ܕܬܶܫܒܚܳܬ ܬܶܫܒ̈ܚܳܬܳܐ

 

 

ܩܶܦܰܠܶܐܘܳܢ: ܐ. ܩܶܦܰܠܶܐܘܳܢ: ܒ. ܩܶܦܰܠܶܐܘܳܢ: ܓ. ܩܶܦܰܠܶܐܘܳܢ: ܕ.

ܩܶܦܰܠܶܐܘܳܢ: ܗ. ܩܶܦܰܠܶܐܘܳܢ: ܘ. ܩܶܦܰܠܶܐܘܳܢ: ܙ. ܩܶܦܰܠܶܐܘܳܢ: ܚ.

 

 

ܩܶܦܰܠܶܐܘܳܢ: ܐ.

 

¹: ܢܢܰܫܩܰܢܝ ܡܶܢ ܢܽܘܫ̈ܩܳܬܳܐ ܕܦܽܘܡܶܗ. ܡܶܛܽܠ ܕܛܳܒܺܝܢ ܖ̈ܰܚܡܰܝܟ ܡܶܢ ܚܰܡܪܳܐ. ²: ܠܪܺܝܚ ܒܶܣܡܳܢܰܝ̈ܟ ܛܳܒ̈ܶܐ. ܡܶܫܚܳܐ ܕܡܽܘܪܳܐ ܫܡܳܟ݂: ܡܶܛܽܠ ܗܳܢܳܐ ܥܠܰܝ̈ܡܳܬܳܐ ܖ̈ܰܚܡܳܟ݂. ³: ܓܶܕܰܝܢܝ ܒܳܬܪܳܟ: ܢܶܪܗܰܛ ܐܰܥܶܠܰܝܢܝ ܡܰܠܟܳܐ ܠܩܰܝܛܽܘܢܳܟ. ܢܶܚܕܶܐ ܘܰܢܕ݂ܽܘܨ ܒܳܟ݂. ܢܶܬܕܟܰܪ ܚܽܘܒܳܟ݂ ܡܶܢ ܚܰܡܪܳܐ. ܘܡܶܢ ܬܖ̈ܺܝܨܶܐ ܪܶܚܡܬܳܐ.  ⁴: ܐܽܘܟܳܡܳܐ ܐ̱ܢܳܐ: ܘܝܳܐܝܳܐ ܐ̱ܢܳܐ: ܒ̈ܢܳܬ ܐܽܘܪܺܫܠܶܡ. ܐܰܝܟ݂ ܡܰܫܟܢܰܝ̈ ܩܶܕ݂ܳܪ: ܘܰܐܝܟ݂ ܝܳܖ̈ܺܝܥܳܬ ܫܠܶܝܡܽܘܢ.  ⁵: ܠܳܐ ܬܶܚܙܽܘܢܳܢܝ ܕܽܐܘܟܳܡܳܐ ܐ̱ܢܳܐ: ܕܰܐܘܟܡܰܢܝ ܫܶܡܫܳܐ. ܒܢܰܝ̈ ܐܶܡܝ ܐܶܬܟܰܬܰܫܘ ܒܺܝ. ܣܳܡܽܘܢܝ ܢܳܛܪܰܬ ܟܰܖ̈ܡܶܐ. ܘܟܰܪܡܝ ܕܺܝܠܝ ܠܳܐ ܢܶܛܪܶܬ.  ⁶: ܚܰܘܰܐܽܘܢܝ ܡܰܢ ܕܪܶܚܡܰܬ ܢܰܦܫܝ. ܐܰܝܟܰܢܳܐ ܪܥܺܝܬ: ܘܰܐܝܟܰܢܳܐ ܪܶܒܥܶܬ ܒܛܰܗܪܳܐ ܕܰܠܡܳܐ ܐܶܗܘܶܐ ܐܰܝܟ݂ ܛܳܥܺܝܬܳܐ ܒܰܓܙܳܪܳܐ ܕܥܶܖ̈ܒܰܝܟ. ⁷: ܐܶܠܳܐ ܬܶܕܥܶܝܢ ܝܳܬܶܟ݂ܝ ܫܰܦܺܝܪܰܬ ܒܢܶܫ̈ܶܐ. ܬܳܝ ܐܰܢ̱ܬܝ ܒܥܶܩܒܳܐ ܕܥܳܢ̈ܳܐ ܘܰܪܥܳܝ ܓܕܰܝ̈ܟܝ ܒܡܰܫܟܢ̈ܶܐ ܕܖ̈ܳܥܰܘܳܬܳܐ. ⁸: ܠܣܽܘܣܬܝ ܒܡܰܪܟܰܒܬܶܗ ܕܦܶܪܥܽܘܢ ܕܰܡܺܝܬܶܟ݂ܝ ܩܰܪܺܝܒܰܬܝ. ⁹: ܝܳܐܝ̈ܳܢ ܦܰܟܰܝ̈ܟܝ ܒܰܓܕ݂ܽܘ̈ܠܶܐ. ܘܨܰܘܪܶܟ݂ܝ ܒܥܶܩ̈ܶܐ. ¹⁰: ܓܕ݂ܽܘ̈ܠܶܐ ܕܕܰܗܒܳܐ ܢܶܥܒܶܕ݂ ܠܶܟ݂ܝ. ܥܰܡ ܙܠܺܝܚ̈ܶܐ ܕܣܺܐܡܳܐ. ¹¹: ܥܰܡ ܡܰܠܟܳܐ ܒܰܣܡܳܟܶܗ. ܢܰܪܕܺܝܢ ܝܰܗܒ ܪܪܝܚܶܗ. ¹²: ܨܪܳܪܳܐ ܕܡܽܘܪܳܐ ܕܰܪܚܶܡ ܠܺܝ ܒܶܝܬ ܬܕܰܝ̈ ܢܒܽܘܬ. ¹³: ܣܓܽܘܠܳܐ ܕܟܽܘܦܪܳܐ ܕܳܕܝ ܒܟܰܪܡܳܐ ܕܥܺܝܢ ܓܳܕ݂. 14: ܗܳܐ ܫܰܦܺܝܪܰܬܝ ܩܰܪܺܝܒܰܬܝ ܗܳܐ ܫܰܦܺܝܪܰܬܝ. ܥܰܝܢܰܝ̈ܟܝ ܕܝܰܘܢܳܐ.  ¹⁵: ܗܳܐ ܫܰܦܺܝܪ ܐܰܢ̱ܬ ܕܳܕܝ: ܐܳܦ ܒܰܣܺܝܡ ܐܰܢ̱ܬ ܐܳܦ ܥܰܪܣܰܢ ܪܨܺܝܦ. ¹⁶: ܩܳܖ̈ܝܰܬ݂ ܒܰܝܬܰܢ ܐܰܖ̈ܙܶܐ: ܥܰܖ̈ܩܶܐ ܕܰܩܛܰܪܩܳܐ.   

ܩܶܦܰܠܶܐܘܳܢ: ܒ.

¹: ܐܰܝܟ݂ ܫܽܘܫܰܢܰܬ ܫܰܪܘܰܝܢܳܐ: ܫܽܘܫܰܢܰܬ ܥܽܘܡܩܳܐ. ²: ܐܰܝܟ݂ ܫܽܘܫܰܢ̈ܶܐ ܒܰܝܢܳܬ ܟܽܘ̈ܒܶܐ: ܗܳܟܰܢܳܐ ܩܰܪܺܝܒܰܬܝ ܒܰܝܢܳܬ ܒ̈ܢܳܬܳܐ. ³: ܐܰܝܟ݂ ܚܰܙܽܘܪܳܐ ܒܩܰܝ̈ܣܶܐ ܕܥܳܒܳܐ: ܗܳܟܰܢܳܐ ܕܳܕܝ ܒܰܝܢܳܬ ܒ̈ܢܰܝܳܐ. ܒܛܶܠܳܠܶܗ ܐܶܬܪܰܓܪܓܶ݀ܬ ܘܝܶܬܒܶܬ ܘܶܐܒܶܗ ܚܠܶܐ ܠܶܟܝ. ⁴: ܐܰܥܠܽܘܢܝ ܠܒܶܝܬ ܚܰܡܪܳܐ. ܛܰܟܶܣܘ ܥܠܰܝ ܪܶܚܡܬܳܐ. ⁵: ܣܳܡܽܘܢܝ ܒܦܽܘܢܳܩ̈ܶܐ. ܐܰܟ݂ܪܟܽܘܢܝ ܒܚܰܙܽܘܖ̈ܶܐ. ܡܶܛܽܠ ܕܰܟ݂ܪܺܝܗܰܬ ܪܶܚܡܬܳܐ ܐ̱ܢܳܐ.  ⁶: ܣܶܡܳܠܶܗ ܬܚܶܝܬ ܪܺܝܫܝ ܘܝܰܡܺܝܢܶܗ ܬܥܰܦܩܰܢܝ. ⁷: ܐܰܘܡܺܝܬܟܶܝܢ ܐܳܘ ܒ̈ܢܳܬ ܐܽܘܪܺܫܠܶܡ: ܒܰܛ̈ܒܰܝܳܐ ܐܰܘ ܒܥܽܘܙܰܝ̈ܠܶܐ ܕܚܰܩܠܳܐ. ܐܶܢ ܬܥܺܝܖ̈ܳܢ ܘܶܐܢ ܬܥܰܝܖ̈ܳܢ ܝܳܬ ܪܶܚܡܬܳܐ: ܥܕܰܡܳܐ ܕܬܶܨܒܶܐ. ⁸: ܩܳܠܶܗ ܕܕܳܕܝ ܗܳܐ ܗܳܢܳܐ ܕܳܐܬܶܐ. ܡܫܰܘܰܪ ܥܰܠ ܛܽܘܖ̈ܶܐ. ܡܩܰܝܶܙ ܥܰܠ ܖ̈ܳܡܳܬܳܐ. ⁹: ܕܳܡܶܐ ܕܳܕܝ ܠܛܰܒܝܳܐ: ܐܰܘ ܠܥܽܘܙܰܝܠܳܐ ܕܰܐܝ̈ܠܶܐ. ܗܳܐ ܗܽܘ ܩܳܐܶܡ ܒܶܣܬܰܪ ܐܶܣܬܰܢ: ܡܕܺܝܩ ܡܶܢ ܟܰܘ̈ܶܐ: ܡܰܪܟܶܢ ܡܶܢ ܨܳܝܖ̈ܳܬܳܐ. ¹⁰: ܥܢܳܐ ܕܳܕܝ ܘܶܐܡܰܪ ܠܺܝ: ܩܽܘܡܝ ܠܶܟ݂ܝ ܫܰܦܺܝܪܰܬܝ: ܩܰܪܺܝܒܰܬܝ: ܘܙܶܠܝ ܠܶܟ݂ܝ. ¹¹: ܡܶܛܽܠ ܕܗܳܐ ܣܰܬܘܳܐ ܥ̣ܒܰܪ. ܘܡܶܛܪܳܐ ܥ̣ܒܰܪ ܘܶܐܙܰܠ ܠܶܗ. ¹²: ܗܰܒܳܒ̈ܶܐ ܐܶܬܚܙܺܝܘ ܒܰܐܪܥܳܐ. ܙܰܒܢܳܐ ܕܰܟܣܳܚܳܐ ܡܛܳܐ. ܘܩܳܠܳܐ ܕܫܽܘܦܢܺܝܢܳܐ ܐܶܫܬܡܰܥ ܒܰܐܪܥܰܢ.  ¹³: ܬܺܬܳܐ ܝܶܗܒܰܬ ܦܰܩܽܘ̈ܥܶܝܗ̇ ܓܽܘܦ̈ܢܶܐ ܘܰܣܡܳܕܖ̈ܶܐ ܝܰܗܒܘ ܪܺܝܚܳܐ. ܩܽܘܡܝ ܠܶܟ݂ܝ ܫܰܦܺܝܪܰܬܝ ܩܰܪܺܝܒܽܘܬܝ: ܘܬܳܝ ܠܶܟ݂ܝ. ¹⁴: ܝܰܘܢܝ ܒܚܽܘܠܰܢܳܐ ܕܫܽܘܥܳܐ: ܒܣܶܬܪܳܐ ܕܰܣܝܳܓܳܐ: ܚܰܘܰܐܺܝܢܝ ܚܶܙܘܶܟ݂ܝ: ܘܰܐܫܡܰܥܺܝܢܝ ܩܳܠܶܟ݂ܝ. ܡܶܛܽܠ ܕܩܳܠܶܟ݂ܝ ܒܰܣܺܝܡ: ܘܚܶܙܘܶܟ݂ܝ ܝܳܐܶܐ. ¹⁵: ܐܰܚܽܘܕ݂ܘ ܠܰܢ ܬܰܥ̈ܠܶܐ: ܬܰܥ̈ܠܶܐ ܕܰܩܕܩ̈ܶܐ ܡܚܰܒܠܰܝ̈ ܟܰܖ̈ܡܶܐ. ܘܟܰܖ̈ܡܺܝܢ ܕܰܣܡܳܕܖ̈ܺܝܢ. ¹⁶: ܕܳܕܝ ܠܺܝ ܘܶܐܢܳܐ ܠܶܗ: ܕܪܳܥܶܐ ܒܫܽܘܫܰܢ̈ܶܐ. ¹⁷: ܥܰܕ݂ ܢܦܽܘܓ ܝܰܘܡܳܐ: ܘܢܶܪܟܢܽܘܢ ܛܶܠ̈ܳܠܶܐ. ܐܶܬܗܰܦܟ݂ ܕܡܺܝ ܠܳܟ ܕܳܕܝ: ܠܛܰܒܝܳܐ ܐܰܘ ܠܥܽܘܙܰܝܠܳܐ ܕܰܐܝ̈ܠܶܐ: ܥܰܠ ܛܽܘܖ̈ܰܝ ܒܶܣܡܳܢ̈ܶܐ.   

ܩܶܦܰܠܶܐܘܳܢ: ܓ.

¹: ܥܰܠ ܡܰܫܟܰܒܝ ܒܠܰܝ̈ܠܰܘܳܬܳܐ ܒܥܺܝܬ ܠܰܕܪܶܚܡܰܬ ܢܰܦܫܝ: ܒܥܺܝܬܶܗ ܘܠܳܐ ܐܶܫܟܰܚܬܶܗ. ²: ܐܶܩܽܘܡ ܢܺܐ: ܐܶܬܟܪܶܟ݂ ܒܰܡܕܺܝܢ̱ܬܳܐ ܒܫܽܘ̈ܩܶܐ ܘܒܰܦܠܳܛܰܘ̈ܳܬܳܐ: ܐܶܒܥܶܐ ܠܰܕܪܶܚܡܰܬ ܢܰܦܫܝ. ܒܥܺܝܬܶܗ ܘܠܳܐ ܐܶܫܟܰܚܬܶܗ. ³: ܐܶܫܟܚܽܘܢܝ ܢܳܛܽܘܖ̈ܶܐ ܕܡܶܬܟܰܪܟܺܝܢ ܒܰܡܕܺܝܢ̱ܬܳܐ. ܠܡܳܐ ܠܰܕ݂ܪܶܚܡܰܬ ܢܰܦܫܝ ܚܙܰܝܬܽܘܢ. ⁴: ܟܰܕ݂ ܩܰܠܺܝܠ ܥܶܒܪܶܬ ܡܶܢܗܽܘܢ: ܥܕܰܡܳܐ ܕܶܐܫܟܚܶܬ݂ ܝܳܬ ܕܪܶܚܡܰܬ ܢܰܦܫܝ. ܐܶܚܰܕܬܶܗ ܘܠܳܐ ܐܰܪܦܺܝܬܶܗ: ܥܕܰܡܳܐ ܕܰܐܥܶܠܬܶܗ ܠܒܶܝܬ ܐܶܡܝ: ܘܰܠܩܰܝܛܽܘܢܳܗ̇ ܕܝܳܠܶܕܬܝ. ⁵: ܐܳܘ ܡܝܰܬܟܶܝܢ ܒ̈ܢܳܬ ܐܽܘܪܺܫܠܶܡ: ܒܰܛ̈ܒܰܝܳܐ ܐܰܘ ܒܥܽܘܙܰܝ̈ܠܶܐ ܕܚܰܩܠܳܐ: ܐܶܢ ܬܥܺܝܖ̈ܳܢ ܘܶܐܢ ܬܥܰܝܖ̈ܳܢ: ܝܳܬ ܪܶܚܡܬܳܐ ܥܕܰܡܳܐ ܕܬܶܨܒܶܐ. ⁶: ܡܰܢ ܗ̱ܝ ܗܳܕܶܐ ܕܣܳܠܩܳܐ ܡܶܢ ܡܰܕ݂ܒܪܳܐ: ܐܰܝܟ݂ ܥܶܛܪܳܐ ܕܬܶܢܳܢܳܐ ܡܒܰܣܡܳܐ ܒܡܽܘܪܳܐ ܘܒܰܠܒܽܘܢܬܳܐ: ܡܶܢ ܟܽܠ ܚܶܠܳܐ ܕܒܶܣܡ̈ܶܐ. ⁷: ܗܳܐ ܥܰܪܣܶܗ ܕܰܫܠܶܝܡܽܘܢ: ܫܬܺܝܢ ܓܰܢ̱ܒܳܖ̈ܺܝܢ ܟܪܺܝܟܺܝܢ ܠܳܗ̇ ܡܶܢ ܓܰܢ̱ܒܳܖ̈ܶܐ ܕܺܝܣܪܳܐܶܝܠ. ⁸: ܟܽܠܗܽܘܢ ܐܰܚܺܝܕܰܝ̈ ܚܰܪܒܳܐ ܘܡܰܠܦܰܝ̈ ܩܪܳܒܳܐ ܓܒܰܪ ܚܰܪܒܶܗ ܥܰܠ ܥܰܛܡܶܗ: ܡܶܢ ܕܶܚܠܬܳܐ ܕܠܰܝ̈ܠܰܘܳܬܳܐ. ⁹: ܡܰܓܕܠܳܐ ܥ̣ܒܰܕ݂ ܠܶܗ ܡܰܠܟܳܐ ܫܠܶܝܡܽܘܢ ܡܶܢ ܩܰܝ̈ܣܶܐ ܕܠܶܒܢܳܢ. ¹⁰: ܥܰܡܽܘܕܰܘ̈ܗܝ ܥ̣ܒܰܕ݂ ܕܣܺܐܡܳܐ: ܬܰܫܘܺܝܬܶܗ ܕܕܰܗܒܳܐ. ܬܰܟܣܺܝܬܶܗ ܕܰܐܪܓܘܳܢܳܐ. ܓܰܘܶܗ ܪܨܺܝܦ ܪܶܚܡܬܳܐ ܡܶܢ ܒ̈ܢܳܬ ܐܽܘܪܺܫܠܶܡ. ¹¹: ܦܽܘ̈ܩܶܝܢ ܘܰܚ̈ܙܳܝܶܝܢ ܒ̈ܢܳܬ ܨܶܗܝܽܘܢ ܒܡܰܠܟܳܐ ܫܠܶܝܡܽܘܢ: ܒܰܟܠܺܝܠܳܐ ܕܟܽܠ: ܐܳܠܶܦ ܣܰܟܖ̈ܺܝܢ ܬܰܠ̈ܝܳܢ ܥܠܰܘܗܝ: ܟܽܠ ܫܳܠܛ̈ܶܐ ܕܓܰܢ̱ܒܳܖ̈ܶܐ.   

ܩܶܦܰܠܶܐܘܳܢ: ܕ.

 :¹ܗܳܐ ܫܰܦܺܝܪܰܬܝ ܩܰܪܺܝܒܬܝ܆ ܗܳܐ ܫܰܦܺܝܪܰܬܝ. ܥܰܝܢܰܝ̈ܟܝ ܕܝܰܘܢܳܐ. ܥܒܰܪ ܫܶܬܩܶܟܝ. ܣܰܥܪܶܟܝ. ܐܰܝܟ ܓܙܳܪܳܐ ܕܥܶܙ̈ܶܐ ܕܣܳܠܶܩ ܡܶܢ ܛܽܘܪܳܐ ܕܓܶܠܥܳܕ.²: ܫܶܢܰܝ̈ܟܝ. ܐܰܝܟ ܓܙܳܪܳܐ ܕܰܓܙܺܝ̈ܙܳܬܳܐ ܕܰܣܠܶܩ̈ܝ ܡܶܢ ܡܰܣܚܽܘܬܳܐ. ܕܟܶܠܗܶܝܢ ܡܶܬܰܐܡ̈ܳܢ: ܘܕܰܡܓܰܙܝܳܐ ܠܰܝܬ ܒܶܗܝܢ.³: ܐܰܝܟ݂ ܚܽܘܛܳܐ ܕܰܣܚܽܘܪܺܝܬܳܐ.ܣܶܦ̈ܘܳܬܶܟܝ ܡܡܰܠܠܶܟܝ. ܝܳܐܝܳܐ ܐܰܝܟ݂ ܨܶܠ̈ܦܶܐ ܕܪܽܘܡܳܢܳܐ.⁴: ܩܕܳܠܳܟܝ ܡܶܛܽܠ ܫܶܬܩܶܟܝ: ܐܰܝܟ݂ ܡܰܓܕܠܶܗ ܕܕܰܘܺܝܕ. ܨܰܘܪܶܟܝ ܒܢܳܐ ܟܬܳܒ̈ܶܐ ܐܳܠܶܦ ܣܰܟܖ̈ܺܝܢ ܬܰܠ̈ܝܳܢ ܥܠܰܘܗܝ. ܟܽܠ ܫܶܠ̈ܛܶܐ ܕܓܰܢ̱ܒܳܖ̈ܶܐ. ⁵: ܬܪܶܝܢ ܬܕܰܝ̈ܟܝ ܐܰܝܟ݂ ܬܪܶܝܢ ܥܽܘܙܰܝ̈ܠܶܐ ܬܳܐܡ̈ܶܐ ܕܰܛܒ̈ܰܝܳܐ ܕܪܳܥܶܝܢ ܒܫܽܘܫܰܢ̈ܶܐ. ⁶: ܥܰܕ݂ ܢܦܽܘܓ ܝܰܘܡܳܐ: ܘܢܶܪܟܢܽܘܢ ܛܶܠܳܠܰܝ̈ ܪܰܡܫܳܐ: ܙܶܠܝ ܠܛܽܘܪܳܐ ܕܡܽܘܪܳܐ: ܘܰܠܖ̈ܳܡܳܬܳܐ ܕܰܠܒܽܘܢܬܳܐ. ⁷: ܟܽܠܶܟ݂ܝ ܫܰܦܺܝܪܰܬܝ ܩܰܪܺܝܒܬܝ ܘܡܽܘܡܳܐ ܠܰܝܬ ܒܶܟ݂ܝ. ⁸: ܬܳܝ ܡܶܢ ܠܶܒܢܳܢ ܚܳܬ݂ܝ ܟܰܠܬ݂ܳܐ: ܬܳܝ ܡܶܢ ܠܶܒܢܳܢ. ܬܳܐܬܶܝܢ ܘܬܶܥܒܪܺܝܢ ܡܶܢ ܪܺܝܫ ܐܰܡܢ̈ܶܐ: ܘܡܶܢ ܪܺܝܫܝ ܣܳܢܺܝܪ ܘܚܶܪܡܽܘܢ: ܘܡܶܢ ܡܰܪܒܽܘܥܺܝܬܳܐ ܕܰܐܖ̈ܝܰܘܳܬܳܐ: ܘܡܶܢ ܛܽܘܖ̈ܰܝ ܢܶܡܖ̈ܶܐ. ⁹: ܠܰܒܶܒܬܺܝܢܝ ܚܳܬܝ ܟܰܠܬ݂ܳܐ ܠܰܒܶܒܬܺܝܢܝ: ܒܰܚܕ݂ܳܐ ܡܶܢ ܥܰܝܢܰܝ̈ܟܝ: ܒܚܰܕ݂ ܥܶܩܳܐ ܡܶܢ ܨܰܘܪܶܟ݂ܝ. ¹⁰: ܡܳܐ ܫܰܦܺܝܪܝܺܢ ܬܕܰܝ̈ܟܝ ܚܳܬܝ ܟܰܠܬ݂ܳܐ. ܡܳܐ ܫܰܦܺܝܪܺܝܢ ܬܕܰܝ̈ܟܝ ܡܶܢ ܚܰܡܪܳܐ. ܘܪܺܝܚ ܒܶܣܡܳܢܰܝ̈ܟܝ ܡܶܢ ܟܽܠ ܒܶܣ̈ܡܳܢܺܝܢ. ¹¹: ܟܰܟܳܪܺܝܬܳܐ ܡܰܛ̈ܦܳܢ ܣܶܦ̈ܘܳܬܶܟ݂ܝ ܟܽܠ ܕܶܒܫܳܐ ܘܚܰܠܒܳܐ ܬܚܶܝܬ ܣܶܦ̈ܘܳܬܶܟ݂ܝ. ܘܪܺܝܚ ܬܰܟ݂ܣܺܝܬܶܟ݂ܝ ܐܰܝܟ݂ ܪܺܝܚ ܠܶܒܢܳܢ. ¹²: ܓܰܢܬܳܐ ܕܰܐܚܺܝܕ݂ܳܐ ܚܳܬܝ ܟܰܠܬ݂ܳܐ: ܓܰܢܬܳܐ ܕܰܐܚܺܝܕ݂ܳܐ: ܡܥܺܝܢܳܐ ܕܰܚܬܺܝܡܳܐ. ¹³: ܫܠܺܝܚܽܘܬܶܟ݂ܝ ܦܰܪܕܰܝܣܳܐ ܕܖ̈ܽܘܡܳܢܶܐ: ܥܰܡ ܦܺܐܖ̈ܶܐ ܕܰܐܒܒܳܢ̈ܶܐ: ܟܽܘܡܪܳܐ ܥܰܡ ܢܳܪܕܽܘܢ. ¹⁴: ܘܟܽܘܪܟܡܳܐ: ܩܰܢܝܳܐ ܘܩܽܘܢܳܡܽܘܢ: ܥܰܡ ܩܰܝܣܳܐ ܕܰܠܒܽܘܢܬܳܐ: ܡܽܘܪܳܐ ܘܥܰܠܘܰܝ: ܥܰܡ ܟܽܠ ܪܺܝܫ ܒܶܣܡܳܢ̈ܶܐ. ¹⁵: ܡܥܺܝܢܳܐ ܕܓܰܢ̈ܶܐ: ܒܺܪܳܐ ܕܡܰܝ̈ܳܐ ܚܰܝ̈ܶܐ ܕܪܳܕܶܝܢ ܡܶܢ ܠܶܒܢܳܢ. ¹⁶: ܐܶܬܬܥܺܝܪܝ ܓܰܪܒܝܳܐ: ܘܬܳܝ ܬܰܝܡܢܳܐ. ܫܰܒܝ ܒܓܰܢܰܬܝ ܢܳܪܕܽܘܢ ܒܶܣܡܳܢܰܝ̈ ܢܺܐܬܶܐ ܕܳܕܝ ܠܓܰܢܬܶܗ: ܘܢܶܐܟ݂ܽܘܠ ܡܶܢ ܦܺܐܖ̈ܶܐ ܕܶܐܒܒܳܢܰܘܗܝ.   

ܩܶܦܰܠܶܐܘܳܢ: ܗ.

¹: ܐܶܬܺܝ̇ܬ ܠܓܰܢܰܬܝ ܚܳܬܝ ܟܰܠܬ݂ܳܐ: ܐܶܬܺܝܬ ܠܓܰܢܰܬܝ. ܩܶܛܦܶܬ ܡܽܘܪܝ ܥܰܡ ܒܶܣܡܳܢܰܝ̈ ܘܶܐܟ݂ܠܶܬ ܒܰܣܺܝܡܽܘܬܝ ܥܰܡ ܕܶܒܫܝ ܐܶܫܬܺܝܬ݁ ܚܰܡܪܝ ܥܰܡ ܚܰܠܒܝ ܐܰܟܽܘܠܘ ܚܰܒܖ̈ܰܝ: ܘܶܐܫܬܰܘ. ܘܰܪܘܰܘ ܕܳܕܰܝ̈. ²: ܐܶܢܳܐ ܕܰܡܟܳܐ: ܘܠܶܒܝ ܥܺܝܪ ܩܳܠܶܗ ܕܕܳܕܝ ܕܢܳܩܶܫ ܦܬܰܚܝ ܠܺܝ ܚܳܬܝ ܩܰܪܺܝܒܬܝ: ܝܰܘܢܝ ܬܰܡܺܝܡܬܳܐ. ܡܶܛܽܠ ܕܪܺܝܫܝ ܐܶܬܡܠܺܝ ܛܰܠܳܐ: ܘܩܽܘ̈ܨܳܬܝ ܡܶܢ ܖ̈ܣܺܝܣܰܝ ܠܺܠܝܳܐ. ³: ܫܶܠܚܶܬ ܟܽܘܬܺܝܢܝ: ܐܰܝܟܰܢܳܐ ܐܶܠܒܫܺܝܗ̇ ܐܰܫܺܝܓܶܬ ܖ̈ܶܓܠܰܝ: ܐܰܝܟܰܢܳܐ ܐܶܛܰܢܶܦ ܐܶܢܶܝܢ. ⁴: ܕܳܕܝ ܐܰܘܫܶܛ ܐܺܝܕܶܗ ܡܶܢ ܢܶܩܒܳܐ. ܘܰܡܥܰܝ̈ ܓܳܠܘ ܥܠܰܘܗܝ. ⁵: ܩܳܡܶܬ ܐܶܢܳܐ ܕܶܐܦܬܰܚ ܠܕܳܕܝ ܘܺܐܝܕ݂ܝ ܢܶܛܦܰܬ ܡܽܘܪܳܐ. ܘܨܶܒ̈ܥܳܬܝ ܡܽܘܪܳܐ ܢܛܰܦ ܥܰܠ ܝܰܕ݂ ܣܽܘܟܪܳܐ. ⁶: ܦܶܬܚܶܬ ܐܶܢܳܐ ܠܕܳܕܝ. ܘܕܳܕܝ ܐܰܪܟܶܢ ܥܒܰܪ. ܢܰܦܫܝ ܢܶܦܩܰܬ ܒܡܰܡܠܠܶܗ. ܒܥܺܝܬܶܗ: ܘܠܳܐ ܐܶܫܟܰܚܬܶܗ. ܩܪܺܝܬܶܗ: ܘܠܳܐ ܥܢܳܢܝ. ⁷: ܐܶܫܟܚܽܘܢܝ ܢܳܛܽܘܖ̈ܶܐ ܕܡܶܬܟܰܪܟܺܝܢ ܒܰܡܕ݂ܺܝܢܬܳܐ. ܡܚܰܐܽܘܢܝ: ܘܨܰܠܦܽܘܢܝ. ܢܣܰܒܘ ܡܶܢܝ ܪܕ݂ܺܝܕ݂ܝ ܢܳܛܖ̈ܰܝ ܫܽܘܪܳܐ. ⁸: ܐܰܘܡܺܝܬܟܶܝܢ ܒ̈ܢܳܬ ܐܽܘܪܺܫܠܶܡ ܐܶܢ ܬܶܫ̈ܟܚܳܢ ܠܕܳܕܝ: ܐܶܫܬܰܥܺܝܢ ܠܶܗ: ܕܰܟ݂ܪܺܝܗܰܬ ܪܶܚܡܬܳܐ ܐ̱ܢܳܐ. ⁹: ܡܰܢܽܘ ܕܳܕܶܟ݂ܝ ܡܶܢ ܕܳܕ̈ܶܐ: ܫܰܦܺܝܪܰܬ ܒܢܶܫ̈ܶܐ. ܡܰܢܽܘ ܕܳܕܶܟ݂ܝ ܡܶܢ ܕܳܕ̈ܶܐ: ܕܗܳܟܰܢܳܐ ܐܰܘܡܺܝܬܺܝܢ. ¹⁰: ܕܳܕܝ ܚܶܘܳܪ ܘܣܽܘܡܳܩ: ܘܰܓܒܶܐ ܡܶܢ ܖ̈ܶܒܘܳܬܳܐ. ¹¹: ܪܺܝܫܶܗ ܐܰܝܟ݂ ܟܺܐܦܳܐ ܕܕܰܗܒܳܐ. ܩܽܘ̈ܨܳܬܶܗ ܡܦܰܫ̈ܛܳܢ: ܐܘ̈ܟܳܡܳܢ ܐܰܝܟ݂ ܥܽܘܪܒܳܐ. ¹²: ܥܰܝܢܰܘ̈ܗܝ ܐܰܝܟ݂ ܕܝܰܘ̈ܢܶܐ: ܥܰܠ ܫܳܒ̈ܩܶܐ ܕܡܰܝ̈ܳܐ ܕܣܳܚ̈ܝܳܢ ܒܚܰܠܒܳܐ: ܘܝܳܬܒ̈ܳܢ ܥܰܠ ܫܰܠܡܽܘܬܳܐ. ¹³: ܦܰܟܰܘ̈ܗܝ ܐܰܝܟ݂ ܡܰܫ̈ܟܒܳܬܳܐ ܕܒܶܣܡ̈ܶܐ. ܣܶܦ̈ܘܳܬܶܗ ܐܰܝܟ݂ ܫܽܘܫܰܢ̈ܶܐ ܕܢܳܛ̈ܦܳܢ ܡܽܘܪܳܐ ܘܢܰܪܕܺܝܢ. ¹⁴: ܐܺܝܕ݂ܰܘ̈ܗܝ ܐܰܝܟ݂ ܟܶܪܟܳܐ ܕܕܰܗܒܳܐ ܕܰܡܠܶܐ ܟܺܐܦܰܝ̈ ܕܰܗܒܳܐ ܟܰܪܣܶܗ ܥܒܳܕ݂ܳܐ ܕܫܶܢܳܐ ܥܰܠ ܡܰܦܚܳܐ ܕܣܰܦܺܝܠܳܐ. ¹⁵: ܫܳܩܰܘ̈ܗܝ ܥܰܡܽܘ̈ܕܶܐ ܕܫܺܝܫܳܐ: ܕܡܰܬܩܢܺܝܢ ܥܰܠ ܚܽܘܡܖ̈ܶܐ ܕܕܰܗܒܳܐ ܚܰܕ݂ܝܶܗ ܐܰܝܟ݂ ܕܠܶܒܢܳܢ: ܘܰܓܒܶܐ ܐܰܝܟ݂ ܐܰܖ̈ܙܶܐ. ¹⁶: ܚܶܟܶܗ ܐܰܝܟ݂ ܟܰܟܳܖ̈ܝܳܬܳܐ ܕܚܰܠ̈ܝܳܢ ܪܓܺܝܓܺܝܢ ܗܳܢܰܘ ܕܳܕܝ: ܘܗܳܢܰܘ ܚܰܒܪܝ: ܒ̈ܢܳܬ ܐܽܘܪܺܫܠܶܡ. ¹⁷: ܠܰܐܝܟܳܐ ܐܶܙܰܠ ܕܳܕܶܟ݂ܝ ܫܰܦܺܝܪܰܬ ܒܢܶܫ̈ܶܐ. ܠܰܐܝܟܳܐ ܦܢܳܐ ܕܳܕܶܟ݂ܝ: ܕܢܶܒܥܺܝܘܗܝ ܥܰܡܶܟ݂ܝ.   

ܩܶܦܰܠܶܐܘܳܢ: ܘ.

¹: ܕܳܕܝ ܢܚܶܬ ܠܓܰܢܬܶܗ: ܘܰܠܡܰܫ̈ܟܒܳܬܳܐ ܕܒܶܣܡܳܢ̈ܶܐ: ܕܢܶܪܥܶܐ ܒܓܰܢ̈ܳܬܶܐ: ܘܢܶܠܩܽܘܛ ܫܽܘܫܰܢ̈ܶܐ. ²: ܐܶܢܳܐ ܠܕܳܕܝ: ܘܕܳܕܝ ܠܺܝ: ܕܪܳܥܳܐ ܒܫܽܘܫܰܢ̈ܶܐ.  ³: ܫܰܦܺܝܪܰܬܝ ܩܰܪܺܝܒܰܬܝ ܐܰܝܟ݂ ܨܶܒܝܳܢܳܐ. ܝܳܐܝܰܬ݁ܝ ܐܰܝܟ݂ ܐܽܘܪܺܫܠܶܡ. ܘܰܕ݂ܚܺܝܠܰܬ݁ܝ ܐܰܝܟ݂ ܓܒܺܝܬܳܐ. ⁴: ܐܰܗܦܶܟ݂ܝ ܥܰܝܢܰܝ̈ܟܝ ܡܶܢ ܠܽܘܩܒܰܠܝ: ܡܶܛܽܠ ܕܗܶܢܶܝܢ ܐܰܦܖ̈ܕ݂ܶܢܝ. ܣܰܥܪܶܟ݂ܝ ܐܰܝܟ݂ ܓܙܳܪܳܐ ܕܥܶܙ̈ܶܐ: ܕܣܳܠܶܩ ܡܶܢ ܛܽܘܪܳܐ ܕܓܶܠܥܳܕ݂. ⁵: ܫܶܢܰܝ̈ܟܝ ܐܰܝܟ݂ ܓܙܳܪܳܐ ܕܰܓܙܺܝ̈ܙܳܬܳܐ: ܕܣܳܠܶܩ ܡܶܢ ܡܰܣܚܽܘܬܳܐ. ܕܟܽܠܗܶܝܢ ܡܰܬܰܐܡ̈ܳܢ: ܘܕܰܡܓܰܙܝܳܐ ܠܰܝܬ ܒܗܶܝܢ. ⁶: ܘܰܐܝܟ݂ ܨܠܳܦܳܐ ܕܪܽܘܡܳܢܳܐ ܩܕ݂ܳܠܶܟ݂ܝ ܠܒܰܪ ܡܶܢ ܫܶܬܩܶܟ݂ܝ. ⁷: ܫܬܺܝܢ ܐܶܢܶܝܢ ܡܰܠ̈ܟܳܢ: ܘܰܬܡܳܢܺܝܢ ܕܖ̈ܽܘܟܳܢ. ܘܰܥܠܰܝ̈ܡܳܬܳܐ ܕܠܰܝܬ ܠܗܶܝܢ ܡܶܢܝܳܢ. ⁸: ܚܕ݂ܳܐ ܗ̱ܝ ܝܰܘܢܝ ܬܰܡܺܝܡܬܳܐ: ܚܕ݂ܳܐ ܗ̱ܝ ܠܶܐܡܳܗ̇. ܘܓܰܒܝܳܐ ܗ̱ܝ ܠܝܳܠܶܕܬܳܗ̇ ܚ̈ܙܰܝܳܗ̇ ܒ̈ܢܳܬܳܐ. ܘܫܰܒ̈ܚܳܗ̇ ܡܰܠ̈ܟܳܬܳܐ. ܘܰܕ݂ܖ̈ܽܘܟܳܬܳܐ ܘܫܰܒ̈ܚܳܗ̇. ⁹: ܡܰܢ ܗ̱ܝ ܗܳܕܶܐ ܕܰܡܕ݂ܺܝܩܳܐ ܐܰܝܟ݂ ܨܰܦܪܳܐ. ܫܰܦܺܝܪܳܐ ܐܰܝܟ݂ ܣܰܗܪܳܐ. ܕܰܟ݂ܝܳܐ ܐܰܝܟ݂ ܫܶܡܫܳܐ. ܕܚܺܝܠܳܐ ܐܰܝܟ݂ ܪܰܘܖ̈ܒܳܬܳܐ. ¹⁰: ܠܓܰܢܰܬ ܓܰܘ̈ܙܶܐ ܢܶܚܬܶܬ ܕܶܐܚܙܶܐ ܒܶܐܒܳܐ ܕܢܰܚ̈ܠܶܐ. ܠܡܶܚܙܳܐ ܐܶܢ ܦܶܪܥܰܬ ܓܦܶܬܳܐ: ܘܶܐܢ ܒܠܰܨܘ ܖ̈ܽܘܡܳܢܶܐ. ¹¹: ܘܠܳܐ ܝܶܕ݂ܥܰܬ ܢܰܦܫܝ ܣܳܡܬܰܢܝ ܒܡܰܪܟܰܒܬܳܐ ܕܥܰܡܳܐ ܕܰܡܛܰܝܰܒ.  ¹²: ܬܽܘܒܝ ܬܽܘܒܝ ܫܺܝܠܽܘܡܳܝܬܳܐ. ܬܽܘܒܝ ܬܽܘܒܝ: ܘܰܢܚܽܘܪ ܒܶܟ݂ܝ.   

ܩܶܦܰܠܶܐܘܳܢ: ܙ.

¹: ܡܳܢܳܐ ܬܶܚܙܽܘܢ ܒܫܺܝܠܽܘܡܳܝܬܳܐ ܕܢܳܚܬܳܐ ܐܰܝܟ݂ ܚܰܕ݂ܽܘܬܳܐ: ܘܰܐܝܟ݂ ܚܰܕ݂ܽܘܬܳܐ ܕܡܰܫܖ̈ܝܳܬܳܐ ܡܳܐ ܫܰܦܺܝܖ̈ܳܢ ܖ̈ܶܓܠܶܟܝ ܒܰܡܣܳܢ̈ܶܐ ܒܰܪܬ ܡܛܰܝܒܳܐ ܘܨܰܘܪܶܬ ܥܰܛ̈ܡܳܬܶܟܝ ܐܰܝܟ݂ ܚܶܖ̈ܩܶܐ: ܥܒܳܕ݂ ܐܺܝܕܰܝ̈ ܐܽܘܡܳܢܳܐ. ²: ܫܶܪܶܟ݂ܝ ܐܰܓܳܢܳܐ ܕܰܟܪܺܝܟܳܐ: ܕܠܳܐ ܚܳܣܰܪ ܒܳܗ̇ ܡܙܳܓܳܐ. ܟܰܪܣܶܟ݂ܝ ܥܪܰܡܬܳܐ ܕܚ̈ܶܛܶܐ ܕܣܺܝܓܳܐ ܒܫܽܘܫܰܢ̈ܶܐ. ³: ܬܪܶܝܢ ܬܕܰܝ̈ܟܝ ܐܰܝܟ݂ ܬܪܶܝܢ ܥܽܘܙܰܝ̈ܠܶܐ ܬܳܐܡ̈ܶܐ ܕܰܛܒܰܝ̈ܳܐ: ܕܪܳܥܶܝܢ ܒܫܽܘܫܰܢ̈ܶܐ.  ⁴: ܨܰܘܪܶܟ݂ܝ ܐܰܝܟ݂ ܡܰܓܕܠܳܐ ܕܫܶܢ̈ܶܐ ܥܰܝܢܰܝ̈ܟܝ ܐܰܝܟ݂ ܝܰܡ̈ܡܳܬܳܐ ܕܚܶܫܒܽܘܢ ܥܰܠ ܬܰܪܥܳܐ ܕܒܰܪܬ ܣܰܓܺܝܐܳܐ. ܢܚܺܝܪܶܟ݂ܝ ܐܰܝܟ݂ ܡܰܓܕܠܳܐ ܕܠܶܒܢܳܢ: ܕܚܳܐܰܪ ܠܰܐܦܰܝ̈ ܕܰܪܡܣܽܘܩ. ⁵: ܪܺܝܫܶܟ݂ܝ ܥܠܰܝܟܝ ܐܰܝܟ݂ ܟܰܪܡܠܳܐ. ܘܰܓܕ݂ܽܘ̈ܠܶܐ ܕܪܺܝܫܶܟ݂ܝ ܐܰܝܟ݂ ܐܰܪܓܘܳܢܳܐ ܕܡܰܠܟܳܐ: ܕܰܐܣܺܝܪ ܒܖ̈ܰܗܛܶܐ. ⁶: ܡܳܐ ܫܰܦܺܝܪܰܬܝ: ܘܡܳܐ ܒܰܣܺܝܡܰܬܝ ܐܳܘ ܪܚܺܝܡܬܳܐ: ܒܰܪܬ ܦܽܘܢܳܩ̈ܶܐ. ⁷: ܘܗܳܕܶܐ ܩܰܘܡܬܶܟ݂ܝ ܕܳܡܝܳܐ ܠܕܶܩܠܳܐ: ܘܰܬܕܰܝ̈ܟܝ ܠܰܣܓܽܘ̈ܠܶܐ. ⁸: ܐܶܡܪܶܬ ܐܶܣܰܩ ܒܕܶܩܠܳܐ: ܘܶܐܚܽܘܕ݂ ܒܣܰܘܟܰܘ̈ܗܝ. ܘܢܶܗܘܽܘܢ ܬܕܰܝ̈ܟܝ ܐܰܝܟ݂ ܣܓܽܘܠܰܝ̈ ܓܽܘܦ̈ܢܶܐ ܘܪܺܝܚ ܐܰܦܰܝ̈ܟܝ ܐܰܝܟ݂ ܚܰܙܽܘܖ̈ܶܐ. ⁹: ܘܚܶܟܶܟ݂ܝ ܐܰܝܟ݂ ܚܰܡܪܳܐ ܛܳܒܳܐ: ܕܳܐܙܶܠ ܠܕܳܕܝ ܠܰܬܪܺܝܨܽܘܬܳܐ ܘܕܰܡܙܺܝܥ ܣܶܦ̈ܘܳܬܝ ܘܫܶܢܰܝ̈. ¹⁰: ܐܶܢܳܐ ܠܕܳܕܝ: ܘܰܥܠܰܝ ܦܰܢܺܝܬܶܗ.  ¹¹: ܬܳܐ ܕܳܕܝ: ܢܶܦܽܘܩ ܠܚܰܩܠܳܐ ܢܒܽܘܬ ܒܟܰܦܪܳܐ. ¹²: ܘܰܢܩܰܕܶܡ ܠܟܰܪܡܳܐ: ܘܢܶܚܙܶܐ ܐܶܢ ܦܶܪܥܰܬ ܓܦܶܬܳܐ: ܘܰܢܦܰܩܘ ܣܡܳܕ݂ܖ̈ܶܐ: ܘܰܒܠܰܨܘ ܖ̈ܽܘܡܳܢܶܐ. ܬܰܡܳܢ ܐܶܬܶܠ ܠܳܟ ܬܕܰܝ̈. ¹³: ܝܰܒܖ̈ܽܘܚܶܐ ܝܰܗܒܘ ܪܺܝܚܳܐ ܘܥܰܠ ܬܰܖ̈ܥܺܝܢ ܟܽܠ ܐܶܒܢܺܝ̈ܢ ܚܰܕ݂ܬܺܝܢ ܘܥܰܬܺܝܩܺܝܢ: ܕܳܕܝ: ܢܶܛܪܶܬ ܠܳܟ.   

ܩܶܦܰܠܶܐܘܳܢ: ܚ.

¹: ܡܰܢ ܢܶܬܠܳܟ ܐܰܝܟ݂ ܐܰܚܳܐ ܠܺܝ: ܐܰܝܢܶܩܘ ܬܕܰܝ̈ ܐܶܡܖ̈ܰܝ. ܐܶܫܟܚܳܟ݂ ܒܫܽܘܩܳܐ. ܐܰܫܩܳܟ݂: ܘܠܳܐ ܢܶܒܣܪܽܘܢܳܢܝ. ²: ܐܶܕܒܪܳܟ݂: ܘܰܐܥܠܳܟ ܠܒܶܝܬ ܐܶܡܝ: ܘܰܠܩܰܝܛܽܘܢܳܗ̇ ܕܝܳܠܶܕܬܝ ܐܰܫܩܶܝܟ݂ ܡܶܢ ܚܰܡܪܝ ܒܰܣܺܝܡܳܐ: ܘܡܶܢ ܚܰܠܝܽܘܬܳܐ ܕܖ̈ܽܘܡܳܢܰܝ. ³: ܣܶܡܳܠܶܗ ܬܚܶܝܬ ܪܺܝܫܝ: ܘܝܰܡܺܝܢܶܗ ܬܥܰܦܩܰܢܝ. ⁴: ܐܰܘܡܺܝܬܟܶܝܢ ܒ̈ܢܳܬ ܐܽܘܪܺܫܠܶܡ ܐܶܢ ܬܥܺܝܖ̈ܳܢ ܘܶܐܢ ܬܥܰܝܖ̈ܳܢ ܝܳܬ ܪܶܚܡܬܳܐ ܥܕܰܡܳܐ ܕܬܶܨܒܶܐ.  ⁵: ܡܰܢ ܗ̱ܝ ܗܳܕܶܐ ܕܣܳܠܩܳܐ ܡܶܢ ܡܰܕ݂ܒܪܳܐ: ܘܡܶܣܬܰܡܟܳܐ ܥܰܠ ܕܳܕܳܗ̇ ܬܚܶܝܬ ܚܰܙܽܘܪܳܐ ܥܰܝܰܪܬܶܟ݂ܝ: ܘܬܰܡܳܢ ܚܰܒܶܠܬܶܟ݂ܝ ܐܶܡܶܟ݂ܝ ܬܰܡܳܢ ܚܰܒܠܰܬ ܝܳܠܶܕܬܶܟ݂ܝ. ⁶: ܣܺܝܡܰܝܢܝ ܚܳܬܡܳܐ ܥܰܠ ܠܶܒܳܟ: ܘܰܐܝܟ݂ ܚܳܬܡܳܐ ܥܰܠ ܕܪܳܥܳܟ݂ ܡܶܛܽܠ ܕܬܰܩܺܝܦܳܐ ܐܰܝܟ݂ ܡܰܘܬܳܐ ܪܶܚܡܬܳܐ. ܘܰܩܫܶܐ ܐܰܝܟ݂ ܫܝܽܘܠ ܛܢܳܢܳܐ. ܙܰܠܺܝ̈ܩܶܝܗ̇ ܙܰܠܺܝܩܰܝ̈ ܢܽܘܪܳܐ ܘܫܰܠܗܶܒܺܝܬܳܐ. ⁷: ܡܰܝ̈ܳܐ ܣܰܓܺܝ̈ܐܶܐ ܠܳܐ ܡܶܫܟܚܺܝܢ ܠܰܡܕܰܥܳܟ݂ܽܘ ܠܪܶܚܡܬܳܐ. ܘܢܰܗܖ̈ܰܘܳܬܳܐ ܠܳܐ ܓܳܪܦܺܝܢ ܠܳܗ̇ ܐܶܢ ܢܶܬܶܠ ܓܰܒܪܳܐ ܟܽܠ ܥܽܘܬܪܳܐ ܕܒܰܝܬܶܗ ܒܪܶܚܡܬܳܐ: ܡܡܰܝܳܩܽܘ ܢܡܰܝܩܽܘܢ ܒܶܗ.  ⁸: ܚܳܬܳܐ ܐܺܝܬ ܠܰܢ ܙܥܽܘܪܬܳܐ ܘܰܬܕܰܝ̈ܳܐ ܠܰܝܬ ܠܳܗ̇ ܡܳܢܳܐ ܢܶܥܒܶܕ݂ ܠܚܳܬܰܢ ܒܝܰܘܡܳܐ ܕܡܶܬܡܰܠܰܠ ܒܳܗ̇. ⁹: ܐܶܢ ܫܽܘܪܳܐ ܗ̱ܝ: ܢܶܒܢܶܐ ܥܠܶܝܗ̇ ܥܶܠ̈ܝܳܢ ܕܰܟܣܶܦ ܘܶܐܢ ܬܰܪܥܳܐ ܗ̱ܝ: ܢܨܽܘܪ ܥܠܶܝܗ̇ ܠܽܘܚ̈ܶܐ ܕܰܐܪܙܳܐ.  ¹⁰: ܐܶܢܳܐ ܫܽܘܪܳܐ: ܘܰܬܕܰܝ̈ ܡܰܓ̈ܕܠܶܐ. ܗܳܝܕܶܝܢ ܐܺܝܬܰܝ ܗ̱ܘܺܝ݀ܬ ܒܥܰܝܢܰܘ̈ܗܝ ܐܰܝܟ݂ ܡܶܫܟܚܰܬ ܫܠܳܡܳܐ. ¹¹: ܟܰܪܡܳܐ ܐܺܝܬ ܗ̱ܘܳܐ ܠܰܫܠܶܝܡܽܘܢ: ܘܶܐܒܶܗ ܣܰܓܺܝ ܝܶܗ̱ܒܰܬ ܟܰܪܡܳܐ ܠܢܳܛܽܘܖ̈ܶܐ ܓܰܒܪܳܐ ܝܰܗܒ ܒܦܺܐܖ̈ܰܘܗܝ ܐܳܠܶܦ ܕܰܟܣܶܦ. ¹²: ܟܰܪܡܳܐ ܕܺܝܠܝ ܩܕܳܡܰܝ ܐܳܠܶܦ ܠܳܟ ܫܠܶܝܡܽܘܢ: ܘܡܰܐܬܶܝܢ ܠܢܳܛܖ̈ܰܝ ܦܺܐܖ̈ܶܐ. ¹³: ܐܰܝܠܶܝܢ ܕܝܳܬܒܺܝܢ ܒܓܰܢ̈ܶܐ: ܘܨܳܝܬܺܝܢ ܠܩܳܠܳܟ: ܐܰܫܡܰܥܰܝܢܝ. ¹⁴: ܐܶܬܗܰܦܰܟ݂ ܕܳܕܝ ܕܡܺܝ ܠܳܟ ܠܛܰܒܝܳܐ ܘܰܠܥܽܘܙܰܝܠܳܐ ܕܰܐܝ̈ܠܶܐ ܥܰܠ ܛܽܘܖ̈ܰܝ ܒܶܣܡܳܢ̈ܶܐ.