܒܬܐ ܡܓܝ̈ܙܢ ܘܡܦܘ̈ܫܫܢ ܘܡܛܠܩ̈ܢ. ܘܗܟܢܐ ܠܘܬ ܥܦܪܢܝܘܬܟ ܩܕܡܝܬܐ ܘܟܝܢܝܬܐ ܠܟ ܡܗܦ̈ܟܢ. ܘܠܚܒܠܐ ܡܫܪ̈ܟܢ.

 

 

 

ܦܣܘܩܐ ܬܫܝܥܝܐ ܕܩܦܠܐܘܢ ܪܒܝܥܝܐ ܕܫܬܐܣܬܐ ܬܪܥܣܝܪܝܬܐ

 

ܡܛܠ ܒܛܝ̣ܠܘܬܐ ܐܠܗܝܬܐ ܡܦܪܢܣܢܝ̣ܬܗܘܢ. ܘܡ̣ܢ ܒܬܪ ܡܣܡܒܪܝܫܐ ܗ̇ܘ ܕܥܕܪ ܗ̣ܘܐ ܠܗܘܢ ܩܕܡܝܬ ܓܘܫܡܐ

 

 

 

ܘܩܪܐ ܐܕܡ ܫܡܐ ܕܐܢ̱ܬܬܗ ܚܘܐ. ܡܛܠ ܕܗ̣ܝ ܗܘܬ݀ ܐܡܐ ܕܟܠ ܕܚܝ. ܘܥܒܕ ܡܪܝܐ ܐܠܗܐ ܠܐܕܡ ܘܠܐܢ̱ܬܬܗ ܟܘܬܝ̣ܢ̈ܝܬܐ ܕܡܫܟܐ ܘܐܠܒܫ ܐܢܘܢ. ܘܐܡ̣ܪ ܡܪܝܐ ܐܠܗܐ. ܗܐ ܐܕܡ ܗܘ̣ܐ ܐܝܟ ܚܕ ܡܢܢ ܠܡܕܥ ܛܒܬܐ ܘܒܝܫܬܐ. ܘܗܫܐ ܕܠܡܐ ܢܘܫܛ ܐܝܕܗ ܘܢܣܒ ܡ̣ܢ ܐܝܠܢ̈ܐ ܕܚܝ̈ܐ ܘܢܐܟܘܠ ܘܢܚܐ ܠܥܠܡ. ܘܫܕܪܗ ܡܪܝܐ ܐܠܗܐ ܡ̣ܢ ܦܪܕܝܣܐ ܕܥܕܝܢ ܠܡܦܠܚ ܐܪܥܐ ܕܐܬܢܣܒ ܡܢܗ̇. ܘܐܟܪܟ ܡ̣ܢ ܡܕ̈ܢܚܝ ܦܪܕܝܣܐ ܕܥܕܝܢ ܟܪܘܒܐ ܘܫܢܢܐ ܘܚܪܒܐ ܕܡܬܗܦܟܐ ܠܡܛܪܐ ܐܝܠܢܐ ܕܚܝ̈ܐ.

 

ܦܘܫܩܐ:

 

ܐܢ̱ܬܬܐ ܕܝܢ ܕܝ̣ܠܢܐܝܬ ܐܬܟܢܝܬ݀ ܒܫܡܐ ܗܢܐ ܕܡܘܠܕܢܘܬ ܗ̇ܘ ܕܚܝ. ܒܗ̇ܝ ܕܓܒܪܐ ܡ̣ܢ ܐܪܥܐ ܡܘܠܕ ܕܒܚܝܠܐ ܒܠܚܘܕ ܚܝ. ܘܒܡܥܒܕܢܘܬܐ ܡܝ̣ܬܐ ܗ̱ܘ. ܘܠܗ ܠܗܢܐ ܟܕ ܐܝܟ ܕܒܚܝܠܐ ܪܡܐ ܥܘ̣ܠܐ ܒܡܥܒܕܢܘܬܐ ܚܝ ܡܫܡܠܝܐܝܬ. ܗ̇ܝ ܕܠܗܘܝܐ ܡܝܬܝܐ. ܒܟܘ̣ܬܝ̣ܢ̈ܝܬܐ ܕܝܢ ܡܫܟ̈ܚܬܐ ܠܗܘܢ ܣܬܪ. ܗ̣ܘ ܐܠܗܐ ܫܘܒܚܐ ܠܛܝܒܘܬܗ. ܒܝܕ ܚܘܫܒܐ ܕܐܝܟ ܗܢܐ ܒܗܘܢ ܐܕܝ̣ܠ ܕܢܟܣܘܢ ܦܘܪܣܝܗܘܢ. ܒܕܠܐ ܦܐܝܐ ܗܘܬ݀ ܠܗܘܢ ܗܝܕܝܢ ܥܪܛܠܝܘܬܐ. ܐܦܠܐ ܦܪ̈ܙܘܡܐ ܗ̇ܢܘܢ ܛܪ̈ܦܢܝܐ ܣ̇ܦܩܝܢ ܗ̣ܘܘ ܠܡܣܬܪܘܬܗܘܢ. ܘܕܠܒܘ̈ܫܐ ܡܕܡ ܕܡ̣ܢ ܡܫ̈ܟܝ ܚܝ̈ܘܬܐ ܐܬܬܩܢܘ܇ ܐܝܬܝܗܝܢ ܗܘܝ̈ ܟܘ̣ܬܝ̈ܢܝܬܐ ܗ̇ܢܝܢ. ܐܝܟ ܕܐܡ̣ܪ ܩܕܝܫܐ ܐܬܐܢܐܣܝܘܣ ܒܡܐܡܪܐ ܕܥܠ ܙܩܝ̣ܦܐ. ܗ̣ܘ ܗܟܘܬ ܘܡܪܝ ܐܦܪܝܡ ܝܬܝܪ ܒܝܬܝܐ ܠܡܣܒܪܘ ܛܒ ܡ̣ܢ ܩܠܦ̈ܐ ܕܐܝܠܢ̈ܐ. ܐܘ ܒܣܪܐ ܥܒܝܐ ܘܩܫܝܐ ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܬܐܘܠܘܓܘܣ. ܘܡ̣ܢ ܪܓܬ݀ ܙܘܘܓܐ ܘܒܛܢܐ ܘܝܠܕܐ ܘܬܪܒܝ̣ܬܐ ܘܣܝܒܪܬܐ ܘܟܘܪܗܢܐ ܘܪܘܓܙܐ ܘܡܘܬܐ ܐܝܟ ܕܐܡ̣ܪ ܩܕܝܫܐ ܓܪܝܓܘܪܝܘܣ ܕܢܘܣܐ. ܘܠܗ ܫܠܡ ܦܝܠܠܘܟܣܝܢܘܣ ܕܡܒܘܓ. ܘܒܬܪ ܗܠܝܢ ܐܡ̣ܪ ܗ̣ܘ ܐܠܗܐ ܚܕܢܝ ܟܝܢܐ܆ ܒܦܚܡܐ ܕܬܠܝܬܝܘܬ ܩܢܘ̈ܡܘܗܝ ܣܓܝܢܐܝܬ. ܕܗܐ ܐܕܡ ܗܘ̣ܐ ܐܝܟ ܚܕ ܡܢܢ. ܟܐܡܬ݀ ܚܬܝ̣ܬܐܝܬ ܝܕܥܗ̇ ܗܫܐ ܐܟܡܐ ܕܐܦ ܚܢܢ ܝ̇ܕܥܝ̣ܢܢ ܕܕܐܝܟ ܐܝܠܝܢ ܡܙܡܢܐ ܢܛܘܪܘܬ ܦܘܩܕܢܐ. ܘܕܐܝܟ ܐܝܠܝܢ ܒܝ̈ܫܬܐ ܢܓܕ ܘܡܝܬܐ ܘܢܬܦ ܥܒܪ ܢܡܘܣܐ. ܘܡܟܝܠ ܕܐܬܪܓܪܓ ܠܗܢܝܐܘܬܐ ܡܬܪܓܫܢܝ̣ܬܐ ܘܠܗ̇ ܐܫܬܒܝ̣. ܕܠܡܐ ܢܣܥܐ ܠܡܬܪܓܪܓܘ ܠܗܢܝܐܘܬܐ ܡܬܝܕܥܢܝ̣ܬܐ ܕܒܬܐܘܪ̈ܝܐܣ ܕܗܠܝܢ ܕܐܝܬܝܗܝܢ܇ ܗ̇ܝ ܕܠܐ ܡܨܝܐ. ܥܛܘ̈ܝܬܐ ܓܝܪ ܐܢܝܢ ܕܚܕ̈ܕܐ ܬܪ̈ܬܝܗܝܢ ܡܕܪ̈ܟܢܘܬܐ ܗ̇ܢܝܢ ܐܝܟ ܕܗ̣ܘ ܫܪܝܪܐ ܫܪܪ. ܕܠܐ ܠܡ ܡܨܐ ܥܒ̣ܕܐ ܠܬܪܝܢ ܡܪ̈ܘܢ ܠܡܦܠܚ ܘܫܪܟܐ. ܘܡܛܠ ܗܕܐ ܐܟܣܘ̣ܪܝ̣ܣܬܝ̣ܢܐ ܙܕܩ ܠܗ ܠܡܗܘܐ ܡ̣ܢ ܕܘܝܪܐ ܦܪܕܝܣܝܐ. ܐܠܘ ܐܟܡܐ ܕܙܕܩ ܗ̣ܘܐ ܒܗ ܐܬܕܒܪ܆ ܐܦ ܡ̣ܢ ܐܝܠܢܐ ܕܝܕܥܬܐ ܡܫܬܘܐ ܗ̣ܘܐ ܠܡܐܟܠ ܒܙܒܢܗ. ܘܕܠܐ ܥܕܠܝ ܗ̇ܘܐ ܗ̣ܘܐ܇ ܟܕ ܢܡܘܣܐܝܬ ܒܗ ܡܬܚܫܚ ܗ̣ܘܐ. ܗ̣ܘ ܗܟܘܬ ܘܡ̣ܢ ܐܝܠܢܐ ܕܚܝ̈ܐ ܬܘܒ ܠܐ ܡܬܓܠܙ ܗ̣ܘܐ. ܘܗܟܢܐ ܐܦܩܗ ܐܠܗܐ. ܠܘ ܡ̣ܢ ܦܓܪܐ ܦܪܕܝܣܐ. ܐܠܐ ܡ̣ܢ ܕܘܒܪܐ ܗ̇ܘ ܩܕܡܝܐ ܕܦܓܪܐ. ܕܗ̣ܘ ܡܪܢܐܝܬ ܦܪܕܝܣܐ ܫܘܐ ܠܡܬܩܪܝܘ. ܡܠܘܢ ܕܝܢ ܗ̣ܘ ܠܗ ܐܦܩ. ܘܓܒܐ ܠܗ ܠܡܬܥܫ ܘܠܡܥܡܠ ܒܐܪܥܐ. ܘܗܟܢܐ ܐܙܕܓܪܬ݀ ܐܘܪܚ ܦܢܝ̣ܬܐ ܗ̇ܝ ܕܡܢܗ̇ ܕܢܚܐ ܗܘܬ݀ ܠܗ ܝܕܥܬܐ ܕܗܘܝ̈ܐ. ܘܒܝܕ ܡܚܘܝܢ̈ܘܬܐ ܗ̇ܢܝܢ ܕܕܡܝܘܬܐ ܩܢ̈ܝܢ ܕܣܓܝܐܘܬ ܥܝ̈ܢܐ ܕܟܪܘܒܐ ܢܛܘܪܗ ܕܦܪܕܝܣܐ܆ ܠܡܚܣܢ ܡܬܡܨܐ ܠܡܕܪܟܘ ܡܕܡ ܡ̣ܢ ܝܕ̈ܥܬܐ ܡܪ̈ܢܝܬܐ. ܟܕ ܐܝܟ ܕܒܣܘܓܐܐ ܡ̣ܢ ܐ̱ܚܪ̈ܢܐ ܕܡܝܝ̈ ܠܫܢܢ̈ܐ ܘܗܦܟ̈ܬܐ ܡܣܒ̈ܗܬ݀ ܠܚܪܒܐ ܘܠܟܘ̣ܟܝܬܐ ܡܬܕܩܪ ܗ̣ܘܐ: ܟܠ ܟܡܐ ܕܗܡܣ ܗ̣ܘܐ ܠܡܬܩܪܒܘ ܠܡܕܡ ܡ̣ܢ ܗܘܢܢ̈ܝܬܐ ܒܗܘܢܗ܆ ܥܕܡܐ ܠܡܐܬܝܬܗ ܕܗ̇ܘ ܕܗ̣ܘ ܦܘܡܗ ܫܪܝܪܐ ܐܡ̇ܪ ܕܗܠܝܢ ܐܢܘܢ ܚܝ̈ܐ ܫܪܝܪ̈ܐ ܕܢܕܥܘܢܟ ܘܫܪܟܐ. ܘܠܐܘܪܚ ܐܝܠܢܐ ܗ̇ܘ ܕܒܛܒܬܗ ܒܝܫܬܐ ܫܒܝ̣ܩܐ ܟܡܐ ܕܡܨܝܐ ܙܓܪ܀܀܀

 

ܫܠܡ ܘܫܘܒܚܐ ܠܐܠܗܐ ܕܠܐ ܫܠܡ