ܛܟܣܐ ܕܝܠܕܬ ܐܠܗܐ ܕܥܠ ܫܒ̈ܠܐ ܛܟܣܐ ܕܣܘܠܩܗ ܕܡܪܢ ܠܫܡܝܐ ܕܡܢ ܒܬܪ ܐܪܒܥܝܢ ܝܘܡܝ̈ܢ ܕܩܝܡܬܗ ܛܟܣܐ ܕܥܐܕܐ ܩܕܝܫܐ ܕܡ̈ܛܠܠܐ ܐܘܟܝܬ ܫܘܚܠܦ ܕܡܘܬ ܡܪܢ ܥܠ ܛܘܪ ܬܒܘܪ ܛܟܣܐ ܡܪܝ ܐܚܐ ܥܢܘܝܐ ܕܕܝܪܐ ܕܦܢܬ ܕܥܠ ܓܢܒ ܒܝܬ ܡܢܥܡ ܛܟܣܐ ܕܥܪܘܒܬܐ ܕܫܠܝ̈ܚܐ ܕܡܬܩܪܝܐ ܕܕܗܒܐ ܛܟܣܐ ܕܥܠ ܡܪܝ ܫܠܝܛܐ ܡܢ ܣܝܥܬܗ ܕܡܪܝ ܐܘܓܝܢ ܛܟܣܐ ܕܥܠ ܬܪܥܣܪ ܫܠܝ̈ܚܐ ܩܕܝ̈ܫܐ ܕܡܪܢ ܝܫܘܥ ܡܫܝܚܐ ܛܟܣܐ ܕܥܠ ܪ̈ܝܫܢܐ ܕܫܠܝ̈ܚܐ ܦܛܪܘܣ ܘܦܘܠܘܣ ܛܟܣܐ ܕܥܠ ܡܪܝ ܬܐܘܡܐ ܫܠܝܚܐ ܕܡܫܬܡܠܐ ܓ̄ ܒܬܡܘܙ ܝܪܚܐ ܛܟܣܐ ܕܥܠ ܣܗܕܐ ܡܪܝ ܩܘܪܝܩܘܣ ܘܐܡܗ ܝܘܠܝܛܝ ܘܚܕܥܣܪ ܐܠܦܝ̈ܐ ܘܐܪܒܥܡܐܐ ܘܬܠܬܝܢ ܘܐܪܒܥܐ ܣܗ̈ܕܐ ܚܒܪ̈ܘܗܝ ܛܟܣܐ ܕܥܠ ܣܗ̈ܕܐ ܩܕܝ̈ܫܐ ܫܡܘܢܝ ܘܒܢܝ̈ܗ̇ ܘܐܠܝܙܪ ܛܟܣܐ ܕܥܠ ܩܕܝܫܐ ܡܪܝ ܡܠܟܐ ܩܘܠܙܡܝܐ ܒܪ ܚܬܗ ܕܡܪܝ ܐܘܓܝܢ ܛܟܣܐ ܕܥܠ ܩܕܝܫܐ ܡܪܝ ܕܝܡܛ ܛܟܣܐ ܕܥܠ ܡܪܝ ܐܕܝ ܫܠܝܚܐ ܪܝܫܐ ܕܡܣܒܪ̈ܢܐ ܛܟܣܐ ܕܥܠ ܣܗܕܬܐ ܡܪܬܝ ܒܪܒܪܐ ܘܝܘܠܝܢܐ ܛܟܣܐ ܕܥܠ ܣܗܕܐ ܡܪܝ ܒܗܢܡ ܘܣܪܐ ܚܬܗ ܘܐܪܒܥܝܢ ܣܗ̈ܕܐ ܚܒܪ̈ܘܗܝ ܛܟܣܐ ܕܥܠ ܩܕܝܫܐ ܡܪܝ ܐܒܪܗܡ ܩܘܣܛܢܛܝܢܝܐ ܛܟܣܐ ܕܥܠ ܩܕܝܫܐ ܡܪܝ ܒܪܨܘܡܐ ܓܪܒܝܝܐ ܪܝܫܐ ܕܐܒܝ̈ܠܐ ܛܟܣܐ ܕܥܠ ܡܪܝ ܓܒܪܐܝܠ ܐܦܣܩܘܦܐ ܕܥܘܡܪܐ ܕܩܪܬܡܝܢ ܛܟܣܐ ܕܥܠ ܩܕܝܫܐ ܡܪܝ ܣܐܘܝܪܐ ܦܛܪܝܪܟܐ ܕܐܢܛܝܘܟܝܐ

ܛܟܣܐ ܕܝܠܕܬ ܐܠܗܐ ܕܡܛܠ ܙܪ̈ܥܐ ܕܢܬܒܪܟܘܢ ܘܢܬܢܛܪܘܢ ܘܡܫܬܡܠܐ ܒܟܣܗ ܕܟܢܘܢ ܐܚܪܝ ܛܟܣܐ ܕܥܠ ܡܪܝ ܣܒܐ ܣܗܕܐ ܢܨܝܚܐ ܘܐܦ ܣܝܥܬܐ ܕܚܒܪ̈ܘܗܝ ܬܪܥܣܪ ܐܠܦܝ̈ܐ ܘܫܬܡܐܐ ܘܬܠܬܝܢ ܘܐܪܒܥܐ ܕܥܡܗ ܐܬܟܠܠܘ ܛܟܣܐ ܕܩܕܝ̈ܫܐ ܡܪܝ ܣܪܓܝܣ ܘܒܟܘܣ ܛܟܣܐ ܕܥܠ ܩܕܝܫܐ ܡܪܝ ܩܘܡܐ: ܘܝܫܘܥ ܘܦܠܓ ܬܠܡܝ̈ܕܘܗܝ ܛܟܣܐ ܕܥܠ ܡܘܠܕܗ̇ ܕܝܠܕܬ ܐܠܗܐ ܛܟܣܐ ܕܥܠ ܡܪܝ ܐܫܥܝܐ ܚܠܒܝܐ: ܘܡܪܝ ܦܝܢܚܣ ܘܡܪܝ ܐܣܝܐ ܛܟܣܐ ܕܥܠ ܩܕܝܫܐ ܡܪܝ ܐܦܪܝܡ ܡܠܦܢܐ ܘܡܪܝ ܬܐܘܕܘܪܘܣ ܕܢܫܬܡܠܐ ܒܫܒܬܐ ܩܕܡܝܬܐ ܕܨܘܡܐ ܛܟܣܐ ܕܚܕ ܒܫܒܐ ܩܕܡܝܐ ܕܦܢܛܝܩܘܣܛܝ ܛܟܣܐ ܕܥܠ ܩܕܝܫܐ ܡܪܝ ܒܣܘܣ ܘܚܬܗ ܫܘܫܢ ܛܟܣܐ ܕܥܠ ܡܪܝ ܥܙܙܐܝܠ ܣܗܕܐ ܛܟܣܐ ܕܩܕܝܫܐ ܡܪܝ ܕܕܐ ܕܩܒܝܪ ܦܓܪܗ ܒܒܝܬ ܣܒܝܪܝܢܐ ܛܟܣܐ ܕܩܕܝܫܐ ܡܪܝ ܐܘܓܝܢ ܪܝܫ ܣܝܥܬܐ ܐܠܗܝܬܐ ܛܟܣܐ ܕܥܠ ܡܪܝ ܦܝܠܘܟܣܝܢܘܣ ܪܒܐ ܐܦܣܩܘܦܐ ܕܡܒܘܓ ܡܕܝܢܬܐ ܕܗܘ ܡܪܝ ܐܟܣܢܝܐ ܛܟܣܐ ܕܥܠ ܩܕܝܫܐ ܡܪܝ ܫܡܥܘܢ ܕܙܝ̈ܬܐ: ܕܩܒܝܪ ܒܥܘܡܪܐ ܕܩܪܬܡܝܢ: ܘܗܘ ܐܝܬܘܗܝ ܛܠܝܐ ܕܐܬܬܕܝܫ ܘܡܝܬ ܒܫܘܢܝܗ ܕܡܪܝ ܓܒܪܐܝܠ ܛܟܣܐ ܕܥܠ ܚܕ ܩܢܘܡܐ ܣܗܕܝܐ ܚܫܚ ܠܡܪܝ ܩܘܙܡܐ ܘܡܪܝ ܕܘܡܝܐ ܘܡܪܝ ܪܘܡܐܢܘܣ ܘܫܪܟܐ ܕܣܗ̈ܕܐ ܕܐܬܩܛܠܘ ܒܣܗܕܘܬܐ ܛܟܣܐ ܕܥܠ ܩܕܝܫܐ ܡܪܝ ܐܣܝܐ

 

ܥܠ ܚܝܠܐ ܕܬܠܝܬܝܘܬܐ ܩܕܝܫܬܐ ܘܫܘܝܬ ܒܐܘܣܝܐ ܐܒܐ ܘܒܪܐ ܘܪܘܚܐ ܩܕܝܫܐ ܚܕ ܐܠܗܐ ܫܪܝܪܐ ܡܫܪܝܢܢ ܕܢܟܬܘܒ ܣܕܪ̈ܐ ܘܚܘ̈ܣܝܐ ܕܥܐܕ̈ܐ ܡܪ̈ܢܝܐ ܘܕܘܟܪ̈ܢܐ ܕܩܕܝ̈ܫܐ ܕܫܟܝܚܝܢ ܠܘܬܢ ܘܡܫܬܡܠܝܢ ܨܝܕܝܢ ܩܕܡܝܬ

 

ܛܟܣܐ ܕܝܠܕܬ ܐܠܗܐ ܕܥܠ ܫܒ̈ܠܐ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܫܺܝܚܳܐ ܐܠܰܗܳܐ ܡܶܠܬܳܐ ܕܡܶܢ ܐܰܒܳܐ ܕܰܐܝܟ ܡܶܛܪܳܐ ܐܶܙܕܪܰܥܬ ܒܚܰܩܠܐ ܒܬܽܘܠܳܝܬܳܐ: ܘܰܐܝܟ ܫܶܒܠܐܴ ܡܫܰܡܠܳܝܬܳܐ ܫܘܰܚܬ ܡ̣ܶܢ ܥܽܘܒܳܗ̇ ܕܡܰܪܝܰܡ ܕܠܐ ܐܰܟܳܪܳܐ ܘܰܗܘܰܝܬ ܬܽܘܪܣܳܝܳܐ ܠܥܳܠܡܳܐ ܕܰܨܪܺܝܟ ܗܘܳܐ ܡ̣ܶܢ ܡܶܐܟܠܐ ܬܽܘܪܣܳܝܳܐ ܪܽܘܚܳܢܳܝܳܐ: ܐܰܝܟܰܢܳܐ ܕܰܒܚܰܕܽܘܬܳܐ ܘܒܰܪܘܳܙܳܐ ܕܬܰܪܥܺܝܬܳܐ: ܘܰܒܩ̈ܳܠܐ ܗܰܢܺܝ̈ܰܐܝ ܢܶܥ̈ܡܳܬܳܐ ܢܫܰܒܚܳܟ ܘܰܢܩܰܠܣܳܟ ܒܝܽܘܡ ܕܽܘܟܪܳܢܳܗ̇ ܕܶܐܡܳܟ ܡܒܰܪܰܟܬܳܐ: ܘܠܳܗ̇ ܢܶܬܶܠ ܛܽܘܒܳܐ ܕܺܝ̣ܠܶܕܬܳܟ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗܰܘ ܐܰܟܳܪܳܐ ܚܰܟܺܝܡܳܐ ܕܰܙܪܰܥ ܗ̣ܽܘ ܠܶܗ ܒܚܰܩܠܐ ܒܬܽܘܠܳܝܳܐ ܘܺܝ̣ܥܳܐ ܘܰܫܘܰܚ ܡܶܢܳܗ̇ ܐܰܝܟ ܫܶܒܠܐܴ ܕܢܶܗܘܶܐ ܬܽܘܪܣܳܝܳܐ ܠܥܳܠܡܳܐ ܕܟܰܦܺܝܢ ܗܘܳܐ ܠܡܶܐܟܽܘܠܬܳܐ ܕܪܽܘܚܳܐ: ܠܗܰܘ ܕܰܨܒܳܐ ܘܶܐܬܪܰܒܺܝ ܒܶܝܬ ܙܺܝ̈ܙܳܢܶܐ ܚܳܢܽܘ̈ܩܶܐ ܘܡܰܟ̈ܝܳܢܶܐ ܘܠܶܗ ܠܐ ܐܰܟܺܝܘ: ܐܶܠܐ ܠܗܽܘܢ ܘܰܠܙܰܪܥܗܽܘܢ ܡ̣ܶܢ ܚܰܩܠܶܗ ܒܪܺܝܟܬܳܐ ܥܬܺܝܕ ܕܢܶܥܩܽܘܪ ܘܢܰܘܩܶܕ. ܘܰܠܚܶܛܰܘ̈ܗܝ ܓܰܒ̈ܝܳܬܳܐ ܢܶܚܡܽܘܠ ܒܰܐܘܨܪ̈ܶܐ ܕܺܝܠܶܗ ܕܚܰܝ̈ܶܐ: ܕܠܶܗ ܗܳܫܳܐ ܢܦܺܝܣ ܒܕܽܘܟܪܳܢܳܗ̇ ܕܝܳܠܶܕܬܶܗ: ܕܡ̣ܶܢ ܝܰܩܕܳܢܳܐ ܕܢܽܘܪܳܐ ܕܠܐ ܕܳܥܟܳܐ ܘܰܕܠܐ ܛܳܦܝܳܐ ܢܫܰܘܙܶܒ ܠܰܢ: ܘܒܰܐܘܨܪ̈ܶܐ ܪ̈ܘܺܝܚܶܐ ܕܡܰܠܟܽܘܬܶܗ ܢܶܚܡܽܘܠ ܠܰܢ: ܗ̇ܰܘ ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܶܠܬܳܐ ܡܬܽܘܡܳܝܳܐ ܘܠܐ ܡܶܬܡܰܠܠܳܢܳܐ: ܢܽܘܗܪܳܐ ܠܚܽܘܕܳܝܳܐ ܘܠܐ ܡܶܬܩܰܪܒܳܢܳܐ: ܠܰܚܡܳܐ ܫܡܰܝܳܢܳܐ ܘܠܐ ܡܶܣܬܰܝܟܳܢܳܐ: ܫܶܒܠܐܴ ܕܚܰܕ̈ܘܳܬܳܐ ܘܠܐ ܫܳܝܽܘܒܬܳܐ: ܚܽܘܒܳܐ ܫܰܪܺܝܪܳܐ ܘܠܐ ܡܶܬܦܰܣܩܳܢܳܐ: ܣܰܒܪܳܐ ܓܡܺܝܪܳܐ ܘܠܐ ܡܶܬܛܰܠܩܳܢܳܐ ܗ̇ܰܘ ܕܰܒܝܰܕ ܪܶܚܡܰܬ݀ ܐ̱ܢܳܫܽܘܬܳܟ ܫܦܺܝܥܬܳܐ: ܐܰܕܺܝܩܬ ܡ̣ܶܢ ܡܪܰܘܡܳܐ ܕܺܐܝܩܳܪܳܟ ܪܰܒܳܐ: ܘܰܚܙܰܝܬ ܠܥܳܠܡܳܐ ܕܡ̣ܶܢ ܫܽܘܪܳܝܳܐ ܒܪܰܝܬ ܒܛܳܒܽܘܬ ܛܳܒܽܘܬܳܟ: ܕܰܟܦܶܢ ܘܰܨܗܺܝ ܠܡܶܠܬܳܐ ܕܚܰܝ̈ܶܐ ܕܺܐܝܬܶܝܗ̇ ܬܽܘܪܣܳܝܳܐ ܕܢܰܦܫܳܐ: ܘܡܶܚܕܳܐ ܒܛܰܝܒܽܘܬܳܟ ܘܠܰܘ ܒܨܶܒܝܳܢܰܢ ܢܚܶܬܬ ܐܰܝܟ ܡܶܛܪܳܐ ܐܰܝܟ ܛܰܠܐ ܠܐܪܥܳܐ ܕܠܰܘ̈ܛܳܬܳܐ: ܘܰܓܒܰܝܬ ܠܳܟ ܐܰܪܥܳܐ ܛܳܒܬܳܐ ܥܽܘܒܳܗ̇ ܕܒܰܪܬ ܕܰܘܺܝܕ ܕܰܟܝܰܬ݀ ܒܟܽܠ ܡܰܪܝܰܡ: ܗܳܕܶܐ ܕܰܐܝܟ ܡܶܛܪܳܐ ܫܡܰܝܳܢܳܐ ܩܰܒܶܠܬܳܟ: ܘܰܐܝܟ ܫܶܒܠܐܴ ܕܒܽܘܪ̈ܟܳܬܳܐ ܐܰܫܘܰܚܬܳܟ: ܗܳܕܶܐ ܕܰܐܝܟ ܛܠܐ ܢܺܝ̣ܚܳܐ ܛܥܶܢܬܳܟ ܘܰܐܝܟ ܠܰܚܡܳܐ ܕܚܰܝ̈ܶܐ ܝܺܠܶܕܬܳܟ: ܗܳܕܶܐ ܕܰܐܝܟ ܪ̈ܣܺܝܣܶܐ ܡܫܰܝ̈ܢܶܐ ܚܡܰܠܬܳܟ ܘܰܐܝܟ ܟܰܦܳܐ ܕܥܶܣܒܳܐ ܠܥܳܠܡܳܐ ܝܰܗܒܬܳܟ: ܗܳܕܶܐ ܕܰܐܝܟ ܓܦܶܬܳܐ ܡܰܝ̈ܳܐ ܕܚܰܝ̈ܶܐ ܐܶܫܬܝܰܬܳܟ ܘܰܐܝܟ ܣܓܽܘܠܐ ܕܚܰܕ̈ܘܳܬܳܐ ܠܰܒܪܺܝܬܳܐ ܐܰܓܥܶܠܬܳܟ ܘܰܐܝܟ ܠܰܚܡܳܐ ܕܚܰܝ̈ܶܐ ܝܺܠܶܕܬܳܟ: ܗܳܕܶܐ ܕܰܐܝܟ ܓܶܙܬܳܐ ܡܠܺܝܠܬܳܐ ܙܰܝܰܚܬܳܟ ܘܰܐܝܟ ܡܰܝ̈ܳܐ ܚܰܝ̈ܶܐ ܠܥܳܡܰܪܬܳܐ ܫܰܟܶܢܬܳܟ: ܗܳܕܶܐ ܕܰܕܠܐ ܐܰܟܳܪܳܐ ܐܰܘܥܝܰܬܳܟ ܘܰܕܠܐ ܙܰܪܥܳܐ  ܒܬܶܕܡܽܘܪܬܳܐ ܐܰܫܘܰܚܬܳܟ ܘܡܶܛܽܠ ܗܳܕܶܐ ܛܽܘܒܳܐ ܒܙܶܕܩܳܐ ܠܳܗ̇ ܝܳܗܒܺܝܢܰܢ ܟܰܕ ܐܳܡܪܺܝܢܰܢ: ܛܽܘܒܰܝܟܝ ܐܠܶܦܳܐ ܡܶܬܝܰܕܥܳܢܺܝܬܳܐ ܕܰܫܪܳܐ ܒܶܟܝ ܬܰܐܓܳܪܳܐ ܛܥܺܝܢ ܓܰܙ̈ܶܐ ܘܥܽܘܬܪ̈ܶܐ ܫܡܰܝ̈ܳܢܶܐ: ܛܽܘܒܰܝܟܝ ܒܬܽܘܠܬܳܐ ܘܶܐܡܳܐ ܕܰܐܠܳܗܳܐ ܡܶܠܬܳܐ: ܛܽܘܒܰܝܟܝ ܓܶܙܬܳܐ ܒܪܺܝܟܬܳܐ ܕܩܰܒܠܰܬ݀ ܛܰܠܐ ܡ̣ܶܢ ܪܰܘܡܳܐ: ܛܽܘܒܰܝܟܝ ܕܟܺܝܬܳܐ ܕܺܝܠܶܕܬܝ ܕܰܟܝܳܐܝ̣ܬ ܠܗܰܘ ܕܟܶܐ ܒܟܽܠ ܕܕܰܟܺܝ ܒܕܰܟܝܽܘܬܶܗ ܠܰܒܪܺܝܬܳܐ: ܛܽܘܒܰܝܟܝ ܗܰܝܟܠܐ ܒܬܽܘܠܳܝܳܐ ܘܗܰܘܢܳܐ ܗܕܺܝܪܳܐ ܕܪܺܝܫ ܟܽܘܡܪ̈ܶܐ ܫܡܰܝܳܢܳܐ: ܛܽܘܒܰܝܟܝ ܘܰܥܕܳܐ ܘܳܠܝܳܝܳܐ ܕܶܐܬܘܰܥܰܕ ܠܰܫܟܺܝܢܬܶܟܝ ܥܳܡܽܘܪܳܐ ܕܰܫܡܰܝܳܐ: ܛܽܘܒܰܝܟܝ ܙܗܺܝܬܳܐ ܒܰܒܬܽܘ̈ܠܳܬܳܐ ܕܰܐܥܒܰܪܬܝ ܒܝܰܠܕܶܟܝ ܠܠܰܘܛܬܳܐ ܕܟܽܘ̈ܒܶܐ ܘܕܰܪܕܪ̈ܶܐ ܡ̣ܶܢ ܐܰܪܥܳܐ: ܛܽܘܒܰܝܟܝ ܡܒܰܪܰܟܬܳܐ ܘܰܐܪܥܳܐ ܨܗܺܝܬܳܐ ܕܩܰܒܶܠܬܝ ܡܶܛܪܳܐ ܡ̣ܶܢ ܪܰܘܡܳܐ: ܘܰܐܘܥܺܝܬܝ ܫܶܒܠܐܴ ܫܡܰܝܳܢܳܐ: ܛܽܘܒܰܝܟܝ ܛܽܘܒܳܢܺܝܬܳܐ ܘܫܰܘܝܰܬ݀ ܠܟܽܠ ܛܽܘܒܺܝ̈ܢ ܕܡ̣ܶܢ ܠܰܚܡܶܟܝ ܣܶܒܥܰܬ݀ ܟܽܠܳܗ̇ ܒܪܺܝܬܳܐ ܘܰܛܥܳܬ݀ ܟܰܦܢܽܘܬܳܗ̇: ܛܽܘܒܰܝܟܝ ܝܳܗܒܰܬ݀ ܚܰܝ̈ܶܐ ܠܰܒܢܰܝ̈ܢܳܫܳܐ ܕܰܒܪܶܟܝ ܦܰܪܩܶܗ ܠܓܶܢܣܰܢ ܥܰܦܪܳܢܳܐ ܘܫܰܟܶܢ ܠܰܢ ܠܐ ܡܳܝܽܘܬܽܘܬܳܐ: ܛܽܘܒܰܝܟܝ ܟܢܺܝܟܬܳܐ ܘܰܟܚܺܝܕܬܳܐ ܕܡ̣ܶܢ ܚܶܛܬܳܐ ܟܳܗܢܳܝܬܳܐ ܕܫܶܘܚܰܬ݀ ܒܶܟܝ ܐܶܬܒܰܝܰܐܬ݀ ܟܽܠܳܗ̇ ܥܳܡܰܪܬܳܐ: ܛܽܘܒܰܝܟܝ ܠܚܽܘܕܳܝܰܬ݀ ܒܢܶܩ̈ܒܳܬܳܐ ܕܥܶܣܒܳܐ ܕܺܝ̣ܥܳܐ ܒܶܟܝ ܡܬܰܪܣܶܐ ܠܟܽܠܗܶܝܢ ܒܶܪ̈ܝܳܬܳܐ: ܛܽܘܒܰܝܟܝ ܡܰܠܟܬܳܐ ܘܒܰܪܬ ܡܰܠܟܳܐ ܕܰܡܠܶܟ ܡܰܠܟ̈ܶܐ ܘܩܳܛܰܪ ܬܳܓ̈ܶܐ ܠܫܰܠܺܝ̈ܛܳܢܶܐ ܡܶܢܶܟܝ ܩܛܰܪ ܬܳܓܳܐ: ܛܽܘܒܰܝܟܝ ܢܽܘܗܪܳܐ ܕܥܳܡܰܪܬܳܐ ܕܡܶܢܶܟܝ ܕܢܰܚ ܢܽܘܗܪܳܐ ܗ̇ܰܘ ܡܰܢܗܰܪ ܠܟܽܠ ܒܰܪܢܳܫ ܕܳܐܬܶܐ ܠܥܳܠܡܳܐ: ܛܽܘܒܰܝܟܝ ܣܰܬܳܐ ܒܪܺܝܟܬܳܐ ܕܰܫܘܰܚ ܡ̣ܶܢ ܓܽܘܫܡܶܟܝ ܣܓܽܘܠܐ ܕܰܒܚܰܡܪܶܗ ܚܰܣܺܝ ܠܢܰܦ̈ܫܳܬܳܐ: ܛܽܘܒܰܝܟܝ ܥܶܩܳܪܳܐ ܒܪܺܝܟܳܐ ܕܰܢܒܰܓ ܡ̣ܶܢ ܓܽܘܙܥܶܟܝ ܫܰܒܛܳܐ ܕܰܬܪܺܝܨܽܘܬܳܐ ܘܦܺܐܪܳܐ ܕܠܐ ܡܳܝܽܘܬܽܘܬܳܐ: ܛܽܘܒܰܝܟܝ ܦܐܻܝܬܳܐ ܘܰܦܢܺܝ̣ܬܳܐ ܩܰܕܡܳܝܬܳܐ ܕܰܕܢܰܚ ܡܶܢܶܟܝ ܐܺܝܡܳܡܳܐ ܕܙܰܕܺܝܩܽܘܬܳܐ: ܛܽܘܒܰܝܟܝ ܨܰܠܡܳܐ ܦܰܐܝܳܐ ܕܰܥܠܰܝ̈ܡܳܬܳܐ ܘܨܶܒܬܳܐ ܗܕܺܝܪܳܐ ܕܟ̈ܰܠܠܳܬܳܐ ܘܫܽܘܦܪܳܐ ܠܐ ܡܶܬܦܰܚܡܳܢܳܐ ܕܝܰܠܳܕ̈ܳܬܳܐ: ܛܽܘܒܰܝܟܝ ܩܠܺܝܕܳܐ ܕܓܰܢܰܬ݀ ܥܕܶܝܢ ܕܒܶܟܝ ܐܶܬܦܢܺܝܘ ܐܰܒܳܗܰܝ̈ܢ ܩܰܕ̈ܡܳܝܶܐ ܠܝܳܪܬܽܘܬܗܽܘܢ: ܛܽܘܒܰܝܟܝ ܪܩܺܝܥܳܐ ܡܶܬܗܰܘܢܳܢܳܐ ܕܒܶܟܝ ܐܶܬܚܙܺܝ ܫܶܡܫܳܐ ܕܙܰܕܺܝܩܽܘܬܳܐ ܘܰܐܢܗܰܪ ܠܕܰܠܥܶܠ ܘܰܠܕܰܠܬܰܚܬ: ܛܽܘܒܰܝܟܝ ܫܪܳܪܳܐ ܕܰܢܒܺܝ̈ܶܐ ܘܫܽܘܒܗܳܪܳܐ ܕܰܫܠܺܝ̈ܚܶܐ ܘܚܽܘܬܪܳܐ ܕܣܳܗ̈ܕܶܐ: ܛܽܘܒܰܝܟܝ ܬܠܺܝܬܳܝܰܬ݀ ܛܽܘ̈ܒܶܐ ܕܡܳܪܶܐ ܛܽܘ̈ܒܶܐ ܠܥܳܠܡܳܐ ܕܰܓܠܺܝܙ ܡ̣ܶܢ ܛܽܘ̈ܒܶܐ ܐܰܓܥܶܠܬܝ: ܛܽܘܒܰܝܟܝ ܡ̣ܶܢ ܥܶܠܳܝ̈ܶܐ ܕܺܝܠܶܕܬܝ ܠܡܳܪܗܽܘܢ: ܛܽܘܒܰܝܟܝ ܡ̣ܶܢ ܬܰܚܬܳܝ̈ܶܐ ܕܺܝܠܶܕܬܝ ܠܦܳܪܽܘܩܗܽܘܢ: ܛܽܘܒܰܝܟܝ ܡ̣ܶܢ ܢܒܺܝ̈ܶܐ ܕܺܝܠܶܕܬܝ ܠܚܽܘܬܳܡ ܡܶܠܰܝ̈ܗܽܘܢ: ܛܽܘܒܰܝܟܝ ܡ̣ܶܢ ܫܠܺܝ̈ܚܶܐ ܕܺܝܠܶܕܬܝ ܠܡܰܘܪܒܳܢܗܽܘܢ: ܛܽܘܒܰܝܟܝ ܡ̣ܶܢ ܣܳܗ̈ܕܶܐ ܕܺܝܠܶܕܬܝ ܠܰܡܢܰܨܚܳܢܗܽܘܢ: ܛܽܘܒܰܝܟܝ ܡ̣ܶܢ ܡܶܣ̈ܟܺܢܶܐ ܕܰܥܬܰܪܘ ܡ̣ܶܢ ܝܰܠܕܶܟܝ: ܛܽܘܒܰܝܟܝ ܡ̣ܶܢ ܟܰܦ̈ܢܶܐ ܕܰܣܒܰܥܘ ܡ̣ܶܢ ܠܰܚܡܶܟܝ: ܛܽܘܒܰܝܟܝ ܡ̣ܶܢ ܨܗܰܝ̈ܳܐ ܕܰܪܘܺܝܘ ܡ̣ܶܢ ܚܰܡܪܶܟܝ: ܛܽܘܒܰܝܟܝ ܡ̣ܶܢ ܪ̈ܰܚܺܝܩܶܐ ܘܩܰܪ̈ܺܝܒܶܐ ܕܶܐܬܚܰܝܰܕܘ ܒܰܒܪܶܟܝ: ܛܽܘܒܰܝܟܝ ܠܥܳܠܰܡ ܥܳܠܡܺܝܢ ܩܰܝܳܡ ܝܰܠܕܳܐ ܕܺܝܠܶܕܬܝ: ܘܡܶܛܽܠܗܳܕܶܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܰܫܦܰܪ ܠܳܟ ܕܡܶܢܳܗ̇ ܒܰܪܢܳܫܳܐ ܬܶܗܘܶܐ ܒܗܳܢܳܐ ܝܰܘܡܳܐ ܕܕܽܘܟܪܳܢܳܗ̇ ܡܶܫܬܰܡܠܐܷ: ܠܢܽܘܛܳܪܳܐ ܕܥ̈ܰܠܠܳܬܳܐ ܐܰܘܟܺܝܬ ܕܚܰܩ̈ܠܳܬܳܐ ܕܙܰܪ̈ܥܶܐ ܘܰܕܟܰܪ̈ܡܶܐ ܘܦܰܪ̈ܕܰܝܣܶܐ ܡ̣ܶܢ ܒܰܪܕܳܐ ܘܫܰܘܒܳܐ ܘܝܰܪܩܳܢܳܐ: ܘܡ̣ܶܢ ܩܰܡܨܳܐ ܘܙܳܚܠܐ ܘܨܰܪܨܽܘܪܳܐ ܘܝܰܩܕܳܢܳܐ: ܘܡ̣ܶܢ ܟܽܠܗܽܘܢ ܢܶܟ̈ܝܳܢܶܐ ܢܶܬܢܰܛܪܽܘܢ ܘܰܬܢܰܛܰܪ ܠܢܰܦ̈ܫܳܬܰܢ ܠܫ̈ܶܐܠܳܬܰܢ ܡܳܪܝ ܫܡܰܥ ܕܫܳܐܠܺܝܢܰܢ ܡܶܢܳܟ: ܘܦܰܨܳܐ ܠܰܢ ܡ̣ܶܢ ܝܰܩܕܳܢܳܐ ܕܚܰܫ̈ܶܐ: ܘܡ̣ܶܢ ܒܰܪܕܳܐ ܕܰܚܛܳܗ̈ܶܐ: ܘܡ̣ܶܢ ܫܰܘܒܳܐ ܕܽܐܘܠܨ̈ܳܢܶܐ: ܘܡ̣ܶܢ ܝܰܪܩܳܢܳܐ ܕܟܺܐܒ̈ܶܐ: ܘܡ̣ܶܢ ܩܰܡܨܳܐ ܘܙܳܚܠܐ ܡܶܬܝܰܕܥܳܢܳܐ ܕܫܺܐܕ̈ܶܐ ܘܕܰܒܢܰܝ̈ܢܳܫܳܐ ܒܺܝ̈ܫܶܐ: ܐܰܝܟܰܢܳܐ ܕܰܒܢܰܘܚܳܐ ܕܡ̣ܶܢ ܟܽܠܗܶܝܢ ܡܰܪ̈ܕܘܳܬܳܐ ܢܫܰܒܚܳܟ ܘܰܢܪܰܡܪܡܳܟ ܒܗܺܝܠܐܴܝ̣ܬ: ܘܠܐܡܳܟ ܡܒܰܪܰܟܬܳܐ ܢܩܰܠܶܣ ܘܰܢܝܰܩܰܪ ܒܰܙܡܺܝܪ̈ܳܬܳܐ ܘܢܶܥ̈ܡܳܬܳܐ ܕܪܽܘܚܳܐ ܐܰܡܺܝܢܳܐܝ̣ܬ: ܘܢܶܫܬܘܶܐ ܚܢܰܢ ܘܟܶܢܫܰܢ ܘܥܰܡܰܢ ܘܥܰܢܺܝ̈ܕܰܝܢ ܕܥܰܡܳܗ̇ ܘܥܰܡ ܟܽܠܗܽܘܢ ܩܰܕܺܝ̈ܫܰܝܢ ܢܶܥܽܘܠ ܠܰܓܢܽܘܢ ܢܽܘܗܪܳܐ ܕܡܰܠܟܽܘܬܳܟ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܗܳܫܳܐ܀

 

ܥܛܪܐ

 

ܚܰܩܠܐ ܒܪܺܝܟܬܳܐ ܡܰܪܝܰܡ ܝܳܠܕܰܬ ܐܠܰܗܳܐ: ܕܺܝ̣ܥܳܐ ܒܳܗ̇ ܥܶܩܳܪܳܐ ܒܰܣܺܝܡܳܐ ܕܠܐ ܡܳܝܽܘܬܽܘܬܳܐ ܘܠܐ ܡܶܬܚܰܒܠܳܢܽܘܬܳܐ: ܘܰܫܘܰܚ ܡܶܢܳܗ̇ ܫܶܒܠܐܴ ܡܬܰܪܣܝܳܢܳܐ ܕܥܳܠܡ̈ܶܐ ܘܒܶܪ̈ܝܳܬܳܐ: ܘܝܶܗܒܰܬ݀ ܠܰܚܡܳܐ ܕܚܰܝ̈ܶܐ ܠܟܽܠܳܗ̇ ܒܪܺܝܬܳܐ: ܐܰܢ̱ܬܝ ܗܳܟܺܝܠ ܗܘܳܝ ܡܦܺܝܣܳܢܺܝܬܳܐ ܠܰܒܪܳܐ ܕܰܐܠܳܗܳܐ ܕܰܨܒܳܐ ܘܶܐܬܒܰܣܰܪ ܘܶܐܬܺܝܠܶܕ ܡܶܢܶܟܝ ܕܠܐ ܫܽܘܚܠܳܦܳܐ: ܕܠܐ ܡܶܛܽܠ ܠܐ ܢܳܡܽܘܣܳܝ̈ܘܳܬܳܐ ܕܺܝܠܰܢ ܢܶܟܠܐܷ ܡܶܢܰܢ ܢܶܒ̈ܥܶܐ ܕܒܽܘܪ̈ܟܳܬܶܗ ܘܫܶܦ̈ܥܶܐ ܕܛܳܒ̈ܳܬܶܗ ܘܓܰܙܳܐ ܕܥܽܘܕܪ̈ܳܢܰܘܗܝ ܘܡܰܘܗܰܒܬܳܐ ܕܪ̈ܰܚܡܰܘܗܝ: ܡܶܛܽܠ ܕܠܐ ܡܬܽܘܡ ܟܳܠܐܷ ܠܶܟܝ ܫ̈ܶܐܠܳܬܝ ܘܠܐ ܣܳܟ ܡܰܥܒܰܪ ܒܳܥ̈ܘܳܬܶܟܝ: ܐܶܠܐ ܥܳܒܶܕ ܨܶܒܝܳܢܶܟܝ ܘܡܶܬܪܟܶܢ ܠܰܦܝܳܣܶܟܝ: ܘܟܰܕ ܠܗܳܠܶܝܢ ܠܘܳܬܰܢ ܚܰܛܳܝ̈ܶܐ ܡܦܰܪܢܶܣ ܒܰܣܢܺܐܓܪܽܘܬܶܟܝ ܘܰܢܒܰܪܶܟ ܒܝܰܕ ܨܠܰܘ̈ܳܬܶܟܝ ܙܰܪ̈ܥܰܝܢ ܘܚܰܩ̈ܠܳܬܰܢ ܒܒܽܘܪ̈ܟܳܬܶܗ ܫܦܺܝ̈ܥܳܬܳܐ: ܘܢܰܫܘܶܐ ܠܰܢ ܘܰܠܥܰܢܺܝ̈ܕܰܝܢ ܠܒܽܘܣܳܡܳܐ ܕܥܰܠ ܦܳܬܽܘܪܶܗ ܡܠܐܷ ܓܶܐܘ̈ܳܬܳܐ: ܘܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܫܰܠܺܝܛܳܐ ܕܰܫܠܳܡܳܐ ܕܒܰܫܠܳܡܳܐ ܥܒܰܕ ܡܶܐܬܺܝܬܶܗ ܠܰܒܪܺܝܬܳܐ: ܠܗܰܘ ܬܰܩܺܝܦܳܐ ܘܚܰܣܺܝܢܳܐ ܕܰܐܝܟ ܛܰܠܐ ܢܚܶܬ ܘܰܫܪܳܐ ܥܰܠ ܛܽܘܪܳܐ ܡܠܺܝܠܐ ܕܨܶܗܝܽܘܢ ܕܰܓܒܳܗ̇ ܠܡܰܥܡܪܶܗ: ܠܗܰܘ ܛܳܒܳܐ ܘܒܰܣܺܝܡܳܐ ܕܚܽܘܒܶܗ ܣܰܓܺܝܳܐܐ ܥܨܳܝܗܝ ܕܡܰܟܺܝܟܳܐܝ̣ܬ ܢܶܣܥܽܘܪ ܡܰܪܥܺܝܬܶܗ: ܠܗܰܘ ܕܟܰܕ ܐܠܰܗܰܐ ܗ̱ܘ ܒܰܟܝܳܢܶܗ ܥܒܰܕ ܗ̣ܽܘ ܠܶܗ ܒܰܪܢܳܫܳܐ ܡܶܛܽܠ ܦܽܘܪܩܳܢܳܐ ܕܰܓܒܺܝܠܬܶܗ: ܠܗܰܘ ܕܰܫܩ̣ܰܠ ܠܶܗ ܐܶܡܳܐ ܡ̣ܶܢ ܐܰܪܥܳܐ ܕܠܰܝܬ ܗܘܳܐ ܠܶܗ: ܘܡܶܢܳܗ̇ ܐܶܨܛܰܠܰܡ ܐܳܕܳܡܳܝܽܘܬܳܐ ܕܢܰܥܕܶܐ ܡ̣ܶܢ ܫܰܒܳܝܳܐ ܡܳܪܽܘܕܳܐ ܠܰܫܒܺܝܬܶܗ: ܠܗܰܘ ܦܫܺܝܛܳܐ ܘܠܐ ܡܪܰܟܒܳܐ ܕܪܰܟܶܒ ܠܶܗ ܗܰܕ̈ܳܡܶܐ ܒܓܰܘ ܡܰܪܒܥܳܐ ܠܐ ܡܛܰܘܫܳܐ ܕܝܳܠܶܕܬܶܗ: ܘܰܒܗܽܘܢ ܦܰܪܢܶܣ ܦܽܘܪܩܳܢܳܐ ܠܰܒܪܺܝܬܶܗ: ܕܠܶܗ ܠܗܰܘ ܕܟܰܢܶܫ ܠܰܢ ܠܰܡܒܰܕܪ̈ܶܐ ܠܰܚܕܳܐ ܐܰܘܝܽܘܬܳܐ ܒܡܰܚܰܬܬܶܗ ܘܣܳܡ ܠܰܢ ܡܫܰܒ̈ܚܳܢܶܐ ܘܣܳܓܽܘ̈ܕܶܐ ܒܥܺܕܬܳܐ ܡܟܺܝܪܬܶܗ: ܕܰܢܗܰܠܶܠ ܘܰܢܙܰܡܰܪ ܘܰܢܫܰܒܰܚ ܘܰܢܪܰܡܪܶܡ ܒܝܰܘܡܳܐ ܕܕܽܘܟܪܳܢܳܗ̇ ܫܒܺܝܚܳܐ ܕܝܳܠܶܕܬܶܗ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ܀

 

ܣܕܪܐ

 

ܫܽܘܒܚܳܐ ܠܳܟ ܐܠܰܗܳܐ ܠܐ ܡܶܬܕܰܪܟܳܢܳܐ ܘܠܐ ܡܶܬܥܰܩܒܳܢܳܐ: ܡܶܠܬܳܐ ܡܡܰܠܠܳܢܳܐ ܘܠܐ ܡܶܬܡܰܠܠܳܢܳܐ: ܚܰܝܠܐ ܡܥܰܫܢܳܢܳܐ ܘܠܐ ܡܶܬܡܰܚܠܳܢܳܐ: ܚܶܟܡܬܳܐ ܐܠܰܗܳܝܬܳܐ ܘܝܳܗܒܰܬ݀ ܟܽܠ ܪܳܕܝܽܘܬܳܐ ܘܣܽܘܟܳܠܐ ܠܣܰܟܽܘ̈ܠܬܳܢܶܐ: ܗ̇ܰܘ ܕܺܐܝܬܰܘܗܝ ܝܰܠܕܳܐ ܓܢܺܝܙܳܐ ܘܠܐ ܡܶܬܩܰܪܒܳܢܳܐ: ܗ̇ܰܘ ܕܡ̣ܶܢ ܐܰܒܳܐ ܩܽܘܫܬܳܢܳܝܳܐ ܘܫܰܪܺܝܪܳܐ: ܠܥܶܠ ܡ̣ܶܢ ܟܽܠܳܗ̇ ܚܰܫܳܢܳܝܽܘܬܳܐ ܘܰܦܣܳܩܳܐ. ܘܰܠܗܰܠ ܡ̣ܶܢ ܟܽܠܳܗ̇ ܡܰܕܪܟܳܢܽܘܬܳܐ ܕܗܰܘ̈ܢܶܐ ܥܒܺܝ̈ܕܶܐ: ܘܰܠܓܰܘ ܡ̣ܶܢ ܟܽܠܳܗ̇ ܡܰܚܫܰܒܬܳܐ ܕܬܶܐܘܳܪܺܝܰܐ ܕܰܗܘܰܝ̈ܳܐ ܝܺܠܺܝܕ ܐܰܢ̱ܬ: ܗ̇ܰܘ ܕܠܰܝܬ ܫܽܘܪܳܝܳܐ ܠܐܝܬܽܘܬܳܟ ܘܠܐ ܫܽܘܠܳܡܳܐ ܠܡܰܠܟܽܘܬܳܟ ܘܠܐ ܣܰܩܽܘܒܠܐ ܠܐܠܳܗܽܘܬܳܟ: ܗ̇ܰܘ ܕܡ̣ܶܢ ܡܰܠܐܟ̈ܶܐ ܘܪ̈ܺܝܫܰܝ ܡܰܠܐܟ̈ܶܐ ܡܶܫܬܰܡܰܫ ܐܰܢ̱ܬ: ܘܡ̣ܶܢ ܫܽܘܠܛܳܢ̈ܶܐ ܘܡܳܪ̈ܰܘܳܬܳܐ ܡܶܣܬܓܶܕ ܐܰܢ̱ܬ: ܘܡ̣ܶܢ ܚܰܝ̈ܠܐ ܘܚܰܝܠܰܘ̈ܳܬܳܐ ܫܰܠܗܶܒܺܝ̈ܬܳܢܳܝܶܐ ܡܶܬܩܰܠܰܣ ܐܰܢ̱ܬ: ܘܡ̣ܶܢ ܡܰܘ̈ܬܒܶܐ ܘܪ̈ܺܝܫܳܢܘܳܬܳܐ ܡܶܬܗܰܕܰܪ ܐܰܢ̱ܬ: ܘܡ̣ܶܢ ܟܪ̈ܽܘܒܶܐ ܘܓܺܝ̈ܓܠܐ ܡ̈ܰܠܳܠܳܬܳܐ ܒܩܽܘܒܰܬ݀ ܫܡܰܝܳܐ ܕܠܐ ܦܣܳܩ ܡܶܬܒܰܪܰܟ ܐܰܢ̱ܬ: ܘܡ̣ܶܢ ܣܪ̈ܳܦܶܐ ܪ̈ܳܣܡܰܝ ܢܽܘܪܳܐ ܒܣܶܦ̈ܘܳܬܳܐ ܝܳܩܽܘ̈ܕܳܬܳܐ ܡܶܬܩܰܕܰܫ ܐܰܢ̱ܬ: ܘܡ̣ܶܢ ܠܶܫܳܢ̈ܶܐ ܢܰܒܪ̈ܫܳܢܳܝܶܐ ܒܠܶܥ̈ܙܶܐ ܘܪ̈ܶܬܡܶܐ ܥܰܙܺܝ̈ܙܶܐ ܡܶܫܬܰܒܰܚ ܐܰܢ̱ܬ: ܘܡ̣ܶܢ ܓܽܘ̈ܕܶܐ ܠܐ ܗܽܘܠܳܢܳܝ̈ܳܬܳܐ ܒܩܺܝ̈ܢܳܬܳܐ ܢܶܥܡܬܳܢܳܝ̈ܳܬܳܐ ܘܗܰܢܺܝ̈ܳܐܬ݀ ܪܽܘܡܪ̈ܳܡܶܐ ܕܚܺܝܠܐܴܝ̣ܬ ܡܶܬܪܰܡܪܰܡ ܐܰܢ̱ܬ: ܘܡ̣ܶܢ ܝܰܗ̈ܠܐ ܗܰܘܢܳܢܳܝ̈ܳܬܳܐ ܘܦܳܠܰܚܘ̈ܳܬܳܐ ܥܶܠܳܝ̈ܳܬܳܐ ܘܰܐܪ̈ܟܰܐܣ ܪ̈ܽܘܚܳܢܳܝܳܬܳܐ ܐܰܡܺܝܢܳܐܝ̣ܬ ܡܶܬܝܰܩܰܪ ܐܰܢ̱ܬ: ܗ̇ܰܘ ܕܰܒܛܳܒܽܘܬܳܐ ܕܺܝܠܳܟ ܠܐ ܡܶܫܬܰܓܢܝܳܢܺܝܬܳܐ ܘܠܐ ܡܶܬܕܰܠܩܒܳܢܺܝܬܳܐ ܒܰܪܢܳܫܳܐ ܨܒܰܝܬ ܕܬܶܗܘܶܐ ܡܶܛܽܠ ܒܰܪܢܳܫܳܐ ܗ̇ܰܘ ܕܡܶܢܳܟ ܕܡܽܘܬ ܨܰܠܡܳܟ ܐܶܬܝܰܩܰܢ: ܘܡ̣ܶܢ ܡܰܠܝܽܘܬܳܐ ܕܺܝܠܳܟ ܕܬܶܣܬܰܪܰܩ ܐܠܰܗܽܘܬܳܐ ܘܥܰܒܕܽܘܬܳܐ ܬܫܰܡܶܫ ܡܶܛܽܠ ܠܐ ܡܶܫܬܰܡܥܳܢܽܘܬܳܐ ܕܗ̇ܰܘ ܡܶܫܬܰܪܥܳܢܳܐ ܘܡܶܫܬܰܓܢܝܳܢܳܐ ܕܰܠܘܳܬ ܚܛܺܝܬܳܐ ܕܰܥܒܳܪ ܦܽܘܩܕܳܢܳܐ: ܘܟܰܕ ܠܗܳܕܶܐ ܚܽܘܒܳܢܳܐܝ̣ܬ ܘܨܶܒܝܳܢܳܐܝ̣ܬ ܠܰܥܒܳܕܳܐ ܓܡܺܝܪܳܐ ܘܠܐ ܡܶܬܬܰܘܝܳܢܳܐ ܐܶܬܰܝܬ: ܘܡ̣ܶܢ ܥܽܘܒ ܐܰܒܳܐ ܠܐ ܡܫܰܢܝܳܢܳܐܝ̣ܬ ܐܰܢ̱ܬ ܠܳܟ ܐܰܪܟܶܢܬ: ܘܰܠܘܳܬ ܥܽܘܒܳܐ ܒܬܽܘܠܐ ܕܠܐ ܡܨܰܥܨܰܥ ܒܰܚܛܳܗ̈ܶܐ ܕܒܰܪܬ ܕܰܘܺܝܕ ܐܰܝܟ ܫܽܘܘܕܳܥܳܐ ܢܒܺܝܳܝܳܐ ܢܚܶܬܬ: ܘܒܶܗ ܐܰܝܟ ܦܽܘܪ̈ܢܳܣܰܝܟ ܠܐ ܡܶܬܩܰܪ̈ܒܳܢܶܐ ܦܰܓܪܳܐ ܐܰܢ̱ܬ ܠܳܟ ܙܩܰܪܬ ܒܰܩܢܽܘܡ ܝܳܬܳܟ: ܐܶܬܚܰܝܰܕܬ ܬܡܺܝܗܳܐܝ̣ܬ ܠܥܶܠ ܡ̣ܶܢ ܡܰܚܫܰܒܬܳܐ ܘܺܝܕܰܥܬܳܐ ܡܰܠܳܠܬܳܐ: ܘܰܗܘܰܝܬ ܒܰܪܢܳܫܳܐ ܡܫܰܡܠܝܳܐܝ̣ܬ ܕܰܒܝܰܕ ܒܽܘܪܢܳܫܳܟ ܐܠܰܗܳܝܳܐ ܚܰܕܬܳܐܝ̣ܬ ܬܶܒܪܶܐ ܒܛܰܝܒܽܘܬܳܟ ܘܰܠܗܳܝ ܟܺܝܬ ܕܰܒܥܶܠܬܳܗ̇ ܐܰܘܒܶܕܘ ܓܰܐܝܽܘܬܳܐ ܥܕܶܢܳܝܬܳܐ ܒܰܫܦܺܝܥܽܘܬܳܐ ܕܛܳܒܽܘܬܳܟ ܦܰܐܝܽܘܬ ܪܶܚܡܰܬ ܐ̱ܢܳܫܳܐܝ̣ܬ ܠܗܽܘܢ ܬܫܰܟܶܢ: ܘܟܰܕ ܠܝܰܠܕܳܐ ܙܰܒܢܳܝܳܐ ܐܶܬܰܝܬ ܒܳܬܰܪ ܫܽܘܡܠܳܝ ܢܳܡܽܘܣܳܐ ܒܰܛܢܳܝܳܐ: ܠܰܟܝܳܢܳܐ ܙܟܰܝܬ ܘܠܳܗ̇ ܠܝܳܠܶܕܬܳܟ ܕܠܐ ܚܒܳܠܐ ܐܰܩܺܝܡܬ: ܘܰܠܥܶܠ ܡ̣ܶܢ ܬܶܡܗܳܐ ܘܬܶܕܡܽܘܪܬܳܐ ܠܳܗ̇ ܐܰܘܪܶܒܬ: ܘܰܠܒܳܨܽܘ̈ܝܶܐ ܘܕܳܪ̈ܽܘܫܶܐ ܘܰܡܥܰܩ̈ܒܳܢܶܐ ܒܰܬܒܳܪܳܐ ܐܰܪܡܺܝܬ: ܘܥܰܠܗܳܝ ܟܰܕ ܡܶܬܒܰܩܶܝܢܰܢ ܒܳܗ̇ ܒܝܳܠܶܕܬܳܟ ܕܰܠܟܽܠ ܬܶܡܗܳܐ ܘܕܽܘܡܳܪܳܐ ܥܳܒܪܳܐ ܠܳܗ̇ ܚܳܙܶܝܢܰܢ: ܘܡܶܢܳܗ̇ ܘܰܠܘܳܬܳܗ̇ ܐܰܝܟ ܕܙܳܕܶܩ ܘܰܦܐܶܐ ܐܳܡܪܺܝܢܰܢ: ܐܶܠܐ ܐܶܢ ܕܢܶܩܪܶܝܗ̇ ܐܶܡܳܐ ܕܰܐܠܳܗܳܐ ܘܒܶܝܬ ܡܰܫܪܝܳܐ ܕܰܡܪܰܝܡܳܐ: ܒܬܽܘܠܬܳܐ ܠܐ ܡܙܰܘܰܓܬܳܐ ܕܝܶܠܕܰܬ݀ ܒܰܒܣܰܪ ܠܥܰܡܰܢܽܘܐܶܝܠ ܐܰܝܟ ܫܽܘܘܕܳܥܳܐ ܢܒܺܝܳܝܳܐ: ܓܢܽܘܢܳܐ ܡܢܰܦܫܳܐ ܕܚܰܬܢܳܐ ܠܐ ܡܶܬܚܰܒܠܳܢܳܐ: ܕܽܘܟܬܳܐ ܘܰܐܬܪܳܐ ܕܗ̇ܰܘ ܠܐ ܡܶܣܬܰܝܟܳܢܳܐ: ܗܰܝܟܠܐ ܩܰܕܺܝܫܳܐ ܕܪܺܝܫ ܟܽܘܡܪ̈ܶܐ ܘܰܫܠܺܝܚܳܐ ܘܡܰܠܦܳܢܳܐ: ܘܰܥܕܳܐ ܕܝܰܠܕܳܐ ܣܓܺܝܕܳܐ ܘܠܐ ܡܶܬܩܰܪܒܳܢܳܐ: ܙܗܺܝܬܳܐ ܘܰܚܣܺܝܬܳܐ ܕܰܠܢܽܘܪܳܐ ܐܳܟܶܠܬܳܐ ܩܰܒܠܰܬ݀ ܒܓܰܘܳܗ̇ ܘܩܰܘܝܰܬ݀ ܕܠܐ ܢܶܟܝܳܢܳܐ: ܚܰܩܠܐ ܒܬܽܘܠܳܝܳܐ ܕܝܶܗܒܰܬ݀ ܫܶܒܠܐܴ ܡܣܰܒܥܳܢܳܐ: ܛܽܘܪܳܐ ܕܡܶܢܳܗ̇ ܐܶܬܓܙܰܪ ܫܽܘܥܳܐ ܫܰܪܺܝܪܳܐ ܘܠܐ ܡܶܬܦܰܣܠܳܢܳܐ: ܝܰܘܢܳܐ ܬܰܡܺܝܡܬܳܐ ܕܒܳܗ̇ ܐܶܬܚܰܘܺܝ ܢܶܫܪܳܐ ܫܡܰܝܳܢܳܐ: ܟܰܪܡܳܐ ܡܶܬܝܰܕܥܳܢܳܐ ܘܒܳܗ̇ ܐܶܬܪܰܒܺܝ ܣܓܽܘܠܐ ܝܳܗܶܒ ܚܰܡܪܳܐ ܡܚܰܕܝܳܢܳܐ: ܠܐ ܡܙܰܘܰܓܬܳܐ ܘܠܐ ܡܚܰܬܰܢܬܳܐ ܕܝܶܠܕܰܬ݀ ܠܥܶܠ ܡ̣ܶܢ ܡܶܠܬܳܐ ܠܡܶܠܬܳܐ ܗ̇ܰܘ ܠܐ ܡܶܬܡܰܠܠܳܢܳܐ: ܡܥܺܝܢܳܐ ܐܰܚܺܝܕܬܳܐ ܘܓܰܢܬܳܐ ܚܬܺܝܡܬܳܐ ܕܝܶܗܒܰܬ݀ ܠܰܒܪܺܝܬܳܐ ܦܺܐܪܳܐ ܚܰܝܳܐ ܘܡܰܚܝܳܢܳܐ: ܢܶܨܒܬܳܐ ܐܰܗܪܽܘܢܳܝܬܳܐ ܕܰܫܘܰܚ ܡܶܢܳܗ̇ ܗܰܒܳܒܳܐ ܡܰܦܨܚܳܢܳܐ: ܣܺܝܡܬܳܐ ܕܡܶܢܳܗ̇ ܩܢܰܝܢܰܢ ܒܽܘܪ̈ܟܳܬܳܐ ܘܥܽܘܬܪܳܐ ܠܐ ܡܰܘܦܝܳܢܳܐ: ܥܢܳܢܳܐ ܩܰܠܺܝܠܬܳܐ ܕܒܳܗ̇ ܐܶܙܕܰܝܰܚ ܡܰܠܟܳܐ ܫܡܰܝܳܢܳܐ ܦܺܝܪܡܳܐ ܡܠܺܝܠܐ ܘܡܶܬܗܰܘܢܳܢܳܐ ܕܰܐܦܺܝܚܰܬ݀ ܒܰܒܪܺܝܬܳܐ ܥܶܛܪܳܐ ܡܚܰܣܝܳܢܳܐ: ܨܰܠܡܳܐ ܫܒܺܝܚܳܐ ܕܟܽܠܗܽܘܢ ܣܰܡ̈ܡܳܢܶܐ ܕܰܢܒܺܝ̈ܶܐ ܒܳܗ̇ ܐܶܣܬܰܝܰܟܘ ܘܰܩܢܰܘ ܫܽܘܡܠܳܝܳܐ: ܩܶܣܛܳܐ ܕܰܗܒܳܢܳܝܬܳܐ ܕܒܳܗ̇ ܐܶܬܢܛܰܪ ܠܰܚܡܳܐ ܠܐ ܡܰܘܦܝܳܢܳܐ ܪܩܺܝܥܳܐ ܢܰܗܺܝܪܳܐ ܘܡܰܠܠܐ ܕܒܳܗ̇ ܐܶܬܬܰܨܡܰܚ ܫܶܡܫܳܐ ܕܙܰܕܺܝܩܽܘܬܳܐ ܘܰܪܕܰܦ ܘܛܰܠܶܩ ܡ̣ܶܢ ܥܳܡܰܪܬܳܐ ܚܶܫܽܘܟܳܐ ܘܥܰܡܛܳܢܳܐ: ܫܽܘܫܶܦܳܐ ܕܢܽܘܗܪܳܐ ܕܶܐܨܛܰܪܰܪܘ ܒܳܗ̇ ܡܰܝ̈ܳܐ ܠܐ ܡܶܬܰܐܫ̈ܕܳܢܶܐ: ܬܰܪܥܳܐ ܐܰܚܺܝܕܳܐ ܕܡܶܢܶܗ ܢܦܰܩ ܓܰܒܪܳܐ ܐܰܚܺܝܕ ܡܽܘܫ̈ܚܳܬܳܐ ܕܙܰܟܺܝ ܠܰܒܪܺܝܬܳܐ ܘܰܐܥܒܰܪ ܠܥܰܡ̈ܡܶܐ ܒܡܰܝ̈ܳܐ ܡܕܰܟ̈ܝܳܢܶܐ: ܘܡܶܟܺܝܠ ܐܰܝܟ ܡܶܠܬܶܟܝ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܛܽܘܒܳܐ ܝܳܗ̈ܒܳܢ ܠܶܟܝ ܟܰܕ ܐܳܡܪ̈ܳܢ: ܛܽܘܒܳܐ ܠܐܕܢܶܟܝ ܕܩܰܒܠܰܬ݀ ܠܡܶܠܬܳܐ ܦܳܪܶܩ ܥܳܠܡ̈ܶܐ: ܛܽܘܒܳܐ ܠܟܰܪܣܶܟܝ ܕܛܶܥܢܰܬ݀ ܠܰܛܥܺܝܢ ܒܶܪ̈ܝܳܬܳܐ: ܛܽܘܒܳܐ ܠܡܰܪܒܥܳܐ ܕܺܝܠܶܟܝ ܕܟܰܕ ܢܛܺܝܪ ܒܰܒܬܽܘ̈ܠܐ ܐܰܘܠܶܕ ܠܨܳܐܰܪ ܥܽܘ̈ܠܐ ܒܓܰܘ ܒܥܺܝ̈ܠܳܬܳܐ: ܛܽܘܒܳܐ ܠܰܕܪ̈ܳܥܰܝܟܝ ܕܙܰܝܰܚܘ ܠܥܳܡܰܪ ܒܰܡܪ̈ܰܘܡܶܐ: ܛܽܘܒܳܐ ܠܰܬܕܰܝ̈ܟܝ ܕܝܰܗܒܘ ܬܽܘܪܣܳܝܳܐ ܠܙܳܐܶܢ ܥܳܠܡ̈ܶܐ: ܛܽܘܒܳܐ ܠܟܶܢ̈ܦܰܝܟܝ ܕܥܰܦܶܩ̈ܝ ܠܐܚܺܝܕ ܟܽܘܠܐ: ܛܽܘܒܳܐ ܠܥܰܝ̈ܢܰܝܟܝ ܕܶܐܬܒܰܩ̈ܺܝ ܒܗܰܘ ܕܰܓܢܺܝܙ ܡ̣ܶܢ ܥܶܠܳܝ̈ܶܐ: ܛܽܘܒܳܐ ܠܦܽܘܡܶܟܝ ܕܢܰܨܰܪ ܠܪܳܥܡܳܐ ܕܩ̈ܳܠܐ: ܛܽܘܒܳܐ ܠܣܶܦ̈ܘܳܬܶܟܝ ܕܢܰܫܶܩ̈ܝ ܠܡܳܪܶܐ ܫܽܘܦܪ̈ܶܐ: ܛܽܘܒܳܐ ܠܠܶܫܳܢܶܟܝ ܕܡܰܠܶܠ ܠܝܳܗܶܒ ܦܶܬܓ̈ܳܡܶܐ: ܛܽܘܒܰܝܟܝ ܡ̣ܶܢ ܡܰܠܐܟ̈ܶܐ ܕܠܺܝܚܺܝܕܶܟܝ ܡܫܰܒܚܺܝܢ: ܛܽܘܒܰܝܟܝ ܡ̣ܶܢ ܥܺܝܪ̈ܶܐ ܕܠܰܒܪܶܟܝ ܡܗܰܠܠܺܝܢ: ܛܽܘܒܰܝܟܝ ܡ̣ܶܢ ܢܽܘܪ̈ܳܢܶܐ ܕܰܠܦܺܐܪܶܟܝ ܣܳܓܕܺܝܢ: ܛܽܘܒܰܝܟܝ ܡ̣ܶܢ ܡܰܪܟܰܒܬܳܐ ܕܰܟܪ̈ܽܘܒܶܐ ܕܠܐ ܦܳܚܡܳܐ ܠܪܰܒܽܘܬܶܟܝ: ܛܽܘܒܰܝܟܝ ܡ̣ܶܢ ܟܽܘܪܣܝܳܐ ܢܽܘܪܳܢܳܝܳܐ ܕܠܐ ܕܳܡܶܐ ܠܕܰܟܝܽܘܬܶܟܝ: ܛܽܘܒܰܝܟܝ ܡ̣ܶܢ ܫܡܰܝܳܐ ܕܰܙܥܽܘܪܝܳܐ ܡܶܢܶܟܝ ܘܡ̣ܶܢ ܐܰܪܥܳܐ ܕܶܐܬܒܰܪܟܰܬ݀ ܒܝܰܠܕܶܟܝ: ܘܒܰܕܓܽܘܢ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܡܳܪܶܐ ܡܳܪ̈ܰܘܳܬܳܐ ܕܡܶܢܳܗ̇ ܠܐ ܡܶܬܡܰܠܠܳܢܳܐܝ̣ܬ ܐܶܬܺܝܠܶܕܬ: ܐܰܝܟܰܢܳܐ ܕܒܰܨܠܰܘ̈ܳܬܳܗ̇ ܚܰܣ̈ܝܳܬܳܐ ܘܩܰܕܺܝ̈ܫܳܬܳܐ ܕܶܐܡܳܟ ܡܒܰܪܰܟܬܳܐ: ܕܰܬܒܰܪܶܟ ܠܟܽܠܰܢ ܒܒܽܘܪ̈ܟܳܬܳܟ ܘܬܰܐܓܶܢ ܥܠܰܝܢ ܛܰܝܒ̈ܘܳܬܳܟ ܘܰܬܫܰܡܠܐܷ ܠܘܳܬܰܢ ܡܰܘܗ̈ܒܳܬܳܟ: ܘܬܶܣܥܽܘܪ ܠܰܒܪܺܝܬܳܐ ܒܥܽܘܕܪ̈ܳܢܰܝܟ ܘܰܠܡܰܪܥܺܝܬܳܟ ܒܚܰܘ̈ܣܳܢܰܝܟ ܘܰܠܝܳܪܬܽܘܬܳܟ ܒܝܰܕ ܪ̈ܰܚܡܰܝܟ: ܘܠܰܟܠܺܝܠܐ ܕܫܰܢ̱ܬܳܐ ܒܰܪܶܟ: ܠܐܪܥܳܐ ܒܰܪ̈ܣܺܝܣܶܐ ܘܡܶܛܪ̈ܶܐ ܡܫܰܝ̈ܢܶܐ ܐܰܪܘܳܐ: ܠܙܰܪ̈ܥܶܐ ܪܰܒܳܐ: ܠܢܶܨ̈ܒܳܬܳܐ ܪܰܓܳܐ: ܠܥ̈ܰܠܠܳܬܳܐ ܫܰܪܬܰܚ: ܠܢܶܟ̈ܝܳܢܶܐ ܘܣܽܘܓ̈ܦܳܢܶܐ ܡܶܢܗܶܝܢ ܐܰܪܺܝܡ: ܗܰܒ ܠܟܰܦ̈ܢܶܐ ܣܰܒܥܳܐ: ܙܝܳܢܬܳܐ ܛܳܒܬܳܐ ܠܡܶܣ̈ܟܺܢܶܐ: ܠܕܰܡܦܰܪܟܠܺܝܢ ܒܣܺܝܪܶܣ ܕܥܰܘܠܐ ܦܰܣܶܩ ܦܟܳܪ̈ܰܝܗܽܘܢ: ܠܕܰܕܒܺܝܪܺܝܢ ܒܰܩܛܺܝܪܳܐ ܘܰܒܙܺܝܙܺܝܢ ܘܰܫܒܶܝܢ ܦܪܽܘܩ: ܠܰܕܡܶܬܬܰܥܒܕܺܝܢ ܘܡܶܬܕܰܢܩܺܝܢ ܡ̣ܶܢ ܠܙܺܝܙܽܘܬܳܐ ܕܫܺܐܕ̈ܶܐ ܘܕܰܒܢܰܝ̈ܢܳܫܳܐ ܒܺܝ̈ܫܶܐ ܫܰܘܙܶܒ ܘܚܰܪܰܪ: ܠܰܕܡܰܟܰܐܒܺܝܢ ܒܟܺܐܒ̈ܶܐ ܡܦܰܬܟ̈ܶܐ ܘܰܠܚܽܘܠܡܳܢܳܐ ܡܣܰܟܶܝܢ ܐܰܣܳܐ ܘܰܐܚܠܶܡ: ܠܰܕܩܳܝܡܺܝܢ ܒܕܳܪ̈ܳܬܳܟ ܟܳܗ̈ܢܳܝܳܬܳܐ ܘܰܡܗܰܠܟܺܝܢ ܒܽܐܘܪܚܳܐ ܕܢܳܡܽܘ̈ܣܰܝܟ ܣܡܽܘܟ ܘܚܰܝܶܠ ܠܕܰܡܫܰܡܫܺܝܢ ܒܒܰܝܬܳܟ ܘܰܡܟܰܗܢܺܝܢ ܠܐܪ̈ܳܙܰܝܟ ܗܰܒ ܕܰܟܝܽܘܬܳܐ: ܠܕܰܡܕܰܒܪܺܝܢ ܠܥܰܡܳܟ ܘܰܡܦܰܪܢܣܺܝܢ: ܠܙܰܕܺܝ̈ܩܰܝܟ ܚܰܟܶܡ ܘܙܰܗܳܐ: ܠܕܰܐܚܺܝܕܺܝܢ ܫܰܒܛܳܐ ܕܫܽܘܠܛܳܢܳܐ ܫܰܝܶܢ: ܫܠܳܡܳܐ ܘܫܰܝܢܳܐ ܠܥܺܕܬܳܟ ܘܰܠܝܰܠܕܶܝ̈ܗ̇ ܫܰܟܶܢ: ܘܗ̇ܳܝ ܕܥܳܕܪܳܐ ܘܦܳܩܚܳܐ ܠܟܽܠ ܕܰܠܘܳܬܳܟ ܚܳܐܰܪ ܘܒܳܟ ܡܣܰܒܰܪ ܫܰܪܰܪ: ܘܠܐܝܠܶܝܢ ܕܝܰܩܰܪܘ ܠܥܽܘܗܕܳܢܳܐ ܚܣܶܐ ܒܟܽܠ ܕܝܳܠܶܕܬܳܟ ܒܩܽܘܪ̈ܒܳܢܶܐ ܘܪ̈ܺܝܫܝܳܬܳܐ ܘܡܰܥܣܳܪ̈ܶܐ ܘܰܢܝܳܚ̈ܳܬܳܐ ܘܙܽܘܡܳܪ̈ܶܐ ܘܬܶܫܒ̈ܚܳܬܳܐ ܘܩܰܘ̈ܡܶܐ ܘܬܶܫܡ̈ܫܳܬܳܐ ܩܰܒܶܠ ܡܶܢܗܽܘܢ: ܘܦܽܘܪ̈ܥܳܢܶܐ ܒܰܐܥ̈ܦܶܐ ܦܪܽܘܥ: ܘܠܐܝܠܶܝܢ ܕܰܫܟܺܝܒܺܝܢ ܒܓܰܘ ܚܶܦܪܳܐ ܘܰܠܡܶܐܬܺܝܬܳܟ ܬܪܰܝܳܢܺܝܬܳܐ ܚܳܝܪܺܝܢ: ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܐܰܝܠܶܝܢ ܕܒܰܬܪܺܝܨܽܘܬ ܫܽܘܒܚܳܐ ܘܗܰܝܡܳܢܽܘܬܳܐ ܚܙܰܩܘ ܥܶܗܰܕ ܘܰܐܢܺܝܚ ܘܚܰܣܳܐ ܒܪܶܚܡܰܬ ܐ̱ܢܳܫܽܘܬܳܟ: ܘܰܒܝܰܘܡܳܐ ܕܰܩܝܳܡܬܳܐ ܡ̣ܶܢ ܕܺܝܢܳܐ ܥܰܙܺܝܙܳܐ ܦܰܨܳܐ ܘܫܰܘܙܶܒ ܘܥܰܡ ܓܒܰܝ̈ܳܐ ܕܺܝܠܳܟ ܒܓܰܒܳܐ ܕܝܰܡܺܝܢܳܐ ܠܰܢ ܘܰܠܗܽܘܢ ܛܰܟܶܣ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܐܺܝܬܝܳܐ ܠܐ ܡܶܬܕܰܪܟܳܢܳܐ ܠܗܰܘ ܒܪܳܐ ܝܺܚܺܝܕܳܝܳܐ ܘܕܰܠܥܶܠ ܡܶܢܟܽܠ: ܠܗܰܘ ܝܰܠܕܳܐ ܓܢܺܝܙܳܐ ܕܰܒܚܰܪܬܳܐ ܕܙܰܒ̈ܢܶܐ ܡ̣ܶܢ ܒܬܽܘܠܬܳܐ ܒܰܪܬ ܕܰܘܺܝܕ ܕܢܰܚ ܠܰܢ ܕܠܐ ܙܽܘܘܳܓܳܐ: ܘܰܠܕܽܘܟܪܳܢܳܗ̇ ܕܶܐܡܶܗ ܡܝܰܩܰܪ ܘܰܡܪܰܡܪܶܡ ܒܗܳܝ ܕܝܰܬܺܝܪ ܡ̣ܶܢ ܡܰܪܟܰܒܬܳܐ ܕܰܟܪ̈ܽܘܒܶܐ ܣܰܓܺܝ̈ܰܐܝ ܥܰܝ̈ܢܶܐ ܠܶܗ ܪܚܺܝܡ: ܗ̇ܰܘ ܕܰܠܕܽܘܟܪܳܢܳܗ̇ ܡܚܰܒܶܒ ܒܗܳܝ ܕܝܰܬܺܝܪ ܡ̣ܶܢ ܫܡܰܝܳܐ ܠܶܗ ܨܰܒܶܬ ܘܢܰܨܰܚ: ܘܡܶܛܽܠ ܫܽܘܦܪܳܐ ܕܪܶܥܝܳܢܳܗ̇ ܗ̣ܽܘ ܠܶܗ ܒܥܽܘܒܳܗ̇ ܫܽܘܒܚܶܗ ܣܰܬܰܪ: ܘܡܶܛܽܠ ܕܰܟܝܽܘܬܳܐ ܕܦܰܓܪܳܗ̇ ܒܰܕܪ̈ܳܥܶܝܗ̇ ܐܶܬܥܰܦܰܩ: ܘܡܶܛܽܠ ܫܰܦܺܝܪܽܘܬ ܚܽܘܫܳܒܶܝ̈ܗ̇ ܥܰܠ ܒܽܘܪ̈ܟܶܝܗ̇ ܐܶܙܕܰܝܰܚ: ܕܠܶܗ ܡܶܬܬܚܺܝܒܳܐ ܣܶܓܕܬܳܐ ܘܙܳܕܩܳܐ ܬܰܘܕܺܝܬܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

 

ܡܶܬܟܰܫܦܺܝܢܰܢ ܠܶܟܝ ܐܳܘ ܐܶܡܳܐ ܝܳܠܕܰܬ݀ ܐܠܰܗܳܐ ܗܕܺܝܪܰܬ݀ ܒܫܽܘܦܪ̈ܶܐ ܘܫܳܘܝܰܬ݀ ܠܛܽܘ̈ܒܶܐ ܘܡܰܠܝܰܬ݀ ܡ̣ܶܢ ܐ̱ܪ̈ܳܙܶܐ ܫܒܺܝ̈ܚܶܐ: ܥܶܠܬܳܐ ܕܬܶܗܪ̈ܶܐ ܪܰܘܪ̈ܒܶܐ: ܦܰܪܕܰܝܣܳܐ: ܕܫܰܦܺܝܪܽܘܬ ܪ̈ܰܚܡܶܐ: ܡܥܺܝܢܳܐ ܕܣܰܓܺܝܽܐܘܬ ܥܽܘܕܪ̈ܳܢܶܐ: ܦܺܝܪܡܳܐ ܕܒܰܣܺܝܡܽܘܬ ܪ̈ܺܝܚܳܢܶܐ: ܡܢܳܪܬܳܐ ܥܰܬܺܝܪܰܬ݀ ܢܰܗܺܝܪ̈ܶܐ: ܦܳܬܽܘܪܳܐ ܡܫܰܪܬܰܚ ܒܛܽܘ̈ܒܶܐ: ܗܰܝܟܠܐ ܗܕܺܝܪܳܐ ܘܟܳܗܢܳܝܳܐ: ܬܪܽܘܢܳܘܣ ܡܥܰܠܝܳܐ ܘܠܐ ܡܶܬܩܰܪܒܳܢܳܐ: ܟܽܘܪܣܝܳܐ ܪܳܡܳܐ ܕܰܛܥܺܝܢ ܠܐܠܳܗܳܐ: ܘܩܶܣܛܳܐ ܕܡܽܘܪܽܘܢ ܠܐ ܡܶܣܬܰܦܩܳܢܳܐ: ܐ̱ܪܳܙܳܐ ܕܡܶܫܚܳܐ ܕܰܡܫܺܝܚܽܘܬܳܐ: ܡܕܺܝܢ̱ܬܳܐ ܡܚܰܣܰܢܬܳܐ ܕܠܐ ܫܶܠܛܰܬ݀ ܒܳܗ̇ ܚܛܺܝܬܳܐ: ܛܽܘܪܳܐ ܩܰܕܺܝܫܳܐ ܘܟܳܗܢܳܝܳܐ ܕܰܓܒܳܐ ܐܠܰܗܳܐ ܠܡܶܬܰܒ ܒܶܗ: ܨܶܗܝܽܘܢ ܫܰܪܺܝܪܬܳܐ ܕܰܨܒܳܐ ܒܳܗ̇ ܡܳܪܝܳܐ ܘܰܥܡܰܪ ܒܳܗ̇: ܐܶܡܳܐ ܒܬܽܘܠܬܳܐ ܕܝܶܠܕܰܬ ܠܡܳܪܳܗ̇: ܐܶܡܳܐ ܩܰܕܺܝܫܬܳܐ ܕܪܰܒܝܰܬ݀ ܠܒܳܪܽܘܝܳܗ̇: ܟܰܠܬܳܐ ܠܐ ܡܙܰܘܰܓܬܳܐ ܕܰܐܝܢܩܰܬ݀ ܠܙܳܝܽܘܢܳܗ̇: ܥܠܰܝܡܬܳܐ ܠܐ ܡܚܰܬܰܢܬܳܐ ܕܰܗܘܳܬ݀ ܓܢܽܘܢܳܐ ܠܓܳܒܽܘܠܳܗ̇: ܐܺܝܢ ܩܰܕܺܝܫܬܳܐ ܘܡܰܠܝܰܬ݀ ܛܰܝܒܽܘܬܳܐ: ܩܰܒܶܠܝ ܠܕܳܫ̈ܢܶܐ ܗܳܠܶܝܢ ܙܥܽܘܪ̈ܶܐ ܕܡ̣ܶܢ ܒܨܺܝܪܽܘܬܰܢ ܠܶܟܝ ܡܶܬܩܰܪܒܺܝܢ ܘܶܐܬܟܰܫܰܦܝ ܥܰܡܰܢ ܘܰܚܠܳܦܰܝܢ ܠܡܶܠܬܳܐ ܐܠܰܗܳܐ ܕܶܐܬܓܰܫܰܡ ܡ̣ܶܢ ܥܽܘܒܶܟܝ ܕܰܟܝܳܐ ܕܰܐܘܪܒܶܟܝ: ܕܰܢܫܰܟܶܢ ܒܪܶܚܡܰܬ ܐ̱ܢܳܫܽܘܬܶܗ ܚܽܘܣܳܝܳܐ ܠܢܰܦ̈ܫܳܬܰܢ ܕܣܳܘ̈ܚܳܢ ܠܫܽܘܦܪ̈ܰܝܟܝ: ܗܶܕܪܳܐ ܘܪܽܘܡܪܳܡܳܐ ܠܰܒ̈ܢܳܬ ܩ̈ܳܠܐ ܕܡܰܚܒܳܢܰܝ̈ܟܝ: ܥܽܘܕܪܳܢܳܐ ܠܟܶܢܫܳܐ ܕܰܡܫܰܒ̈ܚܳܢܰܝܟܝ: ܢܽܘܛܳܪܳܐ ܠܣܶܕܪܳܐ ܕܰܡܩܰܠܣ̈ܳܢ ܠܥܰܕ̈ܥܺܐܕܰܝܟܝ: ܫܠܳܡܳܐ ܠܕܰܝܪ̈ܳܬܳܐ ܕܕܳܝ̈ܨܳܢ ܒܕܽܘܟܪܳܢܶܟܝ: ܬܽܘܒ ܕܶܝܢ ܐܳܘ ܐܶܡܳܐ ܕܟܺܝܬܳܐ ܐܶܬܟܰܫܰܦܝ ܠܺܝܚܺܝܕܶܟܝ ܕܰܢܫܰܝܶܢ ܠܥܳܠܡܳܐ ܒܰܚܢܳܢܶܗ: ܘܰܢܒܰܛܶܠ ܫܓܽܘ̈ܫܝܶܐ ܒܝܰܕ ܚܽܘܒܶܗ: ܘܢܰܥܒܰܪ ܠܢܶܣܝܽܘ̈ܢܶܐ ܒܝܰܕ ܛܰܝܒܽܘܬܶܗ: ܘܢܶܟܠܐܷ ܠܡܰܚܘ̈ܳܬܳܐ ܕܪܽܘܓܙܳܐ ܒܰܡܪܰܚܡܳܢܽܘܬܶܗ ܘܢܶܕܚܽܘܩ ܠܰܩܪ̈ܳܒܶܐ ܒܚܰܝܽܘܣܬܳܢܽܘܬܶܗ ܘܢܶܙܓܽܘܪ ܠܣܶܕ̈ܩܶܐ ܒܬܽܘܩܦܳܐ ܕܥܽܘܫܢܶܗ: ܘܰܢܢܰܛܰܪ ܠܚܰܝ̈ܶܐ ܒܰܨܠܺܝܒܶܗ: ܘܰܢܢܺܝܚ ܠܢܰܦ̈ܫܳܬܳܐ ܕܥܰܢܺܝ̈ܕܶܐ ܡܗܰܝ̈ܡܢܶܐ ܒܰܓܢܽܘܢܶܗ: ܐܰܝܟܰܢܳܐ ܕܰܒܫܰܝܢܳܐ ܘܒܰܫܠܳܡܳܐ ܕܡܶܢܶܗ ܢܳܣܒܺܝܢܰܢ ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܶܗ: ܘܠܐܒܽܘܗܝ ܘܰܠܪܽܘܚܶܗ ܚܰܝܳܐ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܫܶܒܠܐܴ ܫܡܰܝܳܢܳܐ ܕܺܝ̣ܥܳܐ ܒܚܰܩܠܐ ܐ̱ܢܳܫܳܝܬܳܐ ܠܥܶܠ ܡ̣ܶܢ ܕܽܘܡܳܪܳܐ: ܘܶܐܬܪܰܒܺܝ ܒܶܝܬ ܙܺܝ̈ܙܳܢܶܐ ܘܝܰܥܪܳܐ ܕܐ̱ܢܳܫܽܘܬܰܢ ܠܐ ܡܶܬܢܰܟܝܳܢܳܐܝ̣ܬ: ܘܶܐܬܚܨܶܕ ܒܨܶܒܝܳܢܶܗ ܥܰܠ ܓܳܓܽܘܠܬܳܐ ܘܰܐܚܺܝ ܠܟܽܠܳܗ̇ ܒܪܺܝܬܳܐ: ܐܰܢ̱ܬ ܡܳܪܝ ܐܳܦ ܗܳܫܳܐ ܒܛܰܝܒܽܘܬܳܟ ܘܒܰܨܠܽܘܬ ܝܳܠܶܕܬܳܟ ܒܰܪܶܟ ܠܙܰܪ̈ܥܶܐ ܘܰܠܚܰܩ̈ܠܳܬܳܐ ܕܥܰܒܕܰܝ̈ܟ: ܘܰܟܠܺܝ ܡܶܢܗܽܘܢ ܢܶܟܝ̈ܳܢܶܐ ܡܣܰܓ̈ܦܳܢܶܐ: ܐܰܝܟܰܢܳܐ ܕܡ̣ܶܢ ܥܰܠܠܳܢ̈ܶܐ ܘܰܐܟܳܪ̈ܶܐ ܘܡ̣ܶܢ ܒܳܝ̈ܫܶܐ ܘܡܶܣ̈ܟܺܢܶܐ: ܬܶܫܬܰܒܰܚ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܕܡܰܪܟܰܒܬܳܐ ܕܰܟܪ̈ܽܘܒܶܐ ܠܐ ܡܣܰܝܟܳܐ ܠܪܰܒܽܘܬܶܗ ܘܓܺܝ̈ܓܠܐ ܡ̈ܰܠܳܠܳܬܳܐ ܠܐ ܡܰܘ̈ܦܝܳܢ ܠܰܓܢܺܝܙܽܘܬܶܗ: ܘܰܨܒܳܐ ܒܚܽܘܒܶܗ ܕܢܶܬܚܡܶܠ ܐܰܝܟ ܥܽܘ̣ܠܐ ܒܟܰܪܣܳܐ ܕܒܶܣܪܳܐ ܕܰܒܬܽܘܠܬܳܐ ܡܰܪܝܰܡ ܒܰܒܛܺܝ̣ܢܽܘܬܶܗ ܘܰܕܢܶܬܛܥܶܢ ܥܰܠ ܕܪ̈ܳܥܶܐ ܐ̱ܢܳܫܳܝ̈ܳܐ ܕܶܐܡܳܐ ܒܬܽܘܠܬܳܐ ܒܺܝܠܺܝܕܽܘܬܶܗ. ܠܗܰܘ ܫܶܒܰܠ ܚܰܝ̈ܶܐ ܕܰܕܠܐ ܐܰܟܳܪܳܐ ܗ̣ܽܘ ܠܶܗ ܙܪܰܥ ܒܚܰܩܠܐ ܐ̱ܢܳܫܳܝܬܳܐ ܒܨܶܒܝܳܢܶܗ: ܘܰܫܘܰܚ ܡ̣ܶܢ ܐܰܪܥܳܐ ܨܗܺܝܬܳܐ ܒܬܶܕܡܽܘܪܬܳܐ ܒܦܽܘܩܕܳܢܶܗ: ܘܪܰܒܺܝ ܠܰܩܢܽܘܡ ܝܳܬܶܗ ܕܠܐ ܢܶܟܝܳܢ ܐܰܝܟ ܚܰܝܠܶܗ: ܘܝܰܗܒ ܢܰܦܫܶܗ ܠܰܚܨܳܕܳܐ ܒܓܳܓܽܘܠܬܳܐ ܕܰܫܦܰܪ ܠܶܗ. ܘܶܐܣܬܒܶܠ ܠܐܷܕܪܳܐ ܕܩܰܒܪܳܐ ܒܛܰܝܒܽܘܬܶܗ: ܘܝܰܗܒ ܦܰܓܪܶܗ ܐܽܘܟܠܐ ܠܥܰܡ̈ܡܶܐ ܡܗܰܝ̈ܡܢܶܐ ܒܰܚܢܳܢܶܗ: ܘܰܠܟܽܠ ܣܳܦܶܩ ܕܰܢܒܰܣܶܡ ܘܰܢܰܣܒܰܥ ܡ̣ܶܢ ܒܰܣܺܝܡܽܘܬܶܗ: ܘܡܰܠܝܽܘܬܶܗ ܟܰܕ ܗ̣ܽܘ ܠܐ ܡܰܘܦܶܐ: ܕܠܶܗ ܠܗܰܘ ܕܠܐ ܡܶܬܕܪܶܟ ܘܠܐ ܡܶܬܥܰܩܰܒ ܥܽܘܩܳܒܳܐ ܪܘܺܝ̣ܚܳܐ ܕܰܡܕܰܒܪܳܢܽܘܬܶܗ: ܢܫܰܒܰܚ ܘܰܢܪܰܡܪܶܡ ܘܢܶܣܓܽܘܕ: ܒܗܳܢܳܐ ܥܶܕܳܢܳܐ܀

 

ܣܕܪܐ

 

ܡܫܺܝܚܳܐ ܚܰܝܠܐ ܘܚܶܟܡܬܳܐ ܘܡܰܕܥܳܐ ܕܰܐܠܳܗܳܐ ܘܰܐܒܳܐ: ܗ̇ܰܘ ܠܐ ܡܶܬܡܰܠܠܳܢܳܐ ܘܠܐ ܡܶܬܦܰܫܩܳܢܳܐ: ܓܢܺܝܙܳܐ ܘܠܐ ܡܶܬܩܰܪܒܳܢܳܐ ܓܰܐܝܳܐ ܘܰܫܒܺܝܚܳܐ ܘܠܐ ܡܶܬܚܰܙܝܳܢܳܐ: ܪܳܡܳܐ ܘܰܡܥܰܠܝܳܐ ܘܠܐ ܡܶܣܬܰܝܟܳܢܳܐ: ܗ̇ܰܘ ܕܠܐ ܡܬܽܘܡ ܚܳܣܰܪ ܕܰܨܒܳܐ ܘܶܐܬܡܰܣܟܰܢ ܕܰܠܡܶܣ̈ܟܺܢܶܐ ܢܰܥܬܰܪ: ܠܰܚܡܳܐ ܫܡܰܝܳܢܳܐ ܕܰܢܚܶܬ ܡ̣ܶܢ ܪܰܘܡܳܐ ܕܰܠܟܰܦܢܽܘܬܳܐ ܕܥܰܡ̈ܡܶܐ ܢܣܰܒܰܥ: ܐܰܟܳܪܳܐ ܒܪܺܝܟܳܐ ܕܶܐܬܳܐ ܠܐܪܥܳܐ ܟܽܘܒܳܢܳܝܬܳܐ ܕܰܠܝܰܥܪܳܐ ܘܙܺܝ̈ܙܳܢܶܐ ܢܶܥܽܘܕ ܘܢܰܘܩܶܕ: ܫܶܒܠܐܴ ܫܡܰܝܳܢܺܝܬܳܐ ܕܗ̣ܺܝ ܠܳܗ̇ ܙܶܪܥܰܬ݀ ܒܰܐܪܥܳܐ ܡܠܺܝܠܬܳܐ ܘܗ̣ܺܝ ܠܳܗ̇ ܪܰܒܝܰܬ݀ ܕܠܐ ܫܶܩܝܳܐ ܘܰܕܠܐ ܦܰܠܳܚܳܐ: ܚܶܛܬܳܐ ܪܽܘܚܳܢܺܝܬܳܐ ܕܗ̣ܺܝ ܠܳܗ̇ ܐܰܫܘܚܰܬ݀ ܡ̣ܶܢ ܚܰܩܠܐ ܒܬܽܘܠܳܝܬܳܐ ܘܗ̣ܺܝ ܠܳܗ̇ ܫܰܟܢܰܬ݀ ܡܶܐܟܽܘܠܬܳܐ ܠܡܳܝܽܘ̈ܬܶܐ ܕܢܺܐܚܽܘܢ ܒܳܗ̇: ܥܶܣܒܳܐ ܕܒܽܘܪ̈ܟܳܬܳܐ ܕܗ̣ܽܘ ܠܶܗ ܐܰܘܥܺܝ ܒܰܡܕܺܝܢ̱ܬܳܐ ܛܒܺܝܒܬܳܐ ܘܝܰܗܒ ܗ̣ܽܘ ܠܶܗ ܒܽܘܣܳܡܳܐ ܠܟܰܦ̈ܢܶܐ ܕܢܶܬܬܰܪܣܽܘܢ ܒܶܗ: ܥܶܩܳܪܳܐ ܕܚܰܝ̈ܶܐ ܕܰܐܫܘܰܚ ܗ̣ܽܘ ܠܶܗ ܒܽܘܣܳܡܳܐ ܠܟܰܦ̈ܢܶܐ ܕܢܶܬܬܰܪܣܽܘܢ ܒܶܗ: ܥܶܩܳܪܳܐ ܕܚܰܝ̈ܶܐ ܕܰܐܫܘܰܚ ܗ̣ܽܘ ܠܶܗ ܡ̣ܶܢ ܓܽܘܙܥܶܗ ܕܺܐܝܫܰܝ ܕܢܶܗܘܶܐ ܠܥܰܡ̈ܡܶܐ ܗ̇ܳܢܽܘܢ ܕܰܡܗܰܝܡܢܺܝܢ ܚܰܝ̈ܶܐ ܘܚܽܘܠܡܳܢܳܐ: ܦܺܐܪܳܐ ܗܰܢܺܝܳܐܐ ܕܰܢܒܰܓ ܡ̣ܶܢ ܐܺܝܠܳܢܳܐ ܡܶܬܝܰܕܥܳܢܳܐ ܕܠܰܛܥܳܡܬܶܗ ܕܗ̇ܰܘ ܦܺܐܪܳܐ ܩܳܛܽܘܠܐ ܢܛܰܠܶܩ ܡ̣ܶܢ ܚܶܟ̈ܶܐ ܕܡܳܝܽܘ̈ܬܶܐ: ܟܰܦܳܐ ܕܒܽܘܪ̈ܟܳܬܳܐ ܕܝܺܥܳܬ݀ ܡ̣ܶܢ ܐܰܪܥܳܐ ܨܗܺܝܬܳܐ ܕܠܐ ܙܰܪܥܳܐ ܘܗ̣ܺܝ ܠܐ ܡܰܘܦܝܳܐ: ܓܕܺܝܫܳܐ ܠܐ ܡܶܣܬܰܝܟܳܢܳܐ ܕܟܽܠܗܶܝܢ ܐܶܕܪ̈ܶܐ ܕܥܳܡܰܪܬܳܐ ܐܶܬܡܰܠܺܝܺܝܢ ܡܶܢܶܗ ܘܗ̣ܽܘ ܐܰܝܟ ܕܺܐܝܬܰܘܗܝ ܡܩܰܘܶܐ: ܟܰܪܝܳܐ ܪܰܒܳܐ ܘܥܰܫܺܝܢܳܐ ܕܟܽܠܗܽܘܢ ܐܰܘܨܪ̈ܶܐ ܕܰܒܪܺܝܬܳܐ ܐܶܬܡܠܺܝܘ ܡܶܢܶܗ ܘܗ̣ܽܘ ܠܐ ܡܶܬܒܰܨܰܪ: ܟܰܝܠܐ ܫܦܺܝܥܳܐ ܕܰܐܫܦܰܥ ܬܽܘܪܣܳܝܳܐ ܠܥܳܠܡ̈ܶܐ ܘܒܶܪ̈ܝܳܬܳܐ ܘܡ̣ܶܢ ܫܶܦܥܶܗ ܠܐ ܚܳܣܰܪ: ܐܰܘܨܪܳܐ ܪܘܺܝ̣ܚܳܐ ܕܰܡܠܐܷ ܟܽܠ ܛܳܒ̈ܳܢ ܕܟܽܠܗܽܘܢ ܥܳܠܡ̈ܶܐ ܢܳܣܒܺܝܢ ܡܶܢܶܗ ܘܗ̣ܽܘ ܠܐ ܡܶܫܬܰܚܠܰܦ: ܚܢܰܢ ܡܳܪܝ ܕܶܝܢ ܟܰܕ ܬܳܗܪܺܝܢܰܢ ܒܥܽܘܬܪܳܐ ܕܡܰܘܗ̈ܒܳܬܳܟ ܫܦܺܝ̈ܥܳܬܳܐ: ܬܰܘܕܺܝܬܳܐ ܕܟܺܝܬܳܐ ܘܬܶܫܒܽܘܚܬܳܐ ܡܶܬܬܚܺܝܒܳܢܺܝܬܳܐ ܒܝܰܘܡܳܐ ܗܳܢܳܐ ܕܕܽܘܟܪܳܢܳܗ̇ ܕܶܐܡܳܟ ܡܩܰܠܣܰܬ݀ ܒܟܽܠ: ܒܬܽܘܠܬܳܐ ܩܰܕܺܝܫܬܳܐ ܘܶܐܡܳܐ ܠܐ ܡܢܰܣܝܰܬ݀ ܒܙܽܘܘܳܓܳܐ ܡܰܪܝܰܡ ܡܕܰܫܢܺܝܢܰܢ ܟܰܕ ܐܳܡܪܺܝܢܰܢ: ܒܪܺܝܟ ܐܰܢ̱ܬ ܫܶܒܠܐܴ ܫܡܰܝܳܢܳܐ ܕܒܳܟ ܐܶܬܥܰܛܝܰܬ݀ ܠܰܘܛܬܳܐ ܩܰܕܡܳܝܬܳܐ ܡܶܢ ܐܰܪܥܳܐ: ܒܪܺܝܟ ܐܰܢ̱ܬ ܫܶܒܠܐܴ ܫܡܰܝܳܢܳܐ ܕܒܳܟ ܐܶܬܬܰܠܰܚ ܐܫܛܳܪܳܐ ܕܰܟܬܰܒ ܒܺܝܫܳܐ ܥܰܠ ܓܶܢܣܰܢ: ܒܪܺܝܟ ܐܰܢ̱ܬ ܫܶܒܠܐܴ ܫܡܰܝܳܢܺܝܬܳܐ ܕܒܳܟ ܐܶܬܬܰܠܚܰܬ݀ ܕܽܘܪܰܟܬܶܗ ܕܚܶܘܝܳܐ ܥܰܬܺܝܩܳܐ ܡܶܢ ܢܰܦܫܰܢ: ܒܪܺܝܟ ܐܰܢ̱ܬ ܫܶܒܰܠ ܚܰܝ̈ܶܐ ܕܒܳܟ ܐܶܬܒܰܛܰܠ ܡܰܘܬܳܐ ܡܡܺܝ̣ܬܳܢܰܢ: ܒܪܺܝܟ ܐܰܢ̱ܬ ܫܶܒܰܠ ܚܰܝ̈ܶܐ ܕܒܳܟ ܐܶܬܓܰܙܝܰܬ݀ ܫܝܽܘܠ ܘܰܚܛܺܝܬܳܐ: ܘܥܶܬܪܰܬ݀ ܒܳܟ ܓܰܢܬܳܐ ܥܕܶܢܳܝܬܳܐ: ܒܪܺܝܟ ܐܰܢ̱ܬ ܫܶܒܰܠ ܚܰܝ̈ܶܐ ܕܰܒܝܰܕ ܛܥܳܡܬܳܟ ܚܠܺܝܬܳܐ ܐܶܬܥܰܛܝܰܬ݀ ܛܥܳܡܬܶܗ ܕܗ̇ܰܘ ܦܺܐܪܳܐ ܡܰܪܺܝܪܳܐ: ܒܪܺܝܟ ܐܰܢ̱ܬ ܫܶܒܰܠ ܚܰܕ̈ܘܳܬܳܐ ܕܒܳܟ ܣܰܒܰܥ̈ܝ ܢܰܦ̈ܫܳܬܳܐ ܟܰܦ̈ܢܳܬܳܐ ܠܰܚܡܳܐ ܕܒܽܘܪ̈ܟܳܬܳܐ: ܒܪܺܝܟ ܐܰܢ̱ܬ ܫܶܒܰܠ ܛܳܒ̈ܳܬܳܐ ܕܒܳܟ ܗܘܰܝ̈ ܠܓܶܢܣܰܢ ܟܽܠܗܶܝܢ ܡܝܰܬܪ̈ܳܬܳܐ: ܒܪܺܝܟ ܐܰܢ̱ܬ ܫܶܒܰܠ ܛܳܒ̈ܬܳܐ ܕܒܳܟ ܐܶܬܰܝ̈ ܠܰܢ ܟܽܠ ܣܰܒܪ̈ܳܬܳܐ ܗܰܢܺܝ̈ܳܐܬܳܐ: ܒܪܺܝܟ ܐܰܢ̱ܬ ܫܶܒܰܠ ܛܳܒ̈ܳܬܳܐ ܕܒܳܟ ܐܶܬܬܰܪܨܰܬ݀ ܡܰܦܽܘܠܬܰܢ ܕܒܰܥܒܳܪ ܦܽܘܩܕܳܢܳܐ: ܒܪܺܝܟ ܐܰܢ̱ܬ ܫܶܒܰܠ ܒܽܘ̈ܣܳܡܶܐ ܕܒܳܟ ܒܣܶܡ ܛܰܥܡܰܢ ܘܶܐܬܡܰܕܟܰܬ݀ ܦܰܟܺܝܗܽܘܬܰܢ: ܒܪܺܝܟ ܐܰܢ̱ܬ ܫܶܒܰܠ ܕܽܘܡܳܪܳܐ ܕܰܐܢ̱ܬ ܠܳܟ ܙܪܰܥܬ: ܘܰܐܢ̱ܬ ܠܳܟ ܐܰܫܘܰܚܬ: ܘܰܐܢ̱ܬ ܠܳܟ ܪܰܒܺܝܬ: ܘܰܐܢ̱ܬ ܠܳܟ ܚܨܰܕܬ: ܘܰܐܢ̱ܬ ܠܳܟ ܐܰܝܬܺܝܬ ܠܐܕܪܳܐ: ܘܰܐܢ̱ܬ ܠܳܟ ܐܰܣܶܐܢܬ ܒܰܐܘܨܪ̈ܶܐ ܡܶܬܝܰܕ̈ܥܳܢܶܐ ܕܠܶܒܰܘ̈ܳܬܰܢ: ܒܪܺܝܟ ܐܰܢ̱ܬ ܫܶܒܰܠ ܬܶܗܪܳܐ ܕܰܐܢ̱ܬ ܠܳܟ ܗܘܰܝܬ ܠܰܢ ܐܽܘܟܠܐ ܘܫܶܩܝܳܐ ܘܬܽܘܪܣܳܝܳܐ ܘܚܰܝ̈ܶܐ ܘܰܩܝܳܡܬܳܐ ܘܦܽܘܪܩܳܢܳܐ: ܒܪܺܝܟ ܐܰܢ̱ܬ ܫܶܒܰܠ ܣܰܒܪܳܐ ܕܰܥܠܰܝܟ ܐܺܝܬܰܘܗܝ ܬܽܘܟܠܳܢܰܢ ܘܰܐܢ̱ܬ ܗ̣ܘ ܒܶܝܬ ܓܰܘܣܰܢ ܘܒܽܘܣܳܡܰܢ: ܒܪܺܝܟ ܐܰܢ̱ܬ ܫܶܒܰܠ ܦܽܘܪܩܳܢܳܐ ܕܝܰܗܒܬ ܠܰܢ ܦܰܓܪܳܟ ܘܰܕܡܳܟ ܪܰܗܒܽܘܢܳܐ ܕܚܰܝ̈ܶܐ ܕܰܠܥܳܠܰܡ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܶܠܬܳܐ ܐܠܰܗܳܐ ܒܝܰܘܡܳܐ ܗܳܢܳܐ ܕܥܽܘܗܕܳܢܳܐ ܕܶܐܡܳܐ ܕܺܝܠܳܟ ܟܢܺܝܟܬܳܐ ܘܡܰܠܝܰܬ݀ ܛܰܝܒܽܘܬܳܐ: ܐܰܝܟܰܢܳܐ ܕܒܰܨܠܰܘ̈ܳܬܳܗ̇ ܫܡܺܝ̈ܥܳܬܳܐ ܬܰܫܦܰܥ ܥܠܰܝܢ ܘܥܰܠ ܟܽܠܳܗ̇ ܥܳܡܰܪܬܳܐ ܪ̈ܰܚܡܶܐ ܥܰܬܺܝܪ̈ܶܐ ܕܰܚܢܳܢܳܟ: ܒܰܪܶܟ ܡܳܪܝ ܟܠܺܝܠܐ ܕܫܰܢ̱ܬܳܐ ܒܒܳܥܘ̈ܳܬܳܗ̇ ܘܢܰܛܰܪ ܦܺܐܪ̈ܶܐ ܘܳܐܕ̈ܫܶܐ ܘܥ̈ܰܠܠܳܬܳܐ ܕܰܐܪܥܳܐ ܒܛܰܝܒܽܘܬܳܟ: ܣܰܒܰܥ ܡܳܪܝ ܠܟܰܦ̈ܢܶܐ ܘܠܰܨܪ̈ܺܝܟܶܐ ܒܬܰܟܫ̈ܦܳܬܳܗ̇: ܘܬܰܪܣܳܐ ܠܝܰܬܡ̈ܶܐ ܘܰܠܡܶܣ̈ܟܺܢܶܐ ܒܒܰܣܺܝܡܽܘܬܳܟ: ܐܰܣܳܐ ܡܳܪܝ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܒܺܐܝܙܓܰܕܽܘܬܳܟ: ܘܰܐܦܢܳܐ ܠܛܳܥܰܝ̈ܳܐ ܘܠܐܒܺܝ̈ܕܶܐ ܒܰܡܪܰܚܡܳܢܽܘܬܳܟ: ܚܰܣܳܐ ܡܳܪܝ ܠܚܰܛܳܝ̈ܶܐ ܘܰܠܬܰܝ̈ܳܒܶܐ ܒܰܣܢܺܐܓܪܽܘܬܳܟ: ܘܰܦܪܽܘܩ ܠܐܣܺܝܪ̈ܶܐ ܘܠܰܫܒܰܝ̈ܳܐ ܒܪܶܚܡܰܬ݀ ܐ̱ܢܳܫܽܘܬܳܟ: ܥܰܕܰܪ ܡܳܪܝ ܠܟܽܠ ܢܰܦܫܳܐ ܕܩܳܪܝܳܐ ܠܳܟ ܒܰܨܠܰܘ̈ܳܬܳܗ̇: ܘܰܟܠܺܝ ܡܶܢ ܐܰܪܥܳܐ ܘܡܶܢ ܥ̈ܰܠܠܳܬܳܗ̇ ܘܥܳܡܽܘܪ̈ܶܝܗ̇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܒܚܰܝܘܣܬܳܢܽܘܬܳܟ ܘܰܠܟܽܠ ܕܰܡܝܰܩܰܪ ܒܚܽܘܒܳܐ ܘܰܒܗܰܝܡܳܢܽܘܬܳܐ ܠܝܽܘܡ ܥܰܕܥܺܐܕܳܗ̇ ܕܝܳܠܶܕܬܳܟ ܬܶܬܒܰܪܰܟ ܢܰܦܫܶܗ ܘܒܰܝܬܶܗ ܘܩܶܢܝܳܢܰܘ̈ܗܝ ܘܥ̈ܰܠܠܳܬܶܗ: ܘܢܶܫܬܘܶܐ ܠܚܰܪܬܳܐ ܛܳܒܬܳܐ ܗ̇ܳܝ ܕܺܐܝܬܶܝܗ̇ ܠܓܰܒܪ̈ܶܐ ܕܰܫܠܳܡܳܐ: ܘܒܰܛܶܠ ܡܶܢ ܥܽܘܡܪ̈ܶܐ ܘܕܰܝܪ̈ܳܬܳܐ ܘܥܺܕ̈ܳܬܳܐ ܟܽܠܗܶܝܢ ܕܳܐܪܬܳܕܳܘܟܣܽܘ ܩܪ̈ܳܒܶܐ ܘܬܰܟܬܽܘ̈ܫܶܐ ܕܰܒܥܶܠܕ̈ܒܳܒܶܐ: ܘܶܐܬܕܰܟܪ ܥܰܡܳܗ̇ ܕܝܳܠܶܕܬܳܟ ܡܳܪܝܳܐ ܐܳܦ ܠܩܰܕܺܝ̈ܫܰܝܟ ܢܒܺܝ̈ܶܐ ܘܫܰܠܺܝ̈ܛܳܢܶܐ ܘܣܳܗ̈ܕܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܘܳܐܦ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܘܰܐܫܘܳܐ ܠܰܢ ܕܥܰܡܗܽܘܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

ܥܛܪܐ

 

ܩܰܕܺܝܫܳܐ ܘܰܡܩܰܕܫܳܢܳܐ ܕܩܰܕܺܝ̈ܫܶܐ ܕܩܰܕܶܫ ܠܟܰܪܣܳܐ ܕܰܛܥܶܢܬܶܗ ܘܰܐܘܪܒܳܗ̇ ܠܰܒܬܽܘܠܬܳܐ ܕܰܒܛܶܢܬܶܗ: ܘܢܰܨܰܚ ܠܰܕܟܺܝܬܳܐ ܕܙܰܝܰܚܬܶܗ: ܩܰܕܶܫ ܡܳܪܝ ܠܶܒܰܘ̈ܳܬܰܢ ܠܩܽܘܕܫܳܟ: ܘܪܰܡܪܶܡ ܠܒܰܪܬ ܩܳܠܰܢ ܠܫܽܘܒܚܳܟ: ܘܙܰܗܳܐ ܠܠܶܫܳܢܰܝ̈ܢ ܠܗܶܕܪܳܟ: ܘܩܰܒܶܠ ܦܺܝܪܡܰܢ ܒܰܚܢܳܢܳܟ: ܘܦܰܢܳܐ ܫ̈ܶܐܠܳܬܰܢ ܒܪܶܡܙܳܟ ܒܝܰܕ ܬܰܟܫ̈ܦܳܬܳܗ̇ ܕܝܳܠܶܕܬܳܟ: ܘܰܕܟܽܠܗܽܘܢ ܥܳܒ̈ܕܰܝ ܨܶܒܝܳܢܳܟ ܡܳܪܰܢ ܘܰܐܠܳܗܰܢ܀

 

ܛܟܣܐ ܕܣܘܠܩܗ ܕܡܪܢ ܠܫܡܝܐ ܕܡܢ ܒܬܪ ܐܪܒܥܝܢ ܝܘܡܝ̈ܢ ܕܩܝܡܬܗ

 

ܩܕܡܝܬ ܨܠܘܬܐ ܕܫܘܪܝܐ

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܗܽܘ̈ܠܳܠܐ ܐܠܰܗܳܝ̈ܶܐ: ܘܰܒܢܶܥ̈ܡܳܬܳܐ ܕܰܟܝ̈ܳܬܳܐ ܘܰܒܩܺܝ̈ܢܳܬܳܐ ܫܒܺܝ̈ܚܳܬܳܐ: ܢܚܰܓܶܐ ܠܥܰܕܥܺܐܕܳܐ ܗܳܢܳܐ ܫܒܺܝܚܳܐ ܕܣܽܘܠܳܩܳܟ ܡܠܐܷ ܬܶܗܪܳܐ: ܘܗܰܒܠܰܢ ܕܥܰܡ ܥܺܝܪ̈ܰܝ ܪܰܘܡܳܐ ܢܶܬܚܰܠܰܛ ܒܝܰܘܡܳܐ ܕܓܶܠܝܳܢܳܟ ܡܠܐܷ ܬܶܗܪܳܐ: ܘܥܰܡܗܽܘܢ ܠܐ ܡܶܫܬܰܠܡܳܢܳܐܝ̣ܬ ܢܥܰܕܥܶܕ ܠܰܫܡܳܟ ܡܫܰܒܚܳܐ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܗܳܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ: ܗ̇ܰܘ ܕܡܶܛܽܠ ܦܽܘܪܩܳܢܰܢ ܡ̣ܶܢ ܫܡܰܝܳܐ ܢܚܶܬ: ܘܟܽܠܳܗ̇ ܡܕܰܒܪܳܢܽܘܬܳܐ ܦܳܪܽܘܩܳܝܬܳܐ ܫܰܡܠܺܝ: ܘܝܰܘܡܳܢܳܐ ܒܬܶܗܪܳܐ ܘܰܠܥܶܠ ܡ̣ܶܢ ܡܶܠܬܳܐ ܗܦܰܟ ܣܠܶܩ ܠܘܳܬ ܐܰܒܳܐ ܕܺܝܠܶܗ ܡܫܰܒܚܳܐ ܘܡ̈ܶܠܐ ܕܰܢܒܺܝ̈ܶܐ ܩܰܕܺܝ̈ܫܶܐ ܫܰܡܠܺܝ: ܠܗܰܘ ܕܳܐܦ ܚܢܰܢ ܥܰܡ ܐܠܰܗܳܝܳܐ ܕܰܘܺܝܕ ܡܰܙܥܩܺܝܢܰܢ ܘܳܐܡܪܺܝܢܰܢ: ܐܰܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ ܕܢܶܥܽܘܠ ܡܰܠܟܳܐ ܕܬܶܫܒܽܘܚܬܳܐ ܘܕܺܐܝܩܳܪ̈ܶܐ: ܛܳܒܳܐ ܕܠܶܗ ܢܶܬܕܟܰܪ: ܘܠܶܗ ܢܫܰܒܰܚ ܘܠܶܗ ܢܶܣܓܽܘܕ: ܒܗܳܢܳܐ ܥܶܕܳܢܳܐ܀

 

ܣܕܪܐ

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܡܥܰܠܰܝ ܡ̣ܶܢ ܟܽܠ ܒܺܐܝܩܳܪܳܐ ܘܫܽܘܒܚܳܐ ܘܪܰܒܽܘܬܳܐ ܘܶܐܬܬܰܚܬܺܝ ܒܨܶܒܝܳܢܶܗ ܠܣܽܘܪܳܩܳܐ ܘܚܰܫ̈ܶܐ ܡܰܠܝ̈ܰܝ ܫܺܝܛܽܘܬܳܐ: ܘܟܰܕ ܢܣ̣ܰܒ ܠܶܗ ܦܰܓܪܶܐ ܡ̣ܶܢ ܟܝܳܢܳܐ ܡܚܺܝܠܐ ܕܐ̱ܢܳܫܽܘܬܳܐ: ܘܒܶܗ ܚܰܕܶܬ ܠܰܓܒܺܝܠܬܳܐ ܕܺܝܠܰܢ ܗ̇ܳܝ ܕܰܒܠܳܬ݀ ܒܰܚܒܳܠܐ ܘܰܐܥܬܩܰܬ݀ ܒܚܰܫ̈ܶܐ ܕܰܚܛܺܝܬܳܐ: ܘܒܳܬܰܪ ܕܫܰܡܠܺܝ ܐܽܘܪܚܶܗ ܗ̇ܳܝ ܕܰܠܥܽܘܕܪܳܢܳܐ ܕܺܝܠܰܢ ܣܺܝ̣ܡܳܐ ܗܘܳܬ݀: ܘܰܓܡܰܪ ܠܰܡܕܰܒܪܳܢܽܘܬܶܗ ܐ̱ܢܳܫܳܝܬܳܐ ܗ̇ܳܝ ܕܰܠܦܽܘܪܩܳܢܳܐ ܕܺܝܠܰܢ ܠܚܽܘܕ ܥܰܒܕܳܗ̇: ܗܦܰܟ ܡܶܟܺܝܠ ܠܐܝܟܳܐ ܕܺܐܝܬܰܘܗܝ ܗܘܳܐ ܡ̣ܶܢ ܩܕܺܝܡ: ܘܠܐܬܪܳܐ ܗ̇ܰܘ ܕܟܰܕ ܫܰܒܩܶܗ ܒܶܗ ܡܕܰܝܰܪ ܗܘܳܐ: ܘܥܰܠ ܠܰܩܕܽܘܫܩܽܘ̈ܕܫܺܝܢ ܗ̇ܰܘ ܓܰܘܳܝܳܐ ܘܰܠܡܰܫܟܢܳܐ ܗ̇ܰܘ ܠܐ ܥܒܺܝܕ ܒܺܐܝ̈ܕܰܝܳܐ: ܕܡܶܬܝܰܕܥܳܢܳܐܝ̣ܬ ܡܶܣܬܰܟܰܠ ܠܗܰܘ̈ܢܶܐ ܕܰܒܪ̈ܰܝܳܐ: ܘܟܰܕ ܣܠܶܩ: ܠܬܰܪ̈ܥܶܐ ܕܰܫܡܰܝܳܐ ܦܬܰܚ ܠܰܢ: ܗ̇ܳܢܽܘܢ ܕܡ̣ܶܢ ܙܰܒܢܳܐ ܕܰܐܒܽܘܢ ܐܳܕܳܡ ܩܰܕܡܳܝܳܐ ܒܠܐܴ ܡܶܫܬܰܡܥܳܢܽܘܬܳܐ ܘܰܥܒܳܪ ܦܽܘܩܕܳܢܳܐ ܐܰܚܺܝܕܺܝܢ ܗܘܰܘ: ܗ̣ܽܘ ܕܶܝܢ ܒܝܰܕ ܕܰܗܘܳܐ ܡܶܢܰܢ ܠܝܳܪܬܽܘܬܰܢ ܩܰܕܡܳܝܬܳܐ ܐܰܦܢܺܝ ܠܰܢ: ܟܰܕ ܡ̣ܶܢ ܝܰܡܺܝܢܳܐ ܕܰܐܒܽܘܗܝ ܡܫܰܒܚܳܐ ܐܰܘܬܶܒ ܠܰܢ: ܒܝܰܕ ܪܺܝܫܺܝܬܳܐ ܕܦܰܓܪܶܗ ܡܢܰܦܫܳܐ ܗ̇ܰܘ ܕܰܢܣܰܒ ܡܶܢܰܢ: ܡ̣ܶܢ ܗܳܪܟܳܐ ܗܳܟܺܝܠ ܚܰܝܠܰܘ̈ܳܬܳܐ ܗ̇ܳܢܽܘܢ ܫܡܰܝ̈ܳܢܶܐ ܟܰܕ ܚܳܪܘ ܘܰܚܙܰܐܘܽܘܗܝ ܕܦܰܓܪܳܢܳܐܝ̣ܬ ܠܰܫܡܰܝܳܐ ܡܶܬܥܰܠܐܷ: ܘܰܐܟܚܕܳܐ ܬܽܘܒ ܥܰܡܶܗ ܠܰܟܝܳܢܳܐ ܕܰܒܢܰܝ̈ܢܳܫܳܐ ܡܥܰܠܐܷ: ܬܶܗܪܳܐ ܘܕܽܘܡܳܪܳܐ ܐܶܬܡܠܺܝܘ: ܘܰܕܡܰܢܽܘ ܗܳܢܳܐ ܡܥܰܩܒܳܢܳܐܝ̣ܬ ܠܰܚܕ̈ܳܕܶܐ ܡܫܰܐܠܺܝܢ ܗܘܰܘ: ܕܡܰܢܽܘ ܗܳܢܳܐ ܕܳܐܬܶܐ ܡ̣ܶܢ ܐܰܕܽܘܡ ܐܰܘܟܺܝܬ ܡ̣ܶܢ ܐܰܪܥܳܐ ܘܣܽܘܡܳܩܺܝ̈ܢ ܢܰܚܬܰܘ̈ܗܝ ܡ̣ܶܢ ܒܽܘܨܳܪ: ܗܳܢܰܘ ܕܶܝܢ ܡ̣ܶܢ ܒܶܣܪܳܐ: ܡܰܢܽܘ ܗܳܢܳܐ ܕܡܶܬܥܰܠܐܷ ܥܰܠ ܟܶܢ̈ܦܰܝ ܪܽܘܚܳܐ ܒܙܰܘܚܳܐ ܕܙܳܟܽܘܬܳܐ ܘܗܳܝܕܶܝܢ ܓܽܘܕܳܐ ܠܓܽܘܕܳܐ ܥܳܢܝܳܐ ܗܘܳܐ ܘܥܺܕܬܳܐ ܠܰܚܒܰܪܬܳܗ̇ ܡܰܠܦܳܐ ܗܘܳܬ݀: ܕܗܳܢܰܘ ܡܳܪܝܳܐ ܥܰܫܺܝܢܳܐ ܘܓܰܢ̱ܒܳܪܳܐ: ܗܳܢܰܘ ܡܳܪܝܳܐ ܓܰܢ̱ܒܳܪܳܐ ܘܰܩܪܰܒܬܳܢܳܐ: ܗܳܢܰܘ ܡܳܪܝܳܐ ܕܰܫܒܳܐ ܫܒܺܝܬܶܗ ܕܚܰܣܺܝ̣ܢܳܐ: ܘܒܰܙܩܺܝܦܶܗ ܦܟܳܪܶܗ ܠܡܰܘܬܳܐ ܛܪܽܘܢܳܐ: ܗܳܝܕܶܝܢ ܡܶܬܬܪܺܝܡܳܢܽܘܬܳܐ ܕܬܰܪ̈ܥܶܐ ܦܳܩܕܺܝܢ ܗܘܰܘ: ܘܰܚܦܺܝܛܳܐܝ̣ܬ ܠܰܚܕ̈ܳܕܶܐ ܕܰܐܪܺܝܡܘ ܪ̈ܺܝܫܰܝܟܽܘܢ ܬܰܪ̈ܥܶܐ ܟܰܕ ܩܳܥܶܝܢ ܗܘܰܘ: ܐܶܬܬܪܺܝܡܘ ܬܰܪ̈ܥܶܐ ܕܡܶܢܥܳܠܰܡ ܡܝܰܒܒܺܝܢ ܗܘܰܘ: ܕܢܶܥܽܘܠ ܡܰܠܟܳܐ ܕܺܐܝܩܳܪ̈ܶܐ ܩܳܥܶܝܢ ܗܘܰܘ: ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܬܠܺܝܬܳܐܝ̣ܬ ܕܠܐ ܫܶܠܝܳܐ ܩܳܥܶܝܢ ܗܘܰܘ: ܐܳܦ ܚܢܰܢ ܥܰܠ ܐܰܦܰܝ̈ ܦܽܘܪܩܳܢܰܢ ܥܰܡ ܬܶܓ̈ܡܶܐ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ ܩܳܥܶܝܢ ܗܘܰܘ: ܘܰܚܢܰܢ ܡܳܐܟ̈ܶܐ ܘܥܰܦܪ̈ܳܢܶܐ ܩܳܥܶܝܢܰܢ ܘܳܐܡܪܺܝܢܰܢ: ܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡ̣ܶܢ ܐܰܬܪܶܗ ܠܥܳܠܰܡ: ܒܪܺܝܟ ܗܽܘ ܕܶܐܬܬܰܚܬܺܝ ܘܪܰܡܪܶܡ ܠܰܢ: ܒܪܺܝܟ ܗܽܘ ܕܰܢܚܶܬ ܠܘܳܬܰܢ ܘܠܐܬܪܶܗ ܪܳܡܳܐ ܐܰܣܶܩ ܠܰܢ: ܒܪܺܝܟ ܗܽܘ ܕܶܐܬܡܰܟܰܟ ܕܰܢܥܰܠܐܷ ܠܰܢ: ܒܪܺܝܟ ܗܽܘ ܕܶܐܬܳܐ ܘܰܦܪܰܩ ܠܰܢ: ܘܬܽܘܒ ܐܳܬܶܐ ܘܰܡܢܰܚܶܡ ܠܰܢ: ܒܪܺܝܟ ܗܽܘ ܕܰܪܟܶܒ ܥܰܠ ܟܪ̈ܽܘܒܶܐ ܘܰܦܪܰܚ ܘܗܳܐ ܐܶܢܳܐ ܥܰܡܟܽܘܢ ܐ̱ܢܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ ܐܶܫܬܰܘܕܺܝ ܠܰܢ: ܒܪܺܝܟ ܗ̣ܽܘ ܕܰܒܪܽܘܚܳܦܳܐ ܕܺܐܝܕܰܘ̈ܗܝ ܠܰܫܠܺܝ̈ܚܶܐ ܟܽܘܡܪ̈ܰܘܗܝ ܐܠܰܒܶܫ ܦܽܘܪܩܳܢܳܐ: ܘܡ̣ܶܢ ܕܰܣܠܶܩ ܣܳܡ ܚܶܫܽܘܟܳܐ ܠܓܶܢܝܶܗ: ܘܙܰܗܪܳܐ ܘܗܶܕܪܳܐ ܐܶܬܥܰܛܰܦ: ܘܰܥܒܰܕ ܠܰܒܥܶܠܕ̈ܒܳܒܰܘܗܝ ܟܽܘܒܫܳܐ ܬܚܶܝܬ ܪ̈ܶܓܠܰܘܗܝ: ܘܰܠܬܰܠܡܺܝ̈ܕܰܘܗܝ ܐܰܫܰܪ ܫܽܘܘ̈ܕܳܝܰܘܗܝ: ܘܒܰܕܓܽܘܢ ܚܢܰܢ ܥܰܒܕܰܝ̈ܟ ܡܫܺܝܚܳܐ ܐܠܰܗܰܢ ܘܦܳܪܽܘܩܰܢ: ܟܰܕ ܠܥܺܐܕܳܐ ܕܣܽܘܠܳܩܳܟ ܒܰܦܨܺܝܚܽܘܬܳܐ ܘܒܰܪܘܳܙܳܐ ܡܫܰܡܠܺܝܢܰܢ: ܘܕܰܢܩܰܒܶܠ ܠܡܶܐܬܺܝܬܳܟ ܗ̇ܳܝ ܕܬܰܪܬܶܝܢ ܒܚܰܕܽܘܬܳܐ ܘܒܰܕܝܳܨܳܐ ܡܣܰܟܶܝܢܰܢ: ܡܦܺܝܣܺܝܢܰܢ ܕܰܬܢܳܢ ܒܚܰܝ̈ܶܐ ܕܠܳܟ ܫܳܦܪܺܝܢ ܢܶܬܕܰܒܰܪ: ܘܰܠܙܰܒܢܳܐ ܗܳܢܳܐ ܕܬܰܘܬܳܒܽܘܬܰܢ ܣܛܰܪ ܡ̣ܶܢ ܟܽܠ ܫܚ̈ܳܩܶܐ ܘܛܽܘܪ̈ܳܦܶܐ ܒܥܽܘܕܪܳܢܳܐ ܕܡܶܢܳܟ ܢܶܫܟܰܚ: ܘܰܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܢܶܬܒܰܣܰܡ ܘܡ̣ܶܢ ܟܽܠ ܡܰܪ̈ܕܘܳܬܳܐ ܩܰܫ̈ܝܳܬܳܐ ܘܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܢܶܫܬܰܘܙܰܒ: ܘܡܳܐ ܕܡ̣ܶܢ ܗܽܘܠܐܷ ܐܰܪܥܳܢܳܝܬܳܐ ܘܝܰܩܺܝܪܬܳܐ ܘܰܕܝܰܬܺܝܪ ܥܒܺܝܬܳܐ ܡܶܬܚܰܪܪܺܝܢܰܢ: ܘܡ̣ܶܢ ܐܰܣܽܘܪ̈ܰܘܗܝ ܕܦܰܓܪܳܐ ܗܳܢܳܐ ܡܶܬܢܰܦܨܺܝܢܰܢ: ܢܶܣܰܒ ܠܠܐܴ ܡܳܝܽܘܬܽܘܬܳܐ ܗ̇ܳܝ ܕܡܶܢܳܟ ܡܠܺܝܟܳܐ ܠܰܢ: ܘܰܐܟܚܕܳܐ ܥܰܡ ܚܰܝܠܰܘ̈ܳܬܳܐ ܠܐ ܗܽܘܠܳܢܳܝܷ̈ܐ ܠܐܘܪܥܳܟ ܢܶܬܚܰܦܰܛ ܘܰܒܟܽܠܙܒܰܢ ܥܰܡܳܟ ܠܥܳܠܰܡ ܘܰܕܠܐ ܫܽܘܠܳܡ ܢܶܗܘܶܐ: ܘܰܚܢܰܢ ܟܺܝܬ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܒܫܰܦܺܝܪܽܘܬ ܬܰܘܕܺܝܬܳܐ ܕܒܳܟ ܚܝܰܘ ܘܶܐܬܬܢܺܝܚܘ ܥܰܠ ܣܰܒܪܳܟ: ܢܶܫܟܰܚ ܠܩܰܘܡܳܐ ܕܝܰܡܺܝܢܳܐ ܦܰܪܶܗܣܺܝܳܐܝ̣ܬ: ܘܫܽܘܒܚܳܐ ܕܠܐ ܫܶܠܝܳܐ ܥܰܡ ܐܶܡܪ̈ܶܐ ܕܟܰܝ̈ܳܐ ܕܰܟܝܳܐܝ̣ܬ ܢܶܙܡܰܪ ܠܳܟ ܒܪܳܐ ܝܺܚܺܝܕܳܝܳܐ ܒܢܽܘܗܪܳܐ ܓܰܐܝܳܐ ܘܰܫܒܺܝܚܳܐ ܕܰܐܠܳܗܽܘܬܳܟ: ܘܠܐܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܐ ܕܺܝܠܳܟ ܩܰܕܺܝܫܳܐ ܘܛܳܒܳܐ ܘܰܣܓܺܝܕܳܐ: ܗܳܫܳܐ܀

 

ܥܛܪܐ

 

ܫܽܘܒܚܳܐ ܠܳܟ ܐܠܰܗܳܐ ܫܰܪܺܝܪܳܐ: ܐܰܢ̱ܬ ܕܡܶܛܽܠܳܬܰܢ ܡ̣ܶܢ ܫܡܰܝܳܐ ܢܚܶܬܬ: ܘܦܰܓܪܳܐ ܐܶܬܥܰܛܰܦܬ: ܘܚܰܫܬ ܘܡܺܝܬܬ ܚܠܳܦܰܝܢ ܒܰܒܣܰܪ: ܘܠܰܬܠܳܬܳܐ ܝܰܘ̈ܡܺܝܢ ܩܳܡܬ ܡ̣ܶܢ ܩܰܒܪܳܐ: ܘܝܰܘܡܳܢܳܐ ܒܙܳܟܽܘܬܳܐ ܠܰܫܡܰܝܳܐ ܐܶܬܥܰܠܺܝܬ: ܐܰܝܟܰܢܳܐ ܕܠܰܢ ܬܶܓܰܕ ܘܬܰܣܶܩ ܠܰܫܡܰܝܳܐ: ܘܗܳܫܳܐ ܡܳܪܝ ܥܰܠܐܴ ܘܰܐܣܶܩ ܘܩܰܒܶܠ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܣܽܘܠܳܩܳܟ ܫܒܺܝܚܳܐ: ܘܛܰܝܶܒ ܠܰܢ ܠܡܶܐܬܺܝܬܳܐ ܕܪܽܘܚܳܟ ܩܰܕܺܝܫܳܐ ܗ̇ܰܘ ܕܶܐܫܬܰܘܕܺܝܬ ܠܰܡܫܰܕܳܪܽܘ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܘܟܰܕ ܒܒܶܣܡܳܢܰܝ̈ܟ ܡܳܪܝ ܡܶܬܒܰܣܡܺܝܢܰܢ: ܘܰܒܫܽܘ̈ܟܳܢܰܝܟ ܪ̈ܽܘܚܳܢܳܝܶܐ ܡܶܬܗܰܕܪܺܝܢܰܢ ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܕܡܰܠܟ̈ܶܐ ܘܡܳܪܶܐ ܡܳܪ̈ܰܘܳܬܳܐ: ܕܨܶܒܝܳܢܳܐܝ̣ܬ ܢܚܶܬ ܠܐܪܥܳܐ ܒܪܶܚܡܬܳܐ ܡܶܛܽܠ ܨܰܠܡܳܐ ܕܪܰܒܽܘܬܶܗ ܕܢܶܦܪܩܺܝܘܗܝ ܠܐܕܳܡ ܡ̣ܶܢ ܚܛܺܝܬܳܐ: ܘܰܣܠܶܩ ܠܰܫܡܰܝܳܐ ܒܬܶܫܒܽܘܚܬܳܐ ܟܰܕ ܛܥܺܝܢ ܢܺܝܫܳܐ ܕܙܳܟܽܘܬܳܐ ܢܰܨܺܝܚܬܳܐ: ܠܗܰܘ ܫܰܪܺܝܪܳܐ ܕܫܰܪܰܪ ܠܰܫܠܺܝܚܰܘ̈ܗܝ ܥܰܠ ܢܽܘܚܳܡܶܗ ܐܰܪܒܥܺܝܢ ܝܰܘ̈ܡܳܬܳܐ ܘܒܰܪܶܟ ܐܶܢܽܘܢ ܘܶܐܬܥܰܠܺܝ ܠܘܳܬ ܫܳܠܽܘܚܶܗ ܒܙܰܘܚܳܐ: ܕܠܶܗ ܝܳܐܐ ܫܽܘܒܚܳܐ܀

 

ܣܕܪܐ

 

ܡܳܪܝܳܐ ܐܠܰܗܳܐ ܚܰܝܠܬܳܢܳܐ ܘܥܰܫܺܝܢܳܐ ܒܰܠܚܽܘܕܰܘܗܝ: ܗ̇ܰܘ ܓܰܢ̱ܒܳܪܳܐ ܘܰܩܪܰܒܬܳܢܳܐ ܘܠܐ ܡܶܬܕܰܪܟܳܢܳܐ: ܗ̇ܰܘ ܕܰܒܡܰܪܟܰܒܬܳܐ ܕܰܟܪ̈ܽܘܒܶܐ ܠܐ ܡܶܬܡܰܠܠܳܢܳܐܝ̣ܬ ܡܶܙܕܰܝܰܚ ܐܰܢ̱ܬ: ܘܡ̣ܶܢ ܬܶܓ̈ܡܶܐ ܥܶܠܳܝ̈ܶܐ ܕܠܐ ܫܶܠܝܳܐ ܡܶܬܗܰܕܰܪ ܐܰܢ̱ܬ: ܘܡ̣ܶܢ ܦܳܠܰܚ̈ܘܳܬܳܐ ܕܠܐ ܓܫܽܘܡ ܡܶܬܩܰܠܰܣ ܐܰܢ̱ܬ: ܗ̇ܰܘ ܕܡ̣ܶܢ ܟܶܢ̈ܫܶܐ ܣܒܺܝ̈ܣܶܐ ܕܓܰܘܙܰܠܬܳܐ ܡܶܬܒܰܪܰܟ ܐܰܢ̱ܬ: ܘܡ̣ܶܢ ܦܽܘ̈ܡܶܐ ܡܠܺܝ̈ܠܐ ܕܢܰܒܪܰܫܬܳܐ ܡܶܬܪܰܡܪܰܡ ܐܰܢ̱ܬ: ܗ̇ܰܘ ܕܰܕܚܺܝܠܐܝ̣ܬ ܘܰܐܠܳܗܳܐܝ̣ܬ ܡܰܡܠܶܟ ܐܰܢ̱ܬ ܥܰܠ ܣܰܘ̈ܦܶܐ ܐܰܝܟ ܥܳܒܽܘܕܳܐ: ܘܡ̣ܶܢ ܟܽܠܗܽܘܢ ܥܶܒܪ̈ܶܝܗ̇ ܕܰܐܪܥܳܐ ܡܶܬܩܰܠܰܣ ܐܰܢ̱ܬ ܐܰܝܟ ܒܳܪܽܘܝܳܐ: ܗ̇ܰܘ ܕܓܳܙܪ̈ܳܬܳܐ ܡܫܰܒ̈ܚܳܢ ܠܳܟ ܐܰܝܟ ܝܳܨܽܘܦܳܐ: ܘܶܐܡܘ̈ܳܬܳܐ ܡܰܘ̈ܕܝܳܢ ܠܳܟ ܐܰܝܟ ܡܕܰܒܪܳܢܳܐ: ܘܥܰܡ̈ܡܶܐ ܣܳܓܕܺܝܢ ܠܳܟ ܐܰܝܟ ܦܳܪܽܘܩܳܐ: ܗ̇ܰܘ ܕܡܶܛܽܠܳܬܰܢ ܡ̣ܶܢ ܡܶܕܝܳܪ̈ܶܐ ܪ̈ܳܡܶܐ ܕܰܐܒܽܘܟ ܢܚܶܬܬ: ܘܰܒܡܽܘܟܳܟܳܟ ܚܰܕܶܬܬ ܠܓܶܢܣܰܢ ܕܡ̣ܶܢ ܚܛܺܝܬܳܐ ܐܶܬܚܰܒܰܠ: ܘܠܰܢ ܗ̇ܳܢܽܘܢ ܕܺܐܝܬܰܝܢ ܗܘܰܝܢ ܛܪ̈ܺܝܕܶܐ ܘܡܰܣܠܰܝ̈ܳܐ ܩܰܪܶܒܬ ܠܘܳܬܳܟ ܘܰܒܒܰܝܬܳܝܽܘܬܳܐ ܕܺܝܠܳܟ ܐܰܝܟ ܪܶܚܡܰܬ ܐ̱ܢܳܫܽܘܬܳܟ ܐܰܩܺܝܡܬ ܠܰܢ: ܚܢܰܢ ܗ̇ܳܢܽܘܢ ܕܳܐܦܠܐ ܠܐܪܥܳܐ ܫܳܘܶܝܢ ܗܘܰܝܢ ܝܳܪ̈ܽܘܬܶܐ ܕܡܰܠܟܽܘܬܳܟ ܙܰܡܶܢܬ ܠܰܢ: ܥܰܡܳܟ ܒܫܽܘܒܚܳܐ ܡ̣ܶܢ ܝܰܡܺܝܢ ܐܰܒܽܘܟ ܒܰܡܪ̈ܰܘܡܶܐ ܐܰܘܬܶܒܬ ܠܰܢ: ܘܟܰܕ ܠܰܫܡܰܝܳܐ ܡ̣ܶܢ ܒܳܬܰܪ ܡܕܰܒܪܳܢܽܘܬܳܟ ܐܠܰܗܳܝܬܳܐ ܕܡܶܛܽܠܳܬܰܢ ܐܶܬܥܰܠܺܝܬ ܒܫܽܘܒܚܳܐ ܪܰܒܳܐ ܘܙܳܟܽܘܬܳܐ ܠܐ ܡܶܬܡܰܠܠܳܢܺܝܬܳܐ: ܘܫܰܡܠܺܝܬ ܐ̱ܪ̈ܳܙܶܐ ܢܒܺܝܳܝ̈ܶܐ ܕܡܶܛܽܠ ܡܰܣܰܩܬܳܟ ܩܰܕܶܡܘ ܐܶܬܢܰܒܺܝܘ: ܟܰܕ ܕܰܘܺܝܕ ܐܠܰܗܳܝܳܐ ܡܙܰܡܰܪ ܒܬܶܗܪܳܐ ܟܰܕ ܐܳܡܰܪ ܗܘܳܐ: ܕܰܣܠܶܩ ܐܠܰܗܳܐ ܒܫܽܘܒܚܳܐ ܘܡܳܪܝܳܐ ܒܙܰܘܚܳܐ ܕܙܳܟܽܘܬܳܐ ܡܶܬܢܰܒܶܐ ܗܘܳܐ: ܘܰܐ̱ܚܪܺܢܳܐ ܕܰܝܢ ܕܥܰܠ ܟܽܘܪܣܝܳܐ ܡܫܰܒܚܳܐ ܝܳܬܶܒ ܗܘܰܝܬ ܡܚܰܘܶܐ ܗܘܳܐ: ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܣܪ̈ܳܦܶܐ ܕܦܳܪܚܺܝܢ ܚܰܕ ܠܘܳܬ ܚܰܕ ܘܩܳܥܶܝܢ ܗܘܰܘ ܩܰܕܺܝܫ ܩܰܕܺܝܫ ܩܰܕܺܝܫ ܬܠܺܝܬܳܐܝ̣ܬ ܚܳܙܶܐ ܗܘܳܐ: ܚܰܕ ܕܰܐܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ ܡܰܙܥܶܩ ܗܘܳܐ ܕܢܶܥܽܘܠ ܡܰܠܟܳܐ ܡܳܪܳܗ̇ ܕܬܶܫܒܽܘܚܬܳܐ ܡܝܰܒܶܒ ܗܘܳܐ: ܐ̱ܚܪܺܢܳܐ ܕܶܝܢ ܕܡܰܢܽܘ ܗܳܢܳܐ ܕܳܐܬܶܐ ܡ̣ܶܢ ܐܰܕܽܘܡ ܡܫܰܐܶܠ ܗܘܳܐ ܘܰܕܣܽܘܡܳܩܺܝ̈ܢ ܢܰܚܬܰܘ̈ܗܝ ܡ̣ܶܢ ܕܡܳܐ ܡܒܰܕܶܩ ܗܘܳܐ: ܚܰܕ ܥܰܠ ܚܰܨܳܐ ܕܰܟܪ̈ܽܘܒܶܐ ܠܳܟ ܚܳܙܶܐ ܗܘܳܐ: ܘܰܐ̱ܚܪܺܢܳܐ ܕܥܰܠ ܟܶܢ̈ܦܶܐ ܕܪܽܘܚܳܐ ܦܳܪܰܚ ܐܰܢ̱ܬ ܡܰܠܶܦ ܗܘܳܐ: ܚܰܕ ܕܡ̣ܶܢ ܩܶܛܠܐ ܒܶܪܝ ܣܠܶܩܬ ܐܳܡܰܪ ܗܘܳܐ: ܘܰܐ̱ܚܪܺܢܳܐ ܕܡܳܪܝܳܐ ܥܰܫܺܝܢܳܐ ܘܓܰܢ̱ܒܳܪܳܐ ܡܙܰܡܰܪ ܗܘܳܐ: ܚܰܕ ܕܗܳܐ ܡܳܪܝܳܐ ܥܰܠ ܥܢܳܢ̈ܶܐ ܡܶܙܕܰܝܰܚ ܪܳܫܶܡ ܗܘܳܐ: ܘܰܐ̱ܚܪܺܢܳܐ ܕܰܣܠܶܩܬ ܠܰܡܪܰܘܡܳܐ ܘܰܫܒܰܝܬ ܫܒܺܝܬܳܐ ܡܰܟܪܶܙ ܗܘܳܐ: ܚܰܕ ܕܬܶܒ ܠܳܟ ܡ̣ܶܢ ܝܰܡܺܝܢܝ ܡܛܰܒܶܒ ܗܘܳܐ: ܥܕܰܡܳܐ ܕܶܐܣܺܝܡ ܒܥܶܠܕ̈ܒܳܒܰܝܟ ܟܽܘܒܫܳܐ ܬܚܶܝܬ ܪ̈ܶܓܠܰܝܟ ܡܫܰܘܕܰܥ ܗܘܳܐ: ܠܳܟ ܗܳܟܺܝܠ ܡܶܬܟܰܫܦܺܝܢܰܢ ܒܗܳܢܳܐ ܝܰܘܡܳܐ ܕܣܽܘܠܳܩܳܟ ܕܠܰܫܡܰܝܳܐ: ܕܰܬܥܰܠܐܷ ܠܢܰܦ̈ܫܳܬܳܐ ܘܰܠܗܰܘ̈ܢܶܐ ܕܺܝܠܰܢ ܡ̣ܶܢ ܣܪܺܝܩܽܘܬ ܡܰܪ̈ܢܝܳܬܳܐ ܥܳܠܡܳܢܳܝ̈ܳܬܳܐ: ܘܬܰܢܗܰܪ ܠܡܰܕܥܳܐ ܕܺܝܠܰܢ ܒܙܰܠܺܝ̈ܩܶܐ ܕܫܽܘܒܚܳܐ ܕܺܝܠܳܟ ܐܠܰܗܳܝܳܐ: ܐܰܝܟܰܢܳܐ ܕܟܰܕ ܒܪܽܘܚܳܐ ܩܰܕܺܝܫܳܐ ܡܶܬܥܰܠܶܝܢܰܢ: ܥܰܡ ܚܰܝܠܰܘ̈ܳܬܳܐ ܕܠܐ ܓܫܽܘܡ ܕܠܐ ܫܶܠܝܳܐ ܬܶܫܒܽܘܚܬܳܐ ܡܙܰܡܰܪ ܠܳܟ ܟܰܕ ܐܳܡܪܺܝܢܰܢ: ܕܡܳܪܝܳܐ ܓܰܢ̱ܒܳܪܳܐ ܘܥܰܫܺܝܢܳܐ ܡܳܪܝܳܐ ܓܰܢ̱ܒܳܪܳܐ ܘܰܩܪܰܒܬܳܢܳܐ: ܘܥܰܡ ܗܳܠܶܝܢ ܟܰܕ ܡܶܣܬܰܝܥܺܝܢܰܢ ܒܥܽܘܕܪ̈ܳܢܰܝܟ ܐܠܰܗܳܝ̈ܶܐ: ܢܶܫܬܘܶܐ ܕܰܢܥܰܕܥܶܕ ܠܳܟ ܥܺܐܕܳܐ ܗܳܢܳܐ ܕܣܽܘܠܳܩܳܟ: ܘܰܒܗܰܘ ܥܺܐܕܳܐ ܕܰܠܥܳܠܰܡ ܠܐ ܦܳܛܰܪ: ܘܰܣܥܽܘܪ ܒܪ̈ܰܚܡܰܝܟ ܒܝܰܘܡܳܐ ܗܳܢܳܐ ܩܰܕܺܝܫܳܐ ܠܟܽܠܗܽܘܢ ܡܰܟܰܐܒ̈ܶܐ ܘܰܫܚܺܝ̈ܩܶܐ ܘܰܡܛܰܪ̈ܦܶܐ: ܘܰܒܫܰܝܢܳܐ ܕܡܶܢܳܟ ܨܰܒܶܬ ܠܰܢ: ܘܰܒܙܽܘܦܳܟ ܩܰܕܺܝܫܳܐ ܚܰܘܰܪ ܠܰܢ: ܘܰܐܫܘܳܐ ܠܰܢ ܠܪ̈ܰܚܡܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܘܰܠܡܰܦܩܳܢܳܐ ܡܫܰܝܢܳܐ ܕܡ̣ܶܢ ܗܳܪܟܳܐ ܘܰܐܢܺܝܚ ܠܢܰܦ̈ܫܳܬܳܐ ܕܥܰܢܺܝ̈ܕܶܐ ܡܗܰܝ̈ܡܢܶܐ ܒܰܐܘ̈ܳܢܶܐ ܕܺܝܠܳܟ ܛܽܘܒܬܳܢ̈ܶܐ ܒܡܰܫܟܢܳܐ ܕܩܰܕܺܝ̈ܫܰܝܟ ܘܰܒܒܽܘܣܳܡܳܐ ܕܡܰܠܟܽܘܬܳܟ ܫܡܰܝܳܢܺܝܬܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܐܺܝܬܝܳܐ ܡܬܽܘܡܳܝܳܐ ܕܰܫܒܰܩ ܐܰܬܪܶܗ ܡܥܰܠܝܳܐ ܘܶܐܬܳܐ ܠܘܳܬܰܢ ܘܡ̣ܶܢ ܐܰܬܪܶܗ ܠܐ ܫܰܢܺܝ: ܘܰܗܘܳܐ ܡܶܢܰܢ ܒܰܕܡܽܘܬܰܢ ܘܡ̣ܶܢ ܫܽܘܒܚܶܗ ܠܐ ܐܶܬܢܰܟܪܺܝ: ܘܫܰܡܠܺܝ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܘܰܗܦܰܟ ܐܶܬܥܰܠܺܝ ܘܛܰܟܣܺܝ̈ܣ ܕܰܫܡܰܝ̈ܳܢܶܐ ܩܰܒܠܽܘܗܝ: ܘܰܪܟܶܒ ܥܰܠ ܟܪ̈ܽܘܒܶܐ ܘܰܣܠܶܩ: ܘܡ̣ܶܢ ܝܰܡܺܝܢܳܐ ܕܰܐܒܳܐ ܝܺܬܶܒ: ܘܠܰܟܝܳܢܰܢ ܡܳܝܽܘܬܳܐ ܥܰܡܶܗ ܐܰܣܶܩ: ܕܠܶܗ ܒܦܽܘܡܳܐ ܘܠܶܫܳܢܳܐ ܢܫܰܒܰܚ: ܘܰܒܠܶܒܳܐ ܘܪܶܥܝܳܢܳܐ ܢܶܣܓܽܘܕ: ܒܗܳܢܳܐ ܥܶܕܳܢܳܐ܀

ܣܕܪܐ

 

ܡܳܪܝܳܐ ܐܠܰܗܳܐ ܗ̇ܰܘ ܕܰܒܪܰܒܽܘܬ ܦܰܐܝܽܘܬܶܗ ܠܥܶܠ ܡ̣ܶܢ ܫܡܰܝܳܐ: ܘܰܡܥܰܠܰܝ ܘܰܡܪܰܝܰܡ ܘܰܡܪܰܡܪܰܡ ܒܺܐܝܬܽܘܬܶܗ: ܡܫܺܝܚܳܐ ܚܰܝܠܶܗ ܕܰܐܒܳܐ ܘܚܶܟܡܬܶܗ: ܗ̇ܰܘ ܕܰܒܥܳܠܡܳܐ ܗܘܳܐ ܩܕܳܡ ܕܢܺܐܬܶܐ ܠܥܳܠܡܳܐ ܒܡܶܬܒܰܪܢܫܳܢܽܘܬܶܗ: ܘܚܰܝܠܰܘ̈ܳܬܳܐ ܥܶܠܳܝ̈ܶܐ ܠܐ ܪܓܶܫܘ ܒܶܗ: ܘܰܣܠܶܩ ܠܰܡܪ̈ܰܘܡܶܐ ܟܰܕ ܡܰܠܺܝ ܠܰܡܕܰܒܪܳܢܽܘܬܶܗ ܘܓܽܘ̈ܕܶܐ ܕܪ̈ܽܘܚܳܢܶܐ ܬܗܰܪܘ ܒܶܗ: ܡܰܠܟܳܐ ܥܰܫܺܝܢܳܐ ܕܰܒܚܰܫ̈ܶܐ ܕܰܩܢܽܘܡܶܗ ܙܟܳܐ ܠܚܰܣܺܝ̣ܢܳܐ ܘܰܫܒܳܐ ܫܒܺܝܬܶܗ: ܦܳܪܩܳܐ ܪܰܒܳܐ ܕܦܰܟܪܶܗ ܠܡܰܘܬܳܐ ܛܪܽܘܢܳܐ ܒܰܙܩܺܝܦܶܗ: ܐܠܰܗܳܐ ܠܐ ܡܶܬܚܰܙܝܳܢܳܐ ܕܰܫܢܰܝ̈ܳܐ ܬܠܳܬܺܝܢ ܗܘܳܐ ܒܰܐܪܳܥܐ ܒܡܰܟܺܝܟܽܘܬܶܗ: ܘܰܫܢܰܝ̈ܳܐ ܬܠܳܬ ܣܥܰܪ ܚܰܝ̈ܠܐ ܘܬܶܕܡܪ̈ܳܬܳܐ ܒܓܰܢ̱ܒܳܪܽܘܬܶܗ: ܘܠܐܪܥܳܐ ܕܠܺܝܛܳܐ ܗܘܳܬ݀ ܒܰܪܟܳܗ̇ ܒܗܰܠܟ̈ܳܬܶܗ: ܘܰܣܥܰܪ ܠܡܺܝ̈ܬܶܐ ܕܰܫܝܽܘܠ ܒܰܩܒܽܘܪܬܶܗ: ܘܰܥܒܰܕ ܣܰܒܪܳܐ ܠܰܕܠܐ ܣܰܒܪܳܐ ܒܰܩܝܳܡܬܶܗ: ܘܚܰܕܺܝ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܒܢܽܘܚܳܡܶܗ ܘܫܰܪܰܪ ܐܶܢܽܘܢ ܟܰܕ ܚܰܘܺܝ ܠܗܽܘܢ ܫܽܘ̈ܡܳܬܶܗ: ܘܡ̣ܶܢ ܒܳܬܰܪ ܐܰܪܒܥܺܝܢ ܝܰܘ̈ܡܺܝܢ ܕܒܰܪ ܐܶܢܽܘܢ ܘܰܐܦܶܩ ܐܶܢܽܘܢ ܕܢܶܚܙܽܘܢ ܣܽܘܠܳܩܶܗ: ܘܰܦܫܰܛ ܐܺܝܕܰܘ̈ܗܝ ܘܒܰܪܶܟ ܐܶܢܽܘܢ ܒܪܽܘܚܳܦܶܗ: ܘܰܒܝܰܕ ܡܰܠܐܟ̈ܶܐ ܠܰܒܶܒ ܐܶܢܽܘܢ ܥܰܠ ܦܽܘܪܫܳܢܶܗ: ܕܗܳܢܳܐ ܝܶܫܽܘܥ ܕܶܐܣܬܰܠܰܩ ܠܰܫܡܰܝܳܐ ܗܳܟܰܢܳܐ ܥܬܺܝܕ ܕܢܺܐܬܶܐ ܒܫܽܘܒܚܶܗ: ܘܰܒܗܳܕܶܐ ܬܶܫܒܽܘܚܬܳܐ ܕܪܰܒܽܘܬܳܐ ܥܳܒܶܕ ܠܳܗ̇ ܠܡܶܐܬܺܝܬܶܗ: ܒܗܳܢܳܐ ܫܽܘܠܛܳܢܳܐ ܡܳܪܳܢܳܝܳܐ ܗܳܘܝܳܐ ܡܰܠܟܽܘܬܶܗ: ܥܢܳܢܳܐ ܕܢܽܘܗܪܳܐ ܩܰܒܶܠܬܶܗ ܠܗܰܘ ܕܒܰܥܢܳܢܳܐ ܡܰܠܶܠ ܥܰܡ ܡܽܘܫܶܐ ܥܰܒܕܶܗ: ܘܗܕܺܝ ܒܰܥܢܳܢܳܐ ܠܐܝܣܪܳܐܶܝܠ ܚܰܒܺܝܒܶܗ: ܘܕܰܪܟܺܝܒ ܥܰܠ ܥܢܳܢ̈ܶܐ ܩܰܠܺܝ̈ܠܳܬܳܐ ܚܙܳܝܗܝ ܐܶܫܰܥܝܳܐ ܒܰܢܒܺܝܽܘܬܶܗ: ܢܚܶܬ ܕܠܐ ܕܡܽܘ̣ܬܳܐ ܘܰܣܠܶܩ ܒܰܕܡܽܘܬܳܐ ܟܰܕ ܠܐ ܐܶܫܬܰܚܠܰܦ ܟܝܳܢܳܐ ܕܰܐܠܳܗܽܘܬܶܗ ܘܠܐ ܐܠܰܗܽܘܬܶܗ ܐܶܫܬܰܚܠܦܰܬ݀ ܠܒܶܣܪܳܐ ܗ̇ܰܘ ܕܰܢܣ̣ܰܒ ܡܶܢܰܢ ܒܰܚܕܳܝܽܘܬܶܗ: ܐܶܠܐ ܟܰܕ ܢܛܺܝܪ ܒܚܰܕ ܩܢܽܘܡܳܐ ܕܠܐ ܒܽܘܠܒܳܠܐ ܟܝܳܢܳܐ ܕܰܐܠܳܗܽܘܬܶܗ ܘܰܕܐ̱ܢܳܫܽܘܬܶܗ: ܗܳܟܰܢܳܐ ܐܶܬܬܪܺܝܡ ܥܰܠ ܫܡܰܝܳܐ ܘܰܪܟܶܒ ܥܰܠ ܟܪ̈ܽܘܒܶܐ ܘܰܦܪܰܚ ܐܰܝܟ ܕܙܰܡܰܪ ܕܰܘܺܝܕ ܒܰܢܒܺܝܽܘܬܶܗ: ܘܩܰܒܠܽܘܗܝ ܡܰܠܐܟ̈ܶܐ ܒܫܽܘܫܶܦܰܝ̈ܗܽܘܢ ܕܰܓܢܺܝܙܳܐ ܗܘܳܬ݀ ܡܶܢܗܽܘܢ ܐܽܘܪܚܳܐ ܕܰܡܕܰܒܪܳܢܽܘܬܶܗ: ܘܠܰܚܕ̈ܳܕܶܐ ܡܫܰܐܠܺܝܢ ܗܘܰܘ ܘܰܡܥܰܩܒܺܝܢ ܡܶܛܽܠܳܬܶܗ: ܕܡܰܢܽܘ ܟܰܝ ܗܳܢܳܐ ܡܰܠܟܳܐ ܕܺܐܝܩܳܪ̈ܶܐ ܕܰܡܥܰܠܝܳܐ ܐܺܝܬܰܘܗܝ ܒܰܚܙܳܬܶܗ: ܡܰܢܽܘ ܗܳܢܳܐ ܕܳܐܬܶܐ ܡ̣ܶܢ ܐܰܕܽܘܡ ܘܣܽܘܡܳܩܺܝ̈ܢ ܢܰܚܬܰܘ̈ܗܝ ܘܰܓܢܺܝܙ ܒܠܐܴ ܡܶܬܕܰܪܟܳܢܽܘܬܶܗ: ܘܰܡܦܰܫܩܺܝܢ ܗܘܰܘ ܚܰܝܠܰܘ̈ܳܬܳܐ ܥܶܠܳܝ̈ܶܐ ܠܬܰܚܬܳܝ̈ܶܐ ܕܗܳܢܰܘ ܡܳܪܝܳܐ ܥܰܫܺܝܢܳܐ ܘܓܰܢ̱ܒܳܪܳܐ: ܗܳܢܰܘ ܡܳܪܝܳܐ ܓܰܢ̱ܒܳܪܳܐ ܒܰܩܪܰܒܬܳܢܽܘܬܶܗ: ܘܰܕܢܶܬܬܪܺܝܡܽܘܢ ܬܰܪ̈ܥܶܐ ܦܳܩܕܺܝܢ ܗܘܰܘ ܒܡܰܣܰܩܬܶܗ ܕܳܐܕܳܡ ܗ̇ܰܘ ܕܶܐܚܰܕ ܠܰܫܡܰܝܳܐ ܒܰܥܒܳܪ ܦܽܘܩܕܳܢܶܗ: ܘܶܐܬܬܪܺܝܡܘ ܬܰܪ̈ܥܶܐ ܕܶܐܬܬܚܶܕ ܒܰܓܙܳܪ ܕܺܝܢܳܐ ܒܪܽܘܡܪܳܡܶܗ: ܘܰܐܡܠܶܟ ܥܰܠ ܥܰܡ̈ܡܶܐ ܡܰܘܗ̈ܒܳܬܳܐ ܠܝܳܪܬܽܘܬܶܗ ܕܗ̇ܰܘ ܕܥܶܒܪ̈ܶܝܗ̇ ܕܰܐܪܥܳܐ ܐܽܘܚܕܳܢܶܗ: ܘܝܰܩܪܽܘܗܝ ܙܰܝܚܽܝ̈ܗܝ ܠܶܓܝܽܘ̈ܢܶܐ ܕܒܶܝܬ ܐܰܒܳܐ ܠܣܽܘܠܳܩܶܗ ܘܰܪܥܶܡܘ ܩܽܘܕܳܫܰܝ̈ܗܽܘܢ ܒܰܡܪ̈ܰܘܡܶܐ ܘܒܽܘܪ̈ܟܳܬܗܽܘܢ ܒܰܫܡܰܝܳܐ ܒܡܶܬܥܰܠܝܳܢܽܘܬܶܗ: ܟܰܕ ܗ̇ܳܢܽܘܢ ܡ̇ܰܢ ܩܰܕܺܝܫ ܩܰܕܺܝܫ ܩܰܕܺܝܫ ܩܳܥܶܝܢ ܗܘܰܘ ܠܶܗ: ܘܗܳܠܶܝܢ ܕܶܝܢ ܡܰܙܥܩܺܝܢ ܗܘܰܘ ܕܰܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡ̣ܶܢ ܐܰܬܪܶܗ ܠܥܳܠܰܡ ܘܟܽܠ ܬܶܓ̈ܡܶܐ ܕܰܡܛܳܐ ܠܘܳܬܗܽܘܢ ܣܓܶܕܘ ܠܶܗ ܘܶܐܬܥܰܠܺܝ ܡ̣ܶܢ ܨܶܝܕܰܝ̈ܗܽܘܢ: ܘܫܰܒܚܽܘܗܝ ܒܰܪܩܺܝܥܳܐ ܕܥܽܘܫܢܶܗ: ܣܠܶܩ ܠܐܬܪܳܐ ܕܰܡܕܰܝܰܪ ܗܘܳܐ ܒܶܗ: ܘܠܐܝܟܳܐ ܕܡܶܢ ܩܕܺܝܡ ܐܺܝܬܰܘܗܝ ܗܘܳܐ ܡܰܥܡܪܶܗ: ܘܠܰܩܕܽܘܫ ܩܽܘܕܫܺܝ̈ܢ ܗ̇ܰܘ ܠܐ ܥܒܺܝܕ ܒܺܐܝ̈ܕܰܝܳܐ ܡܰܫܟܢܶܗ ܘܶܐܬܚܙܺܝ ܩܕܳܡ ܦܰܪܨܽܘܦܶܗ ܡܫܰܒܚܳܐ ܕܰܐܒܳܐ ܕܺܝܠܶܗ ܘܺܝܬܶܒ ܡ̣ܶܢ ܝܰܡܺܝܢܳܐ ܕܪܰܒܽܘܬܳܐ ܕܫܳܠܽܘܚܶܗ: ܘܥܰܠ ܬܪܽܘܢܳܘܣ ܕܡ̣ܶܢ ܥܳܠܰܡ ܡܰܬܩܰܢ ܕܗ̣ܽܘ ܐܺܝܬܰܘܗܝ ܟܽܘܪܣܝܶܗ: ܘܒܶܗ ܘܥܰܡܶܗ ܝܺܬܶܒ ܒܫܽܘܒܚܳܐ ܕܡܰܠܟܽܘܬܶܗ: ܘܡܶܛܽܠ ܗܳܕܶܐ ܢܩܰܕܶܡ ܐܰܦܰܘ̈ܗܝ ܒܬܰܘܕܺܝܬܳܐ ܕܰܐܠܳܗܽܘܬܶܗ ܕܗܳܕܶܐ ܟܽܠܳܗ̇ ܡܕܰܒܪܳܢܽܘܬܳܐ ܡܶܛܽܠ ܐܳܕܳܡ ܫܰܡܠܺܝ ܕܢܶܦܪܩܶܗ: ܘܗܳܕܶܐ ܛܰܝܒܽܘܬܳܐ ܫܰܟܶܢ ܠܶܗ ܒܰܚܢܳܢܶܗ: ܘܰܒܚܰܕܽܘܬܳܐ ܕܢܶܦܽܘܩ ܠܐܘܪܥܳܐ ܕܡܶܐܬܺܝܬܶܗ: ܘܒܳܐܐܰܪ ܢܛܽܘܣ ܘܥܰܡ ܡܰܠܐܟ̈ܶܐ ܩܰܕܺܝ̈ܫܶܐ ܢܝܰܩܰܪ ܣܽܘܠܳܩܶܗ: ܘܰܢܗܰܠܶܠ ܒܟܽܠܙܒܰܢ ܬܶܫܒ̈ܚܳܬܶܗ: ܘܠܐܒܽܘܗܝ ܓܢܺܝܙܳܐ ܘܩܰܕܺܝܫܳܐ ܫܳܠܽܘܚܶܗ: ܘܰܠܪܽܘܚܶܗ ܚܰܝܳܐ ܘܦܰܪܰܩܠܺܝܛܳܐ ܝܳܗܽܘܒܶܗ: ܚܕܳܐ ܐܠܰܗܽܘܬܳܐ ܘܚܰܝܠܐ ܕܒܰܬܠܳܬܳܐ ܩܢܽܘ̈ܡܶܐ ܡܶܫܬܰܒܚܳܐ ܡܬܽܘܡܳܝܽܘܬܶܗ ܘܒܰܐܠܳܗܽܘܬܶܗ ܘܰܒܚܰܝܠܶܗ: ܕܠܳܗ̇ ܫܽܘܒܚܳܐ ܡܶܢܟܽܠ ܢܶܫܡܳܐ ܕܒܳܪܽܘܝܽܘܬܶܗ: ܘܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

ܕܨܦܪܐ ܕܣܘܠܩܐ

ܨܠܘܬܐ ܕܫܘܪܝܐ

 

ܗܰܒܠܰܢ ܡܳܪܝܳܐ ܒܛܰܝܒܽܘܬܳܟ ܕܥܰܡ ܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܒܥܰܝ̈ܢܶܐ ܕܪ̈ܶܥܝܳܢܰܝܢ ܢܶܚܙܶܐ ܠܣܽܘܠܳܩܳܟ ܡܫܰܒܚܳܐ: ܘܢܶܬܗܰܪ ܒܰܡܕܰܒܪܳܢܽܘܬܳܟ ܚܰܟܺܝܡܰܬ݀ ܒܟܽܠ: ܘܰܢܛܰܝܶܒ ܠܶܒܰܘ̈ܳܬܰܢ ܠܰܡܩܰܒܠܳܢܽܘܬܳܐ ܕܫܽܘ̈ܟܳܢܰܝܟ ܐܠܰܗܳܝ̈ܶܐ: ܘܢܶܙܡܰܪ ܫܽܘܒܚܳܐ ܠܳܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܠܐ ܡܶܬܕܰܪܟܳܢܳܐ ܘܠܐ ܡܶܬܡܰܠܠܳܢܳܐ ܘܠܐ ܡܶܬܥܰܩܒܳܢܳܐ: ܠܗܰܘ ܪܳܡܳܐ ܕܶܐܬܬܰܚܬܺܝ ܠܰܙܥܽܘܪܽܘܬܳܐ ܘܰܐܣܶܩ ܠܰܢ ܥܰܡܶܗ ܠܰܫܡܰܝܳܐ: ܘܪܰܡܪܶܡ ܘܥܰܠܺܝ ܠܰܢ ܠܥܶܠ ܡ̣ܶܢ ܚܰܝܠܰܘ̈ܳܬܳܐ ܥܶܠܳܝ̈ܶܐ: ܘܰܐܘܬܒܰܢ ܥܰܡܶܗ ܡ̣ܶܢ ܝܰܡܺܝܢ ܐܰܒܽܘܗܝ: ܠܗܰܘ ܕܰܣܠܶܩ ܒܚܰܝܠܶܗ ܠܐ ܡܶܬܒܰܨܝܳܢܳܐ: ܘܟܰܕ ܡܛܳܐ ܠܰܥܢܳܢ̈ܶܐ ܥܢܳܢܳܐ ܩܰܒܶܠܬܶܗ: ܘܟܰܕ ܐܶܬܥܰܠܺܝ ܩܰܒܠܽܘܗܝ ܡܰܠܐܟ̈ܶܐ ܒܰܐܬܪܳܐ ܕܺܝܠܗܽܘܢ: ܘܟܰܕ ܬܽܘܒ ܐܶܬܥܰܠܺܝ ܩܰܒܠܽܘܗܝ ܟܪ̈ܽܘܒܶܐ: ܘܟܰܕ ܣܠܶܩ ܩܰܒܠܽܘܗܝ ܣܪ̈ܳܦܶܐ: ܘܟܰܕ ܐܶܬܥܰܠܺܝ ܩܰܒܠܽܘܗܝ ܡܰܘ̈ܬܒܶܐ ܘܡܳܪ̈ܰܘܳܬܳܐ: ܘܟܽܠ ܬܶܓ̈ܡܺܝܢ ܢܦܰܩܘ ܠܐܘܪܥܶܗ: ܘܟܽܠܗܶܝܢ ܐܰܪ̈ܟܰܐܣ ܥܶܠܳܝ̈ܳܬܳܐ ܠܬܶܫܒܽܘܚܬܶܗ ܘܶܐܬܥܰܠܺܝ ܗ̣ܽܘ ܠܥܶܠ ܡ̣ܶܢ ܟܽܠܗܽܘܢ ܠܰܫܡܰܘ̈ܗܝ ܥܶܠܳܝ̈ܶܐ: ܘܝܺܬܶܒ ܡ̣ܶܢ ܝܰܡܺܝܢ ܐܰܒܽܘܗܝ ܒܫܽܘܒܚܳܐ ܪܰܒܳܐ ܕܠܐ ܣܳܟܳܐ: ܘܟܽܠܗܽܘܢ ܬܶܓ̈ܡܶܐ ܩܳܥܶܝܢ ܘܰܡܫܰܒܚܺܝܢ: ܕܰܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡ̣ܶܢ ܐܰܬܪܶܗ: ܘܫܰܒܚܽܘܗܝ ܒܰܪܩܺܝܥܳܐ ܕܥܽܘܫܢܶܗ: ܫܰܒܚܽܘܗܝ ܒܣܽܘܓܳܐܐ ܕܪܰܒܽܘܬܶܗ: ܗ̇ܰܘ ܕܰܫܡܰܝ̈ܳܐ ܡܠܶܝܢ ܡ̣ܶܢ ܬܶܫܒܽܘܚܬܶܗ ܘܰܐܪܥܳܐ ܠܐ ܡܣܰܝܟܳܐ ܠܰܫܒܺܝܚܽܘܬܶܗ: ܕܠܶܗ ܝܳܐܐ ܫܽܘܒܚܳܐ܀

ܣܕܪܐ

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܐܠܰܗܳܐ ܫܰܪܺܝܪܳܐ ܕܡ̣ܶܢ ܐܠܰܗܳܐ ܫܰܪܺܝܪܳܐ: ܗ̇ܰܘ ܕܡ̣ܶܢ ܥܽܘܒܶܗ ܕܰܐܒܳܐ ܓܢܺܝܙܳܐ ܐܶܫܬܰܕܰܪܬ ܠܥܳܠܡܳܐ: ܐܰܝܟܰܢܳܐ ܕܠܰܢ ܗ̇ܳܢܽܘܢ ܕܰܢܦܰܠܢ ܡ̣ܶܢ ܥܶܠܰܬ݀ ܚܛܺܝܬܳܐ ܬܪܰܡܪܶܡ ܘܰܬܥܰܠܐܷ ܠܰܫܡܰܝܳܐ ܠܘܳܬ ܫܳܠܽܘܚܳܟ: ܠܳܟ ܬܰܘܕܺܝܬܳܐ ܘܢܽܘܗܪܳܐ ܕܡ̣ܶܢ ܥܽܘܒܶܗ ܓܰܐܝܳܐ ܕܰܐܒܳܐ ܠܘܳܬܰܢ ܡܚܺܝ̈ܠܐ ܘܰܡܥܰܪ̈ܙܠܰܝ ܒܰܚܛܺܝܬܳܐ ܐܶܫܬܠܰܚܬ: ܐܰܝܟܰܢܳܐ ܕܒܳܟ ܕܺܐܝܬܰܝܟ ܣܰܡܳܐ ܡܰܐܣܝܳܢܳܐ ܢܶܬܰܐܣ̈ܝܳܢ ܚܒܳܪ̈ܳܬܰܢ: ܠܳܟ ܬܶܫܒܽܘܚܬܳܐ ܕܰܢܚܶܬܬ ܡ̣ܶܢ ܡܶܕܝܳܪ̈ܶܐ ܪ̈ܳܡܶܐ ܘܰܡܥܰܠܰܝ̈ܳܐ ܘܶܐܬܥܰܛܰܦܬ ܕܡܽܘ̣ܬܳܐ ܕܥܰܒܕܳܐ ܘܰܢܣܰܒܬ ܦܰܓܪܳܐ ܡܢܰܦܫܳܐ ܡ̣ܶܢ ܒܬܽܘܠܬܳܐ: ܐܰܝܟܰܢܳܐ ܕܠܰܢ ܗ̇ܳܢܽܘܢ ܡܰܠܝ̈ܰܝ ܡ̣ܶܢ ܫܽܘ̈ܡܳܬܳܐ ܕܰܚܛܺܝܬܳܐ ܬܶܡܠܐܷ ܪܽܘܚܳܐ ܕܺܝܠܳܟ ܩܰܕܺܝܫܳܐ: ܐܶܬܺܝܠܶܕܬ ܦܰܓܪܳܐܝ̣ܬ ܘܶܐܬܚܙܰܝܬ ܒܥܳܠܡܳܐ ܐܰܝܟ ܒܰܪܢܳܫܳܐ: ܟܰܕ ܐܺܝܬܰܝܟ ܐܠܰܗܳܐ ܫܰܪܺܝܪܳܐ: ܐܶܬܗܰܦܰܟܬ ܥܰܡܰܢ ܥܰܠ ܐܰܪܥܳܐ ܐܰܝܟ ܡܶܣܟܺܢܳܐ: ܐܰܢ̱ܬ ܕܺܐܝܬܰܝܟ ܝܳܗܽܘܒܳܐ ܕܥܽܘܬܪ̈ܶܐ ܫܡܰܝ̈ܳܢܶܐ: ܘܰܣܥܰܪܬ ܒܰܒܪܺܝܬܳܐ ܬܶܕܡܪ̈ܳܬܳܐ ܬܡܺܝ̈ܗܳܬܳܐ: ܐܰܝܟܰܢܳܐ ܕܰܚܢܰܢ ܢܩܽܘܡ ܡ̣ܶܢ ܓܽܘܡܳܨܳܐ ܕܰܚܛܺܝܬܳܐ: ܥܰܠܬ ܠܒܶܝܬ ܕܺܝܢܳܐ ܐܰܝܟ ܚܰܝܳܒܳܐ: ܟܰܕ ܠܕܰܝܳ̈ܢܶܐ ܒܕܺܝܢܳܐ ܕܺܝܠܳܟ ܦܳܟܰܪ ܐܰܢ̱ܬ: ܣܠܶܩܬ ܠܰܨܠܺܝܒܳܐ ܐܰܝܟ ܥܳܒܶܕ ܒܺܝ̈ܫܳܬܳܐ: ܘܰܦܬܰܚܬ ܠܓܰܝܳܣܳܐ ܕܒܳܟ ܐܰܘܕܺܝ ܬܰܪܥܳܐ ܕܦܰܪܕܰܝܣܳܐ ܕܛܽܘ̈ܒܶܐ: ܘܥܰܡܳܟ ܐܰܫܘܺܝܬܳܝܗܝ ܠܡܶܥܰܠ: ܐܶܬܩܒܰܪܬ ܒܩܰܒܪܳܐ ܚܰܕܬܳܐ: ܐܰܝܟܰܢܳܐ ܕܠܰܢ ܬܰܦܢܶܐ ܠܰܥܕܶܝܢ ܐܰܬܪܳܐ ܕܺܝܠܰܢ ܩܰܕܡܳܝܳܐ ܕܰܐܘܒܶܕܢܰܢ: ܢܚܶܬܬ ܠܗܰܘܬܳܐ ܕܡܺܝ̈ܬܶܐ ܘܰܙܪܰܥܬ ܒܗܳܡܳܢ ܕܰܩܒܺܝܪ̈ܶܐ ܫܰܝܢܳܐ ܘܢܽܘܚܳܡܳܐ ܘܚܰܝ̈ܶܐ ܚܰܕ̈ܬܶܐ ܘܶܐܬܢܰܚܰܡܬ ܒܙܳܟܽܘܬܳܐ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܩܳܡܬ ܘܰܐܩܺܝܡܬ ܥܰܡܳܟ ܠܟܶܢܫܳܐ ܕܩܰܕܺܝ̈ܫܶܐ ܕܡ̣ܶܢ ܢܽܘܓܪܳܐ ܫܟܺܝܒܺܝܢ ܗܘܰܘ ܘܚܳܝܪܺܝܢ ܗܘܰܘ ܠܡܶܐܬܺܝܬܳܟ: ܘܰܣܥܰܪܬ ܐܶܢܽܘܢ ܠܬܰܠܡܺܝ̈ܕܰܝܟ ܒܕܽܘܟ̈ܝܳܬܳܐ ܡܫܰܚ̈ܠܦܳܬܳܐ ܘܫܰܪܰܪܬ ܐܶܢܽܘܢ ܥܰܠ ܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܘܰܓܠܰܝܬ ܠܗܽܘܢ ܥܰܠ ܢܽܘܚܳܡܳܟ: ܘܟܰܢܶܫܬ ܐܶܢܽܘܢ ܠܘܰܥܕܶܗ ܕܣܽܘܠܳܩܳܟ ܬܡܺܝܗܳܐ ܕܠܰܫܡܰܝܳܐ: ܘܚܰܘܺܝܬ ܐܶܢܽܘܢ ܪܽܘܡܪܳܡܳܟ: ܕܰܠܘܳܬ ܐܰܒܽܘܟ ܡܫܰܒܚܳܐ: ܘܶܐܬܬܪܺܝܡܬ ܘܶܐܬܥܰܠܺܝܬ ܘܰܣܠܶܩܬ ܡ̣ܶܢ ܐܰܪܥܳܐ ܠܰܫܡܰܝܳܐ: ܘܰܢܓܰܕܬ ܠܰܢ ܥܰܡܳܟ ܕܰܣܚܺܝ̣ܦܺܝܢ ܗܘܰܝܢ ܥܰܠ ܥܰܦܪܳܐ: ܘܟܰܕ ܒܙܳܟܽܘܬܳܐ ܢܰܦܫܳܟ ܠܘܳܬ ܝܳܠܽܘܕܳܟ ܥܰܠܺܝܬ: ܬܶܗܪܳܐ ܘܕܽܘܡܳܪܳܐ ܡܠܰܝܬ ܠܚܰܝܠܰܘ̈ܳܬܳܐ ܩܰܕܺܝ̈ܫܶܐ ܘܰܫܡܰܝ̈ܳܢܶܐ: ܟܰܕ ܡܫܰܐܠܺܝܢ ܗܘܰܘ ܠܰܚܕ̈ܳܕܶܐ ܘܳܐܡܪܺܝܢ: ܕܡܰܢܽܘ ܟܰܝ ܗܳܢܳܐ ܕܡܶܬܥܰܠܐܷ ܒܙܳܟܽܘܬܳܐ ܟܰܕ ܬܰܪ̈ܥܶܐ ܗܰܘ̈ܢܶܐ ܕܰܫܡܰܝ̈ܳܢܶܐ ܡܶܬܦܰܬܚܺܝܢ ܩܕܳܡܰܘܗܝ: ܡܰܢܽܘ ܗܳܢܳܐ ܕܡܶܬܠܰܘܶܐ ܡ̣ܶܢ ܥܢܳܢܳܐ ܘܰܪܩܺܝܥܳܐ ܣܳܓܶܕ ܩܕܳܡܰܘܗܝ: ܡܰܢܽܘ ܗܳܢܳܐ ܕܡܶܬܒܰܪܰܟ ܡ̣ܶܢ ܓܺܝ̈ܓܠܐ ܡ̈ܰܠܳܠܳܬܳܐ ܘܰܣܪ̈ܳܦܶܐ ܙܳܠܚܺܝܢ ܩܽܘ̈ܕܳܫܶܐ ܠܐܬܪܳܐ ܕܰܫܟܺܝܢܬܶܗ: ܡܰܢܽܘ ܗܳܢܳܐ ܕܡܶܬܬܪܺܝܡ ܠܰܫܡܰܝܳܐ ܘܡ̣ܶܢ ܥܰܪ̈ܦܶܠܐ ܡܥܰܠܰܝ ܗ̣ܽܘ ܣܽܘܠܳܩܶܗ: ܡܰܢܽܘ ܗܳܢܳܐ ܕܰܡܒܰܙ̈ܥܳܢ ܐܺܝܕܰܘ̈ܗܝ ܘܪ̈ܶܓܠܘܗܝ ܘܚܰܝܠܰܘ̈ܳܬܳܐ ܕܰܫܡܰܝܳܐ ܡܩܰܒܠܺܝܢ ܠܶܗ ܒܚܰܕܽܘܬܳܐ ܘܒܰܪܘܳܙܳܐ: ܘܒܶܪ̈ܝܳܬܳܐ ܡܫܰܒ̈ܚܳܢ ܠܶܗ: ܡܰܢܽܘ ܗܳܢܳܐ ܕܰܬܪܺܝܥ ܣܶܛܪܶܗ ܒܠܽܘܟܳܝܬܳܐ ܘܰܪܩܺܝܥܳܐ ܪܳܐܶܬ ܡܶܢܶܗ ܘܰܦܪܰܩ ܠܰܫܒܺܝܬܳܐ ܡ̣ܶܢ ܛܪܽܘܢܽܘܬܶܗ ܕܡܳܪܽܘܕܳܐ: ܡܰܢܽܘ ܗܳܢܳܐ ܕܰܥܛܺܝܦ ܦܰܓܪܳܐ ܐ̱ܢܳܫܳܝܳܐ ܘܰܐܝܟ ܡܳܪܝܳܐ ܚܰܝܠܬܳܢܳܐ ܡܶܬܝܰܩܰܪ ܘܺܐܝܬܰܘܗܝ ܫܰܪܺܝܪܳܐܝ̣ܬ ܐܠܰܗܳܐ ܕܥܰܠ ܟܽܠ: ܡܰܢܽܘ ܗܳܢܳܐ ܕܰܐܝܟ ܒܰܪܢܳܫܳܐ ܡ̣ܶܢ ܐܰܪܥܳܐ ܡܶܬܥܰܠܐܷ ܘܰܐܝܟ ܐܠܰܗܳܐ ܡ̣ܶܢ ܫܡܰܝܳܐ ܡܶܬܩܰܒܰܠ: ܡܰܢܽܘ ܗܳܢܳܐ ܕܡ̣ܶܢ ܬܰܠܡܺܝ̈ܕܰܘܗܝ ܐܰܝܟ ܒܰܪܢܳܫܳܐ ܡܶܬܠܰܘܶܐ ܘܡ̣ܶܢ ܓܺܝ̈ܓܠܐ ܕܢܽܘܪܳܐ ܚܰܝܬܳܐ ܐܰܝܟ ܐܠܰܗܳܐ ܡܶܬܒܰܪܰܟ: ܡܰܢܽܘ ܗܳܢܳܐ ܕܟܳܘ̈ܙܳܢ ܡܶܢܶܗ ܦܠܰܓ̈ܶܐ ܫܓܺܝܪ̈ܳܬܳܐ ܕܒܶܝܬ ܐܰܒܳܐ ܣܳܓ̈ܕܳܢ ܠܶܗ ܒܶܪ̈ܝܳܬܳܐ ܒܰܐܬܪܗܶܝܢ: ܡܰܢܽܘ ܗܳܢܳܐ ܕܰܡܙܰܝ̈ܚܳܢ ܠܶܗ ܓܽܘ̈ܕܶܐ ܘܟܶܢ̈ܫܶܐ ܕܡܰܠܐܟ̈ܶܐ ܘܕܳܝܨܺܝܢ ܩܕܳܡܰܘܗܝ ܥܺܝܪ̈ܶܐ ܘܰܟܪ̈ܽܘܒܶܐ ܒܝܽܘܒܳܒܰܝ̈ܗܽܘܢ: ܡܰܢܽܘ ܗܳܢܳܐ ܕܠܰܩܕܽܘܫܩܽܘ̈ܕܫܺܝܢ ܓܰܘܳܝܳܐ ܡܶܬܥܰܠܐܷ ܟܰܕ ܥܛܺܝܦ ܦܰܓܪܳܐ ܐ̱ܢܳܫܳܝܳܐ: ܡܰܢܽܘ ܗܳܢܳܐ ܕܡ̣ܶܢ ܐܰܪܥܳܐ ܣܳܠܶܩ ܘܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܒܫܰܘܝܽܘܬ ܐܺܝܩܳܪܳܐ ܐܺܝܬܰܘܗܝ ܘܰܡܩܰܕܫܺܝܢ ܠܶܗ ܣܪ̈ܳܦܶܐ ܒܩܽܘܕܳܫܰܝ̈ܗܽܘܢ ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܘܬܽܘܒ ܡܦܰܢܶܝܢ ܒܚܰܕܽܘܬܳܐ ܘܳܐܡܪܺܝܢ: ܗܳܢܰܘ ܫܰܪܺܝܪܳܐܝ̣ܬ ܡܳܪܝܳܐ ܚܰܝܠܬܳܢܳܐ: ܗܳܢܰܘ ܡܳܪܝܳܐ ܓܰܢ̱ܒܳܪܳܐ ܘܰܩܪܰܒܬܳܢܳܐ: ܗܳܢܰܘ ܡܳܪܝܳܐ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ ܘܰܕܟܽܠܗܶܝܢ ܒܶܪ̈ܝܳܬܳܐ: ܗܳܢܰܘ ܡܳܪܝܳܐ ܬܰܩܺܝܦܳܐ ܘܢܰܨܺܝܚܳܐ ܒܰܩܪܳܒܳܐ: ܗܳܢܰܘ ܡܳܪܝܳܐ ܫܰܠܺܝܛܳܐ ܕܰܬܪ̈ܰܝܗܽܘܢ ܥܳܠܡ̈ܶܐ: ܗܳܢܰܘ ܡܳܪܝܳܐ ܦܳܪܽܘܩܳܐ ܕܰܫܒܰܝ̈ܳܐ: ܗܳܢܰܘ ܡܳܪܝܳܐ ܡܚܰܪܪܳܢܳܐ ܕܰܚܒܺܝ̈ܫܶܐ: ܗܳܢܰܘ ܡܳܪܝܳܐ ܕܰܐܥܕܺܝ ܫܒܺܝܬܳܐ ܡ̣ܶܢ ܐܳܟܶܠܩܰܪܨܳܐ: ܗܳܢܰܘ ܡܳܪܝܳܐ ܕܢܰܚܶܡ ܠܐܕܳܡ ܘܰܠܝܰܠܕܰܘ̈ܗܝ ܡ̣ܶܢ ܗܰܘܬܳܐ ܕܰܩܒܺܝܪ̈ܶܐ: ܗܳܢܰܘ ܡܳܪܝܳܐ ܕܡ̣ܶܢ ܩܕܳܡ ܥܳܠܡ̈ܶܐ ܐܺܝܬܰܘܗܝ ܘܰܗܘܳܐ ܒܪܳܐ ܠܰܒܬܽܘܠܬܳܐ ܒܚܰܪܰܬ݀ ܙܰܒ̈ܢܶܐ: ܗܳܢܰܘ ܡܳܪܝܳܐ ܕܡܶܛܽܠܳܬܶܗ ܪܫܰܡܘ ܟܽܠܗܽܘܢ ܢܒܺܝ̈ܶܐ ܘܙܰܕܺܝ̈ܩܶܐ ܘܟܺܐܢ̈ܶܐ ܒܫܰܪ̈ܒܰܝܗܽܘܢ ܡܰܠܶܠܘ ܛܽܘܦܣܳܢܳܐܝ̣ܬ ܘܰܒܣܽܘܠܳܩܶܗ ܓܡܰܪ ܡܶܠܰܝ̈ܗܽܘܢ: ܗܳܢܰܘ ܡܳܪܝܳܐ ܕܩܰܕܶܡ ܨܳܪ ܠܶܗ ܕܰܘܺܝܕ ܛܽܘܦܣܳܐ ܘܬܰܪ̈ܥܶܐ ܐܶܬܦܰܬܰܚܘ ܩܕܳܡܰܘܗܝ ܟܰܕ ܣܳܠܶܩ: ܗܳܢܰܘ ܡܳܪܝܳܐ ܕܙܰܝܰܚ ܡܽܘܫܶܐ ܐ̱ܪ̈ܳܙܰܘܗܝ ܒܡܶܨܪܶܝܢ ܘܰܪܫܰܡ ܐܠܶܝܳܐ ܣܽܘܠܳܩܶܗ ܒܚܽܘܪܺܝܒ: ܗܳܢܰܘ ܡܳܪܝܳܐ ܕܒܰܕܶܩ ܥܠܰܘܗܝ ܕܳܢܺܝܶܐܝܠ ܘܫܰܘܕܰܥ ܚܢܽܘܟ ܪܽܘܡܪܳܡܶܗ ܕܠܰܫܡܰܝܳܐ: ܗܳܢܰܘ ܡܳܪܝܳܐ ܕܙܰܝܚܶܗ ܝܰܥܩܽܘܒ ܒܒܶܝܬ ܐܺܝܠ ܘܒܰܕܩܶܗ ܐܺܝܣܚܳܩ ܒܰܕܒܺܝܚܽܘܬܶܗ ܒܛܽܘܪܳܐ: ܗܳܢܰܘ ܡܳܪܝܳܐ ܕܰܐܟܪܙܶܗ ܙܟܰܪܝܳܐ ܒܰܢܒܺܝܽܘܬܶܗ ܘܚܰܘܝܶܗ ܚܰܙܩܺܝܶܐܝܠ ܒܚܶܙܘܳܐ ܕܡܰܪܟܰܒܬܶܗ: ܗܳܢܰܘ ܡܳܪܝܳܐ ܕܶܐܡܰܪ ܥܠܰܘܗܝ ܐܶܫܰܥܝܳܐ ܕܰܚܙܳܐ ܘܰܫܡܰܥ ܠܰܣܪ̈ܳܦܶܐ ܕܰܡܩܰܕܫܺܝܢ ܠܶܗ: ܗܳܢܰܘ ܡܳܪܝܳܐ ܕܬܶܗܪܳܐ ܘܕܽܘܡܳܪܳܐ ܡܰܠܝܳܐ ܡܰܣܰܩܬܶܗ ܟܰܕ ܚܳܝܪܺܝܢ ܒܶܗ ܬܰܠܡܺܝ̈ܕܶܐ: ܘܰܡܙܰܝܚܺܝܢ ܠܶܗ ܢܽܘܪ̈ܳܢܶܐ ܒܩܽܘܠܳܣܰܝ̈ܗܽܘܢ ܘܩܰܒܠܽܘܗܝ ܫܡܰܝ̈ܳܢܶܐ ܒܣܶܓ̈ܕܳܬܗܽܘܢ: ܟܰܕ ܩܳܥܶܝܢ ܒܚܰܕܽܘܬܳܐ ܘܳܐܡܪܺܝܢ: ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܨܒܰܐܘܳܬ: ܩܰܕܺܝܫ ܡܳܪܝܳܐ ܕܰܙܟܳܝܗܝ ܠܰܛܪܽܘܢܳܐ: ܩܰܕܺܝܫ ܡܳܪܝܳܐ ܕܚܰܝܒܶܗ ܠܡܳܪܽܘܕܳܐ: ܩܰܕܺܝܫ ܡܳܪܝܳܐ ܕܰܐܓܶܣ ܒܓܰܘ ܩܰܒܪܳܐ: ܘܶܐܬܢܰܚܰܡ ܘܩܳܡ ܠܰܬܠܳܬܳܐ ܝܰܘ̈ܡܺܝܢ ܓܰܢ̱ܒܳܪܳܐܝ̣ܬ: ܩܰܕܺܝܫ ܡܳܪܝܳܐ ܕܰܢܚܶܬ ܠܒܶܝܬ ܡܺܝ̈ܬܶܐ ܒܨܶܒܝܳܢܶܗ ܘܩܳܡ ܐܰܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܩܰܕܺܝܫ ܡܳܪܝܳܐ ܕܥܰܠܺܝ ܗ̣ܽܘ ܠܶܗ ܘܰܣܠܶܩ ܠܘܳܬ ܐܰܒܳܐ ܒܫܽܘܒܚܳܐ ܠܐܝܟܳܐ ܕܺܐܝܬܰܘܗܝ ܗܘܳܐ ܠܐ ܡܫܰܢܝܳܢܳܐܝ̣ܬ ܩܰܕܺܝܫ ܡܳܪܝܳܐ ܕܡܶܬܩܰܕܶܫ ܡ̣ܶܢ ܟܽܠܗܽܘܢ ܚܰܝܠܰܘ̈ܳܬܳܐ ܘܡ̣ܶܢ ܟܽܠܗܶܝܢ ܢܰܦ̈ܫܳܬܳܐ ܕܩܰܕܺܝ̈ܫܶܐ ܕܺܝܠܶܗ: ܩܰܕܺܝܫ ܡܳܪܝܳܐ ܕܰܐܣܶܩ ܥܰܡܶܗ ܠܥܰܦܪ̈ܳܢܶܐ ܠܰܫܡܰܝܳܐ ܠܘܳܬ ܫܳܠܽܘܚܶܗ: ܩܰܕܺܝܫ ܡܳܪܝܳܐ ܕܰܐܣܶܩ ܥܰܡܶܗ ܠܥܰܦܪ̈ܳܢܶܐ ܠܰܫܡܰܝܳܐ ܠܘܳܬ ܫܳܠܽܘܚܶܗ: ܩܰܕܺܝܫ ܡܳܪܝܳܐ ܕܰܡܠܳܗ̇ ܠܐܪܥܳܐ ܬܶܗܪܳܐ ܒܡܰܚܰܬܬܶܗ: ܩܰܕܺܝܫ ܡܳܪܝܳܐ ܕܚܰܕܺܝ ܠܰܫܡܰܝ̈ܳܢܶܐ ܒܣܽܘܠܳܩܶܗ: ܘܥܰܠܗܳܝ ܐܳܦ ܚܢܰܢ ܚܰܛܳܝ̈ܶܐ ܥܰܡ ܚܰܝܠܰܘ̈ܳܬܳܐ ܡܰܠܐܟܳܝ̈ܶܐ ܢܰܙܥܶܩ ܝܰܘܡܳܢܳܐ ܘܢܺܐܡܰܪ: ܕܰܣܠܶܩ ܐܠܰܗܳܐ ܒܫܽܘܒܚܳܐ ܘܡܳܪܝܳܐ ܒܩܳܠܐ ܕܩܰܪܢܳܐ ܘܙܰܘܚܳܐ ܕܙܳܟܽܘܬܳܐ: ܘܒܳܥܶܝܢܰܢ ܕܶܝܢ ܟܰܕ ܡܦܺܝܣܺܝܢܰܢ ܠܳܟ ܡܳܪܝܳܐ ܒܝܰܘܡܳܐ ܗܳܢܳܐ ܕܥܰܕܥܺܐܕܳܟ: ܕܰܬܫܰܟܶܢ ܠܰܢ ܕܢܶܬܥܰܠܐܷ ܒܳܟ ܐܳܦ ܚܢܰܢ ܠܘܳܬ ܝܳܠܽܘܕܳܟ: ܟܰܕ ܕܶܝܢ ܐܰܪܥܳܐ ܘܰܐܪ̈ܥܳܢܝܳܬܳܐ ܡܥܰܠܐܷ ܐܰܢ̱ܬ ܠܰܢ: ܠܘܳܬ ܪܰܘܡܳܐ ܕܺܝܕܰܥܬܳܐ ܕܺܝܠܳܟ ܐܠܰܗܳܝܬܳܐ: ܘܕܰܠܐܴ ܠܢܰܦ̈ܫܳܬܰܢ ܡ̣ܶܢ ܛܽܘܒܳܥܳܐ ܕܰܚܛܺܝܬܳܐ: ܘܓܶܕ ܡܰܚܫ̈ܒܳܬܰܢ ܡ̣ܶܢ ܐܰܪܥܳܐ: ܘܥܰܠܐܴ ܡܰܕ̈ܥܰܝܢ ܠܰܫܡܰܝܳܐ: ܐܰܩܢܳܐ ܠܰܢ ܓܶܦ̈ܶܐ ܩܰܠܺܝ̈ܠܐ ܕܪܽܘܚܳܐ: ܘܗܰܒܠܰܢ ܕܰܢܛܽܘܣ ܠܐܘܪܥܳܟ ܒܡܶܐܬܺܝܬܳܟ ܕܬܰܪܬܶܝܢ ܫܒܺܝܚܬܳܐ ܘܰܐܠܳܗܳܝܬܳܐ: ܘܰܐܫܘܳܐ ܠܰܢ ܠܕܽܘܝܳܪܳܐ ܕܥܰܡ ܗ̇ܳܢܽܘܢ ܕܒܰܐܦ̈ܶܐ ܓܰܠܝ̈ܳܬܳܐ ܥܬܺܝܕܺܝܢ ܕܰܢܩܰܒܠܽܘܢܳܟ: ܘܠܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܩܰܕܶܡܘ ܚܙܰܩܘ ܠܘܳܬܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܥܰܡ ܐܶܡܪ̈ܶܐ ܒܢ̈ܰܝ ܝܰܡܺܝܢܳܟ ܛܰܟܶܣ ܘܰܡܢܺܝ: ܘܳܐܦ ܚܢܰܢ ܥܰܡܗܽܘܢ ܠܰܓܢܽܘܢܳܟ ܢܶܥܽܘܠ: ܘܰܐܟܚܕܳܐ ܒܓܽܘ̈ܕܶܐ ܕܩܰܕܺܝ̈ܫܰܝܟ ܢܙܰܡܰܪ ܠܳܟ ܬܶܫܒ̈ܚܳܬܳܐ ܦܰܐܝ̈ܳܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

 

ܡܫܺܝܚܳܐ ܚܰܝܠܐ ܐܺܝܬܝܳܝܳܐ ܕܡ̣ܶܢ ܐܰܒܳܐ ܕܰܠܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܬܰܚܽܘܒܳܐ ܐܶܬܬܰܚܬܺܝ ܘܰܦܪܰܩ ܘܚܰܪܰܪ ܠܰܢ  ܡ̣ܶܢ ܢܽܘ̈ܬܳܥܶܐ ܕܰܚܛܳܗ̈ܶܐ ܒܰܡܕܰܒܪܳܢܽܘܬܳܐ ܕܺܝܠܶܗ ܐܠܰܗܳܝܬܳܐ: ܐܰܢ̱ܬ ܡܳܪܝ ܒܝܰܕ ܪ̈ܰܚܡܰܝܟ ܡܬܽܘܡܳܝ̈ܶܐ ܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܣܽܘܠܳܩܳܟ ܕܡ̣ܶܢ ܐܰܪܥܳܐ ܠܰܫܡܰܝܳܐ: ܘܒܳܥܶܝܢܰܢ ܡܶܢܳܟ ܘܡܶܬܟܰܫܦܺܝܢܰܢ ܠܳܟ ܕܬܶܬܪܽܘܨ ܠܪ̈ܺܝܫܶܐ ܕܺܝܠܰܢ ܟܦܺܝ̈ܦܶܐ ܠܘܳܬ ܫܡܰܝܳܐ ܒܢܳܛܽܘܪܽܘܬܳܐ ܕܦܽܘܩ̈ܕܳܢܰܝܟ ܩܰܕܺܝ̈ܫܶܐ ܘܡܰܥܒ̈ܕܰܝ ܚܰܝ̈ܶܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗܰܘ ܠܐ ܡܒܰܣܪܳܐ ܕܶܐܬܒܰܣܰܪ ܘܠܰܟܝܳܢܰܢ ܐܰܣܶܩ ܥܰܡܶܗ ܠܪ̈ܰܘܡܶܐ ܥܶܠܳܝ̈ܶܐ: ܘܚܰܪܪܶܗ ܡ̣ܶܢ ܥܰܒܕܽܘܬܶܗ ܕܣܳܛܳܢܳܐ ܒܝܰܕ ܣܽܘܠܳܩܶܗ ܕܠܰܫܡܰܝܳܐ: ܠܗܰܘ ܕܰܠܥܶܠ ܡܶܢ ܛܶܟ̈ܣܶܐ ܘܬܶܓ̈ܡܶܐ ܕܰܟܪ̈ܽܘܒܶܐ ܘܕܰܣܪ̈ܳܦܶܐ ܐܶܬܥܰܠܺܝ: ܘܟܽܠ ܚܰܕ ܡ̣ܶܢ ܗܰܘ̈ܢܶܐ ܩܰܒܠܶܗ ܘܙܰܝܚܶܗ ܥܕܰܡܳܐ ܠܐܬܪܳܐ ܕܺܝܠܶܗ: ܘܦܳܫܘ ܡܶܢܶܗ ܟܰܕ ܬܰܗܺܝܪܺܝܢ ܘܰܡܫܰܒܚܺܝܢ: ܗ̇ܰܘ ܕܡܰܠܐܟ̈ܶܐ ܚܕܺܝܘ ܒܣܽܘܠܳܩܶܗ ܒܗܳܝ ܕܶܐܬܚܰܝܰܕ ܠܐܪ̈ܥܳܢܶܐ ܘܶܐܫܬܰܝܢܰܬ݀ ܪܓܺܝܙܽܘܬܳܐ ܕܒܰܡܨܰܥܬܳܐ: ܠܗܰܘ ܕܠܐ ܡܰܠܐܟ̈ܶܐ ܘܠܐ ܫܽܘܠܛܳܢ̈ܶܐ ܘܠܐ ܚܰܝ̈ܠܐ ܘܠܐ ܡܳܪ̈ܰܘܳܬܳܐ ܐܰܪܓܶܫܘ ܒܡܰܚܰܬܬܶܗ ܒܣܽܘܠܳܩܶܗ ܕܶܝܢ ܕܥܰܡ ܒܶܣܪܳܐ ܡܫܰܒܚܺܝܢ ܗܘܰܘ ܟܰܕ ܐܳܡܪܺܝܢ: ܫܰܒܰܚܘ ܠܡܳܪܝܳܐ ܕܚܰܝܠܰܘ̈ܳܬܳܐ ܕܗܽܘܝܽܘ ܡܰܠܟܳܐ ܕܬܶܫܒܽܘܚܬܳܐ ܕܠܶܗ ܝܳܐܐ ܫܽܘܒܚܳܐ܀

 

ܣܕܪܐ

 

ܐܠܰܗܳܐ ܡܶܠܬܳܐ ܕܰܐܒܳܐ ܡܬܽܘܡܳܝܳܐ: ܗ̇ܰܘ ܕܶܐܬܡܰܠܰܠ ܐ̱ܪܳܙܳܢܳܐܝ̣ܬ ܡ̣ܶܢ ܢܒܺܝ̈ܶܐ: ܘܶܐܬܟܪܶܙ ܓܰܠܝܳܐܝ̣ܬ ܡ̣ܶܢ ܫܠܺܝ̈ܚܶܐ ܩܰܕܺܝ̈ܫܶܐ: ܡܰܠܟܳܐ ܕܡܰܠܐܟ̈ܶܐ ܡܫܰܡܫܺܝܢ ܠܐܝܩܳܪܶܗ ܘܡܳܪܳܐ ܕܡܳܪ̈ܰܘܳܬܳܐ ܡܙܰܝܚܺܝܢ ܠܶܗ: ܗ̇ܰܘ ܕܚܰܕܺܝ ܠܐܪ̈ܥܳܢܶܐ ܒܡܰܚܰܬܬܶܗ ܘܰܐܬܗܰܪ ܠܰܫܡܰܝ̈ܳܢܶܐ ܒܡܰܣܰܩܬܶܗ ܟܰܕ ܠܐ ܡܬܽܘܡ ܫܒܰܩ ܘܰܐܪܦܺܝ ܟܽܘܪܣܝܳܐ ܕܬܶܫܒܽܘܚܬܶܗ: ܗ̇ܰܘ ܕܰܒܪ̈ܰܚܡܰܘܗܝ ܠܐ ܡܶܬܡܰܠܠܳܢ̈ܶܐ ܬܰܚܬܺܝ ܝܳܬܶܗ ܠܦܽܘܪܩܳܢܳܐ ܕܰܓܒܺܝܠܬܶܗ: ܘܠܰܢ ܗ̇ܳܢܽܘܢ ܕܰܒܚܶܫܽܘܟܳܐ ܘܰܒܛܶܠܳܠܰܝ̈ ܡܰܘܬܳܐ ܝܳܬܒܺܝܢ ܗܘܰܝܢ ܦܪܰܩ: ܘܢܽܘܗܪܳܐ ܪܰܒܳܐ ܕܢܰܚ ܠܰܢ ܒܡܶܐܬܺܝܬܶܗ: ܘܡ̣ܶܢ ܕܰܣܥܰܪ ܟܽܠܳܗ̇ ܡܕܰܒܪܳܢܽܘܬܶܗ: ܦܰܓܪܳܢܳܐܝ̣ܬ ܐܶܬܥܰܠܺܝ ܨܶܝܕ ܫܳܠܽܘܚܶܗ: ܘܰܠܟܽܠܗܽܘܢ ܚܰܝܠܰܘ̈ܳܬܳܐ ܥܶܠܳܝ̈ܶܐ ܐܰܬܗܰܪ ܒܡܰܣܰܩܬܶܗ ܕܰܚܙܰܘ ܠܗܰܘ ܡܶܠܬܳܐ ܐܠܰܗܳܐ ܘܰܐܒܳܐ: ܠܗܰܘ ܕܳܐܕܳܡ ܕܰܬܪܶܝܢ ܐܶܬܟܰܢܺܝ: ܠܗܰܘ ܡܳܪܳܗ̇ ܕܬܶܫܒܽܘܚܬܳܐ: ܠܗܰܘ ܫܘܶܐ ܒܽܐܘܣܺܝܰܐ ܠܐܠܳܗܳܐ ܐܰܒܳܐ: ܕܦܰܓܪܳܢܳܐܝ̣ܬ ܐܶܣܬܰܠܰܩ ܟܰܕ ܚܰܝܠܰܘ̈ܳܬܳܐ ܡ̇ܰܢ ܡܰܠܐܟܳܝ̈ܶܐ ܡܰܙܥܩܺܝܢ ܘܳܐܡܪܺܝܢ: ܐܰܪܺܝܡܘ ܬܰܪ̈ܥܶܐ ܪ̈ܺܝܫܶܐ ܕܺܝܠܟܽܘܢ ܕܢܶܥܽܘܠ ܡܰܠܟܳܐ ܕܺܐܝܩܳܪ̈ܶܐ: ܡܶܛܽܠ ܗܳܕܶܐ ܒܬܶܗܪܳܐ ܥܺܝܪ̈ܶܐ ܡܫܰܐܠܺܝܢ ܗܘܰܘ ܕܡܰܢܽܘ ܗܳܢܳܐ ܡܰܠܟܳܐ ܕܬܶܫܒܽܘܚܬܳܐ: ܢܒܺܝ̈ܶܐ ܕܶܝܢ ܩܳܥܶܝܢ ܗܘܰܘ ܕܡܳܪܝܳܐ ܚܰܝܠܬܳܢܳܐ ܘܥܰܫܺܝܢܳܐ ܘܰܩܪܰܒܬܳܢܳܐ ܐܺܝܬܰܘܗܝ: ܗ̇ܰܘ ܕܰܣܠܶܩ ܠܰܫܡܰܝܳܐ ܒܫܽܘܒܚܳܐ ܘܙܰܘܚܳܐ ܕܙܳܟܽܘܬܳܐ ܠܰܡܪܰܘܡܳܐ ܘܰܫܒܳܐ ܫܒܺܝܬܶܗ ܡ̣ܶܢ ܒܥܶܠܕ̈ܒܳܒܰܘܗܝ ܘܥܰܡܶܗ ܐܰܣܩܳܗ̇ ܠܰܫܡܰܝܳܐ ܘܡ̣ܶܢ ܝܰܡܺܝܢܳܐ ܕܰܐܒܳܐ ܕܺܝܠܶܗ ܐܰܘܬܒܳܗ̇: ܠܳܟ ܗܳܟܺܝܠ ܘܰܩܕܳܡܰܝܟ ܡܳܪܝܳܐ ܡܩܰܪܒܺܝܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܣܽܘܠܳܩܳܟ ܫܒܺܝܚܳܐ ܘܰܡܠܐܷ ܬܶܗܪܳܐ: ܡܶܛܽܠ ܕܒܰܡܕܰܒܪܳܢܽܘܬܳܐ ܕܺܝܠܳܟ ܦܪܰܩܬ ܘܫܰܘܙܶܒܬ ܘܚܰܪܰܪܬ ܠܰܢ: ܘܰܒܝܰܕ ܣܽܘܠܳܩܳܟ ܬܡܺܝܗܳܐ ܐܰܣܶܩܬ ܘܰܐܘܬܶܒܬ ܠܰܢ ܒܫܽܘܒܚܳܐ ܥܰܡܳܟ ܡ̣ܶܢ ܝܰܡܺܝܢܶܗ ܕܰܐܒܽܘܟ: ܕܥܰܡܗܽܘܢ ܕܚܰܝܠܰܘ̈ܳܬܳܐ ܓܢܺܝ̈ܙܶܐ ܘܩܰܕܺܝ̈ܫܶܐ ܕܰܠܥܶܠ: ܘܥܰܡ ܓܽܘ̈ܕܶܐ ܩܰܕܺܝ̈ܫܶܐ ܕܰܢܒܺܝ̈ܶܐ ܘܕܰܫܠܺܝ̈ܚܶܐ ܢܙܰܡܰܪ ܘܢܺܐܡܰܪ: ܕܚܰܝ̈ܶܐ ܡ̇ܰܢ ܐܺܝܬܰܝܟ ܡܶܛܽܠ ܕܒܳܟ ܚܝܰܝܢܰܢ ܡ̣ܶܢ ܡܺܝܬܽܘܬܳܐ ܕܰܚܛܺܝܬܳܐ: ܘܢܽܘܗܪܳܐ ܡ̇ܰܢ ܐܺܝܬܰܝܟ ܡܶܛܽܠ ܕܒܳܟ ܐܶܬܢܰܗܰܪܢܰܢ ܚܢܰܢ ܗ̇ܳܢܽܘܢ ܕܰܒܚܶܫܽܘܟܳܐ ܘܰܒܛܶܠܳܠܰܝ̈ ܡܰܘܬܳܐ ܝܳܬܒܺܝܢ ܗܘܰܝܢ: ܘܽܐܘܪܚܳܐ ܡ̇ܰܢ ܘܬܰܪܥܳܐ ܐܺܝܬܰܝܟ ܡܶܛܽܠ ܕܒܳܟ ܗܦܰܟܢܰܢ ܘܗܰܠܶܟܢܰܢ ܠܘܳܬ ܒܰܝܬܳܝܽܘܬܳܐ ܛܽܘܒܬܳܢܺܝ̣ܬܳܐ ܘܰܫܡܰܝܳܢܺܝܬܳܐ ܕܰܐܒܳܐ ܕܺܝܠܳܟ ܫܡܰܝܳܢܳܐ: ܘܗܳܫܳܐ ܟܰܕ ܠܚܰܫ̈ܶܐ ܕܺܝܠܳܟ ܩܰܕܺܝ̈ܫܶܐ ܘܡܰܥܒ̈ܕܰܝ ܚܰܝ̈ܶܐ ܡܰܥܗܕܺܝܢܰܢ ܩܕܳܡܰܝܟ ܡܳܪܰܢ ܣܰܓܺܝ ܪ̈ܰܚܡܶܐ: ܚܽܘܣܳܝܳܐ ܕܚܰܘ̈ܒܰܝܢ ܘܫܽܘܒܩܳܢܳܐ ܕܰܚܛܳܗܰܝ̈ܢ ܘܰܕܣܰܟܠܘ̈ܳܬܰܢ ܬܳܒܥܺܝܢܰܢ: ܘܰܦܝܳܣܳܐ ܠܛܰܝܒܽܘܬܳܟ ܡܩܰܪܒܺܝܢܰܢ ܕܠܐ ܬܰܗܡܶܐ ܡ̣ܶܢ ܫܰܦܺܝܪܽܘܬ ܣܳܥܽܘܪ̈ܘܳܬܳܟ ܕܰܠܘܳܬܰܢ: ܕܡ̣ܶܢ ܟܽܠܗܶܝܢ ܐܰܝܠܶܝܢ ܕܰܡܥܰܕܪ̈ܳܢ ܘܰܡܫܰܘ̈ܙܒܳܢ ܠܚܰܝ̈ܶܐ ܕܺܝܠܰܢ ܕܳܘܰܝ̈ܳܐ: ܕܰܒܥܳܠܡܳܐ ܗܳܢܳܐ ܕܥܳܩ̈ܳܬܳܐ: ܐܶܠܐ ܚܰܝܶܕ ܘܚܰܠܶܛ ܘܫܰܘܬܶܦ ܠܰܟܢܽܘ̈ܫܳܬܳܐ ܕܩܰܕܺܝ̈ܫܶܐ ܕܺܝܠܳܟ: ܗ̇ܳܢܽܘܢ ܕܪܽܘܚܳܢܳܐܝ̣ܬ ܘܩܰܕܺܝܫܳܐܝ̣ܬ ܡܥܰܕܥܕܺܝܢ ܠܳܟ ܒܥܺܐܕܳܟ ܗ̇ܰܘ ܕܠܐ ܡܶܫܬܰܪܝܳܢܳܐ ܘܰܕܠܐ ܦܳܛܰܪ: ܐܰܝܟܳܐ ܕܚܰܕ̈ܘܳܬܳܐ ܠܐ ܡܶܬܡܰܠܠܳܢ̈ܝܳܬܳܐ ܫܟܺܝ̈ܚܳܢ ܘܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܕܠܐ ܫܰܠܘܳܐ ܡܶܬܩܰܪ̈ܒܳܢ ܠܳܟ: ܐܰܝܟܳܐ ܕܒܽܘܣܳܡܳܐ ܠܐ ܡܶܣܬܰܒܥܳܢܳܐ ܠܕܳܚ̈ܠܰܝ ܫܡܳܟ ܢܛܺܝܪ ܘܰܠܥܳܒ̈ܕܰܝ ܨܶܒܝܳܢܳܟ: ܬܰܡܳܢ ܚܰܕܳܐ ܘܰܐܦܨܰܚ ܠܰܢ: ܒܢܽܘܗܪܳܐ ܫܒܺܝܚܳܐ ܕܦܰܪܨܽܘܦܳܟ ܒܡܰܠܟܽܘܬܳܟ ܫܡܰܝܳܢܺܝܬܳܐ ܒܰܡܕܺܝܢ̱ܬܳܐ ܕܺܝܠܳܟ ܗ̇ܳܝ ܪܽܘܚܳܢܳܝܬܳܐ: ܒܥܳܠܡܳܐ ܕܺܝܠܳܟ ܗ̇ܰܘ ܡܬܽܘܡܳܝܳܐ ܘܰܕܠܐ ܥܳܒܰܪ: ܐܰܝܟܰܢܳܐ ܕܰܢܫܰܒܰܚ ܘܰܢܙܰܡܰܪ ܠܳܟ ܦܳܪܽܘܩܶܗ ܕܓܶܢܣܰܢ: ܘܠܐܒܽܘܟ ܕܨܳܒܶܐ ܒܦܽܘܪܩܳܢܰܢ: ܘܰܠܪܽܘܚܳܟ ܩܰܕܺܝܫܳܐ ܡܚܰܣܝܳܢܳܐ ܕܒܽܘܨܳܪ̈ܰܝܢ: ܗܳܫܳܐ ܘܰܒܟܽܠܙܒܰܢ܀

 

ܛܟܣܐ ܕܥܐܕܐ ܩܕܝܫܐ ܕܡ̈ܛܠܠܐ ܐܘܟܝܬ ܫܘܚܠܦ ܕܡܘܬ ܡܪܢ ܥܠ ܛܘܪ ܬܒܘܪ

 

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܩܰܕܺܝܫܳܐܝ̣ܬ ܢܥܰܕܥܶܕ ܠܳܟ: ܘܕܰܟܝܳܐܝ̣ܬ ܢܙܰܡܰܪ ܠܳܟ ܘܰܒܬܶܫܒ̈ܚܳܬܳܐ ܘܩܺܝ̈ܢܳܬܳܐ ܪ̈ܽܘܚܳܢܳܝܳܬܳܐ ܢܚܰܓܶܐ ܠܳܟ: ܒܗܳܢܳܐ ܝܰܘܡܳܐ ܕܡܶܬܓܰܠܝܳܢܽܘܬ ܐܠܰܗܽܘܬܳܟ ܥܰܠ ܛܽܘܪܳܐ ܕܬܳܒܽܘܪ: ܘܟܰܕ ܡܶܬܚܰܠܦܺܝܢܰܢ ܡ̣ܶܢ ܒܺܝ̈ܫܳܬܳܐ ܠܛܳܒ̈ܳܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܕܡܰܪܟܰܒܬܳܐ ܕܰܟܪ̈ܽܘܒܶܐ ܒܕܶܚܠܐ ܠܶܗ ܛܥܺܝܢܳܐ ܠܗܰܘ ܓܰܐܝܳܐ ܘܰܓܢܺܝܙܳܐ ܕܛܰܟܣܺܝܣ ܫܡܰܝܳܢܺܝܬܳܐ ܠܶܗ ܪܟܺܝ̣ܢܳܐ: ܠܗܰܘ ܐܺܝܬܝܳܐ ܕܒܺܐܝܬܽܘܬܶܗ ܐܠܰܗܳܝܬܳܐ ܘܡܳܪܽܘܬܳܐ: ܬܠܺܝܬܳܐܝ̣ܬ ܘܥܳܠܡܳܢܳܐܝ̣ܬ ܐܺܝܬܰܘܗܝ ܘܡܶܬܺܝܕܰܥ: ܠܗܰܘ ܕܰܒܠܐ ܦܽܘܪܳܫܳܐ ܐܳܦܶܢ ܒܫܽܘܡܳܗܳܐ ܦܪܺܝܫܳܐ ܘܒܰܚܕܳܢܳܝܽܘܬ ܐܽܘܣܺܝܰܐ ܕܺܝܠܳܢܳܐܝ̣ܬ ܡܬܡܰܕܰܥ: ܕܒܰܩܢܽܘ̈ܡܶܐ ܕܰܐܒܳܗܽܘܬܳܐ ܘܕܰܒܪܽܘܬܳܐ ܘܰܕܢܳܦܽܘܩܽܘܬܳܐ: ܐ̱ܪܳܙܳܐ ܕܺܝܕܰܥܬܳܐ ܠܰܒܪ̈ܰܝܳܐ ܫܰܘܕܰܥ: ܘܗܺܝܟܰܕܗܺܝܽܘܬ ܟܝܳܢܳܐ ܠܐ ܒܰܪܝܳܐ ܚܶܟܡܬܳܢܳܐܝ̣ܬ ܠܝܳܕܽܘ̈ܥܶܐ ܕܶܝܢ ܒܩܰܛܰܦܰܣܺܝܣ ܕܩܰܢܳܝܽܘܬܳܐ ܕܛܳܒܽܘܬܳܐ ܘܰܕܚܰܝܠܐ ܘܰܕܚܶܟܡܬܳܐ ܡܶܬܗܰܘܢܰܢ: ܗܳܢܳܐ ܕܠܐ ܒܪܰܒܽܘܬܳܐ ܡܶܫܬܰܘܫܰܛ ܘܳܐܦܠܐ ܒܰܙܥܽܘܪܽܘܬܳܐ ܡܶܬܩܰܛܪܰܓ ܕܒܰܚܕܳܐ ܡܳܪܽܘܬܳܐ ܘܰܐܟܣܺܝܳܡܰܐ ܘܶܐܘܬܰܢܛܺܝܰܐ ܘܨܶܒܝܳܢܳܐ ܣܳܥܰܪ: ܒܫܰܠܡܽܘܬܳܐ ܕܰܐܩܽܘܠܰܘܬܺܝܰܐ ܠܐ ܡܶܬܒܰܠܒܰܠ ܐܳܦܠܐ ܒܰܐܢܳܘܠܳܘܓܺܝܡܳܘܣ ܡܶܬܚܒܶܫ: ܕܡ̣ܶܢ ܟܽܠ ܕܶܐܬܬܟܺܝܢ ܘܡܶܬܬܟܺܝܢ ܡܳܪܳܢܳܐܝ̣ܬ ܡܶܣܬܓܶܕ ܘܡܶܫܬܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

 

ܐܠܰܗܳܐ ܐܰܒܳܐ ܥܶܠܬܳܐ ܕܰܠܩܽܘܫܬܺܝܢ ܕܒܺܐܝܬܽܘܬܳܟ ܕܠܐ ܙܰܒܢܳܐ ܘܰܕܠܐ ܡܶܬܚܳܐ ܡܬܽܘܡܳܐܝ̣ܬ ܠܡܶܠܬܳܐ ܐܰܘܠܶܕܬ: ܘܰܠܪܽܘܚܳܐ ܕܠܐ ܦܣܳܩܳܐ ܐܰܦܶܩܬ ܟܰܕ ܒܠܐܴ ܗܽܘ̈ܠܐܷ ܐܺܝܬܰܝܟ: ܘܠܐ ܡܰܚܫܰܒܬܳܐ ܣܳܒܟܳܐ ܒܳܟ: ܘܠܐ ܥܽܘܩܳܒܳܐ ܡܰܕܪܶܟ ܠܳܟ: ܘܠܐ ܒܽܘܚܳܢܳܐ ܚܳܒܶܨ ܠܳܟ: ܘܰܬܠܺܝܬܳܐܝ̣ܬ ܠܝܰܕܽܘܥ̈ܬܳܢܶܐ ܡܶܬܒܠܩ ܐܰܢ̱ܬ: ܘܰܚܕܳܢܳܐܝ̣ܬ ܠܫܰܪܺܝܪ̈ܶܐ ܡܰܬܡܰܗ ܐܰܢ̱ܬ: ܘܢܳܘܡܺܝܩܳܐܝ̣ܬ ܒܰܐܛܺܝܡܽܘ ܕܺܝܠܳܟ ܠܰܒܚܺܝܪ̈ܶܐ ܡܰܨܠܶܦ ܐܰܢ̱ܬ: ܗ̇ܰܘ ܕܝܳܬܳܟ ܠܐ ܡܶܬܬܰܚܡܳܐ ܘܺܐܝܬܽܘܬܳܟ ܠܐ ܡܶܬܥܰܩܒܳܐ: ܠܥܶܠ ܡ̣ܶܢ ܐܰܬܪܳܐ ܘܙܰܒܢܳܐ ܘܕܽܘܟܬܳܐ ܘܰܟܡܳܝܽܘܬܳܐ ܘܰܐܝܢܳܝܽܘܬܳܐ ܘܕܺܝܰܬܰܗܣܺܝܣ ܣܺܝܡܳܐ: ܕܠܐ ܦܣܳܩܳܐ ܘܰܕܠܐ ܪܶܕܝܳܐ ܘܰܕܠܐ ܚܰܫܳܐ: ܥܳܒܽܘܕܳܐܝ̣ܬ ܠܟܽܠ ܐܰܚܺܝܕ ܐܰܢ̱ܬ: ܐܶܠܐ ܒܟܽܘܠܳܢܳܝܽܘܬܳܐ ܘܡܶܢܬܢܳܝܽܘܬܳܐ ܡܶܬܪܢܶܐ ܒܩܰܐܛܰܦܰܣܺܝܣ ܕܓܳܠܙܳܐ ܠܟܽܠ ܕܺܝܠܳܝܬܳܐ ܕܰܒܪ̈ܰܝܳܐ ܘܡܶܬܪ̈ܰܓܫܳܢܶܐ ܥܳܒܰܪ ܐܰܢ̱ܬ: ܒܰܠܚܽܘܕ ܕܶܝܢ ܒܕܺܝܠܳܝ̈ܳܬܳܐ ܝܺܕܺܝ̈ܥܳܬܳܐ ܡܶܬܕܰܠܰܠ ܐܰܢ̱ܬ: ܠܐ ܓܶܝܪ ܕܽܘܡܝܳܐ ܩܢܶܐ ܐܰܢ̱ܬ: ܒܕܰܠܥܶܠ ܡܶܢܟܽܠ  ܪܶܢܺܝ ܓܢܺܝܙ ܐܰܢ̱ܬ: ܗܰܘܢܳܐ ܓܶܝܪ ܢܽܘܗܪܳܢܳܝܳܐ ܐܰܘܟܺܝܬ ܝܺܚܺܝܕܳܝܳܟ ܬܡܺܝܗܳܐܝ̣ܬ ܕܢܰܚ ܒܰܒܪܺܝܬܳܐ ܠܡܰܢܗܳܪܽܘ ܠܕܰܒܚܶܫܽܘܟܐ ܛܳܥܝܽܘܬܳܢܳܝܳܐ ܝܳܬܒܺܝܢ: ܒܰܕܡܽܘܬܳܐ ܐ̱ܢܳܫܳܝܬܳܐ ܐܶܬܚܙܺܝ ܥܰܠ ܐܰܪܥܳܐ: ܕܰܢܨܰܠܶܡ ܠܰܟܝܳܢܰܢ ܒܺܝܕܰܥܬܳܟ ܘܰܢܛܰܗܶܡ ܠܐܢܳܫܽܘܬܰܢ ܒܰܐܠܳܗܽܘܬܳܟ: ܒܶܗ ܒܗܳܢܳܐ ܝܰܘܡܳܐ ܟܰܕ ܐܶܬܬܰܒܪܰܩܘ ܨܶܡ̈ܚܶܐ ܐܠܰܗܽܘ̈ܬܳܢܳܝܶܐ ܥܰܠ ܐ̱ܢܳܫܽܘܬܶܗ ܘܶܐܬܚܰܙܝܰܬ݀ ܫܰܪܺܝܪܽܘܬܳܐ ܕܰܚܕܳܢܳܝܽܘܬܶܗ: ܬܡܰܗܘ ܬܰܠܡܺܝ̈ܕܶܐ ܘܶܐܬܕܰܡܰܪܘ: ܘܶܐܡܰܪܘ ܕܫܰܪܺܝܪܳܐܝ̣ܬ ܐܠܰܗܳܐ ܐܶܬܚܙܺܝ ܥܰܠ ܐܰܪܥܳܐ: ܝܰܘܡܳܢܳܐ ܬܳܒܽܘܪ ܘܚܶܪܡܽܘܢ ܕܳܨܘ ܘܠܶܗ ܫܰܒܰܚܘ ܟܰܕ ܐܶܬܓܠܺܝ: ܝܰܘܡܳܢܳܐ ܡܰܠܐܟ̈ܶܐ ܙܳܚܘ ܠܐܝܩܳܪܶܗ ܕܡܳܪܝܳܐ: ܕܫܰܚܠܶܦ ܠܰܕܡܽܘ̣ܬܶܗ ܕܢܶܓܠܐܷ ܫܽܘܒܚܶܗ ܒܥܳܠܡܳܐ: ܝܰܘܡܳܢܳܐ ܝܰܥܩܽܘܒ ܘܝܽܘܚܰܢܳܢ ܕܳܨܘ ܠܡܶܚܙܳܐ ܠܪܰܒܽܘܬܶܗ ܘܟܰܣܝܰܬ݀ ܐܶܢܽܘܢ ܕܶܚܠܬܳܐ: ܝܰܘܡܳܢܳܐ ܨܳܒܘ ܠܘܳܬܶܗ ܢܒܺܝ̈ܶܐ ܕܥܰܬܺܝܩܬܳܐ ܘܚܰܙܳܝ̈ܶܐ ܕܰܥܬܺܝ̈ܕܳܬܳܐ: ܝܰܘܡܳܢܳܐ ܐܠܶܝܳܐ ܬܰܫܒܳܝܳܐ ܐܶܬܳܐ ܠܡܶܣܓܰܕ ܠܡܳܪܳܐ ܕܰܢܒܺܝ̈ܶܐ ܕܰܢܚܶܬ ܕܰܢܫܰܡܠܐܷ ܡ̈ܶܠܐ ܕܰܢܒܺܝ̈ܶܐ: ܝܰܘܡܳܢܳܐ ܡܽܘܫܶܐ ܪܺܝܫܳܐ ܕܰܢܒܺܝ̈ܶܐ ܐܶܬܢܰܚܰܡ ܘܶܐܬܳܐ: ܕܢܶܚܙܶܐ ܠܡܳܪܳܐ ܕܰܚܙܳܝܗܝ ܒܣܰܢܝܳܐ ܠܐ ܝܳܩܽܘܕܳܐ: ܝܰܘܡܳܢܳܐ ܐܶܫܬܰܘܕܰܥܘ ܬܰܠܡܺܝ̈ܕܶܐ ܕܫܰܠܺܝܛ ܗ̣ܽܘ ܥܰܠ ܚܰܝ̈ܶܐ ܘܡܺܝ̈ܬܶܐ ܗܳܐ ܡܳܐܶܬ ܘܦܳܪܶܩ ܘܡܰܐܚܶܐ ܠܐܡܘ̈ܳܬܳܐ: ܝܰܘܡܳܢܳܐ ܐܠܶܝܳܐ ܢܒܺܝܳܐ ܐܶܬܳܐ ܕܰܢܦܺܝܣܺܝܘܗܝ ܠܡܳܪܳܐ ܕܶܐܬܳܐ ܢܚܰܪܰܪ ܒܶܪ̈ܝܳܬܳܐ ܟܰܕ ܐܳܡܰܪ: ܐܺܝܢ ܡܳܪܝ ܠܓܳܓܽܘܠܬܳܐ ܕܺܐܝܣܚܳܩ ܣܰܩ: ܘܩܰܕܫܶܝܗ̇ ܠܰܥܠܳܬܳܐ ܕܒܳܗ̇ ܐܶܬܬܨܺܝܪ ܦܽܘܪܩܳܢ ܒܶܪ̈ܝܳܬܳܐ: ܐܺܝܢ ܡܳܪܝ ܐܶܬܥܰܠܐܴ ܥܰܠ ܡܰܕܒܚܳܐ ܡܰܠܟܺܝܙܕܶܩܳܝܳܐ ܕܠܳܟ ܪܫܰܡ ܕܺܐܝܬܰܝܟ ܠܰܚܡܳܐ ܘܩܽܘܪܒܳܢܳܐ ܘܰܡܩܰܒܶܠ ܟܽܠ ܪ̈ܺܝܫܝܳܬܳܐ: ܨܠܽܘܒ ܠܰܚܛܺܝܬܳܐ ܘܰܐܡܺܝܬ ܠܡܰܘܬܳܐ: ܘܰܐܥܡܶܕ ܠܐܕܳܡ ܒܰܕܡܳܟ ܚܰܝܳܐ: ܝܰܘܡܳܢܳܐ ܫܰܪܺܝ ܡܽܘܫܶܐ ܢܒܺܝܳܐ ܡܶܬܟܰܫܰܦ ܒܰܚܢܰܓܬܳܐ: ܕܚܽܘܬ ܠܘܳܬ ܪܳܚܡܳܟ ܘܚܰܕܶܬ ܝܽܘܩܢܳܐ ܕܬܶܫܒܽܘܚܬܳܟ ܕܰܒܡܽܘܢܺܝܛܺܝ ܐܶܬܛܰܒܰܥ ܕܨܽܘܪܬܳܟ: ܘܗܳܐ ܠܳܟ ܡܣܰܟܶܐ ܘܰܡܣܰܘܰܚ ܠܦܶܓܥܳܟ: ܡܒܰܓܶܢ ܪܰܥܽܘܡܳܐܝ̣ܬ ܟܰܕ ܛܰܒܺܝܥ ܒܗܰܘܬܳܐ ܥܰܡܺܝܩܬܳܐ: ܐܰܦܨܰܚ ܠܰܟܡܺܝܪ̈ܶܐ ܒܢܰܘ̈ܗܝ ܕܥܰܡܶܗ ܚܒܺܝܫܺܝܢ ܘܰܡܣܰܟܶܝܢ ܠܳܟ: ܐܰܒܪܳܗܳܡ ܚܰܒܺܝܒܳܟ: ܐܺܝܣܚܳܩ ܕܶܒܚܳܟ: ܝܰܥܩܽܘܒ ܣܳܓܽܘܕܳܟ: ܦܺܝܢܚܶܣ ܡܰܪܥܺܝܬܳܟ: ܐܰܗܪܽܘܢ ܡܢܺܝܚܳܢܳܟ: ܟܽܠܗܽܘܢ ܢܒܺܝ̈ܶܐ ܕܠܳܟ ܣܰܟܺܝܘ ܘܚܳܝܪܺܝܢ ܠܳܟ: ܐܶܬܬܙܺܝܥܘ ܫܠܺܝ̈ܚܶܐ ܘܰܕܚܶܠܘ ܡ̣ܶܢ ܙܺܝܘܶܗ: ܬܡܰܗܘ ܡ̣ܶܢ ܢܒܺܝ̈ܶܐ ܕܶܐܬܘܰܥܰܕܘ ܠܘܳܬܶܗ: ܪܥܶܠܘ ܡ̣ܶܢ ܥܢܳܢܳܐ ܕܰܐܛܠܰܬ݀ ܥܠܰܘܗܝ: ܫܡܰܥܘ ܬܽܘܒ ܠܐܒܳܐ ܕܩܳܥܶܐ ܕܗܳܢܰܘ ܒܶܪܝ ܚܰܒܺܝܒܳܐ ܠܶܗ ܫܡܰܥܘ: ܐܰܟܡ̇ܰܢ ܕܫܰܠܺܝܛ ܗ̣ܽܘ ܒܪܰܘܡܳܐ ܘܰܒܥܽܘܡܩܳܐ: ܘܡܳܪܳܐ ܕܚܰܝ̈ܶܐ ܘܰܕܡܺܝ̈ܬܶܐ ܘܡܰܠܟܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܕܠܶܗ ܫܳܐܠܺܝܢܰܢ ܒܗܳܢܳܐ ܝܰܘܡܳܐ ܕܡܶܬܓܰܠܝܳܢܽܘܬܶܗ ܫܒܺܝܚܬܳܐ: ܕܥܺܐܕܳܐ ܗܳܢܳܐ ܫܒܺܝܚܳܐ ܘܟܽܠܗܽܘܢ ܥܺܐܕܰܘ̈ܗܝ ܩܰܕܺܝ̈ܫܶܐ: ܕܕܰܟܝܳܐܝ̣ܬ ܢܥܰܕܥܶܕ ܘܰܒܫܰܝܢܳܐ ܘܒܰܫܠܳܡܳܐ ܢܫܰܡܠܐܷ: ܘܰܒܫܰܝܢܳܐ ܘܒܰܫܠܳܡܳܐ ܢܰܦܨܰܚ ܠܐܪܥܳܐ ܘܥܳܡܽܘܪ̈ܶܝܗ̇: ܘܠܰܟܠܺܝܠܐ ܕܫܰܢ̱ܬܳܐ ܢܒܰܪܶܟ: ܘܰܠܩܳܪ̈ܝܰܝ ܫܡܶܗ ܒܟܽܠ ܕܽܘܟ ܢܶܥܢܶܐ: ܘܰܠܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܢܰܪܘܰܚ: ܘܰܒܝܰܡܺܝܢܳܐ ܕܺܝܠܶܗ ܥܰܡ ܢܒܺܝ̈ܶܐ ܘܰܫܠܺܝ̈ܚܶܐ ܢܰܣܡܶܟ: ܘܳܐܦ ܠܰܢ ܘܰܠܥܰܢܺܝ̈ܕܰܝܢ ܟܢܺܝܫܳܐܝ̣ܬ ܢܚܰܣܶܐ: ܘܟܽܠܰܢ ܒܟܶܢܫܳܐ ܫܒܺܝܚܳܐ ܕܰܓܒܰܘ̈ܗܝ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

ܥܛܪܐ

 

ܒܰܐܬܪܳܐ ܕܰܡܥܰܠܰܝ ܡ̣ܶܢ ܟܽܠ ܐܰܝܟܳܐ ܕܡܰܪܟܰܒܬܳܟ ܡܶܙܕܰܝܚܳܐ: ܩܰܒܶܠ ܥܶܛܪܳܐ ܗܳܢܳܐ ܕܰܒܝܰܘܡܳܐ ܕܓܶܠܝܳܢܳܟ ܩܰܪܶܒܢܰܢ ܠܳܟ: ܛܳܒܳܐ ܕܰܓܠܰܝܬ ܝܳܬܳܟ ܠܥܺܝܢ ܬܰܠܡܺܝ̈ܕܰܝܟ ܘܰܐܛܶܠܬ ܥܠܰܝܗܽܘܢ ܥܢܳܢܳܐ ܕܒܰܣܺܝܡܽܘܬܳܟ ܐܳܦ ܥܠܰܝܢ ܚܰܛܳܝ̈ܶܐ ܐܰܛܶܠ ܝܰܡܺܝܢ ܐܠܰܗܽܘܬܳܟ ܘܛܰܪ ܠܟܽܠܗܽܘܢ ܛܒܺܝ̈ܥܰܝ ܒܡܽܘܢܺܝܛܺܝ ܕܺܝܠܳܟ ܬܪܰܝܳܢܺܝܬܳܐ: ܘܠܐܪܥܳܐ ܘܥܳܡܽܘܪ̈ܶܝܗ̇ ܫܰܟܶܢ ܫܽܘܪܬܳܚܳܐ ܕܛܰܝܒܽܘܬܳܟ ܓܡܺܝܪܬܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܚܰܣܳܐ ܘܰܐܢܺܝܚ ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

 

ܚܘܬܡܐ

 

ܗܰܒ ܡܳܪܝ ܠܥܺܕܬܳܟ ܫܰܝܢܳܐ ܐܰܡܺܝܢܳܐ: ܘܰܐܥܬܰܪܶܝܗ̇ ܒܰܫܠܳܡܳܐ ܟܰܗܺܝܢܳܐ: ܘܰܙܓܽܘܪ ܡ̣ܶܢ ܝܰܠܕܶܝ̈ܗ̇ ܚܣܳܡܳܐ ܘܚܶܪܝܳܢܳܐ ܘܟܽܠ ܡܰܟܝܳܢܽܘܬܳܐ ܕܰܒܥܶܠܕ̈ܒܳܒܶܐ: ܐܰܝܟܰܢܳܐ ܕܰܬܥܰܕܥܶܕ ܕܰܟܝܳܐܝ̣ܬ ܥܺܐܕܰܝ̈ܟ ܩܰܕܺܝ̈ܫܶܐ ܬܶܣܓܽܘܕ ܠܳܟ ܐܰܡܺܝܢܳܐܝ̣ܬ: ܗܳܫܳܐ ܘܰܒܟܽܠܙܒܰܢ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ ܠܐ ܡܶܬܦܰܣܩܳܢܺܝܬܳܐ: ܘܬܰܘܕܺܝܬܳܐ ܠܐ ܡܰܘܦܝܳܢܺܝܬܳܐ ܢܶܫܬܘܶܐ ܕܢܰܣܶܩ: ܠܗܰܘ ܡܬܽܘܡܳܝܳܐ ܕܝܰܘܡܳܢܳܐ ܐܰܢܗܰܪ ܙܺܝܘܶܗ ܥܰܠ ܛܽܘܪܳܐ ܕܬܳܒܽܘܪ: ܘܫܰܘܬܶܦ ܠܰܫܠܺܝ̈ܚܰܘܗܝ ܒܰܚܙܳܬܳܐ ܫܒܺܝܚܬܳܐ ܕܦܰܪܨܽܘܦܶܗ ܐܠܰܗܳܝܳܐ ܘܠܐ ܡܶܬܦܰܚܡܳܢܳܐ ܘܪܽܘܡܪܳܡܳܐ ܐܰܡܺܝܢܳܐ ܘܰܕܠܐ ܫܰܠܘܳܐ ܘܳܠܐܷ ܕܰܢܫܰܒܰܚ: ܠܗܰܘ ܟܰܣܝܳܐ ܕܰܟܣܶܐ ܡ̣ܶܢ ܐܰܪ̈ܟܰܐܣ ܘܡ̣ܶܢ ܫܽܘܠܛܳܢ̈ܶܐ: ܕܚܰܘܺܝ ܠܥܰܒ̈ܕܰܘܗܝ ܩܰܕܺܝ̈ܫܶܐ ܕܡܶܛܽܠ ܐܳܕܳܡ ܐܶܬܳܐ ܠܣܽܘܪܳܩܳܐ ܨܶܒܝܳܢܳܝܳܐ ܕܢܰܦܢܶܝܘܗܝ ܠܬܶܫܒܽܘܚܬܶܗ ܩܰܕܡܳܝܬܳܐ ܘܣܶܓܕܬܳܐ ܐܰܡܺܝܢܬܳܐ ܝܳܐܶܐ ܕܰܢܩܰܪܶܒ ܠܗܰܘ ܕܽܘܡܳܪܳܐ ܘܠܐ ܡܶܬܕܰܪܟܳܢܳܐ ܕܚܰܘܺܝ ܩܰܠܺܝܠ ܡ̣ܶܢ ܙܰܗܪܳܐ ܕܰܐܠܳܗܽܘܬܶܗ ܠܥܺܝܢ ܟܶܢܫܳܐ ܕܬܰܠܡܺܝ̈ܕܰܘܗܝ ܘܰܪܕܰܦ ܡ̣ܶܢ ܥܰܝܢܰܝ̈ܗܽܘܢ ܠܥܰܡܛܳܢܳܐ ܕܛܳܥܝܽܘܬܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ܀

 

ܣܕܪܐ

 

ܟܰܕ ܒܐܪܳܙܳܐ ܕܰܡܕܰܒܪܳܢܽܘܬܳܟ ܡܰܠܝܰܬ݀ ܬܶܗܪܳܐ ܡܶܬܒܰܩܶܝܢܰܢ ܐܳܘ ܡܶܠܬܳܐ ܐܠܰܗܳܐ: ܬܰܘܕ̈ܝܳܬܳܐ ܘܩܽܘܠܳܣ̈ܶܐ ܠܐ ܡܰܘܦ̈ܝܳܢܶܐ ܠܡܳܪܽܘܬܳܟ ܐܰܡܺܝܢܳܐܝ̣ܬ ܡܰܣܩܺܝܢܰܢ: ܡܶܛܽܠ ܕܒܳܟ ܚܰܐܝ̣ܢܰܢ ܘܡܶܬܬܙܺܝܥܺܝܢܰܢ ܘܺܐܝܬܰܝܢ: ܐܳܘ ܥܳܒܽܘܕܰܢ ܫܰܪܺܝܪܳܐ: ܘܡܰܢܽܘ ܡܨܶܐ ܕܰܢܡܰܠܶܠ ܥܰܠ ܚܰܝܠܬܳܢܽܘܬܳܟ ܕܰܠܘܳܬܰܢ: ܐܳܘ ܛܳܒܳܐ ܘܰܡܥܺܝܢܳܐ ܕܛܳܒܽܘܬܳܐ: ܟܽܠܗܽܘܢ ܓܶܝܪ ܦܽܘ̈ܡܶܐ ܘܠܶܫ̈ܳܢܶܐ ܘܗܰܘ̈ܢܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܘܠܐ ܣܳܦܩܺܝܢ ܕܰܠܒܶܨܪܳܐ ܙܥܽܘܪܳܐ ܕܺܐܝܬܽܘܬܳܟ ܢܫܰܒܚܽܘܢ: ܐܳܘ ܣܺܝܡܬܳܐ ܘܓܰܙܳܐ ܕܡ̣ܶܢ ܡܬܽܘܡ ܠܐ ܙܥܰܪ̈ܝ ܘܰܐܘܦܺܝ̈ ܡܰܘܗ̈ܒܳܬܳܟ ܘܫܽܘ̈ܟܳܢܰܝܟ ܐܠܰܗܳܝ̈ܶܐ ܕܰܠܘܳܬܰܢ: ܘܒܰܕܓܽܘܢ ܠܐܝܬܽܘܬܳܟ ܫܽܘܒܚܳܐ ܠܳܥܙܺܝܢܰܢ ܘܗܶܕܪ̈ܶܐ ܘܪܽܘܡܪ̈ܳܡܶܐ ܠܐܠܳܗܽܘܬܳܟ ܙܳܡܪܺܝܢܰܢ ܥܰܠ ܕܺܐܝܬܰܝܟ ܝܽܘܩܢܳܐ ܠܐ ܡܶܫܬܰܚܠܦܳܢܳܐ ܕܰܐܒܳܐ: ܐܺܝܬܝܳܐ ܡܬܽܘܡܳܝܳܐ ܘܕܰܠܥܶܠ ܡ̣ܶܢ ܙܰܒ̈ܢܶܐ ܘܥܶܕ̈ܳܢܶܐ ܡܬܽܘܡܳܐܝ̣ܬ ܘܠܐ ܡܶܬܡܰܠܠܳܢܳܐܝ̣ܬ ܡ̣ܶܢ ܥܽܘܒܶܗ ܨܡܰܚܬ: ܘܰܒܚܰܪܰܬ݀ ܙܰܒ̈ܢܶܐ ܟܰܕ ܐܶܨܛܒܰܝܬ ܪܶܚܡܰܬ݀ ܐ̱ܢܳܫܽܘܬܳܟ ܕܬܶܚܽܘܬ ܬܶܦܪܽܘܩ ܠܰܓܒܺܝܠܬܳܟ ܐܶܬܒܰܣܰܪܬ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܘܰܒܦܰܓܪܳܐ ܗ̇ܰܘ ܕܡܶܢܳܗ̇ ܐܶܬܥܰܛܰܦܬ ܣܥܰܪܬ ܚܰܝ̈ܠܐ ܘܬܶܕܡܪ̈ܳܬܳܐ ܘܰܓܢ̱ܒܰܪ̈ܘܳܬܳܐ: ܘܟܰܕ ܩܰܪܺܝܒ ܗܘܳܐ ܙܰܒܢܳܐ ܕܚܰܫܳܟ ܦܳܪܽܘܩܳܝܳܐ ܕܒܰܒܣܰܪ ܕܰܚܠܳܦܰܝܢ ܘܡܶܛܽܠܳܬܰܢ: ܨܒܰܝܬ ܕܬܶܓܠܐܷ ܕܬܰܘܕܰܥ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܥܰܠ ܚܽܘܕܳܬܳܐ ܕܥܳܠܡܳܐ ܕܰܥܬܺܝܕ ܘܬܶܫܒܽܘܚܬܳܐ ܕܰܢܛܺܝܪܳܐ ܠܥܳܒ̈ܕܰܝ ܛܳܒ̈ܳܬܳܐ ܘܰܐܝܟܰܢܳܐ ܕܠܐ ܢܶܬܟܰܫܠܽܘܢ ܒܢ̈ܰܝ ܐ̱ܪܳܙܳܟ ܥܰܠ ܚܰܫܰܝ̈ܟ ܨܶܒܝܳܢܳܝ̈ܶܐ ܘܡܰܘܬܳܟ ܕܒܰܒܣܰܪ ܗ̇ܳܢܽܘܢ ܕܰܒܗܽܘܢ ܩܳܡܢܰܢ ܡ̣ܶܢ ܡܺܝܬܽܘܬܳܐ ܕܰܚܛܺܝܬܳܐ ܘܶܐܡܰܪܬ ܠܗܽܘܢ ܒܡܶܠܬܳܟ ܡܳܪܳܢܳܝܬܳܐ ܘܰܐܠܳܗܳܝܬܳܐ: ܕܺܐܝܬ ܡܶܢܟܽܘܢ ܬܢܳܢ ܐ̱ܢܳܫ̈ܳܐ ܕܠܐ ܢܶܛܥܡܽܘܢ ܡܰܘܬܳܐ ܥܕܰܡܳܐ ܕܢܶܚܙܽܘܢ ܠܰܒܪܶܗ ܕܐ̱ܢܳܫܳܐ ܕܳܐܬܶܐ ܒܬܶܫܒܽܘܚܬܳܐ ܕܺܝܠܶܗ: ܟܰܕ ܒܝܰܕ ܗܳܕܶܐ ܪܡܰܙܬ ܘܰܐܠܶܦܬ ܠܬܰܠܡܺܝ̈ܕܶܐ ܗ̇ܳܢܽܘܢ ܕܰܐܣܶܩܬ ܒܳܬܰܪܟܶܢ ܥܰܡܳܟ ܠܛܽܘܪܳܐ ܘܚܰܘܺܝܬ ܐܶܢܽܘܢ ܩܰܠܺܝܠ ܡ̣ܶܢ ܫܽܘܒܚܳܐ ܘܙܺܝܘܳܐ ܠܐ ܡܶܬܡܰܠܠܳܢܳܐ ܕܰܐܠܳܗܽܘܬܳܟ: ܒܗܳܢܳܐ ܓܶܝܪ ܝܰܘܡܳܐ ܕܥܰܕܥܺܐܕܳܐ ܕܺܝܠܳܟ ܫܒܺܝܚܳܐ ܕܡܶܬܓܰܠܝܳܢܽܘܬ ܫܽܘܒܚܳܟ ܕܥܰܠ ܛܽܘܪܳܐ: ܕܒܰܪܬ ܥܰܡܳܟ ܠܫܶܡܥܽܘܢ ܘܰܠܝܰܥܩܽܘܒ ܘܰܠܝܽܘܚܰܢܳܢ: ܘܰܠܛܽܘܪܳܐ ܕܬܳܒܽܘܪ ܣܠܶܩܬ ܘܶܐܫܬܰܚܠܰܦ ܠܥܺܢܰܝ̈ܗܽܘܢ ܘܰܢܗܰܪ ܦܰܪܨܽܘܦܳܟ ܐܰܝܟ ܫܶܡܫܳܐ: ܟܰܕ ܒܝܰܕ ܗܳܕܶܐ ܒܰܕܶܩܬ ܘܚܰܘܺܝܬ ܠܰܢ ܕܰܒܪܶܗ ܐܰܢ̱ܬ ܕܰܐܠܳܗܳܐ ܕܶܐܬܒܰܪܢܰܫ ܘܠܰܘ ܡܽܘܫܶܐ ܘܶܐܠܺܝܳܐ ܐܶܠܐ ܡܳܪܗܽܘܢ ܕܟܽܠܗܽܘܢ ܢܒܺܝ̈ܶܐ: ܘܬܽܘܒ ܚܰܘܺܝܬ ܠܰܢ ܕܰܒܚܰܪܬܳܐ ܘܫܽܘܠܳܡܳܐ ܕܙܰܒ̈ܢܶܐ: ܙܰܕܺܝ̈ܩܶܐ ܡܰܢܗܪܺܝܢ ܐܰܝܟ ܫܶܡܫܳܐ: ܘܡܶܫܬܰܚܠܦܺܝܢ ܡ̣ܶܢ ܚܒܳܠܐ ܠܠܐܴ ܡܶܬܚܰܒܠܳܢܽܘܬܳܐ: ܘܒܶܗ ܒܗܳܢܳܐ ܝܰܘܡܳܐ ܩܰܪܝܳܐ ܘܩܰܕܺܝܫܳܐ ܢܰܚ̈ܬܶܐ ܕܥܰܠ ܦܰܓܪܳܟ ܗܘܰܘ ܚܶܘܳܪ̈ܶܐ ܐܰܝܟ ܬܰܠܓܳܐ ܘܝܰܗܒܬ ܠܰܢ ܒܗܽܘܢ ܛܽܘܦܣܳܐ ܥܰܠ ܠܒܽܘ̈ܫܶܐ ܢܰܗܺܝܪ̈ܶܐ ܕܠܐ ܡܳܝܽܘܬܽܘܬܳܐ ܕܰܢܛܺܝܪܺܝܢ ܠܥܳܒ̈ܕܰܝ ܨܶܒܝܳܢܳܟ: ܒܗܳܢܳܐ ܥܰܕܥܺܐܕܳܟ ܫܒܺܝܚܳܐ ܡܰܢܰܥܘ ܠܘܳܬܳܟ ܥܒ̈ܳܕܶܐ ܫܰܪܺܝܪ̈ܶܐ: ܡܽܘܫܶܐ ܕܡ̣ܶܢ ܒܶܝܬ ܡܺܝ̈ܬܶܐ ܘܶܐܠܺܝܳܐ ܕܡ̣ܶܢ ܒܶܝܬ ܚܰܝ̈ܶܐ: ܟܰܕ ܡܦܺܝܣܺܝܢ ܘܒܳܥܶܝܢ ܡܶܢܳܟ ܕܠܐ ܬܰܗܡܶܐ ܡ̣ܶܢ ܦܽܘܢܳܝܳܐ ܕܰܐܝܠܶܝܢ ܕܰܐܪܓܶܙܘ ܠܡܳܪܽܘܬܳܟ ܘܬܶܣܥܽܘܪ ܒܝܰܕ ܢܰܦܫܳܟ ܠܡܺܝ̈ܬܶܐ ܕܰܪܒܰܚܘ ܥܰܠ ܥܰܦܪܳܐ ܕܰܫܝܽܘܠ: ܒܗܳܢܳܐ ܝܰܘܡܳܐ ܩܰܪܝܳܐ ܘܩܰܕܺܝܫܳܐ ܐܶܫܬܰܥܺܝܘ ܠܳܟ ܢܒܺܝ̈ܶܐ ܕܒܶܝܬ ܐܰܒܽܘܟ ܥܰܠ ܐܰܝܠܶܝܢ ܕܰܣܒܰܠܘ ܡ̣ܶܢ ܥܰܡܳܐ ܦܰܩܪܳܐ ܕܝܽܘ̈ܕܳܝܶܐ: ܟܰܕ ܡܽܘܫܶܐ ܡ̇ܰܢ ܫܰܘܕܰܥ ܥܰܠ ܩܰܫܝܽܘܬ ܠܶܒܗܽܘܢ ܕܺܐܝܣܰܪ̈ܠܳܝܶܐ ܘܪܶܛܢܗܽܘܢ ܕܥܰܠܘ ܕܰܒܡܰܕܒܪܳܐ: ܐܠܶܝܳܐ ܓܠܐܴ ܥܰܠ ܒܺܝܫܽܘܬܶܗ ܕܳܐܚܳܒ ܡܰܠܟܳܐ ܘܰܥܪܽܘܩܝܶܗ ܕܡ̣ܶܢ ܩܕܳܡ ܐܺܝܙܒܶܝܠ ܫܳܛܺܝܬܳܐ: ܒܗܳܢܳܐ ܥܰܕܥܺܐܕܳܐ ܫܒܺܝܚܳܐ ܫܶܡܥܽܘܢ ܟܰܕ ܪܰܥܺܝܠ ܡ̣ܶܢ ܕܶܚܠܬܳܐ ܕܚܰܫ̈ܶܐ ܘܡܰܘܬܳܐ: ܕܰܢܒܺܝ̈ܶܐ ܐܰܦܺܝܣܽܘܟ ܕܬܶܣܒܽܘܠ ܚܠܳܦ ܓܒܺܝܠܬܳܐ ܕܺܐܝܕܰܝ̈ܟ: ܨܳܒܶܐ ܗܘܳܐ ܕܢܶܥܒܶܕ ܡ̈ܛܰܠܠܐ ܠܡܳܪܽܘܬܳܟ ܒܛܽܘܪܳܐ ܕܬܶܬܶܒ ܬܰܡܳܢ ܒܕܽܘܟܬܳܐ ܐܰܝܕܳܐ ܕܰܓܠܺܝܙܳܐ ܡ̣ܶܢ ܨܳܠܽܘ̈ܒܶܐ ܘܥܰܡܳܐ ܨܗܶܐ ܠܰܕܡܳܐ ܦܳܪܽܘܩܳܝܳܐ: ܘܒܶܗ ܒܗܳܢܳܐ ܝܰܘܡܳܐ ܩܰܪܝܳܐ ܘܩܰܕܺܝܫܳܐ ܥܢܳܢܳܐ ܕܢܽܘܗܪܳܐ ܐܶܫܰܕ ܐܰܒܳܐ ܡ̣ܶܢ ܪܰܘܡܳܐ: ܘܰܐܓܢܰܬ݀ ܥܰܠ ܛܽܘܪܳܐ ܕܬܳܒܽܘܪ: ܐܰܟܡܰܢ ܕܰܬܒܰܕܶܩ ܠܰܢ ܕܒܰܥ̈ܢܳܢܶܐ ܕܢܽܘܗܪܳܐ ܡܶܬܚܰܛܦܺܝܢ ܙܰܕܺܝ̈ܩܶܐ ܠܐܘܪܥܳܟ ܒܝܰܘܡܳܐ ܐ̱ܚܪܳܝܳܐ: ܘܰܒܟܽܠܙܒܰܢ ܥܰܡܳܟ ܗܘܰܝܢ ܘܰܒܢܽܘܗܪܳܟ ܡܶܬܒܰܣܡܺܝܢ ܒܗܳܢܳܐ ܥܰܕܥܺܐܕܳܐ ܫܒܺܝܚܳܐ ܐܰܙܥܶܩ ܐܰܒܳܐ ܒܩܳܠܐ ܪܳܡܳܐ ܠܰܫܠܺܝ̈ܚܰܝܟ ܡܶܛܽܠܳܬܳܟ ܕܗܳܢܰܘ ܒܶܪܝ ܚܰܒܺܝܒܳܐ ܠܶܗ ܫܡܰܥܘ ܕܒܶܗ ܐܶܨܛܒܺܝܬ: ܘܒܶܗ ܒܗܳܢܳܐ ܝܰܘܡܳܐ ܩܰܕܺܝܫܳܐ ܡ̣ܶܢ ܙܺܝܘܳܐ ܕܦܰܪܨܽܘܦܳܟ ܘܢܰܗܺܝܪܽܘܬܳܐ ܕܰܥܢܳܢܳܐ ܘܩܳܠܐ ܕܰܐܒܽܘܟ ܡܫܰܒܚܳܐ: ܐܶܬܬܙܺܝܥܘ ܬܰܠܡܺܝ̈ܕܶܐ ܘܰܢܦܰܠܘ ܥܰܠ ܐܰܦܰܝ̈ܗܽܘܢ ܡ̣ܶܢ ܕܶܚܠܬܳܐ ܘܰܩܪܶܒܬ ܒܪܶܚܡܰܬ ܐ̱ܢܳܫܽܘܬܳܟ ܘܰܐܩܺܝܡܬ ܐܶܢܽܘܢ: ܘܰܐܠܶܦܬ ܐܶܢܽܘܢ ܕܰܒܨܶܒܝܳܢܳܟ ܡܛܰܝܰܒ ܐܰܢ̱ܬ ܕܬܺܐܬܶܐ ܥܕܰܡܳܐ ܠܩܰܝܣܳܐ ܕܰܙܩܺܝܦܳܐ: ܘܠܰܘ ܡ̣ܶܢ ܡܚܺܝܠܽܘܬܳܐ ܐ̱ܢܳܫܳܝܬܳܐ: ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ ܒܗܳܢܳܐ ܝܰܘܡܳܐ ܡܙܰܡܢܳܢܳܐ ܕܛܳܒ̈ܳܬܳܐ ܕܫܽܘܚܠܳܦ ܙܺܝܘܳܟ ܡܫܰܒܚܳܐ ܘܡܶܬܓܰܠܝܳܢܽܘܬ ܐܠܰܗܽܘܬܳܟ ܕܒܰܒܣܰܪ: ܕܰܬܫܰܚܠܶܦ ܠܠܶܒܰܘ̈ܳܬܰܢ ܡ̣ܶܢ ܒܺܝ̈ܫܳܬܳܐ ܠܛܳܒ̈ܳܬܳܐ: ܘܡ̣ܶܢ ܚܶܫܽܘܟܽܘܬܳܐ ܕܕܽܘܒܳܪ̈ܶܐ ܒܺܝ̈ܫܶܐ: ܠܘܳܬ ܥܒ̈ܳܕܶܐ ܕܢܽܘܗܪܳܐ ܡܰܨܡ̈ܚܰܝ ܒܰܡܝܰܬܪܽܘܬܳܐ ܘܗܰܝܡܳܢܽܘܬܳܐ ܫܰܪܺܝܪܬܳܐ: ܘܰܩܦܽܘܠ ܡܶܢܰܢ ܠܰܠܒܽܘ̈ܫܶܐ ܨ̈ܳܐܶܐ ܕܰܪ̈ܓܺܝܓܳܬܳܐ ܫܟܺܝܪ̈ܳܬܳܐ: ܘܰܥܒܶܕ ܕܢܶܗܘܽܘܢ ܢܰܚܬܰܝ̈ܢ ܚܶܘܳܪ̈ܺܝܢ ܐܰܘܟܺܝܬ ܕܽܘܒܳܪ̈ܰܝܢ ܝܰܬܺܝܪ ܡ̣ܶܢ ܙܰܠܺܝ̈ܩܶܐ ܫܶܡܫܳܢܳܝ̈ܶܐ: ܘܰܐܫܘܳܐ ܠܰܢ ܕܒܰܡ̈ܛܰܠܠܐ ܕܢܽܘܗܪܳܐ ܫܒܺܝܚܳܐ ܢܶܣܬܰܬܰܪ: ܘܢܶܫܡܰܥ ܠܩܳܠܳܟ ܚܰܝܳܐ ܕܳܐܡܰܪ ܠܰܢ: ܕܬܰܘ ܥܽܘܠܘ ܒܪ̈ܺܝܟܰܘܗܝ ܝܺܪܰܬܘ ܡܰܠܟܽܘܬܳܐ ܫܡܰܝܳܢܺܝܬܳܐ: ܒܛܽܘܪܳܐ ܗ̇ܰܘ ܩܰܕܺܝܫܳܐ ܘܰܡܫܰܒܚܳܐ ܘܕܰܠܥܶܠ ܡ̣ܶܢ ܥܳܠܡܳܐ: ܚܰܕܶܬ ܒܰܢ ܪܽܘܚܳܐ ܬܩܰܢܬܳܐ ܘܰܫܪܳܪܳܐ ܕܦܽܘܩ̈ܕܳܢܰܝܟ ܡܰܥܒ̈ܕܰܝ ܚܰܝ̈ܶܐ: ܘܰܐܥܒܰܪ ܡܶܢܰܢ ܠܕܶܚܠܬܳܐ ܡܟܰܡܪܢܺܝܬܳܐ ܗ̇ܳܝ ܕܡ̣ܶܢ ܥܶܠܰܬ ܚܛܳܗ̈ܶܐ ܒܰܢ ܡܶܬܝܰܠܕܳܐ: ܘܰܐܫܪܳܐ ܘܰܐܢܺܝܚ ܠܥܰܢܺܝ̈ܕܰܝܢ ܒܰܐܘ̈ܳܢܶܐ ܐܽܘܪ̈ܫܠܳܡܳܝܶܐ: ܘܰܐܫܘܳܐ ܠܰܢ ܘܰܠܗܽܘܢ ܕܢܶܦܽܘܩ ܠܐܘܪܥܳܟ ܒܡܶܐܬܺܝܬܳܟ ܕܬܰܪܬܶܝܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗܰܘ ܢܽܘܗܪܳܐ ܓܰܐܝܳܐ ܘܠܐ ܡܶܬܡܰܠܠܳܢܳܐ: ܠܗܰܘ ܨܶܡܚܳܐ ܪܰܒܳܐ ܕܰܐܒܳܐ ܡܬܽܘܡܳܝܳܐ: ܠܗܰܘ ܝܽܘܩܢܳܐ ܫܒܺܝܚܳܐ ܕܒܶܗ ܐܶܫܬܰܘܕܰܥܢܰܢ ܠܐܪܳܙܳܐ ܡܥܰܠܝܳܐ ܘܰܬܠܺܝܬܳܝܳܐ ܕܰܐܠܳܗܽܘܬܳܐ: ܠܗܰܘ ܕܰܐܡܺܝܢܳܐܝ̣ܬ ܒܛܺܝܠ ܠܶܗ ܥܰܠ ܓܶܢܣܳܐ ܐ̱ܢܳܫܳܝܳܐ ܘܰܒܟܽܠܙܒܰܢ ܣܳܥܰܪ ܠܶܗ ܒܥܽܘܕܪ̈ܳܢܰܘܗܝ ܣܒܺܝ̈ܣܶܐ ܘܠܐ ܡܶܬܡ̈ܰܠܠܳܢܶܐ: ܠܗܰܘ ܕܝܰܘܡܳܢܳܐ ܒܬܶܕܡܽܘܪܬܳܐ ܐܶܬܓܠܺܝ ܥܰܠ ܛܽܘܪܳܐ ܕܬܳܒܽܘܪ ܛܽܘܦܣܳܢܳܝܳܐ: ܘܚܰܘܺܝ ܠܬܰܠܡܺܝ̈ܕܰܘܗܝ ܒܶܨܪܳܐ ܩܰܠܺܝܠ ܡ̣ܶܢ ܫܽܘܒܚܳܐ ܕܺܝܠܶܗ ܟܝܳܢܳܝܳܐ: ܘܫܰܪܰܪ ܐܶܢܽܘܢ ܒܚܶܙܘܳܐ ܕܺܝܠܶܗ ܡܳܪܳܢܳܝܳܐ: ܗ̇ܰܘ ܕܠܶܗ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܕܰܢܫܰܪܰܪ ܠܰܢ ܒܚܽܘܒܶܗ ܐܠܰܗܳܝܳܐ: ܘܰܢܩܰܒܶܠ ܨܠܰܘ̈ܳܬܰܢ ܥܰܠ ܡܰܕܒܚܶܗ ܫܡܰܝܳܢܳܐ: ܘܢܰܫܘܶܐ ܠܰܢ ܕܢܶܣܓܽܘܕ ܠܶܗ ܘܰܢܒܰܪܟܺܝܘܗܝ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ: ܒܗܳܢܳܐ܀

 

ܣܕܪܐ

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܠܐ ܡܶܬܦܰܪܫܳܢܳܐܝ̣ܬ ܘܠܐ ܡܶܫܬܰܚܠܦܳܢܳܐܝ̣ܬ ܡܶܣܬܓܶܕ ܐܰܢ̱ܬ ܘܡܶܫܬܰܒܰܚ ܐܰܢ̱ܬ ܡ̣ܶܢ ܚܰܝܠܰܘ̈ܳܬܳܐ ܢܽܘܪ̈ܳܢܳܝܶܐ ܘܕܰܠܥܶܠ ܡ̣ܶܢ ܥܳܠܡܳܐ ܘܩܽܘ̈ܕܳܫܶܐ ܬܠܺܝܬܳܝ̈ܶܐ ܡܩܰܒܶܠ ܐܰܢ̱ܬ ܡ̣ܶܢ ܦܳܠܰܚ̈ܘܳܬܳܐ ܠܐ ܗܽܘܠܳܢܳܝ̈ܳܬܳܐ: ܘܥܰܠ ܓܺܝ̈ܓܠܐ ܡ̈ܰܠܳܠܳܬܳܐ ܡܶܙܕܰܝܰܚ ܐܰܢ̱ܬ ܡ̣ܶܢ ܝܰܗ̈ܠܐܷ ܘܬܶܓ̈ܡܶܐ ܘܡܳܪ̈ܰܘܳܬܳܐ: ܘܟܰܕ ܨܒܰܝܬ ܒܪܶܚܡܰܬ ܐ̱ܢܳܫܽܘܬܳܟ ܕܰܠܓܶܢܣܳܐ ܕܺܝܠܰܢ ܥܰܦܪܳܢܳܐ ܬܪܰܡܪܶܡ ܘܚܰܒܪܳܐ ܕܪ̈ܽܘܚܳܢܶܐ ܠܶܗ ܬܶܥܒܶܕ: ܘܰܕܫܳܘܶܐ ܠܰܛܝܳܪܳܐ ܕܚܰܝ̈ܶܐ ܠܶܗ ܬܚܰܘܶܐ: ܘܒܰܐܬܪ̈ܰܘܳܬܳܐ ܥܶܠܳܝ̈ܶܐ ܬܛܰܟܶܣ ܠܐܕܳܡ ܗ̇ܰܘ ܩܰܕܡܳܝܳܐ ܘܰܕܡ̣ܶܢ ܛܺܝܢܳܐ ܒܰܣܝܳܐ ܠܘܳܬ ܗܘܳܝܳܐ ܐܰܝܬܺܝܬ: ܘܰܒܫܽܘܠܛܳܢܳܐ ܘܡܰܠܟܽܘܬܳܐ ܠܗܳܢܳܐ ܨܰܒܶܬܬ: ܘܥܰܠ ܟܽܠ ܡܳܐ ܕܰܒܪܰܝܬ ܡܳܪܳܢܳܐܝ̣ܬ ܠܶܗ ܐܰܫܠܶܛܬ: ܘܟܰܕ ܠܘܳܬ ܟܝܳܢܳܐ ܐܰܪܥܳܢܳܝܳܐ ܐܶܬܬܰܚܬܺܝ ܘܡ̣ܶܢ ܫܽܘܒܚܳܐ ܗ̇ܰܘ ܥܶܠܳܝܳܐ ܢܦܰܠ ܒܝܰܕ ܥܒܳܪ ܦܽܘܩܕܳܢܳܐ ܕܡܳܪܽܘܬܳܐ ܕܺܝܠܳܟ: ܘܕܽܘܝܳܪܳܐ ܕܒܰܫܝܽܘܠ ܩܰܒܶܠ: ܘܰܥܓܺܝ̣ܢܳܐ ܒܰܣܝܳܢܳܐ ܐܶܬܚܙܺܝ: ܪ̈ܰܚܡܰܝܟ ܟܝܳܢܳܝ̈ܶܐ ܐܳܘ ܡܳܪܝܳܐ ܢܰܓܕܽܘܟ ܕܬܶܚܽܘܬ ܠܐܪܥܳܐ ܡܶܛܽܠܳܬܶܗ ܘܬܶܦܪܩܺܝܘܗܝ: ܠܘܳܬ ܗ̇ܰܘ ܫܽܘܒܚܳܐ ܩܰܕܡܳܝܳܐ ܬܰܦܢܺܝܘܗܝ: ܒܛܰܝܒܽܘܬܳܟ ܕܶܝܢ ܗ̇ܳܝ ܒܳܪܝܰܬ݀ ܟܽܠ ܦܰܓܪܳܐ ܕܡܽܘܟܳܟܳܐ ܠܒܶܫܬ: ܘܰܠܘܳܬ ܥܽܘܡܩܳܐ ܕܰܫܝܽܘܠ ܢܚܶܬܬ: ܘܡ̣ܶܢ ܨܳܡܰܪܬܳܐ ܕܰܐܒܕܳܢܳܐ ܒܪܶܚܡܰܬ ܚܽܘܒܳܟ ܕܰܐܠܺܝܬܳܝܗܝ: ܘܰܠܪܰܘܡܳܐ ܕܰܐܒܽܘܟ ܥܰܠܺܝܬܳܝܗܝ ܘܰܠܘܳܬ ܬܶܫܒܽܘܚܬܳܐ ܕܺܝܠܳܟ ܩܰܪܶܒܬܳܝܗܝ: ܘܗܳܝܕܶܝܢ ܫܰܪܺܝܬ ܠܰܡܚܰܘܳܝܽܘ ܠܓܶܢܣܳܐ ܕܺܝܠܰܢ ܡܚܺܝܠܐ ܐ̱ܪ̈ܳܙܶܐ ܓܢܺܝ̈ܙܶܐ ܕܰܐܠܳܗܽܘܬܳܟ: ܐܰܝܟܰܢܳܐ ܕܰܢܗܰܝܡܶܢ ܕܰܐܢ̱ܬ ܒܛܰܝܒܽܘܬܳܟ ܢܚܶܬܬ ܘܰܦܪܰܩܬܳܝܗܝ: ܘܟܰܕ ܠܡܽܘܫܶܐ ܡ̇ܰܢ ܗ̇ܰܘ ܩܰܕܡܳܝܳܐ ܘܚܰܙܳܝܳܐ ܕܬܶܕܡܪ̈ܳܬܳܟ: ܚܰܘܺܝܬ ܐܳܬܘ̈ܳܬܳܐ ܘܰܓܢ̱ܒܰܪ̈ܘܳܬܳܐ ܗ̇ܳܢܶܝܢ ܕܰܒܗܶܝܢ ܦܪܰܩܬ ܠܐܝܣܪܳܐܶܝܠ ܡ̣ܶܢ ܥܰܒܕܽܘܬܳܐ ܦܶܪܥܽܘܢܳܝܬܳܐ: ܘܰܒܝܰܕ ܗܳܕܶܐ ܐܶܫܬܰܘܕܰܥܢܰܢ ܠܦܽܘܪܩܳܢܳܐ ܕܰܦܪܰܩܬ ܠܓܶܢܣܰܢ ܡ̣ܶܢ ܥܰܒܕܽܘܬܳܐ ܕܡܰܘܬܳܐ ܘܣܳܛܳܢܳܐ: ܘܰܒܢܽܘܗܪܳܟ ܕܰܒܰܪܬ ܠܥܰܡܳܟ ܐܰܝܟ ܕܰܒܡܰܕܒܪܳܐ ܫܰܗܝܳܐ ܘܠܐ ܡܶܬܝܰܬܒܳܢܳܐ: ܘܰܠܡܽܘܫܶܐ ܬܽܘܒ ܐܶܬܚܙܰܝܬ ܒܣܰܢܝܳܐ ܕܕܳܠܶܩ ܒܢܽܘܪܳܐ ܘܨܶܡܚܳܐ ܡܶܬܝܰܕܥܳܢܳܐ: ܘܥܰܠ ܛܽܘܪܳܐ ܬܽܘܒ ܒܥܰܪܦܶܠܐ ܘܒܰܥܢܳܢܳܐ ܘܰܒܩܳܠܐ ܕܩܰܪ̈ܢܳܬܳܐ: ܘܰܒܟܽܠ ܕܳܪ̈ܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ ܒܫܽܘܚܠܳܦ ܚܶܙܘ̈ܳܢܶܐ ܐܶܬܚܙܰܝܬ: ܘܶܐܬܓܠܰܝܬ ܠܰܢܒܺܝ̈ܶܐ ܘܠܐܒܳܗ̈ܳܬܳܐ: ܘܟܰܕ ܫܽܘܡܠܳܝܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܨܒܰܝܬ ܕܬܶܓܡܽܘܪ ܒܰܫܒܺܝܚܽܘܬܳܐ ܬܗܺܝܪܬܳܐ ܘܡܳܪܳܢܳܝܬܳܐ ܠܒܰܛܢܳܐ ܘܝܰܠܕܳܐ ܘܰܥܡܳܕܳܐ ܐܶܬܰܝܬ ܒܚܰܟܺܝܡܽܘܬܳܐ: ܘܰܩܕܳܡ ܕܰܠܚܰܫܳܐ ܘܡܰܘܬܳܐ ܬܶܫܬܠܶܡ ܒܝܰܕ ܨܠܺܝܒܽܘܬܳܐ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܕܒܰܪܬ ܒܝܰܨܺܝܦܽܘܬܳܐ: ܘܰܠܛܽܘܪܳܐ ܪܳܡܳܐ ܕܬܳܒܽܘܪ ܐܰܣܶܩܬ ܐܶܢܽܘܢ ܥܰܡܳܟ ܒܰܚܦܺܝܛܽܘܬܳܐ: ܟܰܕ ܠܫܶܡܥܽܘܢ ܘܰܠܝܰܥܩܽܘܒ ܘܰܠܝܽܘܚܰܢܳܢ ܓܒܰܝܬ ܠܣܳܗܕܽܘܬܳܐ: ܘܚܰܘܺܝܬ ܐܶܢܽܘܢ ܐ̱ܪ̈ܳܙܶܐ ܓܢܺܝ̈ܙܶܐ ܕܰܐܠܳܗܽܘܬܳܟ: ܘܶܐܫܬܰܚܠܰܦܬ ܠܥܺܢܰܝ̈ܗܽܘܢ ܒܙܺܝܘܳܐ ܢܽܘܪܳܢܳܐ ܕܰܫܒܺܝܚܽܘܬܳܟ: ܘܶܐܬܥܰܛܰܦܬ ܥܢܳܢܳܐ ܢܰܗܺܝܪܬܳܐ ܕܪܽܘܚܳܢܽܘܬܳܐ: ܘܰܐܫܡܰܥܬ ܐܶܢܽܘܢ ܩܳܠܶܗ ܕܰܐܒܳܐ ܡܠܐܷ ܚܰܕ̈ܘܳܬܳܐ: ܕܡܰܙܥܶܩ ܘܶܐܡܰܪ ܕܗܳܢܰܘ ܒܶܪܝ ܚܰܒܺܝܒܳܐ ܠܶܗ ܨܽܘܬܘ ܘܰܫܡܰܥܘ ܕܠܐ ܦܠܺܝܓܽܘܬܳܐ: ܘܰܠܡܽܘܫܶܐ ܘܠܐܠܺܝܳܐ ܐܰܝܬܺܝܬ ܐܶܢܽܘܢ ܒܰܡܣܰܪܗܒܽܘܬܳܐ: ܘܡ̈ܠܐ ܓܢܺܝ̈ܙܳܬܳܐ ܥܰܡܗܽܘܢ ܡܡܰܠܶܠ ܗܘܰܝܬ ܥܰܠ ܚܰܪܬܳܐ ܕܙܰܒ̈ܢܶܐ ܘܝܰܘ̈ܡܳܬܳܐ: ܘܡܶܛܽܠ ܐܰܝܠܶܝܢ ܕܰܒܗܶܝܢ ܥܬܺܝܕ ܐܰܢ̱ܬ ܕܬܶܥܒܶܕ ܠܰܒܪܺܝܬܳܐ ܬܒܰܥܬܳܐ ܘܦܽܘܪܥܳܢܽܘܬܳܐ ܘܟܰܕ ܒܬܶܡܗܳܐ ܐܶܬܬܙܺܝܥܰܬ݀ ܓܽܘܕܳܐ ܕܰܫܠܺܝܚܽܘܬܳܐ: ܢܦܰܠܘ ܩܕܳܡܰܝܟ ܘܰܗܘܰܘ ܐܰܝܟ ܡܺܝ̈ܬܶܐ ܒܰܕܚܺܝܠܽܘܬܳܐ: ܗܳܝܕܶܝܢ ܫܰܪܰܪܬ ܠܪ̈ܶܓܫܶܐ ܕܺܝܠܗܽܘܢ ܘܰܐܩܺܝܡܬ ܐܶܢܽܘܢ ܒܚܰܝܠܬܳܢܽܘܬܳܐ: ܘܶܐܫܬܰܘܕܰܥܘ ܕܰܐܢ̱ܬ ܗ̣ܽܘ ܡܳܪܳܐ ܕܚܰܝ̈ܶܐ ܘܰܕܡܺܝ̈ܬܶܐ ܒܫܰܪܺܝܪܽܘܬܳܐ ܘܫܰܪܺܝ ܫܶܡܥܽܘܢ ܕܢܺܐܡܰܪ ܒܰܡܦܺܝܣܳܢܽܘܬܳܐ: ܕܫܰܦܺܝܪ ܗ̣ܽܘ ܠܰܢ ܕܢܶܥܒܶܕ ܬܠܳܬ ܡܛܰܠܠܺܝ̈ܢ ܠܥܽܘܗܕܳܢܽܘܬܳܐ: ܚܕܳܐ ܠܳܟ ܡܳܪܝ ܘܰܚܕܳܐ ܠܡܽܘܫܶܐ ܘܰܚܕܳܐ ܠܐܠܺܝܳܐ ܒܰܣܕܺܝܪܽܘܬܳܐ: ܘܠܐ ܐܶܬܒܰܝܰܢ ܠܗ̇ܳܢܶܝܢ ܕܡܶܢܶܗ ܡܶܬܡ̈ܰܠܠܳܢ ܗܘܰܝ̈ ܡܶܛܽܠ ܣܰܓܺܝܽܐܘܬ ܪܰܬܺܝܬܽܘܬܳܐ: ܘܰܒܚܰܝܠܳܟ ܡܨܶܐ ܟܽܠ ܐܰܩܺܝܡܬ ܐܶܢܽܘܢ ܘܚܰܝܶܠܬ ܐܶܢܽܘܢ ܘܰܐܢܗܰܪܬ ܐܶܢܽܘܢ ܒܺܝܕܰܥܬܳܐ ܕܪܽܘܚܳܢܽܘܬܳܐ: ܘܙܰܗܰܪܬ ܐܶܢܽܘܢ ܕܢܶܛܪܽܘܢ ܠܐܪܳܙܳܐ ܗܳܢܳܐ ܫܒܺܝܚܳܐ ܥܕܰܡܳܐ ܕܢܶܫܬܰܡܠܐܷ ܚܰܫܳܐ ܕܰܙܩܺܝܦܽܘܬܳܐ: ܘܰܕܠܐ ܬܒܰܛܶܠ ܐܽܘܪܚܳܐ ܓܡܺܝܪܬܳܐ ܕܰܡܕܰܒܪܳܢܽܘܬܳܐ: ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ ܐܳܘ ܡܳܪܳܐ ܛܳܒܳܐ ܘܣܰܓܺܝ ܡܰܘܗ̈ܒܳܬܳܐ ܒܰܫܦܺܝܥܽܘܬܳܐ: ܕܬܰܢܗܰܪ ܠܥܺܕܬܳܟ ܩܰܕܺܝܫܬܳܐ ܒܢܽܘܗܪܳܟ ܪܰܒܳܐ ܡܠܐܷ ܦܰܐܝܽܘܬܳܐ: ܘܰܬܫܰܪܰܪ ܠܰܢ ܥܰܠ ܫܶܬܶܐܣܬܳܐ ܚܰܝܠܬܳܢܺܝܬܳܐ ܕܗܰܝܡܳܢܽܘܬܳܐ ܐܳܪܬܳܕܽܘܟܣܳܝܬܳܐ ܘܰܬܪܰܡܪܶܡ ܩܰܪܢܳܐ ܕܰܟܪ̈ܺܝܣܛܝܳܢܶܐ ܒܰܙܗܺܝܪܽܘܬܳܐ: ܘܰܬܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܡܪܰܚܡܳܢܽܘܬܳܐ ܘܬܶܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܐܘܕܺܝܘ ܒܰܬܠܺܝܬܳܝܽܘܬܳܐ: ܘܰܐܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܢܶܬܶܠ ܬܰܘܕܺܝܬܳܐ: ܠܳܟ ܡܳܪܝ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܠܐܷ ܛܰܝܒܽܘܬܳܐ: ܗܳܫܳܐ܀

 

ܕܨܦܪܐ ܕܥܐܕܐ ܕܡ̈ܛܠܠܐ

 

ܦܪܘܡܝܘܢ ܡܠܝܠܐ ܕܡܕܒܪܢܘܬܐ

 

ܬܶܫܒܽܘܚܬܳܐ: ܠܗܰܘ ܕܺܐܝܬܰܘܗܝ ܗܘܳܐ ܘܺܐܝܬܰܘܗܝ ܘܢܶܗܘܶܐ ܐܺܝܬܰܘܗܝ: ܡܫܰܪܝܳܢܳܐ ܘܡܰܫܠܡܳܢܳܐ ܕܫܽܘܪܳܝܳܐ ܘܫܽܘܠܳܡܳܐ ܠܐ ܚܳܒܶܫ ܠܶܗ ܫܶܠܝܳܐ ܘܰܒܗܺܝܠܐ ܘܠܐ ܡܶܬܬܙܺܝܥܳܢܳܐ: ܘܕܰܐܚܺܝܕ ܐܰܬܪܳܐ ܕܢܰܦܫܶܗ: ܕܟܽܠ ܠܘܳܬܶܗ ܡܶܬܬܙܺܝܥ ܐܰܝܟ ܩܶܢܛܪܽܘܢ ܚܽܘܓܬܳܐ ܘܥܶܠܬܳܐ ܩܰܕܡܳܝܬܳܐ ܟܰܕ ܗ̣ܽܘ ܠܘܳܬ ܡܶܕܶܡ ܠܐ ܡܶܬܬܙܺܝܥ: ܣܰܩܽܘܒܠܳܝܳܐ ܠܘܳܬ ܨܶܒܝܳܢܳܐ ܕܰܠܩܽܘܒܠܐ ܠܐܝܬܽܘܬܶܗ ܠܰܝܬ: ܟܽܠ ܕܰܗܘܳܐ ܘܗܳܘܶܐ ܒܦܽܘܩܕܳܢܶܗ ܐܶܬܬܟܺܝܢ ܘܡܶܬܬܟܺܝܢ ܐܰܝܟ ܕܨܳܒܶܐ ܘܰܐܝܟܰܢܳܐ ܕܨܳܒܶܐ ܠܟܽܠ ܩܰܪܺܝܒ ܘܟܽܠ ܠܘܳܬܶܗ ܠܐ ܩܳܪܶܒ: ܐܳܚܶܕ ܘܠܐ ܡܶܬܬܚܶܕ ܘܰܠܪܰܒܽܘܬܶܗ ܣܳܟܳܐ ܠܐ ܡܬܰܚܰܡ: ܐܠܰܗ ܐܠܰܗܺܝ̈ܢ ܘܡܳܪܶܐ ܡܳܪ̈ܰܘܳܢ ܕܡܶܢܶܗ ܡܶܫܬܰܡܗܳܐ ܟܽܠ ܐܰܒܳܗܽܘܬܳܐ ܕܒܰܫܡܰܝܳܐ ܘܒܰܐܪܥܳܐ ܐܰܒܳܐ ܕܠܐ ܐܰܒܳܐ: ܘܰܒܪܳܐ ܕܶܝܢ ܕܠܐ ܒܪܳܐ: ܪܽܘܚܳܐ ܕܠܐ ܐܰܒܳܐ ܐܳܦܠܐ ܒܪܳܐ: ܕܰܫܘܶܝܢ ܘܰܣܕܺܝܩܺܝܢ: ܘܰܐܘܶܝܢ ܘܰܦܠܺܝܓܺܝܢ ܘܠܐ ܡܶܫܬܰܚܠܦܺܝܢ ܡܶܫܬܰܒ̈ܚܳܢܶܐ ܘܠܐ ܡܫܰܒ̈ܚܳܢܶܐ: ܡܶܣܬܰܓ̈ܕܳܢܶܐ ܘܠܐ ܣܳܓܽܘ̈ܕܶܐ: ܚܰܕ ܟܝܳܢܳܐ ܓܢܺܝܙܳܐ ܘܠܐ ܡܶܬܕܰܪܟܳܢܳܐ ܕܦܽܘ̈ܡܶܐ ܡܠܺܝ̈ܠܐ ܕܟܽܠܗܽܘܢ ܒܪ̈ܰܝܳܐ ܘܰܥܒܺܝ̈ܕܶܐ ܕܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ: ܙܳܝܥܺܝܢ ܘܪܳܥܠܺܝܢ ܘܬܳܡܗܺܝܢ ܘܡܶܬܒܰܠܗܺܝܢ ܡ̣ܶܢ ܬܶܫܒܽܘܚܬܶܗ: ܘܠܶܗ ܬܶܫܒ̈ܚܳܬܳܐ ܣܒܺܝ̈ܣܳܬܳܐ ܒܝܽܘ̈ܒܳܒܶܐ ܡܨ̈ܰܠܠܐ: ܒܩܺܝ̈ܢܳܬܳܐ ܕܰܟܝ̈ܳܬܳܐ ܘܢܶܥ̈ܡܳܬܳܐ ܚܰܠܝ̈ܳܬܳܐ ܡܩܰܠܣܺܝܢ: ܒܗܳܢܳܐ܀

 

ܣܕܪܐ

 

ܐܠܰܗ ܘܰܐܠܳܗܺܝ̈ܢ ܘܡܳܪܶܐ ܡܳܪ̈ܰܘܳܢ ܡܳܪܝܳܐ ܫܡܳܟ: ܡܶܠܬܳܐ ܡܝܰܩܰܢܬܳܐ ܕܦܽܘܡܳܐ ܠܐ ܓܫܺܝܡܳܐ: ܡܡܰܠܠܳܢܳܐ ܘܠܐ ܡܶܬܡܰܠܠܳܢܳܐ ܕܰܐܠܳܗܳܐ ܘܰܐܒܳܐ: ܚܶܟܡܰܬ݀ ܐܠܰܗܺܝ̈ܢ ܘܝܳܗܒܰܬ݀ ܣܟܳܘܠܺܝܽܘܢ ܠܟܽܠ ܚܰܟܺܝ̈ܡܺܝܢ ܕܶܐܬܪܕܺܝܘ ܒܚܶܟܡܬܳܐ ܐܠܰܗܳܝܬܳܐ: ܘܰܡܡܰܕܟܰܬ݀ ܠܪ̈ܳܕܝܰܝ ܒܣܽܘܟܳܠܐ ܚܰܝܠܬܳܢܳܐ: ܚܰܝܠܐ ܡܬܽܘܡܳܝܳܐ ܕܡ̣ܶܢ ܚܰܝܠܬܳܢܽܘܬܳܐ ܩܢܽܘܡܳܝܬܳܐ ܘܝܳܗܒܰܬ݀ ܬܽܘܩܦܳܐ ܠܟܽܠ ܚܰܝܠܬܳܢ̈ܶܐ: ܚܰܝܳܐ ܡܠܺܝܠܐ ܘܠܐ ܡܳܝܽܘܬܳܐ ܘܕܰܠܥܶܠ ܡ̣ܶܢ ܚܰܝ̈ܶܐ ܡܠܺܝ̈ܠܐ: ܗ̇ܰܘ ܕܰܒܝܰܕ ܡܶܬܝܰܠܕܳܢܽܘܬܳܐ ܠܐ ܙܰܒܢܳܝܬܳܐ ܘܠܐ ܐܰܬܪܳܢܳܝܬܳܐ: ܘܠܐ ܕܽܘܟܬܳܢܳܝܬܳܐ: ܗܘܳܐ ܢܽܘܗܪܳܐ ܘܶܐܬܟܰܢܝܰܬ݀ ܟܽܠܳܗ̇ ܒܪܺܝܬܳܐ ܠܐ ܗܽܘܠܳܢܳܝܬܳܐ ܘܕܰܠܥܶܠ ܡ̣ܶܢ ܗܽܘ̈ܠܐܷ: ܘܗܳܕܶܐ ܗܽܘܠܳܢܳܝܬܳܐ: ܟܰܕ ܠܰܚܕܳܐ ܚܕܳܐ ܡܶܢܗܶܝܢ ܐܰܬܰܪ ܕܰܨܒܰܝܬ ܣܰܬܶܬܬ ܒܠܐܴ ܓܫܺܝܡܬܳܐ ܟܰܣܝܽܘܬܳܟ ܫܰܒܰܚܬ: ܘܰܒܗܽܘܠܳܢܳܝܬܳܐ ܓܰܢ̱ܒܳܪܽܘܬܳܟ ܐܰܘܕܰܥܬ: ܟܰܕ ܐܰܣܗܶܕܬ ܘܶܐܡܰܪܬ ܐܳܘ  ܫܒܺܝܚ ܒܰܓܢܺܝܙܽܘܬܳܟ ܡܳܪܝܳܐ: ܕܡ̣ܶܢ ܦܽܘܡ ܥܶܠܳܝܳܐ ܢܶܦܩܶܬ ܘܰܠܟܽܠܳܗ̇ ܕܰܠܬܰܚܬ ܟܰܣܺܝܬ: ܒܪ̈ܰܘܡܶܐ ܥܶܠܳܝ̈ܶܐ ܡܰܫܟܰܢܝ ܢܶܩܫܶܬ ܘܰܒܥܽܘ̈ܡܩܰܝ ܬܗܽܘ̈ܡܶܐ ܐܽܘܪ̈ܚܳܬܝ ܣܳܡܶܬ ܘܥܰܠ ܥܰܡܽܘ̈ܕܰܝ ܥܢ̈ܳܢܶܐ ܬܪܽܘܢܺܝܳܘܢ ܕܥܽܘܫܢܝ ܐܰܘ ܬܳܒܶܬ: ܘܰܒܣܰܘ̈ܦܰܝ ܥܳܡܰܪܬܳܐ ܐܰܘܚܕܰܢܝ: ܘܬܽܘܒ ܐܰܘܕܥܶܬ ܕܒܰܫ̈ܡܰܝ ܫܡܰܝ̈ܳܐ ܥܰܡ ܝܳܠܽܘܕܝ ܐܺܝܬܰܝ: ܘܒܰܡܨܰܥܬܳܐ ܕܰܐܪܥܳܐ ܐܶܥܒܶܕ ܦܽܘܪܩܳܢܝ: ܟܰܕ ܕܶܝܢ ܓܡܰܪܬ ܘܫܰܡܠܺܝܬ ܠܗܰܘ̈ܢܶܐ ܡ̇ܰܢ ܘܰܠܢܽܘܗܪ̈ܶܐ ܥܶܠܳܝ̈ܶܐ ܘܰܠܟܽܘܟܺܝܬܳܐ ܗ̇ܳܝ ܬܽܘܗܽܘܒܳܢܳܝܬܳܐ ܡ̣ܶܢ ܐܰܦܰܝ̈ ܐܳܕܰܡܬܳܐ ܓܰܠܓܶܠܬ ܘܰܕܚܰܝܬ: ܗܳܝܕܶܝܢ ܥܒܳܕ ܐܺܝܕܰܝ̈ܟ ܫܦܰܪ ܠܳܟ ܛܰܒܥܳܐ ܫܰܦܺܝܪܳܐ ܝܰܩܶܢܬ ܕܡܽܘܬ ܨܰܠܡܳܟ ܚܰܝܳܐ ܕܒܶܗ ܐܶܬܝܰܕܥܰܬ݀ ܪܰܒܽܘܬܳܟ: ܟܰܕ ܡ̣ܶܢ ܗܽܘܠܐܷ ܕܳܝܽܘܒܬܳܐ ܪܒܺܝܥܳܝܰܬ݀ ܐܶܣܛܽܘ̈ܟܣܶܐ ܚܰܝܶܕܬܳܝܗܝ: ܘܳܐܕܳܡ ܫܰܡܰܗܬ ܘܟܰܢܺܝܬܳܝܗܝ ܫܰܠܺܝܛܳܐ ܥܰܠ ܗܽܘܠܐܷ ܥܒܰܕܬܳܝܗܝ ܡܫܰܡܫܳܢܳܐ ܘܦܰܠܳܚܳܐ ܕܟܰܪܡܳܐ ܠܐ ܗܽܘܠܳܢܳܝܳܐ ܐܰܣܪܰܚܬܳܝܗܝ: ܘܒܰܪܬ ܨܰܘܒܳܐ ܣܳܡܬ ܥܰܡܶܗ ܐܰܝܟ ܕܰܠܚܰܒܪܽܘܬܶܗ: ܘܫܰܘܬܳܦܬܳܐ ܗܘܳܬ݀ ܕܦܰܪܓܫܳܢܳܐ ܢܳܡܽܘܣܳܝܳܐ ܒܚܰܘܪܳܐ ܕܚܺܐܪܽܘܬܶܗ ܫܛܳܐ ܘܡ̣ܶܢ ܦܽܘܩܕܳܢ ܡܳܪܽܘܬܳܟ ܣܛܳܐ: ܘܥܶܨܝܳܝܳܐ ܐܶܬܚܙܺܝ ܒܢܰܩܺܝܦܽܘܬܳܐ ܕܰܠܥܶܕܪܶܗ ܘܡܶܠܟܳܗ̇ ܩܰܒܶܠ ܒܕܰܐܘܫܶܛ ܐܺܝܕܶܗ ܘܰܡܪܰܛ ܦܺܐܪ ܡܰܘܬܳܐ: ܘܶܐܫܬܠܰܚ ܡ̣ܶܢ ܫܽܘܒܚܶܗ ܘܶܐܣܬܰܪܰܩ: ܘܫܽܘܦܪܶܗ ܘܝܳܐܝܽܘܬܳܐ ܒܰܠܺܝ: ܘܡܺܝܙܪ̈ܳܢܶܐ ܚܶܣܕ̈ܳܢܳܝܶܐ ܘܛܰܪ̈ܦܶܐ ܐܶܬܟܒܶܢ: ܘܶܐܫܬܰܠܰܡ ܠܰܒܥܺܝܪܳܐ ܘܶܐܬܕܰܡܺܝ ܠܳܗ̇: ܘܰܒܪܶܥܝܳܐ ܚܳܢܽܘܩܳܐ ܩܕܳܠܶܗ ܐܰܪܬܰܥ ܗܘܳܐ: ܘܝܺܥܳܢܳܝ̈ܳܬܳܐ ܟܽܘܒܳܢܳܝ̈ܳܬܳܐ ܪܳܥܶܐ ܗܘܳܐ: ܘܡܰܝ̈ܳܐ ܡܰܘܬܪ̈ܳܢܳܝܶܐ ܠܐܴܝܰܥ ܗܘܳܐ: ܘܟܳܣܳܐ ܬܶܛܪܳܢܳܝܳܐ ܐܶܫܬܺܝ ܗܘܳܐ ܘܟܽܠ ܕܰܐܦܪܺܝ: ܗܳܝܕܶܝܢ ܟܰܕ ܚܙܰܝܬ ܐܳܘ ܒܪܳܐ ܘܡܶܠܬܳܐ ܕܰܐܠܳܗܳܐ ܠܰܥܒܳܕܳܐ ܕܺܝܠܳܟ ܘܨܰܠܡܳܐ ܕܪܰܒܽܘܬܳܟ ܕܡ̣ܶܢ ܩܳܝܽܘ̈ܡܶܐ ܥܳܫܽܘ̈ܩܶܐ ܘܡܳܪ̈ܰܝܳܐ ܙܥܺܝ̈ܦܶܐ ܐܶܬܥܰܒܕܰܕ ܒܳܬܰܪ ܟܽܠܗܶܝܢ ܡܝܰܬܪ̈ܳܬܳܐ ܕܫܰܟܶܢܬ ܠܳܗ̇: ܐܶܬܬܘܺܝܬ ܥܠܰܘܗܝ ܘܰܒܗܳܝ ܕܢܺܚܶܐ ܦܰܪܢܶܣܬ ܒܕܰܨܠܰܝܬ ܫܡܰܝܳܐ ܘܥܰܪܦܶܠܐ ܪܰܟܶܒܬ: ܘܰܐܬܰܪ ܕܰܨܒܰܝܬ ܢܛܰܚܬ: ܘܶܐܡܰܪܬ ܕܡ̣ܶܢ ܩܕܳܡ ܥܳܠܡ̈ܶܐ ܐܺܝܬܰܝ ܘܒܺܐܝܣܪܳܐܶܝܠ ܐܰܫܪܳܐ: ܘܡ̣ܶܢ ܝܰܥܩܽܘܒ ܠܥܳܠܡܺܝܢ ܥܽܘܗܕܳܢܝ ܠܐ ܢܶܥܢܰܕ ܘܰܡܫܰܚܬ ܩܢܽܘܡܳܝܽܘܬܳܟ ܒܒܶܣܪܳܐ ܡܡܰܕܥܳܐ ܘܰܡܢܰܦܫܳܐ ܕܠܶܗ ܐܶܬܚܰܝܰܕܬ ܒܰܩܪܺܝܬܳܐ ܪܚܺܝܡܬܳܐ ܕܡܶܢܳܗ̇ ܡܰܘܠܳܕܳܐ ܬܪܰܝܳܢܳܐ ܣܒܰܠܬ: ܒܙܰܒܢܳܐ ܘܕܽܘܟܬܳܐ ܟܰܕ ܠܐ ܣܳܟ ܥܳܐܶܠ ܐܰܢ̱ܬ ܒܝܰܕ ܒܽܘܪܢܳܫܳܟ ܬܚܶܝܬ ܐܰܪܰܬܡܰܛܺܝܩܺܝ ܣܒܺܝܣܰܬ݀ ܒܡܶܢܝܳܢܳܐ ܕܰܟܬܳܒ̈ܶܐ ܘܕܰܟܝܳܢܳܐ: ܘܳܐܦܠܐ ܡܢܳܬܳܐ ܘܥܶܐܦܳܐ ܘܦܶܠܓܳܐ ܐܺܝܬܰܝܟ: ܐܳܦܠܐ ܐ̱ܚܪܺܢܳܐ ܘܰܐ̱ܚܪܺܢܳܐܝ̣ܬ: ܐܶܠܐ ܚܰܕ ܐܠܰܗܳܐ ܒܰܫܪܳܪܳܐ ܐܺܝܬܰܝܟ ܘܰܠܥܳܠܰܡ ܥܳܠܡܺܝܢ: ܚܰܕ ܡܫܺܝܚܳܐ ܕܰܒܫܰܦܪܳܐ ܘܰܒܦܳܢܝܳܐ ܐܶܬܚܙܰܝܬ: ܟܰܕ ܠܗܰܠ ܡ̣ܶܢ ܪܰܡܫܳܐ ܘܫܽܘܠܳܡܳܐ ܐܺܝܬܰܝܟ: ܕܰܒܥܰܡ̈ܡܶܐ ܪ̈ܰܚܺܝܩܶܐ ܐܶܬܚܰܘܺܝ ܫܽܘܠܛܳܢܳܟ: ܘܒܶܐܡ̈ܘܳܬܳܐ ܩܰܪ̈ܺܝܒܳܬܳܐ ܦܽܘܪܩܳܢܳܟ: ܡ̣ܶܢ ܡܶܨܪܶܝܢ ܚܰܕ ܒܪܳܐ ܩܪܳܟ ܐܰܒܳܐ ܣܳܗܕܳܐ ܠܐ ܡܶܬܕܰܓܠܳܢܳܐ: ܒܢܳܨܪܰܬ݀ ܓܙܽܘܪܬܳܐ ܫܰܡܠܺܝܬ ܐܰܝܟ ܕܰܒܢܳܡܽܘܣܳܐ ܩܰܪܶܒܬ: ܘܥܰܠ ܕܪ̈ܳܥܶܐ ܡܰܪ̈ܫܠܳܢܶܐ ܒܗܰܝܟܠܐ ܐܶܙܕܰܝܰܚܬ: ܩܽܘܪ̈ܒܳܢܶܐ ܕܰܒܢܳܡܽܘܣܳܐ ܩܰܪܶܒܬ ܚܠܳܦܰܝܟ ܘܩܰܒܶܠܬ ܠܰܗܡܰܝܪ̈ܶܐ ܡܠܺܝ̈ܠܐ ܕܺܐܝܪܽܘܕܺܝܰܢܽܘ ܛܰܠܝܽܘ̈ܣܶܐ ܐܶܬܟܰܢܺܝܬ: ܘܥܰܡ ܝܳܢܽܘܣ̈ܩܶܐ ܕܽܐܘܪܫܠܶܡ ܠܰܓܠܶܓܬ: ܒܢܳܨܪܰܬ ܡܕܺܝܢ̱ܬܳܐ ܐܶܬܪܰܒܺܝܬ: ܘܰܒܥܰܡܳܐ ܝܰܩܺܝܪܳܐ ܐܶܬܓܕܰܘܕܰܬ: ܐܰܝܟ ܕܶܩܠܐ ܐܶܬܓܰܢ̱ܒܰܪܬ: ܘܰܐܝܟ ܐܰܪ̈ܙܶܐ ܕܠܶܒܢܳܢ ܐܶܬܥܰܠܰܡܬ: ܘܰܐܝܟ ܐܺܝܠܳܢܳܐ ܕܡܶܫܚܳܐ ܒܣܳܢܺܝܪ ܫܶܘܚܰܬ݀ ܩܰܘܡܬܳܟ: ܘܰܐܝܟ ܕܽܘܠܒܳܐ ܡܥܰܠܝܳܐ ܥܰܠ ܣܦܳܪ̈ܰܝ ܝܽܘܪܕܢܳܢ ܐܶܬܚܙܰܝܬ: ܘܰܥܡܰܕܬ ܘܚܰܠܶܠܬܳܝܗܝ ܠܗܰܘ ܨܰܚܢܳܐ ܕܒܰܣܝܳܢܳܐ ܐܶܨܛܰܥܨܰܥ ܗܘܳܐ: ܘܰܐܝܟ ܙܰܝܬܳܐ ܥܰܒܺܝܛ ܫܽܘܒܚܳܐ ܒܰܦܩܰܥܬܳܐ ܪܰܒܺܝܬ: ܘܰܒܨܰܘܡܳܐ ܐܰܪܒܥܺܝܢܳܝܳܐ ܫܰܚܶܢܬ ܘܠܰܡܢܰܣܝܳܢܳܐ ܫܰܦܶܠܬ: ܟܰܕ ܒܩܺܝܢܳܡܽܘܢ ܘܰܒܡܽܘܪܳܐ ܕܒܰܣܺܝܡܽܘܬܳܟ ܣܰܡܣܶܡܬ ܠܣܰܪܝܽܘܬܳܐ ܫܽܘܚܢܳܢܳܝܬܳܐ ܕܰܐܝܠܶܝܢ ܕܠܐ ܪܥܰܘ ܒܥܽܘܕܪ̈ܳܢܰܝܟ: ܡ̣ܶܢ ܗܰܝܟܠܐ ܪܺܝܫܳܝܳܐ ܘܡ̣ܶܢ ܠܘܳܬ ܚܰܕܝܽܘܟ ܒܒܶܣܡܳܐ ܡ̣ܶܢ ܝܰܕ ܙܳܢܺܝܬܳܐ ܐܶܬܡܫܰܚܬ: ܘܡܰܘܒܠܐ ܚܛܺܝܬܳܢܳܝܬܳܐ ܡ̣ܶܢ ܢܰܦܫܳܗ̇ ܫܪܰܝܬ: ܘܰܠܠܶܒܰܘ̈ܳܬܳܐ ܕܚܰܛܳܝ̈ܶܐ ܣܰܒܪܳܐ ܪܰܒܳܐ ܕܰܬܝܳܒܽܘܬܳܐ ܡܠܰܝܬ: ܠܛܽܘܪ ܬܳܒܽܘܪ ܥܰܡ ܬܰܠܡܺܝ̈ܕܰܝܟ ܓܒܰܝ̈ܳܐ ܣܠܶܩܬ: ܘܒܶܨܪܳܐ ܙܥܽܘܪܳܐ ܡ̣ܶܢ ܬܶܫܒܽܘܚܬܳܐ ܕܰܐܠܳܗܽܘܬܳܟ ܥܠܰܝܗܽܘܢ ܐܰܙܠܶܓܬ: ܘܓܰܠܝܳܐܝ̣ܬ ܥܰܠ ܚܰܫܳܟ ܘܰܨܠܺܝܒܽܘܬܳܟ ܘܡܰܘܬܳܟ ܩܕܳܡܰܝܗܽܘܢ ܐܰܪܶܙܬ: ܘܪ̈ܺܝܫܳܢܶܐ ܕܰܢܒܺܝܰܝ̈ܟ ܡܽܘܫܶܐ ܘܶܐܠܺܝܳܐ ܦܰܓܪܳܢܳܐܝ̣ܬ ܠܗܽܘܢ ܚܰܘܺܝܬ ܘܗܰܝܡܢܽܘܟ ܕܰܐܢ̱ܬ ܗ̣ܽܘ ܡܳܪܳܐ ܕܚܰܝ̈ܶܐ ܘܰܕܡܺܝ̈ܬܶܐ ܫܰܪܺܝܪܳܐܝ̣ܬ: ܘܰܩܠܺܝ̈ܕܶܐ ܡ̣ܶܢ ܪ̈ܺܝܫܳܢܶܐ ܕܥܰܬܺܝܩܬܳܐ ܢܣܰܒܬ: ܘܬܰܩܕܳܐ ܪܳܥܝܳܝܳܐ ܘܫܽܘܠܛܳܢܳܐ ܡܳܪܳܢܳܝܳܐ ܠܐܪ̈ܟܽܘܢܺܝܣܛܶܐ ܕܰܚܕܰܬܳܐ ܐܰܓܥܶܠܬ: ܘܶܐܬܦܰܫܩܰܬ݀ ܘܶܐܬܓܰܠܝܰܬ݀ ܗ̇ܳܝ ܕܠܐ ܢܶܛܥܡܽܘܢ ܡܰܘܬܳܐ ܥܕܰܡܳܐ ܕܬܶܬܓܠܐܷ ܘܬܶܬܚܰܘܶܐ ܡܰܠܟܽܘܬܳܟ ܠܗܽܘܢ ܫܰܘܕܰܥܬ: ܘܟܰܕ ܠܰܡܕܺܝܢܰܬ݀ ܨܳܠܽܘ̈ܒܶܐ ܡܰܪܕܺܝܬܳܐ ܥܒܰܕܬ: ܥܺܝܠܐ ܒܰܣܝܳܐ ܪܟܶܒܬ ܘܡ̣ܶܢ ܠܐ ܡܨܰܥ̈ܨܥܶܐ ܐܶܫܬܰܒܰܚܬ: ܘܰܐܢܗܰܪܬ ܠܬܰܪ̈ܥܝܳܬܳܐ ܕܫܰܒܪ̈ܶܐ ܘܩܰܠܣܽܘܟ ܒܬܶܫ̈ܒܚܳܬܳܐ ܟܰܕ ܐܳܡܪܺܝܢ: ܬܶܫܒܽܘܚܬܳܐ ܒܰܡܪ̈ܰܘܡܶܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ: ܚܰܫܬ ܒܒܽܘܪܢܳܫܳܟ ܟܰܕ ܠܥܶܠ ܡ̣ܶܢ ܚܰܫ̈ܶܐ ܐܺܝܬܰܝܟ: ܡܠܰܝܬ ܠܛܽܘܪ ܬܳܒܽܘܪ ܥܰܡ ܬܰܠܡܺܝ̈ܕܰܝܟ ܓܒܰܝ̈ܳܐ ܣܠܶܩܬ: ܘܒܶܨܪܳܐ ܙܥܽܘܪܳܐ ܡ̣ܶܢ ܬܶܫܒܽܘܚܬܳܐ ܕܰܐܠܳܗܽܘܬܳܟ ܥܠܰܝܗܽܘܢ ܐܰܙܠܶܓܬ: ܘܓܰܠܝܳܐܝ̣ܬ ܥܰܠ ܚܰܫܳܟ ܘܰܨܠܺܝܒܽܘܬܳܟ ܘܡܰܘܬܳܟ ܩܕܳܡܰܝܗܽܘܢ ܐܰܪܶܙܬ: ܐܶܬܩܒܰܥܬ ܒܕܽܘܟܬܳܐ ܓܦܺܝܦܬܳܐ ܒܓܳܓܽܘܠܬܳܐ ܥܰܠ ܨܠܺܝܒܳܐ: ܘܰܐܫܠܶܡܬ ܪܽܘܚܳܟ ܒܺܐܝ̈ܕܰܝ ܐܰܒܽܘܟ: ܒܰܙܩܽܘܪܳܐ ܟܶܬܳܢܳܝܳܐ ܕܝܰܘܣܶܦ ܐܶܬܟܰܪܟܰܬ ܘܰܒܚܽܘܢܰܛܬܳܐ ܢܺܝܩܳܘܕܺܝܡܽܘܣܳܝܬܳܐ ܐܶܬܥܰܢܰܕܬ: ܘܰܒܩܰܒܪܳܐ ܢܩܺܝܪ ܒܟܺܐܦܳܐ ܘܓܰܢܬܶܗ ܕܝܰܘܣܶܦ ܒܽܘܠܽܘܛܺܝ ܐܶܬܩܒܰܪܬ: ܘܰܬܚܶܝܬ ܛܰܒ̈ܥܶܐ ܘܛܺܝܛܠܽܘܣ ܐܶܬܬܣܺܝܡܬ: ܗܳܝܕܶܝܢ ܩܛܺܝܠܐ ܨܰܦܪܳܝܳܐ ܚܕܺܝ ܕܰܚܙܳܟ: ܘܥܰܢܺܝܕܳܐ ܦܳܢܝܳܝܳܐ ܪܘܰܙ ܕܶܐܫܬܰܘܕܥܳܟ: ܡܺܝ̈ܬܰܝ ܥܳܠܰܡ ܐܰܪܥܽܘܟ: ܘܰܫܟܺܝ̈ܒܰܝ ܕܳܪܕܳܪ̈ܺܝܢ ܐܰܩܒܠܽܘܟ: ܥܳܡܪ̈ܰܝ ܚܶܦܪܳܐ ܗܰܠܠܽܘܟ: ܘܰܚܒܺܝ̈ܫܰܝ ܚܶܫܽܘܟܳܐ ܐܰܟܪܙܽܘܟ: ܦܰܓܪ̈ܶܐ ܣܰܓܺܝ̈ܶܐܐ ܕܰܫܟܺܝܒܺܝܢ ܗܘܰܘ ܡ̣ܶܢ ܩܰܒܪ̈ܰܝܗܽܘܢ ܩܳܡܘ ܘܰܢܦܰܩܘ: ܘܒܳܬܰܪ ܩܝܳܡܬܳܟ ܒܶܝܬ ܚܰܝ̈ܶܐ ܣܗܶܕܘ ܘܣܰܒܪܽܘܟ ܘܰܠܩܰܒܪ̈ܰܝܗܽܘܢ ܗܦܰܟܘ: ܐܶܬܡܰܠܰܠ ܒܡܰܘܬܳܐ ܕܽܘܟܪܳܢܳܟ ܘܒܰܫܝܽܘܠ ܐܶܬܟܪܶܙ ܛܶܐܒ ܢܽܘܚܳܡܳܟ: ܩܳܡܬ ܬܠܺܝܬܳܝ ܝܰܘ̈ܡܶܐ ܒܬܶܫܒܽܘܚܬܳܐ ܡ̣ܶܢ ܩܰܒܪܳܐ ܘܦܶܪܚܰܬ݀ ܣܒܰܪܬܳܐ ܩܝܳܡܬܳܢܳܝܬܳܐ ܒܟܽܠ ܐܰܪܰܥ: ܣܠܶܩܬ ܒܫܽܘܒܚܳܐ ܠܘܳܬ ܐܰܒܽܘܟ: ܘܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܡܶܬܓܰܝܶܐܐ ܐܰܢ̱ܬ: ܘܰܒܝܽܘܒܳܠܐ ܕܪܽܘܚܳܐ ܦܰܪܰܩܠܺܛܳܐ ܚܰܟܶܡܬ ܘܫܰܪܰܪܬ ܠܰܬܪܶܥܣܰܪܬܳܝܽܘܬܳܐ ܒܥܶܠܺܝܬܳܐ ܗ̇ܳܝ ܐ̱ܪܳܙܳܢܳܝܬܳܐ: ܘܗ̣ܶܢܽܘܢ ܠܟܽܠܳܗ̇ ܥܳܡܰܪܬܳܐ ܡܰܠܶܠܘ ܘܰܐܛܺܝܦܘ ܘܰܡܠܰܘ ܒܪܶܚܡܬܳܟ ܐܺܝܬܝܳܝܬܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ:ܠܐ ܬܶܛܥܶܐ ܠܥܺܕܬܳܐ ܕܺܝܠܳܟ ܒܡܶܬܕܰܟܪܳܢܽܘܬܳܟ ܕܙܰܒܶܢܬܳܗ̇ ܒܣܽܘܪܳܩܳܐ ܕܺܝܠܳܟ ܨܶܒܝܳܢܳܝܳܐ: ܐܶܠܐ ܢܶܫܬܰܪܰܪ ܫܽܘܕܳܝܳܐ ܡܶܠܰܝ̈ܟ ܕܰܠܘܳܬܳܗ̇: ܕܰܐܝܟ ܪܽܘܕܽܘܕܰܦܢܳܐ ܐܶܩܽܘܫ ܥܰܩܪܶܟܝ: ܘܰܐܝܟ ܓܦܶܬܳܐ ܫܒܺܝܚܬܳܐ ܝܳܐܝܰܬ݀ ܦܺܐܪ̈ܶܐ ܐܶܨܒܶܟܝ: ܢܽܘܪ̈ܒܰܝܟܝ ܢܽܘܪ̈ܒܰܝ ܗܶܕܪܳܐ ܘܣܰܘܟܰܝ̈ܟܝ ܣܰܘ̈ܟܰܝ ܬܶܫܒܽܘܚܬܳܐ ܐܶܘܢܽܘܟ̈ܣܰܝܟ ܢܶܣܛܽܘܢ ܠܘܳܬܳܗ̇: ܘܡ̣ܶܢ ܦܳܬܽܘܪܳܗ̇ ܢܶܬܦܰܛܡܽܘܢ: ܘܡ̣ܶܢ ܚܰܡܪܳܗ̇ ܪܽܘܚܳܢܳܝܳܐ ܢܶܫܬܽܘܢ: ܘܢܶܬܒܰܣܡܽܘܢ ܘܢܶܪܘܽܘܢ: ܠܕܰܘܩܳܐ ܕܰܒܡܰܓܕܠܳܗ̇ ܕܳܐܶܩ: ܒܳܒ̈ܳܬܳܐ ܠܐ ܛܺܝܛܳܢܳܝ̈ܳܬܳܐ ܕܥܰܝ̈ܢܶܐ ܠܐ ܟܰܡ̈ܗܳܬܳܐ: ܗܰܒ ܠܡܶܫܬܰܘܕܳܥܽܘ ܠܐܝܠܶܝܢ ܕܒܰܟܡܺܐܢܳܐ ܕܫܽܘܩܪܳܐ ܛܫܶܝܢ ܘܫܰܩܳܪ̈ܳܬܳܐ ܘܥܽܘ̈ܢܳܬܳܐ ܥܠܶܝܗ̇ ܪܳܢܶܝܢ: ܠܐܚܺܝ̈ܕܰܝ ܬܰܩܕܳܐ ܕܺܝܠܳܗ̇ ܛܰܘܶܛ ܠܗܽܘܢ ܚܽܘܛܪܳܐ ܕܩܰܝܣܽܘܬܳܐ ܘܡܰܫܪܽܘܩܺܝ̣ܬܳܐ ܐܠܰܒܶܟ: ܐܰܝܟܰܢܳܐ ܕܰܒܝܰܕ ܩܛܳܝܗܽܘܢ ܢܕܰܘܕܽܘܢ ܠܕܺܐܒ̈ܶܐ ܡܶܬܝܰܕ̈ܥܳܢܶܐ ܕܠܐ ܢܶܬܡܨܽܘܢ ܠܰܡܡܰܥܳܣܽܘ ܠܐܡܪ̈ܶܝܗ̇: ܠܰܕܥܰܠ ܫܽܘܪ̈ܶܝܗ̇ ܡܰܛܪ̈ܳܬܳܐ ܠܺܠܝܳܝ̈ܳܬܳܐ ܢܳܛܪܺܝܢ ܫܰܟܶܢ ܠܗܽܘܢ ܥܺܝܪܽܘܬܳܐ ܕܠܐ ܡܶܬܚܰܠܨܳܐ ܡ̣ܶܢ ܡܰܕܡܟܳܐ ܡܙܰܡܶܢ ܚܽܘܠܳܨܳܐ ܡܰܘܬܳܢܳܝܳܐ: ܠܦܰܐܦܺܝܽܘܣ ܕܒܳܗ̇ ܐܰܦܳܘܩܪܺܝܣܺܝܣ ܡܩܰܒܰܠܬܳܐ ܐܰܥܛܶܦ: ܐܰܝܟܰܢܳܐ ܕܰܠܪ̈ܶܒܝܳܬܳܐ ܕܟܰܟܪ̈ܰܝܗܽܘܢ ܐܰܥܦܳܐ ܢܰܝܬܽܘܢ: ܘܒܰܙܥ̈ܳܩܳܬܗܽܘܢ ܠܛܰܪ̈ܦܳܢܣܰܘܗܝ ܕܒܶܠܐܷܝܰܪ ܡܳܪܽܘܕܳܐ ܢܒܰܙܥܽܘܢ ܠܕܺܝܰܐܩܳܢܽܘ ܕܕܺܝܰܐܪ̈ܽܘܢܺܝܣܶܐ ܙܰܒܢܳܝ̈ܶܐ ܥܳܡܪܺܝܢ ܒܳܗ̇ ܐܰܦܽܘܕܳܐ ܛܶܟܣܳܢܳܝܳܐ ܙܩܺܝܪܰܬ݀ ܒܢܰܘܠܐ ܩܽܘܫܬܺܝ̣ܢܳܝܳܐ ܘܰܡܬܰܠܦܰܬ ܒܣܺܝ̣ܪܶܣ ܠܐ ܡܶܣܬܰܕܩܳܢܳܐ ܐܠܰܒܶܫ: ܐܰܝܟܰܢܳܐ ܕܟܰܕ ܡ̣ܶܢ ܗܳܪܟܳܐ ܢܫܰܢܽܘܢ ܒܗܳܝ ܕܰܠܥܶܠ ܢܶܫܬܘܽܘܢ ܕܰܢܫܰܡܫܽܘܢ: ܠܰܡܙܰܡܪ̈ܳܢܶܐ ܕܒܳܗ̇ ܚܰܟܶܡ ܐܰܝܟܰܢܳܐ ܕܰܒܝܰܕ ܐܰܒܽܘ̈ܒܶܐ ܐܽܘܪ̈ܓܰܢܳܝܶܐ ܢܒܰܣܡܽܘܢ ܠܐܡܪ̈ܶܝܗ̇: ܘܰܒܢܶܥ̈ܡܳܬܗܽܘܢ ܚܰܠܝ̈ܳܬܳܐ ܒܒܰܪܬ ܩܳܠܐ ܬܡܺܝܢܳܝܰܬ݀ ܩܺܝ̈ܢܳܬܳܐ ܠܳܟ ܡܩܰܒܠܳܢܳܐ ܕܩܽܘ̈ܕܳܫܶܐ ܢܶܩܥܽܘܢ: ܗܳܟܘܳܬ ܘܰܠܟܽܠ ܕܒܰܛܝܳܪܳܗ̇ ܚܒܺܝܫ ܛܰܪ: ܘܰܐܫܘܳܐ ܠܡܶܫܘܰܪ ܥܰܠ ܡܶܢ ܢܽܘ̈ܟܬܳܬܳܐ ܓܳܪ̈ܣܳܢܳܝܳܬܳܐ ܘܥܽܘ̈ܩܣܶܐ ܥܶܩܰܪ̈ܒܳܢܳܝܳܬܳܐ: ܠܦܶܬܢܳܐ ܡܰܪܺܝܪܳܐ ܕܥܰܠ ܫܒܺܝܠ ܝܰܠܕܶܝ̈ܗ̇ ܪܰܒܺܝܥ ܘܰܠܡܶܡܚܳܐ ܠܥܶܩܒܳܐ ܕܺܝܠܗܽܘܢ ܒܳܥܶܐ: ܒܩܽܘܢܛܳܪ ܨܠܺܝܒܳܐ ܢܶܦܥܽܘܢ ܪܺܝܫܶܗ ܘܢܶܗܘܶܐ ܠܬܰܗܠܰܠܬܳܐ ܘܰܠܡܶܣܬܰܠܝܳܢܽܘܬܳܐ ܘܠܰܡܡܰܝܩܳܢܽܘܬܳܐ: ܘܶܐܡܰܬܝ ܕܨܳܦܰܚܬܳܐ ܩܶܨܳܢܳܝܬܳܐ ܠܡܰܪܕܺܝܬܳܐ ܩܳܛܥܳܐ ܘܙܰܘܚܳܐ ܥܬܺܝܕܳܐ ܕܡܶܐܬܺܝܬܳܐ ܬܪܰܝܳܢܺܝܬܳܐ ܕܦܽܘܪܥܳܢ ܕܳܪ̈ܶܐ ܘܫܰܪ̈ܒܳܬܳܐ ܥܳܒܶܕ ܐܰܢ̱ܬ: ܢܶܫܬܘܶܐ ܚܢܰܢ ܘܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܒܥܰܝ̈ܢܶܐ ܠܐ ܢܳܝܽܘ̈ܡܳܬܳܐ ܘܰܒܬܶܡܪ̈ܶܐ ܕܠܐ ܡܬܺܝܚܳܐ ܥܠܰܝܗܽܘܢ ܫܶܢܰܬ݀ ܡܰܘܬܳܐ ܬܶܢܝܳܢܳܐ: ܐܶܠܐ ܟܰܕ ܐܰܣܺܝܪܺܝܢ ܚܰܨܰܝ̈ܢ ܘܡܰܢܗܪܺܝܢ ܫܪ̈ܳܓܰܝܢ: ܕܳܠܩܺܝܢ ܠܰܡܦܺܐܕܰܝ̈ܢ ܒܡܶܫܚܳܐ ܕܰܡܪܰܚܡܳܢܽܘܬܳܐ: ܒܩܰܘ̈ܡܶܐ ܗ̇ܳܢܽܘܢ ܕܰܒܦܽܘܪܺܝܳܘܢ ܕܰܡܪܰܝܡܽܘܬܳܟ ܪܒܰܘ ܘܺܝܪܶܒܘ: ܒܪ̈ܰܚܡܶܐ ܢܶܬܬܕܺܝܢ ܘܢܶܐܪܽܘܥ ܦܰܪܨܽܘܦܳܟ ܫܒܺܝܚ ܡܶܢ ܟܽܠ ܘܢܰܓܣܶܐ ܠܶܒܰܢ ܬܶܫܒ̈ܚܳܬܳܐ ܕܺܝܠܳܟ: ܘܢܰܒܰܥ ܦܽܘܡܰܢ ܬܰܘܕ̈ܝܳܬܳܟ: ܘܢܶܪ̈ܬܡܳܢ ܣܶܦܘ̈ܳܬܰܢ ܩܽܘ̈ܠܳܣܶܐ ܕܺܐܝܬܽܘܬܳܟ ܘܕܰܐܒܽܘܟ ܡܫܰܒܚܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܕܪܽܘܚܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ܀

ܥܛܪܐ

 

ܝܰܠܕܳܐ ܕܺܝܠܺܝܕ ܡܢ ܐܰܒܳܐ ܩܕܳܡ ܥܳܠܡ̈ܶܐ ܘܰܟܣܶܐ ܡܢ ܥܶܠܳܝ̈ܶܐ: ܘܝܰܠܕܶܗ ܦܰܓܪܳܢܳܝܳܐ ܝܺܕܺܝܥ ܙܰܒܢܶܗ ܘܰܓܠܐܷ ܡܰܘܠܳܕܶܗ ܒܒܶܝܬܠܚܶܡ: ܬܰܪܒܺܝܬܶܗ ܒܺܝܗܽܘܕ: ܡܰܥܡܽܘܕܺܝܬܶܗ ܒܝܽܘܪܕܢܳܢ: ܙܳܟܽܘܬܶܗ ܒܡܰܕܒܪܳܐ: ܡܰܠܦܳܢܽܘܬܶܗ ܒܛܽܘܪ ܬܳܒܽܘܪ: ܐ̱ܪܳܙܶܗ ܒܥܶܠܺܝܬܳܐ: ܩܒܽܘܪܬܶܗ ܒܪܰܡܫܳܐ: ܩܝܳܡܬܶܗ ܒܠܺܠܝܳܐ: ܓܶܠܝܳܢܳܐ ܕܢܽܘܚܳܡܶܗ ܒܨܰܦܪܳܐ: ܣܒܰܪܬܶܗ ܒܶܝܬ ܥܰܡ̈ܡܶܐ: ܫܽܘܠܛܳܢܶܗ ܒܪܰܘܡܳܐ ܘܰܒܥܽܘܡܩܳܐ: ܥܺܕܬܶܗ ܡܙܰܝܚܳܐ ܡܕܰܒܪܳܢܽܘܬܶܗ: ܡܰܪܥܺܝܬܶܗ ܣܳܓܕܳܐ ܠܰܨܠܺܝܒܶܗ: ܟܳܗܢܰܘ̈ܗܝ ܡܩܰܪܒܺܝܢ ܠܶܗ ܒܶܣ̈ܡܶܐ ܘܰܨܠܰܘ̈ܳܬܳܐ ܩܕܳܡ ܡܰܕܒܚܶܗ ܕܗܽܘ ܢܩܰܒܶܠ ܐܶܢܽܘܢ ܒܛܰܝܒܽܘܬܶܗ: ܘܰܐܒܳܐ ܫܳܠܽܘܚܶܗ ܢܫܰܟܶܢ ܒܗܽܘܢ ܚܽܘܣܳܝܳܐ ܠܟܽܠ ܕܰܐܘܕܺܝ ܒܶܗ ܘܰܒܪܽܘܚܶܗ ܩܰܕܺܝܫܳܐ ܘܫܽܘܒܩܳܢܳܐ ܠܟܽܠ ܕܰܡܗܰܝܡܶܢ ܒܶܗ: ܘܚܽܘܣܳܝܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܒܶܗ: ܘܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܐܠܳܗܳܐ ܐܰܒܳܐ ܐܰܚܺܝܕ ܟܽܠ: ܘܠܰܒܪܳܐ ܝܺܚܺܝܕܳܝܳܐ ܦܳܪܽܘܩܳܐ ܕܟܽܠ: ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܕܟܽܠ ܡܶܕܶܡ: ܬܠܳܬܳܐ ܩܢܽܘ̈ܡܶܐ ܫܰܘ̈ܝܰܝ ܒܺܐܝܬܽܘܬܳܐ: ܬܠܳܬܳܐ ܫܡܳܗ̈ܶܐ ܫܰܘ̈ܝܰܝ ܒܽܐܘܣܺܝܰܐ ܕܚܰܕ ܐܠܰܗܳܐ ܐܺܝܬܰܝܗܽܘܢ: ܘܚܰܕ ܟܝܳܢܳܐ ܡܶܬܝܰܕܥܺܝܢ ܘܚܰܕ ܨܶܒܝܳܢܳܐ ܡܶܫܬܰܒܚܺܝܢ: ܚܰܕ ܚܰܝܠܐ ܕܠܐ ܚܳܐܶܒ: ܘܚܰܕ ܥܽܘܫܢܳܐ ܕܠܐ ܬܳܚܶܒ: ܚܰܕ ܫܽܘܠܛܳܢܳܐ ܕܠܐ ܡܶܫܬܪܶܐ: ܘܚܰܕ ܐܽܘܚܕܳܢܳܐ ܕܠܐ ܥܳܒܰܪ: ܚܰܕ ܚܶܟܡܬܳܐ ܕܠܐ ܒܳܛܠܐ: ܘܰܚܕܳܐ ܝܺܕܰܥܬܳܐ ܕܠܐ ܡܶܬܕܰܪܟܳܐ: ܥܳܒܽܘܕܬܳܐ ܘܠܐ ܥܒܺܝܕܬܳܐ: ܡܫܰܡܠܝܳܢܺܝܬܳܐ ܘܠܐ ܡܶܫܬܰܡܠܝܳܢܺܝܬܳܐ: ܕܠܳܗ̇ ܡܶܬܬܚܺܝܒܳܐ ܬܶܫܒܽܘܚܬܳܐ ܘܬܰܘܕܺܝܬܳܐ: ܒܗܳܢܳܐ܀

 

ܣܕܪܐ

 

ܐܰܝܠܶܝܢ ܒܢ̈ܳܬ ܩ̈ܳܠܐ ܫܒܺܝ̈ܚܳܬܳܐ ܡܶܫܟ̈ܚܳܢ ܕܰܢܡ̈ܰܠܠܳܢ ܬܶܕܡܪ̈ܳܬܳܟ ܦܰܐܝ̈ܳܬܳܐ ܡܳܪܝܳܐ ܐܠܰܗܳܐ: ܒܪܶܬܡܳܐ ܟܺܝܬ ܘܙܰܘ̈ܥܶܐ ܘܡܰܕ̈ܥܶܐ ܚܰܬܺܝ̈ܬܶܐ ܢܶܫܬܰܥܽܘܢ ܫܽܘܒܚܳܟ ܫܒܺܝܚܳܐ ܕܰܠܥܶܠ ܡܶܢ ܟܝܳܢܳܐ ܘܣܽܘܟܳܠܐ ܦܰܓܪܳܢܳܝܳܐ ܐܰܘ ܓܢܺܝܙ ܡܶܢܟܽܠ: ܘܡܰܒܥܰܕ ܡܶܢ ܟܽܠ ܝܺܕܰܥܬܳܐ ܐ̱ܢܳܫܳܝܬܳܐ: ܕܶܐܬܚܰܘܺܝ ܬܚܶܝܬ ܙܰܒܢܳܐ: ܘܕܰܒܙܰܒܢܳܐ ܐ̱ܚܪܺܢܳܐ ܐܶܬܓܠܺܝ: ܗܰܘܢܳܐ ܕܠܐ ܡܶܬܥܰܩܰܒ ܘܠܐ ܡܶܬܕܪܶܟ: ܕܰܢܦܰܠ ܠܶܗ ܬܚܶܝܬ ܒܥܳܬܳܐ ܕܚܰܟܺܝ̈ܡܶܐ ܘܠܐ ܐܶܫܟܰܚܘ ܕܰܢܡܰܠܠܽܘܢܳܝܗܝ: ܐܰܝܟ ܕܺܐܝܬܰܘܗܝ ܡ̣ܢ ܥܳܠܰܡ ܘܰܠܥܳܠܡܺܝܢ ܠܐ ܥܳܒܰܪ: ܒܰܐܝܠܶܝܢ ܚܽܘ̈ܫܳܒܶܐ ܓܫܺܝ̈ܡܶܐ ܐܺܝܬ ܚܰܝܠܐ ܕܰܢܣܰܝܟܽܘܢ ܠܫܰܪܒܶܗ: ܙܳܚ ܡܶܠܬܳܐ ܡܬܽܘܡܳܝܳܐ ܒܨܶܒܝܳܢܶܗ ܕܰܐܒܳܐ ܘܪܽܘܚܳܐ: ܘܰܢܚܶܬ ܠܒܶܫ ܦܰܓܪܳܐ ܐ̱ܢܳܫܳܝܳܐ ܕܰܟܝܳܢܰܢ ܡܶܬܚܰܒܠܳܢܳܐ: ܛܳܒ ܗܽܘ ܡܳܪܝܳܐ ܘܛܰܝܒܽܘܬܶܗ ܥܰܠ ܕܳܚܠܰܘ̈ܗܝ: ܘܛܰܝܒܽܘܬܶܗ ܕܡܳܪܝܳܐ ܡܢ ܥܳܠܰܡ ܗܺܝ ܘܠܰܢ ܐܶܬܝܰܗܒܰܬ݀: ܘܝܰܗܒܳܗ̇ ܐܰܒܳܐ ܡܰܘܗܰܒܬܳܐ ܛܳܒܬܳܐ ܠܥܳܠܡܳܐ: ܕܰܢܚܶܬ ܡܶܢ ܫܡܰܝܳܐ ܟܰܕ ܒܝܰܕ ܥܺܝܪܳܐ ܐܶܬܟܪܶܙ ܣܽܘܒܳܪܶܗ ܘܕܶܢܚܶܗ ܕܡܢ ܒܬܽܘܠܬܳܐ: ܘܰܕܠܐ ܙܽܘܘܳܓܳܐ ܐܶܬܒܛܶܢ ܒܰܥܠܰܝܡܬܳܐ ܒܰܪܬ ܕܰܘܺܝܕ: ܘܶܐܬܺܝܠܶܕ ܟܰܕ ܠܐ ܐܺܫܬܪܺܝܘ ܛܰܒ̈ܥܶܐ ܒܬܽܘ̈ܠܳܝܶܐ: ܕܒܰܐܦܰܝ̈ ܡܰܪܒܥܳܐ ܥܒܺܝܕܺܝܢ ܣܳܗ̈ܕܶܐ ܕܕܰܟܝܽܘܬܳܐ ܘܕܰܢܛܺܝܪܽܘܬܳܐ ܠܣܳܗܕܽܘܬܳܐ ܕܪܽܘܚܳܢܽܘܬܶܗ ܐܶܬܢܛܰܪܘ: ܘܰܠܕܽܘܡܳܪܳܐ ܕܡܶܬܒܰܪܢܫܳܢܽܘܬܶܗ: ܘܡܶܢ ܗܳܪܟܳܐ ܕܽܘܡܳܪܳܐ ܐܶܬܩܪܺܝ ܒܰܢܒܺܝܽܘܬܳܐ ܘܬܶܗܪܳܐ ܪܰܒܳܐ ܘܬܶܕܡܽܘܪܬܳܐ ܕܠܐ ܡܶܬܒܰܨܝܳܐ: ܕܽܘܡܳܪܰܐ ܗ̱ܘ ܒܟܽܠܳܗ̇ ܐܽܘܪܚܳܐ ܕܰܡܕܰܒܪܳܢܽܘܬܶܗ ܘܬܶܗܪܳܐ ܪܰܒܳܐ ܒܰܐܠܳܗܽܘܬܶܗ ܘܰܒܐ̱ܢܳܫܽܘܬܶܗ ܟܰܕ ܐܺܝܬܰܘܗܝ ܐܠܰܗܳܐ ܢܚܶܬ ܡܶܢ ܫܡܰܝܳܐ: ܘܟܰܕ ܠܒܶܫ ܦܰܓܪܳܐ ܫܪܳܐ ܒܰܒܬܽܘܠܬܳܐ ܟܰܕ ܐܺܝܬܰܘܗܝ ܐܠܰܗܳܐ: ܢܦܰܩ ܠܥܶܠ ܡܶܢ ܟܝܳܢܳܐ ܡܶܢ ܟܰܪܣܳܐ ܟܰܕ ܐܺܝܬܰܘܗܝ ܒܰܪܢܳܫܳܐ: ܐܶܬܟܰܪܰܟ ܒܥܰܙܪܽܘܪ̈ܶܐ ܟܰܕ ܐܺܝܬܰܘܗܝ ܐܠܰܗܳܐ: ܫܰܒܚܽܘܗܝ ܚܰܝܠܰܘ̈ܳܬܳܐ ܕܡܰܠܐܟ̈ܶܐ ܘܟܰܕ ܐܺܝܬܰܘܗܝ ܒܰܪܢܳܫܳܐ: ܚܙܰܐܘܽܘܗܝ ܪ̈ܳܥܰܘܳܬܳܐ ܒܰܡܥܰܪܬܳܐ ܟܰܕ ܐܺܝܬܰܘܗܝ ܐܠܰܗܳܐ: ܘܥܺܝܪܳܐ ܫܰܘܕܥܶܗ ܠܝܰܘܣܶܦ ܟܰܕ ܐܺܝܬܰܘܗܝ ܒܰܪܢܳܫܳܐ: ܗܦܰܟ ܠܐܪܥܳܐ ܕܺܐܝܣܪܳܐܶܝܠ ܟܰܕ ܐܺܝܬܰܘܗܝ ܐܠܰܗܳܐ: ܘܰܐܣܗܶܕ ܥܠܰܘܗܝ ܐܰܒܳܐ ܫܡܰܝܳܢܳܐ ܟܰܕ ܐܺܝܬܰܘܗܝ ܒܰܪܢܳܫܳܐ: ܐܶܬܥܡܶܕ ܒܝܽܘܪܕܢܳܢ ܡܶܢ ܝܽܘܚܰܢܳܢ ܟܰܕ ܐܺܝܬܰܘܗܝ ܐܠܰܗܳܐ: ܒܰܪܶܟ ܥܰܠ ܠܰܚܡܳܐ ܘܰܣܓܺܝ ܐܰܝܟ ܐܠܰܗܳܐ: ܘܶܐܟܰܠ ܡܶܢ ܠܰܚ̈ܡܶܐ ܐܰܝܟ ܒܰܪܢܳܫܳܐ: ܢܰܚܶܡ ܠܡܺܝ̈ܬܶܐ ܐܰܝܟ ܐܠܰܗܳܐ: ܘܰܐܣܺܝ ܟܪ̈ܺܝܗܶܐ ܐܰܝܟ ܒܰܪܢܳܫܳܐ: ܐܰܘܕܰܥ ܠܬܰܠܡܺܝ̈ܕܰܘܗܝ ܕܡܺܝܬ ܠܳܥܳܙܳܪ ܐܰܝܟ ܐܠܰܗܳܐ: ܘܫܰܐܶܠ ܕܰܐܝܟܳܐ ܣܳܡܬܽܘܢܳܝܗܝ ܐܰܝܟ ܒܰܪܢܳܫܳܐ: ܫܒܰܩ ܚܛܳܗܰܘ̈ܗܝ ܕܰܡܫܰܪܝܳܐ ܐܰܝܟ ܐܠܰܗܳܐ: ܘܪܰܩ ܥܰܠ ܐܰܪܥܳܐ ܘܦܰܬܰܚ ܠܣܰܡܝܳܐ ܐܰܝܟ ܒܰܪܢܳܫܳܐ: ܡܰܠܶܠ ܥܰܡ ܬܰܠܡܺܝ̈ܕܰܘܗܝ ܕܬܰܘ ܢܶܣܰܩ ܠܛܽܘܪ ܬܳܒܽܘܪ ܘܬܶܚܙܽܘܢ ܫܒܺܝ̈ܚܳܬܳܐ ܐܰܝܟ ܐܠܰܗܳܐ: ܘܶܐܬܚܰܫܰܒ ܫܶܡܥܽܘܢ ܕܢܶܥܒܶܕ ܠܶܗ ܡ̈ܛܰܠܠܐ ܐܰܝܟ ܒܰܪܢܳܫܳܐ: ܐܶܫܬܰܚܠܰܦ ܠܥܺܢܰܝ̈ܗܽܘܢ ܘܰܐܒܪܶܩ ܚܶܙܘܶܗ ܐܰܝܟ ܐܠܰܗܳܐ: ܘܶܐܬܳܐ ܠܘܳܬܶܗ ܡܽܘܫܶܐ ܡܶܢ ܡܺܝ̈ܬܶܐ ܘܶܐܠܺܝܳܐ ܡܶܢ ܚܰܝ̈ܶܐ ܘܰܚܙܰܐܘܽܘܗܝ ܐܰܝܟ ܒܰܪܢܳܫܳܐ: ܐܰܫܡܰܥ ܐܶܢܽܘܢ ܩܳܠܶܗ ܕܰܐܒܳܐ ܐܰܝܟ ܐܠܰܗܳܐ: ܘܰܐܘܕܰܥ ܐܶܢܽܘܢ ܥܰܠ ܚܰܫܶܗ ܘܰܙܩܺܝܦܽܘܬܶܗ ܐܰܝܟ ܒܰܪܢܳܫܳܐ: ܩܰܒܶܠ ܫܽܘܒܚܳܐ ܒܽܐܘ̈ܫܰܥܢܶܐ ܐܰܝܟ ܐܠܰܗܳܐ: ܘܰܪܟܶܒ ܥܰܠ ܥܺܝܠܐ ܐܰܝܟ ܒܰܪܢܳܫܳܐ: ܣܗܶܕ ܕܰܠܒܰܝܬܳܐ ܕܳܐܒܝ ܥܒܰܕܬܽܘܢܳܝܗܝ ܒܶܝܬ ܬܶܐܓܽܘܪܬܳܐ ܐܰܝܟ ܐܠܰܗܳܐ: ܘܰܥܒܰܕ ܦܪ̈ܳܓܶܠܐ ܡܶܢ ܚܰܒܠܐ ܘܰܛܪܰܕ ܐܶܢܽܘܢ ܐܰܝܟ ܒܰܪܢܳܫܳܐ: ܘܰܐܘܕܰܥ ܠܫܶܡܥܽܘܢ ܕܟܳܦܰܪ ܒܶܗ ܐܰܝܟ ܐܠܰܗܳܐ: ܘܶܐܬܒܰܙܰܚ ܡܢ ܣܳܦܪ̈ܶܐ ܘܰܦܪ̈ܺܝܫܶܐ ܐܰܝܟ ܒܰܪܢܳܫܳܐ: ܐܰܓܺܝܠ ܠܝܽܘܕܳܐ ܢܟܺܝܠܐ ܘܝܰܗܒ ܠܶܗ ܠܰܚܡܳܐ ܨܒܺܝܥܳܐ ܐܰܝܟ ܐܠܰܗܳܐ: ܘܩܰܒܶܠ ܢܽܘܫܰܩܬܳܐ ܡܶܢ ܙܺܐܦܳܢܳܐ ܐܰܝܟ ܒܰܪܢܳܫܳܐ: ܐܶܡܰܪ ܠܝܽܘ̈ܕܳܝܶܐ ܫܪܰܐܘܽܘܢܳܝܗܝ ܠܗܰܝܟܠܐ ܗܳܢܳܐ ܘܶܐܒܢܶܝܘܗܝ ܐܰܝܟ ܐܠܰܗܳܐ: ܘܚܰܘܺܝ ܕܟܰܪܝܳܐ ܠܶܗ ܠܢܰܦܫܶܗ ܡܶܢ ܡܰܘܬܳܐ ܐܰܝܟ ܕܰܠܒܰܪܢܳܫܳܐ: ܐܰܙܺܝܥ ܠܨܳܠܽܘ̈ܒܶܐ ܐܰܝܟ ܐܠܰܗܳܐ: ܘܰܩܥܳܐ ܐܠܰܗܝ ܐܠܰܗܝ ܠܡܳܢܳܐ ܫܒܰܩܬܳܢܝ ܐܰܝܟ ܒܰܪܢܳܫܳܐ: ܐܰܦܩܰܥ ܠܫܽܘ̈ܥܶܐ ܘܨܰܪܺܝ ܠܩܰܒܪ̈ܶܐ ܐܰܝܟ ܐܠܰܗܳܐ: ܘܶܐܬܩܒܰܥ ܒܨܶܨ̈ܶܐ ܐܰܝܟ ܒܰܪܢܳܫܳܐ: ܪܕܳܐ ܡܶܢ ܕܰܦܢܶܗ ܕܡܳܐ ܘܡܰܝ̈ܳܐ ܐܰܝܟ ܐܠܰܗܳܐ: ܘܰܐܥܠܽܘܗܝ ܠܓܰܘ ܩܰܒܪܳܐ ܐܰܝܟ ܒܰܪܢܳܫܳܐ: ܩܳܡ ܒܬܶܫܒܽܘܚܬܳܐ ܡܶܢ ܒܶܝܬ ܡܺܝ̈ܬܶܐ ܐܰܝܟ ܐܠܰܗܳܐ: ܘܒܳܬܰܪ ܩܝܳܡܬܶܗ ܐܶܟܰܠ ܘܶܐܫܬܺܝ ܐܰܝܟ ܒܰܪܢܳܫܳܐ: ܠܐ ܫܪܳܐ ܛܰܒ̈ܥܶܐ ܕܩܰܒܪܳܐ ܟܰܕ ܢܦܰܩ ܐܰܝܟ ܐܠܰܗܳܐ: ܘܟܰܕ ܐܶܬܢܰܚܰܡ ܚܙܰܐܝܳܝ̈ܗܝ ܢܶܫ̈ܶܐ ܐܰܝܟ ܒܰܪܢܳܫܳܐ: ܥܰܠ ܠܥܶܠܺܝܬܳܐ ܟܰܕ ܐܰܚܺܝܕܺܝܢ ܬܰܪ̈ܥܶܐ ܐܰܝܟ ܐܠܰܗܳܐ: ܘܚܰܘܺܝ ܕܽܘܟܰܬ݀ ܨܶܨ̈ܶܐ ܘܠܽܘܟܳܝܬܳܐ ܐܰܝܟ ܒܰܪܢܳܫܳܐ: ܫܰܪܰܪ ܠܬܽܐܘܡܰܐ ܕܶܐܬܦܰܠܰܓ ܐܰܝܟ ܐܠܰܗܳܐ: ܘܗܰܝܡܢܽܘܗܝ ܘܓܳܫܽܘܗܝ ܐܰܝܟ ܒܰܪܢܳܫܳܐ: ܣܠܶܩ ܠܰܫܡܰܝܳܐ ܘܶܐܬܚܙܺܝ ܠܗܽܘܢ ܐܰܝܟ ܒܰܪܢܳܫܳܐ: ܐܶܠܐ ܫܰܕܰܪ ܠܽܗܘܢ ܪܽܘܚܶܗ ܩܰܕܺܝܫܳܐ ܘܚܰܟܶܡ ܐܶܢܽܘܢ ܐܰܝܟ ܐܠܰܗܳܐ: ܘܒܰܕܓܽܘܢ ܚܢܰܢ ܡܗܰܝ̈ܡܢܶܐ ܒܥܺܐܕܳܐ ܗܳܢܳܐ ܡܚܰܓܶܝܢܰܢ ܘܳܐܡܪܺܝܢܰܢ: ܝܰܘܡܳܢܳܐ ܝܰܘܡܰܐ ܗ̱ܘ ܩܰܪܝܳܐ ܘܩܰܕܺܝܫܳܐ: ܝܰܘܡܰܐ ܗ̱ܘ ܕܚܰܕܽܘܬܳܐ ܘܕܰܪܘܳܙܳܐ: ܝܰܘܡܰܐ ܗ̱ܘ ܕܚܰܝ̈ܶܐ ܘܡܺܝ̈ܬܶܐ ܐܶܬܟܰܢܰܫܘ ܫܰܘܝܳܐܝ̣ܬ: ܝܰܘܡܰܐ ܗ̱ܘ ܕܒܶܗ ܐܰܓܥܶܠܘ ܥܰܬܺܝ̈ܩܶܐ ܩܠܺܝ̈ܕܶܐ ܦܽܘܩ̈ܕܳܢܶܐ ܠܰܚܕ̈ܳܕܶܐ: ܝܰܘܡܰܐ ܗ̱ܘ ܕܒܶܗ ܚܳܕܶܝܢ ܬܰܠܡܺܝ̈ܕܶܐ ܕܰܚܙܰܘ ܫܽܘܒܚܳܐ ܪܰܒܳܐ ܕܠܐ ܡܶܬܡܰܠܰܠ: ܝܰܘܡܰܐ ܗ̱ܘ ܕܰܡܠܐܷ ܚܰܕ̈ܘܳܬܳܐ: ܝܰܘܡܰܐ ܗ̱ܘ ܕܥܺܕܰܬ ܩܽܘܕܫܳܐ ܚܳܕܝܳܐ ܒܶܗ ܘܒܰܪܬ ܐܰܪ̈ܡܳܝܶܐ ܦܨܺܝܚܳܐ ܒܶܗ: ܘܡܶܢ ܡܳܪܳܗ̇ ܫܳܐܠܐ ܫܽܘܒܩܳܢܳܐ ܕܰܚܛܳܗ̈ܶܐ ܕܰܒܢܶܝ̈ܗ̇ ܘܚܽܘܣܳܝܳܐ ܕܝܰܠܕܶܝ̈ܗ̇: ܘܰܢܝܳܚܳܐ ܘܒܽܘܣܳܡܳܐ ܠܟܽܠܗܽܘܢ ܥܰܢܺܝ̈ܕܶܐ ܕܰܥܢܰܕܘ ܡܶܢܳܗ̇ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܙܳܡܪܳܐ ܬܶܫܒܽܘܚܬܳܐ ܕܠܐ ܫܰܠܘܳܐ ܠܰܒܪܳܐ ܕܦܰܪܩܳܗ̇ ܒܰܡܕܰܒܪܳܢܽܘܬܶܗ ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ܀

 

ܛܟܣܐ ܡܪܝ ܐܚܐ ܥܢܘܝܐ ܕܕܝܪܐ ܕܦܢܬ ܕܥܠ ܓܢܒ ܒܝܬ ܡܢܥܡ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܚܰܕܳܐ ܠܰܢ ܡܳܪܝ ܒܥܺܐܕܳܟ ܗ̇ܰܘ ܠܐ ܡܶܫܬܰܪܝܳܢܳܐ: ܘܗܰܒܠܰܢ ܕܰܒܕܰܟܝܽܘܬܳܐ ܢܩܰܠܶܣ ܠܥܺܐܕܶܗ ܕܡܳܪܝ ܐܰܚܳܐ ܒܬܽܘܠܐ ܩܰܕܺܝܫܳܐ ܕܪܰܚܡܳܟ ܒܟܽܠܶܗ ܠܶܒܳܐ ܘܪܶܥܝܳܢܳܐ: ܘܰܐܥܒܰܪ ܡܶܢܰܢ ܒܰܨܠܰܘ̈ܳܬܶܗ ܟܽܠܶܗ ܚܣܳܡܳܐ ܘܚܶܪܝܳܢܳܐ: ܘܰܐܪܚܶܩ ܡܶܢܰܢ ܟܽܠ ܟܺܐܒܳܐ ܟܽܘܪܗܳܢܳܐ: ܡܳܪܰܢ ܘܰܐܠܳܗܳܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܘܒܰܣܺܝܡܳܐ ܕܰܥܒܰܕ ܗ̣ܽܘ ܠܶܗ ܐܰܚܳܐ ܘܚܰܒܪܳܐ ܕܒܳܝ̈ܫܶܐ ܘܡܶܣ̈ܟܺܢܶܐ: ܠܗܰܘ ܕܺܐܝܬܰܘܗܝ ܐܠܰܗܳܐ ܒܰܟܝܳܢܶܗ ܘܥܰܒܕܰܢ ܠܶܗ ܒܪܶܚܡܰܬ ܐ̱ܢܳܫܽܘܬܶܗ ܐܰܚ̈ܶܐ ܘܰܒܢܰܝ̈ܳܐ ܘܝܳܪ̈ܽܘܬܳܐ ܒܡܰܠܟܽܘܬܶܗ: ܠܗܰܘ ܕܰܓܒܳܝܗܝ ܠܡܳܪܝ ܐܰܚܳܐ ܝܺܚܺܝܕܳܝܳܐ ܘܥܳܢܘܳܝܳܐ: ܘܡ̣ܶܢ ܦܳܠܚܽܘܬܳܐ ܕܰܩܕܳܡ ܡܰܠܟܳܐ ܦܳܪܣܳܝܳܐ ܦܰܪܫܶܗ ܠܶܗ ܠܡܳܪܝ ܡܺܝܟܳܐܶܝܠ ܢܺܝܢܘܳܝܳܐ: ܘܰܗܘܰܘ ܦܳܠܚ̈ܶܐ ܠܝܶܫܽܘܥ ܡܰܠܟܳܐ ܐܺܝܬܝܳܝܳܐ: ܠܗܰܘ ܕܰܥܒܰܕ ܐܶܢܽܘܢ ܫܽܘܪܳܝܳܐ ܘܒܶܝܬ ܓܰܘܣܳܐ ܠܐܬܪܰܢ ܘܰܠܟܽܠܗܽܘܢ ܡܗܰܝ̈ܡܢܶܐ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܟܰܕ ܠܝܰܘܡܳܐ ܚܰܕܽܘܬܳܢܳܝܳܐ ܘܰܦܨܺܝܚܳܐ ܕܥܰܕܥܺܐܕܳܟ ܐܠܰܗܳܝܳܐ: ܐܳܘ ܪܰܒܳܐ ܒܥܳܢ̈ܘܳܝܶܐ ܘܰܚܠܺܝܨܳܐ ܒܺܝܚܺܝ̈ܕܳܝܶܐ: ܘܟܰܫܺܝܪܳܐ ܒܛܽܘܪ̈ܳܝܶܐ ܘܡܰܕܒܪ̈ܳܝܶܐ ܢܰܨܺܝ̈ܚܶܐ: ܘܢܰܨܺܝܚ ܫܽܘܦܪ̈ܶܐ ܡܳܪܝ ܐܰܚܳܐ ܠܕܽܘܟܪܳܢܳܐ ܡܫܰܡܠܶܝܢܰܢ: ܘܰܩܕܳܡ ܟܶܢܫܳܐ ܕܰܡܗܰܝ̈ܡܢܶܐ ܠܰܫܒܺܝܚܽܘܬ ܬܶܕܡܪ̈ܳܬܳܐ ܕܺܝܠܳܟ ܐܠܰܗܳܝ̈ܳܬܳܐ ܡܶܫܬܰܥܶܝܢܰܢ ܘܢܽܘܛܦ̈ܳܬܳܐ ܡ̣ܶܢ ܝܰܡܳܐ ܪܘܺܝܚܳܐ ܕܳܐܬܘ̈ܳܬܳܐ ܕܺܝܠܳܟ ܣܰܓܺܝ̈ܳܐܬܳܐ ܕܳܠܺܝܢܰܢ: ܘܰܒܓܰܘ ܡܰܫܡܰܥܬܳܐ ܕܰܒܢܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܣܳܝܡܺܝܢܰܢ: ܘܒܰܒ̈ܢܳܬ ܩ̈ܳܠܐ ܚܰܠܝ̈ܳܬܳܐ ܐܳܡܪܺܝܢܰܢ: ܗܳܢܳܐ ܝܰܘܢܳܐ ܫܒܺܝܚܳܐ ܘܰܗܕܺܝܪܳܐ ܕܶܐܬܥܰܛܰܦ ܡ̣ܶܢ ܢܶܨ̈ܶܐ ܕܟܳܦܽܘܪܽܘܬܳܐ: ܘܶܐܫܬܩܶܠ ܡ̣ܶܢ ܪܺܝܫ ܥܰܝܢܳܐ ܡܕܺܝܢ̱ܬܳܐ ܘܰܠܦܳܪܶܣ ܢܚܶܬ ܒܰܫܒܺܝܬܐ: ܥܰܡ ܢܳܟܽܘܢ ܪܰܒ ܚܰܝܠܐ ܕܦܳܪܣܳܝܽܘܬܳܐ: ܗܳܢܳܐ ܫܽܘܦܢܺܝܢܳܐ ܫܰܦܺܝܪܳܐ ܕܦܳܫ ܡ̣ܶܢ ܐܰܒܳܗܰܘ̈ܗܝ ܒܰܡܓܰܙܝܽܘܬܳܐ: ܘܰܠܡܳܪܝ ܡܺܝܟܳܐܶܝܠ ܐܶܬܚܰܒܰܪ ܒܢܰܩܺܝܦܽܘܬܳܐ: ܟܰܕ ܒܦܶܨܬܳܐ ܠܗܰܘ ܐܶܬܺܝܗܶܒ ܡ̣ܶܢ ܫܒܺܝܬܳܐ ܗܳܢܳܐ ܘܰܣܩܳܐ ܙܥܽܘܪܳܐ ܕܰܫܒܰܩ ܥܰܒܕܽܘܬܳܐ ܕܒܰܐܬܪܳܐ ܕܦܳܪܣܳܝܽܘܬܳܐ: ܘܰܠܛܽܘܪ ܥܰܒܕܺܝ̈ܢ ܡܛܳܐ ܒܰܒܛܺܝܠܽܘܬܳܐ ܘܰܒܬܰܠܕܰܐܪܳܘܣ ܥܰܒܕ ܬܶܕܡܽܘܪܬܳܐ: ܕܰܦܫܰܛ ܠܠܶܫܳܢܶܗ ܕܛܰܠܝܳܐ ܚܰܘܪܳܐ ܒܪܶܗ ܕܪܺܝܫܳܢܳܐ  ܬܶܐܘܳܕܳܘܪܳܘܣ: ܘܡ̣ܶܢ ܟܪܶܣ ܐܶܡܶܗ ܐܶܬܺܝܠܶܕ ܒܚܰܪܳܫܽܘܬܳܐ ܘܦܺܐܩܽܘܬܳܐ: ܗܳܢܳܐ ܕܥܰܡ ܫܽܘܡܠܳܝܳܗ̇ ܕܬܶܕܡܽܘܪܬܳܐ ܕܰܝܪܳܐ ܒܢܳܐ ܠܶܗ ܥܰܠ ܓܶܢ̱ܒ ܬܰܠܕܰܐܪܳܘܣ ܒܝܰܨܺܝܦܽܘܬܳܐ: ܘܺܝܬܶܒܘ ܒܳܗ̇ ܡܳܪܝ ܐܰܚܳܐ ܘܡܳܪܝ ܡܺܝܟܳܐܶܝܠ ܒܰܦܨܺܝܚܽܘܬܳܐ: ܘܶܐܬܺܝܗܶܒ ܠܗܽܘܢ ܛܰܠܝܳܐ ܕܰܐܣܺܝܘ ܕܰܫܡܶܗ ܗܘܳܐ ܚܰܘܪܳܐ ܕܰܢܫܰܡܶܫ ܠܗܽܘܢ ܒܬܰܠܡܺܝܕܽܘܬܳܐ: ܘܰܗܘܰܘ ܒܶܗ ܝܰܬܺܝܪ ܡ̣ܶܢ ܥܶܣܪܺܝܢ ܐܰܚ̈ܶܐ ܒܰܟܢܺܝܫܽܘܬܳܐ: ܗܳܢܳܐ ܕܚܳܢܶܗ ܠܗܳܒܶܝܠ ܥܠܰܝܡܳܐ ܕܡܶܬܬܰܥܒܰܕ ܗܘܳܐ ܡ̣ܶܢ ܪܽܘܚܳܐ ܕܛܰܢܦܽܘܬܳܐ: ܘܰܛܪܰܕ ܠܪܽܘܚܳܐ ܕܫܳܚܶܩ ܗܘܳܐ ܠܶܗ ܒܰܐܠܺܝܨܽܘܬܳܐ ܘܰܡܢܳܬܳܐ ܕܟܰܪܡܳܐ ܩܰܒܶܠ ܡ̣ܶܢ ܬܶܐܘܳܕܳܘܪܳܘܣ ܒܙܰܡܳܪܬܳܐ ܩܪܺܝܬܳܐ: ܗܳܢܳܐ ܕܛܰܝܶܒ ܢܰܦܫܶܗ ܠܐܘܪܫܠܶܡ ܐܶܙܰܠ ܒܰܒܛܺܝܠܽܘܬܳܐ: ܘܒܽܐܘܪܚܶܗ ܝܺܕܰܥ ܠܰܬܪܶܝܢ ܐܰܚܰܘ̈ܗܝ ܘܰܫܡܰܥ ܛܶܒܳܗ̇ ܕܶܐܡܶܗ ܚܰܫܺܝܫܰܬ݀ ܒܣܰܝܒܽܘܬܳܐ: ܘܰܫܒܰܩ ܐܶܢܽܘܢ ܘܰܠܕܰܝܪܶܗ ܡܛܳܐ ܒܰܡܣܰܪܗܒܽܘܬܳܐ: ܕܰܢܫܰܡܠܐܷ ܦܽܘܩܕܳܢ ܡܳܪܶܗ ܒܫܰܪܺܝܪܽܘܬܳܐ: ܗܳܢܳܐ ܕܝܰܗܒ ܠܐܡܶܗ ܫܚ̈ܳܩܶܐ ܘܛܽܘܪܳܦܳܐ ܒܝܰܕ ܡܶܐܬܺܝܬܳܗ̇ ܕܰܠܘܳܬܶܗ ܟܽܠܳܗ̇ ܗ̇ܳܝ ܡܰܒܰܥܕܽܘܬܳܐ: ܘܟܰܕ ܚܙܳܗ̇ ܒܗܳܝ ܠܐܷܘܬܳܐ: ܒܟܳܐ ܘܶܐܡܰܪ ܕܡܳܪܝ ܠܐ ܬܶܚܫܽܘܒ ܠܺܝ ܗܳܕܶܐ ܣܰܟܠܽܘܬܳܐ: ܗܳܢܳܐ ܕܰܐܢܺܝܚܳܗ̇ ܠܐܡܶܗ ܒܫܳܩܽܘܬܳܐ ܕܡܰܝ̈ܳܐ ܕܡ̣ܶܢ ܩܽܘܠܬܳܐ ܘܰܐܥܠܳܗ̇ ܠܕܰܝܪܳܐ ܕܺܝܠܶܗ ܒܰܚܘܺܝܚܽܘܬܳܐ: ܘܒܳܬܰܪ ܫܢܰܝ̈ܳܐ ܬܫܰܥ ܩܰܒܪܳܗ̇ ܒܺܐܝܩܳܪܳܐ ܕܫܳܘܝܳܐ ܗܘܳܬ݀ ܠܶܗ ܒܰܡܥܰܠܝܽܘܬܳܐ: ܘܒܰܕܓܽܘܢ ܠܛܽܘ̈ܒܶܐ ܕܛܽܘܒܬܳܢܽܘܬܶܗ ܩܳܪܒܺܝܢܰܢ: ܘܒܰܒ̈ܢܳܬ ܩ̈ܳܠܐ ܐܠܰܗܳܝ̈ܳܬܳܐ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܥܳܢܘܳܝܳܐ ܕܚܰܡܶܫ ܕܰܝܪ̈ܳܬܳܐ ܒܢܰܝܬ ܠܳܟ ܘܶܐܬܟܰܢܰܫܘ ܠܗܶܝܢ ܣܽܘܓܳܐܐ ܕܕܰܝܪ̈ܳܝܶܐ ܩܰܕܺܝ̈ܫܶܐ ܘܰܗܘ̈ܰܝ ܐܰܝܟ ܚܰܡܶܫ ܡܕܺܝ̈ܢܳܬܳܐ ܕܫܽܘܘܙܳܒܳܐ ܠܰܡܗܰܝ̈ܡܢܶܐ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܶܐܬܥܰܫܰܡܬ ܡ̣ܶܢ ܡܰܟܣܺܝܡܳܘܣ ܓܰܒܪܳܗ̇ ܕܕܽܘܪܣܺܝܠܐܱ ܥܩܰܪܬܳܐ ܘܡܰܚܘ̈ܳܬܳܐ ܩܰܫ̈ܝܳܬܳܐ ܐܰܣܒܠܳܟ ܘܦܰܟܪܳܟ ܒܫܺܝ̈ܫܠܳܬܳܐ ܘܰܒܒܶܝܬ ܐܰܣܺܝܪ̈ܶܐ ܐܰܪܡܝܳܟ: ܘܕܰܚܙܳܐ ܡܳܪܝܳܐ ܛܠܺܝܡܽܘܬܳܟ ܪܕܳܗ̇ ܠܰܛܠܺܝܬܳܐ ܕܰܛܠܰܡܬܳܟ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܨܰܠܺܝܬ ܘܫܰܘܙܶܒܬ ܠܰܛܠܺܝܬܳܐ: ܘܰܠܠܶܓܝܽܘܢ ܕܫܺܐܕ̈ܶܐ ܛܪܰܕܬ ܡܶܢܳܗ̇ ܘܰܒܢܰܝ̈ܳܐ ܠܕܽܘܪܣܺܝܠܐܱ ܥܩܰܪܬܳܐ ܡܳܪܬܳܗ̇ ܡ̣ܶܢ ܡܳܪܳܟ ܫܶܐܠܬ ܘܝܰܗܒܬ ܠܳܗ̇: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܰܐܝܬܺܝܬ ܠܐܬܪܰܢ ܡܢܳܬܳܐ ܡ̣ܶܢ ܩܰܝܣܳܐ ܕܰܨܠܺܝܒܳܐ ܚܰܝܳܐ: ܕܚܰܡܶܫ ܫܢܺܝ̈ܢ ܟܰܬܰܪܬ ܒܰܐܬܪܳܐ ܕܪ̈ܽܘܡܳܝܶܐ ܐܳܦ ܒܰܐܬܪܳܐ ܕܰܐܬܺܝ̈ܢܳܝܶܐ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܟܰܕ ܗܦܰܟܬ ܠܒܰܝܬܶܗ ܕܪܳܚܡܳܟ ܡܰܟܣܺܝܡܳܘܣ ܓܰܒܪܳܗ̇ ܕܕܽܘܪܣܺܝܠܐܱ: ܫܰܒܥܳܐ ܒܢܰܝ̈ܳܐ ܐܶܫܟܰܚܬ ܕܰܗܘܰܘ ܠܶܗ: ܘܒܽܘܟܪܳܐ ܕܺܝܠܗܽܘܢ ܪܽܘܡܰܐܢܳܘܣ ܗܘܳܐ ܬܰܠܡܺܝܕܳܐ ܠܪܰܒܽܘܬܳܟ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܰܥܩܰܪܬ ܠܐܝܠܳܢܳܐ ܥܰܫܺܝܢܳܐ ܕܣܳܓܕܺܝܢ ܗܘܰܘ ܠܶܗ ܒܢ̈ܰܝ ܐܰܪܡܰܢܺܝܰܐ ܘܡܶܫܬܰܪܚܺܝܢ ܗܘܰܘ ܬܚܽܘܬܰܘܗܝ ܒܟܽܠ ܙܢ̈ܰܝ ܫܟܺܝܪܽܘܬܳܐ ܘܦܰܚܙܽܘܬܳܐ: ܘܰܡܢܳܬܳܐ ܕܡ̣ܶܢ ܩܰܝܣܳܐ ܕܚܰܝ̈ܶܐ ܫܕܰܝܬ ܒܶܗ ܘܶܐܡܰܪܬ: ܨܠܺܝܒܳܐ ܚܰܝܳܐ ܚܰܘܳܐ ܚܰܝܠܳܟ: ܘܒܳܗ̇ ܒܫܳܥܬܳܐ ܐܶܬܥܩܰܪ ܘܶܐܫܬܕܺܝ ܒܝܰܕ ܚܰܝܠܐ ܐܠܰܗܳܝܳܐ ܘܰܥܒܰܪ ܒܰܐܪܣܺܝܢܳܘܣ ܢܰܗܪܳܐ ܪܰܒܳܐ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܬܰܠܡܶܕܬ ܠܣܰܩܠܰܒ ܪܺܝܫܳܢܶܐ ܕܥܰܘܣܶܐ ܩܪܺܝܬܳܐ: ܘܝܰܗܒ ܠܳܟ ܐܳܫܽܘܛ ܒܪܶܗ ܘܰܗܘܳܐ ܠܳܟ ܬܰܠܡܺܝܕܳܐ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܕܰܝܪܳܐ ܒܢܰܝܬ ܠܳܟ ܒܕܽܘܟܰܬ ܐܺܝܠܳܢܳܐ ܗ̇ܰܘ ܕܒܶܛܡܬܳܐ: ܘܒܶܗ ܗ̣ܽܘ ܫܰܠܶܡܬ ܝܰܘ̈ܡܳܬܳܟ: ܠܳܟ ܛܽܘܒܰܝܟ ܡܳܪܝ ܐܰܚܳܐ ܕܰܗܘ̈ܰܝ ܫܢ̈ܰܝ ܚܰܝܰܝ̈ܟ ܡܳܐܐ ܘܚܰܡܶܫ ܫܢܺܝ̈ܢ: ܘܡܰܦܩܳܢܳܟ ܕܡ̣ܶܢ ܥܳܠܡܳܐ ܗܳܢܳܐ ܥܶܣܪܺܝܢ ܘܚܰܡܫܳܐ ܒܟܳܢܽܘܢ ܐ̱ܚܪܳܝܳܐ: ܫܢܰܬ݀ ܬܡܳܢܶܡܳܐܐ ܘܰܬܠܳܬܺܝܢ ܘܫܶܬ ܕܝܰܘ̈ܢܳܝܶܐ: ܟܰܕ ܒܕܰܝܪܳܐ ܗ̇ܳܝ ܕܥܰܠ ܓܶܢ̱ܒ ܥܰܘܣܶܐ ܕܩܰܪܺܝܒܳܐ ܠܐܪܣܺܝܢܳܘܣ ܢܰܗܪܳܐ ܐܶܬܥܰܦܺܝ ܦܰܓܪܳܟ ܩܰܕܺܝܫܳܐ: ܘܒܳܬܰܪ ܢܽܘܓܪܳܐ ܕܰܫܢܰܝ̈ܳܐ ܐܶܬܬܰܝܬܺܝ ܦܰܓܪܳܟ ܙܰܗܝܳܐ ܠܕܶܦܢܰܬ ܒܛܽܘܪܳܐ ܕܡܶܬܩܪܶܐ ܕܒܶܝܬ ܓܰܘܓܺܝ ܕܩܰܪܺܝܒܳܐ ܠܒܶܝܬ ܡܰܢܥܶܡ: ܒܺܐܝ̈ܕܰܝ ܡܳܪܝ ܐܠܶܝܳܐ ܒܳܣܝܳܝܳܐ: ܘܡܳܪܝ ܢܰܘܚܳܐ ܬܰܠܕܰܐܪܝܳܐ ܬܰܠܡܺܝ̈ܕܰܝܟ ܓܒܰܝ̈ܳܐ ܘܰܕܟܰܝ̈ܳܐ ܐܰܟܡܳܐ ܕܶܐܬܚܙܰܝܬ ܠܡܳܪܝ ܚܰܘܪܳܐ ܪܺܝܫ ܬܰܠܡܺܝ̈ܕܰܝܟ: ܘܗܳܫܳܐ ܒܰܨܠܰܘ̈ܳܬܳܟ ܐܳܘ ܩܰܕܺܝܫܳܐ ܡܳܪܝ ܐܰܚܳܐ ܘܰܕܩܰܕܺܝ̈ܫܶܐ ܬܰܠܡܺܝ̈ܕܶܐ ܕܪܰܒܽܘܬܳܟ: ܢܶܫܬܰܝܰܢ ܐܰܬܪܰܢ ܘܰܦܢܺܝܬܰܢ: ܘܫ̈ܶܐܠܳܬܳܐ ܕܰܠܡܳܪܳܟ ܫܳܐܠܺܝܢܰܢ ܒܝܰܕ ܒܳܥ̈ܘܳܬܳܟ ܢܶܬܦܰܢ̈ܝܳܢ ܠܰܢ: ܛܳܒ̈ܳܬܳܐ ܘܒܽܘܪ̈ܟܳܬܳܐ ܘܰܫܦܺܝܥܽܘܬ ܐܶܕܪ̈ܳܬܳܐ: ܢܶܣܓ̈ܝܳܢ ܘܢܶܫܬܰܪ̈ܬܚܳܢ: ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ ܢܶܥܒܪܽܘܢ ܡܶܢܰܢ ܩܰܡܨܳܐ ܠܐ ܢܶܫܬܰܠܰܛ ܒܰܐܬܪܰܢ ܫܰܘܒܳܐ ܘܝܰܪܩܳܢܳܐ ܘܟܰܦܢܳܐ ܘܡܰܘܬܳܢܳܐ ܢܶܙܕܰܓܪܽܘܢ ܘܠܐ ܢܰܐܟܽܘܢ ܠܰܢ: ܢܳܨܽܘܪܳܐ ܘܨܰܪܨܽܘܪܳܐ ܘܙܳܚܠܐ ܘܡܳܫܽܘܛܳܐ ܠܐ ܢܰܗܰܪ ܠܰܢ: ܟܳܗ̈ܢܶܐ ܢܶܙܕܰܗܽܘܢ ܘܰܡܫܰܡ̈ܫܳܢܶܐ ܢܶܬܢܰܟܦܽܘܢ: ܣܳܒ̈ܶܐ ܢܶܬܚܰܝܠܽܘܢ: ܥܠܰܝ̈ܡܶܐ ܘܰܛܠܳܝ̈ܶܐ ܢܶܬܪܰܒܽܘܢ: ܢܶܫ̈ܶܐ ܒܚܺܐܪܽܘܬܳܐ ܢܶܨܛܰܒ̈ܬܳܢ ܘܥܰܠ ܟܽܠ ܩܰܘ̈ܡܳܢ ܘܡܽܘ̈ܫܚܳܢ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܰܢ ܫܟܶܒܘ ܒܡܰܠܟܽܘܬܳܐ ܢܶܬܒܰܣܡܽܘܢ ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܶܗ ܫܽܘܒܚܳܐ ܠܡܳܪܝܳܐ ܕܰܓܒܳܟ: ܘܒܰܡܝܰܬܪ̈ܳܬܳܐ ܨܶܒܬܳܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܓܒܰܝ̈ܳܐ ܘܩܰܕܺܝ̈ܫܶܐ ܡܳܪܝ ܐܰܚܳܐ ܘܡܳܪܝ ܡܺܝܟܳܐܶܝܠ ܓܰܢ̱ܒܳܪ̈ܰܝ ܚܰܝܠܐ: ܒܝܰܕ ܨܠܰܘ̈ܳܬܟܽܘܢ ܢܶܬܒܰܪܰܟ ܟܶܢܫܰܢ ܕܰܡܝܰܩܰܪ ܥܺܐܕܟܽܘܢ ܘܰܡܩܰܠܶܣ ܠܕܽܘܟܪܳܢܟܽܘܢ: ܘܢܶܬܩܰܒܰܠ ܦܺܝܪܡܰܢ ܩܕܳܡ ܡܳܪܟܽܘܢ: ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܒܰܦܝܳܣܟܽܘܢ ܘܫܰܝܢܳܐ ܘܰܫܠܳܡܳܐ ܘܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܒܒܳܥ̈ܘܳܬܟܽܘܢ: ܕܢܰܣܶܩ ܫܽܘܒܚܳܐ ܠܰܡܢܰܨܚܳܢܟܽܘܢ: ܡܳܪܰܢ܀

 

 

 

ܚܘܬܡܐ

 

 

 

ܫܰܝܶܢ ܡܳܪܝ ܒܪ̈ܰܚܡܰܝܟ ܐܰܬܪܰܢ ܘܰܦܢܺܝܬܰܢ: ܕܗܳܐ ܡܝܰܩܰܪ ܘܰܡܩܰܠܶܣ ܠܥܺܐܕܶܗ ܕܢܰܨܺܝܚܐ ܡܳܪܝ ܐܰܚܳܐ ܦܳܠܚܳܐ ܩܪܰܒܬܳܢܳܐ: ܘܰܐܥܒܰܪ ܡܶܢܰܢ ܟܽܠ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܠܐ ܐܰܝܟ ܕܰܠܒܺܝ̈ܫܶܐ ܘܢܽܘܟܪ̈ܳܝܶܐ ܬܰܪܓܶܙ ܥܠܰܝܢ: ܐܳܦ ܥܒܳܕܰܝ̈ܢ ܒܺܝܫܺܝ̈ܢ ܘܡܰܪܺܝܪܺܝܢ: ܡܶܛܽܠ ܕܰܐܚ̈ܶܐ ܕܺܝܠܰܢ ܩܪܰܝܬܳܢ ܘܫܰܡܰܗܬܳܢ: ܘܰܐܝܟ ܕܥܰܠ ܐܰܚ̈ܶܐ ܘܒܰܝܬܳܝ̈ܶܐ ܚܽܘܣ ܘܪܰܚܶܡܥܠܰܝܢ: ܒܝܰܕ ܨܠܰܘ̈ܳܬܶܗ ܕܡܳܪܝ ܐܰܚܳܐ ܡܢܺܝܚܳܢܳܟ: ܗܳܫܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܟܝܳܢܳܐ ܕܪܰܒܽܘܬܳܐ: ܘܨܶܡܚܳܐ ܘܙܺܝܘܳܐ ܘܗܶܕܪܳܐ ܕܰܫܒܺܝܚܽܘܬܳܐ: ܕܢܰܨܰܚ ܠܡܳܪܝ ܐܰܚܳܐ ܒܥܺܕܬܶܗ ܩܰܕܺܝܫܬܳܐ: ܠܗܰܘ ܕܥܰܕܪܶܗ ܡ̣ܶܢ ܛܰܠܝܽܘܬܶܗ ܥܰܡ ܓܰܒܪܳܐ ܐܠܰܗܳܝܳܐ ܡܳܪܝ ܡܺܝܟܳܐܶܝܠ ܦܳܠܚܳܐ ܟܰܫܺܝܪܳܐ: ܘܬܶܕܡܽܘܪܬܳܐ ܐܠܰܗܳܝܬܳܐ ܣܥܰܪܘ ܒܰܒܪܶܗ ܕܬܶܐܘܳܕܳܘܪܳܘܣ ܡܗܰܝܡܢܳܐ ܕܟܰܕ ܡܫܰܪܰܝ ܗܘܳܐ ܒܰܨܠܰܘ̈ܳܬܗܽܘܢ ܐܰܚܠܡܽܘܗܝ: ܠܗܰܘ ܐܰܒܳܐ ܕܰܫܪܳܪܳܐ ܕܶܐܬܠܰܘܺܝ ܠܡܳܪܝ ܐܰܚܳܐ ܚܠܳܦ ܓܶܢܣܳܐ ܘܛܽܘܗܡܳܐ: ܘܰܥܒܰܕ ܠܶܗ ܕܰܝܪ̈ܳܬܳܐ ܘܳܐܦ ܬܰܠܡܺܝ̈ܕܶܐ ܕܠܐ ܡܶܢܝܳܢܳܐ: ܠܗܰܘ ܕܡܶܢܟܽܠ ܦܪܽܘܣ ܪ̈ܳܥܡܺܝܢ ܬܰܠܡܺܝ̈ܕܰܘܗܝ ܒܥܺܕ̈ܳܬܳܐ ܘܕܰܝܪ̈ܳܬܳܐ ܕܠܰܫܡܶܗ ܐܶܬܒ̈ܢܺܝ ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܪܺܝܫܳܐ ܘܪܳܡܳܐ ܘܫܶܬܶܐܣܬܳܐ ܕܟܽܠܳܗ̇ ܥܳܡܰܪܬܳܐ: ܐܶܬܚܙܺܝ ܓܰܒܝܳܐ ܡܳܪܝ ܐܰܚܳܐ ܒܥܺܕܬܳܐ ܕܡܳܪܝܳܐ ܡܳܪܶܗ ܘܰܒܢܳܐ ܠܢܰܦܫܶܗ ܒܫܽܘܦܪ̈ܶܐ ܐܠܰܗܳܝ̈ܶܐ ܘܰܛܒܺܝ̈ܒܶܐ: ܘܒܰܢܺܝ ܗܘܳܐ ܠܬܰܠܡܺܝ̈ܕܰܘܗܝ ܒܟܽܠ ܐܰܬܰܪ ܘܦܶܢ̈ܝܳܬܶܗ ܕܥܳܠܡܳܐ: ܥܰܠ ܗ̇ܳܝ ܟܰܕ ܠܝܰܘܡܳܐ ܕܚܰܓܳܐ ܕܺܝܠܶܗ ܐܠܰܗܳܝܳܐ ܨܳܒܶܝܢܰܢ ܠܰܡܩܰܠܳܣܽܘ: ܓܳܗܪܺܝܢ ܗܰܘ̈ܢܶܐ: ܘܠܶܫ̈ܳܢܶܐ ܡܶܬܟܠܶܝܢ ܡ̣ܶܢ ܡܰܐܨܕܳܢܽܘܬܳܐ ܕܩܽܘܠܳܣܰܘ̈ܗܝ ܛܒܺܝ̈ܒܶܐ ܘܰܐܠܳܗܳܝ̈ܶܐ: ܘܟܰܕ ܒܰܪܬ ܩܳܠܐ ܡܣܰܠܛܒܰܬ݀ ܒܫܽܘܒܚܳܐ ܬܶܐܘܳܪܺܝܣܳܝܳܐ ܦܶܕܰܐܓܽܘܓܺܝ̈ܣܶܐ ܥܳܒܕܺܝܢܰܢ ܒܚܽܘܒܳܝܳܐ ܥܰܡܺܝܩܳܐ ܦܳܝܫܺܝܢܰܢ: ܡ̣ܶܢ ܡܰܐܨܕܳܢܽܘܬܳܐ ܕܰܒܥܰܡ̈ܠܐ ܥܡܺܝ̈ܠܐ ܕܕܽܘܒܳܪ̈ܰܘܗܝ ܐܰܢܛܽܘܢܺܝ̈ܣܳܝܶܐ ܘܰܐܘܓܺܝ̈ܢܳܝܶܐ ܘܰܒܒܰܪܬ ܩܳܠܐ ܐܰܦܪܶܝܡܳܝܬܳܐ ܢܣܰܠܓܶܣ ܒܦܺܝܠܺܝܣܽܘܦܺܝܰܐ ܪܽܘܚܳܢܳܝܬܳܐ ܟܰܕ ܐܳܡܪܺܝܢܰܢ: ܗܳܢܳܐ ܕܰܣܢܳܐ ܠܐܒܳܗ̈ܶܐ ܦܰܓܪ̈ܳܢܳܝܶܐ ܘܰܪܚܶܡ ܠܐܠܳܗܳܐ ܐܰܒܳܐ: ܗܳܢܳܐ ܕܶܐܬܢܰܟܪܺܝ ܠܓܶܢܣܳܐ ܐܰܪܥܳܢܳܝܳܐ ܘܰܩܢܳܐ ܚܰܒܪܽܘܬܳܐ ܠܛܽܘܗܡܳܐ ܪܽܘܚܳܢܳܝܳܐ: ܗܳܢܳܐ ܕܕܽܘܪܳܫܳܐ ܐܠܰܗܳܝܳܐ ܘܰܐܠܺܝܨܳܐ ܕܰܐܪܶܫ ܢܰܦܫܶܗ ܒܚܰܝ̈ܶܐ ܕܙܰܒܢܳܐ ܗܳܢܳܐ: ܗܳܢܳܐ ܕܰܒܢܳܐ ܘܫܰܟܠܶܠ ܚܰܡܶܫ ܕܰܝܪ̈ܳܬܳܐ: ܘܰܗܘ̈ܰܝ ܚܰܡܶܫ ܡܕܺܝ̈ܢܳܬܳܐ ܕܫܽܘܘܙܳܒܳܐ: ܗܳܢܳܐ ܕܒܰܗܕܺܝܪܽܘܬܳܐ ܕܕܽܘܒܳܪ̈ܰܘܗܝ ܪ̈ܳܡܶܐ ܘܰܬܡܺܝ̈ܗܶܐ ܦܰܪܢܶܣ ܠܚܰܝ̈ܶܐ ܙܰܒܢܳܝ̈ܶܐ ܒܥܳܠܡܳܐ ܗܳܢܳܐ: ܗܳܢܳܐ ܕܰܡܛܳܐ ܠܐܬܪ̈ܰܘܳܬܳܐ ܕܪ̈ܽܘܡܳܝܶܐ: ܘܰܐܝܬܺܝ ܠܐܬܪܰܢ ܡܢܳܬܳܐ ܡ̣ܶܢ ܩܰܝܣܳܐ ܕܚܰܝ̈ܶܐ ܘܒܶܗ ܥܬܰܪ ܐܰܬܪܰܢ ܒܟܽܠ ܡܰܘܗ̈ܒܳܢ ܕܪܽܘܚܳܐ ܩܰܕܺܝܫܳܐ: ܗܳܢܳܐ ܕܰܣܚܰܦ ܠܒܶܝܬ ܡܰܥܡܪ̈ܶܐ ܕܫܺܐܕ̈ܶܐ ܘܰܒܢܳܐ ܒܕܽܘܟ̈ܝܳܬܗܽܘܢ ܡܰܕܒ̈ܚܶܐ ܩܰܕܺܝ̈ܫܶܐ ܠܐܠܳܗܽܘܬܳܐ ܡܪܰܝܰܡܬܳܐ: ܗܳܢܳܐ ܕܰܥܩܰܪ ܠܐܝܠܳܢܳܐ ܥܰܒܺܝܛܳܐ ܗ̇ܰܘ ܕܰܣܪ̈ܺܝܚܶܐ ܛܰܡ̈ܶܐܐ ܒܚܰܝܠܐ ܕܰܨܠܺܝܒܳܐ ܙܰܟܳܝܳܐ: ܗܳܢܳܐ ܕܦܳܚ ܪܺܝܚܳܐ ܚܰܠܝܳܐ ܕܰܫܡܶܗ ܒܟܽܠܳܗ̇ ܥܳܡܰܪܬܳܐ: ܘܰܬܗܰܪ ܒܶܗ ܥܰܡܳܐ ܦܪܺܝܩܳܐ ܕܰܦܢܺܝܬܰܢ ܐܳܦ ܕܰܐܪܡܰܢܺܝܰܐ: ܗܳܢܳܐ ܕܣܺܝܡܳܐ ܦܶܨܬܶܗ ܥܰܡ ܢܒܺܝ̈ܶܐ ܘܰܫܠܺܝ̈ܚܶܐ ܒܝܰܕ ܐܳܬܘ̈ܳܬܳܐ ܬܡܺܝ̈ܗܳܬܳܐ ܕܰܣܥܰܪ ܐܰܟܘܳܬܗܽܘܢ: ܗܳܢܳܐ ܕܰܨܕܳܬ݀ ܕܰܝܪܳܐ ܕܺܝܠܶܗ ܩܰܕܺܝܫܬܳܐ ܡ̣ܶܢ ܥܳܡܽܘܪ̈ܶܐ ܘܕܰܝܪ̈ܳܝܶܐ: ܘܰܒܡܶܐܬܺܝܬܳܐ ܕܶܝܢ ܕܣܺܝܡܰܬ݀ ܓܰܪ̈ܡܰܘܗܝ ܬܽܘܒ ܬܶܢܝܳܢܽܘܬ ܦܢܳܬ݀ ܘܝܶܪܒܰܬ݀ ܝܰܬܺܝܪ ܡ̣ܶܢ ܩܰܕܡܳܝܬܳܐ ܒܝܰܕ ܚܶܘܳܪܳܐ ܐܠܰܗܳܝܳܐ ܪܺܝܫ ܬܰܠܡܺܝ̈ܕܰܘܗܝ ܘܗܰܕܪܳܗ̇ ܒܰܙܢܰܝ̈ܳܐ ܕܰܡܝܰܬܪܽܘܬܳܐ: ܐܰܝܟ ܗܰܝܟܠܐ ܕܰܫܠܶܝܡܽܘܢ ܕܰܘܺܝܕܳܝܳܐ ܒܝܰܕ ܙܽܘܪܒܳܒܶܝܠ ܘܝܶܫܘܽܥ ܒܰܪ ܝܽܘܙܳܕܳܩ ܛܒܺܝ̈ܒܶܐ: ܗܳܢܳܐ ܕܠܐ ܡܰܡܪܚܳܐ ܡܶܠܬܰܢ ܠܡܶܬܢܳܐ ܩܽܘܠܳܣܰܘ̈ܗܝ ܐܠܰܗܳܝ̈ܶܐ ܐܶܠܐ ܒܚܽܘܒܳܐ ܢܠܰܓܠܶܓ ܠܶܗ ܒܚܽܘܓܳܝܳܐ ܪܽܘܚܳܢܳܝܳܐ ܟܰܕ ܐܳܡܪܺܝܢܰܢ: ܒܣܽܘܘܳܚܳܐ ܐܠܰܗܳܝܳܐ: ܬܳܐ ܒܰܫܠܳܡܳܐ ܐܰܒܳܐ ܛܒܺܝܒܳܐ ܕܪܰܒܺܝ ܠܰܒܢܰܘ̈ܗܝ ܒܕܰܟܝܽܘܬܳܐ: ܬܳܐ ܒܰܫܠܳܡܳܐ ܡܒܰܢܝܳܢܳܐ ܕܥܺܕ̈ܳܬܳܐ ܘܕܰܝܪ̈ܳܬܳܐ ܘܥܳܩܽܘܪܳܐ ܕܰܥܠܰܘ̈ܳܬܳܐ: ܬܳܐ ܒܰܫܠܳܡܳܐ ܣܳܬܽܘܪܳܐ ܕܛܳܥܝܽܘܬܳܐ ܘܰܕܟܽܠܗܽܘܢ ܪ̈ܰܘܡܶܐ ܕܰܦܬܰܟܪܽܘܬܳܐ: ܬܳܐ ܒܰܫܠܳܡܳܐ ܡܠܰܒܒܳܢܳܐ ܕܰܡܚܺܝ̈ܠܐ ܘܥܰܝܺܝ̈ܩܰܝ ܪܽܘܚܳܐ: ܬܳܐ ܒܰܫܠܳܡܳܐ ܡܕܰܪܓܳܢܳܐ ܕܬܰܠܡܺܝ̈ܕܰܘܗܝ ܠܐܘܪܚܳܐ ܐܠܰܗܳܝܬܳܐ: ܬܳܐ ܒܰܫܠܳܡܳܐ ܒܰܪ ܬܶܓܡܳܐ ܕܺܝܚܺܝ̈ܕܳܝܶܐ ܘܰܓܡܺܝܪ̈ܶܐ ܫܰܪܺܝܪ̈ܶܐ: ܬܳܐ ܒܰܫܠܳܡܳܐ ܛܳܪܽܘܕܳܐ ܕܫܺܐܕ̈ܶܐ ܡܳܪ̈ܽܘܕܶܐ ܡ̣ܶܢ ܟܪ̈ܺܝܗܶܐ ܘܰܡܢܰܣܰܝ̈ܳܐ: ܬܳܐ ܒܰܫܠܳܡܳܐ ܕܕܰܝܪ̈ܳܬܳܟ ܨܰܗܝ̈ܳܢ ܠܨܰܘܬܳܟ ܪܓܺܝܓܳܐ ܘܰܐܒܳܗܳܝܳܐ: ܬܳܐ ܒܰܫܠܳܡܳܐ ܕܬܰܠܡܺܝ̈ܕܰܝܟ ܚܳܝܪܺܝܢ ܠܰܫܠܳܡܳܟ ܚܰܠܝܳܐ: ܬܳܐ ܒܰܫܠܳܡܳܐ ܘܰܣܥܽܘܪ ܠܰܢ ܒܰܫܠܳܡܶܗ ܕܡܳܪܳܟ: ܬܳܐ ܒܰܫܠܳܡܳܐ ܕܪ̈ܽܘܚܳܢܶܐ ܪܓܺܝܓܺܝܢ ܠܥܶܢܝܳܢܳܟ: ܬܳܐ ܒܰܫܠܳܡܳܐ ܐܰܚܳܐ ܘܒܰܪ ܬܰܪܒܺܝܬܳܐ ܕܰܐܒܺܝ̈ܠܐ ܘܰܡܓܰܙܰܝ̈ܳܐ: ܬܳܐ ܒܰܫܠܳܡܳܐ ܛܥܺܝܢ ܣܰܒܪ̈ܳܬܳܐ ܛܳܒ̈ܳܬܳܐ ܠܟܽܠܶܗ ܥܳܠܡܳܐ: ܬܳܐ ܒܰܫܠܳܡܳܐ ܡܒܰܝܰܐܐ ܠܐܬܪܰܢ ܘܰܦܢܺܝܬܰܢ ܒܰܫܠܳܡܶܗ ܦܰܐܝܳܐ: ܬܳܐ ܒܰܫܠܳܡܳܐ ܡܰܥܒܰܪ ܡܶܢܰܢ ܒܰܪܕܳܐ ܘܟܰܦܢܳܐ ܘܡܰܘܬܳܢܳܐ: ܬܳܐ ܒܰܫܠܳܡܳܐ ܡܳܠܐܷ ܠܐܬܪܰܢ ܫܰܝܢܳܐ ܟܰܗܺܝܢܳܐ: ܬܳܐ ܒܰܫܠܳܡܳܐ ܡܢܰܛܰܪ ܥ̈ܰܠܠܳܬܰܢ ܡ̣ܶܢ ܢܶܟ̈ܝܳܢܶܐ ܢܳܟܽܘ̈ܝܶܐ: ܬܳܐ ܒܰܫܠܳܡܳܐ ܕܰܫܠܳܡܰܢ ܠܐ ܣܳܦܶܩ ܠܳܟ: ܐܶܠܐ ܩܰܒܶܠ ܒܚܽܘܒܳܐ: ܬܳܐ ܒܰܫܠܳܡܳܐ ܡܪܰܒܝܳܢܳܐ ܕܟܽܠܰܢ ܒܙܽܘܡܳܪ̈ܶܐ ܐܠܰܗܳܝ̈ܶܐ: ܐܶܠܐ ܫܰܐܠ ܡ̣ܶܢ ܡܳܪܳܟ ܫܰܝܢܳܐ ܘܰܫܠܳܡܳܐ: ܐܰܝܟܰܢܳܐ ܕܢܶܗܘܶܐ ܥܽܘܗܕܳܢܳܟ ܒܰܝܢܳܬܰܢ ܘܰܒܥܰܡܰܢ ܠܥܳܠܡ̈ܶܐ ܥܳܠܡܺܝ̈ܢܳܝܶܐ: ܘܢܶܗܘܶܐ ܕܽܘܟܪܳܢܳܐ ܛܳܒܳܐ ܠܝܳܠܕܰܬ ܐܠܰܗܳܐ ܡܰܪܝܰܡ ܘܩܰܕܺܝ̈ܫܶܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܗܳܪܟܳܐ ܘܕܰܒܟܽܠ ܐܰܬܰܪ: ܘܢܰܣܶܩ ܫܽܘܒܚܳܐ ܠܡܳܪܳܟ ܒܥܰܕܥܺܐܕܳܟ ܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܕܰܟܝܽܘܬܳܐ ܘܩܰܕܺܝܫܽܘܬܳܐ ܢܝܰܩܰܪ ܘܰܢܩܰܠܶܣ: ܠܝܰܘܡܶܗ ܕܕܽܘܟܪܳܢܳܐ ܕܢܰܨܺܝܚ ܫܽܘܦܪ̈ܶܐ ܡܳܪܝ ܐܰܚܳܐ: ܘܠܐ ܬܶܥܒܶܕ ܠܰܢ ܐܰܟܣ̈ܢܳܝܶܐ ܘܢܽܘܟܪ̈ܳܝܶܐ ܡ̣ܶܢ ܡܰܠܟܽܘܬܳܟ: ܘܠܐ ܛܪ̈ܺܝܕܶܐ ܘܡܰܣܠܰܝ̈ܳܐ ܡ̣ܶܢ ܝܳܪܬܽܘܬܳܟ: ܐܶܠܐ ܐܰܚ̈ܶܐ ܘܒܰܝܬܳܝ̈ܶܐ ܘܰܣܡܺܝ̈ܟܶܐ ܒܰܓܢܽܘܢܳܟ: ܒܝܰܕ ܨܠܰܘ̈ܳܬܶܗ ܕܓܰܒܝܳܟ ܡܳܪܝ ܐܰܚܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܡܢܰܨܰܚ ܠܢܰܨܺܝ̈ܚܶܐ ܢܰܨܺܝܚܳܐܝ̣ܬ ܕܢܰܨܚܶܗ ܠܐܬܠܺܝܛܳܐ ܥܛܺܝܦ ܙܳܟܽܘܬܳܐ ܡܳܪܝ ܐܰܚܳܐ: ܠܗܰܘ ܕܦܰܪܫܶܗ ܡ̣ܶܢ ܬܪܶܝܢ ܐܰܚܰܘ̈ܗܝ ܘܥܰܒܕܶܗ ܡܳܐܢܳܐ ܓܰܒܝܳܐ ܕܚܳܫܰܚ ܠܶܗ: ܠܗܰܘ ܕܰܗܘܳܐ ܠܡܳܪܝ ܐܰܚܳܐ ܥܳܢܘܳܝܳܐ: ܐܰܚܳܐ ܚܠܳܦ ܐܰܚܰܘ̈ܗܝ: ܘܰܐܒܳܐ ܚܠܳܦ ܥܽܘܒܰܕܝܳܐ ܐܰܒܽܘܗܝ ܘܰܡܕܰܒܪܳܢܳܐ ܘܡܳܪܳܐ ܘܝܳܨܽܘܦܳܐ: ܘܰܡܒܰܝܳܐܢܳܐ ܘܰܡܠܰܒܒܳܢܳܐ ܘܰܡܦܰܪܢܣܳܢܳܐ ܕܚܰܝܰܘ̈ܗܝ: ܠܶܗ ܠܗܰܘ ܡܢܰܨܚܳܢܶܗ ܢܫܰܒܰܚ ܘܰܢܪܰܡܪܶܡ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܒܺܝܕܰܥܬܳܟ ܐܺܝܬܝܳܝܬܳܐ ܘܰܒܚܶܟܡܬܳܟ ܐܠܰܗܳܝܬܳܐ: ܓܒܰܝܬ ܠܢܰܨܺܝܚ ܫܽܘܦܪ̈ܶܐ ܡܳܪܝ ܐܰܚܳܐ ܕܢܶܗܘܶܐ ܒܶܝܬ ܡܰܫܪܝܳܐ ܠܰܫܒܺܝܚܽܘܬܳܟ ܠܐ ܙܰܒܢܳܝܬܳܐ: ܗܳܢܳܐ ܕܟܰܕ ܒܢܽܘܪ ܚܽܘܒܳܟ ܐܶܫܬܓܰܪ ܘܰܒܚܽܘܒܳܟ ܐܺܝܬܺܝܩܳܝܳܐ ܐܶܬܢܰܝܰܪ: ܘܰܒܥܳܠܡܳܐ ܪܺܝܩܺܝܢܳܝܳܐ ܟܦܰܪ: ܘܠܰܢܝܳܚܰܘ̈ܗܝ ܘܰܪ̈ܓܺܝܓܳܬܶܗ ܫܳܛ ܘܒܰܣܰܪ: ܘܥܰܠ ܦܰܚܰܘ̈ܗܝ ܕܰܐܪܡܰܠܐܱܘܳܣ ܗ̇ܰܘ ܛܰܪܟܳܢܳܐ ܫܘܰܪ: ܘܠܰܡܨܺܝ̈ܕܳܬܶܗ ܕܒܶܠܐܷܝܰܪ ܬܰܒܰܪ ܘܰܠܟܽܠܳܗ̇ ܡܰܫܪܺܝܬܶܗ ܐܰܚܦܰܪ: ܘܰܒܣܽܘܓܳܐܐ ܕܰܡܝܰܬܪ̈ܳܬܶܗ ܐܶܬܗܰܕܰܪ: ܘܰܠܥܰܡ̈ܡܶܐ ܘܶܐܡܘ̈ܳܬܳܐ ܒܬܶܕܡܪ̈ܳܬܳܐ ܕܺܝܠܶܗ ܫܒܺܝ̈ܚܳܬܳܐ ܐܰܬܗܰܪ: ܘܠܐܠܺܝ̈ܨܶܐ ܐܳܦ ܡܰܟܰܐܒ̈ܶܐ ܒܳܐܣ̈ܘܳܬܶܗ ܬܡܺܝ̈ܗܳܬܳܐ ܥܰܕܰܪ: ܘܰܠܚܶܫܽܘ̈ܟܶܐ ܘܚܰܢ̈ܦܶܐ ܘܛܳܥܰܝ̈ܳܐ ܐܰܬܗܰܪ: ܘܰܠܚܰܣܺܝܪ̈ܰܝ ܡܰܕܥܳܐ ܒܝܽܘܠܦܳܢܰܘ̈ܗܝ ܢܰܗܰܪ: ܘܰܠܡܰܕܢܚܳܐ ܘܡܰܥܪܒܳܐ ܬܰܠܡܶܕ ܘܫܰܪܰܪ ܘܡ̣ܶܢ ܬܰܘܫܳܐ ܕܛܳܥܝܽܘܬܳܐ ܚܰܪܰܪ ܘܥܰܠ ܗ̇ܳܝ ܚܢܰܢ ܛܟܺܝܢܽܘ ܘܰܛܦܺܝܢܽܘ ܠܶܗ ܡܩܰܠܣܺܝܢܰܢ ܘܳܐܡܪܺܝܢܰܢ: ܡܳܪܝ ܐܰܚܳܐ ܒܺܝܠܕܰܪܳܐ ܚܠܺܝܨܳܐ ܕܡܶܛܽܠ ܟܳܪܽܘܙܽܘܬܳܐ ܕܡܳܪܶܗ ܪܗܶܛ ܟܰܕ ܠܒܺܝܒ: ܡܳܪܝ ܐܰܚܳܐ ܥܳܩܽܘܪܶܗ ܕܺܐܝܠܳܢܳܐ ܗ̇ܰܘ ܕܡܶܣܬܓܶܕ ܗܘܳܐ ܡ̣ܶܢ ܥܰܡܳܐ ܕܰܫܓܳܐ ܘܰܐܪܫܰܥ: ܡܳܪܝ ܐܰܚܳܐ ܬܰܠܡܺܝܕܳܐ ܕܰܙܩܺܝܦܽܘܬܳܐ ܕܰܐܝܬܺܝ ܠܐܬܪܰܢ ܡܢܳܬܳܐ ܕܰܨܠܺܝܒܳܐ ܚܰܝܳܐ: ܡܳܪܝ ܐܰܚܳܐ ܐ̱ܪܳܙܳܐ ܡܥܰܠܝܳܐ ܕܥܶܩܳܪܶܗ ܒܰܐܬܪܰܢ ܢܨܺܝܒ: ܘܣܰܘ̈ܟܳܬܶܗ ܒܶܝܬ ܪ̈ܽܘܡܳܝܶܐ ܘܰܐܬܺܝ̈ܢܳܝܶܐ ܐܶܣܬܰܪ̈ܥܰܦܝ: ܡܳܪܝ ܐܰܚܳܐ ܫܰܒܳܝܳܐ ܕܰܠܦܳܪ̈ܣܳܝܶܐ ܡ̇ܰܢ ܐܶܫܬܒܺܝ ܥܰܡ ܡܺܝܟܳܐܶܝܠ ܘܦܳܠܚܽܘܬܳܐ ܠܢܳܒܽܘܢ ܡܰܠܟܳܐ ܫܰܡܶܫ: ܡܳܪܝ ܐܰܚܳܐ ܐܳܣܝܳܐ ܕܰܐܣܺܝ ܠܰܟܪ̈ܺܝܗܶܐ ܕܒܶܗ ܐܶܬܓܰܘܰܣ: ܡܳܪܝ ܐܰܚܳܐ ܫܰܠܘܳܝܳܐ ܘܥܳܢܘܳܝܳܐ ܕܚܰܡܶܫ ܕܰܝܪ̈ܳܬܳܐ ܫܰܬܶܐܣ ܘܰܩܒܰܥ: ܡܳܪܝ ܐܰܚܳܐ ܬܰܠܡܺܝܕܳܐ ܕܒܰܐܬܪܳܐ ܕܰܐܪܡܰܢܺܝܰܐ ܫܡܶܗ ܐܶܬܢܰܨܰܚ: ܡܳܪܝ ܐܰܚܳܐ ܪܰܝܺܡܳܐ ܩܰܠܺܝܠܐ ܕܡ̣ܶܢ ܛܰܝܪܳܐ ܠܐܬܪܰܢ ܪܗܶܛ: ܡܳܪܝ ܐܰܚܳܐ ܒܰܩܛܺܝܪܳܐܝ̣ܬ ܕܠܐܡܶܗ ܣܰܡܶܟ ܘܒܰܐܻܝ: ܡܳܪܝ ܐܰܚܳܐ ܙܰܟܳܝܳܐ ܒܰܩܪܳܒܳܐ ܕܰܠܚܰܝܠܶܗ ܕܒܺܝܫܳܐ ܫܰܦܶܠ ܘܰܙܟܳܐ: ܡܳܪܝ ܐܰܚܳܐ ܡܶܬܦܪܶܕ ܠܚܽܘܕܳܝܳܐ ܕܰܗܘܰܘ ܠܶܗ ܥܰܡܶܗ ܬܰܠܡܺܝ̈ܕܶܐ: ܡܳܪܝ ܐܰܚܳܐ ܘܰܥܕܳܐ ܫܰܪܺܝܪܳܐ ܘܡܰܓܕܠܐ ܡܪܺܝܕܳܐ ܕܟܶܢܫܰܢ ܒܶܗ ܛܦܰܣ: ܡܳܪܝ ܐܰܚܳܐ ܫܰܦܺܝܪ ܫܽܘܒܚܳܐ: ܕܫܽܘܦܪܶܗ ܒܟܽܠ ܦܶܢ̈ܝܳܢ ܐܰܝܟ ܘܰܪܕܳܐ ܗܰܒܶܒ: ܡܳܪܝ ܐܰܚܳܐ ܪܺܝܫ ܐܳܣܘ̈ܳܬܳܐ ܕܰܠܟܺܐܒ̈ܶܐ ܕܰܐܬܪܰܢ ܒܰܡܢܳܬܳܐ ܕܰܨܠܺܝܒܳܐ ܐܰܣܺܝ: ܡܳܪܝ ܐܰܚܳܐ ܣܳܗܕܳܐ ܩܰܕܺܝܫܳܐ ܕܡ̣ܶܢ ܪܺܝܫ ܥܰܝܢܳܐ ܠܘܳܬܰܢ ܐܶܫܬܰܕܰܪ: ܡܳܪܝ ܐܰܚܳܐ ܡܰܠܳܚܳܐ ܡܗܺܝܪܳܐ ܕܠܰܢ ܡ̣ܶܢ ܟܺܐܡܽܘ̈ܢܶܐ ܕܰܚܛܺܝܬܳܐ ܕܰܐܠܺܝ: ܡܳܪܝ ܐܰܚܳܐ ܥܳܛܽܘܝܳܐ ܘܕܳܚܽܘܝܳܐ ܕܰܦܬܰܟܪܽܘܬܳܐ ܘܰܡܗܰܕܝܳܢܳܐ ܕܰܐܝܠܶܝܢ ܕܰܐܒܺܝܕܺܝܢ: ܡܳܪܝ ܐܰܚܳܐ ܕܶܒܫܳܐ ܚܰܠܝܳܐ ܕܛܰܥܡܳܐ ܕܚܰܝ̈ܶܐ ܠܰܢ ܐܰܩܢܺܝ: ܡܳܪܝ ܐܰܚܳܐ ܝܰܘܢܳܐ ܬܰܡܺܝܡܬܳܐ ܕܰܐܩܢܰܬ݀ ܒܣܰܘ̈ܟܳܬܶܗ ܕܰܨܠܺܝܒܳܐ: ܡܳܪܝ ܐܰܚܳܐ ܐܳܣܝܳܐ ܚܰܟܺܝܡܳܐ ܕܟܽܘܬܡ̈ܳܬܰܢ ܒܶܗ ܐܶܬܚܰܘܰܪ̈ܝ: ܘܟܰܕ ܡ̣ܶܢ ܩܽܘܠܳܣܰܝ̈ܟ ܚܳܝܒܺܝܢܰܢ: ܘܰܕܢܺܐܡܰܪ ܢܶܨܚܳܢܰܝ̈ܟ ܡܰܘܚܠܺܝܢܰܢ: ܘܒܰܡܥܰܠܝܽܘܬ ܬܶܕܡܪ̈ܳܬܳܟ ܬܳܗܪܺܝܢܰܢ ܘܡܶܬܕܰܡܪܺܝܢܰܢ: ܘܰܕܢܶܫܬܰܥܶܐ ܟܽܠܗܶܝܢ ܓܢ̱ܒܰܪ̈ܘܳܬܳܐ ܕܰܣܥܰܪܬ ܠܐ ܡܨܶܝܢܰܢ: ܘܰܠܝܰܡܳܐ ܥܰܡܺܝܩܳܐ ܕܣܳܥܽܘܪ̈ܘܳܬܳܟ ܠܐ ܓܳܝܫܺܝܢܰܢ: ܘܠܰܬܡܺܝ̈ܗܳܬܳܟ ܠܐ ܡܰܕܪܟܺܝܢܢ ܡܠܐܷ ܚܶܨܪܳܐ ܡ̣ܶܢ ܝܰܡܳܐ ܪܘܺܝܚܳܐ ܕܳܐܬܘ̈ܳܬܳܟ ܕܳܠܺܝܢܰܢ: ܡܶܟܺܝܠ ܥܰܠ ܫܶܕܬܰܢ ܒܚܰܝܳܒܽܘܬܳܐ ܗܳܦܟܺܝܢܰܢ: ܟܰܕ ܥܰܠ ܬܪ̈ܰܝܗܽܘܢ ܩܦܳܣܰܝ̈ܢ ܡܰܚܓܪܺܝܢܰܢ: ܘܠܳܟ ܒܰܚܘܺܝܚܽܘܬܳܐ ܡܢܰܨܪܺܝܢܰܢ ܟܰܕ ܐܳܡܪܺܝܢܰܢ: ܐܰܢ̱ܬ ܐܺܝܬܰܝܟ ܢܽܘܛܳܪܳܐ ܡܰܠܟܳܝܳܐ ܕܫܽܘܒܩܳܢ ܚܰܘ̈ܒܳܬܰܢ ܟܬܰܒ ܒܰܫܡܰܝܳܐ ܘܰܬܪܺܝܣܩܳܝܳܐ ܕܒܰܥ̈ܒܳܕܶܐ ܡܝܰܬܪ̈ܶܐ ܕܰܪܺܝܫ ܘܰܚܠܺܝܨ: ܐܰܢ̱ܬ ܐܺܝܬܰܝܟ ܚܰܒܺܝܒܶܗ ܕܝܶܫܽܘܥ ܫܰܠܺܝܛܳܐ ܕܥܰܠ ܟܽܠ: ܐܰܢ̱ܬ ܐܺܝܬܰܝܟ ܝܰܐܩܽܘܕ ܝܰܩܺܝܪ ܛܺܝ̈ܡܶܐ ܕܫܰܦܺܝܪ ܠܚܰܙܳܝ̈ܶܐ ܘܰܬܡܺܝܗ ܗ̣ܽܘ: ܐܰܢ̱ܬ ܐܺܝܬܰܝܟ ܛܽܘܪܳܐ ܩܰܕܺܝܫܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܶܗ ܥܶܡܪܰܬ݀: ܐܰܢ̱ܬ ܢܶܪܓܶܣ ܒܰܣܺܝܡ ܪܺܝܚܳܐ ܕܰܒܬܳܓܶܗ ܕܰܡܫܺܝܚܳܐ ܐܶܬܬܣܺܝܡ: ܐܰܢ̱ܬ ܐܺܝܬܰܝܟ ܝܳܕܽܘܥܳܐ ܕܰܓܢܺܝ̈ܙܳܬܳܐ: ܕܟܰܣ̈ܝܳܬܳܐ ܘܰܣܬܺܝܪ̈ܳܬܳܐ ܠܰܢ ܢܰܗܰܪ: ܐܰܢ̱ܬ ܐܺܝܬܰܝܟ ܡܰܠܦܳܢܳܐ ܡܠܺܝܛܳܐ ܕܚܶܟ̈ܡܳܬܳܐ ܕܡ̣ܶܢ ܩܰܝܣܶܗ ܕܰܨܠܺܝܒܳܐ ܡܬܰܩ ܘܶܐܫܬܺܝ: ܐܰܢ̱ܬ ܐܺܝܬܰܝܟ ܡܳܪܝܳܐ ܕܰܓܢܳܐ ܒܰܣܡܳܟܶܗ ܕܚܰܬܢܳܐ ܕܪܰܘܡܳܐ: ܐܰܢ̱ܬ ܐܺܝܬܰܝܟ ܩܶܪܝܽܘܢܳܐ ܢܰܗܺܝܪܳܐ ܗ̇ܰܘ ܕܰܠܢܰܦ̈ܫܳܬܳܐ ܕܺܝܠܰܢ ܡܟܰܡ̈ܗܳܢ ܒܰܚܛܺܝܬܳܐ ܐܰܨܡܰܚ: ܐܰܢ̱ܬ ܐܺܝܬܰܝܟ ܘܰܪܕܳܐ ܚܠܐܷ ܪܺܝܚܳܐ ܘܫܰܦܺܝܪ ܓܰܘܢܳܐ ܕܰܫܦܰܪ ܣܰܓܺܝ ܡ̣ܶܢ ܩܰܝܣܳܐ ܕܰܙܩܺܝܦܽܘܬܳܐ: ܐܰܢ̱ܬ ܐܺܝܬܰܝܟ ܫܶܒܠܬܳܐ ܕܚܳܫܰܚ ܠܡܽܘܪܽܘܢ ܐܠܰܗܳܝܳܐ: ܘܗܳܫܳܐ ܠܳܟ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܐܳܘ ܓܰܒܝܳܐ ܡܳܪܝ ܐܰܚܳܐ: ܕܬܶܒܥܶܐ ܚܠܳܦܰܝܢ ܠܡܳܪܝܳܐ ܡܳܪܳܟ ܕܪ̈ܰܚܡܰܘܗܝ ܘܰܚܢܳܢܶܗ ܥܠܰܝܢ ܢܶܫܬܰܦܥܽܘܢ: ܘܫܰܝܢܶܗ ܘܰܫܠܳܡܶܗ ܒܣܳܚܪ̈ܳܬܰܢ ܢܰܡܠܟܽܘܢ: ܘܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܠܰܢ ܢܶܫܬܰܟܢܽܘܢ: ܘܚܽܘܒܳܐ ܘܰܐܘܝܽܘܬܳܐ ܠܰܢ ܢܶܣܓܽܘܢ: ܘܚܶܪ̈ܝܳܢܶܐ ܘܡܰܨ̈ܘܳܬܳܐ ܡܶܢܰܢ ܢܶܫܠܽܘܢ: ܚܣܳܡܳܐ ܘܗܶܪ̈ܳܬܳܐ ܢܶܬܕܰܥܟܽܘܢ: ܕܠܽܘܚ̈ܝܶܐ ܢܶܫܬܰܦܽܘܢ: ܘܟܽܘܪ̈ܗܳܢܶܐ ܢܶܬܛܰܠܩܽܘܢ: ܟܪ̈ܺܝܗܶܐ ܢܶܬܰܐܣܽܘܢ: ܘܓܰܪ̈ܒܳܢܶܐ ܢܶܬܕܰܟܽܘܢ: ܩܪ̈ܳܒܶܐ ܘܩܺܐܪ̈ܣܶܐ ܡܶܢܰܢ ܢܶܥܒܪܽܘܢ: ܘܥܺܕܬܳܐ ܘܝܰܠܕܶܝ̈ܗ̇ ܒܰܐܘܝܽܘܬܳܐ ܢܶܗܘܽܘܢ ܚܣ̈ܰܝܳܐ ܕܒܳܗ̇ ܢܶܙܕܰܗܽܘܢ: ܩܰܫܺܝ̈ܫܶܐ ܢܶܬܟܰܢܟܽܘܢ: ܡܫܰܡ̈ܫܳܢܶܐ ܢܶܬܢܰܟܦܽܘܢ: ܥܠܰܝ̈ܡܶܐ ܢܶܬܒܰܪܟܽܘܢ: ܓܰܒܪ̈ܶܐ ܢܶܬܗܰܕܪܽܘܢ: ܛܰܠܝܽܘ̈ܣܶܐ ܢܶܬܪܰܒܽܘܢ ܐܳܦ ܢܶܫܬܰܘܫܛܽܘܢ ܝܳܢܽܘ̈ܣܩܶܐ ܢܶܬܢܰܛܪܽܘܢ: ܥܠܰܝ̈ܡܶܐ ܘܓܰܕܽܘ̈ܕܶܐ ܘܟܽܠ ܩܰܘ̈ܡܳܢ ܘܡܽܘ̈ܫܚܳܢ ܕܰܡܗܰܝ̈ܡܢܶܐ ܫܰܪܺܝܪ̈ܶܐ ܕܰܠܥܺܐܕܳܟ ܐܠܰܗܳܝܳܐ ܨܒܰܘ ܕܰܢܝܰܩܪܽܘܢ: ܒܰܨܠܰܘ̈ܳܬܳܟ ܠܰܠܡܺܐܢܳܐ ܕܫܰܝܢܳܐ ܢܶܡܛܽܘܢ: ܘܠܐܬܪܳܐ ܕܰܢܝܳܚܳܐ ܢܶܬܡܰܢܥܽܘܢ: ܘܰܠܡܰܦܩܳܢܳܐ ܕܫܰܝܢܳܐ ܢܶܫܬܘܽܘܢ: ܘܰܠܡܰܠܟܽܘܬ ܪܰܘܡܳܐ ܢܶܬܘܰܥܕܽܘܢ: ܘܥܰܢܺܝ̈ܕܰܝܢ ܒܦܰܪܕܰܝܣܳܐ ܥܕܶܢܳܝܳܐ ܢܶܣܬܰܡܟܽܘܢ: ܘܡ̣ܶܢ ܐܰܓܳܢܳܐ ܪܽܘܚܳܢܳܝܬܳܐ ܢܶܫܬܽܘܢ ܘܢܶܪܘܽܘܢ: ܘܥܰܡ ܩܰܕܺܝ̈ܫܶܐ ܢܕܽܘܨܽܘܢ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܕܽܘܟ̈ܣܶܐ ܠܐ ܡܶܫܬܰܬܩܳܢ̈ܶܐ: ܥܰܡ ܝܰܗ̈ܠܐ ܦܫܺܝ̈ܛܶܐ ܘܠܐ ܡܪ̈ܰܟܒܶܐ ܠܳܟ ܡܫܺܝܚܳܐ ܡܢܰܨܚܳܢܳܐ ܕܩܰܕܺܝ̈ܫܰܘܗܝ: ܘܠܐܒܽܘܟ ܡܰܘܪܒܳܢܳܐ ܕܕܳܚܠܰܘ̈ܗܝ: ܘܰܠܪܽܘܚܳܟ ܩܰܕܺܝܫܳܐ ܡܟܰܠܠܳܢܳܐ ܕܰܪ̈ܚܽܘܡܰܘܗܝ: ܗܳܫܳܐ܀

 

 

 

ܥܛܪܐ

 

 

 

ܦܺܝܪܡܳܐ ܕܰܟܝܳܐ ܘܩܰܢܕܺܝܕܽܘܣ ܚܰܠܝܳܐ: ܕܥܰܠ ܓܳܓܽܘܠܬܳܐ ܐܶܬܬܰܥܛܰܪ ܘܪܰܥܺܝ ܠܐܒܽܘܗܝ ܡܪܰܝܡܳܐ: ܩܰܒܶܠܳܝܗܝ ܡܳܪܝ ܠܩܶܛܪܽܘܩܳܐ ܗܳܢܳܐ ܕܩܰܪܶܒܢܰܢ ܠܳܟ ܒܥܺܐܕܳܐ ܫܒܺܝܚܳܐ ܕܓܰܒܝܳܟ ܡܳܪܝ ܐܰܚܳܐ ܘܫܰܟܶܢ ܠܰܢ ܒܰܨܠܰܘ̈ܳܬܶܗ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܘܫܰܝܢܳܐ ܘܰܫܠܳܡܳܐ ܘܡܰܦܩܳܢܳܐ ܡܫܰܝܢܳܐ ܘܒܰܣܺܝܡܳܐ: ܘܰܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܡܳܪܰܢ ܘܰܐܠܳܗܳܢ܀

 

 

 

ܚܘܬܡܐ

 

 

 

ܦܫܽܘܛ ܡܳܪܝ ܝܰܡܺܝܢܳܐ ܕܺܝܠܳܟ ܐܠܰܗܳܝܬܳܐ: ܘܒܰܪܶܟܳܝܗܝ ܠܥܰܡܳܐ ܗܳܢܳܐ ܕܶܐܬܟܰܢܰܫ ܠܰܡܝܰܩܳܪܽܘ ܠܐܬܠܺܝܛܳܟ ܡܳܪܝ ܐܰܚܳܐ ܥܛܺܝܦ ܙܳܟܽܘܬܳܐ: ܘܰܐܫܘܳܐ ܠܰܢ ܠܰܡܢܳܬܳܐ ܘܦܶܣܳܐ ܕܥܰܡ ܓܒܰܝ̈ܟ: ܘܰܠܚܽܘܠܛܳܢܳܐ ܕܥܰܡ ܚܰܣܝܰܝ̈ܟ: ܐܰܝܟܰܢܳܐ ܕܰܢܫܰܒܚܳܟ ܥܰܡ ܣܺܝ̈ܥܳܬܳܐ ܕܰܙܗܰܝܰܝ̈ܟ: ܒܡܰܫ̈ܟܢܶܐ ܥܶܠܳܝ̈ܶܐ ܕܰܫܡܰܝ̈ܟ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܥܒܰܕ ܠܶܗ ܡܰܠܐܟ̈ܶܐ ܗܰܘ̈ܢܶܐ ܬܪ̈ܰܝܳܢܶܐ ܡܫܰܒ̈ܚܳܢܶܐ ܠܐ ܫܰܠܘܳ̈ܝܶܐ: ܘܰܐܩܺܝܡ ܠܬܶܫܡܫܬܶܗ ܛܶܟ̈ܣܶܐ ܗܽܘܠܳܢܳܝ̈ܶܐ ܐܰܘܟܺܝܬ ܡܶܕܪ̈ܳܢܳܝܶܐ ܘܚܶܠܳܢܳܝ̈ܶܐ ܕܺܐܝܬܰܝܗܽܘܢ ܗܰܘ̈ܢܶܐ ܬܠܺܝ̈ܬܳܝܶܐ: ܕܥܳܠܒܺܝܢ ܒܬܶܫܒ̈ܚܳܬܗܽܘܢ ܠܗ̇ܳܢܽܘܢ ܠܐ ܗܽܘܠܳܢܳܝ̈ܶܐ ܘܝܳܒܽܘܠܳܝ̈ܶܐ: ܕܠܶܗ ܡܫܰܒܚܺܝܢ ܘܰܡܪܰܡܪܡܺܝܢ ܠܶܗ ܠܗܰܘܢܳܐ ܩܰܕܡܳܝܳܐ ܘܡܰܗܽܘܝܳܢܳܐ ܕܗܰܘ̈ܢܶܐ: ܠܗܰܘ ܩܰܕܺܝܫ ܒܟܽܠ ܕܰܒܩܰܕܺܝܫܽܘܬܳܐ ܡܩܰܕܫܳܢܺܝܬܳܐ ܕܡܶܢܶܗ ܩܰܕܶܫ ܠܓܰܒܝܳܐ ܡܳܪܝ ܐܰܚܳܐ ܝܺܚܺܝܕܳܝܳܐ ܘܥܳܢܘܳܝܳܐ: ܘܪܰܡܪܶܡ ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ: ܕܠܶܗ ܠܡܳܪܝܳܐ ܡܢܰܨܚܳܢܶܗ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܐܰܝܠܶܝܢ ܠܶܫ̈ܳܢܶܐ ܣܳܦܩܺܝܢ ܠܩܽܘܠܳܣܰܝ̈ܟ ܐܳܘ ܢܰܨܺܝܚܳܐ ܘܓܰܒܝܳܐ ܘܩܰܕܺܝܫܳܐ ܡܳܪܝ ܐܰܚܳܐ: ܒܢ̈ܳܬ ܩ̈ܳܠܐ ܕܺܝܠܰܢ ܬܰܚܽܘ̈ܒܶܐ ܘܚܰܛܳܝ̈ܶܐ ܚܳܝ̈ܒܳܢ ܡ̣ܶܢ ܡܥܰܠܝܽܘܬ ܕܽܘܒܳܪ̈ܶܐ ܕܺܝܠܳܟ ܫܒܺܝ̈ܚܶܐ ܘܰܡܥܰܠܰܝ̈ܳܐ: ܥܰܡ̈ܡܶܐ ܘܶܐܡܘ̈ܳܬܳܐ ܬܗܰܪܘ ܘܶܐܬܕܰܡܰܪܘ ܘܫܰܒܰܚܘ ܠܐܠܳܗܳܐ ܕܰܓܒܳܟ ܠܦܳܠܚܽܘܬܶܗ: ܝܰܘܡܳܢܳܐ ܚܳܕ̈ܝܳܢ ܘܪ̈ܳܘܙܳܢ ܕܰܝܪ̈ܳܬܳܟ: ܘܟܶܢ̈ܫܶܐ ܕܬܰܠܡܺܝ̈ܕܰܝܟ ܕܟܰܝ̈ܳܐ ܣܳܘܚܺܝܢ ܠܐܘܪܰܥ ܥܰܕܥܺܐܕܳܟ: ܫܡܰܝ̈ܳܢܶܐ ܕܳܝܨܺܝܢ ܘܡܶܬܦܰܨܚܺܝܢ ܒܕܽܘܟܪܳܢܳܟ ܗ̇ܳܢܽܘܢ ܕܰܒܗܽܘܢ ܡܰܪܺܝܬ: ܒܫܰܗܪܳܟ ܘܥܰܡܠܳܟ: ܘܺܝ̈ܠܐ ܘܫܽܘ̈ܫܶܦܶܐ ܚܶܘܳܪ̈ܳܬܳܐ ܐܰܝܬܺܝܘ ܥܰܡܗܽܘܢ ܠܰܡܩܰܠܳܣܽܘ ܒܗܶܝܢ ܢܰܦܫܳܟ ܚܣܺܝܬܳܐ ܒܝܽܘܡ ܥܽܘܢܕܳܢܳܟ: ܥܶܛܪ̈ܶܐ ܗܰܢܺܝ̈ܶܐܐ ܪܣܰܡܘ ܒܳܐܐܰܪ ܒܝܽܘܡ ܫܽܘܢܳܝܳܟ: ܣܶܕܪ̈ܶܐ ܕܡܰܠܐܟ̈ܶܐ ܐܶܬܰܘ ܠܰܫܠܳܡܳܟ: ܒܽܘܪ̈ܟܳܬܳܐ ܕܰܟܪ̈ܽܘܒܶܐ ܐܶܬܡܰܠܝܰܬ݀ ܕܰܝܪܳܟ ܝܰܗ̈ܠܐ ܕܢܽܘܪ̈ܳܢܶܐ ܐܶܬܘܰܥܰܕܘ ܠܰܩܒܽܘܪܬܳܟ ܘܩ̈ܳܠܐ ܪ̈ܳܡܶܐ ܕܬܶܫܒ̈ܚܳܬܳܐ ܝܰܒܶܒܘ ܠܡܳܪܝܳܐ ܡܳܪܳܟ: ܝܽܘܒ̈ܳܒܶܐ ܘܙܽܘܡܳܪ̈ܶܐ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ ܐܶܬܚܰܠܰܛܘ ܒܝܽܘܡ ܫܽܘܢܳܝܳܟ ܢܗܳ̈ܡܳܬܳܐ ܚܢܺܝ̈ܓܳܬܳܐ ܢܳܗ̈ܡܳܢ ܗܘܰܝ̈ ܕܰܝܪ̈ܳܬܳܐ: ܝܰܘܡܳܢ ܐܶܡܳܟ ܬܰܪܓܶܫ ܥܰܠ ܕܰܚܺܝܚܳܗ̇ ܒܝܰܕ ܫܟܺܝܢܬܳܐ ܕܦܰܓܪܳܟ: ܐܳܦ ܐܰܒܽܘܟ ܥܽܘܒܰܕܝܳܐ ܥܢܰܕ ܟܰܕ ܓܠܺܝܙ ܡ̣ܶܢ ܚܙܳܬܳܟ ܘܪܺܝܫ ܥܰܝܢܳܐ ܬܶܬܟܡܰܪ ܕܡ̣ܶܢ ܣܳܚܪ̈ܳܬܳܗ̇ ܐܶܬܠܰܝܬܺܝܬ ܕܰܝܪܳܟ ܕܳܝܨܳܐ: ܥܰܘܣܶܐ ܬܶܬܶܐܒܶܠ ܒܡܰܦܰܩܬܳܟ ܕܡ̣ܶܢ ܠܘܳܬܳܟ̇: ܕܰܝܪܳܐ ܕܰܦܢܳܬ݀ ܬܶܬܬܪܺܝܡ ܩܰܪܢܳܗ̇ ܒܡܶܬܬܰܝܬܝܳܢܽܘܬܶܗ ܕܦܰܓܪܳܟ ܠܓܰܘܳܗ̇: ܝܰܘܡܳܢܳܐ ܢܶܚܕܽܘܢ ܫܡܰܝ̈ܳܢܶܐ ܕܰܗܘܰܘ ܒܥܶܢܝܳܢܳܟ ܘܰܐܪ̈ܥܳܢܳܝܶܐ ܢܶܚܫܽܘܢ ܕܡ̣ܶܢ ܨܰܘܬܳܟ ܐܶܬܓܰܙܺܝܘ: ܘܟܰܕ ܠܰܫܠܳܡܳܟ ܗ̇ܰܘ ܐܠܰܗܳܝܳܐ ܣܳܘܚܺܝܢܰܢ ܘܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܐܳܡܪܺܝܢܰܢ: ܫܠܳܡܠܳܟ ܡܳܪܝ ܐܰܚܳܐ ܥܳܢܘܳܝܳܐ ܕܰܠܡܰܕܢܚܳܐ ܐܰܟܪܶܙܬ ܘܬܰܠܡܶܕܬ ܘܰܠܡܰܥܪܒܳܐ ܐܰܪܬܺܝܬ ܘܟܰܘܶܢܬ: ܫܠܳܡܠܳܟ ܡܳܪܝ ܐܰܚܳܐ ܕܰܫܠܳܡܳܐ ܘܫܰܝܢܳܐ ܙܪܰܥܬ ܒܰܐܬܪܰܢ: ܟܰܕ ܡܢܳܬܳܐ ܡ̣ܶܢ ܩܰܝܣܳܐ ܕܰܨܠܺܝܒܳܐ ܚܰܝܳܐ ܠܰܢ ܐܰܝܬܺܝܬ: ܫܠܳܡܠܳܟ ܡܳܪܝ ܐܰܚܳܐ ܕܒܰܫܒܺܝܬܳܐ ܕܦܳܪ̈ܣܳܝܶܐ ܐܶܬܕܒܰܪܬ ܐܳܦ ܒܰܡܨܺܝܕܬܳܐ ܐܠܰܗܳܝܬܳܐ ܐܶܬܬܨܺܝܕܬ: ܫܠܳܡܠܳܟ ܡܳܪܝ ܐܰܚܳܐ ܕܰܒܦܶܨܬܶܗ ܕܡܳܪܝ ܡܺܝܟܳܐܶܝܠ ܣܠܶܩܬ: ܘܒܶܝܬ ܐܺܝ̈ܕܰܘܗܝ ܠܐܘܪܚܳܐ ܕܚܰܝ̈ܶܐ ܐܶܬܗܰܕܺܝܬ: ܫܠܳܡܠܳܟ ܡܳܪܝ ܐܰܚܳܐ ܕܰܠܠܶܫܳܢܶܗ ܕܗ̇ܰܘ ܦܺܐܩܳܐ ܘܚܰܪܫܳܐ ܛܰܠܝܳܐ ܕܡܶܬܩܪܶܐ ܗܘܳܐ ܚܶܘܳܪܳܐ ܦܫܰܛܬ: ܘܠܳܟ ܐܶܬܬܰܠܡܰܕ ܘܩܰܕܺܝܫܳܐ ܡܝܰܬܪܐ ܗܘܳܐ: ܫܠܳܡܠܳܟ ܡܳܪܝ ܐܰܚܳܐ ܘܡܳܪܝ ܡܺܝܟܳܐܶܝܠ: ܕܰܬܪ̈ܰܝܟܽܘܢ ܥܰܠܬܽܘܢ ܠܒܰܝܬܶܗ ܕܬܶܐܘܳܕܳܘܪܳܘܣ ܗ̇ܰܘ ܪܺܝܫܳܢܳܐ ܡܗܰܝܡܢܳܐ: ܘܰܬܠܳܬܳܐ ܡܶܬܚܙܶܝܢ ܗܘܰܝܬܽܘܢ ܠܰܒܪܶܗ ܚܶܘܳܪܳܐ ܗ̇ܰܘ ܚܰܪܫܳܐ ܘܦܺܐܩܳܐ: ܟܰܕ ܡܫܺܝܚܳܐ ܒܰܝܢܳܬܟܽܘܢ ܫܪܶܐ ܗܘܳܐ ܘܰܠܛܰܠܝܳܐ ܙܥܽܘܪܳܐ ܡܶܬܚܙܶܐ ܗܘܳܐ: ܫܠܳܡܠܟܽܘܢ ܡܳܪܝ ܐܰܚܳܐ ܘܡܳܪܝ ܡܺܝܟܳܐܶܝܠ ܒܰܥܳܝ̈ܶܐ ܕܰܚܠܳܦܰܝܢ ܕܰܠܒܽܘܫܳܐ ܒܰܣܝܳܐ ܥܛܺܝܦܺܝܢ ܗܘܰܝܬܽܘܢ ܘܩܶܛܡܳܐ ܡܰܟܺܝܟ ܗܘܳܐ ܠܟܽܘܢ ܘܰܥܠܰܘܗܝ ܡܨܰܠܶܝܢ ܗܘܰܝܬܽܘܢ: ܘܪ̈ܰܚܡܶܐ ܘܰܚܢܳܢܳܐ ܚܠܳܦ ܟܽܠܶܗ ܥܳܠܡܳܐ ܡ̣ܶܢ ܐܠܰܗܳܐ ܫܳܐܠܺܝܢ ܗܘܰܝܬܽܘܢ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܥܩܰܪܬ ܠܐܝܠܳܢܳܐ ܕܣܳܓܕܺܝܢ ܗܘܰܘ ܠܶܗ ܚܰܢ̈ܦܶܐ ܘܛܳܥܰܝ̈ܳܐ ܒܰܐܬܪܳܐ ܕܰܐܪܡܰܢܝܰܐ: ܘܕܰܝܪܳܐ ܡܥܰܠܰܝܬܳܐ ܒܕܽܘܟܬܶܗ ܩܒܰܥܬ ܘܫܰܬܶܐܣܬ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܠܐ ܣܦܰܩ ܠܳܟ ܐܰܬܪܳܐ ܕܦܳܪ̈ܣܳܝܶܐ ܠܡܰܟܪܳܙܽܘ ܒܶܗ ܫܡܶܗ ܕܰܡܫܺܝܚܳܐ: ܐܶܠܐ ܥܰܡܶܗ ܣܽܘܪܺܝܰܐ ܘܰܐܬܪܳܐ ܕܪ̈ܽܘܡܳܝܶܐ ܘܕܰܐܬܺܝ̈ܢܳܝܶܐ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܩܒܰܥܬ ܥܽܘܡܪ̈ܶܐ ܘܕܰܝܪ̈ܳܬܳܐ ܘܫܰܟܠܶܠܬ ܡܰܕܒ̈ܚܶܐ ܘܗܰܝ̈ܟܠܐ ܒܟܽܠ ܐܰܬܪ̈ܰܘܳܬܳܐ ܘܦܶܢ̈ܝܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܐܦܢܺܝܬ ܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ ܘܬܰܠܡܶܕܬ ܥܰܡ̈ܡܶܐ ܣܰܓܺܝ̈ܶܐܐ ܘܰܐܥܡܶܕܬ ܚܰܢ̈ܦܶܐ ܕܠܐ ܡܶܢܝܳܢ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܟܠܰܝܬ ܡ̣ܶܢ ܐܰܬܪܰܢ ܒܰܪܕܳܐ ܩܰܫܝܳܐ ܘܡܰܪܺܝܪܳܐ ܕܰܒܥܶܠܬܶܗ ܡܺܝܬܘ ܒܢܰܝ̈ܢܳܫܳܐ ܣܰܓܺܝ̈ܶܐܐ ܘܰܒܥܺܝܪ̈ܳܐ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܡ̣ܶܢ ܡܕܺܝܢܰܬ݀ ܡܰܠܟܽܘܬܳܐ ܩܽܘܣܛܰܢܛܺܝܢܽܘܦܳܠܺܝܣ ܐܰܝܬܺܝܬ ܡܢܳܬܳܐ ܠܐܬܪܰܢ ܡ̣ܶܢ ܩܰܝܣܳܐ ܗ̇ܰܘ ܕܰܨܠܺܝܒܳܐ ܚܰܝܳܐ: ܘܰܒܕܰܝܪܳܐ ܗ̇ܳܝ ܕܰܒܢܳܐ ܐܺܝܠ ܐܰܫܪܺܝ ܣܳܡܳܗ̇: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܳܐܦ ܦܰܓܪܳܟ ܐܶܬܬܰܝܬܺܝ ܡ̣ܶܢ ܐܰܬܪܳܐ ܕܪ̈ܽܘܡܳܝܶܐ ܠܐܬܪܳܐ ܒܪܺܝܟܳܐ ܕܛܽܘܪ ܥܰܒܕܺܝ̈ܢ ܠܕܰܝܪܳܟ ܕܡܶܬܩܰܪܝܳܐ ܕܶܦܢܳܬ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܛܪܰܕܬ ܠܫܺܐܕ̈ܶܐ ܘܕܰܟܺܝܬ ܠܓܰܪ̈ܒܶܐ ܘܰܦܫܰܛܬ ܠܶܫܳܢܳܐ ܕܦܺܐܩܳܐ: ܘܝܰܗܒܬ ܠܥܰܩܪ̈ܳܬܳܐ ܒܢܰܝ̈ܳܐ ܪ̈ܚܺܝܡܶܐ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܦܩܰܕܬ ܠܥܰܠܥܳܠܐ ܩܰܫܝܳܐ ܘܬܰܩܺܝܦܳܐ ܘܥܶܩܳܪܶܗ ܠܐܝܠܳܢܳܐ ܕܡܶܣܬܓܶܕ ܗܘܳܐ: ܘܰܫܩܰܠ ܠܪ̈ܰܟܫܳܐ ܘܬܰܘܪ̈ܶܐ ܘܥܳܢ̈ܳܐ ܗ̇ܳܢܽܘܢ ܕܰܡܛܰܝܒܺܝܢ ܗܘܰܘ ܠܡܶܬܕܒܳܚܽܘ ܩܕܳܡ ܐܠܰܗ̈ܶܐ ܣܪ̈ܺܝܩܶܐ ܘܕܰܓ̈ܳܠܐ ܘܒܰܐܪܣܺܝܢܳܘܣ ܢܰܗܪܳܐ ܫܕܳܐ ܐܶܢܽܘܢ: ܬܳܐ ܒܰܫܠܳܡܳܐ ܡܳܪܝ ܐܰܚܳܐ ܕܰܚܒܰܫܬ ܠܛܳܥܰܝ̈ܳܐ ܒܥܰܡܛܳܢܳܐ ܕܚܶܫܽܘܟܳܐ ܥܕܰܡܳܐ ܕܰܐܘܕܺܝܘ ܒܰܡܫܺܝܚܳܐ ܢܽܘܗܪܳܐ ܫܰܪܺܝܪܳܐ: ܘܟܰܕ ܡ̣ܶܢ ܩܽܘܠܳܣܰܝ̈ܟ ܡܰܘܚܠܐ ܡܶܠܬܳܐ ܐܶܠܐ ܘܳܐܦ ܐܰܢ̱ܬ ܗܳܫܳܐ ܒܥܺܝ ܠܰܢ ܡ̣ܶܢ ܡܳܪܳܟ ܕܢܶܙܕܪܰܥ ܝܽܘܠܦܳܢܳܟ ܒܢܰܦ̈ܫܳܬܰܢ: ܘܰܐܬܪܰܢ ܕܶܐܫܬܘܺܝ ܠܰܫܟܺܝܢܬܳܐ ܐܠܰܗܳܝܬܳܐ ܕܣܺܝܡܰܬ݀ ܓܰܪ̈ܡܰܝܟ: ܘܠܰܡܢܳܬ ܚܰܝ̈ܶܐ ܕܰܨܠܺܝܒܳܐ ܦܳܪܽܘܩܳܝܳܐ: ܢܶܥܒܪܽܘܢ ܡܶܢܶܗ ܫܰܒ̈ܛܶܐ ܘܡܰܚܘ̈ܳܬܳܐ ܕܪܽܘܓܙܳܐ: ܘܰܢܒܰܛܶܠ ܡܶܢܶܗ ܚܰܪܒܳܐ ܘܫܶܒܝܳܐ ܘܟܰܦܢܳܐ ܘܡܰܘܬܳܢܳܐ: ܘܟܽܠ ܚܰܫܳܐ ܡܰܚܫܳܢܳܐ ܘܟܽܠ ܓܶܕܫܳܐ ܘܣܽܘܓܦܳܢܳܐ: ܘܢܺܐܬܽܘܢ ܠܰܢ ܙܰܒ̈ܢܶܐ ܕܰܡܫܰܝܢܽܘܬܳܐ: ܘܰܫܢܰܝ̈ܳܐ ܘܝܰܪ̈ܚܶܐ ܕܟܰܗܺܝܢܽܘܬܳܐ: ܠܟܳܗ̈ܢܶܐ ܒܥܺܝ ܙܰܗܝܽܘܬܳܐ ܘܠܰܡܫܰܡ̈ܫܳܢܶܐ ܢܰܟܦܽܘܬܳܐ: ܠܣܳܒ̈ܶܐ ܡܣܰܡܟܽܘܬܳܐ: ܠܓܰܒܪ̈ܶܐ ܢܺܝܚܽܘܬܳܐ: ܠܰܥܠܰܝ̈ܡܶܐ ܫܰܦܝܽܘܬܳܐ: ܠܢܶܫ̈ܶܐ ܟܚܺܝܕܽܘܬܳܐ: ܠܰܒ̈ܢܳܬ ܩܝܳܡܳܐ ܡܪܰܚܡܳܢܽܘܬܳܐ: ܠܰܒܬܽܘܠܽܘܬܳܐ ܢܛܺܝܪܽܘܬܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܳܐ ܘܒܽܘܣܳܡܳܐ ܒܡܰܠܟܽܘܬܳܐ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܠܡܳܪܝܳܐ ܡܢܰܨܚܳܢܳܟ: ܐܳܘ ܡܳܪܝ ܐܰܚܳܐ ܒܩܰܕܺܝܫܽܘܬܳܐ: ܗܳܫܳܐ ܘܰܒܟܽܠܙܒܰܢ܀

 

ܛܟܣܐ ܕܥܪܘܒܬܐ ܕܫܠܝ̈ܚܐ ܕܡܬܩܪܝܐ ܕܕܗܒܐ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܠܰܡܩܰܒܳܠܽܘ ܥܽܘܬܪܳܐ ܫܦܺܝܥܳܐ ܕܡܰܘܗ̈ܒܳܬܳܐ ܪ̈ܳܡܳܬ ܡ̣ܶܢ ܥܳܠܡܳܐ: ܘܰܠܡܶܛܰܪ ܙܗܺܝܪܳܐܝ̣ܬ ܠܫܽܘ̈ܟܳܢܶܐ ܕܛܰܝܒ̈ܘܳܬܳܟ ܐܠܰܗܳܝ̈ܳܬܳܐ: ܘܰܠܡܶܛܥܰܢ ܠܡܰܘܒܠܳܟ ܩܰܠܺܝܠܬܳܐ: ܘܰܠܡܰܟܪܳܙܽܘ ܠܰܫܡܳܟ ܩܰܕܺܝܫܳܐ ܒܶܝܬ ܥܰܡܳܐ ܘܥܰܡ̈ܡܶܐ: ܘܢܶܚܕܶܐ ܒܨܰܥܪܳܐ ܘܢܶܓ̈ܕܶܐ ܕܰܚܠܳܦܰܝܟ: ܐܰܟܡܳܐ ܕܫܶܡܥܽܘܢ ܘܝܽܘܚܰܢܳܢ ܘܫܰܪܟܳܐ ܕܬܰܠܡܺܝ̈ܕܰܝܟ ܩܰܕܺܝ̈ܫܶܐ: ܥܰܡܗܽܘܢ ܢܶܚܕܶܐ ܒܡܰܠܟܽܘܬܳܟ ܕܠܐ ܥܳܒܪܳܐ: ܘܢܰܣܶܩ ܠܳܟ ܫܽܘܒܚܳܐ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܗܰܘ ܚܰܝܠܶܗ ܕܰܐܒܳܐ ܘܚܶܟܡܬܶܗ ܕܫܰܡܠܺܝ ܒܝܰܕ ܐܰܒܳܐ ܫܽܘܘܕܳܝܶܗ ܫܰܦܺܝܪܳܐ ܠܘܳܬ ܫܠܺܝ̈ܚܰܘܗܝ ܩܰܕܺܝ̈ܫܶܐ: ܘܫܰܕܰܪ ܥܠܰܝܗܽܘܢ ܘܰܓܡܰܪ ܐܶܢܽܘܢ ܘܚܰܟܶܡ ܘܩܰܕܶܫ ܐܶܢܽܘܢ: ܘܰܐܢܗܰܪ ܠܬܰܪ̈ܥܝܳܬܗܽܘܢ ܒܫܽܘ̈ܟܳܢܰܘܗܝ ܐܠܰܗܳܝ̈ܶܐ: ܠܗܰܘ ܕܩܰܕܡ ܐܶܡܰܪ ܠܗܽܘܢ: ܕܒܳܬܰܪ ܕܬܶܠܒܫܽܘܢ ܚܰܝܠܐ ܦܰܪܰܩܠܺܝܛܳܐ ܡ̣ܶܢ ܪܰܘܡܳܐ: ܗܳܝܕܶܝܢ ܦܽܘܩܘ ܐܰܟܪܶܙܘ ܣܒܰܪܬܳܐ ܕܦܽܘܪܩܳܢܳܐ ܒܥܰܡܳܐ ܘܰܒܥܰܡ̈ܡܶܐ: ܘܟܽܠ ܡܳܐ ܕܬܶܫܶܐܠܽܘܢ ܠܐܴܒܝ ܒܫܶܡܝ ܢܶܬܶܠ ܠܟܽܘܢ: ܒܶܗ ܒܗܳܢܳܐ ܫܽܘܘܕܳܝܳܐ ܐܰܚܠܶܡܘ ܫܶܡܥܽܘܢ ܟܺܐܦܳܐ ܘܝܽܘܚܰܢܳܢ ܠܰܚܓܺܝܪܳܐ ܕܡ̣ܶܢ ܟܪܶܣ ܐܶܡܶܗ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܡܳܪܰܢ ܝܶܫܽܘܥ ܡܫܺܝܚܳܐ ܫܡܳܐ ܫܰܦܺܝܪܳܐ ܘܰܪܓܺܝܓܳܐ: ܘܛܳܒܳܐ ܘܰܪܚܺܝܡܳܐ ܒܰܣܺܝܡܳܐ ܘܢܺܝܚܳܐ: ܗ̇ܰܘ ܕܰܫܦܰܪ ܠܨܶܒܝܳܢܶܗ ܕܢܳܨܪܳܝܳܐ ܢܶܬܟܰܢܶܐ ܘܢܶܫܬܰܡܰܗ ܘܢܶܬܺܝܕܰܥ: ܘܰܫܡܳܐ ܕܰܐܠܳܗܽܘܬܳܐ ܚܰܦܺܝ ܡ̣ܶܢ ܛܳܠܽܘ̈ܡܶܐ: ܟܰܕ ܕܶܝܢ ܡܳܪܝ ܥܰܡ ܬܰܠܡܺܝ̈ܕܰܝܟ ܥܰܠ ܐܰܪܥܳܐ ܡܗܰܠܶܟ ܗܘܰܝܬ: ܘܡ̣ܶܢ ܒܳܬܰܪ ܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܦܰܩܶܕܬ ܐܶܢܽܘܢ ܘܶܐܡܰܪܬ: ܕܙܶܠܘ ܠܥܳܠܡܳܐ ܟܽܠܶܗ ܘܰܐܟܪܶܙ ܐܶܘܢܓܶܠܝܽܘܢ ܕܺܝܠܝ ܠܟܽܠܗܽܘܢ ܥܰܡ̈ܡܶܐ: ܘܒܰܫܡܳܐ ܕܺܝܠܝ ܕܰܝ̈ܘܶܐ ܡ̣ܶܢ ܐ̱ܢܳܫ̈ܳܐ ܐܰܦܶܩܘ: ܘܰܟܪ̈ܺܝܗܶܐ ܘܡܰܟܰܐܒ̈ܶܐ ܐܰܚܠܶܡܘ: ܡܺܝ̈ܬܶܐ ܢܰܚܶܡܘ ܘܟܽܠ ܚܰܝܠܺܝ̈ܢ ܘܬܶܕܡܪ̈ܳܢ ܒܗܰܝܡܳܢܽܘܬܳܐ ܣܥܽܘܪܘ ܘܥܰܠ ܪ̈ܰܚܫܳܐ ܒܺܝܫܳܐ ܕܪܽܘܟܘ: ܘܬܰܠܡܶܕܘ ܠܟܽܠܗܽܘܢ ܥܰܡ̈ܡܶܐ ܒܰܫܡܳܐ ܕܰܬܠܺܝܬܳܝܽܘܬܳܐ: ܗ̇ܳܢܽܘܢ ܕܶܝܢ ܬܰܠܡܺܝ̈ܕܶܐ ܫܰܪܺܝܪ̈ܶܐ ܟܰܕ ܩܰܒܶܠܘ ܡܰܘܗܰܒܬܳܐ ܓܡܺܝܪܬܳܐ ܕܪܽܘܚܳܐ ܩܰܕܺܝܫܳܐ ܐܰܝܟ ܫܽܘܘܕܳܝܰܝ̈ܟ ܕܰܠܘܳܬܗܽܘܢ ܒܝܰܕ ܠܶܫ̈ܳܢܶܐ ܚܰܕ̈ܬܶܐ ܕܢܽܘܪܳܐ ܐܠܰܗܳܝܬܳܐ ܕܡ̣ܶܢ ܫܡܰܝܳܐ ܗ̇ܳܝ ܕܫܰܕܰܪ ܐܰܒܳܐ ܒܰܫܡܳܐ ܕܺܝܠܳܟ ܡܝܰܩܪܳܐ: ܫܰܪܺܝܘ ܕܰܢܡܰܠܠܽܘܢ ܓܢܺܝ̈ܙܳܬܳܐ ܘܰܥܬܺܝ̈ܕܳܬܳܐ ܡ̣ܶܢ ܢܳܡܽܘܣܳܐ ܘܰܢܒܺܝ̈ܶܐ ܥܰܠ ܟܽܠܳܗ̇ ܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܕܒܰܒܣܰܪ: ܗܳܝܕܶܝܢ ܫܶܡܥܽܘܢ ܦܶܛܪܽܘܣ ܘܝܽܘܚܰܢܳܢ ܒܰܪ ܪܰܥܡܳܐ: ܝܰܘܡܳܢܳܐ ܒܰܥܪܽܘܒܬܳܐ ܗܳܕܶܐ ܩܳܡܘ ܘܶܐܙܰܠܘ ܠܰܡܨܰܠܳܝܽܘ ܡܶܬܬܙܺܝܥܳܢܽܘܬܳܐ ܕܪܽܘܚܳܐ ܕܰܒܗܽܘܢ ܥܳܡܰܪ ܗܘܳܐ: ܒܥܶܕܳܢܳܐ ܕܰܬܫܰܥ̈ܫܳܥܺܝܢ ܕܒܶܗ ܡܺܝܬܬ ܒܰܒܣܰܪ ܚܠܳܦ ܟܽܠܢܳܫ: ܘܰܐܝܟ ܡܕܰܒܪܳܢܽܘܬܳܐ ܕܺܝܠܳܟ ܚܰܟܺܝܡܰܬ݀ ܒܟܽܠ ܐܰܦܓܰܥܬ ܒܗܽܘܢ ܒܰܪܢܳܫܳܐ ܚܓܺܝܪܳܐ ܕܡ̣ܶܢ ܡܰܘܠܳܕܶܗ ܗ̇ܰܘ ܟܰܕ ܒܰܫܡܳܟ ܢܶܣܬܥܰܪ ܘܬܶܫܬܰܒܰܚ ܥܰܡ ܐܰܒܽܘܟ ܡ̣ܶܢ ܟܽܠܢܳܫ: ܟܰܕ ܚܙܳܐ ܐܶܢܽܘܢ ܕܥܳܐܠܺܝܢ ܒܬܰܪܥܳܐ ܕܗܰܝܟܠܐ ܫܰܦܺܝܪܳܐ ܣܒܰܪ ܕܙܶܕܩܬܳܐ ܐܰܘܟܺܝܬ ܡܪܰܚܡܳܢܽܘܬܳܐ ܢܶܬܠܽܘܢ ܠܶܗ ܬܰܠܡܺܝ̈ܕܰܝܟ: ܗܶܢܽܘܢ ܕܶܝܢ ܟܰܕ ܥܕܰܟܺܝܠ ܒܰܫܡܳܟ ܠܐ ܣܥܰܪܘ ܗܘܰܘ ܚܰܝ̈ܠܐ ܡܶܕܶܡ: ܐܶܡܰܪܘ ܠܗܶ ܚܽܘܪ ܒܰܢ ܐܰܟܡܰܢ ܕܢܶܫܬܰܘܕܰܥ ܠܰܫܡܳܟ ܕܒܶܗ ܩܳܢܶܐ ܢܦܺܐܫܳܐ ܡ̣ܶܢ ܐܽܘܠܨܳܢܳܐ ܕܺܝܠܶܗ: ܘܟܰܕ  ܚܳܪ ܒܗܽܘܢ ܡܶܬܚܰܢܳܢܳܐܝ̣ܬ ܫܶܡܥܽܘܢ ܢܰܨܺܝܚܳܐ ܓܫܰܦ ܒܺܐܝܕܶܗ ܘܶܐܡܰܪ ܠܶܗ: ܕܰܗܒܳܐ ܘܣܺܐܡܳܐ ܠܰܝܬ ܠܰܢ ܕܢܶܬܶܠ ܠܳܟ ܐܶܠܐ ܡ̣ܶܢ ܥܽܘܬܪܳܐ ܪܽܘܚܳܢܳܝܳܐ ܘܰܫܡܰܝܳܢܳܐ ܕܰܩܢܰܝܢܰܢ ܢܶܬܶܠ ܠܳܟ: ܘܰܩܥܳܐ ܒܗܰܝܡܳܢܽܘܬܳܐ ܕܟܽܠ ܐ̱ܢܳܫ ܢܶܫܡܰܥ ܩܳܠܶܗ: ܒܰܫܡܶܗ ܕܝܶܫܽܘܥ ܢܳܨܪܳܝܳܐ ܗ̇ܰܘ ܕܰܨܠܰܒܘ ܝܽܘܕܳܝ̈ܶܐ ܥܰܠ ܩܰܝܣܳܐ: ܘܩܳܡ ܠܰܬܠܳܬܳܐ ܝܰܘܡܺܝ̈ܢ: ܩܽܘܡ ܗܳܫܳܐ ܥܰܠ ܪ̈ܶܓܠܰܝܟ ܕܢܶܚܙܽܘܢ ܥܰܡ̈ܡܶܐ ܐܳܬܳܐ ܚܕܰܬܳܐ ܘܰܢܗܰܝܡܢܽܘܢ: ܐܳܘ ܠܬܶܕܡܽܘܪܬܳܐ ܪܰܒܬܳܐ ܘܪܺܝܫܳܝܬܳܐ ܕܶܐܣܬܰܥܪܰܬ݀ ܒܺܐܝ̈ܕܰܝ ܫܠܺܝ̈ܚܶܐ ܩܰܕܺܝ̈ܫܶܐ ܒܰܫܡܳܟ ܝܶܫܽܘܥ: ܐܳܘ ܠܚܰܝܠܐ ܬܰܩܺܝܦܳܐ ܕܐܪܡܺܝ ܙܰܘ̈ܥܶܐ ܒܗܰܕ̈ܳܡܶܐ ܡܫܰܪ̈ܰܝܳܐ ܘܶܐܬܬܙܺܝܥܘ ܠܡܰܪܗܳܛܽܘ ܘܠܰܡܫܰܘܳܪܽܘ: ܐܳܘ ܠܣܽܘܥܪܳܢܳܐ ܡܳܪܳܢܳܝܳܐ: ܐܳܘ ܠܰܥܒܳܕܳܐ ܐܠܰܗܳܝܳܐ: ܐܳܘ ܠܒܰܪܬ ܩܳܠܐ ܫܠܺܝܚܳܝܬܳܐ ܕܶܐܡܰܪܬ ܘܰܗܘܳܐ: ܘܦܶܩܕܰܬ݀ ܠܡܳܪܝܳܐ ܕܩܽܘܡ: ܘܩܳܡ ܕܠܐ ܬܽܘܗܳܝܳܐ: ܡ̣ܶܢ ܗܳܫܳܐ ܕܶܝܢ ܫܠܺܝ̈ܚܶܐ ܕܚܳܕܶܝܢ ܕܡܶܫܬܰܒܚܺܝܢ ܡܶܢܟܽܠ ܐ̱ܢܳܫ: ܗܶܢܽܘܢ ܕܡܰܠܦܺܝܢ ܕܠܰܘ ܒܚܰܝܠܰܢ ܥܒܰܕܢ ܗܳܕܶܐ ܐܶܠܐ ܒܰܫܡܶܗ ܘܰܒܚܰܝܠܶܗ ܕܝܶܫܽܘܥ ܢܳܨܪܳܝܳܐ ܡܳܪܰܢ ܘܰܐܠܳܗܰܢ: ܚܓܺܝܪܳܐ ܬܽܘܒ ܕܰܡܫܰܘܰܪ ܘܰܡܩܰܝܶܙ ܘܰܡܫܰܒܰܚ ܥܰܡܳܐ ܕܬܳܗܰܪ ܟܰܕ ܚܳܙܶܐ ܠܰܚܓܺܝܪܳܐ ܕܪܳܗܶܛ: ܟܶܢ̈ܫܶܐ ܣܰܓܺܝ̈ܶܐܐ ܕܰܡܗܰܝܡܢܺܝܢ ܒܰܫܡܳܐ ܕܰܬܠܺܝܬܳܝܽܘܬܳܐ ܘܡܰܘܕܶܝܢ ܘܥܳܡܕܺܝܢ: ܦܪ̈ܺܝܫܶܐ ܘܙܰܕܽܘܩܳܝ̈ܶܐ ܘܪ̈ܺܝܫܰܝ ܟܳܗ̈ܢܶܐ ܕܡܶܬܟܰܡܪܺܝܢ ܘܰܠܬܰܠܡܺܝ̈ܕܶܐ ܪܳܫܶܝܢ ܥܰܠ ܬܶܕܡܽܘܪܬܳܐ ܕܰܗܘܳܬ݀ ܒܰܫܡܳܟ ܘܰܓܙ̈ܳܡܶܐ ܘܨܰܥܪ̈ܶܐ ܘܠܽܘ̈ܚܳܡܶܐ ܘܢܶܓ̈ܕܶܐ ܡܰܝܬܶܝܢ ܥܰܠ ܬܰܠܡܺܝ̈ܕܶܐ ܕܠܐ ܢܡܰܠܠܽܘܢ ܬܽܘܒ ܒܰܫܡܳܟ ܘܗܶܢܽܘܢ ܪ̈ܰܚܡܰܝܟ ܐܶܬܡܠܺܝܘ ܚܰܕܽܘܬܳܐ ܘܰܪܘܳܙܳܐ: ܟܰܕ ܠܚܰܒܪ̈ܰܝܗܽܘܢ ܡܣܰܒܪܺܝܢ ܗܘܰܘ ܕܰܫܘܰܘ ܠܨܰܥܪ̈ܶܐ ܘܰܠܢܶܓ̈ܕܶܐ ܘܠܰܚܒܽܘ̈ܫܝܶܐ ܕܡܶܛܽܠ ܫܡܳܟ: ܘܡ̣ܶܢ ܕܢܰܠܦܽܘܢ ܠܥܰܡܳܐ ܠܐ ܫܳܐܠܺܝܢ ܗܘܰܘ ܘܡ̣ܶܢ ܚܰܝ̈ܠܐ ܕܳܐܬܘ̈ܳܬܳܐ ܕܒܰܫܡܳܟ ܗܳܘܶܝܢ ܠܐ ܢܳܝܚܺܝܢ ܗܘܰܘ: ܥܕܰܡܳܐ ܕܡ̣ܶܢ ܛܶܠܳܢܺܝܬܶܗ ܕܦܶܛܪܽܘܣ ܟܪ̈ܺܝܗܶܐ ܡܶܬܚܰܠܡܺܝܢ ܗܘܰܘ: ܘܟܽܠ ܟܺܐܒ ܘܟܽܘܪܗܳܢ ܡܫܰܢܶܐ ܗܘܳܐ: ܘܳܐܦ ܡܺܝ̈ܬܶܐ ܬܽܘܒ ܕܰܥܠܰܝܗܽܘܢ ܫܳܟܢܳܐ ܗܘܳܬ ܒܚܰܝܠܳܟ ܪܰܒܳܐ ܚܳܐܶܝܢ ܗܘܰܘ: ܚܢܰܢ ܕܶܝܢ ܡܳܪܝ ܕܰܠܥܽܘܗܕܳܢܳܐ ܕܬܶܕܡܽܘܪܬܳܐ ܗܳܕܶܐ ܚܕܰܬܳܐ ܘܪܺܝܫܳܝܬܳܐ ܘܰܡܫܰܡܠܶܝܢܰܢ: ܘܒܳܥܶܝܢܰܢ ܡܶܢܳܟ ܘܠܳܟ ܡܶܬܟܰܫܦܺܝܢܰܢ ܕܰܬܫܰܪܰܪ ܠܟܽܠܰܢ ܒܰܣܒܰܪܬܳܟ ܘܰܒܗܰܝܡܳܢܽܘܬܳܟ: ܘܰܬܫܰܠܗܶܒ ܒܠܶܒܰܢ ܚܽܘܒܳܟ ܘܪܶܚܡܬܳܟ ܒܰܨܠܰܘ̈ܳܬܗܽܘܢ ܕܰܫܠܺܝ̈ܚܰܝܟ ܡܥܰܠܰܝ̈ܳܐ: ܘܬܰܪܶܨ ܗܰܠܟ̈ܳܬܰܢ ܒܰܫܒܺܝ̈ܠܰܝܟ ܕܢܽܘܗܪܳܐ ܕܠܐ ܬܽܘܩ̈ܠܳܬܳܐ ܕܰܚܛܳܗ̈ܶܐ: ܘܰܣܥܽܘܪ ܠܰܟܪ̈ܺܝܗܶܐ ܒܰܚܢܳܢܳܟ: ܘܠܐܠܺܝ̈ܨܶܐ ܒܰܡܪܰܚܡܳܢܽܘܬܳܟ: ܘܰܓܡܽܘܪ ܠܘܳܬܰܢ ܟܽܠܗܽܘܢ ܥܽܘܕܪ̈ܳܢܰܝܟ ܡܫܰܡ̈ܠܰܝܳܐ ܘܗܰܒܠܰܢ ܕܢܶܗܘܶܐ ܡܛܰܝ̈ܒܶܐ ܕܰܚܠܳܦ ܫܪܳܪܳܟ ܢܶܚܰܫ ܟܡܳܐ ܕܡܰܨܝܳܐ ܕܰܢܣܰܝܒܰܪ: ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܰܡ̈ܛܰܠܠܐ ܘܓܽܘ̈ܕܶܐ ܕܩܰܕܺܝ̈ܫܰܝܟ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܥܰܠ ܐܰܦܰܝ̈ ܬܶܕܡܪ̈ܳܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܝܳܕܽܘܥܳܐ ܕܟܰܣ̈ܝܳܬܳܐ ܕܡ̣ܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ ܓܒܳܐ ܠܰܫܠܺܝ̈ܚܰܘܗܝ ܠܟܳܪܽܘܙܽܘܬܶܗ ܫܰܪܺܝܪܬܳܐ ܘܰܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܩܪܳܐ ܐܶܢܽܘܢ ܠܬܰܠܡܺܝܕܽܘܬܳܐ: ܘܫܰܕܰܪ ܐܶܢܽܘܢ ܠܰܒܪܺܝܬܳܐ ܕܢܰܠܦܽܘܢ ܠܥܰܡܳܐ ܘܰܠܥܰܡ̈ܡܶܐ ܣܒܰܪܬܶܗ: ܘܝܰܗܒ ܒܺܐܝܕܰܝ̈ܗܽܘܢ ܚܰܝܠܐ ܘܫܽܘܠܛܳܢܳܐ ܕܪܰܘܡܳܐ ܘܰܕܥܽܘܡܩܳܐ: ܘܰܕܢܶܐܣܪܽܘܢ ܘܢܶܫܪܽܘܢ ܒܰܫܡܰܝܳܐ ܘܒܰܐܪܥܳܐ: ܙܰܝܶܢ ܐܶܢܽܘܢ ܒܪܽܘܚܶܗ ܩܰܕܺܝܫܳܐ ܕܢܶܣܥܪܽܘܢ ܚܰܝ̈ܠܐ ܘܳܐܬܘ̈ܳܬܳܐ ܬܡܺܝ̈ܗܳܬܳܐ ܒܰܫܡܶܗ ܘܰܕܠܐ ܢܶܕܚܠܽܘܢ ܡ̣ܶܢ ܕܰܝ̈ܳܢܶܐ ܕܥܳܠܡܳܐ ܗܳܢܳܐ ܘܡ̣ܶܢ ܡܰܠܟ̈ܶܐ ܛܪ̈ܽܘܢܶܐ: ܗ̇ܰܘ ܕܠܶܗ ܡܦܺܝܣܺܝܢܰܢ ܕܢܰܫܘܶܐ ܠܰܢ ܕܰܒܕܰܟܝܽܘܬܳܐ ܢܝܰܩܰܪ ܠܝܽܘܡ ܕܕܽܘܟܪ̈ܳܢܰܝܗܽܘܢ ܘܰܒܙܰܗܝܽܘܬܳܐ ܕܢܰܦܫܳܐ ܘܰܕܦܰܓܪܳܐ: ܢܶܨܛܰܒܰܬ ܒܥܰܕܥܺܐܕܰܝ̈ܗܽܘܢ ܚܣܰܝ̈ܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܚܰܝܠܐ ܘܚܶܟܡܬܳܐ ܕܰܐܒܳܐ ܡܬܽܘܡܳܝܳܐ: ܗ̇ܰܘ ܫܶܡܫܳܐ ܕܙܰܕܺܝܩܽܘܬܳܐ ܘܡܰܢܗܰܪ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ: ܗ̇ܰܘ ܕܒܺܝܕܰܥܬܳܐ ܕܺܝܠܳܟ ܐܺܝܬܝܳܝܬܳܐ ܘܠܐ ܡܶܬܗܰܘܢܳܢܺܝܬܳܐ ܓܒܰܝܬ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܡ̣ܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ: ܘܡ̣ܶܢ ܨܰܝ̈ܳܕܶܐ ܕܢܽܘ̈ܢܶܐ ܨܰܝ̈ܳܕܰܝ ܒܢܰܝ̈ܢܳܫܳܐ ܠܚܰܝ̈ܶܐ ܫܰܡܠܺܝܬ ܐܶܢܽܘܢ: ܘܰܒܡܶܠܬܳܟ ܐܶܬܶܐܣܰܪܘ ܒܚܽܘܒܳܟ ܘܶܐܬܢܬܶܦ ܠܪܶܚܡܬܳܟ ܘܥܰܠ ܝܳܕܽܘܥܰܝ̈ܗܽܘܢ ܐܰܒܣܺܝܘ ܡܶܛܽܠ ܚܽܘܒܳܟ ܕܠܳܟ ܢܶܩܢܽܘܢ ܘܠܳܟ ܢܶܬܝܰܕܥܽܘܢ ܟܦܰܪܘ ܒܰܐܒ̈ܳܗܶܐ ܘܰܐܚ̈ܶܐ ܘܰܐ̱ܚܝ̈ܳܢܶܐ: ܘܰܫܒܰܩܘ ܠܟܽܠܗܽܘܢ ܥܳܒܽܘܪ̈ܝܳܬܳܐ ܘܙܳܕܩܳܐܝ̣ܬ ܘܠܳܚܡܳܐܝ̣ܬ ܪܕܰܘ ܒܽܐܘܪܚܳܐ ܕܺܝܠܳܟ ܡܰܠܟܳܝܬܳܐ: ܘܡܶܛܽܠ ܗܳܕܶܐ ܒܫܽܘ̈ܟܳܢܰܝܟ ܪ̈ܳܡܶܐ ܘܠܐ ܡܶܬܕܰܓ̈ܠܳܢܶܐ ܠܰܒܶܒܬ ܐܶܢܽܘܢ: ܒܡܶܠܰܝ̈ܟ ܚܰܝ̈ܳܬܳܐ ܣܰܡܶܟܬ ܐܶܢܽܘܢ: ܚܰܝܠܳܟ ܠܐ ܡܶܬܚܰܣܢܳܢܳܐ ܐܰܩܢܰܝܬ ܐܶܢܽܘܢ: ܐܳܣܘ̈ܳܬܳܐ ܕܟܽܠ ܟܽܘܪ̈ܗܳܢܺܝܢ ܚܰܘܺܝܬ ܐܶܢܽܘܢ: ܕܢܶܫܒܩܽܘܢ ܚܰܘ̈ܒܶܐ ܘܰܚܛܳܗ̈ܶܐ ܠܰܒܢܰܝ̈ܢܳܫܳܐ ܐܰܫܠܶܛܬ ܐܶܢܽܘܢ ܥܰܠ ܒܶܝܬ ܓܰܙܳܟ ܓܺܝܙܰܒܪ̈ܶܐ ܥܒܰܕܬ ܐܶܢܽܘܢ: ܒܰܫܡܰܝܳܐ ܘܒܰܐܪܥܳܐ ܕܢܶܐܣܪܽܘܢ ܘܢܶܫܪܽܘܢ ܦܰܩܶܕܬ ܐܶܢܽܘܢ: ܪ̈ܳܚܡܶܐ ܘܚܰܒܺܝ̈ܒܶܐ ܫܰܡܰܗܬ ܐܶܢܽܘܢ: ܘܰܕܢܶܬܒܽܘܢ ܥܰܠ ܟܽܘܪ̈ܣܰܘܳܬܳܐ ܬܪܶܥܣܰܪ ܡܠܰܟܬ ܠܗܽܘܢ: ܕܰܢܕܽܘܢܽܘܢ ܠܰܕܒܶܝܬ ܐܺܝܣܪܳܐܶܝܠ ܐܶܡܰܪܬ ܠܗܽܘܢ: ܘܒܰܕܓܽܘܢ ܠܡܰܠܐܟ̈ܶܐ ܘܠܰܒܢܰܝ̈ܢܳܫܳܐ ܐܰܬܗܰܪܘ ܒܟܳܪܽܘܙܽܘܬܗܽܘܢ ܘܥܶܠܳܝ̈ܶܐ ܘܬܰܚܬܳܝ̈ܶܐ ܐܶܬܕܰܡܰܪܘ ܒܰܠܒܺܝܒܽܘܬܗܽܘܢ ܟܰܕ ܩܕܳܡ ܡܰܠܟ̈ܶܐ ܛܪ̈ܽܘܢܶܐ ܩܳܝܡܺܝܢ ܗܘܰܘ: ܘܰܠܟܽܠܳܗ̇ ܡܶܬܥܰܡܪܳܢܺܝܬܳܐ ܠܰܚܕܳܐ ܗܰܝܡܳܢܽܘܬܳܐ ܠܰܚܶܡܘ: ܟܰܕ ܠܕܰܝ̈ܳܢܶܐ ܥܰܘ̈ܳܠܐ ܒܬܶܕܡܪ̈ܳܬܳܐ ܡܰܬܡܗܺܝܢ: ܟܰܕ ܠܚܰܟܺܝ̈ܡܶܐ ܒܳܐܣ̈ܘܳܬܳܐ ܡܫܰܚ̈ܠܦܳܬܳܐ ܡܰܬܡܗܺܝܢ: ܟܰܕ ܡܰܚܠܡܺܝܢ ܠܰܟܪ̈ܺܝܗܶܐ: ܟܰܕ ܡܚܰܝܨܺܝܢ ܠܰܡܫܰܪ̈ܰܝܳܐ: ܟܰܕ ܡܕܰܟܶܝܢ ܠܓܰܪ̈ܒܶܐ: ܟܰܕ ܡܦܰܬܚܺܝܢ ܠܰܣܡܰܝ̈ܳܐ: ܟܰܕ ܡܢܰܚܡܺܝܢ ܠܡܺܝ̈ܬܶܐ: ܟܰܕ ܪܳܕܦܺܝܢ ܠܫܺܐܕ̈ܶܐ: ܟܰܕ ܛܳܪܕܺܝܢ ܠܕܰܝ̈ܘܶܐ ܛܰܢ̈ܦܶܐ: ܟܰܕ ܠܟܽܠ ܥܰܡܡܺܝ̈ܢ ܟܕܰܢܘ ܒܢܺܝܪܳܐ ܢܺܝܚܳܐ ܕܙܰܕܺܝܩܽܘܬܳܐ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ ܐܰܥܶܠܘ ܠܰܛܝܳܪܳܐ ܕܚܰܝ̈ܶܐ: ܬܗܰܪܘ ܟܺܝܬ ܘܶܐܬܕܰܡܰܪܘ ܟܽܠ ܩܰܘ̈ܡܳܢ ܘܡܽܘ̈ܫܚܳܢ ܒܰܠܒܺܝܒܽܘܬܗܽܘܢ ܚܰܝܠܬܳܢܺܝܬܳܐ ܘܠܐ ܡܶܬܚܰܒܠܳܢܺܝܬܳܐ: ܕܰܚܠܳܦ ܡܰܪ̈ܥܝܳܬܗܽܘܢ ܐܽܘܠܨܳܢ̈ܶܐ ܠܐ ܡܶܣܬܰܝܒܪ̈ܳܢܶܐ ܣܰܝܒܰܪܘ: ܫܰܦܺܝܪ ܗܘܳܐ ܠܗܽܘܢ ܟܰܕ ܠܳܟ ܡܫܺܝܚܳܐ ܪܰܒܗܽܘܢ ܘܰܐܠܳܗܳܐ ܕܥܰܠ ܟܽܠ ܡܶܬܕܰܡܶܝܢ: ܝܳܐܶܐ ܗܘܳܐ ܠܗܽܘܢ ܟܰܕ ܠܟܽܠ ܫܶܢܕܺܝ̈ܢ ܚܠܳܦܰܝܟ ܣܳܒܠܺܝܢ ܗܘܰܘ: ܦܐܶܐ ܗܘܳܐ ܠܗܽܘܢ ܟܰܕ ܒܰܐܣܽܘܪ̈ܶܐ ܩܫܰܝ̈ܳܐ ܡܶܬܰܐܣܪܺܝܢ ܗܘܰܘ: ܚܳܕܶܝܢ ܗܘܰܘ ܒܨܰܥܪ̈ܶܐ ܦܨܺܝܚܺܝܢ ܗܘܰܘ ܒܚܶܣ̈ܕܶܐ: ܠܒܺܝܒܺܝܢ ܗܘܰܘ ܒܡܰܚ̈ܘܳܬܳܐ: ܚܘܺܝܚܺܝܢ ܗܘܰܘ ܒܰܣܪ̈ܳܩܶܐ: ܡܣܰܟܶܝܢ ܗܘܰܘ ܠܡܰܘܬܳܐ: ܘܗܳܐ ܝܰܘܡܳܢ ܥܺܕܬܳܐ ܩܰܕܺܝܫܬܳܐ ܗ̇ܳܝ ܕܫܰܬܶܐܣܘ ܡܝܰܩܪܳܐ ܠܕܽܘܟܪ̈ܳܢܰܝܗܽܘܢ ܘܰܐܝܟ ܡܰܠܦܳܢܽܘܬܗܽܘܢ ܚܰܟܺܝܡܰܬ݀ ܒܟܽܠ ܠܥܺܐܕܰܝ̈ܗܽܘܢ ܡܩܰܠܣܳܐ: ܘܰܒܬܶܫܒ̈ܚܳܬܳܐ ܟܳܗ̈ܢܳܝܳܬܳܐ ܘܰܒܩܺܝ̈ܢܳܬܳܐ ܕܪܽܘܚܳܐ ܩܰܕܺܝܫܳܐ ܠܘܳܬܗܽܘܢ ܡܰܙܥܩܳܐ ܟܰܕ ܐܳܡܪܳܐ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܕܰܐܝܟ ܫܶܬܶܐܣܬܳܐ ܣܳܡܟܽܘܢ ܡܫܺܝܚܳܐ ܪܰܒܟܽܘܢ: ܘܰܥܠܰܝܟܽܘܢ ܒܢܳܐ ܠܥܺܕܬܳܐ ܗ̇ܳܝ ܕܰܦܪܰܩ ܒܰܕܡܶܗ ܚܰܝܳܐ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܕܒܶܝܬ ܐܺܝܕܰܝ̈ܟܽܘܢ ܐܶܬܦܢܺܝܘ ܥܰܡ̈ܡܶܐ ܠܺܝܕܰܥܬܳܐ ܕܰܬܠܺܝܬܳܝܽܘܬܳܐ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܕܓܰܙ̈ܶܐ ܘܣܺܝ̈ܡܳܬܳܐ ܐܶܬܗܰܝܡܰܢܬܽܘܢ ܠܰܡܦܰܠܳܓܽܘ ܪܽܘܚܳܢܳܐܝ̣ܬ ܠܰܣܢܺܝ̈ܩܶܐ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܕܕܽܘܟܪ̈ܳܢܰܝܟܽܘܢ ܘܰܫܡܳܗܰܝ̈ܟܽܘܢ ܒܣܶܦܪܳܐ ܫܡܰܝܳܢܳܐ ܟܬܺܝܒܺܝܢ ܘܰܒܥܺܕܬܳܐ ܐܰܪܥܳܢܳܝܬܳܐ ܡܶܬܝܰܩܪܺܝܢ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܘܰܐܠܳܗܳܝ̈ܶܐ ܕܗܶܕܪܳܐ ܘܓܰܐܝܽܘܬܳܐ ܡܶܬܥܰܛܦܺܝܬܽܘܢ ܒܡܶܐܬܺܝܬܶܗ ܬܪܰܝܳܢܺܝܬܳܐ ܕܪܰܒܟܽܘܢ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܐܠܰܗܳܝ̈ܶܐ ܕܘܳܠܝܳܐܝ̣ܬ ܡܶܬܒܰܣܡܺܝܬܽܘܢ ܒܦܳܬܽܘܪܳܐ ܪܽܘܚܳܢܳܝܳܐ ܐܰܝܟ ܫܽܘܘܕܳܝܶܗ ܫܰܪܺܝܪܳܐ ܕܡܳܪܟܽܘܢ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܐܠܰܗܳܝ̈ܶܐ ܕܙܰܝܢܳܐ ܠܐ ܡܶܙܕܰܟܝܳܢܳܐ ܡ̣ܶܢ ܥܶܠܺܝܬܳܐ ܐܬܚܰܙܰܩܬܽܘܢ ܘܒܶܗ ܙܟܰܝܬܽܘܢ ܘܫܰܥܒܶܕܬܽܘܢ ܠܟܽܠܗܽܘܢ ܥܰܡ̈ܡܶܐ ܘܶܐܡܘ̈ܳܬܳܐ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܐܠܰܗܳܝ̈ܶܐ ܕܰܚܕܽܘ̈ܓܶܐ ܪ̈ܚܺܝܡܶܐ ܕܚܰܬܢܳܐ ܫܡܰܝܳܢܳܐ ܗܘܰܝܬܽܘܢ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܘܰܐܠܳܗܳܝ̈ܶܐ ܕܛܳܒ̈ܳܬܳܐ ܘܒܽܘܪ̈ܟܳܬܳܐ ܠܟܽܠܳܗ̇ ܒܪܺܝܬܳܐ ܡܶܫܬܰܟ̈ܢܳܢ ܒܰܨܠܰܘ̈ܳܬܟܽܘܢ: ܛܽܘܒܰܝܟܽܘܢ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܕܝܳܗ̈ܒܰܝ ܫܽܘ̈ܟܳܢܶܐ ܕܚܰܘ̈ܒܶܐ ܘܕܰܚܛܳܗ̈ܶܐ ܐܶܫܬܰܡܠܺܝܬܽܘܢ: ܐܰܢ̱ܬܽܘܢ ܐܺܝܬܰܝܟܽܘܢ ܬܪܶܥܣܰܪ ܟܠܺܝ̈ܠܐ ܡܰܦܪ̈ܓܳܢܶܐ: ܬܪܶܥܣܰܪ ܡܰܠܦܳܢ̈ܶܐ ܕܰܫܪܳܪܳܐ: ܬܪܶܥܣܰܪ ܢܰܗܺܝܪ̈ܶܐ ܕܰܐܝܠܶܝܢ ܕܝܳܬܒܺܝܢ ܒܚܶܫܽܘܟܳܐ: ܬܪܶܥܣܰܪ ܣܳܚܽܘ̈ܦܶܐ ܘܰܡܒܰܛܠܳܢ̈ܶܐ ܕܗܶܪ̈ܶܣܺܝܣ: ܬܪܶܥܣܰܪ ܥܰܡܽܘ̈ܕܶܐ ܠܐ ܡܶܙܕܰܥܙ̈ܥܳܢܶܐ ܕܥܳܡܰܪܬܳܐ: ܬܪܶܥܣܰܪ ܦܺܝܠܺܝ̈ܣܽܘܦܶܐ ܐܠܰܗܳܝ̈ܶܐ ܕܰܙܟܰܘ ܠܚܰܟܺܝ̈ܡܶܐ: ܬܪܶܥܣܰܪ ܨܶܡ̈ܚܶܐ ܨܰܡܽܘ̈ܚܬܳܢܶܐ ܕܥܰܘܰܪܘ ܠܫܺܐܕ̈ܶܐ ܢܰܣܺܝ̈ܣܰܝ ܒܰܚܙܳܬܳܐ: ܬܪܶܥܣܰܪ ܩܳܝܽܘ̈ܡܶܐ ܘܰܡܕܰܒܪ̈ܳܢܶܐ ܕܥܺܕܬܳܐ ܒܰܪܬ ܐܰܪ̈ܡܳܝܶܐ: ܬܪܶܥܣܰܪ ܪ̈ܰܒܰܝ ܚܰܝܠܰܘ̈ܳܬܳܐ ܕܡܰܠܟܳܐ ܫܡܰܝܳܢܳܐ: ܬܪܶܥܣܰܪ ܫܽܘܪ̈ܶܐ ܪ̈ܳܡܶܐ ܕܥܺܕܬܳܐ ܩܰܕܺܝܫܬܳܐ: ܬܪܶܥܣܰܪ ܬܰܦ̈ܶܐ ܪ̈ܽܘܚܳܢܳܝܶܐ ܕܰܠܟܽܠܳܗ̇ ܥܳܡܰܪܬܳܐ ܫܶܩܝܳܐ ܐܠܰܗܳܝܳܐ ܐܰܫܩܺܝܘ: ܘܒܰܕܓܽܘܢ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܚܽܘܣ ܥܰܠ ܥܺܕܬܳܟ ܕܰܡܝܰܩܪܳܐ ܠܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ: ܘܰܒܝܰܕ ܨܠܰܘ̈ܳܬܗܽܘܢ ܓܡܽܘܪ ܠܥܳܢܘܳܝ̈ܶܐ: ܕܰܒܰܪ ܠܰܒܬܽܘ̈ܠܐ: ܐܰܣܳܐ ܠܰܟܪ̈ܺܝܗܶܐ: ܒܰܝܰܐܐ ܠܐܒܺܝ̈ܠܐ: ܗܰܕܳܐ ܠܺܝܚܺܝ̈ܕܳܝܶܐ: ܛܰܪ ܠܩܰܪ̈ܺܝܒܶܐ: ܘܰܥܶܕ ܠܪ̈ܰܚܺܝܩܶܐ: ܐܰܩܺܝܡ ܠܢܰܦ̈ܠܐ: ܟܠܺܝ ܠܢܶܣܝܽܘ̈ܢܶܐ: ܠܰܒܶܒ ܠܥܰܝܺܝ̈ܩܰܝ ܪܽܘܚܳܐ: ܡܪܽܘܩ ܠܟܽܘܬܡ̈ܳܬܰܢ: ܢܽܘܗܪܳܟ ܢܰܢܗܰܪ ܚܶܫܽܘܟܽܘܬܰܢ: ܣܰܡܳܟ ܢܰܐܣܶܐ ܚܒܳܪ̈ܳܬܰܢ: ܥܽܘܕܪ̈ܳܢܰܝܟ ܢܚܰܝܠܽܘܢ ܡܚܺܝܠܽܘܬܰܢ: ܦܰܓܪܳܟ ܘܰܕܡܳܟ ܢܚܰܠܠܽܘܢ ܨܽܘܥ̈ܨܳܥܰܝܢ: ܨܠܺܝܒܳܟ ܚܰܝܳܐ ܢܶܣܚܽܘܦ ܠܰܒܥܶܠܕ̈ܒܳܒܰܝܢ: ܩܰܕܺܝ̈ܫܰܝܟ ܢܪܰܥܽܘܢܳܟ ܚܠܳܦܰܝܢ: ܪܰܘܪ̈ܒܳܢܰܝܟ ܢܦܺܝܣܽܘܢܳܟ ܡܶܛܽܠܳܬܰܢ: ܫܠܺܝ̈ܚܰܝܟ ܢܶܬܟܰܫܦܽܘܢ ܠܳܟ ܕܬܶܬܦܰܢܶܐ ܥܠܰܝܢ: ܬܰܠܡܺܝ̈ܕܰܝܟ ܢܶܒܥܽܘܢ ܡܶܢܳܟ ܫܰܝܢܳܐ ܘܰܫܠܳܡܶܐ ܠܥܺܕܬܳܐ ܘܰܠܝܰܠܕܶܝ̈ܗ̇: ܘܰܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܘܰܚܢܰܢ ܘܗܶܢܽܘܢ ܢܶܫܬܘܶܐ ܕܰܒܓܽܘܕܰܝ̈ܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܣܳܓܕܺܝܢܰܢ ܠܳܟ ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ ܕܡܶܢܳܟ ܢܒܰܥܘ ܬܪܶܥܣܰܪ ܡܰܒܽܘ̈ܥܺܝܢ ܕܰܒܗܽܘܢ ܐܶܬܦܰܝܓܰܬ݀ ܐܰܪܥܳܐ ܡ̣ܶܢ ܨܰܗܝܽܘܬܳܗ̇ ܘܰܒܗܽܘܢ ܐܶܬܥܰܩܪܰܬ݀ ܚܛܺܝܬܳܐ ܩܳܛܽܘܠܬܳܐ ܡ̣ܶܢ ܦܶܢ̈ܝܳܬܳܐ ܗ̇ܳܝ ܕܒܺܝܫܳܐ ܙܰܪܥܳܗ̇ ܒܰܝܢܳܬ ܚ̈ܶܛܶܐ: ܘܟܰܕ ܒܰܐܪܒܰܥ ܦܶܢ̈ܝܳܢ ܫܦܰܥ ܝܽܘܠܦܳܢܗܽܘܢ ܐܰܪܥܳܐ ܒܶܣܡܰܬ݀ ܒܝܰܕ ܣܒܰܪܬܗܽܘܢ: ܐܳܐܰܪ ܐܶܬܩܰܕܰܫ ܒܟܳܪܽܘܙܽܘܬܗܽܘܢ: ܐܰܢ̱ܬ ܡܳܪܝܳܐ ܫܽܘܪܳܪܳܐ ܕܡܰܠܦܳܢܽܘܬܗܽܘܢ ܢܰܛܰܪ ܘܠܰܢ ܒܰܨܠܰܘ̈ܬܗܽܘܢ ܕܰܬܪܶܥܣܰܪ ܫܠܺܝ̈ܚܰܝܟ ܩܰܕܺܝ̈ܫܶܐ: ܘܚܰܣܳܐ ܘܰܫܒܽܘܩ ܠܟܽܠܗܶܝܢ ܡܶܬܥܰܒܪ̈ܳܢܘܳܬܰܢ: ܘܰܐܦܨܰܚ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܟ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܦܫܺܝܛܳܐ ܕܶܐܬܳܐ ܠܪܽܘܟܳܒܳܐ ܒܨܶܒܝܳܢܶܗ ܟܰܕ ܠܰܦܫܺܝܛܽܘܬ ܟܝܳܢܶܗ ܠܐ ܫܰܓܢܺܝ ܠܗܰܘ ܕܰܓܒܳܐ ܠܰܣܒܰܪܬܳܗ ܓܽܘܕܳܐ ܕܰܒܪܺܝܪ̈ܶܐ ܘܨܰܝ̈ܳܕܰܝ ܢܽܘ̈ܢܶܐ: ܘܫܰܕܰܪ ܐܶܢܽܘܢ ܠܰܒܪܺܝܬܳܐ: ܕܰܢܨܽܘܕܽܘܢ ܒܢܰܝ̈ܢܳܫܳܐ ܡ̣ܶܢ ܡܰܘܬܳܐ ܠܚܰܝ̈ܶܐ: ܘܝܰܗܒ ܠܗܽܘܢ ܫܽܘܠܛܳܢܳܐ ܥܰܠ ܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ: ܘܥܰܠ ܟܺܐܒ̈ܶܐ ܘܟܽܘܪ̈ܗܳܢܶܐ ܠܡܰܐܣܳܝܽܘ: ܠܗܰܘ ܕܒܰܫܡܶܗ ܙܰܟܳܝܳܐ ܫܶܡܥܽܘܢ ܟܺܐܦܳܐ ܘܝܽܘܚܰܢܳܢ ܪܳܚܡܶܗ: ܝܰܘܡܳܢܳܐ ܬܶܕܡܽܘܪܬܳܐ ܒܟܺܝܪܳܝܬܳܐ ܥܒܰܕܘ ܒܽܐܘܪܫܠܶܡ ܒܰܚܓܺܝܪܳܐ ܕܰܐܣܺܝܘ: ܘܗܰܝܡܶܢܘ ܘܰܥܡܰܕܘ ܒܰܫܡܶܗ ܐܰܝܟ ܚܰܡܫܳܐ ܐܠܰܦܺܝ̈ܢ ܢܰܦ̈ܫܳܢ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܫܽܘܒܚܳܐ ܠܳܟ ܐܠܰܗܳܐ ܐܰܒܳܐ ܩܰܕܺܝܫܳܐ ܒܳܪܽܘܝܳܐ ܕܟܽܠ ܒܶܪ̈ܝܳܢ: ܗ̇ܰܘ ܕܡܶܛܽܠ ܪܶܚܡܰܬ݀ ܐ̱ܢܳܫܽܘܬܳܟܳ ܘܚܽܘܒܳܟ ܕܨܶܝܕ ܓܶܢܣܰܢ ܥܰܠ ܕܰܚܙܰܝܬܳܝܗܝ ܕܰܫܪܶܟ ܠܐܒܕܳܢܳܐ ܓܡܺܝܪܳܐ ܒܦܳܠܚܽܘܬ ܫܺܐܕ̈ܶܐ: ܘܰܕܠܐ ܡܰܨܝܳܐ ܗܘܳܬ ܕܬܶܗܘܶܐ ܒܰܪܢܳܫܳܐ ܘܬܶܬܺܝܠܶܕ: ܠܰܒܪܳܟ ܝܺܚܺܝܕܳܝܳܐ ܝܰܠܕܳܐ ܕܡ̣ܶܢ ܥܽܘܒܳܟ ܘܨܶܡܚܳܐ ܕܫܽܘܒܚܳܟ ܘܨܰܠܡܳܐ ܕܰܐܠܳܗܽܘܬܳܟ ܫܰܕܰܪܬ ܠܦܽܘܪܩܳܢܶܗ: ܗ̇ܰܘ ܕܟܰܕ ܐܶܬܒܰܣܰܪ ܕܠܐ ܫܽܘܚܠܳܦܳܐ ܡ̣ܶܢ ܐܶܡܳܐ ܒܬܽܘܠܬܳܐ ܣܛܰܪ ܡ̣ܶܢ ܢܶܩܦܳܐ: ܘܶܐܬܺܝܠܶܕ ܡܰܘܠܳܕܳܐ ܬܪܰܝܳܢܳܐ ܐܰܘܟܺܝܬ ܐ̱ܢܳܫܳܝܳܐ: ܘܶܐܬܪܰܒܺܝ ܒܡܽܘ̈ܫܚܳܬܳܐ ܐ̱ܢܳܫܳܝ̈ܳܬܳܐ ܕܠܐ ܒܽܘܠܒܳܠܐ: ܘܰܥܡܰܕ ܒܝܽܘܪܕܢܳܢ ܢܰܗܪܳܐ ܡ̣ܶܢ ܪܰܗܳܛܳܐ ܩܰܕܡܳܝܳܐ ܝܽܘܚܰܢܳܢ: ܘܶܐܣܬܗܶܕ ܡܶܢܳܟ ܕܗܽܘܝܽܘ ܒܪܳܟ ܚܰܒܺܝܒܳܐ ܕܫܰܕܰܪܬ ܠܦܽܘܪܩܳܢ ܥܳܠܡܳܐ: ܘܡ̣ܶܢ ܗܳܪܟܳܐ ܫܰܪܺܝ ܒܡܰܠܦܳܢܽܘܬܳܐ ܘܰܒܣܳܥܽܘܪܽܘܬܳܐ ܕܬܶܕܡܪ̈ܳܬܳܐ ܕܰܠܥܶܠ ܡ̣ܶܢ ܟܝܳܢܳܐ: ܘܰܓܒܳܐ ܠܶܗ ܓܽܘܕܳܐ ܕܬܰܠܡܺܝ̈ܕܶܐ ܕܢܶܗܘܽܘܢ ܠܶܗ ܣܳܗ̈ܕܶܐ ܒܟܽܠܳܗ̇ ܡܕܰܒܪܳܢܽܘܬܶܗ ܐܠܰܗܳܝܬܳܐ ܐ̱ܢܳܫ̈ܳܐ ܦܫܺܝ̈ܛܰܝ ܡܰܕܥܳܐ: ܡܶܣ̈ܟܺܢܶܐ: ܨܰܝ̈ܳܕܶܐ: ܒܽܘܪ̈ܶܐ: ܒܨܺܝܪ̈ܶܐ ܒܓܶܢܣܳܐ: ܕܰܒܗܽܘܢ ܢܒܰܙܰܚ ܒܥܳܠܡܳܐ: ܘܰܢܟܰܐܐܰܪ ܠܥܰܬܺܝܪ̈ܶܐ: ܘܢܰܒܗܶܬ ܠܚܰܟܺܝ̈ܡܶܐ: ܘܰܢܫܰܦܶܠ ܠܚܰܝܠܬܳܢ̈ܶܐ: ܘܢܰܦܢܶܐ ܠܥܰܡ̈ܡܶܐ ܘܠܐܡܘ̈ܳܬܳܐ ܠܺܝܕܰܥܬܳܐ ܕܚܰܕ ܐܠܰܗܳܐ ܫܰܪܺܝܪܳܐ: ܚܰܕ ܒܳܪܽܘܝܳܐ: ܚܰܕ ܡܕܰܒܪܳܢܳܐ: ܕܗܳܢܳܐ ܟܽܠ: ܐܰܒܳܐ ܘܰܒܪܺܐ ܘܪܽܘܚܳܐ ܩܰܕܺܝܫܳܐ: ܘܩܰܕܡܳܝܗܽܘܢ ܚܰܘܝ ܚܰܝ̈ܠܐ ܬܡܺܝ̈ܗܶܐ ܘܰܓܢ̱ܒܰܪ̈ܘܳܬܳܐ ܘܒܰܕܶܩ ܠܗܽܘܢ ܥܰܠ ܡܰܫܠܡܳܢܽܘܬܶܗ ܘܥܰܠ ܡܰܘܬܶܗ: ܘܥܰܠ ܩܝܳܡܬܶܗ ܘܥܰܠ ܣܽܘܠܳܩܶܗ: ܘܥܰܠ ܡܽܘܠܟܳܢܳܐ ܕܫܰܕܰܪ ܥܠܰܝܗܽܘܢ: ܗܳܢܰܘ ܕܶܝܢ ܪܽܘܚܳܐ ܦܰܪܰܩܠܺܝܛܳܐ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܚܰܝܬܳܐ: ܘܰܐܠܶܦ ܐܶܢܽܘܢ ܕܒܰܫܡܶܗ ܢܶܣܥܪܽܘܢ ܬܶܕܡܪ̈ܳܬܳܐ ܒܥܳܠܡܳܐ: ܘܰܢܬܰܠܡܕܽܘܢ ܘܢܶܥܡܕܽܘܢ ܠܥܰܡ̈ܡܶܐ ܒܰܫܡܳܐ ܕܰܐܒܳܐ ܘܕܺܝܠܶܗ ܘܰܕܪܽܘܚܳܐ ܩܰܕܺܝܫܳܐ: ܘܰܡܠܰܟ ܠܗܽܘܢ ܟܽܘܪ̈ܣܰܘܳܬܳܐ ܠܕܺܝܢܳܐ ܕܰܒ̈ܢܰܝ ܝܰܥܩܽܘܒ ܐܰܝܠܶܝܢ ܕܠܐ ܩܰܒܶܠܘ ܡܰܠܦܳܢܽܘܬܳܐ ܕܺܝܠܗܽܘܢ ܘܗܶܢܽܘܢ ܕܶܝܢ ܟܰܕ ܠܒܶܫܘ ܚܰܝܠܐ ܡ̣ܶܢ ܪܰܘܡܳܐ ܗ̇ܰܘ ܕܡ̣ܶܢ ܠܘܳܬܳܟ: ܐܶܬܚܰܟܰܡܘ ܘܶܐܫܬܰܪܰܪܘ ܒܗܰܝܡܳܢܽܘܬܳܐ ܘܰܒܣܰܒܪܳܐ ܘܚܽܘܒܳܐ: ܘܺܝܠܶܦܘ ܕܰܢܡܰܠܠܽܘܢ ܒܟܽܠ ܠܶܫܳܢ ܕܰܒܢܰܝ̈ܢܳܫܳܐ ܕܠܐ ܬܽܘܩܠܐ: ܡܶܚܕܳܐ ܝܰܗܒܘ ܢܰܦܫܗܽܘܢ ܠܰܣܒܰܪܬܳܐ ܘܰܠܡܰܟܪܳܙܽܘ ܡܕܰܒܪܳܢܽܘܬܳܐ ܦܳܪܽܘܩܳܝܬܳܐ ܕܰܚܠܳܦܰܝܢ: ܘܰܒܗܰܘ ܝܰܘܡܳܐ ܬܰܠܡܶܕܘ ܐܰܝܟ ܬܠܳܬܳܐ ܐܠܰܦܺܝ̈ܢ ܢܰܦ̈ܫܳܢ ܡ̣ܶܢ ܥܰܡ̈ܡܶܐ ܕܒܽܐܘܪܫܠܶܡ ܥܳܡܪܺܝܢ ܗܘܰܘ ܦܰܪ̈ܬܘܳܝܶܐ ܘܡܳܕܳܝ̈ܶܐ ܘܫܰܪܟܳܐ: ܝܰܘܡܳܢܳܐ ܕܶܝܢ ܫܶܡܥܽܘܢ ܟܺܐܦܳܐ ܘܝܽܘܚܰܢܳܢ ܒܰܪ ܙܰܒܕܰܝ ܟܰܕ ܣܳܠܩܺܝܢ ܗܘܰܘ ܠܗܰܝܟܠܐ ܠܰܡܨܰܠܳܝܽܘ ܩܕܳܡܰܝܟ: ܐܰܝܟ ܕܝܺܠܶܦܘ ܡ̣ܶܢ ܒܪܳܟ ܚܰܒܺܝܒܳܐ ܦܓܰܥܘ ܒܒܰܪܢܳܫܳܐ ܚܓܺܝܪܳܐ ܕܡ̣ܶܢ ܟܰܪܣܳܐ ܕܝܳܬܶܒ ܒܬܰܪܥܳܐ ܕܗܰܝܟܠܐ ܘܫܳܐܶܠ ܙܶܕܩܬܳܐ ܡ̣ܶܢ ܐܰܝܠܶܝܢ ܕܥܳܐܠܺܝܢ ܘܢܳܦܩܺܝܢ: ܗ̣ܽܘ ܕܶܝܢ ܡܰܟܰܐܒܳܐ ܦܫܰܛ ܝܰܡܺܝܢܶܗ ܠܘܳܬܗܽܘܢ ܕܰܡܪܰܚܡܳܢܽܘܬܳܐ ܢܶܬܠܽܘܢ ܠܶܗ: ܗܳܝܕܶܝܢ ܟܺܐܦܳܐ ܘܝܽܘܚܰܢܳܢ ܐܶܬܬܙܺܝܥܘ ܒܪܽܘܚܳܐ ܩܰܕܺܝܫܳܐ ܕܰܒܗܽܘܢ: ܘܶܐܡܰܪܘ ܠܘܳܬܶܗ ܚܢܰܢ ܠܐ ܟܺܝܣܳܐ ܘܠܐ ܬܰܪܡܳܠܐ ܐܺܝܬ ܠܰܢ: ܐܳܦܠܐ ܢܚܳܫܳܐ ܒܙܽܘܢܳܐ ܕܺܝܠܰܢ ܐܺܝܬ: ܐܶܠܐ ܡ̣ܶܢ ܟܺܝܣܳܐ ܕܰܒܠܶܒܰܢ ܝܳܗܒܺܝܢܰܢ ܠܳܟ: ܗܳܝܕܶܝܢ ܐܰܘܫܶܛܘ ܠܶܗ ܝܰܡܺܝܢܳܐ ܕܪ̈ܰܚܡܶܐ: ܘܶܐܡܰܪ ܦܶܛܪܽܘܣ ܠܘܳܬܶܗ ܟܰܕ ܡܶܬܥܰܙܰܙ ܒܪܽܘܚܳܐ ܩܰܕܺܝܫܳܐ: ܒܰܫܡܶܗ ܕܝܶܫܽܘܥ ܢܳܨܪܳܝܳܐ ܗ̇ܰܘ ܕܰܙܩܰܦܘ ܝܽܘܕܳܝ̈ܶܐ ܥܰܠ ܩܰܝܣܳܐ: ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘ̈ܡܺܝܢ ܐܰܝܟ ܕܶܐܡܰܪ ܘܰܣܠܶܩ ܠܰܫܡܰܝܳܐ: ܩܽܘܡ ܥܰܠ ܪ̈ܶܓܠܰܝܟ ܘܗܰܠܶܟ: ܘܰܫܘܰܪ ܓܰܒܪܳܐ ܗ̇ܰܘ ܘܩܳܡ ܘܫܰܪܺܝ ܡܰܘܕܶܐ ܘܰܡܫܰܒܰܚ ܠܐܠܳܗܳܐ ܕܒܰܫܡܶܗ ܩܢܳܐ ܚܽܘܠܡܳܢܳܐ: ܘܥܰܠ ܥܰܡܗܽܘܢ: ܠܗܰܝܟܠܐ ܟܰܕ ܡܫܰܘܰܪ ܘܰܡܩܰܝܶܙ ܘܡܰܟܪܶܙ ܠܬܶܕܡܽܘܪܬܳܐ ܕܰܗܘܳܬ ܒܶܗ: ܘܗܰܝܡܶܢܘ ܘܰܥܡܰܕܘ ܒܗܰܘ ܝܰܘܡܳܐ ܐܰܝܟ ܚܰܡܫܳܐ ܐܠܰܦܺܝ̈ܢ ܓܰܒܪ̈ܺܝܢ: ܘܰܡܫܰܒܚܺܝܢ ܗܘܰܘ ܘܡܰܘܕܶܝܢ ܠܐܠܳܗܳܐ ܬܠܺܝܬܳܐܝ̣ܬ ܘܰܠܚܽܘܕܳܐܝ̣ܬ ܘܰܫܡܶܗ ܕܝܶܫܽܘܥ ܡܶܬܪܰܡܪܰܡ ܗܘܳܐ: ܪ̈ܰܒܰܝ ܟܳܗ̈ܢܶܐ ܕܶܝܢ ܘܣܳܦܪ̈ܶܐ ܒܠܰܥܘ ܒܰܚܣܳܡܳܐ: ܘܨܳܒܘ ܕܰܢܫܰܬܩܽܘܢ ܐܶܢܽܘܢ ܠܰܫܠܺܝ̈ܚܶܐ ܘܰܠܥܰܡ̈ܡܶܐ ܡ̣ܶܢ ܬܰܘܕܺܝܬܳܐ ܕܰܒܝܶܫܽܘܥ ܘܠܐ ܐܶܬܡܨܺܝܘ ܚܰܝܠܐ ܕܪܽܘܚܳܐ ܩܰܕܺܝܫܳܐ ܐܶܠܐ ܒܟܽܠܙܒܰܢ ܡܰܠܦܺܝܢ ܒܗܰܝܟܠܐ ܥܰܠ ܝܶܫܽܘܥ ܘܥܰܠ ܩܝܳܡܬܶܗ: ܘܡܰܦܢܶܝܢ ܗܘܰܘ ܥܰܡܳܐ ܘܰܠܥܰܡ̈ܡܶܐ ܒܬܶܕܡܪ̈ܳܬܳܐ ܕܣܳܥܪܺܝܢ ܗܘܰܘ: ܘܰܟܡܳܐ ܕܒܳܠܥܺܝܢ ܗܘܰܘ ܚܳܕܶܝܢ ܗܘܰܘ: ܚܢܰܢ ܕܶܝܢ ܡܳܪܝ ܥܰܒܕܰܝ̈ܟ ܟܰܕ ܬܳܗܪܺܝܢܰܢ ܒܣܰܓܺܝܐܘܽܬ ܚܢܳܢܳܟ ܘܛܰܝܒ̈ܘܳܬܳܟ ܕܰܠܘܳܬܰܢ: ܬܰܘܕ̈ܝܳܬܳܐ ܘܬܶܫܒ̈ܚܳܬܳܐ ܠܐ ܫܰܠܘܳܝ̈ܳܬܳܐ ܡܩܰܪܒܺܝܢܰܢ ܠܳܟ ܟܰܕ ܒܳܥܶܝܢܰܢ ܡ̣ܶܢ ܝܰܡܳܐ ܠܐ ܡܶܬܬܟܺܝܠܳܢܳܐ ܕܪ̈ܰܚܡܰܝܟ: ܕܰܬܚܰܕܶܐ ܠܘܳܬܰܢ ܒܨܺܝܪ̈ܶܐ ܘܚܰܛܳܝ̈ܶܐ ܘܕܳܘܰܝ̈ܳܐ ܥܽܘܕܪ̈ܳܢܰܝܟ ܐܠܰܗܳܝ̈ܶܐ: ܘܰܬܫܰܕܰܪ ܥܠܰܝܢ ܛܰܝܒܽܘܬܳܟ ܘܗܰܒܠܰܢ ܪܽܘܚܳܟ ܩܰܕܺܝܫܳܐ ܘܡܰܥܒܶܕ ܚܰܝ̈ܶܐ: ܘܢܶܡܠܐܷ ܠܠܶܒܰܘ̈ܳܬܰܢ ܥܽܘܬܪܳܐ ܕܫܽܘ̈ܟܳܢܰܘܗܝ ܐܠܰܗܳܝ̈ܶܐ: ܘܢܶܬܶܠ ܠܰܢ ܚܰܝܠܐ ܥܰܠ ܟܽܠܶܗ ܪ̈ܰܚܫܳܐ ܡܶܬܝܰܕܥܳܢܳܐ ܩܳܛܽܘܠܐ ܕܢܰܦ̈ܫܳܬܰܢ: ܘܰܢܕܰܟܶܐ ܠܪܶܥܝܳܢܰܢ ܡ̣ܶܢ ܟܽܠ ܦܽܘܠܳܓܳܐ ܡܰܚܣܪܳܢܳܐ: ܘܰܠܡܰܕ̈ܥܰܝܢ ܡ̣ܶܢ ܟܽܠ ܪ̈ܶܢܝܶܐ ܒܶܣܪ̈ܳܢܶܐ: ܢܨܰܠܶܠ ܠܗܰܘ̈ܢܰܝܢ ܘܰܢܟܰܢܶܫ ܐܶܢܽܘܢ ܡ̣ܶܢ ܟܽܠ ܦܗ̈ܰܝܳܐ ܡܰܚܫ̈ܟܳܢܶܐ ܕܢܰܦ̈ܫܳܬܰܢ: ܘܗܰܒ ܠܰܢ ܒܰܨܠܰܘ̈ܳܬܗܽܘܢ ܕܰܫܠܺܝ̈ܚܰܝܟ ܩܰܕܺܝ̈ܫܶܐ: ܐܳܣܝܽܘܬܳܐ ܡܫܰܡܠܳܝܬܳܐ ܠܦܰܓܪ̈ܶܐ ܘܰܠܢܰܦ̈ܫܳܬܳܐ ܕܺܝܠܰܢ: ܘܰܦܬܰܚ ܦܽܘܡܰܝ̈ܢ ܠܫܽܘܒܚܳܟ ܘܰܠܛܽܘܫ ܠܶܫܳܢܰܝ̈ܢ ܠܬܰܘܕ̈ܝܳܬܳܟ ܘܰܐܙܺܝܥ ܣܶܦ̈ܘܳܬܰܢ ܠܪܽܘܡܪܳܡܳܟ: ܘܰܐܥܺܝܪ ܕܰܡܟܽܘܬܰܢ ܠܩܽܘܠܳܣܳܟ: ܘܰܐܫܘܳܐ ܠܰܢ ܘܠܥܰܢܺܝ̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܺܝܢܳܟ ܒܡܰܠܟܽܘܬܳܟ ܫܡܰܝܳܢܺܝܬܳܐ ܕܰܚܢܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܰܒܪܳܟ ܝܺܚܺܝܕܳܝܳܐ ܡܳܪܰܢ ܝܶܫܽܘܥ ܡܫܺܝܚܳܐ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝ ܒܰܚܢܳܢܳܟ ܦܺܝܪܡܳܐ ܕܩܰܪܶܒܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ ܒܰܨܠܰܘ̈ܳܬܗܽܘܢ ܕܰܡܢܺܝ̈ܚܳܢܰܝܟ ܘܟܳܪ̈ܽܘܙܰܝܟ ܡܫܰܒ̈ܚܶܐ: ܫܶܡܥܽܘܢ ܟܺܐܦܳܐ ܘܝܽܘܚܰܢܳܢ ܘܫܰܪܟܳܐ ܕܰܫܠܺܝ̈ܚܰܝܟ ܩܰܕܺܝ̈ܫܶܐ: ܦܰܢܳܐ ܫ̈ܶܐܠܳܬܰܢ ܫܰܦܺܝܪ̈ܳܬܳܐ ܒܝܰܕ ܬܰܟܫ̈ܦܳܬܗܽܘܢ: ܘܦܽܘܚ ܒܰܢ ܪܺܝܚܳܐ ܕܰܡܝܰܬܪܽܘܬܗܽܘܢ ܘܢܶܫܬܘܶܐ ܒܛܰܝܒܽܘܬܳܟ ܠܒܽܘܣܳܡܳܐ ܕܥܰܡܗܽܘܢ ܒܰܡܛܰܠܠܰܝ̈ܗܽܘܢ: ܘܗܰܒ ܕܢܶܬܩܰܕܰܫ ܒܰܢ ܫܡܳܟ ܘܢܶܫܬܰܡܰܫ ܒܰܢ ܨܶܒܝܳܢܳܟ: ܘܢܺܐܪܰܒ ܒܰܢ ܚܽܘܒܳܟ ܘܬܶܬܓܰܘܙܰܠ ܒܢܰܦ̈ܫܳܬܰܢ ܢܽܘܪ ܪܶܚܡܬܳܟ: ܕܢܶܚܙܶܐ ܚܢܳܢܳܟ ܗܳܪܟܳܐ ܘܰܒܥܳܠܡܳܐ ܕܰܥܬܺܝܕ ܚܢܰܢ ܘܥܰܢܺܝ̈ܕܰܝܢ ܘܟܶܢܫܰܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ ܘܰܒܟܽܠܙܒܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

ܡܢ ܛܟܣܐ ܕܬܪܥܣܪ ܫܠܝ̈ܚܐ

 

 

 

ܬܶܫܒܽܘܚܬܳܐ: ܠܗܰܘ ܕܡ̣ܶܢ ܥܽܘܒܳܐ ܕܰܐܒܳܐ ܓܢܺܝܙܳܐ ܢܦܰܩ ܘܶܐܬܳܐ ܠܥܳܠܡܳܐ: ܘܰܐܢܗܰܪ ܠܐܪܒܰܥ ܦܶܢ̈ܝܳܬܳܐ ܒܢܽܘܗܪܳܐ ܕܺܝܕܰܥܬܶܗ: ܠܗܰܘ ܕܒܰܬܪܶܥܣܰܪ ܙܰܠܺܝ̈ܩܶܐ ܐܰܢܗܰܪ ܠܡܶܬܥܰܡܪܳܢܺܝܬܳܐ: ܘܒܰܦܫܺܝܛܽܘܬܗܽܘܢ ܙܟܰܘ ܠܟܽܠܳܗ̇ ܚܶܟܡܬܳܐ ܕܚܰܟܺܝ̈ܡܰܘܗܝ ܕܥܳܠܡܳܐ ܗܳܢܳܐ: ܘܰܐܦܢܺܝܘ ܠܥܰܡ̈ܡܶܐ ܠܗܰܝܡܳܢܽܘܬܳܐ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܚܰܕ ܐܠܰܗܳܐ ܫܰܪܺܝܪܳܐ ܥܳܒܽܘܕܳܐ ܕܟܽܠܗܶܝܢ ܒܶܪ̈ܝܳܬܳܐ: ܛܳܒܳܐ ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ: ܗ̇ܰܘ ܕܒܰܬܪܶܥܣܰܪ ܐܺܝܙ̈ܓܰܕܺܝܢ ܩܪܳܐ ܠܰܚܠܽܘܠܶܗ ܠܟܽܠܗܶܝܢ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ: ܘܒܺܐܝܕܰܝ̈ܗܽܘܢ ܐܠܰܦ ܠܟܽܠܢܳܫ ܣܶܓܕܬܳܐ ܘܬܰܘܕܺܝܬܳܐ ܕܒܰܬܠܺܝܬܳܝܽܘܬܳܐ ܡܫܰܒܰܚܬܳܐ: ܟܽܘܡܪܳܐ ܕܰܫܪܳܪܳܐ ܕܒܰܬܪܶܥܣܰܪ ܒܽܘܟܪ̈ܺܝܢ ܡܫܰܡ̈ܫܳܢܶܐ ܕܫܶܡܫܳܐ ܕܙܰܕܺܝܩܽܘܬܳܐ ܒܰܛܶܠ ܥܠܰܘ̈ܳܬܳܐ ܘܕܶܒ̈ܚܶܐ ܕܰܟܢܽܘ̈ܫܳܬܳܐ ܐܽܘܡܳܢܳܐ ܡܗܺܝܪܳܐ ܕܒܰܬܪܶܥܣܰܪ ܓܰܒܪ̈ܺܝܢ ܚܰܕܶܬ ܣܚܺܝ̣ܦܽܘܬܶܗ ܕܥܳܠܡܳܐ ܒܽܘܟܪܳܐ ܩܰܕܡܳܝܳܐ ܕܒܰܬܪܶܣܥܰܪ ܕܳܫܢܺܝ̈ܢ ܩܽܘܪ̈ܒܳܢܶܐ ܡܩܰܒ̈ܠܐ ܘܰܕܟܰܝ̈ܳܐ ܣܰܥܪܳܗ̇ ܠܰܒܪܺܝܬܳܐ: ܚܶܟܡܬܶܗ ܕܰܐܒܳܐ ܫܡܰܝܳܢܳܐ ܕܒܰܬܪܶܥܣܰܪ ܗܶܕܝܽܘ̈ܛܺܝܢ ܚܰܟܶܡ ܠܰܡܗܰܝ̈ܡܢܶܐ ܒܝܽܘܠܦܳܢ̈ܶܐ ܬܪ̈ܺܝܨܶܐ: ܡܳܪܳܐ ܛܳܒܳܐ ܘܒܰܣܺܝܡܳܐ ܕܒܰܬܪܶܥܣܰܪ ܘܰܪ̈ܕܺܝܢ ܫܒܺܝ̈ܚܶܐ ܒܰܣܶܡ ܠܐܢܳܫܽܘܬܳܐ ܡ̣ܶܢ ܙܰܗܡܽܘܬܳܐ ܕܣܳܛܳܢܳܐ: ܚܰܬܢܳܐ ܫܰܪܺܝܪܳܐ ܕܒܰܬܪܶܥܣܰܪ ܙܡܺܝ̈ܢܺܝܢ ܥܒܰܕ ܠܶܗ ܡܶܫܬܽܘܬܳܐ ܪܽܘܚܳܢܳܝܬܳܐ: ܡܰܠܟܳܐ ܫܡܰܝܳܢܳܐ ܕܒܰܬܪܶܥܣܰܪ ܚܕܽܘ̈ܓܺܝܢ ܡܰܟܪܳܗ̇ ܠܥܺܕܬܳܐ ܟܰܠܬܳܐ ܗܕܺܝܪܬܳܐ ܘܰܬܪܺܝܨܬܳܐ: ܐܰܪܕܺܝܟܠܐ ܚܰܟܺܝܡܳܐ ܕܒܰܬܪܶܥܣܰܪ ܛܰܒܥܺܝ̈ܢ ܓܒܰܝ̈ܳܐ ܒܢܳܐ ܘܰܐܩܺܝܡ ܚܰܪ̈ܒܳܬܳܗ̇ ܕܰܐܪܥܳܐ: ܥܳܒܽܘܕܳܐ ܕܥܳܠܡ̈ܶܐ ܕܒܰܬܪܶܥܣܰܪ ܝܰܪ̈ܕܺܝܢ ܣܡܰܟ ܘܰܐܫܩܺܝ ܠܨܰܗܝܽܘܬܳܗ̇ ܕܥܳܡܰܪܬܳܐ: ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܕܒܰܬܪܶܥܣܰܪ ܟܰܘܟ̈ܒܺܝܢ ܐܰܨܡܰܚ ܢܽܘܗܪܳܐ ܫܰܪܺܝܪܳܐ: ܢܽܘܗܪܳܐ ܫܡܰܝܳܢܳܐ ܕܒܰܬܪܶܥܣܰܪ ܠܰܡܦܺܐܕܺܝ̈ܢ ܐܰܢܗܰܪ ܠܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ ܥܰܬܺܝܪܳܐ ܘܰܫܦܺܝܥܳܐ ܕܒܰܬܪܶܥܣܰܪ ܡܶܣܟܺܢܺܝ̈ܢ ܦܰܪܢܶܣ ܣܽܘܢܩܳܢܳܗ̇ ܕܡܶܬܥܰܡܪܳܢܺܝܬܳܐ: ܝܰܡܳܐ ܕܰܚܢܳܢܳܐ ܕܒܰܬܪܶܥܣܰܪ ܢܰܗܪ̈ܺܝܢ ܦܰܝܶܓ ܠܨܰܗܝܽܘܬܳܐ ܕܰܡܛܰܪ̈ܦܶܐ: ܡܠܶܟ ܡܰܠܟ̈ܶܐ ܕܒܰܬܪܶܥܣܰܪ ܣܰܟܪ̈ܺܝܢ ܣܬܰܪ ܚܶܣ̈ܢܶܝܗ̇ ܕܰܚܛܺܝܬܳܐ: ܪܰܒ ܚܰܝܠܐ ܩܪܰܒܬܳܢܳܐ ܕܒܰܬܪܶܥܣܰܪ ܥܰܒܕܺܝ̈ܢ ܟܒܰܫ ܠܥܽܘܫܢܳܐ ܕܟܽܠܗܶܝܢ ܡܰܠܟ̈ܘܳܬܳܐ: ܪܰܒ ܟܽܘܡܪ̈ܶܐ ܡܗܰܝܡܢܳܐ ܕܒܰܬܪܶܥܣܰܪ ܦܺܝܪ̈ܡܶܐ ܡܠܺܝ̈ܠܐ ܚܰܣܺܝ ܠܥܰܡ̈ܡܶܐ ܘܶܐܡܘ̈ܳܬܳܐ: ܡܰܠܦܳܢܳܐ ܕܩܽܘܫܬܳܐ ܕܒܰܬܪܶܥܣܰܪ ܨܰܝܳܕܺܝ̈ܢ ܐܠܰܦ ܠܥܺܕܬܶܗ ܝܰܕ̈ܥܳܬܳܐ ܫܰܪܺܝܪ̈ܳܬܳܐ ܡܰܠܳܚܳܐ ܬܡܺܝܗܳܐ ܕܒܰܬܪܶܥܣܰܪ ܩܽܘܒܰܪ̈ܢܺܝܛܺܝܢ ܕܰܒܰܪ ܠܰܟܪܺܝܗܽܘܬܳܐ ܕܚܰܢܦܽܘܬܳܐ ܒܝܰܕ ܐܠܶܦܳܐ ܕܗܰܝܡܳܢܽܘܬܳܐ ܬܪܺܝܨܬܳܐ: ܡܰܒܽܘܥܳܐ ܕܪ̈ܰܚܡܶܐ ܕܒܰܬܪܶܥܣܰܪ ܪ̈ܰܥܡܺܝܢ ܐܰܪܥܶܡ ܒܰܒܪܺܝܬܳܐ ܣܒܰܪܬܳܐ ܐܶܘܢܓܶܠܳܝܬܳܐ: ܐܺܝܡܳܡܳܐ ܪܰܒܳܐ ܕܒܰܬܪܶܥܣܰܪ ܫܳܥܺܝ̈ܢ ܪܕܰܦ ܠܚܶܫܟܳܐ ܕܦܶܢ̈ܝܳܬܳܐ: ܢܶܒܥܳܐ ܕܚܰܝ̈ܶܐ ܕܒܰܬܪܶܥܣܰܪ ܬܰܦ̈ܶܐ ܐܰܫܩܺܝ ܠܰܨܗܰܝ̈ܳܐ ܫܶܦ̈ܥܶܐ ܕܒܽܘܪ̈ܟܳܬܳܐ: ܠܳܟ ܡܫܺܝܚܳܐ ܐܠܰܗܰܢ ܫܰܪܺܝܪܳܐ ܡܦܺܝܣܺܝܢܰܢ: ܟܰܕ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܒܥܽܘܗܕܳܢܰܢ ܢܳܣܒܺܝܢܰܢ: ܘܰܠܣܳܥܽܘܪܽܘܬܗܽܘܢ ܬܡܺܝܗܬܳܐ ܩܕܳܡܰܝܟ ܡܰܥܗܕܺܝܢܰܢ ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܘܰܒܬܰܟ̈ܫܦܳܬܗܽܘܢ ܩܰܕܺܝ̈ܫܳܬܳܐ ܕܰܚܠܳܦܰܝܢ: ܐܰܫܘܳܐ ܠܰܢ ܕܰܐܝܟ ܕܫܳܦܰܪ ܠܨܶܒܝܳܢܳܟ ܢܶܦܠܽܘܚ ܠܳܟ ܥܰܒܕܽܘܬܳܐ ܛܳܒܬܳܐ: ܟܰܕ ܫܳܐܠܺܝܢܰܢ ܡܶܢܳܟ: ܕܰܠܫ̈ܶܐܠܳܬܰܢ ܒܺܐܝ̈ܕܰܝܗܽܘܢ ܬܶܬܶܠ: ܘܠܰܡܝܰܬܪܽܘܬܳܐ ܕܺܝܠܗܽܘܢ ܢܳܨܶܒ ܐܰܢ̱ܬ ܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ: ܘܰܠܨܰܘܪ̈ܶܐ ܕܺܝܠܰܢ ܟܳܕܶܢ ܐܰܢ̱ܬ ܒܦܽܘܠܚܳܢ ܫܰܦܺܝܪ̈ܳܬܗܽܘܢ: ܘܝܳܗܶܒ ܐܰܢ̱ܬ ܒܛܰܝܒܽܘܬܳܟ ܡܳܪܝܳܐ ܠܗܶܪ̈ܓܶܐ ܘܰܠܚܽܘ̈ܫܳܒܶܐ ܦܳܪܽܘܫܽܘܬܳܐ: ܠܪ̈ܶܥܝܳܢܶܐ ܘܣܽܘ̈ܟܳܠܐ ܢܰܗܺܝܪܽܘܬܳܐ ܐܰܝܟ ܡ̇ܰܢ ܕܢܶܓܒܶܐ ܠܗܳܠܶܝܢ ܕܝܽܘܬܪ̈ܳܢܶܐ ܘܢܰܒܣܶܐ ܕܶܝܢ ܒܰܐܝܠܶܝܢ ܕܰܡܠܶܝܢ ܚܽܘܣܪ̈ܳܢܶܐ ܐܰܝܟܰܢܳܐ ܕܰܢܫܽܘܛ ܠܗܳܠܶܝܢ ܕܥܳܠܡܳܐ ܘܙܰܒܢܳܝ̈ܳܬܳܐ ܕܠܐ ܡܶܬܩܰܕ̈ܝܳܢ: ܢܝܰܩܰܪ ܕܶܝܢ ܠܗܳܠܶܝܢ ܫܡܰܝ̈ܳܢܝܳܬܳܐ ܐܰܝܟ ܕܳܐܦ ܫܠܺܝ̈ܚܶܐ ܕܺܝܠܳܟ ܢܰܨܺܝ̈ܚܶܐ: ܢܶܥܪܽܘܩ ܕܶܝܢ ܡ̣ܶܢ ܚܡܺܝܪܳܐ ܕܚܰܢܦܽܘܬܳܐ ܘܰܕܝܽܘܕܳܝܽܘܬܳܐ ܢܩܰܒܶܠ ܕܶܝܢ ܠܛܰܥܡܳܐ ܕܡܰܠܦܳܢܽܘܬܳܐ ܐܶܘܢܓܶܠܳܝܬܳܐ ܘܩܰܕܺܝܫܬܳܐ ܘܰܫܠܺܝܚܳܝܬܳܐ ܘܰܚܢܰܢ ܡܳܪܝ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܘܶܐܬܬܢܺܝܚܘ ܥܰܠ ܣܰܒܪܳܟ: ܢܶܫܬܘܶܐ ܕܢܶܥܽܘܠ ܠܡܰܠܟܽܘܬܳܐ ܕܺܝܠܳܟ ܫܒܺܝܚܬܳܐ ܘܰܠܝܳܪܬܽܘܬܳܟ ܗ̇ܳܝ ܛܽܘܒܬܳܢܺܝܬܳܐ: ܘܰܒܓܽܘܕܰܝ̈ܗܽܘܢ ܕܰܓܒܰܝ̈ܳܐ ܕܺܝܠܳܟ ܢܶܬܚܰܠܰܛ: ܘܰܒܣܶܕܪ̈ܰܝܗܽܘܢ ܢܶܬܛܰܟܰܣ: ܘܰܒܟܶܢܦܰܝ̈ܗܽܘܢ ܢܶܣܬܰܬܰܪ: ܘܥܰܡܗܽܘܢ ܘܒܰܝܢܳܬܗܽܘܢ ܟܢܺܝܫܳܐܝ̣ܬ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܓܢܺܝܙܳܐ ܘܰܠܪܽܘܚܳܟ ܣܓܺܝܕܳܐ ܘܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܫܠܝܛܐ ܡܢ ܣܝܥܬܗ ܕܡܪܝ ܐܘܓܝܢ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܠܰܡܝܰܩܳܪܽܘ ܠܝܰܘܡܳܐ ܕܥܺܐܕܶܗ: ܕܢܰܨܺܝܚ ܫܽܘܦܪ̈ܶܐ ܡܳܪܝ ܫܰܠܺܝܛܳܐ: ܦܳܠܚܳܐ ܕܰܦܠܰܚ ܒܰܩܪܰܒܬܳܢܽܘܬܳܐ: ܘܦܰܠܳܚܳܐ ܟܰܫܺܝܪܳܐ ܕܰܦܠܰܚ ܒܟܰܪܡܳܟ ܡ̣ܶܢ ܨܰܦܪܳܐ ܠܪܰܡܫܳܐ: ܘܒܰܛܶܠ ܡܶܢܰܢ ܒܰܨܠܰܘ̈ܳܬܶܗ ܡܰܪ̈ܕܘܳܬܳܐ ܒܺܝ̈ܫܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܰܐܡܠܶܟ ܫܰܝܢܳܟ ܒܥܺܕܬܳܟ ܘܰܒܟܽܠܶܗ ܥܳܠܡܳܐ ܥܕܰܡܳܐ ܠܥܳܠܰܡ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܕܡܰܠܟ̈ܶܐ ܘܡܳܪܶܐ ܡܳܪ̈ܰܘܳܬܳܐ: ܕܡܰܠܟܽܘܬܳܐ ܡܰܠܟܳܝܬܳܐ ܘܰܐܣܺܝܣܳܝܬܳܐ ܡܰܡܠܶܟ ܥܰܠ ܟܽܠ ܡܰܠܟ̈ܘܳܢ ܕܡܶܬܡܰܠܟܺܝܢ ܒܡܰܠܟܽܘܬܳܐ ܗܳܕܶܐ ܐܰܫܺܝܠܬܳܐ ܘܕܺܝܰܐܬܶܐܣܺܝܣܳܝܬܳܐ: ܘܰܒܡܽܘܠܟܳܢܰܘ̈ܗܝ ܡܰܠܟ̈ܳܝܶܐ ܘܥܳܠܡܺܝ̈ܢܳܝܶܐ ܡܠܰܟ ܠܪ̈ܳܚܡܰܘܗܝ ܡܰܠܟܽܘܬܳܐ ܬܶܐܘܳܪܺܝܛܺܝܩܳܝܬܳܐ: ܠܗܰܘ ܫܰܠܺܝܛܳܐ ܕܫܰܠܺܝ̈ܛܳܢܶܐ ܕܰܒܫܰܠܺܝܛܽܘܬ ܫܽܘܠܛܳܢܶܗ ܡܫܰܠܛܳܐ ܐܰܫܠܶܛ ܒܫܰܠܺܝܛܽܘܬܶܗ ܡܫܰܠܰܛܬܳܐ: ܠܡܳܪܝ ܫܰܠܺܝܛܳܐ ܡܫܰܠܰܛ ܥܰܠ ܫܰܠܺܝ̈ܛܰܝ ܫܽܘܠܛܳܢܽܘܬܶܗ ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܠܥܰܕܥܺܐܕܳܟ ܫܒܺܝܚܳܐ ܘܰܡܠܐܷ ܬܶܗܪܳܐ ܡܫܰܡܠܶܝܢܰܢ ܝܰܘܡܳܢܳܐ ܐܳܘ ܐܰܬܠܺܝܛܳܐ ܢܰܨܺܝܚܳܐ ܘܦܰܠܳܚܳܐ ܟܰܫܺܝܪܳܐ ܘܰܩܪܰܒܬܳܢܳܐ ܓܰܒܝܳܐ ܡܳܪܝ ܫܰܠܺܝܛܳܐ: ܐܰܟܳܪܳܐ ܪܽܘܚܳܢܳܝܳܐ ܕܰܙܪܰܥ ܙܰܪܥܳܐ ܒܪܺܝܟܳܐ ܒܙܰܒܢܳܐ ܗ̇ܰܘ ܢܺܝܣܳܢܳܝܳܐ: ܘܦܳܥܠܐ ܐܰܘܓܺܝܢܳܝܳܐ ܕܟܰܢܶܫ ܟܰܦ̈ܶܐ ܡܰܠܝ̈ܳܬ ܚܰܕ̈ܘܳܬܳܐ ܒܰܥܕܶܝܢ ܗ̇ܳܝ ܡܰܠܝܰܬ݀ ܒܽܘ̈ܣܳܡܶܐ ܘܓܶܐܘ̈ܳܬܳܐ: ܒܰܪ ܬܶܓܡܳܐ ܕܣܳܗ̈ܕܶܐ ܘܥܳܢ̈ܘܳܝܶܐ ܘܕܺܝܚܺܝ̈ܕܳܝܶܐ ܘܛܽܘܪ̈ܳܝܶܐ ܘܕܰܫܠܺܝ̈ܚܶܐ ܐܶܘܢܓܶܠܳܝ̈ܶܐ ܓܺܝܙܰܒܪܳܐ ܚܰܟܺܝܡܳܐ ܕܰܐܫܠܛܶܗ ܡܳܪܶܗ ܥܰܠ ܒܶܝܬ ܓܰܙܶܗ ܡܠܐܷ ܟܽܠ ܛܳܒ̈ܳܢ: ܕܰܢܦܰܪܢܶܣ ܠܟܽܠܚܰܕ ܐܰܝܟ ܫ̈ܶܐܠܳܬܶܗ ܫܰܦܺܝܪ̈ܳܬܳܐ ܕܶܩܠܐ ܪܳܡܳܐ ܘܰܗܕܺܝܪܳܐ ܢܨܺܝܒ ܥܰܠ ܬܰܦܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ ܗܰܡܢܺܝܟܳܐ ܫܰܦܺܝܪܳܐ ܕܰܬܠܐܷ ܒܨܰܘܪܳܗ̇ ܕܟܰܠܬܳܐ ܒܰܪܬ ܐܰܪ̈ܡܳܝܶܐ ܥܺܕܬܳܐ ܓܒܺܝܬܳܐ: ܘܰܪܕܳܐ ܚܠܐܷ ܪܺܝܚܳܐ ܘܫܰܦܺܝܪ ܓܰܘܢܳܐ ܕܡ̣ܶܢ ܟܽܘ̈ܒܶܐ ܚܰܢ̈ܦܳܝܶܐ ܐܶܬܩܛܶܦ: ܙܰܟܳܝܳܐ ܚܠܺܝܨܳܐ ܕܒܰܬܪܶܝܢ ܐܰܓܽܘܢܺܝ̈ܢ ܐܶܬܒܚܰܪ ܒܗܰܘ ܕܥܳܢܘܳܝܽܘܬܳܐ ܘܰܒܗܰܘ ܕܣܳܗܕܽܘܬܳܐ: ܚܰܝܠܬܳܢܳܐ ܒܰܩܪܳܒܳܐ ܕܰܠܡܶܨܪܶܝܢ ܗ̇ܳܝ ܚܶܫܽܘܟܬܳܐ ܘܰܣܢܺܝܬܳܐ ܒܰܦܬܰܟܪ̈ܶܐ ܒܢܽܘܗܪܳܐ ܐܠܰܗܳܝܳܐ ܐܰܢܗܰܪ ܘܠܰܢܨܺܝܒܺܝܢ ܕܒܶܝܬ ܬܚܽܘ̈ܡܶܐ ܒܝܰܕ ܬܽܘܠܡܳܕܶܗ ܐܰܬܗܰܪ: ܛܥܺܝܢ ܝܽܘܩܪܳܐ ܪܰܒܳܐ ܘܥܰܫܺܝܢܳܐ ܕܒܰܝܬܳܐ ܡܶܬܝܰܕܥܳܢܳܐ ܥܳܠܡܳܐ ܗܳܢܳܐ ܘܰܠܛܽܘܥܝܰܝ ܗ̇ܰܘ ܡܶܫܬܰܥܒܕܳܢܳܐ: ܝܳܗܽܘܒܳܐ ܕܳܐܣܘ̈ܳܬܳܐ ܘܥܽܘܕܪ̈ܳܢܶܐ ܠܰܡܡܰܚܰܝ̈ܳܐ ܡܩܺܝܡܳܢܳܐ ܕܡܺܝ̈ܬܶܐ ܐܰܝܟ ܡܳܪܶܗ ܒܳܪܽܘܝܳܐ ܕܰܒܪ̈ܰܝܳܐ: ܟܰܘܟܒܳܐ ܥܰܬܺܝܪ ܙܰܠܓ̈ܶܐ ܘܰܫܒܺܝܚ ܨܶܡܚ̈ܶܐ: ܕܰܠܡܰܕܢܚܳܐ ܘܰܠܡܰܥܪܒܳܐ ܐܰܢܗܰܪ ܘܰܠܥܳܡܽܘܪ̈ܰܝܗܶܝܢ ܬܰܠܡܶܕ ܘܰܐܦܢܺܝ ܠܐܘܪܚܳܐ ܕܰܫܪܳܪܳܐ: ܘܥܰܠܗܳܝ ܛܽܘܒܳܐ ܝܳܗܒܺܝܢܰܢ ܠܶܗ ܟܰܕ ܒܣܶܦ̈ܘܳܬܳܐ ܕܰܟܝ̈ܳܬܳܐ ܘܰܡܪܺܝܩܳܬ݀ ܡ̣ܶܢ ܛܽܘܠܛܳܫܐܳ ܕܰܚܛܺܝܬܳܐ ܠܘܳܬܶܗ ܐܳܡܪܺܝܢܰܢ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܫܰܠܺܝܛܳܐ ܕܰܠܡܰܠܐܟܳܐ ܕܪܽܘܓܙܳܐ ܗ̇ܰܘ ܕܒܰܢܨܺܝܒܺܝܢ ܡܕܺܝܢ̱ܬܳܐ ܚܳܪܶܒ ܗܘܳܐ ܘܩܳܛܶܠ ܕܠܐ ܪ̈ܰܚܡܶܐ: ܕܒܰܨܠܰܘ̈ܳܬܳܟ ܟܠܰܝܬܳܝܗܝ ܐܳܦ ܠܐܢܳܫܶܝ̈ܗ̇ ܬܰܠܡܶܕܬ ܠܰܣܒܰܪܬܳܐ ܡܰܚܝܳܢܺܝܬܳܐ: ܠܳܟ ܛܽܘܒܰܝܟ ܢܰܨܺܝܚܳܐ ܡܳܪܝ ܫܰܠܺܝܛܳܐ ܕܡ̣ܶܢ ܚܰܢ̈ܦܶܐ ܘܟܳܦܽܘܪ̈ܶܐ ܘܣܳܓ̈ܕܰܝ ܠܨܰܠܡ̈ܶܐ ܥܰܡ̈ܡܶܐ ܕܠܐ ܡܶܢܝܳܢ ܐܰܥܡܶܕܬ ܒܪܽܘܫܡܳܐ ܕܰܬܠܺܝܬܳܝܽܘܬܳܐ: ܠܳܟ ܛܽܘܒܰܝܟ ܡܳܪܝ ܫܰܠܺܝܛܳܐ ܕܢܰܘܣܳܐ ܕܰܟܝܳܐ ܘܒܶܝܬ ܡܰܥܡܪܳܐ ܥܒܺܝܕ ܐܰܢ̱ܬ ܠܰܡܫܺܝܚܳܐ ܐܠܰܗܳܐ: ܘܰܩܕܳܡ ܡܰܠܟ̈ܶܐ ܚܰܢ̈ܦܶܐ ܐܰܘܕܺܝܬ ܘܗܰܝܡܶܢܬ ܒܶܗ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܫܰܠܺܝܛܳܐ ܕܣܳܡܬ ܢܰܦܫܳܟ ܫܳܛܝܳܐ ܘܗܶܕܝܽܘܛܳܐ ܟܰܕ ܥܰܠܬ ܠܕܰܝܪܳܐ ܕܒܶܝܬ ܦܰܟܽܘܡ: ܘܶܐܫܬܶܐܠܬ ܐܰܝܟ ܠܐ ܝܳܕܽܘܥܳܐ ܟܰܕ ܠܰܟ̈ܬܳܒܰܝ ܩܽܘܕܫܳܐ ܡ̣ܶܢ ܠܶܒܳܟ ܬܳܢܶܐ ܗܘܰܝܬ: ܠܳܟ ܛܽܘܒܰܝܟ ܢܰܨܺܝܚܳܐ ܡܳܪܝ ܫܰܠܺܝܛܳܐ ܕܰܥܒܳܕܰܝ̈ܟ ܘܥܰܡܠܰܝ̈ܟ ܫܒܺܝ̈ܚܶܐ ܠܐ ܨܒܳܐ ܡܳܪܳܟ ܕܢܶܬܟܰܣܽܘܢ: ܐܶܠܐ ܐܰܕܢܰܚ ܐܶܢܽܘܢ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܫܰܠܺܝܛܳܐ ܕܦܰܕܽܘܥܳܐ ܣܛܪܰܢܽܘܡܺܝܰܐ ܥܒܺܝܕ ܐܰܢ̱ܬ ܠܬܽܘܒܳܪ ܬܰܢܺܝ̈ܢܶܐ ܘܪ̈ܺܝܫܰܝܗܽܘܢ ܕܓܳܪ̈ܣܶܐ ܫܺܐܕܳܢܳܝ̈ܶܐ ܡܰܟܝܳܢ̈ܶܐ ܕܐ̱ܢܳܫܽܘܬܳܐ: ܠܳܟ ܛܽܘܒܰܝܟ ܢܰܨܺܝܚܳܐ ܡܳܪܝ ܫܰܠܺܝܛܳܐ ܕܨܶܒܝܳܢܳܐܝ̣ܬ ܦܪܰܫܬ ܢܰܦܫܳܟ ܡ̣ܶܢ ܐܰܒܳܗܰܝ̈ܟ ܘܠܰܨܠܺܝܒܳܟ ܥܰܠ ܟܰܬܦܳܟ ܫܩܰܠܬ ܐܰܟܡܳܐ ܕܰܫܡܰܥܬ ܡ̣ܶܢ ܡܳܪܳܟ ܘܒܳܬܰܪ ܥܶܩ̈ܒܳܬܶܗ ܪܕܰܝܬ: ܠܳܟ ܛܽܘܒܰܝܟ ܡܳܪܝ ܫܰܠܺܝܛܳܐ ܕܩܳܡܬ ܩܪܰܒܬܳܢܳܐܝ̣ܬ ܠܽܘܩܒܰܠ ܩܪ̈ܳܒܰܘܗܝ ܕܒܺܝܫܳܐ ܒܥܶܠܕܒܳܒܶܗ ܕܓܶܢܣܰܢ: ܘܰܠܚܰܝܠܶܗ ܫܰܦܶܠܬ ܘܰܠܝܽܘܠܦܳܢܶܗ ܡ̣ܶܢ ܡܰܕܢܚܳܐ ܘܡܰܥܪܒܳܐ ܥܩܰܪܬ ܘܝܽܘܠܦܳܢ ܚܰܝ̈ܶܐ ܙܪܰܥܬ: ܠܳܟ ܛܽܘܒܰܝܟ ܡܳܪܝ ܫܰܠܺܝܛܳܐ ܕܰܪܫܰܡܬ ܐܳܬܳܐ ܕܰܨܠܺܝܒܳܐ ܥܰܠ ܛܰܠܝܳܐ ܗ̇ܰܘ ܕܒܰܠܥܶܗ ܗܘܳܐ ܬܰܢܺܝܢܳܐ ܠܺܝܛܳܐ: ܘܡ̣ܶܢ ܡܺܝܬܽܘܬܳܐ ܢܰܚܶܡܬܳܝܗܝ ܒܚܰܝܠܐ ܐܠܰܗܳܝܳܐ ܕܰܫܪܶܐ ܗܘܳܐ ܒܳܟ: ܠܳܟ ܛܽܘܒܰܝܟ ܡܳܪܝ ܫܰܠܺܝܛܳܐ ܕܰܫܡܳܟ ܣܳܗܶܕ ܥܠܰܝܟ ܟܡܳܐ ܐܰܫܠܛܳܟ ܡܳܪܳܟ ܥܰܠ ܒܶܝܬ ܓܰܙܶܗ: ܕܬܶܣܰܒ ܘܬܶܬܶܠ ܠܟܽܠ ܚܰܕ ܐܰܝܟ ܫ̈ܶܐܠܳܬܶܗ ܫܰܦܺܝܪ̈ܳܬܳܐ: ܠܳܟ ܛܽܘܒܰܝܟ ܡܳܪܝ ܫܰܠܺܝܛܳܐ ܕܬܶܕܡܪ̈ܳܬܳܟ ܠܐ ܡܶܬܡܰܢ̈ܝܳܢ ܘܰܬܡܺܝ̈ܗܳܬܳܟ ܠܐ ܡܶܬܡܰܫ̈ܚܳܢ ܘܡܶܢܗܶܝܢ ܗܰܘ̈ܢܶܐ ܐ̱ܢܳܫ̈ܳܝܶܐ ܓܳܗܪܺܝܢ: ܘܡ̣ܶܢ ܕܰܠܡܺܐܡܰܪ ܥܰܡ̈ܠܐ ܕܰܣܥܰܪܬ ܚܳܝܒܺܝܢ: ܘܒܰܕܓܽܘܢ ܥܺܕܬܳܐ ܕܙܰܝܚܰܬ݀ ܠܥܰܕܥܺܐܕܳܟ ܡܦܺܝܣܳܐ ܠܳܟ ܡܶܬܟܰܫܦܳܢܳܐܝ̣ܬ ܕܬܶܫܰܐܠ ܠܳܗ̇ ܡ̣ܶܢ ܡܳܪܳܟ ܡܶܬܚܰܢܳܢܳܐܝ̣ܬ: ܕܰܢܒܰܛܶܠ ܡܶܢܳܗ̇ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ ܡܪܰܚܡܳܢܳܐܝ̣ܬ ܘܰܙܓܽܘܪ ܡܶܢܳܗ̇ ܪ̈ܰܘܒܶܐ ܘܰܫܓܽܘ̈ܫܝܶܐ ܘܟܽܠ ܚܶܪ̈ܝܳܢܶܐ ܐܰܟܺܝܦܳܐܝ̣ܬ: ܕܝܰܨܺܝܦܳܐܝ̣ܬ ܬܶܦܪܽܘܥ ܩ̈ܳܠܐ ܦܰܐܝ̈ܳܐ ܕܬܰܘܕܺܝܬܳܐ ܠܡܳܪܝܳܐ ܡܢܰܛܪܳܢܳܗ̇ ܐܰܡܺܝܢܳܐܝ̣ܬ ܫܰܝܢܶܗ ܢܶܣܓܶܐ ܒܳܗ̇ ܫܦܺܝܥܳܐܝ̣ܬ: ܠܰܫܠܳܡܶܗ ܬܣܰܟܶܐ ܕܢܶܬܝܰܬܰܪ ܒܳܗ̇ ܣܰܓܺܝ ܬܟܺܝܠܐܴܝ̣ܬ: ܝܰܡܺܝܢܶܗ ܬܰܐܓܶܢ ܥܠܶܝܗ̇ ܒܛܺܝܠܐܴܝ̣ܬ: ܛܳܒ̈ܳܬܶܗ ܢܶܫܬܰܪ̈ܬܚܳܢ ܒܳܗ̇ ܡܰܠܝܳܐܝ̣ܬ: ܐܳܦ ܒܽܘܪ̈ܟܳܬܶܗ ܢܶܬܡܰܠܝ̈ܳܢ ܣܳܚܪ̈ܳܬܳܗ̇ ܣܰܓܺܝܳܐܐܝ̣ܬ: ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܩܰܠܶܣܘ ܠܥܺܐܕܳܟ ܒܳܟ ܢܶܙܕܰܗܽܘܢ: ܪ̈ܳܥܰܘܳܬܳܐ ܘܰܐܚܺܝܕܺܝܢ ܬܰܩܕܳܐ ܕܪܳܥܝܽܘܬܳܐ ܫܠܺܝܚܳܝܬܳܐ ܒܳܟ ܢܶܚܕܽܘܢ: ܕܰܝܪ̈ܳܝܶܐ ܕܡܰܪܺܝܘ ܒܥܰܡܠܰܝ̈ܟ ܒܳܟ ܢܕܽܘܨܽܘܢ: ܓܰܒܪ̈ܶܐ ܘܰܛܠܳܝ̈ܶܐ ܕܪܰܡܪܶܡܘ ܠܕܽܘܟܪܳܢܳܟ ܒܳܟ ܢܶܪܽܘܙܽܘܢ: ܝܰܠܽܘ̈ܕܶܐ ܘܓܰܕܽܘ̈ܕܶܐ ܒܳܟ ܢܶܬܪܰܒܽܘܢ: ܐܠܰܝ̈ܨܶܐ ܘܡܰܟܰܐܒ̈ܶܐ ܒܳܟ ܢܶܬܚܰܠܡܽܘܢ: ܚܰܛܳܝ̈ܶܐ ܘܡܰܣܟ̈ܠܳܢܶܐ ܒܳܟ ܢܶܬܚܰܣܽܘܢ: ܡܚܺܝ̈ܠܐ ܘܰܟܪ̈ܺܝܗܶܐ ܒܳܟ ܢܶܬܰܐܣܽܘܢ: ܢܶܣܝܽܘ̈ܢܶܐ ܘܡܰܪ̈ܕܘܳܬܳܐ ܒܳܟ ܢܶܥܒܪܽܘܢ: ܝܰܬܡ̈ܶܐ ܘܰܐܪ̈ܡܠܳܬܳܐ ܒܳܟ ܢܶܬܬܰܪܣܽܘܢ: ܫܒܰܝ̈ܳܐ ܘܟܰܦ̈ܢܶܐ ܘܡܰܘܬܳܢ̈ܶܐ ܒܳܟ ܢܶܫܬܰܗܽܘܢ: ܡܰܨܘ̈ܳܬܳܐ ܘܰܩܒܽܘܠܝ̈ܶܐ ܘܚܶܪ̈ܝܳܢܶܐ ܒܳܟ ܢܶܬܒܰܛܠܽܘܢ: ܥܳܩ̈ܳܬܳܐ ܒܳܟ ܢܶܬܬܰܗ̈ܝܳܢ: ܙܰܒ̈ܢܶܐ ܡܫܰܝ̈ܢܶܐ ܒܳܟ ܢܺܐܬܽܘܢ: ܨܠܰܘ̈ܳܬܰܢ ܒܳܟ ܢܶܬܩܰܒ̈ܠܳܢ: ܒܳܥܘ̈ܳܬܰܢ ܒܳܟ ܢܶܫܬܰܡ̈ܥܳܢ: ܫ̈ܶܐܠܳܬܰܢ ܒܳܟ ܢܶܬܦܰܢ̈ܝܳܢ: ܒܺܝ̈ܫܳܬܰܢ ܒܳܟ ܢܶܬܪ̈ܰܝܚܳܢ: ܣܰܟܠܘ̈ܳܬܰܢ ܒܳܟ ܢܶܬܥܰܛܝ̈ܳܢ: ܨܳܐܝ̈ܘܳܬܰܢ ܒܳܟ ܢܶܬܡܰܪ̈ܩܳܢ: ܗܶܪ̈ܳܬܰܢ ܒܳܟ ܢܶܬܠܰܝ̈ܬܳܢ: ܦܠܰܓ̈ܘܳܬܰܢ ܒܳܟ ܢܶܫܬܰܝ̈ܢܳܢ: ܦܰܓܪ̈ܰܝܢ ܒܳܟ ܢܶܬܕܰܟܽܘܢ: ܢܰܦ̈ܫܳܬܰܢ ܒܳܟ ܢܶܬܩܰܕ̈ܫܳܢ ܪ̈ܽܘܚܳܬܰܢ ܒܳܟ ܢܶܙܕܰܗ̈ܝܳܢ ܥ̈ܰܠܠܳܬܰܢ ܒܳܟ ܢܶܣܓ̈ܝܳܢ: ܐܶܕܪ̈ܳܬܰܢ ܒܳܟ ܢܶܫܬܰܦ̈ܥܳܢ: ܒܽܘܪ̈ܟܳܬܰܢ ܒܳܟ ܢܶܫܬܰܪ̈ܬܚܳܢ: ܚܰܝ̈ܶܐ ܕܟܽܠܰܢ ܟܢܺܝܫܳܐܝ̣ܬ ܘܓܰܘܳܢܳܐܝ̣ܬ ܒܰܨܠܰܘ̈ܳܬܳܟ ܢܶܬܢܰܛܪܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܒܳܥ̈ܘܳܬܳܟ ܢܶܬܚܰܣܽܘܢ: ܘܟܽܠܰܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܡܫܺܝܚܳܐ ܗ̇ܰܘ ܕܰܐܫܪܺܝ ܚܰܝܠܶܗ ܒܓܰܪ̈ܡܰܝܟ ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܥܶܛܪܳܐ ܕܒܶܣ̈ܡܶܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡܰܝܟ ܡܳܪܝܳܐ: ܒܕܽܘܟܪܳܢ ܐܰܬܠܺܝܛܳܟ ܡܳܪܝ ܫܰܠܺܝܛܳܐ: ܢܶܫܬܰܟܰܢ ܠܰܢ ܒܶܗ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܢܶܬܩܰܒܰܠ ܩܕܳܡ ܪܰܒܽܘܬܳܟ ܐܰܝܟ ܦܺܝܪܡܶܗ ܕܰܐܗܪܽܘܢ ܟܳܗܢܳܐ: ܘܰܐܝܟ ܩܽܘܪܒܳܢܶܗ ܕܰܐܒܪܳܗܳܡ: ܢܶܬܚܰܣܽܘܢ ܒܶܗ ܥܰܢܺܝ̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܚܰܣܳܐ ܡܳܪܝ ܠܡܰܪܥܺܝܬܳܟ ܕܳܐܚܕܳܐ ܓܰܘܣܳܐ ܒܰܨܠܺܝܒܳܟ ܘܰܡܦܺܝܣܳܐ ܠܰܡܪܰܚܡܳܢܽܘܬܳܟ: ܕܙܰܒ̈ܢܶܐ ܛܳܒ̈ܶܐ ܬܶܬܶܠ ܠܳܗ̇ ܫܢܰܝ̈ܳܐ ܟܰܗܺܝ̈ܢܳܬܳܐ: ܘܬܰܥܒܰܪ ܡܶܢܳܗ̇ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܒܰܪܶܟ ܠܝܰܠܕܶܝ̈ܗ̇ ܒܚܽܘܒܳܟ ܘܣܰܬܰܪ ܠܰܒ̈ܢܶܝܗ̇ ܠܓܰܘ ܥܽܘܒܳܗ̇: ܒܰܨܠܰܘ̈ܳܬܶܗ ܘܰܒܡܶܬܟܰܫܦܳܢܽܘܬܶܗ ܕܥܰܒܕܳܟ ܡܳܪܝ ܫܰܠܺܝܛܳܐ ܕܰܥܒܰܕ ܨܶܒܝܳܢܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܩܰܕܺܝܫܳܐ ܘܰܡܠܐܷ ܡ̣ܶܢ ܩܽܘ̈ܕܫܶܐ ܕܰܒܩܰܕܺܝ̈ܫܶܐ ܡܶܬܬܢܺܝܚ ܘܡܶܬܩܰܕܰܫ ܕܩܰܕܫܶܗ ܠܩܰܕܺܝܫܳܐ ܡܳܪܝ ܫܰܠܺܝܛܳܐ ܟܰܕ ܗܽܘ ܒܟܰܪܣܳܐ ܕܶܐܡܶܗ: ܠܗܰܘ ܓܡܺܝܪܳܐ ܕܒܰܓܡܺܝܪܽܘܬ ܓܡܺܝܪܽܘܬܶܗ ܓܰܡܪܶܗ ܠܡܳܪܝ ܫܰܠܺܝܛܳܐ ܒܟܽܠ ܚܰܝ̈ܠܐ ܓܳܡܽܘܪ̈ܶܐ ܓܡܺܝܪ̈ܰܝ ܒܰܓܡܺܝܪܽܘܬܳܐ ܡܥܰܠܰܝܬܐ: ܠܗܰܘ ܢܰܨܺܝܚܳܐ ܘܰܡܢܰܨܰܚ ܠܢܰܨܺܝ̈ܚܶܐ ܕܢܰܨܰܚ ܠܡܳܪܝ ܫܰܠܺܝܛܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܠܳܟ ܡܩܰܠܣܺܝܢܰܢ ܐܳܘ ܦܳܠܚܳܐ ܢܰܨܺܝܚܳܐ ܘܰܥܛܺܝܦ ܙܳܟܽܘܬܳܐ ܚܠܺܝܨܳܐ ܒܰܩܪܳܒܳܐ ܡܳܪܝ ܫܰܠܺܝܛܳܐ ܫܰܠܺܝܛ ܥܰܠ ܓܰܙܳܐ ܕܡܳܪܶܗ: ܫܰܠܺܝܛܳܐ ܐܶܬܚܙܰܝܬ ܥܰܠ ܟܺܐܒ̈ܶܐ ܘܟܽܘܪ̈ܗܳܢܶܐ ܕܰܛܪܰܕܬ ܡ̣ܶܢ ܐ̱ܢܳܫܽܘܬܳܐ: ܫܰܠܺܝܛܳܐ ܬܽܘܒ ܐܶܬܚܰܘܺܝܬ ܠܶܗ ܠܡܰܠܐܟܳܐ ܕܪܽܘܓܙܳܐ ܗ̇ܰܘ ܕܚܳܪܶܒ ܗܳܕܶܐ ܒܰܢܨܺܝܒܺܝܢ ܡܕܺܝܢ̱ܬܳܐ: ܫܰܠܺܝܛܳܐ ܬܽܘܒ ܐܺܝܬܰܝܟ ܕܰܐܥܕܺܝܬ ܡ̣ܶܢ ܦܽܘܡܶܗ ܕܬܰܢܺܝܢܳܐ ܠܛܰܠܝܳܐ ܡܺܝܬܳܐ: ܐܰܢ̱ܬ ܗܽܘ ܚܰܡܣܶܢܬ ܥܰܠ ܡܰܚ̈ܘܳܬܳܐ ܘܫܶܢ̈ܕܶܐ ܕܰܐܣܒܠܽܘܟ ܐܰܪܺܝܰܐܢܽܘ ܡܰܣ̈ܠܰܝܳܐ ܒܰܐܠܶܟܣܰܢܕܪܺܝܰܐ ܡܕܺܝܢ̱ܬܳܐ ܕܣܰܕܶܩܘ ܠܗܰܝܡܳܢܽܘܬܳܐ ܬܪܺܝܨܬܳܐ: ܐܰܢ̱ܬ ܗܽܘ ܕܰܣܪ̈ܳܩܶܐ ܘܰܟܘܳܝ̈ܶܐ ܕܢܽܘܪܳܐ ܒܦܰܓܪܳܟ ܩܰܕܺܝܫܳܐ ܣܰܝܒܰܪܬ: ܐܰܢ̱ܬ ܗܽܘ ܕܰܐܓܽܘ̈ܢܶܐ ܪܰܘܪ̈ܒܶܐ ܒܰܩܢܽܘܡܳܟ ܚܰܘܺܝܬ: ܠܰܡܗܰܝ̈ܡܢܶܐ ܒܰܐܠܶܟܣܰܢܕܪܺܝܰܐ ܡܚܰܡܣܢܳܢܽܘܬܳܐ ܪܰܒܬܳܐ ܐܰܩܢܰܝܬ: ܐܰܢ̱ܬ ܗܽܘ ܕܡ̣ܶܢ ܚܰܢ̈ܦܶܐ ܠܺܝ̈ܛܶܐ ܘܟܳܦܽܘܪ̈ܶܐ ܛܳܥܰܝ̈ܳܐ ܡܗܰܝ̈ܡܢܶܐ ܫܰܪܺܝܪ̈ܶܐ ܥܒܰܕܬ: ܐܰܢ̱ܬ ܗܽܘ ܕܰܪܕܰܦܬ ܠܫܺܐܕ̈ܶܐ ܡ̣ܶܢ ܐ̱ܢܳܫܽܘܬܳܐ ܘܰܠܕܰܝ̈ܘܶܐ ܐܰܥܪܶܩܬ: ܐܰܢ̱ܬ ܗܽܘ ܕܝܰܗܒ ܠܳܟ ܡܳܪܳܟ ܫܽܘܠܛܳܢܳܐ ܥܰܠ ܟܽܠ ܟܺܐܒ ܘܟܽܘܪܗܳܢ: ܐܰܢ̱ܬ ܗܽܘ ܕܰܐܣܺܝܬ ܠܰܡܡܰܚܰܝ̈ܳܐ ܘܕܰܟܺܝܬ ܠܓܰܪ̈ܒܶܐ: ܐܰܢ̱ܬ ܗܽܘ ܕܰܠܣܺܝܥܬܳܐ ܕܒܶܝܬ ܡܳܪܝ ܐܰܘܓܺܝܢ ܢܩܶܦܬ: ܐܰܢ̱ܬ ܗܽܘ ܠܝܰܬܺܝܪ ܡ̣ܶܢ ܫܰܪܟܳܐ ܕܚܰܒܪ̈ܰܝܟ ܕܒܰܡܝܰܬܪ̈ܳܬܳܐ ܥܡܰܠܬ: ܐܰܢ̱ܬ ܗܽܘ ܕܫܰܘܙܶܒܬ ܠܗ̇ܳܢܽܘܢ ܕܰܒܟܺܐܒܳܐ ܕܫܰܪܥܽܘܛܳܐ ܒܠܰܥܘ: ܘܡ̣ܶܢ ܦܽܘܡܳܗ̇ ܕܰܫܝܽܘܠ ܠܗܽܘܢ ܐܰܥܕܺܝܬ: ܐܰܢ̱ܬ ܗܽܘ ܕܘܳܝܳܐ ܠܰܒ̈ܢܰܝ ܫܳܢܝܽܘܬܶܗ ܕܰܐܪܺܝܽܘܣ ܗ̇ܰܘ ܠܺܝܛܳܐ ܝܰܗܒܬ: ܐܰܢ̱ܬ ܗܽܘ ܕܥܰܠ ܫܰܪܝܽܘܬܳܐ ܕܡܰܝ̈ܳܐ ܕܕܶܩܠܰܬ݀ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ ܗܰܠܶܟܬ: ܐܰܢ̱ܬ ܗܽܘ ܕܰܚܘܺܝܚܳܐܝ̣ܬ ܠܛܽܘܪ̈ܰܝ ܩܰܪܕܽܘ ܠܘܳܬ ܡܳܪܝ ܐܰܘܓܺܝܢ ܘܡܳܪܝ ܝܰܥܩܽܘܒ ܪܳܥܝܳܐ ܕܰܢܨܺܝܒܺܝܢ ܠܩܽܘܕܳܫ ܗܰܝܟܠܐ ܣܠܶܩܬ: ܐܰܢ̱ܬ ܗܽܘ ܕܰܠܓܰܒܪܳܐ ܕܺܐܝܬ ܗܘܳܐ ܒܶܗ ܫܺܐܕܳܐ ܘܗܽܘ ܠܶܗ ܒܟܺܐܦ̈ܶܐ ܡܨܰܠܶܦ ܗܘܳܐ ܒܰܨܠܽܘܬܳܐ ܐܰܣܺܝܬ: ܐܰܢ̱ܬ ܗܽܘ ܕܫܰܠܺܝܛܳܐܝ̣ܬ ܐܰܫܠܛܳܟ ܡܳܪܳܟ ܫܰܠܺܝܛܳܐ ܕܫܰܠܺܝ̈ܛܳܢܶܐ ܘܥܰܠ ܟܽܠ ܫܽܘܠܛܳܢܺܝ̈ܢ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ ܗܳܐ ܡܫܰܠܰܛ ܐܰܢ̱ܬ: ܐܰܢ̱ܬ ܗܽܘ ܕܶܐܬܓܠܺܝ ܥܠܰܝܟ ܡܳܪܰܢ ܝܶܫܽܘܥ ܡܫܺܝܚܳܐ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܘܚܰܝܶܠ ܠܬܰܪܥܺܝܬܳܟ: ܘܪܰܒܳܐ ܒܡܰܠܟܽܘܬܳܐ ܕܺܝܠܶܗ ܐܶܫܬܰܘܕܺܝ ܕܢܶܥܒܕܳܟ: ܐܰܢ̱ܬ ܗܽܘ ܕܒܽܐܘܪܚܳܐ ܫܠܺܝܚܳܝܬܳܐ ܘܣܳܗܕܳܝܬܳܐ ܐܶܬܗܰܕܺܝܬ ܒܝܰܕ ܬܽܘܠܡܳܕܳܟ ܕܒܰܐܬܪ̈ܰܘܳܬܳܐ ܘܚܽܘܡܣܳܢܳܟ ܕܥܰܠ ܡܰܚ̈ܘܳܬܳܐ: ܐܰܢ̱ܬ ܗܽܘ ܕܰܨܡܰܚܬ ܡ̣ܶܢ ܐܺܝܓܽܘܦܛܽܘܣ ܗ̇ܳܝ ܚܶܫܽܘܟܬܳܐ: ܘܰܒܙܰܠܓ̈ܶܐ ܕܝܽܘܠܦܳܢܰܝ̈ܟ ܐܰܢܗܰܪܬܳܗ̇ ܘܰܠܨܰܠܡܶܝ̈ܗ̇ ܬܰܒܰܪܬ: ܐܰܢ̱ܬ ܗܽܘ ܕܰܠܛܽܘܪܳܐ ܕܺܐܝܙܠܐ ܛܽܘܪܳܐ ܕܓܶܠܝ̈ܳܢܶܐ ܣܺܝܢܰܝ ܕܰܬܪܶܝܢ ܒܚܶܙ̈ܘܳܢܶܐ: ܥܰܡ ܣܺܝܥܬܳܐ ܐܠܰܗܳܝܬܳܐ ܐܶܬܡܰܢܰܥܬ: ܐܰܢ̱ܬ ܗܽܘ ܕܘܰܥܶܕܬ ܟܽܠ ܛܳܒ̈ܳܬܳܐ ܘܒܽܘ̈ܣܳܡܶܐ ܠܟܶܢ̈ܫܶܐ ܘܰܠܥܰܡ̈ܡܶܐ ܕܰܐܥܡܶܕܬ: ܐܰܢ̱ܬ ܗܽܘ ܕܬܰܠܡܶܕܬ ܘܰܐܟܪܶܙܬ ܒܰܐܠܶܟܣܰܢܕܪܺܝܰܐ ܘܰܒܡܶܨܪܶܝܢ ܘܰܒܣܽܘܪܺܝܰܐ ܘܒܶܝܬ ܢܰܗܪ̈ܺܝܢ ܘܨܶܝܕ ܛܽܘܪ̈ܰܝ ܩܰܪܕܽܘ ܫܰܠܶܡܬ: ܘܳܐܦ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܟܰܕ ܠܝܰܘܡܳܐ ܕܕܽܘܟܪܳܢܳܟ ܡܥܰܕܥܕܺܝܢܰܢ: ܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܡܰܙܥܩܺܝܢܰܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܫܰܠܺܝܛܳܐ ܘܛܽܘܒܳܐ ܠܩܰܕܺܝ̈ܫܶܐ ܚܰܒܪ̈ܰܝܟ ܕܰܢܩܶܦܘ ܠܳܟ: ܠܳܟ ܛܽܘܒܰܝܟ ܡܳܪܝ ܫܰܠܺܝܛܳܐ ܘܛܽܘܒܳܐ ܠܐܒܳܐ ܡܺܝܟܳܐ ܘܰܐܒܳܐ ܣܰܠܳܪܳܐ ܘܶܐܡܶܗ ܐܠܶܝܫܒܰܥ ܛܽܘܒܳܢܺܝܬܳܐ: ܕܰܣܥܰܪܬܽܘܢ ܚܰܝ̈ܠܐ ܘܳܐܬܘ̈ܳܬܳܐ ܘܚܰܘܺܝܬܽܘܢ ܥܰܠ ܓܢ̱ܒܰܪ̈ܘܳܬܳܐ ܬܡܺܝ̈ܗܳܬܳܐ: ܠܳܟ ܛܽܘܒܰܝܟ ܐܰܒܳܐ ܣܰܠܳܪܳܐ ܘܛܽܘ̈ܒܶܝܗ̇ ܠܐܡܳܟ ܩܰܕܺܝܫܬܳܐ ܕܠܐܝܕܳܐ ܡܫܽܘܚܬܳܐ ܡܰܛܺܝܬܽܘܢ: ܗ̇ܳܝ ܕܦܰܪܣܝܰܬ݀ ܠܚܰܪ̈ܳܫܳܬܳܐ ܒܢܳܬ ܣܳܛܳܢܳܐ ܘܟܰܣ̈ܝܳܬܳܐ ܘܰܥܬܺܝ̈ܕܳܬܳܐ ܒܰܕܡܽܘܬ ܢܒܺܝ̈ܶܐ ܩܰܕܺܝ̈ܫܶܐ ܝܶܕܥܰܬ݀ ܠܳܟ: ܛܽܘܒܰܝܟ ܐܰܒܳܐ ܣܰܠܳܪܳܐ ܕܟܰܕ ܠܰܬܠܳܬ ܕܰܝܪ̈ܳܬܳܐ ܕܰܒܛܽܘܪܳܐ ܕܺܐܝܙܠܐ ܣܳܥܰܪ ܗܘܰܝܬ: ܠܳܟ ܛܽܘܒܰܝܟ ܐܰܒܳܐ ܣܰܠܳܪܳܐ ܕܫܰܥܒܶܕܬ ܘܰܟܕܰܢܬ ܠܣܳܛܳܢܳܐ ܒܢܺܝܪܳܐ ܕܥܰܒܕܽܘܬܳܐ ܥܰܠ ܕܰܒܥܳܐ ܕܢܰܘܣܶܦ ܠܳܟ ܝܽܘܩܪܳܐ ܥܰܠ ܡܰܘܒܠܐ ܕܚ̈ܶܛܶܐ ܕܰܛܥܺܝܢ ܗܘܰܝܬ: ܟܰܕ ܠܪܰܚܝܳܐ ܕܬܶܛܚܰܢ ܐܳܙܶܠ ܗܘܰܝܬ: ܠܳܟ ܛܽܘܒܰܝܟ ܐܰܒܳܐ ܣܰܠܳܪܳܐ ܕܰܐܛܥܺܝܬܳܝܗܝ ܬܪܶܝܢ ܝܰܘ̈ܡܺܝܢ ܒܦܽܘܩܕܳܢܳܐ ܐܠܰܗܳܝܳܐ ܘܰܗܘܳܐ ܟܰܕ ܛܳܚܶܢ ܒܪܰܚܝܳܐ ܘܛܳܥܶܢ ܘܡܰܝܬܶܐ ܠܘܳܬܳܟ: ܘܰܡܫܰܡܶܫ ܐܰܝܟ ܥܰܒܕܳܐ ܙܒܺܝܢܳܐ ܘܰܡܫܰܥܒܕܳܐ ܬܠܳܬ ܫܢܺܝ̈ܢ ܘܒܳܬܰܪܟܶܢ ܫܪܰܝܬܳܝܗܝ: ܠܟܽܘܢ ܛܽܘܒܰܝܟܽܘܢ ܫܳܡܽܘܢܳܐ ܘܓܽܘܪܝܳܐ ܘܚܰܒܺܝܒ ܡܰܘܕ̈ܝܳܢܶܐ ܒܚܺܝܪ̈ܶܐ ܘܣܳܗ̈ܕܶܐ ܚܠܺܝ̈ܨܶܐ: ܕܰܐܣܗܶܕܬܽܘܢ ܒܽܐܘܪܗܳܝ ܡܕܺܝܢ̱ܬܳܐ: ܘܶܐܬܩܰܛܰܠܬܽܘܢ ܡܶܛܽܠ ܚܽܘܒܶܗ ܕܡܳܪܰܢ: ܘܗܳܫܳܐ ܒܰܨܠܰܘ̈ܳܬܟܽܘܢ ܫܡܺܝ̈ܥܳܬܳܐ ܕܰܠܘܳܬ ܡܳܪܟܽܘܢ: ܩܪ̈ܳܒܶܐ ܘܩܺܐܪ̈ܣܶܐ ܢܶܬܒܰܛܠܽܘܢ: ܕܰܝܘ̈ܶܐ ܘܪ̈ܽܘܚܶܐ ܛܰܢ̈ܦܳܬܳܐ ܢܶܬܪܰܕܦܽܘܢ: ܝܰܪ̈ܕܶܐ ܕܰܚܛܳܗܰܝ̈ܢ ܒܟܽܘܢ ܢܶܬܛܰܡܡܽܘܢ: ܫܳܪ̈ܥܳܬܳܐ ܘܣܰܢ̈ܝܳܬܳܐ ܒܟܽܘܢ ܢܶܬܠܰܚ̈ܝܳܢ: ܐܽܘܠܨ̈ܳܢܶܐ ܘܣܽܘܓ̈ܦܳܢܶܐ ܒܟܽܘܢ ܢܶܬܢܰܘܓܽܘܢ ܘܢܶܥܒܪܽܘܢ ܘܢܶܫܬܰܗܽܘܢ: ܘܰܚܢܰܢ ܘܟܽܠܗܽܘܢ ܡܗܰܝ̈ܡܢܶܐ ܘܢܶܬܚܰܣܶܐ: ܫܽܘܒܚܳܐ ܘܺܐܝܩܳܪܳܐ ܥܰܡ ܣܶܓܕܬܳܐ ܢܰܣܶܩ ܒܗܳܢܳܐ ܝܰܘܡܳܐ ܕܕܽܘܟܪܳܢܟܽܘܢ: ܠܝܶܫܽܘܥ ܡܫܺܝܚܳܐ ܕܡܶܛܽܠ ܚܽܘܒܶܗ ܐܶܬܢܰܨܰܚܬܽܘܢ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܰܫܪܳܐ ܡܳܪܝܳܐ ܐܠܰܗܳܐ ܫܰܝܢܳܟ ܘܰܫܠܳܡܳܟ ܒܥܰܡܳܟ ܘܡܰܪܥܺܝܬܳܟ: ܘܢܰܛܰܪ ܝܰܠܕܶܝ̈ܗ̇ ܕܥܺܕܬܳܐ ܒܰܨܠܺܝܒܳܟ: ܘܚܰܣܳܐ ܚܰܘ̈ܒܶܐ ܘܰܚܛܳܗ̈ܶܐ ܕܡܰܣܟ̈ܠܳܢܶܐ ܒܰܡܪܰܚܡܳܢܽܘܬܳܟ: ܘܦܰܨܳܐ ܠܰܢ ܡ̣ܶܢ ܟܽܠ ܕܺܐܒ̈ܶܐ ܡܚܰܒ̈ܠܳܢܶܐ: ܘܡ̣ܶܢ ܐ̱ܢܳܫ̈ܳܐ ܒܺܝ̈ܫܶܐ ܠܐ ܡܪ̈ܰܚܡܳܢܶܐ: ܒܝܰܕ ܒܳܥ̈ܘܳܬܶܗ ܕܪܳܚܡܳܟ ܘܰܡܪܰܥܝܳܢܳܟ ܡܳܪܝ ܫܰܠܺܝܛܳܐ ܪܳܡ ܢܶܨ̈ܚܳܢܶܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܪܰܝܡܳܐ ܘܚܰܝܠܬܳܢܳܐ ܕܰܠܥܳܠܡܺܝܢ ܡܟܰܬܰܪ ܫܽܘܠܛܳܢܶܗ: ܠܗܰܘ ܚܰܟܺܝܡܳܐ ܕܠܰܫܡܰܝܳܐ ܨܰܒܶܬ ܒܬܽܘܩܢܶܗ ܠܗܰܘ ܕܰܓܒܳܐ ܠܶܗ ܟܺܐܢ̈ܶܐ ܘܙܰܕܺܝ̈ܩܶܐ ܕܰܢܫܰܒܚܽܘܢܳܝܗܝ: ܠܗܰܘ ܕܶܐܡܰܪ ܒܰܣܒܰܪܬܳܐ ܕܺܝܠܶܗ ܡܰܚܝܳܢܺܝܬܳܐ ܕܢܽܘܪܳܐ ܐܶܬܺܝܬ ܕܰܐܪܡܶܐ ܒܰܐܪܥܳܐ ܘܨܳܒܶܐ ܐ̱ܢܳܐ ܕܶܐܠܽܘ ܡ̣ܶܢ ܟܰܕܽܘ ܕܶܠܩܰܬ݀: ܠܗܰܘ ܕܰܒܢܽܘܪܶܗ ܐܠܰܗܳܝܬܳܐ ܫܰܠܗܶܒ ܠܢܰܨܺܝܚܳܐ ܡܳܪܝ ܫܰܠܺܝܛܳܐ ܕܫܳܛ ܠܓܶܢܣܳܐ ܘܛܽܘܗܡܳܐ ܘܰܟܦܰܪ ܒܥܳܠܡܳܐ ܘܰܫܩܰܠ ܗܘܳܐ ܨܠܺܝܒܶܗ ܘܰܢܦܰܩ ܒܰܒܥܳܬܶܗ: ܕܠܶܗ ܠܡܳܪܝܳܐ ܕܰܓܒܳܝܗܝ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܚܰܓܳܐ ܪܽܘܚܳܢܳܝܳܐ ܕܣܺܝܥܬܳܐ ܐܠܰܗܳܝܬܳܐ: ܘܕܰܦܠܰܓܳܐ ܫܒܺܝܚܬܳܐ ܘܩܰܕܺܝܫܬܳܐ ܘܰܕܣܺܝܣܰܪܬܳܐ ܫܰܒܥܺܝܢܳܝܬܳܐ ܗ̇ܳܝ ܕܒܶܝܬ ܡܳܪܝ ܐܰܘܓܺܝܢ ܒܬܶܫܒ̈ܚܳܬܳܐ ܡܰܠܐܟܳܝ̈ܳܬܳܐ ܟܺܝܬ ܘܰܟܪ̈ܽܘܒܳܝܳܬܳܐ ܗܕܺܝܪܳܐܝ̣ܬ ܡܥܰܕܥܕܺܝܢܰܢ: ܗܳܠܶܝܢ ܕܠܰܘ ܒܚܰܕ ܐܰܬܪܳܐ ܘܰܦܢܺܝܬܳܐ ܐܰܟܪܶܙܘ ܘܰܐܠܶܦܘ: ܐܶܠܐ ܠܡܰܕܢܚܳܐ ܘܰܠܡܰܥܪܒܳܐ ܘܰܠܟܽܠܳܗ̇ ܐܰܪܥܳܐ ܒܰܕܡܽܘܬ ܫܠܺܝ̈ܚܶܐ ܩܰܕܺܝ̈ܫܶܐ ܬܰܠܡܶܕܘ ܘܕܰܟܺܝܘ ܘܰܥܩܰܪܘ ܝܰܥܪܳܐ ܘܙܺܝܙܳܢ̈ܶܐ ܕܰܚܛܺܝܬܳܐ: ܗܳܠܶܝܢ ܕܰܒܗܽܘܢ ܢܗܰܪܘ ܛܽܘܪ̈ܶܐ ܘܪ̈ܳܡܳܬܳܐ: ܘܟܰܪ̈ܡܶܐ ܘܰܡܕܺܝ̈ܢܳܬܳܐ ܘܡܰܠܟ̈ܶܐ ܘܫܰܠܺܝ̈ܛܳܢܶܐ ܘܡܳܪ̈ܰܘܳܬܳܐ ܗܘܰܘ ܡܫܰܥ̈ܒܕܶܐ ܐܳܦ ܡܶܫܬܰܡ̈ܥܳܢܶܐ ܠܡܰܠܦܳܢܽܘܬܗܽܘܢ: ܗܳܠܶܝܢ ܕܰܒܥܽܘܡܪ̈ܶܐ ܘܕܰܝܪ̈ܳܬܳܐ ܨܰܒܬܽܘܗ̇ ܘܗܰܕܪܽܘܗ̇ ܠܐܪܥܳܐ ܘܰܫܡܰܝܳܐ ܕܬܰܪܬܶܝܢ ܥܰܒܕܽܘܗ̇: ܗܳܠܶܝܢ ܕܰܠܫܰܒܥܺܝܢ ܡܣܰܒܪ̈ܳܢܶܐ ܕܳܡܶܝܢ ܐܰܝܠܶܝܢ ܕܰܒܥܰܡܠܰܝ̈ܗܽܘܢ ܡܰܪܺܝܘ ܘܰܒܥܶܩ̈ܒܳܬܗܽܘܢ ܪܕܰܘ: ܘܰܐܟܘܳܬܗܽܘܢ ܬܰܠܡܶܕܘ ܘܰܐܟܪܶܙܘ ܒܟܽܠܳܗ̇ ܡܶܬܥܰܡܪܳܢܺܝܬܳܐ: ܗܳܠܶܝܢ ܕܚܰܕ ܡܶܢܗܽܘܢ ܐܺܝܬܰܘܗܝ ܢܰܨܺܝܚܳܐ ܘܓܰܒܝܳܐ ܡܳܪܝ ܫܰܠܺܝܛܳܐ ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܰܢ: ܗܳܢܳܐ ܕܶܐܬܬܰܓܰܪ ܒܝܰܡܳܐ ܘܰܒܝܰܒܫܳܐ ܥܕܰܡܳܐ ܠܡܰܪܓܳܢܺܝܬܳܐ ܗ̇ܳܝ ܝܰܩܺܝܪܰܬ݀ ܕܡܰܝ̈ܳܐ ܒܢܰܦܫܶܗ ܕܟܺܝܬܳܐ ܘܩܰܕܺܝܫܬܳܐ ܝܺܬܰܪ ܘܰܩܢܳܐ ܗܳܢܳܐ ܕܰܒܒܶܢܝܳܢ ܗܰܝܟܠܐ ܪܰܒܳܐ ܘܰܛܒܺܝܒܳܐ ܗ̇ܰܘ ܕܰܢܨܺܝܒܺܝܢ ܥܰܡ ܡܳܪܝ ܝܰܥܩܽܘܒ ܩܰܝܶܡ ܡܽܘܫ̈ܚܳܬܶܗ ܥܰܡܗܽܘܢ ܝܺܨܶܦ ܘܫܰܟܠܶܠ ܒܶܢܝܳܢܶܗ ܗܳܢܳܐ ܕܓܳܚܘ ܫܶܦ̈ܥܶܐ ܕܝܽܘܠܦܳܢܰܘ̈ܗܝ ܡ̣ܶܢ ܐܺܝܓܽܘܦܛܽܘܣ ܘܣܽܘܪܺܝܰܐ ܘܰܥܕܰܡܳܐ ܠܦܰܠܣܛܺܝܢܺܝ: ܘܰܒܒܶܝܬ ܢܰܗܪ̈ܺܝܢ ܘܰܥܕܰܡܳܐ ܠܛܽܘܪ̈ܰܝ ܩܰܪܕܽܘ ܕܪܰܟܘ ܡܳܡܽܘ̈ܠܰܘܗܝ: ܗܳܢܳܐ ܕܰܕܚܰܩ ܠܫܺܐܕ̈ܶܐ ܘܰܛܪܰܕ ܠܕܰܝ̈ܘܶܐ ܘܕܰܟܺܝ ܠܓܰܪ̈ܒܶܐ ܘܰܐܩܺܝܡ ܠܰܡܫܰܪ̈ܰܝܳܐ ܘܢܰܚܶܡ ܠܡܺܝ̈ܬܶܐ: ܗܳܢܳܐ ܕܰܗܘܳܐ ܒܚܰܝܰܘ̈ܗܝ ܘܳܐܦ ܒܳܬܰܪ ܡܰܘܬܶܗ ܡܰܒܽܘܥܳܐ ܕܡܰܪܕܶܐ ܥܽܘܕܪ̈ܳܢܶܐ ܠܰܟܪ̈ܺܝܗܶܐ ܘܰܐܠܺܝ̈ܨܶܐ: ܗܳܢܳܐ ܕܘܰܥܶܕ ܠܶܗ ܡܳܪܶܗ ܡܰܠܟܽܘܬܳܐ ܫܡܰܝܳܢܺܝܬܳܐ ܘܰܐܫܠܛܶܗ ܥܰܠ ܒܶܝܬ ܓܰܙܶܗ ܡܠܐܷ ܟܽܠ ܛܳܒ̈ܳܬܳܐ: ܗܳܢܳܐ ܕܰܙܟܳܐ ܠܗ̇ܳܢܽܘܢ ܕܰܢܨܰܘ ܘܕܰܪܰܪܘ ܥܰܠ ܦܰܓܪܶܗ ܒܝܽܘܡ ܥܽܘܢܕܳܢܶܗ: ܘܠܐ ܫܒܰܩ ܗܘܳܐ ܕܢܶܚܛܦܽܘܢܳܝܗܝ ܘܰܢܦܽܘܫ ܟܽܘܪܚܶܗ ܡܶܢܶܗ ܓܠܺܝܙܳܐ ܘܰܣܦܺܝܩܳܐ: ܗܳܢܳܐ ܕܚܰܘܺܝ ܒܪܽܘܚ ܠܟܽܘܕܰܢܬܳܐ ܗ̇ܳܝ ܕܛܶܥܢܰܬ݀ ܦܰܓܪܶܗ ܘܢܰܓܕܳܗ̇ ܥܰܠ ܫܰܪܝܽܘܬ ܡܰܝ̈ܳܐ ܘܗܰܠܟܰܬ݀ ܣܛܰܪ ܡ̣ܶܢ ܕܒܽܘܪܝܳܐ ܘܰܢܓܽܘܕܝܳܐ ܐ̱ܢܳܫܳܝܳܐ ܒܬܶܗܪܳܐ ܪܰܒܳܐ: ܗܳܢܳܐ ܕܛܶܒܶܗ ܦܪܰܚ ܒܟܽܠܳܗ̇ ܥܳܡܰܪܬܳܐ ܘܰܫܡܶܗ ܝܺܪܶܒ ܒܣܰܘ̈ܦܶܐ ܘܦܶܢ̈ܝܳܬܳܐ: ܗܳܢܳܐ ܕܝܰܗܒ ܢܰܦܫܶܗ ܠܥܰܡ̈ܠܐ ܩܫܰܝ̈ܳܐ: ܘܠܰܣܪ̈ܳܩܶܐ ܘܫܶܢ̈ܕܶܐ ܡܰܪܺܝܪ̈ܶܐ ܕܰܐܪ̈ܺܝܰܐܢܽܘ: ܗ̇ܳܢܽܘܢ ܕܰܒܦܰܪ̈ܙܠܐ ܡܰܚ̈ܡܶܐ ܕܰܒܢܽܘܪܳܐ ܠܦܰܓܪܶܗ ܩܰܕܺܝܫܳܐ ܐܰܘܩܶܕܘ: ܘܰܒܡܰܚ̈ܘܳܬܳܐ ܕܰܓܝܳ̈ܕܶܐ ܦܰܛܺܝܪ̈ܶܐ ܠܒܶܣܪܶܗ ܐܰܫܺܝܚܘ ܘܰܛܠܰܩܘ: ܗܳܢܳܐ ܕܰܟܠܺܝ̈ܠܐ ܬܪܶܝܢ ܩܰܒܶܠ ܚܰܕ ܕܣܳܗܕܽܘܬܳܐ ܘܰܐ̱ܚܪܺܝܢ ܕܥܳܢܘܳܝܽܘܬܳܐ ܘܠܰܬܪ̈ܰܝܗܽܘܢ ܐܶܬܥܰܛܰܦ: ܗܳܢܳܐ ܕܠܐܱܪ̈ܺܝܰܐܢܽܘ ܕܕܳܢܽܘܗܝ ܐܰܒܗܶܬ ܘܰܙܟܳܐ ܘܰܒܬܰܘܕܺܝܬܗܽܘܢ ܡܰܣܠܳܝܬܳܐ ܓܰܚܶܟ: ܘܠܐ ܐܰܙܺܝܥܽܘܗܝ ܠܽܘܚܳܡܰܝ̈ܗܽܘܢ ܘܠܐ ܕܰܚܠܽܘܗܝ ܓܙܳܡܰܝ̈ܗܽܘܢ: ܗܳܢܳܐ ܕܡ̣ܶܢ ܐܰܓܽܘܢܳܐ ܕܣܳܗܕܽܘܬܳܐ ܠܐ ܐܶܙܕܟܺܝ ܐܶܠܐ ܠܟܽܠ ܪ̈ܽܘܚܺܝܢ ܙܟܳܐ ܟܰܕ ܚܳܕܶܐ ܘܕܳܐܶܨ: ܐܶܠܐ ܘܬܽܘܒ  ܩܳܠܐ ܡ̣ܶܢ ܫܡܰܝܳܐ ܩܪܳܐ ܠܶܗ ܟܰܕ ܐܳܡܰܪ: ܐܶܬܚܰܝܠ ܥܰܒܕܝ ܫܰܠܺܝܛܳܐ ܕܰܟܠܺܝܠܳܟ ܓܕܺܝܠ ܘܦܽܘܪܥܳܢܳܟ ܢܛܺܝܪ: ܦܽܘܩ ܬܰܠܡܶܕ ܘܰܐܥܡܶܕ ܘܰܐܟܪܶܙ ܒܫܶܡܝ ܕܰܠܗܳܕܶܐ ܓܒܺܝܬܳܟ ܘܰܦܪܰܫܬܳܟ: ܘܗܳܫܳܐ ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܢܰܗܺܝܪ ܦܰܪܨܽܘܦܶܗ ܘܙܺܝܘܳܐ ܕܰܐܦܰܘ̈ܗܝ ܙܗܶܐ ܘܝܰܬܺܝܪ ܡ̣ܶܢ ܙܰܠܺܝ̈ܩܰܘܗܝ ܫܶܡܫܳܐ ܨܡܰܚ ܒܢܽܘܗܪܳܐ ܐܠܰܗܳܝܳܐ ܕܰܥܠܰܘܗܝ ܐܶܬܓܠܺܝ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܣܰܘܺܝܚ ܒܨܰܘ̈ܡܶܐ ܢܰܓܺܝܪ̈ܶܐ ܘܒܰܨܠܰܘ̈ܳܬܳܐ ܡܬܺܝ̈ܚܳܬܳܐ ܘܰܒܥܰܡ̈ܠܐ ܥܶܓܪ̈ܶܐ ܕܠܰܝ̈ܠܰܝ ܐܺܝܡܳܡ ܡܚܰܘܶܐ ܗܘܳܐ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܥܰܠ ܛܰܠܝܳܐ ܗ̇ܰܘ ܕܒܰܠܥܶܗ ܬܰܢܺܝܢܳܐ ܨܰܠܺܝ ܘܶܐܫܬܰܘܙܰܒ: ܘܟܰܕ ܡܰܐܝ̣ܬ ܓܣܳܝܗܝ ܡ̣ܶܢ ܦܽܘܡܶܗ ܘܰܒܚܺܝܠ ܡܳܪܶܗ ܩܪܳܝܗܝ ܘܰܐܩܺܝܡܶܗ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܦܳܫܰܬ݀ ܕܰܝܪܶܗ ܒܝܽܘܡ ܥܽܘܗܕܳܢܳܐ ܕܺܝܠܶܗ ܟܰܕ ܥܶܛܪܳܐ ܕܒܶܣ̈ܡܶܐ ܘܰܕܗܶܪ̈ܽܘܡܶܐ ܦܳܐܰܚ ܡܶܢܳܗ̇ ܕܶܐܬܬܣܺܝܡ ܒܳܗ̇ ܦܰܓܪܶܗ ܩܰܕܺܝܫܳܐ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܨܶܒܝܳܢܶܗ ܠܐ ܐܶܨܛܒܺܝ ܕܰܢܟܰܬܰܪ ܒܕܽܘܟܬܳܐ ܕܒܳܗ̇ ܐܰܫܠܶܡ ܪܽܘܚܶܗ ܠܥܳܒܽܘܕܶܗ ܘܠܐ ܨܒܳܐ ܕܢܶܫܬܒܶܩ ܦܰܓܪܶܗ ܠܒܰܪ ܡ̣ܶܢ ܕܰܝܪܶܗ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܰܩܒܰܥ ܠܶܗ ܟܽܘܪܚܳܐ ܥܰܠ ܓܶܢ̱ܒ ܢܨܺܝܒܺܝܢ ܐܝܰܟ ܕܢܶܥܡܰܪ ܒܶܗ: ܘܟܰܕ ܐܶܬܩܰܠܰܣ ܡ̣ܶܢ ܒܢܰܝ̈ܢܳܫܳܐ ܫܰܢܺܝ ܠܶܗ ܘܰܠܥܶܠ ܡ̣ܶܢ ܫܳܟܶܢ ܩܪܺܝܬܳܐ ܩܒܰܥ ܫܟܺܝܢܬܶܗ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܪܳܥܡܳܐ ܕܬܶܫܒ̈ܚܳܬܳܐ ܘܰܙܡܺܝܪ̈ܳܬܳܐ ܕܛܰܟܣܺܝ̈ܣ ܥܶܠܳܝ̈ܳܬܳܐ ܐܶܬܡܠܺܝ ܐܰܬܪܳܐ ܗ̇ܰܘ ܕܒܶܗ ܐܶܬܥܰܦܺܝ ܘܶܐܬܝܰܩܰܪ ܦܰܓܪܶܗ ܩܰܕܺܝܫܳܐ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܫܰܢܝܰܬ݀ ܢܰܦܫܶܗ ܡ̣ܶܢ ܦܰܓܪܶܗ ܟܰܕ ܗܽܘ ܒܰܪܺܝܟ ܒܰܨܠܽܘܬܳܐ ܩܕܳܡ ܡܳܪܶܗ ܒܬܶܕܡܽܘܪܬܶܗ ܪܰܒܬܳܐ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܟܰܕ ܚܳܙܶܐ ܠܡܳܪܝ ܫܰܠܺܝܛܳܐ ܕܬܶܫܡܫܬܶܗ ܠܐ ܦܰܣܩܳܗ̇ ܘܬܰܟܫܶܦܬܶܗ ܠܐ ܫܰܠܡܳܗ̇ ܘܒܳܥܽܘܬܶܗ ܠܐ ܫܪܳܗ̇ ܘܡ̣ܶܢ ܗܶܪܓܶܗ ܠܐ ܫܠܐܴ ܟܽܠ ܝܰܘ̈ܡܰܝ ܚܰܝܰܘ̈ܗܝ: ܘܡܶܛܽܠܗܳܕܶܐ ܥܺܕܬܳܐ ܩܰܕܺܝܫܬܳܐ ܕܰܠܥܺܐܕܶܗ ܙܰܝܚܰܬ݀ ܘܰܒܣܺܝܡܰܬ ܓܰܪ̈ܡܰܘܗܝ ܛܶܦܣܰܬ݀ ܚܰܝܠܐ ܘܥܽܘܕܪ̈ܳܢܶܐ ܕܰܬܣܰܒ ܡ̣ܶܢ ܡܳܪܶܗ ܒܰܨܠܰܘ̈ܳܬܶܗ ܫܳܐܠܐ ܘܒܳܥܝܳܐ: ܘܰܡܦܺܝܣܳܐ ܠܶܗ ܢܳܣܒܳܐ ܟܰܕ ܠܶܗ ܐܳܡܪܳܐ: ܕܰܒܥܺܝ ܗܳܟܺܝܠ ܚܠܳܦ ܝܰܠܕ̈ܰܝ ܕܢܶܥܒܪ̈ܳܢ ܡܶܢܗܽܘܢ ܟܽܠ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܢܶܫܬܰܟܰܢ ܠܗܽܘܢ ܙܰܒ̈ܢܶܐ ܡܫܰܝ̈ܢܶܐ ܘܡܰܠܝ̈ܰܝ ܪܘܳܙܳܐ: ܒܥܺܝ ܗܳܟܺܝܠ ܠܪ̈ܳܥܰܘܳܬܳܐ ܒܗܺܝܠܽܘܬܳܐ: ܠܟܳܗ̈ܢܶܐ ܙܰܗܝܽܘܬܳܐ ܠܰܡܫܰܡ̈ܫܳܢܶܐ ܢܰܟܦܽܘܬܳܐ: ܠܕܰܝܪ̈ܳܝܶܐ ܡܣܰܝܒܪܳܢܽܘܬܳܐ: ܠܥܳܢ̈ܘܳܝܶܐ ܘܰܢܙܺܝܪ̈ܶܐ ܡܚܰܡܣܢܳܢܽܘܬܳܐ: ܠܣܳܒ̈ܶܐ ܡܪܰܚܡܳܢܽܘܬܳܐ: ܠܪ̈ܺܝܫܳܢܶܐ ܝܰܩܺܝܪܽܘܬܳܐ: ܠܕܰܝܪ̈ܳܝܶܐ ܬܪܺܝܨܽܘܬܳܐ: ܠܡܰܠܟ̈ܶܐ ܘܫܰܠܺܝ̈ܛܳܢܶܐ ܡܫܰܝܢܽܘܬܳܐ: ܠܓܰܒܪ̈ܶܐ ܘܰܠܢܶܫ̈ܶܐ ܫܰܘܝܽܘܬܳܐ: ܠܰܥܠܰܝ̈ܡܶܐ ܦܳܪܽܘܫܽܘܬܳܐ: ܠܰܛܠܳܝ̈ܶܐ ܫܰܦܝܽܘܬܳܐ: ܠܫܰܒܪ̈ܶܐ ܘܝܰܠܽܘ̈ܕܶܐ ܬܰܪܒܺܝܬܳܐ ܛܳܒܬܳܐ: ܘܰܠܥܰܪܣܳܐ ܕܫܰܘܬܳܦܽܘܬܳܐ ܩܰܕܺܝܫܽܘܬܳܐ: ܘܰܠܟܽܠܰܢ ܚܰܪܬܳܐ ܛܳܒܬܳܐ ܘܰܡܫܰܡܠܳܝܬܳܐ ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܒܳܗ̈ܶܐ ܘܰܐܚ̈ܶܐ ܘܪ̈ܰܒܳܢܶܐ ܕܺܝܠܰܢ ܢܝܳܚܳܐ ܘܒܽܘܣܳܡܳܐ ܒܰܓܢܽܘܢܳܐ ܠܐ ܡܶܫܬܰܪܝܳܢܳܐ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܠܚܰܕܽܘܬܳܐ ܗ̇ܳܝ ܓܳܘܳܢܳܝܬܳܐ ܘܠܰܕܝܳܨܳܐ ܪܽܘܚܳܢܳܝܳܐ ܕܥܰܡ ܟܺܐܢ̈ܶܐ ܢܶܫܬܘܶܐ: ܐܰܝܟܰܢܳܐ ܕܰܕܠܐ ܫܶܠܝܳܐ ܫܽܘܒܚܳܐ ܐܰܡܺܝܢܳܐ ܢܰܣܶܩ: ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܪܺܝܚܳܐ ܗܰܢܺܝܳܐܐ ܕܣܳܩܽܘܗܝ ܡܺܝ̈ܬܶܐ ܘܰܚܝܰܘ ܒܶܗ: ܘܥܶܛܪܳܐ ܕܬܰܪܥܽܘܬܳܐ ܕܪܰܥܺܝ ܠܐܒܽܘܗܝ ܥܰܡ ܒܶܪ̈ܝܳܬܶܗ: ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܡ̣ܶܢ ܐܺܝܕܰܝ̈ܢ ܚܰܠܳܫ̈ܳܬܳܐ: ܘܰܐܝܟ ܕܶܐܬܪܰܥܺܝ ܨܶܒܝܳܢܳܐ ܕܪܰܒܽܘܬܳܐ ܕܺܝܠܳܟ ܒܥܶܛܪ̈ܰܝܗܽܘܢ ܕܰܐܒܳܗ̈ܳܬܳܐ ܡܪ̈ܰܥܝܳܢܰܝܟ: ܘܰܒܕܶܒܚܰܝ̈ܗܽܘܢ ܕܰܪ̈ܚܽܘܡܰܝܟ: ܨܒܺܝ ܐܳܦ ܗܳܫܳܐ ܘܩܰܒܶܠ ܨܠܰܘ̈ܳܬܰܢ ܡܚܺܝ̈ܠܳܬܳܐ ܘܬܰܟܫ̈ܦܳܬܳܐ ܕܺܝܠܰܢ ܒܨܺܝܪ̈ܳܬܳܐ: ܘܒܳܥ̈ܘܳܬܰܢ ܫܺܝ̈ܛܳܬܳܐ: ܒܰܨܠܽܘܬ ܪܚܽܘܡܳܟ ܡܳܪܝ ܫܰܠܺܝܛܳܐ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܫܰܟܶܢ ܠܰܢ ܡܳܪܝܳܐ ܐܠܰܗܳܐ ܚܰܝ̈ܶܐ ܕܠܐ ܣܳܐܒܶܝܢ ܒܝܰܕ ܨܠܰܘ̈ܳܬܶܗ ܕܰܥܛܺܝܦ ܙܳܟܽܘܬܳܐ ܡܳܪܝ ܫܰܠܺܝܛܳܐ: ܕܗܰܠܶܟ ܥܰܠ ܡܰܝ̈ ܕܶܩܠܰܬ݀ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ ܘܨܰܠܺܝ ܘܰܐܫܠܶܡ ܪܽܘܚܶܗ ܥܰܠ ܕܰܚܙܳܬܶܗ ܗܘܳܬ ܐܰܢ̱ܬܬܳܐ ܕܰܡܗܰܠܶܟ ܥܰܠ ܪܶܕܝܳܐ: ܐܰܢ̱ܬ ܡܳܪܝ ܕܰܠܐܴ ܠܰܢ ܡ̣ܶܢ ܛܽܘܒܳܥܳܐ ܕܥܳܠܡܳܐ ܝܰܡܳܐ ܕܰܚܛܳܗ̈ܶܐ: ܘܡ̣ܶܢ ܫܽܘܒܚܳܐ ܚܬܺܝܪܳܐ ܢܰܟܪܺܝ ܠܰܢ: ܘܡ̣ܶܢ ܒܶܗܬܰܬ݀ ܐܰܦ̈ܶܐ ܕܰܩܕܳܡܰܝܟ ܦܰܨܳܐ ܠܰܢ ܕܢܰܘܕܶܐ ܠܳܟ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܢܶܣܓܽܘܕ ܘܰܢܫܰܒܰܚ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܐܘܪܶܒ ܕܽܘܟܪܳܢ ܓܰܒܝܳܐ ܡܳܪܝ ܫܰܠܺܝܛܳܐ ܒܰܫܡܰܝܳܐ ܘܒܰܐܪܥܳܐ: ܠܗܰܘ ܕܡܰܒܰܥ ܡ̣ܶܢ ܓܰܪ̈ܡܰܘܗܝ ܕܰܐܬܠܺܝܛܳܐ ܟܽܠ ܐܳܣܘ̈ܳܬܳܐ ܘܥܽܘܕܪ̈ܳܢܶܐ ܠܰܡ̈ܡܰܚܰܝܳܐ ܠܗܰܘ ܕܰܐܫܪܺܝ ܚܰܝܠܶܗ ܐܠܰܗܳܝܳܐ ܒܥܰܦܪܳܐ ܘܕܰܚܺܝܚܳܐ ܕܥܰܒܕ̈ܰܘܗܝ: ܘܰܥܕܰܡܳܐ ܠܫܽܘܠܳܡܳܐ ܡܢܰܛܰܪ ܠܗܽܘܢ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܟܰܕ ܠܥܺܐܕܳܐ ܫܒܺܝܚܳܐ ܘܚܰܕܽܘܬܳܢܳܝܳܐ ܕܢܰܨܺܝܚ ܫܽܘܦܪ̈ܶܐ ܡܳܪܝ ܫܰܠܺܝܛܳܐ ܐܶܬܛܰܝܰܒܢܰܢ ܘܶܐܬܰܝܢܰܢ: ܐܰܝܟܰܢܳܐ ܕܢܶܓܕܽܘܠ ܟܠܺܝ̈ܠܐ ܠܰܡܥܰܠܝܽܘܬܶܗ ܘܠܐ ܬܶܡܢܶܐ ܠܰܢ ܡ̣ܶܢ ܫܳܗܪ̈ܶܐ ܒܰܛܺܝ̈ܠܐ: ܘܠܐ ܡ̣ܶܢ ܦܳܥ̈ܠܐ ܗ̇ܳܢܽܘܢ ܕܠܐ ܥܰܠܘ ܠܟܰܪܡܳܐ ܕܺܝܠܳܟ ܘܠܐ ܢܛܰܪܘ ܦܽܘܩ̈ܕܳܢܶܐ ܕܺܝܠܳܟ ܐܶܘܢܓܶܠܳܝ̈ܶܐ: ܚܢܰܢ ܡܳܪܝ ܟܶܢܫܳܐ ܕܰܡܗܰܝ̈ܡܢܶܐ ܬܪ̈ܺܝܨܰܝ ܫܽܘܒܚܳܐ: ܕܰܢܛܰܪܢܰܢ ܦܽܘܩ̈ܕܳܢܰܝܟ ܘܰܥܡܰܕܢ ܒܡܰܥܡܽܘܕܺܝܬܳܟ ܘܩܰܒܶܠܢܰܢ ܢܳܡܽܘ̈ܣܶܐ ܕܺܝܠܳܟ: ܘܰܠܥܺܐܕܳܐ ܦܨܺܝܚܳܐ ܕܚܰܓܳܐ ܗܳܢܳܐ ܪܽܘܚܳܢܳܝܳܐ ܕܦܳܠܚܳܐ ܕܺܝܠܳܟ ܢܰܨܺܝܚܳܐ ܡܳܪܝ ܫܰܠܺܝܛܳܐ ܨܳܒܶܝܢܰܢ ܠܰܡܝܰܩܳܪܽܘ: ܡܳܪܝ ܫܰܠܺܝܛܳܐ ܕܰܐܪܦܺܝ ܠܗܰܝܡܳܢܽܘܬܳܐ ܘܛܳܥܝܽܘܬܳܐ ܕܰܐܒܳܗܰܘ̈ܗܝ ܘܰܪܚܶܡ ܕܰܒܝܶܫܽܘܥ ܡܫܺܝܚܳܐ: ܡܳܪܝ ܫܰܠܺܝܛܳܐ ܕܩܰܒܶܠ ܪܕܽܘܦܝܳܐ ܡܰܪܺܝܪܳܐ ܡ̣ܶܢ ܐܰܪ̈ܝܰܐܢܽܘ ܒܢ̈ܰܝ ܓܰܒܶܗ ܕܰܐܪܺܝܽܘܣ ܕܳܐܡܪܺܝܢ ܗܘܰܘ ܠܶܗ ܕܰܡܫܺܝܚܳܐ ܕܶܝܢ ܒܰܪܝܰܐ ܗ̱ܘ: ܡܳܪܝ ܫܰܠܺܝܛܳܐ ܕܰܐܒܗܶܬ ܠܕܰܝܳܢܳܐ ܚܰܢܦܳܐ ܘܠܐܱܪܝܰܐܢܽܘܣ ܘܚܰܝܶܠ ܘܠܰܒܶܒ ܠܓܰܒܳܐ ܕܰܟܪ̈ܺܝܣܛܝܳܢܶܐ ܐܰܝܠܶܝܢ ܕܰܪ̈ܕܺܝܦܺܝܢ ܗܘܰܘ: ܡܳܪܝ ܫܰܠܺܝܛܳܐ ܕܰܒܢܳܐ ܠܶܗ ܟܽܘܪܚܳܐ ܠܥܶܠ ܡ̣ܶܢ ܢܨܺܝܒܺܝܢ ܡܕܺܝܢ̱ܬܳܐ: ܘܰܟܠܐ ܠܡܰܠܐܟܳܐ ܕܪܽܘܓܙܳܐ ܗ̇ܰܘ ܕܚܳܪܶܒ ܗܘܳܐ ܒܳܗ̇: ܘܰܐܣܺܝ ܗܘܳܐ ܠܰܟܪ̈ܺܝܗܶܐ ܕܰܫܚܺܝܩܺܝܢ ܗܘܰܘ ܒܳܗ̇: ܡܳܪܝ ܫܰܠܺܝܛܳܐ ܕܦܰܪܣܺܝ ܠܰܨܢܺܝ̈ܥܶܐ ܘܰܐܒܗܶܬ ܠܚܰܪ̈ܳܫܶܐ ܘܰܙܟܳܐ ܘܟܰܐܐܰܪ ܠܟܰܠܩܺܝ̈ܕܽܘܢܳܝܶܐ ܠܺܝ̈ܛܶܐ ܘܡܰܣ̈ܠܰܝܳܐ: ܡܳܪܝ ܫܰܠܺܝܛܳܐ ܕܶܐܬܚܰܒܰܪ ܠܪܰܒܳܐ ܘܓܰܒܝܳܐ ܡܳܪܝ ܐܰܘܓܺܝܢ: ܪܺܝܫ ܣܺܝܥܬܳܐ ܐܠܰܗܳܝܬܳܐ ܕܛܽܘ̈ܒܳܢܶܐ: ܘܰܨܡܰܚ ܘܶܐܬܳܐ ܠܰܢ ܡ̣ܶܢ ܐܰܪܥܳܐ ܕܡܶܨܪܶܝܢ ܚܶܫܽܘܟܬܳܐ: ܡܛܳܐ ܠܐܬܪܳܐ ܕܺܝܠܰܢ ܘܰܥܕܰܡܳܐ ܠܡܰܕܢܚܳܐ ܐܰܢܗܰܪ ܘܬܰܠܡܶܕ ܘܰܐܟܪܶܙ ܘܰܐܠܶܦ ܡܳܪܝ ܫܰܠܺܝܛܳܐ ܕܢܰܚܶܡ ܠܛܰܠܝܳܐ ܙܥܽܘܪܳܐ ܗ̇ܰܘ ܕܥܰܡ ܐܰܚܽܘܗܝ ܩܳܐܫܺܝܢ ܗܘܰܘ ܩܰܝ̈ܣܶܐ ܡ̣ܶܢ ܥܳܒܳܐ: ܘܒܰܠܥܶܗ ܗܘܳܐ ܬܰܢܺܝܢܳܐ ܠܺܝܛܳܐ ܘܰܩܪܳܐ ܠܶܗ ܠܒܰܪ ܘܰܓܣܳܐ ܠܛܰܠܝܳܐ ܟܰܕ ܠܰܝܬ ܒܶܗ ܢܰܦܫܳܐ: ܘܢܰܚܡܶܗ ܘܰܐܚܺܝ ܡܳܪܶܗ ܫܰܡܗܶܗ: ܘܶܐܬܕܰܡܰܪܘ ܡܳܪܝ ܐܰܘܓܺܝܢ ܘܡܳܪܝ ܝܰܥܩܽܘܒ ܪܳܥܝܳܐ ܕܰܢܨܺܝܒܺܝܢ ܒܬܶܕܡܽܘܪܬܳܐ ܘܫܰܒܰܚܘ ܠܐܠܳܗܳܐ: ܡܳܪܝ ܫܰܠܺܝܛܳܐ ܕܗܰܠܶܟ ܥܰܠ ܡܰܝ̈ܳܐ ܕܕܶܩܠܰܬ݀ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ: ܘܟܰܕ ܚܙܳܬܶܗ ܗܘܳܬ ܐܰܢ̱ܬܬܳܐ ܡܳܠܝܰܬ݀ ܡܰܝ̈ܳܐ ܕܥܰܠ ܪܶܕܝܳܐ ܕܝܰܡܳܐ ܪܳܗܶܛ: ܪܶܗܛܰܬ݀ ܗܘܳܬ ܠܰܩܪܺܝܬܳܐ ܘܫܶܒܩܰܬ݀ ܗܘܳܬ ܩܽܘܠܬܳܗ̇ ܥܰܠ ܕܶܩܠܰܬ ܘܶܐܡܪܰܬ݀ ܠܐܢܳܫ̈ܳܐ ܕܒܰܩܪܺܝܬܳܐ: ܬܰܘ ܚܙܰܘ ܠܓܰܒܪܳܐ ܕܰܐܠܳܗܳܐ ܕܥܰܠ ܡܰܝ̈ܳܐ ܡܗܰܠܶܟ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ: ܘܗܽܘ ܩܰܕܺܝܫܳܐ ܟܰܕ ܚܙܳܐ ܕܰܒܥܳܐ ܠܶܗ ܒܺܝܫܳܐ ܕܢܶܓܢܒܺܝܘܗܝ ܒܫܽܘܒܚܳܐ ܣܪܺܝܩܳܐ: ܨܰܠܺܝ ܘܶܐܡܰܪ ܡܳܪܝܳܐ ܘܰܐܠܳܗܝ ܣܰܒ ܠܢܰܦܫܳܐ ܕܺܝܠܝ ܕܰܒܥܳܐ ܣܳܛܳܢܳܐ ܕܰܢܥܰܘܟܰܢܝ: ܠܐ ܐܶܬܓܠܶܙ ܡ̣ܶܢ ܫܽܘܒܚܳܐ ܕܺܝܠܳܟ: ܘܟܰܕ ܐܶܬܰܘ ܐ̱ܢܳܫ̈ܳܐ ܕܰܩܪܺܝܬܳܐ ܗ̇ܳܝ ܚܙܰܘ ܕܒܰܪܺܝܟ ܒܰܨܠܽܘܬܳܐ: ܘܟܰܕ ܩܪܶܒܘ ܠܘܳܬܶܗ ܚܙܰܘ ܕܰܐܫܠܶܡ ܗܘܳܐ ܪܽܘܚܶܗ ܟܰܕ ܣܺܝܡ ܪܺܝܫܶܗ ܒܶܝܬ ܒܽܘܪ̈ܟܰܘܗܝ: ܘܶܐܬܒܰܪܰܟܘ ܡܶܢܶܗ ܘܶܐܬܬܰܢܰܚܘ ܘܰܒܟܰܘ ܣܰܓܺܝ ܕܰܚܙܰܘ ܕܡ̣ܶܢ ܟܰܕܽܘ ܡܺܝܬ ܠܶܗ: ܘܩܰܪܶܒ ܠܶܗ ܣܶܓ̈ܕܳܬܳܐ ܘܰܒܥܰܘ ܕܢܰܘܒܠܽܘܢ ܠܰܩܪܺܝܬܳܐ ܕܺܝܠܗܽܘܢ ܠܦܰܓܪܶܗ ܩܰܕܺܝܫܳܐ: ܘܰܕܢܶܒܢܽܘܢ ܥܠܰܘܗܝ ܥܺܕܬܳܐ ܘܗܰܝܟܠܐ ܕܫܳܘܶܐ ܗܘܳܐ ܠܶܗ: ܘܟܰܕ ܐܶܬܟܰܢܰܫܘ ܗܘܰܘ ܐ̱ܢܳܫ̈ܳܐ ܕܰܐܬܪܳܐ ܗ̇ܰܘ: ܘܰܗܘܳܐ ܚܶܪܝܳܢܳܐ ܪܰܒܳܐ ܘܰܒܥܰܘ ܕܢܶܚܪܒܽܘܢ ܠܰܚܕ̈ܳܕܶܐ ܒܣܰܝ̈ܦܶܐ ܘܰܗܘܳܐ ܓܶܠܝܳܢܳܐ ܡ̣ܶܢ ܐܠܰܗܳܐ ܕܰܐܝܬܰܘ ܟܽܘܕܰܢܝܳܐ ܙܥܽܘܪܳܐ ܕܠܐ ܡܟܰܒܰܫ ܘܣܺܝܡܽܘܢܳܝܗܝ ܥܠܰܘܗܝ: ܘܰܐܝܟܳܐ ܕܨܳܒܶܐ ܐܠܰܗܳܐ ܘܗܽܘ ܩܰܕܺܝܫܳܐ ܡܶܬܬܢܺܝܚ ܬܰܡܳܢ ܢܶܫܪܶܐ: ܘܟܽܠܰܢ ܢܶܫܬܘܶܐ ܘܢܶܥܒܶܕ ܥܺܕܬܳܐ ܘܕܰܝܪܳܐ ܪܰܒܬܳܐ: ܘܰܥܒܰܕܘ ܐܰܝܟ ܕܶܐܬܦܰܩܰܕܘ ܘܫܰܠܶܡ ܣܽܘܥܪܳܢܳܐ ܘܶܐܬܬܰܩܰܢ ܘܟܽܠ ܐ̱ܢܳܫ ܫܰܒܰܚܘ ܠܐܠܳܗܳܐ ܥܰܠ ܫܰܦܺܝܪܽܘܬ ܣܳܥܽܘܪ̈ܘܳܬܶܗ ܕܠܶܗ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܒܰܚܘܺܝܚܽܘܬܳܐ ܐܶܬܰܝܢܰܢ: ܠܰܡܝܰܩܳܪܽܘ ܠܕܽܘܟܪܳܢܶܗ ܕܢܰܨܺܝܚܳܐ ܡܳܪܝ ܫܰܠܺܝܛܳܐ ܒܰܙܡܺܝܪ̈ܳܬܳܐ ܘܗܽܘ̈ܠܳܠܐ ܕܪܽܘܚܳܐ ܩܰܕܺܝܫܳܐ: ܕܗܽܘ ܢܶܗܘܶܐ ܒܰܥܳܝܳܐ ܚܠܳܦܰܝܢ ܘܰܡܦܺܝܣܳܢܳܐ ܒܗܳܢܳܐ ܥܳܠܡܳܐ ܘܰܒܗܰܘ ܕܰܥܬܺܝܕ: ܕܰܒܝܰܕ ܨܠܰܘ̈ܳܬܶܗ ܢܚܰܣܶܐ ܠܰܢ ܐܠܰܗܳܐ ܟܽܠ ܕܰܚܛܰܝܢܰܢ: ܘܢܶܫܒܽܘܩ ܠܰܢ ܟܽܠܗܶܝܢ ܣܰܟܠܘ̈ܳܬܰܢ: ܘܢܶܥܛܶܐ ܠܰܢ ܟܽܠܗܶܝܢ ܠܐ ܢܳܡܽܘܣܳܝ̈ܘܳܬܰܢ: ܘܰܢܩܺܝܡ ܠܰܢ ܡ̣ܶܢ ܝܰܡܺܝܢܶܗ ܥܰܡ ܩܰܕܺܝ̈ܫܰܘܗܝ ܕܰܥܒܰܕܘ ܨܶܒܝܳܢܶܗ ܘܢܶܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܥܢܰܕܘ ܒܰܬܪܺܝܨܽܘܬ ܫܽܘܒܚܳܐ: ܘܡܰܘܕܶܝܢܰܢ ܠܳܟ ܥܰܠ ܟܽܠܗܶܝܢ ܛܰܝܒ̈ܘܳܬܳܟ ܕܰܠܘܳܬܰܢ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܬܪܥܣܪ ܫܠܝ̈ܚܐ ܩܕܝ̈ܫܐ ܕܡܪܢ ܝܫܘܥ ܡܫܝܚܐ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܒܝܰܕ ܬܰܟܫ̈ܦܳܬܳܐ ܕܰܬܪܶܥܣܰܪ ܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܠܐ ܡܶܨܛܰܠܝ̈ܳܢܶܐ ܘܠܐ ܡܶܙܕܰܥ̈ܙܥܳܢܶܐ ܒܬܰܘܕܺܝܬܳܐ ܕܺܝܠܗܽܘܢ ܢܟܰܬܰܪ: ܘܰܒܕܽܘܒܳܪ̈ܶܐ ܢܰܨܺܝ̈ܚܶܐ ܢܰܦܪܶܓ: ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ ܐܠܰܗܳܐ ܣܰܒܪܳܐ ܕܚܰܝܰܝ̈ܢ: ܘܦܳܪܽܘܩܳܐ ܕܢܰܦ̈ܫܳܬܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܗܰܘ ܡܶܠܬܳܐ ܐܠܰܗܳܐ ܕܡ̣ܶܢ ܐܠܰܗܳܐ: ܢܽܘܗܪܳܐ ܫܰܪܺܝܪܳܐ ܕܡ̣ܶܢ ܢܽܘܗܪܳܐ ܫܰܪܺܝܪܳܐ: ܗ̇ܰܘ ܕܡ̣ܶܢ ܐܰܒܳܐ ܐܶܫܬܰܕܰܪܬ ܐܰܝܟ ܡܶܠܬܳܟ ܒܚܰܪܰܬ ܙܰܒ̈ܢܶܐ: ܐܰܝܟܰܢܳܐ ܕܠܰܒܪܺܝܬܳܐ ܕܰܥܓܺܝܢܳܐ ܗܘܳܬ݀ ܒܚܶܫܽܘܟܳܐ ܕܕܶܚܠܰܬ݀ ܫܺܐܕ̈ܶܐ: ܕܬܰܢܗܪܺܝܗ̇ ܒܢܽܘܗܪܳܟ ܡܬܽܘܡܳܝܳܐ: ܗ̇ܰܘ ܕܰܓܒܰܝܬ ܠܳܟ ܓܽܘܕܳܐ ܕܰܬܪܶܥܣܰܪ ܨܶܡ̈ܚܶܐ ܐܺܝܡܳܡܳܝ̈ܶܐ: ܘܬܽܘܒ ܕܫܰܒܥܺܝܢ ܘܰܬܪܶܝܢ ܟܰܘܟ̈ܒܶܐ ܫܶܡܫܳܢܳܝ̈ܶܐ: ܘܰܡܠܰܝܬ ܐܶܢܽܘܢ ܢܽܘܗܪܳܐ ܕܺܝܠܳܟ: ܘܫܰܕܰܪܬ ܐܶܢܽܘܢ ܠܡܰܢܗܳܪܽܘ ܠܟܽܠܗܽܘܢ ܐܰܝܠܶܝܢ ܕܰܒܚܶܫܽܘܟܳܐ ܕܛܳܥܝܽܘܬܳܐ ܪܡܶܝܢ ܗܘܰܘ: ܘܰܢܩܰܪܒܽܘܢ ܐܶܢܽܘܢ ܠܺܝܕܰܥܬܳܐ ܕܚܰܕ ܐܠܰܗܳܐ ܫܰܪܺܝܪܳܐ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܫܶܡܫܳܐ ܕܙܰܕܺܝܩܽܘܬܳܐ ܕܰܐܢܗܰܪ ܒܕܶܢܚܶܗ ܠܟܽܠܳܗ̇ ܥܳܡܰܪܬܳܐ: ܘܰܒܙܰܠܺܝ̈ܩܰܘܗܝ ܐܰܥܪܶܩ ܠܠܺܠܝܳܐ ܕܛܳܥܝܽܘܬܳܐ ܡ̣ܶܢ ܐܰܦ̈ܰܝ ܟܽܠܳܗ̇ ܒܪܺܝܬܳܐ: ܗ̇ܰܘ ܕܰܓܒܰܝܬ ܠܪܰܒܽܘܬܳܟ ܓܽܘܕܳܐ ܕܰܬܪܶܥܣܰܪ ܨܰܝ̈ܳܕܰܝ ܢܽܘ̈ܢܶܐ ܐ̱ܢܳܫ̈ܳܐ ܦܫܺܝ̈ܛܶܐ: ܒܽܘܪ̈ܶܐ ܘܗܶܕܝܽܘ̈ܛܶܐ: ܒܨܺܝܪ̈ܶܐ ܘܡܶܣ̈ܟܺܢܶܐ: ܘܚܰܘܺܝܬ ܠܗܽܘܢ ܐܽܘܪܚܳܐ ܕܡܰܘܒܠܐ ܠܡܰܠܟܽܘܬܳܐ ܕܰܫܡܰܝܳܐ: ܒܝܰܕ ܚܰܝ̈ܠܐ ܘܳܐܬܘ̈ܳܬܳܐ ܕܰܣܥܰܪܬ ܩܕܳܡܰܝܗܽܘܢ ܒܥܰܡܳܐ: ܘܫܰܘܕܰܥܬ ܐܶܢܽܘܢ ܥܰܠ ܐܰܒܳܐ ܘܪܽܘܚܳܐ ܕܰܫܘܶܝܢ ܠܳܟ ܒܽܐܘܣܺܝܰܐ ܕܰܐܠܳܗܽܘܬܳܐ: ܘܰܐܠܶܦܬ ܐܶܢܽܘܢ ܡܰܟܺܝܟܽܘܬܳܐ ܘܢܺܝܚܽܘܬܳܐ ܘܒܰܣܺܝܡܽܘܬܳܐ ܒܡܶܠܬܳܐ ܘܒܰܥܒܳܕܳܐ: ܘܰܢܓܰܕܬ ܐܶܢܽܘܢ ܠܘܳܬ ܚܰܫܰܝ̈ܟ ܘܰܨܠܺܝܒܽܘܬܳܟ ܨܶܒܝܳܢܳܝܬܳܐ: ܘܰܐܩܢܰܝܬ ܐܶܢܽܘܢ ܡܣܰܝܒܪܳܢܽܘܬܳܐ ܕܰܒܟܽܠ ܢܶܣܝܽܘ̈ܢܺܝܢ: ܘܰܡܠܰܝܬ ܐܶܢܽܘܢ ܫܠܳܡܳܐ ܘܫܰܝܢܳܐ: ܘܰܙܪܰܥܬ ܒܗܽܘܢ ܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ: ܘܰܒܡܰܦܽܘܚܺܝܬܳܐ ܝܰܗܒܬ ܠܗܽܘܢ ܪܽܘܚܳܐ ܩܰܕܺܝܫܳܐ: ܘܰܐܓܥܶܠܬ ܒܺܐܝܕܰܝ̈ܗܽܘܢ ܩܠܺܝ̈ܕܶܐ ܕܡܰܠܟܽܘܬܳܐ ܕܰܫܡܰܝܳܐ: ܕܢܶܦܬܚܽܘܢ ܘܢܶܐܚܕܽܘܢ ܘܢܶܐܣܪܽܘܢ ܘܢܶܫܪܽܘܢ: ܘܫܰܕܰܪܬ ܐܶܢܽܘܢ ܠܡܰܟܪܳܙܽܘ ܣܒܰܪܬܳܟ ܒܟܽܠܳܗ̇ ܐܰܪܥܳܐ: ܘܰܢܬܰܠܡܕܽܘܢ ܘܢܰܥܡܕܽܘܢ ܠܥܰܡܳܐ ܘܰܠܥܰܡ̈ܡܶܐ ܒܰܫܡܳܐ ܕܰܐܒܳܐ ܘܕܰܒܪܳܐ ܘܪܽܘܚܳܐ ܩܰܕܺܝܫܳܐ: ܕܰܢܦܰܠܓܽܘܢ ܐ̱ܪ̈ܳܙܶܐ ܠܰܡܗܰܝ̈ܡܢܶܐ ܠܚܽܘܣܳܝܳܐ: ܘܫܰܕܰܪܬ ܠܗܽܘܢ ܡ̣ܶܢ ܠܘܳܬ ܐܰܒܳܐ ܘܪܽܘܚܳܐ ܦܰܪܰܩܠܺܝܛܳܐ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ: ܘܰܡܠܐܴ ܐܶܢܽܘܢ ܟܽܠ ܚܶܟ̈ܡܳܬܳܐ ܘܝܰܕ̈ܥܳܬܳܐ ܘܰܒܟܽܠ ܠܶܫܳܢ ܝܺܠܶܦܘ ܕܰܢܡܰܠܠܽܘܢ ܘܢܰܠܦܽܘܢ: ܘܟܰܕ ܗܳܠܶܝܢ ܫܽܘ̈ܟܳܢܶܐ ܡܥܰܠܰܝ̈ܳܐ ܩܰܒܶܠܘ: ܫܩܰܠܘ ܫܡܳܟ ܣܓܺܝܕܳܐ ܥܠܰܝܗܽܘܢ: ܘܢܺܝܪܳܟ ܩܰܠܺܝܠܐ ܘܒܰܣܺܝܡܳܐ: ܘܶܐܬܒܰܕܰܪܘ ܒܟܽܠܳܗ̇ ܡܶܬܥܰܡܪܳܢܺܝܬܳܐ: ܟܰܕ ܡܶܣܟܺܝܢܺܝܢ ܨܪܺܝܟܺܝܢ ܘܫܺܝܛܺܝܢ: ܘܥܰܪܛܶܠܺܝܢ ܘܚܶܦܝܳܝܺܝܢ: ܘܰܒܗܳܢܳܐ ܐܶܣܟܺܡܳܐ ܒܰܣܝܳܐ ܫܰܪܺܝܘ ܡܡܰܠܠܺܝܢ ܒܟܽܠ ܠܶܫܳܢ ܬܶܕܡܪ̈ܳܬܳܟ: ܘܡܰܠܦܺܝܢ ܠܟܽܠ ܥܰܡ̈ܡܺܝܢ ܐܽܘܪܚܳܐ ܕܡܰܠܟܽܘܬܳܟ: ܟܰܕ ܥܳܒܕܺܝܢ ܒܰܫܡܳܟ ܟܽܠ ܬܶܕܡܪ̈ܳܬܳܐ ܪܰܘܪ̈ܒܳܬܳܐ: ܟܰܕ ܡܕܰܟܶܝܢ ܓܰܪ̈ܒܶܐ: ܟܰܕ ܡܰܚܠܡܺܝܢ ܟܪ̈ܺܝܗܶܐ ܟܰܕ ܡܰܪܗܛܺܝܢ ܚܓܺܝܪ̈ܶܐ: ܟܰܕ ܡܚܰܝܨܺܝܢ ܡܫܰܪ̈ܰܝܳܐ: ܟܰܕ ܡܢܰܚܡܺܝܢ ܡܺܝ̈ܬܶܐ: ܟܰܕ ܬܳܪܨܺܝܢ ܟܦܺܝ̈ܦܶܐ: ܟܰܕ ܛܳܪܕܺܝܢ ܕܰܝ̈ܘܶܐ: ܟܰܕ ܡܫܰܘܙܒܺܝܢ ܠܡܶܬܬܰܥܒ̈ܕܳܢܶܐ: ܟܰܕ ܡܰܢܗܪܺܝܢ ܠܚܶܫܽܘ̈ܟܶܐ: ܟܰܕ ܡܬܰܠܡܕܺܝܢ ܠܰܡܗܰܝ̈ܡܢܶܐ: ܟܰܕ ܡܰܥܡܕܺܝܢ ܠܰܡܗܰܝ̈ܡܢܶܐ: ܟܰܕ ܡܚܰܕܶܝܢ ܠܚܰܛܳܝ̈ܶܐ: ܟܰܕ ܡܰܥܬܪܺܝܢ ܠܒܳܝ̈ܫܶܐ: ܟܰܕ ܡܦܰܬܚܺܝܢ ܣܡܰܝ̈ܳܐ: ܟܰܕ ܡܰܫܡܥܺܝܢ ܕܽܘ̈ܓܶܐ: ܟܰܕ ܡܣܰܒܪܺܝܢ ܡܰܠܟܽܘܬܳܐ ܕܰܫܡܰܝܳܐ ܕܠܐ ܒܳܛܠܐ: ܟܰܕ ܡܒܰܗܬܺܝܢ ܒܡܶܠܬܳܟ ܠܚܰܟܺܝ̈ܡܶܐ: ܟܰܕ ܙܳܟܶܝܢ ܠܚܰܝܠܬܳܢ̈ܶܐ ܒܚܰܝܠܳܟ: ܟܰܕ ܠܟܽܠ ܐ̱ܢܳܫ ܒܣܳܥܽܘܪܽܘܬ ܬܶܕܡܪ̈ܳܬܳܟ: ܟܰܕ ܣܳܚܦܺܝܢ ܒܶܝܬ ܦܬܰܟܪ̈ܶܐ ܘܒܳܢܶܝܢ ܥܺܕ̈ܳܬܳܐ: ܟܰܕ ܗܳܓܡܺܝܢ ܒܶܝܬ ܨܰܠܡ̈ܶܐ ܘܢܳܨܒܺܝܢ ܕܰܝܪ̈ܳܬܳܐ: ܟܰܕ ܡܳܠܶܝܢ ܠܟܽܠ ܐ̱ܢܳܫ ܡ̣ܶܢ ܡܰܘܗ̈ܒܳܬܳܟ: ܟܰܕ ܡܩܺܝܡܺܝܢ ܟܳܗ̈ܢܶܐ ܘܪ̈ܺܝܫܰܝ ܟܳܗ̈ܢܶܐ ܒܰܡܕܺܝ̈ܢܳܬܳܐ: ܟܰܕ ܟܽܠܝܽܘܡ ܚܰܕܬܳܐܝ̣ܬ ܡܰܟܪܙܺܝܢ ܡܶܠܬܳܐ ܕܝܽܘܠܦܳܢܰܝ̈ܟ: ܟܰܕ ܟܽܠ ܝܽܘܡ ܡܳܝܬܺܝܢ ܗܘܰܘ: ܟܰܕ ܡܶܛܽܠܳܬܳܟ ܡܶܬܢܰܓܕܺܝܢ ܗܘܰܘ: ܟܰܕ ܡܶܛܽܠ ܫܡܳܟ ܡܶܨܛܰܥܪܺܝܢ ܗܘܰܘ: ܟܰܕ ܥܰܠ ܐܰܦܰܝ̈ܟ ܥܰܠ ܐܽܘܠܨܳܢܺܝ̈ܢ ܣܳܒܠܺܝܢ ܗܘܰܘ: ܟܰܕ ܚܠܳܦ ܥܳܢ̈ܳܟ ܦܰܓܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܰܫܠܡܺܝܢ ܗܘܰܘ: ܟܰܕ ܡܶܛܽܠ ܡܰܪܥܺܝܬܳܟ ܩܢܽܘܡܰܝ̈ܗܽܘܢ ܠܟܽܠ ܬܰܫܢܺܝ̈ܩܺܝܢ ܝܳܗܒܺܝܢ ܗܘܰܘ: ܟܰܕ ܟܽܠ ܫܳܥ ܨܠܰܘ̈ܳܬܳܐ ܚܠܳܦܰܝܗܽܘܢ ܠܳܟ ܡܩܰܪܒܺܝܢ ܗܘܰܘ: ܟܰܕ ܗܳܠܶܝܢ ܘܕܰܐܝܟ ܗܳܠܶܝܢ ܒܺܝ̈ܫܳܬܳܐ ܡܩܰܒܠܺܝܢ ܗܘܰܘ: ܒܨܶܒܝܳܢܳܐ ܛܳܒܳܐ ܟܰܕ ܚܳܕܶܝܢ ܘܪܳܘܙܺܝܢ ܗܘܰܘ: ܟܰܕ ܡܶܛܽܠ ܫܡܳܟ ܡܶܬܚܰܣܕܺܝܢ ܘܡܶܣܬܠܶܝܢ ܗܘܰܘ: ܒܫܺܝ̈ܫܠܳܬܳܐ ܡܶܛܽܠ ܚܽܘܒܳܟ ܒܰܐܣܽܘܪ̈ܶܐ ܚܠܳܦ ܪܶܚܡܬܳܟ: ܒܰܪ̈ܕܽܘܦܝܶܐ ܡܶܛܽܠ ܣܰܒܪܳܟ: ܒܢܽܘ̈ܘܳܓܶܐ ܚܠܳܦ ܕܶܚܠܬܳܟ ܒܰܐܟܣܽܘܪ̈ܝܰܐܣ ܡܶܛܽܠ ܬܰܘܕܺܝܬܳܐ ܕܒܰܟ ܠܚܰܝ̈ܘܳܬܳܐ ܡܶܛܽܠ ܟܳܪܽܘܙܽܘܬܳܟ: ܠܝܰܩܕܳܢܳܐ ܡܶܛܽܠ ܬܽܘܠܡܳܕܳܟ: ܠܣܰܝܦܳܐ ܕܚܺܝ̣ܠܐ ܚܠܳܦ ܥܶܪ̈ܒܰܝܟ: ܠܰܙܩܺܝܦܳܐ ܚܠܳܦ ܢܩܰܘ̈ܳܬܳܟ ܘܗܳܠܶܝܢ ܟܽܠܗܶܝܢ ܠܐ ܚܫܺܝ̈ܒܳܢ ܗܘܰܝ̈ ܠܗܽܘܢ ܡܶܕܶܡ ܠܦܽܘܬ ܡܰܘܗ̈ܒܳܬܳܟ ܕܰܚܠܳܦ ܟܽܠ: ܘܰܠܦܽܘܬ ܐܰܝܠܶܝܢ ܕܶܐܫܬܰܘܕܺܝܬ ܠܗܽܘܢ ܠܡܺܐܪܰܬ݀: ܐܰܢ̱ܬ ܕܶܝܢ ܡܳܪܝܳܐ ܛܳܒܳܐ ܘܦܳܪܽܘܥܳܐ ܟܺܐܢܳܐ ܐܰܣܓܺܝܬ ܐܺܝܩܳܪܗܽܘܢ ܒܰܫܡܰܝܳܐ ܘܒܰܐܪܥܳܐ: ܟܰܕ ܡܰܠܟ̈ܶܐ ܣܳܓܕܺܝܢ ܗܘܰܘ ܠܗܽܘܢ: ܟܰܕ ܫܰܠܝ̈ܛܳܢܶܐ ܠܗܽܘܢ ܡܝܰܩܪܺܝܢ ܗܘܰܘ: ܟܰܕ ܡܳܪ̈ܰܘܳܬܳܐ ܠܗܽܘܢ ܡܰܘܪܒܺܝܢ ܗܘܰܘ: ܟܰܕ ܪ̈ܺܝܫܳܢܶܐ ܠܗܽܘܢ ܡܪܰܡܪܡܺܝܢ ܗܘܰܘ: ܟܰܕ ܩܽܘܪ̈ܒܳܢܶܐ ܠܗܽܘܢ ܡܩܰܪܒܺܝܢ ܗܘܰܘ: ܟܰܕ ܚܰܟܺܝ̈ܡܶܐ ܠܗܽܘܢ ܡܰܘܕܶܝܢ ܗܘܰܘ: ܘܟܽܠ ܛܽܘܒܳܐ ܠܗܽܘܢ ܝܳܗܒܺܝܢ ܗܘܰܘ: ܘܗܶܢܽܘܢ ܐܰܝܟ ܕܺܝܠܶܦܘ ܡ̣ܶܢ ܡܳܪܽܘܬܳܟ ܠܟܽܠ ܚܰܕ ܐܰܝܟ ܦܽܘܠܚܳܢܶܗ ܟܺܐܢܳܐܝܬ ܡܰܠܦܺܝܢ ܗܘܰܘ: ܠܡܰܠܟ̈ܶܐ ܥܰܠ ܪܶܚܡܰܬ ܐ̱ܢܳܫܽܘܬܳܐ ܡܚܰܦܛܺܝܢ ܗܘܰܘ: ܠܕܰܝ̈ܳܢܶܐ ܥܰܠ ܬܪܺܝܨܽܘܬܳܐ ܡܰܙܗܪܺܝܢ ܗܘܰܘ: ܠܥܰܬܺܝܪ̈ܶܐ ܥܰܠ ܡܪܰܚܡܳܢܽܘܬܳܐ ܡܰܠܦܺܝܢ ܗܘܰܘ: ܠܪ̈ܺܝܫܳܢܶܐ ܥܰܠ ܡܰܟܺܝܟܽܘܬܳܐ ܡܦܰܩܕܺܝܢ ܗܘܰܘ: ܠܡܳܪ̈ܰܝܳܐ ܥܰܠ ܐܺܝܩܳܪܳܐ ܕܥܰܒ̈ܕܶܐ ܐܳܡܪܺܝܢ ܗܘܰܘ: ܘܰܠܥܰܒ̈ܕܶܐ ܥܰܠ ܡܶܫܬܰܡܥܳܢܽܘܬܳܐܕܰܠܡܳܪ̈ܰܝܗܽܘܢ ܡܗܰܕܶܝܢ ܗܘܰܘ: ܠܓܰܒܪ̈ܶܐ ܘܰܠܢ̈ܶܫܶܐ ܥܰܠ ܐܰܘܝܽܘܬܳܐ ܘܫܰܝܢܳܐ ܛܳܒ ܡܙܰܗܪܺܝܢ ܗܘܰܘ: ܘܠܰܒ̈ܢܰܝܳܐ ܥܰܠ ܡܶܫܬܰܡܥܳܢܽܘܬܳܐ: ܠܟܳܗ̈ܢܶܐ ܥܰܠ ܫܰܦܺܝܪܽܘܬ ܩܰܘܡܳܐ ܘܬܶܫܡܫܬܳܐ: ܠܪ̈ܺܝܫܰܝ ܟܳܗ̈ܢܶܐ ܥܰܠ ܦܰܐܝܽܘܬܳܐ ܘܥܰܠ ܫܰܦܺܝܪܽܘܬ ܡܛܰܟܣܽܘܬܳܐ ܥܺܕܬܳܢܳܝܬܳܐ: ܘܰܠܟܽܠܶܗ ܩܠܺܝܪܽܘܣ ܥܰܠ ܕܰܟܝܽܘܬܳܐ ܘܢܰܟܦܽܘܬܳܐ ܘܢܰܗܺܝܪܽܘܬܳܐ ܟܰܕ ܟܽܠܳܗ̇ ܥܺܕܬܳܐ ܒܢܳܡܽܘ̈ܣܶܐ ܐܠܰܗܳܝ̈ܶܐ ܨܰܒܶܬܘ ܒܨܰܘ̈ܡܶܐ ܘܒܰܨܠܰܘ̈ܳܬܳܐ ܘܰܒܬܶܫܡ̈ܫܳܬܳܐ ܕܠܰܝ̈ܠܰܝ ܐܺܝܡܳܡ: ܒܥܺܐܕ̈ܶܐ ܡܳܪ̈ܳܢܳܝܶܐ: ܒܰܢܛܽܘܪܽܘܬ ܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ: ܒܰܐܚܺܝܕܽܘܬ ܗܰܝܡܳܢܽܘܬܳܐ ܕܰܒܕܶܚܠܰܬ ܐܠܰܗܳܐ: ܠܐܚܪ̈ܳܢܶܐ ܒܥܳܢܘܳܝܽܘܬܳܐ: ܠܐܚܪ̈ܳܢܶܐ ܒܦܳܠܚܽܘܬܳܐ ܪܽܘܚܳܢܳܝܬܳܐ: ܠܐܚܪ̈ܳܢܶܐ ܒܡܰܠܦܳܢܽܘܬܳܐ: ܠܐܚܪ̈ܳܢܶܐ ܒܚܶܟܡܬܳܐ ܕܪܽܘܚܳܐ: ܠܐܚܪ̈ܳܢܶܐ ܒܺܝܕܰܥܬܳܐ ܕܪܽܘܚܳܐ: ܘܰܠܟܽܠ ܐ̱ܢܳܫ ܠܘܳܬ ܬܰܩܢܽܘܬܳܐ ܩܪܰܘ: ܟܰܕ ܘܠܐ ܚܕܳܐ ܡ̣ܶܢ ܐܰܝܠܶܝܢ ܕܺܝܠܶܦܘ ܗܘܰܘ ܡܶܢܳܟ ܟܰܣܺܝܘ ܡ̣ܶܢ ܐ̱ܢܳܫ ܟܰܕ ܕܶܝܢ ܫܦܰܪ ܠܨܶܒܝܳܢܳܟ ܘܰܕܒܰܪܬ ܐܶܢܽܘܢ ܠܘܳܬܳܟ ܐܰܝܟ ܕܺܝܢܰܝ̈ܟ ܠܐ ܡܶܬܕܰܪ̈ܟܳܢܶܐ: ܟܽܠ ܚܰܕ ܒܙܰܒܢܶܗ ܒܝܰܕ ܡܰܘܬܳܐ ܩܛܺܝܪܳܝܳܐ ܫܰܠܶܡ ܚܰܝܰܘ̈ܗܝ: ܘܗܳܐ ܝܰܘܡܳܢ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ ܚܳܕܶܝܢ ܘܰܡܙܰܝܚܺܝܢ ܠܕܽܘܟܪ̈ܳܢܰܝܗܽܘܢ: ܚܢܰܢ ܕܶܝܢ ܡܳܪܝ ܐܰܚܺܝ̈ܕܰܝ ܫܪܳܪܳܐ ܕܝܽܘܠܦܳܢܗܽܘܢ ܒܳܥܶܝܢܰܢ ܡܶܢܳܟ ܒܺܐܝܙܓܰܕܽܘܬܗܽܘܢ: ܕܰܬܩܰܒܶܠ ܡܶܢܰܢ ܚܰܛܳܝ̈ܶܐ ܒܳܥ̈ܘܳܬܳܐ ܕܰܡܩܰܪܒܺܝܢ ܠܳܟ ܚܠܳܦ ܢܰܦ̈ܫܳܬܰܢ: ܘܰܚܠܳܦ ܟܽܠܶܗ ܛܶܟܣܳܐ ܥܺܕܬܳܢܳܝܳܐ ܕܢܶܬܢܛܰܪ ܡܶܢܟܽܠ ܢܶܟܝܳܢܺܝ̈ܢ ܕܰܒܥܶܠܕܰܪܳܐ ܘܡ̣ܶܢ ܝܰܕ ܙܺܝܙ̈ܳܢܶܐ ܘܝܰܥܪܳܐ ܒܺܝܫܳܐ ܕܙܳܪܰܥ ܒܥܶܠܕܒܳܒܳܐ: ܘܡܶܢܟܽܠ ܚܶܪ̈ܝܳܢܺܝܢ ܘܣܶܕ̈ܩܺܝܢ ܕܪܳܡܶܐ ܒܺܝܫܳܐ ܢܳܟܽܘܠܐ: ܘܡܶܢܟܽܠ ܦܰܚܺܝ̈ܢ ܘܢܶܫ̈ܒܺܝܢ ܕܨܳܠܐܷ ܨܢܺܝܥܳܐ: ܘܡܶܢܟܽܠ ܒܺܝ̈ܫܳܢ ܕܡܰܝܬܶܐ ܥܰܠ ܥܰܡܳܐ ܕܺܝܠܳܟ: ܘܬܽܘܒ ܒܳܥܶܝܢܰܢ ܡܶܢܳܟ ܕܬܶܬܶܠ ܠܰܢ ܕܢܶܛܰܪ ܦܽܘܩ̈ܕܳܢܰܝܟ ܡܳܪ̈ܳܢܳܝܶܐ ܘܰܢܫܰܡܠܐܷ ܨܶܒܝܳܢܳܟ ܘܢܶܥܒܶܕ ܢܝܳܚܳܟ: ܘܥܰܡ ܗܳܠܶܝܢ ܡܳܪܝܳܐ: ܒܰܝܰܐܐ ܠܰܡ̈ܥܳܩܶܐ ܘܰܐܪܘܰܚ ܠܐܠܺܝ̈ܨܶܐ: ܣܰܒܰܥ ܠܟܰܦ̈ܢܶܐ ܘܰܐܢܺܝܚ ܠܰܡܛܰܪ̈ܦܶܐ: ܣܥܽܘܪ ܠܰܟܪ̈ܺܝܗܶܐ ܘܚܽܘܢ ܠܒܳܝ̈ܫܶܐ: ܚܰܣܳܐ ܠܚܰܛܳܝ̈ܶܐ ܘܙܰܕܶܩ ܠܬܰܝ̈ܳܒܶܐ: ܐܰܦܢܳܐ ܠܛܳܥܰܝ̈ܳܐ ܘܟܰܢܶܫ ܠܰܡܒܰܕܪ̈ܶܐ: ܘܫܰܟܶܢ ܫܰܝܢܳܐ ܘܰܫܠܳܡܳܐ ܒܥܺܕ̈ܳܬܳܟ ܘܰܒܕܰܝܪ̈ܳܬܳܟ ܩܰܕܺܝ̈ܫܳܬܳܐ ܘܢܰܛܰܪ ܠܥܳܡܽܘܪ̈ܰܝܗܶܝܢ ܡ̣ܶܢ ܒܺܝܫܳܐ ܘܚܰܝܠܰܘ̈ܳܬܶܗ: ܐܰܝܟܰܢܳܐ ܕܰܒܚܰܕܽܘܬܳܐ ܢܰܣܩܽܘܢ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܥܛܪܐ

 

 

 

ܫܡܳܐ ܡܫܰܒܚܳܐ ܕܙܰܝܚܽܘܗܝ ܫܠܺܝ̈ܚܶܐ ܒܡܶܠܰܝ̈ܗܽܘܢ ܘܰܥܒܳܕܰܝ̈ܗܽܘܢ ܒܟܽܠܳܗ̇ ܥܳܡܰܪܬܳܐ: ܘܟܰܢܶܫܘ ܠܶܗ ܥܰܡܳܐ ܓܰܒܝܳܐ ܡ̣ܶܢ ܥܰܡ̈ܡܶܐ ܥܺܕܬܳܐ ܠܰܫܡܶܗ: ܘܰܐܝܬܺܝܘ ܠܶܗ ܣܳܓܽܘ̈ܕܶܐ ܫܰܪܺܝܪ̈ܶܐ ܕܰܒܪܽܘܚܳܐ ܢܶܣܓܕܽܘܢ ܠܡܳܪܽܘܬܶܗ: ܘܰܐܦܺܝ̣ܚܘ ܒܟܽܠܳܗ̇ ܥܳܡܰܪܬܳܐ ܪܺܝܚ ܩܶܛܠܶܗ: ܘܚܰܘܺܝܘ ܠܟܽܠ ܐ̱ܢܳܫ ܪܰܒܽܘܬܳܐ ܕܰܨܠܺܝܒܶܗ ܘܫܽܘܒܗܳܪܗܽܘܢ ܕܒܰܙܩܺܝܦܶܗ: ܐܰܢ̱ܬ ܡܳܪܝ ܒܝܰܕ ܨܠܰܘ̈ܳܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ: ܐܰܝܟܰܢܳܐ ܕܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܡ̣ܶܢ ܥܽܘܒܳܐ ܕܰܐܒܳܐ ܓܢܺܝܙܳܐ ܢܦܰܩ ܘܶܐܬܳܐ ܠܥܳܠܡܳܐ: ܘܰܐܢܗܰܪ ܠܐܪܒܰܥ ܦܶܢ̈ܝܳܬܳܐ ܒܢܽܘܗܪܳܐ ܕܺܝܕܰܥܬܶܗ: ܠܗܰܘ ܕܒܰܬܪܶܥܣܰܪ ܙܰܠܺܝ̈ܩܶܐ ܐܰܢܗܰܪ ܠܡܶܬܥܰܡܪܳܢܺܝܬܳܐ: ܘܒܰܦܫܺܝܛܽܘܬܗܽܘܢ ܙܟܰܘ ܠܟܽܠܳܗ̇ ܚܶܟܡܬܳܐ ܕܚܰܟܺܝ̈ܡܰܘܗܝ ܕܥܳܠܡܳܐ ܗܳܢܳܐ: ܘܰܐܦܢܺܝܘ ܠܥܰܡ̈ܡܶܐ ܠܗܰܝܡܳܢܽܘܬܳܐ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܚܰܕ ܐܠܰܗܳܐ ܫܰܪܺܝܪܳܐ ܥܳܒܽܘܕܳܐ ܕܟܽܠܗܶܝܢ ܒܶܪ̈ܝܳܬܳܐ: ܛܳܒܳܐ ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ: ܗ̇ܰܘ ܕܒܰܬܪܶܥܣܰܪ ܐܺܝܙܓܰܕܺܝ̈ܢ ܩܪܳܐ ܠܰܚܠܽܘܠܶܗ ܠܟܽܠܗܶܝܢ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ: ܘܒܺܐܝܕܰܝ̈ܗܽܘܢ ܐܠܰܦ ܠܟܽܠܢܳܫ ܣܶܓܕܬܳܐ ܘܬܰܘܕܺܝܬܳܐ ܕܒܰܬܠܺܝܬܳܝܽܘܬܳܐ ܡܫܰܒܰܚܬܳܐ: ܟܽܘܡܪܳܐ ܕܰܫܪܳܪܳܐ ܕܒܰܬܪܶܥܣܰܪ ܒܽܘܟܪ̈ܺܝܢ ܡܫܰܡ̈ܫܳܢܶܐ ܕܫܶܡܫܳܐ ܕܙܰܕܺܝܩܽܘܬܳܐ ܒܰܛܶܠ ܥܠܰܘ̈ܳܬܳܐ ܘܕܶܒ̈ܚܶܐ ܕܰܟܢܽܘ̈ܫܳܬܳܐ ܐܽܘܡܳܢܳܐ ܡܗܺܝܪܳܐ ܕܒܰܬܪܶܥܣܰܪ ܓܰܒܪ̈ܺܝܢ ܚܰܕܶܬ ܣܚܺܝܦܽܘܬܶܗ ܕܥܳܠܡܳܐ: ܒܽܘܟܪܳܐ ܩܰܕܡܳܝܳܐ ܕܒܰܬܪܶܥܣܰܪ ܕܳܫܢܺܝ̈ܢ ܩܽܘܪ̈ܒܳܢܶܐ ܡܩܰܒ̈ܠܐ ܘܰܕܟܰܝ̈ܳܐ ܣܰܥܪܳܗ̇ ܠܰܒܪܺܝܬܳܐ: ܚܶܟܡܬܶܗ ܕܰܐܒܳܐ ܫܡܰܝܳܢܳܐ ܕܒܰܬܪܶܥܣܰܪ ܗܶܕܝܽܘ̈ܛܺܝܢ ܚܰܟܶܡ ܠܰܡܗܰܝ̈ܡܢܶܐ ܒܝܽܘܠܦܳܢ̈ܶܐ ܬܪ̈ܺܝܨܶܐ: ܡܳܪܳܐ ܛܳܒܳܐ ܘܒܰܣܺܝܡܳܐ ܕܒܰܬܪܶܥܣܰܪ ܘܰܪ̈ܕܺܝܢ ܫܒܺܝ̈ܚܶܐ ܒܰܣܶܡ ܠܐܢܳܫܽܘܬܳܐ ܡ̣ܶܢ ܙܰܗܡܽܘܬܳܐ ܕܣܳܛܳܢܳܐ: ܚܰܬܢܳܐ ܫܰܪܺܝܪܳܐ ܕܒܰܬܪܶܥܣܰܪ ܙܡܺܝ̈ܢܺܝܢ ܥܒܰܕ ܠܶܗ ܡܶܫܬܽܘܬܳܐ ܪܽܘܚܳܢܳܝܬܳܐ ܡܰܠܟܳܐ ܫܡܰܝܳܢܳܐ ܕܒܰܬܪܶܥܣܰܪ ܚܕܽܘ̈ܓܺܝܢ ܡܰܟܪܳܗ̇ ܠܥܺܕܬܳܐ ܟܰܠܬܳܐ ܗܕܺܝܪܬܳܐ ܘܰܬܪܺܝܨܬܳܐ: ܐܰܪܕܺܝܟܠܐ ܚܰܟܺܝܡܳܐ ܕܒܰܬܪܶܥܣܰܪ ܛܰܒܥܺܝ̈ܢ ܓܒܰܝ̈ܳܐ ܒܢܳܐ ܘܰܐܩܺܝܡ ܚܰܪ̈ܒܳܬܳܗ̇ ܕܰܐܪܥܳܐ: ܥܳܒܽܘܕܳܐ ܕܥܳܠܡ̈ܶܐ ܕܒܰܬܪܶܥܣܰܪ ܝܰܪ̈ܕܺܝܢ ܣܡܰܟ ܘܰܐܫܩܺܝ ܠܨܰܗܝܽܘܬܳܗ̇ ܕܥܳܡܰܪܬܳܐ: ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܕܒܰܬܪܶܥܣܰܪ ܟܰܘܟ̈ܒܺܝܢ ܐܰܨܡܰܚ ܢܽܘܗܪܳܐ ܫܰܪܺܝܪܳܐ: ܢܽܘܗܪܳܐ ܫܡܰܝܳܢܳܐ ܕܒܰܬܪܶܥܣܰܪ ܠܰܡܦܺܐܕܺܝ̈ܢ ܐܰܢܗܰܪ ܠܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ: ܥܰܬܺܝܪܳܐ ܘܰܫܦܺܝܥܳܐ ܕܒܰܬܪܶܥܣܰܪ ܡܶܣܟܺܢܺܝ̈ܢ ܦܰܪܢܶܣ ܣܽܘܢܩܳܢܳܗ̇ ܕܡܶܬܥܰܡܪܳܢܺܝܬܳܐ: ܝܰܡܳܐ ܕܰܚܢܳܢܳܐ ܕܒܰܬܪܶܥܣܰܪ ܢܰܗܪ̈ܺܝܢ ܦܰܝܶܓ ܠܨܰܗܝܽܘܬܳܐ ܕܰܡܛܰܪ̈ܦܶܐ: ܡܠܶܟ ܡܰܠܟ̈ܶܐ ܕܒܰܬܪܶܥܣܰܪ ܣܰܟܪ̈ܺܝܢ ܣܬܰܪ ܚܶܣ̈ܢܶܝܗ̇ ܕܰܚܛܺܝܬܳܐ: ܪܰܒ ܚܰܝܠܐ ܩܪܰܒܬܳܢܳܐ ܕܒܰܬܪܶܥܣܰܪ ܥܰܒܕܺܝ̈ܢ ܟܒܰܫ ܠܥܽܘܫܢܳܐ ܕܟܽܠܗܶܝܢ ܡܰܠܟ̈ܘܳܬܳܐ ܪܰܒ ܟܽܘܡܪ̈ܶܐ ܡܗܰܝܡܢܳܐ ܕܒܰܬܪܶܥܣܰܪ ܦܺܝܪ̈ܡܶܐ ܡܠܺܝ̈ܠܐ ܚܰܣܺܝ ܠܥܰܡ̈ܡܶܐ ܘܶܐܡܘ̈ܳܬܳܐ: ܡܰܠܦܳܢܳܐ ܕܩܽܘܫܬܳܐ ܕܒܰܬܪܶܥܣܰܪ ܨܰܝܳܕܺܝ̈ܢ ܐܠܰܦ ܠܥܺܕܬܶܗ ܝܰܕ̈ܥܳܬܳܐ ܫܰܪܺܝܪ̈ܳܬܳܐ: ܡܰܠܳܚܳܐ ܬܡܺܝܗܳܐ ܕܒܰܬܪܶܥܣܰܪ ܩܽܘܒܰܪ̈ܢܺܝܛܺܝܢ ܕܰܒܰܪ ܠܰܟܪܺܝܗܽܘܬܳܐ ܕܚܰܢܦܽܘܬܳܐ ܒܝܰܕ ܐܠܶܦܳܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ: ܡܰܒܽܘܥܳܐ ܕܪ̈ܰܚܡܶܐ ܕܒܰܬܪܶܥܣܰܪ ܪ̈ܰܥܡܺܝܢ ܐܰܪܥܶܡ ܒܰܒܪܺܝܬܳܐ ܣܒܰܪܬܳܐ ܐܶܘܢܓܶܠܳܝܬܳܐ: ܐܺܝܡܳܡܳܐ ܪܰܒܳܐ ܕܒܰܬܪܶܥܣܰܪ ܫܳܥܺܝ̈ܢ ܪܕܰܦ ܠܚܶܫܟܳܐ ܕܦܶܢ̈ܝܳܬܳܐ: ܢܶܒܥܳܐ ܕܚܰܝ̈ܶܐ ܕܒܰܬܪܶܥܣܰܪ ܬܰܦ̈ܶܐ ܐܰܫܩܺܝ ܠܰܨܗܰܝ̈ܳܐ ܫܶܦ̈ܥܶܐ ܕܒܽܘܪ̈ܟܳܬܳܐ: ܠܳܟ ܡܫܺܝܚܳܐ ܐܠܰܗܰܢ ܫܰܪܺܝܪܳܐ ܡܦܺܝܣܺܝܢܰܢ ܟܰܕ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܒܥܽܘܗܕܳܢܰܢ ܢܳܣܒܺܝܢܰܢ: ܘܰܠܣܳܥܽܘܪܽܘܬܗܽܘܢ ܬܡܺܝܗܬܳܐ ܩܕܳܡܰܝܟ ܡܰܥܗܕܺܝܢܰܢ: ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܘܰܒܬܰܟ̈ܫܦܳܬܗܽܘܢ ܩܰܕܺܝ̈ܫܳܬܳܐ ܕܰܚܠܳܦܝܢ: ܘܰܐܫܘܳܐ ܠܰܢ ܕܰܐܝܟ ܕܫܳܦܰܪ ܠܨܶܒܝܳܢܳܟ ܢܶܦܠܽܘܚ ܠܳܟ ܥܰܒܕܽܘܬܳܐ ܛܳܒܬܳܐ: ܟܰܕ ܫܳܐܠܺܝܢܰܢ ܡܶܢܳܟ ܕܰܠܫ̈ܶܐܠܳܬܰܢ ܒܺܐܝܕܰܝ̈ܗܽܘܢ ܬܶܬܶܠ ܘܠܰܡܝܰܬܪܽܘܬܳܐ ܕܺܝܠܗܽܘܢ ܢܳܨܶܒ ܐܰܢ̱ܬ ܥܰܠ ܠܽܘ̈ܚܶܐ ܕܠܶܒܰܘ̈ܳܬܗܽܘܢ ܘܰܕܠܶܒܰܘ̈ܳܬܰܢ: ܘܰܠܨܰܘܪ̈ܶܐ ܕܺܝܠܰܢ ܟܳܕܶܢ ܐܰܢ̱ܬ ܒܦܽܘܠܚܳܢ ܫܰܦܺܝܪ̈ܳܬܗܽܘܢ: ܘܝܳܗܶܒ ܐܰܢ̱ܬ ܒܛܰܝܒܽܘܬܳܟ ܡܳܪܝܳܐ: ܠܗܶܪ̈ܓܶܐ ܘܰܠܚܽܘ̈ܫܳܒܶܐ ܦܳܪܽܘܫܽܘܬܳܐ: ܠܪ̈ܶܥܝܳܢܶܐ ܘܣܽܘ̈ܟܳܠܐ ܢܰܗܺܝܪܽܘܬܳܐ: ܐܰܟܡܰܢ ܕܢܶܓܒܶܐ ܠܗܳܠܶܝܢ ܕܝܽܘܬܪ̈ܳܢܶܐ ܘܢܰܒܣܶܐ ܕܶܝܢ ܒܰܐܝܠܶܝܢ ܕܰܡܠܶܝܢ ܚܽܘܣܪ̈ܳܢܶܐ: ܐܰܝܟܰܢܳܐ ܕܰܢܫܽܘܛ ܠܗܳܠܶܝܢ ܕܥܳܠܡܳܐ ܘܙܰܒ̈ܢܳܬܳܐ ܕܠܐ ܡܶܬܩܰܕ̈ܝܳܢ: ܢܝܰܩܰܪ ܕܶܝܢ ܠܗܳܠܶܝܢ ܫܡܰܝܳܢ̈ܝܳܬܳܐ ܐܰܝܟ ܕܳܐܦ ܫܠܺܝ̈ܚܶܐ ܕܺܝܠܳܟ ܢܰܨܺܝ̈ܚܶܐ: ܢܶܥܪܽܘܩ ܕܶܝܢ ܡ̣ܶܢ ܚܡܺܝܪܳܐ ܕܚܰܢܦܽܘܬܳܐ ܘܰܕܝܽܘܕܳܝܽܘܬܳܐ: ܢܩܰܒܶܠ ܕܶܝܢ ܠܛܰܥܡܳܐ ܕܡܰܠܦܳܢܽܘܬܳܐ ܐܶܘܢܓܶܠܳܝܬܳܐ ܘܩܰܕܺܝܫܬܳܐ ܘܰܫܠܺܝܚܳܝܬܳܐ ܘܰܚܢܰܢ ܡܳܪܝ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܘܶܐܬܬܢܺܝܚܘ ܥܰܠ ܣܰܒܪܳܟ ܢܶܫܬܘܶܐ ܕܢܶܥܽܘܠ ܠܡܰܠܟܽܘܬܳܐ ܕܺܝܠܳܟ ܫܒܺܝܚܬܳܐ ܘܰܠܝܳܪܬܽܘܬܳܟ ܗ̇ܳܝ ܛܽܘܒܬܳܢܺܝܬܳܐ: ܘܰܒܓܽܘܕܰܝ̈ܗܽܘܢ ܕܰܓܒܰܝ̈ܳܐ ܕܺܝܠܳܟ ܢܶܬܚܰܠܰܛ: ܘܰܒܣܶܕܪ̈ܰܝܗܽܘܢ ܢܶܬܛܰܟܰܣ ܘܰܒܟܶܢܦܰܝ̈ܗܽܘܢ ܢܶܣܬܰܬܰܪ: ܘܥܰܡܗܽܘܢ ܘܒܰܝܢܳܬܗܽܘܢ ܟܢܺܝܫܳܐܝ̣ܬ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܪ̈ܝܫܢܐ ܕܫܠܝ̈ܚܐ ܦܛܪܘܣ ܘܦܘܠܘܣ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܗܰܒ ܠܰܢ ܡܳܪܝܳܐ ܐܠܰܗܳܐ ܒܪܶܚܡܰܬ݀ ܐ̱ܢܳܫܽܘܬܳܟ: ܕܢܶܣܰܒ ܟܽܠܰܢ ܥܽܘܕܪ̈ܳܢܶܐ ܡ̣ܶܢ ܓܰܪ̈ܡܰܝܗܽܘܢ ܕܪ̈ܺܝܫܳܢܶܐ ܕܰܫܠܺܝ̈ܚܰܝܟ ܦܶܛܪܽܘܣ ܘܦܰܘܠܳܘܣ ܢܰܨܺܝ̈ܚܶܐ: ܒܗܳܢܳܐ ܝܰܘܡܳܐ ܕܥܽܘܗܕܳܢܳܐ ܕܟܽܘܠܳܠܗܽܘܢ ܡܫܰܡܠܶܝܢܰܢ: ܘܢܶܪܕܶܐ ܒܥܶܩ̈ܒܳܬܗܽܘܢ ܘܢܶܗܘܶܐ ܫܳܡܽܘ̈ܥܶܐ ܕܦܽܘܩ̈ܕܳܢܰܝܗܽܘܢ: ܘܰܢܙܰܝܰܚ ܘܰܢܝܰܩܰܪ ܠܥܽܘܗܕܳܢܗܽܘܢ ܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܡܳܪ̈ܰܘܳܬܳܐ: ܠܗܰܘ ܦܳܪܽܘܩܳܐ ܕܰܫܒܰܝ̈ܳܐ ܘܰܡܚܰܪܪܳܢܳܐ ܕܰܚܒܺܝ̈ܫܶܐ: ܗ̇ܰܘ ܕܟܰܕ ܨܒܳܐ ܕܢܶܦܪܽܘܩ ܠܰܓܒܺܝܠܬܶܗ ܡ̣ܶܢ ܫܒܺܝܬܶܗ ܕܳܐܟܶܠܩܰܪܨܳܐ ܗ̇ܰܘ ܕܰܒܬܰܘܫܳܐ ܕܛܳܥܝܽܘܬܳܐ ܚܰܒܠܳܗ̇: ܓܒܳܐ ܠܶܗ ܫܠܺܝ̈ܚܶܐ ܩܰܕܺܝ̈ܫܶܐ ܪ̈ܺܝܫܰܝ ܚܰܝܠܰܘ̈ܳܬܳܐ ܩܪ̈ܰܒܬܳܢܶܐ ܐܰܣܺܝܪ̈ܰܝ ܙܰܝܢܳܐ ܡܶܬܝܰܕܥܳܢܳܐ ܕܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܝܰܗܒ ܠܗܽܘܢ ܫܽܘܠܛܳܢܳܐ ܘܚܰܝܠܐ ܕܰܢܕܽܘܫܽܘܢ ܚܘܰܘ̈ܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ: ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܘܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ: ܘܰܐܢܕܪܶܐܘܳܣ ܩܰܕܡܳܝ ܒܬܰܠܡܺܝܕܽܘܬܳܐ: ܗ̇ܳܢܽܘܢ ܕܟܰܕ ܩܰܒܶܠܘ ܪܽܘܚܳܐ ܩܰܕܺܝܫܳܐ ܘܰܐܙܕܰܝܰܢܘ ܒܚܰܝܠܐ ܐܠܰܗܳܝܳܐ ܘܰܢܦܰܩܘ ܥܰܠ ܡܰܫܪܺܝܬܶܗ ܕܒܺܝܫܳܐ ܘܰܐܘܒܕܽܘܗ̇ ܘܰܐܦܢܺܝܘ ܠܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ: ܗ̇ܳܢܽܘܢ ܕܟܰܕ ܥܽܘܗܕܳܢܗܽܘܢ ܡܫܰܡܠܶܝܢܰܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܰܢ: ܕܬܶܥܒܶܕ ܠܰܢ ܫܰܘ̈ܬܳܦܶܐ ܕܚܰܫܰܝ̈ܗܽܘܢ: ܘܡܶܬܬܦܺܝ̈ܣܳܢܶܐ ܠܡܰܠܦܳܢܽܘܬܗܽܘܢ: ܘܪ̈ܳܕܝܰܝ ܒܰܫܒܺܝܠ ܥܶܩ̈ܒܳܬܗܽܘܢ: ܘܰܡܫܰܒ̈ܚܳܢܶܐ ܠܗܰܘ ܕܰܓܒܳܐ ܐܶܢܽܘܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܓܒܰܝܬ ܫܠܺܝ̈ܚܶܐ ܠܟܳܪܽܘܙܽܘܬܳܐ: ܘܰܩܪܰܝܬ ܐܶܢܽܘܢ ܒܰܩܪܳܝܬܳܐ ܐܠܰܗܳܝܬܳܐ: ܘܪܰܡܪܶܡܬ ܐܶܢܽܘܢ ܡ̣ܶܢ ܚܰܝܠܐ ܠܚܰܝܠܐ: ܘܥܰܠܺܝܬ ܐܶܢܽܘܢ ܡ̣ܶܢ ܫܽܘܒܚܳܐ: ܘܰܐܩܶܦܬ ܐܶܢܽܘܢ ܒܰܐܘܝܽܘܬܳܐ ܕܟܳܪܽܘܙܽܘܬܳܐ: ܗ̇ܳܢܽܘܢ ܕܰܒܦܶܣܐ ܕܪܽܘܚܳܐ ܩܰܕܺܝܫܳܐ ܐܶܬܓܒܺܝܘ ܘܡܶܠܬܳܟ ܐܠܰܗܳܝܬܳܐ ܐܶܫܬܠܰܚܘ ܦܶܛܪܽܘܣ ܩܰܪܩܰܦܬܳܐ ܕܰܫܠܺܝ̈ܚܶܐ ܘܦܰܘܠܳܘܣ ܓܰܒܝܳܐ ܕܟܳܪܽܘܙܽܘܬܳܐ: ܐܰܢܕܪܶܐܘܳܣ ܩܰܕܡܳܝ ܒܬܰܠܡܺܝܕܽܘܬܳܐ: ܗ̇ܳܢܽܘܢ ܕܰܥܬܰܪܘ ܒܫܽܘ̈ܟܳܢܶܐ ܫܡܰܝ̈ܳܢܶܐ ܘܩܰܒܶܠܘ ܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܘܶܐܬܺܝܕܰܥܘ ܕܶܝܢ ܒܰܒ̈ܢܳܬ ܩ̈ܳܠܐ ܕܺܝܠܳܟ ܕܰܐܙܥܶܩܬ ܠܟܽܠܚܰܕ ܡܶܢܗܽܘܢ ܠܦܶܛܪܽܘܣ ܡ̇ܰܢ ܟܰܕ ܚܙܰܝܬܳܝܗܝ ܥܰܠ ܝܰܕ ܝܰܡܳܐ ܕܪܳܡܶܐ ܡܨܺܝܕܬܳܐ ܠܨܰܝܕܳܐ ܕܢܽܘ̈ܢܶܐ: ܘܶܐܡܰܪܬ ܠܶܗ ܕܬܳܐ ܒܳܬܰܪܝ ܘܶܐܥܒܕܳܟ ܨܰܝܳܕܳܐ ܕܰܒܢܰܝ̈ܢܳܫܳܐ: ܗ̣ܽܘ ܕܶܝܢ ܟܰܕ ܫܡܰܥ ܫܒܰܩ ܠܰܡܨܺܝܕܬܳܐ ܘܰܪܗܶܛ ܒܳܬܪܳܟ: ܘܟܰܕ ܕܶܝܢ ܫܰܐܷܠܬ ܕܡܰܢܽܘ ܐܳܡܪܺܝܢ ܥܠܰܝ ܟܶܢ̈ܫܶܐ ܕܺܐܝܬܰܝ: ܦܰܢܺܝ ܘܶܐܡܰܪ ܕܰܐܢ̱ܬ ܗ̣ܽܘ ܡܫܺܝܚܳܐ ܒܪܶܗ ܕܰܐܠܳܗܳܐ ܚܰܝܳܐ: ܘܥܰܠܗܳܝ ܠܛܽܘܪܳܐ ܐܰܫܘܺܝܬܳܝܗܝ: ܘܟܰܕ ܚܙܳܟ ܒܶܐܠܦܳܐ ܕܳܐܬܶܐ ܐܰܢ̱ܬ ܠܘܳܬܗܽܘܢ ܥܰܠ ܡܰܝ̈ܳܐ ܫܕܳܐ ܢܰܦܫܶܗ ܘܰܣܘܰܚ ܠܳܟ: ܘܟܰܕ ܓܠܰܝܬ ܠܬܰܠܡܺܝ̈ܕܰܝܟ ܥܰܠ ܚܰܫܳܟ ܗ̣ܽܘ ܒܰܠܚܽܘܕܰܘܗܝ ܟܰܕ ܫܰܪܺܝܪ ܐܰܡܣܰܪ ܕܳܐܦܶܢ ܬܶܗܘܶܐ ܠܰܡܡܳܬ ܥܰܡܳܟ ܠܐ ܟܳܦܰܪ ܒܳܟ: ܘܥܰܠ ܕܠܐ ܡܰܨܝܳܐ ܗܘܳܬ݀ ܕܰܣܛܰܪ ܡ̣ܶܢ ܡܺܝܬܽܘܬܳܟ ܢܶܗܘܶܐ ܚܰܝ̈ܶܐ ܘܦܽܘܪܩܳܢܳܐ ܟܦܰܪ ܦܰܐܝܳܐܝ̣ܬ ܘܫܰܪܰܪ ܠܦܽܘܩܕܳܢܳܟ: ܘܟܰܕ ܗܦܰܟܬ ܚܳܪܬ ܒܶܗ ܦܢܳܐ ܘܗܰܝܡܶܢ ܘܫܰܪܰܪ ܠܣܳܥܽܘܪܽܘܬ ܪ̈ܰܚܡܰܝܟ: ܘܰܦܬܰܚ ܬܰܪܥܳܐ ܕܗܰܝܡܳܢܽܘܬܳܐ ܘܰܬܝܳܒܽܘܬܳܐ: ܘܟܰܕ ܥܰܩܶܒܬܳܗ̇ ܠܪܶܚܡܬܶܗ ܒܫܽܘ̈ܐܳܠܐ ܬܠܺܝ̈ܬܳܝܶܐ: ܒܰܬܠܳܬܰܝ̈ܗܽܘܢ ܫܰܪܺܝܪܳܐ ܐܶܬܚܙܺܝ: ܘܠܳܟ ܩܪܳܐ ܣܳܗܕܳܐ ܕܗܳܠܶܝܢ: ܘܥܰܠ ܗ̇ܳܝ ܐܰܓܥܶܠܬ ܠܶܗ ܪܳܥܝܽܘܬܳܐ ܕܶܐܡܪ̈ܶܐ ܘܥܶܪ̈ܒܶܐ ܘܰܢܩܰܘ̈ܳܬܳܐ: ܘܰܐܘܣܶܦܬ ܘܶܐܡܰܪܬ ܠܶܗ ܕܟܰܕ ܛܠܐܷ ܗܘܰܝܬ ܐܰܢ̱ܬ ܠܳܟ ܐܳܣܰܪ ܗܘܰܝܬ ܚܰܨܰܝ̈ܟ: ܘܳܐܙܶܠ ܗܘܰܝܬ ܠܐܝܟܳܐ ܕܨܳܒܶܐ ܐܰܢ̱ܬ: ܘܗܳܫܳܐ ܕܶܝܢ ܕܣܶܐܒܬ ܬܶܦܫܽܘܛ ܐܺܝܕܰܝ̈ܟ ܘܰܐ̱ܚܪܺܝܢ ܢܶܐܣܽܘܪ ܠܳܟ ܚܰܨܰܝ̈ܟ: ܘܢܰܘܒܠܳܟ ܠܐܝܟܳܐ ܕܠܐ ܨܳܒܶܐ ܐܰܢ̱ܬ: ܘܟܰܕ ܫܰܘܕܰܥܬ ܒܗܳܕܶܐ ܕܒܰܐܝܢܳܐ ܡܰܘܬܳܐ ܥܬܺܝܕ ܕܰܢܫܰܒܰܚ ܠܐܠܳܗܳܐ: ܐܳܦ ܠܦܰܘܠܳܘܣ ܕܶܝܢ ܟܰܕ ܚܙܰܝܬܳܝܗܝ ܕܝܳܩܶܕ ܒܰܛܢܳܢܳܐ ܥܰܠ ܢܳܛܽܘܪܽܘܬܳܐ ܕܢܳܡܽܘܣܳܐ ܛܶܠܳܢܳܝܳܐ: ܟܰܕ ܡܚܰܒܶܒ ܐܰܢ̱ܬ ܠܶܗ ܒܳܬܰܪ ܕܶܐܪܰܥܬܳܝܗܝ ܒܗܰܘܦܳܐ ܒܨܺܝܪܳܐ ܕܚܰܝܠܳܟ ܐܶܬܬܘܺܝ: ܘܶܐܡܰܪܬ ܠܘܳܬܶܗ ܫܳܐܘܳܠ ܫܳܐܘܳܠ ܡܳܢܳܐ ܪܳܕܶܦ ܐܰܢ̱ܬ ܠܺܝ: ܘܟܰܕ ܕܳܘܝܳܐܝ̣ܬ ܗ̣ܽܘ ܦܰܢܺܝ ܕܡ̇ܰܢ ܐܰܢ̱ܬ ܡܳܪܝ: ܐܰܢ̱ܬ ܕܶܝܢ ܡܪܰܚܡܳܢܳܐ ܦܰܢܺܝܬ ܠܶܗ ܕܶܐܢܰܐ ܗ̱ܘ ܝܶܫܽܘܥ ܢܳܨܪܳܝܳܐ ܕܰܐܢ̱ܬ ܪܳܕܶܦ ܐܰܢ̱ܬ: ܘܰܐܘܣܶܦܬ ܕܶܝܢ ܘܶܐܡܰܪܬ ܠܘܳܬܶܗ ܕܘܳܠܐܷ ܗܘܳܐ ܠܳܟ ܠܰܡܒܰܥܳܛܽܘ ܠܥܽܘ̈ܩܣܶܐ: ܘܟܰܕ ܠܘܳܬ ܚܰܢܰܢܝܳܐ ܫܰܕܰܪܬܳܝܗܝ ܩܰܕܶܡܬ ܘܫܰܘܕܰܥܬ ܠܗܰܘ ܟܰܕ ܐܶܡܰܪܬ: ܕܡܳܐܢܰܐ ܗ̱ܘ ܠܺܝ ܓܰܒܝܳܐ: ܘܰܦܩܰܕܬ ܠܶܗ ܕܢܰܥܡܕܺܝܘܗܝ ܘܟܰܕ ܥܡܰܕ ܐ̱ܚܪܺܢܳܐ ܡ̣ܶܢ ܐ̱ܚܪܺܢܳܐ ܗܘܳܐ: ܘܒܰܕܡܽܘܬ ܐܰܪܝܳܐ ܢܦܰܩ ܥܰܠ ܟܳܪܽܘܙܽܘܬܳܐ: ܘܡ̣ܶܢ ܐܽܘܪܫܠܶܡ ܠܐܷܠܽܘܪܺܝܘܳܢ ܡܰܠܺܝ ܒܰܣܒܰܪܬܶܗ ܕܰܡܫܺܝܚܳܐ: ܘܡ̣ܶܢ ܥܽܘ̈ܡܩܶܐ ܢܰܦܫܳܢܳܝ̈ܶܐ ܡܰܙܥܶܩ ܗܘܳܐ ܘܳܐܡܰܪ: ܕܡܰܢܽܘ ܢܶܦܪܫܰܢܝ ܡ̣ܶܢ ܚܽܘܒܶܗ ܕܰܡܫܺܝܚܳܐ: ܐܽܘܠܨܳܢܳܐ ܐܰܘ ܪܕܽܘܦܝܳܐ ܐܰܘ ܩܺܝܢܕܽܘܢܽܘܣ ܐܰܘ ܡܰܘܬܳܐ: ܘܡܰܢܽܘ ܡܶܬܟܪܰܗ ܘܠܰܘ ܐܶܢܳܐ ܡܶܬܟܪܰܗ ܐ̱ܢܳܐ: ܘܡܰܢܽܘ ܡܶܬܟܫܶܠ ܘܠܰܘ ܐܶܢܳܐ ܝܳܩܶܕ ܐ̱ܢܳܐ: ܘܟܰܕ ܒܫܽܘܚܢܳܐ ܡܶܬܢܰܘܰܠ ܗܘܳܐ ܫܶܐܠ ܡܶܢܳܟ ܐܳܣܝܽܘܬܳܐ: ܘܟܰܕ ܦܰܢܺܝܬ ܠܶܗ ܕܣܳܦܩܳܐ ܠܳܟ ܛܰܝܒܽܘܬܝ: ܚܰܝܠܝ ܓܶܝܪ ܒܰܡܚܺܝ̣̈ܠܐ ܡܶܬܓܡܰܪ ܘܡܶܛܽܠ ܗܳܕܶܐ ܠܰܡ ܓܒܺܝܬܳܟ ܕܰܬܡܰܠܐܷ ܣܒܰܪܬܝ: ܘܰܕܢܶܬܟܪܶܙ ܫܶܡܝ ܒܶܐܡ̈ܘܳܬܳܐ: ܘܟܰܕ ܫܰܘܝܳܐܝ̣ܬ ܐܶܬܟܕܶܢ ܒܢܺܝܪܳܐ ܕܰܫܠܺܝܚܽܘܬܳܐ: ܠܐܢܛܺܝܽܘܟܺܝܰܐ ܘܪܽܘܡܺܝ ܬܰܠܡܶܕ ܒܟܳܪܽܘܙܽܘܬܳܐ: ܘܫܰܘܝܳܐܝ̣ܬ ܩܰܒܶܠܘ ܟܠܺܝ̈ܠܐ ܕܣܳܗܕܽܘܬܳܐ: ܘܡܶܛܽܠ ܗܳܕܶܐ ܥܺܕܬܳܐ ܩܰܕܺܝܫܬܳܐ ܡܙܰܝܚܳܐ ܕܽܘܟܪܳܢܗܽܘܢ ܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܟܰܕ ܐܳܡܪܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܐܰܪܓܽܘܒܠܐ ܚܰܝܠܬܳܢ ܒܟܺܐܦ̈ܶܐ ܠܐ ܦܠܺܝ̈ܚܳܬܳܐ: ܕܥܰܡܽܘ̈ܕܶܐ ܩܒܰܥ: ܘܫܰܬܶܐܣ ܫܶܬܶܐܣ̈ܶܐ ܥܺܕܬܳܢܳܝ̈ܶܐ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܫܠܺܝܚܳܐ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ: ܒܕܰܘܩܳܐ ܥܰܬܺܝܪ ܣܽܘ̈ܟܳܠܐ ܕܙܰܗܝܽܘܬܳܐ ܥܰܡܶܩ ܘܣܳܡ ܫܶܬܶܐܣ̈ܶܐ ܥܰܠ ܟܺܐܦܳܐ ܕܪܺܝܫ ܙܳܘܺܝܬܳܐ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܦܶܛܪܽܘܣ ܪܺܝܫܳܐ ܕܫܠܺܝ̈ܚܶܐ ܓܺܝܙܰܒܪܳܐ ܫܰܪܺܝܪܳܐ ܘܪܰܒܒܰܝܬܳܐ ܡܗܰܝܡܢܳܐ: ܕܰܐܓܥܶܠ ܡܳܪܶܗ ܒܶܝܬ ܐܺܝܕܰܘ̈ܗܝ ܣܺܝ̈ܡܳܬܳܐ ܫܡܰܝ̈ܳܢܝܳܬܳܐ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܕܰܝܳܢܳܐ ܟܺܐܢܳܐ ܕܠܐ ܐܶܬܪܡܺܝ ܠܡܰܣܰܒ ܒܰܐܦ̈ܶܐ ܕܟܽܠ ܐ̱ܢܳܫ ܒܛܶܟܣܶܗ ܟܰܘܶܢ: ܛܽܘܒܰܝܟ ܐܰܒܽܘܢ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܗܶܕܝܽܘܛܳܐ ܘܠܐ ܣܦܺܝܪܳܐ: ܕܪܽܘܚܳܐ ܩܰܕܺܝܫܳܐ ܚܰܟܡܶܗ ܘܰܐܠܦܶܗ ܟܽܠܗܽܘܢ ܚܶܟ̈ܡܳܬܳܐ: ܠܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܫܠܺܝܚܳܐ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܘܰܪܕܳܐ ܦܰܐܝܳܐ ܘܒܰܣܺܝܡ ܪܺܝܚܳܐ ܕܰܐܩܶܦ ܥܒܳܕܰܘ̈ܗܝ ܒܡܶܠܰܘ̈ܗܝ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܙܰܗܪܺܝܪܳܐ ܥܰܬܺܝܪ ܨܶܡܚ̈ܶܐ ܕܡ̣ܶܢ ܢܽܘܪܳܐ ܐܠܰܗܳܝܬܳܐ ܨܡܰܚ ܘܰܐܒܪܶܩ ܒܥܺܕܬܳܐ ܩܰܕܺܝܫܬܳܐ ܒܢܰܨܺܝܚܽܘܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܦܰܘܠܳܘܣ ܚܕܽܘܓܳܐ ܪܚܺܝܡܳܐ ܕܟܰܠܬܳܐ ܫܠܶܝܡܽܘܢܳܝܬܳܐ ܕܳܐܦ ܕܡܶܗ ܩܰܪܶܒ ܪܽܘܡܝܳܢܳܐ ܠܡܳܪܶܗ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܛܰܒܥܳܐ ܢܰܗܺܝܪܳܐ ܘܟܺܐܦܳܐ ܝܰܩܺܝܪܰܬ݀ ܕܡܰܝ̈ܳܐ ܕܡ̣ܶܢ ܡܳܪܰܢ ܐܶܬܩܪܺܝ ܟܺܐܦܳܐ: ܘܰܥܠܰܘܗܝ ܐܶܬܒܰܢܝܰܬ݀ ܥܺܕܬܳܐ ܒܫܰܪܺܝܪܽܘܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܝܰܕܽܘܥܬܳܢܳܐ ܕܐ̱ܪ̈ܳܙܶܐ ܫܡܰܝ̈ܳܢܶܐ: ܘܰܠܟܽܠܳܗ̇ ܬܺܒܶܝܠ ܓܠܐܴ ܘܰܐܘܕܰܥ ܒܡܰܠܦܳܢܽܘܬܳܐ ܕܺܝܠܶܗ: ܛܽܘܒܰܝܟ ܦܶܛܪܽܘܣ ܪܺܝܫܳܐ ܕܫܠܺܝ̈ܚܶܐ ܟܰܘܟܒܳܐ ܨܰܡܽܘܚܬܳܢܳܐ ܕܒܰܪܩܺܝܥܳܗ̇ ܕܒܰܪܬ ܥܰܡ̈ܡܶܐ ܥܺܕܬܳܐ ܩܰܕܺܝܫܬܳܐ ܣܕܺܝܪ: ܛܽܘܒܰܝܟ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܠܚܺܝܡܳܐ ܘܰܡܩܰܛܪܓܳܢܳܐ ܕܰܐܝܠܶܝܢ ܕܰܐܚܺܝܕܺܝܢ ܒܙܳܢܝܽܘܬܳܐ: ܛܽܘܒܰܝܟ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܡܰܠܦܳܢܳܐ ܕܢܺܝܚܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ: ܕܡ̣ܶܢ ܫܡܰܝܳܐ ܝܰܠܦܳܗ̇ ܘܰܒܪܳܐ ܡܫܺܝܚܳܐ ܝܰܗܒ ܠܶܗ ܛܽܘܒܳܐ ܒܣܳܗܕܽܘܬܳܐ: ܛܽܘܒܰܝܟ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܢܰܚܫܺܝܪܬܳܢܳܐ ܛܒܺܝܒܳܐ ܕܰܒܦܽܘܪ̈ܣܶܐ ܚܶܟܡܬܳܢܳܝ̈ܶܐ ܨܳܕ ܘܒܰܝܬܺܝ ܠܣܰܓܺܝ̈ܶܐܐ ܡ̣ܶܢ ܠܐ ܝܺܕܰܥܬܳܐ ܠܺܝܕܰܥܬܳܐ ܕܰܬܠܺܝܬܳܝܽܘܬܳܐ: ܛܽܘܒܰܝܟ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܣܳܚܽܘܦܳܐ ܕܚܰܪܳܫܽܘܬܳܐ ܘܪܶܚܡܰܬ݀ ܟܶܣܦܳܐ: ܕܡ̣ܶܢ ܣܰܘ̈ܦܶܐ ܠܣܰܘ̈ܦܶܐ ܛܳܣ ܘܰܥܛܳܐ ܠܣܶܓܕܰܬ݀ ܨܰܠܡ̈ܶܐ ܕܟܳܦܽܘܪܽܘܬܳܐ: ܛܽܘܒܰܝܟ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܥܶܩܳܪܳܐ ܗܰܢܺܝ ܪܺܝܚܳܐ ܚܰܠܝܳܐ ܕܟܳܪܽܘܙܽܘܬܳܐ: ܛܽܘܒܰܝܟ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܦܶܕܰܐܓܽܘܓܳܐ ܢܰܓܺܝܪ ܪܽܘܚܳܐ ܕܥܰܡ ܟܽܠ ܩܰܘ̈ܡܳܢ ܠܰܓܠܶܓ ܠܰܣܒܰܪܬܳܐ ܐܶܘܢܓܶܠܳܝܬܳܐ: ܛܽܘܒܰܝܟ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܨܰܝܳܕܳܐ ܒܚܺܝܪܳܐ ܕܚܰܟܺܝܡܳܐܝ̣ܬ ܡܰܙܶܓ ܐܶܢܽܘܢ ܠܣܰܡ̈ܡܳܢܶܐ ܕܟܳܪܽܘܙܽܘܬܳܐ ܡܰܚܝܳܢܺܝܬܳܐ: ܛܽܘܒܰܝܟ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܩܰܝܛܽܘܢܩܳܢܳܐ ܡܗܰܝܡܢܳܐ ܘܫܰܪܺܝܪܳܐ: ܕܶܐܬܗܰܝܡܰܢ ܩܠܺܝ̈ܕܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܛܽܘܒܰܝܟ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܪܗܺܝܛܪܳܐ ܪܰܒܳܐ ܕܟܳܪܽܘܙܽܘܬܳܐ ܐܶܘܢܓܶܠܳܝܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܫܰܪܘܰܝܢܳܐ ܢܨܺܝܒ ܥܰܠ ܬܰܦܳܐ ܕܡܰܥܡܽܘܕܺܝܬܳܐ ܘܶܐܬܬܰܫܩܺܝ ܒܰܕܡܳܐ ܕܣܳܗܕܽܘܬܳܐ: ܘܢܰܫܶܩ ܥܶܩܒܰܘ̈ܗܝ ܕܪܰܒܶܗ ܒܰܙܩܺܝܦܽܘܬܳܐ: ܛܽܘܒܰܝܟ ܦܰܘܠܳܘܣ ܓܰܒܝܳܐ ܕܥܺܕ̈ܳܬܳܐ ܬܳܐܪܐܳܐ ܪܰܕܳܝܳܐ ܕܪܳܕܝܳܐܝ̣ܬ ܪܕܳܐ ܘܰܐܠܶܦ ܣܒܰܪܬܳܐ ܚܕܰܬܳܐ ܘܰܡܫܺܝܚܳܝܬܳܐ: ܘܗܳܫܳܐ ܒܳܥܶܝܢܰܢ ܡܶܢܟܽܘܢ ܫܠܺܝ̈ܚܶܐ ܩܰܕܺܝ̈ܫܶܐ ܦܶܛܪܽܘܣ ܘܦܰܘܠܳܘܣ ܐܰܦܺܝܣܘ ܚܠܳܦܰܝܢ ܠܰܡܫܺܝܚܳܐ ܐܠܰܗܳܐ ܕܰܓܒܳܟܽܘܢ: ܕܝܰܡܺܝܢܶܗ ܢܰܐܓܶܢ ܥܠܰܝܢ: ܘܫܰܝܢܶܗ ܢܰܡܠܶܟ ܒܣܳܚܪ̈ܳܬܰܢ: ܘܰܫܠܳܡܶܗ ܢܕܰܝܰܪ ܒܰܝܢܳܬܰܢ: ܥܽܘܕܪܳܢܶܗ ܢܣܰܝܰܥ ܠܰܢ: ܚܢܳܢܶܗ ܢܰܫܦܰܥ ܥܠܰܝܢ: ܛܰܝܒܽܘܬܶܗ ܬܣܰܬܰܪ ܠܰܢ ܝܽܘܩܢܳܐ ܕܰܨܠܺܝܒܶܗ ܢܢܰܛܰܪ ܠܰܢ: ܐܳܦ ܪܽܘܚܶܗ ܩܰܕܺܝܫܳܐ ܢܩܰܕܫܰܢ: ܒܝܰܕ ܒܳܥ̈ܘܳܬܟܽܘܢ ܕܶܝܢ ܫܡܺܝ̈ܥܳܬܳܐ ܦܶܛܪܽܘܣ ܘܦܰܘܠܳܘܣ ܢܰܨܺܝ̈ܚܶܐ: ܣܰܩܽܘ̈ܒܠܐ ܕܗܳܪܶܝܢ ܥܰܡܰܢ ܢܶܬܒܰܛܠܽܘܢ: ܫܰܒ̈ܛܶܐ ܕܪܽܘܓܙܳܐ ܢܶܥܒܪܽܘܢ: ܡܰܪ̈ܕܘܳܬܳܐ ܢܶܙܕܰܓܪ̈ܳܢ: ܡܰܚܘ̈ܳܬܳܐ ܩܰܫ̈ܝܳܬܳܐ ܢܶܫܬܰܗ̈ܝܳܢ: ܟܪ̈ܺܝܗܶܐ ܐܳܣܝܽܘܬܳܐ ܢܶܩܢܽܘܢ: ܘܰܡܚܺܝ̈ܠܐ ܚܽܘܠܡܳܢܳܐ ܐܳܦ ܡܫܰܪ̈ܰܝܳܐ ܫܽܘܪܳܪܳܐ: ܘܚܰܛܳܝ̈ܶܐ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܳܐ ܘܒܽܘܣܳܡܳܐ ܒܡܰܠܟܽܘܬܳܐ: ܘܢܰܣܶܩ ܫܽܘܒܚܳܐ ܠܰܡܫܺܝܚܳܐ ܕܰܐܟܪܶܙܬܽܘܢ ܠܰܣܒܰܪܬܶܗ ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܩܕܳܡܰܝܟ ܡܫܺܝܚܳܐ ܐܠܰܗܳܐ ܩܰܪܶܒܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܒܥܽܘܗܕܳܢܳܐ ܪܚܺܝ̣ܡܳܐ ܕܪ̈ܺܝܫܳܢܶܐ ܕܰܫܠܺܝ̈ܚܰܝܟ ܦܶܛܪܽܘܣ ܘܦܰܘܠܳܘܣ: ܒܳܥܶܝܢܰܢ ܡ̣ܶܢ ܡܪܰܚܡܳܢܽܘܬܳܟ ܕܢܶܬܩܰܒܰܠ ܩܕܳܡ ܪܰܒܽܘܬܳܟ: ܘܰܒܝܰܕ ܒܳܥ̈ܘܳܬܗܽܘܢ ܕܰܫܠܺܝ̈ܚܶܐ ܕܺܝܠܳܟ ܐܶܬܦܰܢ ܥܰܠ ܬܰܟܫ̈ܦܳܬܰܢ ܘܦܰܢܳܐ ܫ̈ܶܐܠܳܬܰܢ: ܐܰܝܟܰܢܳܐ ܕܰܢܝܰܩܰܪ ܘܰܢܥܰܕܥܶܕ ܠܕܽܘܟܪ̈ܳܢܰܝܗܽܘܢ ܒܰܕܝܳܨܳܐ: ܘܢܳܣܒܺܝܢܰܢ ܡܶܢܳܟ ܐܰܓܪܳܐ ܘܦܽܘܪܥܳܢܳܐ: ܫܰܝܢܳܐ ܐܰܡܺܝܢܳܐ ܠܥܺܕܬܳܟ ܫܠܳܡܳܐ ܟܰܗܺܝܢܳܐ ܠܡܰܪܥܺܝܬܳܟ ܐܳܦ ܠܝܰܠܕܶܝ̈ܗ̇ ܚܽܘܣܳܝܳܐ ܘܫܽܘܒܩܳܢܳܐ: ܠܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܕܚܰܣܝܽܘܬܳܐ: ܗܳܫܳܐ ܘܰܒܟܽܠܙܒܰܢ܀

 

 

 

ܚܘܬܡܐ

 

 

 

ܝܶܫܽܘܥ ܨܰܝܳܕܳܐ ܕܡ̣ܶܢ ܪܰܘܡܳܐ ܢܚܶܬ: ܘܨܳܕܶܗ ܠܓܶܢܣܰܢ ܒܠܶܩܛܳܐ ܕܡܶܠܰܘ̈ܗܝ ܚܰܝ̈ܳܬܳܐ: ܘܰܓܒܳܐ ܠܶܗ ܫܠܺܝ̈ܚܶܐ ܕܺܐܝܬܰܝܗܽܘܢ ܗܘܰܘ ܨܰܝ̈ܳܕܶܐ ܕܢܽܘ̈ܢܶܐ: ܘܰܥܒܰܕ ܐܶܢܽܘܢ ܨܰܝ̈ܳܕܶܐ ܕܰܒܢܰܝ̈ܢܳܫܳܐ: ܒܳܥܶܝܢܰܢ ܡܶܢܳܟ ܒܝܰܕ ܨܠܰܘ̈ܳܬܗܽܘܢ: ܨܠܺܝ ܠܰܢ ܦܰܚܳܐ ܕܰܡܪܰܚܡܳܢܽܘܬܳܟ: ܘܒܶܗ ܨܽܘܕ ܠܰܢ ܘܰܩܢܺܝ ܠܰܢ ܒܢܰܝ̈ܳܐ ܥܳܒ̈ܕܰܝ ܨܶܒܝܳܢܳܟ ܘܣܳܓܽܘ̈ܕܶܐ ܫܰܪܺܝܪ̈ܶܐ ܠܐܠܳܗܽܘܬܳܟ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܶܗ ܫܠܺܝ̈ܚܶܐ ܩܰܕܺܝ̈ܫܶܐ ܕܢܰܟܪܽܙܘܢ ܣܒܰܪܬܳܐ ܒܟܽܠܳܗ̇ ܡܶܬܥܰܡܪܳܢܺܝܬܳܐ: ܘܰܒܩܺܝܩܢܳܐ ܕܰܨܠܺܝܒܳܐ ܒܰܕܡܽܘܬ ܬܰܘܪ̈ܶܐ ܟܕܰܢ ܐܶܢܽܘܢ ܘܢܶܦܠܚܽܘܢ ܣܰܘ̈ܦܶܝܗ̇ ܕܰܒܪܺܝܬܳܐ: ܘܢܶܥܩܪܽܘܢ ܘܰܢܕܰܟܽܘܢ ܟܽܠܶܗ ܝܰܥܪܳܐ ܕܚܰܢܦܽܘܬܳܐ: ܘܰܥܒܰܕ ܬܪܶܝܢ ܡܶܢܗܽܘܢ ܪ̈ܺܝܫܳܢܶܐ ܠܰܫܠܺܝܚܽܘܬܳܐ ܚܰܕ ܦܶܛܪܽܘܣ ܕܰܟܦܰܪ ܒܶܗ ܒܥܶܕܳܢ ܙܩܺܝܦܽܘܬܳܐ ܘܚܰܘܺܝ ܬܝܳܒܽܘܬܳܐ ܕܟܺܝܬܳܐ ܘܫܰܪܺܝܪܬܳܐ ܘܰܗܘܳܐ ܐܰܚܺܝܕ ܩܠܺܝ̈ܕܶܐ ܕܡܰܠܟܽܘܬܳܐ: ܘܰܐ̱ܚܪܺܝܢ ܦܰܘܠܳܘܣ ܕܡܶܢ ܩܕܺܝܡ ܢܳܨܰܚ ܗܘܳܐ ܒܟܳܦܽܘܪܽܘܬܳܐ ܘܪܳܕܶܦ ܗܘܳܐ ܠܰܫܠܺܝܚܽܘܬܳܐ: ܕܶܐܬܬܰܠܡܰܕ ܠܶܗ ܘܰܗܘܳܐ ܪܺܝܫܳܐ ܠܰܟܪܺܝܣܛܝܳܢܽܘܬܳܐ: ܘܬܰܠܡܶܕ ܠܥܳܠܡܳܐ ܟܽܠܶܗ ܠܰܡܢܰܨܚܳܢܗܽܘܢ ܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܠܟܽܘܢ ܡܩܰܠܣܺܝܢܰܢ ܫܠܺܝ̈ܚܶܐ ܩܰܕܺܝ̈ܫܶܐ ܦܶܛܪܽܘܣ ܘܦܰܘܠܳܘܣ ܝܰܪ̈ܕܶܐ ܡܰܠܝ̈ܰܝ ܐܳܣܝܽܘܬܳܐ ܘܥܽܘܕܪ̈ܳܢܶܐ: ܘܫܳܩܰܝ̈ܳܐ ܕܰܐܫܩܺܝܘ ܘܰܐܛܺܝܦܘ ܒܝܰܕ ܡܰܠܦܳܢܽܘܬܳܐ ܐܠܰܗܳܝܬܳܐ ܠܟܽܠܳܗ̇ ܒܪܺܝܬܳܐ: ܦܶܛܪܽܘܣ ܐܳܦ ܦܰܘܠܳܘܣ ܐܰܟܳܪ̈ܶܐ ܪ̈ܽܘܚܳܢܳܝܶܐ ܕܰܥܩܰܪܘ ܡ̣ܶܢ ܐܰܪܥܳܐ ܙܺܝ̈ܙܳܢܶܐ ܕܰܚܛܺܝܬܳܐ ܦܶܛܪܽܘܣ ܐܳܦ ܦܰܘܠܳܘܣ ܐܰܚܺܝ̈ܕܰܝ ܩܠܺܝ̈ܕܶܐ ܕܡܰܠܟܽܘܬܳܐ ܘܰܡܚܰܘ̈ܝܰܝ ܠܰܢ ܐܽܘܪܚܳܐ ܕܰܬܝܳܒܽܘܬܳܐ: ܦܶܛܪܽܘܣ ܐܰܚܳܐ ܘܚܰܒܪܳܐ ܕܬܰܝ̈ܳܒܶܐ: ܘܦܰܘܠܳܘܣ ܐܰܪܕܺܝܟܠܐ ܛܒܺܝܒܳܐ ܕܰܡܫܰܪܪܳܐܝ̣ܬ ܣܕܰܪ ܕܽܘܡ̈ܣܶܐ ܕܒܶܢܝܳܢܳܐ ܕܥܺܕܬܳܐ ܒܰܫܪܳܪܳܐ ܕܰܣܒܰܪܬܳܐ: ܦܶܛܪܽܘܣ ܒܰܢܳܝܳܐ ܡܗܺܝܪܳܐ ܕܥܰܠ ܫܽܘܥܳܐ ܦܶܛܪܽܘܣܳܝܳܐ ܐܰܬܩܶܢ ܘܫܰܪܰܪ ܒܶܢܝܳܢܳܗ̇ ܕܰܡܟܺܝܪܬܶܗ ܕܫܶܡܫܳܐ ܕܙܰܕܺܝܩܽܘܬܳܐ: ܦܰܘܠܳܘܣ ܓܰܙܳܐ ܥܰܬܺܝܪ ܚܶܟ̈ܡܳܬܳܐ: ܕܰܐܦܶܩ ܘܰܕܪܳܐ ܣܺܝ̈ܡܳܬܳܐ ܒܥܺܕܬܳܐ ܩܰܕܺܝܫܬܳܐ: ܦܶܛܪܽܘܣ ܕܰܘܩܳܐ ܥܺܝܪܳܐ ܕܩܰܕܶܡ ܕܳܩ ܘܰܐܪܓܶܫ ܘܰܩܪܳܐ ܘܙܰܗܰܪ ܡ̣ܶܢ ܫܳܪ̈ܥܳܬܳܐ ܕܰܚܛܺܝܬܳܐ ܦܰܘܠܳܘܣ ܗܶܢܝܽܘܟܳܐ ܠܒܺܝܒܳܐ ܕܬܰܩܺܝܦܳܐܝ̣ܬ ܡܰܪܟܰܒܬܳܐ ܣܒܰܪܬܳܢܳܝܬܳܐ ܪܰܟܶܒ ܘܶܐܪܰܥ ܠܛܳܥܝܽܘܬܳܐ ܕܥܰܡ̈ܡܶܐ ܘܰܐܦܢܺܝ ܐܶܢܽܘܢ ܠܗܰܝܡܳܢܽܘܬܳܐ: ܦܶܛܪܽܘܣ ܘܰܥܕܳܐ ܕܟܽܠ ܛܽܘ̈ܒܺܝܢ ܕܒܰܩܢܽܘܡܶܗ ܓܡܰܪ ܟܽܠ ܦܽܘܩ̈ܕܳܢܺܝܢ: ܘܰܥܒܰܕ ܘܰܐܠܶܦ ܐܰܝܟ ܟܺܐܢܽܘܬܳܐ: ܦܰܘܠܳܘܣ ܓܰܒܝܳܐ ܙܰܠܺܝܩܳܐ ܫܒܺܝܚܳܐ ܕܡ̣ܶܢ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ: ܥܬܰܪ ܢܽܘܗܪܳܐ ܕܺܝܕܰܥܬܳܐ ܘܗܰܝܡܳܢܽܘܬܳܐ: ܦܶܛܪܽܘܣ ܚܰܙܳܝܳܐ ܕܟܰܣ̈ܝܳܬܳܐ: ܕܡ̣ܶܢ ܐܰܒܳܐ ܩܰܒܶܠ ܝܺܕܰܥܬܳܐ: ܕܰܡܫܺܝܚܳܐ ܒܪܶܗ ܗ̣ܽܘ ܕܰܐܠܳܗܳܐ: ܘܥܰܠ ܗ̇ܳܝ ܐܶܫܬܘܺܝ ܠܛܽܘܒܳܐ: ܦܰܘܠܳܘܣ ܛܽܘܒܳܢܳܐ ܫܦܺܝܥ ܝܰܕ̈ܥܳܬܳܐ ܫܡܰܝܳܢ̈ܝܳܬܳܐ ܕܥܰܡ ܟܽܠ ܟܽܠ ܗܘܳܐ: ܘܰܠܟܽܠ ܝܺܬܰܪ ܒܰܒܛܺܝܠܽܘܬܳܐ: ܦܶܛܪܽܘܣ ܝܽܘܩܢܳܐ ܫܒܺܝܚܳܐ ܘܢܰܗܺܝܪܳܐ ܕܰܡܫܰܡܠܝܳܐܝ̣ܬ ܐܰܝܟ ܕܡܰܨܝܳܐ ܫܩܰܠ ܕܶܡܘ̈ܳܬܳܐ ܕܬܰܦܢܟܳܐ ܝܶܫܽܘܥ ܨܰܠܡܳܐ ܕܬܶܫܒܽܘܚܬܳܐ ܦܰܘܠܳܘܣ ܟܳܪܽܘܙܳܐ ܪܳܡ ܩܳܠܐ ܕܒܰܐܦ̈ܶܐ ܓܰܠܝ̈ܳܬܳܐ ܕܦܰܪܶܗܣܺܝܰܐ ܩܰܢ̈ܝܳܢ ܠܰܣܒܰܪܬܳܐ ܕܶܝܢ ܐܰܪܺܝܒ ܒܰܬܟܺܝܠܽܘܬܳܐ: ܦܶܛܪܽܘܣ ܠܳܚܽܘܝܳܐ ܕܟܳܦܽܘܪܽܘܬܳܐ ܒܣܺܝܪܬܳܐ: ܒܡܶܬܦܰܢܝܳܘܬܽܐ ܡܩܰܠܰܣܬܳܐ ܠܚܳܐ ܠܰܟܦܽܘܪܝܳܐ ܘܰܕܪܰܫ ܐܽܘܪܚܳܐ ܕܰܬܝܳܒܽܘܬܳܐ: ܦܰܘܠܳܘܣ ܡܰܠܳܚܐ ܙܗܺܝܪܳܐܝ̣ܬ ܕܢܺܝܚܳܐܝ̣ܬ ܕܰܒܰܪ ܠܐܠܦܳܐ ܥܺܕܬܳܢܳܝܬܳܐ: ܟܰܕ ܢܛܺܝܪܳܐ ܡ̣ܶܢ ܟܺܐܡܽܘ̈ܢܶܐ ܘܡܰܚܫܽܘ̈ܠܐ ܕܝܽܘܕܳܝܽܘܬܳܐ: ܦܶܛܪܽܘܣ ܢܰܗܺܝܪܳܐ ܪܰܒܳܐ ܕܰܫܩܰܠ ܫܽܘܠܛܳܢܳܐ ܡ̣ܶܢ ܐܺܝܡܳܡܳܐ ܡܫܺܝܚܳܐ ܫܶܡܫܳܐ ܕܙܰܕܺܝܩܽܘܬܳܐ: ܦܰܘܠܳܘܣ ܣܳܬܽܘܪܳܐ ܕܥܳܒܪ̈ܰܝ ܥܰܠ ܢܳܡܽܘܣܳܐ: ܘܰܕܙܳܢܝܽܘܬܳܐ ܕܰܐܣܓܺܝ ܟܬܰܒ ܡܶܛܽܠܬܗܶܝܢ ܒܣܽܘܓܳܐܐ ܕܶܐܓܪ̈ܳܬܳܐ: ܦܶܛܪܽܘܣ ܥܳܕܽܘܪܳܐ ܣܰܓܺܝ ܒܛܺܝܠܽܘܬܳܐ ܕܥܳܕ ܟܽܠܶܗ ܝܰܥܪܳܐ ܕܟܳܦܽܘܪܽܘܬܳܐ: ܦܰܘܠܳܘܣ ܦܺܝܠܺܝܣܽܘܦܳܐ ܡܠܺܝܠ ܢܶܥ̈ܡܳܬܳܐ ܕܒܰܡܠܺܝܠܽܘܬܶܗ ܫܰܥܒܶܕ ܚܰܟܺܝ̈ܡܶܐ ܕܝܰܘܢܳܝܽܘܬܳܐ: ܦܶܛܪܽܘܣ ܨܰܝܳܕܳܐ ܕܢܽܘ̈ܢܶܐ ܕܶܐܬܩܪܺܝ ܡܶܢܫܶܝܠ ܘܶܐܫܬܰܚܠܰܦ ܘܰܗܘܳܐ ܨܰܝܳܕܳܐ ܕܰܒܢܰܝ̈ܢܳܫܳܐ: ܦܰܘܠܳܘܣ ܩܪܰܒܬܳܢܳܐ ܢܰܨܺܝܚܳܐ ܕܓܰܢ̱ܒܳܪܳܐܝ̣ܬ ܙܟܳܐ ܠܟܽܠܗܽܘܢ ܚܰܝܠܰܘ̈ܳܬܳܐ ܕܛܳܥܝܽܘܬܳܐ: ܦܶܛܪܽܘܣ ܪܰܝܡܳܐ ܫܒܺܝܚ ܚܺܐܪܽܘܬܳܐ: ܚܕܳܢܳܝ ܩܰܪܢܳܐ ܐܰܘܟܺܝܬ ܫܪܳܪܳܐ ܘܗܰܝܡܳܢܽܘܬܳܐ: ܦܰܘܠܳܘܣ ܫܽܘܫܰܢܬܳܐ ܗܰܢܺܝܰܐܬ݀ ܪܺܝܚܳܐ ܕܓܰܘܢܶܗ ܡܰܣܡܰܩ ܒܰܕܡܳܐ ܕܣܳܗܕܽܘܬܳܐ: ܘܪܺܝܚܶܗ ܣܰܓܺܝ ܡܒܰܣܶܡ ܒܚܰܬܺܝܬܽܘܬ ܟܳܪܽܘܙܽܘܬܳܐ: ܦܶܛܪܽܘܣ ܬܰܘܪܳܐ ܟܳܪܽܘܒܳܐ ܘܨܳܪܶܐ ܚܳܛܽܘ̈ܛܶܐ ܣܒܰܪ̈ܬܳܢܳܝܶܐ ܒܚܰܝܠܬܳܢܽܘܬܳܐ: ܦܰܘܠܳܘܣ ܬܰܪܥܳܐ ܕܥܳܢ̈ܳܐ ܡܫܺܝܚܳܝܬܳܐ ܒܶܗ ܘܰܠܓܰܘ ܡܶܢܶܗ ܡܶܣܬܰܬܪܳܐ: ܠܳܟ ܛܽܘܒܰܝܟ ܐܰܢܕܪܶܐܰܣ ܐܰܚܳܐ ܕܦܶܛܪܽܘܣ ܘܚܰܒܪܳܐ ܕܦܰܘܠܳܘܣ ܕܶܐܬܬܰܠܡܰܕ ܠܡܰܠܟܽܘܬܳܐ ܕܰܫܡܰܝܳܐ ܘܰܩܢܳܐ ܬܰܪ̈ܬܰܝܗܶܝܢ ܚܰܕ̈ܬܳܬܳܐ: ܕܫܰܡܠܺܝ ܥܰܬܺܝܩܬܳܐ ܘܫܰܪܺܝ ܒܰܚܕܰܬܳܐ: ܛܽܘܒܰܝܟ ܫܠܺܝܚܳܐ ܐܰܢܕܪܶܐܰܣ ܕܒܰܕܡܽܘܬ ܡܳܪܶܗ ܐܶܨܛܠܶܒ ܒܬܰܪܥܳܐ ܕܦܰܬܳܪܳܘܣ ܘܫܰܡܠܺܝ ܪܶܗܛܶܗ ܒܰܫܠܺܝܚܽܘܬܳܐ ܘܣܳܗܕܽܘܬܳܐ: ܘܒܰܕܓܽܘܢ ܥܺܕܬܳܐ ܩܰܕܺܝܫܬܳܐ ܗ̇ܳܝ ܕܫܰܬܶܐܣܬܽܘܢ ܥܰܠ ܫܽܘܥܳܐ ܠܐ ܡܶܙܕܰܥܙܥܳܢܳܐ ܕܗܰܝܡܳܢܽܘܬܳܐ ܘܰܒܢܰܝܬܽܘܢܳܗ̇ ܒܕܽܘ̈ܡܣܶܐ ܕܕܽܘܓܡܰܛܰܐ ܕܺܝܠܟܽܘܢ ܠܐ ܕܰܓ̈ܳܠܐ: ܘܫܰܟܠܶܠܬܽܘܢܳܗ̇ ܒܰܕܡܳܐ ܕܨܰܘܪ̈ܰܝܟܽܘܢ: ܟܰܕ ܣܰܓܺܝ ܚܳܕܝܳܐ ܒܝܰܘܡܳܐ ܕܕܽܘܟܪܳܢܟܽܘܢ: ܘܡܶܬܓܰܘܣܳܐ ܒܰܨܠܰܘ̈ܳܬܟܽܘܢ: ܕܬܶܫܶܐܠܽܘܢ ܠܳܗ̇ ܡ̣ܶܢ ܡܳܪܟܽܘܢ: ܐܰܘܝܽܘܬܳܐ ܘܰܚܕܳܝܽܘܬܳܐ ܠܡܰܠܟ̈ܶܐ: ܒܗܺܝܠܽܘܬܳܐ ܠܪ̈ܳܥܰܘܳܬܳܐ: ܪܽܘܡܪܳܡܳܐ ܠܪ̈ܺܝܫܰܝ ܟܳܗ̈ܢܶܐ: ܗܶܕܪܳܐ ܠܟܳܗ̈ܢܶܐ: ܡܥܰܠܝܽܘܬܳܐ ܠܰܡܫܰܡ̈ܫܳܢܶܐ: ܒܽܘܝܳܢܳܐ ܠܕܰܝܪ̈ܳܝܶܐ: ܨܶܒܬܳܐ ܠܰܩܠܺܝܪ̈ܺܝܩܽܘ: ܝܰܨܺܝܦܽܘܬܳܐ ܠܓܰܒܪ̈ܶܐ: ܪܡܺܝܣܽܘܬܳܐ ܠܢܶܫ̈ܶܐ: ܐܽܘܟܦܳܢܳܐ ܛܳܒܳܐ ܠܐܪ̈ܡܠܳܬܳܐ: ܕܽܘܒܳܪ̈ܶܐ ܟܺܐܢ̈ܶܐ ܠܝܰܬܡ̈ܶܐ: ܬܰܪܒܺܝܬܳܐ ܫܰܦܺܝܪܬܳܐ: ܠܰܛܠܳܝ̈ܶܐ ܠܽܘܒܳܒܳܐ ܠܚܰܛܳܝ̈ܶܐ: ܒܽܘܝܳܐܳܐ ܠܬܰܝ̈ܳܒܶܐ: ܣܰܒܥܳܐ ܠܟܰܦ̈ܢܶܐ: ܡܰܝܬܳܝܽܘܬ ܦܺܐܪ̈ܶܐ ܛܳܒ̈ܶܐ ܒܰܡܫܰܪܬܚܽܘܬܳܐ: ܗܕܺܝܪܽܘܬ ܥ̈ܰܠܠܳܬܳܐ ܒܟܰܗܺܝܢܽܘܬܳܐ: ܣܳܥܽܘܪܽܘܬܳܐ ܕܪ̈ܰܚܡܶܐ ܠܟܽܠ ܒܣܰܪ: ܡܰܘܗ̈ܒܳܬܳܐ ܛܳܒ̈ܳܬܳܐ ܠܟܰܫܺܝܪ̈ܶܐ: ܗܰܝܡܳܢܽܘܬܳܐ ܕܰܫܪܳܪܳܐ ܠܥܺܕܬܳܐ ܩܰܕܺܝܫܬܳܐ ܫܰܝܢܳܐ ܘܰܫܠܳܡܳܐ ܢܰܡܠܶܟ ܒܳܗ̇ ܐܰܡܺܝܢܳܐܝ̣ܬ ܥܕܰܡܳܐ ܠܥܳܠܰܡ: ܥܰܡ ܚܽܘܣܳܝܳܐ ܘܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ ܠܡܰܣܟ̈ܠܳܢܶܐ: ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܘܡ̣ܶܢ ܟܽܠ ܬܶܓܡܺܝ̈ܢ ܟܢܺܝܫܳܐܝ̣ܬ: ܘܡܶܢܟܽܠ ܦܽܘܡܺܝ̈ܢ ܫܰܘܝܳܐܝ̣ܬ: ܘܡܶܢܟܽܠ ܠܶܫܳܢܺܝ̈ܢ ܫܦܺܝܥܳܐܝ̣ܬ: ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܢܰܣܶܩ: ܠܐܒܳܐ ܕܰܓܒܳܟܽܘܢ ܘܠܰܒܪܳܐ ܕܠܰܣܒܰܪܬܶܗ ܫܠܰܚܬܽܘܢ ܘܰܠܪܽܘܚܳܐ ܩܰܕܺܝܫܳܐ ܕܚܰܟܶܡܟܽܘܢ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܦܶܛܪܽܘܣ ܘܦܰܘܠܳܘܣ ܕܰܐܦܢܺܝܬܽܘܢ ܠܥܰܡ̈ܡܶܐ ܘܟܰܘܶܢܬܽܘܢ ܠܛܳܥܰܝ̈ܳܐ: ܡ̣ܶܢ ܬܰܘܫܳܐ ܕܰܚܛܺܝܬܳܐ: ܗܳܫܳܐ ܒܰܨܠܰܘ̈ܳܬܟܽܘܢ ܢܶܬܦܢܶܐ ܟܽܠܰܢ ܚܰܛܳܝ̈ܶܐ ܡ̣ܶܢ ܦܶܗܝܳܐ ܕܰܣܪ̈ܺܝܩܳܬܳܐ ܘܢܺܐܬܶܐ ܠܰܢ ܠܐܘܪܚܳܐ ܕܰܬܝܳܒܽܘܬܳܐ: ܘܢܶܙܕܪܰܥ ܝܽܘܠܦܳܢܟܽܘܢ ܒܠܶܒܰܘ̈ܳܬܰܢ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܕܰܐܩܺܝܡ ܒܥܺܕܬܶܗ ܥܰܡܽܘ̈ܕܶܐ ܚܰܝܠܬܳܢ̈ܶܐ: ܦܶܛܪܽܘܣ ܘܦܰܘܠܳܘܣ ܛܽܘ̈ܒܳܢܶܐ: ܠܗܰܘ ܕܒܶܗ ܡܰܪܺܝܘ ܘܣܳܡܘ ܢܰܦܫܗܽܘܢ ܚܠܳܦ ܥܳܢ̈ܳܐ ܗ̇ܳܝ ܕܰܦܪܰܩ ܒܰܕܡܶܗ ܠܗܰܘ ܕܡܶܛܽܠ ܚܽܘܒܶܗ ܐܶܙܕܩܶܦ ܪܰܒܳܐ ܦܶܛܪܽܘܣ ܒܳܬܰܪ ܪܺܝܫܶܗ: ܘܦܰܘܠܳܘܣ ܒܣܰܝܦܳܐ ܐܶܬܟܰܠܰܠ ܘܶܐܬܦܣܶܩ ܪܺܝܫܶܗ ܠܗܰܘ ܪܰܒܳܐ ܕܩܽܘܫܬܳܐ ܕܰܐܠܶܦ ܠܦܶܛܪܽܘܣ ܒܓܶܠܝܳܢܳܐ ܥܰܠ ܐܺܝܬܽܘܬܶܗ ܥܰܡ ܐܰܒܳܐ ܘܪܽܘܚܳܐ: ܐܶܬܚܙܺܝ ܠܦܰܘܠܳܘܣ ܒܽܐܘܪܚܳܐ ܘܰܐܢܗܰܪ ܠܬܰܪܥܺܝܬܶܗ: ܘܗܳܐ ܪܳܥܡܺܝܢ ܣܰܘ̈ܦܶܐ ܒܕܽܘܟܪ̈ܳܢܰܝܗܽܘܢ: ܘܙܳܡܪܺܝܢ ܫܽܘܒܚܳܐ ܠܡܳܪܝܳܐ ܡܟܰܠܠܳܢܗܽܘܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܓܢܺܝܙܳܐ ܘܰܡܥܰܠܰܝ ܒܟܽܠ: ܗ̇ܰܘ ܕܰܫܦܰܪ ܠܶܗ ܘܶܐܬܗܰܦܰܟ ܥܰܡܰܢ ܡܕܰܒܪܳܢܳܐܝ̣ܬ: ܘܰܗܘܳܐ ܫܠܺܝܚܳܐ ܩܰܕܡܳܝܳܐ ܘܪܺܝܫ ܟܽܘܡܪ̈ܶܐ ܕܬܰܘܕܺܝܬܰܢ ܝܶܫܽܘܥ ܡܫܺܝܚܳܐ: ܘܚܰܣܺܝ ܚܰܘ̈ܒܶܐ ܘܰܚܛܳܗ̈ܶܐ ܕܒܶܝܬ ܐܳܕܳܡ: ܐܶܠܐ ܒܰܡܕܰܒܪܳܢܽܘܬܶܗ ܓܒܳܐ ܠܶܗ ܬܪܶܥܣܰܪ ܗܶܕܝܽܘ̈ܛܶܐ ܘܚܰܟܶܡ ܐܶܢܽܘܢ ܒܪܽܘܚܶܗ ܩܰܕܺܝܫܳܐ: ܘܣܳܡ ܠܗܽܘܢ ܛܶܟ̈ܣܶܐ ܘܢܳܡܽܘ̈ܣܶܐ ܫܒܺܝ̈ܚܶܐ: ܕܰܡܛܰܟܣܳܐܝ̣ܬ ܘܠܐ ܗܘܳܐ ܒܠܺܝܠܐܴܝ̣ܬ ܬܶܬܟܪܶܙ ܣܒܰܪܬܳܐ ܐܶܘܢܓܶܠܳܝܬܳܐ: ܘܰܥܒܰܕ ܠܗܽܘܢ ܪܺܝܫܳܐ ܐܳܦ ܫܶܬܶܐܣܬܳܐ ܠܗܰܘ ܡܥܰܠܝܳܐ ܒܰܓܡܺܝܪܽܘܬܳܐ ܦܶܛܪܽܘܣܳܝܬܳܐ ܘܚܰܘܺܝ ܠܶܗ ܪܺܝܫܳܐܝ̣ܬ ܓܶܠܝ̈ܳܢܶܐ ܘܐ̱ܪ̈ܳܙܶܐ ܐܠܰܗܳܝ̈ܶܐ: ܘܥܰܒܕܶܗ ܕܽܘܡܝܳܐ ܠܰܓܡܺܝܪ̈ܶܐ ܘܰܠܬܰܝ̈ܳܒܶܐ: ܐܰܝܟ ܪܺܝܫܳܐ ܘܩܰܕܡܳܝܳܐ ܕܰܐܚܰܘ̈ܗܝ: ܘܫܰܕܪܶܗ ܠܪܽܘܡܺܝ ܪܺܝܫܳܝܬܳܐ ܘܩܰܕܡܳܝܬܳܐ ܕܟܽܠܗܶܝܢ ܡܕܺܝ̈ܢܳܬܳܐ: ܘܶܐܬܚܙܺܝ ܬܽܘܒ ܠܦܰܘܠܳܘܣ ܟܰܕ ܪܳܕܶܦ ܠܬܰܠܡܺܝ̈ܕܰܘܗܝ ܘܨܳܕܶܗ ܒܽܐܘܪܚܳܐ: ܘܡ̣ܶܢ ܪܳܕܽܘܦܳܐ ܥܰܒܕܶܗ ܪܕܺܝܦܳܐ: ܘܰܐܥܬܪܶܗ ܒܓܶܠܝ̈ܳܢܶܐ ܫܒܺܝ̈ܚܶܐ ܘܚܰܟܡܶܗ ܒܐܪ̈ܳܙܶܐ ܐܠܰܗܳܝ̈ܶܐ: ܘܛܳܣ ܠܟܽܠ ܦܶܢ̈ܝܳܢ ܐܰܝܟ ܢܶܫܪܳܐ: ܘܰܡܠܳܗ̇ ܠܥܳܡܰܪܬܳܐ ܣܒܰܪܬܳܐ ܐܶܘܢܓܶܠܳܝܬܳܐ: ܐܰܟܶܣ ܠܡܰܠܟ̈ܶܐ ܘܟܰܘܶܢ ܠܕܰܝ̈ܳܢܶܐ: ܠܰܒܶܒ ܠܬܰܝ̈ܳܒܶܐ: ܚܰܝܶܠ ܠܰܡܚܺܝ̈ܠܐ: ܬܪ̈ܰܝܗܽܘܢ ܫܰܘܝܳܐܝ̣ܬ ܐܰܟܪܶܙܘ: ܬܪ̈ܰܝܗܽܘܢ ܫܰܘܝܳܐܝ̣ܬ ܐܶܬܟܰܠܰܠܘ: ܟܰܕ ܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܒܳܬܰܪ ܪܺܝܫܶܗ ܐܶܨܛܠܶܒ: ܕܢܶܗܘܶܐ ܡܢܰܫܶܩ ܥܶܩ̈ܒܳܬܶܗ ܕܰܙܩܺܝܦܳܐ ܝܶܫܽܘܥ ܪܰܒܶܗ: ܘܦܰܘܠܳܘܣ ܕܶܝܢ ܒܣܰܝܦܳܐ ܐܶܬܦܣܶܩ ܪܺܝܫܶܗ: ܘܒܰܛܝܳܪܳܐ ܕܥܳܢ̈ܳܐ ܙܰܒܢܳܐ ܐܶܬܬܣܺܝܡ: ܘܰܒܓܶܠܝܳܢܳܐ ܐܠܰܗܳܝܳܐ ܠܪܺܝܫ ܟܳܗ̈ܢܶܐ ܟܣܳܣܛܽܘܣ ܦܰܛܪܝܰܪܟܳܐ ܐܶܬܚܘܺܝ ܟܰܕ ܐܺܝܬܶܝܗ̇ ܪܳܥܝܳܐ ܡ̣ܶܢ ܛܝܳܪܳܐ ܕܰܥܢܳܢ̈ܶܐ ܠܪܺܝܫܳܐ ܡܝܰܩܪܳܐ ܘܝܰܗܒܶܗ ܠܦܰܛܪܝܰܪܟܳܐ: ܘܰܐܘܒܠܶܗ ܠܥܺܕܬܳܐ ܠܘܳܬ ܦܰܓܪܳܐ ܩܰܕܺܝܫܳܐ ܕܡܶܢܶܗ ܐܶܬܦܣܶܩ: ܘܰܐܚܬܶܗ ܗܘܳܐ ܠܪܺܝܫܳܐ ܡܝܰܩܪܳܐ ܠܘܳܬ ܪ̈ܶܓܠܰܘܗܝ: ܘܟܰܕ ܒܠܺܠܝܳܐ ܫܰܗܪܳܐ ܥܒܰܕܘ ܘܒܳܥܽܘܬܳܐ ܐܰܩܺܝܡܘ: ܥܒܰܕ ܐܠܰܗܳܐ ܬܶܕܡܽܘܪܬܳܐ ܪܰܒܬܳܐ ܠܫܽܘܪܳܪܳܐ ܕܰܡܗܰܝ̈ܡܢܶܐ: ܘܰܒܨܰܦܪܶܗ ܕܝܰܘܡܳܐ ܐܶܬܚܙܺܝ ܕܶܐܬܬܪܺܝܡ ܪܺܝܫܳܐ ܡ̣ܶܢ ܒܶܝܬ ܪ̈ܶܓܠܐ ܘܶܐܬܬܰܘܒܰܠ ܠܶܗ ܠܕܽܘܟܬܳܐ ܕܡܶܢܳܗ̇ ܐܶܬܦܣܶܩ: ܘܶܐܬܚܰܝܰܕ ܠܦܰܓܪܳܐ ܩܰܕܺܝܫܳܐ ܘܶܐܬܚܠܶܡ ܘܶܐܬܚܬܶܡ ܒܳܗ̇ ܒܕܽܘܟܬܶܗ: ܘܶܐܬܺܝܕܰܥ ܠܟܽܠ ܐ̱ܢܳܫ ܕܗ̇ܰܘ ܪܺܝܫܳܐ ܠܗܰܘ ܦܰܓܪܳܐ ܐܺܝܬܰܘܗܝ: ܘܟܽܠ ܕܰܚܙܰܘ ܫܰܒܰܚܘ ܠܐܠܳܗܳܐ ܡܰܘܪܒܳܢܳܐ ܕܕܳܚܠܰܘ̈ܗܝ: ܘܗܳܐ ܝܰܘܡܳܢ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܕܒܰܐܪܒܰܥ ܦܶܢ̈ܝܳܢ ܢܰܨܰܚ ܕܽܘܟܪܳܢܗܽܘܢ: ܘܟܽܠܗܽܘܢ ܕܥܺܕܬܳܐ ܙܳܡܪܺܝܢ ܫܽܘܒܚܳܐ ܠܗܰܘ ܕܰܐܘܪܶܒ ܐܶܢܽܘܢ: ܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܰܙܥܩܺܝܢܰܢ ܘܳܐܡܪܺܝܢܰܢ: ܦܶܛܪܽܘܣ ܘܦܰܘܠܳܘܣ ܐܰܟܳܪ̈ܶܐ ܡܠܺܝ̈ܠܐ ܕܰܥܩܰܪܘ ܡ̣ܶܢ ܐܰܪܥܳܐ ܠܟܽܠܶܗ ܝܰܥܪܳܐ ܕܚܰܢܦܽܘܬܳܐ: ܦܶܛܪܽܘܣ ܘܦܰܘܠܳܘܣ ܒܶܝܬ ܨܰܘܒܳܐ ܕܟܽܠܳܗ̇ ܡܝܰܬܪܽܘܬܳܐ: ܘܪ̈ܰܒܰܝ ܒ̈ܳܬܶܐ ܦܰܐܝ̈ܳܐ ܕܰܐܠܳܗܽܘܬܳܐ: ܘܪ̈ܺܝܫܰܝ ܚܰܝܠܰܘ̈ܳܬܳܐ ܕܡܰܠܟܳܐ ܫܡܰܝܳܢܳܐ: ܦܶܛܪܽܘܣ ܘܦܰܘܠܳܘܣ ܓܰܢ̱ܒܳܪ̈ܶܐ ܠܒܺܝ̈ܒܶܐ ܘܚܰܝܠܬܳܢ̈ܶܐ ܕܰܐܟܶܣܘ ܠܡܰܠܟ̈ܶܐ ܛܪ̈ܽܘܢܶܐ ܘܰܐܣܗܶܕܘ ܥܰܠ ܫܪܳܪܳܐ ܕܰܙܩܺܝܦܽܘܬܳܐ ܒܩܳܠܐ ܪܳܡܳܐ: ܦܶܛܪܽܘܣ ܘܦܰܘܠܳܘܣ ܕܰܗܒܳܐ ܣܢܺܝܢܳܐ ܕܰܨܡܰܚ ܙܺܝܘܗܽܘܢ ܫܰܦܺܝܪܳܐ ܒܰܐܪܒܰܥ ܦܶܢ̈ܝܳܬܳܐ: ܘܰܐܢܗܰܪ ܠܟܽܠܗܶܝܢ ܢܰܦ̈ܫܳܬܳܐ ܚܶܫܽܘ̈ܟܳܬܳܐ: ܦܶܛܪܽܘܣ ܘܦܰܘܠܳܘܣ ܗܰܝ̈ܟܠܐ ܕܟܰܝ̈ܳܐ ܘܰܙܗܰܝ̈ܳܐ ܕܰܒܗܽܘܢ ܥܶܡܪܰܬ݀ ܪܽܘܚܶܗ ܕܰܡܫܺܝܚܳܐ ܐܠܰܗܳܐ ܡܶܠܬܳܐ ܕܶܐܬܒܰܣܰܪ: ܦܶܛܪܽܘܣ ܘܦܰܘܠܳܘܣ ܘܰܪ̈ܕܶܐ ܗܰܢܺܝ̈ܰܐܝ ܪܺܝܚܳܐ ܘܫܰܦܺܝܪ̈ܰܝ ܚܙܳܬܳܐ ܕܰܒܪܺܝܚܗܽܘܢ ܗܰܢܺܝܳܐܐ ܒܰܣܡܽܘܗ̇ ܠܥܺܕܬܳܐ ܩܰܕܺܝܫܬܳܐ: ܦܶܛܪܽܘܣ ܘܦܰܘܠܳܘܣ ܙܗܰܝ̈ܳܐ ܘܩܰܕܺܝ̈ܫܶܐ ܕܙܰܗܺܝܘ ܠܢܰܦ̈ܫܳܬܗܽܘܢ ܒܡܰܚ̈ܘܳܬܳܐ ܘܰܒܚܶܣ̈ܕܶܐ ܘܰܒܨܽܘܚ̈ܝܳܬܳܐ ܕܡܶܛܽܠ ܡܫܺܝܚܳܐ: ܦܶܛܪܽܘܣ ܘܦܰܘܠܳܘܣ ܚܽܘܡܪ̈ܶܐ ܝܰܩܺܝܪ̈ܳܬܳܐ ܕܰܒܬܳܓܶܗ ܕܡܰܠܟܳܐ ܪܰܒܳܐ ܡܰܨܡܚܺܝܢ: ܘܢܽܘܗܪܳܐ ܥܰܠ ܚܰܙܳܝ̈ܶܐ ܐܳܫܕܺܝܢ: ܦܶܛܪܽܘܣ ܘܦܰܘܠܳܘܣ ܛܰܢ̈ܳܢܶܐ ܕܗܰܝܡܳܢܽܘܬܳܐ ܕܡ̣ܶܢ ܐܽܘܪܫܠܶܡ ܥܕܰܡܳܐ ܠܐܷܠܽܘܪܺܝܩܳܘܢ ܐܰܟܪܶܙܘ ܒܟܽܠܳܗ̇ ܥܳܡܰܪܬܳܐ ܠܰܣܒܰܪܬܳܐ ܐܶܘܢܓܶܠܳܝܬܳܐ: ܦܶܛܪܽܘܣ ܘܦܰܘܠܳܘܣ ܝܽܘ̈ܩܢܶܐ ܨܺܝܪ̈ܰܝ ܒܣܰܡ̈ܡܳܢܶܐ ܕܰܙܩܺܝܦܽܘܬܳܐ: ܘܛܰܒ̈ܥܶܐ ܛܒܺܝ̈ܥܰܝ ܒܡܽܘܢܺܝܛܺܝ ܕܪܽܘܚܳܐ ܩܰܕܺܝܫܳܐ: ܦܶܛܪܽܘܣ ܘܦܰܘܠܳܘܣ ܟܰܘܟ̈ܒܶܐ ܨܰܡܽܘܚ̈ܬܳܢܶܐ ܕܰܪܕܰܦܘ ܒܙܰܠܺܝ̈ܩܶܐ ܕܝܽܘܠܦܳܢܗܽܘܢ ܠܚܶܫܟܳܐ ܕܛܳܥܝܽܘܬܳܐ: ܦܶܛܪܽܘܣ ܘܦܰܘܠܳܘܣ ܩܪ̈ܰܒܬܳܢܶܐ ܢܰܨܺܝ̈ܚܶܐ: ܘܠܰܡܦܺܐܕ̈ܶܐ ܢܰܗܺܝܪ̈ܰܝ ܕܰܠܩܳܐ: ܕܰܒܝܰܕ ܟܳܪܽܘܙܽܘܬܗܽܘܢ ܐܰܢܗܰܪܘ ܠܟܽܠܳܗ̇ ܥܳܡܰܪܬܳܐ: ܦܶܛܪܽܘܣ ܘܦܰܘܠܳܘܣ ܡܳܐܢ̈ܶܐ ܓܒܰܝ̈ܳܐ ܕܰܒܗܽܘܢ ܥܶܡܪܰܬ݀ ܘܶܐܬܬܢܺܝܚܰܬ݀ ܬܠܺܝܬܳܝܽܘܬܳܐ ܡܫܰܒܰܚܬܳܐ: ܦܶܛܪܽܘܣ ܘܦܰܘܠܳܘܣ ܢܰܗܪ̈ܰܘܳܬܳܐ ܥܕܶܢܳܝ̈ܶܐ ܕܰܐܫܩܺܝܘ ܠܟܽܠܳܗ̇ ܥܳܡܰܪܬܳܐ ܡܰܝ̈ܳܐ ܚܰܝ̈ܶܐ ܡ̣ܶܢ ܡܰܒܽܘܥܳܐ ܫܡܰܝܳܢܳܐ: ܦܶܛܪܽܘܣ ܘܦܰܘܠܳܘܣ ܣܳܓܽܘ̈ܕܶܐ ܡܠܺܝ̈ܠܐ ܕܰܥܨܰܪ ܐܶܢܽܘܢ ܢܺܐܪܽܘܢ ܡܰܠܟܳܐ ܚܰܢܦܳܐ: ܘܰܐܪܘܺܝܘ ܒܝܰܕ ܚܰܡܪܗܽܘܢ ܠܟܽܠܳܗ̇ ܐܰܪܥܳܐ ܘܣܶܓܕܰܬ݀ ܠܐܠܳܗܳܐ ܒܳܪܽܘܝܳܗ̇: ܦܶܛܪܽܘܣ ܘܦܰܘܠܳܘܣ ܥܰܡܽܘ̈ܕܶܐ ܠܐ ܡܶܙܕܰܥܙ̈ܥܳܢܶܐ ܕܰܥܠܰܝܗܽܘܢ ܐܶܬܒܰܢܝܰܬ݀ ܥܺܕܬܳܐ ܩܰܕܺܝܫܬܳܐ ܘܡܽܘ̈ܟܠܶܝܗ̇ ܕܰܫܝܽܘܠ ܠܐ ܡܨܶܝܢ ܚܳܣܢܺܝܢ ܠܳܗ̇: ܦܶܛܪܽܘܣ ܘܦܰܘܠܳܘܣ ܦܺܝܪ̈ܡܶܐ ܕܟܰܝ̈ܳܐ ܕܰܒܪܺܝܚ ܣܘܳܬܳܐ ܕܩܶܛܠܰܝ̈ܗܽܘܢ ܪܰܥܺܝܘ ܠܪܺܝܫ ܟܽܘܡܪ̈ܶܐ ܫܡܰܝܳܢܳܐ: ܦܶܛܪܽܘܣ ܘܦܰܘܠܳܘܣ ܨܰܝ̈ܳܕܶܐ ܡܗܺܝܪ̈ܶܐ ܕܒܰܡܨܺܝܕܬܳܐ ܐܶܘܢܓܶܠܳܝܬܳܐ ܨܳܕܘ ܠܐܢܳܫܽܘܬܳܐ ܘܰܐܣܩܽܘܗ̇ ܡ̣ܶܢ ܝܰܡܳܐ ܕܰܚܛܺܝܬܳܐ: ܘܰܐܥܠܽܘܗ̇ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܦܶܛܪܽܘܣ ܘܦܰܘܠܳܘܣ ܩܪ̈ܰܒܬܳܢܶܐ ܢܰܚܫܺܝܪ̈ܬܳܢܶܐ ܕܰܐܩܪܶܒܘ ܘܰܙܟܰܘ ܠܟܽܠܗܶܝܢ ܡܰܫܪ̈ܝܳܬܶܗ ܕܳܐܟܶܠܩܰܪܨܳܐ: ܦܶܛܪܽܘܣ ܘܦܰܘܠܳܘܣ ܪ̈ܰܒܰܝ ܒ̈ܳܬܶܐ ܡܗܰܝ̈ܡܢܶܐ ܕܰܡܫܺܝܚܳܐ: ܐܳܦ ܐܰܚܺܝ̈ܕܰܝ ܩܠܺܝ̈ܕܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܦܶܛܪܽܘܣ ܘܦܰܘܠܳܘܣ ܫܰܘܫܒܺܝ̈ܢܶܐ ܕܚܰܬܢܳܐ ܫܡܰܝܳܢܳܐ: ܘܡܳܟܽܘܪ̈ܶܐ ܕܟܰܠܬܳܐ ܫܠܶܝܡܽܘܢܳܝܬܳܐ: ܦܶܛܪܽܘܣ ܘܦܰܘܠܳܘܣ ܬܰܦ̈ܶܐ ܥܕܶܢܳܝ̈ܶܐ ܘܪ̈ܽܘܚܳܢܳܝܶܐ ܕܰܡܚܰܕܶܝܢ ܠܥܺܕܬܶܗ ܕܰܐܠܳܗܳܐ ܒܝܰܕ ܡܟܰܬܒܳܢ̈ܘܳܬܗܽܘܢ: ܢܦܺܝܚܰܬ݀ ܒܪܽܘܚܳܐ ܩܰܕܺܝܫܳܐ: ܘܗܳܫܳܐ ܡܦܺܝܣܺܝܢܰܢ ܠܳܟ ܡܳܪܝܳܐ ܐܠܰܗܳܐ ܒܝܰܕ ܒܳܥ̈ܘܳܬܗܽܘܢ ܕܰܫܠܺܝ̈ܚܰܝܟ ܩܰܕܺܝ̈ܫܶܐ ܘܫܰܪܟܰܐ ܕܚܰܒܪ̈ܰܝܗܽܘܢ ܘܕܶܐܡܳܟ ܒܬܽܘܠܬܳܐ ܡܰܪܝܰܡ ܘܰܕܟܽܠܗܽܘܢ ܩܰܕܺܝ̈ܫܰܝܟ: ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܠܐ ܬܰܗܡܶܐ ܡܶܢܰܢ ܘܡܶܬܟܰܫܦܺܝܢܰܢ ܠܳܟ: ܚܰܝܶܠ ܡܚܺܝܠܽܘܬܰܢ ܥܨܽܘܒ ܠܕܰܬܒܺܝܪܺܝܢ: ܣܥܽܘܪ ܠܕܰܡܚܺܝܠܺܝܢ: ܬܪܽܘܨ ܠܕܰܟܦܺܝܦܺܝܢ: ܐܰܩܺܝܡ ܠܰܕܢܰܦܺܝܠܺܝܢ: ܥܰܕܰܪ ܠܕܰܛܠܺܝܡܺܝܢ: ܦܪܽܘܩ ܠܕܰܕܒܺܝܪܺܝܢ: ܟܰܢܶܫ ܠܕܰܡܒܰܕܪܺܝܢ: ܐܰܣܳܐ ܠܕܰܟܪܺܝܗܺܝܢ: ܦܰܢܳܐ ܠܰܕܪܰܚܺܝܩܺܝܢ: ܢܰܛܰܪ ܠܰܕܩܰܪܺܝܒܺܝܢ: ܚܰܣܳܐ ܠܰܕܚܰܛܳܝܺܝܢ: ܦܰܪܢܶܣ ܠܝܰܬܡ̈ܶܐ: ܙܰܘܶܢ ܠܡܶܣ̈ܟܺܢܶܐ: ܫܰܪܬܰܚ ܠܥܰܬܺܝܪ̈ܰܝ ܒܛܳܒ̈ܳܬܳܐ: ܣܡܽܘܟ ܠܣܳܒ̈ܶܐ: ܢܰܛܰܪ ܠܰܥܠܰܝ̈ܡܶܐ: ܘܪܰܒܳܐ ܠܰܛܠܳܝ̈ܶܐ: ܙܰܗܳܐ ܠܰܒܬܽܘ̈ܠܐ: ܟܰܢܶܟ ܠܰܡܙܰܘ̈ܓܶܐ: ܢܰܟܶܦ ܠܙܰܠܺܝ̈ܠܐ: ܘܰܠܟܽܠ ܩܰܘ̈ܡܳܢ ܘܡܽܘܫ̈ܚܳܢ ܕܰܒܝܰܕ ܟܳܪܽܘܙܽܘܬܗܽܘܢ ܒܳܟ ܡܗܰܝܡܢܺܝܢ: ܗܘܺܝ ܡܳܪܝܳܐ ܡܣܰܬܪܳܢܳܐ ܡ̣ܶܢ ܟܽܠܗܽܘܢ ܚܛܳܗ̈ܶܐ ܘܣܽܘܓ̈ܦܳܢܶܐ ܕܢܰܦܫܳܐ ܘܰܕܦܰܓܪܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܠܘܳܬܳܟ ܫܰܢܺܝܘ ܒܰܬܪܺܝܨܽܘܬ ܫܽܘܒܚܳܐ: ܐܰܢܺܝܚ ܐܶܢܽܘܢ ܡܳܪܝ ܒܰܐܘ̈ܳܢܶܐ ܕܺܝܠܳܟ ܛܽܘܒ̈ܬܳܢܶܐ: ܘܰܚܢܰܢ ܘܗ̣ܶܢܽܘܢ ܒܓܽܘ̈ܕܶܐ ܕܰܡܢܺܝ̈ܚܳܢܶܐ ܕܺܝܠܳܟ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܥܛܪܐ

 

 

 

ܥܶܛܪܳܐ ܒܰܣܺܝܡܳܐ ܘܪܺܝܚܳܐ ܗܰܢܺܝܳܐܐ ܗܘܰܝܬܽܘܢ ܒܰܒܪܺܝܬܳܐ ܦܶܛܪܽܘܣ ܘܦܰܘܠܳܘܣ ܘܫܰܪܟܳܐ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܘܰܪܕܰܦܬܽܘܢ ܠܫܺܐܕ̈ܶܐ ܘܰܛܪܰܕܬܽܘܢ ܠܕܰܝ̈ܘܶܐ: ܐܰܦܺܝܣܘ ܗܳܟܺܝܠ ܚܠܳܦܰܝܢ ܠܰܡܫܺܝܚܳܐ ܐܠܰܗܰܢ: ܕܢܶܬܕܰܟܶܐ ܡ̣ܶܢ ܟܽܘܬܡ̈ܶܐ ܕܰܚܛܺܝܬܳܐ: ܘܦܺܝܪܡܳܐ ܕܩܰܪܶܒܢܰܢ ܒܕܽܘܟܪܳܢܟܽܘܢ ܢܶܬܥܰܠܐܷ ܠܰܩܕܽܘܫ ܩܽܘܕܫܺܝ̈ܢ ܓܰܘܳܝܳܐ: ܘܢܶܬܩܰܒܰܠ ܠܘܳܬ ܪܺܝܫ ܟܽܘܡܪ̈ܶܐ ܕܰܫܪܳܪܳܐ: ܗܳܫܳܐ܀

 

 

 

ܚܘܬܡܐ

 

 

 

ܚܰܝܠܐ ܕܚܰܝܶܠ ܠܐܬܠܺܝܛܽܘܬܟܽܘܢ ܪ̈ܺܝܫܳܢܶܐ ܡܥܰܠܰܝ̈ܳܐ ܦܶܛܪܽܘܣ ܘܦܰܘܠܳܘܣ ܛܽܘܒ̈ܳܢܶܐ: ܗ̣ܽܘ ܢܚܰܝܶܠ ܠܰܢ ܕܢܶܛܰܪ ܦܽܘܩܕܳܢܰܝ̈ܟܽܘܢ: ܘܢܶܪܕܶܐ ܒܥܶܩ̈ܒܳܬܟܽܘܢ ܘܰܢܡܰܪܶܐ ܒܕܽܘܒܳܪ̈ܰܝܟܽܘܢ: ܘܰܕܠܐ ܫܶܠܝܳܐ ܢܰܣܶܩ ܫܽܘܒܚܳܐ ܠܕܰܓܒܳܟܽܘܢ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܠܗܰܘ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܫܡܰܝܳܢܳܐ ܕܰܠܥܳܠܰܡ ܗ̣ܺܝ ܡܰܠܟܽܘܬܶܗ ܘܰܠܕܳܪܕܳܪ̈ܺܝܢ ܫܽܘܠܛܳܢܶܗ ܠܐ ܥܳܒܰܪ: ܗ̇ܰܘ ܕܟܰܕ ܥܒܰܕ ܦܽܘܪܩܳܢܳܐ ܠܰܓܒܺܝܠܬܶܗ ܒܰܩܢܽܘܡܶܗ ܘܠܐ ܨܒܳܐ ܕܢܶܫܒܩܶܝܗ̇ ܕܠܐ ܡܰܥܗ̈ܕܳܢܶܐ ܘܰܡܕܰܒܪ̈ܳܢܶܐ ܚܦܺܝ̈ܛܶܐ: ܗܳܠܶܝܢ ܕܡ̣ܶܢ ܫܽܘܪܳܝܳܐ ܠܶܗ ܢܩܶܦܘ ܘܰܚܙܰܘ ܘܰܫܡܰܥܘ ܘܓܳܫܘ ܟܽܠܗܶܝܢ ܛܰܝܒ̈ܘܳܬܶܗ ܒܰܥܒܳܕܳܐ ܘܰܒܡܶܠܬܳܐ: ܘܰܠܗܽܘܢ ܫܰܕܰܪ ܐܰܝܟ ܐܺܝܙ̈ܓܰܕܶܐ ܒܟܽܠܳܗ̇ ܥܳܡܰܪܬܳܐ: ܘܒܺܐܝܕܰܝ̈ܗܽܘܢ ܟܽܠ ܐܳܣܘ̈ܳܬܳܐ ܘܚܰܝ̈ܠܐ ܘܥܽܘܕܪ̈ܳܢܶܐ ܫܰܟܶܢ ܠܦܰܓܪ̈ܶܐ ܘܢܰܦ̈ܫܳܬܳܐ: ܕܠܶܗ ܝܳܐܐ܀

 

 

 

ܣܕܪܐ

 

 

 

ܠܡ̇ܰܢ ܟܺܝܬ ܐܺܝܬ ܦܽܘܡܳܐ ܚܰܕܬܳܐ ܕܡܰܒܰܥ ܒܶܗ ܬܶܫܒ̈ܚܳܬܳܐ ܚܰܕ̈ܬܳܬܳܐ: ܐܰܘ ܠܶܫܳܢܳܐ ܪܽܘܚܳܢܳܝܳܐ ܕܰܡܠܰܚܶܡ ܩܽܘܠܳܣ̈ܶܐ ܡܰܠܝܰ̈ܝ ܚܶܟ̈ܡܳܬܳܐ: ܐܰܘ ܣܶܦ̈ܘܳܬܳܐ ܠܐ ܡܛܰܘ̈ܫܳܬܳܐ ܕܰܢܡ̈ܰܠܠܳܢ ܡ̈ܶܠܐ ܣܒܺܝ̈ܣܳܬ݀ ܒܝܰܕ̈ܥܳܬܳܐ: ܐܰܘ ܓܰܓܪ̈ܳܬܳܐ ܕܰܟܝ̈ܳܬܳܐ ܕܝܳܗ̈ܒܳܢ ܩ̈ܳܠܐ ܦܰܐܝ̈ܰܝ ܙܳܟܽܘܬܳܐ ܡܥܰܠܰܝܬܳܐ: ܕܢܶܫܬܰܥܽܘܢ ܓܡܺܝܪܳܐܝ̣ܬ ܥܰܠ ܪܰܒܽܘܬ ܡܥܰܠܝܽܘܬܳܐ ܕܪ̈ܺܝܫܰܝ ܫܠܺܝ̈ܚܶܐ ܕܺܝܠܳܟ ܡܶܠܬܳܐ ܐܠܰܗܳܐ: ܦܶܛܪܽܘܣ ܘܦܰܘܠܳܘܣ: ܗ̇ܳܢܽܘܢ ܕܰܐܢ̱ܬ ܓܒܰܝܬ ܘܗܰܕܰܪܬ ܘܰܐܘܪܶܒܬ ܒܡܶܠܬܳܟ ܫܰܪܺܝܪܬܳܐ: ܘܰܒܡܰܘܗ̈ܒܳܬܳܟ ܠܐ ܡܶܬܦܰܫܩܳܢ̈ܝܳܬܳܐ: ܠܗܰܘ ܡ̇ܰܢ ܟܺܐܦܳܐ ܟܰܢܺܝܬܳܝܗܝ ܒܰܫܡܳܐ ܕܺܝܠܳܟ ܠܐ ܡܶܙܕܰܥܙܥܳܢܳܐ: ܡ̣ܶܢ ܟܰܕ ܩܰܒܶܠ ܓܶܠܝܳܢܳܐ ܫܡܰܝܳܢܳܐ ܡ̣ܶܢ ܐܰܒܽܘܟ ܡܬܽܘܡܳܝܳܐ ܘܰܡܪܰܚܡܳܢܳܐ: ܘܰܥܠܰܘܗܝ ܐܶܫܬܰܘܕܺܝܬ ܕܰܬܫܰܬܶܐܣ ܠܥܺܕܬܳܐ ܡܗܰܝܡܰܢܬܳܐ ܩܰܬܽܘܠܺܝܩܺܝ ܗ̇ܳܝ ܕܺܝܠܳܟ: ܗ̇ܳܝ ܕܥܰܠ ܦܰܣܰܬ݀ ܐܺܝܕܰܝ̈ܟ ܩܰܕܺܝ̈ܫܳܬܳܐ ܩܒܺܝܥܳܐ ܒܪ̈ܰܘܡܶܐ ܥܶܠܳܝ̈ܶܐ: ܘܠܶܗ ܟܰܕ ܠܶܗ ܐܰܫܠܶܡܬ ܩܠܺܝ̈ܕܶܐ ܕܡܰܠܟܽܘܬܳܐ ܕܰܫܡܰܝܳܐ: ܗ̇ܳܝ ܕܢܶܐܣܽܘܪ ܘܢܶܫܪܶܐ: ܘܢܶܐܚܽܘܕ ܘܢܶܦܬܰܚ ܘܠܶܗ ܬܽܘܒ ܐܰܓܥܶܠܬ ܠܡܰܪܥܺܝܬܳܟ ܗ̇ܳܝ ܕܰܦܪܰܩܬ ܒܩܶܛܠܳܟ ܚܰܝܳܐ ܘܰܙܒܰܢܬ ܒܰܕܡܳܟ ܝܰܩܺܝܪܳܐ: ܘܝܰܗܒܬ ܒܺܐܝܕܰܘ̈ܗܝ ܚܰܝܠܐ ܘܓܰܢ̱ܒܳܪܽܘܬܳܐ ܠܽܘܩܒܰܠ ܐܳܟܶܠܩܰܪܨܳܐ ܒܥܶܠܕܒܳܒܳܐ: ܘܳܐܣ̈ܘܳܬܳܐ ܘܬܶܕܡܪ̈ܳܬܳܐ ܬܡܺܝ̈ܗܳܬܳܐ ܒܺܐܝܕܰܘ̈ܗܝ ܠܟܽܠܳܗ̇ ܐ̱ܢܳܫܽܘܬܳܐ ܫܰܟܶܢܬ ܥܕܰܡܳܐ ܕܳܐܦ ܛܶܠܳܢܺܝܬܶܗ ܡܺܝ̈ܬܶܐ ܡܩܺܝܡܳܐ ܗܘܳܬ݀: ܠܫܳܐܘܳܠ ܕܶܝܢ ܡ̇ܰܢ ܗܳܢܳܐ ܠܦܰܘܠܳܘܣ ܐܰܥܒܰܪܬ: ܕܠܐ ܝܽܘܕܳܐܝ̣ܬ ܢܶܦܠܽܘܚ ܠܳܟ: ܘܒܰܐܪܥܳܐ ܕܡܽܘܠܟܳܢܳܐ ܒܰܠܚܽܘܕ ܢܶܦܠܽܘܚ ܠܳܟ: ܐܶܠܐ ܕܢܶܫܩܽܘܠ ܒܶܝܬ ܥܰܡ̈ܡܶܐ ܘܡܰܠܟ̈ܶܐ ܘܰܒܢܰܝ̈ܳܐ ܕܺܐܝܣܪܳܐܶܝܠ ܘܢܶܛܥܰܢ ܨܠܺܝܒܳܟ ܘܚܶܣܕܳܟ ܥܠܰܘܗܝ: ܘܠܰܨܠܺܝܒܳܟ ܡܳܪܳܢܳܝܳܐ ܫܽܘܒܚܳܐ ܘܫܽܘܒܗܳܪܳܐ ܢܶܣܰܒ: ܠܗܳܢܳܐ ܡܳܐܢܳܐ ܕܺܝܠܳܟ ܓܰܒܝܳܐ ܩܪܰܝܬܳܝܗܝ ܦܰܠܳܚܳܐ ܛܳܒܳܐ ܒܟܰܪܡܳܐ ܕܺܝܠܳܟ ܪܽܘܚܳܢܳܝܳܐ ܥܒܰܕܬܳܝܗܝ ܘܟܳܪܽܘܙܳܐ ܕܶܐܘܢܓܶܠܝܽܘܢ ܕܰܡܕܰܒܪܳܢܽܘܬܳܟ ܪܳܡܰܬ݀ ܡ̣ܶܢ ܦܽܘ̈ܫܳܩܶܐ ܐܰܩܺܝܡܬܳܝܗܝ: ܘܰܒܓܶܠܝ̈ܳܢܶܐ ܫܒܺܝ̈ܚܶܐ ܘܠܐ ܡܶܬܡ̈ܰܠܠܳܢܶܐ ܐܰܥܬܰܪܬܳܝܗܝ: ܘܰܒܟܽܠ ܚܶܟܡܳܐ ܕܪܽܘܚ ܘܰܒܟܽܠ ܥܒܳܕܳܐ ܕܬܶܕܡܪ̈ܳܬܳܐ ܪ̈ܳܡܳܬ ܡ̣ܶܢ ܥܳܠܡܳܐ ܗܰܕܰܪܬܳܝܗܝ: ܘܚܰܝ̈ܠܐ ܘܳܐܣܘ̈ܳܬܳܐ ܘܓܰܢ̱ܒܳܪܽܘܬ ܢܰܦܫܳܐ ܠܽܘܩܒܰܠ ܟܽܠ ܩܺܝܢܕܽܘ̈ܢܽܘ ܡܰܠܝ̈ܳܬ݀ ܡܰܘܬܳܐ ܠܶܗ ܝܰܗܒܬ: ܠܗܳܢܳܐ ܡ̇ܰܢ ܡ̣ܶܢ ܪܳܕܽܘܦܳܐ ܪܕܺܝܦܳܐ ܥܒܰܕܬ: ܘܡ̣ܶܢ ܡܰܩܪܒܳܢܳܐ ܕܠܽܘܩܒܰܠ ܣܒܰܪܬܳܐ ܕܶܐܘܢܓܶܠܝܽܘܢ ܕܺܝܠܳܟ: ܫܠܺܝܚܳܐ ܪܰܒܳܐ ܥܒܰܕܬ: ܘܡܰܠܦܳܢܳܐ ܫܰܪܺܝܪܳܐ ܕܺܝܠܳܟ ܣܳܡܬ: ܘܡ̣ܶܢ ܪܳܓܽܘܡܳܐ ܕܥܺܕܬܳܟ ܩܰܕܺܝܫܬܳܐ ܪܓܺܝܡܳܐ ܘܰܩܛܺܝܠܐ ܕܥܰܠ ܐܰܦܰܝ̈ܟ ܫܰܚܠܶܦܬ: ܠܗܳܢܳܐ ܕܰܒܚܶܫܽܘܟܳܐ ܕܠܐ ܒܺܝܕܰܥܬܳܐ ܡܗܰܠܶܟ ܗܘܳܐ ܢܰܗܺܝܪܳܐ ܪܰܒܳܐ ܘܰܡܫܰܘܕܥܳܢܳܐ ܕܢܽܘܗܪܳܐ ܡܬܽܘܡܳܝܳܐ ܐܰܣܪܰܚܬ: ܒܰܕܓܽܘܢ ܠܗܳܠܶܝܢ ܐܰܒܳܗ̈ܳܬܳܐ ܕܺܝܠܰܢ ܘܰܡܚܰܟ̈ܡܳܢܶܐ ܘܡܰܢܗܪ̈ܳܢܶܐ ܕܢܰܦ̈ܫܳܬܰܢ ܥܰܡ ܕܰܟܝܽܘܬܳܐ ܘܩܰܕܺܝܫܽܘܬܳܐ ܘܳܐܡܪܺܝܢܰܢ: ܐܳܘ ܦܶܛܪܽܘܣ ܘܦܰܘܠܳܘܣ ܙܰܘܓܳܐ ܕܰܐܚ̈ܶܐ ܪ̈ܽܘܚܳܢܳܝܶܐ ܕܒܰܚܕܳܐ ܢܦܶܫ ܘܰܒܚܰܕ ܪܶܥܝܳܢ ܪܽܘܚܳܢܳܐܝ̣ܬ ܡܶܬܬܙܺܝܥܺܝܢ ܗܘܰܘ ܘܚܳܐܶܝܢ ܗܘܰܘ: ܐܳܘ ܠܙܰܘܓܳܐ ܕܰܐܬܠܺܝ̈ܛܶܐ ܐܠܰܗܳܝ̈ܶܐ: ܦܶܛܪܽܘܣ ܘܦܰܘܠܳܘܣ ܕܒܰܚܕܳܐ ܓܰܢ̱ܒܳܪܽܘܬܳܐ ܠܒܺܝܒܬܳܐ ܠܽܘܩܒܰܠ ܒܺܝܫܳܐ ܘܚܰܝܠܰܘ̈ܳܬܶܗ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܩܳܝܡܺܝܢ ܗܘܰܘ: ܘܠܰܫܒܺܝܬܶܗ ܕܡܳܪܗܽܘܢ ܡ̣ܶܢ ܐܺܝ̈ܕܰܝ ܡܚܰܒܠܳܢܳܐ ܡܰܥܕܶܝܢ ܗܘܰܘ: ܐܳܘ ܠܙܰܘܓܳܐ ܕܢܰܗܺܝܪ̈ܶܐ ܡܰܠܝ̈ܰܝ ܨܶܡ̈ܚܶܐ ܐܠܰܗܳܝ̈ܶܐ ܦܶܛܪܽܘܣ ܘܦܰܘܠܳܘܣ ܕܠܽܘܩܒܰܠ ܚܶܫܽܘܟܳܐ ܕܛܽܘܥܝܰܝ ܕܠܐܝܠܶܝܢ ܕܰܠܟܳܪܽܘܙܽܘܬܗܽܘܢ ܫܳܠܡܺܝܢ ܝܰܬܺܝܪ ܡ̣ܶܢ ܫܶܡܫܳܐ ܡܰܢܗܪܺܝܢ ܗܘܰܘ: ܐܳܘ ܠܙܰܘܓܳܐ ܕܢܰܗܪ̈ܰܘܳܬܳܐ ܫܦܺܝ̈ܥܶܐ: ܦܶܛܪܽܘܣ ܘܦܰܘܠܳܘܣ ܕܚܰܝ̈ܶܐ ܘܥܽܘܕܪ̈ܳܢܶܐ ܠܟܽܠܳܗ̇ ܐܰܪܥܳܐ ܡܠܺܝܠܬܳܐ ܕܥܰܡ̈ܡܶܐ ܡܰܫܩܶܝܢ ܘܰܡܚܰܕܶܝܢ ܗܘܰܘ: ܐܳܘ ܠܙܰܘܓܳܐ ܕܰܐܪ̈ܕܺܝܟܠܐ ܚܰܟܺܝ̈ܡܶܐ ܦܶܛܪܽܘܣ ܘܦܰܘܠܳܘܣ ܕܡ̣ܶܢ ܗ̇ܰܘ ܕܰܒܢܳܐ ܒܺܐܪܰܬ݀ ܥܳܠܡ̈ܶܐ ܒܡܶܠܬܶܗ ܐܶܬܚܰܟܰܡܘ: ܘܠܰܣܚܺܝܦܽܘܬܳܐ ܕܥܳܠܡܳܐ ܩܰܝܶܡܘ ܘܫܰܪܰܪܘ: ܐܳܘ ܠܙܰܘܓܳܐ ܕܦܰܠܳܚ̈ܶܐ ܚܦܺܝ̈ܛܶܐ ܦܶܛܪܽܘܣ ܘܦܰܘܠܳܘܣ ܕܡܰܓ̈ܠܐ ܕܪܽܘܚܳܐ ܩܰܒܶܠܘ ܡ̣ܶܢ ܡܳܪܶܐ ܚܰܩܠܐ: ܘܰܥܩܰܪܘ ܙܺܝ̈ܙܳܢܶܐ ܡ̣ܶܢ ܐܰܪ̈ܥܳܬܳܐ ܡܠܺܝ̈ܠܳܬܳܐ ܘܚ̈ܶܛܶܐ ܕܰܟܝ̈ܳܬܳܐ ܙܪܰܥܘ: ܐܳܘ ܠܐܢܳܫ̈ܳܐ ܒܨܺܝܪ̈ܶܐ ܘܠܐ ܡܫܰܡ̈ܗܶܐ ܬܰܡܺܝ̈ܡܶܐ ܘܰܦܫܺܝ̈ܛܶܐ: ܕܠܐܪܥܳܐ ܟܽܠܳܗ̇ ܐܶܚܰܕܘ ܘܰܠܥܰܡ̈ܡܶܐ ܘܶܐܡܘ̈ܳܬܳܐ ܐܰܦܢܺܝܘ ܡ̣ܶܢ ܣܶܓܕܰܬ݀ ܨܰܠܡ̈ܶܐ ܠܘܳܬ ܣܶܓܕܬܳܐ ܫܰܪܺܝܪܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ: ܗ̇ܳܢܽܘܢ ܕܒܰܨܠܰܘ̈ܳܬܗܽܘܢ ܡܶܬܓܰܘܣܺܝܢܰܢ ܘܰܠܗܽܘܢ ܡܶܬܟܰܫ̈ܦܳܢܶܐ ܚܠܳܦ ܢܰܦ̈ܫܳܬܰܢ ܡܩܰܪܒܺܝܢܰܢ: ܠܳܟ ܐܠܰܗܰܢ ܐܰܝܟܰܢܳܐ ܕܰܬܚܰܣܶܐ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܟܣܰܝ̈ܳܐ ܘܰܓܠܰܝ̈ܳܐ: ܘܰܬܫܰܘܙܶܒ ܠܰܢ ܡ̣ܶܢ ܟܽܠ ܢܶܣܝܽܘ̈ܢܶܐ ܥܰܣ̈ܩܶܐ ܘܰܩܫܰܝ̈ܳܐ ܘܰܬܦܰܨܶܐ ܠܰܢ ܡ̣ܶܢ ܟܽܠ ܓܶܕ̈ܫܶܐ ܡܫܺܝ̈ܡܳܢܶܐ ܕܢܰܦܫܳܐ ܘܰܕܦܰܓܪܳܐ: ܘܰܬܢܰܟܪܶܐ ܠܰܢ ܡ̣ܶܢ ܬܰܫܢܺܝ̈ܩܶܐ ܕܰܠܥܳܠܰܡ: ܘܰܬܥܰܠܐܷ ܠܰܢ ܠܒܽܘܣܳܡܳܐ ܕܪ̈ܰܘܡܶܐ ܥܶܠܳܝ̈ܶܐ ܟܰܕ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ ܕܺܝܠܳܟ ܘܰܠܥܳܡܽܘܪ̈ܰܝܗܶܝܢ ܡܚܰܣܶܐ ܐܰܢ̱ܬ: ܘܒܰܢܛܽܘܪܽܘܬ ܦܽܘܩ̈ܕܳܢܰܝܟ ܐܶܘܢܓܶܠܳܝ̈ܶܐ ܠܰܢ ܡܥܰܫܶܢ ܐܰܢ̱ܬ: ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ ܠܰܢܝܳܚܬܳܐ ܕܥܰܡ ܩܰܕܺܝ̈ܫܰܝܟ ܡܰܫܘܶܐ ܐܰܢ̱ܬ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܬܐܘܡܐ ܫܠܝܚܐ ܕܡܫܬܡܠܐ ܓ̄ ܒܬܡܘܙ ܝܪܚܐ

 

ܩܕܡܝܬ ܨܠܘܬܐ ܕܫܘܪܝܐ

 

 

ܛܪܽܘܕ ܡܳܪܝ ܡܶܢ ܦܽܘܠܳܓ̈ܶܐ ܡܰܚܣܪ̈ܳܢܶܐ: ܐܰܝܟ ܕܰܕܚܶܩܬ ܡ̣ܶܢ ܬܽܐܘܡܰܐ ܠܦܽܘܠܳܓ ܪܶܥܝܳܢܳܐ ܒܝܰܕ ܓܶܫܬܳܐ ܕܣܶܛܪܳܟ ܡܰܚܝܳܢܳܐ: ܐܰܝܟܰܢܳܐ ܕܰܒܥܰܝ̈ܢܶܐ ܕܠܶܒܳܐ ܢܶܚܙܶܝܟ: ܒܺܐܝ̈ܕܰܝܳܐ ܡܶܬܗܰܘܢܳܢ̈ܝܳܬܳܐ ܢܶܓܫܳܟ: ܘܰܒܦܽܘ̈ܡܶܐ ܕܟܰܝ̈ܳܐ ܢܺܐܟܠܳܟ: ܘܰܒܣܶܦ̈ܘܳܬܳܐ ܠܐ ܡܛܰܘ̈ܫܳܬܳܐ ܢܶܫܬܶܝܟ: ܘܚܰܕ ܐܠܰܗܳܐ ܫܰܪܺܝܪܳܐ ܢܶܫܬܰܘܕܥܳܟ: ܘܰܕܠܐ ܫܶܠܝܳܐ ܢܫܰܒܚܳܟ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܡܰܪ ܠܰܫܠܺܝܚܳܐ ܡܳܪܝ ܬܽܐܘܡܰܐ ܒܗܰܝܡܳܢܽܘܬܳܐ ܘܰܐܩܦܶܗ ܠܰܫܠܺܝ̈ܚܶܐ ܚܰܒܪ̈ܰܘܗܝ ܕܰܦܠܺܝܓ ܗܘܳܐ: ܘܟܰܕ ܓܳܫ ܕܰܦܢܶܗ ܕܶܐܬܬܰܪܥܰܬ݀ ܗܘܳܬ ܒܠܽܘܟܳܝܬܳܐ ܕܰܐܢ̱ܬ ܗ̣ܽܘ ܡܳܪܝ ܘܰܐܠܳܗܝ ܩܥܳܐ: ܘܫܰܕܪܶܗ ܠܡܰܟܪܳܙܽܘ ܣܒܰܪܬܶܗ ܒܗܶܢܕܽܘ: ܘܙܰܒܢܶܗ ܠܚܳܒܳܢ ܬܰܐܓܳܪܳܐ ܒܥܶܣܪܺܝܢ ܕܟܶܣܦܳܐ: ܘܰܒܢܳܐ ܒܺܝܪܬܳܐ ܠܡܰܠܟܳܐ ܘܫܰܚܠܦܶܗ ܡ̣ܶܢ ܛܳܥܝܽܘܬܳܐ ܠܗܰܝܡܳܢܽܘܬܳܐ ܕܰܫܪܳܪܳܐ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܟܰܕ ܥܽܘܗܕܳܢܳܐ ܪܚܺܝܡܳܐ ܘܰܡܝܰܩܪܳܐ ܕܰܐܬܠܺܝܛܳܐ ܚܰܟܺܝܡܳܐ ܘܫܰܦܺܝܪ ܙܳܟܽܘܬܳܐ ܘܰܫܠܺܝܚܳܐ ܐܠܰܗܳܝܳܐ ܡܳܪܝ ܬܽܐܘܡܰܐ ܕܝܰܘܡܳܢܳܐ ܡܫܰܡܠܶܝܢܰܢ ܥܺܐܕܶܗ: ܘܰܠܕܽܘܟܪܳܢܶܗ ܫܒܺܝܚܳܐ ܒܬܶܫܒ̈ܚܳܬܳܐ ܘܗܽܘ̈ܠܳܠܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܙܰܝܚܺܝܢܰܢ: ܒܕܶܢܚܳܐ ܗܳܢܳܐ ܪܽܘܚܳܢܳܝܳܐ ܘܐ̱ܪܳܙܳܢܳܝܳܐ: ܘܦܺܝܪܡܳܐ ܡܪܰܥܝܳܢܳܐ: ܨܠܰܘ̈ܳܬܳܐ ܘܬܰܟܫ̈ܦܳܬܳܐ ܡܩܰܪܒܺܝܢܰܢ ܘܰܡܦܺܝܣܺܝܢܰܢ ܠܳܟ ܡܳܪܝܳܐ ܡܳܪܰܢ ܕܰܬܩܰܒܶܠ ܠܰܢ ܒܝܰܕ ܐܺܝܙܓܰܕܽܘܬܶܗ ܘܒܳܥܽܘܬܶܗ ܕܰܚܠܳܦܰܝܢ: ܚܰܝܶܠ ܘܥܰܕܰܪ ܠܰܢ ܕܢܶܬܩܰܪܰܒ ܒܚܽܘܒܳܐ ܠܘܳܬ ܩܽܘܠܳܣܰܘ̈ܗܝ ܫܒܺܝ̈ܚܶܐ ܘܰܐܠܳܗܳܝ̈ܶܐ: ܘܢܶܥܢܶܐ ܘܢܺܐܡܰܪ: ܗܳܢܰܘ ܫܠܺܝܚܳܐ ܐܠܰܗܳܝܳܐ ܕܟܰܕ ܐܶܬܦܰܠܰܓ ܥܰܠ ܩܝܳܡܬܳܐ ܕܺܝܠܳܟ ܐܠܰܗܳܝܬܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܡܶܐܬܺܝܬܳܐ ܕܬܰܪܬܶܝܢ ܠܘܳܬܶܗ ܠܥܶܠܺܝܬܳܐ ܥܒܰܕܬ: ܘܥܰܠ ܫܽܘܪܳܪܳܐ ܕܗܳܕܶܐ ܠܶܗ ܐܶܬܚܰܘܺܝܬ: ܗܳܢܰܘ ܫܠܺܝܚܳܐ ܐܠܰܗܳܝܳܐ ܕܶܐܫܬܘܺܝ ܕܢܶܓܽܘܫ ܠܕܰܦܢܳܐ ܩܰܕܺܝܫܬܳܐ ܕܰܪܕܰܘ ܡܶܢܳܗ̇ ܕܡܳܐ ܘܡܰܝ̈ܳܐ ܘܓܳܫ ܐܰܝܟܳܐ ܕܚܰܕ ܡ̣ܶܢ ܫܠܺܝ̈ܚܶܐ ܠܐ ܡܳܫ: ܗܳܢܰܘ ܫܠܺܝܚܳܐ ܐܠܰܗܳܝܳܐ ܕܰܚܠܰܕ ܒܨܶܒ̈ܥܳܬܶܗ ܕܽܘܟܰܬ ܨܶܨ̈ܶܐ ܐܰܝܟ ܕܶܐܬܝܰܐܝܰܒ ܘܪܳܓ: ܗܳܢܰܘ ܫܠܺܝܚܳܐ ܐܠܰܗܳܝܳܐ ܕܗܰܝܡܶܢ ܘܰܐܘܕܺܝ ܘܰܩܥܳܐ ܒܩܳܠܐ ܕܰܐܢ̱ܬ ܗ̣ܽܘ ܒܩܽܘܫܬܳܐ ܡܳܪܝ ܘܰܐܠܳܗܝ: ܗܳܢܰܘ ܫܠܺܝܚܳܐ ܐܠܰܗܳܝܳܐ ܕܟܰܕ ܐܶܫܬܰܕܰܪ ܕܢܺܐܙܰܠ ܢܰܟܪܶܙ ܠܰܣܒܰܪܬܳܟ ܒܰܐܬܪܳܐ ܕܗܶܢܕܽܘ ܐܰܝܟ ܒܨܺܝܪܳܐ ܠܘܳܬ ܚܰܒܪ̈ܰܘܗܝ ܐܳܡܰܪ ܗܘܳܐ: ܘܰܐܝܟ ܕܰܚܽܘܠܬܳܢܳܐ ܡ̣ܶܢ ܬܰܠܡܺܝ̈ܕܶܐ ܐ̱ܚܝܳܢܰܘ̈ܗܝ ܫܳܐܷܠ ܗܘܳܐ ܘܒܰܦܝܳܣܐ ܚܢܺܝܓܳܐ ܒܳܥܶܐ ܗܘܳܐ: ܕܨܰܠܰܘ ܥܠܰܝ ܕܢܰܬܩܶܢ ܡܳܪܝܳܐ ܐܽܘܪܚܳܐ ܗܳܕܶܐ ܕܢܶܦܩܶܬ ܐܻܙܰܠ ܒܳܗ̇: ܨܰܠܰܘ ܥܠܰܝ ܕܢܶܬܪܽܘܨ ܡܳܪܝܳܐ ܫܒܺܝܠܐ ܗܳܢܳܐ ܕܪܳܕܶܐ ܐ̱ܢܳܐ ܒܶܗ: ܥܶܣܪܳܐ ܐܰܚ̈ܰܝ ܒܥܰܘ ܚܠܳܦܰܝ ܡ̣ܶܢ ܡܳܪܰܢ ܕܰܢܫܰܦܶܐ ܠܬܰܘܫܳܐ ܘܥܰܪܡܳܐ ܡ̣ܶܢ ܩܕܳܡ ܡܰܪܕܺܝܬܝ: ܘܶܐܬܟܰܫܦܘ ܚܰܒܪ̈ܰܝ ܠܡܳܪܰܢ ܕܰܢܫܰܚܠܶܦ ܠܠܶܒܰܘ̈ܳܬܳܐ ܕܰܐܝܠܶܝܢ ܕܳܐܙܶܠ ܐ̱ܢܳܐ ܕܰܐܟܪܶܙ ܥܠܰܝܗܽܘܢ: ܡ̣ܶܢ ܥܰܣܩܽܘܬܳܐ ܘܩܰܫܝܽܘܬܳܐ ܠܰܡܫܰܝܢܽܘܬܳܐ ܘܒܰܣܺܝܡܽܘܬܳܐ: ܐܰܘ ܐܰܚܺܝܕ ܩܠܺܝ̈ܕܶܐ ܕܡܰܠܟܽܘܬܳܐ ܦܶܛܪܽܘܣ ܘܰܒܬܽܘܠܐ ܝܰܩܺܝܪܳܐ ܝܽܘܚܰܢܳܢ: ܩܰܪܶܒܘ ܚܠܳܦܰܝ ܒܳܥܽܘܬܳܐ ܠܪܰܒܟܽܘܢ ܕܢܶܦܬܰܚ ܩܕܳܡܰܝ ܬܰܪܥܳܐ ܕܢܶܥܠܽܘܢ ܒܶܗ ܚܰܛܳܝ̈ܶܐ ܠܰܬܝܳܒܽܘܬܳܐ: ܘܟܰܕ ܐܶܙܕܰܘܰܕ ܨܠܰܘ̈ܳܬܳܐ ܡ̣ܶܢ ܟܽܠܗܽܘܢ: ܐܶܡܰܪܘ ܚܰܒܪ̈ܰܘܗܝ ܠܘܳܬܶܗ: ܕܡܳܪܰܢ ܢܺܐܙܰܠ ܥܰܡܳܟ ܘܠܳܟ ܢܕܰܒܰܪ ܒܽܐܘܪܚܳܐ ܗܳܕܶܐ ܕܪܳܕܶܐ ܐܰܢ̱ܬ ܒܳܗ̇: ܚܰܝܠܐ ܕܰܠܘܶܐ ܠܝܰܘܣܶܦ ܘܢܰܛܪܶܗ ܡ̣ܶܢ ܣܳܩܽܘܪ̈ܰܘܗܝ ܗ̣ܽܘ ܢܶܬܠܰܘܶܐ ܠܳܟ ܐܰܚܽܘܢ ܠܐܬܪܳܐ ܕܠܶܗ ܐܳܙܶܠ ܐܰܢ̱ܬ ܘܰܢܫܰܥܒܶܕ ܠܳܟ ܩܫܰܝ̈ܳܐ ܘܥܰܣ̈ܩܶܐ: ܢܶܦܪܽܘܩ ܡܳܪܝܳܐ ܒܺܐܝ̈ܕܰܝܟ ܠܥܳܢ̈ܳܐ ܕܶܐܫܬܰܒܝܰܬ݀ ܠܐܟܶܠܩܰܪܨܳܐ: ܘܶܐܬܢܰܘܠܰܬ݀ ܒܥܰܪ̈ܡܶܐ ܘܰܒܪ̈ܳܡܳܬܳܐ ܐܳܦ ܒܦܰܚ̈ܶܐ ܘܰܒܓܽܘ̈ܡܳܨܶܐ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܟܰܕ ܪܳܕܶܐ ܗܘܳܐ ܒܽܐܘܪܚܳܐ ܨܠܰܘ̈ܳܬܳܐ ܐܰܡܺܝ̈ܢܳܬܳܐ ܡܩܰܪܒܶ ܗܘܳܐ ܕܬܶܬܩܰܒܰܠ ܒܟܳܪܽܘܙܽܘܬܳܐ ܕܡܳܪܶܗ ܠܘܳܬ ܡܶܫܬܰܕܪ̈ܳܢܶܐ ܕܰܠܘܳܬܗܽܘܢ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܡܶܬܟܰܬܫܳܢܳܐ ܗܘܳܐ ܚܠܳܦ ܥܳܢ̈ܳܐ ܕܶܐܬܓܰܥܠܰܬ݀ ܠܶܗ ܘܦܰܨܝܳܗ̇ ܘܫܰܘܙܒܳܗ̇ ܡ̣ܶܢ ܚܰܝܠܰܘ̈ܳܬܳܐ ܣܰܩܽܘܒ̈ܠܳܝܶܐ ܒܺܝܫܳܐ ܘܣܳܛܳܢܳܐ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܰܗܘܳܐ ܟܳܪܽܘܙܳܐ ܘܰܡܣܰܒܪܳܢܳܐ ܘܢܽܘܗܪܳܐ ܡܰܢܗܪܳܢܳܐ ܠܗܶܢܕܽܘ: ܘܰܛܪܰܕ ܡܶܢܳܗ̇ ܚܶܫܽܘܟܽܘܬܳܐ ܕܛܽܘܥܝܰܝ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܰܗܘܳܐ ܪܳܥܝܳܐ ܛܳܒܳܐ ܘܩܳܝܽܘܡܳܐ ܘܝܰܨܽܘܦܬܳܢܳܐ ܠܡܰܪܥܺܝܬܳܐ ܕܡܰܟܪܳܗ̇ ܠܚܰܬܢܳܐ ܫܡܰܝܳܢܳܐ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܰܗܘܳܐ ܡܰܠܦܳܢܳܐ ܠܐܘܪܚܳܐ ܕܚܰܝ̈ܶܐ ܠܰܒ̈ܢܶܝܗ̇ ܕܗܰܝܡܳܢܽܘܬܳܐ: ܘܰܐܢܗܰܪ ܐܶܢܽܘܢ ܠܗܰܘܢܰܝ̈ܗܽܘܢ ܘܰܠܡܰܕܥܰܝ̈ܗܽܘܢ ܒܢܽܘܗܪܳܐ ܕܶܐܘܢܓܶܠܝܽܘܢ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܡ̣ܶܢ ܣܺܝܡܰܬ ܓܰܪ̈ܡܰܘܗܝ ܚܰܝ̈ܶܐ ܫܰܪܺܝܪ̈ܶܐ ܘܡܰܠܝ̈ܰܝ ܫܰܝܢܳܐ ܠܢܰܦ̈ܫܳܬܰܢ ܫܳܐܠܺܝܢܰܢ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܰܩܕܳܡ ܓܠܽܘܣܩܡܳܐ ܕܦܰܓܪܳܐ ܕܺܝܠܶܗ ܩܰܕܺܝܫܳܐ ܓܳܥܶܝܢܰܢ ܥܰܠ ܟܺܐܒܰܝ̈ܢ ܟܣܰܝ̈ܳܐ ܘܰܓܠܰܝ̈ܳܐ ܕܢܶܬܰܐܣܽܘܢ: ܗܳܢܰܘ ܫܠܺܝܚܳܐ ܩܰܕܺܝܫܳܐ ܕܰܠܕܽܘܟܪܳܢܶܗ ܡܙܰܝܚܺܝܢܰܢ ܘܰܠܥܰܕܥܺܐܕܶܗ ܡܝܰܩܪܺܝܢܰܢ: ܘܰܠܚܰܓܶܗ ܒܚܰܕܽܘܬܳܐ ܡܪܰܡܪܡܺܝܢܰܢ: ܘܰܠܟܽܘܠܳܠܶܗ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܰܘܪܒܺܝܢܰܢ: ܘܰܠܘܳܬܶܗ ܡܦܺܝܣܺܝܢܰܢ ܟܰܕ ܐܳܡܪܺܝܢܰܢ: ܩܽܘܡ ܐܰܒܽܘܢ ܫܠܺܝܚܳܐ ܡܳܪܝ ܬܽܐܘܡܰܐ ܐܰܬܠܺܝܛܳܐ ܓܰܒܝܳܐ ܘܢܰܨܺܝܚܳܐ ܣܽܘܓ ܬܽܘܪ̈ܥܳܬܰܢ ܕܣܰܓܺܝ̈ܳܐܢ: ܐܰܣܳܐ ܒܰܨܠܽܘܬܳܟ ܠܰܟܪ̈ܺܝܗܶܐ ܘܡܰܪ̈ܥܶܐ ܕܺܐܝܬ ܒܰܢ: ܕܗܳܐ ܒܬܰܪܥܳܐ ܕܪ̈ܰܚܡܶܐ ܢܳܩܫܺܝܢܰܢ: ܬܽܘܒ ܕܶܝܢ ܒܳܥܶܝܢܰܢ ܡܶܢܳܟ ܡܳܪܝܳܐ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܕܽܘܟܪܳܢܶܗ ܡܩܰܪܒܺܝܢܰܢ ܠܳܟ: ܕܰܬܫܰܘܙܶܒ ܠܰܢ ܒܰܨܠܰܘ̈ܳܬܶܗ ܡ̣ܶܢ ܟܽܠ ܩܪ̈ܳܒܶܐ ܘܬܰܟܬܽܘ̈ܫܶܐ: ܘܡ̣ܶܢ ܟܽܠ ܣܶܕ̈ܩܶܐ ܘܚܶܪ̈ܝܳܢܶܐ ܡ̣ܶܢ ܟܽܠ ܒܥܶܠܕ̈ܒܳܒܶܐ ܘܩܺܝܢܕܽܘ̈ܢܽܘ ܘܢܶܣܝܽܘ̈ܢܶܐ: ܘܰܒܝܰܕ ܬܰܟܫ̈ܦܳܬܶܗ ܘܳܐܦ ܕܰܫܠܺܝ̈ܚܶܐ ܚܰܒܪ̈ܰܝܟ: ܫܰܟܶܢ ܠܥܺܕܬܳܟ ܕܰܩܢܰܝܬ ܒܰܕܡܳܟ ܝܰܩܺܝܪܳܐ: ܫܰܝܢܳܐ ܐܰܡܺܝܢܳܐ: ܫܠܳܡܳܐ ܟܰܗܺܝܢܳܐ: ܠܪ̈ܳܥܰܘܳܬܳܐ ܡ̇ܰܢ ܡܰܠܦܳܢܽܘܬܳܐ ܚܠܺܝܡܬܳܐ ܘܰܬܪܺܝܨܰܬ ܫܽܘܒܚܳܐ: ܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܙܰܗܝܽܘܬܳܐ ܘܩܰܕܺܝܫܽܘܬܳܐ: ܠܕܰܝ̈ܳܢܶܐ ܘܰܡܕܰܒܪ̈ܳܢܶܐ ܫܰܦܺܝܪܽܘܬ ܨܶܒܬܳܐ ܘܗܶܕܪܳܐ ܘܪܽܘܡܪܳܡܳܐ: ܠܥܰܬܺܝܪ̈ܶܐ ܘܰܡܩܰܒ̈ܠܰܝ ܐܰܟܣ̈ܢܳܝܶܐ ܡܪܰܚܡܳܢܽܘܬܳܐ ܘܚܰܝܽܘܣܬܳܢܽܘܬܳܐ: ܠܣܳܒ̈ܶܐ ܘܰܡܚܺܝ̈ܠܐ ܡܚܰܝܠܳܢܳܐ ܐܳܦ ܚܽܘܛܪܳܐ ܠܐ ܡܶܙܕܰܥܙܥܳܢܳܐ: ܠܰܥܠܰܝ̈ܡܶܐ ܘܰܠܓܰܕܽܘ̈ܕܶܐ ܘܰܛܠܳܝ̈ܶܐ ܟܢܺܝܟܽܘܬܳܐ ܡܩܰܠܰܣܬܳܐ: ܠܫܰܒܪ̈ܶܐ ܘܝܰܠܽܘ̈ܕܶܐ ܬܰܪܒܺܝܬܳܐ ܛܳܒܬܳܐ: ܠܰܒܬܽܘ̈ܠܐ ܐܳܦ ܠܰܡܙܰܘ̈ܓܶܐ ܕܰܟܝܽܘܬܳܐ ܘܢܰܟܦܽܘܬܳܐ: ܠܕܰܝܪ̈ܳܝܶܐ ܘܺܝܚܺܝ̈ܕܳܝܶܐ ܡܚܰܡܣܢܳܢܽܘܬܳܐ ܘܫܰܡܠܐܴ ܐܶܢܽܘܢ ܒܟܽܠ ܫܰܦܺܝܪ̈ܳܬܳܐ: ܠܚܰܛܳܝ̈ܶܐ ܘܬܰܝ̈ܳܒܶܐ ܡܩܰܒܠܳܢܳܐ ܘܰܡܩܰܕܫܳܢܳܐ: ܠܩܰܪ̈ܺܝܒܶܐ ܘܒܰܝܬܳܝ̈ܶܐ ܡܢܰܛܪܳܢܳܐ ܘܰܡܣܰܬܪܳܢܳܐ: ܠܐܒܺܝ̈ܠܐ ܘܰܠܥܰܝܺܝ̈ܩܰܝ ܪܽܘܚܳܐ ܠܽܘܒܳܒܳܐ ܘܒܽܘܝܳܐܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܡܢܺܝܚܳܢܳܐ ܘܰܡܚܰܣܝܳܢܳܐ: ܘܰܒܓܽܘ̈ܕܶܐ ܕܚܰܒܺܝ̈ܒܰܝܟ ܐܰܩܺܝܡ ܐܶܢܽܘܢ: ܘܰܒܣܶܕܪ̈ܶܐ ܕܰܪ̈ܚܽܘܡܰܝܟ ܡܢܺܝ ܐܶܢܽܘܢ ܐܳܦ ܒܰܣܡܳܟܳܐ ܕܦܳܠܚܰܝ̈ܟ ܐܰܓܢܳܐ ܐܶܢܽܘܢ: ܘܠܰܢ ܥܰܡܗܽܘܢ ܕܢܰܣܶܩ ܠܳܟ ܫܽܘܒܚܳܐ ܒܰܝܢܳܬܗܽܘܢ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝ ܠܦܺܝܪܡܰܢ ܘܰܦܬܰܚ ܬܰܪܥܳܟ ܠܰܨܠܽܘܬܰܢ: ܘܚܽܘܣ ܘܶܐܬܪܰܚܰܡ ܥܰܠ ܟܽܠܰܢ: ܒܝܰܕ ܨܠܰܘ̈ܳܬܶܗ ܕܰܫܠܺܝܚܳܟ ܘܟܳܪܽܘܙܳܟ ܬܽܐܘܡܰܐ ܕܓܳܫ ܕܰܦܢܳܟ: ܘܰܕܚܽܘܩ ܡܶܢܰܢ ܠܰܦܠܰܓ̈ܘܳܬܳܐ ܘܣܶܕ̈ܩܶܐ ܘܚܶܪ̈ܝܳܢܶܐ: ܐܰܝܟ ܕܰܕܚܰܩܬ ܠܦܽܘܠܳܓܳܐ ܕܬܰܪܥܺܝܬܶܗ ܕܥܰܠ ܩܝܳܡܬܳܟ ܦܳܪܽܘܩܳܝܬܳܐ: ܘܰܐܝܟ ܕܫܰܪܰܪܬܳܝܗܝ ܒܗܰܝܡܳܢܽܘܬܳܐ ܕܒܳܟ: ܗܳܟܰܢܳܐ ܫܰܪܰܪ ܠܰܢ ܒܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܡܳܪܝܳܐ ܐܠܰܗܳܐ ܕܰܐܓܶܫܬ ܠܬܽܐܘܡܰܐ ܕܽܘܟܰܬ ܨܶܨ̈ܶܐ: ܘܝܰܗܒܬ ܠܰܢ ܕܢܶܓܽܘܫ ܘܢܶܩܨܶܐ ܦܰܓܪܳܟ ܩܰܕܺܝܫܳܐ ܠܚܽܘܣܳܝܳܐ ܕܢܳܣܽܘ̈ܒܰܘܗܝ: ܘܰܐܫܘܳܐ ܠܰܢ ܡܳܪܝ ܒܰܨܠܰܘ̈ܳܬܶܗ ܕܡܳܪܝ ܬܽܐܘܡܰܐ ܕܓܳܫܳܟ: ܘܰܒܗܰܘ̈ܢܰܝܢ ܢܓܽܘܫ ܥܰܡܺܝ̈ܩܳܬܳܐ ܕܺܝܠܳܟ ܘܐ̱ܪ̈ܳܙܳܢܳܝܳܬܳܐ ܕܺܝܠܳܟ ܘܟܰܣ̈ܝܳܬܳܟ ܘܰܒܥܳܠܡܳܟ ܪܽܘܚܳܢܳܝܳܐ ܢܶܬܒܰܣܰܡ: ܡܳܪܰܢ ܘܰܐܠܳܗܰܢ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܨܰܒܬܳܢܳܐ ܕܪܰܗܳܛܶܗ ܒܟܽܠ ܫܽܘܦܪ̈ܺܝܢ ܕܪܰܡܪܶܡ ܠܐܝܙܓܰܕܶܗ ܒܟܽܠ ܬܶܗܪ̈ܺܝܢ: ܘܢܰܨܰܚ ܠܟܳܪܽܘܙܶܗ ܒܟܽܠ ܩܽܘܠܳܣܺܝ̈ܢ: ܘܗܰܕܰܪ ܥܺܐܕܶܗ ܒܟܽܠ ܥܰܡܡܺܝ̈ܢ: ܘܙܰܝܰܚ ܟܠܺܝܠܶܗ ܒܟܽܠ ܣܰܘ̈ܦܺܝܢ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܟܰܕ ܥܽܘܗܕܳܢܳܐ ܫܒܺܝܚܳܐ ܕܰܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ ܡܫܰܡܠܶܝܢܰܢ ܩܕܳܡܰܝܟ ܡܶܠܬܳܐ ܐܠܰܗܳܐ ܕܶܐܬܒܰܪܢܰܫ ܡܶܛܽܠ ܦܽܘܪܩܳܢܰܢ: ܫܽܘܒܚܳܐ ܕܠܐ ܫܰܠܘܳܐ ܠܐܝܬܽܘܬܳܟ ܠܐ ܡܶܬܡܰܠܠܳܢܺܝܬܳܐ ܡܕܰܫܢܺܝܢܰܢ ܗ̇ܰܘ ܕܰܓܒܰܝܬܳܝܗܝ ܡ̣ܶܢ ܟܰܪܣܳܐ ܠܡܰܟܪܳܙܽܘ ܣܒܰܪܬܳܟ ܒܶܝܬ ܥܰܡ̈ܡܶܐ: ܘܢܰܦܢܶܐ ܐܶܢܽܘܢ ܒܛܰܝܒܽܘܬܳܟ ܡ̣ܶܢ ܛܳܥܝܽܘܬܳܐ ܘܠܐ ܗܰܝܡܳܢܽܘܬܳܐ: ܠܘܳܬ ܫܪܳܪܳܐ ܘܗܰܝܡܳܢܽܘܬܳܐ ܕܒܳܟ ܘܒܰܐܒܽܘܟ ܘܰܒܪܽܘܚܳܟ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܚܕܳܐ ܐܠܰܗܽܘܬܳܐ ܡܪܰܝܰܡܬܳܐ: ܚܢܰܢ ܕܶܝܢ ܠܶܗ ܠܬܰܠܡܺܝܕܳܟ ܛܽܘܒܳܐ ܝܳܗܒܺܝܢܰܢ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ ܕܰܐܫܘܝܳܟ ܡܳܪܟ ܕܰܬܓܽܘܫ ܕܰܦܢܶܗ ܕܶܐܬܬܰܪܥܰܬ݀ ܒܠܽܘܟܳܝܬܳܐ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܬܽܐܘܡܰܐ ܕܰܒܝܰܕ ܓܶܫܬܳܐ ܕܦܰܓܪܶܗ ܡܳܪܳܢܳܝܳܐ ܕܰܡܫܺܝܚܳܐ ܨܶܒ̈ܥܳܬܳܟ ܬܳܡ̈ܳܬܳܐ ܐܶܬܦܰܠܰܓ̈ܝ ܘܶܐܬܰܐܣܺܝ̈ܝ ܒܬܶܕܡܽܘܪܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ ܕܓܰܠܝܳܐܝ̣ܬ ܐܰܙܥܶܩܬ ܠܘܳܬ ܡܳܪܳܟ ܡܳܪܝ ܘܰܐܠܳܗܝ ܒܗܰܝܡܳܢܽܘܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܰܕܚܰܩܬ ܒܡܶܠܬܳܟ ܬܗܺܝܪܬܳܐ ܠܠܐܴ ܗܰܝܡܳܢܽܘܬܳܐ ܕܰܐܝܠܶܝܢ ܕܰܡܦܰܠܓܺܝܢ ܠܰܚܕܳܝܽܘܬ ܟܝܳܢܳܐ ܕܡܳܪܳܟ ܒܰܥܘܺܝܪܽܘܬܳܐ: ܠܳܟ ܛܽܘܒܰܝܟ ܡܳܪܝ ܬܽܐܘܡܰܐ ܫܠܺܝܚܳܐ ܕܗܰܝܡܳܢܽܘܬܳܟ ܐܰܒܗܬܰܬ݀ ܠܗܰܓܳܓܳܝ̈ܶܐ ܘܠܰܬܪ̈ܰܝܰܝ ܟܝ̈ܳܢܶܐ ܒܰܬܪܺܝܨܽܘܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܘܳܝܳܐ ܐܰܩܢܰܝܬ ܠܰܡܓܰܕ̈ܦܳܢܶܐ ܕܥܰܠ ܡܶܬܒܰܪܢܫܳܢܽܘܬܶܗ ܕܡܳܪܳܟ ܒܩܽܘܫܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ ܕܙܰܝܢܳܐ ܚܰܣܺܝܢܳܐ ܐܠܰܒܶܫܬ ܠܰܬܪ̈ܺܝܨܰܝ ܫܽܘܒܚܳܐ ܒܡܶܠܬܳܟ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܚܰܘܺܝܬ ܒܬܰܘܕܺܝܬܳܟ ܫܰܪܺܝܪܬܳܐ ܕܚܰܕ ܗ̣ܽܘ ܒܰܟܝܳܢܳܐ ܡܫܺܝܚܳܐ ܡܶܠܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܛܰܠܶܩܬ ܒܝܰܕ ܠܶܫܳܢܳܟ ܬܪܺܝܨܳܐ ܠܟܽܠܗܶܝܢ ܐܶܪ̈ܶܣܺܝܣ ܕܠܽܘܩܒܰܠ ܫܪܳܪܳܐ ܩܳܝ̈ܡܳܢ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܝܰܗܒܬ ܐܰܢ̱ܬ ܠܳܟ ܕܶܝܢ ܠܡܶܙܕܰܒܳܢܽܘ ܠܥܰܒ̈ܕܰܘܗܝ ܡܶܛܽܠ ܟܳܪܽܘܙܽܘܬܶܗ ܕܡܳܪܳܟ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܰܟܦܰܪܬ ܒܥܳܠܡܳܐ ܘܰܒܢܰܦܫܳܟ ܡܶܛܽܠ ܪܶܚܡܬܶܗ ܕܡܳܪܳܟ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܠܐ ܐܰܙܺܝܥܽܘܟ ܓܙ̈ܳܡܶܐ ܥܰܙܺܝ̈ܙܶܐ ܕܡܰܠܟܳܐ ܕܗܶܢܕܽܘ ܡܶܛܽܠ ܒܺܝܪܬܳܐ ܕܰܒܢܰܝܬ ܠܶܗ ܒܰܫܡܰܝܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܰܡܫܺܝܚܳܐ ܡܳܪܳܟ ܐܰܣܓܺܝ ܢܶܨܚܳܢܳܐ ܕܺܝܠܳܟ ܒܰܐܬܪܳܐ ܕܚܺܝܠܐ ܕܗܶܢܕ̈ܘܳܝܶܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܢܽܘܗܪܳܐ ܕܺܝܕܰܥܬܳܐ ܘܕܰܫܪܳܪܳܐ ܡܠܰܝܬ ܠܰܦܢܺܝܬܳܐ ܡܰܕܢܚܳܝܬܳܐ ܒܟܳܪܽܘܙܽܘܬܳܟ ܡܥܰܠܰܝܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܰܣܒܰܪܬܳܐ ܕܚܰܝ̈ܶܐ ܐܰܟܪܶܙܬ ܒܰܐܬܪܳܐ ܕܗܶܢܕܽܘ ܘܗܰܝܡܶܢܘ ܒܡܳܪܳܟ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܥܰܒܕܽܘܬܳܟ ܐܰܩܢܝܰܬ݀ ܚܺܐܪܽܘܬܳܐ ܠܰܒ̈ܢܰܝ ܗܶܢܕܽܘ: ܡ̣ܶܢ ܒܺܝܫܳܐ ܘܰܚܛܺܝܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܦܽܘܠܳܓܳܟ ܕܥܰܠ ܦܳܪܽܘܩܰܢ ܘܥܰܠ ܩܝܳܡܬܳܐ ܡܰܠܝܰܬ݀ ܚܰܝ̈ܶܐ: ܗܘܳܐ ܣܢܺܐܓܪܳܐ ܠܟܽܠܳܗ̇ ܥܺܕܬܳܐ ܩܰܕܺܝܫܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܨܰܒܶܬܬ ܒܝܰܡܺܝܢܳܟ ܩܰܕܺܝܫܬܳܐ ܠܟܰܠܬܳܐ ܐܽܘܟܳܡܬܳܐ ܒܢܰܚ̈ܬܶܐ ܚܶܘܳܪ̈ܶܐ ܕܡܰܥܡܽܘܕܺܝܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܩܰܒܶܠܬ ܒܕܰܦܢܳܟ ܕܩܳܪܳܐ ܕܰܒܠܽܘܟܳܝܬܳܐ ܒܛܽܘܦܣܶܗ ܕܰܡܫܺܝܚܳܐ ܡܳܪܳܟ ܒܚܰܕܽܘܬܳܐ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܪܰܘܡܳܐ ܐܳܦ ܥܽܘܡܩܳܐ ܛܽܘܒܳܐ ܝܳܗܒܺܝܢ ܠܳܟ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܰܫܡܰܝܳܐ ܘܰܐܪܥܳܐ ܚܳܕܶܝܢ ܒܕܽܘܟܪܳܢܳܟ: ܠܳܟ ܛܽܘܒܰܝܟ ܫܠܺܝܚܳܐ ܡܳܪܝ ܬܽܐܘܡܰܐ ܕܬܰܘܕܺܝܬܳܐ ܕܰܒܡܳܪܳܟ ܡܶܬܟܰܪܙܳܐ ܒܥܺܕܬܳܐ ܩܰܕܺܝܫܬܳܐ: ܘܥܰܠܗܳܕܶܐ ܠܳܟ ܡܦܺܝܣܺܝܢܰܢ ܐܳܘ ܫܠܺܝܚܳܐ ܓܰܒܝܳܐ ܘܣܳܗܕܳܐ ܐܠܰܗܳܝܳܐ: ܘܟܳܪܽܘܙܳܐ ܕܰܫܠܳܡܳܐ ܡܳܪܝ ܬܽܐܘܡܰܐ: ܕܬܰܫܘܶܐ ܠܰܢ ܡܙܰܝ̈ܚܰܝ ܥܰܕܥܺܐܕܳܟ ܒܰܨܠܰܘ̈ܳܬܳܟ ܛܽܘܒܬܳܢܳܝܳ̈ܬܳܐ: ܐܰܝܟܰܢܳܐ ܕܰܒܗܶܝܢ ܢܶܫܟܰܚ ܟܽܠ ܥܽܘܕܪ̈ܳܢܺܝܢ: ܘܗܰܒ ܚܘܠܡܳܢܳܐ ܠܰܟܪ̈ܺܝܗܶܐ: ܢܦܺܐܫܳܐ ܠܐܠܺܝ̈ܨܶܐ: ܒܽܘܝܳܐܳܐ ܠܐܒܺܝ̈ܠܐ: ܠܽܘܒܳܒܳܐ ܠܰܡܥ̈ܳܩܶܐ: ܫܰܝܢܳܐ ܠܥܺܕ̈ܳܬܳܐ: ܫܠܳܡܳܐ ܠܕܰܝܪ̈ܳܬܳܐ: ܒܽܘܛܳܠܐ ܕܰܩܪ̈ܳܒܶܐ: ܫܽܘܗܳܝܳܐ ܕܚܶܪ̈ܝܳܢܶܐ: ܘܣܰܒܥܽܘܬܳܐ ܠܟܰܦ̈ܢܶܐ: ܬܽܘܪܣܳܝܳܐ ܠܰܣܢܺܝ̈ܩܶܐ: ܐܰܘܝܽܘܬܳܐ ܠܪ̈ܳܥܰܘܳܬܳܐ: ܙܰܗܝܽܘܬܳܐ ܠܟܳܗ̈ܢܶܐ: ܗܶܕܪܳܐ ܠܰܡܫܰܡ̈ܫܳܢܶܐ: ܟܢܺܝܟܽܘܬܳܐ ܠܣܳܒ̈ܶܐ: ܢܰܟܦܽܘܬܳܐ ܠܰܥܠܰܝ̈ܡܶܐ: ܬܰܪܒܺܝܬܳܐ ܛܳܒܬܳܐ ܠܰܛܠܳܝ̈ܶܐ: ܡܚܰܡܣܢܳܢܽܘܬܳܐ ܠܺܝܚܺܝ̈ܕܳܝܶܐ: ܢܝܳܚܳܐ ܘܒܽܘܣܳܡܳܐ ܒܚܰܝ̈ܶܐ ܛܽܘܒ̈ܬܳܢܶܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܛܰܝܒܽܘܬܳܐ ܘܪܶܚܡܰܬ݀ ܐ̱ܢܳܫܽܘܬܶܗ ܕܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ: ܕܠܶܗ ܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܫܽܘܒܚܳܐ ܘܺܐܝܩܳܪܳܐ ܘܪܽܘܡܪܳܡܳܐ: ܗܳܫܳܐ ܘܰܒܟܽܠܙܒܰܢ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܢܝܰܩܰܪ ܥܺܐܕܶܗ ܕܰܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ: ܕܓܳܫ ܣܶܛܪܳܟ ܡܰܚܝܳܢܳܐ: ܘܰܬܪܽܘܥ ܥܰܝ̈ܢܶܐ ܕܺܝܠܰܢ ܕܢܰܪ̈ܕܝܳܢ ܕܶܡ̈ܥܶܐ ܠܰܡܫܳܓܽܘ ܒܗܶܝܢ ܨܳܐܬܳܐ ܕܰܚܛܳܗܰܝ̈ܢ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ ܒܚܰܝܽܘܣܬܳܢܽܘܬܳܟ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܪܰܒܳܐ ܘܡܳܪܳܐ ܘܰܐܠܳܗܳܐ ܕܥܰܠ ܟܽܠ ܕܫܰܟܶܢ ܠܰܫܠܺܝ̈ܚܰܘܗܝ ܓܒܰܝ̈ܳܐ ܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܘܚܰܟܶܡ ܘܰܐܢܗܰܪ ܫܡܰܝܳܢ̈ܝܳܬܳܐ: ܘܝܰܗܒ ܒܺܐܝܕܰܝ̈ܗܽܘܢ ܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ: ܘܫܰܕܰܪ ܐܶܢܽܘܢ ܠܡܰܟܪܳܙܽܘ ܣܒܰܪܬܶܗ ܦܳܪܽܘܩܳܝܬܳܐ ܒܟܽܠܳܗ̇ ܡܶܬܥܰܡܪܳܢܺܝܬܳܐ: ܗ̇ܰܘ ܕܰܠܬܽܐܘܡܰܐ ܫܠܺܝܚܳܐ ܐܰܝܟ ܥܰܒܕܳܐ ܡܙܰܒܢܳܐ ܫܰܕܪܶܗ ܠܗܶܢܕܽܘ ܐܰܬܪܳܐ ܕܽܐܘܟܳܡ̈ܶܐ ܕܢܰܢܗܪܶܗ ܒܢܽܘܗܪܳܐ ܕܺܝܕܰܥܬܶܗ ܐܠܰܗܳܝܬܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܟܰܕ ܠܰܡܕܰܒܪܳܢܽܘܬܳܟ ܚܰܟܺܝܡܰܬ݀ ܒܟܽܠ ܒܗܰܘ̈ܢܶܐ ܕܺܝܠܰܢ ܢܳܣܒܺܝܢܰܢ ܡܫܺܝܚܳܐ ܡܳܪܰܢ: ܬܳܗܪܺܝܢܰܢ ܐܳܦ ܡܶܬܕܰܡܪܺܝܢܰܢ: ܒܕܺܝ̈ܢܶܐ ܠܐ ܡܶܬܡܰܫ̈ܚܳܢܶܐ ܕܰܡܕܰܒܪܳܢܽܘܬܳܟ: ܐܳܦ ܒܰܥܒܺܝ̈ܕܳܬܳܟ ܡܰܬܡ̈ܗܳܬ݀ ܠܗܰܘ̈ܢܶܐ ܕܚܰܙܳܝ̈ܐ: ܕܟܰܕ ܐܰܢ̱ܬ ܐܰܝܬܺܝܬ ܠܟܽܠܗܶܝܢ ܒܶܪ̈ܝܳܬܳܐ ܠܰܗܘܳܝܳܐ: ܘܒܳܟ ܩܳܝ̈ܡܳܢ ܘܺܐܝܬܰܝܗܶܝܢ ܡܶܬܚܰܙܝܳܢ̈ܝܳܬܳܐ ܟܺܝܬ ܘܠܐ ܡܶܬܚܰܙܝܳܢ̈ܝܳܬܳܐ: ܨܒܰܝܬ ܒܪܶܚܡܰܬ ܐ̱ܢܳܫܽܘܬܳܟ ܠܐ ܡܶܬܡܰܠܠܳܢܺܝܬܳܐ ܕܬܶܦܪܽܘܩ ܠܰܒܪܺܝܬܳܟ ܡ̣ܶܢ ܣܶܓܕܰܬ݀ ܨܰܠܡ̈ܶܐ ܠܣܶܓܕܬܳܐ ܕܚܰܕ ܐܠܰܗܳܐ: ܘܰܓܒܰܝܬ ܠܳܟ ܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܫܦܰܝ̈ܳܐ ܘܰܦܫܺܝ̈ܛܶܐ: ܘܰܠܟܽܠ ܚܰܕ ܡܶܢܗܽܘܢ ܫܰܕܰܪܬ ܠܐܬܪܳܐ ܕܰܡܛܳܝܗܝ ܒܦܶܣܳܐ ܕܪܽܘܚܳܐ ܩܰܕܺܝܫܳܐ: ܬܽܐܘܡܰܐ ܕܶܝܢ ܗܳܢܳܐ ܕܕܽܘܟܪܳܢܶܗ ܡܥܰܕܥܕܺܝܢܰܢ ܟܰܕ ܠܗܶܢܕܽܘ ܐܶܫܬܰܕܰܪ ܐܰܝܟ ܕܶܐܡܰܪ ܡܳܪܶܗ ܡܚܰܘܶܐ ܗܘܳܐ: ܘܒܳܬܰܪܟܶܢ ܒܪܽܘܡܚܳܐ ܐܰܝܟ ܡܳܪܶܗ ܐܶܬܕܩܰܪ ܗܘܳܐ: ܘܩܰܒܶܠ ܟܠܺܝܠܐ ܕܣܳܗܕܽܘܬܳܐ ܥܰܡ ܕܰܪܓܳܐ ܕܰܫܠܺܝܚܽܘܬܳܐ ܘܗܳܐ ܝܰܘܡܳܢ ܒܟܽܠ ܦܶܢ̈ܝܳܢ ܡܶܬܡܰܠܰܠ ܫܰܪܒܶܗ: ܘܰܒܟܽܠ ܟܶܢܫܺܝ̈ܢ ܪܳܥܡܺܝܢ ܩܽܘܠܳܣܰܘ̈ܗܝ ܘܰܒܟܽܠ ܚܰܓܺܝ̈ܢ ܡܶܫܬܰܡܥܺܝܢ ܡܺܐܡܪ̈ܰܘܗܝ ܘܢܶܨܚܳܢܰܘ̈ܗܝ: ܘܳܐܦ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܕܰܠܝܽܘܡ ܕܽܘܟܪܳܢܶܗ ܟܢܺܝܫܺܝܢܰܢ: ܘܰܒܬܶܫܒ̈ܚܳܬܳܐ ܘܩܽܘܠܳܣ̈ܶܐ ܡܝܰܩܪܺܝܢܰܢ ܘܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܒܰܨܠܰܘ̈ܳܬܶܗ ܕܡܳܪܝ ܬܽܐܘܡܰܐ ܫܠܺܝܚܳܐ ܘܕܰܫܠܺܝ̈ܚܶܐ ܚܰܒܪ̈ܰܘܗܝ ܘܕܰܒܬܽܘܠܬܳܐ ܡܰܪܝܰܡ ܐܶܡܳܐ ܕܺܝܠܶܕܬܳܟ: ܕܰܬܫܰܘܙܶܒ ܠܰܢ ܡ̣ܶܢ ܟܽܠܗܶܝܢ ܡܰܪ̈ܕܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܚܰܣܳܐ ܚܰܘ̈ܒܰܝܢ ܒܒܳܥ̈ܘܳܬܶܗ: ܫܒܽܘܩ ܣܰܟ̈ܠܘܳܬܰܢ ܒܬܰܟܫ̈ܦܳܬܶܗ: ܝܰܡܺܝܢܶܗ ܗ̇ܳܝ ܕܓܳܫܰܬ݀ ܠܣܶܛܪܳܟ ܗ̣ܺܝ ܬܶܬܦܫܶܛ ܗܳܫܳܐ ܘܰܬܒܰܪܶܟ ܠܟܽܠܰܢ ܨܶܒܥܶܗ ܙܗܺܝܬܳܐ ܗ̇ܳܝ ܕܶܐܬܬܪܺܝܡܰܬ݀ ܘܶܐܬܪܰܡܝܰܬ݀ ܒܕܽܘܟܰܬ ܨܶܨ̈ܶܐ ܗ̣ܺܝ ܬܰܪܡܶܐ ܐܳܦ ܬܶܣܚܽܘܦ ܠܫܺܐܕ̈ܶܐ ܘܰܠܚܰܫ̈ܶܐ ܕܡܰܠܙܺܝܢ ܠܰܢ: ܦܽܘܡܶܗ ܩܰܕܺܝܫܳܐ ܕܰܐܘܕܺܝ ܒܳܟ ܢܰܒܰܥ ܠܰܢ ܗܳܫܳܐ ܟܽܠ ܒܽܘܪ̈ܟܳܬܳܐ: ܠܶܫܳܢܶܗ ܕܶܐܡܰܪ ܠܳܟ ܕܡܳܪܝ ܐܰܢ̱ܬ ܘܰܐܠܳܗܝ: ܗ̣ܽܘ ܗܳܫܳܐ ܢܶܗܘܶܐ ܠܳܟ ܡܦܺܝܣܳܢܳܐ ܚܠܳܦܰܝܢ: ܘܰܚܠܳܦ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܕܰܒܫܰܝܢܳܐ ܘܒܰܫܠܳܡܳܐ ܢܶܬܢܰܛܪܽܘܢ: ܚܠܳܦ ܪ̈ܳܥܰܘܳܬܳܐ ܘܟܳܗ̈ܢܶܐ ܕܢܶܙܕܰܗܽܘܢ ܚܠܳܦ ܡܫܰܡ̈ܫܳܢܶܐ ܘܰܐܦܽܘܕܝܰܐܩ̈ܢܽܘ ܕܢܶܬܟܰܢܟܽܘܢ: ܚܠܳܦ ܓܰܒܪ̈ܶܐ ܘܢܶܫ̈ܶܐ ܕܢܶܬܢܰܟܦܽܘܢ: ܚܠܳܦ ܡܥܳܩ̈ܶܐ ܘܰܐܒܺܝ̈ܠܐ ܕܢܶܬܒܰܝܽܐܘܢ: ܚܠܳܦ ܡܶܣ̈ܟܺܢܶܐ ܘܰܨܪ̈ܺܝܟܶܐ ܕܢܶܬܦܰܪܢܣܽܘܢ: ܚܠܳܦ ܥܰܢܺܝ̈ܕܶܐ ܡܗܰܝ̈ܡܢܶܐ ܕܢܶܬܚܰܣܽܘܢ ܒܽܘܨܳܪ̈ܰܝܗܽܘܢ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܥܰܒܕܳܐ ܐܶܙܕܰܒܰܢ: ܘܰܐܝܟ ܕܰܠܡܳܪܳܐ ܐܶܫܬܡܥܘ ܠܶܗ ܟܝ̈ܳܢܶܐ ܡܠܺܝ̈ܠܐ ܘܠܐ ܡܠܺܝ̈ܠܐ: ܐܶܙܕܰܒܰܢ ܠܰܚܠܽܘܠܐ ܕܚܰܬܢܳܐ ܘܰܕܟܰܠܬܳܐ ܘܰܐܩܢܺܝ ܒܬܽܘܠܽܘܬܳܐ ܘܩܰܕܺܝܫܽܘܬܳܐ ܡܚܳܝܗܝ ܫܳܩܝܳܐ ܥܰܠ ܦܰܟܶܗ ܘܦܰܫܚܳܗ̇ ܐܰܪܝܳܐ ܠܝܰܡܺܝܢܳܐ ܕܰܡܚܳܬܶܗ: ܠܙܰܡܳܪܬܳܐ ܐܰܦܢܺܝ: ܠܰܣܡܺܝ̈ܟܶܐ ܐܰܬܗܰܪ: ܠܰܙܡܺܝ̈ܢܶܐ ܐܰܬܡܰܗ: ܠܰܚܕܽܘ̈ܓܶܐ ܐܰܘܬܰܪ: ܟܰܕ ܟܽܠܗܽܘܢ ܒܰܥܒܺܝ̈ܕܳܬܶܗ ܬܡܺܝ̈ܗܳܬܳܐ ܡܶܬܒܰܩܶܝܢ ܗܘܰܘ ܘܬܳܗܪܺܝܢ ܟܰܕ ܡܶܢܟܽܠ ܕܽܘܟ ܠܛܶܒܶܗ ܨܳܝܒܺܝܢ ܗܘܰܘ: ܡܰܠܟ̈ܶܐ ܘܕܰܝ̈ܳܢܶܐ ܠܰܚܙܳܬܶܗ ܡܶܬܪܰܓܪܓܺܝܢ ܗܘܰܘ: ܘܟܰܕ ܠܡܶܠܬܶܗ ܫܳܡܥܺܝܢ ܗܘܰܘ: ܘܡ̣ܶܢ ܒܺܝ̈ܫܳܬܗܽܘܢ ܦܳܢܶܝܢ ܟܰܕ ܥܳܡܕܺܝܢ: ܡ̣ܶܢ ܐܽܘܟܳܡ̈ܶܐ ܚܶܘܳܪ̈ܶܐ ܗܳܘܶܝܢ ܗܘܰܘ: ܘܟܰܕ ܟܪ̈ܺܝܗܶܐ ܘܰܡܫܰܪ̈ܰܝܳܐ ܠܶܗ ܡܶܬܩܰܪܒܺܝܢ ܗܘܰܘ ܚܽܘܠܡܳܢܳܐ ܡ̣ܶܢ ܡܶܠܬܶܗ ܩܳܢܶܝܢ ܗܘܰܘ: ܘܟܰܕ ܣܡܰܝ̈ܳܐ ܘܰܥܘܺܝܪ̈ܶܐ ܠܶܗ ܡܰܝܬܶܝܢ ܗܘܰܘ: ܚܙܳܝܳܐ ܢܰܗܺܝܪܳܐ ܡܩܰܒܠܺܝܢ ܗܘܰܘ: ܒܰܕܡܽܘܬ ܫܶܡܫܳܐ ܕܡܰܦܨܰܚ ܠܰܒܪܺܝܬܳܐ ܒܙܰܠܺܝ̈ܩܰܘܗܝ: ܐܰܦܨܚܳܗ̇ ܬܽܐܘܡܰܐ ܫܠܺܝܚܳܐ ܠܗܶܢܕܽܘ ܚܶܫܽܘܟܬܳܐ ܒܥܽܘܕܪ̈ܳܢܰܘܗܝ ܣܒܺܝ̈ܣܶܐ: ܒܳܐܣ̈ܘܳܬܶܗ ܬܡܺܝ̈ܗܳܬܳܐ: ܟܰܕ ܡܕܰܟܶܐ ܓܰܪ̈ܒܶܐ: ܡܦܰܬܰܚ ܠܰܣܡܰܝ̈ܳܐ: ܬܳܪܶܨ ܠܰܟܦܺܝ̈ܦܶܐ: ܟܰܕ ܡܚܰܝܶܨ ܠܰܡܫܰܪ̈ܰܝܳܐ: ܟܰܕ ܡܫܰܝܢ ܠܒܰܥܪܺܝܪ̈ܳܝܶܐ: ܟܰܕ ܡܢܰܚܶܡ ܠܡܺܝ̈ܬܶܐ: ܟܰܕ ܟܽܠ ܕܳܐܡܰܪ ܗܘܳܐ ܘܦܳܩܶܕ ܡܶܫܬܰܡܠܐܷ ܗܘܳܐ: ܐܶܬܕܰܡܰܪܘ ܛܶܟ̈ܣܶܐ ܫܡܰܝ̈ܳܢܶܐ ܘܪ̈ܽܘܚܳܬܳܐ ܕܙܰܕܺܝ̈ܩܶܐ: ܟܰܕ ܡܳܫܰܚ ܗܘܳܐ ܘܪܳܫܶܡ ܠܒܺܝܪܬܳܐ ܗ̇ܝ ܡܶܬܗܰܘܢܳܢܺܝܬܳܐ ܘܡܳܪܶܗ ܡܫܰܟܠܶܠ ܗܘܳܐ ܠܳܗ̇ ܒܰܫܡܰܝܳܐ: ܒܶܢܝܳܢܳܐ ܕܠܐ ܫܶܬܶܐܣ̈ܶܐ: ܩܰܝܛܽܘܢܳܐ ܕܠܐ ܬܰܛܠܺܝܠܐ: ܫܽܘܦܪܳܐ ܕܠܐ ܡܶܬܡܰܠܰܠ ܙܺܝܘܳܐ ܕܠܐ ܡܶܬܦܰܫܰܛ: ܐܽܘܡܳܢܳܐ ܕܠܐ ܡܶܬܕܪܶܟ: ܘܟܰܕ ܒܦܰܐܝܽܘܬܳܐ ܗܳܕܶܐ ܪܽܘܚܳܢܳܝܬܳܐ ܐܶܫܬܰܘܕܰܥ ܡܰܠܟܳܐ ܘܗܰܝܡܶܢ ܘܰܥܡܰܕ ܗ̣ܽܘ ܘܰܒܢ̈ܰܝ ܒܰܝܬܶܗ ܥܰܡ ܟܽܠܗܽܘܢ ܪܰܘܪ̈ܒܳܢܰܘܗܝ: ܘܶܐܬܢܰܨܰܚ ܬܽܐܘܡܰܐ ܘܶܐܬܗܰܝܡܰܢ ܡܫܺܝܚܳܐ: ܘܶܐܬܝܰܩܰܪ ܥܰܒܕܳܐ ܘܶܐܬܩܰܒܰܠ ܡܳܪܶܗ: ܘܟܰܕ ܟܽܠܝܽܘܡ ܣܒܰܪܬܳܐ ܠܗܽܘܢ ܡܰܟܪܶܙ ܗܘܳܐ: ܘܥܰܠ ܪܶܒܘܳܬܳܐ ܕܺܝܠܶܗ ܕܰܐܠܳܗܰܢ ܘܡܶܬܢܰܚܬܳܢܽܘܬܶܗ ܕܰܠܘܳܬܰܢ ܠܗܽܘܢ ܓܳܠܐܷ ܗܘܳܐ: ܘܥܰܠ ܣܽܘܪܳܩܶܗ ܨܶܒܝܳܢܳܝܳܐ ܘܚܰܫܰܘ̈ܗܝ ܘܰܙܩܺܝܦܽܘܬܶܗ ܠܗܽܘܢ ܡܰܘܕܰܥ ܗܘܳܐ: ܘܥܰܠ ܡܰܘܬܶܗ ܘܰܩܒܽܘܪܬܶܗ ܘܰܩܝܳܡܬܶܗ ܠܗܽܘܢ ܡܣܰܟܶܠ ܗܘܳܐ: ܘܥܰܠ ܡܰܠܟܽܘܬܳܐ ܘܓܺܗܰܢܳܐ ܠܗܽܘܢ ܡܰܠܶܦ ܗܘܳܐ: ܘܰܥܒܳ̈ܕܶܐ ܫܰܦܺܝܪ̈ܶܐ ܕܚܳܫܚܺܝܢ ܠܰܟܪ̈ܺܝܣܛܝܳܢܶܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܥܛܪܐ

 

 

 

ܐܰܦܢܳܐ ܠܰܢ ܡܳܪܝܳܐ ܐܠܰܗܳܐ ܠܐܘܪܚܳܐ ܕܰܫܪܳܪܳܐ: ܐܰܝܟ ܕܰܐܦܢܺܝܬ ܠܗܶܢܕ̈ܘܳܝܶܐ ܘܟܽܘ̈ܫܳܝܶܐ ܡ̣ܶܢ ܬܰܘܫܳܐ ܕܛܳܥܝܽܘܬܳܐ ܒܶܝܬ ܐܺܝܕܰܝ̈ ܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ: ܘܢܰܪܕܶܐ ܠܰܢ ܡ̣ܶܢ ܣܶܛܪܶܗ ܕܶܐܬܬܪܰܥ ܒܠܽܘܟܳܝܬܳܐ ܟܽܠ ܚܽܘܠܡܳܢ̈ܶܐ ܘܥܽܘܕܪ̈ܳܢܶܐ ܠܟܺܐܒܰܝ̈ܢ ܟܣܰܝ̈ܳܐ ܘܰܓܠܰܝ̈ܳܐ: ܘܒܰܕܡܳܟ ܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ ܘܣܰܟܠܘ̈ܳܬܰܢ: ܘܰܚܢܰܢ ܘܥܰܢܺܝ̈ܕܰܝܢ ܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܩܕܳܡܰܝܟ ܒܰܨܠܰܘ̈ܳܬܶܗ ܕܰܡܢܺܝܚܳܢܳܟ ܡܳܪܝ ܬܽܐܘܡܰܐ ܡܳܪܰܢ܀

 

 

 

ܚܘܬܡܐ

 

 

 

ܚܰܬܢܳܐ ܕܰܫܪܳܪܳܐ ܡܫܺܝܚܳܐ ܕܬܰܠܡܶܕ ܠܚܰܬܢܳܐ ܘܰܠܟܰܠܬܳܐ ܒܗܳܝ ܡܕܺܝܢ̱ܬܳܐ ܡܰܚܽܘܙܰܐ ܕܗܶܢܕ̈ܘܳܝܶܐ ܒܺܐܝ̈ܕܰܝ ܬܰܠܡܺܝܕܳܐ ܕܩܽܘܫܬܳܐ ܫܠܺܝܚܳܐ ܓܰܒܝܳܐ ܡܳܪܝ ܬܽܐܘܡܰܐ: ܘܰܗܘܰܘ ܟܳܪ̈ܽܘܙܶܐ ܠܰܣܒܰܪܬܳܟ: ܐܰܫܘܳܐ ܠܰܢ ܕܢܶܗܘܶܐ ܥܰܡܗܽܘܢ ܙܡܺܝ̈ܢܶܐ ܘܰܩܪ̈ܰܝܳܐ ܒܰܚܠܽܘܠܳܟ: ܘܰܣܡܺܝ̈ܟܶܐ ܒܡܰܠܟܽܘܬܳܟ ܕܢܰܘܕܶܐ ܠܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܡܶܠܬܳܐ ܡܬܽܘܡܳܝܳܐ ܕܰܗܘܳܐ ܒܰܪܢܳܫܳܐ ܒܚܽܘܒܶܗ: ܘܚܰܫ̈ܶܐ ܘܰܨܠܺܝܒܳܐ ܣܰܝܒܰܪ ܡܶܛܽܠ ܦܽܘܪܩܳܢܰܢ: ܘܩܳܡ ܡ̣ܶܢ ܒܶܝܬ ܡܺܝ̈ܬܶܐ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܫܽܘܘܕܳܝܶܗ ܘܫܰܪܰܪ ܠܬܽܐܘܡܰܐ ܕܶܐܬܦܰܠܰܓ ܥܰܠ ܩܝܳܡܬܶܗ: ܘܚܰܘܺܝ ܠܶܗ ܫܽܘ̈ܡܳܬܶܗ ܐܳܦ ܬܪܳܥܳܐ ܕܣܶܛܪܶܗ: ܘܗܳܝܕܶܝܢ ܐܰܘܕܺܝ ܘܗܰܝܡܶܢ ܒܶܗ: ܘܒܳܬܰܪ ܣܽܘܠܳܩܶܗ ܫܰܕܪܶܗ ܠܗܶܢܕܽܘ ܕܢܰܟܪܶܙ ܠܰܣܒܰܪܬܶܗ: ܘܰܐܦܢܺܝ ܠܥܰܡ̈ܡܶܐ ܛܳܥܰܝ̈ܳܐ ܠܗܰܝܡܳܢܽܘܬܶܗ: ܕܠܶܗ ܝܳܐܐ܀

 

 

 

ܣܕܪܐ

 

 

 

ܡܫܺܝܚܳܐ ܪܳܥܝܳܐ ܫܰܪܺܝܪܳܐ ܕܰܢܚܶܬ ܡ̣ܶܢ ܫܡܰܝܳܐ ܡܶܛܽܠ ܥܳܢ̈ܳܐ ܐܰܒܺܝܕܬܳܐ ܘܛܳܥܺܝܬܳܐ ܕܢܰܗܦܟܶܝܗ̇ ܠܰܛܝܳܪܶܗ: ܘܒܰܕܡܳܐ ܝܰܩܺܝܪܳܐ ܕܰܩܢܽܘܡܶܗ ܗ̇ܰܘ ܕܶܐܫܰܕ ܚܠܳܦܶܝܗ̇ ܒܰܒܣܰܪ ܙܰܒܢܳܗ̇ ܘܚܰܪܪܳܗ̇: ܡ̣ܶܢ ܒܺܝܫܳܐ ܘܡܰܘܬܳܐ: ܘܕܰܒܪܳܗ̇ ܘܰܐܣܩܳܗ̇ ܥܰܡܶܗ ܠܰܡܪ̈ܰܘܡܶܐ ܘܰܐܥܠܳܗ̇ ܠܰܛܝܳܪܶܗ: ܗ̇ܰܘ ܕܰܓܒܳܐ ܠܶܗ ܓܽܘܕܳܐ ܕܬܰܠܡܺܝ̈ܕܶܐ ܠܰܣܒܰܪܬܶܗ ܐܶܘܢܓܶܠܳܝܬܳܐ: ܘܫܰܕܰܪ ܐܶܢܽܘܢ ܠܡܰܟܪܳܙܽܘ ܠܥܰܡ̈ܡܶܐ ܘܶܐܡ̈ܘܳܬܳܐ ܗܰܝܡܳܢܽܘܬܳܐ ܫܰܪܺܝܪܬܳܐ: ܘܰܠܡܰܥܡܳܕܽܘ ܠܰܡܗܰܝ̈ܡܢܶܐ ܒܰܫ̈ܡܳܗܶܐ ܡܫܰܒ̈ܚܶܐ ܕܰܬܠܺܝܬܳܝܽܘܬܳܐ ܡܬܽܘܡܳܝܬܳܐ: ܗ̇ܰܘ ܕܰܠܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܐܰܫܘܺܝ ܘܓܳܫ ܕܰܦܢܶܗ ܚܰܝܬܳܐ: ܒܨܳܐ ܒܝܰܡܺܝܢܶܗ ܫܽܘ̈ܡܳܬܳܐ ܕܺܐܝ̈ܕܰܘܗܝ ܥܰܡ ܪ̈ܶܓܠܰܘܗܝ ܐܰܝܟ ܕܶܐܬܝܰܐܝܰܒ ܒܦܳܪܽܘܫܽܘܬܳܐ: ܘܫܰܕܪܶܗ ܠܗܶܢܕܽܘ ܐܰܬܪܳܐ ܚܶܫܽܘܟܳܐ ܕܢܰܢܗܪܶܗ ܒܢܽܘܗܪܳܐ ܫܒܺܝܚܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܕܰܐܠܳܗܳܐ ܡܶܠܬܳܐ: ܘܰܚܠܳܦܰܘܗܝ ܣܰܝܒܰܪ ܚܰܫ̈ܶܐ ܘܫܶܢ̈ܕܶܐ ܘܰܕܩܳܪܳܐ ܕܠܽܘܟܳܝܬܳܐ ܘܰܫܩܰܠ ܟܠܺܝܠܐ ܥܦܺܝܦܳܐ ܕܰܫܠܺܝܚܽܘܬܳܐ ܘܰܕܣܳܗܕܽܘܬܳܐ: ܘܰܐܦܢܺܝ ܒܝܽܘܠܦܳܢܶܗ ܠܗܶܢܕܽܘ ܘܗܶܢܕܽܘܣ ܡܕܺܝ̈ܢܳܬܳܐ: ܐܳܦ ܠܥܰܡ̈ܡܶܐ ܢܽܘܟܪ̈ܳܝܶܐ ܘܟܽܘ̈ܫܳܝܶܐ ܠܺܝܕܰܥܬܳܐ ܕܚܰܕ ܐܠܰܗܳܐ ܕܒܰܬܠܳܬܳܐ ܩܢܽܘ̈ܡܶܐ ܫܰܘ̈ܝܰܝ ܒܺܐܝܬܽܘܬܳܐ ܓܢܺܝܙܬܳܐ: ܘܗܳܐ ܝܰܘܡܳܢ ܡܶܙܕܰܝܰܚ ܕܽܘܟܪܳܢܶܗ ܒܟܽܠܳܗ̇ ܥܳܡܰܪܬܳܐ: ܘܰܠܗܰܝܡܳܢܽܘܬܶܗ ܡܰܟܪܙܳܐ ܥܺܕܬܳܐ ܩܰܕܺܝܫܬܳܐ: ܘܥܰܠܗܳܝ ܒܩܽܘ̈ܠܳܣܶܐ ܕܗܰܝܡܳܢܽܘܬܳܐ ܡܚܰܓܶܝܢܰܢ ܠܝܽܘܡ ܕܽܘܟܪܳܢܶܗ ܟܰܕ ܐܳܡܪܺܝܢܰܢ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܬܰܠܡܺܝܕܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܕܬܰܘܕܺܝܬܳܐ ܬܪܺܝܨܬܳܐ ܚܰܘܺܝ ܘܰܐܠܶܦ ܒܰܒܪܺܝܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܫܽܘܦܪܳܐ ܕܰܟܢܰܘ̈ܳܬܶܗ: ܕܫܰܦܺܝܪܽܘܬ ܕܶܚܠܬܳܐ ܐܠܰܦ ܠܥܳܡܰܪܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܪܳܚܡܳܐ ܕܩܽܘܫܬܳܐ ܘܕܰܫܪܳܪܳܐ ܕܰܪܗܺܝܒܳܐܝ̣ܬ ܫܰܘܕܰܥ ܥܰܠ ܩܽܘܫܬܳܐ ܕܰܩܪܺܝܚܳܐܝ̣ܬ ܡܰܠܶܠ ܒܚܰܕܽܘܬܳܐ ܬܶܫܒܽܘܚܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܨܶܒܬܳܐ ܕܰܨܠܺܝܒܽܘܬܳܐ: ܕܨܶܒܝܳܢܳܐܝ̣ܬ ܚܰܫ ܚܠܳܦ ܡܫܺܝܚܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܦܳܥܠܐ ܕܦܰܐܝܽܘܬ ܐܠܰܗܽܘܬܳܐ: ܕܰܦܠܰܚ ܟܰܫܺܝܪܳܐ ܒܟܰܪܡܳܐ ܕܡܳܪܶܗ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܥܰܒܕܳܐ ܟܰܫܺܝܪܳܐ ܕܡܳܪܽܘܬܳܐ ܫܡܰܝܳܢܺܝܬܳܐ: ܕܰܥܩܰܪ ܒܠܶܫܳܢܶܗ ܫܰܦܝܳܐ ܠܠܐ ܗܰܝܡܳܢܽܘܬܳܐ ܡ̣ܶܢ ܥܺܕܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܣܳܗܕܳܐ ܕܰܣܒܰܪܬܳܐ ܐܶܘܢܓܶܠܳܝܬܳܐ: ܘܣܳܬܽܘܪܳܐ ܕܟܽܠܗܽܘܢ ܐܰܝܠܶܝܢ ܕܣܳܢܶܝܢ ܠܰܡܗܰܝ̈ܡܢܶܐ: ܘܛܳܪܶܕ ܠܟܽܠܗܶܝܢ ܐܶܪ̈ܶܣܺܝܣ ܕܰܓ̈ܳܠܳܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܘܢܽܘܗܪܳܐ ܫܒܺܝܚܳܐ ܕܡ̣ܶܢ ܫܡܰܫܳܐ ܕܙܰܕܺܝܩܽܘܬܳܐ ܨܡܰܚ: ܘܢܽܘܗܪܳܐ ܩܢܰܘ ܒܶܗ ܐܽܘܟܳܡ̈ܶܐ ܒܢ̈ܰܝ ܗܶܢܕܽܘ ܡܫܰܟܰܪܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܡܰܠܳܚܳܐ ܕܶܐܠܦܳܐ ܪܽܘܚܳܢܳܝܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܡܶܠܚܳܐ ܡܫܺܝܚܳܝܬܳܐ ܡܡܰܕܟܰܬ݀ ܠܦܰܟܺܝ̈ܗܶܐ: ܘܡܰܝ̈ܳܐ ܡܰܚ̈ܝܳܢܶܐ ܡܫܺܝ̈ܓܰܝ ܠܰܚܛܺܝܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܕܠܗܰܝܡܳܢܽܘܬܳܐ ܒܠܐ ܗܰܝܡܳܢܽܘܬܳܐ ܫܰܪܰܪ: ܘܰܠܠܐ ܪ̈ܳܕܰܝܳܐ ܘܟܰܘܶܢ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܟܳܪܽܘܙܳܐ ܕܟܺܐܢܽܘܬܳܐ ܕܟܺܐܢܳܐܝ̣ܬ ܓܳܫ ܕܽܘܟ̈ܝܳܬܳܐ ܕܨܶܨ̈ܶܐ ܘܰܕܠܽܘܟܳܝܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܝܳܕܽܘܥܳܐ ܕܟܰܣ̈ܝܳܬܳܐ ܐܰܝܟ ܪܰܒܶܗ: ܕܝܰܡܺܝܢܳܐ ܕܰܡܚܳܬܶܗ ܦܰܫܚܳܗ̇ ܐܰܪܝܳܐ ܘܛܰܥܢܳܗ̇ ܟܰܠܒܳܐ ܘܰܐܥܠܳܗ̇ ܠܰܣܡܳܟܳܐ ܒܶܝܬ ܡܶܫܬܽܘܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܛܽܘܒܬܳܢܳܐ: ܕܛܰܝܶܒ ܢܰܦܫܶܗ ܛܒܺܝܒܳܐܝ̣ܬ ܕܰܢܡܽܘܬ ܥܰܡ ܡܳܪܶܗ ܒܚܰܕܽܘܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܚܰܒܺܝܒܶܗ ܕܚܰܬܢܳܐ ܫܡܰܝܳܢܳܐ ܕܚܶܘܳܪ̈ܶܐ ܐܠܰܒܶܫ ܠܟܰܠܬܳܐ ܐܽܘܟܳܡܬܳܐ ܕܰܡܟܰܪ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܕܙܰܝܢܳܐ ܕܙܰܕܺܝܩܽܘܬܳܐ ܚܫܰܠ ܘܙܰܝܶܢ ܒܬܰܘܕܺܝܬܳܐ ܠܒܰܪܬ ܐܰܪ̈ܡܳܝܶܐ ܥܺܕܬܳܐ ܠܽܘܩܒܰܠ ܝܽܘܠܦܳܢ̈ܶܐ ܡܣܰܝ̈ܒܶܐ ܕܛܳܥܝܽܘܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܕܘܺܝܠܐ ܕܚܶܫܟܳܐ ܓܠܰܦ ܡܶܢܩܕܳܡ ܦܰܪܨܽܘܦܳܗ̇ ܕܟܰܠܬܳܐ: ܘܘܰܥܕܳܐ ܫܰܪܺܝܪܳܐ ܒܡܶܠܬܳܐ ܫܰܪܺܝܪܬܳܐ ܘܰܥܶܕ ܠܳܗ̇: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܕܗܰܕܪܳܗ̇ ܠܟܰܠܬܳܐ ܫܠܶܝܡܽܘܢܳܝܬܳܐ ܒܗܶܕܪ̈ܶܐ ܕܠܐ ܡܶܬܚܰܒܠܳܢܽܘܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܕܳܚܽܘܩܳܐ ܕܕܶܚ̈ܠܳܬܳܐ ܣܪ̈ܺܝܩܳܬܳܐ: ܕܰܕܠܐ ܕܶܚܠܐ ܐܰܙܥܶܩ ܡܳܪܝ ܘܰܐܠܳܗܝ ܠܘܳܬ ܡܫܺܝܚܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܓܰܒܝܳܐ ܒܰܫܠܺܝ̈ܚܶܐ: ܕܓܰܠܝܳܐܝ̣ܬ ܐܰܣܗܶܕ ܥܰܠ ܝܶܫܽܘܥ ܕܶܐܨܛܠܶܒ ܥܰܠ ܩܰܝܣܳܐ ܒܓܳܓܽܘܠܬܳܐ ܘܓܰܢ̱ܒܳܪܳܐܝ̣ܬ ܙܟܳܐ ܠܡܰܘܬܳܐ ܘܩܳܡ ܒܬܶܫܒܽܘܚܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ ܒܚܺܝܪܳܐ ܕܒܰܫܪܳܪܶܗ ܐܽܘܡܬܳܐ ܟܪܺܝܣܛܝܳܢܳܝܬܳܐ ܡܶܫܬܰܒܗܪܳܐ: ܘܒܶܗ ܡܶܬܚܰܬܪܳܐ ܠܽܘܩܒܰܠ ܟܽܠܶܗ ܓܰܒܳܐ ܕܰܣܪ̈ܺܝܩܰܝ ܗܰܝܡܳܢܽܘܬܳܐ: ܡܳܪܝ ܬܽܐܘܡܰܐ ܫܠܺܝܚܳܐ ܓܰܒܝܳܐ ܐܺܝܙܓܰܕܳܐ ܕܰܐܠܳܗܳܐ ܡܶܠܬܳܐ ܕܰܐܝܟ ܥܰܒܕܳܐ ܐܶܙܕܰܒܰܢ ܘܰܐܝܟ ܐܰܪܕܝܺܟܠܐ ܒܢܳܐ ܒܰܫܡܰܝܳܐ ܒܺܝܪܬܳܐ ܗܕܺܝܪܬܳܐ ܠܡܰܠܟܳܐ ܕܗܶܢܕܽܘ: ܒܰܕܓܽܘܢ ܒܳܥܶܝܢܰܢ ܘܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܰܢ ܡܰܘܪܒܳܢܶܗ ܕܢܰܨܺܝܚܳܐ ܡܳܪܝ ܬܽܐܘܡܰܐ ܫܠܺܝܚܳܐ ܕܩܽܘܫܬܳܐ: ܕܰܒܝܰܕ ܨܠܰܘ̈ܳܬܶܗ ܫܡܺܝ̈ܥܳܬܳܐ ܬܶܬܗܰܕܰܪ ܥܺܕܬܳܐ ܕܺܝܠܳܟ ܫܒܺܝܚܬܳܐ ܒܫܰܝܢܳܐ ܘܒܰܫܠܳܡܳܐ ܘܰܒܬܰܘܕܺܝܬܳܐ ܕܠܐ ܡܽܘܡܳܐ: ܘܢܶܫܠܽܘܢ ܡܶܢܳܗ̇ ܣܶܕ̈ܩܶܐ ܘܚܶܪ̈ܝܳܢܶܐ ܕܕܳܪ̈ܽܘܫܶܐ ܕܰܡܥܰܩܒܺܝܢ ܠܰܡܕܰܒܪܳܢܽܘܬܳܐ ܕܺܝܠܳܟ ܐܠܰܗܳܝܬܳܐ: ܘܰܐܥܒܰܪ ܡܶܢܳܗ̇ ܟܽܠܗܽܘܢ ܣܽܘܓ̈ܦܳܢܶܐ ܕܰܒܥܶܠܕ̈ܒܳܒܶܐ ܒܺܝ̈ܫܶܐ: ܘܢܰܛܰܪ ܒܓܰܘܳܗ̇ ܠܪ̈ܳܥܰܘܳܬܳܐ ܬܪ̈ܺܝܨܶܐ: ܕܢܶܪܥܽܘܢܳܗ̇ ܒܙܰܗܝܽܘܬܳܐ: ܘܗܰܕܰܪ ܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܒܕܰܟܝܽܘܬܳܐ: ܒܰܪܶܟ ܠܟܶܢܫܳܐ ܕܰܒܢܶܝ̈ܗ̇ ܒܟܽܠܗܶܝܢ ܒܽܘܪ̈ܟܳܬܳܐ ܛܳܒ̈ܳܬܳܐ: ܘܗܰܒ ܠܟܰܦ̈ܢܶܐ ܣܰܒܥܽܘܬܳܐ: ܠܚܰܛܳܝ̈ܶܐ ܫܽܘܒܩܳܢ ܚܰܘ̈ܒܳܬܳܐ: ܠܕܰܝܪ̈ܳܝܶܐ ܘܥܳܢܘܳܝ̈ܶܐ ܘܺܝܚܺܝ̈ܕܳܝܶܐ ܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܰܠܟܽܠܢܳܫ ܗ̇ܳܝ ܕܥܳܕܪܳܐ ܠܶܗ ܒܫܰܘܝܽܘܬܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܥܽܘܗܕܳܢܳܐ ܕܚܰܣܝܽܘܬܳܐ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܣܗܕܐ ܡܪܝ ܩܘܪܝܩܘܣ ܘܐܡܗ ܝܘܠܝܛܝ ܘܚܕܥܣܪ ܐܠܦܝ̈ܐ ܘܐܪܒܥܡܐܐ ܘܬܠܬܝܢ ܘܐܪܒܥܐ ܣܗ̈ܕܐ ܚܒܪ̈ܘܗܝ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܕܟܰܕ ܠܥܺܐܕܗܽܘܢ ܐܠܰܗܳܝܳܐ ܕܢܰܨܺܝܚܳܐ ܡܳܪܝ ܩܽܘܪܝܰܩܳܘܣ ܘܝܽܘܠܺܝܛܺܝ ܐܶܡܶܗ ܘܰܚܕܰܥܣܰܪ ܐܠܰܦܰܝ̈ܳܐ ܚܰܒܪ̈ܰܘܗܝ: ܘܰܕܡܳܪܝ ܐܰܒܚܰܝ ܘܰܐܢܕܪܶܐܘܳܣ ܫܠܺܝܚܳܐ: ܒܚܰܕܽܘܬܳܐ ܡܫܰܡܠܶܝܢܰܢ: ܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܢܶܬܒܰܣܰܡ: ܘܰܒܚܽܘܒܳܐ ܘܰܐܘܝܽܘܬܳܐ ܢܶܗܘܶܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܣܳܗܕܳܐ ܩܰܕܡܳܝܳܐ ܕܰܩܥܳܐ ܥܰܠ ܩܰܝܣܳܐ ܕܰܙܩܺܝܦܽܘܬܳܐ ܘܚܳܪ ܒܶܗ ܣܳܗܕܳܐ ܩܽܘܪܝܰܩܳܘܣ ܘܶܐܬܕܰܡܺܝ ܒܶܗ: ܘܰܐܫܠܶܡ ܦܰܓܪܶܗ ܠܫܶܢ̈ܕܶܐ ܘܽܐܘܠܨܳܢ̈ܶܐ ܡܶܛܽܠ ܚܽܘܒܶܗ: ܠܗܰܘ ܙܰܟܳܝܳܐ ܕܰܠܡܰܘܬܳܐ ܛܪܽܘܢܳܐ ܙܟܳܐ: ܘܙܰܟܳܝܳܐ ܐܶܬܚܙܺܝ ܐܰܓܽܘܢܺܝܣܛܳܐ ܕܺܝܠܶܗ ܠܽܘܩܒܰܠ ܚܰܢ̈ܦܶܐ ܘܟܳܦܽܘܪ̈ܶܐ: ܠܗܰܘ ܚܰܬܢܳܐ ܫܡܰܝܳܢܳܐ ܕܙܰܡܶܢ ܚܕܽܘ̈ܓܶܐ ܠܡܶܫܬܽܘܬܶܗ: ܘܗܳܐ ܒܰܚܠܽܘܠܳܗ ܡܶܬܒܰܣܡܺܝܢ ܟܽܠܗܽܘܢ ܐܰܝܠܶܝܢ ܕܡܶܬܛܰܝܒܺܝܢ ܒܝܰܘܡܳܐ ܕܕܽܘܟܪܳܢܶܗ: ܕܠܶܗ ܠܡܳܪܝܳܐ ܕܺܝܠܶܗ ܢܶܬܟܰܫܰܦ ܕܢܶܬܶܠ ܠܰܢ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܩܕܳܡܰܝܟ ܡܫܺܝܚܳܐ ܐܠܰܗܰܢ ܣܳܓܕܺܝܢܰܢ ܘܠܳܟ ܡܰܘܕܶܝܢܰܢ: ܘܠܰܥܛܺܝܦ ܙܳܟܽܘܬܳܐ ܡܢܺܝܚܳܢܳܟ ܡܳܪܝ ܩܽܘܪܝܰܩܳܘܣ ܒܚܰܕܽܘܬܳܐ ܡܫܰܡܠܶܝܢܰܢ: ܛܰܠܝܳܐ ܙܥܽܘܪܳܐ ܕܒܰܡܫܽܘܚܬܳܐ ܕܰܬܠܳܬ ܫܢܺܝ̈ܢ ܩܳܐܶܡ ܩܕܳܡ ܕܰܝ̈ܳܢܶܐ ܘܰܠܗܽܘܢ ܡܰܒܗܶܬ ܠܗܽܘܢ: ܐܰܬܠܺܝܛܳܐ ܬܡܺܝܗܳܐ: ܒܶܪܽܘܠܐ ܕܠܐ ܟܽܘܬܡ̈ܳܬܳܐ: ܓܰܢ̱ܒܳܪܳܐ ܫܒܺܝܚܳܐ: ܕܰܟܝܳܐ ܕܠܐ ܡܽܘܡܳܐ: ܗܶܕܪܳܐ ܡܰܠܟܳܝܳܐ: ܘܰܪܕܳܐ ܚܠܐܷ ܪܺܝܚܳܐ: ܙܰܗܝܳܐ ܘܰܟܢܺܝܟܳܐ: ܚܰܣܝܳܐ ܘܩܰܕܺܝܫܳܐ: ܛܰܠܝܳܐ ܥܰܙܺܝܙܳܐ: ܝܰܘܢܳܐ ܫܰܪܘܳܝܳܐ: ܟܶܢܳܪܳܐ ܪܓܺܝܓܳܐ: ܠܡܺܐܢܳܐ ܕܰܡܛܰܪ̈ܦܶܐ: ܡܰܠܦܳܢܳܐ ܕܰܛܠܳܝ̈ܶܐ: ܢܟܺܝܣܳܐ ܕܠܐ ܣܰܟܠܽܘ: ܣܳܗܕܳܐ ܫܰܪܺܝܪܳܐ: ܥܰܡܽܘܕܳܐ ܚܰܝܠܬܳܢܳܐ: ܦܺܝܪܡܳܐ ܕܬܰܪܥܽܘܬܳܐ: ܨܰܠܡܳܐ ܕܰܪ̈ܕܺܝܦܶܐ: ܩܺܝܬܳܪܳܐ ܚܰܠܝܳܐ: ܪܺܝܚܳܐ ܒܰܣܺܝܡܳܐ: ܫܽܘܦܪܳܐ ܫܰܦܺܝܪܳܐ ܬܡܺܝܗܳܐ ܒܰܢܟܺܝ̈ܣܶܐ: ܒܰܪ ܬܰܪܒܺܝܬܳܐ ܕܶܐܡܳܐ ܛܰܥܡܳܢܺܝܬܳܐ: ܢܽܘܪܒܳܐ ܕܶܐܬܦܣܶܩ ܒܪܰܓܝܽܘܬܶܗ ܘܶܐܬܪܡܺܝ ܒܫܰܠܗܶܒܺܝܬܳܐ ܘܠܐ ܝܺܩܶܕ: ܩܰܝܣܳܐ ܢܰܦܫܳܢܳܝܳܐ ܕܶܐܬܢܣܰܪ ܒܡܰܣܳܪܳܐ ܕܢܶܗܘܶܐ ܩܺܐܒܽܘܬܳܐ ܐܰܘܟܺܝܬ ܡܰܥܡܪܳܐ ܠܪܽܘܚܳܐ ܩܰܕܺܝܫܳܐ: ܫܽܘܥܳܐ ܡܫܰܪܪܳܐ ܕܠܐ ܐܶܙܕܰܥܰܙܥ ܡ̣ܶܢ ܒܺܝܫܽܘܬ ܩܽܘܪ̈ܢܳܣܰܝܗܽܘܢ ܕܽܐܘܡ̈ܢܶܐ ܕܰܚܛܺܝܬܳܐ: ܥܰܡܽܘܕܳܐ ܦܰܪܙܠܳܝܳܐ ܕܰܛܥܺܝܢ ܠܝܽܘܩܪܳܐ ܝܰܩܺܝܪܳܐ ܘܠܐ ܐܶܬܟܦܶܦ ܬܰܛܠܺܝܠܐ: ܛܰܠܝܳܐ ܙܥܽܘܪ ܒܩܰܘܡܬܳܐ ܕܰܐܒܗܶܬ ܠܣܳܒ̈ܶܐ ܩܰܫܺܝ̈ܫܰܝ ܒܝܰܘ̈ܡܳܬܗܽܘܢ: ܥܠܰܝܡܳܐ ܚܰܟܺܝܡܳܐ ܕܰܙܟܳܐ ܠܰܥܪܺܝܡܽܘܬܳܐ ܕܰܨܢܺܝ̈ܥܶܐ: ܝܰܘܢܳܐ ܦܰܪܽܘܓܳܐ ܕܰܦܪܰܚ ܒܥܽܘܫܢܳܐ ܡܶܢܩܕܳܡ ܨܰܝ̈ܳܕܶܐ ܘܠܐ ܐܶܬܥܰܪܩܰܠ ܒܢܶܫ̈ܒܶܐ ܘܰܡܨܺܝ̈ܕܳܬܳܐ ܕܰܦܪܰܣܘ ܠܶܗ ܡܰܪ̈ܳܚܶܐ: ܚܰܓܠܐ ܫܰܦܺܝܪ ܪܶܗܛܳܐ ܕܰܪܗܶܛ ܬܪܺܝܨܳܐܝ̣ܬ ܒܽܐܘܪܚܳܐ ܕܙܰܕܺܝܩܽܘܬܳܐ ܘܶܐܬܦܰܠܰܛ ܡ̣ܶܢ ܦܰܚ̈ܶܐ ܕܢܶܨ̈ܶܐ ܒܺܝ̈ܫܶܐ: ܩܰܠܺܝܠܐ ܕܠܐ ܐܰܚܕܽܘܗܝ ܩܶܣܛܽܘܪ̈ܶܐ ܕܰܛܪܽܘܢܳܐ ܕܰܡܬܰܚ ܠܩܶܫܬܳܐ ܕܺܝܠܶܗ ܕܢܶܫܒܶܐ ܟܽܠܳܗ̇ ܥܳܡܰܪܬܳܐ: ܘܥܰܠ ܗܳܕܶܐ ܠܘܳܬܳܟ ܣܳܗܕܳܐ ܚܠܺܝܨܳܐ ܡܳܪܝ ܩܽܘܪܝܰܩܳܘܣ ܐܳܡܪܺܝܢܰܢ: ܐܰܢ̱ܬ ܐܺܝܬܰܝܟ ܐܺܝܠܳܢܳܐ ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ ܘܦܺܐܪ̈ܰܝܟ ܝܳܗܒܺܝܢ ܚܰܝ̈ܶܐ ܘܚܰܠܝܽܘܬܳܐ: ܐܰܢ̱ܬ ܐܺܝܬܰܝܟ ܒܬܽܘܠܐ ܕܠܐ ܛܽܘܠܫܳܐ ܕܠܰܒܬܽܘ̈ܠܐ ܘܠܰܡܙܰܘ̈ܓܶܐ ܙܰܡܶܢܬ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܐܰܢ̱ܬ ܐܺܝܬܰܝܟ ܓܡܺܝܪܳܐ ܒܢܰܨܺܝ̈ܚܶܐ: ܐܰܢ̱ܬ ܐܺܝܬܰܝܟ ܕܶܒܚܳܐ ܕܰܟܝܳܐ ܕܶܐܬܩܰܪܰܒܬ ܪܺܝܫܺܝܬܳܐ ܡܩܰܒܰܠܬܳܐ ܠܡܳܪܳܟ: ܐܰܢ̱ܬ ܐܺܝܬܰܝܟ ܗܰܝܟܠܐ ܕܰܐܠܳܗܳܐ ܘܒܳܟ ܥܶܡܪܰܬ݀ ܪܽܘܚܳܐ ܩܰܕܺܝܫܳܐ: ܐܰܢ̱ܬ ܐܺܝܬܰܝܟ ܘܰܥܕܳܐ ܕܛܳܒ̈ܳܬܳܐ: ܐܰܢ̱ܬ ܐܺܝܬܰܝܟ ܙܰܕܺܝܩܳܐ ܕܡ̣ܶܢ ܟܰܪܣܳܐ ܕܶܐܡܳܟ ܝܽܘܠܺܝܛܺܝ ܐܶܬܓܒܰܝܬ ܐܰܝܟ ܕܬܶܗܘܶܐ ܣܳܗܕܳܐ ܠܰܡܫܺܝܚܳܐ: ܐܰܢ̱ܬ ܐܺܝܬܰܝܟ ܚܰܬܢܳܐ ܗܕܺܝܪܳܐ ܕܰܒܡܶܫܬܽܘܬܳܟ ܡܶܬܒܰܣܡܳܐ ܥܺܕܬܳܐ ܩܰܕܺܝܫܬܳܐ: ܐܰܢ̱ܬ ܐܺܝܬܰܝܟ ܛܰܥܡܳܐ ܗܰܢܺܝܳܐܐ ܕܒܰܛܥܳܡܬܳܟ ܪܳܘܙܳܐ ܡܰܪܥܺܝܬܳܐ: ܐܰܢ̱ܬ ܐܺܝܬܰܝܟ ܝܳܗܽܘܒܳܐ ܕܥܽܘܕܪ̈ܳܢܶܐ ܠܐܠܺܝ̈ܨܶܐ: ܐܰܢ̱ܬ ܐܺܝܬܰܝܟ ܟܺܐܢܳܐ ܕܰܒܟܺܐܢܽܘܬܳܐ ܐܰܟܶܣܬ ܠܟܳܦܽܘܪ̈ܶܐ: ܐܰܢ̱ܬ ܐܺܝܬܰܝܟ ܠܡܺܐܢܳܐ ܕܰܡܛܰܪ̈ܦܶܐ: ܐܰܢ̱ܬ ܐܺܝܬܰܝܟ ܡܩܰܒܠܳܢܳܐ ܕܛܽܘ̈ܒܶܐ ܫܡܰܝ̈ܳܢܶܐ: ܐܰܢ̱ܬ ܐܺܝܬܰܝܟ ܐܶܡܪܳܐ ܕܠܐ ܡܽܘܡܳܐ: ܘܥܰܠܗܳܝ ܛܽܘܒܳܐ ܝܳܗܒܺܝܢܰܢ ܠܳܟ ܟܰܕ ܐܳܡܪܺܝܢܰܢ: ܛܽܘܒܰܝܟ ܕܰܗܘܰܝܬ ܬܰܪܥܳܐ ܘܡܰܥܒܰܪܬܳܐ ܡ̣ܶܢ ܥܳܠܡܳܐ ܗܳܢܳܐ ܠܥܳܠܡܳܐ ܡܠܐܷ ܛܽܘ̈ܒܶܐ: ܛܽܘܒܰܝܟ ܕܰܗܘܰܝܬ ܩܠܺܝܕܳܐ ܘܒܳܟ ܐܶܬܦܰܬܚܰܬ݀ ܐܽܘܪܚܳܐ ܕܡܰܘܒܠܐ ܠܚܰܝ̈ܶܐ: ܛܽܘܒܰܝܟ ܕܰܗܘܰܝܬ ܕܽܘܡܝܳܐ ܠܣܳܗ̈ܕܶܐ ܚܰܒܪ̈ܰܝܟ ܚܕܰܥܣܰܪ ܐܠܰܦܰܝ̈ܳܐ ܘܰܐܪܒܰܥܡܳܐܐ ܘܰܬܠܳܬܺܝܢ ܘܰܐܪܒܥܳܐ ܕܰܒܥܶܠܬܳܟ ܐܶܬܟܰܠܰܠܘ: ܛܽܘܒܰܝܟ ܕܰܗܘܰܝܬ ܡܥܺܝܢܳܐ ܕܥܽܘܕܪ̈ܳܢܶܐ ܠܰܟܪ̈ܺܝܗܶܐ ܘܡܰܪ̈ܥܶܐ: ܛܽܘܒܰܝܟ ܕܥܰܒܕܳܟ ܡܳܪܳܟ ܐܳܣܝܳܐ ܠܰܡܡܰܚܰܝ̈ܳܐ: ܛܽܘܒܰܝܟ ܕܰܟܠܺܝܠܳܟ ܓܕܺܝܠ ܘܰܒܪܺܝܫܳܟ ܡܶܬܬܣܺܝܡ ܘܡ̣ܶܢ ܝܰܡܺܝܢ ܡܳܪܳܟ ܙܳܡܪܰܬ ܬܶܫܒܽܘܚܬܳܐ: ܘܡܶܛܽܠ ܗܳܕܶܐ ܫܠܳܡܳܐ ܢܫܰܘܫܶܛ ܠܳܟ ܟܰܕ ܐܳܡܪܺܝܢܰܢ: ܫܠܳܡܠܳܟ ܬܡܺܝܗܳܐ ܘܰܬܗܺܝܪܳܐ: ܫܠܳܡܠܳܟ ܫܽܘܦܪܳܐ ܕܫܰܦܺܝܪ̈ܶܐ: ܫܠܳܡܠܳܟ ܪܺܝܫܳܐ ܕܢܰܨܺܝ̈ܚܶܐ: ܫܠܳܡܠܳܟ ܩܪܰܒܬܳܢܳܐ ܘܙܰܟܳܝܳܐ: ܫܠܳܡܠܳܟ ܨܶܡܚܳܐ ܕܢܰܗܺܝܪ̈ܶܐ: ܫܠܳܡܠܳܟ ܦܳܬܽܘܪܳܐ ܕܛܽܘ̈ܒܶܐ: ܫܠܳܡܠܳܟ ܥܶܩܳܪܳܐ ܒܪܺܝܟܳܐ: ܫܠܳܡܠܳܟ ܣܳܗܕܳܐ ܫܰܪܺܝܪܳܐ: ܫܠܳܡܠܳܟ ܢܰܚܫܺܝܪܬܳܢܳܐ ܒܰܩܪܳܒܳܐ: ܫܠܳܡܠܳܟ ܡܥܺܝܢܳܐ ܕܒܽܘܪ̈ܟܳܬܳܐ: ܫܠܳܡܠܳܟ ܠܶܘܝܳܐ ܕܰܐܟܣ̈ܢܳܝܶܐ: ܫܠܳܡܠܳܟ ܟܠܺܝܠܐ ܡܰܕܗܒܳܐ: ܫܠܳܡܠܳܟ ܝܳܗܽܘܒܳܐ ܕܳܐܣ̈ܘܳܬܳܐ: ܫܠܳܡܠܳܟ ܛܰܒܥܳܐ ܕܰܢܟܺܝ̈ܣܶܐ: ܫܠܳܡܠܳܟ ܚܰܒܪܳܐ ܕܰܪ̈ܕܺܝܦܶܐ: ܫܠܳܡܠܳܟ ܙܪܺܝܙܳܐ ܒܬܰܟܬܽܘܫܳܐ: ܫܠܳܡܠܳܟ ܘܺܝܠܐ ܡܰܠܟܳܝܬܳܐ: ܫܠܳܡܠܳܟ ܗܰܡܢܺܝܟܳܐ ܟܳܗܢܳܝܳܐ: ܫܠܳܡܠܳܟ ܕܶܒܚܳܐ ܡܩܰܒܠܐ: ܫܠܳܡܠܳܟ ܓܰܢ̱ܒܳܪܳܐ ܕܰܢܨܰܚ: ܫܠܳܡܠܳܟ ܒܶܪܽܘܠܐ ܗܕܺܝܪܳܐ: ܫܠܳܡܠܳܟ ܐܰܬܠܺܝܛܳܐ ܟܰܫܺܝܪܳܐ: ܫܠܳܡܠܳܟ ܣܳܗܕܳܐ ܩܽܘܪܝܰܩܳܘܣ: ܘܰܫܠܳܡܳܐ  ܠܣܺܝܥܬܳܐ ܕܚܰܒܪ̈ܰܝܟ ܚܕܰܥܣܰܪ ܐܠܰܦܰܝ̈ܳܐ ܘܰܐܪܒܰܥܡܳܐܐ ܘܰܬܠܳܬܺܝܢ ܘܰܐܪܒܥܳܐ ܣܳܗ̈ܕܶܐ ܩܰܕܺܝ̈ܫܶܐ ܘܒܰܕܓܽܘܢ ܒܳܥܶܝܢܰܢ ܘܡܶܬܟܰܫܦܺܝܢܰܢ ܠܳܟ ܐܠܰܗܳܐ ܡܪܰܚܡܳܢܳܐ ܒܝܰܘܡܳܐ ܗܳܢܳܐ ܕܕܽܘܟܪܳܢܗܽܘܢ ܕܩܰܕܺܝ̈ܫܰܝܟ: ܘܰܕܚܰܣܝܳܐ ܓܰܒܝܳܐ ܡܳܪܝ ܐܰܒܚܰܝ ܐܶܦܣܩܽܘܦܳܐ ܕܢܺܝܩܺܝܰܐ: ܘܕܰܐܠܦܰܝ̈ܳܐ ܩܰܕܺܝ̈ܫܶܐ ܕܒܺܐܝ̈ܕܰܘܗܝ ܐܶܬܒܚܰܪܘ: ܩܕܳܡ ܬܶܐܘܳܕܳܣܝܳܘܣ ܡܰܠܟܳܐ ܡܗܰܝܡܢܳܐ: ܘܰܕܡܳܪܝ ܝܰܥܩܽܘܒ ܪܰܒܳܐ ܕܰܢܨܺܝܒܺܝܢ: ܘܰܕܡܳܪܝ ܐܰܦܪܶܝܡ ܡܰܠܦܳܢܳܐ ܬܰܠܡܺܝܕܶܗ: ܘܰܕܡܳܪܝ ܐܰܢܕܪܶܐܘܳܣ ܫܠܺܝܚܳܐ ܗ̇ܰܘ ܕܬܰܠܡܶܕ ܠܐܬܪܳܐ ܕܒܶܝܬ ܟܰܠܒܺܝܢ: ܥܰܡ ܡܳܪܝ ܩܽܘܪܝܰܩܳܘܣ ܘܝܽܘܠܺܝܛܺܝ ܐܶܡܶܗ ܕܝܰܘܡܳܢܳܐ ܕܽܘܟܪܳܢܗܽܘܢ ܘܰܕܩܰܕܺܝܫܰܝ̈ܟ: ܘܰܕܚܰܣܝܳܐ ܓܰܒܝܳܐ ܡܳܪܝ ܐܰܒܚܰܝ ܡܫܰܡܠܶܝܢܰܢ: ܐܰܣܳܐ ܟܺܐܒܰܝ̈ܢ ܘܰܥܨܽܘܒ ܫܽܘ̈ܚܢܰܝܢ: ܐܰܚܠܶܡ ܬܒܺܝܪܽܘܬܰܢ: ܕܰܟܳܐ ܡܽܘ̈ܡܰܝܢ: ܚܰܘܰܪ ܟܽܘܬܡ̈ܳܬܰܢ: ܚܰܣܳܐ ܚܰܘ̈ܒܳܬܰܢ: ܘܰܫܒܽܘܩ ܚܛܳܗܰܝ̈ܢ: ܘܢܰܛܰܪ ܠܚܰܝܰܝ̈ܢ ܒܰܨܠܺܝܒܳܟ: ܘܫܰܝܢܳܟ ܘܰܫܠܳܡܳܟ ܢܕܰܝܰܪ ܒܰܝܢܳܬܰܢ: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܘܛܰܟܶܣ ܐܶܢܽܘܢ ܒܰܐܘ̈ܳܢܶܐ ܕܰܢܝܳܚܳܐ ܥܰܡ ܩܰܕܺܝ̈ܫܰܝܟ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܦܺܝܪܡܳܐ ܕܚܽܘܣܳܝܳܐ ܕܩܰܪܶܒ ܗ̣ܽܘ ܠܶܗ ܥܰܠ ܐܰܦܰܝ̈ܢ ܘܚܰܣܺܝ ܥܰܘܠܶܗ ܕܥܳܠܡܳܐ: ܩܰܒܶܠ ܡܶܢܰܢ ܡܳܪܝܳܐ ܚܢܰܢ ܚܰܛܳܝ̈ܶܐ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ: ܒܥܽܘܗܕܳܢܳܐ ܕܣܳܗܕܳܐ ܚܠܺܝܨܳܐ ܡܳܪܝ ܩܽܘܪܝܰܩܳܘܣ: ܘܚܰܣܳܐ ܒܶܗ ܚܛܳܗ̈ܶܐ ܕܟܽܠܰܢ ܥܰܒܕܰܝ̈ܟ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܚܘܬܡܐ

 

 

 

ܒܝܰܕ ܨܠܰܘ̈ܳܬܗܽܘܢ ܕܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܩܽܘܪܝܰܩܳܘܣ ܘܝܽܘܠܺܝܛܺܝ ܐܶܡܶܗ ܘܰܚܕܰܥܣܰܪ ܐܠܰܦܰܝ̈ܳܐ ܚܰܒܪ̈ܰܘܗܝ: ܢܺܐܬܽܘܢ ܠܰܢ ܙܰܒ̈ܢܶܐ ܡܫܰܝ̈ܢܶܐ ܘܒܰܣܺܝ̈ܡܶܐ: ܘܢܶܒܛܠܽܘܢ ܩܪ̈ܳܒܶܐ ܡ̣ܶܢ ܐܰܪܥܳܐ: ܘܫܶܒ̈ܝܶܐ ܘܡܰܘ̈ܬܳܢܶܐ ܢܶܥܒܪܽܘܢ: ܘܠܰܢ ܘܰܠܥܰܢܺܝ̈ܕܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܢܶܫܬܰܟܰܢ ܚܽܘܣܳܝܳܐ ܘܫܽܘܒܩܳܢܳܐ ܒܰܬܪ̈ܰܝܗܽܘܢ ܥܳܠܡ̈ܶܐ: ܡܳܪܰܢ ܘܰܐܠܳܗܰܢ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܝܰܠܕܳܐ ܡܬܽܘܡܳܝܳܐ ܕܡ̣ܶܢ ܩܕܳܡ ܥܳܠܡ̈ܶܐ ܝܺܠܺܝܕ ܠܗܰܠ ܡ̣ܶܢ ܙܰܒ̈ܢܶܐ ܘܥܶܕ̈ܳܢܶܐ ܡܬܽܘ̈ܡܳܝܶܐ: ܘܰܒܚܰܪܰܬ݀ ܙܰܒ̈ܢܶܐ ܝܺܠܶܕܬܶܗ ܒܬܽܘܠܬܳܐ ܒܬܽܘܠܐܴܝ̣ܬ ܘܰܠܥܶܠ ܡ̣ܶܢ ܡܶܠܬܳܐ: ܘܚܰܫ ܒܰܙܩܺܝܦܳܐ ܘܰܕܪܰܫ ܐܽܘܪܚܳܐ ܠܣܳܗ̈ܕܶܐ ܩܰܕܺܝ̈ܫܶܐ: ܠܓܰܒܪ̈ܶܐ ܟܺܝܬ ܘܢܶܫ̈ܶܐ: ܘܡ̣ܶܢ ܟܝܳܢܳܐ ܪܰܦܝܳܐ ܕܢܶܫ̈ܶܐ ܥܒܰܕ ܓܰܢ̱ܒܳܪ̈ܶܐ ܚܠܺܝ̈ܨܶܐ: ܝܽܘܠܺܝܛܺܝ ܕܶܝܢ ܓܰܢ̱ܒܳܪܰܬ݀ ܚܰܝܠܐ ܫܕܳܬ݀ ܡܶܢܳܗ̇ ܪܰܦܝܽܘܬܳܐ ܢܶܫܳܝܬܳܐ ܘܚܰܝܠܬܳܢܳܐܝ̣ܬ ܥܶܠܰܬ݀ ܠܐܓܽܘܢܳܐ ܕܣܳܗܕܽܘܬܳܐ: ܗ̣ܺܝ ܘܰܒܪܳܗ̇ ܛܰܠܝܳܐ ܩܽܘܪܝܰܩܳܘܣ ܥܰܠ ܐܰܦܰܝ̈ ܫܪܳܪܶܗ ܕܰܡܫܺܝܚܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ: ܕܰܠܥܰܡ̈ܡܶܐ ܚܶܫܽܘ̈ܟܶܐ ܐܰܢܗܰܪ ܒܙܰܠܺܝ̈ܩܶܐ ܕܥܰܙܺܝܙܽܘܬܶܗ: ܗ̇ܰܘ ܝܰܡܳܐ ܫܦܺܝܥܳܐ ܘܠܐ ܡܶܬܬܟܺܝܠܳܢܳܐ ܕܰܐܫܦܰܥ ܥܽܘܕܪ̈ܳܢܰܘܗܝ ܥܰܠ ܒܶܪ̈ܝܳܬܶܗ: ܓܰܙܳܐ ܫܰܪܺܝܪܳܐ ܕܰܠܫܰܪܺܝܪ̈ܶܐ ܙܰܝܶܢ ܒܰܫܪܳܪܶܗ: ܠܡܰܟܳܣܽܘ ܐܶܢܽܘܢ ܠܚܰܢ̈ܦܶܐ ܕܰܓ̈ܳܠܐ ܘܰܕܠܐ ܐܠܰܗ: ܒܝܰܕ ܚܰܘܳܐ ܗܘܳܬ݀ ܡܶܙܕܰܟܝܳܢܽܘܬܳܐ ܒܓܰܘ ܦܰܪܕܰܝܣܳܐ: ܘܰܒܝܰܕ ܒܰܪܬܳܗ̇ ܡܰܪܝܰܡ ܐܶܙܕܟܺܝ ܡܳܪܽܘܕܳܐ ܒܥܶܠܕܰܪܳܐ: ܚܰܘܳܐ ܡܶܛܽܠ ܕܗܰܝܡܢܰܬ݀ ܠܚܶܘܝܳܐ ܐܶܬܬܠܺܝܛܰܬ݀ ܘܡܰܪܝܰܡ ܡܶܛܽܠ ܕܗܰܝܡܢܰܬ݀ ܠܥܺܝܪܳܐ ܐܶܬܒܰܪܟܰܬ݀: ܚܰܘܳܐ ܒܝܰܕ ܫܽܘܥܠܳܝܶܗ̇ ܘܡܶܫܬܰܡܥܳܢܽܘܬܳܗ̇ ܠܢܳܟܽܘܠܐ ܡ̣ܶܢ ܫܽܘܒܚܳܗ̇ ܢܶܦܠܰܬ݀: ܘܡܰܪܝܰܡ ܕܩܰܒܠܰܬ݀ ܣܒܰܪܬܳܐ ܡ̣ܶܢ ܪܺܝܫܳܐ ܕܡܰܠܐܟ̈ܶܐ ܚܰܝ̈ܶܐ ܚܰܕ̈ܬܶܐ ܠܟܽܠܶܗ ܥܳܠܡܳܐ ܒܝܰܕ ܡܰܟܺܝܟܽܘܬܳܗ̇ ܐܰܫܘܚܰܬ݀ ܘܡ̣ܶܢ ܒܳܬܰܪ ܡܰܘܠܳܕܶܗ ܕܡܶܠܬܳܐ ܐܠܰܗܳܐ ܕܡ̣ܶܢ ܐܶܡܳܐ ܩܰܕܺܝܫܬܳܐ: ܒܥܰܝܢܳܐ ܪܽܘܚܳܢܳܝܬܳܐ ܚܙܳܬܶܗ ܝܽܘܠܺܝܛܺܝ ܡܗܰܝܡܰܢܬܳܐ ܘܰܐܘܕܝܰܬ݀ ܓܰܠܝܳܐܝ̣ܬ ܕܠܐ ܟܽܘܚܳܕ ܒܝܶܫܽܘܥ ܡܫܺܝܚܳܐ ܘܰܕܗ̣ܽܘ ܐܺܝܬܰܘܗܝ ܐܠܰܗܳܐ ܫܰܪܺܝܪܳܐ: ܘܗ̣ܺܝ ܘܰܒܪܳܗ̇ ܛܰܠܝܳܐ ܙܥܽܘܪܳܐ ܩܽܘܪܝܰܩܳܘܣ ܐܰܣܗܶܕܘ ܡܶܛܽܠ ܫܡܶܗ ܚܰܝܳܐ ܩܕܳܡ ܕܰܝ̈ܳܢܶܐ ܚܰܢ̈ܦܶܐ ܘܰܛܪ̈ܽܘܢܶܐ: ܘܗ̣ܺܝ ܗܳܕܶܐ ܙܰܟܝܰܬ݀ ܠܚܰܘܳܐ ܐܶܡܰܢ ܩܰܕܡܳܝܬܳܐ: ܚܰܘܳܐ ܡ̇ܰܢ ܒܝܰܕ ܫܰܒܪܽܘܬܳܗ̇ ܗܘܳܬ ܡܰܦܽܘܠܬܳܐ ܠܫܰܪ̈ܒܳܬܳܐ: ܘܝܽܘܠܺܝܛܺܝ ܒܚܰܟܺܝܡܽܘܬܳܗ̇ ܐܰܩܺܝܡܰܬ݀ ܠܰܣܚܺܝ̈ܦܶܐ: ܚܰܘܳܐ ܡ̇ܰܢ ܠܰܒܢܶܝ̈ܗ̇ ܙܰܡܢܰܬ݀ ܟܡܺܝܪܽܘܬܳܐ: ܘܝܽܘܠܺܝܛܺܝ ܕܶܝܢ ܠܰܒܪܳܗ̇ ܘܠܰܒ̈ܢܰܝ ܥܺܕܬܳܐ ܚܕܰܥܣܰܪ ܐܠܰܦܰܝ̈ܳܐ ܩܪܳܬ݀ ܠܚܰܕܽܘܬܳܐ ܠܐ ܥܳܒܽܘܪܬܳܐ: ܚܰܘܳܐ ܐܰܘܒܕܰܬ݀ ܠܟܽܠܗܽܘܢ ܛܽܘ̈ܒܶܐ ܕܰܒܦܰܪܕܰܝܣܳܐ ܘܝܽܘܠܺܝܛܺܝ ܒܰܕܪܰܬ݀ ܟܽܠ ܕܰܩܢܳܬ݀ ܒܓܰܘ ܥܳܠܡܳܐ ܘܩܰܕܝܰܬ݀ ܚܰܝ̈ܶܐ ܫܡܰܝ̈ܳܢܶܐ: ܚܰܘܳܐ ܡ̇ܰܢ ܨܠܳܬ݀ ܐܶܕܢܳܗ̇ ܠܡܰܠܦܳܢܳܐ ܕܫܽܘܩܪܳܐ ܚܶܘܝܳܐ ܠܺܝܛܳܐ: ܘܰܓܣܳܐ ܒܠܶܒܳܐ ܕܺܝܠܳܗ̇ ܡܶܪܬܳܐ ܩܳܛܽܘܠܬܳܐ: ܘܝܽܘܠܺܝܛܺܝ ܨܠܳܬ݀ ܐܶܕܢܳܗ̇ ܠܪܰܒܳܐ ܕܰܫܪܳܪܳܐ ܡܫܺܝܚܳܐ: ܗ̇ܰܘ ܕܰܩܥܳܐ ܘܰܐܠܶܦ ܒܰܣܒܰܪܬܶܗ ܕܟܽܠ ܕܡܰܘܒܶܕ ܢܰܦܫܶܗ ܡܶܛܽܠܳܬܝ ܒܡܰܠܟܽܘܬܳܐ ܢܶܫܟܚܺܝܗ̇: ܘܥܰܠܗܳܕܶܐ ܡܩܰܠܣܺܝܢܰܢ ܠܣܳܗܕܬܳܐ ܩܰܕܺܝܫܬܳܐ ܝܽܘܠܺܝܛܺܝ: ܢܶܬܶܠ ܠܳܗ̇ ܛܽܘܒܳܐ ܟܰܕ ܐܳܡܪܺܝܢܰܢ: ܛܽܘܒܰܝܟܝ ܣܳܗܕܬܳܐ ܩܰܕܺܝܫܬܳܐ ܝܽܘܠܺܝܛܺܝ ܐܶܡܳܐ ܢܰܟܦܬܳܐ ܕܛܰܠܝܳܐ ܙܥܽܘܪܳܐ ܩܽܘܪܝܰܩܳܘܣ: ܕܰܗܘܰܝܬܝ ܥܶܠܬܳܐ ܛܳܒܬܳܐ ܠܢܰܦܫܶܟܝ ܘܰܠܣܰܓܺܝ̈ܶܐܐ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܒܰܪܬ ܟܺܐܢ̈ܶܐ ܘܙܰܕܺܝ̈ܩܶܐ: ܕܟܺܐܢܳܐܝ̣ܬ ܐܶܫܬܰܪܰܪܬܝ ܒܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܕܰܐܒܳܗܰܝ̈ܟܝ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܕܰܓܡܰܪܬܝ ܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ ܕܰܡܫܺܝܚܳܐ ܦܳܪܽܘܩܰܢ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܕܟܺܝܬܳܐ ܘܰܗܕܺܝܪܬܳܐ ܒܢܶܫ̈ܶܐ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܕܠܐ ܐܰܙܺܝܥܽܘܟܝ ܠܽܘܚܳܡܰܘ̈ܗܝ ܕܰܐܠܶܟܣܰܢܕܪܳܘܣ ܕܰܝܳܢܳܐ ܥܰܘܳܠܐ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܕܒܰܓܢܽܘܢܳܐ ܫܡܰܝܳܢܳܐ ܡܶܬܒܰܣܡܳܐ ܐܰܢ̱ܬܝ ܥܰܡ ܒܪܳܐ ܕܺܝܠܳܟܝ ܩܽܘܪܝܰܩܳܘܣ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܝܰܘܢܳܐ ܬܰܡܺܝܡܬܳܐ ܕܰܦܪܰܚܬܝ ܠܡܰܠܟܽܘܬܳܐ ܕܰܫܡܰܝܳܐ: ܛܽܘܒܰܝܟܝ ܣܳܗܕܬܳܐ ܝܽܘܠܺܝܛܺܝ ܫܰܦܺܝܪܰܬ݀ ܙܳܟܽܘܬܳܐ: ܕܒܰܕܡܳܐ ܕܰܩܢܽܘܡܶܟܝ ܡܰܦܪܶܓ ܙܺܝܘܶܟܝ ܦܰܐܝܳܐ: ܘܟܰܕ ܠܛܽܘܒܶܟܝ ܠܐ ܡܳܛܶܝܢܰܢ: ܫܠܳܡܠܶܟܝ ܣܳܗܕܬܳܐ ܫܠܳܡܳܐ ܢܶܬܶܠ ܠܶܟܝ ܟܰܕ ܐܳܡܪܺܝܢܰܢ: ܫܠܳܡܠܶܟܝ ܣܳܗܕܬܳܐ ܝܽܘܠܺܝܛܺܝ ܘܰܫܠܳܡܳܐ ܠܰܒܪܶܟܝ ܩܽܘܪܝܰܩܳܘܣ: ܫܠܳܡܠܶܟܝ ܣܳܗܕܬܳܐ ܝܽܘܠܺܝܛܺܝ ܕܠܐ ܐܶܬܪܟܶܢ ܪܺܝܫܶܟܝ ܩܕܳܡ ܨܰܠܡ̈ܶܐ ܕܰܓ̈ܳܠܐ: ܘܡܳܛܶܠ ܗܳܕܶܐ ܒܥܳܝ ܘܰܐܦܺܝܣܝ ܠܡܳܪܝܳܐ ܡܳܪܶܟܝ ܕܡܶܛܽܠܳܬܶܗ ܢܰܦܫܶܟܝ ܠܩܶܛܠܐ ܐܰܫܠܶܡܬܝ: ܕܰܢܫܰܟܶܢ ܒܝܰܕ ܨܠܰܘ̈ܳܬܶܟܝ: ܫܰܝܢܳܐ ܘܰܫܠܳܡܳܐ ܠܥܺܕ̈ܳܬܳܐ: ܪܽܘܡܪܳܡܳܐ ܠܕܰܝܪ̈ܳܬܳܐ ܐܰܘܝܽܘܬܳܐ ܠܥܳܡܽܘܪ̈ܶܐ ܕܺܝܠܗܶܝܢ: ܙܰܗܝܽܘܬܳܐ ܠܟܳܗ̈ܢܶܐ: ܕܰܟܝܽܘܬܳܐ ܠܪ̈ܳܥܰܘܳܬܳܐ: ܢܛܺܝܪܽܘܬܳܐ ܠܟܶܢܫܳܐ ܕܰܡܗܰܝ̈ܡܢܶܐ: ܠܡܰܠܟ̈ܶܐ ܬܪܺܝܨܽܘܬܳܐ: ܠܕܰܝ̈ܳܢܶܐ ܡܪܰܚܡܳܢܽܘܬܳܐ: ܠܰܒܬܽܘ̈ܠܐ ܢܰܟܦܽܘܬܳܐ: ܠܕܰܝܪ̈ܳܝܶܐ ܡܚܰܡܣܢܳܢܽܘܬܳܐ: ܠܚܰܛܳܝ̈ܶܐ ܫܽܘܒܩܳܢܳܐ: ܠܐܣܺܝܪ̈ܶܐ ܫܪܳܝܳܐ: ܠܰܡܫܰܥ̈ܒܕܶܐ ܚܽܘܪܳܪܳܐ: ܠܰܟܡܺܝܪ̈ܶܐ ܒܽܘܝܳܐܐ: ܠܐܒܺܝ̈ܕܶܐ ܫܟܳܚܬܳܐ: ܠܰܡܛܰܪ̈ܦܶܐ ܢܰܘܚܳܐ: ܘܢܶܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܡܫܺܝܚܳܐ ܕܰܗܘܳܐ ܫܰܒܪܳܐ ܘܫܰܦܶܦ ܥܰܡ ܫܰܒܪ̈ܶܐ ܙܥܽܘܪ̈ܶܐ ܒܫܽܘ̈ܩܶܝܗ̇ ܕܽܐܘܪܫܠܶܡ: ܘܰܓܒܳܝܗܝ ܠܫܰܒܪܳܐ ܩܽܘܪܝܰܩܳܘܣ ܘܰܐܣܗܶܕ ܘܶܐܬܩܛܶܠ ܡܶܛܽܠ ܫܪܳܪܶܗ: ܚܰܟܶܡ ܡܳܪܝ ܗܶܕܝܽܘܛܽܘܬܰܢ ܕܢܶܕܰܥ ܐܽܘܪ̈ܚܳܬܳܟ ܘܢܶܪܕܶܐ ܒܰܫܒܺܝ̈ܠܰܝܟ ܬܪ̈ܺܝܨܶܐ: ܒܝܰܕ ܨܠܰܘ̈ܳܬܶܗ ܕܣܳܗܕܳܟ ܡܳܪܝ ܩܽܘܪܝܰܩܳܘܣ ܘܝܽܘܠܺܝܛܺܝ ܐܶܡܶܗ ܘܰܕܓܽܘܕܳܐ ܢܰܨܺܝܚܬܳܐ ܕܥܰܡܶܗ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܫܰܪܺܝܪܳܐ ܕܒܰܫܪܳܪܶܗ ܐܶܙܕܰܝܰܢ ܢܰܨܺܝܚܳܐ ܩܽܘܪܝܰܩܳܘܣ: ܠܗܰܘ ܕܶܐܨܛܠܶܒ ܥܰܠ ܓܳܓܽܘܠܬܳܐ ܘܶܐܣܬܰܟܰܟ ܒܨ̈ܶܨܶܐ: ܕܰܚܠܳܦܰܘܗܝ ܘܡܶܛܽܠܳܬܶܗ ܐܶܣܬܰܟܰܟ ܒܫܰܦܽܘ̈ܕܶܐ ܕܪܳܬܚܺܝܢ ܘܚܰܡܺܝܡܺܝܢ: ܣܳܗܕܳܐ ܙܰܟܳܝܳܐ ܩܽܘܪܝܰܩܳܘܣ: ܘܰܐܫܠܶܡ ܦܰܓܪܶܗ ܠܐܘܠܨܳܢ̈ܶܐ ܘܫܶܢ̈ܕܶܐ ܡܰܪܺܝܪ̈ܶܐ: ܘܶܐܬܬܰܪܡܺܝ ܒܰܐܬܽܘܢܳܐ ܕܢܽܘܪܳܐ: ܘܶܐܬܛܰܓܰܢ ܒܩܶܕܣܳܐ ܕܰܫܓܺܝܪ ܛܰܠܝܳܐ ܙܥܽܘܪܳܐ ܒܰܪ ܬܠܳܬ ܫܢܺܝ̈ܢ: ܕܠܶܗ ܠܗܰܘ ܕܙܰܟܝܶܗ ܘܢܰܨܚܶܗ ܢܰܘܕܶܐ ܘܰܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܐܠܰܗܳܐ ܗ̇ܰܘ ܡܝܰܬܰܪ ܒܟܽܠ ܘܰܡܫܰܒܚܳܐ ܒܰܠܚܽܘܕܰܘܗܝ ܚܰܢܳܢܳܐ ܘܰܡܪܰܚܡܳܢܳܐ: ܗ̇ܰܘ ܕܩܳܪܶܐ ܐܰܢ̱ܬ ܠܐܝܠܶܝܢ ܕܠܐ ܗܘܰܝ̈ ܠܘܳܬ ܗ̇ܳܝ ܕܢܶܗܘ̈ܝܳܢ: ܘܡ̣ܶܢ ܥܽܘܡܩܳܐ ܡܰܣܶܩ ܠܪܰܘܡܳܐ ܘܡ̣ܶܢ ܩܺܝܩܰܠܬܳܐ ܡܪܺܝܡ ܠܒܳܝܫܳܐ: ܗ̇ܰܘ ܕܳܐܦ ܠܢܰܟܦܬܳܐ ܘܩܰܕܺܝܫܬܳܐ ܝܽܘܠܺܝܛܺܝ ܘܠܰܒܪܳܗ̇ ܬܠܺܝܬܳܝ ܫܢܰܝ̈ܳܐ ܣܳܗܕܳܐ ܚܠܺܝܨܳܐ ܩܽܘܪܝܰܩܳܘܣ ܠܕܰܪܳܐ ܕܥܰܡ ܣܳܛܳܢܳܐ ܘܚܰܝܠܰܘ̈ܳܬܶܗ ܥܰܙܺܝ: ܘܰܡܠܳܗ̇ ܣܰܒܪܳܐ ܘܠܽܘܒܳܒܳܐ ܘܚܰܝܠܐ ܘܚܶܟܡܬܳܐ ܕܠܐ ܡܶܬܡܰܠܠܐ: ܟܰܕ ܕܶܝܢ ܐܳܟܶܠܩܰܪܨܳܐ ܡܳܪܽܘܕܳܐ ܓܰܪܶܓ ܠܦܳܠܚܰܘ̈ܗܝ ܕܡܰܠܟ̈ܶܐ ܚܰܢ̈ܦܶܐ: ܘܠܰܒܶܛ ܐܶܢܽܘܢ ܥܰܠ ܬܰܟܬܽܘܫܳܐ ܕܥܰܡܳܟ: ܪܕܽܘܦܝܳܐ ܐܰܩܺܝܡ ܥܰܠ ܣܳܓܽܘ̈ܕܰܝܟ ܦܪ̈ܺܝܩܰܝ ܒܰܨܠܺܝܒܳܟ: ܐܰܝܟ ܕܺܝܢܰܝ̈ܟ ܓܢܺܝ̈ܙܶܐ ܘܠܐ ܡܶܬܕܰܪ̈ܟܳܢܶܐ: ܗ̣ܺܝ ܓܶܝܪ ܝܽܘܠܺܝܛܺܝ ܢܰܟܦܬܳܐ ܡ̣ܶܢ ܕܶܚܠܬܳܗ̇ ܕܥܰܠ ܒܪܳܗ̇ ܩܽܘܪܝܰܩܳܘܣ ܕܰܥܕܰܟܺܝܠ ܒܚܰܠܒܳܐ ܡܶܬܪܰܒܶܐ ܗܘܳܐ: ܥܶܪܩܰܬ݀ ܠܳܗ̇ ܡ̣ܶܢ ܡܕܺܝܢܳܐ ܠܰܡܕܺܝܢܳܐ: ܟܶܐܡܰܬ݀ ܕܶܐܢ ܗ̣ܺܝ ܬܶܣܗܰܕ ܠܳܗ̇ ܒܪܳܗ̇ ܢܺܐܒܰܕ ܠܶܗ: ܗ̣ܽܘ ܕܶܝܢ ܛܪܽܘܢܳܐ ܟܰܕ ܥܰܩܶܒ ܥܠܶܝܗ̇ ܘܠܐ ܐܶܫܟܚܺܝܗ̇: ܪܕܰܦ ܒܳܬܪܳܗ̇ ܥܕܰܡܳܐ ܠܰܡܕܺܝܢ̱ܬܳܐ ܛܰܪܣܽܘܣ: ܐܳܘ ܠܒܺܝܫܽܘܬ ܥܰܘܠܶܗ ܕܒܺܝܫܳܐ: ܣܒܰܪ ܓܶܝܪ ܕܰܐܘ ܠܳܗ̇ ܐܰܘ ܠܰܒܪܳܗ̇ ܢܶܫܒܶܐ ܡ̣ܶܢ ܛܝܳܪܳܟ ܕܚܰܝ̈ܶܐ: ܟܰܕ ܕܶܝܢ ܐܶܬܬܰܚܕܰܬ݀ ܘܥܶܠܰܬ݀ ܩܕܳܡ ܗܺܓܡܽܘܢܳܐ ܡܰܪܳܚܳܐ ܘܰܬܒܰܥ ܡܶܢܳܗ̇ ܣܶܓܕܬܳܐ ܕܰܩܕܳܡ ܐܠܰܗܰܘ̈ܗܝ ܘܰܟܦܽܘܪܝܳܐ ܕܰܒܡܳܪܽܘܬܳܟ: ܗ̣ܺܝ ܕܶܝܢ ܒܚܶܟܡܬܳܐ ܕܪܽܘܚ ܦܰܢܝܰܬ݀ ܠܶܗ ܕܢܺܐܬܶܐ ܒܪܳܐ ܕܺܝܠܝ ܘܢܺܐܠܰܦ ܐܰܝܕܳܐ ܕܦܰܐܝܳܐ: ܘܟܰܕ ܐܰܝܬܺܝܘܗܝ ܠܛܰܠܝܳܐ ܪܓܺܝܓܳܐ ܬܠܺܝܬܳܝ ܫܢܰܝ̈ܳܐ ܠܰܩܕܳܡ ܕܰܝܳܢܳܐ ܛܪܽܘܢܳܐ: ܥܰܝ̈ܢܶܝܗ̇ ܬܠܳܬ݀ ܠܰܫܡܰܝܳܐ ܕܰܐܢ̱ܬ ܡܳܪܝ ܡܰܠܶܠ ܒܶܗ ܐܰܝܕܳܐ ܕܰܡܢܺܝܚܳܐ ܠܨܶܒܝܳܢܳܟ: ܫܽܘܒܚܳܐ ܠܳܟ ܐܠܰܗܳܐ ܕܰܐܝܟ ܫܽܘܘܕܳܝܳܟ ܕܰܠܘܳܬ ܬܰܠܡܺܝ̈ܕܰܝܟ ܘܰܒܝܰܕ ܛܰܝܒܽܘܬܳܟ ܐܠܰܗܳܝܬܳܐ ܢܣܰܟܬ ܥܠܰܘܗܝ ܚܰܝܠܐ ܕܪܽܘܚܳܟ: ܘܰܡܠܰܝܬܳܝܗܝ ܚܶܟܡܬܳܐ: ܐܰܝܕܳܐ ܕܠܐ ܐܶܫܟܰܚ ܐ̱ܢܳܫ ܘܢܺܐܡܰܪ ܠܩܽܘܒܠܳܗ̇ ܐܰܝܟ ܡܶܠܬܳܟ ܫܰܪܺܝܪܬܳܐ: ܐܳܘ ܠܬܶܗܪܳܐ ܘܰܠܕܽܘܡܳܪܳܐ: ܕܠܶܫܳܢܳܐ ܕܰܥܕܰܟܺܝܠ ܡܠܰܓܠܶܓ ܐܰܦܪܺܝ ܡܶܠܬܳܐ ܚܠܺܝܡܬܳܐ ܕܓܰܒܪ̈ܶܐ ܚܰܟܺܝ̈ܡܶܐ ܚܳܝܓܺܝܢ ܡܶܢܳܗ̇: ܐܳܘ ܠܛܰܠܝܳܐ ܒܰܪ ܚܰܠܒܳܐ ܕܡܰܟܣܳܢܽܘܬ ܪܽܘܫܥܳܐ ܡܩܰܪܶܒ ܠܕܰܝܳܢܳܐ: ܐܳܘ ܠܥܰܘܳܠܐ ܝܳܢܽܘܣܩܳܐ ܕܡ̈ܶܠܐ ܕܬܶܫܒ̈ܚܳܬܳܐ ܡܰܟܪܶܙ ܗܘܳܐ ܩܕܳܡ ܚܰܢ̈ܦܶܐ: ܐܳܘ ܠܛܰܠܝܽܘܣܳܐ ܙܥܽܘܪܳܐ ܕܗܰܝܡܳܢܽܘܬܳܐ ܕܒܳܟ ܘܒܰܐܒܽܘܟ ܘܰܒܪܽܘܚܳܟ ܩܰܕܺܝܫܳܐ ܡܰܠܶܦ ܗܘܳܐ: ܐܳܘ ܠܰܒܨܺܝܪ ܡܰܕܥܳܐ ܕܰܐܝܠܶܝܢ ܕܦܰܐܝ̈ܳܢ ܠܰܟܪ̈ܺܝܣܛܝܳܢܶܐ ܡܶܣܬܰܘܰܕ ܗܘܳܐ ܠܪ̈ܰܫܺܝܥܶܐ: ܐܳܘ ܕܠܐ ܗܰܘܢܳܐ ܘܰܕܠܐ ܒܽܘܝܳܢܳܐ ܠܘܳܬ ܛܪܽܘܢܳܐ ܡܰܠܟܳܐ ܚܰܢܦܳܐ ܐܳܡܰܪ ܗܘܳܐ: ܠܐܝܕܳܐ ܣܶܓܕܬܳܐ ܩܳܪܶܐ ܐܰܢ̱ܬ ܠܰܢ: ܠܘܳܬ ܐܰܝܠܶܝܢ ܐܠܰܗ̈ܶܐ ܡܩܰܪܶܒ ܐܰܢ̱ܬ ܠܰܢ: ܠܐ ܗܘܳܐ ܠܘܳܬ ܟܺܐܦ̈ܶܐ ܐܰܘ ܩܰܝ̈ܣܶܐ ܓܠܺܝ̈ܦܶܐ: ܠܐ ܗܘܳܐ ܠܘܳܬ ܚܰܪ̈ܫܶܐ ܘܕܽܘ̈ܓܶܐ ܘܰܡܣܰܟ̈ܟܰܝ ܒܩܰܦܠܽܘ̈ܛܶܐ ܒܶܐܣ̈ܶܐ: ܠܗܳܠܶܝܢ ܐܰܝܢܳܐ ܘܳܠܐܷ ܠܡܶܣܓܰܕ ܐܳܘ ܕܠܐ ܗܰܘܢܳܐ: ܕܒܺܐܝ̈ܕܰܝܳܐ ܓܠܺܝܦܺܝܢ ܘܫܺܐܕ̈ܶܐ ܥܳܡܪܺܝܢ ܒܗܽܘܢ: ܐܶܬܒܰܝܰܢ ܠܡܽܘܢ ܦܳܠܰܚ ܐܰܢ̱ܬ: ܚܢܰܢ ܕܶܝܢ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ ܣܳܓܕܺܝܢܰܢ ܘܡܰܘܕܶܝܢܰܢ: ܘܢܰܦ̈ܫܳܬܳܐ ܕܺܝܠܰܢ ܩܽܘܪܒܳܢܳܐ ܠܶܗ ܡܕܰܒܚܺܝܢܰܢ: ܘܰܕܡܳܐ ܕܨܰܘܪ̈ܰܝܢ ܠܶܗ ܡܢܰܩܶܝܢܰܢ: ܡܶܛܽܠ ܕܗܽܘܝܽܘ ܐܠܰܗܰܢ: ܘܠܰܝܬ ܐܠܰܗܳܐ ܐ̱ܚܪܺܝܢ ܠܒܰܪ ܡܶܢܶܗ: ܐܳܘ ܠܬܶܕܡܽܘܪܬܳܐ ܕܠܐ ܡܶܬܡܰܠܠܐ: ܐܳܘ ܠܦܶܬܓ̈ܳܡܶܐ ܚܠܰܝ̈ܳܐ ܘܗܰܢܺܝ̈ܶܐܐ: ܚܢܰܢ ܠܗܰܘ ܕܰܒܪܳܐ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ ܝܶܫܽܘܥ ܡܫܺܝܚܳܐ: ܒܪܶܗ ܕܰܐܠܳܗܳܐ ܚܰܝܳܐ ܡܶܣܬܰܟܠܺܝܢܰܢ: ܗ̇ܰܘ ܕܶܐܨܛܠܶܒ ܚܠܳܦܰܝܢ ܒܰܒܣܰܪ ܡܶܬܬܦܺܝܣܺܝܢܰܢ ܐܰܝܟ ܕܰܟܬܺܝܒ: ܠܐܠܳܗܳܐ ܘܳܠܐܷ ܠܡܶܬܛܦܳܣܽܘ ܝܰܬܺܝܪ ܡ̣ܶܢ ܕܠܰܒܢܰܝ̈ܢܳܫܳܐ: ܘܥܰܠ ܗܳܠܶܝܢ ܐܶܬܬܙܺܝܥ ܛܪܽܘܢܳܐ ܒܚܶܡܬܳܐ: ܟܰܕ ܣܳܒܰܪ ܗܘܳܐ ܕܒܰܚܕܳܐ ܡܶܠܬܳܐ ܡܶܬܛܦܺܝܣ ܠܶܗ ܛܰܠܝܳܐ: ܘܫܰܪܺܝ ܒܫܶܢ̈ܕܶܐ ܥܰܙܺܝ̈ܙܶܐ ܕܠܐ ܪ̈ܰܚܡܶܐ ܢܫܰܢܶܩ ܐܶܢܽܘܢ: ܐܳܘ ܠܬܶܗܪܳܐ ܕܰܟܡܳܐ ܚܰܡܣܶܢ ܛܰܠܝܳܐ ܘܶܐܡܶܗ: ܒܢܶܓ̈ܕܶܐ ܡܰܪܺܝܪ̈ܶܐ: ܒܰܣܪ̈ܳܩܶܐ ܩܫܰܝ̈ܳܐ: ܒܝܰܩܕܳܢܳܐ ܕܢܽܘܪܳܐ: ܒܦܽܘܣܳܩܳܐ ܕܠܰܡ̈ܢܰܘܳܬܳܐ: ܒܰܚܒܽܘ̈ܫܝܶܐ ܐܠܰܝ̈ܨܶܐ: ܒܟܰܦܢܳܐ ܘܰܒܨܰܗܝܳܐ: ܒܰܕܡܳܐ ܕܡܶܫܬܰܦܰܥ ܥܰܠ ܐܰܪܥܳܐ: ܒܣܶܟ̈ܶܐ ܕܰܡܩܰܒ̈ܥܳܢ ܒܪܺܝܫܶܗ ܕܛܰܠܝܳܐ: ܒܦܰܪ̈ܙܠܐ ܕܰܡܥܰܩܪܺܝܢ ܫܶܢ̈ܶܐ: ܒܰܐܝܠܶܝܢ ܕܡܰܦܩܺܝܢ ܒܳܒ̈ܳܬܳܐ: ܒܰܐܝܠܶܝܢ ܕܡܶܬܒܪܶܝܢ ܓܰܪ̈ܡܶܐ: ܒܰܐܝܠܶܝܢ ܕܫܳܪܶܝܢ ܫܳܪ̈ܝܳܬܳܐ: ܒܩܰܕܣܳܐ ܕܪܳܬܰܚ: ܝܽܘܠܺܝܛܺܝ ܕܕܳܚܠܐ ܘܡ̣ܶܢ ܒܪܳܗ̇ ܡܶܬܠܰܒܒܳܐ: ܐܳܘ ܠܰܡܚܰܡܣܢܳܢܽܘܬܶܗ ܕܛܰܠܝܳܐ ܙܥܽܘܪ ܩܰܘܡܬܳܐ: ܐܳܘ ܠܠܶܒܳܐ ܕܥܰܘܳܠܐ ܕܠܐ ܡܶܬܬܘܶܐ: ܐܳܘ ܠܣܰܟܠܐ ܕܠܐ ܒܽܘܝܳܢ: ܕܟܰܕ ܚܳܙܶܐ ܠܶܬܕܡܪ̈ܳܬܳܐ ܕܗܳܘ̈ܝܳܢ ܡ̣ܶܢ ܛܰܠܝܳܐ ܙܥܽܘܪܳܐ: ܘܠܐ ܡܶܣܬܰܟܰܠ ܠܰܫܪܳܪܳܐ: ܨܰܠܺܝ ܛܰܠܝܳܐ ܐܰܝܟ ܫܶܐܠܰܬ݀ ܚܰܢܦܳܐ: ܘܰܗܘܳܐ ܡ̣ܶܢ ܡܣܳܐܢܳܐ ܬܰܝܫܳܐ ܘܬܰܘܪܳܐ: ܘܶܐܙܰܠ ܬܰܘܪܳܐ ܘܕܰܩܪܶܗ ܠܥܰܘܳܠܐ ܘܠܐ ܗܰܝܡܶܢ: ܐܶܬܩܰܛܰܠܘ ܗܳܠܶܝܢ ܘܶܐܟܰܠܘ ܐܠܰܦ̈ܶܐ ܡܶܢܗܽܘܢ ܘܰܣܒܰܥܘ: ܡܰܪܳܚܳܐ ܠܐ ܐܶܬܛܦܺܝܣ ܕܢܰܘܕܶܐ: ܘܶܐܬܬܪ̈ܺܝܡܝ ܣܶܟ̈ܶܐ ܡ̣ܶܢ ܓܽܘܫܡܶܗ ܕܛܰܠܝܳܐ ܘܶܐܬܩ̈ܒܰܥܝ ܒܪܺܝܫܶܗ ܕܡܰܠܟܳܐ ܘܚܰܫ: ܘܶܐܬܟܰܫܰܦ ܠܛܰܠܝܳܐ ܘܰܐܣܶܩ ܐܶܢܶܝܢ ܘܠܐ ܐܶܬܪܰܟܰܟ ܠܶܒܶܗ ܘܠܐ ܐܶܬܬܘܺܝ: ܡܰܝ̈ܳܐ ܕܪܳܬܚܺܝܢ ܘܛܰܠܝܳܐ ܒܗܽܘܢ ܟܰܕ ܡܶܫܬܥܶܐ ܘܰܡܫܰܒܰܚ: ܗ̣ܽܘ ܕܶܝܢ ܣܰܟܠܐ ܣܒܰܪ ܠܶܗ ܕܩܰܪܺܝܪܺܝܢ: ܟܰܕ ܫܩܰܠ ܡܶܢܗܽܘܢ ܩܽܘܪܝܰܩܳܘܣ ܒܺܐܝܕܶܗ ܐܰܪܡܺܝ ܥܰܠ ܡܰܠܟܳܐ ܘܺܝܩܶܕ ܡܶܢܗܽܘܢ ܘܠܐ ܗܰܝܡܶܢ: ܘܥܰܠܗܳܕܶܐ ܐܠܰܦ̈ܶܐ ܚܕܰܥܣܰܪ ܕܗܰܝܡܶܢܘ ܒܳܟ ܐܠܰܗܰܢ ܣܳܥܰܪ ܬܶܕܡܪ̈ܳܬܳܐ ܪܰܘܪ̈ܒܳܬܳܐ: ܘܶܐܬܩܰܛܰܠܘ ܡܶܛܽܠܳܬܳܟ: ܡܰܢܽܘ ܡܳܪܝ ܡܶܫܟܰܚ ܦܳܪܰܥ ܛܰܝܒܽܘܬܳܟ ܕܰܠܘܳܬܰܢ: ܫܽܘܒܚܳܐ ܠܳܟ ܥܰܠ ܛܳܒ̈ܳܬܳܟ: ܘܡ̣ܶܢ ܒܳܬܰܪ ܗܳܠܶܝܢ ܟܽܠܗܶܝܢ ܐܶܬܟܰܠܰܠܘ ܣܳܗ̈ܕܶܐ ܒܣܰܝܦܳܐ ܘܫܰܢܺܝܘ ܠܘܳܬܳܟ ܒܣܳܗܕܽܘܬܳܐ ܫܰܪܺܝܪܬܳܐ: ܘܡܶܛܽܠ ܗܳܕܶܐ ܚܢܰܢ ܐܶܬܟܰܢܰܫܢܰܢ ܠܥܺܐܕܳܐ ܦܰܐܝܳܐ ܕܢܶܨܚܳܢܗܽܘܢ: ܟܠܺܝܠ ܛܽܘ̈ܒܶܐ ܒܙܶܕܩܳܐ ܠܗܽܘܢ ܓܳܕܠܺܝܢܰܢ ܟܰܕ ܐܳܡܪܺܝܢܰܢ: ܛܽܘܒܰܝܟܝ ܢܶܩܝܳܐ ܒܪܺܝܟܬܳܐ ܝܽܘܠܺܝܛܺܝ ܕܺܝܠܶܕܬܝ ܠܐܡܪܳܐ ܕܰܟܝܳܐ ܡܳܪܝ ܩܽܘܪܝܰܩܳܘܣ ܘܕܶܒܚܳܐ ܠܐܡܪܳܐ ܚܰܝܳܐ ܕܰܐܠܳܗܳܐ ܩܰܪܶܒܬܺܝܘܗܝ ܚܘܺܝܚܳܐ: ܠܳܟ ܛܽܘܒܰܝܟ ܐܶܡܪܳܐ ܕܠܐ ܡܽܘܡܳܐ ܩܽܘܪܝܰܩܳܘܣ: ܕܰܠܝܽܘܠܺܝܛܺܝ ܐܶܡܳܟ ܠܰܒܶܒܬ ܥܰܠ ܡܰܘܬܳܐ ܬܗܺܝܪܳܐܝ̣ܬ: ܠܶܟܝ ܛܽܘܒܰܝܟܝ ܝܰܘܢܳܐ ܬܰܡܺܝܡܬܳܐ ܝܽܘܠܺܝܛܺܝ ܕܰܠܦܰܪܽܘܓܳܐ ܪܓܺܝܓܳܐ ܕܶܝܠܶܟܝ ܩܽܘܪܝܰܩܳܘܣ ܩܽܘܪܒܳܢܳܐ ܠܢܶܫܪܳܐ ܫܡܰܝܳܢܳܐ ܡܫܺܝܚܳܐ ܐܰܣܶܩܬܝ ܡܛܰܝܒܳܐܝ̣ܬ: ܠܳܟ ܛܽܘܒܰܝܟ ܚܰܓܠܐ ܪܚܺܝܡܳܐ ܩܽܘܪܝܰܩܳܘܣ ܕܰܠܝܽܘܠܺܝܛܺܝ ܐܶܡܳܟ ܚܰܕܺܝܬ ܒܦܽܘܢܳܝ ܡܶܠܰܝ̈ܟ ܕܰܠܘܳܬ ܛܪܽܘܢܳܐ ܚܰܟܺܝܡܳܐܝ̣ܬ: ܠܶܟܝ ܛܽܘܒܰܝܟ ܚܰܟܺܝܡܬܳܐ ܝܽܘܠܺܝܛܺܝ ܕܠܐ ܪܚܶܡܬܝ ܕܒܶܠܥܳܕ ܡ̣ܶܢ ܝܰܠܕܶܟܝ ܩܽܘܪܝܰܩܳܘܣ ܬܶܬܟܰܠܠܺܝܢ ܒܣܳܗܕܽܘܬܳܐ ܢܰܨܺܝܚܳܐܝ̣ܬ: ܠܳܟ ܛܽܘܒܰܝܟ ܢܰܗܺܝܪ ܡܰܕܥܳܐ ܩܽܘܪܝܰܩܳܘܣ ܕܠܐ ܫܦܰܪ ܠܳܟ ܕܬܶܣܒ ܡܰܠܟܽܘܬܳܐ ܕܰܫܡܰܝܳܐ ܒܶܠܥܳܕ ܡ̣ܶܢ ܐܶܡܳܟ ܬܪܺܝܨܳܐܝ̣ܬ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܰܒܝܰܕ ܐܽܘܠܨܳܢ̈ܶܐ ܕܣܰܝܒܰܪܬܽܘܢ ܒܩܰܠܺܝܠ ܙܰܒܢܳܐ: ܢܝܳܚܬܳܐ ܕܰܠܥܳܠܰܡ ܝܺܪܶܬܬܽܘܢ ܗܰܢܺܝܳܐܝ̣ܬ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܰܚܠܳܦ ܚܰܝ̈ܶܐ ܬܥܺܝ̈ܫܶܐ ܘܙܰܒ̈ܢܳܝܶܐ: ܚܰܝ̈ܶܐ ܡܬܽܘ̈ܡܳܝܶܐ ܩܢܰܝܬܽܘܢ ܟܺܐܢܳܐܝ̣ܬ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܰܚܠܳܦ ܫܽܘܒܚܶܗ ܕܥܳܠܡܳܐ ܕܰܐܣܠܺܝܬܽܘܢ: ܫܽܘܒܚܳܐ ܕܒܡܰܠܟܽܘܬܳܐ ܕܰܫܡܰܝܳܐ ܫܩܰܠܬܽܘܢ ܡ̣ܶܢ ܡܳܪܟܽܘܢ ܕܶܝܢ ܫܒܺܝܚܳܐܝ̣ܬ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܐܠܰܗܳܐ ܡܚܰܟܡܳܢܗܽܘܢ ܘܰܡܚܰܝܠܳܢܗܽܘܢ: ܕܬܰܫܘܶܐ ܠܟܽܠܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܒܗܳܢܳܐ ܝܰܘܢܳܐ ܕܟܽܘܠܳܠܗܽܘܢ: ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܕܢܶܥܒܶܕ ܨܶܒܝܳܢܳܟ ܘܰܢܫܰܡܠܐܷ ܢܳܡܽܘܣܰܝ̈ܟ ܘܢܶܛܰܪ ܦܽܘܩ̈ܕܳܢܰܝܟ: ܟܰܕ ܥܳܒܶܕ ܐܰܢ̱ܬ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܢܦܺܐܫܳܐ: ܠܚܰܛܳܝ̈ܶܐ ܘܰܠܬܰܝ̈ܳܒܶܐ ܚܽܘܣܳܝܳܐ: ܘܰܠܛܳܥܰܝ̈ܳܐ ܘܰܐܒܺܝ̈ܕܶܐ ܦܽܘܢܳܝܳܐ ܕܰܠܘܳܬܳܟ ܘܠܰܡ̈ܥܳܩܶܐ ܘܠܐܒܺܝ̈ܠܐ ܒܽܘܝܳܐܳܐ: ܘܰܠܒܳܝ̈ܫܶܐ ܘܡܶܣ̈ܟܺܢܶܐ ܬܽܘܪܣܳܝܳܐ: ܘܰܠܥܺܕ̈ܳܬܳܐ ܘܕܰܝܪ̈ܳܬܳܐ ܫܠܳܡܳܐ ܘܫܰܝܢܳܐ ܘܦܽܘܠܚܳܢ ܡܝܰܬܪ̈ܳܬܳܐ ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܐܳܦ ܒܽܘܣܳܡܳܐ ܕܰܒܡܰܠܟܽܘܬܳܐ ܕܺܝܠܳܟ: ܘܠܰܢ ܕܰܒܚܰܝ̈ܶܐ ܗܳܠܶܝܢ ܫܰܪܺܝܟܺܝܢܰܢ ܡܰܦܩܳܢܳܐ ܕܪ̈ܰܚܡܶܐ ܘܦܽܘܨܳܝܳܐ ܕܡ̣ܶܢ ܨܳܝ̈ܕܰܝ ܢܰܦ̈ܫܳܬܳܐ ܫܺܐܕ̈ܶܐ ܐܳܐܰܪ̈ܳܝܶܐ: ܘܩܰܘܡܳܐ ܦܨܺܝܚܳܐ ܕܰܩܕܳܡ ܒܺܐܡ ܕܺܝܠܳܟ ܕܚܺܝܠܬܳܐ: ܘܚܰܕܽܘܬܳܐ ܘܰܪܘܳܙܳܐ ܕܰܒܡܰܠܟܽܘܬܳܐ ܡܬܽܘܡܳܝܬܳܐ: ܘܢܰܣܶܩ ܠܳܟ ܫܽܘܒܚܳܐ: ܗܳܫܳܐ܀

 

 

 

 

ܥܛܪܐ

 

 

 

ܩܰܒܠ ܡܳܪܝ ܠܦܺܝܪܡܳܐ ܗܳܢܳܐ ܡ̣ܶܢ ܐܺܝܕܰܝ̈ܢ ܠܳܟ ܐܶܬܩܰܪܰܒ ܒܕܽܘܟܪܳܢܶܗ ܕܡܳܪܝ ܩܽܘܪܝܰܩܳܘܣ: ܫܰܟܶܢ ܠܟܽܠܰܢ ܪ̈ܰܚܡܶܐ ܘܰܚܢܳܢܳܐ ܥܰܡ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܫܰܟܶܢ ܒܶܗ ܠܥܺܕܬܳܐ ܕܺܝܠܳܟ ܫܰܝܢܳܐ ܘܰܫܠܳܡܳܐ ܘܢܽܘܛܳܪܳܐ ܠܝܰܠܕܶܝ̈ܗ̇: ܘܰܐܢܺܝܚ ܘܚܰܣܳܐ ܠܐܒܳܗܰܝ̈ܢ ܘܠܐܚܰܝ̈ܢ ܘܰܠܪ̈ܰܒܳܢܰܝܢ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܚܰܝܠܐ ܚܰܝܳܐ ܘܠܐ ܡܶܬܡܰܠܠܳܢܳܐ ܕܰܢܚܶܬ ܡ̣ܶܢ ܪܰܘܡܳܐ ܘܰܐܓܶܢ ܒܰܒܬܽܘܠܬܳܐ ܘܰܕܢܰܚ ܡ̣ܶܢ ܟܰܪܣܳܐ ܚܬܺܝܡܬܳܐ ܕܢܶܦܪܽܘܩ ܠܓܶܢܣܰܢ ܕܥܰܠ ܐܰܪܥܳܐ ܕܢܰܦܺܝܠ ܗܘܳܐ ܒܰܚܛܺܝܬܳܐ: ܘܰܓܒܳܐ ܠܐܡܬܶܗ ܣܳܗܕܬܳܐ ܝܽܘܠܺܝܛܺܝ ܕܬܶܣܗܰܕ ܩܕܳܡ ܕܰܝܳܢܳܐ ܥܰܘܳܠܐ ܡܶܛܽܠ ܡܶܐܬܺܝܬܶܗ ܕܰܠܥܳܠܡܳܐ: ܐܰܢ̱ܬ ܡܳܪܝ ܐܰܩܶܦ ܐܳܦ ܚܰܝܶܕ ܠܰܢ ܒܳܟ: ܐܰܝܟ ܕܚܰܝܶܕܬ ܐܰܢ̱ܬ ܠܳܟ ܒܰܢ: ܕܰܬܚܰܝܕܰܢ ܒܫܽܘܒܚܳܐ ܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܐܪܡܺܝ ܢܽܘܪܳܐ ܕܚܽܘܒܶܗ ܒܠܶܒܳܐ ܕܥܰܒ̈ܕܰܘܗܝ ܥܕܰܡܳܐ ܕܰܐܩܠܺܝܘ ܥܰܠ ܚܰܫ̈ܶܐ ܘܫܶܢ̈ܕܶܐ ܘܥܰܠ ܣܰܝܦܳܐ ܕܚܺܝ̣ܠܐ: ܠܗܰܘ ܕܚܰܝܶܠ ܠܣܳܗܕܳܐ ܢܰܨܺܝܚܳܐ ܩܽܘܪܝܰܩܳܘܣ ܒܰܐܓܽܘܢܳܐ ܕܰܕܡܳܐ: ܘܰܒܚܽܘܒܶܗ ܫܳܛ ܗܘܳܐ ܠܥܳܠܡܳܐ ܘܠܰܪ̈ܓܺܝܓܳܬܶܗ: ܛܰܠܝܳܐ ܙܥܽܘܪܳܐ ܒܰܪ ܬܠܳܬ ܫܢܺܝ̈ܢ ܕܰܐܝܠܶܝܢ ܡܪܳܪ̈ܶܐ ܐܰܣܒܠܶܗ ܡܰܠܟܳܐ ܚܰܢܦܳܐ ܘܡ̣ܶܢ ܗܰܝܡܳܢܽܘܬܳܐ ܠܐ ܐܶܙܕܰܥܙܰܥ: ܘܰܐܥܕܺܝ ܟܠܺܝܠܐ ܕܙܳܟܽܘܬܳܐ ܒܚܰܝܠܐ ܕܩܰܒܶܠ ܡ̣ܶܢ ܡܳܪܶܗ: ܕܠܶܗ ܠܗܰܘ ܕܚܰܝܠܶܗ ܘܢܰܨܚܶܗ ܒܰܐܓܽܘܢܳܐ ܢܰܘܕܶܐ ܘܰܢܫܰܒܚ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܠܝܰܘܡܳܐ ܪܰܒܳܐ ܘܰܫܒܺܝܚܳܐ ܕܝܽܘܡ ܕܽܘܟܪܳܢܶܗ ܕܣܳܗܕܳܐ ܢܰܨܺܝܚܳܐ ܡܳܪܝ ܩܽܘܪܝܰܩܳܘܣ ܡܫܰܡܠܶܝܢܰܢ: ܘܒܰܒ̈ܢܳܬ ܩ̈ܳܠܐ ܕܰܟ̈ܝܳܬܳܐ ܠܘܳܬܶܗ ܥܰܡ ܩܽܘܠܳܣ̈ܶܐ ܘܪܽܘܡܪ̈ܳܡܶܐ ܡܰܙܥܩܺܝܢܰܢ ܘܳܐܡܪܺܝܢܰܢ: ܗܳܢܰܘ ܐܰܬܠܺܝܛܳܐ ܙܪܺܝܙܳܐ ܕܒܰܡܫܽܘܚܬܳܐ ܕܰܬܠܳܬ ܫܢܺܝ̈ܢ ܥܰܠ ܠܶܗ ܠܐܓܽܘܢܳܐ ܕܰܕܡܳܐ: ܗܳܢܰܘ ܛܰܠܝܽܘܣܳܐ ܙܥܽܘܪܳܐ ܕܰܒܩܰܘܡܬܳܐ ܫܰܒܪܳܝܬܳܐ ܢܚܶܬ ܠܐܣܛܰܕܝܽܘܢ ܕܡܰܘܬܳܐ ܘܰܐܥܕܺܝ ܡܶܢܶܗ ܟܠܺܝܠܐ ܕܙܳܟܽܘܬܳܐ: ܗܳܢܰܘ ܦܳܠܚܳܐ ܟܰܫܺܝܪܳܐ ܕܒܰܕܡܳܐ ܚܢܺܝܓܳܐ ܕܨܰܘܪܶܗ ܩܢܳܐ ܠܶܗ ܡܰܠܟܽܘܬܳܐ ܕܰܫܡܰܝܳܐ: ܗܳܢܰܘ ܓܰܢ̱ܒܳܪܳܐ ܠܒܺܝܒܳܐ ܕܚܰܝܶܒ ܠܕܰܝ̈ܳܢܶܐ ܛܪ̈ܽܘܢܶܐ ܘܰܐܒܗܶܬ ܐܶܢܽܘܢ ܒܕܰܪܳܐ ܕܰܣܕܰܪ ܠܽܘܩܒܰܠܗܽܘܢ: ܗܳܢܰܘ ܐܰܓܽܘܢܺܝܣܛܳܐ ܚܠܺܝܨܳܐ ܕܟܰܕ ܗܰܕܳܡ ܗܰܕܳܡ ܡܶܬܦܣܶܩ ܗܘܳܐ ܬܽܘܒ ܡܰܙܥܶܩ ܗܘܳܐ ܕܠܺܝ ܠܐ ܢܶܗܘܶܐ ܠܺܝ ܕܶܐܫܬܰܒܗܰܪ: ܐܶܠܐ ܐܶܢ ܒܰܙܩܺܝܦܶܗ ܕܰܡܫܺܝܚܳܐ: ܗܳܢܰܘ ܢܰܚܫܺܝܪܬܳܢܳܐ ܛܒܺܝܒܳܐ ܕܡܶܛܽܠ ܕܶܚܠܰܬ ܐܠܰܗܳܐ ܪܺܝܫܶܗ ܬܚܶܝܬ ܣܰܝܦܳܐ ܕܠܐ ܩܶܢܛܳܐ ܐܰܪܟܶܢ ܗܘܳܐ: ܗܳܢܰܘ ܩܪܰܒܬܳܢܳܐ ܙܪܺܝܙܳܐ ܒܰܪ ܬܰܪܒܺܝܬܳܐ ܕܥܺܕܬܳܐ ܩܰܕܺܝܫܬܳܐ: ܗܳܢܰܘ ܢܟܺܝܣܳܐ ܘܰܕܒܺܝܚܳܐ ܕܰܕܡܶܗ ܒܚܰܠܒܳܐ ܕܶܐܡܶܗ ܡܶܬܚܰܠܰܛ ܗܘܳܐ: ܗܳܢܰܘ ܕܡ̣ܶܢ ܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܐܶܬܩܪܺܝ ܠܡܰܟܳܣܽܘ ܠܕܰܝ̈ܳܢܶܐ ܚܰܢ̈ܦܶܐ ܘܰܕܠܐ ܐܠܰܗ: ܗܳܢܰܘ ܕܰܛܥܶܢ ܠܰܫܡܳܐ ܩܰܕܺܝܫܳܐ ܕܡܳܪܶܗ ܩܕܳܡ ܕܰܝ̈ܳܢܶܐ ܕܰܐܪܥܳܐ ܘܰܐܒܗܶܬ ܐܶܢܽܘܢ ܒܡܰܡܠܠܐ ܕܣܶܦ̈ܘܳܬܶܗ: ܗܳܢܰܘ ܕܦܰܪܣܺܝ ܠܰܓܠܺܝ̈ܦܶܐ ܕܰܠܗܽܘܢ ܡܰܠܟ̈ܶܐ ܛܪ̈ܽܘܢܶܐ ܦܳܠܚܺܝܢ ܗܘܰܘ: ܗܳܢܰܘ ܕܟܽܠܳܗ̇ ܥܺܕܬܳܐ ܠܶܗ ܡܝܰܩܪܳܐ: ܗܳܢܰܘ ܕܰܠܫܽܘ̈ܡܳܬܶܗ ܡܢܰܫܩܳܐ ܘܰܠܡܰܚ̈ܘܳܬܶܗ ܡܚܰܒܒܳܐ: ܘܰܠܘܳܬܶܗ ܒܦܽܘܡܳܐ ܕܝܰܠܕܶܝ̈ܗ̇ ܡܰܙܥܩܳܐ ܘܳܐܡܪܳܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܙܰܟܳܝܳܐ ܥܛܺܝܦ ܙܳܟܽܘܬܳܐ ܡܳܪܝ ܩܽܘܪܝܰܩܳܘܣ ܕܚܳܒܰܬ݀ ܡܶܢܳܟ ܟܽܠܳܗ̇ ܛܽܘܥܝܰܝ ܕܰܦܬܰܟܪ̈ܶܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܙܰܟܳܝܳܐ ܡܳܪܝ ܩܽܘܪܝܰܩܳܘܣ ܕܒܰܡܫܽܘܚܬܳܐ ܕܰܬܠܳܬ ܫܢܺܝ̈ܢ ܐܰܒܗܶܬܬ ܠܬܶܐܘܰܛܪܽܘܢ ܕܡܰܠܟ̈ܶܐ ܥܰܘ̈ܳܠܐ ܕܰܐܙܕܶܝܰܢܘ ܥܰܠ ܩܶܛܠܳܟ: ܠܳܟ ܛܽܘܒܰܝܟ ܣܳܗܕܳܐ ܙܰܟܳܝܳܐ ܡܳܪܝ ܩܽܘܪܝܰܩܳܘܣ ܕܰܐܚܦܰܪܬ ܘܰܐܚܡܶܨܬ ܠܣܰܟ̈ܠܐ ܒܡ̈ܠܐ ܚܠܺܝ̈ܡܳܬܳܐ ܕܡ̣ܶܢ ܒܰܝܢܳܬ ܣܶܦ̈ܘܳܬܳܟ ܫܳܘ̈ܚܳܢ ܗܘ̈ܰܝ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܢܰܨܺܝܚܳܐ ܡܳܪܝ ܩܽܘܪܝܰܩܳܘܣ ܕܙܰܝܢܳܐ ܕܪܽܘܚܳܐ ܩܰܕܺܝܫܳܐ ܐܶܬܥܰܛܰܦܬ ܘܒܶܗ ܐܰܟܡܰܪܬ ܠܒܺܝܫܳܐ ܢܟܺܝܠܐ ܘܰܠܦܳܠܚܰܘ̈ܗܝ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܢܰܨܺܝܚܳܐ ܡܳܪܝ ܩܽܘܪܝܰܩܳܘܣ ܕܰܣܒܰܠ ܓܽܘܫܡܳܟ ܪܶܒܽܘ ܡܰܚ̈ܘܳܢ ܥܰܠ ܐܰܦܰܝ̈ ܫܡܶܗ ܕܰܡܫܺܝܚܳܐ ܡܳܪܳܟ: ܘܒܰܕܓܽܘܢ ܥܰܡ̈ܡܶܐ ܡܗܰܝ̈ܡܢܶܐ ܒܰܨܠܰܘ̈ܳܬܳܟ ܡܶܬܓܰܘܣܺܝܢ ܘܰܒܓܰܪ̈ܡܰܝܟ ܛܳܦܣܺܝܢ: ܕܢܶܣܒܽܘܢ ܥܽܘܕܪ̈ܳܢܶܐ ܠܟܺܐܒܰܝ̈ܗܽܘܢ ܟܣܰܝ̈ܳܐ ܘܰܓܠܰܝ̈ܳܐ: ܐܶܠܐ ܐܰܦܺܝܣ ܗܳܢܳܐ ܚܠܳܦܰܝܢ ܐܳܘ ܣܳܗܕܳܐ ܡܳܪܝ ܩܽܘܪܝܰܩܳܘܣ ܠܡܳܪܳܟ ܕܡܶܛܽܠ ܫܡܶܗ ܩܰܕܺܝܫܳܐ ܐܰܣܗܶܕܬ: ܕܰܢܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ ܘܠܰܟܠܺܝܠ ܫܰܢ̱ܬܳܐ ܢܒܰܪܶܟ ܒܛܰܝܒܽܘܬܶܗ: ܘܰܢܣܰܒܰܥ ܠܟܰܦܢܳܐ ܡ̣ܶܢ ܡܰܠܝܽܘܬܶܗ ܘܢܰܪܘܰܚ ܠܐܠܺܝ̈ܨܶܐ ܒܰܡܪܰܚܡܳܢܽܘܬܶܗ: ܘܢܰܫܦܰܥ ܥܰܠ ܟܽܠܰܢ ܒܽܘܪ̈ܟܳܬܶܗ: ܘܰܢܪܰܣܶܣ ܛܰܠܐ ܕܫܽܘܒܩܳܢܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܫܟܺܝ̈ܒܰܝ ܥܰܠ ܣܰܒܪܶܗ: ܘܢܶܩܪܶܐ ܘܰܢܩܺܝܡ ܐܶܢܽܘܢ ܡ̣ܶܢ ܝܰܡܺܝܢܶܗ ܒܝܰܘܡܳܐ ܕܕܳܢܚܳܐ ܪܰܒܽܘܬܶܗ: ܘܠܰܢ ܘܰܠܗܽܘܢ ܢܰܫܘܶܐ ܠܒܽܘܣܳܡܳܐ ܕܰܒܡܰܠܟܽܘܬܶܗ: ܘܰܠܚܰܕܽܘܬܳܐ ܕܒܰܓܢܽܘܢܶܗ: ܘܢܰܣܶܩ ܫܽܘܒܚܳܐ ܘܢܶܬܶܠ ܬܰܘܕܺܝܬܳܐ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܣܗ̈ܕܐ ܩܕܝ̈ܫܐ ܫܡܘܢܝ ܘܒܢܝ̈ܗ̇ ܘܐܠܝܙܪ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝ ܕܰܒܚܽܘܒܳܐ ܕܰܟܝܳܐ ܕܠܐ ܡܰܐܻܝܢܽܘܬܳܐ ܠܝܰܘܡܳܐ ܗܳܢܳܐ ܫܒܺܝܚܳܐ ܢܥܰܕܥܶܕ ܕܺܐܝܬܰܘܗܝ ܕܽܘܟܪܳܢܳܗ̇ ܕܰܫܡܽܘܢܺܝ ܘܕܰܒܢܶܝ̈ܗ̇ ܣܳܗ̈ܕܶܐ ܩܰܕܺܝ̈ܫܶܐ ܘܕܶܐܠܺܝ̣ܥܳܙܳܪ ܡܰܠܦܳܢܗܽܘܢ: ܕܩܰܒܶܠܘ ܟܠܺܝ̈ܠܐ ܕܣܳܗܕܽܘܬܳܐ ܘܰܗܘܰܘ ܫܽܘܪܳܐ ܠܰܡܗܰܝ̈ܡܢܶܐ: ܡܳܪܝܳܐ ܢܫܰܟܶܢ ܠܰܢ ܒܰܨܠܰܘ̈ܳܬܗܽܘܢ ܫܰܝܢܳܐ ܘܫܠܳܡܳܐ: ܘܚܽܘܒܳܐ ܘܰܐܘܝܽܘܬܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܰܐܓܽܘ̈ܢܶܐ ܘܰܡܟܰܠܠܳܢܳܐ ܕܰܐܬܠܺܝ̈ܛܶܐ: ܠܗܰܘ ܕܰܗܘܳܐ ܪܺܝܫܳܐ ܕܣܳܗ̈ܕܶܐ ܩܰܕܺܝ̈ܫܶܐ: ܘܗ̣ܽܘ ܪܰܡܪܶܡ ܘܥܰܠܺܝ ܠܚܰܓܳܐ ܕܩܶܛܠܰܝ̈ܗܽܘܢ ܕܢܶܫ̈ܶܐ ܘܰܕܓܰܒܪ̈ܶܐ: ܕܰܚܕܳܐ ܡܶܢܗܶܝܢ ܪܺܝܫܳܝܬܳܐ ܘܩܰܕܡܳܝܬܳܐ ܕܟܽܠܗܶܝܢ ܡܳܪܬܝ ܫܡܽܘܢܺܝ ܐܶܡܳܐ ܢܰܨܺܝܚܬܳܐ ܕܥܰܕܥܺܐܕܳܗ̇ ܒܟܶܢܫܰܢ ܡܶܫܬܰܡܠܐܷ: ܐܳܦ ܕܽܘܟܪܳܢܳܗ̇ ܒܥܰܡܰܢ ܡܶܬܢܰܨܰܚ: ܗܳܕܶܐ ܕܡ̣ܶܢ ܟܽܠ ܣܰܘܦܺܝ̈ܢ ܐܶܬܟܰܢܰܫܘ ܥܰܡ̈ܡܶܐ ܕܰܢܝܰܩܪܽܘܢ ܠܚܰܓܳܗ̇ ܣܒܺܝܣ ܒܚܰܕ̈ܘܳܬܳܐ: ܕܠܶܗ ܠܡܳܪܝܳܐ ܕܰܓܒܳܗ̇ ܬܶܫܒ̈ܚܳܢ ܘܒܽܘܪ̈ܟܳܢ ܘܬܰܘܕ̈ܝܳܢ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܕܽܘܟܪܳܢܳܐ ܡܝܰܩܪܳܐ ܘܰܪܚܺܝܡܳܐ ܕܩܽܘܠܳܣܰܝ̈ܟܝ ܣܳܗܕܬܳܐ ܢܰܨܺܝܚܬܳܐ ܡܳܪܬܝ ܫܡܽܘܢܺܝ ܥܰܠ ܪܶܥܝܳܢܰܢ ܡܰܣܩܺܝܢܰܢ: ܘܒܰܒ̈ܢܳܬ ܩ̈ܳܠܐ ܗܕܺܝܪ̈ܳܬܳܐ ܡܝܰܩܪܺܝܢܰܢ ܘܳܐܡܪܺܝܢܰܢ: ܐܰܢ̱ܬܝ ܐܺܝܬܰܝܟܝ ܩܰܕܡܳܝܬܳܐ ܒܣܳܗ̈ܕܶܐ ܘܶܐܡܳܐ ܕܣܳܗ̈ܕܶܐ ܩܰܕ̈ܡܳܝܶܐ: ܚܳܕܝܰܬ ܒܕܶܒܚܳܐ ܡܩܰܒܠܐ ܕܰܒܢܶܝ̈ܗ̇: ܗ̇ܳܝ ܕܟܰܕ ܛܶܒܳܐ ܕܣܳܗܕܽܘܬܳܐ ܢܦܰܠ ܒܶܐܕ̈ܢܶܝܗ̇ ܣܶܘܚܰܬ݀ ܒܚܰܕܽܘܬܳܐ ܘܪܶܘܙܰܬ݀ ܒܰܦܨܺܝܚܽܘܬܳܐ: ܘܰܐܘܕܝܰܬ݀ ܠܡܳܪܝܳܐ ܥܰܠ ܫܽܘܟܳܢܳܐ ܕܛܰܝܶܒ ܠܪܶܥܝܳܢܳܗ̇: ܘܰܨܠܽܘܬܳܐ ܘܒܳܥܽܘܬܳܐ ܠܡܳܪܝܳܐ ܩܰܪܒܰܬ݀ ܒܰܚܦܺܝܛܽܘܬܳܐ: ܕܰܠܡܰܘܬܳܐ ܡܠܐܷ ܚܰܝ̈ܶܐ ܕܣܳܗܕܽܘܬܳܐ: ܢܶܫܬܰܠܡܽܘܢ ܒܢܶܝ̈ܗ̇ ܒܢܰܨܺܝܚܽܘܬܳܐ: ܘܠܰܩܕܳܡ ܡܰܠܟܳܐ ܡܰܡܠܶܟ ܛܪܽܘܢܳܐܝ̣ܬ ܥܶܠܰܬ݀ ܥܰܡ ܚܦܺܝܛܽܘܬܳܐ: ܘܠܰܒ̈ܢܶܝܗ̇ ܫܰܒܥܳܐ ܗܕܺܝܪ̈ܰܝ ܒܢܰܨܺܝܚܽܘܬܳܐ: ܩܰܛܪܓܰܬ݀ ܩܕܳܡܰܘܗܝ ܒܰܣܒܺܝܪܽܘܬܳܐ: ܕܗܳܐ ܠܰܡ ܡܳܪ̈ܽܘܕܶܐ ܐܶܢܽܘܢ ܡ̣ܶܢ ܡܶܫܬܰܡܥܳܢܽܘܬܳܐ: ܐܶܠܐ ܐܰܦܶܣ ܠܺܝ ܕܶܐܡܰܠܰܠ ܥܰܡܗܽܘܢ ܒܰܡܦܺܝܣܳܢܽܘܬܳܐ: ܘܰܦܩܰܕ ܠܳܗ̇ ܥܰܘܳܠܐ ܘܫܺܝܥ ܗܰܘܢܳܐ ܒܚܰܢܦܽܘܬܳܐ: ܕܙܶܠܝ ܠܘܳܬܗܽܘܢ ܒܰܪܗܺܝܒܽܘܬܳܐ: ܘܡܰܠܶܠܝ ܥܰܡܗܽܘܢ ܒܰܚܘܺܝܚܽܘܬܳܐ: ܢܶܫܬܰܡܥܽܘܢ ܠܺܝ ܒܚܰܢܦܽܘܬܳܐ: ܘܶܐܥܒܶܕ ܐܶܢܽܘܢ ܬܪ̈ܰܝܳܢܶܐ ܒܰܡܝܰܩܪܽܘܬܐ: ܘܠܶܟܝ ܐܶܣܺܝܡ ܡܰܠܟܬܳܐ ܒܰܡܥܰܠܝܽܘܬܳܐ: ܗ̣ܺܝ ܕܶܝܢ ܥܶܠܰܬ݀ ܠܘܳܬ ܒܢܶܝ̈ܗ̇ ܥܰܡ ܟܚܺܝܕܽܘܬܳܐ: ܘܡܰܠܠܰܬ݀ ܥܰܡܗܽܘܢ ܒܫܰܓܽܘܫܬܳܢܽܘܬܳܐ ܕܳܐܘ ܒܢܰܝ̈ܳܐ ܕܪܰܒܺܝܬ ܒܰܡ̈ܥܰܝ ܒܚܰܝܽܘܣܬܳܢܽܘܬܳܐ: ܐܶܬܪܰܚܡܘ ܥܰܠ ܐܶܡܟܽܘܢ ܒܦܽܘܪܥܳܢܽܘܬܳܐ: ܘܝܰܩܰܪܘ ܠܚܰܠܒܝ ܕܒܰܬܕ̈ܰܝ ܒܡܰܝܢܩܽܘܬܳܐ: ܘܚܰܘܰܘ ܠܺܝ ܕܶܝܢ ܒܽܘܩܳܝܳܐ ܕܬܰܪܒܺܝܬܟܽܘܢ ܒܫܰܪܺܝܪܽܘܬܳܐ ܐܶܬܓܰܢ̱ܒܪܘ ܥܰܠ ܛܪܽܘܢܳܐ ܘܥܰܠ ܫܶܢ̈ܕܰܘܗܝ ܒܰܐܬܠܺܝܣܽܘܬܳܐ: ܘܣܺܝܡܘ ܠܟܽܘܢ ܫܡܳܐ ܘܢܶܨܚܳܢܳܐ ܒܰܢܛܺܝܪܽܘܬܳܐ ܠܕܳܪ̈ܶܐ ܕܳܐܬܶܝܢ ܒܢܰܩܺܝܦܽܘܬܳܐ: ܘܩܰܒܶܠܘ ܟܠܺܝ̈ܠܐ ܗܕܺܝܪ̈ܶܐ ܒܰܡܚܰܡܣܢܳܢܽܘܬܳܐ: ܘܰܐܡܠܶܟܘ ܥܰܠ ܛܪܽܘܢܽܘܬܶܗ ܕܡܰܘܬܳܐ ܒܚܺܝܨܽܘܬܳܐ: ܕܬܶܬܓܰܝܽܐܘܢ ܒܶܝܬ ܡܰܠܟܽܘܬܳܐ ܒܰܐܡܺܝܢܽܘܬܳܐ ܘܚܰܕܰܘ ܠܐܒܳܗܰܝ̈ܟܽܘܢ ܩܰܕ̈ܡܳܝܶܐ ܘܡܰܩ̈ܒܰܝܳܐ ܒܫܰܦܺܝܪܽܘܬܳܐ: ܘܶܐܬܕܰܟܪܘ ܠܐܒܪܳܗܳܡ ܣܳܒܳܐ ܘܥܰܡܳܐ ܕܟܺܐܢ̈ܶܐ ܒܰܡܫܰܟܠܽܘܬܳܐ: ܚܽܘܪܘ ܒܺܐܝܣܚܳܩ ܒܪܶܗ ܕܰܕܒܺܝܚ ܒܨܶܒܝܳܢܶܗ ܘܨܳܪ ܛܽܘܦܣܳܐ ܒܰܪܓܺܝܓܽܘܬܳܐ ܕܺܝܠܶܗ: ܐܶܬܕܰܡܘ ܠܝܰܘܣܶܦ ܒܢܰܟܦܽܘܬܳܐ: ܘܰܠܡܽܘܫܶܐ ܒܬܰܡܺܝܗܽܘܬܳܐ: ܘܠܐܗܪܽܘܢ ܘܚܽܘܪ ܘܦܺܝܢܚܶܣ ܒܦܺܝܪ̈ܡܶܐ ܗܰܢܺܝ̈ܶܐܐ ܕܰܡܚܰܕܝܳܢܽܘܬܳܐ: ܘܗܰܕܰܪܘ ܘܩܰܠܶܣܘ ܠܺܝܗܽܘܕܳܐ ܘܡܰܩܒܰܝ ܥܰܡ ܐܰܒܳܗܰܝ̈ܟܽܘܢ ܒܰܟܢܺܝܫܽܘܬܳܐ: ܘܪܰܡܪܶܡܘ ܠܫܳܩܳܐ ܕܫܰܪܒܰܬܟܽܘܢ ܒܡܰܨܡܚܽܘܬܳܐ ܘܶܐܢܳܐ ܒܳܬܰܪ ܩܶܛܠܰܝ̈ܟܽܘܢ ܐܺܬܶܐ ܒܢܰܩܺܝܦܽܘܬܳܐ ܘܟܽܠܰܢ ܢܶܚܕܶܐ ܒܡܰܠܟܽܘܬܳܐ ܒܰܟܢܺܝܫܽܘܬܳܐ: ܘܦܰܢܺܝܘ ܠܳܗ̇ ܒܢܶܝ̈ܗ̇ ܒܰܦܨܺܝܚܽܘܬܳܐ: ܚܕܳܝ ܐܳܘ ܐܶܡܰܢ ܒܰܪܘܺܝܙܽܘܬܳܐ: ܕܟܽܠܰܢ ܨܶܒܝܳܢܰܝ̈ܢ ܫܰܠܶܡܢ ܐܶܢܽܘܢ ܠܣܳܗܕܽܘܬܳܐ: ܘܰܡܛܰܝܒܺܝܢܰܢ ܕܢܶܣܒܽܘܠ ܚܰܫ̈ܶܐ ܒܗܺܝܟܰܕܗܺܝܽܘܬܳܐ: ܘܬܶܚܕܶܝܢ ܒܫܽܘܡܠܳܝܰܢ ܒܰܡܩܰܠܣܽܘܬܳܐ: ܘܰܦܢܳܬ ܫܡܽܘܢܺܝ ܠܘܳܬ ܡܰܠܟܳܐ ܒܰܠܒܺܝܒܽܘܬܳܐ: ܕܰܒܢ̈ܰܝ ܡܳܪ̈ܽܘܕܶܐ ܐܶܢܽܘܢ ܡ̣ܶܢ ܡܶܬܪܰܟܢܳܢܽܘܬܳܐ: ܐܶܠܐ ܠܐ ܬܚܽܘܣ ܥܠܰܝܗܽܘܢ ܒܰܡܫܰܝܢܽܘܬܳܐ: ܡܶܛܽܠ ܕܫܳܘܶܝܢ ܠܡܰܘܬܳܐ ܓܢܺܝܚܳܐ ܒܰܟܢܺܝܫܽܘܬܳܐ: ܫܓܽܘܪ ܚܶܡܬܳܟ ܥܠܰܝܗܽܘܢ ܒܕܰܚܽܘܠܬܳܢܽܘܬܳܐ: ܕܰܟܒܰܪ ܢܶܫܠܡܽܘܢ ܠܳܟ ܒܰܬܟܺܝܠܽܘܬܳܐ: ܘܩܳܡܰܬ݀ ܠܳܗ̇ ܠܽܘܩܒܰܠ ܒܢܶܝ̈ܗ̇ ܒܰܕܡܺܝܪܽܘܬܳܐ: ܟܰܕ ܡܶܬܟܰܠܠܺܝܢ ܒܫܰܘܝܽܘܬܳܐ: ܘܡ̣ܶܢ ܕܶܡܗܽܘܢ ܠܶܟܚܰܬ݀ ܒܗܰܝܡܳܢܺܘܬܳܐ: ܘܰܐܪܘܙܰܬ݀ ܐܶܢܽܘܢ ܒܰܡܩܰܠܣܽܘܬܳܐ: ܘܗܶܦܟܰܬ݀ ܠܳܗ̇ ܠܘܳܬ ܡܰܠܟܳܐ: ܘܶܐܡܪܰܬ݀ ܠܶܗ ܕܶܝܢ ܒܓܰܢ̱ܒܳܪܽܘܬܳܐ: ܕܰܐܛܥܺܝܬ ܒܳܟ ܐܳܘ ܦܰܛܥܳܐ ܥܰܡ ܕܰܓܳܠܽܘܬܳܐ: ܘܟܰܠܠܶܬ ܠܰܒ̈ܢܰܝ ܡܫܰܡܠܝܳܐܝ̣ܬ ܒܛܽܘܒܬܳܢܽܘܬܳܐ: ܘܚܳܪ ܒܳܗ̇ ܡܰܠܟܳܐ ܒܰܪܓܺܝܙܽܘܬܳܐ: ܘܰܦܩܰܕ ܕܬܶܫܬܕܶܐ ܒܢܽܘܪܳܐ ܒܩܰܠܺܝܠܽܘܬܳܐ: ܗ̣ܺܝ ܕܶܝܢ ܪܶܗܛܰܬ݀ ܥܰܡ ܦܨܺܝܚܽܘܬܳܐ: ܘܥܶܠܰܬ݀ ܠܓܰܘܙܰܠܬܳܐ ܘܶܐܫܬܰܡܠܝܰܬ݀ ܒܰܬܫܺܝܥܽܘܬܳܐ: ܘܰܚܢܰܢ ܠܘܳܬܳܗ̇ ܢܰܙܥܶܩ ܥܰܡ ܡܗܰܠܠܽܘܬܳܐ: ܕܳܐܘ ܗܕܺܝܪܰܬ݀ ܒܰܡܨܰܒܬܽܘܬܳܐ ܘܰܟܢܺܝܟܰܬ݀ ܒܰܡܟܰܠܠܳܢܽܘܬܳܐ: ܕܥܶܒܪܰܬ݀ ܠܟܽܠܗܶܝܢ ܢܶܫ̈ܶܐ ܒܰܡܥܰܙܝܳܢܽܘܬܳܐ: ܘܶܐܬܪܰܡܪܡܰܬ݀ ܒܬܶܓܡܳܐ ܢܶܫܳܝܳܐ ܒܩܰܕܡܳܝܽܘܬܳܐ ܘܥܰܠ ܠܘܳܬܳܗ̇ ܢܰܙܥܶܩ ܥܰܡ ܒܗܺܝܠܽܘܬܳܐ: ܬܳܝ ܒܫܠܳܡܳܐ ܟܰܠܬܳܐ ܫܠܶܝܡܽܘܢܳܝܬܳܐ ܗ̇ܳܝ ܡܚܰܟܡܰܬ݀ ܒܰܥܒܳܕ ܐܺܝܕܶܝ̈ܗ̇ ܒܰܗܕܺܝܪܽܘܬܳܐ: ܒܬܶܟܠܬܳܐ ܘܰܥܒܺܝܕܽܘܬ ܠܒܽܘ̈ܫܶܐ ܠܓܰܒܪܳܗ̇ ܒܰܝܢܳܬ ܚܰܒܪ̈ܰܘܗܝ ܒܰܡܗܺܝܪܽܘܬܳܐ: ܘܰܚܢܰܢ ܢܶܩܥܶܐ ܠܘܳܬܳܗ̇ ܟܰܕ ܐܳܡܪܺܝܢܰܢ ܒܰܡܚܰܓܝܳܢܽܘܬܳܐ: ܕܳܐܘ ܩܰܕܺܝܫܬܳܐ ܣܥܽܘܪܝ ܠܟܽܠܰܢ ܒܰܐܡܺܝܢܽܘܬܳܐ ܘܰܐܣܳܝ ܠܰܟܪ̈ܺܝܗܰܝܢ ܒܚܽܘܠܡܳܢܳܐ: ܘܰܐܦܪܶܓܝ ܠܰܢ ܟܽܠ ܥܽܘܕܪ̈ܳܢܺܝܢ ܒܰܫܦܺܝܥܽܘܬܳܐ: ܕܢܶܬܶܠ ܫܽܘܒܚܳܐ ܠܡܳܪܝܳܐ ܡܟܰܠܠܳܢܶܟܝ ܒܟܽܠ ܙܰܒܢܺܝ̈ܢ ܒܰܐܡܺܝܢܽܘܬܳܐ: ܘܰܢܝܰܩܰܪ ܠܰܫܡܶܗ ܣܓܺܝܕܳܐ ܠܥܳܠܰܡ ܥܳܠܡܺܝܢ ܒܰܚܘܺܝܚܽܘܬܳܐ: ܗܳܫܳܐ܀

 

 

 

ܥܛܪܐ

 

 

 

ܥܶܛܪܳܐ ܕܒܶܣ̈ܡܶܐ ܕܩܰܪܶܒܢܰܢ ܠܡܳܪܝܳܐ ܡܳܪܶܟܝ ܒܝܽܘܡ ܕܽܘܟܪܳܢܶܟܝ ܡܳܪܬܝ ܫܡܽܘܢܺܝ ܚܠܺܝܨܰܬ݀ ܒܣܳܗܕܽܘܬܳܐ: ܢܶܬܩܰܒܰܠ ܥܰܠ ܡܰܕܒܚܳܐ ܪܳܡܳܐ ܘܕܰܠܥܶܠ ܡ̣ܶܢ ܫܡܰܝܳܐ: ܘܢܶܫܬܰܟܰܢ ܠܰܢ ܒܶܗ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܘܰܕܣܰܟܠܘ̈ܳܬܳܐ: ܘܰܕܥܰܢܺܝ̈ܕܰܝܢ ܡܗܰܝ̈ܡܢܶܐ ܒܓܰܘ ܩܰܒܪ̈ܰܝܗܽܘܢ ܢܶܩܢܽܘܢ ܒܶܗ ܡܰܪܓܫܳܢܽܘܬܳܐ: ܘܢܶܬܒܰܪܟܽܘܢ ܒܶܗ ܦܺܐܪ̈ܶܐ ܕܰܐܪ̈ܥܳܬܰܢ ܒܰܡܫܰܪܬܚܽܘܬܳܐ: ܘܢܶܫܬܰܦ̈ܥܳܢ ܒܽܘܪ̈ܟܳܬܳܐ: ܗܳܫܳܐ܀

 

 

 

ܚܘܬܡܐ

 

 

 

ܫܠܳܡܳܐ ܠܟܽܘܢ ܝܳܗܒܺܝܢܰܢ ܣܳܗ̈ܕܶܐ ܡܰܩ̈ܒܰܝܳܐ ܚܠܺܝ̈ܨܰܝ ܒܟܽܠܳܗ̇ ܐܰܬܠܺܝܛܽܘܬܳܐ: ܕܢܶܫܬܰܟܰܢ ܠܰܢ ܡ̣ܶܢ ܓܰܙܶܗ ܕܡܳܪܟܽܘܢ ܟܽܠ ܥܽܘܕܪ̈ܳܢܺܝܢ ܒܗܰܝܡܳܢܺܘܬܳܐ: ܘܰܢܩܰܪܶܒ ܠܡܳܪܝܳܐ ܦܺܐܪ̈ܶܐ ܪ̈ܚܺܝܡܶܐ ܕܰܬܝܳܒܽܘܬܳܐ: ܘܢܰܐܓܶܢ ܥܠܰܝܢ ܘܺܝܠܐ ܡܣܰܬܪܳܢܳܐ ܕܛܰܝܒܽܘܬܳܐ ܐܰܒܳܗܳܝܬܳܐ: ܘܰܒܟܽܠ ܥܶܕܳܢܺܝ̈ܢ ܢܶܙܡܰܪ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܥܠ ܐܠܝܥܙܪ ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܗܰܕܰܪ ܠܐܷܠܺܝܥܳܙܳܪ ܒܣܰܝܒܽܘܬܳܐ ܘܨܰܒܬܶܗ ܒܟܳܗܢܽܘܬܳܐ: ܘܢܰܨܚܶܗ ܒܰܐܬܠܺܝܛܽܘܬܳܐ ܘܫܰܟܶܢ ܒܶܝܬ ܐܺܝܕܰܘ̈ܗܝ ܚܽܘܣܳܝܳܐ ܕܣܰܟܠܘ̈ܳܬܳܐ ܒܕܶܒ̈ܚܶܐ ܘܩܽܘܪ̈ܒܳܢܶܐ ܘܰܕܡܳܐ ܕܚܰܝ̈ܘܳܬܳܐ ܠܗܰܘ ܕܥܰܒܕܶܗ ܪܰܒܳܐ ܒܡܰܠܦܳܢܽܘܬܳܐ: ܘܗ̣ܽܘ ܛܰܟܶܣ ܠܫܰܒܥܳܐ ܛܠܳܝ̈ܶܐ ܗܕܺܝܪ̈ܰܝ ܒܰܫܒܺܝܚܽܘܬܳܐ: ܒܢܶܝ̈ܗ̇ ܕܰܕܟܺܝܬܳܐ ܫܡܽܘܢܺܝ ܡܗܰܝܡܰܢܬܳܐ: ܕܠܶܗ ܠܰܡܟܰܠܠܳܢܗܽܘܢ ܢܰܣܶܩ ܬܶܫܒܽܘܚܬܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܘܳܬ ܐܶܣܛܰܕܝܽܘܢ ܕܚܰܫ̈ܶܐ ܣܳܗ̈ܕܳܝܶܐ ܕܰܐܓܽܘܢܺܝܣܛܳܐ ܩܪܰܒܬܳܢܳܐ ܘܟܳܗܢܳܐ ܕܰܫܪܳܪܳܐ ܐܠܶܝܥܳܙܳܪ ܡܶܬܩܰܪܒܺܝܢܰܢ: ܘܒܶܗ ܡܶܬܒܰܩܶܝܢܰܢ ܬܳܗܪܺܝܢܰܢ ܘܡܶܬܕܰܡܪܺܝܢܰܢ: ܘܰܒܚܽܘܒܳܐ ܕܫܶܬܩܳܐ ܡ̣ܶܢ ܩܽܘܠܳܣܰܘ̈ܗܝ ܡܰܘܚܠܺܝܢܰܢ: ܘܡ̣ܶܢ ܪܰܘܡܳܐ ܪܳܡܳܐ ܘܰܡܥܰܠܝܳܐ ܕܰܐܓܽܘ̈ܢܰܘܗܝ ܬܡܺܝ̈ܗܶܐ ܘܠܐ ܡܶܬܡ̈ܰܠܠܳܢܶܐ ܦܳܝܫܺܝܢܰܢ: ܒܪܰܡ ܕܶܝܢ ܣܳܒܟܳܐ ܬܰܪܥܺܝܬܳܐ ܐ̱ܢܳܫܳܝܬܳܐ ܠܡܶܬܒܰܩܳܝܽܘ ܒܰܗܕܺܝܪܽܘܬ ܩܰܘܡܶܗ ܕܰܐܬܠܺܝܛܳܐ: ܗ̇ܰܘ ܕܟܰܕ ܒܟܳܗܢܽܘܬܳܐ ܠܶܘܺܝܬܳܐ ܝܺܗܺܝܒܰܬ݀ ܡ̣ܶܢ ܐܠܰܗܳܐ ܠܥܰܡܳܐ ܐܺܝܣܰܪܠܳܝܳܐ ܗܳܠܶܝܢ ܕܬܶܫܡܫܬܳܐ ܡܫܰܡܠܐܷ ܗܘܳܐ: ܘܰܒܕܶܒ̈ܚܶܐ ܘܢܽܘ̈ܩܳܝܶܐ ܕܰܚܠܳܦ ܣܰܟܠܘ̈ܳܬܳܐ ܡܰܦܪܰܓ ܗܘܳܐ: ܥܶܛܪܳܐ ܕܶܝܢ ܡ̇ܰܢ: ܚܰܝܠܐ ܕܪܽܘܓܙܳܐ ܡ̣ܶܢ ܥܰܡܳܐ ܟܳܠܐܷ ܗܘܳܐ: ܡܰܠܦܳܢܽܘܬܳܐ ܕܰܒܢܳܡܽܘܣܳܐ ܟܬܺܝܒ ܐܠܰܗܳܐܝ̣ܬ ܠܰܒ̈ܢܰܝܳܐ ܕܥܶܒܪ̈ܳܝܶܐ ܡܶܬܰܐܪܙܳܐ ܗܘܳܬ: ܩܳܝܽܘܡܽܘܬܶܗ ܕܶܝܢ ܙܗܺܝܬܳܐ ܕܰܩܕܳܡ ܐܠܰܗܳܐ: ܡܶܨܥܳܝܽܘܬܳܐ ܕܒܶܝܬ ܥܰܡܳܐ ܠܡܳܪܝܳܐ ܢܳܨܚܳܐ ܗܘܳܬ: ܕܠܰܘ ܟܰܕ ܠܛܽܘܪܳܐ ܣܳܠܶܩ ܘܗܳܝܕܶܝܢ ܝܳܠܶܦ ܐ̱ܪ̈ܳܙܶܐ: ܒܪܰܡ ܥܰܠ ܩܰܪܩܰܦܬܳܐ ܕܰܡܝܰܬܪܽܘܬܳܐ ܡܶܬܥܰܠܐܷ ܗܘܳܐ: ܘܗܳܠܶܝܢ ܕܚܶܙܘܳܐ ܡ̣ܶܢ ܡܳܪܝܳܐ ܡܶܬܗܰܕܶܐ ܗܘܳܐ: ܫܒܰܩ ܕܶܝܢ ܘܗ̇ܳܝ ܕܒܶܣܡܳܐ ܡܪܰܟܰܒ ܡ̣ܶܢ ܢܶܛܦܬܳܐ ܘܛܶܦܪܳܐ ܚܰܠܒܳܢܳܝܬܳܐ ܥܶܛܪܳܐ ܡܶܘܫܳܝܳܐ ܕܰܩܕܳܡ ܡܳܪܝܳܐ ܒܡܰܫܟܢܳܐ ܕܣܳܗܕܽܘܬܳܐ ܕܶܝܢ ܡܶܬܬܰܥܛܰܪ ܗܘܳܐ: ܘܰܠܗܳܝ ܕܚܽܘܫܳܒܰܘ̈ܗܝ ܪܺܝܚܳܐ ܒܰܣܺܝܡܳܐ ܘܥܶܛܪܳܐ ܗܰܢܺܝܳܐܐ ܠܐܠܳܗܳܐ ܡܰܣܶܩ ܗܘܳܐ: ܗ̇ܰܘ ܕܟܰܕ ܒܙܰܒ̈ܢܶܐ ܐܠܰܝ̈ܨܶܐ ܕܚܰܢܦܽܘܬܳܐ ܒܪܺܝܫܳܐ ܩܳܐܶܡ ܗܘܳܐ: ܘܗܳܠܶܝܢ ܕܬܶܫܡܫܬܳܐ ܟܳܗܢܳܝܬܳܐ ܠܫܰܪܟܳܢܳܐ ܕܥܰܡܳܐ ܡܡܰܠܰܚ ܗܘܳܐ: ܦܰܛܥܳܐܝ̣ܬ ܦܩܺܝܪ ܗܘܳܐ ܐܰܢܛܺܝܰܟܳܘܣ ܥܰܠ ܐܰܚܺܝ̈ܕܰܝ ܢܳܡܽܘܣܳܐ ܕܗܳܝܕܶܝܟ: ܘܰܒܣܽܘܓܳܐܐ ܘܠܽܘܬܳܟܰܘ̈ܗܝ ܠܟܽܠ ܐ̱ܢܳܫ ܒܗܰܘ ܙܰܒܢܳܐ ܡܫܰܕܶܠ ܗܘܳܐ: ܘܰܠܗܳܝ ܕܢܶܣܓܕܽܘܢ ܘܰܢܕܰܒܚܽܘܢ ܠܨܰܠܡ̈ܶܐ ܥܰܠ ܟܽܠܢܳܫ ܡܶܬܠܰܚܰܡ ܗܘܳܐ: ܘܰܠܚܰܕ ܡ̇ܰܢ ܒܫܽܘ̈ܕܳܠܐ ܟܰܕ ܡܰܛܥܶܐ ܗܘܳܐ: ܘܠܐܚܪܺܢܳܐ ܕܶܝܢ ܒܡܰܘܗ̈ܒܳܬܳܐ ܡܳܠܶܟ ܗܘܳܐ: ܠܚܰܕ ܕܶܝܢ ܒܫܶܢ̈ܕܶܐ ܘܰܒܒܽܘ̈ܣܒܳܣܶܐ ܡܛܰܠܶܩ ܗܘܳܐ: ܘܺܐܝܬ ܐ̱ܢܳܫܺܝ̈ܢ ܐܰܝܟܳܐ ܕܥܰܠ ܫܶܢ̈ܕܶܐ ܡܥܰܙܺܝܢ ܗܘܰܘ: ܐ̱ܚܪ̈ܳܢܶܐ ܕܶܝܢ ܡ̣ܶܢ ܩܰܫܝܽܘܬܳܐ ܕܕܽܘܚܳܠܰܘ̈ܗܝ ܙܳܝܥܺܝܢ ܗܘܰܘ: ܘܰܒܓܽܘ̈ܡܳܨܰܘܗܝ ܕܶܝܢ ܡܶܫܬܰܪܓܠܺܝܢ ܗܘܰܘ: ܟܳܗܢܳܐ ܕܶܝܢ ܣܳܒܳܐ ܐܠܶܝܥܳܙܳܪ ܒܗܳܠܶܝܢ ܕܥܰܡܳܐ ܚܳܐܶܫ ܗܘܳܐ: ܪܶܓܬܳܐ ܕܛܳܒ̈ܳܬܳܐ ܡܶܬܝܰܐܝܰܒ ܗܘܳܐ: ܘܰܠܪܽܘܓܙܳܐ ܕܰܡܬܺܝܚ ܐܺܝܬ ܗܘܳܐ ܐܰܝܟܳܐ ܕܰܐܝܟ ܕܰܠܒܽܘܩܝܳܐ ܐܰܘ ܚܠܳܦ ܦܽܘܪܥܳܢ ܣܰܟܠܘ̈ܳܬܳܐ ܕܡ̣ܶܢ ܐܠܰܗܳܐ ܡܶܬܕܰܡܰܪ ܗܘܳܐ: ܘܬܽܘܒ ܘܰܠܘܳܬܶܗ ܡܛܳܐ ܪܶܙܦܳܐ ܕܓܰܠܠܰܘ̈ܗܝ ܕܝܰܡܳܐ ܕܡܶܬܒܰܥܪܰܪ ܗܘܳܐ: ܘܰܐܬܠܺܝܛܳܐ ܩܕܳܡ ܛܪܽܘܢܳܐ ܩܳܐܶܡ: ܠܥܽܘܒܰܕܝܳܐ ܕܢܳܡܽܘܣܳܐ ܗ̇ܰܘ ܐܰܒܳܗܳܝܳܐ ܡܶܬܬܒܰܥ ܗܘܳܐ: ܘܰܠܡܰܥܒܳܪܽܘ ܕܶܒ̈ܚܶܐ ܕܠܐܠܳܗܳܐ ܒܳܪܽܘܝܳܐ ܘܠܐ ܡܶܬܚܰܙܝܳܢܳܐ ܠܰܥܒܳܕ ܐܺܝܕܰܝ̈ܳܐ ܕܒܰܪܢܳܫܳܐ ܡܶܬܓܙܶܡ ܗܘܳܐ: ܗ̣ܽܘ ܕܶܝܢ ܚܰܝܠܬܳܢܳܐ: ܘܠܐ ܡܽܘܢ ܕܗ̣ܽܘ ܐܶܢ ܢܶܗܘܽܘܢ ܫܶܢ̈ܕܶܐ: ܡ̣ܶܢ ܗ̇ܳܝ ܕܰܠܢܳܡܽܘܣܳܐ ܕܢܶܫܬܰܥܒܰܕ ܐܳܡܰܪ ܗܘܳܐ: ܐܰܘ ܠܐܠܳܗܳܐ ܒܰܦܬܰܟܪ̈ܶܐ ܡܺܝ̈ܬܶܐ ܢܚܰܠܶܦ ܡܶܫܬܰܘܕܶܐ ܗܘܳܐ: ܐܳܘ ܠܕܺܝܢܳܐ ܟܺܐܢܳܐ ܕܡܳܪܝܳܐ: ܗ̇ܰܘ ܕܨܳܒܶܐ ܕܠܰܓ̈ܒܰܝܳܐ ܕܺܝܠܶܗ ܠܘܳܬܶܗ ܢܶܚܡܽܘܠ: ܐܳܘ ܠܰܬܡܺܝܗܽܘܬ ܦܽܘܪ̈ܢܳܣܰܘܗܝ ܕܗ̇ܰܘ ܛܳܒܳܐ: ܕܠܰܘ ܟܰܕ ܕܶܒ̈ܚܶܐ ܕܡ̣ܶܢ ܥܰܡܳܐ ܚܠܳܦܰܝܗܽܘܢ ܢܳܣܶܒ ܗܘܳܐ: ܠܕܶܒܚܳܐ ܫܰܠܡܳܐ ܘܰܬܡܺܝܗܳܐ ܕܡܰܣܶܩ ܗܘܳܐ ܟܳܗܢܳܐ ܣܳܒܳܐ ܘܩܰܕܺܝܫܳܐ ܡܠܺܝܠܐܴܝ̣ܬ ܓܳܡܰܪ ܗܘܳܐ: ܘܰܚܠܳܦ ܢܽܘ̈ܩܳܝܶܐ ܡܶܬܰܐܫ̈ܕܳܢܶܐ ܕܡܳܐ ܚܰܣܝܳܐ ܕܣܳܒܳܐ ܢܳܣܶܒ ܗܘܳܐ: ܘܰܠܡܳܪܳܐ ܕܟܽܠ ܕܡܳܐ ܙܰܟܳܝܳܐ ܡܰܥܛܰܪ ܗܘܳܐ: ܐܠܶܝܥܳܙܳܪ ܗܳܪܟܳܐ ܫܽܘܟܠܳܠܐ ܕܗ̇ܳܢܽܘܢ ܕܰܩܕܳܡ ܡܫܺܝܚܳܐ ܚܰܫ: ܐܰܝܟܰܢܳܐ ܕܗ̇ܳܢܽܘܢ ܕܡ̣ܶܢ ܒܳܬܰܪ ܡܫܺܝܚܳܐ ܪܺܝܫܺܝܬܳܐ ܗܘܳܐ ܗܘܳܐ ܣܛܶܦܰܢܳܘܣ ܓܰܒܝܳܐ: ܓܰܒܪܳܐ ܟܳܗܢܳܐ ܣܳܒܳܐ ܡܝܰܩܪܳܐ ܒܬܰܪܥܺܝܬܳܐ ܛܳܒܬܳܐ ܩܕܳܡ ܥܰܡܳܐ ܡܕܰܒܰܚ ܗܘܳܐ: ܘܰܡܨܰܠܐܷ ܗܘܳܐ: ܘܗܳܫܳܐ ܕܶܝܢ ܕܶܒ̈ܚܶܐ ܕܝܰܬܺܝܪ ܡ̣ܶܢ ܟܽܠ ܡܫܰܡܠܺܝܢ ܡܩܰܪܶܒ ܗܘܳܐ ܠܶܗ ܠܐܠܳܗܳܐ: ܬܰܕܟܺܝܬܳܐ ܕܟܽܠܳܗ̇ ܒܪܺܝܬܳܐ ܘܰܕܟܽܠܶܗ ܥܰܡܳܐ: ܪܺܝܫܳܐ ܛܳܒܳܐ ܕܰܐܬܠܺܝܣܽܘܬܳܐ: ܡܰܪܬܝܳܢܽܘܬܳܐ ܕܰܡܡܰܠܠܐ ܟܰܕ ܫܰܬܺܝܩܳܐ: ܡܩܰܪܶܒ ܕܶܝܢ ܫܰܒܥܳܐ ܛܠܳܝ̈ܶܐ: ܫܽܘܡܠܳܝܳܐ ܕܶܝܢ ܕܡܰܪܕܽܘܬܶܗ ܕܶܒܚܳܐ ܚܰܝܳܐ ܘܩܰܕܺܝܫܳܐ ܕܟܽܠܳܗ̇ ܒܪܺܝܬܳܐ ܡܳܪܝܳܐ: ܕܠܶܗ ܨܳܐܰܪ ܗܘܳܐ ܣܳܒܳܐ ܙܰܗܝܳܐ: ܕܶܒܚܳܐ ܚܰܝܳܐ ܕܰܫܦܰܪ ܠܐܠܳܗܳܐ ܝܰܬܺܝܪ ܕܟܶܐ ܡ̣ܶܢ ܟܽܠ ܕܶܒܚܬܳܐ ܘܦܽܘܠܚܳܢ ܟܳܗܢܽܘܬܳܐ ܢܳܡܽܘܣܳܝܬܳܐ: ܘܒܰܥܳܝܳܐ ܘܰܡܦܺܝܣܳܢܳܐ ܚܠܳܦܰܝܢ ܠܶܗ ܡܩܺܝܡܺܝܢܰܢ: ܘܰܠܘܳܬ ܡܳܪܝܳܐ ܡܢܰܨܚܳܢܶܗ ܐܳܡܪܺܝܢܰܢ: ܐܰܣܓܳܐ ܠܳܗ̇ ܡܳܪܝܳܐ ܠܐܪܥܳܐ ܥ̈ܰܠܠܳܬܳܗ̇: ܐܰܫܦܰܥ ܡܳܪܝܳܐ ܒܽܘܪ̈ܟܳܬܳܟ ܠܥܳܡܽܘܪ̈ܶܝܗ̇: ܒܰܪܶܟ ܟܠܺܝܠܐ ܕܫܰܢ̱ܬܳܐ ܒܛܰܝܒܽܘܬܳܟ: ܓܡܽܘܪ ܠܰܟܪ̈ܺܝܗܶܐ ܒܳܐܣ̈ܘܳܬܳܟ: ܕܰܒܰܪ ܠܚܳܙܽܘ̈ܩܶܐ ܒܪ̈ܰܚܡܰܝܟ: ܗܰܕܰܪ ܠܥܺܕ̈ܳܬܳܐ ܘܕܰܝܪ̈ܳܬܳܐ ܒܒܰܣܺܝܡܽܘܬܳܟ: ܘܰܫܪܺܝ ܣܶܕ̈ܩܶܐ ܚܶܪ̈ܝܳܢܶܐ ܡ̣ܶܢ ܥܰܡܳܟ: ܙܓܽܘܪ ܠܡܰܪ̈ܕܘܳܬܳܐ ܒܚܰܣܺܝܢܽܘܬ ܬܽܘܩܦܳܟ: ܚܰܝܶܠ ܠܰܡܚܺܝ̈ܠܐ ܒܰܚܢܳܢܳܟ: ܛܰܪ ܫܽܘܘ̈ܕܳܝܰܝܟ ܫܰܪܺܝܪ̈ܶܐ ܘܠܐ ܕܰܓ̈ܳܠܐ ܠܥܺܕܬܳܟ: ܝܰܡܺܝܢܳܟ ܬܶܬܠܰܘܶܐ ܠܰܒ̈ܢܶܝܗ̇: ܟܠܺܝ ܚܣܳܡܳܐ ܘܢܶܟܠܐ ܡܶܢܗܽܘܢ: ܠܚܺܝ ܒܽܘܨܳܪ̈ܶܐ ܕܡܰܪܥܺܝܬܳܟ: ܡܰܠܐܴ ܣܢܺܝܩܽܘܬܳܐ ܕܚܰܣܺܝܪ̈ܶܐ: ܢܰܛܰܪ ܒܰܨܠܺܝܒܳܟ ܠܪ̈ܳܥܰܘܳܬܳܐ: ܣܰܝܰܥ ܐܶܢܽܘܢ ܒܢܶܣܝܽܘ̈ܢܶܐ ܕܰܚܠܳܦ ܫܡܳܟ: ܥܰܕܰܪ ܠܟܽܠ ܕܡܶܬܓܰܘܣܺܝܢ ܒܩܰܕܺܝ̈ܫܰܝܟ: ܦܪܽܘܥ ܛܳܒ̈ܳܬܳܟ ܠܐܝܠܶܝܢ ܕܰܨܒܰܘ ܘܶܐܬܰܘ ܠܥܰܕܥܺܐܕܗܽܘܢ: ܨܽܘܬ ܘܰܫܡܰܥ ܩܳܠ ܒܳܥ̈ܘܳܬܳܐ ܕܰܡܝܰܩܪ̈ܰܝ ܕܽܘܟܪ̈ܳܢܰܝܗܽܘܢ: ܩܰܒܶܠ ܨܠܰܘ̈ܳܬܗܽܘܢ ܒܪ̈ܰܚܡܰܝܟ: ܪ̈ܰܚܡܰܝܟ ܘܰܚܢܳܢܳܟ ܢܶܫܬܰܦܥܽܘܢ ܥܰܠ ܟܶܢܫܰܢ: ܫܰܝܢܳܟ ܘܰܫܠܳܡܳܟ ܢܕܰܝܰܪ ܒܰܝܢܳܬܰܢ: ܬܶܗܘܶܐ ܛܰܝܒܽܘܬܳܟ ܡܚܰܣܝܳܢܺܝܬܳܐ ܠܚܰܘ̈ܒܰܝܢ ܘܰܕܥܰܢܺܝ̈ܕܰܝܢ:  ܘܬܶܒܪܽܘܟ ܘܬܶܣܓܽܘܕ ܥܺܕܬܳܐ ܥܰܡ ܝܰܠܕܶܝ̈ܗ̇ ܠܳܟ ܡܫܺܝܚܳܐ ܡܢܰܨܚܳܢܳܐ ܕܩܰܕܺܝ̈ܫܰܘܗܝ: ܘܠܐܒܽܘܟ ܣܓܺܝܕܳܐ ܡܚܰܝܠܳܢܳܐ ܕܰܪ̈ܚܽܘܡܰܘܗܝ: ܘܰܠܪܽܘܚܳܐ ܩܰܕܺܝܫܳܐ ܡܟܰܠܠܳܢܳܐ ܕܢܰܨܺܝ̈ܚܰܘܗܝ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܒܰܪܶܟ ܡܳܪܝܳܐ ܒܛܰܝܒܽܘܬܳܟ ܠܥܰܡܳܐ ܗܳܢܳܐ ܫܒܺܝܥܳܝܳܐ: ܥܕܰܡܳܐ ܕܰܢܰܡܢܰܥ ܠܥܳܠܡܳܐ ܗ̇ܰܘ ܬܡܺܝܢܳܝܳܐ ܘܩܰܕܡܳܝܳܐ: ܒܝܰܕ ܨܠܰܘ̈ܳܬܗܽܘܢ ܕܣܳܗ̈ܕܶܐ ܗܳܠܶܝܢ ܫܰܒܥܳܐ ܢܰܨܺܝ̈ܚܶܐ: ܘܕܶܐܡܗܽܘܢ ܫܡܽܘܢܺܝ ܡܗܰܝܡܰܢܬܳܐ: ܘܕܶܐܠܺܝܥܳܙܳܪ ܡܰܠܦܳܢܗܽܘܢ ܘܰܚܢܰܢ ܕܳܘܰܝ̈ܳܐ ܢܶܫܬܘܶܐ ܠܰܡܢܳܬܳܐ ܘܦܶܣܳܐ ܕܥܰܡܗܽܘܢ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܚܰܕ ܓܢܺܝܙܳܐ ܘܠܐ ܡܶܬܥܰܩܒܳܢܳܐ: ܠܚܰܕ ܒܳܪܽܘܝܳܐ ܚܰܟܺܝܡܳܐ ܘܠܐ ܡܶܬܕܰܪܟܳܢܳܐ ܕܰܒܩܰܕ̈ܡܳܝܶܐ ܘܡܶܨ̈ܥܳܝܶܐ ܘܰܐ̱ܚܪ̈ܳܝܶܐ ܨܶܒܝܳܢܶܗ ܫܰܡܠܺܝ: ܠܗܰܘ ܕܡ̣ܶܢ ܩܰܘܡܬܳܐ ܫܰܒܪܳܝܬܳܐ ܘܣܳܒܳܝܬܳܐ ܘܢܶܫܳܝܬܳܐ ܐܰܩܺܝܡ ܡܶܬܟܰܬܫ̈ܳܢܶܐ: ܘܟܰܐܰܪ ܠܐܢܛܺܝܰܟܳܘܣ ܥܰܘܳܠܐ ܘܰܠܦܳܠܚܰܘ̈ܗܝ ܩܰܫܺܝ̈ܫܰܝ ܒܝܰܘ̈ܡܳܬܳܐ ܕܰܛܠܰܡܘ ܬܰܘܕܺܝܬܳܐ: ܗܰܕܰܪ ܕܶܝܢ ܒܰܫܒܺܝܥܳܝܽܘܬ ܡܶܢܝܳܢܳܐ ܕܦܳܠܚ̈ܶܐ ܙܪ̈ܺܝܙܶܐ ܡܰܩ̈ܒܰܝܳܐ ܩܝܳܡܬܳܐ ܠܐ ܡܶܬܢܰܦܠܳܢܺܝܬܳܐ ܕܥܰܬܺܝܩܬܳܐ: ܗ̇ܳܢܽܘܢ ܕܒܰܨܠܰܘ̈ܳܬܗܽܘܢ ܡܶܬܓܰܘܣܺܝܢܰܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܐܰܝܢܳܐ ܗܰܘܢܳܐ ܡܠܺܝܠܐ ܐܰܘ ܠܶܫܳܢܳܐ ܣܦܺܝܪܳܐ: ܐܰܘ ܐܰܝܕܳܐ ܒܰܪܬ ܩܳܠܐ ܢܰܨܺܝܚܬܳܐ ܕܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܡܰܨܝܳܐ ܕܰܐܟܚܕܳܐ ܒܠܶܥ̈ܙܶܐ ܣܒܺܝ̈ܣܰܝ ܒܩܺܝ̈ܢܳܬܳܐ ܡܠܰܚ̈ܡܳܬܳܐ ܘܡܽܘܣܺܝ̈ܩܪ̈ܳܝܳܬܳܐ ܕܰܢܠܰܚܡܽܘܢ ܠܰܙܥܺܝܩܽܘܬ ܩܽܘ̈ܠܳܣܶܐ ܠܐ ܡܶܬܕܰܪ̈ܟܳܢܶܐ ܕܺܝܠܟܽܘܢ: ܐܳܘ ܫܰܒܥܳܐ ܛܠܳܝ̈ܶܐ ܡܰܩ̈ܒܰܝܳܐ ܣܳܗ̈ܕܶܐ ܩܰܕܺܝ̈ܫܶܐ: ܦܳܐܕܳܐ ܕܶܝܢ ܡܰܚܫܰܒܬܳܐ ܡ̣ܶܢ ܕܰܠܡܶܓܫܰܦ ܒܰܫܒܺܝܚܽܘܬ ܬܶܫܒ̈ܚܳܬܳܐ ܡܝܰܬܪ̈ܳܬܳܐ ܕܙܳܕ̈ܩܳܢ ܠܥܺܐܕܳܐ ܕܺܝܠܟܽܘܢ ܠܐ ܡܶܫܬܰܪܝܳܢܳܐ: ܚܰܓܳܐ ܓܶܝܪ ܘܩܰܘܡܳܐ ܡܰܠܐܟܳܝܳܐ ܠܥܶܠ ܐܶܚܰܕܬܽܘܢ: ܘܥܰܡ ܣܳܐܶܡ ܐܰܓܽܘܢܰܝ̈ܟܽܘܢ ܒܛܶܟܣܳܐ ܝܰܡܺܝܢܳܝܳܐ ܐܶܣܬܰܕܰܪܬܽܘܢ: ܘܡ̇ܰܢ ܡܶܫܟܰܚ ܕܢܶܓܫܽܘܦ ܐܳܦܶܢ ܠܘܰܥܕܳܐ ܒܨܺܝܪܳܐ ܕܫܽܘܒܚܟܽܘܢ: ܕܪܳܡ ܗ̣ܽܘ ܡ̣ܶܢ ܗܰܘܢܳܐ ܐܰܓܽܘܢܟܽܘܢ ܘܰܡܥܰܠܝܳܐ ܡ̣ܶܢ ܡܰܚܫܰܒܬܳܐ ܡܥܰܙܝܳܢܽܘܬܟܽܘܢ ܘܰܡܝܰܬܪܳܐ ܡ̣ܶܢ ܒܰܪܬ ܩܳܠܐ ܕܠܶܫܳܢܳܐ ܒܶܣܪܳܢܳܐ ܣܳܗܕܽܘܬܟܽܘܢ ܕܟܰܕ ܕܰܪܳܐ ܥܰܡ ܐܰܚܺܝܕ ܥܳܠܡ̈ܶܐ ܒܥܶܠܕܒܳܒܳܐ ܕܗܳܝܕܶܝܟ ܘܰܕܗܳܫܳܐ: ܘܰܐܢܛܺܝܰܟܳܘܣ ܡܰܠܟܳܐ ܥܰܘܳܠܐ ܣܕܰܪܬܽܘܢ: ܠܐ ܟܳܦܟܽܘܢ ܐܰܘ ܐܰܩܗܰܪܟܽܘܢ ܡ̣ܶܢ ܐܳܕܫ̈ܶܐ ܕܫܶܢ̈ܕܶܐ ܡܶܕܶܡ ܠܘܳܬ ܗ̇ܳܝ ܕܬܶܟܦܪܽܘܢ ܒܰܐܠܳܗܳܐ: ܕܠܐ ܦܳܣ̈ܩܰܝ ܗܰܕܳܡ̈ܶܐ ܘܠܐ ܓܺܝ̈ܓܠܐ ܘܣܶܟ̈ܶܐ ܕܰܡܣܰܪ̈ܚܳܢ: ܠܐ ܣܶܕ̈ܠܐ ܡܰܚ̈ܡܶܐ ܘܠܐ ܦܰܠܩ̈ܶܐ ܠܛܺܝ̈ܫܶܐ: ܠܐ ܚܰܪܺܝܦܽܘܬܳܐ ܕܛܶܦܪ̈ܶܐ ܕܦܰܪܙܠܐ ܘܠܐ ܣܰܝ̈ܦܶܐ ܕܡܶܬܠܰܛܫܺܝܢ: ܠܐ ܩܶܕ̈ܣܶܐ ܕܪܳܬܚܺܝܢ: ܘܠܐ ܢܽܘܪܳܐ ܕܡܶܬܢܰܒܪܫܳܐ: ܠܐ ܐܰܬܽܘܢܳܐ ܕܡܶܫܬܓܰܪ ܘܠܐ ܛܪ̈ܽܘܢܶܐ ܕܡܶܬܠܰܚܡܺܝܢ: ܘܠܐ ܛܥܺܝ̈ܢܰܝ ܢܰܝܙ̈ܟܶܐ ܕܓܳܙܡܺܝܢ ܘܠܐ ܗܰܕܳܡ̈ܶܐ ܕܡܶܬܦܰܫܚܺܝܢ: ܘܠܐ ܒܶܣܪܳܐ ܘܰܕܡܳܐ ܕܪܳܕܶܝܢ: ܘܠܐ ܛܰܠܝܽܘܬܳܐ ܕܡܶܬܛܰܠܩܳܐ: ܠܐ ܩܰܫ̈ܝܳܬܳܐ ܕܩܰܪ̈ܺܝܒܳܢ ܘܠܐ ܕܚܺܝ̈ܠܳܬܳܐ ܕܡܶܣܬܰܟ̈ܝܳܢ: ܐܳܘ ܠܐܡܳܐ ܢܰܟܦܬܳܐ ܕܚܳܙܝܳܐ ܠܰܪ̈ܚܽܘܡܶܝܗ̇ ܕܰܚܪܺܝܒܺܝܢ ܘܰܦܨܺܝܚܳܐ: ܐܳܘ ܠܐܡܳܐ ܛܰܥܡܳܢܺܝܬܳܐ ܕܚܳܙܝܳܐ ܠܫܰܒܥܳܐ ܢܽܘܪ̈ܒܶܝܗ̇ ܕܡܶܬܦܰܣܩܺܝܢ ܘܡ̣ܶܢ ܬܶܫܒܽܘܚܬܳܐ ܠܐ ܒܳܛܠܐ ܗܘܳܬ݀ ܒܒܰܪܬ ܩܳܠܐ ܢܰܨܺܝܚܬܳܐ ܡܰܘܕܝܳܐ ܐ̱ܢܳܐ ܠܳܟ ܐܰܒܳܐ ܩܰܕܺܝܫܳܐ ܐܶܡܪܰܬ݀: ܘܠܳܟ ܢܳܡܽܘܣܳܐ ܡܰܠܦܳܐ: ܘܠܳܟ ܐܠܶܝܥܳܙܳܪ ܐܰܒܳܐ ܕܺܝܠܰܢ ܘܡܶܬܟܰܬܫܳܢܳܐ ܩܰܕܡܳܝܳܐ: ܦܺܐܪ̈ܶܐ ܕܚܶܒ̈ܠܰܝ ܩܰܒܶܠܬܽܘܢ: ܕܰܗܘܺܝܬ ܕܡ̣ܶܢ ܟܽܠ ܐܶܡܗ̈ܳܬܳܐ ܡܰܟܗܢܳܐ ܘܠܐ ܡܶܕܶܡ ܫܶܒܩܶܬ ܠܥܳܠܡܳܐ: ܟܰܕ ܠܐܠܳܗܳܐ ܝܶܗܒܶܬ ܣܺܝܡܬܳܐ ܕܺܝܠܝ: ܣܰܒܪܳܐ ܡܢܺܝ̈ܚܳܢܰܝ ܣܰܝܒܽܘܬܝ: ܚܰܒܺܝ̈ܒܶܐ ܕܺܝܠܝ ܩܰܕܡܳܐܝ̣ܬ ܩܽܘܪܒܳܢܳܐ ܩܰܪܒܶܬ ܠܐܱܕܽܘܢܰܝ: ܘܰܒܟܽܠ ܚܰܕ ܡ̣ܶܢ ܒܢܰܝ̈ܳܐ ܐܶܬܟܰܬܫܶܬ: ܘܒܳܬܰܪܗܽܘܢ ܐܳܙܳܠܐ ܐ̱ܢܳܐ ܒܕܶܒ̈ܚܶܐ ܡܫܰܡ̈ܠܰܝܳܐ: ܠܐ ܡܢܰܬܫܳܐ ܐ̱ܢܳܐ ܣܰܥܪܳܐ ܕܪܺܝܫ: ܘܠܐ ܣܳܕܩܳܐ ܐ̱ܢܳܐ ܟܽܘܬܺܝܢܳܐ ܕܺܝܠܝ: ܘܠܐ ܣܳܪܩܳܐ ܐ̱ܢܳܐ ܒܶܣܪܝ ܒܛܶܦܪ̈ܰܝ: ܘܠܐ ܡܚܰܪܛܳܐ ܐ̱ܢܳܐ ܐܰܦ̈ܰܝ: ܐܳܦܠܐ ܙܶܒܠܐ ܪܳܡܝܳܐ ܐ̱ܢܳܐ ܘܠܐ ܥܰܦܪܳܐ ܥܰܠ ܪܺܝܫܝ: ܠܐ ܡܩܺܝܡܳܐ ܐ̱ܢܳܐ ܐܠܶܝܳܐ: ܠܐ ܩܳܪܝܳܐ ܐ̱ܢܳܐ ܠܰܡܒܰܝ̈ܳܐܢܶܐ: ܠܐ ܡܺܝܬܬܽܘܢ ܒܢ̈ܰܝ: ܐܶܠܐ ܦܺܐܪ̈ܶܐ ܐܶܬܩܰܪܰܒܬܽܘܢ ܠܐܠܳܗܳܐ: ܠܐ ܚܰܝܽܘܬܳܐ ܚܰܛܦܰܬܟܽܘܢ: ܘܠܰܘ ܟܽܘܪܗܳܢܳܐ ܫܪܟܽܘܢ: ܐܠܶܘ ܡ̣ܶܢ ܫܶܢ̈ܕܶܐ ܐܶܙܕܟܺܝܬܽܘܢ ܡܕܰܡܥܳܐ ܗܘܺܝܬ: ܐܠܶܘ ܚܰܕ ܡܶܢܟܽܘܢ ܐܶܒܰܕ ܐܽܘܠܝ̈ܳܬܳܐ ܡܪܰܟܒܳܐ ܗܘܺܝܬ: ܘܗܳܫܳܐ ܩܽܘܠܳܣܳܐ ܘܚܰܕܽܘܬܳܐ ܐܳܦ ܬܶܫܒܽܘܚܬܳܐ: ܐܶܢܳܐ ܓܶܝܪ ܥܠܰܝܟܽܘܢ ܐܶܬܕܒܰܚ: ܘܥܰܡ ܚܰܢܰܐ ܐܶܫܬܰܒܰܚ: ܗ̇ܳܝ ܡ̇ܰܢ ܚܰܕ ܝܺܗܺܝܒ ܡ̣ܶܢ ܐܠܰܗܳܐ: ܐܶܢܳܐ ܕܶܝܢ ܫܰܒܥܳܐ ܓܰܒܪ̈ܶܐ ܠܐܷܠܺܝܫܕܰܝ ܩܰܪܒܶܬ ܘܟܰܗܢܶܬ: ܐܳܘ ܠܫܰܒܥܳܐ ܐܰܬܠܺܝ̈ܛܶܐ ܙܪ̈ܺܝܙܶܐ ܘܠܐ ܡܶܙܕܰܟ̈ܝܳܢܶܐ:ܐܳܘ ܠܫܰܒܥܳܐ ܐܰܓܽܘܢܺܝ̈ܣܛܶܐ ܚܰܝܠܬܳܢ̈ܶܐ ܘܠܐ ܡܶܬܟܰܒ̈ܫܳܢܶܐ: ܐܳܘ ܠܫܰܒܥܳܐ ܦܳܠܚ̈ܶܐ ܙܰܟܳܝ̈ܶܐ: ܐܳܘ ܠܫܰܒܥܳܐ ܪ̈ܰܒܰܝ ܚܰܝ̈ܠܐ ܢܰܨܺܝ̈ܚܶܐ: ܘܰܒܚܰܕ ܩܰܘܡܬܳܐ ܕܛܰܠܝܽܘܬܳܐ ܡܗܰܒܒܺܝܢ ܗܘܰܘ: ܘܰܚܕܳܐ ܐܰܬܠܺܝܣܽܘܬܳܐ ܘܦܳܠܚܽܘܬܳܐ ܥܰܡ ܚܰܕ ܐܠܰܗܳܐ ܡܰܦܠܚܺܝܢ: ܕܰܚܕܳܐ ܪܽܘܚܳܐ ܣܳܝܩܺܝܢ ܕܒܰܚܕܳܐ ܟܰܪܣܳܐ ܝܺܠܺܝܕܽܘܬܳܐ ܦܰܓܪܳܢܳܝܬܳܐ ܣܒܰܠܘ: ܒܚܰܕ ܕܶܝܢ ܐܰܓܽܘܢܳܐ ܠܚܰܝ̈ܶܐ ܥܳܠܡܳܢܳܝ̈ܶܐ ܡܛܰܠܩܺܝܢ: ܘܠܺܝܠܺܝܕܽܘܬܳܐ ܕܬܰܪܬܶܝܢ ܒܝܰܕ ܕܡܳܐ ܥܳܡܕܺܝܢ: ܫܰܘ̈ܝܰܝ ܒܡܶܢܝܳܢܳܐ ܫܒܺܝܥܳܝܳܐ ܘܪܺܝܫܳܢܳܝܳܐ ܕܰܠܥܶܒܪ̈ܳܝܶܐ ܢܳܡܽܘܣܳܐ ܐܰܒܳܗܳܝܳܐ ܡܝܰܩܰܪ: ܫܰܒܥܳܐ ܝܰܘ̈ܡܳܬܳܐ ܢܰܗܺܝܪ̈ܶܐ ܕܒܰܒܪܺܝܬܳܐ ܕܝܶܢ ܡܶܬܟܰܪܟܺܝܢ: ܘܠܰܟܪܽܘܟܝܳܐ ܕܫܰܢ̱ܬܳܐ ܡܫܰܡܠܶܝܢ: ܘܒܺܐܝܕܰܝ̈ܗܽܘܢ ܠܘܳܬ ܥܳܠܡܳܐ ܬܡܺܝܢܳܝܳܐ ܒܰܢܝܳܚܬܳܐ ܠܰܡܝܰܩܪ̈ܳܢܰܝܗܽܘܢ ܡܝܰܒܠܺܝܢ: ܗ̇ܳܝ ܕܳܐܦ ܐܠܰܗܳܐ ܒܰܢܝܳܚܬܶܗ ܒܫܽܘܪܳܝ ܒܪܺܝܬܳܐ ܩܰܕܶܡ ܝܰܩܰܪ: ܫܰܒܥܳܐ ܐܺܝܡܳܡ̈ܶܐ ܢܰܨܺܝ̈ܚܶܐ ܕܰܒܗܽܘܢ ܐܶܬܝܰܩܰܪܘ ܚܡܺܝܪܳܐ ܥܰܬܺܝܩܳܐ ܗ̇ܰܘ ܕܰܠܡܽܘܫܶܐ ܝܺܗܺܝܒ: ܫܰܒܥܳܐ ܫܰܒܽܘ̈ܥܶܐ ܡܶܬܟܰܪ̈ܟܳܢܶܐ ܕܰܒܗܽܘܢ ܚܽܘܪܳܪܳܐ ܡ̣ܶܢ ܥܰܒܕܽܘܬܳܐ ܕܰܚܛܺܝܬܳܐ ܩܢܰܝܢܰܢ: ܘܦܰܓܪ̈ܰܝܢ ܘܢܰܦ̈ܫܳܬܰܢ ܠܐܠܳܗܳܐ ܡܟܰܗܢܺܝܢܰܢ: ܐܳܦ ܡܶܬܪܰܚܩܳܢܽܘܬܳܐ ܕܡ̣ܶܢ ܚܰܫ̈ܶܐ ܘܡ̣ܶܢ ܩܶܢ̈ܝܳܢܶܐ ܙܰܒ̈ܢܳܝܶܐ ܡܰܓܗܺܝܢܰܢ ܫܒܰܥ ܫܒܺܝ̈ܥܳܝܘܳܬܳܐ ܕܡ̣ܶܢ ܫܳܒܽܘܥܳܐ ܕܥܳܠܡܳܐ ܗܳܢܳܐ ܡܫܰܩܠܺܝܢ: ܠܰܬܡܺܝܢܳܝܽܘܬܳܐ ܕܥܳܠܡܳܐ ܚܰܕܬܳܐ ܒܺܐܝܕܰܝ̈ܗܽܘܢ ܡܢܳܬܳܐ ܕܢܰܦܫܰܢ ܝܳܗܒܺܝܢܰܢ: ܫܰܒܥܳܐ ܐܰܘ̈ܳܢܶܐ ܕܪܽܘܚܳܐ ܡܝܰܩܰܪܬܳܐ ܐܰܘܟܺܝܬ ܫܒܰܥ ܡܰܥܒܕܳܢ̈ܘܳܬܳܐ ܕܕܽܘܟܳܝܳܐ ܩܰܕܺܝܫܳܐ: ܕܰܫܒܰܥ ܪ̈ܽܘܚܶܐ ܕܡ̣ܶܢ ܐܶܫܰܥܝܳܐ ܬܡܺܝܗ ܒܓܶܠܝ̈ܳܢܶܐ ܡܶܬܬܰܙܥ̈ܩܳܢ ܗܘ̈ܰܝ ܕܰܒܗܶܝܢ ܬܽܘܒ ܡܶܬܢܰܗܪܺܝܢܰܢ: ܫܰܒܥܳܐ ܡܰܒܽܘ̈ܥܶܐ ܡܕܰܟ̈ܝܳܢܶܐ ܕܰܫܒܺܝܥܳܐܝ̣ܬ ܠܢܰܦ̈ܫܳܬܰܢ ܡܕܰܟܶܝܢ ܒܰܕܡܽܘܬ ܣܺܐܡܳܐ ܒܚܺܝܪܳܐ: ܫܰܒܥܳܐ ܕܰܪܳܪ̈ܶܐ ܡܫܰܢ̈ܩܳܢܶܐ ܕܰܚܛܺܝܬܳܐ ܕܺܐܝܬܶܝܗ̇ ܡܣܳܡ ܒܪܺܝܫܳܐ ܕܣܰܟܠܽܘܬܶܗ ܕܩܳܐܶܝܢ: ܫܒܰܥ ܡܶܬܬܰܫܒܥܳܢ̈ܘܳܬܳܐ ܥܽܘܦܳܦܳܐ ܕܰܢܝܳܚܬܳܐ ܕܦܽܘܪܥܳܢܶܗ ܕܠܰܡܟ: ܫܰܒܥܳܐ ܥܶܦ̈ܶܐ ܕܰܒܗܽܘܢ ܡܶܬܦܰܪܥܺܝܢ ܒܥܽܘܒܗܽܘܢ ܣܳܛܳܢܳܐ ܘܚܰܝܠܰܘ̈ܳܬܶܗ: ܫܰܒܥܳܐ ܫܒܳܒ̈ܶܐ ܢܳܛܽܘܪ̈ܶܐ ܕܓܶܢܣܰܢ: ܫܰܒܥܳܐ ܥܰܡܽܘ̈ܕܶܐ ܫܰܪ̈ܘܳܝܶܐ ܕܰܒܗܽܘܢ ܡܶܣܬܡܶܟ ܥܳܠܡܳܐ ܟܽܠܶܗ ܒܰܝܬܳܐ ܕܚܶܟܡܬܳܐ ܕܶܐܬܡܚܶܠ ܒܰܚܛܺܝܬܳܐ ܕܰܥܒܳܪ ܦܽܘܩܕܳܢܶܗ ܕܳܐܕܳܡ ܫܒܰܥ ܥܰܝ̈ܢܳܬܳܐ ܡܰܪ̈ܕܝܳܬ݀ ܟܽܠ ܥܽܘܕܪ̈ܳܢܺܝܢ ܕܰܒܗܽܘܢ ܥܺܕܬܳܐ ܐܰܘܟܺܝܬ ܙܽܘܪܒܳܒܶܝܠ ܡܨܰܒܰܬ݀: ܫܒܰܥ ܬܶܫܒ̈ܚܳܬܳܐ ܗܕܺܝܪ̈ܳܬܳܐ ܕܰܒܗܽܘܢ ܐܠܰܗܳܐ ܫܒܺܝܥܳܐܝ̣ܬ ܒܝܰܘܡܳܐ ܡܶܫܬܰܒܰܚ: ܫܰܒܥܳܐ ܙܽܘ̈ܦܶܐ ܡܕܰܟ̈ܝܳܢܶܐ ܕܰܒܗܽܘܢ ܢܰܦܫܳܐ ܥܩܰܪܬܳܐ ܡ̣ܶܢ ܚܽܘ̈ܫܳܒܶܐ ܚܛܺܝ̈ܬܳܢܳܝܶܐ ܡܶܬܕܰܟܝܳܐ: ܫܰܒܥܳܐ ܫܺܝܦܽܘܪ̈ܶܐ ܡܶܬܬܰܙ̈ܥܩܳܢܐ ܕܒܰܟܪ̈ܽܘܟܝܶܐ ܫܒܺܝ̈ܥܳܝܶܐ ܕܒܰܐܦ̈ܰܝ ܟܳܗ̈ܢܶܐ ܒܝܰܘ̈ܡܳܬܳܐ ܫܒܺܝ̈ܥܳܝܶܐ ܫܽܘܪ̈ܶܐ ܐܺܝܪ̈ܺܝܚܽܘܢܳܝܶܐ ܡܶܬܗܰܓܡܺܝܢ: ܫܰܒܥܳܐ ܗܽܘܦܳܟ̈ܶܐ ܢܒܺܝ̈ܳܝܶܐ ܕܶܐܠܺܝܳܐ ܢܒܺܝܳܐ ܘܡܰܦܽܘܚܺܝܬܳܐ ܬܠܺܝܬܳܝܬܳܐ ܘܐ̱ܪܳܙܳܢܳܝܬܳܐ ܕܺܝܠܶܗ: ܕܠܰܘ ܠܰܒܪܳܗ̇ ܕܰܐܪܡܰܠܬܳܐ ܥܳܒܕܺܝܢ ܕܢܺܚܶܐ: ܐܶܠܐ ܠܐܕܳܡ ܝܰܠܕܳܐ ܕܡ̣ܶܢ ܐܰܪܥܳܐ ܕܰܐܪܡܠܰܬ݀ ܒܰܚܛܺܝܬܳܐ: ܒܝܰܕ ܡܰܦܽܘܚܺܝܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܠܰܬܠܳܬܳܐ ܚܰܝ̈ܠܐ ܕܢܰܦܫܳܐ ܡ̣ܶܢ ܡܺܝܬܽܘܬܳܐ ܕܰܒܚܰܫ̈ܶܐ ܡܰܥܒܕܺܝܢ ܕܬܺܚܶܐ: ܫܰܒܥܳܐ ܩܰܢ̈ܳܝܶܐ ܢܰܨܺܝ̈ܚܶܐ ܕܰܒܫܰܒܥܳܐ ܫܪ̈ܳܓܶܐ ܕܰܡܢܳܪܬܳܐ ܡܶܬܝܰܕܥܳܢܺܝܬܳܐ ܥܺܕܬܳܐ ܩܰܕܺܝܫܬܳܐ ܡܰܒܪܩܺܝܢ: ܐܳܦ ܢܽܘܗܪܳܐ ܥܰܠ ܚܰܙܳܝ̈ܶܐ ܐܳܫܕܺܝܢ: ܘܡܶܛܽܠ ܗܳܕܶܐ ܟܰܕ ܠܝܽܘܡ ܥܺܐܕܟܽܘܢ ܡܚܰܓܶܝܢܰܢ: ܘܰܠܕܽܘܟܪܳܢܳܐ ܕܺܝܠܟܽܘܢ ܡܫܰܡܠܶܝܢܰܢ: ܐܳܦ ܠܣܺܝܡܰܬ݀ ܓܰܪ̈ܡܰܝܟܽܘܢ ܡܚܰܒܒܺܝܢܰܢ ܘܳܐܡܪܺܝܢܰܢ: ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܫܰܒܥܳܐ ܡܰܩ̈ܒܰܝܳܐ ܘܛܽܘ̈ܒܶܝܗ̇ ܠܐܡܳܐ ܕܺܝܠܶܕܬܟܽܘܢ: ܘܠܐܠܺܝܥܳܙܳܪ ܡܰܠܦܳܢܟܽܘܢ: ܛܽܘܒܰܝܟܽܘܢ ܫܰܒܥܳܐ ܣܳܗ̈ܕܶܐ ܡܰܩ̈ܒܰܝܳܐ ܒܢܶܝ̈ܗ̇ ܕܰܫܡܽܘܢܺܝ ܢܰܨܺܝܚܬܳܐ: ܛܽܘܒܰܝܟܽܘܢ ܘܰܪ̈ܕܶܐ ܒܰܣܺܝ̈ܡܰܝ ܪܺܝܚܳܐ ܕܟܽܠܶܗ ܥܳܠܡܳܐ ܒܟܽܘܢ ܐܶܬܒܰܣܰܡ: ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܚܰܒܺܝ̈ܒܰܘܗܝ ܕܰܐܠܳܗܳܐ ܕܰܒܟܽܘܢ ܩܢܰܝܢܰܢ ܒܰܝܬܳܝܽܘܬܳܐ ܕܰܠܘܳܬܶܗ: ܡܶܟܺܝܠ ܒܫܰܝܢܳܐ ܘܒܰܫܠܳܡܳܐ ܘܰܒܚܽܘܒܳܐ ܕܡܶܢܟܽܘܢ ܢܶܬܚܰܙܰܩ: ܘܟܽܠܰܢ ܥܰܡ ܟܽܠܰܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܬܰܘ ܒܰܫܠܳܡܳܐ ܡܒܘ̈ܥܐ ܡܰܪ̈ܕܝܰܝ ܚܰܝ̈ܶܐ ܠܢܰܦ̈ܫܳܬܰܢ: ܬܰܘ ܒܰܫܠܳܡܳܐ ܣܳܡܽܘ̈ܟܶܐ ܕܰܡܚܺܝܠܽܘܬܰܢ: ܬܰܘ ܒܰܫܠܳܡܳܐ ܨܶܡ̈ܚܶܐ ܡܰܢܗܪ̈ܰܝ ܢܰܦ̈ܫܳܬܰܢ ܐܶܠܐ ܟܰܕ ܒܣܺܝܡܰܬ݀ ܓܰܪ̈ܡܰܝܟܽܘܢ ܟܽܠܰܢ ܛܳܦܣܺܝܢܰܢ ܠܰܡܫܺܝܚܳܐ ܡܢܰܨܚܳܢܟܽܘܢ ܡܶܬܟܰܫܦܺܝܢܰܢ ܘܳܐܡܪܺܝܢܰܢ: ܬܰܘܕܺܝܬܰܢ ܒܟܽܘܢ ܬܶܬܢܰܨܰܚ: ܫܳܪ̈ܥܳܬܰܢ ܒܟܽܘܢ ܢܶܬܥ̈ܰܛܝܳܢ: ܪ̈ܰܚܺܝܩܶܐ ܒܟܽܘܢ ܢܶܬܦܢܽܘܢ: ܩܰܪ̈ܺܝܒܶܐ ܒܟܽܘܢ ܢܶܬܢܰܛܪܽܘܢ: ܨܳܐܝ̈ܘܳܬܰܢ ܒܟܽܘܢ ܢܶܬܡܰܪ̈ܩܳܢ: ܦܰܐܝ̈ܳܬܰܢ ܒܟܽܘܢ ܢܶܬܗܰܕܪ̈ܳܢ: ܥ̈ܰܠܠܳܢܶܐ ܒܟܽܘܢ ܢܶܬܕܰܒܪܽܘܢ: ܣܰܢ̈ܝܳܬܰܢ ܒܟܽܘܢ ܢܶܬܕܰܚ̈ܩܳܢ: ܢܰܦ̈ܫܳܬܰܢ ܒܟܽܘܢ ܢܶܬܩܰܕ̈ܫܳܢ: ܡܰܠܟ̈ܘܳܬܳܐ ܒܟܽܘܢ ܢܶܫܬܰܝ̈ܢܳܢ: ܠܽܘܒܳܒܰܢ ܒܟܽܘܢ ܢܶܣܓܶܐ: ܟܰܦ̈ܢܶܐ ܒܟܽܘܢ ܢܶܣܒܥܽܘܢ: ܝܰܬܡ̈ܶܐ ܒܟܽܘܢ ܢܶܬܪܰܒܽܘܢ: ܛܰܡ̈ܶܐܐ ܒܟܽܘܢ ܢܶܬܩܰܕܫܽܘܢ: ܚܛܳܗ̈ܶܐ ܒܟܽܘܢ ܢܶܬܚܰܣܽܘܢ: ܙܰܠܺܝ̈ܠܐ ܒܟܽܘܢ ܢܶܬܢܰܟܦܽܘܢ: ܘܰܟܢܺܝ̈ܟܶܐ ܒܟܽܘܢ ܢܶܬܗܰܕܪܽܘܢ: ܗܶܪ̈ܳܬܳܐ ܒܟܽܘܢ ܢܶܫܬܰܝ̈ܢܳܢ: ܕܰܝܪ̈ܳܝܶܐ ܒܟܽܘܢ ܢܶܬܓܰܢ̱ܒܪܽܘܢ: ܓܽܘܕܰܝ̈ܗܽܘܢ ܒܟܽܘܢ ܢܶܣܬܰܕܪ̈ܳܢ: ܒܽܘܪ̈ܟܳܬܳܐ: ܒܟܽܘܢ ܢܶܫܬܰܦ̈ܠܳܢ: ܐܰܒܺܝ̈ܠܐ ܒܟܽܘܢ ܢܶܬܒܰܝܽܐܘܢ: ܐܰܣܺܝܪ̈ܶܐ ܒܟܽܘܢ ܢܶܫܬܪܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܟܽܘܢ ܢܶܬܚܰܣܽܘܢ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܠܰܡܟܰܠܠܳܢܟܽܘܢ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܒܟܽܘܢ ܓܶܝܪ ܐܳܚܕܺܝܢܰܢ ܓܰܘܣܳܐ ܐܳܘ ܣܳܗ̈ܕܶܐ ܡܰܩ̈ܒܰܝܳܐ: ܘܶܐܠܺܝܥܳܙܳܪ ܣܳܒܳܐ ܐܰܒܪܳܗܳܡܳܝܳܐ: ܘܰܫܡܽܘܢܺܝ ܟܢܺܝܟܬܳܐ ܐܶܡܳܐ ܕܫܰܒܥܳܐ ܢܰܨܺܝ̈ܚܶܐ: ܐܶܬܟܰܫܦܘ ܠܗܰܘ ܕܡܶܛܽܠܳܬܶܗ ܥܰܠ ܫܶܢ̈ܕܶܐ ܐܰܡܣܰܪܬܽܘܢ ܕܢܶܬܥܰܠܐܷ ܠܰܩܕܳܡ ܟܽܘܪܣܝܳܐ ܕܡܳܪܽܘܬܶܗ ܥܶܛܪܳܐ ܕܩܰܪܶܒܢܰܢ ܝܰܘܡܳܢܳܐ ܒܕܽܘܟܪܳܢܟܽܘܢ: ܘܢܶܗܘܶܐ ܠܰܢ ܠܡܺܐܢܳܐ ܒܥܳܠܡܳܐ ܫܒܺܝܥܳܝܳܐ: ܘܢܶܬܛܰܦܰܣ ܒܰܬܡܺܝܢܳܝܳܐ ܥܰܡ ܟܽܠܗܽܘܢ ܩܰܕܺܝ̈ܫܶܐ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܐܳܘ ܕܰܒܝܰܘܡܳܐ ܗ̇ܰܘ ܫܒܺܝܥܳܝܳܐ ܐܶܬܬܢܺܝܚ ܘܡܶܛܽܠܳܬܶܗ ܕܶܝܢ ܐܬܩܰܛܰܠܘ ܗܳܠܶܝܢ ܫܰܒܥܳܐ ܛܠܳܝ̈ܶܐ ܡܰܩ̈ܒܰܝܳܐ: ܒܢܶܝ̈ܗ̇ ܕܰܫܡܽܘܢܺܝ ܡܗܰܝܡܰܢܬܳܐ: ܕܰܒܰܪ ܠܰܢ ܒܥܳܠܡܳܐ ܗܳܢܳܐ ܫܒܺܝܥܳܝܳܐ ܒܕܽܘܒܳܪ̈ܶܐ ܬܰܩ̈ܢܶܐ ܕܫܳܦܪܺܝܢ ܠܳܟ: ܘܰܒܥܳܠܡܳܐ ܗ̇ܰܘ ܬܡܺܝܢܳܝܳܐ ܘܩܰܕܡܳܝܳܐ ܒܰܣܶܡ ܠܰܢ ܘܰܠܥܰܢܺܝ̈ܕܰܝܢ ܒܛܳܒ̈ܳܬܳܐ ܕܰܡܠܺܝ̈ܟܳܢ ܠܗܳܠܶܝܢ ܣܳܗ̈ܕܶܐ ܩܰܕܺܝ̈ܫܶܐ ܘܰܠܟܽܠܗܽܘܢ ܡܰܚܒܳܢܰܝ̈ܟ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܥܶܠܬܳܐ ܕܚܰܝ̈ܶܐ ܘܣܳܝܽܘܡܳܐ ܕܰܐܓܽܘ̈ܢܶܐ ܫܰܦܺܝܪ̈ܶܐ ܘܰܡܟܰܠܠܳܢܳܐ ܕܰܐܬܠܺܝ̈ܛܶܐ ܩܰܕܺܝ̈ܫܶܐ: ܗ̇ܰܘ ܕܝܰܗܒ ܗܘܳܐ ܢܳܡܽܘܣܳܐ ܠܥܰܡܳܐ ܩܰܕܡܳܝܳܐ ܛܽܘܦܣܳܐ ܘܛܶܠܳܢܺܝܬܳܐ ܠܢܳܡܽܘܣܳܐ ܕܺܝܠܶܗ ܪܽܘܚܳܢܳܝܳܐ: ܗ̇ܰܘ ܕܰܐܩܢܺܝ ܚܰܝܠܐ ܘܓܰܢ̱ܒܳܪܽܘܬܳܐ ܕܕܶܚܠܰܬ݀ ܐܠܰܗܳܐ ܠܣܳܒܳܐ ܥܰܬܺܝܩ ܝܰܘ̈ܡܳܬܳܐ ܘܰܡܟܰܗܢܳܢܳܐ ܘܡܰܠܶܦ ܢܳܡܽܘܣܳܐ ܐܠܶܝܥܳܙܳܪ ܗ̇ܰܘ ܕܗ̣ܽܘ ܒܡܶܠܰܘ̈ܗܝ ܙܰܕܺܝ̈ܩܳܬܳܐ ܘܒܰܩܢܽܘܡܶܗ ܚܰܘܺܝ ܐܶܣܛܰܕܝܽܘܢ ܪܽܘܚܳܢܳܝܳܐ ܠܰܒ̈ܢܰܝ ܡܰܪܕܽܘܬܶܗ: ܛܠܳܝ̈ܶܐ ܫܰܒܥܳܐ ܘܶܐܡܗܽܘܢ ܟܢܺܝܟܬܳܐ ܗ̇ܳܢܽܘܢ ܕܟܰܕ ܡܶܢܶܗ ܡܶܬܕܰܪܫܺܝܢ ܗܘܰܘ ܒܢܳܡܽܘܣܳܐ ܛܶܠܳܢܳܝܳܐ: ܘܒܳܗ̇ ܟܰܕ ܒܳܗ̇ ܒܡܰܠܦܳܢܽܘܬܶܗ ܚܰܘܺܝ ܫܒܺܝܠܐ ܠܗܳܠܶܝܢ ܕܺܝܠܶܗ ܒܝܰܕ ܐܰܬܠܺܝܣܽܘܬܳܐ ܘܣܳܗܕܽܘܬܳܐ ܕܡܶܛܽܠܳܬܳܟ ܪܰܒ ܟܽܘܡܪ̈ܶܐ ܫܡܰܝܳܢܳܐ: ܟܰܕ ܠܗܽܘܢ ܐܳܡܰܪ ܗܘܳܐ ܢܒܺܝܳܐܝ̣ܬ: ܝܳܕܥܺܝܬܽܘܢ ܐܳܘ ܒܢܰܝ̈ܳܐ ܕܺܝܠܝ ܚܰܒܺܝ̈ܒܶܐ ܘܪ̈ܽܘܚܳܢܳܝܶܐ: ܕܰܠܗܰܘ ܡܶܣܬܰܟܶܐ ܡܰܠܟܳܐ ܘܦܳܪܽܘܩܳܐ ܕܺܐܝܣܪܳܐܶܝܠ ܕܡ̈ܶܐ ܣܰܓܺܝ̈ܶܐܐ ܘܕܶܒ̈ܚܶܐ ܡܠܺܝ̈ܠܐ ܡܶܬܩܰܪܒܺܝܢ ܚܠܳܦܰܘܗܝ: ܡܶܛܽܠ ܕܰܥܬܺܝܕ ܕܰܚܠܳܦ ܟܽܠܶܗ ܥܳܠܡܳܐ ܥܰܠ ܪܳܡܬܳܐ ܡܶܬܕܒܰܚ ܒܨܶܒܝܳܢܶܗ ܘܒܰܕܡܳܐ ܕܺܝܠܶܗ ܕܡܶܫܬܰܦܰܥ ܚܽܘܣܳܝܳܐ ܐܳܦ ܦܽܘܪܩܳܢܳܐ ܠܥܰܡܳܐ ܘܰܠܥܰܡ̈ܡܶܐ ܢܫܰܟܶܢ: ܕܠܶܗ ܩܰܕܡܳܐܝ̣ܬ ܕܶܝܢ ܙܳܕܶܩ ܕܰܢܩܰܪܶܒ ܚܢܰܢ ܠܰܢ ܕܶܒ̈ܚܶܐ ܡܠܺܝ̈ܠܐ ܒܰܕܡܳܐ ܕܢܰܦ̈ܫܳܬܰܢ ܛܳܒ ܡ̣ܶܢ ܝܰܩ̈ܕܶܐ ܘܕܶܒ̈ܚܶܐ ܕܚܰܝ̈ܘܳܬܳܐ: ܡܶܛܽܠ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܬܰܘܕܺܝܬܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܥܽܘܗܕܳܢܳܐ ܕܰܡܢܺܝ̈ܚܳܢܰܝܟ ܡܫܰܡܠܶܝܢܰܢ ܩܕܳܡܰܝܟ ܡܫܺܝܚܳܐ ܐܠܰܗܳܐ: ܗ̇ܰܘ ܡܳܪܶܐ ܡܳܪ̈ܰܘܳܬܳܐ ܘܚܰܝܠܬܳܢܳܐ ܒܰܠܚܽܘܕܰܘܗܝ ܕܗܳܠܶܝܢ ܐܰܬܠܺܝ̈ܛܶܐ ܙܰܟܳܝ̈ܶܐ ܘܢܰܨܺܝ̈ܚܶܐ: ܫܡܽܘܢܺܝ ܡܗܰܝܡܰܢܬܳܐ ܣܳܒܬܳܐ ܩܰܕܺܝܫܬܳܐ ܓܰܢ̱ܒܳܪܰܬ݀ ܢܰܦܫܳܐ: ܘܰܕܫܰܒܥܳܐ ܒܢܰܝ̈ܳܐ ܕܺܝܠܳܗ̇ ܪ̈ܚܺܝܡܶܐ ܘܚܰܒܺܝ̈ܒܶܐ: ܐܳܦ ܐܠܶܝܥܳܙܳܪ ܡܰܠܦܳܢܳܐ ܕܺܝܠܗܽܘܢ ܘܪܰܒܗܽܘܢ: ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܒܗܽܘܢ: ܕܟܰܕ ܠܐ ܚܙܰܐܘܽܘܟ ܒܚܽܘܒܳܐ ܕܺܝܠܳܟ ܘܰܒܪܶܚܡܬܳܟ ܪܬܰܚܘ ܘܶܐܫܬܰܠܗܰܒܘ ܘܠܳܟ ܕܡܶܣܬܰܟܶܐ ܗܘܰܝܬ ܠܶܗ ܣܰܒܪܗܽܘܢ ܐܰܓܥܶܠܘ: ܘܰܠܡܶܬܢܰܩܳܝܽܘ ܠܳܟ ܐܶܬܛܰܝܰܒܘ: ܟܰܕ ܐܰܢܛܺܝܰܟܳܘܣ ܗ̇ܰܘ ܥܰܒܕܳܐ ܕܫܺܐܕ̈ܶܐ ܘܦܳܠܚܳܐ ܕܰܦܬܰܟܪ̈ܶܐ ܓܙܳ̈ܡܶܐ ܘܠܽܘ̈ܚܳܡܶܐ ܠܐ ܡܶܣܬܰܝܒܪ̈ܳܢܶܐ ܥܰܠ ܥܰܡܳܐ ܕܺܝܠܳܟ ܢܳܫܶܡ ܗܘܳܐ ܒܪܽܘܓܙܳܐ ܡܰܪܺܝܪܳܐ: ܠܟܽܠܶܗ ܥܰܡܳܐ ܐܰܪܗܶܒ ܗܘܳܐ ܒܡܶܠܰܘ̈ܗܝ ܩܰܫ̈ܝܳܬܳܐ: ܡܶܛܽܠ ܕܰܠܘܳܬ ܣܶܓܕܬܳܐ ܘܦܳܠܚܽܘܬ ܦܬܰܟܪ̈ܶܐ ܡܚܰܦܶܛ ܗܘܳܐ: ܘܰܠܘܳܬ ܡܶܐܟܽܘܠܬܳܐ ܛܰܡܰܐܬܳܐ ܒܢܳܡܽܘܣܳܐ ܘܰܡܣܰܝܰܒܬܳܐ ܠܰܓܙܺܝܪ̈ܶܐ ܕܶܝܢ ܩܳܪܶܐ ܗܘܳܐ: ܟܰܕ ܕܶܝܢ ܟܽܠܢܳܫ ܡ̣ܶܢ ܦܰܚ̈ܶܐ ܗܳܠܶܝܢ ܥܳܪܶܩ ܗܘܳܐ: ܟܰܕ ܐܶܬܬܚܶܕܘ ܗܳܠܶܝܢ ܛܰܠܝܳܐ ܡܛܰܝ̈ܒܶܐ ܕܝܰܘܡܳܢ ܕܽܘܟܪܳܢܗܽܘܢ ܡܚܰܓܶܝܢܰܢ: ܟܰܕ ܠܐܠܺܝܥܳܙܳܪ ܡܫܺܝܚ ܟܳܗܢܳܐܝ̣ܬ ܐܶܣܛܰܕܝܽܘܢ ܕܰܕܡܳܐ ܐܶܬܩܰܪܰܒ ܗܘܳܐ: ܒܳܥܽܘܬܳܐ ܬܽܘܒ ܠܘܳܬܳܟ ܩܰܪܶܒ ܗܘܳܐ ܚܠܳܦ ܗܳܠܶܝܢ ܕܺܝܠܶܗ: ܟܰܕ ܐܳܦ ܡܶܬܟܰܫܰܦ ܘܰܦܝܳܣܳܐ ܠܗܽܘܢ ܡܰܪܡܶܐ ܗܘܳܐ ܘܰܡܚܰܦܶܛ ܗܘܳܐ: ܕܒܽܐܘܪܚܶܗ ܢܶܪܕܽܘܢ ܘܡ̣ܶܢ ܢܳܡܽܘܣܳܐ ܠܐ ܢܶܣܛܽܘܢ: ܘܰܠܕܶܚܠܬܳܐ ܕܰܐܒܳܗܰܝ̈ܗܽܘܢ ܠܐ ܢܶܫܒܩܽܘܢ: ܘܰܠܫܽܘ̈ܕܳܠܰܘܗܝ ܕܡܰܠܟܳܐ ܥܰܘܳܠܐ ܠܐ ܢܶܫܠܽܘܢ: ܡܶܛܽܠ ܕܰܚܢܰܢ ܒܢ̈ܰܝ ܠܚܰܕ ܐܠܰܗܳܐ ܝܳܕܥܺܝܢܰܢ ܗ̇ܰܘ ܐܠܰܗܶܗ ܕܰܐܒܽܘܢ ܐܰܒܪܳܗܳܡ ܘܕܺܐܝܣܚܳܩ ܘܰܕܝܰܥܩܽܘܒ ܘܰܕܡܰܩܒܰܝ ܐܰܒܳܐ ܕܺܝܠܰܢ ܟܰܕ ܕܶܝܢ ܣܶܓܕܬܳܐ ܘܕܶܒܚܬܳܐ ܠܨܺܝܪ̈ܶܐ ܡܶܬܬܒܰܥ ܗܘܳܐ ܛܪܽܘܢܳܐܝ̣ܬ: ܟܰܕ ܥܠܰܝܡܳܐܝ̣ܬ ܘܰܙܪܺܝܙܳܐܝ̣ܬ ܡܰܙܥܶܩ ܗܘܳܐ: ܕܡ̣ܶܢ ܣܶܓܕܬܳܐ ܕܰܐܕܽܘܢܰܝ ܚܢܰܢ ܠܐ ܡܰܣܛܶܝܢܰܢ: ܐܰܛܶܦ ܠܕܶܒ̈ܚܶܐ ܛܰܡ̈ܶܐܐ ܐܺܝܕܰܝ̈ܳܐ ܕܺܝܠܰܢ ܠܐ ܡܰܘܫܛܺܝܢܰܢ: ܘܰܠܢܽܘ̈ܩܳܝܶܐ ܡܣܰܝ̈ܒܶܐ ܨܶܒ̈ܥܳܬܳܐ ܟܳܗܢܳܝ̈ܳܬܳܐ ܠܐ ܡܩܰܪܒܺܝܢܰܢ ܘܰܠܦܽܘ̈ܡܶܐ ܚܣܰܝ̈ܳܐ ܡܶܐܟ̈ܠܳܬܳܐ ܛܰܡ̈ܳܐܬܳܐ ܠܐ ܡܰܥܠܶܝܢܰܢ: ܐܳܦ ܬܰܘܕܺܝܬܳܐ ܕܰܠܘܳܬ ܐܠܰܗܰܢ ܝܶܫܽܘܥ ܡܫܺܝܚܳܐ ܠܰܦܬܰܟܪ̈ܶܐ ܕܺܝܠܳܟ ܠܐ ܝܳܗܒܺܝܢܰܢ: ܚܢܰܢ ܕܶܝܢ ܠܚܰܕ ܐܠܰܗܳܐ ܒܳܪܽܘܝܳܐ ܕܟܽܠ ܒܶܪ̈ܝܳܢ ܗ̇ܰܘ ܕܒܰܫܡܰܝܳܐ ܥܳܡܰܪ ܒܢܽܘܗܪܳܐ ܠܐ ܡܶܬܩܰܪܒܳܢܳܐ ܘܟܽܠ ܡܠܐܷ ܡܶܢܶܗ: ܠܶܗ ܕܡܳܐ ܕܺܝܠܰܢ ܡܢܰܩܶܝܢܰܢ: ܘܢܰܦ̈ܫܳܬܰܢ ܘܦܰܓܪ̈ܰܝܢ ܕܶܒܚܬܳܐ ܚܰܝܬܳܐ ܠܶܗ ܡܩܰܪܒܺܝܢܰܢ: ܕܰܟܡܳܐ ܕܺܐܝܬ ܠܰܢ ܕܰܢܩܰܘܶܐ ܗܳܪܟܳܐ ܒܚܰܝ̈ܶܐ ܥܳܒܽܘܪ̈ܶܐ ܡ̣ܶܢ ܡܰܘܬܳܐ ܠܐ ܕܳܚܠܺܝܢܰܢ: ܘܡ̣ܶܢ ܕܢܶܥܒܪܺܝܗ̇ ܠܐܱܢܰܢܩܺܝ ܫܽܘܟܳܢܳܐ ܕܶܝܢ ܪܚܺܝܡܳܐ ܕܚܰܝ̈ܶܐ ܕܰܠܥܳܠܰܡ ܢܺܚܶܐ: ܟܰܕ ܕܶܝܢ ܐܶܙܕܟܺܝ ܛܪܽܘܢܳܐ ܡ̣ܶܢ ܡܶܠܰܘ̈ܗܝ ܕܟܳܗܢܳܐ ܘܣܳܗܕܳܐ ܕܩܽܘܫܬܳܐ ܘܙܰܕܺܝܩܳܐ ܠܣܰܝܒܽܘܬܶܗ ܓܡܺܝܪܰܬ݀ ܒܦܽܘܠܚܳܢ ܟܺܐܢܽܘܬܳܐ ܒܫܶܢ̈ܕܶܐ ܥܰܙܺܝ̈ܙܶܐ ܫܰܡܠܺܝ: ܘܚܰܘܪܳܐ ܛܳܒܳܐ ܠܗܳܠܶܝܢ ܕܒܳܬܪܶܗ ܫܒܰܩ: ܗܳܝܕܶܝܢ ܠܰܩܕܳܡܰܘܗܝ ܠܚܰܕ ܡ̣ܶܢ ܗܳܠܶܝܢ ܝܰܠܕܶܝ̈ܗ̇ ܕܰܫܡܽܘܢܺܝ ܠܘܳܬܶܗ ܩܪܳܐ: ܗ̇ܰܘ ܝܰܠܺܝܦ ܡ̣ܶܢ ܐܰܒܳܐ ܪܽܘܚܳܢܳܐ ܟܽܠܗܶܝܢ ܪܰܘܪ̈ܒܳܬܳܐ ܘܰܓܢ̱ܒܰܪ̈ܘܳܬܳܐ ܕܰܐܒܳܗ̈ܶܐ ܚܰܝܠܬܳܢ̈ܶܐ ܗ̇ܳܢܽܘܢ ܕܡ̣ܶܢ ܩܰܕܡܳܝܗܽܘܢ ܘܡ̣ܶܢ ܐܶܡܳܐ ܚܰܟܺܝܡܬܳܐ ܗܳܟܘܳܬ ܟܽܠܗܶܝܢ ܗܳܠܶܝܢ ܕܰܠܘܳܬ ܓܰܢ̱ܒܳܪܽܘܬ ܢܰܦܫܳܐ ܡܥܰܠܶܝܢ ܕܝܰܬܺܝܪ ܚܰܝܠܬܳܢ ܕܶܝܢ ܐܶܬܚܰܘܺܝ ܠܽܘܩܒܰܠ ܫܽܘܓܳܫܰܘ̈ܗܝ ܘܠܽܘ̈ܚܳܡܰܘܗܝ ܕܦܳܥܠܐ ܕܕܰܝ̈ܘܶܐ: ܘܫܰܪܺܝ ܕܶܝܢ ܛܪܽܘܢܳܐ ܒܰܥܒܳܕܳܐ ܒܺܝܫܳܐ: ܘܰܠܒܽܘܟܪܳܐ ܕܫܰܒܥܳܐ ܒܝܰܕ ܦܽܘܣܳܩܳܐ ܕܫܳܪ̈ܝܳܬܳܐ ܘܗܰܕܳܡ̈ܶܐ ܓܰܡܪܶܗ: ܟܰܕ ܗ̣ܽܘ ܠܐܚܰܘ̈ܗܝ ܐܽܘܪܚܳܐ ܠܚܰܝ̈ܶܐ ܕܪܰܫ ܘܰܟܠܺܝܠܐ ܒܟܺܝܪܳܝܳܐ ܩܰܒܶܠ: ܗܳܟܘܳܬ ܐܳܦ ܗ̇ܰܘ ܬܪܰܝܳܢܳܐ ܒܡܰܘܬܳܐ ܡܰܪܺܝܪܳܐ ܓܰܡܪܶܗ ܘܒܰܟܠܺܝܠܐ ܕܫܳܘܶܐ ܠܶܗ ܐܶܬܟܰܠܰܠ: ܗܳܟܘܳܬ ܬܽܘܒ ܒܺܐܝܕܳܐ ܒܺܐܝܕܳܐ ܟܽܠܗܽܘܢ ܒܚܰܕ ܐܰܓܽܘܢܳܐ ܐܶܬܓܡܰܪܘ ܘܶܐܫܬܰܡܠܺܝܘ: ܘܰܟܠܺܝ̈ܠܐ ܕܢܰܨܺܝܚܽܘܬܳܐ ܒܟܺܐܢܽܘܬܳܐ ܫܩܰܠܘ: ܟܰܕ ܟܽܠܗܽܘܢ ܠܚܰܕ ܦܽܘܪܥܳܢܳܐ ܡܣܰܟܶܝܢ ܗܘܰܘ: ܘܰܠܚܰܝ̈ܶܐ ܚܰܕ̈ܬܶܐ ܕܰܠܥܳܠܰܡ ܡܣܰܒܪܺܝܢ: ܐܳܘ ܠܚܰܝܠܬܳܢܽܘܬܳܐ ܕܰܛܠܳܝ̈ܶܐ ܕܠܐ ܐܶܫܟܰܚ ܥܽܘܙܳܐ ܕܚܰܢ̈ܦܶܐ ܕܢܶܙܟܺܝܗ̇: ܐܳܘ ܠܰܠܒܺܝܒܽܘܬܳܐ ܕܫܰܒܪ̈ܶܐ ܕܠܐ ܙܳܥܘ ܡ̣ܶܢ ܛܪܽܘܢܽܘܬܶܗ ܕܡܰܠܟܳܐ ܥܰܘܳܠܐ: ܐܳܘ ܠܚܰܬܢ̈ܶܐ ܪ̈ܚܺܝܡܶܐ ܘܪ̈ܽܘܚܳܢܳܝܶܐ ܕܰܠܡܶܫܬܽܘܬܳܐ ܕܰܠܥܶܠ ܘܠܰܚܠܽܘܠܐ ܕܠܐ ܦܳܛܰܪ ܐܶܙܕܰܡܰܢܘ: ܐܳܘ ܠܰܙܡܺܝ̈ܢܶܐ ܡܫܺܝ̈ܚܳܝܶܐ ܕܠܰܣܡܳܟܳܐ ܕܒܶܝܬ ܐܰܒܪܳܗܳܡ ܐܶܬܥܰܠܺܝܘ: ܐܳܘ ܠܰܚܠܺܝܡܽܘܬ ܬܰܪܥܺܝܬܳܐ ܕܰܫܡܽܘܢܺܝ ܢܰܨܺܝܚܬܳܐ: ܐܳܘ ܠܓܰܢ̱ܒܳܪܽܘܬ ܢܰܦܫܳܐ ܕܣܳܒܬܳܐ ܩܰܕܺܝܫܬܳܐ: ܕܠܐ ܣܳܟ ܥܳܩܰܬ݀ ܠܳܗ̇ ܒܡܰܘܬܳܐ ܕܚܰܒܺܝ̈ܒܶܝܗ̇ ܘܠܐ ܚܳܣܰܬ݀ ܥܰܠ ܦܰܪ̈ܽܘܓܶܝܗ̇ ܝܰܘܢܳܐ ܬܰܡܺܝܡܬܳܐ: ܐܳܘ ܠܐܡܳܐ ܚܰܝܽܘܣܬܳܢܺܝܬܳܐ ܕܠܐ ܐܰܝܬܝܰܬ݀ ܥܰܠ ܒܳܠܳܗ̇ ܡܓܰܙܝܽܘܬܳܐ ܕܺܝܠܳܗ̇ ܕܡ̣ܶܢ ܝܰܠܕܶܝ̈ܗ̇ ܟܰܕ ܗ̣ܺܝ ܒܳܬܰܪܗܽܘܢ ܠܡܰܘܬܳܐ ܡܥܰܬܕܳܐ ܗܘܳܬ݀ ܘܠܐ ܨܳܒܝܳܐ ܗܘܳܬ݀ ܒܚܰܝ̈ܶܐ ܡܰܠܟܳܝ̈ܶܐ ܕܚܰܢ̈ܦܶܐ: ܐܶܠܐ ܒܚܰܝ̈ܶܐ ܐܰܒܳܗܳܝ̈ܶܐ ܘܛܽܘܒ̈ܬܳܢܶܐ ܘܰܠܘܳܬ ܥܽܘ̈ܒܶܐ ܐܰܒܪ̈ܳܗܳܡܳܝܶܐ ܠܗܽܘܢ ܡܥܰܠܝܳܐ ܗܘܳܬ݀: ܠܐܘ̈ܳܢܶܐ ܐܺܝܣܚ̈ܳܩܳܝܶܐ ܠܗܽܘܢ ܡܫܰܕܪܳܐ ܗܘܳܬ ܘܟܰܕ ܒܬܰܘܕܺܝܬܳܐ ܠܰܫܠܰܕܰܝ̈ܗܽܘܢ ܡܶܬܟܰܪܟܳܐ ܗܘܳܬ݀: ܠܗܰܕܳܡܰܝ̈ܗܽܘܢ ܠܘܳܬ ܚܕܳܕ̈ܶܐ ܡܠܰܚܡܳܐ ܗܘܳܬ݀: ܟܰܕ ܠܰܫܪ̈ܰܕܽܘܕܰܝܗܽܘܢ ܡܟܰܢܫܳܐ ܗܘܳܬ݀ ܩܽܘܒܳܠܛܰܝܒܽܘܬܳܐ ܠܐܠܳܗܳܐ ܡܩܰܪܒܳܐ ܗܘܳܬ: ܟܰܕ ܕܶܝܢ ܠܦܰܓܪ̈ܰܝܗܽܘܢ ܚܣܰܝ̈ܳܐ ܒܓܰܘ ܩܺܐܒܽܘܬܳܐ ܣܺܝܡܳܐ ܗܘܳܬ݀: ܬܶܫܒܽܘܚܬܳܐ ܠܳܟ ܡܟܰܠܠܳܢܗܽܘܢ ܡܕܰܫܢܳܐ ܗܘܳܬ: ܟܰܕ ܒܡܰܘܬܰܝ̈ܗܽܘܢ ܕܳܨܰܬ݀ ܒܫܽܘܡܠܳܝܗܽܘܢ ܪܶܘܙܰܬ݀ ܐܳܦ ܕܶܡܗܽܘܢ ܥܰܠ ܐܰܦܶܝ̈ܗ̇ ܛܳܫܰܬ݀ ܘܒܰܙܡܺܝܪ̈ܳܬܳܐ ܡܰܠܝܳ̈ܬ݀ ܚܰܕܽܘܬܳܐ ܠܘܳܬ ܒܢܶܝ̈ܗ̇ ܐܳܡܪܳܐ ܗܘܳܬ: ܐܶܗܶܐ ܐܶܗܶܐ ܒܢܰܝ̈ܳܐ ܚܰܒܺܝ̈ܒܶܐ ܫܰܦܺܝܪ ܚܙܰܝ̈ ܒܟܽܘܢ ܥܰܝ̈ܢܶܐ ܕܺܝܠܝ ܛܳܒܳܐܝ̣ܬ ܫܰܡܠܺܝܬܽܘܢ ܨܶܒܝܳܢܝ: ܟܰܕ ܕܶܝܢ ܡ̣ܶܢ ܠܘܳܬ ܒܢܶܝ̈ܗ̇ ܫܰܢܝܰܬ݀ ܒܢܶܗ̈ܡܳܬܳܐ ܓܶܝܪ ܚܰܒܺܝ̈ܒܳܬܳܐ ܘܰܠܘܳܬ ܐܰܢܛܺܝܰܟܳܘܣ ܥܰܘܳܠܐ ܪܶܗܛܰܬ݀ ܟܰܕ ܡܠܐܷ ܠܶܒܳܗ̇ ܪܘܳܙܳܐ ܪܰܒܳܐ: ܘܰܒܣܳܗܕܽܘܬܳܐ ܫܰܦܺܝܪܰܬ݀ ܙܳܟܽܘܬܳܐ ܐܶܬܓܰܡܪܰܬ݀: ܟܰܕ ܐܳܡܪܳܐ ܗܘܳܬ ܠܘܳܬܶܗ ܕܰܛܪܽܘܢܳܐ: ܗܳܫܳܐ ܐܶܬܬܢܺܝܚ ܠܶܒܝ ܕܰܚܙܺܝܬ ܠܰܒ̈ܢܰܝ ܡܟܰ̈ܠܠܐ: ܗܳܫܳܐ ܐܶܬܡܠܺܝܬ ܪܘܳܙܳܐ ܕܰܗܘܰܘ ܒܢܰܝ̈ ܚܰܬܢ̈ܶܐ ܒܰܫܡܰܝܳܐ: ܗܳܫܳܐ ܐܶܬܒܰܝܐܻܝܬ ܡ̣ܶܢ ܥܳܩܬܳܐ ܘܕܶܚܠܬܳܐ ܕܰܫܩܰܠܘ ܒܢܰܝ̈ ܥܠܰܝܟ ܙܳܟܽܘܬܳܐ: ܐܳܘ ܠܓܽܘܕܳܐ ܫܰܦܺܝܪܰܬ݀ ܙܳܟܽܘܬܳܐ: ܐܳܘ ܠܫܰܪܒܬܳܐ ܠܐ ܡܶܙܕܰܟܝܳܢܺܝܬܳܐ: ܐܳܘ ܠܛܽܘܗܡܳܐ ܠܐ ܡܶܬܚܰܣܢܳܢܳܐ: ܐܳܘ ܠܣܳܗ̈ܕܶܐ ܫܰܦܺܝܪ̈ܰܝ ܕܶܚܠܬܳܐ: ܐܳܦ ܥܺܕܬܳܐ ܩܰܕܺܝܫܬܳܐ ܟܰܕ ܠܕܽܘܟܪ̈ܳܢܰܝܗܽܘܢ ܡܫܰܡܠܝܳܐ ܛܽܘܒܳܐ ܠܗܽܘܢ ܝܳܗܒܳܐ ܟܰܕ ܐܳܡܪܳܐ: ܠܟܽܘܢ ܛܽܘܒܰܝܟܽܘܢ ܕܠܐܝܢܳܐ ܟܠܺܝܠܐ ܦܰܐܝܳܐ ܐܶܫܬܘܺܝܬܽܘܢ: ܠܟܽܘܢ ܛܽܘܒܰܝܟܽܘܢ ܕܠܐܝܕܳܐ ܡܰܠܟܽܘܬܳܐ ܐܶܬܡܰܢܰܥܬܽܘܢ: ܠܟܽܘܢ ܛܽܘܒܰܝܟܽܘܢ ܕܒܰܕܡܳܐ ܕܨܰܘܪ̈ܰܝܟܽܘܢ ܠܘܳܬ ܡܫܺܝܚܳܐ ܡܳܪܟܽܘܢ ܗ̇ܰܘ ܕܠܶܗ ܡܫܺܝܚܳܐ ܡܳܪܟܽܘܢ ܗ̇ܰܘ ܕܠܶܗ ܡܣܰܟܶܝܢ ܗܘܰܝܬܽܘܢ ܐܶܬܩܰܪܰܒܬܽܘܢ ܘܒܰܕܓܽܘܢ ܠܳܟ ܡܦܺܝܣܺܝܢܰܢ ܡܫܺܝܚܳܐ ܐܠܰܗܳܐ ܡܰܘܪܒܳܢܳܐ ܕܩܰܕܺܝ̈ܫܰܘܗܝ ܘܰܡܟܰܠܠܳܢܳܐ ܕܣܳܗ̈ܕܰܘܗܝ: ܐܰܝܟܰܢܳܐ ܕܰܒܝܰܕ ܨܠܰܘ̈ܳܬܗܽܘܢ ܠܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ ܢܶܫܬܘܶܐ: ܐܳܦ ܠܰܚܠܽܘ̈ܠܰܝܗܽܘܢ ܢܶܙܕܰܡܰܢ: ܥܰܡܗܽܘܢ ܒܰܡܛܰܠܠܰܝ̈ܗܽܘܢ ܢܶܚܕܶܐ ܘܰܒܓܽܘܕܰܝ̈ܗܽܘܢ ܢܶܬܛܰܟܰܣ ܘܰܐܟܚܕܳܐ ܚܢܰܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܡܠܟܐ ܩܘܠܙܡܝܐ ܒܪ ܚܬܗ ܕܡܪܝ ܐܘܓܝܢ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܛܰܠܶܩ ܡܳܪܝܳܐ ܐܠܰܗܳܐ ܘܰܛܪܽܘܕ ܠܰܦܠܰܓܳܐ ܕܫܺܐܕ̈ܶܐ ܡܳܪ̈ܽܘܕܶܐ ܘܕܰܝ̈ܘܶܐ ܒܺܝ̈ܫܶܐ: ܕܗܳܐ ܡܰܪܡܶܝܢ ܠܰܢ ܒܓܽܘܡܳܨܳܐ ܕܰܚܛܺܝܬܳܐ ܘܙܳܪܥܺܝܢ ܒܰܢ ܚܽܘ̈ܫܳܒܶܐ ܣܢܰܝ̈ܳܐ: ܒܝܰܕ ܨܠܰܘ̈ܳܬܶܗ ܕܰܐܬܠܺܝܛܳܟ ܡܳܪܝ ܡܰܠܟܶܐ ܥܛܺܝܦ ܙܳܟܽܘܬܳܐ ܕܰܛܪܰܕ ܐܶܢܽܘܢ ܡ̣ܶܢ ܕܰܝܪܶܗ ܒܬܰܩܺܝܦܽܘܬܳܐ: ܘܝܰܗܒܬ ܠܶܗ ܕܡ̣ܶܢ ܒܳܬܰܪ ܡܰܘܬܶܗ ܢܶܣܥܽܘܪ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܘܢܶܛܪܽܘܕ ܫܺܐܕ̈ܶܐ ܘܕܰܝ̈ܘܶܐ ܡ̣ܶܢ ܐ̱ܢܳܫܽܘܬܳܐ ܘܫܰܟܶܢ ܠܰܢ ܒܝܰܕ ܒܳܥ̈ܘܳܬܶܗ ܫܽܘܒܩܳܢܳܐ ܕܣܰܟܠܘ̈ܳܬܳܐ: ܡܳܪܰܢ ܘܰܐܠܳܗܳܢ܀

 

 

 

ܦܪܘܡܝܘܢ

 

 

 

 

ܬܶܫܒܽܘܚܬܳܐ: ܠܗܰܘ ܛܳܒܳܐ ܘܪܳܚܶܡܢܳܫܳܐ ܕܢܽܘܪܳܐ ܕܪܶܚܡܬܶܗ ܐܰܪܡܺܝ ܒܠܶܒܰܘ̈ܳܬܳܐ ܕܣܳܓܽܘ̈ܕܰܘܗܝ: ܠܗܰܘ ܡܪܰܚܡܳܢܳܐ ܕܫܰܠܗܶܒ ܠܰܦܪ̈ܺܝܩܰܘܗܝ ܕܢܶܪܕܽܘܢ ܒܥܶܩ̈ܒܳܬܶܗ: ܠܗܰܘ ܕܝܰܗܒ ܠܥܰܦܪ̈ܳܢܶܐ ܚܰܝܠܐ ܕܰܢܕܽܘܫܽܘܢ ܥܰܠ ܚܰܝܠܶܗ ܕܡܳܪܽܘܕܳܐ ܕܰܢܫܰܥܒܕܽܘܢܳܝܗܝ ܬܚܶܝܬ ܟܽܘܒܫܳܐ ܕܪ̈ܶܓܠܰܝܗܽܘܢ: ܠܗܰܘ ܕܥܰܕܪܶܗ ܠܡܳܪܝ ܡܰܠܟܶܐ ܘܟܰܠܠܶܗ ܒܰܟܠܺܝܠܐ ܠܐ ܡܶܬܚܰܒܠܳܢܳܐ: ܘܥܰܒܕܶܗ ܝܳܪܬܳܐ ܒܰܓܢܽܘܢܶܗ ܠܐ ܥܳܒܽܘܪܐ: ܕܠܶܗ ܝܳܐܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܣܓܺܝܕܳܐ ܘܡܳܪܳܐ ܕܟܽܠ: ܡܶܠܬܳܐ ܡܝܰܩܢܰܬ݀ ܟܽܠ ܘܚܶܟܡܬܳܐ ܕܰܐܒܳܐ ܘܨܶܡܚܳܐ ܘܰܫܘܶܐ ܒܽܐܘܣܺܝܰܐ ܠܝܳܠܽܘܕܶܗ: ܐܰܢ̱ܬ ܕܡ̣ܶܢ ܥܽܘܒܶܗ ܕܰܢܚܶܬ: ܘܡ̣ܶܢ ܒܬܽܘܠܬܳܐ ܒܚܰܪܰܬ݀ ܙܰܒ̈ܢܶܐ ܐ̱ܢܳܫܳܐܝ̣ܬ ܐܶܬܺܝܠܶܕܬ ܠܦܽܘܪܩܳܢ ܟܽܠܗܶܝܢ ܒܶܪ̈ܝܳܬܳܐ ܘܰܕܪܽܘܚܳܐ ܩܰܕܺܝܫܳܐ ܢܦܰܚܬ ܒܬܰܠܡܺܝ̈ܕܶܐ ܒܨܺܝܪ̈ܶܐ: ܘܰܠܚܶܟܡܬܳܐ ܕܚܰܟܺܝ̈ܡܶܐ ܙܟܰܘ: ܘܰܓܢ̱ܒܰܪ̈ܘܳܬܳܐ ܚܰܘܺܝܘ ܒܥܳܠܡܳܐ ܒܚܰܝܠܐ ܙܰܟܳܝܳܐ ܕܝܰܗܒܬ ܠܗܽܘܢ: ܘܡܳܐܢ̈ܶܐ ܠܪܽܘܚܳܐ ܡܰܚܝܳܢܳܐ ܚܰܘܺܝܬ ܐܶܢܽܘܢ: ܘܝܰܬܺܝܪ ܡ̣ܶܢ ܥܒܳ̈ܕܶܐ ܕܰܣܥܰܪܬ ܒܰܡܕܰܒܪܳܢܽܘܬܳܟ ܕܥܰܠ ܐܰܦܰܝ̈ ܦܽܘܪܩܳܢܰܢ ܕܢܶܥܒܕܽܘܢ ܒܰܫܡܳܟ ܐܰܫܠܶܛܬ ܐܶܢܽܘܢ: ܐܰܝܟ ܡܶܠܬܳܟ ܠܐ ܕܰܓܳܠܬܳܐ ܕܶܐܡܰܪܬ ܕܳܐܬܘ̈ܳܬܳܐ ܠܐܝܠܶܝܢ ܕܰܡܗܰܝܡܢܺܝܢ ܒܺܝ ܗܳܠܶܝܢ ܢܳܩ̈ܦܳܢ ܒܫܶܡܝ ܫܺܐܕ̈ܶܐ ܢܰܦܩܽܘܢ ܘܰܚܘܰܘ̈ܳܬܳܐ ܢܶܫܩܠܽܘܢ: ܘܶܐܢ ܣܰܡܳܐ ܕܡܰܘܬܳܐ ܢܶܫܬܽܘܢ ܠܐ ܢܰܗܰܪ ܐܶܢܽܘܢ: ܕܰܠܗܽܘܢ ܠܫܽܘ̈ܘܕܳܥܶܐ ܗܳܠܶܝܢ ܝܰܬܺܝܪ ܦܰܐܝܳܐܝ̣ܬ ܒܢܰܨܺܝܚܳܐ ܕܰܐܬܠܺܝ̈ܛܶܐ ܩܰܕܺܝܫܳܐ ܡܳܪܝ ܡܰܠܟܶܐ ܬܡܺܝܗܳܐܝ̣ܬ ܕܶܝܢ ܐܶܬܚܰܘܺܝܘ: ܗܳܢܳܐ ܕܰܢܩܶܦ ܠܰܫܪܳܪܳܟ ܡ̣ܶܢ ܟܽܠܶܗ ܠܶܒܶܗ ܘܣܳܡ ܐܺܝܕܶܗ ܥܰܠ ܩܺܝܩܢܳܐ ܕܦܰܕܳܢܳܐ ܐܰܘܟܺܝܬ ܨܠܺܝܒܳܐ ܕܺܝܠܳܟ ܡܰܚܝܳܢܳܐ: ܘܰܢܦܰܩ ܒܳܬܪܳܟ ܘܠܐ ܦܢܳܐ ܠܥܳܠܡܳܐ ܘܰܠܨܶܒ̈ܘܳܬܳܐ ܕܺܝܠܶܗ: ܐܶܠܐ ܦܰܠܳܚܳܐ ܟܰܫܺܝܪܳܐ ܘܰܙܪܺܝܙܳܐ ܒܶܐܫܟܳܪܳܐ ܥܺܕܬܳܢܳܝܳܐ ܐܶܬܚܙܺܝ: ܘܰܠܡܰܠܟܽܘܬܳܐ ܫܡܰܝܳܢܺܝܬܳܐ ܐܶܫܬܘܺܝ: ܘܡ̣ܶܢ ܟܽܠܳܗ̇ ܐܰܪܥܳܢܳܝܽܘܬܳܐ ܨܰܠܶܠ ܢܰܦܫܶܗ: ܘܥܰܒܕܳܗ̇ ܡܳܐܢܳܐ ܝܰܩܺܝܪܳܐ ܠܐܝܩܳܪܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܪܳܕܽܘܦܳܐ ܠܰܘ ܠܪܽܘܚܳܐ ܒܺܝܫܬܳܐ ܕܥܳܡܪܳܐ ܐܰܝܟ ܕܰܠܢܶܣܝܳܢܳܐ ܒܒܰܪܢܳܫܳܐ ܠܚܽܘܕ ܐܶܬܚܙܺܝ: ܐܶܠܐ ܘܠܰܫܒܰܥ ܗ̇ܳܢܶܝܢ ܕܗܳܡ̈ܣܳܢ ܘܫܳܘܪ̈ܳܢ ܕܢܶܥܒ̈ܕܳܢ ܐ̱ܚܪܳܝܬܳܐ ܒܺܝ̈ܫܳܢ ܡ̣ܶܢ ܩܰܕ̈ܡܳܝܳܬܳܐ: ܠܟܽܠ ܒܰܪܢܳܫܳܐ ܕܰܣܪܺܝܩ ܘܰܚܡܺܝܡ ܘܰܡܨܰܒܰܬ݀ ܒܫܽܘܒܚܳܐ ܣܪܺܝܩܳܐ ܘܠܰܝܬ ܒܶܗ ܡܢܳܬܳܐ ܡ̣ܶܢ ܕܶܚܠܰܬ ܐܠܰܗܳܐ: ܒܕܰܒܠܐ ܬܰܘܳܢܳܐ ܕܠܶܒܶܗ ܡ̣ܶܢ ܬܶܫܒ̈ܚܳܬܳܐ ܐܰܡܺܝ̈ܢܳܬܳܐ ܕܡܳܪܝܳܐ ܘܠܰܝ̈ܠܰܝ ܐܺܝܡܳܡ ܨܰܠܶܠ ܘܰܡܪܰܩ ܠܚܽܘܫܳܒܰܘ̈ܗܝ ܡ̣ܶܢ ܦܶܗܝܳܐ ܕܰܐܪ̈ܥܳܢܝܳܬܳܐ: ܘܰܐܣܶܢ ܠܢܰܦܫܶܗ ܛܽܘܝܳܒܶܗ ܕܶܐܘܢܓܶܠܝܽܘܢ ܘܰܠܟܽܠܗܽܘܢ ܦܽܘܩ̈ܕܳܢܰܘܗܝ ܡܳܪ̈ܳܢܳܝܶܐ: ܐܰܝܟܰܢܳܐ ܕܳܐܦ ܛܶܠܳܢܺܝܬܶܗ ܡܳܐ ܕܥܰܠ ܫܺܐܕ̈ܶܐ ܥܳܒܪܳܐ ܗܘܳܬ ܡܶܬܛܰܠܩܺܝܢ ܗܘܰܘ: ܗܳܟܰܢܳܐ ܪܳܕܽܘܦܳܐ ܗܘܳܐ ܠܫܶܚܪܳܐ ܕܺܝܠܗܽܘܢ ܗܳܢܳܐ ܓܰܒܝܳܐ ܡܳܪܝ ܡܰܠܟܶܐ: ܕܰܠܣܺܝܥܬܳܐ ܚܕܳܐ ܡ̣ܶܢ ܨܳܡܰܪܬܳܐ ܪܕܰܦ ܗܘܳܐ: ܘܰܠܦܰܚܳܐ ܕܺܝܠܗܽܘܢ ܕܰܚܦܰܪܘ ܕܰܢܛܰܠܩܽܘܢ ܒܶܗ ܠܰܒܢܰܝ̈ܢܳܫܳܐ ܒܚܰܝܠܶܗ ܪܰܒܳܐ ܕܰܨܠܺܝܒܳܐ ܗܦܰܟ ܥܠܰܝܗܽܘܢ: ܘܕܰܝܪܳܐ ܕܬܶܗܘܶܐ ܠܰܥܡܽܘܪܝܳܐ ܕܰܐܬܠܺܝ̈ܛܶܐ ܕܰܡܫܺܝܚܳܐ ܘܥܳܢ̈ܘܳܝܶܐ ܕܕܶܚܠܰܬ݀ ܐܠܰܗܳܐ ܒܳܗ̇ ܐܰܥܡܰܪ: ܘܥܰܒܕܳܗ̇ ܒܶܝܬ ܓܰܘܣܳܐ ܠܰܡܗܰܝ̈ܡܢܶܐ ܘܠܰܟܪ̈ܺܝܗܶܐ ܘܠܐܠܺܝ̈ܨܶܐ ܘܰܠܟܽܠ ܕܡܶܬܕܰܝܘܢܺܝܢ ܦܪܰܩ ܘܫܰܘܙܶܒ: ܒܪܽܘܚܳܐ ܐܰܝܟ ܐܠܶܝܳܐ ܢܒܺܝܳܐ ܐܶܬܚܰܛܰܦ ܠܘܳܬ ܡܰܠܟܳܐ ܙܰܟܳܝܳܐ ܩܽܘܣܛܰܢܛܺܝܢܳܘܣ ܦܪܰܚ ܒܙܰܘܚܳܐ ܕܪܽܘܚܳܐ ܕܠܶܗ ܠܘܶܐ ܗܘܳܐ: ܘܒܰܚܕܳܐ ܫܳܥܳܐ ܠܘܰܥܕܳܐ ܕܰܡܕܺܝܢ̱ܬܳܐ ܩܽܘܣܛܰܢܛܺܝܢܽܘܦܳܠܺܝܣ ܡܛܳܐ: ܘܕܰܟܺܝ ܠܓܰܒܪ̈ܶܐ ܓܰܪ̈ܒܳܢܶܐ ܕܰܦܓܰܥܘ ܒܶܗ: ܘܥܰܠ ܠܦܽܘܠܳܛܺܝܢ ܕܡܰܠܟܳܐ ܒܙܰܘܚܳܐ ܘܒܺܐܝܩܳܪܳܐ: ܘܰܐܣܺܝ ܠܰܛܠܺܝܬܳܐ ܒܰܪܬܶܗ ܕܡܰܠܟܳܐ ܡ̣ܶܢ ܫܺܐܕܳܐ ܕܫܳܚ ܗܘܳܐ ܠܳܗ̇: ܘܰܐܣܺܝ ܬܰܡܳܢ ܟܪ̈ܺܝܗܶܐ ܕܠܐ ܡܶܢܝܳܢܳܐ: ܡܰܢܽܘ ܕܠܐ ܢܶܬܗܰܪ ܒܶܗ ܒܰܐܬܠܺܝܛܳܐ ܕܰܡܠܐܷ ܚܢܳܢܳܐ ܘܳܐܣܘ̈ܳܬܳܐ: ܘܰܠܦܽܘܬ ܟܺܐܒ̈ܶܐ ܕܡܶܬܩܰܪܒܺܝܢ ܗܘܰܘ ܥܽܘܕܪ̈ܳܢܶܐ ܡܶܢܶܗ ܢܳܒܥܺܝܢ: ܡܰܠܽܘܢ ܕܶܝܢ ܡ̣ܶܢ ܡܫܺܝܚܳܐ ܕܒܶܗ ܥܳܡܰܪ ܗܘܳܐ ܘܒܰܫܡܶܗ ܟܽܠ ܚܰܝ̈ܠܐ ܬܡܺܝ̈ܗܶܐ ܣܳܥܰܪ ܗܘܳܐ: ܡܰܢܽܘ ܕܠܐ ܢܶܬܗܰܪ ܒܰܐܬܠܺܝܛܳܐ ܒܥܶܕܳܢܳܐ ܕܒܶܗ ܐܶܣܰܪ ܠܫܺܐܕܳܐ ܡܳܪܽܘܕܳܐ ܘܚܰܒܫܶܗ ܐܰܝܟ ܕܰܠܠܶܣܛܳܝܳܐ ܒܰܐܬܪܳܐ ܥܰܣܩܳܐ ܕܫܳܘܶܐ ܗܘܳܐ ܠܶܗ: ܡܰܢܽܘ ܕܠܐ ܬܳܗܰܪ ܒܥܶܕܳܢܳܐ ܕܰܩܪܳܝܗܝ ܘܰܢܩܶܦ ܠܶܗ ܐܰܝܟ ܥܰܒܕܳܐ ܣܳܢܳܐܐ ܕܥܰܒ̈ܕܰܘܗܝ ܕܰܐܠܳܗܳܐ ܘܰܠܟܽܠ ܡܳܐ ܕܦܳܩܶܕ ܗܽܘ ܣܳܥܰܪ ܗܘܳܐ: ܡܰܢܽܘ ܕܠܐ ܬܳܗܰܪ ܗܘܳܐ ܟܰܕ ܚܳܙܶܐ ܠܩܽܘܣܛܰܢܛܺܝܢܳܘܣ ܡܰܠܟܳܐ ܐܳܦ ܠܰܡܗܰܝ̈ܡܢܶܐ ܕܰܐܝܟ ܥܰܒ̈ܕܶܐ ܥܳܒܪܺܝܢ ܐܰܪ̈ܓܳܠܰܘܗܝ ܘܳܐܙܺܠ̱ܝܢ ܩܕܳܡ ܥܰܒܕܶܗ ܕܰܡܫܺܝܚܳܐ: ܡܰܢܽܘ ܕܠܐ ܬܳܗܰܪ ܗܘܳܐ ܒܥܶܕܳܢܳܐ ܕܰܐܩܺܝܡܶܗ ܠܫܺܐܕܳܐ ܩܕܳܡ ܓܽܘܪܢܳܐ ܘܰܦܩܰܕ ܠܶܗ ܒܰܫܡܶܗ ܕܰܡܫܺܝܚܳܐ ܕܢܶܛܥܢܺܝܗ̇ ܙܗܺܝܪܳܐܝ̣ܬ: ܡܰܢܽܘ ܕܠܐ ܬܳܗܰܪ ܘܡܶܬܕܰܡܰܪ ܗܘܳܐ ܒܥܶܕܳܢܳܐ ܕܰܐܪܺܝܡܳܗ̇ ܫܺܐܕܳܐ ܠܐ ܡܓܰܫܡܳܐ ܠܟܺܐܦܳܐ ܡܓܰܫܰܡܬܳܐ ܘܰܬܠܳܗ̇ ܠܥܶܠ ܒܳܐܐܰܪ ܘܰܩܕܳܡ ܩܰܕܺܝܫܳܐ ܥܳܒܰܪ ܙܗܺܝܪܳܐܝ̣ܬ ܒܙܰܘܥܬܳܐ: ܣܓܺܝܘ ܓܽܘ̈ܕܶܐ ܕܰܡܫܰܒ̈ܚܳܢܶܐ ܬܰܡܳܢ: ܘܟܽܠ ܐ̱ܢܳܫ ܐܰܘܪܶܒ ܒܗܰܘ ܥܶܕܳܢܳܐ ܠܩܰܕܺܝܫܳܐ ܘܰܠܡܳܪܶܗ ܕܝܰܗܒ ܠܶܗ ܙܳܟܽܘܬܳܐ: ܓܽܘ̈ܕܶܐ ܕܡܰܠܐܟ̈ܶܐ ܚܳܕܶܝܢ ܗܘܰܘ ܬܰܡܳܢ: ܕܗ̇ܰܘ ܕܰܥܒܰܕܕܳܗ̇ ܠܰܒܪܺܝܬܳܐ ܒܨܶܢ̈ܥܳܬܶܗ ܗܘܳܐ ܥܰܒܕܳܐ ܠܥܰܒܕܶܗ ܕܰܡܫܺܝܚܳܐ: ܗܰܠܶܠܘ ܥܺܝܪ̈ܶܐ ܬܰܡܳܢ ܕܰܟܡܺܝܪܺܝܢ ܗܘܰܘ ܥܰܠ ܒܢ̈ܰܝ ܓܶܢܣܰܢ ܕܰܫܒܳܐ ܐܶܢܽܘܢ ܣܳܛܳܢܳܐ: ܘܶܐܫܟܰܚ ܐܶܢܽܘܢ ܪܳܥܝܳܐ ܛܳܒܳܐ: ܘܗܳܐ ܗܳܦܟܺܝܢ ܡܫܰܢܩܺܝܢ ܠܶܗ ܒܰܫܡܶܗ ܕܒܰܪ ܡܳܪܗܽܘܢ: ܘܡܶܫܬܰܥܶܝܢ ܒܶܗ ܝܰܠܕܶܝ̈ܗ̇ ܕܡܰܥܡܽܘܕܺܝܬܳܐ ܩܰܕܺܝܫܬܳܐ ܬܰܠܡܺܝ̈ܕܰܘܗܝ ܕܰܡܫܺܝܚܳܐ ܒܓܳܪܣܳܐ ܕܫܳܚܶܩ ܗܘܳܐ ܠܗܽܘܢ: ܘܗܳܐ ܡܕܰܝܫܺܝܢ ܠܶܗ ܬܚܶܝܬ ܥܶܩ̈ܒܶܐ ܕܺܝܠܗܽܘܢ ܒܚܰܝܠܐ ܙܰܟܳܝܳܐ ܕܙܰܟܺܝ ܐܶܢܽܘܢ: ܘܟܽܠܗܽܘܢ ܟܶܢ̈ܫܶܐ ܕܶܐܬܟܰܢܰܫܘ ܠܰܚܙܳܬܳܐ ܬܡܺܝܗܬܳܐ ܐܰܘܕܺܝܘ ܬܰܡܳܢ ܘܰܣܓܶܕܘ ܠܛܽܘܒܳܢܳܐ ܒܕܶܚܠܬܳܐ: ܘܰܗܦܰܟ ܗ̣ܽܘ ܘܒܰܪܶܟ ܐܶܢܽܘܢ ܒܪܶܚܡܬܳܐ ܘܰܦܢܰܘ ܠܒ̈ܳܬܶܐ ܕܺܝܠܗܽܘܢ ܟܰܕ ܛܥܺܝܢܺܝܢ ܙܘ̈ܳܕܶܐ ܘܒܽܘܪ̈ܟܳܬܳܐ ܒܩ̈ܳܠܐ ܕܩܽܘܒܳܠܛܰܝܒܽܘܬܳܐ: ܘܰܒܟܽܠܳܗ̇ ܐܽܘܪܚܶܗ ܚܰܝ̈ܠܐ ܣܳܥܰܪ ܗܘܳܐ ܕܠܐ ܡܶܬܡܰܠܠܺܝܢ ܘܰܐܣܺܝ ܠܟܺܐܒ̈ܬܳܢܶܐ ܕܒܰܩܪܺܝܬܳܐ ܡܰܚܪܰܡܬܳܐ ܘܶܐܙܰܠ ܒܬܶܕܡܽܘܪܬܳܐ: ܘܰܗܦܰܟ ܒܣܳܥܽܘܪܽܘܬܳܐ: ܘܡܰܢܰܥ ܠܕܰܝܪܶܗ ܒܰܫܠܳܡܳܐ: ܘܣܳܡܶܗ ܠܓܽܘܪܢܳܐ ܡ̣ܶܢ ܫܺܐܕܳܐ ܕܬܶܗܘܶܐ ܐܳܬܳܐ ܠܕܳܪ̈ܶܐ ܕܳܐܬܶܝܢ ܠܫܽܘܪܳܪ ܬܡܺܝ̈ܗܳܬܶܗ ܘܛܰܪܕܶܗ ܠܫܺܐܕܳܐ ܐܰܝܟ ܕܰܠܟܰܠܒܳܐ ܡ̣ܶܢ ܦܢܺܝܬ ܕܰܝܪܶܗ: ܘܚܰܬܡܳܗ̇ ܒܰܨܠܺܝܒܳܐ ܚܰܝܳܐ ܕܠܐ ܬܽܘܒ ܢܶܟܡܰܢ ܥܰܠ ܬܰܠܡܺܝ̈ܕܰܘܗܝ: ܘܗܳܐ ܚܳܕܶܝܢ ܘܕܳܝܨܺܝܢ ܠܩܽܘܒܠܶܗ ܒܪܶܚܡܬܳܐ: ܘܰܡܥܰܕܥܕܺܝܢ ܠܝܰܘܡܳܐ ܕܥܰܕܥܺܐܕܶܗ ܒܰܦܨܺܝܚܽܘܬܳܐ: ܘܒܰܪܘܳܙܳܐ ܕܠܶܒܳܐ ܡܰܙܥܩܺܝܢ ܟܰܕ ܐܳܡܪܺܝܢ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܡܳܪܝ ܡܰܠܟܶܐ ܕܟܰܠܠܳܟ ܡܳܪܳܟ ܒܰܟܠܺܝܠܐ ܠܐ ܡܶܬܚܰܒܠܳܢܳܐ: ܠܳܟ ܛܽܘܒܰܝܟ ܡܳܪܝ ܩܽܘܠܳܙܡܳܝܳܐ ܕܰܡܠܶܟ ܡܰܠܟ̈ܶܐ ܐܰܘܪܶܒ ܠܰܫܡܳܟ ܒܟܽܠܳܗ̇ ܥܳܡܰܪܬܳܐ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܰܠܡܺܐܢܳܐ ܗܘܳܬ݀ ܕܰܝܪܳܟ ܠܰܟܪ̈ܺܝܗܶܐ ܘܰܐܠܺܝ̈ܨܶܐ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܡܳܪܝ ܡܰܠܟܶܐ ܕܢܶܒܥܳܐ ܕܡܰܪܕܶܐ ܥܽܘܕܪ̈ܳܢܶܐ ܗܘܰܝܬ ܠܡܰܟܰܐܒ̈ܶܐ ܘܰܡܛܰܪ̈ܦܶܐ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܡܳܪܝ ܡܰܠܟܶܐ ܕܥܰܡ̈ܡܶܐ ܡ̣ܶܢ ܟܽܠ ܦܶܢ̈ܝܳܢ ܐܳܬܶܝܢ ܠܰܡܝܰܩܳܪܽܘ ܠܝܰܘܡܳܐ ܦܰܐܝܳܐ ܕܕܽܘܟܪܳܢܳܟ ܘܡܶܬܒܰܪܟܺܝܢ ܡ̣ܶܢ ܣܺܝܡܰܬ݀ ܓܰܪ̈ܡܰܝܟ: ܐܳܦ ܡܶܬܓܰܘܣܺܝܢ ܒܰܨܠܰܘ̈ܳܬܳܟ ܘܡܶܬܟܰܫܦܺܝܢ ܠܰܡܫܺܝܚܳܐ ܕܰܒܝܰܕ ܒܳܥ̈ܘܳܬܳܟ ܢܫܰܟܶܢ ܠܗܽܘܢ ܢܝܳܚܬܳܐ ܕܡ̣ܶܢ ܛܽܘܪ̈ܳܦܶܐ: ܘܰܓܗܳܝܬܳܐ ܕܡ̣ܶܢ ܫܰܒܳܝ̈ܶܐ: ܘܥܰܡ ܗܳܠܶܝܢ ܢܶܫܬܘܶܐ ܠܡܰܦܩܳܢܳܐ ܡܫܰܝܢܳܐ ܘܰܠܡܰܓܠܐܷ ܐܰܦ̈ܶܐ ܕܰܩܕܳܡܰܘܗܝ ܒܝܰܘܡܳܐ ܕܕܳܢܚܳܐ ܪܰܒܽܘܬܶܗ ܘܰܢܚܰܣܶܐ ܠܰܢ ܒܽܘܨܳܪ̈ܰܝܢ ܒܰܡܪܰܚܡܳܢܽܘܬܶܗ: ܘܰܢܢܺܝܚ ܘܰܢܚܰܣܶܐ ܠܥܰܢܺܝ̈ܕܰܝܢ ܕܰܫܟܶܒܘ ܥܰܠ ܣܰܒܪܶܗ: ܐܰܝܟܰܢܳܐ ܕܟܽܠܰܢ ܒܰܚܕܳܐ ܟܢܺܝܫܽܘܬܳܐ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܗܘܺܝ ܚܠܳܦܰܝܢ ܡܦܺܝܣܳܢܳܐ ܠܡܳܪܳܟ ܓܰܒܝܳܐ ܡܳܪܝ ܡܰܠܟܶܐ: ܕܢܶܬܪܰܥܶܐ ܠܰܢ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܕܙܰܝܰܚܢܰܢ ܥܰܕܥܺܐܕܳܟ ܒܥܺܕܬܳܐ ܩܰܕܺܝܫܬܳܐ: ܕܰܢܩܰܒܶܠ ܦܺܝܪܡܰܢ ܘܢܰܥܒܰܪ ܡܶܢܰܢ ܡܰܚ̈ܘܳܬܳܐ ܡܫܺܝ̈ܡܳܢܝܳܬܳܐ ܘܢܶܛܪܽܘܕ ܡ̣ܶܢ ܟܶܢܫܰܢ ܠܪ̈ܽܘܚܶܐ ܛܰܢ̈ܦܳܬܳܐ: ܘܰܢܫܰܘܙܶܒ ܠܰܢ ܡ̣ܶܢ ܟܽܠܗܶܝܢ ܣܰܩܽܘܒ̈ܠܳܝܳܬܳܐ: ܘܢܰܫܦܰܥ ܥܠܰܝܢ ܒܽܘܪ̈ܟܳܬܳܐ ܫܡܰܝܳܢ̈ܝܳܬܳܐ ܘܡ̣ܶܢ ܐܰܪܥܳܐ ܛܳܒ̈ܳܬܳܐ: ܕܰܕܠܐ ܫܶܠܝܳܐ ܢܫܰܒܰܚ ܠܶܗ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

 

 

ܚܘܬܡܐ

 

 

 

ܡܳܪܝܳܐ ܐܠܰܗܳܐ ܕܚܰܝܶܠ ܠܓܰܒܝܳܐ ܡܳܪܝ ܡܰܠܟܶܐ: ܐܰܢ̱ܬ ܒܪ̈ܰܚܡܰܝܟ ܣܰܓܺܝ̈ܶܐܐ ܚܰܝܶܠ ܘܣܰܝܰܥ ܠܰܢ: ܘܗܰܒ ܠܰܢ ܕܰܢܕܽܘܫ ܠܨܶܢ̈ܥܳܬܶܗ ܕܳܐܟܶܠܩܰܪܨܳܐ ܘܚܰܕܳܐ ܠܰܢ ܒܥܰܕܥܺܐܕܶܗ ܕܰܪܚܽܘܡܳܟ ܘܙܰܗܳܐ ܠܟܳܗ̈ܢܰܝܢ ܘܢܰܟܶܦ ܠܰܡܫܰܡ̈ܫܳܢܰܝܢ ܘܰܣܡܽܘܟ ܠܣܳܒܰܝ̈ܢ: ܘܢܰܛܰܪ ܠܟܽܠܶܗ ܟܶܢܫܰܢ: ܘܰܐܢܺܝܚ ܠܥܰܢܺܝ̈ܕܰܝܢ ܒܝܰܕ ܨܠܰܘ̈ܳܬܶܗ ܕܰܡܢܺܝܚܳܢܳܟ ܡܳܪܝ ܡܰܠܟܶܐ: ܡܳܪܰܢ ܘܰܐܠܳܗܳܢ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܚܰܘܝܶܗ ܠܡܳܪܝ ܐܰܘܓܺܝܢ ܓܰܒܝܳܐ ܘܪܺܝܫ ܣܺܝܥܬܳܐ ܕܫܰܒܥܺܝܢ ܘܰܬܪܶܝܢ ܥܰܡܽܘ̈ܕܶܐ ܢܰܗܺܝܪ̈ܶܐ ܕܰܐܦܢܺܝܘ ܠܥܰܡ̈ܡܶܐ ܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ: ܠܗܰܘ ܕܬܰܠܡܶܕ: ܘܰܐܥܡܶܕ ܒܶܝܬ ܐܺܝܕܰܘ̈ܗܝ ܥܰܡ̈ܡܶܐ ܕܠܐ ܡܶܢܝܳܢ: ܠܗܰܘ ܕܚܰܘܝܶܗ ܢܰܗܺܝܪܳܐ: ܗ̇ܰܘ ܕܰܐܢܗܰܪ ܠܟܽܠܗܽܘܢ ܚܶܫܽܘ̈ܟܶܐ ܡ̣ܶܢ ܢܽܘܗܪܳܐ ܕܝܽܘܠܦܳܢܶܗ: ܠܗܰܘ ܕܣܳܡܶܗ ܠܶܗ ܘܰܠܬܰܠܡܺܝ̈ܕܰܘܗܝ ܒܶܝܬ ܓܰܘܣܳܐ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܕܰܩܒܰܥܘ ܒܳܗ̇ ܒܡܰܕܢܚܳܐ: ܛܳܒܳܐ ܕܠܶܗ ܢܶܬܕܟܰܪ: ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣܶܗ ܕܙܰܟܳܝܳܐ ܡܳܪܝ ܐܰܘܓܺܝܢ ܩܳܪܒܺܝܢܰܢ: ܘܰܠܥܺܐܕܶܗ ܚܰܕܽܘܬܳܢܳܝܳܐ ܡܫܰܡܠܶܝܢܰܢ ܒܢܽܘܨܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܢܰܨܪܺܝܢܰܢ ܘܳܐܡܪܺܝܢܰܢ: ܗܳܢܳܐ ܡܳܪܝ ܐܰܘܓܺܝܢ ܥܰܡܽܘܕܳܐ ܪܰܒܳܐ ܕܰܒܝܰܡܳܐ ܕܡܰܣܶܩ ܗܘܳܐ ܡܰܪ̈ܓܳܢܝܳܬܳܐ ܝܰܩܺܝܪ̈ܳܬ݀ ܕܡܰܝ̈ܳܐ ܘܰܡܢܺܝܚ ܗܘܳܐ ܠܐܟܣ̈ܢܳܝܶܐ ܘܡܶܣ̈ܟܺܢܶܐ ܘܥܰܝܺܝ̈ܩܰܝ ܪܽܘܚܳܐ: ܗܳܢܳܐ ܕܰܨܒܳܐ ܡܳܪܝܳܐ ܡܪܰܚܡܳܢܳܐ ܕܢܶܗܘܶܐ ܪܺܝܫ ܣܺܝܥܬܳܐ ܫܰܒܥܺܝܢܳܝܬܳܐ: ܘܡ̣ܶܢ ܕܰܝܪܳܐ ܕܒܶܝܬ ܦܰܟܽܘܡ ܪܕܰܘ ܘܶܐܬܰܘ: ܘܫܰܪܺܝܘ ܒܦܽܘܠܚܳܢܳܐ ܫܠܺܝܚܳܝܳܐ: ܗܳܢܳܐ ܕܡ̣ܶܢ ܬܰܡܳܢ ܫܰܪܺܝ ܒܟܽܘܢܳܫܳܐ ܕܓܰܒܪ̈ܶܐ ܙܪ̈ܺܝܙܶܐ ܘܡܰܩܪ̈ܒܳܢܶܐ ܕܥܰܡ ܫܺܐܕ̈ܶܐ ܗܳܢܳܐ ܕܡ̣ܶܢ ܡܶܨܪܶܝܢ ܐܶܬܘܰܥܰܕ ܓܰܒܪ̈ܶܐ ܕܥܰܡܶܗ ܘܰܡܛܰܘ ܠܡܰܕܢܚܳܐ: ܘܟܰܕ ܪܳܕܶܝܢ ܒܽܐܘܪܚܳܐ ܣܥܰܪܘ ܐܳܬܘ̈ܳܬܳܐ ܬܡܺܝ̈ܗܳܬܳܐ ܒܟܽܠܗܽܘܢ ܐܠܰܝ̈ܨܶܐ ܕܰܦܓܰܥܘ ܒܗܽܘܢ: ܗܳܢܳܐ ܕܟܰܕ ܡܛܳܐ ܥܰܡ ܣܺܝܥܬܳܐ ܕܺܝܠܶܗ ܠܛܽܘܪܳܐ ܕܺܐܝܙܠܐ ܬܰܠܡܶܕܘ ܘܰܐܥܡܶܕܘ ܠܥܽܘܡܪ̈ܳܝ ܛܽܘܪ̈ܶܐ ܕܺܐܝܙܠܐ ܘܟܽܠܗܽܘܢ ܚܰܢ̈ܦܶܐ ܕܰܒܗܰܘ ܐܰܬܪܳܐ: ܘܰܗܘܰܘ ܟܪ̈ܺܝܣܛܝܳܢܶܐ ܫܰܪܺܝܪ̈ܶܐ ܘܰܒܢܰܘ ܥܺܕ̈ܳܬܳܐ ܘܕܰܝܪ̈ܳܬܳܐ ܘܥܽܘܡܪ̈ܶܐ: ܘܰܗܘ̈ܰܝ ܒܶܝܬ ܓܰܘܣܳܐ ܘܰܠܡܺܐܢܳܐ ܠܟܽܠܗܽܘܢ ܐ̱ܢܳܫ̈ܳܐ ܡܗܰܝ̈ܡܢܶܐ: ܗܳܢܳܐ ܕܰܗܘܳܐ ܡܕܺܝܢ̱ܬܳܐ ܕܒܶܝܬ ܫܽܘܘܙܳܒܳܐ ܠܟܽܠ ܪ̈ܕܺܝܦܶܐ ܘܰܐܠܺܝ̈ܨܶܐ ܕܶܐܬܓܰܘܰܣܘ ܒܶܗ: ܗܳܢܳܐ ܕܦܰܠܓܳܗ̇ ܗܘܳܐ ܠܟܽܠܳܗ̇ ܡܰܕܢܚܳܐ ܒܰܝܢܳܬ ܬܰܠܡܺܝ̈ܕܰܘܗܝ ܓܒܰܝ̈ܳܐ ܕܰܢܬܰܠܡܕܽܘܢܳܗ̇ ܘܢܶܥܩܪܽܘܢ ܡܶܢܳܗ̇ ܚܰܢܦܽܘܬܳܐ ܘܝܽܘܠܦܳܢܳܐ ܕܛܽܘܥܝܰܝ: ܘܰܐܦܢܺܝܘ ܘܰܐܥܡܶܕܘ ܠܟܽܠܗܽܘܢ ܥܰܡ̈ܡܶܐ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܢܳܐ ܕܩܰܒܶܠ ܐ̱ܪ̈ܳܙܰܝ ܢܒܺܝܽܘܬܳܐ ܥܰܠ ܙܰܒ̈ܢܶܐ ܘܡܰܠܟ̈ܶܐ: ܘܚܰܘܺܝ ܥܬܺܝ̈ܕܳܬܳܐ ܠܕܳܪ̈ܶܐ ܕܳܐܬܶܝܢ: ܗܳܢܳܐ ܕܰܗܘܳܐ ܡܰܒܽܘܥܳܐ ܕܡܰܪܕܶܐ ܚܰܝ̈ܶܐ ܠܟܽܠܶܗ ܥܳܠܡܳܐ: ܘܟܽܠ ܕܶܐܫܬܺܝ ܡ̣ܶܢ ܚܰܠܝܽܘܬܶܗ ܠܐ ܨܗܺܝ: ܗܳܢܳܐ ܕܚܰܘܺܝ ܠܡܰܠܟ̈ܶܐ ܐܽܘܪܚܳܐ ܕܰܫܪܳܪܳܐ: ܘܰܐܣܺܝ ܠܟܽܠ ܟܪ̈ܺܝܗܶܐ ܘܰܐܠܺܝ̈ܨܶܐ ܘܶܐܬܩܰܪܰܒܘ ܠܶܗ: ܗܳܢܳܐ ܕܰܗܘܳܐ ܐܰܝܟ ܙܰܠܺܝܩܳܐ ܢܽܘܗܪܳܢܳܝܳܐ ܘܰܐܨܡܰܚ ܗܘܳܐ ܠܟܽܠܶܗ ܥܳܠܡܳܐ ܒܙܰܠܓ̈ܶܐ ܕܝܽܘܠܦܳܢܶܗ ܐܠܰܗܳܝܳܐ: ܘܟܰܕ ܠܰܫܠܳܡܶܗ ܩܰܕܺܝܫܳܐ ܟܽܠܰܢ ܣܳܘܚܺܝܢܰܢ ܘܩܳܥܶܝܢܰܢ ܘܳܐܡܪܺܝܢܰܢ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܣܳܒܳܐ ܐܺܝܓܽܘܦܛܳܝܳܐ ܕܰܒܡܰܪ̈ܓܳܢܝܳܬܳܟ ܥܺܕܬܳܐ ܩܰܕܺܝܫܬܳܐ ܐܶܬܪܰܡܪܡܰܬ݀: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܐܺܝܓܽܘܦܛܳܝܳܐ ܕܰܙܟܰܝܬ ܠܢܽܘܪܳܐ ܡܫܰܠܗܰܒܬܳܐ ܘܰܬܗܰܪܘ ܚܰܙܳܝ̈ܶܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܐܺܝܓܽܘܦܛܳܝܳܐ ܕܰܓܒܰܝܬ ܠܫܰܒܥܺܝܢ ܘܰܬܪܶܝܢ ܥܰܡܽܘ̈ܕܶܐ ܕܰܐܦܢܺܝܘ ܠܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܐܺܝܓܽܘܦܛܳܝܳܐ ܕܰܪܕܰܝܬ ܡ̣ܶܢ ܡܶܨܪܶܝܢ ܘܡܰܢܰܥܬ ܠܰܢܨܺܝܒܺܝܢ ܘܰܣܠܶܩܬ ܘܰܥܡܰܪܬ ܒܛܽܘܪܳܐ ܕܺܐܝܙܠܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܕܰܒܢܰܝܬ ܠܥܽܘܡܪ̈ܶܐ ܘܕܰܝܪ̈ܳܬܳܐ ܒܰܦܢܺܝܬ ܡܰܕܒܚܳܐ ܐܰܝܟ ܟܰܘܟ̈ܒܰܝ ܫܡܰܝܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܐܺܝܓܽܘܦܛܳܝܳܐ ܕܗܰܠܶܟܬ ܥܰܠ ܡܰܝ̈ܳܐ ܘܦܰܨܺܝܬ ܠܐܱܠܦ̈ܶܐ ܘܪ̈ܶܒܘܳܬܳܐ ܡ̣ܶܢ ܛܽܘܒܳܥܳܐ ܕܰܚܛܺܝܬܳܐ: ܘܰܒܛܽܘܪܳܐ ܪܳܡܳܐ ܕܩܰܪܕܽܘ ܐܰܣܓܺܝܬ ܛܳܒ̈ܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܐܺܝܓܽܘܦܛܳܝܳܐ ܕܰܒܢܰܝܬ ܥܺܕܬܳܐ ܒܕܽܘܟܰܬ݀ ܟܶܐܘܺܝܠܐ ܘܰܐܦܢܺܝܬ ܐܶܢܽܘܢ ܠܩܰܪ̈ܕܘܳܝܶܐ ܠܐܘܪܚܳܐ ܕܰܫܪܳܪܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܕܰܐܚܺܝܬ ܬܠܳܬ ܡܺܝ̈ܬܶܐ ܒܗܳܕܶܐ ܦܢܺܝܬܳܐ ܘܰܐܦܢܺܝܬ ܠܛܳܥܰܝ̈ܳܐ ܠܗܰܝܡܳܢܽܘܬܳܐ ܕܰܫܪܳܪܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܣܳܒܳܐ ܡܫܰܒܚܳܐ ܘܰܗܕܺܝܪܳܐ: ܘܟܰܕ ܠܰܫܠܳܡܳܟ ܠܐ ܡܰܘܦܶܝܢܰܢ ܠܘܳܬ ܛܽܘ̈ܒܰܝܟ ܛܽܘܒ̈ܬܳܢܶܐ ܚܳܒܨܺܝܢܰܢ: ܘܥܰܡ ܚܰܕܽܘܬܳܐ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܪܺܝܫ ܣܺܝܥܬܳܐ ܗ̇ܳܝ ܫܰܒܥܺܝܢܳܝܬܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܕܫܰܒܥܺܝܢ ܦܽܘܡܺܝ̈ܢ ܘܠܶܫܳܢܺܝ̈ܢ ܠܐ ܣܳܦܩܺܝܢ ܠܛܽܘܒܳܟ ܪܰܒܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܪܳܥܝܳܐ ܥܺܝܪܳܐ ܕܕܰܒܰܪ ܠܥܳܢ̈ܶܗ ܥܰܠ ܡܰܪ̈ܓܶܐ ܪ̈ܽܘܚܳܢܳܝܶܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܦܳܥܠܐ ܟܰܫܺܝܪܳܐ ܕܰܦܠܰܚ ܒܟܰܪܡܳܐ ܕܡܳܪܶܗ ܒܟܰܟܪ̈ܶܐ ܥܣܺܝܪ̈ܳܝܳܬܳܐ ܐ̱ܪܳܙܳܢܳܐܝ̣ܬ ܐܳܦ ܪܽܘܚܳܢܳܐܝ̣ܬ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܪܺܝܫܳܐ ܪܰܒܳܐ ܘܟܳܪܽܘܙܳܐ ܡܫܰܒܚܳܐ ܕܳܐܦ ܬܰܠܡܺܝ̈ܕܰܝܟ ܐܰܝܟ ܫܠܺܝ̈ܚܶܐ ܐܰܦܢܺܝܘ ܠܛܳܥܰܝ̈ܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܡܶܨܪܳܝܳܐ ܚܰܕ ܡ̣ܶܢ ܥܰܡܽܘ̈ܕܶܐ ܕܰܐܟܬܒ ܩܽܘܣܛܰܢܛܺܝܢܳܘܣ ܡܰܠܟܳܐ ܙܰܟܳܝܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܪܺܝܫܳܐ ܪܰܒܳܐ ܕܦܰܪܣܺܝܬ ܠܟܽܠ ܐܶܪ̈ܶܣܺܝܣ ܫܰܩܳܪ̈ܳܬܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܕܡܰܢܥܰܬ݀ ܐܠܶܦܳܟ ܠܰܠܡܺܐܝܢ ܚܰܝ̈ܶܐ: ܐܶܠܐ ܐܰܢ̱ܬ ܚܽܘܪ ܒܰܢ ܒܥܰܝܢܳܐ ܕܪ̈ܰܚܡܶܐ: ܘܫܰܕܰܪ ܠܰܢ ܡ̣ܶܢ ܠܘܳܬ ܡܳܪܳܟ ܟܽܠ ܛܳܒ̈ܳܬܳܐ ܘܒܽܘܪ̈ܟܳܬܳܐ: ܘܰܐܛܶܠ ܥܠܰܝܢ ܝܰܡܺܝܢܳܟ ܗ̇ܳܝ ܕܒܳܗ̇ ܒܰܪܶܟܬ ܠܟܽܠܗܽܘܢ ܒܢ̈ܰܝ ܡܰܪܥܺܝܬܳܟ: ܐܰܣܳܐ ܠܐܝܠܶܝܢ ܕܰܟܪܺܝܗܺܝܢ: ܐܰܚܠܶܡ ܠܐܝܠܶܝܢ ܕܰܡܚܺܝܠܺܝܢ: ܢܶܗܘܶܐ ܠܰܢ ܝܰܘܡܶܗ ܕܕܽܘܟܪܳܢܳܟ ܥܺܐܕܳܐ ܪܰܒܳܐ ܘܥܰܕܥܺܐܕܳܐ ܦܨܺܝܚܳܐ: ܫܰܝܢܰܢ ܟܰܗܺܝܢܳܐܝ̣ܬ ܢܶܪܕܶܐ ܒܰܨܠܰܘ̈ܳܬܳܟ: ܥ̈ܰܠܠܳܬܰܢ ܢܶܫܬܰܪ̈ܬܚܳܢ ܒܝܰܕ ܒܳܥ̈ܘܳܬܳܟ ܕܰܠܘܳܬ ܡܳܪܳܟ: ܘܰܨܠܰܘ̈ܳܬܰܢ ܒܺܐܝ̈ܕܰܝܟ ܢܶܬܩܰܒ̈ܠܳܢ: ܘܥܰܠ ܟܽܠܰܢ ܘܟܽܠܶܗ ܟܶܢܫܰܢ ܕܚܳܕܶܐ ܒܝܽܘܡ ܕܽܘܟܪܳܢܳܟ ܢܺܐܬܶܐ ܚܢܳܢܳܐ ܘܪ̈ܰܚܡܶܐ ܡ̣ܶܢ ܒܶܝܬ ܓܰܙܶܗ ܕܡܳܪܳܟ: ܘܰܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܦܪܰܫܘ ܡ̣ܶܢ ܒܰܝܢܳܬܰܢ: ܘܟܽܠܰܢ ܢܰܣܶܩ ܫܽܘܒܚܳܐ ܠܐܒܳܐ ܡܚܰܝܠܳܢܳܟ: ܘܠܰܒܪܳܐ ܡܢܰܨܚܳܢܳܟ: ܘܰܠܪܽܘܚܳܐ ܩܰܕܺܝܫܳܐ ܡܟܰܠܠܳܢܳܟ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܰܣܳܐ ܡܳܪܝܳܐ ܒܛܰܝܒܽܘܬܳܟ ܟܺܐܒ̈ܶܐ ܡܫܺܝ̣̈ܡܳܢܶܐ ܕܢܰܦ̈ܫܳܬܰܢ ܒܝܰܕ ܨܠܰܘ̈ܳܬܶܗ ܕܓܰܒܝܳܐ ܡܳܪܝ ܡܰܠܟܶܐ ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܰܢ: ܘܰܐܥܒܰܪ ܘܒܰܛܶܠ ܡܶܢܰܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܫܰܗܳܐ ܠܚܰܫ̈ܶܐ ܡܰܚܛܝ̈ܳܢܶܐ ܡ̣ܶܢ ܠܶܒܰܘ̈ܳܬܰܢ: ܘܩܰܕܶܫ ܦܰܓܪ̈ܰܝܢ ܘܢܰܦ̈ܫܳܬܰܢ: ܘܰܐܢܺܝܚ ܠܥܰܢܺܝ̈ܕܶܐ ܕܰܥܢܰܕܘ ܡ̣ܶܢ ܒܰܝܢܳܬܰܢ: ܡܳܪܰܢ ܘܰܐܠܳܗܳܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܡܰܠܐܟ̈ܶܐ ܕܰܥܒܰܕ ܠܶܗ ܡ̣ܶܢ ܒܢܰܝ̈ܢܳܫܳܐ ܡܫܰܒ̈ܚܳܢܶܐ ܐܰܝܟ ܡܰܠܐܟ̈ܶܐ: ܘܚܰܘܺܝ ܒܥܳܠܡܳܐ ܐ̱ܢܳܫ̈ܳܐ ܢܰܗܺܝܪ̈ܶܐ ܡܥܰܠܰܝ̈ܳܐ ܘܢܺܝ̣̈ܚܶܐ: ܠܗܰܘ ܕܰܐܕܢܰܚ ܒܡܳܪܝ ܡܰܠܟܶܐ ܚܰܝܠܐ ܟܰܣܝܳܐ ܕܰܐܠܳܗܽܘܬܶܗ ܦܟܰܪ ܠܫܺܐܕ̈ܶܐ ܒܡܶܠܬܳܐ ܡܫܰܠܰܛܬܳܐ ܘܰܟܕܰܢ ܐܶܢܽܘܢ ܒܢܺܝܪܳܐ ܡܫܰܥܒܕܳܐ ܕܥܰܒܕܽܘܬܳܐ: ܠܗܰܘ ܕܚܰܘܝܶܗ ܠܡܳܪܝ ܡܰܠܟܶܐ ܩܕܳܡ ܡܰܠܟܳܐ ܙܰܟܳܝܳܐ ܘܰܡܗܰܝܡܢܳܐ ܕܒܽܘܙܰܢܛܺܝܰܐ ܒܰܪܦܳܦ ܥܰܝܢܳܐ ܩܰܠܺܝܠܐ ܘܰܐܣܺܝ ܠܒܰܪܬܶܗ ܕܡܰܠܟܶܐ: ܘܠܰܟܪ̈ܺܝܗܶܐ ܘܠܐܠܺܝ̈ܨܶܐ ܕܺܐܝܬ ܗܘܳܐ ܒܰܡܕܺܝܢ̱ܬܳܐ ܘܝܰܗܒܘ ܫܽܘܒܚܳܐ ܠܡܳܪܝܳܐ ܟܽܠܗܽܘܢ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣܰܘ̈ܗܝ ܕܡܳܪܝ ܡܰܠܟܶܐ ܩܽܘܠܳܙܡܳܝܳܐ ܡܢܰܨܪܺܝܢܰܢ: ܘܰܒܣܺܝܥܬܳܐ ܗ̇ܳܝ ܐܠܰܗܳܝܬܳܐ ܘܰܛܒܺܝܒܬܳܐ ܕܒܶܝܬ ܡܳܪܝ ܐܰܘܓܺܝܢ ܚܳܠܶܗ ܕܩܰܕܺܝܫܳܐ ܡܳܪܝ ܡܰܠܟܶܐ ܡܰܨܕܺܝܢܰܢ: ܒܥܰܝܢܳܐ ܢܰܗܺܝܪܬܳܐ ܕܢܰܦܫܳܐ ܚܳܙܶܝܢܰܢ: ܘܰܒܒܰܪܬ ܩܳܠܐ ܕܰܘܺܝܕܳܝܬܳܐ ܡܙܰܡܪܺܝܢܰܢ ܘܳܐܡܪܺܝܢܰܢ: ܐܳܘ ܛܽܘܪܳܐ ܪܳܡܳܐ ܘܺܐܝܙܠܳܝܳܐ ܛܽܘܪ ܣܺܝܥܬܳܐ ܐܠܰܗܳܝܬܳܐ ܕܫܰܒܥܺܝܢ ܘܰܬܪܶܝܢ ܡܣܰܒܪ̈ܳܢܶܐ ܬܰܠܡܺܝ̈ܕܶܐ ܐܠܰܗܳܝ̈ܶܐ: ܕܰܐܦܢܺܝܘ ܠܥܰܡ̈ܡܶܐ ܡ̣ܶܢ ܚܶܫܽܘܟܳܐ ܕܚܰܢܦܽܘܬܳܐ ܘܝܰܬܺܝܪ ܡ̣ܶܢ ܚܰܒܪ̈ܰܘܗܝ ܐܶܬܚܙܺܝ ܡܳܪܝ ܡܰܠܟܶܐ ܩܽܘܠܳܙܡܳܝܳܐ: ܗܳܢܳܐ ܕܡ̣ܶܢ ܨܶܝܕ ܪܰܒܳܐ ܐܳܦ ܡܰܠܦܳܢܳܐ ܕܺܝܠܶܗ ܡܳܪܝ ܫܡܽܘܐܶܝܠ ܐܶܬܬܰܪܬܺܝ ܒܺܝܕܰܥܬܳܐ ܐܠܰܗܳܝܬܳܐ: ܥܰܡ ܐܰܚܽܘܗܝ ܡܳܪܝ ܐܠܶܝܫܳܥ: ܘܟܰܕ ܒܰܐܒܳܗ̈ܶܐ ܘܓܶܢܣܳܐ ܠܐ ܐܶܬܦܟܰܪ: ܘܠܐ ܚܽܘܒܳܐ ܕܩܶܢܝ̈ܳܢܶܐ ܥܰܘܟܶܗ: ܐܶܬܕܰܪܰܓ ܒܡܰܣ̈ܩܳܬܳܐ ܕܕܽܘܒܳܪ̈ܶܐ ܐܰܢܛܽܘ̈ܢܺܝܣܳܝܶܐ ܘܡ̣ܶܢ ܗܳܪܟܳܐ ܛܪܰܕ ܠܡܰܥܡܪܳܐ ܕܫܺܐܕ̈ܶܐ ܛܰܡ̈ܶܐܐ ܘܥܰܒܕܶܗ ܒܶܝܬ ܡܰܥܡܪܳܐ ܠܪܽܘܚܳܐ ܩܰܕܺܝܫܳܐ: ܘܰܩܒܰܥ ܒܶܗ ܕܰܝܪܶܐ ܛܒܺܝܒܬܳܐ ܘܰܐܥܕܺܝ ܠܰܫܠܶܝܡܽܘܢ ܒܪܳܐ ܘܝܳܪܬܳܐ ܕܪܺܝܫܳܢܽܘܬܳܐ ܕܕܰܝܪܳܐ ܥܰܡ ܕܽܘܒܳܪ̈ܶܐ ܪ̈ܰܒܳܢܳܝܶܐ: ܘܡ̣ܶܢ ܗܳܪܟܳܐ ܦܽܘ̈ܫܳܩܰܝ ܡܰܬܠܰܝ̈ ܙܰܪܥܳܐ ܘܰܚܨܳܕܳܐ ܒܝܰܕ ܛܠܺܝܬܳܐ ܡܰܠܟܬܳܐ ܠܣܰܐܢܰܐܣܺܝܣ ܡܶܫܬܰܡܠܶܝܢ ܗܘܰܘ: ܘܰܕܠܰܝܬ ܦܽܘܪܩܳܢܳܐ ܐܶܠܐ ܐܶܢ ܒܡܳܪܝ ܡܰܠܟܶܐ ܩܽܘܠܳܙܡܳܝܳܐ ܡܶܬܰܐܡܪܳܐ ܗܘܳܬ݀ ܘܠܐܬܪܳܐ ܕܪ̈ܽܘܡܳܝܶܐ ܒܪܶܡܙܳܐ ܩܰܠܺܝܠܐ ܦܪܰܚ: ܘܚܰܝܠܐ ܕܢܽܘܪܳܐ ܥܰܡܶܗ ܒܦܽܘܪܫܳܢܳܐ: ܘܰܐܣܺܝ ܠܰܛܠܺܝܬܳܐ ܠܣܰܐܢܰܐܣܺܝܣ: ܘܩܰܒܶܠ ܫܺܐܕܳܐ ܡܳܪܽܘܕܳܐ ܡܰܪܕܽܘܬܳܐ ܪܰܒܬܳܐ ܕܫܳܘܶܐ ܗܘܳܐ ܠܳܗ̇: ܛܥܽܘܢܬܶܗ ܕܓܽܘܪܢܳܐ ܕܰܥܕܰܡܳܐ ܠܕܰܝܪܳܐ ܘܗܳܐ ܢܛܺܝܪ ܘܺܝܕܺܝܥ ܠܕܳܪ̈ܶܐ ܕܳܐܬܶܝܢ: ܟܰܕ ܠܐܱܘܬܶܝܠ ܥܰܪܰܒܳܝܳܐ ܐܰܣܺܝ ܗ̇ܳܝ ܕܶܝܢ ܠܟܽܠܶܗ ܥܽܘܬܪܳܐ ܘܥܳܠܡܳܐ ܫܳܛ ܘܰܠܘܳܬ ܩܰܕܺܝܫܳܐ ܥܡܰܪ: ܘܶܐܬܪܰܒܺܝ ܒܕܽܘܒܳܪ̈ܶܐ ܕܕܰܝܪܳܝܽܘܬܳܐ ܗ̣ܽܘ ܘܚܰܒܪ̈ܰܘܗܝ ܥܰܒ̈ܕܶܐ ܕܰܩܢܶܐ ܗܘܳܐ ܘܕܽܘܟܪܳܢܳܐ ܛܳܒܳܐ ܫܒܰܩ ܒܥܳܠܡܳܐ: ܘܟܰܕ ܠܕܽܘܟܪܳܢܶܗ ܚܰܓܳܢܳܝܳܐ ܗܳܐ ܡܥܰܕܥܕܺܝܢܰܢ ܒܩܽܘ̈ܠܳܣܶܐ ܕܪܽܘܚܳܐ ܢܰܙܥܶܩ ܠܘܳܬܶܗ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܚܰܠܶܦܬ ܥܳܠܡܳܐ ܥܳܒܽܘܪܳܐ ܒܥܳܠܡܳܐ ܗ̇ܰܘ ܥܳܠܡܺܝܢܳܝܳܐ ܘܰܕܠܐ ܥܳܒܰܪ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܰܣܢܰܝܬ ܠܚܽܘܒܳܐ ܕܫܽܘܦܢܰܝ ܚܳܬܳܟ ܥܰܡ ܡܟܺܝܪܰܬ݀ ܛܰܠܝܽܘܬܳܟ: ܘܰܡܟܰܪܬ ܢܰܦܫܳܟ ܠܰܙܩܺܝܦܳܐ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܶܐܬܚܰܠܰܛܬ ܒܣܺܝܥܬܳܐ ܗ̇ܳܝ ܫܰܒܥܺܝܢܳܝܬܳܐ ܕܰܡܣܰܒܪ̈ܳܢܶܐ ܐܠܰܗܳܝ̈ܶܐ ܕܰܐܦܢܺܝܘ ܠܩܰܪ̈ܕܘܳܝܶܐ ܘܡܰܕܢ̈ܚܳܝܶܐ ܠܐܘܪܚܳܐ ܕܰܫܪܳܪܳܐ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܕܰܝܪܳܟ ܢܛܺܝܪܳܐ ܘܰܩܒܺܝܥܳܐ ܠܙܰܒ̈ܢܶܐ ܚܰܪ̈ܬܳܢܳܝܶܐ ܫܽܘ̈ܠܳܡܳܢܳܝܶܐ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܶܐܬܡܰܢܰܥܬ ܠܰܠܡܺܐܢܳܐ ܕܠܐ ܚܳܫܽܘܫܽܘܬܳܐ ܒܙܰܒܢܳܐ ܙܥܽܘܪܳܐ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܥܰܡ ܬܶܓ̈ܡܶܐ ܐܠܰܗܳܝ̈ܶܐ ܕܰܚܙܳܐ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܚܰܒܪܳܐ ܘܪܺܝܫܳܐ ܥܒܺܝܕ ܐܰܢ̱ܬ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܰܚܙܰܝܬ ܠܐܬܪܳܐ ܕܢܽܘܗܪܳܐ ܘܠܐܘ̈ܳܢܶܐ ܕܰܢܝܳܚܳܐ ܟܰܕ ܐܰܢ̱ܬ ܒܥܳܠܡܳܐ ܗܳܢܳܐ ܡܕܰܝܰܪ ܗܘܰܝܬ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܛܽܘ̈ܒܶܐ ܥܶܣܪܳܐ ܕܰܡܠܰܟ ܡܳܪܳܟ ܒܰܣܒܰܪܬܶܗ ܚܰܘܺܝܬ ܐܶܢܽܘܢ ܒܰܩܢܽܘܡܳܟ: ܠܳܟ ܛܽܘܒܰܝܟ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܕܛܽܘܒܶܗ ܕܥܳܠܡܰܢ ܠܐ ܣܳܦܶܩ ܠܳܟ ܐܶܠܐ ܟܰܕ ܒܥܳܠܡ̈ܶܐ ܓܢܺܝ̈ܙܶܐ ܡܕܰܝܰܪ ܐܰܢ̱ܬ ܚܽܘܪ ܒܰܢ ܡ̣ܶܢ ܬܰܡܳܢ: ܘܟܰܕ ܒܚܰܕܽܘܬܳܐ ܢܶܥܢܶܐ ܘܢܺܐܡܰܪ: ܬܳܐ ܒܰܫܠܳܡܳܐ ܐܰܒܽܘܢ ܡܳܪܝ ܡܰܠܟܶܐ ܬܳܐ ܥܰܕܰܪ ܘܣܰܝܰܥ ܠܡܶܠܬܳܐ ܕܰܬܚܰܓܶܝܟ ܒܚܽܘ̈ܓܳܝܶܐ ܐܠܰܗܳܝ̈ܶܐ ܘܒܰܙܡܺܝܪ̈ܳܬܳܐ ܕܰܘܺܝ̈ܕܳܝܳܬܳܐ: ܬܳܐ ܒܰܫܠܳܡܳܐ ܐܰܒܽܘܢ ܡܳܪܝ ܡܰܠܟܶܐ ܢܳܛܽܘܪܳܐ ܕܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ: ܬܳܐ ܒܰܫܠܳܡܳܐ ܐܰܒܽܘܢ ܡܳܪܝ ܡܰܠܟܶܐ ܛܳܪܽܘܕܳܐ ܕܫܺܐܕ̈ܶܐ ܡܳܪ̈ܽܘܕܶܐ ܘܶܐܣܛܪ̈ܰܐܠܺܝܣܛܳܝܶܐ: ܬܳܐ ܒܰܫܠܳܡܳܐ ܡܫܰܥܒܶܕ ܠܫܺܐܕ̈ܶܐ ܒܰܛܥܽܘܢ̈ܝܳܬܳܐ ܐܳܦ ܡܰܘ̈ܒܠܐ ܝܰܩܺܝܪ̈ܳܬܳܐ ܕܟܺܐܦ̈ܶܐ: ܬܳܐ ܒܰܫܠܳܡܳܐ ܡܰܚܠܡܳܢܳܐ ܕܰܟܪ̈ܺܝܗܶܐ: ܘܰܡܚܰܪܪܳܢܳܐ ܕܕܰܝ̈ܘܳܢܶܐ: ܬܳܐ ܒܰܫܠܳܡܳܐ ܙܳܓܰܪ ܠܢܶܒܥܽܘܢ ܛܰܗܪܳܝܳܐ ܘܰܡܬܰܚܶܡ ܠܚܶܡ̈ܬܳܢܶܐ: ܬܳܐ ܒܰܫܠܳܡܳܐ ܡܒܰܢܶܐ ܠܕܰܝܪܶܗ ܒܰܐܬܪܳܐ ܢܛܺܝܪܳܐ ܘܪܺܝܫܳܝܳܐ: ܬܳܐ ܒܰܫܠܳܡܳܐ ܡܒܰܝܰܐܐ ܠܬܰܠܡܺܝ̈ܕܰܘܗܝ ܒܰܙ̈ܢܰܝܳܐ ܐܠܰܗܳܝ̈ܶܐ: ܬܳܐ ܒܰܫܠܳܡܳܐ ܡܰܣܓܶܐ ܫܠܳܡܳܐ ܠܪ̈ܰܚܺܝܩܶܐ: ܘܰܠܩܰܪ̈ܺܝܒܶܐ: ܬܳܐ ܒܰܫܠܳܡܳܐ ܕܰܫܠܳܡܰܢ ܙܥܽܘܪ ܗ̣ܽܘ ܠܳܟ ܐܰܒܽܘܢ ܛܽܘܒܳܢܳܐ: ܘܟܰܕ ܡ̣ܶܢ ܡܳܪܝܳܐ ܡܳܪܳܟ ܢܺܐܬܶܐ ܠܰܢ ܥܽܘܕܪܳܢܳܐ ܓܡܺܝܪܳܐ ܒܕܽܘܟܪܳܢܳܟ ܐܠܰܗܳܝܳܐ: ܘܫܰܝܢܳܐ ܘܰܫܠܳܡܳܐ ܘܚܽܘܒܳܐ ܘܰܐܘܝܽܘܬܳܐ: ܚܽܘܠܡܳܢܳܐ ܠܰܟܪ̈ܺܝܗܶܐ: ܘܠܰܡ̈ܢܰܣܰܝܳܐ ܕܨܳܝܒܺܝܢ ܠܕܰܝܪܳܟ: ܣܡܽܘܟ ܘܥܰܕܰܪ ܐܶܢܽܘܢ ܕܰܡܣܰܟܶܝܢ ܠܚܰܝܠܐ ܕܡܳܪܳܟ ܕܰܫܪܶܐ ܒܳܟ: ܟܰܕ ܣܳܥܰܪ ܐܰܢ̱ܬ ܠܗܽܘܢ ܒܚܽܘܠܡܳܢܳܐ ܕܢܰܦܫܳܐ ܘܰܕܦܰܓܪܳܐ: ܚܰܘܳܐ ܠܗܽܘܢ ܐܳܬܳܐ ܕܚܽܘܠܡܳܢܳܐ ܚܙܳܬܳܐ ܐܠܰܗܳܝܬܳܐ ܒܝܰܕ ܡܶܬܓܰܠܝܳܢܽܘܬܳܟ ܕܰܠܗܽܘܢ: ܚܰܝܶܠ ܠܕܰܝܪ̈ܳܝܶܐ ܡܚܺܝ̈ܠܐ ܕܢܳܛܪܺܝܢ ܕܽܘܟ̈ܝܳܬܳܟ ܩܰܕܺܝ̈ܫܳܬܳܐ: ܠܰܒܶܒ ܐܶܢܽܘܢ ܒܙܰܝܢܳܐ ܐܰܒܳܗܳܝܳܐ ܕܪܶܚܡܬܳܟ ܐܰܒܳܗܳܝܬܳܐ: ܐܰܫܘܳܐ ܐܶܢܽܘܢ ܘܠܰܢ ܒܨܺܝܪ̈ܶܐ ܥܰܒܕܰܝ̈ܟ ܕܶܐܬܟܰܢܰܫܢܰܢ ܠܥܺܐܕܳܐ ܚܰܕܽܘܬܳܢܳܝܳܐ ܠܚܰܪܬܳܐ ܛܳܒܬܳܐ ܕܥܰܡ ܓܰܒܪ̈ܶܐ ܕܰܫܠܳܡܳܐ: ܠܣ̈ܳܒܶܐ ܣܡܳܟܳܐ ܠܐ ܡܶܙܕܰܥܙܥܳܢܳܐ: ܠܓܰܒܪ̈ܶܐ ܥܰܡ̈ܠܐ ܪ̈ܚܺܝܡܶܐ ܕܕܶܚܠܰܬ݀ ܐܠܰܗܳܐ: ܠܰܛܠܳܝ̈ܶܐ ܪܽܘܒܳܝܳܐ ܠܐ ܥܕܺܝܠܐ: ܠܝܰܠܽܘ̈ܕܶܐ ܘܫܰܒܪ̈ܶܐ ܡܢܰܛܪ̈ܳܢܶܐ: ܠܢܶܫ̈ܶܐ ܕܶܚܠܰܬ ܐܠܰܗܳܐ: ܘܠܐܬܪܰܢ ܟܽܠܶܗ ܡ̣ܶܢ ܣܳܟܶܗ ܢܽܘܛܳܪܳܐ ܕܡ̣ܶܢ ܚܰܪܒܳܐ ܘܫܶܒܝܳܐ ܘܟܰܦܢܳܐ ܘܡܰܘܬܳܢܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܚܽܘܣܳܝܳܐ ܘܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ: ܘܰܥܠܰܝܢ ܘܰܥܠܰܝܗܽܘܢ ܬܰܛܶܐܠ ܝܰܡܺܝܢܶܗ ܕܡܳܪܳܟ: ܕܗܳܪܟܳܐ ܢܩܰܠܣܳܟ ܘܰܒܥܳܠܡܳܐ ܕܰܥܬܺܝܕ ܢܶܥܽܘܠ ܥܰܡܳܟ ܠܰܓܢܽܘܢܳܐ: ܘܡ̣ܶܢ ܦܽܘܡ ܟܽܠܰܢ ܚܕܳܐ ܬܰܘܕܺܝܬܳܐ ܡܩܰܒܰܠܬܳܐ: ܠܳܟ ܡܳܪܝ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܥܛܪܐ

 

 

 

ܡܳܪܝܳܐ ܐܠܰܗܳܐ ܐܰܝܟ ܕܰܛܪܰܕܬ ܠܫܺܐܕ̈ܶܐ ܡܳܪ̈ܽܘܕܶܐ ܒܶܝܬ ܐܺܝ̈ܕܰܝ ܡܢܺܝܚܳܢܳܟ ܡܳܪܝ ܡܰܠܟܶܐ ܡ̣ܶܢ ܕܰܝܪܶܗ ܩܰܕܺܝܫܳܬܐ: ܗܳܟܰܢܳܐ ܪܕܽܘܦ ܘܛܰܠܶܩ ܠܟܽܠܳܗ̇ ܦܠܰܓܳܐ ܡܰܚܪܰܡܬܳܐ ܕܺܝܠܗܽܘܢ ܡ̣ܶܢ ܐܰܬܪܰܢ ܘܡ̣ܶܢ ܟܶܢܫܰܢ: ܘܡ̣ܶܢ ܟܽܠܗܽܘܢ ܕܰܝܘ̈ܳܢܶܐ ܘܫܺܐܕ̈ܳܢܶܐ ܐܰܝܠܶܝܢ ܕܡܶܬܬܰܥܒܕܺܝܢ ܘܰܒܓܰܒܝܳܐ ܡܳܪܝ ܡܰܠܟܶܐ ܡܶܬܓܰܘܣܺܝܢ ܘܰܠܕܰܝܪܶܗ ܩܰܕܺܝܫܬܳܐ ܨܳܝܒܺܝܢ ܘܡ̣ܶܢ ܣܺܝܡܰܬ ܓܰܪ̈ܡܰܘܗܝ ܡܶܬܒܰܪܟܺܝܢ ܒܝܰܕ ܦܺܝܪܡܳܐ ܗܳܢܳܐ ܕܰܒܕܽܘܟܪܳܢܶܗ ܩܰܪܶܒܢܰܢ ܠܳܟ ܗܰܒܠܰܢ ܫܰܦܺܝܪ̈ܳܬܳܐ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ: ܒܝܰܕ ܨܠܰܘ̈ܳܬܶܗ ܫܡܺܝ̈ܥܳܬܳܐ ܘܰܡܩܰܒ̈ܠܳܬܳܐ ܕܰܠܘܳܬܳܟ: ܡܳܪܰܢ ܘܰܐܠܳܗܳܢ܀

 

 

 

ܚܘܬܡܐ

 

 

 

ܩܽܘܡ ܘܩܰܒܶܠ ܐܳܘ ܐܰܒܽܘܢ ܛܽܘܒܳܢܳܐ ܡܳܪܝ ܡܰܠܟܶܐ ܠܟܶܢ̈ܫܶܐ ܕܶܐܬܰܘ ܠܥܰܕܥܺܐܕܳܟ: ܐܳܦ ܐܶܬܛܰܝܰܒܘ ܠܕܰܝܪܳܟ ܕܢܶܬܒܰܪܟܽܘܢ ܒܣܺܝܡܰܬ݀ ܦܰܓܪܳܟ ܩܰܕܺܝܫܳܐ: ܣܥܽܘܪ ܡܰܪ̈ܥܰܝܗܽܘܢ: ܐܰܣܳܐ ܟܪ̈ܺܝܗܰܝܗܽܘܢ: ܐܰܚܠܶܡ ܫܽܘܚ̈ܢܰܝܗܽܘܢ: ܚܰܪܰܪ ܕܰܝܘܳܢܰܝ̈ܗܽܘܢ: ܫܪܺܝ ܦܟܳܪ̈ܰܝܗܽܘܢ: ܘܰܒܥܺܝ ܠܐܬܪܰܢ ܫܰܝܢܳܐ ܘܰܫܠܳܡܳܐ ܘܫܽܘܪܬܳܚܳܐ ܕܥ̈ܰܠܠܳܬܳܐ: ܘܢܰܘܚܳܐ ܕܡ̣ܶܢ ܟܽܠܳܗ̇ ܫܓܺܝܫܽܘܬܳܐ ܘܚܶܪ̈ܝܳܢܶܐ: ܕܰܢܫܰܒܚܺܝܘܗܝ ܠܡܳܪܳܟ ܒܕܽܘܟܪܳܢܳܟ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܡ̣ܶܢ ܟܰܪܣܳܐ ܓܒܳܝܗܝ ܠܩܰܕܺܝܫܳܐ ܡܳܪܝ ܡܰܠܟܶܐ: ܘܡ̣ܶܢ ܡܰܪܒܥܳܐ ܦܰܪܫܶܗ ܘܩܰܕܫܶܗ ܐܰܝܟ ܐܶܪܰܡܝܳܐ ܘܰܫܡܽܘܐܶܝܠ: ܠܗܰܘ ܕܚܰܕܺܝ ܠܐܒܳܗܰܘ̈ܗܝ ܒܝܽܘܡ ܡܰܘܠܳܕܶܗ ܘܚܰܕܺܝ ܠܐܠܺܝ̈ܨܶܐ ܘܠܰܡܛܰܪ̈ܦܶܐ ܒܥܽܘܕܪ̈ܳܢܰܘܗܝ ܘܳܐܣܘ̈ܳܬܶܗ: ܕܠܶܗ ܠܡܳܪܝܳܐ ܡܢܰܨܚܳܢܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܕܽܘܟܪܳܢܶܗ ܕܰܢܨܺܝܚ ܫܽܘܦܪ̈ܐ ܡܳܪܝ ܡܰܠܟܶܐ ܩܽܘܠܳܙܡܳܝܳܐ ܐܶܬܛܰܝܰܒܢܰܢ ܠܰܡܩܰܠܳܣܽܘ: ܗܳܢܳܐ ܕܶܝܢ ܦܳܠܚܳܐ ܢܰܨܺܝܚܳܐ ܕܰܠܣܺܝܥܬܳܐ ܕܒܶܝܬ ܡܳܪܝ ܐܰܘܓܺܝܢ ܫܰܒܥܺܝܢ ܘܰܬܪܶܝܢ ܢܩܶܦ: ܗܳܢܳܐ ܕܡ̣ܶܢ ܩܠܽܘܙܡܰܐ ܡܕܺܝܢ̱ܬܳܐ ܕܩܰܪܺܝܒܳܐ ܠܡܶܨܪܶܝܢ ܐܶܬܳܐ ܕܰܒܛܽܘܪܳܐ ܩܰܕܺܝܫܳܐ ܕܺܐܝܙܠܐ ܩܒܰܥ ܕܰܝܪܶܗ ܘܰܥܒܰܕ ܒܶܝܬ ܡܰܫܪܝܶܗ: ܗܳܢܳܐ ܕܒܶܝܬ ܐܺܝ̈ܕܰܝ ܚܳܠܶܗ ܡܳܪܝ ܐܰܘܓܺܝܢ ܠܒܶܫ ܐܶܣܟܺܝܡܳܐ ܕܕܰܝܪܳܝܽܘܬܳܐ: ܗ̣ܽܘ ܘܚܰܒܪܶܗ ܡܳܪܝ ܐܠܶܝܫܳܥ: ܗܳܢܳܐ ܕܰܫܩܰܠ ܐܶܢܽܘܢ ܟܰܘܟܰܒ ܢܽܘܓܗܳܐ ܡܳܪܝ ܐܰܘܓܺܝܢ ܘܡ̣ܶܢ ܥܰܡܽܘܕܳܐ ܕܢܽܘܗܪܳܐ ܡܳܪܝ ܝܰܥܩܽܘܒ ܐܶܦܣܩܽܘܦܳܐ ܕܰܢܨܺܝܒܺܝܢ ܐܠܰܒܶܫ ܐܶܢܽܘܢ ܟܳܗܢܽܘܬܳܐ: ܗܳܢܳܐ ܕܰܫܒܰܩ ܠܐܒܽܘܗܝ ܝܽܘܚܰܢܳܢ ܒܰܡܓܰܙܝܽܘܬܳܐ ܘܠܐܡܶܗ ܪܰܦܩܰܐ ܒܰܟܡܺܝܪܽܘܬܳܐ: ܘܰܠܚܳܬܶܗ ܫܽܘܦܢܰܝ ܒܰܐܒܺܝܠܽܘܬܳܐ: ܗܳܢܳܐ ܕܰܒܝܰܘܡܳܐ ܕܰܗܦܰܟ ܒܺܝܛܰܒܥܐ ܥܰܒܕܶܗ ܘܰܐܝܬܺܝ ܣܒܰܪܬܳܐ ܡܰܪܺܝܪܬܳܐ ܕܰܐܒܕܳܢܶܗ ܦܳܫܘ ܐܰܒܳܗܰܘ̈ܗܝ ܒܥܳܩܬܳܐ ܘܟܰܪܝܽܘܬܳܐ: ܘܰܥܒܰܕܘ ܥܠܰܘܗܝ ܐܶܒܠܐ ܪܰܒܳܐ ܘܡܰܪܩܽܘܕܬܳܐ ܗܳܢܳܐ ܕܠܐܘܪܫܠܶܡ ܐܶܙܰܠ ܘܶܐܬܒܰܪܰܟ ܡ̣ܶܢ ܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܕܕܰܝܰܪ ܒܗܶܝܢ ܡܳܪܰܢ: ܗ̣ܽܘ ܘܚܰܒܪܶܗ ܐܠܶܝܫܳܥ ܒܰܪ ܡܰܪܕܽܘܬܳܐ: ܗܳܢܳܐ ܕܰܐܥܕܺܝ ܕܠܰܫܠܶܝܡܽܘܢ ܒܰܪ ܘܰܗܒܳܢ ܐܰܪܟܰܚܳܝܳܐ ܕܚܰܛܦܶܗ ܗܘܳܐ ܫܺܐܕܳܐ ܡ̣ܶܢ ܬܺܐܬܳܐ ܘܰܐܚܬܶܗ ܒܦܶܚܬܳܐ ܘܰܒܗܰܘܬܳܐ: ܗܳܢܳܐ ܕܬܰܚܡܶܗ ܠܫܺܐܕܳܐ ܐܶܣܛܪܰܐܛܰܣܺܝܣ ܘܰܐܦܩܶܗ ܠܛܰܠܝܳܐ ܫܠܶܝܡܽܘܢ ܕܠܐ ܡܰܟܝܳܢܽܘܬܳܐ: ܗܳܢܳܐ ܕܰܐܝܟ ܕܰܠܟܰܠܒܳܐ ܛܰܪܕܶܗ ܠܶܗ ܘܰܠܚܰܒܪ̈ܰܘܗܝ ܡ̣ܶܢ ܗ̇ܳܝ ܕܽܘܟܬܳܐ: ܘܬܰܡܳܢ ܒܢܳܐ ܕܰܝܪܶܗ ܩܰܕܺܝܫܬܳܐ ܘܗܳܐ ܪܳܥܡܳܐ ܒܩܳܠܰܝ̈ ܬܶܫܒ̈ܚܳܬܳܐ: ܗܳܢܳܐ ܕܰܐܝܟ ܒܰܪܩܳܐ ܦܪܰܚ ܡ̣ܶܢ ܕܰܝܪܶܗ ܘܰܡܛܳܐ ܠܪܽܘܡܺܝ ܒܩܰܠܺܝܠܽܘܬܳܐ ܘܥܰܠ ܡܕܺܝܢ̱ܬܳܐ ܒܰܪܗܺܝܒܽܘܬܳܐ: ܘܛܰܪܕܶܗ ܠܡܳܪܽܘܕܳܐ ܐܶܣܛܪܰܐܠܺܝܣ ܒܡܶܙܕܰܓܪܳܢܽܘܬܳܐ ܟܰܕ ܕܰܡܫܰܢܶܩ ܗܘܳܐ ܠܰܠܣܰܐܡܰܐܣܺܝܣ ܒܰܪܬܶܗ ܕܡܰܠܟܳܐ ܩܽܘܣܛܰܢܛܺܝܢܳܘܣ ܗܳܢܳܐ ܕܒܽܘܟܪ̈ܶܐ ܐܰܘܟܺܝܬ ܛܰܒ̈ܥܶܐ ܫܩܰܠ ܥܰܡܶܗ ܡ̣ܶܢ ܕܰܝܪܶܗ ܟܰܕ ܫܰܚܺܝܢܺܝܢ ܝܰܗܒ ܐܶܢܽܘܢ ܠܡܰܠܟܳܐ ܡܗܰܝܡܢܳܐ: ܘܰܬܗܰܪܘ ܟܽܠ ܕܰܚܙܰܘ: ܘܫܰܒܰܚܘ ܠܐܠܳܗܳܐ: ܗܳܢܳܐ ܕܰܐܣܺܝ ܒܡܶܐܙܰܠܬܶܗ ܠܫܰܒܥܳܐ ܓܰܒܪ̈ܺܝܢ ܕܡ̣ܶܢ ܐܳܕܰܝ ܩܪܺܝܬܳܐ ܕܡ̣ܶܢ ܣܳܛܳܢܳܐ ܡܶܬܬܰܥܒܕܺܝܢ ܗܘܰܘ: ܐܳܦ ܠܚܰܡܫܳܐ ܐܰܪ̈ܝܳܢܶܐ ܕܰܟܺܝ: ܗܳܢܳܐ ܕܡ̣ܶܢ ܕܛܰܪܕܶܗ ܠܫܺܐܕܳܐ ܘܰܐܦܩܶܗ ܡ̣ܶܢ ܛܠܺܝܬܳܐ ܚܰܒܫܶܗ ܒܒܶܝܬ ܐܺܝܩܳܪ̈ܶܐ ܒܰܝܬܳܐ ܕܙܶܒܠܐ ܥܰܠ ܕܫܳܘܶܐ ܠܳܗ̇ ܠܗܳܝ ܕܽܘܟܬܳܐ: ܥܕܰܡܳܐ ܕܰܐܣܺܝ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܕܺܐܝܬ ܗܘܳܐ ܒܰܡܕܺܝܢ̱ܬܳܐ: ܗܳܢܳܐ ܕܫܶܐܠ ܡ̣ܶܢ ܡܰܠܟܳܐ ܓܽܘܪܢܳܐ ܕܟܺܐܦܳܐ ܘܰܐܛܥܢܶܗ ܠܫܺܐܕܳܐ ܘܰܐܝܬܝܶܗ ܠܕܰܝܪܶܗ ܐܰܝܟ ܕܰܠܚܽܘܘܳܝܳܐ ܘܳܐܬܳܐ ܠܕܳܪ̈ܶܐ ܕܳܐܬܶܝܢ: ܗܳܢܳܐ ܕܛܰܪܕܶܗ ܠܫܺܐܕܳܐ ܒܳܬܰܪ ܕܰܐܢܺܝܚܳܗ̇ ܠܓܽܘܪܢܳܐ ܟܰܕ ܓܳܥܰܪ ܒܶܗ ܕܠܰܝܬ ܠܳܟ ܫܽܘܠܛܳܢܳܐ ܕܰܬܟܰܬܰܪ ܒܕܽܘܟܬܳܐ ܗܳܕܶܐ: ܗܳܢܳܐ ܕܰܐܚܠܶܡ ܠܐܱܘܬܶܝܠ ܒܰܪ ܐܺܝܽܘܒ ܐܳܬܽܘܪܳܝܳܐ ܡ̣ܶܢ ܡܫܰܪܝܽܘܬܳܐ: ܘܒܳܬܰܪ ܕܰܐܣܝܶܗ ܐܶܬܬܰܠܡܰܕ ܠܢܺܝܪܳܐ ܕܕܰܝܪܳܝܽܘܬܳܐ ܗ̣ܽܘ ܘܰܫܠܶܝܡܽܘܢ ܒܰܪ ܘܰܗܒܳܘܢ ܕܦܰܨܝܶܗ ܗܘܳܐ ܡ̣ܶܢ ܬܰܢܺܝܢܳܐ ܕܰܒܗܰܘܬܳܐ ܗܳܢܳܐ ܕܥܶܬܪܰܬ݀ ܕܰܝܪܶܗ ܒܰܐܚ̈ܶܐ ܐܳܦ ܒܳܐܣ̈ܘܳܬܳܐ ܘܬܶܕܡܪ̈ܳܬܳܐ ܐܰܝܠܶܝܢ ܕܶܐܣܬܥܰܪ̈ܝ ܒܐܢܳܫܽܘܬܳܐ: ܗܳܢܳܐ ܕܪܳܡܺܝܢ ܥܰܡܠܰܘ̈ܗܝ ܘܰܫܒܺܝܚܺܝܢ ܕܽܘܒܳܪ̈ܰܘܗܝ ܒܰܡܝܰܬܪܽܘܬܳܐ: ܗܳܢܳܐ ܕܰܠܝܰܡܳܐ ܕܠܐ ܡܶܬܡܢܶܝܢ ܓܰܠܠܰܘ̈ܗܝ ܕܳܡܶܐ ܒܣܳܥܽܘܪܽܘܬ ܬܶܕܡܪ̈ܳܬܳܐ: ܗܳܢܳܐ ܕܥܶܪܰܩܬܳܐ ܕܦܰܪܙܠܐ ܐܰܣܺܝܪ ܗܘܳܐ ܥܰܠ ܚܰܨܰܘ̈ܗܝ ܐܳܦ ܠܒܽܘܫܳܐ ܒܰܣܝܳܐ ܡܥܰܛܰܦ ܗܘܳܐ: ܗܳܢܳܐ ܕܰܒܨܰܘܡܳܐ ܕܫܳܒܽܘ̈ܥܶܐ ܫܰܠܶܡ ܝܰܘ̈ܡܳܬܶܗ ܐܳܦ ܚܶܦܝܳܝ ܗܰܠܶܟ ܗܘܳܐ: ܗܳܢܳܐ ܕܰܒܝܰܕ ܨܠܰܘ̈ܳܬܶܗ ܐܰܝܟ ܫܶܐܠܶܬܶܗ ܒܥܶܕܳܢ ܡܰܘܬܶܗ ܢܰܥܒܰܪ ܐܠܰܗܳܐ ܡ̣ܶܢ ܐܰܬܪܰܢ: ܚܰܪܒܳܐ ܘܫܶܒܝܳܐ ܘܡܰܘܬܳܢܳܐ: ܘܰܐܬܪܰܢ ܕܥܳܒܶܕ ܕܽܘܟܪܳܢܶܗ ܘܡܶܬܕܟܰܪ ܒܶܗ ܫܡܶܗ ܘܰܫܡܳܐ ܕܡܳܪܶܗ: ܠܐ ܢܶܗܘܶܐ ܒܶܗ ܠܐ ܒܰܪܕܳܐ ܘܠܐ ܫܰܘܒܳܐ: ܘܠܐ ܝܰܪܩܳܢܳܐ ܘܠܐ ܙܳܚܠܐ ܘܢܶܒܛܠܽܘܢ ܡܶܢܶܗ ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܡܫܺܝ̈ܡܳܢܶܐ ܕܪܽܘܓܙܳܐ: ܘܟܽܠ ܡܗܰܝܡܢܳܐ ܕܛܳܦܶܣ ܘܡܶܬܟܰܫܰܦ ܘܡܶܬܓܰܘܰܣ ܒܶܗ: ܠܐ ܢܶܗܘܶܐ ܕܰܡܫܰܪܰܝ ܘܠܐ ܕܰܟܪܺܝܗ ܒܒܰܝܬܶܗ: ܘܠܐ ܕܰܣܡܶܗ ܘܠܐ ܕܰܥܘܺܝܪ: ܘܠܐ ܕܰܓܪܶܒ ܘܠܐ ܕܰܫܚܺܝܩ ܡ̣ܶܢ ܣܳܛܳܢܳܐ: ܐܳܦ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܕܰܫܗܰܪܘ ܒܝܽܘܡ ܕܽܘܟܪܳܢܶܗ ܢܛܰܟܶܣ ܐܶܢܽܘܢ ܡܳܪܝܳܐ ܥܰܡ ܐܰܗܪܽܘܢ ܘܦܺܝܢܚܶܣ ܘܶܐܠܺܝܥܳܙܳܪ ܘܰܫܡܽܘܐܶܝܠ ܘܟܽܠ ܡܗܰܝ̈ܡܢܶܐ ܕܰܡܝܰܩܪܺܝܢ ܠܥܺܐܕܶܗ ܢܶܬܚܰܣܽܘܢ ܚܰܘܒܰܝ̈ܗܽܘܢ: ܘܢܶܫܬܰܒ̈ܩܳܢ ܣܰܟܠܘ̈ܳܬܗܽܘܢ: ܘܢܶܬܬܢܺܝܚܽܘܢ ܥܰܢܺܝܕܰܝ̈ܗܽܘܢ ܒܰܐܘ̈ܳܢܶܐ ܐܽܘܪ̈ܫܠܶܡܳܝܶܐ ܘܰܒܥܽܘ̈ܒܶܐ ܐܰܒܪ̈ܳܗܳܡܳܝܶܐ: ܘܰܚܢܰܢ ܘܗ̣ܶܢܽܘܢ ܘܟܽܠܗܽܘܢ ܡܗܰܝ̈ܡܢܶܐ: ܘܰܐܝܠܶܝܢ ܕܰܡܝܰܩܪܺܝܢ ܠܕܽܘܟܪ̈ܳܢܰܝܗܽܘܢ ܕܩܰܕܺܝ̈ܫܶܐ ܘܰܕܡܳܪܝ ܡܰܠܟܶܐ ܘܡܳܪܝ ܐܰܘܓܺܝܢ ܘܰܕܟܽܠܗܽܘܢ ܬܰܠܡܺܝ̈ܕܰܘܗܝ: ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܳܟ ܡܳܪܝ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܕܝܡܛ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܗܰܒܠܰܢ ܡܳܪܝܳܐ ܐܠܰܗܳܐ ܕܢܶܬܰܐܣܶܐ ܡ̣ܶܢ ܟܺܐܒܰܝ̈ܢ ܟܣܰܝ̈ܳܐ ܘܰܓܠܰܝ̈ܳܐ: ܐܰܝܟ ܡܶܬܰܐܣܝܳܢܽܘܬܶܗ ܕܓܰܒܝܳܟ ܡܳܪܝ ܕܺܝܡܶܛ: ܘܰܐܦܢܳܐ ܠܶܒܰܘ̈ܳܬܰܢ ܠܐܘܪܚܳܐ ܕܰܫܪܳܪܳܐ: ܘܫܰܚܠܶܦ ܠܰܢ ܡ̣ܶܢ ܒܺܝ̈ܫܳܬܳܐ ܠܛܳܒ̈ܳܬܳܐ ܐܰܝܟ ܡܶܫܬܰܚܠܦܳܢܽܘܬܶܗ ܘܥܰܕܰܪ ܠܰܢ ܒܰܨܠܰܘ̈ܳܬܶܗ: ܘܢܰܛܰܪ ܠܰܢ ܡ̣ܶܢ ܡܰܟܝܳܢܽܘܬܶܗ ܕܒܺܝܫܳܐ: ܒܝܰܕ ܬܰܟܫ̈ܦܳܬܶܗ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܝܗܝ ܠܓܰܒܝܳܐ ܡܳܪܝ ܕܺܝܡܶܛ ܡ̣ܶܢ ܒܶܝܬ ܚܰܢܦܽܘܬܳܐ: ܘܫܰܚܠܦܶܗ ܐܰܝܟ ܦܰܘܠܳܘܣ ܕܶܐܬܪܰܥܺܝ ܒܺܝ̈ܫܳܬܳܐ ܥܰܠ ܥܺܕ̈ܳܬܳܐ: ܐܳܦ ܗܳܢܳܐ ܫܰܚܠܦܶܗ ܐܠܰܗܳܐ ܠܠܶܒܶܗ ܒܝܰܕ ܡܚܽܘܬܳܐ ܡܰܪܺܝܪܬܳܐ: ܠܗܰܘ ܕܰܒܝܰܕ ܡܰܠܐܟܳܐ ܪܕܳܝܗܝ ܠܡܳܪܝ ܕܺܝܡܶܛ ܒܝܰܕ ܟܺܐܒܳܐ ܡܰܪܺܝܪܳܐ: ܘܒܶܗ ܦܢܳܐ ܠܐܘܪܚܳܐ ܕܰܫܪܳܪܳܐ: ܠܗܰܘ ܕܟܰܕ ܚܙܳܝܗܝ ܠܡܳܪܝ ܕܺܝܡܶܛ ܕܰܡܥܰܬܶܕ ܢܶܟܠܐ ܥܰܠ ܟܽܠܶܗ ܓܰܒܳܐ ܕܰܡܗܰܝ̈ܡܢܶܐ ܡܚܳܝܗܝ ܡܚܽܘܬܳܐ ܡܰܪܺܝܪܬܳܐ: ܘܥܰܒܕܶܗ ܐܳܣܝܳܐ ܠܰܟܪ̈ܺܝܗܶܐ ܕܒܶܗ ܡܶܬܓܰܘܣܺܝܢ: ܕܠܶܗ ܠܡܳܪܝܳܐ ܡܢܰܨܚܳܢܶܗ ܫܽܘܒܚܳܐ ܡܰܣܩܺܝܢܰܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܡܚܰܓܶܝܢܰܢ ܠܥܺܐܕܶܗ ܕܡܳܪܝ ܕܺܝܡܶܛ ܝܺܚܺܝܕܳܝܳܐ ܘܣܳܗܕܳܐ ܘܪܳܚܶܡ ܠܰܡܫܺܝܚܳܐ: ܗܳܢܳܐ ܕܨܳܕܶܗ ܐܠܰܗܳܐ ܒܝܰܕ ܡܰܠܐܟܳܐ ܕܰܡܚܳܝܗܝ ܒܟܺܐܒܳܐ ܠܐ ܡܶܣܬܰܝܒܪܳܢܳܐ ܘܡ̣ܶܢ ܐܽܘܠܨܳܢܶܗ ܗܦܰܟ ܡ̣ܶܢ ܩܰܫܝܽܘܬܳܐ ܕܰܩܢܶܐ ܗܘܳܐ: ܐܳܦ ܒܺܐܝ̈ܕܰܝ ܡܳܪܝ ܫܰܒܰܝ ܩܰܒܶܠ ܪܽܘܫܡܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ ܘܰܐܠܦܶܗ ܐܽܘܪܚܳܐ ܕܚܰܝ̈ܶܐ ܕܒܳܗ̇ ܢܺܚܶܐ: ܘܬܰܡܳܢ ܠܘܳܬܶܗ ܥܡܰܪ ܒܛܽܘܪ̈ܰܝ ܩܽܘܪܳܘܣ: ܘܶܐܬܥܰܢܘܺܝ ܒܕܽܘܒܳܪ̈ܶܐ ܐܠܰܗܳܝ̈ܶܐ ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ ܘܶܐܫܬܰܡܠܺܝ ܒܰܓܡܺܝܪܽܘܬܳܐ ܡܫܰܡܠܳܝܬܳܐ: ܘܰܐܣܺܝ ܠܦܰܓܪܶܗ ܘܰܠܢܰܦܫܶܗ ܫܰܘܝܳܐܝ̣ܬ: ܘܳܐܣܝܳܐ ܗܘܳܐ ܒܳܬܰܪܟܶܢ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܕܒܶܗ ܡܶܬܓܰܘܣܺܝܢ ܒܗܰܝܡܳܢܽܘܬܳܐ: ܘܠܐ ܟܳܠܐܷ ܥܽܘܕܪ̈ܳܢܰܘܗܝ ܘܠܐ ܡ̣ܶܢ ܚܰܢ̈ܦܶܐ ܘܠܐ ܡ̣ܶܢ ܟܳܦܽܘܪ̈ܶܐ ܟܡܳܐ ܕܰܫܪܳܪܳܐ ܢܳܨܰܚ ܒܥܳܠܡܰܢ: ܘܡܶܛܽܠ ܗܳܕܶܐ ܟܽܠܰܢ ܒܢܰܝ̈ܳܐ ܕܥܺܕܬܳܐ ܒܣܺܝܡܰܬ݀ ܓܰܪ̈ܡܰܘܗܝ ܛܳܦܣܺܝܢܰܢ: ܕܢܶܣܰܒ ܥܽܘܕܪ̈ܳܢܶܐ ܘܳܐܣܝܽܘܬܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ: ܗܳܢܳܐ ܐܰܬܠܺܝܛܳܐ ܕܶܐܬܢܰܨܰܚ ܒܰܬܪܶܝܢ ܟܠܺܝ̈ܠܺܝܢ ܕܥܳܢܘܳܝܽܘܬܳܐ ܐܳܦ ܕܣܳܗܕܽܘܬܳܐ ܘܗܳܐ ܟܽܠ ܥܰܡ̈ܡܺܝܢ ܙܳܡܪܺܝܢ ܫܽܘܒܚܳܐ ܒܝܽܘܡ ܕܽܘܟܪܳܢܶܗ ܛܒܺܝܒܳܐ ܘܰܚܢܰܢ ܠܘܳܬܶܗ ܡܰܙܥܩܺܝܢܰܢ ܟܰܕ ܐܳܡܪܺܝܢܰܢ: ܬܳܐ ܒܰܫܠܳܡܳܐ ܦܰܘܠܳܘܣ ܬܪܰܝܳܢܳܐ ܡܳܪܝ ܕܺܝܡܶܛ ܕܰܗܘܰܝܬ ܪܕܺܝܦܳܐ ܚܠܳܦ ܪܳܕܽܘܦܳܐ: ܬܳܐ ܒܰܫܠܳܡܳܐ ܡܳܪܝ ܕܺܝܡܶܛ ܕܰܚܠܳܦ ܒܺܝ̈ܫܳܬܳܐ ܕܰܐܠܶܦܬ ܠܘܳܠܺܝܣ ܡܰܠܟܳܐ ܪܰܫܺܝܥܳܐ ܡܶܛܽܠ ܥܽܘܡܪ̈ܶܐ ܘܕܰܝܪ̈ܳܬܳܐ ܘܟܳܗ̈ܢܶܐ ܘܰܡܫܰܡ̈ܫܳܢܶܐ: ܗܳܐ ܫܳܐܷܠ ܐܰܢ̱ܬ ܥܽܘܕܪ̈ܳܢܶܐ ܒܝܽܘܡ ܕܽܘܟܪܳܢܳܟ: ܬܳܐ ܒܰܫܠܳܡܳܐ ܡܳܪܝ ܕܺܝܡܶܛ ܕܡ̣ܶܢ ܡܳܪܝ ܫܰܒܰܝ ܢܣܰܒܬ ܪܽܘܫܡܳܐ ܕܚܰܝ̈ܶܐ ܡ̣ܶܢ ܡܰܝ̈ܳܐ ܕܒܰܡܥܰܪܬܳܐ ܠܳܟ ܢܒܰܥܘ: ܬܳܐ ܒܰܫܠܳܡܳܐ ܡܳܪܝ ܕܺܝܡܶܛ ܘܩܰܒܶܠ ܫܠܳܡܰܢ ܘܦܰܢܳܐ ܫ̈ܶܐܠܳܬܰܢ: ܘܟܰܕ ܒܚܰܓܳܟ ܛܽܘܒܬܳܢܳܐ ܡܶܬܒܰܣܡܺܝܢܰܢ: ܛܽܘܒܳܐ ܠܳܟ ܝܳܗܒܺܝܢܰܢ ܘܳܐܡܪܺܝܢܰܢ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܡܳܪܝ ܕܺܝܡܶܛ ܪܳܕܽܘܦܳܐ ܕܰܗܘܳܐ ܪܕܺܝܦܳܐ: ܘܡܶܛܽܠ ܗܳܕܶܐ ܫܺܐܕ̈ܶܐ ܐܳܦ ܟܽܘܪ̈ܗܳܢܶܐ ܗܳܐ ܡܶܬܪܰܕܦܺܝܢ: ܠܳܟ ܛܽܘܒܰܝܟ ܡܳܪܝ ܕܺܝܡܶܛ ܣܳܗܕܳܐ ܚܠܺܝܨܳܐ ܐܳܦ ܥܳܢܘܳܝܳܐ ܟܰܫܺܝܪܳܐ: ܠܳܟ ܘܒܳܝܟ ܡܳܪܝ ܕܺܝܡܶܛ ܣܳܗܕܳܐ ܕܰܦܠܰܚܬ ܥܰܡ ܡܳܪܳܟ ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ ܒܟܰܦܢܳܐ ܘܨܰܗܝܳܐ ܘܛܽܘܪܳܦܳܐ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܕܺܝܡܶܛ ܕܒܶܝܬ ܐܺܝܕܰܝ̈ܟ ܡܶܬܚܰܠܡܺܝܢ ܟܪ̈ܺܝܗܶܐ ܘܰܐܠܺܝ̈ܨܶܐ ܘܰܡܥܰܓ̈ܒܶܐ ܘܟܽܘܣ̈ܬܳܢܶܐ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܕܺܝܡܶܛ ܕܒܰܨܠܰܘ̈ܳܬܳܟ ܟܦܺܝ̈ܦܶܐ ܡܶܬܦܰܫܛܺܝܢ: ܘܰܡܫܰܪ̈ܰܝܳܐ ܡܶܫܬܰܪܪܺܝܢ ܘܰܚܓܺܝܪ̈ܶܐ ܡܩܰܝܙܺܝܢ: ܠܳܟ ܛܽܘܒܰܝܟ ܡܳܪܝ ܕܺܝܡܶܛ ܕܡ̣ܶܢ ܟܽܠ ܕܽܘܟ ܡܶܬܟܰܢܫܺܝܢ ܒܢܰܝ̈ܢܳܫܳܐ ܘܳܐܬܶܝܢ ܠܓܰܘ ܕܰܝܪܳܟ ܕܢܶܣܒܽܘܢ ܡ̣ܶܢ ܓܰܪ̈ܡܰܝܟ ܥܽܘܕܪ̈ܳܢܶܐ ܠܟܺܐܒܰܝ̈ܗܽܘܢ ܟܣܰܝ̈ܳܐ ܘܰܓܠܰܝ̈ܳܐ: ܐܶܠܐ ܫܰܐܠ ܘܰܒܥܺܝ ܡ̣ܶܢ ܡܳܪܳܟ ܒܝܽܘܡ ܥܺܐܕܳܟ: ܢܦܺܐܫܳܐ ܠܐܠܺܝ̈ܨܶܐ: ܪܘܳܚܬܳܐ ܠܥܰܝܺܝ̈ܩܶܐ: ܐܳܣܝܽܘܬܳܐ ܠܰܟܪ̈ܺܝܗܶܐ: ܫܽܘܪܳܪܳܐ ܠܰܡܫܰܪ̈ܰܝܳܐ: ܚܽܘܠܡܳܢܳܐ ܠܰܡܥܰܓ̈ܒܶܐ: ܫܪܳܝܳܐ ܠܐܣܺܝܪ̈ܶܐ: ܦܽܘܢܳܝܳܐ ܠܪ̈ܰܚܺܝܩܶܐ: ܢܽܘܛܳܪܳܐ ܠܩܰܪ̈ܺܝܒܶܐ: ܙܝܳܢܬܳܐ ܠܰܨܪ̈ܺܝܟܶܐ: ܣܰܒܥܳܐ ܠܟܰܦ̈ܢܶܐ ܫܽܘܪܬܳܚܳܐ ܠܥ̈ܰܠܠܳܬܳܐ: ܠܰܟܠܺܝܠܳܗ̇ ܕܫܰܢ̱ܬܳܐ ܒܽܘܪ̈ܟܳܬܳܐ: ܫܰܝܢܳܐ ܠܡܰܠܟ̈ܘܳܬܳܐ: ܒܽܘܛܳܠܐ ܕܰܫܓܽܘ̈ܫܝܶܐ: ܢܰܘܚܳܐ ܒܗܺܝܠܐ ܠܰܟܪ̈ܺܝܣܛܝܳܢܶܐ: ܘܰܠܥܺܕ̈ܳܬܳܐ ܘܥܽܘܡܪ̈ܶܐ ܘܕܰܝܪ̈ܳܬܳܐ ܢܳܛܽܘܪܽܘܬܳܐ ܕܡ̣ܶܢ ܟܽܠ ܢܶܟܝܳܢܺܝ̈ܢ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ: ܘܥܰܠ ܟܽܠܶܗ ܟܶܢܫܰܢ ܪ̈ܰܚܡܶܐ ܘܰܚܢܳܢܳܐ: ܗܳܫܳܐ܀

 

 

 

ܥܛܪܐ

 

 

 

ܥܶܛܪܳܐ ܗܰܢܺܝܳܐܐ ܘܪܺܝܚܳܐ ܒܰܣܺܝܡܳܐ ܢܶܣܰܩ ܠܳܟ ܡܳܪܝ ܒܕܽܘܟܪܳܢܶܗ ܕܓܰܒܝܳܐ ܡܳܪܝ ܕܺܝܡܶܛ ܪܳܕܽܘܦܳܐ ܕܰܗܘܳܐ ܪܕܺܝܦܳܐ ܘܰܒܝܰܕ ܟܺܐܒܶܗ ܐܰܣܺܝ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܕܠܶܗ ܐܶܬܩܰܪܰܒܘ: ܘܗܳܐ ܟܽܠܗܶܝܢ ܥܺܕ̈ܳܬܳܐ ܘܕܰܝܪ̈ܳܬܳܐ ܙܳܡܪ̈ܳܢ ܫܽܘܒܚܳܐ ܠܗܰܘ ܕܚܰܝܠܶܗ: ܘܫ̈ܳܐܠܳܢ ܪ̈ܰܚܡܶܐ ܘܰܚܢܳܢܳܐ ܒܰܨܠܰܘ̈ܳܬܶܗ ܕܡܳܪܝ ܕܺܝܡܶܛ: ܗܳܫܳܐ܀

 

 

 

ܚܘܬܡܐ

 

 

 

ܒܕܽܘܟܪܳܢܳܟ ܓܰܒܝܳܐ ܡܳܪܝ ܕܺܝܡܶܛ ܘܰܕܡܳܪܝ ܫܰܒܰܝ ܡܰܥܡܕܳܢܳܟ: ܢܶܫܬܰܟܰܢ ܠܰܢ ܒܰܨܠܰܘ̈ܳܬܟܽܘܢ ܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ: ܘܟܳܗ̈ܢܶܐ ܘܰܡܫܰܡ̈ܫܳܢܶܐ ܕܫܳܗܪܺܝܢ ܒܥܺܐܕܳܐ ܕܺܝܠܟܽܘܢ: ܢܶܬܚܰܠܛܽܘܢ ܥܰܡ ܦܺܝܢܚܶܣ ܘܶܐܠܺܝܥܳܙܳܪ: ܘܢܶܚܙܽܘܢ ܚܢܳܢܳܐ ܘܪ̈ܰܚܡܶܐ ܒܝܽܘܡ ܕܺܝܢܳܐ: ܘܡܳܪܰܢ ܘܰܐܠܳܗܰܢ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܩܪܳܝܗܝ ܠܡܳܪܝ ܕܺܝܡܶܛ ܡ̣ܶܢ ܚܰܢܦܽܘܬܳܐ ܕܢܶܗܘܶܐ ܟܳܪܽܘܙܳܐ ܠܗܰܝܡܳܢܽܘܬܳܐ ܫܰܪܺܝܪܬܳܐ: ܠܗܰܘ ܕܣܳܡ ܠܶܗ ܟܺܐܒܳܐ ܕܢܶܗܘܶܐ ܥܶܠܬܳܐ ܕܚܰܝ̈ܶܐ: ܕܒܶܗ ܢܶܬܬܨܺܝܕ ܘܢܺܐܬܶܐ ܠܛܳܒܬܳܐ: ܘܗܳܐ ܥܒܺܝܕ ܐܳܣܝܳܐ ܠܟܽܠ ܟܺܐܒ ܘܟܽܘܪܗܳܢ: ܗ̇ܰܘ ܕܰܒܝܰܕ ܨܠܰܘ̈ܳܬܶܗ ܢܶܬܰܐܣܶܐ ܒܢܰܦܫܳܐ ܘܰܒܦܰܓܪܳܐ ܘܰܠܡܰܦܢܝܳܢܶܗ ܡ̣ܶܢ ܛܳܥܝܽܘܬܳܐ ܢܰܘܕܶܐ ܘܰܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܠܳܟ ܡܳܪܝܳܐ ܐܠܰܗܳܐ ܣܳܓܕܺܝܢܰܢ: ܘܰܫܡܳܟ ܕܢܺܐܬܶܐ ܠܐܝܳܠܰܢ ܫܳܐܠܺܝܢܰܢ: ܐܳܦ ܥܽܘܕܪ̈ܳܢܰܝܟ ܠܣܽܘܝܳܥܰܢ ܬܳܒܥܺܝܢܰܢ ܐܰܝܟ ܕܰܠܓܰܒܝܳܐ ܡܳܪܝ ܕܺܝܡܶܛ ܒܳܥܶܝܢܰܢ: ܗܳܢܳܐ ܕܰܒܟܺܐܒܳܐ ܪܶܓܫܳܢܳܝܶܐ ܪܕܰܝܬܳܝܗܝ ܘܰܕܠܐ ܒܨܶܒܝܳܢܶܗ ܠܰܫܪܳܪܳܟ ܐܰܦܢܺܝܬܳܝܗܝ ܘܰܚܠܳܦ ܪܳܕܽܘܦܳܐ ܕܥܺܕܬܳܐ ܪܕܺܝܦܳܐ ܥܒܰܕܬܳܝܗܝ: ܘܰܕܗܰܝܡܶܢ ܒܳܟ ܡ̣ܶܢ ܟܽܠܶܗ ܠܶܒܶܗ ܡ̣ܶܢ ܟܺܐܒܶܗ ܐܰܣܺܝܬܳܝܗܝ: ܘܰܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ ܐܰܫܠܶܛܬܳܝܗܝ: ܘܥܰܠ ܒܶܝܬܓܰܙܳܟ ܗܰܝܡܶܢܬܳܝܗܝ: ܘܥܰܠ ܥܽܘܬܪܳܟ ܐܠܰܗܳܝܳܐ ܐܰܓܥܶܠܬܳܝܗܝ ܘܰܒܡܰܥܡܽܘܕܺܝܬܳܐ ܩܰܕܺܝܫܬܳܐ ܕܰܟܺܝܬܳܝܗܝ: ܘܡ̣ܶܢ ܛܰܡܽܐܘܬܳܐ ܩܰܕܶܫܬܳܝܗܝ: ܘܰܣܥܰܪ ܚܰܝ̈ܠܐ ܘܬܶܕܡܪ̈ܳܬܳܐ ܚܰܘܺܝܬܳܝܗܝ ܘܰܕܢܰܦܢܶܐ ܠܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ ܐܰܘܕܰܥܬܳܝܗܝ: ܘܡܶܛܽܠ ܥܰܡܠܰܘ̈ܗܝ ܪܰܘܪ̈ܒܶܐ ܘܽܐܘܠܨܳܢ̈ܶܐ ܣܰܝܒܰܪ ܠܰܫܡܶܗ ܩܰܕܺܝܫܳܐ ܐܰܘܪܶܒܬܳܝܗܝ ܘܒܰܐܪܒܰܥ ܦܶܢ̈ܝܳܢ ܐܰܟܪܶܙܬܳܝܗܝ: ܘܰܠܪܰܒܳܐ ܕܩܽܘܫܬܳܐ ܘܡܰܠܦܳܢܳܐ ܕܰܫܪܳܪܳܐ ܡܳܪܝ ܫܰܒܰܝ ܐܠܰܘܶܬܬܳܝܗܝ: ܘܡܰܠܐܟܳܐ ܕܺܝܠܳܟ ܠܐܣܝܽܘܬܶܗ ܫܰܕܰܪܬܳܝܗܝ ܘܰܕܢܺܐܡܰܪ ܠܶܗ ܕܰܥܒܺܝܕ ܐܳܣܝܳܐ ܠܰܒܢܰܝ̈ܢܳܫܳܐ ܣܰܒܰܪܬܳܝܗܝ: ܘܰܕܢܰܐܣܶܐ ܬܽܘܒ ܠܚܰܢ̈ܦܶܐ ܘܟܳܦܽܘܪ̈ܶܐ ܘܰܟܪ̈ܺܝܣܛܝܳܢܶܐ ܫܰܘܝܳܐܝ̣ܬ ܐܰܘܕܰܥܬܳܝܗܝ: ܘܕܽܘܡܝܳܐ ܛܳܒܳܐ ܠܡܶܬܦܰܢ̈ܝܳܢܶܐ ܘܬܰܝ̈ܳܒܶܐ ܥܒܰܕܬܳܝܗܝ ܘܰܒܨܰܘܡܳܐ ܐܳܦ ܒܰܨܠܽܘܬܳܐ ܢܰܨܰܚܬܳܝܗܝ ܐܳܦ ܒܕܽܘܒܳܪ̈ܶܐ ܕܙܰܕܺܝܩܽܘܬܳܐ ܘܥܰܡ̈ܠܐ ܕܰܡܝܰܬܪܽܘܬܳܐ ܫܰܪܰܪܬܳܝܗܝ: ܘܡܶܛܽܠ ܫܰܗܪܶܗ ܐܰܡܺܝܢܳܐ ܕܠܰܝ̈ܠܰܝ ܐܺܝܡܳܡ ܥܰܡ ܡܰܠܐܟ̈ܶܐ ܚܰܠܶܛܬܳܝܗܝ: ܘܟܰܕ ܡ̣ܶܢ ܟܳܦܽܘܪܽܘܬܳܐ ܕܒܳܗ̇ ܐܺܝܬܰܘܗܝ ܗܘܳܐ ܐܰܦܢܺܝܬܳܝܗܝ: ܘܡ̣ܶܢ ܥܝ̈ܳܕܶܐ ܡܰܣܠܰܝ̈ܳܐ ܕܚܰܢ̈ܦܶܐ ܐܰܒܥܶܕܬܳܝܗܝ: ܘܡ̣ܶܢ ܐܳܣܘ̈ܳܬܳܐ ܘܚܰܪ̈ܳܫܶܐ ܕܰܒܥܰܘ ܕܢܶܩܛܠܽܘܢܳܝܗܝ ܫܰܘܙܶܒܬܳܝܗܝ ܘܡ̣ܶܢ ܢܶܟܠܗܽܘܢ ܘܰܚܣܳܡܗܽܘܢ ܢܰܛܰܪܬܳܝܗܝ: ܘܳܐܣܝܳܐ ܕܡܰܟܰܐܒ̈ܶܐ ܘܰܡܫܰܪ̈ܰܝܳܐ ܘܕܰܡܥܰܓ̈ܒܶܐ ܣܳܡܬܳܝܗܝ ܘܰܐܝܟ ܕܰܠܦܰܘܠܳܘܣ ܪܳܕܽܘܦܳܐ ܕܰܗܘܳܐ ܪܕܺܝܦܳܐ ܕܰܡܺܝܬܳܝܗܝ: ܘܰܠܨܶܒܝܳܢܶܗ ܩܰܫܝܳܐ ܠܰܡܫܰܝܢܽܘܬܳܐ ܘܒܰܣܺܝܡܽܘܬܳܐ ܐܰܗܦܶܟܬܳܝܗܝ: ܘܰܚܠܳܦ ܕܢܶܥܩܽܘܪ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ ܒܳܢܶܐ ܕܰܝܪ̈ܳܬܳܐ ܘܩܳܒܰܥ ܡܰܕܒ̈ܚܶܐ ܥܒܰܕܬܳܝܗܝ: ܘܡ̣ܶܢ ܟܳܦܽܘܪܽܘܬܳܐ ܠܬܰܘܕܺܝܬܳܐ ܬܪܺܝܨܬܳܐ ܐܰܦܢܺܝܬܳܝܗܝ: ܘܡ̣ܶܢ ܕܺܐܒܳܐ ܚܳܛܽܘܦܳܐ ܘܰܐܪܝܳܐ ܣܳܪܽܘܚܳܐ ܐܶܡܪܳܐ ܠܰܛܝܳܪܳܟ ܐܰܥܶܠܬܳܝܗܝ: ܘܡ̣ܶܢ ܒܺܝ̈ܫܳܬܳܐ ܠܛܳܒ̈ܳܬܳܐ ܫܰܚܠܶܦܬܳܝܗܝ ܘܦܰܠܳܚܳܐ ܒܟܰܪܡܳܟ ܣܳܡܬܳܝܗܝ: ܘܒܰܪ ܒܰܝܬܳܟ ܘܝܳܕܰܥ ܐ̱ܪ̈ܳܙܰܝܟ ܐܰܩܺܝܡܬܳܝܗܝ: ܘܥܽܘܬܪܳܟ ܒܶܝܬ ܐܺܝܕܰܘ̈ܗܝ ܠܰܣܢܺܝ̈ܩܶܐ ܦܰܪܢܶܣܬܳܝܗܝ: ܘܟܽܘܪܚܶܗ ܡܰܠܐܟ̈ܶܐ ܡܠܰܝܬܳܝܗܝ ܘܠܰܡܥܰܪܬܳܐ ܠܘܳܬ ܡܳܪܝ ܫܰܒܰܝ ܨܰܝܶܒܬܳܝܗܝ: ܘܰܒܡܰܝ̈ܳܐ ܕܰܢܒܰܥܘ ܡ̣ܶܢ ܡܥܰܪܬܶܗ ܠܶܗ ܘܰܠܬܰܠܡܺܝܕܶܗ ܐܰܒܰܝ ܐܰܥܡܶܕܬܳܝܗܝ ܘܰܒܗܰܘ ܛܽܘܪܳܐ ܐܰܘܬܶܒܬܳܝܗܝ: ܘܕܰܢܫܰܠܶܡ ܝܰܘ̈ܡܳܬܶܗ ܬܰܡܳܢ ܚܰܘܺܝܬܳܝܗܝ: ܘܰܕܢܶܗܘܶܐ ܠܶܗ ܬܰܠܡܺܝܕܳܐ ܘܢܶܒܢܶܐ ܕܰܝܪܳܐ ܦܰܩܶܕܬܳܝܗܝ: ܘܕܽܘܟܪܳܢܶܗ ܠܥܶܠ ܒܰܫܡܰܝܳܐ ܥܒܰܕܬܳܝܗܝ: ܘܰܫܡܶܗ ܒܡܰܠܟܽܘܬܳܐ ܕܺܝܠܳܟ ܟܬܰܒܬܳܝܗܝ: ܘܰܒܢܽܘܗܪܳܟ ܐܠܰܗܳܝܳܐ ܐܰܨܡܰܚܬܳܝܗܝ: ܘܰܒܫܽܘ̈ܟܳܢܶܐ ܕܺܝܠܳܟ ܐܰܥܬܰܪܬܳܝܗܝ: ܐܳܦ ܒܳܐܣ̈ܘܳܬܳܐ ܘܥܽܘܕܪ̈ܳܢܶܐ ܨܰܒܶܬܬܳܝܗܝ: ܘܡ̣ܶܢ ܨܶܝܕ ܘܳܠܺܝܣ ܐܰܪܚܶܩܬܳܝܗܝ: ܘܡ̣ܶܢ ܗ̇ܳܝ ܕܢܶܪܕܽܘܦ ܠܰܟܪ̈ܺܝܣܛܝܳܢܶܐ ܟܠܰܝܬܳܝܗܝ: ܘܡ̣ܶܢ ܕܢܰܚܪܶܒ ܥܺܕ̈ܳܬܳܐ ܘܕܰܝܪ̈ܳܬܳܐ ܐܰܚܓܰܪܬܳܝܗܝ: ܘܒܰܡܚܽܘܬܳܐ ܕܡ̣ܶܢ ܪܶܓܠܶܗ ܥܕܰܡܳܐ ܠܚܰܨܶܗ ܐܰܥܺܝܩܬܳܝܗܝ: ܘܟܰܕ ܒܳܟܶܐ ܘܡܶܫܬܰܢܰܩ ܒܽܐܘ̈ܠܨܳܢܶܐ ܫܒܰܩܬܳܝܗܝ: ܘܰܕܢܶܕܥܳܟ ܡ̇ܰܢ ܐܰܢ̱ܬ ܘܥܰܠ ܡܽܘܢ ܡܶܫܬܰܢܰܩ ܚܰܘܺܝܬܳܝܗܝ: ܘܰܠܡܶܩܰܫ ܕܶܝܢ ܒܳܬܪܥܳܟ ܒܰܩܛܺܝܪܳܐ ܐܰܠܶܨܬܳܝܗܝ: ܘܕܰܢܗܰܝܡܶܢ ܒܳܟ ܟܰܕ ܠܐ ܨܳܒܶܐ ܡܚܰܝܬܳܝܗܝ: ܘܡ̣ܶܢ ܕܰܥܡܰܕ ܘܗܰܝܡܶܢ ܒܳܟ ܐܰܣܺܝܬܳܝܗܝ: ܘܰܕܢܶܗܘܶܐ ܗ̣ܽܘ ܐܳܣܝܳܐ ܠܟܽܠ ܟܺܐܒ ܘܟܽܘܪܗܳܢ ܐܰܫܠܶܛܬܳܝܗܝ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܕܰܓܒܰܝܬܳܝܗܝ: ܘܥܰܠ ܒܺܝܫܳܐ ܘܚܰܝܠܶܗ ܚܰܝܶܠܬܳܝܗܝ: ܐܳܦ ܠܰܢ ܫܰܚܠܶܦ ܡ̣ܶܢ ܒܺܝ̈ܫܳܬܳܐ ܠܛܳܒ̈ܳܬܳܐ ܐܰܝܟ ܕܫܰܚܠܶܦܬܳܝܗܝ ܘܩܰܒܶܠܰܝܢ ܠܡܶܬܬܰܘ̈ܝܳܢܶܐ ܐܰܝܟ ܕܩܰܒܶܠܬܳܝܗܝ: ܘܰܣܚܽܘܦ ܡܶܢܰܢ ܠܒܺܝܫܳܐ ܐܰܝܟ ܕܰܩܕܳܡܰܘܗܝ ܣܚܰܦܬܳܝܗܝ: ܘܢܰܛܰܪ ܠܰܢ ܒܰܨܠܺܝܒܳܟ ܙܰܟܳܝܳܐ ܐܰܝܟ ܕܰܢܛܰܪܬܳܝܗܝ ܘܰܦܬܰܚ ܩܕܳܡܰܝܢ ܬܪܰܥ ܪ̈ܰܚܡܰܝܟ ܐܰܝܟ ܕܰܩܕܳܡܰܘܗܝ ܦܬܰܚܬܳܝܗܝ: ܘܰܥܒܶܕ ܠܰܢ ܒܢ̈ܰܝ ܝܳܪܬܽܘܬܳܟ ܐܰܝܟ ܕܰܥܒܰܕܬܳܝܗܝ: ܩܪܺܝ ܠܰܢ ܠܡܶܫܬܽܘܬܳܟ ܐܰܝܟ ܕܰܩܪܰܝܬܳܝܗܝ: ܘܒܰܣܶܡ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܟ ܐܰܝܟ ܕܒܰܣܶܡܬܳܝܗܝ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܐܠܰܗܳܐ ܕܚܰܝܶܠܬܳܝܗܝ: ܘܠܳܟ ܒܪܳܐ ܡܫܺܝܚܳܐ ܕܢܰܨܰܚܬܳܝܗܝ: ܘܠܳܟ ܪܽܘܚܳܐ ܩܰܕܺܝܫܳܐ ܕܒܰܟܠܺܝܠܐ ܕܙܳܟܽܘܬܳܐ ܟܰܠܶܠܬܳܝܗܝ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܡܫܺܝܚܳܐ ܐܠܰܗܳܐ ܕܫܰܚܠܶܦܬܳܝܗܝ ܠܓܰܒܝܳܐ ܡܳܪܝ ܕܺܝܡܶܛ ܡ̣ܶܢ ܚܰܢܦܽܘܬܳܐ ܕܺܐܝܬܰܘܗܝ ܗܘܳܐ ܒܳܗ̇: ܫܰܚܠܶܦ ܠܰܢ ܡܳܪܝ ܠܥܰܒ̈ܕܰܝܟ ܡ̣ܶܢ ܒܺܝ̈ܫܳܬܳܐ ܠܘܳܬ ܛܳܒ̈ܳܬܳܐ: ܘܡ̣ܶܢ ܬܰܘܫܳܐ ܕܰܚܛܺܝܬܳܐ ܠܘܳܬ ܝܺܕܰܥܬܳܐ ܕܰܫܪܳܪܳܐ: ܕܢܶܗܘܶܐ ܥܰܡܶܗ ܝܳܪ̈ܽܘܬܶܐ ܡܬܽܘ̈ܡܳܝܶܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܫܰܚܠܦܳܢܳܐ ܕܙܰܒ̈ܢܶܐ ܘܥܶܕ̈ܳܢܶܐ ܕܫܽܘܚܠܳܦܳܐ ܥܠܰܘܗܝ ܠܐ ܥܳܕܶܐ: ܕܫܰܚܠܦܶܗ ܠܡܳܪܝ ܕܺܝܡܶܛ ܡ̣ܶܢ ܚܰܢܦܽܘܬܳܐ ܠܗܰܝܡܳܢܽܘܬܳܐ ܬܪܺܝܨܬܳܐ: ܠܗܰܘ ܕܫܰܕܰܪ ܡܰܠܐܟܶܗ ܘܰܡܚܳܝܗܝ ܠܕܺܝܡܶܛ ܡܚܽܘܬܳܐ ܡܰܪܺܝܪܬܳܐ ܘܰܒܥܶܠܬܶܗ ܐܶܬܪܰܟܰܟ ܠܶܒܶܗ ܘܰܦܢܳܐ ܡ̣ܶܢ ܛܳܥܝܽܘܬܳܐ ܠܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ: ܕܠܶܗ ܠܡܳܪܝܳܐ ܕܨܳܕܶܗ ܒܰܡܨܺܝܕܬܳܐ ܐܠܰܗܳܝܬܳܐ ܢܰܘܕܶܐ ܘܰܢܫܰܒܰܚ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣܰܝ̈ܟ ܐܳܘ ܓܰܒܝܳܐ ܡܳܪܝ ܕܺܝܡܶܛ ܐܶܬܰܝܢܰܢ ܝܰܘܡܳܢܳܐ ܠܰܡܥܰܕܥܳܕܽܘ: ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܠܰܡܪܰܡܪܳܡܽܘ: ܘܰܠܡܳܪܝܳܐ ܕܨܳܒܶܐ ܕܟܽܠ ܠܰܡܫܰܒܳܚܽܘ: ܘܰܠܟܽܠܶܗ ܟܶܢܫܳܐ ܕܰܡܗܰܝ̈ܡܢܶܐ: ܫܰܪܒܶܗ ܕܕܺܝܡܶܛ ܘܳܠܐܷ ܠܡܰܘܕܳܥܽܘ ܗܳܢܳܐ ܕܟܰܕ ܡ̣ܶܢ ܝܺܠܺܝܕܽܘܬܶܗ ܒܚܰܢܦܽܘܬܳܐ ܐܶܬܪܰܒܺܝ ܗܘܳܐ ܒܣܰܝܒܽܘܬܗ ܩܰܒܶܠ ܟܠܺܝܠܐ ܕܥܰܡ̈ܠܐ ܪܰܘܪ̈ܒܶܐ ܘܰܗܘܳܐ ܒܰܪ ܡܰܠܟܽܘܬܳܐ ܫܡܰܝܳܢܺܝܬܳܐ: ܗܳܢܳܐ ܕܟܰܕ ܠܡܰܥܪܒܳܐ ܐܰܫܩܶܠ ܘܰܠܡܰܠܟܳܐ ܗ̇ܰܘ ܪܰܫܺܝܥܳܐ ܘܳܠܺܝܣ ܢܩܶܦ: ܘܰܕܢܶܚܽܘܬ ܠܡܰܕܢܚܳܐ ܘܢܰܚܪܶܒ ܥܺܕ̈ܳܬܳܐ ܘܕܰܝܪ̈ܳܬܳܐ ܘܢܶܪܕܽܘܦ ܟܪ̈ܺܝܣܛܝܳܢܶܐ ܘܰܒܗܳܠܶܝܢ ܡܰܠܟ̈ܶܐ ܒܺܝ̈ܫܶܐ ܠܫܳܢܝܽܘܬܶܗ ܕܘܳܠܺܝܣ ܡܳܠܶܟ ܗܘܳܐ: ܗܳܢܳܐ ܕܰܒܦܶܠܓܶܗ ܕܠܺܠܝܳܐ ܢܚܶܬ ܡܰܠܐܟܶܗ ܕܡܳܪܝܳܐ ܘܰܡܚܳܝܗܝ ܡܚܽܘܬܳܐ ܡܰܪܺܝܪܬܳܐ: ܘܰܐܦܶܩ ܘܰܪܺܝܕܳܐ ܡ̣ܶܢ ܚܰܨܶܗ ܘܰܗܘܳܐ ܒܽܐܘܠܨܳܢܳܐ ܪܰܒܳܐ: ܗܳܢܳܐ ܕܰܒܪܰܡܫܳܐ ܟܽܠ ܒܺܝ̈ܫܶܐ ܒܠܶܒܶܗ ܟܡܺܝ̈ܢܳܢ ܗܘܰܝ̈ ܘܰܒܦܶܠܓܶܗ ܕܠܺܠܝܳܐ ܗܘܳܐ ܣܳܒܶܠ ܟܽܠ ܕܽܘܢܳܩܺܝ̈ܢ ܒܰܩܢܽܘܡܶܗ: ܗܳܢܳܐ ܕܡܳܪܝܳܐ ܠܐ ܨܳܒܶܐ ܒܰܐܒܕܳܢܳܐ ܕܰܓܒܺܝܠܬܶܗ ܘܠܐ ܡܰܪܦܶܐ ܐܺܝܕܳܐ ܒܕܳܚ̈ܠܰܘܗܝ: ܠܐ ܫܳܒܶܩ ܕܡܰܚܫܰܒܬܶܗ ܕܕܺܝܡܶܛ ܕܡܰܠܝܳܐ ܗܘܳܐ ܪܽܘܫܥܳܐ ܕܬܶܣܰܩ ܠܪܺܝܫ ܗܳܢܳܐ ܕܰܪܕܳܝܗܝ ܐܠܰܗܳܐ ܐܰܝܟ ܕܰܠܦܰܘܠܳܘܣ ܕܰܡܥܰܬܶܕ ܗܘܳܐ ܪܕܽܘܦܝܳܐ ܠܬܰܠܡܺܝ̈ܕܶܐ: ܗܳܢܳܐ ܕܡܶܛܽܠ ܕܺܝܕܰܥ ܐܠܰܗܳܐ ܕܛܰܢܳܢ̈ܶܐ ܐܶܢܽܘܢ ܣܰܓܺܝ ܦܰܘܠܳܘܣ ܐܳܦ ܕܺܝܡܶܛ: ܘܶܐܢ ܢܨܽܘܕ ܐܶܢܽܘܢ ܣܰܓܺܝ̈ܶܐܐ ܢܰܝܬܽܘܢ ܠܶܗ ܘܰܢܬܰܠܡܕܽܘܢ: ܦܰܘܠܳܘܣ ܡ̇ܰܢ ܒܝܰܕ ܟܳܪܽܘܙܽܘܬܶܗ ܠܣܰܓܺܝ̈ܶܐܐ ܐܰܦܢܺܝ: ܘܕܺܝܡܶܛ ܒܝܰܕ ܐܳܣ̈ܘܳܬܶܗ ܠܚܰܢ̈ܦܶܐ ܕܠܐ ܡܶܢܝܳܢ ܬܰܠܡܶܕ: ܗܳܢܳܐ ܕܰܠܛܽܘܪ̈ܰܝ ܩܽܘܪܳܘܣ ܡܰܢܰܥ ܘܡ̣ܶܢ ܡܳܪܝ ܫܰܒܰܝ ܥܡܰܕ ܡ̣ܶܢ ܡܰܝ̈ܐܳ ܕܰܢܒܰܥܘ ܒܰܡܥܰܪܬܳܐ: ܘܡܶܢܶܗ ܐܶܬܚܰܘܺܝ ܠܶܗ ܐܽܘܪܚܳܐ ܕܰܫܪܳܪܳܐ ܗܳܢܳܐ ܕܰܗܘܳܐ ܐܳܣܝܳܐ ܚܰܟܺܝܡܳܐ ܘܰܒܛܶܠܝ̈ ܟܽܠܗܶܝܢ ܐܳܣ̈ܘܳܬܳܐ ܐܳܦ ܥܶܩܳܪ̈ܶܐ ܒܝܰܘ̈ܡܳܬܶܗ ܘܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܒܶܗ ܩܳܢܶܝܢ ܗܘܰܘ ܚܽܘܠܡܳܢܳܐ ܘܳܐܣܝܽܘܬܳܐ: ܗܳܢܳܐ ܕܟܳܗ̈ܢܶܐ ܘܰܚܣܰܝ̈ܳܐ ܘܰܡܫܰܡ̈ܫܳܢܶܐ ܡܳܠܶܟ ܗܘܳܐ ܕܰܒܫܺܝ̈ܫܠܳܬܳܐ ܟܽܠܗܽܘܢ ܢܶܬܰܐܣܽܘܢ ܘܰܕܠܐ ܪ̈ܰܚܡܶܐ ܢܶܬܩܰܛܠܽܘܢ: ܘܗܳܐ ܝܰܘܡܳܢܳܐ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܶܢܗܽܘܢ ܡܶܬܩܰܠܰܣ ܗܳܢܳܐ ܕܥܺܕ̈ܳܬܳܐ ܘܕܰܝܪ̈ܳܬܳܐ ܕܡܳܠܶܟ ܗܘܳܐ ܕܢܰܚܪܶܒ ܘܢܶܥܩܽܘܪ ܗܳܐ ܝܰܘܡܳܢܳܐ ܓܽܘܕܰܝ̈ܗܶܝܢ ܪ̈ܳܥܡܳܢ ܒܬܶܫܒ̈ܚܳܬܳܐ ܘܰܠܥܺܐܕܶܗ ܡܝܰܩܪ̈ܳܢ: ܗܳܢܳܐ ܕܟܰܕ ܡ̣ܶܢ ܡܰܥܪܒܳܐ ܐܶܬܳܐ ܠܛܽܘܪ̈ܰܝ ܩܽܘܪܳܘܣ ܡܛܳܐ: ܘܕܰܢܩܽܘܡ ܕܥܰܠ ܪ̈ܶܓܠܰܘܗܝ ܠܐ ܡܨܶܐ ܗܘܳܐ: ܗܳܢܳܐ ܕܰܥܠܰܝܡܳܐ ܕܥܰܡܶܗ ܕܰܫܡܶܗ ܗܘܳܐ ܐܰܒܰܝ ܛܰܥܢܶܗ ܘܰܐܥܠܶܗ ܠܰܡܥܰܪܬܳܐ ܠܘܳܬ ܡܳܪܝ ܫܰܒܰܝ: ܘܰܬܪ̈ܰܝܗܽܘܢ ܩܰܒܶܠܘ ܡܶܢܶܗ ܪܽܘܫܡܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ: ܗܳܢܳܐ ܕܰܢܚܶܬ ܡܰܠܐܟܳܐ ܠܰܡܥܰܪܬܳܐ ܠܘܳܬܶܗ ܘܶܐܡܰܪ ܠܶܗ ܕܶܐܢܳܐ ܐ̱ܢܰܐ ܗ̱ܘ ܕܰܡܚܰܝܬܳܟ ܡܶܛܽܠ ܒܺܝܫܽܘܬܳܟ: ܘܗܳܫܳܐ ܐܶܬܺܝܬ ܘܰܐܣܺܝܬܳܟ ܡܶܛܽܠ ܬܝܳܒܽܘܬܳܟ: ܗܘܺܝ ܚܠܺܝܡ ܘܰܡܫܰܪܰܪ ܒܗܰܝܡܳܢܽܘܬܳܟ: ܘܰܚܢܰܢ ܡܚܺܝ̈ܠܐ ܘܬܰܚܽܘ̈ܒܶܐ ܒܰܒ̈ܢܳܬ ܩ̈ܳܠܐ ܫܒܺܝ̈ܚܳܬܳܐ ܠܶܗ ܡܩܰܠܣܺܝܢܳܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܐܰܒܽܘܢ ܡܳܪܝ ܕܺܝܡܶܛ ܐܳܣܝܳܐ ܕܠܐ ܥܶܩܳܪ̈ܶܐ ܘܣܰܡ̈ܡܳܢܶܐ: ܠܳܟ ܛܽܘܒܰܝܟ ܐܰܒܽܘܢ ܡܳܪܝ ܕܺܝܡܶܛ ܒܶܝܬ ܨܰܘܒܳܐ ܕܟܽܠ ܥܽܘܕܪ̈ܳܢܶܐ: ܠܳܟ ܛܽܘܒܰܝܟ ܐܰܒܽܘܢ ܡܳܪܝ ܕܺܝܡܶܛ ܓܰܙܳܐ ܕܰܡܠܐܷ ܟܽܠ ܛܳܒ̈ܳܢ: ܠܳܟ ܛܽܘܒܰܝܟ ܐܰܒܽܘܢ ܡܳܪܝ ܕܺܝܡܶܛ ܕܒܰܡܥܰܪܬܳܐ ܚܒܰܫܬ ܢܰܦܫܳܟ ܫܢܰܝ̈ܳܐ ܬܠܳܬܺܝܢ ܘܰܬܡܳܢܶܐ: ܠܳܟ ܛܽܘܒܰܝܟ ܐܰܒܽܘܢ ܡܳܪܝ ܕܺܝܡܶܛ ܕܗܳܐ ܫܡܳܟ ܢܳܨܰܚ ܒܟܽܠܗܽܘܢ ܕܳܪ̈ܶܐ ܥܰܡ ܙܰܒ̈ܢܶܐ: ܠܳܟ ܛܽܘܒܰܝܟ ܡܳܪܝ ܕܺܝܡܶܛ ܕܳܐܣܝܽܘܬܳܐ ܝܳܗܶܒ ܐܰܢ̱ܬ ܠܰܒܢܰܝ̈ܢܳܫܳܐ ܘܚܰܝ̈ܘܳܬܳܐ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܡܳܪܝ ܕܺܝܡܶܛ ܕܰܐܢ̱ܬ ܗ̣ܽܘ ܛܳܪܽܘܕܳܐ ܕܟܽܠ ܐܽܘܠܨ̈ܳܢܶܐ ܘܢܶܣܝܽܘ̈ܢܶܐ: ܘܗܳܫܳܐ ܠܡܳܪܳܟ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܕܢܶܥܒܶܕ ܠܟܽܠܰܢ ܡܶܬܦܰܢ̈ܝܳܢܶܐ ܘܒܳܟ ܘܰܒܪܰܒܳܟ ܡܳܪܝ ܫܰܒܰܝ ܡܶܬܓܰܘ̈ܣܳܢܶܐ: ܘܰܐܢ̱ܬܽܘܢ ܬܶܗܘܽܘܢ ܠܰܢ ܡܗܰܕܝ̈ܳܢܶܐ ܘܒܰܫܒܺܝ̈ܠܐ ܬܪ̈ܺܝܨܶܐ ܡܫܰܒ̈ܠܳܢܶܐ: ܘܡ̣ܶܢ ܟܽܠ ܢܶܣܝܽܘ̈ܢܶܐ ܘܩܺܐܪ̈ܣܶܐ ܡܣܰܬܪ̈ܳܢܶܐ ܘܡ̣ܶܢ ܟܽܠ ܫܰܒ̈ܛܶܐ ܕܪܽܘܓܙܳܐ ܡܫܰܘ̈ܙܒܳܢܶܐ: ܘܰܠܟܽܠ ܡܰܪ̈ܕܘܳܬܳܐ ܩܰܫ̈ܝܳܬܳܐ ܡܰܥܒܪ̈ܳܢܶܐ: ܕܗܳܐ ܚܢܰܢ ܟܽܠܰܢ ܒܰܨܠܰܘ̈ܳܬܟܽܘܢ ܡܶܬܛܦܺܝ̈ܣܳܢܶܐ: ܘܰܠܥܺܐܕܰܝ̈ܟܽܘܢ ܡܝܰܩܪ̈ܶܐ: ܘܰܠܓܰܪ̈ܡܰܝܟܽܘܢ ܡܙܰܝ̈ܚܳܢܶܐ: ܘܰܒܒܳܥ̈ܘܳܬܟܽܘܢ ܡܶܬܓܰܘ̈ܣܳܢܶܐ ܕܢܶܫܬܘܶܐ ܠܡܰܦ̈ܩܳܢܶܐ ܡܫܰܝ̈ܢܶܐ: ܘܰܕܢܶܫܬܰܦܥܽܘܢ ܥܠܰܝܢ ܪ̈ܰܚܡܶܐ ܘܰܚܢܳܢܳܐ: ܘܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܡܰܠܟܽܘܬܳܐ ܡܶܬܒܰܣ̈ܡܳܢܶܐ: ܘܢܶܙܡܰܪ ܫܽܘܒ̈ܚܶܐ ܠܐ ܡܶܫܬܰܬܩ̈ܳܢܶܐ: ܠܰܬܠܳܬܳܐ ܩܢܽܘ̈ܡܶܐ ܡܪ̈ܰܚܡܳܢܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܡܳܪܳܐ ܕܰܫܡܰܝ̈ܳܢܶܐ ܘܦܳܪܽܘܩܳܐ ܕܺܝܠܰܢ ܐܰܪ̈ܥܳܢܶܐ: ܩܰܒܶܠ ܠܒܶܣ̈ܡܶܐ ܗܳܠܶܝܢ ܕܩܰܪܶܒܢܰܢ ܠܳܟ ܝܰܘܡܳܢܳܐ: ܒܕܽܘܟܪܳܢܶܗ ܕܡܳܪܝ ܕܺܝܡܶܛ ܐܳܣܝܳܐ ܕܟܺܐܒ̈ܬܳܢܶܐ: ܘܥܳܨܽܘܒܳܐ ܕܟܽܠ ܟܺܐܒ̈ܶܐ ܘܟܽܘܪ̈ܗܳܢܶܐ: ܐܰܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܚܢܰܢ ܥܰܒܕܰܝ̈ܟ ܡܶܣ̈ܟܺܢܶܐ: ܘܰܐܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܡܳܪܝ ܕܺܝܡܶܛ ܘܡܳܪܝ ܫܰܒܰܝ ܘܡܳܪܝ ܐܰܒܰܝ: ܒܥܰܘ ܪ̈ܰܚܡܶܐ ܚܠܳܦ ܟܶܢ̈ܫܶܐ ܡܝܰܩܪ̈ܳܢܰܝܟܽܘܢ: ܡ̣ܶܢ ܡܫܺܝܚܳܐ ܡܳܪܟܽܘܢ ܒܗܳܢܳܐ ܝܰܘܡܳܐ ܕܕܽܘܟܪܳܢܟܽܘܢ: ܕܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܠܰܡܢܳܬܳܐ ܕܺܝܠܟܽܘܢ: ܘܰܠܡܰܠܟܽܘܬܳܐ ܕܰܢܛܺܝܪܳܐ ܠܟܽܘܢ: ܒܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܫܶܡܫܳܐ ܕܙܰܕܺܝܩܽܘܬܳܐ ܘܺܐܝܡܳܡܳܐ ܕܠܐ ܥܳܪܶܒ: ܠܗܰܘ ܢܽܘܗܪܳܐ ܕܠܐ ܚܳܫܶܟ ܘܨܶܡܚܳܐ ܕܠܐ ܩܳܦܶܣ: ܠܗܰܘ ܕܰܒܡܶܐܬܺܝܬܶܗ ܕܠܐܪܥܳܐ ܠܥܳܠܡܳܐ ܟܽܠܶܗ ܐܰܢܗܰܪ: ܘܒܶܗ ܐܶܫܬܰܚܠܰܦ ܓܰܒܝܳܐ ܡܳܪܝ ܕܺܝܡܶܛ ܠܘܳܬ ܩܽܘܫܬܳܐ ܘܰܫܪܳܪܳܐ ܕܠܶܗ ܝܳܐܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܚܠܳܦܰܝܢ ܚܰܛܳܝ̈ܶܐ ܡܰܘܬܳܐ ܨܶܒܝܳܢܳܝܳܐ ܘܰܨܠܺܝܒܳܐ ܘܚܰܫ̈ܶܐ ܣܒܰܠ ܒܰܒܣܰܪ: ܘܰܐܝܟ ܐܶܡܪܳܐ ܘܪܰܒ ܟܽܘܡܪ̈ܶܐ ܡܩܰܒܠܐ ܩܰܪܶܒ ܗ̣ܽܘ ܠܶܗ ܚܠܳܦ ܚܛܳܗܰܘ̈ܗܝ ܕܥܰܡܳܐ ܘܰܚܛܳܗ̈ܶܐ ܕܺܝܠܰܢ: ܘܒܰܕܡܳܐ ܕܶܐܫܰܕ ܥܰܠ ܐܰܦܰܝ̈ܢ ܚܰܣܺܝ ܘܩܰܕܶܫ ܠܢܰܦ̈ܫܳܬܰܢ ܘܒܺܝܗܺܝܒܽܘܬܳܐ ܕܐ̱ܪ̈ܳܙܰܘܗܝ ܦܰܓܪܶܗ ܘܰܕܡܶܗ ܩܰܕܺܝܫܳܐ: ܡ̣ܶܢ ܕܶܒ̈ܚܶܐ ܘܢܽܘ̈ܩܳܝܶܐ ܛܰܡ̈ܶܐܐ ܕܫܺܐܕ̈ܶܐ ܐܰܪܚܶܩ ܠܰܢ: ܘܡ̣ܶܢ ܬܶܫܡܫܬܳܐ ܕܕܰܝ̈ܘܶܐ ܕܒܰܦܬܰܟܪ̈ܶܐ ܚܰܪ̈ܫܶܐ ܡܦܰܩܩܺܝܢ ܗܘܰܘ ܚܰܪܰܪ ܠܰܢ: ܗ̇ܰܘ ܕܒܰܡܩܰܕܡܽܘܬ ܝܺܕܰܥܬܶܗ ܐܠܰܗܳܝܬܳܐ ܝܺܕܰܥ ܫܽܘܚܠܳܦܶܗ ܕܡܳܪܝ ܕܺܝܡܶܛ: ܐܰܪܚܶܫ ܒܠܶܒܶܗ ܕܡܳܪܝ ܫܰܒܰܝ ܘܰܐܥܡܕܶܗ ܕܰܕܠܐ ܕܶܚܠܐ ܢܶܬܩܰܪܰܒ ܠܡܰܘܕܝܳܢܽܘܬܳܐ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܗ̇ܰܘ ܕܟܰܕ ܫܡܰܥ ܡܳܪܝ ܕܺܝܡܶܛ ܠܡܶܠܰܬ݀ ܪܰܒܶܗ ܡܳܪܝ ܫܰܒܰܝ ܐܶܬܢܰܗܪܰܬ݀ ܬܰܪܥܺܝܬܶܗ: ܘܡ̣ܶܢ ܗܳܪܟܳܐ ܟܰܕ ܫܰܡܠܺܝ ܫܢܰܝ̈ܳܐ ܬܠܳܬܺܝܢ ܘܰܬܡܳܢܶܐ ܥܰܡ ܪܰܒܶܗ ܡܳܪܝ ܫܰܒܰܝ ܒܕܽܘܒܳܪ̈ܶܐ ܕܥܳܢܘܳܝܽܘܬܳܐ ܘܶܐܫܬܰܡܠܺܝ ܒܐܪܳܙܳܐ ܕܡܰܥܡܽܘܕܺܝܬܳܐ: ܘܰܒܐܪܳܙܳܐ ܡܰܥܒܶܕ ܚܰܝ̈ܶܐ ܦܰܓܪܳܐ ܘܰܕܡܳܐ ܐܶܫܬܰܘܬܰܦ: ܩܰܒܶܠ ܣܳܗܕܽܘܬܳܐ ܢܰܨܺܚܝܬܳܐ ܡ̣ܶܢ ܘܳܠܺܝܣ ܡܰܠܟܳܐ ܚܰܢܦܳܐ: ܘܰܗܘܳܐ ܐܶܡܪܳܐ ܕܰܟܝܳܐ ܡ̣ܶܢ ܝܰܕ ܕܺܐܒܳܐ ܚܰܨܺܝܦܐ: ܘܕܰܗܒܳܐ ܣܢܺܝܢܳܐ ܡ̣ܶܢ ܝܰܕ ܦܰܪܙܠܐ ܩܰܫܝܳܐ: ܒܝܰܕ ܕܶܒܚܬܳܐ ܩܰܕܺܝܫܬܳܐ ܕܢܰܦܫܶܗ ܩܕܳܡ ܡܳܪܶܗ ܒܬܰܘܕܺܝܬܳܐ ܬܪܺܝܨܬܳܐ: ܗܳܢܳܐ ܕܟܰܕ ܐܰܪܓܫܰܬ݀ ܚܰܢܦܽܘܬܳܐ ܕܰܗܘܳܐ ܕܺܝܡܶܛ ܟܪܺܝܣܛܝܳܢܳܐ ܒܝܰܕ ܒܽܘܠܗܳܝܳܐ ܪܰܒܳܐ ܢܶܦܠܰܬ݀ ܣܰܓܺܝ ܚܶܫܰܬ݀: ܡܰܢܽܘ ܕܠܐ ܢܶܬܗܰܪ ܒܳܟ ܡܳܪܰܢ ܡܫܰܚܠܶܦ ܠܡܳܟ̈ܣܶܐ ܘܚܰܛܳܝ̈ܶܐ ܠܟܳܪܽܘܙܽܘܬܶܗ: ܕܳܐܦ ܠܗܳܢܳܐ ܕܺܝܡܶܛ ܫܰܚܠܶܦ ܡ̣ܶܢ ܚܰܢܦܽܘܬܳܐ ܠܣܶܓܕܬܳܐ ܕܚܰܕ ܐܠܰܗܳܐ: ܘܡ̣ܶܢ ܫܳܛܝܽܘܬ ܫܽܘܩܪܳܐ ܠܺܝܕܰܥܬܳܐ ܕܰܫܪܳܪܳܐ: ܘܒܰܕܓܽܘܢ ܫܰܪܺܝ ܡܳܪܝ ܕܺܝܡܶܛ ܡܒܰܙܰܚ ܒܨܰܠܡ̈ܶܐ ܘܡܰܥܡܶܪ̈ܐ ܕܫܺܐܕ̈ܶܐ ܠܗܽܘܢ ܩܳܪܶܐ ܗܘܳܐ: ܘܠܐܝܠܶܝܢ ܕܰܠܗܽܘܢ ܣܳܓܕܺܝܢ ܦܳܠܚ̈ܰܝ ܠܕܰܝ̈ܘܶܐ ܠܗܽܘܢ ܡܫܰܡܰܗ ܗܘܳܐ: ܘܥܰܠܗܳܝ ܝܰܗܒ ܠܶܗ ܡܫܺܝܚܳܐ ܕܢܰܐܣܶܐ ܟܽܘܪ̈ܗܳܢܶܐ: ܠܐ ܗܘܳܐ ܕܰܡܗܰܝ̈ܡܢܶܐ ܒܰܠܚܽܘܕ ܐܶܠܐ ܕܚܰܢ̈ܦܶܐ ܘܟܳܦܽܘܪ̈ܶܐ ܘܰܒܢܰܝ̈ܢܳܫܳܐ ܘܰܒܥܺܝܪ̈ܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܒܗܳܢܳܐ ܝܰܘܡܳܐ ܕܕܽܘܟܪܳܢܶܗ: ܕܬܰܥܒܰܪ ܡ̣ܶܢ ܥܺܕܬܳܐ ܘܝܰܠܕܶܝ̈ܗ̇ ܟܽܠ ܡܰܪ̈ܕܘܳܬܳܐ ܩܰܫ̈ܝܳܬܳܐ ܘܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܫܰܝܢܳܐ ܘܰܫܠܳܡܳܐ ܫܰܟܶܢ ܠܰܢ ܒܛܰܝܒܽܘܬܳܟ: ܟܰܕ ܡܰܠܟ̈ܘܳܬܳܐ ܡܫܰܝܶܢ ܐܰܢ̱ܬ: ܘܠܰܟܪ̈ܺܝܗܶܐ ܣܳܥܰܪ ܐܰܢ̱ܬ: ܘܠܰܣܡܰܝ̈ܳܐ ܕܶܝܢ ܡܦܰܬܰܚ ܐܰܢ̱ܬ: ܘܰܠܚܰܛܳܝ̈ܶܐ ܡܚܰܣܶܐ ܐܰܢ̱ܬ: ܘܠܰܚܛܳܗ̈ܶܐ ܫܳܒܶܩ ܐܰܢ̱ܬ: ܘܰܠܟܰܦ̈ܢܶܐ ܡܣܰܒܰܥ ܐܰܢ̱ܬ: ܘܠܐܒܺܝ̈ܠܐ ܘܰܡܥܳܩ̈ܶܐ ܡܠܰܒܶܒ ܐܰܢ̱ܬ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܡܢܰܚܶܡ ܐܰܢ̱ܬ: ܘܰܒܥܽܘ̈ܒܶܐ ܐܰܒܪ̈ܳܗܳܡܳܝܶܐ ܡܒܰܣܶܡ ܐܰܢ̱ܬ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܐܕܝ ܫܠܝܚܐ ܪܝܫܐ ܕܡܣܒܪ̈ܢܐ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܗܰܘ̈ܢܶܐ ܫܦܰܝ̈ܳܐ ܘܒܰܥ̈ܒܳܕܶܐ ܕܟܰܝ̈ܳܐ: ܘܚܽܘ̈ܫܳܒܶܐ ܙܗܰܝ̈ܳܐ: ܢܥܰܕܥܶܕ ܠܝܰܘܡܳܐ ܗܳܢܳܐ ܒܪܺܝܟܳܐ ܕܫܽܘܪܳܝܳܐ ܕܫܰܢ̱ܬܳܐ ܕܣܽܘܪ̈ܝܳܝܶܐ: ܘܥܽܘܗܕܳܢܳܐ ܢܰܨܺܝܚܳܐ ܘܥܰܕܥܺܐܕܳܐ ܦܨܺܝܚܳܐ ܕܰܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܪܺܝܫ ܓܽܘܕܳܐ ܐܠܰܗܳܝܬܳܐ ܕܫܰܒܥܺܝܢ ܘܰܬܪܶܝܢ ܡܣܰܒܪ̈ܳܢܶܐ: ܘܢܶܬܦܰܨܶܐ ܡ̣ܶܢ ܢܶܟ̈ܝܳܢܶܐ ܒܰܨܠܰܘ̈ܳܬܶܗ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܕܫܰܕܰܪ ܠܚܰܕ ܡ̣ܶܢ ܙܰܠܺܝ̈ܩܰܘܗܝ ܫܒܺܝ̈ܚܶܐ ܠܐܘܪܗܳܝ ܡܒܰܪܰܟܬܳܐ: ܕܺܐܝܬܰܘܗܝ ܫܠܺܝܚܳܐ ܘܰܡܣܰܒܪܳܢܳܐ ܡܳܪܝ ܐܰܕܰܝ ܕܫܰܕܪܶܗ ܠܐܒܓܰܪ ܡܰܠܟܳܐ ܐܽܘܟܳܡܳܐ ܘܰܐܣܝܶܗ ܡ̣ܶܢ ܟܺܐܒܳܐ ܕܫܳܚܶܩ ܗܘܳܐ ܠܶܗ: ܘܬܰܠܡܶܕ ܠܟܰܪܟܳܐ ܘܥܳܡܽܘܪ̈ܰܘܗܝ ܘܰܠܟܽܠܶܗ ܠܐܬܪܳܐ ܕܒܶܝܬ ܢܰܗܪ̈ܺܝܢ ܘܰܦܢܺܝܬܳܐ ܕܡܰܕܢܚܳܐ: ܠܗܰܘ ܕܰܐܥܡܶܕ ܒܶܝܬ ܐܺܝ̈ܕܰܝ ܥܰܒܕܶܗ ܥܰܠ ܥܰܡܡܺܝ̈ܢ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܐܠܰܗܳܐ ܡܶܠܬܳܐ ܡܬܽܘܡܳܝܳܐ ܘܺܝܚܺܝܕܳܝܳܐ ܠܚܽܘܕܳܐܝ̣ܬ: ܗ̇ܰܘ ܕܰܟܣܶܐ ܗܘܳܐ ܘܰܓܢܺܝܙ ܒܥܽܘܒܳܐ ܕܝܳܠܽܘܕܶܗ ܩܕܳܡ ܕܳܪ̈ܶܐ ܘܫܰܪ̈ܒܳܬܳܐ ܟܰܣܝܳܐܝ̣ܬ ܐܳܦ ܓܢܺܝܙܳܐܝ̣ܬ ܗ̇ܰܘ ܕܟܰܕ ܩܪܶܒ ܙܰܒܢܳܐ ܡܩܰܒܠܐ ܘܝܰܘ̈ܡܳܬܳܐ ܕܦܽܘܪܫܳܢܳܐ ܘܡܶܬܟܰܪܙܳܢܽܘܬ ܫܰܢ̱ܬܳܐ ܡܩܰܒܰܠܬܳܐ ܡܶܣܬܰܝܟܳܢܳܐܝ̣ܬ ܘܳܐܦ ܡܰܚܰܬܬܶܗ ܕܰܒܪܳܐ ܠܐܪܥܳܐ ܕܰܪܕܪܳܝܬܳܐ ܘܟܽܘܒܳܢܳܝܬܳܐ ܕܺܝܠܰܢ ܛܰܒܺܝ̈ܥܰܝ ܒܰܐܒܕܳܢܳܐ ܕܳܘܝܳܐܝ̣ܬ: ܐܰܝܟܰܢܳܐ ܕܰܢܚܰܬܶܡ ܝܽܘ̈ܩܢܶܐ ܘܛܽܘܦ̈ܣܶܐ ܕܰܢܒܺܝ̈ܶܐ ܨܰܝܳܪ̈ܶܐ ܕܨܰܠܡܶܗ ܦܰܓܪܳܢܳܝܳܐ ܘܢܶܓܡܽܘܪ ܡܰܠܝܳܐܝ̣ܬ: ܥܰܠ ܕܰܒܪܳܡܽܘܬܳܐ ܡܶܙܕܰܪܟܰܠ ܗܘܳܐ ܚܶܘܝܳܐ ܘܠܰܢ ܣܚܰܦ ܡ̣ܶܢ ܦܰܪܕܰܝܣܳܐ ܚܰܪܡܳܢܳܐܝ̣ܬ: ܗܳܢܳܐ ܟܽܠܶܗ ܐܶܬܡܰܟܰܟ ܝܰܠܕܳܐ ܕܬܶܕܡܽܘܪܬܳܐ ܡܰܟܺܝܟܳܐܝ̣ܬ: ܘܰܗܘܳܐ ܥܽܘܠܐ ܫܺܝܛܳܐܝ̣ܬ ܟܰܕ ܠܰܟܪ̈ܽܘܒܶܐ ܘܰܣܪ̈ܳܦܶܐ ܡܰܓܗܰܪ ܕܚܺܝ̣ܠܐܝ̣ܬ: ܘܰܐܝܟ ܫܰܒܪܳܐ ܫܰܦܶܦ ܫܰܒܪܳܐܝ̣ܬ ܘܰܐܝܟ ܝܰܠܽܘܕܳܐ ܐܶܬܪܰܒܺܝ ܚܰܠܒܳܢܳܐܝ̣ܬ ܘܰܠܡܶܨܪܶܝܢ ܐܶܙܰܠ ܥܳܪܽܘܩܳܐܝ̣ܬ ܟܰܕ ܗ̣ܽܘ ܐܺܝܬܰܘܗܝ ܕܝܳܗܶܒ ܚܰܝܠܐ ܘܥܽܘܫܢܳܐ ܠܟܽܠܗܽܘܢ ܒܪ̈ܰܝܳܐ ܘܰܥܒܺܝ̈ܕܶܐ ܡܙܺܝܥܳܢܳܐܝ̣ܬ: ܘܟܰܕ ܐܶܬܡܰܛܺܝ ܠܩܰܘܡܬܳܐ ܓܰܒܪܳܢܳܝܬܳܐ ܡܫܰܡܠܝܳܐܝ̣ܬ ܫܰܡܠܺܝ ܟܽܠܗܶܝܢ ܕܰܒܢܳܡܽܘܣܳܐ ܠܶܗ ܨܳܝܪ̈ܳܢ ܛܶܠܳܢܳܐܝ̣ܬ: ܘܫܰܪܺܝ ܒܚܰܕ̈ܬܳܬܳܐ ܕܠܶܗ ܚܳܝܪ̈ܳܢ ܗܘܰܝ̈ ܘܡܶܢܶܗ ܡܶܣܬܰܥܪ̈ܳܢ ܗܘܰܝ̈ ܐܰܡܺܝܢܳܐܝ̣ܬ: ܘܰܓܒܳܐ ܠܶܗ ܫܠܺܝ̈ܚܶܐ ܘܰܡܣܰܒܪ̈ܳܢܶܐ ܘܟܳܪ̈ܽܘܙܶܐ ܕܰܫܪܳܪܳܐ ܘܡܰܠܦܳܢ̈ܶܐ ܕܩܽܘܫܬܳܐ ܒܚܺܝܪܳܐܝ̣ܬ: ܘܚܰܟܶܡ ܐܶܢܽܘܢ ܒܪܽܘܚܳܐ ܕܺܝܠܶܗ ܩܰܕܺܝܫܳܐ ܢܰܗܺܝܪܳܐܝ̣ܬ ܘܰܕܢܰܐܣܽܘܢ ܟܺܐܒ̈ܶܐ ܘܟܽܘܪ̈ܗܳܢܶܐ ܦܰܩܶܕ ܐܶܢܽܘܢ ܒܛܺܝܠܐܴܝ̣ܬ: ܐܳܦ ܕܢܰܦܩܽܘܢ ܫܺܐܕ̈ܶܐ ܙܰܗܰܪ ܐܶܢܽܘܢ ܚܦܺܝܛܳܐܝ̣ܬ: ܘܥܰܠ ܚܘܰܘ̈ܳܬܳܐ ܘܥܶܩܰܪ̈ܒܶܐ ܐܰܕܺܝܫ ܐܶܢܽܘܢ ܩܪܰܒܬܳܢܳܐܝ̣ܬ: ܘܶܐܢ ܣܰܡܳܐ ܕܡܰܘܬܳܐ ܢܶܫܬܽܘܢ ܠܐ ܢܰܗܰܪ ܐܶܢܽܘܢ ܡܰܟܝܳܢܳܐܝ̣ܬ: ܘܛܶܠܳܢ̈ܳܝܳܬܗܽܘܢ ܢܩܺܝ̈ܡܳܢ ܡܺܝ̈ܬܶܐ ܐܰܫܘܺܝ ܐܶܢܽܘܢ ܫܰܘܝܳܐܝ̣ܬ: ܘܰܠܣܰܘ̈ܦܶܐ ܘܦܶܢ̈ܝܳܬܳܐ ܐܰܦܶܩ ܐܶܢܽܘܢ ܠܟܽܠܗܽܘܢ ܡܶܫܬܰܕܪܳܢܳܐܝ̣ܬ: ܘܰܠܟܰܪ̈ܟܶܐ ܘܰܡܕܺܝ̈ܢܳܬܳܐ ܦܰܠܶܓ ܐܶܢܽܘܢ ܠܗܽܘܢ ܡܶܬܟܰܪܟܳܢܳܐܝ̣ܬ: ܘܕܰܢܬܰܠܡܕܽܘܢ ܘܢܰܥܡܕܽܘܢ ܠܟܽܠܢܳܫ ܒܰܫܡܶܗ ܦܰܪܓܶܠ ܐܶܢܽܘܢ ܡܠܰܒܛܳܢܳܐܝ̣ܬ: ܘܟܰܕ ܠܪܺܝܫܳܐ ܕܟܽܠܗܽܘܢ ܫܶܡܥܽܘܢ ܦܶܛܪܽܘܣ ܠܪܽܘܡܺܝ ܪܺܝܫܳܝܬܳܐ ܕܟܽܠܗܶܝܢ ܡܕܺܝ̈ܢܳܬܳܐ ܫܰܟܶܢ ܩܰܕܺܝܡܳܐܝ̣ܬ ܘܰܡܝܰܩܪܳܐܝ̣ܬ: ܠܝܽܘܚܰܢܳܢ ܒܰܪ ܙܰܒܕܰܝ ܐܶܦܶܣܳܘܣ ܡܫܰܡܰܗܬܳܐ ܘܟܽܘܡܪܽܘܬܳܐ ܡܛܳܬ݀ ܠܶܗ ܡ̣ܶܢ ܪܰܒܶܗ ܕܢܰܟܪܶܙ ܒܳܗ̇ ܣܒܰܪܬܳܐ ܕܚܰܝ̈ܶܐ ܚܰܒܺܝܒܳܐܝ̣ܬ: ܬܽܐܘܡܰܐ ܕܶܝܢ ܕܓܳܫ ܕܰܦܢܶܗ ܠܗܶܢܕܽܘ ܗ̇ܳܝ ܡܫܰܟܰܪܬܳܐ ܫܰܕܪܶܗ ܐܰܝܟ ܥܰܒܕܳܐ ܡܶܙܕܰܒܢܳܢܳܐܝ̣ܬ: ܐܰܢܕܪܶܐܘܳܣ ܣܳܒܳܐ ܙܰܗܝܳܐ ܠܐܬܪܳܐ ܕܒܶܝܬ ܟܰܠܒܺܝܢ ܐܰܡܛܝܶܗ ܦܽܘܪܣܳܢܳܐܝ̣ܬ: ܟܰܕ ܠܟܽܠ ܚܰܕ ܡܶܢܗܽܘܢ ܐܰܬܪܳܐ ܕܰܡܛܳܝܗܝ ܡ̣ܶܢ ܪܰܒܶܗ ܩܰܒܶܠ ܚܳܕܝܳܐܝ̣ܬ: ܐܰܕܰܝ ܕܶܝܢ ܬܡܺܝܗܳܐ ܗܳܢܳܐ ܕܰܥܠܰܘܗܝ ܫܶܩܠܰܬ݀ ܡܶܠܬܳܐ ܚܺܐܦܳܐ ܠܰܡܡܰܠܳܠܽܘ ܡܚܰܓܝܳܢܳܐܝ̣ܬ: ܠܐܘܪܗܳܝ ܡܒܰܪܰܟܬܳܐ ܐܶܬܡܰܛܺܝ ܢܺܝܚܳܐܝ̣ܬ: ܘܠܐܒܓܰܪ ܡܰܠܟܳܐ ܟܺܐܢܳܐ ܕܡ̣ܶܢ ܢܽܘܓܪܳܐ ܡܣܰܟܶܐ ܗܘܳܐ ܠܶܗ ܠܗܺܝܩܳܐܝ̣ܬ: ܐܰܝܟ ܡܰܘܗܰܒܬܳܐ ܘܕܳܫܢܳܐ ܡܰܠܟܳܝܳܐ ܐܶܬܕܰܫܰܢ ܥܰܬܺܝܪܳܐܝ̣ܬ: ܗܳܢܳܐ ܕܟܰܕ ܥܰܠ ܠܶܗ ܠܟܰܪܟܳܐ ܐܽܘܪܗܳܝ ܗܳܢܳܐ ܥܰܫܺܝܢܳܐ ܒܗܺܝܠܐܴܝ̣ܬ ܛܶܠܳܢ̈ܝܳܬܳܐ ܘܓܰܕ̈ܶܐ ܕܨܰܠܡ̈ܶܐ ܘܩܰܠܦ̈ܠܳܦܶܐ ܕܰܐܠܳܗܽܘ̈ܢܶܐ ܕܰܓܳܠܰܝ ܫܡܳܐ ܗ̇ܳܢܽܘܢ ܕܰܩܒܺܝܥܺܝܢ ܒܨܶܨ̈ܶܐ ܘܩܰܦܠܽܘ̈ܛܶܐ ܐܰܫܺܝܠܐܴܝ̣ܬ: ܫܰܪܺܝܘ ܢܳܝܕܺܝܢ ܕܡ̣ܶܢ ܕܶܚܠܰܬܗܽܘܢ ܡ̣ܶܢ ܡܶܠܬܶܗ ܘܚܰܝܠܶܗ ܕܡܳܪܝ ܐܰܕܰܝ ܫܠܺܝܚܳܐ ܡܶܣܬܰܕܪܳܢܳܐܝ̣ܬ: ܗܳܢܳܐ ܕܰܐܝܟ ܫܶܡܫܳܐ ܥܰܬܺܝܪ ܨܶܡ̈ܚܶܐ ܐܰܢܗܪܳܗ̇ ܠܐܘܪܗܳܝ ܢܰܗܺܝܪܳܐܝ̣ܬ: ܘܰܐܝܟ ܐܳܣܝܳܐ ܡܗܺܝܪܳܐ ܡܢܰܣܰܝ ܒܥܶܩܳܪ̈ܶܐ ܘܡܽܘ̈ܙܳܓܶܐ ܪ̈ܽܘܚܳܢܳܝܶܐ ܣܰܡܣܡܳܗ̇ ܐܳܣܝܳܐܝ̣ܬ: ܘܰܐܝܟ ܡܶܛܪܳܐ ܒܟܺܝܪܳܝܳܐ ܘܰܠܩܺܝܫܳܝܳܐ ܒܝܽܘܠܦܳܢܰܘ̈ܗܝ ܐܠܰܗܳܝ̈ܶܐ ܘܡܶܠܰܘ̈ܗܝ ܚܰܝ̈ܳܬܳܐ ܐܰܫܩܝܳܗ̇ ܝܰܨܺܝܦܳܐܝ̣ܬ: ܗܳܢܳܐ ܕܰܐܝܟ ܣܰܡܳܐ ܕܚܰܝ̈ܶܐ ܕܰܠܟܽܠ ܚܳܫܰܚ ܐܶܬܚܰܘܺܝ ܒܽܐܘܪܗܳܝ ܫܟܺܝܚܳܐܝ̣ܬ: ܗܳܢܳܐ ܕܰܐܕܺܝܩ ܥܰܠ ܟܽܘܪ̈ܗܳܢܶܐ ܘܰܐܥܪܶܩ ܐܶܢܽܘܢ ܡܫܰܢܝܳܢܳܐܝ̣ܬ: ܘܥܰܠ ܡܫܰܪ̈ܰܝܳܐ ܘܚܰܝܶܨ ܚܠܺܝܡܳܐܝ̣ܬ: ܘܥܰܠ ܫܺܐܕ̈ܶܐ ܘܰܛܪܰܕ ܐܶܢܽܘܢ ܩܰܠܺܝܠܐܴܝ̣ܬ: ܘܥܰܠ ܡܺܝ̈ܬܶܐ ܘܢܰܚܶܡ ܦܳܩܽܘܕܳܐܝ̣ܬ: ܗܳܢܳܐ ܕܟܰܕ ܡܶܬܒܰܩܶܐ ܐ̱ܢܳܫ ܒܚܰܝ̈ܠܐ ܘܬܶܕܡܪ̈ܳܬܳܐ ܕܣܳܥܰܪ ܗܘܳܐ ܬܡܺܝܗܳܐܝ̣ܬ: ܬܶܗܪܳܐ ܘܕܽܘܡܳܪܳܐ ܡܶܬܡܠܐܷ ܟܰܕ ܡܰܐܨܶܕ ܘܚܳܙܶܐ ܡܶܬܗܰܘܢܳܢܳܐܝ̣ܬ: ܚܺܐܪ̈ܶܐ ܕܪܰܟܺܝܟܺܝܢ ܘܰܠܡܶܠܬܶܗ ܫܳܡܥܺܝܢ ܐܰܟܺܝܦܳܐܝ̣ܬ: ܣܳܒ̈ܶܐ ܕܰܟܦܺܝܦܺܝܢ ܥܰܠ ܪ̈ܶܓܠܰܘܗܝ ܘܰܡܢܰܫܩܺܝܢ ܠܗܶܝܢ ܡܰܟܺܝܟܳܐܝ̣ܬ: ܐܰܒܓܰܪ ܡܰܠܟܳܐ ܕܡܶܬܰܐܣܶܐ ܘܚܳܕܶܐ ܘܕܳܐܶܨ ܦܨܺܝܚܳܐܝ̣ܬ: ܡܰܢܥܽܘ ܒܪܶܗ ܘܡܰܪܝܳܗܶܒ ܘܚܰܒܪ̈ܰܘܗܝ ܛܶܒܰܘ̈ܗܝ ܡܰܝܬܶܝܢ ܡܣܰܪܗܒܳܐܝ̣ܬ: ܪ̈ܺܝܫܳܢܶܐ ܕܡܶܬܒܰܠܗܺܝܢ ܘܦܶܬܓܳܡܰܘ̈ܗܝ ܨܳܝܬܺܝܢ ܣܰܟܽܘܠܬܳܢܳܐܝ̣ܬ: ܐܰܓܽܘܣܛܺܝܢ ܐܶܡܶܗ ܕܡܰܠܟܳܐ ܕܪܳܘܙܳܐ ܚܳܕܝܳܐܝ̣ܬ: ܟܽܘܡܪ̈ܶܐ ܕܡܶܬܬܰܠܡܕܺܝܢ ܐܳܦ ܠܐܠܳܗܰܝ̈ܗܽܘܢ ܡܬܰܒܪܺܝܢ ܚܶܡܬܢܳܐܝ̣ܬ: ܠܐܒܽܘܢܳܐ ܘܰܐܒܽܘܒܺܝ ܘܣܳܢܺܝܩ ܒܰܪ ܥܰܒܕܽܘ ܘܚܰܒܪ̈ܰܝܗܽܘܢ ܕܶܝܢ ܕܡܶܬܦܰܨܚܺܝܢ ܠܐ ܣܰܒܥܳܐܝ̣ܬ: ܒܰܪ ܣܰܡܝܳܐ ܘܥܰܒܫܰܠܡܳܐ ܥܰܡ ܥܘܺܝܕܳܐ ܕܬܰܗܺܝܪܺܝܢ ܡܶܬܕܰܡܪܳܢܳܐܝ̣ܬ: ܛܽܘܒܰܝ ܒܰܪ ܛܽܘܒܺܝܰܐ ܝܽܘܕܳܝܳܐ ܕܝܰܡܬܳܐ ܕܚܰܝ̈ܶܐ ܒܒܰܝܬܶܗ ܫܰܪܝܳܐ ܗܘܳܬ݀ ܡܰܥܬܪܳܢܳܐܝ̣ܬ: ܝܽܘܕܳܝ̈ܶܐ ܘܚܰܢ̈ܦܶܐ ܕܰܡܗܰܝܡܢܺܝܢ ܫܰܪܺܝܪܳܐܝ̣ܬ ܒܺܝܠ ܘܢܳܒܽܘ ܕܡܶܬܥܰܩܪܺܝܢ ܟܽܠܳܢܳܐܝ̣ܬ: ܘܚܰܢܳܢ ܛܒܰܠܳܪܳܐ ܥܰܡ ܫܶܡܫܰܓܪܰܡ ܕܨܽܘܪܬܳܐ ܕܚܰܝ̈ܶܐ ܨܳܝܪܺܝܢ ܗܕܺܝܪܳܐܝ̣ܬ ܬܰܠܡܺܝ̈ܕܶܐ ܐܰܓܰܝ ܘܦܰܠܽܘܛ ܕܡܶܬܟܰܗܢܺܝܢ ܐ̱ܪܳܙܳܢܳܐܝ̣ܬ: ܟܳܪ̈ܽܘܙܶܐ ܚܰܕ̈ܬܶܐ ܕܟܳܪܽܘܙܽܘܬܳܐ ܕܚܰܝ̈ܶܐ ܡܰܟܪܙܺܝܢ ܐܳܦ ܡܰܠܦܺܝܢ ܦܫܺܝܛܳܐܝ̣ܬ: ܠܶܫܳܢ̈ܶܐ ܠܰܥ̈ܓܶܐ ܕܰܒܪܽܘܚܳܐ ܩܰܕܺܝܫܳܐ ܠܳܥܙܺܝܢ ܬܶܫܒ̈ܚܳܬܳܐ ܦܪ̈ܺܝܫܳܬܳܐ ܦܫܺܝܩܳܐܝ̣ܬ: ܐܽܘܪܗܳܝ ܡܒܰܪܰܟܬܳܐ ܕܰܥܠܰܒܬܳܗ̇ ܠܐܘܪܫܠܶܡ ܨܳܠܽܘܒܬܳܐ ܒܗܰܝܡܳܢܽܘܬܳܐ ܚܰܡܺܝܡܳܐܝ̣ܬ: ܫܰܠܡܰܬ݀ ܒܰܪܬ ܡܰܗܕܪܰܬ݀ ܡܰܠܟܬܳܐ ܐܰܢ̱ܬܬܶܗ ܕܡܰܠܟܳܐ ܕܠܰܫܠܳܡܳܐ ܕܰܐܕܰܝ ܢܳܚܬܳܐ ܪܶܓܠܳܐܝ̣ܬ ܥܒܶܕܢܳܒܽܘ ܘܰܥܘܺܝܕܳܐ ܘܦܺܝܪܽܘܙܕܰܢܩܽܘ ܕܗܳܘܶܝܢ ܟܽܘܡܪ̈ܶܐ ܠܝܶܫܽܘܥ ܡܫܺܝܚܳܐ ܡܫܰܥܒܕܳܐܝ̣ܬ: ܝܰܘ̈ܢܳܝܶܐ ܘܒܰܪܒܪ̈ܳܝܶܐ ܕܥܳܡܕܺܝܢ ܡܣܰܪܗܒܳܐܝ̣ܬ ܐܳܬܽܘܪ̈ܳܝܶܐ ܘܟܰܠܕܳܝ̈ܶܐ ܕܠܰܛܝܳܪܳܐ ܕܚܰܝ̈ܶܐ ܥܳܐܠܺܝܢ ܪܗܺܝܒܳܐܝ̣ܬ: ܚܳܪ̈ܢܳܝܶܐ ܘܨܽܘ̈ܒܳܝܶܐ ܕܒܰܡܨܺܝܕܬܳܐ ܡܶܬܚܰܒܫܺܝܢ ܨܶܒܝܳܢܳܐܝ̣ܬ ܠܝܽܘ̈ܕܳܝܶܐ ܘܣܳܓ̈ܕܰܝ ܠܨܰܠܡ̈ܶܐ ܘܣܳܓ̈ܕܰܝ ܠܢܽܘܪܳܐ ܩܛܺܝܪܳܐ ܕܳܐܬܘ̈ܳܬܳܐ ܥܳܨܶܐ ܗܘܳܐ ܠܗܽܘܢ ܕܰܢܗܰܝܡܢܽܘܢ ܐܠܳܨܳܐܝ̣ܬ: ܫܳܡܪ̈ܳܝܶܐ ܘܦܳܪ̈ܣܳܝܶܐ ܘܟܽܠ ܓܶܢܣܺܝ̈ܢ ܘܟܽܠ ܐܶܡ̈ܘܳܢ ܕܥܰܡ̈ܡܶܐ ܡܫܰܚ̈ܠܦܶܐ ܕܰܗܘܰܘ ܣܳܓܽܘ̈ܕܶܐ ܚܰܕ̈ܬܶܐ ܠܰܡܫܺܝܚܳܐ ܟܪܺܝܣܛܝܳܢܳܐܝ̣ܬ: ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܗܳܘܝ̈ܳܢ ܗܘܰܝ̈ ܠܟܽܠܢܳܫ ܠܘܳܬ ܝܺܕܰܥܬܳܐ ܩܛܺܝܪܳܐܝ̣ܬ: ܘܒܰܕܓܽܘܢ ܗܘܰܘ ܡ̣ܶܢ ܐܽܘܟܳܡ̈ܶܐ ܚܶܘܳܪ̈ܶܐ ܘܡ̣ܶܢ ܣܢܰܝ̈ܳܐ ܫܰܦܺܝܪ̈ܶܐ: ܘܡ̣ܶܢ ܟܳܦܽܘܪ̈ܶܐ ܣܳܓܽܘ̈ܕܶܐ ܘܡ̣ܶܢ ܠܐ ܡܗܰܝ̈ܡܢܶܐ ܡܗܰܝ̈ܡܢܶܐ: ܘܡ̣ܶܢ ܥܰܒ̈ܕܶܐ ܒܢ̈ܰܝ ܚܺܐܪ̈ܶܐ: ܘܗܳܐ ܥܺܕ̈ܳܬܳܐ ܘܕܰܝܪ̈ܳܬܳܐ ܕܰܒܟܽܠܳܗ̇ ܒܶܝܬܢܰܗܪ̈ܺܝܢ ܘܰܒܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ ܒܥܺܐܕܶܗ ܚܰܕܽܘܬܳܢܳܝܳܐ ܕܰܫܠܺܝܚܳܐ ܕܩܽܘܫܬܳܐ ܘܰܡܣܰܒܪܳܢܳܐ ܕܰܫܪܳܪܳܐ ܡܳܪܝ ܐܰܕܰܝ ܚܳܕܶܝܢ ܘܕܳܝܨܺܝܢ: ܘܰܠܚܰܓܶܗ ܦܨܺܝܚܳܐ ܡܝܰܩܪܺܝܢ: ܐܳܦ ܠܕܽܘܟܪܳܢܶܗ ܫܒܺܝܚܳܐ ܡܶܬܟܰܢܫܺܝܢ ܘܰܒܚܽܘܒܳܐ ܐܠܰܗܳܝܳܐ ܠܶܗ ܡܙܰܝܚܺܝܢ: ܘܒܰܕܓܽܘܢ ܟܰܕ ܡ̣ܶܢ ܩܽܘܠܳܣܰܘ̈ܗܝ ܚܳܝܒܺܝܢܰܢ: ܐܳܦ ܠܰܟܠܺܝܠ ܢܶܨܚܳܢܰܘ̈ܗܝ ܠܐ ܡܨܶܝܢܰܢ ܓܳܕܠܺܝܢܰܢ: ܘܠܰܡܣܰܝܳܟܽܘ ܬܡܺܝ̈ܗܳܬܶܗ ܠܐ ܡܶܫܟܚܺܝܢܰܢ: ܢܶܦܢܶܐ ܠܰܢ ܥܰܠ ܚܰܝܳܒܽܘܬܰܢ ܘܥܰܠ ܫܽܘܠܳܡ ܚܰܝܰܘ̈ܗܝ ܐܳܡܪܺܝܢܰܢ: ܗ̇ܰܘ ܕܟܰܕ ܐܶܬܟܪܰܗ ܟܽܘܪܗܳܢܳܐ ܕܡܳܐܶܬ ܒܶܗ ܩܪܳܐ ܠܐܒܓܰܪ ܡܰܠܟܳܐ ܘܪܰܘܪ̈ܒܶܐ ܘܚܺܐܪ̈ܶܐ ܕܡܰܠܟܽܘܬܶܗ: ܘܰܠܬܰܠܡܺܝ̈ܕܶܐ ܫܰܪܺܝܪ̈ܶܐ ܕܪܰܒܽܘܬܶܗ: ܘܦܰܩܶܕ ܐܶܢܽܘܢ ܘܙܰܗܰܪ ܐܶܢܽܘܢ ܦܽܘܩ̈ܕܳܢܶܐ ܡܰܠܝ̈ܰܝ ܚܰܝ̈ܶܐ ܘܙܽܘܗܳܪ̈ܶܐ ܡܰܘܬܪ̈ܳܢܶܐ ܘܰܐܣܪܰܚ ܠܐܱܓܺܝ ܥܳܒܶܕ ܫܺܐܪ̈ܳܝܶܐ ܬܰܠܡܺܝܕܶܗ ܥܰܒܕܶܗ ܐܶܦܣܩܽܘܦܳܐ ܘܰܐܩܺܝܡܶܗ ܡܕܰܒܪܳܢܳܐ ܒܕܽܘܟܬܶܗ ܘܰܐܪܥܶܡ ܠܥܺܕܬܳܐ ܒܟܳܪܽܘܙܽܘܬܳܐ ܘܫܰܢܺܝ ܠܘܳܬ ܡܳܪܶܗ ܒܚܰܕܽܘܬܳܐ ܘܒܰܦܨܺܝܚܽܘܬܳܐ: ܒܰܐܪܒܰܥܣܰܪ ܒܺܐܝܳܪ ܝܰܪܚܳܐ ܝܽܘܡ ܚܰܡܫܳܐ ܒܫܰܒܳܐ: ܘܗܳܐ ܕܳܐܶܨ ܘܪܳܘܶܙ ܥܰܡ ܫܠܺܝ̈ܚܶܐ ܚܰܒܪ̈ܰܘܗܝ ܒܡܰܠܟܽܘܬܳܐ ܫܡܰܝܳܢܺܝܬܳܐ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܒܗܳܢܳܐ ܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ ܕܰܫܠܺܝܚܳܐ ܐܠܰܗܳܝܳܐ ܘܰܡܣܰܒܪܳܢܳܐ ܕܩܽܘܫܬܳܐ ܡܳܪܝ ܐܰܕܰܝ ܪܺܝܫܳܐ ܕܫܰܒܥܺܝܢ ܘܰܬܪܶܝܢ ܡܣܰܒܪ̈ܳܢܶܐ ܐܠܰܗܳܝ̈ܶܐ: ܒܰܪܶܟ ܠܟܽܠܰܢ ܒܝܰܡܺܝܢܳܟ: ܒܰܝܰܐܐ ܠܰܢ ܒܒܽܘܝܳܐܱܝ̈ܟ: ܥܰܕܰܪ ܠܰܢ ܒܥܳܩ̈ܳܬܰܢ ܘܰܐܪܘܰܚ ܠܰܢ ܒܽܐܘܠܨܳܢܰܝ̈ܢ: ܬܠܽܘܚ ܐܫܛܳܪ ܚܰܘ̈ܒܳܬܰܢ: ܗܰܕܳܐ ܠܰܢ ܠܰܠܡܺܐܢܳܟ: ܕܰܒܰܪ ܠܰܢ ܒܛܰܝܒܽܘܬܳܟ: ܫܡܰܥ ܨܠܰܘ̈ܳܬܰܢ: ܠܚܺܝ ܟܽܘܬܡ̈ܳܬܰܢ: ܝܰܩܶܢ ܠܰܢ ܕܽܘܡܝܳܐ ܕܒܳܟ: ܚܰܣܳܐ ܠܰܢ ܒܰܚܢܳܢܳܟ: ܐܰܥܒܰܪ ܡܶܢܰܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܡܢܺܝ ܠܰܢ ܥܰܡ ܐܶܡܪ̈ܰܝܟ: ܪܫܽܘܡ ܠܰܢ ܒܒܽܘܟܪ̈ܶܐ ܩܳܪ̈ܝܰܝ ܫܡܳܟ: ܝܰܒܶܠ ܠܰܢ ܠܰܓܢܽܘܢܳܟ: ܐܰܫܘܳܐ ܠܰܢ ܘܰܠܥܰܒܕܰܝ̈ܟ ܡܗܰܝ̈ܡܢܶܐ ܕܰܒܝܰܘܡܳܐ ܕܢܳܣܶܒ ܟܠܺܝܠܶܗ ܝܽܘܠܦܳܢܶܗ ܘܰܫܪܳܪܶܗ ܢܰܨܰܚ ܒܢܰܦ̈ܫܳܬܰܢ: ܕܰܢܫܰܒܚܳܟ ܩܰܕܺܝܫܳܐܝ̣ܬ ܘܰܢܩܰܠܣܳܟ ܗܕܺܝܪܳܐܝ̣ܬ ܘܢܶܣܓܽܘܕ ܠܳܟ ܦܫܺܝܛܳܐܝ̣ܬ: ܘܢܰܘܕܶܐ ܠܳܟ ܠܐ ܫܰܠܘܳܐܝ̣ܬ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܡܚܰܟܶܡ ܠܰܫܠܺܝ̈ܚܰܘܗܝ ܘܰܡܥܰܫܶܢ ܠܰܡܣܰܒܪ̈ܳܢܘܳܬܳܐ: ܚܰܟܶܡ ܠܰܢ ܒܪܽܘܚܳܟ: ܥܰܫܶܢ ܠܰܢ ܒܣܰܒܪܳܟ: ܢܰܨܰܚ ܠܰܢ ܒܰܫܪܳܪܳܟ: ܠܰܒܶܒ ܠܰܢ ܒܡܶܠܬܳܟ: ܙܰܝܶܢ ܠܰܢ ܒܙܳܟܽܘܬܳܟ: ܘܰܐܫܘܳܐ ܠܰܢ ܕܰܐܡܺܝܢܳܐܝ̣ܬ ܢܶܚܕܶܐ ܘܢܶܬܦܨܰܚ ܒܥܺܐܕ̈ܶܐ ܕܰܪ̈ܚܽܘܡܰܝܟ: ܘܝܰܬܺܝܪܳܐܝ̣ܬ ܒܥܺܐܕܳܐ ܗܳܢܳܐ ܕܰܫܠܺܝܚܳܐ ܡܳܪܝ ܐܰܕܰܝ: ܘܩܰܒܶܠ ܡ̣ܶܢ ܐܺܝܕܰܝ̈ܢ ܚܰܛܳܝ̈ܳܬܳܐ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܥܽܘܗܕܳܢܶܗ ܩܰܪܶܒܢܰܢ ܠܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܚܘܬܡܐ

 

 

 

ܥܢܺܝ ܡܳܪܝܳܐ ܐܠܰܗܳܐ ܠܡܶܬܟܰܫ̈ܦܳܢܶܐ ܕܩܳܪܶܝܢ ܠܳܟ ܒܕܽܘܟܪܳܢܶܗ ܕܡܳܪܝ ܐܰܕܰܝ: ܘܨܽܘܬ ܠܚܶܢ̈ܓܳܬܳܐ ܕܡܶܬܩܰܪ̈ܒܳܢ ܒܥܰܕܥܺܐܕܶܗ: ܘܚܰܝܶܠ ܠܰܟܪ̈ܺܝܗܶܐ ܕܰܨܒܰܘ ܘܶܐܬܰܘ ܠܰܫܠܳܡܶܗ: ܘܩܰܒܶܠ ܢܶܕܪ̈ܶܐ ܘܡܰܥܣܳܪ̈ܶܐ ܕܶܐܬܩܰܪܰܒܘ ܠܐܝܩܳܪܶܗ ܘܦܰܢܳܐ ܠܟܽܠܚܰܕ ܐܰܝܟ ܫ̈ܶܐܠܳܬܶܗ: ܘܰܐܢܺܝܚ ܠܥܰܢܺܝ̈ܕܶܐ ܕܩܰܒܶܠܘ ܝܽܘܠܦܳܢܶܗ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܡܳܪܝ ܐܰܒܰܝ ܡ̣ܶܢ ܥܰܡܳܐ ܟܳܦܽܘܪܳܐ ܘܰܐܣܗܶܕ ܚܠܳܦ ܫܪܳܪܳܐ ܕܡܳܪܶܗ: ܠܗܰܘ ܕܰܐܢܗܰܪ ܠܡܳܪܝ ܐܰܒܰܝ ܒܝܰܕ ܡܳܪܝ ܐܰܘܓܺܝܢ ܢܰܨܺܝܚ ܫܽܘܦܪ̈ܶܐ ܘܡܶܢܶܗ ܩܰܒܶܠ ܙܺܝܘܳܐ ܕܪܽܘܚܳܐ ܚܰܝܳܐ ܘܩܰܕܺܝܫܳܐ: ܠܗܰܘ ܕܰܐܣܗܶܕ ܚܠܳܦ ܫܡܶܗ ܡܳܪܝ ܐܰܒܰܝ ܣܳܗܕܳܐ ܚܠܺܝܨܳܐ ܡ̣ܶܢ ܐܺܝ̈ܕܰܝ ܐܰܒܽܘܗܝ ܡܰܠܟܳܐ ܚܰܢܦܳܐ: ܘܒܳܬܰܪܟܶܢ ܐܶܬܬܰܠܡܰܕ ܗ̣ܽܘ ܐܰܒܽܘܗܝ ܘܰܗܘܳܐ ܕܰܝܪܳܝܳܐ: ܠܗܰܘ ܕܰܐܫܘܺܝ ܕܽܘܟܪܳܢܶܗ ܕܡܳܪܝ ܐܰܒܰܝ ܥܰܡ ܡܳܪܝ ܐܰܕܰܝ ܫܠܺܝܚܳܐ ܘܰܡܣܰܒܪܳܢܳܐ: ܘܥܰܡܗܽܘܢ ܡܳܪܝ ܡܰܐܡܰܐ ܚܠܺܝܨܳܐ ܘܰܩܪܰܒܬܳܢܳܐ: ܕܰܠܡܳܪܝܳܐ ܡܢܰܨܚܳܢܗܽܘܢ ܐܳܦ ܡܰܘܪܒܳܢܗܽܘܢ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܕܽܘܟܪܳܢܶܗ ܕܡܳܪܝ ܐܰܒܰܝ ܣܳܗܕܳܐ ܙܰܟܳܝܳܐ ܡܥܰܕܥܕܺܝܢܰܢ: ܘܒܰܒ̈ܢܳܬ ܩ̈ܳܠܐ ܕܫܽܘܒܚܳܐ ܢܺܐܡܰܪ ܪܽܘܚܳܢܳܐܝ̣ܬ: ܕܳܐܘ ܣܳܗܕܳܐ ܙܰܟܳܝܳܐ ܘܫܰܦܺܝܪ ܫܡܳܐ ܡܳܪܝ ܐܰܒܰܝ ܐܰܒܳܐ ܕܺܝܠܰܢ ܘܥܳܕܽܘܪܳܐ ܕܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ: ܗܳܢܳܐ ܕܰܟܦܰܪ ܒܟܽܠܶܗ ܥܳܠܡܳܐ ܘܰܐܡܣܰܪ ܥܰܠ ܚܰܫ̈ܶܐ ܘܫܶܢ̈ܕܶܐ ܕܪ̈ܳܕܽܘܦܶܐ: ܗܳܢܳܐ ܕܰܥܡܰܕ ܒܰܫܡܶܗ ܕܰܡܫܺܝܚܳܐ ܘܩܰܒܶܠ ܪܽܘܚܳܐ ܩܰܕܺܝܫܳܐ ܘܒܶܗ ܙܟܳܐ ܠܚܰܢ̈ܦܶܐ ܘܟܳܦܽܘܪ̈ܶܐ: ܗܳܢܳܐ ܕܟܰܕ ܫܡܰܥ ܐܰܒܽܘܗܝ ܡܰܠܟܳܐ ܚܰܢܦܳܐ ܕܗܰܝܡܶܢ ܐܰܒܰܝ ܒܪܶܗ ܒܰܡܫܺܝܚܳܐ ܐܶܬܚܰܡܰܬ݀ ܥܠܰܘܗܝ ܘܩܰܛܠܶܗ ܒܪܽܘܓܙܳܐ ܡܰܪܺܝܪܳܐ: ܗܳܢܳܐ ܕܰܒܝܰܕ ܟܽܘܠܳܠܶܗ ܬܗܰܪܘ ܥܺܝܪ̈ܶܐ ܘܡܰܠܐܟ̈ܶܐ ܒܝܰܕ ܙܗܺܝܪܽܘܬܶܗ ܣܳܗܕܳܝܬܳܐ: ܗܳܢܳܐ ܕܗܰܝܡܢܰܬ݀ ܐܶܡܶܗ ܥܰܡܶܗ ܘܩܰܒܠܰܬ݀ ܟܠܺܝܠܐ ܕܣܳܗܕܽܘܬܳܐ: ܗܳܢܳܐ ܕܟܰܕ ܨܒܳܐ ܐܰܒܽܘܗܝ ܕܢܶܩܛܠܶܗ ܪܗܶܛ ܩܕܳܡܰܘܗܝ: ܘܟܰܕ ܐܰܕܪܟܶܗ ܩܥܳܐ ܠܘܳܬ ܐܠܰܗܳܐ ܘܒܳܗ̇ ܒܫܳܥܬܳܐ ܐܶܨܛܰܪܺܝ ܫܽܘܥܳܐ ܘܰܢܚܶܬ ܒܓܰܘܶܗ ܦܰܓܪܶܗ ܩܰܕܺܝܫܳܐ: ܘܡܶܛܽܠ ܐܺܝܩܳܪܶܗ ܪܰܒܳܐ ܝܰܡܺܝܢܶܗ ܦܳܫܰܬ݀ ܠܒܰܪ ܕܬܶܗܘܶܐ ܥܽܘܕܪܳܢܳܐ ܠܟܽܠܗܽܘܢ ܡܗܰܝ̈ܡܢܶܐ ܕܒܳܗ̇ ܡܶܬܓܰܘܣܺܝܢ: ܗܳܢܳܐ ܛܰܠܝܳܐ ܡܳܪܝ ܐܰܒܰܝ ܕܰܙܟܳܐ ܠܚܰܢܦܽܘܬܳܐ ܘܠܰܡܓܽܘܫܽܘܬܳܐ ܘܰܒܝܰܘܡܳܐ ܕܒܶܗ ܩܰܒܶܠ ܪܽܘܫܡܳܐ ܕܡܰܥܡܽܘܕܺܝܬܳܐ ܐܶܬܟܰܠܰܠ ܒܣܰܝܦܳܐ ܘܩܰܒܶܠ ܟܠܺܝܠܐ ܦܰܐܝܳܐ ܕܣܳܗܕܽܘܬܳܐ: ܘܗܳܐ ܟܽܠܗܶܝܢ ܥܺܕ̈ܳܬܳܐ ܘܕܰܝܪ̈ܳܬܳܐ ܥܰܡ ܟܶܢ̈ܫܶܐ ܕܰܡܗܰܝ̈ܡܢܶܐ ܛܽܘܒܳܐ ܠܡܳܪܝ ܐܰܒܰܝ ܘܰܠܡܳܪܝ ܡܰܐܡܰܐ ܣܳܗ̈ܕܶܐ ܢܰܨܺܝ̈ܚܶܐ ܡܰܘܫܛܺܝܢ ܟܰܕ ܐܳܡܪܺܝܢ: ܠܳܟ ܛܽܘܒܰܝܟ ܡܳܪܝ ܡܰܐܡܰܐ ܣܳܗܕܳܐ ܚܠܺܝܨܳܐ ܘܛܽܘܒܳܐ ܠܐܒܳܗܰܝ̈ܟ ܟܺܐܢ̈ܶܐ ܘܙܰܕܺܝ̈ܩܶܐ: ܠܳܟ ܛܽܘܒܰܝܟ ܡܳܪܝ ܡܰܐܡܰܐ ܘܛܽܘܒܳܐ ܠܐܒܽܘܟ ܬܶܐܘܳܕܪܺܝܛܽܘܣ ܣܳܒܳܐ ܩܰܕܺܝܫܳܐ ܘܠܐܡܳܟ ܣܳܒܬܳܐ ܕܪܽܘܦܰܢܺܝܰܐ: ܠܳܟ ܛܽܘܒܰܝܟ ܡܳܪܝ ܡܰܐܡܰܐ ܕܰܐܒܗܶܬܬ ܠܡܰܠܟܳܐ ܚܰܢܦܳܐ ܘܰܐܟܶܣܬ ܠܟܳܦܽܘܪ̈ܶܐ ܘܰܕܠܐ ܕܶܚܠܐ ܐܰܘܕܺܝܬ ܒܰܡܫܺܝܚܳܐ ܡܳܪܳܟ: ܠܳܟ ܛܽܘܒܰܝܟ ܡܳܪܝ ܡܰܐܡܰܐ ܕܟܰܕ ܫܠܺܝܚ ܐܰܢ̱ܬ ܢܰܓܕܽܘܟ ܠܺܝ̈ܛܶܐ ܡܰܪܺܝܪܳܐܝ̣ܬ: ܘܰܫܕܰܘ ܥܰܠ ܦܰܐܬܳܟ ܢܽܘܪܳܐ ܘܢܶܦܛܳܐ ܘܡܶܢܬܳܐ ܕܣܰܥܪܳܐ ܠܐ ܐܶܬܚܰܪܟܰܬ݀ ܒܳܟ: ܛܽܘܒܰܝܟ ܡܳܪܝ ܡܰܐܡܰܐ ܕܟܰܕ ܒܥܰܘ ܚܰܢ̈ܦܶܐ ܕܛܰܣܳܐ ܢܣܺܝܡܽܘܢ ܕܰܐܒܳܪܳܐ ܒܰܩܕܳܠܳܟ ܘܰܢܛܰܒܥܽܘܢܳܟ ܒܝܰܡܳܐ ܘܡܰܠܐܟܳܐ ܣܰܡܺܝ ܠܥܰܝܢܰܝ̈ܗܽܘܢ ܘܠܳܟ ܛܽܘܒܰܝܟ ܡܳܪܝ ܡܰܐܡܰܐ ܕܡܳܪܳܟ ܦܰܨܺܝ ܠܰܟ ܡ̣ܶܢ ܚܰܢ̈ܦܶܐ ܘܟܳܦܽܘܪ̈ܶܐ: ܘܠܳܟ ܫܰܘܙܶܒ ܡ̣ܶܢ ܐܺܝܕܰܝ̈ܗܽܘܢ ܘܰܠܛܽܘܪܳܐ ܐܰܘܒܠܳܟ: ܘܰܓܒܶܬܳܐ ܡܶܢ ܚܰܠܒܳܐ ܕܚܰܝ̈ܘܳܬܳܐ ܐܰܘܟܠܳܟ: ܘܰܫܒܽܘܩܬܳܐ ܡ̣ܶܢ ܫܡܰܝܳܐ ܢܶܚܬܰܬ݀ ܠܳܟ: ܘܶܐܘܢܓܶܠܝܽܘܢ ܐܶܬܺܝܗܶܒ ܠܳܟ: ܘܦܳܬܽܘܪܳܐ ܕܰܡܠܐܷ ܛܳܒ̈ܳܬܳܐ ܐܶܫܬܰܕܰܪ ܠܳܟ: ܠܳܟ ܛܽܘܒܰܝܟ ܡܳܪܝ ܡܰܐܡܰܐ ܕܰܫܕܰܐܘܽܘܟ ܒܰܐܬܽܘܢܳܐ ܕܢܽܘܪܳܐ ܘܰܣܟܰܪܘ ܒܰܐܦܰܝ̈ܟ: ܘܒܳܬܰܪ ܬܠܳܬܳܐ ܝܰܘ̈ܡܺܝܢ ܦܬܰܚܘ ܠܐܬܽܘܢܳܐ ܘܶܐܫܟܚܽܘܟ ܟܰܕ ܩܳܐܶܡ ܐܰܢ̱ܬ ܘܰܡܙܰܡܰܪ ܐܰܢ̱ܬ ܠܐܠܳܗܳܐ ܒܳܪܽܘܝܳܟ: ܘܚܰܒܫܽܘܟ ܥܰܡ ܕܶܒܳܐ ܘܡܶܕܶܡ ܠܐ ܣܶܪܚܰܬ݀ ܒܳܟ: ܘܥܰܡ ܢܶܡܪܳܐ ܘܡܶܕܶܡ ܠܐ ܐܰܥܺܝܩܳܟ: ܘܥܰܡ ܐܰܪܝܳܐ ܣܳܪܽܘܚܳܐ ܘܰܡܠܰܟܶܚ ܗܘܳܐ ܪ̈ܶܓܠܰܝܟ ܘܰܡܢܰܫܶܩ ܗܘܳܐ ܠܗܶܝܢ: ܘܪܰܓܡܽܘܟ ܒܟܺܐܦ̈ܶܐ ܘܠܐ ܚܕܳܐ ܡܶܢܗܶܝܢ ܐܶܬܩܰܪܒܰܬ݀ ܠܳܟ: ܘܦܰܣܩܽܘܗܝ ܠܠܶܫܳܢܳܟ ܕܠܐ ܬܡܰܠܶܠ ܘܰܐܢ̱ܬ ܒܰܩܥܳܬܳܐ ܪܰܒܬܳܐ ܡܰܟܪܶܙ ܗܘܰܝܬ ܫܡܶܗ ܕܰܡܫܺܝܚܳܐ ܡܳܪܶܗ ܕܰܐܕܰܝ ܕܡܺܝܬܬ ܥܰܠ ܣܰܒܪܶܗ: ܘܰܡܡܰܠܶܠ ܗܘܰܝܬ ܡܰܡܠܠܐ ܬܡܺܝܗܳܐ ܒܳܬܰܪ ܕܶܐܬܦܣܶܩ ܠܶܫܳܢܳܟ: ܠܳܟ ܛܽܘܒܰܝܟ ܡܳܪܝ ܡܰܐܡܰܐ ܕܰܐܪܟܒܽܘܟ ܥܰܠ ܣܳܪܓܳܐ ܕܦܰܪܙܠܐ ܕܰܩܒܺܝ̈ܥܳܢ ܗܘܰܝ̈ ܒܶܗ ܣܶܟ̈ܶܐ ܚܰܪ̈ܺܝܦܳܬܳܐ ܘܰܬܠܳܬ ܡܢܰܘ̈ܳܢ ܐܶܬܦܣܶܩܬ ܘܒܶܗ ܗܘܳܐ ܟܽܘܠܳܠܳܟ: ܘܫܰܢܝܰܬ݀ ܢܰܦܫܳܟ ܠܘܳܬ ܡܳܪܳܟ: ܘܡܰܠܟܳܐ ܪܰܫܺܝܥܳܐ ܕܕܳܢܳܟ ܩܰܒܶܠ ܡܣܳܡ ܒܪܺܝܫܳܐ ܕܪܽܘܓܙܳܐ ܒܶܗ ܒܝܰܘܡܳܐ ܕܟܽܘܠܳܠܳܟ: ܘܣܽܘܣܝܳܐ ܕܰܥܠܰܘܗܝ ܐܰܪܟܒܽܘܟ ܒܚܶܡܬܳܐ ܗܦܰܟ ܥܰܠ ܡܰܠܟܳܐ ܘܕܳܫܶܗ ܘܰܦܪܰܬ݀ ܟܰܪܣܶܗ ܘܡܺܝܬ ܘܶܐܙܰܠ ܠܓܺܗܰܢܳܐ: ܘܟܽܠ ܕܰܚܙܳܐ ܘܰܫܡܰܥ ܫܰܒܰܚ ܠܐܠܳܗܳܐ ܡܰܘܪܒܳܢܳܟ ܘܰܡܢܰܨܚܳܢܳܟ: ܘܟܰܕ ܡ̣ܶܢ ܬܡܺܝܗܽܘܬ ܬܶܕܡܪ̈ܳܬܳܟ ܚܳܝܒܺܝܢܰܢ: ܘܰܚܕܳܐ ܡ̣ܶܢ ܐܠܳܦ ܠܐ ܐܳܡܪܺܝܢܰܢ: ܢܶܬܩܰܪܰܒ ܠܘܳܬ ܫܠܺܝܚܳܐ ܩܰܕܺܝܫܳܐ ܘܰܡܣܰܒܪܳܢܳܐ ܕܰܫܪܳܪܳܐ ܡܳܪܝ ܐܰܕܰܝ ܢܽܘܗܪܳܐ ܕܰܣܡܰܝ̈ܳܐ ܘܦܳܪܽܘܩܳܐ ܕܰܫܒܰܝ̈ܳܐ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܕܢܰܚܶܡܬ ܒܦܶܬܓܳܡܰܝ̈ܟ ܡܰܠܝ̈ܰܝ ܚܰܝ̈ܶܐ ܠܡܺܝ̈ܬܰܝ ܒܰܚܛܺܝܬܳܐ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܣܳܡܟܳܐ ܚܰܝܠܬܳܢܳܐ ܕܣܰܡܟܳܗ̇ ܠܐܘܪܗܳܝ ܗ̇ܳܝ ܡܒܰܪܰܟܬܳܐ: ܘܰܣܬܰܪ ܘܚܰܝܶܒ ܠܣܳܓ̈ܕܰܝ ܠܒܶܪ̈ܝܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܥܳܩܽܘܪܳܐ ܕܚܰܢܦܽܘܬܳܐ ܘܰܕܝܽܘܕܳܝܽܘܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܦܺܝܪܡܳܐ ܗܰܢܺܐܝ ܪܺܝܚܳܐ ܕܦܳܚ ܪܺܝܚܶܗ ܒܽܐܘܪܗܳܝ ܡܒܰܪܰܟܬܳܐ ܘܰܒܟܽܠܳܗ̇ ܡܰܕܢܚܳܐ ܡܪܰܥܝܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܨܶܡܚܳܐ ܨܰܡܽܘܚܬܳܢܳܐ ܕܰܨܡܰܚܘ ܙܰܗܪܺܝܪ̈ܶܐ ܕܙܰܠܺܝ̈ܩܰܘܗܝ ܒܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܟܶܢܳܪܳܐ ܚܠܐܷ ܢܶܥ̈ܡܳܬܳܐ ܕܩܺܝ̈ܢܳܬܳܐ ܗܰܢܺܝ̈ܳܐܬܳܐ ܩܰܢܩܶܢܬ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܪܳܚܡܳܐ ܚܰܒܺܝܒܳܐ ܘܬܰܠܡܺܝܕܳܐ ܕܪܰܒܳܐ ܫܰܪܺܝܪܳܐ ܕܰܪܚܶܡܬܳܝܗܝ ܠܡܳܪܳܟ ܘܓܰܘܙܶܠܬ ܒܪܚܶܡܬܶܗ ܢܰܦ̈ܫܳܬܳܐ ܣܰܓܺܝ̈ܳܐܬܳܐ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܘܰܡܣܰܒܪܳܢܳܐ ܕܰܫܪܳܪܳܐ ܡܳܪܝ ܐܰܕܰܝ ܬܳܓܳܐ ܡܰܕܗܒܳܐ ܕܥܺܕܬܳܐ ܩܰܕܺܝܫܬܳܐ ܘܬܶܫܒܽܘܚܬܳܐ ܘܫܽܘܒܗܳܪܳܐ ܕܰܫܠܺܝܚܽܘܬܳܐ: ܘܒܰܕܓܽܘܢ ܥܺܕܬܳܐ ܘܝܰܠܕܶܝ̈ܗ̇ ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܟܽܘܢ ܡܝܰܩܪܳܐ: ܫܰܐܠܽܘܢ ܠܳܗ̇ ܡ̣ܶܢ ܡܳܪܟܽܘܢ ܐܳܘ ܩܰܕܺܝ̈ܫܶܐ ܓܒܰܝ̈ܳܐ ܡܳܪܝ ܐܰܕܰܝ ܘܡܳܪܝ ܐܰܒܰܝ ܘܡܳܪܝ ܡܰܐܡܰܐ ܕܰܐܣܗܶܕܘ ܐܰܬܠܺܝܛܳܐܝ̣ܬ ܕܢܰܡܠܶܟ ܫܰܝܢܳܐ ܘܰܫܠܳܡܳܐ ܒܙܳܘ̈ܝܳܬܳܐ ܕܺܝܠܳܗ̇ ܟܰܗܺܝܢܳܐܝ̣ܬ ܘܚܽܘܒܳܐ ܘܰܐܘܝܽܘܬܳܐ ܫܦܺܝܥܳܐܝ̣ܬ ܘܙܰܗܝܽܘܬܳܐ ܘܩܰܕܺܝܫܽܘܬܳܐ ܠܟܳܗ̈ܢܶܝܗ̇ ܘܪ̈ܳܥܰܘܳܬܳܗ̇ ܐܰܡܺܝܢܳܐܝ̣ܬ: ܘܫܽܘܪܬܳܚܳܐ ܠܦܺܐܪ̈ܶܝܗ̇ ܕܰܐܪܥܳܐ ܠܐ ܡܕܰܘܕܳܐܝ̣ܬ: ܘܣܰܒܥܳܐ ܠܟܰܦ̈ܢܶܐ ܘܰܐܪ̈ܡܠܳܬܳܐ ܘܝܰܬܡ̈ܶܐ ܘܰܨܪ̈ܺܝܟܶܐ ܡܫܰܪܬܚܳܐܝ̣ܬ: ܘܚܽܘܣܳܝܳܐ ܘܠܰܢ ܘܰܠܥܰܢܺܝ̈ܕܰܝܢ ܕܰܫܟܶܒܘ ܒܰܬܪܺܝܨܽܘܬ ܫܽܘܒܚܳܐ ܡܪܰܚܡܳܢܳܐܝ̣ܬ ܘܣܶܓܕܬܳܐ ܠܳܟ ܡܳܪܝ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܫܠܺܝܚܳܐ ܡܳܪܝ ܐܰܕܰܝ ܘܣܳܗܕܳܐ ܐܰܒܰܝ ܘܥܰܡܗܽܘܢ ܡܳܪܝ ܡܰܐܡܰܐ: ܒܥܰܘ ܡ̣ܶܢ ܐܠܰܗܳܐ ܒܗܳܢܳܐ ܝܰܘܡܳܐ ܕܕܽܘܟܪܳܢܟܽܘܢ ܕܺܐܝܬܰܘܗܝ ܪܺܝܫ ܫܰܢ̱ܬܳܐ: ܕܢܶܥܒܪܽܘܢ ܡܶܢܰܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܢܺܐܬܽܘܢ ܠܰܢ ܝܰܪ̈ܚܶܐ ܕܚܰܕ̈ܘܳܬܳܐ: ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܢܰܡܠܶܟ ܥܠܰܝܢ ܫܰܝܢܳܐ ܘܰܫܠܳܡܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܶܗ ܬܰܪܬܶܝܢ ܓܽܘܕܺܝ̈ܢ ܡܶܬܟܰܪ̈ܟܳܢܶܐ ܕܥܰܡܶܗ ܘܡܰܟܪ̈ܙܳܢܶܐ ܕܰܣܒܰܪܬܳܗ ܐܶܘܢܓܶܠܳܝܳܐܝ̣ܬ: ܘܟܰܕ ܫܰܡܠܺܝ ܕܶܝܢ ܡܕܰܒܪܳܢܳܐܝ̣ܬ ܟܽܠܡܶܕܶܡ ܥܰܠ ܐܰܪܥܳܐ ܐ̱ܢܳܫܳܐܝ̣ܬ: ܚܕܳܐ ܓܽܘܕܳܐ ܡܶܬܓܰܘ̈ܝܰܝ ܒܐܪ̈ܳܙܰܘܗܝ ܓܢܺܝܙܳܐܝ̣ܬ: ܘܰܐ̱ܚܪܺܬܐܳ ܕܫܰܒܥܺܝܢ ܘܰܬܪܶܝܢ ܫܰܠܺܝ̈ܛܰܝ ܥܰܠ ܒܶܝܬ ܓܰܙܶܗ ܦܰܪܶܗܣܺܝܳܐܝ̣ܬ: ܕܚܰܕ ܡܶܢܗܽܘܢ ܐܺܝܬܰܘܗܝ ܡܳܪܝ ܐܰܕܰܝ ܫܠܺܝܚܳܐ ܕܩܽܘܫܬܳܐ ܘܰܡܣܰܒܪܳܢܳܐ ܕܰܫܪܳܪܳܐ ܪܺܝܫܳܐ ܘܪܰܒܳܐ ܕܗܳܕܶܐ ܓܽܘܕܳܐ ܬܪܰܝܳܢܺܝܬܳܐ ܪܺܝܫܳܢܳܐܝ̣ܬ: ܕܝܰܘܡܳܢܳܐ ܕܽܘܟܪܳܢܶܗ ܡܶܙܕܰܝܰܚ ܒܟܶܢܫܰܢ ܫܒܺܝܚܳܐܝ̣ܬ: ܕܒܰܨܠܰܘ̈ܳܬܶܗ ܪ̈ܰܚܡܶܐ ܡ̣ܶܢ ܡܳܪܶܗ ܫܳܐܠܺܝܢܰܢ ܚܢܰܢ ܡܶܬܚܰܢܳܢܳܐܝ̣ܬ: ܒܗܳܢܳܐ ܥܕܢܐ܀

 

 

 

ܣܕܪܐ

 

 

 

ܟܰܕ ܠܰܡܫܺܝܚܳܐ ܐܠܰܗܳܐ ܣܳܓܕܺܝܢܰܢ ܘܰܡܫܰܒܚܺܝܢܳܢ ܕܣܰܥܪܳܗ̇ ܠܰܓܒܺܝܠܬܶܗ ܒܥܽܘܕܪ̈ܳܢܰܘܗܝ ܡܪܰܚܡܳܢܳܐܝ̣ܬ: ܟܰܕ ܗܰܠܶܟ ܒܰܐܪܥܳܐ ܡܕܰܒܪܳܢܳܐܝ̣ܬ: ܘܰܐܣܺܝ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܒܝܰܕ ܪܶܡܙܶܗ ܦܳܩܽܘܕܳܐܝ̣ܬ: ܘܗܰܝܡܶܢܘ ܒܶܗ ܥܰܡ̈ܡܶܐ ܫܰܪܺܝܪܳܐܝ̣ܬ ܕܰܚܙܰܘ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܡܶܣܬܰܥܪ̈ܳܢ ܗܘܰܝ̈ ܬܡܺܝܗܳܐܝ̣ܬ ܘܰܐܘܕܺܝܘ ܕܰܐܠܳܗܰܐ ܗ̱ܘ ܘܒܰܪ ܐܠܰܗܳܐ ܠܐ ܦܠܺܝܓܳܐܝ̣ܬ: ܩܰܕܡܳܝܳܐ ܕܟܽܠܗܽܘܢ ܐܰܝܠܶܝܢ ܕܗܰܝܡܶܢܘ ܐܺܝܬܰܘܗܝ ܐܰܒܓܰܪ ܡܰܠܟܳܐ ܐܽܘܟܳܡܳܐ ܕܩܰܪܶܒ ܗܰܝܡܳܢܽܘܬܶܗ ܒܰܟܳܪܳܐܝ̣ܬ: ܘܟܰܕ ܫܰܕܰܪ ܠܘܳܬܶܗ ܘܶܐܡܰܪ ܠܶܗ ܠܰܡܫܺܝܚܳܐ ܡܫܰܥܒܕܳܐܝ̣ܬ: ܕܝܳܕܰܥ ܐ̱ܢܳܐ ܕܰܐܠܳܗܳܐ ܐܺܝܬܰܝܟ ܕܡ̣ܶܢ ܫܡܰܝܳܐ ܢܚܶܬܬ ܕܠܰܢ ܬܶܦܪܽܘܩ ܡܶܬܕܰܡܪܳܢܳܐܝ̣ܬ: ܘܫܶܡܥܶܬ ܠܺܝ ܕܝܽܘܕܳܝ̈ܶܐ ܗܳܐ ܣܳܩܪܺܝܢ ܠܳܟ ܘܣܳܢܶܝܢ ܠܳܟ ܚܰܣܳܡܳܐܝ̣ܬ: ܟܰܪܟܳܐ ܙܥܽܘܪܳܐ ܐܺܝܬ ܠܺܝ ܣܳܦܶܩ ܗ̣ܽܘ ܠܺܝ ܘܠܳܟ ܐܶܢ ܬܺܐܬܶܐ ܘܨܶܝܕܰܝ ܬܶܬܢܺܝܚ ܚܳܕܝܳܐܝ̣ܬ: ܦܩܽܘܕ ܘܬܳܐ ܒܰܪܶܟܳܝܗܝ ܠܟܰܪܟܰܢ ܒܒܽܘܪ̈ܟܳܬܳܟ ܡܰܥܬܪܳܢܳܐܝ̣ܬ: ܣܳܦܶܩ ܗ̣ܽܘ ܠܰܬܪ̈ܰܝܢ ܐܶܢ ܬܺܐܬܶܐ ܘܠܐ ܬܶܚܰܫ ܟܡܺܝܪܳܐܝ̣ܬ. ܘܬܳܐ ܐܰܣܳܐ ܟܺܐܒܳܐ ܕܓܰܪܒܳܐ ܕܺܐܝܬ ܠܺܝ ܘܗܳܐ ܡܫܰܢܶܩ ܠܺܝ ܡܫܺܝܡܳܢܳܐܝ̣ܬ: ܝܳܕܰܥ ܐ̱ܢܳܐ ܕܡܰܐܣܶܐ ܐܰܢ̱ܬ ܟܽܠ ܟܺܐܒ̈ܶܐ ܘܟܽܠ ܟܽܘܪ̈ܗܳܢܶܐ ܕܠܐ ܥܶܩܳܪ̈ܶܐ ܐܰܟܺܝܦܳܐܝ̣ܬ: ܨܗܶܐ ܐ̱ܢܳܐ ܠܰܚܙܳܬܳܟ ܣܰܓܺܝ ܘܶܐܢ ܡܰܨܝܳܐ ܗܘܳܬ݀ ܥܰܠ ܪܺܝܫ ܐܳܬܶܐ ܗܘܺܝܬ ܠܘܳܬܳܟ ܘܰܠܣܶܓܕܬܳܟ ܥܰܒܕܳܢܳܐܝ̣ܬ ܩܰܒܶܠ ܡܶܢܝ ܕܳܫ̈ܢܐܶ ܕܫܰܕܪܶܬ ܠܳܟ ܒܨܺܝܪܳܐܝ̣ܬ: ܘܠܐ ܬܰܣܠܐܷ ܠܰܓܥܳܬܶܗ ܕܥܰܒܕܳܟ ܕܫܳܐܶܠ ܠܳܟ ܚܢܺܝܓܳܐܝ̣ܬ: ܕܰܬܫܰܕܰܪ ܠܺܝ ܥܰܡ ܥܰܒ̈ܕܰܝ ܚܰܢܳܢ ܘܰܫܡܶܫܓܶܪܰܡ ܘܡܰܪܝܳܗܶܒ ܐܳܣܝܽܘܬܳܐ ܠܟܺܐܒ̈ܰܝ ܡܣܰܪܗܒܳܐܝ̣ܬ: ܗܳܝܕܶܝܢ ܦܰܢܺܝ ܡܫܺܝܚܳܐ ܠܐܒܓܰܪ ܟܰܕ ܐܳܡܰܪ ܠܶܗ ܡܳܪܳܢܳܐܝ̣ܬ: ܕܬܶܗܘܶܐ ܒܪܺܝܟ ܐܰܢ̱ܬ ܘܟܰܪܟܳܟ ܡܶܛܽܠ ܕܗܰܝܡܶܢܬ ܒܺܝ ܚܰܡܺܝܡܳܐܝ̣ܬ: ܘܰܒܥܶܠܕܒܳܒܳܐ ܠܐ ܢܶܫܬܰܠܰܛ ܒܟܰܪܟܳܟ ܡܶܛܽܠ ܕܩܰܕܶܡܬ ܗܰܝܡܶܢܬ ܠܺܝ ܡܣܰܪܗܒܳܐܝ̣ܬ: ܡܕܰܒܪܳܢܽܘܬܳܐ ܐܺܝܬ ܠܺܝ ܕܶܐܫܰܡܠܐܷ ܘܗܳܐ ܣܳܠܶܩ ܐ̱ܢܳܐ ܠܘܳܬ ܗ̇ܰܘ ܕܫܰܕܪܰܢܝ ܐܳܒܝ ܨܶܒܝܳܢܳܐܝ̣ܬ: ܘܟܰܕ ܣܳܠܶܩ ܐ̱ܢܳܐ ܗܳܐ ܡܫܰܕܰܪ ܐ̱ܢܳܐ ܠܳܟ ܚܰܕ ܡ̣ܶܢ ܬܰܠܡܺܝ̈ܕܶܐ ܕܺܝܠܝ ܕܰܠܟܺܐܒܰܝ̈ܟ ܢܰܐܣܶܐ ܒܚܰܝܠܐ ܕܺܝܠܝ ܐܠܰܗܳܐܝ̣ܬ: ܐܳܦ ܕܰܢܫܰܪܪܳܟ ܒܗܰܝܡܳܢܽܘܬܳܐ ܘܢܰܘܕܥܳܟ ܐܰܝܠܶܝܢ ܕܣܶܒܠܶܬ ܪܶܚܡܰܬ݀ ܐ̱ܢܳܫܳܐܝ̣ܬ ܘܟܰܕ ܫܰܡܠܺܝ ܡܕܰܒܪܳܢܽܘܬܶܗ ܘܰܣܠܶܩ ܠܘܳܬ ܐܰܒܳܐ ܕܫܰܠܚܶܗ ܡܶܬܥܰܠܝܳܢܳܐܝ̣ܬ ܗܳܝܕܶܝܢ ܫܰܕܪܶܗ ܠܰܫܠܺܝܚܳܐ ܕܩܽܘܫܬܳܐ ܘܰܡܣܰܒܪܳܢܳܐ ܕܰܫܪܳܪܳܐ ܡܳܪܝ ܐܰܕܰܝ ܠܐܘܪܗܳܝ ܕܒܶܝܬܢܰܗܪ̈ܺܝܢ ܟܰܪܟܳܐ ܕܶܐܬܒܰܪܰܟ ܡ̣ܶܢ ܗ̇ܰܘ ܦܽܘܡܳܐ ܩܰܕܺܝܫܳܐ ܥܰܬܺܝܪܳܐ̣ܝܬ: ܘܰܚܕܺܝ ܐܰܒܓܰܪ ܒܡܶܐܬܺܝܬܶܗ ܕܰܫܠܺܝܚܳܐ ܐܰܕܰܝ ܐܰܝܟ ܫܽܘܘܕܳܝܳܐ ܕܶܐܫܬܰܘܕܺܝ ܠܶܗ ܡܫܺܝܚܳܐ ܠܐ ܕܰܓܳܠܐܴܝ̣ܬ: ܘܰܐܣܺܝ ܟܺܐܒܶܗ ܘܟܽܘܪܗܳܢܶܗ ܘܟܽܠܗܽܘܢ ܐܠܰܝ̈ܨܶܐ ܕܺܐܝܬ ܗܘܰܘ ܒܟܰܪܟܳܐ ܐܽܘܪܗܳܝ ܘܰܩܢܰܘ ܚܽܘܠܡܳܢܳܐ ܡܫܰܪܪܳܢܳܐܝ̣ܬ ܐܰܬܩܶܢ ܡܰܥܡܽܘܕܺܝܬܳܐ ܘܰܐܥܡܶܕ ܡܰܠܟܳܐ ܘܰܠܪܰܘܪ̈ܒܳܢܰܘܗܝ ܘܟܽܠܗܽܘܢ ܒܢ̈ܰܝ ܒܰܝܬܶܗ ܐܳܦ ܠܟܽܠܳܗ̇ ܡܕܺܝܢ̱ܬܳܐ ܪܗܺܝܒܳܐܝ̣ܬ: ܬܰܒܰܪ ܠܨܰܠܡ̈ܶܐ ܥܩܰܪ ܠܰܥܠܰܘ̈ܳܬܳܐ ܘܰܐܪܬܺܝ ܐܶܢܽܘܢ ܡܰܠܦܳܢܳܐܝ̣ܬ: ܒܢܳܐ ܠܥܺܕܬܳܐ ܗ̇ܳܝ ܪܰܒܬܳܐ ܘܰܬܡܺܝܗܬܳܐ ܘܰܡܫܰܡܰܗܬܳܐ ܘܩܰܕܶܫ ܐ̱ܪ̈ܳܙܶܐ ܘܫܰܘܬܶܦ ܐܶܢܽܘܢ ܦܨܺܝܚܳܐܝ̣ܬ ܘܟܰܕ ܒܰܒ̈ܢܳܬ ܩ̈ܳܠܐ ܗܰܢܺܝ̈ܳܐܬܳܐ ܘܢܶܥ̈ܡܳܬܳܐ ܚܰܠܝ̈ܳܬܳܐ ܕܪܽܘܚܳܐ ܩܰܕܺܝܫܳܐ ܐܳܡܪܺܝܢܢ ܡܥܰܢܝܳܢܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܘܰܡܣܰܒܪܳܢܳܐ ܕܫܪܳܪܳܐ ܡܳܪܝ ܐܰܕܰܝ ܐܺܝܙܓܰܕܳܐ ܫܰܪܺܝܪܳܐ ܕܡܰܠܟܳܐ ܫܡܰܝܳܢܳܐ ܕܰܐܝܬܺܝܬ ܠܰܢ ܛܶܒ̈ܶܐ ܛܳܒ̈ܶܐ ܡܚܰܕܝܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܒܶܪܽܘܠܐ ܫܒܺܝܚܳܐ ܕܒܽܐܘܪܗܳܝ ܕܒܶܝܬܢܰܗܪ̈ܺܝܢ ܨܡܰܚ ܢܰܗܺܝܪܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܡܳܪܝ ܐܰܕܰܝ ܓܺܝܙܰܒܪܳܐ ܫܰܪܺܝܪܳܐ ܕܝܶܫܽܘܥ ܐܠܰܗܳܐ ܕܰܓܠܐ ܥܽܘܬܪ̈ܰܘܗܝ ܠܐ ܡܶܬܡܰܣ̈ܟܢܳܢܶܐ ܒܰܐܬܪܳܐ ܕܺܝܠܰܢ ܡܫܰܪܬܚܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܡܳܪܝ ܐܰܕܰܝ ܕܳܫܢܳܐ ܡܰܠܟܳܝܳܐ ܕܶܐܬܕܰܫܰܢ ܡ̣ܶܢ ܡܳܪܰܢ ܠܐܒܓܰܪ ܡܰܠܟܳܐ ܚܽܘܒܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܗܰܕܳܝܳܐ ܕܛܳܥܰܝ̈ܳܐ ܕܗܰܕܺܝ ܠܰܢ ܠܘܳܬ ܫܒܺܝ̈ܠܐ ܬܪ̈ܺܝܨܶܐ ܝܰܡܺܝܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܘܰܥܕܳܐ ܡܠܐܷ ܟܽܠ ܛܽܘܒܺܝ̈ܢ ܕܘܰܥܶܕ ܡܫܺܝܚܳܐ ܠܐܒܓܰܪ ܐܽܘܟܳܡܳܐ ܒܰܪ ܡܰܥܢܽܘ ܪܰܗܒܽܘܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܙܡܰܪܓܕܳܐ ܝܰܩܺܝܪ ܛܺܝ̈ܡܶܐ ܕܰܙܢܰܩ ܒܙܰܗܪܺܝܪ̈ܰܘܗܝ ܚܶܫܟܳܐ ܕܰܦܢܺܝܬܰܢ ܡܓܰܡܪܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܚܕܽܘܓܳܐ ܪܚܺܝܡܳܐ ܕܡܶܫܬܽܘܬܳܐ ܕܚܰܬܢܳܐ ܩܛܺܝܠܐ ܕܚܰܘܺܝ ܠܰܢ ܐܽܘܪܚܳܐ ܕܚܰܝ̈ܶܐ ܫܰܪܺܝܪܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܛܪܺܝܓܽܘܕܳܐ ܣܳܦܩܳܐ ܘܪܺܝܫ ܓܽܘܕܳܐ ܫܰܒܥܺܝܢܳܝܬܳܐ ܕܰܛܪܰܕ ܒܢܶܥ̈ܡܳܬܶܗ ܚܰܠܝ̈ܳܬܳܐ ܡ̣ܶܢ ܢܰܦ̈ܫܳܬܰܢ ܠܪܰܦܝܽܘܬܳܐ ܐܳܦ ܠܡܰܐܻܝܢܽܘܬܳܐ ܚܺܝܨܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܝܰܪܕܳܐ ܡܓܺܝܚܳܢܳܐ ܕܝܽܘܠܦܳܢ̈ܶܐ ܫܠܺܝ̈ܚܳܝܶܐ ܝܰܒܶܠ ܘܬܰܦܶܦ ܒܥܺܕ̈ܳܬܰܢ ܫܦܺܝܥܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܟܶܢܳܪܳܐ ܚܰܠܝܳܐ ܡܽܘܣܺܝܩܪܳܝܳܐ ܕܟܰܢܶܫ ܒܰܢܩܰܫ ܡܶܢܰܘ̈ܗܝ ܚܰܠܝ̈ܳܬܳܐ ܠܥܰܡ̈ܡܶܐ ܘܶܐܡܘ̈ܳܬܳܐ ܠܘܳܬ ܣܒܰܪܬܳܐ ܕܚܰܝ̈ܶܐ ܐܶܘܢܓܶܠܳܝܳܐܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܠܡܺܐܢܳܐ ܘܢܰܘܚܳܐ ܘܒܶܝܬ ܨܰܘܒܳܐ ܕܐ̱ܢܳܫܽܘܬܳܐ ܕܠܐܝ̈ܳܐ ܘܰܡܛܰܪ̈ܦܶܐ ܒܳܟ ܡܶܬܬܢܺܝܚܺܝܢ ܒܗܺܝܠܐܴܝ̣ܬ: ܬܳܐ ܒܰܫܠܳܡܳܐ ܫܠܺܝܚܳܐ ܕܩܽܘܫܬܳܐ ܡܳܪܝ ܐܰܕܰܝ ܡܒܰܕܩܳܢܳܐ ܕܰܡܕܰܒܪܳܢܽܘܬܳܐ ܐܠܰܗܳܝܬܳܐ ܘܰܡܫܰܪܰܪ ܡܶܬܒܰܪܢܫܳܢܽܘܬܳܐ ܦܳܪܽܘܩܳܝܬܳܐ ܕܡܰܠܶܠ ܘܰܐܟܪܶܙ ܕܽܘܓܡܰܛܰܐ ܬܶܐܘܳܠܳܘ̈ܓܺܝܣܳܝܶܐ ܦܰܬܝܳܐܝ̣ܬ: ܘܟܰܕ ܠܰܫܠܳܡܳܟ ܠܐ ܡܰܘܦܶܝܢܰܢ: ܐܰܫܘܳܐ ܠܰܢ ܠܥܽܘܕܪܳܢܳܐ ܕܰܨܠܰܘ̈ܳܬܳܟ ܡܩܰܒ̈ܠܳܬܳܐ ܡܣܰܝܥܳܢܳܐܝ̣ܬ: ܘܫܰܟܶܢ ܠܰܢ ܒܝܽܘܡ ܕܽܘܟܪܳܢܳܟ ܟܽܠ ܛܳܒ̈ܳܬܳܐ ܘܒܽܘܪ̈ܟܳܬܳܐ ܡ̣ܶܢ ܡܳܪܳܟ ܡܫܰܪܬܚܳܐܝ̣ܬ: ܘܰܐܥܒܰܪ ܡܶܢܰܢ ܟܽܠ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܕܡܶܛܽܠ ܚܛܳܗܰܝ̈ܢ ܐܳܬܶܝܢ ܥܠܰܝܢ ܡܰܪܕܽܘܬܳܢܳܐܝ̣ܬ ܘܰܐܣܳܐ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܒܥܽܘܕܪܳܢܶܗ ܕܡܳܪܳܟ ܐܳܣܝܳܐܝ̣ܬ: ܘܒܰܪܶܟ ܠܰܢ ܒܝܰܡܺܝܢܳܟ ܕܒܳܗ̇ ܒܰܪܶܟܬ ܠܐܘܪ̈ܗܳܝܶܐ ܘܗܳܐ ܫܰܪܝܳܐ ܒܰܐܬܪܰܢ ܘܣܺܝܡܳܐ ܒܶܝܬ ܓܰܘܣܳܐ ܘܫܽܘܪܳܐ ܠܟܽܠܰܢ ܡܣܰܬܪܳܢܳܐܝ̣ܬ: ܘܰܒܒܳܥ̈ܘܳܬܳܟ ܢܶܥܒܶܕ ܡܳܪܝܳܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܰܫܟܶܒܘ ܥܰܠ ܣܰܒܪܶܗ ܡܪܰܚܡܳܢܳܐܝ̣ܬ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܰܡܫܺܝܚܳܐ ܕܰܓܒܳܟ ܠܰܫܠܺܝܚܽܘܬܳܐ ܘܢܰܨܚܳܟ ܒܟܳܪܽܘܙܽܘܬܳܐ ܡܣܰܒܪܳܢܳܐܝ̣ܬ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܐܰܡܺܝܢܳܐܝ̣ܬ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝ ܒܪ̈ܰܚܡܰܝܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ: ܘܶܐܬܪܰܥܳܐ ܠܰܪܓܺܝܙܽܘܬܰܢ ܒܝܰܕ ܨܠܰܘ̈ܳܬܶܗ ܕܡܳܪܝ ܐܰܕܰܝ ܫܠܺܝܚܳܟ: ܘܣܰܬܰܪ ܠܟܽܠܰܢ ܒܝܰܡܺܝܢܳܟ: ܘܗܰܒܠܰܢ ܡܶܛܪ̈ܶܐ ܡܫܰܝ̈ܢܶܐ ܘ̈ܛܰܠܐ ܘܰܪ̈ܣܺܝܣܶܐ ܒܙܰܒܢܰܝ̈ܗܽܘܢ: ܘܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܰܢܝܳܚܳܐ ܘܒܽܘܣܳܡܳܐ ܕܦܰܓܪ̈ܶܐ ܘܢܰܦ̈ܫܳܬܳܐ ܒܰܐܘ̈ܳܢܶܐ ܕܚܰܕ̈ܘܳܬܳܐ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܦܫܽܘܛ ܝܰܡܺܝܢܳܟ ܡܰܠܝܰܬ݀ ܒܽܘܪ̈ܟܳܬܳܐ ܫܠܺܝܚܳܐ ܡܳܪܝ ܐܰܕܰܝ ܘܒܰܪܶܟ ܠܟܶܢܫܳܐ ܗܳܢܳܐ ܕܶܐܬܛܰܝܰܒ ܠܥܺܐܕܳܟ ܗܰܒ ܠܗܽܘܢ ܫ̈ܶܐܠܳܬܗܽܘܢ ܫܰܦܺܝܪ̈ܳܬܳܐ: ܘܰܣܥܽܘܪ ܐܶܢܽܘܢ ܒܥܽܘܕܪ̈ܳܢܰܝܟ: ܘܰܐܣܳܐ ܐܶܢܽܘܢ ܒܥܽܘܕܪ̈ܳܢܰܝܟ: ܘܰܐܣܳܐ ܟܺܐܒܰܝ̈ܗܽܘܢ ܘܚܰܣܳܐ ܚܰܘܒܰܝ̈ܗܽܘܢ: ܘܰܐܢܺܝܚ ܠܥܰܢܺܝ̈ܕܰܝܗܽܘܢ: ܘܰܒܥܺܝ ܡ̣ܶܢ ܡܳܪܳܟ ܚܠܳܦ ܟܽܠܰܢ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܰܫܠܺܝ̈ܚܶܐ ܡ̣ܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ: ܘܰܐܦܢܺܝܘ ܠܟܽܠ ܥܰܡܡܺܝ̈ܢ ܠܘܳܬ ܣܶܓܕܬܳܐ ܕܺܝܠܶܗ: ܕܚܰܕ ܡܶܢܗܽܘܢ ܐܺܝܬܰܘܗܝ ܡܳܪܝ ܐܰܕܰܝ ܫܠܺܝܚܳܐ ܘܰܡܣܰܒܪܳܢܳܐ ܕܟܳܪܽܘܙܽܘܬܳܐ ܐܶܘܢܓܶܠܳܝܬܳܐ: ܠܗܰܘ ܕܫܰܕܪܶܗ ܠܐܘܪܗܳܝ ܕܦܰܪ̈ܬܘܳܝܶܐ ܕܒܰܟܪܰܬ݀ ܒܰܣܒܰܪܬܳܐ ܩܰܕܡܳܐܝ̣ܬ: ܘܣܶܘܚܰܬ݀ ܒܚܰܕܽܘܬܳܐ ܠܽܘܩܒܰܠ ܟܳܪܽܘܙܽܘܬܳܐ ܘܰܫܠܺܝܚܳܐ ܘܡܳܪܝ ܐܰܕܰܝ: ܠܗܰܘ ܕܰܐܙܺܝܥ ܠܐܒܓܰܪ ܡܰܠܟܳܐ ܕܰܢܫܰܕܰܪ ܠܶܗ ܐܶܓܪ̈ܳܬܳܐ: ܘܰܢܩܰܒܶܠ ܡܶܢܶܗ ܦܽܘܢܳܝܳܐ ܕܰܡܠܐܷ ܒܽܘܪ̈ܟܳܬܳܐ ܥܰܡ ܝܽܘܩܢܳܐ ܦܰܐܝܳܐ ܕܪܰܒܽܘܬܳܐ: ܘܟܽܠܶܗ ܟܰܪܟܳܐ ܐܶܬܒܰܪܰܟ ܒܶܗ: ܕܠܶܗ ܝܳܐܐ܀

 

 

 

ܣܕܪܐ

 

 

 

ܟܰܕ ܠܥܽܘܗܕܳܢܶܗ ܕܡܳܪܝ ܐܰܕܰܝ ܫܠܺܝܚܳܐ ܡܫܰܡܠܶܝܢܰܢ: ܥܰܡ ܚܽܘܒܳܐ ܘܗܰܝܡܳܢܽܘܬܳܐ ܘܕܽܘܒܳܪ̈ܶܐ ܡܝܰܬܪ̈ܶܐ ܕܰܡܪܰܥܶܝܢ ܠܐܠܳܗܳܐ ܘܰܒܩ̈ܳܠܐ ܕܩܽܘܒܳܠ ܛܰܝܒܽܘܬܳܐ ܢܰܙܥܶܩ ܘܢܺܐܡܰܪ: ܕܗܳܢܰܘ ܫܠܺܝܚܳܐ ܘܟܳܪܽܘܙܳܐ ܕܶܐܬܓܒܺܝ ܕܢܰܟܪܶܙ ܠܰܣܒܰܪܬܳܐ ܐܶܘܢܓܶܠܳܝܬܳܐ: ܕܫܰܕܪܶܗ ܡܳܪܶܗ ܠܐܘܪܗܳܝ ܪܳܡܰܬ݀ ܫܡܳܐ ܕܒܰܟܪܰܬ݀ ܒܗܰܝܡܳܢܽܘܬܳܐ ܗܳܢܳܐ ܕܰܐܟܪܶܙ ܒܡܰܕܢܚܳܐ ܣܒܰܪܬܳܐ ܕܚܰܝ̈ܶܐ ܠܟܽܠܗܽܘܢ ܒܢ̈ܰܝ ܒܰܝܬܳܐ ܕܗܰܝܡܳܢܽܘܬܳܐ: ܗܳܢܳܐ ܕܟܰܕ ܠܐ ܚܙܰܐܘܽܘܗܝ ܠܡܳܪܶܗ ܗܰܝܡܶܢܘ ܒܶܗ ܘܫܰܕܰܪ ܠܘܳܬܗܽܘܢ ܐܶܓܰܪܬܶܗ ܘܝܽܘܩܢܳܐ ܦܰܐܝܳܐ ܕܦܰܪܨܽܘܦܶܗ: ܘܩܰܒܠܽܘܗܝ ܒܚܰܕܽܘܬܳܐ ܘܒܰܪܘܳܙܳܐ ܪܽܘܚܳܢܳܝܳܐ: ܘܟܰܕ ܫܰܕܰܪ ܠܗܽܘܢ ܠܐܕܰܝ ܫܠܺܝܚܳܐ ܘܰܡܣܰܒܪܳܢܳܐ ܕܡܶܠܬܳܐ ܕܚܰܝ̈ܶܐ ܘܟܰܕ ܡܛܳܐ ܠܐܘܪܗܳܝ ܡܕܺܝܢ̱ܬܳܐ ܩܰܒܠܽܘܗܝ ܥܰܡ ܚܘܺܝܚܽܘܬܳܐ ܒܪܶܚܡܬܳܐ ܐܠܰܗܳܝܬܳܐ: ܘܰܐܥܠܶܗ ܐܰܒܓܰܪ ܠܒܰܝܬܶܗ ܘܶܐܬܒܰܪܰܟ ܗ̣ܽܘ ܘܟܽܠܗܽܘܢ ܒܰܝܬܳܝܰܘ̈ܗܝ ܘܰܡܕܺܝܢ̱ܬܶܗ: ܘܰܐܣܺܝ ܗܘܳܐ ܟܺܐܒܰܝ̈ܗܽܘܢ ܒܡܶܠܰܬ݀ ܡܳܪܰܢ: ܘܰܐܟܪܶܙ ܠܗܽܘܢ ܥܰܠ ܚܰܝ̈ܠܐ ܘܳܐܬܘ̈ܳܬܳܐ ܕܰܥܒܰܕ ܡܳܪܰܢ ܒܥܳܠܡܳܐ: ܘܰܡܫܰܪܰܪ ܗܘܳܐ ܡܶܠܰܘ̈ܗܝ ܒܳܐܬܘ̈ܳܬܳܐ ܕܣܳܥܰܪ ܗܘܳܐ: ܗܳܢܳܐ ܕܰܐܥܡܶܕ ܠܰܒ̈ܢܰܝ ܐܽܘܪܗܳܝ ܘܰܠܟܽܠܳܗ̇ ܒܶܝܬܢܰܗܪ̈ܺܝܢ ܘܰܐܠܶܦ ܐܶܢܽܘܢ ܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ: ܘܒܶܝܬ ܐܺܝܕܰܝ̈ ܡܳܪܝ ܐܰܘܓܺܝܢ ܬܰܠܡܺܝܕܳܐ ܕܺܝܠܶܗ ܘܰܐܦܢܺܝ ܘܰܐܥܡܶܕ ܠܟܽܠܳܗ̇ ܦܢܺܝܬܳܐ ܡܰܕܢܚܳܝܬܳܐ ܡ̣ܶܢ ܐܽܘܪܗܳܝ ܘܚܳܪܳܢ ܘܒܰܥܠܒܰܟ ܘܰܢܨܺܝܒܺܝܢ ܥܕܰܡܳܐ ܠܗܶܢܕܽܘܶ: ܘܟܰܕ ܣܐܷܒ ܘܰܣܒܰܥ ܝܰܘ̈ܡܳܬܶܗ ܘܶܐܬܬܰܓܰܪ ܛܳܒ ܘܥܰܦܶܦ ܐܶܢܶܝܢ ܠܟܰܟܪ̈ܶܐ ܕܶܐܬܓ̈ܥܶܠܝ ܠܶܗ: ܘܰܐܦܢܺܝ ܝܽܘܬܪܳܢܗܶܝܢ ܒܰܐܥ̈ܦܶܐ ܣܰܓܺܝ̈ܶܐܐ: ܘܰܥܩܰܪ ܠܟܽܘ̈ܒܶܐ ܘܕܰܪܕܪ̈ܶܐ ܡ̣ܶܢ ܠܶܒܰܘ̈ܳܬܗܽܘܢ ܘܰܙܪܰܥ ܚܠܳܦܰܝܗܽܘܢ ܚ̈ܶܛܶܐ ܓܰܒܝ̈ܳܬܳܐ: ܗܳܢܳܐ ܕܰܚܕܺܝܘ ܒܶܗ ܟܽܠܗܽܘܢ ܫܠܺܝ̈ܚܶܐ ܐܰܚ̈ܶܐ ܕܺܝܠܶܗ ܘܰܪܘܰܙ ܒܶܗ ܡܣܰܒܪ̈ܳܢܶܐ ܟܽܠܗܽܘܢ ܒܢ̈ܰܝ ܠܶܘܺܝܬܶܗ ܘܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܢܦܰܩܘ ܠܐܘܪܥܶܗ: ܛܽܘ̈ܒܶܐ ܫܡܰܝ̈ܳܢܶܐ ܝܰܗܒܘ ܠܶܗ ܟܰܕ ܒܰܪܘܳܙܳܐ ܪܽܘܚܳܢܳܝܳܐ ܩܳܥܶܝܢ ܘܳܐܡܪܺܝܢ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܘܰܡܣܰܒܪܳܢܳܐ: ܕܥܰܡ ܐܰܒܓܰܪ ܡܰܠܟܳܐ ܒܢܰܝܬ ܥܺܕܬܳܐ ܒܰܟܳܪܬܳܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܢܰܗܺܝܪܳܐ ܕܰܐܢܗܪܳܗ̇ ܠܟܽܠܳܗ̇ ܡܰܕܢܚܳܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܕܰܥܩܰܪܬ ܥܠܰܘ̈ܳܬܳܐ ܘܰܢܨܰܒܬ ܥܺܕ̈ܳܬܳܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܕܰܣܚܰܦܬ ܕܶܝܢ ܠܰܦܬܰܟܪ̈ܶܐ ܘܰܩܒܰܥܬ ܡܰܕܒ̈ܚܶܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܕܰܐܦܢܺܝܬ ܠܛܳܥܰܝ̈ܳܐ ܘܬܰܠܡܶܕܬ ܠܥ̈ܰܛܠܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܕܒܰܛܶܠܬ ܠܚܰܪ̈ܳܫܶܐ ܘܩܳܨܽܘ̈ܡܶܐ ܒܺܝ̈ܫܶܐ ܘܰܥܒܰܕܬ ܐܶܢܽܘܢ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܡܰܐܣܝܳܢܳܐ ܕܟܺܐܒ̈ܶܐ ܘܟܽܘܪ̈ܗܳܢܶܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܕܰܒܢܰܝܬ ܥܽܘܡܪ̈ܶܐ ܘܫܰܟܠܶܠܬ ܕܰܝܪ̈ܳܬܳܐ: ܠܳܟ ܛܽܘܒܰܝܟ ܡܳܪܝ ܐܰܕܰܝ ܫܠܺܝܚܳܐ ܕܪܰܒ ܗ̣ܽܘ ܛܽܘܒܳܟ ܡ̣ܶܢ ܟܽܠ ܛܽܘܒܺܝ̈ܢ ܕܰܒܥܳܠܡܳܐ: ܘܥܰܠ ܗ̇ܳܝ ܠܰܫܠܳܡܳܟ ܣܳܘܚܺܝܢܰܢ ܟܰܕ ܩܳܥܶܝܢܰܢ ܘܳܐܡܪܺܝܢܢ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܫܠܺܝܚܳܐ ܙܳܪܽܘܥܳܐ ܕܰܫܠܳܡܳܐ ܒܰܐܬܪܰܢ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܫܠܺܝܚܳܐ ܡܰܘܪܒܳܢܶܗ ܕܰܫܠܳܡܳܐ ܒܒܶܝܬܢܰܗܪ̈ܺܝܢ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܰܥܬܪܳܢܳܐ ܕܬܶܐܘܳܠܳܘܓܺܝܰܐ ܒܡܶܠܬܳܟ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܡܰܠܠܳܢܳܐ ܕܐ̱ܪ̈ܳܙܰܝ ܡܳܪܶܗ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܰܘܪܶܒ ܠܦܽܘ̈ܫܳܩܰܝ ܟܬܳܒ̈ܶܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܩܰܠܶܣ ܠܬܽܘܪ̈ܓܳܡܰܝ ܪܽܘܚܳܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܓܰܒܪܳܢܳܐ ܕܣܳܗ̈ܕܶܐ ܥܰܠ ܫܶܢ̈ܕܶܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܢܰܨܰܚ ܠܬܶܓܡܳܐ ܕܕܰܝܪ̈ܳܝܶܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܝܳܨܽܘܦܳܐ ܕܝܰܬܡ̈ܶܐ ܘܕܰܐܪ̈ܡܠܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܰܐܣܝܳܢܳܐ ܕܟܺܐܒ̈ܶܐ ܘܟܽܘܪ̈ܗܳܢܶܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܪܳܕܽܘܦܳܐ ܕܫܺܐܕ̈ܶܐ ܘܛܳܪܽܘܕܳܐ ܕܪ̈ܽܘܚܶܐ ܒܺܝ̈ܫܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܚܰܪܪܳܢܳܐ ܕܕܰܝ̈ܘܶܐ ܘܡܰܥܒܪܳܢܳܐ ܕܢܶܣܝܽܘ̈ܢܶܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܒܰܛܠܳܢܳܐ ܕܰܫܓܽܘ̈ܫܝܶܐ ܘܰܡܫܰܗܝܳܢܳܐ ܕܡܰܘܬܳܢ̈ܶܐ: ܬܳܐ ܒܰܫܠܳܡܳܐ ܡܳܪܝ ܐܰܕܰܝ ܡܥܰܕܪܳܢܳܐ ܕܥܰܝܺܝ̈ܩܶܐ ܘܡܳܠܽܘܟܳܐ ܕܫܰܦܺܝܪ̈ܳܬܳܐ: ܐܶܠܐ ܒܥܺܝ ܘܶܐܬܟܰܫܦ ܚܠܳܦܰܝܢ ܠܡܳܪܳܟ: ܕܰܢܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܘܰܐܘܝܽܘܬܳܐ ܠܪ̈ܳܥܰܘܳܬܳܐ: ܙܰܗܝܽܘܬܳܐ ܠܟܳܗ̈ܢܰܝܢ: ܢܰܟܦܽܘܬܳܐ ܠܰܡܫܰܡ̈ܫܳܢܰܝܢ: ܡܛܰܟܣܽܘܬܳܐ ܠܟܶܢܫܰܝ̈ܢ: ܒܽܘܛܳܠܐ ܕܰܩܪ̈ܳܒܶܐ: ܫܰܝܢܳܐ ܠܰܪ̈ܓܺܝܙܶܐ: ܫܽܘܪܬܳܚܳܐ ܕܥ̈ܰܠܠܳܬܳܐ: ܟܰܗܺܝܢܽܘܬܳܐ ܕܦܺܐܪ̈ܶܐ: ܘܢܶܗܘܶܐ ܟܠܺܝܠܳܗ̇ ܫܰܢ̱ܬܳܐ ܡܒܰܪܟܳܐ: ܘܬܶܗܘܶܐ ܫܰܢ̱ܬܳܐ ܡܩܰܒܰܠܬܳܐ ܠܡܳܪܝܳܐ ܘܝܰܘ̈ܡܳܬܳܐ ܕܦܽܘܪܩܳܢܳܐ: ܘܢܺܐܬܽܘܢ ܠܰܢ ܝܰܪ̈ܚܶܐ ܕܚܰܕ̈ܘܳܬܳܐ ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܒܰܨܠܰܘ̈ܳܬܳܟ ܢܶܗܘܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܢܺܝ̈ܕܰܝܢ: ܘܰܚܢܰܢ ܘܗܶܢܽܘܢ ܢܶܬܡܰܢܰܥ ܠܚܰܪܬܳܐ ܛܳܒܬܳܐ ܕܰܡܠܺܝܟܳܐ ܠܓܰܒܪ̈ܶܐ ܕܰܫܠܳܡܳܐ: ܘܟܽܠܰܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܣܗܕܬܐ ܡܪܬܝ ܒܪܒܪܐ ܘܝܘܠܝܢܐ

 

ܩܕܡܝܬ ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܚܰܝܠܐ ܚܰܝܠܬܳܢܳܐ ܕܰܒܥܽܘܫܢܶܗ ܐܶܬܢܰܨܰܚܘ ܣܳܗ̈ܕܶܐ: ܘܰܒܬܽܘܩܦܶܗ ܫܩܰܠܘ ܡܰܘܕ̈ܝܳܢܶܐ ܙܳܟܽܘܬܳܐ: ܘܰܒܙܰܝܢܶܗ ܙܰܟܳܝ̈ܶܐ ܙܟܰܘ ܘܶܐܬܟܰܠܰܠܘ ܐܰܬܠܺܝ̈ܛܶܐ: ܠܗܰܘ ܕܥܰܠ ܣܰܒܪܶܗ ܫܰܪܺܝܪܳܐ ܢܰܨܺܝܚܬܳܐ ܒܶܪܒܰܪܰܐ ܒܰܐܓܽܘܢܳܐ ܕܣܳܗܕܽܘܬܳܐ ܚܰܡܺܝܡܳܐܝ̣ܬ ܩܳܡܰܬ݀ ܘܰܫܪܳܪܳܐ ܕܗܰܝܡܳܢܽܘܬܳܗ̇ ܩܕܳܡ ܟܽܠܢܳܫ ܐܰܟܪܙܰܬ݀: ܘܚܰܪܺܝܦܽܘܬ ܚܽܘܒܳܗ̇ ܒܰܥܒܳܕܳܐ ܚܰܘܝܰܬ݀: ܘܫܽܘܠܗܳܒ ܪܶܚܡܬܳܗ̇ ܕܰܠܘܳܬܶܗ ܓܰܠܝܳܐܝ̣ܬ ܐܰܕܢܚܰܬ݀: ܘܰܒܚܽܘܠܡܳܢ ܬܰܪܥܺܝܬܳܗ̇ ܠܟܽܠ ܫܶܢ̈ܕܶܐ ܡܰܪܺܝܪ̈ܶܐ ܗ̣ܺܝ ܠܳܗ̇ ܝܶܗܒܰܬ݀: ܘܠܐܒܽܘܗ̇ ܛܪܽܘܢܳܐ ܘܰܠܟܽܠܳܗ̇ ܚܰܢܦܽܘܬܳܐ ܒܠܐ ܡܶܙܕܰܟܝܳܢܽܘܬܳܐ ܕܺܝܠܳܗ̇ ܐܰܒܗܬܰܬ݀ ܕܠܶܗ ܝܳܐܶܐ ܫܽܘܒܚܳܐ܀

 

 

 

ܣܕܪܐ

 

 

 

ܡܫܺܝܚܳܐ ܚܰܝܠܐ ܘܬܽܘܩܦܳܐ ܘܥܽܘܫܢܳܐ ܠܐ ܡܶܙܕܰܟܝܳܢܳܐ ܕܟܽܠ ܕܒܶܗ ܡܶܙܕܰܝܢܺܝܢ: ܘܣܰܒܪܳܐ ܘܬܽܘܟܠܳܢܳܐ ܫܰܪܺܝܪܳܐ ܕܟܽܠ ܕܒܶܗ ܡܶܬܓܰܘܣܺܝܢ: ܘܚܰܝ̈ܶܐ ܚܰܕ̈ܬܶܐ ܘܚܰܕܽܘܬܳܐ ܘܰܪܘܳܙܳܐ ܕܟܽܠ ܕܒܶܗ ܡܣܰܒܪܺܝܢ: ܗ̇ܰܘ ܕܰܠܣܳܗܕܬܳܐ ܫܰܦܺܝܪܰܬ݀ ܙܳܟܽܘܬܳܐ ܒܶܪܒܰܪܰܐ ܒܰܒܛܺܝܠܽܘܬ ܛܰܝܒܽܘܬܶܗ ܡ̣ܶܢ ܚܶܫܟܳܐ ܕܛܽܘܥܝܰܝ ܕܰܦܬܰܟܪܽܘܬܳܐ ܠܘܳܬ ܢܽܘܗܪܳܐ ܕܰܣܒܰܪܬܶܗ ܫܰܢܺܝ: ܘܡ̣ܶܢ ܕܶܚܠܰܬ݀ ܫܺܐܕ̈ܶܐ ܠܘܳܬ ܕܶܚܠܬܳܐ ܕܺܝܠܶܗ ܘܕܰܐܒܽܘܗܝ ܘܰܕܪܽܘܚܶܗ ܩܰܕܺܝܫܳܐ ܐܰܥܒܰܪ: ܘܡ̣ܶܢ ܓܽܘܡܳܨܳܐ ܕܰܚܒܳܠܐ ܠܘܳܬ ܪܰܘܡܳܐ ܕܺܝܕܰܥܬܳܐ ܐܠܰܗܳܝܬܳܐ ܢܓܰܕ ܘܰܐܣܶܩ: ܗ̇ܰܘ ܕܟܰܕ ܚܙܳܗ̇ ܡ̣ܶܢ ܫܡܰܝܳܐ ܕܩܽܘܕܫܶܗ ܕܰܚܦܺܝܛܳܐ ܕܰܠܘܳܬ ܕܶܚ̈ܠܳܬܳܐ ܣܪ̈ܺܝܩܳܬܳܐ: ܫܰܕܰܪ ܠܳܗ̇ ܥܽܘܕܪܳܢܳܐ ܒܝܰܕ ܓܶܠܝܳܢܳܐ: ܘܡ̣ܶܢ ܥܰܡܛܳܢܳܐ ܕܛܽܘܥܝܰܝ ܠܘܳܬ ܡܰܙܠܓܽܘܬܳܐ ܕܢܽܘܗܪܳܐ ܫܰܪܺܝܪܳܐ ܥܰܠܺܝ ܡܰܕܥܳܗ̇: ܟܰܕ ܡܚܰܘܶܐ ܠܳܗ̇ ܒܝܰܕ ܐܺܝܙܓܰܕܳܐ ܕܺܝܠܶܗ ܠܺܠܝܳܝܳܐ ܐܽܘܪܚܳܐ ܕܰܫܪܳܪܳܐ: ܟܰܕ ܡܰܟܪܶܙ ܠܳܗ̇ ܗܰܝܡܳܢܽܘܬܳܐ ܬܪܺܝܨܬܳܐ: ܟܰܕ ܡܫܰܪܰܪ ܠܳܗ̇ ܒܣܰܒܪܳܐ ܫܰܪܺܝܪܳܐ: ܟܰܕ ܡܳܠܐܷ ܠܳܗ̇ ܡ̣ܶܢ ܚܽܘܒܳܐ ܐܠܰܗܳܝܳܐ: ܟܰܕ ܡܰܠܒܶܫ ܠܳܗ̇ ܐܶܣܛܠܐ ܢܰܗܺܝܪܬܳܐ ܕܰܒܝܰܕ ܡܰܥܡܽܘܕܺܝܬܳܐ: ܟܰܕ ܡܬܰܪܶܨ ܗܰܠܟ̈ܳܬܳܗ̇ ܒܽܐܘܪܚܳܐ ܕܟܺܐܢܽܘܬܳܐ: ܟܰܕ ܡܥܰܬܶܕ ܠܳܗ̇ ܟܠܺܝܠܐ ܕܣܳܗܕܽܘܬܳܐ: ܟܰܕ ܡܫܰܘܕܰܥ ܠܳܗ̇ ܥܰܠ ܓܢܽܘܢܳܐ ܡܠܐܷ ܢܽܘܗܪܳܐ: ܘܰܡܝܰܐܝܰܒ ܠܳܗ̇ ܠܗܰܘ ܒܽܘܣܳܡܳܐ ܪܽܘܚܳܢܳܝܳܐ: ܘܰܡܙܰܗܰܪ ܠܳܗ̇ ܡ̣ܶܢ ܗ̇ܰܘ ܬܰܫܢܺܝܩܳܐ ܕܰܢܛܺܝܪ ܟܳܦܽܘܪ̈ܶܐ ܒܓܺܗܰܢܳܐ: ܗ̣ܺܝ ܢܰܨܺܝܚܬܳܐ ܚܘܺܝܚܳܐܝ̣ܬ ܩܰܒܠܰܬ݀ ܒܚܶܠܡܳܐ ܕܠܺܠܝܳܐ ܠܰܣܒܰܪܬܳܐ ܐܺܝܡܳܡܳܝܬܳܐ: ܘܗ̇ܰܘ ܡܶܕܶܡ ܕܠܐ ܐܶܫܟܰܚ ܢܰܗܺܝܪܳܐ ܕܢܰܕܢܰܚ ܒܬܰܪܥܺܝܬܳܗ̇ ܒܺܐܝܡܳܡܳܐ: ܒܠܺܠܝܳܐ ܚܶܫܽܘܟܳܐ ܐܰܕܢܚܳܗ̇ ܚܶܠܡܳܐ ܫܰܪܺܝܪܳܐ ܘܢܰܗܺܝܪܳܐ: ܘܡܶܚܕܳܐ ܐܶܫܬܰܚܠܰܦ ܪܶܥܝܳܢܳܗ̇ ܡ̣ܶܢ ܒܺܝܫܽܘܬܳܐ ܠܛܳܒܽܘܬܳܐ: ܘܰܗܘܳܬ ܡܢܳܪܬܳܐ ܢܰܗܺܝܪܬܳܐ ܚܠܳܦ ܩܳܝܶܡܬܳܐ ܕܚܶܫܟܳܐ: ܘܟܰܕ ܐܶܬܬܥܺܝܪܰܬ݀ ܡ̣ܶܢ ܡܰܕܡܟܽܘܬܳܗ̇ ܘܶܐܬܒܰܝܢܰܬ݀ ܒܰܫܪܳܪܳܐ ܕܶܐܬܚܰܘܺܝ ܠܳܗ̇: ܫܰܪܝܰܬ݀ ܒܦܽܘܠܚܳܢܳܐ ܕܙܰܕܺܝܩܽܘܬܳܐ: ܟܰܕ ܠܨܰܠܡ̈ܶܐ ܕܰܐܒܳܗܶܝ̈ܗ̇ ܡܣܰܚܦܳܐ ܗܘܳܬ: ܘܣܶܓܕܬܳܐ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܪܽܘܚܳܐ ܘܒܰܫܪܳܪܳܐ ܡܩܰܪܒܳܐ ܗܘܳܬ݀: ܟܰܕ ܠܐܒܽܘܒܳܐ ܕܒܶܗܬܬܳܐ ܕܒܶܗ ܙܳܡܪܳܐ ܗܘܳܬ ܩܽܘܕܡܰܬ݀ ܫܺܐܕ̈ܶܐ ܡܬܰܒܪܳܐ ܗܘܳܬ: ܒܟܶܢܳܪ̈ܶܐ ܕܪܽܘܚܳܐ ܩܰܕܺܝܫܳܐ ܘܩܺܝ̈ܢܳܬܳܐ ܘܰܙܡܺܝܪ̈ܳܬܳܐ ܐܠܰܗܳܝ̈ܳܬܳܐ ܙܳܡܪܳܐ ܗܘܳܬ݀: ܟܰܕ ܠܡܰܓܕܠܐ ܕܡ̣ܶܢ ܟܺܐܦ̈ܶܐ ܐܶܬܒܢܺܝ ܠܳܗ̇ ܒܩܽܘܒܰܬ݀ ܫܡܰܝ̈ܳܐ ܥܶܠܳܝ̈ܶܐ ܡܚܰܠܦܳܐ: ܘܠܰܓܢܽܘܢܳܐ ܥܳܒܽܘܪܳܐ ܒܗ̇ܳܝ ܒܶܝܬ ܓܢܽܘܢܳܐ ܕܰܡܟܰܬܰܪ ܡܰܣܠܝܳܐ: ܘܰܠܚܰܬܢܳܐ ܡܳܝܽܘܬܳܐ ܒܗܰܘ ܚܰܬܢܳܐ ܕܰܡܩܰܘܶܐ ܠܥܳܠܰܡ ܫܳܒܩܳܐ: ܠܡܰܠܟܽܘܬܳܐ ܦܳܛܽܘܪܬܳܐ ܒܗܳܝ ܡܰܠܟܽܘܬܳܐ ܕܠܐ ܦܳܛܪܳܐ ܡܰܪܦܝܳܐ: ܠܐܒܳܗ̈ܶܐ ܕܒܶܣܪܳܐ ܒܰܐܒܳܐ ܫܡܰܝܳܢܳܐ ܫܳܝܛܳܐ: ܘܰܠܦܽܘܪ̈ܦܳܥܶܐ ܓܰܘܬܳܢܳܝ̈ܶܐ ܒܒܽܘ̈ܣܳܡܶܐ ܠܐ ܡܶܫܬܰܪ̈ܝܳܢܶܐ ܒܳܣܪܳܐ: ܘܡܶܢܟܽܠ ܡܶܕܶܡ ܕܡܶܬܚܙܶܐ ܡܶܬܪܰܚܩܳܐ: ܒܪܶܓܰܬ݀ ܗ̇ܳܝ ܕܥܰܝܢܳܐ ܠܐ ܚܙܳܬ݀ ܘܶܐܕܢܳܐ ܠܐ ܫܶܡܥܰܬ݀ ܘܥܰܠ ܠܶܒܳܐ ܕܒܰܪܢܳܫܳܐ ܠܐ ܣܠܶܩ ܕܠܶܗ ܐܰܚܒܰܬ݀: ܕܡܶܟܺܝܠ ܠܐ ܫܽܘܦܪܳܐ ܡܶܬܚܰܒܠܳܢܳܐ ܐܰܣܛܝܳܗ̇ ܡ̣ܶܢ ܗ̇ܳܝ ܪܶܓܬܳܐ: ܐܳܦܠܐ ܫܽܘܒܚܳܐ ܙܰܒܢܳܝܳܐ ܘܥܽܘܬܪܳܐ ܥܳܒܽܘܪܳܐ: ܘܠܐ ܚܰܝ̈ܶܐ ܙܥܽܘܪ̈ܶܐ ܐܰܦܢܺܝܘ ܠܰܚܝܳܪܳܗ̇ ܡ̣ܶܢ ܗ̇ܳܝ ܦܰܐܝܽܘܬܳܐ ܡܥܰܠܰܝܬܳܐ ܘܥܽܘܪܬܳܐ ܘܫܽܘܒܚܳܐ ܥܳܠܡܺܝܢܳܝܳܐ: ܘܡ̣ܶܢ ܗܳܪܟܳܐ ܫܰܠܡܰܬ݀ ܗ̣ܺܝ ܠܳܗ̇ ܠܟܽܠ ܫܶܢܕܺܝ̈ܢ ܡܰܪܺܝܪ̈ܶܐ: ܟܰܕ ܡܶܬܓܰܢ̱ܒܪܳܐ ܥܰܠ ܡܰܘܬܳܐ: ܟܰܕ ܠܐ ܕܳܚܠܐ ܡ̣ܶܢ ܣܪ̈ܳܩܶܐ: ܟܰܕ ܠܐ ܙܳܝܥܳܐ ܡ̣ܶܢ ܝܰܩܕܳܢܳܐ: ܟܰܕ ܠܐ ܪܳܥܠܐ ܡ̣ܶܢ ܦܽܘܣܳܩ ܗܰܕܳܡ̈ܶܐ: ܟܰܕ ܠܐ ܡܶܬܟܰܚܕܳܐ ܡ̣ܶܢ ܒܽܘ̈ܙܳܚܶܐ: ܡܶܛܽܠ ܪܶܚܡܬܶܗ ܕܗ̇ܰܘ ܚܰܬܢܳܐ ܫܡܰܝܳܢܳܐ ܕܠܳܗ̇ ܐܶܬܪܰܓܪܰܓ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܳܪܝܳܐ ܝܶܫܽܘܥ ܡܟܰܠܠܳܢܳܐ ܘܡܰܘܪܒܳܢܳܐ ܕܣܳܗ̈ܕܰܘܗܝ ܘܰܡܚܰܝܠܳܢܳܐ ܕܰܐܬܠܺܝ̈ܛܰܘܗܝ: ܘܰܚܢܰܢ ܕܝܰܩܰܪܢܰܢ ܠܝܰܘܡܳܐ ܕܟܽܘܠܳܠܳܗ̇: ܕܒܰܨܠܰܘ̈ܳܬܳܗ̇ ܘܰܕܩܰܕܺܝܫܬܳܐ ܝܽܘܠܝܰܢܰܐ ܕܥܰܡܳܗ̇ ܐܰܣܗܕܰܬ݀: ܕܬܰܫܘܶܐ ܠܰܢ ܠܢܽܘܗܪܳܐ ܕܺܝܕܰܥܬܳܟ ܘܰܠܢܳܛܽܘܪܽܘܬ ܦܽܘܩ̈ܕܳܢܰܝܟ ܩܰܕܺܝ̈ܫܶܐ: ܘܰܕܢܶܫܬܰܚܠܰܦ ܡ̣ܶܢ ܒܺܝܫܽܘܬܳܐ ܠܛܳܒܽܘܬܳܐ: ܘܡ̣ܶܢ ܠܐ ܟܰܫܺܝܪܽܘܬܳܐ ܠܦܽܘܠܚܳܢܳܐ ܓܡܺܝܪܳܐ ܕܟܺܐܢܽܘܬܳܐ: ܘܡ̣ܶܢ ܠܐ ܗܰܝܡܳܢܽܘܬܳܐ ܠܗܰܝܡܳܢܽܘܬܳܐ ܚܠܺܝܡܬܳܐ: ܘܡ̣ܶܢ ܛܳܥܝܽܘܬܳܐ ܥܳܠܡܳܢܳܝܬܳܐ ܠܘܳܬ ܫܪܳܪܳܐ ܘܚܰܝ̈ܶܐ ܕܥܳܠܡܳܐ ܕܰܥܬܺܝܕ: ܘܡ̣ܶܢ ܚܳܪܥܽܘܬܳܐ ܘܰܨܢܺܝܥܽܘܬܳܐ ܠܫܰܦܝܽܘܬܳܐ ܘܰܠܬܰܡܺܝܡܽܘܬܳܐ: ܘܡ̣ܶܢ ܐܰܟܬܳܢܽܘܬܳܐ ܠܰܡܫܰܝܢܽܘܬܳܐ: ܘܡ̣ܶܢ ܚܽܘ̈ܫܳܒܶܐ ܒܶܣܪ̈ܳܢܳܝܶܐ ܠܘܳܬ ܗܳܠܶܝܢ ܪ̈ܽܘܚܳܢܳܝܶܐ: ܘܡ̣ܶܢ ܕܶܚܠܰܬ ܦܰܓܪܳܐ ܠܘܳܬ ܪܶܚܡܰܬ݀ ܚܽܘܒܳܟ: ܘܡ̣ܶܢ ܫܽܘܒܚܳܐ ܣܪܺܝܩܳܐ ܠܘܳܬ ܡܰܟܺܝܟܽܘܬ ܬܰܪܥܺܝܬܳܐ ܘܡ̣ܶܢ ܟܽܠܗܶܝܢ ܐܰܝܠܶܝܢ ܕܰܠܢܰܦܫܳܐ ܘܰܠܦܰܓܪܳܐ ܡܣܰܓ̈ܦܳܢ ܠܘܳܬ ܐܰܝܠܶܝܢ ܕܰܡܥܰܕܪ̈ܳܢ ܠܰܡܚܺܝܠܽܘܬܰܢ: ܟܰܕ ܠܚܰܝ̈ܶܐ ܡܢܰܛܰܪ ܐܰܢ̱ܬ: ܘܰܠܡܺܝ̈ܬܶܐ ܡܢܰܚܶܡ ܐܰܢ̱ܬ: ܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܩܘܡܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܫܰܦܺܝܪܳܐ ܘܛܳܒܳܐ ܕܡ̣ܶܢ ܫܽܘܦܪܳܐ ܕܺܝܠܶܗ ܓܡܺܝܪܳܐ ܩܳܢܶܝܢ ܫܰܦܺܝܪ̈ܶܐ ܫܽܘܦܪܳܐ: ܘܡ̣ܶܢ ܪܺܝܚܶܗ ܛܳܒܳܐ ܣܳܝܩܺܝܢ ܪ̈ܺܝܚܬܳܢܶܐ ܪܺܝܚܳܐ ܒܰܣܺܝܡܳܐ ܡ̣ܶܢ ܩܢܽܘ̈ܡܰܝܗܽܘܢ: ܚܰܡܪܶܗ ܗܰܢܺܝܳܐܐ ܘܚܰܠܝܳܐ ܒܳܣܡܺܝܢ ܚܕܽܘܓܰܘ̈ܗܝ ܪ̈ܚܺܝܡܶܐ ܘܛܳܥܶܝܢ ܠܕܺܝܠܗܽܘܢ: ܘܡ̣ܶܢ ܙܺܝܘܶܗ ܡܫܰܒܚܳܐ ܘܦܰܐܝܳܐ ܡܶܙܕܰܗܶܝܢ ܪ̈ܳܚܡܰܘܗܝ ܘܠܳܒ̈ܫܳܢ ܙܰܗܝܽܘܬܳܐ ܢܰܦ̈ܫܳܬܗܽܘܢ: ܘܡ̣ܶܢ ܕܰܟܝܽܘܬܶܗ ܫܦܺܝܬܳܐ ܡܕܰܟܶܝܢ ܝܳܶܕܥܰܘ̈ܗܝ ܠܶܒܰܘ̈ܳܬܗܽܘܢ: ܕܢܶܫܪܶܐ ܘܢܰܐܓܶܢ ܒܗܽܘܢ: ܗ̇ܰܘ ܕܰܒܝܰܕ ܪܶܚܡܬܶܗ ܐܶܬܰܐܣܪܰܬ݀ ܢܰܨܺܝܚܬܳܐ ܒܬܽܘܠܬܳܐ ܒܶܪܒܰܪܰܐ ܘܰܛܥܳܬ݀ ܠܒܶܝܬ ܐܰܒܽܘܗ̇ ܡܶܛܽܠܳܬܶܗ ܕܫܰܦܺܝܪܳܐ: ܘܒܰܕܡܳܐ ܕܡ̣ܶܢ ܨܰܘܪܳܗ̇ ܗܘܳܬ ܠܶܗ ܟܰܠܬܳܐ ܘܗܳܐ ܒܰܓܢܽܘܢܳܐ ܝܳܬܒܳܐ ܘܡܶܬܒܰܣܡܳܐ ܒܫܽܘܦܪܶܗ ܪܚܺܝܡܳܐ: ܕܠܶܗ ܝܳܐܶܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܨܶܡܚܳܐ ܓܰܐܝܳܐ ܕܫܽܘܒܚܶܗ ܕܰܐܒܳܐ ܡܬܽܘܡܳܝܳܐ ܘܙܺܝܘܳܐ ܦܰܐܝܳܐ ܕܝܽܘܩܢܶܗ ܐܠܰܗܳܝܳܐ: ܗ̇ܰܘ ܕܒܳܟ ܐܶܙܕܰܗܺܝܘ ܟܺܐܢ̈ܶܐ ܘܰܫܦܰܪܘ ܙܰܕܺܝ̈ܩܶܐ: ܘܒܳܟ ܐܶܬܓܰܢ̱ܒܰܪܘ ܢܰܨܺܝ̈ܚܶܐ ܘܶܐܬܥܰܫܰܢܘ ܚܰܝܠܬܳܢ̈ܶܐ: ܗ̇ܰܘ ܕܠܳܟ ܚܙܳܬ݀ ܛܒܺܝܒܬܳܐ ܒܶܪܒܰܪܰܐ ܒܬܽܘܠܬܳܐ ܩܰܕܺܝܫܬܳܐ: ܕܡ̣ܶܢ ܒܬܽܘܠܬܳܐ ܕܟܺܝܬܳܐ ܠܐ ܡܙܰܘܰܓܬܳܐ ܕܰܢܚܶܬ ܠܥܳܠܡܳܐ: ܘܰܒܢܽܘܗܪܳܟ ܡܬܽܘܡܳܝܳܐ ܐܰܢܗܰܪܬܳܗ̇ ܘܰܠܚܶܫܽܘܟܳܐ ܕܛܳܥܝܽܘܬܳܐ ܟܽܠܳܢܳܐܝ̣ܬ ܡܶܢܳܗ̇ ܓܰܠܓܶܠܬ: ܘܒܳܟ ܢܽܘܗܪܳܐ ܫܰܪܺܝܪܳܐ ܚܙܳܬ ܢܽܘܗܪܳܐ ܬܠܺܝܬܳܝܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܕܰܒܚܰܕ ܢܽܘܗܪܳܐ ܡܶܬܬܰܒܪܩܺܝܬܽܘܢ ܘܒܰܬܠܳܬܳܐ ܡܶܬܝܰܕܥܺܝܬܽܘܢ: ܗ̣ܺܝ ܕܶܝܢ ܢܰܨܺܝܚܬܳܐ ܟܰܕ ܒܡܰܓܕܠܐ ܕܰܐܬܩܶܢ ܠܳܗ̇ ܐܰܒܽܘܗ̇ ܠܠܐ ܡܶܬܚܰܙܝܳܢܽܘܬ ܫܽܘܦܪܶܗ ܟܝܳܢܳܝܳܐ: ܡܗܰܒܒܳܐ ܗܘܳܬ ܓܶܝܪ ܒܨܶܒܬܳܐ ܥܳܠܡܳܢܳܝܳܐ: ܘܠܰܦܬܰܟܪ̈ܶܐ ܕܰܐܒܽܘܗ̇ ܒܰܐܒܽܘܒܳܐ ܚܠܐܷ ܢܶܥ̈ܡܳܬܳܐ ܙܳܡܪܳܐ ܗܘܳܬ: ܘܰܠܟܽܠ ܥܳܒܪ̈ܰܝ ܐܽܘܪܚܳܐ ܒܩܳܠ ܙܡܳܪܳܗ̇ ܗܰܢܺܝܳܐܐ ܡܰܬܗܪܳܐ ܗܘܳܬ: ܟܰܕ ܕܶܝܢ ܚܙܰܝܬ ܐܳܘ ܛܳܒܳܐ ܠܰܚܦܺܝܛܽܘܬܳܗ̇ ܕܰܠܘܳܬ ܦܽܘܠܚܳܢ ܫܺܐܕ̈ܶܐ: ܐܰܘܟܺܝܬ ܠܫܽܘܦܪܳܐ ܪܓܺܝܓܳܐ ܕܰܒܪܰܝܬ ܕܡܶܨܛܰܐܷܐ ܒܙܰܗܡܰܘܬܳܐ ܕܰܦܬܰܟܪ̈ܶܐ: ܐܰܕܢܰܚܬ ܒܠܶܒܳܗ̇ ܕܰܟܝܳܐ ܢܽܘܗܪܳܐ ܫܰܪܺܝܪܳܐ ܕܺܝܕܰܥܬܳܟ: ܘܰܚܙܳܬ ܕܰܠܟܺܐܦ̈ܶܐ ܘܩܰܝ̈ܣܶܐ ܙܳܡܪܳܐ ܗܘܳܬ ܘܰܡܝܰܩܪܳܐ: ܘܫܰܪܝܰܬ݀ ܒܰܒܥܳܬܳܐ ܕܰܫܪܳܪܳܐ ܘܡܶܚܕܳܐ ܒܝܰܕ ܚܶܠܡܳܐ ܚܰܘܺܝܬ ܠܳܗ̇ ܢܽܘܗܪܳܐ ܠܐ ܡܶܬܩܰܪܒܳܢܳܐ ܕܰܬܠܺܝܬܳܝܽܘܬܳܐ ܣܓܺܝܕܬܳܐ: ܘܪܽܘܚܳܢܳܐܝ̣ܬ ܩܰܒܠܰܬ݀ ܥܰܡ ܝܺܕܰܥܬܳܐ ܕܰܫܪܳܪܳܐ ܪܽܘܫܡܳܐ ܬܠܺܝܬܳܝܳܐ ܕܰܐܒܳܐ ܘܕܰܒܪܳܐ ܘܕܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܒܪܳܐ ܘܒܳܪܽܘܝܳܐ ܕܰܫܡܰܝܳܐ ܘܕܰܐܪܥܳܐ ܘܟܽܠ ܕܰܒܗܽܘܢ: ܘܡ̣ܶܢ ܗܳܪܟܳܐ ܐܰܣܠܝܰܬ݀ ܠܕܶܚܠܰܬ ܦܬܰܟܪ̈ܶܐ ܘܰܠܣܰܓܺܝܽܐܘܬ ܐܠܰܗ̈ܶܐ: ܘܕܰܚܩܰܬ݀ ܡ̣ܶܢ ܠܶܒܳܗ̇ ܪܶܚܡܬܳܗ̇ ܕܰܐܒܳܗܶܝ̈ܗ̇ ܘܰܠܫܽܘܒܚܳܐ ܕܡܰܠܟܽܘܬܳܐ ܥܳܒܽܘܪܬܳܐ: ܐܳܘ ܠܫܽܘܚܠܳܦܳܐ ܕܝܰܡܺܝܢܳܐ ܕܺܝܠܶܗ ܕܡܳܪܝܳܐ: ܐܳܘ ܠܰܒܛܺܝܠܽܘܬܳܐ ܐܠܰܗܳܝܬܳܐ: ܕܰܠܗܳܝ ܕܰܒܚܶܫܟܳܐ ܕܛܽܘܥܝܰܝ ܥܰܡ ܒܺܝ̈ܫܶܐ ܦܳܠܚܳܐ ܗܘܳܬ: ܠܢܽܘܗܪܳܐ ܕܺܝܠܶܗ ܐܠܰܗܳܝܳܐ ܩܪܳܐ ܘܰܐܗܦܶܟ ܗ̣ܺܝ ܕܶܝܢ ܢܰܨܺܝܚܬܳܐ ܚܠܳܦ ܐܰܒܽܘܒܳܐ ܕܩܰܢܝܳܐ ܗܘܳܬ ܩܺܝܬܳܪܳܐ ܕܕܰܘܺܝܕ ܐܠܰܗܳܝܳܐ ܐܶܚܕܰܬ݀: ܘܒܶܗ ܠܳܥܙܳܐ ܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ ܠܰܬܠܺܝܬܳܝܽܘܬܳܐ ܡܪܰܝܰܡܬܳܐ: ܗ̇ܰܘ ܕܡܰܒܽܘܥܳܐ ܕܚܰܝ̈ܶܐ ܥܰܡܳܟ ܗ̣ܽܘ ܡܳܪܝܳܐ ܘܰܒܢܽܘܗܪܳܟ ܚܳܙܶܝܢܰܢ ܢܽܘܗܪܳܐ: ܘܰܒܗܳܢܳܐ ܫܽܘܒܚܳܐ ܩܳܡܰܬ݀ ܒܶܪܒܰܪܰܐ ܒܰܪܬ ܡܰܠܟܳܐ ܟܰܕ ܡܨܰܒܬܳܐ ܒܰܠܒܽܘܫܳܐ ܓܰܐܝܳܐ ܘܢܰܗܺܝܪܳܐ: ܫܰܦܺܝܪ ܗ̣ܽܘ ܠܕܰܘܺܝܕ ܢܒܺܝܳܐ ܟܰܕ ܡܙܰܡܰܪ ܠܘܳܬܳܗ̇ ܒܩܺܝܬܳܪܳܐ ܐܠܰܗܳܝܳܐ ܗܳܟܰܢܳܐ: ܫܡܰܥܝ ܒܪܰܬܝ ܘܰܚܙܳܝ ܘܰܨܠܳܝ ܐܶܕܢܶܟܝ: ܘܰܛܥܳܝ ܥܰܡܶܟܝ ܘܒܶܝܬ ܐܰܒܽܘܟܝ ܚܰܢ̈ܦܶܐ: ܕܢܶܬܪܰܓܪܰܓ ܚܰܬܢܳܐ ܡܠܶܟ ܡܰܠܟ̈ܶܐ ܠܫܽܘܦܪܶܟܝ ܕܰܟܝܳܐ: ܡܶܛܽܠ ܕܗ̣ܽܘ ܐܺܝܬܰܘܗܝ ܡܳܪܶܟܝ ܣܓܽܘܕܝ ܠܶܗ: ܘܕܰܥܝ ܕܟܰܕ ܠܶܗ ܬܶܬܢܰܩܦܺܝܢ ܘܰܒܚܽܘܒܶܗ ܬܶܬܰܐܣܪܺܝܢ: ܒܩܽܘܪ̈ܒܳܢܶܐ ܠܐܦܰܝ̈ܟܝ ܢܩܰܕܡܽܘܢ ܡܰܠܟ̈ܶܐ ܘܪ̈ܺܝܫܳܢܶܐ ܘܥܰܬܺܝܪ̈ܶܐ ܕܥܰܡ̈ܡܶܐ: ܘܰܠܗܰܝܟܠܶܟܝ ܢܺܐܬܽܘܢ ܘܢܶܥܠܽܘܢ ܠܡܶܣܰܒ ܥܽܘܕܪ̈ܳܢܶܐ ܡ̣ܶܢ ܘܰܥܕܶܟܝ: ܡܶܛܽܠ ܕܟܽܠܗܽܘܢ ܫܽܘܦܪ̈ܰܝܟܝ ܘܫܽܘܒܚܶܟܝ ܡ̣ܶܢ ܠܓܰܘ ܐܺܝܬܰܘܗܝ: ܗܳܢܰܘ ܕܶܝܢ ܡܳܪܶܟܝ ܠܰܩܢܽܘܡܶܟܝ ܒܕܰܗܒܳܐ ܛܳܒܳܐ ܐܰܘܟܺܝܬ ܐܠܰܗܽܘܬܳܐ ܡܨܰܒܶܬ: ܘܰܒܬܽܘ̈ܠܳܬܳܐ ܣܰܓܺܝ̈ܳܐܬܳܐ ܢܺܐܙ̈ܳܠ̱ܢ ܒܳܬܪܶܟܝ ܘܢܶܥ̈ܠܳܢ ܠܗܰܝܟܠܶܗ ܕܡܰܠܟܳܐ ܫܡܰܝܳܢܳܐ: ܟܰܕ ܠܗܳܠܶܝܢ ܙܡܺܝܪ̈ܳܬܳܐ ܨܳܬܰܬ݀ ܥܠܰܝܡܬܳܐ ܦܐܻܝ̣ܬܳܐ ܘܶܐܬܢܰܒܪܫܰܬ݀ ܝܰܬܺܝܪܳܐܝ̣ܬ ܒܚܽܘܒܳܟ: ܟܰܕ ܕܶܝܢ ܐܰܒܽܘܗ̇ ܒܰܠܐܱܢܺܝ ܠܳܗ̇ ܥܒܰܕ ܗܘܳܐ ܐܰܝܟ ܕܰܠܡܰܣܚܽܘܬܳܗ̇: ܠܗܳܝ ܕܶܐܬܕܰܟܝܰܬ݀ ܒܰܣܚܳܬܳܐ ܕܪܽܘܚܳܐ: ܢܶܚܬܰܬ݀ ܡ̣ܶܢ ܡܰܕܓ̈ܠܶܝܗ̇ ܕܬܶܚܙܺܝܗ̇: ܘܟܰܕ ܐܰܕܺܝܩܰܬ݀ ܚܙܳܬ ܕܬܰܪܬܶܝܢ ܟܰܘܺܝ̈ܢ ܥܒܰܕܘ ܐܽܘܡ̈ܳܢܶܐ ܠܢܽܘܗܪܳܐ: ܐܳܡܪܳܐ ܠܗܽܘܢ ܕܰܬܠܳܬ ܟܰܘܺܝ̈ܢ ܙܳܕܶܩ ܕܢܶܗܘ̈ܝܳܢ ܠܢܽܘܗܪܳܐ ܒܛܽܘܦܣܳܐ ܕܰܬܠܺܝܬܳܝܽܘܬܳܐ ܬܠܺܝܬܳܝܰܬ݀ ܨܶܡܚ̈ܶܐ ܒܚܰܕ ܢܽܘܗܪܳܐ: ܘܰܒܡܶܠܟܶܝ̈ܗ̇ ܥܒܰܕܘ ܗ̣ܶܢܽܘܢ ܬܠܳܬ ܟܰܘܺܝ̈ܢ ܠܒܰܪ ܡ̣ܶܢ ܦܽܘܩܕܳܢ ܐܰܒܽܘܗ̇: ܗ̇ܰܘ ܕܟܰܕ ܐܶܬܳܐ ܘܰܚܙܳܐ ܬܠܳܬ ܟܰܘܺܝ̈ܢ ܐܶܬܚܰܡܰܬ݀ ܥܰܠ ܐܰܪ̈ܕܺܝܟܠܐ ܐܰܟܡܰܢ ܕܫܳܛܘ ܦܽܘܩܕܳܢܶܗ: ܘܟܰܕ ܝܺܠܶܦ ܕܡ̣ܶܢ ܒܶܪܒܰܪܰܐ ܗܘܳܬ ܗ̇ܳܝ ܕܰܬܠܳܬ ܢܶܗܘ̈ܝܳܢ: ܩܪܳܗ̇ ܛܪܽܘܢܳܐ ܘܶܐܡܰܪ ܠܳܗ̇: ܕܰܟܡܳܐ ܡܰܥ̈ܠܳܢ ܬܠܳܬ ܟܰܘܺܝ̈ܢ ܢܽܘܗܪܳܐ ܝܰܬܺܝܪ ܡ̣ܶܢ ܬܰܪܬܶܝܢ: ܠܦܽܘܩܕܳܢܝ ܐܰܣܠܺܝܬܝ ܒܗܳܕܶܐ ܗ̣ܺܝ ܕܶܝܢ ܐܶܬܬܙܺܝܥܰܬ݀ ܒܪܽܘܚܳܐ ܟܰܕ ܦܫܺܝܛܳܐ ܨܶܒܥܳܗ̇ ܐܶܡܪܰܬ݀: ܚܙܺܝ ܛܪܽܘܢܳܐ: ܗܳܐ ܐܰܒܳܐ ܢܽܘܗܪܳܐ: ܘܗܳܐ ܒܪܳܐ ܢܽܘܗܪܳܐ: ܘܗܳܐ ܪܽܘܚܳܐ ܚܰܝܳܐ ܘܩܰܕܺܝܫܳܐ ܢܽܘܗܪܳܐ: ܕܺܐܝܬܶܝܗ̇ ܬܠܺܝܬܳܝܽܘܬܳܐ ܚܰܕ ܐܠܰܗܳܐ ܫܰܪܺܝܪܳܐ ܕܠܐ ܡܶܬܚܙܶܐ: ܕܠܶܗ ܣܳܓܕܺܝܢ ܡܰܠܐܟ̈ܶܐ ܘܰܒܢܰܝ̈ܢܳܫܳܐ ܡܗܰܝ̈ܡܢܶܐ ܘܟܽܠ ܒܶܪ̈ܝܳܢ: ܐܳܘ ܠܚܰܢܦܳܐ ܕܰܐܝܟܰܢ ܐܶܫܬܓܰܪ ܒܚܶܡܬܳܐ ܥܰܠ ܒܰܪܬܶܗ ܚܰܒܺܝܒܬܳܐ: ܕܰܫܘܰܪ ܥܠܶܝܗ̇ ܐܰܝܟ ܐܰܪܝܳܐ ܣܳܪܽܘܚܳܐ ܕܢܰܘܒܕܺܝܗ̇: ܘܨܰܠܝܰܬ݀ ܩܰܕܺܝܫܬܳܐ ܘܡܶܚܕܳܐ ܐܶܨܛܰܪܝܰܬ݀ ܐܶܣܬܳܐ ܘܩܰܒܶܠܬܳܗ̇ ܘܰܐܥܒܰܪܬܳܗ̇ ܠܛܽܘܪܳܐ: ܘܗ̣ܽܘ ܛܪܽܘܢܳܐ ܟܰܕ ܐܶܬܚܰܡܰܬ݀ ܢܦܰܩ ܒܳܬܪܳܗ̇ ܘܶܐܫܟܚܳܗ̇ ܒܫܽܘܘܕܳܥܳܐ ܕܚܰܕ ܪܳܥܝܳܐ: ܗ̇ܰܘ ܕܰܗܘܳܐ ܗ̣ܽܘ ܘܥܳܢ̈ܶܗ ܩܰܢܬܰܪܺܝܕܽܘܣ ܐܰܘܟܺܝܬ ܚܰܒܽܘ̈ܫܝܳܬܳܐ ܥܕܰܡܳܐ ܠܝܰܘܡܳܢܳܐ ܗܳܝܕܶܝܢ ܐܰܫܠܡܳܗ̇ ܠܺܝܚܺܝܕܳܝܬܶܗ ܠܗܺܝܓܡܽܘܢܳܐ ܕܕܳܡܶܐ ܠܶܗ ܘܰܐܘܡܝܶܗ ܕܠܐ ܢܶܚܽܘܣ ܥܠܶܝܗ̇: ܘܟܰܕ ܠܐ ܐܶܬܬܦܺܝܣܰܬ݀ ܠܫܽܘܕܳܠܰܝ̈ܗܽܘܢ ܕܚܰܢ̈ܦܶܐ ܟܰܕ ܡܦܰܪܣܝܳܐ ܐܰܚܬܽܘܗ̇ ܠܐܓܽܘܢܳܐ ܕܚܰܫ̈ܶܐ: ܐܳܘ ܠܠܶܒܳܐ ܛܰܪܳܢܳܝܳܐ ܕܰܛܪܽܘܢܳܐ ܕܠܐ ܐܶܬܪܰܟܰܟ ܟܰܕ ܚܙܳܗ̇ ܠܺܝܚܺܝܕܳܝܬܶܗ ܒܗܳܠܶܝܢ ܫܶܢ̈ܕܶܐ ܘܽܐܘܠܨܳܢ̈ܶܐ: ܐܳܘ ܠܚܽܘܒܳܟ ܡܳܪܰܢ ܝܶܫܽܘܥ ܕܰܫܒܳܐ ܠܰܒܬܽܘ̈ܠܳܬܳܐ ܘܠܰܥܠܰܝ̈ܡܳܬܳܐ ܢܰܟ̈ܦܳܬܳܐ ܠܢܶܩܦܶܗ ܘܠܐ ܚܰܫܶܝ̈ܢ ܒܫܶܢ̈ܕܶܐ ܕܰܚܠܳܦܰܘܗܝ: ܘܡ̣ܶܢ ܗܳܪܟܳܐ ܫܰܪܝܰܬ݀ ܫܰܦܺܝܪܰܬ ܒܙܳܟܽܘܬܳܐ ܒܶܪܒܰܪܰܐ ܠܡܶܣܒܰܠ ܚܰܫ̈ܶܐ: ܠܐ ܒܶܗܬܰܬ݀ ܒܦܽܘܪܣܳܝܳܗ̇: ܠܐ ܚܶܫܰܬ݀ ܒܢܶܓ̈ܕܶܐ: ܠܐ ܐܰܪܓܫܰܬ݀ ܒܫܽܘܩܳܦܳܐ ܕܥܰܠ ܐܰܦܶܝ̈ܗ̇ ܒܚܰܒܠܐ ܕܡܰܣܳܐ: ܚܳܪܰܬ݀ ܕܶܝܢ ܒܡܰܠܐܟܳܐ ܕܡܳܪܝܳܐ ܕܰܢܚܶܬ ܐܰܣܝܳܗ̇ ܘܠܰܒܒܳܗ̇ ܥܰܠ ܐܰܓܽܘܢܳܗ̇: ܬܽܘܒ ܕܶܝܢ ܒܰܣܪ̈ܳܩܶܐ ܕܓܽܘܫܡܳܗ̇ ܠܐ ܒܰܓܢܰܬ݀ ܗ̣ܺܝ ܘܫܰܘܬܳܦܬܳܗ̇ ܝܽܘܠܝܰܢܰܐ: ܘܒܰܡܚܰܪܟܽܘܬܳܐ ܕܨܽܘܠܦ̈ܳܬܳܗ̇ ܠܐ ܫܶܐܠܰܬ݀: ܘܰܒܡܰܚ̈ܘܳܬܳܐ ܕܥܰܠ ܪܺܝܫܳܗ̇ ܒܰܐܪܙܰܦܬܳܐ ܠܐ ܐܶܬܢܰܟܝܰܬ݀: ܘܒܰܦܣܳܩܳܐ ܕܰܬܕܶܝ̈ܗ̇ ܠܐ ܐܰܝܠܰܬ݀: ܘܰܒܡܰܟܪܟܽܘܬܐ ܕܰܒܟܽܠܶܗ ܐܰܬܪܳܐ ܟܰܕ ܡܡܰܚܝܳܐ ܘܰܡܦܰܪܣܝܳܐ ܠܐ ܐܶܬܪܰܥܡܰܬ݀: ܐܶܠܐ ܒܰܨܠܰܘ̈ܳܬܳܗ̇ ܐܶܬܢܰܦܰܚ ܦܰܓܪܳܗ̇ ܘܶܐܬܥܰܒܺܝ ܕܠܐ ܬܶܬܚܙܶܐ: ܘܬܽܘܒ ܡܰܠܐܟܳܐ ܟܰܣܝܶܗ ܠܦܰܓܪܳܗ̇ ܒܶܐܣܛܠܐ ܚܶܘܳܪܬܳܐ ܘܰܬܗܰܪܘ ܚܰܙܳܝ̈ܶܐ: ܘܒܳܬܰܪ ܗܳܠܶܝܢ ܐܶܬܟܰܠܠܰܬ݀ ܒܣܰܝܦܳܐ ܥܰܠ ܛܽܘܪܳܐ ܗ̣ܺܝ ܘܰܐ̱ܚܝܳܢܬܳܗ̇ ܝܽܘܠܝܰܢܰܐ: ܘܗܳܐ ܢܳܨܰܚ ܕܽܘܟܪܳܢܳܗ̇ ܒܟܽܠܳܗ̇ ܥܳܡܰܪܬܳܐ: ܘܰܫܟܺܝܢܬܳܐ ܕܓܰܪ̈ܡܶܝܗ̇ ܡܰܒܥܳܐ ܐܳܣܝܽܘܬܳܐ ܕܟܽܠ ܓܢܶܣ: ܟܰܕ ܐܰܒܽܘܗ̇ ܘܗܺܝܓܡܽܘܢܳܐ ܒܠܰܥܘ ܒܝܰܩܕܳܢܳܐ ܕܢܽܘܪܳܐ ܕܡ̣ܶܢ ܪܰܘܡܳܐ: ܕܒܰܨܠܰܘ̈ܳܬܳܗ̇ ܘܰܕܚܳܬܳܐ ܕܺܝܠܳܗ̇ ܝܽܘܠܝܰܢܰܐ ܕܰܢܩܶܦܬܳܗ̇ ܠܡܰܘܬܳܐ ܕܰܚܠܳܦܰܝܟ ܡܫܺܝܚܳܐ: ܫܰܘܙܶܒ ܠܥܺܕܬܳܟ ܩܰܕܺܝܫܬܳܐ ܘܰܠܝܰܠܕܶܝ̈ܗ̇ ܡ̣ܶܢ ܐܺܝܕܰܝ̈ܳܐ ܕܟܳܦܽܘܪ̈ܶܐ ܚܰܪ̈ܡܶܐ ܘܕܰܒ̈ܢܰܝ ܗܺܝܪ̈ܺܝܛܺܝܩܽܘ: ܘܟܰܕ ܡܫܰܟܶܢ ܐܰܢ̱ܬ ܠܳܗ̇ ܘܰܠܗܽܘܢ ܫܰܝܢܳܐ ܘܰܫܠܳܡܳܐ ܘܚܽܘܒܳܐ ܘܰܐܘܝܽܘܬܳܐ: ܘܒܰܛܶܠ ܡ̣ܶܢ ܓܰܘܳܗ̇ ܣܶܕ̈ܩܶܐ ܘܚܶܪ̈ܝܳܢܶܐ ܕܥܰܠ ܐܰܦܰܝ̈ܟ: ܟܰܕ ܡܫܰܪܰܪ ܐܰܢ̱ܬ ܠܰܒܢܶܝ̈ܗ̇ ܒܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ ܘܒܰܢܛܽܘܪܽܘܬ ܦܽܘܩ̈ܕܳܢܰܝܟ ܐܶܘܢܓܶܠܳܝ̈ܶܐ: ܟܰܕ ܡܫܰܟܶܢ ܐܰܢ̱ܬ ܒܛܰܝܒܽܘܬܳܟ: ܠܰܟܪ̈ܺܝܗܶܐ ܚܽܘܠܡܳܢܳܐ: ܠܐܠܺܝ̈ܨܶܐ ܢܦܺܐܫܳܐ: ܠܰܫ̈ܒܰܝܳܐ ܦܽܘܪܩܳܢܳܐ: ܠܐܣܺܝܪ̈ܶܐ ܚܽܘܪܳܪܳܐ: ܠܐܒܺܝ̈ܠܐ ܒܽܘܝܳܐܳܐ: ܠܰܡܛܰܪ̈ܦܶܐ ܢܰܘܚܳܐ: ܠܰܛܠܺܝ̈ܡܶܐ ܫܽܘܘܙܳܒܳܐ: ܠܡܶܣ̈ܟܺܢܶܐ ܬܽܘܪܣܳܝܳܐ: ܠܐܟܣ̈ܢܳܝܶܐ ܒܶܝܬ ܨܰܘܒܳܐ ܠܟܰܦ̈ܢܶܐ ܣܰܒܥܳܐ: ܠܚܰܛܳܝ̈ܶܐ ܫܽܘܒܩܳܢܳܐ: ܠܛܳܥܰܝ̈ܳܐ ܦܽܘܢܳܝܳܐ: ܘܰܠܟܽܠ ܕܡܰܕܘܰܝ ܡܶܢܟܽܠ ܚܰܫܳܐ ܐܰܝܢܳܐ ܕܗ̣ܽܘ ܕܢܰܦܫܳܐ ܘܰܕܦܰܓܪܳܐ ܦܽܘܪܩܳܢܳܐ ܘܥܽܘܕܪܳܢܳܐ: ܘܰܣܥܽܘܪ ܐܳܦ ܠܐܪܥܳܐ ܒܡܶܛܪ̈ܶܐ ܡܫܰܝ̈ܢܶܐ ܘܒܰܪ̈ܣܺܝܣܶܐ ܒܪ̈ܺܝܟܶܐ: ܐܳܦ ܠܥܰܢܺܝ̈ܕܶܐ ܡܗܰܝ̈ܡܢܶܐ ܒܚܽܘܣܳܝܳܐ ܘܰܢܝܳܚܬܳܐ ܕܰܠܥܳܠܰܡ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗܰܘ ܚܰܬܢܳܐ ܩܰܕܺܝܫܳܐ ܕܰܐܪܘܺܝ ܠܣܳܗ̈ܕܶܐ ܩܰܕܺܝ̈ܫܶܐ ܒܪܶܚܡܬܶܗ ܝܰܬܺܝܪ ܡ̣ܶܢ ܚܰܡܪܳܐ: ܘܰܢܓܰܕ ܒܪܺܝܚ ܒܶܣܡܳܢܰܘ̈ܗܝ ܩܰܕܺܝ̈ܫܶܐ ܠܢܰܦ̈ܫܳܬܳܐ ܥܠܰܝ̈ܡܳܬܳܐ: ܠܗܰܘ ܚܽܘܒܳܐ ܫܰܪܺܝܪܳܐ ܕܰܫܒܳܐ ܒܪܶܬܚܶܗ ܢܰܦ̈ܫܳܬܳܐ ܕܣܳܓܽܘ̈ܕܰܘܗܝ: ܘܰܩܥܳܐ ܘܫܰܡܰܗ ܐܶܢܶܝܢ ܒܢ̈ܳܬ ܐܽܘܪܫܠܶܡ ܕܰܠܥܶܠ: ܘܰܕܢܶܚ̈ܙܝܳܢ ܝܰܘܡܳܐ ܕܚܰܬܢܽܘܬܶܗ ܕܺܐܝܬܶܝܗ̇ ܙܩܺܝܦܽܘܬܳܐ: ܕܠܶܗ ܝܳܐܶܐ܀

 

 

 

ܣܕܪܐ

 

 

 

ܟܰܕ ܠܒܶܪܒܰܪܰܐ ܣܳܗܕܬܳܐ ܢܰܨܺܝܚܬܳܐ ܡܩܰܠܣܺܝܢܰܢ ܠܐ ܒܰܙܥܽܘܪ: ܘܰܒܠܶܥ̈ܙܶܐ ܗܰܢܺܝ̈ܶܐܐ ܕܰܙܡܺܝܪ̈ܳܬܳܐ ܠܝܽܘܡ ܕܽܘܟܪܳܢܳܗ̇ ܡܙܰܝܚܺܝܢܰܢ: ܗܳܕܶܐ ܕܰܗܘܳܬ ܒܓܰܘ ܥܳܠܡܳܐ ܗܳܢܳܐ ܡܰܚܙܺܝܬܳܐ ܫܰܦܺܝܪܬܳܐ ܘܡܰܪܕܝܰܬ݀ ܟܽܠ ܛܳܒ̈ܳܬܳܐ: ܗܳܕܶܐ ܕܰܒܒܰܠܐܱܢܺܝ ܕܰܒܢܳܐ ܠܳܗ̇ ܐܰܒܽܘܗ̇ ܨܳܪܰܬ݀ ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܰܬܠܳܬ ܟܰܘܺܝ̈ܢ ܕܣܳܡܰܬ݀ ܒܶܗ: ܗ̇ܳܢܶܝܢ ܕܟܰܕ ܚܙܳܗ̇ ܐܰܒܽܘܗ̇ ܐܶܬܒܰܥܪܰܪ ܒܚܶܡܬܳܐ ܠܩܽܘܒܠܳܗ̇ ܘܰܠܩܶܛܠܐ ܐܰܫܠܡܳܗ̇: ܘܰܠܢܶܓ̈ܕܶܐ ܕܚܺܝ̈ܠܐ ܘܡܰܪܺܝܪ̈ܶܐ: ܘܰܠܛܽܘܪܳܐ ܥܶܪܩܰܬ݀ ܕܬܶܬܛܫܶܐ ܡ̣ܶܢ ܪ̈ܳܕܽܘܦܶܐ: ܪ̈ܳܥܰܘܳܬܳܐ ܗ̇ܳܢܽܘܢ ܕܩܰܒܠܽܘܗ̇ ܗܘܰܘ ܐܶܬܒܰܪܰܟܘ: ܘܕܰܓܠܰܘ ܥܠܶܝܗ̇ ܐܶܬܬܠܺܝܛܘ: ܗܳܕܶܐ ܕܥܰܡ ܚܰܕܽܘܬܳܐ ܩܳܥܝܳܐ ܗܘܳܬ: ܕܠܐ ܦܳܪܫܺܝܢ ܠܺܝ ܡ̣ܶܢ ܚܽܘܒܶܗ ܕܝܶܫܽܘܥ ܡܳܪܰܢ: ܠܐ ܐܰܒܳܗ̈ܶܐ ܘܠܐ ܓܶܢܣܳܐ ܘܠܐ ܛܽܘܗܡܳܐ: ܗܳܕܶܐ ܕܥܰܡ ܚܰܡܺܝܡܽܘܬ ܕܪܶܬܚܳܐ ܕܚܽܘܒܳܗ̇ ܠܰܟܢܺܝܟܬܳܐ ܘܢܰܟܦܬܳܐ ܝܽܘܠܝܰܢܰܐ ܢܶܓܕܰܬ݀ ܘܥܰܡܳܗ̇ ܠܐܓܽܘܢܳܐ ܢܶܚܬܰܬ݀ ܘܚܰܫ̈ܰܝ ܒܶܣܪܳܐ ܣܒܰܠܝ̈: ܐܽܘܠܨܳܢ̈ܶܐ ܣܰܝܒܰܪ̈ܝ: ܘܩܰܒܶܠܝ̈ ܡܰܘܬܳܐ ܕܣܰܝܦܳܐ ܡܶܛܽܠ ܫܪܳܪܳܐ ܕܡܳܪܗܶܝܢ: ܘܡܶܢܗܶܝܢ ܒܗܶܬ ܒܺܝܫܳܐ ܘܶܐܙܕܟܺܝ ܟܽܠܗܶܝܢ ܨܶܢܥ̈ܳܬܶܗ ܘܰܒܗܶܝܢ ܚܳܒ ܓܰܒܳܐ ܕܰܦܬܰܟܪ̈ܶܐ ܘܰܐܚܦܰܪܘ ܚܰܝܠܰܘ̈ܳܬܳܐ ܢܳܟܽܘ̈ܠܐ ܕܡܳܪܽܘܕܳܐ: ܘܗ̣ܶܢܶܝܢ ܫܩ̈ܰܠܝ ܟܠܺܝ̈ܠܐ ܕܙܳܟܽܘܬܳܐ ܕܒܰܨܠܰܘ̈ܳܬܳܗ̇ ܕܶܐܡܳܐ ܒܬܽܘܠܬܳܐ ܡܰܪܝܰܡ ܕܺܝܠܶܕܬܳܟ: ܘܰܕܣܳܗܕܬܳܐ ܢܰܨܺܝܚܬܳܐ ܒܶܪܒܰܪܰܐ: ܘܰܕܟܽܠܗܶܝܢ ܢܶܫ̈ܶܐ ܩܰܕܺܝ̈ܫܳܬܳܐ ܘܣܳܗ̈ܕܳܬܳܐ ܕܠܳܟ ܡܳܪܰܢ ܝܳܕ̈ܥܳܢ ܟܪ̈ܺܝܗܶܐ ܢܶܬܚܰܠܡܽܘܢ ܘܰܡܫܰܪ̈ܰܝܳܐ ܢܶܫܬܰܪܪܽܘܢ: ܡܚܺܝ̈ܠܐ ܘܰܐܠܺܝ̈ܨܶܐ ܢܶܬܥܰܕܪܽܘܢ: ܘܥܺܕܬܳܐ ܘܝܰܠܕܶܝ̈ܗ̇ ܒܚܰܕܽܘܬܳܐ ܢܝܰܒܒܽܘܢ ܘܰܢܩܰܠܣܽܘܢ: ܒܶܪܒܰܪܰܐ ܐܠܶܦܳܐ ܕܚܰܕ̈ܘܳܬܳܐ: ܘܝܽܘܠܝܰܢܰܐ ܕܟܺܝܬܳܐ ܘܰܕܠܐ ܡܽܘܡܳܐ ܘܗܰܕܺܝܪܰܬ݀ ܒܫܽܘܦܪ̈ܶܐ: ܒܶܪܒܰܪܰܐ ܘܳܝܳܐ ܝܶܗܒܰܬ݀ ܠܚܰܢ̈ܦܶܐ: ܝܽܘܠܝܰܢܰܐ ܙܰܝܢܳܐ ܕܬܰܟܬܽܘܫܳܐ: ܒܶܪܒܰܪܰܐ ܚܰܒܺܝܒܬܶܗ ܕܰܡܟܺܝܪܳܗ̇: ܝܽܘܠܝܰܢܰܐ ܛܥܺܝܢܰܬ݀ ܟܽܠ ܛܽܘ̈ܒܺܝܢ: ܒܶܪܒܰܪܰܐ ܝܳܗܒܰܬ݀ ܥܽܘܕܪ̈ܳܢܶܐ: ܝܽܘܠܝܰܢܰܐ ܟܠܺܝܠܐ ܕܣܳܗ̈ܕܳܬܳܐ: ܒܶܪܒܰܪܰܐ ܠܡܺܐܢܳܐ ܕܰܪ̈ܕܺܝܦܶܐ: ܝܽܘܠܝܰܢܰܐ ܡܥܺܝܢܳܐ ܕܳܐܣܝܽܘܬܳܐ: ܒܶܪܒܰܪܰܐ ܢܽܘܗܪܳܐ ܕܚܶܫܽܘ̈ܟܶܐ: ܝܽܘܠܝܰܢܰܐ ܣܰܡܳܐ ܕܰܚܒܳܪ̈ܳܬܳܐ: ܒܶܪܒܰܪܰܐ ܥܽܘܕܪ̈ܳܢܶܐ ܠܟܽܠ ܝܳܗܒܳܐ: ܝܽܘܠܝܰܢܰܐ ܦܐܻܝܬܳܐ ܘܰܟܢܺܝܟܬܳܐ: ܒܶܪܒܰܪܰܐ ܨܶܒܬܳܐ ܗ̱ܝ ܕܰܥܠܰܝ̈ܡܳܬܳܐ: ܝܽܘܠܝܰܢܰܐ ܩܳܠܐ ܕܬܶܫܒ̈ܚܳܬܳܐ: ܒܶܪܒܰܪܰܐ ܪܘܳܙܳܐ ܕܥܺܕ̈ܳܬܳܐ ܩܰܕܺܝ̈ܫܳܬܳܐ: ܝܽܘܠܝܰܢܰܐ ܫܽܘܦܪܳܐ ܕܕܰܝܪ̈ܳܬܳܐ: ܒܶܪܒܰܪܰܐ ܬܶܫܒܽܘܚܬܳܐ ܢܶܣܰܩ ܟܽܠܰܢ ܒܥܰܕܥܺܐܕܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܐܺܝܬܝܳܝܬܳܐ ܘܰܡܬܽܘܡܳܝܬܳܐ ܣܓܺܝܕܬܳܐ ܘܫܰܘܝܰܬ݀ ܒܽܐܘܣܺܝܰܐ: ܗܳܫܳܐ ܘܰܒܟܽܠܙܒܰܢ ܠܥܳ܀ ܢܠܡܺܝܢ܀

 

ܛܟܣܐ ܕܥܠ ܣܗܕܐ ܡܪܝ ܒܗܢܡ ܘܣܪܐ ܚܬܗ ܘܐܪܒܥܝܢ ܣܗ̈ܕܐ ܚܒܪ̈ܘܗܝ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܫܰܝܢܳܐ ܐܰܡܺܝܢܳܐ ܘܒܰܫܠܳܡܳܐ ܟܰܗܺܝܢܳܐ ܘܰܒܚܽܘܒܳܐ ܫܰܦܝܳܐ ܘܰܒܢܰܦܫܳܐ ܢܰܗܺܝܪܬܳܐ: ܘܰܒܚܽܘ̈ܫܳܒܶܐ ܕܟܰܝ̈ܳܐ: ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܢܚܰܓܶܐ ܘܰܢܥܰܕܥܶܕ ܠܝܰܘܡܳܐ ܗܳܢܳܐ ܕܥܽܘܗܕܳܢܳܐ ܕܺܝܠܶܗ ܡܫܰܒܚܳܐ ܕܢܰܨܺܝܚܳܐ ܒܰܐܬܠܺܝܛܽܘܬܳܐ ܡܳܪܝ ܒܶܗܢܰܡ: ܘܰܕܣܰܪܳܐ ܚܳܬܶܗ ܘܕܰܐܪܒܥܺܝܢ ܣܳܗ̈ܕܶܐ ܚܰܒܪ̈ܰܘܗܝ ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܢܶܬܚܰܝܰܠ ܒܩܰܘܡܳܐ ܕܬܶܫܡܫܬܗܽܘܢ ܘܢܶܣܰܒ ܥܽܘܕܪ̈ܳܢܶܐ ܡ̣ܶܢ ܓܰܪ̈ܡܰܝܗܽܘܢ: ܕܥܰܡܗܽܘܢ ܘܒܰܝܢܳܬܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܢܰܨܚܳܢܳܐ ܕܣܳܗ̈ܕܶܐ ܩܰܕܺܝ̈ܫܶܐ: ܘܰܡܟܰܠܠܳܢܳܐ ܕܰܐܬܠܺܝ̈ܛܶܐ ܙܰܟܳܝ̈ܶܐ ܘܡܰܘܪܒܳܢܳܐ ܕܡܰܘܕ̈ܝܳܢܶܐ: ܗ̇ܰܘ ܕܗ̣ܽܘ ܒܰܩܢܽܘܡܶܗ ܕܪܰܫ ܐܽܘܪܚܳܐ ܕܣܳܗܕܽܘܬܳܐ ܠܐܝܠܶܝܢ ܕܗܰܝܡܶܢܘ ܒܰܫܡܶܗ ܘܰܣܕܰܪ ܒܳܗ̇ ܐܽܘܠܨܳܢ̈ܶܐ ܘܚܰܫ̈ܶܐ: ܘܡܰܘ̈ܬܶܐ ܡܫܰܚ̈ܠܦܶܐ ܘܰܩܛܺܝܪ̈ܳܝܶܐ: ܐܰܝܠܶܝܢ ܕܰܠܡܰܠܟܽܘܬܳܐ ܕܰܫܡܰܝܳܐ ܡܰܘܒܠܺܝܢ: ܚܰܝ̈ܶܐ ܚܰܕ̈ܬܶܐ ܘܰܡܥܰܠܝ̈ܰܝ ܡ̣ܶܢ ܡܰܘܬܳܐ ܡܟܰܢܫܺܝܢ: ܗ̇ܳܝ ܒܳܗ̇ ܐܰܬܠܺܝܛܳܐ ܢܰܨܺܝܚܳܐ ܘܦܳܠܚܳܐ ܙܪܺܝܙܳܐ ܡܳܪܝ ܒܶܗܢܰܡ ܘܣܰܪܳܐ ܚܳܬܶܗ ܪܕܰܘ ܚܘܺܝܚܳܐܝ̣ܬ ܘܝܰܬܺܝܪ ܚܠܺܝܨܳܐܝ̣ܬ ܘܰܒܣܰܪܘ ܥܰܠ ܫܶܢ̈ܕܶܐ ܘܰܐܗܶܠܘ ܒܡܰܘܬܳܐ: ܘܰܦܫܰܛܘ ܨܰܘܪ̈ܰܝܗܽܘܢ ܠܣܰܝܦܳܐ ܕܰܐܒܽܘܗܽܘܢ ܣܰܢܚܰܪܺܝܒ ܡܰܠܟܳܐ ܕܳܐܬܽܘܪ: ܘܥܰܠ ܗ̇ܳܝ ܝܰܩܰܪ ܘܰܐܘܪܶܒ ܐܶܢܽܘܢ ܒܦܶܚܡܳܐ  ܕܟܽܠܗܽܘܢ ܣܳܗ̈ܕܶܐ ܩܰܕܺܝ̈ܫܶܐ ܘܡܰܘ̈ܕܝܳܢܶܐ ܕܰܐܟܘܳܬܗܽܘܢ ܘܗܳܐ ܪܳܕܶܝܢ ܡ̣ܶܢ ܓܰܪ̈ܡܰܝܗܽܘܢ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ ܣܢܺܝ̈ܩܶܐ: ܘܟܽܠ ܕܡܶܬܓܰܘܰܣ ܒܗܽܘܢ ܡܶܬܦܰܨܶܐ ܡ̣ܶܢ ܐܽܘܠܨܳܢ̈ܶܐ ܕܫܺܐܕ̈ܶܐ ܡܰܪ̈ܳܚܶܐ: ܕܠܶܗ ܠܡܳܪܝܳܐ ܡܟܰܠܠܳܢܗܽܘܢ ܫܽܘܒܚܳܐ ܘܺܐܝܩܳܪܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܚܰܬܢܳܐ ܕܰܫܪܳܪܳܐ ܘܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܗ̇ܰܘ ܕܟܰܕ ܨܒܰܝܬ ܒܚܽܘܒܳܟ ܕܰܠܓܶܢܣܳܐ ܕܰܒܢܰܝ̈ܢܳܫܳܐ ܬܶܦܪܽܘܩ ܡ̣ܶܢ ܛܳܥܝܽܘܬܳܐ ܕܣܶܓܕܰܬ݀ ܨܰܠܡ̈ܶܐ ܘܦܽܘܠܚܳܢ ܫܺܐܕ̈ܶܐ: ܘܡ̣ܶܢ ܪ̈ܰܘܡܶܐ ܥܶܠܳܝ̈ܶܐ ܘܠܐ ܡܶܬܡܰܫ̈ܚܳܢܶܐ ܠܐܪܥܳܐ ܢܚܶܬܬ: ܘܒܰܒܬܽܘܠܬܳܐ ܡܰܪܝܰܡ ܫܪܰܝܬ: ܗ̇ܳܝ ܕܰܒܢܰܦܫܳܐ ܘܰܒܦܰܓܪܳܐ ܩܰܕܡܰܬ݀ ܐܶܬܕܰܟܝܰܬ݀ ܒܪܽܘܚܳܐ ܩܰܕܺܝܫܳܐ: ܘܡܶܢܳܗ̇ ܐܶܬܓܰܫܰܡܬ ܐܰܘܟܺܝܬ ܐܶܬܒܰܣܰܪܬ: ܘܰܕܠܐ ܙܽܘܘܳܓܳܐ ܡܶܢܳܗ̇ ܐܶܬܺܝܠܶܕܬ ܦܰܓܪܳܢܳܐܝ̣ܬ ܟܰܕ ܠܐ ܐܶܫܬܰܚܠܰܦܬ: ܘܗ̣ܽܘ ܟܰܕ ܗ̣ܽܘ ܐܺܝܬܰܝܟ ܐܠܰܗܳܐ ܘܒܰܪܢܳܫܳܐ ܟܝܳܢܳܐܝ̣ܬ ܘܰܩܢܽܘܡܳܐܝ̣ܬ ܒܰܚܕܳܝܽܘܬܳܐ ܠܐ ܡܶܬܡܰܠܠܳܢܺܝܬܳܐ ܘܗ̣ܺܝ ܝܺܠܶܕܬܳܟ ܟܰܬܪܰܬ݀ ܒܬܽܘܠܬܳܐ ܠܐ ܡܶܬܚܰܒܠܳܢܳܐܝܬ: ܘ̣ܰܒܝܰܕ ܝܺܠܺܝܕܽܘܬܳܟ ܕܒܰܒܣܰܪ ܩܰܕܶܫܬ ܠܰܟܝܳܢܳܐ ܕܢܶܫ̈ܶܐ: ܘܥܰܠ ܗ̇ܳܝ ܥܠܰܝ̈ܡܳܬܳܐ ܘܰܒܬܽܘ̈ܠܳܬܳܐ ܪ̈ܰܚܡܳܢܳܟ ܘܰܢܩܶܦ̈ܝ ܠܳܟ: ܘܰܫܒܰܩ̈ܝ ܠܒܶܝܬ ܐܰܒܽܘܗܶܝܢ ܘܐܶܬܰܝ̈ ܒܳܬܪܳܟ: ܘܕܰܟܝܽܘܬܗܶܝܢ ܘܰܫܪܳܪܗܶܝܢ ܢܛܰܪ̈ܶܝܢ ܘܰܡܟܺܝܪ̈ܳܬܳܐ ܘܟ̈ܰܠܠܳܬܳܐ ܗܘ̈ܰܝ ܠܳܟ: ܘܥܰܠ ܚܰܕܺܝ̈ܗܶܝܢ ܐܰܓܣܶܢܳ̈ܟ ܘܰܒܩܰܝܛܽܘܢ ܠܶܒܰܘ̈ܳܬܗܶܝܢ ܐܰܓܢܶܝ̈ܢܳܟ: ܕܰܚܕܳܐ ܡܶܢܗܶܝܢ ܐܺܝܬܶܝܗ̇ ܣܰܪܳܐ ܩܰܕܺܝܫܬܳܐ ܘܰܒܬܽܘܠܬܳܐ ܕܟܺܝܬܳܐ: ܗ̇ܳܝ ܕܡ̣ܶܢ ܫܽܘܪܳܝ ܚܰܝܶܝ̈ܗ̇ ܡ̣ܶܢ ܟܪܶܣ ܝܳܠܶܕܬܳܗ̇ ܒܚܰܫܳܐ ܘܰܒܟܺܐܒܳܐ ܕܓܰܪܒܳܐ ܡܡܰܚܝܳܐ ܗܘܳܬ: ܘܡ̣ܶܢ ܐܳܣܘ̈ܳܬܳܐ ܣܳܟ ܠܐ ܡܶܬܥܰܕܪܳܐ ܗܘܳܬ: ܟܰܕ ܕܶܝܢ ܚܳܣܬ ܐܳܘ ܡܪܰܚܡܳܢܳܐ ܥܰܠ ܓܒܺܝܠܬܳܟ ܒܝܰܕ ܥܰܒܕܳܟ ܘܰܡܢܺܝܚܳܢܳܐ ܕܡܳܪܽܘܬܳܟ ܘܰܡܪܰܥܝܳܢܳܐ ܕܰܐܠܳܗܽܘܬܳܟ ܡܳܪܝ ܡܰܬܰܝ: ܒܝܰܕ ܐܽܘܙܢܳܐ ܕܡܰܝ̈ܳܐ ܝܺܗܺܝܒ ܡ̣ܶܢ ܪ̈ܰܚܡܰܝܟ: ܡܰܘܠܳܕܳܐ ܬܪܰܝܳܢܳܐ ܐܶܬܝܰܠܕܰܬ݀ ܒܢܰܦܫܳܐ ܙܗܺܝܬܳܐ ܘܰܒܦܰܓܪܳܐ ܕܰܟܝܳܐ: ܘܰܒܪܶܥܝܳܢܳܐ ܚܠܺܝܡܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܕܒܳܟ: ܘܡ̣ܶܢ ܬܰܡܳܢ ܐܶܬܢܰܩܦܰܬ݀ ܠܳܟ: ܘܟܰܠܬܳܐ ܚܰܒܺܝܒܬܳܐ ܡ̣ܶܢ ܡܟܺܝܪܽܘܬܳܐ ܪܽܘܚܳܢܳܝܬܳܐ ܗܘܳܬ݀ ܠܳܟ: ܗ̇ܳܝ ܕܰܒܫܽܘܒܚܳܐ ܕܡܰܠܟ̈ܳܬܳܐ ܩܳܡܰܬ݀ ܘܰܐܝܟ ܣܰܗܪܳܐ ܡ̣ܶܢ ܝܰܡܺܝܢܳܟ ܐܶܬܗܰܕܪܰܬ݀ ܘܡ̣ܶܢ ܬܰܡܳܢ ܛܥܳܬ݀ ܠܥܰܡܳܗ̇ ܘܰܠܒܶܝܬ ܐܰܒܽܘܗ̇ ܣܰܢܚܰܪܺܝܒ ܡܰܠܟܳܐ: ܘܠܳܟ ܡܰܠܟܳܐ ܕܡܰܠܟ̈ܶܐ ܕܡܰܠܟܽܘܬܶܗ ܠܐ ܥܳܒܪܳܐ ܕܶܐܬܪܰܓܪܓܰܬ݀: ܘܠܳܟ ܣܶܓܕܰܬ݀ ܥܰܡ ܐܰܚܳܐ ܕܺܝܠܳܗ̇ ܢܰܨܺܝܚ ܫܽܘܦܪ̈ܶܐ ܘܰܒܬܽܘܠܐ ܢܰܩܕܳܐ ܡܳܪܝ ܒܶܗܢܰܡ: ܗ̇ܳܢܽܘܢ ܕܰܠܘܳܬܗܽܘܢ ܪܽܘܚܳܐ ܩܰܕܺܝܫܳܐ ܒܰܡܙܰܡܪ̈ܳܢܶܐ ܐܳܡܰܪ: ܕܟܽܠܶܗ ܫܽܘܒܚܳܐ ܕܰܒܢ̈ܰܝ ܡܰܠܟ̈ܶܐ ܡ̣ܶܢ ܠܓܰܘ ܡܨܰܒܬܺܝܢ ܒܰܠܒܽܘܫܳܐ ܡܕܰܗܒܳܐ: ܘܰܒܩܽܘܪ̈ܒܳܢܶܐ ܢܺܐܪܥܽܘܢ ܦܰܪ̈ܨܽܘܦܰܝܗܽܘܢ ܫܰܠܺܝ̈ܛܳܢܶܐ ܘܥܰܬܺܝܪ̈ܶܐ ܕܥܰܡ̈ܡܶܐ: ܘܗ̇ܳܝ ܬܽܘܒ ܕܰܒܩܽܘܪ̈ܒܳܢܶܐ ܢܺܐܙܽܠ̱ܘܢ ܠܘܳܬܳܟ ܡܰܠܟܳܐ ܡܫܺܝܚܳܐ: ܕܡܳܐ ܕܨܰܘܪ̈ܰܝܗܽܘܢ ܩܰܪܶܒܘ ܠܳܟ: ܡܶܛܽܠ ܪܶܚܡܬܳܟ ܘܡܶܛܽܠ ܢܽܘܪܳܐ ܗ̇ܳܝ ܕܰܐܪܡܺܝܬ ܒܰܐܪܥܳܐ: ܗ̇ܳܝ ܕܒܳܗ̇ ܢܶܬܦܰܠܰܓ ܐܰܒܳܐ ܥܰܠ ܒܪܳܐ: ܘܰܒܪܳܐ ܥܰܠ ܐܰܒܳܐ: ܘܶܐܡܳܐ ܥܰܠ ܒܰܪܬܳܗ̇: ܘܒܰܪܬܳܐ ܥܰܠ ܐܶܡܳܐ: ܘܨܳܒܶܐ ܗܘܺܝܬ ܕܡ̣ܶܢ ܟܰܕܽܘ ܚܶܒܰܬ݀ ܒܪܶܥܝܳܢܗܽܘܢ ܘܣܶܦܰܬ݀ ܘܰܣܢܰܘ ܠܓܶܢܣܳܐ ܘܠܛܽܘܗܡܳܐ ܕܺܝܠܗܽܘܢ ܘܠܐܒܳܐ ܘܠܐܡܳܐ ܫܒܰܩܘ: ܘܰܒܡܰܠܟܽܘܬܳܐ ܥܳܒܽܘܪܬܳܐ ܟܦܰܪܘ ܘܰܠܥܽܘܬܪܳܐ ܫܳܛܘ ܘܰܠܩܶܢܝܳܢܳܐ ܐܰܣܠܺܝܘ ܘܠܰܦܬܰܟܪ̈ܶܐ ܐܰܘܟܺܝܬ ܕܶܚ̈ܠܳܬܳܐ ܕܰܐܒܳܗܰܝ̈ܗܽܘܢ ܟܺܐܦ̈ܶܐ ܚܰܪ̈ܳܫܳܬܳܐ ܘܩܰܝ̈ܣܶܐ ܡܰܒ̈ܠܛܶܐ ܩܪܰܘ: ܒܰܡܓܽܘܫܽܘܬܳܐ ܒܰܙܰܚܘ: ܘܰܒܟܽܠܳܗ̇ ܫܽܘܒܚܳܐ ܥܳܒܽܘܪܳܐ ܟܦܰܪܘ: ܘܰܒܪܶܚܡܬܳܟ ܐܶܬܢܰܒܪܰܫܘ ܘܰܒܚܽܘܒܳܟ ܐܶܫܬܰܠܗܰܒܘ: ܘܰܒܝܰܕ ܗܰܝܡܳܢܽܘܬܳܟ ܐܶܫܬܰܪܰܪܘ: ܘܥܰܠ ܣܰܒܪܳܐ ܕܫܽܘܘ̈ܕܳܝܰܝܟ ܫܰܪܺܝܪ̈ܶܐ ܫܶܢ̈ܕܶܐ ܘܽܐܘܠܨ̈ܳܢܶܐ ܣܒܰܠܘ: ܒܚܰܝ̈ܶܐ ܐ̱ܢܳܫܳܝ̈ܶܐ ܐܰܒܣܺܝܘ ܘܥܰܠ ܣܰܝܦܳܐ ܐܰܩܠܺܝܘ: ܒܡܰܘܬܳܐ ܓܰܚܶܟܘ ܠܫܽܘ̈ܕܳܠܐ ܠܐ ܚܫܰܒܘ: ܠܫܽܘ̈ܓܳܫܶܐ ܕܚܰܩܘ: ܠܠܽܘ̈ܚܳܡܶܐ ܙܢܰܩܘ: ܠܰܓ̈ܙܳܡܶܐ ܐܰܥܒܰܪܘ: ܘܥܰܠ ܟܽܠ ܪ̈ܓܺܝܓܳܢ ܦܣܰܥܘ: ܠܡܰܠܟܽܘܬܳܐ ܕܰܫܡܰܝܳܐ ܐܶܬܪܰܓܪܰܓܘ: ܠܰܓܢܽܘܢܳܐ ܕܢܽܘܗܪܳܐ ܐܶܬܝܰܐܝܰܒܘ: ܠܦܰܪ̈ܕܰܝܣܶܐ ܕܛܽܘ̈ܒܶܐ ܐܶܬܚܰܘܰܚܘ: ܠܚܰܝ̈ܶܐ ܡܰܠܐܟܳܝ̈ܶܐ ܐܰܚܶܒܘ: ܠܓܽܘ̈ܕܶܐ ܫܡܰܝܳܢ̈ܝܳܬܳܐ ܐܶܬܪܰܓܪܰܓܘ ܘܡܶܛܽܠ ܫܽܘܦܪܶܗ ܘܫܽܘܒܚܶܗ ܕܗ̇ܰܘ ܥܳܠܡܳܐ ܗܶܢܽܘܢ ܠܗܽܘܢ ܠܩܶܛܠܐ ܝܰܗܒܘ: ܘܰܟܠܺܝ̈ܠܐ ܕܙܳܟܽܘܬܳܐ ܫܩܰܠܘ: ܘܰܒܣܳܗܕܽܘܬܳܐ ܐܶܫܬܰܡܠܺܝܘ: ܘܡ̣ܶܢ ܐܶܣܛܰܕܝܽܘܢ ܪܰܒܳܐ ܢܰܨܺܝ̈ܚܶܐ ܢܦܰܩܘ: ܩܽܘܪ̈ܒܳܢܶܐ ܡ̣ܶܢ ܐܺܝ̈ܕܰܝ ܐܰܒܽܘܗܽܘܢ ܠܳܟ ܡܰܠܟܳܐ ܫܡܰܝܳܢܳܐ ܐܶܬܩܰܪܰܒܘ ܐܰܝܟ ܗܡܰܝܪ̈ܶܐ ܡܰܠܟܳܝ̈ܶܐ: ܘܡܶܛܽܠ ܗܳܕܶܐ ܒܩܽܘܠܳܣ̈ܶܐ ܡܰܠܝ̈ܰܝ ܛܽܘ̈ܒܶܐ ܘܰܒܢܶܥ̈ܡܳܬܳܐ ܚܰܠܝ̈ܳܬܳܐ ܠܘܳܬܗܽܘܢ ܐܳܡܪܺܝܢܰܢ: ܠܶܟܝ ܛܽܘܒܰܝܟܝ ܣܳܗܕܬܳܐ ܢܰܨܺܝܚܬܳܐ ܡܳܪܬܝ ܣܰܪܳܐ ܥܰܡ ܐܰܚܽܘܟܝ ܐܰܬܠܺܝܛܳܐ ܡܳܪܝ ܒܶܗܢܰܡ ܕܰܠܚܰܬܢܳܐ ܫܡܰܝܳܢܳܐ ܐܰܡܟܰܪܬܽܘܢ ܢܰܦ̈ܫܳܬܟܽܘܢ: ܠܶܟܝ ܛܽܘܒܰܝܟܝ ܢܰܨܺܝܚܬܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܒܶܗܢܰܡ ܐܰܥܕܺܝܬܽܘܢ ܟܠܺܝܠܐ ܕܙܳܟܽܘܬܳܐ: ܠܶܟܝ ܛܽܘܒܰܝܟܝ ܛܽܘܒܳܢܺܝܬܳܐ ܡܳܪܬܝ ܣܰܪܳܐ ܕܥܰܡ ܛܽܘܒܬܳܢܳܐ ܐܰܚܽܘܟܝ ܡܳܪܝ ܒܶܗܢܰܡ ܒܰܐܬܪܳܐ ܕܛܽܘ̈ܒܶܐ ܡܶܬܒܰܣܡܺܝܢ ܐܰܢ̱ܬܽܘܢ: ܠܶܟܝ ܛܽܘܒܰܝܟܝ ܣܰܬܳܐ ܗܕܺܝܪܬܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܫܰܪܘܰܝܢܳܐ ܡܗܰܕܪܳܐ ܡܳܪܝ ܒܶܗܢܰܡ: ܐܶܬܢܰܨܰܚܬܽܘܢ ܒܢܰܨܺܝܚܽܘܬܳܐ ܫܰܪܺܝܪܬܳܐ ܘܶܐܬܢܨܰܒܬܽܘܢ ܒܓܰܢܬܳܐ ܥܕܶܢܳܝܬܳܐ: ܠܶܟܝ ܛܽܘܒܰܝܟܝ ܡܰܪܓܳܢܺܝܬܳܐ ܝܰܩܺܝܪܰܬ݀ ܕܡܰܝ̈ܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܛܰܒܥܳܐ ܣܰܓܺܝ ܕܡܰܝ̈ܳܐ ܡܳܪܝ ܒܶܗܢܰܡ: ܒܬܳܓܶܗ ܕܡܰܠܟܳܐ ܕܪܰܘܡܳܐ ܐܶܬܩܒܰܥܬܽܘܢ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܕܟܺܝܬܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܒܬܽܘܠܐ ܕܰܟܝܳܐ ܘܕܠܐ ܡܽܘܡܳܐ ܡܳܪܝ ܒܶܗܢܰܡ: ܒܥܺܕܬܳܐ ܕܒܽܘܟܪ̈ܶܐ ܫܡܰܝ̈ܳܢܶܐ ܪܳܦܣܐ ܐܰܢ̱ܬܝ: ܠܶܟܝ ܛܽܘܒܰܝܟܝ ܥܠܰܝܡܬܳܐ ܓܰܒܪܳܢܳܝܬܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܓܰܢ̱ܒܳܪܳܐ ܘܰܩܪܰܒܬܳܢܳܐ ܡܳܪܝ ܒܶܗܢܰܡ ܠܐܟܶܠܩܰܪܨܳܐ ܘܰܠܫܰܡܳܫܰܘ̈ܗܝ ܐܰܒܗܶܬܬܽܘܢ: ܠܶܟܝ ܛܽܘܒܰܝܟܝ ܝܰܘܢܳܐ ܬܰܡܺܝܡܬܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܢܶܫܪܳܐ ܙܪܺܝܙܳܐ ܡܳܪܝ ܒܶܗܢܰܡ: ܒܓܶܦ̈ܶܐ ܕܪܽܘܚܳܐ ܠܩܶܢܳܐ ܫܡܰܝܳܢܳܐ ܦܪܰܚܬܽܘܢ: ܠܶܟܝ ܛܽܘܒܰܝܟܝ ܢܰܟܦܬܳܐ ܡܳܪܬܝ ܣܰܪܳܐ ܕܥܰܡ ܐܰܚܽܘܟܝ ܪܚܺܝܡܳܐ ܡܳܪܝ ܒܶܗܢܰܡ: ܥܰܠ ܓܶܢ̱ܒ ܡܰܕܒܚܳܐ ܡܶܬܝܰܕܥܳܢܳܐ ܕܪ̈ܺܝܫܟܳܗܢܶܐ ܫܡܰܝܳܢܳܐ ܩܶܢܟܽܘܢ ܣܳܡܬܽܘܢ: ܦܰܪ̈ܽܘܓܶܐ ܫܰܦܺܝܪ̈ܶܐ ܪܰܒܺܝܬܽܘܢ: ܠܶܟܝ ܛܽܘܒܰܝܟܝ ܡܳܪܬܝ ܣܰܪܳܐ ܢܶܩܝܳܐ ܟܢܺܝܟܬܳܐ ܕܥܰܡ ܐܶܡܪܳܐ ܕܠܐ ܡܽܘܡܳܐ ܐܰܚܽܘܟܝ ܡܳܪܝ ܒܶܗܢܰܡ ܕܶܒ̈ܚܶܐ ܡܠܺܝ̈ܠܐ ܠܪܺܝܫ ܟܽܘܡܪ̈ܶܐ ܡܫܺܝܚܳܐ ܝܶܫܽܘܥ ܐܶܬܩܰܪܰܒܬܽܘܢ: ܠܶܟܝ ܛܽܘܒܰܝܟܝ ܕܥܰܡ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܠܰܓܢܽܘܢܳܐ ܠܐ ܥܳܒܽܘܪܳܐ ܥܳܐܠܐܴ ܐܰܢ̱ܬܝ: ܠܶܟܝ ܛܽܘܒܰܝܟܝ ܕܥܰܡ ܩܰܕܺܝ̈ܫܳܬܳܐ ܠܗܰܝܟܠܶܗ ܕܡܰܠܟܳܐ ܫܡܰܝܳܢܳܐ ܡܶܬܓܰܘܝܳܐ ܐܰܢ̱ܬܝ: ܠܶܟܝ ܛܽܘܒܰܝܟܝ ܡ̣ܶܢ ܥܺܝܪ̈ܶܐ ܒܪܰܘܡܳܐ ܕܣܳܘܚܺܝܢ ܠܶܟܝ ܒܰܫܠܳܡܳܐ: ܠܶܟܝ ܛܽܘܒܰܝܟܝ ܡܳܪܬܝ ܣܰܪܳܐ ܡ̣ܶܢ ܐ̱ܢܳܫ̈ܳܐ ܒܥܽܘܡܩܳܐ ܕܰܡܙܰܝܚܺܝܢ ܠܥܰܕܥܺܐܕܶܟܝ: ܠܶܟܝ ܛܽܘܒܰܝܟܝ ܡ̣ܶܢ ܟܽܠܗܶܝܢ ܥܺܕ̈ܳܬܳܐ ܕܒܰܐܪܒܰܥ ܦܶܢ̈ܝܳܢ ܕܰܡܝܰܩܪ̈ܳܢ ܠܕܽܘܟܪܳܢܶܟܝ ܘܡܶܛܽܠ ܗܳܕܶܐ ܟܰܕ ܒܰܨܠܰܘ̈ܳܬܗܽܘܢ ܩܰܕܺܝ̈ܫܳܬܳܐ ܡܶܬܓܰܘܣܺܝܢܰܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܡܰܘܪܒܳܢܗܽܘܢ ܘܰܡܟܰܠܠܳܢܗܽܘܢ: ܕܰܬܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܐܰܣܳܐ ܠܰܟܪ̈ܺܝܗܶܐ ܡܳܪܝܳܐ: ܒܰܝܰܐܐ ܠܰܡܥ̈ܳܩܶܐ: ܠܰܒܶܒ ܠܥܰܝܺܝ̈ܩܶܐ: ܐܰܪܘܰܚ ܠܐܠܺܝ̈ܨܶܐ: ܚܰܪܰܪ ܠܡܶܬܬܰܥ̈ܒܕܳܢܶܐ ܡ̣ܶܢ ܪ̈ܽܘܚܶܐ ܒܺܝ̈ܫܳܬܳܐ: ܫܰܘܙܶܒ ܠܺܪ̈ܕܺܝܦܰܝ ܡ̣ܶܢ ܫܺܐܕ̈ܶܐ: ܐܰܩܺܝܡ ܠܢܰܦ̈ܠܐ: ܬܰܪܣܳܐ ܠܰܣܢܺܝ̈ܩܶܐ: ܙܽܘܢ ܠܡܶܣ̈ܟܺܢܶܐ: ܢܰܟܶܦ ܠܰܒܬܽܘ̈ܠܐ: ܪܰܒܳܐ ܠܰܛܠܳܝ̈ܶܐ ܘܰܠܓܰܕܽܘ̈ܕܶܐ: ܣܡܽܘܟ ܠܣܳܒ̈ܶܐ: ܚܰܝܶܠ ܠܰܡܚܺܝ̈ܠܐ: ܐܰܦܢܳܐ ܠܛܳܥܰܝ̈ܳܐ: ܠܪ̈ܳܕܝܰܝ ܒܽܐܘܪ̈ܚܳܬܳܐ ܠܰܘܳܐ: ܠܛܳܝ̈ܦܰܝ ܠܰܠܡܺܐܢܳܐ ܐܰܩܶܦ: ܠܟܽܠ ܕܩܳܪܶܐ ܠܳܟ ܘܡܶܬܓܰܘܰܣ ܒܰܨܠܰܘ̈ܳܬܗܽܘܢ ܕܗܳܠܶܝܢ ܐܰܬܠܺܝ̈ܣܶܐ ܡܢܺܝ̈ܚܳܢܶܐ ܕܺܝܠܳܟ ܥܢܺܝ ܒܛܰܝܒܽܘܬܳܟ: ܘܦܰܢܳܐ ܘܫܰܟܶܢ ܠܗܽܘܢ ܒܪ̈ܰܚܡܰܝܟ ܫ̈ܶܐܠܳܬܗܽܘܢ: ܘܰܠܥܺܕܬܳܐ ܐܳܪܬܳܕܽܘܟܣܳܝܬܳܐ ܕܰܒܟܽܠܳܗ̇ ܬܺܒܶܝܠ ܢܰܛܰܪ ܘܣܰܬܰܪ: ܠܳܗ̇ ܘܰܠܝܰܠܕܶܝ̈ܗ̇ ܡܶܢܟܽܠ ܢܶܟܝܳܢܺܝ̈ܢ: ܘܳܐܦ ܠܐܒܳܗܰܝ̈ܢ ܘܠܐܚܰܝ̈ܢ ܘܰܠܪ̈ܰܒܳܢܰܝܢ: ܘܰܠܥܰܢܺܝ̈ܕܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܐܰܫܘܳܐ ܠܩܰܘܡܳܐ ܕܡ̣ܶܢ ܝܰܡܺܝܢܳܟ: ܘܰܠܡܶܠܬܳܐ ܒܰܣܺܝܡܬܳܐ ܕܶܐܡܰܪܬ ܠܗܽܘܢ ܟܽܠ ܕܳܐܟܶܠ ܦܰܓܪܝ ܘܫܳܬܶܐ ܕܶܡܝ ܝܳܪܶܬ ܚܰܝ̈ܶܐ ܕܰܠܥܳܠܰܡ: ܘܰܚܢܰܢ ܟܽܠܰܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܣܳܝܽܘܡܳܐ ܕܰܐܓܽܘ̈ܢܶܐ ܚܰܝܠܬܳܢ̈ܶܐ ܘܰܡܥܰܬܕܳܢܳܐ ܕܶܐܣܛܰܕܝܽܘܢ ܕܣܳܗ̈ܕܶܐ ܘܡܰܘܕ̈ܝܳܢܶܐ: ܠܗܰܘ ܡܟܰܠܠܳܢܳܐ ܕܰܐܬܠܺܝ̈ܛܶܐ ܙܰܟܳܝ̈ܶܐ ܘܡܰܘܪܒܳܢܳܐ ܕܰܐܓܽܘܢܺܝ̈ܣܛܶܐ ܩܪ̈ܰܒܬܳܢܶܐ: ܗ̇ܰܘ ܕܰܠܡܳܪܝ ܒܶܗܢܰܡ ܚܰܝܶܠ ܒܰܐܓܽܘܢܳܐ ܕܣܳܗܕܽܘܬܳܐ ܘܰܠܚܰܒܪ̈ܰܘܗܝ ܥܰܡܶܗ: ܘܟܰܠܶܠ ܐܶܢܽܘܢ ܒܰܟܠܺܝ̈ܠܐ ܕܙܳܟܽܘܬܳܐ: ܘܗܳܐ ܡܰܒܥܺܝܢ ܘܡܰܪܕܶܝܢ ܓܰܪ̈ܡܰܝܗܽܘܢ ܥܽܘܕܪ̈ܳܢܶܐ ܘܳܐܣܘ̈ܳܬܳܐ ܠܟܽܠܗܽܘܢ ܐܰܝܠܶܝܢ ܕܰܒܗܽܘܢ ܡܶܬܓܰܘܣܺܝܢ ܒܗܰܝܡܳܢܽܘܬܳܐ: ܘܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ ܒܚܰܕܽܘܬܳܐ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܟܰܕ ܠܥܽܘܗܕܳܢܳܐ ܕܣܳܗ̈ܕܰܝܟ ܚܰܝܠܬܳܢ̈ܶܐ ܚܰܒܪ̈ܰܘܗܝ ܕܢܰܨܺܝܚܳܐ ܘܪܰܒ ܢܶܨ̈ܚܳܢܶܐ ܡܳܪܝ ܒܶܗܢܰܡ ܩܕܳܡܰܝܟ ܡܰܝܬܶܝܢܰܢ ܝܶܫܽܘܥ ܡܫܺܝܚܳܐ: ܪܺܝܫܳܐ ܘܥܶܠܬܳܐ ܕܰܐܓܽܘ̈ܢܶܐ ܢܰܨܺܝ̈ܚܶܐ: ܘܒܰܒ̈ܢܳܬ ܩ̈ܳܠܐ ܕܩܽܘܠܳܣ̈ܶܐ ܠܗܽܘܢ ܡܰܘܪܒܺܝܢܰܢ: ܗ̇ܳܢܽܘܢ ܕܥܰܡ ܒܰܪ ܡܰܠܟܽܘܬܳܐ ܡܳܪܝ ܒܶܗܢܰܡ ܦܳܠܚܽܘܬܳܐ ܙܰܒܢܳܝܬܳܐ ܦܠܰܚܘ: ܘܥܰܡܶܗ ܬܽܘܒ ܒܦܳܠܚܽܘܬܳܐ ܗܳܕܶܐ ܚܕܰܬܳܐ ܘܪܽܘܚܳܢܳܝܬܳܐ ܐܶܬܢܰܨܰܚܘ: ܥܰܡܶܗ ܠܢܰܚܫܺܝܪܳܐ ܕܨܰܝܕܳܐ ܢܦܰܩܘ: ܘܥܰܡܶܗ ܒܓܶܠܝ̈ܳܢܶܐ ܕܪܰܘܡܳܐ ܐܶܬܢܰܗܰܪܘ: ܘܥܰܡܶܗ ܠܐܘܪܚܳܐ ܕܰܫܪܳܪܳܐ ܡ̣ܶܢ ܓܰܒܝܳܐ ܡܳܪܝ ܡܰܬܝܰ ܐܶܬܗܰܕܺܝܘ ܘܳܐܦ ܥܰܡܶܗ ܪܽܘܫܡܳܐ ܚܰܝܳܐ ܕܡܰܥܡܽܘܕܺܝܬܳܐ ܩܰܒܶܠܘ: ܘܬܰܘܕܺܝܬܳܐ ܕܟܺܝܬܳܐ ܕܒܰܬܠܺܝܬܳܝܽܘܬܳܐ ܡܪܰܝܰܡܬܳܐ ܥܰܡܶܗ ܐܰܘܕܺܝܘ: ܘܰܐܟܘܳܬܶܗ ܟܦܰܪܘ ܒܣܳܛܳܢܳܐ ܘܰܒܦܳܠܚܽܘܬܶܗ ܘܒܰܕܡܽܘܬܶܗ ܒܺܝܕܰܥܬܳܐ ܕܚܰܕ ܐܠܰܗܳܐ ܫܰܪܺܝܪܳܐ ܐܶܬܬܰܨܡܚܰܘ: ܘܰܒܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ ܐܶܫܬܰܪܰܪܘ ܗ̇ܳܝ ܕܡܰܟܪܙܳܐ ܚܰܕ ܟܝܳܢܳܐ ܘܚܰܕ ܨܶܒܝܳܢܳܐ ܠܰܒܪܳܐ ܡܶܠܬܳܐ ܐܠܰܗܳܐ ܕܶܐܬܒܰܣܰܪ: ܘܰܒܦܶܚܡܶܗ ܒܚܽܘܒܶܗ ܕܰܡܫܺܝܚܳܐ ܐܶܬܢܰܒܪܰܫܘ: ܘܰܒܣܳܗܕܽܘܬܳܐ ܒܕܽܘܡܝܶܗ ܐܶܬܟܰܠܰܠܘ: ܘܰܠܘܳܬܶܗ ܥܡܶܗ ܗܳܫܳܐ ܩܳܝܡܺܝܢ ܘܰܚܠܳܦ ܟܽܠܶܗ ܥܳܠܡܳܐ ܠܐܠܳܗܳܐ ܡܶܬܟܰܫܦܺܝܢ: ܡܶܛܽܠ ܗܳܕܶܐ ܒܪܽܘܡܪ̈ܳܡܶܐ ܚܠܰܝ̈ܳܐ ܠܘܳܬܗܽܘܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܐܳܘ ܠܐܡܪ̈ܶܐ ܒܪܺܝܪ̈ܶܐ ܐܰܪܒܥܺܝܢ ܕܥܰܡ ܚܰܕ ܕܶܟܪܳܐ ܚܰܝܠܬܳܢܳܐ ܡܳܪܝ ܒܶܗܢܰܡ ܐܶܬܢܟܶܣܘ: ܘܩܽܘܪ̈ܒܳܢܶܐ ܠܡܰܠܟܳܐ ܫܡܰܝܳܢܳܐ ܐܶܬܩܰܪܰܒܘ: ܐܳܘ ܠܒܶܪ̈ܽܘܠܐ ܝܰܩܺܝܪ̈ܶܐ ܐܰܪܒܥܺܝܢ ܕܥܰܡ ܚܰܕ ܛܰܒܥܳܐ ܒܶܗܢܰܡ ܒܬܳܓܳܗ̇ ܕܥܺܕܬܳܐ ܩܰܕܺܝܫܬܳܐ ܡܰܨܡܚܺܝܢ: ܐܳܘ ܠܓܰܒܪ̈ܶܐ ܓܰܢ̱ܒܳܪ̈ܶܐ ܐܪܰܒܥܺܝܢ ܕܥܰܡ ܚܰܕ ܪܰܒܚܰܝܠܐ ܩܪܰܒܬܳܢܳܐ: ܡܳܪܝ ܒܶܗܢܰܡ ܙܳܟܽܘܬܳܐ ܡܫܰܡܠܳܝܬܳܐ ܚܰܘܺܝܘ: ܐܳܘ ܠܕܶܩ̈ܠܐ ܪ̈ܳܡܶܐ ܘܥܰܫܺܝ̈ܢܶܐ ܐܰܪܒܥܝܢ ܕܥܰܡ ܚܰܕ ܐܰܪܙܳܐ ܪܳܡܳܐ ܘܰܡܥܰܠܝܳܐ ܡܳܪܝ ܒܶܗܢܰܡ ܒܦܰܪܕܰܝܣܶܗ ܕܰܐܠܳܗܳܐ ܐܶܬܢܨܶܒܘ: ܐܳܘ ܠܰܗܡܰܝܪ̈ܶܐ ܡܠܺܝ̈ܠܐ ܐܰܪܒܥܺܝܢ ܕܥܰܡ ܚܰܕ ܒܰܪ ܚܺܐܪ̈ܶܐ ܡܫܰܡܗܳܐ ܡܳܪܝ ܒܶܗܢܰܡ ܠܫܰܠܺܝܛܳܐ ܕܪܰܘܡܳܐ ܘܥܽܘܡܩܳܐ ܐܶܬܩܰܪܰܒܘ: ܐܳܘ ܠܘܰܪ̈ܕܶܐ ܗܰܢܺܝ̈ܰܐܝ ܪܺܝܚܳܐ ܐܰܪܒܥܺܝܢ ܕܥܰܡ ܚܰܕ ܚܰܙܽܘܪܳܐ ܦܐܷܐ ܚܶܙܘܳܐ ܘܒܰܣܺܝܡ ܛܰܥܡܳܐ ܘܰܚܠܐܷ ܪܺܝܚܳܐ ܡܳܪܝ ܒܶܗܢܰܡ ܒܓܰܢܰܬ݀ ܥܕܶܝܢ ܗܳܫܳܐ ܡܰܦܪܓܺܝܢ: ܐܳܘ ܠܰܙܪ̈ܺܝܙܶܐ ܘܰܚܠܺܝ̈ܨܶܐ ܐܰܪܒܥܺܝܢ ܕܥܰܡ ܚܰܕ ܓܰܢ̱ܒܳܪ ܚܰܝܠܐ ܡܳܪܝ ܒܶܗܢܰܡ ܙܳܟܽܘܬܳܐ ܥܰܠ ܐܳܟܶܠܩܰܪܨܳܐ ܘܚܰܝܠܰܘ̈ܳܬܶܗ ܫܩܰܠܘ: ܐܳܘ ܠܚܽܘܡܪ̈ܶܐ ܫܒܺܝ̈ܚܳܬܳܐ ܐܰܪܒܥܺܝܢ ܕܥܰܡ ܚܰܕ ܒܶܪܽܘܠܚܳܐ ܡܳܪܝ ܒܶܗܢܰܡ: ܘܰܚܕܳܐ ܡܰܪܓܳܢܺܝܬܳܐ ܕܟܺܝܬܳܐ ܡܳܪܬܝ ܣܰܪܳܐ ܒܥܶܩܳܗ̇ ܕܒܰܪܬ ܐܰܪ̈ܡܳܝܶܐ ܚܪܺܝܙܺܝܢ: ܐܳܘ ܠܛܰܒ̈ܥܶܐ ܛܳܒ̈ܶܐ ܐܰܪܒܥܺܝܢ ܕܥܰܡ ܚܰܕ ܙܡܰܪܓܕܳܐ ܣܰܓܺܝ ܫܽܘܦܪ̈ܶܐ ܡܳܪܝ ܒܶܗܢܰܡ ܒܰܟܠܺܝܠܶܗ ܕܚܰܬܢܳܐ ܫܡܰܝܳܢܳܐ ܡܰܙܗܪܺܝܢ: ܐܳܘ ܠܝܰܕܺܝ̈ܕܶܐ ܘܰܪ̈ܚܺܝܡܶܐ ܐܰܪܒܥܺܝܢ ܕܥܰܡ ܚܰܕ ܙܡܺܝܢܳܐ ܚܰܒܺܝܒܳܐ ܡܳܪܝ ܒܶܗܢܰܡ ܒܰܚܠܽܘܠܐ ܫܡܰܝܳܢܳܐ ܪܳܦܣܺܝܢ ܘܚܳܕܶܝܢ: ܐܳܘ ܠܟܰܫܺܝܪ̈ܶܐ ܘܢܰܨܺܝ̈ܚܶܐ ܐܰܪܒܥܺܝܢ ܕܥܰܡ ܚܰܕ ܦܰܠܳܚܳܐ ܛܳܒܳܐ ܡܳܪܝ ܒܶܗܢܰܡ ܒܟܰܪܡܶܗ ܪܽܘܚܳܢܳܝܳܐ ܕܡܳܪܝܳܐ ܨܒܰܐܘܳܬ ܦܳܠܚܺܝܢ: ܐܳܘ ܠܶܠܽܘܪ̈ܶܐ ܚܰܠܝ̈ܰܝ ܩܺܝ̈ܢܳܬܳܐ ܐܰܪܒܥܺܝܢ ܕܥܰܡ ܚܰܕ ܐܽܘܪܓܰܢܽܘܢ ܡܗܰܕܪܳܐ ܡܳܪܝ ܒܶܗܢܰܡ ܩܺܝ̈ܢܳܬܳܐ ܠܥܺܝ̈ܙܳܬ ܒܪܽܘܚܳܐ ܩܰܕܺܝܫܳܐ ܡܙܰܡܪܺܝܢ: ܐܳܘ ܠܡܰܒܽܘ̈ܥܶܐ ܥܰܬܺܝܪ̈ܶܐ ܐܰܪܒܥܺܝܢ ܕܥܰܡ ܚܰܕ ܓܺܝܚܽܘܢ ܪܰܒܳܐ ܡܳܪܝ ܒܶܗܢܰܡ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ ܡܓܺܝܚܺܝܢ: ܐܳܘ ܠܢܳܛܽܘܪ̈ܶܐ ܚܰܟܺܝ̈ܡܶܐ ܐܰܪܒܥܺܝܢ ܕܥܰܡ ܚܰܕ ܩܽܘܒܰܪܢܺܝܛܺܝ ܣܰܟܽܘܠܬܳܢܳܐ ܡܳܪܝ ܒܶܗܢܰܡ ܠܢܰܦ̈ܫܳܬܳܐ ܕܛܳܝ̈ܦܳܢ ܒܝܰܡܳܐ ܒܳܠܽܘܥܳܐ ܡܫܰܘܙܒܺܝܢ: ܐܳܘ ܠܣܳܦܪ̈ܶܐ ܡܗܺܝܪ̈ܶܐ ܐܰܪܒܥܺܝܢ ܕܥܰܡ ܚܰܕ ܢܽܘܡܺܝܩܳܐ ܘܡܰܠܦܳܢܳܐ ܕܩܽܘܫܬܳܐ ܡܳܪܝ ܒܶܗܢܰܡ ܫܒܺܝܠܐ ܕܚܰܝ̈ܶܐ ܕܡܰܘܒܶܠ ܠܡܰܠܟܽܘܬܳܐ ܕܰܫܡܰܝܳܐ ܒܰܥܒܳܕܳܐ ܡܰܠܦܺܝܢ: ܐܳܘ ܠܥܽܘ̈ܙܰܝܠܐ ܙܪ̈ܺܝܙܶܐ ܐܰܪܒܥܺܝܢ ܕܥܰܡ ܚܰܕ ܐܰܝܠܐ ܕܩܽܘܫܬܳܐ ܘܬܰܡܺܝܡܳܐ ܡܳܪܝ ܒܶܗܢܰܡ ܠܬܰܢܺܝ̈ܢܶܐ ܡܶܬܝܰܕ̈ܥܳܢܶܐ ܒܺܝܫܳܐ ܘܚܰܝܠܰܘ̈ܳܬܶܗ ܡܓܰܡܪܺܝܢ: ܐܳܘ ܠܦܺܝܪ̈ܡܶܐ ܡܰܠܝ̈ܰܝ ܗܶܪ̈ܽܘܡܶܐ ܐܰܪܒܥܺܝܢ ܕܥܰܡ ܚܰܕ ܪ̈ܺܝܫܟܳܗܢܶܐ ܡܳܪܝ ܒܶܗܢܰܡ ܡܰܥܛܪܺܝܢ: ܘܡ̣ܶܢ ܐ̱ܢܳܫܽܘܬܳܐ ܟܽܠܳܗ̇ ܟܺܐܒ̈ܶܐ ܘܟܽܘܪ̈ܗܳܢܶܐ ܡܛܰܠܩܺܝܢ: ܐܘ ܠܰܨܠܰܘ̈ܠܳܝܶܐ ܡܠܺܝ̈ܠܐ ܐܰܪܒܥܺܝܢ ܕܥܰܡ ܚܰܕ ܕܰܚܠܽܘܠܐ ܡܳܪܝ ܒܶܗܢܰܡ ܠܫܶܚܪ̈ܶܐ ܕܰܚܙܺܝܪ̈ܶܐ ܡܰܪܗܒܺܝܢ: ܐܳܘ ܠܩܽܘܢܛܳܪ̈ܶܐ ܚܰܪ̈ܺܝܦܶܐ ܐܰܪܒܥܺܝܢ ܕܥܰܡ ܚܰܕ ܢܰܝܙܟܳܐ ܠܛܺܝܫ ܒܰܕܡܳܐ ܡܳܪܝ ܒܶܗܢܰܡ ܠܛܽܘ̈ܠܳܩܰܘܗܝ ܕܪܺܝܫ ܒܺܝܫܬܳܐ ܡܒܰܣܒܣܺܝܢ: ܐܳܘ ܠܪ̈ܺܝܫܰܝ ܒ̈ܳܬܶܐ ܡܗܰܝ̈ܡܢܶܐ ܐܰܪܒܥܺܝܢ ܕܥܰܡ ܚܰܕ ܓܺܝܙܰܒܪܳܐ ܛܳܒܳܐ ܡܳܪܝ ܒܶܗܢܰܡ ܥܰܠ ܒܶܝܬ ܓܰܙܶܗ ܪܰܒܳܐ ܕܡܰܠܟܳܐ ܕܡܰܠܟ̈ܶܐ ܡܗܰܝܡܢܺܝܢ ܘܠܰܣܢܺܝ̈ܩܶܐ ܘܚܰܣܺܝܪ̈ܶܐ ܫ̈ܶܐܠܳܬܗܽܘܢ ܡܦܰܢܶܝܢ: ܐܳܘ ܠܫܺܝܦܽܘܪ̈ܶܐ ܪ̈ܳܡܶܐ ܐܰܪܒܥܺܝܢ ܕܥܰܡ ܚܰܕ ܪܰܥܡܳܐ ܥܰܙܺܝܙܳܐ ܡܳܪܝ ܒܶܗܢܰܡ ܠܽܘܩܒܰܠ ܟܶܢ̈ܫܶܐ ܕܓܰܝ̈ܳܣܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܪܳܥܡܺܝܢ: ܐܳܘ ܠܰܫ̈ܠܰܕܶܐ ܚܰܪ̈ܺܝܒܳܬܳܐ ܐܰܪܒܥܺܝܢ ܕܥܰܡ ܚܰܕ ܩܛܺܝܠܐ ܘܰܚܪܺܝܒܳܐ ܡܳܪܝ ܒܶܗܢܰܡ ܣܺܝ̈ܡܳܢ: ܘܡ̣ܶܢ ܕܰܚܺܝܚܗܽܘܢ ܕܰܝ̈ܘܶܐ ܚܰܪ̈ܡܶܐ ܪܳܥܠܺܝܢ: ܘܰܟܪ̈ܺܝܗܶܐ ܘܡܰܪ̈ܥܶܐ ܐܳܣܝܽܘܬܳܐ ܡ̣ܶܢ ܫܟܺܝ̈ܢܳܬܗܽܘܢ ܢܳܣܒܺܝܢ: ܐܳܘ ܠܬܰܘܪ̈ܶܐ ܚܰܝܠܬܳܢ̈ܶܐ ܐܰܪܒܥܺܝܢ ܕܥܰܡ ܚܰܕ ܐܺܝܙܒܰܪܟܳܐ ܥܰܫܺܝܢܳܐ ܡܳܪܝ ܒܶܗܢܰܡ ܒܢܺܝܪܳܐ ܕܣܳܗܕܽܘܬܳܐ ܟܕܺܝܢܺܝܢ ܘܦܽܘܠܚܳܢܳܐ ܪܽܘܚܳܢܳܝܳܐ ܥܳܒܕܺܝܢ: ܒܟܽܘܢ ܗܳܫܳܐ ܛܳܦܣܺܝܢܰܢ ܘܡܶܢܟܽܘܢ ܒܳܥܶܝܢܰܢ: ܐܳܘ ܣܳܗ̈ܕܶܐ ܩܰܕܺܝ̈ܫܶܐ ܕܬܶܬܟܰܫܦܽܘܢ ܚܠܳܦܰܝܢ ܠܡܳܪܝܳܐ ܡܫܺܝܚܳܐ ܡܟܰܠܠܳܢܟܽܘܢ ܗ̇ܰܘ ܕܡܶܛܽܠܳܬܶܗ ܐܶܬܩܰܛܰܠܬܽܘܢ: ܐܶܬܕܰܟܪܘ ܕܡ̣ܶܢ ܟܝܳܢܳܐ ܕܺܝܠܰܢ ܐܺܝܬܰܝܟܽܘܢ: ܘܚܰܘܰܘ ܠܶܗ ܕܡܳܐ ܚܰܣܝܳܐ ܕܡ̣ܶܢ ܨܰܘܪ̈ܰܝܗܽܘܢ: ܡܶܛܽܠ ܕܝܰܩܺܝܪ ܗ̣ܽܘ ܕܶܡܟܽܘܢ ܒܥܰܝܢܰܘ̈ܗܝ: ܡܥܳܕ ܗ̣ܽܘ ܓܶܝܪ ܥܳܒܶܕ ܨܶܒܝܳܢܳܐ ܕܺܝܠܟܽܘܢ ܒܟܽܠܡܶܕܶܡ ܥܰܠܗܳܝ ܕܣܰܓܺܝ ܐܰܚܶܒܬܽܘܢܳܝܗܝ: ܒܥܰܘ ܚܠܳܦܰܝܢ ܐܳܘ ܩܰܕܺܝ̈ܫܶܐ: ܐܶܡܰܪܽܘܢ ܠܶܗ ܡܶܛܽܠܳܬܰܢ ܐܳܘ ܕܟܰܝ̈ܳܐ: ܐܰܝܟܰܢܳܐ ܕܢܰܥܒܰܪ ܡܶܢܰܢ ܙܰܒ̈ܢܶܐ ܒܺܝ̈ܫܶܐ ܘܡܰܚ̈ܘܳܬܳܐ ܩܰܫ̈ܝܳܬܳܐ: ܒܥܰܘ ܡܶܢܶܗ ܕܰܢܢܰܛܰܪ ܠܰܢ ܡܶܢܟܽܠ ܢܶܣܝܽܘ̈ܢܶܐ ܥܰܣ̈ܩܶܐ ܘܰܐܒܕܳܢܳܐ ܕܒܰܚܛܳܗ̈ܶܐ: ܐܶܬܟܰܫܰܦܘ ܠܶܗ ܐܳܘ ܚܠܺܝ̈ܨܶܐ ܕܰܢܩܰܒܶܠ ܙܶܕ̈ܩܶܐ ܘܕܶܒ̈ܚܶܐ ܕܺܝܠܰܢ ܕܰܢܫܰܪܬܰܚ ܠܢܰܦ̈ܫܳܬܰܢ ܒܰܥܒܳܕ̈ܶܐ ܛܳܒ̈ܶܐ: ܒܥܰܘ ܡܶܢܶܗ ܡܶܛܽܠ ܟܪ̈ܺܝܗܶܐ ܘܰܐܠܺܝ̈ܨܶܐ ܘܳܐܦ ܡܶܬܕܰܝ̈ܘܢܳܢܶܐ ܕܢܶܣܥܽܘܪ ܐܶܢܽܘܢ ܒܰܡܪܰܚܡܳܢܽܘܬܶܗ: ܐܶܬܟܰܫܰܦܘ ܠܶܗ ܡܶܛܽܠ ܥ̈ܰܠܠܳܬܳܐ ܕܢܶܬܢܰܛܪ̈ܳܢ ܡ̣ܶܢ ܢܶܟܝ̈ܳܢܶܐ: ܘܰܢܫܰܟܶܢ ܠܐܪ̈ܥܳܬܳܐ ܡܶܛܪ̈ܶܐ ܡܫܰܝ̈ܢܶܐ ܘܰܪ̈ܣܺܝܣܶܐ ܣܒܺܝ̈ܣܶܐ: ܐܰܦܺܝܣܘ ܠܶܗ ܡܶܛܽܠ ܫܰܝܢܳܐ ܘܰܫܠܳܡܳܐ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ ܕܰܒܟܽܠܳܗ̇ ܬܺܒܶܝܠ: ܐܶܡܰܪܘ ܠܶܗ ܕܚܽܘܢ ܠܚܰܛܳܝ̈ܶܐ: ܘܢܰܦܢܶܐ ܠܛܳܥܰܝ̈ܳܐ ܠܘܳܬܶܗ ܘܢܶܬܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܠܟܶܢ̈ܫܶܐ ܕܶܐܬܛܰܝܰܒܘ ܠܥܺܐܕܟܽܘܢ ܘܳܐܦ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܶܗ: ܕܰܚܢܰܢ ܘܗܶܢܽܘܢ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܰܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

 

ܪܺܝܚܳܐ ܚܰܠܝܳܐ ܕܒܰܠܐܱܣܡܽܘܢ ܡܽܘܪܳܢܳܝܳܐ ܕܗܳܐ ܝܰܘܡܳܢܳܐ ܦܳܐܰܚ ܡ̣ܶܢ ܓܰܪ̈ܡܰܝܟ ܡܳܪܝ ܒܶܗܢܰܡ ܣܳܗܕܳܐ ܢܰܨܺܝܚܳܐ: ܗ̣ܽܘ ܢܪܰܥܶܐ ܠܡܳܪܝܳܐ ܡܳܪܳܟ ܒܝܽܘܡ ܥܰܕܥܺܐܕܳܟ ܗܳܢܳܐ: ܚܠܳܦ ܚܰܛܳܝ̈ܶܐ ܘܰܟܪ̈ܺܝܗܶܐ ܘܡܶܣ̈ܟܺܢܶܐ ܕܰܪܟܺܝܢܺܝܢ ܗܳܫܳܐ ܩܕܳܡܰܝܟ: ܘܳܐܣܝܽܘܬܳܐ ܛܳܒܬܳܐ ܕܣܳܦܩܳܐ ܠܗܽܘܢ ܫܰܟܶܢ: ܡ̣ܶܢ ܒܶܝܬ ܓܰܙܶܗ ܕܰܡܫܺܝܚܳܐ ܡܳܪܳܟ: ܕܡܰܓܥܶܠ ܗ̣ܽܘ ܒܺܐܝ̈ܕܰܝܳܐ ܕܺܝܠܳܟ ܣܳܗܕܳܐ ܒܪܺܝܟܳܐ ܘܥܰܠ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܢܶܗܘܽܘܢ: ܗܳܫܳܐ܀

 

 

 

ܦܪܘܡܝܘܢ

 

 

 

ܫܽܘܒ̈ܚܶܐ ܠܐ ܡܶܫܬܰܬܩ̈ܳܢܶܐ ܘܪܽܘܡܪ̈ܳܡܶܐ ܠܐ ܡܶܬܥܰܒܪ̈ܳܢܶܐ ܘܩܽܘܠܳܣ̈ܶܐ ܠܐ ܡܶܬܚܰܓܪ̈ܳܢܶܐ: ܒܢܶܥ̈ܡܳܬܳܐ ܚܰܠܝ̈ܳܬܳܐ ܢܶܫܬܘܶܐ ܕܰܢܩܰܪܶܒ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܚܰܬܐܳ ܐܺܝܬܝܳܝܬܳܐ ܘܰܡܬܽܘܡܳܝܬܳܐ: ܬܠܳܬܳܐ ܩܢܽܘ̈ܡܶܐ ܣܓܺܝ̈ܕܶܐ ܘܰܬܠܳܬܳܐ ܫܡܳܗ̈ܶܐ ܡܝܰܩܪ̈ܶܐ: ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܗ̇ܰܘ ܕܰܡܝܰܬܰܪ ܗ̣ܽܘ ܠܘܳܬܶܗ ܡܰܘܬܳܐ ܕܙܰܕܺܝ̈ܩܰܘܗܝ ܘܝܰܩܺܝܪ ܗ̣ܽܘ ܕܶܡܗܽܘܢ ܒܥܰܝܢܰܘ̈ܗܝ: ܗ̇ܰܘ ܕܰܠܣܳܗܕܳܐ ܢܰܨܺܝܚܳܐ ܡܳܪܝ ܒܶܗܢܰܡ ܩܪܳܐ ܡ̣ܶܢ ܚܶܫܽܘܟܳܐ ܘܥܰܡܛܳܢܳܐ ܕܛܳܥܝܽܘܬܳܐ ܠܘܳܬ ܢܽܘܗܪܳܐ ܕܰܫܪܳܪܳܐ ܕܶܐܘܢܓܶܠܝܽܘܢ: ܘܡ̣ܶܢ ܚܽܘܒܳܪܳܐ ܡܟܰܡܗܳܐ ܕܠܐ ܝܺܕܰܥܬܳܐ ܠܘܳܬ ܨܶܡܚܳܐ ܕܺܝܕܰܥܬܳܐ ܐܠܰܗܳܝܬܳܐ: ܘܡ̣ܶܢ ܣܶܓܕܬܳܐ ܕܒܶܪ̈ܝܳܬܳܐ ܠܘܳܬ ܣܶܓܕܬܳܐ ܕܺܝܠܶܗ ܪܽܘܚܳܢܳܝܬܳܐ: ܘܡ̣ܶܢ ܙܰܗܡܽܘܬܳܐ ܕܕܶܒ̈ܚܶܐ ܕܚܰܝܘ̈ܳܬܳܐ ܘܢܽܘ̈ܩܳܝܶܐ ܛܰܡ̈ܶܐܐ ܕܰܥܠܰܘ̈ܳܬܳܐ ܠܘܳܬ ܕܶܒܚܳܐ ܡܠܺܝܠܐ ܕܠܐ ܡܽܘܡܳܐ ܕܰܚܠܳܦ ܟܽܠܶܗ ܥܳܠܡܳܐ ܐܶܬܕܒܰܚ ܠܦܽܘܪܩܳܢܳܐ ܕܢܰܦ̈ܫܳܬܳܐ ܕܰܡܗܰܝ̈ܡܢܶܐ: ܘܳܐܦ ܗ̣ܽܘ ܣܳܗܕܳܐ ܩܢܽܘܡܶܗ ܩܰܪܶܒ ܠܶܗ ܕܶܒܚܳܐ ܡܠܺܝܠܐ ܘܩܽܘܪܒܳܢܳܐ ܡܩܰܒܠܐ ܡ̣ܶܢ ܐܺܝ̈ܕܰܝ ܐܰܒܽܘܗܝ ܡܰܠܟܳܐ ܥܰܘܳܠܐ: ܘܗܳܫܳܐ ܥܒܺܝܕ ܣܢܺܐܓܪܳܐ ܚܠܳܦ ܐܰܝܠܶܝܢ ܕܒܶܗ ܡܶܬܓܰܘܣܺܝܢ ܘܥܽܘܕܪ̈ܳܢܶܐ ܐܰܡܺܝ̈ܢܶܐ ܡܫܰܟܶܢ ܠܐܝܠܶܝܢ ܕܒܶܗ ܛܳܦܣܺܝܢ: ܕܠܶܗ ܠܗܰܘ ܕܰܩܪܳܝܗܝ ܠܘܳܬܶܗ ܘܚܰܝܠܶܗ ܘܢܰܨܚܶܗ ܒܰܐܓܽܘܢܳܐ ܕܚܰܫ̈ܶܐ: ܘܝܰܗܒ ܠܶܗ ܫܽܘܠܛܳܢܳܐ ܥܰܠ ܫܺܐܕ̈ܶܐ ܩ̈ܳܠܐ ܚܠܰܝ̈ܳܐ ܕܬܶܫܒ̈ܚܳܬܳܐ ܣܒܺܝ̈ܣܳܬܳܐ ܒܢܶܥ̈ܡܳܬܳܐ ܗܰܢܺܝ̈ܳܐܬܐ ܢܫܰܘܫܶܛ: ܒܗܳܢܳܐ܀

 

 

 

ܣܕܪܐ

 

 

 

ܡܳܪܝܳܐ ܐܠܰܗܳܐ ܛܳܒܳܐ ܘܛܽܘܒܬܳܢܳܐ ܘܰܡܫܰܟܢܳܢܳܐ ܕܛܳܒ̈ܳܬܳܐ: ܗ̇ܰܘ ܥܰܬܺܝܪܳܐ ܒܡܰܘ̈ܗܒܳܬܳܐ ܘܰܫܦܺܝܥܳܐ ܒܫܽܘ̈ܟܳܢܶܐ: ܗ̇ܰܘ ܕܰܩܪܳܐ ܠܐܝܠܶܝܢ ܕܠܐ ܐܺܝܬܰܝܗܽܘܢ ܗܘܰܘ ܘܰܠܘܳܬ ܡܶܫܟܚܳܢܽܘܬܳܐ ܐܰܝܬܺܝ: ܘܰܠܠܐ ܡܶܬܡܰܨ̈ܝܳܢܝܳܬܳܐ ܠܘܳܬ ܡܶܬܡܰܨܝܳܢܽܘܬܳܐ ܩܰܪܶܒ: ܘܰܒܗܳܠܶܝܢ ܚܰܘܺܝ ܚܰܝܠܐ ܕܥܳܒܽܘܕܽܘܬܶܗ ܘܬܽܘܩܦܳܐ ܕܓܰܢ̱ܒܳܪܽܘܬܶܗ: ܟܰܕ ܚܙܰܝܬ ܕܶܝܢ ܐܳܘ ܫܒܺܝܚ ܒܓܰܐܝܽܘܬܳܐ ܠܰܒܪܺܝܬܳܟ ܗܳܕܶܐ ܕܠܰܚܒܳܠܐ ܫܶܪܟܰܬ݀ ܗ̇ܳܝ ܕܒܰܒܪܳܟ ܚܰܒܺܝܒܳܐ ܒܪܰܝܬ ܘܬܰܩܶܢܬ: ܗ̇ܰܘ ܡܶܠܬܳܐ ܘܚܶܟܡܬܳܐ ܕܺܝܠܳܟ ܘܨܰܠܡܳܐ ܘܝܽܘܩܢܳܐ ܘܙܺܝܘܳܐ ܕܦܰܐܝܽܘܬܳܟ: ܠܶܗ ܟܰܕ ܠܶܗ ܫܰܕܰܪܬ ܩܢܽܘܡܳܐܝ̣ܬ ܠܦܽܘܪܩܳܢܳܗ̇ ܡ̣ܶܢ ܛܳܥܝܽܘܬܳܐ ܕܰܐܚܺܝܕܳܐ ܗܘܳܬ ܒܳܗ̇: ܗ̇ܰܘ ܡ̇ܰܢ ܕܟܰܕ ܢܚܶܬ ܠܐ ܫܰܢܺܝ ܡ̣ܶܢ ܠܘܳܬܳܟ: ܘܰܒܝܰܕ ܡܰܚܰܬܬܶܗ ܫܰܝܢܳܐ ܥܒܰܕ ܒܶܝܬ ܥܶܠܳܝ̈ܶܐ ܠܬܰܚܬܳܝ̈ܶܐ: ܘܰܒܝܰܕ ܒܶܣܪܶܗ ܗ̇ܰܘ ܕܚܰܝܶܕ ܠܶܗ ܡ̣ܶܢ ܒܬܽܘܠܬܳܐ ܕܠܐ ܡܢܰܣܝܰܬ݀ ܒܙܽܘܘܳܓܳܐ ܦܰܪܣܺܝ ܠܐܪ̈ܟܰܐܣ ܘܰܠܫܰܠܺܝ̈ܛܳܢܶܐ ܐܰܚܺܝ̈ܕܰܝ ܥܳܠܡܳܐ ܗܳܢܳܐ ܚܶܫܽܘܟܳܐ: ܘܰܒܝܰܕ ܨܠܺܝܒܶܗ ܦܳܪܽܘܩܳܝܳܐ ܘܡܰܥܒܶܕ ܚܰܝ̈ܶܐ: ܠܒܺܝܫܳܐ ܣܚܰܦ ܘܰܠܡܰܘܬܳܐ ܩܛܰܠ ܘܠܰܫܝܽܘܠ ܐܰܚܪܶܒ: ܘܠܐܝܠܶܝܢ ܕܰܚܒܺܝܫܺܝܢ ܗܘܰܘ ܒܳܗ̇ ܡ̣ܶܢ ܥܳܠܰܡ ܐܰܦܶܩ ܠܘܳܬ ܢܽܘܗܪܳܐ ܕܰܫܪܳܪܳܐ ܘܠܰܫܡܰܝܳܐ ܕܩܽܘܕܫܶܗ ܐܰܣܶܩ: ܘܟܰܕ ܥܰܠ ܨܠܺܝܒܳܐ ܐܺܝܬܰܘܗܝ ܗܘܳܐ ܘܒܰܦܫܳܛܳܐ ܕܺܐܝܕܰܘ̈ܗܝ ܚܰܣ̈ܝܳܬܳܐ ܠܐܪܥܳܐ ܟܽܠܳܗ̇ ܩܪܳܐ ܘܟܰܢܶܫ ܠܘܳܬܶܗ: ܘܰܠܥܰܡ̈ܡܶܐ ܛܳܥܰܝ̈ܳܐ ܠܘܳܬ ܣܶܓܕܬܳܐ ܕܺܝܠܳܟ ܘܕܺܝܠܶܗ ܘܰܕܪܽܘܚܳܐ ܩܰܕܺܝܫܳܐ ܢܓܰܕ ܘܰܐܝܬܺܝ: ܘܰܚܠܳܦ ܟܽܠܳܗ̇ ܒܪܺܝܬܳܐ ܩܽܘܪܒܳܢܳܐ ܡܠܺܝܠܐ ܘܪܺܝܚܳܐ ܒܰܣܺܝܡܳܐ ܗܘܳܐ: ܘܠܳܟ ܪܰܥܺܝ ܥܰܡ ܒܶܪ̈ܝܳܬܳܟ: ܗ̣ܽܘ ܬܽܘܒ ܟܰܕ ܗ̣ܽܘ ܒܪܶܚܡܰܬ݀ ܐ̱ܢܳܫܽܘܬܶܗ ܐܺܝܬܝܳܝܬܳܐ: ܡܕܰܒܪܳܢܳܐܝ̣ܬ ܠܘܳܬ ܒܪܺܝܬܳܐ ܕܺܝܠܶܗ ܐܶܬܪܟܶܢ ܒܚܽܘܒܶܗ ܐܰܘܟܺܝܬ ܠܘܳܬ ܬܶܐܘܳܪܺܝܰܐ ܘܝܳܪܬܽܘܬܳܐ ܕܺܝܠܶܗ: ܕܰܚܙܳܗ̇ ܗܘܳܐ ܕܒܰܚܒܳܪܳܐ ܕܛܳܥܝܽܘܬܳܐ ܘܰܕܚܰܢܦܽܘܬܳܐ ܐܺܝܬܶܝܗ̇ ܗܘܳܬ: ܘܣܶܓܕܬܳܐ ܕܠܳܟ ܪܚܺܝܡܳܐ ܘܡܶܬܬܚܺܝܒܳܐ ܠܨܰܠܡ̈ܶܐ ܚܰܪ̈ܫܶܐ ܕܛܳܥܝܽܘܬܳܐ ܡܩܰܪܒܳܐ ܘܕܶܒ̈ܚܶܐ ܘܢܽܘ̈ܩܳܝܶܐ ܠܰܥܒܳܕ ܐܺܝ̈ܕܰܝܳܐ ܡܰܣܩܳܐ ܘܰܠܩܰܝ̈ܣܶܐ ܘܟܺܐܦ̈ܶܐ ܘܰܓܠܺܝ̈ܦܶܐ ܐܠܰܗ̈ܶܐ ܩܳܪܝܳܐ: ܘܣܰܒܪܳܗ̇ ܘܬܽܘܟܠܳܢܳܗ̇ ܥܠܰܝܗܽܘܢ ܣܺܝܡܳܐ: ܗܳܝܕܶܝܢ ܐܰܪܚܶܫ ܒܠܶܒܶܗ ܕܫܰܦܺܝܪ ܫܡܳܐ ܘܰܗܕܺܝܪ ܩܰܘܡܬܳܐ ܘܚܰܟܺܝܡ ܒܺܝܕܰܥܬܳܐ ܡܳܪܝ ܒܶܗܢܰܡ ܒܪܶܗ ܕܣܰܢܚܰܪܺܝܒ ܡܰܠܟܳܐ: ܘܰܐܝܟ ܕܰܠܢܰܚܫܺܝܪܳܐ ܕܨܰܝܕܳܐ ܐܰܦܩܶܗ ܥܰܡ ܓܽܘܕܳܐ ܕܺܝܠܶܗ ܙܗܺܝܬܳܐ ܕܰܐܪܒܥܺܝܢ ܦܳܠܚ̈ܶܐ: ܘܰܐܝܟ ܦܽܘܪܣܳܢܝܳܐ ܠܘܳܬ ܦܽܘܪ̈ܣܳܢܝܶܐ ܚܰܝܽܘܬܳܐ ܡܶܕܶܡ ܫܰܦܺܝܪܰܬ݀ ܚܶܙܘܳܐ ܐܰܝܟ ܠܰܩܛܳܐ ܣܳܡ ܩܕܳܡܰܝܗܽܘܢ: ܘܰܒܨܺܝܕܬܶܗ ܐܰܥܶܠ ܚܒܰܫ ܐܶܢܽܘܢ: ܘܰܒܝܰܕ ܓܶܠܝܳܢܳܐ ܕܚܰܘܺܝ ܒܰܫܦܽܘܠܶܗ ܕܛܽܘܪܳܐ ܕܰܐܠܦܳܦ: ܗ̇ܰܘ ܕܒܶܗ ܥܳܡܰܪ ܗܘܳܐ ܡܳܪܝ ܡܰܬܰܝ ܓܰܒܝܳܐ ܪܺܝܫܳܐ ܘܰܡܕܰܒܪܳܢܳܐ ܕܫܰܒܥܳܐ ܐܠܰܦܰܝ̈ܳܐ ܕܰܒܛܽܘܪ̈ܶܐ ܘܢܰܚ̈ܠܐ ܬܚܶܝܬ ܦܽܘܩܕܳܢܶܗ ܣܺܝܡܺܝܢ ܗܘܰܘ: ܠܘܳܬܶܗ ܕܶܝܢ ܕܗܳܢܳܐ ܚܠܺܝܨܳܐ ܫܰܕܪܶܗ ܐܰܝܟܰܢܳܐ ܕܰܢܗܰܕܶܝܘܗܝ ܠܐܘܪܚܳܐ ܕܰܫܪܳܪܳܐ ܘܡܶܢܒܳܬܰܪ ܕܩܰܒܶܠ ܡܳܪܝ ܒܶܗܢܰܡ ܡܰܠܦܳܢܽܘܬܳܐ ܕܣܳܒܳܐ: ܬܽܘܒ ܬܒܰܥ ܡܶܢܶܗ ܕܢܶܚܽܘܬ ܥܰܡܶܗ ܘܢܰܐܣܶܐ ܠܚܳܬܶܗ ܡ̣ܶܢ ܫܘܽܚܢܳܐ ܡܰܪܺܝܪܳܐ ܕܥܰܠ ܓܽܘܫܡܳܗ̇ ܗ̇ܰܘ ܕܡ̣ܶܢ ܐܳܣܰܘ̈ܳܬܳܐ ܕܠܐ ܡܶܢܝܳܢ ܐܶܬܥܨܶܒ ܘܰܥܠܰܝܗܽܘܢ ܘܥܰܠ ܣܰܡܡܳܢܰܝ̈ܗܽܘܢ ܡܪܰܕ: ܗ̣ܽܘ ܕܶܝܢ ܠܒܺܝܒܳܐ ܡܳܪܝ ܒܶܗܢܰܡ ܡܠܐܷ ܡ̣ܶܢ ܪܽܘܚܳܐ ܩܰܕܺܝܫܳܐ ܐܰܫܩܶܠ ܠܶܗ ܠܘܰܥܕܳܗ̇ ܕܕܽܘܟܬܳܐ ܗ̇ܳܝ ܕܒܳܗ̇ ܨܒܳܐ ܐܳܣܝܳܐ ܛܳܒܳܐ ܕܰܢܚܰܘܶܐ ܚܰܝܠܶܗ ܠܐ ܡܶܙܕܰܟܝܳܢܳܐ: ܘܰܒܝܰܕ ܨܠܰܘ̈ܳܬܶܗ ܘܒܳܥܘ̈ܳܬܶܗ ܒܦܽܘܩܕܳܢ ܒܳܪܽܘܝܳܐ ܕܟܽܠ: ܐܰܪܥܳܐ ܝܰܒܺܝܫܬܳܐ ܡܰܝ̈ܳܐ ܐܰܒܥܰܬ݀ ܘܡܰܥܡܽܘܕܺܝܬܳܐ ܩܰܕܺܝܫܬܳܐ ܐܶܬܛܰܝܒܰܬ݀: ܘܰܠܣܰܪܳܐ ܡܗܰܝܡܰܢܬܳܐ ܒܡܰܝ̈ܳܐ ܕܰܟܺܝ ܡ̣ܶܢ ܫܽܘܚܢܳܐ ܕܢܰܦܫܳܗ̇ ܘܰܕܦܰܓܪܳܗ̇: ܘܗܳܝܕܶܝܢ ܐܰܥܡܶܕ ܠܩܰܕܺܝܫܳܐ ܡܳܪܝ ܒܶܗܢܰܡ ܘܰܠܓܽܘܕܳܐ ܕܺܝܠܶܗ: ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ: ܐܳܘ ܠܬܶܕܡܽܘܪܬܳܐ ܕܠܐ ܡܶܬܡܰܠܠܐ: ܐܳܘ ܠܕܽܘܡܳܪܳܐ ܕܠܐ ܡܶܬܦܰܫܰܩ: ܒܢ̈ܰܝ ܕܺܐܒ̈ܶܐ ܕܡܶܢܫܶܝܠܝ ܗܘܰܘ ܐܶܡܪ̈ܶܐ ܢܶܨ̈ܶܐ ܚܳܛܽܘ̈ܦܶܐ ܕܰܗܘܰܘ ܠܗܽܘܢ ܝܰܘ̈ܢܶܐ ܬܰܡܺܝ̈ܡܶܐ: ܢܽܘܟܪ̈ܳܝܶܐ ܕܰܗܘܰܘ ܒܰܝ̈ܬܳܝܶܐ: ܪ̈ܰܚܺܝܩܶܐ ܕܰܗܘܰܘ ܩܰܪ̈ܺܝܒܶܐ ܒܢܰܝ̈ܳܐ ܕܚܰܢ̈ܦܶܐ ܕܰܒܚܕ ܥܶܕܳܢܳܐ ܐܶܫܬܰܚܠܰܦ ܘܰܗܘܰܘ ܒܢܰܝ̈ܳܐ ܕܰܐܠܳܗܳܐ: ܒܢ̈ܰܝ ܣܶܡܳܠܐ ܕܒܰܡܠܐܷ ܫܳܥܳܐ ܐܶܬܛܰܟܰܣܘ ܡ̣ܶܢ ܝܰܡܺܝܢܳܐ: ܡ̣ܶܢ ܗܳܪܟܳܐ ܫܰܪܺܝܘ ܡܫܰܒܚܺܝܢ ܟܰܕ ܐܳܡܪܺܝܢ ܬܰܘ ܢܫܰܒܰܚ ܠܡܳܪܝܳܐ ܘܢܶܙܡܰܪ ܠܐܠܳܗܳܐ ܦܳܪܽܘܩܰܢ ܢܩܰܕܶܡ ܐܰܦܰܘ̈ܗܝ ܒܬܰܘܕܺܝܬܳܐ ܘܒܰܙܡܺܝܪ̈ܳܬܳܐ ܢܫܰܒܚܺܝܘܗܝ ܗܽܘܝܽܘ ܥܰܒܕܰܢ ܘܠܐ ܗܘܳܐ ܚܢܰܢ: ܥܰܡܶܗ ܚܢܰܢ ܘܥܳܢ̈ܳܐ ܕܡܰܪܥܺܝܬܶܗ: ܘܟܰܕ ܒܕܰܐܝܟ ܗܳܠܶܝܢ ܡ̈ܶܠܐ ܕܬܶܫܒ̈ܚܳܬܳܐ ܪܳܘܙܺܝܢ ܗܘܰܘ ܐܰܝܟ ܚܰܬܢ̈ܶܐ ܥܛܺܝ̈ܦܰܝ ܟܠܺܝ̈ܠܐ ܕܬܶܫܒܽܘܚܬܳܐ ܠܐܬܽܘܪ ܡܕܺܝܢ̱ܬܳܐ ܥܳܐܠܺܝܢ ܗܘܰܘ: ܘܠܐܒܽܘܗܽܘܢ ܒܬܶܡܗܳܐ ܐܰܩܺܝܡܘ ܗܘܰܘ: ܒܢ̈ܰܝ ܡܕܺܝܢ̱ܬܳܐ ܒܚܽܘܠܡܳܢܗܽܘܢ ܪܳܘܙܺܝܢ ܗܘܰܘ: ܒܫܽܘܚ̈ܠܳܦܰܝܗܽܘܢ ܕܶܝܢ ܛܳܒ ܡܶܬܬܥܺܝܩܺܝܢ ܗܘܰܘ: ܐܰܒܽܘܗܽܘܢ ܕܶܝܢ ܠܣܶܓܕܬܳܐ ܕܰܦܬܰܟܪ̈ܶܐ ܡܙܰܡܶܢ ܗܘܳܐ ܠܗܽܘܢ: ܘܗܶܢܽܘܢ ܨܰܥܪܳܐ ܫܳܕܝܶܢ ܗܘܰܘ ܒܗܽܘܢ: ܐܰܒܽܘܗܽܘܢ ܠܡܰܥܛܳܪܽܘ ܒܶܣ̈ܡܶܐ ܡܩܰܪܶܒ ܗܘܳܐ ܠܗܽܘܢ: ܘܗܶܢܽܘܢ ܪܽܘܩܳܐ ܒܦܰܪ̈ܨܽܘܦܰܝܗܽܘܢ ܙܳܠܚܺܝܢ ܗܘܰܘ: ܟܦܺܝܪ ܒܳܟ ܒܺܝܠ ܥܘܺܝܪܳܐ ܐܳܡܪܺܝܢ ܗܘܰܘ: ܟܦܺܝܪ ܒܳܟ ܒܶܠܰܬܺܝ ܚܰܪܫܳܐ: ܟܦܺܝܪ ܒܳܟ ܟܶܐܘܳܢ ܕܽܘܓܳܐ: ܚܢܰܢ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܡܰܘܕܶܝܢܰܢ ܘܰܡܗܰܝܡܢܺܝܢܰܢ ܚܰܕ ܐܠܰܗܳܐ ܫܰܪܺܝܪܳܐ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ ܘܟܽܠ ܡܳܐ ܕܰܒܗܽܘܢ ܟܦܺܝܪ ܒܰܐܒܳܐ ܘܒܶܐܡܳܐ ܘܰܒܟܽܠܳܗ̇ ܡܰܠܟܽܘܬܳܐ ܐܰܪܥܳܢܳܝܬܳܐ: ܕܚܰܕ ܐܰܒܳܐ ܐܺܝܬ ܠܰܢ ܗ̇ܰܘ ܫܡܰܝܳܢܳܐ ܕܠܐ ܥܳܒܪܳܐ ܡܰܠܟܽܘܬܶܗ ܟܰܕ ܗܳܠܶܝܢ ܫܡܰܥ ܡܰܠܟܳܐ ܐܰܦܶܩ ܐܶܢܽܘܢ ܡ̣ܶܢ ܨܶܝܕܰܘܗܝ ܒܚܶܡܬܳܐ ܩܫܺܝܬܳܐ: ܘܰܦܩܰܕ ܥܠܰܝܗܽܘܢ ܕܟܽܠ ܐܰܝܟܳܐ ܕܢܶܫܬܰܟܚܽܘܢ ܢܶܬܩܰܛܠܽܘܢ: ܗܶܢܽܘܢ ܥܠܰܝ̈ܡܶܐ ܗܕܺܝܪ̈ܶܐ ܢܦܰܩܘ ܡ̣ܶܢ ܠܘܳܬ ܐܰܒܽܘܗܽܘܢ ܐܰܝܟܰܢܳܐ ܕܰܠܘܳܬ ܪܰܒܗܽܘܢ ܡܳܪܝ ܡܰܬܰܝ ܢܺܐܙܽܠ̱ܘܢ ܢܶܣܒܽܘܢ ܒܽܘܪ̈ܟܳܬܶܗ: ܘܰܐܕܪܶܟܘ ܐܶܢܽܘܢ ܩܳܛܽܘ̈ܠܐ ܥܰܠ ܬܶܠܠܐ ܚܰܕ ܘܰܢܟܰܣܘ ܐܶܢܽܘܢ ܒܰܕܡܽܘܬ ܐܶܡܪ̈ܶܐ: ܠܡܳܪܝ ܒܶܗܢܰܡ ܕܶܝܢ ܐܺܝܩܳܪܳܐ ܦܪܰܫܘ ܐܰܝܟ ܡ̇ܰܢ ܕܶܝܢ ܓܳܕܫܳܐ ܢܶܗܦܟܽܘܢ ܡ̣ܶܢ ܬܰܪܥܺܝܬܳܐ ܕܰܩܢܰܘ: ܗܶܢܽܘܢ ܕܶܝܢ ܣܳܗ̈ܕܶܐ ܒܳܬܰܪ ܕܨܰܠܺܝܘ ܘܰܒܥܰܘ ܪ̈ܰܚܡܶܐ ܡ̣ܶܢ ܐܠܰܗܳܐ ܥܰܠ ܥܳܠܡܳܐ: ܗܳܝܕܶܝܢ ܦܫܰܛܘ ܨܰܘܪ̈ܰܝܗܽܘܢ ܐܰܝܟ ܐܶܡܪ̈ܶܐ ܠܢܶܟܣܬܳܐ ܟܰܕ ܐܳܡܪܺܝܢ: ܡܶܛܽܠܳܬܳܟ ܡܳܪܰܢ ܗܳܐ ܡܶܬܢܰܟܣܺܝܢܰܢ ܘܰܐܝܟ ܐܶܡܪ̈ܶܐ ܠܕܶܒܚܬܳܐ ܚܫܺܝܒܺܝܢܰܢ: ܗܳܠܶܝܢ ܟܽܠܗܶܝܢ ܐܶܬܰܝ̈ ܥܠܰܝܢ ܘܠܐ ܦܫܰܛܢ ܐܺܝܕܰܝ̈ܢ ܠܘܳܬ ܐܠܰܗ̈ܶܐ ܢܽܘܟܪ̈ܳܝܶܐ: ܐܶܬܬܥܺܝܪ ܘܠܐ ܬܶܕܡܰܟ ܡܳܪܝܳܐ: ܥܶܗܰܕܶܝܢ ܘܠܐ ܬܶܛܥܶܝܢ: ܘܰܐܦܰܝ̈ܟ ܡܶܢܰܢ ܠܐ ܬܰܗܦܶܟ: ܡ̣ܶܢ ܒܳܬܰܪ ܕܶܐܬܩܰܛܰܠܘ ܘܰܨܒܰܘ ܕܢܰܘܩܕܽܘܢ ܐܶܢܽܘܢ: ܦܩܰܕ ܐܠܰܗܳܐ ܠܐܪܥܳܐ ܘܶܐܨܛܰܪܝܰܬ݀ ܘܠܰܫܠܰܕܰܝ̈ܗܽܘܢ ܒܥܽܘܒܳܗ̇ ܣܰܬܪܰܬ݀: ܡܰܠܟܳܐ ܕܶܝܢ ܐܰܝܟ ܦܽܘܩܕܳܢܳܟ ܐܠܰܗܳܝܳܐ ܐܶܬܢܰܣܺܝ ܡ̣ܶܢ ܕܰܝܘܳܐ ܕܠܶܗ ܣܳܓܶܕ ܗܘܳܐ: ܘܒܰܨܠܰܘ̈ܳܬܶܗ ܕܢܰܨܺܝܚܳܐ ܡܳܪܝ ܡܰܬܰܝ ܐܶܬܚܠܶܡ: ܡܰܢܽܘ ܡܰܘܦܶܐ ܠܗܳܠܶܝܢ ܕܺܝܠܳܟ ܢܰܨܺܝܚܳܐ ܡܳܪܝ ܒܶܗܢܰܡ: ܐܰܘ ܡܰܢܽܘ ܡܰܕܪܶܟ ܠܪܰܘܡܳܐ ܪܰܒܳܐ ܕܩܽܘܠܳܣܰܝ̈ܟ: ܡܰܠܐܟܳܐ ܕܢܽܘܗܪܳܐ ܐܶܬܳܐ ܠܰܫܠܳܡܳܟ: ܐܰܒܳܐ ܕܰܐܒܺܝ̈ܠܐ ܐܰܥܡܕܳܟ: ܐܰܪܥܳܐ ܝܰܒܺܝܫܬܳܐ ܐܰܒܥܰܬ݀ ܡܰܝ̈ܳܐ ܠܰܣܚܳܬܳܟ: ܐܰܪܥܳܐ ܐܶܨܛܰܪܝܰܬ݀ ܘܣܰܬܪܰܬ݀ ܓܘܫܡܳܟ ܐܰܒܳܗܰܝ̈ܟ ܐܶܫܬܰܚܠܰܦܘ ܒܩܶܛܠܳܟ: ܘܰܚܠܳܦ ܕܺܐܒ̈ܶܐ ܗܘܰܘ ܐܶܡܪ̈ܶܐ ܒܰܓܙܳܪܶܗ ܕܡܳܪܳܟ: ܐܳܬܽܘܪ ܐܶܬܬܰܚܕܬܰܬ ܒܡܰܘܬܳܟ: ܫܡܰܝܳܐ ܪܘܰܙܘ ܒܟܽܘܠܳܠܳܟ: ܘܰܐܪܥܳܐ ܪܶܘܙܰܬ݀ ܒܝܰܘܡܳܟ: ܐܰܒܳܐ ܒܰܫܡܰܝܳܐ ܫܡܳܟ ܪܫܰܡ: ܘܰܒܪܳܐ ܒܪܰܘܡܳܐ ܓܢܘܢܳܟ ܩܛܰܪܘ: ܘܪܽܘܚܳܐ ܩܰܕܺܝܫܳܐ ܒܡܰܠܟܽܘܬܶܗ ܫܡܰܝܳܢܺܝܬܳܐ ܟܠܺܝܠܳܟ ܓܕܰܠ: ܟܶܢ̈ܫܶܐ ܕܥܶܠܳܝ̈ܶܐ ܣܳܘܚܺܝܢ ܠܰܫܠܳܡܳܟ: ܘܪ̈ܽܘܚܳܬܳܐ ܕܩܰܕܺܝ̈ܫܶܐ ܛܽܘܒܳܐ ܝܳܗ̈ܒܳܢ ܠܳܟ: ܚܢܰܢ ܕܶܝܢ ܥܰܒܕܰܝ̈ܟ ܟܰܕ ܚܳܕܶܝܢܰܢ ܘܪܳܘܙܺܝܢܰܢ ܟܰܕ ܐܳܡܪܺܝܢܰܢ: ܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ: ܢܶܚܕܽܘܢ ܒܝܰܘܡܳܟ ܟܶܢ̈ܫܶܐ ܕܶܐܬܰܘ ܠܰܫܠܳܡܳܟ: ܢܕܽܘܨܽܘܢ ܒܥܰܕܥܺܐܕܳܟ ܟܺܐܒ̈ܬܳܢܶܐ ܕܶܐܬܰܐܣܺܝܘ ܒܳܟ: ܢܶܪܦܣܽܘܢ ܒܰܚܠܽܘܠܳܟ ܐܰܚ̈ܶܐ ܕܰܡܫܰܡܫܺܝܢ ܩܕܳܡ ܫܟܺܝܢܬܳܟ ܢܶܪܽܘܙܽܘܢ ܒܚܰܓܳܟ ܒܬܽܘ̈ܠܐ ܘܰܒܬܽܘ̈ܠܳܬܳܐ ܕܶܐܨܛܰܝܰܒܘ ܠܕܰܝܪܳܟ: ܟܽܠ ܦܽܘܡܺܝ̈ܢ ܛܽܘܒܳܐ ܝܳܗܒܺܝܢ ܠܳܟ ܘܟܽܠ ܠܶܫܳܢܺܝ̈ܢ ܩܽܘܠܳܣ̈ܶܐ ܡܕܰܫܢܺܝܢ ܠܳܟ: ܘܟܽܠ ܥܰܡ̈ܡܺܝܢ ܕܳܫ̈ܢܶܐ ܥܰܡ ܢܶܕܪ̈ܶܐ ܡܩܰܪܒܺܝܢ ܠܳܟ: ܩܰܒܶܠ ܡܶܢܰܢ ܗܳܟܺܝܠ ܐܳܘ ܐܰܒܳܐ ܕܣܳܗ̈ܕܶܐ ܘܰܚܠܺܝܨ ܒܰܩܪ̈ܰܒܬܳܢܶܐ ܡܳܪܝ ܒܶܗܢܰܡ: ܘܣܰܪܳܐ ܚܳܬܶܗ ܠܰܦܝ̈ܳܣܶܐ ܘܬܰܟܫ̈ܦܳܬܳܐ ܕܠܳܟ ܡܶܬܩܰܪܒܺܝܢ: ܘܶܐܬܕܰܟܪ ܠܕܳܘܝܽܘܬܳܐ ܕܺܝܠܰܢ ܘܠܰܡܚܺܝܠܽܘܬܰܢ ܩܕܳܡ ܡܳܪܳܟ: ܡܥܳܕ ܗ̣ܽܘ ܓܶܝܪ ܡܳܪܳܟ ܡܩܰܒܶܠ ܣܢܺܐܓܪܽܘܬܳܟ ܩܰܕܺܝܫܬܳܐ ܡܶܛܽܠ ܕܡܳܟ ܕܰܐܫܦܰܥܬ ܚܠܳܦ ܫܡܶܗ ܠܐ ܟܳܠܐܷ ܠܳܟ ܫ̈ܶܐܠܳܬܳܟ: ܓܺܝܙܰܒܪܳܐ ܥܒܺܝܕ ܐܰܢ̱ܬ ܥܰܠ ܒܶܝܬ ܓܰܙܶܗ: ܐܰܦܶܩ ܠܰܢ ܡ̣ܶܢ ܣܺܝ̈ܡܳܬܶܗ ܕܡܳܪܳܟ ܐܰܝܠܶܝܢ ܕܝܳܕܰܥ ܐܰܢ̱ܬ ܕܥܳܕܪ̈ܳܢ ܠܳܢ: ܘܰܒܥܺܝ ܡܶܢܶܗ ܚܠܳܦ ܟܪ̈ܺܝܗܶܐ ܕܢܶܬܚܰܠܡܽܘܢ: ܘܰܚܠܳܦ ܐܰܣܺܝܪ̈ܶܐ ܕܢܶܫܬܪܽܘܢ: ܘܰܚܠܳܦ ܡܥ̈ܳܩܶܐ ܕܢܶܬܒܰܝܽܐܘܢ: ܘܰܚܠܳܦ ܫܒ̈ܰܝܳܐ ܕܢܶܬܚܰܪܪܽܘܢ: ܘܰܚܠܳܦ ܪ̈ܕܺܝܦܰܝ ܫܺܐܕ̈ܶܐ ܕܢܶܬܦܰܪܩܽܘܢ: ܘܰܚܠܳܦ ܣܢܺܝ̈ܩܶܐ ܕܢܶܬܬܰܪܣܽܘܢ: ܘܰܚܠܳܦ ܟܰܦ̈ܢܶܐ ܕܢܶܣܒܥܽܘܢ: ܘܰܚܠܳܦ ܟܠܺܝܠܳܗ̇ ܕܫܰܢ̱ܬܳܐ ܕܢܶܬܒܰܪܰܟ: ܘܰܚܠܳܦ ܫܰܒ̈ܛܶܐ ܕܪܽܘܓܙܳܐ ܕܢܶܬܒܰܛܠܽܘܢ: ܘܰܚܠܳܦ ܫܰܝܢܳܐ ܘܰܫܠܳܡܳܐ ܕܢܰܡܠܟܽܘܢ: ܘܰܚܠܳܦ ܪ̈ܺܝܫܰܝ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܢܶܙܕܰܗܽܘܢ: ܘܰܚܠܳܦ ܟܽܠܗܽܘܢ ܡܗܰܝ̈ܡܢܶܐ ܕܢܶܬܒܰܪܟܽܘܢ: ܘܰܚܠܳܦ ܥܰܢܺܝ̈ܕܶܐ ܡܗܰܝ̈ܡܢܶܐ ܒܰܐܘ̈ܳܢܶܐ ܛܽܘܒ̈ܬܳܢܶܐ ܢܶܬܢܺܝܚܽܘܢ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܐܒܳܐ ܕܰܓܒܳܟ: ܘܠܰܒܪܳܐ ܕܰܐܘܪܒܳܟ: ܘܰܠܪܽܘܚܳܐ ܚܰܝܳܐ ܘܩܰܕܺܝܫܳܐ ܕܟܰܠܠܳܟ: ܗܳܫܳܐ܀

 

 

 

ܥܛܪܐ

 

 

 

ܩܕܳܡ ܬܪܳܘܢܺܝܘܳܢ ܕܰܡܪܰܝܡܽܘܬܳܟ ܡܳܪܶܐ ܡܳܪ̈ܰܘܳܬܳܐ: ܢܶܥܽܘܠ ܥܶܛܪܳܐ ܕܗܶܪܽܘܡܬܳܢܳܝܽܘܬ ܦܺܝܪܡܰܢ: ܘܰܐܝܟ ܪܺܝܚ ܕܡܳܐ ܕܣܳܗ̈ܕܰܝܟ ܢܰܨܺܝ̈ܚܶܐ ܡܳܪܝ ܒܶܗܢܰܡ ܘܣܰܪܳܐ ܚܳܬܶܗ ܘܚܰܒܪ̈ܰܘܗܝ ܐܰܪܒܥܺܝܢ: ܢܶܦܽܘܚ ܒܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ: ܘܢܶܛܪܽܘܕ ܡ̣ܶܢ ܢܰܦ̈ܫܳܬܳܐ ܕܰܡܗܰܝ̈ܡܢܶܐ: ܠܟܽܠܳܗ̇ ܙܰܗܡܽܘܬܳܐ ܕܪܺܝܚܳܐ ܕܰܚܛܺܝܬܳܐ: ܘܡ̣ܶܢ ܢܰܣܺܝ̈ܣܶܐ ܠܟܽܠܳܗ̇ ܫܽܘܚܢܳܝܽܘܬܳܐ ܚܳܠܽܘܕܬܳܐ: ܘܡ̣ܶܢ ܗܰܕܳܡ̈ܶܐ ܫܚܺܝ̈ܩܰܝ ܡ̣ܶܢ ܪ̈ܽܘܚܶܐ ܫܰܩܳܪ̈ܳܬܳܐ ܠܟܽܠܳܗ̇ ܚܰܫܳܢܳܝܽܘܬܳܐ ܕܕܰܝ̈ܘܶܐ: ܐܰܝܟܰܢܳܐ ܕܡ̣ܶܢ ܟܽܠ ܬܶܫܬܰܒܰܚ ܘܬܶܬܪܰܡܪܰܡ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

 

 

ܨܠܘܬܐ ܕܫܘܪܝܐ ܕܬܠܬܫܥܝ̈ܢ

 

ܐܝܬܘܗܝ ܕܚܕ ܩܢܘܡܐ ܣܗܕܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ: ܘܰܒܫܰܝܢܳܐ ܐܰܡܺܝܢܳܐ ܘܒܰܫܠܳܡܳܐ ܟܰܗܺܝܢܳܐ ܘܰܒܚܽܘܒܳܐ ܫܰܦܝܳܐ: ܘܰܒܢܰܦܫܳܐ ܢܰܗܺܝܪܬܳܐ: ܘܰܒܚܽܘ̈ܫܳܒܶܐ ܕܟܰܝ̈ܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܕܥܽܘܗܕܳܢܶܗ ܡܫܰܒܚܳܐ ܕܢܰܨܺܝܚ ܒܰܐܬܠܺܝ̈ܛܶܐ ܡܳܪܝ ܦܠܳܢ ܐܰܝܟܰܢܳܐ ܕܒܰܨܠܰܘ̈ܳܬܶܗ ܢܶܬܚܰܝܰܠ ܒܩܰܘܡܳܐ ܕܬܶܫܡܫܬܳܐ: ܘܢܶܣܰܒ ܥܽܘܕܪ̈ܳܢܶܐ ܡ̣ܶܢ ܓܰܪ̈ܡܰܘܗܝ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܦܪܘܡܝܘܢ

 

 

 

ܫܽܘܒ̈ܚܶܐ ܠܐ ܡܰܘܦ̈ܝܳܢܶܐ: ܘܩܽܘܠܳܣ̈ܶܐ ܠܐ ܫܰܠܘܳ̈ܝܶܐ: ܘܺܐܝܩܳܪܳܐ ܠܐ ܡܶܫܬܰܪܝܳܢܳܐ: ܢܶܫܬܘܶܐ ܕܰܢܩܰܪܶܒ ܠܗܰܘ ܕܰܒܚܰܝܠܶܗ ܠܐ ܡܶܬܡܰܚܠܳܢܳܐ ܐܶܬܚܰܝܰܠ ܐܰܬܠܺܝܛܶܗ ܡܳܪܝ ܒܶܗܢܰܡ ܣܳܗܕܳܐ ܢܰܨܺܝܚܳܐ: ܘܰܒܚܶܟܡܬܶܗ ܡܬܽܘܡܳܝܬܳܐ ܐܶܬܚܰܟܰܡ ܐܰܓܽܘܢܺܝܣܛܳܐ ܟܰܫܺܝܪܳܐ: ܘܒܰܫܪܳܪܶܗ ܠܐ ܡܶܙܕܰܟܝܳܢܳܐ ܐܶܬܢܰܗܰܪ ܦܳܠܚܳܐ ܕܺܝܠܶܗ ܙܰܟܳܝܳܐ ܟܰܕ ܠܡܰܠܟ̈ܶܐ ܐܰܟܶܣ ܒܓܰܢ̱ܒܳܪܽܘܬܶܗ ܘܰܠܕܰܝ̈ܳܢܶܐ ܚܰܝܶܒ ܒܚܶܟܡܬܶܗ ܘܰܠܪ̈ܳܕܽܘܦܶܐ ܐܰܒܗܶܬ ܒܚܽܘܡ̈ܣܳܢܶܐ ܕܺܝܠܶܗ: ܘܠܰܫܡܰܝ̈ܳܢܶܐ ܘܠܐܪ̈ܥܳܢܳܝܶܐ ܐܰܦܨܰܚ ܘܚܰܕܺܝ ܒܙܳܟܽܘܬܶܗ: ܠܗܰܘ ܕܚܰܝܠܶܗ ܘܙܰܟܝܶܗ ܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܡܳܪܰܢ ܝܶܫܽܘܥ ܡܫܺܝܚܳܐ ܡܶܠܬܳܐ ܐܠܰܗܳܐ: ܗ̇ܰܘ ܕܺܐܝܬܰܘܗܝ ܦܽܘܪܩܳܢܳܐ ܘܫܽܘܘܙܳܒܳܐ ܘܚܰܝ̈ܶܐ ܘܰܩܝܳܡܬܳܐ: ܘܙܳܟܽܘܬܳܐ ܘܰܫܪܳܪܳܐ ܕܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ ܘܟܽܠܳܗ̇ ܛܳܒܽܘܬܳܐ: ܗ̇ܰܘ ܕܒܰܨܠܺܝܒܳܟ ܙܰܟܳܝܳܐ ܡܰܟܶܟܬ ܠܩܰܪܢܳܐ ܕܚܰܢܦܽܘܬܳܐ: ܘܒܰܟܪܺܝܗܽܘܬ ܒܶܣܪܳܟ ܫܰܦܶܠܬ ܠܚܰܝܠܶܗ ܕܢܳܟܽܘܠܐ: ܘܰܒܡܰܘܬܳܟ ܚܰܝܳܐ ܐܰܡܺܝܬܬ ܠܡܰܘܬܳܐ ܘܠܐ ܡܶܕܶܡ ܥܒܰܕܬܳܝܗܝ ܩܕܳܡ ܐܰܬܠܺܝ̈ܛܰܝܟ ܫܰܪܺܝܪ̈ܶܐ: ܗܳܠܶܝܢ ܕܰܠܟܽܠ ܫܶܢܕܺܝ̈ܢ ܝܰܗܒܘ ܨܰܘܪ̈ܰܝܗܽܘܢ ܘܗܰܕܳܡܰܝ̈ܗܽܘܢ ܡܶܛܽܠ ܚܽܘܒܳܟ ܪܰܒܳܐ ܕܰܠܘܳܬܰܢ: ܟܰܕ ܟܽܠ ܚܰܕ ܚܰܕ ܡܶܢܗܽܘܢ ܒܟܽܠܗܽܘܢ ܬܰܫܢܺܝ̈ܩܶܐ ܨܳܒܶܐ ܕܢܶܬܒܰܩܶܐ ܐܰܝܟ ܕܰܗܒܳܐ ܒܟܽܘܪܳܐ: ܐܰܝܟܰܢܳܐ ܕܨܰܠܡܳܐ ܐܰܘܟܺܝܬ ܝܽܘܩܢܳܐ ܕܚܰܫܰܝ̈ܟ ܢܶܬܚܰܘܶܐ ܒܶܗ ܓܡܺܝܪܳܐܝ̣ܬ ܟܰܕ ܚܰܕ ܡ̇ܰܢ ܒܳܬܰܪ ܐܽܘܠܨ̈ܳܢܶܐ ܣܰܓܺܝ̈ܶܐܐ ܒܢܽܘܪܳܐ ܡܫܰܠܗܰܒܬܳܐ ܐܶܬܓܡܰܪ: ܘܰܐ̱ܚܪܺܢܳܐ ܕܶܝܢ ܒܳܬܰܪ ܒܽܘܣ̈ܒܳܣܶܐ ܡܰܪܺܝܪ̈ܶܐ ܒܣܰܝܦܳܐ ܕܠܐ ܪ̈ܰܚܡܶܐ ܐܶܬܬܢܺܝܚ: ܚܰܕ ܡ̇ܰܢ ܒܳܬܰܪ ܐܰܓܽܘ̈ܢܶܐ ܥܰܙܺܝ̈ܙܶܐ ܒܰܪܓܽܘܡܝܳܐ ܕܟܺܐܦ̈ܶܐ ܫܰܠܶܡ ܝܰܘ̈ܡܳܬܶܗ: ܘܰܐ̱ܚܪܺܢܳܐ ܒܳܬܰܪ ܕܽܘܢ̈ܩܶܐ ܣܒܺܝ̈ܣܶܐ ܒܡܰܣܳܪܳܐ ܕܩܰܝܣܳܐ ܫܰܩܠܳܗ̇ ܠܙܳܟܽܘܬܶܗ: ܚܰܕ ܕܶܝܢ ܒܳܬܰܪ ܗܰܠܟ̈ܳܬܳܐ ܕܥܰܠ ܣܶܟ̈ܶܐ ܒܣܰܦܣܺܝܪܳܐ ܚܰܪܺܝܦܬܳܐ ܐܶܫܬܩܶܠ ܪܺܝܫܶܗ: ܘܰܐ̱ܚܪܺܢܳܐ ܒܳܬܰܪ ܘܳܝ̈ܶܐ ܘܥܳܝ̈ܶܐ ܕܰܐܣܪܰܚܘ ܠܶܗ ܒܘܰܪ̈ܺܝܕܶܐ ܦܰܛܺܝܪ̈ܶܐ ܕܬܰܘܪ̈ܶܐ ܛܰܠܶܩܘ ܚܰܝܽܘܬܶܗ: ܚܰܕ ܕܶܝܢ ܒܳܬܰܪ ܙܢܰܝ̈ ܫܶܢ̈ܕܶܐ ܕܩܰܪܶܒܘ ܠܶܗ: ܒܛܺܝܓܢܳܐ ܕܡܽܘܬ ܢܽܘܢܳܐ ܫܰܢܩܽܘܗܝ ܕܠܐ ܪ̈ܰܚܡܶܐ: ܘܰܐ̱ܚܪܺܢܳܐ ܒܳܬܰܪ ܕܚܰܝ̈ܘܳܬܳܐ ܣܒܰܟ̈ܝ ܒܶܗ ܪܰܚܫܳܐ ܩܳܛܽܘܠܐ ܡܶܪܬܐ ܫܕܳܐ ܒܓܽܘܫܡܶܗ: ܚܰܕ ܕܶܝܢ ܒܳܬܰܪ ܛܽܘܪ̈ܳܦܶܐ ܣܰܓܺܝ̈ܶܐܐ ܒܩܰܕܣܳܐ ܟܰܕ ܪܳܬܰܚ ܐܰܪܡܺܝܘܗܝ ܡܰܪ̈ܳܚܶܐ: ܘܰܐ̱ܚܪܺܢܳܐ ܒܳܬܰܪ ܝܰܩܕܳܢܳܐ ܕܗܰܕ̈ܳܡܶܐ ܒܬܽܘܒܳܪܳܐ ܕܓܰܪ̈ܡܶܐ ܐܰܢܺܝܚܘ ܒܶܗ ܚܶܡܬܗܽܘܢ: ܚܰܕ ܒܳܬܰܪ ܟܘܳܝ̈ܶܐ ܙܺܝ̈ܥܶܐ ܒܩܽܘܟܰܠܺܝܘܳܢ ܕܦܰܪܙܠܐ ܥܰܨܰܪܘ ܡܰܬܢ̈ܳܬܶܗ: ܘܰܐ̱ܚܪܺܢܳܐ ܒܳܬܰܪ ܠܽܘ̈ܠܝܳܬܳܐ ܕܒܰܙܰܥ̈ܝ ܓܰܒܰܘ̈ܗܝ ܠܒܽܘܣ̈ܒܳܣܶܐ ܕܚܰܝ̈ܘܳܬܳܐ ܚܰܒ̈ܳܠܳܬܳܐ ܝܰܗܒܽܘܗ̇ ܠܰܫܠܰܕܶܗ: ܚܰܕ ܕܶܝܢ ܒܳܬܰܪ ܡܰܚ̈ܘܳܬܳܐ ܬܟܺܝ̈ܒܳܬܳܐ ܒܬܰܢܽܘܪܳܐ ܕܰܢܚܳܫܳܐ ܫܰܢܺܝ ܠܘܳܬܶܗ ܡܳܪܶܗ: ܘܰܐ̱ܚܪܺܢܳܐ ܒܳܬܰܪ ܢܶܓ̈ܕܶܐ ܘܰܣܪ̈ܳܩܶܐ ܒܰܙܩܺܝܦܳܐ ܬܠܐܱܘܽܘܗܝ ܒܺܝ̈ܫܶܐ ܐܰܝܟ ܡܳܪܶܗ: ܚܰܕ ܕܶܝܢ ܒܳܬܰܪ ܣܬܽܘܪܝܳܐ ܕܗܰܕܳܡܰܘ̈ܗܝ ܒܓܽܘܙܳܠܐ ܕܢܽܘܪܳܐ ܐܶܬܬܰܪܡܺܝ ܡ̣ܶܢ ܚܰܢ̈ܦܶܐ: ܘܰܐ̱ܚܪܺܢܳܐ ܒܳܬܰܪ ܥܰܪܝܳܐ ܘܩܽܘܪܳܐ ܕܰܐܣܒܠܽܘܗܝ ܠܦܳܪܰܚܬܳܐ ܕܰܫܡܰܝܳܐ ܝܰܗܒܘ ܦܰܓܪܶܗ: ܚܰܕ ܕܶܝܢ ܒܳܬܰܪ ܦܽܘܣܳܩܳܐ ܕܟܽܠܶܗ ܓܽܘܫܡܶܗ ܒܣܰܝܦܳܐ ܠܛܺܝܫܳܐ ܦܰܣܩܽܘܗܝ ܠܪܺܝܫܶܗ: ܘܰܐ̱ܚܪܺܢܳܐ ܒܳܬܰܪ ܨܽܘܠܦ̈ܳܬܳܐ ܕܰܒܦܰܓܪܶܗ ܟܰܕ ܐܰܣܺܝܪ ܘܰܦܟܺܝܪ ܛܰܒܥܽܘܗܝ ܒܝܰܡܳܐ ܥܰܘ̈ܳܠܐ: ܚܰܕ ܕܶܝܢ ܒܳܬܰܪ ܩ̈ܶܛܠܐ ܣܰܓܺܝ̈ܶܐܐ ܒܚܶܦܪܳܐ ܕܰܡܠܐܷ ܒܽܘܣ̈ܒܳܣܶܐ ܫܕܰܐܘܽܘܗܝ ܛܳܠܽܘ̈ܡܶܐ: ܘܰܐ̱ܚܪܺܢܳܐ ܒܳܬܰܪ ܪܓܽܘܡܝܳܐ ܕܰܒܟܺܐܦ̈ܶܐ ܠܰܚܡܳܐ ܠܓܰܘܙܰܠܬܳܐ ܝܰܗܒܽܘܗܝ ܪ̈ܰܫܺܝܥܶܐ: ܚܰܕ ܕܶܝܢ ܒܳܬܰܪ ܫܶܢ̈ܕܶܐ ܣܒܺܝ̈ܣܶܐ ܘܥܰܙܺܝ̈ܙܶܐ ܥܰܠ ܓܺܝܓܠܐ ܡܰܬܚܽܘܗܝ ܛܪ̈ܽܘܢܶܐ ܚܰܪ̈ܡܶܐ: ܘܰܐ̱ܚܪܺܢܳܐ ܒܳܬܰܪ ܬܠܳܝܳܐ ܕܥܰܠ ܩܰܝܣܳܐ ܥܰܡ ܪ̈ܰܟܫܳܐ ܐܰܣܪܽܘܗܝ ܘܛܰܠܶܩܘ ܗܰܕܳܡܰܘ̈ܗܝ ܦܰܐܝ̈ܳܐ: ܗܳܢܳܐ ܕܶܝܢ ܐܰܬܠܺܝܛܳܐ ܙܪܺܝܙܳܐ ܡܳܪܝ ܒܶܗܢܰܡ ܐܳܘ ܡܳܪܝ ܦܠܳܢ: ܒܟܽܠܗܽܘܢ ܗܳܠܶܝܢ ܫܶܢ̈ܕܶܐ ܡܰܪܺܝܪ̈ܶܐ ܐܶܨܛܒܺܝ ܕܢܶܫܬܰܢܰܕ ܒܢܽܘܪܳܐ ܕܚܽܘܒܶܗ ܡ̣ܶܢ ܐܰܪ̈ܝܰܘܳܬܳܐ ܕܰܢܗܰܡܶܝܢ ܠܐ ܪܥܶܠ: ܡ̣ܶܢ ܒܰܥܪܺܝܪܽܘܬ ܪ̈ܰܟܫܳܐ ܠܐ ܟܘܰܙ: ܡ̣ܶܢ ܓܽܘܙܳܠܐ ܕܫܰܠܗܶܒܺܝܬܳܐ ܠܐ ܕܚܶܠ: ܡ̣ܶܢ ܕܚܺܝܠܽܘܬ ܫܶܢ̈ܕܶܐ ܠܐ ܙܳܥ: ܡ̣ܶܢ ܗܰܝܡܳܢܽܘܬܶܗ ܫܰܪܺܝܪܬܳܐ ܠܐ ܦܰܕ: ܡ̣ܶܢ ܘܳܠܝܳܝܽܘܬ ܬܰܘܕܺܝܬܶܗ ܬܪܺܝܨܬܳܐ ܠܐ ܦܳܫ: ܡ̣ܶܢ ܙܽܘܡܳܪܶܗ ܘܬܶܫܒܽܘܚܬܶܗ ܠܐ ܫܬܶܩ: ܡ̣ܶܢ ܚܰܕܽܘܬܶܗ ܕܰܒܬܰܫܢܺܝ̈ܩܶܐ ܠܐ ܗܦܰܟ: ܠܛܽܘܓܳܢܳܐ ܐܰܝܟ ܠܰܗܓܳܐ ܚܰܫܒܶܗ: ܝܰܩܕܳܢܳܐ ܐܰܝܟ ܛܰܠܐ ܕܰܢܝܳܚܳܐ ܗܘܳܐ ܠܘܳܬܶܗ: ܟܺܐܒ̈ܶܐ ܕܡ̣ܶܢ ܣܪ̈ܳܩܶܐ ܐܰܝܟ ܡܶܫܚܳܐ ܗܘܰܘ ܠܶܗ ܠܠܽܘ̈ܚܳܡܶܐ ܕܰܛܪ̈ܽܘܢܶܐ ܥܰܡ ܪܽܘܚܳܐ ܫܰܕܰܪ: ܠܡܰܚ̈ܘܳܬܳܐ ܐܰܝܟ ܡܰܘܗܰܒܬܳܐ ܩܰܒܶܠ: ܠܢܰܟ̈ܝܳܢܶܐ ܐܰܝܟ ܕܳܫ̈ܢܶܐ ܚܰܒܶܒ: ܠܣܰܟܺܝ̈ܢܶܐ ܘܰܠܢܰܝ̈ܙܟܶܐ ܒܰܪܘܳܙܳܐ ܪܰܒܳܐ ܛܥܶܢ ܠܡܰܪܺܝܪܽܘܬ ܫܶܢ̈ܕܶܐ ܒܕܶܒܫܳܐ ܚܰܠܝܳܐ ܦܰܚܶܡ: ܠܥܶܩܳܪܳܐ ܕܳܫ̈ܢܶܐ ܐܰܝܟ ܚܰܙܽܘܪ̈ܶܐ ܦܰܐܝ̈ܰܝ ܪܺܝܚܳܐ ܘܛܰܥܡܳܐ ܪܚܶܡ: ܠܦܽܘܣܳܩܳܐ ܕܨܰܘܪܶܗ ܐܰܝܟ ܗܰܡܢܺܝܟܳܐ ܡܰܠܟܳܝܳܐ ܚܫܰܒ: ܠܨܰܥܪܳܐ ܐܰܝܟ ܩܽܘܠܳܣܳܐ ܩܰܒܶܠ: ܠܩܶܛܠܐ ܥܠܺܝܒܳܐ ܐܰܝܟ ܩܽܘܪܒܳܢܳܐ ܗ̣ܽܘ ܠܶܗ ܠܡܳܪܶܗ ܩܰܪܶܒ: ܠܰܪܓܽܘܡܝܳܐ ܕܟܺܐܦ̈ܶܐ ܐܰܝܟ ܫܺܐܪ̈ܳܝܶܐ ܘܟܶܬܳܢ̈ܶܐ ܠܰܚܶܡ: ܠܰܫܡܳܛܳܐ ܕܠܶܫܳܢܳܐ ܐܰܝܟ ܓܽܘܥܠܳܢܳܐ ܪܰܒܳܐ ܣܳܡܶܗ: ܠܬܽܘܒܳܪܳܐ ܕܫܳܩ̈ܶܐ ܐܰܝܟ ܪܰܗܒܽܘܢܳܐ ܕܚܰܝ̈ܶܐ ܥܰܦܩܶܗ: ܒܚܺܐܪܽܘܬܶܗ ܒܟܽܠܗܽܘܢ ܐܶܬܥܰܢܺܝ: ܒܓܰܢ̱ܒܳܪܽܘܬܶܗ ܥܰܠ ܟܽܠܗܽܘܢ ܐܰܩܠܺܝ: ܒܰܠܒܺܝܒܽܘܬܶܗ ܥܰܠ ܟܽܠܗܽܘܢ ܐܰܫܺܝܚ: ܒܚܽܘܒܶܗ ܥܰܠ ܟܽܠܗܽܘܢ ܐܰܡܣܰܪ: ܒܪܶܚܡܰܬ ܐ̱ܢܳܫܽܘܬܶܗ ܕܡܳܪܶܗ ܡܶܫܬܰܠܗܰܒ ܗܘܳܐ ܟܰܕ ܐܳܡܰܪ: ܐܰܝܡܶܟܳܐ ܠܺܝ ܗܳܕܶܐ ܕܒܰܕܡܳܐ ܕܰܩܢܽܘܡܝ ܐܰܢܺܝܚ ܠܡܳܪܝ: ܐܰܝܡܶܟܳܐ ܠܺܝ ܗܳܕܶܐ ܕܰܒܡܰܘܬܝ ܥܰܡ ܡܳܪܝ ܚܰܝ̈ܶܐ ܚܰܕ̈ܬܶܐ ܐܺܚܶܐ: ܦܰܓܪܳܐ ܐ̱ܚܪܺܢܳܐ ܒܳܥܶܐ ܗܘܺܝܬ ܠܺܝ ܕܶܐܫܰܠܶܡ ܒܶܗ ܢܝܳܚ: ܓܽܘܫܡܳܐ ܐ̱ܚܪܺܢܳܐ ܨܳܒܶܐ ܗܘܺܝܬ ܕܢܶܗܘܶܐ ܠܺܝ ܕܒܶܗ ܨܶܒܝܳܢܝ ܐܶܓܡܽܘܪ: ܡܳܪܝ ܘܰܐܠܳܗܝ ܝܶܫܽܘܥ ܡܫܺܝܚܳܐ ܩܰܒܶܠ ܪܽܘܚܝ ܒܛܰܝܒܽܘܬܳܐ ܕܺܝܠܳܟ: ܘܠܐ ܬܢܰܟܪܶܝܢܝ ܡ̣ܶܢ ܒܽܘܣܳܡܳܐ ܕܥܰܡ ܩܰܕܺܝ̈ܫܰܝܟ: ܐܳܘ ܠܐܬܠܺܝܛܳܐ ܢܰܨܺܝܚܳܐ ܕܰܟܡܳܐ ܐܽܘܠܨܳܢ̈ܶܐ ܣܰܝܒܰܪ ܘܨܶܒܝܳܢܶܗ ܠܐ ܐܶܫܬܰܡܠܺܝ: ܐܳܘ ܠܐܓܽܘܢܺܝܣܛܳܐ ܚܠܺܝܨܳܐ ܕܰܒܟܽܠܗܽܘܢ ܬܰܫܢܺܝ̈ܩܶܐ ܥܒܰܪ: ܘܰܢܝܳܚܶܗ ܠܐ ܐܶܬܓܡܰܪ: ܘܡܶܛܽܠ ܗܳܕܶܐ ܚܢܰܢ ܡܗܰܝ̈ܡܢܶܐ ܟܠܺܝܠ ܛܽܘ̈ܒܶܐ ܢܶܓܕܽܘܠ ܠܐܬܠܺܝܛܽܘܬܶܗ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܣܳܗܕܳܐ ܛܽܘܒܳܢܳܐ ܡܳܪܝ ܦܠܳܢ ܢܰܨܺܝܚ ܫܽܘܦܪ̈ܶܐ: ܕܥܰܡ ܪܺܝܫܳܐ ܕܣܳܗ̈ܕܶܐ ܣܛܶܦܰܢܳܘܣ ܒܡܰܠܟܽܘܬ ܪܰܘܡܳܐ ܚܳܕܶܐ ܐܰܢ̱ܬ: ܠܳܟ ܛܽܘܒܰܝܟ ܣܳܗܕܳܐ ܩܰܕܺܝܫܳܐ ܫܒܺܝܚ ܕܽܘܒܳܪ̈ܶܐ ܡܳܪܝ ܦܠܳܢ: ܕܰܟܠܺܝܠ ܛܽܘ̈ܒܶܐ ܒܙܳܟܽܘܬܳܐ ܓܶܕܠܰܬ݀ ܠܳܟ ܪܽܘܚܳܐ ܕܩܽܘܕܫܳܐ: ܠܳܟ ܛܽܘܒܰܝܟ ܗܕܺܝܪ ܩܽܘܠܳܣ̈ܶܐ ܣܳܗܕܳܐ ܡܳܪܝ ܦܠܳܢ: ܕܥܰܡ ܡܰܠܐܟ̈ܶܐ ܡܕܰܝܰܪ ܐܰܢ̱ܬ ܒܓܰܢܰܬ݀ ܚܰܕܘ̈ܳܬܳܐ: ܠܳܟ ܛܽܘܒܰܝܟ ܣܳܗܕܳܐ ܥܰܬܺܝܪ ܢܶܨ̈ܚܳܢܶܐ ܡܳܪܝ ܦܠܳܢ: ܕܰܒܣܶܦܪܳܐ ܕܚܰܝ̈ܶܐ ܪܫܺܝܡ ܕܽܘܟܪܳܢܳܟ ܒܽܐܘܪܫܠܶܡ ܕܒܰܫܡܰܝܳܐ: ܠܳܟ ܛܽܘܒܰܝܟ ܕܶܒܚܳܐ ܡܩܰܒܠܐ ܣܳܗܕܳܐ ܡܳܪܝ ܦܠܳܢ ܕܡ̣ܶܢ ܣܺܝܡܰܬ݀ ܓܰܪ̈ܡܰܝܟ ܢܳܒܥܺܝܢ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ: ܘܒܰܕܓܽܘܢ ܚܢܰܢ ܒܳܥܶܝܢܰܢ ܡܶܢܳܟ ܡܫܺܝܚܳܐ ܡܚܰܝܠܳܢܳܐ ܕܥܰܒܕܰܘ̈ܗܝ ܘܰܡܟܰܠܠܳܢܳܐ ܕܰܪ̈ܚܽܘܡܰܘܗܝ ܕܒܰܨܠܰܘ̈ܳܬܗܽܘܢ ܩܰܕܺܝ̈ܫܳܬܳܐ ܬܰܥܒܰܪ ܡ̣ܶܢ ܥܺܕܬܳܐ ܘܝܰܠܕܶܝ̈ܗ̇ ܒܢܰܝ̈ܳܐ ܕܡܰܥܡܽܘܕܺܝܬܳܐ: ܟܽܠ ܡܰܪ̈ܕܘܳܬܳܐ ܩܰܫ̈ܝܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܰܫܠܳܡܳܐ ܘܫܰܝܢܳܐ ܘܰܐܘܝܽܘܬܳܐ ܬܫܰܟܶܢ ܠܰܢ ܒܛܰܝܒܽܘܬܳܟ: ܟܰܕ ܠܡܰܠܟ̈ܘܳܬܳܐ ܡܫܰܝܶܢ ܐܰܢ̱ܬ ܘܰܠܟܽܘܪ̈ܗܳܢܶܐ ܡܫܰܗܶܐ ܐܰܢ̱ܬ: ܟܰܕ ܠܚܰܛܳܝ̈ܶܐ ܡܚܰܣܶܐ ܐܰܢ̱ܬ ܘܠܰܚܛܳܗ̈ܶܐ ܡܰܥܒܰܪ ܐܰܢ̱ܬ: ܟܰܕ ܠܟܰܦ̈ܢܶܐ ܡܣܰܒܰܥ ܐܰܢ̱ܬ ܘܰܠܡܶܣ̈ܟܺܢܶܐ ܬܽܘܪܣܳܝܳܐ ܝܳܗܶܒ ܐܰܢ̱ܬ: ܟܰܕ ܠܰܡ̈ܥܳܩܶܐ ܡܠܰܒܶܒ ܐܰܢ̱ܬ: ܘܠܐܒܺܝ̈ܠܐ ܒܽܘܝܳܐܳܐ ܡܫܰܟܶܢ ܐܰܢ̱ܬ: ܟܰܕ ܠܚܰܝ̈ܶܐ ܕܺܝܠܰܢ ܡܢܰܛܰܪ ܐܰܢ̱ܬ: ܘܰܠܡܰܟ̈ܝܳܢܶܐ ܘܢܳܟܽܘ̈ܠܐ ܙܳܓܰܪ ܐܰܢ̱ܬ: ܟܰܕ ܠܕܰܝܪ̈ܳܝܶܐ ܝܺܚܺܝ̈ܕܳܝܶܐ ܡܥܰܕܰܪ ܐܰܢ̱ܬ: ܘܰܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܡܙܰܗܶܐ ܐܰܢ̱ܬ: ܘܠܐܒܳܗܰܝ̈ܢ ܘܠܐܚܰܝ̈ܢ ܘܰܠܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܡܢܺܝܚ ܐܰܢ̱ܬ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܐܚܪܢܐ ܕܣܗ̈ܕܐ ܓܘܢܐܝܬ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܟܝܳܢܳܐ ܛܽܘܒܬܳܢ ܒܟܽܠ: ܘܡܰܒܽܘܥܳܐ ܕܟܽܠܳܗ̇ ܛܽܘܒܬܳܢܽܘܬܳܐ: ܠܗܰܘ ܕܠܶܗ ܐܶܬܪܰܓܪܰܓܘ ܣܳܗ̈ܕܶܐ ܩܰܕܺܝ̈ܫܶܐ ܘܶܐܫܬܰܠܗܰܒܘ ܒܪܶܚܡܬܶܗ ܠܗܰܘ ܕܢܰܦ̈ܫܳܬܳܐ ܕܙܰܕܺܝ̈ܩܶܐ ܠܶܗ ܡܒܰܪ̈ܟܳܢ ܘܪ̈ܽܘܚܳܬܳܐ ܕܰܢܒܺܝ̈ܶܐ ܘܕܰܫܠܺܝ̈ܚܶܐ ܘܰܕܣܳܗ̈ܕܶܐ ܩܰܕܺܝ̈ܫܶܐ ܘܕܰܐܒܳܗ̈ܳܬܳܐ ܛܽܘܒ̈ܬܳܢܶܐ ܠܶܗ ܡܫܰܒ̈ܚܳܢ: ܐܰܟܡܰܢ ܕܒܺܐܝ̈ܕܰܝܳܐ ܕܺܝܠܶܗ ܣܳܝ̈ܡܳܢ ܘܺܐܝܬܰܝܗܶܝܢ: ܘܡܶܛܽܠ ܗܳܕܶܐ ܠܶܗ ܡܰܘܕܶܝܢܰܢ ܘܰܡܒܰܪܟܺܝܢܰܢ: ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡ ܪܰܒܽܘܬܶܗ ܡܩܰܪܒܺܝܢܰܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܪܳܡܳܐ ܘܰܡܥܰܠܝܳܐ: ܗ̇ܰܘ ܡܚܰܝܠܳܢܳܐ ܘܰܡܢܰܨܚܳܢܳܐ ܕܩܰܕܺܝ̈ܫܰܘܗܝ: ܗ̇ܰܘ ܕܰܓܠܐ ܐ̱ܪ̈ܳܙܰܘܗܝ ܠܥܰܒܕܰܘ̈ܗܝ ܢܒܺܝ̈ܶܐ ܘܒܰܕܶܩ ܣܬܺܝܪ̈ܳܬܶܗ ܠܰܫܠܺܝ̈ܚܰܘܗܝ ܩܰܕܺܝ̈ܫܶܐ: ܗ̇ܰܘ ܕܡܶܛܽܠܳܬܶܗ ܣܰܝܒܰܪܘ ܟܺܐܢ̈ܶܐ ܐܽܘܠܨܳܢ̈ܶܐ ܘܰܣܒܰܠܘ ܣܳܗ̈ܕܶܐ ܫܶܢ̈ܕܶܐ: ܟܰܕ ܠܥܺܝܢ ܟܽܠܗܽܘܢ ܥܰܡ̈ܡܶܐ ܒܚܰܕܽܘܬܳܐ ܩܳܥܶܝܢ ܗܘܰܘ ܘܳܐܡܪܺܝܢ ܕܠܐ ܚܒܽܘܫܝܳܐ ܘܠܐ ܢܽܘܪܳܐ ܘܠܐ ܣܰܝܦܳܐ ܘܠܐ ܡܰܘܬܳܐ: ܘܠܐ ܫܶܢ̈ܕܶܐ ܘܠܐ ܐܽܘܠܨܳܢ̈ܶܐ: ܘܠܐ ܪܰܘܡܳܐ ܐܳܦܠܐ ܥܽܘܡܩܳܐ ܘܳܐܦܠܐ ܒܪܺܝܬܳܐ ܐ̱ܚܪܺܬܳܐ ܡܨܶܝܢ ܦܳܪܫܺܝܢ ܠܰܢ ܡ̣ܶܢ ܚܽܘܒܶܗ ܕܰܡܫܺܝܚܳܐ ܐܠܰܗܳܐ ܕܺܝܠܰܢ: ܘܟܰܕ ܟܽܠ ܚܰܕ ܚܰܕ ܡܶܢܗܽܘܢ ܠܚܰܫܰܘ̈ܗܝ ܐܰܝܟ ܪܽܘܡܝܳܢܶܗ ܠܡܳܪܶܗ ܡܩܰܪܶܒ ܗܘܳܐ: ܘܡܽܘܠܟܳܢ̈ܶܐ ܘܦܽܘܪ̈ܥܳܢܶܐ ܡܶܢܶܗ ܢܳܣܶܒ ܗܘܳܐ: ܟܰܕ ܩܰܕܡܳܝܳܐ ܕܟܽܠܗܽܘܢ ܩܛܺܝܠ ܘܰܫܕܶܐ ܒܡܰܕܒܪܳܐ: ܘܰܐ̱ܚܪܺܢܳܐ ܚܒܺܝܫ ܒܩܺܐܒܽܘܬܳܐ ܝܰܪ̈ܚܶܐ ܬܪܶܥܣܰܪ ܘܝܰܘ̈ܡܳܬܳܐ ܥܶܣܪܳܐ: ܚܰܕ ܥܒܺܝܕ ܣܳܚܽܘܪܳܐ ܒܰܐܬܪܳܐ ܢܽܘܟܪܳܝܳܐ: ܘܰܐ̱ܚܪܺܢܳܐ ܦܟܺܝܪ ܘܩܳܐܶܡ ܒܪܺܝܫ ܛܽܘܪܳܐ: ܚܰܕ ܥܰܪܺܝܩ ܠܡܰܕܢܚܳܐ: ܘܰܐ̱ܚܪܺܢܳܐ ܟܪܺܝܟܺܝܢ ܠܶܗ ܩܪ̈ܳܒܶܐ ܕܰܬܠܳܬܺܝܢ ܘܚܰܕ ܡܰܠܟ̈ܽܘ: ܚܰܕ ܪܡܶܐ ܥܰܠ ܐܰܦܰܘܗܝ ܚܠܳܦ ܡܰܣܟ̈ܠܳܢܶܐ: ܘܰܐ̱ܚܪܺܢܳܐ ܢܰܦܺܝܩ ܒܪܶܗ ܒܳܬܪܰܗ ܠܡܰܘܬܳܐ: ܚܰܕ ܟܪܺܝܟܺܝܢ ܠܶܗ ܗܶܢܕ̈ܘܳܝܶܐ ܒܰܚܣܳܡܳܐ: ܘܰܐ̱ܚܪܺܢܳܐ ܚܕܺܝܪܺܝܢ ܠܶܗ ܐܳܬܽܘܪ̈ܳܝܶܐ ܒܰܓܙܳܡ̈ܶܐ: ܚܰܕ ܒܠܰܥ ܒܓܶܐܪܳܐ ܡ̣ܶܢ ܓܰܢ̱ܒܳܪ̈ܶܐ ܛܰܡ̈ܶܐܐ: ܘܰܐ̱ܚܪܺܢܳܐ ܪܳܡܶܝܢ ܒܶܗ ܫܺܝ̈ܫܠܳܬܳܐ ܒܰܫܒܺܝܬܳܐ: ܚܰܕ ܥܰܪܺܝܩ ܠܪܽܘܡܺܝ ܡ̣ܶܢ ܕܰܝܳܢܳܐ: ܘܰܐ̱ܚܪܺܢܳܐ ܒܳܥܶܝܢ ܕܢܶܣܒܽܘܢ ܪܺܝܫܶܗ ܒܣܰܝܦܳܐ: ܚܰܕ ܪܡܶܐ ܥܰܠ ܓܰܒܶܗ ܬܠܳܬܡܳܐܐ ܘܬܶܫܥܳܐ ܝܰܘܡܺܝ̈ܢ ܘܰܐ̱ܚܪܺܢܳܐ ܡܫܰܦܰܠ ܘܰܫܕܶܐ ܥܰܠ ܩܺܝܩܰܠܬܳܐ ܕܽܐܘܠܨܳܢ̈ܶܐ: ܚܰܕ ܪܡܶܐ ܒܓܽܘܒܳܐ ܕܰܣܝܳܢܳܐ ܡ̣ܶܢ ܚܰܪܡܳܐ: ܘܰܐ̱ܚܪܺܢܳܐ ܪܡܶܐ ܥܰܡ ܐܰܪ̈ܝܰܘܳܬܳܐ ܕܠܐ ܪ̈ܰܚܡܶܐ: ܬܠܳܬܳܐ ܪܡܶܝܢ ܒܓܰܘ ܐܰܬܽܘܢܳܐ ܕܢܽܘܪܳܐ ܒܰܐܪܥܳܐ ܕܒܳܒܶܝܠ: ܘܫܰܒܥܳܐ ܫܕܶܝܢ ܥܰܠ ܛܺܝܓܢܳܐ ܕܫܰܠܗܶܒܺܝܬܳܐ: ܚܰܕ ܒܰܪ ܫܰܒܥܺܝܢ ܫܢܺܝ̈ܢ ܡܶܫܬܰܢܕܺܝܢ ܒܶܗ ܪ̈ܳܕܽܘܦܶܐ: ܘܰܐ̱ܚܪܺܢܳܐ ܣܺܝܡ ܪܺܝܫܶܗ ܒܦܺܝܢܟܳܐ ܒܰܣܡܳܟܳܐ: ܚܰܕ ܚܪܶܫ ܩܕܳܡ ܡܰܕܒܚܳܐ ܒܰܚܣܳܡܳܐ: ܘܰܐ̱ܚܪܺܢܳܐ ܪܓܺܝܡ ܥܰܠ ܟܰܪܡܶܗ ܒܰܛܠܽܘܡܝܳܐ: ܚܰܕ ܪܡܶܐ ܩܕܳܡ ܚܰܝܠܰܘ̈ܳܬܳܐ ܒܶܐܦܶܣܳܘܣ: ܘܰܐ̱ܚܪܺܢܳܐ ܬܠܐܷ ܗܰܦܟܳܐܝ̣ܬ ܒܰܙܩܺܝܦܳܐ ܒܓܰܘ ܪܽܘܡܺܝ: ܚܰܕ ܩܛܺܝܠ ܒܩܰܝܣܳܐ ܕܩܳܨܪܳܐ ܒܽܐܘܪܫܠܶܡ: ܘܰܐ̱ܚܪܺܢܳܐ ܕܠܐ ܪ̈ܰܚܡܶܐ ܥܰܠ ܐܰܦܰܘ̈ܗܝ ܓܰܪܺܝܪ ܒܰܐܬܪܳܐ ܕܒܶܝܬ ܟܰܠܒܺܝܢ: ܚܰܕ ܪܕܺܝܦ ܡ̣ܶܢ ܫܰܒܥܺܝܢ ܘܰܬܪܶܝܢ ܕܰܝ̈ܳܢܶܐ: ܘܰܐ̱ܚܪܺܢܳܐ ܒܰܪ ܬܠܳܬ ܫܢܺܝ̈ܢ ܩܳܐܶܡ ܒܕܺܝܢܳܐ: ܚܰܕ ܦܣܺܝܩ ܠܶܫܳܢܶܗ ܡ̣ܶܢ ܕܰܝܳܢܳܐ ܥܰܘܳܠܐ: ܘܰܐ̱ܚܪܺܢܳܐ ܪܡܶܐ ܒܫܺܝ̈ܫܠܳܬܳܐ ܥܰܡ ܙܳܢܝ̈ܳܬܳܐ ܒܰܚܒܽܘܫܝܳܐ ܚܰܕ ܡܦܰܣܰܩ ܗܰܕܳܡ ܥܰܡ ܗܰܕܳܡ ܡ̣ܶܢ ܝܰܘ̈ܢܳܝܶܐ: ܘܰܐ̱ܚܪܺܢܳܐ ܪܡܶܐ ܒܶܝܬ ܦܬܰܟܪ̈ܶܐ ܡ̣ܶܢ ܚܰܢ̈ܦܶܐ ܚܰܕ ܪܓܺܝܡ ܡ̣ܶܢ ܝܽܘܕܳܝ̈ܶܐ ܕܠܐ ܪ̈ܰܚܡܶܐ: ܘܰܐ̱ܚܪܺܢܳܐ ܢܣܺܝܪ ܡ̣ܶܢ ܡܢܰܫܶܐ ܒܰܚܣܳܡܳܐ: ܚܰܕ ܡܗܰܠܶܟ ܥܰܠ ܣܶܟ̈ܶܐ ܕܦܰܪܙܠܐ ܘܡܰܗܠܺܝܢ ܒܶܗ ܡܰܠܟ̈ܶܐ ܛܪ̈ܽܘܢܶܐ: ܘܰܐ̱ܚܪܺܢܳܐ ܕܡܶܬܢܰܓܰܕ ܒܰܓ̈ܝܳܕܶܐ ܦܰܛܺܝܪ̈ܶܐ ܕܬܰܘܪ̈ܶܐ ܥܰܠ ܟܰܪܣܶܗ: ܬܪܶܥܣܰܪ ܐܶܬܢܣܰܪܘ ܡ̣ܶܢ ܫܳܡܺܝܪ ܡܰܠܟܳܐ ܦܳܪܣܳܝܳܐ: ܘܰܐܪܒܥܺܝܢ ܐܶܬܢܰܨܰܚܘ ܒܝܰܡܬܳܐ ܕܰܓܠܺܝܕܳܐ: ܬܪܶܥܣܰܪ ܐܠܰܦܰܝ̈ܳܐ ܩܰܕܺܝ̈ܫܶܐ ܐܶܬܩܰܛܰܠܘ ܘܩܰܒܶܠܘ ܟܠܺܝ̈ܠܐ ܕܙܳܟܽܘܬܳܐ ܥܰܠ ܛܽܘܪ̈ܰܝ ܐܰܗܡܳܘܺܝ ܘܳܐܫܽܘܡܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܰܒܝܰܕ ܨܠܰܘ̈ܳܬܗܽܘܢ ܘܬܰܟܫ̈ܦܳܬܗܽܘܢ ܕܰܐܬܠܺܝ̈ܛܰܝܟ ܣܳܗ̈ܕܶܐ ܩܰܕܺܝ̈ܫܶܐ ܘܰܕܡܳܪܝ ܦܠܳܢ ܢܰܨܺܝܚ ܫܽܘܦܪ̈ܶܐ ܘܪܳܡ ܒܰܓ̈ܒܰܝܳܐ ܕܝܰܘܡܳܢܳܐ ܕܽܘܟܪܳܢܶܗ ܡܫܰܡܠܶܝܢܰܢ: ܘܰܕܟܽܠܗܽܘܢ ܩܰܕܺܝ̈ܫܶܐ ܡܢܺܝ̈ܚܳܢܶܐ ܕܺܝܠܳܟ ܡܳܪܝܳܐ: ܕܰܬܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܩܕܳܡܰܝܟ ܒܥܺܐܕܳܐ ܗܳܢܳܐ ܕܥܽܘܗܕܳܢܗܽܘܢ ܕܰܪ̈ܚܽܘܡܰܝܟ: ܘܫܰܟܶܢ ܒܶܗ ܡܳܪܝܳܐ ܐܠܰܗܳܐ ܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ: ܠܡܰܠܟ̈ܘܳܬܳܐ ܬܰܪܥܽܘܬܳܐ: ܠܟܳܗ̈ܢܶܐ ܙܳܟܽܘܬܳܐ ܕܥܰܠ ܦܬܰܟܪ̈ܶܐ ܘܰܒܥܶܠܕ̈ܒܳܒܶܐ: ܘܢܶܗܘܽܘܢ ܙܗܰܝ̈ܳܐ: ܘܠܰܡܫܰܡ̈ܫܳܢܶܐ ܢܰܟܦܽܘܬܳܐ ܠܰܒܬܽܘ̈ܠܐ ܡܚܰܡܣܢܳܢܽܘܬܳܐ: ܠܰܡܙܰܘ̈ܓܶܐ ܟܚܺܝܕܽܘܬܳܐ: ܠܣܳܒ̈ܶܐ ܟܢܺܝܟܽܘܬܳܐ: ܠܰܛܠܳܝ̈ܶܐ ܬܰܪܒܺܝܬܳܐ ܡܩܰܠܰܣܬܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܩܰܕܶܡܘ ܫܟܶܒܘ ܥܰܠ ܣܰܒܪܳܐ ܕܺܝܠܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܫܰܟܶܢ ܠܗܽܘܢ: ܐܰܝܟܰܢܳܐ ܕܰܒܝܰܘܡܳܐ ܗ̇ܰܘ ܪܰܒܳܐ ܕܒܶܗ ܢܳܣܒܺܝܢ ܐܰܓܪܗܽܘܢ: ܬܰܫܘܶܐ ܠܰܢ ܒܰܨܠܰܘ̈ܳܬܗܽܘܢ ܕܢܶܬܚܰܠܰܛ ܥܰܡܗܽܘܢ ܒܣܶܕܪ̈ܰܝܗܽܘܢ ܘܢܶܣܬܰܬܰܪ ܒܟܶܢܦܰܝ̈ܗܽܘܢ ܘܥܰܡܗܽܘܢ ܘܒܰܝܢܳܬܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܐܒܪܗܡ ܩܘܣܛܢܛܝܢܝܐ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ: ܕܰܒܚܽܘܒܳܐ ܕܠܐ ܢܟܺܝܠܽܘܬܳܐ ܢܥܰܕܥܶܕ ܠܝܰܘܡܳܐ ܗܳܢܳܐ ܕܕܽܘܟܪܳܢܶܗ ܕܢܰܨܺܝܚܳܐ ܡܳܪܝ ܐܰܒܪܳܗܳܡ ܡ̣ܶܢ ܟܽܠܶܗ ܠܶܒܰܢ: ܘܰܕܚܽܘܩ ܡܶܢܰܢ ܠܟܽܠܗܽܘܢ ܚܽܘ̈ܫܳܒܶܐ ܒܺܝ̈ܫܶܐ: ܘܰܠܨܶܢ̈ܥܳܬܶܗ ܕܗ̇ܰܘ ܡܪܰܡܝܳܢܳܐ ܣܳܢܳܐܐ ܕܐ̱ܢܳܫܽܘܬܰܢ: ܘܰܐܫܦܰܥ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ: ܟܽܠܗܶܝܢ ܛܳܒ̈ܳܬܳܐ ܘܪ̈ܰܚܡܶܐ ܘܰܚܢܳܢܳܐ ܠܟܽܠܰܢ: ܥܰܡ ܩܰܕܺܝ̈ܫܰܝܟ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܐܰܡܺܝܢܳܐܝ̣ܬ ܐܳܘ ܡܰܚܝܳܢܰܢ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܟܪ̈ܽܘܒܶܐ ܠܶܗ ܡܒܰܪܟܺܝܢ: ܘܰܣܪ̈ܳܦܶܐ ܠܶܗ ܡܩܰܕܫܺܝܢ ܘܡܰܠܐܟ̈ܶܐ ܠܶܗ ܣܳܓܕܺܝܢ: ܘܥܰܦܪ̈ܳܢܶܐ ܠܶܗ ܡܪܰܡܪܡܺܝܢ: ܠܗܰܘ ܕܰܓܒܳܝܗܝ ܠܦܳܠܚܳܐ ܕܺܝܠܶܗ ܢܰܨܺܝܚܳܐ ܡܳܪܝ ܐܰܒܪܳܗܳܡ: ܘܰܐܘܪܶܒ ܠܰܫܡܶܗ ܒܟܽܠܳܗ̇ ܒܪܺܝܬܳܐ: ܐܰܝܟ ܐܰܒܪܳܗܳܡ ܐܰܒܳܐ ܕܥܰܡ̈ܡܶܐ ܘܫܰܪ̈ܒܳܬܳܐ: ܠܗܰܘ ܕܡ̣ܶܢ ܟܪܶܣ ܐܶܡܶܗ ܦܰܪܫܶܗ ܘܩܰܕܫܶܗ ܕܢܶܗܘܶܐ ܥܡܽܘܪܝܳܐ ܠܪܰܒܽܘܬܶܗ: ܕܠܶܗ ܠܗܰܘ ܕܰܐܣܓܺܝ ܪܰܡܪܡܶܗ ܢܫܰܒܰܚ ܘܢܶܣܓܽܘܕ ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܝܰܠܕܳܐ ܕܶܐܬܰܝܬ ܠܦܽܘܪܩܳܢܰܢ: ܘܡ̣ܶܢ ܐܰܬܺܝܪ ܥܶܠܳܝܳܐ ܐܰܬܪܳܐ ܕܺܝܠܳܟ ܢܚܶܬܬ ܕܬܶܦܪܽܘܩ ܠܰܢ: ܕܺܐܝܬܰܝܢ ܡܶܕܪ̈ܳܢܳܝܶܐ ܘܚܶܠܳܢܳܝ̈ܶܐ: ܘܰܫܠܺܝ̈ܚܰܝܟ ܩܰܕܺܝ̈ܫܶܐ ܫܰܕܰܪܬ ܘܰܐܟܪܶܙܘ ܣܒܰܪܬܳܟ ܐܶܘܢܓܶܠܳܝܬܳܐ ܘܨܳܕܘ ܒܳܗ̇ ܠܥܳܠܡܳܐ ܚܶܫܽܘܟܳܐ: ܘܶܐܬܡܰܠܝܰܬ݀ ܐܰܪܥܳܐ ܩܰܕܺܝ̈ܫܶܐ: ܘܚܰܕ ܡܶܢܗܽܘܢ ܕܩܰܕܺܝ̈ܫܶܐ ܗ̇ܳܢܽܘܢ ܐܺܝܬܰܘܗܝ ܗܳܢܳܐ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܗܳܢܳܐ ܕܡܶܢܳܟ ܐܠܰܗܳܐ ܠܶܗ ܐܶܬܶܐܡܰܪ: ܕܙܶܠ ܥܰܩܶܒ ܥܰܠ ܛܰܠܝܳܐ ܒܰܪܨܰܘܡܳܐ ܘܺܐܝܬܰܘܗܝ ܝܰܬܡܳܐ ܒܰܡܕܺܝܢ̱ܬܳܐ ܫܡܺܝܫܰܛ ܒܗܰܝܟܠܐ ܕܰܒܢܳܐ ܐܽܘܣܺܒܝܘܳܣ ܐܶܦܣܩܽܘܦܳܐ ܕܰܡܕܺܝܢ̱ܬܳܐ: ܘܡ̣ܶܢ ܒܳܬܰܪ ܬܠܳܬܳܐ ܝܰܘ̈ܡܺܝܢ ܕܟܳܪܶܟ ܗܘܳܐ ܒܰܡܕܺܝܢ̱ܬܳܐ ܐܶܫܟܚܶܗ ܗܳܢܳܐ ܕܫܰܐܠܶܗ ܠܒܰܪܨܰܘܡܳܐ ܝܰܬܡܳܐ ܥܰܠ ܥܰܒܕܶܗ: ܦܰܢܺܝ ܠܶܗ ܒܰܪܨܰܘܡܳܐ ܕܝܰܬܡܳܐ ܐܺܝܬܰܝ ܡܶܛܽܠ ܕܳܐܒܝ ܘܶܐܡܝ ܡܺܝܬܘ ܠܗܽܘܢ ܘܶܐܢܳܐ ܕܶܐܦܠܽܘܚ ܠܡܳܪܝܳܐ ܗܳܐ ܢܰܦܺܝܩ ܐ̱ܢܳܐ: ܗܳܢܳܐ ܕܫܰܩܠܶܗ ܠܕܰܝܪܶܗ ܘܰܐܠܦܶܗ ܘܛܰܟܣܶܗ ܘܰܐܠܒܫܶܗ ܐܶܣܟܺܝܡܳܐ ܝܰܩܺܝܪܳܐ ܕܕܰܝܪܳܝܽܘܬܳܐ: ܗܳܢܳܐ ܕܶܐܬܪܰܘܪܰܒܘ ܢܶܨܚܳܢܰܘ̈ܗܝ ܒܟܽܠ ܐܰܬܪ̈ܰܘܳܢ: ܘܫܰܪܺܝܘ ܐܳܬܶܝܢ ܠܘܳܬ ܗܳܢܰܘ ܙܰܟܳܝܳܐ ܡܳܪܝ ܐܰܒܪܳܗܳܡ ܟܽܠܗܽܘܢ ܟܪ̈ܺܝܗܶܐ ܘܳܐܦ ܐܰܝܠܶܝܢ ܕܡܶܬܢܰܣܶܝܢ ܗܘܰܘ ܡ̣ܶܢ ܐܳܟܶܠܩܰܪܨܳܐ: ܘܡܶܬܰܐܣܶܝܢ ܗܘܰܘ ܡܚܺܝܠܐ ܐܠܰܗܳܝܳܐ: ܕܰܠܘܶܐ ܗܘܳܐ ܠܶܗ: ܗܳܢܳܐ ܕܫܰܪܺܝ ܣܳܛܳܢܳܐ ܠܰܡܢܰܣܳܝܽܘ ܠܶܗ: ܟܰܕ ܚܙܳܐ ܠܥܰܡܠܰܘ̈ܗܝ ܕܪܰܘܪ̈ܒܺܝܢ: ܘܛܰܝܶܒ ܥܰܠ ܓܶܢ̱ܒ ܕܰܝܪܳܐ ܕܺܝܠܗܽܘܢ ܚܶܘܝܳܐ ܚܰܕ ܪܰܒܳܐ: ܘܟܽܠ ܫܳܥ ܡܙܺܝܥ ܗܘܳܐ ܠܐܚ̈ܶܐ: ܘܟܽܠ ܐܰܝܟ ܕܳܐܙܺܠ̱ܝܢ ܗܘܰܘ ܥܳܒܰܪ ܗܘܳܐ ܩܕܳܡܰܝܗܽܘܢ: ܘܶܐܙܰܠ ܗܘܳܐ ܛܽܘܒܳܢܳܐ ܘܰܐܚܕܶܗ ܘܰܫܕܳܝܗܝ ܥܰܠ ܐܰܪܥܳܐ: ܘܶܐܨܛܰܪܺܝ ܡ̣ܶܢ ܪܺܝܫܶܗ ܥܕܰܡܳܐ ܠܕܽܘܢܒܶܗ ܘܡܺܝܬ: ܗܳܢܳܐ ܕܰܐܝܬܺܝ ܠܘܳܬܶܗ ܡܶܢܶܗ ܕܰܐܬܪܳܐ ܥܠܰܝܡܳܐ ܚܰܕ ܕܺܐܝܬ ܗܘܳܐ ܒܶܗ ܕܰܝܘܳܐ: ܘܟܽܠ ܝܽܘܡ ܒܫܺܝ̈ܫܠܳܬܳܐ ܘܣܽܘܛܡ̈ܶܐ ܡܶܬܶܐܣܰܪ ܗܘܳܐ: ܘܰܡܦܰܣܶܩ ܗܘܳܐ ܐܰܣܽܘܪ̈ܰܘܗܝ ܘܥܳܪܶܩ: ܘܠܐ ܐ̱ܢܳܫ ܡܶܫܟܰܚ ܗܘܳܐ ܠܡܶܟܒܫܶܗ: ܘܟܰܕ ܚܙܳܐ ܣܳܛܳܢܳܐ ܠܩܰܕܺܝܫܳܐ: ܐܰܝܠܶܠ ܝܺܠܰܠܬܳܐ ܪܰܒܬܳܐ ܘܶܐܡܰܪ: ܘܳܝ ܠܺܝ ܡܶܢܳܟ ܐܰܒܪܳܗܳܡ ܕܰܝܪܳܝܳܐ: ܘܳܝ ܠܺܝ ܡܶܢܳܟ: ܘܥܰܪܺܝܩ ܡ̣ܶܢ ܐܰܬܪܶܗ: ܘܙܰܓܪܶܗ ܗ̣ܽܘ ܩܰܕܺܝܫܳܐ ܘܰܓܥܰܪ ܒܶܗ: ܘܰܐܦܩܶܗ ܡ̣ܶܢ ܥܠܰܝܡܳܐ ܗ̇ܰܘ ܘܶܐܬܰܐܣܺܝ: ܗܳܢܳܐ ܕܶܐܬܰܘ ܠܘܳܬܶܗ ܬܪܶܝܢ ܡܫܰܪ̈ܰܝܳܐ ܘܰܬܠܳܬܳܐ ܓܰܪ̈ܒܶܐ: ܟܰܕ ܒܳܥܶܝܢ ܕܰܢܨܰܠܐܷ ܥܠܰܝܗܽܘܢ ܕܢܶܬܰܐܣܽܘܢ: ܘܰܫܩܰܠ ܡܶܫܚܳܐ ܘܰܪܫܰܡ ܥܠܰܘܗܝ ܢܺܝܫܳܐ ܕܰܨܠܺܝܒܳܐ ܘܨܰܠܺܝ ܥܠܰܘܗܝ: ܘܝܰܗܒܶܗ ܠܠܐܷܘܰܢܛܺܝ ܬܰܠܡܺܝܕܶܗ ܘܰܡܫܰܚ ܐܶܢܽܘܢ: ܘܶܐܬܰܐܣܺܝܘ ܡ̣ܶܢ ܟܺܐܒܰܝ̈ܗܽܘܢ: ܘܶܐܫܬܰܪܰܪܘ ܗܰܕܳܡܰܝ̈ܗܽܘܢ: ܘܶܐܬܕܰܟܺܝܘ ܦܰܓܪ̈ܰܝܗܽܘܢ: ܗܳܢܳܐ ܕܰܐܝܬܺܝܘ ܠܘܳܬܶܗ ܚܰܕ ܥܠܰܝܡܳܐ ܕܺܐܝܬ ܗܘܳܐ ܠܶܗ ܟܺܐܒܳܐ ܕܨܶܡܪܳܐ: ܘܟܺܐܒ ܓܰܘܳܐ: ܘܡܶܫܬܰܚܰܩ ܗܘܳܐ ܘܡܶܬܛܰܓܰܢ ܒܠܺܠܝܳܐ ܘܒܺܐܝܡܳܡܳܐ: ܘܥܰܡ ܢܰܦ̈ܩܳܬܳܐ ܣܰܓܺܝ̈ܳܐܬܳܐ ܕܰܐܦܶܩܘ ܥܠܰܘܗܝ ܐܰܒܳܗܰܘ̈ܗܝ ܠܐܣ̈ܰܘܳܬܳܐ: ܐܳܦܠܐ ܩܰܠܺܝܠ ܢܦܺܐܫܳܐ ܐܶܫܬܟܰܚ ܠܶܗ: ܘܟܰܕ ܡܛܰܘ ܠܬܰܪܥܶܗ ܫܕܰܘ ܢܰܦ̈ܫܳܬܗܽܘܢ ܩܕܳܡܰܘܗܝ ܘܒܳܟܶܝܢ ܗܘܰܘ ܘܳܐܡܪܺܝܢ: ܒܳܥܶܝܢܰܢ ܡܶܢܳܟ ܐܰܣܳܝܗܝ ܠܰܒܪܰܢ: ܘܒܰܪܶܟ ܥܰܠ ܟܳܣܳܐ ܕܡܰܝ̈ܳܐ ܘܝܰܗܒ ܕܢܰܫܩܽܘܢܳܝܗܝ: ܘܟܰܕ ܐܶܫܬܺܝ ܢܚܶܬ ܡ̣ܶܢ ܫܦܽܘܠܰܘ̈ܗܝ ܒܰܕܡܽܘܬܳܐ ܕܡܽܘܕܳܝܳܐ: ܟܰܕ ܛܥܺܝܢ ܥܰܠܩܳܐ ܕܡܰܝ̈ܳܐ ܘܶܐܙܰܠ ܟܰܕ ܡܰܝܠܶܠ: ܗܳܢܳܐ ܕܰܐܝܬܺܝܘ ܠܘܳܬܶܗ ܥܠܰܝܡܳܐ ܐ̱ܚܪܺܢܳܐ ܕܺܐܝܬ ܒܶܗ ܕܰܝܘ̈ܶܐ ܣܰܓܺܝ̈ܶܐܐ: ܘܟܰܕ ܚܙܳܝܗܝ ܠܰܥܠܰܝܡܳܐ ܗ̇ܰܘ ܐܶܬܪܰܚܰܡ ܥܠܰܘܗܝ: ܘܰܒܪܶܟ ܒܰܨܠܽܘܬܳܐ ܘܨܰܠܺܝ: ܘܩܳܡ ܡ̣ܶܢ ܨܠܽܘܬܶܗ ܘܰܓܥܰܪ ܒܠܶܓܝܽܘܢ ܕܫܺܐܕ̈ܶܐ: ܘܟܰܕ ܫܡܰܥܘ ܗܳܠܶܝܢ ܕܰܝܘ̈ܶܐ ܩܳܠܶܗ ܫܕܰܐܘܽܘܗܝ ܠܰܥܠܰܝܡܳܐ ܗ̇ܰܘ ܕܡ̣ܶܢ ܛܽܘܪܳܐ ܪܳܡܳܐ ܘܰܢܦܰܩܘ ܡܶܢܶܗ: ܘܰܢܩܰܫܘ ܫܽܘܥܳܐ ܗ̇ܰܘ ܕܰܠܩܽܘܒܠܗܽܘܢ: ܘܶܐܬܬܰܠܚܰܬ݀ ܫܶܢܳܐ ܗ̇ܳܝ ܘܰܢܦܰܠܘ ܡܶܢܳܗ̇ ܟܺܐܦ̈ܶܐ ܣܰܓܺܝ̈ܶܐܐ: ܘܩܳܡ ܥܠܰܝܡܳܐ ܟܰܕ ܚܠܺܝܡ: ܗܳܢܳܐ ܕܰܐܝܬܺܝܘ ܠܘܳܬܶܗ ܚܰܕ ܕܺܐܝܬ ܗܘܳܐ ܠܶܗ ܕܰܝܘܳܐ ܫܰܬܺܝܩܳܐ: ܘܡܶܫܬܰܢܰܩ ܗܘܳܐ ܘܡܶܬܶܐܠܶܨ: ܘܣܳܡ ܥܠܰܘܗܝ ܝܰܡܺܝܢܶܗ ܘܨܰܠܺܝ: ܘܰܐܦܶܩ ܠܕܰܝܘܳܐ ܡܶܢܶܗ ܘܰܐܣܝܶܗ: ܘܝܺܬܶܒ ܨܶܝܕܰܘܗܝ ܕܩܰܕܺܝܫܳܐ ܘܰܐܠܒܫܶܗ ܐܶܣܟܺܝܡܳܐ ܕܕܰܝܪܳܝܽܘܬܳܐ: ܘܰܥܡܰܠ ܘܶܐܬܕܰܟܺܝ ܘܰܣܥܰܪ ܬܶܕܡܪ̈ܳܬܳܐ: ܘܰܒܢܳܐ ܠܶܗ ܗ̣ܽܘ ܥܠܰܝܡܳܐ ܕܰܝܪܳܐ ܠܒܰܪ ܡ̣ܶܢ ܕܰܝܪܳܐ ܕܪܰܒܶܗ ܐܰܝܟ ܡܺܝܠܐ ܚܰܕ: ܘܶܐܬܩܰܪܝܰܬ݀ ܗ̇ܳܝ ܕܰܝܪܳܐ ܕܡܳܪܝ ܝܰܘܢܳܢ: ܥܕܰܡܳܐ ܠܝܰܘܡܳܢ: ܗܳܢܳܐ ܕܰܫܡܰܥ ܛܶܒܶܗ ܚܰܕ ܓܰܒܪܳܐ ܝܺܕܺܝܥܳܐ ܪܰܒ ܚܰܝܠܶܗ ܕܰܛܪܺܝܕܺܝܛܽܘܣ ܡܰܠܟܳܐ ܚܰܢܦܳܐ: ܕܺܐܝܬ ܗܘܳܐ ܠܶܗ ܫܰܒܥܳܐ ܒܢܰܝ̈ܳܐ ܕܰܡܠܶܝܢ ܗܘܰܘ ܟܽܠ ܡܽܘ̈ܡܺܝܢ: ܬܠܳܬܳܐ ܓܰܪ̈ܒܳܢܶܐ ܘܰܬܪܶܝܢ ܡܢܰܣܰܝ̈ܳܐ: ܘܰܐ̱ܚܪܺܢܳܐ ܡܫܰܪܝܳܐ: ܘܚܰܕ ܡܶܢܗܽܘܢ ܕܠܰܝܬ ܗܘܳܐ ܒܶܗ ܡܽܘܡܳܐ ܪܳܕܶܦ ܗܘܳܐ ܠܰܟܪ̈ܺܝܣܛܝܳܢܶܐ: ܫܰܕܰܪ ܐܶܢܽܘܢ ܠܘܳܬܶܗ: ܘܥܰܡܗܽܘܢ ܬܠܳܬܺܝܢ ܥܰܒ̈ܕܶܐ: ܘܰܦܩܰܕ ܐܶܢܽܘܢ ܕܶܐܢ ܠܐ ܢܶܬܰܐܣܽܘܢ ܠܐ ܢܗܰܝܡܢܽܘܢ: ܘܟܰܕ ܡܛܰܘ ܠܘܳܬܶܗ ܗܰܝܡܶܢܘ ܘܰܐܣܺܝ ܐܶܢܽܘܢ: ܘܩܳܡܘ ܥܰܒ̈ܕܶܐ ܕܢܶܩܛܠܽܘܢ ܐܶܢܽܘܢ: ܘܰܢܦܰܩܘ ܫܺܐܕ̈ܶܐ ܡ̣ܶܢ ܗܳܠܶܝܢ ܘܥܰܠܘ ܒܥܰܒ̈ܕܶܐ: ܘܗܰܝܡܶܢܘ ܥܰܒ̈ܕܶܐ ܘܰܐܣܺܝ ܐܶܢܽܘܢ: ܘܰܐܥܡܰܕ ܟܽܠܗܽܘܢ ܘܰܐܠܒܶܫ ܐܶܢܽܘܢ ܐܶܣܟܺܝܡܳܐ ܕܕܰܝܪܳܝܽܘܬܳܐ: ܘܰܗܘܰܘ ܕܰܝܪ̈ܳܝܶܐ ܒܚܺܝܪ̈ܶܐ ܘܶܐܫܬܘܺܝܘ ܠܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ: ܗܳܢܳܐ ܕܶܐܬܓܠܺܝ ܠܶܗ ܡ̣ܶܢ ܪܽܘܚܳܐ ܩܰܕܺܝܫܳܐ ܥܰܠ ܟܽܠ ܡܶܕܶܡ: ܗܳܢܳܐ ܕܶܐܬܳܐ ܠܘܳܬܶܗ ܙܽܘܗܳܕܳܡ ܡܰܠܟܳܐ ܕܕܺܝܠܺܝܡܳܢܳܝܶ̈ܐ: ܘܥܰܡܶܗ ܐܰܢ̱ܬܬܶܗ ܘܰܬܠܳܬܳܐ ܒܢܰܘ̈ܗܝ ܡܫܰܪ̈ܰܝܳܐ ܘܓܰܪ̈ܒܳܢܶܐ: ܘܰܕܒܰܪܘ ܥܰܡܗܽܘܢ ܩܶܢܝ̈ܳܢܶܐ ܘܺܐܝܩܰܪܬܳܐ ܪܰܒܬܳܐ: ܥܰܡ ܕܰܗܒܳܐ ܣܰܓܺܝܳܐܐ: ܘܫܰܪܺܝܘ ܠܡܶܪܕܳܐ ܒܽܐܘܪܚܳܐ: ܘܡ̣ܶܢ ܩܕܳܡ ܕܢܶܡܛܽܘܢ ܠܕܰܝܪܶܗ ܐܶܬܰܐܣܺܝܘ: ܘܰܐܪܓܶܫܘ ܒܡܶܕܶܡ ܕܰܗܘܳܐ ܘܶܐܡܰܪ ܠܗܽܘܢ ܠܬܰܠܡܺܝ̈ܕܰܘܗܝ: ܘܟܰܕ ܡܛܰܘ ܨܶܝܕܰܘܗܝ ܦܬܰܚ ܟܰܘܬܳܐ ܕܒܶܝܬ ܚܒܽܘܫܝܶܗ ܘܡܰܠܶܠ ܥܰܡܗܽܘܢ: ܘܶܐܡܰܪ ܠܬܰܠܡܺܝܕܶܗ ܠܐܷܘܰܢܛܺܝ ܕܰܐܬܩܶܢ ܐܽܘܙܢܳܐ ܕܡܰܥܡܽܘܕܺܝܬܳܐ: ܘܰܢܦܰܩ ܡ̣ܶܢ ܒܶܝܬ ܚܒܽܘܫܝܶܗ ܘܰܐܥܡܶܕ ܐܶܢܽܘܢ ܒܫܶܡ ܬܠܺܝܬܳܝܽܘܬܳܐ: ܘܰܣܠܶܩ ܟܰܕ ܢܳܨܚܺܝܢ ܘܡܰܒܪܩܺܝܢ ܒܝܰܕ ܫܽܘܦܪܳܐ ܐܠܰܗܳܝܳܐ ܕܩܰܒܶܠܘ ܗܘܰܘ ܡ̣ܶܢ ܡܰܥܡܽܘܕܺܝܬܳܐ ܩܰܕܺܝܫܬܳܐ: ܗܳܘܶܝܢ ܗܘܰܝ̈ ܢܰܦ̈ܫܳܬܳܐ ܕܰܐܥܡܶܕ ܒܡܶܢܝܳܢܳܐ ܬܶܫܥܺܝܢ ܢܰܦ̈ܫܳܢ: ܘܰܗܘܰܘ ܠܘܳܬܶܗ ܕܛܽܘܒܳܢܳܐ ܥܶܣܪܺܝܢ ܝܰܘ̈ܡܺܝܢ: ܘܰܗܦܰܟܘ ܒܰܫܠܳܡܳܐ ܠܐܬܪܗܽܘܢ ܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܐܠܰܗܳܐ ܕܰܐܝܟ ܕܰܐܣܺܝܬ ܒܰܨܠܰܘ̈ܳܬܶܗ ܠܗܳܠܶܝܢ ܟܪ̈ܺܝܗܶܐ ܕܰܠܘܳܬܶܗ ܐܳܬܶܝܢ ܗܘܰܘ: ܬܰܐܣܶܐ ܠܰܢ ܡ̣ܶܢ ܟܽܠܗܽܘܢ ܟܺܐܒ̈ܶܐ ܟܣܰܝ̈ܳܐ ܘܰܓܠܰܝ̈ܳܐ: ܘܰܬܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܘܰܠܝܳܚܳܐ ܕܣܰܟܠܘ̈ܳܬܳܐ: ܘܕܰܬܒܰܣܶܡ ܠܥܰܢܺܝ̈ܕܰܝܢ ܒܡܰܠܟܽܘܬܳܟ ܫܡܰܝܳܢܺܝܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܒܟܽܠܙܒܰܢ ܡܶܬܬܙܺܝܥܳܢܽܘܬܳܐ ܠܘܳܬ ܡܰܥܒܕܳܢܽܘܬܳܐ ܐܺܝܬ ܠܳܟ ܐܠܰܗܳܐܝ̣ܬ: ܗ̇ܰܘ ܕܡ̣ܶܢ ܐܠܰܗܳܐ ܐܰܒܳܐ ܐܰܝܟ ܡܶܠܬܳܐ ܡ̣ܶܢ ܗܰܘܢܳܐ ܐܶܬܺܝܠܶܕܬ ܠܐ ܡܶܬܰܐܡܪܳܢܳܐܝ̣ܬ ܘܡ̣ܶܢ ܐܠܰܗܳܐ ܪܽܘܚܳܐ ܩܰܕܺܝܫܳܐ ܐܶܬܓܰܫܰܡܬ ܒܟܰܪܣܳܐ ܕܰܒܬܽܘܠܬܳܐ ܘܡܶܢܳܗ̇ ܐܶܬܺܝܠܶܕܬ ܨܶܒܝܳܢܳܐܝ̣ܬ: ܘܰܓܒܰܝܬ ܠܳܟ ܩܰܕܺܝ̈ܫܶܐ ܕܢܶܥܒܕܽܘܢ ܨܶܒܝܳܢܳܟ ܕܚܰܕ ܡܶܢܗܽܘܢ ܐܺܝܬܰܘܗܝ ܡܳܪܝ ܐܰܒܪܳܗܳܡ: ܒܳܥܶܝܢܰܢ ܡܶܢܳܟ ܒܝܰܕ ܨܠܰܘ̈ܳܬܶܗ: ܕܰܬܩܰܒܶܠ ܠܒܶܣ̈ܡܶܐ ܗܳܠܶܝܢ ܕܰܡܩܰܪܒܺܝܢܰܢ ܠܳܟ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܠܠܝܐ

 

ܥܠ ܡܪܝ ܐܒܪܗܡ

 

 

 

ܬܶܫܒܽܘܚܬܳܐ: ܠܗܰܘ ܡܢܰܨܚܳܢܳܐ ܕܕܳܚܠܰܘ̈ܗܝ ܕܢܰܨܰܚ ܘܰܓܒܳܐ ܠܥܰܒܕܶܗ ܡܳܪܝ ܐܰܒܪܳܗܳܡ: ܡ̣ܶܢ ܓܰܘ ܟܰܪܣܳܐ ܪܶܚܡܬܳܢܳܐܝ̣ܬ: ܠܗܰܘ ܕܫܰܟܶܢ ܠܶܗ ܚܰܝ̈ܠܐ ܘܳܐܣܘ̈ܳܬܳܐ: ܕܢܰܐܣܶܐ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܘܠܰܡܫܰܪ̈ܰܝܳܐ ܘܰܠܓܰܪ̈ܒܶܐ ܫܰܘܝܳܐܝ̣ܬ: ܠܗܰܘ ܕܝܳܗܶܒ ܒܰܨܠܰܘ̈ܳܬܶܗ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܠܟܽܠ ܡ̇ܰܢ ܕܰܡܝܰܩܰܪ ܠܶܗ: ܘܥܳܒܶܕ ܥܺܐܕܶܗ ܒܗܰܝܡܳܢܽܘܬܳܐ: ܘܫܳܐܶܠ ܪ̈ܰܚܡܶܐ ܒܝܰܕ ܒܳܥ̈ܘܳܬܶܗ ܕܠܐ ܦܠܺܝܓܽܘܬܳܐ: ܕܠܶܗ ܠܗܰܘ ܕܰܓܒܳܝܗܝ ܢܫܰܒܰܚ ܐܰܡܺܝܢܳܐܝ̣ܬ: ܒܗܳܢܳܐ܀

 

 

 

ܣܕܪܐ

 

 

 

ܒܰܐܝܢܳܐ ܦܽܘܡܳܐ ܐܰܘ ܠܶܫܳܢܳܐ ܐܺܝܬ ܚܰܝܠܐ ܠܰܡܡܰܠܳܠܽܘ ܬܶܕܡܪ̈ܳܬܳܐ ܪܰܘܪ̈ܒܳܬܳܐ ܕܰܣܥܰܪ ܒܥܳܠܡܳܐ ܗܳܢܳܐ ܓܰܒܝܳܐ ܪܰܒܐ ܘܰܡܥܰܠܝܳܐ ܡܳܪܝ ܐܰܒܪܳܗܳܡ ܡܢܺܝܚܳܢܳܐ ܕܺܝܠܳܟ ܐܳܘ ܡܳܪܝܳܐ ܐܠܰܗܳܐ ܕܺܝܠܰܢ: ܗܰܘܢܳܐ ܕܶܝܢ ܩܳܐܶܡ ܠܶܗ ܒܬܶܡܗܳܐ: ܟܰܕ ܚܳܙܶܐ ܠܰܡܝܰܬܪ̈ܳܬܶܗ ܕܥܳܒܪ̈ܳܢ ܠܣܽܘܟܳܠܐ ܐ̱ܢܳܫܳܝܳܐ ܗܳܢܳܐ ܕܡ̣ܶܢ ܡܕܺܝܢܰܬ݀ ܡܰܠܟܽܘܬܳܐ ܩܽܘܣܛܰܢܛܺܝܢܽܘܦܳܠܺܝܣ ܐܺܝܬܰܘܗܝ ܗܘܳܐ: ܘܰܒܗܰܝܡܳܢܽܘܬܳܐ ܫܰܪܺܝܪܬܳܐ ܡܕܰܪܰܫ ܗܘܳܐ: ܡ̣ܶܢ ܐܰܒܳܗܰܘ̈ܗܝ ܡܗܰܝ̈ܡܢܶܐ ܫܰܪܺܝܪ̈ܶܐ ܘܰܛܒܺܝ̈ܒܶܐ: ܗܳܢܳܐ ܕܺܝܚܺܝܕܳܝܳܐ ܗܘܳܐ ܠܐܒܳܗܰܘ̈ܗܝ: ܘܒܺܐܝܩܳܪ̈ܶܐ ܪܰܘܪ̈ܒܶܐ ܐܶܬܪܰܒܺܝ: ܘܟܽܠܗܽܘܢ ܒܢ̈ܰܝ ܡܕܺܝܢ̱ܬܶܗ ܡܶܛܽܠ ܥܽܘܬܪܳܐ ܘܺܐܝܩܳܪܳܐ ܕܰܐܒܳܗܰܘ̈ܗܝ ܪܳܚܡܺܝܢ ܗܘܰܘ ܠܶܗ: ܘܳܐܦ ܡ̣ܶܢ ܟܽܠ ܐ̱ܢܳܫ ܡܶܬܩܰܠܰܣ ܗܘܳܐ: ܘܗ̣ܽܘ ܪܚܺܝܡܳܐ ܘܦܰܐܝܳܐ ܘܩܰܕܺܝܫܳܐ ܠܐ ܡܩܰܒܶܠ ܗܘܳܐ ܫܽܘܒܚܳܐ ܣܪܺܝܩܳܐ: ܗܳܢܳܐ ܕܟܰܕ ܐܺܝܬܰܘܗܝ ܗܘܳܐ ܐܰܝܟ ܒܰܪ ܬܰܪܬܰܥܶܣܪܶܐ ܫܢܰܝ̈ܳܐ: ܝܰܗܒܽܘܗܝ ܐܰܒܳܗܰܘ̈ܗܝ ܕܢܺܐܠܰܦ ܣܶܦܪܳܐ ܒܶܐܣܟܽܘܠܺܝ ܥܰܡ ܒܢ̈ܰܝ ܪܰܘܪ̈ܒܶܐ ܚܰܒܪ̈ܰܘܗܝ: ܘܰܐܓܢܰܬ݀ ܥܠܰܘܗܝ ܛܰܝܒܽܘܬܳܐ ܐܠܰܗܳܝܬܳܐ: ܗܳܢܳܐ ܕܟܰܕ ܨܒܰܘ ܐܰܒܳܗܰܘ̈ܗܝ ܕܢܶܡܟܪܽܘܢ ܠܶܗ ܐܰܢ̱ܬܬܳܐ ܠܐ ܫܳܠܶܡ ܠܨܶܒܝܳܢܗܽܘܢ: ܐܶܠܐ ܥܳܪܶܩ ܡܶܢܗܽܘܢ ܡܛܰܫܝܳܐܝ̣ܬ: ܘܶܐܬܳܐ ܠܰܣܦܳܪ̈ܰܝ ܝܰܡܳܐ ܐܰܝܟܳܐ ܕܰܣܦܺܝ̈ܢܶܐ ܩܳܝ̈ܡܳܢ ܗܘܰܝ̈ ܘܝܰܗܒ ܐܰܓܪܳܐ ܕܰܚܕܳܐ ܡܶܢܗܶܝܢ: ܘܰܪܟܶܒ ܗܘܳܐ: ܘܶܐܙܰܠ ܠܣܽܘܪܺܝܰܐ: ܗܳܢܳܐ ܕܚܳܕܰܪ ܗܘܳܐ ܘܡܶܬܟܪܶܟ ܒܰܐܬܪܳܐ ܕܦܰܪ̈ܬܘܳܝܶܐ: ܘܳܐܦ ܠܡܰܕܢܚܳܐ ܐܶܙܰܠ: ܘܰܡܛܳܐ ܠܛܽܘܪ̈ܰܝ ܩܰܪܕܽܘ: ܘܰܗܦܰܟ ܡ̣ܶܢ ܬܰܡܳܢ: ܘܡܰܢܰܥ ܠܛܽܘܪܳܐ ܚܰܕ ܕܡܶܬܩܪܶܐ ܛܽܘܪܳܐ ܕܪܳܡ: ܘܶܐܫܟܰܚ ܡ̣ܶܢ ܡܰܕܢܚܶܗ ܕܛܽܘܪܳܐ ܡܥܰܪܬܳܐ ܚܕܳܐ ܕܡܶܬܩܰܪܝܳܐ ܕܒܶܝܬ ܣܰܒܪܳܐ: ܘܥܳܡܰܪ ܗܘܳܐ ܒܳܗ̇ ܚܰܕ ܓܰܒܪܳܐ ܓܡܺܝܪܳܐ ܕܰܫܡܶܗ ܐܰܒܰܐܣ: ܘܥܰܡܶܗ ܐܰܝܟ ܥܶܣܪܺܝܢ ܘܰܬܪܶܝܢ ܐܰܚ̈ܶܐ ܒܡܶܢܝܳܢܳܐ: ܗܳܢܳܐ ܕܟܰܕ ܐܶܬܳܐ ܠܘܳܬܗܽܘܢ ܒܶܐܣܟܺܝܡܳܐ ܫܺܝܛܳܐ ܕܰܐܒܺܝܠܽܘܬܳܐ: ܟܰܕ ܚܶܦܝܳܝ ܘܨܰܪܺܝܟ ܘܰܡܣܰܪܶܩ ܫܶܐܠ ܒܰܫܠܳܡܗܽܘܢ ܘܰܣܓܶܕ ܠܗܽܘܢ: ܗ̣ܶܢܽܘܢ ܕܶܝܢ ܩܰܒܠܽܘܗܝ ܚܘܺܝܚܳܐܝ̣ܬ: ܗܳܢܳܐ ܕܡ̣ܶܢ ܒܳܬܰܪ ܬܠܳܬܳܐ ܝܰܘܡܺܝ̈ܢ ܡܡܰܠܶܠ ܥܰܡܶܗ ܪܺܝܫ ܕܰܝܪܳܐ ܘܶܐܡܰܪ ܠܶܗ ܡܫܰܐܠܐܴܝ̣ܬ: ܒܶܪܝ ܡ̣ܶܢ ܐܰܝܟܳܐ ܐܺܝܬܰܝܟ ܘܠܐܝܟܳܐ ܐܳܙܶܠ ܐܰܢ̱ܬ: ܘܡܽܘܢ ܒܳܥܶܐ ܐܰܢ̱ܬ: ܘܦܰܢܺܝ ܕܰܐܟܣܢܳܝܳܐ ܐܺܝܬܰܝ ܘܒܽܐܘܪܚܳܐ ܕܰܐܠܳܗܳܐ ܢܶܦܩܶܬ ܘܰܐܝܟܳܐ ܐܶܥܡܰܪ ܠܐ ܝܳܕܰܥ ܐ̱ܢܳܐ: ܐܶܠܐ ܒܳܥܶܐ ܐ̱ܢܳܐ ܡܶܢܳܟ ܕܰܬܩܰܒܠܰܢܝ ܠܘܳܬܳܟ: ܘܰܐܠܶܦܰܝܢܝ ܝܽܘܠܦܳܢܳܐ ܐܠܰܗܳܝܳܐ: ܘܰܩܢܺܝ ܒܺܝ ܚܰܝ̈ܶܐ ܠܢܰܦܫܳܟ: ܗܳܢܳܐ ܕܟܰܕ ܚܙܳܝܗܝ ܪܺܝܫ ܕܰܝܪܳܐ ܕܰܡܛܰܟܰܣ ܘܡܰܟܺܝܟ ܘܰܪܡܺܝܣ ܕܕܰܝܪܳܝܽܘܬܳܐ: ܘܰܚܕܺܝ ܒܶܗ ܐܰܝܟ ܕܰܒܣܺܝܡܬܳܐ ܡܝܰܬܰܪܬܳܐ: ܗܳܢܳܐ ܒܨܰܘܡܳܐ ܘܒܰܨܠܽܘܬܳܐ ܘܰܒܡܰܟܺܝܟܽܘܬܳܐ ܘܡܶܫܬܰܡܥܳܢܽܘܬܳܐ ܡܕܰܪܰܫ ܗܘܳܐ ܢܰܦܫܶܗ: ܘܰܒܕܽܘܒܳܪ̈ܰܘܗܝ ܬܡܺܝ̈ܗܶܐ ܘܰܐܠܳܗܳܝ̈ܶܐ ܡܰܬܗܰܪ ܗܘܳܐ ܠܪܺܝܫ ܕܰܝܪܳܐ ܘܠܐܚ̈ܶܐ: ܘܰܣܒܰܠ ܗܘܳܐ ܘܰܡܣܰܝܒܰܪ ܨܰܥܪܳܐ ܘܒܶܙܚܳܐ ܘܡܽܘܝܳܩܳܐ ܕܡ̣ܶܢ ܐܰܚ̈ܶܐ: ܘܠܐ ܪܰܛܶܢ ܘܠܐ ܡܰܠܶܠ ܥܰܡܗܽܘܢ ܡܶܠܬܳܐ ܕܰܫܚܳܩܳܐ ܠܗܽܘܢ: ܗܳܢܳܐ ܕܡ̣ܶܢ ܒܳܬܰܪ ܬܪܶܥܣܰܪ ܫܢܺܝ̈ܢ ܚܣܰܡܘ ܗܘܰܘ ܒܶܗ ܐܰܚ̈ܶܐ ܕܗ̇ܳܝ ܕܰܝܪܳܐ: ܘܶܐܬܒܰܪܰܟ ܡ̣ܶܢ ܪܺܝܫ ܕܰܝܪܳܐ ܘܰܐܪܚܶܩ ܡܶܢܗܽܘܢ: ܘܶܐܙܰܠ ܡ̣ܶܢ ܨܶܝܕܰܝܗܽܘܢ: ܘܰܣܠܶܩ ܗܘܳܐ ܠܪܺܝܫܶܗ ܕܛܽܘܪܳܐ ܘܶܐܫܟܰܚ ܬܰܡܳܢ ܕܽܘܟܬܳܐ ܕܦܰܐܝܳܐ ܘܒܳܬ ܬܰܡܳܢ: ܗܳܢܳܐ ܕܟܰܕ ܕܰܡܺܝܟ ܐܶܬܓܠܺܝ ܠܶܗ ܒܓܶܠܝܳܢܳܐ ܡܶܢܳܟ ܐܠܰܗܳܐ ܘܶܐܡܰܪܬ ܠܶܗ: ܕܗܳܐ ܕܽܘܟܬܐ ܗܳܕܶܐ ܐܶܬܛܰܝܒܶܬ ܠܳܟ: ܐܶܬܕܰܟܪ ܘܰܠܐܻܝ ܕܬܶܣܰܒ ܟܠܺܝܠܐ ܕܠܐ ܡܶܬܚܰܒܰܠ: ܘܩܽܘܡ ܘܰܒܢܺܝ ܠܳܟ ܗܳܪܟܳܐ ܕܰܝܪܳܐ ܘܗܳܐ ܡܫܰܕܰܪ ܐ̱ܢܳܐ ܠܳܟ ܬܪܶܝܢ ܬܰܠܡܺܝ̈ܕܶܐ ܕܢܶܥܡܪܽܘܢ ܥܰܡܳܟ: ܟܽܠܶܗ ܙܰܒܢܳܐ ܕܚܰܝܰܝ̈ܟ: ܗܳܢܳܐ ܕܟܰܕ ܐܶܬܬܥܺܝܪ ܡ̣ܶܢ ܫܶܢܬܶܗ ܐܶܬܒܰܝܰܢ ܒܪܶܥܝܳܢܶܗ ܒܚܶܙܘܳܐ ܕܰܚܙܳܐ: ܘܩܳܡ ܘܰܓܒܳܐ ܕܽܘܟܬܳܐ ܚܕܳܐ ܘܫܰܪܺܝ ܛܳܥܶܢ ܟܺܐܦ̈ܶܐ ܘܡܰܝܬܶܐ ܘܣܳܐܶܡ ܒܳܗ̇ ܟܰܕ ܡܫܰܒܰܚ ܘܰܡܙܰܡܰܪ: ܘܰܫܒܰܥ ܙܰܒܢܺܝ̈ܢ ܒܝܰܘܡܳܐ ܣܳܐܶܡ ܗܘܳܐ ܒܽܘܪܟܳܐ ܘܰܡܨܰܠܐܷ ܗܘܳܐ: ܗܳܢܳܐ ܕܒܳܬܰܪ ܐܰܪܒܥܳܐ ܝܰܘܡܺܝ̈ܢ ܐܰܪܺܝܡ ܥܰܝܢܰܘ̈ܗܝ ܘܰܚܙܳܐ ܬܪܶܝܢ ܓܰܒܪ̈ܺܝܢ ܕܣܳܠܩܺܝܢ ܒܰܫܒܺܝܠܐ ܗ̇ܰܘ ܕܛܽܘܪܳܐ ܘܳܐܬܶܝܢ ܠܘܳܬܶܗ: ܘܰܪܗܶܛ ܠܐܘܪܰܥܗܽܘܢ ܘܩܰܒܶܠ ܐܶܢܽܘܢ: ܘܫܶܐܠܘ ܒܰܫܠܳܡܳܐ ܕܰܚܕܳܕ̈ܶܐ ܒܢܽܘܫܰܩܬܳܐ ܩܰܕܝܺܫܬܳܐ: ܘܰܪܕܰܘ ܘܶܐܬܳܐ ܥܰܡܶܗ ܥܕܰܡܳܐ ܠܕܽܘܟܬܳܐ ܕܟܰܢܶܫ ܒܳܗ̇ ܟܺܐܦ̈ܶܐ: ܗܳܢܳܐ ܕܚܰܘܺܝ ܠܗܽܘܢ ܟܽܠ ܡܶܕܶܡ ܢܰܗܺܝܪܳܐܝ̣ܬ: ܘܰܕܠܐ ܬܽܘܗܳܝܳܐ ܛܰܝܶܒܘ ܟܽܠ ܡܶܕܶܡ ܕܚܳܫܰܚ ܗܘܳܐ ܠܒܶܢܝܳܢܳܐ ܕܕܰܝܪܳܐ ܘܰܒܡܽܘܠܳܝܳܐ ܕܥܶܣܪܺܝܢ ܘܫܰܒܥܳܐ ܝܰܘܡܺܝ̈ܢ ܒܢܰܐܘܽܘܗ̇: ܘܰܥܒܰܕܘ ܠܗܽܘܢ ܣܶܬܳܪܳܐ ܩܰܠܺܝܠ: ܘܠܰܩܶܛܘ ܡ̣ܶܢ ܣܥܳܪ̈ܶܐ ܕܕܰܒܪܳܐ ܐܰܝܟ ܡܠܐܷ ܟܺܝܠܐ ܚܰܕ ܘܰܛܚܰܢܘ ܐܶܢܽܘܢ: ܘܰܗܘܰܘ ܐܳܟܠܺܝܢ ܡܶܢܶܗ ܬܪܶܝܢ ܝܰܪ̈ܚܺܝܢ: ܗܳܢܳܐ ܕܟܰܕ ܒܢܳܐ ܠܶܗ ܒܶܝܬ ܚܒܽܘܫܝܳܐ: ܦܪܰܫ ܢܰܦܫܶܗ ܘܰܢܙܰܪ ܗ̣ܽܘ ܠܶܗ ܡ̣ܶܢ ܠܰܚܡܳܐ ܘܡ̣ܶܢ ܡܰܝ̈ܳܐ: ܘܡ̣ܶܢ ܒܶܣܪܳܐ ܘܡ̣ܶܢ ܚܰܡܪܳܐ: ܘܡ̣ܶܢ ܟܽܠ ܙܢܳܐ ܕܙܳܪܥܳܐ ܦܰܕܳܢܳܐ: ܘܨܳܐܶܡ ܗܘܳܐ ܡ̣ܶܢ ܚܰܕ ܒܫܰܒܳܐ ܠܚܰܕ ܒܫܰܒܳܐ: ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ: ܘܡܶܣܬܰܝܒܰܪ ܗܘܳܐ ܡ̣ܶܢ ܝܰܪܩܳܐ ܕܒܰܫܺܝܠ ܘܡ̣ܶܢ ܥܶܩܳܪ̈ܶܐ ܕܕܰܒܪܳܐ: ܗܳܢܳܐ ܕܰܦܫܺܝܛܳܐ ܗܘܳܬ ܩܰܘܡܬܶܗ ܠܰܨܠܽܘܬܳܐ ܒܠܺܠܝܳܐ ܘܒܺܐܝܡܳܡܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܘ̈ܗܝ: ܘܕܶܡ̈ܥܶܐ ܣܰܓܺܝ̈ܶܐܐ ܢܳܚ̈ܬܳܢ ܗܘ̈ܰܝ ܡ̣ܶܢ ܥܰܝܢܰܘ̈ܗܝ: ܘܠܳܒܶܫ ܗܘܳܐ ܟܽܘܬܺܝܢܳܐ ܕܣܰܥܪܳܐ: ܘܺܐܝܬ ܗܘܳܐ ܠܶܗ ܥܶܪܰܩܬܳܐ ܕܦܰܪܙܠܐ ܥܰܠ ܚܰܨܶܗ: ܘܗܳܟܰܢܳܐ ܐܠܰܝܨܳܐ ܗܘܳܬ ܥܠܰܘܗܝ: ܥܕܰܡܳܐ ܕܰܫܘܰܪ ܒܶܣܪܳܐ ܘܰܣܠܶܩ ܠܥܶܠ ܡ̣ܶܢ ܥܶܪܰܩܬܳܐ ܕܦܰܪܙܠܐ ܘܶܐܬܟܰܣܝܰܬ݀: ܗܳܢܳܐ ܕܺܐܝܬ ܗܘܳܐ ܠܶܗ ܕܽܘܟܬܳܐ ܝܺܕܺܝܥܬܳܐ ܕܢܳܦܶܩ ܗܘܳܐ ܡ̣ܶܢ ܣܰܪܓܬܶܗ: ܘܳܐܶܙܠ ܗܘܳܐ ܠܛܽܘܪܳܐ ܒܰܠܚܽܘܕܰܘܗܝ ܟܰܕ ܡܙܰܡܰܪ ܘܰܡܨܰܠܐܷ ܒܫܶܠܝܳܐ: ܒܩܰܝܛܳܐ ܘܰܒܣܰܬܘܳܐ: ܘܰܒܠܺܠܝܳܐ ܘܒܺܐܝܡܳܡܳܐ: ܘܰܗܘܳܐ ܒܰܐܓܽܘܢܳܐ ܗܳܢܳܐ ܬܠܳܬ ܫܢܺܝ̈ܢ ܕܒܰܪ ܠܚܰܕ ܡ̣ܶܢ ܬܰܠܡܺܝ̈ܕܰܘܗܝ ܕܰܫܡܶܗ ܣܛܶܦܰܢܳܘܣ ܘܶܐܙܰܠܘ ܠܘܳܬ ܡܳܪܝ ܝܽܘܚܰܢܳܢ ܐܶܦܣܩܽܘܦܳܐ ܕܰܐܬܪܳܐ ܗ̇ܰܘ: ܘܶܐܫܟܚܶܗ ܒܰܩܪܺܝܬܳܐ ܒܺܝܪܶܐ: ܘܥܰܠܘ ܠܘܳܬܶܗ ܘܫܶܐܠܘ ܒܰܫܠܳܡܶܗ: ܘܶܐܬܒܰܪܰܟܘ ܡܶܢܶܗ ܘܶܐܬܬܰܣܪܰܚܘ ܡ̣ܶܢ ܐܺܝܕܰܘ̈ܗܝ ܘܰܗܘܳܐ ܩܰܫܺܝܫܳܐ: ܘܬܰܠܡܺܝܕܶܗ ܡܫܰܡܫܳܢܳܐ: ܘܰܗܦܰܟܘ ܠܕܰܝܪܗܽܘܢ: ܘܗܳܫܳܐ ܡܶܢܳܟ ܫܳܐܠܺܝܢܰܢ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܰܒܝܰܕ ܨܠܰܘ̈ܳܬܶܗ ܕܰܡܢܺܝܚܳܢܳܟ ܡܳܪܝ ܐܰܒܪܳܗܳܡ: ܘܰܕܬܰܠܡܺܝ̈ܕܰܘܗܝ ܓܒܰܝ̈ܳܐ ܘܩܰܕܺܝ̈ܫܶܐ: ܘܰܕܣܺܝܥܬܳܐ ܕܢܰܩܺܝܦܳܐ ܠܶܗ: ܠܟܳܗ̈ܢܶܐ ܢܰܟܦܽܘܬܳܐ: ܠܰܡܫܰܡ̈ܫܳܢܶܐ ܙܰܗܝܽܘܬܳܐ: ܠܓܰܒܪ̈ܶܐ ܩܰܕܺܝܫܽܘܬܳܐ: ܠܢܶܫ̈ܶܐ ܟܚܺܝܕܽܘܬܳܐ: ܠܰܛܠܳܝ̈ܶܐ ܡܶܬܚܰܟܡܳܢܽܘܬܳܐ: ܠܕܰܝ̈ܘܳܢܶܐ ܡܶܬܚܰܪܪܳܢܽܘܬܳܐ: ܘܡ̣ܶܢ ܫܺܐܕ̈ܶܐ ܡܶܫܬܰܘܙܒܳܢܽܘܬܳܐ: ܠܰܣ̈ܡܰܝܳܐ ܡܶܬܦܰܬܚܳܢܽܘܬܳܐ: ܠܓܰܪ̈ܒܳܢܶܐ ܡܶܬܕܰܟܝܳܢܽܘܬܳܐ: ܠܰܡܫܰܪ̈ܰܝܳܐ ܡܶܬܚܰܝܨܳܢܽܘܬܳܐ: ܠܰܟܪ̈ܺܝܗܶܐ ܡܶܬܰܐܣܝܳܢܽܘܬܳܐ: ܠܐܠܺܝ̈ܨܶܐ ܡܶܬܪܰܘܚܳܢܽܘܬܳܐ: ܠܡܶܣ̈ܟܺܢܶܐ ܣܰܒܥܽܘܬܳܐ: ܘܠܰܡܛܰܪ̈ܦܶܐ ܡܶܬܬܢܺܝܚܳܢܽܘܬܳܐ: ܘܠܰܢ ܚܰܛܳܝ̈ܶܐ ܡܰܠܟܽܘܬܳܐ: ܘܰܕܚܽܘܩ ܡܶܢܰܢ ܠܟܽܠܗܽܘܢ ܚܽܘ̈ܫܳܒܶܐ ܒܺܝ̈ܫܶܐ: ܘܰܠܨܶܢ̈ܥܳܬܶܗ ܕܗ̇ܰܘ ܡܪܰܡܝܳܢܳܐ ܗ̇ܰܘ ܣܳܢܳܐܐ ܕܐ̱ܢܳܫܽܘܬܰܢ: ܘܰܐܫܦܰܥ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ ܟܽܠܗܶܝܢ ܛܳܒ̈ܳܬܳܐ ܘܪ̈ܰܚܡܶܐ ܘܰܚܢܳܢܳܐ ܠܟܽܠܰܢ: ܥܰܡ ܩܰܕܺܝ̈ܫܰܝܟ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܐܰܡܺܝܢܳܐܝ̣ܬ ܐܳܘ ܡܰܚܝܳܢܰܢ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܠܰܗܳܐ ܗ̇ܰܘ ܕܡܶܛܽܠ ܚܽܘܒܳܟ ܐܶܬܢܰܟܪܺܝܘ ܩܰܕܺܝ̈ܫܶܐ ܠܥܳܠܡܳܐ ܗܳܢܳܐ ܥܳܒܽܘܪܳܐ: ܓܰܒܝܳܐ ܡܳܪܝ ܐܰܒܪܳܗܳܡ: ܘܪܺܝܫ ܒܰܓܰ̈ܒܰܝܳܐ ܡܳܪܝ ܒܰܪܨܰܘܡܳܐ: ܘܶܐܣܛܶܦܰܢܳܘܣ ܘܠܐܷܘܰܢܛܺܝ ܘܝܰܘܢܳܢ ܘܫܰܪܟܳܐ ܕܰܐܚܰܝ̈ܗܽܘܢ ܬܰܠܡܺܝ̈ܕܰܘܗܝ: ܘܶܐܬܓܰܢ̱ܒܰܪ ܘܥܰܠ ܟܽܠܗܶܝܢ ܪ̈ܓܺܝܓܳܬܶܗ ܗܰܒ ܠܰܢ ܕܰܢܡܰܪܶܐ ܒܕܽܘܒܳܪ̈ܰܝܗܽܘܢ: ܘܢܶܫܦܰܪ ܠܨܶܒܝܳܢܳܟ ܛܳܒܳܐ ܐܰܟܘܳܬܗܽܘܢ ܘܥܰܡܗܽܘܢ ܘܒܰܝܢܳܬܗܽܘܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܫܒܺܝܚܳܐ ܘܰܡܫܰܒܚܳܐ: ܕܰܫܒܺܝܚ ܒܢܶܨ̈ܚܳܢܶܐ ܡܳܪܝ ܐܰܒܪܳܗܳܡ ܠܗ̇ܰܘ ܕܰܣܥܰܪ ܒܶܝܬ ܐܺܝܕܰܘ̈ܗܝ ܟܽܠ ܚܰܝ̈ܠܐ ܘܬܶܕܡܪ̈ܳܬܳܐ: ܕܒܰܨܠܰܘ̈ܳܬܶܗ ܟܽܠܰܢ ܡܶܬܓܰܘܣܺܝܢܰܢ: ܘܡ̣ܶܢ ܓܰܪ̈ܡܰܘܗܝ ܥܽܘܕܪ̈ܳܢܶܐ ܢܳܣܒܺܝܢܰܢ: ܘܬܶܫܒܽܘܚܬܳܐ ܠܡܳܪܶܗ ܡܰܣܩܺܝܢܰܢ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܠܥܰܕܥܺܐܕܳܐ ܕܺܝܠܶܗ ܐܶܬܛܰܝܰܒܢܰܢ: ܘܶܐܬܰܝܢܰܢ ܕܰܐܬܠܺܝܛܳܐ ܢܰܨܺܝܚܳܐ ܩܰܕܺܝܫܳܐ ܡܳܪܝ ܐܰܒܪܳܗܳܡ: ܘܒܰܙܡܺܝܪ̈ܳܬܳܐ ܘܰܒܩܺܝ̈ܢܳܬܳܐ ܐܠܰܗܳܝ̈ܳܬܳܐ ܠܝܰܘܡܳܐ ܕܕܽܘܟܪܳܢܶܗ ܕܰܐܒܳܐ ܒܪܺܝܟܳܐ ܡܳܪܝ ܐܰܒܪܳܗܳܡ ܡܥܰܕܥܕܺܝܢܰܢ: ܬܗܺܝܪܺܝܢ ܥܒܳܕܰܘ̈ܗܝ ܘܪܰܘܪ̈ܒܺܝܢ ܢܶܨܚܳܢܰܘ̈ܗܝ: ܘܰܙܥܽܘܪ ܗ̣ܽܘ ܦܽܘܡܰܢ ܠܩܽܘܠܳܣܶܗ: ܘܰܒܨܺܝܪ ܗ̣ܽܘ ܠܶܫܳܢܰܢ ܕܢܶܫܬܰܥܶܐ ܦܰܐܝ̈ܳܬܶܗ: ܗܳܢܳܐ ܕܰܐܝܟ ܡܰܪ̈ܓܶܐ ܣܒܺܝܣܺܝܢ ܫܽܘܦܪ̈ܰܘܗܝ ܘܣܰܓܺܝ̈ܳܐܢ ܐܳܬܘ̈ܳܬܶܗ: ܗܳܢܳܐ ܕܡ̣ܶܢ ܐܰܬܪܳܐ ܕܩܽܘܣܛܰܢܛܺܝܢܽܘܦܳܠܺܝܣ ܐܺܝܬܰܘܗܝ ܗܘܳܐ: ܘܰܐܝܟ ܕܳܫܢܳܐ ܕܒܽܘܪ̈ܟܳܬܳܐ ܐܶܫܬܰܕܰܪ ܠܰܦܢܺܝܬܰܢ ܘܰܐܬܪܰܢ: ܘܰܐܥܬܰܪ ܠܰܢ ܒܥܽܘܕܪ̈ܳܢܰܘܗܝ ܐܠܰܗܳܝ̈ܶܐ: ܘܶܐܬܓܡܰܪ ܒܰܡܝܰܬܪܽܘܬܳܐ: ܗܳܢܳܐ ܕܡ̣ܶܢ ܐܰܬܪܳܐ ܕܣܽܘܪܺܝܰܐ ܠܛܽܘܪ̈ܰܝ ܩܰܪܕܽܘ ܐܶܙܰܠ: ܘܰܗܦܰܟ ܡ̣ܶܢ ܬܰܡܳܢ ܘܶܐܬܳܐ ܠܩܰܪܺܝܒܽܘܬ ܛܽܘܪܳܐ ܕܪܳܡ: ܘܡ̣ܶܢ ܐܰܒܳܐ ܐܰܒܰܐܣ ܗ̇ܰܘ ܡܝܰܬܪܳܐ ܐܶܬܬܰܠܡܰܕ ܘܶܐܬܪܕܺܝ: ܗܳܢܳܐ ܕܡ̣ܶܢ ܐܰܚ̈ܶܐ ܐܶܬܚܣܶܡ: ܕܰܒܕܰܝܪܶܗ ܣܰܝܒܰܪ ܨܰܥܪܳܐ ܘܒܶܙܚܳܐ ܘܩܽܘܦܳܚܳܐ ܡܶܢܗܽܘܢ ܘܠܐ ܐܶܬܟܫܶܠ ܠܶܒܶܗ ܥܰܠ ܚܰܕ ܡܶܢܗܽܘܢ: ܕܰܠܡܳܐ ܢܰܘܒܶܕ ܠܰܡܝܰܬܪ̈ܳܬܶܗ: ܗܳܢܳܐ ܕܰܬܪܶܥܣܰܪ ܫܢܺܝ̈ܢ ܗܘܳܐ ܒܕܰܝܪܳܐ ܟܰܕ ܡܶܨܛܰܥܰܪ ܡ̣ܶܢ ܐܰܚ̈ܶܐ: ܘܰܡܡܰܝܩܺܝܢ ܒܶܗ ܘܶܐܣܟܺܝܡܬܳܢܳܐ ܩܳܪܶܝܢ ܗܘܰܘ ܠܶܗ: ܘܠܐ ܪܰܛܶܢ ܐܰܘ ܡܰܠܶܠ ܥܰܡ ܐ̱ܢܳܫ ܡ̣ܶܢ ܐܰܚ̈ܶܐ ܡܶܠܬܳܐ ܕܰܫܚܳܩܳܐ ܡܶܡܬܽܘܡ: ܗܳܢܳܐ ܕܟܰܕ ܚܙܳܐ ܠܐܚ̈ܶܐ ܟܽܠܗܽܘܢ ܕܳܐܡܪܺܝܢ: ܕܰܐܘ ܢܶܦܽܘܩ ܗ̣ܽܘ ܡ̣ܶܢ ܕܰܝܪܳܐ: ܐܰܘ ܟܽܠܰܢ ܢܳܦܩܺܝܢܰܢ ܡܶܢܳܗ̇: ܒܰܕ ܠܶܗ ܗ̣ܽܘ ܣܳܢܶܝܢܰܢ: ܘܰܥܡܽܘܪܝܳܐ ܥܰܡܶܗ ܠܐ ܥܳܒܕܺܝܢܰܢ: ܗܳܢܳܐ ܕܟܰܕ ܗ̣ܽܘ ܒܳܟܶܐ ܘܰܡܕܰܡܰܥ ܘܰܡܨܰܠܐ ܥܠܰܝܗܽܘܢ ܢܦܰܩ ܡ̣ܶܢ ܨܶܝܕܰܝܗܽܘܢ: ܘܰܠܛܽܘܪܳܐ ܕܡܶܬܩܪܶܐ ܛܽܘܪܳܐ ܕܪܳܡ ܬܪܰܨ ܐܽܘܪܚܶܗ: ܗܳܢܳܐ ܕܟܰܕ ܒܪܺܝܫ ܛܽܘܪܶܗ ܕܰܡܺܝܟ ܗܘܳܐ: ܐܶܬܓܠܺܝ ܥܠܰܘܗܝ ܐܠܰܗܳܐ ܘܶܐܡܰܪ ܠܶܗ ܕܰܒܢܺܝ ܠܳܟ ܗܳܪܟܳܐ ܕܰܝܪܳܐ: ܘܗܳܐ ܡܫܰܕܰܪ ܐ̱ܢܳܐ ܠܳܟ ܬܰܠܡܺܝ̈ܕܶܐ ܕܢܶܗܘܽܘܢ ܨܶܝܕܰܝܟ ܘܰܢܒܰܝܰܐܘܽܢܳܟ: ܗܳܢܳܐ ܕܒܰܫܡܶܗ ܕܰܡܫܺܝܚܳܐ ܐܶܬܚܙܶܩ: ܘܰܒܚܰܝܠܶܗ ܣܥܰܪ ܒܥܳܠܡܳܐ ܟܽܠ ܐܳܬܘ̈ܳܬܳܐ ܘܬܶܕܡܪ̈ܳܬܳܐ: ܗܳܢܳܐ ܕܒܳܬܰܪ ܕܰܒܢܳܐ ܠܕܰܝܪܶܗ ܘܶܐܬܟܰܢܰܫܘ ܨܶܝܕܰܘܗܝ ܬܰܠܡܺܝ̈ܕܶܐ: ܐܰܣܒܶܠ ܠܢܰܦܫܶܗ ܟܽܠ ܥܰܡ̈ܠܐ ܪܰܘܪ̈ܒܶܐ: ܘܰܐܓܽܘ̈ܢܶܐ ܩܫܰܝ̈ܳܐ ܘܡܰܪܺܝܪ̈ܶܐ: ܗܳܢܳܐ ܕܰܢܙܰܪ ܗ̣ܽܘ ܠܶܗ ܡ̣ܶܢ ܠܰܚܡܳܐ ܘܡ̣ܶܢ ܡܶܫܚܳܐ: ܘܡ̣ܶܢ ܟܽܠܡܶܕܶܡ ܕܙܳܪܥܳܐ ܦܰܕܳܢܳܐ: ܗܳܢܳܐ ܕܰܥܒܰܕ ܠܶܗ ܒܶܝܬ ܚܒܽܘܫܝܳܐ ܘܒܶܗ ܡܨܰܠܐ ܗܘܳܐ: ܘܡ̣ܶܢ ܚܰܕ ܒܫܰܒܳܐ ܠܚܰܕ ܒܫܰܒܳܐ ܨܳܐܶܡ ܗܘܳܐ: ܘܡ̣ܶܢ ܥܶܩܳܪ̈ܶܐ ܕܕܰܒܪܳܐ ܡܶܬܬܰܪܣܶܐ ܗܘܳܐ: ܗܳܢܳܐ ܕܶܐܣܰܪ ܠܶܗ ܥܶܪܰܩܬܳܐ ܕܦܰܪܙܠܐ ܥܰܠ ܓܽܘܫܡܶܗ: ܥܕܰܡܳܐ ܕܶܐܬܥܰܒܺܝ ܦܰܓܪܶܗ: ܘܶܐܬܟܰܣܝܰܬ݀ ܥܶܪܰܩܬܳܐ ܒܒܶܣܪܶܗ ܘܟܰܕ ܟܽܘܬܺܝܢܳܐ ܕܣܰܥܪܳܐ ܠܒܺܝܫ ܗܘܳܐ: ܗܳܢܳܐ ܕܰܒܠܺܠܝܳܐ ܘܒܺܐܝܡܳܡܳܐ ܒܬܶܫܒ̈ܚܳܬܳܐ ܕܕܰܘܺܝܕ ܐܠܰܗܳܝܳܐ ܡܙܰܡܰܪ ܗܘܳܐ: ܟܰܕ ܒܩܰܘܡܳܐ ܕܰܩܕܳܡ ܐܠܰܗܳܐ ܐܰܡܺܝܢ ܗܘܳܐ: ܗܳܢܳܐ ܕܰܢܣܰܒ ܠܐܣܛܶܦܰܢܳܘܣ ܬܰܠܡܺܝܕܶܗ: ܠܰܩܪܺܝܬܳܐ ܕܰܫܡܳܗ̇ ܒܺܐܪܶܐ ܨܶܝܕ ܡܳܪܝ ܝܽܘܚܰܢܳܢ ܐܶܦܣܩܽܘܦܳܐ ܕܺܝܠܗܽܘܢ ܐܶܙܰܠܘ: ܘܰܣܝܳܡ ܐܺܝܕܳܐ ܕܟܳܗܢܽܘܬܳܐ ܡܶܢܶܗ ܩܰܒܶܠ: ܗܳܢܳܐ ܕܰܗܘܳܐ ܦܺܝܪܡܳܐ ܕܰܟܝܳܐ ܕܰܠܟܽܠ ܦܶܢ̈ܝܳܢ ܪܺܝܚܶܗ ܦܳܐܰܚ ܗܘܳܐ: ܘܰܠܡܳܪܶܗ ܒܰܥܒ̈ܳܕܰܘܗܝ ܡܝܰܬܪ̈ܶܐ ܫܰܦܺܝܪ ܗ̣ܽܘ: ܗܳܢܳܐ ܕܰܠܘܳܬܶܗ ܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܘܰܡܫܰܪ̈ܰܝܳܐ ܘܓܰܪ̈ܒܳܢܶܐ ܨܳܝܒܺܝܢ ܗܘܰܘ: ܘܟܽܠܗܽܘܢ ܣܡܰܝ̈ܳܐ ܘܕܰܝܘ̈ܳܢܶܐ ܒܰܨܠܰܘ̈ܳܬܶܗ ܚܽܘܠܡܳܢܳܐ ܩܳܢܶܝܢ ܗܘܰܘ: ܘܫܽܘܒܚܳܐ ܠܡܳܪܶܗ ܡܰܣܩܺܝܢ ܗܘܰܘ: ܗܳܢܳܐ ܕܰܒܛܽܘܪ̈ܶܐ ܘܒܰܡܥܰܪ̈ܶܐ ܘܒܰܫܩܺܝ̈ܦܶܐ ܘܰܒܦܶܥܪ̈ܶܝܗ̇ ܕܺܝܠܳܗ̇ ܕܰܐܪܥܳܐ ܡܶܬܥܰܢܘܶܐ ܗܘܳܐ: ܘܰܨܠܰܘ̈ܳܬܳܐ ܕܰܟܝ̈ܳܬܳܐ ܠܡܳܪܶܗ ܡܩܰܪܶܒ ܗܘܳܐ: ܘܪ̈ܰܚܡܶܐ ܚܠܳܦ ܟܽܠܶܗ ܥܳܠܡܳܐ ܫܳܐܶܠ ܗܘܳܐ: ܗܳܢܳܐ ܕܰܠܫܺܐܕ̈ܶܐ ܡ̣ܶܢ ܐܰܝܠܶܝܢ ܕܳܐܬܶܝܢ ܗܘܰܘ ܠܕܰܝܪܶܗ ܛܳܪܶܕ ܗܘܳܐ: ܘܰܠܟܺܐܒ̈ܶܐ ܘܟܽܘܪ̈ܗܳܢܶܐ ܡ̣ܶܢ ܡܰܟܰܐܒ̈ܶܐ ܪܳܕܶܦ ܗܘܳܐ: ܘܚܽܘܠܡܳܢܳܐ ܠܟܽܠܗܽܘܢ ܡܚܺܝ̈ܠܐ ܒܚܰܝܠܶܗ ܕܰܡܫܺܝܚܳܐ ܝܳܗܶܒ ܗܘܳܐ: ܘܡܶܛܽܠܗܳܕܶܐ ܠܰܫܠܳܡܶܗ ܣܳܘܚܺܝܢܰܢ: ܘܰܠܪܰܒܽܘܬܶܗ ܡܩܰܠܣܺܝܢܰܢ ܘܳܐܡܪܺܝܢܰܢ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ ܣܳܡܽܘܟܳܐ ܕܰܡܚܺܝ̈ܠܐ: ܕܠܐ ܬܰܚܶܒܬ ܐܳܘ ܐܰܡܚܶܠܬ ܡ̣ܶܢ ܪܶܗܛܳܐ ܕܫܰܦܺܝܪ̈ܳܬܳܐ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܒܶܝܬ ܓܰܘܣܳܐ ܕܰܡܗܰܝ̈ܡܢܶܐ ܕܰܙܟܰܝܬ ܘܦܰܪܣܺܝܬ ܠܟܽܠ ܐܶܪ̈ܶܣܺܝܣ ܕܰܓ̈ܳܠܳܬܳܐ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܐܰܚܳܐ ܘܚܰܒܪܳܐ ܕܪ̈ܽܘܚܳܢܶܐ ܕܰܐܦܢܺܝܬ ܠܛܳܥܰܝ̈ܳܐ ܠܺܝܕܰܥܬܳܐ ܕܰܫܪܳܪܳܐ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ ܚܽܘܬܪܳܐ ܕܰܢܒܺܝ̈ܶܐ: ܕܰܠܚܶܘܝܳܐ ܕܰܫܘܰܪ ܠܳܟ ܡܚܰܝܬܳܝܗܝ ܘܰܨܪܰܝܬܳܝܗܝ ܡ̣ܶܢ ܪܺܝܫܶܗ ܘܰܥܕܰܡܳܐ ܠܕܽܘܢܒܶܗ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܛܽܘܒܬܳܢ ܒܟܽܠ ܘܕܰܟܝܳܐ: ܕܰܓܥܰܪܬ ܒܣܳܛܳܢܳܐ ܕܰܒܥܳܐ ܕܢܶܨܠܐܷ ܠܩܽܘܒܠܳܟ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ ܝܽܘܩܢܳܐ ܢܰܗܺܝܪܳܐ ܕܰܐܦܶܩܬ ܠܕܰܝܘܳܐ ܫܰܬܺܝܩܳܐ ܡ̣ܶܢ ܝܰܘܢܳܢ ܕܶܐܬܬܰܠܡܰܕ ܠܳܟ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܐܰܪܕܺܝܟܠܐ ܚܰܟܺܝܡܳܐ ܘܰܛܒܺܝܒܳܐ: ܕܰܐܥܡܶܕܬ ܠܙܽܘܗܳܕܳܡ ܡܰܠܟܳܐ ܕܟܽܘ̈ܙܳܝܶܐ: ܘܰܐܦܢܺܝܬܳܝܗܝ ܠܗܰܝܡܳܢܽܘܬܳܐ ܫܰܪܺܝܪܬܳܐ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܣܳܥܽܘܪܳܐ ܘܡܰܚܠܡܳܢܳܐ ܕܰܡܚܺܝ̈ܠܐ: ܘܟܰܕ ܟܽܠܶܗ ܙܰܒܢܳܐ ܕܚܰܝܰܝ̈ܟ ܐܽܘܠܨ̈ܳܢܶܐ ܠܦܰܓܪܳܟ ܡܰܣܒܶܠ ܗܘܰܝܬ ܠܐ ܡܶܐܢܰܬ ܠܳܟ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܡܢܺܝܚܳܢܳܐ ܕܰܡܛܰܪ̈ܦܶܐ ܘܥܰܝܺܝ̈ܩܶܐ: ܕܬܰܠܡܶܕܬ ܥܰܡ̈ܡܶܐ ܣܰܓܺܝ̈ܶܐܐ: ܘܰܐܝܬܺܝܬ ܐܶܢܽܘܢ ܠܐܘܪܚܳܐ ܕܰܫܪܳܪܳܐ: ܫܠܳܡܠܳܟ ܣܳܒܳܐ ܙܰܗܝܳܐ ܡܳܪܝ ܐܰܒܪܳܗܳܡ: ܗܰܒܳܒܳܐ ܒܰܣܺܝܡ ܪܺܝܚܳܐ ܕܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܘܰܡܫܰܪ̈ܰܝܳܐ ܘܓܰܪ̈ܒܳܢܶܐ ܠܘܳܬܳܟ ܐܳܬܶܝܢ ܗܘܰܘ: ܘܚܽܘܠܡܳܢܳܐ ܩܳܢܶܝܢ: ܟܰܕ ܟܽܠܰܢ ܠܰܫܠܳܡܳܟ ܠܐ ܣܳܦܩܺܝܢܰܢ ܘܡ̣ܶܢ ܩܽܘܠܳܣܰܝ̈ܟ ܚܳܝܒܺܝܢܰܢ ܘܡܰܘܚܠܺܝܢܰܢ ܒܥܺܝ ܚܠܳܦܰܝܢ ܠܝܶܫܽܘܥ ܡܫܺܝܚܳܐ ܡܳܪܝ: ܕܢܶܬܶܠ ܠܰܢ ܒܰܚܢܳܢܶܗ ܫܰܝܢܳܐ ܠܥܺܕ̈ܳܬܰܢ: ܘܰܫܠܳܡܳܐ ܠܕܰܝܪ̈ܳܬܰܢ: ܒܽܘܛܳܠܐ ܕܰܩܪ̈ܳܒܶܐ: ܬܽܘܗܳܝܳܐ ܕܩܺܐܪ̈ܣܶܐ ܕܒܰܨܠܰܘ̈ܳܬܳܟ ܫܡܺܝ̈ܥܳܬܳܐ ܕܰܠܘܳܬܶܗ ܢܶܙܓܽܘܪ ܡܶܢܰܢ ܠܚܰܪܒܳܐ ܘܫܶܒܝܳܐ ܘܟܰܦܢܳܐ ܘܡܰܘܬܳܢܳܐ: ܘܢܶܥܒܰܪ ܡ̣ܶܢ ܐܰܬܪܳܐ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܢܰܐܣܶܐ ܟܺܐܒ̈ܶܐ ܕܢܰܦ̈ܫܳܬܰܢ ܘܰܕܦܰܓܪ̈ܰܝܢ: ܘܰܢܚܰܣܶܐ ܚܰܘܒܰܝ̈ܢ ܘܰܚܛܳܗܰܝ̈ܢ ܒܝܰܡܳܐ ܫܦܺܝܥܳܐ ܕܒܰܣܺܝܡܽܘܬܳܐ ܕܺܝܠܶܗ: ܘܰܢܫܰܟܶܢ ܠܟܽܠܶܗ ܩܝܳܡܳܐ ܥܺܕܬܳܢܳܝܳܐ: ܓܰܠܝܽܘܬ ܐܰܦ̈ܶܐ ܩܕܳܡ ܒܺܐܡ ܕܺܝܠܶܗ: ܘܰܠܥܰܢܺܝ̈ܕܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܥܛܪܐ

 

 

 

ܥܶܛܪܳܐ ܗܰܢܺܝܳܐܐ ܘܪܺܝܚܳܐ ܒܰܣܺܝܡܳܐ: ܢܰܣܶܩ ܒܕܽܘܟܪܳܢܳܟ ܠܡܳܪܳܟ ܐܳܘ ܚܠܺܝܨܳܐ ܒܰܩܪ̈ܰܒܬܳܢܶܐ: ܘܰܥܛܺܝܦ ܙܳܟܽܘܬܳܐ ܡܳܪܝ ܐܰܒܪܳܗܳܡ ܐܰܓܽܘܢܺܝܣܛܳܐ ܢܰܨܺܝܚܳܐ ܕܪܰܥܺܝ ܠܡܳܪܶܗ ܒܕܺܝܩܽܘܢܝܰܐ ܕܺܝܠܶܗ ܕܟܺܝܬܳܐ: ܘܢܶܬܩܰܒ̈ܠܳܢ ܨܠܰܘ̈ܳܬܰܢ ܘܒܳܥ̈ܘܳܬܰܢ ܘܬܰܟܫ̈ܦܳܬܰܢ ܒܰܒܥܳܝܳܟ ܕܰܚܠܳܦܰܝܢ: ܘܠܐ ܢܶܗܘܶܐ ܒܰܐܬܪܰܢ ܘܰܦܢܺܝܬܰܢ ܕܰܝܰܐܦܬܽܘܪܰܐ: ܘܢܶܬܡܰܙ̈ܓܳܢ ܐܳܐܰܪ̈ܰܐܣ ܕܝܰܪܣܰܩܦܳܘܠܳܘܣ ܡܛܰܟܣܳܐܝ̣ܬ: ܘܰܚܢܰܢ ܘܥܰܢܺܝ̈ܕܰܝܢ ܢܶܫܬܘܶܐ ܠܒܽܘܣܳܡܳܐ ܥܺܕܬܳܢܳܝܳܐ: ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܘܰܐܠܳܗܳܐ ܕܥܰܠ ܟܽܠ: ܠܗܰܘ ܕܡܶܬܩܰܠܰܣ ܡ̣ܶܢ ܢܽܘܪ̈ܳܢܶܐ ܘܪ̈ܽܘܚܳܢܶܐ: ܘܡ̣ܶܢ ܟܽܠܗܽܘܢ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܡܶܬܗܰܕܰܪ: ܠܗܰܘ ܕܰܓܒܳܐ ܠܢܰܨܺܝܚ ܫܽܘܦܪ̈ܶܐ ܡܳܪܝ ܐܰܒܪܳܗܳܡ ܩܽܘܣܛܰܢܛܺܝܢܳܝܳܐ: ܠܗܰܘ ܕܰܓܒܳܐ ܠܢܰܨܺܝܚ ܫܽܘܦܪ̈ܶܐ ܡܳܪܝ ܗܳܒܶܝܠ ܙܽܘܝܳܝܳܐ: ܘܥܰܒܕܶܗ ܢܰܘܣܳܐ ܕܰܟܝܳܐ ܕܚܳܫܰܚ ܠܐܝܩܳܪܶܗ: ܘܰܒܝܰܡܺܝܢܶܗ ܚܰܝܠܬܳܢܺܝܬܳܐ ܪܰܡܪܡܶܗ: ܘܰܒܕܽܘܒܳܪ̈ܶܐ ܕܟܰܝ̈ܳܐ ܨܰܒܬܶܗ: ܘܰܒܥܰܡ̈ܠܐ ܕܚܳܫܚܺܝܢ ܠܐܠܳܗܽܘܬܶܗ ܩܰܕܫܶܗ: ܕܠܶܗ ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܫܽܘܒܚܳܐ ܡܰܣܩܺܝܢܰܢ ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܢܽܘܗܪܳܐ ܠܐ ܡܶܬܚܰܙܝܳܢܳܐ: ܘܨܶܡܚܳܐ ܠܐ ܡܶܬܓܰܫܫܳܢܳܐ: ܥܰܬܺܝܪܳܐ ܕܠܐ ܚܳܣܰܪ: ܓܰܙܳܐ ܪܰܒܳܐ ܕܺܝܠܶܗ: ܒܳܪܽܘܝܳܐ ܕܰܓܒܳܐ ܠܶܗ ܐ̱ܢܳܫ̈ܳܐ ܟܺܐܢ̈ܶܐ ܘܙܰܕܺܝ̈ܩܶܐ: ܘܰܥܒܰܕ ܐܶܢܽܘܢ ܕܢܶܗܘܽܘܢ ܢܰܗܺܝܪ̈ܶܐ ܒܥܳܠܡܳܐ ܗܳܢܳܐ ܥܳܒܽܘܪܳܐ: ܘܝܰܬܺܝܪ ܡ̣ܶܢ ܟܽܠ ܚܰܘܺܝ ܠܡܳܪܝ ܗܳܒܶܝܠ ܐܶܣܛܽܘܢܳܪܳܐ: ܘܓܰܡܪܶܗ ܒܟܽܠ ܥܒܳܕ ܛܳܒ: ܗ̇ܰܘ ܕܰܠܕܽܘܟܪܳܢܶܗ ܝܰܘܡܳܢܳܐ ܟܽܠܰܢ ܟܢܺܝܫܳܐܝܳܬ: ܥܰܡ ܡܰܫܪ̈ܝܳܬܳܐ ܪ̈ܽܘܚܳܢܳܝܳܬܳܐ ܡܙܰܝܚܺܝܢܰܢ ܥܺܐܕܳܢܳܐܝ̣ܬ: ܘܰܠܘܳܬܶܗ ܟܽܠܰܢ ܐܳܡܪܺܝܢܰܢ ܦܨܺܝܚܳܐܝ̣ܬ: ܟܰܕ ܡܶܬܒܰܪܟܺܝܢܰܢ ܡ̣ܶܢ ܢܽܘܗܪܳܐ ܕܙܰܠܺܝ̈ܩܰܘܗܝ ܘܳܠܝܳܐܝ̣ܬ: ܘܒܰܒ̈ܢܳܬ ܩ̈ܳܠܐ ܕܩܽܘܠܳܣ̈ܶܐ ܠܘܳܬܶܗ ܡܰܙܥܩܺܝܢܰܢ ܬܪܺܝܨܳܐ̣ܝܬ: ܠܳܟ ܛܽܘܒܰܝܟ ܡܳܪܝ ܗܳܒܶܝܠ: ܨܽܘܪܬܳܐ ܡܰܠܝܰܬ݀ ܣܰܡ̈ܡܳܢܶܐ ܡܝܰܬܪ̈ܶܐ ܘܚܰܘܪܳܐ ܛܳܒܳܐ: ܠܰܕܚܳܐܰܪ ܢܰܗܺܝܪܳܐܝ̣ܬ: ܕܰܐܩܪܶܒ ܥܰܡ ܐܰܪܟܽܘܢ ܒܶܠܐܴܝܰܪ ܟܰܫܺܝܪܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܗܳܒܶܝܠ: ܠܰܡܦܺܐܕܳܐ ܢܰܗܺܝܪܳܐ ܕܰܠܩܳܐ ܠܥܳܡܰܪܬܳܐ ܟܽܠܳܗ̇ ܐܰܢܗܰܪ ܓܰܠܝܳܐܝ̣ܬ: ܘܠܽܘܒܳܒܳܐ ܕܥܰܝܺܝ̈ܩܰܝ ܠܶܒܳܐ ܕܠܰܒܶܒ ܠܥܺܕܬܳܐ ܕܩܳܝܡܳܐ ܗܘܳܬ ܫܓܺܝܫܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܗܳܒܶܝܠ: ܘܰܪܕܳܐ ܗܰܢܺܝ ܪܺܝܚܳܐ ܕܒܰܣܶܡ ܒܣܰܘܩܶܗ ܠܟܽܠܳܗ̇ ܥܳܡܰܪܬܳܐ ܘܳܠܝܳܐܝ̣ܬ: ܘܰܛܪܰܕ ܠܙܰܗܡܽܘܬܳܐ ܕܰܚܛܺܝܬܳܐ ܒܚܺܝܠ ܡܳܪܶܗ ܟܰܫܺܝܪܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܥܳܢܘܳܝܳܐ ܡܳܪܝ ܗܳܒܶܝܠ: ܥܰܡܽܘܕܳܐ ܠܐ ܡܶܙܕܰܥܙܥܳܢܳܐ ܕܰܥܠܰܘܗܝ ܐܶܣܬܰܡܟܰܬ݀ ܥܺܕܬܳܐ ܥܰܙܺܝܙܳܐܝ̣ܬ: ܘܗ̣ܽܘ ܝܳܗܶܒ ܥܽܘܕܪ̈ܳܢܶܐ ܠܩܳܪ̈ܝܰܝ ܠܡܳܪܶܗ ܒܰܫܡܶܗ ܥܰܬܺܝܪܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܐܶܣܛܽܘܢܳܪܳܐ ܡܳܪܝ ܗܳܒܶܝܠ: ܠܽܘܒܳܒܳܐ ܕܥܰܝܺܝ̈ܩܶܐ ܕܠܐ ܬܰܚܶܒ ܡ̣ܶܢ ܨܰܘܡܳܐ ܘܠܐ ܐܰܫܦܶܠ ܡ̣ܶܢ ܨܠܽܘܬܳܐ ܪܰܦܝܳܐܝ̣ܬ: ܐܶܠܐ ܩܳܡ ܒܰܐܓܽܘܢܳܐ ܕܠܽܘܩܒܰܠ ܒܥܶܠܕ̈ܒܳܒܶܐ ܓܰܢ̱ܒܳܪܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܗܳܒܶܝܠ ܐܰܘܓܽܘܣܛܰܐܠܽܘܣܺܝܰܐ ܪܰܒ ܚܰܝܠܰܘ̈ܳܬܳܐ ܕܰܗܘܳܐ ܚܕܽܘܓܳܐ ܕܡܰܠܟܽܘܬܳܐ ܩܛܺܝܪܳܐܝ̣ܬ ܘܩܰܛܺܝܢܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܙܳܘܝܳܝܳܐ ܡܳܪܝ ܗܳܒܶܝܠ: ܕܳܡܶܐ ܠܒܶܢܝܳܢܳܐ ܕܶܐܬܛܰܪܺܝ ܒܶܗ ܡܶܠܐܴܐ ܕܫܺܐܕ̈ܶܐ ܘܠܐ ܐܶܬܪܰܦܺܝ ܢܰܫܺܝܫܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܐܶܣܛܽܘܢܳܝܳܐ ܡܳܪܝ ܗܳܒܶܝܠ ܢܽܘܗܪܳܐ ܕܶܐܬܬܣܺܝܡ ܥܰܠ ܡܢܳܪܬܳܐ ܕܗܰܝܡܳܢܽܘܬܳܐ ܡܰܢܗܰܪ ܠܥܳܠܽܘ̈ܠܰܝ ܒܰܝܬܶܗ ܢܰܗܺܝܪܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܙܳܘܝܳܝܳܐ ܡܳܪܝ ܗܳܒܶܝܠ ܒܪܺܝܫܳܐ ܐܽܘܛܽܘܪܽܘܣ ܕܠܰܘ ܐܽܘܛܽܘܒܰܗܪܽܘܣ ܙܟܳܐ ܠܕܺܝܒܠܳܘܣ: ܐܶܠܐ ܒܰܐܢܬܺܝܕܺܝܛܽܘܣ ܪܽܘܚܳܢܳܐ ܪܽܘܚܳܢܳܐܝ̣ܬ: ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܗܳܒܶܝܠ ܗܶܢܝܽܘܟܳܐ ܚܰܟܺܝܡܳܐ ܕܰܕܒܰܪ ܐܠܶܦܶܗ ܠܰܠܡܺܐܢܳܐ ܕܫܰܝܢܳܐ ܗܰܢܺܝܳܐܝ̣ܬ ܠܳܟ ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܡܳܪܝ ܗܳܒܶܝܠ ܐܶܣܛܽܘܢܳܪܳܐ: ܢܰܗܪܳܐ ܥܕܶܢܳܝܳܐ ܕܓܳܚ ܡܶܢܶܗ ܥܽܘܕܪ̈ܳܢܶܐ ܘܩܳܡ ܒܰܐܓܽܘܢܳܐ ܢܰܨܺܝܚܳܐܝ̣ܬ: ܠܳܟ ܐܰܒܽܘܢ ܛܽܘܒܳܢܳܐ ܥܳܢܘܳܝܳܐ ܡܳܪܝ ܗܳܒܶܝܠ: ܡܰܓܕܠܐ ܪܳܡ ܒܶܢܝܳܢܳܐ ܕܠܐ ܬܰܚܶܒ ܡ̣ܶܢ ܨܰܘܡܳܐ ܘܰܨܠܽܘܬܳܐ ܟܽܠܳܢܳܐܝ̣ܬ: ܐܶܠܐ ܡܰܠܽܘܢ ܝܰܬܺܝܪ ܡܰܘܣܶܦ ܗܘܳܐ ܥܰܡ̈ܠܐ ܩܫܰܝ̈ܳܐ ܒܚܺܝܪܳܐܝ̣ܬ: ܗܳܢܳܐ ܕܟܰܕ ܐܶܬܳܐ ܠܘܳܬܶܗ ܠܒܺܝܫ ܠܐܠܳܗܳܐ ܡܳܪܝ ܐܰܟܣܢܳܝܳܐ ܦܩܰܕ ܠܐܣܛܽܘܢܳܐ ܕܟܺܐܦ̈ܶܐ ܘܟܰܦܦܶܗ ܬܡܺܝܗܳܐ̣ܝܬ: ܘܶܐܬܒܰܪܰܟܘ ܩܰܕܺܝ̈ܫܶܐ ܡ̣ܶܢ ܚܕܳܕ̈ܶܐ ܒܚܰܕܽܘܬܳܐ ܪܰܒܬܳܐ ܠܐ ܡܶܬܡܰܠܠܳܢܳܐܝ̣ܬ: ܗܳܢܳܐ ܒܥܶܠ ܫܡܶܗ ܕܗܳܒܶܝܠ ܩܰܕܡܳܝܳܐ ܕܶܐܬܩܛܶܠ ܬܰܡܺܝܡܳܐܝ̣ܬ: ܐܶܠܐ ܝܰܬܺܝܪ ܦܳܪܽܘܫܳܐܝ̣ܬ ܠܰܘ ܕܶܝܢ ܚܕܳܐ ܙܒܰܢ̱ܬܳܐ ܡܺܝܬ: ܐܶܠܐ ܟܽܠܝܽܘܡ ܡܳܐܶܬ ܗܘܳܐ ܨܶܒܝܳܢܳܐܝ̣ܬ: ܟܰܕ ܫܠܰܚ ܠܥܳܠܡܳܐ ܘܰܠܥܳܠܡܳܢ̈ܳܝܳܬܳܐ ܓܡܺܝܪܳܐܝ̣ܬ: ܘܰܐܚܕܰܪ ܠܢܰܦܫܶܗ ܫܽܘܪܳܐ ܕܰܡܣܰܪܩܽܘܬܳܐ ܕܠܐ ܥܳܐܠܺܝܢ ܒܶܗ ܚܰܫ̈ܶܐ ܕܡܰܐܟܶܝܢ ܠܶܗ ܫܓܺܝܫܳܐܝ̣ܬ: ܗܳܢܳܐ ܬܶܐܘܳܪܺܝܛܺܝܩܳܐ ܘܰܦܪܽܘܛܺܝܩܳܐܝ̣ܬ ܣܕܰܪ ܗ̣ܽܘ ܠܶܗ ܐܰܝܟ ܬܳܓܳܐ ܒܪܺܝܫܶܗ ܕܡܰܠܟܳܐ ܫܡܰܝܳܢܳܐ ܬܡܺܝܗܳܐܝ̣ܬ: ܡܰܠܺܝܣܛܰܐ ܕܶܝܢ ܝܶܫܽܘܥ ܡܫܺܝܚܳܐ ܗ̇ܰܘ ܕܚܰܘܺܝܬܳܝܗܝ ܕܰܒܟܽܠܶܗ ܗܳܢܳܐ ܫܽܘܦܪܳܐ ܡܰܨܡܰܚ ܗܕܺܝܪܳܐܝ̣ܬ ܒܰܨܠܰܘ̈ܳܬܶܗ ܡܦܺܝܣܺܝܢܰܢ ܠܳܟ ܡܶܬܚܰܢܳܢܳܐܝ̣ܬ: ܡܶܬܟܰܫܦܺܝܢܰܢ ܠܳܟ ܒܓܽܘܪ̈ܓܳܚܶܐ ܚܢܺܝܓܳܐܝ̣ܬ: ܕܬܶܫܡܰܥ ܠܰܨܠܰܘ̈ܳܬܰܢ ܐܰܡܺܝܢܳܐܝ̣ܬ: ܕܰܬܩܰܒܶܠ ܒܳܥ̈ܘܳܬܰܢ ܡܪܰܚܡܳܢܳܐܝ̣ܬ: ܝܰܬܡ̈ܶܐ ܢܶܬܪܰܒܽܘܢ ܕܰܟܝܳܐܝ̣ܬ: ܕܰܝܪ̈ܳܬܳܐ ܢܶܬܢܰܛܪ̈ܳܢ ܝܰܡܺܝܢܳܐܝ̣ܬ: ܦܠܰܓܘ̈ܳܬܳܐ ܢܶܬܕܰܚ̈ܩܳܢ ܦܰܐܝܳܐܝ̣ܬ: ܘܥܳܫܽܘ̈ܩܶܐ ܢܶܬܒܰܛܠܽܘܢ ܓܡܺܝܪܳܐܝ̣ܬ: ܢܶܟ̈ܝܳܢܶܐ ܢܶܥܒܪܽܘܢ ܚܰܘܣܳܢܳܐܝ̣ܬ: ܘܝܰܩܺܝܪ̈ܶܐ ܢܶܬܢܰܛܪܽܘܢ ܕܰܟܝܳܐܝ̣ܬ: ܩܪ̈ܳܒܶܐ ܢܶܬܟܠܽܘܢ ܡܫܰܝܢܳܐܝ̣ܬ: ܝܺܚܺܝ̈ܕܳܝܶܐ ܢܶܬܒܽܘܢ ܢܺܝܚܳܐܝ̣ܬ: ܐܰܣܺܝܪ̈ܶܐ ܢܶܫܬܪܽܘܢ ܡܦܰܨܝܳܢܳܐܝ̣ܬ: ܣܳܩܽܘܪ̈ܶܐ ܢܶܫܬܰܚܠܦܽܘܢ ܓܡܺܝܪܳܐܝ̣ܬ: ܡܰܚ̈ܘܳܬܳܐ ܢܶܙܕܰܓܪ̈ܳܢ ܟܽܠܳܢܳܐܝ̣ܬ: ܗܶܪ̈ܳܬܳܐ ܢܶܫܬܰܝ̈ܢܳܢ ܫܰܬܺܝܩܳܐܝ̣ܬ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܢܶܬܚܰܣܽܘܢ ܫܳܒܽܘܩܳܐܝ̣ܬ: ܘܰܚܢܰܢ ܘܗ̣ܶܢܽܘܢ ܢܰܶܣܩ ܫܽܘܒܚܳܐ ܐܰܡܺܝܢܳܐܝ̣ܬ: ܠܳܟ ܡܫܺܝܚܳܐ ܐܠܰܗܰܢ ܕܢܰܨܰܚܬ ܠܡܳܪܝ ܗܳܒܶܝܠ ܐܰܬܠܺܝܣܳܐܝ̣ܬ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܕܰܩܛܰܪ ܠܶܗ ܟܠܺܝܠܐ ܘܳܠܝܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܒܪܨܘܡܐ ܓܪܒܝܝܐ ܪܝܫܐ ܕܐܒܝ̈ܠܐ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܢܥܰܕܥܶܕ ܘܰܢܝܰܩܰܪ ܠܥܺܐܕܳܐ ܗܳܢܳܐ ܕܩܰܕܺܝܫܳܐ ܕܺܝܠܳܟ ܡܳܪܝ ܒܰܪܨܰܘܡܳܐ: ܘܰܒܬܶܫܒ̈ܚܳܬܳܐ ܪ̈ܽܘܚܳܢܳܝܳܬܳܐ ܢܩܰܠܣܺܝܘܗܝ ܘܰܢܪܰܡܪܡܺܝܘܗܝ: ܘܰܐܢ̱ܬ ܡܳܪܝܳܐ ܐܠܰܗܳܐ ܒܰܨܠܰܘ̈ܳܬܶܗ ܘܰܒܬܰܟܫ̈ܦܳܬܶܗ ܐܶܬܪܰܥܳܐ ܠܥܰܒܕܰܝ̈ܟ ܟܽܠܗܽܘܢ ܐܰܝܠܶܝܢ ܕܙܰܝܰܚܘ ܘܝܰܩܰܪܘ ܕܽܘܟܪܳܢܶܗ: ܘܦܰܢܳܐ ܠܗܽܘܢ ܫ̈ܶܐܠܳܬܗܽܘܢ ܡ̣ܶܢ ܒܶܝܬ ܓܰܙܳܟ ܗ̇ܰܘ ܡܰܥܬܪܳܢܳܐ: ܕܢܰܘܕܶܐ ܘܢܶܣܓܽܘܕ ܠܳܟ ܒܟܽܠܙܒܰܢ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܝܳܐ ܘܥܳܒܽܘܕܳܐ ܕܟܽܠ: ܠܗܰܘ ܕܰܒܟܽܠܙܒܰܢ ܐܺܝܬܰܘܗܝ ܠܐ ܡܶܫܬܰܚܠܦܳܢܳܐ ܘܠܐ ܡܶܫܬܰܓܢܝܳܢܳܐ: ܗ̇ܰܘ ܠܐ ܚܳܫܽܘܫܳܐ ܘܠܐ ܡܶܬܦܰܠܓܳܢܳܐ: ܗ̇ܰܘ ܠܐ ܡܶܬܕܰܪܟܳܢܳܐ ܘܠܐ ܡܶܬܩܰܪܒܳܢܳܐ: ܠܗܳܝ ܪܰܒܽܘܬܳܐ ܕܠܐ ܡܶܬܚܰܠܦܳܐ: ܘܬܶܫܡܫܬܳܐ ܡܬܽܘܡܳܝܬܳܐ ܗ̇ܳܝ ܛܳܒܽܘܬܳܐ ܕܠܐ ܡܶܣܬܰܝܟܳܐ: ܗ̇ܰܘ ܨܶܡܚܳܐ ܘܝܽܘܩܢܳܐ ܢܰܗܺܝܪܳܐ: ܕܰܒܢܰܦܫܶܗ ܕܩܰܕܺܝܫܳܐ ܡܳܪܰܢ ܡܳܪܝ ܒܰܪܨܰܘܡܳܐ ܝܰܬܺܝܪܳܐܝ̣ܬ ܡܰܙܠܶܓ ܘܡܰܢܗܰܪ: ܘܰܟܡܳܐ ܕܶܝܢ ܕܢܶܬܶܐܡܰܪ ܐܰܟܡܳܐ ܕܺܐܝܬܰܘܗܝ ܠܐ ܡܶܫܟܚܳܐ: ܗ̇ܰܘ ܟܝܳܢܳܐ ܠܐ ܒܰܪܝܳܐ: ܗ̇ܰܘ ܐܺܝܩܳܪܳܐ ܕܡܰܪܕܽܘܬܳܐ: ܗ̇ܳܝ ܛܰܝܒܽܘܬܳܐ ܟܝܳܢܳܝܬܳܐ: ܗ̇ܳܝ ܬܶܫܡܫܬܳܐ ܡܥܰܠܰܝܬܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܘܰܡܬܽܘܡܳܐܝ̣ܬ ܐܺܝܬܰܘܗܝ: ܘܡܶܣܬܓܶܕ ܐܳܦ ܡܶܫܬܰܒܰܚ ܡ̣ܶܢ ܒܶܪ̈ܝܳܬܳܐ ܡܠܺܝ̈ܠܳܬܳܐ ܘܡܶܬܝܰܕ̈ܥܳܢܝܳܬܳܐ: ܕܠܐ ܫܶܠܝܳܐ ܘܰܕܠܐ ܫܶܬܩܳܐ: ܒܗܳܢܳܐ܀

 

 

 

ܣܕܪܐ

 

 

 

ܠܡܰܢܽܘ ܡ̣ܶܢ ܒܢܰܝ̈ܢܳܫܳܐ ܐܺܝܬ ܠܶܗ ܦܽܘ̈ܡܶܐ ܐܰܘ ܠܶܫܳܢ̈ܶܐ ܕܒܰܡܡܰܠܠܽܘܬ ܬܶܫܒ̈ܚܳܬܳܐ ܡܥܰܠܝ̈ܳܬܳܐ ܪܗܺܝܛܪܳܐܝ̣ܬ ܩܽܘܠܳܣ̈ܶܐ ܙܳܩܪܺܝܢ: ܕܢܶܫܟܰܚ ܠܰܡܡܰܠܠܽܘܬ ܥܰܠ ܪܰܘܡܳܐ ܡܥܰܠܝܳܐ ܘܠܐ ܡܶܬܩܰܪܒܳܢܳܐ ܕܕܽܘܒܳܪ̈ܰܘܗܝ ܕܢܰܨܺܝܚ ܫܽܘܦܪ̈ܶܐ ܡܳܪܝ ܒܰܪܨܰܘܡܳܐ: ܓܳܗܪܺܝܢ ܓܶܝܪ ܗܰܘ̈ܢܶܐ ܕܟܽܠ ܘܡܰܘܦ̈ܝܳܢ ܡ̈ܶܠܐܷ ܕܰܒܫܰܦܺܝܪܽܘܬ ܡܠܰܚܡܽܘܬܳܐ ܡܶܬܬܙܺܝ̈ܥܳܢ: ܡ̣ܶܢ ܡܰܨܡܚܽܘܬܳܐ ܣܒܺܝܣܰܬ݀ ܒܙܰܠܺܝ̈ܩܶܐ ܠܐ ܡܶܬܕܰܪ̈ܟܳܢܶܐ ܕܰܡܝܰܬܪ̈ܳܬܶܗ: ܦܳܠܚܳܐ ܚܰܝܠܬܳܢܳܐ ܕܡ̣ܶܢ ܛܰܠܝܽܘܬܶܗ ܒܟܽܘܠܳܝܽܘܬ ܐܶܡ̈ܢܶܐ ܕܰܓܡܺܝܪܽܘܬܳܐ ܐܶܬܚܰܙܰܩ: ܘܒܰܠܒܺܝܒܽܘܬ ܬܰܪܥܺܝܬܳܐ ܚܰܝܠܬܳܢܺܝܬܳܐ ܘܠܐ ܡܶܬܡܰܚܠܳܢܺܝܬܳܐ ܥܰܠ ܐܰܓܽܘ̈ܢܶܐ ܪ̈ܳܡܰܝ ܡ̣ܶܢ ܥܳܠܡܳܐ ܐܰܝܟ ܠܐ ܦܰܓܪܳܢܳܐ ܐܶܬܓܰܢ̱ܒܰܪ: ܘܡ̣ܶܢ ܗܳܪܟܳܐ ܟܰܕ ܒܦܰܓܪܳܐ ܡ̇ܰܢ ܕܺܝܠܶܗ ܐܰܒܣܺܝ: ܠܘܳܬ ܕܶܝܢ ܡܰܣܒܗܽܘܬܳܐ ܗ̇ܳܝ ܕܰܒܚܰܝ̈ܠܰܘܳܬܳܐ ܫܡܰܝ̈ܳܢܶܐ ܘܰܕܠܐ ܓܫܽܘܡ ܐܶܬܥܰܠܺܝ: ܥܰܠ ܚܣܺܝܠܽܘܬܳܐ ܕܡ̣ܶܢ ܡܶܐܟ̈ܠܳܬܳܐ ܒܰܣܰܪ: ܥܰܠ ܣܰܩܳܐ ܘܟܽܘܬܺܝܢ ܦܰܪܙܠܐ ܐܰܡܣܰܪ: ܥܰܠ ܐܽܘܠܨ̈ܳܢܶܐ ܣܒܺܝ̈ܣܶܐ ܕܠܰܝ̈ܠܰܝ ܐܺܝܡܳܡ ܐܶܬܚܰܝܰܠ: ܥܰܠ ܡܬܺܝܚܽܘܬ ܩܰܘܡܳܐ ܕܚܰܡܫܺܝܢ ܘܰܐܪܒܰܥ ܫܢܰܝ̈ܳܐ ܐܶܬܓܰܢ̱ܒܰܪ ܥܰܠ ܪܟܺܝܢܽܘܬ ܚܰܨܳܐ ܘܰܨܠܰܘ̈ܳܬܳܐ ܡܬܺܝ̈ܚܳܬܳܐ ܐܰܫܺܝܚ: ܥܰܠ ܐܰܫܺܝܕܽܘܬ ܕܶܡ̈ܥܶܐ ܕܥܰܠ ܓܶܦ̈ܶܐ ܢܽܘܪ̈ܳܢܳܝܶܐ ܕܒܰܪ ܓܰܘܙܰܠܬܳܐ ܕܒܰܕܡܽܘܬ ܡܰܪ̈ܓܳܢܝܳܬܳܐ ܝܰܩܺܝܪ̈ܳܬܳܐ ܪ̈ܳܣܡܳܢ ܗܘܰܝ̈ ܐܶܬܠܰܒܰܒ ܥܰܠ ܟܦܺܝܦܽܘܬ ܩܰܘܡܬܳܐ ܕܰܠܥܶܠ ܡ̣ܶܢ ܩܰܘܡܳܐ ܡܬܺܝܚܳܐ ܡܰܘܣܦܳܐ ܗܘܳܬ ܘܕܽܘܥ̈ܳܬܳܐ ܪ̈ܳܣܡܳܬ݀ ܡܰܘܬܳܐ ܪܳܣܡܳܐ ܗܘܳܬ ܐܰܩܠܺܝ: ܥܰܠ ܠܰܝܠܰܘ̈ܳܬܳܐ ܕܠܐ ܫܶܢܬܳܐ ܕܡ̣ܶܢ ܥܰܡܠܐ ܕܩܰܘܡܳܐ ܐܳܦ ܗ̣ܺܝ ܢܰܘܡܬܳܐ ܛܪܺܝܕܳܐ ܗܘܳܬ݀ ܥܰܙܺܝ: ܟܰܕ ܠܥܶܠ ܡ̣ܶܢ ܫܩܺܝ̈ܦܶܐ ܒܚܽܘܡܳܐ ܟܺܝܬ ܘܰܒܥܰܪܝܳܐ ܐܰܝܟ ܥܰܡܽܘܕܳܐ ܕܦܰܪܙܠܐ ܚܶܦܝܳܝ ܩܳܐܶܡ ܗܘܳܐ: ܟܰܕ ܣܳܐܶܛ ܒܚܽܘܡܳܐ: ܟܰܕ ܝܳܩܶܕ ܒܛܰܗܪܳܐ: ܟܰܕ ܥܰܡ ܙܰܠܺܝ̈ܩܶܐ ܕܫܶܡܫܳܐ ܡܶܬܗܰܦܰܟ: ܟܰܕ ܝܳܗܶܒ ܦܰܪܨܽܘܦܶܗ ܠܨܶܡ̈ܚܶܐ ܠܐ ܡܶܣܬܰܝܒܪ̈ܳܢܶܐ ܕܚܰܡܺܝܡܽܘܬܶܗ ܕܩܰܝܛܳܐ ܕܰܒܗܽܘܢ ܢܶܬܛܰܓܰܢ: ܟܰܕ ܕܰܪܳܐ ܬܽܘܒ ܣܕܰܪ ܥܰܡ ܥܽܘܙܳܐ ܡܰܪܺܝܪܳܐ ܕܣܰܬܘܳܐ: ܟܰܕ ܚܠܺܝܨܳܐܝ̣ܬ ܥܰܡ ܥܰܪܝܳܐ ܡܶܬܓܰܘܙܰܠ ܗܘܳܐ ܘܰܒܢܽܘܪܳܐ ܐܠܰܗܳܝܬܳܐ ܡܶܬܢܰܒܪܰܫ ܗܘܳܐ: ܟܰܕ ܠܒܺܝܒܳܐܝ̣ܬ ܥܰܡ ܡܰܫ̈ܒܶܐ ܕܪ̈ܽܘܚܶܐ ܥܰܙܺܝ̈ܙܳܬܳܐ ܡܶܬܟܰܬܰܫ ܘܰܒܪܶܬܚܳܐ ܕܚܽܘܒܳܐ ܡܶܬܓܰܘܙܰܠ: ܟܰܕ ܫܶܦ̈ܥܶܐ ܕܢܳܣ̈ܟܶܐ ܕܬܰܠܓܳܐ ܥܠܰܘܗܝ ܡܶܣܬܰܦܩܺܝܢ ܘܡ̣ܶܢ ܩܰܘܡܳܐ ܡܬܺܝܚܳܐ ܠܐ ܡܶܙܕܰܥܙܰܥ: ܟܰܕ ܐܰܝܟ ܠܐ ܡܢܰܦܫܳܐ ܠܟܽܠܗܽܘܢ ܫܽܘܚ̈ܠܳܦܶܐ ܡܰܪܺܝܪ̈ܶܐ ܕܫܰܢ̱ܬܳܐ ܡܣܰܝܒܰܪ: ܘܰܒܦܺܐܪ̈ܶܐ ܕܒܰܪܳܐ ܠܚܽܘܕ ܡܶܣܬܰܝܒܰܪ: ܘܡܶܛܽܠ ܗܳܕܶܐ ܟܰܕ ܥܰܠ ܓܰܙܳܐ ܪܳܡܳܐ ܕܥܽܘܬܪ̈ܶܐ ܠܐ ܡܶܣܬܰܝ̈ܟܳܢܶܐ ܕܡܳܪܶܗ ܐܶܬܗܰܝܡܰܢ: ܠܰܒܪܺܝܬܳܐ ܟܽܠܳܗ̇ ܒܫܶܦ̈ܥܶܐ ܣܒܺܝ̈ܣܶܐ ܕܥܽܘܕܪ̈ܳܢܶܐ ܪ̈ܽܘܚܳܢܳܝܶܐ ܐܰܥܬܰܪ: ܒܒܽܘܪ̈ܟܳܬܳܐ ܫܦܺܝ̈ܥܳܬܳܐ ܒܳܐܣ̈ܘܳܬܳܐ ܬܡܺܝ̈ܗܳܬܳܐ: ܥܶܩܳܪ̈ܶܐ ܕܡ̣ܶܢ ܡܰܪܺܝܪܽܘܬܳܐ ܡܶܬܚܰܠܶܝܢ: ܘܫܽܘ̈ܥܶܐ ܘܰܠܥܶܠ ܡ̣ܶܢ ܐܰܪܥܳܐ ܡܰܛܠܠܺܝܢ: ܬܰܠܡܺܝ̈ܕܶܐ ܕܡ̣ܶܢ ܓܪܺܝܨܬܳܐ ܡܶܬܬܰܪܣܶܝܢ: ܐܰܣܺܝܪ̈ܰܝ ܠܪ̈ܽܘܚܶܐ ܒܺܝ̈ܫܳܬܳܐ ܕܡܶܬܚܰܪܪܺܝܢ: ܕܰܝܘ̈ܶܐ ܕܡܶܬܪܰܕܦܺܝܢ: ܐܠܰܝ̈ܨܶܐ ܕܡܶܬܦܰܪܩܺܝܢ: ܥܰܝܺܝ̈ܩܰܝ ܪܽܘܚܳܐ ܕܡܶܬܪܰܘܚܺܝܢ: ܒܢ̈ܰܝ ܚܶܫܽܘܟܳܐ ܕܡܶܬܛܰܪܕܺܝܢ: ܘܫܶܡܫܳܐ ܘܣܰܗܪܳܐ ܕܡܶܙܕܰܓܪܺܝܢ: ܢܟܺܝ̈ܬܰܝ ܡ̣ܶܢ ܚܰܪܡܳܢܳܐ ܕܡܶܬܚܰܠܡܺܝܢ: ܚܓܺܝ̈ܣܶܐ ܕܰܡܫܰܘܪܺܝܢ: ܣܡܰܝ̈ܳܐ ܕܡܶܬܦܰܬܚܺܝܢ: ܝܰܒܺܝ̈ܫܰܝ ܐܺܝܕܰܝ̈ܳܐ ܕܡܶܬܦܰܫܛܺܝܢ: ܐܳܟܶܕ̈ܢܶܐ ܕܡܶܬܝܰܒ̈ܫܳܢ: ܒܢ̈ܰܝ ܪܩܶܡ ܕܡܶܬܦܰܪܩܺܝܢ: ܪ̈ܣܺܝܣܶܐ ܕܡܶܬܬܰܪܥܺܝܢ: ܨܰܠܡ̈ܶܐ ܕܡܶܬܬܰܒܪܺܝܢ: ܒܢ̈ܰܝ ܡܽܘܐܴܒ ܕܡܶܬܒܰܕܪܺܝܢ: ܡܰܠܟ̈ܶܐ ܕܡܶܬܪܰܟܢܺܝܢ: ܐܰܪ̈ܓܘܳܢܶܐ ܕܰܩܕܳܡ ܣܰܩܳܐ ܒܳܪܟܺܝܢ ܒܰܕܓܽܘܢ ܥܺܕܬܳܐ ܩܰܕܺܝܫܬܳܐ ܥܰܡ ܟܽܠܗܽܘܢ ܝܰܠܕܶܝ̈ܗ̇ ܕܰܠܕܽܘܟܪܳܢܶܗ ܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܟܳܗܢܳܝ̈ܳܬܳܐ ܡܝܰܩܪܳܐ: ܘܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܠܘܳܬܶܗ ܡܰܙܥܩܳܐ ܟܰܕ ܐܳܡܪܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ ܐܰܪܕܺܝܟܠܐ ܚܰܟܺܝܡܳܐ ܕܰܒܢܳܐ ܩܢܽܘܡܶܗ ܥܰܠ ܫܽܘܥܳܐ ܠܐ ܡܶܙܕܰܥܙܥܳܢܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܒܰܪܨܰܘܡܳܐ: ܒܶܝܬ ܨܰܘܒܳܐ ܕܟܽܠܳܗ̇ ܩܰܕܺܝܫܽܘܬܳܐ ܕܰܠܘܳܬ ܡܡܰܪܝܽܘܬܳܐ ܕܰܒܚܰܝܠܰܘ̈ܳܬܳܐ ܫܡܰܝ̈ܳܢܶܐ ܕܠܐ ܓܫܽܘܡ ܐܶܬܥܰܠܺܝܬ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ ܓܳܡܽܘܪܳܐ ܕܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ ܕܠܐ ܟܰܬܡܳܟ ܥܳܠܡܳܐ ܗܳܢܳܐ ܒܺܝܫܳܐ ܒܰܚܕܳܐ ܡ̣ܶܢ ܨܶܒܘ̈ܳܬܶܗ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ: ܕܳܫܢܳܐ ܪܰܒܳܐ ܕܶܐܫܬܰܕܰܪ ܠܥܺܕܰܬ ܩܽܘܕܫܳܐ ܒܙܰܒܢܳܐ ܕܰܙܩܰܦܘ ܥܠܶܝܗ̇ ܟܺܐܡܽܘ̈ܢܶܐ ܐܶܪ̈ܺܝܛܺܝܩܳܝܶܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ ܗܡܰܝܪܳܐ ܕܬܰܪܥܽܘܬܳܐ ܕܰܒܟܽܠܙܒܰܢ ܥܽܘܬܪ̈ܶܐ ܪ̈ܽܘܚܳܢܳܝܶܐ ܡ̣ܶܢ ܡܰܠܟܳܐ ܡܫܺܝܚܳܐ ܢܳܓܶܕ ܐܰܢ̱ܬ ܠܰܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ ܘܰܥܕܳܐ ܕܟܽܠ ܛܽܘܒܺܝ̈ܢ ܕܡܶܢܳܟ ܪܳܕܶܝܢ ܟܽܠܗܽܘܢ ܥܽܘܕܪ̈ܳܢܶܐ ܘܛܳܒ̈ܳܬܳܐ ܠܐܝܠܶܝܢ ܕܒܳܟ ܡܶܬܓܰܘܣܺܝܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ: ܙܰܗܝܳܐ ܒܰܓܡܺܝܪ̈ܶܐ ܕܙܰܗܺܝܬ ܠܢܰܦܫܳܟ ܒܥܰܡ̈ܠܐ ܪܰܘܪ̈ܒܶܐ ܕܰܓܡܺܝܪܽܘܬܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ: ܚܕܽܘܓܳܐ ܪܚܺܝܡܳܐ ܕܟܰܠܰܬ݀ ܢܽܘܗܪܳܐ ܕܰܛܪܰܕܬ ܡ̣ܶܢ ܣܳܚܪ̈ܳܬܗ̇ ܠܟܽܠܳܗ̇ ܚܶܫܽܘܟܽܘܬܳܐ ܕܛܽܘܥܝܰܝ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܒܰܪܨܰܘܡܳܐ ܛܰܒܥܳܐ ܢܰܨܺܝܚ ܫܽܘܦܪ̈ܶܐ ܕܡ̣ܶܢ ܢܽܘܗܪܳܐ ܠܐ ܡܶܬܦܰܚܡܳܢܳܐ ܕܛܰܒܥܳܐ ܕܫܽܘܦܪ̈ܶܐ ܕܪܺܝܫ ܬܰܦܢܟܳܐ ܐܶܬܬܰܨܡܰܚܬ: ܘܥܰܠ ܗܳܕܶܐ ܡܰܠܟ̈ܶܐ ܐܰܪܺܝܡܘ ܬܳܓܰܝ̈ܗܽܘܢ ܘܰܣܓܶܕܘ ܩܽܘܕܡܰܝܟ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ: ܝܽܘܩܢܳܐ ܪܳܡܳܐ ܪܨܺܝܦ ܒܟܺܐܦ̈ܶܐ ܝܽܘܩܰܢ̈ܬܳܢܳܝܳܬܳܐ ܕܰܡܝܰܬܪܽܘܬܳܐ: ܕܰܒܪܶܬܚܳܐ ܕܫܶܡܫܳܐ ܐܶܬܢܰܝܰܪܬ: ܘܰܒܬܰܠܓܳܐ ܘܩܽܘܪܳܐ ܐܶܬܬܰܒܪܰܩܬ ܘܰܒܬܳܓܳܐ ܕܰܡܠܶܟ ܡܰܠܟ̈ܶܐ ܫܡܰܝܳܢܳܐ ܐܶܬܩܰܒܰܬ: ܥܺܝܪ̈ܰܝ ܫܡܰܝܳܐ ܬܗܰܪܘ ܒܒܰܪ ܐܳܕܳܡ ܟܡܳܐ ܐܶܬܪܰܡܪܰܡ: ܪ̈ܽܘܚܳܢܶܐ ܐܶܬܕܰܡܰܪܘ ܒܰܓܫܺܝܡܳܐ ܟܡܳܐ ܐܶܬܬܢܺܝܚ: ܝܰܗ̈ܠܐ ܕܫܰܠܗܶܒܺܝܬܳܐ ܩܰܠܶܣܘ ܠܐܪܥܳܢܳܐ ܟܡܳܐ ܐܶܬܟܰܫܰܪ: ܣܶܕܪ̈ܶܐ ܕܓܰܘܙܰܠܬܳܐ ܣܘܰܚܘ ܠܐܘܪܥܶܗ ܟܽܠ ܚܰܕ ܡܶܢܗܽܘܢ ܕܰܒܗܽܘܢ ܢܶܬܛܰܟܰܣ: ܪ̈ܽܘܚܳܬܳܐ ܕܩܰܕܺܝ̈ܫܶܐ ܪ̈ܘܰܙܝ ܒܰܚܙܳܬܶܗ: ܘܰܐܝܟ ܐ̱ܚܝܳܢܳܐ ܘܒܰܪ ܛܽܘܗܡܳܐ ܥܰܡܗܽܘܢ ܐܶܬܚܰܠܰܛ: ܘܟܰܕ ܒܕܰܘ̈ܨܶܐ ܡܰܠܐܟܳܝ̈ܶܐ ܟܽܠܗܽܘܢ ܫܰܘܝܳܐܝ̣ܬ ܪ̈ܶܦܣܶܐ ܩܛܰܪܘ ܘܩܰܒܠܽܘܗܝ ܘܰܒܫܰܦܺܝܪܽܘܬ ܢܶܥ̈ܡܳܬܳܐ ܡܨ̈ܰܠܠܳܬܳܐ ܝܰܒܶܒܘ ܩܽܘܕܡܰܘܗܝ ܟܰܕ ܐܳܡܪܺܝܢ: ܬܳܐ ܒܰܫܠܳܡܳܐ ܠܰܡܰܦܺܐܕܳܐ ܕܰܡܝܰܬܪܽܘܬܳܐ: ܬܳܐ ܒܰܫܠܳܡܳܐ ܢܽܘܗܪܳܐ ܕܗܰܝܡܳܢܽܘܬܳܐ: ܬܳܐ ܒܰܫܠܳܡܳܐ ܣܳܬܽܘܪܳܐ ܕܛܳܥܝܽܘܬܳܐ: ܬܳܐ ܒܰܫܠܳܡܳܐ ܥܳܩܽܘܪܳܐ ܕܚܰܢܦܽܘܬܳܐ: ܬܳܐ ܒܰܫܠܳܡܳܐ ܦܺܝܪܡܳܐ ܕܒܰܣܺܝܡܽܘܬ ܪܺܝܚܳܐ: ܬܳܐ ܒܰܫܠܳܡܳܐ ܨܶܒܬܳܐ ܕܳܐܪܬܳܕܽܘܟܣܺܝܰܐ: ܬܳܐ ܒܰܫܠܳܡܳܐ ܩܰܦܶܠܐܘܢ ܕܥܳܢܘܳܝܽܘܬܳܐ: ܬܳܐ ܒܰܫܠܳܡܳܐ ܪܺܝܫܳܐ ܕܰܓܡܺܝܪܽܘܬܳܐ: ܬܳܐ ܒܰܫܠܳܡܳܐ ܫܽܘܡܠܳܝܳܐ ܕܩܰܕܺܝܫܽܘܬܳܐ: ܬܳܐ ܒܰܫܠܳܡܳܐ ܡܚܰܘܝܳܢܳܐ ܕܰܢܙܺܝܪܽܘܬܳܐ: ܬܳܐ ܒܰܫܠܳܡܳܐ ܬܳܓܳܐ ܡܰܕܗܒܳܐ: ܬܳܐ ܒܰܫܠܳܡܳܐ ܡܥܰܕܪܳܢܳܐ ܕܰܡܚܺܝܠܽܘܬܳܐ: ܬܳܐ ܒܰܫܠܳܡܳܐ ܟܠܺܝܠܐ ܫܰܦܺܝܪܳܐ ܕܟܰܠܬܳܐ ܫܠܶܝܡܽܘܢܳܝܬܳܐ: ܡܶܛܽܠ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܕܰܠܕܽܘܟܪܳܢܳܟ ܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ ܡܝܰܩܪܺܝܢܰܢ: ܬܚܶܝܬ ܟܶܢ̈ܦܶܐ ܕܰܨܠܰܘ̈ܳܬܳܟ ܢܶܣܬܰܬܰܪ: ܬܰܟܫ̈ܦܳܬܰܢ ܒܳܟ ܢܶܬܩܰܒ̈ܠܳܢ: ܫܰܝܢܰܢ ܟܰܗܺܝܢܳܐ ܒܳܟ ܢܶܬܦܰܬܶܐ: ܪܽܘܓܙܳܐ ܒܳܟ ܢܶܫܬܰܗܶܐ: ܪܰܘܒܳܐ ܒܳܟ ܢܶܬܬܰܗܶܐ: ܩܪ̈ܳܒܶܐ ܒܳܟ ܢܶܬܒܰܛܠܽܘܢ: ܩܺܐܪ̈ܣܶܐ ܒܳܟ ܢܶܫܬܰܝܢܽܘܢ: ܨܠܰܘ̈ܳܬܳܐ ܒܳܟ ܢܶܙܕܰܗ̈ܝܳܢ: ܨܳܐܝ̈ܘܳܬܰܢ ܒܳܟ ܢܶܬܡܰܪ̈ܩܳܢ: ܦܳܠܰܓ̈ܘܳܬܳܐ ܒܳܟ ܢܶܬܕܰܚ̈ܩܳܢ: ܦܰܐܝ̈ܳܬܳܐ ܒܳܟ ܢܶܫܬܰܟ̈ܢܳܢ: ܥܰܘ̈ܳܠܐ ܒܳܟ ܢܶܬܟܰܢܟܽܘܢ: ܥܳܫܽܘ̈ܩܶܐ ܒܳܟ ܢܶܬܪܰܝܚܽܘܢ: ܡܰܚ̈ܘܳܬܳܐ ܒܳܟ ܢܶܙܕܰܓܪ̈ܳܢ: ܡܰܪ̈ܕܘܳܬܳܐ ܒܳܟ ܢܶܬܛܰܠܩ̈ܳܢ: ܠܽܘ̈ܚܳܡܶܐ ܒܳܟ ܢܶܫܬܰܗܽܘܢ: ܠܽܘܬܳܟ̈ܶܐ ܒܳܟ ܢܶܬܥܰܩܪܽܘܢ: ܟܺܐܒ̈ܶܐ ܒܳܟ ܢܶܬܰܐܣܽܘܢ: ܟܽܘܪ̈ܗܳܢܶܐ ܒܳܟ ܢܶܬܚܰܠܡܽܘܢ: ܝܰܩܺܝܪ̈ܶܐ ܒܳܟ ܢܶܬܢܰܛܪܽܘܢ: ܝܰܬܡ̈ܶܐ ܒܳܟ ܢܶܬܪܰܒܽܘܢ: ܛܰܡ̈ܶܐܐ ܒܳܟ ܢܶܬܩܰܕܫܽܘܢ: ܛܳܥܰܝ̈ܳܐ ܒܳܟ ܢܶܬܦܢܽܘܢ: ܚܰܛܳܝ̈ܶܐ ܒܳܟ ܢܶܬܚܰܣܽܘܢ: ܚܰܝ̈ܳܒܶܐ ܒܳܟ ܢܶܬܚܰܪܪܽܘܢ: ܙܰܕܺܝ̈ܩܶܐ ܒܳܟ ܢܶܬܓܰܡܪܽܘܢ: ܙܰܠܺܝ̈ܠܐ ܒܳܟ ܢܶܙܕܰܗܽܘܢ ܘܰܐܣܺܝܪ̈ܶܐ ܒܳܟ ܢܶܫܬܰܪܽܘܢ: ܘܰܐܠܺܝ̈ܨܶܐ ܒܳܟ ܢܶܬܦܰܪܩܽܘܢ ܗܶܪ̈ܳܬܳܐ ܒܳܟ ܢܶܫܬܰܬܩ̈ܳܢ: ܗܰܝܟ̈ܠܐ ܒܳܟ ܢܶܨܛܰܒܬܽܘܢ: ܕܰܝܪ̈ܳܝܶܐ ܒܳܟ ܢܶܬܓܰܡܪܽܘܢ ܕܰܝܪ̈ܳܬܳܐ ܒܳܟ ܢܶܬܢܰܛܪ̈ܳܢ ܓܙܳܪ̈ܰܝܗܶܝܢ ܒܳܟ ܢܶܬܒܰܪܟܽܘܢ: ܓܽܘܕܰܝ̈ܗܶܝܢ ܒܳܟ ܢܶܬܗܰܕܪ̈ܳܢ: ܒܳܥ̈ܘܳܬܗܶܝܢ ܒܳܟ ܢܶܬܥ̈ܰܠܝܳܢ: ܒܬܽܘ̈ܠܐ ܒܳܟ ܢܶܙܕܰܗܽܘܢ: ܐܰܒܳܗ̈ܶܐ ܒܳܟ ܢܕܽܘܨܽܘܢ: ܐܳܦ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܒܗܰܝܡܳܢܽܘܬܳܐ ܐܳܪܬܳܕܽܘܟܣܳܝܬܳܐ ܡ̣ܶܢ ܚܰܝ̈ܶܐ ܗܳܠܶܝܢ ܫܰܢܺܝܘ ܒܳܟ ܢܶܬܬܢܺܝܚܽܘܢ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܠܐܒܳܐ ܕܰܓܒܳܟ: ܘܠܰܒܪܳܐ ܕܚܰܝܠܳܟ ܒܰܐܓܽܘܢܳܐ: ܘܰܠܪܽܘܚܳܐ ܩܰܕܺܝܫܳܐ ܕܟܰܠܠܳܟ ܒܰܟܠܺܝܠܐ ܕܙܳܟܽܘܬܳܐ: ܘܰܥܠܰܝܢ ܚܰܛܳܝ̈ܶܐ ܪ̈ܰܚܡܶܐ ܢܶܫܬܰܦܥܽܘܢ ܒܰܨܠܰܘ̈ܳܬܳܟ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠܳܝܗܝ ܡܳܪܝܳܐ ܐܠܰܗܳܐ ܠܦܺܝܪܡܳܐ ܗܳܢܳܐ: ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܕܽܘܟܪܳܢܶܗ ܕܓܰܒܝܳܟ ܡܳܪܝ ܒܰܪܨܰܘܡܳܐ: ܘܗܰܒ ܘܫܰܟܶܢ ܒܶܗ ܠܥܺܕܬܳܟ ܡܗܰܝܡܰܢܬܳܐ ܚܕܳܝܽܘܬܳܐ ܘܰܐܘܝܽܘܬܳܐ ܘܣܽܘܬܳܬܳܐ ܕܰܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܰܒܟܽܠܙܒܰܢ ܠܐ ܣܰܒܥܳܐܝ̣ܬ ܢܝܰܩܰܪ ܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ: ܘܰܢܩܰܒܶܠ ܡܶܢܳܟ ܛܳܒ̈ܳܬܳܐ ܘܒܽܘܪ̈ܟܳܬܳܐ: ܘܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܢܝܳܚܳܐ ܕܶܝܢ ܘܕܽܘܟܪܳܢܳܐ ܛܳܒܳܐ ܠܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܗܳܠܶܝܢ ܒܳܥܶܝܢܰܢ ܡܶܢܳܟ ܐܳܘ ܐܰܒܳܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ: ܟܰܕ ܡܦܺܝܣܺܝܢܰܢ ܠܳܟ ܡܶܬܓܰܪܓܚܳܢܳܐܝ̣ܬ: ܡܰܠܽܘܢ ܕܶܝܢ ܒܺܐܝ̈ܕܰܝܟ ܠܐܠܳܗܳܐ: ܕܕܽܘܡܝܳܐ ܢܶܗܘܶܐ ܠܩܰܕܺܝ̈ܫܶܐ: ܐܳܦ ܚܢܰܢ ܥܰܒ̈ܕܶܐ ܕܺܝܠܳܟ ܨܰܠܡܳܐ ܕܰܐܠܳܗܳܐ: ܒܰܨܠܰܘ̈ܳܬܳܐ ܡ̇ܰܢ ܕܺܝܠܳܟ: ܘܰܒܬܰܟܫ̈ܦܳܬܳܐ ܕܟܽܠܗܽܘܢ ܒܢ̈ܰܝ ܬܶܓܡܳܟ ܘܰܟܢܰܘ̈ܳܬܳܟ: ܥܰܡ ܡܫܰܒܰܚܬܳܐ ܝܳܠܕܰܬ ܐܠܰܗܳܐ ܡܰܪܝܰܡ: ܘܰܒܥܳܠܡܳܐ ܗܳܢܳܐ ܢܶܗܘܶܐ ܚܠܺܝ̈ܡܶܐ ܘܒܰܣܺܝ̈ܡܶܐ: ܕܳܐܦ ܒܗܰܘ ܕܰܥܬܺܝܕ ܘܰܕܠܐ ܦܳܛܰܪ ܢܶܗܘܶܐ ܡܩܰܘ̈ܝܳܢܶܐ ܕܰܠܥܳܠܰܡ: ܘܢܰܣܶܩ ܫܽܘܒܚܳܐ ܠܐܠܳܗܳܐ ܕܰܓܒܳܟ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܟܺܐܢܳܐ ܘܙܰܕܺܝܩܳܐ ܕܟܰܠܶܠ ܠܐܬܠܺܝܛܶܗ ܡܳܪܝ ܒܰܪܨܰܘܡܳܐ ܒܙܳܟܽܘܬܳܐ: ܠܗܰܘ ܕܢܰܨܰܚ ܘܰܐܘܪܶܒ ܕܽܘܟܪܳܢܶܗ ܒܰܒܪܺܝܬܳܐ ܘܙܰܝܰܚ ܥܰܕܥܺܐܕܶܗ ܒܰܐܪܒܰܥ ܦܶܢ̈ܝܳܬܳܐ ܘܣܰܬܰܪ ܓܰܪ̈ܡܰܘܗܝ ܒܓܰܘ ܥܺܕܬܳܐ ܘܰܥܒܰܕ ܐܶܢܽܘܢ ܣܶܬܳܪܳܐ ܠܟܽܠܗܽܘܢ ܒܢܰܝ̈ܢܳܫܳܐ ܘܰܐܫܠܶܡ ܒܺܐܝ̈ܕܰܘܗܝ ܓܰܙܰܘ̈ܗܝ ܟܽܠܗܽܘܢ ܒܰܐܡܺܝܢܽܘܬܳܐ: ܕܢܶܬܶܠ ܥܽܘܕܪ̈ܳܢܶܐ ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܒܰܫܦܺܝܥܽܘܬܳܐ: ܕܠܶܗ ܙܳܕܩܳܐ ܬܶܫܒܽܘܚܬܳܐ ܘܝܳܐܝܳܐ ܬܰܘܕܺܝܬܳܐ: ܘܩܽܘܒܳܠܛܰܝܒܽܘܬܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܥܽܘܗܕܳܢܳܐ ܕܦܳܠܚܳܐ ܕܺܝܠܳܟ ܢܰܨܺܝܚܳܐ ܡܳܪܝ ܒܰܪܨܰܘܡܳܐ ܡܥܰܕܥܕܺܝܢܰܢ: ܐܳܘ ܡܶܠܬܳܐ ܐܠܰܗܳܐ: ܘܰܒܬܶܫܒ̈ܚܳܬܳܐ ܘܩܽܘܠܳܣ̈ܶܐ ܘܰܙܡܺܝܪ̈ܳܬܳܐ ܐܠܰܗܳܝ̈ܳܬܳܐ ܒܝܰܘܡܳܐ ܕܕܽܘܟܪܳܢܶܗ ܡܚܰܓܶܝܢܰܢ: ܗܳܢܳܐ ܕܡ̣ܶܢ ܫܰܒܪܽܘܬܶܗ ܫܰܪܺܝ ܒܽܐܘܪܚܳܐ ܕܙܰܕܺܝܩܽܘܬܳܐ ܘܰܠܡܶܬܚܳܐ ܕܰܫܢܰܘ̈ܗܝ: ܫܰܠܶܡ ܒܕܽܘܒܳܪ̈ܶܐ ܦܰܐܝ̈ܳܐ ܕܥܳܢܘܳܝܽܘܬܳܐ: ܗܳܢܳܐ ܕܰܒܛܽܘܪ̈ܶܐ ܘܒܰܡܥܰܪ̈ܶܐ ܘܰܒܦܶܥܪ̈ܶܐ ܕܰܐܪܥܳܐ ܥܳܡܰܪ ܗܘܳܐ: ܗܳܢܳܐ ܕܢܰܟܪܺܝ ܢܰܦܫܶܗ ܡ̣ܶܢ ܐܰܒܳܗܰܘ̈ܗܝ ܠܳܟ ܡܫܺܝܚܳܐ ܐܰܒܳܐ ܕܰܫܪܳܪܳܐ ܒܰܠܚܽܘܕ ܩܢܳܐ: ܗܳܢܳܐ ܕܰܟܦܰܪ ܒܓܶܢܣܳܐ ܘܰܒܛܽܘܗܡܳܐ ܘܰܐܒܣܺܝ ܒܩܶܢ̈ܝܳܢܶܐ ܘܰܒܥܽܘܬܪܳܐ ܕܺܝܠܶܗ ܕܥܳܠܡܳܐ ܥܳܒܽܘܪܳܐ: ܗܳܢܳܐ ܕܰܐܪܦܺܝ ܠܰܕܥܳܒܪ̈ܳܢ ܘܶܐܫܬܰܘܫܰܛ ܕܰܩܕܳܡܰܘܗܝ ܒܰܓܡܺܝܪܽܘܬܳܐ: ܗܳܢܳܐ ܕܦܰܓܶܕ ܠܦܰܓܪܶܗ ܘܕܰܝܶܒ ܠܒܶܣܪܶܗ ܒܰܡܚܰܡܣܢܳܢܽܘܬܳܐ: ܗܳܢܳܐ ܕܰܪܚܶܡ ܥܳܢܘܳܝܽܘܬܳܐ ܘܰܐܚܶܒ ܢܙܺܝܪܽܘܬܳܐ ܘܥܰܙܺܝ ܒܰܡܣܰܝܒܪܳܢܽܘܬܳܐ: ܗܳܢܳܐ ܕܫܰܡܶܫ ܠܰܒܬܽܘܠܽܘܬܳܐ ܘܶܐܬܪܰܓܪܰܓ ܠܕܰܟܝܽܘܬܳܐ: ܗܳܢܳܐ ܕܰܫܩܰܠ ܙܩܺܝܦܳܟ ܕܰܟܝܳܐ ܘܶܐܣܟܺܝܡ ܕܺܝܠܳܟ ܡܝܰܩܪܳܐ ܗܳܢܳܐ ܕܰܙܩܰܦ ܢܰܦܫܶܗ ܠܥܳܠܡܳܐ ܘܠܰܪ̈ܓܺܝܓܳܬܶܗ ܐܰܪ̈ܥܳܢܳܝܳܬܳܐ ܘܠܳܟ ܒܰܠܚܽܘܕ ܚܝܳܐ: ܗܳܢܳܐ ܕܰܒܢܳܡܽܘ̈ܣܶܐ ܕܺܝܠܳܟ ܐܠܰܗܳܝ̈ܶܐ ܐܶܬܗܰܓܺܝ ܐܺܝܡܳܡ̈ܶܐ ܘܠܰܝܠܰܘ̈ܳܬܳܐ: ܗܳܢܳܐ ܕܰܒܩܰܘ̈ܡܶܐ ܡܬܺܝ̈ܚܶܐ ܘܫܰܗܪ̈ܶܐ ܘܰܨܠܰܘ̈ܳܬܳܐ ܐܰܡܺܝ̈ܢܶܐ ܟܽܠܶܗ ܙܰܒܢܳܐ ܕܚܰܝܰܘ̈ܗܝ ܫܰܡܠܺܝ: ܗܳܢܳܐ ܕܰܚܠܳܦ ܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܓܰܢ̱ܒܳܪܳܐܝ̣ܬ ܐܶܬܟܰܬܰܫ ܘܛܰܢܳܢܳܐ ܘܚܰܝܠܬܳܢܳܐ ܐܶܬܚܰܘܺܝ ܘܡܰܩܪܒܳܢܳܐ ܢܰܚܫܺܝܪܬܳܢܳܐ ܠܽܘܩܒܰܠ ܒܥܶܠܕ̈ܒܳܒܶܐ ܕܓܶܢܣܰܢ ܐܶܬܚܙܺܝ: ܘܩܰܠܺܝܠܐ ܘܦܳܪܽܘܚܳܐ ܠܥܶܠ ܡ̣ܶܢ ܢܶܫܒܰܘ̈ܗܝ ܘܰܡܨܺܝ̈ܕܳܬܶܗ ܕܰܒܥܶܠܕܰܪܳܐ ܗ̣ܽܘ ܠܶܗ ܥܒܰܕ: ܗܳܢܳܐ ܕܰܫܩܰܠ ܢܺܝܪܳܟ ܒܛܰܠܝܽܘܬܶܗ ܘܡܰܘܒܠܳܟ ܩܰܠܺܝܠܬܳܐ ܘܰܒܣܰܝܒܽܘܬܶܗ ܡܶܢܶܗ ܠܐ ܐܰܚܬܳܗ̇: ܗܳܢܳܐ ܕܰܫܒܰܩ ܠܰܥܡܽܘܪܝܳܐ ܕܥܰܡ ܒܢܰܝ̈ܢܳܫܳܐ ܘܰܢܦܰܩ ܠܕܰܒܪܳܐ ܨܰܕܝܳܐ ܡܶܛܽܠ ܚܽܘܒܳܟ ܫܰܪܺܝܪܳܐ ܕܰܠܘܳܬܶܗ: ܗܳܢܳܐ ܕܰܐܚܶܒ ܠܓܽܘܪܓܳܚܳܐ ܘܰܠܡܰܫܟܒܳܐ ܐܰܡܺܝܢܳܐ ܕܥܰܠ ܐܰܪܥܳܐ: ܗܳܢܳܐ ܕܟܽܠܶܗ ܪܶܗܛܳܐ ܕܚܰܝܰܘ̈ܗܝ ܒܨܰܘ̈ܡܶܐ ܘܒܰܨܠܰܘ̈ܳܬܳܐ ܬܟܺܝ̈ܒܳܬܳܐ ܘܒܰܚܣܺܝܠܽܘܬܳܐ ܕܡ̣ܶܢ ܡܶܐܟ̈ܠܳܬܳܐ ܫܰܡܠܺܝ ܗܘܳܐ: ܗܳܢܳܐ ܕܰܐܝܟ ܦܳܠܚܳܐ ܟܰܫܺܝܪܳܐ ܐܶܬܬܰܓܰܪ ܡܰܘܒܠܐ ܕܝܽܘܬܪ̈ܳܢܶܐ ܪ̈ܽܘܚܳܢܳܝܶܐ: ܗܳܢܳܐ ܕܠܰܝ̈ܠܰܝ ܐܺܝܡܳܡ ܒܬܶܫܡ̈ܫܳܬܳܐ ܘܰܨܠܰܘ̈ܳܬܳܐ ܠܡܳܪܶܗ ܡܪܰܥܶܐ ܗܘܳܐ: ܗܳܢܳܐ ܕܰܫܢܰܝ̈ܳܐ ܚܰܡܫܺܝܢ ܘܰܐܪܒܰܥ ܚܰܡܣܶܢ ܒܟܰܦܢܳܐ ܘܰܒܨܰܗܝܳܐ ܡܶܛܽܠ ܒܽܘܣܳܡܳܐ ܕܰܒܡܰܠܟܽܘܬܳܐ ܫܡܰܝܳܢܺܝܬܳܐ: ܗܳܢܳܐ ܕܕܽܘܒܳܪ̈ܰܘܗܝ ܪܳܡܺܝܢ ܡ̣ܶܢ ܡܶܠܬܳܐ ܘܢܶܨܚܳܢܰܘ̈ܗܝ ܛܒܺܝܒܺܝܢ ܒܰܒܪܺܝܬܳܐ: ܗܳܢܳܐ ܕܰܐܝܟ ܥܰܡܽܘܕܳܐ ܕܢܽܘܪܳܐ ܕܠܐ ܕܳܥܶܟ ܒܠܺܠܝܳܐ ܘܒܺܐܝܡܳܡܳܐ ܙܩܰܦ ܢܰܦܫܶܗ ܩܕܳܡ ܡܳܪܶܗ: ܘܰܒܢܽܘܗܪܶܗ ܠܐܪܒܰܥ ܦܶܢ̈ܝܳܬܳܐ ܡܰܦܨܰܚ ܗܘܳܐ: ܗܳܢܳܐ ܕܚܰܕܺܝ ܠܥܶܠܳܝ̈ܶܐ ܒܰܡܚܰܡܣܢܳܢܽܘܬܶܗ ܘܰܐܬܗܰܪ ܠܬܰܚܬܳܝ̈ܶܐ ܒܰܡܥܰܙܝܳܢܽܘܬܶܗ: ܗܳܢܳܐ ܕܰܒܪܶܬܚܳܐ ܕܗܰܝܡܳܢܽܘܬܶܗ ܕܰܕܠܐ ܙܺܐܦܳܐ ܐܰܟܣܶܗ ܠܡܰܠܟܳܐ ܡܰܪܩܺܝܰܐܢܳܘܣ ܥܰܘܳܠܐ ܘܦܰܪܣܺܝ ܠܰܟܢܽܘܫܝܳܐ ܚܰܪܡܳܐ ܕܣܽܘܢܢܰܗܕܳܘܣ ܪܰܫܺܝܥܬܳܐ ܕܟܰܠܩܺܝܕܽܘܢܰܐ: ܗܳܢܳܐ ܕܠܐ ܡܬܽܘܡ ܦܰܠܶܓ ܠܰܒܪܳܐ ܡܫܺܝܚܳܐ ܠܰܟ̈ܝܳܢܶܐ ܘܕܺܝܠܳܝ̈ܳܬܳܐ ܐܰܝܟ ܬܚܽܘܡܳܐ ܡܣܰܝܒܳܐ ܕܠܐܷܘܳܢ ܪܰܫܺܝܥܳܐ: ܐܶܠܐ ܕܚܰܕ ܗ̣ܽܘ ܟܝܳܢܳܐ ܡܒܰܣܪܳܐ ܘܰܩܢܽܘܡܳܐ ܕܺܝܠܶܗ ܕܡܶܠܬܳܐ ܕܶܐܬܒܰܪܢܰܫ ܐܰܘܕܺܝ ܐܰܝܟ ܐܰܒܳܗ̈ܳܬܳܐ ܩܰܕܺܝ̈ܫܶܐ: ܗܳܢܳܐ ܕܟܽܠ ܦܶܢ̈ܝܳܢ ܨܳܝ̈ܒܳܢ ܘܳܐܬܝ̈ܳܢ ܠܕܽܘܟܪܳܢܶܗ ܘܰܠܥܰܕܥܺܐܕܶܗ: ܕܢܶܣܒܽܘܢ ܥܽܘܕܪ̈ܳܢܶܐ ܡ̣ܶܢ ܣܺܝܡܰܬ݀ ܓܰܪ̈ܡܰܘܗܝ ܘܢܶܬܒܰܪܟܽܘܢ ܒܰܨܠܰܘ̈ܳܬܶܗ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܐܳܘ ܡܳܪܝܳܐ ܕܒܰܨܠܰܘ̈ܳܬܶܗ ܕܗܳܢܳܐ ܐܰܬܠܺܝܛܳܐ ܥܛܺܝܦ ܙܳܟܽܘܬܳܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ: ܗܳܢܳܐ ܕܝܰܘܡܳܢܳܐ ܥܽܘܗܕܳܢܶܗ ܡܫܰܡܠܶܝܢܰܢ ܘܒܰܨܠܰܘ̈ܳܬܳܐ ܕܟܽܠܗܽܘܢ ܩܰܕܺܝ̈ܫܶܐ ܚܰܒܪ̈ܰܘܗܝ ܘܰܕܟܽܠܳܗ̇ ܡܰܫܪܺܝܬܶܗ ܫܰܟܶܢ ܠܰܢ ܙܰܝܢܳܐ ܘܚܰܝܠܐ ܬܰܩܺܝܦܳܐ ܠܽܘܩܒܰܠ ܟܽܠܗܶܝܢ ܨܶܢܥ̈ܳܬܶܗ ܕܳܐܟܶܠܩܰܪܨܳܐ ܘܕܰܒܥܶܠܕ̈ܒܳܒܶܐ ܕܺܝܠܰܢ ܟܣܰܝ̈ܳܐ ܘܰܓܠܰܝ̈ܳܐ ܘܰܥܒܶܕ ܠܰܢ ܡܡܰܪ̈ܝܳܢܶܐ ܒܕܽܘܒܳܪ̈ܶܐ ܕܺܝܠܶܗ ܘܰܕܟܽܠܗܽܘܢ ܩܰܕܺܝ̈ܫܶܐ ܕܺܝܠܳܟ: ܘܓܳܡܽܘܪ̈ܶܐ ܕܦܽܘܩ̈ܕܳܢܶܐ ܕܺܝܠܳܟ ܚܰܘܳܐ ܠܰܢ ܘܚܽܘܒܳܐ ܕܰܠܘܳܬܳܟ ܘܰܠܘܳܬ ܚܕܳܕ̈ܶܐ ܫܰܟܶܢ ܠܰܢ: ܐܰܝܟܰܢܳܐ ܕܢܶܫܬܘܶܐ ܕܳܐܦ ܚܢܰܢ ܘܥܰܢܺܝ̈ܕܰܝܢ ܥܰܡܶܗ ܢܶܬܒܰܣܰܡ ܒܡܰܠܟܽܘܬܳܐ ܫܡܰܝܳܢܺܝܬܳܐ: ܘܰܐܟܚܕܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܛܟܣܐ ܕܥܠ ܡܪܝ ܝܥܩܘܒ ܡܠܦܢܐ ܕܒܛܢܢ ܕܣܪܘܓ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ ܕܰܒܢܶܥ̈ܡܳܬܳܐ ܚܰܠܝ̈ܳܬܳܐ: ܘܒܰܙܡܺܝܪ̈ܳܬܳܐ ܐܠܰܗܳܝ̈ܳܬܳܐ: ܘܰܒܩ̈ܳܠܐ ܒܰܣܺܝ̈ܡܶܐ ܕܬܶܫܒ̈ܚܳܬܳܐ: ܢܚܰܓܶܐ ܘܰܢܥܰܕܥܶܕ ܠܝܰܘܡܳܐ ܗܳܢܳܐ ܒܪܺܝܟܳܐ ܕܕܽܘܟܪܳܢܶܗ ܕܡܳܪܝ ܝܰܥܩܽܘܒ ܡܢܺܝܚܳܢܳܟ ܘܡܰܠܦܳܢܳܐ ܕܐ̱ܪ̈ܳܙܰܝܟ ܛܽܘܒ̈ܬܳܢܶܐ: ܐܰܝܟܰܢܳܐ ܕܥܰܡܶܗ ܘܥܰܡ ܟܽܠܗܽܘܢ ܡܢܺܝ̈ܚܳܢܶܐ ܕܡܳܪܽܘܬܳܟ ܢܶܬܒܰܣܰܡ ܒܰܓܢܽܘܢܳܟ ܡܳܪܰܢ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܚܰܕ ܐܺܝܬܝܳܐ ܡܬܽܘܡܳܝܳܐ ܕܒܰܬܠܳܬܳܐ ܩܢܽܘ̈ܡܶܐ ܡܶܬܗܰܝܡܰܢ: ܠܚܰܕ ܐܠܰܗܳܐ ܫܰܪܺܝܪܳܐ ܕܒܰܬܠܳܬܳܐ ܫܡܳܗ̈ܶܐ ܡܶܬܺܝܕܰܥ: ܠܚܰܕ ܡܳܪܝܳܐ ܚܰܝܠܬܳܢܳܐ ܕܒܰܬܠܳܬ ܕܺܝܠܳܝ̈ܳܬܳܐ ܡܶܬܝܰܩܰܢ: ܠܰܚܕܳܐ ܐܠܰܗܽܘܬܳܐ ܓܢܺܝܙܬܳܐ: ܐܰܒܳܗܽܘܬܳܐ ܡ̇ܰܢ ܘܰܒܪܽܘܬܳܢܽܘܬܳܐ ܘܢܳܦܽܘܩܽܘܬܳܐ: ܐܰܝܠܶܝܢ ܕܡܶܬܚܰܝܕܺܝܢ ܬܠܺܝܬܳܐܝ̣ܬ: ܘܡܶܬܦܰܠܓܺܝܢ ܚܕܳܢܳܐܝ̣ܬ: ܐܰܝܟܰܢܳܐ ܕܰܬܠܺܝܬܳܝܽܘܬܳܐ ܚܕܳܢܳܝܽܘܬܳܐ: ܬܶܬܗܰܝܡܰܢ ܚܕܳܢܳܝܽܘܬܳܐ ܬܠܺܝܬܳܝܽܘܬܳܐ ܬܶܬܬܰܘܕܶܐ: ܚܰܕ ܬܠܳܬܳܐ ܘܰܬܠܳܬܳܐ ܚܰܕ: ܘܡܶܫܬܰܒ̈ܚܳܢܶܐ ܘܠܰܘ ܡܫܰܒ̈ܚܳܢܶܐ: ܡܶܣܬܰܓ̈ܕܳܢܶܐ ܘܠܰܘ ܣܳܓܽܘ̈ܕܶܐ: ܕܰܫܘܶܝܢ ܒܽܐܘܣܺܝܰܐ: ܒܰܟܝܳܢܳܐ ܘܒܰܐܠܳܗܽܘܬܳܐ: ܘܰܒܪܰܒܽܘܬܳܐ ܘܰܒܒܳܪܽܘܝܽܘܬܳܐ ܘܰܒܛܳܒܽܘܬܳܐ ܘܰܒܡܳܪܽܘܬܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܕܒܶܗ ܟܽܠ ܕܺܐܝܬܰܘܗܝ ܘܰܕܗܳܘܶܐ ܘܰܗܘܳܐ ܐܶܬܬܰܝܬܺܝ ܘܡܶܬܬܰܝܬܶܐ: ܘܟܽܠ ܩܰܘܡܳܐ ܒܶܗ ܘܰܥܠܰܘܗܝ ܩܳܐܶܡ ܘܡܶܣܬܡܶܟ: ܘܟܽܠ ܙܰܘܥܳܐ ܒܶܗ ܡܶܬܺܝܕܰܥ ܘܰܠܘܳܬܶܗ: ܕܠܶܗ ܩ̈ܳܠܐ ܕܬܰܘܕ̈ܝܳܬܳܐ ܘܰܕܬܶܫܒ̈ܚܳܬܳܐ ܦܰܐܝ̈ܳܬܳܐ ܒܢܶܥ̈ܡܳܬܳܐ ܚܰܠܝ̈ܳܬܳܐ ܡܰܣܩܺܝܢܰܢ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܶܠܬܶܗ ܕܰܐܒܳܐ ܘܚܰܝܠܶܗ ܘܚܶܟܡܬܶܗ ܙܺܝܘܶܗ ܘܨܶܡܚܶܗ: ܘܰܕܪܳܥܶܗ ܘܬܽܘܩܦܶܗ ܘܝܽܘܩܢܳܐ ܕܺܐܝܬܽܘܬܶܗ ܘܨܰܠܡܳܐ ܕܬܶܫܒܽܘܚܬܶܗ: ܗ̇ܰܘ ܕܡܶܛܽܠ ܛܰܝܒ̈ܘܳܬܳܟ ܥܒܰܕܬ ܠܳܟ ܡܫܰܒ̈ܚܳܢܶܐ ܒܰܫܡܰܝ̈ܐ ܥܶܠܳܝ̈ܶܐ ܗܰܘ̈ܢܶܐ ܬܪ̈ܰܝܳܢܶܐ ܗ̇ܳܢܽܘܢ ܕܰܡܫܰܡܫܺܝܢ ܠܗܰܘܢܳܐ ܩܰܕܡܳܝܳܐ ܘܰܠܚܽܘܕܳܝܳܐ ܘܡ̇ܰܢ ܢܽܘܪܳܐ ܠܐ ܗܽܘܠܳܢܳܝܬܳܐ ܝܰܩܶܢܬ ܐܶܢܽܘܢ: ܘܠܐ ܡܶܨܛܰܠܝ̈ܳܢܶܐ ܘܠܐ ܡܶܙܕܰܥ̈ܙܳܢܶܐ ܥܒܰܕܬ ܐܶܢܽܘܢ: ܘܒܰܬܠܳܬ ܥܺܕ̈ܳܬܳܐ ܣܕܺܝܪܳܐܝ̣ܬ ܛܰܟܶܣܬ ܐܶܢܽܘܢ: ܟܰܕ ܗ̇ܳܢܽܘܢ ܡ̇ܰܢ ܩܰܕ̈ܡܳܝܶܐ ܡܶܢܳܟ ܡܶܬܢܰܗܪܺܝܢ ܡܶܨܥܳܝ̈ܶܐ ܕܶܝܢ ܡ̣ܶܢ ܩܰܕ̈ܡܳܝܶܐ ܡܶܬܬܰܨܡܚܺܝܢ: ܘܰܐ̱ܚܪ̈ܳܝܶܐ ܡ̣ܶܢ ܡܶܨܥ̈ܳܝܶܐ ܡܶܬܬܰܙܠܓܺܝܢ: ܘܟܽܠܗܽܘܢ ܡ̣ܶܢ ܪܺܝܫ ܚܰܝ̈ܶܐ ܣܳܝܩܺܝܢ: ܟܰܕ ܕܶܝܢ ܡ̣ܶܢ ܓܒܺܝܠܬܳܐ ܕܡܳܝܽܘ̈ܬܶܐ ܘܡ̣ܶܢ ܥܰܦܪܳܐ ܡܫܰܒ̈ܚܳܢܶܐ ܕܩܰܪܺܝܒܺܝܢ ܟܡܳܐ ܕܡܰܨܝܳܐ ܠܓܽܘܫܡܳܐ ܕܠܰܕܠܐ ܓܽܘܫܡܳܐ ܥܒܰܕܬ ܘܰܡܫܰܘ̈ܬܦܶܐ ܕܶܝܢ ܒܡܶܬܢܰܗܪ̈ܘܳܬܳܐ ܕܡܶܢܳܟ: ܠܗܰܘ̈ܢܶܐ ܬܪ̈ܰܝܳܢܶܐ ܠܗܽܘܢ ܣܳܡܬ: ܐܰܝܟܰܢܳܐ ܕܳܐܦ ܗܶܢܽܘܢ ܡ̣ܶܢ ܗܳܠܶܝܢ ܕܰܒܥܺܕܬܳܐ ܬܠܺܝܬܳܝܬܳܐ ܟܰܕ ܡܶܬܢܰܗܪܺܝܢ ܒܨܶܡ̈ܚܶܐ ܪܺܝܫܽܘܬ ܟܳܗܢܽܘܬܳܐ ܗܳܕܶܐ ܕܺܝܠܰܢ ܟܡܳܐ ܕܡܰܨܝܳܐ ܠܡܶܬܪ̈ܰܓܫܳܢܶܐ ܠܡܶܬܥܰܠܳܝܽܘ ܒܕܰܟܝܽܘܬܳܐ ܕܪ̈ܶܓܫܶܐ ܘܓܳܡܽܘܪܽܘܬ ܫܽܘܡ̈ܠܳܝܶܐ ܟܳܗ̈ܢܶܐ ܒܥܺܕܬܳܐ ܕܶܝܢ ܕܺܝܠܰܢ ܩܰܕܡܳܐܝ̣ܬ ܬܠܳܬܳܐ ܛܶܟ̈ܣܶܐ ܡܫܰܡ̈ܠܝܶܐ ܛܰܟܶܣܬ ܪܺܝܫܽܘܬ ܟܳܗܢܽܘܬܳܐ ܦܰܛܪ̈ܝܰܪܟܽܘ ܘܪ̈ܺܝܫܰܝ ܐܶܦܣܩܽܘ̈ܦܶܐ ܘܶܐܦܣܩܽܘ̈ܦܶܐ ܗܳܠܶܝܢ ܕܡ̣ܶܢ ܗܰܘ̈ܢܶܐ ܗܳܠܶܝܢ ܕܰܠܥܶܠ ܡܶܢܗܽܘܢ ܡܶܬܬܰܙܠܓܺܝܢ ܟܡܳܐ ܕܡܰܨܝܳܐ: ܠܗܳܠܶܝܢ ܕܰܠܬܰܚܬ ܡܶܢܗܽܘܢ ܘܰܐܝܟ ܫܰܦܺܝܪܽܘܬ ܡܛܰܟܣܽܘܬܳܐ ܓܡܺܝܪܬܳܐ ܡܫܰܟܢܺܝܢ: ܟܰܕ ܠܗܳܢܳܐ ܪܺܝܫ ܟܳܗ̈ܢܶܐ ܛܽܘܒܳܢܳܐ ܡܳܪܝ ܝܰܥܩܽܘܒ ܓܳܡܽܘܪܳܐ ܒܥܺܕܬܳܐ ܗܳܕܶܐ ܡܥܰܠܰܝܬܳܐ ܡܛܰܟܰܣ ܝܰܬܺܝܪ ܓܡܺܝܪܳܐܝ̣ܬ ܒܫܽܘ̈ܟܳܢܶܐ ܐܠܰܗܳܝ̈ܶܐ ܡܶܢܳܟ ܪܺܝܫ ܐܠܰܗܽܘܬܳܐ ܡܫܰܡܠܝܳܐܝ̣ܬ ܐܶܬܗܰܕܰܪ: ܘܡ̣ܶܢ ܪܽܘܚܳܐ ܩܰܕܺܝܫܳܐ ܛܳܒ ܐܶܬܓܡܰܪ: ܘܦܽܘܠܚܳܢܳܐ ܕܩܽܘܕ̈ܫܶܐ ܐ̱ܪ̈ܳܙܳܢܳܝܶܐ ܐܶܬܗܰܝܡܰܢ: ܠܪܰܒܽܘܬܳܐ ܕܰܐܝܟ ܗܳܕܶܐ ܐܰܫܘܺܝܬܳܝܗܝ: ܐܰܝܟܰܢܳܐ ܟܰܝ ܕܪܳܥܝܳܐ ܫܰܪܺܝܪܳܐ ܕܡܰܣܒܰܗ ܒܳܟ ܪܳܥܝܳܐ ܛܳܒܳܐ ܗ̇ܰܘ ܣܳܡ ܢܰܦܫܶܗ ܚܠܳܦ ܡܰܪܥܺܝܬܶܗ ܐܳܦ ܗ̣ܽܘ ܥܰܠ ܡܰܪܥܺܝܬܳܟ ܙܒܺܝܢܰܬ݀ ܒܰܕܡܳܟ ܪܳܥܝܳܐ ܥܺܝܪܳܐ ܢܶܗܘܶܐ: ܘܡ̣ܶܢ ܗܳܪܟܳܐ ܣܺܝܡܬܳܐ ܕܥܽܘܕܪ̈ܳܢܶܐ ܘܰܕܝܽܘܠܦܳܢ̈ܶܐ ܐܠܰܗܳܝ̈ܶܐ ܥܒܰܕܬܳܝܗܝ: ܐܳܦ ܡܰܒܽܘܥܳܐ ܕܡܰܪܕܶܐ ܢܰܗܪ̈ܰܘܳܬܳܐ ܕܡܰܝ̈ܳܐ ܚܰܝ̈ܶܐ ܫܰܡܠܺܝܬܳܝܗܝ: ܗ̇ܰܘ ܕܡ̣ܶܢ ܪܺܝܫ ܚܰܝܰܘ̈ܗܝ: ܠܰܡܫܽܘܚܬܳܐ ܕܪܰܘܪܒܳܐ ܥܒܰܪ: ܘܰܒܩܰܘܡܬܳܐ ܗ̇ܳܝ ܫܰܒܪܳܝܬܳܐ ܘܚܰܣܺܝܪܽܘܬ ܡܰܡܠܠܐ ܘܺܝܕܰܥܬܳܐ: ܘܓܽܘܚܟܳܐ ܥܝܳܕܳܢܳܝܳܐ ܘܟܰܕ ܒܗܰܝܟܠܐ ܕܺܝܠܳܟ ܒܟܶܢ̈ܦܶܐ ܕܺܝܠܳܗ̇ ܕܝܳܠܶܕܬܶܗ ܫܰܦܺܝܪܰܬ݀ ܕܶܚܠܬܳܐ ܥܰܦܺܝܩ ܗܘܳܐ: ܡܰܚܰܬܬܳܐ ܕܺܝܠܶܗ ܥܒܰܕ: ܘܰܒܚܺܐܦܳܐ ܫܰܒܪܳܝܳܐ ܥܰܠ ܐܺܝܕܰܘ̈ܗܝ ܘܪ̈ܶܓܠܰܘܗܝ ܪܫܰܦ: ܘܠܰܩܕܽܘܫܩܽܘܕ̈ܫܺܝܢ ܓܰܘܳܝܳܐ ܒܝܰܕ ܪܽܘܚܳܐ ܩܰܕܺܝܫܳܐ ܡܗܰܕܝܳܢܶܗ ܥܰܠ: ܘܥܰܠ ܬܪܽܘܢܽܘܣ ܝܰܩܺܝܪܳܐ ܣܠܶܩ: ܘܰܠܘܳܬ ܦܳܬܽܘܪܳܐ ܕܙܰܘܥܬܳܐ ܐܺܝܕܰܝ̈ܳܐ ܐܰܘܫܶܛ: ܘܡ̣ܶܢ ܟܳܣܳܐ ܕܰܕܡܳܟ ܐ̱ܪܳܙܳܢܳܝܳܐ ܐܰܘܟܺܝܬ ܪܽܘܚܳܐ ܩܰܕܺܝܫܳܐ ܡܠܐܴ ܚܽܘܦܢܰܘ̈ܗܝ ܘܰܬܠܺܝܬܳܐܝ̣ܬ ܐܶܫܬܺܝ: ܪܽܘܚܳܐ ܘܚܰܝ̈ܶܐ ܘܚܶܟܡܬܳܐ: ܘܟܰܕ ܠܟܽܠ ܐ̱ܢܳܫ ܒܒܽܘܠܗܳܝܳܐ ܐܰܩܺܝܡ: ܘܬܶܕܡܽܘܪܬܳܐ ܗܘܳܬ݀ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܘܡ̣ܶܢ ܬܰܡܳܢ ܐܶܬܡܠܺܝ ܚܶܟܡܬܳܐ ܐܠܰܗܳܝܬܳܐ: ܘܰܗܘܳܐ ܐܰܘܳܢܳܐ ܘܒܶܝܬ ܡܰܥܡܪܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܟܰܕ ܠܰܡܫܽܘܚܬܳܐ ܐܰܘܟܺܝܬ ܩܰܘܡܬܳܐ ܓܰܒܪܳܢܳܝܬܳܐ ܐܶܫܬܰܘܫܰܛ ܗܘܳܐ: ܘܬܰܩܕܳܐ ܕܪܳܥܝܽܘܬܳܐ ܡܳܪܳܢܳܝܬܳܐ ܐܰܚܺܝܕ ܗܘܳܐ: ܡܺܐܡܪ̈ܶܐ ܐܰܘܟܺܝܬ ܬܽܘܪ̈ܓܳܡܶܐ ܬܶܐܘܳܪ̈ܺܝܛܺܝܩܳܝܶܐ ܘܠܽܘܓܺܝ̈ܣܳܝܶܐ ܐܳܦ ܡܽܘܣܺܝܩܳܪ̈ܳܝܶܐ ܣܳܡ ܒܥܺܕܬܳܐ ܘܟܰܕ ܠܘܳܬ ܢܺܝܫܳܐ ܕܣܺܝܡ ܠܶܗ ܥܳܢܶܐ ܗܘܳܐ ܘܰܠܗܰܘ ܡܳܐ ܕܠܶܗ ܡܫܰܒܰܚ ܗܘܳܐ: ܟܰܕ ܟܽܠܶܗ ܥܰܡ ܟܽܠܶܗ ܬܰܡܳܢ ܗܳܘܶܐ ܗܘܳܐ: ܘܥܰܡܶܗ ܕܢܺܝܫܳܐ ܚܰܠܝܳܐ ܡܶܬܡܰܙܰܓ ܗܘܳܐ: ܟܰܕ ܓܶܝܪ ܥܰܠ ܡܡܰܠܠܽܘܬ ܐܠܰܗܽܘܬܳܐ ܡܶܬܗܰܒܰܒ ܗܘܳܐ: ܟܰܕ ܟܽܠܶܗ ܒܟܽܠܶܗ ܒܢܽܘܪ ܐܠܰܗܽܘܬܳܐ ܐܰܟܡܳܐ ܕܡܰܨܝܳܐ ܡܶܬܓܰܘܙܰܠ ܗܘܳܐ: ܘܟܰܕ ܥܰܠ ܒܪܺܝܬܳܐ ܠܐ ܗܽܘܠܳܢܳܝܬܳܐ ܕܗܰܘ̈ܢܰܝ ܫܡܰܝ̈ܳܐ ܡܰܠܶܦ ܥܰܡܗܽܘܢ ܒܫܽܘܒ̈ܚܶܐ ܠܐ ܗܽܘܠܳܢܳܝ̈ܶܐ ܡܶܬܚܰܠܰܛ ܗܘܳܐ: ܘܟܰܕ ܠܰܬܠܺܝܬܳܝܽܘܬ ܩܽܘ̈ܕܳܫܶܐ ܣܪܳܦܳܐܝ̣ܬ ܡܩܰܕܶܫ ܗܘܳܐ: ܘܥܰܠ ܡܰܪܟܰܒܬܳܐ ܦܬܺܝܟܰܬ݀ ܕܶܡܘ̈ܳܬܳܐ ܡܬܰܪܓܰܡ ܗܘܳܐ ܚܶܙܘܳܐ ܡܶܕܶܡ ܓܢܺܝܚܳܐ ܚܳܙܶܐ ܗܘܳܐ: ܘܥܰܠ ܚܽܘܪܒܳܗ̇ ܕܥܺܕܬܳܐ ܐܳܡܺܝܕܳܝܬܳܐ ܐܳܠܐܷ ܗܘܳܐ: ܘܟܰܕ ܥܰܠ ܟܽܠܗܶܝܢ ܒܶܪ̈ܝܳܬܳܐ ܡܡܰܠܶܠ ܗܘܳܐ: ܠܳܟ ܒܳܪܽܘܝܳܐ ܘܥܳܒܽܘܕܳܐ ܕܟܽܠ ܒܗܶܝܢ ܚܳܙܶܐ ܘܰܕܟܽܠܗܶܝܢ ܒܶܪ̈ܝܳܬܳܐ ܥܶܠܳܝ̈ܳܬܳܐ ܘܬܰܚܬܳܝ̈ܳܬܳܐ ܒܙܰܪܬܳܟ ܣܺܝ̈ܡܳܢ ܡܫܰܪܰܪ ܗܘܳܐ: ܥܰܠ ܡܶܬܒܰܣܪܳܢܽܘܬܳܟ ܕܡ̣ܶܢ ܐܶܡܳܐ ܠܐ ܡܢܰܣܝܰܬ݀ ܒܙܽܘܘܳܓܳܐ ܠܐ ܡܶܬܡܰܠܠܳܢܳܐܝ̣ܬ ܡܙܰܡܰܪ: ܠܳܟ ܕܺܐܝܬܰܝܟ ܒܥܽܘܒܶܗ ܕܰܐܒܽܘܟ ܘܰܒܥܽܘܒܳܗ̇ ܕܝܳܠܶܕܬܳܟ ܐܳܡܰܪ ܗܘܳܐ: ܘܰܒܗܳܠܶܝܢ ܠܛܳܠܡ̈ܰܝ ܠܰܚܕܳܝܽܘܬܳܟ ܠܐ ܡܶܬܦܰܠܓܳܢܺܝܬܳܐ ܡܰܟܶܣ ܗܘܳܐ: ܘܟܰܕ ܥܰܠ ܝܺܠܺܝܕܽܘܬܳܟ ܒܶܣܪܳܢܳܝܬܳܐ ܕܡ̣ܶܢ ܒܬܽܘܠܬܳܐ ܡܰܒܗܶܬ ܗܘܳܐ: ܟܰܕ ܠܝܳܠܶܕܬܳܟ ܡܗܰܕܪܰܬ݀ ܒܰܒܬܽܘ̈ܠܐ ܕܶܝܢ ܡܩܰܠܶܣ ܗܘܳܐ: ܟܽܠܶܗ ܥܰܡ ܟܽܠܶܗ ܥܰܡ ܩܽܘܠܳܣ̈ܶܐ ܚܳܙܶܩ ܗܘܳܐ: ܟܰܕ ܠܰܡܓܰܕ̈ܦܰܝ ܥܰܠ ܒܬܽܘܠܽܘܬܳܗ̇ ܐܳܦ ܠܐܝܠܶܝܢ ܕܟܳܦܪܺܝܢ ܒܰܐܠܳܗܽܘܬܳܟ ܘܒܳܗ̇ ܐܰܟܡܳܐ ܕܠܰܘ ܠܐܠܳܗܽܘܬܳܟ ܝܶܠܕܰܬ݀ ܥܰܡ ܒܶܣܪܳܐ ܡܰܣܠܐܷ ܗܘܳܐ: ܘܟܰܕ ܠܗܰܝܟܠܐ ܥܰܡ ܩܽܘܪ̈ܒܳܢܶܐ ܡܶܬܩܰܪܰܒ ܗܘܰܝܬ: ܠܳܟ ܕܺܐܝܬܰܝܟ ܡܩܰܒܠܳܢܳܐ ܕܩܽܘܪ̈ܒܳܢܶܐ ܘܝܳܗܽܘܒܳܐ ܕܢܳܡܽܘܣܳܐ ܝܳܕܰܥ ܗܘܳܐ: ܟܰܕ ܠܰܥܡܳܕܳܐ ܐܰܝܟ ܚܰܝܳܒܳܐ ܡܶܬܩܰܪܰܒ ܗܘܰܝܬ ܥܰܡ ܡܰܥܡܕܳܢܳܐ ܕܺܝܠܳܟ ܡܰܙܥܶܩ ܗܘܳܐ: ܕܗܳܢܰܘ ܐܶܡܪܶܗ ܕܰܐܠܳܗܳܐ ܗ̇ܰܘ ܕܫܳܩܶܠ ܠܰܚܛܺܝܬܶܗ ܕܥܳܠܡܳܐ ܘܦܳܪܶܩ ܠܶܗ: ܘܟܰܕ ܕܶܝܢ ܠܨܰܘܡܳܐ ܡܳܪܳܢܳܝܳܐ ܡܫܰܒܰܚ ܗܘܳܐ ܠܟܽܠ ܬܶܓܡܺܝ̈ܢ ܠܰܡܩܰܒܠܳܢܽܘܬܶܗ ܡܚܰܦܶܛ ܗܘܳܐ: ܘܰܠܘܳܬ ܡܪܰܚܡܳܢܽܘܬܳܐ ܣܰܓܺܝܐܬܳܐ ܡܓܰܪܶܓ ܗܘܳܐ: ܘܟܰܕ ܥܰܠ ܣܳܥܽܘܪܽܘܬܳܐ ܕܬܶܕܡܪ̈ܳܬܳܐ ܕܺܝܠܳܟ ܡܰܬܡ̈ܗܳܬ ܠܗܰܘ̈ܢܶܐ ܐ̱ܢܳܫܳܝ̈ܶܐ ܡܰܠܶܦ ܗܘܳܐ: ܠܟܽܠܢܳܫ ܠܘܳܬ ܗܰܝܡܳܢܽܘܬܳܐ ܕܒܳܟ ܩܳܪܶܐ ܗܘܶܐ: ܘܟܰܕ ܥܰܠ ܡܰܥܠܬܳܟ ܕܠܐܘܪܫܠܶܡ ܕܥܰܠ ܥܺܝܠܐ ܡܦܰܫܶܩ ܗܘܳܐ ܥܰܡ ܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܡܫܰܒܰܚ ܗܘܳܐ: ܐܳܦ ܠܣܳܒ̈ܶܐ ܣܰܟ̈ܠܐ ܒܡܶܠܬܳܐ ܡܟܰܐܐܰܪ ܗܘܳܐ: ܘܟܰܕ ܠܗܳܠܶܝܢ ܟܽܠܗܶܝܢ ܕܶܐܣܬܥܰܪ̈ܝ ܒܚܰܫܳܟ ܡܰܥܒܶܕ ܚܰܝ̈ܶܐ ܓܡܺܝܪܳܐܝ̣ܬ ܡܰܠܶܦ ܗܘܳܐ ܠܟܽܠ ܥܰܡܡܺܝ̈ܢ ܕܥܰܡܳܟ ܢܶܚܫܽܘܢ ܐܰܟܘܳܬܶܗ ܡܓܰܪܶܓ ܗܘܳܐ: ܘܟܰܕ ܥܰܠ ܨܠܺܝܒܳܐ ܕܺܝܠܳܟ ܦܳܪܽܘܩܳܝܳܐ ܡܡܰܠܶܠ ܗܘܳܐ: ܠܟܽܠ ܐܶܡܘ̈ܳܢ ܠܘܳܬ ܣܶܓܕܬܳܟ ܡܚܰܦܶܛ ܗܘܳܐ: ܘܟܰܕ ܥܰܠ ܩܒܽܘܪܬܳܟ ܗ̇ܳܝ ܬܠܺܝܬܳܝܰܬ݀ ܝܰܘ̈ܡܶܐ ܡܣܰܒܰܪ ܗܘܳܐ: ܕܰܒܓܰܘ ܩܰܒܪܳܐ ܘܒܰܫܝܽܘܠ ܘܒܰܡܪ̈ܰܘܡܶܐ ܥܶܠܳܝ̈ܶܐ ܠܘܳܬ ܐܰܒܽܘܟ ܡܰܟܪܶܙ ܗܘܳܐ: ܘܟܰܕ ܥܰܠ ܩܝܳܡܬܳܟ ܡܰܦܨܚܰܬ݀ ܠܟܽܠ ܦܶܢ̈ܝܳܢ ܡܬܰܪܓܰܡ ܗܘܳܐ: ܥܰܡ ܢܶܫ̈ܶܐ ܬܰܠܡܺܝ̈ܕܳܬܳܐ ܠܘܳܬ ܩܰܒܪܳܟ ܪܳܗܶܛ ܗܘܳܐ ܘܥܰܡ ܡܰܠܐܟ̈ܶܐ ܠܒܺܝ̈ܫܰܝ ܚܶܘܳܪ̈ܶܐ ܕܩܳܡ ܡܳܪܰܢ ܘܠܐ ܗ̣ܽܘ ܬܢܳܢ ܐܳܡܰܪ ܗܘܳܐ ܘܟܰܕ ܥܰܠ ܣܽܘܠܳܩܳܟ ܡܥܰܠܝܳܐ ܕܒܰܦܓܰܪ ܠܘܳܬ ܐܰܒܽܘܟ ܡܫܰܒܚܳܐ ܡܦܰܫܶܩ ܗܘܳܐ: ܥܰܡ ܬܶܓ̈ܡܶܐ ܥܶܠܳܝ̈ܶܐ ܒܩ̈ܳܠܐ ܕܠܐ ܫܰܠܘܳܐ ܡܥܰܢܶܐ ܗܘܳܐ ܘܰܐܪܺܝܡܘ ܪ̈ܺܝܫܳܢܶܐ ܬܰܪ̈ܥܶܐ ܕܢܶܥܽܘܠ ܡܰܠܟܳܐ ܕܺܐܝܩܳܪ̈ܶܐ ܐܳܡܰܪ ܗܘܳܐ: ܘܟܰܕ ܥܰܠ ܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܛܳܐ ܡܰܟܪܶܙ ܗܘܳܐ: ܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܪܽܘܚܳܐ ܩܰܕܺܝܫܳܐ ܡܩܰܒܶܠ ܗܘܳܐ: ܘܰܒܠܶܫ̈ܳܢܶܐ ܢܽܘܪ̈ܳܢܳܝܶܐ ܥܰܠ ܚܰܝ̈ܠܐ ܬܡܺܝ̈ܗܶܐ ܘܬܶܕܡܪ̈ܳܬܳܐ ܕܺܝܠܳܟ ܥܰܡܗܽܘܢ ܠܥܰܙ ܗܘܳܐ ܘܟܰܕ ܥܰܠ ܫܽܘܠܳܡ ܙܰܒ̈ܢܶܐ ܘܥܶܕ̈ܳܢܶܐ ܡܡܰܠܶܠ ܗܘܳܐ: ܐܰܝܟ ܗ̇ܰܘ ܕܥܰܡ ܡܶܠܬܶܗ ܡܳܛܶܐ ܗܘܳܐ ܩܶܨܶܗ ܐܳܡܰܪ ܗܘܳܐ: ܘܠܐܝܠܶܝܢ ܕܰܡܓܰܕܦܺܝܢ ܥܠܰܝܟ ܐܰܟܡܰܢ ܕܰܠܝܰܘܡܳܐ ܐ̱ܚܪܳܝܳܐ ܘܫܳܥܬܳܐ ܠܐ ܝܳܕܰܥ ܐܰܢ̱ܬ ܡܰܟܶܣ ܗܘܳܐ: ܘܟܰܕ ܥܰܠ ܩܝܳܡܬܳܐ ܓܰܘܳܢܳܝܬܳܐ ܕܟܽܠ ܐ̱ܢܳܫ: ܘܕܺܝܢܳܐ ܟܺܐܢܳܐ ܘܦܽܘܪܥܳܢܳܐ ܡܡܰܠܶܠ ܗܘܳܐ: ܘܠܐܝܠܶܝܢ ܕܟܳܦܪܺܝܢ ܒܰܩܝܳܡܬܳܐ ܕܦܰܓܪ̈ܶܐ ܡܟܰܐܐܱܪ ܗܘܳܐ: ܘܥܰܡ ܗܳܠܶܝܢ ܒܕܽܘܒܳܪ̈ܶܐ ܕܓܰܒܪ̈ܶܐ ܚܰܝܠܬܳܢ̈ܶܐ ܡܡܰܪܶܐ ܗܘܳܐ: ܒܡܶܠܬܳܐ ܟܺܝܬ ܘܒܰܥܒܳܕܳܐ ܥܰܡܗܽܘܢ ܡܶܬܥܢܶܐ ܗܘܳܐ: ܒܗܳܢܽܘܢ ܪ̈ܺܝܫܰܝ ܐܰܒܳܗ̈ܳܬܳܐ ܒܗܰܝܡܳܢܽܘܬܳܐ ܦܫܺܝܛܬܳܐ ܐܳܦ ܬܰܡܺܝܡܽܘܬܳܐ ܡܩܰܠܰܣܬܳܐ ܘܰܗܕܺܝܪܬܳܐ ܒܩܰܪܩܰܦܬܳܐ ܕܚܰܙܳܝ̈ܶܐ ܘܰܐܚܺܝܕ ܚܽܘܛܪܳܐ ܐ̱ܪܳܙܳܢܳܝܬܳܐ ܕܡܰܟܺܝܟܽܘܬܳܐ: ܒܗܰܘ ܚܰܪܺܝܦ ܢܰܝܙܟܳܐ ܒܛܰܢܳܢܽܘܬܳܐ ܒܰܗܓܽܘܡܽܘܬ ܫܽܘܪ̈ܶܐ ܐܺܝܪ̈ܺܝܚܽܘܢܳܝܶܐ ܐܰܝܟ ܒܥܶܠܫܡܳܐ ܕܡܳܪܶܗ ܒܗܰܘ ܕܶܐܣܰܪ ܠܰܫܡܰܝܳܐ ܒܡܶܠܬܶܗ ܘܰܠܟܽܘܡܪ̈ܶܐ ܕܰܚܛܺܝܬܳܐ ܩܛܰܠ ܒܰܛܢܳܢܳܐ ܕܕܶܚܠܰܬ݀ ܐܠܰܗܳܐ: ܒܗܰܘ ܡܫܰܒܰܚ ܒܰܢ̈ܒܺܝܶܐ ܒܟܳܪܽܘܙܽܘܬܳܐ ܡܥܰܠܰܝܬܳܐ: ܒܗܰܘ ܕܶܐܟܰܠ ܟܶܪܟܳܐ ܣܪܺܝܛ ܒܪܽܘܚܳܐ ܕܰܠܓܶܠܝܳܢܰܘ̈ܗܝ ܐܠܰܗܳܝ̈ܶܐ ܬܗܺܝܪܳܐܝ̣ܬ ܫܰܘܕܰܥ ܒܟܽܠܗܽܘܢ ܕܶܝܢ ܡܰܐܪ̈ܙܰܝ ܡܶܐܬܺܝܬܳܟ ܕܒܰܒܣܰܪ ܒܕܽܘܓ̈ܡܰܛܰܘܗܝ ܐܠܰܗܳܝ̈ܶܐ ܐܶܫܬܰܘܬܰܦ ܘܠܰܣܬܺܝܪ̈ܳܬܳܐ ܕܣܶܦܪ̈ܶܐ ܕܺܝܠܗܽܘܢ ܓܰܠܺܝ ܒܗܰܘ ܡܣܰܒܰܪ ܡܰܠܟܽܘܬܳܐ ܕܺܝܠܳܟ ܘܪܰܗܳܛܳܐ ܕܰܩܕܳܡ ܡܳܪܽܘܬܳܟ ܒܰܒܬܽܘܠܽܘܬܳܐ ܘܟܳܪܽܘܙܽܘܬܳܐ ܘܰܒܡܰܟܣܳܢܽܘܬܳܐ: ܒܗܰܘ ܐܰܚܺܝܕ ܩܠܺܝ̈ܕܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ ܒܬܰܘܕܺܝܬܳܐ ܬܪܺܝܨܬܳܐ ܘܠܐ ܙܺܐܦܳܢܳܝܬܳܐ ܒܗܰܘ ܕܰܟܪ̈ܽܘܒܶܐ ܐܰܬܪ̈ܳܢܳܝܶܐ ܥܒܰܕ ܘܡܰܘ̈ܬܶܐ ܣܰܓܺܝ̈ܶܐܐ ܣܒܰܠ ܥܰܠ ܐܰܦܰܝ̈ ܐܶܘܢܓܶܠܝܽܘܢ ܕܺܝܠܳܟ ܒܡܰܠܦܳܢܽܘܬܳܐ ܫܰܪܺܝܪܬܳܐ ܒܰܚܦܺܝܛܽܘܬܳܐ ܣܰܓܺܝܐܬܳܐ ܕܥܰܠ ܡܰܪܥܺܝܬܳܟ ܟܳܗܢܳܝܬܳܐ ܥܒܰܕ: ܟܰܕ ܟܽܠܝܽܘܡ ܒܡܰܪ̈ܓܶܐ ܗܰܢܺܝ̈ܶܐܐ ܕܝܽܘܠܦܳܢ̈ܶܐ ܐܶܘܢܓܶܠܳܝ̈ܶܐ ܠܳܗ̇ ܪܥܶܐ ܗܘܳܐ: ܘܫܶܩܝܳܐ ܕܚܰܝ̈ܶܐ ܡ̣ܶܢ ܡܰܒܽܘ̈ܥܶܐ ܥܕܶܢܳܝ̈ܶܐ ܠܳܗ̇ ܡܰܫܩܶܐ ܗܘܳܐ: ܟܰܕ ܠܕܺܐܒ̈ܶܐ ܚܰܒܳ̈ܠܐ ܡܶܢܳܗ̇ ܟܳܠܐܷ ܗܘܳܐ: ܘܰܠܓܰܢ̈ܳܒܶܐ ܨܢܺܝ̈ܥܶܐ ܡ̣ܶܢ ܨܶܝܕܶܝܗ̇ ܛܳܪܶܕ ܗܘܳܐ: ܫܽܘܪ̈ܶܐ ܚܰܣܺܝ̈ܢܶܐ ܕܰܨܠܽܘܬܳܐ ܠܳܗ̇ ܡܰܟܪܶܟ ܗܘܳܐ: ܘܒܳܥ̈ܘܳܬܳܐ ܬܟܺܝ̈ܒܳܬܳܐ ܐܰܡܺܝܢܳܐܝ̣ܬ ܚܠܳܦܶܝܗ̇ ܡܩܰܪܶܒ ܗܘܳܐ: ܘܰܫܒܺܝ̈ܠܐ ܡܰܠܝ̈ܰܝ ܚܰܝ̈ܶܐ ܩܕܳܡܶܝܗ̇ ܬܳܪܶܨ ܗܘܳܐ: ܘܰܠܟܽܘ̈ܒܶܐ ܘܙܺܝ̈ܙܳܢܶܐ ܡ̣ܶܢ ܚܰܩ̈ܠܳܬܳܗ̇ ܡܕܰܟܶܐ ܗܘܳܐ ܘܥܰܠ ܣܳܚܪ̈ܳܬܳܗ̇ ܠܰܝ̈ܠܰܝ ܐܺܝܡܳܡ ܡܶܬܟܪܶܟ ܗܘܳܐ: ܘܡ̣ܶܢ ܓܰܝ̈ܳܣܶܐ ܡܚܰܒ̈ܠܰܝ ܢܰܦ̈ܫܳܬܳܐ ܠܳܗ̇ ܢܳܛܰܪ ܗܘܳܐ: ܟܰܕ ܟܽܠܝܽܘܡ ܚܠܳܦܶܝܗ̇ ܡܰܘܬܳܐ ܣܳܒܶܠ ܗܘܳܐ: ܘܡܶܛܽܠܗܳܕܶܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܒܝܰܕ ܨܠܰܘ̈ܳܬܶܗ ܕܟܳܪܽܘܙܳܟ: ܕܬܶܦܢܶܐ ܠܰܢ ܡ̣ܶܢ ܛܳܥܝܽܘܬܳܐ ܠܐܘܪܚܳܐ ܕܰܫܪܳܪܳܐ: ܘܰܬܫܰܘܙܶܒ ܠܰܢ ܡ̣ܶܢ ܟܽܠ ܢܶܣܝܽܘ̈ܢܶܐ ܥܰܣ̈ܩܶܐ ܘܫܰܒ̈ܛܶܐ ܕܪܽܘܓܙܳܐ: ܟܰܕ ܠܥܺܕ̈ܬܳܐܳ ܘܕܰܝܪ̈ܳܬܳܐ ܡ̣ܶܢ ܩܰܘ̈ܡܶܐ ܣܰܩܽܘܒ̈ܠܳܝܶܐ ܕܶܐܪ̈ܶܣܺܝܣ ܚܰܒ̈ܳܠܳܬܳܐ ܡܢܰܛܰܪ ܐܰܢ̱ܬ: ܐܳܦ ܠܪ̈ܳܥܰܘܳܬܳܐ ܠܘܳܬ ܗ̇ܳܝ ܕܰܐܝܟ ܨܶܒܝܳܢܳܟ ܢܕܰܒܪܽܘܢ ܗܶܢܽܘܢ ܠܗܽܘܢ ܘܰܠܡܰܪ̈ܥܝܳܬܗܽܘܢ ܡܰܝܬܶܐ ܐܰܢ̱ܬ: ܠܟܳܗ̈ܢܶܐ ܟܺܝܬ ܘܰܡܫܰܡ̈ܫܳܢܶܐ ܘܰܠܟܽܠܶܗ ܩܠܺܝܪܽܘܣ ܟܳܗܢܳܝܳܐ ܡܙܰܗܶܐ ܐܰܢ̱ܬ: ܠܡܰܠܟ̈ܶܐ ܘܕܰܝ̈ܳܢܶܐ ܘܪ̈ܺܝܫܳܢܶܐ ܕܥܰܡܳܟ ܚܰܝܽܘܣܬܳܢܽܘܬܳܐ ܕܥܰܠ ܥܰܡܳܟ ܡܳܠܐܷ ܐܰܢ̱ܬ: ܘܰܠܟܽܠܗܽܘܢ ܡܗܰܝ̈ܡܢܶܐ ܫܰܪܺܝܪ̈ܶܐ ܡ̣ܶܢ ܬܽܘܩ̈ܠܳܬܳܐ ܕܰܚܛܳܗ̈ܶܐ ܡܫܰܘܙܶܒ ܐܰܢ̱ܬ: ܘܠܐܪܒܰܥ ܦܶܢ̈ܝܳܬܳܐ ܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܡܨܰܒܶܬ ܐܰܢ̱ܬ: ܘܰܠܟܽܠܳܗ̇ ܒܪܺܝܬܳܐ ܕܺܝܠܳܟ ܕܶܝܢ ܒܪ̈ܰܚܡܶܐ ܣܳܥܰܪ ܐܰܢ̱ܬ: ܘܰܠܟܽܠ ܐ̱ܢܳܫ ܗ̇ܳܝ ܕܥܳܕܪܳܐ ܘܦܳܩܚܳܐ ܡܫܰܟܶܢܶ ܐܰܢ̱ܬ: ܘܠܰܟܠܺܝܠܐ ܕܫܰܢ̱ܬܳܐ ܒܽܘܪ̈ܟܳܬܳܐ ܡܳܠܐܷ ܐܰܢ̱ܬ: ܘܡ̣ܶܢ ܣܰܩܽܘܒ̈ܠܳܝܳܬܳܐ ܠܡܰܘ̈ܥܳܝܳܬܳܐ ܕܺܝܠܳܗ̇ ܡܦܰܨܶܐ ܐܰܢ̱ܬ: ܠܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܳܐ ܘܒܽܘܣܳܡܳܐ ܗܰܢܺܝܳܐܐ ܒܰܓܢܽܘܢܳܟ ܡܫܰܟܶܢ ܐܰܢ̱ܬ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܢܶܒܣܰܡ ܠܳܟ ܡܳܪܝ ܥܶܛܪܳܐ ܕܰܨܠܰܘ̈ܳܬܰܢ ܐܰܝܟ ܒܰܣܺܝܡܽܘܬ ܪܺܝܚܳܐ ܕܰܨܠܰܘ̈ܳܬܶܗ ܕܰܐܒܽܘܢ ܓܰܒܝܳܐ ܡܳܪܝ ܝܰܥܩܽܘܒ: ܘܩ̈ܳܠܐ ܕܒܳܥ̈ܘܳܬܰܢ ܡܚܺܝ̈ܠܳܬܳܐ ܐܰܝܟ ܩ̈ܳܠܐ ܗܰܢܺܝ̈ܶܐܐ ܕܒܳܥ̈ܘܳܬܶܗ: ܘܕܶܒ̈ܚܶܐ ܕܬܰܘܕܺܝܬܰܢ ܐܰܝܟ ܕܶܒ̈ܚܶܐ ܡܩܰܒ̈ܠܐ ܕܬܰܘܕ̈ܝܳܬܶܗ: ܘܬܶܫܡ̈ܫܳܬܰܢ ܘܒܳܥ̈ܘܳܬܰܢ ܘܕܽܘܒܳܪ̈ܰܝܢ ܢܶܬܩܰܕܫܽܘܢ ܒܩܰܕܺܝܫܽܘܬܳܐ ܘܕܰܟܝܽܘܬܳܐ ܕܥܰܡܠܰܘ̈ܗܝ: ܘܢܶܬܢܰܛܪܽܘܢ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܡ̣ܶܢ ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܐܰܝܟܰܢܳܐ ܕܟܽܠܰܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܩܰܕܺܝܫܳܐ ܡܳܪܝ ܝܰܥܩܽܘܒ ܡܰܠܦܳܢܳܐ ܡ̣ܶܢ ܓܰܘ ܟܰܪܣܳܐ ܐܰܝܟ ܐܶܪܰܡܝܳܐ: ܐܳܦ ܥܰܒܕܶܗ ܡܳܐܢܳܐ ܓܰܒܝܳܐ ܕܫܳܦܰܪ ܠܐܝܩܳܪܶܗ ܕܰܟܝܳܐܝ̣ܬ ܘܩܰܕܺܝܫܳܐܝ̣ܬ: ܠܗܰܘ ܕܚܰܝܠܶܗ ܘܢܰܨܚܶܗ ܒܰܐܓܽܘܢܳܐ ܕܠܽܘܩܒܰܠ ܐܳܟܶܠܩܰܪܨܳܐ ܓܰܢ̱ܒܳܪܳܐ ܘܰܐܒܗܶܬ ܠܒܺܝܫܳܐ ܘܰܠܚܰܝܠܶܗ ܡܰܚܦܪܳܢܳܐܝ̣ܬ: ܠܗܰܘ ܕܝܰܩܰܪ ܕܽܘܟܪܳܢ ܚܰܣܝܶܗ ܘܰܐܘܪܶܒ ܥܺܐܕܶܗ ܒܰܫܡܰܝܳܐ ܘܒܰܐܪܥܳܐ ܢܰܨܺܝܚܳܐܝ̣ܬ: ܘܥܰܒܕܶܗ ܣܶܬܳܪܳܐ ܘܒܶܝܬ ܓܰܘܣܳܐ ܠܐܝܠܶܝܢ ܕܡܶܬܓܰܘܣܺܝܢ ܒܰܨܠܰܘ̈ܳܬܶܗ ܐܰܡܺܝܢܳܐܝ̣ܬ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܠܩܰܕܺܝܫܳܐ ܕܺܝܠܳܟ ܡܢܰܨܰܚ ܐܰܢ̱ܬ ܘܰܡܗܰܕܰܪ ܐܰܢ̱ܬ ܒܟܽܠ ܕܳܪ ܩܰܕܺܝܫܳܐܝ̣ܬ: ܘܡ̣ܶܢ ܥܺܕܬܳܐ ܕܰܡܝܰܩܪܳܐ ܠܥܺܐܕܰܝ̈ܗܽܘܢ ܡܶܫܬܰܒܰܚ ܐܰܢ̱ܬ ܕܚܺܝܠܐܴܝ̣ܬ: ܗ̇ܰܘ ܕܠܐܒܳܐ ܩܰܕܺܝܫܳܐ ܡܳܪܝ ܝܰܥܩܽܘܒ ܡܰܠܦܳܢܳܐ ܗ̇ܰܘ ܕܰܩܕܳܡܰܝܟ ܐܶܬܢܰܨܰܚ ܐܰܬܠܺܝܛܳܐܝ̣ܬ: ܝܰܩܰܪܬ ܕܽܘܟܪܳܢܶܗ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܫܰܪܺܝܪܳܐܝ̣ܬ: ܗܳܢܳܐ ܕܡܶܢܰܢ ܡܚܺܝ̈ܠܐ ܘܚܰܛܳܝ̈ܶܐ ܡܶܬܩܰܠܰܣ ܗܕܺܝܪܳܐ̣ܝܬ: ܘܰܐܝܟ ܡܳܐܢܳܐ ܓܰܒܝܳܐ ܡܶܬܢܰܨܰܚ ܢܰܨܺܝܚܳܐܝܬ: ܗܳܢܳܐ ܕܰܐܝܟ ܫܶܡܫܳܐ ܗܕܺܝܪܳܐ ܢܳܨܚܺܝܢ ܕܽܘܒܳܪ̈ܰܘܗܝ ܐܠܰܗܳܐܝ̣ܬ: ܘܰܐܝܟ ܪܰܒܒܰܝܬܳܐ ܚܰܟܺܝܡܳܐ ܡܝܰܬܪܺܝܢ ܟܽܠܗܽܘܢ ܣܽܘܥܪ̈ܳܢܰܘܗܝ ܚܰܟܺܝܡܳܐܝ̣ܬ ܗܳܢܳܐ ܕܡ̣ܶܢ ܨܰܦܪܳܐ ܥܰܠ ܠܶܗ ܠܟܰܪܡܳܐ ܘܰܦܠܰܚ ܒܶܗ ܟܰܫܺܝܪܳܐܝ̣ܬ: ܗܳܢܳܐ ܕܰܪܚܶܡ ܥܳܢܘܳܝܽܘܬܳܐ ܘܰܐܚܶܒ ܢܙܺܝܪܽܘܬܳܐ ܡܫܰܡܠܝܳܐܝ̣ܬ: ܘܝܰܩܰܪ ܒܬܽܘܠܽܘܬܳܐ ܘܫܰܡܶܫ ܙܰܗܝܳܐܝ̣ܬ ܘܰܓܡܺܝܪܳܐܝ̣ܬ ܗܳܢܳܐ ܕܰܙܩܰܦ ܗ̣ܽܘ ܠܶܗ ܠܥܳܠܡܳܐ ܘܠܳܟ ܚܝܳܐ ܫܰܪܺܝܪܳܐܝ̣ܬ ܘܰܫܩܰܠ ܥܠܰܘܗܝ ܠܢܺܝܪܳܐ ܕܺܝܠܳܟ ܟܽܠܳܢܳܐܝ̣ܬ: ܗܳܢܳܐ ܕܰܒܢܳܡܽܘ̈ܣܰܝܟ ܐܠܰܗܳܝ̈ܶܐ ܐܶܬܗܰܓܺܝ ܐܺܝܡܳܡܳܐ ܘܠܺܠܝܳܐ ܢܰܗܺܝܪܳܐܝ̣ܬ: ܗܳܢܳܐ ܕܰܒܩܰܘ̈ܡܶܐ ܡܬܺܝ̈ܚܶܐ ܘܫܰܗܪ̈ܶܐ ܕܠܰܝܠܰܘ̈ܳܬܳܐ ܒܟܽܠܶܗ ܡܶܬܚܳܐ ܕܚܰܝܰܘ̈ܗܝ ܡܰܠܺܝ ܢܳܡܽܘܣܳܐܝ̣ܬ: ܗܳܢܳܐ ܕܰܗܘܳܐ ܐܰܒܺܝܠܐ ܥܰܠ ܣܰܒܪܳܟ ܘܰܪܕܺܝܦܳܐ ܡܶܛܽܠ ܫܡܳܟ ܫܚܺܝܩܳܐܝ̣ܬ: ܗܳܢܳܐ ܕܟܰܕ ܒܰܨܠܰܘ̈ܳܬܶܗ ܡܶܬܓܰܘܣܺܝܢܰܢ ܘܰܒܒܳܥ̈ܘܳܬܶܗ ܡܶܣܬܰܬܪܺܝܢܰܢ ܟܚܺܝܕܳܐܝ̣ܬ: ܘܰܠܘܳܬܶܗ ܡܰܙܥܩܺܝܢܰܢ ܘܳܐܡܪܺܝܢܰܢ ܚܦܺܝܛܳܐܝ̣ܬ: ܬܳܐ ܒܰܫܠܳܡܳܐ ܐܰܒܳܐ ܒܪܺܝܟܳܐ ܡܳܪܝ ܝܰܥܩܽܘܒ ܡܰܠܦܳܢܳܐ ܘܢܳܛܽܘܪܳܐ ܕܦܽܘܩ̈ܕܳܢܶܐ ܐܠܰܗܳܝ̈ܶܐ ܩܰܕܺܝܫܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܒܬܽܘܠܐ ܕܠܐ ܐܶܬܟܰܬܰܡ ܒܰܪ̈ܓܺܝܓܳܬܳܐ ܕܒܶܣܪܳܐ ܦܰܓܪܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܡܰܠܦܳܢܳܐ ܓܡܺܝܪܳܐ ܕܚܰܝܶܒ ܠܐܪ̈ܶܣܺܝܣ ܕܰܓ̈ܳܠܳܬܳܐ ܓܰܠܝܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܕܳܫܢܳܐ ܪܰܒܳܐ ܕܶܐܬܺܝܗܶܒ ܠܥܺܕܬܳܐ ܩܰܕܺܝܫܬܳܐ ܪܽܘܚܳܢܳܐܝܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܗܡܰܝܪܳܐ ܕܬܰܪܥܽܘܬܳܐ ܕܥܽܘܬܪ̈ܶܐ ܫܡܰܝ̈ܳܢܶܐ ܢܳܣܶܟ ܐܰܢ̱ܬ ܫܦܺܝܥܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܘܰܥܕܳܐ ܘܰܐܘܳܢܳܐ ܕܩܰܕܺܝܫܽܘܬܳܐ ܙܰܗܝܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܙܺܝܘܳܐ ܘܗܶܕܪܳܐ ܕܡܰܠܦܳܢ̈ܶܐ ܬܡܺܝܗܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܚܕܽܘܓܳܐ ܕܟܰܠܬܳܐ ܦܨܺܝܚܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܕܰܛܪܰܕܬ ܡ̣ܶܢ ܥܺܕܬܳܐ ܠܐܪ̈ܶܣܺܝܣ ܡܚܰܒ̈ܠܳܬܳܐ ܡܙܰܡܛܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܝܰܪܕܳܐ ܕܰܐܫܦܰܥ ܠܰܢ ܡܺܐܡܪ̈ܶܐ ܘܡܰܕܪ̈ܳܫܶܐ ܘܝܽܘܠܦܳܢ̈ܶܐ ܐܠܰܗܳܝ̈ܶܐ ܐܳܪܳܡܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܟܠܺܝܠܐ ܕܰܡܠܐܷ ܫܽܘܦܪ̈ܶܐ ܡܰܦܪܓܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܠܰܡܦܺܐܕܳܐ ܕܢܰܗܺܝܪܽܘܬܳܐ ܣܕܺܝܪܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܡܢܰܨܚܳܢܳܗ̇ ܕܥܺܕܬܳܐ ܩܰܕܺܝܫܬܳܐ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܢܽܘܗܪܳܐ ܡܰܢܗܪܳܢܳܐ ܠܝܳܬܒ̈ܰܝ ܒܚܶܫܽܘܟܳܐ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܣܳܬܽܘܪܳܐ ܘܰܡܛܰܠܩܳܢܳܐ ܕܚܰܢܦܽܘܬܳܐ ܠܐ ܡܶܙܕܰܟܝܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܥܳܕܽܘܪܳܐ ܘܡܰܝܬܝܳܢܳܐ ܕܛܳܒ̈ܳܬܳܐ ܠܰܕܒܶܝܬ ܐܳܕܳܡ ܥܰܬܺܝܪܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܦܺܝܪܡܳܐ ܕܬܰܪܥܽܘܬܳܐ ܕܪܺܝܚܶܗ ܒܰܣܶܡ ܠܡܳܪܶܗ ܘܶܐܬܪܰܥܺܝ ܥܰܡܰܢ ܡܫܰܝܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܨܶܒܬܳܐ ܕܳܐܪܬܳܕܽܘܟܣܽܘ ܨܰܡܽܘܚܬܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܩܶܦܰܠܐܘܢ ܕܥܳܢܘܳܝܽܘܬܳܐ ܢܰܨܺܝܚܳܐܝܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܪܺܝܫܳܐ ܘܗܶܕܪܳܐ ܕܟܽܠܳܗ̇ ܣܽܘܪܝܳܝܽܘܬܳܐ ܡܰܠܦܳܢܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܫܽܘܒܗܳܪܳܐ ܕܟܽܠܳܗ̇ ܬܺܒܶܝܠ ܒܚܺܝܪܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܬܳܓܳܐ ܡܰܕܗܒܳܐ ܕܰܒܪܺܝܫ ܥܺܕܬܳܐ ܣܺܝܡ ܩܒܺܝܥܳܐܝ̣ܬ: ܬܳܐ ܒܰܫܠܳܡܳܐ ܡܳܪܝ ܝܰܥܩܽܘܒ ܕܰܗܘܳܐ ܡܰܘܬܳܟ ܡܝܰܩܪܳܐ ܫܢܰܬ݀ ܬܡܳܢܶܡܳܐܐ ܘܰܬܠܳܬܺܝܢ ܘܬܰܪܬܶܝܢ ܕܝܰܘ̈ܢܳܝܶܐ ܡܫܰܢܝܳܢܳܐܝ̣ܬ ܡܶܛܽܠ ܗܳܕܶܐ ܚܢܰܢ ܡܗܰܝ̈ܡܢܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܕܰܠܕܽܘܟܪܳܢܳܟ ܒܬܶܫܒ̈ܚܳܬܳܐ ܡܝܰܩܪܺܝܢܰܢ ܚܰܒܺܝܒܳܐܝ̣ܬ: ܐܰܝܟܰܢܳܐ ܕܰܒܝܰܕ ܨܠܰܘ̈ܳܬܳܟ ܢܶܣܬܰܬܰܪ ܚܠܺܝܡܳܐܝ̣ܬ ܘܰܒܝܰܕ ܒܳܥ̈ܘܳܬܳܟ ܢܶܬܦܰܨܶܐ ܡ̣ܶܢ ܢܶܣܝܽܘ̈ܢܶܐ ܘܡܰܚܘ̈ܳܬܳܐ ܠܐ ܡܶܬܢܰܟܝܳܢܳܐܝ̣ܬ: ܘܰܒܝܰܕ ܬܰܟܫ̈ܦܳܬܳܟ ܢܶܬܢܛܰܪ ܡ̣ܶܢ ܒܥܶܠܕ̈ܒܳܒܰܝܢ ܐܰܡܺܝܢܳܐܝ̣ܬ: ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܠܘܳܬ ܡܳܪܳܟ ܒܺܐܝܙܓܰܕܽܘܬܳܟ ܪܰܚܡܳܢܳܐܝ̣ܬ: ܘܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܨܠܰܘ̈ܳܬܳܟ ܡܚܰܠܠܳܢܳܐܝ̣ܬ: ܘܢܶܫܬܰܒܩܽܘܢ ܒܽܘܨܳܪ̈ܰܝܢ ܘܡܶܬܥܰܒܪ̈ܳܢܘܳܬܰܢ ܟܽܠܳܢܳܐܝ̣ܬ: ܘܢܺܐܬܽܘܢ ܥܠܰܝܢ ܪ̈ܰܚܡܰܘܗܝ ܕܡܳܪܳܟ ܫܦܺܝܥܳܐܝ̣ܬ: ܘܢܶܬܕܰܟܪܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܩܕܳܡ ܟܽܘܪܣܝܳܐ ܕܺܐܝܩܳܪܶܗ ܡܰܥܗܕܳܢܳܐܝ̣ܬ: ܘܢܶܬܬܢܺܝ̈ܚܳܢ ܪ̈ܽܘܚܳܬܗܽܘܢ ܒܰܐܘ̈ܳܢܶܐ ܕܡܰܠܟܽܘܬܳܐ ܒܰܣܺܝܡܳܐܝ̣ܬ: ܘܢܶܩܪܶܐ ܘܰܢܩܺܝܡ ܐܶܢܽܘܢ ܡ̣ܶܢ ܝܰܡܺܝܢܶܗ ܒܡܶܐܬܺܝܬܶܗ ܕܬܰܪܬܶܝܢ ܦܨܺܝܚܳܐܝ̣ܬ: ܘܰܚܢܰܢ ܘܗܶܢܽܘܢ ܢܶܦܓܰܥ ܒܳܟ ܩܰܕܺܝܫܳܐܝ̣ܬ: ܟܰܕ ܕܳܠܩܺܝܢ ܩܶܪ̈ܝܽܘܢܰܝܢ ܒܡܶܫܚܳܐ ܕܙܰܕܺܝܩܽܘܬܳܐ ܢܰܨܺܝܚܳܐܝ̣ܬ: ܘܥܰܡܳܟ ܘܥܰܡ ܟܽܠܗܽܘܢ ܩܰܕܺܝ̈ܫܶܐ ܕܰܫܦܰܪܘ ܠܡܳܪܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܰܫܘܳܐ ܠܢ ܡܳܪܝܳܐ ܐܠܰܗܳܐ ܕܢܶܚܕܶܐ ܘܢܶܪܘܰܙ ܘܰܢܕܽܘܨ ܒܕܽܘܟܪܳܢܶܗ ܕܰܐܒܳܐ ܒܪܺܝܟܳܐ ܡܳܪܝ ܝܰܥܩܽܘܒ ܘܢܶܣܰܒ ܥܽܘܕܪ̈ܳܢܶܐ ܠܟܺܐܒܰܝ̈ܢ ܒܰܨܠܰܘ̈ܳܬܶܗ ܘܢܶܫܬܘܶܐ ܠܫܽܘܒܩܳܢܳܐ ܕܰܚܛܳܗ̈ܶܐ ܒܒܳܥ̈ܘܳܬܶܗ ܘܗܰܒ ܠܰܢ ܕܢܶܫܗܰܪ ܩܕܳܡܰܝܟ ܒܕܽܘܟܪܳܢܶܗ ܕܰܐܒܽܘܢ ܓܰܒܝܳܐ ܡܳܪܝ ܝܰܥܩܽܘܒ ܡܰܠܦܳܢܳܐ ܫܰܪܺܝܪܳܐ ܘܒܰܨܠܰܘ̈ܳܬܶܗ ܢܶܬܦܰܢ̈ܝܳܢ ܫ̈ܶܐܠܳܬܳܐ ܕܟܽܠܰܢ ܡܫܰܡܠܝܳܐܝ̣ܬ ܘܒܰܨܠܰܘ̈ܳܬܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܝܳܗܽܘܒܳܐ ܕܚܶܟܡܬܳܐ ܫܰܪܺܝܪܬܳܐ ܘܰܡܦܰܠܓܳܢܳܐ ܕܫܽܘ̈ܟܳܢܶܐ ܐܠܰܗܳܝ̈ܶܐ ܠܐܝܠܶܝܢ ܕܫܳܘܶܝܢ ܠܗܽܘܢ: ܕܫܰܟܶܢ ܘܝܰܗܒ ܡܰܘܗܰܒܬܳܐ ܕܡܰܠܦܳܢܽܘܬܳܐ ܠܢܰܨܺܝܚ ܒܰܓܒܰܝ̈ܳܐ ܘܪܳܡ ܒܰܚܣܰܝ̈ܳܐ ܘܰܪܗܺܝܛܪܳܐ ܪܽܘܚܳܢܳܝܳܐ ܘܡܰܠܦܳܢܳܐ ܬܺܒܶܝܠܳܝܳܐ ܩܰܕܺܝܫܳܐ ܡܳܪܝ ܝܰܥܩܽܘܒ: ܠܗܰܘ ܕܰܐܥܬܪܳܗ̇ ܠܥܺܕܬܳܐ ܩܰܕܺܝܫܬܳܐ ܒܣܺܝܡܬܳܐ ܕܡܶܠܰܘ̈ܗܝ ܚܰܠܝ̈ܳܬܳܐ: ܠܗܰܘ ܕܨܰܒܬܶܗ ܒܟܽܠ ܫܽܘܦܪ̈ܺܝܢ ܕܦܽܘ̈ܫܳܩܰܝ ܣܬܺܝܪ̈ܳܬܳܐ ܘܰܓܢܺܝ̈ܙܳܬܳܐ ܕܒܰܟ̈ܬܳܒܶܐ ܡܰܠܝ̈ܰܝ ܡ̣ܶܢ ܪܽܘܚܳܐ ܩܰܕܺܝܫܳܐ: ܠܗܰܘ ܕܚܰܕܺܝ ܠܟܶܢܫܰܢ ܒܢܶܥ̈ܡܳܬܳܐ ܫܒܺܝ̈ܚܳܬܳܐ ܕܳܐܦ ܒܗܶܝܢ ܠܶܗ ܢܩܰܠܶܣ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܐܳܦ ܒܠܶܥ̈ܙܶܐ ܪ̈ܽܘܚܳܢܳܝܶܐ ܠܝܰܘܡܳܐ ܕܕܽܘܟܪܳܢܶܗ ܕܡܳܪܝ ܝܰܥܩܽܘܒ ܡܰܠܦܳܢܳܐ ܡܥܰܕܥܕܺܝܢܰܢ: ܐܳܦ ܒܰܒ̈ܢܳܬ ܩ̈ܳܠܐ ܕܬܶܫܒ̈ܚܳܬܳܐ ܡ̣ܶܢ ܡܶܠܰܘ̈ܗܝ ܟܠܺܝܠ ܩܽܘܠܳܣ̈ܶܐ ܠܰܫܟܺܝܢܬܳܐ ܐܠܰܗܳܝܬܳܐ ܕܓܰܪ̈ܡܰܘܗܝ ܡܩܰܪܒܺܝܢܰܢ ܗܳܢܳܐ ܕܡ̣ܶܢ ܪܺܝܫܺܝܬܶܗ ܕܥܳܠܡܳܐ ܫܰܪܺܝ ܗܘܳܐ ܢܩܰܠܶܣ ܠܟܽܠܗܽܘܢ ܐܰܝܠܶܝܢ ܕܥܰܠܘ ܠܶܗ ܠܥܳܠܡܳܐ ܒܙܰܕܺܝܩܽܘܬܳܐ ܘܣܳܡ ܠܗܽܘܢ ܟܠܺܝ̈ܠܐ ܗܕܺܝܪ̈ܶܐ ܕܛܳܒ ܥܰܬܺܝܪܺܝܢ ܒܕܶܚܠܰܬ ܐܠܰܗܳܐ: ܘܚܰܬܰܪ ܘܟܰܢܶܟ ܐܶܢܽܘܢ ܒܙܽܘ̈ܝܳܚܶܐ ܕܫܳܘܶܝܢ ܗܘܰܘ ܥܰܡܠܰܝ̈ܗܽܘܢ ܬܗܺܝܪ̈ܶܐ: ܗܳܢܳܐ ܕܟܰܐܰܪ ܘܓܰܢܺܝ ܠܟܽܠܗܽܘܢ ܪ̈ܦܰܝܳܐ ܘܰܚܒܰܢܳܢ̈ܶܐ ܡ̣ܶܢ ܩܳܐܷܝܢ ܩܳܛܽܘܠܐ: ܘܒܺܐܝܕܳܐ ܒܺܐܝܕܳܐ ܠܟܽܠܗܽܘܢ ܐܰܝܠܶܝܢ ܕܕܳܡܶܝܢ ܠܶܗ: ܗܳܢܳܐ ܕܩܰܠܶܣ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܥܰܠܘ ܠܶܗ ܠܥܳܠܡܳܐ: ܘܰܠܟܽܠ ܚܰܕ ܣܳܡ ܠܶܗ ܟܠܺܝܠܐ ܕܫܳܘܶܐ ܠܥܰܡ̈ܠܰܘܗܝ ܐܠܰܗܳܝ̈ܶܐ: ܗܳܢܳܐ ܕܛܳܒ ܡ̣ܶܢ ܟܽܠܗܽܘܢ ܟܺܐܢ̈ܶܐ ܓܰܠܺܝ ܒܥܳܠܡܳܐ ܠܕܽܘܒܳܪ̈ܰܝܗܽܘܢ ܟܰܕ ܡ̣ܶܢ ܙܰܒܢܳܐ ܕܰܩܕܳܡܰܘܗܝ ܒܫܶܬܩܳܐ ܪܡܶܝܢ ܗܘܰܘ ܘܰܛܫܶܝܢ ܘܰܐܝܟ ܕܥܰܠ ܡܢܳܪܬܳܐ ܥܰܠ ܒܺܝ̈ܡܰܛܰܐܣ̈ ܕܥܺܕ̈ܳܬܳܐ ܘܕܰܝܪ̈ܳܬܳܐ ܐܰܟܪܶܙ ܘܰܓܠܐ ܕܽܘܒܳܪ̈ܰܝܗܽܘܢ ܫܒܺܝ̈ܚܶܐ: ܘܡ̣ܶܢ ܟܽܠܗܽܘܢ ܝܰܠܕܶܝ̈ܗ̇ ܡܗܰܝ̈ܡܢܶܐ ܡܶܙܕܰܡܰܪ ܩܽܘܠܳܣܶܗ ܒܟܽܠ ܥܰܡ̈ܡܺܝܢ ܘܠܶܫܳܢܺܝ̈ܢ: ܘܟܰܕ ܐܶܫܬܰܘܕܰܥܘ ܒܗܳܕܶܐ ܡܶܢܟܽܠ ܦܶܢ̈ܝܳܢ ܪܗܶܛܘ ܘܶܐܬܓܰܘܰܣܘ ܒܓܰܪ̈ܡܰܘܗܝ ܕܢܶܣܒܽܘܢ ܡܶܢܶܗ ܥܽܘܕܪ̈ܳܢܶܐ: ܗܳܢܳܐ ܕܰܥܒܰܪ ܒܙܰܒܢܶܗ ܠܟܽܠܗܽܘܢ ܒܢ̈ܰܝ ܕܳܪܶܗ: ܗܳܢܳܐ ܕܢܰܨܰܚ ܠܣܳܗ̈ܕܶܐ ܘܗܰܕܰܪ ܛܶܒܳܐ ܛܳܒܳܐ ܕܢܶܨܚܳܢܰܝ̈ܗܽܘܢ ܒܟܽܠܳܗ̇ ܬܺܒܶܝܠ: ܗܳܢܳܐ ܕܟܰܠܶܠ ܠܡܰܘ̈ܕܝܳܢܶܐ ܒܩ̈ܳܠܐ ܗܕܺܝܪ̈ܶܐ ܕܫܳܘܝܳܐ ܗܘܳܬ݀ ܠܐܬܠܺܝܛܽܘܬܗܽܘܢ ܪܕܺܝܦܬܳܐ: ܗܳܢܳܐ ܕܰܕܪܰܫ ܐܽܘܪܚܳܐ ܕܡܰܠܝܳܐ ܠܽܘܒܳܒܳܐ ܠܬܶܓܡܳܐ ܟܽܠܶܗ ܕܚܰܛܳܝ̈ܶܐ ܘܚܰܘܺܝ ܠܗܽܘܢ ܕܗܶܢܽܘܢ ܒܳܪܶܝܢ ܠܢܰܦܫܗܽܘܢ ܕܠܰܝܬܶܝܗ̇ ܨܶܝܕ ܐܠܰܗܳܐ: ܗܳܢܳܐ ܕܚܰܘܺܝ ܠܥܳܠܡܳܐ ܡܶܠܬܳܐ ܡܚܰܓܝܳܢܺܝܬܳܐ ܕܓܳܠܝܳܐ ܠܶܗ ܥܰܠ ܡܶܬܒܰܪܢܫܳܢܽܘܬܳܐ ܐܠܰܗܳܝܬܳܐ ܕܡܶܠܬܳܐ ܐܠܰܗܳܐ: ܘܩܰܠܶܣ ܘܚܰܓܺܝ ܠܟܽܠܗܽܘܢ ܥܺܐܕ̈ܶܐ ܡܳܪ̈ܳܢܳܝܶܐ ܕܰܡܕܰܒܪܳܢܽܘܬܳܐ ܐܠܰܗܳܝܬܳܐ: ܘܰܠܟܽܠ ܚܰܕ ܚܰܕ ܡܶܢܗܽܘܢ ܒܡܺܐܡܪ̈ܶܐ ܥܰܡ ܡܰܕܪ̈ܳܫܶܐ ܐܳܦ ܬܽܘܪ̈ܓܳܡܶܐ ܐܠܰܗܳܝ̈ܶܐ ܠܟܽܠܗܽܘܢ ܣܰܩܶܡ ܘܣܳܡ: ܘܟܰܕ ܒܰܒ̈ܢܳܬ ܩ̈ܳܠܐ ܪ̈ܳܡܳܬܳܐ ܒܟܽܠ ܫܢܳܐ ܒܰܫܢܳܐ ܗܳܐ ܡܶܬܩܰܠܣܺܝܢ: ܘܚܳܕܶܝܢ ܐܳܦ ܪܳܘܙܺܝܢ ܩܳܪ̈ܽܘܝܶܐ ܘܳܐܡܽܘܪ̈ܶܐ ܘܳܐܦ ܫܰܗܳܪ̈ܶܐ: ܗܳܢܳܐ ܬܗܺܝܪܳܐ ܘܢܰܨܺܝܚܳܐ ܕܟܰܕ ܡܺܐܡܪܳܐ ܕܥܰܠ ܡܰܪܟܰܒܬܳܐ ܡܰܒܰܥ ܗܘܳܐ: ܐܶܬܚܰܘܺܝ ܠܶܗ ܒܪܽܘܚ ܥܰܠ ܓܰܝܳܣܳܐ ܘܥܰܠ ܚܽܘܪܒܳܗ̇ ܕܳܐܡܺܝܕ ܘܝܰܩܕܳܢܳܐ ܕܥܺܕܬܳܐ ܕܒܳܗ̇: ܗܳܢܳܐ ܕܩܳܡܘ ܥܠܰܘܗܝ ܟܽܠܗܽܘܢ ܐܰܝܠܶܝܢ ܕܚܰܕܪܽܘܗܝ ܟܰܕ ܐܳܡܪܺܝܢ: ܕܰܫܢܰܝܬ ܠܳܟ ܐܳܘ ܣܪܽܘܓܳܝܳܐ ܕܡ̣ܶܢ ܫܰܪܒܳܐ ܠܫܰܪܒܳܐ ܗܳܐ ܫܰܪܺܝܟ ܐܰܢ̱ܬ: ܘܰܟܬܰܒܘ ܘܰܐܘܕܰܥܘ ܕܒܰܐܝܢܳܐ ܥܶܕܳܢܳܐ ܘܒܰܐܝܢܳܐ ܝܰܘܡܳܐ ܗܘܳܬ݀ ܠܳܗ̇ ܬܶܕܡܽܘܪܬܳܐ ܗܳܕܶܐ: ܗܳܢܳܐ ܕܦܰܪܣܺܝ ܘܰܒܠܰܡ ܠܦܽܘܡܗܽܘܢ ܕܦܺܝܠܺܝ̈ܣܽܘܦܰܝ ܒܡܶܠܬܳܐ ܘܰܒܪ̈ܶܥܝܳܢܶܐ ܬܗܺܝܪ̈ܶܐ ܙܥܽܘܪ̈ܰܝ ܒܡܶܢܝܳܢܳܐ ܩܦܰܣ ܘܣܰܩܶܡ ܗܘܳܐ ܠܰܡܫܽܘܚܬܳܐ ܣܰܓܺܝܐܬܳܐ ܕܒܰܒ̈ܢܳܬ ܩ̈ܳܠܐ ܕܰܟܬܳܒܰܝ̈ܗܽܘܢ ܣܰܦܣܰܪ ܐܳܦ ܪܰܘܪܶܒ: ܘܟܰܕ ܫܰܦܪ ܠܡܳܪܶܗ ܕܢܶܡܠܐܷ ܠܥܳܠܡܳܐ ܡ̣ܶܢ ܝܽܘܠܦܳܢܶܗ ܐܠܰܗܳܝܳܐ: ܗܳܢܳܐ ܕܟܰܕ ܒܟܶܢܦܳܗ̇ ܕܝܳܠܶܕܬܶܗ ܐܺܝܬܰܘܗܝ ܗܘܳܐ ܐܶܬܬܙܺܝܥ ܘܰܪܫܰܦ ܗܘܳܐ ܠܘܳܬ ܩܕܽܘܫܩܽܘܕ̈ܫܺܝܢ ܬܪܰܨ ܡܰܪܕܺܝܬܶܗ ܒܰܝܢܳܬ ܟܶܢ̈ܫܶܐ ܨܪܳܐ ܘܰܥܒܰܪ ܘܰܠܘܳܬ ܦܳܬܽܘܪܳܐ ܕܚܰܝ̈ܶܐ ܣܠܶܩ ܘܡܰܝ̈ܳܐ ܚܰܝ̈ܶܐ ܘܚܶܟܡܬܳܐ ܐܠܰܗܳܝܬܳܐ ܡܬܰܩ ܘܶܐܫܬܺܝ: ܗܳܢܳܐ ܕܟܰܕ ܐܶܣܬܰܥܪܰܬ݀ ܒܶܗ ܬܶܕܡܽܘܪܬܳܐ ܗܳܕܶܐ ܬܶܗܪܳܐ ܘܕܽܘܡܳܪܳܐ ܐܶܬܡܠܺܝܘ ܟܶܢ̈ܫܶܐ ܕܬܰܡܳܢ: ܘܟܽܠܗܽܘܢ ܡ̣ܶܢ ܚܰܕ ܦܽܘܡ ܬܶܫܒܽܘܚܬܳܐ ܠܐܠܳܗܳܐ ܐܰܣܶܩܘ ܗܘܰܘ: ܗܳܢܳܐ ܕܰܐܫܦܰܥ ܡ̣ܶܢ ܦܽܘܡܶܗ ܪ̈ܶܕܝܶܐ ܥܰܬܺܝܪ̈ܰܝ ܝܽܘܠܦܳܢ̈ܶܐ ܚܠܰܝ̈ܳܐ ܒܡ̈ܶܠܐ ܬܪ̈ܺܝܨܳܬܳܐ: ܕܡ̣ܶܢ ܦܽܘܡܶܗ ܪ̈ܳܕܝܳܢ ܗܘ̈ܰܝ: ܟܰܕ ܫܰܒܥܺܝܢ ܣܳܦܪ̈ܶܐ ܠܐ ܡܶܫܟܚܺܝܢ ܗܘܰܘ ܠܡܰܟܬܳܒܽܘ ܥܠܰܘܗܝ ܐܶܠܐ ܠܟܽܠܗܽܘܢ ܥܳܠܶܒ ܗܘܳܐ ܒܰܪܗܺܝܛܪܽܘܬܳܐ ܕܡܶܠܰܘ̈ܗܝ ܘܦܶܬܓܳܡܰܘ̈ܗܝ ܐܺܝܬܺܝܛܺܝܩܳܐܝ̣ܬ ܘܟܰܕ ܢܚܶܬ ܠܕܰܪܳܐ ܕܥܰܡ ܒܢ̈ܰܝ ܐܶܪ̈ܶܣܺܝܣ ܙܟܳܐ ܘܚܰܝܶܒ ܐܶܢܽܘܢ: ܘܦܰܪܣܺܝ ܠܙܺܐܦܳܐ ܕܰܓܳܠܐ ܕܛܳܥܝܽܘܬܗܽܘܢ ܘܚܰܘܺܝ ܐܶܢܽܘܢ ܕܰܓܳ̈ܠܰܝ ܫܡܳܐ ܒܟܽܠܗܽܘܢ ܝܽܘܠܦܳܢܰܝ̈ܗܽܘܢ: ܗܳܢܳܐ ܕܰܓܒܳܝܗܝ ܡܳܪܶܗ ܠܕܰܪܓܳܐ ܕܶܐܦܣܩܽܘܦܽܘܬܳܐ ܠܗܳܕܶܐ ܐܶܬܪܰܡܪܰܡ: ܟܽܠܳܗ̇ ܥܺܕܬܳܐ ܚܶܕܝܰܬ݀ ܘܪܶܘܙܰܬ݀ ܒܶܗ: ܗܳܢܳܐ ܕܠܐ ܣܳܦܶܩ ܠܶܫܳܢܰܢ ܡܚܺܝܠܐ ܕܰܢܩܰܠܣܺܝܘܗܝ: ܘܟܰܕ ܟܽܠܗܽܘܢ ܦܽܘ̈ܡܶܐ ܘܠܶܫܳܢ̈ܶܐ ܓܳܗܪܺܝܢ ܡ̣ܶܢ ܩܽܘܠܳܣܰܘ̈ܗܝ ܐܠܰܗܳܝ̈ܶܐ: ܒܗܳܝ ܕܗ̣ܽܘ ܩܰܠܶܣ ܠܟܽܠܗܽܘܢ ܫܰܘ̈ܝܰܝ ܠܩܽܘܠܳܣ̈ܶܐ: ܘܪܰܡܪܶܡ ܠܟܽܠܗܽܘܢ ܚܰܫ̈ܶܐ ܡܡܰܟ̈ܟܶܐ ܕܰܐܒܺܝ̈ܠܰܝ ܒܰܫܪܳܪܳܐ: ܡܳܕܶܝܢ ܟܽܠܗܽܘܢ ܦܽܘ̈ܡܶܐ ܘܠܶܫܳܢ̈ܶܐ ܕܰܒܢܰܝ̈ܢܳܫܳܐ ܠܐ ܣܳܦܩܺܝܢ ܠܩܽܘܠܳܣܰܘ̈ܗܝ ܪ̈ܳܡܶܐ ܘܰܐܠܳܗܳܝ̈ܶܐ: ܡܰܠܐܟ̈ܶܐ ܥܰܡܰܢ ܢܩܰܠܣܽܘܢܳܝܗܝ: ܪ̈ܽܘܚܳܢܶܐ ܒܰܝܢܳܬܰܢ ܢܝܰܩܪܽܘܢܳܝܗܝ: ܒܢ̈ܰܝ ܢܽܘܗܪܳܐ ܒܟܶܢܫܰܝ̈ܗܽܘܢ ܢܚܰܓܽܘܢ ܠܶܗ: ܘܰܚܢܰܢ ܘܗܶܢܽܘܢ ܒܰܚܕܳܐ ܫܰܘܝܽܘܬܳܐ ܢܰܙܥܶܩ ܘܢܺܐܡܰܪ: ܬܳܐ ܒܰܫܠܳܡܳܐ ܫܳܘܶܐ ܠܰܫܠܳܡܳܐ ܕܰܫܠܳܡܰܢ ܠܐ ܣܳܦܶܩ ܗܘܳܐ ܠܰܫܠܳܡܳܟ ܕܗ̣ܽܘ ܐܰܪܡܺܝ ܫܠܳܡܳܐ ܒܰܝܢܳܬ ܓܠܺܝ̈ܙܰܝ ܡ̣ܶܢ ܫܠܳܡܳܐ: ܬܳܐ ܒܰܫܠܳܡܳܐ ܡܩܰܠܶܣ ܒܬܽܘܪ̈ܓܳܡܰܘܗܝ ܠܟܽܠܶܗ ܓܰܒܳܐ ܕܰܬܪ̈ܺܝܨܰܝ ܫܽܘܒܚܳܐ ܒܰܬܪܺܝܨܽܘܬ ܡܰܡܠܠܶܗ ܕܰܐܠܳܗܳܐ: ܬܳܐ ܒܰܫܠܳܡܳܐ ܡܢܰܨܰܚ ܒܡܰܕܪ̈ܳܫܰܘܗܝ ܠܟܽܠܗܽܘܢ ܥܺܐܕ̈ܶܐ ܐܠܰܗܳܝ̈ܶܐ: ܘܰܡܥܺܝܪ ܠܫܳܗܪ̈ܶܐ ܒܩ̈ܳܠܐ ܦܬܺܝ̈ܟܶܐ ܘܣܽܘ̈ܟܳܠܐ ܣܰܓܺܝ̈ܰܐܝ ܫܽܘܦܪ̈ܶܐ: ܬܳܐ ܒܰܫܠܳܡܳܐ ܡܗܰܕܰܪ ܠܥܺܕ̈ܳܬܰܢ ܘܰܠܕܰܝܪ̈ܳܬܰܢ ܒܝܽܘܠܦܳܢܰܘ̈ܗܝ ܐܠܰܗܳܝ̈ܶܐ: ܬܳܐ ܒܰܫܠܳܡܳܐ ܡܰܘܕܰܥ ܠܰܢ ܡܕܰܒܪܳܢܽܘܬܶܗ ܕܰܡܫܺܝܚܳܐ ܐܠܰܗܰܢ: ܘܓܳܠܐܷ ܠܰܢ ܟܰܣ̈ܝܳܬܳܐ ܐܰܝܠܶܝܢ ܕܒܰܟ̈ܬܳܒܶܐ ܩܰܕܺܝ̈ܫܶܐ: ܘܡܰܘܕܰܥ ܠܰܢ ܥܬܺܝ̈ܕܳܬܳܐ ܕܗܳܘ̈ܝܳܢ ܠܚܰܪܬܳܐ ܘܫܽܘܠܳܡܳܐ ܒܝܰܕ ܡܺܐܡܪ̈ܰܘܗܝ ܘܬܽܘܪ̈ܓܳܡܰܘܗܝ ܫܒܺܝ̈ܚܶܐ: ܐܰܟܡܳܐ ܕܪܽܘܚܳܐ ܩܰܕܺܝܫܳܐ ܓܠܐܴ ܘܚܰܘܺܝ: ܬܳܐ ܒܰܫܠܳܡܳܐ ܦܬܰܚ ܦܽܘܡܳܐ ܠܟܽܠܳܗ̇ ܣܽܘܪܝܳܝܽܘܬܳܐ: ܐܳܦ ܡܓܰܢ̱ܒܰܪ ܠܥܰܡܰܢ ܥܰܠ ܟܽܠܗܶܝܢ ܒܺܝ̈ܡܰܛܰܐܣ ܐܦܳ ܟܢܽܘܫܝܰܢ ܒܟܽܠܳܗ̇ ܐܰܪܥܳܐ: ܐܶܠܐ ܟܰܕ ܟܽܠܰܢ ܒܝܰܘܡܳܟ ܚܳܕܶܝܢܰܢ ܘܡ̣ܶܢ ܡܳܪܳܟ ܒܺܐܝ̈ܕܰܝܟ ܫܳܐܠܺܝܢܰܢ: ܕܰܢܒܰܛܶܠ ܡ̣ܶܢ ܥܺܕ̈ܳܬܳܐ ܕܺܝܠܰܢ ܘܕܰܝܪ̈ܳܬܰܢ ܟܽܠܗܶܝܢ ܡܥܺܝܩܳܢ̈ܝܳܬܳܐ ܘܚܶܪ̈ܝܳܢܶܐ ܕܶܐܪ̈ܶܣܺܝܣ ܡܚܰܒ̈ܠܳܬܳܐ ܘܢܰܫܘܶܐ ܠܟܽܠܰܢ ܠܚܰܪܬܳܐ ܛܳܒܬܳܐ ܗ̇ܳܝ ܕܫܳܦܪܳܐ ܠܶܗ: ܘܰܚܢܰܢ ܘܥܰܢܺܝ̈ܕܰܝܢ ܢܶܚܕܶܐ ܘܢܶܪܘܰܙ ܘܰܢܫܰܒܰܚ ܠܐܒܳܐ ܡܢܰܨܚܳܢܶܗ ܘܠܰܒܪܳܐ ܡܟܰܠܠܳܢܶܗ: ܘܰܠܪܽܘܚܳܐ ܩܰܕܺܝܫܳܐ ܡܫܰܡܠܝܳܢܶܗ ܒܟܽܠܗܶܝܢ ܝܰܡܺܝ̈ܢܳܝܳܬܳܐ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܐܰܝܟ ܕܰܒܣܶܡ ܠܳܟ ܝܽܘܡ ܥܽܘܗܕܳܢܶܗ ܘܥܽܘܢܕܳܢܶܗ ܕܡܳܪܝ ܝܰܥܩܽܘܒ ܘܶܐܬܬܢܺܝܚ ܨܶܒܝܳܢܳܟ ܒܟܽܠܗܽܘܢ ܕܽܘܒܳܪ̈ܰܘܗܝ ܕܟܰܝ̈ܳܐ ܘܩܰܕܺܝ̈ܫܶܐ: ܗܳܟܰܢܳܐ ܢܶܒܣ̈ܡܳܢ ܠܳܟ ܨܠܰܘ̈ܳܬܰܢ ܘܒܳܥ̈ܘܳܬܰܢ ܕܩܰܪܶܒܢܰܢ ܠܳܟ ܒܕܽܘܟܪܳܢܶܗ ܘܦܺܝܪܡܰܢ ܢܶܗܘܶܐ ܠܬܰܪܥܽܘܬܳܟ ܘܬܶܬܢܺܝܚ ܒܶܗ ܪܰܒܽܘܬܳܟ ܘܡܳܪܽܘܬܳܟ: ܘܢܶܬܚܰܣܽܘܢ ܒܶܗ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܘܶܐܬܬܢܺܝܚ ܥܰܠ ܣܰܒܪܳܟ ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܚܰܕ ܟܝܳܢܳܐ ܠܐ ܡܶܬܦܰܠܓܳܢܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܪܰܝܰܡܬܳܐ ܕܡܶܬܝܰܕܥܳܐ ܬܠܺܝܬܳܐܝ̣ܬ: ܘܡܶܬܒܰܕܩܳܐ ܠܚܽܘܕܳܐܝ̣ܬ: ܘܡܶܬܦܰܪܫܳܐ ܡ̇ܰܢ ܒܕܺܝܠܳܝ̈ܳܬܳܐ: ܒܰܐܒܳܗܽܘܬܳܐ ܡ̇ܰܢ: ܘܒܺܝܠܺܝܕܽܘܬܳܐ ܘܢܳܦܽܘܩܽܘܬܳܐ ܘܰܡܚܰܕܶܐ ܒܺܐܝܬܽܘܬܳܐ ܘܒܰܐܠܳܗܽܘܬܳܐ ܘܰܒܒܳܪܽܘܝܽܘܬܳܐ ܘܰܒܥܳܒܽܘܕܽܘܬܳܐ: ܕܰܒܚܰܝܠܳܗ̇ ܓܰܡܪܰܬ݀ ܘܓܳܡܪܳܐ ܘܰܡܫܰܡܠܝܳܐ ܠܰܡܫܰܡ̈ܠܝܳܢܶܐ ܘܡܶܫܬܰܡ̈ܠܝܳܢܶܐ: ܘܗ̣ܺܝ ܒܚܽܘܒܳܗ̇ ܚܰܝܠܰܬ݀ ܠܩܰܕܺܝܫܳܐ ܡܳܪܝ ܝܰܥܩܽܘܒ ܡܰܠܦܳܢܳܐ ܒܙܳܟܽܘܬܳܐ ܕܥܰܠ ܫܺܐܕ̈ܶܐ: ܘܫܰܡܠܝܰܬܶܗ ܒܟܽܠܗܶܝܢ ܡܝܰܬܪ̈ܳܬܳܐ: ܕܠܶܗ ܝܳܐܐ܀

 

 

 

ܣܕܪܐ

 

 

 

ܟܰܕ ܒܩܽܘܠܳܣ̈ܶܐ ܘܰܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܘܠܶܥ̈ܙܶܐ ܪ̈ܽܘܚܳܢܳܝܶܐ ܥܰܡ ܬܶܫܒ̈ܚܳܬܳܐ ܟܳܗ̈ܢܳܝܳܬܳܐ ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ ܕܢܰܨܺܝܚ ܫܽܘܦܪ̈ܶܐ ܡܳܪܝ ܝܰܥܩܽܘܒ ܡܰܠܦܳܢܳܐ ܡܥܰܕܥܕܺܝܢܰܢ: ܒܥܰܡ̈ܠܐ ܩܫܰܝ̈ܳܐ ܕܕܽܘܒܳܪ̈ܰܘܗܝ ܐܠܰܗܳܝ̈ܶܐ: ܘܒܰܡܥܰܙܝܳܢܽܘܬܶܗ ܕܥܰܠ ܨܰܘܡܳܐ ܘܰܨܠܰܘ̈ܳܬܳܐ ܘܫܰܗܪܳܐ ܕܠܰܝ̈ܠܰܝ ܐܺܝܡܳܡ: ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܘܰܒܩܽܘܠܳܣ̈ܶܐ ܕܪܽܘܚܳܐ ܩܰܕܺܝܫܳܐ ܘܒܰܙܡܺܝܪ̈ܳܬܳܐ ܠܘܳܬܶܗ ܡܥܰܢܶܝܢܰܢ ܟܰܕ ܐܳܡܪܺܝܢܰܢ ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܕܰܗܘܰܝܬ ܐܰܟܳܪܳܐ ܪܽܘܚܳܢܳܝܳܐ ܘܰܙܪܰܥܬ ܫܰܝܢܳܐ ܒܥܺܕܬܶܗ ܕܰܡܫܺܝܚܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܕܰܗܘܰܝܬ ܒܶܝܬ ܡܰܥܡܪܳܐ ܠܪܽܘܚܳܐ ܩܰܕܺܝܫܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܓܺܝܙܰܒܪܳܐ ܕܡܰܠܟܳܐ ܫܡܰܝܳܢܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܕܰܗܘܰܝܬ ܕܚܺܝܠܐ ܥܰܠ ܫܺܐܕ̈ܶܐ ܘܰܡܝܰܩܪܳܐ ܥܰܠ ܡܰܠܐܟ̈ܶܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܗܰܒܳܒܳܐ ܗܰܢܺܝ ܪܺܝܚܳܐ ܕܰܒܥܺܕܬܶܗ ܕܰܡܫܺܝܚܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܕܰܗܘܰܝܬ ܘܺܝܠܐ ܕܰܦܪܺܝܣ ܥܰܠ ܒܶܪ̈ܝܳܬܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܙܪܺܝܙܳܐ ܘܚܰܝܠܬܳܢܳܐ ܥܰܠ ܟܽܠܗܽܘܢ ܚܰܫܰܝ̈ ܒܶܣܪܳܐ: ܘܛܽܘܒܰܝܟ ܚܰܝܠܬܳܢܳܐ ܕܚܰܝܠܬܳܢܳܐܝ̣ܬ ܐܶܬܟܰܬܰܫܬ ܠܽܘܩܒܰܠ ܒܶܠܐܷܝܰܪ ܡܶܬܝܰܕܥܳܢܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܛܒܺܝܒܳܐ ܒܡܰܠܦܳܢ̈ܶܐ ܒܚܺܝܪ̈ܶܐ: ܘܰܒܚܺܝܪܳܐ ܒܣܳܥܽܘܪ̈ܘܳܬܳܐ: ܘܛܽܘܒܰܝܟ ܕܰܗܘܰܝܬ ܝܰܡܳܐ ܕܥܽܘܕܪ̈ܳܢܶܐ ܘܰܐܛܺܝܦܬܳܗ̇ ܠܐܪܥܳܐ ܒܳܐܣ̈ܘܳܬܳܟ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܟܶܢܳܪܳܐ ܚܰܠܝܳܐ ܕܥܺܕܬܳܐ ܩܰܕܺܝܫܬܳܐ: ܠܳܟ ܛܽܘܒܰܝܟ ܕܰܗܘܰܝܬ ܠܡܺܐܢܳܐ ܘܢܰܘܚܳܐ ܠܟܽܠܗܽܘܢ ܡܗܰܝ̈ܡܢܶܐ ܬܪ̈ܺܝܨܰܝ ܫܽܘܒܚܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܡܳܐܢܳܐ ܕܰܟܝܳܐ ܕܚܳܫܰܚ ܠܬܶܫܡܫܬܳܐ ܕܰܡܫܺܝܚܳܐ: ܘܛܽܘܒܰܝܟ ܕܰܗܘܰܝܬ ܢܰܘܣܳܐ ܓܰܒܝܳܐ ܘܥܶܡܪܰܬ݀ ܒܳܟ ܪܽܘܚܶܗ ܕܰܐܠܳܗܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܣܳܦܪܳܐ ܡܗܺܝܪܳܐ ܕܰܐܠܶܦܬ ܬܰܩ̈ܢܳܬܳܐ ܠܰܒܢܰܝ̈ܢܳܫܳܐ: ܘܛܽܘܒܰܝܟ ܕܰܗܘܰܝܬ ܥܰܒܕܳܐ ܛܳܒܳܐ ܘܰܦܠܰܚܬ ܒܟܰܪܡܶܗ ܕܡܳܪܳܟ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܦܺܝܪܡܳܐ ܡܪܰܥܝܳܢܳܐ ܕܒܳܟ ܐܶܬܪܰܥܺܝ ܡܳܪܳܟ ܠܥܳܠܡܳܐ: ܘܛܽܘܒܰܝܟ ܕܰܨܠܰܘ̈ܳܬܳܟ ܫܡܺܝ̈ܥܳܬܳܐ ܐܶܢܶܝܢ ܩܕܳܡ ܬܪܽܘܢܳܘܣ ܕܰܐܠܳܗܽܘܬܳܐ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܩܽܘܒܰܪܢܺܝܛܺܝ ܡܗܺܝܪܳܐ ܗ̇ܰܘ ܕܰܐܥܕܺܝ ܠܐܠܦܶܗ ܡ̣ܶܢ ܢܽܘܘ̈ܳܓܶܐ ܕܰܦܠܺܝܓܽܘܬܳܐ: ܘܛܽܘܒܰܝܟ ܕܰܗܘܰܝܬ ܪܳܥܝܳܐ ܥܺܝܪܳܐ ܘܰܚܦܺܝܛܳܐ ܠܽܘܩܒܰܠ ܕܺܐܒ̈ܶܐ ܡܶܬܝܰܕ̈ܥܳܢܶܐ ܕܟܽܠܗܶܝܢ ܐܶܪ̈ܶܣܺܝܣ: ܠܳܟ ܛܽܘܒܰܝܟ ܡܳܪܝ ܝܰܥܩܽܘܒ ܡܰܠܦܳܢܳܐ ܫܽܘܪܳܐ ܪܳܡܳܐ ܕܽܐܘܡܬܳܐ ܕܣܽܘܪ̈ܝܳܝܶܐ: ܘܛܽܘܒܰܝܟ ܕܬܰܘܕܺܝܬܳܐ ܕܟܺܝܬܳܐ ܢܩܰܪܶܒ ܠܡܳܪܳܟ ܒܕܽܘܟܪܳܢܳܟ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܰܢ ܒܕܽܘܟܪܳܢܶܗ ܕܢܰܨܺܝܚ ܫܽܘܦܪ̈ܶܐ ܡܳܪܝ ܝܰܥܩܽܘܒ ܡܰܠܦܳܢܳܐ ܕܰܒܝܰܕ ܨܠܰܘ̈ܳܬܶܗ ܬܶܗܘܶܐ ܠܐܒܺܝ̈ܠܐ ܡܒܰܝܳܐܢܳܐ: ܠܰܒܬܽܘ̈ܠܐ ܡܢܰܛܪܳܢܳܐ: ܠܰܓܡܺܝܪ̈ܶܐ ܡܩܰܕܫܳܢܳܐ: ܠܕܰܝܪ̈ܳܝܶܐ ܡܚܰܝܠܳܢܳܐ: ܠܗܶܪ̈ܳܬܳܐ ܡܕܰܥܟܳܢܳܐ: ܠܠܽܘ̈ܬܳܟܶܐ ܡܛܰܠܩܳܢܳܐ: ܠܙܰܕܺܝ̈ܩܶܐ ܡܢܰܛܪܳܢܳܐ: ܠܚܰܛܳܝ̈ܶܐ ܡܚܰܣܝܳܢܳܐ: ܠܛܳܥܰܝ̈ܳܐ ܡܰܦܢܝܳܢܳܐ: ܠܝܰܬܡ̈ܶܐ ܡܪܰܒܝܳܢܳܐ: ܠܟܰܦ̈ܢܶܐ ܡܣܰܒܥܳܢܳܐ: ܠܡܶܣ̈ܟܺܢܶܐ ܙܳܝܽܘܢܳܐ ܠܢܽܘܟܪ̈ܳܝܰܝ ܠܕܶܚܠܬܳܟ ܡܒܰܝܬܳܢܳܐ: ܠܣܳܩܽܘܪ̈ܰܝܢ ܡܫܰܝܢܳܢܳܐ: ܠܥܳܫܽܘ̈ܩܰܝܢ ܡܒܰܕܪܳܢܳܐ: ܠܦܳܬܽܘܪ̈ܰܝܢ ܡܠܺܝ ܛܳܒ̈ܳܬܳܐ: ܠܰܨܠܰܘ̈ܳܬܰܢ ܥܒܶܕ ܫܡܺܝ̈ܥܳܬܳܐ: ܠܩܳܠܰܝ̈ܢ ܥܢܺܝ ܒܚܰܕܽܘܬܳܐ: ܠܪ̈ܰܚܡܰܝܟ ܫܰܕܰܪ ܠܰܢ ܒܰܐܡܺܝܢܽܘܬܳܐ: ܠܫ̈ܶܐܠܳܬܰܢ ܦܰܢܳܐ ܒܒܰܣܺܝܡܽܘܬܳܟ: ܠܬܰܘܕ̈ܝܳܬܰܢ ܩܰܒܶܠ ܒܰܡܪܰܚܡܳܢܽܘܬܳܟ ܘܰܠܥܰܢܺܝ̈ܕܰܝܢ ܚܰܣܳܐ ܒܛܰܝܒܽܘܬܳܟ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܓܒܪܐܝܠ ܐܦܣܩܘܦܐ ܕܥܘܡܪܐ ܕܩܪܬܡܝܢ

 

ܩܕܡܝܬ ܨܠܘܬܐ ܕܫܘܪܝܐ

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܢܶܚܕܶܐ ܘܢܶܪܘܰܙ ܘܰܢܕܽܘܨ ܒܕܽܘܟܪܳܢܶܗ ܕܰܐܒܳܐ ܒܪܺܝܟܳܐ ܡܳܪܝ ܓܰܒܪܺܐܶܝܠ ܘܢܶܣܰܒ ܥܽܘܕܪ̈ܳܢܶܐ ܠܟܺܐܒܰܝ̈ܢ ܒܰܨܠܰܘ̈ܳܬܶܗ ܘܢܶܫܬܘܶܐ ܠܫܽܘܒܩܳܢܳܐ ܕܰܚܛܳܗ̈ܶܐ ܒܒܳܥ̈ܘܳܬܶܗ: ܘܗܰܒܠܰܢ ܕܢܶܫܗܰܪ ܩܕܳܡܰܝܟ ܒܕܽܘܟܪܳܢܶܗ ܒܰܨܠܰܘ̈ܳܬܶܗ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܗܳܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܩܰܕܺܝܫܳܐ ܡܳܪܝ ܓܰܒܪܺܐܶܝܠ ܐܶܦܣܩܽܘܦܳܐ ܡ̣ܶܢ ܓܰܘ ܟܰܪܣܳܐ ܐܰܝܟ ܐܶܪܰܡܝܳܐ ܘܰܫܡܽܘܐܶܝܠ: ܘܥܰܒܕܶܗ ܡܳܐܢܳܐ ܓܰܒܝܳܐ ܕܰܫܦܰܪ ܠܐܝܩܳܪܶܗ ܠܗܰܘ ܕܚܰܝܠܶܗ ܠܐܒܳܐ ܩܰܕܺܝܫܳܐ: ܒܰܐܓܽܘܢܳܐ ܕܠܽܘܩܒܰܠ ܒܺܝܫܳܐ ܓܰܢ̱ܒܳܪܳܐܝ̣ܬ: ܠܗܰܘ ܕܝܰܩܰܪ ܕܽܘܟܪܳܢܶܗ ܒܰܫܡܰܝܳܐ ܘܒܰܐܪܥܳܐ ܘܥܰܒܕܶܗ ܒܶܝܬ ܓܰܘܣܳܐ ܘܥܽܘܕܪܳܢܳܐ ܠܐܝܠܶܝܢ ܕܡܶܬܓܰܘܣܺܝܢ ܒܰܨܠܰܘ̈ܳܬܶܗ ܕܠܶܗ ܠܗܰܘ ܕܰܓܒܳܝܗܝ ܢܰܘܕܶܐ ܘܰܢܫܰܒܰܚ ܒܗܳܢܳܐ܀

 

ܣܕܪܐ

 

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܠܩܰܕܺܝ̈ܫܰܝܟ ܡܢܰܨܰܚ ܐܰܢ̱ܬ ܘܰܡܗܰܕܰܪ ܒܟܽܠ ܕܳܪ̈ܺܝܢ ܩܰܕܺܝܫܳܐܝ̣ܬ: ܘܡ̣ܶܢ ܥܺܕܬܳܐ ܘܝܰܠܕܶܝ̈ܗ̇ ܕܰܡܝܰܩܪܳܐ ܕܽܘܟܪ̈ܳܢܰܝܗܽܘܢ: ܘܰܐܢ̱ܬ ܡܶܫܬܰܒܰܚ ܐܰܢ̱ܬ ܕܚܺܝܠܐܴܝ̣ܬ: ܰܗ̇ܘ ܕܠܐܒܳܐ ܩܰܕܺܝܫܳܐ ܡܳܪܝ ܓܰܒܪܺܐܶܝܠ ܪܺܝܫ ܟܳܗ̈ܢܶܐ ܕܩܰܕܺܝ̈ܫܰܝܟ ܘܕܰܩܕܳܡ ܪܰܒܽܘܬܳܟ ܐܶܬܢܰܨܰܚ ܐܰܬܠܺܝܛܳܐܝ̣ܬ: ܝܰܩܰܪܬ ܕܽܘܟܪܳܢܶܗ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܫܒܺܝܚܳܐܝ̣ܬ ܗܳܢܳܐ ܕܡܶܢܰܢ ܡܚܺܝ̈ܠܐ ܘܚܰܛܳܝ̈ܶܐ ܡܶܬܩܰܠܰܣ ܘܡܶܬܪܰܡܪܰܡ ܗܕܺܝܪܳܐܝ̣ܬ: ܗܳܢܳܐ ܕܰܐܝܟ ܫܶܡܫܳܐ ܦܰܐܝܳܐ ܢܳܨܚܺܝܢ ܕܽܘܒܳܪ̈ܰܘܗܝ ܐܠܰܗܳܐܝ̣ܬ: ܘܰܐܝܟ ܪܰܒܒܰܝܬܳܐ ܘܚܰܟܺܝܡܳܐ ܡܶܬܝܰܬܪܺܝܢ ܣܽܘܥܪ̈ܳܢܰܘܗܝ ܚܰܟܺܝܡܳܐܝ̣ܬ: ܗܳܢܳܐ ܕܡ̣ܶܢ ܛܰܠܝܽܘܬܶܗ ܩܰܒܶܠ ܥܠܰܘܗܝ ܢܺܝܪܳܐ ܕܕܰܝܪܳܝܽܘܬܳܐ ܘܰܟܕܰܢ ܒܶܗ ܢܰܦܫܶܗ ܘܦܰܓܪܶܗ ܘܰܦܠܰܚ ܒܟܰܪܡܳܐ ܕܡܳܪܶܗ ܡ̣ܶܢ ܨܰܦܪܳܐ ܠܪܰܡܫܳܐ ܟܰܫܺܝܪܳܐܝ̣ܬ: ܗܳܢܳܐ ܩܰܕܺܝܫܳܐ ܡܳܪܝ ܓܰܒܪܺܐܶܝܠ ܡ̣ܶܢ ܐܰܬܪܳܐ ܕܚܰܐܚ ܡܕܺܝܢ̱ܬܳܐ: ܡ̣ܶܢ ܩܪܺܝܬܳܐ ܕܰܫܡܳܗ̇ ܩܽܘܣܛܺܝ ܐܺܝܬܰܘܗܝ ܫܰܪܺܝܪܳܐܝ̣ܬ: ܗܳܢܳܐ ܕܶܐܬܬܰܠܡܰܕ ܠܕܰܝܪܳܝܳܐ ܓܶܐܘܰܪܓܺܝ ܝܺܚܺܝܕܳܝܳܐ ܕܥܰܠ ܓܶܢ̱ܒ ܚܰܐܚ ܡܕܺܝܢ̱ܬܳܐ ܥܳܡܰܪ ܗܘܳܐ ܠܚܽܘܕܳܐܝ̣ܬ: ܗܳܢܳܐ ܕܟܰܕ ܚܙܳܐ ܕܡܶܬܶܐܠܶܨ ܡ̣ܶܢ ܐܰܒܳܗܰܘ̈ܗܝ: ܫܶܐܠ ܦܽܘܩܕܳܢܳܐ ܡ̣ܶܢ ܪܰܒܶܗ ܕܢܰܪܚܶܩ ܡܶܢܗܽܘܢ ܩܰܠܺܝܠܐܴܝ̣ܬ: ܘܨܰܠܺܝ ܥܠܰܘܗܝ ܘܝܰܗܒ ܠܶܗ ܫܠܳܡܳܐ ܚܽܘܒܳܢܳܐܝ̣ܬ: ܗܳܢܳܐ ܕܨܰܠܺܝ ܠܘܳܬ ܡܳܪܝܳܐ ܕܢܶܬܪܽܘܨ ܡܰܪܕܺܝܬܶܗ ܘܩܳܡ ܒܠܺܠܝܳܐ ܘܗܰܠܶܟ ܥܕܰܡܳܐ ܠܨܰܦܪܳܐ ܘܡܰܢܰܥ ܠܥܽܘܡܪܳܐ ܕܩܰܪܬܡܺܝܢ ܚܳܕܝܳܐܝ̣ܬ: ܗܳܢܳܐ ܕܩܰܒܠܽܘܗܝ ܐܰܚ̈ܶܐ ܕܥܽܘܡܪܳܐ ܟܳܗܢܳܝܳܐ ܘܟܰܕ ܚܙܰܘ ܡܝܰܬܪܽܘܬܶܗ ܗܳܝܕܶܝܢ ܣܳܡܽܘܗܝ ܥܠܰܝܗܽܘܢ ܪܺܝܫ ܕܰܝܪܳܐ ܘܒܳܬܰܪܟܶܢ ܐܶܦܣܩܽܘܦܳܐ ܦܨܺܝܚܳܐܝ̣ܬ: ܗܳܢܳܐ ܕܰܒܩܰܘ̈ܡܶܐ ܡܬܺܝ̈ܚܶܐ ܘܰܒܫܰܗܪ̈ܶܐ ܕܠܰܝܠܰܘ̈ܳܬܳܐ ܡܰܠܺܝ ܠܪܶܗܛܳܐ ܕܚܰܝܰܘ̈ܗܝ ܟܰܫܺܝܪܳܐܝ̣ܬ: ܗܳܢܳܐ ܕܰܚܠܳܦ ܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܛܰܢܳܢܳܐ ܐܶܬܚܙܺܝ ܥܰܙܺܝܙܳܐܝ̣ܬ: ܗܳܢܳܐ ܕܰܗܘܳܐ ܐܰܒܺܝܠܐ ܥܰܠ ܣܰܒܪܳܟ ܘܡܰܟܺܝܟܳܐ ܘܰܪܚܺܝܡܳܐ ܥܰܠ ܟܽܠ ܐ̱ܢܳܫ ܒܰܣܺܝܡܳܐܝ̣ܬ: ܗܳܢܳܐ ܕܰܣܥܰܪ ܚܰܝ̈ܠܐ ܘܬܶܕܡܪ̈ܳܬܳܐ ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ ܐܠܰܗܳܐܝ̣ܬ: ܗܳܢܳܐ ܕܢܰܚܶܡ ܬܠܳܬܳܐ ܥܰܢܺܝ̈ܕܶܐ ܩܰܕܡܳܝܳܐ ܪܺܝܫ ܕܰܝܪܳܐ ܕܒܶܝܬ ܐܺܝܠ: ܬܪܰܝܳܢܳܐ ܒܰܪ ܐܰܪܡܰܠܬܳܐ ܒܣܺܝܓܽܘܢ ܩܪܺܝܬܳܐ: ܘܰܬܠܺܝܬܳܝܳܐ ܐܠܳܝܳܐܝܳܐ ܒܳܐܠܶܝܢ ܩܪܺܝܬܳܐ: ܘܶܐܬܬܰܠܡܰܕ ܠܩܰܕܺܝܫܳܐ ܘܫܰܡܫܶܗ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ ܡܰܟܺܝܟܳܐܝ̣ܬ: ܗܳܢܳܐ ܕܡܰܠܶܠ ܥܰܡ ܥܰܢܺܝܕܳܐ ܝܽܘܚܰܢܳܢ ܕܰܝܪܳܝܳܐ ܕܥܰܢܺܝܕ ܗܘܳܐ ܡ̣ܶܢ ܩܕܳܡ ܫܰܢ̱ܬܳܐ ܚܕܳܐ ܘܫܰܐܠܶܗ ܗܘܳܐ ܥܰܠ ܕܰܗܒܶܗ ܕܗ̇ܰܘ ܬܰܐܓܳܪܳܐ ܒܰܕܘܳܝܳܐ ܕܺܐܝܬܰܘܗܝ ܗܘܳܐ ܠܘܳܬܶܗ ܓܽܘܥܠܳܢܳܐܝ̣ܬ ܗܳܢܳܐ ܕܦܰܢܺܝ ܥܰܢܺܝܕܳܐ ܡ̣ܶܢ ܩܰܒܪܳܐ ܘܶܐܡܰܪ ܠܶܗ ܐܳܘ ܪܳܚܡܶܗ ܕܰܡܫܺܝܚܳܐ ܡܳܪܝ ܓܰܒܪܺܐܶܝܠ ܗܳܐ ܕܰܗܒܳܐ ܣܺܝܡ ܒܕܽܘܟܬܳܐ ܐܰܝܟܳܐ ܕܛܰܫܺܝܬܶܗ ܐܶܢܳܐ ܘܡܳܪܶܗ ܟܰܣܝܳܐܝ̣ܬ: ܗ̇ܳܝ ܕܶܝܢ ܫܰܒܰܚ ܟܽܠ ܐ̱ܢܳܫ ܠܐܠܳܗܳܐ ܒܩܳܠܐ ܪܳܡܳܐ: ܘܩܰܠܶܣܘ ܠܡܳܪܝ ܓܰܒܪܺܐܶܝܠ ܥܰܒܕܳܐ ܕܡܳܪܶܗ ܫܒܺܝܚܳܐܝ̣ܬ: ܗܳܢܳܐ ܕܟܰܕ ܚܙܳܐ ܗ̇ܰܘ ܒܰܕܘܳܝܳܐ ܠܥܽܘܡܪܳܐ ܗܳܢܳܐ ܕܰܡܡܰܠܠܺܝܢ ܒܶܗ ܚܰܝ̈ܶܐ ܥܰܡ ܡܺܝ̈ܬܶܐ ܬܗܰܪ ܘܶܐܬܕܰܡܰܪ ܘܡ̣ܶܢ ܒܳܬܰܪ ܗܳܠܶܝܢ ܗܳܝܕܶܝܢ ܒܰܕܰܪ ܟܽܠܶܗ ܥܽܘܬܪܶܗ ܒܥܽܘܡܪܳܐ ܘܰܠܓܰܡܠܰܘ̈ܗܝ ܕܢܶܛܥܢܽܘܢ ܩܰܡܚܳܐ ܠܫܰܒܥܺܝܢ ܪ̈ܰܚܘܳܬܳܐ ܕܺܐܝܬ ܗܘܳܐ ܠܶܗ ܠܥܽܘܡܪܳܐ ܕܡܳܪܝ ܓܰܒܪܺܐܶܝܠ ܘܗ̣ܽܘ ܐܰܥܡܕܶܗ ܘܰܩܪܳܐ ܫܡܶܗ ܝܽܘܚܰܢܳܢ ܥܰܠ ܫܶܡ ܪܳܚܡܶܗ: ܟܰܕ ܒܢܳܐ ܠܶܗ ܡܛܰܠܬܳܐ ܥܰܠ ܬܪܰܥ ܒܶܝܬ ܩܰܕܺܝ̈ܫܶܐ ܘܰܦܠܰܚ ܒܳܗ̇ ܠܡܳܪܶܗ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ: ܗܳܢܳܐ ܕܰܫܩܰܠ ܐܽܘܡ̈ܳܢܶܐ ܘܶܐܙܰܠ ܠܪܽܘܚܩܳܐ ܡ̣ܶܢ ܕܰܝܪܳܐ ܘܰܚܦܰܪܘ ܒܫܽܘܥܳܐ ܘܰܦܣܰܩܘ ܟܺܐܦܳܐ ܪܰܒܬܳܐ ܘܥܰܫܺܝܢܬܳܐ ܡܶܛܽܠ ܚܫܳܚܬܳܐ ܕܥܽܘܡܪܳܐ ܘܣܳܡܽܘܗ̇ ܥܰܠ ܥܳܓܰܠܬܳܐ: ܥܕܰܡܳܐ ܠܡܰܣܰܩܬܳܐ ܕܕܰܝܪܳܐ: ܗܳܝܕܶܝܢ ܐܶܬܡܰܚܠܰܬ݀ ܥܳܓܰܠܬܳܐ: ܘܶܐܡܰܪ ܠܬܰܠܡܺܝܕܶܗ ܕܙܶܠ ܠܳܟ ܒܶܪܝ ܘܐ̱ܡܰܪ ܠܐܚ̈ܶܐ ܕܰܒܕܰܝܪܳܐ ܐܶܠܐ ܟܽܠ ܕܺܐܝܬ ܒܕܰܝܪܳܐ ܢܺܐܬܽܘܢ ܠܰܩܕܳܡ ܟܺܐܦܳܐ ܪܗܺܝܒܳܐܝ̣ܬ: ܘܒܳܗ̇ ܒܫܳܥܬܳܐ ܕܡܰܠܶܠ ܩܰܕܺܝܫܳܐ ܡܳܪܝ ܓܰܒܪܺܐܶܝܠ ܩܳܡܘ ܚܰܝ̈ܶܐ ܘܟܽܠܗܽܘܢ ܡܺܝ̈ܬܶܐ ܐܰܝܠܶܝܢ ܕܰܩܒܺܝܪܺܝܢ ܗܘܰܘ ܒܕܰܝܪܳܐ ܡܣܰܪܗܒܳܐܝ̣ܬ: ܘܛܰܥܢܽܘܗ̇ ܠܟܺܐܦܳܐ ܘܰܐܥܠܽܘܗ̇ ܠܕܰܝܪܳܐ ܘܰܗܦܰܟܘ ܠܩܰܒܪ̈ܰܝܗܽܘܢ ܐܰܝܟ ܦܽܘܩܕܳܢܶܗ ܕܡܳܪܝ ܓܰܒܪܺܐܶܝܠ ܢܺܝܚܳܐܝ̣ܬ: ܗܳܢܳܐ ܕܰܒܝܰܘܡܳܐ ܕܰܗܘܳܐ ܥܽܘܢܕܳܢܶܗ ܐܶܬܟܰܢܰܫܘ ܡ̣ܶܢ ܐܰܬܪܳܐ ܗܳܢܳܐ ܬܡܳܢܝܳܐ ܐܠܰܦܰܝ̈ܳܐ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ: ܘܥܶܣܪܳܐ ܐܶܦܣ̈ܩܽܘܦܶܐ ܘܰܐܪܒܥܺܝܢ ܐܠܰܦܰܝ̈ܳܐ ܥܳܠܡܳܝ̈ܶܐ ܘܫܰܡܶܫܘ ܩܕܳܡ ܦܰܓܪܶܗ ܫܰܒܥܳܐ ܐܺܝܡܳܡܺܝ̈ܢ ܘܫܰܒܥܳܐ ܠܰܝܠܰܘ̈ܳܢ: ܘܗܳܝܕܶܝܢ ܩܰܕܶܫܘ ܐ̱ܪ̈ܳܙܶܐ ܐܠܰܗܳܝ̈ܶܐ ܘܡ̣ܶܢ ܚܶܒܨܳܐ ܕܟܶܢܫܳܐ ܕܰܗܘܳܐ ܒܗܰܝܟܠܐ ܪܰܒܳܐ: ܢܦܰܠ ܚܰܕ ܛܰܠܝܳܐ ܬܚܶܝܬ ܪ̈ܶܓܠܰܝܗܽܘܢ ܘܡܺܝܬ ܟܽܠܳܢܳܐܝ̣ܬ: ܗܳܝܕܶܝܢ    ܫܰܩܠܽܘܗ̇ ܠܰܫܠܰܕܶܗ ܕܛܰܠܝܳܐ ܘܣܳܡܽܘܗ̇ ܥܰܠ ܦܰܓܪܶܗ ܕܡܳܪܝ ܓܰܒܪܺܐܶܝܠ: ܒܳܗ̇ ܒܫܳܥܬܳܐ ܩܳܡ ܩܰܠܺܝܠܐܴܝ̣ܬ: ܗ̇ܰܘ ܛܰܠܝܳܐ ܕܶܐܬܚܢܶܩ ܗܘܳܐ ܐܺܝܬܰܘܗܝ ܗܘܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܫܰܪܺܝܪܳܐܝ̣ܬ: ܗܳܢܳܐ ܕܠܐ ܡܨܶܐ ܦܽܘܡܰܢ ܐܳܦܠܐ ܠܶܫܳܢܰܢ ܠܡܶܬܢܶܐ ܟܽܠܗܶܝܢ ܬܡܺܝ̈ܗܳܬܶܗ ܘܬܶܕܡܪ̈ܳܬܶܗ ܐܰܝܟ ܕܫܳܘܶܐ ܙܳܕܩܳܐܝ̣ܬ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܒܗܳܢܳܐ ܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ ܕܡܳܪܝ ܓܰܒܪܺܐܶܝܠ: ܐܰܝܟܰܢܳܐ ܕܰܒܰܝܕ ܨܠܰܘ̈ܳܬܶܗ ܩܰܕܺܝ̈ܫܳܬܳܐ ܘܕܰܬܪܶܥܣܰܪ ܐܠܰܦܰܝ̈ܳܐ ܚܰܒܪ̈ܰܘܗܝ ܕܰܒܒܶܝܬ ܩܰܕܺܝ̈ܫܶܐ ܩܒܺܝܪܺܝܢ ܘܰܬܡܳܢܶܡܳܐܐ ܡܶܨܪ̈ܳܝܶܐ ܟܢܺܝܫܳܐܝ̣ܬ ܢܶܫܬܰܘܙܰܒ ܡ̣ܶܢ ܟܽܠܗܶܝܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ ܐܰܡܺܝܢܳܐܝ̣ܬ ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܒܺܐܝܙܓܰܕܽܘܬܗܽܘܢ ܪܶܚܡܬܳܢܳܐܝ̣ܬ ܘܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܨܠܽܘܬܗܽܘܢ ܡܚܰܠܠܳܢܳܐܝ̣ܬ ܘܢܶܬܬܢܺܝܚܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܡܰܠܟܽܘܬܳܐ ܕܰܫܡܰܝܳܐ ܫܰܘܝܳܐܝ̣ܬ ܘܰܚܢܰܢ ܘܥܰܢܺܝ̈ܕܰܝܢ ܢܰܣܶܩ ܠܶܗ ܫܽܘܒܚܳܐ ܥܰܡ ܩܰܕܺܝ̈ܫܶܐ ܕܰܫܦܰܪܘ ܩܕܳܡܰܘܗܝ ܓܡܺܝܪܳܐܝ̣ܬ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

ܥܛܪܐ

 

ܡܫܺܝܚܳܐ ܐܠܰܗܳܐ ܕܺܝܠܰܢ ܐܰܝܟ ܕܰܒܣܶܡ ܠܳܟ ܝܽܘܡ ܥܽܘܢܕܳܢܶܗ ܕܡܳܪܝ ܓܰܒܪܺܐܶܝܠ ܘܶܐܬܬܢܺܝܚ ܨܶܒܝܳܢܳܟ ܒܟܽܠܗܽܘܢ ܕܽܘܒܳܪ̈ܰܘܗܝ ܕܟܰܝ̈ܳܐ ܘܩܰܕܺܝ̈ܫܶܐ ܗܳܟܰܢܳܐ ܢܶܒܣ̈ܡܳܢ ܠܳܟ ܨܠܰܘ̈ܳܬܰܢ ܘܒܳܥ̈ܘܳܬܰܢ ܕܩܰܪܶܒܢܰܢ ܠܳܟ ܒܕܽܘܟܪܳܢܶܗ: ܘܦܺܝܪܡܰܢ ܢܶܗܘܶܐ ܠܬܰܪܥܽܘܬܳܟ: ܘܬܶܬܢܺܝܚ ܒܶܗ ܡܳܪܽܘܬܳܟ: ܘܢܶܬܚܰܣܽܘܢ ܒܶܗ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܐܺܝܬܝܳܐ ܡܬܽܘܡܳܝܳܐ ܘܰܡܥܰܠܝܳܐ ܒܛܽܘܒܬܳܢܽܘܬܳܐ: ܘܠܐ ܡܶܬܕܰܪܟܳܢܳܐ ܒܰܐܠܳܗܽܘܬܳܐ ܠܗܰܘ ܕܰܐܘܪܶܒ ܕܽܘܟܪܳܢ ܥܰܒܕܶܗ ܡܳܪܝ ܓܰܒܪܺܐܶܝܠ ܒܰܐܪܒܰܥ ܦܶܢ̈ܝܳܢ ܘܢܰܨܰܚ ܥܰܕܥܺܐܕܶܗ ܒܬܺܒܶܝܠ: ܕܠܶܗ ܠܗܰܘ ܕܚܰܝܠܶܗ ܒܰܐܓܽܘܢܳܐ ܕܠܽܘܩܒܰܠ ܒܥܶܠܕܰܪܶܗ: ܘܣܳܡ ܒܶܝܬ ܐܺܝܕܰܘ̈ܗܝ ܬܶܕܡܪ̈ܳܬܳܐ ܘܚܰܝ̈ܠܐ ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ: ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܥܽܘܗܕܳܢܳܐ ܕܦܳܠܚܳܐ ܪܚܺܝܡܳܐ ܘܰܡܝܰܩܪܳܐ ܡܥܰܕܥܕܺܝܢܰܢ ܐܳܘ ܡܶܠܬܳܐ ܐܠܰܗܳܐ ܒܬܶܫܒ̈ܚܳܬܳܐ ܘܩܽܘܠܳܣ̈ܶܐ ܘܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܚܰܓܶܝܢܰܢ ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ ܕܰܐܒܳܐ ܒܪܺܝܟܳܐ ܡܳܪܝ ܓܰܒܪܺܐܶܝܠ ܐܶܦܣܩܽܘܦܳܐ: ܗܳܢܳܐ ܕܡ̣ܶܢ ܛܰܠܝܽܘܬܶܗ ܫܰܪܺܝ ܒܦܽܘܠܚܳܢܳܐ ܕܙܰܕܺܝܩܽܘܬܳܐ: ܘܰܒܒܰܣܺܝܡܽܘܬܳܐ ܫܰܠܶܡ ܥܰܡ̈ܠܐ ܕܰܓܡܺܝܪܽܘܬܳܐ: ܗܳܢܳܐ ܕܢܰܟܪܺܝ ܢܰܦܫܶܗ ܡ̣ܶܢ ܐܰܒܳܗܰܘ̈ܗܝ: ܘܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܦܪܰܫ ܗ̣ܽܘ ܡ̣ܶܢ ܓܶܢܣܳܐ ܘܛܽܘܗܡܳܐ ܕܺܝܠܶܗ: ܘܠܳܟ ܡܫܺܝܚܳܐ ܐܰܒܳܐ ܕܰܫܪܳܪܳܐ ܩܢܳܐ: ܗܳܢܳܐ ܕܰܟܦܶܢ ܘܰܨܗܺܝ ܘܶܐܬܛܰܪܰܦ ܡܶܛܽܠ ܫܡܳܐ ܕܡܳܪܶܗ ܐܰܝܟܰܢܳܐ ܕܢܶܬܬܰܓܰܪ ܚܰܝ̈ܶܐ ܚܰܕ̈ܬܶܐ: ܗܳܢܳܐ ܕܰܛܥܳܐ ܠܒܶܣܬܪܶܗ ܘܶܐܫܬܰܘܫܰܛ ܠܰܩܕܳܡܰܘܗܝ ܒܰܓܡܺܝܪܽܘܬܳܐ: ܗܳܢܳܐ ܕܩܳܡ ܒܰܩܪܳܒܳܐ ܠܽܘܩܒܰܠ ܒܺܝܫܳܐ ܒܥܶܠܕܰܪܳܐ ܘܫܰܦܠܶܗ ܒܰܐܓܽܘܢܳܐ ܘܰܠܪܺܝܫܶܗ ܕܳܫ: ܗܳܢܳܐ ܕܦܠܰܚ ܒܟܰܪܡܳܐ ܕܩܽܘܫܬܳܐ ܘܠܐ ܫܒܰܩ ܒܚܰܩܠܶܗ ܙܺܝ̈ܙܳܢܶܐ ܕܰܠܚ̈ܶܛܶܐ ܢܶܚܢܩܽܘܢ: ܗܳܢܳܐ ܕܙܰܗܺܝ ܩܢܽܘܡܶܗ ܒܰܒܬܽܘܠܽܘܬܳܐ: ܘܫܰܡܠܺܝ ܦܽܘܩ̈ܕܳܢܰܝܟ ܐܠܰܗܳܝ̈ܶܐ: ܗܳܢܳܐ ܕܩܳܡ ܒܪܺܝܫ ܥܰܡܳܟ ܘܰܪܥܳܐ ܠܥܳܢ̈ܳܟ ܡܠܺܝܠܬܳܐ ܥܰܠ ܡܰܪ̈ܓܶܐ ܕܥܽܘܫܢܳܐ ܘܡܰܝ̈ܳܐ ܕܰܢܝܳܚܳܐ: ܗܳܢܳܐ ܕܗܰܕܰܪ ܠܥܺܕܬܳܟ ܩܰܕܺܝܫܬܳܐ ܒܫܰܦܺܝܪܽܘܬ ܩܰܘܡܳܐ ܘܰܬܪܺܝܨܽܘܬܳܐ: ܗܳܢܳܐ ܕܰܐܩܺܝܡ ܐܰܓܽܘܢܳܐ ܘܢܰܨܰܚ ܒܩܽܘܫܬܐ ܘܫܰܦܶܠ ܠܰܒܥܶܠܕ̈ܒܳܒܶܐ: ܗܳܢܳܐ ܕܒܰܩܢܽܘܡܶܗ ܛܥܶܢ ܝܽܘܩܪܳܐ ܕܰܡܚܺܝ̈ܠܐ ܘܰܫܩܰܠ ܥܠܰܘܗܝ ܡܝܰܬܪܽܘܬܳܐ ܕܟܽܠܗܽܘܢ ܩܰܕܺܝ̈ܫܶܐ: ܗܳܢܳܐ ܕܥܰܡ ܦܰܘܠܳܘܣ ܡܰܙܥܶܩ ܗܘܳܐ ܕܡܰܢܽܘ ܕܡܶܬܟܪܰܗ ܘܠܰܘ ܐܶܢܳܐ ܡܶܬܟܪܰܗ ܐ̱ܢܳܐ: ܐܰܘ ܡܰܢܽܘ ܡܶܬܟܫܶܠ ܘܠܰܘ ܐܶܢܳܐ ܝܳܩܶܕ ܐ̱ܢܳܐ: ܗܳܢܳܐ ܕܰܠܟܽܠܶܗ ܪܶܗܛܳܐ ܕܚܰܝܰܘ̈ܗܝ ܒܨܰܘܡܳܐ ܘܒܰܨܠܰܘ̈ܳܬܳܐ ܘܰܒܫܰܗܪ̈ܶܐ ܕܠܰܝܠܰܘ̈ܳܬܳܐ ܫܰܡܠܺܝ: ܗܳܢܳܐ ܬܡܺܝܗܳܐ ܕܠܐ ܣܳܦܩܳܐ ܡܶܠܬܰܢ ܠܩܽܘܠܳܣܶܗ: ܐܳܦܠܐ ܠܶܫܳܢܰܢ ܕܰܢܬܰܪܓܶܡ ܟܽܠܗܶܝܢ ܫܒܺܝ̈ܚܳܬܶܗ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܒܰܨܠܰܘ̈ܳܬܶܗ ܕܰܐܬܠܺܝܛܳܟ ܩܰܕܺܝܫܳܐ ܡܳܪܝ ܓܰܒܪܺܐܶܝܠ ܕܝܰܘܡܳܢܳܐ ܥܽܘܗܕܳܢܶܗ ܡܫܰܡܠܶܝܢܰܢ ܕܰܬܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܙܰܝܢܳܐ ܚܰܣܺܝܢܳܐ ܠܽܘܩܒܰܠ ܟܽܠܗܽܘܢ ܒܥܶܠܕ̈ܒܳܒܶܐ ܟܣܰܝ̈ܳܐ ܘܰܓܠܰܝ̈ܳܐ: ܘܰܥܒܶܕ ܠܰܢ ܡܡܰܪ̈ܝܳܢܶܐ ܒܕܽܘܒܳܪ̈ܶܐ ܕܩܰܕܺܝ̈ܫܰܝܟ ܘܓܳܡܽܘܪ̈ܶܐ ܕܦܽܘܩ̈ܕܳܢܶܐ ܚܰܘܳܐ ܠܰܢ: ܕܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܥܰܡܶܗ ܕܰܐܬܠܺܝܛܳܟ ܩܰܕܺܝܫܳܐ ܡܳܪܝ ܓܰܒܪܺܐܶܝܠ ܘܥܰܡ ܟܽܠܗܽܘܢ ܩܰܕܺܝ̈ܫܶܐ ܚܰܒܪ̈ܰܘܗܝ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗܰܘ ܕܢܰܨܰܚ ܠܥܺܐܕܶܗ ܕܡܳܪܝ ܓܰܒܪܺܐܶܝܠ ܒܥܺܕܬܳܐ ܡܟܺܝܪܬܶܗ ܘܚܰܝܶܠ ܐܳܦ ܠܰܢ ܕܰܠܥܺܐܕܶܗ ܢܚܰܓܶܐ ܒܰܒ̈ܢܳܬ ܩ̈ܳܠܐ ܕܰܒܥܰܡܠܐ ܕܩܰܕܺܝ̈ܫܰܘܗܝ ܡܶܬܬܢܺܝܚ ܘܚܳܕܶܐ ܘܰܠܥܺܐܕ̈ܶܐ ܕܩܽܘܠܳܣܰܝ̈ܗܽܘܢ ܡܝܰܩܰܪ ܘܰܡܟܰܠܶܠ: ܠܗܰܘ ܕܙܰܡܶܢ ܠܟܽܠܶܗ ܟܶܢܫܰܢ ܠܰܡܥܰܕܥܳܕܽܘ ܠܕܽܘܟܪܳܢܶܗ: ܗܳܐ ܒܟܽܠܳܗ̇ ܥܺܕܬܳܐ ܡܶܬܩܰܠܰܣ ܘܡܶܬܪܰܡܪܰܡ ܕܠܶܗ ܠܗܰܘ ܕܝܰܩܪܶܗ: ܢܰܘܕܶܐ ܘܰܢܫܰܒܰܚ ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܘܠܶܥ̈ܙܶܐ ܪ̈ܽܘܚܳܢܳܝܶܐ ܘܬܶܫܒ̈ܚܳܬܳܐ ܟܳܗ̈ܢܳܝܳܬܳܐ ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ ܕܢܰܨܺܝܚ ܫܽܘܦܪ̈ܶܐ ܡܳܪܝ ܓܰܒܪܺܐܶܝܠ ܪܺܝܫ ܟܳܗ̈ܢܶܐ ܡܥܰܕܥܕܺܝܢܰܢ: ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܒܥܰܡ̈ܠܐ ܩܫܰܝ̈ܳܐ ܘܒܰܡܥܰܙܝܳܢܽܘܬܶܗ ܕܥܰܠ ܨܠܰܘ̈ܳܬܳܐ ܘܫܰܗܪܳܐ ܕܠܰܝ̈ܠܰܝ ܐܺܝܡܳܡ: ܘܒܰܕܓܽܘܢ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܠܘܳܬܶܗ ܡܰܙܥܩܺܝܢܰܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܓܰܒܪܺܐܶܝܠ ܐܶܦܣܩܽܘܦܳܐ ܕܰܗܘܰܝܬ ܐܰܟܳܪܳܐ ܪܽܘܚܳܢܳܝܳܐ ܘܰܙܪܰܥܬ ܫܰܝܢܳܐ ܒܥܺܕܬܶܗ ܕܰܡܫܺܝܚܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܐܶܦܣܩܽܘܦܳܐ ܕܰܗܘܰܝܬ ܡܰܥܡܪܳܐ ܠܪܽܘܚܳܐ ܩܰܕܺܝܫܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܓܺܝܙܰܒܪܳܐ ܥܰܠ ܒܶܝܬܓܰܙܶܗ ܫܡܰܝܳܢܳܐ ܕܡܳܪܳܟ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܕܚܺܝܠܐ ܥܰܠ ܫܺܐܕ̈ܶܐ ܘܰܡܝܰܩܪܳܐ ܥܰܠ ܡܰܠܐܟ̈ܶܐ ܘܰܒܢܰܝ̈ܢܳܫܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܗܰܒܳܒܳܐ ܗܰܢܺܝ ܪܺܝܚܳܐ ܒܥܺܕܬܶܗ ܕܰܒܪܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܘܺܝܠܐ ܕܰܦܪܺܝܣ ܠܥܽܘܕܪܳܢܰܢ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܙܪܺܝܙܳܐ ܘܚܰܝܠܬܳܢܳܐ ܒܰܩܪܳܒܳܐ ܕܡܳܪܳܟ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܐܶܦܣܩܽܘܦܳܐ ܕܚܰܝܠܬܳܢܳܐܝ̣ܬ ܐܶܬܟܰܬܰܫܬ ܥܰܡ ܒܥܶܠܕ̈ܒܳܒܶܐ ܡܶܬܝܰܕ̈ܥܳܢܶܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܛܒܺܝܒܳܐ ܒܟܽܠܗܽܘܢ ܩܰܕܺܝ̈ܫܶܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܝܳܗܽܘܒܳܐ ܕܟܽܠܗܽܘܢ ܫܽܘ̈ܟܳܢܶܐ ܐܠܰܗܳܝ̈ܶܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܟܶܢܳܪܳܐ ܚܠܐܷ ܢܶܥ̈ܡܳܬܳܐ ܠܥܺܕܬܳܐ ܩܰܕܺܝܫܬܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܠܡܺܐܢܳܐ ܘܢܰܘܚܳܐ ܠܟܽܠܗܽܘܢ ܡܗܰܝ̈ܡܢܶܐ ܬܪ̈ܺܝܨܰܝ ܫܽܘܒܚܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܡܳܐܢܳܐ ܕܰܟܝܳܐ ܘܥܶܡܪܰܬ݀ ܒܳܟ ܪܽܘܚܳܐ ܕܩܽܘܕܫܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܣܳܦܪܳܐ ܡܗܺܝܪܳܐ ܕܰܐܠܶܦܬ ܐܽܘܪܚܳܐ ܕܚܰܝ̈ܶܐ ܠܰܒܢܰܝ̈ܢܳܫܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܥܰܒܕܳܐ ܛܳܒܳܐ ܘܰܦܠܰܚܬ ܒܟܰܪܡܶܗ ܕܡܳܪܳܟ ܦܽܘܠܚܳܢܳܐ ܕܙܰܕܺܝܩܽܘܬܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܦܺܝܪܡܳܐ ܡܪܰܥܝܳܢܳܐ ܘܒܳܟ ܐܶܬܪܰܥܺܝ ܡܳܪܳܟ ܒܥܳܠܡܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܨܠܰܘ̈ܳܬܳܟ ܫܡܺܝ̈ܥܳܬܳܐ ܐܶܢܶܝܢ ܩܕܳܡ ܬܪܽܘܢܳܘܣ ܕܰܐܠܳܗܽܘܬܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܩܽܘܒܰܪܢܺܝܛܺܝ ܚܰܟܺܝܡܳܐ ܘܰܐܥܕܺܝܬ ܠܐܠܦܰܢ ܡ̣ܶܢ ܢܽܘܘܳܓܳܐ ܕܰܦܠܺܝܓܽܘܬܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܪܳܥܝܳܐ ܥܺܝܪܳܐ ܘܰܚܦܺܝܛܳܐ ܠܽܘܩܒܰܠ ܕܺܐܒ̈ܶܐ ܡܶܬܝܰܕ̈ܥܳܢܶܐ ܕܶܐܪ̈ܶܣܺܝܣ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܫܽܘܪܳܐ ܪܳܡܳܐ ܠܥܺܕܬܶܗ ܕܰܒܪܳܐ ܡܫܺܝܚܳܐ: ܠܳܟ ܛܽܘܒܰܝܟ ܡܳܪܝ ܓܰܒܪܺܐܶܝܠ ܕܰܗܘܰܝܬ ܬܡܺܝܗܳܐ ܠܟܽܠܗܽܘܢ ܚܰܙܳܝܰܝ̈ܟ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܰܢ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܳܟ ܒܕܽܘܟܪܳܢܶܗ ܕܡܳܪܝ ܓܰܒܪܺܐܶܝܠ ܕܒܰܨܠܰܘ̈ܳܬܶܗ ܘܕܰܬܪܶܥܣܰܪ ܐܠܰܦܰܝ̈ܳܐ ܚܰܒܪ̈ܰܘܗܝ ܘܕܰܬܡܳܢܶܡܳܐܐ ܡܶܨܪ̈ܳܝܶܐ: ܘܰܕܡܳܪܝ ܫܡܽܘܐܶܝܠ ܘܡܳܪܝ ܫܶܡܥܽܘܢ ܟܢܰܘ̈ܳܬܶܗ: ܕܬܶܗܘܶܐ ܠܐܒܺܝ̈ܠܐ ܡܒܰܝܳܐܢܳܐ: ܠܰܒܬܽܘ̈ܠܐ ܡܢܰܛܪܳܢܳܐ: ܠܰܓܡܺܝܪ̈ܶܐ ܡܩܰܕܫܳܢܳܐ: ܠܕܰܝܪ̈ܳܝܶܐ ܡܚܰܝܠܳܢܳܐ: ܠܗܶܪ̈ܳܬܳܐ ܡܕܰܥܟܳܢܳܐ: ܠܠܽܘ̈ܬܳܟܶܐ ܡܛܰܠܩܳܢܳܐ: ܠܙܰܕܺܝ̈ܩܶܐ ܡܢܰܛܪܳܢܳܐ: ܠܚܰܛܳܝ̈ܶܐ ܡܰܦܢܝܳܢܳܐ ܠܛܳܥܰܝ̈ܳܐ ܡܗܰܕܝܳܢܳܐ: ܠܝܰܬܡ̈ܶܐ ܡܪܰܒܝܳܢܳܐ: ܠܟܰܦ̈ܢܶܐ ܡܣܰܒܥܳܢܳܐ: ܠܠܰܘ̈ܛܳܬܳܐ ܡܒܰܛܠܳܢܳܐ: ܠܡܶܣ̈ܟܺܢܶܐ ܙܳܝܽܘܢܳܐ: ܠܢܽܘܟܪ̈ܳܝܰܝ ܠܕܶܚܠܬܳܟ ܡܒܰܝܬܳܢܳܐ: ܠܣܳܩܽܘܪ̈ܰܝܢ ܡܫܰܝܢܳܢܳܐ: ܠܥܳܫܽܘ̈ܩܰܝܢ ܡܒܰܕܪܳܢܳܐ: ܠܦܳܬܽܘܪ̈ܰܝܢ ܡܠܺܝ ܟܽܠ ܛܳܒ̈ܳܬܳܐ: ܠܰܨܠܰܘ̈ܳܬܰܢ ܥܒܶܕ ܫܡܺܝ̈ܥܳܬܳܐ: ܠܩܳܠܰܝ̈ܢ ܥܢܺܝ ܒܚܰܕܽܘܬܳܐ: ܠܪ̈ܰܚܡܰܝܟ ܫܰܕܰܪ ܠܰܢ ܒܰܐܡܺܝܢܽܘܬܳܐ: ܘܰܠܫ̈ܶܐܠܳܬܰܢ ܦܰܢܳܐ ܒܒܰܣܺܝܡܽܘܬܳܐ: ܠܬܰܘܕܺܝܬܰܢ ܩܰܒܶܠ ܒܰܡܪܰܚܡܳܢܽܘܬܳܟ ܘܰܠܥܰܢܺܝ̈ܕܰܝܢ ܚܰܣܳܐ ܒܛܰܝܒܽܘܬܳܟ: ܘܰܠܟܽܠܰܢ ܐܰܫܘܳܐ ܠܰܢ ܠܡܰܠܟܽܘܬܳܟ ܒܝܰܘܡܳܐ ܪܰܒܳܐ ܕܡܶܬܓܰܠܝܳܢܽܘܬܳܟ ܘܥܰܡ ܩܰܕܺܝ̈ܫܶܐ ܕܰܥܒܰܕܘ ܨܶܒܝܳܢܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܡܥܰܠܝܳܐ ܒܛܽܘܒܬܳܢܽܘܬܶܗ ܘܠܐ ܡܶܬܕܰܪܟܳܢܳܐ ܒܰܐܠܳܗܽܘܬܶܗ: ܠܗܰܘ ܕܗ̣ܽܘ ܠܶܗ ܣܰܝܶܟ ܟܰܕ ܠܐ ܡܶܣܬܰܝܟܳܢܰܐ ܗ̱ܘ ܒܺܐܝܬܽܘܬܶܗ: ܠܗܰܘ ܕܰܓܒܳܐ ܠܥܰܒܕܶܗ ܡܳܪܝ ܓܰܒܪܺܐܶܝܠ ܡ̣ܶܢ ܡܰܘܠܳܕܶܗ ܘܚܰܝܠܶܗ ܒܰܐܓܽܘܢܳܐ ܠܽܘܩܒܰܠ ܒܺܝܫܳܐ ܒܥܶܠܕܰܪܳܐ: ܘܗܳܐ ܥܺܕܬܳܐ ܘܝܰܠܕܶܝ̈ܗ̇ ܚܳܕܝܳܐ ܒܥܰܕܥܺܐܕܶܗ: ܘܙܳܡܪܳܐ ܬܶܫܒܽܘܚܬܳܐ ܠܡܳܪܝܳܐ ܡܟܰܠܠܳܢܶܗ: ܒܗܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܒܟܽܠ ܕܳܪ̈ܺܝܢ ܒܟܺܐܢ̈ܶܐ ܕܪܰܚܡܽܘܟ ܡܶܬܢܰܨܰܚ ܐܰܢ̱ܬ: ܘܰܒܕܽܘܒܳܪ̈ܶܐ ܕܙܰܕܺܝ̈ܩܶܐ ܡܶܫܬܰܒܰܚ ܐܰܢ̱ܬ: ܗ̇ܰܘ ܕܰܒܩܶܛܠܐ ܕܣܳܗ̈ܕܶܐ ܘܡܰܘ̈ܕܝܳܢܶܐ ܡܶܬܪܰܥܶܐ ܐܰܢ̱ܬ: ܗ̇ܰܘ ܕܰܒܕܽܘܡܝܳܐ ܫܠܺܝܚܳܝܳܐ ܐܶܬܢܰܨܰܚ ܩܕܳܡܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܓܰܒܪܺܐܶܝܠ ܐܶܦܣܩܽܘܦܳܐ: ܗܳܢܳܐ ܕܰܙܥܽܘܪ ܦܽܘܡܰܢ ܠܩܽܘܠܳܣܰܘ̈ܗܝ: ܘܰܒܨܺܝܪ ܠܶܫܳܢܰܢ ܕܢܶܫܬܰܥܶܐ ܦܰܐܝ̈ܳܬܶܗ: ܘܠܐ ܣܳܦܩܳܐ ܬܰܪܥܺܝܬܰܢ ܠܡܶܚܫܰܒ ܡܝܰܬܪ̈ܳܬܶܗ: ܬܰܐܓܳܪܳܐ ܚܰܟܺܝܡܳܐ ܕܙܰܒܶܢ ܩܶܢܝܳܢܶܗ ܘܰܩܢܳܐ ܣܺܝܡܬܳܐ ܫܡܰܝܳܢܺܝܬܳܐ ܠܢܰܦܫܶܗ: ܙܡܺܝܢܳܐ ܡܛܰܝܒܳܐ ܠܡܶܫܬܽܘܬܳܐ ܕܶܐܙܕܰܡܰܢ ܠܳܗ̇ ܡܶܛܽܠ ܡܝܰܬܪ̈ܶܐ ܕܺܝܠܶܗ: ܐܰܬܠܺܝܛܳܐ ܢܰܨܺܝܚܳܐ ܕܰܒܚܰܫ̈ܶܐ ܕܰܩܢܽܘܡܶܗ ܫܩܰܠ ܙܳܟܽܘܬܳܐ ܕܢܶܨܚܳܢܶܗ: ܡܰܠܦܳܢܳܐ ܡܗܺܝܪܳܐ ܒܬܶܐܘܳܪ̈ܺܝܰܐܣ ܐܠܰܗܳܝ̈ܳܬܳܐ ܕܰܐܠܶܦ ܠܬܰܠܡܺܝ̈ܕܰܘܗܝ ܕܰܢܡܰܪܽܘܢ ܒܝܽܘܠܦܳܢܶܗ: ܫܪܳܓܳܐ ܢܰܗܺܝܪܳܐ ܕܠܐ ܙܳܥܰܪ ܢܽܘܗܪܳܐ ܕܠܰܡܦܺܐܕܶܗ ܕܰܒܡܶܫܚܳܐ ܕܙܰܕܺܝܩܽܘܬܳܐ ܡܶܬܢܰܒܪܰܫ ܗܘܳܐ ܕܰܠܩܶܗ: ܗܳܢܳܐ ܕܟܽܠܰܢ ܢܦܺܝܣ ܠܡܳܪܝܳܐ ܒܕܽܘܟܪܳܢܶܗ ܕܢܶܬܶܠ ܠܰܢ ܕܰܒܕܽܘܒܳܪ̈ܶܐ ܕܟܰܝ̈ܳܐ ܢܝܰܩܰܪ ܠܝܰܘܡܳܐ ܕܥܰܕܥܺܐܕܶܗ ܠܰܘ ܒܩܽܘܠܳܣ̈ܶܐ ܕܡ̈ܶܠܐ: ܐܶܠܐ ܒܣܳܥܽܘܪܽܘܬܳܐ ܕܰܥܒ̈ܳܕܶܐ ܛܳܒ̈ܶܐ: ܠܰܘ ܒܰܠܒܽܘ̈ܫܶܐ ܫܺܐܪ̈ܳܝܶܐ ܕܠܐ ܦܳܐܷܝܢ ܐܶܠܐ ܒܚܰܝ̈ܶܐ ܢܰܟ̈ܦܶܐ ܘܰܒܗܺܝ̈ܠܐ ܢܶܗܘܶܐ ܡܕܰܡ̈ܝܳܢܶܐ ܕܡܽܘܟܳܟܶܗ: ܛܰܢܳܢ̈ܶܐ ܫܰܦܺܝܪ̈ܶܐ ܕܢܶܛܰܢ ܒܥܰܡ̈ܠܐ ܕܰܡܝܰܬܪ̈ܳܬܶܗ: ܘܢܶܬܒܢܶܐ ܥܰܠ ܫܶܬܶܐܣܬܳܐ ܕܰܫܪܳܪܶܗ: ܐܰܝܟܰܢܳܐ ܕܢܶܬܡܰܢܰܥ ܥܰܡܶܗ ܠܚܰܝ̈ܶܐ ܕܰܢܛܺܝܪܺܝܢ ܠܶܗ: ܘܰܠܛܽܘ̈ܒܶܐ ܫܡܰܝ̈ܳܢܶܐ ܕܰܡܠܺܝܟܺܝܢ ܠܶܗ: ܚܢܰܢ ܘܥܰܢܺܝ̈ܕܰܝܢ ܢܶܫܬܘܶܐ ܕܥܰܡܶܗ ܢܶܫܬܰܘܬܰܦ ܒܦܶܓܥܳܐ ܗ̇ܰܘ ܡܚܰܕܝܳܢܳܐ ܕܩܰܕܺܝ̈ܫܶܐ ܡܶܬܟܰܠܠܺܝܢ ܒܶܗ: ܘܟܽܠܰܢ ܒܰܚܕܳܐ ܬܶܐܘܰܛܪܽܘܢ ܝܰܡܺܝܢܳܝܬܳܐ ܢܶܬܒܰܣܰܡ ܥܰܡܶܗ ܘܬܰܡܳܢ ܪܽܘܚܳܢܳܐܝ̣ܬ ܢܫܰܒܰܚ ܘܰܢܪܰܡܪܶܡ ܠܳܟ ܡܫܺܝܚܳܐ ܡܟܰܠܶܠ ܠܰܪ̈ܚܽܘܡܰܘܗܝ: ܘܠܐܒܽܘܟ ܡܝܰܩܰܪ ܠܰܡܫܰܒ̈ܚܳܢܰܘܗܝ: ܘܰܠܪܽܘܚܳܟ ܩܰܕܺܝܫܳܐ ܡܚܰܕܶܐ ܠܣܳܓܽܘ̈ܕܰܘܗܝ ܘܰܚܢܰܢ ܘܥܰܢܺܝ̈ܕܰܝܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܛܟܣܐ ܕܥܠ ܩܕܝܫܐ ܡܪܝ ܣܐܘܝܪܐ ܦܛܪܝܪܟܐ ܕܐܢܛܝܘܟܝܐ

 

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ ܕܥܰܡ ܝܺܕܰܥܬܳܐ ܪܽܘܚܳܢܳܝܬܳܐ ܘܣܽܘܟܳܠܐ ܐܠܰܗܳܝܳܐ: ܢܝܰܩܰܪ ܘܰܢܫܰܡܠܐܷ ܠܥܺܐܕܶܗ ܕܓܰܒܝܳܐ ܡܳܪܝ ܣܶܐܘܺܝܪܶܐ: ܘܗܰܒܠܰܢ ܕܢܶܪܕܶܐ ܒܥܶܩ̈ܒܳܬܶܗ ܘܢܶܫܬܰܪܰܪ ܘܢܶܬܗܰܕܰܪ ܒܳܗ̇ ܒܡܰܠܟܽܘܬܶܗ ܢܶܬܚܰܟܰܡ ܘܢܶܬܗܰܕܶܐ: ܒܡܶܠܰܘ̈ܗܝ ܩܰܕܺܝ̈ܫܳܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܟܝܳܢܳܐ ܪܳܡܳܐ ܘܰܡܥܰܠܝܳܐ ܘܰܫܒܺܝܚܳܐ ܘܰܡܫܰܡܠܝܳܐ ܒܺܐܝܬܽܘܬܶܗ: ܐ̱ܪܳܙܳܐ ܟܰܣܝܳܐ ܘܠܐ ܡܶܬܦܰܫܩܳܢܳܐ: ܚܰܝܠܐ ܥܰܫܺܝܢܳܐ ܘܠܐ ܡܶܬܕܰܪܟܳܢܳܐ: ܠܗܰܘ ܢܽܘܗܪܳܐ ܓܰܐܝܳܐ ܘܠܐ ܡܶܬܩܰܪܒܳܢܳܐ: ܕܶܢܚܳܐ ܓܢܺܝܙܳܐ ܘܠܐ ܡܶܬܦܰܚܡܳܢܳܐ: ܐܽܘܣܺܝܰܐ ܣܓܺܝܕܬܳܐ ܕܠܐ ܡܶܣܬܰܝܟܳܐ: ܘܰܠܟܽܠ ܡܣܰܝܟܳܐ ܐܠܰܗܽܘܬܳܐ ܡ̇ܰܢ ܡܰܥܒܕܰܬ݀ ܡܶܢܟܽܠ: ܘܡܳܪܽܘܬܳܐ ܦܫܺܝܛܬܳܐ ܘܰܥܦܺܝܩܰܬ݀ ܠܟܽܠ: ܛܳܒܽܘܬܳܐ ܡܥܰܠܰܝܬܳܐ ܘܡܰܥܬܪܰܬ݀ ܠܟܽܠ: ܗ̇ܳܝ ܕܰܠܥܶܠ ܡ̣ܶܢ ܟܽܠ ܐܽܘܣܺܝ̈ܰܐܣ ܐܺܝܬܶܝܗ̇: ܘܒܰܡܣܰܝܟܽܘܬܳܐ ܕܰܫܡܳܗ̈ܶܐ ܠܐ ܡܶܬܚܰܫܒܳܐ: ܐܰܒܳܐ ܡ̇ܰܢ ܡܰܢܗܪܳܢܳܐ ܘܫܶܡܫܳܐ ܕܡܶܬܝܰܕ̈ܥܳܢܶܐ: ܒܪܳܐ ܕܶܝܢ ܨܶܡܚܳܐ ܘܢܽܘܗܪܳܐ ܕܡܶܬܪ̈ܰܓܫܳܢܶܐ: ܪܽܘܚܳܐ ܩܰܕܺܝܫܳܐ ܙܰܠܺܝܩܳܐ ܕܫܽܘܒܚܳܐ ܘܡܰܒܽܘܥܳܐ ܕܟܽܠܳܗ̇ ܛܳܒܽܘܬܳܐ: ܗ̇ܰܘ ܕܡܶܢܶܗ ܡܶܬܦܰܠܰܓ ܟܽܠ ܫܽܘ̈ܟܳܢܶܐ ܬܡܺܝ̈ܗܶܐ ܘܰܐܠܳܗܳܝ̈ܶܐ ܠܗ̇ܳܢܽܘܢ ܕܰܒܗܽܘܢ: ܘܗܳܐ ܐܰܒܰܥ ܡ̣ܶܢ ܟܰܪܣܳܐ ܕܡܳܪܝ ܣܶܐܘܺܝܪܶܐ ܝܽܘܠܦܳܢܳܐ ܘܚܶܟܡܬܳܐ ܘܣܽܘܟܳܠܐ ܘܫܶܦܥܳܐ ܕܪܽܘܚܳܐ ܩܰܕܺܝܫܳܐ: ܘܰܡܠܐܴ ܠܥܺܕܬܳܐ ܩܰܕܺܝܫܬܳܐ ܡ̣ܶܢ ܬܽܘܪ̈ܓܳܡܶܐ ܕܺܝܠܶܗ ܐܠܰܗܳܝ̈ܶܐ: ܕܠܶܗ ܠܰܡܚܰܝܠܳܢܶܗ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܫܽܘܒܚܳܐ ܘܺܐܝܩܳܪܳܐ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܬܽܘܡܳܝܳܐ ܕܒܰܡܩܰܕܡܽܘܬ ܝܺܕܰܥܬܳܐ ܐܠܰܗܳܝܬܳܐ ܘܠܐ ܡܶܬܡܰܠܠܳܢܺܝܬܳܐ ܘܠܐ ܡܶܬܗܰܘܢܳܢܺܝܬܳܐ: ܓܒܰܝܬ ܠܰܫܠܺܝ̈ܚܰܝܟ ܩܰܕܺܝ̈ܫܶܐ ܘܒܺܐܝܕܰܝ̈ܗܽܘܢ ܐܰܦܢܺܝܬ ܠܥܳܡܰܪܬܳܐ ܠܣܶܓܕܬܳܐ ܕܶܝܢ ܕܰܬܠܺܝܬܳܝܽܘܬܳܐ ܡܫܰܒܰܚܬܳܐ: ܗ̇ܰܘ ܕܒܰܣܒܰܪܬܳܟ ܐܶܘܢܓܶܠܳܝܬܳܐ: ܐܶܫܬܰܘܕܺܝܬ ܘܶܐܡܰܪܬ ܕܟܽܠ ܐܰܝܢܳܐ ܕܰܡܗܰܝܡܶܢ ܒܺܝ ܢܰܗܪ̈ܰܘܳܬܳܐ ܕܡܰܝ̈ܳܐ ܚܰܝ̈ܶܐ ܢܶܪܕܽܘܢ ܡ̣ܶܢ ܟܰܪܣܶܗ: ܘܥܰܠ ܗ̇ܳܝ ܕܒܰܥܒܳܕܳܐ ܫܰܡܠܺܝܬ ܠܘܳܬ ܚܰܣܝܳܐ ܘܪܺܝܫ ܟܳܗ̈ܢܶܐ: ܡܳܪܝ ܣܶܐܘܺܝܪܶܐ: ܗܳܢܳܐ ܕܰܬܪܺܝܨܳܐܝ̣ܬ ܗܰܝܡܶܢ ܒܟܳ ܘܒܰܐܒܽܘܟ ܘܰܒܪܽܘܚܳܟ ܩܰܕܺܝܫܳܐ ܚܕܳܐ ܐܺܝܬܽܘܬܳܐ ܠܐ ܡܶܬܦܰܠܓܳܢܺܝܬܳܐ: ܚܰܕ ܨܶܒܝܳܢܳܐ ܠܐ ܡܶܣܬܰܕܩܳܢܳܐ: ܚܰܕ ܫܽܘܠܛܳܢܳܐ ܫܰܘܝܳܐ ܡܳܪܳܢܳܝܳܐ: ܗܳܢܳܐ ܕܰܙܥܽܘܪ ܗ̣ܽܘ ܦܽܘܡܰܢ ܠܩܽܘܠܳܣܰܘ̈ܗܝ ܘܠܐ ܣܳܦܩܳܐ ܡܶܠܬܰܢ ܠܬܰܫܥܺܝܬܶܗ: ܘܠܐ ܐܳܚܕܳܐ ܬܰܪܥܺܝܬܰܢ ܠܡܶܚܫܰܒ ܠܰܡܝܰܬܪ̈ܳܬܶܗ ܕܗܳܢܳܐ ܕܰܐܝܟ ܝܽܘܩܢܳܐ ܦܰܐܝܳܐ ܣܒܺܝܣܺܝܢ ܫܽܘܦܪ̈ܰܘܗܝ ܘܰܐܝܟ ܫܶܡܫܳܐ ܗܕܺܝܪܳܐ ܢܳܗܪܺܝܢ ܕܽܘܒܳܪ̈ܰܘܗܝ: ܘܰܐܝܟ ܘܰܪܕܳܐ ܒܰܣܺܝܡ ܪܺܝܚܳܐ ܣܽܘܥܪ̈ܳܢܰܘܗܝ ܘܰܐܝܟ ܥܰܬܺܝܪܳܐ ܘܥܰܒܕܳܐ ܛܳܒܳܐ ܣܰܟܺܝ ܠܡܳܪܶܗ ܟܰܕ ܠܐ ܚܳܐܶܒ ܒܰܨܠܽܘܬܳܐ: ܟܰܕ ܐܰܡܺܝܢ ܒܫܰܗܪܳܐ: ܟܰܕ ܠܐ ܡܶܬܩܰܛܥܳܐ ܠܶܗ ܒܬܶܫܡܫܬܳܐ ܟܰܕ ܗܰܢܺܝܽܐܘܬܳܐ ܚܫܰܒ ܠܨܰܘܡܳܐ: ܟܰܕ ܐܰܓܽܘܢܳܐ ܥܰܡ ܒܺܝܫܳܐ ܣܳܕܰܪ ܗܘܳܐ: ܟܰܕ ܚܳܣܶܠ ܦܽܘܡܶܗ ܡ̣ܶܢ ܪ̈ܓܺܝܓܳܬܳܐ ܥܳܒܽܘܪ̈ܝܳܬܳܐ: ܟܰܕ ܠܶܗ ܡܶܐܟܽܘܠܬܳܐ ܫܚܺܝܡܬܳܐ: ܟܰܕ ܐܰܓܽܘܢܳܐ ܥܒܰܕ ܠܽܘܩܒܰܠ ܟܽܠ ܚܰܫ̈ܶܐ ܕܰܚܛܺܝܬܳܐ: ܟܰܕ ܒܡܰܟܺܝܟܽܘܬܳܐ ܡܨܰܒܶܬ ܠܰܩܢܽܘܡܶܗ: ܟܰܕ ܛܶܒ̈ܶܐ ܕܫܽܘܦܪ̈ܰܘܗܝ ܠܟܽܠ ܐܰܬܰܪ ܦܳܪܚܺܝܢ: ܟܰܕ ܝܽܘܬܪ̈ܳܢܶܐ ܣܰܓܺܝ̈ܶܐܐ ܢܳܒܥܺܝܢ ܡܶܢܶܗ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܟܰܕ ܒܰܣܝܳܡܰܘ̈ܗܝ ܒܚܺܝܪ̈ܶܐ ܠܟܽܠ ܐ̱ܢܳܫ ܐܰܬܗܰܪ: ܟܰܕ ܘܰܥܶܕ ܠܰܣܢܺܝ̈ܩܶܐ ܕܢܶܥܬܪܽܘܢ ܡܶܢܶܗ: ܟܰܕ ܬܰܪ̈ܥܶܐ ܦܳܬܰܚ ܠܒܳܝ̈ܫܶܐ ܘܡܶܣܟܺܢ̈ܶܐ: ܘܢܶܬܬܰܪܣܽܘܢ ܡܶܢܶܗ: ܟܰܕ ܟܽܠܢܳܫ ܡܶܛܽܠܳܬܶܗ ܠܡܳܪܶܗ ܡܫܰܒܰܚ ܗܘܳܐ: ܘܒܰܕܓܽܘܢ ܐܰܝܟ ܪܰܒܒܰܝܬܳܐ ܚܰܟܺܝܡܳܐ ܐܶܬܗܰܝܡܰܢ ܥܰܠ ܟܢܰܘ̈ܳܬܶܗ ܘܰܐܬܗܰܪ ܒܩܳܝܽܘܡܽܘܬܶܗ ܠܡܰܠܐܟ̈ܶܐ ܘܠܰܒܢܰܝ̈ܢܳܫܳܐ: ܘܚܰܝܠܬܳܢܳܐܝ̣ܬ ܘܰܩܪܰܒܬܳܢܳܐܝ̣ܬ ܢܛܰܪ ܠܥܳܢ̈ܳܐ ܡܠܺܝܠܬܳܐ ܕܶܐܬܓܰܥܠܰܬ݀ ܠܶܗ: ܐܶܡܰܬܝ ܠܡܰܠܦܳܢܽܘܬܳܐ ܐܠܰܗܳܝܬܳܐ ܡܳܬܰܚ ܗܘܳܐ: ܐܶܡܰܬܝ ܕܝܰܡܺܝܢܶܗ ܠܰܟܬܺܝ̈ܒܳܬܳܐ ܦܳܫܶܛ ܗܘܳܐ: ܐܶܡܰܬܝ ܕܫܽܘܡܠܳܝܳܐ ܕܬܶܐܘܳܠܳܘܓܺܝܰܐ ܡܰܠܶܦ ܗܘܳܐ: ܐܶܡܰܬܝ ܕܘܳܠܝܳܐܝ̣ܬ ܥܰܠ ܒܺܐܡܰܐ ܡܬܰܪܓܶܡ ܗܘܳܐ: ܐܶܡܰܬܝ ܕܥܰܡ ܐܶܪ̈ܶܣܺܝܣ ܩܪܳܒܳܐ ܣܳܕܰܪ ܗܘܳܐ: ܐܶܡܰܬܝ ܕܶܝܢ ܕܚܰܝܠܬܳܢܳܐ ܚܠܳܦ ܗܰܝܡܳܢܽܘܬܳܐ ܡܶܬܟܰܬܰܫ ܗܘܳܐ: ܐܶܡܰܬܝ ܕܛܽܘ̈ܒܶܐ ܫܡܰܝ̈ܳܢܶܐ ܠܰܡܗܰܝ̈ܡܢܶܐ ܡܳܠܶܟ ܗܘܳܐ: ܐܶܡܰܬܝ ܕܝܽܘܬܪ̈ܳܢܶܐ ܣܰܓܺܝ̈ܶܐܐ ܠܰܬܪ̈ܺܝܨܰܝ ܫܽܘܒܚܳܐ ܝܳܗܶܒ ܗܘܳܐ: ܐܶܡܰܬܝ ܕܰܐܝܟ ܩܽܘܒܰܪܢܺܝܛܺܝ ܚܰܟܺܝܡܳܐ ܠܐܠܦܳܗ̇ ܕܥܺܕܬܳܐ ܡ̣ܶܢ ܟܺܐܡܽܘ̈ܢܶܐ ܡܕܰܠܐܷ ܗܘܳܐ: ܐܶܡܰܬܝ ܕܰܒܚܰܠܝܽܘܬ ܝܽܘܠܦܳܢ̈ܶܐ ܐܠܰܗܳܝ̈ܶܐ ܕܡܰܠܶܦ ܗܘܳܐ: ܐܶܡܰܬܝ ܕܰܒܒܽܘܪ̈ܟܳܬܳܐ ܫܡܰܝܳܢ̈ܝܳܬܳܐ ܕܡ̣ܶܢ ܦܽܘܡܶܗ ܚܰܣܝܳܐ ܘܩܰܕܺܝܫܳܐ ܒܥܽܘܗܕܳܢܳܐ ܕܰܐܒܳܗ̈ܳܬܳܐ ܒܚܺܝܪ̈ܶܐ ܒܘܳܠܺܝܬܳܐ ܙܶܕܩܳܝܬܳܐ ܠܳܗ̇ ܡܚܰܘܶܐ ܗܘܳܐ: ܒܬܰܟܫ̈ܦܳܬܳܐ ܕܡܶܛܽܠܳܬܳܗ̇ ܡܩܰܪܶܒ ܗܘܳܐ: ܒܗܰܢܺܝܽܐܘܬܳܐ ܕܡܶܠܰܘ̈ܗܝ ܚܰܝ̈ܳܬܳܐ: ܒܕܽܘܒܳܪ̈ܰܘܗܝ ܫܒܺܝ̈ܚܶܐ: ܒܰܐܓܽܘ̈ܢܰܘܗܝ ܬܡܺܝ̈ܗܶܐ: ܒܒܳܥ̈ܘܳܬܳܐ ܕܺܝܠܶܗ ܬܟܺܝ̈ܒܳܬܳܐ: ܒܛܽܘܪ̈ܳܦܰܘܗܝ ܣܰܓܺܝ̈ܶܐܐ: ܒܢܶܣܝܽܘ̈ܢܰܘܗܝ ܣܒܺܝ̈ܣܶܐ: ܘܡܶܛܽܠ ܗܳܕܶܐ ܥܺܕܬܳܐ ܩܰܕܺܝܫܬܳܐ ܠܝܰܘܡܳܐ ܕܥܰܕܥܺܐܕܶܗ ܡܝܰܩܪܳܐ ܘܰܠܘܳܬܶܗ ܟܰܕ ܡܰܙܥܩܳܐ ܘܳܐܡܪܳܐ: ܠܳܟ ܛܽܘܒܰܝܟ ܚܰܣܝܳܐ ܡܳܪܝ ܣܶܐܘܺܝܪܶܐ: ܐ̱ܪܳܙܳܐ ܪܰܒܳܐ ܘܪܳܡܳܐ ܕܰܒܣܰܘ̈ܟܶܐ ܕܰܨܠܺܝܒ ܢܽܘܗܪܳܐ ܐܰܩܶܢܬ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܒܶܝܬ ܡܰܥܡܪܳܐ ܕܪܽܘܚܳܐ ܩܰܕܺܝܫܳܐ: ܕܶܐܙܕܰܡܰܪ̈ܝ ܒܳܟ ܩܺܝ̈ܢܳܬܳܐ ܕܶܝܢ ܕܰܬܪܺܝܨܽܘܬ ܫܽܘܒܚܳܐ: ܠܳܟ ܛܽܘܒܰܝܟ ܚܰܣܝܳܐ ܩܰܕܺܝܫܳܐ ܡܳܪܝ ܣܶܐܘܺܝܪܶܐ ܓܺܝܙܰܒܪܳܐ ܚܰܟܺܝܡܳܐ ܕܓܰܙܳܐ ܕܡܳܪܳܟ ܦܬܰܚܬܳܗ̇ ܩܕܳܡ ܢܳܣܽܘ̈ܒܶܐ ܬܪ̈ܺܝܨܶܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܰܝܪܳܐ ܕܐ̱ܪ̈ܳܙܶܐ ܐܠܰܗܳܝ̈ܶܐ: ܕܰܒܝܽܘܠܦܳܢܳܟ ܐܶܬܦܰܫܰܩ ܟܽܠܗܽܘܢ ܩܽܘܕ̈ܫܶܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܗܰܡܢܺܝܟܳܐ ܫܒܺܝܚܳܐ ܕܰܒܨܰܘܪܳܗ̇ ܕܥܺܕܬܳܐ ܐܰܦܪܶܓܬ ܘܰܒܨܶܡ̈ܚܶܐ ܕܡܰܠܦܳܢܽܘܬܳܟ ܠܝܰܠܕܶܝ̈ܗ̇ ܐܰܦܨܰܚܬ ܘܚܰܕܺܝܬ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܘܰܪܕܳܐ ܒܰܣܺܝܡ ܪܺܝܚܳܐ ܕܰܠܢܰܦ̈ܫܳܬܳܐ ܕܰܒܢܰܝ̈ܢܳܫܳܐ ܪܺܝܚܳܐ ܕܺܝܕܰܥܬܳܐ ܐܠܰܗܳܝܬܳܐ ܡܠܰܝܬ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܙܰܝܬܳܐ ܡܫܰܒܚܳܐ ܕܥܰܠ ܬܰܦܳܐ ܕܡܰܥܡܽܘܕܺܝܬܳܐ ܐܶܬܢܨܶܒ: ܘܰܒܕܽܘܗܳܢܶܗ ܐܰܕܗܶܢ ܠܪܺܝܫܳܐ ܘܰܠܕܰܩܢܳܐ ܕܽܐܘܡܬܳܐ ܐܳܪܬܳܕܽܘܟܣܳܝܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܚܽܘܬܪܳܐ ܘܫܽܘܒܗܳܪܳܐ ܕܰܪ̈ܕܺܝܦܶܐ ܕܒܰܢ̈ܩܳܫܰܝ ܢܶܥ̈ܡܳܬܳܐ ܚܰܠܝ̈ܳܬܳܐ ܐܰܥܪܶܩ ܠܪ̈ܳܕܽܘܦܶܐ ܡ̣ܶܢ ܡܰܪܥܺܝܬܶܗ: ܠܳܟ ܛܽܘܒܰܝܟ ܚܰܣܝܳܐ ܡܳܪܝ ܣܶܐܘܺܝܪܶܐ ܛܰܒܥܳܐ ܛܳܒܳܐ ܕܰܒܬܳܓܶܗ ܕܡܰܠܟܳܐ ܫܡܰܝܳܢܳܐ ܩܒܺܝܥ ܐܰܢ̱ܬ: ܘܰܠܣܳܢ̈ܝܰܝ ܫܪܳܪܳܐ ܒܙܰܗܪܳܐ ܗ̇ܰܘ ܕܰܫܪܳܪܶܗ ܪܕܰܦ ܐܶܢܽܘܢ ܕܡ̣ܶܢ ܥܺܕܬܳܐ ܩܰܕܺܝܫܬܳܐ ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܝܽܘܩܢܳܐ ܕܡܰܠܦܳܢܽܘܬܳܐ ܐܠܰܗܳܝܬܳܐ: ܕܰܠܣܰܩܽܘ̈ܒܠܳܝܶܐ ܒܬܶܡܗܳܐ ܐܰܩܺܝܡܬ: ܕܟܰܕ ܚܳܙܶܝܢ ܗܘܰܘ ܕܰܐܝܟ ܐܰܝܢܳܐ ܡܰܒܽܘܥܳܐ ܕܚܰܝ̈ܶܐ ܕܝܽܘܠܦܳܢܳܐ ܪܽܘܚܳܢܳܝܳܐ ܡ̣ܶܢ ܣܶܦ̈ܘܳܬܶܗ ܕܰܟܝ̈ܳܬܳܐ ܡܰܒܰܥ ܗܘܳܐ ܘܰܒܥܽܘ̈ܢܝܳܬܶܗ ܗ̣ܶܢܶܝܢ ܬܡܺܝ̈ܗܳܬܳܐ ܒܬܽܘܪ̈ܓܳܡܰܘܗܝ ܡܥܰܕܥ̈ܕܳܢܶܐ: ܗ̇ܳܢܽܘܢ ܕܰܬܡܳܢܶܡܳܐܐ ܬܽܘܪ̈ܓܳܡܶܐ ܗܳܘܶܝܢ ܘܬܽܘܒ ܐܰܟܘܳܬܗܽܘܢ ܬܡܳܢܶܡܳܐܐ ܡܰܥܢ̈ܝܳܬܳܐ: ܘܒܰܫܢܰܬ ܬܡܳܢܶܡܳܐܐ ܐܶܬܺܝܕܰܥ ܗܘܳܐ ܙܰܒܢܶܗ ܒܰܟܬܳܒܰܘ̈ܗܝ ܐܰܡܺܝܪ̈ܝ ܐܰܦܺܝܬܪܽܘܢܝܽܘܢ ܡ̣ܶܢ ܪܽܘܚܳܐ ܩܰܕܺܝܫܳܐ ܒܣܶܕܪ̈ܰܘܗܝ ܡܚܰܓ̈ܝܳܢܶܐ ܘܰܡܩܰܠܣ̈ܳܢܶܐ ܕܟܽܠܳܗ̇ ܐܰܢܕܺܝܩܛܳܝܬܳܐ ܒܶܐܓܪ̈ܳܬܶܗ ܫܒܺܝ̈ܚܳܬܳܐ ܘܠܐ ܡܶܬܦܰܣ̈ܩܳܢܝܳܬܳܐ ܕܰܡܫܰܕܰܪ ܗܘܳܐ: ܟܰܕ ܒܰܐܟܣܽܘܪܝܳܐ ܗܘܳܐ ܓܰܘܳܝܬܳܐ ܕܺܐܝܓܽܘܦܛܽܘܣ ܡܶܬܚܳܐ ܕܰܐܪܒܥܺܝܢ ܫܢܺܝ̈ܢ ܡܶܛܽܠ ܫܽܘܪܳܪܳܗ̇ ܕܗܰܝܡܳܢܽܘܬܳܐ ܬܪܺܝܨܬܳܐ ܘܒܶܐܓܪ̈ܳܬܶܗ ܚܰܝܶܠ ܠܰܙܥܽܘܪ̈ܰܝ ܗܰܝܡܳܢܽܘܬܳܐ: ܘܫܰܪܰܪ ܠܝܽܘܠܦܳܢܶܗ ܕܩܽܘܪܺܝܠܠܽܘܣ ܪܰܒܳܐ: ܘܒܰܟܬܳܒܰܘ̈ܗܝ ܩܰܠܶܣ ܠܰܒܬܽܘܠܬܳܐ ܡܰܪܝܰܡ ܟܰܕ ܐܳܡܰܪ: ܕܗ̇ܳܝ ܠܐܠܳܗܳܐ ܝܶܠܕܰܬ݀ ܝܳܠܕܰܬ ܐܠܰܗܳܐ ܐܺܝܬܶܝܗ̇: ܘܩܰܠܶܣ ܠܰܫܠܺܝ̈ܚܰܘܗܝ ܕܰܒܪܳܐ ܘܰܐܘܕܺܝ ܐܰܟܘܳܬܗܽܘܢ ܘܢܰܨܰܚ ܠܣܳܗ̈ܕܶܐ ܘܶܐܬܟܰܠܰܠ ܐܰܟܘܳܬܗܽܘܢ: ܐܰܒܰܥ ܡܰܠܦܳܢܽܘܬܳܐ ܚܠܺܝܬܳܐ: ܘܡܶܛܽܠ ܗܳܕܶܐ ܟܶܢܫܳܐ ܕܰܦܪ̈ܺܝܩܳܐ ܒܳܟ ܛܳܦܣܺܝܢܰܢ ܘܠܳܟ ܡܩܰܠܣܺܝܢܰܢ ܟܰܕ ܐܳܡܪܺܝܢܰܢ: ܐܰܢ̱ܬ ܐܺܝܬܰܝܟ ܟܠܺܝܠܐ ܕܡܰܠܦܳܢ̈ܶܐ: ܐܰܢ̱ܬ ܐܺܝܬܰܝܟ ܠܰܡܦܺܐܕܳܐ ܕܰܡܦܰܫ̈ܩܳܢܶܐ: ܐܰܢ̱ܬ ܐܺܝܬܰܝܟ ܡܢܰܨܚܳܢܳܐ ܕܗܰܝܡܳܢܽܘܬܳܐ: ܐܰܢ̱ܬ ܐܺܝܬܰܝܟ ܢܽܘܗܪܳܐ ܕܰܒܬܽܘܠܽܘܬܳܐ: ܐܰܢ̱ܬ ܐܺܝܬܰܝܟ ܣܳܬܽܘܪܳܐ ܕܶܐܪ̈ܶܣܺܝܣ: ܐܰܢ̱ܬ ܐܺܝܬܰܝܟ ܥܳܩܽܘܪܳܐ ܕܛܽܘܥܝܰܝ: ܐܰܢ̱ܬ ܐܺܝܬܰܝܟ ܦܺܝܪܡܳܐ ܕܒܰܣܺܝܡܽܘܬ ܪܺܝܚܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ: ܒܗܳܢܳܐ ܝܰܘܡܳܐ ܕܕܽܘܟܪܳܢܶܗ ܕܰܐܒܽܘܢ ܡܳܪܝ ܣܶܐܘܺܝܪܶܐ ܦܰܛܪܝܰܪܟܳܐ: ܨܽܘܬ ܠܬܰܟܫ̈ܦܳܬܰܢ: ܩܰܒܶܠ ܠܒܳܥ̈ܘܳܬܰܢ: ܘܪ̈ܰܚܡܰܝܟ ܐܰܫܦܰܥ ܥܰܠ ܚܰܝܳܒܽܘܬܰܢ: ܫܒܽܘܩ ܚܰܘ̈ܒܳܬܰܢ ܒܰܚܢܳܢܳܟ: ܘܰܬܚܰܣܶܐ ܛܰܝܒܽܘܬܳܟ ܠܡܶܬܥܰܒܪ̈ܳܢܘܳܬܰܢ: ܘܫܰܝܢܳܐ ܘܰܫܠܳܡܳܐ ܢܶܣܓܶܐ ܠܰܢ ܡ̣ܶܢ ܠܘܳܬܳܟ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܢܩܰܒܠܽܘܢ ܡܶܢܳܟ ܡܫܺܝܚܳܐ ܐܠܰܗܰܢ: ܘܰܚܢܰܢ ܘܗܶܢܽܘܢ ܒܓܰܒܳܐ ܝܰܡܺܝܢܳܝܳܐ ܢܩܽܘܡ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܐܠܰܗܳܐ ܗ̇ܰܘ ܕܰܒܫܽܘ̈ܟܳܢܶܐ ܫܡܰܝ̈ܳܢܶܐ ܨܰܒܶܬ ܠܡܳܪܝ ܣܶܐܘܺܝܪܶܐ ܦܰܛܪܝܰܪܟܳܐ ܘܰܐܒܗܶܬ ܠܕܰܓ̈ܳܠܐ ܘܰܙܟܳܐ ܠܟܽܠܗܶܝܢ ܕܶܚ̈ܠܳܬܳܐ ܕܶܐܪ̈ܶܣܺܝܣ ܒܚܰܝܠܐ ܕܡܳܪܶܗ ܠܐ ܡܶܬܚܰܣܢܳܢܳܐ: ܩܰܒܶܠ ܐܳܦ ܗܳܫܳܐ ܠܦܺܝܪܡܳܐ ܕܩܰܪܶܒܢܰܢ ܒܥܺܐܕܶܗ: ܘܨܰܒܶܬ ܠܰܢ ܒܰܫܪܳܪܶܗ: ܘܰܐܢܗܰܪ ܡܰܕܥܰܝ̈ܢ ܒܝܽܘܠܦܳܢܶܗ ܘܰܐܢܺܝܚ ܠܢܰܦ̈ܫܳܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܒܡܰܠܟܽܘܬܳܟ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܓܰܐܝܳܐ ܕܬܶܫܒܽܘܚܬܳܐ ܕܨܰܒܶܬ ܠܡܳܪܝ ܣܶܐܘܺܝܪܶܐ ܒܟܽܠ ܫܽܘܦܪ̈ܺܝܢ: ܘܢܰܨܚܶܗ ܒܟܽܠ ܬܶܗܪ̈ܺܝܢ: ܘܪܰܡܪܶܡ ܠܒܰܪܬ ܩܳܠܐ ܕܟܳܪܽܘܙܽܘܬܶܗ ܒܟܽܠ ܦܶܢ̈ܝܳܢ ܘܣܰܘܦܺܝ̈ܢ: ܠܗܰܘ ܕܰܐܘܪܶܒ ܥܺܐܕܶܗ ܒܟܽܠ ܕܳܪ̈ܺܝܢ ܘܣܶܦ̈ܘܳܬܳܐ ܚܳܝ̈ܒܳܢ ܡܶܢܶܗ ܘܠܶܫ̈ܳܢܶܐ ܟܳܘܙܺܝܢ ܡ̣ܶܢ ܡܺܐܡܪܶܗ: ܘܗܳܐ ܡܶܬܝܰܩܰܪ ܥܺܐܕܶܗ ܒܟܽܠ ܦܶܢ̈ܝܳܢ: ܘܰܟܠܺܝܠܶܗ ܢܳܨܰܚ ܒܬܶܫܒܽܘܚܬܳܐ: ܕܠܶܗ ܠܡܳܪܝܳܐ ܡܢܰܨܚܳܢܶܗ ܢܰܘܕܶܐ ܘܰܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܡܦܺܝܣܺܝܢܰܢ ܠܳܟ ܐܳܦ ܡܰܠܦܳܢܳܐ ܕܩܽܘܫܬܳܐ ܘܰܫܠܺܝܚܳܐ ܕܓܰܒܝܽܘܬܳܐ: ܘܣܳܗܕܳܐ ܓܰܒܝܳܐ ܕܫܰܦܺܝܪܽܘܬ ܕܶܚܠܬܳܐ ܡܩܰܠܰܣܬܳܐ ܡܳܪܝ ܣܶܐܘܺܝܪܶܐ ܕܕܳܪܳܐ ܩܰܕܡܳܝܳܐ: ܣܓܽܘܠܐ ܫܰܦܺܝܪܳܐ ܕܶܐܬܚܙܺܝ ܒܥܺܕܬܳܐ ܩܰܕܺܝܫܬܳܐ: ܘܰܛܪܰܕ ܠܚܶܫܟܳܐ ܕܛܳܥܝܽܘܬܳܐ ܘܠܰܚܣܳܡܳܐ ܣܰܢܝܳܐ ܕܰܬܪ̈ܰܝܳܢܰܝ ܟܝ̈ܳܢܶܐ ܛܳܠܽܘ̈ܡܶܐ: ܪܺܝܫܳܐ ܡܝܰܩܪܳܐ ܕܡܰܠܦܳܢ̈ܶܐ ܕܡܰܠܦܺܝܢ ܡܰܠܟܽܘܬܳܐ ܕܰܫܡܰܝܳܐ ܠܐܝܠܶܝܢ ܕܨܳܒܶܝܢ ܕܢܶܩܢܽܘܢ ܡܰܠܟܽܘܬܳܐ ܕܠܐ ܥܳܒܪܳܐ: ܡܚܰܘܝܳܢܳܐ ܕܶܐܣܛܰܕܝܽܘܢ ܕܰܣܒܰܪܬܳܐ ܐܶܘܢܓܶܠܳܝܬܳܐ: ܡܰܠܐܟܳܐ ܕܒܶܣܪܳܐ ܕܰܒܝܰܕ ܨܰܘܡܶܗ ܢܰܓܺܝܪܳܐ ܘܰܨܠܰܘ̈ܳܬܶܗ ܘܰܢܙܺܝܪܽܘܬܶܗ ܕܛܳܒ ܡܝܰܬܪܳܐ ܐܶܫܬܘܺܝ ܠܡܰܠܟܽܘܬܳܐ ܕܰܠܥܶܠ ܡ̣ܶܢ ܥܳܠܡܳܐ: ܐܰܟܳܪܳܐ ܛܳܒܳܐ ܕܰܙܪܰܥ ܡ̈ܶܠܐ ܕܰܢܒܺܝܽܘܬܳܐ ܘܰܚܨܰܕ ܟܰܦܳܐ ܕܚܰܕ̈ܘܳܬܳܐ ܡ̣ܶܢ ܫܠܺܝ̈ܚܶܐ: ܘܰܐܥܕܺܝ ܟܠܺܝܠܐ ܕܣܳܗܕܽܘܬܳܐ ܒܝܰܕ ܡܰܘܕܝܳܢܽܘܬܳܐ ܕܺܝܠܶܗ ܫܰܪܺܝܪܬܳܐ: ܦܳܠܚܳܐ ܪܽܘܚܳܢܳܐ ܕܫܰܥܒܶܕ ܢܰܦܫܶܗ ܒܦܳܠܚܽܘܬܳܐ ܡܠܺܝܠܬܳܐ ܘܪܽܘܚܳܢܳܝܬܳܐ ܕܡܳܪܶܗ: ܘܰܟܕܰܢ ܢܰܦ̈ܫܳܬܰܢ ܒܽܘܪ̈ܳܬܳܐ ܕܢ̈ܶܬܠܳܢ ܦܺܐܪ̈ܶܐ ܣܰܓܺܝ̈ܶܐܐ ܕܗܰܝܡܳܢܽܘܬܳܐ: ܪܕܺܝܦܳܐ ܘܰܚܒܺܝܫܳܐ ܘܰܛܪܺܝܕܳܐ ܕܡ̣ܶܢ ܟܽܘܪܣܝܶܗ: ܩܛܺܝܠ ܒܰܚܣܳܡܳܐ ܪܕܺܝܦ ܒܰܛܢܳܢܳܐ ܕܡܶܛܽܠ ܡܶܠܬܳܐ ܕܗܰܝܡܳܢܽܘܬܳܐ ܬܪܺܝܨܬܳܐ: ܡܠܰܒܶܒ ܘܰܡܒܰܝܰܐܐ ܠܟܽܠ ܪ̈ܕܺܝܦܰܝ ܘܰܛܪ̈ܺܝܕܰܝ ܡ̣ܶܢ ܗܰܝܡܳܢܽܘܬܳܐ: ܫܰܢܶܩ ܠܟܽܠ ܕܩܳܡ ܠܩܽܘܒܠܶܗ ܘܰܐܒܗܬܶܗ: ܒܠܰܡ ܠܰܦܠܰܩܣܺܝܡܽܘܣ ܦܰܛܥܳܐ ܘܠܺܝܛܳܐ: ܘܰܠܝܽܘܚܰܢܳܢ ܗ̇ܰܘ ܓܪܰܡܰܛܺܝܩܽܘܣ ܘܙܰܝܶܦ ܠܟܽܠܳܗ̇ ܡܰܠܦܳܢܽܘܬܶܗ: ܘܰܐܒܗܶܬ ܠܝܽܘܠܝܰܢܶܐ ܠܺܝܛܳܐ ܕܐܠܰܩܪܰܐܢܣܽܘܣ ܘܚܰܘܝܶܗ ܠܝܽܘܠܦܳܢܶܗ ܕܰܓܳܠܐ ܘܰܕܠܐ ܦܺܐܪ̈ܶܐ: ܘܕܰܓܠܺܝܙ ܡ̣ܶܢ ܚܶܛܬܳܐ ܪܽܘܚܳܢܳܝܬܳܐ: ܘܟܰܐܰܪ ܠܣܳܒܳܐ ܒܰܗܺܝܬܳܐ ܐܰܦܽܘܠܺܝܢܽܘܣ ܕܙܰܝܶܦ ܘܰܐܣܠܺܝ ܠܡܰܟܬܒܳܢܽܘܬܶܗ ܕܩܽܘܪܺܝܠܠܽܘܣ ܡ̣ܶܢ ܠܘܳܬܶܗ: ܘܚܰܘܝܶܗ ܡܳܪܝ ܣܶܐܘܺܝܪܶܐ ܠܗܰܘ ܡܟܰܣܰܝ ܪܺܝܫܳܐ ܘܰܛܡܺܝܪ ܒܒܶܗܬܬܳܐ: ܘܰܕܠܐ ܡܨܶܐ ܗܘܳܐ ܕܢܶܬܚܙܳܐ ܗܘܳܐ ܒܺܐܝܡܳܡܳܐ ܕܢܽܘܗܪܳܗ̇ ܕܥܺܕܬܳܐ ܣܰܡܝܰܬ݀ ܠܒܳܒ̈ܳܬܶܗ: ܐܶܠܐ ܐܶܬܛܰܫܺܝ ܒܓܰܗܪܳܐ ܒܺܝܫܳܐ ܕܡܰܠܟܽܘܬܶܗ: ܘܰܐܒܗܶܬ ܘܰܐܚܦܰܪ: ܥܰܠ ܗ̇ܰܘ ܟܶܢܫܳܐ ܕܰܡܗܰܝ̈ܡܢܶܐ ܩܥܰܘ ܒܚܰܕܽܘܬܳܐ ܘܒܰܪܘܳܙܳܐ ܟܰܕ ܐܳܡܪܺܝܢ: ܕܰܙܟܳܐ ܐܰܒܽܘܢ ܘܶܐܬܢܰܨܚܰܬ݀ ܩܰܪܢܳܐ ܕܥܺܕܬܳܐ ܩܰܕܺܝܫܬܳܐ: ܒܰܡܢܰܨܚܳܢܳܐ ܕܚܰܫ̈ܰܝ ܨܠܺܝܒܽܘܬܳܐ: ܒܕܶܐܬܪܕܶܦ ܡ̣ܶܢ ܐܰܬܪܶܗ ܚܠܳܦ ܡܳܪܶܗ ܘܥܰܡܶܗ ܐܶܫܬܰܒܰܚ: ܘܡ̣ܶܢ ܒܳܬܰܪ ܡܰܘܬܶܗ ܐܶܬܒܰܕܰܪܘ ܓܰܪ̈ܡܰܘܗܝ ܡ̣ܶܢ ܣܳܐܢܰܘ̈ܗܝ: ܘܠܶܗ ܗܘܳܬ݀ ܩܽܘܠܳܣܳܐ ܘܰܠܗܽܘܢ ܠܟܽܘܐܳܪܳܐ ܘܰܠܒܶܗܬܬܳܐ: ܪܕܺܝܦܳܐ ܒܰܚ̈ܣܰܝܳܐ: ܬܗܺܝܪܳܐ ܦܰܐܝܳܐ ܒܡܰܠܦܳܢ̈ܶܐ: ܘܪܰܒܳܐ ܒܰܡܦܰܫ̈ܩܳܢܶܐ: ܡܥܰܠܝܳܐ ܒܡܰܘ̈ܕܝܳܢܶܐ: ܓܰܒܝܳܐ ܒܟܳܪ̈ܽܘܙܶܐ: ܙܗܶܐ ܒܰܒܬܽܘ̈ܠܐ: ܫܦܶܐ ܒܬܰܡܺܝ̈ܡܶܐ: ܡܩܰܠܣܳܐ ܒܛܰܢ̈ܳܢܶܐ: ܢܰܩܕܳܐ ܒܰܢܙܺܝܪ̈ܶܐ: ܕܰܟܝܳܐ ܒܨܰܝ̈ܳܡܶܐ: ܡܨܰܠܠܐ ܒܥܳܢܘܳܝ̈ܶܐ: ܩܰܕܺܝܫܳܐ ܒܢܰܟ̈ܦܶܐ: ܟܢܺܝܟܳܐ ܒܰܪ̈ܡܺܝܣܶܐ: ܒܰܣܺܝܡܳܐ ܒܢܶܨ̈ܚܳܢܶܐ: ܪܳܡܳܐ ܒܡܰܟܺܝ̈ܟܶܐ: ܬܗܺܝܪܳܐ ܒܟܰܫܺܝܪ̈ܶܐ: ܪܓܺܝܓ ܒܫܰܦܺܝܪ̈ܶܐ: ܢܰܨܺܝܚܳܐ ܒܟܽܘܡܪ̈ܶܐ: ܪܺܝܫܳܐ ܕܪ̈ܺܝܫܰܝ ܕܡܶܢܶܗ ܐܶܫܬܰܪܰܒ ܫܡܳܐ ܕܪܺܝܫܽܘܬ ܟܳܗܢܽܘܬܳܐ ܐܠܰܗܳܝܬܳܐ: ܛܰܪܩܳܐ ܒܢܰܨܺܝ̈ܚܶܐ: ܚܠܺܝܨܳܐ ܒܰܪ̈ܕܺܝܦܶܐ: ܡܢܶܐ ܒܰܚܣܺܝ̈ܡܶܐ: ܫܰܪܺܝܪܳܐ ܘܰܛܥܺܝܢ ܫܪܳܪܳܐ ܕܣܳܗ̈ܕܶܐ: ܫܽܘܦܪܳܐ ܕܩܰܕ̈ܡܳܝܶܐ: ܗܶܕܪܳܐ ܕܡܶܨ̈ܥܳܝܶܐ: ܪܺܝܫܺܝܬܳܐ ܕܺܝܚܺܝ̈ܕܳܝܶܐ: ܒܥܺܝ ܗܳܟܺܝܠ ܡ̣ܶܢ ܡܳܪܳܟ ܡܠܐܷ ܪ̈ܰܚܡܶܐ ܕܢܰܣܓܶܐ ܒܥܺܕܬܳܟ ܩܰܕܺܝܫܬܳܐ ܫܰܝܢܳܐ ܘܰܫܠܳܡܳܐ ܘܚܽܘܒܳܐ: ܘܰܐܘܝܽܘܬܳܐ ܡܫܰܡܠܳܝܬܳܐ ܘܰܓܡܺܝܪܬܳܐ: ܗܰܝܡܳܢܽܘܬܳܐ ܬܪܺܝܨܬܳܐ ܘܬܰܘܕܺܝܬܳܐ ܕܟܺܝܬܳܐ: ܥܰܡ ܥܺܝܪܽܘܬܳܐ ܕܢܰܦܫܳܐ ܘܪܳܥܝܽܘܬܳܐ ܥܺܝܪܬܳܐ: ܟܳܗܢܽܘܬܳܐ ܡܚܰܣܝܳܢܺܝܬܳܐ ܡܰܟܺܝܟܬܳܐ ܕܨܶܒܝܳܢܳܐ: ܝܺܚܺܝܕܳܝܽܘܬܳܐ ܡܝܰܬܰܪܬܳܐ: ܡܣܰܪܩܽܘܬܳܐ ܥܰܬܺܝܪܬܳܐ: ܬܶܫܡܫܬܳܐ ܡܰܠܐܟܳܝܬܳܐ: ܡܰܠܦܳܢܽܘܬܳܐ ܫܰܪܺܝܪܬܳܐ: ܡܰܐܪܙܳܢܽܘܬܳܐ ܡܥܰܠܰܝܬܳܐ: ܐܰܬܠܺܝܛܽܘܬܳܐ ܢܰܨܺܝܚܬܳܐ: ܡܰܘܕܝܳܢܽܘܬܳܐ ܡܰܠܝܰܬ ܙܳܟܽܘܬܳܐ: ܐܰܝܟܰܢܳܐ ܕܰܒܦܽܘܡܳܐ ܕܟܽܠܗܽܘܢ ܝܰܠܕܶܝ̈ܗ̇ ܬܶܓܕܽܘܠ ܟܠܺܝܠܐ ܕܩܽܘ̈ܠܳܣܶܐ ܗܕܺܝܪ̈ܶܐ ܠܡܰܘܕܝܳܢܽܘܬܳܟ ܐܰܬܠܺܝܛܳܐ ܫܰܪܺܝܪܳܐ: ܘܙܳܕܩܳܐܝ̣ܬ ܬܫܰܒܰܚ ܠܶܗ ܒܟܽܠ ܥܶܕܳܢ: ܠܡܳܪܝܳܐ ܕܪܰܡܪܶܡ ܝܽܘܡ ܥܺܐܕܳܐ ܠܥܶܠ ܒܰܫܡܰܝܳܐ ܘܰܠܬܰܚܬ ܥܰܠ ܐܰܪܥܳܐ: ܘܬܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܢܥܰܕܥܶܕ ܒܕܰܟܝܽܘܬܳܐ ܘܩܰܕܺܝܫܽܘܬܳܐ: ܠܚܰܓܳܐ ܕܰܐܬܠܺܝ̈ܛܰܝܟ ܩܰܕܺܝ̈ܫܶܐ ܒܙܰܗܝܽܘܬܳܐ: ܘܢܶܣܓܶܐ ܐܺܝܩܳܪܳܐ ܕܺܝܠܗܽܘܢ ܒܗܰܝܡܳܢܽܘܬܳܐ: ܐܰܝܟܰܢܳܐ ܕܢܶܫܬܘܶܐ ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܝܰܬܺܝܪܳܐܝ̣ܬ ܕܡܳܪܝ ܣܶܐܘܺܝܪܶܐ ܦܰܛܪܝܰܪܟܳܐ ܢܰܨܺܝܚܳܐ ܡܢܺܝܚܳܢܳܐ ܕܡܳܪܽܘܬܳܟ ܠܒܽܘܪ̈ܟܳܬܳܐ ܫܡܰܝܳܢ̈ܝܳܬܳܐ ܘܰܠܡܰܘܗ̈ܒܳܬܳܐ ܪ̈ܽܘܚܳܢܳܝܳܬܳܐ ܘܰܥܛܳܝܳܐ ܕܡܶܬܥܰܒܪ̈ܳܢܘܳܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܒܺܐܝܬܽܘܬܶܗ ܓܢܺܝܙܳܐ ܘܠܐ ܡܶܬܚܰܙܝܳܢܳܐ ܒܩܰܕܺܝܡܽܘܬܶܗ: ܠܗܰܘ ܡܶܬܒܰܨܝܳܢܳܐ ܒܰܕܚܺܝܠܽܘܬܶܗ ܕܩܰܕܺܝܡ ܠܟܽܠ ܘܰܐܝܬܺܝ ܠܟܽܠ ܠܰܗܘܳܝܳܐ ܡ̣ܶܢ ܠܐ ܡܶܕܶܡ ܘܰܠܟܽܠ ܡܶܕܶܡ ܗ̣ܽܘ ܡܦܰܪܢܶܣ ܒܡܶܠܬܳܐ ܕܛܰܝܒܽܘܬܶܗ: ܠܗܰܘ ܕܰܓܒܳܐ ܠܢܰܨܺܝܚ ܒܗܰܝܡܳܢܽܘܬܳܐ ܘܰܛܢܳܢ ܒܙܰܝܢܶܗ ܘܚܰܟܺܝܡ ܗ̣ܽܘ ܒܪܽܘܚܳܢܽܘܬܳܐ: ܓܰܒܝܳܐ ܦܰܛܪܝܰܪܟܳܐ ܡܳܪܝ ܣܶܐܘܺܝܪܶܐ ܕܒܺܐܝ̈ܕܰܘܗܝ ܫܰܪܰܪ ܡܶܬܒܰܣܪܳܢܽܘܬܶܗ ܘܚܰܘܺܝ ܠܥܳܠܡܳܐ ܘܰܠܥܰܡ̈ܡܶܐ ܕܰܒܓܰܘ ܡܶܨܪܶܝܢ ܐܽܘܪܚܳܐ ܕܰܫܠܺܝܚܽܘܬܳܐ ܘܒܰܟܬܺܝ̈ܒܳܬܶܗ ܡܠܐܴ ܒܠܶܒܳܐ ܕܰܡܗܰܝ̈ܡܢܶܐ ܘܒܰܝܰܐܐ ܐܶܢܽܘܢ ܡ̣ܶܢ ܟܺܐܡܽܘ̈ܢܶܐ ܕܰܬܪ̈ܰܝܳܢܰܝ ܟܝ̈ܳܢܶܐ: ܗܳܢܳܐ ܕܘܺܝܠܐ ܟܠܐܷܡܺܝܣܳܝܬܳܐ ܐܶܬܥܰܛܰܦ ܘܰܠܟܰܠܬܳܐ ܫܠܶܝܡܽܘܢܳܝܬܳܐ ܗܰܕܰܪ ܘܰܠܡܳܪܝܳܐ ܡܢܰܨܚܳܢܶܗ ܢܗܰܠܶܠ ܘܰܢܪܰܡܪܶܡ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܐܠܰܗܳܐ ܗ̇ܰܘ ܕܰܡܫܰܒܚ ܠܐܝܠܶܝܢ ܕܰܡܫܰܒܚܺܝܢ ܠܶܗ ܫܒܺܝܚܳܐܝ̣ܬ ܘܡܰܘܪܶܒ ܠܐܝܠܶܝܢ ܕܡܰܘܪܒܺܝܢ ܠܶܗ ܬܪܺܝܨܳܐܝ̣ܬ: ܘܰܡܚܰܟܶܡ ܠܐܝܠܶܝܢ ܕܡܰܘܕܶܝܢ ܠܶܗ ܬܠܺܝܬܳܐܝ̣ܬ: ܗ̇ܰܘ ܕܠܐ ܡܶܬܡܰܠܰܠ ܡ̣ܶܢ ܡ̈ܰܠܳܠܐ ܘܠܐ ܡܶܬܦܰܫܰܩ ܡ̣ܶܢ ܢܽܘܡܺܝ̈ܩܶܐ: ܘܠܐ ܡܶܬܬܰܪܓܰܡ ܡ̣ܶܢ ܣܟܽܘܠܺܝ̈ܣܛܺܝܩܶܐ: ܗ̇ܰܘ ܕܠܐ ܡܶܬܒܨܶܐ ܡ̣ܶܢ ܕܳܪ̈ܽܘܫܶܐ: ܘܗ̇ܰܘ ܕܠܐ ܡܶܬܥܰܩܰܒ ܡ̣ܶܢ ܒܳܨܽܘ̈ܝܶܐ ܘܠܐ ܡܶܬܕܪܶܟ ܡ̣ܶܢ ܣܽܘܦܺܝ̈ܣܛܶܐ: ܗ̇ܰܘ ܕܪܳܚܶܡ ܠܰܕ̈ܟܰܝܳܐ ܘܡܰܚܶܒ ܠܰܚ̈ܣܰܝܳܐ: ܘܰܡܥܰܠܐܷ ܠܡܰܟܺܝ̈ܟܶܐ ܘܠܰܫ̈ܦܰܝܳܐ: ܗ̇ܰܘ ܕܡܶܬܡܰܠܰܠ ܡ̣ܶܢ ܐܰܝܠܶܝܢ ܕܡܰܠܶܠܘ ܚܽܘܒܳܢܳܐܝ̣ܬ: ܗ̇ܰܘ ܕܡܶܬܦܰܫܰܩ ܡ̣ܶܢ ܐܰܝܠܶܝܢ ܕܪܳܚܡܺܝܢ ܫܰܪܺܝܪܳܐܝ̣ܬ: ܘܡܶܬܺܝܕܰܥ ܡ̣ܶܢ ܐܰܝܠܶܝܢ ܕܕܳܚܠܺܝܢ ܠܶܗ ܐܠܰܗܳܐܝ̣ܬ: ܕܰܠܗܳܢܳܐ ܪܺܝܫ ܟܳܗ̈ܢܶܐ ܘܛܽܘܒܬܳܢܳܐ ܘܡܰܠܦܳܢܳܐ ܕܰܫܪܳܪܳܐ ܘܡܳܪܝ ܣܶܐܘܺܝܪܶܐ ܦܰܛܪܝܰܪܟܳܐ ܟܠܺܝܠܐ ܘܗܶܕܪܳܐ ܕܟܽܠܗܽܘܢ ܡܰܠܦܳܢ̈ܶܐ ܘܰܐܒܳܗ̈ܳܬܳܐ ܕܡ̣ܶܢ ܓܰܘ ܡܥܰܝ̈ܳܐ ܘܥܽܘ̈ܒܶܐ ܐܶܡܗܳܝ̈ܶܐ ܓܒܳܝܗܝ: ܘܡܳܐܢܳܐ ܓܰܒܝܳܐ ܥܰܒܕܶܗ ܠܬܶܫܡܫܬܶܗ: ܗ̇ܰܘ ܕܥܰܠ ܚܰܕܝܳܐ ܕܶܐܡܶܗ ܟܺܝܬ ܡܶܬܬܰܪܣܝܳܐ ܣܺܝܡ ܗܘܳܐ: ܘܡ̣ܶܢ ܗܳܪܟܳܐ ܡ̣ܶܢ ܬܕܰܝ̈ܳܐ ܝܳܗ̈ܒܰܝ ܚܰܠܝܽܘܬܳܐ ܚܰܠܒܳܐ ܢܰܩܕܳܐ ܝܺܢܶܩ ܗܘܳܐ: ܘܠܐܡܶܐ ܟܳܗܢܳܝܬܳܐ ܐܰܘܟܺܝܬ ܥܺܕܬܳܐ ܩܰܕܺܝܫܬܳܐ ܡܶܬܝܰܐܝܰܒ ܗܘܳܐ: ܐܰܝܟܰܢܳܐ ܟܰܝ ܕܬܽܘܪ̈ܣܳܝܶܐ ܪ̈ܽܘܚܳܢܳܝܶܐ ܡ̣ܶܢ ܬܕܰܝ̈ܳܐ ܐܠܰܗܳܝ̈ܶܐ ܘܰܓܡܺܝܪ̈ܶܐ ܡܩܰܒܶܠ ܗܘܳܐ: ܟܰܕ ܕܶܝܢ ܠܩܰܘܡܬܳܐ ܩܰܕܡܳܝܬܳܐ ܐܰܥܒܰܪ ܒܗܳܠܶܝܢ ܡ̇ܰܢ ܬܽܘܪ̈ܣܳܝܶܐ ܐܶܘܢܓܶܠܳܝ̈ܶܐ ܠܡܽܘܫ̈ܚܳܬܳܐ ܕܬܰܪܬܶܝܢ ܘܒܺܝܕܰܥܬܳܐ ܓܡܺܝܪܬܳܐ ܐܶܫܬܰܘܫܰܛ ܘܡܶܚܕܳܐ ܒܬܰܪܥܺܝܬܳܐ ܚܰܡܺܝܡܬܳܐ ܕܰܠܘܳܬ ܐܶܡܳܐ ܪܽܘܚܳܢܳܝܬܳܐ ܥܶܒܕܰܬ݀ ܥܰܡ ܬܰܘܕܺܝܬܳܐ ܬܪܺܝܨܬܳܐ ܘܗܰܝܡܳܢܽܘܬܳܐ ܠܐ ܡܶܬܦܰܠܓܳܢܺܝܬܳܐ ܐܶܬܩܰܪܰܒ: ܘܟܰܕ ܡܶܢܳܗ̇ ܫܽܘܟܳܢܳܐ ܕܪܽܘܚܳܐ ܩܰܕܺܝܫܳܐ ܢܣܰܒ: ܘܰܒܣܺܝܡܰܬ݀ ܒܢܰܝ̈ܳܐ ܐܶܬܟܬܶܒ ܟܰܕ ܐܰܝܟ ܓܰܒܪܳܐ ܚܰܟܺܝܡܳܐ ܐܰܩܶܦ ܠܡܰܘܠܳܕܳܐ ܪܽܘܚܳܢܳܝܳܐ ܡܰܘܠܳܕܳܐ ܐ̱ܚܪܺܢܳܐ ܕܡ̣ܶܢ ܥܳܠܡܳܐ: ܕܰܫܘܶܐ ܐܺܝܬܰܘܗܝ ܗܘܳܐ ܠܗܰܘ ܕܡ̣ܶܢ ܡܰܝ̈ܳܐ ܘܪܽܘܚܳܐ: ܟܰܕ ܕܶܝܢ ܠܐܣܟܺܝܡܳܐ ܩܰܕܺܝܫܳܐ ܩܰܒܶܠ: ܘܰܐ̱ܚܪܺܢܳܐ ܡ̣ܶܢ ܪܽܘܚܳܐ ܩܰܕܺܝܫܳܐ ܠܶܗ ܐܶܬܬܰܘܣܰܦ: ܟܰܕ ܠܢܺܝܪܳܐ ܒܰܣܺܝܡܳܐ ܕܦܽܘܩ̈ܕܳܢܶܐ ܐܠܰܗܳܝ̈ܶܐ ܘܡܰܚ̈ܝܳܢܶܐ ܫܩܰܠ ܥܠܰܘܗܝ: ܘܡܰܘܒܠܐ ܩܰܠܺܝܠܬܳܐ ܣܳܡ ܥܰܠ ܟܰܬܦܶܗ ܘܰܠܥܳܠܡܳܐ ܐܶܙܕܩܶܦ: ܟܰܕ ܡ̣ܶܢ ܗܳܪܟܳܐ ܥܠܰܝܡܳܐܝ̣ܬ ܘܰܙܪܺܝܙܳܐܝ̣ܬ ܢܚܶܬ ܗܘܳܐ ܠܐܣܛܰܕܝܽܘܢ ܪܽܘܚܳܢܳܝܳܐ ܕܠܐ ܕܡܳܐ: ܘܟܰܕ ܕܰܪܳܐ ܐܰܩܺܝܡ ܠܽܘܩܒܰܠ ܪܽܘܚܳܐ ܕܛܳܥܝܽܘܬܳܐ ܘܫܰܠܺܝ̈ܛܶܐ ܕܚܶܫܽܘܟܳܐ ܗܳܝܕܶܝܢ ܐܶܬܟܰܬܰܫ ܗܘܳܐ ܚܠܺܝܨܳܐܝ̣ܬ ܐܰܝܟ ܛܰܪܩܳܐ: ܟܰܕ ܠܒܶܣܪܶܗ ܕܰܝܶܒ ܒܥܳܢܘܳܝܽܘܬܳܐ ܫܰܪܺܝܪܬܳܐ ܟܽܠܳܢܳܐܝ̣ܬ: ܘܰܠܢܰܦܫܶܗ ܬܰܐܪܰܐܐ ܒܕܽܘܓ̈ܡܰܛܰܐ ܢܒܺܝ̈ܳܝܶܐ ܘܰܫܠܺܝ̈ܚܳܝܶܐ: ܟܰܕ ܠܒܶܣܪܳܐ ܪܽܘܚܳܐ ܫܰܥܒܶܕ ܓܡܺܝܪܳܐܝ̣ܬ ܘܶܐܬܢܰܨܰܚ ܒܰܐܓܽܘܢܳܐ ܓܰܢ̱ܒܳܪܳܐܝ̣ܬ: ܘܒܰܕܓܽܘܢ ܟܠܺܝܠܐ ܕܙܳܟܽܘܬܳܐ ܩܰܒܶܠ ܥܰܠ ܒܥܶܠܕ̈ܒܳܒܶܐ: ܟܰܕ ܡܶܟܺܝܠ ܠܘܳܬ ܕܰܪܳܐ ܘܬܰܟܬܽܘܫܳܐ ܕܥܰܡ̈ܡܶܐ ܠܺܝ̈ܛܶܐ ܘܶܐܪ̈ܶܣܝܽܘܛܶܐ ܢܳܨ̈ܚܰܝ ܥܰܡ ܐܠܰܗܳܐ ܘܒܰܡܪ̈ܰܘܡܶܐ ܐܶܬܥܰܠܺܝ: ܟܰܕ ܒܙܰܝ̈ܢܶܐ ܚܰܝܠܬܳܢ̈ܶܐ ܠܽܘܩܒܰܠ ܩܳܝܽܘ̈ܡܶܐ ܕܶܐܪ̈ܶܣܺܝܣ ܕܰܓ̈ܳܠܳܬܳܐ ܡܰܩܪܶܒ ܗܘܳܐ: ܘܰܒܓܶܐܪ̈ܶܐ ܚܰܝܠܬܳܢ̈ܶܐ ܘܰܫܢܺܝ̈ܢܶܐ ܕܪܽܘܚܳܐ ܠܽܘܩܒܰܠܗܽܘܢ ܢܫܰܛ ܗܘܳܐ: ܟܰܕ ܠܬܰܪ̈ܥܝܳܬܗܽܘܢ ܡܰܪ̈ܥܳܬܳܐ ܙܪܺܝܙܳܐܝ̣ܬ ܡܡܰܚܶܐ ܗܘܳܐ: ܘܰܠܚܶܫܟܰܝ̈ܗܽܘܢ ܥܘܺܝܪ̈ܶܐ ܘܪ̈ܶܥܝܳܢܰܝܗܽܘܢ ܒܺܝ̈ܫܶܐ ܣܪܺܝܩ ܒܫܽܘܒܚܳܐ ܡܚܰܘܶܐ ܗܘܳܐ: ܟܰܕ ܠܡ̈ܶܠܰܝ ܡܰܠܦܳܢ̈ܶܐ ܕܰܫܪܳܪܳܐ ܠܗܳܠܶܝܢ ܕܺܝܠܶܗ ܡܰܩܶܦ ܗܘܳܐ: ܘܰܒܚܰܕ ܪܶܥܝܳܢܳܐ ܘܬܰܪܥܺܝܬܳܐ ܚܠܺܝܡܬܳܐ ܡܰܦܪܓܺܝܢ ܗܘܰܘ: ܟܰܕ ܠܶܫܳܢ̈ܶܐ ܕܺܝܠܗܽܘܢ ܠܐ ܥܰܣ̈ܩܶܐ ܫܳܪܶܐ ܗܘܳܐ: ܒܰܗܺܝ̈ܬܶܐ ܘܢܽܘܟܪ̈ܳܝܶܐ ܠܕܶܚܠܬܳܐ ܐܠܰܗܳܝܬܳܐ ܠܗܽܘܢ ܥܳܒܶܕ ܗܘܳܐ: ܘܰܠܡܶܠܰܝ̈ܗܽܘܢ ܡܠܰܬܟ̈ܶܐ ܘܰܨܢܺܝܥܳܐܝ̣ܬ ܩܕܳܡ ܟܽܠܢܳܫ ܡܦܰܪܣܶܐ ܗܘܳܐ: ܘܰܠܡܰܗܡܝܳܢܽܘܬܳܐ ܒܫܰܦܺܝܪܽܘܬ ܡܶܠܬܳܐ ܘܕܶܚܠܰܬ݀ ܐܠܰܗܳܐ ܡܫܰܬܶܩ ܗܘܳܐ: ܟܰܕ ܠܗ̇ܳܢܽܘܢ ܐܰܓܽܘ̈ܢܶܐ ܬܡܺܝ̈ܗܶܐ ܚܰܝܠܬܳܢܳܐ ܘܠܐ ܡܶܙܕܰܟܝܳܢܳܐ ܡܶܬܚܙܶܐ ܗܘܳܐ: ܘܰܒܬܶܫܒ̈ܚܳܬܳܐ ܘܙܳܟܽܘܬܳܐ ܠܕܰܝܪܶܗ ܩܰܕܺܝܫܬܳܐ ܗܳܦܶܟ ܗܘܳܐ: ܘܠܰܝ̈ܠܰܝ ܐܺܝܡܳܡ ܒܰܟܬܳܒ̈ܶܐ ܩܰܕܺܝ̈ܫܶܐ ܢܦܺܝ̈ܚܰܝ ܒܪܽܘܚܳܐ ܩܰܕܺܝܫܳܐ ܐܰܡܺܝܢܳܐܝ̣ܬ ܗܳܪܶܓ ܗܘܳܐ: ܘܥܰܡܗܽܘܢ ܕܰܐܓܽܘܢܺܝ̈ܣܛܶܐ ܚܰܝܠܬܳܢ̈ܶܐ ܡܶܬܥܢܶܐ ܗܘܳܐ: ܗܳܝܕܶܝܢ ܡ̣ܶܢ ܪܽܘܚܳܐ ܗ̇ܰܘ ܕܒܶܗ ܥܳܡܰܪ ܗܘܳܐ: ܒܫܽܘܠܛܳܢܳܐ ܚܰܡܺܝܡܳܐ ܕܡܰܠܟܳܐ ܙܰܟܳܝܳܐ ܘܰܡܗܰܝܡܢܳܐ ܘܫܳܘܶܐ ܠܕܽܘܟܪܳܢܳܐ ܛܳܒܳܐ ܬܶܐܘܳܕܳܘܣܝܳܘܣ ܠܡܰܘܬܒܳܐ ܟܳܗܢܳܝܳܐ ܘܰܫܠܺܝܚܳܝܳܐ ܐܰܘܟܺܝܬ ܠܟܽܘܪܣܝܳܐ ܐܰܢܛܺܝܽܘܟܳܝܳܐ ܐܶܬܓܒܺܝ ܘܶܐܬܬܰܣܪܰܚ: ܟܰܕ ܥܰܠ ܒܺܐܡܰܐ ܦܶܛܪܽܘܣܳܝܬܳܐ ܘܰܫܠܺܝܚܳܝܬܳܐ ܘܺܐܝܓܢܰܐܛܺܝܽܘܣܳܝܬܳܐ ܡ̇ܰܢ ܐܶܬܥܰܠܺܝ: ܒܡ̈ܶܠܐ ܚܠܺܝ̈ܡܳܬܳܐ ܐܰܘܟܺܝܬ ܒܪܶܥܝܳܐ ܫܡܰܝܳܢܳܐ ܕܝܽܘܠܦܳܢ̈ܶܐ ܡܰܚ̈ܝܳܢܶܐ ܠܐܡܪ̈ܶܐ ܕܥܳܢܶܗ ܡܬܰܪܣܶܐ ܗܘܳܐ: ܟܰܕ ܡܶܢܗܽܘܢ ܡ̇ܰܢ ܒܚܽܘܛܪܳܐ ܪܳܕܶܐ ܗܘܳܐ: ܠܐܚܪ̈ܳܢܶܐ ܒܡܰܫܪܽܘܩܺܝܬܳܐ ܠܘܳܬ ܬܽܘܪܣܳܝܳܐ ܕܚܰܝ̈ܶܐ ܡܗܰܕܶܐ ܗܘܳܐ: ܟܰܕ ܠܕܺܐܒ̈ܶܐ ܣܳܪ̈ܽܘܚܶܐ ܒܩܶܠܥܳܐ ܕܗܰܝܡܳܢܽܘܬܳܐ ܘܰܒܟܺܐܦܶܐ ܕܳܪ̈ܝܰܝ ܓܽܘܢܝܳܐ ܡܰܥܪܶܩ ܗܘܳܐ: ܟܰܕ ܕܶܝܢ ܡ̣ܶܢ ܒܺܐܡܰܐ ܢܳܚܶܬ ܗܘܳܐ: ܠܒܶܝܬ ܐܰܦܺܝܣܩܝܽܘܢ ܥܳܐܶܠ ܗܘܳܐ: ܘܰܠܕܽܘܟ̈ܝܳܬܳܐ ܡܣܰܝ̈ܒܳܬܳܐ ܕܗ̇ܳܢܽܘܢ ܡܰܚ̈ܫܰܝ ܐܠܰܗܳܐ ܬܪ̈ܰܝܳܢܰܝ ܟܝ̈ܳܢܶܐ ܒܕܽܘܪ̈ܟܳܬܶܗ ܐܠܰܗܳܝ̈ܳܬܳܐ ܡܩܰܕܶܫ ܗܘܳܐ: ܟܰܕ ܠܙܳܘ̈ܝܳܬܳܐ ܥܰܡܽܘ̈ܛܳܬܳܐ ܕܗ̇ܳܢܽܘܢ ܢܳܨ̈ܝܰܝ ܥܰܡ ܐܠܰܗܳܐ ܒܳܪܽܘܝܳܐ ܒܢܽܘܗܪܳܐ ܐܠܰܗܳܝܳܐ ܡܰܢܗܰܪ ܗܘܳܐ ܟܰܕ ܠܒܶܝܬ ܡܓܺܝܪ̈ܣܶܐ ܕܺܝܠܗܽܘܢ ܕܗ̇ܳܢܽܘܢ ܡܫܰܥܒ̈ܕܰܝ ܠܟܰܪܣܗܽܘܢ ܡ̣ܶܢ ܬܽܘܩ̈ܳܢܶܐ ܘܒܽܘ̈ܫܳܠܐ ܡܓܰܝܶܙ ܗܘܳܐ ܠܒܶܝܬ ܡܰܣܚ̈ܘܳܬܳܐ ܕܺܝܠܗܽܘܢ ܛܰܡ̈ܳܐܬܳܐ ܣܳܬܰܪ ܗܘܳܐ: ܟܰܕ ܗ̣ܽܘ ܛܽܘܒܬܳܢܳܐ: ܬܽܘܪܣܳܝܳܐ ܫܚܺܝܡܳܐ ܘܝܰܪ̈ܩܳܢܶܐ ܘܠܰܚܡܳܐ ܫܚܺܝܡܳܐ ܠܦܰܓܪܶܗ ܢܰܩܕܳܐ ܡܣܰܘܣܶܐ ܗܘܳܐ: ܟܰܕ ܡ̣ܶܢ ܫܶܩܝܳܐ ܕܚܰܡܪ̈ܳܢܶܐ ܠܰܓܡܳܠܐ ܠܐ ܡܶܬܩܰܪܰܒ ܗܘܳܐ: ܠܢܰܦܫܶܗ ܕܶܝܢ ܘܰܠܡܰܪܥܺܝܬܶܗ ܡ̣ܶܢ ܬܽܘܪܣܳܝܳܐ ܥܡܺܝܠܐ ܐܳܦ ܪܽܘܚܳܢܳܝܳܐ ܡܦܰܛܶܡ ܗܘܳܐ: ܟܰܕ ܒܡܰܝ̈ܳܐ ܚܰܝ̈ܶܐ ܘܶܐܘܢܓܶܠܳܝ̈ܶܐ ܠܢܰܦ̈ܫܳܬܗܽܘܢ ܡܰܪܘܶܐ ܗܘܳܐ: ܘܠܐܝܠܶܝܢ ܕܰܒܦܽܘܪ̈ܓܳܝܶܐ ܥܳܠܡܳܢܳܝ̈ܶܐ ܥܳܢܶܝܢ ܗܘܰܘ: ܠܘܳܬ ܦܽܘܠܚܳܢ ܙܰܕܺܝܩܽܘܬܳܐ ܒܡܶܠܰܘ̈ܗܝ ܚܰܝ̈ܳܬܳܐ ܢܳܓܶܕ ܗܘܳܐ: ܘܠܐܝܠܶܝܢ ܕܰܠܘܳܬ ܪܰܩܕܳܐ ܙܰܠܺܝܠܐ ܘܰܙܡܺܝܪ̈ܳܬܳܐ ܦܰܚ̈ܙܳܬܳܐ ܡ̇ܰܢ ܐܰܣܺܝܪܺܝܢ ܗܘܰܘ: ܠܘܳܬ ܩܽܘ̈ܝܳܙܶܐ ܪ̈ܽܘܚܳܢܳܝܶܐ ܘܰܙܡܺܝܪ̈ܳܬܳܐ ܩܰܕܺܝ̈ܫܳܬܳܐ ܘܰܢܦܺܝܚܰܬ ܒܪܽܘܚܳܐ ܩܰܕܺܝܫܳܐ ܡܰܝܬܶܐ ܗܘܳܐ: ܟܰܕ ܠܐܝܠܶܝܢ ܕܒܰܪ̈ܓܺܝܓܳܬܳܐ ܥܳܠܡܳܢܳܝ̈ܳܬܳܐ ܡܛܰܒܥܺܝܢ ܗܘܰܘ: ܠܪܰܘܡܳܐ ܪܳܡܳܐ ܕܙܰܕܺܝܩܽܘܬܳܐ ܡܥܰܠܐܷ ܗܘܳܐ: ܘܠܐܝܠܶܝܢ ܕܝܰܡܶܗ ܕܥܳܠܡܳܐ ܚܢܰܩ ܐܶܢܽܘܢ ܘܡܶܬܡܰܚܫܠܺܝܢ ܗܘܰܘ ܠܰܠܡܺܐܢܳܐ ܕܥܺܕܬܳܐ ܕܰܐܠܳܗܳܐ ܠܗܽܘܢ ܡܫܰܘܙܶܒ ܗܘܳܐ: ܟܰܕ ܒܰܕܡܽܘܬ ܥܢܳܢܳܐ ܢܰܗܺܝܪܬܳܐ ܥܰܠ ܟܽܠܳܗ̇ ܬܺܒܶܝܠ ܦܰܪܺܝܣ ܗܘܳܐ: ܘܠܐܝܠܶܝܢ ܕܰܬܚܶܝܬ ܛܶܠܳܠܶܗ ܡܶܣܬܰܬܪܺܝܢ ܗܘܰܘ: ܡ̣ܶܢ ܫܰܘܒܳܐ ܘܡ̣ܶܢ ܚܽܘܡܳܐ ܡܰܥܕܶܐ ܗܘܳܐ: ܛܰܠܐ ܫܡܰܝܳܢܳܐ ܥܠܰܝܗܽܘܢ ܪܳܐܶܣ ܗܘܳܐ: ܟܰܕ ܡ̣ܶܢ ܟܽܠܗܽܘܢ ܟܰܦܢܳܐ ܘܨܰܗܝܳܐ ܠܟܽܠܗܽܘܢ ܡܦܰܝܶܓ ܗܘܳܐ: ܘܰܐܝܟ ܪܳܥܝܳܐ ܛܳܒܳܐ ܢܰܦܫܶܗ ܚܠܳܦ ܥܳܢ̈ܳܐ ܠܡܰܘܬܳܐ ܟܽܠܝܽܘܡ ܡܰܫܠܶܡ ܗܘܳܐ: ܟܰܕ ܡ̣ܶܢ ܛܪ̈ܽܘܢܶܐ ܚܰܪ̈ܡܶܐ ܘܠܐ ܡܗܰܝ̈ܡܢܶܐ ܕܰܬܪ̈ܰܝܰܝ ܟܝ̈ܳܢܶܐ ܡܶܬܪܕܶܦ ܗܘܳܐ: ܒܕܽܘܟ̈ܝܳܬܳܐ ܠܐ ܝܺܕܺܝ̈ܥܳܬܳܐ ܡܶܬܛܰܫܶܐ ܗܘܳܐ: ܘܰܠܥܶܪ̈ܒܶܐ ܕܡܰܪܥܺܝܬܶܗ ܣܰܒܪܳܐ ܘܠܽܘܒܳܒܳܐ ܒܰܟܬܺܝ̈ܒܳܬܶܗ ܡܰܩܢܶܐ ܗܘܳܐ: ܘܰܕܠܐ ܢܶܬܠܽܘܢ ܐܺܝܕܳܐ ܠܰܒܥܶܠܕ̈ܒܳܒܶܐ ܕܟܺܐܢܽܘܬܳܐ ܡܣܰܗܶܕ ܗܘܳܐ: ܟܰܕ ܡ̣ܶܢ ܟܬܳܒ̈ܶܐ ܩܰܕܺܝ̈ܫܶܐ ܬܰܚܘ̈ܝܳܬܳܐ ܡ̇ܰܢ ܝܳܗܒܰܬ݀ ܚܰܝܠܐ ܡܩܰܪܶܒ ܗܘܳܐ: ܘܡ̣ܶܢ ܙܥܽܘܪܽܘܬ ܢܰܦܫܳܐ ܘܰܐܒܕܳܢܳܐ ܕܢܶܟܣܰܝ̈ܗܽܘܢ ܡܢܳܚ ܗܘܳܐ ܟܰܕ ܕܰܢܒܰܣܪ̈ܳܢ ܥܰܠ ܣܰܝ̈ܦܶܐ ܕܚܺܝ̈ܠܐ ܡܶܛܽܠ ܗܰܝܡܳܢܽܘܬܳܐ ܐܳܪܬܳܕܽܘܟܣܳܝܬܳܐ ܠܗܽܘܢ ܡܚܰܦܶܛ ܗܘܳܐ: ܟܽܠܗܽܘܢ ܕܶܝܢ ܐܰܝܟ ܐܰܪܥܳܐ ܛܳܒܬܳܐ ܠܐܝܠܶܝܢ ܕܫܳܡܥܺܝܢ ܗܘܰܘ: ܘܦܺܐܪ̈ܶܐ ܛܳܒ̈ܶܐ ܒܙܰܒܢܰܝ̈ܗܽܘܢ ܝܳܗܒܺܝܢ ܗܘܰܘ: ܟܰܕ ܒܙܰܒܢܳܐ ܕܫܽܘܢܳܝܶܗ ܕܰܠܘܳܬ ܡܳܪܶܗ ܬܶܕܡܪ̈ܳܬܳܐ ܚܰܕ̈ܬܶܐ ܡܶܬܚܰܘ̈ܝܳܢ ܗܘܰܝ̈: ܟܰܕ ܠܟܽܠܢܳܫ ܒܰܩܛܺܝܪܳܐ ܕܚܽܘܒܳܐ ܠܡܰܣܚܽܘܬܶܗ ܕܦܰܓܪܳܐ ܒܒܰܠܐܱܢܺܝ ܠܶܗ ܡܰܥܠܶܝܢ ܟܰܕ ܗ̣ܽܘ ܩܰܕܺܝܫܳܐ ܡܳܪܝ ܣܶܐܘܺܝܪܶܐ ܠܗܽܘܢ ܠܐ ܫܳܡܰܥ ܗܘܳܐ ܟܰܕ ܐܳܡܰܪ: ܕܡ̣ܶܢ ܒܳܬܰܪ ܣܚܳܬܳܐ ܩܰܕܺܝܫܬܳܐ ܕܰܒܡܰܥܡܽܘܕܺܝܬܳܐ ܒܡܰܝ̈ܳܐ ܫܚܺܝ̈ܡܶܐ ܣܳܚܶܐ ܐ̱ܢܳܐ: ܟܰܕ ܠܕܽܘܟܬܳܐ ܗ̇ܳܝ ܕܒܳܗ̇ ܡܰܓܶܣ ܗܘܳܐ: ܝܳܗܒܰܬ݀ ܚܰܝ̈ܠܐ ܘܥܽܘܕܪ̈ܳܢܶܐ ܥܒܺܝܕܺܝܢ ܠܟܽܠܗܽܘܢ ܐ̱ܢܳܫ̈ܳܐ: ܘܟܰܕ ܡ̣ܶܢ ܬܰܡܳܢ ܫܰܠܶܡ ܠܪܶܗܛܳܐ ܕܚܰܝܰܘ̈ܗܝ ܡ̣ܶܢ ܟܽܘܪܗܳܢܶܗ ܢܝܳܚܳܐ ܠܐ ܐܶܫܬܟܰܚ ܠܶܗ: ܠܘܳܬ ܓܽܘܪܢܐ ܗ̇ܰܘ ܕܒܰܫܩܳܠ ܛܰܥܢܳܐ ܣܰܓܺܝܳܐܐ ܥܒܺܝܕ ܗܘܳܐ ܠܦܰܓܪܳܐ ܩܰܕܺܝܫܳܐ ܒܥܶܕܳܢ ܫܽܘܢܳܝܶܗ ܡܰܝܬܶܝܢ ܗܘܰܘ: ܟܰܕ ܥܰܠ ܓܽܘܪܢܳܐ ܣܳܡܽܘܗܝ ܠܗܰܘ ܦܰܓܪܳܐ ܩܰܕܺܝܫܳܐ: ܗ̇ܰܘ ܓܽܘܪܢܳܐ ܡ̇ܰܢ ܐܶܫܬܟܰܚ ܕܰܙܥܽܘܪܳܐ ܐܺܝܬܰܘܗܝ ܘܰܩܦܺܝܣܳܐ ܘܠܐ ܥܳܪܶܐ ܠܶܗ: ܟܰܕ ܒܰܬܘܳܪܳܐ ܪܰܒܳܐ ܩܳܝܡܺܝܢ ܗܘܰܘ ܟܽܠܗܽܘܢ ܘܠܐ ܝܳܕܥܺܝܢ ܗܘܰܘ ܡܳܢܳܐ ܢܶܥܒܕܽܘܢ: ܠܓܽܘܪܢܳܐ ܐܰܪܰܐ ܢܬܰܒܪܽܘܢ ܠܐ ܒܳܥܶܝܢ ܗܘܰܘ: ܘܰܠܒܽܘܪ̈ܟܰܝܗܽܘܢ ܢܛܰܚܢܽܘܢ ܘܰܢܬܰܒܪܽܘܢ ܠܐ ܡܶܫܟܚܺܝܢ ܗܘܰܘ: ܗܳܝܕܶܝܢ ܡ̣ܶܢ ܫܶܠܝܳܐ ܠܦܰܓܪܳܐ ܩܰܕܺܝܫܳܐ ܒܓܽܘܪܢܳܐ ܐܰܚܬܽܘܗܝ ܗܘܰܘ: ܡ̣ܶܢ ܒܳܬܰܪ ܨܳܡܘ ܘܨܰܠܺܝܘ ܘܒܳܥܽܘܬܳܐ ܠܐܠܳܗܳܐ ܐܰܩܺܝܡܘ ܗܘܰܘ: ܘܶܐܫܟܚܽܘܗܝ ܕܶܐܬܡܠܺܝ ܡܶܢܶܗ ܗ̇ܰܘ ܓܽܘܪܢܳܐ ܘܛܳܒܳܐܝ̣ܬ ܐܶܬܬܣܺܝܡ: ܘܟܽܠܗܽܘܢ ܬܶܫܒܽܘܚܬܳܐ ܠܐܠܳܗܳܐ ܐܰܣܶܩܘ ܗܘܰܘ: ܟܰܕ ܠܐ ܝܳܕܥܺܝܢ ܡܳܢܰܐ ܗ̱ܘ ܕܰܗܘܳܐ: ܓܽܘܪܢܳܐ ܝܺܪܶܟ: ܐܰܘ ܦܰܓܪܳܐ ܩܰܕܺܝܫܳܐ ܕܚܰܣܝܳܐ ܘܛܽܘܒܬܳܢܳܐ ܐܶܬܩܦܶܣ: ܐܳܘ ܠܬܶܗܪܳܐ ܪܰܒܳܐ: ܐܳܘ ܠܬܶܕܡܽܘܪܬܳܐ ܪܰܒܬܳܐ ܘܰܚܕܰܬܳܐ ܘܰܬܡܺܝܗܬܳܐ: ܕܠܐ ܐܶܬܩܦܶܣ ܦܰܓܪܳܐ ܘܠܐ ܓܽܘܪܢܳܐ ܐܶܬܡܬܰܚ: ܡܳܐ ܬܡܺܝܗܺܝܢ ܥܒܳܕܰܝ̈ܟ ܡܳܪܝܳܐ: ܡܳܐ ܠܘܳܬܳܟ ܡܰܘܬܳܐ ܕܚܰܒܺܝ̈ܒܰܝܟ: ܘܒܰܕܓܽܘܢ ܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܰܢ ܡܩܰܪܒܺܝܢܳܢ ܠܳܟ ܬܰܟܫܦܬܳܐ ܡܰܘܪܶܒ ܠܪ̈ܳܚܡܰܘܗܝ: ܕܒܰܨܠܰܘ̈ܳܬܶܗ ܘܰܒܒܳܥ̈ܘܳܬܶܗ ܕܛܘܽܒܬܳܢܳܐ ܦܰܛܪܝܰܪܟܳܐ ܡܳܪܝ ܣܶܐܘܺܝܪܶܐ: ܗܰܒ ܠܟܽܠܰܢ ܐܰܚܺܝ̈ܕܰܝ ܠܰܫܪܳܪܳܐ ܕܗܰܝܡܳܢܽܘܬܳܐ ܕܰܢܩܰܪܶܒ ܦܺܐܪ̈ܶܐ ܕܰܡܪܰܥܶܝܢ ܠܡܳܪܽܘܬܳܟ ܘܫܰܟܶܢ ܠܰܢ ܕܢܶܫܬܰܘܫܰܛ ܒܰܥ̈ܒܳܕܶܐ ܕܙܰܕܺܝܩܽܘܬܳܐ: ܘܰܒܦܽܘܠܚܳܢܳܐ ܛܳܒܳܐ ܕܰܡܝܰܬܪ̈ܳܬܳܐ ܒܕܽܘܒܳܪ̈ܶܐ ܕܩܰܕܺܝܫܽܘܬܳܐ: ܒܬܰܘܕܺܝܬܳܐ ܕܟܺܝܬܳܐ ܘܰܒܗܰܝܡܳܢܽܘܬܳܐ ܠܐ ܥܕܺܝܠܬܳܐ: ܒܥܽܘܠܳܝܳܐ ܕܡ̣ܶܢ ܗܳܠܶܝܢ ܕܰܠܬܰܚܬ ܠܘܳܬ ܗܳܠܶܝܢ ܕܰܠܥܶܠ: ܒܨܽܘܠܳܠܐ ܕܗܰܘܢܳܐ ܘܰܕܦܰܓܪܳܐ ܘܰܕܢܰܦܫܳܐ ܒܚܽܘܒܳܐ ܕܠܐ ܐܰܟܬܳܐ ܒܬܰܪܥܺܝܬܳܐ ܚܠܺܝܡܬܳܐ: ܟܰܕ ܡܢܰܛܰܪ ܐܰܢ̱ܬ ܠܰܢ ܒܚܰܝܠܶܗ ܕܰܨܠܺܝܒܳܐ ܙܰܟܳܝܳܐ ܘܒܰܨܠܽܘܬ ܐܶܡܳܟ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܘܕܰܡܢܺܝܚܳܢܳܟ ܡܳܪܝ ܣܶܐܘܺܝܪܶܐ: ܢܶܬܦܰܨܶܐ ܡ̣ܶܢ ܒܺܝܫܽܘܬܳܐ ܕܫܺܐܕ̈ܶܐ ܘܡ̣ܶܢ ܦܰܚ̈ܶܐ ܐܺܝܪ̈ܺܝܛܺܝܩܳܝܶܐ ܘܛܳܥܝܽܘܬ ܟܽܘܪ̈ܗܳܢܶܐ ܗܰܓܳܓܳܝ̈ܶܐ: ܘܡ̣ܶܢ ܪܰܘܡܳܐ ܕܰܬܪ̈ܰܝܰܝ ܟܝ̈ܳܢܶܐ: ܘܡ̣ܶܢ ܚܽܘ̈ܫܳܒܶܐ ܫܟܺܝܪ̈ܶܐ ܘܡ̣ܶܢ ܚܰܫ̈ܶܐ ܢܕܺܝ̈ܕܶܐ: ܟܰܕ ܠܟܽܠܰܢ ܓܰܘܳܢܳܐܝ̣ܬ ܘܰܠܟܽܠ ܚܰܕ ܕܺܝܠܳܢܳܐܝ̣ܬ ܗ̇ܳܝ ܕܥܳܕܪܳܐ ܘܦܳܩܚܳܐ ܠܰܢ ܡܫܰܟܶܢ ܐܰܢ̱ܬ ܘܰܚܢܰܢ ܘܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܥܢܰܕܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܪܺܝܚܳܐ ܚܰܠܝܳܐ ܘܥܶܛܪܳܐ ܗܰܢܺܝܳܐܐ ܘܦܺܝܪܡܳܐ ܕܰܡܠܐܷ ܬܰܪܥܽܘܬܳܐ: ܐܰܡܺܝܢܳܐܝ̣ܬ ܦܳܐܰܚ ܠܳܟ ܡ̣ܶܢ ܓܰܪ̈ܡܰܝܗܽܘܢ ܕܰܪ̈ܚܽܘܡܰܝܟ: ܗ̣ܽܘ ܢܶܗܘܶܐ ܡܦܺܝܣܳܢܳܐ ܠܐܠܳܗܽܘܬܳܟ ܚܠܳܦ ܚܰܛܳܝ̈ܶܐ ܘܡܰܣܟ̈ܠܳܢܶܐ: ܚܠܳܦ ܛܳܥܰܝ̈ܳܐ ܘܰܐܒܺܝ̈ܕܶܐ: ܚܠܳܦ ܫܒܰܝܳ̈ܐ ܟܽܠ ܐܰܝܠܶܝܢ ܕܰܪܕܺܝܦܺܝܢ ܘܕܰܛܠܺܝܡܺܝܢ: ܘܰܚܠܳܦ ܟܠܺܝܠܐ ܕܫܰܢ̱ܬܳܐ ܕܢܶܬܒܰܪܰܟ: ܘܰܚܠܳܦ ܐܰܝܠܶܝܢ ܕܡܶܬܢܰܣܶܝܢ ܡ̣ܶܢ ܪ̈ܽܘܚܶܐ ܒܺܝ̈ܫܳܬܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܫܰܒܚܳܐ ܕܫܰܒܰܚ ܘܰܫܒܺܝܚ ܒܢܰܨܺܝ̈ܚܶܐ ܡܳܪܝ ܣܶܐܘܺܝܪܶܐ ܒܪܺܝܫ ܟܽܠܗܶܝܢ ܥܺܕ̈ܳܬܳܐ ܕܣܽܘܪ̈ܝܳܝܶܐ: ܘܝܰܗܒ ܠܶܗ ܡܶܠܬܳܐ ܚܠܺܝܡܬܳܐ ܘܰܐܠܳܗܳܝܬܳܐ ܘܰܡܠܐܷ ܠܟܽܠܳܗ̇ ܬܺܒܶܝܠ ܚܰܝ̈ܶܐ ܕܠܐ ܡܶܬܚܰܒܠܳܢܽܘܬܳܐ: ܠܗܰܘ ܕܢܰܨܚܶܗ ܒܰܪܕܽܘܦܝܳܐ ܕܰܬܪ̈ܰܝܰܝ ܟܝ̈ܳܢܶܐ: ܡܶܛܽܠ ܪܕܺܝܦܽܘܬܶܗ ܘܰܫܪܳܪܶܗ ܘܩܰܠܣܶܗ ܡܳܪܶܗ ܘܰܐܘܪܶܒ ܕܽܘܟܪܳܢܶܗ ܠܗܰܘ ܕܰܐܥܺܝܪ ܠܟܶܢܫܰܢ ܕܰܢܩܰܠܣܺܝܘܗܝ ܠܥܺܐܕܶܗ ܐܠܰܗܳܝܳܐ: ܕܫܳܘܶܐ ܠܟܽܠ ܩܳܠܺܝ̣̈ܢ ܕܰܢܚܰܓܺܝܘܗܝ ܠܥܺܐܕܶܗ: ܕܠܶܗ ܠܰܡܚܰܝܠܳܢܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ܀

 

 

 

ܣܕܪܐ

 

 

 

ܒܰܐܝܕܳܐ ܒܰܪܬ ܩܳܠܐ ܢܶܪܬܽܘܡ ܠܶܗ ܩܽܘܠܳܣ̈ܶܐ ܠܥܺܐܕܳܟ ܫܒܺܝܚ ܒܟܽܠ ܪܰܗܳܛܳܐ ܦܺܝܠܽܘܣܽܘܦܳܐ: ܠܺܠܝܳܐ ܓܶܝܪ ܘܺܐܝܡܳܡܳܐ ܕܟܽܠܶܗ ܡܶܬܚܳܐ ܕܚܰܝ̈ܶܐ ܙܰܒܢܳܝ̈ܶܐ ܐܠܶܘ ܩܰܠܶܣܢܰܢ ܠܐ ܡܰܘܦܶܝܢܰܢ ܠܡܺܐܡܰܪ ܩܽܘܠܳܣܰܝ̈ܟ: ܐܠܶܝܳܐ ܒܛܰܢܳܢܽܘܬܳܐ: ܡܽܘܫܶܐ ܢܒܺܝܳܐ ܒܡܰܟܺܝܟܽܘܬܳܐ: ܐܠܶܝܫܳܥ ܒܬܶܕܡܪ̈ܳܬܳܐ: ܕܰܘܺܝܕ ܒܰܢܒܺܝܽܘܬܳܐ: ܐܶܪܰܡܝܳܐ ܒܡܰܟܣܳܢܽܘܬܳܐ: ܐܠܶܘ ܒܟܽܠܗܽܘܢ ܩܰܕ̈ܡܳܝܶܐ ܚܳܪܢܰܢ ܥܳܒܪܳܐ ܡܝܰܬܪܽܘܬܳܟ ܠܟܽܠܗܽܘܢ: ܕܰܐܠܶܦ ܘܰܟܬܰܒܬ ܘܚܰܕܺܝܬ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܐܠܰܘܶܬ ܠܟܽܠ ܒܡܶܠܬܳܐ ܕܥܰܠ ܡܶܬܒܰܣܪܳܢܽܘܬܳܐ ܘܰܐܠܶܦ ܕܚܰܕ ܡ̣ܶܢ ܬܠܺܝܬܳܝܽܘܬܳܐ ܐܺܝܬܰܘܗܝ ܡܶܠܬܳܐ ܐܠܰܗܳܐ ܕܶܐܬܒܰܣܰܪ ܕܠܐ ܫܽܘܚܠܳܦܳܐ ܒܶܣܪܳܐ ܡܢܰܦܫܳܐ ܡܗܰܘܢܳܐ: ܟܰܕ ܒܗܳܠܶܝܢ ܟܽܠܗܶܝܢ ܕܺܝܠܰܢ ܐܶܬܕܰܡܺܝ ܣܛܰܪ ܡ̣ܶܢ ܚܛܺܝܬܳܐ: ܘܥܰܠ ܗܳܕܶܐ ܥܰܡ ܡܳܪܳܟ ܠܡܶܨܪܶܝܢ ܥܪܰܩܬ  ܗܘܰܝܬ: ܘܠܳܟ ܐܰܒܽܘܢ ܐܰܝܟ ܕܰܠܥܺܕܬܳܐ ܣܰܬܰܪܬ: ܘܰܙܪܰܥܬ ܒܳܗ̇ ܡܶܠܬܳܐܕܚܰܝ̈ܶܐ ܒܗܰܝܡܳܢܽܘܬܳܐ ܫܠܺܝܚܳܝܬܳܐ ܘܡ̣ܶܢ ܩܕܳܡ ܪ̈ܳܕܽܘܦܰܝܟ ܥܪܰܩܬ: ܡ̣ܶܢ ܡܕܺܝܢ̱ܬܳܐ ܠܰܡܕܺܝܢ̱ܬܳܐ ܫܰܢܺܝܬ: ܐܰܝܟ ܡܶܠܬܳܐ ܐܶܘܢܓܶܠܳܝܬܳܐ ܕܡܳܪܳܟ: ܘܰܒܟܽܠܗܽܘܢ ܕܳܪ̈ܶܐ ܛܰܪ̈ܩܶܐ ܐܶܬܚܙܰܝܬ: ܘܡ̣ܶܢ ܥܳܠܡܳܐ ܗܳܢܳܐ ܡܠܐܷ ܥܳܩ̈ܳܬܳܐ ܒܚܰܕܽܘܬܳܐ ܐܰܫܩܶܠܬ ܘܰܒܢܽܘܗܪܳܐ ܐܠܰܗܳܝܳܐ ܡܶܬܒܰܣܰܡ ܐܰܢ̱ܬ: ܘܥܰܠܗܳܕܶܐ ܚܳܝ̈ܒܳܢ ܡ̈ܶܠܐ ܘܓܳܗܪ̈ܳܢ ܒܢ̈ܳܬ ܩ̈ܳܠܐ ܠܰܡܚܰܘܳܝܽܘ ܥܽܘܬܪܳܐ ܕܰܟܣܶܐ ܒܒܶܝܬ ܓܰܙܳܟ ܣܒܺܝܣ ܒܥܽܘܬܪ̈ܶܐ ܠܐ ܡܶܬܡܰܣ̈ܟܢܶܐ ܕܡܳܪܳܟ: ܘܥܰܡ ܥܺܝܪ̈ܰܝ ܪܰܘܡܳܐ ܢܰܙܥܶܩ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܐܰܓܽܘܢܺܝܣܛܳܐ ܙܪܺܝܙܳܐ ܦܰܛܪܝܰܪܟܳܐ ܣܶܐܘܺܝܪܶܐ: ܕܬܰܒܰܪܬ ܣܽܘ̈ܛܡܶܐ ܘܟܶܒ̈ܠܐ ܕܰܬܪ̈ܰܝܰܝ ܟܝ̈ܳܢܶܐ: ܘܰܐܒܗܶܬܬ ܠܟܰܠܩܺܝ̈ܕܽܘܢܳܝܶܐ ܛܳܠܡ̈ܰܝ ܩܽܘܫܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ: ܒܶܪܽܘܠܐ ܠܐ ܫܰܦܺܝܪܳܐ ܕܰܒܨܰܘܪܳܐ ܕܺܝܠܳܗ̇ ܕܥܺܕܬܳܐ ܩܰܕܺܝܫܬܳܐ ܚܪܺܝܙ ܘܡܰܥܘܰܪ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܰܓܠܰܝܬ ܠܚܰܫܰܘ̈ܗܝ ܕܡܳܪܳܟ ܘܰܐܒܗܶܬܬ ܠܝܽܘܠܺܝܢܺܝ̈ܣܛܶܐ ܗܰܓܳܓܳܝ̈ܶܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܡܶܬܦܰܫܰܩ ܫܡܳܟ ܡܬܰܒܰܪ ܠܟܽܠ ܐܶܪ̈ܶܣܺܝܣ ܕܰܓ̈ܳܠܳܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܗܰܝܡܳܢܽܘܬܳܐ ܕܠܐ ܙܺܐܦܳܐ ܐܰܟܪܶܙܬ ܠܟܽܠ ܥܰܡܡܺܝ̈ܢ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܘܳܠܝܳܐܝ̣ܬ ܐܶܬܗܰܕܺܝܬ ܒܽܐܘܪܚܳܐ ܕܰܫܠܺܝܚܽܘܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܙܡܰܪܓܕܳܐ ܝܰܩܺܝܪܳܐ ܕܙܰܒܶܢܬ ܩܢܽܘܡܳܟ ܘܰܙܒܶܢܬ ܡܰܠܟܽܘܬܳܐ ܡܰܠܟܽܘܬܳܐ ܕܰܫܡܰܝܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܚܕܽܘܓܳܐ ܘܝܳܪܬܳܐ ܕܡܶܕܶܡ ܕܛܰܝܶܒ ܐܠܰܗܳܐ ܠܰܕܪܳܚܡܺܝܢ ܠܶܗ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܛܳܒ ܐܶܬܟܰܬܰܫܬ ܚܠܳܦ ܗܰܝܡܳܢܽܘܬܳܐ ܕܡܳܪܳܟ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܝܳܪܽܘܬܳܐ ܥܒܺܝܕ ܐܰܢ̱ܬ ܕܗ̇ܳܝ ܡܰܠܟܽܘܬܳܐ ܕܰܫܡܰܝܳܐ: ܚܠܳܦ ܥܰܡܠܳܟ ܘܛܽܘܪܳܦܳܟ ܕܥܰܠ ܐܰܦܶܝ̈ܗ̇: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܟܽܘ̈ܒܶܐ ܘܙܺܝܙ̈ܳܢܶܐ ܘܕܰܪܕܪ̈ܶܐ ܥܩܰܪܬ ܡ̣ܶܢ ܓܰܘ ܥܺܕܬܳܐ ܡܗܰܝܡܰܢܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܠܰܘ ܗܳܠܶܝܢ ܕܒܰܐܪܥܳܐ ܐܶܬܪܰܥܺܝܬ: ܐܶܠܐ ܗ̇ܳܢܶܝܢ ܫܡܰܝܳܢ̈ܝܳܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܡܰܠܦܳܢܳܐ ܒܚܺܝܪܳܐ ܕܶܐܬܬܰܠܡܰܕܬ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܣܰܝܒܰܪܬ ܕܡ̣ܶܢ ܪܳܕܽܘܦܳܟ ܚܰܫ̈ܶܐ ܘܨܰܥܪܳܐ ܘܛܽܘܪ̈ܳܦܶܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܰܥܒܰܪܬ ܠܟܽܠܗܽܘܢ ܡܰܠܦܳܢ̈ܶܐ ܒܰܡܝܰܬܪܽܘܬܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܨܰܒܶܬܬ ܠܥܺܕܬܳܐ ܩܰܕܺܝܫܬܳܐ ܒܝܰܘ̈ܡܳܬܳܟ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܦܰܛܪܝܰܪܟܳܐ ܡܥܰܠܝܳܐ ܕܟܽܘܪܣܝܳܐ ܕܰܐܢܛܺܝܽܘܟܺܝܰܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܩܪܰܒܬܳܢܳܐ ܕܬܰܒܰܪܬ ܘܰܣܚܰܦܬ ܠܡܶܬܦ̈ܰܠܓܰܝ ܥܰܠ ܡܶܬܒܰܪܢܫܳܢܽܘܬܶܗ ܕܡܳܪܝܳܐ ܡܫܺܝܚܳܐ: ܠܳܟ ܛܽܘܒܰܝܟ ܣܶܐܘܺܝܪܶܐ ܕܪܰܒܳܐ ܘܰܡܫܰܡܗܳܐ ܥܒܺܝܕ ܐܰܢ̱ܬ ܠܟܽܠܗܽܘܢ ܣܽܘܪ̈ܝܳܝܶܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܫܳܛܬ ܒܪܶܚܡܰܬ ܡܳܪܽܘܬܳܐ ܕܡܳܪܳܟ ܠܟܽܠܶܗ ܥܳܠܡܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܬܰܦܳܐ ܕܠܐ ܓܳܐܶܙ: ܪܶܕܝܶܗ ܕܰܐܥܬܰܪܬ ܠܥܺܕܬܳܐ ܩܰܕܺܝܫܬܳܐ ܒܡܰܠܦܳܢܽܘܬܳܟ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܰܒܫܶܡ ܩܰܫܺܝܫܳܟ ܐܰܒܳܐ ܕܰܐܒܽܘܟ ܐܶܬܟܰܢܺܝܬ ܡ̣ܶܢ ܡܰܥܡܽܘܕܺܝܬܳܐ ܐܶܦܣܩܽܘܦܳܐ ܥܒܺܝܕ ܗܘܳܐ ܠܡܳܪܝܳܐ ܒܗܳܕܶܐ ܡܕܺܝܢ̱ܬܳܐ ܕܰܫܡܳܗ̇ ܣܽܘܙܽܘܦܠܺܝܣ: ܘܰܫܒܺܝܚ ܗܘܳܐ ܒܡܰܠܦܳܢܽܘܬܳܐ ܘܗܰܝܡܳܢܽܘܬܳܐ ܬܪܺܝܨܬܳܐ ܐܰܚܺܝܕ ܗܘܳܐ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܟܡܳܐ ܫܒܺܝܚܳܐ ܗܘܳܬ ܩܰܘܡܬܳܟ ܦܰܓܪܳܢܳܝܬܳܐ: ܘܰܒܝܽܘܡ ܡܰܘܬܳܟ ܒܓܽܘܪܢܳܐ ܢܩܺܝܪܳܐ ܕܟܺܐܦܳܐ ܕܣܳܡܽܘܟ: ܘܒܺܐܝܩܳܪܳܐ ܪܰܒܳܐ ܥܰܦܺܝܘ ܠܦܰܓܪܳܟ: ܠܳܟ ܛܽܘܒܰܝܟ ܡܳܪܝ ܣܶܐܘܺܝܪܶܐ ܕܒܰܫܢܰܬ݀ ܬܡܳܢܶܡܳܐܐ ܘܥܶܣܪܺܝܢ ܘܰܐܪܒܰܥ ܝܺܬܶܒܬ ܥܰܠ ܟܽܘܪܣܝܳܐ ܕܶܝܢ ܕܦܰܛܪܝܰܪܟܽܘܬܳܐ: ܘܒܰܫܢܰܬ݀ ܬܡܳܢܶܡܳܐܐ ܘܚܰܡܫܺܝܢ ܘܰܬܠܳܬ ܫܟܶܒܬ ܘܶܐܬܬܢܺܝܚܬ ܒܰܫܒܳܛ ܝܰܪܚܳܐ ܒܰܬܡܳܢܝܳܐ ܒܶܗ ܒܝܰܘܡܳܐ ܕܫܰܒܬܳܐ ܘܰܗܘܰܘ ܚܰܝܰܝ̈ܟ ܫܰܒܥܺܝܢ ܘܰܬܫܰܥ: ܘܠܰܥܕܶܝܢ ܐܰܫܩܰܠܬ ܘܡܶܛܽܠܗܳܕܶܐ ܥܺܕܬܳܐ ܩܰܕܺܝܫܬܳܐ ܠܘܳܬܳܟ ܡܰܙܥܩܳܐ ܘܳܐܡܪܳܐ: ܣܶܐܘܶܝܪܳܘܣ ܦܺܝܪܡܳܐ ܕܬܰܪܥܽܘܬܳܐ: ܣܶܐܘܶܝܪܳܘܣ ܥܰܡܽܘܕܳܐ ܕܥܺܕܬܳܐ ܩܰܕܺܝܫܬܳܐ: ܣܶܐܘܶܝܪܳܘܣ ܨܶܒܬܳܐ ܫܰܪܺܝܪܳܐ ܕܣܳܗ̈ܕܶܐ: ܣܶܐܘܶܝܪܳܘܣ ܡܩܰܠܣܳܢܳܐ ܕܰܐܓܽܘܢܰܝ̈ܗܽܘܢ: ܣܳܐܘܶܝܪܳܘܣ ܐܰܪܕܳܐ ܕܠܐ ܡܶܬܒܰܙܒܰܥ ܡ̣ܶܢ ܓܶܐܪ̈ܶܐ ܐܺܝܪ̈ܺܝܛܺܝܩܳܝܶܐ: ܣܶܐܘܶܝܪܳܘܣ ܬܰܠܡܺܝܕܳܐ ܫܰܪܺܝܪܳܐ ܕܰܡܫܺܝܚܳܐ: ܕܰܠܬܶܐܘܳܠܳܘܓܺܝܰܐ ܡܰܠܶܠ ܐܠܰܗܳܐܝ̣ܬ ܩܕܳܡ ܪ̈ܳܕܽܘܦܰܘܗܝ ܕܰܒܝܰܕ ܨܠܰܘ̈ܳܬܶܗ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܬܶܬܪܰܥܳܐ ܠܰܢ ܒܒܰܣܺܝܡܽܘܬܳܟ: ܘܰܬܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ: ܟܰܕ ܠܰܟܪ̈ܺܝܗܶܐ ܝܳܗܶܒ ܐܰܢ̱ܬ ܚܽܘܠܡܳܢܳܐ: ܠܐܠܺܝ̈ܨܶܐ ܢܦܺܐܫܳܐ ܘܰܠܥܰܬܺܝܪ̈ܶܐ ܫܽܘܪܬܳܚܳܐ ܒܙܶܕ̈ܩܳܬܳܐ: ܠܡܶܣ̈ܟܺܢܶܐ ܩܽܘܒܳܠ ܛܰܝܒܽܘܬܳܐ ܒܡܰܘܕܝܳܢܽܘܬܳܐ: ܠܟܳܗ̈ܢܶܐ ܘܰܡܫܰܡ̈ܫܳܢܶܐ ܕܰܟܝܽܘܬܳܐ ܘܕܽܘܒܳܪ̈ܶܐ ܡܝܰܬܪ̈ܶܐ ܘܟܽܠܶܗ ܛܶܟܣܳܐ ܥܺܕܬܳܢܳܝܳܐ: ܥܰܬܺܝܪܽܘܬ ܝܽܘܠܦܳܢܳܐ ܐܠܰܗܳܝܳܐ ܒܝܰܕ ܕܶܚܠܬܳܐ ܫܰܪܺܝܪܬܳܐ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܐܶܢܽܘܢ: ܘܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܐܰܫܘܳܐ ܠܟܽܠܰܢ: ܘܥܰܠ ܟܽܠ ܩܰܘ̈ܡܳܢ ܘܡܽܘܫ̈ܚܳܢ ܕܰܒܥܺܕܬܳܐ ܪ̈ܰܚܡܶܐ ܘܰܚܢܳܢܳܐ ܢܶܗܘܽܘܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܝܠܕܬ ܐܠܗܐ ܕܡܛܠ ܙܪ̈ܥܐ ܕܢܬܒܪܟܘܢ ܘܢܬܢܛܪܘܢ ܘܡܫܬܡܠܐ ܒܟܣܗ ܕܟܢܘܢ ܐܚܪܝ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ ܒܛܰܝܒܽܘܬܳܟ ܕܟܰܕ ܢܰܗܺܝܪܺܝܢ ܡܰܕ̈ܥܰܝܢ ܘܰܕܟܶܝܢ ܚܽܘܫܳܒܰܝ̈ܢ: ܘܰܡܩܰܕܫܺܝܢ ܦܰܓܪ̈ܰܝܢ ܘܢܰܦ̈ܫܳܬܰܢ: ܢܥܰܕܥܶܕ ܘܰܢܚܰܓܶܐ ܠܥܺܐܕܳܐ ܒܪܺܝܟܳܐ ܘܰܡܒܰܪܟܳܐ ܕܝܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ: ܕܢܶܬܒܰܪ̈ܟܳܢ ܚܰܩ̈ܠܳܬܰܢ ܘܰܐܪ̈ܥܳܬܳܐ ܕܠܶܒܰܘܳ̈ܬܰܢ: ܠܰܡܩܰܒܳܠܽܘ ܙܰܪܥܳܐ ܒܪܺܝܟܳܐ ܘܩܰܕܺܝܫܳܐ ܕܦܽܘܩ̈ܕܳܢܰܝܟ ܪ̈ܽܘܚܳܢܳܝܶܐ: ܘܢܶܬܢܰܛܪ̈ܳܢ ܡܶܢܟܽܠ ܢܶܟ̈ܝܳܢܶܐ ܘܣܽܘܓ̈ܦܳܢܶܐ ܕܢ̈ܶܬܠܳܢ ܦܺܐܪ̈ܶܐ ܗܕܺܝܪ̈ܶܐ ܚܰܕ ܒܰܬܠܳܬܺܝܢ ܘܒܶܫܬܺܝܢ ܘܒܰܡܳܐܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܦܺܐܪܳܐ ܡܫܰܒܚܳܐ ܕܡ̣ܶܢ ܥܽܘܒܳܐ ܒܬܽܘܠܳܝܳܐ ܫܘܰܚ ܘܰܢܦܰܩ ܠܥܳܠܡܳܐ: ܘܰܠܡܺܝ̈ܬܰܝ ܒܡܶܐܟܽܘܠܬܳܐ ܕܰܥܒܳܪ ܦܽܘܩܕܳܢܳܐ ܦܪܰܩ ܘܰܐܚܺܝ: ܠܗܰܘ ܥܶܩܳܪܳܐ ܒܪܺܝܟܳܐ ܕܡ̣ܶܢ ܐܰܪܥܳܐ ܨܗܺܝܬܳܐ ܡܰܪܝܰܡ ܝܺܥܳܐ ܘܰܣܠܶܩ: ܘܰܠܟܪ̈ܺܝܗܰܝ ܒܰܚܛܺܝܬܳܐ ܐܰܣܺܝ: ܠܗܰܘ ܡܰܢܢܳܐ ܚܰܠܝܳܐ ܕܰܒܩܶܣܛܳܐ ܡܠܺܝܠܬܳܐ ܡܰܪܝܰܡ ܐܶܬܬܣܺܝܡ: ܘܰܠܡܰܪܺܝܪ̈ܰܝ ܒܛܽܘܥܝܰܝ ܚܰܠܺܝ: ܠܗܰܘ ܣܓܽܘܠܐ ܕܚܰܕ̈ܘܳܬܳܐ ܕܒܰܓܦܶܬܳܐ ܡܫܰܒܰܚܬܳܐ ܡܰܪܝܰܡ ܐܶܬܚܰܘܺܝ: ܘܰܠܥܰܝܺܝ̈ܩܰܝ ܪܽܘܚܳܐ ܒܚܰܡܪܶܗ ܚܰܕܺܝ: ܠܗܰܘ ܫܶܒܠܐ ܫܡܰܝܳܢܺܝܬܳܐ ܕܰܒܚܰܩܠܐ ܕܠܐ ܦܠܺܝܚܳܐ ܡܰܪܝܰܡ ܐܶܬܚܙܺܝ: ܘܰܠܟܰܦܢܽܘܬܳܐ ܕܥܰܡ̈ܡܶܐ ܣܰܒܰܥ: ܠܗܰܘ ܡܶܠܚܳܐ ܡܡܰܕܟܳܢܺܝܬܳܐ ܕܰܒܩܰܘܡܬܳܐ ܚܕܰܬܳܐ ܡܰܪܝܰܡ ܐܶܬܬܣܺܝܡ: ܘܰܠܟܽܠܳܗ̇ ܦܰܟܺܝܗܽܘܬܳܐ ܕܰܐܪܥܳܐ ܡܰܕܰܟ: ܠܗܰܘ ܡܳܪܳܐ ܕܰܟܪ̈ܽܘܒܶܐ ܕܥܰܠ ܡܰܪܟܰܒܬܳܐ ܒܶܣܪܳܢܳܝܬܳܐ ܡܰܪܝܰܡ ܐܶܙܕܰܝܰܚ: ܘܡ̈ܶܠܐ ܢܒܺܝ̈ܳܝܳܬܳܐ ܚܰܬܶܡ ܘܰܓܡܰܪ ܘܰܠܓܶܢܣܳܐ ܕܐ̱ܢܳܫܽܘܬܳܐ ܦܪܰܩ: ܘܣܶܓ̈ܕܳܬܳܐ ܠܘܳܬܶܗ ܢܓܰܕ ܘܰܠܝܳܠܶܕܬܶܗ ܝܰܩܰܪ: ܘܰܒܛܽܘ̈ܒܶܐ ܕܟܽܠܗܶܝܢ ܫܰܪ̈ܒܳܬܳܐ ܠܶܗ ܗܰܕܰܪ: ܘܰܠܥܽܘܗܕܳܢܶܗ ܪܚܺܝܡܳܐ ܒܰܩܕܽܘܫ̈ܩܽܘܕܫܺܝܢ ܫܡܰܝ̈ܳܢܶܐ ܪܰܡܪܶܡ: ܘܥܰܠ ܡܰܕܒ̈ܚܶܐ ܕܒܰܐܪܒܰܥ ܦܶܢ̈ܝܳܢ ܐܰܘܪܶܒ ܘܢܰܨܚܰ ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܒܫܰܠܗܶܒܺܝܬܳܐ ܕܢܽܘܪܳܐ: ܘܰܒܓܰܘܙܰܠܬܳܐ ܠܐ ܡܬܪܰܓܫܳܢܺܝܬܳܐ ܐܶܬܚܙܰܝܬ ܠܐ ܡܶܬܚܰܒܠܳܢܳܐܝ̣ܬ: ܟܰܕ ܢܛܰܪܬ ܠܟܰܣܝܽܘܬܶܗ ܕܗܰܒܳܒܳܐ: ܘܠܰܡܚܺܝܠܽܘܬܳܐ ܕܢܶܨܒܬܳܐ ܐܺܝܕܳܐ ܕܰܛܥܶܢܬܳܟ ܠܳܟ ܐܠܰܗܳܐ ܐܰܚܺܝܕ ܟܽܠ: ܘܰܠܚܶܙܘܳܐ ܗܳܢܳܐ ܪܰܒܳܐ ܘܰܬܡܺܝܗܳܐ: ܠܡܽܘܫܶܐ ܗ̇ܰܘ ܡܗܺܝܪ ܒܓܶܠܝ̈ܳܢܶܐ ܚܰܘܺܝܬ: ܘܨܳܪܬ ܛܽܘܦܣܳܐ ܠܺܝܠܺܝܕܽܘܬܳܟ ܕܡ̣ܶܢ ܒܬܽܘܠܬܳܐ: ܕܗܳܟܰܢܳܐ ܬܶܫܪܶܐ ܐܠܰܗܳܐܝ̣ܬ ܘܠܐ ܡܶܣܬܰܝܟܳܢܳܐ ܒܶܐܡܳܐ ܥܠܰܝܡܬܳܐ: ܘܢܽܘܪܳܐ ܕܰܐܠܳܗܽܘܬܳܟ ܬܶܛܪܺܝܗ̇: ܕܠܐ ܬܶܬܚܰܪܰܟ ܡ̣ܶܢ ܙܰܠܺܝ̈ܩܶܐ ܫܒܺܝ̈ܚܶܐ ܕܰܟܝܳܢܳܐ ܛܽܘܒܬܳܢܳܐ ܘܠܐ ܡܶܬܕܰܪܟܳܢܳܐ ܕܡܳܪܽܘܬܳܟ: ܐܰܝܟ ܕܰܒܣܰܢܝܳܐ ܓܶܝܪ ܡܰܪܺܝܪܳܐ ܘܕܰܡܠܐܷ ܟܽܘ̈ܒܶܐ ܘܠܰܘ̈ܛܳܬܳܐ ܘܟܺܐܒ̈ܶܐ: ܘܠܐ ܚܳܫܚܳܐ ܠܣܳܗܕܳܐ ܕܚܰܝܠܬܳܢܽܘܬܳܐ ܕܺܐܝܠܳܢ̈ܶܐ ܕܡܰܛܠܠܺܝܢ: ܫܪܰܝܬ ܒܓܶܢܣܳܐ ܕܺܝܠܰܢ ܒܰܣܝܳܐ ܘܰܡܚܺܝܠܐ ܕܶܐܬܚܰܝܰܒ ܒܠܰܘܛܬܳܐ ܕܰܥܒܳܪ ܦܽܘܩܕܳܢܳܐ: ܘܥܰܠܗܳܕܶܐ ܢܒܺܝ̈ܶܐ ܫܰܕܰܪܬ: ܘܰܠܢܳܡܽܘܣܳܐ ܬܰܚܶܡܬ ܘܠܐܝܙ̈ܓܰܕܶܐ ܫܠܰܚܬ: ܐ̱ܪ̈ܳܙܶܐ ܪܫܰܡܬ: ܘܛܽܘܦ̈ܣܶܐ ܚܰܘܺܝܬ: ܘܦ̈ܶܠܐܬܳܐ ܨܳܪܬ: ܘܡ̈ܰܬܠܐ ܐܰܣܪܰܚܬ: ܘܰܠܟܳܪ̈ܽܘܙܶܐ ܐܰܩܺܝܡܬ ܕܰܠܡܶܐܬܺܝܬܳܟ ܫܒܺܝܚܬܳܐ ܢܩܰܕܡܽܘܢ ܢܝܰܩܪܽܘܢ ܒܐܪ̈ܳܙܰܝܗܽܘܢ ܘܛܽܘܦܣܰܝ̈ܗܽܘܢ: ܒܗܳܝ ܕܰܥܬܺܝܕ ܗܘܰܝܬ ܕܡ̣ܶܢ ܒܬܽܘܠܬܳܐ ܝܳܠܕܰܬ ܐܠܰܗܳܐ ܡܰܪܝܰܡ ܬܶܕܢܰܚ ܠܐ ܡܶܫܬܰܚܠܦܳܢܳܐܝ̣ܬ ܘܠܐ ܒܠܺܝܠܐܴܝ̣ܬ: ܠܡܽܘܫܶܐ ܓܶܝܪ ܒܣܰܢܝܳܐ ܕܡܶܬܢܰܒܪܰܫ ܘܠܐ ܝܳܩܶܕ ܐܶܬܚܙܰܝܬ ܘܒܰܥܢܳܢ̈ܶܐ ܘܰܒܥܰܪ̈ܦܶܠܐ ܘܰܒܢܽܘܪܳܐ ܗ̇ܳܝ ܕܡܶܬܓܰܘܙܠܐ: ܕܬܰܛܰܦܶܣ ܒܝܰܕ ܗܳܠܶܝܢ ܛܽܘ̈ܦܣܶܐ ܡܥܰܠܰܝ̈ܳܐ ܠܡܶܐܬܺܝܬܳܟ ܦܳܪܽܘܩܳܝܬܳܐ ܗ̇ܳܝ ܕܒܰܒܣܰܪ: ܕܰܐܝܟܰܢܳܐ ܕܶܝܢ ܕܰܒܗܳܠܶܝܢ ܠܐ ܐܶܣܬܰܝܟܰܬ݀ ܐܠܰܗܽܘܬܳܟ: ܗܳܟܰܢܳܐ ܬܶܫܪܶܐ ܐܳܦ ܒܟܰܪܣܳܐ ܒܠܐܴ ܡܣܰܝܟܽܘܬܳܐ ܕܥܳܒܪܳܐ ܠܡܶܠܬܳܐ: ܐܶܬܬܨܺܝܪܬ ܓܶܝܪ ܒܰܥܢܳܢܳܐ ܘܰܒܥܰܪܦܶܠܐ ܟܝܳܢܳܐ ܕܠܐ ܡܶܬܠܒܶܟ ܕܠܰܪ̈ܣܺܝܣܶܐ ܕܠܐ ܙܽܘܘܳܓ ܠܚܰܩ̈ܠܳܬܳܐ ܨܪ̈ܺܝܟܳܬܳܐ ܡܫܰܡܪ̈ܳܢ ܗܳܟܰܢܳܐ ܐܰܢ̱ܬ ܡܶܛܪܳܐ ܕܚܰܝ̈ܶܐ ܡ̣ܶܢ ܫܡܰܝܳܐ ܢܚܶܬܬ ܠܐܪܥܳܐ: ܘܒܰܥܢܳܢܳܐ ܕܒܶܣܪܳܐ ܡܰܪܝܰܡ ܐܶܙܕܰܝܰܚܬ: ܐܶܬܪܫܶܡܬ ܬܽܘܒ ܒܟܺܐܦܳܐ ܕܛܰܪܳܢܳܐ ܗ̇ܰܘ ܕܒܰܫܺܝܡܽܘܢ: ܕܡܰܒܽܘ̈ܥܶܐ ܕܡܰܝ̈ܳܐ ܐܰܦܪܝܰܬ݀ ܕܠܐ ܪܰܛܺܝܒܽܘܬܳܐ: ܕܰܠܩܰܫܝܽܘܬܶܗ ܕܥܰܡܳܐ ܣܰܒܥܰܬ݀: ܕܗܳܟܰܢܳܐ ܐܰܢ̱ܬ ܕܺܐܝܬܰܝܟ ܡܰܝ̈ܳܐ ܚܰܝ̈ܶܐ ܡ̣ܶܢ ܥܽܘܒܳܗ̇ ܕܡܰܠܝܰܬ݀ ܫܽܘܦܪ̈ܶܐ ܕܠܐ ܢܶܩܦܳܐ ܐܶܬܺܝܠܶܕܬ: ܘܰܠܨܰܗܝܽܘܬܳܐ ܕܥܳܠܡܳܐ ܫܶܩܝܳܐ ܗܘܰܝܬ: ܘܕܺܐܝܬܰܝܟ ܡܰܝ̈ܳܐ ܚܰܝ̈ܶܐ ܒܰܟܝܳܢܳܟ ܠܰܢ ܠܡܳܝܽܘ̈ܬܶܐ ܐܰܚܺܝܬ: ܡܶܫܚܳܐ ܕܶܝܢ ܗ̇ܰܘ ܕܒܰܙܒܰܢ ܢܳܒܰܥ ܗܘܳܐ ܡ̣ܶܢ ܛܰܪܳܢܳܐ: ܠܰܡܫܺܝܚܽܘܬܳܐ ܕܺܝܠܳܟ ܐܠܰܗܳܝܬܳܐ ܨܳܪ: ܕܡ̣ܶܢ ܕܰܟܝܽܘܬܳܗ̇ ܕܰܒܬܽܘܠܬܳܐ ܒܐܪܳܙܳܐ ܡܫܰܡܠܝܳܐ ܢܦܰܩܬ ܘܰܡܫܺܝܚܽܘܬܳܐ ܩܰܕܺܝܫܬܳܐ ܗܘܰܝܬ ܠܥܺܕܬܳܐ ܦܪܺܝܩܰܬ݀ ܒܰܨܠܺܝܒܳܟ ܝܰܩܺܝܪܳܐ: ܒܕܶܒܫܳܐ ܕܶܝܢ ܗ̇ܰܘ ܕܡ̣ܶܢ ܟܺܐܦܳܐ ܩܫܺܝܬܳܐ ܘܠܐ ܡܰܦܪܝܳܢܺܝܬܳܐ ܕܰܠܥܰܡܳܐ ܐܺܝܣܰܪܠܳܝܳܐ ܐܽܘܟܠܐ ܝܰܗܒܬ: ܠܚܰܠܝܽܘܬܳܐ ܕܺܝܠܳܟ ܛܰܦܶܣܬ ܒܶܗ ܠܡܰܪܺܝܪܽܘܬܳܐ ܕܥܰܡ̈ܡܶܐ ܚܰܠܺܝܬ ܘܒܰܣܶܡܬ: ܒܩܺܐܒܽܘܬܳܐ ܕܶܝܢ ܗ̇ܳܝ ܕܰܒܕܰܗܒܳܐ ܣܢܺܝܢܳܐ ܩܪܺܝܡܳܐ ܗܘܳܬ: ܟܰܕ ܡ̣ܶܢ ܩܰܝ̈ܣܶܐ ܠܐ ܡܰܒ̈ܠܛܶܐ ܡܪܰܟܒܳܐ ܗܘܳܬ ܒܡܽܘ̈ܫܚܳܬܳܐ ܢܳܡܽܘܣܳܝ̈ܘܳܬܳܐ ܠܳܗ̇ ܠܐܠܳܗܽܘܬܳܟ ܘܰܠܡܶܬܒܰܪܢܫܳܢܽܘܬܳܟ ܕܡ̣ܶܢ ܒܬܽܘܠܬܳܐ: ܘܚܰܘܺܝܬ ܠܰܢ ܒܝܰܕ ܗܳܠܶܝܢ ܘܕܰܐܝܟ ܗܳܠܶܝܢ ܚܕܳܝܽܘܬܳܐ ܟܝܳܢܳܝܬܳܐ ܘܰܩܢܽܘܡܳܝܬܳܐ ܕܥܰܡ ܒܶܣܪܳܐ: ܟܰܕ ܒܕܰܗܒܳܐ ܠܐܠܳܗܽܘܬܳܟ ܛܰܦܶܣܬ: ܒܩܰܝܣܳܐ ܕܶܝܢ ܡܚܺܝܠܐ ܠܐܢܳܫܽܘܬܳܐ ܕܺܝܠܰܢ ܒܨܺܝܪܬܳܐ: ܘܰܕܡ̣ܶܢ ܬܪܰܝܳܢܽܘܬܗܶܝܢ ܚܰܕ ܟܽܘܢܳܝܳܐ ܩܢܶܝܬ: ܕܡ̣ܶܢ ܐܠܰܗܽܘܬܳܐ ܘܐ̱ܢܳܫܽܘܬܳܐ: ܚܰܕ ܒܪܳܐ ܠܚܽܘܕܳܝܳܐ ܘܺܝܚܺܝܕܳܝܳܐ ܐܺܝܬܰܝܟ ܕܠܐ ܫܽܘܚܠܳܦܳܐ ܘܳܐܦ ܒܫܰܒܛܶܗ ܕܰܐܗܪܽܘܢ ܕܰܐܦܪܰܥ ܕܠܐ ܢܶܩܦܳܐ ܕܓܰܒܪܳܐ ܫܘܰܚܬ ܚܰܘܺܝܬ ܠܰܢ: ܒܩܶܣܛܳܐ ܕܡܰܢܢܳܐ ܡܶܐܟܠܳܢܳܝܳܐ ܒܰܟܝܳܢܳܐ ܡܫܰܡܠܝܳܐ ܕܰܒܢܳܡܽܘܣܳܐ ܐܶܬܢܛܰܪ: ܬܽܘܒ ܠܒܰܛܢܳܟ ܬܗܺܝܪܳܐ ܕܡ̣ܶܢ ܡܰܪܝܰܡ ܛܰܦܶܣ ܠܰܢ: ܗ̇ܰܘ ܕܒܰܕܡܽܘܬ ܡܰܢܢܳܐ ܕܡ̣ܶܢ ܫܡܰܝܳܐ ܫܰܕܰܪܬ ܢܚܶܬܬ ܡ̣ܶܢ ܪܰܘܡܳܐ ܕܰܫܡܰܝܳܐ ܘܰܒܟܰܪܣܳܐ ܫܪܰܝܬ: ܕܬܶܗܘܶܐ ܐܽܘܟܠܐ ܫܡܰܝܳܢܳܐ ܠܥܺܕܬܳܐ ܩܰܕܺܝܫܬܳܐ: ܘܥܰܠ ܡܰܕܒܚܳܗ̇ ܟܽܠܝܽܘܡ ܡܶܙܕܰܝܰܚ ܒܰܡܫܰܡܠܝܽܘܬܳܐ ܕܟܰܝܠܐ ܢܳܡܽܘܣܳܝܳܐ ܕܠܐ ܐܰܘܦܺܝ ܡ̣ܶܢ ܣܛܰܐܡܶܐܢܶܐܣ ܗ̇ܝ ܕܰܗܒܳܢܳܝܬܳܐ: ܡܶܬܚܰܘܝܳܐ ܕܶܝܢ ܛܶܠܳܢܺܝܬܳܐ ܕܰܕܒܺܝܚܽܘܬܳܟ: ܐܳܦ ܒܬܽܘܪܬܳܐ ܣܽܘܡܳܩܬܳܐ ܗ̇ܳܝ ܕܰܒܓܰܘܢܳܐ ܕܰܕܡܳܟ ܩܰܕܡܰܬ݀ ܐܶܬܝܰܩܪܰܬ݀ ܒܐܪܳܙܳܐ: ܓܶܙܬܳܐ ܕܶܝܢ ܗ̇ܳܝ ܕܒܳܛܠܐ ܡ̣ܶܢ ܫܡܰܝܳܐ ܐܶܨܛܰܒܥܰܬ݀: ܒܡܰܚܰܬܬܳܟ ܕܡܶܢܫܶܝܠ ܕܡ̣ܶܢ ܫܡܰܝܳܐ ܫܰܘܕܥܰܬ݀: ܠܰܢ ܗ̇ܳܝ ܕܩܰܕܡܳܝܰܬ݀ ܠܘܳܬ ܐܽܘܪܫܠܶܡ ܢܶܚܬܰܬ݀ ܘܠܳܗ̇ ܝܰܩܰܪܬ ܒܡܰܚܰܬܬܳܐ ܗ̇ܳܝ ܕܬܰܪܬܶܝܢ ܕܥܰܠ ܐܰܪܥܳܐ ܕܰܠܥܰܡ̈ܡܶܐ ܗܳܘܝܳܐ: ܠܐܘܪܫܠܶܡ ܕܶܝܢ ܝܰܒܺܝܫܬܳܐ ܥܳܒܕܳܐ ܡ̣ܶܢ ܡܝܰܬܪ̈ܳܬܳܐ: ܠܥܰܡ̈ܡܶܐ ܕܶܝܢ ܒܗܰܝܡܳܢܽܘܬܳܐ ܕܒܳܟ ܡܪܰܛܒܳܐ: ܐܰܝܟܰܢܳܐ ܓܶܝܪ ܕܥܰܠ ܟܽܠܳܗ̇ ܐܰܪܥܳܐ ܢܚܶܬ ܛܰܠܐ: ܓܶܙܬܳܐ ܕܶܝܢ ܒܰܠܚܽܘܕܶܝܗ̇ ܕܠܐ ܐܶܬܪܰܛܒܰܬ݀: ܕܰܘܺܝܕ ܕܶܝܢ ܐܳܦ ܡܶܬܪܰܓܪܳܓܽܘ ܐܶܬܪܰܓܪܰܓ ܠܡܰܝ̈ܳܐ ܕܰܐܠܳܗܽܘܬܳܟ ܟܰܕ ܐܳܡܰܪ ܕܡ̣ܶܢ ܓܽܘܒܳܐ ܪܰܒܳܐ ܕܰܒܒܶܝܬܠܚܶܡ ܒܣܽܘܘܳܚܳܐ ܨܰܗܝܽܘܬܝ ܬܶܬܦܰܝܰܓ: ܠܰܘ ܠܡܰܝ̈ܳܐ ܕܡܰܒܽܘ̈ܥܶܐ ܘܰܕܥܰܝ̈ܢܳܬܳܐ ܫܳܐܶܠ ܪܰܛܺܝܒܽܘܬܳܐ ܕܪܶܕܝܳܐ ܘܠܐ ܡܶܬܟܰܠܝܳܐ ܐܶܠܐ ܠܡܰܝ̈ܳܐ ܕܡ̣ܶܢ ܪܰܘܡܳܐ ܢܳܚܬܺܝܢ ܘܰܒܓܽܘܒܳܐ ܡܶܬܰܐܣܪܺܝܢ ܠܐ ܐܰܫܺܝܕܳܐܝ̣ܬ: ܐܰܢ̱ܬ ܐܺܝܬܰܝܟ ܡܰܝ̈ܳܐ ܚܰܝ̈ܶܐ ܕܡ̣ܶܢ ܒܶܝܬܠܚܶܡ ܚܙܳܟ ܕܰܘܺܝܕ: ܕܰܠܥܳܠܡܳܐ ܡܰܫܩܶܐ ܗܘܰܝܬ ܘܶܐܬܪܰܓܪܰܓ ܠܳܟ: ܒܥܶܣܒܳܐ ܕܰܐܪܥܳܐ ܓܶܝܪ ܕܝܺܥܳܐ ܨܳܪܳܟ ܬܽܘܒ: ܕܰܕܠܐ ܙܰܪܥܳܐ ܫܘܰܚܬ ܡ̣ܶܢ ܐܰܪܥܳܐ ܨܗܺܝܬܳܐ ܒܬܽܘܠܬܳܐ ܡܰܪܝܰܡ ܒܬܰܘܠܥܳܐ ܕܶܝܢ ܟܰܢܝܳܟ ܕܰܕܠܐ ܙܽܘܘܳܓ ܠܓܰܘ ܡ̣ܶܢ ܛܰܒ̈ܥܶܐ ܢܛܺܝܪ̈ܶܐ ܕܰܒܬܽܘܠܬܳܐ ܐܶܬܚܙܰܝܬ ܡܫܰܡܠܝܳܐ ܠܗܰܠ ܓܶܝܪ ܡ̣ܶܢ ܐܰܒܳܐ ܕܠܐ ܐܶܡܳܐ ܐܶܬܺܝܠܶܕܬ: ܗܳܪܟܳܐ ܕܶܝܢ ܡ̣ܶܢ ܐܶܡܳܐ ܕܠܐ ܐܰܒܳܐ: ܐܰܝܟ ܟܺܐܦܳܐ ܕܩܶܠܥܳܐ ܡ̣ܶܢ ܒܬܽܘܠܬܳܐ ܢܦܰܩܬ ܠܐ ܡܶܣܬܰܕܩܳܢܳܐܝ̣ܬ: ܘܰܐܪܡܺܝܬ ܠܪܺܝܫܳܐ ܒܺܝܫܳܐ ܡܕܰܘܕܳܐ ܕܓܽܘܠܝܰܕ ܡܶܬܝܰܕܥܳܢܳܐ: ܗ̇ܰܘ ܕܒܟܽܠܙܒܰܢ ܠܐܝܣܪܳܐܶܝܠ ܡܚܰܣܶܕ ܗܘܳܐ ܓܒܺܝܠܬܳܐ ܐ̱ܢܳܫܳܝܬܳܐ ܕܡ̣ܶܢ ܦܰܪܕܰܝܣܳܐ ܒܠܐܴ ܡܶܫܬܰܡܥܳܢܽܘܬܳܐ ܚܳܒܰܬ݀: ܒܠܰܡܦܺܐܕܳܐ ܕܶܝܢ ܗ̇ܰܘ ܕܰܒܩܽܘܠܬܳܐ ܚܶܨܦܳܢܳܝܬܳܐ ܐܶܬܪܰܫܡܰܬ݀ ܒܰܙܒܰܢ: ܢܽܘܗܪܳܐ ܕܺܝܠܳܟ ܐܠܰܗܳܝܳܐ ܒܰܓܒܺܝܠܬܳܐ ܥܰܦܪܳܢܳܝܬܳܐ ܬܶܚܒܽܘܫ: ܘܣܺܝܡܬܳܐ ܐܠܰܗܳܝܬܳܐ ܒܡܺܐܢܳܐ ܕܚܶܨܦܳܐ ܬܣܺܝܡ ܘܰܬܣܰܬܰܪ: ܘܰܠܡܽܘܪܳܢܺܝܬܳܐ ܕܢܽܘܟܪ̈ܳܝܶܐ ܬܶܣܚܽܘܦ: ܠܐܒܪܳܗܳܡ ܕܶܝܢ ܒܶܐܡܪܳܐ ܕܠܐ ܙܽܘܘܳܓ ܕܒܺܐܝܠܳܢܳܐ ܐܶܬܬܠܺܝ: ܐܶܬܚܰܘܺܝܬ ܕܰܒܩܶܛܠܳܟ ܠܥܳܠܡܳܐ ܫܰܘܙܶܒܬ: ܘܰܫܪܰܝܬ ܐܰܣܽܘܪ̈ܶܐ ܕܰܚܛܺܝܬܳܐ: ܘܥܰܠ ܗܳܕܶܐ ܒܳܥܶܝܢܰܢ ܘܰܡܦܺܝܣܺܝܢܰܢ ܠܳܟ ܐܳܘ ܛܳܒܳܐ ܘܪܳܚܶܡ ܐ̱ܢܳܫܳܐ ܒܝܰܘܡܳܐ ܗܳܢܳܐ ܕܕܽܘܟܪܳܢܳܐ ܕܩܰܕܺܝܫܬܳܐ ܘܰܡܫܰܒܰܚܬܳܐ ܘܰܒܬܽܘܠܰܬ݀ ܒܟܽܠܙܒܰܢ ܝܳܠܕܰܬ ܐܠܰܗܳܐ: ܕܰܫܘܳܬ݀ ܕܬܶܗܘܶܐ ܠܳܟ ܐܶܡܳܐ ܒܛܰܝܒܽܘܬܳܐ ܕܒܰܨܠܰܘ̈ܳܬܳܗ̇ ܘܰܕܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܣܰܟܺܝܘ ܠܓܶܠܝܳܢܳܟ: ܘܕܰܢܒܺܝ̈ܶܐ ܕܒܰܕܶܩܘ ܐ̱ܪ̈ܳܙܰܝܟ: ܘܕܰܫܠܺܝ̈ܚܶܐ ܕܣܰܒܰܪܘ ܡܶܐܬܺܝܬܳܟ ܒܣܰܘ̈ܦܶܝܗ̇ ܕܰܐܪܥܳܐ: ܘܰܕܣܳܗ̈ܕܶܐ ܘܡܰܘܕ̈ܝܳܢܶܐ ܕܶܐܬܩܰܛܰܠܘ ܡܶܛܽܠ ܚܽܘܒܳܟ: ܕܬܶܬܶܠ ܫܰܝܢܳܐ ܘܰܒܗܺܝܠܽܘܬܳܐ ܒܥܰܡܳܟ ܘܰܒܥܺܕܬܳܟ: ܘܰܬܒܰܛܶܠ ܩܪ̈ܳܒܶܐ ܘܬܰܟܬܽܘ̈ܫܶܐ ܡ̣ܶܢ ܥܶܒܪ̈ܶܝܗ̇ ܕܰܐܪܥܳܐ: ܘܬܶܙܓܽܘܪ ܠܣܶܕ̈ܩܶܐ ܘܚܶܪ̈ܝܳܢܶܐ ܡ̣ܶܢ ܟܽܠܳܗ̇ ܬܺܒܶܝܠ ܘܰܬܟܰܢܶܫ ܠܥܰܛܠܳܝ̈ܶܐ ܠܡܶܠܬܳܐ ܕܝܽܘܠܦܳܢܰܝ̈ܟ ܘܬܶܬܶܠ ܚܽܘܠܡܳܢܳܐ ܠܰܟܪ̈ܺܝܗܶܐ: ܘܣܳܥܽܘܪܽܘܬܳܐ ܠܗ̇ܳܢܽܘܢ ܕܡ̣ܶܢ ܪ̈ܽܘܚܶܐ ܒܺܝ̈ܫܳܬܳܐ ܡܶܬܢܰܣܶܝܢ: ܘܬܶܫܒܽܘܩ ܠܡܰܣܟ̈ܠܳܢܶܐ ܒܛܰܝܒܽܘܬܳܟ: ܘܬܶܬܶܠ ܣܰܒܥܽܘܬܳܐ ܠܰܣܢܺܝ̈ܩܶܐ ܘܰܪܘܰܚܬܳܐ ܠܐܠܺܝ̈ܨܶܐ ܘܰܠܕܶܐܫܬܰܘܬܰܦܘ ܘܬܽܘܒ ܡܶܫܬܰܘܬܦܺܝܢ ܒܕܽܘܟܪܳܢܳܗ̇ ܕܩܰܕܺܝܫܬܳܐ ܝܳܠܕܰܬ ܐܠܰܗܳܐ ܡܰܪܝܰܡ ܘܰܒܡܰܘ̈ܗܒܳܬܳܐ ܕܰܣܢܺܝ̈ܩܶܐ ܘܡܶܣ̈ܟܺܢܶܐ ܫܰܘܬܶܦ ܒܛܳܒ̈ܳܬܳܐ ܕܠܐ ܥܳܒܪ̈ܳܢ: ܘܓܶܐܘ̈ܳܬܳܐ ܕܠܐ ܡܰܘܦ̈ܝܳܢ: ܘܬܶܫܪܶܐ ܒܢܽܘܗܪܳܐ ܕܠܐ ܦܳܛܰܪ: ܘܒܰܣܡܳܟܳܐ ܕܠܐ ܡܶܫܬܪܶܐ ܠܢܰܦ̈ܫܳܬܳܐ ܕܰܐܒܳܗܰܝ̈ܢ ܘܕܰܐܚܰܝ̈ܢ ܘܰܕܪ̈ܰܒܳܢܰܝܢ ܘܰܕܥܰܢܺܝ̈ܕܰܝܢ ܘܰܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܡܶܛܽܠ ܕܰܐܢ̱ܬ ܗ̣ܽܘ ܣܰܒܪܰܢ ܘܒܶܝܬ ܓܰܘܣܰܢ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܦܺܝܪܡܳܐ ܕܰܟܝܳܐ ܕܡܶܢܶܗ ܡܶܬܒܰܣܡܺܝܢ ܟܽܠܗܽܘܢ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܘܪ̈ܽܘܚܳܢܳܝܶܐ ܡܶܢܶܗ ܡܶܬܡܠܶܝܢ ܘܡܶܫܬܰܡܠܶܝܢ ܒܟܽܠܳܗ̇ ܒܰܣܺܝܡܽܘܬܳܐ: ܘܡܶܢܶܗ ܣܳܝܩܺܝܢ ܟܽܠܗܽܘܢ ܒܪ̈ܰܝܳܐ ܘܰܥܒܺܝ̈ܕܶܐ ܪܺܝܚܳܐ ܕܚܰܝ̈ܶܐ ܘܣܰܘܩܳܐ ܡܠܐܷ ܕܰܟܝܽܘܬܳܐ: ܪܳܡܳܐ ܕܰܢܚܶܬ ܡ̣ܶܢ ܪܰܘܡܳܐ ܫܒܺܝܚܳܐ ܘܰܓܢܺܝܙܳܐ ܕܰܡܥܰܠܝܽܘܬܳܐ ܡܪܰܝܰܡܬܳܐ: ܠܘܳܬ ܡܶܬܒܰܣܪܳܢܽܘܬܳܐ ܐ̱ܢܳܫܳܝܬܳܐ ܘܰܫܪܳܐ ܒܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܘܶܐܬܺܝܠܶܕ ܡܶܢܳܗ̇ ܟܰܕ ܢܛܺܝܪܳܐ ܗ̣ܺܝ ܒܕܰܟܝܽܘܬܳܐ: ܘܰܒܬܽܘ̈ܠܶܝܗ̇ ܠܐ ܫܪܳܐ ܒܡܰܘܠܳܕܶܗ ܕܡ̣ܶܢ ܩܰܕܺܝܫܽܘܬܳܗ̇ ܘܰܒܝܰܘܡܳܐ ܕܥܰܕܥܺܐܕܳܗ̇ ܫܒܺܝܚܳܐ ܚܰܕܺܝ ܘܰܐܦܨܰܚ ܠܰܢܒܺܝ̈ܶܐ ܘܠܰܫܠܺܝ̈ܚܶܐ ܘܰܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܣܰܟܺܝܘ ܠܓܶܠܝܳܢܶܗ ܫܰܪܺܝܪܳܐ: ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܘܡܶܬܟܰܫܦܺܝܢܰܢ ܠܪ̈ܰܚܡܰܝܟ ܕܰܬܩܰܒܶܠ ܡܶܢܰܢ ܚܰܛܳܝ̈ܶܐ ܥܰܒܕܰܝ̈ܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ: ܒܝܰܘܡܳܐ ܗܳܢܳܐ ܕܥܽܘܗܕܳܢܳܗ̇ ܡܝܰܩܪܳܐ ܘܩܰܕܺܝܫܳܐ: ܘܰܬܫܰܟܶܢ ܠܰܢ ܒܶܗ ܟܽܠܗܶܝܢ ܒܽܘܪ̈ܟܳܬܳܐ ܫܦܺܝ̈ܥܳܬܳܐ ܥܰܡ ܫܽܘܒܩܳܢܳܐ ܕܟܽܠܗܶܝܢ ܫܽܘܪ̈ܥܳܬܳܐ ܘܣܰܟܠܘ̈ܳܬܳܐ ܘܡܶܬܥܰܒܪ̈ܳܢܘܳܬܳܐ ܕܡܶܢܰܢ ܡܚܺܝ̈ܠܐ ܘܚܰܛܳܝ̈ܶܐ ܐܶܣܬܥܰܪ̈ܝ: ܘܗܰܒ ܠܰܢ ܒܝܰܕ ܨܠܰܘ̈ܳܬܳܗ̇ ܫܰܝܢܳܐ ܐܰܡܺܝܢܳܐ ܘܰܫܡܳܐ ܠܐ ܡܶܬܦܰܣܩܳܢܳܐ ܘܕܽܘܟܪܳܢܳܐ ܛܳܒܳܐ ܘܰܢܝܳܚܬܳܐ ܠܐ ܡܶܫܬܰܪܝܳܢܺܝܬܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܡܰܠܟܽܘܬܳܟ ܫܡܰܝܳܢܺܝܬܳܐ: ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܚܘܬܡܐ

 

 

 

ܐܰܫܦܰܥ ܡܳܪܝܳܐ ܐܠܰܗܳܐ ܒܽܘܪ̈ܟܳܬܳܐ ܥܰܠ ܐܰܪܥܳܐ ܕܨܰܗܝܳܐ ܠܰܚܢܳܢܳܟ: ܘܰܐܥܒܰܪ ܡ̣ܶܢ ܙܰܪ̈ܥܶܐ ܘܚܰܩ̈ܠܳܬܳܐ ܕܥܰܒܕܰܝ̈ܟ ܟܽܠܗܶܝܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܰܐܫܽܘܕ ܡܶܛܪ̈ܶܐ ܘ̈ܛܰܠܐ ܕܰܚܢܳܢܳܟ ܥܰܠ ܢܰܦ̈ܫܳܬܳܐ ܕܣܳܓܽܘ̈ܕܰܝܟ ܕܰܡܝܰܩܪܺܝܢ ܠܥܰܕ̈ܥܺܐܕܶܐ ܕܝܳܠܶܕܬܳܟ: ܘܫܰܝܢܳܟ ܘܰܫܠܳܡܳܟ ܢܰܡܠܶܟ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܕܰܡܩܰܠܣ̈ܳܢ ܠܥܽܘܗܕܳܢܳܗ̇: ܘܡܰܘܪ̈ܒܳܢ ܠܰܫܡܳܟ: ܘܡܰܘܕ̈ܝܳܢ ܘܣܳܓ̈ܕܳܢ ܠܐܠܳܗܽܘܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܝܰܠܕܳܐ ܠܐ ܙܰܒܢܳܝܳܐ ܕܶܐܬܳܐ ܒܚܽܘܒܶܗ ܠܡܰܘܠܳܕܳܐ ܙܰܒܢܳܝܳܐ ܡ̣ܶܢ ܡܰܪܒܥܳܐ ܒܬܽܘܠܳܝܳܐ: ܠܗܰܘ ܫܰܠܺܝܛܳܐ ܕܰܫܠܳܡܳܐ ܕܰܕܢܰܚ ܡ̣ܶܢ ܐܳܦܰܪܬܳܐ ܕܠܐ ܙܽܘܘܳܓܳܐ: ܠܗܰܘ ܪܳܥܝܳܐ ܛܳܒܳܐ ܕܶܐܬܚܙܺܝ ܐܰܝܟ ܐܶܡܪܳܐ ܡ̣ܶܢ ܢܶܩܝܳܐ ܡܠܺܝܠܬܳܐ ܕܠܐ ܙܰܪܥܳܐ ܕܓܰܒܪܳܐ: ܠܗܰܘ ܠܰܚܡܳܐ ܕܚܰܝ̈ܶܐ ܕܰܫܘܰܚ ܡ̣ܶܢ ܒܶܝܬܠܚܶܡ ܕܺܝܗܽܘܕܳܐ ܕܠܐ ܐܰܟܳܪܳܐ: ܠܗܰܘ ܒܪܳܐ ܕܰܐܠܳܗܳܐ ܕܶܐܬܺܝܠܶܕ ܡ̣ܶܢ ܐܰܒܳܐ ܕܠܐ ܐܶܡܳܐ ܘܰܗܘܳܐ ܡ̣ܶܢ ܐܶܡܳܐ ܕܠܐ ܐܰܒܳܐ ܕܠܐ ܫܽܘܚܠܳܦ ܠܶܗ ܝܳܐܶܐ ܫܽܘܒܚܳܐ ܘܩܽܘܠܳܣܳܐ ܘܠܐܒܽܘܗܝ ܘܰܠܪܽܘܚܶܗ ܚܰܝܳܐ ܘܩܰܕܺܝܫܳܐ ܒܝܽܘܡ ܕܽܘܟܪܳܢܳܗ̇ ܕܝܳܠܶܕܬܶܗ: ܒܗܳܢܳܐ܀

 

 

 

ܣܕܪܐ

 

 

 

ܣܳܓܕܺܝܢܰܢ ܠܳܟ ܝܰܠܕܳܐ ܡܬܽܘܡܳܝܳܐ ܕܶܐܬܺܝܠܶܕܬ ܡ̣ܶܢ ܐܰܒܳܐ ܕܠܐ ܪܶܕܝܳܐ ܘܰܨܒܰܝܬ ܬܽܘܒ ܕܬܶܬܺܝܠܶܕ ܡ̣ܶܢ ܐܶܡܳܐ ܒܬܽܘܠܬܳܐ ܕܠܐ ܚܰܫܳܐ: ܡܰܘܕܶܝܢܰܢ ܠܳܟ ܠܐ ܡܶܬܚܰܙܝܳܢܳܐ ܕܶܐܬܚܙܺܝ ܒܰܒܣܰܪ ܡܪܰܡܪܡܺܝܢܰܢ ܠܳܟ ܠܐ ܡܶܬܓܰܫܫܳܢܳܐ ܕܶܐܬܓܫܶܫ ܒܰܦܓܰܪ: ܡܰܘܪܒܺܝܢܰܢ ܠܳܟ ܠܐ ܗܽܘܠܳܢܳܝܳܐ ܕܶܐܬܚܰܘܺܝ ܒܗܰܘܢܳܐ: ܡܫܰܒܚܺܝܢܰܢ ܠܳܟ ܐܠܰܗܳܐ ܕܰܗܘܰܝܬ ܒܰܪܢܳܫܳܐ ܕܠܐ ܦܽܘܠܳܓ ܡܩܰܠܣܺܝܢܰܢ ܠܳܟ ܗ̇ܰܘ ܕܺܐܝܬܰܘܗܝ ܗܘܳܐ ܠܘܳܬ ܐܠܰܗܳܐ ܘܺܐܝܬܰܘܗܝ: ܘܰܗܘܳܐ ܥܰܡ ܐ̱ܢܳܫܳܐ: ܗ̣ܽܘ ܟܰܕ ܗ̣ܽܘ ܐܺܝܬܰܘܗܝ: ܡܰܢܽܘ ܡܳܪܝ ܡܰܕܪܶܟ ܠܺܝܠܺܝܕܽܘܬܳܟ ܩܰܕܡܳܝܬܳܐ ܕܡ̣ܶܢ ܐܰܒܳܐ ܕܠܐ ܦܣܳܩܳܐ: ܐܰܘ ܡܰܢܽܘ ܡܨܶܐ ܕܰܢܦܰܫܶܩ ܠܺܝܠܺܝܕܽܘܬܳܟ ܕܬܰܪܬܶܝܢ ܕܡ̣ܶܢ ܒܬܽܘܠܬܳܐ ܕܠܐ ܙܽܘܘܳܓܳܐ: ܗ̇ܳܝ ܠܥܶܠ ܡ̣ܶܢ ܕܽܘܡܳܪܳܐ ܐܺܝܬܶܝܗ̇ ܠܟܽܠܗܽܘܢ ܗܰܘ̈ܢܶܐ ܫܡܰܝ̈ܳܢܶܐ ܘܗܳܕܶܐ ܕܗܳܫܳܐ ܠܥܶܠ ܡ̣ܶܢ ܬܶܕܡܽܘܪܬܳܐ ܐܺܝܬܶܝܗ̇ ܠܟܽܠ ܗܰܘܢܳܐ ܘܡܶܠܬܳܐ ܕܰܐܪ̈ܥܳܢܳܝܶܐ: ܒܰܛܢܳܐ ܕܠܐ ܙܰܪܥܳܐ ܘܰܕܠܐ ܢܶܩܦܳܐ: ܡܰܢܽܘ ܡܳܛܶܐ ܠܶܗ: ܝܰܠܕܳܐ ܕܠܐ ܫܪܳܐ ܠܛܰܒ̈ܥܶܐ ܒܬܽܘ̈ܠܳܝܶܐ ܕܝܳܠܶܕܬܶܗ ܒܺܝܠܺܝܕܽܘܬܶܗ: ܡܰܢܽܘ ܒܳܨܶܐ ܠܶܗ: ܚܰܠܒܳܐ ܕܠܐ ܪܶܓܬܳܐ ܡܰܢܽܘ ܡܥܰܩܶܒ ܠܶܗ: ܓܰܘܙܰܠܬܳܐ ܒܥܰܙܪܽܘܪ̈ܶܐ ܡܰܢܽܘ ܩܳܪܶܒ ܠܳܗ̇: ܢܽܘܪܳܐ ܒܓܰܘ ܐܽܘܪܝܳܐ ܡܰܢܽܘ ܒܳܚܰܪ ܠܗ̇: ܪܽܘܚܳܐ ܒܓܰܘ ܚܽܘ̈ܦܢܶܐ ܡܰܢܽܘ ܡܒܰܕܶܩ ܠܳܗ̇: ܡܰܝ̈ܳܐ ܒܫܽܘܫܶܦܳܐ ܡܰܢܽܘ ܡܰܕܢܰܚ ܠܗܽܘܢ: ܢܽܘܗܪܳܐ ܒܰܡܥܰܪܬܳܐ ܡܰܢܽܘ ܥܳܪܶܐ ܠܶܗ: ܫܶܡܫܳܐ ܒܓܰܘ ܦܶܥܪܳܐ ܡܰܢܽܘ ܚܳܒܶܫ ܠܳܗ̇: ܢܺܐܬܶܐ ܡܶܟܺܝܠ ܠܘܳܬ ܩܽܘܠܳܣܳܐ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܝܳܠܶܕܬܳܟ: ܘܥܰܡ ܬܶܕܡܽܘܪܬܳܐ ܪܰܒܬܳܐ ܠܘܳܬܳܗ̇ ܡܰܙܥܩܺܝܢܰܢ ܟܰܕ ܐܳܡܪܺܝܢܰܢ: ܐܳܘ ܠܐܪܥܳܐ ܒܬܽܘܠܬܳܐ ܕܰܐܒܥܰܬ݀ ܠܐܕܳܡ ܚܰܕܬܳܐ ܕܡ̣ܶܢ ܣܶܛܪܶܗ ܢܶܦܩܰܬ݀ ܠܰܢ ܐܶܡܳܐ ܪܽܘܚܳܢܳܝܬܳܐ ܕܺܐܝܬܶܝܗ̇ ܡܰܥܡܽܘܕܺܝܬܳܐ: ܐܳܘ ܠܒܰܪܬܳܐ ܡܒܰܪܰܟܬܳܐ ܕܰܐܘܠܕܰܬ݀ ܠܐܒܳܗܶܝ̈ܗ̇ ܡܳܪܳܐ ܘܦܳܪܽܘܩܳܐ: ܐܳܘ ܠܓܽܘܙܥܳܐ ܕܡ̣ܶܢ ܐܺܝܫܰܝ ܕܰܫܘܰܚ ܡܶܢܳܗ̇ ܢܽܘܪܒܳܐ ܕܰܣܡܺܝܟ ܒܚܰܝܠܶܗ ܠܰܒܪܺܝܬܳܐ: ܐܳܘ ܠܕܰܝܪܳܐ ܡܶܬܗܰܘܢܳܢܺܝܬܳܐ ܕܡܶܢܳܗ̇ ܢܦܰܩ ܪܳܥܝܳܐ ܛܳܒܳܐ ܕܶܐܬܳܐ ܕܢܶܒܥܶܐ ܠܐܒܺܝܕܽܘܬܰܢ: ܐܳܘ ܠܗܰܝܟܠܐ ܗܕܺܝܪܳܐ ܘܟܳܗܢܳܝܳܐ ܕܒܶܗ ܐܶܬܪܰܒܺܝ ܟܽܘܡܪܳܐ ܫܡܰܝܳܢܳܐ: ܐܳܘ ܠܘܰܥܕܳܐ ܡܠܐܷ ܚܰܝ̈ܶܐ ܠܶܗ ܐܶܬܘܰܥܰܕ ܡܳܪܳܐ ܕܒܶܪ̈ܝܳܬܳܐ: ܐܳܘ ܠܙܰܪܥܳܐ ܡܰܠܟܳܝܳܐ ܕܡܶܢܶܗ ܩܛܰܪ ܬܳܓܳܐ ܡܠܶܟ ܡܰܠܟ̈ܶܐ ܕܠܐ ܣܰܘܦܳܐ: ܐܳܘ ܠܚܰܩܠܐ ܕܰܕܠܐ ܙܰܪܥܳܐ ܘܰܕܠܐ ܐܰܟܳܪܳܐ ܫܘܰܚ ܡܶܢܶܗ̇ ܫܶܒܰܠ ܚܰܕ̈ܘܳܬܳܐ: ܐܳܘ ܠܛܽܘܪܳܐ ܩܰܕܺܝܫܳܐ ܘܰܡܠܺܝܠܐ: ܕܡܶܢܶܗ ܐܶܬܓܰܙܪܰܬ݀ ܟܺܐܦܳܐ ܕܠܐ ܒܺܐܝ̈ܕܰܝܳܐ: ܐܳܘ ܠܝܰܘܢܳܐ ܬܰܡܺܝܡܬܳܐ ܕܡܶܢܳܗ̇ ܐܶܬܺܝܠܶܕ ܢܶܫܪܳܐ ܫܡܰܝܳܢܳܐ: ܐܳܘ ܠܟܶܢ̈ܦܶܐ ܕܰܟܝ̈ܳܬܳܐ ܕܥܰܦܶܩ̈ܝ ܠܰܓܡܽܘܪܬܳܐ ܐܠܰܗܳܝܬܳܐ: ܐܳܘ ܠܠܽܘ̈ܚܶܐ ܒܶܣܪ̈ܳܢܳܝܳܬܳܐ: ܕܶܐܬܟܬܶܒ ܥܠܰܝܗܶܝܢ ܡܶܠܬܳܐ ܐܠܰܗܳܐ ܗ̇ܰܘ ܣܳܐܶܡ ܢܳܡܽܘܣܳܐ: ܐܳܘ ܠܡܰܪܟܰܒܬܳܐ ܡܶܬܪܰܓܫܳܢܺܝܬܳܐ ܕܰܥܠܶܝܗ̇ ܐܶܙܕܰܝܰܚ ܡܳܪܳܐ ܕܡܰܠܐܟ̈ܶܐ: ܐܳܘ ܠܢܶܩܝܳܐ ܒܬܽܘܠܬܳܐ ܕܡܶܢܳܗ̇ ܐܶܬܺܝܠܶܕ ܕܶܟܪܳܐ ܕܠܐ ܡܽܘܡܳܐ: ܐܳܘ ܠܣܰܬܳܐ ܒܪܺܝܟܬܳܐ ܕܰܐܦܪܥܰܬ݀ ܣܡܳܕܪܳܐ ܐܠܰܗܳܝܳܐ: ܐܳܘ ܠܰܥܢܳܩܳܐ ܪܚܺܝܡܬܳܐ: ܕܰܐܘܠܕܰܬ݀ ܐܶܡܪܳܐ ܗ̇ܰܘ ܕܫܳܩܶܠ ܚܛܺܝܬܶܗ ܕܥܳܠܡܳܐ: ܐܳܘ ܠܦܳܬܽܘܪܳܐ ܡܢܰܦܫܳܐ ܕܰܥܠܰܘܗܝ ܐܶܬܬܣܺܝܡ ܠܰܚܡܳܐ ܕܚܰܝ̈ܶܐ ܘܟܳܣܳܐ ܕܦܽܘܪܩܳܢܳܐ: ܐܳܘ ܠܨܶܗܝܽܘܢ ܩܰܕܺܝܫܬܳܐ ܕܒܳܗ̇ ܐܶܬܺܝܠܶܕ ܐܠܰܗ ܐܠܰܗܺܝ̈ܢ ܓܰܢ̱ܒܳܪܳܐ ܕܥܳܠܡ̈ܶܐ: ܐܳܘ ܠܩܰܪܢܳܐ ܫܒܺܝܚܬܳܐ ܕܡܶܢܳܗ̇ ܢܒܰܥ ܡܽܘܪܽܘܢ ܡܣܰܦܩܳܐ ܘܒܰܣܶܡ ܠܰܒܪܺܝܬܳܐ ܒܣܰܘܩܶܗ ܗܰܢܺܝܳܐܐ: ܐܳܘ ܠܰܪܟܽܘܒܳܐ ܡܨܰܒܰܬ݀ ܒܫܽܘܦܪ̈ܶܐ ܠܐ ܡܶܬܦܰܚ̈ܡܳܢܶܐ ܕܰܥܠܰܘܗܝ ܪܟܶܒ ܘܶܐܙܕܰܝܰܚ ܡܳܪܝܳܐ ܟܰܕ ܥܳܐܶܠ ܠܡܶܨܪܶܝܢ ܕܢܰܘܒܶܕ ܠܰܦܬܰܟܪ̈ܶܐ: ܐܳܘ ܠܰܫܡܰܝܳܐ ܕܬܰܪܬܶܝܢ ܕܡܶܢܳܗ̇ ܕܢܰܚ ܠܝܳܬܒ̈ܰܝ ܒܚܶܫܽܘܟܳܐ ܕܛܽܘܥܝܰܝ ܗ̇ܰܘ ܫܶܡܫܳܐ ܕܙܰܕܺܝܩܽܘܬܳܐ: ܐܳܘ ܠܬܰܪܥܳܐ ܕܰܩܕܽܘܫܩܽܘܕܫܺܝܢ ܕܰܒܕܰܐܚܺܝܕ ܘܰܚܬܺܝܡ ܥܰܠ ܒܶܗ ܘܰܢܦܰܩ ܡܶܢܶܗ ܡܶܠܬܳܐ ܐܠܰܗܳܐ ܘܡܰܝ̈ܳܐ ܚܰܝ̈ܶܐ ܘܡܰܚ̈ܝܳܢܶܐ: ܘܡܶܛܽܠ ܗܳܕܶܐ ܐܰܝܟ ܡܶܠܬܳܗ̇ ܛܽܘܒܳܐ ܒܙܶܕܩܳܐ ܢܶܬܶܠ ܠܳܗ̇ ܟܰܕ ܐܳܡܪܺܝܢܰܢ: ܠܶܟܝ ܛܽܘܒܰܝܟܝ ܕܺܐܝܠܳܢܳܐ ܕܚܰܝ̈ܶܐ ܡܶܢܶܟܝ ܫܘܰܚ ܠܰܢ: ܠܶܟܝ ܛܽܘܒܰܝܟܝ ܒܪܺܝܟܰܬ݀ ܐܰܢ̱ܬܝ ܒܢܶܫ̈ܶܐ ܕܛܳܒ̈ܳܬܳܐ ܘܒܽܘܪ̈ܟܳܬܳܐ ܡܶܢܶܟܝ ܐܶܬܰܝ̈ ܠܰܢ: ܠܶܟܝ ܛܽܘܒܰܝܟܝ ܕܓܰܙ̈ܶܐ ܘܣܺܝ̈ܡܳܬܳܐ ܕܥܽܘܬܪ̈ܶܐ ܫܡܰܝ̈ܳܢܶܐ ܒܶܟܝ ܩܢܰܝܢܰܢ: ܠܶܟܝ ܛܽܘܒܰܝܟܝ ܕܕܶܒܚܳܐ ܚܰܝܳܐ ܘܰܡܠܺܝܠܐ ܡܶܢܶܟܝ ܐܶܬܺܝܗܶܒ ܠܰܢ: ܠܶܟܝ ܛܽܘܒܰܝܟܝ ܕܗ̇ܰܘ ܕܰܡܠܶܟ ܠܰܢ ܡܰܠܟܽܘܬ ܪܰܘܡܳܐ ܡܶܢܶܟܝ ܗܘܳܐ ܠܰܢ: ܠܶܟܝ ܛܽܘܒܰܝܟܝ ܕܙܰܝܢܳܐ ܠܐ ܡܶܙܕܰܥܙܥܳܢܳܐ ܡܶܢܶܟܝ ܐܶܬܛܰܝܰܒ ܠܰܢ: ܠܶܟܝ ܛܽܘܒܰܝܟܝ ܕܚܰܘܒܰܬ݀ ܓܶܢܣܰܢ ܒܶܟܝ ܐܶܬܥܰܛܝܰܬ݀ ܠܰܢ: ܠܶܟܝ ܛܽܘܒܰܝܟܝ ܕܛܰܠܐ ܡܦܰܝܓܳܢܳܐ ܡܶܢܶܟܝ ܐܶܬܪܣܶܣ ܠܰܢ: ܠܶܟܝ ܛܽܘܒܰܝܟܝ ܕܟܽܘܡܪܽܘܬܳܐ ܘܟܳܗܢܽܘܬܳܐ ܡ̣ܶܢ ܝܰܠܕܶܟܝ ܩܰܒܶܠܢܰܢ: ܠܶܟܝ ܛܽܘܒܰܝܟܝ ܕܰܠܡܺܐܢܳܐ ܕܢܰܘܚܳܐ ܒܶܟܝ ܐܶܫܟܰܚܢܰܢ: ܠܶܟܝ ܛܽܘܒܰܝܟܝ ܕܡܶܠܚܳܐ ܪܽܘܚܳܢܳܝܬܳܐ ܡܶܢܶܟܝ ܪܕܳܬ݀ ܘܡܰܕܟܰܬ݀ ܠܦܰܟܺܝܗܽܘܬܰܢ: ܠܶܟܝ ܛܽܘܒܰܝܟܝ ܢܽܘܗܪܳܐ ܕܡ̣ܶܢ ܢܽܘܗܪܳܐ ܡܶܢܶܟܝ ܨܡܰܚ ܘܰܐܢܗܰܪ ܠܰܢ: ܠܶܟܝ ܛܽܘܒܰܝܟܝ ܕܣܰܡܳܐ ܕܚܰܝ̈ܶܐ ܒܶܟܝ ܐܶܬܡܰܕܰܟ ܘܰܐܣܺܝ ܠܡܰܚ̈ܘܳܬܰܢ: ܠܶܟܝ ܛܽܘܒܰܝܟܝ ܕܥܳܛܽܘܝܳܐ ܕܣܰܟܠܘ̈ܳܬܰܢ ܡܶܢܶܟܝ ܐܶܬܩܰܪܰܒ ܠܰܢ: ܠܶܟܝ ܛܽܘܒܰܝܟܝ ܕܦܺܐܪܳܐ ܡܰܚܝܳܢܳܐ ܕܡܺܝܬܽܘܬܰܢ ܡܶܢܶܟܝ ܫܘܰܚ ܠܰܢ: ܠܶܟܝ ܛܽܘܒܰܝܟܝ ܕܨܶܡܚܳܐ ܕܙܰܕܺܝܩܽܘܬܳܐ ܡܶܢܶܟܝ ܐܶܬܬܰܙܠܰܓ ܠܰܢ: ܠܶܟܝ ܛܽܘܒܰܝܟܝ ܕܩܽܘܫܬܳܐ ܘܰܫܪܳܪܳܐ ܡ̣ܶܢ ܨܶܝܕܰܝܟܝ ܢܒܰܥ ܠܰܢ: ܠܶܟܝ ܛܽܘܒܰܝܟܝ ܕܪ̈ܰܚܡܰܘܗܝ ܕܰܐܒܳܐ ܡ̣ܶܢ ܠܘܳܬܶܟܝ ܐܰܓܶܢ ܥܠܰܝܢ: ܠܶܟܝ ܛܽܘܒܰܝܟܝ ܕܫܰܝܢܳܐ ܘܰܫܠܳܡܳܐ ܘܚܽܘܒܳܐ ܕܰܠܥܳܠܰܡ ܡ̣ܶܢ ܥܽܘܒܶܟܝ ܐܶܫܬܰܦܰܥ̈ܝ ܥܠܰܝܢ: ܠܶܟܝ ܛܽܘܒܰܝܟܝ ܕܬܰܘܪܳܐ ܕܦܶܛܡܳܐ ܡ̣ܶܢ ܓܰܘܶܟܝ ܐܶܬܢܟܶܣ ܠܰܢ: ܕܡܶܢܶܗ ܟܰܕ ܡܶܬܒܰܣܡܺܝܢܰܢ ܬܰܘܕ̈ܝܳܬܳܐ ܦܰܐܝ̈ܳܬܳܐ: ܘܬܶܫܒ̈ܚܳܬܳܐ ܣܒܺܝ̈ܣܳܬܳܐ ܘܣܶܓ̈ܕܳܬܳܐ ܪ̈ܽܘܚܳܢܳܝܳܬܳܐ ܢܰܣܶܩ ܠܶܗ ܚܢܰܢ ܘܥܰܢܺܝ̈ܕܰܝܢ ܐܰܟܚܕܳܐ: ܘܠܐܒܽܘܗܝ ܘܰܠܪܽܘܚܶܗ ܚܰܝܳܐ ܘܩܰܕܺܝܫܳܐ ܘܡܰܥܒܶܕ ܚܰܝ̈ܶܐ ܒܢܰܦ̈ܫܳܬܰܢ: ܗܳܫܳܐ܀

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗܰܘ ܡܶܠܬܳܐ ܕܠܐ ܡܶܬܡܰܠܰܠ ܡ̣ܶܢ ܟܽܠ ܒܪ̈ܰܝܳܐ ܕܰܒܠܽܘ̈ܚܶܐ ܕܒܶܣܪܳܐ ܐܰܟܬܶܒ ܝܳܬܶܗ ܓܽܘܫܡܳܢܳܐܝ̣ܬ ܠܗܰܘ ܒܰܪ ܐܺܝܬܽܘܬܳܐ ܕܰܨܒܳܐ ܘܶܐܫܬܰܡܰܗ ܒܰܪ ܕܰܘܺܝܕ: ܘܡ̣ܶܢ ܒܰܪܬ ܕܰܘܺܝܕ ܒܬܽܘܠܬܳܐ ܐܶܬܺܝܠܶܕ ܦܰܓܪܳܢܳܐܝ̣ܬ: ܟܰܕ ܡܳܪܶܗ ܕܕܰܘܺܝܕ ܐܺܝܬܰܘܗܝ ܐܠܰܗܳܐܝ̣ܬ: ܠܗܰܘ ܕܝܰܗܒ ܠܰܒܬܽܘܠܬܳܐ ܕܽܝܠܶܕܬܶܗ ܕܶܐܡܳܐ ܘܰܒܬܽܘܠܬܳܐ ܬܶܗܘܶܐ ܘܬܶܬܩܪܶܐ ܫܰܪܺܝܪܳܐܝ̣ܬ: ܠܗܰܘ ܕܰܐܘܪܶܒ ܠܐܡܶܗ ܒܰܫܡܰܝܳܐ ܠܥܶܠ ܡ̣ܶܢ ܢܽܘܪ̈ܳܢܶܐ: ܘܥܰܠ ܐܰܪܥܳܐ ܠܥܶܠ ܡ̣ܶܢ ܟܽܠܗܽܘܢ ܛܶܟ̈ܣܶܐ ܕܩܰܕܺܝ̈ܫܶܐ ܘܳܝܠܝܳܐܝ̣ܬ: ܗ̇ܳܝ ܕܒܰܨܠܰܘ̈ܳܬܳܗ̇ ܩܰܕܺܝ̈ܫܳܬܳܐ ܡܶܬܓܰܘܣܺܝܢܰܢ ܘܬܶܫܒܽܘܚܬܳܐ ܚܠܺܝ̣ܬܳܐ ܒܢܶܥ̈ܡܳܬܳܐ ܗܰܢܺܝ̈ܳܐܬܳܐ ܠܳܟ ܕܰܕܢܰܚܬ ܡ̣ܶܢ ܥܽܘܒܳܗ̇ ܡܕܰܫܢܺܝܢܰܢ ܐܰܡܺܝܢܳܐܝ̣ܬ: ܘܛܽܘܒܳܐ ܠܰܒܬܽܘܠܽܘܬܳܗ̇ ܝܳܗܒܺܝܢܰܢ ܙܳܕܩܳܐܝ̣ܬ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܪܰܡܪܡܺܝܢܰܢ ܠܶܟܝ ܐܳܘ ܡܰܠܝܰܬ ܛܽܘ̈ܒܶܐ ܒܬܽܘܠܬܳܐ ܝܳܠܕܰܬ ܐܠܰܗܳܐ ܡܰܪܝܰܡ: ܐܶܡܳܐ ܒܬܽܘܠܬܳܐ ܕܠܐܠܳܗܳܐ ܝܶܠܕܰܬ ܩܰܕܺܝܫܳܐܝ̣ܬ: ܒܺܝܪܬܳܐ ܡܫܰܟܠܰܠܬܳܐ ܕܠܐܪܕܺܝܟܠܐ ܕܰܫܡܰܝܳܐ ܘܕܰܐܪܥܳܐ ܛܶܥܢܰܬ݀ ܒܬܽܘܠܐܴܝ̣ܬ ܓܶܙܬܳܐ ܡܒܰܪܰܟܬܳܐ ܕܰܠܛܰܠܐ ܕܪܰܘܡܳܐ ܩܰܒܠܰܬ݀ ܐ̱ܪܳܙܳܢܳܐܝ̣ܬ: ܕܟܺܝܬܳܐ ܘܩܰܕܺܝܫܬܳܐ ܕܰܠܩܰܕܺܝܫܳܐ ܘܝܳܗܶܒ ܩܽܘܕܫܳܐ  ܠܩܰܕܺܝ̈ܫܶܐ ܫܰܟܢܰܬ݀ ܕܰܟܝܳܐܝ̣ܬ: ܗܰܝܟܠܐ ܗܕܺܝܪܳܐ ܕܰܫܪܳܐ ܒܶܗ ܪܺܝܫ ܟܳܗ̈ܢܶܐ ܫܡܰܝܳܢܳܐ ܟܳܗܢܳܐܝ̣ܬ ܘܰܥܕܳܐ ܕܚܰܝ̈ܶܐ ܕܝܶܗܒܰܬ݀ ܠܓܶܢܣܳܐ ܕܡܳܝܽܘ̈ܬܶܐ ܚܰܝ̈ܶܐ ܫܦܺܝܥܳܐܝ̣ܬ: ܙܗܺܝܬܳܐ ܘܰܚܣܺܝܬܳܐ ܕܰܐܒܥܰܬ݀ ܡ̣ܶܢ ܥܽܘܒܳܗ̇ ܚܽܘܣܳܝܳܐ ܠܰܡܗܰܝ̈ܡܢܶܐ ܙܰܗܝܳܐܝ̣ܬ: ܚܰܩܠܐ ܒܪܺܝܟܬܳܐ ܕܺܝܥܳܐ ܒܳܗ̇ ܫܶܒܠܐ ܕܒܽܘܪ̈ܟܳܬܳܐ ܘܣܰܒܥܰܬ݀ ܟܰܦܢܽܘܬܳܗ̇ ܕܥܳܡܰܪܬܳܐ ܡܰܠܝܳܐܝ̣ܬ: ܛܽܘܪܳܐ ܩܰܕܺܝܫܳܐ ܕܡܶܢܶܗ ܐܶܬܓܰܙܪܰܬ݀ ܟܺܐܦܳܐ ܕܠܐ ܒܺܐܝ̈ܕܰܝܢ ܘܬܰܒܪܰܬ݀ ܠܨܰܠܡ̈ܶܐ ܕܛܽܘܥܝܰܝ ܓܡܺܝܪܳܐܝ̣ܬ: ܝܰܘܢܳܐ ܬܰܡܺܝܡܬܳܐ ܕܛܶܥܢܰܬ݀ ܠܢܶܫܪܳܐ ܫܡܰܝܳܢܳܐ ܡܰܟܺܝܟܳܐܝ̣ܬ ܟܰܠܬܳܐ ܠܐ ܚܰܟܺܝܡܬܳܐ ܕܰܕܠܐ ܙܽܘܘܳܓ ܫܪܳܐ ܒܩܰܝܽܛܘܢܳܗ̇ ܚܰܬܢܳܐ ܫܡܰܝܳܢܳܐ ܢܺܝܚܳܐܝ̣ܬ: ܡܢܰܪܬܳܐ ܢܰܗܺܝܪܬܳܐ ܕܰܥܠܶܝܗ̇ ܐܶܙܕܰܝܰܚ ܢܽܘܗܪܳܐ ܕܒܶܪ̈ܝܳܬܳܐ ܢܰܗܺܝܪܳܐܝ̣ܬ: ܢܶܩܝܳܐ ܚܣܺܝܡܬܳܐ ܕܝܶܠܕܰܬ ܐܶܡܪܶܗ ܕܰܐܠܳܗܳܐ ܕܰܫܩܰܠ ܠܰܚܛܺܝܬܶܗ ܕܥܳܠܡܳܐ ܨܶܒܝܳܢܳܐܝ̣ܬ: ܣܰܢܝܳܐ ܠܐ ܝܳܩܽܘܕܳܐ ܕܰܐܓܢܰܬ݀ ܒܶܗ ܢܽܘܪܳܐ ܠܐ ܗܽܘܠܳܢܳܝܬܳܐ ܘܰܡܕܰܟܝܳܢܺܝܬܳܐ ܕܟܽܘܬܡ̈ܳܬܶܗ ܕܥܳܠܡܳܐ ܠܐ ܡܶܬܢܰܟܝܳܢܳܐܝ̣ܬ: ܥܢܳܢܳܐ ܩܰܠܺܝܠܬܳܐ ܕܰܪܟܶܒ ܥܠܶܝܗ̇ ܡܳܪܳܐ ܕܟܽܠ ܒܶܪ̈ܝܳܢ ܘܶܐܬܳܐ ܣܰܚܶܦ ܠܰܦܬܰܟܪ̈ܶܐ ܕܛܳܥܝܽܘܬܳܐ ܙܺܝܥܳܐܝ̣ܬ: ܦܺܝܪܡܳܐ ܡܶܬܝܰܕܥܳܢܳܐ ܕܰܢܦܰܩ ܡܶܢܶܗ ܪܺܝܚܳܐ ܒܰܣܺܝܡܳܐ ܕܕܰܟܺܝ ܠܰܒܪܺܝܬܳܐ ܗܰܢܺܝܳܐܝ̣ܬ: ܨܶܗܝܽܘܢ ܩܰܕܺܝܫܬܳܐ ܕܶܐܬܚܙܺܝ ܒܳܗ̇ ܐܠܰܗ ܐܠܰܗܺܝ̈ܢ ܦܳܪܽܘܩܳܐܝ̣ܬ: ܩܰܘܩܬܳܐ ܚܕܰܬܳܐ ܕܰܒܡܶܠܚܳܗ̇ ܡܰܕܟܰܬ݀ ܦܰܟܺܝܗܽܘܬܳܐ ܕܥܰܡ̈ܡܶܐ ܘܶܐܡܘ̈ܳܬܳܐ ܛܥܺܝܢܳܐܝ̣ܬ: ܪܩܺܝܥܳܐ ܡܶܬܗܰܘܢܳܢܳܐ ܕܰܕܢܰܚ ܒܳܗ̇ ܫܶܡܫܳܐ ܕܙܰܕܺܝܩܽܘܬܳܐ ܢܰܗܺܝܪܳܐܝ̣ܬ: ܫܡܰܝܳܐ ܡܢܰܦܫܳܐ ܕܰܥܡܰܪ ܒܳܗ̇ ܐܠܰܗܳܐ ܡܶܠܬܳܐ ܠܐ ܡܣܰܝܟܳܐܝ̣ܬ ܬܰܪܥܳܐ ܕܩܽܘܫܬܳܐ ܕܒܶܗ ܥܰܠ ܐܠܰܗܳܐ ܠܥܳܠܡܳܐ ܘܰܢܦܰܩ ܒܶܗ ܟܰܕ ܐܰܚܺܝܕ ܙܗܺܝܪܳܐܝ̣ܬ ܘܥܰܠܗܳܕܶܐ ܟܽܠܗܶܝܢ ܫܰܪ̈ܒܳܬܳܐ ܕܰܐܪ̈ܥܳܢܳܝܶܐ ܘܕܰܫܡܰܝ̈ܳܢܶܐ ܝܳܗ̈ܒܳܢ ܠܶܟܝ ܛܽܘܒܳܐ ܟܰܕ ܐܳܡܪ̈ܳܢ ܟܢܺܝܫܳܐܝ̣ܬ: ܠܶܟܝ ܛܽܘܒܰܝܟܝ ܫܽܘܒܗܳܪܳܐ ܕܰܫܠܺܝ̈ܚܶܐ: ܠܶܟܝ ܛܽܘܒܰܝܟܝ ܬܶܫܒܽܘܚܬܳܐ ܕܰܢܒܺܝ̈ܶܐ: ܠܶܟܝ ܛܽܘܒܰܝܟܝ ܪܽܘܡܪܳܡܳܐ ܕܣܳܗ̈ܕܶܐ: ܠܶܟܝ ܛܽܘܒܰܝܟܝ ܩܺܐܒܽܘܬܳܐ ܕܐ̱ܪ̈ܳܙܶܐ: ܠܶܟܝ ܛܽܘܒܰܝܟܝ ܨܶܒܬܳܐ ܕܰܒܬܽܘ̈ܠܳܬܳܐ: ܠܶܟܝ ܛܽܘܒܰܝܟܝ ܦܳܬܽܘܪܳܐ ܕܒܽܘܪ̈ܟܳܬܳܐ: ܠܶܟܝ ܛܽܘܒܰܝܟܝ ܥܳܕܽܘܪܬܳܐ ܕܢܰܦ̈ܫܳܬܳܐ: ܠܶܟܝ ܛܽܘܒܰܝܟܝ ܣܶܒܠܬܳܐ ܕܰܫܡܰܝܳܐ: ܠܶܟܝ ܛܽܘܒܰܝܟܝ ܢܽܘܗܪܳܐ ܕܒܶܪ̈ܝܳܬܳܐ: ܠܶܟܝ ܛܽܘܒܰܝܟܝ ܡܰܒܽܘܥܳܐ ܕܛܳܒ̈ܳܬܳܐ: ܠܶܟܝ ܛܽܘܒܰܝܟܝ ܠܶܘܝܶܐ ܕܰܡܗܰܝ̈ܡܢܶܐ: ܠܶܟܝ ܛܽܘܒܰܝܟܝ ܟܠܺܝܠܐ ܕܢܰܦ̈ܫܳܬܳܐ: ܠܶܟܝ ܛܽܘܒܰܝܟܝ ܝܽܘܩܢܳܐ ܕܦܰܐܝ̈ܳܬܳܐ: ܠܶܟܝ ܛܽܘܒܰܝܟܝ ܛܰܒܥܳܐ ܕܰܒܬܽܘܠܽܘܬܳܐ: ܠܶܟܝ ܛܽܘܒܰܝܟܝ ܚܳܬܡܳܐ ܕܩܰܕܺܝܫܽܘܬܳܐ: ܠܶܟܝ ܛܽܘܒܰܝܟܝ ܙܰܝܢܳܐ ܕܡܰܟܺܝܟܽܘܬܳܐ: ܠܶܟܝ ܛܽܘܒܰܝܟܝ: ܘܺܝܠܐ ܕܢܰܗܺܝܪܽܘܬܳܐ: ܠܶܟܝ ܛܽܘܒܰܝܟܝ ܗܶܕܪܳܐ ܕܶܐܡܗ̈ܳܬܳܐ: ܠܶܟܝ ܛܽܘܒܰܝܟܝ ܕܰܝܪܳܐ ܕܪ̈ܳܥܰܘܳܬܳܐ: ܠܶܟܝ ܛܽܘܒܰܝܟܝ ܓܡܽܘܪܬܳܐ ܕܦ̈ܶܠܐܬܳܐ: ܠܶܟܝ ܛܽܘܒܰܝܟܝ ܐܻܝܳܠܐ ܕܟܽܠܗܶܝܢ ܛܳܒ̈ܳܬܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܥܰܠ ܟܽܠ: ܕܰܒܝܰܕ ܨܠܰܘ̈ܳܬܳܗ̇ ܕܶܐܡܳܟ ܡܒܰܪܰܟܬܳܐ: ܐܽܘܠܨ̈ܳܢܶܐ ܢܶܬܒܰܛܠܽܘܢ: ܘܰܐܠܺܝ̈ܨܶܐ ܢܶܬܪܰܘܚܽܘܢ: ܒܺܝ̈ܫܳܬܳܐ ܢܶܙܕܰܓܪ̈ܳܢ: ܘܛܳܒ̈ܳܬܳܐ ܢܶܫܬܰܟ̈ܢܳܢ: ܓܙ̈ܳܡܶܐ ܢܶܫܬܰܗܽܘܢ: ܘܫܽܘ̈ܘܕܳܝܶܐ ܕܫܰܝܢܳܐ ܢܰܡܠܟܽܘܢ: ܕܶܚ̈ܠܐ ܡܰܪܺܝܪ̈ܶܐ ܢܶܥܪܩܽܘܢ: ܘܚܰܕ̈ܘܳܬܳܐ ܘܒܽܘܪ̈ܟܳܬܳܐ ܢܶܫܬܰܦ̈ܥܳܢ: ܗܶܪ̈ܳܬܳܐ ܢܶܬܬܪܺܝܡܽܘܢ: ܘܰܫܠܳܡܳܐ ܘܫܰܝܢܳܐ ܢܶܪܚܦܽܘܢ: ܘܳܝ̈ܶܐ ܘܬܰܫܢܺܝ̈ܩܶܐ ܢܶܫܬܰܬܩܽܘܢ: ܘܛܽܘ̈ܒܶܐ ܫܡܰܝ̈ܳܢܶܐ ܢܰܓܢܽܘܢ: ܙܰܘ̈ܥܶܐ ܘܰܕܠܽܘ̈ܚܝܶܐ ܢܶܬܪܰܝܚܽܘܢ: ܘܒܽܘ̈ܣܳܡܶܐ ܘܰܢܝܳܚ̈ܶܐ ܢܶܬܚܰܘܽܘܢ: ܚܶܪ̈ܝܳܢܶܐ ܘܡܰܨܘ̈ܳܬܳܐ ܢܶܬܬܢܺܝܚܽܘܢ: ܘܰܐܘܝܽܘܬܳܐ ܘܚܽܘܒܳܐ ܢܶܬܢܰܨܚܽܘܢ: ܛܳܒ̈ܶܐ ܡܰܚ̈ܫܳܢܶܐ ܢܶܬܛܰܠܩܽܘܢ: ܘܣܰܒܪ̈ܳܬܳܐ ܡܚܰܕ̈ܝܳܢܝܳܬܳܐ ܢܬܰܟ̈ܒܳܢ: ܝܰܥܪ̈ܶܐ ܘܙܺܝܙܳܢ̈ܶܐ ܢܶܬܚܰܢܩܽܘܢ: ܘܫܶܒ̈ܠܐ ܕܒܽܘܪ̈ܟܳܬܳܐ ܢܶܫ̈ܘܚܳܢ: ܟܺܐܒ̈ܶܐ ܟܽܘܪ̈ܗܳܢܶܐ ܢܶܬܰܐܣܽܘܢ: ܘܚܽܘܠܡܳܢ̈ܶܐ ܘܳܐܣܘ̈ܳܬܳܐ ܢܶܬܝܰܗܒܽܘܢ: ܠܽܘܚ̈ܳܡܶܐ ܕܰܛܪ̈ܽܘܢܶܐ ܢܶܥܒܪܽܘܢ: ܘܰܪܘܳܙܳܐ ܘܰܦܨܺܝܚܽܘܬܳܐ ܢܶܕܢܚܽܘܢ: ܡܰܘܬܳܢ̈ܶܐ ܕܰܓܪ̈ܽܘܦܝܶܐ ܢܶܬܟܠܽܘܢ: ܘܚܰܝ̈ܶܐ ܚܰܕ̈ܬܶܐ ܠܰܒܢܰܝ̈ܢܳܫܳܐ ܢܶܗܘܽܘܢ: ܢܶܣܝܽܘ̈ܢܶܐ ܥܰܣ̈ܩܶܐ ܢܰܩܠܽܘܢ: ܘܪ̈ܰܚܡܶܐ ܥܰܬܺܝܪ̈ܶܐ ܢܰܡܛܪܽܘܢ: ܣܳܢ̈ܶܐܐ ܘܣܳܩܽܘܪ̈ܶܐ ܢܶܬܪܰܚܩܽܘܢ: ܘܪ̈ܳܚܡܶܐ ܘܚܰܒܺܝ̈ܒܶܐ ܢܶܬܟܰܢܫܽܘܢ: ܥܰܘ̈ܳܠܐ ܘܥܰܢ̈ܳܬܶܐ ܢܺܐܒܕܽܘܢ ܘܟܺܐܢ̈ܶܐ ܘܙܰܕܺܝ̈ܩܶܐ ܢܶܬܢܰܛܪܽܘܢ: ܦܰܚ̈ܶܐ ܘܰܡܨܺܝ̈ܕܳܬܳܐ ܕܥܰܘܠܐ ܢܶܬܦܰܣܩܽܘܢ: ܨܰܘܪ̈ܳܢܶܐ ܘܚܰܫ̈ܶܐ ܢܶܬܥܰܩܪܽܘܢ: ܘܢܰܘܚܳܐ ܘܰܒܗܺܝܠܽܘܬܳܐ ܢܶܫܬܰܟܢܽܘܢ: ܩܪ̈ܳܒܶܐ ܕܒܰܪܒܪ̈ܳܝܶܐ ܢܶܫܬܰܗܽܘܢ: ܘܥܰܡ̈ܡܶܐ ܡܗܰܝ̈ܡܢܶܐ ܢܶܒܗܠܽܘܢ: ܪ̈ܳܡܶܐ ܘܰܚܬܺܝܪ̈ܶܐ ܢܶܬܡܰܟܟܽܘܢ: ܘܡܰܟܺܝ̈ܟܶܐ ܘܬܰܡܺܝ̈ܡܶܐ ܢܶܬܬܪܺܝܡܽܘܢ: ܫܓܽܘܫ̈ܝܶܐ ܗܶܪ̈ܶܛܺܝܩܳܝܶܐ ܢܶܒܛܠܽܘܢ: ܘܗܰܝܡܳܢܽܘܬܳܐ ܘܰܫܪܳܪܳܐ ܢܶܬܩܰܝܡܽܘܢ: ܬܽܘܩ̈ܠܳܬܳܐ ܕܰܚܛܳܗ̈ܶܐ ܢܶܬܠܰܚ̈ܡܳܢ: ܐܳܦ ܬܶܫܒ̈ܚܳܬܳܐ ܚܰܕ̈ܬܳܬܳܐ ܡ̣ܶܢ ܟܽܠ ܦܽܘܡܺܝ̈ܢ ܢܰܣ̈ܩܳܢ: ܠܳܟ ܡܫܺܝܚܳܐ ܡܰܘܪܒܳܢܳܐ ܕܝܳܠܶܕܬܶܗ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܚܰܩܠܐ ܒܪܺܝܟܬܳܐ ܕܗܶܪ̈ܽܘܡܶܐ ܡܰܚ̈ܝܳܢܶܐ: ܕܰܐܦܺܝܚܰܬ݀ ܒܥܳܠܡܳܐ ܪܺܝܚܳܐ ܕܠܐ ܡܳܝܽܘܬܽܘܬܳܐ: ܘܥܶܩܳܪܳܐ ܕܥܽܘܕܪ̈ܳܢܶܐ ܝܶܗܒܰܬ݀ ܠܥܳܠܡܳܐ: ܕܢܶܬܒܰܝܰܐܐ ܒܶܗ: ܒܥܳܝ ܗܳܟܺܝܠ ܐܳܘ ܡܥܺܝܢܳܐ ܕܪ̈ܰܚܡܶܐ ܘܦܽܘܪܩܳܢܳܐ: ܕܰܒܝܰܕ ܬܰܟܫ̈ܦܳܬܶܟܝ: ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܐܥܛܰܪܢܰܢ: ܢܶܗܘܶܐ ܠܬܰܪܥܽܘܬܳܐ ܘܠܰܢܝܳܚܳܐ ܕܺܝܚܺܝܕܶܟܝ: ܘܰܠܚܽܘܣܳܝܳܐ ܘܕܽܘܟܳܝܳܐ ܕܡܶܬܥܰܒܪ̈ܳܢܘܳܬܰܢ: ܘܰܠܚܽܘܠܡܳܢܳܐ ܘܳܐܣܝܽܘܬܳܐ ܕܰܟܪܺܝܗܽܘܬܰܢ: ܘܠܰܢܝܳܚܳܐ ܘܒܽܘܣܳܡܳܐ ܕܥܰܢܺܝ̈ܕܶܐ ܡܗܰܝ̈ܡܢܶܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܡ̣ܶܢ ܩܕܳܡ ܡܰܘܠܳܕܶܗ ܬܪܰܝܳܢܳܐ: ܐ̱ܢܳܫ ܠܐ ܡܨܶܐ ܗܘܳܐ ܕܢܶܬܒܰܩܶܐ ܗܘܳܐ ܒܶܗ: ܠܗܰܘ ܕܒܳܬܰܪ ܕܶܐܬܝܺܠܶܕ ܡ̣ܶܢ ܒܬܽܘܠܬܳܐ ܡܰܪܝܰܡ ܐܶܬܚܙܺܝ ܐܰܝܟ ܒܰܪܢܳܫܳܐ ܫܚܺܝܡܳܐ ܒܫܽܘ̈ܩܰܝ ܢܳܨܪܰܬ݀: ܠܗܰܘ ܕܡ̣ܶܢ ܩܕܳܡ ܦܰܓܪܳܢܽܘܬܶܗ ܩܰܒܶܠ ܡ̣ܶܢ ܐܰܒܽܘܗܝ ܠܗܳܝ ܕܬܰܘ ܢܶܒܪܶܐ ܐ̱ܢܳܫܳܐ ܒܨܰܠܡܰܢ ܘܒܰܕܡܽܘܬܰܢ: ܗܳܢܰܘ ܕܶܝܢ ܕܺܝܠܶܗ ܘܕܰܐܒܽܘܗܝ ܘܰܕܪܽܘܚܶܗ ܩܰܕܺܝܫܳܐ: ܠܗܰܘ ܕܟܰܕ ܚܙܳܐ ܠܨܰܠܡܳܐ ܕܺܝܠܶܗ ܡܰܠܟܳܝܳܐ ܕܰܡܫܰܥܒܰܕ ܠܚܰܫ̈ܶܐ: ܗܘܳܐ ܒܰܪܢܳܫܳܐ ܡ̣ܶܢ ܒܰܪܬ ܕܰܘܺܝܕ ܟܰܕ ܠܐ ܐܶܫܬܰܚܠܰܦ ܘܦܰܪܩܶܗ ܒܡܶܬܒܰܣܪܳܢܽܘܬܶܗ ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܐܠܰܗܳܐ ܗ̇ܰܘ ܪܳܡܳܐ ܘܰܡܥܰܠܝܳܐ ܘܠܐ ܡܶܬܕܰܪܟܳܢܳܐ ܗ̇ܰܘ ܕܥܳܡܰܪ ܒܢܽܘܗܪܳܐ ܠܐ ܡܶܬܩܰܪܒܳܢܳܐ ܚܰܢܳܢܳܐ ܕܶܝܢ ܘܚܰܝܽܘܣܬܳܢܳܐ: ܗ̇ܰܘ ܕܰܒܛܰܝܒܽܘܬܶܗ ܠܐ ܡܶܬܡܰܠܠܳܢܺܝܬܳܐ: ܘܰܒܪ̈ܰܚܡܰܝܟ ܡܬܽܘ̈ܡܳܝܶܐ ܘܠܐ ܡܶܬܕܰܪ̈ܟܳܢܶܐ ܐܰܝܬܺܝܬ ܠܟܽܠܗܶܝܢ ܒܶܪ̈ܝܳܬܳܐ ܠܰܗܘܳܝܳܐ: ܗ̇ܰܘ ܕܟܰܕ ܨܒܰܝܬ ܕܰܠܚܰܝ̈ܳܒܶܐ ܬܶܫܒܽܘܩ: ܘܳܐܦ ܠܓܶܢܣܰܢ ܡܚܺܝܠܐ ܡ̣ܶܢ ܥܰܒܕܽܘܬܳܐ ܕܳܐܟܶܠܩܰܪܨܳܐ ܘܰܕܒܺܝܫܳܐ ܡܳܪܽܘܕܳܐ ܬܚܰܪܰܪ: ܘܰܠܘܳܬ ܩܰܐܛܶܣܛܰܐܣܺܝܣ ܗܳܕܶܐ ܚܕܰܬܳܐ ܘܕܽܘܒܳܪܳܐ ܡܫܰܡܠܝܳܐ ܬܰܝܬܶܐ: ܓܒܰܝܬ ܠܳܟ ܐܶܡܳܐ ܡ̣ܶܢ ܓܶܢܣܳܐ ܕܺܝܠܗܽܘܢ ܕܚܰܝ̈ܳܒܶܐ: ܐܰܝܟܰܢܳܐ ܕܰܒܬܰܪܥܳܐ ܕܥܰܠ ܒܶܗ ܡܰܘܬܳܐ ܥܠܰܝܗܽܘܢ: ܬܶܥܽܘܠ ܐܰܢ̱ܬ ܕܺܐܝܬܰܝܟ ܚܰܝ̈ܶܐ ܕܟܽܠ ܡܫܺܝܚܳܐ ܐܠܰܗܳܐ: ܘܰܐܝܟܰܢܳܐ ܕܡ̣ܶܢ ܚܰܙܳܝ̈ܶܐ ܘܰܢܒܺܝ̈ܶܐ ܩܰܕܡܰܬ݀ ܘܶܐܬܝܰܩܪܰܬ݀ ܝܳܠܶܕܬܳܟ ܒܛܽܘܦܣܰܝ̈ܗܽܘܢ ܗܳܟܰܢܳܐ ܐܳܦ ܚܢܰܢ ܠܳܗ̇ ܗ̣ܽܘ ܡܩܰܠܣܺܝܢܰܢ ܟܰܕ ܐܳܡܪܺܝܢܰܢ: ܠܶܟܝ ܛܽܘܒܰܝܟܝ ܡܰܠܝܰܬ݀ ܛܰܝܒܽܘܬܳܐ: ܐܰܘܨܪܳܐ ܠܐ ܡܶܬܛܰܠܩܳܢܳܐ ܕܠܰܚܡܳܐ ܫܡܰܝܳܢܳܐ: ܠܶܟܝ ܛܽܘܒܰܝܟܝ ܐܶܡܳܐ ܕܥܰܬܺܝܩ ܝܰܘ̈ܡܳܬܳܐ: ܕܰܨܒܳܐ ܕܢܶܗܘܶܐ ܥܽܘܠܐ ܒܓܰܘ ܟܰܪܣܶܟܝ: ܗ̇ܰܘ ܕܠܐ ܐܺܝܬ ܠܶܗ ܫܽܘܪܳܝܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ: ܟܰܠܬܳܐ ܒܬܽܘܠܬܳܐ ܘܠܐ ܡܙܰܘܰܓܬܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܬܰܪܥܳܐ ܐܰܚܺܝܕܳܐ: ܗ̇ܰܘ ܕܰܚܙܳܐ ܗܘܳܐ ܢܒܺܝܳܐ ܚܰܙܩܺܝܶܐܝܠ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ: ܩܽܘܩܬܳܐ ܫܡܰܝܳܢܺܝܬܳܐ ܗ̇ܳܝ ܕܝܰܥܩܽܘܒ ܚܙܳܐ ܛܽܘܦܣܳܗ̇ ܒܣܶܒܠܬܳܐ: ܘܰܐܙܥܶܩ ܕܗܳܢܰܘ ܬܰܪܥܳܐ ܕܫܡܰܝܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ: ܕܡܶܢܶܟܝ ܕܢܰܚ ܡܳܪܳܐ ܕܛܽܘܗ̈ܡܶܐ ܘܰܕܫܰܪ̈ܒܳܬܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܝܳܠܶܕܬܳܐ ܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܰܗܘܰܝܬܝ ܠܰܢ ܥܶܠܬܳܐ ܕܟܽܠܗܶܝܢ ܛܳܒ̈ܳܬܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܛܽܘܪܳܐ ܩܰܕܺܝܫܳܐ ܕܡܶܢܶܟܝ ܐܶܬܓܰܙܪܰܬ݀ ܟܺܐܦܳܐ ܕܠܐ ܒܺܐܝ̈ܕܰܝܳܐ ܕܐ̱ܢܳܫ̈ܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܒܺܐܝ̈ܕܰܝܟܝ ܗܘܳܐ ܦܽܘܪܩܳܢܳܐ ܠܓܶܢܣܳܐ ܕܒܶܝܬ ܐܳܕܳܡ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܐܶܡܳܐ ܚܕܰܬܳܐ ܕܟܽܠܶܗ ܥܳܠܡܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܕܺܝܠܶܕܬܝ ܒܰܒܬܽܘܠܽܘܬܶܟܝ ܠܝܰܠܕܳܐ ܗ̇ܰܘ ܕܶܐܬܢܰܒܺܝ ܥܠܰܘܗܝ ܐܶܫܰܥܝܳܐ ܡܫܰܒܚܳܐ ܒܰܢ̈ܒܺܝܶܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܕܰܐܝܟ ܝܰܠܽܘܕܳܐ ܢܰܨܰܪܬܺܝܘܗܝ: ܠܗܰܘ ܕܰܣܪ̈ܳܦܶܐ ܪܳܥܠܺܝܢ ܡ̣ܶܢ ܙܺܝܘܶܗ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܕܶܐܡܳܐ ܡܪܰܒܝܳܢܺܝܬܳܐ ܗܘܰܝܬܝ ܠܕܶܐܬܺܝܗܶܒ ܠܟܰܠܒܬܳܐ ܕܢܽܘܪܳܐ ܠܐܫܰܥܝܳܐ ܒܰܪ ܐܰܡܽܘܨ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ: ܕܰܐܢ̱ܬܝ ܥܰܦܶܩܬܝ ܘܚܰܒܶܒܬܝ ܠܢܽܘܪܳܐ ܠܐ ܗܽܘܠܳܢܳܝܬܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܕܛܽܘ̈ܒܶܐ ܟܽܠܗܽܘܢ ܠܶܟܝ ܡܶܬܝܰܗܒܺܝܢ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܫܽܘܒܗܳܪܳܐ ܕܰܢܒܺܝ̈ܶܐ ܘܚܰܕܽܘܬܳܐ ܕܰܫܠܺܝ̈ܚܶܐ: ܘܰܦܨܺܝܚܽܘܬܳܐ ܕܣܳܗ̈ܕܶܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܪܘܳܙܳܐ ܕܡܰܘܕ̈ܝܳܢܶܐ: ܟܠܺܝܠܐ ܕܰܒܬܽܘ̈ܠܳܬܳܐ: ܕܰܘܨܳܐ ܕܰܒܥܺܝ̈ܠܳܬܳܐ ܘܳܐܦ ܚܢܰܢ ܡܗܰܝ̈ܡܢܶܐ ܛܽܘܒܳܐ ܠܶܟܝ ܝܳܗܒܺܝܢܰܢ: ܟܰܕ ܒܳܥܶܝܢܰܢ ܘܰܡܦܺܝܣܺܝܢܰܢ ܠܐܠܳܗܳܐ ܕܡܶܢܶܟܝ ܐܶܬܺܝܠܶܕ: ܕܥܺܕܬܳܐ ܘܝܰܠܕܶܝ̈ܗ̇ ܒܫܰܝܢܳܐ ܢܶܬܢܰܛܪܽܘܢ: ܘܪ̈ܳܥܰܘܳܬܳܗ̇ ܒܫܽܘܒܚܳܐ ܢܶܬܗܰܕܪܽܘܢ: ܟܳܗ̈ܢܶܝܗ̇ ܘܰܡܫܰܡ̈ܫܳܢܶܝܗ̇ ܒܕܰܟܝܽܘܬܳܐ ܢܫܰܡܫܽܘܢ: ܣܳܒܶܝ̈ܗ̇ ܢܶܬܥܰܫܢܽܘܢ: ܥܠܰܝ̈ܡܶܝܗ̇ ܒܰܥ̈ܒܳܕܶܐ ܛܳܒ̈ܶܐ ܢܶܬܚܰܝܠܽܘܢ: ܛܠܳܝ̈ܶܐ ܒܰܚܘܺܝܚܽܘܬܳܐ ܘܚܶܟܡܬܳܐ ܢܶܫܬܰܘܫܛܽܘܢ: ܝܰܬܡ̈ܶܐ ܘܰܐܪ̈ܡܠܳܬܳܐ ܢܶܬܥܰܕܪܽܘܢ: ܘܰܐܪܥܳܐ ܥܰܡ ܥܳܡܽܘܪ̈ܶܝܗ̇ ܒܰܒܗܺܝܠܽܘܬܳܐ ܢܶܬܒܽܘܢ: ܩܪ̈ܳܒܶܐ ܘܰܫܓܽܘ̈ܫܝܶܐ ܡܶܢܳܗ̇ ܢܶܬܒܰܛܠܽܘܢ: ܡܰܠܟ̈ܶܐ ܘܪ̈ܺܝܫܳܢܶܐ ܢܶܫܬܰܝܢܽܘܢ: ܕܰܝ̈ܳܢܶܐ ܬܪܺܝܨܽܘܬܳܐ ܢܕܽܘܢܽܘܢ: ܫܒ̈ܰܝܳܐ ܢܶܬܚܰܪܪܽܘܢ: ܐܰܣܺܝܪ̈ܶܐ ܢܶܫܬܪܽܘܢ: ܚܰܛܳܝ̈ܶܐ ܢܶܬܚܰܣܽܘܢ: ܬܰܝ̈ܳܒܶܐ ܢܶܬܩܰܒܠܽܘܢ: ܪ̈ܰܚܺܝܩܶܐ ܒܫܰܝܢܳܐ ܢܶܬܦܢܽܘܢ: ܩܰܪ̈ܺܝܒܶܐ ܒܰܫܠܳܡܳܐ ܢܶܬܢܰܛܪܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܣܶܦܪܳܐ ܕܚܰܝ̈ܶܐ ܫܡܳܗܰܝ̈ܗܽܘܢ ܢܶܬܟܰܬܒܽܘܢ ܘܒܰܐܘ̈ܳܢܶܐ ܕܢܽܘܗܪܳܐ ܢܶܬܬܢܺܝܚܽܘܢ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܣܒܐ ܣܗܕܐ ܢܨܝܚܐ ܘܐܦ ܣܝܥܬܐ ܕܚܒܪ̈ܘܗܝ ܬܪܥܣܪ ܐܠܦܝ̈ܐ ܘܫܬܡܐܐ ܘܬܠܬܝܢ ܘܐܪܒܥܐ ܕܥܡܗ ܐܬܟܠܠܘ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܢܶܫܬܰܘܬܰܦ ܒܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ: ܘܰܢܝܰܩܰܪ ܥܺܐܕܰܝ̈ܗܽܘܢ ܕܰܐܬܠܺܝ̈ܛܰܝܟ: ܡܳܪܝ ܣܳܒܳܐ ܘܓܽܘܕܳܐ ܕܚܰܒܪ̈ܰܘܗܝ ܕܶܐܬܩܛܶܠܘ ܡܶܛܽܠ ܚܽܘܒܳܟ: ܘܢܶܗܘܽܘܢ ܠܰܢ ܓܰܪ̈ܡܰܝܗܽܘܢ ܚܶܣܢܳܐ ܡܢܰܛܪܳܢܳܐ: ܘܫܽܘܪܳܐ ܡܣܰܬܪܳܢܳܐ: ܗܳܫܳܐ ܘܰܒܟܽܠܙܒܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܬܠܺܝܬܳܝܳܐ ܒܰܐܛܰܡܽܘ̈ ܘܰܚܕܳܢܳܝܳܐ ܒܽܐܘܣܺܝܰܐ: ܕܰܐܗܘܺܝ ܠܰܟ̈ܝܳܢܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ: ܘܰܐܝܬܺܝ ܐܶܢܽܘܢ ܡ̣ܶܢ ܠܰܝܬܳܝܽܘܬܳܐ ܠܐܝܬܽܘܬܳܐ: ܠܗܰܘ ܕܰܢܓܰܕ ܘܰܐܦܢܺܝ ܠܣܳܗܕܳܐ ܡܳܪܝ ܣܳܒܳܐ ܒܝܰܕ ܡܳܪܝ ܐܰܢܕܪܶܐܘܳܣ ܐܶܦܣܩܽܘܦܳܐ ܘܣܺܝܥܬܳܐ ܕܚܰܒܪ̈ܰܘܗܝ ܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ: ܕܰܫܒܳܐ ܐܶܢܽܘܢ ܪܰܫܺܝܥܳܐ ܙܳܡܰܢܣܳܘܦ ܐܰܒܽܘܗܝ: ܘܡ̣ܶܢ ܐܺܝ̈ܕܰܝ ܥܰܘܳܠܐ ܟܽܘܒܰܝ ܐܶܬܩܛܶܠܘ: ܘܒܰܓܢܽܘܢ ܢܽܘܗܪܳܐ ܢܛܺܝܪ ܦܽܘܪܥܳܢܗܽܘܢ: ܘܥܺܕܬܳܐ ܥܰܡ ܝܰܠܕܶܝ̈ܗ̇ ܙܳܡܪܳܐ ܫܽܘܒܚܳܐ ܠܡܳܪܝܳܐ ܡܢܰܨܚܳܢܗܽܘܢ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܠܡܰܢܽܘ ܡ̣ܶܢ ܒܢܰܝ̈ܢܳܫܳܐ ܐܺܝܬ ܦܽܘ̈ܡܶܐ ܐܰܘ ܠܶܫ̈ܳܢܶܐ ܕܰܪܗܺܝܛܪܳܐܝ̣ܬ ܩܽܘܠܳܣ̈ܶܐ ܢܶܙܩܪܽܘܢ: ܓܳܗܪܺܝܢ ܕܶܝܢ ܗܰܘ̈ܢܶܐ ܘܡܰܘ̈ܦܝܳܢ ܦܽܘܣܺܝ̈ܰܐܣ ܕܟܽܠ: ܠܰܡܣܰܠܓܳܣܽܘ ܝܰܕܺܝܕܳܐ ܘܣܳܗܕܳܐ ܫܰܪܘܳܝܳܐ ܡܳܪܝ ܣܳܒܳܐ ܪܺܝܫ ܣܺܝܥܬܳܐ ܒܪܺܝܟܬܳܐ: ܕܰܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ: ܗܳܢܳܐ ܕܰܫܘܰܚ ܘܺܝܥܳܐ ܕܶܝܢ ܒܰܐܬܪܳܐ ܒܪܺܝܟܳܐ ܕܒܶܝܬ ܥܰܪ̈ܰܒܳܝܶܐ ܐܰܝܟ ܥܶܩܳܪܳܐ ܕܚܰܝ̈ܶܐ: ܗܳܢܳܐ ܕܰܨܡܰܚ ܐܰܝܟ ܟܰܘܟܒܳܐ ܨܰܦܪܳܝܳܐ ܡ̣ܶܢ ܒܶܝܬ ܥܰܝ̈ܡܶܐ ܕܰܦܬܰܟܪܽܘܬܳܐ: ܗܳܢܳܐ ܕܰܐܝܟ ܘܰܪܕܳܐ ܫܰܦܺܝܪ ܓܰܘܢܳܐ ܐܶܬܚܙܺܝ ܒܶܝܬ ܦܳܪܣܳܝܽܘܬܳܐ: ܗܳܢܳܐ ܕܰܐܒܽܘܗܝ ܙܡܰܢܣܳܘܣ ܡܰܠܟܳܐ ܡܶܬܩܪܶܐ ܗܘܳܐ ܘܰܫܡܳܐ ܕܶܐܡܶܗ ܓܽܘܫܩܰܢܳܘܫ: ܘܰܐܒܽܘܗܝ ܐܰܚܳܐ ܕܫܳܒܽܘܪ ܡܰܠܟܳܐ ܕܦܳܪܶܣ ܐܺܝܬܰܘܗܝ ܗܘܳܐ: ܘܗ̣ܽܘ ܫܰܕܪܶܗ ܕܢܰܡܠܶܟ ܥܰܠ ܐܰܬܪܳܐ ܕܥܰܪ̈ܰܒܳܝܶܐ: ܗܳܢܳܐ ܕܰܫܒܳܐ ܐܰܒܽܘܗܝ ܫܒܺܝܬܳܐ ܪܰܒܬܳܐ ܡ̣ܶܢ ܥܰܡܳܐ ܚܣܺܝܡܳܐ ܕܰܟܪ̈ܺܝܣܛܝܳܢܶܐ ܘܰܐܝܬܺܝ ܘܰܐܥܡܰܪ ܐܶܢܽܘܢ ܒܒܺܝܪܬܳܐ ܡܕܺܝܢ̱ܬܶܗ: ܘܳܐܦ ܒܫܶܩ̈ܠܐ ܘܡܰܕܰܐܬܳܐ ܐܠܳܨ ܗܘܳܐ ܠܗܽܘܢ ܘܐ̱ܢܳܫ ܪܰܫܺܝܥܳܐ ܘܰܕܠܐ ܪ̈ܰܚܡܶܐ ܕܰܫܡܶܗ ܟܽܘܒܰܝ ܥܠܰܝܗܽܘܢ ܐܰܫܠܶܛ ܗܘܳܐ: ܗܳܢܳܐ ܕܶܐܬܓܠܺܝ ܥܰܠ ܐ̱ܪ̈ܳܙܶܐ ܕܰܟܪ̈ܺܝܣܛܝܳܢܶܐ ܘܰܠܗܽܘܢ ܡܶܬܝܰܐܱܒ ܗܘܳܐ ܕܒܰܚܶܡ ܒܰܐܪܺܝܬܡܰܛܺܝܩܺܝ ܕܺܝܠܶܗ: ܗ̇ܳܝ ܕܦܰܐܝܳܐ ܘܥܳܕܪܳܐ ܠܢܰܦܫܶܗ ܓܒܳܐ ܗܘܳܐ: ܗܳܢܳܐ ܕܢܽܘܪܳܐ ܐܶܬܶܐܘܳܣܳܝܬܳܐ ܣܶܦܰܬ݀ ܒܶܗ: ܘܒܳܗ̇ ܡܶܬܢܰܒܪܰܫ ܗܘܳܐ: ܗܳܢܳܐ ܕܡܰܥܡܽܘܕܺܝܬܳܐ ܡ̣ܶܢ ܡܳܪܝ ܐܰܢܕܪܶܐܘܳܣ ܐܶܦܣܩܽܘܦܳܐ ܩܰܒܶܠ ܗܘܳܐ: ܗܳܢܳܐ ܕܰܫܡܶܗ ܦܺܝܪܓܳܘܫܰܢܣܳܘܦ ܐܺܝܬܰܘܗܝ ܗܘܳܐ: ܘܰܒܝܰܘܡܳܐ ܕܰܥܡܰܕ ܐܶܬܩܪܺܝ ܣܳܒܳܐ: ܐܰܝܟ ܕܡ̣ܶܢ ܡܳܪܝ ܩܽܘܪ ܐܶܦܣܩܽܘܦܳܐ ܘܣܳܗܕܳܐ ܐܶܬܚܰܘܺܝ ܗܘܳܐ: ܗܳܢܳܐ ܕܒܶܝܬ ܦܬܰܟܪ̈ܶܐ ܕܰܠܗܽܘܢ ܣܳܓܶܕ ܗܘܳܐ ܐܰܒܽܘܗܝ ܒܰܟܦܰܪ ܙܰܡܪ̈ܶܐ ܥܰܠ ܣܦܳܪ̈ܰܝ ܕܶܩܠܰܬ ܐܺܝܬܰܘܗܝ ܗܘܳܐ: ܗܳܢܳܐ ܕܒܳܬܰܪ ܕܩܰܒܶܠ ܡܰܥܡܽܘܕܺܝܬܳܐ ܥܨܳܝܗܝ ܐܰܒܽܘܗܝ ܕܰܢܕܰܒܰܚ ܗܘܳܐ ܠܰܦܬܰܟܪ̈ܶܐ ܘܠܐ ܡܶܬܕܢܶܐ ܗܘܳܐ: ܗܳܢܳܐ ܕܰܚܙܳܐ ܐܶܢܽܘܢ ܠܰܟܪ̈ܺܝܣܛܝܳܢܶܐ ܕܡ̣ܶܢ ܟܽܘܒܰܝ ܡܶܬܰܐܠܨܺܝܢ ܗܘܰܘ ܡܶܛܽܠܳܬܗܽܘܢ ܡܦܺܝܣ ܗܘܳܐ ܕܢܰܪܘܰܚ ܠܗܽܘܢ ܐܰܒܽܘܗܝ ܐܳܡܰܪ ܗܘܳܐ: ܗܳܢܳܐ ܕܠܐܒܽܘܗܝ ܙܡܰܢܣܳܘܦ ܕܰܒܪܳܟ ܗܘܳܐ ܟܪܺܝܣܛܝܳܢܳܐ: ܘܶܐܬܬܰܠܡܰܕ ܠܢܳܨܪ̈ܳܝܶܐ ܡܶܬܶܐܡܰܪ ܗܘܳܐ: ܗܳܢܳܐ ܕܟܰܕ ܫܡܰܥ ܐܰܒܽܘܗܝ ܕܗܰܝܡܶܢ ܨܰܪܺܝ ܠܒܽܘ̈ܫܰܘܗܝ ܘܰܒܒܶܟܝܳܐ ܡܰܪܺܝܪܳܐ ܓܳܥܶܐ ܗܘܳܐ: ܗܳܢܳܐ ܕܡܶܛܽܠܳܬܶܗ ܫܰܕܰܪ ܐܰܒܽܘܗܝ ܐܶܓܪ̈ܳܬܳܐ ܠܫܳܒܽܘܪ ܡܰܠܟܳܐ ܕܦܳܪܶܣ ܕܺܐܝܬܰܘܗܝ ܐܰܚܽܘܗܝ ܘܰܓܙܳܡ̈ܶܐ ܘܠܽܘ̈ܚܳܡܶܐ ܥܰܠ ܥܰܡܳܐ ܚܣܺܝܡܳܐ ܕܢܳܨܪ̈ܳܝܶܐ ܛܥܺܝ̈ܢܳܢ ܗܘ̈ܰܝ ܗܳܢܳܐ ܕܶܐܦܽܘܦܣܺܝܣ ܕܡܰܘܬܳܐ ܡ̣ܶܢ ܫܳܒܽܘܪ ܡܰܠܟܳܐ ܥܠܰܘܗܝ ܢܶܦܩܰܬ݀: ܗܳܢܳܐ ܕܗ̣ܽܘ ܗܘܳܐ ܥܶܠܬܳܐ ܛܳܒܬܳܐ ܠܟܽܘܠܳܠܐ ܕܣܺܝܥܬܳܐ ܒܪܺܝܟܬܳܐ ܕܚܰܒܪ̈ܰܘܗܝ: ܗܳܢܳܐ ܕܚܰܒܫܽܘܗܝ ܥܰܡ ܒܢ̈ܳܬ ܪ̈ܺܝܫܳܢܶܐ: ܘܰܒܫܽܘ̈ܕܳܠܐ ܘܡ̈ܶܠܐ ܒ̈ܰܛܳܠܳܬܳܐ ܡܳܠܟ̈ܳܢ ܗܘ̈ܰܝ ܠܶܗ ܘܠܰܚܕܳܐ ܡܶܢܗܶܝܢ ܠܐ ܫܳܡܰܥ ܗܘܳܐ: ܗܳܢܳܐ ܕܚܰܒܫܽܘܗܝ ܒܒܰܝܬܳܐ ܚܶܫܽܘܟܳܐ: ܘܡܰܠܐܟܳܐ ܕܢܽܘܗܪܳܐ ܠܶܗ ܡܰܢܗܰܪ ܗܘܳܐ: ܗܳܢܳܐ ܕܡܳܪܝ ܩܽܘܪ ܣܳܗܕܳܐ ܠܶܗ ܐܶܬܚܰܘܺܝ ܗܘܳܐ: ܘܥܰܠ ܚܰܫ̈ܶܐ ܘܫܶܢ̈ܕܶܐ ܠܶܗ ܡܚܰܦܶܛ ܗܘܳܐ: ܗܳܢܳܐ ܕܶܫܬܰܥܣܰܪ ܝܰܪ̈ܚܶܐ ܗܘܳܐ ܒܶܝܬ ܐܰܣܺܝܪ̈ܶܐ ܟܰܕ ܩܽܘܠܳܪ̈ܶܐ ܒܺܐܝ̈ܕܰܘܗܝ ܘܣܽܘ̈ܛܡܶܐ ܒܪ̈ܶܓܠܰܘܗܝ ܪܡܶܝܢ ܗܘܰܘ: ܐܳܘ ܠܬܶܗܪܳܐ ܕܠܐ ܡܶܬܡܰܠܰܠ: ܐܳܘ ܠܬܶܡܗܳܐ ܕܠܐ ܡܶܬܦܰܫܰܩ: ܕܛܰܠܝܳܐ ܙܥܽܘܪܳܐ ܕܰܐܝܟ ܗܳܢܳܐ ܠܗܳܠܶܝܢ ܐܽܘܠܨܳܢ̈ܶܐ ܩܫܰܝ̈ܳܐ ܐܰܝܟ ܠܐ ܒܶܣܪܳܢܳܐ ܡܣܰܝܒܰܪ ܗܘܳܐ: ܗܳܢܳܐ ܕܣܰܪܩܽܘܗܝ ܠܦܰܓܪܶܗ ܢܰܩܕܳܐ ܥܰܠ ܣܶܒܠܬܳܐ: ܘܥܰܡ ܦܰܘܠܳܘܣ ܫܠܺܝܚܳܐ ܡܰܙܥܶܩ ܗܘܳܐ: ܕܰܙܥܽܘܪܺܝܢ ܐܶܢܽܘܢ ܚܰܫܰܘ̈ܗܝ ܕܙܰܒܢܳܐ ܠܬܶܫܒܽܘܚܬܳܐ ܕܰܥܬܺܝܕܳܐ ܕܬܶܬܓܠܐܷ ܒܰܢ ܩܳܥܶܐ ܗܘܳܐ: ܗܳܢܳܐ ܕܰܛܪܺܝܓܽܘܕܳܐܝ̣ܬ ܥܰܡ ܠܶܒܶܗ ܕܰܐܠܳܗܳܐ ܩܥܳܐ: ܕܗܶܢܽܘܢ ܒܪܶܟܘ ܘܰܢܦܰܠܘ: ܘܰܚܢܰܢ ܩܳܡܢ ܘܶܐܬܛܰܝܰܒܢ ܡܙܰܡܰܪ ܗܘܳܐ: ܗܳܢܳܐ ܕܣܰܝܒܰܪ ܫܶܢ̈ܕܶܐ ܘܰܣܒܰܠ ܐܽܘܠܨܳܢ̈ܶܐ ܡ̣ܶܢ ܐܰܒܽܘܗܝ ܥܰܘܳܠܐ: ܟܰܕ ܚܰܕ ܣܰܝܦܳܐ ܠܩܶܛܠܶܗ ܠܳܛܶܫ ܗܘܳܐ: ܘܰܐ̱ܚܪܺܢܳܐ ܠܒܶܝܬ ܐܰܣܺܝܪ̈ܶܐ ܠܶܗ ܒܰܛܪܽܘܢܽܘܬܳܐ ܕܳܒܰܪ ܗܘܳܐ: ܘܶܐܡܶܗ ܢܺܝ̈ܒܶܐ ܥܠܰܘܗܝ ܚܳܪܩܳܐ ܗܘܬ: ܐܳܦ ܒܫܶܢܶܝ̈ܗ̇ ܠܒܶܣܪܶܗ ܕܰܐܢܶܣܛܽܘܣ ܥܰܒܕܶܗ ܡܢܰܬܫܳܐ ܗܘܳܬ݀: ܐܳܘ ܠܪ̈ܰܚܡܶܐ ܐܰܒܳܗܳܝ̈ܶܐ ܐܰܝܟܰܢܳܐ ܦܳܓܘ: ܘܰܕܠܐ ܚܰܘܣܳܢܳܐ ܒܫܰܒܽܘ̈ܩܶܐ ܕܪ̈ܽܘܡܳܢܶܐ ܟܰܕ ܠܐ ܡܓܰܪܕܺܝܢ ܕܳܝܢܺܝܢ ܗܘܰܘ ܠܶܗ: ܗܳܢܳܐ ܕܰܗܘܳܐ ܟܽܘܠܳܠܶܗ ܫܬܰܥܣܰܪ ܒܳܐܒ ܝܰܪܚܳܐ ܕܓܽܘ̈ܦܢܶܐ: ܫܢܰܬ ܫܶܬܡܳܐܐ ܘܫܰܒܥܺܝܢ ܘܰܐܪܒܰܥ ܕܝܰܘ̈ܢܳܝܶܐ: ܗܳܢܳܐ ܕܡ̣ܶܢ ܩܕܳܡ ܩܶܛܠܶܗ ܒܥܳܐ ܡ̣ܶܢ ܩܳܛܽܘܠܰܘ̈ܗܝ ܥܶܕܳܢܳܐ ܠܰܡܨܰܠܳܝܽܘ ܒܶܗ ܟܰܕ ܐܳܡܰܪ: ܡܳܪܰܢ ܝܶܫܽܘܥ ܡܫܺܝܚܳܐ ܫܡܰܥ ܨܠܽܘܬܶܗ ܕܥܰܒܕܳܟ ܒܥܶܕܳܢܳܐ ܗܳܢܳܐ ܕܠܳܟ ܩܳܪܶܐ ܐ̱ܢܳܐ: ܐܰܣܳܐ ܠܰܟܪ̈ܺܝܗܶܐ: ܐܰܪܘܰܚ ܠܐܠܺܝ̈ܨܶܐ: ܘܫܰܝܶܢ ܠܡܰܠܟ̈ܶܐ: ܘܪܰܡܪܶܡ ܩܰܪܢܳܐ ܕܥܺܕܬܳܐ ܩܰܕܺܝܫܬܳܐ ܕܰܒܟܽܠ ܐܰܬܰܪ: ܘܢܰܛܰܪ ܠܝܰܠܕܶܝ̈ܗ̇ ܡ̣ܶܢ ܢܶܟ̈ܝܳܢܶܐ ܘܣܽܘܓ̈ܦܳܢܶܐ ܕܰܒܥܶܠܕܰܪܳܐ: ܘܟܽܠ ܡ̇ܰܢ ܕܺܐܝܬܰܘܗܝ ܒܟܺܐܦܳܐ ܕܰܐܪܝܳܢܽܘܬܳܐ ܘܰܕܓܰܪܒܳܐ ܘܕܰܡܫܰܪܝܽܘܬܳܐ: ܐܳܘ ܕܣܰܡܝܽܘܬܳܐ ܐܰܘ ܕܒܰܐܢܰܢܩܺܝ: ܐܰܝܕܳܐ ܕܗ̣ܺܝ: ܘܡܶܬܓܰܘܰܣ ܒܰܫܡܳܟ ܩܰܕܺܝܫܳܐ ܘܰܒܓܰܪ̈ܡܰܘܗܝ ܕܥܰܒܕܳܟ: ܗܰܒܠܶܗ ܫ̈ܶܐܠܳܬܶܗ: ܩܰܒܶܠ ܚܘܺܝܚܳܐܝ̣ܬ ܣܪ̈ܳܩܶܐ ܘܢܶܓ̈ܕܶܐ ܘܽܐܘܠܨ̈ܳܢܶܐ ܡܶܛܽܠ ܚܽܘܒܳܐ ܕܡܳܪܶܗ ܟܰܕ ܚܳܕܶܐ: ܘܡܶܛܽܠ ܗܳܕܶܐ ܐܰܝܟ ܓܺܝܙܰܒܪܳܐ ܚܰܟܺܝܡܳܐ ܥܰܠ ܒܶܝܬܓܰܙܳܐ ܕܥܽܘܬܪ̈ܶܐ ܫܡܰܝ̈ܳܢܶܐ ܐܶܬܗܰܝܡܰܢ: ܥܺܝܪ̈ܰܝ ܐܰܘܪܰܢܳܘܣ ܬܗܰܪܘ ܒܒܰܪ ܕܰܚܺܝܚܳܐ ܟܡܳܐ ܣܰܝܒܰܪ: ܐܽܘܣܺܝ̈ܰܐܣ ܫܡܰܝܳܢ̈ܝܳܬܳܐ ܐܶܬܕܰܡܰܪܘ ܒܒܶܣܪܳܢܳܐ ܟܡܳܐ ܥܰܙܺܝ: ܘܰܒܚܰܕܽܘܬܳܐ ܪܽܘܚܳܢܳܝܬܳܐ ܒܫܳܥܰܬ݀ ܟܽܘܠܳܠܶܗ ܠܘܳܬܶܗ ܢܚܶܬܘ ܗܘܰܘ ܟܰܕ ܐܳܡܪܺܝܢ: ܬܳܐ ܒܰܫܠܳܡܳܐ ܐܰܓܽܘܢܺܝܣܛܳܐ ܡܝܰܬܪܳܐ: ܬܳܐ ܒܰܫܠܳܡܳܐ ܒܽܘܠܰܘܘܳܢ ܕܰܒܬܽܘܠܽܘܬܳܐ: ܬܳܐ ܒܰܫܠܳܡܳܐ ܓܺܝܙܰܒܪܳܐ ܕܰܐܠܳܗܽܘܬܳܐ: ܬܳܐ ܒܰܫܠܳܡܳܐ ܕܺܝܡܰܩܪܰܐܛܺܝܣ ܒܣܳܗܕܽܘܬܳܐ: ܬܳܐ ܒܰܫܠܳܡܳܐ ܗܦܺܝܡܰܐܗܪܳܘܣ ܗܰܢܺܝܰܐܬ݀ ܪܺܝܚܳܐ: ܬܳܐ ܒܰܫܠܳܡܳܐ ܘܰܢܟܘܳܣ ܕܪܺܝܚܳܢܽܘܬܳܐ: ܬܳܐ ܒܰܫܠܳܡܳܐ ܙܰܟܳܝܳܐ ܕܠܐ ܚܳܒ ܒܰܐܬܠܺܝܛܽܘܬܳܐ: ܬܳܐ ܒܰܫܠܳܡܳܐ ܚܠܺܝܨܳܐ ܒܰܐܬܠܺܝܣܽܘܬܳܐ: ܬܳܐ ܒܰܫܠܳܡܳܐ ܛܽܘܪܢܽܘܣ ܥܛܺܝܦ ܙܳܟܽܘܬܳܐ: ܬܳܐ ܒܰܫܠܳܡܳܐ ܝܳܪܽܘܬܳܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܬܳܐ ܒܰܫܠܳܡܳܐ ܟܪܽܘܣܽܘܣ ܕܶܐܬܒܚܰܪ ܒܟܽܘܪܳܐ ܕܚܰܢܦܽܘܬܳܐ: ܬܳܐ ܒܰܫܠܳܡܳܐ ܠܽܘܓܛܰܐܛܽܘܣ ܩܕܳܡ ܡܰܠܟܳܐ: ܬܳܐ ܒܰܫܠܳܡܳܐ ܡܰܢܺܝܫܟܳܐ ܚܠܐܷ ܪܺܝܚܳܐ ܕܒܰܣܺܝܡܽܘܬܳܐ: ܬܳܐ ܒܰܫܠܳܡܳܐ ܢܺܝܩܳܘܢܰܡܳܘܣ ܒܰܩܪܳܒܳܐ ܕܰܦܬܰܟܪܽܘܬܳܐ: ܬܳܐ ܒܰܫܠܳܡܳܐ ܣܳܬܽܘܪܳܐ ܕܛܳܥܝܽܘܬܳܐ: ܘܰܚܢܰܢ ܠܘܳܬܶܗ ܡܰܙܥܩܺܝܢܰܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܣܳܒܳܐ ܥܰܒܕܳܐ ܟܰܫܺܝܪܳܐ: ܠܳܟ ܛܽܘܒܰܝܟ ܡܳܪܝ ܣܳܒܳܐ ܦܪܰܟܣܺܝܽܘܢܳܛܶܗ ܕܰܡܠܶܟ ܡܰܠܟ̈ܶܐ ܫܡܰܝܳܢܳܐ: ܠܳܟ ܛܽܘܒܰܝܟ ܡܳܪܝ ܣܳܒܳܐ ܨܶܒܬܳܐ ܘܗܶܕܪܳܐ ܕܣܳܗ̈ܕܶܐ ܚܰܒܪ̈ܰܝܟ: ܠܳܟ ܛܽܘܒܰܝܟ ܡܳܪܝ ܣܳܒܳܐ ܩܰܝܛܽܘܢܩܳܢܳܗ̇ ܕܰܐܠܳܗܽܘܬܳܐ: ܠܳܟ ܛܽܘܒܰܝܟ ܡܳܪܝ ܣܳܒܳܐ ܪܺܝܫ ܓܽܘܕܳܐ ܙܪܺܝܙܬܳܐ ܕܰܬܪܶܥܣܰܪ ܐܠܰܦܰܝ̈ܳܐ ܐܰܬܠܺܝ̈ܛܶܐ: ܠܳܟ ܛܽܘܒܰܝܟ ܣܳܒܳܐ ܫܳܘܶܐ ܠܛܽܘ̈ܒܶܐ ܕܒܰܕܡܶܗ ܚܰܣܝܳܐ ܙܒܰܢ ܐܶܢܽܘܢ ܠܛܽܘ̈ܒܶܐ: ܠܳܟ ܛܽܘܒܰܝܟ ܡܳܪܝ ܣܳܒܳܐ ܬܰܘܪܳܐ ܕܦܶܛܡܳܐ ܕܰܒܡܶܫܬܽܘܬܳܐ ܕܟܰܠܬܳܐ ܫܠܶܝܡܽܘܢܳܝܬܳܐ ܐܶܬܕܒܰܚ: ܒܥܺܝ ܗܳܟܺܝܠ ܘܶܐܬܟܰܫܰܦ ܠܘܳܬ ܡܳܪܳܟ ܒܗܳܢܳܐ ܝܰܘܡܳܐ ܕܕܽܘܟܪܳܢܳܟ: ܐܰܝܟܰܢܳܐ ܕܰܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܢܙܰܗܶܐ: ܠܩܳܪ̈ܽܘܝܶܐ ܘܠܰܡܙܰܡܪ̈ܳܢܶܐ ܢܚܰܟܶܡ: ܠܐܦܽܘܕ̈ܝܰܩܢܽܘ ܘܠܰܦ̈ܣܰܠܛܽܘ ܢܗܰܕܰܪ: ܠܺܝܚܺܝ̈ܕܳܝܶܐ ܘܕܰܝܪ̈ܳܝܶܐ ܒܰܡܝܰܬܪܽܘܬܳܐ ܢܨܰܒܬ: ܠܥܳܢ̈ܘܳܝܶܐ ܘܶܐܣܛܽܘ̈ܢܳܝܶܐ ܢܟܰܠܶܠ: ܠܓܰܒܪ̈ܶܐ ܘܰܠܢܶܫ̈ܶܐ ܢܢܰܛܰܪ: ܠܰܒܬܽܘ̈ܠܐ ܘܰܒܬܽܘ̈ܠܳܬܳܐ ܡ̣ܶܢ ܦܰܚܰܘ̈ܗܝ ܕܣܳܛܳܢܳܐ ܢܫܰܘܙܶܒ: ܘܠܰܛܠܳܝ̈ܶܐ ܘܝܳܢܽܘ̈ܣܩܶܐ ܬܚܶܝܬ ܟܶܢ̈ܦܳܬܶܗ ܕܰܨܠܺܝܒ ܢܽܘܗܪܳܐ ܢܣܰܬܰܪ: ܠܡܶܣ̈ܟܺܢܶܐ ܘܠܰܨܪ̈ܺܝܟܶܐ ܢܦܰܪܢܶܣ: ܘܠܰܡܛܰܪ̈ܦܶܐ ܢܣܰܒܰܥ: ܠܐܣܺܝܪ̈ܶܐ ܘܠܰܫܒܰܝ̈ܳܐ ܢܚܰܪܰܪ: ܠܝܰܬܡ̈ܶܐ ܘܠܐܪ̈ܡܠܳܬܳܐ ܢܙܽܘܢ: ܠܰܟܪ̈ܺܝܗܶܐ ܘܠܐܠܺܝ̈ܨܶܐ ܢܰܪܘܰܚ: ܠܥܰܪ̈ܛܶܠܳܝܶܐ ܢܰܠܒܶܫ: ܠܐܟܣ̈ܢܳܝܶܐ ܘܥܽܘܕ̈ܝܳܝܶܐ ܢܠܰܒܶܒ: ܘܠܰܦܠܺܝ̈ܓܶܐ ܘܰܡܒܰܕܪ̈ܶܐ ܢܟܰܢܶܫ: ܠܡܰܠܟ̈ܶܐ ܘܕܰܝ̈ܳܢܶܐ ܢܫܰܝܶܢ: ܠܰܟܠܺܝܠܐ ܕܫܰܢ̱ܬܳܐ ܒܛܰܝܒܽܘܬܳܟ ܢܒܰܪܶܟ: ܠܐܪܥܳܐ ܒܥ̈ܰܠܠܳܬܳܐ ܢܫܰܪܬܰܚ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܒܰܚܢܳܢܶܗ ܢܚܰܣܶܐ: ܕܰܚܢܰܢ ܘܗܶܢܽܘܢ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܥܛܪܐ

 

 

 

ܢܶܗܘܶܐ ܠܳܟ ܡܳܪܝ ܡܰܘܬܗܽܘܢ: ܕܰܪ̈ܚܽܘܡܰܝܟ ܦܺܝܪܡܳܐ ܕܚܽܘܣܳܝܳܐ ܘܒܶܗ ܬܶܬܰܪܥܶܐ ܐܠܰܗܽܘܬܳܟ: ܘܰܐܝܟ ܕܰܒܣܶܡ ܠܳܟ ܪܺܝܚ ܩܶܛܠܰܝ̈ܗܽܘܢ: ܘܰܫܦܰܪ ܠܳܟ ܕܶܡ ܨܰܘܪ̈ܰܝܗܽܘܢ ܢܒܰܣܶܡ ܠܳܟ ܦܺܝܪܡܳܐ ܕܰܡܩܰܪܒܳܐ ܠܳܟ ܥܺܕܬܳܟ ܒܝܽܘܡ ܕܽܘܟܪ̈ܳܢܰܝܗܽܘܢ: ܘܢܶܬܢܰܛܪܽܘܢ ܝܰܠܕܶܝ̈ܗ̇ ܒܰܨܠܰܘ̈ܳܬܗܽܘܢ: ܘܥܰܢܺܝ̈ܕܶܐ ܢܶܬܚܰܣܽܘܢ ܒܰܣܢܺܐܓܪܽܘܬܗܽܘܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܚܘܬܡܐ

 

 

 

ܡܫܺܝܚܳܐ ܕܶܐܬܚܙܺܝ ܠܚܰܙܩܺܝܶܐܝܠ ܢܒܺܝܳܐ ܐܰܝܟ ܣܳܒܳܐ ܥܰܬܺܝܩ ܝܰܘ̈ܡܳܬܳܐ: ܐܰܢ̱ܬ ܓܒܰܝܬ ܠܣܳܗܕܳܐ ܡܳܪܝ ܣܳܒܳܐ: ܠܐ ܡܳܪܝ ܬܶܫܒܽܘܩ ܠܰܢ ܕܢܶܣܶܐܒ ܒܰܚܛܺܝܬܳܐ: ܘܢܶܥܬܰܩ ܒܣܰܟ̈ܠܘܳܬܳܐ: ܘܢܺܐܙܰܠ ܠܓܺܗܰܢܳܐ: ܐܶܠܐ ܒܰܨܠܰܘ̈ܳܬܶܗ ܕܣܳܗܕܳܟ ܡܳܪܝ ܣܳܒܳܐ ܚܰܕܶܬ ܐܰܝܟ ܕܢܶܫܪܳܐ ܥܠܰܝܡܽܘܬܰܢ: ܒܰܥ̈ܒܳܕܶܐ ܕܰܬܝܳܒܽܘܬܳܐ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܕܚܰܝܠܶܗ ܠܡܳܪܝ ܣܳܒܳܐ ܒܰܐܓܽܘܢܳܐ: ܘܰܣܕܰܪ ܠܶܗ ܟܠܺܝܠܐ ܕܰܡܠܐܷ ܡܰܪ̈ܓܳܢܝܳܬܳܐ ܡ̣ܶܢ ܚܰܫ̈ܶܐ ܝܰܩܺܝܪ̈ܶܐ ܕܰܩܢܽܘܡܶܗ: ܠܗܰܘ ܕܚܰܘܺܝ ܠܥܰܒ̈ܕܶܐ ܕܺܝܠܶܗ ܐܰܬܠܺܝ̈ܛܶܐ ܐܽܘܪܚܳܐ ܕܰܐܬܠܺܝܛܽܘܬܳܐ ܒܰܩܢܽܘܡܶܗ: ܘܺܝܠܶܦܘ ܡܶܢܶܗ ܕܰܐܟܘܳܬܶܗ ܢܶܬܩܰܛܠܽܘܢ ܡܶܛܽܠ ܚܽܘܒܶܗ: ܘܗܳܐ ܟܽܠ ܥܰܡܡܺܝ̈ܢ ܡܙܰܝܚܺܝܢ ܠܝܽܘܡ ܕܽܘܟܪܳܢܶܗ: ܟܰܕ ܫܳܐܠܺܝܢ ܪ̈ܰܚܡܶܐ ܒܰܨܠܰܘ̈ܳܬܶܗ: ܒܗܳܢܳܐ܀

 

 

 

ܣܕܪܐ

 

 

 

ܡܳܪܝܳܐ ܗ̇ܰܘ ܕܰܠܩܰܕܺܝ̈ܫܶܐ ܡܝܰܩܰܪ ܐܰܢ̱ܬ ܘܰܡܢܰܨܰܚ ܐܰܢ̱ܬ: ܘܰܠܥܽܘܗܕܳܢܳܐ ܡܝܰܩܪܳܐ ܕܰܡܢܺܝ̈ܚܳܢܰܝܟ ܡܪܰܡܪܶܡ ܐܰܢ̱ܬ ܘܡܰܢܗܰܪ ܐܰܢ̱ܬ ܠܶܒܰܘ̈ܳܬܗܽܘܢ: ܘܰܠܚܰܓܳܐ ܕܢܰܨܺܝܚ ܫܽܘܦܪ̈ܶܐ ܣܳܗܕܳܐ ܕܺܝܠܳܟ ܡܳܪܝ ܣܳܒܳܐ: ܥܰܡ ܕܰܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ ܣܳܗ̈ܕܶܐ ܩܰܕܺܝ̈ܫܶܐ ܚܰܒܪ̈ܰܘܗܝ ܙܰܡܶܢܬ ܘܰܩܪܰܝܬ ܠܰܢ ܝܰܘܡܳܢܳܐ: ܐܰܝܟܰܢܳܐ ܕܰܒܥܺܐܕܳܐ ܕܺܝܠܶܗ ܫܒܺܝܚܳܐ ܒܚܰܕܽܘܬܳܐ ܪܽܘܚܳܢܳܝܬܳܐ ܟܽܠܰܢ ܢܫܰܒܰܚ: ܘܠܳܟ ܡܳܪܝܳܐ ܡܢܰܨܚܳܢܳܐ ܕܺܝܠܶܗ ܒܰܐܓܽܘܢܳܐ ܕܣܳܗܕܽܘܬܳܐ ܢܰܘܕܶܐ: ܐܰܝܟܰܢܳܐ ܕܒܰܨܠܰܘ̈ܳܬܶܗ ܢܶܬܚܢܢ ܘܢܶܫܬܰܘܙܰܒ ܟܽܠܰܢ ܚܰܛܳܝ̈ܶܐ: ܘܪ̈ܰܚܡܶܐ ܘܰܚܢܰܢ ܟܽܠܰܢ ܢܶܫܰܐܠ: ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܡ̣ܶܢ ܓܰܙܳܟ ܥܰܬܺܝܪܳܐ ܢܶܣܰܒ ܘܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܡܙܰܡܪܺܝܢܰܢ ܘܳܐܡܪܺܝܢܰܢ: ܗܳܢܳܐ ܕܟܰܕ ܐܶܬܪܰܒܺܝ ܒܰܪ ܡܰܠܟܳܐ ܦܺܝܪܓܳܘܫܰܢܣܳܦ ܥܰܡ ܐܰܢܣܛܳܘܣ ܛܰܠܝܳܐ ܒܰܪ ܫܰܒܳܐ: ܘܗ̣ܽܘ ܕܰܪܫܶܗ ܘܰܐܠܦܶܗ ܐ̱ܪ̈ܳܙܰܝ ܥܺܕܬܳܐ ܩܰܕܺܝܫܬܳܐ: ܘܶܐܬܢܰܒܪܰܫ ܒܶܗ ܚܽܘܒܳܐ ܘܗܰܝܡܳܢܽܘܬܳܐ ܐܠܰܗܳܝܬܳܐ: ܘܟܰܕ ܥܡܰܕ ܩܰܒܶܠ ܪܽܘܚܳܐ ܩܰܕܺܝܫܳܐ: ܘܠܐ ܐܶܫܟܰܚ ܕܰܢܣܰܝܒܰܪ ܒܚܰܢܦܽܘܬܳܐ ܘܒܰܡܓܽܘܫܽܘܬܳܐ ܐܶܠܐ ܓܠܐܴ ܘܚܰܘܺܝ ܠܶܗ ܗܰܝܡܳܢܽܘܬܶܗ ܫܰܪܺܝܪܬܳܐ: ܗܳܢܳܐ ܕܰܒܝܰܕ ܥܶܠܬܶܗ ܐܶܬܒܰܥܪܰܪ ܐܰܒܽܘܗܝ ܥܰܠ ܟܪ̈ܺܝܣܛܝܳܢܶܐ ܗ̇ܳܢܽܘܢ ܕܰܐܥܡܕܽܘܗܝ: ܘܰܐܣܒܶܠ ܐܶܢܽܘܢ ܫܶܢ̈ܕܶܐ ܩܫܰܝ̈ܳܐ ܝܰܘ̈ܡܳܬܳܐ ܣܰܓܺܝ̈ܳܐܬܳܐ: ܘܟܰܕ ܠܐ ܟܦܰܪܘ ܒܰܡܫܺܝܚܳܐ: ܗܳܝܕܶܝܢ ܪܓܶܙ ܥܠܰܝܗܽܘܢ ܡܰܠܟܳܐ ܚܰܢܦܳܐ ܙܡܰܢܣܳܘܦ ܘܰܦܩܰܕ ܕܢܶܬܩܛܠܽܘܢ ܒܣܰܝܦܳܐ ܟܽܠܗܽܘܢ ܫܰܘܝܳܐܝ̣ܬ: ܗܳܝܕܶܝܢ ܩܥܰܘ ܟܽܠܗܽܘܢ ܡ̣ܶܢ ܚܰܕ ܦܽܘܡ: ܕܡܶܛܽܠܳܬܳܟ ܡܳܪܝ ܡܳܝܬܺܝܢܰܢ ܬܳܐ ܠܐܝܳܠܰܢ ܘܩܰܒܶܠ ܠܰܢ ܩܕܳܡ ܬܪܽܘܢܳܘܣ ܕܺܐܝܩܳܪܳܟ: ܘܟܰܕ ܡܶܬܟܰܠܠܺܝܢ ܩܳܥܶܝܢ ܗܘܰܘ ܘܳܐܡܪܺܝܢ: ܕܰܚܙܺܝ ܡܳܪܝ ܠܰܕܡܰܢ ܕܗܳܐ ܡܶܬܶܐܫܶܕ ܡܶܛܽܠܳܬܳܟ: ܘܟܽܠ ܚܰܕ ܣܳܘܰܚ ܗܘܳܐ ܕܗ̣ܽܘ ܢܶܬܟܰܠܰܠ ܩܰܕܡܳܝܳܐ: ܘܚܳܝܪܺܝܢ ܗܘܰܘ ܘܚܳܙܶܝܢ ܠܰܟܠܺܝܠܶܗ ܒܫܽܘܒܚܳܐ ܕܠܐ ܡܶܬܡܰܠܰܠ: ܘܣܳܘܚܺܝܢ ܗܘܰܘ ܠܩܽܘܒܠܶܗ ܘܰܫܠܳܡܳܐ ܝܳܗܒܺܝܢ ܗܘܰܘ ܠܶܗ: ܬܳܗܪܺܝܢ ܗܘܰܘ ܚܰܢ̈ܦܶܐ ܒܚܽܘܡܣܳܢܗܽܘܢ: ܘܠܐ ܦܳܫ ܘܠܐ ܚܕܰ ܕܠܐ ܐܶܬܟܰܠܰܠ ܒܚܽܘܒܳܐ ܡܫܺܝܚܳܝܳܐ: ܘܰܚܢܰܢ ܒܚܽܘܒܳܐ ܪܽܘܚܳܢܳܝܳܐ ܡܚܰܓܶܝܢܰܢ ܘܳܐܡܪܺܝܢܢ: ܬܰܘ ܒܰܫܠܳܡܳܐ ܣܳܗ̈ܕܶܐ ܩܰܕܺܝ̈ܫܶܐ ܬܪܶܥܣܰܪ ܐܠܰܦܰܝ̈ܳܐ ܥܰܡ ܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ ܣܳܗ̈ܕܶܐ ܕܒܶܝܬ ܐܺܝ̈ܕܰܝ ܡܳܪܝ ܣܳܒܳܐ ܐܶܬܟܰܠܰܠܘ: ܬܰܘ ܒܰܫܠܳܡܳܐ ܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ ܣܳܗ̈ܕܶܐ ܕܒܶܝܬ ܐܺܝ̈ܕܰܝ ܡܳܪܝ ܣܳܒܳܐ ܐܶܬܟܰܠܰܠܘ ܒܰܐܬܪܳܐ ܕܒܶܝܬ ܥܰܪ̈ܰܒܳܝܶܐ ܡܶܛܽܠ ܚܽܘܒܶܗ ܕܰܡܫܺܝܚܳܐ: ܬܰܘ ܒܰܫܠܳܡܳܐ ܣܳܗ̈ܕܶܐ ܩܰܕܺܝ̈ܫܶܐ ܓܰܒܪ̈ܶܐ ܓܰܢ̱ܒܳܪ̈ܰܝ ܚܰܝܠܐ ܕܰܒܓܽܘܕܶܗ ܕܢܰܨܺܝܚܳܐ ܡܳܪܝ ܣܳܒܳܐ ܐܶܬܢܰܨܰܚܘ ܚܠܺܝܨܳܐܝ̣ܬ: ܐܶܠܐ ܟܰܕ ܠܩܽܘܠܳܣܗܽܘܢ ܐܠܰܗܳܝܳܐ ܣܳܘܚܺܝܢܰܢ: ܒܗܰܝܡܳܢܽܘܬܳܐ ܐܳܡܪܺܝܢܢ: ܠܟܽܘܢ ܛܽܘܒܰܝܟܽܘܢ ܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ: ܥܡ ܡܳܪܝ ܣܳܒܳܐ ܪܺܝܫܳܐ ܕܟܽܠܗܽܘܢ ܣܳܗ̈ܕܶܐ ܙܰܟܳܝ̈ܶܐ ܕܶܐܬܟܰܬܰܫܘ ܥܰܡ ܣܳܛܳܢܳܐ ܘܰܙܟܰܐܘܽܘܗܝ ܒܚܰܝܠܐ ܐܠܰܗܳܝܳܐ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ: ܕܰܐܣܗܶܕܘ ܥܰܡ ܡܳܪܝ ܣܳܒܳܐ ܣܳܗܕܳܐ: ܕܰܗܘܰܝܬܽܘܢ ܐܰܪ̈ܙܶܐ ܪ̈ܳܡܶܐ ܘܫܰܪ̈ܘܰܝܢܶܐ ܗܕܺܝܪ̈ܶܐ ܕܺܝܥܰܘ ܥܰܠ ܬܰܦܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܶܐܬܟܰܠܰܠܘ ܥܰܡ ܡܳܪܝ ܣܳܒܳܐ: ܕܰܗܘܰܝܬܽܘܢ ܡܰܓܕ̈ܠܐ ܥܰܫܺܝ̈ܢܶܐ: ܘܰܒܟܽܘܢ ܐܳܚܕܺܝܢ ܓܰܘܣܳܐ ܟܽܠܗܽܘܢ ܡܚܺܝ̈ܠܐ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܥܰܡ ܡܳܪܝ ܣܳܒܳܐ ܐܶܬܟܰܠܰܠܘ ܕܰܗܘܰܝܬܽܘܢ ܢܶܫܪ̈ܶܐ ܩܰܠܺܝ̈ܠܐ ܘܰܦܪܰܚܬܽܘܢ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܐܶܠܐ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܟܽܘܢ: ܕܢܺܐܬܶܐ ܠܰܢ ܒܝܽܘܡ ܥܺܐܕܟܽܘܢ: ܫܰܝܢܳܐ ܘܫܠܳܡܳܐ: ܘܚܽܘܒܳܐ ܘܰܐܘܝܽܘܬܳܐ: ܘܢܶܬܒ̈ܰܛܠܳܢ ܡܶܢܰܢ ܟܽܠ ܡܰܚ̈ܘܳܬܳܐ ܡܥܺܝܩܳܢ̈ܝܳܬܳܐ ܘܢܶܗܘܶܐ ܠܰܢ ܝܽܘܡ ܕܽܘܟܪܳܢܗܽܘܢ ܥܺܐܕܳܐ ܚܰܕܽܘܬܳܢܳܝܳܐ ܘܚܰܓܳܐ ܪܽܘܚܳܢܳܝܳܐ: ܘܢܶܫܬܰܟܰܢ ܒܶܗ ܚܽܘܣܳܝ ܚܰܘ̈ܒܶܐ ܘܰܚܛܳܗ̈ܶܐ: ܐܳܦ ܠܥܰܢܺܝ̈ܕܶܐ ܕܰܦܪܰܫܘ ܡܶܢܰܢ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܩܕܳܡ ܬܪܽܘܢܳܘܣ ܕܡܳܪܽܘܬܳܟ: ܘܰܚܢܰܢ ܘܗܶܢܽܘܢ ܢܶܦܽܘܩ ܠܐܘܪܥܳܟ ܥܰܡ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗܰܘ ܩܰܕܺܝܫܳܐ ܕܰܒܢܽܘܪܶܗ ܐܶܬܓܰܘܙܰܠܘ ܣܳܗ̈ܕܶܐ ܩܰܕܺܝ̈ܫܶܐ: ܘܶܐܬܟܰܬܰܫܘ ܥܰܡ ܛܽܘܥܝܰܝ ܘܦܰܪܣܺܝܘ ܠܐܪ̈ܟܰܐܣ ܘܫܰܠܺܝ̈ܛܳܢܶܐ ܕܳܐܐܰܪ: ܠܗܰܘ ܕܡ̣ܶܢ ܚܰܡܪܳܐ ܕܚܽܘܒܶܗ ܐܶܫܬܺܝ ܘܰܪܘܺܝ ܣܳܗܕܳܐ ܡܳܪܝ ܣܳܒܳܐ ܥܰܡ ܓܽܘܕܳܐ ܙܪܺܝܙܬܳܐ ܕܣܳܗ̈ܕܶܐ ܚܰܒܪ̈ܰܘܗܝ ܘܚܺܝܨܳܐܝ̣ܬ: ܘܰܠܒܺܝܒܳܐܝ̣ܬ ܢܚܶܬܘ ܠܐܓܽܘܢܳܐ ܕܣܳܗܕܽܘܬܳܐ: ܘܰܐܒܗܶܬܘ ܠܡܰܠܟܳܐ ܛܪܽܘܢܳܐ ܘܪܰܫܺܝܥܳܐ: ܘܰܐܟܚܕܳܐ ܐܶܬܟܰܠܰܠܘ ܒܰܟܠܺܝܠܐ ܕܙܳܟܽܘܬܳܐ: ܠܗܰܘ ܕܰܓܒܳܝܗܝ ܠܣܳܗܕܳܐ ܡܳܪܝ ܣܳܒܳܐ ܘܥܰܒܕܶܗ ܕܽܘܡܝܳܐ ܚܰܬܺܝܬܳܐ ܕܒܶܗ ܢܡܰܪܽܘܢ ܚܰܒܪ̈ܰܘܗܝ: ܕܠܰܡܢܰܨܚܳܢܶܗ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣ̈ܶܐ ܪ̈ܳܡܰܝ ܡ̣ܶܢ ܥܳܠܡܳܐ ܕܡܰܨܠܰܚ ܒܰܐܬܠܺܝ̈ܛܶܐ ܡܳܪܝ ܣܳܒܳܐ ܨܳܒܶܝܢܰܢ ܠܰܡܩܰܠܳܣܽܘ: ܒܬܶܗܪܳܐ ܘܕܽܘܡܳܪܳܐ ܩܳܝܡܺܝܢܰܢ: ܘܠܶܗ ܒܰܒ̈ܢܳܬ ܩ̈ܳܠܐ ܪ̈ܽܘܚܳܢܳܝܳܬܳܐ ܥܳܢܶܝܢܰܢ ܘܳܐܡܪܺܝܢܰܢ: ܗܳܢܳܐ ܕܫܳܛ ܠܥܳܠܡܳܐ ܗܳܢܳܐ ܘܰܠܦܰܓܪܳܐ: ܘܕܳܫ ܥܰܠ ܫܶܢ̈ܕܶܐ ܘܰܐܡܣܰܪ ܥܰܠ ܣܰܝܦܳܐ: ܘܰܐܗܶܠ ܒܪ̈ܳܕܽܘܦܶܐ: ܘܰܓܚܶܟ ܠܽܘܩܒܰܠ ܡܰܘܬܳܐ: ܗܳܢܳܐ ܕܰܬܗܰܪܘ ܡܰܠܐܟ̈ܶܐ ܒܚܽܘܡܣܳܢܶܗ: ܘܛܽܘܒܳܐ ܝܰܗܒܘ ܚܰܝܠܰܘ̈ܳܬܳܐ ܥܶܠܳܝ̈ܶܐ: ܘܰܒܚܰܕܽܘܬܳܐ ܣܘܰܚܘ ܠܐܘܪܥܶܗ ܟܰܕ ܐܳܡܪܺܝܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܣܳܗܕܳܐ ܡܳܪܝ ܣܳܒܳܐ: ܐܺܝܠܳܢܳܐ ܗܕܺܝܪܳܐ ܘܥܰܒܺܝܛ ܛܰܪ̈ܦܶܐ ܕܩܰܕܶܡ ܙܰܡܰܪ ܕܰܘܺܝܕ ܒܪ̈ܶܬܡܰܘܗܝ ܢܒܺܝ̈ܳܝܶܐ: ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ: ܕܦܺܐܪ̈ܰܘܗܝ ܠܚܰܝ̈ܶܐ ܘܛܰܪ̈ܦܰܘܗܝ ܠܐܣܝܽܘܬܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܣܳܗܕܳܐ ܡܳܪܝ ܣܳܒܳܐ ܒܶܪܽܘܠܐ ܕܰܟܝܳܐ ܕܰܪܨܺܝܦ ܒܬܳܓܳܗ̇ ܕܥܺܕܬܳܐ ܩܰܕܺܝܫܬܳܐ: ܘܗܳܐ ܡ̣ܶܢ ܓܰܪ̈ܡܰܝܟ ܢܳܒܥܺܝܢ ܥܽܘܕܪ̈ܳܢܶܐ ܠܐܝܠܶܝܢ ܕܒܳܟ ܡܶܬܓܰܘܣܺܝܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܣܳܗܕܳܐ ܡܳܪܝ ܣܳܒܳܐ ܓܰܢ̱ܒܳܪܳܐ ܢܰܚܫܺܝܪܬܳܢܳܐ ܕܰܐܒܗܶܬ ܠܰܛܪܽܘܢܳܐ ܟܽܘܒܰܝ ܗ̇ܰܘ ܕܶܐܫܬܰܢܰܕ ܒܶܗ: ܠܳܟ ܛܽܘܒܰܝܟ ܣܳܗܕܳܐ ܓܰܒܝܳܐ ܡܳܪܝ ܣܳܒܳܐ ܕܶܒܚܳܐ ܗܳܒܶܠܳܝܳܐ ܕܪܰܥܺܝ ܠܰܡܫܺܝܚܳܐ ܒܩܶܛܠܶܗ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܣܳܗܕܳܐ ܡܳܪܝ ܣܳܒܳܐ ܗܶܕܪܳܐ ܘܨܶܒܬܳܐ ܕܟܽܠܳܗ̇ ܥܳܡܰܪܬܳܐ: ܕܫܰܝܢܳܐ ܘܰܫܠܳܡܳܐ ܢܳܓܶܕ ܐܰܢ̱ܬ ܠܰܢ ܡ̣ܶܢ ܠܘܳܬ ܡܳܪܳܟ ܠܐܝܠܶܝܢ ܕܒܳܟ ܡܶܬܓܰܘܣܺܝܢ: ܠܳܟ ܛܽܘܒܰܝܟ ܡܳܪܝ ܣܳܒܳܐ ܘܰܪܕܳܐ ܒܰܣܺܝܡ ܪܺܝܚܳܐ ܕܩܺܝܢܳܘܡܳܘܢ ܕܰܟܝܳܐ ܗܳܐ ܦܳܐܰܚ ܡ̣ܶܢ ܣܺܝܡܰܬ݀ ܓܰܪ̈ܡܰܝܟ: ܠܳܟ ܛܽܘܒܰܝܟ ܣܳܗܕܳܐ ܡܳܪܝ ܣܳܒܳܐ ܙܪܺܝܙܳܐ ܘܰܠܒܺܝܒܳܐ ܕܩܳܡ ܠܽܘܩܒܰܠ ܫܳܢܝܽܘܬܶܗ ܕܰܐܒܽܘܙܰܪܕ ܘܰܐܒܗܬܶܗ: ܠܳܟ ܛܽܘܒܰܝܟ ܣܳܗܕܳܐ ܓܰܒܝܳܐ ܡܳܪܝ ܣܳܒܳܐ ܚܕܽܘܓܳܐ ܪܚܺܝܡܳܐ ܕܟܰܠܬܳܐ ܦܐܻܝܬܳܐ ܕܡܰܠܟܳܐ ܫܡܰܝܳܢܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܣܳܒܳܐ ܛܰܢܳܢܳܐ ܒܰܫܪܳܪܳܐ: ܕܒܰܛܢܳܢܳܟ ܕܰܠܘܳܬ ܡܳܪܳܟ ܙܟܰܝܬ ܠܰܛܪܽܘܢܽܘܬܶܗ ܕܰܐܒܽܘܟ ܪܰܫܺܝܥܳܐ ܙܡܰܢܣܳܘܦ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܣܳܒܳܐ ܝܽܘܩܢܳܐ ܢܰܨܺܝܚܳܐ ܕܰܐܢܗܰܪ ܠܰܦܢܺܝܬܳܐ ܟܽܠܳܗ̇ ܕܡܰܕܢܚܳܐ ܒܫܽܘܦܪ̈ܰܘܗܝ ܪ̈ܳܡܶܐ ܘܰܗܕܺܝܪ̈ܶܐ: ܠܳܟ ܛܽܘܒܰܝܟ ܣܳܗܕܳܐ ܚܠܺܝܨܳܐ ܡܳܪܝ ܣܳܒܳܐ ܟܰܘܟܒܳܐ ܗܕܺܝܪܳܐ: ܕܟܽܠܗܽܘܢ ܚܰܒܪ̈ܰܝܟ ܒܳܟ ܢܗܰܪܘ ܘܡܶܢܳܟ ܩܢܰܘ ܙܺܝܘܳܐ ܘܣܳܗܕܳܐ: ܘܒܰܕܓܽܘܢ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܕܶܐܬܓܰܘܰܣܢܰܢ ܒܚܺܝܠ ܨܠܰܘ̈ܳܬܳܟ: ܫܶܐܠ ܠܰܢ ܡ̣ܶܢ ܠܘܳܬ ܡܳܪܳܟ ܪ̈ܰܚܡܶܐ ܘܰܚܢܳܢܳܐ ܘܚܽܘܣܳܝܳܐ ܘܫܽܘܒܩܳܢܳܐ: ܠܰܟܪ̈ܺܝܗܶܐ ܚܽܘܠܡܳܢܳܐ: ܠܰܡܫܰܪ̈ܰܝܳܐ ܐܳܣܝܽܘܬܳܐ: ܠܐܒܺܝ̈ܠܐ ܒܽܘܝܳܐܳܐ: ܠܥܰܝܺܝ̈ܩܶܐ ܠܽܘܒܳܒܳܐ: ܠܐܒܺܝ̈ܕܶܐ ܫܟܳܚܬܳܐ: ܠܰܫܚܺܝ̈ܩܶܐ ܡܥܰܕܪܳܢܳܐ: ܠܪ̈ܰܚܺܝܩܶܐ ܟܽܘܢܳܫܳܐ: ܠܩܰܪ̈ܺܝܒܶܐ ܣܰܒܪܳܐ ܛܳܒܳܐ: ܠܝܰܬܡ̈ܶܐ ܙܳܝܽܘܢܳܐ: ܠܟܰܦ̈ܢܶܐ ܡܬܰܪܣܝܳܢܳܐ: ܘܠܐܝܠܶܝܢ ܕܡ̣ܶܢ ܪ̈ܽܘܚܶܐ ܒܺܝ̈ܫܳܬܳܐ ܡܶܬܢܰܣܶܝܢ ܚܽܘܪܳܪܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܢܝܳܚܬܳܐ ܛܳܒܬܳܐ ܗ̇ܳܝ ܕܥܰܡܳܟ: ܘܥܰܡ ܣܺܝܥܬܳܐ ܕܚܰܒܪ̈ܰܝܟ ܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ ܣܳܗ̈ܕܶܐ ܗ̇ܳܢܽܘܢ ܕܶܐܬܟܰܠܰܠܘ ܥܰܡܳܟ ܘܰܒܥܶܠܬܳܟ: ܘܥܰܡ ܟܽܠܗܽܘܢ ܩܰܕܺܝ̈ܫܶܐ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܰܡܫܺܝܚܳܐ ܡܢܰܨܚܳܢܟܽܘܢ ܡܳܪܝ ܣܳܒܳܐ ܘܣܺܝܥܬܳܐ ܕܚܰܒܪ̈ܰܘܗܝ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܕܚܰܝܶܠܟܽܘܢ ܒܰܐܓܽܘܢܳܐ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܪܺܝܫ ܟܽܘܡܪ̈ܶܐ ܕܬܰܘܕܺܝܬܰܢ ܕܰܒܩܶܛܠܶܗ ܕܡܳܪܝ ܣܳܒܳܐ ܘܚܰܒܪ̈ܰܘܗܝ ܨܒܰܝܬ ܘܶܐܬܪܰܥܺܝܬ: ܐܶܬܪܰܥܳܐ ܐܳܦ ܠܰܢ ܒܝܰܘܡܳܐ ܗܳܢܳܐ ܕܕܽܘܟܪܳܢܳܟ: ܘܩܰܒܶܠ ܦܺܝܪܡܳܐ ܕܩܰܪܶܒܢܰܢ ܠܳܟ ܒܥܺܐܕܰܝ̈ܗܽܘܢ: ܘܫܰܟܶܢ ܠܰܢ ܚܽܘܣܳܝ ܚܰܘ̈ܒܶܐ ܘܰܚܛܳܗ̈ܶܐ ܒܰܨܠܰܘ̈ܳܬܗܽܘܢ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܡܫܺܝܚܳܐ ܕܰܚܠܳܦܰܝܟ ܐܶܬܢܰܓܰܕ ܣܳܗܕܳܐ ܡܳܪܝ ܣܳܒܳܐ ܢܶܓ̈ܕܶܐ ܩܫܰܝ̈ܳܐ ܘܡܰܪܺܝܪ̈ܶܐ: ܡ̣ܶܢ ܛܪ̈ܽܘܢܶܐ ܘܥܰܘ̈ܳܠܐ ܕܠܐ ܪ̈ܰܚܡܶܐ: ܐܰܢ̱ܬ ܡܳܪܝ ܒܝܰܕ ܨܠܰܘ̈ܳܬܶܗ ܥܰܡ ܕܣܳܗ̈ܕܶܐ ܚܰܒܪ̈ܰܘܗܝ: ܦܰܨܳܐ ܠܰܢ ܡ̣ܶܢ ܬܰܫܢܺܝ̈ܩܶܐ ܡܰܪܺܝܪ̈ܶܐ ܕܓܺܗܰܢܳܐ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܝܗܝ ܠܣܳܗܕܳܐ ܡܳܪܝ ܣܳܒܳܐ ܘܥܰܒܕܶܗ ܪܺܝܫܳܐ ܠܓܽܘܕܳܐ ܚܰܝܠܬܳܢܺܝܬܳܐ ܗ̇ܳܝ ܕܰܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ ܕܰܒܥܶܠܬܶܗ ܐܶܬܟܰܠܰܠܘ: ܘܰܟܠܺܝ̈ܠܐ ܕܫܽܘܒܚܳܐ ܡ̣ܶܢ ܪܰܘܡܳܐ ܩܰܒܶܠܘ ܗܘܰܘ: ܕܠܶܗ ܠܡܳܪܝܳܐ ܡܢܰܨܚܳܢܗܽܘܢ ܫܽܘܒܚܳܐ ܘܺܐܝܩܳܪܳܐ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܒܢܶܥ̈ܡܳܬܳܐ ܕܩܺܝ̈ܢܳܬܳܐ ܚܰܠܝ̈ܳܬܳܐ: ܐܰܘܟܺܝܬ ܒܬܶܐܘܳܪܺܝܰܐ ܡܶܬܗܰܘܢܳܢܺܝܬܳܐ ܕܢܰܦܫܳܐ: ܠܐܓܽܘܢܳܐ ܬܡܺܝܗܳܐ ܕܰܬܪܶܥܣܰܪ ܐܠܰܦܰܝ̈ܳܐ ܘܫܶܬܡܳܐܐ ܘܰܬܠܳܬܺܝܢ ܘܰܐܪܒܥܳܐ ܣܳܗ̈ܕܶܐ ܚܰܒܪ̈ܰܘܗܝ ܕܡܳܪܝ ܣܳܒܳܐ ܡܥܰܕܥܕܺܝܢܰܢ: ܘܒܳܥܽܘܬܳܐ ܘܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܒܕܽܘܟܪܳܢܶܗ ܕܡܳܪܝ ܣܳܒܳܐ ܘܰܕܟܽܠܳܗ̇ ܓܽܘܕܳܐ ܕܣܳܗ̈ܕܶܐ ܕܥܰܡܶܗ ܕܶܝܢ ܡܙܰܡܪܺܝܢܰܢ: ܗ̇ܳܢܽܘܢ ܕܰܒܥܶܠܬܶܗ ܩܰܒܶܠܘ ܟܠܺܝܠܐ ܕܣܳܗܕܽܘܬܳܐ: ܘܰܕܪܺܝܫ ܟܳܗ̈ܢܶܐ ܡܳܪܝ ܐܰܢܕܪܶܐܘܳܣ ܪܺܝܫܳܐ ܕܰܒܢ̈ܰܝ ܫܒܺܝܬܳܐ: ܥܰܡ ܟܽܠܳܗ̇ ܓܽܘܕܳܐ ܙܪܺܝܙܬܳܐ ܕܰܐܬܠܺܝ̈ܛܶܐ: ܗܳܢܳܐ ܡܳܪܝ ܣܳܒܳܐ ܕܝܰܘܡܳܢܳܐ ܕܽܘܟܪܳܢܶܗ ܘܕܺܝܠܗܽܘܢ ܡܫܰܡܠܶܝܢܰܢ: ܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܡܙܰܡܪܺܝܢܰܢ ܘܳܐܡܪܺܝܢܢ: ܗ̇ܳܢܽܘܢ ܙܪ̈ܺܝܙܶܐ ܘܙܰܟܳܝ̈ܶܐ ܕܶܐܬܟܰܠܰܠܘ ܡܶܛܽܠ ܚܽܘܒܶܗ ܕܰܡܫܺܝܚܳܐ: ܗ̇ܳܢܽܘܢ ܕܰܗܘܳܐ ܠܗܽܘܢ ܡܳܪܝ ܐܰܢܕܪܶܐܘܳܣ ܪܺܝܫܳܐ ܪܰܒܳܐ ܘܰܡܫܰܒܠܳܢܳܐ: ܘܰܕܪܰܫ ܐܽܘܪܚܳܐ ܠܣܳܗܕܽܘܬܳܐ ܕܺܝܠܗܽܘܢ ܐܶܣܛܶܦܳܢܳܝܬܳܐ: ܗ̇ܳܢܽܘܢ ܕܟܰܕ ܒܦܽܘܩ̈ܕܳܢܶܐ ܐܠܰܗܳܝ̈ܶܐ ܐܶܙܕܰܝܰܢܘ: ܘܠܐ ܟܦܰܪܘ ܒܰܡܫܺܝܚܳܐ: ܗ̇ܳܢܽܘܢ ܕܶܐܬܪܰܒܺܝܘ ܒܰܐܬܪܳܐ ܕܡܰܥܪܒܳܐ ܘܶܐܬܟܰܠܰܠܘ ܒܰܦܩܰܥܬܳܐ ܕܒܶܝܬ ܥܰܪ̈ܰܒܳܝܶܐ ܒܰܐܬܪܳܐ ܕܡܰܕܢܚܳܐ: ܗ̇ܳܢܽܘܢ ܕܰܒܝܰܕ ܥܶܠܬܳܐ ܕܗܰܝܡܳܢܽܘܬܶܗ ܕܡܳܪܝ ܣܳܒܳܐ: ܐܶܬܒܰܥܪܰܪ ܐܰܒܽܘܗܝ ܥܰܠ ܓܽܘܕܳܐ ܒܪܺܝܟܬܳܐ ܕܰܟܪ̈ܺܝܣܛܝܳܢܶܐ ܗ̇ܳܢܽܘܢ ܕܰܐܥܡܕܽܘܗܝ ܘܰܚܒܰܫ ܘܫܰܢܶܩ ܐܶܢܽܘܢ ܒܟܽܠ ܐܽܘܠܨܳܢܺܝ̈ܢ: ܘܠܐ ܟܦܰܪܘ ܗܘܰܘ ܒܶܗ ܒܰܡܫܺܝܚܳܐ: ܗܳܝܕܶܝܢ ܪܓܶܙ ܗܘܳܐ ܥܠܰܝܗܽܘܢ ܥܰܘܳܠܐ ܙܡܰܢܣܳܘܦ ܘܰܦܩܰܕ ܗܘܳܐ ܕܢܶܬܟܰܠܠܽܘܢ ܒܣܰܝܦܳܐ ܟܽܠܗܽܘܢ ܐܰܟܚܕܳܐ: ܟܰܕ ܚܰܡܫܺܝܢ ܥܳܐܠܺܝܢ ܗܘܰܘ ܠܰܩܕܳܡ ܣܰܝܦܳܐ ܒܚܰܕܽܘܬܳܐ ܩܳܥܶܝܢ ܗܘܰܘ ܘܳܐܡܪܺܝܢ: ܡܶܛܽܠܳܬܳܟ ܡܳܝܬܺܝܢܰܢ ܬܳܐ ܠܥܽܘܕܪܳܢܰܢ ܘܰܦܪܽܘܩ ܠܰܢ: ܘܟܽܠܚܰܕ ܡܶܢܗܽܘܢ ܣܳܘܰܚ ܗܘܳܐ ܕܩܰܕܡܳܝܳܐ ܢܶܬܟܰܠܰܠ: ܘܰܕܗ̣ܽܘ ܢܶܗܘܶܐ ܒܟܺܝܪܳܝܳܐ ܘܫܰܪܘܳܝܳܐ ܒܡܰܠܟܽܘܬܳܐ ܕܰܫܡܰܝܳܐ: ܘܟܽܠܗܽܘܢ ܒܪܶܚܡܬܳܐ ܐܠܰܗܳܝܬܳܐ ܐܶܬܩܰܛܰܠܘ ܘܩܰܒܶܠܘ ܕܶܝܢ ܟܠܺܝ̈ܠܐ ܕܙܳܟܽܘܬܳܐ: ܐܶܠܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܕܚܰܕܺܝܬ ܠܰܢ ܒܕܽܘܟܪܳܢܳܐ ܕܣܳܗ̈ܕܰܝܟ ܡܳܪܝ ܣܳܒܳܐ ܘܣܺܝܥܬܳܐ ܒܪܺܝܟܬܳܐ ܕܚܰܒܪ̈ܰܘܗܝ: ܚܰܕܳܐ ܠܰܢ ܒܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܕܺܝܠܰܢ: ܘܢܶܫܬܘܶܐ ܟܽܠܰܢ ܠܡܰܥܠܬܳܐ ܕܰܩܕܳܡܰܝܟ ܕܠܐ ܡܰܦܽܘܠܬܳܐ ܕܰܚܛܺܝܬܳܐ: ܘܢܶܗܘܶܐ ܠܰܢ ܝܽܘܡ ܥܺܐܕܶܗ ܕܡܳܪܝ ܣܳܒܳܐ: ܘܰܕܚܰܒܪ̈ܰܘܗܝ ܝܰܘܡܳܐ ܕܚܰܕܽܘܬܳܐ ܘܰܕܦܽܘܪܩܳܢܳܐ ܝܰܘܡܳܐ ܕܡܰܕܪܶܟ ܠܶܗ ܪܰܡܫܳܐ: ܘܢܶܫܬܰܟܰܢ ܒܶܗ ܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ: ܘܚܽܘܒܳܐ ܘܰܐܘܝܽܘܬܳܐ ܘܒܽܘܪ̈ܟܳܬܳܐ ܘܰܫܦܺܝܥܽܘܬ ܥ̈ܰܠܠܳܬܳܐ: ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܩܕܝ̈ܫܐ ܡܪܝ ܣܪܓܝܣ ܘܒܟܘܣ

 

ܨܠܘܬܐ ܕܫܘܪܝܐ

 

 

 

ܡܫܺܝܚܳܐ ܐܠܰܗܳܐ ܕܰܒܪܶܚܡܬܳܟ: ܐܶܬܟܰܠܰܠܘ ܗܳܠܶܝܢ ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܒܰܣܪ̈ܳܩܶܐ ܘܫܶܢ̈ܕܶܐ ܕܡܰܪܺܝܪܺܝܢ: ܘܕܳܫܘ ܥܰܠ ܣܶܟ̈ܶܐ ܚܰܪ̈ܺܝܦܳܬܳܐ: ܗܰܒ ܠܰܢ ܘܰܐܫܘܳܐ ܠܰܢ ܕܰܢܣܰܝܒܰܪ ܐܽܘܠܨ̈ܳܢܶܐ ܒܪܶܚܡܬܳܟ: ܘܦܰܨܳܐ ܠܰܢ ܡ̣ܶܢ ܢܽܘܪܳܐ ܕܓܺܗܰܢܳܐ: ܐܳܦ ܢܶܫܬܘܶܐ ܠܰܚܠܽܘܠܰܝ̈ܗܽܘܢ ܡܳܪܰܢ ܘܰܐܠܳܗܰܢ ܠܥܳܠܡܺܝܢ ܐܰܡܺܝܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܐܪܡܺܝ ܢܽܘܪܳܐ ܐܠܰܗܳܝܬܳܐ ܒܠܶܒܰܘ̈ܳܬܗܽܘܢ ܕܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܣܳܗ̈ܕܶܐ ܢܰܨܺܝ̈ܚܶܐ ܘܒܰܣܰܪܘ ܥܰܠ ܫܶܢ̈ܕܶܐ ܘܽܐܘܠܨܳܢ̈ܶܐ ܘܶܐܬܩܰܛܰܠܘ ܡܶܛܽܠ ܫܡܶܗ: ܠܗܰܘ ܕܰܐܦܶܩ ܐܶܢܽܘܢ ܡ̣ܶܢ ܪܽܘܡܺܝ ܠܐܬܪܳܐ ܕܡܰܕܢܚܳܐ: ܘܰܐܢܗܪܽܘܗܝ ܒܙܰܠܺܝ̈ܩܶܐ ܕܪܽܘܚܳܐ ܩܰܕܺܝܫܳܐ: ܠܗܰܘ ܕܢܰܨܰܚ ܠܰܫܡܳܗܰܝ̈ܗܽܘܢ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܘܒܰܐܪܒܰܥ ܦܶܢ̈ܝܳܢ ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܟܰܕ ܠܝܰܡܳܐ ܠܐ ܡܶܬܡܰܫܚܳܢܳܐ ܕܚܰܫܰܝ̈ܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܢܳܚܬܺܝܢܰܢ: ܘܰܠܪܽܘܚܩܳܐ ܪܰܒܳܐ ܦܳܝܫܺܝܢܰܢ: ܡ̣ܶܢ ܩܽܘܠܳܣܟܽܘܢ ܐܠܰܗܳܝܳܐ: ܘܪܳܡ ܡ̣ܶܢ ܡܶܠܬܰܢ ܡܶܣܟܺܢܬܳܐ: ܡܶܛܽܠ ܕܟܽܠܗܽܘܢ ܦܽܘ̈ܡܶܐ ܕܰܡܩܰܠܣܳܢ̈ܶܐ: ܠܐ ܡܰܘܦܶܝܢ ܕܰܢܩܰܠܣܽܘܢ ܘܰܢܚܰܓܽܘܢ ܠܝܰܘܡܳܐ ܕܥܰܕܥܺܐܕܟܽܘܢ ܪܳܡ ܡ̣ܶܢ ܥܳܠܡܳܐ ܟܽܠܶܗ: ܐܳܘ ܣܳܗ̈ܕܶܐ ܛܒܺܝ̈ܒܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ: ܕܡ̣ܶܢ ܓܶܢܣܳܐ ܡܰܠܟܳܝܳܐ ܒܢ̈ܰܝ ܪܗܽܘܡܺܝ ܪܰܒܬܳܐ ܐܺܝܬܰܝܗܽܘܢ: ܗ̇ܳܢܽܘܢ ܕܡ̣ܶܢ ܙܰܒܢܳܐ ܕܛܰܠܝܽܘܬܗܽܘܢ: ܩܰܒܶܠܘ ܡܰܥܡܽܘܕܺܝܬܳܐ ܐܠܰܗܳܝܬܳܐ: ܘܰܢܗܰܪܘ ܒܐܪ̈ܳܙܶܐ ܕܥܺܕܬܳܐ ܩܰܕܺܝܫܬܳܐ: ܘܰܗܘܰܘ ܒܢ̈ܰܝ ܗܰܝܡܳܢܽܘܬܳܐ ܫܰܪܺܝܪܬܳܐ: ܘܰܗܘܰܘ ܠܶܒܰܘ̈ܳܬܗܽܘܢ ܐܰܘ̈ܳܢܶܐ ܠܪܽܘܚܳܐ ܩܰܕܺܝܫܳܐ: ܘܰܒܠܺܠܝܳܐ ܘܒܺܐܝܡܳܡܳܐ ܕܳܠܶܩ ܗܘܳܐ ܒܠܶܒܰܘ̈ܳܬܗܽܘܢ ܚܽܘܒܶܗ ܕܡܳܪܰܢ: ܘܟܰܕ ܚܣܰܡ ܒܗܽܘܢ ܣܳܛܳܢܳܐ ܘܓܰܪܶܓ ܠܐܟ̈ܠܰܝ ܩܰܪܨܳܐ ܕܢܶܩܪܒܽܘܢ ܠܘܳܬ ܡܰܠܟܳܐ ܡܰܟܣܺܝܡܝܰܢܳܘܣ ܘܢܰܘܕܽܘܢ ܕܡ̣ܶܢ ܗܰܝܡܳܢܽܘܬܳܐ ܕܰܟܪ̈ܺܝܣܛܝܳܢܶܐ ܐܶܢܽܘܢ: ܘܟܰܕ ܠܗܳܠܶܝܢ ܫܡܰܥ ܡܰܠܟܳܐ ܚܰܢܦܳܐ ܐܰܝܟ ܬܶܢܳܢܳܐ ܣܠܶܩ ܪܽܘܓܙܶܗ ܥܠܰܝܗܽܘܢ: ܘܰܨܒܳܐ ܕܢܶܣܓܽܘܕ ܠܰܦܬܰܟܪ̈ܶܐ: ܐܰܘ ܢܰܘܒܶܕ ܚܰܝܰܝ̈ܗܽܘܢ: ܘܰܟܦܰܪܘ ܒܡܰܠܟܳܐ ܘܠܐ ܫܰܡܥܽܘܗܝ: ܘܰܦܩܰܕ ܡܰܠܟܳܐ ܕܢܶܫܬܰܠܚܽܘܢ ܡܳܐܢܰܝ̈ܗܽܘܢ ܘܰܒܚܶܣܕܳܐ ܢܩܽܘܡܽܘܢ: ܘܗܶܢܽܘܢ ܡܙܰܡܪܺܝܢ ܗܘܰܘ ܕܡܳܐ ܛܳܒ ܘܡܳܐ ܫܰܦܺܝܪ ܠܐܚ̈ܶܐ ܡܳܐ ܕܥܳܡܪܺܝܢ ܐܰܟܚܕܳܐ: ܘܥܰܠ ܗ̇ܳܝ ܫܰܕܰܪ ܐܶܢܽܘܢ ܡܰܠܟܳܐ ܒܚܶܣܕܳܐ ܠܡܰܕܒܪܳܐ ܕܡܰܕܢܚܳܐ: ܠܘܳܬ ܥܰܒܕܳܐ ܕܺܝܠܗܽܘܢ ܐܰܢܛܺܝܰܟܳܘܣ: ܘܫܰܐܶܠ ܐܶܢܽܘܢ ܒܚܶܡܬܳܐ ܘܰܦܪܰܫ ܐܶܢܽܘܢ ܡ̣ܶܢ ܚܕܳܕ̈ܶܐ: ܘܫܰܢܶܩ ܠܒܰܟܽܘܣ ܩܰܕܡܳܝܳܐ: ܘܰܡܚܳܝܗܝ ܒܰܓܝ̈ܳܕܶܐ ܦܰܛܺܝܪ̈ܶܐ ܕܬܰܘܪ̈ܶܐ ܘܡܺܝܬ ܠܶܗ ܘܒܰܦܪܳܬ݀ ܢܰܗܪܳܐ ܫܕܰܐܘܽܘܗܝ: ܘܡܳܪܝ ܡܺܝܢܰܐ ܘܡܳܪܝ ܡܰܐܡܰܐ ܕܰܝܪ̈ܳܝܶܐ ܓܡܺܝܪ̈ܶܐ ܘܩܰܕܺܝ̈ܫܶܐ: ܘܡܰܠܐܟܳܐ ܕܶܐܬܚܰܘܺܝ ܠܗܽܘܢ ܕܡܰܣܶܩ ܦܰܓܪܶܗ ܕܒܰܟܽܘܣ ܢܰܨܺܝܚܳܐ ܡ̣ܶܢ ܢܰܗܪܳܐ: ܘܥܰܦܝܽܘܗܝ ܒܺܐܝܩܳܪܳܐ ܪܰܒܳܐ: ܘܗܳܐ ܠܘܳܬܗܽܘܢ ܢܛܺܝܪ ܩܽܘܠܳܣܶܗ: ܘܡܳܪܝ ܣܰܪܓܺܝܣ ܣܶܐܢ ܠܣܶܟ̈ܶܐ ܕܦܰܪܙܠܐ ܘܰܪܗܶܛ ܬܡܳܢܬܰܥܣܰܪ ܡܺܝ̈ܠܐ: ܘܶܐܬܒܰܐܻܝ ܒܝܰܕ ܛܰܝܒܽܘܬܳܐ ܐܠܰܗܳܝܬܳܐ: ܘܶܐܬܟܰܠܰܠ ܒܰܟܠܺܝܠܐ ܕܙܳܟܽܘܬܳܐ: ܒܪܰܦܨܰܐ ܫܶܟܢܰܬ݀ ܫܟܺܝܢܬܶܗ ܝܰܩܺܝܪܬܳܐ: ܘܥܰܠ ܗܳܕܶܐ ܟܽܠܗܶܝܢ ܥܺܕ̈ܳܬܳܐ ܡܚܰܓ̈ܝܳܢ ܘܰܡܩܰܠܣ̈ܳܢ ܠܟܽܘܠܳܠܰܝ̈ܗܽܘܢ ܕܰܐܬܠܺܝ̈ܛܶܐ ܒܪ̈ܺܝܟܶܐ: ܘܰܚܢܰܢ ܚܰܛܳܝ̈ܶܐ ܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܩܳܥܶܝܢܰܢ ܘܳܐܡܪܺܝܢܰܢ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܐܰܬܠܺܝ̈ܛܶܐ ܙܪ̈ܺܝܙܶܐ ܕܶܐܬܟܰܠܰܠܘ ܒܰܟܠܺܝܠܐ ܕܙܳܟܽܘܬܳܐ: ܘܰܙܟܰܘ ܠܒܺܝܫܳܐ ܒܥܶܠܕܰܪܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܐܰܬܠܺܝ̈ܛܶܐ ܙܪܺܝܪ̈ܶܐ ܕܶܐܬܟܰܠܰܠܘ ܒܰܟܠܺܝܠܐ ܕܙܳܟܽܘܬܳܐ ܒܢܰܝ̈ܳܐ ܪ̈ܽܘܚܳܢܳܝܶܐ ܕܝܺܪܶܬܬܽܘܢ ܝܳܪܬܽܘܬܳܐ ܐܠܰܗܳܝܬܳܐ: ܘܰܗܘܰܝܬܽܘܢ ܒܢ̈ܰܝ ܡܰܠܟܽܘܬܳܐ ܫܡܰܝܳܢܺܝܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ: ܓܰܢ̱ܒܳܪ̈ܰܝ ܕܰܐܩܪܶܒܬܽܘܢ ܒܰܩܪܳܒܶܗ ܕܡܳܪܝܳܐ ܘܰܐܒܗܶܬܬܽܘܢ ܠܚܰܢܦܽܘܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܚܠܺܝ̈ܨܶܐ ܕܥܰܠܘ ܠܩܺܐܪܣܳܐ ܕܰܕܡܳܐ: ܘܰܐܒܗܶܬܘ ܠܡܰܠܟܳܐ ܠܚܰܢܦܳܐ ܡܰܟܣܺܝܡܝܰܢܳܘܣ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܛܰܒ̈ܥܶܐ ܛܳܒ̈ܶܐ: ܕܝܽܘܡ ܕܽܘܟܪܳܢܟܽܘܢ ܡܙܰܝܚܺܝܢܰܢ ܐܳܘ ܦܳܥ̈ܠܐ ܟܰܫܺܝܪ̈ܶܐ ܕܰܦܠܰܚܘ ܒܟܰܪܡܶܗ ܕܰܡܫܺܝܚܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܗܰܡܢܺܝ̈ܟܶܐ ܕܶܐܬܬܠܺܝܘ ܒܨܰܘܪܳܗ̇ ܕܥܺܕܬܳܐ ܩܰܕܺܝܫܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܘܰܪ̈ܕܶܐ ܗܰܢܺܝ̈ܰܐܝ ܪܺܝܚܳܐ: ܬܰܘ ܒܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܙܰܠܺܝ̈ܩܶܐ ܨܰܡܽܘܚ̈ܬܳܢܶܐ ܕܰܐܨܡܰܚܘ ܒܟܽܠܶܗ ܥܳܠܡܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܝܽܘܩ̈ܢܶܐ ܕܶܐܬܒܢܺܝܘ ܒܡܰܕܒܚܳܐ ܕܽܐܘܪܫܠܶܡ ܫܡܰܝܳܢܺܝܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܟܶܢܳܪ̈ܶܐ ܕܪܽܘܚܳܐ ܩܰܕܺܝܫܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ: ܠܡܺܐܢܳܐ ܕܟܽܠ ܥܰܝܺܝ̈ܩܶܐ ܘܰܡܛܰܪ̈ܦܶܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܡܰܒܽܘ̈ܥܶܐ ܡܰܪ̈ܕܝܰܝ ܚܰܝ̈ܶܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܢܰܗܺܝܪ̈ܶܐ ܕܰܒܥܺܕ̈ܳܬܳܐ ܘܕܰܝܪ̈ܳܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܣܳܥܽܘܪ̈ܶܐ ܕܰܟܪ̈ܺܝܗܶܐ ܘܰܐܠܺܝ̈ܨܶܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܥܰܡܽܘ̈ܕܶܐ ܠܐ ܡܶܙܕܰܥ̈ܙܥܳܢܶܐ ܕܥܺܕܬܳܐ ܩܰܕܺܝܫܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܦܺܝܪ̈ܡܶܐ ܕܰܡܠܶܝܢ ܬܰܪܥܽܘܬܳܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܨܰܝ̈ܳܕܶܐ ܪ̈ܽܘܚܳܢܳܝܶܐ ܘܒܶܝܬ ܓܰܘܣܳܐ ܕܰܪ̈ܕܺܝܦܶܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܩܺܝܬܳܪ̈ܽܘܕܶܐ ܐܠܰܗܳܝ̈ܶܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܪ̈ܺܝܫܰܝ ܣܳܗ̈ܕܶܐ ܩܰܕܺܝ̈ܫܶܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܫܽܘܒܗܳܪܳܐ ܕܟܽܠܗܽܘܢ ܢܟܺܝ̈ܣܶܐ ܘܰܩܛܺܝ̈ܠܐ: ܬܰܘ ܒܰܫܠܳܡܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ: ܬܰܐܓܳܪ̈ܶܐ ܪ̈ܽܘܚܳܢܳܝܶܐ ܛܥܺܝ̈ܢܰܝ ܛܳܒ̈ܳܬܳܐ: ܘܒܰܕܓܽܘܢ ܒܳܥܶܝܢܰܢ ܡܶܢܟܽܘܢ ܐܳܘ ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܰܒܝܰܕ ܓܰܠܝܽܘܬ ܐܰܦ̈ܶܐ ܕܺܐܝܬ ܠܟܽܘܢ ܠܘܳܬ ܐܠܰܗܳܐ: ܫܶܐܠܽܘܢ ܠܰܢ ܡܶܢܶܗ ܚܽܘܣܳܝܳܐ ܕܚܰܘ̈ܒܶܐ ܫܽܘܒܩܳܢܳܐ ܕܰܚܛܳܗ̈ܶܐ: ܡܥܳܕ ܗ̣ܽܘ ܓܶܝܪ ܕܢܶܥܒܶܕ ܨܶܒܝܳܢܟܽܘܢ ܒܟܽܠ ܡܶܕܶܡ: ܘܰܒܝܰܕ ܨܠܰܘ̈ܳܬܟܽܘܢ ܩܰܕܺܝ̈ܫܳܬܳܐ ܢܰܥܒܰܪ ܡ̣ܶܢ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܟܽܠܗܶܝܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܰܠܗ̇ܳܢܽܘܢ ܕܥܳܒܕܺܝܢ ܥܺܐܕܟܽܘܢ ܘܡܶܬܓܰܘܣܺܝܢ ܒܰܨܠܰܘ̈ܳܬܟܽܘܢ: ܫܰܐܠܘ ܕܢܶܫܬܘܶܐ ܕܢܶܬܒܰܣܰܡ ܥܰܡܟܽܘܢ ܒܡܰܠܟܽܘܬܳܐ ܕܰܢܛܺܝܪܳܐ ܠܟܽܘܢ: ܘܰܐܟܚܕܳܐ ܥܰܡܟܽܘܢ ܘܒܰܝܢܳܬܟܽܘܢ ܘܰܒܓܽܘܕܰܝ̈ܟܽܘܢ ܚܢܰܢ ܘܥܰܢܺܝ̈ܕܰܝܢ ܢܰܣܶܩ ܫܽܘܒܚܳܐ ܠܰܡܫܺܝܚܳܐ ܡܢܰܨܚܳܢܟܽܘܢ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

 

 

ܥܛܪܐ

 

 

 

ܥܶܛܪܳܐ ܕܩܰܪܶܒܬ ܒܨܺܝܪܽܘܬܰܢ ܘܚܰܛܳܝܽܘܬܰܢ ܒܕܽܘܟܪ̈ܳܢܰܝܗܽܘܢ ܕܣܰܪܓܺܝܣ ܘܒܰܟܽܘܣ ܢܰܨܺܝ̈ܚܶܐ: ܢܶܬܩܰܒܰܠ ܩܕܳܡܰܝܟ ܡܳܪܝܳܐ: ܘܢܶܫܬܰܟܰܢ ܠܰܢ ܒܰܨܠܰܘ̈ܳܬܗܽܘܢ ܡܩܰܒ̈ܠܳܬܳܐ ܫܰܝܢܳܐ ܘܰܫܠܳܡܳܐ: ܘܚܽܘܣܳܝܳܐ ܘܫܽܘܒܩܳܢܳܐ ܘܐܣܝܽܘܬܳܐ ܠܰܟܪ̈ܺܝܗܶܐ: ܢܝܳܚܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܗܳܫܳܐ܀

 

 

 

ܚܘܬܡܐ

 

 

 

ܣܳܗܕܳܐ ܩܰܕܡܳܝܳܐ ܡܫܺܝܚܳܐ: ܕܰܒܚܰܡܪܳܟ ܪܘܺܝܘ ܗܳܠܶܝܢ ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܐܰܪܘܳܐ ܠܰܢ ܐܰܟܘܳܬܗܽܘܢ ܒܪܶܚܡܬܳܟ: ܘܰܐܫܘܳܐ ܠܰܢ ܠܰܚܙܳܬܳܟ ܒܝܰܘܡܳܐ ܪܰܒܳܐ ܕܡܶܬܓܰܠܝܳܢܽܘܬܳܟ: ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܪܰܒܳܐ ܘܡܰܠܦܳܢܳܐ ܕܰܐܓܽܘ̈ܢܶܐ ܣܳܗ̈ܕܳܝܶܐ: ܠܗܰܘ ܕܚܰܝܶܠ ܠܥܰܒ̈ܕܰܘܗܝ ܣܳܗ̈ܕܶܐ ܩܰܕܺܝ̈ܫܶܐ: ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܒܚܰܫ̈ܶܐ ܩܢܽܘ̈ܡܳܝܶܐ: ܘܚܰܠܺܝ ܥܠܰܝܽܗܘܢ ܠܡܰܘܬܳܐ ܕܡܶܛܽܠܳܬܶܗ: ܘܒܰܣܰܪܘ ܥܠܰܘܗܝ ܘܰܐܝܟ ܠܐ ܡܶܕܶܡ ܚܰܫܒܽܘܗܝ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܝܶܫܽܘܥ ܐܠܰܗܳܐ: ܕܰܒܚܽܘܒܳܟ ܐܶܬܓܰܘܙܰܠܘ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܘܰܐܩܠܺܝܘ ܥܰܠ ܫܶܢ̈ܕܶܐ ܕܰܛܪ̈ܽܘܢܶܐ: ܘܳܐܦ ܚܢܰܢ ܡܚܰܓܶܝܢܰܢ ܠܥܺܐܕܗܽܘܢ ܘܳܐܡܪܺܝܢܰܢ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܬܳܓ̈ܶܐ ܫܰܦܺܝܪ̈ܶܐ ܕܒܰܕܡܽܘܬ ܕܰܗܒܳܐ ܡܰܒܪܩܺܝܢ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܫܽܘܪ̈ܶܐ ܪ̈ܳܡܶܐ ܘܚܶܣ̈ܢܶܐ ܬܰܩܺܝ̈ܦܶܐ ܕܰܒܗܽܘܢ ܡܶܣܬܰܬܪܺܝܢ ܟܽܠܗܽܘܢ ܡܗܰܝ̈ܡܢܶܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܪ̈ܺܝܫܰܝ ܣܳܗ̈ܕܶܐ ܘܕܳܪ̈ܫܰܝ ܐܽܘܪܚܳܐ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܩܽܘܒܰܪ̈ܢܺܝܛܶܐ ܚܰܟܺܝ̈ܡܶܐ ܕܡܰܢܰܥܬܽܘܢ ܠܰܠܡܺܐܢܳܐ ܕܫܰܝܢܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܨܰܝ̈ܳܕܶܐ ܡܗܺܝܪ̈ܶܐ ܕܰܐܦܶܩܘ ܡ̣ܶܢ ܨܳܡܰܪܬܳܐ ܕܰܐܒܕܳܢܳܐ ܠܢܰܦ̈ܫܳܬܳܐ ܐܰܒܺܝ̈ܕܳܬܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܦܳܥ̈ܠܐ ܟܰܫܺܝܪ̈ܶܐ ܕܰܦܠܰܚܘ ܦܳܠܚܽܘܬܳܐ ܪܽܘܚܳܢܳܝܬܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܰܥܩܰܪܬܽܘܢ ܡ̣ܶܢ ܥܺܕܬܳܐ ܙܺܝ̈ܙܳܢܶܐ ܘܝܰܥܪܳܐ ܕܰܚܛܺܝܬܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܣܳܗ̈ܕܶܐ ܙܰܟܳܝ̈ܶܐ ܘܝܳܗ̈ܒܰܝ ܥܽܘܕܪ̈ܳܢܶܐ ܠܰܡܗܰܝ̈ܡܢܶܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܢܽܘܗܪܳܐ ܕܰܡܡܰܠܠܽܘܬ ܐܠܰܗܽܘܬܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܡܰܥܬܪ̈ܰܝ ܠܟܶܢܫܰܢ ܒܥܽܘܕܪ̈ܳܢܶܐ ܐܠܰܗܳܝ̈ܶܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܠܡܺܐܢܳܐ ܘܢܰܘܚܳܐ ܕܰܪ̈ܕܺܝܦܶܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܟܽܠ ܥܰܡܡܺܝ̈ܢ ܛܳܦܣܺܝܢ ܒܟܽܘܢ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܝܰܗܒ ܐܢ̱ܬܽܘܢ ܠܥܺܕܬܳܐ ܟܽܠ ܥܽܘܕܪ̈ܳܢܶܐ ܡܫܰܡ̈ܠܰܝܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܛܰܥܡܳܐ ܚܰܠܝܳܐ ܕܰܡܠܐܷ ܪܽܘܚܳܐ ܩܰܕܺܝܫܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܚܶܣ̈ܢܶܐ ܚܰܣܺܝ̈ܢܶܐ ܕܰܙܟܰܝܬܽܘܢ ܠܒܺܝܫܳܐ ܘܰܠܦܳܠܚܰܘ̈ܗܝ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܙܰܝ̈ܢܶܐ ܠܐ ܡܶܬܚܰܠܨ̈ܳܢܶܐ ܕܒܰܩܪܳܒܳܐ ܫܰܦܶܠܬܽܘܢ ܠܡܰܠܟܳܐ ܚܰܢܦܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܘܰܥ̈ܕܶܐ ܕܟܽܠ ܛܽܘܒܺܝ̈ܢ ܐܺܝܬܰܝܟܽܘܢ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܗܰܒܳܒ̈ܶܐ ܕܟܽܠ ܓܢܶܣ ܐܺܝܬܰܝܟܽܘܢ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܕܳܫܢܳܐ ܪܺܝܫܳܝܳܐ ܠܡܳܪܟܽܘܢ ܐܶܬܩܰܪܰܒܬܽܘܢ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܰܒܝܰܕ ܣܳܗܕܽܘܬܟܽܘܢ ܡܰܐܪܺܝ ܡܳܪܝ ܝܽܘܚܰܢܳܢ ܕܰܟܦܰܪܣܢܳܝܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܰܐܪܥܳܐ ܕܰܪܕܳܐ ܕܶܡܟܽܘܢ ܥܠܶܝܗ̇ ܩܰܕܫܳܗ̇ ܡܶܢܟܽܠ ܛܰܢܦܽܘܬܳܐ ܕܰܚܛܺܝܬܳܐ: ܘܒܰܕܓܽܘܢ ܫܳܐܠܺܝܢܰܢ ܡ̣ܶܢ ܡܳܪܟܽܘܢ ܕܒܰܨܠܰܘ̈ܳܬܟܽܘܢ ܢܶܫܬܰܟܰܢ ܠܰܢ ܒܗܳܢܳܐ ܝܰܘܡܳܐ ܕܥܺܐܕܟܽܘܢ ܡܝܰܩܪܳܐ: ܟܽܠ ܒܽܘܪ̈ܟܳܬܳܐ ܘܥܽܘܕܪ̈ܳܢܶܐ: ܟܽܠ ܒܽܘ̈ܝܳܐܶܐ ܘܚܰܘ̈ܣܳܢܶܐ: ܟܽܠ ܫܽܘ̈ܟܳܢܶܐ ܠܐ ܥܳܒܽܘܪ̈ܶܐ: ܟܽܠ ܫ̈ܶܐܠܳܬܳܐ ܫܰܦܺܝܪ̈ܳܬܳܐ: ܟܽܠ ܒܽܘ̈ܣܳܡܶܐ ܦܰܪ̈ܕܰܝܣܳܝܶܐ: ܟܽܠ ܛܽܘ̈ܒܶܐ ܡܰܠܟܽܘ̈ܬܳܢܳܝܶܐ: ܠܰܢ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܕܡ̣ܶܢ ܪܗܽܘܡܺܝ ܠܐܬܪܰܢ ܐܶܫܬܰܕܰܪܘ ܘܡ̣ܶܢ ܐܰܢܛܺܝܰܟܳܘܣ ܥܰܘܳܠܐ ܐܶܬܟܰܠܰܠܘ: ܘܒܰܨܠܰܘ̈ܳܬܟܽܘܢ ܩܰܕܺܝ̈ܫܳܬܳܐ ܢܶܬܒܰܪܰܟ ܐܰܬܪܰܢ ܘܰܦܢܺܝܬܰܢ ܘܢܶܫܬܘܶܐ ܟܽܠܰܢ ܕܥܰܡܟܽܘܢ ܢܺܐܪܰܬ݀ ܡܰܠܟܽܘܬܳܐ ܫܡܰܝܳܢܺܝܬܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܚܰܝܠܐ ܠܐ ܡܶܬܚܰܣܢܳܢܳܐ ܕܚܰܝܶܠ ܠܣܳܗ̈ܕܶܐ ܢܰܨܺܝ̈ܚܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܒܰܐܓܽܘܢܳܐ ܕܣܳܗܕܽܘܬܳܐ: ܘܰܕܪܰܫ ܠܗܽܘܢ ܐܽܘܪܚܳܐ ܕܚܰܝ̈ܶܐ ܘܰܪܕܰܘ ܒܳܗ̇ ܒܰܕܡܳܐ ܕܨܰܘܪ̈ܰܝܗܽܘܢ: ܘܗܳܐ ܝܰܘܡܳܢ ܡܶܙܕܰܝܰܚ ܥܺܐܕܗܽܘܢ ܒܥܺܕܬܳܐ ܡܟܺܝܪܬܶܗ: ܘܡܰܒܰܥ ܡ̣ܶܢ ܓܰܪ̈ܡܰܝܗܽܘܢ ܥܽܘܕܪ̈ܳܢܶܐ ܠܰܡܝܰܩܪ̈ܳܢܰܝܗܽܘܢ: ܕܠܶܗ ܠܰܡܟܰܠܠܳܢܗܽܘܢ ܫܽܘܒܚܳܐ ܡܰܣܩܺܝܢܰܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܥܺܐܕܟܽܘܢ ܫܒܺܝܚܳܐ ܡܫܰܡܠܶܝܢܰܢ ܐܳܘ ܣܳܗ̈ܕܶܐ ܥܛܺܝ̈ܦܰܝ ܙܳܟܽܘܬܳܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ: ܘܰܠܝܰܘܡܳܐ ܕܕܽܘܟܪܳܢܟܽܘܢ ܩܰܕܺܝܫܳܐ ܒܩܽܘܠܳܣ̈ܶܐ ܘܰܒܬܶܫܒ̈ܚܳܬܳܐ ܡܙܰܝܚܺܝܢܰܢ: ܐܳܘ ܡܢܺܝ̈ܚܳܢܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܰܩܪ̈ܰܒܬܳܢܶܐ ܕܕܶܚܠܰܬ ܐܠܰܗܳܐ: ܬܶܗܪܳܐ ܘܕܽܘܡܳܪܳܐ ܡܶܬܡܠܶܝܢܰܢ: ܘܰܒܙܶܕܩܳܐ ܠܟܽܘܢ ܘܳܠܝܳܐܝ̣ܬ ܡܝܰܩܪܺܝܢܰܢ: ܐܰܢ̱ܬܽܘܢ ܐܶܢܽܘܢ ܕܠܰܪ̈ܓܺܝܓܳܬܳܐ ܫܳܛܬܽܘܢ ܘܠܰܥܬܺܝ̈ܕܳܬܳܐ ܐܶܬܪܰܓܪܰܓܬܽܘܢ: ܠܒܶܫܬܽܘܢ ܙܰܝܢܳܐ ܫܡܰܝܳܢܳܐ: ܘܥܰܡ ܐܰܪܟܽܘܢܶܗ ܕܥܳܠܡܳܐ ܐܰܩܪܶܒܬܽܘܢ: ܟܰܕ ܫܶܪܝܳܢܳܐ ܕܛܰܝܒܽܘܬܳܐ ܐܠܰܗܳܝܬܳܐ ܐܶܙܕܰܝܰܢܬܽܘܢ: ܘܒܶܐܣܳܪ ܚܰܨ̈ܶܐ ܕܪܽܘܚܳܐ ܩܰܕܺܝܫܳܐ ܐܶܬܚܰܙܰܩܬܽܘܢ ܟܰܕ ܐܰܝܟ ܕܰܒܣܰܢܘܰܪܬܳܐ ܠܪܺܝܫܟܽܘܢ ܡܶܬܗܰܘܢܳܢܳܐ ܟܰܠܶܠܬܽܘܢ: ܘܰܠܛܽܘܝܳܒܶܗ ܕܶܐܘܢܓܶܠܝܽܘܢ ܕܰܫܠܳܡܳܐ ܒܪ̈ܶܓܠܰܝܟܽܘܢ ܣܶܐܢܬܽܘܢ: ܘܣܰܟܪܳܐ ܕܦܽܘܪܩܳܢܳܐ ܗܰܝܡܳܢܽܘܬܳܐ ܫܰܪܺܝܪܬܳܐ ܫܩܰܠܬܽܘܢ: ܘܣܰܝܦܳܐ ܕܪܽܘܚܳܐ ܩܰܕܺܝܫܳܐ ܨܠܺܝܒܳܐ ܩܰܕܺܝܫܳܐ: ܕܰܡܙܺܝܥ ܠܣܰܩܽܘܒ̈ܠܳܝܶܐ ܐܶܚܰܕܬܽܘܢ: ܘܠܽܘܩܒܰܠ ܡܳܪ̈ܽܘܕܶܐ ܢܦܰܩܬܽܘܢ: ܘܠܰܫܡܶܗ ܕܰܡܫܺܝܚܳܐ ܓܰܠܝܳܐܝ̣ܬ ܐܰܟܪܶܙܬܽܘܢ: ܘܰܠܩܰܫܝܽܘܬ ܚܰܫ̈ܶܐ ܘܫܶܢ̈ܕܶܐ ܐܰܝܟ ܠܐ ܡܶܕܶܡ ܚܫܰܒܬܽܘܢ ܘܟܰܕ ܠܒܶܝܬ ܕܺܝܢܳܐ ܐܶܫܬܰܠܰܡܬܽܘܢ: ܠܰܡܫܺܝܚܳܐ ܕܰܝܳܢܳܐ ܕܕܰܝ̈ܳܢܶܐ ܕܩܳܡ ܒܶܝܬ ܕܺܝܢܳܐ ܐܰܝܟ ܚܰܝܳܒܳܐ ܐܶܬܥܰܗܰܕܬܽܘܢ: ܟܰܕ ܠܢܰܚ̈ܬܶܐ ܕܒܶܙܚܳܐ ܢܶܫܳܐܝ̣ܬ ܒܡܶܨܥܰܬ ܪܗܽܘܡܺܝ ܐܶܬܥܰܛܰܦܬܽܘܢ: ܠܗܰܘ ܥܛܺܝܦ ܢܽܘܗܪܳܐ ܕܶܐܬܥܰܛܰܦ ܢܰܚ̈ܬܶܐ ܕܰܙܚܽܘܪܺܝܬܳܐ ܡ̣ܶܢ ܝܽܘ̈ܕܳܝܶܐ ܐܶܬܚܰܫܰܒܬܽܘܢ: ܟܰܕ ܠܡܰܚ̈ܘܳܬܳܐ ܘܰܠܢܶܓ̈ܕܶܐ ܐܶܬܩܰܪܰܒܬܽܘܢ: ܠܗܰܘ ܡܠܶܟ ܡܰܠܟ̈ܶܐ ܕܶܐܬܩܰܪܰܒ ܕܶܒܚܳܐ ܘܶܐܬܢܰܓܰܕ ܒܰܦܪ̈ܳܓܶܠܐ ܐܰܝܟ ܥܳܒܶܕ ܒܺܝ̈ܫܳܬܳܐ: ܐܶܬܕܰܒܰܪܬܽܘܢ: ܘܟܰܕ ܥܰܠ ܓܺܝܓܠܐ ܕܦܰܪܙܠܐ ܐܶܬܡܬܰܚܬܽܘܢ ܡܬܺܝܚܽܘܬܶܗ ܕܥܰܠ ܩܰܝܣܳܐ ܒܓܳܓܽܘܠܬܳܐ ܚܙܰܝܬܽܘܢ: ܟܰܕ ܥܰܠ ܣܶܟ̈ܶܐ ܚܰܪ̈ܺܝܦܳܬܳܐ ܗܰܠܶܟܬܽܘܢ: ܒܣܽܘܟܳܟ ܐܺܝܕܰܘ̈ܗܝ ܘܪ̈ܶܓܠܰܘܗܝ ܕܰܒܨܶܨ̈ܶܐ ܐܶܬܒܰܩܺܝܬܽܘܢ: ܘܡܰܠܟ̈ܶܐ ܛܪ̈ܽܘܢܶܐ ܟܠܺܝܠܐ ܘܬܳܓܳܐ ܘܡܰܠܟܽܘܬܳܐ ܡܶܫܬܰܘܕܺܝܢ ܗܘܰܘ ܠܟܽܘܢ: ܠܗܰܘ ܪܺܝܫܳܐ ܕܚܰܝ̈ܶܐ ܕܶܐܬܟܰܠܰܠ ܒܰܟܠܺܝܠܐ ܕܟܽܘ̈ܒܶܐ ܒܰܪܶܟܬܽܘܢ: ܟܰܕ ܠܐܘܠܨ̈ܳܢܶܐ ܡܰܪܺܝܪ̈ܶܐ ܡܫܰܚ̈ܠܦܶܐ ܐܶܬܬܰܘܒܰܠܬܽܘܢ: ܠܗܰܘ ܓܰܢ̱ܒܳܪ ܥܳܠܡ̈ܶܐ ܕܰܛܥܶܢ ܙܩܺܝܦܶܗ ܥܰܠ ܟܰܬܦܶܗ ܩܰܠܶܣܬܽܘܢ ܟܰܕ ܪܺܝܫܟܽܘܢ ܠܣܰܝܦܳܐ ܘܨܰܘܪ̈ܰܝܟܽܘܢ ܠܦܽܘ̈ܣܳܩܶܐ ܩܰܪܶܒܬܽܘܢ: ܟܽܠܶܗ ܚܰܘܪܳܐ ܕܪܶܥܝܳܢܟܽܘܢ ܒܝܶܫܽܘܥ ܐܠܰܗܳܐ ܕܡܺܝܬ ܒܰܒܣܰܪ ܚܠܳܦܰܝܟܽܘܢ ܩܒܺܝܥ ܗܘܳܐ: ܩܗܰܘ ܣܰܝ̈ܦܶܐ ܕܪ̈ܳܕܽܘܦܶܐ ܘܚܽܘܒܟܽܘܢ ܐܠܰܗܳܝܳܐ ܠܐ ܦܰܣܩܽܘܗܝ ܓܡܰܪܘ ܫܶܢ̈ܕܶܐ ܕܕܰܝ̈ܳܢܶܐ ܘܪܶܥܝܳܢܟܽܘܢ ܚܰܝܠܬܳܢܳܐ ܠܐ ܕܰܘܕܽܘܗܝ: ܬܚܶܒܘ ܡܰܠܟ̈ܶܐ ܘܰܒܗܶܬܘ ܫܰܠܺܝ̈ܛܳܢܶܐ ܘܫܰܪܰܪܟܽܘܢ ܡܝܰܬܪܳܐ ܠܐ ܒܰܛܠܽܘܗܝ: ܩܳܪܰܬ ܢܽܘܪܳܐ ܘܕܶܥܟܰܬ ܫܰܠܗܶܒܺܝܬܳܐ ܘܪܶܚܡܬܶܗ ܕܰܡܫܺܝܚܳܐ ܡ̣ܶܢ ܠܶܒܰܘ̈ܳܬܟܽܘܢ ܠܐ ܛܰܠܩܰܬ݀: ܒܗܶܬ ܣܳܛܳܢܳܐ ܡ̣ܶܢ ܚܽܘܡܣܳܢܳܐ ܕܰܚܠܺܝܨܽܘܬܟܽܘܢ: ܘܰܨܒܳܐ ܕܰܢܫܰܥܒܶܕܟܽܘܢ ܠܡܰܛܥܝܳܢܽܘܬܳܐ: ܘܰܠܦܳܠܚܰܘ̈ܗܝ ܫܰܥܒܶܕܬܟܽܘܢ ܠܣܶܓܕܬܶܗ ܕܰܡܫܺܝܚܳܐ: ܬܗܰܪܘ ܥܶܠܳܝ̈ܶܐ ܒܚܽܘܡܣܳܢܟܽܘܢ: ܬܡܰܗܘ ܬܰܚܬܳܝ̈ܶܐ ܒܰܐܓܽܘ̈ܢܰܝܟܽܘܢ: ܚܙܳܬ݀ ܥܺܕܬܳܐ ܩܰܕܺܝܫܬܳܐ ܚܰܫܰܝ̈ܟܽܘܢ: ܘܰܒܚܰܕܽܘܬܳܐ ܣܶܘܚܰܬ݀ ܠܽܘܩܒܰܠܟܽܘܢ: ܟܶܢܫܰܬ݀ ܠܣܺܝܡܰܬ݀ ܓܰܪ̈ܡܰܝܟܽܘܢ ܘܦܰܠܓܰܬ݀ ܠܰܒ̈ܢܶܝܗ̇: ܙܰܡܢܰܬ݀ ܠܰܡܗܰܝ̈ܡܢܶܐ ܠܥܰܕ̈ܥܺܐܕܰܝܟܽܘܢ: ܘܥܰܡ ܟܽܠܗܽܘܢ ܝܰܠܕܶܝ̈ܗ̇ ܡܰܙܥܩܳܐ ܠܘܳܬܟܽܘܢ ܟܰܕ ܐܳܡܪܳܐ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܝܽܘ̈ܩܢܶܐ ܘܬܰܦܢ̈ܟܶܐ ܗܘܰܝܬܽܘܢ ܒܩܶܛܠܰܝ̈ܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܫܽܘܒܚܳܐ ܫܡܰܝܳܢܳܐ ܠܒܶܫܬܽܘܢ: ܚܠܳܦ ܢܰܚ̈ܬܶܐ ܕܒܶܙܚܳܐ ܕܰܐܠܒܶܫܘ ܠܟܽܘܢ ܚܰܢ̈ܦܶܐ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܘܰܥܶܕ ܡܫܺܝܚܳܐ ܥܰܡ̈ܡܶܐ ܡ̣ܶܢ ܟܽܠ ܦܶܢ̈ܝܳܢ ܕܢܶܙܡܪܽܘܢ ܫܽܘܒܚܳܐ ܒܥܰܕܥܺܐܕܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܥܽܘܕܪ̈ܳܢܶܐ ܠܰܟܪ̈ܺܝܗܶܐ ܘܰܐܠܺܝ̈ܨܶܐ ܗܳܐ ܡܰܒܥܺܝܢ ܓܰܪ̈ܡܰܝܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܣܺܝܡܬܳܐ ܕܚܰܝ̈ܶܐ ܥܒܺܝܕܺܝܢ ܦܰܓܪ̈ܰܝܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܒܶܝܬ ܡܰܫܪܝܳܐ ܠܪܽܘܚܳܐ ܩܰܕܺܝܫܳܐ ܗܘܰܝܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܝܳܪ̈ܽܘܬܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ ܒܰܕܒܺܝܚܽܘܬܟܽܘܢ ܗܘܰܝܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܰܪܘܰܚܬܳܐ ܩܳܢܶܝܢ ܡܥ̈ܳܩܶܐ ܘܰܐܒܺܝ̈ܠܐ ܕܰܒܟܽܘܢ ܡܶܬܓܰܘܣܺܝܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܝܰܡܳܐ ܕܚܽܘܠܡܳܢ̈ܶܐ ܘܳܐܣܘ̈ܳܬܳܐ ܐܺܝܬܰܝܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܢܶܒ̈ܥܶܐ ܕܒܽܘܪ̈ܟܳܬܳܐ ܠܰܢ ܡܚܺܝ̈ܠܐ ܘܚܰܛܳܝ̈ܶܐ ܐܺܝܬܰܝܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܝܶܫܽܘܥ ܚܰܬܢܳܐ ܫܡܰܝܳܢܳܐ ܠܰܚܠܽܘܠܶܗ ܙܰܡܶܢܟܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܕܶܐܙܕܰܡܰܢܬܽܘܢ ܠܗܳܝ ܡܶܫܬܽܘܬܳܐ ܪܘܚܳܢܳܝܬܳܐ: ܐܶܠܐ ܒܳܥܶܝܢܰܢ ܡܶܢܟܽܘܢ ܐܳܘ ܐܰܬܠܺܝ̈ܛܶܐ ܢܰܨܺܝ̈ܚܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܘܰܬܡܳܢܺܝܢ ܘܰܬܠܳܬܳܐ ܣܳܗ̈ܕܶܐ: ܘܰܐܒܳܐ ܝܽܘܚܰܢܳܢ ܙܥܽܘܪܳܐ: ܘܰܐܒܳܐ ܦܰܘܠܐܷ: ܘܰܐܒܳܐ ܒܺܝܫܘܳܝ: ܘܰܐܒܳܐ ܐܶܪܰܡܝܳܐ ܕܗܳܐ ܝܰܘܡܳܢܳܐ ܟܢܺܝܫܳܐܝ̣ܬ ܥܺܐܕܗܽܘܢ ܡܶܢܰܢ ܡܶܙܕܰܝܰܚ: ܘܗܳܫܳܐ ܓܒܰܝ̈ܳܐ ܘܩܰܕܺܝ̈ܫܶܐ ܒܥܰܘ ܘܶܐܬܟܰܫܰܦܘ ܠܰܡܫܺܝܚܳܐ ܡܳܪܟܽܘܢ ܕܰܢܫܰܝܶܢ ܠܥܺܕܬܳܐ ܡܟܺܝܪܬܶܗ: ܘܰܠܟܽܠܗܽܘܢ ܝܰܠܕܶܝ̈ܗ̇ ܢܢܰܛܰܪ ܡ̣ܶܢ ܡܰܪ̈ܕܘܳܬܳܐ: ܘܫܰܒ̈ܛܶܐ ܕܪܽܘܓܙܳܐ: ܘܢܶܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܶܗ ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܡܳܪܝܳܐ ܡܟܰܠܠܳܢܟܽܘܢ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܐܠܰܗܳܐ ܕܰܐܘܪܶܒܬ ܕܽܘܟܪܳܢܳܐ ܕܣܳܗ̈ܕܶܐ ܢܰܨܺܝ̈ܚܶܐ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܒܰܫܡܰܝܳܐ ܘܒܰܐܪܥܳܐ ܘܰܥܒܰܕ ܐܶܢܽܘܢ ܒܶܝܬ ܓܰܙܳܐ ܕܥܽܘܕܪ̈ܳܢܶܐ: ܘܗܳܫܳܐ ܩܰܒܶܠܳܝܗܝ ܡܳܪܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܒܕܽܘܟܪ̈ܳܢܰܝܗܽܘܢ: ܘܫܰܟܶܢ ܠܰܢ ܒܰܨܠܰܘ̈ܳܬܗܽܘܢ ܚܽܘܣܳܝܳܐ ܘܫܽܘܒܩܳܢܳܐ ܘܳܐܣܝܽܘܬܳܐ ܘܥܽܘܕܪܳܢܳܐ: ܘܰܢܝܳܚܳܐ ܠܰܢ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܘܟܽܠܰܢ ܢܰܣܶܩ ܫܽܘܒܚܳܐ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

 

 

 

ܚܘܬܡܐ

 

 

 

ܒܰܪܶܟ ܡܳܪܝ ܠܟܶܢܫܰܢ ܕܰܡܝܰܩܰܪ ܠܥܺܐܕܳܐ ܕܰܐܬܠܺܝ̈ܛܰܝܟ: ܘܰܒܝܰܕ ܒܳܥ̈ܘܳܬܗܽܘܢ ܒܰܛܶܠ ܡܶܢܰܢ ܟܽܠܗܶܝܢ ܡܥܺܝ̈ܩܳܢܝܳܬܳܐ: ܘܰܐܫܘܳܐ ܠܰܢ ܠܓܰܠܝܽܘܬ ܐܰܦ̈ܶܐ ܕܰܩܕܳܡܰܝܟ ܡܳܐ ܕܡܶܬܓܰܠܝܳܐ ܪܰܒܽܘܬܳܟ: ܘܕܳܢܚܳܐ ܡܶܐܬܺܝܬܳܟ ܕܬܰܪܬܶܝܢ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܢܰܨܺܝܚܳܐ ܘܰܡܢܰܨܰܚ ܠܢܰܨܺܝ̈ܚܶܐ ܐܰܡܺܝܢܳܐܝ̣ܬ: ܘܰܒܙܳܟܽܘܬܳܐ ܕܰܐܬܠܺܝ̈ܛܶܐ ܟܽܠܳܢܳܐܝ̣ܬ ܡܶܬܪܰܡܪܰܡ: ܘܰܒܣܳܗܕܽܘܬܳܐ ܕܟܰܫܺܝܪ̈ܶܐ ܛܽܘܒܬܳܢܳܐܝ̣ܬ ܡܶܬܢܰܨܰܪ: ܘܰܒܟܽܘܠܳܠܐ ܕܣܳܗ̈ܕܶܐ ܡܶܬܩܰܠܰܣ ܘܰܒܕܽܘܒܳܪ̈ܶܐ ܕܩܰܕܺܝ̈ܫܶܐ: ܣܰܪܓܺܝܣ ܘܒܰܟܽܘܣ ܗܳܠܶܝܢ ܕܝܰܘܡܳܢܳܐ ܥܺܐܕܟܽܘܢ ܡܫܰܡܠܶܝܢܰܢ ܡܶܢܰܢ ܡܶܫܬܰܒܰܚ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܣܳܗ̈ܕܶܐ ܢܰܨܺܝ̈ܚܶܐ ܡܚܰܓܶܝܢܰܢ: ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܠܗܽܘܢ ܡܩܰܠܣܺܝܢܰܢ: ܘܒܰܒ̈ܢܳܬ ܩ̈ܳܠܐ ܐܠܰܗܳܝ̈ܳܬܳܐ ܠܗܽܘܢ ܡܪܰܡܪܡܺܝܢܰܢ: ܠܝܰܘܡܳܐ ܕܚܳܝܪܺܝܢ ܠܦܽܘܪܥܳܢܳܐ ܥܬܺܝܕܳܐ ܘܰܡܛܰܝܒܳܐ ܗ̇ܰܘ ܕܒܶܗ ܠܚܰܫܰܝ̈ܗܽܘܢ ܛܳܥܶܝܢ: ܘܳܐܦ ܠܐܘܠܨܳܢܰܝ̈ܗܽܘܢ ܠܐ ܡܶܬܕܰܟܪܺܝܢ: ܘܒܰܟܠܺܝ̈ܠܰܝܗܽܘܢ ܚܳܕܶܝܢ ܘܪܳܘܙܺܝܢ: ܘܰܚܢܰܢ ܒܥܺܐܕܗܽܘܢ ܚܰܕܽܘܬܳܢܳܝܳܐ ܢܰܙܥܶܩ ܘܢܺܐܡܰܪ: ܠܟܽܘܢ ܛܽܘܒܰܝܟܽܘܢ ܡܳܪܝ ܣܰܪܓܺܝܣ ܘܡܳܪܝ ܒܰܟܽܘܣ ܝܰܡܦܺܝܽܘ ܕܒܰܕܡܳܐ ܕܨܰܘܪ̈ܰܝܟܽܘܢ ܐܶܬܦܰܠܦܰܠܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܫܰܪ̈ܘܰܝܢܶܐ ܪ̈ܳܡܶܐ ܕܥܰܠ ܬܰܦܐ ܕܡܰܥܡܽܘܕܺܝܬܳܐ ܐܶܬܢܨܶܒܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܘܺܝ̈ܠܐ ܡܕܰܗ̈ܒܳܬܳܐ ܕܰܒܢܰܘܠܐ ܕܣܳܗܕܽܘܬܳܐ ܐܶܙܕܩܰܪܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܥܰܡܽܘ̈ܕܶܐ ܐܺܝܣܳܦܳܢܳܝ̈ܶܐ ܕܰܒܡܰܠܟܽܘܬ ܫܡܰܝܳܐ ܐܶܬܒܢܺܝܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܡܶܫܟܳܢ̈ܶܐ ܕܰܠܡܰܠܟܳܐ ܫܡܰܝܳܢܳܐ ܐܶܬܩܰܪܰܒܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܢܰܘ̈ܛܶܐ ܫܒܺܝ̈ܚܶܐ ܕܡ̣ܶܢ ܝܰܡ ܚܰܢܦܽܘܬܳܐ ܐܶܬܕܰܠܺܝܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܒܶܝܬ ܨܰܘܒܳܐ ܕܟܽܠܳܗ̇ ܡܝܰܬܪܽܘܬܳܐ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܝܰܘ̈ܢܶܐ ܬܰܡܺܝ̈ܡܶܐ ܕܰܠܪ̈ܰܘܡܶܐ ܪ̈ܳܡܶܐ ܦܪܰܚܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܬܪ̈ܺܝܣܩܳܝܶܐ ܕܡܶܛܽܠ ܫܡܶܗ ܕܝܶܫܽܘܥ ܐܶܬܢܟܶܣܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܣܢܺܐܓܪ̈ܶܐ ܘܒܰܥܳܝ̈ܶܐ ܕܰܚܠܳܦܰܝܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܒܢ̈ܰܝ ܡܰܠܟܽܘܬܳܐ ܫܡܰܝܳܢܺܝܬܳܐ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܝܰܕܺܝ̈ܕܶܐ ܕܰܫܒܰܩܘ ܠܡܰܠܟܽܘܬܳܐ ܐܰܪܥܳܢܳܝܬܳܐ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܪ̈ܚܽܘܡܰܘܗܝ ܕܝܶܫܽܘܥ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܝܰܩ̈ܕܶܐ ܫܰܠܡ̈ܶܐ ܕܡܶܛܽܠ ܐܳܬܶܐܘܳܣ ܐܶܬܕܰܒܰܚܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܢܰܗܺܝܪ̈ܶܐ ܫܒܺܝ̈ܚܶܐ: ܕܰܠܚܶܫܟܳܐ ܕܛܳܥܝܽܘܬܳܐ ܛܰܠܶܩܬܽܘܢ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܐܰܚ̈ܶܐ ܕܰܟܦܰܪܘ ܒܥܳܠܡܳܐ ܗܳܢܳܐ: ܛܽܘܒܰܝܟܽܘܢ ܣܰܪܓܺܝܣ ܘܒܰܟܽܘܣ ܐܺܝܙ̈ܓܰܕܶܐ ܕܫܰܝܢܳܐ: ܒܽܘܝܳܐܳܐ ܕܰܡ̈ܥܳܩܶܐ: ܓܺܝܫܪܳܐ ܕܡܰܥܒܰܪ ܠܰܡܗܰܝ̈ܡܢܶܐ ܠܐܬܪܳܐ ܕܚܰܝ̈ܶܐ: ܕܳܪ̈ܫܰܝ ܐܽܘܪܚܳܐ ܠܣܳܗ̈ܕܶܐ: ܗܰܕܳܝ̈ܶܐ ܕܪ̈ܳܥܰܘܳܬܳܐ: ܘܰܥܕܳܐ ܕܛܳܒ̈ܳܬܳܐ: ܙܰܝܢܳܐ ܕܦܽܘܪܩܳܢܳܐ: ܚܽܘܬܪܳܐ ܕܶܝܢ ܕܣܳܗ̈ܕܶܐ: ܛܥܺܝ̈ܢܰܝ ܫܽܘ̈ܡܳܬܶܗ ܕܰܡܫܺܝܚܳܐ: ܝܽܘܩ̈ܢܶܐ ܫܒܺܝ̈ܚܶܐ: ܟܺܐܦ̈ܶܐ ܣܳܡ̈ܟܳܬ ܡܚܺܝ̈ܠܐ: ܠܡܺܐܢ̈ܶܐ ܕܦܽܘܪܩܳܢܳܐ: ܡܥܰܕܪ̈ܳܢܶܐ ܕܰܛܠܺܝ̈ܡܶܐ: ܢܽܘܗܪܳܐ ܕܚܶܫܽܘ̈ܟܶܐ ܣܳܝ̈ܓܰܝ ܬܽܘܪ̈ܥܳܬܳܐ ܕܰܦܢܺܝܬܰܢ: ܥܳܕܽܘܪ̈ܶܐ ܕܟܽܠܶܗ ܟܶܢܫܰܢ: ܦܰܐܝ̈ܰܝ ܛܰܥܡܳܐ ܕܰܡܡܰܕܰܟ ܠܦܰܟܺܝܗܽܘܬܰܢ: ܨܰܠܡ̈ܶܐ ܣܳܓ̈ܕܰܝ ܠܰܨܠܺܝܒܽܘܬܳܐ ܩܽܘܒܰܪ̈ܢܺܝܛܶܐ ܕܢܰܦ̈ܫܳܬܰܢ: ܪ̈ܽܘܡܚܶܐ ܩܳ̈ܛܠܳܬ ܠܰܒܥܶܠܕ̈ܒܳܒܰܝܢ: ܫܽܘܪ̈ܶܐ ܡܣܰܬܪ̈ܰܝ ܢܰܦ̈ܫܳܬܰܢ: ܬܰܪ̈ܥܶܐ ܕܰܒܗܽܘܢ ܥ̈ܳܐܠܳܢ ܨܠܰܘ̈ܳܬܰܢ: ܬܶܫܒ̈ܚܳܬܰܢ ܒܟܽܘܢ ܡܶܬܢܰܨ̈ܚܳܢ: ܬܰܘܕ̈ܝܳܬܰܢ ܒܟܽܘܢ ܢܺܐܪ̈ܒܳܢ: ܫܳܪ̈ܥܳܬܰܢ ܒܟܽܘܢ ܢܶܬܠܰܚ̈ܝܳܢ: ܫܰܦܺܝܪ̈ܳܬܰܢ ܒܟܽܘܢ ܢܶܬܪܰܘܪ̈ܒܳܢ: ܪܰܦܝܽܘܬܰܢ ܒܟܽܘܢ ܬܶܬܚܰܝܰܨ: ܪܰܡܝܽܘܬܰܢ ܒܟܽܘܢ ܬܶܬܥܰܠܐܷ: ܩܺܝ̈ܢܳܬܰܢ ܒܟܽܘܢ ܢܶܨ̈ܛܰܠܠܳܢ: ܩܳܠܰܝ̈ܢ ܒܟܽܘܢ ܢܝܰܒܒܽܘܢ: ܨܳܐܝ̈ܘܳܬܰܢ ܒܟܽܘܢ ܢܶܬܬܫܺܝ̈ܓܳܢ: ܨܠܰܘ̈ܳܬܰܢ ܒܟܽܘܢ ܢܶܬܩܰܒ̈ܠܳܢ: ܦܠܰܓ̈ܘܳܬܰܢ ܒܟܽܘܢ ܢܶܬܚܰܝ̈ܕܳܢ: ܦܰܐܝ̈ܳܬܰܢ ܒܟܽܘܢ ܢܶܬܗܰܕܪ̈ܳܢ: ܥܳܩ̈ܳܬܰܢ ܒܟܽܘܢ ܢܶܥܒܪ̈ܳܢ: ܥܺܕ̈ܳܬܳܐ ܒܟܽܘܢ ܢܶܣܬܰܬܪ̈ܳܢ: ܣܰܟܠܘ̈ܳܬܰܢ ܒܟܽܘܢ ܢܶܬܠܰܚ̈ܝܳܢ: ܣܰܢ̈ܝܳܬܰܢ ܒܟܽܘܢ ܢܶܬܕܰܚ̈ܩܳܢ: ܢܶܣܝܽܘ̈ܢܶܐ ܒܟܽܘܢ ܢܶܥܒܪܽܘܢ: ܢܶܟ̈ܝܳܢܶܐ ܒܟܽܘܢ ܢܶܙܕܰܓܪܽܘܢ: ܡܰܚ̈ܘܳܬܳܐ ܒܟܽܘܢ ܢܶܬܰܐܣ̈ܝܳܢ: ܡܰܠܟ̈ܘܳܬܳܐ ܒܟܽܘܢ ܢܶܫܬܰܝ̈ܢܳܢ: ܠܽܘ̈ܚܳܡܶܐ ܒܟܽܘܢ ܢܶܫܠܽܘܢ: ܠܽܘ̈ܬܳܟܶܐ ܒܟܽܘܢ ܢܶܬܟܰܘܢܽܘܢ: ܟܺܐܒܰܝ̈ܢ ܒܟܽܘܢ ܢܶܬܚܰܠܡܽܘܢ: ܟܽܘܪ̈ܗܳܢܰܝܢ ܒܟܽܘܢ ܢܶܬܰܐܣܽܘܢ: ܝܰܬܡ̈ܶܐ ܒܟܽܘܢ ܢܶܬܪܰܒܽܘܢ: ܝܰܩܺܝܪ̈ܶܐ ܒܟܽܘܢ ܢܶܬܥܰܫܢܽܘܢ: ܛܰܡ̈ܶܐܐ ܒܟܽܘܢ ܢܶܬܩܰܕܫܽܘܢ: ܛܽܘ̈ܠܫܶܐ ܒܟܽܘܢ ܢܶܬܡܰܪܩܽܘܢ: ܚܰܣܺܝܪ̈ܶܐ ܒܟܽܘܢ ܢܶܬܡܰܠܽܘܢ: ܚܰܣܳܡ̈ܶܐ ܒܟܽܘܢ ܢܶܬܟܰܘܢܽܘܢ: ܙܰܘ̈ܥܶܐ ܒܟܽܘܢ ܢܶܫܬܰܗܽܘܢ: ܙܺܝܙܳܢ̈ܶܐ ܒܟܽܘܢ ܢܶܬܥܰܩܪܽܘܢ: ܘܳܝ̈ܶܐ ܒܟܽܘܢ ܢܶܥܒܪܽܘܢ: ܘܰܥ̈ܕܶܐ ܕܚܰܝ̈ܶܐ ܒܟܽܘܢ ܢܶܫܬܰܡܠܽܘܢ: ܗܰܝܟ̈ܠܐ ܒܟܽܘܢ ܢܶܬܗܰܕܪܽܘܢ: ܗܶܪ̈ܳܬܳܐ ܒܟܽܘܢ ܢܶܫܬܰܝ̈ܢܳܢ: ܕܰܝܪ̈ܳܬܰܢ ܒܟܽܘܢ ܢܶܬܢܰܛܪ̈ܳܢ: ܥܺܕ̈ܳܬܰܢ ܒܟܽܘܢ ܢܶܬܦܰܨ̈ܚܳܢ: ܕܰܝܪ̈ܳܝܶܐ ܒܟܽܘܢ ܢܶܬܚܰܝܠܽܘܢ: ܓܽܘ̈ܕܰܝܢ ܒܟܽܘܢ ܢܶܪ̈ܥܡܳܢ: ܓܰܕܽܘ̈ܕܶܐ ܒܟܽܘܢ ܢܶܬܪܰܒܽܘܢ: ܒܬܽܘ̈ܠܐ ܒܟܽܘܢ ܢܶܙܕܰܗܽܘܢ: ܒܽܘܪ̈ܟܳܬܳܐ ܒܟܽܘܢ ܢܶܫܬܰܦ̈ܥܳܢ: ܐܰܬܪܰܢ ܒܟܽܘܢ ܢܶܫܬܰܝܰܢ: ܐܰܪ̈ܥܳܬܰܢ ܒܟܽܘܢ ܢܶܬܒܰܪ̈ܟܳܢ: ܐܰܟܳܪ̈ܶܐ ܒܟܽܘܢ ܢܶܬܚܰܕܽܘܢ: ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܒܰܐܘ̈ܳܢܶܐ ܐܽܘܪ̈ܫܠܳܡܳܝܶܐ ܘܒܰܡ̈ܛܰܠܠܐ ܕܚܰܕ̈ܘܳܬܳܐ ܢܶܬܬܢܺܝܚܽܘܢ: ܘܰܒܓܽܘ̈ܕܶܐ ܕܩܰܕܺܝ̈ܫܰܝܟ ܢܶܬܒܰܣܡܽܘܢ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܐܒܳܐ ܡܬܽܘܡܳܝܳܐ ܡܢܰܨܚܳܢܟܽܘܢ: ܘܠܰܒܪܳܐ ܡܫܺܝܚܳܐ ܡܟܰܠܠܳܢܟܽܘܢ: ܘܰܠܪܽܘܚܳܐ ܩܰܕܺܝܫܳܐ ܡܚܰܝܠܳܢܟܽܘܢ: ܘܓܳܡܽܘܪܳܐ ܕܰܐܓܽܘܢܰܝ̈ܟܽܘܢ: ܗܳܫܳܐ܀

 

ܛܟܣܐ ܕܥܠ ܩܕܝܫܐ ܡܪܝ ܩܘܡܐ: ܘܝܫܘܥ ܘܦܠܓ ܬܠܡܝ̈ܕܘܗܝ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܠܰܡܝܰܩܳܪܽܘ ܠܝܽܘܡ ܥܰܕܥܺܐܕܶܗ ܕܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ ܦܰܠܳܚܳܐ ܟܰܫܺܝܪܳܐ ܕܰܦܠܰܚ ܒܶܐܫܟܳܪܳܟ ܡ̣ܶܢ ܛܰܠܝܽܘܬܶܗ ܥܕܰܡܳܐ ܠܣܰܝܒܽܘܬܶܗ: ܘܒܰܛܶܠ ܡܶܢܰܢ ܒܰܨܠܰܘ̈ܳܬܶܗ ܡܰܪ̈ܕܘܳܬܳܐ ܒܺܝ̈ܫܳܬܳܐ ܘܟܽܠ ܡܰܚ̈ܘܳܬܳܐ ܩܰܫ̈ܝܳܬܳܐ ܘܰܐܡܠܶܟ ܫܰܝܢܳܐ ܘܰܫܠܳܡܳܟ ܒܥܺܕܬܳܟ ܘܰܒܡܰܪܥܺܝܬܳܟ: ܐܰܝܟܰܢܳܐ ܕܰܢܫܰܒܚܳܟ ܩܰܕܺܝܫܳܐܝܬ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܚܰܝܠܐ ܡܚܰܝܶܠ ܟܽܠ: ܕܚܰܝܶܠ ܘܢܰܨܰܚ ܠܩܰܕܺܝܫܳܐ ܘܰܡܠܐܷ ܫܽܘܦܪ̈ܶܐ ܐܠܰܗܳܝ̈ܶܐ ܓܰܒܝܳܐ ܡܳܪܝ ܩܰܘܡܶܐ: ܐܰܬܠܺܝܛܳܐ ܙܪܺܝܙܳܐ ܘܚܰܝܠܬܳܢܳܐ ܕܰܙܟܳܝܗܝ ܠܣܳܛܳܢܳܐ ܒܥܶܠܕܒܳܒܶܗ ܕܓܶܢܣܰܢ: ܘܕܳܫ ܐܶܢܶܝܢ ܠܰܡܨܺܝ̈ܕܳܬܶܗ ܗܳܢܳܐ ܕܰܬܗܰܪܘ ܡܰܠܐܟ̈ܶܐ ܕܢܽܘܪܳܐ ܘܰܕܪܽܘܚܳܐ ܟܰܕ ܚܙܰܘ ܠܩܰܘܡܶܗ ܐܰܡܺܝܢܳܐ ܕܥܰܠ ܐܺܝܠܳܢܳܐ: ܕܥܳܠܶܒ ܠܩܰܘܡܳܐ ܕܺܝܠܗܽܘܢ ܗܳܢܳܐ ܕܰܨܠܰܒ ܗ̣ܽܘ ܠܶܗ ܥܰܠ ܐܺܝܠܳܢܳܐ ܢܽܘܓܪܳܐ ܕܰܫܢܰܝ̈ܳܐ ܒܩܰܘܡܳܐ ܡܰܠܐܟܳܝܳܐ: ܟܰܕ ܡܶܬܟܰܫܰܦ ܩܕܳܡ ܡܳܪܶܗ ܠܰܝ̈ܠܰܝ ܐܺܝܡܳܡ ܕܢܶܫܬܘܶܐ ܠܦܰܪܕܰܝܣܳܐ ܕܰܢܦܰܩ ܡܶܢܶܗ ܐܳܕܳܡ ܘܚܰܘܳܐ ܒܰܥܒܳܪ ܦܽܘܩܕܳܢܳܐ: ܗܳܢܳܐ ܕܠܶܗ ܠܡܳܪܝܳܐ ܕܰܓܒܳܝܗܝ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܘܰܒܠܶܥ̈ܙܶܐ ܪ̈ܽܘܚܳܢܳܝܶܐ ܐܶܬܟܰܢܰܫܢܰܢ ܝܰܘܡܳܢܳܐ ܠܰܡܩܰܠܳܣܽܘ ܠܰܥܛܺܝܦ ܙܳܟܽܘܬܳܐ ܘܰܬܠܺܝܬܳܝ ܛܽܘ̈ܒܶܐ: ܓܰܒܪܳܐ ܕܬܶܕܡܽܘܪܬܳܐ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ: ܡܶܠܬܳܐ ܡ̇ܰܢ ܒܨܺܝܪܳܐ ܗ̱ܝ: ܘܠܶܫܳܢܳܐ ܥܰܛܠܐ ܗ̱ܘ: ܘܗܰܘܢܳܐ ܬܽܘܒ ܣܰܓܺܝ ܚܶܫܽܘܟ: ܘܠܰܝܬ ܒܗܽܘܢ ܠܡܰܘܦܳܝܽܘ ܐܳܦ ܠܡܺܐܡܰܪ ܫܒܺܝ̈ܚܳܬܳܐ ܘܰܬܡܺܝ̈ܗܳܬܳܐ ܕܰܣܥܰܪ ܐܰܬܠܺܝܛܳܐ ܕܩܽܘܫܬܳܐ ܓܰܒܝܳܐ ܡܳܪܝ ܩܰܘܡܶܐ: ܐܶܠܐ ܟܰܕ ܒܥܽܘܕܪܳܢܳܐ ܐܠܰܗܳܝܳܐ ܩܳܪܒܺܝܢܰܢ ܘܥܰܠ ܚܰܝܠܐ ܕܰܨܠܰܘ̈ܳܬܶܗ ܡܶܬܬܟܺܝܠܺܝܢܰܢ: ܘܩܰܠܺܝܠ ܡ̣ܶܢ ܣܰܺܓܝܽܐܘܬ ܪ̈ܳܡܶܐ ܘܰܡܥܰܠܰܝ̈ܳܐ ܥܰܡܠܰܘ̈ܗܝ ܠܰܡܨܰܥܬܳܐ ܡܰܝܬܶܝܢܰܢ: ܘܰܒܨܺܝܪܳܐܝ̣ܬ ܐܰܝܟ ܕܡܰܨܝܳܐ ܐܳܡܪܺܝܢܰܢ: ܗܳܢܳܐ ܕܡ̣ܶܢ ܝܺܠܺܝܕܽܘܬܶܗ ܐܶܬܓܒܺܝ ܡ̣ܶܢ ܟܰܪܣܳܐ ܕܶܐܡܶܗ ܐܰܝܟ ܐܶܪܰܡܝܳܐ ܘܰܫܡܽܘܐܶܝܠ: ܒܢܶܕܪ̈ܶܐ ܘܩܽܘܪ̈ܒܳܢܶܐ ܐܶܬܺܝܗܶܒ ܠܐܒܳܗܰܘ̈ܗܝ ܥܰܩܪ̈ܶܐ ܓܠܺܝ̈ܙܰܝ ܡ̣ܶܢ ܦܺܐܪ̈ܶܐ ܘܰܒܢܰܝ̈ܳܐ: ܗܳܢܳܐ ܕܒܰܢܒܺܝܽܘܬܳܐ ܐܶܬܒܰܕܰܩ ܠܰܢ ܥܠܰܘܗܝ: ܕܰܥܬܺܝܕ ܕܢܶܗܘܶܐ ܡܳܐܢܳܐ ܕܚܳܫܰܚ ܠܦܳܠܚܽܘܬܳܐ ܕܡܳܪܶܗ: ܘܰܥܬܺܝܕ ܕܢܶܗܘܶܐ ܡܰܚܙܺܝܬܳܐ ܕܬܶܗܪܳܐ ܠܰܒܢܰܝ̈ܢܳܫܳܐ: ܗܳܢܳܐ ܕܡ̣ܶܢ ܩܕܳܡ ܕܢܶܬܒܛܶܢ ܘܢܶܬܺܝܠܶܕ: ܚܰܕ ܡ̣ܶܢ ܐܰܒܳܗ̈ܳܬܳܐ ܩܰܕܺܝ̈ܫܶܐ ܫܰܘܕܰܥ ܠܰܢ ܥܠܰܘܗܝ: ܕܰܥܬܺܝܕ ܕܢܺܐܪܰܒ ܫܡܶܗ ܒܥܳܠܡܳܐ ܐܶܡܰܪ: ܗܳܢܳܐ ܕܒܰܚܙܳܬܳܐ ܪܽܘܚܳܢܳܝܬܳܐ ܚܳܪ ܘܶܐܬܒܰܩܺܝ ܒܡܳܪܶܗ: ܘܰܚܙܳܝܗܝ ܟܰܕ ܨܠܺܝܒ ܥܰܠ ܩܰܝܣܳܐ: ܘܰܙܩܰܦ ܐܳܦ ܗ̣ܽܘ ܩܢܽܘܡܶܗ ܥܰܠ ܐܺܝܠܳܢܳܐ ܢܽܘܓܪܳܐ ܕܰܫܢܰܝ̈ܳܐ ܐܰܪܒܥܺܝܢ ܘܚܰܡܶܫ: ܗܳܢܳܐ ܕܶܐܣܰܪ ܠܶܗ ܩܰܝ̈ܣܶܐ ܒܰܕܡܽܘܬ ܨܠܺܝ̈ܒܶܐ ܘܰܡܬܰܚ ܢܰܦܫܶܗ ܥܠܰܝܗܽܘܢ ܐܰܝܟ ܕܢܶܬܶܐܠܶܨ ܘܢܶܚܰܫ ܚܠܳܦ ܡܫܺܝܚܳܐ: ܗܳܢܳܐ ܕܡ̣ܶܢ ܒܳܬܰܪ ܕܰܣܠܶܩ ܠܐܝܠܳܢܳܐ ܠܐ ܐܶܣܬܢܶܩ ܥܰܠ ܚܫܰܚܬܳܐ ܐ̱ܢܳܫܳܝܬܳܐ: ܐܶܠܐ ܒܦܽܘܩܕܳܢܳܐ ܕܡܳܪܶܗ ܡܰܠܐܟ̈ܶܐ ܡܫܰܡܫܺܝܢ ܗܘܰܘ ܠܶܗ: ܗܳܢܳܐ ܕܫܳܛ ܠܡܶܐܟ̈ܠܳܬܳܐ ܐܳܦ ܠܛܳܥܽܘ̈ܡܶܐ ܐܰܪ̈ܥܳܢܳܝܶܐ: ܘܡܶܐܟܽܘܠܬܳܐ ܒܝܰܕ ܡܰܠܐܟ̈ܶܐ ܡ̣ܶܢ ܡܳܪܶܗ ܡܶܫܬܰܕܪܳܐ ܗܘܳܬ ܠܶܗ: ܗܳܢܳܐ ܕܰܙܟܳܐ ܠܫܶܢܬܳܐ ܘܰܪܚܺܝܡ ܠܥܺܝܪܽܘܬܳܐ: ܗܳܢܳܐ ܕܠܐ ܝܺܬܶܒ ܥܰܠ ܐܰܪܥܳܐ ܟܽܠܶܗ ܢܽܘܓܪܳܐ ܗܰܘ ܕܰܗܘܳܐ ܥܰܠ ܐܺܝܠܳܢܳܐ: ܗܳܢܳܐ ܕܰܒܝܰܕ ܪܦܳܦ ܥܰܝܢܳܐ ܚܰܛܦܶܗ ܪܽܘܚܳܐ ܩܰܕܺܝܫܳܐ ܡ̣ܶܢ ܛܽܘܪܳܐ ܕܰܠܬܰܚܬ ܡ̣ܶܢ ܣܶܢܛܪܽܘܣ: ܘܠܰܡܕܺܝܢܰܬ݀ ܣܳܗ̈ܕܶܐ ܡܺܝܦܰܪܩܰܛ ܐܰܝܟܳܐ ܕܺܐܝܬܰܘܗܝ ܗܘܳܐ ܡܰܥܡܪܶܗ ܐܰܝܬܝܶܗ: ܗܳܢܳܐ ܕܰܥܒܰܪ ܠܟܽܠܗܽܘܢ ܝܺܠܺܝ̈ܕܰܝ ܒܶܣܪܳܐ ܒܝܰܕ ܡܰܥܙܺܝܢܽܘܬܶܗ: ܘܒܶܟܝܳܐ ܘܬܶܢܚ̈ܳܬܳܐ ܕܥܰܠ ܐܰܦ̈ܰܝ ܚܛܳܗܰܘ̈ܗܝ ܕܥܳܠܡܳܐ: ܗܳܢܳܐ ܕܰܛܥܳܐ ܠܒܶܣܬܪܶܗ ܘܶܐܫܬܰܘܫܰܛ ܠܰܩܕܳܡܰܘܗܝ ܒܰܡܝܰܬܪ̈ܳܬܳܐ: ܘܟܽܠܫܳܥ ܒܡܳܪܶܗ ܗܳܪܶܓ ܗܘܳܐ ܘܥܰܠ ܗ̇ܳܝ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܠܘܳܬܶܗ ܡܰܙܥܩܺܝܢܰܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ: ܐܰܬܠܺܝܛܳܐ ܕܶܐܬܚܰܙܰܩܬ ܒܚܰܝܠܶܗ ܕܰܨܠܺܝܒܳܐ ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ: ܕܰܒܬܰܝܡܢܳܐ ܐܶܬܥܰܢܘܺܝܬ ܒܝܰܕ ܚܰܒܪܽܘܬܳܐ ܕܦܶܛܪܽܘܣ ܘܕܽܘܡܰܛ ܘܢܽܘܚ ܘܡܰܪܝܳܗܒ ܐ̱ܢܳܫ̈ܳܐ ܟܺܐܢ̈ܶܐ ܘܙܰܕܺܝ̈ܩܶܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ: ܕܰܓܡܺܝܪܳܐܝ̣ܬ ܐܰܗܦܶܟܬ ܐܰܦܰܝ̈ܟ ܡ̣ܶܢ ܥܳܠܡܳܐ ܗܳܢܳܐ ܡܶܬܚܰܒܠܳܢܳܐ: ܘܰܠܗܰܘ ܥܳܠܡܳܐ ܕܛܽܘܒܰܘ̈ܗܝ ܠܐ ܦܳܛܪܺܝܢ ܚܳܐܰܪ ܗܘܰܝܬ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ ܕܕܽܘܟܪܳܢܳܟ ܗܳܐ ܡܶܬܝܰܩܰܪ ܒܰܝܢܳܬ ܟܪ̈ܽܘܒܶܐ ܘܰܣܪ̈ܳܦܶܐ: ܘܒܰܒܢܰܝ̈ܢܳܫܳܐ ܥܰܠ ܐܰܪܥܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ: ܕܰܗܘܰܝܬ ܒܚܰܝܰܝ̈ܟ ܠܡܺܐܢܳܐ ܘܒܶܝܬ ܓܰܘܣܳܐ ܠܰܟܪ̈ܺܝܗܶܐ ܘܰܐܠܺܝ̈ܨܶܐ: ܘܗܳܐ ܝܰܘܡܳܢܳܐ ܦܰܓܪܳܟ ܩܰܕܺܝܫܳܐ ܡܰܒܰܥ ܥܽܘܕܪ̈ܳܢܶܐ ܠܟܽܠܡܰܢ ܕܒܶܗ ܛܳܦܶܣ ܒܗܰܝܡܳܢܽܘܬܳܐ ܕܰܫܪܳܪܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ ܕܘܺܝܠܐ ܡܰܠܟܳܝܬܳܐ ܘܪܽܘܚܳܢܳܝܬܳܐ ܗܳܐ ܡܥܰܛܶܦ ܐܰܢ̱ܬ ܘܡܰܠܟܽܘܬܳܐ ܥܰܠ ܕܟܽܠܗܽܘܢ ܠܒܽܘ̈ܫܶܐ ܐܰܝܟ ܙܶܒܠܐ ܚܫܺܝܒܺܝܢ ܗܘܰܘ ܠܳܟ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ ܕܙܳܚܘ ܡܰܠܐܟ̈ܶܐ ܘܬܶܓ̈ܡܶܐ ܫܡܰܝ̈ܳܢܶܐ ܘܙܰܝܚܽܘܗܝ ܠܢܰܦܫܳܟ ܙܗܺܝܬܳܐ ܘܩܰܕܺܝܫܬܳܐ ܒܝܽܘܡ ܥܽܘܢܕܳܢܳܟ ܡܠܐܷ ܬܶܗܪܳܐ: ܘܰܩܕܳܡ ܬܪܽܘܢܳܘܣ ܕܰܐܠܳܗܽܘܬܳܐ ܒܰܓܠܐܷ ܐܰܦ̈ܶܐ ܐܰܩܺܝܡܽܘܗ̇: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ ܕܰܚܠܺܝܨܳܐ ܐܶܬܚܙܰܝܬ ܠܽܘܩܒܰܠ ܒܺܝܫܳܐ ܡܳܪܽܘܕܳܐ: ܘܠܰܦܠܰܓܳܐ ܕܺܝܠܶܗ ܐܰܒܗܶܬܬ ܘܒܰܙܰܚܬ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ ܕܛܽܘܒܳܐ ܝܰܗܒܘ ܠܳܟ ܟܽܠܗܽܘܢ ܒܢ̈ܰܝ ܐܳܕܳܡ ܕܣܰܓܺܝ ܐܶܬܓܡܰܪܬ ܒܰܡܝܰܬܪܽܘܬܳܐ ܐܠܰܗܳܝܬܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ: ܕܝܶܫܽܘܥ ܘܦܳܠܳܓ ܐܰܚܘ̈ܳܬܳܟ ܗ̇ܳܢܶܝܢ ܕܡ̣ܶܢ ܐܶܣܟܺܝܡܳܐ ܢܶܩܒܬܳܢܳܝܳܐ: ܠܐܣܟܺܝܡܳܐ ܓܰܒܪܳܢܳܝܳܐ ܐܶܫܬܰܚ̈ܠܰܦܝ: ܒܝܰܕ ܚܽܘܒܳܟ ܘܠܽܘܒܳܒܳܐ ܗ̇ܰܘ ܕܰܡܛܳܟ: ܥܕܰܡܳܐ ܠܰܡܫܽܘܚܬܳܟ ܡܳܛܝ̈: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ: ܕܟܰܪܟܳܐ ܕܶܐܬܚܙܺܝ ܠܐܚܘ̈ܳܬܳܟ ܡܶܛܽܠܳܬܳܟ ܐܶܬܟܬܶܒ ܘܰܩܪܳܝܗܝ ܡܰܠܐܟܳܐ ܘܦܰܩܶܕ ܐܶܢܶܝܢ ܕܢܶܗܘ̈ܝܳܢ ܝܰܨܺܝ̈ܦܳܢ ܒܬܶܫܡܫܬܳܟ: ܘܠܐ ܢܰܪ̈ܚܩܳܢ ܡ̣ܶܢ ܨܶܝܕܰܝܟ ܐܶܠܐ ܒܨܶܒܝܳܢܳܟ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ ܕܟܰܕ ܒܛܽܘ̈ܒܶܐ ܕܶܐܘܢܓܶܠܝܽܘܢ ܐܶܬܓܡܰܪܬ ܘܶܐܫܬܰܡܠܺܝܬ ܐܰܝܟ ܡܳܐ ܕܰܠܥܺܝܙ ܒܰܣܒܰܪܬܳܐ ܡܰܚܝܳܢܺܝܬܳܐ ܕܶܐܡܰܪܬ: ܕܛܽܘܒܰܘܗܝ ܠܥܰܒܕܳܐ ܕܢܶܫܬܰܒܰܚ ܫܡܳܐ ܕܡܳܪܶܗ ܡܶܛܽܠܳܬܶܗ: ܘܟܰܕ ܥܰܡܗܽܘܢ ܕܛܽܘ̈ܒܶܐ ܫܰܠܡ̈ܶܐ ܠܪܰܒܽܘܬܳܟ ܡܰܘܫܛܺܝܢܰܢ ܟܰܕ ܐܳܡܪܺܝܢܰܢ: ܫܠܳܡܠܳܟ ܡܳܪܝ ܩܰܘܡܶܐ ܕܰܠܪܗܽܘܡܺܝ ܡܕܺܝܢ̱ܬܳܐ ܐܶܙܰܠܬ: ܘܡ̣ܶܢ ܫܟܺܝ̈ܢܳܬܳܐ ܩܰܕܺܝ̈ܫܳܬܳܐ ܕܦܶܛܪܽܘܣ ܘܦܰܘܠܳܘܣ ܐܶܬܒܰܪܰܟܬ: ܘܩܽܘܪܒܳܢܳܐ ܡ̣ܶܢ ܡܰܕܒܚܳܐ ܕܺܝܠܗܽܘܢ ܢܣܰܒܬ: ܘܠܐܚ̈ܘܳܬܳܟ ܬܰܡܳܢ ܐܶܬܚܙܰܝܬ ܘܥܰܡܗܽܘܢ ܡܰܠܶܠܬ: ܫܠܳܡܠܳܟ ܢܰܨܺܝܚܳܐ ܡܳܪܝ ܩܰܘܡܶܐ: ܕܡ̣ܶܢ ܪܗܽܘܡܺܝ ܠܐܘܪܫܠܶܡ ܕܶܝܢ ܐܶܬܡܰܢܰܥܬ: ܘܰܒܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܕܕܰܝܰܪ ܒܗܶܝܢ ܡܳܪܰܢ ܕܪܰܟܬ: ܘܰܩܕܳܡ ܩܰܒܪܳܐ ܩܰܕܺܝܫܳܐ ܨܰܠܺܝܬ: ܘܰܒܚܰܕ ܣܰܘܩܳܐ ܒܰܡܛܰܠܬܳܟ ܐܶܬܬܣܺܝܡܬ: ܫܠܳܡܠܳܟ ܢܰܨܺܝܚܳܐ ܡܳܪܝ ܩܰܘܡܶܐ: ܕܢܽܘܗܪܳܐ ܐܠܰܗܳܝܳܐ ܘܗܶܪ̈ܽܘܡܶܐ ܒܰܣܺܝ̈ܡܰܝ ܪܺܝܚܳܐ ܐܶܬܡܰܠܝܰܬ݀ ܡܛܰܠܬܳܟ ܒܝܰܘܡܳܐ ܕܥܽܘܢܕܳܢܳܟ: ܫܠܳܡܠܳܟ ܢܰܨܺܝܚܳܐ ܡܳܪܝ ܩܰܘܡܶܐ ܕܰܣܘܰܚܘ ܡܰܠܐܟ̈ܶܐ ܠܐܘܪܰܥ ܢܰܦܫܳܟ ܩܰܕܺܝܫܬܳܐ: ܟܰܕ ܒܶܐܣ̈ܛܠܐ ܚܶܘܳܪ̈ܳܬܳܐ ܡ̣ܶܢ ܚܰܕ ܠܚܰܕ ܡܩܰܒܠܺܝܢ ܗܘܰܘ ܠܳܗ̇: ܫܠܳܡܠܳܟ ܩܰܕܺܝܫܳܐ ܡܳܪܝ ܩܰܘܡܶܐ ܕܥܰܠ ܐܺܝܠܳܢܳܐ ܩܳܡܬ: ܟܰܕ ܒܚܰܝ̈ܶܐ ܕܗܳܪܟܳܐ ܡܕܰܝܰܪ ܗܘܰܝܬ: ܐܳܦ ܒܫܽܘܢܳܝܳܟ ܒܢܽܘܗܪܳܐ ܓܰܐܝܳܐ ܡ̣ܶܢ ܝܰܡܺܝܢ ܐܠܰܗܳܐ ܐܰܒܳܐ ܗܳܐ ܡܶܬܒܰܣܰܡ ܐܰܢ̱ܬ: ܫܠܳܡܠܳܟ ܢܰܨܺܝܚܳܐ ܡܳܪܝ ܩܰܘܡܶܐ: ܕܦܰܓܪܳܟ ܩܰܕܺܝܫܳܐ ܠܐ ܐܶܬܚܰܒܰܠ ܐܰܝܟ ܫܰܪܟܳܐ ܕܡܳܝܽܘ̈ܬܶܐ: ܐܶܠܐ ܩܰܝܳܡ ܦܰܓܪܳܟ ܒܳܬܰܪ ܡܰܘܬܳܟ ܐܰܝܟ ܕܰܒܚܰܝܰܝ̈ܟ: ܫܠܳܡܠܳܟ ܩܰܕܺܝܫܳܐ ܡܳܪܝ ܩܰܘܡܶܐ ܕܨܰܠܡܳܐ ܠܐ ܡܶܬܢܰܦܠܳܢܳܐ ܥܒܺܝܕ ܐܰܢ̱ܬ ܒܚܰܝܠܐ ܐܠܰܗܳܝܳܐ ܗ̇ܰܘ ܕܫܳܪܶܐ ܒܳܟ: ܫܠܳܡܠܳܟ ܢܰܨܺܝܚܳܐ ܡܳܪܝ ܩܰܘܡܶܐ: ܕܰܒܩܰܘܡܳܟ ܬܗܰܪܢܰܢ: ܘܰܒܗܳܢܳܐ ܝܰܘܡܳܐ ܕܥܽܘܢܕܳܢܳܟ ܬܳܗܪܺܝܢܰܢ ܘܰܒܗܳܢܳܐ ܩܰܘܡܳܟ ܕܗܳܫܳܐ ܕܒܳܬܰܪ ܡܰܘܬܳܟ ܠܳܟ ܛܽܘܒܳܐ ܝܳܗܒܺܝܢܰܢ: ܫܠܳܡܠܳܟ ܩܰܕܺܝܫܳܐ ܡܳܪܝ ܩܰܘܡܶܐ ܕܪܺܝܚܳܐ ܕܥܰܡܠܰܝ̈ܟ ܒܣܶܡ ܠܡܳܪܳܟ ܐܰܝܟ ܝܰܩ̈ܕܶܐ ܫܰܠܡ̈ܶܐ: ܫܠܳܡܠܳܟ ܡܳܪܝ ܩܰܘܡܶܐ ܫܳܘܶܐ ܠܰܫܠܳܡܳܐ ܕܡܳܪܶܗ ܕܟܽܠܗܽܘܢ ܛܶܟ̈ܣܶܐ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ ܫܠܳܡܳܐ ܝܰܗܒܘ ܠܳܟ ܘܣܶܓ̈ܕܳܬܳܐ ܩܰܪܶܒܘ ܠܳܟ ܒܝܽܘܡ ܥܽܘܢܕܳܢܳܟ: ܫܠܳܡܠܳܟ ܩܰܕܺܝܫܳܐ ܡܳܪܝ ܩܰܘܡܶܐ ܬܳܓܳܐ ܡܰܕܗܒܳܐ ܪܨܺܝܦ ܒܡܰܪ̈ܓܳܢܝܳܬܳܐ ܘܛܰܒ̈ܥܶܐ ܛܳܒ̈ܶܐ ܕܰܒܪܺܝܫܳܗ̇ ܕܒܰܪܬ ܐܰܪ̈ܡܳܝܶܐ ܣܕܺܝܪ ܘܣܺܝܡ: ܟܰܕ ܡܰܒܪܶܩ ܒܫܽܘܒܚܳܐ ܐܠܰܗܳܝܳܐ: ܘܗܳܫܳܐ ܒܥܺܝ ܚܠܳܦܰܝܢ ܘܰܐܦܺܝܣ ܠܡܳܪܳܟ: ܕܰܢܫܰܟܶܢ ܠܰܢ ܒܰܚܢܳܢܶܗ: ܣܽܘܝܳܥܳܐ ܠܰܡܚܺܝܠܽܘܬܰܢ: ܠܽܘܒܳܒܳܐ ܠܰܡܛܰܪܦܽܘܬܰܢ: ܓܰܢ̱ܒܳܪܽܘܬ ܚܰܝܠܐ ܠܰܬܒܺܝܪܽܘܬܰܢ: ܣܽܘܡܳܟ ܠܶܒܳܐ ܠܡܶܣܟܺܢܽܘܬܰܢ: ܝܰܒܶܠ ܘܫܰܟܶܢ ܠܰܢ ܚܽܘܣܳܝ ܚܰܘ̈ܒܶܐ ܘܰܚܛܳܗ̈ܶܐ: ܫܰܝܢܳܐ ܘܰܫܠܳܡܳܐ ܠܐܘܡܬܳܟ ܘܡܰܪܥܺܝܬܳܟ: ܘܰܥܶܕ ܠܰܢ ܠܰܓܢܽܘܢܳܟ: ܥܒܶܕ ܠܰܢ ܒܢ̈ܰܝ ܝܳܪܬܽܘܬܳܟ: ܚܽܘܢ ܠܰܢ ܒܰܚܢܳܢܳܟ: ܛܰܝܶܒ ܠܰܢ ܒܰܚܠܽܘܠܐ ܕܥܰܡ ܩܰܕܺܝ̈ܫܰܝܟ: ܝܰܡܺܝܢܳܟ ܬܢܰܛܰܪ ܠܟܶܢܫܳܐ ܕܣܳܓܽܘ̈ܕܰܝܟ: ܐܰܢܺܝܚ ܐܶܢܽܘܢ ܠܥܰܢܺܝ̈ܕܰܝܢ ܕܰܫܟܶܒܘ ܥܰܠ ܣܰܒܪܳܟ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝܳܐ ܐܠܰܗܳܐ ܒܒܳܥ̈ܘܳܬܶܗ ܕܰܡܢܺܝܚܳܢܳܟ ܓܰܒܝܳܐ ܡܳܪܝ ܩܰܘܡܶܐ: ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡ ܪܰܒܽܘܬܳܟ ܡܩܰܪܒܺܝܢܰܢ: ܒܗܳܢܳܐ ܝܰܘܡܳܐ ܕܕܽܘܟܪܳܢܶܗ ܘܶܐܬܪܰܥܳܐ ܠܰܢ ܒܶܗ: ܘܫܰܟܶܢ ܚܽܘܠܡܳܢܳܐ ܠܰܟܪ̈ܺܝܗܶܐ: ܢܦܺܐܫܳܐ ܠܐܠܺܝ̈ܨܶܐ: ܒܽܘܝܳܐܳܐ ܠܰܡ̈ܥܳܩܶܐ: ܫܽܘܒܩܳܢܳܐ ܠܚܰܛܳܝ̈ܶܐ: ܢܽܘܛܳܪܳܐ ܠܥܺܕ̈ܳܬܳܐ: ܪܽܘܡܪܳܡܳܐ ܠܕܰܝܪ̈ܳܬܳܐ: ܢܝܳܚܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܗܳܫܳܐ܀

 

 

 

ܚܘܬܡܐ

 

 

 

ܒܓܽܘ̈ܕܶܐ ܕܟܺܐܢ̈ܶܐ ܘܙܰܕܺܝ̈ܩܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ: ܢܛܺܝܪ ܦܽܘܪܥܳܢܳܟ ܓܰܒܝܳܐ ܡܳܪܝ ܩܰܘܡܶܐ ܗܘܺܝ ܗܳܟܺܝܠ ܒܰܥܳܝܳܐ ܘܰܡܦܺܝܣܳܢܳܐ ܚܠܳܦ ܟܳܗ̈ܢܶܐ ܘܰܡܫܰܡ̈ܫܳܢܶܐ: ܡܩܰܠܣܳܢܰܝ̈ܟ ܕܢܶܫܬܘܶܐ ܟܽܠܰܢ ܠܪ̈ܰܚܡܶܐ ܘܰܚܢܳܢܳܐ ܕܡܳܪܳܟ: ܘܢܰܣܶܩ ܫܽܘܒܚܳܐ ܠܗܰܘ ܕܰܓܒܳܟ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܐܺܝܬܝܳܐ ܡܬܽܘܡܳܝܳܐ ܕܰܓܒܳܐ ܠܶܗ ܟܺܐܢ̈ܶܐ ܐܳܦ ܙܰܕܺܝ̈ܩܶܐ ܒܕܳܪ̈ܺܝܢ ܕܳܪ̈ܺܝܢ: ܕܰܢܫܰܒܚܽܘܢܳܝܗܝ ܘܰܕܢܶܗܘܽܘܢ ܩܳܝ̈ܡܰܝ ܒܰܐܦ̈ܶܐ ܘܣܳܝ̈ܓܰܝ ܬܽܘܪ̈ܥܳܬܳܐ: ܘܰܚܠܳܦ ܚܰܛܳܝ̈ܶܐ ܘܡܰܣܟ̈ܠܳܢܶܐ ܢܦܺܝܣܽܘܢܳܝܗܝ: ܕܚܰܕ ܡܶܢܗܽܘܢ ܐܺܝܬܰܘܗܝ ܓܰܒܝܳܐ ܡܳܪܝ ܩܰܘܡܶܐ: ܕܝܰܘܡܳܢܳܐ ܥܺܐܕܶܗ ܒܟܶܢܫܰܢ ܡܶܙܕܰܝܰܚ: ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܠܶܗ ܡܩܰܠܣܺܝܢܰܢ: ܐܳܦ ܠܡܳܪܝܳܐ ܗ̇ܰܘ ܕܰܓܒܳܝܗܝ ܫܽܘܒܚܳܐ ܡܰܣܩܺܝܢܰܢ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܡ̣ܶܢ ܩܽܘܠܳܣܰܘ̈ܗܝ ܕܓܰܒܝܳܐ ܡܳܪܝ ܩܰܘܡܶܐ ܡܰܡܚܠܺܝܢܰܢ: ܘܰܒܪܰܒܽܘܬ ܬܡܺܝ̈ܗܳܬܶܗ ܘܰܡܥܰܠܝܽܘܬ ܐܰܓܽܘܢܶܗ ܬܳܗܪܺܝܢܰܢ ܘܡܶܬܕܰܡܪܺܝܢܰܢ: ܗܳܢܳܐ ܕܡܶܛܽܠ ܩܰܘܡܶܗ ܐܰܡܺܝܢܳܐ ܕܥܰܠ ܐܺܝܠܳܢܳܐ ܢܽܘܓܪܳܐ ܕܰܫܢܰܘ̈ܗܝ ܐܶܬܟܰܢܺܝ ܫܡܶܗ ܡܳܪܝ ܩܰܘܡܶܐ: ܟܰܕ ܫܶܡܥܽܘܢ ܐܺܝܬܰܘܗܝ ܗܘܳܐ ܫܡܶܗ ܡ̣ܶܢ ܩܕܺܝܡ: ܗܳܢܳܐ ܕܶܐܬܕܰܡܺܝ ܒܩܰܘܡܶܗ ܠܡܰܠܐܟ̈ܰܝ ܢܽܘܪܳܐ: ܟܰܕ ܗܶܢܽܘܢ ܐܺܝܬܰܝܗܽܘܢ ܪ̈ܽܘܚܳܢܳܝܶܐ: ܘܗܳܢܳܐ ܡ̇ܰܢ ܓܶܢܣܳܐ ܕܥܰܦܪ̈ܳܢܶܐ: ܗܳܢܳܐ ܕܶܐܬܓܒܺܝ ܡ̣ܶܢ ܟܰܪܣܳܐ ܕܶܐܡܶܗ ܐܰܝܟ ܐܶܪܰܡܝܳܐ ܘܰܫܡܽܘܐܶܝܠ: ܘܰܐܝܟ ܝܽܘܚܰܢܳܢ ܡܰܥܡܕܳܢܳܐ: ܗܳܢܳܐ ܕܰܓܡܺܝܪܳܐܝ̣ܬ ܐܰܗܦܶܟ ܐܰܦܰܘ̈ܗܝ ܡ̣ܶܢ ܥܳܠܡܳܐ ܗܳܢܳܐ: ܘܒܰܣܰܪ ܥܰܠ ܟܽܠܗܶܝܢ ܪ̈ܓܺܝܓܳܬܶܗ ܘܰܒܚܽܘܒܳܐ ܕܡܳܪܶܗ ܐܶܬܓܰܘܙܰܠ ܡܫܰܡܠܝܳܐܝ̣ܬ: ܗܳܢܳܐ ܕܶܐܬܚܰܙܰܩ ܚܰܝܠܐ ܘܓܰܢ̱ܒܳܪܽܘܬܳܐ: ܘܩܳܡ ܙܪܺܝܙܳܐܝ̣ܬ ܒܰܐܓܽܘܢܳܐ ܕܠܽܘܩܒܰܠ ܒܺܝܫܳܐ ܘܕܳܫ ܐܶܢܽܘܢ ܠܦܰܚܰܘ̈ܗܝ: ܘܦܰܣܶܩ ܐܶܢܶܝܢ ܠܰܡܨܺܝ̈ܕܳܬܶܗ: ܗܳܢܳܐ ܕܰܙܩܰܦ ܢܰܦܫܶܗ ܠܥܳܠܡܳܐ ܐܳܦ ܠܰܪ̈ܓܺܝܓܳܬܶܗ: ܗܳܢܳܐ ܕܰܪܘܺܝ ܒܪܶܚܡܬܶܗ ܕܡܳܪܶܗ ܕܺܝܠܶܗ: ܘܰܛܥܳܐ ܟܝܳܢܶܗ: ܘܥܰܙܺܝ ܒܰܡܣܰܝܒܪܳܢܽܘܬܳܐ ܓܡܺܝܪܬܳܐ ܠܽܘܩܒܰܠ ܟܽܠܗܽܘܢ ܚܰܫ̈ܶܐ ܕܰܚܛܺܝܬܳܐ: ܗܳܢܳܐ ܦܳܥܠܐ ܟܰܫܺܝܪܳܐ ܕܰܦܠܰܚ ܒܟܰܪܡܳܐ ܕܡܳܪܶܗ ܡ̣ܶܢ ܨܰܦܪܳܐ ܥܕܰܡܳܐ ܠܪܰܡܫܳܐ: ܘܩܳܡ ܒܪܺܝܫܳܐ ܕܟܽܠܗܶܝܢ ܡܝܰܬܪ̈ܳܬܳܐ: ܗܳܢܳܐ ܕܰܐܩܺܝܡ ܗ̣ܽܘ ܠܶܗ ܩܳܝܶܡܬܳܐ ܠܘܳܬ ܕܽܘܡܝܳܐ ܕܫܰܦܺܝܪ̈ܳܬܳܐ: ܗܳܢܳܐ ܕܰܒܚܰܝܰܘ̈ܗܝ ܘܒܳܬܰܪ ܥܽܘܢܕܳܢܶܗ: ܒܶܝܬ ܨܰܘܒܳܐ ܕܥܽܘܕܪ̈ܳܢܶܐ ܓܡܰܪܬ ܛܰܝܒܽܘܬܳܐ ܐܠܰܗܳܝܬܳܐ: ܗܳܢܳܐ ܕܰܗܘܳܐ ܪܳܕܽܘܦܳܐ ܕܫܺܐܕ̈ܶܐ ܘܰܕܪ̈ܽܘܚܶܐ ܛܰܢ̈ܦܳܬܳܐ ܒܚܰܝܠܶܗ ܕܰܡܫܺܝܚܳܐ: ܗܳܢܳܐ ܕܰܗܘܳܐ ܡܫܰܟܢܳܢܳܐ ܕܚܽܘܠܡܳܢ̈ܶܐ ܘܕܳܐܣ̈ܘܳܬܳܐ: ܠܟܽܠܗܽܘܢ ܐܰܝܠܶܝܢ ܕܒܶܗ ܡܶܬܓܰܘܣܺܝܢ: ܡܳܪܝ ܩܰܘܡܶܐ ܝܰܪܕܳܐ ܡܠܐܷ ܥܽܘܕܪ̈ܳܢܶܐ: ܡܳܪܝ ܩܰܘܡܶܐ ܫܶܦܥܳܐ ܕܛܳܒ̈ܳܬܳܐ: ܡܳܪܝ ܩܰܘܡܶܐ ܘܺܝܠܐ ܦܪܺܝܣܰܬ݀ ܥܰܠ ܐܺܝܠܳܢܳܐ: ܡܳܪܝ ܩܰܘܡܶܐ ܥܰܡܽܘܕܳܐ ܕܰܨܠܺܝܒ ܘܡܰܬܗܰܪ ܠܒܶܪ̈ܝܳܬܳܐ: ܡܳܪܝ ܩܰܘܡܶܐ ܚܰܙܽܘܪܳܐ ܫܰܦܺܝܪ ܫܺܝܽܘܬܳܐ: ܡܳܪܝ ܩܰܘܡܶܐ ܛܰܒܥܳܐ ܘܝܽܘܩܢܳܐ ܘܬܰܦܢܟܳܐ ܕܪܽܘܚܳܢܽܘܬܳܐ: ܡܳܪܝ ܩܰܘܡܶܐ ܕܪܳܥܳܐ ܕܬܰܩܺܝܦܽܘܬܳܐ: ܡܳܪܝ ܩܰܘܡܶܐ ܕܰܗܒܳܐ ܗܕܺܝܪ ܒܡܰܙܠܓܽܘܬܳܐ: ܡܳܪܝ ܩܰܘܡܶܐ ܙܠܰܦܬܳܐ ܚܠܐܷ ܪܺܝܚܳܢܽܘܬܳܐ: ܡܳܪܝ ܩܰܘܡܶܐ ܡܶܣܟܺܢܳܐ ܒܪܽܘܚ ܕܕܺܝܠܳܟ ܗ̣ܺܝ ܡܰܠܟܽܘܬܳܐ: ܡܳܪܝ ܩܰܘܡܶܐ ܘܰܥܕܳܐ ܕܟܽܠܗܶܝܢ ܡܝܰܬܪ̈ܳܬܳܐ: ܫܠܳܡܠܳܟ ܡܳܪܝ ܩܰܘܡܶܐ ܕܬܶܗܪܳܐ ܗ̱ܝ ܚܙܳܬܳܟ ܠܰܕܡܶܬܒܰܩܶܐ ܒܳܟ: ܕܠܰܘ ܐܰܝܟ ܡܳܝܽܘ̈ܬܶܐ ܐܶܬܚܰܒܰܠ ܘܶܐܫܬܪܺܝ ܦܰܓܪܳܐ ܕܺܝܠܳܟ: ܫܠܳܡܠܳܟ ܡܳܪܝ ܩܰܘܡܶܐ ܕܠܐ ܐܶܬܩܒܰܪܬ ܒܰܐܪܥܳܐ ܐܰܝܟ ܥܰܦܪ̈ܳܢܶܐ: ܐܶܠܐ ܗܳܐ ܩܰܝܳܡ ܦܰܓܪܳܟ ܐܰܝܟ ܕܰܒܚܰܝܰܝ̈ܟ: ܫܠܳܡܠܳܟ ܡܳܪܝ ܩܰܘܡܶܐ ܫܪܳܓܳܐ ܢܰܗܺܝܪܳܐ ܕܠܰܘ ܬܚܶܝܬ ܣܰܬܳܐ ܒܩܰܒܪܳܐ ܐܶܬܬܣܺܝܡ: ܐܶܠܐ ܥܰܠ ܡܢܳܪܬܳܐ ܐܰܘܟܺܝܬ ܥܰܠ ܐܺܝܠܳܢܳܐ ܕܰܨܠܺܝܒܽܘܬܳܐ: ܘܡܰܢܗܰܪ ܠܐܝܠܶܝܢ ܕܰܒܒܰܝܬܳܐ ܐܶܢܽܘܢ: ܗܳܢܰܘ ܕܶܝܢ ܠܐܝܠܶܝܢ ܕܰܒܥܳܠܡܳܐ ܗܳܢܳܐ ܐܺܝܬܰܝܗܽܘܢ: ܫܠܳܡܠܳܟ ܡܳܪܝ ܩܰܘܡܶܐ ܫܽܘܪܳܐ ܘܒܶܝܬ ܓܰܘܣܳܐ ܕܰܡܗܰܝ̈ܡܢܶܐ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܨܠܺܝܒܳܐ ܕܥܰܠ ܐܺܝܠܳܢܳܐ ܐܶܙܕܩܶܦ: ܘܟܰܪܟܳܐ ܕܰܩܪܳܐ ܡܰܠܐܟܳܐ ܩܕܳܡ ܐܰܚܘ̈ܳܬܳܟ ܡܛܰܠܬܳܟ ܐܶܬܟܬܶܒ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܙܰܟܳܝܳܐ ܕܶܐܫܬܰܦܰܥ ܣܳܛܳܢܳܐ ܩܕܳܡܰܝܟ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܕܣܳܛܳܢܳܐ ܙܟܰܝܬ ܐܳܦ ܚܰܝܶܒܬ ܠܨܶܢ̈ܥܳܬܶܗ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܕܕܰܝܪܳܐ ܐܶܬܒܰܢܝܰܬ݀ ܥܰܠ ܫܡܳܟ ܨܶܝܕ ܡܛܰܠܬܳܟ ܒܳܬܰܪ  ܡܰܘܬܳܟ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܙܰܟܳܝܳܐ ܕܬܶܫܥܺܝܢ ܫܢܺܝ̈ܢ ܐܶܬܟܰܬܰܫܬ ܒܰܐܓܽܘܢܳܐ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܒܥܶܠܕܰܪܳܐ ܙܟܰܝܬ ܘܢܰܨܰܚܬ: ܘܺܝܪܶܬܬ ܡܰܠܟܽܘܬܳܐ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܪܰܒܒܰܝܬܳܐ ܕܡܳܪܶܗ ܕܥܰܠ ܓܰܙܳܐ ܫܡܰܝܳܢܳܐ ܐܶܬܗܰܝܡܰܢܬ: ܘܗܳܫܳܐ ܒܰܨܠܰܘ̈ܳܬܳܟ ܕܰܟܝ̈ܳܬܳܐ ܢܶܫܬܰܪܰܪ ܟܽܠܰܢ ܡ̣ܶܢ ܡܳܪܳܟ ܒܺܐܝܙܓܰܕܽܘܬܳܟ ܟܽܠ ܒܽܘܪ̈ܟܳܬܳܐ ܫܦܺܝ̈ܥܳܬܳܐ ܘܟܽܠ ܡܰܘܗ̈ܒܳܬܳܐ ܛܳܒ̈ܳܬܳܐ: ܥܺܕ̈ܳܬܰܢ ܢܶܬܗܰܕܪ̈ܳܢ: ܕܰܝܪ̈ܳܬܰܢ ܢܶܬܪܰܡܪ̈ܡܳܢ: ܥܺܐܕܰܝ̈ܢ ܒܰܦܨܺܝܚܽܘܬܳܐ ܢܶܫܬܰܡܠܽܘܢ: ܩܽܘܪ̈ܒܳܢܰܝܢ ܒܰܫܡܰܝܳܐ ܢܶܬܩܰܒܠܽܘܢ: ܘܨܰܘܡܰܢ ܘܰܨܠܰܘ̈ܳܬܰܢ ܠܡܳܪܝܳܐ ܢܶܒܣܡܽܘܢ: ܘܚܰܘ̈ܒܰܝܢ ܘܰܚܛܳܗܰܝ̈ܢ ܢܶܬܥܰܛܝ̈ܳܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܕܒܰܬܪܺܝܨܽܘܬ ܫܽܘܒܚܳܐ ܡ̣ܶܢ ܚܰܝ̈ܶܐ ܗܳܠܶܝܢ ܫܰܢܺܝܘ ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ ܢܶܬܬܢܺܝܚܽܘܢ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܰܡܫܺܝܚܳܐ ܡܰܘܪܒܳܢܳܟ ܘܰܡܢܰܨܚܳܢܳܟ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܡܳܪܝܳܐ ܐܠܰܗܳܐ ܒܝܰܕ ܒܳܥ̈ܘܳܬܶܗ ܕܓܰܒܝܳܟ ܡܳܪܝ ܩܰܘܡܶܐ: ܣܳܩܽܘܪ̈ܶܝܗ̇ ܕܥܺܕܬܳܟ ܢܶܬܕܰܚܩܽܘܢ: ܘܣܳܐܢܶܝ̈ܗ̇ ܢܶܒܗܬܽܘܢ: ܒܥܶܠܕ̈ܒܳܒܶܝܗ̇ ܩܕܳܡܶܝܗ̇ ܢܶܬܬܰܒܪܽܘܢ ܩܪ̈ܳܒܶܐ ܘܩܺܐܪ̈ܣܶܐ ܢܶܬܒܰܛܠܽܘܢ ܫܰܝܢܳܐ ܘܰܫܠܳܡܳܐ ܢܰܡܠܟܽܘܢ ܘܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܡܰܠܟܽܘܬܳܐ ܕܰܫܡܰܝܳܐ ܢܶܬܒܰܣܡܽܘܢ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܓܰܒܝܳܐ ܡܳܪܝ ܩܰܘܡܶܐ ܕܰܐܬܗܰܪ ܠܡܰܠܐܟ̈ܶܐ ܘܠܰܒܢܰܝ̈ܢܳܫܳܐ ܒܚܽܘܡܣܳܢܶܗ: ܠܗܰܘ ܙܩܺܝܦܳܐ ܕܡܶܛܽܠ ܦܽܘܪܩܳܢܰܢ: ܥܰܠ ܩܰܝܣܳܐ ܐܶܙܕܩܶܦ ܡ̣ܶܢ ܝܽܘ̈ܕܳܝܶܐ ܒܽܐܘܪܫܠܶܡ: ܕܒܶܗ ܚܳܪ ܘܶܐܬܒܰܩܺܝ ܗܳܢܳܐ ܓܰܒܝܳܐ ܬܠܺܝܬܳܝ ܛܽܘ̈ܒܶܐ ܡܳܪܝ ܩܰܘܡܶܐ: ܘܰܨܠܰܒ ܗ̣ܽܘ ܠܶܗ ܥܰܠ ܐܺܝܠܳܢܳܐ: ܘܶܐܣܰܪ ܐܺܝ̈ܕܰܘܗܝ ܘܪ̈ܶܓܠܰܘܗܝ ܒܓܰܘ ܐܺܝܠܳܢܳܐ ܟܰܕ ܡܶܬܕܰܡܶܐ ܒܡܳܪܶܗ: ܕܢܺܐܪܰܬ ܚܰܝ̈ܶܐ ܡܬܽܘ̈ܡܳܝܶܐ: ܐܰܝܟܰܢܳܐ ܕܒܰܨܠܰܘ̈ܳܬܶܗ ܢܶܬܚܰܣܶܐ ܚܢܰܢ ܘܥܰܢܺܝ̈ܕܰܝܢ: ܒܗܳܢܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ: ܝܶܫܽܘܥ ܡܫܺܝܚܳܐ ܦܳܪܽܘܩܶܗ ܕܥܳܠܡܳܐ ܕܒܰܣܒܰܪܬܳܟ ܦܳܪܽܘܩܳܝܬܳܐ ܐܰܟܪܶܙܬ ܘܶܐܡܰܪܬ: ܕܢܽܘܪܳܐ ܐܶܬܺܝܬ ܕܰܐܪܡܶܐ ܒܰܐܪܥܳܐ: ܘܨܳܒܶܐ ܐ̱ܢܳܐ ܐܠܶܘ ܡ̣ܶܢ ܟܰܕܽܘ ܚܶܒܰܬ݀: ܘܬܽܘܒ ܐܰܘܣܦܶܬ ܘܶܐܡܪܶܬ: ܕܟܽܠ ܕܡܰܘܒܶܕ ܢܰܦܫܶܗ ܡܶܛܽܠܳܬܝ ܢܶܫܟܚܺܝܗ̇: ܘܡ̣ܶܢ ܗܳܕܶܐ ܒܰܪܬ ܩܳܠܐ ܡܳܪܳܢܳܝܬܳܐ ܘܡܰܠܝܰܬ݀ ܚܰܝ̈ܶܐ ܢܽܘܪ ܪܶܚܡܬܳܟ ܐܶܬܢܰܒܪܫܰܬ݀ ܘܣܶܦܰܬ݀ ܒܠܶܒܶܗ ܕܥܰܒܕܳܟ ܡܳܪܝ ܩܰܘܡܶܐ: ܘܰܙܩܰܦ ܢܰܦܫܶܗ ܥܰܠ ܐܺܝܠܳܢܳܐ ܐܰܪܒܥܺܝܢ ܘܚܰܡܶܫ ܫܢܺܝ̈ܢ: ܐܰܝܟܰܢܳܐ ܕܢܶܫܟܚܺܝܗ̇ ܒܚܰܝ̈ܶܐ ܗ̇ܳܢܽܘܢ ܡܬܽܘ̈ܡܳܝܶܐ ܕܰܠܘܳܬܳܟ: ܗܳܢܳܐ ܕܰܒܢܶܕܪ̈ܶܐ ܐܶܬܺܝܗܶܒ ܠܐܒܳܗܰܘ̈ܗܝ ܥܶܩܳܪ̈ܶܐ ܐܰܝܟ ܪܰܒܳܐ ܒܰܢܒܺܝ̈ܶܐ ܫܡܽܘܐܶܝܠ: ܗܳܢܳܐ ܕܰܐܒܽܘܗܝ ܡ̣ܶܢ ܐܰܬܪܳܐ ܕܒܶܝܬ ܓܰܪ̈ܡܰܝ ܐܺܝܬܰܘܗܝ ܗܘܳܐ: ܡ̣ܶܢ ܩܪܺܝܬܳܐ ܕܰܫܡܳܗ̇ ܒܶܝܬ ܓ̈ܰܠܠܐ: ܘܶܐܡܶܗ ܡ̣ܶܢ ܡܕܺܝܢܰܬ݀ ܣܳܗ̈ܕܶܐ ܡܺܝܦܳܪܩܰܛ: ܗܳܢܳܐ ܕܺܐܝܬܰܘܗܝ ܗܘܳܐ ܫܡܶܗ ܡ̣ܶܢ ܩܕܺܝܡ ܫܶܡܥܽܘܢ: ܘܚܳܬܶܗ ܐܰܓܝܽܘܣܺܝܰܐ: ܘܥܰܠ ܕܰܢܩܶܦܘ ܠܐܢܳܫ̈ܳܐ ܩܰܕܺܝ̈ܫܶܐ ܫܰܚܠܶܦܘ ܫܡܳܗܰܝ̈ܗܽܘܢ ܐܰܝܟ ܕܠܐ ܢܶܬܝܰܕܥܽܘܢ: ܗܳܢܳܐ ܕܡ̣ܶܢ ܩܰܘܡܶܗ ܐܰܡܺܝܢܳܐ ܕܥܰܠ ܐܺܝܠܳܢܳܐ ܐܶܬܟܰܢܺܝ ܫܡܶܗ ܩܰܘܡܶܐ: ܘܰܕܚܳܬܶܗ ܦܳܠܳܓ: ܗܳܢܳܐ ܕܰܠܣܳܒܳܐ ܢܰܬܰܢܰܐܶܝܠ ܐܶܬܬܰܠܡܰܕ: ܘܰܠܛܽܘܪܳܐ ܕܚܶܣܢܳܐ ܕܩܰܪܺܝܒ ܠܡܺܝܦܳܪܩܰܛ ܨܝܕ ܐ̱ܢܳܫ̈ܳܐ ܩܰܕܺܝ̈ܫܶܐ ܐܰܣܶܩ ܐܶܢܽܘܢ: ܗܳܠܶܝܢ ܕܰܒܨܰܘ̈ܡܶܐ ܘܒܰܨܠܰܘ̈ܳܬܳܐ ܘܰܒܕܽܘܒܳܪ̈ܶܐ ܕܰܡܝܰܬܪܽܘܬܳܐ: ܡܶܬܥܰܢܘܶܝܢ ܗܘܰܘ: ܘܟܰܕ ܒܰܝܢܳܬ ܐ̱ܢܳܫ̈ܳܐ ܛܽܘܒ̈ܬܳܢܶܐ ܡܕܰܝܪܺܝܢ ܗܘܰܘ: ܡ̣ܶܢ ܗܳܪܟܳܐ ܠܐܬܪܳܐ ܕܬܰܝܡܢܳܐ ܐܰܫܩܶܠܘ: ܠܨܶܝܕ ܐ̱ܢܳܫ̈ܳܐ ܟܺܐܢ̈ܶܐ ܘܙܰܕܺܝ̈ܩܶܐ ܕܛܳܒ ܡܝܰܬܪܺܝܢ ܗܘܰܘ: ܘܰܒܕܽܘܟ̈ܝܳܬܳܐ ܨܰܕܝ̈ܳܬܳܐ ܝܳܬܒܺܝܢ ܗܘܰܘ: ܐܳܦ ܟܽܘܬܺܝ̈ܢܝܳܬܳܐ ܕܰܓܕܺܝ̈ܠܳܢ ܡ̣ܶܢ ܥܶܣܒܳܐ ܘܰܐܪܒܳܢܳܐ ܡܶܬܟܰܣܶܝܢ ܗܘܰܘ: ܕܡܶܢܗܽܘܢ ܦܶܛܪܽܘܣ ܘܡܰܪܝܳܗܒ ܘܢܽܘܚ ܘܕܽܘܡܰܛ ܡܶܬܝܰܕܥܺܝܢ ܗܘܰܘ: ܗ̇ܳܢܽܘܢ ܕܰܠܬܰܚܬ ܡ̣ܶܢ ܛܽܘܪܳܐ ܕܣܶܢܛܪܽܘܩ ܐܺܝܬܰܝܗܽܘܢ ܗܘܰܘ: ܒܪܶܓܠܬܳܐ ܕܡܶܬܩܰܪܝܳܐ ܢܳܫܽܘܒ ܡܕܰܝܠܺܝܢ ܗܘܰܘ: ܘܟܰܕ ܬܠܳܬܺܝܢ ܫܢܺܝ̈ܢ ܕܩܰܘܺܝܘ ܬܰܡܳܢ ܢܰܨܺܝܚܳܐ ܡܳܪܝ ܩܰܘܡܶܐ ܘܚܳܬܶܗ ܦܳܠܳܓ ܥܰܠ ܐܺܝܕܳܐ ܐ̱ܢܳܫܳܝܬܳܐ ܕܬܶܬܡܰܠܐܷ ܚܫܰܚܬܳܐ ܕܣܽܘܢܩܳܢܰܝ̈ܗܽܘܢ ܠܐ ܐܶܣܬܰܢܰܩܘ ܗܘܰܘ: ܐܶܠܐ ܡ̣ܶܢ ܒܛܺܝܠܽܘܬܳܐ ܐܠܰܗܳܝܬܳܐ ܚܰܝܰܝ̈ܗܽܘܢ ܡܶܬܦܰܪܢܣܺܝܢ ܗܘܰܘ: ܘܡܰܠܐܟ̈ܶܐ ܕܰܢܫܰܡܫܽܘܢ ܐܶܢܽܘܢ ܡ̣ܶܢ ܡܳܪܝܳܐ ܠܗܽܘܢ ܡܶܫܬܰܕܪܺܝܢ ܗܘܰܘ: ܘܡ̣ܶܢ ܦܰܪܕܰܝܣܳܐ ܡܶܐܟܽܘܠܬܳܐ ܠܗܽܘܢ ܡܰܝܬܶܝܢ ܗܘܰܘ: ܘܒܳܬܰܪ ܗܳܠܶܝܢ ܠܡܶܣܰܩ ܠܐܬܪܳܐ ܕܡܺܝܦܳܪܩܰܛ ܡ̣ܶܢ ܛܰܝܒܽܘܬܳܐ ܐܠܰܗܳܝܬܳܐ ܐܶܬܩܪܺܝܘ ܗܘܰܘ: ܕܢܶܗܘܽܘܢ ܡܶܠܚܳܐ ܛܰܥܡܳܢܺܝܬܳܐ ܕܰܡܒܰܣܡܳܐ ܠܥܳܡܽܘܪ̈ܰܘܗܝ ܕܦܰܟܺܝܗܺܝܢ ܗܘܰܘ: ܘܢܽܘܗܪܳܐ ܕܡܰܨܡܰܚ ܥܰܠ ܝܰܬܒܰܘ̈ܗܝ ܕܚܶܫܽܘ̈ܟܺܝܢ ܗܘܰܘ: ܘܟܰܕ ܠܡܶܣܰܩ ܐܶܬܥܰܬܰܕܘ ܗܘܰܘ: ܡܳܪܝ ܩܰܘܡܶܐ ܘܦܳܠܳܓ ܘܝܶܫܽܘܥ ܒܰܪ ܬܽܘܠܡܳܕܗܽܘܢ ܐܶܬܛܰܝܰܒܘ ܗܘܰܘ: ܘܒܰܪܦܳܦ ܥܰܝܢܳܐ ܨܶܝܕ ܡܛܰܠܬܶܗ ܕܰܐܒܳܐ ܓܰܒܪܽܘܢܳܐ ܐܶܬܡܰܛܝܺܘ ܗܘܰܘ: ܘܥܰܠ ܡܰܣܰܩܬܶܗ ܕܠܐܝܠܳܢܳܐ ܗ̣ܽܘ ܓܰܒܝܳܐ ܡܳܪܝ ܩܰܘܡܶܐ ܘܰܐܚܰܘ̈ܗܝ ܡܶܬܚܰܫܒܺܝܢ ܗܘܰܘ: ܘܕܰܐܝܢܳܐ ܡܶܢܗܽܘܢ ܢܶܗܘܶܐ ܡܫܰܡܫܳܢܳܐ ܡܶܬܪܰܢܶܝܢ ܗܘܰܘ: ܐܳܦ ܕܰܬܪ̈ܰܝܗܽܘܢ ܡ̣ܶܢ ܨܶܝܕܰܘܗܝ ܠܐ ܢܰܪܚܩܽܘܢ ܗܘܰܘ: ܒܝܰܕ ܩܪܳܝܬܳܐ  ܕܟܶܪܟܳܐ ܡ̣ܶܢ ܡܰܠܐܟܳܐ ܫܳܡܥܺܝܢ ܗܘܰܘ: ܗܳܝܕܶܝܢ ܠܡܳܪܝ ܩܰܘܡܶܐ ܠܐܝܠܳܢܳܐ ܐܰܣܶܩܘ ܗܘܰܘ: ܘܟܶܢ̈ܫܶܐ ܕܡܰܠܐܟ̈ܶܐ ܚܳܙܶܝܢ ܗܘܰܘ: ܡܶܚܕܳܐ ܬܠܳܬܰܝ̈ܗܽܘܢ ܩܰܕܺܝ̈ܫܶܐ ܒܰܨܠܽܘܬܳܐ ܩܳܡܘ ܗܘܰܘ: ܘܺܐܝܕܰܝ̈ܗܽܘܢ ܠܰܫܡܰܝܳܐ ܦܫܰܛܘ ܗܘܰܘ ܘܪ̈ܰܚܡܶܐ ܡ̣ܶܢ ܐܠܰܗܳܐ ܫܶܐܠܘ ܗܘܰܘ: ܘܩܳܠܐ ܡ̣ܶܢ ܫܡܰܝܳܐ ܫܡܰܥܘ ܗܘܰܘ: ܕܛܽܘ̈ܒܳܢܶܐ ܐܶܫܬܰܡܥܰܬ݀ ܠܳܗ̇ ܨܠܽܘܬܟܽܘܢ ܐܶܣܬܰܒܰܪܘ ܗܘܰܘ: ܘܡ̣ܶܢ ܕܰܗܘܳܐ ܪܰܡܫܳܐ ܒܡܶܐܟܽܘܠܬܳܐ ܕܰܐܝܬܺܝ ܠܗܽܘܢ ܡܰܠܐܟܳܐ ܐܶܣܬܰܝܒܰܪܘ ܗܘܰܘ: ܟܰܕ ܬܶܫܒ̈ܚܳܬܳܐ ܕܡܰܠܐܟ̈ܶܐ ܒܰܡܛܰܠܬܶܗ ܕܡܳܪܝ ܩܰܘܡܶܐ ܫܳܡܥܺܝܢ ܗܘܰܘ: ܘܩܳܠܐ ܕܐ̱ܢܳܫ̈ܳܐ ܩܰܕܺܝ̈ܫܶܐ ܕܠܰܫܠܳܡܶܗ ܐܳܬܶܝܢ ܗܘܰܘ: ܘܰܒܦܶܬܓܳܡܰܝ̈ܗܽܘܢ ܠܶܗ ܡܒܰܝܐܻܝܢ ܗܘܰܘ: ܘܕܶܐܬܬܢܺܝܚ ܒܰܠܡܺܐܢܳܐ ܗܳܢܳܐ ܥܕܰܡܳܐ ܠܡܶܐܬܺܝܬܶܗ ܕܡܳܪܰܢ ܠܶܗ ܐܳܡܪܺܝܢ ܗܘܰܘ: ܘܠܐܠܳܗܳܐ ܕܰܓܒܳܝܗܝ ܫܽܘܒܚܳܐ ܡܰܣܩܺܝܢ ܗܘܰܘ: ܘܒܳܬܰܪ ܗܳܠܶܝܢ ܝܶܫܽܘܥ ܘܦܳܠܳܓ ܡ̣ܶܢ ܡܳܪܝ ܩܰܘܡܶܐ ܫܳܐܠܺܝܢ ܗܘܰܘ: ܕܢܶܚܬܽܘܢ ܠܡܰܕܒܪܳܐ ܗ̇ܰܘ ܕܡܶܨܪܶܝܢ ܡܶܢܶܗ ܬܳܒܥܺܝܢ ܗܘܰܘ: ܕܢܶܬܒܰܪܟܽܘܢ ܡ̣ܶܢ ܩܰܕܺܝ̈ܫܶܐ ܕܬܰܡܳܢ ܥܳܡܪܺܝܢ ܗܘܰܘ: ܘܰܬܠܳܬ ܫܢܺܝ̈ܢ ܬܰܡܳܢ ܐܰܘܚܰܪܘ ܗܘܰܘ: ܟܰܕ ܗ̣ܽܘ ܩܰܕܺܝܫܳܐ ܡܳܪܝ ܩܰܘܡܶܐ ܡܰܠܐܟ̈ܶܐ ܠܶܗ ܗ̣ܽܘ ܡܫܰܡܫܺܝܢ ܗܘܰܘ: ܘܟܰܕ ܝܶܫܽܘܥ ܘܦܳܠܳܓ ܗܳܠܶܝܢ ܠܨܶܝܕ ܡܳܪܝ ܩܰܘܡܶܐ ܐܶܬܡܰܢܰܥܘ ܗܘܰܘ: ܓܰܒܪܳܐ ܩܰܕܺܝܫܳܐ ܕܢܳܚܶܬ ܗܘܳܐ ܣܰܥܪܳܐ ܕܪܺܝܫܶܗ ܥܕܰܡܳܐ ܠܐܪܥܳܐ ܠܘܳܬܶܗ ܐܶܫܟܰܚܘ ܗܘܰܘ: ܘܥܰܡܶܗ ܡ̣ܶܢ ܡܶܐܟܽܘܠܬܳܐ ܕܰܐܝܬܺܝ ܠܗܽܘܢ ܡܰܠܐܟܳܐ ܐܶܟܰܠܘ ܗܘܰܘ: ܘܥܰܠ ܝܺܚܺܝ̈ܕܳܝܶܐ ܕܰܒܡܰܕܒܪܳܐ ܕܡܶܨܪܶܝܢ ܥܰܡܶܗ ܡܶܣܬܰܘܕܺܝܢ ܗܘܰܘ ܟܰܕ ܟܽܠܗܽܘܢ ܒܰܫܡܳܗܰܝ̈ܗܽܘܢ ܠܶܗ ܝܺܕܺܝܥܺܝܢ ܗܘܰܘ: ܘܗܳܝܕܶܝܢ ܨܠܰܘ̈ܳܬܳܐ ܘܒܽܘܪ̈ܟܳܬܳܐ ܡ̣ܶܢ ܚܕ̈ܳܕܶܐ ܐܶܙܕܰܘܰܕܘ ܗܘܰܘ: ܘܝܶܫܽܘܥ ܘܦܳܠܳܓ ܕܢܰܫܩܠܽܘܢ ܠܐܬܪܳܐ ܕܬܰܝܡܢܳܐ ܐܶܬܥܰܬܰܕܘ ܗܘܰܘ ܘܡܶܚܕܳܐ ܒܓܶܠܝܳܢܳܐ ܕܡ̣ܶܢ ܐܠܰܗܳܐ ܐܶܫܬܰܘܕܰܥܘ: ܕܚܰܝܰܝ̈ܗܽܘܢ ܬܰܡܳܢ ܡܫܰܠܡܺܝܢ ܗܘܰܘ: ܒܰܡܥܰܪܬܳܐ ܕܩܰܪܺܝܒܳܐ ܠܰܡܛܰܠܬܳܐ ܦܰܓܪ̈ܰܝܗܽܘܢ ܡܶܣܬܰܬܪܺܝܢ ܗܘܰܘ: ܘܡ̣ܶܢ ܡܰܠܐܟܳܐ ܕܡܳܪܝܳܐ ܫܳܡܥܺܝܢ ܗܘܰܘ: ܗܳܝܕܶܝܢ ܒܺܐܝ̈ܕܰܝ ܐܠܰܗܳܐ ܗܶܢܽܘܢ ܠܗܽܘܢ ܐܰܓܥܶܠܘ ܗܘܰܘ: ܘܕܰܢܕܰܒܰܪ ܐܶܢܽܘܢ ܐܰܝܟ ܨܶܒܝܳܢܶܗ ܡܶܢܶܗ ܫܳܐܠܺܝܢ ܗܘܰܘ: ܘܬܽܘܒ ܠܰܚܙܳܬܳܐ ܕܦܶܛܪܽܘܣ ܘܦܰܘܠܳܘܣ ܕܰܒܪܽܘܡܺܝ ܐܶܬܪܰܓܪܰܓܘ ܗܘܰܘ: ܗ̇ܳܝ ܕܶܝܢ ܒܝܰܕ ܡܰܠܐܟܳܐ ܐܰܝܟ ܪܦܳܦ ܥܰܝܢܳܐ ܦܪܰܚܘ ܗܘܰܘ: ܘܰܠܪܽܘܡܺܝ ܡܕܺܝܢ̱ܬܳܐ ܥܰܠܘ ܗܘܰܘ: ܘܡ̣ܶܢ ܫܟܺܝܢܬܳܐ ܕܦܶܛܪܽܘܣ ܘܦܰܘܠܳܘܣ ܐܶܬܒܰܪܰܟܘ ܗܘܰܘ: ܘܟܰܕ ܒܗܰܝܟܠܐ ܪܰܒܳܐ ܩܳܝܡܺܝܢ ܗܘܰܘ: ܠܐܒܳܐ ܩܰܘܡܶܐ ܟܰܕ ܢܦܰܩ ܡ̣ܶܢ ܡܰܕܒܚܳܐ ܚܳܙܶܝܢ ܗܘܰܘ: ܘܰܕܢܶܥܠܽܘܢ ܢܶܣܒܽܘܢ ܩܽܘܪܒܳܢܳܐ ܡܶܢܶܗ ܡܶܬܦܰܩܕܺܝܢ ܗܘܰܘ: ܗܳܝܕܶܝܢ ܠܡܳܪܝܳܐ ܐܶܬܟܰܫܰܦܘ ܗܘܰܘ: ܘܰܒܚܰܕ ܥܶܕܳܢܳܐ ܠܐܬܪܗܽܘܢ ܐܶܬܚܛܶܦܘ ܗܘܰܘ: ܘܒܳܬܰܪ ܬܰܪܬܶܝܢ ܫܢܺܝ̈ܢ ܠܰܫܠܳܡܶܗ ܕܡܳܪܝ ܩܰܘܡܶܐ ܐܶܬܛܰܝܰܒܘ ܗܘܰܘ: ܘܰܕܩܰܪܺܝܒ ܗ̣ܽܘ ܝܰܘܡܳܐ ܕܡܰܘܬܶܗ ܡܶܢܶܗ ܐܶܣܬܰܒܰܪܘ ܗܘܰܘ: ܘܚܰܫܳܐ ܘܟܰܪܝܽܘܬܳܐ ܐܶܬܥܰܛܰܦܘ ܗܘܰܘ: ܘܰܕܠܐ ܢܶܚܬܽܘܢܳܝܗܝ ܡ̣ܶܢ ܡܛܰܠܬܶܗ ܡܶܢܶܗ ܡܶܙܕܰܗܪܺܝܢ ܗܘܰܘ: ܘܰܕܒܳܗ̇ ܢܶܫܒܩܽܘܢܳܝܗܝ ܡܶܬܦܰܩܕܺܝܢ ܗܘܰܘ: ܘܟܰܕ ܬܚܶܝܬ ܐܺܝܠܳܢܳܐ ܩܳܝܡܺܝܢ ܗܘܰܘ: ܟܶܢ̈ܫܶܐ ܕܰܠܒܺܝܟܺܝܢ ܦܺܝܪ̈ܡܶܐ ܘܢܰܗܺܝܪ̈ܶܐ ܘܫܽܘ̈ܫܶܦܶܐ ܚܶܘܳܪ̈ܳܬܳܐ ܘܰܠܨܶܝܕ ܐܰܒܳܐ ܩܰܘܡܶܐ ܠܓܰܘ ܡܛܰܠܬܳܐ ܕܺܝܠܶܗ ܥܳܐܠܺܝܢ ܗܘܰܘ: ܘܟܰܕ ܝܶܫܽܘܥ ܘܦܳܠܳܓ ܠܪܰܘܡܳܐ ܚܳܝܪܺܝܢ ܗܘܰܘ ܠܢܰܦܫܶܗ ܕܰܐܒܳܐ ܩܰܘܡܶܐ ܚܳܙܶܝܢ ܗܘܰܘ: ܟܰܕ ܡܙܰܝܚܺܝܢ ܠܳܗ̇ ܡܰܠܐܟ̈ܶܐ: ܘܡ̣ܶܢ ܚܰܕ ܠܚܰܕ ܠܳܗ̇ ܡܩܰܒܠܺܝܢ ܗܘܰܘ: ܐܳܦ ܒܗܽܘ̈ܠܳܠܐ ܘܬܶܫܒ̈ܚܳܬܳܐ ܩܕܳܡܶܝܗ̇ ܡܙܰܡܪܺܝܢ ܗܘܰܘ: ܘܒܺܐܝܩܳܪܳܐ ܪܰܒܳܐ ܠܳܗ̇ ܠܰܡܪ̈ܰܘܡܶܐ ܡܰܣܩܺܝܢ ܗܘܰܘ: ܘܰܩܕܳܡ ܬܪܽܘܢܽܘܣ ܕܰܐܠܳܗܳܐ ܠܳܗ̇ ܡܩܺܝܡܺܝܢ ܗܘܰܘ: ܘܗܳܝܕܶܝܢ ܝܶܫܽܘܥ ܘܦܳܠܳܓ ܠܰܡܛܰܠܬܳܐ ܕܡܳܪܝ ܩܰܘܡܶܐ ܣܠܶܩܘ ܗܘܰܘ: ܘܰܫܠܳܡܳܐ ܠܦܰܓܪܳܐ ܩܰܕܺܝܫܳܐ ܝܰܗܒܘ ܗܘܰܘ: ܘܟܰܕ ܐܶܫܟܚܽܘܗܝ ܕܥܰܠ ܩܰܝܣܳܐ ܐܰܣܺܝܪ ܘܣܰܓܺܝ ܬܗܰܪܘ ܗܘܰܘ: ܘܕܰܐܣܺܝܪ̈ܳܢ ܐܺܝܕܰܘ̈ܗܝ ܘܪ̈ܶܓܠܰܘܗܝ ܥܰܠ ܩܰܝܣܳܐ ܒܺܐܝܠܳܢܳܐ ܚܙܰܐܘܽܘܗܝ ܗܘܰܘ: ܘܕܰܟܡܳܐ ܣܰܝܒܰܪ ܘܚܰܡܣܶܢ ܣܰܓܺܝ ܐܶܬܕܰܡܰܪܘ ܗܘܰܘ: ܘܠܐܠܳܗܳܐ ܕܚܰܝܠܶܗ ܫܰܒܰܚܘ ܗܘܰܘ: ܘܟܰܕ ܡܶܢܶܗ ܕܩܰܕܺܝܫܳܐ ܐܶܬܒܰܪܰܟܘ ܗܘܰܘ: ܘܕܰܟܡܳܐ ܐܺܝܬ ܠܶܗ ܕܗܳܟܰܢ ܙܩܺܝܦ ܠܡܰܠܐܟܳܐ ܡܫܰܐܠܺܝܢ ܗܘܰܘ: ܘܕܰܐܪܒܥܺܝܢ ܘܚܰܡܶܫ ܫܢܺܝ̈ܢ ܐܺܝܬ ܠܶܗ ܟܰܕ ܨܠܺܝܒ ܡ̣ܶܢ ܡܰܠܐܟܳܐ ܡܶܬܦܰܢܶܝܢ ܗܘܰܘ: ܘܫܰܪܟܳܢܳܐ ܕܟܽܠܗܽܘܢ ܚܰܝܰܘ̈ܗܝ ܬܶܫܥܺܝܢ ܐܳܦ ܚܰܡܶܫ ܫܢܺܝ̈ܢ ܐܺܝܬܰܝܗܶܝܢ ܝܺܠܶܦܘ ܗܘܰܘ: ܘܗܳܫܳܐ ܡܳܪܝܳܐ ܐܠܰܗܳܐ ܒܝܰܕ ܨܠܰܘ̈ܳܬܶܗ ܕܰܐܬܠܺܝܛܳܟ ܓܰܒܝܳܐ ܡܳܪܝ ܩܰܘܡܶܐ: ܘܰܕܝܶܫܽܘܥ ܘܦܳܠܳܓ ܥܳܒ̈ܕܰܝ ܨܶܒܝܳܢܳܟ: ܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ: ܘܢܰܛܰܪ ܠܥܰܡܳܟ ܘܡܰܪܥܺܝܬܳܟ: ܘܣܰܬܰܪ ܠܰܢ ܬܚܶܝܬ ܟܶܢܦܰܘ̈ܗܝ ܕܰܨܠܺܝܒܳܟ: ܘܰܐܫܘܳܐ ܠܰܢ ܕܢܶܥܽܘܠ ܠܰܓܢܽܘܢܳܟ: ܘܰܐܣܡܶܟ ܠܰܢ ܥܰܠ ܦܳܬܽܘܪܳܟ: ܘܰܐܫܘܳܐ ܠܰܢ ܡ̣ܶܢ ܐܰܓܳܢܳܟ: ܘܒܰܣܶܡ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܟ ܕܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܡܳܪܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܡܩܰܪܒܺܝܢܰܢ ܠܳܟ ܡܳܪܝܳܐ ܐܠܰܗܳܐ ܒܶܣ̈ܡܶܐ ܒܰܣܺܝ̈ܡܰܝ ܪܺܝܚܳܐ ܒܕܽܘܟܪܳܢ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܩܰܘܡܶܐ: ܘܰܒܝܰܕ ܨܠܰܘ̈ܳܬܶܗ ܣܚܽܘܦ ܘܒܰܛܶܠ ܡܶܢܰܢ ܡܳܪܝܳܐ ܐܠܰܗܳܐ ܠܟܽܠܗܽܘܢ ܦܰܚܰܘ̈ܗܝ ܘܰܡܨܺܝ̈ܕܳܬܶܗ ܕܒܺܝܫܳܐ ܢܳܟܽܘܠܢ: ܘܩܰܒܶܠܳܝܗܝ ܠܥܶܛܪܳܐ ܗܳܢܳܐ ܕܰܡܩܰܪܒܺܝܢܰܢ ܠܳܟ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ: ܗܳܫܳܐ܀

 

 

 

ܚܘܬܡܐ

 

 

 

ܡܫܺܝܚܳܐ ܕܶܐܙܕܩܶܦ ܒܪܰܘܡܳܐ ܕܓܳܓܽܘܠܬܳܐ ܡܶܛܽܠ ܦܽܘܪܩܳܢܰܢ: ܘܒܶܗ ܐܶܬܒܰܩܺܝ ܓܰܒܝܳܐ ܡܳܪܝ ܩܰܘܡܶܐ ܘܰܙܩܰܦ ܗ̣ܽܘ ܠܶܗ ܥܰܠ ܐܺܝܠܳܢܳܐ ܐܰܪܒܥܺܝܢ ܘܚܰܡܶܫ ܫܢܺܝ̈ܢ: ܗܰܒܠܰܢ ܕܢܶܙܕܩܶܦ ܠܥܳܠܡܳܐ ܘܠܰܪ̈ܓܺܝܓܳܬܶܗ: ܘܰܐܫܘܳܐ ܠܰܢ ܡܰܠܟܳܐ ܡܫܺܝܚܳܐ ܕܢܶܗܘܶܐ ܝܳܪ̈ܽܘܬܶܐ ܕܡܰܠܟܽܘܬܳܟ: ܘܢܶܚܕܶܐ ܘܢܶܬܒܰܣܰܡ ܒܰܓܢܽܘܢܳܟ: ܚܢܰܢ ܘܥܰܢܺܝ̈ܕܰܝܢ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܟܝܳܢܳܐ ܣܓܺܝܕܳܐ ܘܠܐ ܡܶܬܕܰܪܟܳܢܳܐ: ܕܰܥܒܰܕ ܠܶܗ ܟܝ̈ܳܢܶܐ ܦܫܺܝ̈ܛܶܐ ܒܰܡܪ̈ܰܘܡܶܐ ܥܶܠܳܝ̈ܶܐ ܡܒܰܪ̈ܟܶܐ ܘܰܡܫܰܒ̈ܚܶܐ ܠܰܫܡܶܗ: ܘܰܐܩܺܝܡ ܠܶܗ ܥܰܠ ܐܰܪܥܳܐ ܟܝ̈ܳܢܶܐ ܡܪ̈ܰܟܒܶܐ ܕܡ̣ܶܢ ܗܽܘܠܐܷ: ܣܳܓܽܘ̈ܕܶܐ ܘܰܡܗܰܠܠܳܢ̈ܶܐ ܠܪܰܒܽܘܬܶܗ: ܕܚܰܕ ܡܶܢܗܽܘܢ ܐܺܝܬܰܘܗܝ ܓܰܒܝܳܐ ܡܳܪܝ ܩܰܘܡܶܐ: ܕܰܣܓܶܕ ܒܪܽܘܚܳܐ ܒܰܫܪܳܪܳܐ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܰܨܠܰܒ ܗ̣ܽܘ ܠܶܗ ܠܥܳܠܡܳܐ ܗܳܢܳܐ ܘܰܪ̈ܓܺܝܓܳܬܶܗ: ܘܗܳܐ ܟܽܠ ܦܶܢ̈ܝܳܢ ܪ̈ܳܥܡܳܢ ܒܥܰܕܥܺܐܕܶܗ: ܘܙܳܡܪܺܝܢ ܫܽܘܒܚܳܐ ܠܡܳܪܝܳܐ ܡܢܰܨܚܳܢܶܗ: ܒܗܳܢܳܐ܀

 

 

 

ܣܕܪܐ

 

 

 

ܠܳܟ ܗܳܟܺܝܠ ܡܩܰܠܣܺܝܢܰܢ ܘܰܡܝܰܩܪܺܝܢܰܢ: ܐܳܘ ܥܛܺܝܦ ܙܳܟܽܘܬܳܐ ܢܰܨܺܝܚ ܫܽܘܦܪ̈ܶܐ ܡܳܪܝ ܩܰܘܡܶܐ: ܟܰܕ ܒܰܒ̈ܢܳܬ ܩ̈ܳܠܐ ܡܚܰܓ̈ܝܳܢܝܳܬܳܐ ܠܳܟ ܡܢܰܨܪܺܝܢܰܢ ܘܳܐܡܪܺܝܢܰܢ: ܡܳܪܝ ܩܰܘܡܶܐ ܬܶܐܘܳܕܺܝܡܛܳܐ ܐܠܰܗܳܝܳܐ ܕܰܦܪܰܚ ܒܶܐܒܪ̈ܶܐ ܕܪܽܘܚܳܐ ܘܶܐܬܒܰܪܰܟ ܒܕܽܘܟ̈ܝܳܬܳܐ ܩܰܕܺܝ̈ܫܳܬܳܐ: ܡܳܪܝ ܩܰܘܡܶܐ ܒܽܘܝܳܐܳܐ ܕܰܐܝܠܶܝܢ ܕܰܐܒܺܝܠܺܝܢ: ܕܣܳܒܳܐ ܕܶܐܬܳܐ ܠܘܳܬܶܗ ܒܶܗ ܐܶܬܒܰܝܺܐܝ ܘܶܐܬܠܰܒܰܒ: ܡܳܪܝ ܩܰܘܡܶܐ ܥܰܒܕܳܐ ܛܳܒܳܐ ܕܰܠܦܽܘܩܕܳܢ ܡܳܪܶܗ ܐܶܫܬܡܰܥ: ܡܳܪܝ ܩܰܘܡܶܐ ܩܰܕܺܝܫܳܐ ܕܩܰܕܶܫ ܠܢܰܦܫܶܗ ܘܰܠܦܰܓܪܶܗ ܒܝܰܕ ܥܒܳܕ̈ܶܐ ܡܝܰܬܪ̈ܶܐ ܕܰܥܒܰܕ: ܡܳܪܝ ܩܰܘܡܶܐ ܫܪܳܓܳܐ ܕܰܐܢܗܰܪ ܠܡܰܕܢܚܳܐ: ܘܰܠܟܽܠܶܗ ܐܰܬܪܳܐ ܕܒܶܝܬ ܓܰܪ̈ܡܰܝ: ܡܳܪܝ ܩܰܘܡܶܐ ܝܰܘܢܳܐ ܕܰܦܪܰܚ ܡ̣ܶܢ ܡܛܰܠܬܶܗ ܠܪܽܘܡܺܝ: ܘܡ̣ܶܢ ܫܠܺܝ̈ܚܶܐ ܕܰܩܒܺܝܪܺܝܢ ܬܰܡܳܢ ܐܶܬܒܰܪܰܟ ܐܳܦ ܐܶܬܥܰܕܰܪ: ܡܳܪܝ ܩܰܘܡܶܐ ܫܽܘܦܪܳܐ ܡ̣ܶܢ ܩܰܒܪܳܐ ܡܳܪܳܢܳܝܳܐ: ܘܰܨܠܺܝܒܳܐ ܚܰܝܳܐ ܕܰܠܟܽܠ ܐܰܚܺܝ: ܡܳܪܝ ܩܰܘܡܶܐ ܐܺܝܠܳܢܳܐ ܕܰܢܨܺܝܒ ܥܰܠ ܡܰܥܡܽܘܕܺܝܬܳܐ ܩܰܕܺܝܫܬܳܐ: ܕܺܐܝܠܳܢܳܐ ܥܒܰܕ ܠܶܗ ܣܶܬܳܪܳܐ ܘܰܡܛܰܠܬܳܐ: ܡܳܪܝ ܩܰܘܡܶܐ ܕܩܰܝܳܡ ܘܰܡܫܰܪܰܪ ܒܳܬܰܪ ܡܰܘܬܶܗ ܐܰܝܟ ܕܰܒܚܰܝܰܘ̈ܗܝ: ܡܳܪܝ ܩܰܘܡܶܐ ܘܰܥܕܳܐ ܕܟܽܠ ܛܽܘܒܺܝ̈ܢ: ܕܰܐܚܘ̈ܳܬܶܗ ܠܘܳܬܶܗ ܐܶܬܛܰܝܰܒ̈ܝ: ܘܡܰܠܐܟܳܐ ܠܶܗ ܗ̣ܽܘ ܫܰܡܶܫ: ܡܳܪܝ ܩܰܘܡܶܐ ܡܳܐܢܳܐ ܕܪܽܘܚ: ܕܗ̣ܽܘ ܘܰܐܚܘ̈ܳܬܳܐ ܕܺܝܠܶܗ ܒܰܡܝܰܬܪ̈ܳܬܳܐ ܐܶܬܓܡܰܪܘ: ܡܳܪܝ ܩܰܘܡܶܐ ܐܠܰܗ ܒܶܣܪܳܐ: ܕܒܰܚܛܺܝܬܳܐ ܠܐ ܢܦܰܠ ܘܰܫܪܰܥ: ܘܥܰܠ ܗ̇ܳܝ ܛܽܘ̈ܒܶܐ ܛܽܘܒ̈ܬܳܢܶܐ ܠܛܽܘܒܬܳܢܽܘܬܶܗ ܛܒܺܝܒܬܳܐ ܡܰܘܫܛܺܝܢܰܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܕܡ̣ܶܢ ܛܳܒ̈ܳܬܳܐ ܕܰܐܝܬܺܝܘ ܠܶܗ ܡܰܠܐܟ̈ܶܐ ܡ̣ܶܢ ܦܰܪܕܰܝܣܳܐ ܐܶܟܰܠ: ܘܰܠܡܳܪܶܗ ܫܰܒܰܚ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܢܽܘܗܪܳܐ ܕܰܐܢܗܰܪ ܠܡܺܝܦܳܪܩܰܛ: ܕܰܫܡܶܗ ܒܟܽܠ ܦܶܢ̈ܝܳܢ ܐܶܬܛܰܒܰܒ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܒܶܝܬ ܡܰܥܡܪܳܐ ܕܪܽܘܚܳܐ ܩܰܕܺܝܫܳܐ: ܕܐ̱ܪܳܙܳܐ ܬܠܺܝܬܳܝܳܐ ܒܰܡܛܰܠܬܶܗ ܫܪܳܐ ܘܰܐܓܶܢ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܝܳܗܶܒ ܥܽܘܕܪ̈ܳܢܶܐ ܘܳܐܣ̈ܘܳܬܳܐ ܠܟܽܠܰܢ ܫܰܟܶܢ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܬܗܺܝܪܳܐ ܘܰܬܡܺܝܗܳܐ ܕܩܰܘܡܟ ܕܥܰܠ ܐܺܝܠܳܢܳܐ ܐܰܬܗܰܪ ܠܡܰܠܐܟ̈ܶܐ ܘܠܰܒܢܰܝ̈ܢܳܫܳܐ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܣܘܶܐ ܘܰܡܣܰܘܰܚ ܠܥܶܢܝܳܢ ܡܳܪܶܗ: ܕܩܰܕܺܝ̈ܫܶܐ ܠܰܫܠܳܡܶܗ ܨܳܒܘ ܘܶܐܬܘܰܥܰܕܘ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܒܰܝܬܳܝܳܐ ܘܰܡܓܰܘܰܝ ܒܐܪ̈ܳܙܰܝ ܡܳܪܶܗ: ܕܰܠܒܰܪܢܳܫܳܐ ܥܰܬܺܝܩܳܐ ܡܶܢܶܗ ܫܠܰܚ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܝܰܐܻܝܒ ܘܰܪܓܺܝܓ ܠܡܶܗܘܳܐ ܐܰܝܟ ܠܐ ܒܶܣܪܳܢܳܐ: ܕܶܐܬܰܘ ܠܰܚܙܳܬܶܗ ܦܶܛܪܽܘܣ ܘܕܽܘܡܰܛ ܘܡܰܪܝܳܗܶܒ ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܪܳܕܶܐ ܒܪܽܘܚ ܡ̣ܶܢ ܡܺܝܦܳܪܩܰܛ ܠܨܶܝܕ ܩܰܕܺܝ̈ܫܶܐ ܕܰܒܛܽܘܪܳܐ ܣܶܢܛܪܽܘܩ: ܘܬܰܡܳܢ ܥܰܡܗܽܘܢ ܐܶܬܥܰܢܘܺܝ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܝܳܗܶܒ ܠܢܰܦܫܶܗ ܥܰܡ̈ܠܐ ܘܰܫܚ̈ܳܩܶܐ ܡܶܛܽܠ ܡܳܪܶܗ: ܘܒܰܡܛܰܠܬܳܐ ܗ̣ܽܘ ܠܶܗ ܚܒܰܫ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܢܰܓܺܝܪ ܪܽܘܚܳܐ: ܕܬܶܫܥܺܝܢ ܫܢܺܝ̈ܢ ܦܠܰܚ ܕܽܘܒܳܪ̈ܶܐ ܥܰܓܪ̈ܶܐ ܘܰܩܫܰܝ̈ܳܐ: ܘܡ̣ܶܢ ܚܠܺܝܨܽܘܬܶܗ ܠܐ ܐܶܬܪܰܦܺܝ: ܠܳܟ ܛܽܘܒܰܝܟ ܡܳܪܝ ܩܰܘܡܶܐ ܐܰܦܬܪܰܐܛܽܘܣ ܕܦܰܓܪܳܟ ܠܥܳܠܰܡ ܡܟܰܬܰܪ ܠܐ ܡܶܬܦܰܠܗܕܳܢܳܐ: ܘܗܳܫܳܐ ܒܰܨܠܰܘ̈ܳܬܳܟ ܓܰܒܝܳܐ ܡܳܪܝ ܩܰܘܡܶܐ: ܐܳܦ ܕܰܐܚܘ̈ܳܬܳܟ: ܐܳܦ ܕܣܳܒܳܐ ܢܰܬܰܢܰܐܶܝܠ ܪܰܒܳܟ: ܕܶܐܬܢܰܒܺܝ ܥܠܰܝܟ ܡ̣ܶܢ ܫܰܒܪܽܘܬܳܟ: ܘܰܕܩܰܕܺܝ̈ܫܶܐ ܕܰܗܘܰܘ ܒܥܶܢܝܳܢܳܟ: ܢܫܰܕܰܪ ܠܳܟ ܡܳܪܝܳܐ ܡܳܪܳܟ ܢܰܘܚܳܐ ܘܰܒܗܺܝܠܽܘܬܳܐ: ܬܶܗܘܶܐ ܡܒܰܛܶܠ ܡܶܢܰܢ ܟܰܦܢܳܐ ܘܫܶܒܝܳܐ ܘܡܰܘܬܳܐ ܕܡܰܪܺܝܪ: ܒܺܝܫܳܐ ܡܶܢܰܢ ܢܶܬܬܪܺܝܡ: ܨܶܒܝܳܢ ܬܰܪܥܺܝܬܶܗ ܒܰܢ ܠܐ ܬܶܫܠܰܡ: ܠܪܽܘܚܩܳܐ ܢܶܬܛܰܠܰܩ ܡܶܢܰܢ: ܘܰܢܝܳܚܶܗ ܠܐ ܢܶܓܡܽܘܪ ܒܰܢ: ܬܶܗܘܶܐ ܓܺܗܰܢܳܐ ܡܢܳܬܶܗ: ܕܗ̣ܽܘ ܫܰܓܪܳܗ̇ ܠܶܗ: ܘܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܢܶܬܦܰܨܶܐ ܡ̣ܶܢ ܬܰܫܢܺܝ̈ܩܶܐ: ܒܝܰܕ ܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ: ܘܕܰܐܒܽܘܗܝ ܘܰܕܪܽܘܚܶܗ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܘܠܕܗ̇ ܕܝܠܕܬ ܐܠܗܐ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܥܰܡ ܚܰܢܰܐ ܘܝܽܘܝܳܩܺܝܡ ܐܰܒܳܗܶܝ̈ܗ̇ ܕܰܒܬܽܘܠܬܳܐ ܡܰܪܝܰܡ ܢܶܚܕܶܐ ܘܢܶܪܘܰܙ ܘܢܶܬܦܨܰܚ ܒܝܰܘܡܳܐ ܗܳܢܳܐ ܕܡܰܘܠܳܕܳܗ̇: ܘܒܰܣܶܡ ܠܰܢ ܥܰܡܗܽܘܢ ܒܡܰܠܟܽܘܬܳܐ ܫܡܰܝܳܢܺܝܬܳܐ: ܘܗܰܒܠܰܢ ܘܰܐܫܘܳܐ ܠܰܢ ܕܢܰܘܠܶܕ ܦܺܐܪ̈ܶܐ ܕܫܳܦܪܺܝܢ ܠܳܟ ܘܥܳܒܕܺܝܢ ܨܶܒܝܳܢܳܟ: ܕܢܶܥܒܶܕ ܥܒܳܕ̈ܶܐ ܕܰܡܪܰܥܶܝܢ ܠܳܟ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܰܕܢܰܚ ܒܥܳܡܰܪܬܳܐ ܒܐܪ̈ܳܙܶܐ ܘܛܽܘܦ̈ܣܶܐ ܠܰܒ̈ܢܰܝ ܐܺܝܣܪܳܐܶܝܠ: ܘܚܰܘܺܝ ܠܗܽܘܢ ܒܝܰܕ ܢܒܺܝܰܘ̈ܳܬܳܐ ܕܰܢܒܺܝ̈ܶܐ ܕܡ̣ܶܢ ܒܬܽܘܠܬܳܐ ܕܳܢܰܚ ܒܥܳܠܡܳܐ: ܘܟܽܠܗܶܝܢ ܡܶܠܰܝ̈ܗܽܘܢ ܗܘܰܝ̈ ܒܰܥܒܳܕܳܐ ܠܗܰܘ ܡܳܪܳܐ ܕܟܽܠܳܗ̇ ܥܳܡܰܪܬܳܐ ܕܰܨܒܳܐ ܕܢܶܕܢܰܚ ܡ̣ܶܢ ܒܬܽܘܠܬܳܐ ܡܰܪܝܰܡ: ܗ̇ܳܝ ܕܝܰܘܡܳܢ ܐܶܬܝܰܠܕܰܬ݀ ܒܓܰܘ ܥܳܠܡܳܐ ܕܡ̣ܶܢ ܥܽܘ̈ܒܶܐ ܥܰܩܪ̈ܳܝܶܐ ܕܚܰܢܰܐ ܘܝܽܘܝܳܩܺܝܡ ܟܺܐܢ̈ܶܐ ܘܙܰܕܺܝ̈ܩܶܐ: ܕܣܰܟܺܝܘ ܠܓܶܠܝܳܢܳܐ ܕܰܡܕܰܒܪܳܢܽܘܬܶܗ ܐܠܰܗܳܝܬܳܐ: ܕܒܳܗ̇ ܐܶܬܚܰܪܰܪܘ ܡܰܠܐܟ̈ܶܐ ܘܰܒܢܰܝ̈ܢܳܫܳܐ ܡ̣ܶܢ ܩܶܢܛܳܐ ܕܰܪܡܶܝܢ ܗܘܰܘ ܒܶܗ ܒܗܳܝ ܕܰܩܢܰܘ ܚܰܝ̈ܶܐ ܕܠܐ ܣܳܐܒܶܝܢ: ܕܰܠܗܽܘܢ ܟܽܠܰܢ ܢܶܫܬܘܶܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܝܽܘܡ ܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܥܰܕܥܕܺܝܢܰܢ ܒܰܒ̈ܢܳܬ ܩ̈ܳܠܐ ܪ̈ܽܘܚܳܢܳܝܳܬܳܐ ܡܙܰܡܪܺܝܢܰܢ ܟܰܕ ܐܳܡܪܺܝܢܰܢ: ܕܝܰܘܡܳܢܳܐ ܢܶܚܕܶܐ ܘܢܶܪܘܰܙ ܘܰܢܫܰܒܰܚ: ܟܰܕ ܥܰܡ ܐܰܒܳܗܶܝ̈ܗ̇ ܕܰܒܬܽܘܠܬܳܐ ܐܳܡܪܺܝܢܰܢ: ܒܪܺܝܟ ܡܳܪܝܳܐ ܕܰܣܥܰܪ ܥܰܡܶܗ ܘܰܐܩܺܝܡ ܩܰܪܢܳܐ ܕܦܽܘܪܩܳܢܳܐ ܒܝܰܕ ܡܫܺܝܚܶܗ ܕܰܕܢܰܚ ܡ̣ܶܢ ܥܽܘܒܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܝܰܘܡܳܢܳܐ ܐܶܬܝܰܠܕܰܬ݀ ܒܥܳܠܡܳܐ: ܟܰܕ ܡܶܢܳܗ̇ ܫܰܪܺܝܘ ܚܰܝ̈ܶܐ ܒܥܳܠܡܳܐ ܟܽܠܶܗ: ܘܰܚܕܺܝܘ ܘܝܽܘܝܳܩܺܝܡ ܕܡ̣ܶܢ ܓܶܢܣܳܐ ܕܰܘܺܝܕܳܝܳܐ ܫܘܰܚ ܒܓܰܘ ܥܳܡܰܪܬܳܐ: ܟܰܕ ܨܰܠܺܝܘ ܘܶܐܬܓܰܘܰܣܘ ܘܰܢܕܰܪܘ ܢܶܕܪܳܐ ܕܦܺܐܪܳܐ ܕܡܶܬܺܝܠܶܕ ܠܗܽܘܢ ܠܡܳܪܝܳܐ ܐܠܰܗܳܐ ܢܶܬܠܽܘܢܳܝܗܝ: ܕܰܢܟܰܗܢܽܘܢ ܐܰܒܳܗܶܝ̈ܗ̇ ܩܕܳܡ ܡܳܪܝܳܐ ܐܰܝܟ ܢܒܺܝܳܐ ܪܰܒܳܐ ܫܡܽܘܐܶܝܠ: ܕܳܐܦ ܗ̣ܺܝ ܢܶܕܪܳܐ ܐܶܬܝܰܗܒܰܬ݀ ܐܰܟܘܳܬܶܗ ܠܒܰܝܬܶܗ ܕܡܳܪܝܳܐ: ܘܡ̣ܶܢ ܟܳܗ̈ܢܶܐ ܐܠܰܗܳܝ̈ܶܐ ܐܰܝܟ ܢܶܕܪܳܐ ܕܡܳܪܝܳܐ ܡܶܬܢܰܛܪܳܐ ܗܘܳܬ݀ ܕܬܶܬܡܰܠܐܷ ܗ̇ܳܝ ܕܰܒܝܰܕ ܢܒܺܝܳܐ ܐܠܰܗܳܝܳܐ ܡܶܬܰܐܡܪܳܐ ܗܘܳܬ݀: ܕܢܶܬܺܝܗܶܒ ܟܬܳܒܳܐ ܗܳܢܳܐ ܕܰܚܬܺܝܡ ܠܓܰܒܪܳܐ ܕܩܰܕܺܝܡ ܝܰܠܺܝܦ ܟܬ ܟܬܳܒ̈ܳܬܳܐ: ܘܢܶܥܢܶܐ ܟܰܕ ܐܳܡܰܪ: ܕܠܐ ܝܳܕܰܥ ܐ̱ܢܳܐ ܠܡܶܩܪܶܐ ܠܰܟܬܳܒܳܐ ܗܳܢܳܐ: ܘܢܺܐܡܪܽܘܢ ܠܶܗ ܕܡܶܛܽܠ ܡܳܢܳܐ: ܘܢܺܐܡܰܪ ܕܰܠܝܶܫܽܘܥ ܢܛܺܝܪ ܗ̣ܽܘ ܟܬܳܒܳܐ ܗܳܢܳܐ: ܟܰܕ ܪܳܡܶܙ ܥܰܠ ܓܰܒܝܽܘܬܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܕܡ̣ܶܢ ܩܕܳܡ ܡܰܘܠܳܕܳܗ̇ ܐܶܬܒܰܪܟܰܬ݀ ܘܶܐܬܟܰܪܙܰܬ݀ ܡ̣ܶܢ ܢܒܺܝ̈ܶܐ ܐܠܰܗܳܝ̈ܶܐ: ܕܰܓܒܰܝܬܳܐ ܗ̱ܝ ܕܛܰܝܒܽܘܬܳܐ ܐܠܰܗܳܝܬܳܐ: ܕܫܶܘܚܰܬ݀ ܡ̣ܶܢ ܥܽܘ̈ܒܶܐ ܥܰܩܪ̈ܳܝܶܐ ܗ̇ܳܢܽܘܢ ܕܒܳܬܰܪ ܕܰܦܣܰܩܘ ܣܰܒܪܳܐ ܕܡ̣ܶܢ ܝܰܠܕܳܐ ܐܶܬܝܰܠܕܰܬ݀ ܠܗܽܘܢ ܗܳܕܶܐ: ܘܰܚܕܺܝܘ ܒܳܗ̇ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ: ܐܰܟܡ̇ܰܢ ܕܗ̣ܺܝ ܫܰܡܠܝܰܬ݀ ܡܶܠܰܝ̈ܗܽܘܢ: ܘܒܳܗ̇ ܢܦܰܩ̈ܝ ܠܓܶܠܝܳܐ ܟܽܠܗܶܝܢ ܣܬܺܝܪ̈ܳܬܗܽܘܢ: ܘܥܰܡ ܚܰܕܽܘܬܳܐ ܐܰܩܺܝܡܘ ܓܽܘ̈ܕܶܐ ܒܝܽܘܡ ܡܰܘܠܳܕܳܗ̇ ܟܰܕ ܡܥܰܕܥܕܺܝܢܰܢ ܘܳܐܡܪܺܝܢܰܢ: ܕܳܐܘ ܟܡܳܐ ܗܕܺܝܪܳܐ ܘܦܰܐܝܳܐ ܚܰܕܽܘܬܳܐ ܪܰܒܬܳܐ ܕܶܐܫܬܰܟܢܰܬ݀ ܠܰܢ ܝܰܘܡܳܢܳܐ: ܒܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܡܶܢܳܗ̇ ܕܢܰܚ ܠܰܢ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ: ܘܒܳܗ̇ ܡܶܬܛܰܠܰܩ ܟܽܠܶܗ ܚܶܫܟܳܐ ܕܛܽܘܥܝܰܝ: ܘܒܳܗ̇ ܡܶܫܬܰܡܠܶܝܢ ܟܽܠܗܽܘܢ ܐ̱ܪ̈ܳܙܶܐ ܥܰܡ ܛܽܘܦ̈ܣܶܐ ܘܦ̈ܶܠܐܬܳܐ: ܕܡ̣ܶܢ ܐܳܕܳܡ ܢܒܺܝܳܐ ܪܰܒܳܐ ܩܰܕܡܳܝܳܐ ܥܕܰܡܳܐ ܠܝܰܘܡܳܢ: ܥܠܰܝܟ ܡܳܪܝ ܐܶܬܢܰܒܺܝܘ: ܘܠܳܟ ܕܺܐܝܬܰܝܟ ܚܰܝ̈ܶܐ ܫܰܪܺܝܪ̈ܶܐ ܨܳܝܪܺܝܢ ܗܘܰܘ: ܕܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܳܢܰܚ ܐܰܢ̱ܬ ܒܓܰܘ ܥܳܡܰܪܬܳܐ ܘܰܒܡܰܘܠܳܕܳܗ̇ ܚܶܕܝܰܬ݀ ܓܽܘܕܳܐ ܕܰܢܒܺܝ̈ܶܐ ܟܽܠܗܽܘܢ: ܒܰܒ̈ܢܳܬ ܩ̈ܳܠܐ ܪ̈ܽܘܚܳܢܳܝܳܬܳܐ ܡܙܰܡܪܺܝܢ ܟܰܕ ܐܳܡܪܺܝܢ: ܐܳܘ ܡܰܘܠܳܕܳܗ̇ ܕܡܰܪܝܰܡ ܟܡܳܐ ܫܒܺܝܚ ܘܪܳܡ ܘܰܡܥܰܠܰܝ: ܐܳܘ ܚܰܢܰܐ ܘܝܽܘܝܳܩܺܝܡ ܟܡܳܐ ܪܰܒ ܗ̣ܽܘ ܣܰܒܪܳܐ ܛܳܒܳܐ ܕܶܐܬܺܝܠܶܕ ܒܒܰܝܬܟܽܘܢ ܝܰܘܡܳܢܳܐ: ܕܺܐܝܬܰܘܗܝ ܫܽܘܪܳܝ ܛܳܒ̈ܳܬܳܐ: ܘܥܳܩܽܘܪܳܐ ܕܠܰܘ̈ܛܳܬܳܐ ܘܡܰܦܢܝܳܢܳܐ ܕܫ̈ܶܐܠܳܬܳܐ: ܘܣܳܬܽܘܪܳܐ ܕܰܣܝܳܓܳܐ ܕܛܳܥܝܽܘܬܳܐ ܘܰܡܚܰܠܝܳܢܳܐ ܕܡܶܪܬܳܐ ܩܰܕܡܳܝܬܳܐ ܕܰܒܓܰܘ ܦܰܪܕܰܝܣܳܐ ܛܪܽܘܕܳܐ ܕܰܪܫܳܦܳܐ ܕܚܶܘܝܳܐ ܢܳܟܽܘܠܐ: ܘܰܡܟܰܢܫܳܢܳܐ ܕܰܐܒܺܝ̈ܕܶܐ ܘܡܰܝܬܶܐ ܣܰܒܪ̈ܳܬܳܐ ܚܰܕ̈ܬܳܬܳܐ ܠܓܽܘܕܳܐ ܪܚܺܝܡܬܳܐ ܕܰܡܗܰܝ̈ܡܢܶܐ: ܕܒܳܗ̇ ܒܡܰܪܝܰܡ ܗܘܳܐ ܠܗܽܘܢ ܚܰܕܽܘܬܳܐ: ܘܰܪܘܳܙܳܐ ܪܰܒܳܐ ܟܽܠ ܟܝܳܢ ܢܶܫ̈ܶܐ ܩܳܛܽܘܪ̈ܰܝܢ ܚܰܓܳܐ ܪܽܘܚܳܢܳܝܳܐ ܟܰܕ ܐܳܡܪ̈ܳܢ ܐܢ̱ܬܶܝܢ: ܕܝܰܘܡܳܢܳܐ ܐܶܬܩܰܪܰܒ ܓܶܢܣܳܐ ܕܺܝܠܰܢ ܠܘܳܬ ܚܰܕܽܘܬܳܐ ܩܰܕܡܳܝܬܳܐ ܗ̇ܳܝ ܕܰܒܝܰܕ ܚܰܘܳܐ ܗܘܳܬ݀ ܠܰܢ ܡܙܰܡܢܳܢܺܝܬܳܐ ܠܡܰܦܽܘܠܬܰܢ: ܒܡܰܪܝܰܡ ܒܬܽܘܠܬܳܐ ܩܢܰܝܢܰܢ ܐܽܘܪܚܳܐ ܠܓܰܘ ܦܰܪܕܰܝܣܳܐ ܕܶܐܬܛܪܶܕܢܰܢ ܡܶܢܶܗ: ܘܗܳܫܳܐ ܡܳܪܝܳܐ ܐܠܰܗܳܐ ܕܚܰܕܺܝܬܳܢ ܒܝܽܘܡ ܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܚܰܕܳܐ ܠܰܢ ܒܝܽܘܡ ܥܺܐܕܳܗ̇ ܡܳܪܳܢܳܝܳܐ: ܘܰܐܦܨܰܚ ܠܬܰܪ̈ܥܝܳܬܰܢ ܒܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ: ܘܢܶܫܬܘܶܐ ܟܽܠܰܢ ܠܡܰܥܠܬܳܐ ܕܰܩܕܳܡܰܝܟ ܕܠܐ ܡܰܦܽܘܠܬܳܐ ܕܰܚܛܺܝܬܳܐ: ܘܢܶܗܘܶܐ ܠܰܢ ܥܽܐܕܳܐ ܗܳܢܳܐ ܕܡܰܘܠܳܕܳܗ̇ ܕܡܰܪܝܰܡ ܐܶܡܳܐ ܕܺܝܠܳܟ: ܝܰܘܡܳܐ ܚܰܕܬܳܐ: ܝܰܘܡܳܐ ܕܰܪܘܳܙܳܐ ܘܰܕܚܰܕܽܘܬܳܐ: ܝܰܘܡܳܐ ܕܠܐ ܡܰܕܪܶܟ ܠܶܗ ܪܰܡܫܳܐ: ܝܰܘܡܳܐ ܕܡܰܥܒܰܪ ܡ̣ܶܢ ܒܢܰܝ̈ܢܳܫܳܐ ܥܳܩ̈ܳܬܳܐ: ܝܰܘܡܳܐ ܕܡܰܥܒܶܕ ܡ̣ܶܢ ܥܰܬܺܝ̈ܩܶܐ ܚܰܕ̈ܬܶܐ: ܝܰܘܡܳܐ ܕܰܡܚܰܕܶܐ ܠܟܽܠ ܕܚܳܕܶܐ ܘܪܳܘܶܙ ܒܡܰܘܠܳܕܳܗ̇: ܘܢܶܫܬܰܟܰܢ ܒܳܗ̇ ܠܥܳܠܡܳܐ ܟܽܠܶܗ: ܫܰܝܢܳܐ ܘܰܫܠܳܡܳܐ ܘܚܽܘܒܳܐ ܘܰܐܘܝܽܘܬܳܐ ܘܒܽܘܪ̈ܟܳܬܳܐ: ܘܰܫܦܺܝܥܽܘܬܳܐ ܕܥ̈ܰܠܠܳܬܳܐ: ܘܕܽܘܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܐܰܝܠܶܝܢ ܕܰܫܟܶܒܘ ܥܰܠ ܣܰܒܪܳܐ ܕܰܬܪܺܝܨܽܘܬ ܫܽܘܒܚܳܐ: ܘܚܳܝܪܺܝܢ ܘܰܡܣܰܟܶܝܢ ܠܝܽܘܡ ܢܽܘܚܳܡܳܐ ܕܒܶܗ ܟܽܠܰܢ ܢܶܦܓܰܥ ܒܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝ ܠܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܩܰܪܶܒܢܰܢ ܩܕܳܡ ܪܰܒܽܘܬܳܟ: ܒܝܰܘܡܳܐ ܗܳܢܳܐ ܕܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ: ܕܡ̣ܶܢ ܥܽܘ̈ܒܶܐ ܥܰܩܪ̈ܳܝܶܐ ܫܶܘܚܰܬ݀ ܡ̣ܶܢ ܐܰܒܳܗ̈ܳܬܳܐ ܟܺܐܢ̈ܶܐ ܘܙܰܕܺܝ̈ܩܶܐ: ܒܪܶܚܡܰܬ݀ ܐ̱ܢܳܫܽܘܬܳܟ ܘܥܰܡ ܚܰܕܽܘܬܳܐ ܘܰܪܘܳܙܳܐ ܐܰܙܥܶܩܘ ܘܶܐܡܰܪܘ: ܒܪܺܝܟ ܡܳܪܝܳܐ ܕܰܣܥܰܪ ܥܰܡܶܗ ܘܰܐܣܓܺܝ ܚܢܳܢܶܗ ܠܘܳܬܰܢ: ܘܗܳܫܳܐ ܡܳܪܝܳܐ ܐܠܰܗܳܐ ܩܰܒܶܠ ܠܦܺܝܪܡܳܐ ܕܣܳܓܽܘ̈ܕܰܝܟ: ܘܒܰܪܶܟ ܘܢܰܛܰܪ ܘܫܰܘܙܶܒ ܠܟܽܠܰܢ: ܡ̣ܶܢ ܟܽܠ ܙܢܳܐ ܕܰܒܥܶܠܕܒܳܒܳܐ: ܗܳܫܳܐ܀

 

 

 

ܚܘܬܡܐ

 

 

 

ܡܳܪܝܳܐ ܐܠܰܗܳܐ ܝܳܗܽܘܒܳܐ ܕܚܰܕ̈ܘܳܬܳܐ ܘܰܡܫܰܟܢܳܢܳܐ ܕܰܦܨܺܝܚ̈ܘܳܬܳܐ: ܚܰܕܳܐ ܘܰܐܦܨܰܚ ܠܰܢ ܒܝܽܘܡ ܡܰܘܠܳܕܳܗ̇ ܕܶܐܡܳܟ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܕܝܰܘܡܳܢܳܐ ܒܟܶܢܫܰܢ ܗܳܐ ܡܶܙܕܰܝܰܚ ܐܳܦ ܡܶܬܝܰܩܰܪ ܘܡܶܬܪܰܡܪܰܡ: ܘܰܐܘܣܶܦ ܘܫܰܟܶܢ ܠܰܢ ܚܰܕܽܘܬܳܐ ܥܰܠ ܚܰܕܽܘܬܳܐ ܘܰܦܨܺܝܚܽܘܬܳܐ ܒܓܰܘ ܦܨܺܝܚܽܘܬܳܐ: ܒܫܽܘܒܩܳܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܚܽܘܣܳܝܰܢ ܘܰܢܝܳܚܳܐ ܕܥܰܢܺܝ̈ܕܰܝܢ ܒܝܰܕ ܨܠܰܘ̈ܳܬܳܗ̇: ܘܕܰܐܒܳܗܶܝ̈ܗ̇ ܘܰܕܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܡܳܪܰܢ ܘܰܐܠܳܗܰܢ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܠܗܰܘ ܝܰܠܕܳܐ ܫܒܺܝܚܳܐ ܕܰܕܢܰܚ ܠܰܢ: ܘܰܒܝܽܘܡ ܡܰܘܠܳܕܳܗ̇ ܕܶܐܡܶܗ ܚܰܕܺܝ ܠܰܢ: ܠܗܰܘ ܝܰܠܕܳܐ ܕܶܐܬܺܝܠܶܕ ܡ̣ܶܢ ܝܽܘܝܳܩܺܝܡ ܕܰܘܺܝܕܳܝܳܐ: ܘܰܦܬܰܚ ܠܥܽܘܒܳܐ ܥܰܩܪܳܝܳܐ ܕܚܰܢܰܐ ܐܶܡܳܗ̇: ܘܰܚܕܺܝܘ ܣܳܒ̈ܶܐ ܬܪ̈ܰܝܗܽܘܢ ܒܗܳܢܳܐ ܦܺܐܪܳܐ ܐܠܰܗܳܝܳܐ ܕܶܐܬܚܰܘܺܝ ܠܗܽܘܢ: ܠܗܰܘ ܕܰܒܝܰܕ ܚܶܠܡܳܐ ܕܠܺܠܝܳܐ ܚܰܘܺܝ ܐܶܢܽܘܢ ܥܰܠ ܒܰܛܢܳܗ̇ ܕܛܽܘܒܳܢܺܝܬܳܐ: ܘܶܐܫܬܰܪܰܪܘ ܕܡܶܬܚܰܕܬܳܐ ܥܰܬܺܝܩܽܘܬܰܢ ܠܰܥܠܰܝܡܽܘܬܳܐ: ܒܝܰܕ ܝܰܠܕܳܐ ܦܨܺܝܚܳܐ ܕܰܗܘܳܐ ܠܗܽܘܢ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ܀

 

 

 

ܣܕܪܐ

 

 

 

ܠܡܰܘܠܳܕܶܟܝ ܫܒܺܝܚܳܐ ܘܰܐܠܳܗܳܝܳܐ ܡܩܰܠܣܺܝܢܰܢ ܥܰܡ ܢܽܘܨܪ̈ܳܬܳܐ ܪ̈ܚܺܝܡܳܬܳܐ ܠܳܥܙܺܝܢܰܢ: ܫܽܘܒܚܳܐ ܡܰܠܐܟܳܝܳܐ ܘܥܰܡ ܓܽܘ̈ܕܶܐ ܕܢܽܘܪ̈ܳܢܶܐ ܐܳܡܪܺܝܢܰܢ: ܐܳܘ ܠܝܰܠܕܳܐ ܕܬܶܗܪܳܐ ܕܶܐܬܺܝܠܶܕ ܝܰܘܡܳܢܳܐ ܠܚܰܢܰܐ ܘܰܠܝܽܘܝܳܩܺܝܡ ܣܳܒ̈ܶܐ ܙܗܰܝ̈ܳܐ ܘܥܰܬܺܝ̈ܩܰܝ ܒܝܰܘ̈ܡܳܬܗܽܘܢ: ܕܠܐ ܡ̣ܶܢ ܩܕܳܡܰܘܗܝ ܗܘܳܐ ܐܰܟܘܳܬܶܗ ܐܳܦܠܐ ܡ̣ܶܢ ܒܳܬܪܶܗ ܐ̱ܚܪܺܢܳܐ ܕܕܳܡܶܐ ܠܶܗ: ܗܳܕܶܐ ܕܰܒܓܶܠܝܳܢܳܐ ܐܠܰܗܳܝܳܐ ܐܶܬܒܰܛܢܰܬ݀: ܘܰܒܪܽܘܚܳܐ ܢܒܺܝܳܝܳܐ ܐܶܬܚܰܙܝܰܬ݀: ܗܳܕܶܐ ܕܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܙܳܡܪܺܝܢ ܫܽܘܒܚܳܐ ܠܡܳܪܝܳܐ ܕܰܐܘܪܶܒ ܝܽܘܡ ܝܰܠܕܳܗ̇ ܒܰܒܪܺܝܬܳܐ: ܗܳܕܶܐ ܕܡ̣ܶܢ ܢܙܺܝܪܽܘܬܳܐ ܐܶܬܒܰܛܢܰܬ݀ ܘܡ̣ܶܢ ܥܰܩܪܽܘܬܳܐ ܗܳܐ ܫܶܘܚܰܬ݀ ܘܥܰܡ ܢܰܩܕܽܘܬܳܐ ܐܶܬܝܰܠܕܰܬ݀ ܘܰܒܗܰܝܟܰܠ ܩܽܘܕܫܳܐ ܐܶܬܪܰܒܝܰܬ݀: ܡ̣ܶܢ ܗܶܪ̈ܽܘܡܶܐ ܕܠܶܥ̈ܙܶܐ ܫܰܒܪ̈ܳܝܶܐ: ܗܳܕܶܐ ܕܰܠܝܽܘܡ ܝܰܠܕܳܗ̇ ܟܽܠܗܽܘܢ ܢܒܺܝ̈ܶܐ ܘܚܰܙܳܝ̈ܶܐ ܐ̱ܪ̈ܳܙܶܐ ܨܳܝܪܺܝܢ ܗܘܰܘ: ܕܠܐܡܰܬܝ ܢܶܕܢܰܚ ܡܶܢܳܗ̇ ܗ̇ܰܘ ܕܡܰܢܗܰܪ ܠܗܽܘܢ ܐܰܦܰܝ̈ܗܽܘܢ ܡ̣ܶܢ ܚܶܙ̈ܶܐ ܗܳܠܶܝܢ ܕܰܒܗܽܘܢ ܪܡܶܝܢ ܗܘܰܘ: ܗܳܕܶܐ ܕܟܽܠܗܽܘܢ ܚܰܙܳܝ̈ܶܐ ܠܳܗ̇ ܡܣܰܟܶܝܢ ܗܘܰܘ ܕܒܳܗ̇ ܢܶܦܩܽܘܢ ܐ̱ܪ̈ܳܙܰܝ ܚܶܙܘܰܝ̈ܗܽܘܢ ܠܰܥܒܳܕܳܐ: ܗܳܕܶܐ ܕܕܰܘܺܝܕ ܐܰܒܽܘܗ̇ ܝܰܘܡܳܢ ܡܪܰܩܶܕ ܘܚܳܕܶܐ ܐܰܝܟ ܕܰܩܕܳܡ ܐܳܪܽܘܢܶܗ ܕܰܒܪܳܗ̇ ܘܡܳܪܳܗ̇ ܘܰܐܠܳܗܳܗ̇: ܗܳܕܶܐ ܕܰܫܠܶܝܡܽܘܢ ܒܪܗܶ ܒܫܽܘܫܶܦܳܐ ܠܳܗ̇ ܨܳܐܰܪ ܗܘܳܐ: ܗܳܕܶܐ ܕܒܳܗ̇ ܨܪܺܝܪܺܝܢ ܗܘܰܘ ܡܰܝ̈ܳܐ ܚܰܝ̈ܶܐ ܕܠܐ ܩܛܰܪ̈ܝ ܥܳܠܡܳܐ: ܗܳܕܶܐ ܕܠܳܗ̇ ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܩܳܥܶܐ ܗܘܳܐ ܟܰܕ ܐܳܡܰܪ: ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ ܕܽܘܡܳܪܳܐ: ܗܳܕܶܐ ܕܰܒܽܝܘܡ ܝܰܠܕܳܐ ܚܕܺܝ ܐܶܫܰܥܝܳܐ: ܘܰܪܘܰܙ ܐܶܪܰܡܝܳܐ: ܘܕܳܨ ܚܰܙܩܺܝܶܐܝܠ: ܘܶܐܬܦܨܰܚ ܕܳܢܺܝܶܐܝܠ: ܥܰܡ ܓܽܘܕܳܐ ܐܠܰܗܳܝܬܳܐ ܕܰܬܪܶܥܣܰܪ ܢܒܺܝ̈ܶܐ: ܥܰܡ ܟܽܠܗܽܘܢ ܐܰܒܳܗ̈ܳܬܳܐ ܣܕܺܝܪ̈ܰܝ ܒܡܶܢܝܳܢܳܐ ܕܫܰܪ̈ܒܳܬܳܐ ܐܰܒܳܗܳܝ̈ܳܬܳܐ: ܕܝܰܘܡܳܢ ܗܘܳܐ ܫܽܘܪܳܝ ܒܽܘܝܳܐܳܐ ܐܠܰܗܳܝܳܐ ܕܺܝܠܗܽܘܢ: ܕܶܐܬܝܰܠܕܰܬ݀ ܒܬܽܘܠܬܳܐ ܡܰܪܝܰܡ ܒܓܰܘ ܥܳܠܡܳܐ: ܘܡܶܢܳܗ̇ ܡܶܬܺܝܠܶܕ ܢܽܘܗܪܳܐ ܕܠܐ ܥܳܪܶܒ: ܫܶܡܫܳܐ ܕܠܐ ܚܳܫܶܟ: ܨܶܡܚܳܐ ܕܠܐ ܥܳܡܶܛ: ܕܠܶܗ ܡܶܬܟܰܫܦܺܝܢܰܢ ܒܝܽܘܡ ܡܰܘܠܳܕܳܗ̇ ܕܶܐܡܶܗ ܕܰܢܫܰܪܬܰܚ ܠܰܢ ܒܟܽܠ ܡܰܘܗ̈ܒܳܬܳܐ ܐܠܰܗܳܝ̈ܳܬܳܐ ܕܡ̣ܶܢ ܠܘܳܬܶܗ: ܘܢܰܝܬܶܐ ܠܰܢ ܙܰܒ̈ܢܶܐ ܛܳܒ̈ܶܐ ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܢܰܥܒܰܪ ܡܶܢܰܢ ܟܽܠ ܡܰܪ̈ܕܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܢܰܫܘܶܐ ܠܰܢ ܘܰܠܥܰܢܺܝ̈ܕܰܝܢ ܠܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܥܰܡ ܟܳܪܽܘܙܽܘܬܳܐ ܕܚܶܙ̈ܘܳܢܶܐ ܢܒܺܝ̈ܳܝܶܐ ܥܰܡ ܕܽܘܟܪܳܢܳܐ ܛܳܒܳܐ ܕܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ: ܘܚܽܘܠܡܳܢܳܐ ܠܟܽܠܗܽܘܢ ܡܰܪ̈ܥܶܐ: ܘܡ̣ܶܢ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܚܕܳܐ ܒܰܪܬ ܩܳܠܐ ܕܫܽܘܒܚܳܐ ܡܰܣܩܺܝܢܰܢ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܩܘܡܐ ܕܬܪܝܢ ܕܠܠܝܐ

 

ܦܪܘܡܝܘܢ

 

 

 

ܠܗܰܘ ܕܰܒܝܽܘܡ ܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܚܰܕܬܶܗ ܠܓܶܢܣܰܢ: ܡ̣ܶܢ ܥܰܒܕܽܘܬܳܐ ܕܰܚܛܺܝܬܳܐ ܘܰܐܫܘܰܚ ܠܰܢ ܦܺܐܪܳܐ ܒܽܘܪܟܬܳܢܳܝܳܐ ܕܠܐ ܣܳܐܶܒ ܕܒܶܗ ܡܶܬܚܰܕܬܳܐ ܠܳܗ̇ ܟܽܠܳܗ̇ ܓܒܺܝܠܬܰܢ ܐܠܰܗܳܝܬܳܐ: ܠܗܰܘ ܕܰܒܝܽܘܡ ܡܰܘܠܳܕܳܗ̇ ܕܶܐܡܶܗ ܚܕܺܝ ܘܰܐܦܨܰܚ ܠܰܫܡܰܝ̈ܳܢܶܐ ܘܠܐܪ̈ܥܳܢܳܝܶܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܒܚ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܠܝܰܘܡܳܐ ܗܳܢܳܐ ܕܡܰܘܠܳܕܶܟܝ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ ܐܠܰܗܳܐ ܡܰܪܝܰܡ ܡܥܰܕܥܕܺܝܢܰܢ: ܠܐܒܳܗܰܝ̈ܟܝ ܕܶܐܬܛܰܪܰܦܘ ܘܶܐܬܢܰܘܰܠܘ ܒܥܰܩܪܽܘܬܳܐ ܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ ܛܽܘܒܳܐ ܝܳܗܒܺܝܢܰܢ: ܕܰܐܝܢܳܐ ܦܺܐܪܳܐ ܘܰܐܝܕܳܐ ܣܰܘܟܬܳܐ ܫܶܘܚܰܬ݀ ܒܥܳܠܡܳܐ ܡ̣ܶܢ ܥܰܩܪܗܽܘܢ: ܗܳܠܶܝܢ ܣܳܒ̈ܶܐ ܒܪ̈ܺܝܟܶܐ ܘܩܰܕܺܝ̈ܫܶܐ ܘܥܰܬܺܝ̈ܩܰܝ ܒܝܰܘ̈ܡܳܬܗܽܘܢ: ܟܰܕ ܬܚܶܝܬ ܚܶܣܕܳܐ ܪܰܒܳܐ ܐܺܝܬܰܝܗܽܘܢ ܗܘܰܘ ܡ̣ܶܢ ܝܰܕ ܥܰܩܪܽܘܬܗܽܘܢ: ܝܽܘܝܳܩܺܝܡ ܙܰܕܺܝܩܳܐ ܗ̇ܰܘ ܕܰܒܚܰܡܫܳܐ ܫܡܳܗ̈ܐܶ ܡܶܬܩܪܶܐ ܗܘܳܐ ܡ̣ܶܢ ܡܝܰܬܪܽܘܬ ܕܽܘܒܳܪ̈ܰܘܗܝ: ܝܽܘܝܳܩܺܝܡ ܘܝܽܘܢܳܟܺܝܪ ܘܝܽܘܝܳܟܺܝܡ ܐܳܦ ܨܳܕܽܘܩ ܘܝܽܘܙܳܕܳܩ: ܟܗܢܳܐ ܙܰܗܝܳܐ ܘܩܰܕܺܝܫܳܐ: ܟܰܕ ܕܶܒܚ̈ܶܐ ܘܩܽܘܪ̈ܒܳܢܶܐ ܒܳܥܶܐ ܗܘܳܐ ܕܰܢܩܰܪܶܒ ܠܡܳܪܝܳܐ: ܘܡ̣ܶܢ ܟܳܗ̈ܢܶܐ ܚܰܪ̈ܡܶܐ ܠܐ ܡܶܬܦܣܶܣ ܗܘܳܐ: ܗܳܝܕܶܝܢ ܨܰܠܺܝ ܒܚܰܫܳܐ ܪܰܒܳܐ ܩܕܳܡ ܐܠܰܗܳܐ ܕܢܶܬܶܠ ܠܶܗ ܦܺܐܪܳܐ ܕܢܰܥܒܰܪ ܥܳܩ̈ܳܬܶܗ: ܘܕܰܢܪܺܝܡ ܠܚܶܣܕܳܐ ܕܥܰܩܪܽܘܬܳܐ ܡܶܢܶܗ: ܐܰܢ̱ܬܬܶܗ ܢܰܟܦܬܳܐ ܘܰܬܪܺܝܨܰܬ݀ ܕܽܘܒܳܪ̈ܶܐ ܗ̇ܳܝ ܕܒܰܬܪܶܝܢ ܫܡܳܗ̈ܶܐ ܡܶܬܟܰܢܝܳܐ ܗܘܳܬ݀ ܕܺܝܢܰܐ ܘܚܰܢܰܐ: ܟܰܕ ܒܓܰܢܬܳܐ ܡܛܰܝܠܐ ܗܘܳܬ ܘܰܡܕܰܝܠܐ ܘܚܳܪܰܬ݀ ܘܰܚܙܳܬ݀ ܨܶܦܪ̈ܶܐ ܕܰܒܦܰܪ̈ܽܘܓܰܝܗܶܝܢ ܦܨܺܝ̈ܚܳܢ: ܘܫܰܪܝܰܬ݀ ܒܳܟܝܳܐ ܒܰܚܢܰܓܬܳܐ ܥܰܠ ܥܰܩܪܽܘܬܳܗ̇: ܘܰܐܪܺܝܡܰܬ݀ ܩܳܠܳܗ̇ ܘܶܐܡܪܰܬ݀: ܐܽܘܢ ܡܳܪܝܳܐ ܐܶܬܪܰܚܰܡ ܥܰܠ ܡܛܰܪܦܽܘܬܝ: ܘܗܰܒ ܠܺܝ ܦܺܐܪܳܐ ܠܣܰܝܒܽܘܬܝ: ܕܡܰܥܒܰܪ ܥܳܩ̈ܳܬܝ ܘܰܟܡܺܝܪܽܘܬܝ ܘܢܶܗܘܶܐ ܢܶܕܪܳܐ ܠܪܰܒܽܘܬܳܟ: ܘܰܢܫܰܡܶܫ ܠܐܠܳܗܽܘܬܳܟ: ܘܡܰܠܐܟܳܐ ܢܚܶܬ ܘܣܰܒܪܳܗ̇: ܕܡܳܪܝܳܐ ܩܰܒܶܠ ܒܳܥܽܘܬܶܟܝ ܘܝܳܗܶܒ ܦܺܐܪܳܐ ܠܰܡܓܰܙܝܽܘܬܟܽܘܢ: ܐܰܥܒܰܪܘ ܥܳܩܬܳܐ ܡ̣ܶܢ ܠܶܒܰܘ̈ܳܬܟܽܘܢ: ܝܰܘܡܳܢܳܐ ܐܶܬܝܰܠܕܰܬ݀ ܗ̇ܳܝ ܕܡ̣ܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ ܐܶܬܓܰܒܝܰܬ݀: ܝܰܘܡܳܢܳܐ ܐܶܬܝܰܠܕܰܬ݀ ܗ̇ܳܝ ܕܰܥܠܶܝܗ̇ ܐܶܬܢܰܒܺܝܘ ܢܒܺܝ̈ܶܐ: ܘܡܰܠܶܠܘ ܚܰܙܳܝ̈ܶܐ ܘܒܰܕܶܩܘ ܟܳܪ̈ܽܘܙܶܐ: ܟܰܕ ܩܰܕܡܳܝܳܐ ܕܟܽܠܗܽܘܢ ܗ̇ܳܢܽܘܢ ܕܰܥܠܶܝܗ̇ ܐܶܬܢܰܒܺܝܘ: ܐܺܝܬܰܘܗܝ ܐܳܕܳܡ ܪܺܝܫܳܐ ܕܫܰܪ̈ܒܳܬܳܐ ܟܰܕ ܡܦܰܩܶܕ ܗܘܳܐ ܠܰܒܢܰܘ̈ܗܝ ܒܥܶܕܳܢ ܡܰܘܬܶܗ: ܘܶܐܡܰܪ ܠܗܽܘܢ ܕܶܐܙܕܰܗܪܘ ܒܩܽܘܪ̈ܒܳܢܶܐ ܗܳܠܶܝܢ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ: ܘܣܺܝܡܘ ܐܶܢܽܘܢ ܒܰܡܥܰܪܰܬ݀ ܓܰܙ̈ܶܐ: ܗܳܠܶܝܢ ܕܳܫ̈ܢܶܐ ܐܶܢܽܘܢ ܡܶܢܝ ܠܡܳܪܳܐ ܕܺܝܠܝ: ܕܝܳܕܰܥ ܐ̱ܢܳܐ ܕܡܳܪܝ ܘܰܐܠܳܗܝ ܥܬܺܝܕ ܕܢܺܐܬܶܐ ܠܦܽܘܪܩܳܢܝ: ܘܢܳܚܶܬ ܡ̣ܶܢ ܫܡܰܝܳܐ ܘܫܳܪܶܐ ܒܰܒܬܽܘܠܬܳܐ ܘܡܶܬܺܝܠܶܕ ܡ̣ܶܢ ܒܪܰܬܝ: ܘܠܳܒܶܫ ܦܰܓܪܳܐ ܘܦܳܪܶܩ ܠܺܝ ܘܰܠܟܽܠܗܽܘܢ ܝܰܠܕ̈ܰܝ: ܐܰܪܺܝܡ ܪܺܝܫܟ ܐܳܘ ܐܳܕܳܡ ܕܶܐܫܬܰܡܠܝܰܬ݀ ܢܒܺܝܽܘܬܳܟ: ܕܶܐܬܝܰܠܕܰܬ݀ ܝܰܘܡܳܢܳܐ ܒܰܪܬܳܟ: ܕܝܶܠܕܰܬ݀ ܠܡܳܪܳܟ ܘܰܐܠܳܗܳܟ ܘܦܳܪܽܘܩܳܟ: ܚܕܺܝ ܚܰܙܩܺܝܶܐܝܠ ܕܗܳܐ ܬܰܪܥܳܐ ܐܰܚܺܝܕܳܐ ܘܰܚܬܺܝܡܳܐ ܕܶܐܬܚܰܘܺܝ ܠܳܟ ܕܐ̱ܢܳܫ ܠܐ ܢܶܥܽܘܠ ܒܶܗ: ܡܰܪܝܰܡ ܐܺܝܬܶܝܗ̇ ܕܝܰܘܡܳܢܳܐ ܐܶܬܝܰܠܕܰܬ݀ ܘܟܳܕ ܩܰܝܳܡܺܝܢ ܒܬܽܘ̈ܠܶܝܗ̇ ܘܰܚܬܺܝܡܳܐ ܝܶܠܕܰܬ݀ ܠܰܡܫܺܝܚܳܐ: ܕܽܘܨ ܝܰܥܩܽܘܒ ܕܣܶܒܠܬܳܐ ܗ̇ܳܝ ܕܰܚܙܰܝܬ ܒܳܗ̇ ܣܳܠܩܺܝܢ ܘܢܳܚܬܺܝܢ ܥܺܝܪ̈ܶܐ: ܡܰܪܝܰܡ ܐܺܝܬܶܝܗ̇ ܕܝܰܘܡܳܢܳܐ ܐܶܬܝܰܠܕܰܬ݀ ܕܢܳܚܶܬ ܫܳܪܶܐ ܒܳܗ̇ ܡܶܠܬܳܐ ܐܠܰܗܳܐ ܘܰܒܦܰܓܪܳܐ ܕܡܶܢܳܗ̇ ܢܣܰܒ ܐܰܣܶܩ ܠܓܶܢܣܰܢ ܠܰܫܡܰܝܳܐ: ܪܘܰܙ ܐܠܶܝܫܳܥ ܕܩܽܘܩܬܳܐ ܚܕܰܬܳܐ ܕܒܳܗ̇ ܚܰܠܺܝܬ ܠܡܰܝ̈ܳܐ ܡܰܪܺܝܪ̈ܶܐ: ܠܡܰܪܝܰܡ ܕܝܰܘܡܳܢܳܐ ܐܶܬܝܰܠܕܰܬ݀ ܡܛܰܦܣܳܐ ܗܘܳܬ݀: ܚܰܕܬܽܘܬܳܗ̇ ܡ̇ܰܢ ܠܰܒܬܽܘܠܽܘܬܳܗ̇ ܘܡܶܠܚܳܗ̇ ܕܒܳܗ̇ ܕܰܐܩܢܝܰܬ݀ ܛܰܥܡܳܐ ܠܡܰܝ̈ܳܐ ܣܪ̈ܰܝܳܐ: ܠܰܡܫܺܝܚܳܐ ܡܰܐܪܙܳܐ ܗܘܳܬ݀ ܕܡܰܕܰܟ ܣܰܪܝܽܘܬܳܐ ܘܦܰܟܺܝܗܽܘܬܳܐ ܕܥܰܡ̈ܡܶܐ: ܐܶܬܦܰܨܚ ܓܶܕܥܽܘܢ ܕܰܐܡܬܶܠܬܝ ܡܰܪܝܰܡ ܗ̣ܺܝ ܕܝܰܘܡܳܢ ܐܶܬܝܰܠܕܰܬ݀ ܘܒܰܪܬ ܬܪܶܥܣܰܪ ܫܢܺܝ̈ܢ ܩܰܒܠܰܬ݀ ܠܛܰܠܐ ܫܡܰܝܳܢܳܐ ܘܝܶܠܕܰܬ݀ ܠܡܶܛܪܳܐ ܕܚܰܝ̈ܶܐ ܘܰܐܠܳܗܳܐ: ܝܰܘܡܳܢܳܐ ܢܶܚܕܶܐ ܐܰܒܪܳܗܳܡ ܕܺܐܝܠܳܢܳܐ ܕܰܐܘܠܶܕ ܠܶܗ ܐܶܡܪܳܐ ܕܠܐ ܙܽܘܘܳܓܳܐ: ܘܦܰܪܩܶܗ ܠܐܝܣܚܳܩ ܡ̣ܶܢ ܩܶܛܠܐ: ܠܡܰܪܝܰܡ ܡܛܰܦܶܣ ܗܘܳܐ ܗܳܕܶܐ ܕܝܰܘܡܳܢ ܐܶܬܝܰܠܕܰܬ݀ ܕܝܶܠܕܰܬ݀ ܠܐܡܪܶܗ ܕܰܐܠܳܗܳܐ ܕܦܰܪܩܶܗ ܠܥܳܠܡܳܐ ܡ̣ܶܢ ܣܳܟܶܗ: ܝܰܘܡܳܢܳܐ ܢܶܬܦܨܰܚ ܕܳܢܺܝܶܐܝܠ ܕܛܽܘܪܳܐ ܕܶܐܬܓܰܙܪܰܬ݀ ܡܶܢܶܗ ܟܺܐܦܳܐ ܠܐ ܥܒܺܝܕܳܐ ܒܺܐܝ̈ܕܰܝܳܐ: ܡܰܪܝܰܡ ܐܺܝܬܶܝܗ̇ ܛܽܘܪܳܐ ܕܝܰܘܡܳܢܳܐ ܐܶܬܝܰܠܕܰܬ݀ ܘܡܶܢܳܗ̇ ܐܶܬܚܰܝܰܕ ܡܫܺܝܚܳܐ ܟܺܐܦܳܐ ܕܰܫܪܳܪܳܐ ܕܶܐܬܩܪܺܝ ܟܺܐܦܳܐ ܕܬܽܘܩܰܠܬܳܐ ܘܰܕܡܰܟܫܽܘܠܐ ܕܶܐܬܬܣܺܝܡ ܒܨܶܗܝܽܘܢ: ܝܰܘܡܳܢܳܐ ܢܩܰܝܶܙ ܘܰܢܕܽܘܨ ܕܰܘܺܝܕ ܕܛܽܘܪܳܐ ܕܰܓܒܳܐ ܠܶܗ ܐܠܰܗܳܐ ܠܡܶܬܰܒ ܒܶܗ ܡܰܪܝܰܡ ܐܺܝܬܶܝܗ̇ ܕܝܰܘܡܳܢ ܐܶܬܝܰܠܕܰܬ݀: ܘܶܐܬܓܰܒܝܰܬ݀ ܠܐܠܳܗܳܐ ܘܰܗܘܳܬ݀ ܠܶܗ ܠܒܶܝܬ ܡܰܥܡܪܳܐ ܘܰܢܝܳܚܬܳܐ ܠܥܳܠܰܡ ܥܳܠܡܺܝܢ: ܝܰܘܡܳܢܳܐ ܢܶܪܘܰܙ ܫܠܶܝܡܽܘܢ ܕܫܽܘܫܶܦܳܐ ܕܰܨܪܺܝܪܺܝܢ ܗܘܰܘ ܒܳܗ̇ ܡܰܝ̈ܳܐ ܡܫܺܝܚܳܐ ܗ̇ܰܘ ܕܰܩܪܳܐ ܗ̣ܽܘ ܠܶܗ ܡܰܝ̈ܳܐ ܚܰܝ̈ܶܐ: ܝܰܘܡܳܢܳܐ ܢܶܬܦܰܨܚܽܘܢ ܟܽܠܗܽܘܢ ܢܒܺܝ̈ܶܐ ܕܡܶܠܰܝ̈ܗܽܘܢ ܢܦܰܩ̈ܝ ܠܓܶܠܝܳܐ ܘܶܐܬܦܰܫܰܩ̈ܝ ܣܬܺܝܪ̈ܳܬܗܽܘܢ: ܒܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܡܶܢܳܗ̇ ܐܶܬܺܝܠܶܕ ܡܫܺܝܚܳܐ ܕܫܰܡܠܺܝ ܐ̱ܪ̈ܳܙܶܐ ܘܛܽܘ̈ܦܣܶܐ ܕܰܪܫܰܡܘ ܠܶܗ ܚܰܙܳܝ̈ܶܐ: ܗܳܕܶܐ ܗ̱ܝ ܕܟܰܕ ܗ̣ܺܝ ܒܰܪܬ ܬܠܳܬ ܫܢܺܝ̈ܢ ܐܶܬܝܰܗܒܰܬ݀ ܠܒܶܝܬ ܩܽܘܕܫܳܐ ܐܰܝܟ ܢܶܕܪܳܐ ܕܰܢܕܰܪܘ ܐܰܒܳܗܶܝ̈ܗ̇: ܘܶܐܬܪܰܒܝܰܬ݀ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܶܝ̈ܗ̇: ܗܳܕܶܐ ܗ̱ܝ ܕܡ̣ܶܢ ܫܰܒܪܽܘܬܳܐ ܕܺܝܠܳܗ̇ ܘܝܺܠܺܝܕܽܘܬܳܗ̇ ܐܶܬܚܰܣܠܰܬ݀ ܡ̣ܶܢ ܡܶܐܟ̈ܠܳܬܳܐ ܥܳܒܽܘܪ̈ܝܳܬܳܐ: ܘܣܰܝܒܳܪܬܳܐ ܡ̣ܶܢ ܡܰܠܐܟܳܐ ܡܩܰܒܠܐ ܗܘܳܬ: ܟܰܕ ܒܒܰܝܬܶܗ ܕܡܳܪܝܳܐ ܢܛܺܝܪܳܐ ܗܘܳܬ݀ ܘܡܶܬܪܰܒܝܳܐ ܗܘܳܬ: ܗܳܕܶܐ ܗ̱ܝ ܕܟܰܕ ܗ̣ܺܝ ܒܰܪܬ ܚܰܡܶܫ ܫܢܺܝ̈ܢ ܡܺܝܬܘ ܐܰܒܳܗܶܝ̈ܗ̇ ܘܫܰܒܩܽܘܗ̇ ܝܰܬܡܬܳܐ ܘܰܡܓܰܙܰܝܬܳܐ ܘܡܳܪܝܳܐ ܚܰܡܠܳܗ̇ ܘܰܩܢܳܗ̇ ܘܥܰܒܕܳܗ̇ ܠܶܗ ܒܶܝܬ ܡܰܥܡܪܳܐ: ܗܳܕܶܐ ܗ̱ܝ ܕܝܰܩܺܝܪ̈ܳܬܳܐ ܐܶܬܡ̈ܰܠܰܠܝ ܥܠܶܝܗ̇: ܘܠܰܝܬ ܡܶܕܶܡ ܕܕܳܡܶܐ ܠܳܗ̇: ܠܐ ܒܰܫܡܰܝܳܐ ܘܠܐ ܒܰܐܪܥܳܐ: ܗܳܕܶܐ ܗ̱ܝ ܕܥܰܩܪܽܘܬܳܐ ܘܰܓܠܺܝܙܽܘܬܳܐ ܕܰܐܒܳܗܶܝ̈ܗ̇ ܕܡ̣ܶܢ ܦܺܐܪܳܐ: ܠܥܰܩܪܽܘܬܳܐ ܕܶܝܢ ܕܥܰܡ̈ܡܶܐ ܕܰܓܠܺܝܙܺܝܢ ܗܘܰܘ ܡ̣ܶܢ ܦܺܐܪ̈ܶܐ ܥܒܳܕ̈ܶܐ ܛܳܒ̈ܶܐ ܨܳܝܪܳܐ ܗܘܳܬ: ܘܒܳܬܰܪ ܕܶܝܢ ܕܰܥܬܶܩܘ ܘܰܦܣܰܩܘ ܣܰܒܪܳܐ ܡ̣ܶܢ ܝܰܠܕܳܐ: ܐܶܬܝܰܗܒܰܬ݀ ܠܗܽܘܢ ܡܰܪܝܰܡ ܦܺܐܪܳܐ ܕܒܽܘܪ̈ܟܳܬܳܐ ܒܽܘܝܳܐܳܐ ܠܰܡܛܰܪܦܽܘܬܗܽܘܢ: ܘܚܰܕܽܘܬܳܐ ܪܰܒܬܳܐ ܠܣܰܝܒܽܘܬܗܽܘܢ: ܗܳܟܰܢܳܐ ܘܰܐܪܥܳܐ ܒܳܬܰܪ ܕܰܥܒܰܪܘ ܙܰܒ̈ܢܶܐ ܘܕܳܪ̈ܶܐ ܘܰܫܢܰܝ̈ܳܐ ܘܰܐܥܬܩܰܬ݀ ܒܛܳܥܝܽܘܬܳܐ ܘܦܶܣܩܰܬ݀ ܣܰܒܪܳܐ ܡ̣ܶܢ ܛܳܒܬܳܐ: ܘܩܰܪܺܝܒ ܗܘܳܐ ܐܠܰܦܳܐ ܕܶܫܬܳܐ: ܐܶܬܺܝܠܶܕ ܠܳܗ̇ ܦܳܪܽܘܩܳܐ ܝܶܫܽܘܥ ܡܫܺܝܚܳܐ ܘܰܐܠܶܦ ܠܰܒܢܰܝ̈ܢܳܫܳܐ ܕܢܰܦܪܽܘܢ ܦܺܐܪ̈ܶܐ ܕܙܰܕܺܝܩܽܘܬܳܐ: ܘܰܕܢܶܥܒܕܽܘܢ ܥܒ̈ܳܕܶܐ ܕܰܡܝܰܬܪܽܘܬܳܐ: ܕܠܶܗ ܠܡܳܪܝܳܐ ܕܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܐܶܬܺܝܠܶܕ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܒܝܰܘܡܳܐ ܗܳܢܳܐ ܕܡܰܘܠܳܕܳܗ̇: ܕܢܶܬܶܠ ܠܰܢ ܕܢܰܦܪܶܐ ܦܺܐܪ̈ܶܐ ܐܰܘܟܺܝܬ ܥܒܳܕ̈ܶܐ ܛܳܒ̈ܶܐ ܒܢܰܦ̈ܫܳܬܰܢ ܥܰܩܪ̈ܳܬܳܐ: ܝܰܠܕ̈ܶܐ ܪ̈ܽܘܚܳܢܳܝܶܐ: ܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܘܰܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ: ܘܰܢܙܰܗܶܐ ܠܡܰܚ̈ܫܒܳܬܰܢ ܡܟܰܬܡ̈ܳܬܳܐ ܘܰܢܫܰܦܶܐ ܠܬܰܪ̈ܥܝܳܬܰܢ ܡܣܰܝ̈ܒܳܬܳܐ ܘܰܢܕܰܟܶܐ ܠܬܺܐܪ̈ܳܬܰܢ ܡܛܰܘ̈ܫܳܬܳܐ ܘܢܶܬܶܠ ܠܰܢ ܙܰܒ̈ܢܶܐ ܕܚܰܕ̈ܘܳܬܳܐ ܘܰܫܢܰܝ̈ܳܐ ܟܰܗܺܝ̈ܢܳܬ ܒܛܳܒ̈ܳܬܳܐ ܘܰܢܣܰܒܰܥ ܠܟܰܦ̈ܢܶܐ ܘܠܰܣܢܺܝ̈ܩܶܐ ܘܚܰܣܺܝܪ̈ܶܐ ܘܢܶܙܽܘܢ ܠܝܰܬܡ̈ܶܐ ܘܠܐܪ̈ܡܠܳܬܳܐ ܘܰܢܚܰܕܶܐ ܠܰܢ ܘܰܠܥܰܢܺܝ̈ܕܰܝܢ ܒܚܰܕܽܘܬܶܗ ܗ̇ܳܝ ܠܐ ܡܶܫܬܰܪܝܳܢܺܝܬܳܐ: ܥܰܡ ܐܶܡܶܗ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܕܝܰܘܡܳܢܳܐ ܗܘܳܐ ܡܰܘܠܳܕܳܗ̇: ܘܢܶܫܬܘܶܐ ܠܦܶܣܳܐ ܘܠܰܡܢܳܬܳܐ ܕܥܰܡ ܐܰܒܳܗܶܝ̈ܗ̇ ܟܺܐܢ̈ܶܐ ܘܙܰܕܺܝ̈ܩܶܐ ܘܰܕܢܶܬܒܰܣܰܡ ܥܰܡ ܩܰܕܺܝ̈ܫܶܐ ܒܡܰܠܟܽܘܬܳܐ ܕܰܫܡܰܝܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܒܡܰܘܠܳܕܶܟܝ ܐܳܘ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܫܳܪܽܘܬܳܐ ܪܰܒܬܳܐ ܥܒܰܕܘ ܐܰܒܳܗܰܝ̈ܟܝ ܘܰܦܨܺܝܚܽܘܬܳܐ ܘܚܰܕܽܘܬܳܐ ܐܶܬܡܠܺܝܘ ܒܝܰܕ ܨܠܰܘ̈ܳܬܶܟܝ ܘܰܨܠܰܘ̈ܳܬܳܐ ܕܰܐܒܳܗܰܝ̈ܟܝ ܢܶܬܬܢܺܝܚܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܢܶܬܒܰܣܡܽܘܢ ܒܫܳܪܽܘܬܳܐ ܪܽܘܚܳܢܳܝܬܳܐ ܒܡܰܠܟܽܘܬܳܐ ܫܡܰܝܳܢܺܝܬܳܐ: ܘܰܚܢܰܢ ܘܗ̣ܶܢܽܘܢ ܢܶܫܬܘܶܐ ܠܚܰܕܽܘܬܳܐ ܠܐ ܡܶܫܬܰܪܝܳܢܺܝܬܳܐ ܘܠܰܦܨܺܝܚܽܘܬܳܐ ܠܐ ܥܳܒܽܘܪܬܳܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܠܗܰܘ ܡܰܠܟܳܐ ܕܪܰܘܡܳܐ ܕܰܨܒܳܐ ܒܚܽܘܒܶܗ ܕܢܶܕܢܰܚ ܒܓܰܘ ܥܳܠܡܳܐ ܘܰܓܒܳܐ ܠܶܗ ܐܶܡܳܐ ܒܬܽܘܠܬܳܐ ܕܕܰܟܝܳܐ ܘܢܰܩܕܳܐ ܘܩܰܕܺܝܫܳܐ ܡ̣ܶܢ ܟܽܠܗܶܝܢ ܢܶܩ̈ܒܳܬܳܐ: ܘܰܠܗܳܕܶܐ ܡ̣ܶܢ ܥܽܘ̈ܒܶܐ ܥܰܩܪ̈ܳܝܶܐ ܐܰܫܘܰܚ ܕܡ̣ܶܢ ܒܳܬܰܪ ܦܣܳܩ ܣܰܒܪܳܐ ܕܢܶܗܘܶܐ ܠܗܽܘܢ ܦܺܐܪܳܐ ܒܽܘܪܟܬܳܢܳܝܳܐ ܐܶܫܬܰܘܕܺܝ ܠܗܽܘܢ ܘܶܐܬܝܰܠܕܰܬ݀ ܠܗܽܘܢ ܒܬܽܘܠܬܳܐ ܡܰܪܝܰܡ ܝܰܘܡܳܢܳܐ ܕܰܟܝܳܐܝ̣ܬ ܘܩܰܕܺܝܫܳܐܝ̣ܬ: ܘܟܰܕ ܒܝܽܘܡ ܝܰܠܕܳܗ̇ ܒܚܰܕܽܘܬܳܐ ܘܰܪܘܳܙܳܐ ܪܰܒܳܐ ܐܳܡܪܺܝܢܰܢ: ܕܰܒܪܺܝܟ ܡܳܪܝܳܐ ܕܰܣܥܰܪ ܥܰܡܶܗ ܘܰܐܩܺܝܡ ܠܗܽܘܢ ܩܰܪܢܳܐ ܕܦܽܘܪܩܳܢܳܐ ܒܒܰܝܬܶܗ ܕܕܰܘܺܝܕ ܥܰܒܕܶܗ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܳܪܝܳܐ ܐܠܰܗܳܐ ܡܪܰܝܡܳܐ ܘܰܐܚܽܝܕ ܟܽܠ: ܗ̇ܰܘ ܕܠܐ ܨܳܒܶܐ ܕܢܺܐܒܰܕ ܨܰܠܡܳܐ ܕܰܓܒܰܠܝ̈ ܐܺܝܕܰܘ̈ܗܝ ܗ̇ܰܘ ܓܡܺܝܪܳܐ ܘܡܶܬܬܢܺܝܚ ܒܰܓܡܺܝܪ̈ܶܐ: ܗ̇ܰܘ ܕܗ̣ܽܘ ܐܺܝܬܰܘܗܝ ܥܶܠܬܳܐ ܕܥܺܐܕܳܐ ܘܡܰܘܪܒܳܢܳܐ ܕܥܰܕ̈ܥܺܐܕܶܐ ܗ̇ܰܘ ܕܚܰܕܽܘܬܳܐ ܗ̱ܝ ܠܳܟ ܕܽܘܟܪ̈ܳܢܰܝܗܽܘܢ ܕܟܺܐܢ̈ܶܐ ܩܰܕ̈ܡܳܝܶܐ: ܗ̇ܳܢܽܘܢ ܕܰܗܘܰܘ ܠܳܟ ܝܰܩ̈ܕܶܐ ܫܰܠܡ̈ܶܐ: ܘܫܰܡܠܺܝܬ ܣܽܘܟܳܝܗܽܘܢ ܒܓܰܘ ܥܳܠܡܳܐ: ܒܗܳܢܳܐ ܝܰܘܡܳܐ ܕܡܰܘܠܳܕܳܗ̇ ܕܶܐܡܳܐ ܒܬܽܘܠܬܳܐ ܕܺܝܠܶܕܬܳܟ: ܘܰܫܘܳܬ݀ ܕܬܶܛܥܢܳܟ ܒܟܰܪܣܳܗ̇: ܘܰܬܙܰܝܰܚ ܠܐܪܳܙܳܐ ܪܰܒܳܐ ܕܰܐܠܳܗܽܘܬܳܟ: ܗ̇ܳܝ ܕܝܰܘܡܳܢܳܐ ܐܶܬܝܰܠܕܰܬ݀: ܘܰܒܝܽܘܡ ܝܰܠܕܳܗ̇ ܣܶܓܝܰܬ݀ ܚܰܕܽܘܬܳܐ ܠܟܽܠܶܗ ܓܶܢܣܳܗ̇ ܐܰܒܳܗܳܝܳܐ ܘܕܰܘܺܝܕܳܝܳܐ: ܝܰܘܡܳܢܳܐ ܚܰܢܰܐ ܚܳܕܝܳܐ: ܝܰܘܡܳܢܳܐ ܝܽܘܝܳܩܺܝܡ ܕܳܐܶܨ ܘܪܳܘܶܙ ܒܚܰܕܽܘܬܳܐ ܘܰܡܥܰܢܶܐ ܥܰܡ ܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܕܡܰܢܽܘ ܢܶܬܶܠ ܠܺܝ ܕܝܰܠܕܳܐ ܕܰܐܝܟ ܗܳܢܳܐ ܡܶܢܝ ܢܶܕܢܰܚ ܒܓܰܘ ܐܳܦܰܪܬܳܐ: ܡܰܢܽܘ ܚܰܘܝܰܢܝ ܕܡܰܪܝܰܡ ܒܬܽܘܠܬܳܐ ܡܶܢܝ ܬܶܫܘܰܚ ܒܓܰܘ ܬܺܒܶܝܠ: ܕܡܶܢܳܗ̇ ܡܫܰܪܶܝܢ ܚܰܝ̈ܶܐ ܠܡܶܬܝܰܒܳܠܽܘ ܒܓܰܘ ܥܳܠܡܰܢ: ܚܕܰܘ ܥܰܡܝ ܟܽܠܟܽܘܢ ܟܺܐܢ̈ܶܐ ܩܰܕ̈ܡܳܝܶܐ: ܕܨܶܝܕܰܝ ܡܶܫܬܰܡܠܐܷ ܣܽܘܟܳܝܳܐ ܕܺܝܠܟܽܘܢ: ܕܝܰܠܕܳܐ ܕܡ̣ܶܢ ܡܰܪܝܰܡ ܒܪܰܬܝ ܡܰܥܒܰܪ ܟܰܪܝܽܘܬܳܐ ܡ̣ܶܢ ܐܰܦܰܝ̈ܟܽܘܢ: ܘܳܐܦ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܥܰܡ ܚܰܢܰܐ ܘܝܽܘܝܳܩܺܝܡ ܚܳܕܶܝܢܰܢ ܘܕܳܝܨܺܝܢܰܢ ܟܰܕ ܐܳܡܪܺܝܢܰܢ: ܗܳܕܶܐ ܕܰܗܘܳܬ݀ ܥܢܳܢܳܐ ܩܰܠܺܝܠܬܳܐ ܘܰܠܛܰܠܐ ܫܡܰܝܳܢܳܐ ܝܶܠܕܰܬ݀ ܘܰܠܨܳܐܝ̈ܘܳܬܳܐ ܕܰܐܒܽܘܗ̇ ܐܳܕܳܡ ܐܰܫܺܝܓܰܬ݀ ܢܶܨܒܬܳܐ ܩܰܕܡܳܝܬܳܐ ܕܰܒܬܽܘܠܽܘܬܳܐ: ܣܶܒܠܬܳܐ ܫܡܰܝܳܢܺܝܬܳܐ ܕܰܗܘܳܬ ܠܓܶܢܣܰܢ ܐܰܝܟܰܢܳܐ ܕܰܚܢܰܢ ܟܰܕ ܒܳܗ̇ ܣܳܠܩܺܝܢܰܢ: ܢܶܬܡܨܶܐ ܠܡܶܬܥܰܠܳܝܽܘ ܠܘܳܬ ܫܡܰܝܳܐ ܘܰܐܪܥܳܐ ܡܠܺܝܠܬܳܐ ܕܳܐܕܳܡ ܕܰܬܪܶܝܢ ܡܶܢܳܗ̇ ܝܺܥܳܐ ܘܰܓܒܰܠ ܗ̣ܽܘ ܠܶܗ ܒܰܦܓܰܪ: ܝܽܘܡ ܝܰܠܕܳܗ̇ ܗܘܳܐ ܠܰܢ ܡܰܒܽܘܥܳܐ ܕܚܽܘܠܡܳܢ̈ܶܐ ܘܣܺܝܡܬܳܐ ܪܰܒܬܳܐ ܕܫܽܘ̈ܟܳܢܶܐ ܐܠܰܗܳܝ̈ܶܐ ܗ̇ܰܘ ܕܰܠܝܽܘܡ ܝܰܠܕܳܗ̇ ܡܝܰܩܪ̈ܳܢ ܪ̈ܽܘܚܳܬܳܐ ܕܟܺܐܢ̈ܶܐ ܘܪ̈ܺܝܫܰܝ ܐܰܒܳܗ̈ܳܬܳܐ: ܘܟܽܠܗܽܘܢ ܒܢ̈ܰܝ ܛܰܟܣܺܝ̈ܣ ܥܶܠܳܝ̈ܳܬܳܐ ܗ̇ܳܝ ܕܳܐܦ ܚܢܰܢ ܡܶܬܟܰܫܦܺܝܢܰܢ ܒܝܽܘܡ ܝܰܠܕܳܗ̇: ܕܠܰܨܠܰܘ̈ܳܬܳܐ ܘܒܳܥ̈ܘܳܬܳܐ ܕܺܝܠܰܢ ܬܰܣܶܩ ܐܶܢܶܝܢ ܠܰܩܕܳܡ ܬܪܽܘܢܳܘܣ ܕܰܒܪܳܗ̇: ܗܳܕܶܐ ܕܡܰܨܝܳܐ ܕܰܒܝܽܘܡ ܝܰܠܕܳܗ̇ ܡܚܰܣܝܳܢܺܝܬܳܐ ܬܶܗܘܶܐ ܠܰܚܛܳܗܰܝ̈ܢ ܗ̇ܳܢܽܘܢ ܕܒܺܝܕܰܥܬܳܐ ܘܰܕܠܐ ܒܺܝܕܰܥܬܳܐ: ܘܠܰܒܪܺܝܬܳܐ ܟܽܠܳܗ̇ ܐܰܘܝܽܘܬܳܐ ܬܫܰܟܶܢ: ܘܰܐܝܟ ܐܶܡܳܐ ܛܳܒܬܳܐ ܘܰܡܪܰܚܡܳܢܺܝܬܳܐ ܕܚܳܟܡܳܐ ܣܢܺܝܩܽܘܬܳܐ ܕܰܒܢܶܝ̈ܗ̇: ܥ̈ܰܠܠܳܬܳܐ ܕܬܰܪ̈ܣܝܳܬܰܢ ܬܫܰܪܬܰܚ ܕܶܝܢ ܒܒܰܣܺܝܡܽܘܬܳܗ̇: ܬܽܘܒ ܕܶܝܢ ܡܦܺܝܣܺܝܢܰܢ ܠܳܟ ܡܳܪܝܳܐ ܕܠܐܝܠܶܝܢ ܕܰܒܟܽܘܪ̈ܗܳܢܶܐ ܘܰܒܥܰܒܕܽܘܬܳܐ ܡܰܪܺܝܪܬܳܐ ܡܶܬܢܰܘܓܺܝܢ ܚܰܪܰܪ ܒܺܐܝܳܠܳܟ: ܠܐܪ̈ܡܠܳܬܳܐ ܘܠܰܒܢܰܝ̈ܗܽܘܢ ܬܰܪܣܳܐ: ܘܠܐܝܠܶܝܢ ܕܡܶܬܕܰܒܪܺܝܢ ܒܰܩܛܺܝܪܳܐ ܩܽܘܡ ܥܰܕܰܪ ܐܶܢܽܘܢ ܒܪ̈ܰܚܡܰܝܟ ܣܰܓܺܝ̈ܶܐܐ: ܠܡܰܒܥ̈ܕܰܝ ܡ̣ܶܢ ܫܪܳܪܳܐ ܗܳܕܶܐ ܒܝܰܡܺܝܢܳܟ ܠܐܘܪ̈ܚܳܬܳܐ ܬܪ̈ܺܝܨܳܬܳܐ ܕܫܽܘܘܙܳܒܳܐ: ܘܰܠܟܽܠ ܕܰܣܥܰܪܘ ܛܳܒ̈ܳܬܳܐ ܒܥܺܕܬܳܟ ܘܰܒܥܰܡܳܟ ܚܰܠܶܦ ܠܗܽܘܢ ܛܳܒ̈ܳܬܳܐ ܣܰܓܺܝ̈ܳܐܬܳܐ ܒܰܡܪܰܚܡܳܢܽܘܬܳܟ: ܘܰܠܟܽܠ ܕܫܶܐܠ ܘܫܳܐܶܠ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܗ̇ܳܝ ܕܦܰܐܝܳܐ ܘܝܳܐܝܳܐ ܗܰܒܠܶܗ: ܠܡܰܠܟ̈ܶܐ ܘܰܠܪ̈ܺܝܫܳܢܶܐ ܘܰܠܕܰܝ̈ܳܢܶܐ ܕܥܳܠܡܳܐ ܗܳܢܳܐ ܒܝܰܨܺܝܦܽܘܬܳܟ ܕܰܒܰܪ ܘܰܬܪܽܘܨ: ܘܬܽܘܦ ܐܶܢܽܘܢ ܠܙܰܘܥܬܳܐ ܕܡ̣ܶܢ ܕܺܝܢܳܟ: ܗܰܒ ܫܠܳܡܳܐ ܠܥܺܕ̈ܳܬܳܟ: ܘܰܠܗ̇ܳܢܽܘܢ ܕܪܳܕܶܝܢ ܒܰܚܙܽܘ̈ܩܝܶܐ ܪ̈ܰܚܺܝܩܶܐ ܦܽܘܢܳܝܳܐ ܪܚܺܝܡܳܐ ܗܰܒ ܠܗܽܘܢ ܘܠܰܢ ܘܰܠܥܰܢܺܝ̈ܕܰܝܢ ܐܰܫܘܳܐ ܠܩܰܘܡܳܐ ܕܠܐ ܒܶܗܬܬܳܐ ܕܰܩܕܳܡ ܕܚܺܝܠܽܘܬܳܟ: ܘܰܒ̈ܩܳܠܐ ܢܰܨܺܝ̈ܚܶܐ ܕܗ̇ܳܢܽܘܢ ܕܬܰܡܳܢ ܕܳܝܨܺܝܢ ܘܚܳܕܶܝܢ ܐܰܫܘܳܐ ܠܰܢ ܕܢܶܙܡܰܪ ܟܽܠܰܢ ܐܰܝܠܶܝܢ ܕܚܳܕܶܝܢܰܢ ܒܡܰܘܠܳܕܳܗ̇ ܕܶܐܡܳܟ ܒܬܽܘܠܬܳܐ ܩܰܕܺܝܫܬܳܐ: ܒܝܰܕ ܗܰܢܺܝܽܐܘܬܳܐ ܕܪܶܚܡܰܬ݀ ܐ̱ܢܳܫܽܘܬܳܟ: ܗܳܫܳܐ܀

 

 

 

ܥܛܪܐ

 

 

 

ܡ̣ܶܢ ܗܶܪ̈ܽܘܡܶܐ ܘܪ̈ܺܝܚܳܢܶܐ ܒܰܣܺܝ̈ܡܶܐ ܐܶܬܬܰܥܛܰܪ ܥܶܛܪܳܐ ܕܒܶܣ̈ܡܶܐ ܠܪܺܝܚ ܢܝܳܚܳܐ ܕܰܐܠܳܗܽܘܬܳܟ ܒܝܽܘܡ ܡܰܘܠܳܕܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܒܰܪܬ ܝܽܘܝܳܩܺܝܡ ܘܚܰܢܰܐ ܟܺܐܢ̈ܶܐ ܘܙܰܕܺܝ̈ܩܶܐ ܕܣܰܟܺܝܘ ܠܝܽܘܡ ܓܶܠܝܳܢܳܟ ܐܠܰܗܳܝܳܐ: ܘܰܐܫܘܳܐ ܠܰܢ ܕܢܶܚܕܶܐ ܒܥܰܕܥܺܐܕܳܗ̇: ܘܰܢܚܰܓܶܐ ܒܝܽܘܡ ܡܰܘܠܳܕܳܗ̇: ܘܢܰܣܶܩ ܫܽܘܒܚܳܐ ܠܡܳܪܝܳܐ ܕܰܕܢܰܚ ܡܶܢܳܗ̇: ܗܳܫܳܐ܀

 

 

 

ܚܘܬܡܐ

 

 

 

ܡܳܪܝܳܐ ܐܠܰܗܳܐ ܕܰܕܢܰܚ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܝܰܘܡܳܢܳܐ ܗܘܳܐ ܡܰܘܠܳܕܳܗ̇: ܗ̇ܳܝ ܕܡܰܘܗܰܒܬܳܐ ܡܶܬܦܰܫܩܳܐ ܐܰܥܬܰܪ ܠܰܢ ܒܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܡܠܺܝ ܠܰܢ ܡ̣ܶܢ ܫܽܘ̈ܟܳܢܰܝܟ ܐܠܰܗܳܝ̈ܶܐ: ܐܰܦܨܰܚ ܠܰܢ ܒܚܰܕ̈ܘܳܬܳܟ ܠܐ ܡܶܫܬܰܪ̈ܝܳܢܝܳܬܳܐ: ܘܰܐܩܺܝܡ ܠܰܢ ܘܰܠܥܰܢܺܝ̈ܕܰܝܢ ܒܓܰܒܳܟ ܗ̇ܰܘ ܝܰܡܺܝܢܳܝܳܐ: ܘܚܰܠܶܛ ܠܰܢ ܥܰܡ ܟܶܢ̈ܫܶܐ ܕܩܰܕܺܝ̈ܫܰܝܟ ܕܰܢܫܰܒܚܳܟ ܕܠܐ ܫܶܠܝܳܐ: ܡܳܪܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܶܗ ܐܶܡܳܐ ܡ̣ܶܢ ܓܶܢܣܳܐ ܕܐ̱ܢܳܫ̈ܳܐ ܩܰܕܺܝ̈ܫܶܐ: ܘܝܰܩܰܪ ܝܰܘܡܳܐ ܕܡܰܘܠܳܕܳܗ̇ ܐܳܦ ܥܽܘܗܕܳܢܳܐ ܕܰܐܒܳܗܶܝ̈ܗ̇: ܘܢܰܨܰܚ ܕܽܘܟܪܳܢܗܽܘܢ ܒܰܒܪܺܝܬܳܐ ܕܰܢܡܰܪܽܘܢ ܒܗܽܘܢ ܐܰܒܳܗ̈ܶܐ ܕܕܳܪ̈ܶܐ ܐ̱ܚܪ̈ܳܝܶܐ: ܕܢܰܘܠܕܽܘܢ ܦܺܐܪ̈ܶܐ ܡܪ̈ܰܥܝܳܢܶܐ ܐܰܝܟ ܝܰܠܕܳܐ ܕܰܐܘܠܶܕܘ ܗ̣ܶܢܽܘܢ: ܕܺܐܝܬܰܘܗܝ ܡܰܪܝܰܡ ܒܬܽܘܠܬܳܐ ܐܶܡܳܐ ܕܚܰܝ̈ܶܐ: ܕܠܶܗ ܠܗܰܘ ܕܰܨܒܳܐ ܘܡܶܢܳܗ̇ ܫܦܰܪ ܠܶܗ: ܘܶܐܬܺܝܠܶܕ ܕܢܶܦܪܽܘܩ ܠܓܶܢܣܰܢ ܡܳܝܽܘܬܳܐ ܢܰܘܕܶܐ ܘܰܢܫܰܒܰܚ: ܒܗܳܢܳܐ ܥܶܕܳܢܶܐ܀

 

 

 

ܣܕܪܐ

 

 

 

ܟܰܕ ܠܥܰܕܥܺܐܕܳܐ ܫܒܺܝܚܳܐ ܘܰܡܝܰܩܪܳܐ ܕܡܰܘܠܳܕܶܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܡܢܰܨܪܺܝܢܰܢ: ܘܕܽܘܟܪܳܢܳܐ ܕܰܐܒܳܗܰܝ̈ܟܝ ܟܺܐܢ̈ܶܐ ܘܙܰܕܺܝ̈ܩܶܐ ܝܰܘܡܳܢܳܐ ܥܳܒܕܺܝܢܰܢ: ܒܩܽܘܠܳܣ̈ܶܐ ܘܬܶܫܒ̈ܚܳܬܳܐ ܠܶܟܝ ܘܰܠܗܽܘܢ ܡܝܰܩܪܺܝܢܰܢ: ܘܒܰܒ̈ܢܳܬ ܩ̈ܳܠܐ ܫܒܺܝ̈ܚܳܬܳܐ ܐܳܡܪܺܝܢܰܢ: ܝܽܘܝܳܩܺܝܡ ܟܺܐܢܳܐ ܘܙܰܕܺܝܩܳܐ ܕܰܫܒܰܩ ܐܰܢ̱ܬܬܶܗ ܘܒܰܝܬܶܗ ܘܰܢܦܰܩ ܠܡܰܕܒܪܳܐ ܨܰܕܝܳܐ ܘܨܳܡ ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ ܕܢܶܬܺܝܗܶܒ ܠܶܗ ܦܺܐܪܳܐ ܠܒܽܘܝܳܐܶܗ: ܝܽܘܝܳܩܺܝܡ ܕܰܥܪܰܩ ܠܐܬܪܳܐ ܫܰܗܝܳܐ ܡ̣ܶܢ ܝܰܕ ܚܶܣܕܳܐ ܕܥܰܩܪܽܘܬܶܗ: ܘܒܰܦܩܰܥܬܳܐ ܒܚܽܘܪܒܳܐ ܡܛܰܠܬܳܐ ܢܩܰܫ ܠܶܗ: ܟܰܕ ܡ̣ܶܢ ܡܳܪܝܳܐ ܫܳܐܶܠ ܗܘܳܐ ܕܝܰܠܕܳܐ ܪܚܺܝܡܳܐ ܢܶܬܶܠ ܠܶܗ: ܝܽܘܝܳܩܺܝܡ ܕܫܳܛ ܠܪܶܚܡܰܬ ܥܽܘܬܪܳܐ ܘܩܶܢܝܳܢܳܐ ܘܠܶܒܳܐ ܫܚܺܝܩܳܐ ܘܪܽܘܚܳܐ ܡܰܟܺܝܟܬܳܐ ܠܐܠܳܗܳܐ ܩܰܪܶܒ: ܘܥܰܠ ܗ̇ܳܝ ܚܳܢܶܗ ܘܰܐܥܒܰܪ ܟܰܪܝܽܘܬܶܗ: ܘܝܰܗܒ ܠܶܗ ܦܺܐܪܳܐ ܕܰܡܒܰܝܰܐܐ ܠܶܗ: ܚܰܢܰܐ ܕܶܝܢ ܐܰܢ̱ܬܬܶܗ ܟܢܺܝܟܬܳܐ ܘܰܥܩܰܪܬܳܐ ܚܰܒܪܰܬ݀ ܣܰܪܳܐ ܘܪܰܦܩܰܐ ܒܥܰܩܪܽܘܬܳܐ: ܚܰܢܰܐ ܣܰܓܺܝܰܐܬ݀ ܚܰܫܳܐ ܘܥܳܩܬܳܐ: ܕܰܬܪܶܝܢ ܐܶܒܠܺܝ̈ܢ ܩܰܢܝܳܐ ܗܘܳܬ: ܘܬܰܪܬܶܝܢ ܐܽܘܠܝ̈ܳܢ ܢܳܗܡܳܐ ܗܘܳܬ: ܘܒܰܬܪܶܝܢ ܟܺܐܒܺܝ̈ܢ ܪܰܡܝܳܐ ܗܘܳܬ: ܚܰܕ ܟܺܐܒܳܐ ܗ̇ܰܘ ܕܥܰܩܪܽܘܬܳܗ̇ ܘܰܡܚܰܣܕܽܘܬܳܗ̇ ܕܡ̣ܶܢ ܐܽܘܡܬܳܐ ܐܳܦ ܡ̣ܶܢ ܝܽܘܢܰܐܬܺܝܡ ܐܰܡܬܳܗ̇: ܘܟܺܐܒܳܐ ܐ̱ܚܪܺܢܳܐ ܕܰܥܪܰܩ ܓܰܒܪܳܐ ܕܺܝܠܳܗ̇: ܘܒܰܡܓܰܙܝܽܘܬܳܐ ܦܳܫܰܬ݀ ܠܳܗ̇: ܘܛܶܒܳܐ ܠܰܝܬ ܡ̇ܰܢ ܕܡܰܝܬܶܐ ܠܳܗ̇: ܚܰܢܰܐ ܡܰܪܺܝܪܰܬ݀ ܚܶܢ̈ܟܶܐ ܕܠܶܒܫܰܬ݀ ܡܳܐܢ̈ܶܐ ܕܡܽܘܟܳܟܳܐ: ܘܰܬܚܶܝܬ ܐܺܝܠܳܢܳܐ ܨܰܠܝܰܬ݀ ܘܰܒܟܳܬ݀ ܣܰܓܺܝ ܘܶܐܬܬܰܢܚܰܬ݀ ܘܒܶܪܟܰܬ݀ ܠܐܠܳܗܳܐ ܘܶܐܡܪܰܬ݀: ܐܠܰܗܳܐ ܕܰܐܒܳܗ̈ܳܬܰܢ ܫܡܰܥ ܒܳܥܽܘܬܝ ܘܩܰܒܶܠ ܬܶܢܚ̈ܳܬܝ: ܐܶܬܪܰܥܳܐ ܒܕܶܡ̈ܥܶܐ ܕܒܳܒ̈ܳܬܝ: ܐܠܰܗܝ ܗܰܒܠܺܝ ܦܺܐܪܳܐ: ܐܰܟܡܳܐ ܕܝܰܗܒܬ ܠܳܗ̇ ܠܐܡܝ ܣܰܪܳܐ: ܐܳܦ ܠܚܰܢܰܐ ܐܰܢ̱ܬܬܶܗ ܕܗܰܠܩܳܢܳܐ: ܝܽܘܝܳܩܺܝܡ ܘܚܰܢܰܐ ܟܺܐܢ̈ܶܐ ܘܙܰܕܺܝ̈ܩܶܐ ܕܰܫܡܰܥ ܡܳܪܝܳܐ ܨܠܰܘ̈ܳܬܗܽܘܢ ܘܰܐܥܒܰܪ ܥܳܩܬܳܐ ܡ̣ܶܢ ܠܶܒܰܘ̈ܳܬܗܽܘܢ ܘܰܐܪܺܝܡ ܚܶܣܕܳܐ ܕܥܰܩܪܽܘܬܗܽܘܢ: ܝܽܘܝܳܩܺܝܡ ܘܚܰܢܰܐ ܐܰܢ̱ܬܬܳܐ ܢܰܟ̈ܦܶܐ ܘܩܰܕܺܝ̈ܫܶܐ ܕܪܰܥܺܝܘ ܠܡܳܪܝܳܐ ܒܰܥܒܳܕܰܝ̈ܗܽܘܢ: ܘܦܺܐܪܳܐ ܪܚܺܝܡܳܐ ܝܰܗܒ ܠܗܽܘܢ: ܝܽܘܝܳܩܺܝܡ ܘܚܰܢܰܐ ܕܰܢܚܶܬܘ ܡܰܠܐܟ̈ܶܐ ܠܘܳܬܗܽܘܢ ܘܰܣܒܰܪܬܳܐ ܕܚܰܝ̈ܶܐ ܐܰܝܬܺܝܘ ܠܗܽܘܢ ܘܰܕܝܰܠܕܳܐ ܕܡܶܬܺܝܠܶܕ ܠܗܽܘܢ ܒܰܫܡܰܝܳܐ ܐܳܦ ܒܰܐܪܥܳܐ ܝܳܪܶܒ ܫܡܶܗ: ܘܶܐܡܰܪܘ ܠܘܳܬܗܽܘܢ: ܡܶܟܺܝܠ ܛܽܘܒܳܐ ܝܳܗܒܺܝܢܰܢ ܠܗܽܘܢ ܥܰܠ ܝܰܠܕܳܐ ܕܰܕܢܰܚ ܡܶܢܗܽܘܢ: ܠܟܽܘܢ ܛܽܘܒܰܝܟܽܘܢ ܝܽܘܝܳܩܺܝܡ ܘܚܰܢܰܐ ܐܰܢ̱ܬܬܶܗ ܕܝܰܠܕܳܐ ܫܒܺܝܚܳܐ ܐܰܘܠܶܕܬܽܘܢ: ܘܥܰܩܪܳܐ ܕܚܰܝ̈ܶܐ ܝܰܗܒܬܽܘܢ: ܠܟܽܘܢ ܛܽܘܒܰܝܟܽܘܢ ܝܽܘܝܳܩܺܝܡ ܘܚܰܢܰܐ ܐܰܢ̱ܬܬܶܗ ܕܫܰܒܽܘܩܳܐ ܒܪܺܝܟܳܐ ܐܰܫܘܰܚܬܽܘܢ ܕܣܰܡܟܶܗ ܠܥܳܠܡܳܐ ܡ̣ܶܢ ܣܳܟܶܗ: ܠܟܽܘܢ ܛܽܘܒܰܝܟܽܘܢ ܝܽܘܝܳܩܺܝܡ ܘܚܰܢܰܐ ܐܰܢ̱ܬܬܶܗ: ܕܘܰܥܕܳܐ ܕܚܰܝ̈ܶܐ ܝܺܠܶܕܬܽܘܢ ܘܒܶܝܬ ܓܰܘܣܳܐ ܠܟܽܠܶܗ ܥܳܠܡܳܐ ܪܰܒܺܝܬܽܘܢ: ܠܟܽܘܢ ܛܽܘܒܰܝܟܽܘܢ ܝܽܘܝܳܩܺܝܡ ܘܚܰܢܰܐ ܕܥܶܒܪܰܬ݀ ܥܳܩܬܳܐ ܡ̣ܶܢ ܠܶܒܟܽܘܢ: ܘܡ̣ܶܢ ܐܰܦܰܝ̈ ܟܽܠܳܗ̇ ܐܰܪܥܳܐ: ܠܶܟܝ ܛܽܘܒܰܝܟܝ ܡܰܪܝܰܡ ܕܰܒܡܰܘܠܳܕܶܟܝ ܚܕܺܝܘ ܐܰܒܳܗܰܝ̈ܟܝ ܘܶܐܬܦܨܰܚܘ ܢܒܺܝ̈ܶܐ ܘܰܪܘܰܙܘ ܥܰܡ̈ܡܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ: ܠܶܟܝ ܡܰܪܝܰܡ ܕܢܶܕܪܳܐ ܐܶܬܩܰܪܰܒܬܝ ܠܐܠܳܗܳܐ ܡ̣ܶܢ ܐܰܒܳܗܰܝ̈ܟܝ ܘܩܰܒܠܶܟܝ ܡܳܪܝܳܐ ܘܰܨܒܳܐ ܒܶܟܝ: ܘܫܰܕܰܪ ܡܶܠܬܶܗ ܘܰܫܪܳܐ ܒܶܟܝ: ܠܶܟܝ ܛܽܘܒܰܝܟܝ ܕܰܒܗܰܝܟܠܐ ܐܶܬܪܰܒܺܝܬܝ ܒܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܥܰܡ ܡܰܠܐܟ̈ܶܐ ܐܶܬܥܰܢܺܝܬܝ ܘܡ̣ܶܢ ܟܳܗ̈ܢܶܐ ܠܶܘ̈ܳܝܶܐ ܐܶܬܒܰܪܰܟܬܝ: ܠܶܟܝ ܛܽܘܒܰܝܟܝ ܡܰܪܝܰܡ ܕܡ̣ܶܢ ܟܽܠܶܗ ܥܰܡܳܐ ܐܶܬܪܚܶܡܬܝ ܘܒܰܪܬ ܬܠܳܬ ܫܢܺܝ̈ܢ ܠܒܶܝܬ ܩܽܘܕܫܳܐ ܥܰܠܬܝ: ܘܡܳܪܶܐ ܩܽܘܕܫܳܐ ܒܛܶܢܬܝ ܘܝܺܠܶܕܬܝ: ܠܶܟܝ ܛܽܘܒܰܝܟܝ ܡܰܪܝܰܡ ܕܟܰܕ ܠܰܡܫܽܘܚܬܳܐ ܕܰܬܪܶܥܣܰܪ ܫܢܺܝ̈ܢ ܡܛܰܝܬܝ ܫܰܐܠܽܘܟܝ ܟܳܗ̈ܢܶܐ ܕܰܐܝܕܳܐ ܚܰܒܺܝܒܳܐ ܠܶܟܝ: ܕܬܶܗܘܶܝܢ ܒܒܰܝܬܶܗ ܕܰܐܠܳܗܳܐ ܐܰܘ ܕܰܠܓܰܒܪܳܐ ܢܶܬܠܽܘܢܶܟܝ: ܠܶܟܝ ܛܽܘܒܰܝܟܝ ܡܰܪܝܰܡ ܕܦܰܢܺܝܬܝ ܟܰܕ ܒܳܟܝܳܐ ܐܰܢ̱ܬܝ ܕܝܰܬܡܬܳܐ ܐܺܝܬܰܝ ܘܰܡܓܰܙܰܝܬܳܐ ܠܗܽܘܢ ܐܶܡܰܪܬܝ ܥܒܶܕܽܘܢ ܐܰܝܕܳܐ ܕܫܳܦܪܳܐ ܠܟܽܘܢ ܘܪܳܚܶܡ ܡܳܪܳܐ ܘܰܐܠܳܗܳܐ ܕܺܝܠܟܽܘܢ: ܠܶܟܝ ܛܽܘܒܰܝܟܝ ܡܰܪܝܰܡ ܕܨܰܠܺܝܘ ܐܰܟܡܳܐ ܕܶܐܬܦܩܶܕܘ ܘܚܽܘܛܪܶܗ ܕܝܰܘܣܶܦ ܢܶܦܩܰܬ݀: ܕܡܽܘܬ ܝܰܘܢܳܐ ܘܥܰܠ ܪܺܝܫܶܗ ܫܶܟܢܰܬ݀: ܘܺܝܕܰܥ ܕܨܶܒܥܳܐ ܗ̱ܝ ܕܰܐܠܳܗܳܐ: ܘܫܰܩܠܶܟܝ ܘܰܠܒܰܝܬܶܗ ܐܰܘܒܠܶܟܝ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܝܺܠܶܕܬܝ ܠܡܶܠܬܳܐ ܐܠܰܗܳܐ: ܕܰܦܪܰܩ ܒܡܰܘܠܳܕܶܗ ܠܟܽܠܗܶܝܢ ܒܶܪ̈ܝܳܬܳܐ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܝܺܠܺܝܕܽܘܬܶܟܝ ܘܰܥܕܰܡܳܐ ܠܡܰܘܬܶܟܝ ܝܰܩܺܝܪܳܐ: ܒܕܽܘܒܳܪ̈ܶܐ ܕܰܡܝܰܬܪܽܘܬܳܐ ܫܰܠܶܡܬܝ ܪܶܗܛܳܐ ܕܚܰܝܰܝ̈ܟܝ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܰܒܡܰܘܠܳܕܶܟܝ ܫܳܪܽܘܬܳܐ ܪܰܒܬܳܐ ܥܒܰܕܘ ܐܰܒܳܗܰܝ̈ܟܝ ܩܽܘܪ̈ܒܳܢܶܐ ܠܡܳܪܝܳܐ ܩܰܪܶܒܘ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܩܰܒܶܠ ܡܳܪܝܳܐ ܩܽܘܪ̈ܒܳܢܰܝܗܽܘܢ: ܘܝܰܗܒܶܟܝ ܒܽܘܝܳܐܳܐ ܠܣܰܝܒܽܘܬܗܽܘܢ: ܠܶܟܝ ܛܽܘܒܰܝܟܝ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܒܰܫܢܰܬ݀ ܡܰܐܬܺܝܢ ܘܬܶܫܥܺܝܢ ܘܰܐܪܒܰܥ ܐܶܬܺܝܠܶܕܬܝ ܘܒܰܪ ܫܢܰܝ̈ܳܐ ܚܰܡܫܺܝܢ ܘܰܚܕܳܐ ܠܡܰܠܟܽܘܬܳܐ ܫܰܢܺܝܬܝ ܘܗܳܫܳܐ ܒܰܨܠܰܘ̈ܳܬܶܟܝ ܥܰܡ ܕܝܽܘܝܳܩܺܝܡ ܘܚܰܢܰܐ ܐܶܡܶܟܝ: ܘܰܙܟܰܪܝܳܐ ܘܶܐܠܺܝܫܒܰܥ ܐܚܝܳܢܬܶܟܝ: ܚܶܪ̈ܝܳܢܶܐ ܢܶܫܠܽܘܢ ܛܪ̈ܐܟܣܺܝܣ ܢܶܫܬܰܦܽܘܢ: ܝܽܘܩܪ̈ܳܢܶܐ ܠܐ ܢܶܗܘܽܘܢ: ܐܶܣܛܪ̈ܰܐܢܺܝܰܐܣ ܠܐ ܢܶܫܬܰܡܫܽܘܢ: ܐܪ̈ܐܘܣ ܢܶܙܕܰܗܽܘܢ: ܕܺܝܰܐܩܳܢܽܘ ܢܶܬܢܰܟܦܽܘܢ: ܩܰܣܡܽܘ̈ܣܳܝܶܐ ܢܶܬܢܰܛܪܽܘܢ: ܩܺܐܪ̈ܣܶܐ ܢܶܬܒܰܛܠܽܘܢ: ܩܪ̈ܳܒܶܐ ܢܶܬܕܰܥܟܽܘܢ: ܘܫܰܒ̈ܛܶܐ ܕܪܽܘܓܙܳܐ ܢܶܥܒܪܽܘܢ: ܘܫܰܝܢܳܐ ܘܰܫܠܳܡܳܐ ܢܰܡܠܟܽܘܢ ܘܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܢܶܫܬܰܟܢܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܰܐܘ̈ܳܢܶܐ ܕܢܽܘܗܪܳܐ ܢܶܬܒܰܣܡܽܘܢ: ܘܰܚܢܰܢ ܘܗ̣ܶܢܽܘܢ ܬܚܶܝܬ ܟܶܢܦܰܝ̈ܟܝ ܢܶܣܬܰܬܰܪ: ܘܢܰܣܶܩ ܫܽܘܒܚܳܐ ܠܺܝܚܺܝܕܶܟܝ ܡܫܺܝܚܳܐ ܕܰܕܢܰܚ ܡ̣ܶܢ ܥܽܘܒܶܟܝ: ܘܬܰܘܕܺܝܬܳܐ ܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܐܫܥܝܐ ܚܠܒܝܐ: ܘܡܪܝ ܦܝܢܚܣ ܘܡܪܝ ܐܣܝܐ

 

ܨܠܘܬܐ ܕܫܘܪܝܐ

 

 

 

ܐܰܫܦܰܥ ܡܳܪܝ ܪ̈ܰܚܡܰܝܟ ܘܰܚܢܳܢܳܟ ܥܰܠ ܥܺܕܬܳܟ ܘܥܰܡܳܟ ܘܡܰܪܥܺܝܬܳܟ: ܕܰܡܙܰܝܚܳܐ ܠܕܽܘܟܪܳܢܶܗ ܕܓܰܒܝܳܐ ܡܳܪܝ ܐܶܫܰܥܝܳܐ: ܘܰܐܟܡܳܐ ܕܚܰܢܬܳܝܗܝ ܠܛܰܠܝܳܐ ܢܳܚܠܳܝܳܐ ܘܚܰܪܰܪܬܳܝܗܝ ܡ̣ܶܢ ܫܺܐܕܳܐ ܕܚܳܢܶܩ ܗܘܳܐ ܠܶܗ: ܚܽܘܢ ܘܫܰܘܙܶܒ ܠܰܢ ܡ̣ܶܢ ܒܺܝܫܳܐ ܕܡܰܩܪܶܒ ܥܰܡܰܢ: ܕܰܐܢ̱ܬ ܗ̣ܽܘ ܐܠܰܗܳܐ ܡܨܶܐ ܚܺܝܠ ܟܽܠ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܚܰܬܢܳܐ ܕܰܫܪܳܪܳܐ ܡܫܺܝܚܳܐ: ܕܰܐܫܪܺܝ ܚܽܘܒܶܗ ܠܐ ܐܰܝܢܳܝܳܐ ܒܢܰܦܫܗ ܕܛܽܘܒܳܢܳܐ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܗܳܢܳܐ ܕܰܠܓܽܘܕܳܐ ܕܒܶܝܬ ܡܳܪܝ ܐܰܘܓܺܝܢ ܢܩܶܦ ܘܰܒܣܺܝܥܬܳܐ ܐܠܰܗܳܝܬܳܐ ܐܶܬܚܰܠܰܛ: ܠܗܰܘ ܕܚܰܝܠܶܗ ܘܢܰܛܰܪ ܒܬܽܘܠܽܘܬܳܐ ܒܰܐܬܪܳܐ ܓܰܐܝܳܐ ܘܰܓܢܽܘܢܶܗ ܘܒܳܗ̇ ܠܠܐ ܚܳܫܽܘܫܽܘܬܳܐ ܐܶܬܡܰܛܺܝ: ܘܳܐܦ ܒܬܶܐܘܰܪ̈ܺܝܰܐܣ ܐܠܰܗܳܝ̈ܳܬܳܐ ܡܫܰܡܠܝܳܐ ܘܰܓܡܺܝܪܳܐ ܐܶܬܚܙܺܝ: ܗ̇ܰܘ ܕܰܠܡܰܠܟܳܐ ܡܗܰܝܡܢܳܐ ܣܽܘܡܰܟܽܘܣ ܒܰܝܰܐܐ: ܒܰܒ̈ܢܰܝܳܐ ܒܽܘܪ̈ܟܬܳܢܳܝܶܐ ܐܰܘܓܺܝܢ ܘܡܽܘܪܺܝܩܺܝ ܚܠܳܦ ܐܶܫܰܥܝܳܐ: ܗܳܢܳܐ ܕܰܦܠܰܚ ܒܟܰܪܡܳܐ ܪܽܘܚܳܢܳܝܳܐ ܕܡܳܪܶܗ ܡ̣ܶܢ ܨܰܦܪܳܐ ܘܰܥܕܰܡܳܐ ܠܪܰܡܫܳܐ ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ: ܒܗܳܢܳܐ܀

 

 

 

ܣܕܪܐ

 

 

 

ܟܰܕ ܠܚܰܓܳܐ ܗܰܢܺܝܳܐܐ ܘܛܳܒܳܐ ܕܢܰܨܺܝܚ ܫܽܘܦܪ̈ܶܐ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܛܽܘܒܳܢܳܐ ܘܰܓܡܺܝܪܳܐ ܩܳܪܒܺܝܢܰܢ: ܘܫܰܪܒܳܐ ܕܺܝܠܶܗ ܪܳܡܳܐ ܘܰܐܠܳܗܳܝܳܐ ܡܚܰܓܶܝܢܰܢ: ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܠܶܗ ܢܩܰܠܶܣ ܟܰܕ ܐܳܡܪܺܝܢܰܢ: ܗܳܢܳܐ ܓܰܒܝܳܐ ܕܶܐܬܓܒܺܝ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܒܒܰܪܬ ܩܳܠܐ ܡܰܠܐܟܳܝܬܳܐ ܠܰܢܣܺܝܣܽܘܬ ܠܶܒܶܗ ܚܰܝܶܠ: ܗܳܢܳܐ ܕܥܰܡ ܚܰܢܰܐ ܫܰܘܬܳܦܬܶܗ ܐܶܬܢܙܰܪ ܒܰܓܢܽܘܢܶܗ ܙܰܒܢܳܝܳܐ ܡܶܬܚܳܐ ܕܰܬܠܳܬ ܫܢܺܝ̈ܢ ܘܰܒܢܺܝܣܳܢ ܐܽܘܓܺܝܢܳܝܳܐ ܡܰܦܪܓܳܐ ܫܽܘܫܰܢܬܳܐ ܫܠܶܝܡܽܘܢܳܝܬܳܐ ܕܰܒܠܶܒܶܗ ܟܰܣܝܳܐ ܗܘܳܬ݀: ܗܳܢܳܐ ܕܰܐܓܢܺܝ ܢܰܦܫܶܗ ܥܰܡ ܥܠܰܝ̈ܡܶܐ ܒܢ̈ܰܝ ܐ̱ܪܳܙܶܗ ܠܘܰܥܕܳܐ ܕܣܺܝܥܬܳܐ ܐܠܰܗܳܝܬܳܐ ܘܒܳܗ̇ ܐܶܬܚܰܠܰܛ ܘܶܐܬܓܡܰܪ ܒܙܰܒܢܳܐ ܙܥܽܘܪܳܐ: ܗܳܢܳܐ ܕܰܫܒܰܩ ܠܐܒܳܗܰܘ̈ܗܝ ܒܚܰܫܳܐ ܘܟܰܪܝܽܘܬܳܐ ܘܰܣܒܺܝܪܽܘܬܳܐ: ܕܗ̇ܰܘ ܚܳܢܽܘܩܳܐ ܘܶܐܬܒܰܝܐܝܘ ܒܓܠܶܝܳܢܶܗ ܕܣܳܒܳܐ ܡܳܪܝ ܐܰܘܓܺܝܢ: ܗܳܢܳܐ ܕܰܠܫܰܘܬܳܦܬܶܗ ܒܕܰܝܪܳܐ ܕܰܐܚܘ̈ܳܬܳܐ ܛܰܟܶܣ ܘܰܐܠܘܶܬ: ܘܥܰܡ ܫܰܒܥܺܝܢ ܣܳܒ̈ܶܐ ܐܶܬܡܢܺܝ: ܗܳܢܳܐ ܕܰܠܛܽܘܪܳܐ ܕܺܐܝܙܠܐ ܐܳܦ ܠܰܦܩܰܥܬܳܐ ܕܒܶܝܬ ܥܰܪ̈ܰܒܳܝܶܐ ܐܶܬܡܰܛܺܝ ܘܰܒܫܳܩܽܘܬܳܐ ܕܡܰܝ̈ܳܐ ܠܐܠܺܝ̈ܨܶܐ ܘܰܠܥܳܒܪ̈ܰܝ ܐܽܘܪܚܳܐ ܡܰܪܘܰܚ ܗܘܳܐ: ܗܳܢܳܐ ܕܬܰܠܡܶܕ ܠܣܰܓܺܝ̈ܶܐܐ ܒܝܰܕ ܢܽܘܚܳܡܶܗ ܕܡܰܗܢܽܘܫ ܥܰܪܰܒܳܝܳܐ: ܒܰܪ ܚܳܬܶܗ ܕܟܽܘܫ ܫܰܠܺܝܛܳܐ ܕܰܡܓܽܘ̈ܫܶܐ: ܗܳܢܳܐ ܕܶܐܬܚܙܺܝ ܐܰܝܟ ܐܶܣܛܽܘܢ ܙܰܠܺܝ̈ܩܶܐ ܕܰܛܥܺܝܢ ܝܽܘܩܪܶܗ ܕܥܰܡܰܢ: ܗܳܢܳܐ ܕܒܺܐܪܳܐ ܕܡܰܝ̈ܳܐ ܚܦܰܪ ܗܘܳܐ ܒܰܬܠܽܘܠܬܳܐ ܘܒܳܗ̇ ܐܰܪܘܰܚ ܠܥܳܒܪ̈ܰܝ ܐܽܘܪܚܳܐ: ܗܳܢܳܐ ܕܠܰܢܗܰܪ ܡܳܫܳܟ ܐܶܬܥܰܠܺܝ ܘܕܰܝܪܳܐ ܒܢܳܐ ܠܶܗ ܠܢܰܘܚܳܐ ܕܰܒܗܺܝܠܽܘܬܶܗ: ܗܳܢܳܐ ܕܟܰܕ ܠܐ ܚܙܳܐ ܢܝܳܚܳܐ: ܠܪܺܝܫܶܗ ܕܛܽܘܪܳܐ ܐܶܬܥܰܠܺܝ ܘܟܽܘܪܚܳܐ ܙܥܽܘܪܳܐ ܒܢܳܐ: ܘܒܺܐܪܳܐ ܚܦܰܪ ܩܕܳܡܰܘܗܝ: ܗܳܕܶܐ ܕܫܳܩܽܘܬܳܐ ܕܡܶܢܳܗ̇ ܠܕܰܝ̈ܘܶܐ ܛܳܪܕܳܐ ܗܘܳܬ݀: ܘܬܰܠܡܺܝ̈ܕܶܐ ܙܗܰܝ̈ܳܐ ܘܰܐܠܳܗܳܝ̈ܶܐ ܡܶܬܬܰܓܪܳܐ ܗܘܳܬ݀: ܗܳܝܕܶܝܢ ܠܐܘܪܫܠܶܡ ܐܶܬܥܰܠܺܝ ܒܰܨܠܽܘܬܳܐ: ܘܟܰܕ ܬܶܕܡܽܘܪܬܳܐ ܒܰܦܪܳܬ ܢܰܗܪܳܐ ܣܳܥܰܪ ܗܘܳܐ: ܗܳܢܳܐ ܕܥܰܠ ܫܰܪܝܽܘܬܳܐ ܕܡܰܝܰܘ̈ܗܝ ܡܗܰܠܶܟ ܗܘܳܐ: ܗܳܢܳܐ ܕܰܠܥܽܘܢܕܳܢܳܗ̇ ܕܒܰܪܬ ܙܰܘܓܶܗ ܚܰܢܰܐ ܐܶܬܘܰܥܰܕ ܒܓܶܠܝܳܢܳܐ ܐܠܰܗܳܝܳܐ: ܗܳܢܳܐ ܕܗ̣ܽܘ ܥܰܡܶܨ ܠܥܰܝ̈ܢܶܝܗ̇ ܕܚܰܢܰܐ ܛܽܘܒܳܢܺܝܬܳܐ: ܘܟܰܕ ܐܰܒܽܘܗܝ ܠܐ ܐܶܫܬܰܘܕܥܶܗ ܘܚܰܫܳܐ ܘܟܰܪܝܽܘܬܳܐ ܐܶܬܡܠܺܝ: ܘܰܒܓܶܠܝܳܢܳܐ ܘܚܶܠܡܳܐ ܕܠܺܠܝܳܐ ܠܐܒܽܘܗܝ ܡܥܳܩܳܐ ܠܰܒܶܒ: ܘܰܣܒܰܪܬܳܐ ܛܳܒܬܳܐ ܕܡܰܠܟܽܘܬܳܐ ܓܠܐܴ ܠܶܗ: ܗܳܢܳܐ ܕܰܦܢܳܐ ܠܕܰܝܪܶܗ ܘܪܶܥܡܰܬ݀ ܒܟܰܝܠܐ ܡܰܠܝܳܐ ܕܶܫܬܺܝܢ ܐܰܚ̈ܶܐ ܐܰܢܛܽܘܢܺܝ̈ܣܳܝܶܐ: ܗܳܢܳܐ ܕܟܰܕ ܩܪܶܒ ܫܽܘܠܳܡ ܚܰܝܰܘ̈ܗܝ ܥܳܠܡܳܢܳܝ̈ܶܐ ܐܶܬܓܠܺܝ ܥܠܰܘܗܝ ܢܽܘܗܪܳܐ ܫܡܰܝܳܢܳܐ ܘܰܒܡܶܢܝܳܢܳܐ ܥܣܺܝܪܳܝܳܐ ܕܝܰܘ̈ܡܳܬܳܐ ܐܰܢܗܰܪ ܠܕܰܝܪܶܗ ܒܬܶܗܪܳܐ ܪܰܒܳܐ: ܘܶܐܬܬܙܺܝܥܘ ܬܰܠܡܺܝ̈ܕܰܘܗܝ ܒܬܶܗܪܳܐ ܕܰܗܘܳܐ: ܘܗ̣ܽܘ ܒܓܶܠܝܳܢܳܐ ܐܠܰܗܳܝܳܐ ܬܗܰܪ ܘܶܐܬܕܰܡܰܪ: ܘܡ̈ܶܠܐ ܕܡܰܠܝ̈ܳܢ ܠܽܘܒܳܒܳܐ ܫܡܰܥ ܡ̣ܶܢ ܣܶܕܪ̈ܰܝ ܪ̈ܽܘܚܳܢܶܐ ܕܰܒܬܶܗܪܳܐ ܪܰܒܳܐ ܕܰܟܠܺܝܠܶܗ ܬܰܗܺܝܪܺܝܢ ܗܘܰܘ: ܘܰܐܝܟ ܕܰܒܕܽܘܡܳܪܳܐ ܠܰܚܕ̈ܳܕܶܐ ܡܫܰܐܠܺܝܢ ܗܘܰܘ ܟܰܕ ܐܳܡܪܺܝܢ ܕܗܳܢܳܐ ܟܠܺܝܠܐ ܕܡܰܢܽܘ ܐܺܝܬܰܘܗܝ ܕܗܳܐ ܫܰܒܥܺܝܢ ܘܚܰܕ ܒܣܺܝܥܬܶܗ ܕܣܳܒܳܐ ܐܰܘܓܺܝܢ: ܘܦܰܢܺܝܘ ܐ̱ܚܪ̈ܳܢܶܐ ܕܶܐܫܰܥܝܳܐ ܚܳܠܳܒܳܝܳܐ ܐܺܝܬܰܘܗܝ ܟܠܺܝܠܐ ܗܳܢܳܐ ܫܒܺܝܚܳܐ: ܗ̇ܰܘ ܕܒܺܐܝ̈ܕܰܝ ܪܰܒܶܗ ܣܳܒܳܐ ܐܰܘܓܺܝܢ: ܘܰܒܚܰܕܽܘܬܳܐ ܥܢܰܘ ܟܽܠܗܽܘܢ ܟܰܕ ܐܳܡܪܺܝܢ: ܕܰܠܥܶܣܪܳܐ ܝܰܘܡܺܝ̈ܢ ܟܠܺܝܠܶܗ ܢܳܣܶܒ ܐܶܫܰܥܝܳܐ ܚܳܠܳܒܳܝܳܐ: ܘܩܳܠܐ ܚܰܠܝܳܐ ܕܪ̈ܽܘܚܳܢܶܐ ܝܰܒܶܒܘ ܟܰܕ ܐܳܡܪܺܝܢ ܒܚܰܕܽܘܬܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܟܠܺܝܠܐ ܪܳܡܳܐ ܘܰܫܒܺܝܚܳܐ ܡ̣ܶܢ ܐܠܰܗܳܐ ܐܶܬܓܕܶܠ ܠܳܟ ܒܝܽܘܩܰܢ̈ܬܶܐ ܘܡܰܪ̈ܓܳܢܝܳܬܳܐ ܫܡܰܝܳܢ̈ܝܳܬܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܕܰܚܠܳܦ ܓܢܽܘܢܳܐ ܕܠܐ ܥܳܒܰܪ ܘܠܐ ܡܶܫܬܪܶܐ ܐܶܬܩܛܰܪ ܠܳܟ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܕܰܗܘܰܝܬ ܒܕܰܝܪܳܟ ܐܰܝܟ ܐܶܣܛܽܘܢ ܙܰܠܺܝ̈ܩܶܐ ܘܛܽܘܦܣܳܐ ܘܚܰܘܪܳܐ ܛܳܒܳܐ ܫܒܰܩܬ ܠܬܰܠܡܺܝ̈ܕܰܝܟ ܒܢ̈ܰܝ ܕܰܝܪܳܟ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܦܰܓܪܳܟ ܡܰܢܗܰܪ ܐܰܝܟ ܫܶܡܫܳܐ ܒܠܺܠܝܳܐ ܘܒܺܐܝܡܳܡܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܒܥܰܕܥܺܐܕܳܟ ܚܳܕܶܝܢ ܡܰܠܐܟ̈ܶܐ ܘܰܡܥܰܢܶܝܢ ܠܳܟ ܩܳܠܰܝ̈ ܩܽܘܠܳܣ̈ܶܐ ܥܰܡ ܓܽܘܕܳܐ ܕܬܰܠܡܺܝ̈ܕܰܝܟ ܟܰܕ ܐܳܡܪܺܝܢ: ܬܳܐ ܒܰܫܠܳܡܳܐ ܥܳܢܘܳܝܳܐ ܫܰܪܺܝܪܳܐ: ܬܳܐ ܒܰܫܠܳܡܳܐ ܒܬܽܘܠܐ ܙܰܗܝܳܐ: ܬܳܐ ܒܰܫܠܳܡܳܐ ܢܙܺܝܪܳܐ ܫܰܪܺܝܪܳܐ ܕܠܐ ܙܟܳܬܶܗ ܪܶܓܬܳܐ ܒܰܥܪܺܝܪܳܝܬܳܐ ܕܢܶܫ̈ܶܐ: ܬܳܐ ܒܰܫܠܳܡܳܐ ܐܰܪܕܺܝܟܠܐ ܚܰܟܺܝܡܳܐ ܕܰܒܢܳܐ ܒܰܝܬܶܗ ܒܰܫܡܰܝܳܐ: ܬܳܐ ܒܰܫܠܳܡܳܐ ܐܠܶܦܳܪܳܐ ܡܗܺܝܪܳܐ: ܬܳܐ ܒܰܫܠܳܡܳܐ ܩܽܘܒܰܪܢܺܝܛܺܝ ܐܽܘܡܳܢܳܝܳܐ ܕܕܳܫ ܠܓ̈ܰܠܠܐ ܕܝܰܡܳܐ ܕܥܳܠܡܳܐ ܗܳܢܳܐ ܥܳܒܽܘܪܳܐ: ܬܳܐ ܒܰܫܠܳܡܳܐ ܒܰܪ ܬܰܪܒܺܝܬܳܐ ܕܣܳܒܳܐ ܐܰܘܓܺܝܢ: ܬܳܐ ܒܰܫܠܳܡܳܐ ܕܕܰܝܪܳܟ ܗܳܐ ܚܳܝܪܳܐ ܠܰܫܠܳܡܳܟ ܪܓܺܝܓܳܐ: ܬܳܐ ܒܰܫܠܳܡܳܐ ܕܰܒܢܰܝ̈ܟ ܚܳܕܶܝܢ ܘܕܳܝܨܺܝܢ ܒܝܽܘܡ ܥܰܕܥܺܐܕܳܟ: ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܣܥܽܘܪ ܠܐܪܥܳܐ ܒܥܽܘܕܪ̈ܳܢܶܐ ܕܡ̣ܶܢ ܡܳܪܳܟ: ܒܙܰܒܢܳܐ ܗܳܢܳܐ ܐܠܰܝܨܳܐ ܘܪܰܡܫܳܝܳܐ: ܐܰܝܬܳܐ ܠܠܶܒܰܢ ܠܰܬܝܳܒܽܘܬܳܐ ܕܫܳܦܪܳܐ ܠܡܳܪܳܟ: ܘܗܰܒܠܰܢ ܕܰܒܢܰܚ̈ܬܶܐ ܪ̈ܓܺܝܓܶܐ ܢܶܬܚܙܶܐ ܩܕܳܡ ܡܳܪܝܳܐ ܡܳܪܳܟ ܒܕܽܘܟܪܳܢܳܟ ܐܠܰܗܳܝܳܐ: ܘܗܰܒ ܠܬܰܠܡܺܝ̈ܕܰܝܟ ܕܰܨܗܶܝܢ ܠܩܳܠܳܟ ܫܡܳܐ ܦܰܐܝܳܐ ܘܫܰܦܺܝܪܳܐ: ܠܣܳܒ̈ܶܐ ܚܰܪܬܳܐ ܛܳܒܬܳܐ: ܠܓܰܒܪ̈ܶܐ ܕܽܘܒܳܪ̈ܶܐ ܫܳܘ̈ܝܰܝ ܠܰܕܡܰܠܐܟ̈ܶܐ: ܠܛܰܠܝܳܐ ܪܰܒܳܐ ܒܰܥܝ̈ܳܕܶܐ ܘܛܶܟ̈ܣܶܐ ܕܥܺܕܬܳܐ ܩܰܕܺܝܫܬܳܐ: ܠܢܶܫ̈ܶܐ ܢܰܛܰܪ ܡ̣ܶܢ ܟܽܠ ܙܢܳܐ ܠܐ ܫܰܦܺܝܪܳܐ: ܘܰܐܝܬܳܐ ܠܐܬܪܳܐ ܗܳܢܳܐ ܒܕܽܘܟܪܳܢܳܟ ܘܰܕܩܰܕܺܝܫܳܐ ܡܳܪܝ ܐܳܣܝܳܐ ܘܡܳܪܝ ܦܺܝܢܚܶܣ ܒܢ̈ܰܝ ܠܶܘܺܝܬܳܟ: ܟܽܠ ܛܳܒ̈ܳܬܳܐ ܘܥ̈ܰܠܠܳܬܳܐ ܫܦܺܝ̈ܥܳܬܳܐ: ܐܳܦ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܥܢܰܕܘ ܡ̣ܶܢ ܥܺܕܬܳܐ: ܢܝܳܚܬܳܐ ܒܰܐܘ̈ܳܢܶܐ ܐܽܘܪ̈ܫܠܶܝܡܳܝܶܐ: ܘܡ̣ܶܢ ܟܽܠܰܢ ܬܶܫܒܽܘܚܬܳܐ ܬܶܣܰܩ ܠܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܥܶܛܪܳܐ ܗܰܢܺܝܳܐܐ ܘܪܺܝܚܳܐ ܒܰܣܺܝܡܳܐ: ܕܣܳܩܽܘܗܝ ܡܺܝ̈ܬܶܐ ܘܰܚܝܰܘ ܒܶܗ: ܘܛܰܡ̈ܶܐܐ ܘܶܐܬܩܰܕܰܫܘ ܘܓܰܪ̈ܒܶܐ ܘܶܐܬܕܰܟܺܝܘ ܘܰܡܫܰܪ̈ܰܝܳܐ ܘܰܟܪ̈ܺܝܗܶܐ ܘܶܐܬܚܠܶܡܘ: ܒܝܰܕ ܨܠܰܘ̈ܳܬܶܗ ܕܓܰܒܝܳܟ ܡܳܪܝ ܐܶܫܰܥܝܳܐ: ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܢ: ܦܽܘܚ ܒܰܢ ܪܺܝܚܳܟ ܒܰܣܺܝܡܳܐ: ܘܰܚܢܰܢ ܢܶܬܒܰܣܰܡ ܘܢܶܫܦܰܪ ܘܢܶܬܕܰܟܶܐ ܡ̣ܶܢ ܣܰܪܝܽܘܬܳܐ ܕܰܚܛܳܗ̈ܶܐ: ܘܬܺܚܶܐ ܡܺܝܬܽܘܬܰܢ ܒܚܰܝ̈ܶܐ ܕܰܐܠܳܗܽܘܬܳܟ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܚܘܬܡܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܢܝܰܩܰܪ ܕܽܘܟܪܳܢܶܗ ܕܡܳܪܝ ܐܶܫܰܥܝܳܐ ܚܳܠܳܒܳܝܳܐ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܘܕܰܟܳܐ ܓܰܪܒܳܐ ܕܢܰܦ̈ܫܳܬܰܢ ܒܰܨܠܰܘ̈ܳܬܶܗ: ܐܰܝܟ ܡܳܐ ܕܕܰܟܺܝ ܓܰܪܒܳܐ ܕܥܳܢ̈ܶܗ ܕܟܽܘܫ ܡܓܽܘܫܳܐ: ܘܰܐܚܳܐ ܡܺܝܬܽܘܬܰܢ ܡ̣ܶܢ ܒܳܥ̈ܘܳܬܶܗ: ܐܰܟܡܳܐ ܕܢܰܚܡ ܠܡܰܗܢܽܘܫ ܒܰܪ ܚܳܬܶܗ ܕܟܽܘܫ ܫܰܠܝܛܳܐ ܕܢܰܘܕܶܐ ܘܢܶܣܓܽܘܕ ܘܰܢܫܰܒܚܳܟ: ܗܳܫܳܐ܀

 

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܕܡܰܠܟ̈ܶܐ ܘܩܳܛܰܪ ܬܳܓ̈ܶܐ ܠܡܰܠܟ̈ܶܐ ܕܡ̣ܶܢ ܥܶܩܳܪܳܐ ܡܰܠܟܳܝܳܐ: ܓܒܳܝܗܝ ܠܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܠܗܰܘ ܕܡ̣ܶܢ ܐܺܝܠܳܢܳܐ ܥܰܩܪܳܐ ܘܡ̣ܶܢ ܣܰܘܟܬܐ ܕܰܐܥܬܩܰܬ݀ ܕܠܐ ܦܺܐܪ̈ܺܝܢ ܗܳܢܰܘ ܕܶܝܢ ܡ̣ܶܢ ܣܽܘܡܰܟܽܘܣ ܡܰܠܟܳܐ ܡܗܰܝܡܢܳܐ: ܘܒܰܪܬ ܙܰܘܓܶܗ ܡܰܪܝܰܡ ܕܰܐܣܺܝܪ ܗܘܳܐ ܐܰܦܰܝ̈ ܡܰܪܒܥܳܗ̇ ܒܥܰܩܪܽܘܬܳܐ: ܐܰܦܪܺܝ ܘܰܐܘܠܶܕ ܗܘܳܐ ܦܺܐܪܳܐ ܕܚܰܝ̈ܶܐ ܕܺܐܝܬܰܘܗܝ ܩܰܕܺܝܫܳܐ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܗܳܢܳܐ ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܰܢ: ܕܒܰܨܠܰܘ̈ܳܬܶܗ ܢܶܫܬܰܟܰܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܠܰܢ ܟܺܝܬ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܥܰܕܥܺܐܕܳܟ ܫܒܺܝܚܳܐ ܐܶܬܛܰܝܰܒܢܰܢ ܘܶܐܬܰܝܢܰܢ ܐܳܘ ܩܰܕܺܝܫܳܐ ܢܰܨܺܝܚ ܫܽܘܦܪ̈ܶܐ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܐܰܢ̱ܬ ܗ̣ܽܘ ܕܒܰܣܰܪܬ ܘܫܳܛܬ ܠܥܳܠܡܳܐ ܗܳܢܳܐ ܘܰܪ̈ܓܺܝܓܳܬܶܗ ܘܰܐܝܟ ܙܶܒܠܐ ܚܫܰܒܬ ܠܥܽܘܬܪܶܗ ܘܩܶܢܝܳܢܶܗ: ܐܰܢ̱ܬ ܗ̣ܽܘ ܕܰܙܟܰܝܬ ܠܚܰܫ̈ܰܝ ܦܰܓܪܳܐ ܘܰܠܪܶܓܬܳܐ ܩܳܛܽܘܠܬܳܐ ܘܰܐܝܟ ܠܐ ܦܰܓܪܳܢܳܐ ܚܰܡܣܶܢܬ ܕܶܝܢ ܒܰܐܓܽܘܢܳܐ ܪܽܘܚܳܢܳܝܳܐ: ܘܰܐܩܪܶܒܬ ܥܰܡ ܐܰܪ̈ܟܰܐܣ ܘܫܰܠܺܝ̈ܛܳܢܶܐ ܕܥܳܠܡܳܐ ܗܳܢܳܐ: ܘܰܙܟܰܝܬ ܘܰܢܨܰܚܬ ܘܰܫܩܰܠܬ ܟܠܺܝܠܐ ܕܙܳܟܽܘܬܳܐ: ܘܥܰܠܗܳܕܶܐ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܬܠܳܬ ܫܢܺܝ̈ܢ ܢܛܰܪܬ ܕܰܟܝܽܘܬܳܐ ܘܩܰܕܺܝܫܽܘܬܳܐ ܒܒܶܝܬ ܓܢܽܘܢܳܐ ܕܚܰܬܢܽܘܬܳܟ: ܥܰܡ ܚܰܢܰܐ ܩܰܕܺܝܫܬܳܐ ܒܰܪܬ ܙܰܘܓܳܟ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܚܰܠܶܦܬ ܓܢܽܘܢܳܐ ܗܳܢܳܐ ܡܶܫܬܰܪܝܳܢܳܐ ܘܺܝܪܶܬܬ ܓܢܽܘܢܳܐ ܘܒܽܘܣܳܡܳܐ ܫܡܰܝܳܢܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܠܣܺܝܥܬܳܐ ܕܣܳܒ̈ܶܐ ܐܠܰܗܳܝ̈ܶܐ ܢܩܶܦܬ: ܘܰܠܪܰܒܳܐ ܕܩܽܘܫܬܳܐ ܐܶܬܬܰܠܰܡܬ ܕܺܐܝܬܰܘܗܝ ܓܰܒܝܳܐ ܡܳܪܝ ܐܰܘܓܺܝܢ ܪܺܝܫܳܐ ܕܫܰܒܥܺܝܢ ܩܰܕܺܝ̈ܫܶܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܕܰܥܘܳܝܬܳܐ ܕܰܣܪܺܝܓܳܐ ܒܰܡܨܰܥܬܳܗ̇ ܐܳܦ ܩܠܽܘܒܺܝܢ ܒܠܳܝܳܐ ܠܒܺܝܫ ܗܘܰܝܬ ܚܠܳܦ ܡܳܐܢ̈ܶܐ ܡܕܰܗ̈ܒܶܐ ܗ̇ܳܢܽܘܢ ܕܡܰܠܟܽܘܬܳܐ ܕܒܶܝܬ ܐܰܒܽܘܟ: ܐܰܢ̱ܬ ܗ̣ܽܘ ܕܡܰܪܩܽܘܕܬܳܐ ܪܰܒܬܳܐ ܘܚܰܫܳܐ ܘܰܟܡܺܝܪܽܘܬܳܐ ܐܰܩܢܰܝܬ ܠܐܒܳܗܰܝ̈ܟ: ܟܰܕ ܥܰܠܘ ܠܒܶܝܬ ܓܢܽܘܢܳܐ ܕܚܰܬܢܽܘܬܳܟ ܘܶܐܫܟܰܚܘ ܚܰܬܢܳܐ ܕܥܰܪܺܝܩ ܘܟܰܠܬܳܐ ܕܠܰܝܬܶܝܗ̇: ܐܰܢ̱ܬ ܗ̣ܽܘ ܕܰܐܣܺܝܬ ܠܰܬܠܳܬܳܐ ܓܰܒܪ̈ܶܐ ܐܰܪ̈ܝܳܢܶܐ ܟܰܕ ܚܙܰܐܘܽܘܟ ܕܥܰܠ ܡܰܝ̈ܳܐ ܡܗܰܠܶܟ ܐܰܢ̱ܬ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܒܚܰܕ ܣܰܘܩܳܐ ܐܶܬܚܰܛܰܦܬ ܡ̣ܶܢ ܢܰܗܪܳܐ ܘܰܒܓܽܘܕܳܐ ܕܫܰܒܥܺܝܢ ܣܳܒ̈ܶܐ ܩܰܕܺܝ̈ܫܶܐ ܐܶܬܬܣܺܝܡܬ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܘܛܽܘܒܶܝܗ̇ ܠܚܰܢܰܐ ܒܬܽܘܠܬܳܐ ܩܰܕܺܝܫܬܳܐ ܒܰܪܬ ܙܰܘܓܳܟ: ܕܰܠܒܶܫܬܽܘܢ ܐܶܣܟܺܝܡܳܐ ܕܕܰܝܪܳܝܽܘܬܳܐ ܘܰܐܗܶܠܬܽܘܢ ܒܰܚܠܽܘܠܐ ܥܳܒܽܘܪܳܐ: ܘܰܙܟܰܝܬܽܘܢ ܠܚܰܫ̈ܶܐ ܕܒܶܣܪܳܐ: ܘܡܶܛܽܠ ܗܳܕܶܐ ܢܛܺܝܪ ܦܽܘܪܥܳܢܟܽܘܢ ܒܰܓܢܽܘܢܳܐ ܥܕܶܢܳܝܳܐ: ܠܟܽܘܢ ܛܽܘܒܰܝܟܽܘܢ ܕܰܟܦܰܪܬܽܘܢ ܒܰܚܠܽܘܠ ܚܰܬܢܽܘܬܟܽܘܢ ܙܰܒܢܳܝܬܳܐ: ܘܡܶܛܽܠ ܗܳܕܶܐ ܕܶܝܢ ܐܶܫܬܘܺܝܬܽܘܢ ܠܡܶܫܬܽܘܬܳܐ ܗ̇ܳܝ ܥܳܠܡܺܝܢܳܝܬܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܟܰܢܶܫܬ ܠܠܰܚܡܳܐ ܕܰܠܚܰܡܪܳܐ ܕܰܫܒܰܥ ܐܰܓܳܢ̈ܶܐ ܕܺܐܝܬ ܗܘܳܐ ܩܕܳܡ ܦܬܰܟܪ̈ܶܐ ܘܟܽܘܡܪ̈ܶܐ ܐܰܦܪ̈ܶܐ ܒܰܡܥܰܪ̈ܶܐ ܩܪܺܝܬܳܐ ܕܚܰܢ̈ܦܶܐ: ܘܥܰܡ ܡܰܠܐܟܳܐ ܡܚܰܝܠܳܢܳܟ ܛܥܶܢܬܳܝܗܝ ܘܰܩܕܳܡ ܣܳܒ̈ܶܐ ܐܠܰܗܳܝ̈ܶܐ ܣܳܡܬܳܝܗܝ: ܠܟܽܘܢ ܛܽܘܒܰܝܟܽܘܢ ܡܳܪܝ ܐܶܫܰܥܝܳܐ ܘܡܳܪܝ ܚܰܒܺܝܒ ܕܢܰܚܶܡܬܽܘܢ ܠܐܪܣܛܽܘܣ ܒܪܶܗ ܕܩܽܘܣܛܰܢܛܺܝܢ ܫܰܠܺܝܛܳܐ ܕܒܶܝܬ ܙܰܒܕܰܝ: ܘܰܠܟܽܠܶܗ ܟܰܪܟܳܐ ܬܰܠܡܶܕܬܽܘܢ ܘܰܠܡܰܪܩܺܝܽܘܢܺܝܣܛܳܐ ܡܣܰܝܒܳܐ ܒܪܽܘܓܙܳܐ ܐܰܡܺܝܬܬܽܘܢ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܢܰܚܶܡܬ ܠܡܰܗܢܽܘܫ ܒܰܪ ܚܳܬܶܗ ܕܟܽܘܫ ܚܰܢܦܳܐ ܘܒܳܬܰܪ ܕܰܚܝܳܐ ܐܰܥܡܶܕܬܳܝܗܝ ܠܶܗ ܘܚܳܠܶܗ ܟܽܘܫ ܘܰܠܟܽܠܗܽܘܢ ܒܢ̈ܰܝ ܘܰܪܕܳܢܺܝܬܳܐ ܩܪܺܝܬܳܐ ܬܠܳܬܳܐ ܐܠܰܦܺܝ̈ܢ ܘܫܶܬܡܳܐܐ ܒܢܰܝ̈ܢܳܫܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܐܥܡܶܕܬ ܒܒܶܝܬ ܢܰܚܠܐ ܩܪܺܝܬܳܐ ܝܰܬܺܝܪ ܡ̣ܶܢ ܬܫܰܥܡܳܐܐ ܢܰܦ̈ܫܳܬܳܐ ܕܰܒܢܰܝ̈ܢܳܫܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܫܰܩܠܳܟ ܡܰܠܐܟܳܐ ܥܰܠ ܬܪܰܥ ܚܳܠܳܒ ܡܕܺܝܢ̱ܬܳܐ ܕܰܐܒܳܗܰܝ̈ܟ ܐܰܩܺܝܡܳܟ ܟܰܕ ܐܰܢ̱ܬ ܡܶܬܚܰܫܰܒ ܗܘܰܝܬ ܕܠܐ ܬܶܥܽܘܠ ܠܰܡܕܺܝܢ̱ܬܳܐ ܐܰܝܟ ܕܠܐ ܬܶܬܺܝܕܰܥ ܠܐܒܳܗܰܝ̈ܟ ܘܬܰܘܒܶܕ ܦܽܘܠܚܳܢܳܟ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܶܐܬܓܠܺܝ ܠܳܟ ܡܳܪܝܳܐ ܝܽܘܡ ܥܽܘܢܕܳܢܳܗ̇ ܕܚܰܢܰܐ ܒܰܪܬ ܙܰܘܓܳܟ ܕܺܐܝܬ ܗܘܳܐ ܠܳܗ̇ ܕܰܚܛܺܝܦ ܗܰܘܢܳܗ̇ ܠܰܫܡܰܝܳܐ ܬܠܳܬܳܐ ܝܰܘܡܺܝ̈ܢ ܟܰܕ ܚܳܙܝܳܐ ܘܡܶܬܒܰܩܝܳܐ ܒܛܽܘ̈ܒܶܐ ܕܰܢܛܺܝܪܺܝܢ ܠܳܗ̇ ܚܠܳܦ ܢܳܛܽܘܪܽܘܬ ܒܬܽܘܠܽܘܬܳܗ̇: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܶܐܬܠܺܝ ܠܳܗ̇ ܠܚܰܢܰܐ ܒܰܪܬ ܙܰܘܓܳܟ ܕܩܰܪܺܝܒ ܐܰܢ̱ܬ ܗ̣ܽܘ ܘܰܩܪܳܬܳܟ ܠܘܳܬܳܗ̇ ܘܰܐܪܺܝܡܰܬ݀ ܩܳܠܳܗ̇ ܘܶܐܡܪܰܬ݀: ܬܳܐ ܶܒܰܫܠܳܡܳܐ ܚܰܬܢܳܐ ܚܰܕܬܳܐ ܕܡܰܟܪܰܢܝ ܠܚܰܬܢܳܐ ܫܡܰܝܳܢܳܐ: ܬܳܐ ܒܰܫܠܳܡܳܐ ܓܰܒܪܳܐ ܘܒܰܥܠܐ ܘܰܐܚܳܐ ܕܕܰܟܝܽܘܬܳܐ: ܬܳܐ ܒܰܫܠܳܡܳܐ ܐܳܚܝ ܩܰܕܺܝܫܳܐ ܘܒܰܪ ܓܢܽܘܢܝ ܕܰܟܝܳܐ: ܬܳܐ ܒܰܫܠܳܡܳܐ ܘܰܩܪܽܘܒ ܘܥܰܡܶܨ ܠܺܝ ܥܰܝ̈ܢܰܝ ܕܙܰܒܢܳܐ ܐܺܝܬ ܠܺܝ ܕܝܰܐܻܝܒܳܐ ܐ̱ܢܳܐ ܠܰܚܙܳܬܳܟ ܪܚܺܝܡܬܳܐ: ܢܽܘܓܪܳܐ ܐܺܝܬ ܠܺܝ ܕܚܳܝܪ̈ܳܢ ܠܳܟ ܥܰܝ̈ܢܰܝ: ܒܪܺܝܟ ܗ̣ܽܘ ܡܳܪܝܳܐ ܕܰܐܫܘܝܰܢܝ ܠܰܚܙܳܬܳܟ ܩܕܳܡ ܕܶܐܡܽܘܬ: ܡܶܟܺܝܠ ܦܽܘܫ ܒܰܫܠܳܡܳܐ ܘܨܰܠܐ ܥܠܰܝ: ܘܰܒܥܺܝ ܡ̣ܶܢ ܡܳܪܰܢ ܕܬܰܡܳܢ ܢܶܚܕܶܐ ܘܢܶܬܒܰܣܰܡ ܒܰܓܢܽܘܢܳܐ ܗ̇ܰܘ ܠܐ ܡܶܫܬܰܪܝܳܢܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܕܠܐ ܨܒܰܝܬ ܕܬܶܬܓܠܐܷ ܘܬܶܬܺܝܕܰܥ ܠܐܒܳܗܰܝ̈ܟ ܐܶܠܐ ܬܰܚܶܡܬ ܘܶܐܣܰܪܬ ܒܡܶܠܬܳܐ ܕܰܐܠܳܗܳܐ ܠܪܺܝܫܰܬ݀ ܕܰܝܪܳܐ ܕܠܐ ܬܶܓܠܐܷ ܠܐܢܳܫ ܕܰܐܢ̱ܬ ܐܺܝܬܰܝܟ ܒܪܶܗ ܕܡܰܠܟܳܐ ܥܕܰܡܳܐ ܕܬܶܬܥܰܦܶܐ ܚܰܢܰܐ ܘܬܶܦܽܘܩ ܡ̣ܶܢ ܕܰܝܪܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܒܶܣܬܰܪ ܥܰܪܣܳܐ ܐܳܙܶܠ ܗܘܰܝܬ: ܘܒܶܟܝܳܐ ܚܢܺܝܓܳܐ ܒܳܟܶܐ ܗܘܰܝܬ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܚܙܰܝܬ ܠܐܒܳܗܰܝ̈ܟ ܘܚܰܡܣܶܢܬ ܘܠܐ ܓܠܰܝܬ ܠܗܽܘܢ ܕܝܳܩܕܺܝܢ ܗܘܰܘ ܠܰܚܙܳܬܳܟ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܕܶܐܬܚܙܰܝܬ ܠܐܒܽܘܟ ܒܚܶܠܡܳܐ ܕܠܺܠܝܳܐ ܘܐܰܗܦܶܟܬܳܝܗܝ ܡ̣ܶܢ ܕܰܠܡܶܪܕܰܦ ܒܳܬܪܳܟ ܘܰܠܢܽܘܓܪܳܐ ܕܬܰܪܬܶܝܢ ܫܢܺܝ̈ܢ ܐܰܢ̱ܬ ܘܗ̣ܽܘ ܩܕܳܡ ܒܺܐܡ ܕܰܡܫܺܝܚܳܐ ܬܶܚܙܽܘܢ ܚܕ̈ܳܕܶܐ ܣܰܒܰܪܬܳܝܗܝ: ܘܗܳܫܳܐ ܟܽܠܰܢ ܟܶܢܫܳܐ ܕܰܡܗܰܝ̈ܡܢܶܐ ܕܰܠܕܽܘܟܪܳܢܳܟ ܐܶܬܛܰܝܰܒܢܰܢ ܘܶܐܬܰܝܢܰܢ: ܘܰܒܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܗܳܐ ܡܝܰܩܪܺܝܢܰܢ: ܒܥܺܝ ܚܠܳܦܰܝܢ ܚܰܛܳܝ̈ܶܐ ܕܢܶܫܬܘܶܐ ܐܳܦ ܚܢܰܢ ܠܰܚܙܳܬܳܟ ܩܕܳܡ ܒܺܐܡ ܕܰܡܫܺܝܚܳܐ ܐܰܝܟ ܫܽܘܘܕܳܝܳܟ ܕܠܐܒܽܘܟ ܡܰܠܟܳܐ: ܘܰܕܢܶܬܒܰܣܰܡ ܒܛܽܘ̈ܒܶܐ ܫܡܰܝ̈ܳܢܶܐ ܢܛܺܝܪܺܝܢ: ܘܰܐܬܪܰܢ ܕܶܐܬܬܰܠܡܰܕ ܒܝܰܕ ܟܳܪܽܘܙܽܘܬܳܟ ܘܰܕܫܰܒܥܺܝܢ ܣܳܒ̈ܶܐ ܟܢܰܘ̈ܳܬܳܟ: ܢܶܫܬܰܘܙܰܒ ܡ̣ܶܢ ܐܺܝܕܳܐ ܩܛܺܝܪܳܝܬܳܐ ܘܡ̣ܶܢ ܪܶܓܠܐ ܢܽܘܟܪܳܝܬܳܐ ܘܚܰܩ̈ܠܳܬܰܢ ܘܟܰܪ̈ܡܰܝܢ ܢܶܫܬܰܘܙܒܽܘܢ ܡ̣ܶܢ ܡܰܚܘ̈ܳܬܳܐ ܕܪܽܘܓܙܳܐ ܘܫܰܐܠ ܡ̣ܶܢ ܡܳܪܳܟ ܕܢܶܬܶܠ ܠܰܢ ܡܣܰܝܒܪܳܢܽܘܬܳܐ ܕܥܰܠ ܚܰܫܰܝ̈ ܒܶܣܪܳܐ ܐܰܝܟ ܕܝܰܗܒ ܠܳܟ ܘܰܕܢܶܚܡܣܰܢ ܒܰܐܓܽܘܢܳܐ ܕܰܕܡܳܐ ܐܰܝܟ ܕܚܰܡܣܶܢܬ: ܘܕܰܢܫܰܗܶܐ ܡ̣ܶܢ ܠܶܒܰܘ̈ܳܬܰܢ ܠܪܶܓܬܳܐ ܩܳܛܽܘܠܬܳܐ ܕܙܳܢܝܽܘܬܳܐ ܘܓܰܝܳܪܽܘܬܳܐ: ܐܳܦ ܨܰܚܢܽܘܬܳܐ ܥܰܡ ܦܰܚܙܽܘܬܳܐ ܘܰܒܥܺܝ ܚܠܳܦ ܟܳܗ̈ܢܶܐ ܕܢܶܙܕܰܗܽܘܢ: ܘܰܡܫܰܡ̈ܫܳܢܶܐ ܕܢܶܬܢܰܟܦܽܘܢ: ܘܕܰܝܪ̈ܳܝܶܐ ܕܢܶܣܬܡܰܥܠܽܘܢ: ܒܥܺܝ ܚܠܳܦ ܡܰܠܟ̈ܶܐ ܕܢܶܫܬܰܝܢܽܘܢ: ܘܪ̈ܳܥܰܘܳܬܳܐ ܕܢܶܫܬܘܽܘܢ: ܚܠܳܦ ܣܳܒ̈ܶܐ ܕܢܶܣܬܰܡܟܽܘܢ: ܐܳܦ ܓܰܒܪ̈ܶܐ ܢܶܬܢܰܛܪܽܘܢ: ܘܰܛܠܳܝ̈ܶܐ ܘܫܰܒܪ̈ܶܐ ܕܢܶܬܪܰܒܽܘܢ: ܘܢܶܫ̈ܶܐ ܕܢܶܬܟܰܚ̈ܕܳܢ: ܘܚܰܛܳܝ̈ܶܐ ܕܢܶܬܚܰܣܽܘܢ: ܘܰܚܛܳܗ̈ܶܐ ܕܢܶܫܬܰܒܩܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܰܐܘ̈ܳܢܶܐ ܕܢܽܘܗܪܳܐ ܢܶܬܬܢܺܝܚܽܘܢ: ܘܟܽܠܰܢ ܢܰܣܶܩ ܫܽܘܒܚܳܐ ܠܰܡܚܰܝܠܳܢܳܟ ܘܰܡܢܰܨܚܳܢܳܟ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܣܽܘܟ ܒܰܢ ܡܳܪܝ ܢܶܒܥܳܐ ܕܰܡܠܐܷ ܚܰܝ̈ܶܐ ܐܰܝܟ ܡܰܝ̈ܳܐ ܕܝܰܗܒ ܓܰܒܝܳܟ ܡܳܪܝ ܐܶܫܰܥܝܳܐ ܠܪ̈ܳܥܰܘܳܬܳܐ ܕܫܶܐܠܘ ܡܶܢܶܗ: ܘܕܰܟܳܐ ܠܰܢ ܡ̣ܶܢ ܓܰܪܒܳܐ ܕܰܚܛܳܗ̈ܶܐ ܐܰܟܡܳܐ ܕܶܐܬܕܰܟܝܰܬ݀ ܗ̇ܳܝ ܥܳܢ̈ܳܐ: ܕܰܟܳܐ ܘܰܡܪܽܘܩ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܢܰܦܫ̈ܳܢܳܝܶܐ ܘܦܰܓܪ̈ܳܢܳܝܶܐ: ܒܰܨܠܰܘ̈ܳܬܶܗ ܕܰܐܬܠܺܝܛܳܟ ܡܳܪܝ ܐܶܫܰܥܝܳܐ ܘܰܕܚܰܢܰܐ ܒܬܽܘܠܬܳܐ ܒܰܪܬ ܙܰܘܓܶܗ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܚܰܬܢܳܐ ܕܰܫܪܳܪܳܐ ܡܫܺܝܚܳܐ ܕܰܡܟܰܪ ܠܶܗ ܚܰܬܢ̈ܶܐ ܘܟ̈ܰܠܠܳܬܳܐ ܕܺܐܝܬܰܝܗܶܝܢ ܢܰܦ̈ܫܳܬܳܐ ܕܩܰܕܺܝ̈ܫܶܐ: ܕܰܥܒܰܕܘ ܨܶܒܝܳܢܶܗ ܘܰܢܛܰܪܘ ܦܽܘܩ̈ܕܳܢܰܘܗܝ: ܘܰܟܦܰܪܘ ܒܥܳܠܡܳܐ ܘܰܒܨܶܒܬܶܗ: ܕܚܰܕ ܡܶܢܗܽܘܢ ܐܺܝܬܰܘܗܝ ܙܰܗܝܳܐ ܘܰܒܬܽܘܠܐ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܘܚܰܢܰܐ ܒܬܽܘܠܬܳܐ ܫܰܘܬܳܦܬܶܗ: ܕܰܟܦܰܪܘ ܗܘܰܘ ܒܚܰܬܢܽܘܬܗܽܘܢ ܙܰܒܢܳܝܬܳܐ: ܘܰܫܒܰܩܘ ܓܢܽܘܢܳܐ ܕܺܝܠܗܽܘܢ ܥܳܠܡܳܢܳܝܳܐ: ܘܰܐܡܟܰܪܘ ܢܰܦ̈ܫܳܬܗܽܘܢ ܠܚܰܬܢܳܐ ܫܡܰܝܳܢܳܐ ܕܢܶܩܛܽܘܪ ܠܗܽܘܢ ܓܢܽܘܢܳܐ ܡܰܠܟܽܘܬܳܢܳܝܳܐ ܘܠܐ ܡܶܫܬܰܪܝܳܢܳܐ: ܕܠܶܗ ܠܗܰܘ ܕܰܐܪܡܺܝ ܢܽܘܪܶܗ ܒܠܶܒܰܘ̈ܳܬܗܽܘܢ: ܢܦܺܝܣ ܘܢܶܬܟܰܫܰܦ ܕܰܢܫܰܠܗܶܒ ܠܶܒܰܘ̈ܳܬܰܢ ܒܪܶܚܡܬܶܗ: ܘܰܢܓܰܘܙܶܠ ܢܰܦ̈ܫܳܬܰܢ ܒܚܽܘܒܶܗ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܩܰܪܩܰܦܬܳܐ ܗ̇ܳܝ ܦܶܛܪܽܘܣܳܝܬܳܐ ܕܡܳܪܝ ܐܰܘܓܺܝܢ ܪܺܝܫ ܣܺܝܥܬܳܐ ܐܠܰܗܳܝܬܳܐ ܨܳܒܶܝܢܰܢ ܠܰܡܩܰܠܳܣܽܘ ܒܰܒ̈ܢܳܬ ܩ̈ܳܠܐ ܚܰܠܝ̈ܳܬܳܐ ܠܶܗ ܘܠܰܦܠܰܓܳܐ ܕܺܝܠܶܗ ܡܢܰܨܪܺܝܢܰܢ: ܘܒܰܕܓܽܘܢ ܥܰܠ ܚܰܝܠܐ ܕܰܨܠܰܘ̈ܳܬܗܽܘܢ ܕܰܟܝ̈ܳܬܳܐ ܩܳܪܒܺܝܢܰܢ: ܘܥܽܘܕܪ̈ܳܢܶܐ ܡܶܢܗܽܘܢ ܢܳܣܒܺܝܢܰܢ: ܟܰܕ ܠܝܰܡܳܐ ܪܘܺܝܚܳܐ ܕܟܽܠܶܗ ܟܶܢܫܗܽܘܢ ܠܐ ܡܨܶܝܢܰܢ ܓܳܝܫܺܝܢܰܢ: ܬܗܽܘܡܰܐ ܗ̱ܘ ܓܶܝܪ ܥܰܡܺܝܩܳܐ: ܡܳܕܶܝܢ ܢܶܫܒܽܘܩ ܠܡܶܫܬܰܥܳܝܽܘ ܬܡܺܝܗܽܘܬ ܐܳܣ̈ܘܳܬܳܐ ܘܰܓܢ̱ܒܰܪ̈ܘܳܬܳܐ ܕܰܥܒܰܕܘ ܒܥܳܠܡܳܐ: ܟܢܽܘܫܝܳܐ ܗܳܢܳܐ ܕܩܰܕܺܝ̈ܫܶܐ ܕܒܶܝܬ ܡܳܪܝ ܐܰܘܓܺܝܢ: ܘܥܰܠ ܚܰܕ ܡܶܢܗܽܘܢ ܢܶܫܬܰܥܶܐ ܠܟܽܘܢ: ܕܺܐܝܬܰܘܗܝ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܒܰܪ ܣܽܘܡܰܟܽܘܣ ܡܰܠܟܳܐ ܡܗܰܝܡܢܳܐ ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܰܢ: ܗܳܢܳܐ ܕܡ̣ܶܢ ܟܰܪܣܳܐ ܐܶܬܓܒܺܝ ܘܰܒܢܶܕܪ̈ܶܐ ܘܩܽܘܪ̈ܒܳܢܶܐ ܐܶܬܺܝܠܶܕ: ܘܟܰܕ ܐܶܬܡܰܛܺܝ ܠܰܡܫܽܘܚܬܳܐ ܕܥܶܣܪܺܝܢ ܘܬܰܪܬܶܝܢ ܫܢܺܝ̈ܢ: ܐܠܰܨܽܘܗܝ ܐܰܒܳܗܰܘ̈ܗܝ ܘܰܩܛܰܪܘ ܠܶܗ ܟܠܺܝܠܐ ܕܚܰܬܢܽܘܬܳܐ: ܗܳܢܳܐ ܕܶܐܬܚܙܺܝ ܠܶܗ ܡܰܠܐܟܳܐ ܒܒܶܝܬ ܓܢܽܘܢܶܗ ܕܳܐܡܰܪ ܠܶܗ: ܐܶܬܚܰܝܰܠ ܥܠܰܝܡܳܐ ܐܶܫܰܥܝܳܐ: ܡܶܛܽܠ ܕܠܰܘ ܠܰܓܢܽܘܢܳܐ ܗܳܢܳܐ ܡܶܬܚܰܒܠܳܢܳܐ ܐܶܬܺܝܠܶܕܬ: ܐܶܠܐ ܠܦܳܠܚܽܘܬܶܗ ܕܡܳܪܳܟ ܘܠܰܓܢܽܘܢܶܗ ܠܐ ܡܶܫܬܰܪܝܳܢܳܐ: ܗܳܢܳܐ ܕܰܩܪܳܗ̇ ܠܚܰܢܰܐ ܒܰܪܬ ܙܰܘܓܶܗ ܕܳܐܦ ܗ̣ܺܝ ܡܫܰܘܬܦܳܐ ܗܘܳܬ ܠܰܚܙܳܬܶܗ ܕܡܰܠܐܟܳܐ: ܘܶܐܡܰܪ ܠܳܗ̇ ܕܒܳܥܶܐ ܐ̱ܢܳܐ ܡܶܢܶܟܝ ܕܬܶܬܦܺܝܣܺܝܢ ܠܺܝ ܕܶܐܗܘܶܐ ܕܰܝܪܳܝܳܐ: ܘܗܳܢ ܒܶܝܬ ܓܢܽܘܢܳܐ ܕܟܽܠ ܡܽܘܢ ܕܒܶܗ ܕܺܝܠܶܟܝ ܢܶܗܘܶܐ: ܗܳܢܳܐ ܕܟܰܕ ܚܙܳܬ݀ ܫܰܘܬܳܦܬܶܗ ܕܰܒܢܽܘܪܳܐ ܐܠܰܗܳܝܬܳܐ ܐܶܫܬܓܰܪ ܦܰܢܝܰܬ݀ ܠܶܗ ܕܚܳܣ ܠܺܝ ܕܶܐܟܰܬܰܪ ܒܳܬܪܳܟ ܒܰܓܢܽܘܢܳܐ ܗܳܢܳܐ ܡܶܬܚܰܒܠܳܢܳܐ: ܐܶܠܐ ܟܰܬܰܪ ܠܺܝ ܪܽܘܚܡܝ ܕܶܐܢܳܐ ܩܰܕܡܳܝܬܳܐ ܢܳܦܩܳܐ ܐ̱ܢܳܐ: ܘܰܠܕܰܝܪܳܐ ܕܰܐܚܘ̈ܳܬܳܐ ܐܳܙܳܠܐ ܐ̱ܢܳܐ: ܘܶܐܣܟܺܝܡܳܐ ܕܕܰܝܪܳܝܽܘܬܳܐ ܠܳܒܫܳܐ ܐ̱ܢܳܐ: ܘܰܒܬܽܘܠܽܘܬܝ ܠܰܡܫܺܝܚܳܐ ܢܳܛܪܳܐ ܐ̱ܢܳܐ: ܗܳܢܳܐ ܕܟܰܕ ܚܙܳܗ̇ ܠܛܽܘܒܳܢܺܝܬܳܐ ܚܰܢܰܐ ܕܫܶܠܚܰܬ݀ ܬܰܨܒܺܝܬܳܗ̇ ܟܽܠܳܗ̇: ܘܰܐܝܟ ܚܰܕ ܡ̣ܶܢ ܚܳܕܽܘܪ̈ܶܐ ܢܶܦܩܰܬ݀ ܡ̣ܶܢ ܒܶܝܬ ܓܢܽܘܢܳܗ̇ ܟܶܪܝܰܬ݀ ܠܶܗ ܘܕܰܡܰܥ: ܘܰܒܠܶܒܶܗ ܟܰܣܝܳܐܝ̣ܬ ܠܐܠܳܗܳܐ ܡܰܘܕܶܐ ܗܘܳܐ ܘܰܡܫܰܒܰܚ: ܗܳܢܳܐ ܕܰܠܣܺܝܥܬܳܐ ܕܒܶܝܬ ܡܳܪܝ ܐܰܘܓܺܝܢ ܢܩܶܦ: ܘܰܠܛܽܘܪܳܐ ܕܺܐܝܙܠܐ ܡܛܳܐ: ܗܳܢܳܐ ܕܠܰܫܠܳܡܶܗ ܣܳܘܚܺܝܢܰܢ ܘܰܒܚܰܕܽܘܬܳܐ ܘܒܰܪܘܳܙܳܐ ܐܳܡܪܺܝܢܰܢ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܝܰܡܦܺܝܣ ܕܠܐ ܐܶܬܗܰܢܺܝ ܒܡܶܫܬܽܘܬܳܐ ܥܳܒܽܘܪܬܳܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܫܰܘܫܒܺܝܢܳܐ ܓܢܶܐ ܥܰܡ ܚܰܬܢܳܐ ܫܡܰܝܳܢܳܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܘܰܪܕܳܐ ܚܠܐܷ ܪܺܝܚܳܐ ܘܫܰܦܺܝܪ ܓܰܘܢܳܐ ܕܰܒܬܳܓܳܗ̇ ܕܥܺܕܬܳܐ ܩܰܕܺܝܫܬܳܐ ܐܶܬܬܣܺܝܡ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܥܰܠ ܢܗܰܪ ܡܳܫܳܟ ܩܒܰܥܬ ܕܰܝܪܳܟ ܐܳܦ ܡܰܫܪܝܳܟ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܚܰܠܶܦܬ ܡܰܠܟܽܘܬܳܐ ܐܰܪܥܳܢܳܝܬܳܐ ܘܰܢܣܰܒܬ ܚܠܳܦܶܝܗ̇ ܡܰܠܟܽܘܬܳܐ ܕܰܫܡܰܝܳܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܛܪܰܕܬ ܠܡܰܪܩܝܽܘܢܺܝܣܛܳܐ ܡ̣ܶܢ ܩܶܐܣܛܪܰܐ ܕܒܶܝܬ ܙܰܒܕܰܝ ܘܰܒܠܰܘܛܰܬ݀ ܦܽܘܡܳܟ ܣܳܦ ܡ̣ܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܝܰܡܳܐ ܕܚܽܘܠܡܳܢ̈ܶܐ ܘܥܳܨܽܘܒܳܐ ܕܰܡܡܰܚܰܝ̈ܳܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܐܩܺܝܡܬ ܡ̣ܶܢ ܡܺܝܬܽܘܬܳܐ ܠܡܰܗܢܽܘܫ ܐܳܦ ܠܐܷܪܰܣܛܽܘܣ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܠܛܰܠܝܳܐ ܗ̇ܰܘ ܢܳܚܠܳܝܳܐ ܕܡ̣ܶܢ ܫܺܐܕܳܐ ܡܶܫܬܰܢܰܩ ܗܘܳܐ: ܒܫܳܩܽܘܬܳܐ ܕܡܰܝ̈ܳܐ ܕܡ̣ܶܢ ܒܺܐܪܳܐ ܕܰܚܦܰܪܬ ܚܰܪܰܪܬ ܘܰܐܣܺܝܬܳܝܗܝ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܬܰܠܡܶܕܬ ܠܚܰܢ̈ܦܶܐ ܣܰܓܺܝ̈ܶܐܐ ܘܰܐܣܺܝܬ ܟܺܐܒ̈ܶܐ ܘܟܽܘܪ̈ܗܳܢܶܐ: ܘܕܰܟܺܝܬ ܠܓܰܪ̈ܒܶܐ ܘܰܦܬܰܚܬ ܠܰܣܡܰܝ̈ܳܐ: ܘܢܰܚܡܬ ܠܡܺܝ̈ܬܶܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܥܘܳܝܬܳܐ ܣܪܺܝܓܬܳܐ ܡܣܰܬܰܪ ܗܘܰܝܬ ܠܦܰܓܪܳܟ ܘܝܰܘ̈ܡܳܬܳܐ ܫܳܒܽܘ̈ܥܶܐ ܨܳܐܶܡ ܗܘܰܝܬ: ܘܠܰܚܡܳܐ ܦܰܓܽܘܪܳܐ ܐܳܦ ܡܶܠܚܳܐ ܓܪܺܝܣܬܳܐ ܡܶܬܬܰܪܡܶܐ ܗܘܰܝܬ ܐܳܦ ܚܶܦܝܳܝ ܡܗܰܠܶܟ ܗܘܰܝܬ: ܚܠܳܦ ܫܽܘܒܚܳܐ ܘܺܐܝܩܳܪܳܐ ܘܡܰܠܟܽܘܬܳܐ ܕܰܩܢܶܐ ܗܘܰܝܬ: ܫܠܳܡܠܳܟ ܡܳܪܝ ܐܶܫܰܥܝܳܐ ܘܺܐܝܩܳܪܳܐ ܕܰܢܛܺܝܪ ܠܳܟ ܒܥܳܠܡܳܐ ܪܽܘܚܳܢܳܐ: ܡ̣ܶܢ ܩܕܳܡ ܡܰܦܩܳܢܳܐ ܡ̣ܶܢ ܥܳܠܡܳܐ ܗܳܢܳܐ ܡܶܫܬܰܪܝܳܢܳܐ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܥܶܣܪܳܐ ܝܰܘܡܺܝ̈ܢ ܗܘܳܐ ܥܶܢܝܳܢܳܟ ܘܗܰܘܢܳܟ ܟܰܕ ܡܕܰܝܰܪ ܒܰܫܡܰܝܳܐ: ܘܰܚܙܰܝܬ ܒܗܰܘ ܐܰܬܪܳܐ ܠܐܒܳܐ ܐܰܢܛܽܘܢܺܝܳܘܣ ܒܪܺܝܫ ܣܶܕܪܳܐ ܕܕܰܝܪ̈ܳܝܶܐ: ܘܰܠܣܳܒܳܐ ܡܳܪܝ ܐܰܘܓܺܝܢ ܪܰܒܳܟ: ܟܰܕ ܣܺܝܡܺܝܢ ܟܠܺܝ̈ܠܐ ܒܪ̈ܺܝܫܰܝܗܽܘܢ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܚܙܰܝܬ ܒܺܐܝ̈ܕܰܝ ܪܰܒܳܟ ܟܠܺܝܠܐ ܕܰܗܕܺܝܪ ܒܦܰܐܝܽܘܬܳܐ: ܘܚܰܕ ܡ̣ܶܢ ܬܶܓ̈ܡܶܐ ܕܡܰܠܐܟ̈ܶܐ ܟܰܕ ܡܫܰܐܶܠ ܠܚܰܒܪܗ ܕܰܠܡܰܢܽܘ ܟܰܝ ܐܺܝܬܰܘܗܝ ܟܠܺܝܠܐ ܗܳܢܳܐ ܫܒܺܝܚܳܐ ܕܒܺܐܝ̈ܕܰܝ ܣܳܒܳܐ ܐܰܘܓܺܝܢ ܕܗܳܐ ܫܰܒܥܺܝܢ ܘܚܰܕ ܚܰܕܪܽܘܗܝ ܕܺܐܝܬܰܝܗܽܘܢ ܬܰܠܡܺܝ̈ܕܰܘܗܝ: ܘܩܳܠܐ ܐܶܫܬܡܰܥ ܕܳܐܡܰܪ: ܕܗܳܢܳܐ ܟܠܺܝܠܐ ܕܶܐܫܰܥܝܳܐ ܚܳܠܳܒܳܝܳܐ ܐ̱ܚܪܳܝܳܐ ܕܟܽܠܗܽܘܢ ܛܽܘ̈ܒܳܢܶܐ ܐܺܝܬܰܘܗܝ: ܫܠܳܡܠܳܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܚܙܰܝܬ ܠܡܰܠܐܟܳܐ ܕܰܡܫܰܐܶܠ ܕܠܐܡܰܬܝ ܢܳܣܶܒ ܟܠܺܝܠܶܗ ܐܶܫܰܥܝܳܐ ܚܳܠܳܒܳܝܳܐ: ܘܶܐܬܰܐܡܪܰܬ݀ ܕܰܠܫܽܘܡܠܳܝܳܐ ܕܥܶܣܪܳܐ ܝܰܘܡܺܝ̈ܢ ܢܳܣܶܒ ܟܠܺܝܠܶܗ ܐܶܫܰܥܝܳܐ ܚܳܠܳܒܳܝܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܰܙܩܰܦܬ ܦܰܓܪܳܟ ܘܰܛܥܺܝܬ ܝܳܬܳܟ ܘܣܰܟܺܝܬ ܘܰܠܥܶܢܝܳܢܳܐ ܕܡܳܪܳܟ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܕܶܐܬܶܐܫܶܕ ܥܰܠ ܕܰܝܪܳܟ ܢܽܘܗܪܳܐ ܐܠܰܗܳܝܳܐ ܒܥܶܕܳܢ ܡܰܘܬܳܟ: ܘܰܢܚܶܬܘ ܡܰܠܐܟ̈ܶܐ ܘܙܰܝܚܽܘܗ̇ ܠܢܰܦܫܳܟ ܩܰܕܺܝܫܬܳܐ ܘܰܐܣܩܽܘܗ̇ ܠܰܩܕܳܡ ܟܽܘܪܣܰܝ ܪܰܒܽܘܬܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܠܐ ܐܶܬܡܨܺܝܘ ܬܰܠܡܺܝ̈ܕܰܝܟ ܕܰܠܘܳܬ ܦܰܓܪܳܟ ܢܶܬܩܰܪܒܽܘܢ ܡ̣ܶܢ ܢܽܘܗܪܳܐ ܐܠܰܗܳܝܳܐ ܕܰܦܪܺܝܣ ܗܘܳܐ ܥܠܰܘܗܝ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ: ܕܶܐܫܟܚܽܘܗܝ ܠܦܰܓܪܳܟ ܟܰܕ ܨܠܺܝܒ ܘܩܳܐܶܡ ܥܰܠ ܪ̈ܶܓܠܰܘܗܝ ܒܳܬܰܪ ܦܽܘܪܫܳܢ ܢܰܦܫܳܟ ܕܡܶܢܶܗ: ܘܺܐܝܕܰܝ̈ܟ ܟܰܕ ܦܫܺܝ̈ܛܳܢ ܠܰܫܡܰܝܳܐ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܘܛܽܘܒܰܘܗܝ ܠܐܬܪܰܢ ܕܶܐܫܬܘܺܝ ܠܣܺܝܡܰܬ݀ ܓܰܪ̈ܡܰܝܟ ܘܛܽܘܒܶܝܗ̇ ܠܕܰܝܪܳܟ ܕܒܳܗ̇ ܐܶܬܩܰܒܪܰܬ: ܘܰܠܗܰܝܟܠܳܟ ܕܒܶܗ ܐܶܬܛܰܟܰܣܬ ܘܶܐܬܬܣܺܝܡܬ: ܘܗܳܐ ܒܰܫܡܰܝܳܐ ܥܒܺܝܕ ܡܰܥܡܪܳܟ ܘܕܽܘܝܳܪܳܟ: ܘܦܰܓܪܳܟ ܠܐܣܝܽܘܬ ܟܺܐܒܰܝ̈ܟ ܘܟܽܘܪ̈ܗܳܢܰܝܢ ܐܶܫܬܒܶܩ ܒܰܐܬܪܰܢ: ܠܳܟ ܛܽܘܒܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܕܟܽܠܗܽܘܢ ܝܰܘ̈ܡܰܝ ܚܰܝܰܝ̈ܟ ܬܶܫܥܺܝܢ ܘܰܚܕܳܐ ܫܰܢ̱ܬܳܐ ܘܫܰܢܺܝܬ ܠܥܳܠܡܳܐ ܚܰܕܬܳܐ ܫܢܰܬ݀ ܫܶܬܡܳܐܐ ܘܥܶܣܪܺܝܢ ܘܰܬܡܳܢܶܐ ܕܝܰܘ̈ܢܳܝܶܐ: ܚܰܡܫܬܰܥܣܰܪ ܒܬܶܫܪܺܝܢ ܩܰܕܡܳܝܳܐ: ܘܗܳܫܳܐ ܠܡܳܪܝܳܐ ܕܰܓܒܳܟ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ: ܕܰܢܫܰܟܶܢ ܠܕܰܝܪ̈ܳܝܐ ܕܢܶܛܪܽܘܢ ܒܬܽܘܠܽܘܬܳܐ ܘܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܰܢܩܰܕܶܫ ܥܰܪܣܳܐ ܕܰܡܙܰܘ̈ܓܶܐ ܒܰܨܠܰܘ̈ܳܬܳܟ: ܘܰܢܒܰܪܶܟ ܟܠܺܝܠܐ ܕܫܰܢ̱ܬܳܐ ܒܒܳܥ̈ܘܳܬܳܟ: ܘܢܰܣܓܶܐ ܡܳܪܝܳܐ ܒܰܐܬܪܰܢ ܟܳܗ̈ܢܶܐ ܥܛܺܝ̈ܦܰܝ ܙܰܗܝܽܘܬܳܐ: ܘܰܡܫܰܡ̈ܫܳܢܶܐ ܗܕܺܝܪ̈ܰܝ ܒܢܰܟܦܽܘܬܳܐ: ܘܥܰܠܠܳܢ̈ܶܐ ܕܕܳܝܢܺܝܢ ܬܪܺܝܨܽܘܬܳܐ: ܘܡܰܠܟ̈ܶܐ ܘܰܡܕܰܒܪ̈ܳܢܐ ܘܪ̈ܺܝܫܳܢܶܐ ܕܪܳܚܡܺܝܢ ܐܰܘܝܽܘܬܳܐ: ܘܓܰܒܪ̈ܶܐ ܘܢܶܫ̈ܶܐ ܕܰܦܫܺܝ̈ܛܳܢ ܐܺܝܕܰܝ̈ܗܽܘܢ ܠܙܶܕ̈ܩܳܬܳܐ: ܥܠܰܝ̈ܡܶܐ ܘܰܛܠܳܝ̈ܶܐ ܕܢܶܬܪܰܒܽܘܢ ܒܫܰܦܝܽܘܬܳܐ: ܘܰܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܢܶܫܬܰܟܰܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܣܰܟܠܘ̈ܳܬܳܐ: ܘܕܽܘܟܪܳܢܳܐ ܛܳܒܳܐ ܘܰܢܝܳܚܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܘܒܽܘܣܳܡܳܐ ܒܡܰܠܟܽܘܬܳܐ: ܘܫܽܘܒܚܳܐ ܢܶܣܰܩ ܠܳܟ ܡ̣ܶܢ ܟܽܠܰܢ ܡܫܺܝܚܳܐ ܡܰܘܪܒܳܢܶܗ ܘܰܡܢܰܨܚܳܢܶܗ ܕܰܥܛܺܝܦ ܙܳܟܽܘܬܳܐ ܡܳܪܝ ܐܶܫܰܥܝܳܐ: ܗܳܫܳܐ܀

 

 

 

ܥܛܪܐ

 

 

 

ܢܶܒܣܰܡ ܠܳܟ ܡܳܪܝ ܪܺܝܚܳܐ ܕܰܨܠܽܘܬܰܢ: ܘܶܐܬܪܰܥܳܐ ܠܰܢ ܘܒܰܛܶܠ ܡܶܢܰܢ ܩܪ̈ܳܒܶܐ ܘܩܺܐܪ̈ܣܶܐ ܡܢܰܓ̈ܕܳܢܶܐ ܒܝܰܕ ܨܠܰܘ̈ܳܬܶܗ ܕܡܳܪܝ ܐܶܫܰܥܝܳܐ ܡܢܺܝܚܳܢܳܟ: ܘܰܕܚܰܢܰܐ ܒܬܽܘܠܬܳܐ ܒܰܪܬ ܙܰܘܓܶܗ: ܘܰܕܟܽܠܳܗ̇ ܣܺܝܥܬܳܐ ܕܒܶܝܬ ܡܳܪܝ ܐܰܘܓܺܝܢ: ܘܫܰܟܶܢ ܠܰܢ ܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܙܰܗܳܐ ܡܳܪܝܳܐ ܠܩܰܫܺܝ̈ܫܶܐ ܘܠܰܡܫܰܡ̈ܫܳܢܶܐ ܕܰܫܗܰܪܘ ܒܥܰܕܥܺܐܕܶܗ ܕܓܰܒܝܳܟ ܡܳܪܝ ܐܶܫܰܥܝܳܐ: ܘܰܚܠܽܘܛ ܐܶܢܽܘܢ ܒܓܽܘ̈ܕܶܐ ܕܰܡܫܰܒ̈ܚܳܢܰܝܟ: ܚܪܽܘܙ ܐܶܢܽܘܢ ܒܰܚܙܳܬܳܐ ܕܺܝܠܳܟ: ܘܥܰܡ ܟܺܐܢ̈ܶܐ ܘܟܳܗ̈ܢܶܐ ܡܪ̈ܰܥܝܳܢܰܝܟ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܘܒܰܣܺܝܡܳܐ ܕܚܰܝܶܠ ܠܥܰܒ̈ܕܰܘܗܝ ܥܛܺܝ̈ܦܰܝ ܙܳܟܽܘܬܳܐ ܡܳܪܝ ܐܶܫܰܥܝܳܐ ܘܡܳܪܝ ܦܺܝܢܚܶܣ ܘܡܳܪܝ ܐܳܣܝܳܐ: ܘܝܰܩܰܪ ܘܰܐܘܪܶܒ ܝܰܘܡܳܐ ܕܕܽܘܟܪܳܢܶܗ ܕܡܳܪܝ ܐܶܫܰܥܝܳܐ ܘܰܕܩܰܕܺܝ̈ܫܶܐ ܚܰܒܪ̈ܰܘܗܝ ܒܟܽܠ ܐܰܬܰܪ ܘܦܶܢ̈ܝܳܢ: ܘܗܳܐ ܒܟܽܠ ܥܰܡܡܺܝ̈ܢ ܙܳܡܪܺܝܢ ܫܽܘܒܚܳܐ ܠܡܳܪܝܳܐ ܕܝܰܗܒ ܒܺܐܝܕܰܝ̈ܗܽܘܢ ܟܽܠ ܥܽܘܕܪ̈ܳܢܺܝܢ: ܘܰܐܒܰܥ ܡ̣ܶܢ ܓܰܪ̈ܡܰܝܗܽܘܢ ܟܽܠ ܚܽܘܠܡܳܢ̈ܶܐ ܠܟܽܠܗܽܘܢ ܐܰܝܠܶܝܢ ܕܡܶܢܗܽܘܢ ܫܳܐܠܺܝܢ ܕܠܶܗ ܠܡܳܪܝܳܐ ܡܢܰܨܚܳܢܗܽܘܢ ܡܦܺܝܣܺܝܢܰܢ ܕܰܢܫܰܕܰܪ ܠܰܢ ܡ̣ܶܢ ܒܶܝܬ ܓܰܙܶܗ ܥܰܬܺܝܪܳܐ: ܟܽܠ ܒܽܘܪ̈ܟܳܬܳܐ ܫܦܺܝ̈ܥܳܬܳܐ ܟܽܠ ܡܰܘܗ̈ܒܳܬܳܐ ܫܡܰܝܳܢ̈ܝܳܬܳܐ: ܒܗܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܨܶܡܚܳܐ ܡܬܽܘܡܳܝܳܐ ܘܢܽܘܗܪܳܐ ܫܰܪܺܝܪܳܐ ܘܠܐ ܡܶܬܕܰܪܟܳܢܳܐ: ܘܠܐ ܡܶܬܥܰܩܒܳܢܳܐ ܘܠܐ ܡܶܬܒܰܨܝܳܢܳܐ: ܗ̇ܰܘ ܕܰܨܒܳܐ ܕܢܶܥܒܶܕ ܠܶܗ ܣܳܓܽܘ̈ܕܶܐ ܘܒܰܝܬܳܝ̈ܶܐ ܡ̣ܶܢ ܥܰܦܪ̈ܳܢܶܐ: ܘܰܥܒܰܕ ܐܶܢܽܘܢ ܦܰܠܳܚ̈ܶܐ ܪ̈ܽܘܚܳܢܳܝܶܐ: ܟܰܕ ܐܶܫܬܰܕܰܪ ܓܰܒܪܺܐܶܝܠ ܪܺܝܫ ܡܰܠܐܟ̈ܶܐ ܘܣܰܒܰܪ ܒܰܛܢܶܗ ܕܢܰܨܺܝܚ ܫܽܘܦܪ̈ܶܐ ܡܳܪܝ ܐܳܣܝܳܐ ܕܒܺܐܝ̈ܕܰܘܗܝ ܬܺܐܬܶܐ ܐܳܣܝܽܘܬܳܐ ܠܰܒܢܰܝ̈ܢܳܫܳܐ: ܐܳܣܝܳܐ ܐܶܬܩܪܺܝ ܫܡܶܗ ܡ̣ܶܢ ܡܰܠܐܟܳܐ ܫܰܪܺܝܪܳܐ ܒܦܽܘܩܕܳܢܳܐ ܟܰܣܝܳܐ ܕܡ̣ܶܢ ܐܠܰܗܳܐ: ܗܳܢܳܐ ܕܡ̣ܶܢ ܡܰܠܐܟܳܐ ܐܶܣܬܰܒܰܪ ܒܰܛܢܶܗ: ܘܰܐܝܟ ܝܽܘܚܰܢܳܢ ܡܰܥܡܕܳܢܳܐ ܐܶܬܩܰܕܰܫ ܒܟܰܪܣܳܐ ܕܶܐܡܶܗ: ܗܳܢܳܐ ܕܰܫܡܶܗ ܣܳܗܶܕ ܥܠܰܘܗܝ ܕܰܟܡܳܐ ܫܦܺܝܥܺܝܢ ܥܽܘܕܪ̈ܳܢܰܘܗܝ: ܘܰܟܡܳܐ ܣܰܓܺܝ̈ܺܐܝܢ ܐܳܣܘ̈ܳܬܗ ܘܚܽܘܠܡܳܢܰܘ̈ܗܝ: ܗܳܢܳܐ ܕܰܐܝܟ ܐܳܣܝܳܐ ܕܰܛܥܺܝܢ ܣܰܡ̈ܡܳܢܶܐ ܡ̣ܶܢ ܪܽܘܡܺܝ ܪܰܒܬܳܐ ܐܶܫܬܰܕܰܪ ܡ̣ܶܢ ܐܠܰܗܳܐ ܠܐܬܪܰܢ ܘܰܦܢܺܝܬܰܢ: ܗܳܢܳܐ ܕܰܫܒܰܩ ܠܡܰܠܟܽܘܬܳܐ ܕܰܐܒܽܘܗܝ ܘܫܳܛ ܠܥܽܘܬܪܳܐ ܘܰܐܣܠܺܝ ܠܩܶܢܝܳܢܳܐ: ܗܳܢܳܐ ܕܰܪܚܶܡ ܡܣܰܪܩܽܘܬܳܐ ܘܰܢܙܺܝܪܽܘܬܳܐ ܘܥܳܢܘܳܝܽܘܬܳܐ ܘܰܐܒܺܝܠܽܘܬܳܐ: ܗܳܢܳܐ ܕܡ̣ܶܢ ܛܽܘܪ ܣܺܝܢܰܝ ܠܛܽܘܪܳܐ ܕܙܰܝ̈ܬܶܐ ܫܰܢܺܝ: ܐܳܦ ܒܟܽܘܪܚܶܗ ܕܺܝܡܶܛ ܥܡܰܪ ܘܡܰܝ̈ܳܐ ܠܰܚܫܰܚܬܶܗ ܐܰܪ̈ܝܰܘܳܬܳܐ ܡܰܝܬܶܝܢ ܗܘܰܘ: ܗܳܢܳܐ ܕܥܰܡ ܚܰܝ̈ܘܳܬܳܐ ܥܶܣܒܳܐ ܪܳܥܶܐ ܗܘܳܐ: ܗܳܢܳܐ ܕܠܐ ܫܒܰܩ ܐܰܬܪܳܐ ܘܰܦܢܺܝܬܳܐ ܕܠܐ ܐܶܙܰܠ ܘܬܰܠܡܶܕ ܘܰܐܪܬܺܝ ܘܰܐܥܡܶܕ: ܘܰܐܦܢܺܝ ܠܚܰܢ̈ܦܶܐ ܘܟܳܦܽܘܪ̈ܶܐ: ܘܰܐܣܺܝ ܟܪ̈ܺܝܗܶܐ ܘܰܐܠܺܝ̈ܨܶܐ: ܘܟܰܕ ܒܢܰܩܺܝܦܽܘܬܳܐ ܠܐܬܠܺܝܛܳܐ ܘܣܳܗܕܳܐ ܚܠܺܝܨܳܐ ܡܳܪܝ ܦܺܝܢܚܶܣ ܟܽܠܰܢ ܡܩܰܠܣܺܝܢܰܢ ܘܒܰܒ̈ܢܳܬ ܩ̈ܳܠܐ ܡܚܰܓ̈ܝܳܢܝܳܬܳܐ ܠܘܳܬܶܗ ܐܳܡܪܺܝܢܰܢ: ܗܳܢܳܐ ܕܰܐܝܟ ܕܳܫܢܳܐ ܪܰܒܳܐ ܐܶܬܬܰܝܬܺܝ ܠܐܬܪܰܢ ܘܰܦܢܺܝܬܰܢ: ܟܰܕ ܡ̣ܶܢ ܐܰܬܺܝܢܶܣ ܡܕܺܝܢܰܬ݀ ܚܰܟܺܝ̈ܡܶܐ ܠܣܺܝܥܬܳܐ ܕܒܶܝܬ ܡܳܪܝ ܐܰܘܓܺܝܢ ܢܩܶܦ: ܘܰܒܣܳܥܽܘܪܽܘܬ ܚܰܝ̈ܠܐ ܘܳܐܬܘ̈ܳܬܳܐ ܠܣܰܓܺܝ̈ܶܐܐ ܐܰܬܗܰܪ: ܗܳܢܳܐ ܕܠܰܘ ܒܚܰܕ ܕܰܪܓܳܐ ܘܰܚܕܳܐ ܐܶܣܛܪܰܐܛܺܝܰܐ ܦܠܰܚ: ܐܶܠܐ ܬܪܶܝܢ ܐܰܓܽܘܢܺܝ̈ܢ ܣܒܰܠ ܘܣܰܝܒܰܪ: ܗܳܢܳܐ ܕܰܒܝܰܕ ܬܪܶܝܢ ܟܠܺܝ̈ܠܺܝܢ ܐܶܬܟܰܠܰܠ: ܒܗܰܘ ܕܥܳܢܘܳܝܽܘܬܳܐ ܘܰܒܗܰܘ ܕܣܳܗܕܽܘܬܳܐ: ܗܳܢܳܐ ܕܡ̣ܶܢ ܙܰܒܢܳܐ ܕܛܰܠܝܽܘܬܶܗ ܫܰܪܺܝ ܒܥܰܡ̈ܠܐ ܕܰܡܝܰܬܪܽܘܬܳܐ ܘܰܢܙܺܝܪܽܘܬܳܐ: ܘܰܒܙܰܒܢܳܐ ܕܣܰܝܒܽܘܬܶܗ ܒܰܪ ܫܢܰܝ̈ܳܐ ܬܡܳܢܺܝܢ ܩܰܒܶܠ ܟܠܺܝܠܐ ܕܣܳܗܕܽܘܬܳܐ: ܗܳܢܳܐ ܕܬܰܠܡܶܕ ܟܽܠܳܗ̇ ܡܰܕܢܚܳܐ: ܘܰܐܬܪܳܐ ܕܒܶܝܬ ܢܰܗܪ̈ܺܝܢ ܘܣܽܘܪܺܝܰܐ ܘܒܰܐܬܪܳܐ ܗ̇ܰܘ ܕܩܰܪ̈ܕܘܳܝܶܐ ܫܰܟܢܰܬ݀ ܣܺܝܡܬܳܐ ܕܚܰܝ̈ܶܐ ܦܰܓܪܶܗ ܝܰܩܺܝܪܳܐ ܗܳܢܳܐ ܕܒܰܡܥܰܪܬܳܐ ܥܳܡܰܪ ܗܘܳܐ ܥܰܠ ܓܶܢ̱ܒ ܒܶܝܬ ܓܰܪܒܰܢ ܩܪܺܝܬܳܐ ܕܰܒܛܽܘܪܳܐ ܚܶܘܳܪܳܐ: ܘܡ̣ܶܢ ܫܰܠܺܝܛܳܐ ܕܚܶܣܢܳܐ ܕܰܦܢܰܟ ܐܶܬܩܛܶܠ: ܕܰܫܡܶܗ ܗܘܳܐ ܣܺܝܡܽܘܢ ܥܰܘܳܠܐ ܒܳܬܰܪ ܕܰܣܒܰܠ ܡܰܚ̈ܘܳܬܳܐ ܘܢܶܓ̈ܕܶܐ ܡܰܪܺܝܪ̈ܶܐ ܒܣܰܝܦܳܐ ܦܰܣܩܶܗ ܠܪܺܝܫܶܗ ܝܰܩܺܝܪܳܐ ܘܠܰܡܢܰܘ̈ܳܬܳܐ ܫܒܰܥ ܐܶܬܦܰܠܰܓ ܦܰܓܪܶܗ ܩܰܕܺܝܫܳܐ: ܘܰܫܒܰܥ ܕܰܝܪ̈ܳܬܳܐ ܗܘܰܝ̈ ܥܰܠ ܫܡܶܗ ܕܣܳܗܕܳܐ ܢܰܨܺܝܚܳܐ ܡܳܪܝ ܦܺܝܢܚܶܣ: ܗܳܢܳܐ ܕܰܟܪܳܬܳܐ ܕܺܝܠܶܗ ܫܰܩܠܳܗ̇ ܪܺܝܫܳܢܳܐ ܕܡ̣ܶܢ ܐܰܘܨܰܪ ܩܪܺܝܬܳܐ ܘܥܰܠ ܒܪܶܗ ܕܰܡܡܰܚܰܝ ܗܘܳܐ ܣܳܡܳܗ̇: ܗܳܢܳܐ ܕܗܳܐ ܡܰܪܕܶܝܢ ܓܰܪ̈ܡܰܘܗܝ ܟܽܠ ܥܽܘܕܪ̈ܳܢܺܝܢ ܠܰܕܡܶܬܓܰܘܣܺܝܢ ܒܗܽܘܢ: ܘܒܰܕܓܽܘܢ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܠܚܰܝܠܐ ܐܠܰܗܳܝܳܐ ܕܰܫܪܶܐ ܒܓܰܪ̈ܡܰܝܟܽܘܢ ܡܳܪܝ ܐܶܫܰܥܝܳܐ ܘܡܳܪܝ ܦܺܝܢܚܶܣ ܘܡܳܪܝ ܐܳܣܝܳܐ ܢܶܣܓܽܘܕ ܟܰܕ ܐܳܡܪܺܝܢܰܢ: ܠܰܒܶܒ ܒܚܰܘ̈ܣܳܢܰܝܟ: ܓܰܢ̱ܒܰܪ ܠܰܢ ܥܰܠ ܫܺܐܕ̈ܶܐ ܣܳܢܰܐܝ̈ܟ: ܣܰܝܰܥ ܠܰܢ ܒܝܰܡܺܝܢܳܟ ܥܰܠ ܣܳܩܽܘܪ̈ܰܝܟ: ܝܰܡܺܝܢܳܟ ܐܰܓܶܢ ܥܠܰܝܢ ܡܳܪܝܳܐ ܘܰܫܦܺܝܥܽܘܬ ܪ̈ܰܚܡܰܝܟ ܘܰܚܢܳܢܳܟ ܢܶܫܬܰܕܪܽܘܢ ܠܰܢ: ܘܘܰܥܕܰܝ̈ܟ ܘܒܽܘܣܳܡܰܝ̈ܟ ܘܡܽܘܠܟܳܢܰܝ̈ܟ ܢܶܒܣܡܽܘܢ ܠܰܢ ܥܽܘܕܪ̈ܳܢܰܝܟ ܘܛܰܝܒ̈ܘܳܬܳܟ ܢܺܐܬܽܘܢ ܠܰܢ: ܣܰܒܪܳܐ ܘܚܽܘܒܳܐ ܘܗܰܝܡܳܢܽܘܬܳܐ ܢܶܥܬܪܽܘܢ ܒܰܢ: ܒܽܘܪ̈ܟܳܬܳܟ ܘܫܽܘ̈ܟܳܢܰܝܟ ܢܩܰܘܽܘܢ ܒܰܢ: ܝܰܬܺܝܪܽܘܬܳܐ ܫܰܟܶܢ ܒܥ̈ܰܠܠܳܬܰܢ: ܪܽܘܣ ܒܽܘܪ̈ܟܳܬܳܟ ܒܟܰܪ̈ܡܰܝܢ ܘܡܰܥܨܪ̈ܳܬܰܢ: ܝܰܒܶܠ ܛܳܒ̈ܳܬܳܟ ܠܐܪ̈ܥܳܬܰܢ ܘܶܐܕܪ̈ܳܬܰܢ: ܢܳܛܽܘܪܳܐ ܗܘܺܝ ܠܦܰܓܪ̈ܰܝܢ ܘܢܰܦ̈ܫܳܬܰܢ: ܘܝܳܨܽܘܦܳܐ ܘܰܡܕܰܒܪܳܢܳܐ ܠܚܰܝܰܝ̈ܢ: ܐܰܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ: ܐܰܚܠܶܡ ܫܽܘܚ̈ܢܰܝܢ ܘܡܽܘ̈ܡܰܝܢ: ܘܰܐܢܺܝܚ ܘܚܰܣܳܐ ܠܥܰܢܺܝ̈ܕܰܝܢ ܒܝܰܕ ܓܶܝܪ ܡܦܺܝܣܳܢܽܘܬܳܐ ܕܰܐܬܠܺܝ̈ܛܰܝܟ ܡܳܪܝ ܐܶܫܰܥܝܳܐ ܚܳܠܳܒܳܝܳܐ ܘܡܳܪܝ ܐܳܣܝܳܐ ܥܳܢܘܳܝܳܐ ܘܡܳܪܝ ܦܺܝܢܚܶܣ ܣܳܗܕܳܝܳܐ:ܕܶܐܬܟܰܝܰܢ ܥܺܐܕܗܽܘܢ ܝܰܘܡܳܢܳܐ: ܘܫܽܘܒܚܳܐ ܦܰܐܝܳܐ ܘܢܰܨܺܝܚܳܐ: ܘܪܽܘܡܪܳܡܳܐ ܡܥܰܠܝܳܐ ܘܰܫܒܺܝܚܳܐ: ܢܰܣܶܩ ܠܳܟ ܡܳܪܝ ܒܕܽܘܟܪ̈ܳܢܰܝܗܽܘܢ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܐܦܪܝܡ ܡܠܦܢܐ ܘܡܪܝ ܬܐܘܕܘܪܘܣ ܕܢܫܬܡܠܐ ܒܫܒܬܐ ܩܕܡܝܬܐ ܕܨܘܡܐ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܪܽܘܚܳܐ ܕܰܢܒܺܝ̈ܶܐ ܢܶܬܓܡܰܪ: ܘܰܒܬܰܘܕܺܝܬܳܐ ܕܰܫܠܺܝ̈ܚܶܐ ܢܶܫܬܰܪܰܪ: ܘܰܒܢܶܨ̈ܚܳܢܶܐ ܕܣܳܗ̈ܕܶܐ ܢܶܬܢܰܨܰܚ: ܘܒܰܟܠܺܝܠܐ ܕܡܰܠܦܳܢ̈ܶܐ ܢܶܬܟܰܠܰܠ: ܘܰܒܟܽܠ ܚܰܣܝܽܘܬܳܐ ܕܩܰܕܺܝ̈ܫܳܬܳܐ ܢܶܬܢܗܰܪ ܘܥܰܡܗܽܘܢ ܒܡܰܠܟܽܘܬܳܐ ܢܶܬܒܰܣܰܡ: ܘܒܰܡ̈ܛܰܠܠܐ ܕܺܝܠܗܽܘܢ ܢܶܬܚܰܠܰܛ ܘܰܒܥܶܢܝܳܢܗܽܘܢ ܗܰܢܺܝܳܐܐ ܢܶܬܓܰܝܶܐܐ: ܘܫܽܘܒܚܳܐ ܕܠܐ ܫܰܠܘܳܐ ܢܰܣܶܩ ܠܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܗ̇ܰܘ ܡܰܠܦܳܢܳܐ ܕܚܶܟ̈ܡܳܬܳܐ ܐܠܰܗܳܝ̈ܳܬܳܐ: ܘܰܡܚܰܘܝܳܢܳܐ ܕܝܰܕ̈ܥܳܬܳܐ ܪ̈ܽܘܚܳܢܳܝܳܬܳܐ: ܠܗ̇ܰܘ ܕܡ̣ܶܢ ܩܺܝܩܰܠܬܳܐ ܕܡܽܘܟܳܟܳܐ ܡܩܺܝܡ ܠܒܳܝ̈ܫܶܐ ܘܥܰܠ ܕܰܪܓܳܐ ܡܥܰܠܝܳܐ ܘܰܕܠܶܗ ܫܳܘܶܐ ܡܰܘܬܶܒ: ܗ̇ܰܘ ܕܡ̣ܶܢ ܚܰܢܦܽܘܬܳܐ ܘܣܶܓܕܬܳܐ ܕܰܦܬܰܟܪ̈ܶܐ ܕܒܰܢܨܺܝܒܺܝܢ ܡܕܺܝܢ̱ܬܳܐ ܕܒܰܬܚܽܘ̈ܡܶܐ ܠܗܳܢܳܐ ܡܳܪܝ ܐܰܦܪܶܝܡ ܡܰܠܦܳܢܳܐ ܢܓܰܕ ܘܰܐܦܶܩ ܒܶܝܬ ܐܺܝ̈ܕܰܝ ܪ̈ܺܝܫܟܳܗܢܶܐ ܡܳܪܝ ܝܰܥܩܽܘܒ: ܗ̇ܰܘ ܕܰܒܢܳܗ̇ ܠܣܽܘܦܺܝܰܐ ܥܺܕܬܳܐ ܪܰܒܬܳܐ ܕܰܒܨܰܘܒܳܐ: ܗ̇ܳܢܽܘܢ ܕܰܬܪ̈ܰܝܗܽܘܢ ܐܶܬܩܪܺܝܘ ܠܣܽܘܢܢܰܗܕܳܘܣ ܩܰܕܺܝܫܬܳܐ ܘܬܺܒܶܝܠܳܝܬܳܐ ܕܰܬܠܳܬܡܳܐܐ ܘܰܬܡܳܢܬܰܥܣܰܪ ܐܰܒܳܗ̈ܳܬܳܐ ܕܰܒܪܽܘܚܳܐ ܩܰܕܺܝܫܳܐ ܐܶܬܟܰܢܰܫܘ: ܗܳܢܳܐ ܕܰܒܛܽܘܪܳܐ ܩܰܕܺܝܫܳܐ ܕܽܐܘܪܗܳܝ ܚܒܰܫ ܢܰܦܫܶܗ ܡܶܬܚܳܐ ܕܰܬܠܳܬܺܝܢ ܫܢܺܝ̈ܢ: ܘܟܶܢ ܫܰܪܺܝ ܒܡܰܠܦܳܢܽܘܬܳܐ ܐܠܰܗܳܝܬܳܐ: ܘܰܐܛܺܝܳܦܗ̇ ܠܐܪܥܳܐ ܒܝܽܘܠܦܳܢܰܘ̈ܗܝ: ܘܙܰܝܦܶܗ ܠܒܰܪܕܰܝܨܳܢ ܫܳܛܝܳܐ: ܘܰܐܒܗܶܬ ܠܰܡܓܽܘܫܽܘܬܳܐ ܚܰܢܦܳܝܬܳܐ: ܘܰܕܚܰܩ ܠܝܽܘܠܦܳܢ̈ܶܐ ܕܰܓ̈ܳܠܐ ܡ̣ܶܢ ܡܕܺܝܢ̱ܬܶܗ ܕܰܐܕܰܝ ܘܕܰܐܒܓܰܪ: ܕܠܶܗ ܠܡܳܪܝܳܐ ܡܚܰܟܡܳܢܶܗ ܢܫܰܒܰܚ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܒܟܽܠ ܕܳܪ̈ܺܝܢ ܒܟܺܐܢ̈ܶܐ ܕܪܰܚܡܽܘܟ ܡܶܬܢܰܨܰܚ ܐܰܢ̱ܬ: ܘܰܒܕܽܘܒܳܪ̈ܶܐ ܕܙܰܕܺܝ̈ܩܶܐ ܡܶܫܬܰܒܰܚ ܐܰܢ̱ܬ: ܗ̇ܰܘ ܕܰܐܝܟ ܫܠܺܝ̈ܚܶܐ ܩܰܕܺܝ̈ܫܶܐ ܘܰܡܣܰܒܪ̈ܳܢܶܐ ܓܒܰܝ̈ܳܐ ܐܶܬܢܰܨܰܚ ܩܕܳܡܰܝܟ: ܪܰܒܳܐ ܘܰܡܥܰܠܝܳܐ ܒܡܰܠܦܳܢ̈ܶܐ ܡܳܪܝ ܐܰܦܪܶܝܡ ܣܽܘܪܝܳܝܳܐ: ܗܳܢܳܐ ܕܰܣܕܰܪ ܕܰܐܪܳܐ ܠܽܘܩܒܰܠ ܟܽܠܗܶܝܢ ܐܶܪ̈ܶܣܺܝܣ ܫܰܩܳܪ̈ܳܬܳܐ: ܗܳܢܳܐ ܕܰܙܥܽܘܪ ܗ̣ܽܘ ܦܽܘܡܰܢ ܠܩܽܘ̈ܠܳܣܰܘܗܝ: ܘܰܒܨܺܝܪ ܠܶܫܳܢܰܢ ܕܢܶܫܬܰܥܶܐ ܦܰܐܝ̈ܳܬܶܗ ܘܠܐ ܣܳܦܩܳܐ ܬܰܪܥܺܝܬܰܢ ܠܡܶܚܫܰܒ ܡܝܰܬܪ̈ܳܬܳܐ ܕܺܝܠܶܗ ܕܰܐܝܟ ܟܠܺܝܠܐ ܦܰܐܝܳܐ ܣܒܺܝܣܺܝܢ ܫܽܘܦܪ̈ܰܘܗܝ: ܘܰܐܝܟ ܡܰܪܓܳܐ ܗܰܢܺܝܳܐܐ ܫܳܘܚܺܝܢ ܗܰܒ̈ܳܒܶܐ ܕܢܶܨ̈ܚܳܢܰܘܗܝ: ܘܰܐܝܟ ܫܶܡܫܳܐ ܢܰܗܺܝܪܳܐ ܨܳܡܚܺܝܢ ܕܽܘܒܳܪ̈ܰܘܗܝ ܘܰܐܝܟ ܪܰܒܒܰܝܬܳܐ ܚܰܟܺܝܡܳܐ ܡܩܰܠܣܺܝܢ ܣܽܘܥܪ̈ܳܢܰܘܗܝ: ܕܺܝܠܶܗ ܗ̣ܺܝ ܐܳܦ ܚܰܣܝܽܘܬܳܐ ܘܢܶܨܚܳܢܳܐ ܕܩܰܕܺܝܫܽܘܬܳܐ ܥܰܒܕܳܐ ܛܳܒܳܐ ܕܥܺܝܪܳܐܝ̣ܬ ܫܗܰܪ ܟܰܕ ܡܣܰܟܶܐ ܠܡܶܐܬܺܝܬܳܐ ܕܡܳܪܶܗ ܦܳܥܠܐ ܟܰܫܺܝܪܳܐ ܕܡ̣ܶܢ ܨܰܦܪܳܐ ܠܪܰܡܫܳܐ ܥܡܰܠ ܒܟܰܪܡܳܐ ܡܶܬܝܰܕܥܳܢܳܐ ܕܰܐܠܳܗܶܗ: ܬܰܓܳܪܳܐ ܚܰܟܺܝܡܳܐ ܕܙܰܒܶܢ ܩܶܢܝܳܢܶܗ: ܘܰܩܢܳܐ ܣܺܝܡܬܳܐ ܫܡܰܝܳܢܺܝܬܳܐ ܠܢܰܦܫܶܗ: ܙܡܺܝܢܳܐ ܡܛܰܝܒܳܐ ܠܡܶܫܬܽܘܬܳܐ ܕܶܐܙܕܰܡܰܢ ܠܳܗ̇: ܐܰܬܠܺܝܛܳܐ ܢܰܨܺܝܚܳܐ ܕܰܒܚܰܫ̈ܶܐ ܕܰܩܢܽܘܡܶܗ ܚܰܘܺܝ ܢܶܨܚܳܢܶܗ: ܡܰܠܦܳܢܳܐ ܡܗܺܝܪܳܐ ܕܒܰܥܒܳܕܳܐ ܫܰܪܰܪ ܠܬܰܠܡܺܝ̈ܕܶܐ ܕܩܽܘܫܬܳܐ ܝܽܘܠܦܳܢܶܗ. ܫܪܳܓܳܐ ܢܰܗܺܝܪܳܐ ܕܠܐ ܙܳܥܰܪ ܡܶܫܚܳܐ ܕܠܰܡܦܺܐܕܶܗ: ܗܳܢܳܐ ܕܡ̣ܶܢ ܚܶܫܟܳܐ ܕܚܰܢܦܽܘܬܳܐ ܕܰܐܒܳܗܰܘ̈ܗܝ ܠܘܳܬ ܢܽܘܗܪܳܐ ܕܺܝܕܰܥܬܳܐ ܕܰܐܠܳܗܳܐ ܫܰܪܺܝܪܳܐ: ܫܪܳܝܗܝ ܐܰܒܽܘܗܝ ܟܽܘܡܪܳܐ ܕܨܰܠܡ̈ܶܐ: ܒܫܽܘ̈ܩܶܐ ܕܰܢܨܺܝܒܺܝܢ ܡܕܺܝܢ̱ܬܳܐ ܕܺܝܠܗܽܘܢ: ܘܪܽܘܚܳܐ ܕܰܐܠܳܗܳܐ ܪܶܚܦܰܬ݀ ܥܠܰܝܗܽܘܢ: ܘܡ̣ܶܢ ܪ̈ܽܘܚܶܐ ܫܰܩܳܪ̈ܳܬܳܐ ܫܰܘܙܶܒܬܶܗ: ܘܰܠܘܳܬ ܓܰܒܝܶܗ ܕܰܐܠܳܗܳܐ ܡܳܪܝ ܝܰܥܩܽܘܒ ܡܰܢܰܥܬܶܗ: ܡ̣ܶܢ ܝܰܘܡܳܐ ܕܡܰܘܠܳܕܶܗ ܘܰܕܡܶܣܬܰܠܝܳܢܽܘܬܶܗ ܕܡ̣ܶܢ ܪܺܝܫܳܐ ܕܳܐܐܰܪ ܘܡ̣ܶܢ ܐܰܒܽܘܗܝ ܗ̇ܰܘ ܦܰܓܪܳܢܳܝܳܐ: ܘܨܶܝܕܰܘܗܝ ܫܶܠܡܰܬ݀ ܡܶܠܬܶܗ ܕܰܢܒܺܝܳܐ ܪܰܒܳܐ ܕܰܘܺܝܕ: ܕܟܺܐܦܳܐ ܕܰܐܣܠܝܽܘܗܝ ܒܰܢܳܝ̈ܶܐ ܗ̣ܺܝ ܗܘܳܬ݀ ܠܪܺܝܫ ܓܽܘܢܝܳܐ ܕܒܶܢܝܳܢܳܐ: ܒܰܫܪܳܪܳܐ ܓܶܝܪ ܟܰܕ ܐܶܬܪܰܒܺܝ ܘܶܐܬܥܰܠܰܡ ܒܝܽܘܠܦܳܢ̈ܶܐ ܐܠܰܗܳܝ̈ܶܐ: ܐܳܦ ܡܒܰܢܝܳܢܳܐ ܘܰܡܩܰܝܡܳܢܳܐ ܕܥܺܕܬܳܐ ܩܰܬܽܘܠܺܝܩܺܝ ܐܶܬܚܙܺܝ: ܘܰܒܡܶܠܬܳܐ ܚܠܺܝܡܬܳܐ ܘܰܒܣܳܥܽܘܪܽܘܬܳܐ ܡܫܰܡܠܳܝܬܳܐ: ܒܥܰܡ̈ܠܐ ܟܺܝܬ ܕܰܢܙܺܝܪܽܘܬܳܐ ܘܰܕܥܳܢܘܳܝܽܘܬܳܐ: ܒܺܝܚܺܝܕܳܝܽܘܬܳܐ ܕܰܒܛܽܘܪ̈ܶܐ ܘܒܰܡܥܰܪ̈ܶܐ ܘܰܒܡܰܕܒܪ̈ܶܐ: ܗܳܟܘܳܬ ܘܰܒܓܽܘܫܡܶܗ ܕܽܘܡܝܳܐ ܘܝܽܘܩܢܳܐ ܕܟܽܠܳܗ̇ ܡܝܰܬܪܽܘܬܳܐ ܒܢܰܦܫܶܗ ܚܰܘܺܝ ܘܠܐܚܪ̈ܳܢܶܐ ܐܠܰܦ: ܟܰܕ ܥܰܡ ܟܽܠ ܗܳܘܶܐ ܗܘܳܐ: ܐܰܝܟܰܢܳܐ ܕܰܠܟܽܠ ܢܺܐܬܰܪ: ܘܰܠܟܽܠܗܽܘܢ ܡܰܒܽܘ̈ܥܶܐ ܕܗܰܓܳܓܽܘܬܳܐ ܕܗܶܪ̈ܶܣܺܝܣ ܒܡܰܠܦܳܢ̈ܘܳܬܶܗ ܐܺܝܬܺܝ̈ܩܳܝܳܬܳܐ ܛܰܡܶܡ: ܟܰܕ ܚܰܕ ܘܗ̣ܽܘ ܟܰܕ ܗ̣ܽܘ ܝܳܕܰܥ ܘܡܰܟܪܶܙ ܠܶܗ ܠܥܰܡܰܢܽܘܐܶܝܠ: ܐܠܰܗܳܐ ܡܶܠܬܳܐ ܕܶܐܬܒܰܣܰܪ: ܟܰܕ ܡ̣ܶܢ ܐܠܰܗܽܘܬܶܗ ܠܐ ܐܶܫܬܰܚܠܰܦ: ܗܳܢܳܐ ܕܡܺܐܡܪ̈ܰܘܗܝ ܐܶܢܽܘܢ ܩܽܘܠܳܣܰܘ̈ܗܝ: ܘܡܰܠܦܳܢܽܘܬܶܗ ܢܶܨ̈ܚܳܢܰܘܗܝ: ܐܰܘܪܶܒ ܠܰܫܠܺܝ̈ܚܶܐ ܒܡܰܥܢ̈ܝܳܬܶܗ ܣܕܺܝܪ̈ܳܬܳܐ: ܒܰܟܬܳܒܰܘ̈ܗܝ ܢܦܺܝ̈ܚܰܝ ܒܪܽܘܚܳܐ ܩܰܕܺܝܫܳܐ ܕܠܽܘܩܒܰܠ ܒܰܪܕܰܝܨܳܢ ܘܚܰܒܪ̈ܰܘܗܝ: ܒܡܰܕܪ̈ܳܫܰܘܗܝ ܣܽܘܓܳܐܐ ܕܰܒܗܽܘܢ ܠܥܺܐܕ̈ܶܐ ܕܰܡܕܰܒܪܳܢܽܘܬܳܐ ܨܰܒܶܬ: ܗܳܢܳܐ ܕܰܠܢܶܫ̈ܶܐ ܐܰܥܶܠ ܠܕܰܐܪܳܐ ܕܡܰܠܦܳܢܽܘܬܳܐ: ܘܰܒܗܶܝܢ ܢܰܨܰܚ ܠܓܰܒܳܐ ܕܣܽܘܪܝܳܝܽܘܬܳܐ: ܗܳܢܳܐ ܕܟܽܠܗܽܘܢ ܝܰܘ̈ܡܰܘܗܝ ܠܐ ܫܠܺܝ ܡ̣ܶܢ ܕܰܠܡܰܠܳܦܽܘ ܠܓܰܒܪ̈ܶܐ ܘܰܠܢܶܫ̈ܶܐ ܫܰܘܝܳܐܝ̣ܬ: ܘܰܥܒܰܕ ܡ̣ܶܢ ܚܰܛܳܝ̈ܶܐ ܬܰܝ̈ܳܒܐ: ܘܡ̣ܶܢ ܛܰܡ̈ܶܐܐ ܩܰܕܺܝ̈ܫܶܐ ܘܰܕܟܰܝ̈ܳܐ: ܘܡ̣ܶܢ ܙܰܠܺܝ̈ܠܐ ܢܰܟ̈ܦܶܐ: ܗܳܢܳܐ ܕܟܽܠܰܢ ܢܦܺܝܣ ܠܡܳܪܝܳܐ ܡܳܪܰܢ ܒܕܽܘܟܪܳܢܶܗ ܕܢܶܬܶܠ ܠܰܢ ܕܰܒܕܽܘܒܳܪ̈ܶܐ ܢܰܗܺܝܪ̈ܶܐ ܢܫܰܡܠܐܷ ܠܝܰܘܡܳܐ ܕܥܰܕܥܺܐܕܶܗ: ܘܠܰܘ ܒܰܠܒܽܘ̈ܫܶܐ ܡܨܰܒ̈ܬܶܐ ܕܠܐ ܦܐܶܝܢ ܐܶܠܐ ܒܣܽܘܥܪ̈ܳܢܶܐ ܕܫܰܦܺܝܪܺܝܢ ܘܰܙܗܶܝܢ: ܢܶܗܘܶܐ ܡܕܰܡ̈ܝܳܢܶܐ ܕܡܽܘܟܳܟܶܗ: ܢܶܗܘܶܐ ܛܢ̈ܳܢܶܐ ܕܦܰܐܝ̈ܳܬܳܐ ܕܺܝܠܶܗ: ܢܶܗܘܶܐ ܢܳܛܽܘܪ̈ܶܐ ܕܦܽܘܩܕܳܢܰܘ̈ܗܝ: ܢܶܗܘܶܐ ܟܰܫܺܝܪ̈ܶܐ ܒܥܰܡ̈ܠܰܘܗܝ: ܢܕܰܡܶܐ ܟܽܠܰܢ ܒܗܰܝܡܳܢܽܘܬܶܗ: ܢܶܐܚܽܘܕ ܡܰܠܦܳܢܽܘܬܶܗ ܫܰܪܺܝܪܬܳܐ ܢܶܬܒܢܶܐ ܥܰܠ ܫܶܬܶܐܣܬܳܐ ܕܰܫܪܳܪܶܗ: ܢܶܛܰܢ ܒܰܡܝܰܬܪ̈ܳܬܶܗ: ܕܢܶܬܡܰܢܰܥ ܠܰܚܕܳܪ̈ܰܝ ܐܰܘܘܳܢܶܗ: ܘܶܐܡܰܬܝ ܕܰܡܫܺܝܚܳܐ ܡܶܬܓܠܐܷ ܒܫܽܘܒܚܳܐ ܕܰܐܠܳܗܽܘܬܶܗ: ܘܠܰܓܒܰܝ̈ܳܐ ܕܺܝܠܶܗ ܡܰܡܠܶܟ ܥܰܡܶܗ ܒܡܰܠܟܽܘܬܶܗ: ܘܰܐܝܠܶܝܢ ܕܪܰܥܝܽܘܗܝ ܡܩܰܕܶܝܢ ܒܽܘ̈ܣܳܡܶܐ: ܥܰܡܗܽܘܢ ܢܰܡܠܶܟ ܘܢܺܐܪܰܬ ܛܽܘ̈ܒܶܐ: ܘܦܽܘܪ̈ܥܳܢܶܐ ܕܥܰܡܠܰܘ̈ܗܝ ܡܩܰܒܶܠ ܒܚܰܕܽܘܬܳܐ: ܘܰܚܢܰܢ ܘܥܰܢܺܝ̈ܕܰܝܢ ܢܶܫܬܘܶܐ ܕܥܰܡܶܗ ܢܶܫܬܰܘܬܰܦ ܒܦܶܓܥܰܐ ܗ̱̇ܘ ܕܰܡܚܰܕܝܳܢܳܐ ܗ̇ܰܘ ܕܒܶܗ ܩܰܕܺܝ̈ܫܶܐ ܡܶܬܟܰܠܠܺܝܢ: ܘܢܰܨܺܝ̈ܚܶܐ ܒܗܶܕܪܳܐ ܩܳܝܡܺܝܢ: ܘܙܰܕܺܝ̈ܩܶܐ ܢܽܘܗܪܳܐ ܠܳܒܫܺܝܢ: ܘܰܒܟܶܢ̈ܦܰܘܳܬܳܐ ܕܺܝܠܶܗ ܢܶܣܬܰܬܰܪ: ܡ̣ܶܢ ܐܰܬܪܳܐ ܕܠܶܗ ܥܳܒ̈ܕܰܝ ܒܺܝ̈ܫܳܬܳܐ ܝܳܪܬܺܝܢ: ܘܟܽܠܰܢ ܐܰܟܚܕܳܐ ܠܚܰܕ ܚܰܓܳܐ ܪܽܘܚܳܢܳܝܳܐ ܢܶܬܟܰܢܰܫ: ܘܬܰܡܳܢ ܪܽܘܚܳܢܳܐܝ̣ܬ ܢܫܰܒܰܚ ܘܰܢܪܰܡܪܶܡ: ܠܳܟ ܡܫܺܝܚܳܐ ܡܟܰܠܶܠ ܠܰܪ̈ܚܽܘܡܰܘܗܝ: ܘܠܐܒܽܘܟ ܡܝܰܩܰܪ ܠܰܡܫܰܒ̈ܚܳܢܰܘܗܝ: ܘܰܠܪܽܘܚܳܐ ܩܰܕܺܝܫܳܐ ܡܚܰܕܶܐ ܠܣܳܓܽܘ̈ܕܰܘܗܝ܀

 

 

 

ܥܛܪܐ

 

 

 

ܢܒܰܣܶܡ ܠܳܟ ܡܳܪܝ ܥܶܛܪܳܐ ܕܰܨܠܰܘ̈ܳܬܰܢ: ܒܒܰܣܺܝܡܽܘܬ ܪܺܝܚ ܨܠܰܘ̈ܳܬܶܗ ܕܰܐܒܽܘܢ ܡܳܪܝ ܐܰܦܪܶܝܡ: ܘܩ̈ܳܠܐ ܕܒܳܥ̈ܘܳܬܰܢ ܡܚܺܝ̈ܠܳܬܳܐ ܐܰܝܟ ܩ̈ܳܠܐ ܗܰܢܺܝ̈ܶܐܐ ܕܒܳܥ̈ܘܳܬܶܗ ܘܕܶܒ̈ܚܶܐ ܕܬܰܘܕ̈ܝܳܬܰܢ ܐܰܝܟ ܕܶܒ̈ܚܶܐ ܡܩܰܒ̈ܠܐ ܕܬܰܘܕ̈ܝܳܬܶܗ: ܘܬܶܫܡ̈ܫܳܬܰܢ ܘܕܽܘܒܳܪ̈ܰܝܢ ܢܶܬܩܰܕܫܽܘܢ ܒܩܰܕܺܝܫܽܘܬ ܕܽܘܒܳܪ̈ܰܘܗܝ ܘܕܰܟܝܽܘܬ ܥܰܡܠܰܘ̈ܗܝ ܘܰܒܦܰܪܶܗܣܺܝܰܐ ܘܓܰܠܝܽܘܬ ܐܰܦ̈ܶܐ ܕܺܐܝܬ ܠܶܗ ܨܶܝܕܰܝܟ ܢܶܬܢܰܛܪܽܘܢ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܡ̣ܶܢ ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܪ̈ܺܝܫܰܝ ܟܳܗ̈ܢܶܐ ܡ̇ܰܢ ܘܟܳܗ̈ܢܶܐ ܘܰܡܫܰܡ̈ܫܳܢܶܐ: ܓܰܒܪ̈ܶܐ ܘܢܶܫ̈ܶܐ: ܣܳܒ̈ܶܐ ܘܰܥܠܰܝ̈ܡܶܐ: ܓܰܕܽܘ̈ܕܶܐ ܘܰܛܠܳܝ̈ܶܐ: ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ: ܘܟܽܠܰܢ ܥܰܡ ܟܽܠܰܢ: ܚܢܰܢ ܘܥܰܢܺܝ̈ܕܰܝܢ ܢܶܫܬܘܶܐ ܠܚܰܝ̈ܶܐ ܚܰܕ̈ܬܶܐ ܕܰܒܡܰܠܟܽܘܬܳܟ ܘܰܐܟܚܕܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܕܠܠܝܐ ܕܡܪܝ ܬܐܘܕܘܪܘܣ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗ̇ܰܘ ܕܰܒܚܽܘܒܶܗ ܫܰܠܗܶܒ ܠܢܰܨܺܝܚܳܐ ܡܳܪܝ ܬܶܐܘܳܕܳܘܪܳܘܣ ܘܰܫܒܰܩ ܟܽܠܡܶܕܶܡ ܘܰܪܗܶܛ ܒܳܬܪܶܗ: ܘܰܒܚܰܝܠܐ ܕܩܰܒܶܠ ܡܶܢܶܗ ܒܰܣܰܪ ܘܰܐܩܠܺܝ ܘܰܐܡܣܰܪ ܥܰܠ ܫܶܢ̈ܕܶܐ ܘܰܣܪ̈ܳܩܶܐ ܘܢܶܓ̈ܕܶܐ ܕܪ̈ܳܕܽܘܦܶܐ ܛܪ̈ܽܘܢܶܐ: ܘܰܒܚܽܘܡܣܳܢܶܗ ܙܳܟܽܘܬܳܐ ܥܰܠ ܣܳܛܳܢܳܐ ܘܚܰܝܠܰܘ̈ܳܬܶܗ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܫܩܰܠ: ܘܰܟܠܺܝܠܐ ܕܠܐ ܚܳܡܶܐ ܒܰܠܒܺܝܒܽܘܬ ܬܰܪܥܺܝܬܶܗ ܩܛܰܪ: ܘܗܳܐ ܢܳܨܰܚ ܝܰܘܡܳܐ ܕܕܽܘܟܪܳܢܶܗ ܒܟܽܠ ܦܶܢ̈ܝܳܢ ܘܰܒܥܺܕ̈ܳܬܳܐ ܘܕܰܝܪ̈ܳܬܳܐ ܡܶܬܩܰܠܰܣ ܟܽܘܠܳܠܶܗ: ܕܠܳܟ ܗ̇ܰܘ ܕܢܰܨܰܚܬܳܝܗܝ ܢܫܰܒܰܚ ܘܰܢܩܰܠܶܣ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܥܽܘܗܕܳܢܶܗ ܕܰܪܚܽܘܡܳܟ ܢܰܨܺܝܚ ܒܰܐܬܠܺܝ̈ܛܶܐ ܡܳܪܝ ܬܶܐܘܳܕܳܘܪܳܘܣ ܡܫܰܡܠܺܝܢܰܢ ܐܠܰܗܳܐ ܡܶܠܬܳܐ: ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܒܢܶܨ̈ܚܳܢܶܐ ܕܓܰܢ̱ܒܳܪܽܘܬܶܗ: ܗܳܢܳܐ ܕܰܠܟܽܠ ܡܶܕܶܡ ܕܰܒܳܥܠܡܳܐ ܗܳܢܳܐ ܫܒܰܩ ܘܠܳܟ ܒܰܠܚܽܘܕ ܩܢܳܐ: ܗܳܢܳܐ ܕܰܒܚܰܝܠܳܟ ܐܰܩܠܺܝ ܥܰܠ ܟܽܠ ܫܶܢ̈ܕܺܝܢ ܘܬܰܫܢܺܝ̈ܩܺܝܢ: ܗܳܢܳܐ ܕܰܒܚܽܘܒܳܟ ܐܰܡܣܰܪ ܥܰܠ ܡܰܘܬܳܐ: ܘܥܰܠ ܩܶܛܠܐ ܒܰܣܰܪ: ܗܳܢܳܐ ܕܰܐܝܟ ܐܰܕܰܡܰܣ ܥܰܙܺܝ ܥܰܠ ܓܙܳܡ̈ܶܐ ܘܠܽܘ̈ܚܳܡܶܐ ܕܥܰܘ̈ܳܠܐ: ܗܳܢܳܐ ܕܠܐ ܙܳܥ ܡ̣ܶܢ ܥܰܙܺܝܙܽܘܬ ܡܰܠܟ̈ܶܐ: ܘܠܐ ܚܳܒ ܡ̣ܶܢ ܛܪܽܘܢܽܘܬ ܕܰܝ̈ܳܢܶܐ: ܘܠܐ ܕܚܶܠ ܡ̣ܶܢ ܚܰܪܡܽܘܬ ܪ̈ܳܕܽܘܦܶܐ: ܗܳܢܳܐ ܕܠܽܘܩܒܰܠ ܣܰܝܦܳܐ ܠܒܺܝܒܳܐܝ̣ܬ ܪܗܶܛ: ܘܰܠܓܰܘܙܰܠܬܳܐ ܕܢܽܘܪܳܐ ܚܳܕܝܳܐ ܣܘܰܚ: ܘܰܠܟܽܠ ܫܶܢ̈ܕܺܝܢ ܐܰܝܟ ܡܰܘܗܰܒܬܳܐ ܘܺܐܝܩܳܪܳܐ ܕܝܳܐܐ ܚܫܰܒ: ܗܳܢܳܐ ܕܰܠܫܽܘ̈ܓܳܫܶܐ ܕܕܰܝ̈ܳܢܶܐ ܐܰܥܒܰܪ ܘܰܠܟܽܠ ܫܶܢ̈ܕܺܝܢ ܘܫܽܘ̈ܘܕܳܝܺܝܢ ܕܡܰܠܟ̈ܶܐ ܐܺܝܩܺܝ ܕܳܢ: ܘܰܠܟܽܠܶܗ ܫܽܘܒܚܳܐ ܕܥܳܠܡܳܐ ܐܰܝܟ ܙܶܒܠܐ ܐܰܣܠܺܝ: ܗܳܢܳܐ ܕܰܠܚܰܝ̈ܶܐ ܥܕܶܝ̈ܢܳܝܶܐ ܐܶܬܪܰܓܪܰܓ ܘܰܠܒܽܘ̈ܣܳܡܶܐ ܛܽܘܒ̈ܬܳܢܶܐ ܕܰܒܡܰܠܟܽܘܬܳܐ ܕܰܫܡܰܝܳܐ ܐܶܬܝܰܐܝܰܒ ܘܰܠܚܰܕ̈ܘܳܬܳܐ ܠܐ ܡܰܘܦ̈ܝܳܢܝܳܬܳܐ ܕܬܰܡܳܢ ܚܳܪ ܕܢܶܬܡܰܢܰܥ: ܗܳܢܳܐ ܕܠܰܣܪ̈ܳܩܶܐ ܝܰܗܒ ܓܽܘܫܡܶܗ: ܘܰܠܦܽܘܣܳܩܳܐ ܐܰܫܠܶܡ ܗܰܕܳܡܰܘ̈ܗܝ: ܘܰܠܓܰܘܙܰܠܬܳܐ ܚܰܪܺܝܦܰܬ݀ ܝܰܩܕܳܢܳܐ ܕܠܐ ܕܶܚܠܐ: ܘܰܕܠܐ ܝܰܩܕܳܢܳܐ ܐܶܫܬܰܡܠܺܝ: ܗܳܢܳܐ ܕܰܪܕܰܦ ܠܪ̈ܳܕܽܘܦܶܐ ܒܚܽܘܡܣܳܢܶܗ ܘܰܐܒܗܶܬ ܠܕܰܝ̈ܘܶܐ ܘܪܰܒܗܽܘܢ ܣܳܛܳܢܳܐ ܒܥܽܘܙܝܶܗ ܘܰܐܬܗܰܪ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܒܰܡܣܰܝܒܪܳܢܽܘܬܶܗ: ܗܳܢܳܐ ܕܰܠܬܰܢܺܝܢܳܐ ܩܳܛܽܘܠܐ ܕܰܒܡܰܝ̈ܳܐ ܥܳܡܰܪ ܗܘܳܐ ܒܚܰܝܠܳܟ ܙܰܟܳܝܳܐ ܩܛܰܠ ܘܠܰܛܠܺܝܬܳܐ ܡ̣ܶܢ ܒܶܝܬ ܫܶܢܰܘ̈ܗܝ ܐܰܥܕܺܝ ܒܣܰܒܪܳܟ: ܘܥܰܠ ܗܳܕܶܐ ܚܢܰܢ ܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ ܒܚܰܕܽܘܬܳܐ ܕܠܶܒܳܐ ܛܽܘܒܳܐ ܒܙܶܕܩܳܐ ܠܶܗ ܝܳܗܒܺܝܢܰܢ ܟܰܕ ܐܳܡܪܺܝܢܰܢ: ܛܽܘܒܰܝܟ ܐܰܬܠܺܝܛܳܐ ܢܰܨܺܝܚܳܐ ܡܳܪܝ ܬܶܐܘܳܕܳܘܪܳܘܣ: ܕܰܒܝܰܕ ܗܰܝܡܳܢܽܘܬܳܟ ܐܶܬܕܰܡܰܪܘ ܡܰܠܐܟ̈ܶܐ: ܛܽܘܒܰܝܟ ܐܰܓܽܘܢܺܝܣܛܳܐ ܚܠܺܝܡܳܐ ܡܳܪܝ ܬܶܐܘܳܕܳܘܪܳܘܣ ܕܕܰܝ̈ܘܶܐ ܚܰܪ̈ܡܶܐ ܚܰܪܶܩܘ ܫܶܢ̈ܶܐ ܘܰܥܪܰܩܘ ܡ̣ܶܢ ܠܒܺܝܒܽܘܬܳܟ: ܘܛܽܘܒܰܝܟ ܡܶܬܟܰܬܫܳܢܳܐ ܗܕܺܝܪܳܐ ܡܳܪܝ ܬܶܐܘܳܕܳܘܪܳܘܣ: ܕܘܳܝܳܐ ܐܰܩܢܰܝܬ ܠܪ̈ܳܕܽܘܦܰܝܟ ܒܙܳܟܽܘܬܳܐ ܕܺܝܠܳܟ: ܕܥܰܠ ܟܽܠ ܐܽܘܠܨܳܢܺܝ̈ܢ: ܛܽܘܒܰܝܟ ܙܪܺܝܙܳܐ ܒܣܳܗ̈ܕܶܐ ܡܳܪܝ ܬܶܐܘܳܕܳܘܪܳܘܣ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ ܢܚܶܬܘ ܠܬܶܐܱܛܪܳܘܢ ܕܺܝܠܳܟ: ܘܩܰܠܶܣܘ ܠܕܰܐܪܳܟ ܕܥܰܡ ܐܰܪ̈ܟܽܘܢܶܐ ܘܰܠܙܳܟܽܘܬܳܟ: ܛܽܘܒܰܝܟ ܛܒܺܝܒܳܐ ܒܡܰܩܪ̈ܒܳܢܶܐ ܡܳܪܝ ܬܶܐܘܳܕܳܘܪܳܘܣ ܕܝܰܡܺܝܢܶܗ ܕܰܡܪܰܝܡܳܐ ܚܰܝܠܬܳܟ ܒܕܰܐܪܳܟ ܕܥܰܡ ܨܢܺܝܥܳܐ: ܛܽܘܒܰܝܟ ܕܰܟܠܺܝܠܐ ܕܢܽܘܗܪܳܐ ܓܕܰܠ ܠܳܟ ܡܳܪܳܟ ܒܰܫܡܰܝܳܐ ܒܣܶܦܪܳܐ ܕܚܰܝ̈ܶܐ ܐܰܟܬܶܒ ܒܶܝܬ ܥܺܝܪ̈ܶܐ: ܛܽܘܒܰܝܟ ܕܡܰܠܟܽܘܬܳܐ ܕܰܫܡܰܝܳܐ ܢܛܺܝܪܳܐ ܠܳܟ ܘܢܰܦ̈ܫܳܬܳܐ ܕܟܺܐܢ̈ܶܐ ܣܳܘ̈ܚܳܢ ܘܰܣܡܳܟܳܐ ܕܙܰܕܺܝ̈ܩܶܐ ܚܳܐܰܪ ܠܳܟ: ܛܽܘܒܰܝܟ ܕܰܥܕܶܝܢ ܒܺܐܝ̈ܠܳܢܶܐ ܡܰܠܝ̈ܰܝ ܐܳܪܥܳܐ ܠܳܟ: ܘܦܺܐܪ̈ܶܐ ܗܰܢܺܝ̈ܰܐܝܝ ܒܽܘ̈ܣܳܡܶܐ ܡܰܘܫܛܳܐ ܠܳܟ ܘܨܶܝܕ ܐܺܝܠܳܢܳܐ ܗ̇ܰܘ ܕܚܰܝ̈ܐܶ ܡܡܰܢܥܳܐ ܠܳܟ: ܛܽܘܒܰܝܟ ܕܩܰܕܺܝ̈ܫܶܐ ܟܽܠܗܽܘܢ ܫܠܳܡܳܐ ܝܳܗܒܺܝܢ ܠܳܟ ܒܰܦܨܺܝܚܽܘܬܳܐ: ܘܪ̈ܽܘܚܳܬܳܐ ܕܟܺܐܢ̈ܶܐ ܛܽܘܒܳܐ ܡܕܰܫ̈ܢܳܢ ܠܳܟ ܒܰܚܘܺܝܚܽܘܬܳܐ: ܛܽܘܒܰܝܟ ܢܰܨܺܝܚܳܐ ܡܳܪܝ ܬܶܐܘܳܕܳܘܪܳܘܣ: ܕܰܫܪ̈ܰܕܽܘܕܰܝܟ ܡܰܥܪܩܺܝܢ ܠܕܰܝ̈ܘܶܐ ܘܝܳܗܒܺܝܢ ܥܽܘܕܪ̈ܳܢܶܐ ܠܰܡܗܰܝ̈ܡܢܶܐ: ܛܽܘܒܰܝܟ ܢܰܨܺܝܚܳܐ ܡܳܪܝ ܬܶܐܘܳܕܳܘܪܳܘܣ ܕܬܶܕܡܪ̈ܳܬܳܐ ܘܳܐܣ̈ܘܳܬܳܐ ܬܡܺܝܗ̈ܳܬܳܐ ܡܰܒܥܺܝܢ ܓܰܪ̈ܡܰܝܟ ܡ̣ܶܢ ܚܰܝܠܐ ܕܰܫܪܶܐ ܒܗܽܘܢ: ܘܥܰܠ ܗܳܕܶܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܡܢܰܨܚܳܢܶܗ: ܡܰܘܪܒܳܢܶܗ ܒܰܐܬܠܺܝܛܽܘܬܳܐ ܕܣܳܗܕܽܘܬܳܐ ܕܬܰܫܦܰܥ ܥܠܰܝܢ ܪ̈ܰܚܡܶܐ ܒܝܰܕ ܨܠܰܘ̈ܳܬܶܗ: ܘܬܶܪܕܽܘܦ ܡܶܢܰܢ ܩܪ̈ܳܒܰܘܗܝ ܕܰܢܟܺܝܠܐ ܒܺܐܝܙܰܓܳܕܽܘܬܶܗ: ܘܰܬܪܰܡܪܶܡ ܩܰܪܢܳܐ ܕܰܬܪ̈ܺܝܨܰܝ ܫܽܘܒܚܳܐ ܒܒܳܥܘ̈ܳܬܶܗ ܘܰܠܒܥܶܠܕ̈ܒܳܒܰܝܢ ܚܰܣ̈ܳܡܶܐ ܘܰܢܟܺܝ̈ܠܐ ܬܒܰܕܰܪ ܡ̣ܶܢ ܠܩܽܘܒܠܰܢ ܒܰܣܢܺܐܓܪܽܘܬܶܗ ܘܰܠܓܰܒܪ̈ܶܐ ܐܳܫܕܰܝ̈ ܕܡܳܐ ܕܚܳܪܩܺܝܢ ܫܶܢ̈ܶܐ ܥܠܰܝܢ: ܬܰܘܒܶܕ ܒܬܰܟ̈ܫܦܳܬܶܗ ܘܰܠܢܶܣܝܽܘ̈ܢܶܐ ܥܰܣ̈ܩܐ ܘܫܰܒ̈ܛܶܐ ܕܪܽܘܓܙܳܐ: ܬܰܥܒܰܪ ܡܶܢܰܢ ܒܰܦܝܳܣ̈ܳܬܶܗ ܘܰܬܫܰܟܶܢ ܠܰܢ ܚܽܘܠܡܳܢܳܐ ܘܳܐܣܝܽܘܬܳܐ ܠܟܺܐܒܰܝ̈ܢ ܟܣܰܝ̈ܳܐ ܘܰܓܠܰܝ̈ܳܐ ܒܝܰܕ ܡܶܬܚܰܢܳܢܽܘܬܶܗ: ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ: ܘܰܠܒܽܘܣܳܡܳܐ ܕܥܰܡܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܐܠܰܒܶܫ ܡܳܪܝ ܚܽܘ̈ܫܳܒܰܝܢ ܠܒܽܘܫܳܐ ܚܰܕܬܳܐ ܕܠܐ ܡܶܬܚܰܒܠܳܢܽܘܬܳܐ ܘܢܰܚ̈ܬܶܐ ܫܒܺܝ̈ܚܶܐ ܕܠܐ ܡܳܝܽܘܬܽܘܬܳܐ: ܘܰܐܪܚܶܩ ܘܰܐܒܥܶܕ ܡ̣ܶܢ ܠܘܳܬܰܢ ܥܒܳܕ̈ܶܐ ܢܕܺܝ̈ܕܶܐ ܕܰܚܛܺܝܬܳܐ: ܘܩܰܪܶܒ ܠܰܢ ܠܦܽܘܠܚܳܢܳܐ ܕܰܡܝܰܬܪ̈ܳܬܳܐ: ܘܰܐܫܘܳܐ ܠܰܢ ܕܕܰܟܝܳܐܝ̣ܬ ܘܩܰܕܺܝܫܳܐܝ̣ܬ ܢܶܚܕܶܐ ܘܢܶܪܘܰܙ ܘܰܢܕܽܘܨ ܒܥܰܕܥܺܐܕܶܗ ܕܦܳܠܚܳܐ ܕܺܝܠܳܟ: ܡܰܠܦܳܢܳܐ ܕܰܬܪ̈ܺܝܨܰܝ ܫܽܘܒܚܳܐ: ܒܥܰܕܥܺܐܕܳܟ ܐܳܘ ܡܳܪܝ ܐܰܦܪܶܝܡ ܟܽܠܰܢ ܡܶܬܦܰܨܚܺܝܢܰܢ ܘܛܽܘܒܳܐ ܠܳܟ ܝܳܗܒܺܝܢܰܢ ܣܳܒܳܐ ܙܰܗܝܳܐ: ܘܰܒܝܰܕ ܨܠܰܘ̈ܳܬܶܗ ܢܶܫܟܰܚ ܪ̈ܰܚܡܶܐ ܡ̣ܶܢ ܒܶܝܬ ܓܰܙܳܟ ܡܪܰܚܡܳܢܳܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗ̇ܰܘ ܪܺܝܫܳܐ ܘܡܰܠܟܳܐ ܕܟܽܠ ܪܺܝܫ ܘܡܰܠܟܽܘ: ܕܣܳܗܕܽܘܬܳܐ ܠܐ ܕܰܓܳܠܬܳܐ ܐܰܣܗܶܕ ܩܕܳܡ ܕܰܝܳܢܳܐ ܒܽܐܘܪܫܠܶܡ ܕܡܰܠܟܳܐ ܐܺܝܬܰܘܗܝ ܕܡܰܠܟܽܘܬܶܗ ܒܰܫܡܳܝܳܐ ܗ̱ܝ ܕܥܰܡ ܐܰܒܽܘܗܝ ܠܥܳܠܰܡ ܡܰܡܠܶܟ: ܗ̇ܰܘ ܕܒܰܕܡܶܗ ܚܰܝܳܐ ܕܶܐܫܰܕ ܚܠܳܦܰܝܢ ܒܪܰܘܡܳܐ ܕܓܳܓܽܘܠܬܳܐ ܠܟܽܠܗܽܘܢ ܩܰܕܺܝ̈ܫܶܐ ܐܰܪܘܺܝ ܒܪܶܚܡܬܶܗ ܘܰܚܠܳܦܰܘܗܝ ܟܽܠ ܡܰܘ̈ܬܺܝܢ ܡܫܰܚ̈ܠܦܶܐ ܣܒܰܠܘ: ܗ̇ܰܘ ܕܰܠܗܳܢܳܐ ܐܰܬܠܺܝܛܳܐ ܢܰܨܺܝܚܳܐ ܡܳܪܝ ܬܶܐܘܳܕܳܘܪܳܘܣ ܡ̣ܶܢ ܒܰܝܢܳܬ ܟܽܘ̈ܒܶܐ ܘܗ̈ܰܛܛܶܐ ܕܰܦܬܰܟܪܽܘܬܳܐ ܢܓܰܕ: ܘܰܒܣܰܘ̈ܟܳܬܶܗ ܕܺܐܝܠܳܢܳܐ ܕܚܰܝ̈ܶܐ ܨܠܺܝܒܳܐ ܦܳܪܽܘܩܳܝܳܐ ܩܰܒܥܶܗ: ܘܗܳܐ ܥܺܕܬܳܐ ܡܝܰܩܪܳܐ ܒܚܰܕܽܘܬܳܐ ܠܝܽܘܡ ܕܽܘܟܪܳܢܶܗ: ܘܙܳܡܪܳܐ ܫܽܘܒܚܳܐ ܒܥܰܕܥܺܐܕܶܗ ܒܗܳܢܳܐ ܥܶܕܳܢܳܐ: ܚܽܘܣܳܝܳܐ ܕܨܰܦܪܳܐ ܘܰܒܟܽܠܗܽܘܢ܀

 

 

 

ܣܕܪܐ

 

 

 

ܡܫܰܒܚܺܝܢܰܢ ܠܳܟ ܡܫܺܝܚܳܐ ܡܰܘܪܒܳܢܳܐ ܕܥܰܒܕܰܘ̈ܗܝ: ܡܪܰܡܪܡܺܝܢܰܢ ܠܳܟ ܐܠܰܗܳܐ ܡܢܰܨܚܳܢܳܐ ܕܣܳܗ̈ܕܰܘܗܝ ܡܩܰܠܣܺܝܢܰܢ ܠܡܳܪܽܘܬܳܟ ܝܶܫܽܘܥ ܦܳܪܽܘܩܳܐ ܘܰܡܚܰܝܠܳܢܳܐ ܕܰܐܬܠܺܝ̈ܛܰܘܗܝ: ܗ̇ܳܢܽܘܢ ܕܡܶܛܽܠ ܫܡܶܗ ܘܚܽܘܒܶܗ ܕܰܪܬܰܚ ܒܠܶܒܰܘ̈ܳܬܗܽܘܢ: ܟܽܠ ܡܰܘܬܺܝ̈ܢ ܡܰܪܺܝܪ̈ܶܐ ܣܒܰܠܘ ܗܘܰܘ ܘܣܰܝܒܰܪܘ: ܗ̇ܰܘ ܕܰܠܢܰܨܺܝܚ ܒܰܐܬܠܺܝ̈ܛܶܐ ܡܳܪܝ ܬܶܐܘܳܕܳܘܪܳܘܣ ܓܰܢ̱ܒܰܪ ܘܚܰܝܶܠ ܘܥܰܕܰܪ ܒܰܐܓܽܘܢܳܐ ܕܰܚܠܳܦ ܗܰܝܡܳܢܽܘܬܶܐ ܕܒܶܗ: ܘܦܰܓܪܶܗ ܐܰܫܠܶܡ ܠܟܽܠ ܫܶܢܕܺܝ̈ܢ: ܘܓܽܘܫܡܶܗ ܠܡܰܚ̈ܘܳܬܳܐ: ܚܰܨܶܗ ܝܰܗܒ ܠܢܶܓ̈ܕܶܐ: ܘܗܰܕܳܡܰܘ̈ܗܝ ܠܰܣܪ̈ܳܩܶܐ: ܐܺܝܕܰܘ̈ܗܝ ܦܫܰܛ ܠܰܦܟܳܪ̈ܶܐ: ܘܪ̈ܶܓܠܰܘܗܝ ܠܣܽܘ̈ܛܡܶܐ: ܫܶܢܰܘ̈ܗܝ ܕܢܶܬܥܰܩܪ̈ܳܢ: ܥܰܝܢܰܘ̈ܗܝ ܕܢܶܬܚܰܨ̈ܝܳܢ: ܠܶܫܳܢܶܗ ܕܢܶܬܫܡܶܛ: ܩܢܽܘܡܶܗ ܠܝܰܩܕܳܢܳܐ ܠܡܰܠܟ̈ܶܐ ܐܰܚܶܡܬ: ܠܕܰܝ̈ܳܢܶܐ ܒܰܠܗܺܝ: ܠܪ̈ܳܕܽܘܦܶܐ ܪܕܰܦ: ܠܰܛܪ̈ܽܘܢܶܐ ܐܰܥܺܝܩ: ܠܰܦܬܰܟܪ̈ܶܐ ܫܚܰܩ: ܠܰܓܠܺܝ̈ܦܶܐ ܣܚܰܦ ܘܰܐܪܡܺܝ: ܠܟܽܘܡܪ̈ܶܐ ܐܰܒܗܶܬ: ܘܰܠܫܺܐܕ̈ܶܐ ܥܰܡܗܽܘܢ ܟܰܐܐܰܪ: ܒܰܐܠܳܗ̈ܶܐ ܚܰܪ̈ܫܶܐ ܘܡܺܝ̈ܬܶܐ ܒܰܙܰܚ ܘܠܐ ܕܚܶܠ: ܠܰܓܙ̈ܳܡܶܐ ܫܳܛ: ܘܰܠܠܽܘ̈ܚܳܡܶܐ ܐܰܣܠܺܝ ܘܠܐ ܙܳܥ: ܠܬܰܢܺܝܢܳܐ ܩܛܰܠ ܒܩܽܘܢܛܳܪ ܨܠܺܝܒܳܐ: ܘܰܒܟܺܐܦܳܐ ܕܕܽܘܡܳܪܳܐ ܠܶܗ ܪܓܰܡ: ܘܰܠܢܰܦܫܶܗ ܒܰܠܚܽܘܕ ܢܛܰܪ ܕܠܐ ܡܽܘܡ: ܘܰܒܙܳܟܽܘܬܳܐ ܘܢܶܨܚܳܢܳܐ ܕܥܰܠ ܡܰܘܬܳܐ: ܠܰܥܕܶܝܢ ܕܒܽܘ̈ܣܳܡܶܐ ܕܰܒܰܪܬ ܘܫܰܢܺܝܬܳܝܗܝ: ܘܥܰܠܗܳܕܶܐ ܓܽܘ̈ܕܶܐ ܪ̈ܽܘܚܳܢܳܝܳܬܳܐ: ܘܢܰܦ̈ܫܳܬܳܐ ܕܩܰܕܺܝ̈ܫܶܐ ܒܚܰܕܽܘܬܳܐ ܐܰܪܥܽܘܗ̇ ܠܢܰܦܫܶܗ ܒܰܫܠܳܡܳܐ ܟܰܕ ܐܳܡܪ̈ܳܢ: ܬܳܐ ܒܰܫܠܳܡܳܐ ܐܰܓܽܘܢܺܝܣܛܳܐ ܚܰܝܠܬܳܢܳܐ ܕܰܕܚܶܠ ܡܶܢܶܗ ܐܳܟܶܠܩܰܪܨܳܐ ܘܫܰܡܳܫܰܘ̈ܗܝ: ܬܳܐ ܒܰܫܠܳܡܳܐ ܒܰܪ ܬܰܘܕܺܝܬܳܐ ܫܠܺܝܚܳܝܬܳܐ: ܬܳܐ ܒܰܫܠܳܡܳܐ ܓܰܒܝܳܐ ܘܪܰܒܳܐ ܒܣܳܗ̈ܕܶܐ: ܬܳܐ ܒܰܫܠܳܡܳܐ ܕܒܺܝܚܳܐ ܘܰܩܛܺܝܠܐ ܕܡܶܛܽܠ ܡܳܪܶܗ: ܬܳܐ ܒܰܫܠܳܡܳܐ ܗܰܒܳܒܳܐ ܪܓܺܝܓܳܐ ܘܦܰܩܚܳܐ ܗܕܺܝܪܳܐ ܫܒܺܝܚܳܐ ܘܒܰܣܺܝܡ ܪܺܝܚܳܐ ܕܰܫܘܰܚ ܒܣܰܘ̈ܟܰܘܗܝ ܕܰܨܠܺܝܒܳܐ: ܬܳܐ ܒܰܫܠܳܡܳܐ ܙܪܺܝܙܳܐ ܒܕܰܐܪܳܪ̈ܶܐ: ܬܳܐ ܒܰܫܠܳܡܳܐ ܚܰܝܠܬܳܢܳܐ ܒܡܰܘܕ̈ܝܳܢܶܐ: ܬܳܐ ܒܰܫܠܳܡܳܐ ܛܒܺܝܒܳܐ ܒܦܳܠܚܰܘ̈ܗܝ ܕܰܡܫܺܝܚܳܐ: ܬܳܐ ܒܰܫܠܳܡܳܐ ܝܳܗܽܘܒܳܐ ܕܥܽܘܕܪ̈ܳܢܶܐ ܠܰܡܗܰܝ̈ܡܢܶܐ: ܥܺܕܬܳܐ ܕܶܝܢ ܩܰܕܺܝܫܬܳܐ ܟܠܺܝܠܐ ܕܛܽܘ̈ܒܶܐ ܓܳܕܠܐ ܠܗܶ ܟܰܕ ܐܳܡܪܳܐ: ܠܳܟ ܛܽܘܒܰܝܟ ܡܳܪܝ ܬܶܐܘܳܕܳܘܪܳܘܣ ܕܝܰܡܺܝܢܶܗ ܕܰܡܪܰܝܡܳܐ ܚܰܝܠܬܳܟ ܥܰܠ ܗ̇ܰܘ ܬܰܢܺܝܢܳܐ ܪܰܒܳܐ: ܘܟܺܐܦ̈ܶܐ ܠܰܪܓܽܘܡܝܶܗ ܗ̣ܺܝ ܐܰܘܫܛܰܬ݀ ܠܳܟ: ܠܳܟ ܛܽܘܒܰܝܟ ܡܳܪܝ ܬܶܐܘܳܕܳܘܪܳܘܣ ܕܟܰܕ ܠܗ̇ܰܘ ܚܰܪܡܳܢܳܐ ܐܰܘܒܶܕܬ: ܠܡܰܝ̈ܳܐ ܕܰܟܺܝܬ ܡ̣ܶܢ ܡܶܪܬܶܗ: ܘܠܰܛܠܺܝܬܳܐ ܦܰܨܺܝܬ ܡ̣ܶܢ ܚܽܘܒܳܠܐ: ܠܳܟ ܛܽܘܒܰܝܟ ܡܳܪܝ ܬܶܐܘܳܕܳܘܪܳܘܣ ܕܰܠܒܰܪܒܪ̈ܳܝܶܐ ܙܟܰܝܬ ܒܚܰܝܠܳܟ ܘܠܰܡܕܺܝܢ̱ܬܳܐ ܗ̇ܳܝ ܕܡ̣ܶܢ ܛܳܥܝܽܘܬ ܦܬܰܟܪ̈ܶܐ ܚܰܪܰܪܬ: ܠܳܟ ܛܽܘܒܰܝܟ ܡܳܪܝ ܬܶܐܘܳܕܳܘܪܳܘܣ: ܕܡܰܠܟܽܘܬܳܐ ܕܰܫܡܰܝܳܐ ܢܛܺܝܪܳܐ ܠܳܟ ܗ̇ܳܝ ܕܰܩܢܰܝܬ ܒܰܕܡܳܟ ܝܰܩܺܝܪܳܐ: ܠܳܟ ܛܽܘܒܰܝܟ ܡܳܪܝ ܬܶܐܘܳܕܳܘܪܳܘܣ: ܕܢܽܘܗܪܳܐ ܡܫܺܝܚܳܐ ܟܠܺܝܠ ܢܽܘܗܪܳܐ ܓܕܰܠ ܠܳܟ: ܠܳܟ ܛܽܘܒܰܝܟ ܡܳܪܝ ܬܶܐܘܳܕܳܘܪܳܘܣ ܕܣܺܝܡܰܬ݀ ܥܽܘܕܪ̈ܳܢܶܐ ܥܒܺܝܕ ܦܰܓܪܳܟ ܠܰܡܡܰܚܰܝ̈ܳܐ: ܘܥܰܠ ܗܳܕܶܐ ܚܢܰܢ ܕܙܰܝܰܚܢܰܢ ܠܕܽܘܟܪܳܢܳܟ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܥܽܘܕܪ̈ܳܢܶܐ ܐܰܣܪܰܚ ܠܰܢ ܒܶܝܬ ܓܰܙܟܳ: ܦܬܰܚ ܬܰܪܥܳܟ ܠܰܣܢܺܝ̈ܩܶܐ ܕܒܶܗ ܢܳܩܫܺܝܢ ܘܦܰܢܳܐ ܫ̈ܶܐܠܳܬܗܽܘܢ: ܨܰܘܡܰܢ ܘܰܨܠܰܘ̈ܳܬܰܢ ܢܶܬܩܰܒ̈ܠܳܢ ܒܰܨܠܰܘ̈ܳܬܳܟ: ܩܳܠ ܒܳܥ̈ܘܳܬܰܢ ܢܶܫܬܡܰܥ ܒܒܳܥ̈ܘܳܬܳܟ: ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܥܠܰܝܢ ܒܬܰܟ̈ܫܦܳܬܳܐ ܕܺܝܠܳܟ: ܫ̈ܶܐܠܳܬܳܐ ܕܟܽܠܰܢ ܢܶܬܦܰܢ̈ܝܳܢ ܒܰܣܢܺܐܓܪܽܘܬܳܟ: ܬܝܳܒܽܘܬܰܢ ܬܶܬܢܰܨܰܚ ܒܰܦܝ̈ܳܣܳܬܳܟ ܚܽܘܣܳܝܳܐ ܕܚܰܘ̈ܒܶܐ ܢܶܫܬܰܟܰܢ ܠܰܢ ܡ̣ܶܢ ܡܳܪܳܟ ܒܕܽܘܟܪܳܢܳܟ ܫܰܝܢܳܐ ܘܰܫܠܳܡܳܐ ܢܰܫܪܶܐ ܒܓܰܘ ܥܺܕ̈ܳܬܳܐ ܘܕܰܝܪ̈ܳܬܳܐ ܕܺܝܠܰܢ ܒܒܽܘܪ̈ܟܳܬܳܟ: ܐܳܣܝܽܘܬܳܐ ܘܚܽܘܠܡܳܢܳܐ ܢܶܬܝܰܗܒܽܘܢ ܠܰܢ ܡ̣ܶܢ ܓܰܪ̈ܡܰܝܟ: ܘܥܰܢܺܝ̈ܕܰܝܢ ܢܶܬܬܢܺܝܚܽܘܢ ܒܰܐܘ̈ܘܳܢܶܐ ܕܰܢܝܳܚܳܐ ܬܚܶܝܬ ܟܶܢ̈ܦܰܝܟ: ܘܟܶܢܫܰܢ ܟܽܠܶܗ ܕܙܰܝܰܚ ܥܰܕܥܺܐܕܳܟ: ܢܶܬܒܰܪܰܟ ܒܝܰܡܺܝܢܳܟ: ܘܢܶܫܬܘܶܐ ܠܒܽܘܣܳܡܳܐ ܕܥܰܡܳܟ ܥܰܠ ܦܳܬܽܘܪܳܐ ܕܛܽܘ̈ܒܶܐ ܕܰܢܛܺܝܪ ܠܳܟ: ܘܰܠܗ̇ܰܘ ܕܪܰܡܪܶܡ ܥܰܕܥܺܐܕܳܟ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܐܠܰܗܳܐ ܗ̇ܰܘ ܕܰܒܣܶܡ ܠܳܟ ܩܶܛܠܶܗ ܕܥܰܒܕܳܟ ܠܪܺܝܚ ܢܝܳܚܳܐ ܕܰܐܠܳܗܽܘܬܳܟ ܘܰܗܘܳܬ݀ ܕܶܒܚܬܶܗ ܩܕܳܡܰܝܟ ܩܽܘܪܒܳܢܳܐ ܡܠܺܝܠܐ: ܘܕܶܒܚܳܐ ܟܳܗܢܳܝܳܐ: ܘܪܰܡܪܶܡܬ ܠܝܽܘܡ ܕܽܘܟܪܳܢܶܗ ܒܰܫܡܰܝܳܐ ܘܒܰܐܪܥܳܐ: ܢܶܒܣܰܡ ܠܳܟ ܗܳܟܺܝܠ ܪܺܝܚܶܗ ܕܦܺܝܪܡܰܢ ܐܰܝܟ ܪܺܝܚ ܕܶܒܚܶܗ ܘܩܽܘܪܒܳܢܳܐ ܕܢܰܦܫܶܗ: ܘܗܰܒ ܠܰܢ ܕܰܡܕܰܡ̈ܝܳܢܶܐ ܢܶܗܘܶܐ ܟܽܠܰܢ ܒܰܐܬܠܺܝܣܽܘܬܶܗ ܘܰܡܡܰܪ̈ܝܳܢܶܐ ܒܥܶܕܳܢ ܩܪܳܒܳܐ ܕܚܰܫܰܝ̈ܢ ܬܰܙܺܝ̈ܙܶܐ ܒܰܡܚܰܡܣܢܳܢܽܘܬܶܗ: ܘܢܶܣܰܒ ܡܶܢܳܟ ܦܽܘܪܥܳܢܳܐ ܕܰܡܛܰܝܰܒ ܠܶܗ ܘܰܟܠܺܝܠܐ ܕܰܡܥܰܬܰܕ ܠܶܗ: ܒܝܰܘܡܳܐ ܕܓܶܠܝܳܢܳܟ ܘܢܶܫܬܘܶܐ ܕܥܰܡܶܗ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗ̇ܰܘ ܡܪܰܡܪܡܳܢܳܐ ܕܰܐܬܠܺܝ̈ܛܰܘܗܝ: ܘܡܰܘܪܒܳܢܳܐ ܕܦܳܠܚܰܘ̈ܗܝ ܠܗ̇ܰܘ ܓܳܡܽܘܪܳܐ ܘܰܡܫܰܡܠܝܳܢܳܐ ܕܥܰܒ̈ܕܰܘܗܝ ܒܡܶܠܬܳܐ ܕܰܫܪܳܪܳܐ ܘܰܒܚܶܟܡܬܳܐ ܕܪܽܘܚܳܐ: ܠܗ̇ܰܘ ܕܶܐܡ̣ܰܪ ܒܰܣܒܰܪܬܶܗ ܚܰܝܬܳܐ ܕܠܐ ܬܶܗܘܽܘܢ ܪܳܢܶܝܢ ܕܡܳܢܳܐ ܬܰܦܩܽܘܢ ܪܽܘܚܳܐ ܩܕܳܡ ܡܰܠܟ̈ܶܐ ܘܕܰܝ̈ܳܢܶܐ: ܕܶܐܢܳܐ ܬܰܡܳܢ ܐ̱ܢܳܐ ܥܰܡܟܽܘܢ: ܘܶܐܢܳܐ ܐܶܬܶܠ ܒܟܽܘܢ ܪܽܘܚܳܐ ܕܚܶܟܡܬܳܐ ܘܠܽܘܒܳܒܳܐ ܕܒܳܗ̇ ܬܶܒܗܬܽܘܢ ܠܚܰܢ̈ܦܶܐ ܘܟܳܦܽܘܪ̈ܶܐ: ܘܒܶܝܬ ܐܺܝܕܰܝ̈ܟܽܘܢ ܣܰܓܺܝ̈ܶܐܐ ܢܶܬܩܰܪܒܽܘܢ ܠܘܳܬܝ ܒܗܰܝܡܳܢܽܘܬܳܐ ܕܠܶܗ ܝܳܐܐ܀

 

 

 

ܣܕܪܐ

 

 

 

ܡܫܺܝܚܳܐ ܚܶܟܡܬܳܐ ܘܚܰܝܠܐ ܕܰܐܠܳܗܳܐ ܐܰܒܳܐ: ܗ̇ܰܘ ܕܝܰܗܒܬ ܒܛܰܝܒܽܘܬܳܟ ܚܰܝܠܐ ܘܠܽܘܒܳܒܳܐ ܠܐܬܠܺܝ̈ܛܶܐ ܕܺܝܠܳܟ: ܡܰܘܕ̈ܝܳܢܶܐ ܘܣܳܗ̈ܕܶܐ ܢܰܨܺܝ̈ܚܶܐ: ܕܥܰܡ ܒܺܝܫܳܐ ܘܚܰܝܠܰܘ̈ܳܬܶܗ ܐܰܓܽܘܢܳܐ ܕܰܚܠܳܦ ܕܶܚܠܬܳܟ ܢܶܥܒܕܽܘܢ ܘܰܒܡ̈ܶܠܰܝ ܫܪܳܪܳܐ ܕܦܽܘܡܗܽܘܢ ܠܦܳܠܚܽܘܬܳܐ ܟܽܠܳܗ̇ ܕܕܶܚܠܰܬ݀ ܦܬܰܟܪ̈ܶܐ ܢܶܙܟܽܘܢ ܘܰܢܚܰܝܒܽܘܢ: ܗ̇ܰܘ ܕܰܠܢܰܨܺܝܚܳܐ ܡܳܪܝ ܬܶܐܘܳܕܳܘܪܳܘܣ ܗܳܢܳܐ ܕܝܰܘܡܳܢܳܐ ܕܽܘܟܪܳܢܶܗ ܒܚܰܕܽܘܬܳܐ ܡܫܰܡܠܺܝܢܰܢ ܝܰܗܒܬ ܡܶܠܬܳܐ ܕܚܶܟܡܬܳܐ ܕܰܫܪܳܪܳܐ: ܠܡܰܟܳܣܽܘ ܠܡܰܠܟ̈ܶܐ ܘܕܰܝ̈ܳܢܶܐ ܘܰܕܠܐ ܕܶܚܠܐ: ܗ̇ܰܘ ܕܟܰܕ ܩܰܪܒܽܘܗܝ ܠܒܶܝܬ ܕܺܝܢܳܐ ܚܠܳܦܰܝܟ: ܐܰܝܟ ܐܰܪܝܳܐ ܕܢܳܗܶܡ ܥܰܠ ܬܰܥ̈ܠܐ: ܪܗܶܛ ܠܐܣܛܰܕܝܽܘܢ ܟܰܕ ܪܳܘܶܙ ܒܪܽܘܚܳܐ: ܗ̣ܶܢܽܘܢ ܕܶܝܢ ܟܰܕ ܚܙܰܐܘܽܘܗܝ ܠܒܺܝܒܳܐ ܒܰܠܒܺܝܒܽܘܬܶܗ ܬܗܰܪܘ: ܘܡܶܚܕܳܐ ܫܰܪܺܝܘ ܕܳܝܢܺܝܢ ܠܶܗ ܥܰܠ ܫܽܘܚܠܳܦܶܗ ܕܡ̣ܶܢ ܟܦܽܘܪܝܶܗ ܠܗܰܝܡܳܢܽܘܬܳܐ ܠܡܰܕܒܳܚܽܘ ܠܫܺܐܕ̈ܶܐ ܡܦܺܝܣܺܝܢ ܗܘܰܘ ܠܶܗ ܡܶܢܗܽܘܢ ܒܰܓܙܳܡ̈ܶܐ ܡܰܪܺܝܪ̈ܶܐ: ܘܡܶܢܗܽܘܢ ܒܫܽܘ̈ܕܳܠܐ ܢܟܺܝ̈ܠܐ: ܗ̣ܽܘ ܕܶܝܢ ܟܰܕ ܐܶܬܡܠܺܝ ܪܽܘܚܳܐ ܩܰܕܺܝܫܳܐ ܒܡ̈ܶܠܐ ܕܡܰܟܣܳܢܽܘܬܳܐ ܡܡܰܚܶܐ ܗܘܳܐ ܠܗܽܘܢ ܟܰܕ ܐܳܡ̇ܰܪ: ܕܶܐܢܳܐ ܕܡ̣ܶܢ ܓܽܘܡܳܨܳܐ ܕܰܐܒܕܳܢܳܐ ܣܶܠܩܶܬ ܒܶܗܬܬܳܐ ܗ̇ܳܝ ܠܺܝ ܕܒܶܗ ܟܰܕ ܒܶܗ ܐܶܦܶܠ: ܟܰܕ ܩܶܪܒܶܬ ܠܐܝܡܳܡܳܐ ܪܰܒܳܐ: ܬܽܘܩܰܠܬܳܐ ܗ̱̇ܝ ܪܰܒܬܳܐ ܠܡ̇ܰܢ ܕܰܦܬܺܝ̈ܚܳܢ ܥܰܝܢܰܘ̈ܗܝ: ܘܒܰܝܢܳܬ ܦܰܚ̈ܶܐ ܘܬܽܘܩ̈ܠܳܬܳܐ ܪܳܕܶܐ: ܫܰܦܠܽܘܬܳܐ ܗ̱̇ܝ ܠܡ̇ܰܢ ܕܰܐܓܗܺܝ ܡ̣ܶܢ ܥܰܒܕܽܘܬܳܐ ܕܒܺܝܫܳܐ ܘܬܽܘܒ ܥܠܶܝܗ̇ ܒܨܶܒܝܳܢܶܗ ܢܰܦܢܶܐ: ܪܽܘܫܥܳܐ ܗ̇ܰܘ ܪܰܒܳܐ ܠܡ̇ܰܢ ܕܣܳܓܶܕ ܠܒܶܪ̈ܝܳܬܳܐ ܛܳܒ ܡ̣ܶܢ ܒܳܪܽܘܝܳܐ: ܩܽܘܦܳܚܰܐ ܗ̱̇ܘ ܪܰܒܳܐ ܘܩܽܘܛܪܳܓܳܐ: ܠܡ̇ܰܢ ܕܰܠܟܺܐܦ̈ܶܐ ܘܰܠܩܰܝ̈ܣܶܐ ܐܰܝܟ ܕܠܐܠܳܗ̈ܶܐ ܡܕܰܒܰܚ: ܨܰܥܪܰܐ ܗ̱ܘ ܪܰܒܳܐ ܠܡ̇ܰܢ ܕܰܠܕܰܝ̈ܘܶܐ ܐܰܝܟ ܕܰܠܛܳܒ̈ܶܐ ܡܢܰܩܶܐ: ܦܰܩܪܽܘܬܳܐ ܗ̱ܝ ܠܡ̇ܰܢ ܕܰܠܡܺܝ̈ܬܶܐ ܐܰܝܟ ܕܰܠܚܰܝ̈ܶܐ ܡܫܰܡܶܫ: ܥܰܘܠܐ ܕܶܝܢ ܘܰܛܠܽܘܡܝܳܐ ܠܡ̇ܰܢ ܕܩܰܒܶܠ ܝܺܕܰܥܬܳܐ ܕܰܫܪܳܪܳܐ ܘܰܠܥܰܘ̈ܳܠܐ ܡܶܬܬܦܺܝܣ: ܣܰܟܠܽܘܬܳܐ ܪܰܒܬܳܐ ܠܡ̇ܰܢ ܕܶܐܬܩܪܺܝ ܠܡܶܫܬܽܘܬܳܐ ܗ̇ܳܝ ܕܠܐ ܥܳܒܪܳܐ: ܘܡ̣ܶܢ ܕܶܒ̈ܚܶܐ ܘܢܽܘ̈ܩܳܝܶܐ ܕܫܺܐܕ̈ܶܐ ܢܶܐܟܽܘܠ: ܢܕܺܝܕܽܘܬܳܐ ܗ̱ܝ ܠܡ̇ܰܢ ܕܩܰܒܶܠ ܫܽܘܘܟܳܢܳܐ ܪܽܘܚܳܢܳܝܳܐ ܘܪܺܝܚܳܐ ܕܡܽܘܪܽܘܢ ܐܠܰܗܳܝܳܐ ܘܥܰܡ ܛܰܡ̈ܶܐܐ ܢܶܬܥܰܪܓܰܠ ܒܰܣܝܳܢܳܐ ܕܛܽܘܥܝܰܝ: ܡܽܘܝܳܩܰܐ ܗ̱ܘ ܠܡ̇ܰܢ ܕܥܰܡ ܡܡܰܝ̈ܩܳܢܶܐ ܘܕܰܓ̈ܳܠܐ ܢܶܬܚܰܠܰܛ ܘܢܶܫܒܽܘܩ ܬܪܺܝܨܽܘܬ ܫܽܘܒܚܳܐ: ܠܐ ܘܳܠܐܷ ܕܢܺܐܚܶܐ ܐܰܝܢܳܐ ܕܟܰܕ ܚܠܺܝܡ ܘܢܶܫܬܰܘܬܰܦ ܠܰܡܚܰܒ̈ܠܐ: ܟܽܘܘܳܐܪܰܐ ܗ̱ܘ ܠܺܝ ܟܽܠܶܗ ܦܽܘܠܚܳܢܟܽܘܢ ܝܰܬܺܝܪ ܒܺܝܫܳܐ ܗ̱ܝ ܡ̣ܶܢ ܪܰܒܟܽܘܢ ܣܳܛܳܢܳܐ ܛܳܒܽܘܬܟܽܘܢ: ܛܽܘܒܰܘܗܝ ܠܡ̇ܰܢ ܕܢܰܪܚܶܩ ܡ̣ܶܢ ܛܳܥܝܽܘܬܟܽܘܢ ܘܳܐܦܶܢ ܒܡܰܘܬܳܐ: ܚܰܣܝܰܐ ܗ̱ܘ ܘܩܰܕܺܝܫܳܐ ܐܰܝܢܳܐ ܕܶܐܫܬܰܘܕܰܥ ܣܪܺܝܩܽܘܬܟܽܘܢ: ܙܰܟܳܝܰܐ ܗ̱ܘ ܐܰܝܢܳܐ ܕܠܐ ܐܶܬܬܦܺܝܣ ܠܫܽܘܓܳܫܰܝ̈ܟܽܘܢ: ܘܳܝ ܠܶܗ ܠܡ̇ܰܢ ܕܰܛܒܺܝܥ ܒܰܣܝܳܢܳܐ ܕܛܰܡܽܐܘܬ ܦܽܘܠܚܳܢܟܽܘܢ ܗܕܺܝܪ ܘܰܦܐܶܐ ܩܕܳܡ ܡܳܪܝܳܐ ܗ̇ܰܘ ܕܠܐ ܡܶܬܕܰܢܶܐ ܠܡܽܘܠܟܳܢܟܽܘܢ: ܕܰܟܝܳܐ ܘܰܡܨܰܠܠܐ ܐܺܝܬܰܘܗܝ ܗ̇ܰܘ ܕܰܐܡܶܕ ܡ̣ܶܢ ܫܰܘܬܳܦܽܘܬܟܽܘܢ ܓܰܢ̱ܒܳܪܰܐ ܗ̱ܘ ܘܰܚܠܺܝܨܳܐ ܕܡܰܩܢܶܐ ܥܰܠ ܠܽܘܚܳܡܰܝ̈ܟܽܘܢ: ܒܚܺܝܪܰܐ ܗ̱ܘ ܒܚܰܟܺܝ̈ܡܶܐ ܐܰܝܢܳܐ ܕܡ̣ܶܢ ܐܽܘܪ̈ܚܳܬܟܽܘܢ ܡܰܠܝܰܬ݀ ܥܽܘܩ̈ܣܶܐ ܐܰܪܺܝܡ ܪܶܓܠܶܗ: ܐܺܝܩܳܪܳܐ ܪܰܒܳܐ ܡܶܫܟܰܚ ܒܰܫܡܰܝܳܐ ܘܒܰܐܪܥܳܐ ܐܰܝܢܳܐ ܕܠܐ ܡܶܬܦܢܶܐ ܥܰܠ ܡܰܘܗ̈ܒܳܬܟܽܘܢ ܘܺܐܝܩܳܪ̈ܰܝܟܽܘܢ: ܠܺܝ ܠܰܡ ܠܐ ܢܶܗܘܶܐ ܠܺܝ ܕܶܐܫܬܰܒܗܰܪ. ܐܶܠܐ ܐܶܢ ܒܰܙܩܺܝܦܶܗ ܕܰܡܫܺܝܚܳܐ: ܗ̇ܰܘ ܕܠܐ ܒܳܗܶܬ ܐܰܝܢܳܐ ܕܡܶܬܓܰܘܰܣ ܒܶܗ: ܪܰܒܳܐ ܗ̱ܝ ܠܺܝ ܕܶܐܗܘܶܐ ܪܕܺܝܦܳܐ ܘܰܩܛܺܝܠܐ ܡܶܛܽܠ ܡܳܪܝ ܕܡܺܝܬ ܚܠܳܦܰܝ: ܚܰܢ̈ܦܶܐ ܕܶܝܢ ܟܰܕ ܫܶܢ̈ܕܶܐ ܡܰܪܺܝܪ̈ܶܐ ܐܰܣܒܠܽܘܗܝ: ܒܰܐܬܽܘܢܳܐ ܕܢܽܘܪܳܐ ܫܰܠܶܡ ܚܰܝܰܘ̈ܗܝ ܒܰܨܠܽܘܬܳܐ ܕܠܐ ܢܶܟܝ̈ܳܢܶܐ ܒܚܰܝܠܳܟ: ܠܳܟ ܕܶܝܢ ܡܳܪܰܢ ܗ̇ܰܘ ܕܚܰܝܠܬܳܝܗܝ ܒܰܐܓܽܘܢܶܗ ܡܶܬܟܰܫܦܺܝܢܰܢ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬܫܰܟܶܢ ܠܰܢ ܒܪܶܚܡܰܬ݀ ܐ̱ܢܳܫܽܘܬܳܟ: ܘܒܰܨܠܰܘ̈ܳܬܶܗ ܕܰܐܬܠܺܝܛܳܟ ܐܰܝܕܳܐ ܕܥܳܕܪܳܐ ܘܦܳܩܚܳܐ ܠܚܰܝ̈ܶܐ ܕܢܰܦ̈ܫܳܬܰܢ: ܟܰܕ ܡܰܫܦܰܥ ܐܰܢ̱ܬ ܪ̈ܰܚܡܶܐ ܕܛܰܝܒܽܘܬܳܟ: ܥܰܠ ܡܰܪ̈ܥܶܐ ܘܰܟܪ̈ܺܝܗܶܐ: ܘܥܰܡ ܒܳܝ̈ܫܶܐ ܘܡܶܣ̈ܟܺܢܶܐ: ܘܥܰܠ ܛܳܥܰܝ̈ܳܐ ܘܰܐܒܺܝ̈ܕܶܐ: ܘܥܰܠ ܡܥ̈ܳܩܶܐ ܘܰܫܚܺܝ̈ܩܶܐ: ܘܥܰܠ ܚܰܛܳܝ̈ܶܐ ܘܡܰܣܟܠܳܢ̈ܶܐ: ܘܥܰܠ ܡܰܠܟ̈ܶܐ ܘܪ̈ܺܝܫܳܢܶܐ: ܘܥܰܠ ܪ̈ܳܥܰܘܳܬܳܐ ܘܥܰܠܠܳܢ̈ܶܐ ܕܥܺܕܬܳܟ: ܘܥܰܠ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܡܰܪܥܺܝܬܳܟ: ܥܰܠ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܕܰܫܟܶܒܘ ܒܳܟ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ܀

 

ܛܟܣܐ ܕܚܕ ܒܫܒܐ ܩܕܡܝܐ ܕܦܢܛܝܩܘܣܛܝ

 

ܩܕܡܝܬ ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܕܰܟܝܳܐܝܬ ܘܩܰܕܺܝܫܳܐܝܬ ܢܙܰܡܰܪ ܠܳܟ ܬܶܫܒ̈ܚܳܬܳܐ ܪ̈ܽܘܚܳܢܳܝܬܳܐ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܥܺܐܕܳܐ ܕܡܰܚܰܬܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܕܰܫܪܳܐ ܘܰܐܓܶܢ ܥܰܠ ܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܘܰܐܚܶܡ ܐܶܢܽܘܢ ܒܰܕܡܽܘܬ ܢܽܘܪܳܐ ܘܚܰܟܶܡ ܐܶܢܽܘܢ ܘܢܰܗܰܪ ܐܶܢܽܘܢ ܒܟܽܠܗܶܝܢ ܐܠܰܗܳܝ̈ܳܬܳܐ: ܐܰܢ̱ܬ ܡܳܪܝܳܐ ܪܳܚܶܡܢܳܫܳܐ ܚܰܟܶܡ   ܘܰܐܢܗܰܪ ܠܰܢ ܒܡܰܘ̈ܗܒܳܬܳܐ ܐܠܰܗܳܝ̈ܳܬܳܐ ܘܰܒܠܶܫ̈ܳܢܶܐ ܚܰܕ̈ܬܶܐ ܘܰܕܟܰܝ̈ܳܐ ܢܰܣܶܩ ܠܳܟ ܫܽܘܒܚܳܐ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܳܬܐ ܠܰܚܕܳܐ ܐܠܰܗܽܘܬܳܐ ܡܥܰܠܰܝܬܳܐ ܕܒܰܠܚܽܘܕܳܝܽܘܬܳܐ ܕܪܺܝܫܳܢܽܘܬܳܐ ܪ̈ܺܝܫܝܳܬܳܐ ܡܶܬܝܰܕܥܳܐ ܘܒܰܬܠܺܝܬܳܝܽܘܬ ܩܢܽܘ̈ܡܶܐ ܩܰܕܺܝ̈ܫܶܐ ܡܶܣܬܰܓܕܳܐ: ܐܰܒܳܐ ܛܳܒܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ ܟܰܕ ܠܐܴ ܚܳܣܰܪ: ܒܰܪ ܛܽܘܒܬܳܢܳܐ ܕܶܐܫܬܰܘܬܰܦ ܠܰܟܝܳܢܰܢ ܘܰܦܪܰܩ ܠܰܢ ܟܰܕ ܠܐܴ  ܣܒܰܠ ܒܽܘܨܳܪܳܐ: ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ ܕܰܢܚܶܬ ܘܫܰܟܶܢ ܠܰܢ ܫܽܘ̈ܟܳܢܶܐ ܘܡܰܘܗ̈ܒܳܬܳܐ ܡܦܰܬܟ̈ܳܬܳܐ: ܟܰܕ ܒܶܗ ܦܽܘܠܳܓܳܐ ܠܐܴ ܓܳܫܶܦ ܬܠܳܬܳܐ ܩܢܽܘ̈ܡܶܐ ܡܶܫܬܰܒܰܚ ܐܰܢ̱ܬ: ܘܰܬܠܳܬܳܐ ܚܰܕ ܠܐܴ ܡܶܬܦܰܠܓܳܢܳܐܝ̣ܬ ܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܚܰܕ ܐܠܰܗܳܐ ܫܰܪܺܝܪܳܐ ܕܰܠܥܶܠ ܡ̣ܶܢ ܡܰܕܪܟܳܢܽܘܬܳܐ ܕܰܒܪ̈ܰܝܳܐ ܘܰܥܒܺܝ̈ܕܶܐ ܡܥܰܠܰܝ ܕܠܶܗ ܝܳܐܶܐ ܫܽܘܒܚܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܟܰܕ ܨܒܰܝܬ ܕܬܶܬܥܰܠܐܷ ܒܫܽܘܒܚܳܐ ܠܘܳܬ ܐܰܒܽܘܟ ܠܐܱܝܟܳܐ ܕܡ̣ܶܢ ܬܰܡܳܢ ܠܐܴ ܫܰܢܺܝܬ: ܐܰܪܺܝܡܬ ܐܻܝܕܰܝ̈ܟ ܩܰܕܺܝ̈ܫܳܬܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ: ܘܰܡܠܰܝܬ ܐܶܢܽܘܢ ܒܽܘܪ̈ܟܳܬܳܐ ܘܒܰܪܶܟܬ ܐܶܢܽܘܢ: ܘܦܰܩܶܕܬ ܐܶܢܽܘܢ ܕܰܢܣܰܟܽܘܢ ܠܫܽܘܘܕܳܝܶܗ ܕܰܐܒܳܐ ܗ̇ܰܘ ܕܝܰܘܡܳܢ ܚܰܘܺܝ ܡܶܐܬܺܝܬܶܗ ܪܽܘܚܳܐ ܦܰܪܰܩܠܺܝܛܳܐ: ܗ̇ܰܘ ܕܰܢܚܶܬ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܘܰܡܠܐܴ ܐܶܢܽܘܢ ܫܽܘ̈ܟܳܢܶܐ ܬܡܺܝ̈ܗܶܐ: ܪܽܘܚܳܐ ܩܰܕܺܝܫܳܐ ܕܶܝܢ ܒܩܳܠܐܴ: ܢܽܘܪܳܐ ܒܰܚܙܳܬܳܐ: ܒܰܪ̈ܳܝܶܐ ܕܡܶܬܟܰܢܫܺܝܢ ܓܰܘܳܝ̈ܶܐ ܕܡܶܬܢܰܗܪܺܝܢ ܗܶܕܝܽܘ̈ܛܐ ܕܝܳܠܦܺܝܢ ܣܶܦܪ̈ܶܐ: ܨܰܝܳܕ̈ܶܐ ܕܢܽܘ̈ܢܶܐ ܕܚܶܟܡܬܳܐ ܐܠܰܗܳܝܬܳܐ ܡܶܬܡܠܶܝܢ: ܒܽܘܪ̈ܶܐ ܘܰܦܫܺܝ̈ܛܶܐ ܕܒܺܝܕܰܥܬܳܐ ܕܪܽܘܚܳܐ ܡܰܨܡܚܺܝܢ: ܦܽܘܠܳܓܳܐ ܕܠܶܫ̈ܳܢܶܐ ܕܰܠܗܽܘܢ ܡܶܫܬܰܟܢܺܝܢ: ܚܰܝ̈ܠܐܷ ܘܳܐܣܘ̈ܳܬܳܐ ܕܒܺܐܝ̈ܕܰܝܗܽܘܢ ܕܰܡܚܰܝ̈ܛܰܝ ܡܨܺܝ̣̈ܕܳܬܳܐ ܕܰܒܠܶܫ̈ܳܢܶܐ ܕܥܰܡ̈ܡܶܐ ܐܶܬܚܰܟܰܡܘ: ܘܥܰܛܠܰܝ̈ ܡܰܡܠܠܐܴ ܕܰܒܟܳܪܽܘܙܽܘܬܳܐ ܕܳܪܫܺܝܢ: ܡܚܺܝ̈ܠܰܝ ܢܽܘܗܪܳܐ ܕܰܒܙܰܠܓ̈ܰܝ ܪܽܘܚܳܐ ܩܰܕܺܝܫܳܐ ܡܰܙܠܓܺܝܢ: ܓܡܺܝܪ̈ܶܐ ܕܰܒܗܰܝܡܳܢܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ ܡܰܘܕܶܝܢ ܗܘܰܘ: ܥܰܓܪ̈ܰܝ ܠܶܫܳܢ̈ܶܐ ܕܪܽܘܚܳܐ ܩܰܕܺܝܫܳܐ ܦܬܰܚ ܡܰܕܥܰܝ̈ܗܽܘܢ ܨܰܝ̈ܳܕܶܐ ܕܢܽܘ̈ܢܶܐ ܕܪܽܘܚܳܐ ܩܰܕܺܝܫܳܐ ܨܰܝ̈ܳܕܶܐ ܕܰܒܢܰܝ̈ܢܳܫܳܐ ܥܒܰܕ ܐܶܢܽܘܢ: ܒܨܺܝܪ̈ܰܝ ܒܓܶܢܣܳܐ ܕܰܒܪܽܘܚܳܐ ܩܰܕܺܝܫܳܐ ܐܶܬܚܰܝܰܠܘ ܗܘܰܘ: ܗ̇ܰܘ ܕܳܐܦ ܚܢܰܢ ܟܰܕ ܕܽܘܡܳܪܳܐ ܡܶܬܡܠܶܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܕܫܰܪܺܝܪܳܐܝ̣ܬ ܕܶܝܢ ܐܶܬܚܙܺܝ ܐܠܰܗܳܐ ܥܰܠ ܐܰܪܥܳܐ: ܘܰܒܝܰܕ ܪܽܘܚܳܦܶܗ ܩܰܕܺܝܫܳܐ ܚܰܬܶܡ ܐܶܢܽܘܢ ܠܰܫܠܺܝ̈ܚܰܘܗܝ ܘܓܰܡܰܪ ܐܶܢܽܘܢ: ܘܨܰܒܶܬ ܐܶܢܽܘܢ ܒܫܽܘ̈ܟܳܢܰܘܗܝ: ܗܰܕܺܝ ܐܶܢܽܘܢ ܒܽܐܘܪ̈ܚܳܬܶܗ: ܘܬܰܪܶܨ ܐܶܢܽܘܢ ܒܰܫܒܺܝ̈ܠܰܘܗܝ: ܝܰܘܡܳܢܳܐ ܐܶܫܬܰܪܝܰܬ݀ ܐܶܦܽܘܦܰܐܣܺܝܣ ܗ̇ܳܝ ܕܠܐܴ ܬܶܥܡܰܪܝ ܪܽܘܚܝ ܒܐܢܳܫܳܐ ܠܥܳܠܰܡ ܡ̣ܶܢ ܐܰܒܳܐ ܐܶܬܰܐܡܪܰܬ݀ ܗܘܳܬ݀: ܝܰܘܡܳܢܳܐ ܒܠܶܫܳܢ̈ܶܐ ܕܢܽܘܪܳܐ ܪܽܘܚܳܐ ܩܰܕܺܝܫܳܐ ܐܶܬܚܙܺܝ: ܘܰܠܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ ܐܰܫܠ̣ܶܡ ܐܶܢܽܘܢ ܘܰܠܟܽܘ̈ܒܶܐ ܕܰܥܒܳܪ ܦܽܘܩܕܳܢܳܐ ܛܰܠܶܩ ܡ̣ܶܢ ܟܽܠܶܗ ܥܳܠܡܳܐ: ܝܰܘܡܳܢܳܐ ܓܶܠܝܳܢܳܐ ܕܪܽܘܚܳܐ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܐܶܬܚܰܘܺܝ: ܘܚܰܟܶܡ ܡܰܕܥܰܝ̈ܗܽܘܢ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܕܢܰܚ ܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܶܐ ܒܓܰܘ ܥܶܠܺܝܬܳܐ ܘܰܐܩܶܠ ܡܶܢܗܽܘܢ ܠܢܽܘܬܳܥܳܐ ܗ̇ܰܘ ܩܰܕܡܳܝܳܐ: ܝܰܘܡܳܢܰܐ ܗ̇ܰܘ ܕܒܰܢܒܺܝ̈ܶܐ ܡܰܠܶܠ ܘܠܰܫܠܺܝ̈ܚܶܐ ܡ̇ܰܢ ܫܰܪܺܝܪܳܐܝ̣ܬ ܕܰܢܡܰܠܠܽܘܢ ܒܠܶܫܳܢ ܠܶܫܳܢ ܐܠܰܦ ܘܫܰܪܰܪ ܓܰܠܝܳܐܝ̣ܬ: ܝܰܘܡܳܢܳܐ ܘܳܝܳܐ ܘܒܶܗܬܬܳܐ ܐܶܬܥܰܛܰܦ ܝܽܘܕܳܐ ܣܟܰܪܝܽܘܛܳܐ: ܟܰܕ ܚܙܳܐ ܠܰܫܠܺܝ̈ܚܶܐ ܚܰܒܪ̈ܰܘܗܝ ܗܳܢܽܘܢ ܕܰܒܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܐܶܬܢܰܗܰܪܘ: ܘܐ̱ܪ̈ܳܙܶܐ ܐܠܰܗܳܝ̈ܶܐ ܠܗܽܘܢ ܐܶܫܬܰܟܰܢܘ: ܝܰܘܡܳܢܳܐ ܙܳܚ ܘܰܢܚܶܬ ܪܽܘܚܳܐ ܩܰܕܺܝܫܳܐ ܘܦܰܪܰܩܠܺܝܛܳܐ ܥܰܠ ܟܶܢܫܳܐ ܕܬܰܠܡܺܝ̈ܕܶܐ: ܣܰܬܶܬ ܪܶܥܝܳܢܗܽܘܢ ܒܗܰܝܡܳܢܽܘܬܳܐ ܫܰܪܺܝܪܬܳܐ: ܝܰܘܡܳܢܳܐ ܚܰܕܽܘܬܳܐ ܐܶܬܡܠܺܝܘ ܫܠܺܝܚ̈ܶܐ ܟܡܺܝܪ̈ܶܐ ܒܡܶܐܬܺܝܬܶܗ ܕܪܘܚܳܐ ܩܰܕܺܝܫܳܐ ܡܒܰܝܳܐܢܳܐ: ܝܰܘܡܳܢܳܐ ܛܳܣ ܘܰܢܚܶܬ ܪܽܘܚܳܐ ܩܰܕܺܝܫܳܐ ܠܥܶܠܺܝܬܳܐ ܘܦܰܠܶܓ ܬܰܡܳܢ ܡܰܘܗ̈ܒܳܬܳܐ ܬܡܺܝ̈ܗܳܬܳܐ ܠܰܒ̈ܢܰܝ ܐ̱ܪܳܙܶܗ: ܝܰܘܡܳܢܳܐ ܝܰܒܶܒܘ ܒܠܶܥ̈ܙܶܐ ܚܠܰܝ̈ܳܐ ܓܠܺܝܠܳܝ̈ܶܐ ܕܶܐܬܥܰܛܰܦ ܫܽܘܟܳܢ̈ܶܐ ܕܪܽܘܚܳܐ: ܐܶܬܡܠܺܝܘ ܚܣܳܡܳܐ: ܘܶܐܡܰܪܘ ܕܗܳܠܶܝܢ ܡܶܐܪܺܝܬܳܐ ܐܶܫܬܺܝܘ ܘܰܪܘܺܝܘ ܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܠܝܽܘܕܳܝ̈ܶܐ ܟܰܪܝܽܘܬܳܐ ܘܰܠܣܳܛܳܢܳܐ ܒܶܗܬܬܳܐ: ܒܰܐܪ̈ܙܶܐ ܬܪܶܥܣܰܪ ܕܰܫܘܰܚܘ ܡ̣ܶܢ ܥܶܠܺܝܬܳܐ: ܝܰܘܡܳܢܳܐ ܡ̣ܶܢ ܪܰܘܡܳܐ ܪܽܘܚܳܐ ܩܰܕܺܝܫܐ ܐܰܙܠܶܓ ܥܰܠ ܬܰܠܡܺܝ̈ܕܶܐ ܘܰܪܕܰܦ ܠܚܶܫܟܳܐ ܡܶܢܗܽܘܢ ܘܰܛܪܰܕ ܠܦܽܘܠܳܓ̈ܶܐ ܡ̣ܶܢ ܠܶܒܰܘ̈ܳܬܗܽܘܢ: ܝܰܘܡܳܢܳܐ ܢܰܗܺܝܪܳܐܝ̣ܬ ܐܶܬܚܰܟܰܡܘ ܫܠܺܝ̈ܚܶܐ ܩܰܕܺܝ̈ܫܶܐ ܒܪܽܘܚܳܐ ܩܰܕܺܝܫܳܐ ܘܰܐܒܗܶܬܘ ܠܣ̇ܳܦܪ̈ܶܐ ܘܰܦܪ̈ܺܝܫܶܐ ܕܥܰܡܳܐ ܕܝܽܘܕ̈ܳܝܶܐ: ܝܰܘܡܳܢܳܐ ܣܶܦܪ̈ܶܐ ܕܚܶܟܡܬܳܐ ܐܠܰܗܳܝܬܳܐ ܠܰܫܠܺܝ̈ܚܶܐ ܐܶܬܺܝܗܶܒܘ ܘܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܥܳܠܡܳܐ ܐܰܟܪܙܶܘ ܗܘܰܘ: ܝܰܘܡܳܢܳܐ ܥܶܠܺܝܬܳܐ ܕܒܽܐܘܪܫܠܶܡ ܒܳܒܶܝܠ ܕܬܰܪܬܶܝܢ ܗܘܳܬ݀: ܠܰܘ ܒܰܡܣܳܡ ܒܪܺܝܫܳܐ ܐܠܐܴ ܒܦܽܘ̈ܠܳܓܶܐ ܕܠܶܫܳܢ̈ܶܐ ܒܝܰܕ ܪܽܘܚܳܐ ܩܰܕܺܝܫܳܐ: ܝܰܘܡܳܢܳܐ ܦܳܪܽܘܩܰܢ ܢܰܨܒܳܗ̇ ܠܨܶܗܝܽܘܢ ܫܰܪܺܝܪܬܳܐ ܥܺܕܬܳܐ ܩܰܕܺܝܫܬܳܐ: ܚܠܳܦ ܟܰܪܡܳܐ ܗ̇ܰܘ ܕܝܰܗܒ ܚܰܪ̈ܽܘܒܶܐ ܨܶܗܝܽܘܢ ܨܳܠܽܘܒܬܳܐ ܝܰܘܡܳܢܳܐ ܨܰܝ̈ܳܕܰܝ ܢܽܘ̈ܢܶܐ ܘܠܐܷܣܦܺܝܪ̈ܶܐ ܐܶܬܚܰܟܰܡܘ ܕܰܢܨܽܘܕܽܘܢ ܐ̱ܢܳܫ̈ܳܐ ܠܚܰܝ̈ܶܐ ܘܢܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ: ܝܰܘܡܳܢܳܐ ܩܰܒܠܰܬ݀ ܐܰܪܥܳܐ ܫܶܩܝܳܐ ܕܚܰܝ̈ܶܐ ܚܠܳܦ ܚܰܡܪܳܐ: ܗ̇ܰܘ ܕܦܰܪܣܺܝ ܗܘܳܐ ܠܢܽܘܚ ܬܡܺܝܢܳܐ: ܝܰܘܡܳܢܳܐ ܪܰܦܶܣܘ ܒܠܶܥ̈ܙܶܐ ܫܰܦܺܝܪ̈ܶܐ ܦܰܪ̈ܽܘܓܶܐ ܕܚܰܕܺܝ ܐܶܢܽܘܢ ܢܶܫܪܶܐ ܫܡܰܝܳܢܳܐ ܒܡܰܘ̈ܡܳܬܶܗ ܢܰܗܺܝܪ̈ܳܬܳܐ: ܝܰܘܡܳܢܳܐ ܫܶܡܥܽܘܢ ܚ̇ܳܕܶܐ: ܘܰܐܢܕܪܶܐܘܳܣ ܘܰܒܢ̈ܰܝ ܙܰܒܕܰܝ ܡܫܰܒܚܺܝܢ: ܘܫܰܪܟܳܐ ܕܰܫܠܺܝ̈ܚܶܐ ܒܚܰܕܽܘܬܳܐ ܘܒܰܪܘܳܙܳܐ ܩܳܝܡܺܝܢ ܟܰܕ ܚܳܙܶܝܢ ܕܗ̇ܰܘ ܡܶܕܶܡ ܕܶܐܫܬܰܘܕܺܝ ܠܗܽܘܢ ܒܪܳܐ ܝܺܚܺܝܕܳܝܳܐ ܟܰܕ ܣܳܠܶܩ ܐܶܫܬܰܡܠܺܝ: ܝܰܘܡܳܢܳܐ ܬܶܗܪܳܐ ܘܕܽܘܡܳܪܳܐ ܘܰܪܘܳܙܳܐ ܐܶܬܡܰܠܝܰܬ݀ ܥܺܕܬܳܐ ܩܰܕܺܝܫܬܳܐ: ܟܰܕ ܬܰܘܕܶܐ ܒܗܰܝܡܳܢܽܘܬܳܐ ܠܗ̇ܰܘ ܕܢܰܨܒܳܗ̇ ܘܗܰܕܪܳܗ̇ ܒܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܘܡܶܟܺܝܠ ܐܳܦ ܚܢܰܢ ܒܫܽܘ̈ܟܳܢܶܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܡܶܬܕܰܡܪܺܝܢܰܢ ܘܳܐܡܪܺܝܢܰܢ: ܕܰܒܪܺܝܟ ܗ̣ܽܘ ܚܰܝܠܐܴ ܕܺܝܠܳܟ ܐܠܰܗܳܐ ܘܪܰܘܪ̈ܒܳܢ ܘܰܫܒܺܝ̈ܚܳܢ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܺܝܠܳܟ ܬܗܺܝܪ̈ܳܬܳܐ ܘܰܫܒܺܝ̈ܚܳܬܳܐ: ܘܫܽܘ̈ܟܳܢܶܐ ܕܺܝܠܳܟ ܐܠܰܗܳܝ̈ܳܐ ܠܥܺܕܬܳܐ ܕܺܝܠܳܟ ܩܰܕܺܝܫܬܳܐ ܝܰܗܒܬ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ: ܘܡܶܬܟܰܫܦܺܝܢܰܢ ܠܳܟ ܕܰܬܨܰܒܶܬ ܠܰܢ ܒܪܽܘܚܳܐ ܩܰܕܺܝܫܳܐ ܘܰܒܚܰܝܠܳܟ ܠܐܴ ܡܶܬܕܰܪܟܳܢܳܐ: ܘܰܗܘܺܝ ܡܳܪܝܳܐ ܫܽܘܪܳܐ ܠܢܰܦ̈ܫܳܬܰܢ: ܘܩܰܕܶܫ ܠܰܢ ܒܩܰܕܺܝܫܽܘܬܳܐ ܕܡܶܢܳܟ: ܘܙܰܗܳܐ ܠܬܰܪ̈ܥܝܳܬܰܢ ܒܡܰܘܗ̈ܒܳܬܳܐ ܕܺܝܠܳܟ ܫܡܰܝܳܢ̈ܳܝܳܬܳܐ: ܘܨܰܠܶܠ ܠܚܽܘ̈ܫܳܒܰܝܢ ܡ̣ܶܢ ܟܽܠܗܽܘܢ ܚܰܫ̈ܶܐ ܘܰܪ̈ܓܺܝܓܳܬܳܐ ܛܰܡ̈ܳܐܬܳܐ: ܘܰܥܒܶܕ ܠܰܢ ܢܰܘ̈ܣܶܐ ܕܟܰܝ̈ܳܐ ܕܚܳܫܚܺܝܢ ܠܰܥܡܽܘܪܝܳܐ ܕܺܝܠܳܟ ܩܰܕܺܝܫܳܐ: ܘܰܐܪܟܶܢ ܪ̈ܰܚܡܰܝܟ ܠܘܳܬܰܢ: ܘܰܐܕܢܰܚ ܢܽܘܗܪܳܐ ܕܺܝܕܰܥܬܳܐ ܒܠܶܒܰܘ̈ܳܬܰܢ ܘܦܰܨܳܐ ܠܰܢ ܡ̣ܶܢ ܚܶܫܽܘܟܳܐ ܘܡ̣ܶܢ ܥܰܡܛܳܢܳܐ: ܐܰܫܘܳܐ ܠܰܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܠܒܽܘܣܳܡܳܐ ܕܰܒܡܰܠܟܽܘܬܳܟ ܫܡܰܝܳܢܺܝܬܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܥܛܪܐ

 

 

 

ܬܠܺܝܬܳܝܽܘܬܳܐ ܩܰܕܺܝܫܬܳܐ ܕܰܠܥܶܠ ܡ̣ܶܢ ܐܽܘܣܺܝ̈ܰܐܣ: ܘܰܠܥܶܠ ܡ̣ܶܢ ܟܽܠ ܪ̈ܺܝܫܳܢܘܳܬܳܐ: ܘܰܡܥܰܠܝܰܬ݀ ܡ̣ܶܢ ܟܽܠ ܐܠܰܗܽܘܬܳܐ: ܠܐܴ ܐܳܕܫܳܢܳܝܬܳܐ ܘܠܐܴ ܟܡܳܢܳܝܬܳܐ ܗ̇ܰܘ ܕܒܰܠܚܽܘܕܳܝܽܘܬ ܐܠܰܗܽܘܬܳܐ: ܘܽܐܘܣܺܝܰܐ ܘܰܟܝܳܢܳܐ: ܘܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܕܰܒܠܐܴ ܝܺܠܺܝܕܽܘܬܳܐ ܘܢܳܦܽܘܩܽܘܬܳܐ ܡܶܬܝܰܩܢܳܐ ܘܡܶܬܝܰܩܪܳܐ ܘܡܶܣܬܰܓܕܳܐ: ܘܰܠܒܰܪ ܡܶܢܳܗ̇ ܘܠܐܴ ܣܳܟ ܡܶܣܬܓܶܕ ܩܰܒܶܠ ܡܶܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܘܰܬܪܽܘܨܝ ܠܰܢ ܠܘܳܬ ܩܰܪܩܰܦܬܳܐ ܗ̇ܳܝ ܛܽܘܒܬܳܢܳܝܬܳܐ: ܠܐܱܝܟܳܐ ܕܐ̱ܪ̈ܳܙܶܐ ܦܫܺܝ̈ܛܶܐ ܘܰܫܪ̈ܳܝܶܐ ܕܠܐܴ ܐܰܣܺܝܪܺܝܢ: ܘܩܰܪܶܒܝ ܠܰܢ ܠܘܳܬ ܢܽܘܗܪܳܐ ܕܺܝܠܳܟ: ܕܢܰܘܕܶܐ ܐܰܡܺܝܢܳܐܝ̣ܬ ܘܢܶܣܓܽܘܕ ܠܐܴ ܡܶܬܦܰܫܩܳܢܳܐܝ̣ܬ ܗܳܫܳܐ܀

 

 

 

ܚܘܬܡܐ

 

 

 

ܗܰܒܠܰܢ ܡܳܪܝܳܐ ܡܳܪܰܢ ܕܰܒܣܰܘ̈ܟܶܐ ܪ̈ܽܘܚܳܢܳܝܶܐ ܘܰܫܡܰܝ̈ܳܢܶܐ: ܘܰܒܝܰܕ ܕܽܘܒܳܪ̈ܶܐ ܛܳܒ̈ܶܐ ܕܟܽܠ ܫܳܥ ܢܶܢܗܰܪ ܒܳܟ: ܘܰܒܬܶܫܒ̈ܚܳܬܳܐ ܦܰܐܝ̈ܳܬܳܐ ܟܽܠ ܢܶܫܦܰܪ ܠܳܟ: ܘܰܡܠܺܝ ܠܰܢ ܡ̣ܶܢ ܪܽܘܚܳܟ ܩܰܕܺܝܫܳܐ ܗ̇ܰܘ ܕܫܰܟܶܢ̣ܬ ܝܰܘܡܳܢܳܐ ܠܰܫܠܺܝ̈ܚܰܝܟ ܓܒܰܝ̈ܳܐ ܘܩܰܕܺܝ̈ܫܶܐ: ܘܰܐܫܘܳܐ ܠܰܢ ܠܰܓܢܽܘܢܳܟ ܗ̇ܰܘ ܕܠܐܴ ܦܳܛܪ̈ܳܢ ܚܰܕ̈ܘܳܬܶܗ: ܘܰܚܢܰܢ ܘܥܰܢܺܝ̈ܕܰܝܢ ܐܳܦ ܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܰܣܶܩ ܠܳܟ ܫܽܘܒܚܳܐ܀

 

 

 

ܩܘܡܐ ܩܕܡܝܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܚܰܕ ܟܝܳܢܳܐ ܐܠܰܗܳܐ ܕܰܐܠܳܗܽܘܬܳܐ ܣܓܺܝܕܬܳܐ ܘܰܡܬܽܘܡܳܝܬܳܐ: ܘܚܰܕ ܡܶܬܺܝܕܰܥ ܘܚܰܕ ܐܻܝܬܰܘܗܝ: ܐܻܝܬܽܘܬܳܐ ܕܠܐܴ ܙܰܒܢ̈ܶܐ: ܟܝܳܢܳܐ ܕܠܐܴ ܚܰܫܳܐ ܝܺܕܰܥܬܳܐ ܕܠܐܴ ܝܽܘܠܦܳܢ: ܚܶܟܡܬܳܐ ܕܩܰܕܺܝܡܳܐ ܠܥܰܒ̈ܕܶܐ: ܐܽܘܣܺܝܰܐ ܕܠܐܴ ܡܶܬܥܰܩܒܳܐ: ܡܬܽܘܡܳܝܽܘܬܳܐ ܕܠܐܴ ܡܶܬܕܰܪܟܳܐ: ܛܶܟܣܳܐ ܢܛܺܝܪܳܐ ܕܠܰܝܬ ܠܶܗ ܩܰܕܡܳܝܽܘܬܳܐ ܘܰܐ̱ܚܪܳܝܽܘܬܳܐ: ܗ̇ܰܘ ܕܶܐܬܡܳܠܝ ܘܝܰܘܡܳܢܳܐ: ܗ̣ܽܘ ܟܰܕ ܗ̣ܽܘ ܘܠܐܴ ܡܶܬܚܒܶܫ: ܘܳܐܦܠܐܴ ܬܗܽܘܡܳܐ ܚܳܒܶܫ ܠܶܗ: ܓܡܺܝܪܳܐ ܕܠܐܴ ܚܳܣܰܪ: ܥܳܒܽܘܕܳܐ ܕܠܐܴ ܠܐܴܐܷ: ܘܠܐܴ ܡܰܠܟܳܐ ܗ̇ܰܘ ܕܡ̣ܶܢ ܐ̱ܚܪܺܝܢ ܘܡܰܠܟܳܐ ܕܡ̣ܶܢ ܥܳܠܰܡ: ܘܠܐܴ ܡ̣ܶܢ ܕܽܘܟ ܩܰܒܶܠ ܫܽܘܠܛܳܢܳܐ ܐܰܘ ܝܳܗܶܒ ܠܐܱܚܪܺܝܢ: ܪܰܚܺܝܩ ܘܩܰܪܺܝܒ ܘܝܳܕܰܥ ܠܕܺܝܠܶܗ: ܘܡܶܬܺܝܕܰܥ ܡ̣ܶܢ ܕܺܝܠܶܗ: ܕܠܶܗ ܝ̇ܳܐܶܐ ܫܽܘܒܚܳܐ܀

 

 

 

ܣܕܪܐ ܕܠܘܬ ܐܒܐ

 

 

 

ܐܠܰܗܳܐ ܐܰܒܳܐ ܕܰܡܥܰܠܰܝ ܥܽܘܡܩܳܐ ܦܰܐܝܳܐ ܕܺܐܝܬܽܘܬܶܗ ܡ̣ܶܢ ܡܰܕܪܟܳܢܽܘܬܳܐ ܘܡܶܬܥܰܩܒܳܢܽܘܬܳܐ ܕܽܐܘܣܺܝ̈ܰܐܣ ܡܶܬܗܰܘ̈ܢܳܢܳܝܳܬܳܐ ܘܰܕܠܐܴ ܓܫܽܘܡ: ܗ̇ܰܘ ܕܰܠܡܶܠܬܳܐ ܕܡܶܢܳܟ: ܘܫܳܘܶܐ ܠܳܟ ܒܽܐܘܣܺܝܰܐ ܐܳܦ ܒܰܡܬܽܘܡܳܝܽܘܬܳܐ ܡ̣ܶܢ ܩܕܳܡ ܕܬܶܗܘܶܐ ܡܶܐܬܺܝܬܶܗ ܦܳܪܽܘܩܳܝܬܳܐ: ܠܡܰܚܰܬܬܳܐ ܕܥܰܠ ܛܽܘܪ ܣܺܝܢܰܝ ܐ̱ܪܳܙܳܢܳܐܝ̣ܬ ܚܰܘܺܝܬ: ܘܟܰܕ ܡܢܺܝܚܳܢܳܐ ܕܺܝܠܳܟ ܡܽܘܫܶܐ ܣܠܶܩ ܠܛܽܘܪܳܐ ܠܰܡܩܰܒܠܳܢܽܘܬܳܐ ܕܠܽܘ̈ܚܶܐ ܟܬܺܝ̈ܒܳܬ݀ ܡ̣ܶܢ ܛܰܝܒܽܘܬܳܐ ܠܥܰܡܳܐ ܐܻܝܣܰܪܠܳܝܳܐ: ܗ̇ܰܘ ܕܰܒܣܰܓܺܝܽܐܘܬܳܐ ܕܪ̈ܰܚܡܰܝܟ ܐܽܘܣܝ̈ܳܝܶܐ ܘܰܫܦܺܝ̈ܥܶܐ ܠܺܝܚܺܝܕܳܝܳܐ ܗ̇ܰܘ ܕܡܶܢܳܟ ܘܨܰܠܡܳܐ ܕܺܐܝܬܽܘܬܳܟ ܫܰܕܰܪܬ ܠܥܳܠܡܳܐ ܡܶܛܽܠ ܦܽܘܪܩܳܢܳܐ ܕܨܰܠܡܳܐ ܕܺܝܠܳܟ ܗ̇ܰܘ ܕܰܢܦܰܠ ܗܘܳܐ ܡ̣ܶܢ ܐܺܝܩܳܪܳܐ ܡܰܠܟܳܝܳܐ: ܘܟܰܕ ܠܐܴ ܡܶܬܚܰܙܝܳܢܳܐ ܘܠܐܴ ܡܶܬܕܰܪܟܳܢܳܐ ܐܺܝܬܰܘܗܝ ܗܘܳܐ ܘܡ̣ܶܢ ܠܩܽܘܕܡܺܝܢ ܥܰܡܳܟ ܘܥܰܡ ܪܽܘܚܳܐ ܩܰܕܺܝܫܳܐ ܐܺܝܬܰܘܗܝ ܬܰܚܬܺܝ ܗ̣ܽܘ ܠܶܗ ܠܡܽܘܫ̈ܚܳܬܳܐ ܐ̱ܢܳܫܳܝ̈ܳܬܳܐ ܕܢܰܦܢܶܐ ܠܰܢ ܡ̣ܶܢ ܛܳܥܝܽܘܬܳܐ ܠܣܶܓܕܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܗ̇ܳܝ ܕܰܒܪܽܘܚܳܐ ܘܒܰܫܪܳܪܳܐ ܡܶܣܬܰܓܕܳܐ ܗ̇ܰܘ ܕܟܰܕ ܫܰܡܠܺܝ ܒܰܩܢܽܘܡܶܗ ܐ̱ܪ̈ܳܙܶܐ ܓܢܺܝ̈ܙܶܐ ܕܰܢܒܺܝܽܘܬܳܐ ܓܡܰܪ ܘܫܰܡܠܺܝ ܠܡ̈ܶܠܐܷ ܕܗܳܢܽܘܢ ܕܰܗܘܰܘ ܚܰܙܳܝ̈ܶܐ ܕܺܝܠܶܗ ܕܡܶܠܬܳܐ ܐܠܰܗܳܐ: ܘܟܰܕ ܠܘܳܬ ܣܽܘܠܳܩܳܐ ܕܰܫܡܰܘ̈ܗܝ ܪܳܡܳܐ ܘܡܰܘܬܒܳܐ ܫܰܘܝܳܐ ܥܰܡܳܟ: ܐܰܒܳܐ ܓܢܺܝܙܳܐ ܘܰܡܥܰܠܝܳܐ ܐܶܬܥܰܬܰܕ: ܐܰܣܶܩ ܐܶܢܽܘܢ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܠܘܳܬ ܛܽܘܪܳܐ ܕܙܰܝ̈ܬܶܐ: ܘܒܰܪܶܟ ܘܩܰܕܶܫ ܐܶܢܽܘܢ: ܘܰܒܫܽܘܠܛܳܢܳܐ ܦܐܶܐ ܠܐܱܠܳܗܳܐ ܐܶܡ̣ܰܪ ܠܗܽܘܢ ܫܠܳܡܳܐ ܕܺܝܠܝ ܝܳܗ̇ܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ: ܘܠܰܒܶܒ ܐܶܢܽܘܢ ܡܶܛܽܠ ܡܰܣܩܽܘܬܳܐ ܠܐܴ ܡܫܰܢܝܳܢܳܝܬܳܐ ܕܳܐܦܶܢ ܡܶܣܬܰܠܰܩ ܐ̱ܢܳܐ ܡܶܢܟܽܘܢ ܦܰܓܪܳܢܳܐܝ̣ܬ ܐܶܠܐܴ ܥܰܡܟܽܘܢ ܐ̱ܢܳܐ ܪܽܘܚܳܐܝ̣ܬ ܒܚܰܝ̈ܠܐܷ ܕܪܽܘܚܳܐ ܘܒܰܓܢ̱ܒܰܪ̈ܘܳܬܳܐ: ܘܶܐܢ ܐܶܢܳܐ ܠܐܴ ܐܳܙܶܠ ܐ̱ܢܳܐ ܦܰܪܰܩܠܺܝܛܳܐ ܪܽܘܚܳܐ ܕܰܫܪܳܪܳܐ ܠܐܴ ܐܳܬܶܐ ܠܘܳܬܟܽܘܢ ܘܢܰܐܠܶܦܟܽܘܢ ܫܪܳܪܳܐ ܟܽܠܶܗ ܘܢܶܡܠܶܝܟܽܘܢ ܫܽܘ̈ܟܳܢܶܐ ܕܰܥܬܺܝ̈ܕܳܬܳܐ ܘܰܢܫܰܪܰܪܟܽܘܢ ܒܝܽܘܠܦܳܢܳܐ ܕܪܽܘܚܳܐ ܩܰܕܺܝܫܳܐ: ܘܟܰܕ ܐܰܝܟ ܫܽܘܘܕܳܝܳܐ ܗ̇ܰܘ ܕܶܐܫܬܰܘܕܺܝ ܠܰܫܠܺܝ̈ܚܶܐ ܩܰܕܺܝ̈ܫܶܐ ܕܺܝܠܶܗ ܡܶܛܽܠ ܡܰܐܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ ܗ̇ܰܘ ܕܰܐܓܶܢ ܘܰܫܪܳܐ ܥܠܰܝܗܽܘܢ ܒܥܶܠܺܝܬܐ ܘܰܡܠܐܴ ܐܶܢܽܘܢ ܡ̣ܶܢ ܢܽܘܗܪܳܐ ܦܰܐܝܳܐ ܕܺܝܕܰܥܬܳܐ ܕܺܝܠܶܗ: ܡ̣ܶܢ ܡܰܠܦܳܢܽܘܬܳܐ ܚܰܬܺܝܬܬܳܐ ܕܺܝܠܶܗ ܡܫܰܡܠܳܝܬܳܐ ܘܚܰܟܶܡ ܪ̈ܶܥܝܳܢܶܐ ܕܺܝܠܗܽܘܢ ܒܣܽܘ̈ܟܳܠܐܷ ܡܥܰܠܰܝ̈ܳܐ: ܘܰܐܢܗܰܪ ܡܰܕܥܰܝ̈ܗܽܘܢ ܒܬܶܐܘܳܪܺܝܰܐ ܕܚܶܟܡܬܳܐ ܪܺܝܫܳܝܬܳܐ ܘܗܰܕܺܝ ܐܶܢܽܘܢ ܒܢܽܘܗܪܳܐ ܕܺܝܕܰܥܬܶܗ: ܠܘܳܬ ܟܳܪܽܘܙܽܘܬܳܐ ܕܰܣܒܰܪܬܳܐ ܐܶܘܢܓܶܠܳܝܬܳܐ: ܘܝܰܗܒ ܒܺܐܝܕܰܝ̈ܗܽܘܢ ܩܠܺܝ̈ܕܶܐ ܕܪܰܘܡܳܐ ܘܟܽܠܗܽܘܢ ܥܰܡ̈ܡܶܐ ܕܰܒܣܰܘ̈ܦܶܝܗ̇ ܕܟܽܠܳܗ̇ ܒܪܺܝܬܳܐ: ܘܡܶܛܽܠ ܗܳܕܶܐ ܟܰܕ ܠܝܰܘܡܳܐ ܗܳܢܳܐ ܩܰܕܺܝܫܳܐ ܘܰܡܥܰܠܝܳܐ ܕܦܰܢܛܺܝܩܽܘܣܛܺܝ ܡܥܰܕܥܕܺܝܢܰܢ ܘܠܰܦܪܽܘܬܶܣܡܺܝܰܐ ܐܰܘܟܺܝܬ ܫܽܘܘܕܳܝܳܐ ܕܰܒܪܳܐ ܡܫܺܝܚܳܐ ܒܡܰܕ̈ܥܶܐ ܕܬܰܪ̈ܥܝܳܬܰܢ ܚܳܙܶܝܢܰܢ: ܘܰܠܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܐ ܕܡ̣ܶܢ ܠܘܳܬܳܟ ܐܠܰܗܳܐ ܐܰܒܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܡܶܫܬܰܘܕܥܺܝܢܰܢ: ܘܰܕܡܶܢܳܟ ܐܰܒܳܐ ܡܬܽܘܡܳܝܳܐ ܢܰܦ̇ܶܩ ܘܡ̣ܶܢ ܒܪܳܐ ܐܺܝܬܝܳܝܳܐ ܢܳܣ̇ܶܒ: ܘܰܫܘܶܐ ܒܽܐܘܣܺܝܰܐ ܘܒܰܡܬܽܘܡܳܝܽܘܬܳܐ ܘܒܺܐܝܬܽܘܬܳܐ ܡܗܰܝܡܢܺܝܢܰܢ: ܝܰܘܡܳܢܳܐ ܓܶܝܪ ܠܘܰܥܕܳܐ ܛܶܠܳܢܳܝܳܐ ܕܫܳܒܽܘܥܳܐ ܗ̇ܰܘ ܕܰܒܝܰܕ ܡܽܘܫܶܐ ܐܶܬܝܰܠܰܦ ܡܫܰܡܠܶܝܢܰܢ: ܐܶܠܐܴ ܥܺܐܕܳܐ ܡܶܬܗܰܘܢܳܢܳܐ ܘܶܐܘܢܓܶܠܺܝܰܐ ܗ̇ܰܘ ܕܰܒܝܰܕ ܫܽܘ̈ܟܳܢܶܐ ܦܰܐܝ̈ܳܐ ܕܦܰܪܰܩܠܺܝܛܳܐ ܡܚܰܓܶܝܢܰܢ: ܝܰܘܡܳܢܳܐ ܠܳܘܬ ܡܰܓܕܠܐܴ ܕܰܒܒܰܠܐܱܢܺܝ ܒܳܒܶܠܳܝܬܳܐ ܚܳܙܶܝܢܰܢ ܕܡܶܬܗܓܶܡ: ܐܶܠܐܴ ܡܰܓܕܠܐܴ ܡܶܬܝܰܕܥܳܢܳܐ ܥܺܕܬܳܐ ܩܰܕܺܝܫܬܳܐ ܗ̇ܳܝ ܕܡܶܬܒܰܢܝܳܐ ܒܡܰܚܬܬܳܐ ܕܪܽܘܚܳܐ ܦܰܪܰܩܠܺܝܛܳܐ: ܝܰܘܡܳܐ ܫܠܺܝ̈ܚܶܐ ܩܰܕܺܝ̈ܫܶܐ ܐܶܫܬܰܡܠܺܝܘ ܒܫܽܘ̈ܟܳܢܶܐ ܡܩܰܕ̈ܫܳܢܶܐ ܘܶܐܬܢܰܗܰܪܘ ܡܰܕܥܰܝ̈ܗܽܘܢ ܕܰܢܡܰܠܠܽܘܢ ܒܠܶܫܳܢ̈ܶܐ ܚܰܕ̈ܬܶܐ ܬܶܕܡܪ̈ܳܬܳܐ ܕܰܐܠܳܗܳܐ: ܝܰܘܡܳܢܳܐ ܥܶܠܺܝܬܳܐ ܢܳܗܪܳܐ ܒܢܽܘܗܪܳܐ ܡܰܢܗܪܳܢܳܐ ܕܡ̣ܶܢ ܙܰܗܪ̈ܺܝܪ̈ܶܐ ܐܠܰܗܳܝ̈ܶܐ: ܫܶܕܬܳܐ ܡܶܬܬܰܙܠܓܳܐ ܘܡܶܬܬܰܨܡܚܳܐ ܡܰܐܪ̈ܙܳܢܘܳܬܳܐ ܕܰܣܒܰܪܬܳܐ ܐܠܰܗܳܝܬܳܐ: ܝܰܘܡܳܢܳܐ ܢܚܰܕܽܘܢ ܢܒܺܝ̈ܶܐ ܒܐܪ̈ܳܙܰܝܗܽܘܢ ܕܪܽܘܚܶܗ ܕܡܳܪܝܳܐ ܡܰܠܠܰܬ݀ ܒܓܽܘܕܳܐ ܗ̇ܳܝ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܝܽܘܐܶܝܠ ܢܒܺܝܳܐ ܢܙܺܝܥ ܡܶܢ̈ܰܝ ܩܺܝܬܳܪܶܗ ܕܗܳܐ ܒܢܰܝ̈ܳܐ ܕܰܓܒ̣ܳܐ ܪܽܘܚܳܐ ܩܰܕܺܝܫܳܐ  ܡܶܬܢܰܒܶܝܢ ܗܘܰܘ ܒܪܽܘܚܳܐ ܦܰܪܰܩܠܺܝܛܳܐ: ܝܰܘܡܳܢܳܐ ܢܕܽܘܨ ܐܶܫܰܥܝܳܐ: ܝܰܘܡܳܢܳܐ ܢܶܪܘܰܙ ܐܶܪܰܡܝܳܐ ܕܗܳܐ ܪܽܘܚܳܐ ܩܰܕܺܝܫܳܐ ܗ̇ܰܘ ܕܶܐܥܒܶܕ ܒܗܽܘܢ ܒܕܶܡ̈ܘܳܬܳܐ ܗܳܐ ܢܰܗܺܝܪܳܐܝ̣ܬ ܕܠܐܴ ܬܰܚܦܺܝܬܳܐ ܒܰܫܠܺܝ̈ܚܶܐ ܩܰܕܺܝ̈ܫܶܐ ܕܰܥܠܰܘܗܝ ܡܰܠܶܠܘ: ܓܰܡܰܪ ܠܰܫܠܺܝ̈ܚܶܐ ܒܥܶܠܺܝܬܳܐ: ܝܰܘܡܳܢܳܐ ܡܽܘܫܶܐ ܢܒܺܝܳܐ ܘܫܰܪܟܳܐ ܕܰܢܒܺܝ̈ܶܐ ܚܰܒܪ̈ܰܘܗܝ ܪܳܘܙܺܝܢ ܘܰܦܨܺܝܚܺܝܢ: ܕܪܽܘܚܳܐ ܩܰܕܺܝܫܳܐ ܗ̇ܰܘ ܕܒܰܡ̈ܢܰܘܳܢ ܡܢܰܘ̈ܳܢ ܚܰܘܺܝ ܠܗܽܘܢ ܕܶܡܘ̈ܳܬܶܗ ܕܰܒܪܳܐ ܕܗܳܐ ܓܰܠܝܳܐܝ̣ܬ ܠܟܽܠ ܒܣܰܪ ܫܰܘܕܰܥ ܝܰܘܡܳܢܳܐ ܐ̱ܪܳܙܳܐ ܫܒܺܝܚܳܐ ܕܰܬܠܺܝܬܳܝܽܘܬܳܐ ܡܫܰܒܰܚܬܳܐ ܘܠܐܴ ܡܶܬܕܰܪܟܳܢܺܝܬܳܐ ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ ܐܠܰܗܰܢ ܗ̇ܰܘ ܕܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܘܕܺܝܠܳܝ̈ܳܬܳܐ ܡܶܬܺܝܕܰܥ ܘܒܰܠܚܽܘܕܳܝܽܘܬ ܪܺܝܫܳܢܽܘܬܳܐ ܡܳܪܳܢܳܝܬܳܐ ܡܶܬܬܰܘܕܶܐ: ܐܰܝܟܰܢܳܐ ܕܰܬܫܰܟܶܢ ܠܰܢ ܒܥܺܐܕܳܐ ܗܳܢܳܐ ܩܰܕܺܝܫܳܐ ܡܰܐܓܢܳܢܽܘܬܳܐ ܕܛܰܝܒܽܘܬܳܐ ܘܰܬܚܰܕܶܬ ܬܰܪ̈ܥܝܳܬܳܐ ܘܡܰܕ̈ܥܶܐ ܕܺܝܠܰܢ ܒܚܰܣܝܽܘܬܳܐ ܘܩܰܕܺܝܫܽܘܬܳܐ ܕܺܝܠܳܟ: ܘܰܡܫܰܟܶܢ ܐܰܢ̱ܬ ܠܰܢ ܫܰܝܢܳܐ ܐܰܡܺܝܢܳܐ: ܘܰܫܠܳܡܳܐ ܡܚܰܕܝܳܢܳܐ ܘܙܳܓܰܪ ܐܰܢ̱ܬ ܡܶܢܰܢ ܠܟܽܠ ܡܰܪ̈ܕܘܳܬܳܐ ܘܰܡܫܺܝܡܳܢ̈ܳܝܳܬܳܐ ܕܰܒܝܰܕ ܚܛܳܗܰܝ̈ܢ ܡܶܬܬܰܝ̈ܬܝܳܢ ܥܠܰܝܢ: ܘܟܰܕ ܚܳܕܶܝܢܰܢ ܘܪܳܘܙܺܝܢܰܢ ܒܣܰܒܪܳܐ ܕܡܽܘ̈ܠܟܳܢܰܝܟ ܢܫܰܡܠܐܷ ܠܥܺܐܕܰܝ̈ܟ ܡܳܪ̈ܳܢܳܝܶܐ ܒܩܰܕܺܝܫܽܘܬܳܐ ܘܰܒܕܽܘܒܳܪ̈ܶܐ ܕܰܡܪܰܥܶܝܢ ܠܳܟ: ܘܢܶܫܬܘܶܐ ܟܽܠܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܠܪ̈ܰܚܡܶܐ ܥܰܬܺܝܪ̈ܶܐ ܕܡܶܢܳܟ: ܘܰܚܢܰܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ: ܢܶܚܕܶܐ ܘܰܢܕܽܘܨ ܒܫܽܘܒܚܳܐ ܕܡܰܠܟܽܘܬܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

 

 

ܩܘܡܐ ܕܬܪܝܢ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ ܐܰܡܺܝܢܬܳܐ ܘܣܶܓܕܬܳܐ ܪܟܺܝܢܬܳܐ ܘܬܰܘܕܺܝܬܳܐ ܥܦܺܝܦܬܳܐ ܘܗܰܝܡܳܢܽܘܬܳܐ ܬܪܺܝܨܬܳܐ ܢܶܫܬܘܶܐ ܕܰܢܩܰܕܶܫ ܠܗ̇ܰܘ ܫܶܡܫܳܐ ܦܰܐܝܳܐ ܕܙܰܕܺܝܩܽܘܬܳܐ: ܘܨܶܡܚܳܐ ܠܐܴ ܡܶܬܕܰܪܟܳܢܳܐ: ܕܰܐܨܡܰܚ ܙܰܠܺܝ̈ܩܰܘܗܝ ܒܓܰܘ ܥܶܠܺܝܬܳܐ ܘܫܰܪܰܪ ܠܚܽܘ̈ܫܳܒܶܐ ܕܰܬܪܶܥܣܰܪ ܫܠܺܝ̈ܚܶܐ ܕܗܶܕܝܽܘܛܽܘܬܳܐ: ܘܦܰܠܶܓ ܠܶܫܳܢ̈ܶܐ ܠܰܬܪܶܥܣܰܪ ܒܽܘܪ̈ܶܐ ܕܰܡܡܰܠܠܺܝܢ ܒܝܰܕ ܡܠܰܚܡܽܘܬܳܐ ܕܰܢܦܰܚ ܒܗܽܘܢ ܘܩܰܒܶܠ ܪܽܘܚܳܐ ܩܰܕܺܝܫܳܐ ܠܗ̇ܰܘ ܚܰܟܺܝܡܳܐ ܘܛܽܘܒܬܳܢܳܐ ܕܚܰܟܶܡ ܐܶܢܽܘܢ ܠܬܰܠܡܺܝ̈ܕܰܘܗܝ ܘܶܐܡܰܪ ܠܗܽܘܢ ܕܦܽܘܩܘ ܠܐܱܪܒܰܥ ܦܶܢ̈ܝܳܬܳܐ ܘܰܐܟܪܶܙܘ ܘܰܠܥܰܡ̈ܡܶܐ ܗܰܝܡܳܢܽܘܬܳܐ ܕܰܫܪܳܪܳܐ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܫܶܡܫܳܐ ܦܰܐܝܳܐ ܘܢܽܘܗܪܳܐ ܠܐܴ ܡܶܙܕܰܟܝܳܢܳܐ ܗ̇ܰܘ ܕܡ̣ܶܢ ܚܰܝܠܰܘ̈ܳܬܳܐ ܡܰܠܐܱܟܳܝ̈ܶܐ ܘܢܽܘܪ̈ܳܢܳܝܶܐ ܡܶܬܒܰܪܰܟ ܘܡܶܬܗܰܠܰܠ ܘܡܶܬܩܰܕܰܫ: ܘܡܶܛܽܠ ܕܰܨܒܳܐ ܕܰܠܘܳܬܰܢ ܢܶܬܬܰܚܬܶܐ ܘܢܶܚܠܽܘܛ ܝܳܬܶܗ ܥܰܡ ܓܒܺܝܠܬܰܢ ܘܰܢܚܰܕܶܬ ܨܰܠܡܗ ܕܥܰܡܰܢ: ܡ̣ܶܢ ܡܒܰܪܰܟܬܳܐ ܘܫܰܘܝܰܬ݀ ܠܛܽܘ̈ܒܶܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܩܰܒܶܠ ܘܶܐܬܺܝܠܶܕ ܒܶܣܪܳܢܳܐܝ̣ܬ ܘܰܓܡܰܪ ܗܳܠܶܝܢ ܕܰܒܗܽܘܢ ܐܶܬܦܪܶܩܢܰܢ: ܝܰܠܕܳܐ ܘܰܥܡܳܕܳܐ ܘܚܰܫܳܐ ܘܰܙܩܺܝܦܳܐ ܘܡܰܘܬܳܐ ܘܰܩܒܽܘܪܬܳܐ ܘܰܩܝܳܡܬܳܐ ܡܫܰܒܰܚܬܳܐ: ܘܟܰܕ ܨܒܐ ܕܰܠܘܳܬ ܐܰܒܽܘܗܝ ܒܫܽܘܒܚܳܐ ܢܶܣܬܰܠܰܩ: ܘܢܰܣܶܩ ܥܰܡܶܗ ܠܰܫܡܰܝܐ ܠܨܰܠܡܳܐ ܡܰܠܟܳܝܳܐ ܠܰܒܢ̈ܰܝ ܐ̱ܪܳܙܶܗ ܠܛܽܘܪ ܙܰܝ̈ܬܶܐ ܟܰܢܶܫ ܘܡܰܘܗ̈ܒܳܬܳܐ ܠܗܽܘܢ ܫܰܟܶܢ: ܘܰܢܦܰܚ ܒܗܽܘܢ ܪܽܘܚܶܗ ܩܰܕܺܝܫܳܐ ܘܶܐܡ̣ܰܪ: ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̈ܡܶܐ ܕܢܶܗܘܽܘܢ ܚܰܕ ܥܰܡܳܐ ܓܰܒܝܳܐ ܕܰܚܒܺܝܫ ܒܰܡܨܺܝܕܬܳܐ ܐܶܘܢܓܶܠܳܝܬܳܐ ܐܰܢ̱ܬܽܘܢ ܕܶܝܢ ܒܰܡܕܺܝܢ̱ܬܳܐ ܐܽܘܪܫܠܶܡ ܩܰܘܰܘ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܟܽܘܢ ܪܽܘܚܳܐ ܦܰܪܰܩܠܺܝܛܳܐ: ܡ̣ܶܢ ܠܘܳܬ ܐܰܒܳܐ ܗ̣ܽܘ ܢܗܰܕܶܐ ܘܢܰܢܗܰܪܟܽܘܢ ܘܰܢܚܰܟܶܡܟܽܘܢ ܒܡܰܘ̈ܗܒܳܬܳܐ ܫܒܺܝ̈ܚܳܬܳܐ: ܘܶܐܢ ܐܶܢܳܐ ܠܐܴ ܐܳܙܶܠ ܐ̱ܢܳܐ ܠܘܳܬ ܐܰܒܳܐ ܦܰܪܰܩܠܺܝܛܳܐ ܠܐܴ ܐܳܬܶܐ ܠܘܳܬܟܽܘܢ: ܘܟܰܕ ܗ̣ܽܘ ܡܡܰܠܶܠ ܗܘܳܐ ܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܐܶܬܚܛܶܦ ܡܶܢܗܽܘܢ ܘܰܣܠܶܩ ܠܰܫܡܰܝܳܐ ܘܺܝܬܶܒ ܥܰܠ ܬܪܽܘܢܳܘܣ ܕܫܽܘܒܚܶܗ ܡ̣ܶܢ ܝܰܡܺܝܢܳܐ ܕܫܳܠܽܘܚܶܗ: ܘܗ̣ܶܢܽܘܢ ܕܝܢ ܫܠܺܝ̈ܚܶܐ ܩܰܕܺܝ̈ܫܶܐ ܒܥܶܠܺܝܬܳܐ ܒܰܡܕܺܝܢ̱ܬܳܐ ܐܽܘܪܫܠܶܡ ܩܳܝܡܺܝܢ ܗܘܰܘ ܟܰܕ ܚܳܝܪܝܢ ܕܢܶܫܬܰܠܰܡ ܠܘܳܬܗܽܘܢ ܗ̇ܰܘ ܫܽܘܘܕܳܝܳܐ ܕܰܒܪܳܐ ܫܰܪܺܝܪܳܐ: ܒܥܺܐܕܳܐ ܕܶܝܢ ܪܰܒܳܐ ܕܦܰܢܛܺܝܩܳܘܣܛܺܝ ܘܟܰܕ ܗ̣ܶܢܽܘܢ ܫܠܺܝ̈ܚܶܐ ܒܥܶܠܺܝܬܳܐ ܝܳܬܒܺܝܢ ܗܘܰܘ ܘܡ̣ܶܢ ܫܶܠܝܳܐ ܫܠܺܝ̈ܚܐ ܪܽܘܚܳܐ ܩܰܕܺܝܫܳܐ ܐܰܓܶܢ ܥܠܰܝܗܽܘܢ ܫܟܶܢܘ: ܝܰܘܡܳܢܳܐ ܬܰܠܡܺܝ̈ܕܶܐ ܩܰܕܺܝ̈ܫܶܐ ܒܚܶܟ̈ܡܳܬܳܐ ܐܠܰܗܳܝ̈ܳܬܳܐ ܐܶܬܢܰܗܰܪܘ ܘܰܒܡܰܡܠܠܐܴ ܕܟܽܠܗܽܘܢ ܥܰܡ̈ܡܶܐ ܐܶܬܚܰܟܰܡܘ: ܝܰܘܡܳܢܳܐ ܝܽܘ̈ܕܳܝܶܐ ܪ̈ܰܫܺܝܥܶܐ ܒܶܐܒܠܐܴ ܝܳܬܒܺܝܢ ܗܘܰܘ: ܟܰܕ ܚܳܙܝܶܢ ܠܗܽܘܢ ܕܺܐܝܬܰܝܗܽܘܢ ܗܘܰܘ ܗܶܕܝܽܘ̈ܛܶܐ: ܕܰܡܚܰܟܡܳܢ̈ܶܐ ܘܓܳܡܽܘܪ̈ܶܐ ܕܐ̱ܪ̈ܳܙܶܐ ܐܶܬܚܙܺܝܘ: ܝܰܘܡܳܢܳܐ ܐܶܫܬܪܺܝܘ ܫܠܺܝ̈ܚܶܐ ܩܰܕܺܝ̈ܫܶܐ ܡ̣ܶܢ ܚܰܡܪܳܐ ܐܠܰܗܳܝܳܐ ܘܡܰܘܗܰܒܬܳܐ ܕܪܽܘܚܳܐ ܗ̇ܰܘ ܡܰܥܒܶܕ ܚܰܝ̈ܶܐ ܩܰܒܶܠܘ: ܘܒܰܕܓܽܘܢ ܒܰܚܣܳܡܳܐ ܡ̣ܶܢ ܝܽܘܕܳܝ̈ܶܐ ܡܶܬܡܰܠܠܐܴ ܗܘܳܬ݀ ܕܗܳܠܶܝܢ ܐ̱ܢܳܫ̈ܳܐ ܡܶܐܪܺܝܬܳܐ ܐܶܫܬܺܝܘ ܘܰܪܘܺܝܘ: ܝܰܘܡܳܢܳܐ ܫܶܡܥܽܘܢ ܟܺܐܦܳܐ ܕܳܐܶܨ: ܘܰܐܢܕܪܶܐܘܳܣ ܘܰܒܢ̈ܰܝ ܙܰܒܕܰܝ ܘܫܰܪܟܳܐ ܕܰܫܠܺܝ̈ܚܶܐ ܟܽܠܗܽܘܢ ܒܚܰܕܽܘܬܳܐ ܘܒܰܪܘܳܙܳܐ ܩܳܝܡܺܝܢ ܗܘܰܘ ܟܰܕ ܚ̇ܳܙܶܝܢ ܕܗ̇ܰܘ ܡܶܕܶܡ ܕܰܠܗܽܘܢ ܐܶܫܬܰܘܕܝ ܒܪܳܐ ܝܺܚܺܝܕܳܝܳܐ ܐܶܫܬܰܡܠܺܝ ܠܘܳܬܗܽܘܢ ܝܰܘܡܳܢܳܐ ܒܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܘܥܶܠܺܝܬܳܐ ܗܘܳܬ݀ ܒܳܒܶܝܠ ܕܬܰܪܬܶܝܢ ܠܰܘ ܓܶܝܪ ܒܰܡܣܳܡ ܒܪܺܝܫܳܐ ܐܶܬܦܰܠܰܓܘ ܒܳܗ̇ ܠܶܫܳܢ̈ܶܐ ܐܰܝܟ ܗ̇ܳܝ ܩܰܕܡܳܝܬܳܐ ܐܶܠܐܴ ܒܚܰܝܠܶܗ ܕܪܽܘܚܳܐ ܩܰܕܺܝܫܳܐ ܐܶܬܢܰܗܪܰܬ݀: ܕܰܢܚܰܟܡܽܘܢ ܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܡܶܛܽܠ ܟܳܪܽܘܙܽܘܬܳܐ ܕܰܫܪܳܪܳܐ: ܝܰܘܡܳܢܳܐ ܢܒܺܝ̈ܶܐ ܚܳܕܶܝܢ ܕܓܶܠܝܳܢܰܝ̈ܗܽܘܢ ܒܐܪܳܙܳܐ ܐܶܫܬܰܠܰܡܘ: ܝܰܘܡܳܢܳܐ ܝܺܗܽܘܕܳܐ ܣܟܰܪܝܽܘܛܳܐ ܒܒܶܗܬܬܳܐ ܩܳܐܶܡ ܟܰܕ ܚܳܙܶܐ ܠܰܫܠܺܝ̈ܚܶܐ ܩܰܕܺܝ̈ܫܶܐ ܚܰܒܪ̈ܰܘܗܝ ܕܡܶܫܬܰܚܠܦܺܝܢ ܘܡܶܬܢܰܗܪܺܝܢ ܡܰܕܥܰܝ̈ܗܽܘܢ: ܝܰܘܡܳܢܳܐ ܢܶܠܒܰܫ ܒܶܗܬܬܳܐ ܗ̇ܰܘ ܙܺܐܦܳܢܳܐ ܕܟܰܕ ܒܚܺܐܪܽܘܬܳܐ ܗ̇ܳܝ ܕܡܶܢܶܗ ܐܶܬܢܰܣܒܰܬ݀ ܬܶܫܡܫܬܶܗ ܘܠܐܱܚܪܺܢܳܐ ܕܶܝܢ ܐܶܬܝܰܗܒܰܬ݀: ܝܰܘܡܳܢܳܐ ܢܕܽܘܨ ܡܰܬܺܝܰܐ ܕܰܚܠܳܦ ܣܟܰܪܝܽܘܛܳܐ ܥܰܠ: ܘܩܰܒܶܠ ܘܺܝܪܶܬ ܟܽܘܡܪܽܘܬܶܗ: ܘܰܡܠܺܝ ܕܽܘܟܰܬ݀ ܫܠܺܝܚܽܘܬܶܗ ܝܰܘܡܳܢܳܐ ܢܶܚܕܶܐ ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܘܢܶܪܘܰܙ ܐܰܒܳܐ ܕܰܬܪܶܥܣܰܪ ܫܰܒ̈ܛܶܐ: ܕܗ̇ܳܢܽܘܢ ܕܩܰܒܠܽܘܗ̇ ܠܕܽܘܟܬܶܗ: ܘܰܗܘܰܘ ܡܰܠܟ̈ܶܐ ܘܟܳܗ̈ܢܶܐ ܘܰܢܒܺܝ̈ܶܐ: ܝܰܘܡܳܢܳܐ ܢܕܽܘܨ ܐܶܫܰܥܝܳܐ ܘܢܶܪܘܰܙ ܐܺܝܽܘܒ: ܝܰܘܡܳܢܳܐ ܢܶܚܕܶܐ ܢܽܘܚ ܟܺܐܢܳܐ ܕܢܰܚ ܥܳܠܡܳܐ ܡ̣ܶܢ ܛܰܘܦܳܢܳܐ ܘܰܠܒܶܟܘ ܬܪܶܥܣܰܪ ܠܐܱܪܒܰܥ ܦܶܢ̈ܝܳܬܳܐ: ܘܗ̣ܶܢܽܘܢ ܐܰܢܺܝܚܽܘܗ̇ ܗܘܰܘ ܠܩܺܐܒܽܘܬܳܐ: ܘܰܠܛܰܘܦܳܢܳܐ ܕܰܚܛܺܝܬܳܐ ܒܝܰܕ ܣܒܰܪܬܶܗ ܕܰܒܪܳܐ ܘܰܒܗܽܘܢ ܐܶܬܓܰܡܪܰܬ݀: ܘܰܐܦܺܝܛܘ ܠܐܴܟܳܠܩܰܪܨܳܐ ܘܛܰܒܥܽܘܗܝ ܒܓܰܘ ܬܗܽܘ̈ܡܶܐ ܥܰܡܺܝ̈ܩܶܐ ܘܰܠܟܽܠܶܗ ܚܰܝܠܶܗ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܕܦܰܢܛܺܝܩܳܘܣܛܺܝ ܨܳܐܰܪ ܗܘܳܐ ܡܽܘܫܶܐ ܡܢܺܝܚܳܢܳܐ ܘܰܐܠܳܗܽܘܬܳܟ ܟܰܕ ܩܰܒܶܠ ܗܘܳܐ ܢܳܡܽܘܣܳܐ ܘܦܽܘܩܕ̈ܳܢܶܐ ܕܰܒܝܰܕ ܠܽܘ̈ܚܶܐ ܐܺܝܣܰܪ̈ܠܳܝܳܬܳܐ ܗ̇ܳܢܶܝ̈ܢ ܕܰܒܨܶܒܥܳܐ ܕܰܐܠܳܗܳܐ ܪܽܘܚܳܢܳܐܝ̣ܬ ܐܶܬܪ̈ܫܶܡܶܝܢ ܠܗܳܢܳܐ ܥܺܐܕܳܐ ܩܰܕܺܝܫܳܐ ܨܳܐܰܪ ܗܘܳܐ ܕܡܳܐ ܫܰܒܥܳܐ ܫܪ̈ܳܓܺܝܢ ܕܰܡܢܳܪܰܬ݀ ܩܽܘܕ̈ܫܶܐ ܒܗܽܘܢ ܡܨܰܒܬܳܐ ܗܘܳܬ݀: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܕܡܳܐ ܗ̇ܰܘ ܕܰܫܒܰܥ ܙܰܒܢܺܝ̈ܢ ܠܐܱܦ̈ܰܝ ܩܽܘܕܫܳܐ ܕܡܳܪܝܳܐ ܘܕܶܒܚܬܳܐ ܡܶܬܪܣܶܣ ܗܘܳܐ ܐ̱ܪܳܙܳܢܳܐܝ̣ܬ ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܝܶܫܽܘܥ ܒܰܪܢܽܘܢ ܒܫܰܒܥܳܐ ܟܳܗ̈ܢܶܐ ܩܳܪ̈ܝܰܝ ܩܰܪ̈ܢܳܬܳܐ ܘܩܺܐܒܽܘܬܳܐ ܥܰܠ ܐܺܝܪܺܝܚܽܘ ܡܶܬܬܢܺܝܚܳܐ ܗܘܳܬ݀: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܕܰܘܺܝܕ ܡܰܠܟܳܐ ܘܰܢܒܺܝܳܐ ܟܰܕ ܐܳܡܰܪ ܕܡܺܐܡܪܶܗ ܕܡܳܪܝܳܐ ܡܺܐܡܪܰܐ ܗ̱̇ܘ ܕܰܟܝܳܐ: ܘܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ: ܘܰܡܕܰܟܰܝ ܚܰܕ ܒܫܰܒܥܳܐ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܠܶܝܳܐ ܢܒܺܝܳܐ ܟܰܕ ܐܳܡ̇ܰܪ ܠܐܷܠܺܝܫܳܥ ܬܰܠܡܺܝܕܶܗ ܕܰܢܚܽܘܪ ܠܐܘܪܚܳܐ ܕܝܰܡܳܐ ܒܡܰܪܟܰܒܬܳܐ ܘܓܺܝ̈ܓܠܐܷ ܕܢܽܘܪܳܐ ܣܠܶܩ ܠܰܫܡܰܝܳܐ ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܠܶܝܫܳܥ ܢܒܺܝܳܐ ܟܰܕ ܐܳܡܰܪ ܠܗܰܘ ܓܰܪܒܳܢܳܐ ܢܶܥܡܳܢ ܕܰܫܒܰܥ ܙܰܒܢܺܝ̈ܢ ܢܺܐܙܰܠ ܢܶܣܚܶܐ ܒܝܽܘܪܕܢܳܢ ܢܰܗܪܳܐ ܘܢܶܬܕܰܟܶܐ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܒܝܰܕ ܫܒܰܥ ܡܝܰܩܪ̈ܳܬܳܐ ܟܰܕ ܪܽܘܚܶܗ ܒܡܰܥܒܕܳܢܽܘܬܳܐ ܕܪܽܘܚܳܐ ܩܰܕܺܝܫܳܐ: ܐܶܬܺܝܗܶܒ ܢܳܡܽܘܣܳܐ ܚܰܕܬܳܐ ܕܗ̣ܽܘ ܐܶܘܢܓܶܠܝܽܘܢ ܩܰܕܺܝܫܳܐ ܠܰܟܪ̈ܺܝܣܛܝܳܢܶܐ ܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ: ܘܗܳܫܳܐ ܡܦܺܝܣܺܝܢܰܢ ܠܳܟ ܐܳܘ ܡܶܠܬܳܐ ܐܠܰܗܳܐ: ܒܗܳܢܳܐ ܥܺܐܕܳܐ ܩܰܕܺܝܫܳܐ ܕܦܰܢܛܺܝܩܽܘܣܛܺܝ ܕܬܶܐܫܽܘܕ ܥܠܰܝܢ ܪܽܘܚܳܐ ܩܰܕܺܝܫܳܐ ܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ: ܘܢܶܗܘܶܐ ܠܰܢ ܢܽܘܪܳܐ ܡܰܘܩܕܳܢܺܝܬܳܐ ܕܟܽܠܶܗ ܝܰܥܪܳܐ ܕܰܚܛܺܝܬܳܐ: ܐܰܝܟܰܢܳܐ ܕܒܶܗ ܒܪܽܘܚܳܐ ܩܰܕܺܝܫܳܐ ܡܶܬܢܰܗܪܺܝܢܰܢ ܢܶܫܬܘܶܐ ܕܰܢܩܰܪܶܒ ܦܺܐܪ̈ܶܐ ܪ̈ܽܘܚܳܢܳܝܶܐ ܘܰܕܟܰܝ̈ܳܐ ܕܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܫܒܺܝ̈ܚܳܬܳܐ ܕܰܡܪܰܥܶܝܢ ܠܳܟ: ܟܰܕ ܗܳܘܶܐ ܐܰܢ̱ܬ ܠܥܺܕܬܳܐ ܩܰܕܺܝܫܬܳܐ ܡܢܰܛܪܳܢܳܐ ܡ̣ܶܢ ܟܽܠ ܩܺܝܢܕܽܘ̈ܢܽܘ ܘܰܠܪ̈ܳܥܰܘܳܬܳܐ ܕܺܝܠܳܗ̇ ܘܰܠܓܰܐܝ̈ܳܐ ܘܰܡܫܰܒ̈ܚܶܐ ܡܓܰܢ̱ܒܪ̈ܳܢܶܐ ܕܰܠܟܳܗ̈ܢܶܝܗ̇ ܘܠܰܡܫܰܡ̈ܫܳܢܶܝܗ̇ ܡܙܰܗܝܳܢܳܐ ܠܣܳܒ̈ܶܐ ܘܠܰܡܚܺܝ̈ܠܐܷ ܡܣܰܡܟܳܢܳܐ: ܠܰܥܠܰܝ̈ܡܶܐ ܘܠܰܛܠܳܝ̈ܶܐ ܡܢܰܟܦܳܢܳܐ: ܠܫܰܒܪ̈ܶܐ ܘܰܠܝܰܬܡ̈ܶܐ ܡܪܰܒܝܳܢܳܐ: ܠܐܱܪ̈ܡܠܳܬܳܐ ܗܘܺܝ ܩܳܝܽܘܡܳܐ ܘܰܡܬܰܪܣܝܳܢܳܐ ܘܰܗܘܺܝ ܠܰܟܪ̈ܺܝܗܶܐ ܐܳܣܝܳܐ ܘܠܐܱܣܺܝܪ̈ܶܐ ܥܳܕܽܘܪܳܐ: ܠܛܳܥܰܝ̈ܳܐ ܡܦܰܢܝܳܢܳܐ: ܠܐܱܒܺܝ̈ܕܶܐ ܡܟܰܢܫܳܢܳܐ: ܠܪ̈ܰܚܺܝܩܶܐ ܡܰܝܬܝܳܢܳܐ: ܠܩܰܪ̈ܺܝܒܶܐ ܡܢܰܛܪܳܢܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܡܚܰܣܝܳܢܳܐ: ܐܰܝܟܰܢܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܕܶܢܚܳܐ ܫܰܦܝܳܐ ܘܕܰܟܝܳܐ ܐܠܰܗܳܐ: ܪܽܘܚܳܐ ܦܰܪܰܩܠܺܝܛܳܐ ܕܰܐܢܗܰܪ ܠܰܫܠܺܝ̈ܚܶܐ ܩܰܕܺܝ̈ܫܶܐ ܒܫܽܘ̈ܟܳܢܶܐ ܕܺܝܠܳܗ ܢܽܘܪ̈ܳܢܳܝܶܐ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܕܰܟܳܐ ܠܚܽܘ̈ܫܳܒܰܝܢ ܡܶܢܟܽܠ ܣܰܢ̈ܝܳܬܳܐ: ܐܰܝܟܰܢܳܐ ܕܟܰܕ ܒܙܰܗܪܺܝܪ̈ܶܐ ܕܪܽܘܚܳܐ ܦܰܪܰܩܠܺܝܛܳܐ ܡܶܬܢܰܗܪܺܝܢܰܢ ܘܰܒܚܰܕܽܘܬܳܐ ܘܒܰܦܨܺܝܚܽܘܬܳܐ ܢܫܰܡܠܐܷ ܠܥܺܐܕܳܐ ܗܳܢܳܐ ܕܡܰܚܰܬܬܳܐ ܕܪܽܘܚܳܐ ܩܰܕܺܝܫܳܐ: ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ ܠܰܬܠܺܝܬܳܝܽܘܬܳܐ ܡܫܰܒܰܚܬܳܐ ܘܰܣܓܺܝܕܬܳܐ ܘܰܚܕܳܝܽܘܬܳܐ ܠܐܴ ܡܶܬܦܰܠܓܳܢܺܝܬܳܐ: ܪܽܘܡܪܳܡܳܐ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܐܰܒܳܐ ܕܡܰܠܶܠ ܒܰܢܒܺܝ̈ܶܐ: ܘܰܒܪܳܐ ܕܶܐܬܟܪܶܙ ܒܰܫܠܺܝ̈ܚܶܐ: ܘܪܽܘܚܳܐ ܕܚܰܟܶܡ ܠܬܰܠܡܺܝ̈ܕܶܐ ܐܰܒܳܐ ܝܳܠܽܘܕܳܐ ܘܠܐܴ ܝܺܠܺܝܕܳܐ: ܘܰܒܪܳܐ ܝܺܠܺܝܕܳܐ ܘܠܐܴ ܝܳܠܽܘܕܳܐ: ܘܪܽܘܚܳܐ ܩܰܕܺܝܫܳܐ ܢܳܦܽܘܩܳܐ ܘܢܳܣܽܘܒܳܐ: ܕܡ̣ܶܢ ܐܰܒܳܐ ܢܳܦܶܩ ܡܬܽܘܡܳܐܝ̣ܬ: ܘܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܐܰܓܶܢ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܠܐܴ ܡܰܘܩܕܳܢܳܐܝ̣ܬ: ܘܚܰܟܶܡ ܐܶܢܽܘܢ ܒܝܽܘܠܦܳܢܶܗ ܢܰܗܺܝܪܳܐܝ̣ܬ ܐܰܝܟܰܢܳܐ ܕܰܣܒܰܪܬܶܗ ܢܰܟܪܙܽܘܢ ܠܟܽܠ ܥܰܡ̈ܡܺܝܢ ܒܠܶܫܳܢܰܝ̈ܗܽܘܢ ܘܰܫܪܳܪܶܗ ܕܶܐܘܢܓܶܠܝܽܘܢ ܩܰܕܺܝܫܳܐ ܢܣܰܒܪܽܘܢ ܠܟܽܠ ܐܰܝܟ ܣܶܦܪ̈ܰܝܗܽܘܢ ܕܠܶܗ ܘܰܚܢܰܢ ܢܶܣܓܽܘܕ ܣܶܓܕܬܳܐ ܚܕܰܬܳܐ ܕܟܽܠ ܬܶܗܪ̈ܺܝܢ: ܘܰܢܩܰܪܶܒ ܬܰܘܕܺܝܬܳܐ ܒܟܽܠ ܠܶܫܳܢܺܝ̈ܢ: ܒܗܳܢܳܐ ܥܶܕܳܢܳܐ ܕܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ܀

 

 

 

ܣܕܪܐ

 

 

 

ܕܨܰܦܪܳܐ ܛܰܪܩܳܐ ܐ̱ܪܳܙܳܐ ܪܰܒܳܐ ܘܰܡܥܰܠܝܳܐ ܘܰܡܠܐܷ ܬܶܕܡܽܘܪܬܳܐ ܕܥܺܐܕܳܐ ܩܰܕܺܝܫܐ ܕܦܰܢܛܺܝܩܽܘܣܛܺܝ ܥܰܡ ܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܡܥܰܕܥܕܺܝܢܰܢ ܝܰܘܡܳܢܳܐ: ܗ̇ܰܘ ܕܚܰܡܫܺܝܢܳܝܳܐ ܡ̇ܰܢ ܐܺܝܬܰܘܗܝ: ܘܡ̣ܶܢ ܫܰܒܥܳܐ ܫܳܒܽܘ̈ܥܶܐ ܕܝܰܘ̈ܡܳܬܳܐ ܗܳܠܶܝܢ ܕܗܳܫܳܐ ܡܫܰܡܠܶܝܢܰܢ ܡ̣ܶܢ ܩܝܳܡܬܳܐ ܦܳܪܽܘܩܳܝܬܳܐ: ܘܰܥܕܰܡܳܐ ܠܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܕܝܰܘܡܳܢܳܐ ܡܚܰܓܶܝܢܰܢ: ܡܶܬܟܰܢܰܫ ܠܰܢ ܚܰܡܫܺܝܢ ܝܰܘ̈ܡܳܬܳܐ ܗܳܠܶܝܢ ܕܗܳܫܳܐ ܡܫܰܡܠܶܝܢܰܢ ܒܝܰܕ ܫܽܘܘ̈ܕܳܥܶܐ ܘܛܽܘ̈ܦܣܶܐ ܐ̱ܪ̈ܳܙܳܢܳܝܶܐ: ܠܗܳܢܳܐ ܝܰܘܡܳܐ ܓܶܝܪ ܡܫܰܘܕܰܥ ܗܘܳܐ ܐ̱ܪܳܙܳܐ ܕܫܰܒܥܳܐ ܐܠܰܦܺܝ̈ܢ ܕܡ̣ܶܢ ܫܽܘܪܳܝܳܐ ܕܰܒܪܺܝܬܳܐ ܘܰܥܕܰܡܳܐ ܠܫܽܘܠܳܡܳܐ: ܬܽܘܒ ܕܶܝܢ ܘܐ̱ܪܳܙ ܫܰܒܥܳܐ ܫܳܒܽܘ̈ܥܶܐ ܕܫܰܢ̱ܬܳܐ ܕܡܶܬܟܰܪܟܳܢܽܘܬܳܗ̇ ܕܓܺܝܓܠܐܴ: ܘܫܰܒܥܳܐ ܝܰܘ̈ܡܺܝܢ ܕܰܥܠܶܝܗ̇ ܗܳܦܟܳܐ ܡܰܪܕܺܝܬܶܗ ܕܣܰܗܪܳܐ ܘܰܕܙܰܒ̈ܢܶܐ ܘܥܶܕ̈ܳܢܶܐ: ܗܳܠܶܝܢ ܕܳܐܦ ܒܡܶܢܝܳܢܳܐ ܡܫܰܡܠܶܝܢܰܢ ܟܰܕ ܡܶܬܢܰܣܒܺܝܢ ܠܡܰܘܠܳܕܳܐ ܕܫܰܒܥܺܝܢ ܡܰܘ̈ܠܳܕܺܝܢ: ܟܰܕ ܡܫܰܘܕܥܺܝܢ ܠܫܰܒܥܺܝܢ ܫܰܪ̈ܒܳܬܳܐ ܕܡ̣ܶܢ ܐܳܕܳܡ ܘܰܥܕܰܡܳܐ ܠܡܳܪܰܢ: ܫܰܒܥܺܝܢ ܬܽܘܒ ܠܶܫܳܢ̈ܶܐ ܕܥܰܡ̈ܡܶܐ ܕܰܒܗܽܘܢ ܡܶܫܬܰܒܰܚ ܡܳܪܝܳܐ ܡܰܟܪܙܺܝܢ: ܗܳܟܰܢܳܐ ܐܶܬܢܰܗܰܪ ܢܒܺܝܳܐ ܐܠܰܗܳܝܳܐ ܡܽܘܫܶܐ: ܕܰܒܫܰܒܥܺܝܢ ܣܳܒ̈ܶܐ ܢܶܣܰܩ ܠܛܽܘܪܳܐ ܠܘܳܬ ܥܶܢܝܳܢܳܐ ܐܠܰܗܳܝܳܐ: ܘܰܡܩܰܒܠܳܢܽܘܬܳܐ ܟܺܝܬ ܕܦܽܘܩܕ̈ܳܢܶܐ: ܟܰܕ ܐ̱ܪ̈ܳܙܶܐ ܕܶܝܢ ܠܐܪ̈ܳܙܶܐ ܡܝܰܒܠܺܝܢ: ܫܰܒܥܺܝܢ ܡܦܰܫ̈ܩܳܢܶܐ ܗ̇ܳܢܽܘܢ ܕܰܠܕܺܝܰܬܺܝܩܺܝ ܥܰܬܺܝܩܬܳܐ ܐܰܥܒܰܪܘ ܠܘܳܬ ܥܰܡ̈ܡܶܐ ܕܰܥܬܺܝܕܺܝܢ ܗܘܰܘ ܕܰܡܗܰܝܡܢܺܝܢ ܒܶܐܘܢܓܶܠܝܽܘܢ ܕܢܶܫܬܰܪܪܽܘܢ ܘܐ̱ܪܳܙܳܐ ܕܶܝܢ ܕܫܰܒܥܺܝܢ ܡܣܰܒܪܺܝܢܰܢ ܗܘܰܘ ܘܰܗܘܰܘ ܡܣܰܒܪ̈ܳܢܶܐ ܕܰܣܒܰܪܬܳܐ ܐܶܘܢܓܶܠܳܝܬܳܐ ܐܰܟܪܶܙܘ ܫܰܒܥܺܝܢ ܬܽܘܒ ܢܰܦ̈ܫܳܢ ܥܰܠܝ̈ ܥܰܡ ܐܰܒܽܘܢ ܝܰܥܩܽܘܒ ܠܓܰܘ ܠܡܶܨܪܶܝܢ: ܘܡ̣ܶܢ ܗܳܠܶܝܢ ܣܽܘܓܳܐܐ ܐܶܬܩܰܝܰܡܘ: ܐ̱ܪܳܙܳܐ ܬܽܘܒ ܕܫܰܒܥܺܝܢ ܕܩܳܠܺܝ̈ܢ ܗܳܠܶܝܢ ܬܽܘܒ ܕܰܒܠܺܝܡ ܡܰܟܪܶܙ ܢܳܡܽܘܣܳܐ: ܠܗܳܠܶܝܢ ܬܽܘܒ ܫܰܒܥܳܐ ܫܳܒܽܘ̈ܥܶܐ ܡܰܐܪܙܳܐ ܗܘܳܬ݀ ܫܰܢ̱ܬܳܐ ܫܒܺܝܥܳܝܬܳܐ ܗ̇ܳܝ ܕܥܳܒܕܳܐ ܗܘܳܬ݀ ܚܪ̈ܽܘܪܶܐ ܦܰܐܝ̈ܳܐ ܠܥܰܒ̈ܕܶܐ ܫܒܰܥ ܙܰܒܢ̈ܳܬܳܐ ܡܶܬܦܩܶܕ ܢܶܥܡܳܢ ܐܳܪܳܡܳܝܳܐ: ܡ̣ܶܢ ܐܠܶܝܫܳܥ ܢܒܺܝܳܐ ܕܢܶܣܚܶܐ ܒܡܰܝ̈ܳܐ ܕܝܽܘܪܕܢܳܢ ܕܢܶܬܕܰܟܶܐ ܫܰܒܥܳܐ ܫܪ̈ܳܓܺܝܢ ܐܶܬܬܣܺܝܡܘ ܥܰܠ ܡܢܳܪܬܳܐ ܕܒܶܝܬ ܚܽܘܣܳܝܳܐ ܐܰܝܟ ܕܡܳܪܝܳܐ ܦܰܩܶܕ: ܒܫܰܒܥܳܐ ܥܰܡܽܘ̈ܕܝܢ ܒܰܝܬܳܐ ܕܚܶܟܡܬܳܐ ܐܶܫܬܰܡܠܺܝ: ܐܰܟܡܳܐ ܕܫܽܘܠܳܡܽܘܢ ܡܰܠܶܦ ܠܰܫܒܰܥ ܪ̈ܽܘܚܰܝ ܫܡܰܝܳܐ ܩܰܕܶܡ ܚܙܳܐ ܢܒܺܝܳܐ ܐܠܰܗܳܝܳܐ ܐܶܫܰܥܝܳܐ: ܫܒܰܥ ܓܶܝܪ ܙܰܒܢܺܝ̈ܢ ܐܶܬܟܰܪܟܰܬ݀ ܩܺܐܒܽܘܬܶܗ ܕܡܳܪܝܳܐ ܚܕܳܪ̈ܰܝ ܫܰܒܥܳܐ ܫܽܘܪ̈ܶܐ ܐܺܝܪ̈ܺܝܚܽܘܢܳܝܶܐ ܘܰܢܦܰܠܘ: ܘܰܒܫܰܒܥܳܐ ܝܰܘ̈ܡܺܝܢ ܢܣܰܒ ܝܶܫܽܘܥ ܒܰܪܢܽܘܢ ܙܳܟܘ̈ܳܬܳܐ: ܗܳܢܳܐ ܕܡܰܐܪܶܙ ܥܰܠ ܫܒܰܥ ܬܶܕܡܪ̈ܳܬܐ ܕܰܗܘ̈ܰܝ ܝܽܘܡ ܚܰܫܶܗ ܕܝܶܫܽܘܥ ܦܳܪܽܘܩܰܢ ܕܒܰܒܣܰܪ: ܘܳܐܦ ܥܰܠ ܫܒܰܥ ܡ̈ܶܠܐܷ ܕܡܰܠܶܠ ܡܳܪܰܢ ܒܰܙܩܺܝܦܳܐ: ܫܰܒܥܳܐ ܠܰܡ ܓܶܝܪ ܟܰܕ ܫܒܺܝܥܳܐܝ̣ܬ ܡܶܬܪܰܟܒܺܝܢ ܒܝܰܕ ܡܶܬܟܰܪܟܳܢܽܘܬܳܐ ܩܺܝܩܠܳܣܳܝܬܳܐ ܥܰܠ ܢܰܦܫܗܽܘܢ ܠܗܰܘ ܕܚܰܡܫܺܝܢ ܡܰܘܠܳܕܺܝ̈ܢ: ܟܰܕ ܚܰܕ ܝܰܘܡܳܐ ܚܳܣܪܺܝܢ ܠܗ̇ܰܘ ܕܡ̣ܶܢ ܥܳܠܡܳܐ ܕܰܥܬܺܝܕ ܐܰܟܚܕܳܐ ܢܳܣܒܺܝܢ ܠܶܗ ܩܰܕܺܝ̈ܫܶܐ: ܕܺܐܝܬܰܘܗܝ ܗ̣ܽܘ ܟܰܕ ܗ̣ܽܘ ܬܡܺܝܢܳܝܳܐ ܘܩܰܕܡܳܝܳܐ: ܡܰܐܠܽܘܢ ܕܶܝܢ ܘܚܰܕ ܠܐܴ ܡܶܫܬܰܪܝܳܢܳܐ: ܗ̇ܰܘ ܕܒܶܗ ܥܳܐܠܺܝܢ ܓܡܺܝܪ̈ܶܐ ܠܰܢܝ̇ܳܚܬܳܐ ܕܛܽܘ̈ܒܶܐ ܘܒܽܘ̈ܣܳܡܶܐ ܡܰܠܟܽܘ̈ܬܳܢܳܝܶܐ ܙܳܕܶܩ ܬܽܘܒ ܕܬܰܡܳܢ ܢܶܫܬܰܠܡܽܘܢ ܫܽܘܒܳܬܳܐ ܕܗܳܪܟܳܐ ܕܢܰܦ̈ܫܳܬܳܐ ܢܰܟ̈ܦܳܬܳܐ ܕܰܪ̈ܚܶܡܶܝܢ ܠܐܱܠܳܗܳܐ ܘܰܢܩܰܦ̈ܝ ܒܳܬܰܪ ܥܶܩ̈ܒܳܬܶܗ: ܐܰܝܟܳܐ ܕܶܝܢ ܕܬܶܬܺܝܗܶܒ ܡܢܳܬܳܐ ܠܫܰܒܥܳܐ ܐܳܦ ܠܰܬܡܳܢܝܳܐ ܐܰܝܟ ܕܰܐܓܽܘܪ ܒܰܪ ܝܰܩܺܝ ܡܩܰܠܗܳܢܳܐ ܡܡܰܠܶܠ ܣܬܺܝܪ̈ܳܬܳܐ ܘܰܡܛܰܫ̈ܝܳܬܳܐ ܡܒܰܕܶܩ: ܕܰܟܝ̈ܳܢ ܕܶܝܢ ܡܶܠܰܘ̈ܗܝ ܕܡܳܪܝܳܐ ܥܦܺܝ̈ܦܳܬ ܫܒܺܝܥܳܐܝ̣ܬ: ܟܰܕ ܠܫܰܒܥܳܐ ܛܶܟ̈ܣܶܐ ܥܺܕܬܳܢܳܝ̈ܶܐ ܡܛܰܦܶܣ ܐܰܝܟ ܕܳܐܦ ܫܠܺܝܚܳܐ ܐܠܰܗܳܝܳܐ ܡܦܰܫܶܩ: ܕܺܐܝܬܰܝܗܽܘܢ ܡܰܠܟ̈ܶܐ ܕܚܰܝܠܰܘ̈ܳܬܳܐ ܕܡܶܬܟܰܢܫܝܢ ܫܽܘܦܪܶܗ ܕܒܰܝܬܳܟ ܡܦܰܠܓܺܝܢ ܒܶܙܬܳܐ: ܙܰܕܺܝܩܳܐ ܡ̇ܰܢ ܫܬܺܝܬܳܐܝ̣ܬ ܡ̣ܶܢ ܐܽܘܠܨܳܢ̈ܶܐ ܘܥܳܩ̈ܳܬܳܐ ܡܶܬܦܰܨܶܐ: ܒܗ̇ܳܝ ܕܶܝܢ ܕܰܫܒܰܥ ܐܳܦܠܐܴ ܒܡܶܕܶܡ ܡܶܬܢܰܟܶܐ ܐܰܘ ܡܶܣܬܰܓܰܦ: ܠܡܰܣܟܠܳܢ̈ܶܐ ܕܶܝܢ ܠܰܘ ܫܒܺܝܥܳܐܝ̣ܬ ܒܰܠܚܽܘܕ ܐܶܠܐܴ ܘܳܐܦ ܫܒܺܝܥܳܐܝ̣ܬ ܫܒܰܥ ܡܶܫܬܒܶܩ ܠܶܗ: ܕܰܒܟܽܠܗܶܝܢ ܗܳܠܶܝܢ ܥܰܝ̈ܢܶܐ ܟܺܐܦܳܐ ܗ̇ܳܝ ܙܽܘܪܒܳܒܶܠܳܝܬܳܐ ܡܶܨܛܰܒܬܳܐ ܗܘܳܬ݀ ܟܰܕ ܒܰܬܠܺܝܬܳܝܽܘܬ ܫܳܒܽܘ̈ܥܶܐ ܡܶܬܚܣܶܠ ܡ̣ܶܢ ܕܳܢܺܝܶܐܝܠ ܢܒܺܝܳܐ ܡ̣ܶܢ ܦܰܛܒܳܓ̈ܶܐ ܕܡܰܠܟܳܐ ܟܰܕ ܒܬܰܪܣܺܝܬܳܐ ܫܚܺܝܡܬܳܐ ܕܙܰܪ̈ܥܽܘܢܶܐ ܡܶܣܬܰܝܒܰܪ: ܘܰܪܓܺܝܓܳܐ ܠܡܰܠܐܱܟ̈ܶܐ ܘܰܠܚܰܝ̈ܠܰܘܳܬܳܐ ܫܡܰܝܳܢ̈ܶܐ ܡܶܬܚܙܶܐ: ܗܳܟܰܢܳܐ ܕܶܝܢ ܘܒܰܗܦܽܘܟܝܳܐ ܫܒܺܝܥܳܝܳܐ ܕܶܐܠܺܝܳܐ ܛܰܢܳܢܳܐ ܘܰܢܒܺܝܳܐ ܡܫܰܒܚܳܐ: ܘܡܰܦܽܘܚܺܝܬܳܐ ܗ̇ܳܝ ܬܠܺܝܬܳܝܬܳܐ ܘܐ̱ܪܳܙܳܢܳܝܬܳܐ ܕܺܝܠܶܗ ܕܰܢܦܰܚ ܗܘܳܐ ܒܡܶܬܬܰܝܚܳܢܽܘܬܶܗ ܕܰܒܪܳܐ ܕܰܐܪܡܰܠܬܳܐ ܨܳܪܦܳܝܬܳܐ: ܬܽܘܒ ܕܶܝܢ ܫܽܘܒܳܥܳܐ ܫܳܘܶܐ ܒܡܶܢܝܳܢܳܐ ܕܥܰܠ ܨܠܺܝ̈ܚܶܐ ܟܰܕ ܒܢܽܘܪܳܐ ܡܫܰܕܪܰܬ݀ ܡ̣ܶܢ ܐܠܰܗܳܐ ܠܕܶܒܚܳܐ ܡܩܰܒܠܐܴ ܡܛܰܠܶܩ ܘܠܰܢܒܺܝ̈ܶܐ ܕܒܰܥܠܐܴ ܘܰܕܒܶܗܬܬܳܐ ܩܰܛܶܠ ܕܠܐܴ ܐܶܬܡܨܺܝܘ ܠܗ̇ܳܝ ܕܫܳܘܝܳܐ ܡ̣ܶܢ ܩܰܕܺܝܡܽܘܬ ܩܪܺܝܬܳܐ: ܗܳܟܰܢܳܐ ܕܶܝܢ ܘܒܽܘܕܳܩܳܐ ܫܒܺܝܥܳܝܳܐ ܕܶܐܬܦܩܶܕ ܠܛܰܠܝܳܐ: ܘܒܰܪ ܟܽܘܢܳܝܳܐ ܫܰܘܝܳܐ ܕܶܐܠܺܝܫܳܥ ܕܰܠܘܳܬ ܒܪܳܗ̇ ܕܫܺܝܠܽܘܡܳܝܬܳܐ ܗ̇ܰܘ ܕܰܠܣܰܘܩܳܐ ܫܶܐܠܬܳܢܳܝܳܐ ܐܰܚܺܝ: ܒܗܳܢܳܐ ܕܶܝܢ ܗ̇ܰܘ ܕܒܰܫܒܺܝܥܳܝܽܘܬܳܐ ܕܶܝܢ ܕܝܰܘ̈ܡܳܬܳܐ ܡܶܫܬܰܡܠܐܷ: ܓܰܪܒܳܢܳܐ ܕܶܝܢ ܕܰܒܫܰܒܥܳܐ ܡܶܬܕܰܟܶܐ: ܗܰܝܟܠܐܴ ܕܶܝܢ ܕܰܒܕܰܐܝܟ ܗܳܠܶܝܢ ܡܶܬܚܰܕܰܬ: ܥܰܡܳܐ ܕܶܝܢ ܕܰܒܫܰܢ̱ܬܳܐ ܕܫܰܒܥܺܝܢ ܡ̣ܶܢ ܥܰܒܕܽܘܬܳܐ ܗ̇ܳܝ ܒܳܒܶܠܳܝܬܳܐ ܘܫܶܒܝܳܐ ܦܳܢܶܝܢ: ܘܣܳܠܩܺܝܢ ܠܰܡܕܺܝܢ̱ܬܳܐ ܐ̱ܪ̈ܳܙܶܐ: ܐܰܝܟܰܢܳܐ ܡ̇ܰܢ ܕܺܐܝܬ ܠܳܗ̇ ܒܰܠܚܽܘܕܳܝܽܘܬܳܐ ܕܒܰܥܣܺܝܪܳܝܽܘܬܳܐ ܘܰܒܡܶܢܝܳܢܳܐ ܕܝܰܬܺܝܪ ܓܒܶܐ ܐ̱ܪܳܙܳܐ ܕܫܰܒܥܳܐ ܢܶܬܝܰܩܰܪ: ܘܡ̣ܶܢ ܗܳܪܟܳܐ ܐܳܦ ܚܢܰܢ ܚܰܛܳܝ̈ܶܐ ܕܶܐܫܬܰܘܕܺܝܢܰܢ ܠܰܡܪܰܚܡܳܢܽܘܬܳܟ ܡܳܪܝܳܐ ܕܶܐܫܬܘܶܝܢܰܢ ܠܫܽܘܠܳܡܳܐ ܘܰܠܫܽܘܡܠܳܝܳܐ ܕܝܽܘ̈ܩܢܶܐ ܗܳܠܶܝܢ ܡܨܰܠܡܳܢ̈ܶܐ ܘܨܽܘܪ̈ܬܳܢܳܝܶܐ ܗܳܠܶܝܢ ܕܒܰܡܦܰܬܟܽܘܬܳܐ ܪܰܒܬܳܐ ܐܶܬܺܝܕܰܥܘ: ܘܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܘܟܳܪ̈ܽܘܙܶܐ ܟܰܕ ܦܰܢܛܺܝܩܽܘܣܛܺܝܢܳܐܝ̣ܬ ܟܽܠܰܢ ܡܶܬܟܰܢܫܺܝܢܰܢ: ܠܰܘ ܒܥܶܠܺܝܬܳܐ ܝܰܬܺܝܪܳܐܝ̣ܬ: ܐܶܠܐܴ ܒܬܶܐܘܳܪܺܝܰܐ ܗ̇ܳܝ ܕܪܳܡܳܐ ܡ̣ܶܢ ܟܽܠܗܶܝܢ ܗܽܘܠܳܢܳܝ̈ܳܬܳܐ ܐ̱ܪܳܙܳܢܳܐܝ̣ܬ: ܠܩܳܠܐܴ ܕܝܰܘܡܳܢܳܐ ܗܘܳܐ ܡܶܢܫܶܠܝ ܡ̣ܶܢ ܫܡܰܝܳܐ ܐܰܝܟ ܡܰܫܒܳܐ ܕܪܽܘܚܳܐ ܥܰܙܺܝܙܬܳܐ: ܘܢܶܣܬܰܟܰܠ ܠܥܶܠ ܡ̣ܶܢ ܣܽܘܟܳܝܰܢ ܐܶܬܺܝܗܶܒ ܠܰܢ: ܡܽܘܠܟܳܢܳܐ ܕܪܽܘܚܳܐ ܗ̇ܰܘ ܕܥܳܡܰܪ ܒܰܫܡܰܝ̈ܳܐ ܪ̈ܳܡܶܐ ܘܡ̣ܶܢ ܬܰܡܳܢ ܐܳܬܶܐ ܕܰܢܚܰܘܶܐ ܓܰܢ̱ܒܳܪܽܘܬܶܗ ܘܫܽܘܒܚܳܐ ܕܡܰܠܟܽܘܬܶܗ: ܟܰܕ ܣܳܓܕܺܝܢܰܢ ܘܡܰܘܕܶܝܢܰܢ ܠܰܚܙܳܬܶܗ ܕܪܽܘܚܳܐ ܕܚܺܝܠܬܳܐ ܠܐܴ ܡܣܰܝܒܪܺܝܢܰܢ ܘܰܐܟܚܕܳܐ ܢܶܒܪܽܘܟ: ܟܰܕ ܒܟܽܠܗܶܝܢ ܬܡܺܝ̈ܗܳܬܳܐ ܘܰܓܒܰܪ̈ܘܳܬܳܐ ܕܚܰܘܝܰܬ݀ ܡܳܪܽܘܬܶܗ ܡܶܫܬܰܘܕܥܺܝܢܰܢ: ܘܒܗ ܟܰܕ ܒܶܗ ܐܳܦ ܠܐܱܒܳܐ ܥܰܡܶܗ ܣܳܓܕܺܝܢܰܢ ܘܰܩܕܳܡ ܒܪܳܐ ܢܶܬܓܰܪܓܰܚ ܒܰܣܝܳܡ ܒܽܘܪ̈ܟܶܐ ܬܠܺܝܬܳܝ̈ܗܽܘܢ ܗ̇ܳܢܽܘܢ ܕܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܟܰܗܢܺܝܢ: ܟܰܕ ܡܦܺܝܣܺܝܢܰܢ ܠܳܗ̇ ܕܰܬܫܰܕܰܪ ܠܰܢ ܪ̈ܰܚܡܶܐ ܫܦܺܝ̈ܥܶܐ ܘܥܰܬܺܝܪ̈ܶܐ ܘܒܽܘܪ̈ܟܳܬܳܐ ܦܰܢܛܺܝܩܽܘܣܛܺܝ̈ܢܳܝܳܬܳܐ ܕܡܶܢܳܗ̇ ܘܰܐܬܢܳܢܳܐܝ̣ܬ ܥܰܬܺܝܪ̈ܶܐ ܕܠܐܴ ܡܶܬܦܰܣܩܺܝܢ ܘܠܐܴ ܡܨܰܦܪܺܝܢ ܘܠܐܴ ܡܪܰܡܫܺܝܢ: ܝܰܬܺܝܪ ܓܡܺܝܪܳܐܝ̣ܬ ܥܰܡ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܩܰܕܶܡܘ ܫܟܶܒܘ ܘܶܐܬܬܢܺܝܚܘ: ܡܶܛܽܠ ܕܠܳܗ̇ ܝ̇ܳܐܶܐ ܬܶܫܒܽܘܚܬܳܐ ܘܬܰܘܕܺܝܬܳܐ ܘܺܐܝܩܳܪܳܐ ܘܽܐܘܚܕܳܢܳܐ ܘܪܰܒܽܘܬ ܝܳܐܝܽܘܬܳܐ ܗܳܫܳܐ܀

 

 

 

ܦܝܪܡܐ

 

 

 

ܩܰܕܺܝܫܳܐ ܘܰܡܩܰܕܫܳܢܳܐ ܕܟܽܠ ܡܳܪܝܳܐ ܘܰܐܒܳܐ ܕܰܫܪܳܪܳܐ: ܗ̇ܰܘ ܕܩܰܕܶܫܬ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܒܝܰܕ ܠܶܫܳܢ̈ܶܐ ܕܢܽܘܪܳܐ ܘܚܰܘܺܝ ܒܗܽܘܢ ܡܰܥܒܕܳܢܽܘܬܶܗ ܘܚܰܝܠܶܗ: ܩܰܕܶܫܳܝܗܝ ܡܳܪܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ ܕܡܶܬܚܰܘܝܳܢܽܘܬܶܗ ܕܪܽܘܚܳܐ ܩܰܕܺܝܫܳܐ: ܘܫܰܟܶܢ ܠܰܢ ܒܶܗ ܚܽܘܣܳܝܳܐ ܘܫܽܘܒܩܳܢܳܐ ܕܺܝܠܰܢ ܘܕܰܟܳܐ ܠܠܶܒܰܘ̈ܳܬܰܢ ܡ̣ܶܢ ܟܽܠܶܗ ܝܰܥܪܳܐ ܕܰܚܛܺܝܬܳܐ: ܘܢܶܬܥܰܬܰܕ ܘܢܶܬܬܣܺܝܡ ܠܰܢ ܒܰܫܡܳܟ ܩܰܕܺܝܫܳܐ ܥܶܠܬܳܐ ܕܦܽܘܪܩܳܢܳܐ: ܟܰܕ ܟܽܠܫܳܥ ܒܪ̈ܰܚܡܶܐ ܡܶܣܬܰܥܪܺܝܢܰܢ: ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

 

 

ܚܘܬܡܐ

 

 

 

ܩܰܒܶܠ ܡܳܪܝ ܬܶܫܡ̈ܫܳܬܢܰ ܘܰܨܠܰܘ̈ܳܬܰܢ: ܕܰܒܥܺܐܕܳܐ ܗܳܢܳܐ ܕܦܰܢܛܺܝܩܽܘܣܛܺܝ ܩܰܪܶܒܢܰܢ ܠܳܟ ܥܰܡ ܬܶܫܒ̈ܚܳܬܳܐ ܘܗܽܘ̈ܠܳܠܐܷ ܕܥܺܝܪ̈ܶܐ ܫܡܰܝ̈ܳܢܶܐ: ܗ̇ܳܢܽܘܢ ܕܠܐܴ ܫܳܠܶܝܢ ܡ̣ܶܢ ܩܳܠܐܴ ܕܪܽܘܡܪܳܡܳܟ: ܘܗܰܒ ܠܰܢ ܕܪܽܘܚܳܢܳܐܝ̣ܬ ܐܰܟܘܳܬܗܽܘܢ ܢܙܰܡܰܪ ܠܳܟ ܫܽܘܒܚܳܐ ܠܐܴ ܫܰܠܘܳܐܝ̣ܬ: ܘܠܐܱܒܳܐ ܝܳܠܽܘܕܳܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗ̇ܰܘ ܟܝܳܢܳܐ ܟܰܣܝܳܐ ܘܰܓܢܺܝܙܳܐ ܕܠܶܗ ܟܰܕ ܠܶܗ ܐܝ̣ܬ ܒܰܠܚܽܘܕܳܝܽܘܬܳܐ ܫܽܘܠܛܳܢܳܐ ܡܬܽܘܡܳܝܳܐ ܦܪܺܝܫ ܒܰܬܠܳܬܳܐ ܘܰܚܠܺܝܛ ܒܺܐܝܬܽܘܬܳܐ: ܚܰܕ ܐܰܒܳܐ ܕܒܰܒܪܳܐ ܡܶܬܺܝܕܰܥ: ܚܰܕ ܒܪܳܐ ܕܒܰܐܒܳܐ ܡܶܫܬܰܒܰܚ: ܚܰܕ ܪܽܘܚܳܐ ܕܒܰܐܒܳܐ ܘܒܰܒܪܳܐ ܬܽܘܒ ܡܶܬܗܰܝܡܰܢ: ܐܺܝܬܝܳܐ ܓܢܺܝܙܳܐ ܕܠܐܴ ܦܽܘܪܳܫ ܫܽܘ̈ܟܳܢܰܘܗܝ ܘܫܽܘܡܳܗܰܘ̈ܗܝ ܡ̣ܶܢ ܒܪ̈ܰܝܳܐ ܘܰܥܒܺܝ̈ܕܶܐ ܡܶܬܬܰܪܓܡܺܝܢ: ܘܝܽܘܩܢܳܐ ܕܰܩܢܽܘ̈ܡܰܘܗܝ ܠܐܴ ܡܶܬܡܰܠܠܺܝܢ: ܕܠܶܗ ܝܳܐܶܐ ܫܽܘܒܚܳܐ܀

 

 

 

ܣܕܪܐ

 

 

 

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܡܒܰܝܳܢܳܐ ܪܽܘܚܳܐ ܩܰܕܺܝܫܳܐ ܗ̇ܰܘ ܢܰܨܺܝܚܳܐ ܘܰܗܕܺܝܪ ܒܫܽܘ̈ܟܳܢܶܐ ܐܠܰܗܳܝ̈ܶܐ: ܗ̇ܰܘ ܕܗ̣ܽܘ ܐܰܪܶܙ ܠܚܰܙܳܝ̈ܶܐ ܕܡ̣ܶܢ ܩܕܺܝܡ ܐ̱ܪ̈ܳܙܶܐ ܫܒܺܝ̈ܚܶܐ ܘܰܐܠܳܗܳܝ̈ܶܐ: ܟܰܕ ܡܗܰܕܶܐ ܗܘܳܐ ܘܰܡܫܰܒܶܠ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ ܠܘܳܬ ܒܰܝܬܳܝܽܘܬܳܐ ܐܠܰܗܳܝܬܳܐ ܘܰܡܫܰܟܢܳܢܺܝܬܳܐ ܕܚܰܝ̈ܶܐ ܛܽܘܒܬܳܢ̈ܶܐ: ܡܰܥܒܕܳܢ̈ܘܳܬܳܐ ܐܠܰܗܳܝ̈ܳܬܳܐ ܒܗܽܘܢ ܐܰܒܪܶܩ ܒܝܰܕ ܡܰܘܗ̈ܒܳܬܳܐ ܘܫܽܘ̈ܟܳܢܶܐ ܕܡܶܢܶܗ: ܗ̇ܰܘ ܓܳܡܽܘܪܳܐ ܕܡܰܥܒܕܳܢܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ: ܟܰܕ ܥܰܠ ܫܠܺܝ̈ܚܶܐ ܒܰܕܡܽܘܬ ܠܶܫܳܢ̈ܶܐ ܢܽܘܪ̈ܳܢܳܝܶܐ ܐܰܙܠܶܓ: ܘܰܠܗܰܘ̈ܢܶܐ ܘܠܶܒܰܘ̈ܳܬܳܐ ܕܺܝܠܗܽܘܢ ܫܰܠܗܶܒ ܒܪܶܬܚܳܐ ܕܚܽܘܒܳܐ ܘܠܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ ܒܟܽܠܳܗ̇ ܥܳܡܰܪܬܳܐ ܐܰܟܪܶܙܘ ܫܰܪܰܪܘ: ܗ̇ܰܘ ܕܟܰܕ ܚܰܕ ܡܶܢܳܗ̇ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܛܽܘܒܬܳܢܳܝܬܳܐ ܐܺܝܬܰܘܗܝ ܥܰܡܗܽܘܢ ܐܶܬܚܙܺܝ ܩܕܳܡ ܥܰܡ̈ܡܶܐ ܘܡܰܠܟ̈ܶܐ ܘܫܰܠܺܝܛܳܢ̈ܐ ܘܶܐܡܘ̈ܳܬܳܐ ܘܰܒܢܰܝ̈ܳܐ ܕܺܐܝܣܪܳܐܶܝܠ ܒܝܰܕ ܐܳܬܘ̈ܳܬܳܐ ܐܳܦ ܬܶܕܡܪ̈ܳܬܳܐ ܕܒܺܐܝ̈ܕܰܝܗܽܘܢ ܣܳܥܰܪ ܗܘܳܐ ܘܰܡܥܰܕܰܪ ܗܘܳܐ ܠܗܽܘܢ ܒܰܐܓܽܘ̈ܢܶܐ ܕܺܝܠܗܽܘܢ: ܡܨܰܒܬܳܢܳܐ ܕܥܺܕܬܳܟ ܒܫܽܘ̈ܟܳܢܶܐ ܐܠܰܗܳܝ̈ܶܐ ܘܰܡܩܰܕܫܳܢܳܐ ܘܡܰܐܠܗܳܢܳܐ ܕܓܶܢܣܳܐ ܕܺܝܠܰܢ ܕܰܟܪ̈ܺܝܣܛܝܳܢܶܐ: ܕܠܳܟ ܘܰܚܢܰܢ ܐܰܚܺܝ̈ܕܰܝ ܬܰܩܕܳܐ ܐܰܘܟܺܝܬ ܝܽܘܠܦܳܢܗܽܘܢ ܣܳܓܕܺܝܢܰܢ: ܘܟܽܠܰܢ ܡܥܰܕܥܕܺܝܢܰܢ ܥܺܐܕ̈ܶܐ ܕܰܡܕܰܒܪܳܢܽܘܬܳܐ ܡܶܬܟܰܫܦܺܝܢܰܢ: ܕܬܶܫܪܶܐ ܘܬܶܥܡܰܪ ܒܰܢ ܡܦܺܝܣܺܝܢܰܢ: ܘܡܶܢܟܽܠ ܙܢܰܝ̈ܳܐ ܘܚܽܘ̈ܫܳܒܶܐ ܫܟܺܝܪ̈ܶܐ ܕܰܚܛܺܝܬܳܐ ܕܰܟܳܐ ܠܰܢ: ܐܰܝܟܰܢܳܐ ܕܢܶܫܬܰܘܥܳܟ ܕܰܐܠܳܗܳܐ ܫܰܪܺܝܪܳܐ ܕܠܐܴ ܦܽܘܠܳܓ ܐܺܝܬܰܝܟ ܘܰܦܫܽܘܛ ܠܠܶܫܳܢܰܝ̈ܢ ܠܡܰܘܕܳܝܽܘ ܠܳܟ ܒܢܰܦܫܳܐ ܕܟܺܝܬܳܐ: ܘܰܐܪܟܶܢ ܠܨܰܘܪ̈ܰܝܢ ܠܡܶܣܓܰܕ ܠܳܟ ܒܚܽܘܒܳܐ ܥܰܡ ܪܶܚܡܬܳܐ ܘܣܶܓܕܬܳܐ ܫܰܪܺܝܪܬܳܐ ܕܡܶܬܬܚܺܝܒܳܐ ܠܡܳܪܽܘܬܳܟ: ܘܢܰܕܥܳܟ ܫܰܪܺܝܪܳܐܝ̣ܬ ܥܰܡ ܐܰܒܳܐ ܘܰܒܪܳܐ ܚܰܕ ܚܰܝܠܐܴ ܚܰܕ ܨܶܒܝܳܢܳܐ: ܚܕܳܐ ܐܽܘܣܺܝܰܐ ܚܕܳܐ ܪܺܝܫܳܢܽܘܬܳܐ: ܚܰܕ ܫܽܘܠܛܳܢܳܐ ܕܰܠܟܽܠ ܐܰܚܺܝܕ ܡܳܪܳܢܳܐܝ̣ܬ ܘܟܽܠ ܒܶܗ ܡܶܬܬܩܺܝܡ ܬܽܘܩܳܢܳܐܝ̣ܬ: ܘܠܐܴ ܒܠܺܝܠܐܴܝܬ ܘܠܐܴ ܐܰܫܺܝܕܳܐܝ̣ܬ ܡܶܢܳܟ ܢܩܰܒܶܠ ܘܡܶܢܳܟ ܢܶܣܰܒ: ܢܽܘܗܪܳܐ ܠܡܰܕ̈ܥܰܝܢ ܘܚܶܟܡܬܳܐ ܠܣܽܘܟܳܠܰܢ ܘܰܥܛܳܝܳܐ ܠܣܰܟ̈ܠܘܳܬܰܢ: ܘܕܽܘܟܳܝܳܐ ܘܚܽܘܠܡܳܢܳܐ ܠܦܰܓܪ̈ܰܝܢ: ܘܩܰܕܺܝܫܽܘܬܳܐ ܠܢܰܦ̈ܫܳܬܰܢ: ܘܚܽܘܣܳܝܳܐ ܘܫܽܘܒܩܳܢܳܐ ܠܰܢ ܘܰܠܥܰܢܺܝ̈ܕܰܝܢ: ܘܟܽܠܰܢ ܒܚܰܕܽܘܬܳܐ ܢܰܣܶܩ ܫܽܘܒܳܚܐ ܘܬܰܘܕܺܝܬܳܐ: ܘܢܶܦܪܽܘܥ ܩܽܘܒܳܠ ܛܰܝܒܽܘܬܳܐ ܠܳܟ ܐܠܰܗܳܐ ܪܽܘܚܳܐ ܩܰܕܺܝܫܳܐ: ܘܠܐܱܒܳܐ ܗ̇ܰܘ ܕܡܶܢܶܗ ܢܳܣ̇ܶܒ: ܘܠܰܒܪܳܐ ܫܘܶܐ ܒܰܡܬܽܘܡܳܝܽܘܬܳܐ ܗܳܫܳܐ܀

 

ܛܟܣܐ ܕܥܠ ܩܕܝܫܐ ܡܪܝ ܒܣܘܣ ܘܚܬܗ ܫܘܫܢ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܢܰܦܫܳܐ ܕܟܺܝܬܳܐ ܘܩܰܕܺܝܫܬܳܐ ܘܰܒܦܰܓܪܳܐ ܕܠܐ ܡܟܰܬܰܡ ܒܰܚܛܺܝܬܳܐ: ܘܰܒܚܽܘ̈ܫܳܒܶܐ ܙܗܰܝ̈ܳܐ ܕܕܰܟܝܽܘܬܳܐ: ܢܥܰܕܥܶܕ ܘܰܢܝܰܩܰܪ ܥܺܐܕܶܗ ܕܣܳܗܕܳܐ ܢܰܨܺܝܚܳܐ ܡܳܪܝ ܒܳܣܽܘܣ ܥܰܡ ܚܳܬܶܗ ܫܽܘܫܰܢ: ܦܳܠܚ̈ܶܐ ܟܰܫܺܝܪ̈ܶܐ ܗܳܠܶܝܢ ܕܒܰܕܡܳܐ ܕܨܰܘܪ̈ܰܝܗܽܘܢ ܩܰܒܶܠܘ ܡܶܢܳܟ ܟܠܺܝ̈ܠܐ ܕܙܳܟܽܘܬܳܐ: ܘܗܳܐ ܡܶܬܒܰܣܡܺܝܢ ܒܡܰܠܟܽܘܬܳܐ ܕܰܫܡܰܝܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܟܰܠܶܠ ܠܣܳܗ̈ܕܶܐ ܩܰܕܺܝ̈ܫܶܐ ܥܰܒܕܰܘ̈ܗܝ ܡܳܪܝ ܒܳܣܽܘܣ ܘܚܳܬܶܗ ܫܽܘܫܰܢ: ܡ̣ܶܢ ܐܺܝܕܰܝ̈ ܐܰܒܽܘܗܽܘܢ ܛܪܽܘܢܳܐ ܘܥܰܘܳܠܐ: ܐܰܒܽܘܙܰܪܕ ܚܰܢܦܳܐ ܐܰܚܽܘܗܝ ܕܫܳܒܽܘܪ ܡܰܠܟܳܐ ܚܰܢܦܳܐ ܗ̇ܰܘ ܕܒܰܐܪܥܳܐ ܡܬܰܘܬܰܒ ܗܘܳܐ ܕܡܰܕܢܚܳܐ: ܠܗܰܘ ܣܳܗܕܳܐ ܩܰܕܡܳܝܳܐ ܕܰܐܣܗܶܕ ܒܨܶܗܝܽܘܢ ܡܶܛܽܠ ܦܽܘܪܩܳܢܳܐ: ܘܰܪܕܰܘ ܒܥܶܩ̈ܒܳܬܶܗ ܣܳܗ̈ܕܶܐ ܩܰܕܺܝ̈ܫܶܐ ܘܟܺܐܢ̈ܶܐ ܘܰܓܡܺܝܪ̈ܶܐ: ܠܗܰܘ ܕܙܰܝܶܢ ܒܚܽܘܒܶܗ ܠܰܒܢܰܝ̈ ܚܰܢ̈ܦܶܐ ܘܰܡܓܽܘ̈ܫܶܐ: ܘܶܐܫܰܕܘ ܕܡܳܐ ܕܨܰܘܪ̈ܰܝܗܽܘܢ ܡܶܛܽܠ ܚܽܘܒܶܗ: ܘܰܗܘܰܘ ܗܰܒܳܒ̈ܶܐ ܫܰܦܺܝܪ̈ܶܐ ܒܰܟܠܺܝ̈ܠܶܝܗ̇ ܕܥܺܕܬܳܐ ܒܰܪܬ ܐܳܪ̈ܳܡܳܝܶܐ ܥܺܕܬܳܐ ܩܰܕܺܝܫܬܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܚܳܕܶܐ ܒܕܽܘܟܪܳܢ ܩܰܕܺܝܫܰܘ̈ܗܝ ܘܰܡܝܰܩܰܪ ܠܗܽܘܢ ܘܰܒܥܺܕܬܳܐ ܗ̇ܳܝ ܐܽܘܪܫܠܶܡܳܝܬܳܐ ܡܛܰܟܶܣ ܠܗܽܘܢ: ܘܒܥܺܕܬܳܐ ܐܰܪܥܳܢܳܝܬܳܐ ܡܰܘܪܶܒ ܕܽܘܟܪ̈ܳܢܰܝܗܽܘܢ ܕܡܶܛܽܠ ܚܽܘܒܶܗ ܘܣܰܒܪܳܐ ܫܰܪܺܝܪܳܐ ܕܰܩܝܳܡܬܶܗ ܣܳܗ̈ܕܶܐ ܩܰܕܺܝ̈ܫܶܐ ܕܳܫܘ ܥܰܠ ܢܶܓ̈ܕܶܐ ܘܰܐܩܠܺܝܘ: ܘܰܐܗܶܠܘ ܥܰܠ ܫܶܢ̈ܕܶܐ: ܘܥܰܠ ܡܰܘܬܳܐ: ܘܰܐܚܶܒܘ ܚܰܝ̈ܶܐ ܕܥܰܡ ܡܳܪܗܽܘܢ: ܘܰܐܣܠܺܝܘ ܠܚܰܝ̈ܶܐ ܥܳܒܽܘܪ̈ܶܐ ܘܰܐܝܟ ܠܐ ܡܶܕܶܡ ܚܫܰܒܘ ܠܟܽܠܗܶܝܢ ܛܳܒ̈ܳܬܶܗ ܕܥܳܠܡܳܐ ܗܳܢܳܐ: ܗܳܢܳܐ ܕܡܶܛܽܠ ܪܶܚܡܬܶܗ ܕܰܡܫܺܝܚܳܐ ܝܰܗܒ ܣܳܗܕܳܐ ܢܰܨܺܝܚܳܐ ܡܳܪܝ ܒܳܣܽܘܣ ܨܰܘܪܶܗ ܠܣܰܝܦܳܐ ܘܫܳܛ ܠܡܰܠܟܽܘܬܳܐ ܕܒܶܝܬ ܐܰܒܽܘܗܝ: ܘܰܪܚܶܡ ܚܽܘܒܶܗ ܕܰܡܫܺܝܚܳܐ ܐܰܒܳܐ ܫܰܪܺܝܪܳܐ: ܗܳܢܳܐ ܕܟܰܕ ܗܽܘ ܛܰܠܝܳܐ ܡܳܪܝ ܒܳܣܽܘܣ ܥܰܡ ܛܠܳܝ̈ܶܐ ܗ̇ܳܢܽܘܢ ܕܰܐܝܬܺܝ ܐܰܒܽܘܗܝ ܒܰܫܒܺܝܬܳܐ ܡ̣ܶܢ ܫܒܺܝܬܳܐ ܕܥܰܡܳܐ ܕܰܟܪ̈ܺܝܣܛܝܳܢܶܐ ܘܥܰܡܗܽܘܢ ܡܶܬܗܰܦܰܟ ܗܘܳܐ ܘܰܥܝܳܕܰܝ̈ܗܽܘܢ ܝܳܠܶܦ ܗܘܳܐ: ܘܰܒܢܳܡܽܘܣܰܝ̈ܗܽܘܢ ܡܶܬܕܰܒܰܪ ܗܘܳܐ: ܗܳܢܳܐ ܕܟܰܕ ܫܡܰܥ ܐܰܒܽܘܗܝ ܚܰܢܦܳܐ ܐܰܒܽܘܙܰܪܕ ܕܒܳܣܽܘܣ ܗܳܐ ܡܶܬܢܰܩܰܦ ܠܢܳܨܪ̈ܳܝܶܐ ܐܶܬܚܰܡܰܬ݀ ܥܰܠ ܟܽܠܗܽܘܢ ܐܰܣܺܝܪ̈ܶܐ ܕܰܐܝܬܺܝ: ܘܰܒܫܶܢ̈ܕܶܐ ܩܫܰܝ̈ܳܐ ܫܰܢܶܩ ܐܶܢܽܘܢ: ܘܟܰܕ ܐܰܩܺܝܡ ܠܶܗ ܦܬܰܟܪ̈ܶܐ ܚܰܪ̈ܫܶܐ ܘܨܰܠܡ̈ܶܐ ܣܪ̈ܺܝܩܶܐ ܒܩܶܣܛܪܰܐ ܕܒܶܝܬ ܙܰܒܕܰܝ: ܘܰܠܟܽܠܗܽܘܢ ܥܰܡ̈ܡܶܐ ܐܠܳܨ ܗܘܳܐ ܕܢܶܣܓܕܽܘܢ ܠܗܽܘܢ: ܘܟܰܕ ܫܡܰܥ ܕܰܒܪܶܗ ܒܳܣܽܘܣ ܘܚܳܬܶܗ ܗܘܰܘ ܟܪ̈ܺܝܣܛܝܳܢܶܐ ܘܰܥܡܰܕܘ ܘܩܰܒܶܠܘ ܪܽܘܫܡܳܐ ܕܢܳܨܪ̈ܳܝܶܐ: ܫܰܕܰܪ ܒܳܬܰܪܗܽܘܢ ܘܶܐܡܰܪ ܠܗܽܘܢ ܕܥܺܐܕܳܐ ܪܰܒܳܐ ܐܺܝܬ ܠܰܢ ܝܰܘܡܳܢܳܐ ܕܘܳܠܐܷ ܠܟܽܘܢ ܒܢ̈ܰܝ ܕܝܰܘܡܳܢ ܬܪ̈ܰܝܟܽܘܢ ܬܩܰܪܒܽܘܢ ܕܶܒܚ̈ܶܐ ܠܐܠܳܗ̈ܶܐ ܕܟܽܠܳܗ̇ ܐܰܪܥܳܐ: ܘܟܰܕ ܠܐ ܐܶܬܬܦܺܝܣܘ ܠܡܺܐܙܰܠ ܒܰܩܛܺܝܪܳܐ ܐܰܘܒܶܠ ܐܶܢܽܘܢ ܡ̣ܶܢ ܦܺܝܪܺܝܢ ܡܕܺܝܢ̱ܬܗܽܘܢ ܠܰܡܕܺܝܢ̱ܬܳܐ ܕܰܒܢܳܐ ܐܰܒܽܘܗܝ ܠܣܶܓܕܬܳܐ ܕܰܐܠܳܗܰܘ̈ܗܝ ܒܰܗܺܝ̈ܬܶܐ ܘܰܣܪ̈ܺܝܩܶܐ: ܗܳܢܳܐ ܕܟܰܕ ܡܰܠܟ̈ܶܐ ܪܰܘܪ̈ܒܶܐ ܘܣܰܓܺܝ̈ܶܐܐ ܡܳܠܶܟ ܗܘܳܐ ܠܗܽܘܢ ܠܰܒܢܰܘ̈ܗܝ ܘܳܐܡܰܪ: ܚܙܰܘ ܗܳܫܳܐ ܐܰܢ̱ܬܽܘܢ ܒܢ̈ܰܝ ܠܐ ܬܶܥܒܕܽܘܢܳܢܝ ܓܽܘܚܟܳܐ ܒܰܝܢܳܬ ܟܽܠܗܽܘܢ ܥܰܡ̈ܡܶܐ ܘܡܰܠܟ̈ܶܐ ܕܰܐܪܥܳܐ: ܡܶܛܽܠ ܕܟܽܠܳܗ̇ ܡܰܠܟܽܘܬܳܐ ܕܡܰܕܢܚܳܐ ܕܺܝܠܰܢ ܐܺܝܬܶܝܗ̇ ܘܢܶܫܡܰܥ ܫܳܒܽܘܪ ܡܰܠܟܳܐ ܪܰܒܳܐ ܕܟܽܠܰܢ ܘܢܶܓܙܽܘܪ ܕܺܝܢܳܐ ܘܢܰܦܶܩ ܐܰܦܽܘܦܰܐܣܺܝܣ ܕܡܰܘܬܳܐ ܥܠܰܝܢ ܘܰܥܠܰܝܟܽܘܢ: ܐܶܠܐ ܐܶܬܬܦܺܝܣܘ ܘܩܰܒܶܠܘ ܡܶܠܰܝ̈: ܘܗܳܕܶܐ ܡܰܠܟܽܘܬܳܐ ܕܺܝܠܝ ܠܟܽܘܢ ܐܺܝܬܶܝܗ̇: ܕܦܺܐܪ̈ܶܐ ܕܰܡܥܰܝ̈ ܐܺܝܬܰܝܟܽܘܢ ܘܢܽܘܪ̈ܒܶܐ ܫܰܦܺܝܪ̈ܶܐ: ܕܡܶܢܝ ܫܘܰܚܬܽܘܢ: ܟܰܕ ܦܰܢܺܝܘ ܛܠܳܝ̈ܶܐ ܘܶܐܡܰܪܘ ܠܐܒܽܘܗܽܘܢ: ܐܶܠܐ ܫܡܰܥ ܠܰܢ ܐܳܘ ܐܳܒܝ ܢܺܐܡܰܪ ܠܳܟ ܕܟܽܠܳܗ̇ ܗܳܕܶܐ ܣܰܟܠܽܘܬܳܐ ܕܰܥܒܰܕܬ ܣܰܓܺܝ ܒܺܝܫܳܐ: ܘܰܕܝܰܬܺܝܪܳܐܝ̣ܬ ܗ̇ܳܝ ܕܰܠܗܳܠܶܝܢ ܨܰܠܡ̈ܶܐ ܚܰܪ̈ܫܶܐ ܕܰܥܒܰܕܬ ܕܗܳܐ ܐܠܰܨܬ ܠܥܰܡܳܐ ܕܢܳܨܪ̈ܳܝܶܐ ܕܢܶܣܓܕܽܘܢ ܠܗܽܘܢ: ܕܚܰܠ ܡ̣ܶܢ ܕܺܝܢܶܗ ܕܗ̇ܰܘ ܕܝܰܗܒ ܠܳܟ ܡܰܠܟܽܘܬܳܐ ܘܗܽܘ ܥܬܺܝܕ ܕܰܢܪܺܝܡܶܝܗ̇ ܡܶܢܳܟ: ܡܶܛܽܠ ܪܽܘܫܥܳܟ ܘܢܶܣܚܦܺܝܘܗܝ ܠܬܳܓܳܐ ܕܺܝܠܳܟ ܒܰܐܪܥܳܐ: ܐܶܠܐ ܫܡܰܥ ܠܰܢ ܐܳܒܝ ܘܰܠܥܰܡܳܐ ܗܳܢܳܐ ܕܰܫܒܺܝܬܳܐ ܚܰܪܰܪ: ܡܶܛܽܠ ܕܬܶܫܟܰܚ ܪ̈ܰܚܡܶܐ ܘܰܚܢܳܢܳܐ ܘܚܰܝ̈ܶܐ ܘܦܽܘܪܩܳܢܳܐ ܒܺܐܝ̈ܕܰܘܗܝ ܕܒܳܪܽܘܝܳܟ: ܘܡܶܚܕܳܐ ܕܶܝܢ ܐܶܬܚܰܡܰܬ ܗܘܳܐ ܥܠܰܝܗܽܘܢ ܘܢܰܓܶܕ ܐܶܢܽܘܢ: ܘܰܐܪܡܺܝ ܐܶܢܽܘܢ ܒܶܝܬ ܐܰܣܺܝܪ̈ܶܐ ܠܺܠܝܳܐ ܟܽܠܶܗ: ܘܰܠܨܰܦܪܶܗ ܕܝܰܘܡܳܐ ܐܰܝܬܺܝ ܐܶܢܽܘܢ ܠܰܡܕܺܝܢ̱ܬܳܐ ܕܦܺܝܪܺܝܢ ܘܰܒܡ̈ܶܠܐ ܒܰܣܺܝ̈ܡܳܬܳܐ ܡܫܰܕܶܠ ܗܘܳܐ ܠܗܽܘܢ: ܟܰܕ ܗ̣ܶܢܽܘܢ ܩܰܕܺܝ̈ܫܶܐ ܣܳܗ̈ܕܶܐ ܘܰܛܠܳܝ̈ܶܐ ܫܰܪ̈ܘܳܝܶܐ ܒܓܶܠܝܳܢܳܐ ܕܩܰܒܶܠܘ ܡ̣ܶܢ ܐܠܰܗܳܐ ܐܰܝܟ ܦܰܘܠܳܘܣ ܫܠܺܝܚܳܐ ܥܰܡ ܚܽܘܒܳܐ ܫܰܪܺܝܪܳܐ ܐܰܣܺܝܪܺܝܢ ܗܘܰܘ ܒܶܗ: ܟܰܕ ܡܙܰܡܪܺܝܢ ܗܘܰܘ ܘܳܐܡܪܺܝܢ ܕܡܶܛܽܠܳܬܳܟ ܟܽܠܝܽܘܡ ܡܳܝܬܺܝܢܰܢ: ܘܰܐܝܟ ܐܶܡܪ̈ܶܐ ܠܢܶܟܣܬܳܐ ܗܳܐ ܡܶܬܚܰܫܒܺܝܢܰܢ: ܠܐ ܬܰܗܦܶܟ ܐܰܦܰܝ̈ܟ ܡܶܢܰܢ: ܐܶܠܐ ܩܽܘܡ ܒܥܽܘܕܪܳܢܰܢ: ܘܰܦܪܽܘܩ ܠܰܢ ܘܗܰܒ ܠܰܢ ܚܰܝܠܐ ܕܢܶܙܟܶܐ ܠܣܳܛܳܢܳܐ ܘܰܠܡܰܠܟܳܐ ܕܰܐܚܺܝܕ ܕܳܪܳܐ ܘܡܶܬܟܰܬܰܫ ܥܰܡܰܢ ܘܰܒܪܽܘܫܡܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ ܗ̇ܰܘ ܕܩܰܒܶܠܘ ܡ̣ܶܢ ܣܳܒܳܐ ܙܰܗܝܳܐ ܘܓܰܒܪܳܐ ܕܰܐܠܳܗܳܐ ܐܰܣܺܝܪܺܝܢ ܗܘܰܘ ܘܰܢܗܰܕܰܪܘ ܡܰܕܥܰܝ̈ܗܽܘܢ ܘܫܳܛܘ ܠܟܽܠܳܗ̇ ܡܰܠܟܽܘܬܳܐ ܕܙܰܒܢܳܐ ܘܰܠܗܳܝ ܡܰܠܟܽܘܬܳܐ ܕܠܐ ܥܳܒܪܳܐ ܐܶܬܪܰܓܪܰܓܘ ܗܘܰܘ: ܘܰܒܝܰܕ ܣܛܶܦܰܢܳܘܣ ܡܫܰܡܫܳܢܳܐ ܒܰܪ ܫܶܒܝܳܐ ܡܗܰܕܝܳܢܗܽܘܢ ܗ̇ܰܘ ܕܒܶܝܬ ܐܺܝ̈ܕܰܘܗܝ ܐܶܬܗܰܝܡܰܢܘ ܗܘܰܘ: ܘܟܰܕ ܩܰܪܶܒܘ ܐܶܢܽܘܢ ܥܰܘܳܠܐ ܐܰܒܽܘܙܰܪܕ ܠܟܽܠܗܽܘܢ ܐܰܣܺܝܪ̈ܶܐ ܠܰܩܕܳܡܰܘܗܝ ܘܒܰܓܙܳܡ̈ܶܐ ܡܰܪܺܝܪ̈ܶܐ ܥܠܰܝܗܽܘܢ ܡܶܬܩܰܫܶܐ ܗܘܳܐ ܘܰܡܦܰܩܶܕ ܓܙܳܪ ܕܺܝܢܳܐ: ܕܝܰܘܡܳܢܳܐ ܐܰܢ̱ܬܽܘܢ ܐܶܢܽܘܢ ܕܰܐܥܶܠܬܽܘܢ ܚܰܪ̈ܫܶܐ ܥܰܠ ܒܢ̈ܰܝ ܒܝܰܕ ܡܰܛܥܝܳܢܽܘܬܟܽܘܢ: ܘܚܰܡܫܺܝܢ ܚܰܡܫܺܝܢ ܠܰܩܕܳܡ ܣܰܝܦܳܐ ܐܰܥܶܠ ܐܶܢܽܘܢ ܘܰܠܨܰܘܪ̈ܶܐ ܕܟܽܠܗܽܘܢ ܕܠܐ ܪ̈ܰܚܡܶܐ ܦܳܣܶܩ ܗܘܳܐ: ܘܺܐܝܬܰܝܗܽܘܢ ܗܘܰܘ ܚܕܰܥܣܰܪ ܐܠܰܦܺܝ̈ܢ ܣܳܗ̈ܕܶܐ ܩܰܕܺܝ̈ܫܶܐ ܢܟܺܝ̈ܣܶܐ ܘܰܛܠܺܝ̈ܡܶܐ: ܘܡܳܪܝ ܒܳܣܽܘܣ ܒܣܶܕܪܳܐ ܕܺܝܠܗܽܘܢ ܐܰܝܟ ܪܰܒ ܚܰܝܠܐ ܩܪܰܒܬܳܢܳܐ ܘܦܳܠܚܳܐ ܙܪܺܝܙܳܐ: ܘܡܳܪܝ ܣܛܶܦܰܢܳܘܣ ܫܶܒܝܳܐ ܘܡܳܪܝ ܠܶܘܢܓܺܝܢܶܐ ܣܳܒܳܐ ܙܰܗܝܳܐ ܪܰܒܗܽܘܢ: ܗ̇ܳܢܽܘܢ ܕܶܐܬܟܰܠܰܠܘ ܟܽܠܗܽܘܢ ܒܰܪܓܽܘܠܐ ܕܓܺܗܰܢܳܐ: ܐܳܘ ܠܚܽܘܡܣܳܢܳܐ ܕܰܛܠܳܝ̈ܶܐ ܗܕܺܝܪ̈ܶܐ ܘܫܰܦܺܝܪ̈ܶܐ: ܕܰܦܫܰܛܘ ܨܰܘܪ̈ܰܝܗܽܘܢ ܩܕܳܡ ܣܰܝܦܳܐ: ܐܳܘ ܠܠܶܒܳܐ ܕܰܛܪܽܘܢܳܐ ܥܰܘܳܠܐ ܐܰܒܽܘܙܰܪܕ ܕܠܐ ܐܶܬܪܰܟܰܟ ܟܰܕ ܢܳܟܶܣ ܠܗܽܘܢ ܠܰܒܢܰܘ̈ܗܝ ܕܠܐ ܪ̈ܰܚܶܡܐ: ܐܳܘ ܠܪܶܚܡܬܳܐ ܐܰܒܳܗܳܝܬܳܐ ܕܦܳܓܰܬ݀ ܠܳܗ̇: ܘܠܰܡܥܰܝ̈ܳܐ ܐܶܡܗܳܝ̈ܶܐ ܕܰܐܪܫܶܠܘ ܠܗܽܘܢ ܘܰܐܪܚܶܩܘ: ܘܡܶܛܽܠ ܗܳܕܶܐ ܥܺܕܬܳܐ ܩܰܕܺܝܫܬܳܐ ܕܩܰܒܠܰܬ݀ ܠܕܶܡܗܽܘܢ ܚܰܣܝܳܐ: ܘܰܒܓܰܪ̈ܡܰܝܗܽܘܢ ܡܶܬܓܰܘܣܳܐ ܟܰܕ ܡܶܬܟܰܫܦܳܐ ܘܒܰܫܟܺܝ̈ܢܳܬܳܐ ܕܺܝܠܗܽܘܢ ܩܰܕܺܝ̈ܫܳܬܳܐ ܛܳܦܣܳܐ: ܘܥܽܘܕܪܳܢܳܐ ܡ̣ܶܢ ܣܺܝ̈ܡܳܬܳܐ ܕܺܝܠܗܽܘܢ ܫܳܐܠܐ: ܘܚܽܘܣܳܝܳܐ ܘܫܽܘܒܩܳܢܳܐ ܠܟܽܠܗܽܘܢ ܝܰܠܕܶܝ̈ܗ̇ ܒܰܚܘܺܝܚܽܘܬܳܐ ܒܳܥܝܳܐ: ܘܫܰܝܢܳܐ ܘܰܫܠܳܡܳܐ ܠܟܽܠܳܗ̇ ܡܶܬܥܰܡܪܳܢܺܝܬܳܐ: ܘܚܰܪܬܳܐ ܛܳܒܬܳܐ ܠܟܽܠܗܽܘܢ ܡܗܰܝ̈ܡܢܶܐ ܫܰܪܺܝܪ̈ܶܐ ܕܰܡܥܰܕܥܕܺܝܢ ܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ ܘܰܡܝܰܩܪܺܝܢ ܚܰܓ̈ܶܐ ܘܥܺܐܕ̈ܶܐ ܕܦܳܠܚܰܝ̈ܟ: ܘܰܠܥܰܢܺܝ̈ܕܶܐ ܐܰܝܠܶܝܢ ܕܰܫܟܶܒܘ ܒܰܬܪܺܝܨܽܘܬ ܫܽܘܒܚܳܐ ܐܰܩܺܝܡ ܐܶܢܽܘܢ ܡ̣ܶܢ ܓܰܒܳܐ ܕܺܝܠܳܟ ܕܝܰܡܺܝܢܳܐ: ܐܰܝܟܰܢܳܐ ܕܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܐܠܳܗܳܐ ܐܰܒܳܐ ܕܰܓܒܳܐ ܐܶܢܽܘܢ: ܘܠܰܒܪܳܐ ܡܫܺܝܚܳܐ ܕܢܰܨܰܚ ܐܶܢܽܘܢ: ܘܰܠܪܽܘܚܳܐ ܩܰܕܺܝܫܳܐ ܕܟܰܠܶܠ ܐܶܢܽܘܢ: ܗܳܫܳܐ܀

 

 

 

ܥܛܪܐ

 

 

 

ܡܫܺܝܚܳܐ ܐܠܰܗܳܐ ܕܶܒܚܳܐ ܕܠܐ ܡܽܘܡܳܐ ܘܩܽܘܪܒܳܢܳܐ ܕܠܐ ܛܽܘܠܫܳܐ ܕܶܐܬܩܰܪܰܒ ܚܠܳܦܰܝܢ ܘܚܰܣܺܝܢ: ܘܩܰܪܶܒ ܠܣܶܓܕܬܳܐ ܕܺܝܠܶܗ ܠܰܛܠܳܝ̈ܶܐ ܫܰܦܺܝܪ̈ܶܐ ܒܢ̈ܰܝ ܚܰܢ̈ܦܶܐ ܠܺܝ̈ܛܶܐ: ܘܩܰܒܶܠ ܠܕܶܡܗܽܘܢ ܚܰܣܝܳܐ: ܘܫܰܕܰܪ ܢܽܘܪܳܐ ܐܠܰܗܳܝܬܳܐ ܥܰܠ ܟܳܦܽܘܪ̈ܶܐ ܘܓܰܡܪܰܬ݀ ܠܥܰܘܳܠܐ ܡܰܩܪܒܳܢܗܽܘܢ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܩܰܒܶܠ ܠܦܺܝܪܡܳܐ ܗܳܢܳܐ ܕܰܡܩܰܪܒܺܝܢܰܢ ܠܳܟ ܒܕܽܘܟܪ̈ܳܢܰܝܗܽܘܢ ܕܣܳܗ̈ܕܶܐ ܕܺܝܠܳܟ ܘܫܰܟܶܢ ܠܰܢ ܫܰܝܢܳܐ ܘܚܽܘܒܳܐ ܘܰܐܘܝܽܘܬܳܐ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܚܰܣܳܐ ܡܳܪܝܳܐ ܠܥܰܒܕܰܝ̈ܟ ܘܠܐܱܡܗ̈ܳܬܳܟ ܕܰܠܥܺܐܕܳܐ ܕܰܪ̈ܚܽܘܡܰܝܟ ܐܶܬܛܰܝܰܒܘ ܕܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܒܳܣܽܘܣ ܘܚܳܬܶܗ ܫܽܘܫܰܢ ܘܡܳܪܝ ܣܛܶܦܰܢܳܘܣ ܡܫܰܡܫܳܢܳܐ ܫܶܒܝܳܐ ܒܰܪ ܒܰܝܬܗܽܘܢ: ܚܰܣܳܐ ܘܰܐܥܒܰܪ ܘܰܠܚܺܝ ܠܰܚܛܳܗ̈ܶܐ ܘܣܰܟܠܘ̈ܳܬܳܐ ܕܰܣܥܰܪܢܰܢ ܩܕܳܡܰܝܟ: ܘܠܐ ܬܶܬܕܟܰܪ ܠܰܢ ܐܶܢܽܘܢ: ܗܳܫܳܐ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܣܳܗܕܳܐ ܩܰܕܡܳܝܳܐ ܕܰܐܣܗܶܕ ܒܰܙܩܺܝܦܳܐ ܡܶܛܽܠ ܦܽܘܪܩܳܢܰܢ: ܘܒܰܫܠܳܚ ܒܶܣܪܶܗ ܐܠܰܒܶܫ ܬܶܫܒܽܘܚܬܳܐ ܠܐܕܳܡ ܕܶܐܙܕܰܠܰܠ ܒܶܝܬ ܐܺܝܠܳܢ̈ܶܐ: ܠܗܰܘ ܕܶܒܚܳܐ ܡܚܰܣܝܳܢܳܐ ܕܶܐܬܕܰܒܰܚ ܒܪܺܝܫ ܓܳܓܽܘܠܬܳܐ ܡܶܛܽܠ ܚܽܘܣܳܝܰܢ: ܠܗܰܘ ܕܚܰܝܠܶܗ ܠܡܳܪܝ ܒܳܣܽܘܣ ܣܳܗܕܳܐ ܢܰܨܺܝܚܳܐ: ܘܝܰܗܒ ܠܶܗ ܙܳܟܽܘܬܳܐ ܕܢܶܙܟܶܐ ܒܕܳܪܳܐ ܠܒܺܝܫܳܐ ܘܰܠܚܰܝ̈ܠܰܘܳܬܶܗ ܕܠܶܗ ܠܡܳܪܝܳܐ ܡܚܰܝܠܳܢܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܥܰܕܥܺܐܕܳܐ ܐܳܘ ܣܳܗܕܳܐ ܢܰܨܺܝܚܳܐ ܡܳܪܝ ܒܳܣܽܘܣ ܨܳܒܶܝܢܰܢ ܠܰܡܩܰܠܳܣܽܘ: ܘܰܠܚܰܓܳܐ ܪܽܘܚܳܢܳܝܳܐ ܕܦܳܠܚ̈ܶܐ ܐܰܘܟܺܝܬ ܐܰܬܠܺܝ̈ܛܶܐ ܚܰܒܪ̈ܰܝܟ ܣܛܶܦܰܢܳܘܣ ܒܰܪ ܫܶܒܝܳܐ ܘܣܳܒܳܐ ܙܰܗܝܳܐ ܩܰܕܺܝܫܳܐ ܡܳܪܝ ܠܽܘܢܓܺܝܢܶܐ ܒܡܰܕܥܰܝ̈ܢ ܢܳܣܒܺܝܢܰܢ: ܗ̇ܳܢܽܘܢ ܕܰܒܚܰܕ ܝܰܘܡܳܐ ܐܶܬܩܛܶܠܘ ܗܘܰܘ: ܐܰܪ̈ܒܥܳܬܰܝܗܽܘܢ ܐܰܬܠܺܝ̈ܛܶܐ ܡ̣ܶܢ ܐܰܒܽܘܙܰܪܕ ܐܰܒܳܐ ܕܺܝܠܗܽܘܢ ܥܰܘܳܠܐ: ܒܰܬܠܳܬ ܫܳܥܺܝ̈ܢ ܠܶܣܛܶܦܰܢܳܘܣ ܒܡܰܚܰܬܬܳܐ ܕܛܽܘܪܳܐ ܕܪܳܓܽܘܠܐ ܕܓܺܗܰܢܳܐ: ܘܰܠܩܰܕܺܝܫܬܳܐ ܫܽܘܫܰܢ ܒܰܡܨܰܥܬܳܐ ܕܢܰܚܠܐ ܥܰܠ ܫܽܘܥܳܐ ܢܰܟܣܳܗ̇: ܘܰܠܡܳܪܝ ܒܳܣܽܘܣ ܟܰܕ ܥܳܪܶܩ ܗܘܳܐ ܘܰܠܘܳܬ ܣܳܒܳܐ ܐܠܰܗܳܝܳܐ ܥܰܠ ܐܶܬܛܰܫܺܝ: ܘܟܰܕ ܐܶܫܟܚܶܗ ܠܣܳܒܳܐ ܒܬܰܪܥܳܐ ܕܟܽܘܪܚܶܗ ܫܰܩܠܶܗ ܠܪܺܝܫܶܗ: ܘܰܪܕܰܦ ܒܳܬܰܪ ܒܪܶܗ ܒܳܣܽܘܣ ܕܰܕܠܐ ܪ̈ܰܚܡܶܐ ܢܶܩܛܠܺܝܘܗܝ: ܘܟܰܕ ܐܰܬܠܺܝܛܳܐ ܒܥܳܐ ܕܢܶܩܛܠܺܝܘܗܝ ܒܰܛܠܽܘܡܝܳܐ: ܩܪܳܐ ܠܐܠܳܗܳܐ ܒܰܚܢܰܓܬܳܐ ܕܢܺܐܬܶܐ ܠܐܝܳܠܶܗ ܘܡ̣ܶܢ ܫܶܠܝܳܐ ܐܶܨܛܰܪܺܝ ܫܽܘܥܳܐ ܕܰܡܥܰܪܬܳܐ ܘܰܥܕܰܡܳܐ ܠܪܺܝܫܶܗ ܐܶܬܦܬܰܚ: ܘܒܰܨܪܝܳܐ ܗ̇ܰܘ ܣܠܶܩ ܣܳܗܕܳܐ ܘܶܐܬܛܰܫܺܝ ܡ̣ܶܢ ܐܰܒܽܘܗܝ: ܪ̈ܳܥܰܘܳܬܳܐ ܕܶܝܢ ܚܙܰܐܘܽܘܗܝ: ܚܰܕ ܝܺܡܳܐ ܕܰܠܐܢܳܫ ܠܐ ܚܙܰܝܢܰܢ: ܘܗ̇ܰܘ ܐ̱ܚܪܺܢܳܐ ܓܠܐܴ ܘܰܐܘܕܰܥ ܗܘܳܐ ܠܐܒܽܘܗܝ ܕܗܳܐ ܡܛܰܫܰܝ ܒܕܽܘܟܬܳܐ ܗܳܕܶܐ: ܗܳܢܳܐ ܕܰܓܠܐܴ ܕܰܐܝܟܳܐ ܐܺܝܬܰܘܗܝ ܒܠܰܥ ܗܘܳܐ ܒܪܽܘܓܙܳܐ ܒܟܺܐܒܳܐ ܕܓܰܪܒܳܐ ܣܰܪܝܳܐ ܗܽܘ ܘܰܓܙܳܪܶܗ: ܘܗ̇ܰܘ ܕܝܺܡܳܐ ܕܠܐ ܚܙܳܐ ܗܘܳܐ ܐܶܬܒܰܪܰܟ ܘܩܰܒܶܠ ܨܠܰܘ̈ܳܬܳܐ: ܘܰܒܡܰܥܪ̈ܳܒܰܝ ܫܶܡܫܳܐ ܫܰܡܠܺܝ ܣܳܗܕܽܘܬܳܐ ܕܺܝܠܗܽܘܢ ܛܪܽܘܢܳܐ ܥܰܘܳܠܐ: ܘܰܥܛܰܦ ܠܒܰܝܬܶܗ ܘܰܐܢܺܝܚ ܠܶܒܳܐ ܕܰܐܠܳܗܰܘ̈ܗܝ ܠܺܝ̈ܛܶܐ ܘܒܰܗܺܝ̈ܬܶܐ: ܘܩܰܪܶܒ ܠܗܽܘܢ ܕܶܒܚ̈ܶܐ ܢܕܺܝ̈ܕܶܐ ܘܛܰܡ̈ܐܐ: ܘܢܶܚܬܰܬ݀ ܢܽܘܪܳܐ ܡ̣ܶܢ ܪܰܘܡܳܐ ܘܰܐܘܩܕܰܬ݀ ܠܨܰܠܡ̈ܶܐ ܘܰܠܟܽܠܗܽܘܢ ܚܰܢ̈ܦܶܐ ܕܺܐܝܬ ܗܘܰܘ ܬܰܡܳܢ ܘܠܐ ܫܶܒܩܰܬ݀ ܡܶܕܶܡ: ܐܶܠܐ ܐܶܢ ܠܰܟܪ̈ܺܝܣܛܝܳܢܶܐ ܒܰܠܚܽܘܕ: ܘܰܠܒܰܝܬܳܐ ܕܰܦܬܰܟܪ̈ܶܐ ܘܰܠܟܽܘܡܪ̈ܶܐ ܥܶܒܕܰܬ݀ ܐܶܢܽܘܢ ܩܶܛܡܳܐ ܘܕܰܚܺܝܚܳܐ: ܐܳܘ ܠܬܶܡܗܳܐ ܘܰܠܕܽܘܡܳܪܳܐ ܐܳܘ ܠܕܶܚܠܬܳܐ ܘܰܪܬܺܝܬܳܐ ܥܰܡ ܙܰܘܥܬܳܐ: ܘܠܰܒܟܳܬܳܐ ܗ̇ܳܝ ܡܰܪܺܝܪܬܳܐ ܕܡܶܫܬܰܡܥܳܐ ܗܘܳܬ݀ ܡ̣ܶܢ ܟܽܠ ܦܽܘܡܺܝ̈ܢ: ܐܳܘ ܠܬܶܕܡܽܘܪܬܳܐ ܗ̇ܳܝ ܕܶܐܣܬܰܥܪܰܬ݀ ܕܰܟܪ̈ܺܝܣܛܝܳܢܶܐ ܕܶܝܢ ܐܶܫܬܰܘܙܰܒܘ: ܘܥܰܡܳܐ ܕܚܰܢ̈ܦܶܐ ܘܰܡܓܽܘ̈ܫܶܐ ܕܰܒܢܽܘܪܳܐ ܡܫܰܠܗܰܒܬܳܐ ܝܺܩܶܕܘ ܘܶܐܬܚܰܪܰܟܘ ܘܰܗܘܰܘ ܠܰܩܠܳܠܐ: ܡ̣ܶܢ ܗܳܪܟܳܐ ܚܰܢ̈ܦܶܐ ܕܝܳܩܕܺܝܢ ܨܰܠܡ̈ܶܐ ܕܰܡܕܰܩܩܺܝܢ: ܫܺܐܕ̈ܶܐ ܕܥܰܪܺܝܩܺܝܢ: ܐܠܰܗܽܘ̈ܢܶܐ ܕܒܳܟܶܝܢ: ܟܽܘܡܪ̈ܶܐ ܕܰܩܕܳܡ ܫܺܐܕ̈ܶܐ ܡܕܰܒܚܺܝܢ ܗܘܰܘ: ܗܳܐ ܥܒܺܝܕܺܝܢ ܩܶܛܡܳܐ ܘܕܰܚܺܝܚܳܐ: ܡܰܠܟܳܐ ܠܺܝܛܳܐ ܕܰܥܒܺܝܕ ܒܽܘܠܗܳܝܳܐ ܘܙܰܘܥܳܐ ܠܟܽܠ ܚܰܙܳܝ̈ܶܐ: ܘܰܦܬܰܟܪ̈ܶܐ ܕܺܝܠܶܗ ܕܺܝܩܶܕܘ ܘܠܐ ܐܺܝܬܰܝܗܽܘܢ: ܣܳܗ̈ܕܶܐ ܩܰܕܺܝ̈ܫܶܐ ܕܰܙܟܰܘ ܠܒܺܝܫܳܐ ܘܰܠܚܰܝܠܶܗ ܘܰܢܰܣܒܘ ܟܠܺܝ̈ܠܐ ܕܙܳܟܽܘܬܳܐ ܡ̣ܶܢ ܐܰܒܽܘܗܽܘܢ: ܐܠܰܗܳܐ ܕܢܳܨܳܪ̈ܝܶܐ ܕܚܳܕܶܐ ܘܪܳܘܶܙ: ܬܶܫܒܽܘܚܬܳܐ ܠܐܠܳܗܳܐ ܕܣܳܓܝܳܐ ܘܡܶܬܪܰܘܪܒܳܐ: ܘܓܰܒܳܐ ܕܰܟܪ̈ܺܝܣܛܝܳܢܶܐ ܕܡܶܬܩܰܠܰܣ: ܘܓܰܒܳܐ ܕܚܰܢ̈ܦܶܐ ܕܰܥܒܺܝܕ ܚܶܣܕܳܐ ܘܡܽܘܝܳܩܳܐ: ܘܣܳܛܳܢܳܐ ܘܟܽܠܳܗ̇ ܡܰܫܪܺܝܬܶܗ ܕܶܐܒܕܰܬ݀ ܘܶܐܣܬܰܚܦܰܬ݀: ܒܢ̈ܰܝ ܚܶܕܶܠ ܩܪܺܝܬܳܐ ܕܚܳܕܶܝܢ ܘܪܳܘܙܺܝܢ ܘܰܠܦܰܓܪ̈ܶܐ ܕܣܳܗ̈ܕܶܐ ܩܰܕܺܝ̈ܫܶܐ ܒܚܰܕܽܘܬܳܐ ܢܳܣܒܺܝܢ: ܘܒܶܝܬ ܙܰܒܕܰܝ ܕܒܰܛܶܠ ܕܽܘܟܪܳܢܳܐ ܘܰܒܢܽܘܪܳܐ ܐܶܬܕܰܥܟܰܬ݀: ܘܠܐ ܐܶܫܬܰܟܚܰܬ݀: ܘܦܺܝܪܺܝܢ ܕܬܽܘܢܳܝܳܐ ܘܓܽܘܚܟܳܐ ܥܒܺܝܕܳܐ ܘܒܶܙܚܳܐ ܒܰܝܢܳܬ ܐܰܬܪ̈ܰܘܳܬܳܐ: ܒܢ̈ܰܝ ܚܶܕܶܠ ܕܗܰܝ̈ܟܠܐ ܠܦܰܓܪ̈ܶܐ ܕܩܰܕܺܝ̈ܫܶܐ ܩܳܒܥܺܝܢ ܘܒܳܢܶܝܢ: ܘܥܽܘܕܪ̈ܳܢܶܐ ܡ̣ܶܢ ܓܰܪ̈ܡܰܝܗܽܘܢ ܢܳܣܒܺܝܢ ܘܚܽܘܠܡܳܢ̈ܶܐ ܡ̣ܶܢ ܫܟܺܝ̈ܢܳܬܗܽܘܢ ܩܳܢܶܝܢ ܟܡܳܐ ܟܪ̈ܺܝܗܶܐ ܘܰܐܠܺܝ̈ܨܶܐ ܐܰܚܠܶܡܘ ܠܰܟܡܳܐ ܕܰܝܘ̈ܳܢܶܐ ܚܰܪܰܪܘ: ܘܠܰܟܡܳܐ ܡܢܰܣܰܝ̈ܳܐ ܫܰܘܙܶܒܘ: ܟܡܳܐ ܚܰܝ̈ܠܐ ܘܬܶܕܡܪ̈ܳܬܳܐ ܣܥܰܪܘ: ܘܗܳܫܳܐ ܡܳܪܝܳܐ ܐܠܰܗܳܐ ܡܰܘܪܒܳܢܳܐ ܕܕܳܚܠܰܘ̈ܗܝ ܘܰܡܫܰܡܠܝܳܢܳܐ ܕܰܐܓܽܘܢܳܐ ܠܥܰܒܕܰܘ̈ܗܝ: ܬܳܐ ܠܐܝܳܠܰܢ ܘܚܰܣܳܐ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܕܝܰܩܰܪܢܰܢ ܝܰܘܡܳܢ ܕܽܘܟܪܳܢܳܐ ܕܰܪ̈ܚܽܘܡܰܝܟ ܘܙܰܝܰܚܢܰܢ ܥܺܐܕܳܐ ܦܰܐܝܳܐ ܕܢܰܨܺܝ̈ܚܰܝܟ ܘܰܐܡܠܶܟ ܫܰܝܢܳܐ ܘܰܫܠܳܡܳܐ ܥܰܠ ܟܽܠܰܢ: ܘܙܰܗܳܐ ܠܟܳܗ̈ܢܶܐ ܒܪܺܝܫ ܥܰܡܰܢ: ܘܢܰܟܶܦ ܠܰܡܫܰܡ̈ܫܳܢܶܐ ܕܰܫܗܰܪܘ ܝܰܘܡܳܢ ܒܥܺܐܕܶܗ ܕܥܰܒܕܳܟ ܡܳܪܝ ܒܳܣܽܘܣ ܡܠܐܷ ܕܰܟܝܽܘܬܳܐ: ܢܰܗܰܪ ܠܩܳܪ̈ܽܘܝܶܐ: ܘܚܰܟܶܡ ܠܰܡܦܰܫ̈ܩܳܢܶܐ ܘܠܰܩܠܺܝܪܳܘܣ ܟܽܠܶܗ ܕܺܝܠܳܟ: ܡܠܺܝ ܚܽܘܒܳܐ ܘܰܐܘܝܽܘܬܳܐ: ܘܪܶܚܡܰܬ݀ ܐ̱ܢܳܫܽܘܬܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܳܦ ܐܰܝܠܶܝܢ ܕܰܥܢܰܕܘ ܡ̣ܶܢ ܒܰܝܢܳܬܰܢ ܒܰܬܪܺܝܨܽܘܬ ܫܽܘܒܚܳܐ ܐܰܢܺܝܚ ܐܶܢܽܘܢ ܒܡܰܠܟܽܘܬܳܟ ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܦܺܝܪܡܳܐ ܒܨܺܝܪܳܐ ܘܚܰܠܳܫܳܐ ܕܠܳܟ ܩܰܪܶܒܢܰܢ ܒܥܺܐܕܳܐ ܗܳܢܳܐ ܒܩܶܛܠܐ ܕܣܳܗ̈ܕܶܐ ܪ̈ܚܽܘܡܰܝܟ ܡܳܪܝ ܒܳܣܽܘܣ ܘܚܳܬܶܗ ܫܽܘܫܰܢ ܘܰܚܕܰܥܣܰܪ ܐܠܰܦܰܝ̈ܳܐ ܚܰܒܪ̈ܰܝܗܽܘܢ: ܩܰܒܶܠ ܗܳܫܳܐ ܘܶܐܬܪܰܥܳܐ ܠܟܽܠܰܢ ܘܰܫܒܽܘܩ ܚܰܘ̈ܒܰܝܢ ܘܚܰܣܳܐ ܚܛܳܗܰܝ̈ܢ ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܫܰܒܪܳܐ ܕܺܝܠܳܟ: ܘܰܡܣܰܟܶܝܢ ܠܕܶܢܚܳܟ ܡܳܪܰܢ ܘܰܐܠܳܗܰܢ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܕܶܢܚܳܐ ܡܫܺܝܚܳܐ ܢܽܘܗܪܳܐ ܫܰܪܺܝܪܳܐ: ܘܰܐܠܳܗܳܐ ܕܡ̣ܶܢ ܐܠܰܗܳܐ ܝܶܫܽܘܥ ܡܫܺܝܚܳܐ ܕܒܰܕܡܳܐ ܕܰܙܩܺܝܦܶܗ ܦܪܰܥ ܚܰܘܒܬܶܗ ܕܳܐܕܳܡ ܕܰܐܣܟܶܠ ܘܒܶܗ ܐܶܬܡܰܪܺܝܘ ܣܳܗ̈ܕܶܐ ܩܰܕܺܝ̈ܫܶܐ ܘܰܪܕܰܘ ܒܥܶܩ̈ܒܳܬܶܗ ܘܡܺܝܬܘ ܥܰܠ ܣܰܒܪܶܗ ܒܟܽܠ ܫܶܢܕܺܝ̈ܢ: ܘܩܰܒܶܠܘ ܟܠܺܝ̈ܠܐ ܕܙܳܟܽܘܬܳܐ ܡ̣ܶܢ ܠܘܳܬܶܗ ܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܘܚܽܘܒܳܐ ܕܺܝܠܳܟ ܐܠܰܗܳܐ: ܗ̇ܰܘ ܕܓܳܡܰܪ ܟܽܠ ܡܶܕܶܡ: ܕܢܰܘܕܶܐ ܘܢܶܣܓܽܘܕ ܘܰܢܫܰܒܚܳܟ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܩܰܕܺܝܫܳܐ ܘܰܡܠܐܷ ܡ̣ܶܢ ܩܽܘ̈ܕܳܫܶܐ: ܕܩܰܕܶܫ ܘܙܰܝܶܢ ܠܽܘܩܒܰܠ ܫܶܢ̈ܕܶܐ ܠܣܳܗ̈ܕܶܐ ܩܰܕܺܝ̈ܫܶܐ ܕܢܶܬܕܰܡܽܘܢ ܒܶܗ: ܠܗܰܘ ܕܶܐܡܰܪ ܒܰܣܒܰܪܬܶܗ ܡܰܚܝܳܢܺܝܬܳܐ: ܕܠܐ ܐܶܬܺܝܬ ܕܰܐܪܡܶܐ ܫܰܝܢܳܐ ܒܥܳܠܡܳܐ ܐܶܠܐ ܣܰܝܦܳܐ ܘܚܰܪܒܳܐ ܘܢܽܘܪܳܐ ܕܝܳܩܕܳܐ ܠܗܰܘ ܕܰܐܟܪܶܙ ܘܰܐܠܶܦ ܒܶܐܘܢܓܶܠܝܽܘܢ ܕܟܽܠ ܕܡܰܘܒܶܕ ܢܰܦܫܶܗ ܡܶܛܽܠܳܬܝ ܒܡܰܠܟܽܘܬܳܐ ܗ̇ܳܝ ܕܰܫܡܰܝܳܐ ܢܶܫܟܚܺܝܗ̇ ܗܳܢܳܐ ܕܥܰܠ ܣܰܒܪܳܟ ܘܬܽܘܟܠܳܢܳܐ ܫܰܪܺܝܪܳܐ ܕܰܥܠܰܝܟ ܒܰܪ ܚܰܢ̈ܦܶܐ ܛܰܠܝܳܐ ܒܳܣܽܘܣ ܘܚܳܬܶܗ ܫܽܘܫܰܢ ܗܳܠܶܝܢ ܕܰܟܦܰܪܘ ܒܡܰܠܟܽܘܬܳܐ ܐܰܪܥܳܢܳܝܬܳܐ ܕܰܐܒܽܘܗܽܘܢ: ܘܰܠܡܰܠܟܽܘܬܳܐ ܗ̇ܳܝ ܕܰܫܡܰܝܳܐ ܐܶܬܪܰܓܪܰܓܘ: ܕܠܳܟ ܚܙܰܘ ܒܥܰܝܢܳܐ ܕܪܽܘܚܳܐ ܩܰܕܺܝܫܳܐ ܘܰܟܣܺܝܬܳܐ: ܕܡܶܬܒܰܣܰܡ ܐܰܢ̱ܬ ܒܬܶܐܘܳܪܺܝܰܐ ܕܺܝܠܳܟ: ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܥܶܠܬܳܐ ܛܳܒܬܳܐ ܘܣܳܝܽܘܡܳܐ ܕܰܐܓܽܘ̈ܢܶܐ ܫܰܦܺܝܪ̈ܶܐ ܠܥܰܒ̈ܕܰܘܗܝ ܗ̇ܰܘ ܕܰܐܪܡܺܝ ܢܽܘܪܶܗ ܐܠܰܗܳܝܬܳܐ ܒܥܳܠܡܳܐ ܒܠܶܒܳܐ ܕܥܰܒܕܰܘ̈ܗܝ ܓܰܒܪ̈ܶܐ ܘܢܶܫ̈ܶܐ ܘܰܢܦܰܩܘ ܠܰܩܪܳܒܳܐ ܕܳܐܟܶܠܩܰܪܨܳܐ ܐܰܚܺܝܕ ܫܽܘܠܛܳܢܳܐ ܕܗܳܢܳܐ ܥܳܠܡܳܐ ܘܰܙܟܰܐܘܽܘܗܝ ܒܕܰܪܳܐ ܠܗܰܘ ܕܢܶܫܰܒ ܪܽܘܚܳܐ ܕܛܳܥܝܽܘܬܶܗ: ܘܚܰܒܶܠ ܘܒܰܠܒܶܠ ܠܟܽܠܳܗ̇ ܐ̱ܢܳܫܽܘܬܳܐ ܒܣܰܪܝܽܘܬܳܐ ܢܕܺܝܕܬܳܐ ܕܛܳܥܝܽܘܬܳܐ ܘܰܒܕܶܒ̈ܚܶܐ ܕܠܶܗ ܡܕܰܒܚܺܝܢ ܗܘܰܘ ܗ̇ܰܘ ܕܟܰܕܢܳܗ̇ ܠܟܽܠܳܗ̇ ܡܰܕܢܚܳܐ ܒܣܶܓܕܰܬ݀ ܦܬܰܟܪ̈ܶܐ ܥܕܰܡܳܐ ܕܰܒܢܰܝ̈ܗܽܘܢ ܘܰܒܢ̈ܳܬܗܽܘܢ ܠܫܺܐܕ̈ܶܐ ܚܰܪ̈ܡܶܐ ܢܳܟܣܺܝܢ ܗܘܰܘ: ܡܰܠܽܘܢ ܕܶܝܢ ܠܫܳܒܽܘܪ ܥܰܘܳܠܐ ܘܪܰܒܳܐ ܕܰܐܚܰܘ̈ܗܝ ܟܳܦܽܘܪ̈ܶܐ ܘܰܕܠܐ ܐܠܰܗ ܗ̇ܰܘ ܕܰܒܦܳܪܶܣ ܗ̇ܳܝ ܟܰܗܺܝܢܰܬ݀ ܒܨܰܠܡ̈ܶܐ ܘܓܰܕ̈ܶܐ ܘܥܰܫܺܝܢܰܬ݀ ܒܰܦܬܰܟܪ̈ܶܐ ܝܳܬܶܒ ܗܘܳܐ: ܘܰܫܒܺܝܬܳܐܪܰܒܬܳܐ ܡ̣ܶܢ ܒܶܝܬ ܪ̈ܽܘܡܳܝܶܐ ܟܪ̈ܺܝܣܛܝܳܢܶܐ ܫܰܦܺܝܪ̈ܰܝ ܫܡܳܐ ܘܰܬܪ̈ܺܝܨܰܝ ܗܰܝܡܳܢܽܘܬܳܐ ܥܰܒܕܰܕ ܗܘܳܐ: ܗܳܢܳܐ ܥܰܘܳܠܐ ܫܳܒܽܘܪ ܕܰܒܚܰܕ ܝܰܘܡܳܐ ܩܳܛܶܠ ܗܘܳܐ ܬܶܫܥܳܐ ܐܠܰܦܰܝ̈ܳܐ ܓܰܒܪ̈ܶܐ ܘܢܶܫ̈ܶܐ ܡ̣ܶܢ ܥܰܡܳܐ ܕܰܟܪ̈ܺܝܣܛܝܳܢܶܐ ܕܠܐ ܣܰܟܠܽܘܬܳܐ: ܘܥܰܠ ܫܡܶܗ ܕܰܡܫܺܝܚܳܐ ܟܽܠܗܽܘܢ ܐܰܣܗܶܕܘ ܫܰܪܺܝܪܳܐܝ̣ܬ: ܘܠܰܒܪܳܐ ܕܺܝܠܶܗ ܝܺܚܺܝܕܳܝܳܐ ܟܰܕ ܐܰܪܓܶܫ ܕܰܥܡܰܕ ܘܩܰܒܶܠ ܠܝܽܘܠܦܳܢܳܐ ܕܢܳܨܪ̈ܳܝܶܐ ܫܡܰܛ ܣܰܝܦܶܗ ܘܰܦܣܰܩ ܪܺܝܫܶܗ ܘܶܐܬܩܛܶܠܘ ܥܰܡܶܗ ܘܶܐܫܬܰܡܠܺܝܘ ܒܣܳܗܕܽܘܬܳܐ ܐܰܝܟ ܟܡܳܝܽܘܬܳܐ ܕܡܳܐܐ ܐܠܰܦܰܝ̈ܳܐ ܣܳܗ̈ܕܶܐ ܩܰܕܺܝ̈ܫܶܐ: ܘܟܰܕ ܗܳܢܳܐ ܫܳܒܽܘܪ ܡܰܠܟܳܐ ܥܰܘܳܠܐ ܪܰܒܳܐ ܐܺܝܬܰܘܗܝ ܗܘܳܐ ܕܰܐܚܰܘ̈ܗܝ ܘܰܐܫܠܶܡ ܘܰܐܩܺܝܡ ܡܰܠܟ̈ܶܐ ܒܰܐܬܪ̈ܰܘܳܬܳܐ ܘܰܒܢܺܝܢܘܶܐ ܘܒܰܡܕܺܝ̈ܢܳܬܳܐ ܗ̇ܳܢܶܝܢ ܐ̱ܚܪ̈ܳܢܝܳܬܳܐ ܕܰܠܡܰܕܢܚܳܐ ܠܙܳܡܰܢܣܽܘܦ ܐܰܫܠܶܛ ܡ̣ܶܢ ܢܨܺܝܒܺܝܢ ܘܰܥܕܰܡܳܐ ܠܰܟܦܰܪ̈ܙܰܡܳܪ̈ܶܐ ܥܰܠ ܓܶܢ̱ܒ ܕܶܩܠܰܬ݀ ܘܠܐܒܽܘܙܰܪܕ ܥܰܒܕܶܗ ܗܘܳܐ ܡܽܘܗܦܳܛܳܐ ܥܰܠ ܩܰܪ̈ܕܘܳܝܶܐ ܘܰܦܩܰܥܬܳܐ: ܕܒܶܝܬ ܙܰܒܕܰܝ ܘܰܥܕܰܡܳܐ ܠܪܳܓܽܘܠܐ ܕܓܺܗܰܢܳܐ: ܗܳܢܳܐ ܚܰܪܡܳܐ ܘܛܰܢܦܳܐ ܐܰܒܽܘܙܰܪܕ ܢܣܰܒ ܐܰܢ̱ܬܬܳܐ ܒܰܪܬ ܚܳܬܶܗ ܐܰܝܟ ܢܳܡܽܘܣܳܐ ܕܰܡܓܽܘ̈ܫܶܐ ܙܰܦܪ̈ܶܐ ܘܰܢܕܺܝ̈ܕܶܐ: ܘܶܐܬܺܝܠܶܕ ܡܶܢܳܗ̇ ܬܪܶܝܢ ܝܰܠܽܘ̈ܕܶܐ ܬܳܐܡ̈ܶܐ ܒܰܚܕܳܐ ܟܰܪܣܳܐ ܘܰܩܪܳܐ ܫܡܶܗ ܕܰܒܪܳܐ ܗܰܒܳܒܳܐ ܘܰܠܒܰܪܬܳܐ ܩܪܰܘ ܫܽܘܫܰܢܬܳܐ: ܗܳܢܰܘ ܕܶܝܢ ܫܽܘܫܰܢ: ܘܡ̣ܶܢ ܕܺܝܪܶܒܘ ܗܘܰܘ ܛܠܳܝ̈ܶܐ: ܐܰܘܒܶܠܘ ܐܶܢܽܘܢ ܐܰܒܳܗܰܝ̈ܗܽܘܢ: ܕܢܺܐܠܦܽܘܢ ܗ̇ܰܘ ܕܰܡܓܽܘ̈ܫܶܐ: ܘܛܰܝܒܽܘܬܳܐ ܐܠܰܗܳܝܬܳܐ ܓܒܳܬ݀ ܐܶܢܽܘܢ: ܘܟܰܕ ܐܶܙܰܠܘ ܛܠܳܝ̈ܶܐ ܕܢܺܐܠܦܽܘܢ: ܐܰܘܬܶܒ ܥܰܡܗܽܘܢ ܐܰܒܳܐ ܕܺܝܠܗܽܘܢ: ܠܛܰܠܝܳܐ ܚܰܕ ܒܰܪ ܫܶܒܝܳܐ ܕܺܐܝܬܰܘܗܝ ܟܪܺܝܣܛܝܳܢܳܐ: ܘܰܫܡܶܗ ܗܘܳܐ ܣܛܶܦܰܢܳܘܣ ܘܪܳܕܶܐ ܗܘܳܐ ܣܰܓܺܝ ܒܕܶܚܠܰܬ݀ ܐܠܰܗܳܐ: ܘܢܰܗܺܝܪ ܗܘܳܐ ܘܰܡܕܳܩ ܒܰܟ̈ܬܳܒܰܝ ܩܽܘܕܫܳܐ: ܡܶܛܽܠ ܕܰܐܒܽܘܗܝ ܩܰܫܺܝܫܳܐ ܕܰܡܕܺܝܢ̱ܬܳܐ ܕܺܝܠܗܽܘܢ ܐܺܝܬܰܘܗܝ ܗܘܳܐ: ܘܗܽܘ ܛܰܠܝܳܐ ܣܛܶܦܰܢܳܘܣ ܐܠܰܦ ܠܒܳܣܽܘܣ ܘܰܠܚܳܬܶܗ ܗܰܝܡܳܢܽܘܬܳܐ ܬܪܺܝܨܬܳܐ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܘܟܰܕ ܚܰܢܦܳܐ ܠܺܝܛܳܐ ܐܰܒܽܘܗܽܘܢ ܠܦܳܪܶܣ ܢܳܚܶܬ ܗܘܳܐ ܠܘܳܬ ܫܳܒܘܪ ܡܰܠܟܳܐ ܐܰܚܽܘܗܝ ܗ̇ܰܘ ܕܒܰܡܕܰܝ ܡܶܬܬܰܘܬܰܒ ܗܘܳܐ: ܘܩܰܘܺܝ ܠܘܳܬܶܗ ܐܰܝܟ ܦܶܠܓܽܘܬ ܫܰܢ̱ܬܳܐ ܚܕܳܐ: ܘܰܐܢ̱ܬܬܶܗ ܘܰܒܢܰܘ̈ܗܝ ܒܦܺܝܪܺܝܢ ܡܕܺܝܢ̱ܬܳܐ ܝܳܬܒܺܝܢ ܗܘܰܘ ܗ̇ܳܝ ܕܰܒܪܺܝܫ ܛܽܘܪ̈ܰܝ ܚܶܘܳܪܳܐ ܒܰܢܝܳܐ ܗܘܳܬ݀ ܒܡܰܕ̈ܢܳܚܰܝ ܛܽܘܪ̈ܥܰܒܕܺܝܢ: ܟܰܕ ܪ̈ܳܥܰܘܳܬܳܐ ܕܺܝܠܗܽܘܢ ܒܪܳܓܽܘܠܐ ܕܓܺܗܰܢܳܐ ܪܳܥܶܝܢ ܗܘܰܘ: ܘܰܒܚܰܕ ܡ̣ܶܢ ܝܰܘ̈ܡܺܝܢ ܢܚܶܬܘ ܛܠܳܝ̈ܶܐ ܒܳܣܽܘܣ ܘܚܳܬܶܗ ܠܘܳܬ ܪ̈ܳܥܰܘܳܬܳܐ ܕܺܝܠܗܽܘܢ: ܟܰܕ ܕܶܝܢ ܡܛܰܘ ܠܡܶܨܥܰܬ ܪܳܓܽܘܠܐ: ܢܚܶܬܘ ܡ̣ܶܢ ܪ̈ܰܟܫܰܝܗܽܘܢ ܘܟܰܕ ܒܡܰܣܰܩܬܳܐ: ܣܠܶܩܘ ܗܘܰܘ ܐܶܫܟܰܚܘ ܬܰܡܳܢ ܚܰܕ ܢܶܩܥܶܐ ܙܥܽܘܪܳܐ ܘܰܚܙܰܘ ܒܶܗ ܐ̱ܢܳܫ ܝܺܚܺܝܕܳܝܳܐ ܟܰܕ ܩܳܐܶܡ ܘܰܡܨܰܠܐ ܗܘܳܐ ܘܰܡܟܰܣܰܝ ܒܣܰܥܪܶܗ ܟܽܠܶܗ ܓܽܘܫܡܶܗ ܘܰܫܡܶܗ ܗܘܳܐ ܕܣܳܒܳܐ ܠܶܘܰܢܓܺܝܢܶܐ: ܘܰܕܚܶܠܘ ܛܠܳܝ̈ܶܐ ܘܶܐܬܒܰܠܗܺܝܘ ܗܘܰܘ: ܘܡܶܚܕܰܐ ܐܶܡܰܪ ܠܗܽܘܢ ܒܢ̈ܰܝ ܠܐ ܬܶܕܚܠܽܘܢ ܒܰܪܢܳܫܳܐ ܐܺܝܬܰܝ ܐܰܟܘܳܬܟܽܘܢ: ܘܡܰܠܶܠ ܥܰܡܗܽܘܢ ܘܒܰܪܶܟ ܐܶܢܽܘܢ ܘܨܰܠܺܝ ܥܠܰܝܗܽܘܢ ܘܰܐܬܩܶܢ ܡܰܥܡܽܘܕܺܝܬܳܐ ܘܰܐܥܡܶܕ ܐܶܢܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ: ܘܟܰܕ ܐܶܬܢܰܗܰܪܘ ܗܘܰܘ ܘܺܝܕܰܥܬܳܐ ܐܶܬܡܠܺܝܘ ܗܘܰܘ: ܘܟܽܠܶܗ ܝܰܘܡܳܐ ܐܰܪܬܺܝ ܐܶܢܽܘܢ: ܘܰܠܥܶܕܳܢ ܪܰܡܫܳܐ ܐܶܙܰܠܘ ܠܦܺܝܪܺܝܢ ܡܕܺܝܢ̱ܬܗܽܘܢ ܒܚܰܕܽܘܬܳܐ ܪܰܒܬܳܐ ܥܰܡ ܡܰܠܦܳܢܳܐ ܫܶܒܝܳܐ ܣܛܶܦܰܢܳܘܣ: ܘܟܰܕ ܐܰܒܽܘܗܽܘܢ ܚܰܪܡܳܐ ܡ̣ܶܢ ܨܶܝܕ ܐܰܚܽܘܗܝ ܫܳܒܽܘܪ ܗܦܰܟ ܗܘܳܐ: ܘܥܰܠ ܘܰܚܙܳܐ ܠܰܒܢܰܘ̈ܗܝ ܘܰܚܕܺܝ ܒܗܽܘܢ ܘܢܰܫܶܩ ܐܶܢܽܘܢ: ܘܰܡܚܳܐ ܡܶܢܗܽܘܢ ܪܺܝܚܳܐ ܗܰܢܺܝܳܐܐ ܘܒܰܣܺܝܡܳܐ ܕܡ̣ܶܢ ܡܰܥܡܽܘܕܺܝܬܳܐ ܐܶܬܥܰܛܰܦܘ ܘܰܥܢܳܐ ܘܰܐܒܳܐ ܕܺܝܠܗܽܘܢ ܘܶܐܡܰܪ ܠܗܽܘܢ: ܐܳܘ ܒܢ̈ܰܝ ܡܳܢܰܘ ܪܺܝܚܳܐ ܗܳܢܳܐ ܒܰܣܺܝܡܳܐ ܕܗܳܐ ܦܳܐܰܚ ܡܶܢܟܽܘܢ: ܐܳܡܪܺܝܢ ܠܶܗ ܕܚܰܕ ܣܳܒܳܐ ܢܳܨܪܳܝܳܐ ܡܰܫܚܰܢ ܒܡܶܫܚܳܐ ܗܰܢܺܝܳܐܐ ܘܒܰܣܺܝܡܳܐ ܒܰܫܡܶܗ ܕܰܡܫܺܝܚܳܐ ܐܠܰܗܳܐ ܕܢܳܨܪ̈ܳܝܶܐ: ܘܰܠܥܳܠܰܡ ܠܐ ܐܳܙܶܠ ܗܳܢܳܐ ܪܺܝܚܳܐ ܗܰܢܺܝܳܐܐ ܡ̣ܶܢ ܗܰܕܳܡܰܝ̈ܢ: ܘܟܰܕ ܐܰܒܽܘܗܽܘܢ ܥܺܐܕܳܐ ܪܰܒܳܐ ܠܐܠܳܗܰܘ̈ܗܝ ܥܳܒܶܕ ܗܘܳܐ: ܘܠܰܒܢܰܘ̈ܗܝ ܛܠܳܝ̈ܶܐ ܘܰܠܥܰܒܕܶܗ ܫܶܒܝܳܐ ܣܛܶܦܰܢܳܘܣ: ܕܢܶܥܠܽܘܢ ܠܒܶܝܬ ܦܬܰܟܪ̈ܶܐ ܘܢܶܣܓܕܽܘܢ ܠܐܠܳܗ̈ܶܐ ܕܺܝܠܶܗ ܐܠܳܨ ܗܘܳܐ ܠܗܽܘܢ: ܘܟܰܕ ܠܐ ܨܒܰܘ ܕܢܺܐܙܽܠ̱ܘܢ: ܥܰܩܶܒ ܡܶܛܽܠܬܗܽܘܢ ܕܡܳܢܳܐ ܗ̱ܝ ܥܶܠܬܳܐ ܕܠܐ ܐܳܬܶܝܬܽܘܢ ܠܗܳܢܳܐ ܥܺܐܕܳܐ ܐܳܡܪܺܝܢ ܕܣܶܓܕܬܳܐ ܡܶܬܬܚܺܝܒܳܐ ܒܰܫܪܳܪܳܐ ܠܐܠܳܗܳܐ ܚܰܝܳܐ ܘܳܠܐܷ ܕܰܢܩܰܪܶܒ ܠܗܰܘ ܕܰܒܪܳܐ ܫܡܰܝܳܐ ܘܰܐܪܥܳܐ: ܘܠܐ ܠܨܰܠܡ̈ܶܐ ܕܺܝܠܳܟ ܚܰܪ̈ܡܶܐ ܘܰܢܕܺܝ̈ܕܶܐ ܘܰܥܒܺܝ̈ܕܰܝ ܒܺܐܝ̈ܕܰܝܳܐ ܕܐ̱ܢܳܫ̈ܳܐ: ܘܟܰܕ ܫܡܰܥ ܛܪܽܘܢܳܐ ܠܺܝܛܳܐ ܐܶܬܓܰܘܙܰܠ ܒܚܶܡܬܳܐ ܘܰܒܪܽܘܓܙܳܐ ܥܰܠ ܝܰܠܕܰܘ̈ܗܝ ܘܥܰܠ ܥܰܒܕܶܗ ܣܛܶܦܰܢܳܘܣ ܘܶܐܬܒܰܥܪܰܪ ܐܰܝܟ ܐܰܪܝܳܐ ܣܳܪܽܘܚܳܐ: ܘܰܫܡܰܛ ܗܘܳܐ ܣܰܝܦܶܗ ܘܰܪܕܰܦ ܒܳܬܪܗܽܘܢ: ܘܟܰܕ ܐܰܕܪܟܶܗ ܠܶܣܛܶܦܰܢܳܘܣ ܩܰܕܡܳܐܝ̣ܬ ܦܰܣܩܶܗ ܠܪܺܝܫܶܗ ܕܠܐ ܪ̈ܰܚܡܶܐ ܩܰܛܠܶܗ: ܟܰܕ ܡܛܳܐ ܠܰܡܨܰܥܬܶܗ ܕܢܰܚܠܐ ܐܰܕܪܟܶܗ ܠܫܽܘܫܰܢ ܒܰܪܬܶܗ ܘܰܐܝܟ ܕܺܐܒܳܐ ܣܳܪܽܘܚܳܐ ܘܰܡܚܰܒܠܳܢܳܐ ܒܰܣܒܣܳܗ̇ ܥܰܠ ܫܽܘܥܳܐ ܠܢܶܩܝܳܐ ܕܰܐܠܳܗܳܐ: ܘܰܣܠܶܩ ܠܰܡܥܰܪܬܳܐ ܕܣܳܒܳܐ ܙܰܗܝܳܐ ܡܰܠܦܳܢܳܐ ܕܰܛܠܳܝ̈ܶܐ ܡܳܪܝ ܠܶܘܰܢܓܺܝܢܶܐ: ܡܶܛܽܠ ܕܒܳܣܽܘܣ ܠܘܳܬܶܗ ܐܶܬܛܰܫܺܝ: ܘܩܰܛܠܶܗ ܠܣܳܒܳܐ ܓܰܒܝܳܐ ܘܰܐܒܺܝܠܐ ܕܰܐܠܳܗܳܐ: ܘܥܰܠ ܒܳܬܰܪ ܒܪܳܐ ܕܺܝܠܶܗ ܕܢܶܩܛܠܺܝܘܗܝ ܘܰܣܥܰܪ ܐܠܰܗܳܐ ܬܶܕܡܽܘܪܬܳܐ ܪܰܒܬܳܐ ܘܶܐܨܛܰܪܺܝ ܫܽܘܥܳܐ ܕܫܶܢܳܐ ܗ̇ܳܝ ܘܶܐܬܦܰܬܚܰܬ݀ ܥܕܰܡܳܐ ܠܐܦ̈ܰܝ ܠܥܶܠ: ܘܰܣܠܶܩ ܗܘܳܐ ܡܳܪܝ ܒܳܣܽܘܣ ܒܰܚܪܽܘܪܳܐ ܕܨܶܪܝܳܐ ܗ̇ܰܘ ܥܕܰܡܳܐ ܠܪܺܝܫ ܛܽܘܪܳܐ ܘܶܐܬܛܰܫܺܝ ܒܰܚܕܳܐ ܕܽܘܟܬܳܐ: ܘܟܰܕ ܚܙܰܐܘܽܘܗܝ ܕܶܝܢ ܪ̈ܳܥܰܘܳܬܳܐ: ܚܰܕ ܐܶܡܰܪ ܕܠܐ ܚܙܰܝܢܰܢ ܒܪܳܟ: ܗ̇ܰܘ ܕܰܐܢ̱ܬ ܠܶܗ ܒܳܥܶܐ ܐܰܢ̱ܬ: ܘܰܐ̱ܚܪܺܢܳܐ ܐܶܡܰܪ ܕܶܐܢܳܐ ܚܙܺܝܬܶܗ ܕܰܡܛܰܫܰܝ ܒܕܽܘܟܬܳܐ ܦܠܳܢܺܝܬ: ܘܗܽܘ ܗܳܢܳܐ ܕܳܘܝܳܐ ܒܠܰܥ ܒܰܡܚܽܘܬܳܐ ܡܰܪܥܺܝܬܳܐ ܕܓܰܪܒܳܐ ܘܗܽܘ ܘܥܳܢ̈ܶܗ: ܘܗ̇ܰܘ ܐ̱ܚܪܺܢܳܐ ܕܡ̣ܶܢ ܚܶܕܶܠ ܩܪܺܝܬܳܐ ܩܰܒܶܠ ܨܠܰܘ̈ܳܬܳܐ ܘܒܽܘܪ̈ܟܳܬܳܐ: ܘܟܰܕ ܚܙܳܝܗܝ ܗܘܳܐ ܠܐܒܽܘܗܝ ܕܶܐܬܳܐ ܗܘܳܐ ܕܢܶܩܛܠܶܗ: ܐܰܦܺܝܣܶܗ ܕܠܐ ܬܶܩܛܠܰܢܝ: ܘܬܶܬܚܰܝܰܒ ܠܳܟ ܒܕܶܡܝ ܙܰܟܳܝܳܐ ܐܶܠܐ ܗܰܝܡܶܢ ܘܰܥܡܰܕ ܒܰܫܡܶܗ ܕܰܡܫܺܝܚܳܐ: ܘܬܶܗܘܶܐ ܟܪܺܝܣܛܝܳܢܳܐ ܫܰܪܺܝܪܳܐ ܐܶܡܪܳܐ ܒܥܳܢ̈ܶܗ ܕܰܡܫܺܝܚܳܐ ܘܬܶܬܦܰܨܶܐ ܡ̣ܶܢ ܢܽܘܪܳܐ ܕܓܺܗܰܢܳܐ ܘܟܰܕ ܨܰܠܺܝ ܒܠܶܒܶܗ ܒܰܚܢܰܓܬܳܐ ܟܰܣܝܳܐܝ̣ܬ: ܘܰܐܪܺܝܡ ܗܘܳܐ ܐܰܒܽܘܗܝ ܣܰܝܦܶܗ ܘܦܰܣܩܳܗ̇ ܠܐܝܕܶܗ ܕܝܰܡܺܝܢܳܐ ܘܰܕܣܶܡܳܠܐ ܕܰܒܪܶܗ ܒܳܣܽܘܣ: ܘܡܶܚܕܳܐ ܟܰܕ ܦܣܰܩ ܠܪܺܝܫܶܗ ܘܰܫܕܳܝܗܝ ܠܦܰܓܪܳܐ ܩܰܕܺܝܫܳܐ ܒܓܰܘ ܨܶܪܝܳܐ: ܘܶܐܬܟܰܠܰܠܘ ܢܰܨܺܝ̈ܚܶܐ: ܫܢܰܬ ܫܶܬܡܳܐܐ ܘܬܶܫܥܺܝܢ ܘܰܬܫܰܥ ܕܝܰܘ̈ܢܳܝܶܐ: ܘܰܐܒܽܘܙܰܪܕ ܠܺܝܛܳܐ ܐܰܒܽܘܗܽܘܢ ܕܰܛܠܳܝ̈ܶܐ ܒܳܬܰܪ ܕܰܚܪܰܒ ܐܶܢܽܘܢ ܢܚܶܬ ܘܶܐܬܳܐ ܒܥܶܕܳܢ ܪܰܡܫܳܐ ܘܥܰܠ ܠܒܶܝܬ ܦܬܰܟܪ̈ܶܐ ܕܺܝܠܶܗ ܕܰܢܨܰܠܐܷ ܗܘܳܐ ܐܰܟܡܰܢ ܕܰܐܢܺܝܚ ܠܠܶܒܳܐ ܕܰܐܠܳܗ̈ܶܐ ܕܺܝܠܶܗ ܒܰܗܺܝ̈ܬܶܐ ܒܩܶܛܠܐ ܕܰܒܢܰܘ̈ܗܝ ܚܰܒܺܝ̈ܒܶܐ: ܘܟܰܕ ܦܩܰܕ ܐܠܰܗܳܐ ܫܰܠܺܝܛ ܥܰܠ ܟܽܠ: ܢܽܘܪܳܐ ܥܰܫܺܝܢܬܳܐ ܡ̣ܶܢ ܫܡܰܝܳܐ ܐܰܝܟ ܒܰܪܩܳܐ ܢܶܚܬܰܬ݀ ܘܰܐܘܩܕܰܬ݀ ܠܐܒܽܘܙܰܪܕ ܠܺܝܛܳܐ ܘܠܐܠܳܗܰܘ̈ܗܝ ܦܬܰܟܪ̈ܶܐ ܛܰܡ̈ܶܐܐ ܘܰܠܟܽܠܗܽܘܢ ܚܰܢ̈ܦܶܐ ܕܬܰܡܳܢ ܟܢܺܝܫܺܝܢ ܗܘܰܘ: ܘܠܐ ܐܶܫܬܰܘܙܰܒܘ ܒܗܳܝ ܡܕܺܝܢ̱ܬܳܐ ܐܶܠܐ ܐܶܢ ܟܪ̈ܺܝܣܛܝܳܢܶܐ ܒܰܠܚܽܘܕ: ܘܟܽܠ ܕܰܚܙܳܐ ܠܬܶܕܡܽܘܪܬܳܐ ܗܳܕܶܐ ܫܰܒܰܚ ܠܐܠܳܗܳܐ ܕܬܳܒܰܥ ܥܝܳܪܬܳܐ ܕܥܰܒܕܰܘ̈ܗܝ ܛܠܺܝ̈ܡܶܐ ܘܟܰܕ ܡ̣ܶܢ ܬܰܡܳܢ ܨܰܠܡ̈ܶܐ ܕܰܣܚܺܝܦܺܝܢ: ܐܠܰܗܽܘ̈ܢܶܐ ܕܒܳܟܶܝܢ ܚܰܢ̈ܦܶܐ ܟܽܠܗܽܘܢ ܕܝܳܩܕܺܝܢ ܒܢܽܘܪܳܐ: ܟܪ̈ܺܝܣܛܝܳܢܶܐ ܕܡܶܬܩܰܠܣܺܝܢ ܘܰܫܡܶܗ ܕܰܡܫܺܝܚܳܐ ܕܡܶܫܬܰܒܰܚ ܦܺܝܪܺܝܢ ܕܰܗܘܳܐ ܒܳܗ̇ ܙܰܘܥܳܐ ܘܒܽܘܠܗܳܝܳܐ ܘܒܶܝܬ ܙܰܒܕܰܝ ܕܡܶܬܬܙܺܝܥܳܐ ܘܢܳܝܕܳܐ ܐܰܝܟ ܥܰܪܙܶܠܐ: ܣܳܗ̈ܕܶܐ ܩܰܕܺܝ̈ܫܶܐ ܕܰܢܟܺܝܣܺܝܢ ܡ̣ܶܢ ܚܰܢܦܳܐ ܐܰܒܽܘܗܽܘܢ: ܘܥܺܕܬܳܐ ܩܰܕܺܝܫܬܳܐ ܕܒܰܣܺܝܡܰܬ݀ ܓܰܪ̈ܡܰܝܗܽܘܢ ܛܳܦܣܳܐ ܘܰܠܕܽܘܟܪܳܢܗܽܘܢ ܡܝܰܩܪܺܝܢ: ܘܰܚܢܰܢ ܟܽܠܰܢ ܒܚܰܕܽܘܬܳܐ ܪܰܒܬܳܐ ܘܟܶܢܫܳܐ ܕܰܡܗܰܝ̈ܡܢܶܐ ܡܰܙܥܩܺܝܢܰܢ ܟܰܕ ܐܳܡܪܺܝܢܢ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܠܶܘܢܓܝܢܶܐ ܣܳܒܳܐ ܙܰܗܝܳܐ: ܘܶܣܛܶܦܰܢܳܘܣ ܒܰܪ ܫܶܒܝܳܐ ܘܡܳܪܝ ܒܳܣܽܘܣ ܘܚܳܬܶܗ ܫܽܘܫܰܢ ܕܩܰܒܶܠܬܽܘܢ ܟܠܺܝܠܐ ܕܙܳܟܽܘܬܳܐ ܡ̣ܶܢ ܐܺܝ̈ܕܰܝ ܐܰܒܽܘܙܰܪܕ ܡܰܠܟܳܐ ܚܰܢܦܳܐ ܐܰܒܽܘܟܽܘܢ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܰܫܒܰܩܬܽܘܢ ܡܰܠܟܽܘܬܳܐ ܗܳܕܶܐ ܐܰܪܥܳܢܳܝܬܳܐ ܘܰܠܡܰܠܟܽܘܬܳܐ ܕܰܫܡܰܝܳܐ ܐܶܬܪܰܓܪܰܓܬܽܘܢ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܒܳܣܽܘܣ ܘܚܳܬܶܗ ܫܽܘܫܰܢ: ܕܒܰܪ ܫܢܰܝ̈ܳܐ ܬܠܳܬܰܥܣܰܪ ܐܶܬܟܰܠܰܠܬܽܘܢ: ܡܶܛܽܠ ܕܰܬܪ̈ܰܝܟܽܘܢ ܒܰܚܕܳܐ ܟܰܪܣܳܐ ܬܳܐܡ̈ܶܐ ܐܶܬܺܝܠܶܕܬܽܘܢ: ܠܟܽܘܢ ܛܽܘܒܰܝܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܕܦܰܓܪ̈ܰܝܟܽܘܢ ܒܚܶܕܶܠ ܩܪܺܝܬܳܐ ܕܥܰܠ ܓܶܢ̱ܒ ܢܰܚܠܐ ܐܶܬܛܰܟܰܣܘ: ܘܟܽܠ ܚܰܝܠܺܝ̈ܢ ܘܳܐܣܘ̈ܳܬܳܐ ܠܰܟܪ̈ܺܝܗܶܐ ܘܰܐܠܺܝ̈ܨܶܐ ܡܰܒܥܺܝܢ ܓܰܪ̈ܡܰܝܟܽܘܢ: ܘܡܶܛܽܠ ܗܳܕܶܐ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ: ܕܠܐ ܩܰܠܶܣܢܰܢ ܐܰܝܟ ܕܫܳܘܶܐ ܥܺܐܕܟܽܘܢ ܘܰܠܚܰܝܠܐ ܐܠܰܗܳܝܳܐ ܕܰܫܪܶܐ ܒܗܰܕܳܡܰܝ̈ܟܽܘܢ: ܘܡܶܬܟܰܫܦܺܝܢܰܢ ܠܡܳܪܟܽܘܢ: ܕܢܰܫܪܶܐ ܫܰܝܢܶܗ ܘܰܫܠܳܡܶܗ ܒܥܳܠܡܳܐ ܟܽܠܶܗ: ܘܢܰܥܒܰܪ ܡܶܢܰܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܒܰܨܠܰܘ̈ܳܬܟܽܘܢ: ܘܰܢܚܰܣܶܐ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܒܰܦܝܳܣܳܐ ܕܺܝܠܟܽܘܢ ܘܰܢܫܰܟܶܢ ܡܳܪܟܽܘܢ ܚܽܘܣܳܝܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܕܰܫܟܶܒܘ ܥܰܠ ܣܰܒܪܶܗ ܒܗܰܝܡܳܢܽܘܬܳܐ ܕܰܫܪܳܪܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠܳܝܗܝ ܡܳܪܝܳܐ ܐܠܰܗܳܐ ܠܥܶܛܪܳܐ ܗܳܢܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ ܒܝܰܘܡܳܐ ܗܳܢܳܐ ܕܥܺܐܕܳܐ ܕܩܶܛܠܐ ܕܩܰܕܺܝ̈ܫܶܐ ܘܣܳܗ̈ܕܶܐ ܕܺܝܠܳܟ ܕܩܰܪܶܒ ܕܶܡܗܽܘܢ ܟܳܗܢܳܐ ܥܰܘܳܠܐ ܐܰܒܽܘܗܽܘܢ ܕܰܒܕܶܒܚܶܗ ܐܶܣܬܠܺܝ ܗ̣ܶܢܽܘܢ ܐܶܬܩܰܒܰܠܘ ܐܰܝܟ ܕܶܒܚܳܐ ܕܢܰܦܬܰܚ ܟܺܐܢܳܐ ܘܰܐܝܟ ܩܽܘܪܒܳܢܶܗ ܕܰܐܒܪܳܗܳܡ: ܘܫܰܟܶܢ ܠܰܢ ܒܝܰܘܡܳܐ ܗܳܢܳܐ ܫܰܝܢܳܐ ܘܰܫܠܳܡܳܐ ܠܰܒܪܺܝܬܳܐ ܟܽܠܳܗ̇: ܕܢܰܘܕܶܐ ܠܪ̈ܰܚܡܰܝܟ ܣܰܓܺܝ̈ܶܐܐ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܡܫܺܝܚܳܐ ܕܰܐܠܒܶܫ ܙܰܝܢܳܐ ܠܩܰܕܺܝ̈ܫܰܘܗܝ ܘܩܳܡ ܒܰܐܓܽܘܢܳܐ ܕܚܰܫ̈ܶܐ ܥܰܡ ܣܳܗܕܰܘ̈ܗܝ: ܗܽܘܝܽܘ ܕܟܰܠܶܠ ܒܰܟܠܺܝ̈ܠܐ ܕܢܰܨܺܝ̈ܚܶܐ ܕܙܳܟܽܘܬܳܐ ܠܡܳܪܝ ܒܳܣܽܘܣ ܣܳܗܕܳܐ ܒܰܪ ܚܰܢ̈ܦܶܐ ܘܰܠܚܳܬܶܗ ܫܽܘܫܰܢ ܕܡܶܛܽܠ ܚܽܘܒܳܟ ܝܰܗܒܘ ܨܰܘܪ̈ܰܝܗܽܘܢ ܠܰܣܪ̈ܳܩܶܐ ܐܰܝܟܰܢܳܐ ܕܢܶܬܚܰܕܽܘܢ ܥܰܡܳܟ ܒܰܓܢܽܘܢܳܐ ܐܠܰܗܰܢ ܣܓܺܝܕܳܐ ܝܶܫܽܘܥ ܡܫܺܝܚܳܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܕܡܰܠܟ̈ܶܐ ܘܰܡܚܰܝܠܳܢܳܐ ܕܰܐܬܠܺܝ̈ܛܶܐ: ܕܩܳܡ ܒܶܝܬ ܕܺܝܢܳܐ ܥܰܡ ܣܳܗ̈ܕܶܐ ܩܰܕܺܝ̈ܫܶܐ ܘܰܙܟܰܘ ܠܒܺܝܫܳܐ ܒܥܶܠܕܰܪܳܐ ܘܰܐܥܕܺܝܘ ܟܠܺܝܠܐ ܕܙܳܟܽܘܬܳܐ: ܠܗܰܘ ܕܢܰܨܰܚ ܒܰܐܓܽܘܢܳܐ ܕܣܳܗܕܽܘܬܳܐ ܠܣܳܗ̈ܕܶܐ ܩܰܕܺܝ̈ܫܶܐ ܒܳܣܽܘܣ ܘܚܳܬܶܗ ܘܗܳܐ ܝܰܘܡܳܢ ܢܳܨܰܚ ܕܽܘܟܪܳܢܗܽܘܢ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ ܐܰܝܟܰܢܳܐ ܕܠܰܡܟܰܠܠܳܢܗܽܘܢ ܫܽܘܒܚܳܐ ܡܰܣܩܺܝܢܰܢ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܟܰܠܠܳܢܳܐ ܕܣܳܗ̈ܕܶܐ ܪ̈ܚܽܘܡܰܘܗܝ ܘܰܡܚܰܝܠܳܢܳܐ ܪܰܒܳܐ ܕܰܐܬܠܺܝ̈ܛܰܘܗܝ: ܗ̇ܰܘ ܡܰܒܽܘܥܳܐ ܕܟܽܠܳܗ̇ ܩܰܕܺܝܫܽܘܬܳܐ ܘܪܶܕܝܳܐ ܕܕܰܟܝܽܘܬܳܐ: ܗ̇ܰܘ ܕܠܐ ܛܳܠܶܡ ܐܰܓܪܳܐ ܕܟܳܣܳܐ ܕܩܰܪܺܝܪ̈ܶܐ ܗ̇ܰܘ ܕܝܳܗܶܒ ܠܩܰܕܺܝ̈ܫܶܐ ܡܰܠܟܽܘܬܳܐ ܕܰܫܡܰܝܳܐ: ܘܦܳܪܰܥ ܠܣܳܗ̈ܕܶܐ ܐܰܓܪܳܐ ܕܡܰܘܕܝܳܢܽܘܬܗܽܘܢ: ܗ̇ܰܘ ܕܰܓܒܳܐ ܠܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܒܳܣܽܘܣ ܘܚܳܬܶܗ ܘܡ̣ܶܢ ܓܰܘ ܟܰܪܣܳܐ ܩܰܕܶܫ ܐܶܢܽܘܢ ܒܪܽܘܚܳܐ ܕܺܝܠܶܗ ܡܰܥܒܶܕ ܚܰܝ̈ܶܐ ܘܗܰܕܺܝ ܐܶܢܽܘܢ ܠܐܘܪܚܳܐ ܕܰܫܪܳܪܳܐ ܒܝܰܕ ܣܛܶܦܰܢܳܘܣ ܫܶܒܝܳܐ ܒܰܪ ܒܰܝܬܗܽܘܢ: ܘܣܳܒܳܐ ܙܰܗܝܳܐ ܡܳܪܝ ܠܶܘܰܢܓܺܝܢܶܐ ܪܰܒܳܐ ܕܺܝܠܗܽܘܢ: ܗ̇ܰܘ ܕܰܐܥܡܶܕ ܐܶܢܽܘܢ ܘܰܐܠܶܦ ܐܶܢܽܘܢ ܐܽܘܪܚܳܐ ܕܰܫܪܳܪܳܐ: ܕܺܝ̈ܢܶܐ ܘܢܳܡܽܘ̈ܣܶܐ ܘܛܶܟ̈ܣܶܐ ܕܰܟܪ̈ܺܝܣܛܝܳܢܶܐ: ܘܰܫܒܺܝ̈ܠܐ ܕܡܰܘܒܠܺܝܢ ܠܚܰܝ̈ܶܐ ܡܬܽܘ̈ܡܳܝܶܐ ܘܶܐܬܡܠܺܝܘ ܪܽܘܚܳܐ ܩܰܕܺܝܫܳܐ ܐܶܬܓܰܢ̱ܒܰܪܘ ܥܰܠ ܚܰܫ̈ܶܐ ܘܫܶܢ̈ܕܶܐ ܕܟܳܦܽܘܪ̈ܶܐ: ܘܰܐܡܣܰܪܘ ܥܰܠ ܬܰܫܢܺܝ̈ܩܶܐ ܕܪ̈ܳܕܽܘܦܶܐ ܥܰܘ̈ܶܠܐ: ܘܗ̇ܳܝ ܕܶܝܢ ܐܶܬܟܰܠܰܠܘ ܣܳܗ̈ܕܶܐ ܡ̣ܶܢ ܐܰܒܽܘܗܽܘܢ ܚܰܪܡܳܐ ܘܰܕܠܐ ܐܠܰܗ ܐܰܒܽܘܙܰܪܕ ܣܳܢܳܐܐ ܕܥܰܒܕܰܘ̈ܗܝ ܕܰܐܠܳܗܳܐ: ܘܰܐܝܟ ܩܽܘܪܒܳܢܳܐ ܡܩܰܒܠܐ ܩܰܪܶܒ ܐܶܢܽܘܢ ܟܳܗܢܳܐ ܛܰܡܳܐܐ ܠܰܒܢܰܝ̈ܳܐ ܕܺܝܠܶܗ ܣܓܽܘ̈ܠܐ ܫܰܦܺܝܪ̈ܶܐ ܘܥܰܠ ܗܳܕܶܐ ܟܽܠܰܢ ܡܗܰܝ̈ܡܢܶܐ ܠܕܽܘܟܪܳܢܗܽܘܢ ܨܳܒܶܝܢܰܢ ܠܰܡܝܰܩܳܪܽܘ: ܫܠܳܡܳܐ ܫܰܦܝܳܐ ܠܓܰܪ̈ܡܰܝܗܽܘܢ ܡܩܰܪܒܺܝܢܰܢ ܟܰܕ ܐܳܡܪܺܝܢܢ: ܫܠܳܡ ܠܟܽܘܢ ܣܳܗ̈ܕܶܐ ܢܰܨܺܝ̈ܚܶܐ ܡܳܪܝ ܒܳܣܽܘܣ ܘܚܳܬܶܗ ܫܽܘܫܰܢ ܘܡܳܪܝ ܣܛܶܦܰܢܳܘܣ ܡܫܰܡܫܳܢܳܐ ܒܰܪ ܒܰܝܬܗܽܘܢ: ܘܰܫܠܳܡܳܐ ܠܣܳܒܳܐ ܙܰܗܝܳܐ ܡܳܪܝ ܠܶܘܰܢܓܺܝܢܶܐ ܪܰܒܟܽܘܢ ܕܰܫܠܳܡܳܐ ܘܫܰܝܢܳܐ ܙܪܰܥܬܽܘܢ ܒܰܐܬܪܰܢ ܘܰܐܘܝܽܘܬܳܐ ܪܰܒܬܳܐ: ܘܰܥܩܰܪܬܽܘܢ ܠܟܽܠܳܗ̇ ܚܶܪܝܳܝܽܘܬܳܐ ܘܰܦܠܺܝܓܽܘܬܳܐ: ܫܠܳܡ ܠܟܽܘܢ ܣܳܗ̈ܕܶܐ ܩܰܕܺܝ̈ܫܶܐ ܡܳܪܝ ܒܳܣܽܘܣ ܘܫܽܘܫܰܢ ܚܳܬܶܗ ܕܰܐܚܶܬܬܽܘܢ ܢܽܘܪܳܐ ܝܳܩܶܕܬܳܐ ܒܳܬܰܪ ܟܽܘܠܳܠܟܽܘܢ ܥܰܠ ܨܰܠܡ̈ܶܐ ܒܰܗܺܝ̈ܬܶܐ ܕܰܐܒܽܘܟܽܘܢ ܘܥܰܠ ܟܽܠܗܽܘܢ ܥܰܡ̈ܡܶܐ ܕܰܒܦܺܝܪܺܝܢ ܘܠܐ ܐܶܫܬܰܘܙܰܒܘ ܐܶܠܐ ܐܶܢ ܐܶܫܟܳܪܳܐ ܕܥܰܡܳܐ ܕܰܟܪ̈ܺܝܣܛܝܳܢܶܐ: ܫܠܳܡܠܳܟ ܣܳܗܕܳܐ ܢܰܨܺܝܚܳܐ ܡܳܪܝ ܒܳܣܽܘܣ ܘܰܫܠܳܡܳܐ ܠܓܽܘܕܳܐ ܕܚܰܒܪ̈ܰܝܟ ܣܳܗ̈ܕܶܐ ܩܰܕܺܝ̈ܫܶܐ ܚܕܰܥܣܰܪ ܐܠܰܦܰܝ̈ܳܐ ܕܶܐܬܩܛܶܠܘ ܥܰܡܳܟ ܡ̣ܶܢ ܐܺܝ̈ܕܰܝ ܐܰܒܽܘܟ ܟܳܦܽܘܪܳܐ: ܟܽܠܗܽܘܢ ܡ̣ܶܢ ܫܒܺܝܬܳܐ ܕܰܐܬܪܳܐ ܕܒܶܝܬ ܢܰܗܪܺܝܢ: ܫܠܳܡܠܳܟ ܡܳܪܝ ܒܳܣܽܘܣ ܢܶܫܪܳܐ ܙܪܺܝܙܳܐ ܕܰܩܒܰܥ ܓܶܦܰܘ̈ܗܝ ܒܟܶܢܦܳܐ ܕܰܨܠܺܝܒܳܐ: ܫܠܳܡܠܳܟ ܣܳܗܕܳܐ ܒܳܣܽܘܣ ܛܰܠܝܳܐ ܫܰܪܘܳܝܳܐ ܘܰܫܠܳܡܳܐ ܠܣܳܗܕܬܳܐ ܛܽܘܒܳܢܺܝܬܳܐ ܚܳܬܳܟ ܫܽܘܫܰܢ: ܕܰܐܣܠܺܝܬܽܘܢ ܠܡܰܠܟܽܘܬܳܐ ܕܰܐܒܳܗܰܝ̈ܟܽܘܢ ܘܠܰܡܓܽܘܫܽܘܬܳܐ ܡܰܣܠܰܝܬܳܐ ܘܰܠܝܽܘܠܦܳܢܳܐ ܕܟܰܠܕܳܝܽܘܬܳܐ ܙܰܦܪܐ: ܘܰܐܚܶܒܬ ܘܶܐܬܢܰܩܰܦܬ ܠܝܽܘܠܦܳܢܳܐ ܕܚܰܝ̈ܶܐ ܘܒܶܗ ܢܗܰܪ̈ܝ ܢܰܦ̈ܫܳܬܳܐ ܕܺܝܠܟܽܘܢ ܩܰܕܺܝ̈ܫܳܬܳܐ: ܫܠܳܡܠܳܟ ܡܳܪܝ ܒܳܣܽܘܣ ܕܰܐܝܠܶܝܢ ܕܶܐܬܒܰܪܰܟܘ ܡ̣ܶܢ ܓܰܪ̈ܡܰܝܟ ܥܽܘܕܪܳܢܳܐ ܘܳܐܣܝܽܘܬܳܐ ܩܢܰܘ ܡܶܢܗܽܘܢ: ܘܰܐܝܠܶܝܢ ܕܶܐܬܚܰܫܰܒܘ ܥܰܠ ܩܶܛܠܳܟ ܒܪܽܘܓܙܳܐ ܪܰܒܳܐ ܒܠܰܥܘ ܘܰܒܢܽܘܪܳܐ ܡܫܰܠܗܰܒܬܳܐ ܐܶܬܓܡܪܘ: ܫܠܳܡܠܳܟ ܡܳܪܝ ܒܳܣܽܘܣ ܕܰܠܪܳܥܝܳܐ ܗ̇ܰܘ ܕܰܓܠܐ ܠܐܒܽܘܟ ܥܠܰܝܟ: ܟܺܐܒܳܐ ܕܓܰܪܒܳܐ ܐܠܰܒܶܫܬ ܘܰܠܥܳܢ̈ܶܗ: ܘܰܠܪܳܥܝܳܐ ܕܺܝܡܳܐ ܕܠܐ ܚܙܳܟ ܒܰܪܶܟܬ ܠܥܳܢ̈ܶܗ ܘܰܐܣܓܺܝܬ ܘܰܐܫܘܺܝܬܳܝܗܝ ܒܫܳܥܰܬ݀ ܟܽܘܠܳܠܳܟ ܕܠܰܡܢܳܬܳܐ ܕܝܰܡܺܝܢܳܐ ܒܦܶܨܬܶܗ ܬܶܡܛܶܐ ܗ̇ܰܘ ܕܺܐܝܬܰܘܗܝ ܗܘܳܐ ܡ̣ܶܢ ܚܶܕܶܠ ܐܳܦ ܟܪ̈ܺܝܣܛܝܳܢܶܐ ܐܺܝܬܰܝܗܽܘܢ ܗܘܰܘ ܒܢ̈ܰܝ ܩܪܺܝܬܶܗ: ܘܗܳܫܳܐ ܣܳܗܕܳܐ ܡܳܪܝ ܒܳܣܽܘܣ ܠܐ ܬܶܛܥܶܐ ܠܕܳܘܝܳܐ ܕܣܰܠܓܶܣ ܠܳܟ ܗܳܠܶܝܢ ܡ̈ܶܠܐ ܙܥܽܘܪ̈ܝܳܬܳܐ ܘܥܰܠ ܗ̇ܳܝ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ: ܕܰܬܚܰܕܶܐ ܠܰܢ ܒܰܓܢܽܘܢܳܟ ܘܬܰܣܡܶܟ ܠܰܢ ܒܡܰܠܟܽܘܬܳܟ ܘܬܶܡܢܶܐ ܥܰܡ ܐܶܡܪ̈ܰܝܟ ܒܓܰܒܳܐ ܕܝܰܡܺܝܢܳܐ ܘܬܶܫܡܰܥ ܒܰܪܬ ܩܳܠܐ ܡܰܚܝܳܢܺܝܬܳܐ ܕܳܐܡܪܳܐ ܠܰܢ ܒܒܶܝܬ ܕܺܝܢܳܐ ܘܰܠܥܰܢܺܝ̈ܕܰܝܢ: ܫܒܺܝܩܺܝܢ ܚܰܘ̈ܒܶܐ ܘܰܚܛܳܗ̈ܶܐ ܕܺܝܠܟܽܘܢ ܘܢܶܚܙܶܐ ܚܢܳܢܳܟ ܟܽܠܰܢ ܒܰܐܦ̈ܶܐ ܓܰܠܝ̈ܳܬܳܐ ܐܰܝܟܰܢܳܐ ܕܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܥܙܙܐܝܠ ܣܗܕܐ

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܕܰܠܕܽܘܟܪܳܢܳܐ ܕܣܳܗܕܳܐ ܣܗܺܝܕܳܐ ܒܰܫܪܳܪܳܐ ܡܳܪܝ ܥܙܳܙܳܐܶܝܠ ܙܰܡܶܢ ܠܰܢ: ܘܰܠܥܰܕܥܺܐܕܶܗ ܕܰܐܬܠܺܝܛܶܗ ܓܰܒܝܳܐ ܟܰܢܶܫ ܠܰܢ: ܘܰܒܩܽܘܠܳܣ̈ܶܐ ܕܰܥܛܺܝܦ ܙܳܟܽܘܬܳܐ ܒܰܣܶܡ ܠܰܢ: ܗܳܢܳܐ ܕܪܰܒ ܫܰܪܒܳܐ ܕܢܶܨܚܳܢܰܘ̈ܗܝ ܡ̣ܶܢ ܡܶܠܬܰܢ: ܘܪܳܡ ܕܰܪܓܳܐ ܕܰܐܬܠܺܝܛܽܘܬܶܗ ܡ̣ܶܢ ܡܫܽܘܚܬܰܢ: ܗܳܢܳܐ ܕܰܒܚܽܘܒܳܐ ܕܡܳܪܶܗ ܐܰܫܠܶܡ ܦܰܓܪܶܗ ܠܢܶܓ̈ܕܶܐ: ܘܝܰܗܒ ܓܽܘܫܡܶܗ ܠܫܶܢ̈ܕܶܐ: ܘܒܰܣܰܪ ܥܰܠ ܐܽܘܠܨܳܢ̈ܶܐ: ܘܫܳܛ ܠܡܰܘܬܳܐ ܝܰܥܢܳܐ: ܘܰܗܘܳܐ ܝܽܘܩܢܳܐ ܢܰܗܺܝܪܳܐ ܘܬܰܦܢܟܳܐ ܘܕܽܘܡܝܳܐ ܚܰܬܺܝܬܳܐ ܕܰܡܫܺܝܚܳܐ ܡܰܠܟܳܐ ܡܳܪܶܗ: ܕܗ̣ܽܘ ܩܪܳܝܗܝ ܠܡܶܫܬܽܘܬܶܗ ܘܙܰܡܢܶܗ ܠܰܚܠܽܘܠܶܗ: ܕܥܰܒܕܶܗ ܝܳܪܬܳܐ ܒܡܰܠܟܽܘܬܶܗ: ܕܠܶܗ ܚܢܰܢ ܢܫܰܒܰܚ ܦܰܐܝܳܐܝ̣ܬ: ܘܰܢܝܰܩܰܪ ܠܥܽܘܗܕܳܢܳܐ ܕܩܽܘܠܳܣܶܗ ܚܰܣܝܳܐܝ̣ܬ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܰܡܥܰܕܥܳܕܽܘ ܠܰܡܢܺܝܚܳܢܳܐ ܕܺܝܠܳܟ ܐܶܬܛܰܝܰܒܢܰܢ ܐܳܘ ܡܳܪܝܳܐ: ܘܠܰܡܩܰܠܳܣܽܘ ܠܦܳܠܚܳܐ ܕܺܝܠܳܟ ܐܶܬܘܰܥܰܕܢܰܢ: ܘܠܰܡܝܰܩܳܪܽܘ ܠܕܽܘܟܪܳܢܳܐ ܐܠܰܗܳܝܳܐ ܕܩܰܕܺܝܫܳܐ ܕܺܝܠܳܟ ܣܳܗܕܳܐ ܡܳܪܝ ܥܙܳܙܳܐܶܝܠ ܐܶܬܟܰܢܰܫܢܰܢ: ܐܰܝܟܰܢܳܐ ܕܬܶܫܒ̈ܚܳܬܳܐ ܕܰܟܝ̈ܳܬܳܐ ܒܥܰܕܥܺܐܕܶܗ ܚܰܣܝܳܐ ܢܫܰܘܫܶܛ ܠܳܟ: ܬܰܟܫ̈ܦܳܬܳܐ ܠܺܠܝ̈ܳܠܳܬܳܐ ܕܺܝܠܰܢ ܩܕܳܡ ܫܟܺܝܢܬܳܐ ܕܦܰܓܪܶܗ ܚܰܝܳܐ ܘܣܳܥܰܪ ܚܰܝ̈ܠܐ ܐܳܫܕܺܝܢܰܢ: ܘܰܒܩܽܘܠܳܣ̈ܶܐ ܘܪܽܘܡܪ̈ܳܡܶܐ ܠܶܗ ܡܰܘܪܒܺܝܢܰܢ ܟܰܕ ܒܰܡܚܰܡܣܢܳܢܽܘܬܶܗ ܡܶܬܒܰܩܶܝܢܰܢ ܬܶܗܪܳܐ ܘܕܽܘܡܳܪܳܐ ܡܶܬܡܠܶܝܢܰܢ: ܘܥܰܡ ܦܰܪܶܗܣܺܝܰܐ ܐܳܡܪܺܝܢܰܢ: ܕܗܳܢܰܘ ܣܳܗܕܳܐ ܒܪܺܝܟܳܐ ܕܰܒܗܶܠܟܳܐ ܕܥܰܠ ܢܽܘܪܳܐ ܕܳܐܶܨ ܗܘܳܐ: ܘܒܰܕܝܳܫܳܐ ܕܥܰܠ ܣܰܝܦܳܐ ܪܳܘܶܙ ܗܘܳܐ: ܘܰܒܫܽܘ̈ܩܳܦܶܐ ܕܪܺܝܫܶܗ ܒܳܩܶܐ ܡܥܰܙܶܐ ܗܘܳܐ: ܘܰܒܦܽܘܣܳܩ ܗܰܕܳܡܰܘ̈ܗܝ ܡܢܰܘ̈ܳܢ ܦܨܺܝܚ ܗܘܳܐ: ܘܒܰܚܬܺܝܪܽܘܬ ܡܰܠܟܳܐ ܠܺܝܛܳܐ ܡܰܗܶܠ ܗܘܳܐ: ܐܳܦ ܒܰܓܠܺܝ̈ܦܰܘܗܝ ܛܰܡ̈ܶܐܐ ܡܒܰܙܰܚ ܗܘܳܐ: ܘܒܰܨܠܺܝܒܳܐ ܡܶܫܬܰܒܗܰܪ ܗܘܳܐ: ܘܰܠܦܰܘܠܳܘܣ ܫܠܺܝܚܳܐ ܢܳܩܶܦ ܗܘܳܐ: ܘܡܶܛܽܠ ܐܶܘܢܓܶܠܝܽܘܢ ܕܺܝܠܳܟ ܡܳܐܶܬ ܗܘܳܐ: ܟܰܕ ܥܰܡ ܕܰܘܺܝܕ ܢܒܺܝܳܐ ܡܙܰܡܰܪ ܗܘܳܐ ܘܳܐܡܰܪ: ܕܰܐܥܶܠܬܳܢܝ ܠܡܰܝ̈ܳܐ ܘܰܠܢܽܘܪܳܐ ܘܰܐܦܶܩܬܳܢܝ ܠܰܪܘܳܚܬܳܐ ܕܦܽܘܪܩܳܢܳܟ: ܘܒܰܕܓܽܘܢ ܟܰܕ ܢܰܒܪ̈ܫܳܬܳܐ ܡܠܺܝ̈ܠܳܬܳܐ ܕܰܠܥܶܠ ܙܳܪ̈ܒܰܝ ܠܰܚܕ̈ܳܕܶܐ ܕܰܚܙܰܘ ܠܰܬܡܺܝ̈ܗܳܬܳܐ ܕܰܗ̈ܘܰܝ ܒܝܽܘܡ ܟܽܘܠܳܠܶܗ: ܨܰܠܡ̈ܶܐ ܕܡܶܬܕܰܕܩܺܝܢ ܦܬܰܟܪ̈ܶܐ ܕܰܡܒܰܓܢܺܝܢ ܐܠܰܗܽܘ̈ܢܶܐ ܕܒܳܟܶܝܢ: ܡܰܠܟ̈ܶܐ ܕܡܶܬܝܰܩܪܺܝܢ ܬܳܓ̈ܶܐ ܕܥܰܠ ܥܰܦܪܳܐ ܨܒܺܝܥ ܒܰܕܡܳܐ ܒܳܪܟܺܝܢ: ܥܽܘܡܩܳܐ ܚܶܫܽܘܟܳܝܳܐ ܕܢܽܘܗܪܳܐ ܘܪܺܝܚܳܐ ܒܰܣܺܝܡܳܐ ܡܶܬܡܠܐܷ: ܬܽܘܒ ܕܶܝܢ ܦܳܠܰܚ̈ܘܳܬܳܐ ܕܪ̈ܺܝܫܰܝ ܡܰܠܐܟ̈ܶܐ ܙܳܚܘ ܠܰܚܙܳܬܶܗ ܕܦܰܓܪܳܢܳܐ: ܕܶܐܬܕܰܡܺܝ ܠܪ̈ܽܘܚܳܢܶܐ: ܘܰܒܗܽܘ̈ܠܳܠܐ ܕܟܰܝ̈ܳܐ: ܩܰܠܣܽܘܗܝ ܐܰܝܟ ܕܠܐܚܝܳܢܳܐ ܒܪܳܐ ܢܶܩܦܳܐ ܕܰܠܗܽܘܢ ܟܰܕ ܐܳܡܪܺܝܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܐܰܓܽܘܢܺܝܣܛܳܐ ܕܰܡܠܶܟ ܡܰܠܟ̈ܶܐ ܫܡܰܝܳܢܳܐ: ܕܰܚܣܶܢܬ ܠܪܰܫܺܝܥܳܐ ܡܰܟܣܺܝܡܺܝܢܽܘܣ: ܠܳܟ ܛܽܘܒܰܝܟ ܣܳܗܕܳܐ ܩܰܕܺܝܫܳܐ ܡܳܪܝ ܥܙܳܙܳܐܶܝܠ ܐܰܓܽܘܢܺܝܣܛܳܐ ܒܶܝܬ ܨܰܘܒܳܐ ܕܰܒܬܽܘܠܽܘܬܳܐ ܪܚܺܝܡܬܳܐ ܥܰܠ ܡܰܠܐܟ̈ܶܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܓܰܢ̱ܒܳܪܳܐ ܒܰܩܪܳܒܶܗ ܕܡܳܪܝܳܐ ܕܰܙܟܰܝܬ ܠܒܶܠܐܷܝܰܪ ܛܰܪܟܳܢܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܕܽܘܟܪܳܢܳܟ ܗܳܐ ܡܶܬܢܰܨܰܚ ܒܰܒܪܺܝܬܳܐ: ܕܰܐܝܟ ܡܳܪܳܟ ܨܰܠܺܝܬ ܥܰܠ ܪ̈ܳܕܽܘܦܰܝܟ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܕܗܰܝܡܶܢܬ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܕܘܰܥܶܕܬ ܠܢܰܦܫܳܟ ܒܝܰܕ ܚܰܝ̈ܶܐ ܕܰܣܒܰܠܬ ܠܘܳܬ ܐܰܘ̈ܳܢܶܐ ܛܽܘܒ̈ܬܳܢܶܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܕܙܰܝܶܢܬ ܠܦܰܓܪܳܟ ܒܙܰܝܢܳܐ ܕܡܰܥܡܽܘܕܺܝܬܳܐ ܬܪܰܝܳܢܺܝܬܳܐ ܒܝܰܕ ܕܶܐܬܦܰܠܦܰܠ ܓܽܘܫܡܳܟ ܒܰܕܡܳܟ ܚܰܣܝܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܕܚܰܣܶܢܬ ܠܥܺܕܬܳܐ ܒܚܰܘ̈ܣܳܢܶܐ ܕܫܶܢ̈ܕܶܐ ܕܺܝܠܳܟ: ܒܗܳܝ ܕܶܐܫܬܺܝܬ ܚܰܡܪܳܐ ܙܠܺܝܚ ܒܓܳܓܽܘܠܬܳܐ ܘܰܪܘܰܝܬ: ܠܳܟ ܛܽܘܒܰܝܟ ܡܳܪܝ ܥܙܳܙܳܐܶܝܠ ܛܰܠܝܳܐ ܙܥܽܘܪܳܐ ܘܥܰܙܺܝܙܳܐ ܕܛܺܝ̈ܡܶܐ ܥܦܺܝ̈ܦܶܐ ܩܰܒܶܠܬ ܚܠܳܦ ܬܰܟܬܽܘܫܳܟ ܘܩܰܘܡܳܟ ܕܰܩܕܳܡ ܫܰܠܺܝ̈ܛܳܢܶܐ ܚܰܪ̈ܡܶܐ: ܠܳܟ ܛܽܘܒܰܝܟ ܣܳܗܕܳܐ ܡܳܪܝ ܥܙܳܙܳܐܶܝܠ ܝܰܡܳܐ ܕܚܽܘ̈ܠܡܳܢܶܐ ܘܝܳܗܽܘܒܳܐ ܕܥܽܘܕܪ̈ܳܢܶܐ: ܠܳܟ ܛܽܘܒܰܝܟ ܣܳܗܕܳܐ ܢܰܨܺܝܚܳܐ ܡܳܪܝ ܥܙܳܙܳܐܶܝܠ ܟܰܘܟܒܳܐ ܨܰܡܽܘܚܬܳܢܳܐ ܕܰܒܝܰܕ ܙܰܗܪܺܝܪ̈ܶܐ ܕܰܢܛܰܚܘ ܥܠܰܘܗܝ ܡ̣ܶܢ ܫܶܡܫܳܐ ܕܙܰܕܺܝܩܽܘܬܳܐ ܠܟܽܠܳܗ̇ ܬܚܶܝܬ ܫܡܰܝܳܐ ܡܰܢܗܰܪ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܠܡܺܐܢܳܐ ܕܥܳܡ̈ܠܐ ܘܠܐܝ̈ܳܐ: ܘܒܶܝܬ ܡܶܕܪܳܐ ܕܰܐܝܠܶܝܢ ܕܡ̣ܶܢ ܒܺܝܫܳܐ ܡܶܬܥܰܫܡܺܝܢ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܡܰܒܽܘܥܳܐ ܗܰܢܺܝܳܐܐ ܕܰܢܒܰܥ ܒܰܐܪܥܳܐ ܕܰܫܡܺܝܫܛ ܘܰܡܛܳܐ ܥܕܰܡܳܐ ܠܪܽܘܡܺܝ ܐܰܫܩܺܝ ܠܰܨܗ̈ܰܝܳܐ: ܠܳܟ ܛܽܘܒܰܝܟ ܣܳܗܕܳܐ ܥܙܳܙܳܐܶܝܠ: ܢܽܘܗܪܳܐ ܕܰܬܪ̈ܺܝܨܶܐ ܕܠܐ ܚܰܦܝܽܘܗܝ ܥܰܝ̈ܡܶܐ ܕܰܦܬܟܪܽܘܬܳܐ: ܠܳܟ ܛܽܘܒܰܝܟ ܥܙܳܙܳܐܶܝܠ ܣܳܗܕܳܐ ܢܰܨܺܝܚܳܐ ܕܚܰܫܶܗ ܕܰܡܫܺܝܚܳܐ ܡܰܘܕܝܳܢܳܐ ܚܰܬܺܝܬܳܐ ܕܰܩܝܳܡܬܶܗ ܦܳܪܽܘܩܳܝܬܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܥܰܡܽܘܕܳܐ ܠܐ ܡܶܙܕܰܥܙܥܳܢܳܐ ܩܒܺܝܥܳܐ ܘܰܡܫܰܪܪܳܐ ܕܠܐ ܐܶܬܡܨܺܝܘ ܓܰܠܠܰܝ̈ ܥܳܠܡܳܐ ܕܰܢܙܰܥܙܥܽܘܢܳܝܗܝ: ܠܳܟ ܛܽܘܒܰܝܟ ܣܳܗܕܳܐ ܡܳܪܝ ܥܙܳܙܳܐܶܝܠ ܦܺܝܪܡܳܐ ܘܬܰܪܥܽܘܬܳܐ ܕܰܐܥܛܰܪ ܗ̣ܽܘ ܒܶܗ ܕܽܘܒܳܪ̈ܶܐ ܕܰܡܝܰܬܪ̈ܳܬܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܨܶܒܬܳܐ ܕܰܪ̈ܕܺܝܦܶܐ ܘܨܶܡܚܳܐ ܕܰܢܟܺܝ̈ܣܶܐ: ܕܰܒܨܰܦܪܳܐ ܕܢܽܘܚܳܡܳܐ ܡܚܰܘܶܐ ܙܺܝܘܶܗ: ܠܳܟ ܛܽܘܒܰܝܟ ܣܳܗܕܳܐ ܡܳܪܝ ܥܙܳܙܳܐܶܝܠ ܩܰܕܡܳܝܳܐ ܕܰܢܦܰܩ ܡ̣ܶܢ ܐܰܬܽܘܢܳܐ ܕܢܽܘܪܳܐ ܕܰܒܚܰܪ ܡܳܪܝ ܐܰܒܚܰܝ ܐܶܦܣܩܽܘܦܳܐ ܕܢܺܝܩܺܝܰܐ ܡܕܺܝܢ̱ܬܳܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܪܳܚܡܳܐ ܫܰܪܺܝܪܳܐ ܕܡܳܪܶܗ ܕܰܐܘܕܺܝ ܒܶܗ ܩܕܳܡ ܒܢܰܝ̈ܢܳܫܳܐ ܥܰܠ ܐܰܪܥܳܐ: ܠܳܟ ܛܽܘܒܰܝܟ ܣܳܗܕܳܐ ܡܳܪܝ ܥܙܳܙܳܐܶܝܠ ܫܽܘܡܠܳܝܳܐ ܕܫܰܦܺܝܪ̈ܳܬܳܐ ܘܰܡܦܰܢܝܳܢܳܐ ܕܫ̈ܶܐܠܳܬܳܐ ܠܟܽܠ ܫܽܘ̈ܐܳܠܐ: ܠܳܟ ܛܽܘܒܰܝܟ ܢܰܨܺܝܚ ܫܽܘܦܪ̈ܶܐ ܡܳܪܝ ܥܙܳܙܳܐܶܝܠ ܬܶܫܒܽܘܚܬܳܐ ܕܣܳܗ̈ܕܶܐ ܡ̣ܶܢ ܓܰܘ ܐܰܬܽܘܢܳܐ ܐܰܙܥܶܩ ܩܕܳܡ ܬܶܐܘܳܕܳܘܣܝܳܘܣ ܡܰܠܟܳܐ ܡܗܰܝܡܢܳܐ: ܕܶܐܢܳܐ ܐ̱ܢܳܐ ܥܙܳܙܳܐܶܝܠ ܡܰܠܐܟܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ: ܒܥܺܝ ܡ̣ܶܢ ܡܳܪܳܟ: ܘܒܰܪܶܟ ܠܰܢ ܒܗܳܢܳܐ ܝܰܘܡܳܐ ܕܥܺܐܕܳܟ ܕܢܶܫܬܰܟܰܢ ܫܰܝܢܳܐ ܘܰܫܠܳܡܳܐ ܠܥܺܕ̈ܳܬܰܢ ܘܰܠܕܰܝܪ̈ܳܬܰܢ: ܐܰܘܝܽܘܬܳܐ ܘܰܚܕܳܝܽܘܬܳܐ ܠܥܳܡܽܘܪ̈ܰܝܗܶܝܢ ܘܰܐܥܒܰܪ ܡܶܢܰܢ ܟܽܠ ܡܰܚܘ̈ܳܬܳܐ ܫܰܒ̈ܛܶܐ ܕܪܽܘܓܙܳܐ: ܘܢܺܐܬܽܘܢ ܠܰܢ ܡܶܛܪ̈ܶܐ ܘ̈ܛܰܠܐ ܒܙܰܒܢܰܝ̈ܗܽܘܢ: ܘܢܶܥܒܪ̈ܳܢ ܡܶܢܰܢ ܥܢܳܢ̈ܶܐ ܕܪܽܘܓܙܳܐ ܘܰܕܒܰܪܕܳܐ: ܥܰܡ ܡܰܪ̈ܕܘܳܬܳܐ ܒܙܰܒܢܰܝ̈ܗܶܝܢ ܘܫܰܘܒܳܐ ܘܝܰܡܺܝܢܳܝܳܐ ܕܢܶܗܘܶܐ ܕܽܘܟܪܳܢܳܐ ܛܳܒܳܐ ܠܝܳܠܕܰܬ ܐܠܰܗܳܐ ܡܰܪܝܰܡ ܘܰܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܒܰܨܠܰܘ̈ܳܬܳܐ ܕܟܽܠܟܽܘܢ ܩܰܕܺܝ̈ܫܶܐ ܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܠܚܰܪܬܳܐ ܛܳܒܬܳܐ: ܘܰܠܡܰܠܟܽܘܬܳܐ ܫܡܰܝܳܢܺܝܬܳܐ: ܘܡ̣ܶܢ ܟܽܠܰܢ ܬܶܫܒܽܘܚܬܳܐ ܬܶܣܰܩ ܒܟܽܠܥܶܕܳܢ ܠܐܒܳܐ ܕܰܓܒܳܐ ܠܰܒܢܰܝ̈ܳܐ: ܘܠܰܒܪܳܐ ܕܟܰܠܶܠ ܠܣܳܗ̈ܕܶܐ: ܘܰܠܪܽܘܚܳܐ ܩܰܕܺܝܫܳܐ ܕܫܰܡܠܺܝ ܠܡܰܘܕ̈ܝܳܢܶܐ: ܗܳܫܳܐ܀

 

 

 

ܥܛܪܐ

 

 

 

ܟܰܕ ܚܒܽܘܫܝܳܟ ܕܰܒܓܽܘܒܳܐ ܐܳܘ ܣܳܗܕܳܐ ܡܳܪܝ ܥܙܳܙܳܐܶܝܠ: ܡ̣ܶܢ ܓܽܘܒܳܐ ܕܕܽܘܘܳܢܳܐ ܢܶܬܦܰܨܶܐ: ܘܰܒܝܰܕ ܓܶܐܪ̈ܶܐ ܕܰܒܓܽܘܫܡܳܟ ܐܶܬܡܚܺܝܘ ܓܶܐܪ̈ܶܐ ܝܰܩ̈ܕܶܐ ܕܒܺܝܫܳܐ ܢܶܬܕܰܥܟܽܘܢ ܡܶܢܰܢ: ܘܢܶܬܩܰܒܰܠ ܦܺܝܪܡܰܢ ܘܰܨܠܰܘ̈ܳܬܰܢ ܒܝܰܘܡܳܐ ܗܳܢܳܐ ܕܕܽܘܟܪܳܢܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܘܰܒܝܰܕ ܬܰܟܫ̈ܦܳܬܳܟ ܢܶܬܚܰܣܽܘܢ ܚܰܘܒܰܝ̈ܢ ܘܰܚܛܳܗܰܝ̈ܢ ܘܰܚܛܳܗ̈ܶܐ ܕܥܰܢܺܝ̈ܕܰܝܢ ܘܫܽܘܒܚܳܐ ܢܶܣܰܩ ܡܶܢܰܢ ܠܰܡܟܰܠܠܳܢܳܟ: ܗܳܫܳܐ܀

 

 

 

ܚܘܬܡܐ

 

 

 

ܡܫܺܝܚܳܐ ܕܝܰܗܒܬ ܙܳܟܽܘܬܳܐ ܠܰܥܙܳܙܳܐܶܝܠ ܢܰܨܺܝܚܳܐ: ܘܰܐܒܗܬܶܗ ܠܡܰܟܣܺܝܡܝܰܢܳܘܣ ܥܰܘܳܠܐ: ܦܰܨܳܐ ܠܰܢ ܡ̣ܶܢ ܒܶܗܬܰܬ݀ ܐܰܦ̈ܶܐ ܕܰܩܕܳܡܰܝܟ: ܘܫܰܘܙܶܒ ܠܰܢ ܡ̣ܶܢ ܬܰܫܢܺܝܩܳܐ ܕܓܺܗܰܢܳܐ ܗ̇ܰܘ ܕܰܢܛܺܝܪ ܠܟܳܦܽܘܪ̈ܶܐ: ܐܰܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܒܽܘܣܳܡܳܐ ܘܰܒܡܰܠܟܽܘܬܳܟ ܫܡܰܝܳܢܺܝܬܳܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܕܚܰܝܶܠ ܠܥܰܒܕܶܗ ܒܰܐܓܽܘܢܳܐ: ܘܰܣܕܰܪ ܠܶܗ ܟܠܺܝܠܐ ܕܰܡܠܐܷ ܡܰܪ̈ܓܳܢܝܳܬܳܐ: ܡ̣ܶܢ ܚܰܫ̈ܶܐ ܝܰܩܺܝܪ̈ܶܐ ܕܰܩܢܽܘܡܶܗ: ܘܺܝܠܶܦܘ ܡܶܢܶܗ ܡ̣ܶܢ ܕܰܐܟܘܳܬܶܗ ܢܶܬܩܰܛܠܽܘܢ ܥܰܠ ܚܽܘܒܶܗ: ܘܗܳܐ ܟܽܠ ܥܰܡܡܺܝ̈ܢ ܡܙܰܝܚܺܝܢ ܠܝܽܘܡ ܕܽܘܟܪܳܢܶܗ: ܘܫܳܐܠܺܝܢ ܪ̈ܰܚܡܶܐ ܒܰܨܠܰܘ̈ܳܬܶܗ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܝܰܠܕܳܐ ܫܰܪܺܝܪܳܐ ܕܰܨܡܰܚ ܡ̣ܶܢ ܐܰܒܳܐ ܓܢܺܝܙܳܐ ܕܒܶܝܬ ܐܰܒܳܐ: ܠܳܟ ܗܶܕܪܳܐ ܘܪܽܘܡܪܳܡܳܐ ܕܶܒܚܳܐ ܕܰܒܪܽܘܚܳܐ ܕܓܳܓܽܘܠܬܳܐ ܐܶܬܕܒܰܚ ܠܦܽܘܪܩܳܢ ܒܶܪ̈ܝܳܬܳܐ: ܠܳܟ ܬܰܘܕܺܝܬܳܐ ܣܳܗܕܳܐ ܩܰܕܡܳܝܳܐ ܕܰܐܣܗܶܕ ܒܰܙܩܺܝܦܳܐ: ܘܒܰܫܠܳܚ ܒܶܣܪܶܗ ܦܰܪܣܺܝ ܠܐܠܳܗ̈ܶܐ ܕܰܓ̈ܳܠܰܝ ܫܡܳܐ: ܐܰܢ̱ܬ ܗ̣ܽܘ ܐܽܘܪܚܳܐ ܘܰܫܒܺܝܠܐ ܕܒܳܟ ܚܳܙܩܺܝܢ ܟܽܠܗܽܘܢ ܐܰܝܠܶܝܢ ܕܰܠܘܰܥܕܳܐ ܕܰܫܟܺܝܢܬܳܟ ܡܶܬܘܰܥܕܺܝܢ ܘܡܶܬܡܰܢܥܺܝܢ: ܐܰܢ̱ܬ ܗ̣ܽܘ ܕܶܐܡܰܪܬ ܠܰܟܢܽܘܫܝܳܐ ܣܳܗܕܳܝܳܐ ܘܰܡܢܺܝܚܳܢܳܐ ܕܡܳܪܽܘܬܳܟ ܕܢܶܪܕܽܘܢ ܒܥܶܩ̈ܒܳܬܳܟ ܘܠܰܨܠܺܝܒܳܟ ܒܚܰܕܽܘܬܳܐ ܢܶܫܩܠܽܘܢ ܘܰܠܡܺܐܡܪܳܟ ܠܐ ܕܰܓܳܠܐ ܫܡܰܥ ܘܰܢܩܶܦ ܠܳܟ ܣܳܗܕܳܐ ܚܠܺܝܨܳܐ ܘܚܰܝܠܬܳܢܳܐ ܘܢܰܚܫܺܝܪܬܳܢܳܐ ܡܳܪܝ ܥܙܳܙܳܐܶܝܠ: ܗܳܢܳܐ ܕܝܰܘܡܳܢܳܐ ܥܽܘܗܕܳܢܶܗ ܡܫܰܡܠܶܝܢܰܢ: ܘܰܒܣܶܦܘ̈ܳܬܰܢ ܘܰܒܠܶܫܳܢܰܝ̈ܢ ܠܶܗ ܡܢܰܨܪܺܝܢܰܢ: ܗܳܢܳܐ ܕܟܽܠܗܶܝܢ ܪ̈ܽܘܚܳܢܳܝܳܬܳܐ ܫܰܡܠܺܝ: ܘܰܒܟܰܪܡܳܐ ܕܡܳܪܶܗ ܦܠܰܚ ܘܡܰܠܐܟܳܝܳܐ ܐܶܬܚܰܘܺܝ: ܗܳܢܳܐ ܕܚܰܡܪܳܐ ܪܶܚܡܬܳܢܳܝܳܐ ܗ̇ܰܘ ܕܫܳܬܽܘܝܶܗ ܠܥܶܠ ܐܶܬܚܰܠܰܛ ܘܦܳܣܰܥ ܥܰܠ ܫܶܢ̈ܕܶܐ ܛܪ̈ܽܘܢܳܝܶܐ: ܗܳܢܳܐ ܕܠܶܗ ܚܢܰܢ ܬܰܚܽܘ̈ܒܶܐ ܡܗܰܕܪܺܝܢܰܢ: ܟܰܕ ܒܰܒ̈ܢܳܬ ܩ̈ܳܠܐ ܕܫܽܘܒܚܳܐ ܩܳܥܶܝܢܰܢ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܬܳܓܳܐ ܡܰܕܗܒܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܬܡܺܝܗܳܐ ܒܬܶܕܡܪ̈ܳܬܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܫܰܪܘܰܝܢܳܐ ܡܥܰܠܝܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܫܽܘܪܳܐ ܪܳܡܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܪܚܺܝܡܳܐ ܒܰܫܠܺܝ̈ܚܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܩܛܺܝܠܐ ܢܟܺܝܣܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܩܽܘܪܒܳܢܳܐ ܡܩܰܒܠܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܨܰܦܪܳܐ ܡܗܺܝܪܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܦܳܪܽܘܩܳܐ ܕܰܫܒܰܝ̈ܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܪܚܺܝܡܳܐ ܕܡܰܠܐܟ̈ܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܣܢܺܐܓܪܳܐ ܡܰܠܟܳܝܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܣܺܝܡܬܳܐ ܕܛܰܝܒܽܘܬܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܢܶܫܪܳܐ ܩܰܠܺܝܠܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܢܰܟܦܳܐ ܘܰܪܡܺܝܣܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܡܥܺܝܢܳܐ ܕܥܽܘܕܪ̈ܳܢܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܡܶܠܚܳܐ ܕܦܰܟܺܝ̈ܗܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܠܶܘܝܳܐ ܡܣܰܝܥܳܢܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܠܒܺܝܒܳܐ ܒܰܩܪܳܒܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܟܰܦܳܐ ܕܚܰܕ̈ܘܳܬܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܟܶܢܳܪܳܐ ܕܪܽܘܚܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܝܡܐ ܕܚܶܟ̈ܡܳܬܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܛܰܪܩܳܐ ܘܰܫܒܺܝܚܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܛܰܠܝܳܐ ܫܰܪܘܳܝܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܚܰܒܪܳܐ ܕܰܐܬܠܺܝ̈ܛܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܚܽܘܬܪܳܐ ܕܩܰܕܺܝ̈ܫܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܙܰܠܓܳܐ ܢܰܨܺܝܚܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܘܰܥܕܳܐ ܕܛܳܒ̈ܳܬܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܘܺܝܠܐ ܕܦܽܘܪܩܳܢܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܗܡܰܝܪܳܐ ܡܪܰܥܝܳܢܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܗܳܓܽܘܡܳܐ ܕܫܺܐܕ̈ܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܕܳܫܢܳܐ ܡܚܰܕܝܳܢܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܕܰܘܩܳܐ ܪܳܡܬܳܝܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܓܺܝܙܰܒܪܳܐ ܕܩܽܘܫܬܳܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܓܰܙܳܐ ܕܚܽܘܠܡܳܢ̈ܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܒܘܟܪܐ ܕܰܒܚܺܝܪ̈ܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܒܽܘܝܳܐܝ ܟܺܐܒ̈ܬܳܢܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܐܺܝܳܠܐ ܕܥܽܘܕ̈ܝܳܝܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܐܰܒܳܐ ܕܬܰܝ̈ܳܒܶܐ: ܫܠܳܡܠܳܟ ܡܳܪܝ ܥܙܳܙܳܐܶܝܠ ܬܰܪܥܳܐ ܕܒܶܗ ܥ̈ܳܐܠܳܢ ܨܠܰܘ̈ܳܬܰܢ ܠܰܩܕܳܡ ܡܳܪܝܳܐ ܡܚܰܝܠܳܢܳܐ ܕܺܝܠܶܗ: ܕܡܶܢܶܗ ܢܶܒܥܶܐ ܘܢܶܬܟܰܫܰܦ: ܕܰܒܝܰܕ ܦܝܳܣ̈ܳܬܶܗ ܫܡܺܝ̈ܥܳܬܳܐ: ܢܶܫܬܰܟܰܢ ܠܰܢ ܠܚܽܘܣܳܝܳܐ ܕܡܶܬܥܰܒܪ̈ܳܢܘܳܬܰܢ: ܘܢܽܘܛܳܪܳܐ ܠܪ̈ܳܥܰܘܳܬܳܐ: ܙܰܗܝܽܘܬܳܐ ܠܟܳܗ̈ܢܶܐ: ܢܰܟܦܽܘܬܳܐ ܠܰܡܫܰܡ̈ܫܳܢܶܐ: ܙܳܟܽܘܬܳܐ ܠܡܰܠܟ̈ܶܐ ܟܺܐܢ̈ܶܐ: ܘܫܰܝܢܳܐ ܠܐܪ̈ܒܰܥܦܶܢܝܳܬܳܐ: ܦܽܘܢܳܝܳܐ ܠܪ̈ܰܚܺܝܩܶܐ: ܚܽܘܪܳܪܳܐ ܠܡܶܬܬܰܥܒ̈ܕܳܢܶܐ: ܢܦܺܐܫܳܐ ܠܰܟܪ̈ܺܝܗܶܐ: ܒܽܘܛܳܠܐ ܕܡܰܪ̈ܕܘܳܬܳܐ: ܫܪܳܝܳܐ ܠܐܣܺܝܪ̈ܶܐ: ܬܽܘܪܣܳܝܳܐ ܠܟܰܦ̈ܢܶܐ: ܫܽܘܒܩܳܢܳܐ ܠܡܰܣܟ̈ܠܳܢܶܐ: ܢܝܳܚܳܐ ܘܥܽܘܗܕܳܢܳܐ ܛܳܒܳܐ ܠܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܐܰܝܟܰܢܳܐ ܕܢܰܣܶܩ ܫܽܘܒܚܳܐ ܠܐܒܳܐ ܡܢܰܨܚܳܢܳܟ: ܘܠܰܒܪܳܐ ܕܝܰܩܰܪ ܕܽܘܟܪܳܢܳܟ: ܘܰܠܪܽܘܚܳܐ ܩܰܕܺܝܫܳܐ ܕܥܳܡܰܪ ܒܳܟ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝܳܐ ܐܠܰܗܳܐ ܒܡܶܬܟܰܫܦܳܢܽܘܬܶܗ ܕܰܡܢܺܝܚܳܢܳܟ ܣܳܗܕܳܐ ܚܠܺܝܨܳܐ ܘܰܥܛܺܝܦ ܙܳܟܽܘܬܳܐ ܡܳܪܝ ܥܙܳܙܳܐܶܝܠ: ܠܰܨܠܰܘ̈ܳܬܰܢ ܘܒܳܥ̈ܘܳܬܰܢ: ܘܰܠܦܺܝܪ̈ܡܶܐ ܘܥܶܛܪ̈ܶܐ ܕܰܡܩܰܪܒܳܐ ܒܨܺܝܪܽܘܬܰܢ: ܘܰܐܝܟ ܕܪܰܥܝܳܟ ܒܩܶܛܠܶܗ ܘܒܰܕܡܳܐ ܕܰܪܕܳܐ ܡ̣ܶܢ ܨܰܘܪܶܗ: ܗܳܟܰܢ ܬܶܬܪܰܥܶܐ ܠܰܢ ܡܳܪܽܘܬܳܟ ܘܰܬܚܰܣܶܐ ܠܰܢ ܘܰܠܥܰܢܺܝ̈ܕܰܝܢ ܒܰܡܪܰܚܡܳܢܽܘܬܳܟ: ܡܳܪܰܢ ܘܰܐܠܳܗܰܢ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܡܳܪܝܳܐ ܐܠܰܗܳܐ ܕܫܰܕܰܪܬ ܢܽܘܪܳܐ ܡ̣ܶܢ ܫܡܰܝ̈ܟ ܪ̈ܳܡܶܐ: ܒܝܽܘܡ ܟܽܘܠܳܠܶܗ ܕܣܳܗܕܳܟ ܡܳܪܝ ܥܙܳܙܳܐܶܝܠ: ܘܰܠܟܽܠܗܽܘܢ ܟܳܦܪ̈ܰܝ ܒܰܫܡܳܟ ܩܰܕܺܝܫܳܐ ܐܰܘܩܶܕܬ: ܘܰܠܟܽܠܗܽܘܢ ܣܳܓ̈ܕܰܝ ܠܰܦܬܰܟܪ̈ܶܐ ܛܰܠܶܩܬ ܘܰܣܚܰܦܬ: ܘܰܐܝܟ ܕܦܰܨܺܝܬ ܡ̣ܶܢ ܗ̇ܳܝ ܢܽܘܪܳܐ ܠܟܽܠܗܽܘܢ ܛܳܦ̈ܣܰܝ ܒܰܐܬܠܺܝܛܳܟ ܘܡܶܬܓܰܘ̈ܣܰܝ ܒܣܳܗܕܳܟ ܡܳܪܝ ܥܙܳܙܳܐܶܝܠ: ܗܳܟܰܢܳܐ ܘܒܰܨܠܰܘ̈ܳܬܶܗ ܦܰܨܳܐ ܠܰܢ ܘܰܠܥܰܢܺܝ̈ܕܰܝܢ ܡ̣ܶܢ ܢܽܘܪܳܐ ܕܓܺܗܰܢܳܐ ܕܢܰܘܕܶܐ ܠܳܟ ܡܳܪܝ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܣܳܗܕܳܐ ܫܰܪܺܝܪܳܐ ܕܶܐܬܕܒܰܚ ܒܪܰܘܡܳܐ ܕܓܳܓܽܘܠܬܳܐ ܡܶܛܽܠ ܦܽܘܪܩܳܢܰܢ: ܘܡܺܝܬ ܘܶܐܬܬܣܺܝܡ ܒܩܰܒܪܳܐ ܕܰܚܬܺܝܡ: ܘܰܐܩܺܝܡ ܥܠܰܘܗܝ ܢܳܛܽܘܪ̈ܶܐ: ܘܰܒܡܰܘܬܶܗ ܐܰܚܺܝ ܡܺܝܬܽܘܬܰܢ: ܘܒܶܗ ܐܶܬܕܰܡܺܝ ܣܳܗܕܳܐ ܢܰܨܺܝܚܳܐ ܡܳܪܝ ܥܙܳܙܳܐܶܝܠ: ܕܶܐܬܢܟܶܣ ܘܶܐܬܕܒܰܚ ܒܪܶܚܡܰܬ݀ ܡܳܪܶܗ ܥܰܠ ܪܺܝܫ ܪܳܡܬܳܐ: ܕܨܳܝܪܳܐ ܗܘܳܬ ܠܪܰܘܡܳܐ ܕܓܳܓܽܘܠܬܳܐ: ܘܰܐܪܡܺܝܘ ܒܓܽܘܒܳܐ ܚܰܪܒܳܐ ܕܰܠܒܰܪ ܡܕܺܝܢ̱ܬܳܐ ܐܰܝܟ ܡܳܪܶܗ ܕܶܐܙܕܩܶܦ ܠܒܰܪ ܡ̣ܶܢ ܐܽܘܪܫܠܶܡ: ܘܚܰܬܡܽܘܗܝ ܠܓܽܘܒܳܐ ܘܰܐܩܺܝܡ ܥܠܰܘܗܝ ܢܳܛܽܘܪ̈ܶܐ ܘܛܰܒ̈ܥܶܐ ܘܰܚܬܳܡ̈ܶܐ ܕܥܰܠ ܩܰܒܪܶܗ ܕܡܳܪܶܗ: ܕܠܶܗ ܠܡܳܪܝܳܐ ܠܡܳܪܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ܀

 

 

 

ܣܕܪܐ

 

 

 

ܐܰܝܢܳܐ ܦܽܘܡܳܐ ܐܰܘ ܐܰܝܢܳܐ ܠܶܫܳܢܳܐ ܡܶܫܟܰܚ ܕܢܶܫܬܰܥܶܐ ܥܰܠ ܡܰܠܝܽܘܬ ܐܰܓܽܘܢܳܟ: ܐܘ ܢܰܨܺܝܚܳܐ ܡܳܪܝ ܥܙܳܙܳܐܶܝܠ: ܕܡܶܛܽܠ ܡܳܪܳܟ ܦܰܓܪܳܟ ܠܒܽܘܣ̈ܒܳܣܶܐ ܘܰܠܬܰܫܢܺܝ̈ܩܶܐ ܡܰܪܺܝܪ̈ܶܐ ܐܰܫܠܶܡܬ: ܒܰܦܟܳܪ̈ܶܐ ܚܺܝ̈ܨܶܐ ܘܰܒܫܺܝ̈ܫܠܳܬܳܐ ܕܦܰܪܙܠܐ ܡ̣ܶܢ ܫܡܺܝܫܛ ܡܕܺܝܢ̱ܬܳܟ ܘܰܥܕܰܡܳܐ ܠܪܽܘܡܺܝ ܐܰܘܒܠܽܘܟ: ܘܰܩܕܳܡ ܡܰܟܣܺܝܡܝܰܢܽܘܣ ܡܰܠܟܳܐ ܪܰܫܺܝܥܳܐ ܐܰܩܺܝܡܽܘܟ: ܘܪܶܥܝܳܢܳܟ ܟܰܕ ܚܳܕܶܐ ܘܰܦܨܺܝܚ ܘܰܠܒܺܝܒ: ܥܰܨܰܪܘ ܪ̈ܶܓܠܰܝܟ ܘܬܰܒܰܪܘ ܫܳܩܰܝ̈ܟ ܘܚܰܒܶܠܘ ܒܽܘܪ̈ܟܰܝܟ ܦܰܩܶܣܘ ܐܺܝܕܰܝ̈ܟ ܘܰܟܢܽܘ̈ܢܝܳܬܳܟ: ܘܰܕܕܰܩܰܩܘ ܕܪ̈ܳܥܰܝܟ: ܥܰܩܰܪܘ ܥܰܪ̈ܫܰܝܟ: ܙܠܰܚܘ ܩܰܪܩܰܦܬܳܟ: ܘܰܐܦܶܩܘ ܥܰܝܢܰܝ̈ܟ: ܘܰܐܪܡܝܽܘܟ ܒܓܽܘܒܳܐ: ܘܰܠܓܽܘܒܳܐ ܚܬܰܡܘ ܒܰܙܗܺܝܪܽܘ ܫܳܥܘ: ܬܶܒܥܽܘܟ ܕܬܶܟܦܽܘܪ ܒܰܐܠܳܗܳܟ ܘܬܶܣܓܽܘܕ ܠܨܰܠܡ̈ܶܐ ܚܰܪ̈ܫܶܐ: ܘܠܐ ܐܶܬܪܰܦܝܰܬ݀ ܚܠܺܝܨܽܘܬܳܟ: ܘܣܶܓܕܰܬ݀ ܡܳܪܳܟ ܠܐ ܚܰܠܶܦܬ: ܘܢܽܘܪܳܐ ܫܶܐܠܬ ܡ̣ܶܢ ܡܳܪܳܟ ܕܰܠܚܰܢ̈ܦܶܐ ܘܟܳܦܽܘܪ̈ܶܐ ܬܰܘܩܶܕ: ܕܺܝܢܳܐ ܕܠܐ ܪ̈ܰܚܡܶܐ ܓܙܰܪ ܥܠܰܝܟ ܡܰܠܟܳܐ ܚܰܢܦܳܐ: ܗܰܕܳܡ ܗܰܕܳܡ ܦܰܣܶܩ ܦܰܓܪܳܟ ܘܰܓܙܰܡ ܕܰܠܟܰܠܒ̈ܶܐ ܢܰܘܟܶܠ ܒܶܣܪܳܟ ܐܶܢܗܽܘ ܕܠܐܠܳܗܰܘ̈ܗܝ ܠܐ ܬܶܣܓܽܘܕ ܘܰܬܕܰܒܰܚ ܘܰܬܫܰܡܶܫ ܪܽܘܚܳܐ ܩܰܕܺܝܫܳܐ ܗ̣ܺܝ ܚܰܝܠܬܳܟ: ܘܠܐ ܙܳܥܬ ܘܠܐ ܕܚܶܠܬ ܡ̣ܶܢ ܓܙܳܡܰܝ̈ܗܽܘܢ ܘܠܽܘܚܳܡܰܝ̈ܗܽܘܢ ܕܰܛܪ̈ܽܘܢܶܐ: ܘܰܐܝܟ ܐܰܪ̈ܝܰܘܳܬܳܐ ܠܩܽܘܒܠܳܟ ܢܳܗܡܺܝܢ ܗܘܰܘ ܘܰܕܢܶܩܛܠܽܘܢܳܟ ܘܰܕܢܰܘܩܕܽܘܢܳܟ ܒܳܥܶܝܢ ܗܘܰܘ: ܣܰܝ̈ܦܶܐ ܠܛܰܫܘ: ܘܢܽܘܪܳܐ ܐܰܘܚܶܕܘ: ܘܰܐܬܽܘܢܳܐ ܫܓܰܪܘ: ܘܡܳܐܢ̈ܰܝ ܫܶܢ̈ܕܶܐ ܘܰܣܪ̈ܳܩܶܐ ܩܕܳܡܰܝܟ ܛܰܝܶܒܘ: ܗ̣ܶܢܽܘܢ ܒܗܶܬܘ ܘܰܐܚܦܰܪܘ: ܘܰܒܢܽܘܪܳܐ ܕܡ̣ܶܢ ܪܰܘܡܳܐ ܝܺܩܶܕܘ: ܘܠܶܒܳܟ ܡ̣ܶܢ ܗܳܠܶܝܢ ܠܐ ܩܢܰܛ ܘܠܐ ܙܳܥ: ܡܳܪܝ ܥܙܳܙܳܐܶܝܠ ܣܓܽܘܠܐ ܫܰܪܘܳܝܳܐ: ܕܟܰܕ ܠܐ ܒܫܶܠ: ܒܣܰܝܦܶܗ ܕܡܰܟܣܺܝܡܝܰܢܽܘܣ ܐܶܬܩܛܶܦ ܘܰܒܟܳܣ ܝܶܫܽܘܥ ܡܳܪܰܢ ܐܶܬܥܨܰܪ: ܘܰܕܡܶܗ ܒܚܽܘܒܶܗ ܘܰܒܪܶܚܡܬܶܗ ܐܶܫܬܰܠܗܰܒ ܐܳܦ ܪܬܰܚ: ܡܳܪܝ ܥܙܳܙܳܐܶܝܠ ܒܺܝܠܕܰܪܳܐ ܩܰܠܺܝܠܐ ܕܡ̣ܶܢ ܫܡܺܝܫܰܛ ܠܪܽܘܡܺܝ ܪܗܶܛ ܘܰܠܡܰܠܟܳܐ ܥܰܘܳܠܐ ܘܰܠܦܳܠܚܰܘ̈ܗܝ ܒܡܶܠܰܘ̈ܗܝ ܐܠܰܗܳܝ̈ܳܬܳܐ ܟܰܐܐܰܪ ܘܰܒܗܶܬ: ܘܢܶܓ̈ܕܶܐ ܘܰܣܪ̈ܳܩܶܐ ܡܶܢܗܽܘܢ ܣܒܰܠ ܡܳܪܝ ܥܙܳܙܳܐܶܝܠ ܝܰܕܺܝܕܳܐ ܘܰܪܚܺܝܡܳܐ ܕܥܰܠ ܡܫܺܝܚܳܐ ܕܰܒܦܽܘ̈ܢܳܩܶܐ ܘܰܒܓܶܐܘ̈ܳܬܳܐ ܘܰܒܒܽܘ̈ܣܳܡܶܐ ܒܶܝܬ ܐܰܒܳܗܰܘ̈ܗܝ ܡܗܰܝ̈ܡܢܶܐ ܫܰܪܺܝܪ̈ܶܐ: ܐܳܦ ܐܶܬܪܰܒܺܝ ܘܚܰܢ̈ܦܶܐ ܠܰܫܠܰܕܶܗ ܕܶܒܚܬܳܐ ܚܰܝܬܳܐ ܠܡܳܪܝܳܐ ܩܰܪܒܽܘܗ̇: ܡܳܪܝ ܥܙܳܙܳܐܶܝܠ ܪܳܚܡܶܗ ܕܡܰܠܟܳܐ ܫܡܰܝܳܢܳܐ ܕܡܰܠܐܟܳܐ ܢܚܶܬ ܠܰܫܠܳܡܳܟ ܡܠܐܴ ܠܓܽܘܒܳܐ ܚܶܫܽܘܟܳܝܳܐ ܕܰܚܒܽܘܫܝܳܟ ܢܽܘܗܪܰܐ ܗ̱ܘ ܐܠܰܗܳܝܳܐ: ܘܠܰܡܚܽܘܬܳܟ ܥܨܰܒ ܘܰܐܣܺܝ: ܘܰܠܟܺܐܒ̈ܶܐ ܡ̣ܶܢ ܗܰܕܳܡܰܝ̈ܟ ܛܪܰܕ: ܡܳܪܝ ܥܙܳܙܳܐܶܝܠ ܝܽܘܩܢܳܐ ܘܬܰܦܢܟܳܐ ܫܰܦܺܝܪܳܐ: ܕܟܽܠܗܽܘܢ ܒܢ̈ܰܝ ܪܽܘܡܺܝ ܒܳܟ ܬܗܰܪܘ ܐܳܦ ܐܶܬܕܰܡܰܪܘ: ܘܥܰܠ ܒܶܝܬ ܐܺܝ̈ܕܰܝܟ ܘܰܒܥܶܠܬܳܟ ܠܐܘܪܚܳܐ ܕܚܰܝ̈ܶܐ ܐܶܬܬܰܠܡܰܕܘ: ܘܦܰܓܪܳܟ ܚܰܣܝܳܐ ܥܽܘܕܪ̈ܳܢܶܐ ܘܳܐܣܘ̈ܳܬܳܐ ܠܗܽܘܢ ܐܰܪܕܺܝ: ܡܳܪܝ ܥܙܳܙܳܐܶܝܠ ܢܟܺܝܣܳܐ ܘܰܕܒܺܝܚܳܐ ܘܥܰܠ ܓܰܙܰܝ̈ ܡܳܪܶܗ ܫܰܠܺܝܛ: ܕܢܶܬܶܠ ܥܽܘܬܪܳܐ ܠܐܝܠܶܝܢ ܕܫܳܐܠܺܝܢ ܠܶܗ ܘܡܶܬܓܰܘܣܺܝܢ ܒܰܨܠܰܘ̈ܳܬܶܗ ܚܠܳܦ ܐܽܘܠܨܳܢ̈ܶܐ ܘܫܶܢ̈ܕܶܐ ܘܬܰܫܢܺܝ̈ܩܶܐ ܕܣܰܝܒܰܪ: ܡܳܪܝ ܥܙܳܙܳܐܶܝܠ ܝܰܪܕܳܐ ܘܰܡܥܺܝܢܳܐ ܕܚܽܘܠܡܳܢ̈ܶܐ ܕܡ̣ܶܢ ܪܽܘܡܺܝ ܫܦܰܥ: ܘܰܠܘܳܬܰܢ ܡܛܳܐ: ܘܰܠܟܺܐܒ̈ܶܐ ܘܟܽܘܪ̈ܗܳܢܶܐ ܐܰܣܺܝ: ܘܰܠܚܰܢ̈ܦܶܐ ܘܟܳܦܽܘܪ̈ܶܐ ܒܰܨܠܰܘ̈ܳܬܶܗ ܐܰܦܢܺܝ: ܚܰܝ̈ܶܐ ܠܢܰܦ̈ܫܳܬܗܽܘܢ ܐܰܩܢܺܝ: ܡܳܪܝ ܥܙܳܙܳܐܶܝܠ ܐܶܡܪܳܐ ܕܰܟܝܳܐ ܕܶܐܬܩܰܪܰܒ ܘܰܗܘܳܐ ܕܶܒܚܳܐ ܘܩܽܘܪܒܳܢܳܐ ܠܝܶܫܽܘܥ: ܐܶܡܪܳܐ ܡܰܪܝܰܡ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܗ̇ܰܘ ܕܒܰܕܒܺܝܚܽܘܬܶܗ ܕܰܚܠܳܦܰܝܢ ܦܪܰܩ ܒܶܪ̈ܝܳܬܳܐ: ܢܰܘ̈ܣܶܐ ܘܗܰܝ̈ܟܠܐ ܥܰܫܺܝ̈ܢܶܐ ܕܨܰܠܡ̈ܶܐ ܡܶܬܓܰܕܡܺܝܢ ܘܡܶܬܗܰܓܡܺܝܢ ܬܽܘܒ ܘܒ̈ܳܬܶܐ ܪܰܘܪ̈ܒܶܐ ܕܰܦܬܰܟܪ̈ܶܐ ܚܰܪ̈ܫܶܐ ܕܚܳܪܒܺܝܢ ܘܡܶܣܬܰܚܦܺܝܢ: ܚܰܢ̈ܦܶܐ ܘܟܳܦܽܘܪ̈ܶܐ ܘܟܽܘܡܪ̈ܶܐ ܕܰܚܛܺܝܬܳܐ ܕܒܰܡܫܺܝܚܳܐ ܡܗܰܝܡܢܺܝܢ: ܘܠܰܨܠܺܝܒܳܐ ܚܰܝܳܐ ܣܳܓܕܺܝܢ: ܣܳܗܕܳܐ ܡܳܪܝ ܥܙܳܙܳܐܶܝܠ ܕܡܶܬܟܰܠܰܠ ܘܰܒܩܶܛܠܶܗ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܘܚܰܝ̈ܠܐ ܣܰܓܺܝ̈ܶܐܐ ܕܡܶܣܬܰܥܪܺܝܢ: ܘܡܰܟܣܺܝܡܝܰܢܽܘܣ ܪܰܫܺܝܥܳܐ ܘܦܰܠܳܚܰܘ̈ܗܝ ܕܰܒܢܽܘܪܳܐ ܗ̇ܳܝ ܕܢܶܚܬܰܬ݀ ܡ̣ܶܢ ܫܡܰܝܳܐ ܝܳܩܕܺܝܢ ܘܡܶܬܛܰܠܡܺܝܢ: ܘܡ̣ܶܢ ܗܳܕܶܐ ܢܽܘܪܳܐ ܠܢܽܘܪܳܐ ܗ̇ܳܝ ܕܓܺܗܰܢܳܐ ܡܶܫܬܰܕܪܺܝܢ ܢܶܗܡܰܬ݀ ܢܽܘܪܳܐ ܒܥܰܙܺܝܙܽܘܬܳܗ̇ ܘܡ̣ܶܢ ܪܰܘܡܳܐ ܥܠܰܝܗܽܘܢ ܐܰܝܠܶܝܢ ܕܰܥܪܰܩܘ ܠܘܳܬ ܡܰܠܟܳܐ ܪܰܫܺܝܥܳܐ ܐܰܘܩܶܕܬ: ܬܶܕܡܽܘܪܬܳܐ ܬܽܘܒ ܐܶܣܬܰܥܪܰܬ݀ ܕܠܐܝܠܶܝܢ ܕܗܰܝܡܶܢܘ ܒܰܡܫܺܝܚܳܐ ܫܰܘܙܶܒܬ: ܘܰܠܟܽܠܗܽܘܢ ܐܰܝܠܶܝܢ ܕܰܒܦܰܓܪܶܗ ܕܣܳܗܕܳܐ ܩܛܺܝܠܐ ܦܰܨܺܝܬ: ܪܽܘܡܺܝ ܕܰܫܓܺܝܫܳܐ ܘܬܰܪܬܶܝܢ ܓܽܘ̈ܕܶܐ ܥܒܺܝܕܳܐ: ܚܕܳܐ ܕܡܶܬܓܰܘܣܳܐ ܒܣܳܗܕܳܐ ܢܟܺܝܣܳܐ: ܘܡ̣ܶܢ ܢܽܘܪܳܐ ܡܶܫܬܰܘܙܒܳܐ ܐܳܦ ܡܶܬܦܰܨܝܳܐ: ܘܰܐ̱ܚܪܺܬܳܐ ܕܥܳܪܩܳܐ ܠܘܳܬ ܡܰܠܟܳܐ ܚܰܢܦܳܐ: ܘܰܒܪܽܘܓܙܳܐ ܒܳܠܥܳܐ: ܘܰܒܢܽܘܪܳܐ ܩܫܺܝܬܳܐ ܝܳܩܕܳܐ: ܝܰܗ̈ܠܐ ܘܣܶܕܪ̈ܶܐ ܕܡܰܠܐܟ̈ܶܐ ܢܚܶܬܘ ܘܩܰܠܶܣܘ ܒܬܶܫܒ̈ܚܳܬܗܽܘܢ ܠܣܳܗܕܳܐ ܡܳܪܝ ܥܙܳܙܳܐܶܝܠ: ܗܽܘܠܳܠܰܝ̈ܗܽܘܢ ܘܙܽܘܡܳܪ̈ܰܝܗܽܘܢ ܕܰܐܪ̈ܥܳܢܶܐ ܚܠܰܛܘ ܥܰܡ ܬܶܫܒ̈ܚܳܬܳܐ ܕܪ̈ܽܘܚܳܢܶܐ ܒܥܶܕܳܢ ܟܽܘܠܳܠܶܗ ܕܣܳܗܕܳܐ ܡܳܪܝ ܥܙܳܙܳܐܶܝܠ: ܘܰܐܬܪ̈ܰܘܳܬܳܐ ܪ̈ܰܚܺܝܩܶܐ ܙܳܚܘ ܘܶܐܬܰܘ ܠܰܫܠܳܡܶܗ ܘܰܕܢܶܬܒܰܪܟܽܘܢ ܡ̣ܶܢ ܣܺܝ̈ܡܳܬܳܐ ܕܓܰܪ̈ܡܰܘܗܝ ܕܣܳܗܕܳܐ ܡܳܪܝ ܥܙܳܙܳܐܶܝܠ: ܢܝܳܚܳܐ ܪܰܒܳܐ ܗܘܳܐ ܠܰܟܪ̈ܺܝܣܛܝܳܢܶܐ ܒܝܰܩܕܳܢܶܗ ܘܰܐܒܕܳܢܶܗ ܕܡܰܠܟܳܐ ܪܰܫܺܝܥܳܐ ܡܰܟܣܺܝܡܺܝܢܽܘܣ ܘܰܕܠܐ ܕܶܚܠܐ ܐܶܬܰܘ ܥܰܡ̈ܡܶܐ ܪ̈ܰܚܺܝܩܶܐ ܠܡܶܬܒܰܪܳܟܽܘ ܡ̣ܶܢ ܣܳܗܕܳܐ ܡܳܪܝ ܥܙܳܙܳܐܶܝܠ: ܘܗܳܫܳܐ ܒܥܺܝ ܚܠܳܦܰܝܢ ܠܡܳܪܝܳܐ ܡܳܪܳܟ ܐܳܘ ܣܳܗܕܳܐ ܓܰܒܝܳܐ ܡܳܪܝ ܥܙܳܙܳܐܶܝܠ: ܕܰܠܢܺܝܪܳܐ ܩܰܫܝܳܐ ܕܚܰܢܦܽܘܬܳܐ ܢܒܰܛܶܠ ܡܶܢܰܢ: ܘܝܽܘܩܪ̈ܶܐ ܘܫܶܩ̈ܠܐ ܕܡܰܕܰܐܬܳܐ ܩܫܺܝܬܳܐ ܕܒܶܗ ܟܳܕܢܺܝܢ ܠܰܢ ܢܩܰܠܶܠ ܡܶܢܰܢ ܡܰܚܘ̈ܳܬܳܐ ܘܡܰܪ̈ܕܘܳܬܳܐ ܩܰܫ̈ܝܳܬܳܐ ܢܰܥܒܰܪ ܡܶܢܰܢ ܩܪ̈ܳܒܶܐ ܘܩܺܐܪ̈ܣܶܐ ܘܬܰܟܬܽܘ̈ܫܶܐ ܘܙܰܘ̈ܥܶܐ ܘܕܶܚܠܐ ܘܰܫܓܽܘ̈ܫܝܶܐ ܢܰܥܒܰܪ ܡܶܢܰܢ: ܩܰܡܨܳܐ ܘܙܳܚܠܐ ܘܡܳܫܽܘܛܳܐ ܘܢܳܨܽܘܪܳܐ ܘܒܰܪܕܳܐ ܢܬܰܗܶܐ ܘܰܙܓܽܘܪ ܡ̣ܶܢ ܐܰܪ̈ܥܳܬܰܢ ܘܟܰܪ̈ܡܰܝܢ ܘܚܰܩ̈ܠܳܬܰܢ: ܘܫܰܝܢܳܐ ܘܰܫܠܳܡܳܐ ܢܰܡܠܶܟ ܒܥܺܕ̈ܳܬܰܢ ܘܕܰܝܪ̈ܳܬܰܢ: ܚܣܳܡܳܐ ܘܰܐܟܬܳܐ ܘܚܶܪܝܳܢܳܐ ܢܶܥܩܽܘܪ ܡ̣ܶܢ ܠܶܒܰܘ̈ܳܬܰܢ: ܘܪ̈ܰܚܡܶܐ ܘܰܚܢܳܢܳܐ ܢܰܫܦܰܥ ܥܰܠ ܢܰܦ̈ܫܳܬܰܢ: ܘܚܰܘ̈ܒܶܐ ܘܰܚܛܳܗ̈ܶܐ ܕܰܣܥܰܪܢܰܢ ܢܶܫܒܽܘܩ ܘܰܢܚܰܣܶܐ ܠܰܢ: ܘܡ̣ܶܢ ܓܰܒܶܗ ܝܰܡܺܝܢܳܝܳܐ ܢܣܺܝܡ ܠܢ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܟܰܦܰܪ ܡܳܪܝ ܡܶܢܰܢ ܠܪܺܝܚܳܐ ܣܰܪܝܳܐ ܕܰܚܛܳܗ̈ܶܐ: ܐܰܝܟ ܕܟܰܦܰܪܬ ܘܰܥܛܰܝܬ ܘܰܥܩܰܪܬ ܠܚܰܢܦܽܘܬܳܐ ܒܟܽܘܠܳܠ ܣܳܗܕܳܟ ܡܳܪܝ ܥܙܳܙܳܐܶܝܠ: ܘܰܐܥܛܰܪ ܒܰܢ ܪܺܝܚܳܐ ܚܰܠܝܳܐ ܕܰܥܒܳܕ̈ܶܐ ܛܳܒ̈ܶܐ ܕܰܡܪܰܥܶܝܢ ܠܳܟ: ܐܰܟܡܳܐ ܕܪܰܥܝܳܟ ܩܶܛܠܶܗ ܕܣܳܗܕܳܟ: ܘܰܐܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ: ܐܰܝܟ ܕܰܐܣܺܝܬ ܡܰܚ̈ܘܳܬܳܐ ܕܺܝܠܶܗ ܘܫܽܘ̈ܡܳܬܶܗ ܕܰܐܬܠܺܝܛܳܟ ܘܦܰܨܳܐ ܠܰܢ ܡ̣ܶܢ ܬܰܫܢܺܝ̈ܩܶܐ ܕܰܒܓܺܗܰܢܳܐ: ܘܡ̣ܶܢ ܚܶܫܽܘܟܳܐ ܒܰܪܝܳܐ ܘܡ̣ܶܢ ܓܽܘܒܳܐ ܕܕܽܘܘܳܢܳܐ: ܘܡ̣ܶܢ ܬܰܫܢܺܝ̈ܩܶܐ ܕܡܰܠܟܳܐ ܥܰܘܳܠܐ: ܕܰܚܢܰܢ ܢܰܘܕܶܐ ܠܳܟ: ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܫܰܕܰܪ ܠܰܢ ܡܳܪܝ ܡܰܠܐܟܳܐ ܕܪ̈ܰܚܡܶܐ ܟܰܕ ܛܥܺܝܢ ܪ̈ܰܚܡܶܐ ܘܰܚܢܳܢܳܐ ܕܡ̣ܶܢ ܠܘܳܬܳܟ: ܕܢܰܝܬܶܐ ܠܰܢ ܡܚܺܝ̈ܠܐ ܘܚܰܛܳܝ̈ܶܐ: ܘܕܰܢܚܰܝܶܠ ܠܰܢ ܐܰܡܺܝܢܳܐܝ̣ܬ ܘܢܰܐܣܶܐ ܟܪܺܝܗܽܘܬܰܢ ܐܰܝܟ ܡܳܐ ܕܫܰܕܰܪܬܳܝܗܝ ܠܘܳܬܶܗ ܕܓܰܒܝܳܟ ܡܳܪܝ ܥܙܳܙܳܐܶܝܠ: ܘܚܰܝܶܠܬ ܡܚܺܝܠܽܘܬܶܗ: ܘܰܐܣܺܝܬ ܡܚܽܘܬܶܗ: ܘܝܰܗܒܬ ܠܶܗ ܚܰܝܠܐ ܘܓܰܢ̱ܒܳܪܽܘܬܳܐ: ܘܰܐܒܗܶܬ ܘܰܙܟܳܐ ܠܡܰܠܟ̈ܶܐ ܛܪ̈ܽܘܢܶܐ: ܘܰܚܢܰܢ ܢܶܬܚܰܝܰܠ ܒܰܨܠܰܘ̈ܳܬܶܗ ܘܢܶܬܥܰܕܰܪ ܒܝܰܕ ܒܳܥ̈ܘܳܬܶܗ: ܘܢܶܬܣܰܝܰܥ ܒܝܰܕ ܬܰܟܫ̈ܦܳܬܶܗ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܰܕܪܰܫ ܐܽܘܪܚܳܐ ܕܣܳܗܕܽܘܬܳܐ ܠܐܬܠܺܝ̈ܛܰܘܗܝ: ܘܡ̣ܶܢ ܚܰܝܠܶܗ ܬܰܩܺܝܦܳܐ ܝܰܗܒ ܠܗܽܘܢ ܘܚܰܝܠܐ ܘܓܰܢ̱ܒܳܪܽܘܬܳܐ ܘܙܳܟܽܘܬܳܐ ܠܟܽܠܗܽܘܢ ܣܳܢܰܐܘ̈ܗܝ: ܠܗܰܘ ܕܫܰܕܪܶܗ ܠܛܰܠܝܳܐ ܫܰܪܘܳܝܳܐ ܡܳܪܝ ܥܙܳܙܳܐܶܝܠ: ܠܪܽܘܡܺܝ ܡܕܺܝܢܰܬ݀ ܡܰܠܟܽܘܬܳܐ: ܕܟܰܗܺܝܢܳܐ ܗܘܳܬ݀ ܒܚܰܢܦܽܘܬܳܐ ܕܟܳܦܽܘܪܽܘܬܳܐ: ܕܒܶܗ ܢܰܒܗܶܬ ܠܟܽܠܳܗ̇ ܛܽܘܥܝܰܝ ܕܰܦܬܰܟܪܽܘܬܳܐ: ܘܒܶܗ ܛܰܠܶܩ ܠܥܰܝ̈ܡܶܐ ܚܶܫܽܘܟܳܝ̈ܶܐ ܕܛܳܥܝܽܘܬܳܐ ܘܰܐܦܢܺܝ ܠܥܰܡ̈ܡܶܐ ܠܺܝܕܰܥܬܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ: ܘܗܳܫܳܐ ܒܕܽܘܟܪܳܢܶܗ ܢܩܰܪܶܒ ܫܽܘܒܚܳܐ ܠܡܳܪܝܳܐ ܡܢܰܨܚܳܢܶܗ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܥܰܕܥܺܐܕܶܗ ܕܰܐܬܠܺܝܛܳܐ ܥܛܺܝܦ ܙܳܟܽܘܬܳܐ ܡܳܪܝ ܥܙܳܙܳܐܶܝܠ ܨܳܒܶܝܢܰܢ ܠܰܡܩܰܠܳܣܽܘ: ܘܒܰܒ̈ܢܳܬ ܩ̈ܳܠܐ ܐܠܰܗܳܝ̈ܳܬܳܐ ܠܐܬܠܺܝܣܽܘܬܶܗ ܡܥܰܠܰܝܬܳܐ ܠܰܡܪܰܡܪܳܡܽܘ: ܘܠܰܒ̈ܢܶܝܗ̇ ܕܥܺܕܬܳܐ ܩܰܕܺܝܫܬܳܐ ܫܰܪܒܶܗ ܘܓܶܢܣܶܗ ܘܛܽܘܗܡܶܗ ܠܰܡܚܰܘܳܝܽܘ ܘܰܠܡܰܘܕܳܥܽܘ: ܗܳܢܳܐ ܕܡ̣ܶܢ ܫܡܝܺܫܰܛ ܡܕܺܝܢ̱ܬܳܐ ܐܺܝܬܰܘܗܝ ܗܘܳܐ: ܘܰܒܕܶܚܠܰܬ ܐܠܰܗܳܐ ܡ̣ܶܢ ܐܰܒܳܗܰܘ̈ܗܝ ܡܗܰܝ̈ܡܢܶܐ ܫܰܪܺܝܪ̈ܶܐ ܡܶܬܪܰܒܶܐ ܗܘܳܐ: ܗܳܢܳܐ ܕܟܰܕ ܠܰܡܫܽܘܚܬܳܐ ܘܩܰܘܡܬܳܐ ܕܰܬܪܶܥܣܰܪ ܫܢܰܝ̈ܳܐ ܡܰܛܺܝ ܗܘܳܐ: ܘܡ̣ܶܢ ܐܰܒܳܗܰܘ̈ܗܝ ܪ̈ܺܝܫܳܢܶܐ ܡܥܰܠܰܝ̈ܳܐ ܒܝܽܘ̈ܠܦܳܢܶܐ ܐܠܰܗܳܝ̈ܶܐ ܡܶܬܕܰܪܰܫ ܗܘܳܐ: ܗܳܢܳܐ ܕܟܰܕ ܠܐܓܪ̈ܳܬܶܗ ܕܡܰܠܟܳܐ ܪܰܫܺܝܥܳܐ ܡܰܟܣܺܝܡܝܰܢܽܘܣ ܫܳܡܰܥ ܗܘܳܐ: ܕܰܛܥܺܝ̈ܢܳܢ ܗܘܰܝ̈ ܟܽܠ ܓܙܳܡ̈ܶܐ ܘܠܽܘ̈ܚܳܡܶܐ ܥܰܠ ܥܰܡܳܐ ܕܰܟܪ̈ܺܝܣܛܝܳܢܶܐ: ܕܡܶܢܶܗ ܪܕܺܝܦ ܗܘܳܐ: ܕܟܽܠ ܕܠܐ ܣܳܓܶܕ ܠܰܦܬܰܟܪ̈ܶܐ ܕܡܰܠܟܳܐ ܥܺܐܕܳܐ ܪܰܒܳܐ ܠܗܽܘܢ ܥܳܒܶܕ ܗܘܳܐ: ܒܣܰܝܦܳܐ ܢܶܬܩܛܠ ܘܰܒܢܽܘܪܳܐ ܢܺܐܩܰܕ ܘܳܐܡܰܪ ܗܘܳܐ: ܘܟܽܠ ܕܠܐ ܟܳܦܰܪ ܒܝܶܫܽܘܥ ܢܳܨܪܳܝܳܐ ܕܠܐ ܪܳܚܡܺܝܢ ܠܶܗ ܡܫܰܟܶܢ ܗܘܳܐ: ܗܳܢܳܐ ܕܥܰܡ ܐܰܪܒܥܺܝܢ ܦܰܪ̈ܳܫܶܐ ܟܰܕ ܦܟܺܝܪ ܒܣܽܘܛܡ̈ܶܐ ܘܫܺܝ̈ܫܠܳܬܳܐ ܠܪܽܘܡܺܝ ܐܶܬܬܰܘܒܰܠ ܗܘܳܐ: ܟܰܕ ܩܳܡ ܩܕܳܡ ܡܰܠܟܳܐ ܪܰܫܺܝܥܳܐ ܕܠܐ ܕܶܚܠܐ ܡܰܙܥܶܩ ܗܘܳܐ: ܕܰܟܦܺܝܪ ܒܳܟ ܐܳܦ ܒܰܐܠܳܗܰܝ̈ܟ ܕܶܐܢܳܐ ܠܝܶܫܽܘܥ ܢܳܨܪܳܝܳܐ ܣܳܓܶܕ ܐ̱ܢܳܐ ܒܰܠܒܺܝܒܽܘܬ ܪܶܥܝܳܢܳܐ ܗܳܠܶܝܢ ܐܳܡܰܪ ܗܘܳܐ: ܘܡܶܚܕܳܐ ܒܪܽܘܓܙܳܐ ܘܰܒܚܶܡܬܳܐ ܐܶܬܓܰܘܙܰܠ ܡܰܠܟܳܐ ܚܰܢܦܳܐ: ܘܰܠܘܳܬ ܣܳܗܕܳܐ ܥܙܳܙܳܐܶܝܠ ܐܳܡܰܪ ܗܘܳܐ: ܘܢܳܨܪܳܝܳܟ ܠܗܽܘܢ ܠܐ ܥܳܕܰܪ ܗܘܳܐ: ܗܳܢܳܐ ܛܪܽܘܢܳܐ ܘܡܰܠܟܳܐ ܥܰܘܳܠܐ ܒܒܺܝܫܽܘܬܶܗ ܪܰܒܬܳܐ ܡܶܫܬܰܒܗܰܪ ܗܘܳܐ: ܘܒܰܛܠܺܝ̈ܡܶܐ ܣܰܓܺܝ̈ܶܐܐ ܕܰܩܛܰܠ ܡܶܬܚܬܰܪ ܐܳܦ ܡܶܬܪܰܘܪܰܒ ܗܘܳܐ: ܗܳܢܳܐ ܕܰܦܩܰܕ ܠܰܩܛܺܝܪ̈ܰܘܗܝ ܘܠܶܗ ܠܣܳܗܕܳܐ ܠܒܶܝܬ ܐܰܣܺܝܪ̈ܶܐ ܐܰܘܒܶܠ ܗܘܳܐ: ܘܰܒܓܽܘܒܳܐ ܚܶܫܽܘܟܳܝܳܐ ܚܰܒܫܶܗ ܗܘܳܐ: ܒܳܬܰܪ ܣܪ̈ܳܩܶܐ ܘܫܶܢ̈ܕܶܐ ܡܰܪܺܝܪ̈ܶܐ ܘܢܶܓ̈ܕܶܐ ܐܳܦ ܡܰܚ̈ܘܳܬܳܐ ܕܰܐܣܒܠܶܗ ܗܘܳܐ: ܗܳܢܳܐ ܕܡܰܠܐܟܳܐ ܕܢܽܘܗܪܳܐ ܡܳܪܝܳܐ ܠܘܳܬܶܗ ܫܰܕܰܪ ܗܘܳܐ: ܘܒܰܝܶܐܗ ܘܠܰܒܒܶܗ ܘܰܠܡܰܚ̈ܘܳܬܶܗ ܐܰܣܺܝ ܗܘܳܐ: ܗܳܢܳܐ ܕܡ̣ܶܢ ܓܽܘܒܳܐ ܗ̇ܰܘ ܚܶܫܽܘܟܳܝܳܐ ܡܳܪܝܳܐ ܐܰܦܩܶܗ ܗܘܳܐ: ܘܰܠܘܳܬ ܡܰܠܟܳܐ ܚܰܢܦܳܐ ܬܽܘܒ ܫܰܕܪܶܗ ܗܘܳܐ: ܐܰܝܟ ܕܢܰܪܬܺܝܘܗܝ ܘܰܠܗܰܝܡܳܢܽܘܬܳܐ ܕܰܫܪܳܪܳܐ ܠܶܗ ܘܰܠܦܳܠܚܰܘ̈ܗܝ ܢܰܦܢܶܐ ܗܘܳܐ: ܗܳܢܳܐ ܕܟܰܕ ܠܘܳܬ ܡܰܠܟܳܐ ܚܰܢܦܳܐ ܐܳܙܶܠ ܗܘܳܐ: ܐܶܫܟܰܚ ܨܶܝܕܰܘܗܝ ܕܟܽܠܗܽܘܢ ܡܳܐܢ̈ܰܝ ܫܶܢ̈ܕܶܐ ܘܰܣܪ̈ܳܩܶܐ ܛܰܝܶܒ ܗܘܳܐ: ܗܳܢܳܐ ܕܟܰܕ ܡܰܠܟܳܐ ܚܰܢܦܳܐ ܥܰܠ ܒܺܐܡ ܗܳܢܳܐ ܝܳܬܶܒ ܗܘܳܐ: ܘܰܦܩܰܕ ܘܰܠܣܳܗܕܳܐ ܥܙܳܙܳܐܶܝܠ ܠܘܳܬܶܗ ܐܰܝܬܺܝ ܗܘܳܐ: ܕܠܐ ܪ̈ܰܚܡܶܐ ܘܰܕܠܐ ܚܰܘܣܳܢ ܢܰܓܕܶܗ ܗܘܳܐ: ܗܳܢܳܐ ܕܰܠܪܺܝܫܶܗ ܕܒܰܚܡܳܪ ܕܢܶܓܕܳܐ ܥܰܨܪܶܗ ܗܘܳܐ: ܘܰܠܪ̈ܶܓܠܰܘܗܝ ܘܫܳܩܽܘܪ̈ܰܘܗܝ ܘܰܕܫܰܪܟܳܐ ܕܓܰܪ̈ܡܰܘܗܝ ܒܰܐܪܙܰܦܬܳܐ ܬܰܒܰܪ ܗܘܳܐ: ܘܠܐܝܕܰܘ̈ܗܝ ܘܰܕܪ̈ܳܥܰܘܗܝ ܒܣܝ̈ܢܳܬܳܐ ܦܳܣܶܩ ܗܘܳܐ: ܗܳܢܳܐ ܕܰܠܥܰܪ̈ܫܰܘܗܝ ܘܫܶܢܰܘ̈ܗܝ ܒܟܰܠܒ̈ܳܬܳܐ ܥܳܩܰܪ ܗܘܳܐ: ܘܰܠܥܰܝܢܰܘ̈ܗܝ ܘܒܳܒ̈ܳܬܶܗ ܒܰܡܚܰܨܝܳܢܳܐ ܐܰܦܶܩ ܗܘܳܐ: ܘܰܠܣܶܦ̈ܘܳܬܶܗ ܒܝܰܕ ܫܽܘܦܺܝܢܳܐ ܐܰܣܺܝܦ ܗܘܳܐ: ܘܰܠܟܽܠܶܗ ܦܰܓܪܶܗ ܒܡܳܐܢ̈ܰܝ ܫܶܢ̈ܕܶܐ ܘܰܣܪ̈ܳܩܶܐ ܚܰܒܶܠ ܗܘܳܐ: ܘܰܠܚܰܪܬܳܐ ܥܰܠ ܪܺܝܫ ܪܳܡܬܳܐ ܦܩܰܕ ܕܪܺܝܫܶܗ ܒܣܰܝܦܳܐ ܢܶܬܦܣܶܩ ܗܘܳܐ: ܗܳܢܳܐ ܕܒܰܫܢܰܬ݀ ܫܶܬܡܳܐܐ ܘܚܰܡܫܰܥܣܰܪ ܐܶܬܟܰܠܰܠ ܗܘܳܐ: ܘܒܳܬܰܪ ܕܶܐܬܟܰܠܰܠ ܡܳܪܝܳܐ ܛܢܳܢܶܗ ܐܰܥܺܝܪܶܗ ܗܘܳܐ: ܕܰܢܩܰܡܬܳܐ ܡ̣ܶܢ ܩܳܛܽܘܠܰܘ̈ܗܝ ܢܶܥܒܶܕ ܗܘܳܐ: ܗܳܢܳܐ ܕܫܰܕܰܪ ܡܳܪܝܳܐ ܢܽܘܪܳܐ ܩܫܺܝܬܳܐ ܕܰܠܟܽܠ ܡ̇ܰܢ ܕܺܐܝܬ ܒܪܽܘܡܺܝ ܢܰܘܩܕ ܗܘܳܐ: ܘܒܰܡܚܽܘܬܳܐ ܕܪܽܘܓܙܳܐ ܠܟܽܠܗܽܘܢ ܢܰܘܩܶܕ ܗܘܳܐ: ܘܡܶܚܕܳܐ ܟܰܪܟܳܐ ܪܰܒܳܐ ܕܬܰܪܬܶܝܢ ܓܽܘ̈ܕܶܐ ܡܶܬܚܙܶܐ ܗܘܳܐ: ܚܕܳܐ ܠܰܡܫܺܝܚܳܐ ܚܕܳܐ ܠܣܳܛܳܢܳܐ ܡܶܬܚܰܘܶܐ ܗܘܳܐ: ܣܪܺܝܕܳܐ ܕܗܰܝܡܶܢ ܒܶܗ ܒܰܡܫܺܝܚܳܐ ܘܰܒܣܳܗܕܳܐ ܛܦܰܣ ܡܶܢܳܗ̇ ܕܢܽܘܪܳܐ ܒܝܰܕ ܬܶܕܡܽܘܪܬܳܐ ܡܶܬܦܰܨܶܐ ܗܘܳܐ: ܘܰܐܝܢܳܐ ܕܩܰܘܺܝ ܒܟܳܦܽܘܪܽܘܬܳܐ ܘܰܒܚܰܢܦܽܘܬܳܐ ܒܪܽܘܓܙܳܐ ܪܰܒܳܐ ܘܰܒܢܽܘܪܳܐ ܩܫܺܝܬܳܐ ܝܳܩܶܕ ܗܘܳܐ: ܗ̣ܽܘ ܥܰܡ ܝܰܠܕܰܘ̈ܗܝ ܐܳܦ ܩܶܢܝܳܢܰܘ̈ܗܝ: ܘܟܽܠܶܗ ܒܰܝܬܶܗ ܡܶܢܳܗ̇ ܕܢܽܘܪܳܐ ܠܐ ܦܳܠܰܛ ܗܘܳܐ ܘܠܐ ܡܰܡܕ ܗܘܳܐ: ܐܶܠܐ ܒܢܽܘܪܳܐ ܘܫܰܠܗܶܒܺܝܬܳܐ ܡܶܬܛܰܪܛܰܥ ܗܘܳܐ: ܒܡܰܚ̈ܘܳܬܳܐ ܕܪܽܘܓܙܳܐ ܕܠܐ ܚܰܘܣܳܢܳܐ ܬܽܘܒ ܒܳܠܰܥ ܗܘܳܐ: ܝܺܩܶܕ ܡܰܠܟܳܐ ܗ̇ܰܘ ܥܰܘܳܠܐ ܘܛܰܟܣܺܝܣ ܕܺܝܠܶܗ: ܝܰܩܕܳܢܳܐ ܠܘܳܬ ܝܰܩܕܳܢܳܐ ܕܰܒܓܺܗܰܢܳܐ ܐܶܬܬܰܘܒܰܠ ܗܘܳܐ: ܐܳܘ ܠܳܟ ܡܳܪܝܳܐ ܟܡܳܐ ܪܳܚܶܡ ܐܰܢ̱ܬ ܠܰܕܪܳܚܶܡ ܠܳܟ: ܟܡܳܐ ܫܰܪܺܝܪܳܐܝ̣ܬ ܠܡ̇ܰܢ ܕܰܒܩܽܘܫܬܳܐ ܬܽܘܒ ܩܳܪܶܐ ܠܳܟ ܘܰܕܡܰܚ̈ܒܳܢܰܝܟ ܕܰܒܩܶܛܠܰܝ̈ܗܽܘܢ ܗܳܐ ܫܰܦܺܝܪ̈ܳܢ ܠܳܟ: ܘܗܳܫܳܐ ܒܰܨܠܰܘ̈ܳܬܶܗ ܕܡܳܪܝ ܥܙܳܙܳܐܶܝܠ ܣܳܗܕܳܐ ܐܰܬܠܺܝܛܳܟ: ܕܝܰܗܒ ܦܰܓܪܶܗ ܠܟܽܠ ܫܶܢ̈ܕܶܐ ܘܽܐܘܠܨ̈ܳܢܶܐ ܡܶܛܽܠ ܚܽܘܒܳܟ ܘܰܦܫܰܛ ܨܰܘܪܶܗ ܩܽܘܕܡܰܬ ܣܰܝܦܳܐ ܒܪܶܚܡܬܳܟ: ܘܒܰܨܠܰܘ̈ܳܬܳܗ̇ ܕܡܰܪܝܰܡ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܐܶܡܳܐ ܕܺܝܠܶܕܬܳܟ: ܘܰܕܟܽܠܶܗ ܣܶܕܪܳܐ ܕܩܰܕܺܝ̈ܫܶܐ ܕܰܫܦܰܪܘ ܠܳܟ ܘܰܥܒܰܕܘ ܨܶܒܝܳܢܳܟ: ܢܰܛܰܪ ܠܥܺܕܬܳܟ ܕܗܳܐ ܡܦܺܝܣܳܐ ܠܳܟ: ܒܰܪܶܟ ܠܥܳܢ̈ܳܟ ܘܡܰܪܥܺܝܬܳܟ: ܐܶܬܪܰܚܰܡ ܥܰܠ ܟܽܠܳܗ̇ ܓܒܺܝܠܬܳܟ: ܥܢܺܝ ܠܰܓܙܳܪܳܟ: ܕܰܟܢܺܝܫ ܒܰܫܡܳܟ ܘܗܳܐ ܡܶܬܟܰܫܰܦ ܠܳܟ: ܙܰܗܳܐ ܠܟܳܗ̈ܢܶܐ ܕܰܡܩܰܠܣܺܝܢ ܠܳܟ ܘܠܰܡܫܰܡ̈ܫܳܢܶܐ ܕܗܳܐ ܡܫܰܒܚܺܝܢ ܠܳܟ: ܣܡܽܘܟ ܠܣܳܒ̈ܶܐ ܒܝܰܡܺܝܢܳܟ: ܘܠܰܥܠܰܝ̈ܡܶܐ ܘܠܰܛܠܳܝ̈ܶܐ ܘܰܠܫܰܒܪ̈ܶܐ ܕܡܶܬܓܰܘܣܺܝܢ ܒܳܟ: ܘܣܰܬܰܪ ܠܢܶܫ̈ܶܐ ܘܠܰܒ̈ܢܳܬܗܶܝܢ ܕܗܳܐ ܩܳܪ̈ܝܳܢ ܠܳܟ: ܘܰܫܒܽܘܩ ܚܛܳܗ̈ܶܐ ܕܥܰܒܕ̈ܶܐ ܕܺܝܠܳܟ: ܘܰܐܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܩܕܝܫܐ ܡܪܝ ܕܕܐ ܕܩܒܝܪ ܦܓܪܗ ܒܒܝܬ ܣܒܝܪܝܢܐ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܒܰܙܡܺܝܪ̈ܳܬܳܐ ܘܰܒܢܶܥ̈ܡܳܬܳܐ ܕܪܽܘܚܳܐ ܩܰܕܺܝܫܳܐ ܢܩܰܠܶܣ ܘܰܢܪܰܡܪܶܡ ܠܥܺܐܕܳܐ ܫܒܺܝܚܳܐ ܕܕܽܘܟܪܳܢܶܗ ܕܪܺܝܫ ܟܳܗ̈ܢܶܐ ܡܥܰܠܝܳܐ ܘܚܰܣܝܳܐ ܡܳܪܝ ܕܳܕܳܐ ܐܶܦܣܩܽܘܦܳܐ ܕܬܰܓܪܺܝܬ ܡܕܺܝܢ̱ܬܳܐ: ܘܰܐܝܟܰܢܳܐ ܕܶܐܬܬܰܝܬܺܝ ܦܰܓܪܶܗ ܩܰܕܺܝܫܳܐ ܐܰܝܟ ܒܽܘܪܟܬܳܐ ܘܥܽܘܕܪܳܢܳܐ ܠܛܽܘܪ ܥܰܒܕܺܝ̈ܢ: ܘܰܠܒܶܝܬ ܣܒܺܝܪܺܝܢܳܐ: ܗܳܟܰܢܳܐ ܫܰܕܰܪ ܠܰܢ ܡܳܪܝܳܐ ܐܠܰܗܳܐ ܝܰܘܡܳܢܳܐ ܟܽܠ ܛܳܒ̈ܳܬܳܐ ܫܦܺܝ̈ܥܳܬܳܐ: ܘܟܽܠ ܒܽܘܪ̈ܟܳܬܳܐ ܣܒܺܝ̈ܣܳܬܳܐ: ܘܟܽܠ ܚܽܘܣܳܝܳܐ ܕܡܶܬܥܰܒܪ̈ܳܢܘܳܬܳܐ: ܘܫܽܘܒܩܳܢܳܐ ܕܣܰܟܠܘ̈ܳܬܳܐ: ܘܰܢܝܳܚܳܐ ܘܒܽܘܣܳܡܳܐ ܒܶܝܬ ܡܰܠܟܽܘܬܳܐ ܠܰܢ ܘܰܠܥܰܢܺܝ̈ܕܰܝܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܪܺܝܫ ܟܳܗ̈ܢܶܐ ܫܽܘܒܗܳܪܰܢ ܝܶܫܽܘܥ ܡܫܺܝܚܳܐ: ܕܨܳܪ ܒܪܺܝܫܽܘܬ ܟܳܗܢܽܘܬܳܐ ܠܐܒܽܘܢ ܚܰܣܝܳܐ ܡܳܪܝ ܓܪܺܝܓܳܘܪܺܝܳܘܣ ܕܗ̣ܽܘ ܡܳܪܝ ܕܳܕܳܐ ܐܶܦܣܩܽܘܦܳܐ ܕܬܰܓܪܺܝܬ ܡܕܺܝܢ̱ܬܳܐ: ܠܗܰܘ ܕܰܣܥܰܪ ܒܶܝܬ ܐܺܝܕܰܘ̈ܗܝ ܕܡܳܪܝ ܕܳܕܳܐ ܟܽܠ ܬܶܕܡܪ̈ܳܬܳܐ ܪܰܘܪ̈ܒܳܬܳܐ: ܘܟܽܠ ܐܳܣܘ̈ܳܬܳܐ ܫܒܺܝ̈ܚܳܬܳܐ: ܠܗܰܘ ܕܰܥܒܰܕ ܒܰܫܡܶܗ ܒܛܽܘܪܳܐ ܕܬܰܒܪܺܝܙ: ܟܽܠ ܬܡܺܝ̈ܗܳܬܳܐ ܘܰܓܢ̱ܒܰܪ̈ܘܳܬܳܐ: ܘܥܰܙܺܝ ܒܟܰܦܢܳܐ ܘܰܒܨܶܗܝܳܐ ܬܪܶܥܣܰܪ ܫܢܰܝ̈ܳܐ ܥܰܠ ܪܺܝܫܶܗ ܕܛܽܘܪܳܐ ܕܠܐ ܡܰܥܡܪܳܐ ܒܟܽܠ ܕܽܘܒܳܪ̈ܶܐ ܕܰܡܝܰܬܪܽܘܬܳܐ ܘܰܒܟܽܠ ܢܙܺܝܪܽܘܬܳܐ ܘܥܳܢܘܳܝܽܘܬܳܐ ܕܠܐ ܡܰܐܻܝܢܽܘܬܳܐ: ܕܠܶܗ ܠܡܳܪܝܳܐ ܕܚܰܝܠܶܗ ܘܳܐܦ ܢܰܨܚܶܗ ܘܝܰܗܒ ܠܶܗ ܙܳܟܽܘܬܳܐ ܥܰܠ ܚܰܫܰܝ̈ ܒܶܣܪܳܐ: ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܝܰܘܡܳܐ ܚܰܕܽܘܬܳܢܳܝܳܐ ܕܥܰܕܥܺܐܕܳܟ ܐܳܘ ܐܰܒܽܘܢ ܚܰܣܝܳܐ ܩܰܕܺܝܫܳܐ ܡܳܪܝ ܓܪܺܝܓܳܘܪܺܝܳܘܣ ܕܗ̣ܽܘ ܡܳܪܝ ܕܳܕܳܐ ܓܰܒܝܳܐ ܐܶܬܛܰܝܰܒܢܰܢ ܘܶܐܬܰܝܢܰܢ ܠܰܡܝܰܩܳܪܽܘ ܠܥܰܕܥܺܐܕܳܟ: ܘܰܠܛܽܘܒܬܳܢܽܘܬܳܟ ܡܥܰܠܰܝܬܳܐ ܐܶܬܘܰܥܰܕܢܰܢ ܐܰܝܟܰܢܳܐ ܕܢܶܫܬܰܥܶܐ ܠܰܫܒܺܝܚܽܘܬ ܬܶܕܡܪ̈ܳܬܳܟ ܪܰܘܪ̈ܒܳܬܳܐ ܨܳܒܶܝܢܰܢ: ܘܰܠܡܰܘܕܳܥܽܘ ܡܗܰܝ̈ܡܢܶܐ ܕܰܟܢܺܝܫܺܝܢ ܣܰܓܺܝܽܐܘܬ ܚܰܝ̈ܠܐ ܘܳܐܣܘ̈ܳܬܳܐ ܕܚܰܘܺܝܬ ܒܥܳܠܡܳܐ ܒܳܥܶܝܢܰܢ: ܘܟܰܕ ܡ̣ܶܢ ܣܰܓܺܝܽܐܘܬ ܥܰܡܠܶܗ ܡܰܘܚܠܺܝܢܰܢ ܠܡܶܬܢܶܐ ܬܶܕܡܪ̈ܳܬܶܗ ܠܐ ܡܨܶܝܢܰܢ ܘܰܚܕܳܐ ܡ̣ܶܢ ܐܠܳܦ ܕܳܐܬܘ̈ܳܬܳܐ ܕܺܝܠܳܟ: ܡܰܘܕܥܺܝܢܰܢ: ܘܡ̣ܶܢ ܝܰܡܳܐ ܪܘܺܝܚܳܐ ܫܦܺܝܥܳܐ ܕܰܬܡܺܝ̈ܗܳܬܳܟ ܡܠܐܷ ܚܶܨܪܳܐ ܐܰܝܟ ܕܰܠܡܺܐܡܰܪ ܕܳܠܶܝܢܰܢ: ܘܒܶܐܕ̈ܢܶܐ ܕܫܳܡܽܘ̈ܥܶܐ ܟܽܠܗܽܘܢ ܣܳܝܡܺܝܢܰܢ: ܗܳܢܳܐ ܕܡ̣ܶܢ ܟܰܪܣܳܐ ܕܶܐܡܶܗ ܐܶܬܓܒܺܝ ܐܰܝܟ ܐܶܪܰܡܝܳܐ ܘܰܫܡܽܘܐܶܝܠ ܢܒܺܝܳܐ: ܗܳܢܳܐ ܕܰܒܢܶܕܪ̈ܶܐ ܐܶܬܺܝܗܶܒ ܘܰܒܩܽܘܪ̈ܒܳܢܶܐ ܐܶܬܺܝܠܶܕ ܠܐܒܳܗܰܘ̈ܗܝ ܥܰܩܪ̈ܶܐ ܘܰܡܓܰܙܰܝ̈ܳܐ ܘܰܡܗܰܝ̈ܡܢܶܐ: ܗܳܢܳܐ ܕܡ̣ܶܢ ܣܺܝܕܽܘܣ ܩܪܺܝܬܳܐ ܐܺܝܬܰܝܗܽܘܢ ܗܘܰܘ ܐܰܒܳܗܰܘ̈ܗܝ: ܘܒܰܨܠܰܘ̈ܳܬܶܗ ܕܚܰܕ ܝܺܚܺܝܕܳܝܳܐ ܡܝܰܬܪܳܐ ܕܰܫܡܶܗ ܗܘܳܐ ܡܳܪܝ ܕܰܘܺܝܕ ܥܰܠ ܫܡܶܗ ܩܪܰܐܘܽܘܗܝ ܐܰܒܳܗܰܘ̈ܗܝ ܫܡܶܗ ܕܩܰܕܺܝܫܳܐ ܡܳܪܝ ܕܰܘܺܝܕ: ܘܒܰܨܠܰܘ̈ܳܬܶܗ ܐܶܬܺܝܗܶܒ ܠܗܽܘܢ: ܗܳܢܳܐ ܕܟܰܕ ܛܰܠܝܳܐ ܒܰܪ ܚܰܡܶܫ ܫܢܺܝ̈ܢ ܐܰܘܬܒܽܘܗܝ ܐܰܒܳܗܰܘ̈ܗܝ ܒܶܐܣܟܽܘܠܝ ܕܢܺܐܠܰܦ ܣܶܦܪܳܐ: ܘܝܺܠܶܦ ܝܽܘܠܦܳܢܳܐ ܐܠܰܗܳܝܳܐ: ܗܳܢܳܐ ܕܰܥܬܺܝܕܺܝܢ ܗܘܰܘ ܐܰܒܳܗܰܘ̈ܗܝ ܕܢܶܡܟܪܽܘܢ ܠܶܗ ܐܰܢ̱ܬܬܳܐ ܘܰܕܢܶܬܦܰܨܚܽܘܢ ܗܘܰܘ ܒܰܚܠܽܘܠܐ ܕܡܶܫܬܽܘܬܶܗ ܐܰܝܟ ܫܰܪܟܳܐ ܕܰܒܢܰܝ̈ܢܳܫܳܐ: ܐܶܠܐ ܗ̣ܽܘ ܚܰܫ ܘܶܐܬܟܡܰܪ ܘܠܐ ܨܒܳܐ ܗܘܳܐ: ܗܳܢܳܐ ܕܨܰܠܺܝ ܘܰܒܥܳܐ ܡ̣ܶܢ ܐܠܰܗܳܐ ܕܠܐ ܢܶܬܥܰܪܩܰܠ ܒܦܰܚܳܐ ܕܥܳܠܡܳܐ ܗܳܢܳܐ: ܘܡܺܝܬܘ ܐܰܒܳܗܰܘ̈ܗܝ ܘܦܳܫ ܛܰܠܝܳܐ ܒܨܶܒܝܳܢ ܢܰܦܫܶܗ: ܘܰܫܐܷܠ ܡ̣ܶܢ ܐܠܰܗܳܐ ܕܠܐ ܢܶܬܥܰܪܩܰܠ ܒܦܰܚܳܐ ܕܥܳܠܡܳܐ ܗܳܢܳܐ: ܘܡܺܝܬܘ ܐܰܒܳܗܰܘ̈ܗܝ ܠܚܰܝ̈ܶܐ ܕܰܠܥܳܠܰܡ: ܘܰܕܢܺܐܙܰܠ ܢܶܗܘܶܐ ܕܰܝܪܳܝܳܐ ܘܠܐ ܢܶܬܥܰܘܰܟ ܡ̣ܶܢ ܐܽܘܪܚܳܐ ܕܰܡܝܰܬܪܽܘܬܳܐ: ܗܳܢܳܐ ܕܟܰܕ ܢܦܰܩ ܡ̣ܶܢ ܒܰܝܬܳܐ ܕܰܐܒܳܗܰܘ̈ܗܝ ܒܳܬܰܪ ܕܡܺܝܬܘ: ܘܶܐܙܰܠ ܠܕܰܝܪܳܐ ܕܨܶܝܕ ܬܰܒܪܺܝܙ ܡܕܺܝܢ̱ܬܳܐ ܘܶܐܣܬܰܦܰܪ ܘܰܗܘܳܐ ܕܰܝܪܳܝܳܐ ܒܶܝܬ ܐܺܝܕܰܝ̈ ܪܰܒܶܗ ܡܳܪܝ ܕܰܘܺܝܕ ܝܺܚܺܝܕܳܝܳܐ: ܗܳܢܳܐ ܕܰܒܛܽܘܪܳܐ ܕܬܰܒܪܺܝܙ ܗܘܳܐ ܬܚܶܝܬ ܫܡܰܝܳܐ ܬܪܶܥܣܰܪ ܫܢܰܝ̈ܳܐ ܟܰܕ ܛܡܺܝܪ ܒܬܰܠܓܳܐ ܘܰܓܠܺܝܕܳܐ ܣܰܬܘܳܐ ܟܽܠܶܗ: ܚܙܳܐ ܐܠܰܗܳܐ ܚܽܘܡܣܳܢܶܗ ܘܟܰܕ ܥܰܙܺܝ ܘܰܒܨܶܗܝܳܐ ܫܰܕܰܪ ܠܶܗ ܦܳܬܽܘܪܳܐ ܡ̣ܶܢ ܫܡܰܝܳܐ: ܘܶܐܟܰܠ ܘܶܐܫܬܺܝ ܘܰܐܘܕܺܝ ܘܫܰܒܰܚ ܠܐܠܳܗܳܐ: ܗܳܢܳܐ ܕܶܐܙܰܠ ܠܶܗ ܠܰܡܕܺܝܢܰܬ ܩܽܘܕ̈ܫܶܐ ܘܶܐܬܒܰܪܰܟ ܡ̣ܶܢ ܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܕܗܰܠܶܟ ܒܗܶܝܢ ܡܳܪܰܢ ܝܶܫܽܘܥ ܘܬܰܠܡܺܝ̈ܕܰܘܗܝ ܩܰܕܺܝ̈ܫܶܐ: ܗܳܢܳܐ ܕܰܡܬܰܩ ܚܰܝ̈ܶܐ ܘܚܰܕ̈ܘܳܬܳܐ ܡ̣ܶܢ ܩܰܒܪܶܗ ܕܡܳܪܰܢ ܘܡ̣ܶܢ ܥܶܠܺܝܬܳܐ ܡܰܠܝܰܬ ܐ̱ܪ̈ܳܙܶܐ ܘܦ̈ܶܠܐܬܳܐ ܘܡ̣ܶܢ ܓܳܓܽܘܠܬܳܐ ܕܡܶܢܳܗ̇ ܗܘܳܐ ܦܽܘܪܩܳܢܳܐ ܠܥܳܠܡܳܐ: ܗܳܢܳܐ ܕܡ̣ܶܢ ܬܰܡܳܢ ܠܡܰܕܒܪܳܐ ܗ̇ܰܘ ܕܶܐܣܩܺܝܛܺܝ ܡܛܳܐ ܘܡ̣ܶܢ ܐܰܒܳܗ̈ܳܬܳܐ ܕܬܰܡܳܢ ܐܶܬܒܰܪܰܟ ܘܟܰܕ ܗܦܰܟ ܡ̣ܶܢ ܬܰܡܳܢ ܘܰܒܢܳܐ ܠܶܗ ܕܰܝܪܳܐ ܨܶܝܕ ܐܶܣܦܶܣ ܒܽܐܘܚܕܳܢܳܐ ܕܦܺܝܪ ܘܰܕܒܶܝܬ ܙܰܒܕܰܝ: ܗܳܢܳܐ ܕܟܰܕ ܡܛܳܐ ܗܘܳܐ ܠܕܰܪܓܳܐ ܕܶܐܦܣܩܽܘܦܽܘܬܳܐ ܕܬܰܓܪܺܝܬ ܡܕܺܝܢ̱ܬܳܐ ܕܒܰܐܬܪܳܐ ܕܡܰܕܢܚܳܐ ܘܶܐܬܓܠܺܝ ܠܶܗ ܠܡܳܪܝ ܦܶܛܪܳܐ ܦܰܛܪܝܰܪܟܳܐ ܕܰܐܢܛܺܝܽܘܟܺܝܰܐ ܡܶܛܽܠܳܬܶܗ: ܘܶܐܬܶܐܡܰܪ ܠܶܗ ܕܠܰܝܬ ܕܫܳܘܶܐ ܠܗܳܢܳܐ ܕܰܪܓܳܐ ܐܶܠܐ ܚܰܕ ܝܺܚܺܝܕܳܝܳܐ ܒܽܐܘܚܕܳܢܳܐ ܕܦܺܝܪ ܘܰܕܒܶܝܬ ܙܰܒܕܰܝ ܥܰܠ ܓܶܢ̱ܒ ܩܪܺܝܬܳܐ ܕܰܫܡܳܗ̇ ܐܶܣܦܶܣ ܨܶܝܕ ܪܳܓܽܘܠܐ ܕܓܺܗܰܢܳܐ: ܗܳܢܳܐ ܕܫܰܕܰܪ ܒܳܬܪܶܗ ܦܰܛܪܝܰܪܟܳܐ ܦܶܛܪܳܐ ܕܰܐܢܛܺܝܽܘܟܺܝܰܐ ܥܨܳܝܗܝ ܕܢܶܗܘܶܐ ܐܶܦܣܩܽܘܦܳܐ ܟܰܕ ܥܨܳܝܗܝ ܗܘܳܐ ܘܠܐ ܫܰܡܥܶܗ: ܟܰܕ ܥܪܰܩ ܗܘܳܐ ܡ̣ܶܢ ܝܽܘܩܪܳܐ ܕܟܳܗܢܽܘܬܳܐ: ܗܳܢܳܐ ܕܰܐܪܡܺܝ ܥܠܰܘܗܝ ܦܰܛܪܝܰܪܟܳܐ ܟܶܠܝܳܢܳܐ ܘܰܐܚܪܡܶܗ ܘܰܐܣܪܶܗ ܘܳܐܦ ܒܰܩܛܺܝܪܳܐ ܐܰܣܪܚܶܗ ܟܰܕ ܝܳܕܰܥ ܗܘܳܐ ܕܓܰܒܪܰܐ ܗ̱ܘ ܩܰܕܺܝܫܳܐ ܘܫܳܘܶܐ ܠܡܰܘܗܰܒܬܳܐ ܗܳܕܶܐ ܐܠܰܗܳܝܬܳܐ: ܗܳܢܳܐ ܕܟܰܕ ܒܳܟܶܐ ܗܘܳܐ ܡܰܪܺܝܪܳܐܝ̣ܬ ܐܰܚܬܶܗ ܒܰܩܛܺܝܪܳܐ ܠܬܰܓܪܺܝܬ ܡܰܪܥܺܝܬܶܗ ܕܡ̣ܶܢ ܐܠܰܗܳܐ ܐܶܬܝܰܗܒܰܬ݀ ܠܶܗ: ܘܰܐܝܟ ܚܳܒܳܢ ܕܕܰܒܪܶܗ ܠܬܽܐܘܡܰܐ ܒܥܶܨܝܳܢܳܐ: ܗܳܟܰܢ ܢܰܣܒܽܘܗܝ ܬܰܓܪ̈ܺܝܬܳܢܳܝܶܐ ܡܒܰܪ̈ܟܶܐ: ܠܚܰܣܝܳܐ ܡܳܪܝ ܕܳܕܳܐ ܘܰܢܚܶܬܘ ܡ̣ܶܢ ܨܶܝܕ ܦܰܛܪܝܰܪܟܳܐ ܡܳܪܝ ܦܶܛܪܽܘܣ: ܗܳܢܳܐ ܕܰܣܥܰܪ ܒܽܐܘܪܚܶܗ ܚܰܝ̈ܠܐ ܬܡܺܝ̈ܗܶܐ ܘܳܐܬܘ̈ܳܬܳܐ: ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ: ܗܳܢܳܐ ܕܥܶܣܪܺܝܢ ܫܢܰܝ̈ܳܐ ܫܰܡܶܫ ܐܶܦܣܩܽܘܦܽܘܬܳܐ ܘܰܐܣܪܰܚ ܐܠܰܦܳܐ ܘܰܬܠܳܬܡܳܐܐ ܟܳܗ̈ܢܶܐ: ܘܰܐܠܦܳܐ ܘܰܫܒܰܥܡܳܐܐ ܡܫܰܡ̈ܫܳܢܶܐ: ܘܫܰܢܺܝ ܠܘܳܬ ܡܳܪܶܗ ܫܢܰܬ ܬܫܰܥܡܳܐܐ ܐܳܦ ܥܶܣܪܺܝܢ ܕܝܰܘ̈ܢܳܝܶܐ ܘܶܐܬܥܰܦܺܝ ܘܶܐܬܩܒܰܪ ܒܥܺܕܬܳܐ ܪܰܒܬܳܐ ܕܰܒܬܰܓܪܺܝܬ ܡܕܺܝܢ̱ܬܳܐ ܡܰܪܥܺܝܬܶܗ: ܐܰܬܪܳܐ ܒܪܺܝܟܳܐ ܕܡܰܕܢܚܳܐ: ܗܳܢܳܐ ܕܙܰܡܶܢ ܪܽܘܚܳܐ ܩܰܕܺܝܫܳܐ ܘܰܐܝܬܺܝ ܠܝܰܘܡܳܐ ܕܥܽܘܢܕܳܢܶܗ ܐܠܰܦܳܐ ܘܰܬܡܳܢܶܡܳܐܐ ܟܳܗ̈ܢܶܐ ܩܳܪ̈ܽܘܝܶܐ ܘܰܡܨܰܠܝ̈ܳܢܶܐ ܘܥܰܡ̈ܡܶܐ ܕܠܐ ܡܶܬܡܢܶܝܢ: ܘܫܰܒܥܳܐ ܐܺܝܡܳܡ̈ܶܐ ܘܠܰܝܠܰܘ̈ܳܬܳܐ ܫܰܡܶܫܘ ܗܘܰܘ ܥܰܠ ܫܟܺܝܢܬܳܐ ܕܦܰܓܪܶܗ ܩܰܕܺܝܫܳܐ: ܗܳܢܳܐ ܕܒܳܬܰܪ ܩܒܽܘܪܬܶܗ ܗ̇ܳܝ ܕܰܒܬܰܓܪܺܝܬ ܢܽܘܓܪܳܐ ܕܰܬܡܳܢܬܰܥܣܰܪ ܫܢܺܝ̈ܢ ܐܶܬܬܰܝܬܺܝ ܦܰܓܪܶܗ ܠܕܰܝܪܶܗ ܕܨܶܝܕ ܐܶܣܦܶܣ: ܘܒܳܬܰܪܟܶܢ ܠܛܽܘܪ ܥܰܒܕܺܝ̈ܢ ܐܰܬܪܳܐ ܡܒܰܪܟܳܐ ܕܶܐܬܡܰܢܰܥ: ܘܰܠܒܶܝܬ ܣܒܺܝܪܺܝܢܳܐ ܩܪܺܝܬܳܐ ܫܪܳܬ݀ ܫܟܺܝܢܬܶܗ ܕܦܰܓܪܶܗ ܩܰܕܺܝܫܳܐ: ܘܬܰܡܳܢ ܕܶܝܢ ܢܰܚܶܡ ܗܘܳܐ ܠܚܰܕ ܛܰܠܝܳܐ ܕܥܰܢܺܝܕ ܗܘܳܐ: ܗܳܢܳܐ ܕܶܐܬܒܰܢܝܰܬ݀ ܠܶܗ ܥܺܕܬܳܐ ܪܰܒܬܳܐ ܘܫܰܦܺܝܪܬܳܐ ܥܰܠ ܫܡܶܗ ܒܩܶܣܛܪܰܐ ܕܒܶܝܬ ܣܒܺܝܪܺܝܢܳܐ: ܘܒܳܗ̇ ܐܶܬܩܒܰܪ ܦܰܓܪܶܗ ܩܰܕܺܝܫܳܐ: ܘܶܐܬܩܰܪܝܰܬ݀ ܥܺܕܬܳܐ ܕܩܰܕܺܝܫܳܐ ܡܳܪܝ ܕܳܕܳܐ ܥܕܰܡܳܐ ܠܝܰܘܡܳܢܳܐ: ܘܟܰܕ ܠܳܟ ܗܳܟܺܝܠ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܡܫܺܝܚܳܐ ܐܠܰܗܳܐ ܕܺܝܠܰܢ ܕܒܰܨܠܰܘ̈ܳܬܶܗ ܕܢܰܨܺܝܚܳܐ ܘܓܰܒܝܳܐ ܡܳܪܝ ܕܳܕܳܐ ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܰܢ: ܘܰܐܥܒܰܪ ܡ̣ܶܢ ܐܰܬܪܰܢ ܚܰܪܒܳܐ ܘܫܶܒܝܳܐ ܘܟܰܦܢܳܐ ܘܡܰܘܬܳܢܳܐ: ܘܒܰܛܶܠ ܡ̣ܶܢ ܐܰܪܥܳܐ ܩܰܡܨܳܐ ܘܙܳܚܠܐ ܡ̣ܶܢ ܟܰܪ̈ܡܰܝܢ ܫܰܘܒܳܐ ܘܒܰܪܕܳܐ ܘܢܳܨܽܘܪܳܐ ܘܨܰܪܨܽܘܪܳܐ: ܘܠܐ ܬܫܰܠܶܛ ܥܠܰܝܢ ܐܺܝܕܳܐ ܩܛܺܝܪܳܝܬܳܐ ܘܪܶܓܠܐ ܢܽܘܟܪܳܝܬܳܐ ܘܠܐ ܢܶܬܬܕܺܝܫ ܐܰܬܪܰܢ ܡ̣ܶܢ ܥܰܡ̈ܡܶܐ ܢܽܘܟܪ̈ܳܝܶܐ ܘܓܰܝ̈ܳܣܶܐ ܒܰܪ̈ܳܝܶܐ ܘܰܕܠܐ ܐܠܰܗ ܗܶܢܽܘܢ ܕܡ̣ܶܢ ܒܝܰܕ ܚܛܳܗܰܝ̈ܢ ܡܶܫܬܰܠܛܺܝܢ ܥܠܰܝܢ: ܘܫܰܝܶܢ ܠܡܰܠܟ̈ܶܐ ܘܕܰܝ̈ܳܢܶܐ: ܘܒܰܛܶܠ ܩܪ̈ܳܒܶܐ ܘܬܰܟܬܽܘ̈ܫܶܐ ܘܰܐܪܡܳܐ ܚܽܘܒܳܐ ܘܰܐܘܝܽܘܬܳܐ ܘܰܡܫܰܝܢܽܘܬܳܐ ܒܥܺܕ̈ܳܬܰܢ ܘܰܒܕܰܝܪ̈ܳܬܰܢ: ܘܙܰܗܳܐ ܠܟܳܗ̈ܢܶܐ ܘܢܰܟܶܦ ܠܰܡܫܰܡ̈ܫܳܢܶܐ ܘܩܰܕܶܫ ܠܓܰܒܪ̈ܶܐ ܘܰܠܢܶܫ̈ܶܐ ܕܰܡܩܰܠܣܺܝܢ ܘܰܡܝܰܩܪܺܝܢ ܘܫܳܗܪܺܝܢ ܒܥܺܐܕܶܗ ܕܓܰܒܝܳܟ ܡܳܪܝ ܕܳܕܳܐ: ܪܰܒܳܐ ܠܫܰܒܪ̈ܶܐ ܘܠܰܛܠܳܝ̈ܶܐ ܕܶܐܬܰܘ ܠܡܶܬܒܰܪܳܟܽܘ ܡ̣ܶܢ ܣܺܝܡܰܬ݀ ܓܰܪ̈ܡܰܘܗܝ: ܘܣܰܬܰܪ ܠܢܶܫ̈ܶܐ: ܘܚܰܣܳܐ ܚܰܘ̈ܒܶܐ ܕܚܰܛܳܝ̈ܶܐ: ܘܰܫܒܽܘܩ ܚܛܳܗ̈ܶܐ ܕܡܰܣܟ̈ܠܳܢܶܐ ܘܡܽܘܡ̈ܬܳܢܶܐ: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܶܐ ܡܗܰܝܡ̈ܢܶܐ ܕܩܰܕܶܡܘ ܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܒܕܽܘܟܪܳܢ ܩܰܕܺܝܫܳܐ ܡܳܪܝ ܕܳܕܳܐ: ܘܰܕܡܳܪܝ ܐܺܝܣܚܳܩ ܒܰܪ ܚܳܠܶܗ: ܘܳܕܡܳܪܝ ܦܶܛܪܳܐ ܡܰܣܪܚܳܢܶܗ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܐܰܓܶܢ ܡܳܪܝ ܝܰܡܺܝܢܳܟ ܘܒܰܪܶܟܳܝܗܝ ܠܟܶܢܫܰܢ ܕܶܐܬܛܰܝܰܒܢܰܢ ܠܰܡܝܰܩܳܪܽܘ ܝܽܘܡ ܥܰܕܥܺܐܕܶܗ ܕܢܰܨܺܝܚ ܫܽܘܦܪ̈ܶܐ ܡܳܪܝ ܕܳܕܳܐ: ܘܰܐܥܒܰܪ ܡ̣ܶܢ ܐܰܬܪܰܢ: ܒܰܨܠܰܘ̈ܳܬܶܗ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܢܶܗܘܶܐ ܦܰܓܪܶܗ ܩܰܕܺܝܫܳܐ ܠܐܬܪܰܢ ܫܽܘܪܳܐ ܠܢܰܦ̈ܫܳܬܰܢ: ܘܣܶܬܳܪܳܐ ܠܟܰܪ̈ܡܰܝܢ ܘܰܠܚܰܩ̈ܠܳܬܰܢ: ܘܢܺܐܬܶܐ ܠܰܢ ܒܰܣܢܺܐܓܪܽܘܬ ܟܽܠ ܛܳܒ̈ܳܬܳܐ ܘܒܽܘܪ̈ܟܳܬܳܐ ܘܚܽܘܣܳܝܳܐ ܠܰܢ ܘܰܠܥܰܢܺܝ̈ܕܰܝܢ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܕܟܶܐ ܡ̣ܶܢ ܟܽܠ ܘܩܰܕܺܝܫ ܡܶܢܟܽܠ ܕܠܰܕ̈ܟܰܝܳܐ ܪܳܚܶܡ ܘܰܠܩܰܕܺܝ̈ܫܶܐ ܡܰܚܶܒ: ܕܠܩܰܕܺܝܫܳܐ ܡܳܪܝ ܕܳܕܳܐ ܡ̣ܶܢ ܟܪܶܣ ܐܶܡܶܗ ܓܒܳܐ: ܘܒܶܝܬ ܐܺܝܕܰܘ̈ܗܝ ܕܰܟܝܳܗ̇ ܠܗܳܝ ܐܰܢ̱ܬܬܳܐ ܓܰܪܒܳܢܳܝܬܳܐ ܕܡ̣ܶܢ ܣܰܪܘܰܐܢ ܡܕܺܝܢ̱ܬܳܐ: ܕܰܐܥܡܕܳܗ̇ ܥܰܡ ܓܰܒܪܳܗ̇ ܘܰܠܟܽܠܗܽܘܢ ܒܢ̈ܰܝ ܣܰܪܘܰܢ ܡܕܺܝܢ̱ܬܳܐ: ܘܰܐܦܢܺܝ ܐܶܢܽܘܢ ܡ̣ܶܢ ܛܳܥܝܽܘܬܳܐ ܕܰܦܬܰܟܪ̈ܶܐ ܠܺܝܕܰܥܬܳܐ ܕܰܫܪܳܪܳܐ ܘܰܐܥܡܶܕ ܐܶܢܽܘܢ ܒܫܶܡ ܬܠܺܝܬܳܝܽܘܬܳܐ ܕܠܶܗ ܠܗܰܘ ܕܰܐܦܢܺܝ ܐܶܢܽܘܢ ܠܺܝܕܰܥܬܳܐ ܕܚܰܝ̈ܶܐ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܚܰܝܠܬܳܢܳܐ ܡܳܪܝܳܐ ܐܠܰܗܳܐ ܘܰܒܚܰܝܠܳܟ ܬܰܩܺܝܦܳܐ ܚܰܝܶܠܬ ܠܢܰܨܺܝܚܳܐ ܘܓܰܒܝܳܐ ܡܳܪܝ ܕܳܕܳܐ ܕܥܰܠ ܨܶܢܥ̈ܳܬܶܗ ܕܳܐܟܶܠܩܰܪܨܳܐ ܘܰܙܟܳܝܗܝ ܒܰܩܪܳܒܳܐ: ܣܰܝܰܥ ܠܰܢ ܘܥܰܕܰܪ ܠܰܢ ܠܥܰܒܕܰܝ̈ܟ ܒܰܨܠܰܘ̈ܳܬܶܗ ܕܰܐܬܠܺܝܛܳܟ ܥܛܺܝܦ ܙܳܟܽܘܬܳܐ ܡܳܪܝ ܕܳܕܳܐ: ܐܰܝܟܰܢܳܐ ܕܒܰܒ̈ܢܳܬ ܩ̈ܳܠܐ ܕܪܽܘܚܳܐ ܩܰܕܺܝܫܳܐ ܢܩܰܠܶܣ ܠܰܡܢܺܝܚܳܢܳܟ ܡܳܪܝ ܕܳܕܳܐ: ܘܶܐܬܟܰܬܰܫ ܒܰܐܓܽܘܢܳܐ ܕܰܕܡܳܐ ܘܰܙܟܳܝܗܝ ܠܰܒܥܶܠܕܰܪܳܐ ܘܚܰܕܺܝ ܠܡܳܪܶܗ ܢܰܨܺܝܚ ܫܽܘܦܪ̈ܶܐ ܡܳܪܝ ܕܳܕܳܐ: ܠܰܒܶܒ ܢܰܦܫܶܗ ܢܰܨܺܝܚܳܐ ܘܩܰܘܺܝ ܒܟܰܦܢܳܐ ܘܰܒܨܰܗܝܳܐ ܕܠܐ ܐܽܘܟܠܐ ܘܫܶܩܝܳܐ ܢܽܘܓܪܳܐ ܕܰܫܢܰܝ̈ܳܐ ܬܪܶܥܣܰܪ: ܗܘܳܐ ܠܒܽܘܫܶܗ ܦܰܪܙܠܐ: ܘܝܳܗܶܒ ܗܘܳܐ ܐܰܦܰܘ̈ܗܝ ܠܫܶܡܫܳܐ ܘܝܺܩܶܕ ܒܚܽܘܡܳܐ ܘܶܐܬܛܰܓܰܢ ܐܰܝܟ ܢܽܘܢܳܐ: ܘܰܐܘܟܶܡ ܘܰܫܚܰܪ ܐܰܝܟ ܢܰܨܺܝܚܳܐ ܡܳܪܝ ܒܰܪܨܰܘܡܳܐ ܐܶܬܛܡܰܪ ܒܬܰܠܓܳܐ ܘܰܓܠܺܝܕܳܐ ܐܰܟܘܳܬܶܗ: ܘܣܰܝܒܰܪ ܥܰܪܝܳܐ ܘܩܽܘܪܳܐ ܒܰܕܡܽܘܬܶܗ ܘܶܐܬܓܡܰܪ ܘܶܐܫܬܰܡܠܺܝ ܘܰܡܛܳܐ ܠܰܡܫܽܘܚܬܶܗ: ܒܳܩ ܒܶܣܪܶܗ ܘܰܩܦܽܘܕ ܘܰܟܡܰܫ ܡ̣ܶܢ ܣܰܓܺܝܽܐܘܬ ܕܟܰܦܢܶܗ ܘܨܰܗܝܶܗ ܘܫܰܗܪܶܗ ܘܨܰܘܡܶܗ ܘܰܢܙܺܝܪܽܘܬܶܗ: ܪܚܶܡ ܐܠܰܗܳܐ ܘܟܶܪܝܰܬ݀ ܠܶܗ ܥܠܰܘܗܝ ܕܰܚܙܳܐ ܐܽܘܠܨܳܢܰܘ̈ܗܝ ܩܫܰܝ̈ܳܐ ܘܡܰܪܺܝܪ̈ܶܐ ܡܶܕܶܡ ܕܠܐ ܡܨܶܐ ܦܰܓܪܳܐ ܠܡܶܛܥܰܢ ܗܳܟܰܢ: ܚܳܣ ܥܠܰܘܗܝ ܐܠܰܗܳܐ ܘܫܰܕܰܪ ܠܶܗ ܥܰܡ ܡܰܠܐܟ̈ܶܝ ܢܽܘܗܪܳܐ ܡ̣ܶܢ ܫܡܰܝܳܐ ܦܳܬܽܘܪܳܐ ܡܠܐܷ ܚܰܝ̈ܶܐ ܒܰܕܡܽܘܬ ܡܳܪܝ ܩܰܘܡܶܐ: ܡܶܐܟܽܘܠܬܳܐ ܪܽܘܚܳܢܳܝܬܳܐ ܕܡܰܩܢܝܳܐ ܚܰܝ̈ܶܐ ܘܒܽܘ̈ܣܳܡܶܐ: ܛܽܘܒܰܘܗܝ ܠܡ̇ܰܢ ܕܶܐܫܬܘܺܝ ܠܳܗ̇ ܘܶܐܟܰܠ ܡܶܢܳܗ̇ ܘܰܣܒܰܥ ܘܫܰܒܰܚ ܠܐܠܳܗܳܐ: ܝܰܗܒ ܢܰܦܫܶܗ ܠܥܰܡ̈ܠܐ ܪܰܘܪ̈ܒܶܐ ܥܰܠ ܗ̇ܳܝ ܝܰܩܪܶܗ ܐܠܰܗܳܐ ܘܫܰܕܰܪ ܠܶܗ ܦܳܬܽܘܪܳܐ ܗ̇ܰܘ ܫܡܰܝܳܢܳܐ: ܟܡܳܐ ܐܰܣܒܶܠ ܠܢܰܦܫܶܗ ܐܽܘܠܨܳܢ̈ܶܐ ܘܬܰܫܢܺܝ̈ܩܶܐ ܡܰܪܺܝܪ̈ܶܐ ܒܪܶܚܡܰܬ݀ ܡܳܪܶܗ: ܠܒܰܟ ܢܰܦܫܶܗ ܘܰܐܪܚܶܩ ܡ̣ܶܢ ܥܶܢܝܳܢܳܐ ܕܰܒܢܰܝ̈ܢܳܫܳܐ ܘܕܰܒ̈ܢܰܝ ܕܰܝܪܶܗ: ܘܥܰܠܗܳܝ ܫܰܕܰܪ ܠܶܗ ܐܠܰܗܳܐ ܡܰܠܐܟ̈ܰܝ ܢܽܘܗܪܳܐ ܠܰܫܠܳܡܶܗ: ܐܰܩܺܝܡ ܬܠܳܬܳܐ ܥܰܢܺܝ̈ܕܶܐ ܒܚܰܝܠܶܗ ܕܰܡܫܺܝܚܳܐ ܡܚܰܝܠܳܢܶܗ: ܘܶܐܬܕܰܡܺܝ ܒܡܳܪܶܗ ܓܰܒܪܺܐܶܝܠ ܐܶܦܣܩܽܘܦܳܐ ܘܶܐܬܬܰܝܬܺܝ ܦܰܓܪܶܗ ܠܛܽܘܪ ܥܰܒܕܺܝ̈ܢ ܐܰܬܪܶܗ ܘܡܰܪܥܺܝܬܶܗ ܕܰܟܺܝ ܓܰܪ̈ܒܶܐ ܘܦܰܬܰܚ ܣܡܰܝ̈ܳܐ ܘܚܰܝܶܕ ܡܫܰܪ̈ܰܝܳܐ ܘܰܛܪܰܕ ܠܫܺܐܕ̈ܶܐ ܡ̣ܶܢ ܕܰܝܘ̈ܳܢܶܐ: ܘܰܐܣܺܝ ܠܟܺܐܒ̈ܬܳܢܶܐ: ܝܰܒܶܫ ܘܰܢܓܰܒ ܐܺܝܕܰܝ̈ܗܽܘܢ ܕܠܶܣ̈ܛܳܝܶܐ ܕܰܒܥܰܘ ܕܢܶܩܛܠܽܘܢ ܠܕܰܝܪ̈ܳܝܶܐ ܕܰܐܝܬܺܝܘ ܠܶܗ ܠܦܰܓܪܶܗ: ܘܫܰܟܶܢ ܠܗܽܘܢ ܐܳܣܝܽܘܬܳܐ ܠܠܶܣ̈ܛܳܝܶܐ: ܘܦܰܬܰܚ ܥܰܝܢܰܝ̈ܗܽܘܢ ܕܶܐܣܬܰܡܺܝܘ: ܘܶܐܬܠܡܶܕܘ ܒܕܰܝܪܶܗ ܘܰܗܘܰܘ ܕܰܝܪ̈ܳܝܶܐ ܒܚܺܝܪ̈ܶܐ: ܠܰܟܡܳܐ ܟܪ̈ܺܝܗܶܐ ܐܰܣܺܝ: ܠܰܟܡܳܐ ܡܚܺܝ̈ܠܐ ܚܰܝܶܠ: ܠܰܟܡܳܐ ܚܰܢ̈ܦܶܐ ܬܰܠܡܶܕ ܘܰܐܥܡܶܕ: ܘܝܰܗܒ ܠܥܰܩܪ̈ܳܬܳܐ ܒܢܰܝ̈ܳܐ: ܫܰܕܰܪ ܘܚܰܝܶܨ ܠܰܡܫܰܪ̈ܰܝܳܐ: ܘܰܐܚܠܶܡ ܠܡܰܪ̈ܥܶܐ: ܘܥܰܕܰܪ ܠܐܠܺܝ̈ܨܶܐ ܕܶܐܬܓܰܘܰܣ ܒܶܗ: ܥܨܳܝܗܝ ܦܰܛܪܝܰܪܟܳܐ ܘܒܰܩܛܺܝܪܳܐ ܐܰܣܪܚܶܗ ܐܶܦܣܩܽܘܦܳܐ: ܘܫܰܕܪܶܗ ܡܕܺܝܢ̱ܬܳܐ ܕܡ̣ܶܢ ܐܠܰܗܳܐ ܐܶܬܝܰܗܒܰܬ݀ ܠܶܗ: ܒܰܪܶܟ ܥܰܠ ܛܰܒܥܳܐ ܕܦܽܘܪܫܳܢܳܐ ܘܝܰܗܒܶܗ ܠܛܰܠܝܳܐ ܕܠܐ ܝܳܠܶܦ ܗܘܳܐ: ܘܒܰܨܠܰܘ̈ܳܬܶܗ ܦܬܰܚ ܐܠܰܗܳܐ ܡܰܕܥܶܗ ܘܣܽܘܟܳܠܶܗ: ܘܺܝܕܰܥ ܥܰܬܺܝܩܬܳܐ ܘܰܚܕܰܬܳܐ: ܕܚܺܝܠܐ ܗܘܳܬ ܢܽܘܪܳܐ ܕܰܐܚܶܬ ܥܰܠ ܡܫܰܡܫܳܢܳܐ ܗ̇ܰܘ ܕܡ̣ܶܢ ܒܰܪ ܡܠܺܝܣ ܕܰܒܙܳܢܝܽܘܬܳܐ ܡ̇ܰܢ ܡܶܬܚܰܫܰܚ ܗܘܳܐ ܘܰܐܪܬܝܶܗ ܘܠܐ ܐܶܬܬܰܪܬܺܝ: ܝܰܗܒ ܢܽܘܗܪܳܐ ܠܥܰܝܢܰܘ̈ܗܝ ܕܗ̇ܰܘ ܣܰܡܝܳܐ ܕܰܒܥܺܕܬܳܐ ܕܬܰܓܪܺܝܬ ܥܳܡܰܪ ܗܘܳܐ: ܘܡ̣ܶܢ ܢܽܘܛܦ̈ܳܬܳܐ ܕܡܰܝ̈ܳܐ ܕܰܐܫܺܝܓ ܒܗܶܝܢ ܐܺܝܕܰܘ̈ܗܝ ܘܰܢܦܰܨ ܐܶܢܶܝܢ ܩܰܕܺܝܫܳܐ ܘܡܳܛܝ̈ ܠܥܰܝܢܰܘ̈ܗܝ ܕܣܰܡܝܳܐ ܘܶܐܬܦܬܰܚ̈ܝ ܘܰܚܙܳܐ ܢܽܘܗܪܳܐ: ܟܺܐܒܳܐ ܥܰܣܩܳܐ ܕܣܰܪܛܳܢܳܐ ܕܰܠܒܰܟ ܗܘܳܐ ܒܪܺܝܫܶܗ ܕܓܰܒܪܳܐ ܪܺܝܫܳܢܳܐ ܕܰܐܬܪܳܐ ܘܰܡܫܰܢܶܩ ܗܘܳܐ ܠܶܗ ܡܰܪܺܝܪܳܐܝ̣ܬ: ܚܰܬܡܶܗ ܩܰܕܺܝܫܳܐ ܒܰܨܠܺܝܒܳܐ ܙܰܟܳܝܳܐ ܘܰܐܣܝܶܗ: ܕܰܟܺܝ ܠܓܰܒܪܳܐ ܓܰܪܒܳܢܳܐ ܕܶܐܬܳܐ ܘܶܐܬܟܰܫܰܦ ܠܶܗ: ܘܶܐܬܬܦܺܝܪ ܒܫܺܐܕܳܐ ܘܰܢܦܰܩ ܡ̣ܶܢ ܓܰܒܪܳܐ ܕܰܝܘܳܢܳܐ ܕܪܳܓܶܡ ܗܘܳܐ ܘܰܡܨܰܠܶܦ ܗܘܳܐ ܒܟܺܐܦ̈ܶܐ ܠܪ̈ܰܒܶܐ ܘܠܰܙܥܽܘܪ̈ܶܐ ܕܒܶܝܬ ܣܒܺܝܪܺܝܢܳܐ: ܘܡܰܙܥܶܩ ܗܘܳܐ ܘܳܐܡܰܪ ܕܘܳܝ ܠܺܝ ܡܶܢܳܟ ܕܳܕܳܐ ܣܺܝܕܽܘܣܢܳܝܳܐ ܕܗܳܐ ܛܳܪܶܕ ܐܰܢ̱ܬ ܠܺܝ: ܠܐܚܪܺܝܢ ܕܰܒܟܺܐܒܳܐ ܕܨܶܡܪܳܐ ܡܶܫܬܰܢܰܩ ܗܘܳܐ ܩܪܶܒ ܘܶܐܬܒܰܪܰܟ ܡ̣ܶܢ ܩܰܒܪܶܗ ܕܡܳܪܝ ܕܳܕܳܐ: ܘܰܐܩܢܺܝ ܠܶܗ ܚܽܘܠܡܳܢܳܐ: ܘܣܰܥܪܶܗ ܠܰܡܫܰܪܝܳܐ ܕܺܐܝܬ ܗܘܳܐ ܠܶܗ ܥܶܣܪܺܝܢ ܫܢܰܝ̈ܳܐ ܘܠܐ ܐܶܬܡܨܺܝ ܗܘܳܐ ܕܰܢܩܽܘܡ ܥܰܠ ܪ̈ܶܓܠܰܘܗܝ ܘܫܰܪܰܪ ܠܗܰܕܳܡܰܘ̈ܗܝ ܘܰܐܬܗܰܪ ܠܚܰܙܳܝܰܘ̈ܗܝ: ܠܕܰܦܬܺܝܠ ܗܘܳܐ ܦܰܪܨܽܘܦܶܗ ܠܒܶܣܬܪܶܗ ܘܡ̣ܶܢ ܕܰܩܪܶܒ ܠܦܰܓܪܶܗ ܩܰܕܺܝܫܳܐ ܡܳܪܝ ܕܳܕܳܐ ܘܶܐܬܒܰܪܰܟ ܡܶܢܶܗ: ܬܰܩܶܢ ܗܘܳܐ ܦܰܪܨܽܘܦܶܗ ܘܰܐܘܕܺܝ ܘܫܰܒܰܚ ܠܐܠܳܗܳܐ ܡܰܚܠܡܳܢܶܗ: ܪܰܒ ܬܶܗܪܳܐ ܕܶܐܣܬܥܰܪ ܒܛܰܠܝܳܐ ܡܺܝܬܳܐ ܣܒܺܝܪܺܝܢܳܝܳܐ ܕܰܩܪܶܒ ܠܦܰܓܪܶܗ ܕܩܰܕܺܝܫܳܐ ܡܳܪܝ ܕܳܕܳܐ: ܘܶܐܬܢܰܚܰܡ ܗܘܳܐ ܘܩܳܡ ܐܰܝܟ ܗ̇ܳܝ ܕܶܐܣܬܰܥܪܰܬ݀ ܨܶܝܕ ܐܠܶܝܫܳܥ ܢܒܺܝܳܐ ܒܰܪ ܫܳܦܳܛ: ܒܽܘܝܳܐܳܐ ܘܰܦܨܺܝܚܽܘܬܳܐ ܪܰܒܬܳܐ ܗܘܳܬ݀ ܠܗܽܘܢ ܠܰܒ̈ܢܰܝ ܩܪܺܝܬܳܐ ܒܡܶܐܬܺܝܬܶܗ ܕܦܰܓܪܳܟ ܠܘܳܬܗܽܘܢ: ܐܶܬܟܰܢܰܫܘ ܟܽܠܗܽܘܢ ܪ̈ܰܒܶܐ ܘܰܙܥܽܘܪ̈ܶܐ ܘܰܒܢܰܘ ܥܺܕܬܳܐ ܪܰܒܬܳܐ ܥܰܠ ܫܟܺܝܢܬܳܐ ܕܦܰܓܪܳܟ ܩܰܕܺܝܫܳܐ: ܒܳܟ ܛܦܰܣܘ ܘܒܳܟ ܐܶܬܓܰܘܰܣܘ ܐܰܝܟ ܕܰܒܫܽܘܪܳܐ ܪܳܡܳܐ ܘܚܰܣܺܝܢܳܐ: ܢܽܘܗܪܳܐ ܘܚܰܝ̈ܶܐ ܩܢܰܘ ܡܶܢܳܟ ܟܽܠܗܽܘܢ ܡܗܰܝ̈ܡܢܶܐ: ܨܠܰܘ̈ܳܬܳܟ ܘܒܳܥ̈ܘܳܬܳܟ ܥܒܺܝ̈ܕܳܢ ܫܽܘܪܳܐ ܠܢܰܦ̈ܫܳܬܗܽܘܢ: ܝܰܡܺܝܢܳܟ ܐܠܰܗܳܝܬܳܐ ܬܶܗܘܶܐ ܡܢܰܛܪܳܢܺܝܬܳܐ ܠܟܽܠܗܽܘܢ ܡܗܰܝ̈ܡܢܶܐ ܕܛܳܦܣܺܝܢ ܒܳܟ: ܚܰܝܶܠ ܡܳܪܳܟ ܘܰܨܠܺܝܒܶܗ ܙܰܟܳܝܳܐ ܢܶܗܘܶܐ ܣܶܬܳܪܳܐ ܠܰܡܗܰܝ̈ܡܢܶܐ ܕܡܶܬܓܰܘܣܺܝܢ ܒܳܟ: ܝܽܘܩܢܳܟ ܘܳܐܦ ܓܠܽܘܣܩܡܳܟ ܗ̣ܽܘ ܢܶܛܪܽܘܕ ܠܣܰܩܽܘ̈ܒܠܐ ܘܠܰܢܟܺܝ̈ܠܐ ܡ̣ܶܢ ܐܰܝܠܶܝܢ ܕܡܶܬܓܰܘܣܺܝܢ ܒܳܟ ܟܺܐܒܰܝ̈ܗܽܘܢ ܒܳܟ ܢܶܬܰܐܣܽܘܢ: ܡܰܪ̈ܥܰܝܗܽܘܢ ܒܳܟ ܢܶܬܚܰܠܡܽܘܢ: ܪ̈ܰܘܒܶܐ ܘܰܫܓܽܘ̈ܫܝܶܐ ܘܡܰܨ̈ܘܳܬܳܐ ܘܰܩܪ̈ܳܒܶܐ ܕܒܰܝܢܳܬܗܽܘܢ ܒܳܟ ܢܶܬܒܰܛܠܽܘܢ: ܕܰܝܘ̈ܶܐ ܕܡܰܥܒܕܺܝܢ ܒܰܢ ܚܛܺܝܬܳܐ ܒܳܟ ܢܶܬܪܰܕܦܽܘܢ: ܐܽܘܠܨܳܢ̈ܶܐ ܘܢܶܣܝܽܘ̈ܢܶܐ ܒܳܟ ܢܶܥܒܪܽܘܢ: ܪ̈ܰܚܡܶܐ ܘܰܚܢܳܢܳܐ ܒܳܟ ܢܶܫܬܰܦܥܽܘܢ: ܡܰܚܘ̈ܳܬܳܐ ܘܫܰܒ̈ܛܶܐ ܒܳܟ ܢܶܫܬܰܗܽܘܢ: ܒܽܘܪ̈ܟܳܬܳܐ ܒܳܟ ܢܺܐܬܝ̈ܳܢ: ܝܰܬܡ̈ܶܐ ܘܰܐܪ̈ܡܠܳܬܳܐ ܒܳܟ ܢܶܣܬܰܝܥܽܘܢ ܘܢܶܬܥܰܕܪܽܘܢ: ܛܰܡ̈ܶܐܐ ܒܳܟ ܢܶܬܩܰܕܫܽܘܢ: ܝܰܪ̈ܩܳܢܶܐ ܒܳܟ ܢܶܬܬܰܗܽܘܢ: ܟܽܠ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܒܳܟ ܢܶܥܒܪܽܘܢ: ܟܳܗ̈ܢܶܐ ܒܳܟ ܢܶܙܕܰܗܽܘܢ: ܡܫܰܡ̈ܫܳܢܶܐ ܒܳܟ ܢܶܬܢܰܛܪܽܘܢ: ܣܳܒ̈ܶܐ ܒܳܟ ܢܶܬܚܰܠܡܽܘܢ: ܥܠܰܝ̈ܡܶܐ ܘܰܛܠܳܝ̈ܶܐ ܒܳܟ ܢܶܬܪܰܒܽܘܢ: ܢܶܫ̈ܶܐ ܒܳܟ ܢܶܬܢܰܟ̈ܦܳܢ: ܕܰܝܪ̈ܳܝܳܬܳܐ ܘܰܒܢ̈ܳܬ ܩܝ̈ܳܡܶܐ ܒܳܟ ܢܶܬܒܰܪ̈ܟܳܢ: ܚܰܘ̈ܒܶܐ ܘܰܚܛܳܗ̈ܶܐ ܒܳܟ ܢܶܬܚܰܣܽܘܢ: ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܳܟ ܢܶܬܬܢܺܝܚܽܘܢ: ܘܒܰܐܘ̈ܳܢܶܐ ܡܰܠܝ̈ܰܝ ܪܘܳܙܳܐ ܒܳܟ ܢܶܬܕܰܝܪܽܘܢ ܘܢܶܬܒܰܣܡܽܘܢ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܡܳܪܝܳܐ ܡܚܰܝܠܳܢܳܟ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܐܳܣܝܳܐ ܫܰܪܺܝܪܳܐ ܕܝܰܗܒܬ ܒܶܝܬ ܐܺܝܕܰܘ̈ܗܝ ܕܓܰܒܝܳܟ ܡܳܪܝ ܕܳܕܳܐ ܟܽܠ ܥܽܘܕܪ̈ܳܢܶܐ ܘܳܐܣܘ̈ܳܬܳܐ ܠܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܕܶܐܬܓܰܘܰܣܘ ܒܳܟ: ܘܰܐܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ: ܘܰܐܡܠܶܟ ܫܰܝܢܳܟ ܘܰܫܠܳܡܳܟ ܒܰܝܢܳܬܰܢ: ܘܚܽܘܒܳܟ ܘܪܶܚܡܬܳܟ ܒܓܰܘ ܬܰܪ̈ܥܝܳܬܰܢ: ܘܗܰܒܠܰܢ ܕܰܒܚܰܕܽܘܬܳܐ ܢܶܥܒܶܕ ܥܺܐܕܶܗ ܕܰܐܒܽܘܢ ܚܰܣܝܳܐ ܪ̈ܺܝܫܟܳܗܢܶܐ ܡܳܪܝ ܕܳܕܳܐ ܕܝܰܘܡܳܢܳܐ ܒܟܶܢܫܰܢ ܡܶܙܕܰܝܰܚ ܘܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ ܘܰܐܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܗܕܺܝܪ ܒܰܐܠܳܗܽܘܬܳܐ ܕܗܰܕܰܪ ܠܡܳܪܝ ܕܳܕܳܐ ܘܨܰܒܬܶܗ ܒܕܰܪܓܳܐ ܪܳܡܳܐ ܕܚܰܣܝܽܘܬܳܐ ܠܗܰܘ ܕܚܰܘܺܝ ܓܶܠܝ̈ܳܢܶܐ ܕܰܓܢܺܝܙܽܘܬܳܐ ܠܡܳܪܝ ܦܶܛܪܳܐ ܦܰܛܪܝܰܪܟܳܐ ܕܰܐܢܛܺܝܽܘܟܺܝܰܐ ܡܕܺܝܢ̱ܬܳܐ: ܗ̇ܰܘ ܕܡܰܢܗܰܪ ܗܘܳܐ ܠܩܰܢܕܺܝ̈ܠܐ ܕܰܒܥܺܕ̈ܳܬܳܐ ܡ̣ܶܢ ܢܽܘܗܪܳܐ ܕܰܨܡܰܚ ܗܘܳܐ ܨܶܒܥ̈ܳܬܶܗ ܩܰܕܺܝ̈ܫܳܬܳܐ ܟܽܠܶܗ ܙܰܒܢܳܐ ܕܚܰܝܰܘ̈ܗܝ: ܠܗܰܘ ܕܶܐܡܰܪ ܠܶܗ ܠܡܳܪܝ ܦܶܛܪܳܐ ܦܰܛܪܝܰܪܟܳܐ ܒܪܶܡܙܳܐ ܕܰܢܒܺܝܽܘܬܳܐ ܕܫܰܕܰܪ ܠܐܘܚܕܳܢܳܐ ܕܦܺܝܪ ܘܰܕܒܶܝܬ ܙܰܒܕܰܝ ܡܕܺܝܢ̱ܬܳܐ ܘܺܐܝܬ ܡ̇ܰܢ ܬܰܡܳܢ ܓܰܒܪܳܐ ܕܬܶܕܡܽܘܪܬܳܐ ܘܗ̣ܽܘ ܐܰܣܪܰܚ ܐܶܦܣܩܽܘܦܳܐ ܠܬܰܓܪܺܝܬ ܡܕܺܝܢ̱ܬܳܐ ܕܐܺܝܬܰܘܗܝ ܗܳܢܳܐ ܩܰܕܺܝܫܳܐ ܡܳܪܝ ܕܳܕܳܐ ܓܡܺܝܪ ܘܰܡܫܰܡܰܗ ܒܰܡܥܰܠܝܽܘܬܳܐ: ܕܠܶܗ ܠܗܰܘ ܕܰܓܒܳܝܗܝ ܢܰܘܕܶܐ ܘܰܢܫܰܒܰܚ܀

 

 

 

ܣܕܪܐ

 

 

 

ܟܰܕ ܠܕܽܘܟܪܳܢܳܟ ܐܳܘ ܩܰܕܺܝܫܳܐ ܡܳܪܝ ܕܳܕܳܐ ܝܰܘܡܳܢܳܐ ܡܝܰܩܪܺܝܢܰܢ: ܘܰܒܡ̈ܶܠܐ ܐܠܰܗܳܝ̈ܳܬܳܐ ܠܥܺܐܕܳܟ ܡܩܰܠܣܺܝܢܰܢ ܘܳܐܡܪܺܝܢܰܢ: ܡܳܪܝ ܕܳܕܳܐ ܕܡ̣ܶܢ ܒܶܝܬ ܐܰܒܳܗܰܘ̈ܗܝ ܢܦܰܩ ܗܘܳܐ: ܘܡ̣ܶܢ ܣܺܝܕܽܘܣ ܩܪܺܝܬܳܐ ܕܺܝܠܶܗ ܥܪܰܩ ܗܘܳܐ: ܘܰܠܛܽܘܪܳܐ ܨܰܕܝܳܐ ܗ̇ܰܘ ܕܬܰܒܪܺܝܙ ܡܛܳܐ: ܡܳܪܝ ܕܳܕܳܐ ܕܰܠܕܰܝܪܳܐ ܕܪܰܒܳܐ ܕܺܝܠܶܗ ܡܳܪܝ ܕܰܘܺܝܕ ܐܶܬܝܰܒܰܠ ܗܘܳܐ: ܘܬܰܡܳܢ ܒܶܝܬ ܐܺܝܕܰܘ̈ܗܝ ܐܶܣܬܰܦܰܪ ܗܘܳܐ: ܘܶܐܣܟܺܝܡܳܐ ܕܕܰܝܪܳܝܽܘܬܳܐ ܒܶܝܬ ܐܺܝܕܰܘ̈ܗܝ ܠܒܶܫ ܗܘܳܐ: ܡܳܪܝ ܕܳܕܳܐ ܕܟܰܕ ܡܺܝܬ ܪܰܒܶܗ ܡܳܪܝ ܕܰܘܺܝܕ ܠܛܽܘܪܳܐ ܣܠܶܩ ܗܘܳܐ: ܘܰܬܚܶܝܬ ܫܡܰܝܳܐ ܢܽܘܓܪܳܐ ܕܰܬܪܶܥܣܰܪ ܫܢܰܝ̈ܳܐ ܩܰܘܺܝ ܗܘܳܐ: ܘܰܒܟܽܠ ܕܽܘܒܳܪ̈ܶܐ ܪ̈ܳܡܶܐ ܘܰܡܥܰܠܰܝ̈ܳܐ ܡܶܬܥܰܢܘܶܐ ܗܘܳܐ: ܡܳܪܝ ܕܳܕܳܐ ܕܡܶܛܽܠ ܢܙܺܝܪܽܘܬܳܐ ܘܰܚܣܺܝܠܽܘܬܳܐ ܕܺܝܠܶܗ ܕܡ̣ܶܢ ܡܶܐܟ̈ܠܳܬܳܐ: ܐܠܰܗܳܐ ܦܳܬܽܘܪܳܐ ܫܰܕܰܪ ܡ̣ܶܢ ܫܡܰܝܳܐ ܥܰܡ ܡܰܠܐܟ̈ܶܐ ܠܶܗ ܫܰܕܰܪ ܗܘܳܐ: ܡܳܪܝ ܕܳܕܳܐ ܕܶܐܬܛܥܺܝ ܡ̣ܶܢ ܒܳܠܐܷ ܕܰܒܢ̈ܰܝ ܕܰܝܪܶܗ ܢܽܘܓܪܳܐ ܕܰܫܢܰܝ̈ܳܐ ܬܪܶܥܣܰܪ: ܘܠܐ ܐܶܬܺܝܕܰܥ ܐܰܝܟܳܐ ܐܺܝܬܰܘܗܝ ܗܘܳܐ: ܥܕܰܡܳܐ ܕܰܐܠܳܗܳܐ ܓܠܐܴ ܠܗܽܘܢ ܥܠܰܘܗܝ ܘܰܐܘܕܰܥ ܗܘܳܐ: ܡܳܪܝ ܕܳܕܳܐ ܕܶܐܬܰܘ ܐܰܚ̈ܶܐ ܕܕܰܝܪܶܗ ܠܰܫܠܳܡܶܗ: ܟܰܕ ܛܥܺܝܢܺܝܢ ܦܺܝܪܡܳܐ ܘܢܳܩܽܘܫܳܐ ܘܪܺܝܫ ܕܰܝܪܳܐ ܥܰܡ ܐܰܚܽܘܬܳܐ ܟܽܠܳܗ̇ ܫܽܘܒܩܳܢܳܐ ܡܶܢܶܗ ܬܳܒܰܥ ܗܘܳܐ: ܡܳܪܝ ܕܳܕܳܐ ܕܥܰܡܗܽܘܢ ܐܰܚܬܽܘܗܝ ܡ̣ܶܢ ܛܽܘܪܳܐ ܘܝܰܘ̈ܡܳܬܳܐ ܨܶܝܕܰܝ̈ܗܽܘܢ ܟܰܬܰܪ ܗܘܳܐ ܘܒܽܘܪ̈ܟܳܬܳܐ ܘܰܨܠܰܘ̈ܳܬܳܐ ܠܟܽܠܗܽܘܢ ܦܳܪܰܥ ܗܘܳܐ: ܡܳܪܝ ܕܳܕܳܐ ܕܰܠܩܰܒܪܶܗ ܕܰܡܫܺܝܚܳܐ ܐܶܙܰܠ ܗܘܳܐ: ܘܒܳܬܰܪ ܠܡܰܕܒܪܳܐ ܕܡܶܨܪܶܝܢ ܐܶܬܡܰܢܰܥ ܗܘܳܐ: ܘܡ̣ܶܢ ܕܰܝܪ̈ܳܬܳܐ ܩܰܕܺܝ̈ܫܳܬܳܐ ܕܬܰܡܳܢ ܡܶܬܒܰܪܰܟ ܗܘܳܐ: ܡܳܪܝ ܕܳܕܳܐ ܕܕܰܝܪܳܐ ܠܬܰܚܬ ܡ̣ܶܢ ܐܶܣܦܶܣ ܒܢܳܐ ܗܘܳܐ: ܘܚܰܝ̈ܠܐ ܘܬܶܕܡܪ̈ܳܬܳܐ ܒܳܗ̇ ܣܳܥܰܪ ܗܘܳܐ: ܕܰܐܘܒܶܫ ܠܐܴܟܶܕܢܳܐ ܘܰܬܪܶܝܢ ܓܰܒܪ̈ܺܝܢ ܕܩܶܛܠܰܬ݀ ܗܘܳܬ݀ ܢܰܚܶܡ ܗܘܳܐ: ܡܳܪܝ ܕܳܕܳܐ ܕܠܐܢ̱ܬܬܳܐ ܓܰܪܒܳܢܺܝܬܳܐ ܕܡ̣ܶܢ ܣܰܪܘܰܐܢ ܡܕܺܝܢ̱ܬܳܐ ܕܰܟܺܝ ܗܘܳܐ: ܘܰܒܠܰܥܬܳܗ̇ ܠܟܽܠܗܽܘܢ ܒܢ̈ܰܝ ܡܕܺܝܢ̱ܬܳܐ ܐܰܥܡܶܕ ܗܘܳܐ: ܡܳܪܝ ܕܳܕܳܐ ܕܟܰܕ ܒܰܪ ܫܬܺܝܢ ܫܢܰܝ̈ܳܐ ܐܺܝܬܰܘܗܝ ܗܘܳܐ: ܠܕܰܪܓܳܐ ܕܚܰܣܝܽܘܬܳܐ ܐܶܬܓܒܺܝ ܗܘܳܐ: ܘܰܠܬܰܓܪܺܝܬ ܡܕܺܝܢ̱ܬܳܐ ܐܶܬܬܰܣܪܰܚ ܗܘܳܐ: ܒܰܐܬܪܳܐ ܕܡܰܕܢܚܳܐ ܡܶܬܟܰܢܶܐ ܗܘܳܐ: ܘܡ̣ܶܢ ܡܳܪܝ ܦܶܛܪܳܐ ܦܰܛܪܝܰܪܟܳܐ ܕܰܐܢܛܺܝܽܘܟ ܐܶܬܩܪܺܝ ܗܘܳܐ: ܘܰܓܪܺܝܓܳܘܪܺܝܳܘܣ ܟܰܢܝܶܗ ܗܘܳܐ: ܘܠܐܬܪܳܐ ܕܡܰܕܢܚܳܐ ܫܰܕܪܶܗ ܗܘܳܐ: ܡܳܪܝ ܕܳܕܳܐ ܕܒܰܫܢܰܬ݀ ܬܫܰܥܡܳܐܐ ܫܢܺܝ̈ܢ ܕܝܰܘ̈ܢܳܝܶܐ ܐܶܬܬܰܣܪܰܚ ܗܘܳܐ: ܘܪܳܥܝܳܐ ܛܳܒܳܐ ܠܬܰܓܪܺܝܬ ܡܕܺܝܢ̱ܬܳܐ ܘܰܠܡܰܕܢܚܳܐ ܐܶܬܬܩܺܝܡ ܗܘܳܐ: ܘܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܒܳܗ̇ ܣܥܰܪ ܗܘܳܐ: ܡܳܪܝ ܕܳܕܳܐ ܕܰܠܛܰܠܝܳܐ ܗ̇ܰܘ ܕܠܐ ܝܳܠܶܦ ܗܘܳܐ: ܒܛܰܒܥܳܐ ܕܰܐܘܟܠܶܗ ܩܰܕܺܝܫܳܐ ܐܶܬܢܰܗܰܪ ܗܘܳܐ: ܘܰܠܣܰܡܝܳܐ ܗ̇ܰܘ ܕܰܒܥܺܕܬܳܐ ܕܬܰܓܪܺܝܬ ܡ̣ܶܢ ܢܽܘܛܦ̈ܳܬܳܐ ܕܰܫܝܳܓܬܳܐ ܕܺܐܝ̈ܕܰܘܗܝ ܐܶܬܢܰܗܰܪ ܘܰܚܙܳܐ ܗܘܳܐ: ܡܳܪܝ ܕܳܕܳܐ ܗ̇ܰܘ ܕܰܠܩܰܫܺܝܫܳܐ ܕܡ̣ܶܢ ܐܰܪܒܺܝܠ ܒܝܰܕ ܠܰܘܛܰܬ݀ ܦܽܘܡܶܗ ܐܰܘܒܶܕ ܗܘܳܐ ܘܠܰܡܫܰܡܫܳܢܳܐ ܕܡ̣ܶܢ ܟܪܰܡܠܺܝܣ ܒܢܽܘܪܳܐ ܕܢܶܚܬܰܬ݀ ܥܠܰܘܗܝ ܡ̣ܶܢ ܫܡܰܝܳܐ ܐܰܘܩܶܕ ܗܘܳܐ: ܡܳܪܝ ܕܳܕܳܐ ܕܓܰܪܒܳܢܳܐ ܗ̇ܰܘ ܕܒܰܪܛܶܠܺܝ ܩܪܺܝܬܳܐ ܕܰܟܺܝ ܗܘܳܐ: ܘܰܠܚܰܪܫܳܐ ܘܦܺܐܩܳܐ ܕܡ̣ܶܢ ܒܶܝܬ ܟܽܘܕܺܝܕܳܐ ܐܰܣܺܝ ܗܘܳܐ: ܡܳܪܝ ܕܳܕܳܐ ܕܰܠܗܰܘ ܕܺܐܝܬ ܗܘܳܐ ܠܶܗ ܟܺܐܒܳܐ ܒܪܺܝܫܶܗ ܐܰܚܠܶܡ ܗܘܳܐ ܠܶܗ ܟܺܐܒܳܐ ܒܪܺܝܫܶܗ ܐܰܚܠܶܡ ܗܘܳܐ: ܘܰܠܗܰܘ ܕܰܥܒܺܝܕ ܗܘܳܐ ܠܶܗ ܣܰܪܛܳܢܳܐ ܒܪܺܝܫܶܗ ܘܰܡܢܰܩܶܒ ܗܘܳܐ ܬܽܘܒ ܐܰܣܺܝ ܗܘܳܐ: ܘܰܠܪܺܝܫܳܢܳܐ ܛܳܠܽܘܡܳܐ ܠܺܝܕܰܥܬܳܐ ܕܚܰܝ̈ܶܐ ܐܰܦܢܺܝ ܗܘܳܐ: ܘܟܽܠܗܽܘܢ ܟܺܐܒܰܘ̈ܗܝ ܘܟܽܘܪ̈ܗܳܢܰܘܗܝ ܐܰܚܠܶܡ ܗܘܳܐ: ܡܳܪܝ ܕܳܕܳܐ ܕܟܽܠ ܬܶܕܡܪ̈ܳܬܳܐ ܘܚܰܝ̈ܠܐ ܣܳܥܰܪ ܗܘܳܐ: ܘܰܟܪ̈ܺܝܗܶܐ ܘܰܐܠܺܝ̈ܨܶܐ ܐܰܪܘܰܚ ܗܘܳܐ: ܘܚܰܢ̈ܦܶܐ ܘܟܳܦܽܘܪ̈ܶܐ ܬܰܠܡܶܕ ܗܘܳܐ: ܡܳܪܝ ܕܳܕܳܐ ܕܰܬܠܳܬܳܐ ܐܠܰܦܺܝ̈ܢ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܐܰܣܪܰܚ ܗܘܳܐ: ܘܰܒܥܺܕܬܳܐ ܪܰܒܬܳܐ ܕܡܳܪܝ ܐܰܚܽܘܕܶܡܶܗ ܕܡܶܫܬܰܡܗܳܐ ܝܽܘܪܰܩܬܳܐ ܒܬܰܓܪܺܝܬ ܡܕܺܝܢ̱ܬܳܐ ܐܶܬܩܒܰܪ ܗܘܳܐ: ܡܳܪܝ ܕܳܕܳܐ ܕܒܳܬܰܪ ܥܶܣܪܺܝܢ ܫܢܺܝ̈ܢ ܕܰܩܒܽܘܪܬܶܗ: ܦܰܓܪܶܗ ܠܛܽܘܪ ܥܰܒܕܺܝ̈ܢ ܡܛܳܐ ܗܘܳܐ: ܡܳܪܝ ܕܳܕܳܐ ܕܒܰܩܪܺܝܬܳܐ ܕܡܶܬܩܰܪܝܳܐ ܒܶܝܬ ܣܒܺܝܪܺܝܢܳܐ ܬܶܕܡܽܘܪܬܳܐ ܣܥܰܪ ܗܘܳܐ: ܘܰܠܛܰܠܝܳܐ ܡܺܝܬܳܐ ܢܰܚܶܡ ܗܘܳܐ ܕܰܒܗܰܘ ܝܰܘܡܳܐ ܥܳܢܶܕ ܗܘܳܐ: ܡܳܪܝ ܕܳܕܳܐ ܗ̇ܰܘ ܕܟܶܢܫܳܐ ܟܽܠܶܗ ܕܰܐܬܪܳܐ ܠܰܫܡܳܥܳܗ̇ ܕܬܶܕܡܽܘܪܬܳܐ ܕܰܣܥܰܪ ܐܶܬܟܰܢܰܫ ܗܘܳܐ: ܘܥܺܕܬܳܐ ܡܫܰܡܰܗܬܳܐ ܥܰܠ ܫܡܶܗ ܒܢܳܐ ܦܰܓܪܶܗ ܩܰܕܺܝܫܳܐ ܒܳܗ̇ ܐܶܬܬܣܺܝܡ ܗܘܳܐ: ܗ̇ܰܘ ܕܒܶܝܬ ܐܺܝܕܰܘ̈ܗܝ ܡܳܪܝ ܐܺܝܣܚܳܩ ܒܰܪ ܚܳܠܶܗ ܐܶܬܬܰܝܬܺܝ ܗܘܳܐ: ܡܳܪܝ ܕܳܕܳܐ ܕܰܠܥܰܝ̈ܢܶܐ ܕܠܶܣ̈ܛܳܝܶܐ ܕܰܒܥܰܘ ܕܢܶܩܛܠܽܘܢ ܠܕܰܝܪ̈ܳܝܶܐ ܬܰܠܡܺܝ̈ܕܰܘܗܝ ܣܰܡܺܝ ܗܘܳܐ: ܒܝܰܕ ܒܰܪܩܳܐ ܕܰܥܠܰܝܗܽܘܢ ܐܶܬܬܰܒܪܰܩ ܗܘܳܐ: ܘܺܐܝܕܰܝ̈ܳܐ ܘܪ̈ܶܓܠܐ ܕܺܝܠܗܽܘܢ ܐܰܘܒܶܫ ܗܘܳܐ: ܘܒܳܬܰܪ ܝܰܘ̈ܡܳܬܳܐ ܠܶܣ̈ܛܳܝܶܐ ܗ̇ܳܢܽܘܢ ܠܕܰܝܪܶܗ ܢܳܓܶܕ ܗܘܳܐ ܘܬܰܠܡܶܕ ܗܘܳܐ: ܘܰܠܗܽܘܢ ܡ̣ܶܢ ܛܳܥܝܽܘܬܳܐ ܐܰܦܢܺܝ ܗܘܳܐ: ܡܳܪܝ ܕܳܕܳܐ ܕܰܠܠܶܣ̈ܛܳܝܶܐ ܐܰܦܢܺܝ ܗܘܳܐ: ܘܶܐܣܟܺܝܡܳܐ ܕܕܰܝܪܳܝܽܘܬܳܐ ܠܗܽܘܢ ܐܰܠܒܶܫ ܗܘܳܐ: ܘܰܗܘܰܘ ܕܰܝܪ̈ܳܝܶܐ ܡܝܰܬܪ̈ܶܐ ܐܰܟܡܳܐ ܕܶܐܡܰܪ ܗܘܳܐ: ܡܳܪܝ ܕܳܕܳܐ ܕܒܰܐܬܪܳܐ ܕܛܽܘܪ ܥܰܒܕܺܝ̈ܢ ܦܰܓܪܶܗ ܐܶܬܩܒܰܪ ܗܘܳܐ: ܒܰܩܪܺܝܬܳܐ ܥܰܫܺܝܢܬܳܐ: ܘܦܰܓܪܶܗ ܒܳܗ̇ ܐܶܬܢܛܰܪ ܗܘܳܐ: ܘܰܠܛܰܠܝܳܐ ܡܺܝܬܳܐ ܒܳܗ̇ ܢܰܚܶܡ ܗܘܳܐ: ܡܳܪܝ ܕܳܕܳܐ ܕܰܠܗܰܘ ܕܰܦܬܺܝܠ ܗܘܳܐ ܦܰܪܨܽܘܦܶܗ ܒܳܗ̇ ܐܰܚܠܶܡ ܗܘܳܐ: ܘܰܠܗܰܘ ܕܺܐܝܬ ܗܘܳܐ ܠܶܗ ܟܺܐܒܳܐ ܩܰܫܝܳܐ ܒܪܺܝܫܶܗ ܐܰܣܺܝ ܗܘܳܐ: ܘܰܠܗܰܘ ܡܫܰܪܝܳܐ ܐܰܩܺܝܡ ܗܘܳܐ: ܡܳܪܝ ܕܳܕܳܐ ܕܰܠܕܰܝܘܳܢܳܐ ܗ̇ܰܘ ܕܰܠܣܰܓܺܝ̈ܶܐܐ ܒܟܺܐܦ̈ܶܐ ܪܳܓܶܡ ܗܘܳܐ: ܘܰܠܟܽܠ ܕܥܳܒܰܪ ܡܨܰܠܶܦ ܗܘܳܐ ܘܡ̣ܶܢ ܕܰܩܪܶܒ ܠܦܰܓܪܶܗ ܕܩܰܕܺܝܫܳܐ ܘܶܐܬܒܰܪܺܝ ܗܘܳܐ: ܘܰܢܦܰܩ ܗܘܳܐ ܡܳܪܽܘܕܳܐ ܒܰܕܡܽܘܬ ܬܰܥܠܐ ܫܺܝܛܳܐ ܙܳܦܽܘܪܳܐ ܟܰܕ ܡܰܝܠܶܠ ܗܘܳܐ ܕܘܳܝ ܠܺܝ ܡܶܢܳܟ ܕܳܕܳܐ ܣܺܝܕܽܘܣܳܢܳܝܳܐ ܐܳܡܰܪ ܗܘܳܐ: ܘܥܰܠ ܗܳܕܶܐ ܡ̇ܰܢ ܕܫܳܡܰܥ ܗܘܳܐ ܡܶܬܕܰܡܰܪ ܗܘܳܐ: ܘܠܐܠܳܗܳܐ ܡܰܘܕܶܐ ܘܰܡܫܰܒܰܚ ܗܘܳܐ: ܘܰܠܩܰܕܺܝܫܳܐ ܡܳܪܝ ܕܳܕܳܐ ܡܝܰܩܰܪ ܗܘܳܐ ܘܰܡܩܰܠܶܣ ܗܘܳܐ: ܡܳܪܝ ܕܳܕܳܐ ܕܰܠܗܰܘ ܕܰܒܟܺܐܒ̈ܶܐ ܕܨܶܡܪ̈ܶܐ ܡܶܬܶܐܠܶܨ ܗܘܳܐ: ܘܒܰܨܠܰܘ̈ܳܬܶܗ ܚܽܘܠܡܳܢܳܐ ܠܶܗ ܐܰܩܢܺܝ ܗܘܳܐ: ܘܰܠܛܰܠܝܳܐ ܕܺܐܝܬ ܗܘܳܐ ܠܶܗ ܒܟܰܪܣܶܗ ܡܶܫܬܰܢܰܩ ܗܘܳܐ: ܒܚܰܝܠܐ ܕܰܨܠܽܘܬܶܗ ܐܳܣܝܽܘܬܳܐ ܫܰܟܶܢ ܗܘܳܐ: ܡܳܪܝ ܕܳܕܳܐ ܕܠܐܢ̱ܬܬܳܐ ܥܩܰܪܬܳܐ ܒܢܰܝ̈ܳܐ ܝܰܗܒ ܗܘܳܐ: ܘܰܠܣܰܓܺܝ̈ܶܐܐ ܡ̣ܶܢ ܟܺܐܒܰܝ̈ܗܽܘܢ ܐܰܣܺܝ ܗܘܳܐ: ܘܰܠܡܰܪ̈ܥܶܐ ܘܟܺܐܒ̈ܬܳܢܶܐ ܚܰܪܰܪ ܗܘܳܐ: ܘܰܠܫܺܐܕ̈ܶܐ ܡ̣ܶܢ ܒܢܰܝ̈ܢܳܫܳܐ ܛܪܰܕ ܗܘܳܐ: ܘܰܠܡܺܝ̈ܬܶܐ ܡ̣ܶܢ ܡܰܘܬܰܝ̈ܗܽܘܢ ܐܰܚܺܝ ܗܘܳܐ: ܡܳܪܝ ܕܳܕܳܐ ܕܳܐܣ̈ܘܳܬܶܗ ܠܐ ܡܶܬܡܰܢ̈ܝܳܢ: ܘܬܶܕܡܪ̈ܳܬܶܗ ܠܐ ܡܶܬܚܰܫ̈ܒܳܢ: ܘܣܽܘܓܳܐܐ ܗ̇ܰܘ ܕܰܬܡܺܝ̈ܗܳܬܶܗ ܠܐ ܡܶܬܕܰܪ̈ܟܳܢ ܘܰܡܠܐܷ ܓܰܘܕܳܐ ܡ̣ܶܢ ܝܰܡܳܐ ܪܘܺܝܚܳܐ ܕܰܫܒܺܝ̈ܚܳܬܳܐ ܕܠܰܝܢܰܢ ܘܰܒܡܰܫ̈ܡܥܳܬܳܐ ܕܰܡܗܰܝ̈ܡܢܶܐ ܣܳܡܢܰܢ: ܘܰܒܚܶܫܟܳܐ ܕܰܚܛܺܝܬܳܐ ܦܳܫܢܰܢ: ܘܰܠܒܶܣܬܪܳܐ ܕܺܝܠܰܢ ܗܦܰܟܢܰܢ: ܘܰܒܪܽܘܚܩܳܐ ܪܰܒܳܐ ܡ̣ܶܢ ܕܰܟܝܽܘܬܶܗ ܘܩܰܕܺܝܫܽܘܬܶܗ ܐܰܪܚܶܩܢܰܢ ܘܠܰܡܩܰܠܳܣܽܘܬܶܗ ܐܰܝܟ ܕܝܳܐܶܐ ܘܙܳܕܶܩ ܠܐ ܡܨܶܝܢܰܢ: ܘܟܰܕ ܡܰܪܟܶܢ ܪܺܝܫܰܢ ܒܰܐܪܥܳܐ ܡܶܢܶܗ ܩܰܘܺܝܢܰܢ: ܘܺܐܝܩܳܪܶܗ ܥܰܡ ܩܽܘܠܳܣܶܗ ܥܰܠ ܡܳܪܰܢ ܝܶܫܽܘܥ ܡܫܺܝܚܳܐ ܡܳܪܶܗ ܫܒܰܩܢܰܢ ܘܕܰܢܝܰܩܪܺܝܘܗܝ ܘܰܢܩܰܠܣܺܝܘܗܝ ܒܡܰܠܟܽܘܬܶܗ ܝܳܕܥܺܝܢܰܢ: ܘܰܚܢܰܢ ܥܰܠ ܚܰܝܳܒܽܘܬܰܢ ܫܪܰܟܢܰܢ ܘܰܒܕܰܘܝܽܘܬܰܢ ܚܢܰܢ ܩܰܘܺܝܢܰܢ ܘܒܰܚܛܳܗܰܝ̈ܢ ܡܦܰܠܦܠܺܝܢܰܢ: ܘܰܒܨܳܡܰܪܬܳܐ ܕܰܐܒܕܳܢܳܐ ܡܛܰܒܥܺܝܢܰܢ ܘܰܚܢܺܝܩܺܝܢܰܢ: ܘܗܳܫܳܐ ܡܶܢܳܟ ܡܳܪܝܳܐ ܐܠܰܗܳܐ ܒܳܥܶܝܢܰܢ ܕܰܒܝܰܕ ܨܠܰܘ̈ܳܬܶܗ ܕܰܡܢܺܝܚܳܢܳܟ ܡܳܪܝ ܕܳܕܳܐ ܕܝܰܘܡܳܢܳܐ ܥܺܐܕܶܗ ܡܫܰܡܠܶܝܢܰܢ: ܚܽܘܣ ܘܶܐܬܪܰܚܰܡ ܥܰܠ ܟܽܠܰܢ: ܘܠܐ ܬܰܗܦܶܟ ܐܰܦܰܝ̈ܟ ܡܶܢܰܢ ܡܶܛܽܠ ܣܰܓܺܝܽܐܘܬ ܒܺܝ̈ܫܳܬܰܢ: ܐܶܠܐ ܐܰܣܶܩ ܠܰܢ ܡ̣ܶܢ ܝܰܡܳܐ ܕܰܚܛܳܗ̈ܶܐ ܕܒܶܗ ܡܛܰܒܥܺܝܢܰܢ: ܘܠܐ ܬܫܰܠܶܛ ܥܠܰܝܢ ܥܰܡ̈ܡܶܐ ܢܽܘܟܪ̈ܳܝܶܐ ܕܰܡܢܰܓܕܺܝܢ ܠܰܢ: ܘܠܐ ܩܰܡܨܳܐ ܕܳܐܟܶܠ ܙܰܪ̈ܥܰܝܢ ܘܠܐ ܫܰܘܒܳܐ ܘܝܰܪܩܳܢܳܐ ܕܡܰܟܶܐ ܚܰܩ̈ܠܳܬܰܢ: ܘܠܐ ܟܰܦ̈ܢܶܐ ܘܡܰܘܬܳܢܳܐ ܕܪܽܘܓܙܳܐ ܕܰܡܣܺܝܦ ܠܰܢ: ܐܶܠܐ ܒܪ̈ܰܚܡܶܐ ܡܳܪܝܳܐ ܐܶܬܚܰܫܰܚ ܥܰܡܰܢ: ܕܰܡܪܰܚܡܳܢܳܐ ܘܣܰܓܺܝ ܪ̈ܰܚܡܶܐ ܐܺܝܬܰܝܟ ܝܳܕܥܺܝܢܰܢ: ܡܶܛܽܠ ܦܰܓܪܳܟ ܘܰܕܡܳܟ ܩܰܕܺܝܫܳܐ ܕܰܛܡܺܝܪ ܒܰܢ ܘܰܨܠܺܝܒܳܟ ܩܰܕܺܝܫܳܐ ܕܒܶܗ ܚܬܺܝܡܺܝܢܰܢ: ܘܡܶܛܽܠ ܡܽܘܪܽܘܢ ܒܰܣܺܝܡ ܪܺܝܚܳܐ ܕܒܶܗ ܪܫܺܝܡܺܝܢܰܢ ܡܳܪܝܳܐ ܠܐ ܒܪܽܘܓܙܳܟ ܬܰܟܣܰܢ: ܘܳܐܦܠܐ ܒܚܶܡܬܳܟ ܬܶܪܕܶܐ ܠܰܢ: ܐܶܠܐ ܒܝܰܕ ܪ̈ܰܚܡܶܐ ܕܺܝܠܳܟ: ܘܡܶܬܟܰܫܦܳܢܽܘܬܶܗ ܕܡܳܪܝ ܕܳܕܳܐ ܡܢܺܝܚܳܢܳܟ ܕܰܚܠܳܦܰܝܢ ܕܡܰܘܗܰܒܬܳܐ ܕܪ̈ܰܚܡܶܐ ܘܟܽܠ ܝܽܘܬܪ̈ܳܢܶܐ ܫܰܕܰܪܬܳܝܗܝ ܠܰܢ: ܚܽܘܣ ܘܶܐܬܪܰܚܰܡ ܥܰܠ ܟܽܠܰܢ: ܘܰܫܒܽܘܩ ܚܰܘܒܰܝ̈ܢ ܘܰܚܛܳܗܰܝ̈ܢ: ܘܰܐܢܺܝܚ ܠܥܰܢܺܝ̈ܕܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܥܰܠ ܣܰܒܪܳܟ ܫܟܶܒܘ ܒܰܬܪܺܝܨܽܘܬ ܫܽܘܒܚܳܐ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܰܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

 

ܥܛܪܐ

 

 

 

ܡܫܺܝܚܳܐ ܦܺܝܪܡܳܐ ܡܪܰܥܝܳܢܳܐ ܕܥܰܠ ܪܰܘܡܳܐ ܕܓܳܓܽܘܠܬܳܐ ܐܶܬܬܰܥܛܰܪ ܘܡ̣ܶܢ ܪܺܝܚ ܣܘܳܬܶܗ ܒܰܣܶܡ ܟܽܠܳܗ̇ ܡܶܬܥܰܡܪܳܢܺܝܬܳܐ: ܘܪܰܥܺܝ ܠܐܒܽܘܗܝ ܕܥܰܠ ܐ̱ܢܳܫܽܘܬܰܢ ܪܓܺܝܙ ܗܘܳܐ: ܩܰܒܶܠܳܝܗܝ ܡܳܪܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܠܳܟ ܝܰܘܡܳܢܳܐ ܒܥܺܐܕܶܗ ܕܰܪܚܽܘܡܳܟ ܚܰܣܝܳܐ ܡܳܪܝ ܕܳܕܳܐ ܕܫܰܡܠܺܝ ܗܳܫܳܐ: ܘܒܰܨܠܰܘ̈ܳܬܶܗ ܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܒܽܘܣܳܡܳܐ ܕܒܰܓܢܽܘܢ ܢܽܘܗܪܳܐ ܠܰܢ ܘܰܠܥܰܢܺܝ̈ܕܰܝܢ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܕܝܰܩܰܪ ܘܰܐܘܪܶܒ ܕܽܘܟܪܳܢܶܗ ܕܰܐܒܽܘܢ ܚܰܣܝܳܐ ܡܳܪܝ ܕܳܕܳܐ ܒܟܽܠ ܐܰܬܰܪ ܘܦܶܢ̈ܝܳܢ: ܘܰܢܨܰܚ ܫܡܶܗ ܪܰܒܳܐ ܒܟܽܠ ܥܰܡܡܺܝ̈ܢ: ܠܗܰܘ ܕܫܰܚܠܶܦ ܠܰܫܡܶܗ ܕܡܳܪܝ ܕܳܕܳܐ ܒܝܽܘܡ ܡܶܬܬܰܣܪܚܳܢܽܘܬܶܗ ܘܶܐܬܟܰܢܺܝ ܫܡܶܗ ܓܪܺܝܓܳܘܪܺܝܳܘܣ ܐܰܝܟ ܝܰܥܩܽܘܒ ܕܶܐܬܟܰܢܺܝ ܐܺܝܣܪܳܐܶܝܠ ܘܫܳܐܘܳܠ ܐܶܬܩܪܺܝ ܦܰܘܠܳܘܣ ܫܠܺܝܚܳܐ ܠܗܰܘ ܕܰܣܥܰܪ ܒܶܝܬ ܐܺܝܕܰܘ̈ܗܝ ܕܡܳܪܝ ܕܳܕܳܐ ܟܽܠ ܥܽܘܕܪ̈ܳܢܺܝܢ ܘܟܽܠ ܚܰܝܠܺܝ̈ܢ ܠܟܽܠ ܕܰܟܪ̈ܺܝܗܺܝܢ ܘܰܐܠܺܝ̈ܨܺܝܢ: ܘܗܳܐ ܓܰܪ̈ܡܰܘܗܝ ܡܰܪܕܶܝܢ ܠܐܝܠܶܝܢ ܕܰܡܚܺܝܠܺܝܢ ܟܽܠ ܚܽܘܠܡܳܢܺܝ̈ܢ: ܘܒܰܨܠܰܘ̈ܳܬܶܗ ܟܽܠܰܢ ܡܶܬܓܰܘܣܺܝܢܰܢ: ܒܗܳܢܳܐ܀

 

 

 

ܣܕܪܐ

 

 

 

ܬܶܫܒܽܘܚܬܳܐ: ܘܪܽܘܡܪܳܡܳܐ ܠܳܟ ܡܳܪܶܐ ܡܳܪ̈ܰܘܳܬܳܐ ܕܰܫܒܺܝܚ ܐܰܢ̱ܬ ܒܫܽܘܟܳܢܰܝ̈ܟ ܘܰܒܡܰܘܗ̈ܒܳܬܳܐ ܫܡܰܝܳܢ̈ܝܳܬܳܐ: ܒܪܺܝܟ ܐܺܝܩܳܪܳܟ ܡ̣ܶܢ ܐܰܬܪܳܟ ܕܡ̣ܶܢ ܟܪ̈ܽܘܒܶܐ ܒܝܽܘ̈ܒܳܒܶܐ ܘܰܒܗܶܕܪ̈ܶܐ ܐܠܰܗܳܝ̈ܶܐ ܫܡܳܟ ܗܳܐ ܡܶܬܝܰܒܰܒ: ܥܒܰܕܬ ܠܳܟ ܡܳܪܝ ܡ̣ܶܢ ܓܶܢܣܳܐ ܕܰܒܢ̈ܰܝ ܥܰܦܪܳܐ ܡܫܰܒ̈ܚܳܢܶܐ ܠܰܫܡܳܟ ܩܰܕܺܝܫܳܐ ܢܶܗܘܶܐ ܦܪܰܥ: ܗܰܘ̈ܢܶܐ ܬܠܺܝ̈ܬܳܝܶܐ ܐܰܝܟ ܩܰܕܺܝܫܳܐ ܡܳܪܝ ܕܳܕܳܐ: ܘܡܳܪܝ ܐܺܝܣܚܳܩ ܒܰܪ ܚܳܠܶܗ ܘܰܐܪܒܥܺܝܢ ܕܰܝܪ̈ܳܝܶܐ ܩܰܕܺܝ̈ܫܶܐ ܚܰܒܪ̈ܰܘܗܝ ܠܒܺܝ̈ܒܶܐ ܒܰܩܪܳܒܳܐ ܕܰܒܕܰܝܪܳܐ ܗ̇ܳܝ ܕܨܶܝܕ ܐܶܣܦܶܣ ܢܰܦ̈ܫܳܬܗܽܘܢ ܚܒܰܫܘ: ܝܰܘܢܳܐ ܬܰܡܺܝܡܳܐ ܡܳܪܝ ܕܳܕܳܐ ܗ̇ܰܘ ܕܠܐܘܪܫܠܶܡ ܡܕܺܝܢܰܬ݀ ܩܽܘܕ̈ܫܶܐ ܐܰܫܩܶܠ: ܘܡ̣ܶܢ ܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܐܶܬܒܰܪܰܟ ܘܥܽܘܕܪ̈ܳܢܰܘܗܝ ܘܚܽܘܠܡܳܢܰܘ̈ܗܝ ܒܰܐܬܪܰܢ ܐܶܬܝܰܬܰܪܘ ܘܰܣܓܺܝܘ: ܢܶܫܪܳܐ ܩܰܠܺܝܠ ܓܶܦ̈ܶܐ ܡܳܪܝ ܕܳܕܳܐ ܕܰܠܡܰܕܒܪܳܐ ܕܡܶܨܪܶܝܢ ܦܪܰܚ ܘܡ̣ܶܢ ܩܰܕܺܝ̈ܫܶܐ ܕܬܰܡܳܢ ܐܶܬܒܰܪܰܟ: ܘܰܒܬܰܓܪܺܝܬ ܩܶܢܶܗ ܩܒܰܥ: ܣܢܽܘܢܺܝܬܳܐ ܒܰܣܺܝܡܰܬ݀ ܠܶܥ̈ܙܶܐ ܡܳܪܝ ܕܳܕܳܐ ܗ̇ܰܘ ܕܰܒܬܰܒܪܺܝܙ ܠܶܥܙܰܘ̈ܗܝ ܐܶܫܬܡܰܥܘ: ܘܰܒܓܰܘ ܬܰܓܪܺܝܬ ܦܰܪ̈ܽܘܓܰܘܗܝ ܣܓܺܝܘ: ܘܡ̣ܶܢ ܬܰܡܳܢ ܠܛܽܘܪ ܥܰܒܕܺܝ̈ܢ ܦܪܰܚ: ܒܺܝܠܕܰܪܳܐ ܕܡܰܠܟܳܐ ܫܡܰܝܳܢܳܐ: ܡܳܪܝ ܕܳܕܳܐ ܕܠܐܬܪ̈ܰܘܳܬܳܐ ܣܰܓܺܝ̈ܳܐܬܳܐ ܐܶܫܬܰܕܰܪ: ܘܰܐܣܠܺܝ ܘܫܳܛ ܠܐܪ̈ܥܳܢܝܳܬܳܐ ܘܥܰܠ ܫܡܰܝܳܢ̈ܝܳܬܳܐ ܐܶܫܬܰܠܰܛ: ܝܰܪܕܳܐ ܕܰܡܠܐܷ ܕܰܟܝܽܘܬܳܐ ܡܳܪܝ ܕܳܕܳܐ ܕܰܐܛܺܝܦ ܠܐܬܪܰܢ ܒܣܽܘܓܳܐܐ ܕܳܐܣ̈ܘܳܬܶܗ ܘܰܕܥܽܘܕܪ̈ܳܢܰܘܗܝ ܪܰܒ ܒܰܝܬܳܐ ܐܠܰܗܳܝܳܐ ܡܳܪܝ ܕܳܕܳܐ ܕܰܐܝܬܺܝ ܠܰܢ ܡ̣ܶܢ ܡܳܪܶܗ ܟܽܠ ܝܽܘܬܪ̈ܳܢܶܐ ܐܠܰܗܳܝ̈ܶܐ: ܝܰܐܛܪܽܘܣ ܕܟܺܐܒܰܝ̈ܢ ܘܟܽܘܪ̈ܗܳܢܰܝܢ: ܡܳܪܝ ܕܳܕܳܐ ܕܰܒܒܶܝܬ ܣܒܺܝܪܺܝܢܳܐ ܐܰܩܶܢ ܘܰܚܠܰܕ: ܢܰܘܣܳܐ ܕܪܽܘܚܳܐ ܩܰܕܺܝܫܳܐ ܡܳܪܝ ܕܳܕܳܐ ܕܣܰܝܒܰܪ ܟܰܦܢܳܐ ܘܨܰܗܝܳܐ ܘܽܐܘܠܨܳܢ̈ܶܐ: ܘܦܳܬܽܘܪܳܐ ܫܡܰܝܳܢܳܐ ܡܰܠܐܟ̈ܶܐ ܩܰܕܺܝ̈ܫܶܐ ܠܶܗ ܗ̣ܺܘ ܐܰܝܬܺܝܘ: ܝܽܘܡܦܰܪܩܽܘܣ ܡܰܘܬܪܳܢܳܐ ܡܳܪܝ ܕܳܕܳܐ ܕܟܽܠ ܐܳܣܘ̈ܳܬܳܐ ܡܰܘܬܪ̈ܳܢܘܳܬܳܐ ܠܟܺܐܒ̈ܶܐ ܕܢܰܦ̈ܫܳܬܰܢ ܘܰܕܦܰܓܪ̈ܰܝܢ ܐܰܝܬܺܝ: ܐܺܝܙܓܰܕܳܐ ܘܰܫܠܺܝܚܳܐ ܡܳܪܝ ܕܳܕܳܐ ܕܡ̣ܶܢ ܐܠܰܗܳܐ ܐܶܫܬܰܕܰܪ: ܘܠܐܬܪܰܢ ܘܠܰܦܢܺܝܬܰܢ ܡܛܳܐ: ܡܳܪܝ ܕܳܕܳܐ ܗ̇ܰܘ ܕܣܰܓܺܝ̈ܳܐܢ ܬܶܕܡܪ̈ܳܬܶܗ ܘܰܡܥܰܠܝ̈ܳܢ ܐܳܣܘ̈ܳܬܶܗ: ܘܰܫܒܺܝ̈ܚܳܢ ܬܡܺܝ̈ܗܳܬܶܗ: ܡܳܪܝ ܕܳܕܳܐ ܕܪܰܘܪ̈ܒܳܢ ܥܒܺܝ̈ܕܳܬܶܗ ܘܰܬܗܺܝܪ̈ܳܢ ܣܳܥܽܘܪ̈ܘܳܬܶܗ: ܡܳܪܝ ܕܳܕܳܐ ܕܰܗܕܺܝܪ̈ܳܢ ܐܳܬܘ̈ܳܬܶܗ: ܘܰܕܡܶܬܕܰܡܰܪ ܐ̱ܢܳܫ ܒܰܥܒܺܝ̈ܕܳܬܶܗ ܐܺܝܬܰܘܗܝ: ܘܟܽܠ ܐܰܝܢܳܐ ܕܡܰܐܨܶܕ ܒܶܗ ܡܶܬܒܰܠܗܶܐ: ܥܒܰܕ ܠܶܗ ܟܽܘܬܺܝܢܳܐ ܕܦܰܪܙܠܐ: ܘܗ̣ܺܝ ܡܫܰܢܩܳܐ ܗܘܳܬ ܠܶܗ: ܝܰܗܒ ܗܘܳܐ ܦܰܪܨܽܘܦܶܗ ܠܫܶܡܫܳܐ ܗ̇ܳܝ ܡܰܘܩܕܳܐ ܗܘܳܬ ܠܶܗ: ܛܡܺܝܪ ܗܘܳܐ ܠܶܗ ܒܬܰܠܓܳܐ ܘܓܠܺܝܕܳܐ ܘܡܰܣܶܛ ܗܘܳܐ ܠܶܗ: ܡܛܰܓܶܢ ܗܘܳܐ ܢܰܦܫܶܗ ܒܚܽܘܡܳܐ ܐܰܝܟ ܢܽܘܢܳܐ ܒܓܰܘ ܛܺܝܓܢܳܐ ܘܰܐܘܟܶܡ ܓܽܘܫܡܶܗ: ܘܰܐܬܗܰܪܘ ܗܘܰܘ ܡܰܠܐܟ̈ܶܐ ܕܰܠܥܶܠ ܥܰܠ ܚܽܘܡܣܳܢܶܗ: ܐܶܬܕܰܡܰܪܘ ܒܢܰܝ̈ܢܳܫܳܐ ܒܰܡܣܰܝܒܪܳܢܽܘܬܶܗ: ܥܰܡ̈ܡܶܐ ܣܰܓܺܝ̈ܶܐܐ ܬܡܰܗܘ ܒܰܡܥܰܙܝܳܢܽܘܬܶܗ: ܒܟܰܦܢܳܐ ܘܰܒܨܰܗܝܳܐ ܘܒܽܐܘ̈ܠܨܳܢܶܐ ܘܰܒܫܽܘ̈ܢܳܩܶܐ ܕܰܡܣܰܝܒܰܪ ܗܘܳܐ ܘܠܐ ܟܶܪܝܰܬ݀ ܠܶܗ: ܚܙܳܐ ܡܳܪܶܗ ܚܰܫܰܘ̈ܗܝ ܘܰܚܫܳܩܰܘ̈ܗܝ ܥܰܡ ܛܽܘܪ̈ܳܦܰܘܗܝ ܘܣܰܓܺܝ ܝܰܩܪܶܗ: ܘܦܳܬܽܘܪܳܐ ܡ̣ܶܢ ܫܡܰܝܳܐ ܥܰܡ ܡܰܠܐܟ̈ܶܐ ܫܰܕܰܪ ܠܶܗ ܐܶܟܰܠ ܘܰܣܒܰܥ ܘܫܰܒܰܚ ܠܐܠܳܗܶܗ: ܘܰܐܘܕܺܝ ܘܩܰܒܶܠ ܛܰܝܒܽܘܬܶܗ ܘܦܰܝܶܓ ܟܰܦܢܶܗ ܘܨܶܗܝܶܗ: ܘܰܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܛܽܘܒܳܐ ܠܩܰܕܺܝܫܳܐ ܡܳܪܝ ܕܳܕܳܐ ܝܳܗܒܺܝܢܰܢ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܢܽܘܛܳܪܳܐ ܡܰܠܟܳܝܳܐ ܕܦܽܘܩ̈ܕܳܢܶܐ ܘܙܽܘܗܳܪ̈ܶܐ ܠܡܰܪ̈ܳܚܶܐ ܟܬܰܒ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܬܶܐܘܳܪܺܝܛܽܘܣ ܕܡܰܠܟܳܐ ܫܡܰܝܳܢܳܐ ܕܕܳܩ ܓܢܺܝ̈ܙܳܬܳܐ ܘܟܰܣ̈ܝܳܬܳܐ: ܕܦܰܓܪܶܗ ܠܛܽܘܪ̈ܥܰܒܕܺܝܢ ܡܛܳܐ: ܕܝܺܕܰܥ ܕܝܽܘܠܦܳܢ ܢܰܣܛܽܘܪ ܡܰܪܳܚܳܐ ܒܡܰܕܢܚܳܐ ܒܳܠܶܨ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܚܰܣܝܳܐ ܘܩܰܕܺܝܫܳܐ ܚܰܒܺܝܒܶܗ ܘܰܪܚܽܘܡܶܗ ܕܝܶܫܽܘܥ ܡܫܺܝܚܳܐ ܐܠܰܗܳܐ ܡܳܪܳܐ ܕܟܽܠ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܣܺܝܡܬܳܐ ܡܛܰܫܳܝܬܳܐ ܕܰܠܥܰܡ̈ܡܶܐ ܣܰܓܺܝ̈ܶܐܐ ܐܰܥܬܪܰܬ݀: ܘܥܽܘܬܪܳܟ ܟܽܠܶܗ ܗܳܐ ܠܘܳܬܰܢ ܗ̣ܽܘ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܐܶܦܣܩܽܘܦܳܐ ܕܬܰܓܪܺܝܬ ܡܕܺܝܢ̱ܬܳܐ ܕܰܐܝܟ ܡܰܘܗܰܒܬܳܐ ܕܪ̈ܰܚܡܶܐ ܫܟܺܝܢܬܳܐ ܕܦܰܓܪܳܟ ܠܘܳܬܰܢ ܡܛܳܬ݀: ܠܳܟ ܛܽܘܒܰܝܟ ܡܳܪܝ ܕܳܕܳܐ ܟܳܬܽܘܒܳܐ ܡܗܺܝܪܳܐ ܕܳܐܣ̈ܘܳܬܳܐ ܠܟܺܐܒܰܝ̈ܢ ܘܟܽܘܪ̈ܗܳܢܰܝܢ ܟܬܰܒ ܘܰܪܫܰܡ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܠܽܘܒܳܒܳܐ ܘܣܽܘܝܳܥܳܐ ܘܚܰܝ̈ܠܐ ܠܰܡܚܺܝܠܽܘܬܰܢ ܐܶܫܬܰܕܰܪ ܡܶܢܳܟ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܢܽܘܗܪܳܐ ܢܰܗܺܝܪܳܐ ܕܥܰܝ̈ܢܶܐ ܕܗ̇ܳܢܶܝܢ ܕܣܰܡ̈ܝܳܢ ܗܘܰܝ̈ ܒܳܟ ܐܶܬܦܬܰܚ̈ܝ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܛܽܘܒܳܢܳܐ ܕܛܽܘ̈ܒܶܐ ܫܡܰܝ̈ܳܢܶܐ ܠܳܟ ܘܰܠܬܰܠܡܺܝ̈ܕܰܝܟ ܐܶܬܝܰܒܰܠܘ ܐܰܟܚܰܕ: ܠܳܟ ܛܽܘܒܰܝܟ ܡܳܪܝ ܕܳܕܳܐ ܐܦ ܩܰܕܺܝܫܳܐ ܕܒܳܬܰܪ ܡܰܘܬܶܗ ܐܶܬܚܙܺܝ ܠܡܳܪܝ ܐܺܝܣܚܳܩ ܒܰܪ ܚܳܠܶܗ: ܘܦܰܩܕܶܗ ܘܶܐܡܰܪ ܠܶܗ ܕܰܠܛܽܘܪ ܥܰܒܕܺܝ̈ܢ ܢܰܘܒܶܠ ܦܰܓܪܶܗ ܩܰܕܺܝܫܳܐ: ܘܗܳܫܳܐ ܒܰܨܠܰܘ̈ܳܬܶܗ ܫܡܺܝ̈ܥܳܬܳܐ ܘܰܡܩܰܒ̈ܠܳܬܳܐ ܕܰܠܘܳܬܳܟ ܡܫܺܝܚܳܐ ܐܠܰܗܰܢ ܚܽܘܪ ܒܰܢ ܡܳܪܝܳܐ ܒܥܰܝܢܳܐ ܕܪ̈ܰܚܡܶܐ: ܘܰܐܡܛܰܪ ܥܠܰܝܢ ܚܢܳܢܳܐ ܕܒܰܣܺܝܡܽܘܬܳܟ: ܒܰܝܬܳܐ ܠܰܢ ܠܺܝܕܰܥܬܳܟ ܓܡܽܘܪ ܠܰܢ ܒܡܰܘܗܰܒܬܳܐ: ܕܰܒܰܪ ܠܰܢ ܒܝܰܡܺܝܢܳܟ: ܗܰܕܳܐ ܠܰܢ ܠܰܠܡܺܐܢܳܟ: ܘܰܥܶܕ ܠܰܢ ܠܰܓܢܽܘܢܳܟ: ܙܽܘܢ ܠܰܢ ܒܒܽܘܪ̈ܟܳܬܳܟ: ܚܽܘܢ ܠܰܢ ܒܰܚܢܳܢܳܟ: ܛܰܟܶܣ ܠܰܢ ܥܰܡ ܐܶܡܪ̈ܰܝܟ: ܝܰܒܶܠ ܠܰܢ ܠܡܰܠܟܽܘܬܳܶܟ: ܟܰܢܶܫ ܠܰܢ ܠܒܰܝܬܳܝܽܘܬܳܟ: ܨܰܝܶܒ ܠܰܢ ܒܚܰܝܠܬܳܢܽܘܬܳܟ ܥܰܫܺܝܢܬܳܐ: ܡܰܢܰܥ ܠܰܢ ܠܰܚܠܽܘܠܳܟ ܗ̇ܰܘ ܠܐ ܥܳܒܽܘܪܳܐ: ܐܰܢܗܰܪ ܠܰܢ ܒܝܽܘܠܦܳܢܳܟ ܡܰܚܝܳܢܳܐ: ܣܰܝܰܥ ܠܰܢ ܒܰܕܪܳܥܳܟ ܬܰܩܺܝܦܳܐ: ܥܰܕܰܪ ܠܰܢ ܕܩܳܪܶܝܢܰܢ: ܦܪܽܘܩ ܠܰܢ ܡ̣ܶܢ ܒܥܶܠܕܰܪܰܢ ܐܰܢ̱ܬ ܐܠܰܗܰܢ: ܪܰܚܶܡܥܠܰܝܢ ܕܡܶܬܓܰܘܣܺܝܢܰܢ: ܫܰܘܬܶܦ ܠܰܢ ܒܛܽܘܒܬܳܢܽܘܬܳܟ: ܐܰܩܺܝܡ ܠܰܢ ܡ̣ܶܢ ܝܰܡܺܝܢܳܟ: ܐܰܓܢܳܐ ܠܰܢ ܥܰܠ ܦܳܬܽܘܪܳܟ: ܐܰܪܘܳܐ ܠܰܢ ܡ̣ܶܢ ܪܶܚܡܬܳܟ: ܘܰܐܫܪܳܐ ܒܰܢ ܚܽܘܒܳܟ: ܐܰܫܡܰܥ ܠܰܢ ܡܳܪܝ ܩܳܠܳܟ ܒܰܣܺܝܡܳܐ: ܐܰܦܨܰܚ ܠܰܢ ܒܰܚܙܳܬܳܟ: ܒܰܣܶܡ ܠܰܢ ܒܥܶܢܝܳܢܳܟ: ܐܰܫܘܳܐ ܠܰܢ ܠܫܽܘܒܩܳܢ ܚܰܘ̈ܶܒܐ ܘܰܚܛܳܗ̈ܶܐ ܒܰܡܪܰܚܡܳܢܽܘܬܳܟ: ܐܰܥܶܠ ܠܰܢ ܘܰܠܥܰܢܺܝ̈ܕܰܝܢ ܠܰܓܢܽܘܢܳܟ ܕܢܰܘܕܶܐ ܘܢܶܣܓܽܘܕ ܠܳܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܩܕܝܫܐ ܡܪܝ ܐܘܓܝܢ ܪܝܫ ܣܝܥܬܐ ܐܠܗܝܬܐ

 

ܨܠܘܬܐ ܕܫܘܪܝܐ

 

 

 

ܫܰܟܶܢ ܠܰܢ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܘܚܰܕܽܘܬܳܢܳܝܳܐ ܕܥܰܕܥܺܐܕܶܗ ܕܪܺܝܫܳܐ ܪܰܒܳܐ ܘܰܛܒܺܝܒܳܐ ܫܠܺܝܚܳܐ ܓܰܒܝܳܐ ܡܳܪܝ ܐܰܘܓܺܝܢ: ܡܕܰܒܪܳܢܳܐ ܕܣܺܝܥܬܳܐ ܐܠܰܗܳܝܬܳܐ ܕܫܰܒܥܺܝܢ ܡܣܰܒܪ̈ܳܢܶܐ: ܫܽܘܒܩܳܢܳܐ ܕܚܰܘ̈ܒܶܐ ܘܣܰܟܠܘ̈ܳܬܰܢ ܘܫܽܘܪܬܳܚܳܐ ܕܥ̈ܰܠܠܳܬܰܢ ܒܽܘܛܳܠܐ ܕܡܰܪ̈ܕܘܳܬܳܐ ܡ̣ܶܢ ܐܰܬܪܳܐ ܕܥܳܒܶܕ ܕܽܘܟܪܳܢܶܗ: ܘܰܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

 

 

ܦܪܘܡܝܘܢ ܕܪܡܫܐ

 

 

 

ܬܶܫܒܽܘܚܬܳܐ: ܠܐ ܡܶܬܡܰܠܠܳܢܺܝܬܳܐ ܠܐܠܳܗܳܐ ܒܝܽܘܡ ܕܽܘܟܪܳܢܶܗ ܕܣܳܒܳܐ ܓܰܒܝܳܐ ܡܳܪܝ ܐܰܘܓܺܝܢ: ܠܗܰܘ ܕܚܰܘܝܶܗ ܫܠܺܝܚܳܐ ܐܠܰܗܳܝܳܐ: ܕܪܺܝܫ ܣܺܝܥܬܳܐ ܐܠܰܗܳܝܬܳܐ ܗ̇ܳܝ ܕܫܰܒܥܺܝܢ ܘܰܬܪܶܝܢ ܓܰܒܪ̈ܶܐ ܘܥܰܡܽܘ̈ܕܶܐ ܢܰܗܺܝܪ̈ܶܐ ܕܰܐܦܢܺܝܘ ܗܘܰܘ ܠܥܰܡ̈ܡܶܐ ܛܳܥܰܝ̈ܳܐ ܠܗܰܝܡܳܢܽܘܬܳܐ ܕܰܫܪܳܪܳܐ: ܠܗܰܘ ܕܬܰܠܡܶܕ ܠܚܰܢ̈ܦܶܐ ܘܰܐܥܡܶܕ ܒܶܝܬ ܐܺܝ̈ܕܰܘܗܝ ܕܓܰܒܝܳܐ ܡܳܪܝ ܐܰܘܓܺܝܢ ܣܽܘܓܳܐܐ ܕܥܰܡ̈ܡܶܐ ܕܠܐ ܡܶܢܝܳܢ ܒܰܕܡܽܘܬ ܫܠܺܝ̈ܚܶܐ ܩܰܕܺܝ̈ܫܶܐ ܕܰܐܦܢܺܝܘ ܠܟܽܠܳܗ̇ ܒܪܺܝܬܳܐ ܠܺܝܕܰܥܬܳܐ ܕܚܰܕ ܐܠܰܗܳܐ ܝܶܫܽܘܥ ܡܫܺܝܚܳܐ: ܠܗܰܘ ܕܚܰܘܝܶܗ ܢܰܗܺܝܪܳܐ ܨܰܡܽܘܚܬܳܢܳܐ ܠܡܳܪܝ ܐܰܘܓܺܝܢ ܘܰܐܢܗܰܪ ܠܟܽܠܗܽܘܢ ܚܶܫܽܘ̈ܟܶܐ ܡ̣ܶܢ ܢܽܘܗܪܳܐ ܕܝܽܘܠܦܳܢܶܗ: ܠܗܰܘ ܕܣܳܡܶܗ ܠܡܳܪܝ ܐܰܘܓܺܝܢ ܘܰܠܬܰܠܡܺܝ̈ܕܰܘܗܝ ܒܶܝܬ ܓܰܘܣܳܐ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܕܰܩܒܰܥܘ ܒܳܗ̇ ܒܡܰܕܢܚܳܐ: ܕܠܶܗ ܠܡܳܪܝܳܐ ܡܫܺܝܚܳܐ ܕܥܽܘܕܪ̈ܳܢܶܐ ܫܰܕܰܪ ܒܶܝܬ ܐܺܝܕܰܘ̈ܗܝ ܠܰܒܪܺܝܬܳܐ ܢܰܘܕܶܐ ܘܢܶܣܓܽܘܕ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣܰܘ̈ܗܝ ܕܣܳܒܳܐ ܐܠܰܗܳܝܳܐ ܙܰܟܳܝܳܐ ܘܰܛܒܺܝܒܳܐ ܘܪܺܝܫ ܣܺܝܥܬܳܐ ܐܠܰܗܳܝܬܳܐ ܡܳܪܝ ܐܰܘܓܺܝܢ ܩܳܪܒܺܝܢܰܢ: ܘܰܠܥܺܐܕܶܗ ܚܰܕܽܘܬܳܢܳܝܳܐ ܐܳܦ ܦܰܐܝܳܐ ܡܫܰܡܠܶܝܢܰܢ: ܘܰܒܩ̈ܳܠܐ ܘܰܒܢܽܘܨܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܢܰܨܪܺܝܢܰܢ ܟܰܕ ܐܳܡܪܺܝܢܰܢ: ܗܳܢܳܐ ܓܰܒܝܳܐ ܕܺܐܝܬ ܗܘܳܐ ܠܶܗ ܒܛܰܠܝܽܘܬܶܗ ܐܽܘܡܳܢܽܘܬܳܐ ܕܥܳܡܶܕ ܗܘܳܐ ܒܝܰܡܳܐ ܘܡܰܣܶܩ ܗܘܳܐ ܡܰܪ̈ܓܳܢܝܳܬܳܐ ܝܰܩܺܝܪ̈ܳܬ ܕܡܰܝ̈ܳܐ ܘܰܡܢܺܝܚ ܗܘܳܐ ܡ̣ܶܢ ܕܡܰܝ̈ܗܶܝܢ ܠܟܽܠ ܐܰܟܣ̈ܢܳܝܶܐ ܘܡܶܣ̈ܟܺܢܶܐ ܘܥܰܝܺܝ̈ܩܰܝ ܪܽܘܚܳܐ: ܗܳܢܳܐ ܕܰܢܛܰܪ ܗܘܳܐ ܒܛܰܠܝܽܘܬܶܗ ܟܰܪ̈ܡܶܐ ܕܰܒܢ̈ܰܝ ܩܪܺܝܬܶܗ ܐܰܪܒܰܥܣܰܪ ܫܢܰܝ̈ܳܐ ܘܡ̣ܶܢ ܥܶܢ̈ܒܶܐ ܕܺܝܠܗܽܘܢ ܠܐ ܐܶܟܰܠ: ܗܳܢܳܐ ܕܰܨܒܳܐ ܡܳܪܝܳܐ ܡܪܰܚܡܳܢܳܐ ܕܢܶܗܘܶܐ ܪܺܝܫܳܐ ܠܣܺܝܥܬܳܐ ܫܰܒܥܺܝܢܳܝܬܳܐ ܟܰܕ ܫܰܪܺܝ ܡ̣ܶܢ ܕܰܝܪܳܐ ܕܰܐܒܳܐ ܦܰܟܽܘܡܺܝܽܘܣ ܘܰܪܕܰܘ ܐܶܬܰܘ ܘܫܰܪܺܝܘ ܒܦܽܘܠܚܳܢܳܐ ܕܚܰܝ̈ܶܐ ܘܥܰܡܠܐ ܕܙܰܕܺܝܩܽܘܬܳܐ: ܗܳܢܳܐ ܕܡ̣ܶܢ ܬܰܡܳܢ ܫܰܪܺܝ ܗܘܳܐ ܒܟܽܘܢܳܫܳܐ ܕܓܰܒܪ̈ܶܐ ܐܠܰܗܳܝ̈ܶܐ ܘܰܩܪ̈ܰܒܬܳܢܶܐ ܘܰܙܪ̈ܺܝܙܶܐ ܗܳܠܶܝܢ ܕܡܰܩܪܒܺܝܢ ܥܰܡ ܫܺܐܕ̈ܶܐ: ܗܳܢܳܐ ܕܡ̣ܶܢ ܡܶܨܪܶܝܢ ܐܶܬܘܰܥܰܕܘ ܓܰܒܪ̈ܶܐ ܕܥܰܡܶܗ ܘܥܰܠ ܐܰܒܕܳܢܳܐ ܕܰܦܬܰܟܪܽܘܬܳܐ ܐܰܫܘܺܝܘ ܟܰܬܦܳܐ ܘܝܰܗܒܘ ܫܽܘܘܕܳܝܳܐ ܕܰܥܕܰܡܳܐ ܠܰܕܡܳܐ ܕܨܰܘܪ̈ܰܝܗܽܘܢ ܠܐ ܢܶܪܚܩܽܘܢ ܡ̣ܶܢ ܚܽܘܒܶܗ ܕܰܡܫܺܝܚܳܐ ܐܠܰܗܳܐ: ܘܰܡܛܰܘ ܟܽܠܗܽܘܢ ܠܡܰܕܢܚܳܐ ܕܚܶܫܽܘܟܳܐ ܗܘܳܬ ܒܥܰܝ̈ܡܶܐ ܕܛܳܥܝܽܘܬܳܐ: ܘܰܣܒܺܝܣܳܐ ܗܘܳܬ ܒܕܶܚܠܰܬ݀ ܫܺܐܕ̈ܶܐ ܘܝܽܘܠܦܳܢܳܐ ܙܰܦܪܳܐ ܘܰܢܕܺܝܕܳܐ ܕܰܦܬܰܟܪܽܘܬܳܐ: ܗ̇ܳܢܽܘܢ ܕܟܰܕ ܪܕܰܘ ܘܶܐܬܰܘ ܠܰܦܢܺܝܬܳܐ ܕܡܰܕܢܚܳܐ ܣܥܰܪܘ ܗܘܰܘ ܒܽܐܘܪܰܚܗܽܘܢ: ܬܶܕܡܪ̈ܳܬܳܐ ܬܡܺܝ̈ܗܳܬܳܐ ܘܰܓܢ̱ܒܰܪ̈ܘܳܬܳܐ ܟܰܕ ܡܺܝ̈ܬܶܐ ܡܩܺܝܡܺܝܢ ܗܘܰܘ: ܟܰܕ ܠܰܟܪ̈ܺܝܗܶܐ ܡܰܚܠܡܺܝܢ ܗܘܰܘ: ܟܰܕ ܓܰܪ̈ܒܳܢܶܐ ܡܕܰܟܶܝܢ ܗܘܰܘ: ܟܰܕ ܡܫܰܪ̈ܰܝܳܐ ܡܚܰܝܨܺܝܢ ܗܘܰܘ: ܟܰܕ ܠܰܣܡܰܝ̈ܳܐ ܥܰܝ̈ܢܶܐ ܕܺܝܠܗܽܘܢ ܡܦܰܬܚܺܝܢ ܗܘܰܘ: ܟܰܕ ܠܕܽܘ̈ܓܶܐ ܘܚܰܪ̈ܫܶܐ ܡܰܫܡܥܺܝܢ ܗܘܰܘ: ܘܟܰܕ ܠܟܽܠ ܟܺܐܒ ܘܟܽܘܪܗܳܢ ܕܰܒܢܰܝ̈ܢܳܫܳܐ ܡܰܟܰܐܒ̈ܶܐ ܕܠܐ ܥܶܩܳܪ̈ܶܐ ܘܣܰܡ̈ܡܳܢܶܐ ܒܚܰܝܠܐ ܕܶܐܬܺܝܗܶܒ ܠܗܽܘܢ ܡ̣ܶܢ ܡܫܺܝܚܳܐ ܐܠܰܗܳܐ ܕܥܰܠ ܟܽܠ ܡܳܪܳܐ ܕܺܝܠܗܽܘܢ ܡܰܐܣܶܝܢ ܗܘܰܘ ܘܛܳܪܕܺܝܢ ܗܘܰܘ: ܗܶܢܽܘܢ ܕܟܰܕ ܡܛܰܘ ܗܘܰܘ ܥܰܡ ܪܰܒܳܐ ܘܪܺܝܫܳܐ ܕܺܝܠܗܽܘܢ ܡܳܪܝ ܐܰܘܓܺܝܢ ܠܛܽܘܪܳܐ ܕܺܐܝܙܠܐ: ܬܰܠܡܶܕܘ ܗܘܰܘ ܘܰܐܥܡܶܕܘ ܠܟܽܠܗܽܘܢ ܒܢ̈ܰܝ ܐܰܬܪܳܐ ܘܰܠܥܳܡܪ̈ܰܝ ܛܽܘܪ̈ܶܐ ܕܰܒܛܽܘܪ̈ܶܝ ܐܺܝܙܠܐ: ܘܟܽܠܗܽܘܢ ܚܰܢ̈ܦܶܐ ܕܰܒܗܰܘ ܐܰܬܪܳܐ ܘܰܗܘܰܘ ܟܽܠܗܽܘܢ ܟܪ̈ܺܝܣܛܝܳܢܶܐ ܫܰܪܺܝܪ̈ܶܐ: ܘܰܒܢܰܘ ܒܶܗ ܥܽܘܡܪ̈ܶܐ ܘܕܰܝܪ̈ܳܬܳܐ ܐܰܝܟ ܟܰܘܟ̈ܒܰܝ ܫܡܰܝܳܐ: ܘܠܐ ܒ̈ܳܛܠܳܢ ܗܘܰܝ̈ ܠܐ ܒܠܺܠܝܳܐ ܘܠܐ ܒܺܐܝܡܳܡܳܐ ܡ̣ܶܢ ܫܰܗܪܳܐ ܘܡ̣ܶܢ ܙܽܘܡܳܪܳܐ: ܥܕܰܡܳܐ ܕܰܗܘܰܝ̈ ܫܽܘܘܙܳܒܳܐ ܘܒܶܝܬ ܓܰܘܣܳܐ ܘܰܠܡܺܐܢܳܐ: ܠܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܕܶܐܬܓܰܘܰܣܘ ܒܗܽܘܢ: ܗ̇ܳܢܽܘܢ ܕܬܰܠܡܶܕܘ ܠܰܡܕܺܝܢ̱ܬܳܐ ܢܨܺܝܒܺܝܢ ܕܒܶܝܬ ܬܚܽܘ̈ܡܶܐ ܘܰܐܥܡܶܕܘ ܠܥܳܡܽܘܪ̈ܶܝܗ̇ ܘܰܟܠܰܘ ܡܶܢܳܗ̇ ܡܰܘܬܳܢܳܐ ܕܰܛܠܳܝ̈ܶܐ: ܘܰܐܦܢܺܝܘ ܠܟܽܠܗܽܘܢ ܐ̱ܢܳܫ̈ܳܐ ܕܒܰܡܕܺܝܢ̱ܬܳܐ ܠܐܘܪܚܳܐ ܕܰܫܪܳܪܳܐ: ܗܳܢܳܐ ܓܰܒܝܳܐ ܡܳܪܝ ܐܰܘܓܺܝܢ ܕܶܐܬܳܐ ܠܶܗ ܓܶܠܝܳܢܳܐ ܡ̣ܶܢ ܐܠܰܗܳܐ: ܕܰܢܦܰܠܓܺܝܗ̇ ܕܶܝܢ ܠܟܽܠܳܗ̇ ܡܰܕܢܚܳܐ ܒܰܝܢܳܬ ܬܰܠܡܺܝ̈ܕܰܘܗܝ: ܕܙܰܪܥܳܐ ܕܒܺܝܫܳܐ ܒܡܰܕܢܚܳܐ ܐܶܚܰܕ ܢܽܘܡܺܝ ܡܽܘܓܺܝ ܐܶܫܬܰܪܬܰܚ: ܐܰܝܟܰܢܳܐ ܕܰܢܬܰܠܡܕܽܘܢܳܗ̇ ܘܢܶܥܪܩܽܘܢ ܡܶܢܳܗ̇ ܚܰܢܦܽܘܬܳܐ ܘܟܽܠܶܗ ܝܽܘܠܦܳܢܳܐ ܢܕܺܝܕܳܐ ܕܛܳܥܝܽܘܬܳܐ: ܘܢܰܦܢܽܘܢ ܘܢܰܥܡܕܽܘܢ ܠܟܽܠ ܥܰܡܡܺܝ̈ܢ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܢܳܐ ܕܩܰܒܶܠ ܐ̱ܪ̈ܳܙܰܝ ܢܒܺܝܽܘܬܳܐ ܘܰܓܠܐ ܘܒܰܕܶܩ ܥܰܠ ܙܰܒ̈ܢܶܐ ܘܡܰܠܟ̈ܶܐ: ܘܚܰܘܺܝ ܥܬܺܝ̈ܕܳܬܳܐ ܠܕܳܪ̈ܶܐ ܕܳܐܬܶܝܢ: ܗܳܢܳܐ ܕܡܰܒܽܘܥܳܐ ܕܡܰܪܕܶܐ ܚܰܝ̈ܶܐ ܘܚܽܘܠܡܳܢ̈ܶܐ ܠܟܽܠܶܗ ܥܳܠܡܳܐ ܘܟܽܠ ܕܶܐܫܬܺܝ ܡ̣ܶܢ ܚܰܠܝܽܘܬܳܐ ܕܝܽܘܠܦܳܢܶܗ ܠܐ ܨܗܺܝ ܠܥܳܠܰܡ: ܗܳܢܳܐ ܕܚܰܘܺܝ ܠܡܰܠܟ̈ܶܐ ܐܽܘܪܚܳܐ ܕܰܫܪܳܪܳܐ: ܘܰܐܣܺܝ ܠܟܽܠ ܟܪ̈ܺܝܗܶܐ ܘܰܐܠܺܝ̈ܨܶܐ ܕܶܐܬܩܰܪܰܒܘ ܠܶܗ: ܘܗܰܝܡܶܢܘ ܟܽܠܗܽܘܢ ܥܰܡ̈ܡܶܐ ܘܶܐܡܘ̈ܳܬܳܐ ܕܡ̣ܶܢ ܐܠܰܗܳܐ ܐܶܫܬܰܕܰܪ ܠܰܦܢܺܝܬܳܐ ܗܳܕܶܐ: ܗܳܢܳܐ ܕܰܗܘܳܐ ܠܟܽܠܶܗ ܥܳܠܡܳܐ ܒܢܽܘܗܪܳܐ ܕܝܽܘܠܦܳܢܶܗ ܐܠܰܗܳܝܳܐ: ܒܶܝܬ ܐܺܝܕܰܘ̈ܗܝ ܘܰܕܬܰܠܡܺܝ̈ܕܶܐ ܕܺܝܠܶܗ ܓܒܰܝ̈ܳܐ ܘܩܰܕܺܝ̈ܫܶܐ: ܘܟܰܕ ܠܰܫܠܳܡܶܗ ܩܰܕܺܝܫܳܐ ܟܽܠܰܢ ܣܳܘܚܺܝܢܰܢ ܒܰܒ̈ܢܳܬ ܩ̈ܳܠܐ ܪ̈ܽܘܚܳܢܝܳܬܳܐ ܩܳܥܶܝܢܰܢ ܘܳܐܡܪܺܝܢܰܢ: ܬܳܐ ܒܰܫܠܳܡܳܐ ܣܳܒܳܐ ܙܰܗܝܳܐ ܡܳܪܝ ܐܰܘܓܺܝܢ ܕܰܒܡܰܪܓܳܢܺܝܬܳܟ ܥܺܕܬܳܐ ܩܰܕܺܝܫܬܳܐ ܚܬܺܝܪܳܐ ܘܡܶܫܬܰܒܗܪܳܐ ܕܰܐܝܟ ܬܳܓܳܐ ܡܰܕܗܒܳܐ ܘܰܟܠܺܝܠܐ ܡܦܰܬܟܳܐ ܒܪܺܝܫܳܗ̇ ܣܺܝܡ ܐܰܢ̱ܬ: ܘܰܐܝܟ ܗܰܡܢܺܝܟܳܐ ܘܚܰܙܽܘܪ ܕܰܗܒܳܐ ܒܨܰܘܪܳܗ̇ ܬܠܐܷ ܐܰܢ̱ܬ ܟܰܕ ܡܰܒܪܶܩ ܐܰܢ̱ܬ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܦܰܟܽܘܡܝܳܐ ܕܰܙܟܰܝܬ ܠܢܽܘܪܳܐ ܡܫܰܠܗܰܒܬܳܐ ܕܰܒܦܽܘܪܢܳܐ ܘܟܰܕ ܚܙܳܟ ܕܰܝܪܳܝܳܐ ܫܰܒܬܳܝܳܐ ܬܗܰܪ ܘܶܐܬܕܰܡܰܪ ܘܰܢܦܰܠ ܥܰܠ ܪ̈ܶܓܠܰܝܟ ܩܰܕܺܝ̈ܫܳܬܳܐ: ܘܟܰܕ ܝܺܕܰܥܬ ܕܰܥܬܺܝܕ ܐܰܢ̱ܬ ܕܬܶܬܩܰܠܰܣ ܡ̣ܶܢ ܐܰܚܽܘܬܳܐ ܥܪܰܩܬ ܠܳܟ ܡ̣ܶܢ ܕܰܝܪܳܐ ܕܰܐܒܳܐ ܦܰܟܽܘܡܺܝܽܘܣ ܟܰܕ ܠܐ ܐ̱ܢܳܫ ܐܰܪܓܶܫ ܒܳܟ: ܬܳܐ ܒܰܫܠܳܡܳܐ ܩܰܕܺܝܫܳܐ ܡܳܪܝ ܐܰܘܓܺܝܢ ܐܺܝܓܽܘܦܛܳܝܳܐ ܕܰܓܒܰܝܬ ܠܳܟ ܫܰܒܥܺܝܢ ܘܰܬܪܶܝܢ ܬܰܠܡܺܝ̈ܕܶܐ ܥܰܡܽܘ̈ܕܶܐ ܕܰܐܦܢܺܝܘ ܠܛܳܥܰܝ̈ܳܐ ܠܺܝܕܰܥܬܳܐ ܕܰܒܚܰܕ ܐܠܰܗܳܐ ܫܰܪܺܝܪܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܩܠܽܘܙܡܳܝܳܐ ܕܰܪܕܰܝܬ ܡ̣ܶܢ ܡܶܨܪܶܝܢ: ܘܡܰܢܰܥܬ ܠܰܢܨܺܝܒܺܝܢ ܗ̇ܳܝ ܕܒܶܝܬ ܬܚܽܘ̈ܡܶܐ ܘܰܣܥܰܪܬ ܒܳܗ̇ ܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܘܰܡܫܰܚܬܽܘܢ ܘܫܰܟܠܶܠܬܽܘܢ: ܘܰܐܩܺܝܡܬܽܘܢ ܠܗܰܝܟܠܐ ܪܰܒܳܐ ܕܒܰܢܨܺܝܒܺܝܢ ܡܕܺܝܢ̱ܬܳܐ ܕܒܶܝܬ ܐܺܝܕܰܝ̈ ܡܳܪܝ ܝܰܥܩܽܘܒ ܐܶܬܩܰܝܰܡ ܘܶܐܬܩܰܕܰܫ ܗ̇ܰܘ ܕܺܐܝܬܰܘܗܝ ܗܘܳܐ ܡܕܰܒܪܳܢܳܐ ܐܳܦ ܪܺܝܫ ܟܳܗ̈ܢܶܐ ܕܺܝܠܳܗ̇ ܕܰܡܕܺܝܢ̱ܬܳܐ ܕܰܢܨܺܝܒܺܝܢ: ܘܡ̣ܶܢ ܓܶܢܣܳܐ ܐܳܦ ܛܽܘܗܡܳܐ ܕܝܰܥܩܽܘܒ ܐܰܚܽܘܗܝ ܕܡܳܪܰܢ ܐܺܝܬܰܘܗܝ ܗܘܳܐ: ܟܰܕ ܡܰܠܐܟܳܐ ܕܡܳܪܝܳܐ ܥܰܡܗܽܘܢ ܡܳܫܰܚ ܗܘܳܐ ܡܫܽܘܚܬܶܗ ܕܗܰܝܟܠܐ ܘܰܒܟܽܠ ܡܶܕܶܡ ܡܥܰܕܰܪ ܗܘܳܐ ܠܗܽܘܢ: ܘܡ̣ܶܢ ܢܨܺܝܒܺܝܢ ܡܰܢܰܥܬ ܘܰܣܠܶܩܬ ܠܛܽܘܪ̈ܰܝ ܐܺܝܙܠܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܕܒܢܰܝܬ ܥܽܘܡܪ̈ܶܐ ܘܕܰܝܪ̈ܳܬܳܐ ܒܰܦܢܺܝܬ ܡܰܕܢܚܳܐ ܐܰܝܟ ܟܰܘܟ̈ܒܰܝ ܫܡܰܝܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܩܠܽܘܙܡܳܝܳܐ ܕܗܰܠܶܟܬ ܥܰܠ ܡܰܝ̈ܳܐ ܕܕܶܩܠܰܬ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ: ܘܦܰܨܺܝܬ ܠܐܠܦ̈ܶܐ ܘܪ̈ܶܒܘܳܬܳܐ ܡ̣ܶܢ ܛܽܘܒܳܥܳܐ ܕܰܚܛܺܝܬܳܐ ܘܰܒܛܽܘܪܳܐ ܪܳܡܳܐ ܐܰܣܓܺܝܬ ܛܳܒ̈ܳܬܳܐ: ܘܰܣܥܰܪܬ ܐܳܬܘ̈ܳܬܳܐ ܘܬܶܕܡܪ̈ܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܡܶܨܪܳܝܳܐ ܕܰܒܢܰܝܬܽܘܢ ܥܺܕܬܳܐ ܪܰܒܬܳܐ ܒܕܽܘܟܰܬ ܟܶܐܘܶܝܠܐ ܟܰܕ ܕܒܰܪܬ ܒܰܠܘܺܝܬܟ ܠܡܳܪܝ ܝܰܥܩܽܘܒ ܐܶܦܣܩܽܘܦܳܐ ܕܰܢܨܺܝܒܺܝܢ ܘܰܠܡܳܪܝ ܫܰܠܺܝܛܳܐ ܘܰܠܣܳܒ̈ܶܐ ܐ̱ܚܪ̈ܳܢܶܐ ܓܡܺܝܪ̈ܶܐ ܘܰܐܠܳܗܳܝ̈ܶܐ: ܟܰܕ ܕܶܝܢ ܢܰܚܶܡܬܽܘܢ ܠܡܺܝܬܳܐ ܗ̇ܰܘ ܕܶܐܬܒܠܰܥ ܡ̣ܶܢ ܬܰܢܺܝܢܳܐ ܒܶܝܬ ܐܺܝ̈ܕܰܝ ܡܳܪܝ ܫܰܠܺܝܛܳܐ ܕܛܳܫ ܠܶܗ ܡ̣ܶܢ ܚܢܳܢܳܐ ܕܥܰܡܶܗ: ܕܟܰܕ ܒܥܳܒܳܐ ܐܺܝܬܰܘܗܝ ܗܘܳܐ ܥܰܡ ܐܰܚܽܘܗܝ: ܘܰܐܥܡܶܕ ܘܰܩܪܰܝܬ ܠܶܗ ܫܡܳܐ ܐܰܚܺܝ ܡܳܪܶܗ: ܘܰܩܛܰܠܬܽܘܢ ܠܬܰܢܺܝܢܳܐ ܕܣܰܓܺܝ ܥܰܫܺܝܢ ܗܘܳܐ: ܘܟܽܠ ܕܰܚܙܳܐ ܠܬܶܕܡܽܘܪܬܳܐ ܗܳܕܶܐ ܗܰܝܡܶܢ ܗܘܳܐ ܒܶܝܬ ܐܺܝܕܰܝ̈ܟܽܘܢ: ܘܰܐܦܢܰܝܬ ܐܶܢܽܘܢ ܠܩܰܪ̈ܕܘܳܝܶܐ ܠܐܘܪܚܳܐ ܕܚܰܝ̈ܶܐ ܕܢܺܚܽܘܢ ܒܳܗ̇ ܠܥܳܠܰܡ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܕܰܐܚܺܝܬ ܬܠܳܬܳܐ ܡܺܝ̈ܬܶܐ ܘܰܒܗܳܕܶܐ ܦܢܺܝܬܳܐ ܐܰܦܢܺܝܬ ܠܥ̈ܰܛܠܐ ܠܗܰܝܡܳܢܽܘܬܳܐ ܫܰܪܺܝܪܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܘܓܺܝܢ ܣܳܒܳܐ ܡܫܰܒܚܳܐ ܘܰܗܕܺܝܪ ܚܶܘܳܪ̈ܳܬܳܐ ܐܰܒܪ̈ܳܗܳܡܳܝܳܬܳܐ: ܘܟܰܕ ܠܰܫܠܳܡܳܟ ܠܐ ܡܰܘܦܶܝܢܰܢ ܠܘܳܬ ܛܽܘ̈ܒܰܝܟ ܛܽܘܒ̈ܬܳܢܶܐ ܚܳܒܨܺܝܢܰܢ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܪܺܝܫ ܣܺܝܥܬܳܐ ܫܰܒܥܺܝܢܳܝܬܳܐ ܕܫܰܒܥܺܝܢ ܦܽܘܡܺܝ̈ܢ ܘܠܶܫܳܢܺܝ̈ܢ ܠܐ ܡܨܶܝܢ ܣܳܦܩܺܝܢ ܠܛܽܘܒܳܟ ܪܰܒܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܕܣܳܡܳܟ ܡܫܺܝܚܳܐ ܥܰܡܽܘܕܳܐ ܕܥܺܕܬܳܐ ܩܰܕܺܝܫܬܳܐ ܘܪܳܥܝܳܐ ܥܺܝܪܳܐ ܕܕܰܒܰܪ ܠܥܳܢ̈ܶܗ ܥܰܠ ܡܰܪ̈ܓܶܐ ܪ̈ܽܘܚܳܢܳܝܶܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܦܳܥܠܐ ܟܰܫܺܝܪܳܐ ܕܰܦܠܰܚ ܒܟܰܪܡܳܐ ܕܡܳܪܶܗ ܘܰܢܣܰܒ ܟܰܟܪ̈ܶܐ ܥܣܺܝܪ̈ܳܝܳܬܳܐ ܐܰܟܡܳܐ ܕܶܐܡܰܪ ܒܶܐܘܢܓܶܠܝܽܘܢ ܩܰܕܺܝܫܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܟܳܪܽܘܙܳܐ ܪܰܒܳܐ ܘܰܫܒܺܝܚܳܐ ܘܰܡܫܰܒܚܳܐ ܕܬܰܠܡܺܝ̈ܕܰܝܟ ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ ܐܰܦܢܺܝܘ ܠܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܕܚܰܕ ܡ̣ܶܢ ܥܰܡܽܘ̈ܕܶܐ ܕܰܐܟܬܶܒ ܩܽܘܣܛܰܢܛܺܝܢܳܘܣ ܡܰܠܟܳܐ ܙܰܟܳܝܳܐ ܐܰܢ̱ܬ ܐܺܝܬܰܝܟ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܪܺܝܫܳܐ ܪܰܒܳܐ ܕܦܰܪܣܺܝܬ ܘܰܕܚܰܝܬ ܠܟܽܠܗܶܝܢ ܕܶܚ̈ܠܳܬܳܐ ܣܪ̈ܺܝܩܳܬܳܐ ܘܶܐܪ̈ܶܣܺܝܣ ܫܰܩܳܪ̈ܳܬܳܐ ܘܡܰܢܥܰܬ݀ ܐܠܶܦܳܟ ܠܰܠܡܺܐܢ ܚܰܕ̈ܘܳܬܳܐ: ܐܶܠܐ ܐܰܢ̱ܬ ܚܽܘܪ ܒܰܢ ܒܥܰܝܢܳܐ ܕܪ̈ܰܚܡܶܐ ܘܫܰܕܰܪ ܠܰܢ ܟܽܠ ܒܽܘܪ̈ܟܳܬܳܐ ܘܟܽܠ ܛܳܒ̈ܳܬܳܐ: ܘܰܐܛܶܠ ܥܠܰܝܢ ܝܰܡܺܝܢܳܟ ܕܒܳܗ̇ ܒܰܪܶܟܬ ܠܟܽܠܳܗ̇ ܡܰܪܥܺܝܬܳܟ: ܐܰܣܳܐ ܘܰܐܚܠܶܡ ܠܐܝܠܶܝܢ ܕܰܟܪܺܝܗܺܝܢ ܘܰܡܚܺܝܠܺܝܢ: ܘܢܶܗܘܶܐ ܠܰܢ ܝܰܘܡܳܐ ܗܳܢܳܐ ܕܕܽܘܟܪܳܢܳܟ ܐܳܘ ܐܰܒܽܘܢ ܡܳܪܝ ܐܰܘܓܺܝܢ ܥܺܐܕܳܐ ܪܰܒܳܐ ܘܥܰܕܥܺܐܕ ܡܰܠܟܳܐ: ܫܰܝܢܳܐ ܟܰܗܺܝܢܳܐ ܒܰܨܠܰܘ̈ܳܬܳܟ ܢܶܫܬܰܘܫܰܛ: ܥ̈ܰܠܠܳܬܰܢ ܐܳܦ ܐܰܕܪ̈ܳܬܰܢ ܘܟܰܪ̈ܡܰܝܢ ܘܚܰܩ̈ܠܳܬܰܢ ܒܒܳܥ̈ܘܳܬܳܟ ܢܶܫܬܰܪ̈ܬܚܳܢ: ܨܠܰܘ̈ܳܬܰܢ ܘܒܳܥ̈ܘܳܬܰܢ ܒܺܐܝ̈ܕܰܝܟ ܢܶܬܩܰܒ̈ܠܳܢ: ܘܥܰܠ ܟܽܠܶܗ ܟܶܢܫܰܢ ܕܚܳܕܶܐ ܒܥܰܕܥܺܐܕܳܟ: ܢܺܐܬܶܐ ܠܶܗ ܚܢܳܢܳܐ ܘܪ̈ܰܚܡܶܐ ܡ̣ܶܢ ܒܶܝܬ ܓܰܙܶܗ ܕܡܳܪܳܟ: ܘܚܽܘܣܳܝܳܐ ܘܫܽܘܒܩܳܢܳܐ ܕܣܰܟܠܘ̈ܳܬܳܐ ܘܒܽܘܨܳܪ̈ܶܐ ܕܺܝܠܰܢ: ܘܰܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܦܪܰܫܘ ܡ̣ܶܢ ܒܰܝܢܳܬܰܢ: ܘܟܽܠܰܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܐܒܳܐ ܡܚܰܝܠܳܢܳܟ: ܘܠܰܒܪܳܐ ܚܰܝܳܐ ܡܢܰܨܚܳܢܳܟ: ܘܰܠܪܽܘܚܳܐ ܩܰܕܺܝܫܳܐ ܡܟܰܠܠܳܢܳܟ: ܗܳܫܳܐ܀

 

 

 

ܥܛܪܐ

 

 

 

ܗܘܺܝ ܚܠܳܦܰܝܢ ܒܰܥܳܝܳܐ ܘܰܡܦܺܝܣܳܢܳܐ ܠܡܳܪܳܟ ܓܰܒܝܳܐ ܡܳܪܝ ܐܰܘܓܺܝܢ ܐܰܝܟܰܢܳܐ ܕܢܶܬܪܰܥܶܐ ܠܰܢ ܠܰܡܚܺܝ̈ܠܐ ܕܙܰܝܰܚܢܰܢ ܠܕܽܘܟܪܳܢܳܟ ܝܰܘܡܳܢܳܐ ܒܥܺܕܬܳܐ ܩܰܕܺܝܫܬܳܐ ܕܰܢܩܰܒܶܠ ܦܺܝܪܡܰܢ ܘܰܨܠܰܘ̈ܳܬܰܢ ܘܢܰܥܒܰܪ ܡܶܢܰܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܢܶܙܓܽܘܪ ܡܶܢܰܢ ܠܪ̈ܽܘܚܶܐ ܒܺܝ̈ܫܳܬܳܐ ܘܟܽܠܗܶܝܢ ܣܰܩܽܘ̈ܒܠܳܝܳܬܳܐ: ܘܢܰܫܦܰܥ ܥܠܰܝܢ ܪ̈ܰܚܡܶܐ ܘܰܚܢܳܢܳܐ ܡ̣ܶܢ ܒܶܝܬ ܓܰܙܶܗ ܕܡܳܪܳܟ: ܕܥܰܬܺܝܪ ܒܟܽܠ ܛܳܒ̈ܳܬܳܐ ܣܒܺܝ̈ܣܳܬܳܐ: ܐܰܝܟܰܢܳܐ ܕܰܕܠܐ ܫܶܠܝܳܐ ܢܫܰܒܰܚ ܘܰܢܪܰܡܪܶܡ ܠܰܡܫܺܝܚܳܐ ܐܠܰܗܳܐ ܕܰܓܒܳܟ: ܘܨܶܒܬܳܟ ܒܟܽܠ ܡܝܰܬܪ̈ܳܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀

 

 

 

ܚܘܬܡܐ

 

 

 

ܡܫܺܝܚܳܐ ܐܠܰܗܳܐ ܕܰܒܚܰܝܠܳܟ ܐܶܬܚܰܝܰܠ ܘܶܐܙܕܰܝܰܢ ܒܙܰܝܢܳܟ ܠܐ ܡܶܙܕܰܟܝܳܢܳܐ ܓܰܒܝܳܐ ܡܳܪܝ ܐܰܘܓܺܝܢ ܣܳܒܳܐ ܙܰܗܝܳܐ: ܘܕܳܫ ܠܪܺܝܫܶܗ ܕܰܛܪܽܘܢܳܐ ܡܳܪܽܘܕܳܐ: ܘܰܠܟܽܠܗܶܝܢ ܨܶܢܥ̈ܳܬܶܗ ܡܰܘܒ̈ܕܳܢܝܳܬܳܐ: ܐܰܢ̱ܬ ܡܳܪܝ ܒܪ̈ܰܚܡܰܝܟ ܣܰܓܺܝ̈ܶܐܐ ܫܰܟܶܢ ܠܰܢ ܙܰܒ̈ܢܶܐ ܡܫܰܝ̈ܢܶܐ ܘܒܰܣܺܝ̈ܡܶܐ: ܘܚܽܘܣܳܝܳܐ ܠܰܢ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܒܳܟ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ ܠܰܡܫܺܝܚܳܐ ܪܳܥܝܳܐ ܛܳܒܳܐ: ܘܪܺܝܫ ܥܰܠܠܳܢ̈ܶܐ ܕܰܓܒܳܐ ܠܶܗ ܪ̈ܳܥܰܘܳܬܳܐ ܒܚܺܝܪ̈ܶܐ ܘܥܰܠܠܳܢ̈ܶܐ ܩܳܝ̈ܡܰܝ ܒܰܐܦ̈ܶܐ ܘܣܳܝ̈ܓܰܝ ܬܽܘܪ̈ܥܳܬܳܐ ܕܥܳܢ̈ܳܐ ܡܠܺܝܠܬܳܐ ܘܰܡܫܰܩܰܦܬܳܐ: ܗܳܢܳܐ ܕܚܰܕ ܡܶܢܗܽܘܢ ܐܺܝܬܰܘܗܝ ܪܺܝܫܳܐ ܪܰܒܳܐ ܘܛܒܺܝܒܳܐ ܓܰܒܝܳܐ ܘܢܰܨܺܝܚܳܐ ܕܩܽܘܫܬܳܐ: ܕܡ̣ܶܢ ܛܰܠܝܽܘܬܶܗ ܘܰܥܕܰܡܳܐ ܠܣܰܝܒܽܘܬܶܗ ܫܰܪܺܝ ܦܳܠܰܚ ܒܟܰܪܡܶܗ ܕܰܡܫܺܝܚܳܐ: ܘܰܥܩܰܪ ܘܰܥܝܳܕ ܝܰܥܪܳܐ ܘܙܺܝ̈ܙܳܢܶܐ ܕܚܰܢܦܽܘܬܳܐ: ܡ̣ܶܢ ܠܶܒܰܘ̈ܳܬܳܐ ܕܐ̱ܢܳܫܽܘܬܳܐ: ܘܡܳܠܐܷ ܠܗܶܝܢ ܣܰܒܪܳܐ ܘܚܽܘܒܳܐ ܘܗܰܝܡܳܢܽܘܬܳܐ: ܘܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܡܰܠܦܳܢܽܘܬܳܐ ܫܠܺܝܚܳܝܬܳܐ: ܕܠܶܗ ܠܗܰܘ ܕܰܓܒܳܝܗܝ ܘܰܐܩܺܝܡܶܗ ܒܶܪܝ ܓܽܘܕܳܐ ܫܰܒܥܺܝܢܳܝܬܳܐ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

 

ܘܟܰܕ ܠܩܽܘܠܳܣܰܘ̈ܗܝ ܕܪܰܒ ܒܰܐܬܠܺܝ̈ܛܶܐ ܘܰܓܒܶܐ ܒܰܓܒܰܝ̈ܳܐ ܘܪܺܝܫ ܟܳܗ̈ܢܶܐ ܡܥܰܠܝܳܐ ܘܰܩܪܰܒܬܳܢܳܐ ܙܪܺܝܙܳܐ ܡܳܪܝ ܐܰܘܓܺܝܢ ܨܳܒܶܝܢܰܢ ܠܰܡܩܰܠܳܣܽܘ: ܘܰܠܟܽܠܳܗ̇ ܣܺܝܣܰܪܬܳܐ ܥܰܡ ܚܽܘܓܬܳܐ ܕܛܽܘ̈ܒܳܢܶܐ ܗ̇ܳܢܽܘܢ ܕܶܐܬܢܰܩܰܦܘ ܠܶܗ ܘܶܐܬܰܘ ܒܰܠܘܺܝܬܶܗ ܘܶܐܬܬܰܠܡܰܕܘ ܘܶܐܬܚܰܒܰܪܘ ܠܶܗ ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܪܰܡܪܡܺܝܢܰܢ: ܩܰܕܡܳܐܝ̣ܬ ܠܪܺܝܫ ܟܳܗ̈ܢܶܐ ܡܥܰܠܝܳܐ ܘܩܰܕܡܳܝܳܐ ܕܰܠܗܽܘܢ ܡܳܪܝ ܝܰܥܩܽܘܒ ܐܶܦܣܩܽܘܦܳܐ ܕܰܢܨܺܝܒܺܝܢ ܡܕܺܝܢ̱ܬܳܐ: ܗ̇ܰܘ ܕܺܐܝܬܰܘܗܝ ܗܘܳܐ ܡ̣ܶܢ ܛܽܘܗܡܳܐ ܡܥܰܠܝܳܐ ܘܩܰܕܺܝܫܳܐ ܘܓܶܢܣܳܐ ܡܫܰܡܗܳܐ ܕܝܰܥܩܽܘܒ ܐܶܦܣܩܽܘܦܳܐ ܕܽܐܘܪܫܠܶܡ ܐܰܚܽܘܗܝ ܕܰܡܫܺܝܚܳܐ: ܘܒܰܪ ܝܰܘܣܶܦ ܟܽܠܰܢ ܠܶܗ ܡܩܰܠܣܺܝܢܰܢ: ܘܥܰܡܶܗ ܕܶܝܢ ܠܡܳܪܝ ܐܰܘܓܺܝܢ ܣܳܒܳܐ ܐܠܰܗܳܝܳܐ: ܗ̇ܰܘ ܕܰܐܝܟ ܫܶܡܫܳܐ ܦܪܰܣ ܙܰܠܺܝ̈ܩܰܘܗܝ ܥܰܠ ܟܽܠܳܗ̇ ܬܺܒܶܝܠ ܕܚܶܫܽܘܟܳܐ ܗܘܳܬ ܒܥܰܝ̈ܡܶܐ ܕܛܳܥܝܽܘܬܳܐ: ܗܳܢܳܐ ܕܶܐܬܚܙܺܝ ܠܗܽܘܢ ܡܰܠܐܟܳܐ ܠܶܗ ܘܰܠܡܳܪܝ ܝܰܥܩܽܘܒ ܕܩܽܘܡܘ ܘܰܒܢܰܘ ܠܺܝ ܗܰܝܟܠܐ ܪܰܒܳܐ ܒܰܢܨܺܝܒܺܝܢ ܡܕܺܝܢ̱ܬܳܐ ܕܒܶܝܬ ܬܚܽܘ̈ܡܶܐ ܘܰܢܚܶܬ ܡܰܠܐܟܳܐ ܠܘܳܬܗܽܘܢ ܘܥܰܡܗܽܘܢ ܡܫܰܚ ܗܘܳܐ ܠܗܰܝܟܠܐ ܘܠܐܣܛܘ̈ܶܐ ܘܰܠܕܳܪ̈ܳܬܳܐ: ܘܰܒܦܽܘܩܕܳܢ ܐܠܰܗܳܐ ܐܶܫܬܰܟܠܰܠ ܐܳܦ ܐܶܫܬܰܡܠܺܝ ܗܰܝܟܠܐ ܪܰܒܳܐ ܘܰܪܘܺܝܚܳܐ ܒܟܺܐܦ̈ܶܐ ܦܣܺܝ̈ܠܳܬܳܐ ܟܰܕ ܡܳܪܝܳܐ ܡܥܰܕܰܪ ܗܘܳܐ ܠܗܽܘܢ ܒܟܽܠܡܶܕܶܡ: ܘܡ̣ܶܢ ܬܰܡܳܢ ܐܶܙܰܠܘ ܒܫܰܘܝܽܘܬܳܐ ܡܳܪܝ ܝܰܥܩܽܘܒ ܘܡܳܪܝ ܐܰܘܓܺܝܢ ܘܡܳܪܝ ܫܰܠܺܝܛܳܐ ܒܰܟܢܺܝܫܽܘܬܳܐ: ܘܰܒܢܰܘ ܕܶܝܢ ܗܰܝܟܠܐ ܪܰܒܳܐ ܒܕܽܘܟܰܬ ܩܺܐܒܽܘܬܳܐ: ܘܟܰܕ ܐܶܙܰܠܘ ܕܰܢܩܰܕܫܽܘܢ ܠܗܰܝܟܠܐ ܒܝܰܘ̈ܡܰܝ ܢܺܝܣܢ: ܘܟܰܕ ܡܛܰܘ ܠܰܣܦܳܪ̈ܰܝ ܕܶܩܠܰܬ ܡܳܪܝ ܝܰܥܩܽܘܒ ܘܡܳܪܝ ܐܰܘܓܺܝܢ ܘܡܳܪܝ ܫܰܠܺܝܛܳܐ ܘܥܰܡܗܽܘܢ ܥܶܣܪܳܐ ܣܳܒ̈ܶܐ ܐܠܰܗܳܝ̈ܶܐ ܒܫܰܘܝܽܘܬܳܐ: ܐܶܬܬܢܺܝܚܘ ܩܰܠܺܝܠ ܥܰܠ ܣܦܳܪ̈ܰܝ ܢܰܗܪܳܐ ܡܶܢ ܠܶܙܬܳܐ ܕܐ̱ܢܳܫܽܘܬܳܐ: ܘܡܳܪܝ ܫܰܠܺܝܛܳܐ ܐܶܬܓܢܺܝ ܗܘܳܐ ܡܶܢܗܽܘܢ ܠܰܚܕܳܐ ܕܽܘܟܬܳܐ: ܕܰܢܫܰܡܠܐܷ ܗܘܳܐ ܩܳܢܽܘܢܳܐ ܕܰܦܣܺܝܩ ܗܘܳܐ ܥܠܰܘܗܝ ܘܰܢܨܰܠܐܷ ܗܘܳܐ ܨܠܽܘܬܳܐ ܕܟܺܝܬܳܐ: ܫܡܰܥ ܩܳܠ ܒܶܟܝܳܐ ܘܚܰܫܳܐ ܪܰܒܳܐ ܒܓܰܘ ܥܳܒܳܐ: ܘܶܐܙܰܠ ܩܰܕܺܝܫܳܐ ܥܰܠ ܩܳܠ ܒܶܟܝܳܐ ܘܰܚܙܳܐ ܥܠܰܝܡܳܐ ܚܰܕ ܡ̇ܰܢ ܒܳܟܶܐ ܘܡܰܝܠܶܠ ܗܘܳܐ ܕܠܐ ܟܳܠܺܝܬܳܐ: ܘܳܐܡܰܪ ܗܘܳܐ ܕܘܳܝ ܠܺܝ ܐܳܚܝ ܡܳܢܳܐ ܓܰܕܫܳܟ ܝܰܘܡܳܢܳܐ: ܕܗܳܐ ܐܰܒܺܝܠ ܐܰܢ̱ܬ ܠܬܰܢܺܝܢܳܐ ܕܰܢܦܰܩ ܡ̣ܶܢ ܗܳܕܶܐ ܡܥܰܪܬܳܐ: ܘܟܰܕ ܚܙܳܐ ܡܳܪܝ ܫܰܠܺܝܛܳܐ ܒܶܟܝܶܗ ܟܶܪܝܰܬ݀ ܠܶܗ ܥܠܰܘܗܝ ܘܰܩܥܳܐ ܒܩܳܠܶܗ ܘܠܳܛܶܗ ܠܬܰܢܺܝܢܳܐ ܘܰܙܥܶܩ ܒܶܗ ܘܶܐܡܰܪ ܠܶܗ: ܠܳܟ ܐܳܡܰܪ ܐ̱ܢܳܐ ܒܰܫܡܶܗ ܕܰܡܫܺܝܚܳܐ ܚܶܘܝܳܐ ܠܺܝܛܳܐ ܘܓܰܪܣܳܐ ܚܰܪܡܳܐ ܐܰܗܦܶܟ ܛܰܠܝܳܐ ܟܰܕ ܠܐ ܡܚܰܒܶܠ ܘܣܺܝܡܳܝܗܝ ܩܕܳܡܰܝ ܒܗܳܕܶܐ ܫܳܥܬܳܐ: ܘܟܰܕ ܫܡܰܥ ܠܺܝܛܳܐ ܫܡܶܗ ܕܰܡܫܺܝܚܳܐ ܐܰܝܬܺܝ ܠܛܰܠܝܳܐ ܘܰܓܣܳܝܗܝ ܩܽܘܕܡܰܘܗܝ ܕܡܳܪܝ ܫܰܠܺܝܛܳܐ ܘܠܰܝܬ ܒܶܗ ܢܰܦܫܳܐ ܘܰܡܚܰܒܶܠ ܘܰܣܪܺܝܚ ܘܰܡܠܐܷ ܣܰܪܝܽܘܬܳܐ: ܘܰܐܦܶܩ ܩܰܕܺܝܫܳܐ ܨܠܺܝܒܳܐ ܕܥܰܡܶܗ ܘܣܳܡ ܥܰܠ ܡܰܝ̈ܳܐ ܘܛܳܫ ܥܰܠ ܡܚܽܘܬܶܗ ܕܡܺܝܬܳܐ: ܘܰܩܥܳܐ ܒܶܗ ܘܶܐܡܰܪ ܛܰܠܝܳܐ ܠܳܟ ܐܳܡܰܪ ܐ̱ܢܳܐ ܩܽܘܡ ܒܰܫܡܶܗ ܕܰܡܫܺܝܚܳܐ ܘܩܳܡ ܡ̣ܶܢ ܡܺܝܬܽܘܬܶܗ ܐܰܝܟ ܕܰܡܟܳܐ ܕܢܳܐܶܕ ܘܩܳܐܶܡ ܡ̣ܶܢ ܕܰܟܝܽܘܬܳܐ: ܘܠܐ ܐܶܬܚܰܙܝܰܬ݀ ܒܶܗ ܐܳܦܠܐ ܚܕܳܐ ܫܽܘܡܬܳܐ ܘܠܐ ܡܚܽܘܬܳܐ ܘܟܰܕ ܚܙܳܐ ܐܰܚܽܘܗܝ ܕܡܺܝܬܳܐ ܠܬܶܕܡܽܘܪܬܳܐ ܗܳܝ ܒܥܰܝܢܰܘ̈ܗܝ ܐܶܬܕܰܡܰܪ ܣܰܓܺܝ ܘܰܗܘܳܐ ܠܶܗ ܒܕܶܚܠܬܳܐ ܘܒܰܪܬܺܝܬܳܐ: ܘܰܢܦܰܠ ܥܰܠ ܪ̈ܶܓܠܰܘܗܝ ܕܩܰܕܺܝܫܳܐ ܡܳܪܝ ܫܰܠܺܝܛܳܐ ܕܰܐܩܺܝܡ ܗܘܳܐ ܠܐܚܽܘܗܝ ܡ̣ܶܢ ܪܰܡܝܽܘܬܳܐ: ܘܟܰܕ ܐܶܙܰܠܘ ܡܳܪܝ ܫܰܠܺܝܛܳܐ ܘܡܺܝܬܳܐ ܥܰܡ ܐܰܚܽܘܗܝ ܠܘܳܬ ܡܳܪܝ ܐܰܘܓܺܝܢ ܘܰܠܘܳܬ ܡܳܪܝ ܝܰܥܩܽܘܒ ܒܰܪܗܺܝܒܽܘܬܳܐ: ܘܫܰܪܺܝ ܐܰܚܽܘܗܝ ܕܡܺܝܬܳܐ ܘܡܶܬܓܰܘܰܣ ܒܩܰܕܺܝ̈ܫܶܐ: ܘܰܡܢܰܫܶܩ ܪ̈ܶܓܠܰܝܗܽܘܢ ܟܰܕ ܡܰܘܕܰܥ ܛܶܒܳܐ ܕܰܐܚܽܘܗܝ ܠܩܰܕܺܝ̈ܫܶܐ ܕܰܐܝܟܰܢ ܐܶܬܢܰܚܰܡ ܘܶܐܬܳܐ ܠܚܰܝ̈ܶܐ ܒܫܰܪܺܝܪܽܘܬܳܐ ܘܰܐܥܡܶܕ ܐܶܢܽܘܢ ܡܳܪܝ ܝܰܥܩܽܘܒ ܠܡܺܝܬܳܐ ܘܠܰܒ̈ܢܰܝ ܩܪܺܝܬܶܗ ܡܘܰܝܠܐ ܒܫܶܡ ܬܠܺܝܬܳܝܽܘܬܳܐ: ܘܰܩܪܰܘ ܠܶܗ ܫܡܳܐ ܠܡܺܝܬܳܐ ܕܰܐܩܺܝܡ ܐܰܚܺܝ ܡܳܪܶܗ ܡ̣ܶܢ ܡܰܥܡܽܘܕܺܝܬܳܐ: ܘܡ̣ܶܢ ܬܰܡܳܢ ܥܒܰܪܘ ܥܰܠ ܕܶܩܠܰܬ ܐܰܝܟ ܕܥܰܠ ܐܰܪܥܳܐ ܝܰܒܺܝܫܬܳܐ: ܘܰܡܛܰܘ ܠܛܽܘܪ̈ܰܝ ܩܰܪܕܽܘ ܘܬܰܠܡܶܕܘ ܘܰܐܥܡܶܕܘ ܠܒܶܝܬ ܩܰܪ̈ܕܘܳܝܶܐ ܘܰܠܒܶܝܬ ܢܽܘܗܰܕܪ̈ܶܐ ܘܰܐܣܓܶܕܘ ܐܶܢܽܘܢ ܠܰܬܠܺܝܬܳܝܽܘܬܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ ܚܕܳܐ ܐܺܝܬܽܘܬܳܐ: ܘܩܰܕܶܫܘ ܗܘܰܘ ܠܗܰܝܟܠܐ ܫܒܺܝܚܳܐ ܘܪܰܒܳܐ ܕܰܒܪܺܝܫ ܩܺܐܒܽܘܬܳܐ: ܘܩܰܕܶܫܘ ܐ̱ܪ̈ܳܙܶܐ ܐܠܰܗܳܝ̈ܶܐ ܘܫܰܘܬܶܦܘ ܐܶܢܽܘܢ ܠܟܽܠܗܽܘܢ ܒܢ̈ܰܝ ܐܰܬܪܳܐ ܒܕܶܒܚܳܐ ܚܰܝܳܐ ܕܰܐܠܳܗܽܘܬܳܐ: ܘܰܐܩܺܝܡ ܠܗܽܘܢ ܟܳܗ̈ܢܶܐ ܙܗܰܝ̈ܳܐ ܘܰܡܫܰܡ̈ܫܳܢܶܐ ܘܰܐܠܶܦ ܐܶܢܽܘܢ ܐܽܘܪܚܳܐ ܕܚܰܝ̈ܶܐ ܕܡܰܘܒܠܐ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܘܗܳܐ ܪܳܥܡܺܝܢ ܝܰܘܡܳܢܳܐ ܒܟܽܠ ܦܶܢ̈ܝܳܬܳܐ ܒܗܰܝܡܳܢܽܘܬܳܐ ܫܠܺܝܚܳܝܬܳܐ: ܕܩܰܒܶܠܘ ܡ̣ܶܢ ܡܳܪܝ ܐܰܘܓܺܝܢ ܘܡܳܪܝ ܝܰܥܩܽܘܒ ܘܚܰܒܪ̈ܰܘܗܝ: ܘܟܽܠܗܽܘܢ ܐܰܬܪ̈ܰܘܳܬܳܐ ܘܣܰܘ̈ܦܶܐ ܕܡܰܕܢܚܳܐ ܘܟܽܠܗܶܝܢ ܕܽܘܟ̈ܝܳܬܳܐ: ܘܰܚܢܰܢ ܚܰܛܳܝ̈ܶܐ ܘܡܰܣܟ̈ܠܳܢܶܐ ܕܠܐ ܣܳܦܩܺܝܢܰܢ ܠܩܽܘܠܳܣܰܝ̈ܗܽܘܢ ܢܶܫܟܰܚ ܪ̈ܰܚܡܶܐ ܘܰܚܢܳܢܳܐ: ܒܝܰܘܡܳܐ ܕܕܺܝܢܳܐ ܒܰܨܠܰܘ̈ܳܬܗܽܘܢ: ܘܢܶܬܦܰܨܶܐ ܡ̣ܶܢ ܓܺܗܰܢܳܐ ܘܡ̣ܶܢ ܬܰܫܢܺܝܩܳܐ ܒܰܦܝ̈ܳܣܳܬܳܐ ܕܺܝܠܗܽܘܢ: ܘܢܶܬܚܰܣܽܘܢ ܚܰܘܒܰܝ̈ܢ ܘܰܚܛܳܗܰܝ̈ܢ: ܒܬܰܟܫ̈ܦܳܬܗܽܘܢ: ܘܢܶܬܬܢܺܝܚܽܘܢ ܥܰܢܺܝ̈ܕܰܝܢ ܕܰܫܟܶܒܘ ܗܘܰܘ ܒܰܬܪܺܝܨܽܘܬ ܫܽܘܒܚܳܐ ܒܡܶܬܟܰܫܦܳܢܽܘܬܗܽܘܢ ܘܟܽܠܰܢ ܢܶܫܬܘܶܐ ܠܚܰܪܬܳܐ ܛܳܒܬܳܐ ܕܰܡܠܺܝܟܳܐ ܠܗܽܘܢ: ܘܢܰܣܶܩ ܫܽܘܒܚܳܐ ܠܐܒܳܐ ܕܰܓܒܳܐ ܐܶܢܽܘܢ: ܘܠܰܒܪܳܐ ܕܟܰܠܶܠ ܐܶܢܽܘܢ: ܘܒܰܟܠܺܝ̈ܠܐ ܕܙܳܟܽܘܬܳܐ ܗܰܕܰܪ ܐܶܢܽܘܢ: ܘܰܠܪܽܘܚܳܐ ܩܰܕܺܝܫܳܐ ܕܫܰܡܠܺܝ ܐܰܓܽܘܢܰܝ̈ܗܽܘܢ: ܗܳܫܳܐ܀

 

 

 

ܥܛܪܐ

 

 

 

ܢܶܒܣܰܡ ܠܳܟ ܡܳܪܝ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܝܰܘܡܳܢܳܐ ܩܰܪܶܒܢܰܢ ܒܥܺܐܕܳܐ ܕܰܪ̈ܚܽܘܡܰܝܟ ܡܳܪܝ ܐܰܘܓܺܝܢ ܘܡܳܪܝ ܝܰܥܩܽܘܒ ܘܡܳܪܝ ܫܰܠܺܝܛܳܐ ܘܚܰܒܪ̈ܰܘܗܝ ܢܶܬܬܢܺܝܚ ܒܶܗ ܨܶܒܝܳܢܳܟ ܛܳܒܳܐ: ܘܢܺܐܬܶܐ ܠܰܢ ܒܶܗ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ: ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ ܕܣܰܟܠܘ̈ܳܬܳܐ: ܘܰܢܝܳܚܳܐ ܢܶܗܘܶܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܒܰܬܪܺܝܨܽܘܬ ܫܽܘܒܚܳܐ ܡܳܪܰܢ ܘܰܐܠܳܗܰܢ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܝܳܗܽܘܒܳܐ ܛܳܒܳܐ ܕܠܐ ܟܳܠܐܷ ܪ̈ܰܚܡܰܘܗܝ ܡ̣ܶܢ ܐܰܝܠܶܝܢ ܕܩܳܪܶܝܢ ܠܶܗ ܒܟܽܠܶܗ ܠܶܒܗܽܘܢ: ܦܬܰܚ ܡܳܪܝ ܬܰܪܥܳܐ ܕܪ̈ܰܚܡܰܝܟ ܠܰܨܠܰܘ̈ܳܬܰܢ: ܘܰܫܡܰܥ ܠܩܳܠܐ ܕܒܳܥܽܘܬܰܢ ܘܪܰܚܶܡ ܥܰܠ ܟܽܠܰܢ: ܘܰܐܫܪܳܐ ܫܰܝܢܳܟ ܘܰܫܠܳܡܳܟ ܒܰܝܢܳܬܰܢ: ܒܺܐܝܙܓܰܕܽܘܬܳܐ ܕܶܐܡܳܟ ܡܒܰܪܰܟܬܳܐ ܘܩܰܕܺܝܫܬܳܐ: ܘܰܕܡܳܪܝ ܐܰܘܓܺܝܢ ܪܺܝܫ ܣܺܝܥܬܳܐ ܐܠܰܗܳܝܬܳܐ ܕܗܳܐ ܝܰܘܡܳܢ ܥܺܐܕܶܗ ܡܫܰܡܠܶܝܢܰܢ ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܕܰܐܩܺܝܡ ܒܥܺܕܬܶܗ ܥܰܡܽܘ̈ܕܶܐ ܚܰܝܠܬܳܢ̈ܶܐ ܘܠܐ ܡܶܙܕܰܥ̈ܙܥܳܢܶܐ ܩܳܝ̈ܡܰܝ ܒܰܐܦ̈ܶܐ ܘܣܳܝ̈ܓܰܝ ܬܽܘܪ̈ܥܳܬܳܐ ܕܡܰܪܥܺܝܬܳܐ ܡܠܺܝܠܬܳܐ ܘܰܡܫܰܩܰܦܬܳܐ ܙܒܺܝܢܰܬ݀ ܒܰܕܡܳܐ ܦܳܪܽܘܩܳܝܳܐ ܕܰܡܫܺܝܚܳܐ ܐܠܰܗܰܢ: ܠܗܰܘ ܡܰܠܟܳܐ ܕܡܰܠܟ̈ܶܐ ܕܰܠܥܳܠܰܡ ܗ̣ܺܝ ܡܰܠܟܽܘܬܶܗ: ܘܰܠܕܳܪܕܳܪ̈ܺܝܢ ܫܽܘܠܛܳܢܶܗ ܠܐ ܥܳܒܰܪ: ܗ̇ܰܘ ܕܟܰܕ ܥܒܰܕ ܗܘܳܐ ܦܽܘܪܩܳܢܳܐ ܠܰܓܒܺܝܠܬܶܗ ܒܝܰܕ ܩܢܽܘܡܶܗ: ܘܠܐ ܨܳܒܶܐ ܕܢܶܫܒܩܺܝܗ̇ ܕܠܐ ܡܰܥܗ̈ܕܳܢܶܐ ܘܰܡܕܰܒܪ̈ܳܢܶܐ ܚܦܺܝ̈ܛܶܐ ܗܳܠܶܝܢ ܕܰܓܒܳܐ ܐܶܢܽܘܢ ܡ̣ܶܢ ܟܪܶܣ ܐܶܡܗܽܘܢ: ܘܰܠܗܽܘܢ ܫܰܕܰܪ ܐܰܝܟ ܐܺܝܙ̈ܓܰܕܶܐ ܠܟܽܠܳܗ̇ ܥܳܡܰܪܬܳܐ: ܘܒܺܐܝܕܰܝ̈ܗܽܘܢ ܫܰܟܶܢ ܟܽܠ ܐܳܣܘ̈ܳܬܳܐ ܘܚܰܝ̈ܠܐ ܘܟܽܠ ܥܽܘܕܪ̈ܳܢܶܐ ܠܦܰܓܪ̈ܶܐ ܘܢܰܦ̈ܫܳܬܳܐ ܕܰܡܗܰܝ̈ܡܢܶܐ: ܘܰܒܗܽܘܢ ܬܽܘܒ ܐܰܗܦܶܟܘ ܠܟܽܠܳܗ̇ ܬܚܶܝܬ ܫܡܰܝܳܐ ܠܕܶܚܠܰܬ ܐܠܰܗܳܐ ܫܰܪܺܝܪܳܐ: ܕܠܶܗ ܝܳܐܐ܀

 

 

 

ܣܕܪܐ

 

 

 

ܟܰܕ ܠܩܰܪܩܰܦܬܳܐ ܪܺܝܫܳܝܬܳܐ ܘܦܶܛܪܽܘܣܳܝܬܳܐ ܕܣܳܒܳܐ ܐܠܰܗܳܝܳܐ ܡܳܪܝ ܐܰܘܓܺܝܢ ܪܺܝܫ ܣܺܝܥܬܳܐ ܐܠܰܗܳܝܬܳܐ ܘܫܰܒܥܺܝܢܳܝܬܳܐ ܨܳܒܶܝܢܰܢ ܠܰܡܩܰܠܳܣܽܘ: ܟܰܕ ܒܰܒ̈ܢܳܬ ܩ̈ܳܠܐ ܚܰܠܝ̈ܳܬܳܐ ܡ̇ܰܢ ܠܛܽܘܒܬܳܢܽܘܬܶܗ ܘܰܠܣܺܝܣܰܪܬܳܐ ܕܫܰܒܥܺܝܢ ܘܰܬܪܶܝܢ ܛܽܘܒ̈ܳܢܶܐ ܟܽܠܰܢ ܡܢܰܨܪܺܝܢܰܢ: ܐܶܠܐ ܚܶܫܽܘܟܽܘܬ ܗܰܘܢܰܝ̈ܢ ܘܡܰܕ̈ܥܰܝܢ ܕܒܰܚܛܳܗ̈ܶܐ ܡܥܰܪܙܠܺܝܢܰܢ: ܠܪܽܘܚܩܳܐ ܡܶܢܗܽܘܢ ܣܳܝܡܳܐ ܠܰܢ: ܘܰܠܒܶܝܬ ܘܰܥܕܳܐ ܕܺܝܠܗܽܘܢ ܠܐ ܡܰܡܪܚܺܝܢܰܢ ܩܳܪܒܺܝܢܰܢ: ܘܒܰܕܓܽܘܢ ܥܰܠ ܚܰܝܠܐ ܕܰܨܠܰܘ̈ܳܬܳܐ ܕܰܟܝ̈ܳܬܳܐ ܕܺܝܠܗܽܘܢ ܡܶܬܬܰܟܠܺܝܢܰܢ: ܘܥܽܘܕܪܳܢܳܐ ܕܡ̣ܶܢ ܐܠܰܗܳܐ ܘܣܽܘܝܳܥܳܐ ܠܰܡܚܺܝܠܽܘܬܰܢ ܡܶܢܶܗ ܢܳܣܒܺܝܢܰܢ ܟܰܕ ܠܰܚܢܳܢܳܐ ܪܘܺܝܚܳܐ ܕܟܽܠܶܗ ܟܶܢܫܗܽܘܢ ܠܐ ܡܨܶܝܢܰܢ ܓܳܝܫܺܝܢܰܢ: ܘܡ̣ܶܢ ܬܗܽܘܡܳܐ ܗ̇ܰܘ ܓܶܝܪ ܥܶܠܳܝܳܐ ܬܰܫܥܺܝܬܗܽܘܢ ܘܠܐ ܡܰܡܪܚܺܝܢܰܢ ܠܡܰܕܪܳܟܽܘ ܟܽܠܗܶܝܢ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܰܣܥܰܪܘ ܒܥܳܠܡܳܐ ܒܝܰܡܳܐ ܡܶܬܛܰܒܥܺܝܢܰܢ ܘܰܠܪܽܘܚܩܳܐ ܡܶܢܗܽܘܢ ܦܳܝܫܺܝܢܰܢ ܡܳܕܶܝܢ ܢܶܫܒܽܘܩ ܠܡܶܫܬܰܥܳܝܽܘ ܥܰܠ ܬܡܺܝܗܽܘܬ ܐܳܣܘ̈ܳܬܳܐ ܘܥܰܠ ܣܰܓܺܝܽܐܘܬ ܬܶܕܡܪ̈ܳܬܳܐ ܘܰܓܢ̱ܒܰܪ̈ܘܳܬܳܐ ܕܰܥܒܰܕܘ ܗܘܰܘ ܒܥܳܠܡܳܐ ܗܳܢܳܐ ܟܢܽܘܫܝܳܐ ܓܰܒܝܳܐ ܕܩܰܕܺܝ̈ܫܶܐ ܕܒܶܝܬ ܡܳܪܝ ܐܰܘܓܺܝܢ ܕܰܛܺܝܦܽܘܗ̇ ܠܐܪܥܳܐ ܡ̣ܶܢ ܡܰܥܪܒܳܐ ܘܰܥܕܰܡܳܐ ܠܡܰܕܢܚܳܐ ܒܡ̈ܶܠܐ ܕܟܳܪܽܘܙܽܘܬܗܽܘܢ: ܐܶܠܐ ܚܢܰܢ ܡܶܐܠܰܢ ܡ̣ܶܢ ܣܰܓܺܝ̈ܶܐܐ ܘܣܰܓܺܝ̈ܳܐܬܳܐ ܒܰܕܗܰܘܢܳܐ ܕܺܝܠܰܢ ܠܐ ܥܳܪܶܐ ܠܗܽܘܢ ܘܰܠܕܽܘܒܳܪ̈ܶܐ ܕܺܝܠܗܽܘܢ ܠܐ ܡܶܫܟܚܺܝܢܰܢ ܕܰܢܬܰܢܶܐ ܐܶܢܽܘܢ: ܐܶܠܐ ܢܶܟܦܽܘܟ ܠܰܢ ܥܰܠ ܚܰܝܳܒܽܘܬܰܢ: ܘܰܠܘܳܬ ܓܰܒܪܳܐ ܐܠܰܗܳܝܳܐ ܘܪܺܝܫܳܐ ܡܥܰܠܝܳܐ ܕܓܽܘܕܳܐ ܡܥܰܠܰܝܬܳܐ ܕܫܰܒܥܺܝܢ ܘܰܬܪܶܝܢ ܓܰܒܪ̈ܶܐ ܚܰܝܠܬܳܢ̈ܶܐ ܬܰܠܡܺܝ̈ܕܰܘܗܝ ܕܓܰܒܝܳܐ ܡܳܪܝ ܐܰܘܓܺܝܢ ܨܳܒܶܝܢܰܢ ܠܰܡܩܰܠܳܣܽܘ: ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܠܰܡܪܰܡܪܳܡܽܘ: ܗܳܢܳܐ ܕܰܐܝܟ ܫܶܡܫܳܐ ܕܡܶܬܦܪܶܣ ܥܰܠ ܟܽܠܳܗ̇ ܒܪܺܝܬܳܐܘܰܕܢܰܚ ܡ̣ܶܢ ܡܰܕܢܚܳܐ: ܗܳܟܰܢܳܐ ܨܡܰܚ ܗܘܳܐ ܓܰܒܝܳܐ ܡܳܪܝ ܐܰܘܓܺܝܢ ܡ̣ܶܢ ܦܶܢ̈ܝܳܬܳܐ ܕܡܰܥܪܒܳܐ ܡ̣ܶܢ ܡܰܕܒܪ̈ܶܐ ܓܰܘܳܝ̈ܶܐ ܐܰܘܟܺܝܬ ܕܰܝܪܳܐ ܕܰܐܒܳܐ ܦܰܟܽܘܡܺܝܽܘܣ ܓܰܘܳܝܬܳܐ: ܗܳܢܳܐ ܕܟܰܕ ܥܰܠ ܠܕܰܝܪܳܐ ܕܰܐܒܳܐ ܦܰܟܽܘܡܺܝܽܘܣ ܐܰܝܟ ܐܰܚܳܐ ܫܺܝܛܳܐ ܘܰܫܚܺܝܡܳܐ ܘܕܠܐ ܝܳܕܰܥ ܗ̣ܽܘ ܡܶܕܶܡ ܚܰܘܺܝ ܢܰܦܫܶܗ: ܟܰܕ ܗ̣ܽܘ ܕܶܝܢ ܠܟܽܠܗܽܘܢ ܟܬܳܒ̈ܰܝ ܩܽܘܕܫܳܐ ܡ̣ܶܢ ܠܶܒܶܗ ܬܳܢܶܐ: ܟܰܕ ܫܰܕܪܶܗ ܘܗܳܐ ܪܺܝܫ ܕܰܝܪܳܐ ܥܰܡ ܫܰܒܬܳܝܳܐ ܕܢܶܫܓܽܘܪ ܦܽܘܪܢܳܐ ܛܳܒܳܐܝ̣ܬ: ܥܰܠ ܡܳܪܝ ܐܰܘܓܺܝܢ ܩܳܡ ܠܶܗ ܒܰܡܨܰܥܬܳܐ ܕܫܰܠܗܶܒܺܝܬܳܐ ܕܢܽܘܪܳܐ: ܘܟܰܕ ܐܶܬܳܐ ܐܰܚܳܐ ܫܰܒܬܳܝܳܐ ܚܙܳܐ ܠܡܳܪܝ ܐܰܘܓܺܝܢ ܟܰܕ ܩܳܐܶܡ ܒܡܶܨܥܰܬ ܢܽܘܪܳܐ ܘܰܡܨܰܠܐ  ܗܘܳܐ: ܐܶܬܕܰܡܰܪ ܘܰܢܦܰܩ ܘܫܰܪܺܝ ܟܰܕ ܡܰܘܕܰܥ ܠܐܚ̈ܶܐ ܕܰܒܕܰܝܪܳܐ ܥܰܠ ܬܶܕܡܽܘܪܬܳܐ ܕܰܚܙܳܐ: ܗܳܢܳܐ ܕܰܢܦܰܩ ܡ̣ܶܢ ܦܽܘܪܢܳܐ ܘܠܐ ܐܶܬܚܙܺܝ ܡ̣ܶܢ ܗ̇ܳܝ ܫܳܥܬܳܐ: ܐܶܠܐ ܥܩܰܪ ܠܶܗ ܡ̣ܶܢ ܗ̇ܳܝ ܕܰܝܪܳܐ ܕܠܐ ܢܶܬܓܢܶܒ ܡ̣ܶܢ ܣܳܛܳܢܳܐ: ܘܢܶܦܶܠ ܒܫܽܘܒܚܳܐ ܕܪܳܡܽܘܬܳܐ ܘܰܥܪܰܩ ܠܶܗ ܡ̣ܶܢ ܩܽܘܠܳܣܳܐ ܕܰܐܚܽܘܬܳܐ: ܗܳܢܳܐ ܕܡ̣ܶܢ ܐܠܰܗܳܐ ܩܰܒܶܠ ܓܶܠܝܳܢܳܐ ܕܩܽܘܡ ܠܳܟ ܓܰܒܪܳܐ ܚܰܝܠܬܳܢܳܐ ܘܟܰܢܶܫ ܠܳܟ ܓܰܒܪ̈ܶܐ ܐܠܰܗܳܝ̈ܶܐ ܫܰܒܥܺܝܢ: ܘܙܶܠ ܥܩܽܘܪ ܐܰܒܕܳܢܳܐ ܕܰܦܬܰܟܪܽܘܬܳܐ: ܡܶܛܽܠ ܕܒܰܦܢܺܝܬ ܡܰܕܢܚܳܐ ܥܶܫܢܰܬ݀ ܠܳܗ̇ ܣܰܓܺܝ ܚܰܢܦܽܘܬܳܐ: ܘܙܰܪܥܳܐ ܕܒܺܝܫܽܘܬܳܐ ܡܳܪܽܘܬܳܐ ܐܶܚܰܕ ܢܽܘܡܺܝ ܘܶܐܫܬܰܪܬܰܚ ܒܛܳܥܝܽܘܬܳܐ: ܗܳܢܳܐ ܕܡ̣ܶܢ ܡܶܨܪܶܝܢ ܗ̇ܳܝ ܚܶܫܽܘܟܬܳܐ ܫܰܪܺܝ ܒܟܽܘܢܳܫܳܐ ܕܓܰܒܪ̈ܶܐ ܐܠܰܗܳܝ̈ܶܐ ܘܣܳܡܘ ܐܰܦܰܝ̈ܗܽܘܢ ܕܰܒܚܰܝܠܶܗ ܕܰܡܫܺܝܚܳܐ ܢܶܥܩܪܽܘܢ ܠܚܰܢܦܽܘܬܳܐ ܘܰܠܟܽܠܳܗ̇ ܛܳܥܝܽܘܬܳܐ ܕܰܦܬܰܟܪܽܘܬܳܐ: ܗܳܢܳܐ ܕܟܰܕ ܬܰܠܡܶܕ ܡܕܺܝ̈ܢܳܬܳܐ ܥܰܫܺܝ̈ܢܳܬܳܐ ܘܣܰܘ̈ܦܶܐ ܘܦܶܢ̈ܝܳܬܳܐ: ܡܛܳܐ ܠܰܢܨܺܝܒܺܝܢ ܡܕܺܝܢ̱ܬܳܐ ܕܒܶܝܬ ܬܚܽܘ̈ܡܶܐ ܘܥܰܡܶܗ ܫܰܒܥܺܝܢ ܘܰܬܪܶܝܢ ܓܰܒܪ̈ܶܐ ܐܠܰܗܳܝ̈ܶܐ ܒܡܶܢܝܳܢܽܘܬܳܐ: ܐܶܫܟܚܽܘܗ̇ ܕܰܣܒܺܝܣܳܐ ܗܘܳܬ ܒܝܽܘܠܦܳܢܳܐ ܢܕܺܝܕܳܐ ܕܰܡܓܽܘܫܽܘܬܳܐ ܘܝܽܘܕܳܝܽܘܬܳܐ: ܘܰܐܣܺܝ ܒܳܗ̇ ܟܪ̈ܺܝܗܶܐ ܣܰܓܺܝ̈ܶܐܐ ܘܰܡܫܰܪ̈ܰܝܳܐ ܘܰܟܠܐܴ ܒܳܗ̇ ܡܰܘܬܳܢܳܐ ܕܰܛܠܳܝ̈ܶܐ ܕܰܓܙܰܪ ܗܘܳܐ ܒܳܗ̇ ܘܰܐܩܺܝܡ ܗܘܳܐ ܡ̣ܶܢ ܡܫܰܪܝܽܘܬ ܗܰܕܳܡܰܘ̈ܗܝ ܠܰܫܡܽܘܐܶܝܠ ܒܰܪ ܚܰܢܳܢ ܪܰܒ ܟܢܽܘܫܬܳܐ ܕܝܽܘܕܳܝܽܘܬܳܐ: ܗܳܢܳܐ ܕܒܶܝܬ ܐܺܝܕܰܘ̈ܗܝ ܗܰܝܡܶܢܘ ܘܰܥܡܰܕܘ: ܫܡܽܘܐܶܝܠ ܒܰܪ ܚܰܢܳܢ ܗ̇ܰܘ ܪܺܝܫ ܟܢܽܘܫܬܳܐ: ܘܥܰܡܶܗ ܐܠܰܦܳܐ ܘܡܰܐܬܶܝܢ ܢܰܦ̈ܫܳܬܳܐ ܘܰܐܦܢܺܝ ܐܶܢܶܝܢ ܠܗܰܝܡܳܢܽܘܬܳܐ ܫܰܪܺܝܪܬܳܐ ܕܒܰܐܒܳܐ ܘܒܰܒܪܳܐ ܘܰܒܪܽܘܚ ܩܽܘܕܫܳܐ ܚܕܳܐ ܐܺܝܬܽܘܬܳܐ: ܗܳܢܳܐ ܕܢܰܚܶܡ ܡ̣ܶܢ ܡܺܝܬܽܘܬܳܐ ܠܰܒܪܶܗ ܕܦܰܘܠܳܘܣ ܢܨܺܝܒܺܝܢܳܝܳܐ ܘܡ̣ܶܢ ܒܳܬܰܪ ܕܰܥܢܰܕ ܩܪܳܝܗܝ ܘܰܐܩܺܝܡܶܗ ܒܚܰܝܠܐ ܕܡܳܪܶܗ ܘܰܐܥܡܕܶܗ ܘܝܰܗܒ ܠܶܗ ܬܽܘܒ ܪܽܘܫܡܳܐ ܕܚܰܝ̈ܶܐ ܕܺܐܝܬܰܘܗܝ ܗܘܳܐ ܝܽܘܕܳܝܳܐ ܘܰܐܠܦܶܗ ܗܘܳܐ ܐܽܘܪܚܳܐ ܕܡܰܘܒܠܐ ܠܒܶܝܬ ܡܰܠܟܽܘܬܳܐ: ܘܡ̣ܶܢ ܬܰܡܳܢ ܡܰܢܰܥܘ ܘܰܡܛܰܘ ܠܛܽܘܪ̈ܰܝ ܐܺܝܙܠܐ ܒܰܪܗܺܝܒܽܘܬܳܐ: ܟܰܕ ܐܶܫܟܰܚܘ ܐܶܢܽܘܢ ܕܰܣܒܺܝܣܺܝܢ ܗܘܰܘ ܒܨܰܠܡ̈ܶܐ ܚܰܪ̈ܫܶܐ ܘܣܶܓܕܰܬ݀ ܦܬܰܟܪ̈ܶܐ ܕܛܳܥܝܽܘܬܳܐ: ܘܥܰܡܶܗ ܣܳܒ̈ܶܐ ܐܠܰܗܳܝ̈ܶܐ ܕܰܐܣܺܝܪܺܝܢ ܗܘܰܘ ܚܰܨܰܝ̈ܗܽܘܢ ܒܗܰܝܡܳܢܽܘܬܳܐ: ܘܰܚܙܺܝܩܺܝܢ ܗܘܰܘ ܟܰܬܦ̈ܳܬܗܽܘܢ: ܒܢܺܝܪܳܐ ܕܚܰܝ̈ܶܐ ܕܕܰܝܪܳܝܽܘܬܳܐ: ܨܠܺܝܒܳܐ ܚܰܝ̈ܶܐ ܫܩܰܠܘ ܒܰܠܘܺܝܬܗܽܘܢ ܘܰܐܝܟ ܣܰܢܘܰܪܬܳܐ ܣܳܡܘ ܗܘܰܘ ܩܰܕܡܳܝܗܽܘܢ: ܘܫܺܐܕ̈ܶܐ ܡܳܪ̈ܽܘܕܶܐ ܟܰܕ ܚܙܰܘ ܐܶܢܽܘܢ ܐܰܦܢܺܝܘ ܚܰܨܳܐ ܘܟܳܦܘ ܕܽܘܢܒܰܝ̈ܗܽܘܢ ܘܫܰܪܺܝܘ ܢܳܝܕܺܝܢ ܘܪܳܥܠܺܝܢ ܒ̈ܳܬܶܐ ܕܨܰܠܡ̈ܶܐ ܐܰܝܟ ܥܰܪܙܶܠܐ ܡ̣ܶܢ ܩܕܳܡ ܡܳܪܝ ܐܰܘܓܺܝܢ ܘܰܩܕܳܡ ܬܰܠܡܺܝ̈ܕܰܘܗܝ ܒܰܪܗܺܝܒܽܘܬܳܐ: ܗܳܢܳܐ ܕܶܐܬܬܰܠܡܰܕܘ ܗܘܰܘ ܟܽܠܗܽܘܢ ܛܽܘܪ̈ܰܝ ܐܺܝܙܠܐ ܒܶܝܬ ܐܺܝܕܰܘ̈ܗܝ ܕܡܳܪܝ ܐܰܘܓܺܝܢ ܘܰܕܬܰܠܡܺܝ̈ܕܰܘܗܝ: ܥܕܰܡܳܐ ܕܦܳܫܘ ܗܘܰܘ ܟܽܠܗܽܘܢ ܛܽܘܪ̈ܰܝ ܐܺܝܙܠܐ ܥܳܡܽܘܪ̈ܶܐ ܘܕܰܝܪ̈ܳܬܳܐ ܐܰܝܟ ܟܰܘܟ̈ܒܰܝ ܫܡܰܝܳܐ ܘܣܳܠܩܳܐ ܗܘܳܬ ܡܶܢܗܽܘܢ ܒܰܚܕܳܐ ܩܥܳܬܳܐ ܬܶܫܒܽܘܚܬܳܐ ܦܐܻܝܬܳܐ ܠܐܠܳܗܽܘܬܳܐ: ܗܳܢܳܐ ܕܰܫܡܰܥ ܛܶܒܶܗ ܕܡܳܪܝ ܐܰܘܓܺܝܢ ܫܳܒܽܘܪ ܡܰܠܟܳܐ ܕܦܳܪܣܳܝܽܘܬܳܐ: ܘܫܰܕܰܪ ܒܳܬܪܶܗ ܕܢܰܐܣܶܐ ܠܰܒܢܰܘ̈ܗܝ ܕܺܐܝܬܰܝܗܽܘܢ ܗܘܰܘ ܒܰܡܫܰܪܝܽܘܬܳܐ: ܘܥܰܠܺܝܠ ܗܘܳܐ ܒܗܽܘܢ ܕܰܝܘܳܐ ܘܰܡܫܰܢܶܩ ܗܘܳܐ ܠܗܽܘܢ ܒܡܳܪܽܘܕܽܘܬܳܐ: ܗܳܢܳܐ ܓܰܒܝܳܐ ܡܳܪܝ ܐܰܘܓܺܝܢ ܣܳܒܳܐ ܙܰܗܝܳܐ ܕܰܡܠܐܷ ܢܰܟܦܽܘܬܳܐ: ܟܰܕ ܕܶܝܢ ܡܛܳܐ ܗܘܳܐ ܠܐܬܪ̈ܰܘܳܬܳܐ ܕܡܰܕܢܚܳܐ ܐܶܫܟܰܚ ܐܶܢܽܘܢ ܕܟܰܗܺܝܢܺܝܢ ܗܘܰܘ ܒܰܦܬܰܟܪܽܘܬܳܐ ܘܰܢܕܺܝܕܺܝܢ ܗܘܰܘ ܒܪܽܘܫܡܳܐ ܣܰܢܝܳܐ ܘܰܒܝܽܘܠܦܳܢܳܐ ܙܰܦܪܳܐ ܕܟܰܠܕܳܝܽܘܬܳܐ: ܘܶܐܫܟܰܚ ܐܶܢܽܘܢ ܬܽܘܒ ܕܰܐܚܺܝܕܺܝܢ ܒܛܳܥܝܽܘܬܳܐ ܕܶܐܪ̈ܶܣܺܝܣ ܕܡܰܐܢܺܝ ܠܺܝܛܳܐ ܘܰܕܡܰܪܩܺܝܽܘܢ ܒܗܳܝ ܕܰܠܘܳܬ ܫܳܒܽܘܪ ܡܰܠܟܳܐ ܥܳܡܪܺܝܢ ܗܘܰܘ ܒܰܠܦܰܛ ܡܕܺܝܢ̱ܬܳܐ ܒܰܐܬܪ̈ܰܘܳܬܳܐ ܕܡܰܕܢܚܳܐ ܘܰܣܪܺܝܟܺܝܢ ܗܘܰܘ ܒܝܽܘܠܦܳܢܳܐ ܕܡܰܠܩܺܝܕܳܢܳܝܽܘܬܳܐ: ܘܟܰܕ ܫܡܰܥ ܡܰܐܢܺܝ ܠܺܝܛܳܐ ܕܰܡܛܳܐ ܡܳܪܝ ܐܰܘܓܺܝܢ ܠܐܬܪܳܐ ܕܡܰܕܢܚܳܐ ܘܠܐ ܦܳܫ ܐܰܬܪܳܐ ܠܝܽܘܠܦܳܢܶܗ: ܐܶܬܦܪܶܣ ܥܰܠ ܒܢܰܘ̈ܗܝ ܕܫܳܒܽܘܪ ܡܰܠܟܳܐ ܐܰܝܟܰܢܳܐ ܕܰܒܚܰܪ̈ܫܰܘܗܝ ܘܰܒܚܺܝܠ ܛܽܘܠܩܰܘ̈ܗܝ ܢܶܫܟܰܚ ܢܰܐܣܶܐ ܐܶܢܽܘܢ ܠܰܒܢܰܘ̈ܗܝ ܘܰܢܩܺܝܡ ܐܶܢܽܘܢ ܡ̣ܶܢ ܟܽܘܪ̈ܗܳܢܰܝܗܽܘܢ: ܘܟܰܕ ܙܰܒܢܳܐ ܣܰܓܺܝܳܐܐ ܠܐܻܝ ܒܗܽܘܢ ܘܠܐ ܐܶܫܟܰܚ ܕܢܰܐܣܶܐ ܐܶܢܽܘܢ: ܚܰܕ ܡܺܝܬ ܠܶܗ ܕܶܝܢ ܒܰܡܫܰܪܝܽܘܬܳܐ: ܘܰܐ̱ܚܪܺܝܢ ܦܳܫ ܠܶܗ ܒܚܰܝ̈ܶܐ ܕܙܰܒܢܳܐ ܒܕܰܝܘܳܐ ܒܺܝܫܳܐ ܕܫܳܚܶܩ ܗܘܳܐ ܠܶܗ: ܘܰܒܟܽܘܪܗܳܢܳܐ ܡܶܫܬܰܢܰܩ ܗܘܳܐ ܒܰܐܡܺܝܢܽܘܬܳܐ: ܘܟܰܕ ܚܙܳܐ ܡܰܐܢܺܝ ܠܺܝܛܳܐ ܕܶܐܬܦܰܪܣܺܝ ܠܶܗ ܙܺܐܦܶܗ ܚܰܪܡܳܐ ܒܥܳܐ ܗܘܳܐ ܕܢܶܥܪܽܘܩ ܒܢܶܟܠܶܗ ܡ̣ܶܢ ܠܺܝܦܰܛ ܡܕܺܝܢ̱ܬܳܐ ܕܒܶܝܬ ܦܳܪܣܳܝܽܘܬܳܐ: ܘܶܐܡܰܪ ܗܘܳܐ ܠܥܰܒܕܰܘ̈ܗܝ ܕܰܢܣܺܝܡܽܘܢ ܠܶܗ ܬܚܽܘܬܰܘܗܝ ܠܒܽܘ̈ܫܶܐ ܣܰܓܺܝ ܒܣܳܪܽܘܒܽܘܬܳܐ: ܐܰܝܟܰܢܳܐ ܕܰܒܫܽܘܪܳܐ ܕܰܡܕܺܝܢ̱ܬܳܐ ܒܳܗ̇ ܒܕܽܘܟܬܳܐ ܕܰܦܠܳܢܺܝܬ ܥܬܺܝܕ ܐ̱ܢܳܐ ܕܶܐܚܽܘܬ ܒܠܺܠܝܳܐ ܕܳܐܬܶܐ ܒܰܪܗܺܝܒܽܘܬܳܐ: ܘܰܕܠܐ ܢܶܦܓܰܥ ܒܺܝ ܓܰܝܣܳܐ ܕܡܰܠܟܳܐ: ܕܢܶܟܠܶܬ ܠܰܒܢܰܘ̈ܗܝ ܘܠܐ ܐܶܫܟܚܶܬ ܠܺܝ ܠܡܰܐܣܳܝܽܘ ܐܶܢܽܘܢ ܡܫܰܪܝܽܘܬܗܽܘܢ: ܘܟܰܕ ܥܪܰܩ ܠܺܝܛܳܐ ܒܰܝ ܠܒܰܝ ܘܡ̣ܶܢ ܫܽܘܪܳܐ ܠܫܽܘܪܳܐ ܥܕܰܡܳܐ ܕܶܐܫܟܰܚ ܐܰܬܪܳܐ ܘܰܡܛܳܐ ܠܫܽܘܪܳܐ ܕܰܡܕܺܝܢ̱ܬܳܐ ܒܓܽܘܡܕܳܢܽܘܬܳܐ: ܘܰܒܨܶܒܝܳܢ ܐܠܰܗܳܐ ܛܰܝܶܒ ܘܰܐܝܬܺܝ ܚܕܳܐ ܣܺܝܣܰܪܬܳܐ ܕܟܰܠܒ̈ܶܐ ܒܺܝ̈ܫܶܐ ܕܰܢܚܰܒܠܽܘܢܳܝܗܝ ܘܢܶܐܟܠܽܘܢ ܒܶܣܪܶܗ ܕܪܺܝܫܳܐ ܕܛܽܘܥܝܰܝ ܘܰܕܟܰܕܳܒܽܘܬܳܐ: ܘܟܰܕ ܡܛܳܐ ܠܐܪܥܳܐ ܡܰܐܢܺܝ ܠܺܝܛܳܐ ܟܽܠܶܗ ܒܶܣܪܶܗ ܐܶܬܒܰܣܒܰܣ ܗܘܳܐ ܒܦܽܘܡܳܐ ܕܟܰܠܒ̈ܶܐ ܕܠܐ ܟܳܠܺܝܬܳܐ: ܘܥܰܒܕܰܘ̈ܗܝ ܚܰܪ̈ܡܶܐ ܫܰܘܺܝܘ ܠܒܽܘ̈ܫܶܐ ܒܕܽܘܟܬܳܐ ܐ̱ܚܪܺܬܳܐ ܘܰܒܦܽܘܩܕܳܢܶܗ ܕܡܳܪܝܳܐ ܫܰܪܺܝܪܳܐ ܗ̇ܰܘ ܕܠܐ ܨܳܒܶܐ ܒܨܶܢ̈ܥܳܬܳܐ: ܘܟܰܕ ܕܢܰܚ ܫܶܡܫܳܐ ܐܶܫܟܚܽܘܗܝ ܠܡܰܐܢܺܝ ܒܦܽܘܡܳܐ ܕܟܰܠܒ̈ܶܐ ܘܰܕܚܰܝ̈ܘܳܬܳܐ: ܘܟܰܕ ܫܡܰܥ ܫܳܒܽܘܪ ܡܰܠܟܳܐ ܡܶܢܶܗ ܕܨܰܦܪܳܐ ܕܡܰܐܢܺܝ ܣܰܟܠܐ ܕܰܐܡܺܝܬ ܠܰܒܪܳܟ ܗܳܐ ܐܶܫܟܰܚܢܳܝܗܝ ܒܦܽܘܡܳܐ ܕܟܰܠܒ̈ܶܐ ܕܚܰܒܶܠܘ ܒܶܣܪܶܗ ܘܰܗܘܳܐ ܡܺܝܬܳܐ: ܥܰܠ ܕܰܒܢܶܟܠܐ ܡܶܬܚܰܫܰܚ ܗܘܳܐ ܘܟܽܠ ܕܥܳܒܶܕ ܗܘܳܐ ܒܦܽܘܪ̈ܣܶܐ ܘܛܶܟ̈ܢܶܐ ܘܰܨܢܺܝܥܽܘܬܳܐ: ܘܦܰܩܶܕ ܡܰܠܟܳܐ ܕܰܫܕܰܘ ܠܓܰܪ̈ܡܰܘܗܝ ܒܢܽܘܪܳܐ ܕܢܺܐܩܕܽܘܢ ܕܠܐ ܟܳܠܺܝܬܳܐ: ܘܡ̣ܶܢ ܒܳܬܰܪܟܶܢ ܐܶܬܢܰܨܰܚ ܗܘܳܐ ܫܡܶܗ ܕܰܡܫܺܝܚܳܐ ܒܺܐܝ̈ܕܰܝ ܓܰܒܝܳܐ ܘܣܳܒܳܐ ܙܰܗܝܳܐ ܡܳܪܝ ܐܰܘܓܺܝܢ ܒܗܰܝܡܳܢܽܘܬܳܐ ܘܝܺܪܶܒ ܣܰܓܺܝ ܒܥܰܝ̈ܢܰܝ ܫܳܒܽܘܪ ܡܰܠܟܳܐ ܕܰܐܣܺܝ ܠܰܒܢܰܘ̈ܗܝ ܕܚܰܕ ܐܰܩܺܝܡܶܗ ܗܘܳܐ ܡ̣ܶܢ ܒܳܬܰܪ ܕܡܺܝܬ ܝܰܗܒ ܠܶܗ ܚܰܝ̈ܶܐ ܘܩܳܡ ܥܰܠ ܪ̈ܶܓܠܰܘܗܝ ܒܚܰܝܠܐ ܕܰܡܫܺܝܚܳܐ ܒܰܡܫܰܪܪܽܘܬܳܐ: ܘܰܐ̱ܚܪܺܢܳܐ ܬܽܘܒ ܕܰܡܫܰܪܰܝ ܗܘܳܐ ܚܰܨܶܗ ܕܡܰܘ̈ܗܝ ܘܰܐܩܺܝܡ ܗܘܳܐ ܡ̣ܶܢ ܪܰܡܝܽܘܬܳܐ: ܘܟܰܕ ܚܙܰܘ ܥܰܒܕܰܘ̈ܗܝ ܕܫܳܒܽܘܪ ܡܰܠܟܳܐ ܠܚܰܝ̈ܠܐ ܕܣܳܥܰܪ ܪܺܝܫܳܐ ܪܰܒܳܐ ܘܓܰܒܝܳܐ ܡܳܪܝ ܐܰܘܓܺܝܢ ܒܫܰܪܺܝܪܽܘܬܳܐ: ܐܰܘܚܶܕܘ ܢܽܘܪܳܐ ܘܶܐܡܰܪܘ ܠܓܰܒܝܳܐ ܡܳܪܝ ܐܰܘܓܺܝܢ ܕܶܐܢܗܽܘ ܕܰܡܕܰܥܟܺܝܢ ܐܰܢ̱ܬܽܘܢ ܠܢܽܘܪܳܐ ܗܳܕܶܐ ܣܳܝܡܺܝܬܽܘܢ ܒܳܗ̇ ܡܗܰܝܡܢܺܝܢܰܢ ܒܶܗ ܒܗܰܘ ܐܠܰܗܳܐ ܕܠܶܗ ܣܳܓܕܺܝܢ ܐܰܢ̱ܬܽܘܢ ܕܠܐ ܟܳܠܺܝܬܳܐ: ܘܟܰܕ ܚܰܕ ܡ̣ܶܢ ܬܰܠܡܺܝ̈ܕܰܘܗܝ ܕܡܳܪܝ ܐܰܘܓܺܝܢ ܫܰܐܠ ܡ̣ܶܢ ܪܰܒܶܗ ܘܥܰܠ ܠܳܗ̇ ܠܢܽܘܪܳܐ ܙܰܒܢܳܐ ܢܰܓܺܝܪܳܐ ܩܰܘܺܝ ܒܳܗ̇: ܘܟܰܕ ܩܳܐܶܡ ܗܘܳܐ ܒܰܨܠܽܘܬܳܐ: ܘܶܐܬܕܰܡܰܪܘ ܗܘܰܘ ܟܽܠܗܽܘܢ ܚܰܢ̈ܦܶܐ ܘܝܰܗܒܘ ܬܶܫܒܽܘܚܬܳܐ ܠܝܶܫܽܘܥ ܡܫܺܝܚܳܐ ܚܰܕ ܐܠܰܗܳܐ ܥܰܠ ܬܶܕܡܽܘܪܬܳܐ: ܘܗܰܝܡܶܢܘ ܘܰܥܡܰܕܘ ܘܰܗܘܰܘ ܘܶܐܬܚܰܣܺܝܘ ܡ̣ܶܢ ܛܳܥܝܽܘܬܳܐ: ܫܳܒܽܘܪ ܡܰܠܟܳܐ ܘܟܽܠܗܽܘܢ ܥܰܒܕܰܘ̈ܗܝ ܘܰܒܢܰܘ̈ܗܝ ܥܰܡܶܗ ܘܥܰܡܳܐ ܟܽܠܶܗ ܕܰܡܓܽܘܫܽܘܬܳܐ: ܘܣܶܓܝܰܬ݀ ܬܰܡܳܢ ܚܕܳܐ ܬܶܫܒܽܘܚܬܳܐ ܡ̣ܶܢ ܦܽܘܡ ܐܠܰܦ̈ܶܐ ܘܪ̈ܶܒܘܳܬܳܐ: ܘܝܶܪܒܰܬ݀ ܥܺܕܬܳܐ ܘܶܐܬܬܪܺܝܡ ܪܺܝܫܳܗ̇ ܕܰܟܪܺܝܣܛܝܳܢܽܘܬܳܐ: ܘܰܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܕܰܠܘܳܬ ܥܺܐܕܶܗ ܐܶܬܟܰܢܰܫܢܰܢ ܟܽܠܰܢ ܡܗܰܝ̈ܡܢܶܐ ܒܰܚܦܺܝܛܽܘܬܳܐ: ܢܶܫܟܰܚ ܒܺܐܝܕܶܗ ܚܢܰܢ ܘܪ̈ܰܚܡܶܐ: ܘܰܕܢܶܫܰܐܠ ܠܰܢ ܡ̣ܶܢ ܡܳܪܶܗ ܫܽܘܒܩܳܢ ܚܰܘ̈ܒܶܐ ܘܣܰܟܠܘ̈ܳܬܳܐ: ܘܙܰܒ̈ܢܶܐ ܛܳܒ̈ܶܐ ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܫܽܘܪܬܳܚܳܐ ܕܦܺܐܪ̈ܶܐ ܕܰܐܪܥܳܐ ܘܒܽܘܪܟܬܳܐ ܕܝܰܪ̈ܚܰܝ ܫܰܢ̱ܬܳܐ: ܘܣܰܓܺܝܽܐܘܬ ܥ̈ܰܠܠܳܬܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܥܢܰܕܘ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܡܳܪܝܳܐ ܢܢܺܝܚ ܘܰܢܚܰܣܶܐ ܐܶܢܽܘܢ ܒܡܰܠܟܽܘܬܳܐ ܫܡܰܝܳܢܺܝܬܳܐ: ܘܥܰܠ ܟܽܠܰܢ ܢܶܫܬܰܦܥܽܘܢ ܪ̈ܰܚܡܶܐ ܕܰܬܠܺܝܬܳܶܝܽܘܬܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܥܶܛܪܳܐ ܗܰܢܺܝܳܐܐ ܘܪܺܝܚܳܐ ܒܰܣܺܝܡܳܐ ܢܶܗܘܶܐ ܠܳܟ ܡܳܪܝ ܝܰܘܡܳܐ ܗܳܢܳܐ ܕܕܽܘܟܪܳܢܶܗ ܕܣܳܒܳܐ ܙܰܗܝܳܐ ܘܐܠܰܗܳܝܳܐ ܘܪܺܝܫ ܣܺܝܥܬܳܐ ܡܥܰܠܰܝܬܳܐ ܡܳܪܝ ܐܰܘܓܺܝܢ: ܘܫܰܟܶܢ ܠܰܢ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܕܚܰܕ̈ܘܳܬܳܐ ܕܕܽܘܟܪܳܢܶܗ: ܟܽܠ ܛܳܒ̈ܳܬܳܐ ܘܒܽܘܪ̈ܟܳܬܳܐ: ܘܟܽܠ ܚܰܕ̈ܘܳܬܳܐ ܘܰܦܨܺܝܚ̈ܘܳܬܳܐ ܘܟܽܠ ܫܽܘܒܩܳܢܳܐ ܕܣܰܟܠܘ̈ܳܬܳܐ ܘܰܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ ܡܳܪܰܢ ܘܰܐܠܳܗܰܢ܀

 

 

 

ܚܘܬܡܐ

 

 

 

ܝܰܡܳܐ ܕܪ̈ܰܚܡܶܐ ܘܰܬܗܽܘܡܳܐ ܠܐ ܡܶܬܬܓܺܝܫܳܢܳܐ ܕܛܳܒ̈ܳܬܳܐ ܐܺܝܬܰܝܟ ܡܳܪܝܳܐ: ܫܰܕܰܪ ܠܰܢ ܡ̣ܶܢ ܒܶܝܬ ܓܰܙܳܟ ܕܠܐ ܡܶܬܬܟܺܝܠܐ ܡܰܘܗܰܒܬܳܟ: ܘܠܐ ܚܳܣܰܪ ܝܰܡܳܐ ܕܪ̈ܰܚܡܰܝܟ: ܐܳܣܝܽܘܬܳܐ ܠܰܟܪ̈ܺܝܗܶܐ ܐܳܦ ܚܽܘܪܳܪܳܐ ܡܫܰܡܠܝܳܐ ܠܰܡ̈ܢܰܣܰܝܳܐ ܘܰܢܝܳܚܬܳܐ ܡܚܰܣܝܳܢܺܝܬܳܐ ܠܰܫܟܺܝ̈ܒܶܐ: ܘܰܐܫܘܳܐ ܠܰܢ ܕܢܶܚܕܶܐ ܘܰܢܕܽܘܨ ܒܕܽܘܟܪܳܢܳܐ ܕܰܡܢܺܝ̈ܚܳܢܰܝܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ: ܕܫܰܕܰܪ ܚܰܕ ܡ̣ܶܢ ܙܰܠܺܝܩܰܘ̈ܗܝ ܫܒܺܝ̈ܚܶܐ ܘܨܰܡܽܘܚ̈ܬܳܢܶܐ ܕܢܰܢܗܰܪ ܠܟܽܠܳܗ̇ ܒܪܺܝܬܳܐ ܒܝܽܘܠܦܳܢܳܐ ܕܚܰܝ̈ܶܐ ܕܺܐܝܬܰܘܗܝ ܣܒܰܪܬܳܐ ܚܕܰܬܳܐ ܕܶܐܘܢܓܶܠܝܽܘܢ ܕܡܰܟܪܶܙ ܫܪܳܪܳܐ: ܠܗܰܘ ܚܰܝܠܐ ܚܰܝܠܬܳܢܳܐ ܕܚܰܝܠܶܗ ܠܡܳܪܝ ܐܰܘܓܺܝܢ ܥܰܠ ܚܰܫ̈ܶܐ ܒܰܥܪܺܝܪ̈ܳܝܶܐ ܘܰܙܟܳܐ ܠܣܳܛܳܢܳܐ ܘܰܠܟܽܠܗܽܘܢ ܐܶܪ̈ܶܣܺܝܣ ܕܺܝܠܶܗ ܕܰܓ̈ܳܠܳܬܳܐ: ܠܗܰܘ ܢܽܘܗܪܳܐ ܕܡ̣ܶܢ ܢܽܘܗܪܳܐ ܫܰܪܺܝܪܳܐ ܕܡ̣ܶܢ ܢܽܘܗܪܳܐ ܕܺܝܠܶܗ ܐܠܰܗܳܝܳܐ: ܡܠܐܴ ܠܠܶܒܰܘ̈ܳܬܳܐ ܕܣܳܓܽܘܕܰܘ̈ܗܝ: ܘܰܐܝܟ ܕܰܒܢܽܘܪܳܐ ܢܰܒܪܶܫ ܐܶܢܽܘܢ ܘܰܙܟܳܐ ܠܥܳܠܡܳܐ ܥܳܒܽܘܪܳܐ ܠܟܽܠܗܶܝܢ ܨܶܢܥ̈ܳܬܶܗ ܡܰܘܒܕܳܢ̈ܝܳܬܳܐ: ܠܗܰܘ ܕܫܰܕܰܪ ܠܡܳܪܝ ܐܰܘܓܺܝܢ ܣܳܒܳܐ ܙܰܗܝܳܐ ܠܰܒܪܺܝܬܳܐ ܕܚܶܫܽܘܟܳܐ ܗܘܳܬ ܒܥܰܝ̈ܡܶܐ ܕܛܳܥܝܽܘܬܳܐ: ܟܰܕ ܫܰܪܺܝ ܡ̣ܶܢ ܐܺܝܓܽܘܦܛܽܘܣ ܓܰܘܳܝܬܳܐ ܡܰܟܪܶܙ: ܘܰܥܕܰܡܳܐ ܠܣܰܘ̈ܦܰܝ ܡܰܕܢܚܳܐ ܡܬܰܠܡܶܕ ܘܡܰܥܡܶܕ ܥܰܡ ܬܰܠܡܺܝ̈ܕܰܘܗܝ: ܗܳܢܳܐ ܡܳܪܝ ܐܰܘܓܺܝܢ ܕܺܐܝܬܰܘܗܝ ܚܰܕ ܡ̣ܶܢ ܬܠܳܬܳܐ ܥܰܡܽܘ̈ܕܶܐ ܕܰܚܙܳܐ ܩܽܘܣܛܰܢܛܺܝܢܳܘܣ ܡܰܠܟܳܐ ܡܗܰܝܡܢܳܐ ܕܰܥܠܰܝܗܽܘܢ ܡܶܣܬܰܡܟܳܐ ܪܥܺܝܠܽܘܬܳܐ ܕܰܒܪܺܝܬܳܐ: ܕܠܶܗ ܠܡܳܪܝܳܐ ܕܝܰܗܒ ܒܶܝܬ ܐܺܝܕܰܘ̈ܗܝ ܘܰܕܬܰܠܡܺܝ̈ܕܰܘܗܝ ܟܽܠ ܚܰܝ̈ܠܐ ܘܳܐܬܘ̈ܳܬܳܐ ܘܰܓܢ̱ܒܰܪ̈ܘܳܬܳܐ ܠܡܶܬܥܰܡܪܳܢܺܝܬܳܐ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܰܢܽܘ ܡ̣ܶܢ ܒܢܰܝ̈ܢܳܫܳܐ ܒܶܣܪ̈ܳܢܶܐ ܐܰܘ ܒܢ̈ܳܬ ܩ̈ܳܠܐ ܕܥܰܦܪ̈ܳܢܶܐ ܐܰܝܟ ܕܡܶܫܟܚܺܝܢ ܩܽܘܠܳܣ̈ܶܐ ܙܳܩܪܺܝܢ ܠܓܽܘܕܳܐ ܐܠܰܗܳܝܬܳܐ ܘܣܺܝܣܰܪܬܳܐ ܫܠܺܝܚܳܝܬܳܐ ܘܫܰܒܥܺܝܢܳܝܬܳܐ ܕܒܶܝܬ ܡܳܪܝ ܐܰܘܓܺܝܢ ܐ̱ܢܳܫ̈ܳܐ ܛܽܘܒ̈ܬܳܢܶܐ ܘܪ̈ܳܡܰܝ ܡ̣ܶܢ ܥܳܠܡܳܐ: ܗ̇ܳܢܽܘܢ ܕܶܐܬܓܒܺܝܘ ܡ̣ܶܢ ܟܰܪܣܳܐ ܕܢܶܥܩܪܽܘܢ ܠܝܽܘܠܦܳܢܳܐ ܒܺܝܫܳܐ ܕܰܙܪܰܥ ܣܳܛܳܢܳܐ ܒܰܒܪܺܝܬܳܐ: ܟܰܕ ܣܳܡܘ ܐܰܦܰܝ̈ܗܽܘܢ ܡ̣ܶܢ ܡܰܥܪܒܳܐ ܥܰܠ ܐܰܒܕܳܢܳܐ ܕܰܦܬܰܟܪܽܘܬܳܐ: ܘܰܫܡܶܗ ܕܰܡܫܺܝܚܳܐ ܐܠܰܗܳܐ ܕܟܽܠܳܗ̇ ܒܪܺܝܬܳܐ ܩܪܰܘ ܥܰܠ ܓܶܕ̈ܶܐ ܘܫܺܐܕ̈ܶܐ ܕܰܒܨܰܠܡ̈ܶܐ ܘܛܶܠܳܢܳܝ̈ܳܬܳܐ ܘܰܐܥܪܰܩܘ ܐܶܢܽܘܢ ܡ̣ܶܢ ܦܶܢ̈ܝܳܬܳܐ: ܘܰܒܢܰܘ ܒܕܽܘܟܰܬܗܽܘܢ ܥܺܕ̈ܳܬܳܐ ܘܕܰܝܪ̈ܳܬܳܐ ܘܗܰܝ̈ܟܠܐ ܓܒܰܝ̈ܳܐ ܠܐܠܳܗܽܘܬܳܐ: ܟܰܕ ܡ̇ܰܢ ܠܪܺܝܫܳܐ ܘܪܰܒܳܐ ܕܟܽܠܗܽܘܢ ܡܝܰܩܪܺܝܢܰܢ ܘܰܡܩܰܠܣܺܝܢܰܢ ܒܰܗܕܺܝܪܽܘܬܳܐ: ܡܳܪܝ ܐܰܘܓܺܝܢ ܪܺܝܫ ܣܺܝܥܬܳܐ ܐܠܰܗܳܝܬܳܐ ܕܺܐܝܬܰܘܗܝ ܚܰܕ ܡ̣ܶܢ ܬܠܳܬܳܐ ܥܰܡܽܘ̈ܕܶܐ ܕܶܐܬܚܙܺܝܘ ܠܡܰܠܟܳܐ ܡܗܰܝܡܢܳܐ ܘܙܰܟܳܝܳܐ ܩܽܘܣܛܰܢܛܺܝܢܳܘܣ ܕܰܥܠܰܝܗܽܘܢ ܡܶܣܬܰܡܟܳܐ ܟܽܠܳܗ̇ ܒܪܺܝܬܳܐ: ܗܳܢܳܐ ܡܳܪܝ ܐܰܘܓܺܝܢ ܕܫܰܪܺܝ ܒܟܽܘܢܳܫܳܐ ܕܓܰܒܪ̈ܶܐ ܐܠܰܗܳܝ̈ܶܐ ܡ̣ܶܢ ܡܶܨܪܶܝܢ ܗ̇ܳܝ ܚܶܫܽܘܟܳܝܬܳܐ ܕܶܐܬܚܰܘܺܝ ܠܶܗ ܡ̣ܶܢ ܐܠܰܗܳܐ ܒܓܶܠܝܳܢܳܐ ܕܰܢܒܺܝܽܘܬܳܐ: ܗܳܢܳܐ ܕܰܡܛܳܐ ܠܰܢܨܺܝܒܺܝܢ ܕܒܶܝܬ ܬܚܽܘ̈ܡܶܐ ܕܰܣܒܺܝܣܳܐ ܗܘܳܬ ܒܛܳܥܝܽܘܬܳܐ: ܘܰܠܛܽܘܪܳܐ ܕܺܐܝܙܠܐ ܣܠܶܩ ܗܘܳܐ ܒܰܬܟܺܝܠܽܘܬܳܐ: ܘܰܒܢܳܐ ܒܶܗ ܥܽܘܡܪܳܐ ܘܗܰܝܟܠܐ ܪܰܒܳܐ ܘܗܰܝܟܠܐ ܛܒܺܝܒܳܐ ܘܰܡܫܰܡܗܳܐ ܕܢܶܗܘܶܐ ܣܶܬܳܪܳܐ ܠܟܽܠܳܗ̇ ܐܰܚܽܘܬܳܐ ܘܡ̣ܶܢ ܬܰܡܳܢ ܦܰܠܶܓ ܠܗܽܘܢ ܐܰܬܪ̈ܰܘܳܬܳܐ ܠܬܰܠܡܺܝ̈ܕܰܘܗܝ ܘܰܠܟܽܠܳܗ̇ ܡܰܕܢܚܳܐ ܒܺܐܝܕܳܐ ܒܺܐܝܕܳܐ ܒܫܰܘܝܽܘܬܳܐ: ܘܟܽܠ ܚܰܕ ܡܶܢܗܽܘܢ ܐܰܬܪܳܐ ܕܰܡܛܳܝܗܝ ܡ̣ܶܢ ܪܰܒܶܗ ܫܰܪܺܝ ܡܬܰܠܡܶܕ ܒܥܽܘܕܪܳܢܳܐ ܘܒܰܬܟܺܝܠܽܘܬܳܐ ܕܥܰܠ ܡܳܪܶܗ: ܘܒܰܕܓܽܘܢ ܟܰܕ ܡ̣ܶܢ ܛܽܘܒܗܽܘܢ ܚܳܝܒܺܝܢܰܢ ܘܡܰܘܚܠܺܝܢܰܢ: ܛܽܘ̈ܒܶܐ ܛܽܘܒ̈ܬܳܢܶܐ ܠܗܽܘܢ ܡܰܘܫܛܺܝܢܰܢ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܕܟܠܰܝܬ ܡܰܘܬܳܢܳܐ ܒܰܢܨܺܝܒܺܝܢ ܡܕܺܝܢ̱ܬܳܐ ܘܰܐܩܺܝܡܬ ܠܰܫܡܽܘܐܶܝܠ ܒܰܪ ܚܰܢܳܢ ܒܪܶܗ ܕܪܰܒ ܟܢܽܘܫܬܳܐ ܕܝܽܘ̈ܕܳܝܶܐ ܡ̣ܶܢ ܡܰܫܪ̈ܝܳܬܳܐ: ܠܳܟ ܛܽܘܒܰܝܟ ܡܳܪܝ ܐܰܘܓܺܝܢ ܕܰܐܒܗܶܬܬܳܝܗܝ ܠܡܰܐܢܺܝ ܠܺܝܛܳܐ ܘܚܰܪܳܫܳܐ ܘܰܠܛܳܥܝܽܘܬܳܐ ܕܺܝܠܶܗ: ܗ̇ܰܘ ܕܰܩܛܰܠ ܠܰܒܪܶܗ ܕܫܳܒܽܘܪ ܡܰܠܟܳܐ ܥܰܠ ܕܰܒܥܳܐ ܒܶܗ ܐܳܣܝܽܘܬܳܐ: ܘܠܐ ܐܶܫܟܰܚ ܗܘܳܐ ܘܰܒܥܳܐ ܘܢܶܬܦܰܠܰܛ ܐܳܦ ܢܶܚܽܘܬ ܒܫܽܘܪܳܐ ܕܰܡܕܺܝܢ̱ܬܳܐ ܠܺܝܦܰܛ ܒܢܶܟܠܐ ܘܢܶܥܪܽܘܩ ܗܘܳܐ ܕܠܐ ܟܳܠܺܝܬܳܐ: ܘܟܰܕ ܢܚܶܬ ܗܘܳܐ ܡ̣ܶܢ ܫܽܘܪܳܐ ܒܠܺܠܝܳܐ ܘܰܒܨܶܒܝܳܢ ܐܠܰܗܳܐ ܛܰܝܶܒ ܟܰܠܒ̈ܶܐ ܕܰܢܒܰܣܒܣܽܘܢܳܝܗܝ ܠܰܨܢܺܝܥܳܐ: ܘܰܬܠܰܚܘ ܗܘܰܘ ܒܶܣܪܶܗ ܥܰܡ ܗܰܕܳܡܰܘ̈ܗܝ ܘܥܰܒܕܽܘܗܝ ܒܶܙܚܳܐ ܠܟܽܠ ܚܰܙܳܝܰܘ̈ܗܝ ܥܰܠ ܕܰܢܟܺܝܠ ܗܘܳܐ ܘܰܡܕܰܪܰܡ ܗܘܳܐ ܒܗܰܝܡܳܢܽܘܬܳܐ: ܠܳܟ ܛܽܘܒܰܝܟ ܡܳܪܝ ܐܰܒܪܳܗܳܡ ܟܰܫܟܰܪܝܳܐ ܕܰܛܪܰܕܬ ܠܩܰܡܨܳܐ ܥܰܫܺܝܢܳܐ ܡ̣ܶܢ ܢܨܺܝܒܺܝܢ ܡܕܺܝܢ̱ܬܳܐ ܕܒܶܝܬ ܬܚܽܘ̈ܡܶܐ ܘܰܐܥܪܰܩܬܳܝܗܝ ܒܰܨܠܽܘܬܶܗ ܕܡܳܪܝ ܐܰܘܓܺܝܢ ܘܰܒܦܽܘܩܕܳܢܳܐ ܕܰܢܣܰܒܬܳܝܗܝ ܒܰܬܟܺܝܠܽܘܬܳܐ: ܠܳܟ ܛܽܘܒܰܝܟ ܡܳܪܝ ܡܽܘܫܶܐ ܕܰܐܩܺܝܡ ܡܺܝܬܳܐ ܒܓܳܙܰܪܬܳܐ ܕܫܽܘܥܳܐ ܕܒܰܦܩܰܥܬܳܐ ܕܒܶܝܬ ܥܰܪ̈ܰܒܳܝܶܐ ܕܩܰܪܺܝܒܳܐ ܠܢܰܗܪܳܐ ܚܰܪܒܳܐ ܘܠܰܦܕܳܢ ܩܪܺܝܬܳܐ: ܠܳܟ ܛܽܘܒܰܝܟ ܐܰܒܳܐ ܣܰܠܳܪܳܐ ܘܛܽܘܒܳܐ ܠܐܠܺܝܫܒܰܥ ܐܶܡܳܟ: ܕܶܐܣܰܪܬ ܠܫܺܐܕܳܐ ܬܰܪܬܶܝܢ ܫܢܰܝ̈ܳܐ ܒܪܰܚܝܳܐ ܟܰܕ ܛܳܥܶܢ ܘܡܰܝܬܶܐ ܠܟܽܘܢ: ܐܰܝܟ ܥܰܒܕܳܐ ܙܒܺܝܢܳܐ ܘܰܡܫܰܥܒܕܳܐ: ܒܗܳܝ ܕܟܰܕ ܐܳܬܶܐ ܗܘܳܐ ܡ̣ܶܢ ܪܺܝܚܳܐ ܡܰܘܣܶܦ ܗܘܰܝܬ ܟܺܐܦ̈ܶܐ ܥܰܠ ܡܰܘܒܠܳܟ: ܥܰܠܗܳܝ ܐܶܣܰܪܬܳܝܗܝ ܕܢܶܗܘܶܐ ܡܫܰܡܶܫ ܠܳܟ ܬܰܪܬܶܝܢ ܫܢܰܝ̈ܳܐ ܐܰܝܟ ܥܰܒܕܳܐ: ܠܳܟ ܛܽܘܒܰܝܟ ܡܳܪܝ ܚܰܒܺܝܒ ܐܶܦܣܩܽܘܦܳܐ ܕܢܰܚܶܡܬ ܡܺܝܬܳܐ ܒܰܪ ܚܰܢ̈ܦܶܐ ܘܗܰܝܡܶܢܘ ܘܰܥܡܰܕܘ ܒܶܝܬ ܐܺܝܕܰܝ̈ܟ ܐܰܝܟ ܥܶܣܪܺܝܢ ܐܠܰܦܰܝ̈ܳܐ ܢܰܦ̈ܫܳܬܳܐ: ܠܳܟ ܛܽܘܒܰܝܟ ܡܳܪܝ ܒܳܒܺܝ ܒܰܪ ܢܨܝܺܒܺܝ̈ܢܳܝܶܐ ܕܢܰܚܶܡܬ ܠܐܴܪܚܳܐ ܕܩܰܛܠܽܘܗܝ ܠܶܣܛܳܝ̈ܶܐ ܘܰܓܠܰܝܬ ܥܰܠ ܩܳܛܽܘ̈ܠܐ ܕܡ̇ܰܢ ܐܺܝܬܰܝܗܽܘܢ: ܘܫܰܘܙܶܒܬ ܠܗ̇ܳܢܽܘܢ ܕܰܐܣܺܝܪܺܝܢ ܗܘܰܘ ܕܢܶܬܩܰܛܠܽܘܢ ܗܘܰܘ ܒܰܛܠܽܘܡܝܳܐ: ܠܳܟ ܛܽܘܒܰܝܟ ܡܳܪܝ ܐܰܘܠܽܘܓ ܕܰܐܪܝܳܐ ܫܰܡܫܳܟ ܟܽܠ ܝܰܘ̈ܡܰܝ ܚܰܝܰܝ̈ܟ: ܘܒܳܬܰܪ ܡܰܘܬܳܟ ܚܰܡܫܺܝܢ ܫܢܺܝ̈ܢ ܘܬܰܪܬܶܝܢ ܐ̱ܚܪ̈ܳܢܝܳܬܳܐ: ܠܳܟ ܛܽܘܒܰܝܟ ܡܳܪܝ ܒܶܢܝܳܡܶܝܢ ܐܶܦܣܩܽܘܦܳܐ ܘܓܳܒܪܳܐ ܡܗܰܘܢܳܐ ܕܰܢܨܺܝܒܺܝܢ ܡܕܺܝܢ̱ܬܳܐ: ܕܒܳܬܰܪ ܡܰܘܬܶܗ ܕܡܳܪܝ ܐܰܘܓܺܝܢ ܒܥܶܣܪܺܝܢ ܫܢܺܝ̈ܢ ܐܶܬܚܙܺܝ ܠܳܟ ܒܠܺܠܝܳܐ ܘܶܐܡܰܪ ܠܳܟ: ܕܩܽܘܡ ܠܳܟ ܒܶܪܝ ܒܶܢܝܳܡܶܝܢ ܘܰܐܛܥܶܢ ܠܦܰܓܪܳܐ ܕܺܝܠܝ ܘܰܕܥܶܣܪܳܐ ܣܳܒ̈ܶܐ ܕܰܩܒܺܝܪܺܝܢ ܒܒܶܝܬ ܣܳܗ̈ܕܶܐ ܒܥܽܘܡܪܳܐ ܕܺܝܠܝ: ܘܰܠܥܽܘܡܪܳܐ ܕܡܳܪܝ ܚܰܢܰܢܝܳܐ ܐܰܡܛܺܝ ܐܶܢܽܘܢ ܒܰܪܗܺܝܒܽܘܬܳܐ: ܡܶܛܽܠ ܕܒܳܬܰܪ ܙܰܒܢܳܐ ܡܰܡܠܟܳܐ ܐܶܪ̈ܶܣܺܝܣ ܡܙܰܝܰܦܬܳܐ ܥܰܠ ܕܽܘܟܬܳܐ ܗܳܕܶܐ ܘܠܐ ܨܳܒܶܐ ܐ̱ܢܳܐ ܕܶܐܗܘܶܐ ܬܚܶܝܬ ܫܽܘܥܒܳܕܳܐ ܕܝܽܘܠܦܳܢܗܽܘܢ ܢܕܺܝܕܳܐ ܘܛܰܡܳܐܐ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܗܽܘܙܳܝܳܐ: ܕܶܐܬܰܝܬ ܘܰܫܪܰܝܬ ܡ̣ܶܢ ܦܟܳܪ̈ܰܘܗܝ ܠܡܳܪܝ ܝܽܘܚܰܢܳܢ ܛܰܝܳܝܳܐ ܕܰܬܠܐܱܘܽܘܗܝ ܚܰܢ̈ܦܶܐ ܒܺܐܝܠܳܢܳܐ: ܠܳܟ ܡܳܪܝ ܝܽܘܚܰܢܳܢ ܛܰܝܳܝܳܐ ܕܶܐܬܥܰܫܰܩܬ ܒܩܶܛܠܐ ܕܝܽܘܕܳܝ̈ܶܐ ܕܢܰܚܶܡܬ ܠܰܩܛܺܝܠܐ ܘܰܐܘܕܰܥܬ ܡ̇ܰܢ ܩܶܛܠܶܗ: ܘܟܶܢ̈ܫܶܐ ܕܰܚܙܰܘ ܗܳܕܶܐ ܬܶܕܡܽܘܪܬܳܐ ܫܰܒܰܚܘ ܠܐܠܳܗܳܐ: ܠܟܽܘܢ ܛܽܘܒܰܝܟܽܘܢ ܡܳܪܝ ܩܰܪܕܰܓ ܘܡܳܪܝ ܒܘܣܺܝܢܳܐ ܕܰܬܪ̈ܰܝܟܽܘܢ ܐܶܙܰܠܬܽܘܢ ܠܰܚܙܳܬܶܗ ܕܡܳܪܝ ܦܺܝܠܽܘܢ ܣܳܒܳܐ ܙܰܗܝܳܐ ܗ̇ܰܘ ܕܩܳܡ ܒܺܐܝܠܳܢܳܐ ܟܽܠܗܽܘܢ ܚܰܝܰܘ̈ܗܝ ܡ̣ܶܢ ܡܰܠܐܟ̈ܶܐ ܡܶܫܬܰܡܰܫ ܗܘܳܐ: ܠܳܟ ܛܽܘܒܰܝܟ ܡܳܪܝ ܡܺܝܟܳܐ ܕܰܐܣܺܝܬ ܠܰܚܓܺܝܪܳܐ ܒܰܩܪܺܝܬܳܐ ܕܰܫܡܳܗ̇ ܒܶܝܬ ܠܶܓܶܐ: ܠܳܟ ܛܽܘܒܰܝܟ ܡܳܪܝ ܝܺܪܶܬ ܐܠܰܟܣܰܢܕܪܳܝܳܐ ܕܢܰܚܶܡܬ ܡܺܝܬܳܐ ܒܰܢܨܺܝܒܺܝܢ ܡܕܺܝܢ̱ܬܳܐ ܒܪܶܗ ܕܪܰܒ ܟܢܽܘܫܬܳܐ ܕܝܺܗܽܘ̈ܕܳܝܶܐ: ܕܰܫܡܶܗ ܗܘܳܐ ܟܽܘܢܕܳܫ: ܘܰܗܘܳܬ ܚܰܕܽܘܬܳܐ ܪܰܒܬܳܐ ܠܰܟܪ̈ܺܝܣܛܝܳܢܶܐ ܒܡܰܥܠܬܳܟ ܕܠܰܢܨܺܝܒܺܝܢ: ܘܟܰܪܝܽܘܬܳܐ ܘܰܟܡܺܝܪܽܘܬܳܐ ܨܶܦܚܰܬ݀ ܐܶܢܽܘܢ ܠܰܒܢܶܝ̈ܗ̇ ܕܨܰܠܡܬܳܐ ܟܰܕ ܡܶܬܓܰܡܪܺܝܢ ܗܘܰܘ ܒܦܽܘܡܳܐ ܕܣܰܝܦܳܐ: ܘܶܐܬܬܪܺܝܡ ܪܺܝܫܳܐ ܕܰܟܪ̈ܺܝܣܛܝܳܢܶܐ: ܠܳܟ ܛܽܘܒܰܝܟ ܡܳܪܝ ܝܺܪܶܬ ܐܠܰܟܣܢܕܰܪܳܝܳܐ ܕܰܣܠܶܩܬ ܠܥܽܘܡܪܳܐ ܕܡܳܪܝ ܐܰܘܓܺܝܢ ܘܰܚܙܰܝܬ ܠܡܳܪܝ ܐܰܘܓܺܝܢ ܕܥܰܢܺܝܕ ܗܘܳܐ: ܘܝܰܗܒ ܠܳܟ ܪܺܝܫܕܰܝܪܳܐ ܩܶܠܳܝܬܳܐ ܕܰܠܥܶܠ ܡ̣ܶܢ ܗܰܝܟܠܐ ܘܺܝܬܶܒܬ ܒܳܗ̇ ܬܰܪܬܶܝܢ ܫܢܰܝ̈ܳܐ: ܘܝܰܗܒ ܠܳܟ ܬܰܠܡܺܝܕܳܐ ܕܰܫܡܶܗ ܗܘܳܐ ܩܽܘܪܝܰܩܳܘܣ ܕܢܶܗܘܶܐ ܡܫܰܡܶܫ ܠܳܟ ܟܽܠ ܝܰܘ̈ܡܰܝ ܚܰܝܰܝ̈ܟ: ܠܳܟ ܛܽܘܒܰܝܟ ܡܳܪܝ ܝܺܪܶܬ ܕܰܓܠܰܝܬ ܘܦܰܪܣܺܝܬ ܠܣܰܝܕܳܘ ܚܰܪܥܬܳܐ ܕܰܒܟܽܠ ܠܺܠܝܳܐ ܕܰܐܪܒܥܳܐ ܡܟܰܢܫܳܐ ܗܘܳܬ݀ ܠܰܚܒܳܪ̈ܳܬܳܗ̇ ܘܰܡܦܰܪܣܝܳܐ ܗܘܳܬ ܢܰܦܫܳܗ̇ ܩܕܳܡܰܝܗܶܝܢ ܕܡܶܬܚܰܙܝܳܐ ܗܘܳܬ ܪ̈ܶܓܠܶܝܗ̇ ܡ̣ܶܢ ܛܽܘܪܳܐ ܡܰܕܢܚܳܝܳܐ ܘܰܐ̱ܚܪܺܬܳܐ ܥܰܠ ܡܰܥܪܒܳܝܳܐ: ܘܩܰܘܝܰܬ݀ ܟܰܕ ܦܫܺܝܚܳܐ: ܒܰܨܠܰܘ̈ܳܬܶܗ ܕܡܳܪܝ ܝܺܪܶܬ ܥܕܰܡܳܐ ܠܨܰܦܪܳܐ ܡܶܬܟܰܫܦܳܐ ܘܒܳܥܝܳܐ ܡ̣ܶܢ ܩܰܕܺܝܫܳܐ ܕܠܐ ܬܽܘܒ ܠܥܳܠܰܡ ܒܗܳܢܳܐ ܥܒܳܕܳܐ ܡܶܬܚܰܫܚܳܐ ܘܥܰܒܕܳܗ̇ ܗܘܳܐ ܬܶܗܪܳܐ ܠܟܽܠ ܚܰܙܳܝ̈ܶܐ: ܠܳܟ ܛܽܘܒܰܝܟ ܡܳܪܝ ܝܺܪܶܬ ܕܦܰܨܺܝܬ ܠܐܢ̱ܬܬܳܐ ܕܡ̣ܶܢ ܚܳܪܢܳܝܬܳܐ ܡ̣ܶܢ ܐܺܝܕܶܗ ܕܣܳܛܳܢܳܐ: ܘܚܰܪܰܪܬ ܠܐܢ̱ܬܬܳܐ ܕܡ̣ܶܢ ܣܪܳܓܳܐ ܘܰܐܦܶܩܬ ܡܶܢܳܗ̇ ܫܰܒܥܳܐ ܫܺܐܕ̈ܶܐ ܗ̇ܳܢܽܘܢ ܕܰܡܫܰܠܗܒܺܝܢ ܗܘܰܘ ܠܳܗ̇ ܒܙܳܢܝܽܘܬܳܐ: ܠܳܟ ܛܽܘܒܰܝܟ ܡܳܪܝ ܝܽܘܚܰܢܳܢ ܕܰܟܦܳܢܳܐ ܕܢܰܚܶܡܬ ܡܺܝܬܳܐ ܗ̇ܰܘ ܕܡܶܛܽܠ ܐܰܪܝܳܐ ܥܰܠ ܡܰܝ̈ܳܐ ܕܝܰܪܕܳܐ: ܠܳܟ ܛܽܘܒܰܝܟ ܡܳܪܝ ܒܶܢܝܳܡܶܝܢ ܕܰܐܣܺܝܬ ܠܐܢ̱ܬܬܳܐ ܛܠܺܝܬܳܐ ܡ̣ܶܢ ܫܺܐܕܳܐ: ܘܰܢܦܰܩ ܫܺܐܕܳܐ ܟܰܕ ܡܰܝܠܶܠ ܕܘܳܝܠܺܝ ܡܶܢܳܟ ܘܗܳܫܳܐ ܒܰܨܠܰܘ̈ܳܬܳܟ ܡܳܪܝ ܘܰܕܚܳܠܳܟ ܣܳܒܳܐ ܡܳܪܝ ܐܰܘܓܺܝܢ ܛܪܽܘܕ ܡܶܢܰܢ ܫܺܐܕܳܐ ܒܺܝܫܳܐ ܐܰܝܟ ܕܰܛܪܰܕܬ ܡ̣ܶܢ ܒܰܪܬ ܩܽܘܣܛܰܢܛܺܝܢܳܘܣ ܡܰܠܟܳܐ ܙܰܟܳܝܳܐ: ܘܒܰܨܠܰܘ̈ܳܬܶܗ ܕܡܳܪܝ ܝܰܥܩܽܘܒ ܐܶܦܣܩܽܘܦܳܐ ܕܰܢܨܺܝܒܺܝܢ ܕܺܐܝܬܰܘܗܝ ܡ̣ܶܢ ܓܶܢܣܳܐ ܕܝܰܥܩܽܘܒ ܐܰܚܽܘܗܝ ܕܰܡܫܺܝܚܳܐ ܘܒܰܪ ܝܰܘܣܶܦ: ܘܒܰܨܠܰܘ̈ܳܬܶܗ ܕܡܳܪܝ ܫܰܠܺܝܛܳܐ ܐܺܝܙܠܳܝܳܐ ܗ̇ܰܘ ܕܰܐܩܺܝܡ ܡܺܝܬܳܐ ܩܰܪܕܘܳܝܳܐ ܕܒܰܠܥܶܗ ܗܘܳܐ ܬܰܢܺܝܢܳܐ: ܚܰܘܒܰܝ̈ܢ ܘܰܚܛܳܗܰܝ̈ܢ ܢܶܬܚܰܣܽܘܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܝܰܩܪܘ ܥܺܐܕܟܽܘܢ ܢܶܙܕܰܗܽܘܢ: ܘܰܐܝܟ ܕܩܰܕܶܫܬܽܘܢ ܠܗܰܝܟܠܐ ܕܰܒܟܶܐܘܶܝܠܐ: ܩܰܕܶܫܘ ܠܗܰܝܟ̈ܠܐ ܕܢܰܦ̈ܫܳܬܰܢ ܘܰܕܦܰܓܪ̈ܰܝܢ ܒܥܰܘ ܠܰܢ ܪ̈ܰܚܡܶܐ ܘܰܚܢܳܢܳܐ ܡ̣ܶܢ ܡܫܺܝܚܳܐ ܡܳܪܟܽܘܢ: ܘܚܽܘܣܳܝܳܐ ܘܰܢܝܳܚܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܐܰܝܟܰܢܳܐ ܕܢܰܣܶܩ ܫܽܘܒܚܳܐ ܠܐܠܳܗܳܐ ܕܰܓܒܳܟܽܘܢ ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܡܪܝ ܦܝܠܘܟܣܝܢܘܣ ܪܒܐ ܐܦܣܩܘܦܐ ܕܡܒܘܓ ܡܕܝܢܬܐ ܕܗܘ ܡܪܝ ܐܟܣܢܝܐ

 

ܨܠܘܬܐ ܕܫܘܪܝܐ

 

 

 

ܪܳܡܳܐ ܘܰܡܪܰܝܡܳܐ ܐܠܰܗܳܐ ܕܰܒܪܽܘܡܪ̈ܳܡܶܐ ܪ̈ܳܡܶܐ ܘܪ̈ܰܘܡܳܢܳܝܶܐ ܡܪܰܡܪܡܳܐܝ̣ܬ ܪܰܡܪܶܡ ܒܕܰܪܓܳܐ ܕܪܺܝܫܽܘܬ ܟܳܗܢܽܘܬܳܐ ܠܩܰܕܺܝܫܳܐ ܡܳܪܝ ܦܺܝܠܽܘܟܣܺܝܢܳܘܣ ܐܶܦܣܩܽܘܦܳܐ ܕܡܰܒܽܘܓ ܡܕܺܝܢ̱ܬܳܐ ܘܰܣܚܰܦ ܩܕܳܡܰܘܗܝ ܠܟܽܠܗܶܝܢ ܗܶܪ̈ܶܣܺܝܣ ܫܟܺܝܪ̈ܳܬܳܐ: ܣܚܽܘܦ ܡܳܪܝ ܗܳܫܳܐ ܒܝܰܕ ܨܠܰܘ̈ܳܬܶܗ ܕܰܐܬܠܺܝܛܳܟ ܠܟܽܠܳܗ̇ ܦܠܰܓܳܐ ܫܺܐܕܳܢܳܝܬܳܐ ܕܥܰܡܰܢ ܡܶܬܟܰܬܫܳܐ ܘܡܰܩܪܒܳܐ: ܕܢܰܣܶܩ ܠܳܟ ܫܽܘܒܚܳܐ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܫܰܒܰܚ ܠܰܫܒܺܝܚ ܒܢܶܨ̈ܚܳܢܶܐ ܡܳܪܝ ܦܺܝܠܽܘܟܣܺܝܢܳܘܣ ܒܪܺܝܫ ܟܽܠܗܶܝܢ ܥܺܕ̈ܳܬܳܐ ܕܣܽܘܪ̈ܝܳܝܶܐ: ܠܗܰܘ ܕܝܰܗܒ ܡܶܠܬܳܐ ܚܠܺܝܡܬܳܐ ܒܡܰܠܦܳܢܽܘܬܶܗ ܐܠܰܗܳܝܬܳܐ: ܘܰܣܕܰܪ ܘܰܡܠܳܗ̇ ܠܟܽܠܳܗ̇ ܬܺܒܶܝܠ ܚܰܝ̈ܶܐ ܕܠܐ ܡܶܬܚܰܒܠܳܢܽܘܬܳܐ: ܠܗܰܘ ܕܢܰܨܚܶܗ ܒܰܪܕܽܘܦܝܳܐ ܕܰܬܪ̈ܰܝܳܢܰܝ ܟܝ̈ܳܢܶܐ ܡܶܛܽܠ ܫܪܳܪܶܗ ܘܰܬܪܺܝܨܽܘܬܶܗ ܠܗܰܘ ܥܺܝܪܳܐ ܕܰܐܥܺܝܪ ܠܟܶܢܫܰܢ ܕܰܢܩܰܠܣܺܝܘܗܝ ܠܥܰܕܥܺܐܕܶܗ ܐܠܰܗܳܝܳܐ: ܗ̇ܰܘ ܕܫܳܘܶܐ ܠܟܽܠ ܩܳܠܺܝ̈ܢ ܕܰܢܚܰܓܽܘܢܳܝܗܝ ܠܕܽܘܟܪܳܢܶܗ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣ̈ܶܐ ܕܥܰܕܥܺܐܕܳܟ ܐܠܰܗܳܝܳܐ ܐܳܘ ܡܳܪܝ ܐܰܟܣܢܳܝܳܐ ܘܪܳܚܶܡ ܐܰܟܣ̈ܢܳܝܶܐ ܐܶܬܰܝܢܰܢ ܕܰܢܩܰܠܶܣܘ: ܒܰܒ̈ܢܳܬ ܩ̈ܳܠܐ ܦܬܺܝ̈ܟܳܬܳܐ ܢܙܰܡܰܪ ܟܰܕ ܐܳܡܪܺܝܢܰܢ: ܕܳܐܘ ܐܰܬܠܺܝܛܳܐ ܗܕܺܝܪܳܐ ܘܢܰܨܺܝܚܳܐ ܕܟܰܠܠܳܗ̇ ܠܥܺܕܬܳܐ ܒܰܟܠܺܝ̈ܠܐ ܪ̈ܳܡܶܐ ܕܝܽܘܠܦܳܢܰܘ̈ܗܝ ܚܠܺܝ̈ܡܶܐ ܕܰܩܢܶܝܢ ܡܶܠܬܳܐ ܚܠܺܝܡܬܳܐ ܘܫܰܪܺܝܪܬܳܐ ܕܗܰܝܡܳܢܽܘܬܳܐ ܫܠܺܝܚܳܝܬܳܐ ܘܕܰܡܦܰܢܶܝܢ ܠܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ: ܗܳܢܳܐ ܬܗܺܝܪܳܐ ܕܡܰܓܗܰܪ ܠܗܰܘܢܰܢ ܡ̣ܶܢ ܩܽܘܠܳܣܰܘ̈ܗܝ ܫܒܺܝ̈ܚܶܐ ܘܰܐܠܳܗܳܝ̈ܶܐ: ܗܳܢܳܐ ܕܶܐܬܪܰܒܺܝ ܒܛܽܘܪ̈ܶܐ ܘܒܰܡܥܰܪ̈ܶܐ ܒܦܶܥܪ̈ܶܝܗ̇ ܕܰܐܪܥܳܐ: ܘܰܬܨܰܠܶܠ ܗܰܘܢܶܗ ܕܶܐܬܕܰܟܺܝ ܒܰܪܢܳܫܳܐ ܓܰܘܳܝܳܐ ܘܒܰܪܳܝܳܐ ܘܰܗܘܳܐ ܐܰܝܟ ܦܰܪܙܠܐ ܕܰܨܒܺܝܥ ܒܢܽܘܪܳܐ ܟܽܠܳܢܳܐܝ̣ܬ: ܗܳܢܳܐ ܕܡ̣ܶܢ ܚܰܡܺܝܡܽܘܬ ܪܶܬܚܶܗ ܐܠܰܗܳܝܳܐ ܫܡܰܥ ܡܶܠܬܳܐ ܚܠܺܝܡܬܳܐ ܕܥܰܠ ܕܽܘܒܳܪܳܐ ܥܳܢܘܳܝܳܐ ܘܰܠܚܽܘܕܳܝܳܐ ܕܰܐܢܛܽܘܢܺܝܣܺܝܰܐ ܕܺܐܝܬܰܘܗܝ ܕܽܘܒܳܪܳܐ ܕܕܰܝܪ̈ܳܝܶܐ: ܗܳܢܳܐ ܕܣܰܩܶܡ ܘܣܳܡ ܡܽܘܫ̈ܚܳܬܳܐ ܘܕܰܪ̈ܓܶܐ ܠܕܽܘܒܳܪܳܐ ܕܕܰܝܪ̈ܳܝܶܐ: ܩܰܕܡܳܝܳܐ ܘܡܶܨܥܳܝܳܐ ܘܰܓܡܺܝܪܳܝܳܐ: ܗܳܢܰܘ ܕܶܝܢ ܫܰܪܘܳܝܳܐ ܘܢܰܦܫܳܢܳܝܳܐ ܘܰܡܥܰܠܝܳܐ ܪܽܘܚܳܢܳܝܳܐ ܘܰܓܡܺܝܪܳܐ: ܗܳܢܳܐ ܕܚܰܘܺܝ ܠܰܬܠܳܬ ܡܽܘܫ̈ܚܳܢ ܕܰܒܗܶܝܢ ܡܶܬܝܰܩܰܢ ܟܽܠܶܗ ܒܰܪܢܳܫܳܐ ܚܰܕܬܳܐ: ܗܳܢܳܐ ܕܥܶܣܪܳܐ ܟܬܳܒ̈ܶܐ ܣܳܡ ܕܡܰܠܦܺܝܢ ܥܰܠ ܕܰܪ̈ܓܶܐ ܘܡܽܘܫ̈ܚܳܬܳܐ ܘܡܰܣ̈ܩܳܬܳܐ ܕܕܽܘܒܳܪ̈ܶܐ ܢܽܘܟܪ̈ܺܝܛܳܝܶܐ ܘܰܐܠܳܗܳܝ̈ܶܐ ܕܶܐܣܟܺܝܡܳܐ ܕܕܰܝܪܳܝܽܘܬܳܐ: ܗܳܢܳܐ ܕܰܗܘܳܐ ܝܰܡܳܐ ܠܐ ܡܶܬܥܰܒܪܳܢܳܐ ܕܝܽܘܠܦܳܢ̈ܶܐ ܐܠܰܗܳܝ̈ܶܐ: ܕܣܳܡ ܒܥܺܕܬܳܐ ܡܳܐܐ ܘܫܰܒܥܺܝܢ ܦܳܢܘܳܝ̈ܳܬܳܐ ܕܰܐܒܰܥ ܡ̣ܶܢ ܠܶܒܶܗ ܒܝܰܕ ܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ: ܗܳܢܳܐ ܕܰܬܠܳܬܰܥܣܰܪ ܟܬܳܒ̈ܶܐ ܐ̱ܚܪ̈ܳܢܶܐ ܐܰܣܪܰܚ ܒܗܽܘܢ ܪܰܝܰܚ ܠܠܽܘ̈ܬܳܟܶܐ ܘܥܽܘܪ̈ܙܳܠܐ ܕܟܰܠܩܺܝܕܽܘ̈ܢܳܝܶܐ ܘܰܐܚܪܶܡ ܠܣܽܘܢܰܗܕܳܘܣ ܕܺܝܠܗܽܘܢ ܡܰܣܠܳܝܬܳܐ: ܗܳܢܳܐ ܕܶܫܬܳܐ ܟܬܳܒ̈ܶܐ ܐ̱ܚܪ̈ܳܢܶܐ ܐܰܒܰܥ: ܕܰܒܗܽܘܢ ܩܰܛܪܶܓ ܠܝܽܘܠܦܳܢܰܘ̈ܗܝ ܡܰܣܠܰܝ̈ܳܐ ܘܡܰܛܥ̈ܝܳܢܶܐ ܕܒܰܪܨܰܘܡܳܐ ܕܰܢܨܺܝܒܺܝܢ ܩܳܛܽܘܠܐ ܘܳܐܫܶܕ ܕܡܳܐ: ܗܳܢܳܐ ܕܰܐܣܓܺܝ ܐܶܓܪ̈ܳܬܳܐ ܕܠܐ ܣܳܟ ܕܰܡܫܰܪܪ̈ܳܢ ܠܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܘܠܐ ܙܺܐܦܳܢܳܝܬܳܐ: ܗܳܢܳܐ ܕܶܐܬܪܕܶܦ ܡ̣ܶܢ ܣܰܩܽܘ̈ܒܠܳܝܰܝ ܫܪܳܪܳܐ: ܘܶܐܬܚܒܶܫ ܢܽܘܓܪܳܐ ܕܰܫܢܰܝ̈ܳܐ ܣܰܓܺܝ̈ܳܐܬܳܐ: ܗܳܢܳܐ ܕܠܐܬܪ̈ܰܘܳܬܳܐ ܢܽܘܟܪ̈ܳܝܶܐ ܐܶܫܬܕܺܝ ܠܐܟܣܽܘܪܝܳܐ ܬܠܳܬ ܙܰܒܢܺܝ̈ܢ: ܘܒܰܛܪܽܘܕܝܶܗ ܘܒܰܚܒܽܘܫܝܶܗ ܡܳܠܐܷ ܗܘܳܐ ܠܐܬܪ̈ܰܘܳܬܳܐ ܡ̣ܶܢ ܐܶܓܪ̈ܳܬܶܗ ܬܡܺܝ̈ܗܳܬܳܐ: ܘܰܡܫܰܪܰܪ ܗܘܳܐ ܠܥܺܕ̈ܳܬܳܐ: ܗܳܢܳܐ ܕܡ̣ܶܢ ܒܢ̈ܰܝ ܒܰܝܬܶܗ ܘܩܰܪ̈ܺܝܒܶܐ ܕܺܝܠܶܗ ܩܰܒܶܠ ܪܕܽܘܦܝܳܐ ܠܐ ܡܶܣܬܰܒܪܳܢܳܐ ܡܶܛܽܠ ܫܪܳܪܶܗ ܕܰܡܫܺܝܚܳܐ: ܗܳܢܳܐ ܕܰܗܘܳܐ ܡܰܘܬܶܗ ܓܢܺܝܚܳܐ ܒܬܶܢܳܢܳܐ ܕܡ̣ܶܢ ܐܰܬܽܘܢܳܐ ܕܒܰܠܐܱܢܺܝ: ܟܰܕ ܚܒܺܝܫ ܒܒܰܝܬܳܐ ܥܶܠܳܝܳܐ ܕܒܰܠܐܱܢܺܝ ܗܳܢܳܐ ܕܰܣܒܰܠ ܚܰܫ̈ܶܐ ܡܰܪܺܝܪ̈ܶܐ ܘܰܒܬܶܢܳܢܳܐ ܕܒܰܠܐܱܢܺܝ ܐܶܬܚܒܶܫ ܘܶܐܬܟܰܠܰܠ ܡܶܛܽܠ ܡܳܪܶܗ ܫܢܰܬ݀ ܬܡܳܢܶܡܳܐܐ ܘܰܬܠܳܬܺܝܢ ܘܚܰܡܶܫ ܕܝܰܘ̈ܢܳܝܶܐ: ܗܳܢܳܐ ܪܕܺܝܦܳܐ ܕܶܐܬܕܰܡܺܝ ܠܡܳܪܶܗ ܒܣܳܗܕܽܘܬܳܐ ܕܺܝܠܶܗ: ܘܶܐܬܟܰܠܰܠ ܒܰܟܠܺܝ̈ܠܐ ܣܳܗ̈ܕܳܝܶܐ ܕܫܳܘܝܳܐ ܗܘܳܬ݀ ܠܗܽܘܢ ܚܠܺܝܨܽܘܬܶܗ: ܗܳܢܳܐ ܕܦܰܫܶܩ ܠܥܰܬܺܝܩܬܳܐ ܘܠܰܚܕܰܬܳܐ ܘܟܽܠܗܽܘܢ ܟܬܳܒ̈ܶܐ ܩܽܘܕ̈ܫܳܢܳܝܶܐ: ܗܳܢܳܐ ܕܡ̣ܶܢ ܒܳܬܰܪ ܡܰܘܬܶܗ ܡܰܟܪܶܙ ܠܰܢ ܡܰܠܦܳܢܽܘܬܶܗ ܘܰܬܪܺܝܨܽܘܬ ܕܽܘܒܳܪ̈ܶܘܗܝ ܪ̈ܳܡܶܐ ܘܰܐܠܳܗܳܝ̈ܶܐ: ܗܳܢܳܐ ܕܰܠܘܳܬܶܗ ܬܪܺܝܨ ܟܽܠܶܗ ܩܶܦܰܠܐܘܢ ܕܩܽܘܠܳܣ̈ܶܐ: ܗܳܢܳܐ ܕܨܶܝܕ ܡܳܪܶܗ ܐܺܝܬܰܘܗܝ ܩܽܘܠܳܣܶܗ ܒܟܽܠܥܶܕܳܢ: ܗܳܢܳܐ ܕܩܰܒܶܠ ܛܽܘܒܳܐ ܡ̣ܶܢ ܡܳܪܶܗ ܐܰܝܟ ܕܶܐܡܰܪ ܒܶܐܘܢܓܶܠܝܽܘܢ ܩܰܕܺܝܫܳܐ: ܒܰܕܓܽܘܢ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܐܰܟܙܢܳܐ ܕܺܝܕܰܥܬܰܢ ܬܰܚܽܘܒܬܳܐ ܒܚܰܕܽܘܬܳܐ ܢܰܙܥܶܩ ܘܢܺܐܡܰܪ: ܫܠܳܡܠܳܟ ܡܳܪܝ ܐܰܟܣܢܳܝܳܐ ܐܰܒܺܝܠܐ ܕܨܶܒܝܳܢܳܐ ܘܠܐ ܕܰܟܝܳܢܳܐ: ܫܠܳܡܠܳܟ ܒܬܽܘܠܐ ܢܰܟܦܳܐ ܘܩܰܕܺܝܫܳܐ: ܫܠܳܡܠܳܟ ܥܳܩܽܘܪܳܐ ܕܚܰܢܦܽܘܬܳܐ: ܫܠܳܡܠܳܟ ܦܺܝܠܳܣܽܘܦܳܐ ܚܰܟܺܝܡܳܐ ܕܦܰܪܣܺܝ ܠܐܪ̈ܶܣܺܝܣ ܡܙܰܝ̈ܦܳܬܳܐ: ܫܠܳܡܠܳܟ ܝܰܡܳܐ ܕܝܽܘܠܦܳܢ̈ܶܐ: ܫܠܳܡܠܳܟ ܦܽܘܪܩܳܣܳܐ ܪܳܡܳܐ: ܕܒܳܟ ܐܶܣܬܰܬܪܰܬ݀ ܣܽܘܪܝܳܝܽܘܬܳܐ: ܫܠܳܡܠܳܟ ܝܰܪܕܳܐ ܕܚܶܟ̈ܡܳܬܳܐ: ܕܡܶܢܶܗ ܐܶܫܬܺܝܘ ܐܰܬܪ̈ܰܘܳܬܳܐ: ܬܳܐ ܒܰܫܠܳܡܳܐ ܡܳܪܝ ܐܰܟܣܢܳܝܳܐ ܕܠܳܚܶܡ ܫܡܶܗ ܠܥܰܒ̈ܕܰܘܗܝ ܒܪܶܚܡܰܬ݀ ܡܶܣ̈ܟܺܢܶܐ ܘܰܐܟܣ̈ܢܳܝܶܐ ܕܰܡܝܰܬܪܳܐ ܗ̱ܝ ܒܟܽܠܡܶܕܶܡ: ܬܳܐ ܒܰܫܠܳܡܳܐ ܡܳܪܝ ܐܰܟܣܢܳܝܳܐ ܕܫܳܛ ܠܚܰܝ̈ܶܐ ܗܳܠܶܝܢ ܙܰܒ̈ܢܳܝܶܐ: ܘܰܗܘܳܐ ܝܳܪܬܳܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܘܝܰܗܒ ܢܰܦܫܶܗ ܠܡܰܘܬܳܐ ܡܶܛܽܠ ܡܳܪܶܗ: ܬܳܐ ܒܰܫܠܳܡܳܐ ܡܳܪܝ ܐܰܟܣܢܳܝܳܐ ܝܳܚܺܝܕܳܝܳܐ ܫܰܪܺܝܪܳܐ ܕܣܺܝܡܳܐ ܦܶܨܬܶܗ ܥܰܡ ܥܳܢܘܳܝ̈ܶܐ ܘܕܰܝܪ̈ܳܝܶܐ: ܘܰܚܠܺܝܛܳܐ ܡܢܳܬܶܗ ܥܰܡ ܣܳܗ̈ܕܶܐ ܘܡܰܘܕ̈ܝܳܢܶܐ: ܬܳܐ ܒܰܫܠܳܡܳܐ ܡܳܪܝ ܐܰܟܣܢܳܝܳܐ ܐܶܦܣܩܽܘܦܳܐ ܘܡܰܠܦܳܢܳܐ ܕܰܒܡܰܠܦܳܢܽܘܬܳܟ ܦܬܺܝܬܳܐ ܡܶܬܒܰܣܡܳܐ ܟܽܠܳܗ̇ ܣܽܘܪܺܝܰܐ: ܬܳܐ ܒܰܫܠܳܡܳܐ ܡܳܪܝ ܐܰܟܣܢܳܝܳܐ ܕܰܒܥܽܘܡܪܳܐ ܩܰܕܺܝܫܳܐ ܕܩܰܪܬܡܺܝܢ ܕܰܪܫܺܝܡ ܠܡܰܠܐܟ̈ܶܐ ܐܶܬܕܪܰܫܬ ܘܶܐܬܚܰܟܰܡܬ ܒܝܽܘܠܦܳܢ̈ܶܐ ܡܰܠܝ̈ܰܝ ܚܰܝ̈ܶܐ: ܘܟܰܕ ܠܛܽܘ̈ܒܰܝܟ ܛܽܘܒ̈ܬܳܢܶܐ ܠܐ ܡܳܛܶܝܢܰܢ: ܢܣܰܠܓܶܣ ܠܘܳܬܳܟ ܟܰܕ ܐܳܡܪܺܝܢܰܢ: ܦܫܽܘܛ ܝܰܡܺܝܢܳܟ ܐܰܒܽܘܢ ܡܳܪܝ ܐܰܟܣܢܳܝܳܐ ܐܰܘܟܺܝܬ ܡܳܪܝ ܦܺܝܠܽܘܟܣܺܝܢܳܘܣ ܒܰܪܶܟ ܠܟܶܢܫܰܢ ܕܚܳܕܶܐ ܘܪܳܘܶܙ ܒܥܰܕܥܺܐܕܳܟ ܠܪ̈ܺܝܫܰܝ ܟܳܗ̈ܢܶܐ ܨܰܒܶܬ ܒܢܳܛܽܘܪܽܘܬ ܗܰܝܡܳܢܽܘܬܳܐ ܐܳܪܬܳܕܽܘܟܣܳܝܬܳܐ ܕܢܶܪܥܽܘܢ ܠܥܳܢ̈ܳܐ ܡܠܺܝܠܬܳܐ ܥܰܠ ܡܰܪ̈ܓܶܐ ܕܥܽܘܫܢܳܐ ܘܡܰܝ̈ܳܐ ܕܰܢܝܳܚܳܐ ܠܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܬܶܫܡ̈ܫܳܬܳܐ ܕܺܝܠܗܽܘܢ ܒܥܰܕܥܺܐܕܰܝ̈ܟ ܡܚܰܕ̈ܝܳܢܶܐ ܕܢܶܫܬܘܽܘܢ ܠܰܢܣܺܝܒܽܘܬܳܐ ܕܰܥܒ̈ܳܕܶܐ ܛܳܒ̈ܶܐ ܘܫܰܦܝܽܘܬܳܐ ܒܟܽܠܙܒܰܢ ܠܩܳܪ̈ܽܘܝܶܐ ܕܩܳܪܶܝܢ ܡܺܐܡܪ̈ܰܝܟ ܐܠܰܗܳܝ̈ܶܐ: ܘܥܰܡ ܩܪ̈ܰܝܳܐ ܘܰܙܡܺܝ̈ܢܶܐ ܒܡܰܠܟܽܘܬܳܐ ܥܳܠܡܺܝܢܳܝܬܳܐ ܢܶܬܒܰܣܡܽܘܢ ܡܬܽܘܡܳܐܝ̣ܬ ܘܰܡܙܰܡܪ̈ܳܢܶܐ ܕܙܰܡܰܪܘ ܒܕܽܘܟܪܳܢܳܟ ܫܒܺܝܚܳܐ ܢܶܗܘܽܘܢ ܡܙܰܡܪ̈ܳܢܶܐ ܒܥܺܕܬܳܐ ܗ̇ܳܝ ܫܡܰܝܳܢܺܝܬܳܐ: ܘܠܐܦ̈ܣܰܠܛܽܘ ܘܠܐܢܓܢܺܣ̈ܛܽܘ ܕܕܰܝܶܨܘ ܒܢܰܗܺܝܪ̈ܰܝ ܥܺܐܕܳܟ: ܢܶܬܚܰܕܽܘܢ ܒܢܽܘܗܪܶܗ ܕܡܳܪܳܟ: ܘܥܰܡܳܐ ܡܗܰܝܡܢܳܐ ܕܫܳܗܰܪ ܘܰܡܨܰܠܐ ܩܕܳܡ ܫܟܺܝܢܬܳܐ ܕܦܰܓܪܳܟ ܩܰܕܺܝܫܳܐ: ܢܶܬܚܰܪܰܪ ܡ̣ܶܢ ܚܰܝ̈ܶܐ ܢܰܫܺܝ̈ܫܶܐ ܘܰܪ̈ܦܰܝܳܐ: ܘܟܽܠܰܢ ܥܰܡ ܟܽܠܰܢ ܢܶܫܬܘܶܐ ܕܢܶܫܡܰܥ ܩܳܠܐ ܡܚܰܕܝܳܢܳܐ ܕܳܐܡܰܪ: ܕܬܰܘ ܥܽܘܠܘ ܠܡܰܠܟܽܘܬܳܐ ܕܰܫܡܰܝܳܐ: ܘܰܚܢܰܢ ܘܥܰܢܺܝ̈ܕܰܝܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝ ܒܡܶܨܛܰܒܝܳܢܽܘܬܳܟ ܠܦܺܝܪܡܳܐ ܕܩܰܪܶܒܢܰܢ ܗܳܫܳܐ ܒܕܽܘܟܪܳܢ ܚܰܣܝܳܐ ܡܳܪܝ ܦܺܝܠܽܘܟܣܺܝܢܳܘܣ ܘܚܰܣܳܐ ܒܶܗ ܚܰܘܒܰܝ̈ܢ ܘܰܚܛܳܗܰܝ̈ܢ ܘܰܐܥܒܰܪ ܡܶܢܰܢ ܒܝܰܕ ܨܠܰܘ̈ܳܬܶܗ ܕܰܡܢܺܝܚܳܢܳܟ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܰܩܒܽܘܥ ܝܽܘܠܦܳܢܶܗ ܒܬܰܪ̈ܥܝܳܬܰܢ: ܘܫܰܪܰܪ ܘܣܰܬܶܬ ܗܰܝܡܳܢܽܘܬܶܗ ܬܪܺܝܨܬܳܐ ܒܢܰܦ̈ܫܳܬܰܢ: ܘܰܐܫܘܳܐ ܠܰܢ ܕܢܶܦܓܰܥ ܒܶܗ ܩܕܳܡ ܒܺܐܡ ܕܺܝܠܳܟ ܐܠܰܗܳܝܬܳܐ ܘܰܕܢܶܗܘܶܐ ܚܠܳܦܰܝܢ ܣܢܺܐܓܪܳܐ ܠܡܳܪܽܘܬܳܟ ܡܪܰܝܰܡܬܳܐ܀

 

 

 

ܚܘܬܡܐ

 

 

 

ܦܫܽܘܛ ܕܺܝܟܣܳܝܳܐ ܕܺܝܠܳܟ ܝܳܗܒܰܬ݀ ܫܽܘ̈ܟܳܢܶܐ ܡܰܘܬܪ̈ܳܢܶܐ ܘܡܰܘܗ̈ܒܳܬܳܐ ܐܠܰܗܳܝ̈ܳܬܳܐ: ܐܳܘ ܪܺܝܫܳܐ ܡܥܰܠܝܳܐ ܘܝܰܩܺܝܪܳܐ ܐܰܒܽܘܢ ܚܰܣܝܳܐ ܡܳܪܝ ܦܺܝܠܽܘܟܣܺܝܢܳܘܣ: ܘܒܰܪܶܟ ܠܶܠܐܘܳܣ ܗܳܢܳܐ ܕܶܐܬܟܰܢܰܫ ܠܥܰܕܥܺܐܕܳܟ ܐܠܰܗܳܝܳܐ: ܩܰܝܛܽܘܢܩܳܢܳܐ ܘܫܰܠܺܝܛܳܐ ܐܺܝܬܰܝܟ: ܥܰܠ ܐܽܘܡܺܝܪܽܘܣ ܕܡܳܪܳܟ: ܒܥܺܝ ܠܰܢ ܡܶܢܶܗ ܒܝܰܕ ܦܰܪܶܗܣܺܝܰܐ ܕܺܐܝܬ ܠܘܳܬܶܗ: ܕܰܢܫܰܟܶܢ ܠܰܢ ܫܰܝܢܶܗ ܘܰܫܠܳܡܶܗ ܘܕܰܢܫܰܕܰܪ ܠܰܢ ܪ̈ܰܚܡܰܘܗܝ ܘܰܚܢܳܢܶܗ: ܕܢܰܘܕܶܐ ܘܰܢܫܰܒܰܚ ܠܶܗ ܘܠܐܒܽܘܗܝ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܦܪܘܡܝܘܢ ܕܠܠܝܐ

 

 

 

ܠܗܰܘ ܕܰܓܒܳܝܗܝ ܠܐܒܽܘܢ ܚܰܣܝܳܐ ܡܳܪܝ ܦܺܝܠܽܘܟܣܺܝܢܳܘܣ ܘܥܰܒܕܶܗ ܪܳܥܝܳܐ ܠܡܰܪܥܺܝܬܶܗ ܡܠܺܝܠܬܳܐ ܠܗܰܘ ܕܰܐܩܺܝܡܶܗ ܢܳܛܽܘܪܳܐ ܘܕܰܘܩܳܐ ܥܺܝܪܳܐ: ܘܰܒܝܰܕ ܡܰܠܦܳܢܽܘܬܶܗ ܘܰܙܗܺܝܪܽܘܬܶܗ ܘܚܽܘ̈ܦܳܛܰܘܗܝ ܕܠܰܡܗܰܝ̈ܡܢܶܐ ܐܶܬܬܪܺܝܡ ܪܺܝܫܳܗ̇ ܕܣܽܘܪܝܳܝܽܘܬܳܐ: ܘܰܥܫܶܢ ܓܰܒܳܐ ܕܗܰܝܡܳܢܽܘܬܳܐ ܘܶܐܣܬܰܚܦܰܬ݀ ܟܳܦܽܘܪܽܘܬܳܐ ܘܒܶܗܬܰܬ݀ ܚܰܢܦܽܘܬܳܐ: ܘܚܳܒ ܘܶܐܙܕܟܺܝ ܟܽܠܶܗ ܓܰܒܳܐ ܕܛܳܥܝܽܘܬܳܐ: ܠܗܰܘ ܕܫܰܕܪܶܗ ܠܡܳܪܝ ܐܰܟܣܢܳܝܳܐ ܡܰܘܗܰܒܬܳܐ ܕܛܳܒ̈ܳܬܳܐ ܠܐܬܪܰܢ ܘܰܦܢܺܝܬܰܢ: ܕܠܶܗ ܠܰܡܫܰܕܪܳܢܶܗ ܘܰܡܫܰܟܢܳܢܶܗ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܝܰܘܡܳܐ ܫܒܺܝܚܳܐ ܕܥܰܕܥܺܐܕܶܗ ܕܡܳܪܝ ܐܰܟܣܢܳܝܳܐ ܝܰܘܡܳܢܳܐ ܡܩܰܠܣܺܝܢܰܢ: ܒܰܨܠܰܘ̈ܳܬܶܗ ܩܰܕܺܝ̈ܫܳܬܳܐ ܛܳܦܣܺܝܢܰܢ: ܘܰܒܒܳܥ̈ܘܳܬܶܗ ܡܶܬܓܰܘܣܺܝܢܰܢ: ܗܳܢܳܐ ܪܺܝܫܳܐ ܘܰܡܥܰܠܝܳܐ ܘܝܰܩܺܝܪܳܐ ܕܬܰܠܡܶܕ ܟܰܪ̈ܟܶܐ ܘܰܡܕܺܝ̈ܢܳܬܳܐ: ܗܳܢܳܐ ܕܠܐ ܣܳܦܶܩ ܠܶܗ ܚܰܕ ܐܰܬܪܳܐ ܠܰܡܬܰܠܡܳܕܽܘ ܐܶܠܐ ܒܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ ܐܰܟܪܶܙ ܘܰܐܠܶܦ ܘܬܰܠܡܶܕ: ܗܳܢܳܐ ܕܡ̣ܶܢ ܐܰܬܪܳܐ ܕܒܶܝܬ ܓܰܪ̈ܡܰܝ ܫܘܰܚ: ܡ̣ܶܢ ܩܪܺܝܬܳܐ ܕܰܫܡܳܗ̇ ܬܰܐܚܶܠ: ܘܡ̣ܶܢ ܬܰܡܳܢ ܠܐܬܪܳܐ ܒܪܺܝܟܳܐ ܕܛܽܘܪ ܥܰܒܕܺܝ̈ܢ ܡܛܳܐ ܥܰܡ ܐܰܒܳܗܰܘ̈ܗܝ ܡܗܰܝ̈ܡܢܶܐ: ܗܳܢܳܐ ܕܰܒܢܳܐ ܠܶܗ ܟܽܘܪܚܳܐ ܚܰܕ ܥܰܠ ܓܶܢ̱ܒ ܣܒܺܝܪܺܝܢܳܐ ܩܪܺܝܬܳܐ: ܘܰܦܠܰܚ ܒܶܗ ܕܽܘܒܳܪ̈ܶܐ ܕܕܰܝܪܳܝܽܘܬܳܐ: ܗܳܢܳܐ ܕܰܒܥܽܘܡܪܳܐ ܩܰܕܺܝܫܳܐ ܕܩܰܪܬܡܺܝܢ ܐܶܬܕܰܪܰܫ ܘܶܐܬܚܰܟܰܡ ܒܰܬܪܶܝܢ ܣܶܦܪ̈ܺܝܢ ܕܝܰܘ̈ܢܳܝܶܐ ܘܰܕܣܽܘܪ̈ܝܳܝܶܐ: ܗܳܢܳܐ ܕܟܰܕ ܒܟܺܐܢ̈ܶܐ ܘܩܰܕܺܝ̈ܫܶܐ ܕܰܒܥܽܘܡܪܳܐ ܐܠܰܗܳܝܳܐ ܡܡܰܪܶܐ ܗܘܳܐ: ܘܡܶܢܗܽܘܢ ܟܺܝܬ ܝܳܠܶܦ ܗܘܳܐ ܐܽܘܪܚܳܐ ܡܥܰܠܰܝܬܳܐ ܕܰܓܡܺܝܪܽܘܬܳܐ: ܗܳܢܳܐ ܕܟܰܕ ܐܶܙܰܠ ܠܰܫܠܳܡܶܗ ܕܗܳܒܶܝܠ ܐܶܣܛܽܘܢܳܪܳܐ ܩܰܕܺܝܫܳܐ: ܕܺܐܝܬܰܘܗܝ ܗܘܳܐ ܡܶܢܶܗ ܕܥܽܘܡܪܳܐ ܩܰܕܺܝܫܳܐ: ܘܰܚܒܺܝܫ ܗܘܳܐ ܥܰܠ ܓܶܢ̱ܒ ܡܶܕܝܰܕ ܩܪܺܝܬܳܐ: ܐܶܬܓܗܶܢ ܘܶܐܬܟܦܶܦ ܐܶܣܛܽܘܢܳܐ ܕܟܺܐܦ̈ܶܐ: ܘܶܐܬܒܰܪܰܟܘ ܩܰܕܺܝ̈ܫܶܐ ܡ̣ܶܢ ܚܕܳܕ̈ܶܐ: ܗܳܢܳܐ ܕܰܗܘܳܐ ܪܳܥܝܳܐ ܠܡܰܒܽܘܓ ܡܕܺܝܢ̱ܬܳܐ ܕܒܰܐܬܪܳܐ ܕܡܰܕܢܚܳܐ: ܗܳܢܳܐ ܕܩܰܝܶܡ ܘܫܰܪܰܪ ܠܥܺܕ̈ܳܬܳܐ ܘܕܰܝܪ̈ܳܬܳܐ ܕܰܒܟܽܠܳܗ̇ ܣܽܘܪܺܝܰܐ ܒܡܰܠܦܳܢܽܘܬܶܗ ܬܡܺܝܗܬܳܐ: ܗܳܢܳܐ ܕܣܳܡ ܟܬܳܒ̈ܶܐ ܠܕܰܝܪ̈ܳܝܶܐ ܕܡܶܢܗܽܘܢ ܢܺܐܠܦܽܘܢ ܩܳܢܽܘ̈ܢܶܐ ܘܕܽܘܒܳܪ̈ܶܐ ܕܕܰܝܪܳܝܽܘܬܳܐ: ܗܳܢܳܐ ܕܰܟܬܳܒ̈ܶܐ ܣܰܓܺܝ̈ܶܐܐ ܫܒܰܩ ܒܥܺܕܬܳܐ ܩܰܕܺܝܫܬܳܐ: ܕܺܐܝܬ ܒܗܽܘܢ ܙܢܰܝ̈ܳܐ ܣܰܓܺܝ̈ܶܐܐ ܕܝܽܘܠܦܳܢ̈ܶܐ ܐܠܰܗܳܝ̈ܶܐ ܘܰܒܗܽܘܢ ܩܰܠܶܣ ܠܥܰܕ̈ܥܺܐܕܰܘܗܝ ܕܰܡܫܺܝܚܳܐ ܘܰܠܟܽܠܳܗ̇ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ: ܗܳܢܳܐ ܕܩܰܠܶܣ ܒܬܽܘܪ̈ܓܳܡܰܘܗܝ ܚܠܰܝ̈ܳܐ ܘܒܰܣܺܝ̈ܡܶܐ ܠܩܰܕܺܝ̈ܫܶܐ ܕܰܒܝܰܘ̈ܡܳܬܶܗ: ܘܰܠܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܩܕܳܡ ܙܰܒܢܶܗ: ܗܳܢܳܐ ܕܶܐܬܚܰܒܰܪ ܠܣܶܐܘܺܝܪܶܐ ܪܰܒܳܐ ܘܠܐܢܬܺܝܡܽܘܣ ܘܰܠܬܶܐܘܳܕܽܘܣܝܳܘܣ ܦܰܛܪܝܰܪ̈ܟܶܐ ܡܥܰܠܰܝ̈ܳܐ: ܘܥܰܡܗܽܘܢ ܡܫܰܪܰܪ ܗܘܳܐ ܠܗܰܝܡܳܢܽܘܬܳܐ ܫܰܪܺܝܪܬܳܐ ܘܰܬܪܺܝܨܰܬ ܫܽܘܒܚܳܐ: ܗܳܢܳܐ ܕܰܣܒܰܠ ܐܽܘܠܨܳܢ̈ܶܐ ܣܰܓܺܝ̈ܶܐܐ ܘܫܶܢ̈ܕܶܐ ܡܰܪܺܝܪ̈ܶܐ ܡ̣ܶܢ ܟܰܠܩܺܝ̈ܕܽܘܢܳܝܶܐ ܡܰܣ̈ܠܰܝܳܐ ܘܰܦܣܺܝ̈ܩܶܐ: ܘܠܐ ܐܶܬܪܰܦܺܝ ܡ̣ܶܢ ܫܶܢ̈ܕܶܐ ܘܡ̣ܶܢ ܐܽܘܠܨܳܢ̈ܶܐ ܘܗ̣ܽܘ ܩܰܘܺܝ ܒܰܫܪܳܪܶܗ: ܗܳܢܳܐ ܕܟܰܕ ܡܺܝܬ ܡܰܠܟܳܐ ܡܗܰܝܡܢܳܐ ܐܰܢܶܣܛܽܘܣ ܩܳܡ ܒܳܬܪܶܗ ܪܰܫܺܝܥܳܐ ܝܽܘܣܛܰܢܺܝܢܽܘܣ ܘܰܐܩܺܝܡ ܪܕܽܘܦܝܳܐ ܪܰܒܳܐ ܥܰܠ ܟܪ̈ܺܝܣܛܝܳܢܶܐ: ܘܩܰܒܶܠ ܠܣܽܘܢܰܗܕܳܘܣ ܡܰܣܠܳܝܬܳܐ ܕܟܰܠܩܺܝܕܽܘܢܰܐ: ܘܰܛܪܰܕ ܠܗܳܠܶܝܢ ܦܰܛܪܝܰܪ̈ܟܽܘ ܩܰܕܺܝ̈ܫܶܐ: ܘܰܠܡܳܪܝ ܐܰܟܣܢܳܝܳܐ ܡ̣ܶܢ ܟܽܘܪ̈ܣܰܘܳܬܗܽܘܢ: ܗܳܢܳܐ ܕܠܳܛܶܗ ܠܝܽܘܣܛܰܢܺܝܢܳܐ ܪܰܫܺܝܥܳܐ: ܘܰܡܚܳܝܗܝ ܡܰܠܐܟܳܐ ܕܪܽܘܓܙܳܐ: ܘܢܳܒܰܚ ܗܘܳܐ ܒܰܕܡܽܘܬ ܟܰܠܒܳܐ: ܘܰܒܝܰܕ ܨܠܰܘ̈ܳܬܶܗ ܣܳܦ ܡ̣ܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ: ܗܳܢܳܐ ܕܒܳܬܰܪ ܫܢܰܝ̈ܳܐ ܣܰܓܺܝ̈ܳܐܬܳܐ ܕܰܚܒܺܝܫ ܗܘܳܐ ܡ̣ܶܢ ܐܺܝ̈ܕܰܝ ܟܰܠܩܺܝ̈ܕܽܘܢܳܝܶܐ ܚܰܢ̈ܦܶܐ ܘܟܳܦܽܘܪ̈ܶܐ: ܒܬܶܢܳܢܳܐ ܕܒܰܠܐܱܢܺܝ ܗܘܳܐ ܥܽܘܢܕܳܢܶܗ ܗܳܢܳܐ ܕܣܳܗ̈ܕܶܐ ܣܰܓܺܝ̈ܶܐܐ ܐܶܬܩܰܛܰܠܘ ܡܶܛܽܠ ܡܫܺܝܚܳܐ ܒܝܰܘ̈ܡܳܬܶܗ: ܒܰܪܕܽܘܦܝܳܐ ܗ̇ܰܘ ܕܩܳܐܶܡ ܒܙܰܒܢܳܐ ܕܰܚܒܽܘܫܝܶܗ: ܗܳܢܳܐ ܕܒܳܬܰܪ ܙܰܒܢܳܐ ܣܰܓܺܝ̈ܶܐܐ ܕܥܽܘܢܕܳܢܶܗ: ܐܶܬܬܰܝܬܺܝ ܦܰܓܪܶܗ ܚܰܣܝܳܐ ܠܥܽܘܡܪܳܐ ܩܰܕܺܝܫܳܐ ܕܩܰܪܬܡܺܝܢ ܒܺܐܝ̈ܕܰܝ ܡܳܪܝ ܦܺܝܠܽܘܟܣܺܝܢܳܘܣ ܬܪܰܝܳܢܳܐ ܚܰܣܝܳܐ ܩܰܕܺܝܫܳܐ ܒܰܪ ܚܳܬܶܗ: ܗܳܢܳܐ ܕܪܺܝܫܶܗ ܝܰܩܺܝܪܳܐ ܫܰܩܠܽܘܗܝ ܡܗܰܝ̈ܡܢܶܐ ܠܡܶܕܝܰܕ ܩܪܺܝܬܳܐ: ܘܰܒܢܰܘ ܥܺܕܬܳܐ ܥܰܠ ܫܡܶܗ ܘܗܳܐ ܡܶܬܓܰܘܣܺܝܢ ܒܶܗ: ܗܳܢܳܐ ܕܰܐܝܟ ܢܒܺܝ̈ܶܐ ܝܺܕܰܥ ܟܰܣ̈ܝܳܬܳܐ ܘܰܓܢܺܝ̈ܙܳܬܳܐ: ܘܰܐܝܟ ܫܠܺܝ̈ܚܶܐ ܐܰܟܪܶܙ ܘܬܰܠܡܶܕ ܒܰܐܬܪ̈ܰܘܳܬܳܐ: ܗܳܢܳܐ ܕܰܐܝܟ ܝܺܚܺܝ̈ܕܳܝܶܐ ܘܥܳܢܘ̈ܳܝܶܐ ܗܘܳܐ ܒܰܫܩܺܝ̈ܦܶܐ: ܘܰܒܟܽܘܪ̈ܚܶܐ ܒܫܶܠܝܳܐ ܒܰܠܚܽܘܕܳܝܽܘܬܳܐ: ܗܳܢܳܐ ܕܰܐܝܟ ܣܳܗ̈ܕܶܐ ܘܡܰܘ̈ܕܝܳܢܶܐ ܣܰܝܒܰܪ ܫܶܢ̈ܕܶܐ ܘܽܐܘܠܨܳܢ̈ܶܐ ܘܰܪ̈ܕܽܘܦܝܶܐ ܘܰܚܒܽܘܫ̈ܝܶܐ: ܘܶܐܬܚܰܢܰܩ ܒܬܶܢܳܢܳܐ ܘܩܰܒܶܠ ܟܠܺܝܠܐ ܕܣܳܗܕܽܘܬܳܐ: ܗܳܢܳܐ ܕܠܰܝܬ ܡܶܢܝܳܢܳܐ ܠܬܶܕܡܪ̈ܳܬܶܗ: ܘܠܐ ܚܽܘܫܒܳܢܳܐ ܠܰܬܡܺܝ̈ܗܳܬܶܗ: ܘܠܐ ܟܰܝܠܐ ܠܐܬܪ̈ܰܘܳܬܳܐ ܘܚܰܝ̈ܠܐ ܕܶܐܬܣܥܰܪܘ ܒܶܝܬ ܐܺܝܕܰܘ̈ܗܝ: ܕܰܟܪ̈ܺܝܗܶܐ ܣܰܓܺܝ̈ܶܐܐ ܐܰܣܺܝ: ܡܚܺܝ̈ܠܐ ܘܡܰܟܰܐܒ̈ܶܐ ܐܰܚܠܶܡ: ܡܫܰܪ̈ܰܝܳܐ ܫܰܪܰܪ ܘܰܥܨܰܒ: ܕܰܝܘ̈ܳܢܶܐ ܘܫܺܐܕ̈ܳܢܶܐ ܫܰܘܙܶܒ ܘܚܰܪܰܪ: ܠܡܺܝ̈ܬܶܐ ܐܰܩܺܝܡ: ܠܡܰܠܟ̈ܶܐ ܚܰܢ̈ܦܶܐ ܐܰܒܗܶܬ: ܠܰܡܓܰܕ̈ܦܳܢܶܐ ܘܟܳܦܽܘܪ̈ܶܐ ܐܰܟܶܣ: ܠܟܰܠܩܺܝ̈ܕܽܘܢܳܝܶܐ ܐܰܣܠܺܝ ܘܰܐܚܪܶܡ: ܠܰܡܗܰܝ̈ܡܢܶܐ ܬܪ̈ܺܝܨܰܝ ܫܽܘܒܚܳܐ ܠܰܒܶܒ ܘܚܰܝܶܠ: ܠܰܪ̈ܕܺܝܦܶܐ ܘܰܛܠܺܝ̈ܡܶܐ ܕܡܶܛܽܠ ܗܰܝܡܳܢܽܘܬܳܐ ܕܒܰܡܫܺܝܚܳܐ ܣܰܝܰܥ ܘܥܰܕܰܪ: ܘܰܠܟܽܠܶܗ ܩܝܳܡܳܐ ܕܰܟܪ̈ܺܝܣܛܝܳܢܶܐ ܐܰܘܬܰܪ: ܠܰܚܣܰܝ̈ܳܐ ܕܢܶܪܥܽܘܢ ܘܰܢܕܰܒܪܽܘܢ ܬܪܺܝܨܳܐܝ̣ܬ ܦܰܩܶܕ ܘܙܰܗܰܪ: ܠܩܰܫܺܝ̈ܫܶܐ ܘܠܰܡܫܰܡ̈ܫܳܢܶܐ ܘܰܩܠܺܝܪ̈ܺܝܩܶܐ ܐܠܰܦ ܘܟܰܘܶܢ ܘܢܰܗܰܪ: ܠܕܰܝܪ̈ܳܝܶܐ ܘܰܢܙܺܝܪ̈ܶܐ ܘܰܡܕܰܒܪ̈ܳܢܶܐ ܘܥܳܢܘܳܝ̈ܶܐ ܢܩܶܦ ܘܶܐܬܚܰܒܰܪ: ܥܰܡ ܝܺܚܺܝ̈ܕܳܝܶܐ ܘܢܽܘܟܪ̈ܺܝܛܶܐ ܘܰܡܣܰܡܥ̈ܠܐ ܫܗܰܪ ܘܙܰܡܰܪ: ܘܥܰܠܗܳܝ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܒܶܗ ܡܶܬܓܰܘܣܺܝܢܰܢ: ܘܡܶܢܶܗ ܘܚܰܛܳܝ̈ܶܐ ܒܶܗ ܡܶܬܓܰܘܣܺܝܢܰܢ: ܘܡܶܢܶܗ ܫܳܐܠܺܝܢܰܢ ܟܰܕ ܐܳܡܪܺܝܢܰܢ: ܕܰܐܢ̱ܬ ܐܺܝܬܰܝܟ ܐܰܒܳܐ ܕܝܰܬܡܽܘܬܰܢ: ܥܳܕܽܘܪܳܐ ܕܰܡܚܺܝܠܽܘܬܰܢ: ܒܶܝܬ ܡܶܪܕܳܐ ܕܛܳܠܽܘܡܽܘܬܰܢ: ܐܰܢ̱ܬ ܐܺܝܬܰܝܟ ܝܳܗܽܘܒܳܐ ܕܣܰܡܳܐ ܠܰܟܺܪܝܗܽܘܬܰܢ: ܫܰܝܢܳܐ ܘܰܫܠܳܡܳܐ ܠܰܦܠܺܝܓܽܘܬܰܢ: ܘܰܐܘܝܽܘܬܳܐ ܠܚܶܪܝܳܝܽܘܬܰܢ: ܥܨܳܒܳܐ ܡܫܰܪܪܳܐ ܠܰܬܒܺܝܪܽܘܬܰܢ: ܐܰܢ̱ܬ ܐܺܝܬܰܝܟ ܚܽܘܠܡܳܢܳܐ ܕܰܚܒܳܪ̈ܳܬܰܢ: ܛܰܒܥܳܐ ܫܰܪܺܝܪܳܐ ܕܡܶܬܦܰܢܝܳܢܽܘܬܰܢ: ܝܰܡܳܐ ܕܝܽܘܠܦܳܢܳܐ ܕܰܐܫܩܺܝ ܠܥܺܕ̈ܳܬܰܢ ܐܳܦ ܢܶܒܥܳܐ ܕܚܰܝ̈ܶܐ ܕܰܐܫܦܰܥ ܒܕܰܝܪ̈ܳܬܰܢ: ܒܥܺܝ ܗܳܟܺܝܠ ܚܠܳܦܰܝܢ ܘܰܐܦܺܝܣ ܠܡܳܪܳܟ ܕܚܰܘܒܰܝ̈ܢ ܘܰܚܛܳܗܰܝ̈ܢ ܢܶܬܚܰܣܽܘܢ: ܒܽܘܨܳܪ̈ܰܝܢ ܢܶܫܬܰܒܩܽܘܢ: ܣܰܟܠܘ̈ܳܬܰܢ ܢܶܬܥܰܛܝ̈ܳܢ: ܫܽܘܪ̈ܥܳܬܰܢ ܢܶܬܠܰܚ̈ܝܳܢ: ܚܒܳܪ̈ܳܬܰܢ ܢܶܬܰܐܣ̈ܝܳܢ: ܫܽܘܚ̈ܢܰܝܢ ܢܶܣܬܰܘܣܽܘܢ: ܚܰܝܰܝ̈ܢ ܢܶܬܢܰܛܪܽܘܢ: ܥܰܢܺܝ̈ܕܰܝܢ ܡܗܰܝ̈ܡܢܶܐ ܒܡܰܠܟܽܘܬܳܐ ܢܶܬܒܰܣܡܽܘܢ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܘܢܶܬܶܠ ܬܰܘܕܺܝܬܳܐ ܠܰܡܫܺܝܚܳܐ ܡܰܘܪܒܳܢܳܟ ܘܰܡܢܰܨܚܳܢܳܟ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܠܳܟ ܡܫܺܝܚܳܐ ܐܠܰܗܳܐ ܕܰܐܘܪܶܒܬܳܝܗܝ ܠܚܰܣܝܳܐ ܡܳܪܝ ܐܰܟܣܢܳܝܳܐ ܘܝܰܩܰܪܬ ܕܽܘܟܪܳܢܶܗ ܒܰܫܡܰܝܳܐ ܘܒܰܐܪܥܳܐ: ܣܳܓܕܺܝܢܰܢ ܘܰܡܫܰܒܚܺܝܢܰܢ: ܘܡܶܢܳܟ ܒܳܥܶܝܢܰܢ: ܕܬܰܥܒܰܪ ܒܰܢ ܝܽܘܠܦܳܢܰܝ̈ܟ ܡܰܚܝ̈ܳܢܶܐ ܘܰܬܥܰܕܰܪ ܠܰܢ ܒܝܰܕ ܨܠܰܘ̈ܳܬܶܗ: ܘܬܰܫܘܶܐ ܠܰܢ ܠܒܽܘܪ̈ܟܳܬܳܐ ܕܝܰܡܺܝܢܶܗ: ܘܢܰܛܰܪ ܠܚܰܝܰܝ̈ܢ ܒܝܰܕ ܒܳܥ̈ܘܳܬܶܗ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܒܝܰܕ ܬܰܟܫ̈ܦܳܬܶܗ: ܘܠܳܟ ܫܽܘܒܚܳܐ ܡܚܰܝܠܳܢܶܗ ܘܰܡܢܰܨܚܳܢܶܗ: ܗܳܫܳܐ ܘܰܒܟܽܠܙܒܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܪܳܥܝܳܐ ܫܰܪܺܝܪܳܐ ܡܫܺܝܚܳܐ ܪܰܒ ܪ̈ܳܥܰܘܳܬܳܐ: ܕܰܓܒܳܐ ܠܶܗ ܥܰܠܠܳܢ̈ܶܐ ܘܪ̈ܳܥܰܘܳܬܳܐ: ܩܳܝ̈ܡܰܝ ܘܣܳܝ̈ܓܰܝ ܬܽܘܪ̈ܥܳܬܳܐ: ܕܡܰܪܥܺܝܬܳܐ ܡܫܰܩܰܦܬܳܐ ܣܰܓܺܝܰܐܬ݀ ܥܳܩ̈ܳܬܳܐ: ܕܚܰܕ ܡܶܢܗܽܘܢ ܐܺܝܬܰܘܗܝ ܪܰܒܳܐ ܘܓܰܒܝܳܐ ܡܳܪܝ ܦܺܝܠܽܘܟܣܺܝܢܳܘܣ ܐܶܦܣܩܽܘܦܳܐ ܕܡܰܒܽܘܓ ܡܕܺܝܢ̱ܬܳܐ: ܗܳܢܳܐ ܕܝܰܘܡܳܢܳܐ ܥܺܐܕܶܗ ܒܟܶܢܫܰܢ ܗܳܐ ܡܶܙܕܰܝܰܚ: ܘܰܫܡܳܐ ܕܡܳܪܶܗ ܒܥܰܡܰܢ ܗܳܐ ܡܶܫܬܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܝܶܫܽܘܥ ܡܫܺܝܚܳܐ ܡܨܰܒܬܳܢܳܐ ܕܕܳܚܠܰܘ̈ܗܝ: ܒܡܰܘܗ̈ܒܳܬܶܗ ܫܒܺܝ̈ܚܳܬܳܐ: ܠܳܟ ܩܽܘܠܳܣܳܐ ܘܠܳܟ ܪܽܘܡܪܳܡܳܐ ܡܰܘܪܒܳܢܳܐ ܕܦܳܠܚܰܘ̈ܗܝ ܘܰܡܝܰܩܪܳܢܳܐ ܕܟܽܠܗܽܘܢ ܥܳܒ̈ܕܰܝ ܨܶܒܝܳܢܶܗ: ܝܰܡܳܐ ܠܐ ܡܶܬܡܰܫܚܳܢܳܐ ܕܛܳܒ̈ܳܬܳܐ ܕܰܐܓܺܝܚ ܪܶܕܝܽܘܗܝ ܐܠܰܗܳܝ̈ܶܐ ܘܰܐܫܦܰܥ ܚܶܟ̈ܡܳܬܶܗ ܒܢܰܨܺܝܚ ܫܽܘܦܪ̈ܶܐ ܡܳܪܝ ܦܺܝܠܽܘܟܣܺܝܢܳܘܣ ܐܶܦܣܩܽܘܦܳܐ ܡܥܰܠܝܳܐ ܘܰܫܒܺܝܚܳܐ: ܗܳܢܳܐ ܬܗܺܝܪܳܐ ܕܰܐܬܗܰܪ ܠܟܽܠ ܥܰܡܡܺܝ̈ܢ ܒܡܰܠܦܳܢܽܘܬܶܗ ܚܠܺܝܡܬܳܐ: ܗܳܢܳܐ ܒܝܽܘܒܳܒܳܐ ܪܽܘܚܳܢܳܝܳܐ ܕܝܽܘܠܦܳܢ̈ܶܐ ܕܰܐܪܕܺܝ ܠܰܢ ܚܶܟ̈ܡܳܬܳܐ ܕܰܒܗܶܝܢ ܠܡܳܪܶܗ ܢܩܰܠܶܣ ܘܰܢܝܰܒܶܒ ܗܳܢܳܐ ܥܰܡܽܘܕܳܐ ܚܰܝܠܬܳܢܳܐ ܕܶܐܬܛܰܪܺܝ ܒܶܗ ܡܰܚܫܽܘܠܐ ܕܟܳܦܽܘܪܽܘܬܳܐ ܘܠܐ ܐܶܬܡܰܘܰܛ: ܘܢܶܫܒܰܬ݀ ܒܶܗ ܪܽܘܚ ܫܽܘܩܪܳܐ ܕܟܰܠܩܺܝܕܽܘܢܳܝܽܘܬܳܐ ܘܠܐ ܐܶܙܕܰܥܙܰܥ ܗܳܢܳܐ ܦܰܪܦܶܣܝܽܘܛܳܐ ܚܰܟܺܝܡܳܐ ܕܰܟܬܰܒ ܐܶܓܪ̈ܳܬܳܐ ܕܡܰܠܝ̈ܳܢ ܓܶܐܪ̈ܶܐ ܘܠܽܘ̈ܠܝܳܬܳܐ: ܘܰܒܗܶܝܢ ܫܰܦܶܕ ܘܒܰܙܰܥ ܠܟܽܠܗܝܢ ܐܶܪ̈ܶܣܺܝܣ ܚܰܒܳ̈ܠܳܬܳܐ: ܘܰܠܝܽܘܠܦܳܢܳܐ ܕܺܝܠܗܽܘܢ ܕܰܓܳܠܐ ܦܰܪܣܺܝ: ܗܳܢܳܐ ܝܰܪܕܳܐ ܡܓܺܝܚܳܢܳܐ ܕܶܫܬܳܐ ܟܬܳܒ̈ܶܐ ܐܰܣܪܰܚ ܠܽܘܩܒܰܠ ܒܰܪܨܰܘܡܳܐ ܠܺܝܛܳܐ ܗ̇ܰܘ ܕܰܢܨܺܝܒܺܝܢ: ܘܰܠܝܽܘܠܦܳܢܰܘ̈ܗܝ ܢܕܺܝ̈ܕܶܐ ܒܙܶܒܠܐ ܕܰܝܶܫ: ܗܳܢܳܐ ܠܽܘܓܝܽܘܣ ܚܠܐܷ ܡܰܡܠܠܐ ܕܰܬܪܶܥܣܰܪ ܟܬܳܒ̈ܶܐ ܐܰܒܰܥ: ܘܰܒܗܽܘܢ ܪܰܝܰܚ ܠܣܽܘܢܰܗܕܳܘܣ ܕܟܰܠܩܺܝ̈ܕܽܘܢܽܘ: ܗܳܢܳܐ ܟܰܠܛܽܘܠܳܪܳܐ ܕܰܡܠܳܗ̇ ܠܥܺܕܬܳܐ ܩܰܕܺܝܫܬܳܐ ܟܬܳܒ̈ܶܐ ܘܦܰܢ̈ܩܝܳܬܳܐ ܘܬܽܘܪ̈ܓܳܡܶܐ ܕܰܒܗܽܘܢ ܕܰܬܩܰܠܶܣ ܠܥܰܕ̈ܥܺܐܕܰܘܗܝ ܕܰܡܟܺܝܪܳܗ̇ ܡܳܪܰܢ ܝܶܫܽܘܥ ܗܳܢܳܐ ܣܽܘܢܰܩܠܺܝܛܽܘܣ ܕܡܰܠܟܳܐ ܫܡܰܝܳܢܳܐ: ܕܰܠܡܰܠܟܳܐ ܝܽܘܣܛܳܢܺܝܢܽܘܣ ܕܰܐܣܛܺܝ ܡ̣ܶܢ ܫܪܳܪܳܐ ܐܰܒܗܶܬ ܘܟܰܐܰܪ: ܘܰܠܗܰܘܢܶܗ ܐܰܫܺܝܓ ܘܕܰܘܶܕ: ܗܳܢܳܐ ܝܰܒܠܽܘܢ ܬܰܩܺܝܦܬܳܐ ܕܡ̣ܶܢ ܪܽܘܚܳܐ ܩܰܕܺܝܫܳܐ ܢܶܫܒܰܬ݀: ܘܰܠܟܽܠܗܶܝܢ ܐܶܪ̈ܶܣܺܝܣ ܫܰܩܳܪ̈ܳܬܳܐ ܫܶܚܩܰܬ݀ ܘܬܰܒܪܰܬ݀ ܘܰܒܗ̈ܶܬܝ ܟܽܠܗܶܝܢ ܘܶܐܙܕ̈ܟܺܝ: ܗܳܢܳܐ ܢܰܘܛܳܐ ܡܗܺܝܪܳܐ ܕܠܐ ܫܰܒܩܳܗ̇ ܠܥܺܕܬܳܐ ܕܶܐܬܓܰܠܠܰܬ݀ ܠܶܗ ܕܬܶܛܒܰܥ ܒܝܰܡܳܐ ܕܪ̈ܽܘܫܥܶܐ ܘܓܽܘ̈ܕܳܦܶܐ ܕܰܠܩܽܘܒܠܳܗ̇ ܐܶܬܡܰܚܫܰܠ ܐܳܦ ܐܶܬܒܰܥܪܰܪ: ܗܳܢܳܐ ܘܰܪܕܳܐ ܒܰܣܺܝܡ ܪܺܝܚܳܐ ܕܰܠܡܰܕܢܚܳܐ ܘܰܠܡܰܥܪܒܳܐ ܒܰܣܶܡ ܒܪܺܝܚܶܗ ܚܰܠܝܳܐ: ܘܰܒܝܽܘܠܦܳܢܶܗ ܓܰܒܝܳܐ ܐܶܫܬܰܪܰܪ: ܗܳܢܳܐ ܣܡܳܟܳܐ ܠܐ ܡܶܬܪܰܘܛܳܢܳܐ ܕܰܥܠܰܘܗܝ ܣܺܝܡ ܗܘܳܐ ܟܽܠܶܗ ܝܽܘܩܪܶܗ ܕܒܰܝܬܶܗ ܕܝܰܥܩܽܘܒ ܡܶܬܝܰܕܥܳܢܳܐ: ܘܟܰܕ ܡ̣ܶܢ ܩܽܘܠܳܣܰܘ̈ܗܝ ܚܰܝܳܒܺܝܢܰܢ ܘܡܶܙܕܟܶܝܢܰܢ: ܠܰܫܠܳܡܶܗ ܪܓܺܝܓܳܐ ܡܶܬܝܰܐܻܝܒܺܝܢܰܢ ܘܡܶܣܬܰܘܚܺܝܢܰܢ: ܘܒܰܒ̈ܢܳܬ ܩ̈ܳܠܐ ܚܘܺܝ̈ܚܳܬܳܐ ܠܘܳܬܶܗ ܐܳܡܪܺܝܢܰܢ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܕܰܪܳܐ ܚܠܺܝܨܳܐ ܐܶܬܟܰܬܰܫܬ ܘܰܟܠܺܝܠܐ ܕܣܳܗܕܽܘܬܳܐ ܩܰܒܶܠܬ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܘܳܠܝܳܐܝ̣ܬ ܠܢܰܣܛܽܘܪ ܘܠܐܱܪܺܝܽܘܣ ܐܰܒܗܶܬܬ: ܘܰܠܝܽܘܠܝܰܢܶܐ ܗܰܓܳܓܳܝܳܐ ܐܰܚܪܶܡܬ: ܘܩܶܦ̈ܠܐܐ ܕܠܐܷܘܳܢ ܘܕܰܐܩܳܩ ܪܰܫܺܝܥܳܐ ܐܰܣܠܺܝܬ: ܘܰܠܒܰܪܕܰܝܨܳܢ ܘܠܰܟܬܳܒ̈ܶܐ ܗ̇ܳܢܽܘܢ ܕܣܳܡ ܒܰܙܰܚܬ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܽܘܣ ܕܰܚܣܰܢܬ ܘܰܙܟܰܝܬ ܠܦܰܘܠܐܷ ܫܡܺܝܫܛܳܝܳܐ ܘܰܐܣܠܺܝܬ ܠܰܣܝܳܡ ܐܺܝܕܶܗ ܕܰܐܘܛܽܘܟܶܐ: ܘܒܰܙܰܚܬ ܒܺܝܗܺܝܒܳܐ ܕܽܐܘܪܗܳܝ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܣܰܝܒܰܪܬ ܫܶܢ̈ܕܶܐ ܘܽܐܘܠܨܳܢ̈ܶܐ ܡ̣ܶܢ ܒܰܝܬܳܝ̈ܶܐ ܘܩܰܪ̈ܺܝܒܶܐ: ܕܣܳܛܳܢܳܐ ܒܠܶܒܰܘ̈ܳܬܗܽܘܢ ܐܰܩܶܢ ܘܰܚܠܰܕ: ܫܠܳܡܠܳܟ ܡܳܪܝ ܦܺܝܠܽܘܣܺܝܢܳܘܣ ܕܝܰܗܒܬ ܢܰܦܫܳܟ ܠܡܰܘܬܳܐ ܘܰܚܢܽܘܩܝܳܐ ܕܰܒܬܶܢܳܢܳܐ ܡ̣ܶܢ ܥܰܡܳܐ ܚܰܪܡܳܐ ܘܪܰܫܺܝܥܳܐ ܘܰܕܠܐ ܐܠܰܗ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܰܐܝܟ ܙܶܒܠܐ ܚܫܰܒܬ ܠܡܰܘܗ̈ܒܳܬܳܐ ܘܺܐܝܩܳܪ̈ܶܐ ܕܥܰܡܳܐ ܣܰܟܠܐ ܕܠܳܟ ܩܰܪܶܒ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܩܰܒܶܠܬ ܥܠܰܝܟ ܐܰܝܟ ܡܳܪܳܟ ܚܒܽܘܫܝܳܐ ܘܰܪܕܽܘܦܝܳܐ ܘܰܛܠܺܝܡܽܘܬܳܐ ܘܢܶܓ̈ܕܶܐ ܘܨܰܥܪ̈ܶܐ ܐܶܫܬܡܰܪܘ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ: ܕܘܳܝ̈ܶܐ ܘܥܳܝ̈ܶܐ ܐܰܩܢܰܝܬ ܠܟܽܠܶܗ ܓܰܒܳܐ ܕܣܳܕܽܘ̈ܩܶܐ ܗ̇ܰܘ ܕܡ̣ܶܢ ܛܝܳܪܳܐ ܕܚܰܝ̈ܶܐ ܢܦܰܩ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܡ̣ܶܢ ܡܰܒܽܘܓ ܡܰܪܥܺܝܬܳܟ ܠܓܰܢܓܰܪܰܐ ܐܶܫܬܕܺܝܬ ܠܐܟܣܽܘܪܝܳܐ: ܘܒܳܗ̇ ܐܰܝܟ ܕܰܒܒܶܝܬ ܢܳܛܽܘܪܬܳܐ ܚܰܒܫܽܘܟ: ܟܰܕ ܕܳܝܢܺܝܢ ܠܳܟ ܢܽܘܓܪܳܐ ܕܰܫܢܰܝ̈ܳܐ ܚܰܡܶܫ: ܫܠܳܡܠܳܟ ܡܳܪܝ ܦܺܝܠܽܘܟܣܺܝܢܳܘܣ ܕܰܐܦܺܝܟܡܰܛܺܝܩܺܝ ܕܡܳܪܳܟ ܐܺܝܬܰܝܟ: ܒܪ̈ܰܘܒܶܐ ܘܰܫܓܽܘ̈ܫܝܶܐ ܘܶܐܣܛܰܐܛܺܝܣ ܕܰܥܠܰܝܟ ܥܕܰܝ̈: ܘܟܰܕ ܠܰܫܠܳܡܳܟ ܠܐ ܣܳܦܩܺܝܢܰܢ: ܛܽܘܒܳܐ ܠܳܟ ܝܳܗܒܺܝܢܰܢ ܘܳܐܡܪܺܝܢܰܢ ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ: ܕܣܰܝܒܰܪܬ ܐܰܓܽܘܢܳܐ ܕܟܰܦܢܳܐ ܘܰܕܨܰܗܝܳܐ: ܘܰܟܒܰܫܬ ܠܦܰܓܪܳܟ ܘܫܰܢܶܩܬܳܝܗܝ ܒܝܰܕ ܣܰܩܳܐ ܕܣܰܥܪܳܐ ܕܰܠܒܶܫ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ: ܕܒܰܘܬܳܐ ܘܰܬܪܶܝܢ ܕܨܰܘܡܳܐ ܠܳܟ ܚܫܺܝܒ ܗܘܳܐ ܨܰܘܡܳܐ: ܐܶܠܐ ܕܫܳܒܽܘ̈ܥܶܐ ܬܪܶܝܢ ܘܰܬܠܳܬܳܐ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ: ܕܝܰܗܒܬ ܢܰܦܫܳܟ ܥܰܡ̈ܠܐ ܪܰܘܪ̈ܒܶܐ ܘܰܩܫܰܝ̈ܳܐ ܕܥܰܪܝܳܐ ܘܩܽܘܪܳܐ ܘܚܽܘܡܳܐ ܘܰܚܒܽܘܫܝܳܐ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ: ܕܪܰܚܦܰܬ݀ ܝܰܡܺܝܢܳܟ ܥܰܠ ܪܺܝܫ ܣܶܐܘܺܝܪܶܐ ܦܰܛܪܝܰܪܟܳܐ: ܟܰܕ ܪܽܘܚܳܐ ܩܰܕܺܝܫܳܐ ܠܟܽܠܟܽܘܢ ܩܰܕܶܫ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ ܕܝܽܘܩܽܘܢܛܳܐ ܘܬܶܐܘܺܝܛܳܐ ܐܠܰܗܳܝܳܐ ܒܳܟ ܐܶܬܪܫܶܡ ܘܶܐܬܛܰܒܰܥ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ: ܕܢܽܘܗܪܳܟ ܠܡܰܥܪܒܳܐ ܕܚܶܫܟܰܬ݀ ܒܥܰܝ̈ܡܶܐ ܕܛܳܥܝܽܘܬܳܐ ܐܰܨܡܰܚ: ܘܠܐܝܠܶܝܢ ܕܰܒܡܰܕܢܚܳܐ ܗܰܕܺܝ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ ܕܝܰܡܽܘܐܶܝܠ ܡ̣ܶܢ ܐܰܬܪܳܐ ܕܒܶܝܬ ܓܰܪ̈ܡܰܝ ܢܓܰܕܬܳܟ: ܘܰܠܛܽܘܪ ܥܰܒܕܺܝ̈ܢ ܝܰܒܶܠܬܳܟ: ܘܗܰܕܝܰܬܳܟ ܘܰܐܡܛܝܰܬܳܟ ܠܥܽܘܡܪܳܐ ܕܰܪܫܺܝܡ ܠܡܰܠܐܟ̈ܶܐ: ܠܳܟ ܛܽܘܒܰܝܟ ܡܳܪܝ ܐܰܟܣܢܳܝܳܐ: ܕܶܐܬܪܰܒܺܝܬ ܒܥܽܘܡܪܳܐ ܩܰܕܺܝܫܳܐ ܘܟܳܗܢܳܝܳܐ: ܘܒܶܗ ܐܶܬܚܰܟܰܡܬ ܒܝܽܘܠܦܳܢܳܐ ܝܰܘܢܳܝܳܐ ܐܳܦ ܣܽܘܪܝܳܝܳܐ: ܘܗܳܫܳܐ ܒܰܨܠܰܘ̈ܳܬܳܟ ܐܳܘ ܩܰܕܺܝܫܳܐ ܡܳܪܝ ܦܺܝܠܽܘܟܣܺܝܢܳܘܣ ܬܪܰܝܳܢܳܐ: ܒܥܶܠܫܡܳܟ ܕܰܗܘܳܐ ܐܶܦܣܩܽܘܦܳܐ ܒܳܬܰܪ ܡܰܘܬܳܟ ܠܡܰܒܽܘܓ ܡܕܺܝܢ̱ܬܳܐ ܡܰܪܥܺܝܬܐ ܕܺܝܠܳܟ: ܕܰܠܥܽܘܡܪܳܐ ܕܩܰܪܬܡܺܝܢ ܐܰܝܬܝܶܗ ܠܦܰܓܪܳܟ: ܘܥܰܡ ܟܺܐܢ̈ܶܐ ܘܙܰܕܺܝ̈ܩܶܐ ܐܰܫܪܺܝ ܫܟܺܝܢܬܳܟ ܘܰܒܒܶܝܬ ܩܰܕܺܝ̈ܫܶܐ ܥܰܦܺܝ ܘܣܳܡܳܟ ܘܠܐ ܫܰܒܩܶܗ ܒܓܰܢܓܰܪܰܐ ܕܒܳܗ̇ ܗ̣ܽܘ ܫܰܠܶܡܬ ܝܰܘ̈ܡܳܬܳܟ ܒܰܕܠܐ ܐܺܝܬܶܝܗ̇ ܗܘܳܬ ܕܫܳܘܝܳܐ ܗܘܳܬ݀ ܠܳܟ ܘܠܐ ܐܰܪܦܝܳܟ ܒܺܐܝ̈ܕܰܝ ܛܳܠܽܘ̈ܡܶܐ ܕܰܢܒܰܙܚܽܘܢ ܒܳܟ: ܟܰܕ ܢܽܘܓܪܳܐ ܕܚܰܡܶܫ ܫܢܺܝ̈ܢ ܬܰܡܳܢ ܐܺܝܬ ܗܘܳܐ ܠܳܟ: ܟܰܕ ܚܒܺܝܫ ܐܰܢ̱ܬ: ܘܽܐܘܠܨ̈ܳܢܶܐ ܡܰܣܒܠܺܝܢ ܗܘܰܘ ܠܳܟ ܘܰܬܬܫܠܰܡ ܠܣܽܘܢܰܗܕܳܘܣ ܡܰܣܠܳܝܬܳܐ ܡܳܠܟܺܝܢ ܗܘܰܘ ܠܳܟ: ܘܓܽܘܪ̈ܳܓܰܝܗܽܘܢ ܘܫܽܘܕܳܠܰܝ̈ܗܽܘܢ ܐܰܝܟ ܗܰܦܪܳܐ ܘܒܶܕܝܳܐ ܚܫܺܝܒܺܝܢ ܗܘܰܘ ܠܳܟ: ܘܠܐ ܐܶܬܪܰܦܝܰܬ݀ ܚܠܺܝܨܽܘܬܳܟ ܘܟܽܠ ܫܶܢ̈ܕܺܝܢ ܣܰܝܒܰܪܬ ܚܠܳܦ ܗܰܝܡܳܢܽܘܬܳܟ: ܘܡܶܛܽܠ ܗܳܕܶܐ ܡܳܪܳܟ ܣܰܓܺܝ ܪܰܡܪܡܳܟ: ܘܒܰܫܡܰܝܳܐ ܘܒܰܐܪܥܳܐ ܐܰܘܪܶܒ ܫܡܳܟ: ܘܨܶܝܕ ܟܶܢ̈ܫܶܐ ܫܡܰܝ̈ܳܢܶܐ ܥܒܺܝܕ ܥܽܘܗܕܳܢܳܟ ܘܒܶܝܬ ܐܰܪ̈ܥܳܢܶܐ ܢܳܨܰܚ ܕܽܘܟܪܳܢܳܟ ܐܶܠܐ ܒܥܺܝ ܚܠܳܦܰܝܢ ܠܡܳܪܝܳܐ ܡܳܪܳܟ: ܕܢܶܣܝܽܘܢ ܣܳܛܳܢܳܐ ܠܰܢ ܠܐ ܢܕܰܘܶܕ: ܬܽܘܒ ܕܰܢܫܰܓܫܰܢ ܠܐ ܢܶܫܬܒܶܩ: ܚܰܝܠܶܗ ܢܶܬܬܰܒܰܪ ܘܡ̣ܶܢ ܒܰܝܢܳܬܰܢ ܢܶܙܕܓܰܪ ܣܪܺܝܩܽܘܬ ܡܰܚܫ̈ܒܳܬܶܗ ܡܶܢܰܢ ܬܰܥܒܰܪ: ܘܠܐ ܢܶܬܡܨܶܐ ܚܰܝܠܶܗ ܕܠܰܢ ܢܰܐܒܶܫ: ܢܶܗܘܶܐ ܗ̣ܽܘ ܘܟܽܠܳܗ̇ ܡܰܫܪܺܝܬܶܗ ܐܰܕܺܝܫ ܬܚܶܝܬ ܪ̈ܶܓܠܰܝܢ: ܒܚܺܝܠ ܡܳܪܰܢ ܝܶܫܽܘܥ ܡܫܺܝܚܳܐ: ܕܰܨܠܺܝܒܶܗ ܕܡܳܪܳܟ ܢܶܗܘܶܐ ܠܰܢ ܡܢܰܛܪܳܢܳܐ ܒܝܰܕ ܒܳܥ̈ܘܳܬܳܟ ܠܐ ܢܶܫܒܽܘܩ ܠܨܰܠܡܶܗ ܕܡ̣ܶܢ ܫܺܐܕ̈ܶܐ ܢܶܬܒܰܣܒܰܣ: ܘܠܐ ܢܢܰܟܪܶܐ ܠܰܢ ܡ̣ܶܢ ܝܳܪܬܽܘܬܰܢ: ܬܶܗܘܶܐ ܠܰܢ ܘܰܠܥܰܢܺܝ̈ܕܰܝܢ ܦܰܪܶܗܣܺܝܰܐ ܕܰܩܕܳܡܰܘܗܝ: ܗܳܪܟܳܐ ܢܪܰܚܶܡܥܠܰܝܢ ܘܬܰܡܳܢ ܢܒܰܣܶܡ ܠܰܢ ܥܰܡ ܩܰܕܺܝ̈ܫܰܘܗܝ ܒܰܓܢܽܘܢܶܗ ܠܐ ܡܶܫܬܰܪܝܳܢܳܐ ܕܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

 

 

ܦܝܪܡܐ

 

 

 

ܦܺܝܪܡܳܐ ܕܰܟܝܳܐ ܘܪܺܝܚܳܐ ܒܰܣܺܝܡܳܐ ܢܶܗܘܶܐ ܝܰܘܡܳܐ ܕܕܽܘܟܪܳܢܶܗ ܕܢܰܨܺܝܚ ܫܽܘܦܪ̈ܶܐ ܐܰܒܽܘܢ ܚܰܣܝܳܐ ܡܳܪܝ ܦܺܝܠܽܘܟܣܺܝܢܳܘܣ ܪܳܚܶܡ ܐܰܟܣ̈ܢܳܝܶܐ ܘܬܶܬܪܰܥܶܐ ܒܶܗ ܡܰܪܥܺܝܬܳܟ ܘܢܶܫܬܰܟܰܢ ܒܶܗ ܠܥܰܒܕܰܝ̈ܟ ܚܽܘܣܳܝ ܚܰܘ̈ܒܶܐ ܘܰܚܛܳܗ̈ܶܐ: ܘܢܶܗܘܶܐ ܒܶܗ ܢܝܳܚܳܐ ܘܒܽܘܣܳܡܳܐ ܘܰܚܢܳܢܳܐ ܘܪ̈ܰܚܡܶܐ ܥܰܠ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܕܰܚܬܺܝܪܳܐ ܒܳܟ ܡܫܺܝܚܳܐ ܐܠܰܗܳܐ: ܘܢܶܬܺܝܗܶܒ ܒܶܗ ܫܽܘܪܬܳܚ ܥ̈ܰܠܠܳܬܳܐ ܘܒܽܘܪ̈ܟܳܬܳܐ ܕܡ̣ܶܢ ܫܡܰܝܳܐ ܘܡ̣ܶܢ ܐܰܪܥܳܐ: ܘܢܶܫܬܰܪܪܽܘܢ ܒܶܗ ܡܶܛܪ̈ܶܐ ܒܟܺܝܪ̈ܳܝܶܐ ܘܰܠܩܺܝ̈ܫܳܝܶܐ ܘܫܰܝܢܳܐ ܘܰܫܠܳܡܳܐ ܘܰܠܟܽܠܳܗ̇ ܒܪܺܝܬܳܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

 

ܬܶܫܒܽܘܚܬܳܐ: ܠܗܰܘ ܕܰܓܒܳܐ ܠܥܰܒܕܶܗ ܡܳܪܝ ܦܺܝܠܽܘܟܣܺܝܢܳܘܣ ܘܩܰܕܫܶܗ ܘܥܰܒܕܶܗ ܡܳܐܢܳܐ ܠܐܝܩܳܪܶܗ: ܠܗܰܘ ܕܝܰܗܒ ܒܶܝܬ ܐܺܝܕܰܘ̈ܗܝ ܚܰܝ̈ܠܐ ܘܳܐܣܘ̈ܳܬܳܐ ܠܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܕܡܶܬܓܰܘܣܺܝܢ ܒܶܗ ܠܗܰܘ ܕܝܰܗܒ ܠܶܗ ܛܰܝܒܽܘܬܳܐ ܡܫܰܡܠܳܝܬܳܐ: ܘܰܒܢܳܐ ܥܺܕ̈ܳܬܳܐ ܘܕܰܝܪ̈ܳܬܳܐ: ܘܫܰܬܶܐܣ ܘܰܩܒܰܥ ܥܽܘܡܪ̈ܶܐ ܐܠܰܗܳܝ̈ܶܐ ܕܢܶܗܘܽܘܢ ܠܡܺܐܢܳܐ ܕܫܽܘܘܙܳܒܳܐ ܠܰܡܗܰܝ̈ܡܢܶܐ ܠܗܰܘ ܕܰܒܝܰܕ ܨܠܰܘ̈ܳܬܶܗ ܡܫܰܟܶܢ ܟܽܠ ܥܽܘܕܪܳܢܳܐ ܠܐܝܠܶܝܢ ܕܳܐܬܶܝܢ ܠܥܰܕܥܺܐܕܶܗ: ܕܠܶܗ ܠܡܳܪܝܳܐ ܡܢܰܨܚܳܢܶܗ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܐܰܝܠܶܝܢ ܩܽܘܠܳܣ̈ܶܐ ܘܪܽܘܡܪ̈ܳܡܶܐ ܣܳܦܩܺܝܢ ܠܰܡܥܰܠܝܽܘܬܳܟ: ܐܳܘ ܪܺܝܫܳܐ ܕܟܳܗ̈ܢܶܐ ܘܓܰܒܝܳܐ ܡܳܪܝ ܦܺܝܠܽܘܟܣܺܝܢܳܘܣ: ܕܰܗܘܰܝܬ ܡܰܚܙܺܝܬܳܐ ܡܝܰܬܰܪܬܳܐ ܠܟܽܠܗܽܘܢ ܚܰܙܳܝܰܝ̈ܟ: ܘܒܳܟ ܐܶܬܚܰܝܰܠ ܟܽܠܶܗ ܥܰܡܳܐ ܕܣܽܘܪ̈ܝܳܝܶܐ: ܘܡܶܢܳܟ ܝܺܠܶܦܘ ܟܽܠܗܽܘܢ ܒܢ̈ܰܝ ܒܰܝܬܳܐ ܕܗܰܝܡܳܢܽܘܬܳܐ ܕܽܘܒܳܪ̈ܶܐ ܕܰܡܪܰܥܶܝܢ ܠܐܠܳܗܳܐ: ܟܰܕ ܚܙܰܐܘܽܘܟ ܕܰܐܫܠܶܡܬ ܢܰܦܫܳܟ ܠܟܽܠ ܐܽܘܠܨܳܢܺܝ̈ܢ ܘܫܶܢܕܺܝ̈ܢ ܡܶܛܽܠ ܡܳܪܳܟ: ܐܰܢ̱ܬ ܕܒܰܬܪܶܝܢ ܐܰܓܽܘ̈ܢܶܐ ܩܫܰܝ̈ܳܐ ܐܶܬܢܰܨܰܚܬ ܘܛܳܒ ܐܶܬܟܰܫܰܪܬ: ܚܰܕ ܗ̇ܰܘ ܕܥܳܢܘܳܝܽܘܬܳܐ ܘܰܡܣܰܪܩܽܘܬܳܐ ܐܳܦ ܛܽܘܪܳܦܳܐ ܘܰܫܚܳܩܳܐ ܕܨܰܘܡܳܐ ܘܕܰܨܠܽܘܬܳܐ: ܘܰܐ̱ܚܪܺܝܢ ܗ̇ܰܘ ܕܣܳܗܕܽܘܬܳܐ ܘܰܣܒܽܘܠܝܳܐ ܕܫܶܢ̈ܕܶܐ ܘܽܐܘܠܨܳܢ̈ܶܐ ܘܢܶܓ̈ܕܶܐ ܘܩܽܘ̈ܦܳܚܶܐ ܘܨܰܥܪ̈ܶܐ ܘܒܽܘ̈ܙܳܚܶܐ: ܘܶܐܫܬܰܡܠܺܝܬ ܘܶܐܬܟܰܠܰܠܬ ܒܰܟܠܺܝ̈ܠܐ ܕܡܰܘܕܝܳܢܽܘܬܳܐ: ܐܰܢ̱ܬ ܐܺܝܬܰܝܟ ܕܚܰܘܺܝܬ ܠܟܽܠܗܽܘܢ ܐܰܩ̈ܡܶܐ ܘܕܰܪ̈ܓܶܐ ܕܰܡܫܺܝ̈ܚܳܝܶܐ: ܝܽܘܠܦܳܢ̈ܶܐ ܕܰܡܫܰܒܠܺܝܢ ܠܚܰܝ̈ܶܐ ܡܰܠܟܽܘ̈ܬܳܢܳܝܶܐ: ܟܰܕ ܠܟܽܠܗܽܘܢ ܐܶܣܟܺܝ̈ܡܶܐ ܕܰܒܢ̈ܰܝ ܥܺܕܬܳܐ: ܡܰܠܦܳܢ̈ܘܳܬܳܟ ܫܒܺܝ̈ܚܳܬܳܐ ܚܳܫ̈ܚܳܢ: ܕܺܐܝܬ ܒܗܶܝܢ ܕܽܘܒܳܪ̈ܶܐ ܕܙܳܕܩܺܝܢ ܠܛܶܟܣܳܐ ܕܰܡܢܺܝ̈ܚܳܢܶܐ ܘܕܰܝܪ̈ܳܝܶܐ ܕܰܒܗܽܘܢ ܢܶܬܕܰܒܪܽܘܢ: ܥܕܰܡܳܐ ܕܰܒܰܡܝܰܬܪܽܘܬܳܐ ܢܶܬܓܰܡܪܽܘܢ: ܘܰܠܪ̈ܺܝܫܰܝ ܟܳܗ̈ܢܶܐ ܘܟܳܗ̈ܢܶܐ ܕܒܰܚܦܺܝܛܽܘܬܳܐ ܘܕܶܚܠܰܬ ܐܠܰܗܳܐ ܢܶܬܕܰܪܓܽܘܢ: ܘܰܠܥܳܢ̈ܳܐ ܡܠܺܝܠܬܳܐ ܢܶܪܥܽܘܢ: ܘܠܰܡܗܰܝ̈ܡܢܶܐ ܓܰܒܪ̈ܶܐ ܘܢܶܫ̈ܶܐ ܕܰܒܕܰܟܝܽܘܬܳܐ ܘܩܰܕܺܝܫܽܘܬܳܐ ܢܶܗܘܽܘܢ: ܘܰܕܪܶܚܡܰܬ ܡܶܣ̈ܟܺܢܶܐ ܬܶܗܘܶܐ ܒܗܽܘܢ: ܘܰܠܥܰܬܺܝܪ̈ܶܐ ܕܥܽܘܬܪܗܽܘܢ ܛܳܒܳܐܝ̣ܬ ܢܦܰܪܢܣܽܘܢ ܘܠܰܨܪ̈ܺܝܟܶܐ ܘܰܣܢܺܝ̈ܩܶܐ ܕܥܰܠ ܡܳܙܽܘܢܳܐ: ܕܠܐ ܢܶܗܘܽܘܢ ܡܪܰܛܢܺܝܢ ܥܰܠ ܒܳܪܽܘܝܗܽܘܢ: ܐܰܢ̱ܬ ܐܺܝܬܰܝܟ ܕܥܰܠ ܨܠܽܘܬܳܐ ܣܰܓܺܝ ܡܚܰܦܶܛ ܗܘܰܝܬ: ܕܰܕܚܺܝܠܐ ܣܰܓܺܝ ܥܰܠ ܫܺܐܕ̈ܶܐ ܘܰܪܚܺܝܡܳܐ ܥܰܠ ܡܰܠܐܟ̈ܶܐ ܐܳܡܰܪ ܗܘܰܝܬ: ܕܒܳܗ̇ ܡܶܬܓܰܘܶܐ ܐ̱ܢܳܫ ܥܰܡ ܐܠܰܗܳܐ: ܘܝܳܠܶܦ ܐ̱ܪ̈ܳܙܰܘܗܝ ܘܟܰܣ̈ܝܳܬܶܗ ܘܰܓܢܺܝ̈ܙܳܬܶܗ ܡܰܘܕܰܥ ܗܘܰܝܬ: ܐܰܢ̱ܬ ܐܺܝܬܰܝܟ ܕܥܰܠ ܡܪܰܚܡܳܢܽܘܬܳܐ ܡܦܰܩܶܕ ܗܘܰܝܬ: ܘܰܕܬܶܫܒܽܘܩ ܚܛܳܗ̈ܶܐ ܘܡܺܝ̈ܬܶܐ ܡܩܺܝܡܳܐ ܒܰܟܬܳܒܰܝ̈ܟ ܡܚܰܘܶܐ ܗܘܰܝܬ: ܐܰܢ̱ܬ ܐܺܝܬܰܝܟ ܕܥܰܠ ܨܰܘܡܳܐ ܬܽܘܒ ܡܙܰܗܰܪ ܗܘܰܝܬ: ܘܩܳܢܽܘ̈ܢܰܘܗܝ ܘܰܙܢܰܘ̈ܗܝ ܒܶܐܓܪ̈ܳܬܳܟ ܟܳܬܶܒ ܗܘܰܝܬ: ܘܠܰܡܗܰܝ̈ܡܢܶܐ ܟܺܝܬ ܡܰܠܶܦ ܗܘܰܝܬ ܘܰܕܒܶܗ ܡܶܬܡܰܪܩܳܐ ܥܺܝܢ ܢܰܦܫܳܐ ܘܫܳܘܝܳܐ ܠܰܚܙܳܬ݀ ܗܽܘܠܐܷ ܡܶܬܚܰܙܝܳܢܳܐ ܬܽܘܒ ܡܫܰܘܕܰܥ ܗܘܰܝܬ: ܘܰܕܒܶܗ ܡܶܬܩܰܛܰܢ ܦܰܓܪܳܐ: ܘܰܐܝܟ ܡܰܠܐܟ̈ܶܐ ܗܳܘܶܐ ܠܰܡܢܺܝ̈ܚܳܢܶܐ ܒܢ̈ܰܝ ܩܝܳܡܳܟ ܡܰܟܪܶܙ ܗܘܰܝܬ: ܘܕܰܢܡܰܪܽܘܢ ܒܠܐ ܓܽܘܫ̈ܡܳܢܶܐ ܒܝܰܕ ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ ܘܬܶܫܒ̈ܚܳܬܳܐ ܐܰܡܺܝ̈ܢܳܬܳܐ ܠܗܽܘܢ ܡܓܰܪܶܓ ܗܘܰܝܬ: ܘܰܕܢܶܗܘܽܘܢ ܠܶܒܰܘ̈ܳܬܗܽܘܢ ܫܦܶܝܢ ܘܰܕܟܶܝܢ ܠܗܽܘܢ ܦܳܩܶܕ ܗܘܰܝܬ: ܘܰܕܠܐ ܢܶܦܬܚܽܘܢ ܬܰܪܥܳܐ ܠܐܪ̈ܚܶܐ ܢܽܘܟܪ̈ܳܝܶܐ ܐܰܝܟ ܗ̇ܳܢܽܘܢ ܕܰܘܺܝܕܳܝ̈ܶܐ ܠܗܽܘܢ ܡܰܪܬܶܐ ܗܘܰܝܬ: ܘܰܕܢܶܗܘܽܘܢ ܪ̈ܶܥܝܳܢܰܝܗܽܘܢ ܩܛܺܝܪܺܝܢ ܘܰܐܣܺܝܪܺܝܢ ܒܰܐܠܳܗܳܐ ܐܰܝܟ ܗ̇ܳܝ ܕܒܰܩܢܽܘܡܳܟ ܡܚܰܘܶܐ ܗܘܰܝܬ: ܘܰܕܢܶܗܘܽܘܢ ܗܳܪܓܺܝܢ ܒܰܫܡܰܝܳܢ̈ܝܳܬܳܐ: ܘܕܰܠܥܶܠ ܒܳܥܶܝܢ ܘܕܰܠܥܶܠ ܡܶܬܪܰܥܶܝܢ: ܐܰܝܟ ܕܡ̣ܶܢ ܦܽܘܡ ܫܠܺܝܚܳܐ ܦܰܘܠܳܘܣ ܠܗܽܘܢ ܡܰܫܡܰܥ ܗܘܰܝܬ: ܘܰܕܢܶܗܘܽܘܢ ܙܗܺܝܪ̈ܺܝܢ ܒܒܰܪܢܳܫܗܽܘܢ ܓܰܘܳܝܳܐ ܠܗܽܘܢ ܡܚܰܦܶܛ ܗܘܰܝܬ: ܘܰܕܠܐ ܢܶܦܗܽܘܢ ܒܡܰܪ̈ܢܝܳܬܳܐ ܣܪ̈ܺܝܩܳܬܳܐ ܠܗܽܘܢ ܡܟܰܘܶܢ ܗܘܰܝܬ: ܘܰܕܥܶܕܳܢܳܐ ܕܠܐ ܐܺܝܬܰܘܗܝ ܐܠܰܗܳܐ ܥܰܠ ܒܳܠܶܗ ܕܒܰܪܢܳܫܳܐ ܐܰܝܟ ܚܰܝܛܳܐ ܚܫܺܝܒ ܗ̣ܽܘ: ܘܠܰܝܬܰܘܗܝ ܚܝܳܐ ܗ̇ܰܘ ܒܰܪܢܳܫܳܐ ܗ̇ܰܘ ܥܶܕܳܢܳܐ: ܠܰܒ̈ܢܰܝ ܐ̱ܪܳܙܳܟ ܐܳܡܰܪ ܗܘܰܝܬ: ܘܟܰܕ ܢܶܗܘܶܐ ܐ̱ܢܳܫ ܗܳܪܶܓ ܒܡܰܚ̈ܫܒܳܬܳܐ ܣܪ̈ܺܝܩܳܬܳܐ: ܣܳܛܳܢܰܐ ܗ̱ܘ ܗ̇ܰܘ ܒܰܪܢܳܫܳܐ ܥܶܕܳܢܳܐ ܠܰܠܒܺܝ̈ܫܰܝ ܐܶܣܟܺܝܡܳܟ ܡܰܟܶܣ ܗܘܰܝܬ: ܘܟܰܕ ܢܶܗܘܶܐ ܐ̱ܢܳܫ ܗܳܪܶܓ ܒܥܽܘܗܕܳܢܳܐ ܕܰܐܠܳܗܳܐ ܐܠܰܗܳܝܰܐ ܗ̱ܘ ܗ̇ܰܘ ܒܰܪܢܳܫܳܐ ܠܬܰܠܡܺܝ̈ܕܰܝܟ ܗܳܠܶܝܢ ܓܳܠܐܷ ܗܘܰܝܬ: ܘܰܠܟܽܠܗܽܘܢ ܒܢ̈ܰܝ ܛܶܟܣܳܟ ܡܝܰܩܪܳܐ ܒܝܰܕ ܗܳܠܶܝܢ ܡܬܰܠܡܶܕ ܗܘܰܝܬ: ܘܡܶܛܽܠ ܗܳܕܶܐ ܛܽܘܒܳܐ ܛܒܺܝܒܳܐ: ܠܳܟ ܝܳܗܒܺܝܢܰܢ ܘܳܐܡܪܺܝܢܰܢ ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ ܬܳܟܶܣ ܠܚܰܫܰܝ̈ ܒܶܣܪܳܐ ܘܰܚܛܺܝܬܳܐ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܒܪܽܘܢܺܝܽܘܢ ܗܕܺܝܪ ܫܽܘܦܪ̈ܶܐ: ܕܰܒܕܶܡ ܝܶܫܽܘܥ ܨܒܺܝܥ ܘܰܡܕܰܗܰܒ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܥܰܒܕܳܐ ܛܳܒܳܐ ܕܰܠܦܽܘܩܕܳܢ ܡܳܪܶܗ ܐܶܫܬܡܰܥ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܩܰܐܬܰܪܛܺܝܩܽܘܢ ܕܰܠܟܺܐܒܰܝ̈ܢ ܐܰܚܠܶܡ ܘܰܐܣܺܝ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܫܓܺܝܪ ܒܢܽܘܪܳܐ ܐܠܰܗܳܝܬܳܐ ܕܰܒܒܰܠܐܱܢܺܝ ܐܶܬܚܒܶܫ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܝܰܩܕܳܐ ܫܰܠܡܳܐ ܕܰܚܛܳܗܰܝ̈ܢ ܒܶܗ ܐܶܬܚܰܣܺܝܘ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܫܳܒܽܘܩܳܐ ܕܕܽܘܗܳܢܳܐ ܕܰܒܥܺܕܰܬ ܩܽܘܕܫܳܐ ܐܰܦܪܰܥ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܐܶܠܺܝܩܪܳܐ ܡܗܺܝܪܳܐ ܕܠܐܠܦܳܗ̇ ܕܥܺܕܬܳܐ ܫܰܦܺܝܪ ܡܠܰܚ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܣܽܘܦܺܝܣܛܳܐ ܕܚܶܟ̈ܡܳܬܳܐ ܐܠܰܗܳܝ̈ܳܬܳܐ ܝܰܬܺܝܪ ܡܠܺܝܛ: ܠܳܟ ܛܽܘܒܰܝܟ ܩܰܕܺܝܫܳܐ ܡܳܪܝ ܐܰܟܣܢܳܝܳܐ: ܐܠܶܝܣܳܦ ܪܳܡ ܩܳܠܐ ܕܰܫܗܰܪ ܥܰܠ ܐܰܦ̈ܰܝ ܡܰܪܥܺܝܬܳܐ ܡܫܰܩܰܦܬܳܐ: ܡܶܟܺܝܠ ܒܰܨܠܰܘ̈ܳܬܳܟ ܐܳܘ ܩܰܕܺܝܫܳܐ ܡܳܪܝ ܐܰܟܣܢܳܝܳܐ ܘܒܰܨܠܰܘ̈ܳܬܗܽܘܢ ܕܟܽܠܗܽܘܢ ܩܰܕܺܝ̈ܫܶܐ ܟܢܰܘ̈ܳܬܳܟ: ܘܰܐܝܠܶܝܢ ܕܶܐܬܬܰܠܡܰܕܘ ܒܡܰܠܦܳܢܽܘܬܳܟ ܟܽܠܰܢ ܢܶܬܥܰܕܰܪ: ܘܢܶܬܚܢܶܢ ܒܪ̈ܰܚܡܶܐ ܕܡܳܪܳܟ ܘܢܶܫܬܘܶܐ ܠܡܰܦܩܳܢܳܐ ܡܫܰܝܢܳܐ ܘܒܰܣܺܝܡܳܐ: ܘܰܠܚܽܘܠܛܳܢܳܐ ܕܰܒܟܶܢܫܰܝ̈ܟܽܘܢ ܘܰܚܢܰܢ ܘܥܰܢܺܝ̈ܕܰܝܢ ܢܶܬܒܰܣܰܡ ܒܰܚܙܳܬܟܽܘܢ: ܘܢܶܙܡܰܪ ܫܽܘܒܚܳܐ ܒܓܽܘܕܰܝ̈ܟܽܘܢ ܠܰܡܫܺܝܚܳܐ ܝܶܫܽܘܥ ܡܳܪܟܽܘܢ: ܡܟܰܠܠܳܢܟܽܘܢ ܘܰܡܢܰܨܚܳܢܟܽܘܢ: ܘܠܐܒܽܘܗܝ ܣܳܝܽܘܡܳܐ ܕܰܐܓܽܘܢܰܝ̈ܟܽܘܢ: ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܕܰܐܬܠܺܝܛܽܘܬܟܽܘܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܫܡܥܘܢ ܕܙܝ̈ܬܐ: ܕܩܒܝܪ ܒܥܘܡܪܐ ܕܩܪܬܡܝܢ: ܘܗܘ ܐܝܬܘܗܝ ܛܠܝܐ ܕܐܬܬܕܝܫ ܘܡܝܬ ܒܫܘܢܝܗ ܕܡܪܝ ܓܒܪܐܝܠ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܕܰܟܝܳܐܝ̣ܬ ܘܩܰܕܺܝܫܳܐܝ̣ܬ ܢܫܰܡܠܐܷ ܥܺܐܕܶܗ ܕܓܰܒܝܳܐ ܡܳܪܝ ܫܶܡܥܽܘܢ ܐܶܦܣܩܽܘܦܳܐ ܡܥܰܠܝܳܐ: ܘܒܰܨܠܰܘ̈ܳܬܶܗ ܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܩܕܳܡܰܝܟ: ܘܟܶܢܫܳܐ ܕܰܡܗܰܝ̈ܡܢܶܐ ܕܨܳܒ ܘܶܐܬܳܐ ܠܕܽܘܟܪܳܢܶܗ: ܢܩܰܒܶܠ ܡܶܢܳܟ ܡܳܪܳܐ ܡܪܰܚܡܳܢܳܐ ܒܽܘܪ̈ܟܳܬܳܐ ܫܡܰܝܳܢ̈ܝܳܬܳܐ ܒܰܬܪ̈ܰܝܗܽܘܢ ܥܳܠܡ̈ܶܐ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܚܕܳܢܳܝ ܐܽܘܣܺܝܰܐ ܘܰܬܠܺܝܬܳܝ ܐܰܛܽܘ̈ܡܽܘ ܝܶܫܽܘܥ ܡܫܺܝܚܳܐ ܪܺܝܫ ܐܠܰܗܽܘܬܳܐ: ܕܨܰܒܶܬ ܘܗܰܕܰܪ ܠܡܳܪܝ ܫܶܡܥܽܘܢ ܕܙܰܝ̈ܬܶܐ ܒܪܺܝܫܽܘܬ ܟܳܗܢܽܘܬܳܐ ܠܗܰܘ ܬܶܐܘܽܘܢ ܐܺܝܬܝܳܝܳܐ ܘܕܰܠܥܳܠܰܡ ܕܓܰܡܪܶܗ ܠܢܰܨܺܝܚܳܐ ܥܰܒܕܶܗ ܡܳܪܝ ܫܶܡܥܽܘܢ ܒܰܐܠܺܝܡܰܕܪܽܘܣ ܫܡܰܝܳܢ̈ܝܳܬܳܐ: ܘܰܣܥܰܪ ܒܶܝܬ ܐܺܝܕܰܘ̈ܗܝ ܟܽܠ ܥܽܘܕܪ̈ܳܢܶܐ ܘܚܽܘܠܡܳܢ̈ܶܐ ܠܐܢܳܫܽܘܬܳܐ ܕܠܶܗ ܘܰܚܢܰܢ ܡܚܺܝ̈ܠܐ ܘܚܰܛܳܝ̈ܶܐ ܢܩܰܠܶܣ ܘܰܠܡܳܪܶܗ ܢܫܰܒܰܚ ܘܢܶܣܓܽܘܕ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܝܰܘܡܳܐ ܫܒܺܝܚܳܐ ܘܰܡܪܰܡܪܡܳܐ ܕܥܺܐܕܳܐ ܕܢܰܨܺܝܚ ܫܽܘܦܪ̈ܶܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܐܶܬܟܰܢܰܫܢܰܢ: ܘܡܶܟܺܝܠ ܥܰܠ ܗܶܠܦܺܝܽܘܣ ܕܰܨܠܰܘ̈ܳܬܶܗ ܩܳܪܒܺܝܢܰܢ ܘܰܠܝܽܘܡ ܕܽܘܟܪܳܢܶܗ ܕܓܰܒܝܳܐ ܡܳܪܝ ܫܶܡܥܽܘܢ ܡܩܰܠܣܺܝܢܰܢ ܘܰܒܣܺܝܡܰܬ ܓܰܪ̈ܡܰܘܗܝ ܛܳܦܣܺܝܢܰܢ ܘܡܶܢܗܽܘܢ ܚܰܝܠܐ ܢܳܣܒܺܝܢܰܢ: ܘܒܰܒ̈ܢܳܬ ܩ̈ܳܠܐ ܡܚܰܓܝܳܢ̈ܝܳܬܳܐ ܠܘܳܬܶܗ ܐܳܡܪܺܝܢܰܢ: ܗܳܢܳܐ ܕܟܰܕ ܡ̣ܶܢ ܛܽܘܗܡܳܐ ܡܥܰܠܝܳܐ ܘܰܛܒܺܝܒܳܐ ܐܺܝܬܰܘܗܝ ܗܘܳܐ: ܘܡ̣ܢ ܩܶܣܛܪܰܐ ܡܫܰܡܰܗܬܳܐ ܒܡܰܠܦܳܢ̈ܶܐ ܚܰܒܣܢܽܘܣ ܡܶܬܺܝܕܰܥ ܗܘܳܐ: ܗܳܢܳܐ ܕܰܒܢܶܕܪ̈ܶܐ ܘܰܒܩܽܘܪ̈ܒܳܢܶܐ ܐܶܬܺܝܗܶܒ ܠܐܒܳܗܰܘ̈ܗܝ ܡܗܰܝ̈ܡܢܶܐ ܘܰܠܥܽܘܡܪܳܐ ܩܰܕܺܝܫܳܐ ܕܰܪܫܺܝܡ ܠܡܰܠܐܟ̈ܶܐ ܐܶܬܬܰܝܬܺܝ ܘܒܶܗ ܩܰܒܶܠ ܠܪܽܘܫܡܳܐ ܕܚܰܝ̈ܶܐ ܕܡܰܥܡܽܘܕܺܝܬܳܐ: ܗܳܢܳܐ ܕܰܒܥܽܘܡܪܳܐ ܩܰܕܺܝܫܳܐ ܒܰܬܠܳܬ ܐܶܣܟܽܘ̈ܠܐܱܣ ܐܶܬܚܰܟܰܡ ܘܶܐܬܕܰܪܰܫ ܘܶܐܬܛܰܟܰܣ ܥܕܰܡܳܐ ܕܰܗܘܳܐ ܪܺܝܫ ܩܺܝ̈ܢܳܢ ܕܰܥܣܰܪ: ܘܰܒܥܽܘܡܪܳܐ ܬܽܘܒ ܐܶܬܬܰܣܪܰܚ ܡܫܰܡܫܳܢܳܐ ܡ̣ܶܢ ܡܳܪܝ ܓܰܒܪܺܐܶܝܠ ܪܺܝܫ ܥܽܘܡܪܳܐ ܘܰܠܒܶܫ ܐܰܣܟܺܝܡܳܐ ܕܕܰܝܪܳܝܽܘܬܳܐ ܗܳܢܳܐ ܕܒܳܬܰܪ ܕܶܐܬܓܡܰܪ ܒܟܽܠܳܗ̇ ܡܝܰܬܪܽܘܬܳܐ ܘܶܐܫܬܰܡܠܺܝ ܒܰܥܒܳܕ̈ܶܐ ܕܙܰܕܺܝܩܽܘܬܳܐ: ܐܶܙܰܠ ܚܒܰܫ ܗ̣ܽܘ ܠܶܗ ܒܒܽܘܪܓܳܐ ܕܥܰܠ ܓܶܢ̱ܒ ܣܶܪܘܰܐܢ: ܗܳܢܳܐ ܕܰܐܣܝܶܗ ܠܫܰܗܪܒܰܪܙ ܡܰܠܟܳܐ ܦܳܪܣܳܝܳܐ: ܟܰܕ ܡ̣ܶܢ ܬܰܪ̈ܥܰܝ ܡܰܘܬܳܐ ܐܰܦܢܝܶܗ: ܘܰܥܡܰܕ ܒܰܫܡܶܗ ܕܡܳܪܰܢ ܘܰܠܟܽܠܳܗ̇ ܫܒܺܝܬܳܐ ܕܰܐܝܬܺܝ ܡ̣ܶܢ ܡܰܚܠܶܡ ܡ̣ܶܢ ܩܪܺܝܬܳܐ ܕܚܰܒܣܽܘܣ ܚܰܪܰܪ ܘܫܰܕܰܪ ܗܳܢܳܐ ܕܰܒܢܳܐ ܥܺܕ̈ܳܬܳܐ ܘܕܰܝܪ̈ܳܬܳܐ ܒܰܢܨܺܝܒܺܝܢ ܘܒܽܐܘܪܗܳܝ ܐܳܦ ܒܳܐܡܺܝܕ ܡܕܺܝܢ̱ܬܳܐ: ܗܳܢܳܐ ܕܰܐܥܬܰܪ ܠܡܶܣ̈ܟܺܢܶܐ ܘܠܰܣܢܺܝ̈ܩܶܐ ܘܚܳܕܽܘܪ̈ܶܐ ܒܝܰܕ ܡܰܘܗ̈ܒܳܬܳܐ: ܘܝܳܨܶܦ ܗܘܳܐ ܕܝܰܬܡ̈ܶܐ ܘܕܰܐܪ̈ܡܠܳܬܳܐ: ܡ̣ܶܢ ܕܰܗܒܳܐ ܕܶܐܫܟܰܚ ܒܰܪ ܚܳܬܶܗ ܕܰܘܺܝܕ ܒܓܰܘ ܡܥܰܪܬܳܐ ܗ̇ܳܝ ܕܠܽܘܩܒܰܠ ܩܶܠܥܳܐ ܕܗܰܝܬܰܡ ܕܣܺܝܡ ܒܓܰܘ ܛܽܘܫܺܝܬܳܐ: ܗܳܢܳܐ ܕܰܬܪܶܥܣܰܪ ܐܠܰܦܰܝ̈ܳܐ ܥܶܩܳܪ̈ܶܐ ܕܙܰܝ̈ܬܶܐ ܢܨܰܒ ܘܰܐܩܺܝܡ ܘܪܰܒܺܝ ܥܰܠ ܓܶܢ̱ܒ ܣܰܪܘܰܐܢ: ܘܡܶܢܗܽܘܢ ܕܶܝܢ ܡܶܬܦܪܶܣ ܗܘܳܐ ܢܰܗܺܝܪܳܐ ܕܩܰܢܕܺܝ̈ܠܐ ܕܰܒܥܽܘܡܪܳܐ ܩܰܕܺܝܫܳܐ ܘܰܕܟܽܠܗܶܝܢ ܥܺܕ̈ܳܬܳܐ ܕܰܐܬܪܰܢ: ܢܶܬܚܰܣܽܘܢ ܚܰܘܒܰܝ̈ܢ ܘܰܚܛܳܗܰܝ̈ܢ ܘܟܽܠܗܶܝܢ ܣܰܟܠܘ̈ܳܬܰܢ: ܘܢܶܫܬܰܟܰܢ ܠܡܰܠܟ̈ܶܐ ܕܰܐܪܥܳܐ ܡܫܰܝܢܽܘܬܳܐ ܘܰܠܕܰܝ̈ܳܢܶܐ ܬܪܺܝܨܽܘܬܳܐ: ܘܠܰܩܪ̈ܺܝܩܶܐ ܒܢܶܝ̈ܗ̇ ܕܥܺܕܬܳܐ ܙܰܗܝܽܘܬܳܐ ܘܩܰܕܺܝܫܽܘܬܳܐ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܢܶܬܡܰܢܥܽܘܢ ܠܰܠܡܺܐܢܳܐ ܕܚܰܕ̈ܘܳܬܳܐ: ܘܰܚܢܰܢ ܘܗܶܢܽܘܢ ܒܓܽܘ̈ܕܶܐ ܕܦܳܠܰܚ̈ܘܳܬܳܐ ܫܡܰܝܳܢ̈ܝܳܬܳܐ ܢܶܙܡܰܪ ܫܽܘܒܚܳܐ ܒܩܺܝ̈ܢܳܬܳܐ ܚܰܠܝ̈ܳܬܳܐ: ܠܡܳܪܝܳܐ ܡܢܰܨܚܳܢܳܟ ܘܰܡܫܰܡܠܝܳܢܟ ܕܒܰܓܡܺܝܪܽܘܬܳܐ: ܗܳܫܳܐ܀

 

 

 

ܥܛܪܐ

 

 

 

ܡܠܺܝ ܠܰܢ ܡܳܪܝ ܒܰܣܺܝܡܽܘܬ ܪܺܝܚܳܐ ܕܫܽܘ̈ܟܳܢܰܝܟ ܐܠܰܗܳܝ̈ܶܐ: ܩܰܕܶܫ ܠܰܢ ܒܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܘܢܰܛܰܪ ܠܰܢ ܡ̣ܶܢ ܒܺܝܫܳܐ ܘܚܰܝܠܶܗ: ܘܰܢܫܰܘܙܶܒ ܠܰܢ ܡ̣ܶܢ ܟܽܠܗܶܝܢ ܡܥܺܝ̈ܩܳܢܝܳܬܳܐ: ܘܰܐܫܦܰܥ ܥܠܰܝܢ ܛܰܠܐ ܕܒܰܣܺܝܡܽܘܬܳܟ: ܒܝܰܕ ܒܳܥܘ̈ܳܬܶܗ ܕܚܰܣܝܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܡܢܺܝܚܳܢܳܟ: ܘܰܐܫܘܳܐ ܠܰܢ ܠܰܡܩܰܒܳܠܽܘ ܝܽܘܠܦܳܢܶܗ ܘܰܕܢܶܪܕܶܐ ܒܥܶܩ̈ܒܳܬܶܗ ܘܰܕܢܶܬܕܰܡܶܐ ܒܰܥܒܺܝ̈ܕܳܬܶܗ: ܘܢܶܫܬܰܘܬܰܦ ܒܰܨܠܰܘ̈ܳܬܶܗ ܘܰܕܢܶܬܥܰܕܰܪ ܒܝܰܕ ܬܰܟܫ̈ܦܳܬܶܗ: ܡܳܪܰܢ ܘܰܐܠܳܗܰܢ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܡܥܺܝܢܳܐ ܕܛܽܘܒܬܳܢܽܘܬܳܐ ܘܝܰܪܕܳܐ ܕܩܰܕܺܝܫܽܘܬܳܐ: ܕܡܶܢܶܗ ܗ̣ܺܝ ܟܽܠ ܡܰܘܗܰܒܬܳܐ ܛܳܒܬܳܐ ܘܰܫܡܰܝܳܢܺܝܬܳܐ: ܠܗܰܘ ܕܛܳܒ ܘܩܰܕܶܫ ܠܡܳܪܝ ܫܶܡܥܽܘܢ ܕܙܰܝ̈ܬܶܐ: ܡܫܰܟܠܳܢܳܐ ܕܥܺܕ̈ܳܬܳܐ ܘܰܕܕܰܝܪ̈ܳܬܳܐ: ܘܰܡܩܺܝܡܳܢܳܐ ܕܥܺܕ̈ܳܬܳܐ ܠܗܰܘ ܕܒܰܫܡܶܗ ܐܰܓܺܝܽܘܣ ܣܥܰܪ ܟܽܠ ܬܶܕܡܪ̈ܳܬܳܐ ܫܒܺܝ̈ܚܳܬܳܐ: ܘܡܶܛܽܠܳܬܶܗ ܒܰܣܰܪ ܘܫܳܛ ܠܗܽܘܠܳܢ̈ܝܳܬܳܐ: ܘܶܐܬܝܰܐܱܝܒ ܠܰܫܡܰܝܳܢ̈ܝܳܬܳܐ: ܘܶܐܬܪܰܓܪܰܓ ܠܪ̈ܽܘܚܳܢܝܳܬܳܐ ܕܰܠܗܶܝܢ ܢܶܫܬܘܶܐ ܕܢܶܬܝܰܒܰܠ ܘܢܶܫܬܰܒܰܠ ܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܒܡܰܠܟܽܘܬܳܐ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܟܰܕ ܠܩܽܘܠܳܣܰܘ̈ܗܝ ܕܰܥܛܺܝܦ ܙܳܟܽܘܬܳܐ ܢܰܨܺܝܚ ܫܽܘܦܪ̈ܶܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܪܺܝܫܳܐ ܟܳܗܢܳܝܳܐ ܘܥܰܡܽܘܕܳܐ ܠܐ ܡܶܙܕܰܥܙܥܳܢܳܐ ܡܫܰܡܠܶܝܢܰܢ ܝܰܘܡܳܢܳܐ: ܒܣܽܘܠܐܱܒܽܘ̈ܣ ܕܪܽܘܚܳܐ ܩܰܕܺܝܫܳܐ ܠܘܳܬܶܗ ܡܥܰܢܶܝܢܰܢ ܘܳܐܡܪܺܝܢܰܢ: ܡܳܪܝ ܫܶܡܥܽܘܢ ܕܙܰܝ̈ܬܶܐ: ܕܶܐܬܬܰܠܡܰܕ ܒܥܽܘܡܪܳܐ ܩܰܕܺܝܫܳܐ ܕܒܶܝܬ ܡܳܪܝ ܫܶܡܥܽܘܢ ܕܩܰܪܬܡܺܝܢ: ܦܰܚܡܶܗ ܟܢܳܬܶܗ ܕܗ̇ܰܘ ܚܰܒܪܳܐ ܕܡܰܠܐܟ̈ܶܐ ܐܳܦ ܒܥܶܠܫܡܶܗ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܶܐܬܚܢܶܩ ܒܚܶܒܨܳܐ ܕܟܶܢ̈ܫܶܐ ܝܽܘܡ ܡܰܘܬܶܗ ܕܡܳܪܝ ܓܰܒܪܺܐܶܝܠ ܩܽܘܣܛܺܝܢܳܝܳܐ ܘܶܐܬܢܰܚܰܡ ܘܰܚܝܳܐ ܒܰܨܠܰܘ̈ܳܬܶܗ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܒܢܳܐ ܠܶܗ ܐܽܘܕܺܝܩܽܘܢ ܐܰܘܟܺܝܬ ܦܽܘܪܩܳܣܳܐ ܥܰܠ ܓܶܢ̱ܒ ܣܰܪܘܰܐܢ ܡܕܺܝܢ̱ܬܳܐ ܕܦܳܪ̈ܣܳܝܶܐ ܘܰܚܒܰܫ ܗ̣ܽܘ ܠܶܗ ܫܢܰܝ̈ܳܐ ܣܰܓܺܝ̈ܳܐܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܬܰܠܡܶܕ ܠܡܰܠܟܳܐ ܡܰܐܡܽܘܢ ܘܰܐܣܝܶܗ ܡ̣ܶܢ ܟܺܐܒܳܐ ܕܰܡܥܰܝ̈ܳܐ ܘܰܐܕܪܟܶܗ ܥܰܠ ܕܰܫܒܳܐ ܘܰܐܘܩܶܕ ܠܟܽܠܶܗ ܐܰܬܪܳܐ ܕܛܽܘܪ ܥܰܒܕܺܝ̈ܢ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܠܰܫ̈ܒܰܝܳܐ ܘܠܐܣܺܝܪ̈ܶܐ ܒܢ̈ܰܝ ܐܰܬܪܶܗ ܘܰܩܪܺܝܬܶܗ ܘܰܡܪܰܘܚܳܢܳܐ ܕܟܽܠ ܥܰܝܺܝ̈ܩܶܐ ܘܰܐܠܺܝ̈ܨܶܐ ܕܡܶܬܓܰܘܣܺܝܢ ܒܶܗ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܚܰܕܶܬ ܘܨܰܒܶܬ ܠܥܽܘܡܪܶܗ ܩܰܕܺܝܫܳܐ ܕܩܰܪܬܡܺܝܢ ܒܟܽܠܗܶܝܢ ܨܶܒܘ̈ܳܬܳܐ ܡܶܬܒܰܥܝܳܢ̈ܝܳܬܳܐ: ܐܰܝܟ ܝܶܫܽܘܥ ܒܰܪ ܝܽܘܙܳܕܳܩ ܘܰܐܝܟ ܙܽܘܪܒܳܒܶܝܠ ܕܚܰܕܶܬܘ ܠܐܘܪܫܠܶܡ ܘܰܠܗܰܝܟܠܐ ܕܰܫܠܶܝܡܽܘܢ ܒܳܬܰܪ ܫܒܺܝܬܳܐ ܘܝܰܩܕܳܢܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܫܰܟܶܢ ܠܥܽܘܡܪܳܐ ܟܳܗܢܳܝܳܐ ܦܰܪ̈ܕܰܝܣܶܐ ܘܓܰܢ̈ܶܐ ܘܪ̈ܚܘܬܳܐ ܘܟܰܪ̈ܡܶܐ ܘܰܐܪ̈ܥܳܬܳܐ ܘܚܰܩ̈ܠܳܬܳܐ ܟܽܠ ܩܽܘܪ̈ܝܳܐ ܘܰܡܕܺܝ̈ܢܳܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܐܣܓܺܝ ܒܥܽܘܡܪܳܐ ܟܽܠ ܟܬܳܒ̈ܶܐ ܘܦܰܢ̈ܩܝܳܬܳܐ ܘܦܰܝ̈ܢܶܐ ܘܩܶܣ̈ܛܶܐ ܘܟܳܣ̈ܶܐ ܕܕܰܗܒܳܐ ܘܡܰܪ̈ܽܘܚܳܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܨܰܒܶܬ ܠܡܰܕܒ̈ܚܶܐ ܘܰܬܪ̈ܽܘܢܺܝܽܘ ܕܥܽܘܡܪܳܐ ܒܟܽܠ ܬܰܠܒ̈ܫܳܬܳܐ ܡܰܕܗ̈ܒܳܬܳܐ: ܘܰܒܘܺܝ̈ܠܐ ܡܰܠܟܳܝ̈ܳܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܒܢܳܐ ܥܺܕ̈ܳܬܳܐ ܘܕܰܝܪ̈ܳܬܳܐ ܣܰܓܺܝ̈ܳܐܬܳܐ: ܘܰܩܒܰܥ ܡܰܕܒ̈ܚܶܐ ܘܰܫܟܺܝ̈ܢܳܬܳܐ ܒܥܽܘܡܪܳܐ ܩܰܕܺܝܫܳܐ ܘܒܰܐܬܪܰܢ ܘܰܒܟܽܠ ܩܽܘܪ̈ܝܳܐ ܘܰܡܕܺܝ̈ܢܳܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܫܽܘܠܛܳܢܳܐ ܝܰܗܒ ܠܶܗ ܡܰܐܡܽܘܢ ܡܰܠܟܳܐ ܪܰܒܳܐ ܕܛܰܝܳܝܽܘܬܳܐ: ܕܢܶܒܢܶܐ ܥܺܕ̈ܳܬܳܐ ܘܕܰܝܪ̈ܳܬܳܐ ܒܟܽܠܶܗ ܐܽܘܚܕܳܢܶܗ ܘܰܒܕܽܘܟ̈ܝܳܬܳܐ ܡܫܰܡ̈ܗܳܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܶܐܬܒܰܩܺܝ ܒܟܽܘܪܳܐ ܕܢܶܣܝܽܘ̈ܢܶܐ ܘܰܕܥܳܩ̈ܳܬܳܐ: ܘܶܐܫܬܟܰܚ ܕܰܗܒܳܐ ܕܰܟܝܳܐ ܕܠܰܝܬ ܒܶܗ ܫܽܘܚܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܶܐܬܒܰܚܰܢ ܥܰܡܶܗ ܥܰܠ ܬܰܘܕܺܝܬܳܐ ܘܗܰܝܡܳܢܽܘܬܳܐ ܕܰܬܠܳܬܳܐ ܩܢܽܘ̈ܡܶܐ ܕܰܬܠܺܝܬܳܝܽܘܬܳܐ ܡ̣ܶܢ ܚܰܢ̈ܦܶܐ ܘܝܽܘܕܳܝ̈ܶܐ ܘܫܳܡܪ̈ܳܝܶܐ ܘܰܕܒܶܝܬ ܡܰܐܢܺܝ ܘܢܰܣܛܽܘܪ̈ܝܳܢܶܐ ܒܒܳܒܶܝܠ ܡܕܺܝܢ̱ܬܳܐ ܕܛܰܝܳܝܽܘܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܦܰܪܣܺܝ ܘܚܰܝܶܒ ܠܟܽܠܗܶܝܢ ܐܶܪ̈ܶܣܺܝܣ ܡܚܰܒ̈ܠܳܬܳܐ ܘܰܐܦܶܩ ܐܶܢܶܝܢ ܕܰܓ̈ܳܠܳܬܳܐ ܘܟܰܕܳܒ̈ܳܬܳܐ: ܘܕܰܒܬܰܘܫܳܐ ܪܳܕܶܝܢ ܘܰܒܛܳܥܝܽܘܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ: ܕܰܙܟܳܐ ܠܚܰܢ̈ܦܶܐ ܘܝܽܘܕܳܝ̈ܶܐ: ܒܝܰܕ ܛܰܝܒܽܘܬܳܐ ܐܠܰܗܳܝܬܳܐ ܘܰܐܒܗܶܬ ܠܡܰܢܺܝ̈ܢܶܐ ܘܫܳܡܪ̈ܳܝܶܐ ܘܰܠܢܰܣܛܽܘܪ̈ܺܝܢܶܐ ܒܝܰܕ ܚܶܟܡܬܳܐ ܐܶܬܰܐܘܳܣܳܝܬܳܐ: ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܪܫܰܡ ܐܳܬܳܐ ܕܰܨܠܺܝܒܳܐ ܥܰܠ ܣܰܡܳܐ ܕܡܰܘܬܳܐ ܘܰܐܫܩܺܝܘܗܝ ܒܥܶܠܕ̈ܒܳܒܶܐ ܕܟܺܐܢܽܘܬܳܐ: ܘܡܶܕܶܡ ܠܐ ܐܰܟܝܶܗ ܒܥܽܘܕܪܳܢ ܡܳܪܶܗ: ܕܫܰܠܺܝܛ ܡ̇ܰܢ ܥܰܠ ܟܽܠܳܗ̇ ܒܪܺܝܬܳܐ ܘܗܳܫܳܐ ܡܶܢܳܟ ܡܳܪܝܳܐ ܡܳܪܰܢ ܡܢܰܨܚܳܢܳܐ ܕܕܳܚܠܰܘ̈ܗܝ ܘܣܰܒܪܳܐ ܕܣܳܓܽܘ̈ܕܰܘܗܝ ܒܳܥܶܝܢܰܢ ܘܡܶܬܟܰܫܦܺܝܢܰܢ: ܣܚܽܘܦ ܘܛܰܠܶܩ ܠܰܦܠܰܓܳܐ ܕܫܺܐܕ̈ܶܐ ܕܣܳܢܶܝܢ ܠܰܢ: ܘܰܪܕܽܘܦ ܠܰܒܥܶܠܕ̈ܒܳܒܶܐ ܕܥܰܡܰܢ ܢܶܫܬܰܠܛܽܘܢ ܥܠܰܝܢ ܢܶܥܒܽܘܢ: ܛܰܗܪܳܝܳܐ ܐܰܪܚܶܩ ܡ̣ܶܢ ܨܶܝܕܰܝܢ ܐܶܣܛܪܰܐܛܰܣܺܝܣ ܢܶܬܛܪܶܕ ܥܰܡ ܟܽܠܶܗ ܫܶܚܪܶܗ ܡ̣ܶܢ ܟܽܠܶܗ ܬܚܽܘܡܰܢ ܘܽܐܘܚܕܳܢܰܢ ܘܟܰܕ ܒܫܰܝܢܳܐ ܕܡܶܢܳܟ ܢܶܬܒܰܣܰܡ: ܘܰܒܚܽܘܒܳܐ ܡܪܰܥܝܳܢܳܐ ܘܠܐ ܕܠܺܝܚܳܐ ܥܰܡ ܚܕܳܕ̈ܶܐ ܢܶܬܰܐܘܶܐ: ܘܢܶܥܒܶܕ ܥܒ̈ܳܕܶܐ ܕܫܳܦܪܺܝܢ ܠܳܟ: ܘܕܽܘܒܳܪ̈ܶܐ ܕܰܡܪܰܥܶܝܢ ܠܳܟ: ܘܢܶܫܬܘܶܐ ܠܚܽܘܠܛܳܢܳܐ ܕܥܰܡ ܓܰܒܰܝ̈ܟ: ܘܰܠܒܽܘܣܳܡܳܐ ܕܥܰܡ ܩܰܕܺܝ̈ܫܰܝܟ: ܘܠܰܡܩܰܒܳܠܽܘ ܐܰܦܰܝ̈ܟ: ܟܰܕ ܓܰܠܝ̈ܳܢ ܐܰܦܰܝ̈ܢ ܩܕܳܡܰܝܟ: ܒܝܽܘܡ ܡܶܐܬܺܝܬܳܟ ܬܪܰܝܳܢܺܝܬܳܐ: ܘܰܚܢܰܢ ܘܥܰܢܺܝ̈ܕܰܝܢ ܢܩܽܘܡ ܡ̣ܶܢ ܝܰܡܺܝܢܳܟ ܘܢܶܙܡܰܪ ܫܽܘܒܚܳܐ ܠܐܝܬܽܘܬܳܟ ܘܰܡܬܽܘܡܳܝܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܗܳܫܳܐ܀

 

 

 

ܨܠܘܬܐ ܕܫܘܪܝܐ ܕܨܦܪܐ

 

 

 

ܕܰܟܳܐ ܠܰܢ ܡܳܪܝܳܐ ܐܠܰܗܳܐ ܡ̣ܶܢ ܟܽܠ ܛܽܘܠܫܳܐ ܘܡܽܘܡܳܐ ܕܰܚܛܺܝܬܳܐ: ܐܰܟܡܳܐ ܕܕܰܟܺܝܬܳܗ̇ ܠܚܳܪܳܢ ܡܕܺܝܢ̱ܬܳܐ ܡ̣ܶܢ ܝܽܘܠܦܳܢ̈ܶܐ ܣܪ̈ܺܝܩܶܐ ܕܛܳܥܝܽܘܬܳܐ ܘܰܕܚܰܢܦܽܘܬܳܐ ܒܝܰܕ ܝܽܘܠܦܳܢܰܘ̈ܗܝ ܘܟܽܘܘܳܢܰܘ̈ܗܝ ܕܓܰܒܝܳܟ ܡܳܪܝ ܫܶܡܥܽܘܢ ܛܒܺܝܒ ܒܣܽܘܪܝܳܝܽܘܬܳܐ: ܘܒܰܨܠܰܘ̈ܳܬܶܗ ܐܰܫܦܰܥ ܥܠܰܝܢ ܛܳܒ̈ܳܬܳܐ ܘܒܽܘܪ̈ܟܳܬܳܐ: ܘܦܰܨܳܐ ܠܰܢ ܡ̣ܶܢ ܟܽܠ ܡܰܚܘ̈ܳܬܳܐ ܘܡܰܪ̈ܕܘܳܬܳܐ: ܘܰܫܒܽܘܩ ܚܰܘ̈ܒܶܐ ܘܰܚܛܳܗ̈ܶܐ ܕܺܝܠܰܢ ܐܳܦ ܣܰܟܠܘ̈ܳܬܰܢ ܘܒܰܣܶܡ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܐ: ܘܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ܀

 

 

 

ܦܪܘܡܝܘܢ

 

 

 

ܦܰܢܛܽܘܪ ܩܰܪܛܽܘܪ ܫܡܰܝܳܢܳܐ ܕܰܓܒܳܝܗܝ ܠܡܳܪܝ ܫܶܡܥܽܘܢ ܕܙܰܝ̈ܬܶܐ ܦܪܰܐܦܰܣܝܽܘܛܳܐ ܕܰܐܠܳܗܽܘܬܳܐ ܠܗܰܘ ܪܺܝܫ ܟܽܘܡܪ̈ܶܐ ܘܝܳܗܽܘܒܳܐ ܕܡܰܘܗ̈ܒܳܬܳܐ ܫܡܰܝܳܢ̈ܝܳܬܳܐ ܕܨܰܒܶܬ ܘܗܰܕܰܪ ܠܐܬܠܺܝܛܶܗ ܢܰܨܺܝܚܳܐ ܒܕܰܪܓܳܐ ܕܚܰܣܝܽܘܬܳܐ: ܘܰܐܫܠܛܶܗ ܠܡܶܪܥܳܐ ܠܥܳܢ̈ܳܐ ܕܺܝܠܶܗ ܡܠܺܝܠܬܳܐ ܠܗ̇ܰܘ ܕܥܰܠܝܶܗ ܠܪܰܘܡܳܐ ܪܳܡܳܐ ܕܰܡܝܰܬܪܽܘܬܳܐ: ܘܓܰܡܪܶܗ ܒܟܽܠܗܶܝܢ ܪ̈ܽܘܚܳܢܝܳܬܳܐ: ܕܠܶܗ ܠܡܳܪܝܳܐ ܡܢܰܨܚܳܢܶܗ ܢܶܣܓܽܘܕ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܝܰܡܳܐ ܕܪ̈ܰܚܡܶܐ: ܘܪ̈ܰܚܡܶܐ ܘܰܚܢܳܢܳܐ: ܡܫܺܝܚܳܐ ܗܶܠܝܽܘܣ ܕܙܰܕܺܝܩܽܘܬܳܐ ܕܡ̣ܶܢ ܐܠܰܗܳܐ ܐܰܒܳܐ ܨܡܰܚ: ܫܡܳܐ ܣܓܺܝܕܳܐ ܘܩܰܕܺܝܫܳܐ ܕܡ̣ܶܢ ܡܐܻܪܝܰܐܦܪܰܬܺܝܽܘܢ ܕܢܰܚ: ܘܓܰܐܠܰܩܽܘܣ ܡ̣ܶܢ ܬܕܶܝ̈ܗ̇ ܝܺܢܶܩ: ܘܰܥܕܳܐ ܕܚܰܝ̈ܶܐ ܕܰܠܡܺܝܬܽܘܬܰܢ: ܚܰܝ̈ܶܐ ܘܦܽܘܪܩܳܢܳܐ ܐܰܩܢܺܝ ܥܳܒܽܘܕܳܐ ܕܥܳܠܡ̈ܶܐ ܕܶܐܬܥܰܒܕܰܕ: ܕܰܠܥܰܒ̈ܕܶܐ ܡܫܰܥܒ̈ܕܰܝ ܠܣܳܛܳܢܳܐ ܢܚܰܪܰܪ ܒܳܪܽܘܝܳܐ ܕܒܶܪ̈ܝܳܬܳܐ ܕܰܓܒܳܐ ܠܶܗ ܟܺܐܢ̈ܶܐ ܘܙܰܕܺܝ̈ܩܶܐ ܕܰܡܪܰܥܶܝܢ ܠܶܗ: ܪܰܒ ܪ̈ܳܥܰܘ̈ܳܬܳܐ ܕܰܓܒܳܝܗܝ ܡܳܪܝ ܫܶܡܥܽܘܢ ܠܪܥܝܽܘܬܳܐ: ܨܶܡܚܳܐ ܡܢܰܗܰܪ ܠܒܶܪ̈ܝܳܬܳܐ ܕܰܒܙܰܠܺܝ̈ܩܰܘܗܝ ܢܗܰܪ ܐܰܬܠܺܝܛܳܐ ܥܛܺܝܦ ܙܳܟܽܘܬܳܐ: ܘܰܙܟܳܐ ܠܣܳܛܳܢܳܐ ܣܳܢܳܐܐ ܕܐ̱ܢܳܫܽܘܬܳܐ: ܡܥܺܝܢ ܚܰܝ̈ܶܐ ܕܶܐܬܬܰܪܰܥ ܒܪܰܘܡܳܐ ܕܓܳܓܽܘܠܬܳܐ: ܘܒܶܗ ܐܶܬܒܰܣܰܡ ܗܳܢܳܐ ܓܰܒܝܳܐ ܘܡܶܢܶܗ ܩܢܳܐ ܡܰܠܦܳܢܽܘܬܳܐ: ܐܰܬܰܐܢܰܐܛܽܘܣ ܕܢܰܚܡܶܗ ܠܡܳܪܝ ܫܶܡܥܽܘܢ ܛܰܠܝܳܐ ܕܶܐܬܬܕܺܝܫ ܘܰܨܦܰܚܬܶܗ ܡܺܝܬܽܘܬܳܐ: ܘܟܰܕ ܠܳܟ ܐܰܘܛܽܘܪܩܰܪܛܽܘܪ ܡܪܰܡܪܡܳܢܶܗ ܘܰܡܢܰܨܚܳܢܶܗ ܣܳܓܕܺܝܢܰܢ: ܘܠܶܗ ܒܠܶܥ̈ܙܶܐ ܪ̈ܽܘܚܳܢܳܝܶܐ ܐܳܡܪܺܝܢܰܢ: ܬܳܐ ܒܰܫܠܳܡܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܡܰܣܓܶܐ ܥܺܕ̈ܳܬܳܐ ܘܰܐܬܪܰܢ: ܬܳܐ ܒܰܫܠܳܡܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܠܰܡܦܺܐܕܳܐ ܕܡܰܢܗܰܪ ܠܢܰܦ̈ܫܳܬܰܢ: ܬܳܐ ܒܰܫܠܳܡܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܚܽܘܬܪܳܐ ܘܫܽܘܒܗܳܪܳܐ ܕܰܦܢܺܝܬܰܢ: ܬܳܐ ܒܰܫܠܳܡܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܝܳܨܽܘܦܳܐ ܕܕܰܝܪ̈ܳܬܰܢ: ܬܳܐ ܒܰܫܠܳܡܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܐܳܣܝܳܐ ܕܣܰܘܣܺܝ ܘܣܰܡܣܶܡ ܟܪܺܝܗܽܘܬܰܢ: ܬܳܐ ܒܰܫܠܳܡܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܣܰܡܳܐ ܕܥܽܘܕܪ̈ܳܢܶܐ ܕܰܥܨܰܒ ܗ̣ܽܘ ܠܰܚܒܳܪ̈ܳܬܰܢ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܚܠܺܝܨ ܒܰܩܪܳܒܳܐ: ܘܙܰܟܺܝ ܒܕܰܪܳܐ ܕܙܰܟܳܐ ܠܚܰܢܦܽܘܬܳܐ ܘܰܠܡܰܢܺܝܢܽܘܬܳܐ ܘܝܽܘܕܳܝܽܘܬܳܐ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܛܫܶܐ ܘܰܚܒܺܝܫ ܒܓܽܘܕܳܐ ܕܰܒܕܰܝܪܳܐ ܕܦܰܢܰܟ: ܘܰܒܗܰܘ ܕܡ̣ܶܢ ܥܺܕܬܳܐ ܕܚܰܒܣܢܽܘܣ ܘܰܠܡܰܕܢܚܳܐ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܝܳܗܶܒ ܠܢܰܦܫܶܗ ܥܰܡ̈ܠܐ ܘܛܽܘܪ̈ܳܦܶܐ ܘܰܫܚ̈ܳܩܶܐ ܘܟܽܠ ܐܽܘܠܨܳܢ̈ܶܐ ܡܶܛܽܠ ܡܳܪܶܗ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܐܰܡܺܝܢ ܒܨܰܘ̈ܡܶܐ ܕܫܳܒܽܘ̈ܥܶܐ ܘܒܰܨܠܰܘ̈ܳܬܳܐ ܡܬܺܝ̈ܚܳܬܳܐ ܘܰܒܫܰܗܪ̈ܶܐ ܕܠܰܝܠܰܘ̈ܳܬܳܐ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܗܶܢܝܽܘܟܳܐ ܕܕܰܝܪ̈ܳܝܶܐ: ܘܰܡܦܰܪܢܣܳܢܳܐ ܕܥܺܕ̈ܳܬܳܐ ܘܰܕܕܰܝܪ̈ܳܬܳܐ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܕܚܶܕܝܰܬ݀ ܒܳܟ ܚܳܪܳܢ ܡܕܺܝܢ̱ܬܳܐ ܡܰܪܥܺܝܬܳܟ ܘܪܶܘܙܰܬ݀ ܒܳܟ ܟܽܠܳܗ̇ ܐܽܘܡܬܳܐ ܕܣܽܘܪܝܳܝܽܘܬܳܐ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܚܰܡܶܫ ܕܰܝܪ̈ܳܬܳܐ ܒܢܰܝܬ ܘܫܰܬܶܐܣܬ ܒܰܢܨܺܝܒܺܝܢ ܡܕܺܝܢ̱ܬܳܐ ܕܒܶܝܬ ܬܚܽܘ̈ܡܶܐ: ܠܳܟ ܛܽܘܒܰܝܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܕܰܡܠܰܝܬܳܝܗܝ ܠܐܬܪܰܢ ܥܽܘܡܪ̈ܶܐ ܘܕܰܝܪ̈ܳܬܳܐ ܐܳܦ ܒ̈ܳܬܶܐ ܕܰܨܠܰܘ̈ܳܬܳܐ: ܠܥܰܡܰܢ ܒܰܝܬܳܝܳܐ ܘܰܬܪܺܝܨ ܫܽܘܒܚܳܐ: ܘܰܠܥܰܡܳܐ ܐ̱ܚܪܺܢܳܐ ܕܰܥܒܰܪ ܕܳܪܬܰܢ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܶܐܬܪܫܶܡ ܘܶܐܬܝܰܩܰܪ ܡ̣ܶܢ ܟܽܠ ܥܰܡ̈ܡܶܐ ܘܶܐܡܘ̈ܳܬܳܐ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܶܐܬܟܰܢܺܝ ܠܳܟ ܫܡܳܐ ܐܰܒܺܝ ܩܽܘܪܶܗ: ܗܳܢܰܘ ܕܶܝܢ ܐܰܒܳܐ ܡܝܰܩܪܳܐ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܐܣܗܶܕܬ ܩܕܳܡ ܦܰܛܪܝܰܪܟܳܐ ܒܰܡܝܰܬܪ̈ܳܬܳܐ ܡ̣ܶܢ ܐ̱ܢܳܫ̈ܳܐ ܛܽܘܒܳܢ̈ܶܐ ܘܩܰܕܺܝ̈ܫܶܐ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܘܰܥܶܕ ܘܟܰܢܶܫ ܡܫܺܝܚܳܐ ܡܳܪܳܟ ܠܝܽܘܡ ܥܽܘܦܳܝܳܟ ܚܰܣܝܳܐ: ܬܪܶܥܣܰܪ ܐܶܦܣܩܽܘ̈ܦܶܐ: ܘܰܬܪܶܥܣܰܪ ܐܠܰܦܰܝ̈ܳܐ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܘܟܶܢ̈ܫܶܐ ܘܥܰܡ̈ܡܶܐ ܕܠܐ ܡܶܢܝܳܢ ܓܰܒܪ̈ܶܐ ܘܢܶܫ̈ܶܐ ܕܠܐ ܚܽܘܫܒܳܢ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܶܐܬܟܰܢܺܝ ܠܶܗ ܫܡܳܐ ܫܰܦܺܝܪܳܐ ܘܰܡܝܰܩܪܳܐ ܥܰܠ ܟܽܠ ܐ̱ܢܳܫ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܕܶܐܬܓܠܺܝ ܠܳܟ ܡ̣ܶܢ ܡܳܪܳܟ ܝܽܘܡ ܡܰܘܬܳܟ ܪܚܺܝܡܳܐ ܘܝܰܩܺܝܪܳܐ ܘܰܐܣܪܰܚܬ ܠܕܰܘܺܝܕ ܒܰܪ ܚܳܬܳܟ ܚܰܣܝܳܐ ܠܚܳܪܳܢ ܡܰܪܥܺܝܬܳܐ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܠܥܽܘܡܪܳܐ ܩܰܕܺܝܫܳܐ ܬܰܪܶܨܬ ܡܰܪܕܺܝܬܳܟ ܘܒܶܗ ܐܶܬܥܰܦܺܝ ܦܰܓܪܳܟ ܩܰܕܺܝܫܳܐ ܒܒܶܝܬ ܩܰܕܺܝ̈ܫܶܐ ܨܶܝܕ ܟܢܰܘ̈ܳܬܳܟ: ܫܠܳܡܠܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܰܗܘܳܐ ܝܽܘܡ ܡܰܘܬܳܟ ܝܰܩܺܝܪܳܐ ܝܽܘܡ ܚܰܕ ܒܫܰܒܳܐ ܕܦܰܢܛܺܝܩܽܘܣܛܺܝ ܪܺܝܫܶܗ ܕܰܚܙܺܝܪܳܢ ܝܰܪܚܳܐ ܫܢܰܬ ܐܠܳܦ ܘܰܐܪܒܥܺܝܢ ܘܚܰܡܶܫ ܕܝܰܘ̈ܢܳܝܶܐ: ܠܳܟ ܛܽܘܒܰܝܟ ܘܛܽܘܒܳܐ ܠܢܰܦܫܳܟ ܙܗܺܝܬܳܐ ܕܡܰܢܥܰܬ݀ ܠܪܰܘܡܳܐ ܕܰܫܡܰܝܳܐ: ܘܛܽܘܒܳܐ ܠܐܬܪܰܢ ܕܶܐܫܬܘܺܝ ܠܰܡܢܳܬܳܐ ܕܦܰܓܪܳܟ ܩܰܕܺܝܫܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܬܰܐܣܶܐ ܘܬܰܚܠܶܡ ܟܺܐܒ̈ܶܐ ܕܢܰܦ̈ܫܳܬܰܢ ܘܰܕܦܰܓܪ̈ܰܝܢ ܘܰܙܓܽܘܪ ܡܶܢܰܢ ܠܪ̈ܽܘܚܶܐ ܣܰܩܽܘܒ̈ܠܳܝܳܬܳܐ ܕܗܳܪ̈ܳܢ ܥܰܡܰܢ: ܘܰܦܫܽܘܛ ܝܰܡܺܝܢܳܟ ܘܒܰܪܶܟ ܠܟܶܢܫܰܢ ܕܰܡܩܰܠܶܣ ܥܺܐܕܶܗ ܕܥܰܒܕܳܟ: ܐܰܝܟ ܕܰܒܪܳܟ ܗܳܝܕܶܝܟ ܠܰܒ̈ܢܰܝ ܚܳܪܳܢ ܡܕܺܝܢ̱ܬܳܐ ܘܰܙܓܽܘܪ ܡ̣ܶܢ ܥܺܕܬܳܐ ܘܝܰܠܕܶܝ̈ܗ̇ ܟܽܠ ܝܽܘܠܦܳܢ̈ܶܐ ܢܽܘܟܪ̈ܳܝܶܐ ܐܳܦ ܐܶܪ̈ܶܣܺܝܣ ܐܰܢܛܺܝܦܛܺܝ̈ܩܳܝܳܬܳܐ ܘܠܐܝܠܶܝܢ ܕܰܦܪܰܫܘ ܘܝܰܩܰܪܘ ܘܰܡܝܰܩܪܺܝܢ ܠܝܽܘܡ ܥܺܐܕܶܗ ܘܰܡܩܰܠܣܺܝܢ ܠܕܽܘܟܪܳܢܶܗ: ܦܪܽܘܥ ܐܶܢܽܘܢ ܒܽܘܪ̈ܟܳܬܳܐ ܣܒܺܝ̈ܣܳܬܳܐ ܘܚܽܘܣܳܝ ܚܰܘ̈ܒܶܐ ܘܣܰܟܠܘ̈ܳܬܳܐ: ܘܫܰܘܙܶܒ ܠܟܽܠܰܢ ܡܳܪܝܳܐ ܡ̣ܶܢ ܩܺܝܛܪܳܐ ܕܫܺܐܕ̈ܶܐ ܘܕܰܒܢܰܝ̈ܢܳܫܳܐ ܒܺܝ̈ܫܶܐ: ܘܰܐܟܪܶܟ ܠܰܢ ܢܳܛܽܘܪܽܘܬܳܐ ܕܡܰܠܐܟܰܝ̈ܟ ܩܰܕܺܝ̈ܫܶܐ: ܘܰܐܚܕܰܪ ܠܰܢ ܫܽܘܪܳܐ ܕܪ̈ܰܚܡܶܐ: ܘܫܰܕܰܪ ܠܰܢ ܡܰܠܐܟ̈ܶܐ ܡܫܰܝ̈ܢܶܐ: ܘܣܰܬܰܪ ܠܰܢ ܒܰܒܛܺܝܠܽܘܬܳܟ ܘܰܐܘܚܶܕ ܚܽܘܛܪܳܐ ܕܥܽܘܫܢܳܐ ܠܐܚܺܝ̈ܕܰܝ ܬܰܩܕܳܐ ܪܳܥܝܳܝܳܐ ܘܥܰܛܶܦ ܐܳܦܽܘ̈ܕܶܐ ܙܰܗܝ̈ܳܬܳܐ ܕܟܳܗܢܽܘܬܳܐ ܠܰܕܩܳܝܡܺܝܢ ܥܰܠ ܡܰܛܪ̈ܳܬܳܗ̇ ܕܥܺܕܬܳܐ ܫܳܗܪܺܝܢ ܒܠܰܝܠܰܘ̈ܳܬܳܐ ܘܰܕܝܰܐܪ̈ܽܘܢܺܝܣܶܐ ܥܳܒܕܺܝܢ ܒܕܳܪ̈ܳܬܶܗ ܟܳܗܢܳܝ̈ܳܬܳܐ ܘܰܠܩܳܪ̈ܽܘܝܶܐ ܘܰܡܙܰܡܪ̈ܳܢܶܐ ܘܰܡܩܺܝ̈ܡܳܢܶܐ ܕܓܽܘܕܶܝ̈ܗ̇ ܢܰܛܰܪ ܡ̣ܶܢ ܫܺܐܕ̈ܶܐ ܡܰܟ̈ܝܳܢܶܐ: ܘܢܰܗܰܪ ܘܚܰܟܶܡ ܘܣܰܟܶܠ ܠܟܽܠ ܩܰܘ̈ܡܳܢ ܘܡܽܘ̈ܫܚܳܢ ܕܒܳܗ̇: ܘܰܐܫܘܳܐ ܠܥܰܢܺܝ̈ܕܰܝܢ ܒܰܨܠܰܘ̈ܳܬܶܗ ܠܒܽܘܣܳܡܳܐ ܕܠܐ ܡܶܫܬܪܶܐ: ܒܡܰܠܟܽܘܬܳܐ ܠܐ ܥܳܒܽܘܪܬܳܐ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܠܐ ܫܰܠܘܳܝܳܐ ܘܠܐܒܳܐ ܓܢܺܝܙܐ ܠܐ ܡܶܬܚܰܙܝܳܢܳܐ ܘܠܰܒܪܳܐ ܡܫܺܝܚܳܐ ܠܐ ܡܶܬܕܰܪܟܳܢܳܐ: ܘܰܠܪܽܘܚܳܐ ܩܰܕܺܝܫܳܐ ܠܐ ܡܶܬܒܰܨܝܳܢܳܐ ܕܰܓܒܳܝܗܝ ܡ̣ܶܢ ܟܪܶܣ ܐܶܡܶܗ ܠܰܥܛܺܝܦ ܙܳܟܽܘܬܳܐ ܡܳܪܝ ܫܶܡܥܽܘܢ: ܗܳܫܳܐ܀

 

 

 

ܥܛܪܐ

 

 

 

ܒܝܰܕ ܢܽܘܪܳܐ ܗܳܕܶܐ ܗܽܘܠܳܢܳܝܬܳܐ ܕܛܰܠܩܰܬ݀ ܠܒܶܣ̈ܡܶܐ ܗܳܠܶܝܢ ܕܩܰܪܶܒܢܰܢ ܩܕܳܡ ܪܰܒܽܘܬܳܟ ܡܳܪܝܳܐ ܐܠܰܗܳܐ: ܐܰܫܪܳܐ ܒܰܢ ܢܽܘܪܳܐ ܕܪܶܚܡܬܳܟ ܘܰܐܘܩܶܕ ܙܺܝ̈ܙܳܢܶܐ ܘܛܰܠܶܩ ܠܚܰܫ̈ܶܐ ܚܛܺܝ̈ܬܳܢܳܝܶܐ ܕܙܳܪܰܥ ܣܳܛܳܢܳܐ ܒܠܶܒܰܘ̈ܳܬܰܢ: ܘܕܰܟܳܐ ܠܰܢ ܡ̣ܶܢ ܟܽܘ̈ܒܶܐ ܘܝܰܥܪܳܐ ܕܰܚܛܺܝܬܳܐ: ܕܝܰܒܺܝܫܺܝܢ ܡ̣ܶܢ ܥܰܡܠܐ ܕܰܡܝܰܬܪܽܘܬܳܐ: ܘܪܽܘܣ ܥܠܰܝܢ ܡܶܛܪܳܐ ܕܝܽܘܠܦܳܢܰܝ̈ܟ ܡܰܚ̈ܝܳܢܶܐ ܒܰܨܠܰܘ̈ܳܬܶܗ ܕܰܪܚܽܘܡܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ ܢܰܣܶܩ ܠܳܟ ܫܽܘܒܚܳܐ܀

 

 

 

ܚܘܬܡܐ

 

 

 

ܥܰܬܺܝܪܳܐ ܕܥܽܘܬܪܶܗ ܠܐ ܡܰܘܦܶܐ ܘܡܰܘܗ̈ܒܳܬܶܗ ܠܐ ܚܳܣܪ̈ܳܢ ܐܰܥܬܰܪ ܠܰܢ ܡ̣ܶܢ ܣܺܝ̈ܡܳܬܳܟ: ܐܰܫܦܰܥ ܥܠܰܝܢ ܛܳܒ̈ܳܬܳܟ: ܡ̣ܶܢ ܒܶܝܬܓܰܙܳܐ ܪܘܺܝܚܳܐ ܕܒܶܝܬ ܐܰܒܽܘܟ: ܘܰܐܣܓܳܐ ܠܰܢ ܡ̣ܶܢ ܡܰܘܗ̈ܒܳܬܳܐ ܡܚܰܕܝܳܢ̈ܝܳܬܳܐ: ܡ̣ܶܢ ܐܽܘܡܺܝܪܽܘܣ ܫܡܰܝܳܢܳܐ ܕܺܝܠܳܟ: ܒܡܶܬܟܰܫܦܳܢܽܘܬܶܗ ܕܥܰܒܕܳܟ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܘܰܕܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܚܰܒܪ̈ܰܘܗܝ ܘܥܳܒ̈ܕܰܝ ܨܶܒܝܳܢܳܟ ܘܫܽܘܒܚܳܐ ܘܪܽܘܡܪܳܡܳܐ ܢܩܰܪܶܒ ܠܳܟ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܟܺܐܢܳܐ ܕܰܓܒܳܐ ܠܶܗ ܟܺܐܢ̈ܶܐ ܘܙܰܕܺܝ̈ܩܶܐ ܕܰܢܫܰܒܚܽܘܢܳܝܗܝ: ܠܗܰܘ ܪܳܡܳܐ ܘܰܡܪܰܝܡܳܐ ܕܰܦܪܰܫ ܠܶܗ ܐܰܒܳܗ̈ܳܬܳܐ ܩܰܕܺܝ̈ܫܶܐ ܒܕܳܪ̈ܺܝܢ ܕܳܪ̈ܺܝܢ: ܕܚܰܕ ܡܶܢܗܽܘܢ ܐܺܝܬܰܘܗܝ ܗܳܢܳܐ ܓܰܒܝܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ ܕܥܺܐܕܶܗ ܝܰܘܡܳܢܳܐ ܒܟܶܢܫܰܢ ܗܳܐ ܡܶܙܕܰܝܰܚ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܠܳܟ ܕܰܡܥܰܠܰܝ ܡܶܢܟܽܠ: ܘܡܰܥܡܪܳܟ ܥܒܺܝܕ ܒܰܫ̈ܡܰܝ ܫܡܰܝ̈ܳܐ: ܠܳܟ ܐܰܚܶܒ ܘܰܢܩܶܦ ܗܳܢܳܐ ܐܰܬܠܺܝܛܳܐ ܙܰܟܳܝܳܐ ܘܰܐܓܽܘܢܺܝܣܛܳܐ ܩܪܰܒܬܳܢܳܐ ܡܳܪܝ ܫܶܡܥܽܘܢ ܕܙܰܝ̈ܬܶܐ: ܗܳܢܳܐ ܕܠܰܨܠܺܝܒܳܟ ܫܩܰܠ ܘܰܒܥܶܩ̈ܒܳܬܳܟ ܪܕܳܐ ܘܒܰܫܒܺܝ̈ܠܐ ܕܦܽܘܩ̈ܕܳܢܰܝܟ ܗܰܠܶܟ ܘܰܥܒܰܕ ܨܶܒܝܳܢܳܟ ܘܫܰܡܠܺܝ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ: ܘܥܰܠ ܗܳܕܶܐ ܐܰܘܪܶܒܬ ܠܰܫܡܶܗ ܒܟܽܠ ܐܰܬܰܪ ܘܦܶܢ̈ܝܳܢ: ܘܝܰܩܰܪܬ ܕܽܘܟܪܳܢܶܗ ܒܰܫܡܰܝܳܐ ܘܒܰܐܪܥܳܐ: ܘܰܣܥܰܪ ܟܪ̈ܺܝܗܶܐ ܒܚܰܝܠܳܟ: ܕܰܟܺܝ ܓܰܪ̈ܒܶܐ ܘܚܰܝܶܨ ܠܰܡܫܰܪ̈ܰܝܳܐ ܘܦܰܬܰܚ ܠܰܣܡܰܝ̈ܳܐ ܘܚܰܪܰܪ ܡܢܰܣܰܝ̈ܳܐ ܒܝܰܕ ܡܰܘܗܰܒܬܳܐ ܕܡܶܢܳܟ: ܐܰܒܰܥ ܡܰܝ̈ܳܐ ܡ̣ܶܢ ܟܺܐܦܳܐ ܐܰܝܟ ܡܽܘܫܶܐ ܢܒܺܝܳܐ: ܦܰܪܣܺܝ ܘܚܰܝܶܒ ܠܕܶܚ̈ܠܳܬܳܐ ܣܪ̈ܺܝܩܳܬܳܐ ܐܰܝܟ ܐܶܪܰܡܝܳܐ ܥܰܒܕܳܟ: ܐܰܚܶܬ ܒܰܪܕܳܐ ܕܪܽܘܓܙܳܐ ܥܰܠ ܒܥܶܠܕ̈ܒܳܒܰܘܗܝ ܕܰܫܪܳܪܳܟ ܐܰܝܟ ܡܽܘܫܶܐ ܘܰܐܝܟ ܐܠܶܝܳܐ ܢܒܺܝܳܐ ܛܰܢܳܢܳܐ: ܐܰܪܬܺܝ ܘܟܰܘܶܢ ܠܣܰܓܺܝ̈ܶܐܐ ܘܰܐܦܢܺܝ ܐܶܢܽܘܢ ܠܗܰܝܡܳܢܽܘܬܳܐ ܕܒܳܟ ܐܰܟܪܶܙ ܘܛܰܟܶܣ ܠܟܽܠ ܩܰܘ̈ܡܳܢ ܘܡܽܘ̈ܫܚܳܢ ܘܰܐܘܕܰܥ ܐܶܢܽܘܢ ܐܽܘܪ̈ܚܳܬܳܟ ܐܰܝܟ ܕܳܢܺܝܶܐܝܠ: ܘܰܕܒܶܝܬ ܚܰܢܰܢܝܳܐ: ܨܳܡ ܗܘܳܐ ܘܶܐܬܢܙܰܪ ܡ̣ܶܢ ܡܶܐܟ̈ܠܳܬܳܐ ܐܰܝܟ ܡܳܪܝ ܒܰܪܨܰܘܡܳܐ ܚܒܰܫ ܗ̣ܽܘ ܠܶܗ ܒܓܽܘܒܳܐ ܚܶܫܽܘܟܳܐ ܐܰܝܟ ܐܶܪܰܡܝܳܐ ܒܓܽܘܒܳܐ ܕܰܣܝܳܢܳܐ: ܨܠܰܒ ܗ̣ܽܘ ܠܶܗ ܐܰܝܟ ܫܶܡܥܽܘܢ ܟܺܐܢܳܐ ܘܙܰܕܺܝܩܳܐ ܘܰܒܥܶܠܫܡܶܗ ܒܢܳܐ ܘܫܰܪܰܪ ܥܺܕ̈ܳܬܳܐ ܘܕܰܝܪ̈ܳܬܳܐ ܘܰܩܒܰܥ ܡܰܕܒ̈ܚܶܐ ܐܰܝܟ ܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܦܶܚܡܶܗ ܘܰܟܢܳܬܶܗ ܕܗ̇ܰܘ ܫܶܬܶܐܣܬܳܐ ܕܥܺܕܬܳܐ ܩܰܕܺܝܫܬܳܐ: ܫܗܰܪ ܘܰܙܡܰܪ ܒܠܰܝܠܰܘ̈ܳܬܳܐ: ܘܚܰܘܺܝ ܕܽܘܒܳܪ̈ܶܐ ܡܝܰܬܪ̈ܶܐ ܘܰܡܥܰܠܰܝ̈ܳܐ ܠܰܒ̈ܢܰܝ ܐܰܩܡܶܗ: ܕܰܝܪ̈ܳܝܶܐ ܒܢ̈ܰܝ ܥܽܘܡܪܶܗ ܩܰܕܺܝܫܳܐ: ܐܶܫܬܡܰܥ ܘܶܐܬܬܦܺܝܣ ܠܪ̈ܰܒܳܢܰܘܗܝ ܘܫܰܘܕܰܥ ܠܬܰܠܡܺܝ̈ܕܰܘܗܝ ܕܺܝܠܶܗ ܕܡܶܫܬܰܡܥܳܢܽܘܬܳܐ ܪܰܒܳܐ ܗ̱ܝ ܡ̣ܶܢ ܟܽܠ ܡܝܰܬܪ̈ܳܬܳܐ: ܢܚܶܬܘ ܡܰܠܐܟ̈ܶܐ ܠܥܶܢܝܳܢܶܗ: ܘܢܽܘܗܪܳܐ ܐܠܰܗܳܝܳܐ ܐܶܬܶܐܫܶܕ ܥܠܰܘܗܝ: ܝܺܕܰܥ ܟܰܣ̈ܝܳܬܳܐ ܐܰܝܟ ܢܒܺܝ̈ܶܐ ܩܰܕܺܝ̈ܫܶܐ: ܐܰܟܪܶܙ ܘܰܐܠܶܦ ܘܬܰܠܡܶܕ ܘܰܐܥܡܶܕ ܒܟܽܠ ܐܰܬܪ̈ܰܘܳܢ ܐܰܝܟ ܫܠܺܝ̈ܚܶܐ ܘܰܡܣܰܒܪ̈ܳܢܶܐ ܣܰܝܒܰܪ ܢܶܣܝܽܘ̈ܢܶܐ ܘܽܐܘܠܨܳܢ̈ܶܐ ܘܰܩܪ̈ܳܒܶܐ ܕܡ̣ܶܢ ܣܳܛܳܢܳܐ: ܐܰܝܟ ܣܳܗ̈ܕܶܐ ܡ̣ܶܢ ܡܰܠܟ̈ܶܐ ܛܪ̈ܽܘܢܶܐ: ܘܰܟܕܺܝܢ ܒܥܰܡ̈ܠܐ ܕܟܺܐܢ̈ܶܐ ܕܰܩܕܳܡܰܘܗܝ: ܘܰܙܟܳܐ ܘܰܥܠܰܒ ܒܕܽܘܒܳܪ̈ܶܘܗܝ ܠܗ̇ܳܢܽܘܢ ܕܰܒܝܰܘ̈ܡܳܬܶܗ: ܘܰܕܪܰܫ ܐܽܘܪܚܳܐ ܠܐܝܠܶܝܢ ܕܳܐܬܶܝܢ ܒܳܬܪܶܗ: ܕܢܶܪܕܽܘܢ ܒܥܶܩ̈ܒܳܬܶܗ ܘܰܢܕܰܡܽܘܢ ܒܰܥܒܺܝ̈ܕܳܬܶܗ ܒܰܕܓܽܘܢ ܚܢܰܢ ܕܳܘܰܝ̈ܳܐ ܘܡܶܬܓܰܘ̈ܣܰܝ ܒܰܨܠܰܘ̈ܳܬܶܗ: ܘܬܰܟܫ̈ܦܳܬܳܐ ܡܩܰܪܒܺܝܢܳܢ ܠܶܗ: ܕܢܶܣܥܽܘܪ ܠܰܢ ܒܣܳܥܽܘܪ̈ܘܳܬܶܗ: ܘܰܢܒܰܪܶܟ ܠܐܬܪܰܢ ܒܝܰܡܺܝܢܶܗ ܘܢܶܫܰܐܠ ܚܠܳܦܰܝܢ ܠܡܳܪܶܗ: ܕܰܢܚܰܣܶܐ ܠܰܢ ܘܰܠܥܰܢܺܝ̈ܕܰܝܢ ܒܰܡܪܰܚܡܳܢܽܘܬܶܗ ܘܢܰܣܶܩ ܟܽܠܰܢ ܫܽܘܒܚܳܐ ܒܕܽܘܟܪܳܢܶܗ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܚܕ ܩܢܘܡܐ ܣܗܕܝܐ ܚܫܚ ܠܡܪܝ ܩܘܙܡܐ ܘܡܪܝ ܕܘܡܝܐ ܘܡܪܝ ܪܘܡܐܢܘܣ ܘܫܪܟܐ ܕܣܗ̈ܕܐ ܕܐܬܩܛܠܘ ܒܣܗܕܘܬܐ

 

ܦܪܘܡܝܘܢ ܕܪܡܫܐ

 

 

 

ܫܽܘܒ̈ܚܶܐ ܠܐ ܡܰܘܦ̈ܝܳܢܶܐ: ܩܽܘܠܳܣ̈ܶܐ ܠܐ ܫܰܠܘܳܝ̈ܶܐ: ܘܺܐܝܩܳܪ̈ܶܐ ܠܐ ܡܶܫܬܰܪ̈ܝܳܢܶܐ ܢܶܫܬܘܶܐ ܕܰܢܩܰܪܶܒ ܠܗܰܘ ܕܰܒܚܰܝܠܶܗ ܠܐ ܡܶܬܚܰܒܠܳܢܳܐ: ܐܶܬܚܰܝܰܠ ܐܰܬܠܺܝܛܶܗ ܡܳܪܝ ܦܠܳܢ ܣܳܗܕܳܐ ܢܰܨܺܝܚܳܐ: ܘܳܐܦ ܒܚܶܟܡܬܶܗ ܐܺܝܬܝܳܝܬܳܐ: ܐܶܬܚܰܟܰܡ ܐܰܓܽܘܢܺܝܣܛܳܐ ܟܰܫܺܝܪܳܐ: ܘܒܰܫܪܳܪܶܗ ܠܐ ܡܶܙܕܰܟܝܳܢܳܐ ܐܶܬܢܗܰܪ ܦܰܠܳܚܳܐ ܕܺܝܠܶܗ ܙܰܟܳܝܳܐ ܟܰܕ ܠܡܰܠܟ̈ܶܐ ܐܰܟܶܣ ܒܰܓܢ̱ܒܰܪ̈ܘܳܬܶܗ ܘܰܠܕܰܝ̈ܳܢܶܐ ܚܰܝܶܒ ܒܚܶܟܡܬܶܗ ܘܰܠܡܰܠܟ̈ܶܐ ܐܰܒܗܶܬ ܒܚܽܘܡܣܳܢܶܗ ܘܰܐܦܨܰܚ ܠܰܫܡܰܝ̈ܳܢܶܐ ܘܠܐܪ̈ܥܳܢܳܝܶܐ ܒܙܳܟܽܘܬܶܗ: ܕܰܠܗܰܘ ܕܚܰܝܠܶܗ ܘܙܰܟܝܶܗ ܢܰܘܕܶܐ ܢܫܰܒܰܚ ܒܗܳܢܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܡܳܪܰܢ ܝܶܫܽܘܥ ܡܫܺܝܚܳܐ ܡܶܠܬܳܐ ܐܠܰܗܳܐ: ܗ̇ܰܘ ܕܺܐܝܬܰܘܗܝ ܦܳܪܽܘܩܳܐ ܘܫܽܘܘܙܳܒܳܐ ܘܚܰܝ̈ܶܐ ܘܰܩܝܳܡܬܳܐ: ܘܙܳܟܽܘܬܳܐ ܘܰܫܪܳܪܳܐ: ܘܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ ܘܟܽܠܳܗ̇ ܛܰܝܒܽܘܬܳܐ: ܗ̇ܰܘ ܕܒܰܨܠܺܝܒܳܟ ܙܰܟܳܝܳܐ ܡܰܟܶܟܬ ܠܰܩܪܳܒܳܐ ܘܩܰܪܢܳܐ ܕܚܰܢܦܽܘܬܳܐ ܒܰܟܪܺܝܗܽܘܬ ܒܶܣܪܳܟ ܫܰܦܶܠܬ ܠܚܰܝܠܶܗ ܕܢܳܟܽܘܠܐ: ܘܰܒܡܰܘܬܳܟ ܚܰܝܳܐ ܐܰܡܺܝܬܬ ܠܡܰܘܬܳܐ: ܠܐ ܡܶܕܶܡ ܥܒܰܕܬܳܝܗܝ ܩܕܳܡ ܐܰܬܠܺܝܛܳܐ ܕܺܝܠܳܟ ܫܰܪܺܝܪܳܐ: ܗܳܠܶܝܢ ܕܰܠܟܽܠ ܫܶܢܕܺܝ̈ܢ ܝܰܗܒܘ ܗܰܕܳܡܰܝ̈ܗܽܘܢ: ܡܶܛܽܠ ܚܽܘܒܳܟ ܪܰܒܳܐ ܕܰܠܘܳܬܰܢ: ܟܰܕ ܟܽܠ ܚܰܕ ܡܶܢܗܽܘܢ ܒܬܰܫܢܺܝ̈ܩܶܐ ܡܫܰܚ̈ܠܦܶܐ ܨܳܒܶܐ ܗܘܳܐ: ܕܢܶܬܒܰܩܶܐ ܐܰܝܟ ܕܰܗܒܳܐ ܒܟܽܘܪܳܐ: ܐܰܝܟܰܢܳܐ ܕܨܰܠܡܳܐ ܐܰܘܟܺܝܬ ܝܽܘܩܢܳܐ ܕܚܰܫܰܝ̈ܟ ܢܶܬܚܰܘܶܐ ܒܶܗ ܓܡܺܝܪܳܐܝ̣ܬ ܟܰܕ ܚܰܕ ܡ̣ܶܢ ܒܳܬܰܪ ܐܽܘܠܨܳܢ̈ܶܐ ܣܰܓܺܝ̈ܶܐܐ: ܒܢܽܘܪܳܐ ܡܫܰܠܗܰܒܬܳܐ ܐܶܬܓܡܰܪ: ܐ̱ܚܪܺܢܳܐ ܕܶܝܢ ܒܳܬܰܪ ܒܽܘܣ̈ܒܳܣܶܐ ܡܰܪܺܝܪ̈ܶܐ ܒܣܰܝܦܳܐ ܚܰܪܺܝܦܳܐ ܕܠܐ ܪ̈ܰܚܡܶܐ ܐܶܬܩܰܛܰܠ: ܚܰܕ ܡ̣ܶܢ ܒܳܬܰܪ ܐܰܓܽܘ̈ܢܶܐ ܥܰܙܺܝ̈ܙܶܐ ܒܰܪܓܽܘܡܝܳܐ ܕܟܺܐܦ̈ܶܐ ܫܰܠܶܡ ܚܰܝܰܘ̈ܗܝ: ܘܰܐ̱ܚܪܺܢܳܐ ܒܳܬܰܪ ܕܽܘܢܩ̈ܶܐ ܣܒܺܝ̈ܣܶܐ: ܒܡܶܣܪܳܐ ܕܩܰܝܣܳܐ ܫܰܩܠܳܗ̇ ܠܙܳܟܽܘܬܳܐ: ܚܰܕ ܕܶܝܢ ܒܳܬܰܪ ܗܰܠܟ̈ܳܬܶܗ ܕܥܰܠ ܟܳܣ̈ܶܐ: ܒܣܰܦܣܺܝܪ̈ܶܐ ܚܰܪ̈ܺܝܦܳܬܳܐ ܐܶܫܬܩܶܠ ܪܺܝܫܶܗ: ܘܰܐ̱ܚܪܺܢܳܐ ܒܳܬܰܪ ܘܳܝ̈ܶܐ ܘܥܳܝ̈ܶܐ ܥܪܰܩ ܕܰܐܣܪܰܚܘ ܠܶܗ: ܒܘܰܪ̈ܺܝܕܶܐ ܦܰܛܺܝܪ̈ܶܐ ܕܬܰܘܪ̈ܶܐ ܛܰܠܶܩܘ ܚܰܝܽܘܬܶܗ: ܚܰܕ ܕܶܝܢ ܒܳܬܰܪ ܙܢܰܝ̈ ܫܶܢ̈ܕܶܐ ܕܩܰܪܶܒܘ ܠܶܗ ܒܛܺܝܓܢܳܐ ܕܡܽܘܬ ܢܽܘܢܳܐ ܫܰܢܩܽܘܗܝ ܕܠܐ ܪ̈ܰܚܡܶܐ: ܘܰܐ̱ܚܪܺܢܳܐ ܒܳܬܰܪ ܚܰܝ̈ܘܳܬܳܐ ܕܰܣܒܰܟ̈ܝ ܒܶܗ ܪܰܚܫܳܐ ܩܳܛܽܘܠܐ ܡܶܪܬܶܗ ܫܕܳܐ ܒܓܽܘܫܡܶܗ: ܚܰܕ ܕܶܝܢ ܒܳܬܰܪ ܛܽܘܪ̈ܳܦܶܐ ܣܰܓܺܝ̈ܶܐܐ: ܒܩܶܕܣܳܐ ܟܰܕ ܪܳܬܰܚ ܐܰܪܡܺܝܘ ܡܰܪ̈ܳܚܶܐ: ܘܰܐ̱ܚܪܺܢܳܐ ܒܳܬܰܪ ܝܰܩܕܳܢܳܐ ܕܗܰܕܳܡ̈ܶܐ ܒܬܽܘܒܳܪܳܐ ܕܓܰܪ̈ܡܶܐ ܐܰܢܺܝܚܘ ܒܶܗ ܚܶܡܬܗܽܘܢ: ܚܰܕ ܒܳܬܰܪ ܟܘܳܝ̈ܶܐ ܙܺܝ̈ܥܶܐ ܒܩܽܘܟܰܠܝܽܘܢ ܕܦܰܪܙܠܐ ܥܨܰܪ ܡܰܬܢ̈ܳܬܶܗ: ܘܰܐ̱ܚܪܺܢܳܐ ܒܳܬܰܪ ܠܽܘܠܝ̈ܳܬܳܐ ܕܒܰܙܰܥ̈ܝ ܓܰܒܰܘ̈ܗܝ ܠܒܽܘ̈ܣܒܳܣܶܐ ܕܚܰܝ̈ܘܳܬܳܐ ܚܰܒܳ̈ܠܳܬܳܐ ܝܰܗܒܽܘܗ̇ ܠܰܫܠܰܕܶܗ: ܚܰܕ ܕܶܝܢ ܒܳܬܰܪ ܡܰܚ̈ܘܳܬܳܐ ܬܟܺܝ̈ܒܳܬܳܐ: ܒܬܰܢܽܘܪܳܐ ܕܰܢܚܳܫܳܐ ܫܰܢܺܝ ܠܘܳܬ ܡܳܪܶܗ ܘܰܐ̱ܚܪܺܢܳܐ ܒܳܬܰܪ ܢܶܓ̈ܕܶܐ ܘܰܣܪ̈ܳܩܶܐ ܒܰܙܩܺܝܦܳܐ ܬܠܐܱܘܽܘܗܝ ܒܺܝ̈ܫܶܐ ܐܰܝܟ ܡܳܪܶܗ: ܟܰܕ ܕܶܝܢ ܒܳܬܰܪ ܣܬܽܘܪܝܳܐ ܕܗܰܕܳܡܰܘ̈ܗܝ ܒܓܽܘܙܳܠܐ ܕܢܽܘܪܳܐ ܐܶܬܬܰܪܡܺܝ ܡ̣ܶܢ ܚܰܢ̈ܦܶܐ: ܘܰܐ̱ܚܪܺܢܳܐ ܒܳܬܰܪ ܥܰܪܝܳܐ ܘܩܽܘܪܳܐ ܘܰܓܠܺܝܕܳܐ ܕܰܐܣܒܠܽܘܗܝ ܠܦܳܪܰܚܬܳܐ ܕܰܫܡܰܝܳܐ ܝܰܗܒܽܘܗܝ ܠܦܰܓܪܶܗ: ܚܰܕ ܕܶܝܢ ܒܣܰܝܦܳܐ ܠܛܺܝܫܳܐ ܦܰܣܩܽܘܗܝ ܠܪܺܝܫܶܗ ܘܶܐܬܟܰܠܰܠ: ܘܰܐ̱ܚܪܺܢܳܐ ܒܳܬܰܪ ܨܽܘܠܦ̈ܳܬܶܗ ܘܒܽܘܣܒܳܣܳܐ ܕܗܰܕܳܡܰܘ̈ܗܝ ܟܰܕ ܐܰܣܺܝܪ ܘܰܦܟܺܝܪ ܒܝܰܡܳܐ ܛܰܒܥܽܘܗܝ ܥܰܘ̈ܳܠܐ: ܚܰܕ ܕܶܝܢ ܒܳܬܰܪ ܩ̈ܶܛܠܐ ܣܰܓܺܝ̈ܶܐܐ: ܒܚܶܦܪܳܐ ܕܰܡܠܐܷ ܒܽܘܣ̈ܒܳܣܶܐ ܫܕܰܐܘܽܘܗܝ ܛܳܠܽܘ̈ܡܶܐ: ܘܰܐ̱ܚܪܺܢܳܐ ܒܳܬܰܪ ܪܓܽܘܡܝܳܐ ܕܰܒܟܺܐܦ̈ܶܐ: ܠܰܚܡܳܐ ܕܶܝܢ ܒܳܬܰܪ ܫܶܢ̈ܕܶܐ ܣܒܺܝ̈ܣܶܐ ܘܥܰܙܺܝ̈ܙܶܐ: ܥܰܠ ܓܺܝܓܠܐ ܡܰܬܚܽܘܗܝ ܛܪ̈ܽܘܢܶܐ ܚܰܪ̈ܡܶܐ: ܘܰܐ̱ܚܪܺܢܳܐ ܒܳܬܰܪ ܬܰܠܝܳܐ ܕܥܰܠ ܩܰܝܣܳܐ ܥܰܡ ܪ̈ܰܟܫܳܐ ܐܰܣܪܽܘܗܝ ܘܰܐܘܦܺܝܘ ܗܰܕܳܡܰܘ̈ܗܝ ܦܰܐܝ̈ܳܐ: ܗܳܢܳܐ ܕܶܝܢ ܐܰܬܠܺܝܛܳܐ ܙܪܺܝܙܳܐ ܡܳܪܝ ܦܠܳܢ: ܒܟܽܠܗܽܘܢ ܗܳܠܶܝܢ ܫܶܢ̈ܕܺܝܢ ܡܰܪܺܝܪ̈ܶܐ: ܐܶܨܛܒܺܝ ܕܢܶܫܬܰܢܰܕ ܟܰܕ ܒܢܽܘܪܳܐ ܕܚܽܘܒܶܗ ܡ̣ܶܢ ܐܰܪ̈ܝܰܘܳܬܳܐ ܕܢܳܗܡܺܝܢ ܠܐ ܪܥܶܠ: ܡ̣ܶܢ ܒܰܥܪܺܝܪܽܘܬ ܪ̈ܰܟܫܳܐ ܠܐ ܟܘܰܙ: ܡ̣ܶܢ ܓܽܘܙܳܠܐ ܕܫܰܠܗܶܒܺܝܬܳܐ ܠܐ ܕܚܶܠ: ܡ̣ܶܢ ܕܚܺܝܠܽܘܬ ܫܶܢ̈ܕܶܐ ܠܐ ܙܳܥ: ܡ̣ܶܢ ܗܰܝܡܳܢܽܘܬܳܐ ܕܺܝܠܶܗ ܫܰܪܺܝܪܬܳܐ ܠܐ ܦܳܕ: ܡ̣ܶܢ ܚܕܳܢܳܝܽܘܬ ܬܰܘܕܺܝܬܶܗ ܬܪܺܝܨܬܳܐ ܠܐ ܦܳܫ ܡ̣ܶܢ ܙܽܘܡܳܪܶܗ ܘܬܶܫܒܽܘܚܬܳܐ ܠܐ ܫܬܶܩ ܡ̣ܶܢ ܚܰܕܽܘܬܶܗ ܕܰܒܬܰܫܢܺܝ̈ܩܶܐ ܠܐ ܗܦܰܟ ܠܛܽܘܓܳܢܳܐ ܐܰܝܟ ܠܰܗܓܳܐ ܚܰܫܒܶܗ: ܠܝܰܩܕܳܢܳܐ ܐܰܝܟ ܛܰܠܐ ܢܺܝܚܳܐ ܗܘܳܐ ܠܘܳܬܶܗ: ܠܟܺܐܒ̈ܶܐ ܕܡ̣ܶܢ ܣܪ̈ܳܩܶܐ ܐܰܝܟ ܡܶܫܚܳܐ ܗܘܰܘ ܠܶܗ: ܠܠܽܘܚܳܡܳܐ ܕܰܛܪ̈ܽܘܢܶܐ ܥܰܡ ܪ̈ܽܘܚܳܢܶܐ ܫܰܕܰܪ: ܠܡܰܚ̈ܘܳܬܳܐ ܘܚܰܫ̈ܶܐ ܐܰܝܟ ܡܰܘܗܰܒܬܳܐ ܚܫܰܒ: ܠܢܰܝ̈ܙܟܶܐ ܐܰܝܟ ܕܳܫܢ̈ܶܐ ܚܰܒܶܒ: ܠܣܰܟܺܝ̈ܢܶܐ ܐܰܝܟ ܕܶܒܫܳܐ ܚܰܠܝܳܐ ܦܰܚܶܡ: ܠܥܶܩܳܪ̈ܶܐ ܕܳܫ̈ܢܶܐ ܐܰܝܟ ܚܰܙܽܘܪ̈ܶܐ ܦܰܐܝ̈ܰܝ ܪܺܝܚܳܐ ܘܛܰܥܡܳܐ ܪܳܚܶܡ ܠܦܽܘܣܳܩܳܐ ܕܨܰܘܪܶܗ ܐܰܝܟ ܗܰܡܢܺܝܟܳܐ ܡܰܠܟܳܝܳܐ ܚܫܰܒ: ܠܨܰܥܪܳܐ ܐܰܝܟ ܩܽܘܠܳܣܳܐ ܩܰܒܶܠ: ܠܩܶܛܠܐ ܥܠܺܝܒܳܐ ܐܰܝܟ ܩܽܘܪܒܳܢܳܐ ܠܡܳܪܶܗ ܩܰܪܶܒ ܠܰܪܓܽܘܡܝܳܐ ܕܟܺܐܦ̈ܶܐ ܐܰܝܟ ܫܺܝܪܳܝܳܐ ܘܟܶܬܳܢܳܐ ܠܚܶܡ: ܠܰܫܡܳܛܳܐ ܕܠܶܫܳܢܳܐ ܐܰܝܟ ܓܽܘܥܠܳܢܳܐ ܪܰܒܳܐ ܣܳܡܶܗ: ܠܬܽܘܒܳܪܳܐ ܕܫܳܩ̈ܶܐ ܐܰܝܟ ܪܰܗܒܽܘܢܳܐ ܕܚܰܝ̈ܶܐ ܥܰܦܩܶܗ ܒܚܺܐܪܽܘܬܶܗ ܒܟܽܠܗܽܘܢ ܒܰܣܰܪ: ܒܝܰܕ ܗܰܝܡܳܢܽܘܬܶܗ ܥܰܠ ܟܽܠܗܽܘܢ ܐܰܩܠܺܝ: ܒܣܰܒܪܶܗ ܥܰܠ ܟܽܠܗܽܘܢ ܐܰܫܺܝܚ: ܒܚܽܘܒܶܗ ܥܰܠ ܟܽܠܗܽܘܢ ܐܰܡܣܰܪ: ܘܰܒܪܶܚܡܰܬ ܡܳܪܶܗ ܟܰܕ ܡܶܫܬܰܠܗܰܒ ܐܳܡܰܪ ܗܘܳܐ: ܐܰܝܡܶܟܳܐ ܠܺܝ ܗܳܕܶܐ: ܕܒܰܕܡܳܐ ܕܰܩܢܽܘܡܝ ܐܰܢܺܝܚ ܠܡܳܪܝ: ܐܰܝܡܶܟܳܐ ܠܺܝ ܗܳܕܶܐ ܕܰܒܡܰܘܬܝ ܒܚܰܝ̈ܶܐ ܚܰܕ̈ܬܶܐ ܐܺܚܶܐ ܥܰܡ ܡܳܪܝ: ܦܰܓܪܳܐ ܐ̱ܚܪܺܢܳܐ ܒܳܥܶܐ ܗܘܺܝܬ ܠܺܝ: ܕܶܐܫܰܠܶܡ ܒܶܗ ܢܝܳܚ ܓܽܘܫܡܳܐ ܐ̱ܚܪܺܢܳܐ ܨܳܒܶܐ ܗܘܺܝܬ ܕܢܶܗܘܶܐ ܠܺܝ ܕܶܐܓܡܽܘܪ ܟܽܠܶܗ ܨܶܒܝܳܢܝ ܡܳܪܝ ܘܰܐܠܳܗܝ ܝܶܫܽܘܥ ܡܫܺܝܚܳܐ ܩܰܒܶܠ ܒܛܰܝܒܽܘܬܳܟ ܪܽܘܚܝ: ܘܠܐ ܬܢܰܟܪܰܝܢܝ ܡ̣ܶܢ ܒܽܘܣܳܡܳܐ ܕܥܰܡ ܩܰܕܺܝ̈ܫܰܝܟ: ܐܳܘ ܐܰܬܠܺܝܛܳܐ ܢܰܨܺܝܚܳܐ: ܕܰܟܡܳܐ ܐܽܘܠܨ̈ܳܢܶܐ ܣܰܝܒܰܪ: ܘܨܶܒܝܳܢܶܗ ܠܐ ܐܶܫܬܰܡܠܺܝ: ܐܳܘ ܠܐܓܽܘܢܺܝܣܛܳܐ ܚܠܺܝܨܳܐ: ܕܰܒܟܽܠܗܽܘܢ ܬܰܫܢܺܝ̈ܩܶܐ ܥܒܰܪ: ܘܰܢܝܳܚܶܗ ܠܐ ܐܶܬܓܡܰܪ: ܘܡܶܛܽܠ ܗܳܕܶܐ ܚܢܰܢ ܡܗܰܝ̈ܡܢܶܐ ܟܠܺܝܠ ܛܽܘ̈ܒܶܐ ܢܶܓܕܽܘܠ ܠܐܬܠܺܝܛܽܘܬܶܗ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܣܳܗܕܳܐ ܛܽܘܒܳܢܳܐ ܡܳܪܝ ܦܠܳܢ ܢܰܨܺܝܚܳܐ: ܕܥܰܡ ܣܛܶܦܰܢܳܘܣ ܪܺܝܫܳܐ ܕܣܳܗ̈ܕܶܐ ܒܡܰܠܟܽܘܬ ܪܰܘܡܳܐ ܚܳܕܶܐ ܐܰܢ̱ܬ: ܠܳܟ ܛܽܘܒܰܝܟ ܣܳܗܕܳܐ ܛܽܘܒܳܢܳܐ ܢܰܨܺܝܚ ܫܽܘܦܪ̈ܶܐ ܡܳܪܝ ܦܠܳܢ ܫܒܺܝܚ ܒܕܽܘܒܳܪ̈ܶܐ ܛܳܒ̈ܶܐ: ܕܰܟܠܺܝܠ ܛܽܘ̈ܒܶܐ ܒܙܳܟܽܘܬܳܟ ܓܶܕܠܰܬ݀ ܠܳܟ ܪܽܘܚ ܩܽܘܕܫܳܐ: ܠܳܟ ܛܽܘܒܰܝܟ ܣܳܗܕܳܐ ܛܽܘܒܳܢܳܐ ܢܰܨܺܝܚ ܫܽܘܦܪ̈ܶܐ ܘܰܗܕܺܝܪ ܩܽܘܠܳܣ̈ܶܐ ܓܰܒܝܳܐ ܡܳܪܝ ܦܠܳܢ: ܕܥܰܡ ܡܰܠܐܟ̈ܶܐ ܡܕܰܝܰܪ ܐܰܢ̱ܬ ܒܓܰܢܰܬ ܚܰܕ̈ܘܳܬܳܐ: ܠܳܟ ܛܽܘܒܰܝܟ ܣܳܗܕܳܐ ܢܰܨܺܝܚ ܫܽܘܦܪ̈ܶܐ ܘܥܰܬܺܝܪ ܢܶܨ̈ܚܳܢܶܐ ܡܳܪܝ ܦܠܳܢ: ܕܒܰܣܦܰܪ ܚܰܝ̈ܶܐ ܪܫܺܝܡ ܕܽܘܟܪܳܢܳܟ ܒܽܐܘܪܫܠܶܡ ܕܒܰܫܡܰܝܳܐ: ܠܳܟ ܛܽܘܒܰܝܟ ܣܳܗܕܳܐ ܛܽܘܒܳܢܳܐ ܢܰܨܺܝܚ ܫܽܘܦܪ̈ܶܐ ܘܕܶܒܚܳܐ ܡܩܰܒܠܐ ܡܳܪܝ ܦܠܳܢ: ܕܡ̣ܶܢ ܣܺܝܡܰܬ݀ ܓܰܪ̈ܡܰܝܟ ܢܳܒܥܺܝܢ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ: ܘܒܰܕܓܽܘܢ ܒܳܥܶܝܢܰܢ ܡܶܢܳܟ ܡܫܺܝܚܳܐ ܡܚܰܝܠܳܢܳܐ ܕܥܰܒܕܰܘ̈ܗܝ ܘܰܡܟܰܠܠܳܢܳܐ ܕܰܪ̈ܚܽܘܡܰܘܗܝ ܕܒܰܨܠܰܘ̈ܳܬܗܽܘܢ ܩܰܕܺܝ̈ܫܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܫܰܝܢܳܐ ܘܰܫܠܳܡܳܐ ܘܰܐܘܝܽܘܬܳܐ ܬܫܰܟܶܢ ܠܰܢ ܒܛܰܝܒܽܘܬܳܟ ܟܰܕ ܠܡܰܠܟ̈ܘܳܬܳܐ ܡܫܰܝܶܢ ܐܰܢ̱ܬ: ܘܠܰܒܥܶܠܕ̈ܒܳܒܶܐ ܣܳܬܰܪ ܐܰܢ̱ܬ: ܘܠܰܟܪ̈ܺܝܗܶܐ ܣܳܥܰܪ ܐܰܢ̱ܬ: ܘܰܠܟܽܘܪ̈ܗܳܢܶܐ ܡܫܰܗܶܐ ܐܰܢ̱ܬ: ܟܰܕ ܠܚܰܛܳܝ̈ܶܐ ܡܚܰܣܶܐ ܐܰܢ̱ܬ: ܘܠܰܚܛܳܗ̈ܶܐ ܡܰܥܒܰܪ ܐܰܢ̱ܬ: ܟܰܕ ܠܟܰܦ̈ܢܶܐ ܡܣܰܒܰܥ ܐܰܢ̱ܬ: ܘܰܠܡܶܣ̈ܟܺܢܶܐ ܡܬܰܪܣܶܐ ܐܰܢ̱ܬ: ܟܰܕ ܠܰܡ̈ܥܳܩܶܐ ܡܠܰܒܶܒ ܐܰܢ̱ܬ: ܘܠܐܒܺܝ̈ܠܐ ܡܒܰܝܰܐ ܐܰܢ̱ܬ: ܟܰܕ ܠܰܡܗܰܝ̈ܡܢܶܐ ܡܢܰܛܰܪ ܐܰܢ̱ܬ: ܘܰܠܡܰܟܺܝ̈ܟܶܐ ܪܳܚܶܡ ܐܰܢ̱ܬ: ܟܰܕ ܠܕܰܝܪ̈ܳܝܶܐ ܡܣܰܝܰܥ ܐܰܢ̱ܬ: ܘܰܠܟܳܗ̈ܢܶܐ ܘܰܡܫܰܡ̈ܫܳܢܶܐ ܡܙܰܗܶܐ ܐܰܢ̱ܬ: ܘܠܐܒܳܗܰܝ̈ܢ ܘܠܐܚܰܝ̈ܢ ܘܰܠܪ̈ܰܒܳܢܰܝܢ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܡܢܺܝܚ ܐܰܢ̱ܬ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ ܕܠܠܝܐ

 

 

 

ܬܶܫܒܽܘܚܬܳܐ: ܠܗܰܘ ܓܰܢ̱ܒܳܪܳܐ ܪܳܡܳܐ ܘܚܰܝܠܬܳܢܳܐ ܒܰܩܪܳܒܳܐ: ܠܗܰܘ ܥܰܫܺܝܢܳܐ ܘܰܩܪܰܒܬܳܢܳܐ ܒܙܳܟܽܘܬܳܐ: ܕܚܰܝܶܠ ܠܣܳܗܕܳܐ ܕܺܝܠܶܗ ܒܰܐܓܽܘܢܳܐ ܕܚܰܫ̈ܶܐ ܘܝܰܗܒ ܠܶܗ ܡܚܰܡܣܢܳܢܽܘܬܳܐ ܥܰܠ ܫܶܢ̈ܕܶܐ ܡܰܪܺܝܪ̈ܶܐ ܕܰܛܪ̈ܽܘܢܶܐ: ܠܗܰܘ ܕܰܐܘܪܶܒ ܕܽܘܟܪܳܢܳܐ ܕܰܐܬܠܺܝܛܶܗ ܙܰܟܳܝܳܐ ܒܰܐܪܒܰܥ ܦܶܢ̈ܝܳܬܳܐ: ܘܢܰܨܰܚ ܘܪܰܡܪܶܡ ܥܰܕܥܺܐܕܶܗ ܒܰܫܡܰܝܳܐ ܘܒܰܐܪܥܳܐ ܘܦܰܠܶܓ ܣܺܝܡܰܬ݀ ܓܰܪ̈ܡܰܘܗܝ ܒܰܒܪܺܝܬܳܐ ܠܒܽܘܪ̈ܟܳܬܳܐ ܘܰܠܥܽܘܕܪ̈ܳܢܶܐ: ܠܰܡܗܰܝ̈ܡܢܶܐ ܕܰܒܗܽܘܢ ܡܶܬܓܰܘܣܺܝܢ ܒܗܰܝܡܳܢܽܘܬܳܐ ܕܰܫܪܳܪܳܐ: ܕܠܶܗ ܝܳܐܐ ܫܽܘܒܚܳܐ܀

 

 

 

ܣܕܪܐ

 

 

 

ܠܳܟ ܫܽܘܒܚܳܐ ܝܰܠܕܳܐ ܫܰܪܺܝܪܳܐ: ܕܰܨܡܰܚ ܡ̣ܶܢ ܥܽܘܒܳܐ ܓܢܺܝܙܳܐ ܕܰܐܒܳܐ: ܠܳܟ ܗܶܕܪܳܐ ܘܠܳܟ ܪܽܘܡܪܳܡܳܐ: ܕܶܒܚܳܐ ܕܶܐܬܕܒܰܚ ܒܪܰܘܡܳܗ̇ ܕܓܳܓܽܘܠܬܳܐ ܠܦܽܘܪܩܳܢ ܒܶܪ̈ܝܳܬܳܐ: ܠܳܟ ܬܰܘܕܺܝܬܳܐ ܣܳܗܕܳܐ ܩܰܕܡܳܝܳܐ ܕܰܐܣܗܶܕ ܒܰܙܩܺܝܦܳܐ: ܘܒܰܫܠܳܚ ܒܶܣܪܶܗ ܦܰܪܣܺܝ ܠܐܠܳܗ̈ܶܐ ܕܰܓ̈ܳܠܰܝ ܫܡܳܐ: ܐܰܢ̱ܬ ܗ̣ܽܘ ܓܶܝܪ ܚܰܒܪܳܐ ܘܝܽܘܩܢܳܐ ܘܬܰܦܢܟܳܐ ܕܰܐܝܠܶܝܢ ܕܒܳܟ ܡܡܰܪ̈ܝܳܢ ܘܚܳܙܩܺܝܢ ܟܽܠܗܽܘܢ ܐܰܝܠܶܝܢ ܕܰܠܘܰܥܕܳܐ ܕܰܫܟܺܝܢܬܳܟ ܡܶܬܡܰܢܥܺܝܢ: ܐܰܢ̱ܬ ܗ̣ܽܘ ܕܶܐܡܰܪܬ ܠܟܶܢ̈ܫܶܐ ܣܳܗ̈ܕܳܝܶܐ ܘܰܡܢܺܝ̈ܚܳܢܶܐ ܕܡܳܪܽܘܬܳܟ ܕܰܒܥܶܩ̈ܒܳܬܳܟ ܢܶܪܕܽܘܢ ܠܰܨܠܺܝܒܳܟ ܒܚܰܕܽܘܬܳܐ ܢܶܫܩܠܽܘܢ ܒܰܕܓܽܘܢ ܠܡܺܐܡܪܳܟ ܠܐ ܕܰܓܳܠܐ ܫܡܰܥ: ܗܳܢܳܐ ܣܳܗܕܳܐ ܚܠܺܝܨܳܐ ܘܚܰܝܠܬܳܢܳܐ ܢܰܚܫܺܝܪܬܳܢܳܐ ܡܳܪܝ ܦܠܳܢ: ܐܳܘ ܡܳܪܝܳܐ: ܗܳܢܳܐ ܕܝܰܘܡܳܢܳܐ ܥܽܘܗܕܳܢܶܗ ܡܫܰܡܠܶܝܢܰܢ ܘܰܒܠܶܫܳܢܰܝ̈ܢ ܘܰܒܣܶܦ̈ܘܳܬܰܢ ܠܶܗ ܡܢܰܨܪܺܝܢܰܢ: ܗܳܢܳܐ ܕܰܒܦܰܓܪܶܗ ܪܽܘܚܳܢܳܝܳܐ ܓܡܰܪ ܘܫܰܡܠܺܝ ܘܰܒܟܰܪܡܳܐ ܕܡܳܪܶܗ ܦܽܘܠܚܳܢܳܐ ܡܰܠܐܟܰܝܳܐ ܚܰܘܺܝ: ܗܳܢܳܐ ܕܰܒܚܰܡܪܶܗ ܪܶܚܡܬܳܢܳܝܳܐ: ܗ̣ܽܘ ܕܫܽܘܘܕܳܝܶܗ ܠܥܶܠ ܪܘܳܐ ܘܰܦܣܰܥ ܥܰܠ ܫܶܢ̈ܕܶܐ ܛܪ̈ܽܘܢܳܝܶܐ: ܗܳܢܳܐ ܕܒܰܫܘܳܪ̈ܳܬܳܐ ܚܺܝ̈ܨܳܬܳܐ ܫܚܰܩ ܘܪܰܨܶܨ ܠܪܺܝܫܶܗ ܕܬܰܢܺܝܢܳܐ ܡܶܬܝܰܕܥܳܢܳܐ ܗܳܢܳܐ ܕܰܐܩܶܦ ܠܥܳܠܡܳܐ ܡܶܬܪܰܓܫܳܢܳܐ ܗܳܢܳܐ ܕܰܙܩܰܦ ܠܥܳܠܡܳܐ ܠܡܰܙܥܳܩܽܘ: ܘܗܳܢܳܐ ܕܰܣܢܳܐ ܐܰܚ̈ܶܐ ܘܓܶܢܣܳܐ ܘܛܽܘܗܡܳܐ ܘܰܠܚܰܕ ܐܠܰܗܳܐ ܩܢܳܐ ܒܰܠܚܽܘܕ: ܗܳܢܳܐ ܕܚܰܠܶܦ ܠܐܠܳܗ̈ܶܐ ܕܰܓܳܠܰܝ̈ ܫܡܳܐ ܒܡܰܠܟܽܘܬܳܐ ܗ̇ܳܝ ܥܳܠܡܺܝܢܳܝܬܳܐ ܕܠܐ ܡܶܫܬܰܪܝܳܐ: ܗܳܢܳܐ ܕܰܠܥܶܠ ܡ̣ܶܢ ܥܶܩܳܪ̈ܶܐ ܕܒܺܝ̈ܫܳܬܳܐ ܣܺܝ̈ܡܳܢ ܗܰܠܟ̈ܳܬܶܗ: ܗܳܢܳܐ ܕܰܠܥܶܠ ܡ̣ܶܢ ܕܽܘܒܳܨ̈ܶܐ ܟܽܘܒܳܢܳܝ̈ܶܐ ܕܳܫ: ܘܥܰܠ ܬܰܓܪ̈ܽܘܡܳܝܳܬܳܐ ܕܫܰܠܺܝ̈ܛܳܢܶܐ ܒܳܐܐܰܪ ܡܗܰܠܶܟ ܗܳܢܳܐ ܕܰܙܠܰܚ ܕܡܶܗ ܒܰܐܪܥܳܐ ܘܰܪܫܺܝܡ ܫܡܶܗ ܒܰܫܡܰܝܳܐ: ܘܚܰܝܠܰܘ̈ܗܝ ܢܳܨܚܺܝܢ ܒܣܰܘ̈ܦܶܐ ܬܺܒܶܝܠܳܝ̈ܶܐ: ܗܳܢܳܐ ܕܩܶܛܠܶܗ ܚܰܝ̈ܶܐ ܗ̣ܽܘ: ܘܡܰܘܬܳܐ ܣܰܒܪܰܐ ܗ̱ܘ ܡܶܛܽܠ ܗܳܠܶܝܢ ܘܕܰܐܝܟ ܗܳܠܶܝܢ: ܦܬܰܚ ܡܳܪܝܳܐ ܠܦܽܘ̈ܡܰܝܢ ܠܰܡܡܰܠܳܠܽܘ ܬܶܫܒ̈ܚܳܬܳܟ ܘܣܶܦ̈ܘܳܬܰܢ ܠܰܡܢܰܨܳܪܽܘ ܠܓܰܒܪܳܐ ܕܬܶܗܪܳܐ ܟܰܕ ܐܳܡܪܺܝܢܰܢ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܛܽܘܒܳܢܳܐ ܡܳܪܝ ܦܠܳܢ ܕܡܰܪܺܝܬ ܘܩܶܛܠܶܗ ܕܡܳܪܳܟ ܒܩܶܛܠܳܟ: ܘܰܡܙܰܓܬ ܠܰܕܡܳܟ ܒܰܕܡܶܗ ܘܩܰܘܺܝܬ ܒܶܗ ܘܗ̣ܽܘ ܒܳܟ: ܐܰܝܟ ܕܰܐܟܪܙܰܬ݀ ܒܰܪܬ ܩܳܠܶܗ ܚܰܝܬܳܐ ܘܰܡܠܺܝܠܬܳܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܛܽܘܒܳܢܳܐ ܡܳܪܝ ܦܠܳܢ: ܕܥܳܛܰܪ ܪܺܝܚ ܚܰܠܝܽܘܬܳܟ ܒܟܽܠ ܣܰܘ̈ܦܺܝܢ: ܝܰܬܺܝܪ ܡ̣ܶܢ ܢܰܪܕܺܝܢ ܒܰܣܺܝܡܳܐ ܘܡܽܘܪܽܘܢ ܡܰܦܩܳܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܚܠܺܝܨܳܐ ܡܳܪܝ ܦܠܳܢ: ܕܟܽܠ ܠܶܫܳܢܺܝ̈ܢ ܠܳܥܙܺܝܢ ܫܽܘܒܚܳܐ ܠܡܳܪܳܟ ܒܝܽܘܡ ܕܽܘܟܪܳܢܳܟ ܐܠܰܗܳܝܳܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܥܛܝܦ ܙܳܟܽܘܬܳܐ ܡܳܪܝ ܦܠܳܢ: ܕܰܒܝܰܘܡܳܐ ܕܓܶܠܝܳܢܶܗ ܕܥܰܡܰܢܽܘܐܶܝܠ ܡܥܰܦܶܦ ܠܟܰܟܪܳܟ ܒܰܐܬܪܳܐ ܕܦܽܘܪ̈ܥܳܢܶܐ ܪܰܘܪ̈ܒܶܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܩܰܕܺܝܫܳܐ ܡܳܪܝ ܦܠܳܢ: ܕܰܗܘܰܝܬ ܒܶܝܬ ܡܰܫܪܝܳܐ ܠܪܽܘܚܳܐ ܩܰܕܺܝܫܳܐ: ܘܰܫܪܳܐ ܒܳܟ ܘܶܐܬܬܢܺܝܚ ܒܳܟ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܩܰܕܺܝܫܳܐ ܡܳܪܝ ܦܠܳܢ: ܕܣܰܝܒܰܪ ܦܰܓܪܳܟ ܫܶܢ̈ܕܶܐ ܡܰܪܺܝܪ̈ܶܐ: ܘܗܳܐ ܝܰܘܡܳܢ ܝܳܗܶܒ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܚܠܺܝܨܳܐ ܡܳܪܝ ܦܠܳܢ: ܕܟܽܠ ܥܰܡܡܺܝ̈ܢ ܛܳܦܣܺܝܢ ܒܓܰܪ̈ܡܰܝܟ ܕܢܶܣܒܽܘܢ ܡܶܢܗܽܘܢ ܥܽܘܕܪ̈ܳܢܶܐ ܠܟܺܐܒܰܝ̈ܗܽܘܢ ܟܣܰܝ̈ܳܐ ܘܰܓܠܰܝ̈ܳܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܥܛܺܝܦ ܙܳܟܽܘܬܳܐ ܡܳܪܝ ܦܠܳܢ: ܕܰܐܟܶܣܬ ܠܡܰܠܟ̈ܶܐ ܚܰܢ̈ܦܶܐ ܘܥܰܢ̈ܳܬܶܐ: ܘܩܳܡܬ ܒܶܝܬ ܕܰܪܳܐ ܘܰܙܟܰܝܬ ܠܨܶܢ̈ܥܳܬܶܗ ܕܳܐܟܶܠܪܰܨܐ: ܠܳܟ ܛܽܘܒܰܝܟ ܐܳܘ ܣܳܗܕܳܐ ܩܰܕܺܝܫܳܐ ܡܳܪܝ ܦܠܳܢ: ܕܰܓܢܽܘܢܳܟ ܡܨܰܒܰܬ ܘܰܗܕܺܝܪ ܒܛܰܒ̈ܥܶܐ ܘܰܙܡܰܪ̈ܓܕܶܐ ܫܰܦܺܝܪ̈ܶܐ ܕܰܒܡܶܫܬܽܘܬܶܗ ܕܚܰܬܢܳܐ ܫܡܰܝܳܢܳܐ ܬܶܬܒܰܣܰܡ ܠܥܳܠܡܺܝܢ: ܘܒܰܕܓܽܘܢ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܰܡܫܺܝܚܳܐ ܡܳܪܳܟ ܘܰܡܟܰܠܠܳܢܳܟ ܘܰܡܢܰܨܚܳܢܳܟ ܒܰܐܓܽܘܢܳܐ: ܕܠܰܫܓܽܘ̈ܫܝܶܐ ܡܕܺܝ̈ܢܳܝܶܐ ܢܪܰܝܰܚ: ܘܰܢܪܺܝܡ ܠܡܰܨ̈ܘܳܬܳܐ ܗܶܪ̈ܶܛܺܝܩܳܝܳܬܳܐ ܘܠܰܩܪ̈ܳܒܶܐ ܬܺܒܶܝ̈ܠܳܝܶܐ ܢܒܰܛܶܠ: ܠܡܰܠܟ̈ܶܐ ܘܪ̈ܺܝܫܳܢܶܐ ܢܫܰܝܶܢ: ܠܪ̈ܳܥܰܘܳܬܳܐ ܘܠܰܡܕܰܒܪ̈ܳܢܶܐ ܢܨܰܒܬ: ܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܢܙܰܗܶܐ: ܠܰܒܬܽܘ̈ܠܐ ܘܠܰܡܙܰܘ̈ܓܶܐ ܢܰܟܶܦ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܢܶܥܒܶܕ ܕܽܘܟܪܳܢܳܐ ܛܳܒܳܐ ܘܥܽܘܗܕܳܢܳܐ ܕܚܰܣܝܽܘܬܳܐ ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܘܢܶܬܶܠ ܬܰܘܕܺܝܬܳܐ ܠܰܡܫܺܝܚܳܐ ܡܰܘܪܒܳܢܳܟ ܘܰܡܢܰܨܚܳܢܳܟ ܒܰܐܓܽܘܢܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܕܰܠܕܽܘܟܪܳܢܶܗ ܕܢܰܨܺܝܚܳܐ ܡܳܪܝ ܦܠܳܢ ܙܰܡܶܢ ܠܰܢ: ܘܰܠܥܰܕܥܺܐܕܳܐ ܕܰܐܬܠܺܝܛܳܐ ܓܰܒܝܳܐ ܟܰܢܶܫ ܠܰܢ: ܘܰܒܩܽܘ̈ܠܳܣܶܐ ܕܰܥܛܺܝܦ ܙܳܟܽܘܬܳܐ ܒܰܣܶܡ ܠܰܢ: ܗܳܢܳܐ ܕܪܳܡ ܫܰܪܒܳܐ ܕܢܶܨ̈ܚܳܢܰܘܗܝ ܡ̣ܶܢ ܡܶܠܬܰܢ ܘܪܳܡ ܕܰܪܓܳܐ ܕܰܐܬܠܺܝܛܽܘܬܶܗ ܡ̣ܶܢ ܡܫܽܘܚܬܰܢ: ܗܳܢܳܐ ܕܰܒܚܽܘܒܶܐ ܕܡܳܪܶܗ ܐܰܫܠܶܡ ܦܰܓܪܶܗ ܠܫܶܢ̈ܕܶܐ: ܝܰܗܒ ܓܽܘܫܡܶܗ ܠܢܶܓ̈ܕܶܐ: ܘܒܰܣܰܪ ܥܰܠ ܐܽܘܠܨܳܢ̈ܶܐ: ܘܫܳܛ ܠܡܰܘܬܳܐ ܠܙܺܝܙܳܐ: ܘܰܗܘܳܐ ܝܽܘܩܢܳܐ ܢܰܗܺܝܪܳܐ ܘܬܰܦܢܟܳܐ ܫܰܪܺܝܪܳܐ: ܕܽܘܡܝܳܐ ܚܰܬܺܝܬܳܐ: ܕܰܡܫܺܝܚܳܐ ܡܰܠܟܳܐ ܡܳܪܶܗ ܕܗ̣ܽܘ ܩܪܳܝܗܝ ܠܡܶܫܬܽܘܬܶܗ: ܘܙܰܡܢܶܗ ܠܰܚܠܽܘܠܶܗ: ܘܥܰܒܕܶܗ ܝܳܪܬܳܐ ܒܡܰܠܟܽܘܬܶܗ: ܕܠܶܗ ܘܰܚܢܰܢ ܢܫܰܒܰܚ ܠܰܫܡܶܗ ܦܰܐܝܳܐܝ̣ܬ: ܘܰܢܝܰܩܰܪ ܠܥܽܘܗܕܳܢܳܐ ܕܩܰܕܺܝ̈ܫܶܐ ܚܰܣܝܳܐܝ̣ܬ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܳܪܝܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܠܩܰܕܺܝ̈ܫܰܝܟ ܡܝܰܩܰܪ ܐܰܢ̱ܬ ܘܰܡܢܰܨܰܚ: ܘܰܠܥܽܘܗܕܳܢܳܐ ܕܰܡܢܺܝ̈ܚܳܢܰܝܟ ܡܪܰܡܪܶܡ ܐܰܢ̱ܬ ܘܰܡܫܰܒܰܚ: ܘܰܠܕܽܘܟܪܳܢܳܐ ܕܣܳܗ̈ܕܰܝܟ ܡܰܘܪܶܒ ܐܰܢ̱ܬ ܘܰܡܗܰܕܰܪ: ܘܰܠܚܰܓܳܐ ܗܳܢܳܐ ܕܰܐܬܠܺܝܛܳܐ ܒܢܰܨܺܝ̈ܚܶܐ: ܘܚܰܝܠܬܳܢܳܐ ܘܰܠܒܺܝܒܳܐ ܒܰܐܓܽܘܢܺܝ̈ܣܛܶܐ: ܣܳܗܕܳܐ ܕܺܝܠܳܟ ܡܳܪܝ ܦܠܳܢ: ܝܰܘܡܳܢܳܐ ܡܰܢܰܥܬ ܠܰܢ: ܐܰܝܟܰܢܳܐ ܕܰܒܥܰܕܥܺܐܕܶܗ ܫܒܺܝܚܳܐ ܒܚܰܕܽܘܬܳܐ ܪܽܘܚܳܢܳܝܬܳܐ ܢܶܬܒܰܣܰܡ: ܘܠܳܟ ܡܳܪܝܳܐ ܡܚܰܝܠܳܢܶܗ ܒܰܐܓܽܘܢܳܐ ܕܣܳܗܕܽܘܬܳܐ ܢܫܰܒܰܚ: ܘܒܰܨܠܰܘ̈ܳܬܶܗ ܚܢܰܢ ܚܰܛܳܝ̈ܶܐ ܢܶܫܬܰܘܬܰܦ: ܘܪ̈ܰܚܡܶܐ ܘܰܚܢܳܢܳܐ ܡ̣ܶܢ ܠܘܳܬܳܟ ܢܶܫܰܐܠ: ܘܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܡ̣ܶܢ ܒܶܝܬܓܰܙܳܟ ܢܶܣܰܒ: ܗܳܢܳܐ ܕܦܰܓܪܶܗ ܠܚܰܫ̈ܶܐ ܐܰܫܠܶܡ ܘܢܰܦܫܶܗ ܕܠܐ ܡܽܘܡ ܠܳܟ ܢܛܰܪ: ܘܗܰܝܡܳܢܽܘܬܳܐ ܕܠܐ ܙܺܐܦܳܐ ܠܳܟ ܫܒܰܩ: ܘܰܠܡܰܘܗ̈ܒܳܬܳܐ ܕܡܰܠܟ̈ܶܐ ܫܳܛ: ܠܐܝܩܳܪܳܐ ܕܪ̈ܺܝܫܳܢܶܐ ܕܳܫ: ܠܫܽܘܒܚܳܐ ܕܫܰܠܺܝ̈ܛܳܢܶܐ ܐܰܣܠܺܝ: ܒܕܰܪ̈ܓܶܐ ܥܳܠܡܳܢܳܝ̈ܶܐ ܐܰܒܣܺܝ ܠܥܽܘܬܪܶܗ ܕܥܳܠܡܳܐ ܗܳܢܳܐ ܒܰܣܰܪ: ܠܛܽܘ̈ܒܶܐ ܙܰܒܢܳܝ̈ܶܐ ܣܢܳܐ: ܘܰܠܛܽܘܒܬܳܢܽܘܬܳܐ ܕܰܠܥܳܠܡܺܝܢ ܐܰܚܶܒ: ܠܰܡܫܺܝܚܳܐ ܐܶܬܢܰܩܰܦ ܘܠܶܗ ܪܚܶܡ ܘܡܶܕܶܡ ܛܳܒ ܡ̣ܶܢ ܫܪܳܪܶܗ ܕܡܳܪܝܳܐ ܠܐ ܝܰܩܰܪ: ܘܠܐܘܠܨܳܢ̈ܶܐ ܐܶܬܩܰܪܰܒ ܘܠܐ ܕܚܶܠ: ܠܒܶܝܬ ܕܰܝ̈ܳܢܶܐ ܥܰܘ̈ܳܠܐ ܕܰܛܪ̈ܽܘܢܶܐ ܥܰܠ ܟܰܕ ܚܳܕܶܐ: ܠܰܣܪ̈ܳܩܶܐ ܘܢܶܓ̈ܕܶܐ ܩܰܒܶܠ: ܒܫܶܢ̈ܕܶܐ ܘܬܰܫܢܺܝ̈ܩܶܐ ܠܐ ܐܰܪܓܶܫ: ܒܰܪܓܽܘܡܝܳܐ ܕܟܺܐܦ̈ܶܐ ܠܐ ܪܰܛܶܢ: ܥܰܠ ܣܶܟ̈ܶܐ ܕܦܰܪܙܠܐ ܐܰܝܟ ܕܥܰܠ ܐܳܡܶ̈ܠܐ ܡܰܠܟܳܝ̈ܳܬܳܐ ܗܰܠܶܟ ܘܟܰܕ ܕܳܝܶܨ: ܥܰܠ ܓܺܝ̈ܓܠܐ ܕܚܺܝ̈ܠܳܬܳܐ ܐܶܬܡܬܰܚ ܟܰܕ ܪܳܘܶܙ: ܫܪܳܪܳܐ ܐܰܟܪܶܙ ܟܰܕ ܩܳܥܶܐ: ܕܠܺܝ ܠܐ ܢܶܗܘܶܐ ܠܺܝ ܕܶܐܫܬܰܒܗܰܪ: ܐܶܠܐ ܐܶܢ ܒܰܙܩܺܝܦܶܗ ܕܰܡܫܺܝܚܳܐ: ܕܒܶܗ ܥܳܠܡܳܐ ܨܠܺܝܒ ܠܺܝ: ܘܶܐܢܳܐ ܨܠܺܝܒ ܐ̱ܢܳܐ ܠܥܳܠܡܳܐ: ܠܐ ܒܰܓܶܢ ܟܰܕ ܒܳܠܰܥ ܡܰܪܺܝܪܳܐܝ̣ܬ: ܠܐ ܐܰܝܠܶܠ ܟܰܕ ܡܶܣܬܰܪܰܩ ܛܪܽܘܢܳܐܝ̣ܬ: ܠܐ ܐܶܬܪܗܶܒ ܟܰܕ ܡܶܬܥܰܫܰܩ ܥܰܘܳܠܐܝ̣ܬ: ܡܰܠܟ̈ܶܐ ܬܗܰܪܘ ܒܚܽܘܡܣܳܢܶܗ: ܕܰܝ̈ܳܢܶܐ ܐܶܬܕܰܡܰܪܘ ܒܰܠܒܺܝܒܽܘܬܶܗ: ܚܰܢ̈ܦܶܐ ܐܶܬܪܗܶܒܘ ܒܓܰܢ̱ܒܳܪܽܘܬ: ܟܶܢ̈ܫܶܐ ܚܒܰܨܘ ܠܰܚܕ̈ܳܕܶܐ ܟܰܕ ܡܶܬܒܰܠܗܺܝܢ ܒܰܐܬܠܺܝܛܽܘܬܶܗ ܥܰܡ̈ܡܶܐ ܨܳܒܘ ܘܶܐܬܰܘ ܠܰܚܙܳܬܶܗ: ܘܰܐܝܟ ܡܰܠܐܟܳܐ ܕܢܽܘܗܪܳܐ ܚܙܰܘ ܦܰܪܨܽܘܦܶܗ: ܬܠܐܴ ܚܝܳܪܶܗ ܠܰܫܡܰܝܳܐ ܘܰܚܙܳܐ ܠܝܶܫܽܘܥ ܡܳܪܶܗ ܒܫܽܘܒܚܳܐ ܪܰܒܳܐ ܕܠܐ ܣܳܟܳܐ: ܩܥܳܐ ܐܰܟܘܳܬܶܗ ܕܠܐ ܡܳܪܝ ܬܶܚܫܽܘܒ ܠܗܽܘܢ ܚܛܺܝܬܳܐ ܗܳܕܶܐ ܠܪ̈ܳܕܽܘܦܰܝ: ܘܠܐ ܬܩܺܝܡ ܠܗܽܘܢ ܥܰܘܠܐ ܠܩܳܛܽܘ̈ܠܰܝ: ܠܐ ܬܶܬܒܰܥ ܕܺܝܢܳܐ ܡ̣ܶܢ ܡܒܰܙ̈ܚܳܢܰܝ: ܪܰܒܳܐ ܗ̱ܝ ܗܳܕܶܐ ܕܶܐܗܘܶܐ ܡܕܰܡܝܳܢܳܐ ܕܚܰܫܰܝ̈ܟ ܐܠܰܗܳܝ̈ܶܐ: ܙܥܽܘܪ ܐ̱ܢܳܐ ܕܶܐܬܕܰܡܶܐ ܒܡܰܘܬܳܟ ܦܳܪܽܘܩܝ: ܠܐ ܣܳܦܶܩ ܐ̱ܢܳܐ ܠܗܳܕܶܐ ܕܨܶܒܝܳܢܳܐܝ̣ܬ ܐܶܬܢܟܶܣ ܐܰܟܘܳܬܳܟ: ܟܡܳܐ ܪܰܒܳܐ ܗ̱ܝ ܠܺܝ ܠܥܰܒܕܳܐ ܕܢܶܚܰܫ ܗܳܠܶܝܢ ܕܡܳܪܶܗ: ܗܰܢܺܝ̈ܐܻܝܢ ܠܺܝ ܚܰܫ̈ܶܐ ܕܡܶܛܽܠܳܬܳܟ: ܒܰܣܺܝܡ ܠܺܝ ܡܰܘܬܳܐ ܚܠܳܦܰܝܢ: ܚܠܐܷ ܠܺܝ ܫܽܘܢܳܩܳܐ ܕܰܚܠܳܦ ܗܰܝܡܳܢܽܘܬܳܐ ܕܒܳܟ: ܐܳܘ ܠܣܳܗܕܳܐ ܚܠܺܝܨܳܐ ܕܥܰܠ ܟܽܠ ܚܰܫܺܝ̈ܢ ܥܰܙܺܝ: ܐܳܘ ܠܥܰܒܕܳܐ ܛܳܒܳܐ ܕܰܒܟܽܠܗܶܝܢ ܕܡܳܪܶܗ ܐܶܬܕܰܡܺܝ: ܘܥܰܠܗܳܝ ܚܢܰܢ ܡܚܺܝ̈ܠܐ ܘܚܰܛܳܝ̈ܶܐ: ܘܰܠܕܽܘܟܪܳܢܶܗ ܒܬܶܫܒ̈ܚܳܬܳܐ ܘܩܽܘܠܳܣ̈ܶܐ ܡܝܰܩܪܺܝܢܰܢ: ܠܘܳܬܶܗ ܡܰܙܥܩܺܝܢܰܢ ܘܳܐܡܪܺܝܢܰܢ: ܠܳܟ ܛܽܘܒܰܝܟ ܣܳܗܕܳܐ ܢܰܨܺܝܚܳܐ ܡܳܪܝ ܦܠܳܢ: ܕܫܰܡܠܺܝܬܳܝܗܝ ܐܰܓܽܘܢܳܟ ܒܕܰܟܝܽܘܬܳܐ ܘܩܰܕܺܝܫܽܘܬܳܐ: ܠܳܟ ܛܽܘܒܰܝܟ ܣܳܗܕܳܐ ܢܰܨܺܝܚܳܐ ܡܳܪܝ ܦܠܳܢ: ܕܒܰܐܥ̈ܦܶܐ ܣܰܓܺܝ̈ܶܐܐ ܦܢܳܬ݀ ܬܶܐܓܽܘܪܬܳܟ: ܘܰܐܝܟ ܬܰܐܓܳܪܳܐ ܟܰܫܺܝܪܳܐ ܥܰܠܬ ܠܰܠܡܺܐܢܳܐ ܕܚܰܕ̈ܘܳܬܳܐ: ܛܽܘܒܰܝܟ ܣܳܗܕܳܐ ܢܰܨܺܝܚܳܐ ܡܳܪܝ ܦܠܳܢ: ܕܰܐܝܟ ܦܺܝܪܡܳܐ ܗܰܢܺܝܳܐܐ ܕܰܡܠܐܷ ܗܶܪ̈ܽܘܡܶܐ ܦܳܐܰܚ ܪܺܝܚܳܐ ܕܫܶܢܕܰܝ̈ܟ ܘܕܰܣܪ̈ܳܩܰܝܟ ܒܰܐܪ̈ܒܰܥܦܶܢܝܳܢ ܕܰܒܪܺܝܬܳܐ: ܛܽܘܒܰܝܟ ܒܰܪ ܬܶܓܡܳܐ ܕܰܢܒܺܝ̈ܶܐ: ܛܽܘܒܰܝܟ ܒܰܪ ܥܶܢܝܳܢܳܐ ܕܰܫܠܺܝ̈ܚܶܐ: ܛܽܘܒܰܝܟ ܚܰܒܪܳܐ ܘܰܐܚܝܳܢܳܐ ܕܣܳܗ̈ܕܶܐ: ܡܶܛܽܠܗܳܕܶܐ ܛܽܘܒܳܐ ܝܳܗܒܺܝܢܰܢ ܠܳܟ ܘܰܫܠܳܡܳܐ ܠܐܬܠܺܝܛܽܘܬܳܟ ܢܩܰܪܶܒ: ܫܠܳܡܠܳܟ ܫܳܘܶܐ ܠܰܫܠܳܡܳܐ: ܕܡܳܪܶܗ ܕܰܫܠܳܡܳܐ ܥܰܒܕܳܟ ܒܶܝܬ ܓܰܘܣܳܐ ܕܰܫܠܳܡܳܐ: ܫܠܳܡܠܳܟ ܕܦܰܪܕܰܝܣܳܐ ܥܕܶܢܳܝܳܐ ܩܰܒܠܳܟ ܒܰܫܠܳܡܳܐ: ܫܠܳܡܠܳܟ ܕܰܓܢܽܘܢ ܢܽܘܗܪܳܐ ܚܳܐܰܪ ܒܳܟ ܒܛܽܘ̈ܒܰܘܗܝ: ܫܠܳܡܠܳܟ ܡ̣ܶܢ ܥܺܝܪ̈ܶܐ ܒܪܰܘܡܳܐ: ܫܠܳܡܠܳܟ ܡ̣ܶܢ ܐ̱ܢܳܫ̈ܳܐ ܒܥܽܘܡܩܳܐ: ܫܠܳܡܠܳܟ ܡ̣ܶܢ ܟܶܢ̈ܫܶܐ ܕܶܐܬܛܰܝܰܒܘ ܠܰܫܠܳܡܳܟ: ܫܠܳܡܠܳܟ ܡ̣ܶܢ ܡܚܰܓ̈ܝܳܢܶܐ ܕܕܳܝܨܺܝܢ ܒܕܽܘܟܪܳܢܳܟ: ܫܠܳܡܠܳܟ ܡ̣ܶܢ ܡܳܪܳܟ ܕܡܳܪܶܗ ܗ̣ܽܘ ܕܰܫܠܳܡܳܐ: ܕܰܫܠܳܡܳܐ ܕܺܝܠܰܢ ܚܰܛܳܝ̈ܶܐ ܠܐ ܣܳܦܶܩ ܠܳܟ: ܫܰܐܠ ܠܰܢ ܗܳܟܺܝܠ ܡ̣ܶܢ ܡܳܪܳܟ ܪܳܡܳܐ ܒܰܨܠܰܘ̈ܳܬܳܟ ܪ̈ܰܚܡܶܐ ܘܥܽܘܕܪܳܢܳܐ ܠܢܰܦ̈ܫܳܬܰܢ ܘܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗܰܝ̈ܢ: ܘܰܕܢܰܥܒܰܪ ܡܶܢܰܢ ܡܳܪܝܳܐ ܫܰܒ̈ܛܶܐ ܕܪܽܘܓܙܳܐ: ܕܡܶܛܽܠ ܒܺܝ̈ܫܳܬܰܢ ܡܶܬܬܰܝܬܺܝܢ ܥܠܰܝܢ: ܩܽܘܡ ܘܰܐܦܺܝܣ ܠܟܺܐܢܽܘܬܳܐ ܕܬܶܬܚܰܫܰܚ ܥܰܡܰܢ ܒܰܡܪܰܚܢܽܘܬܳܐ: ܘܬܶܟܠܐܷ ܡܶܢܰܢ ܒܺܝ̈ܫܳܬܳܐ: ܘܢܶܬܦܢܽܘܢ ܠܰܢ ܙܰܒ̈ܢܶܐ ܕܚܰܕ̈ܘܳܬܳܐ: ܘܰܫܦܺܝ̈ܥܰܝ ܒܒܽܘܪ̈ܟܳܬܳܐ: ܘܢܶܬܓܰܢ̱ܒܰܪ ܥܰܠ ܚܰܫ̈ܶܐ ܕܰܚܛܺܝܬܳܐ: ܒܥܺܝ ܚܠܳܦܰܝܢ ܗܳܟܺܝܠ ܒܺܐܝܙܓܰܕܽܘܬܳܟ ܠܰܡܫܺܝܚܳܐ ܣܳܝܽܘܡܳܐ ܕܰܐܓܽܘܢܰܝ̈ܟ ܡܝܰܬܪ̈ܶܐ: ܕܰܢܢܰܛܰܪ ܠܟܶܢܫܳܐ ܕܙܰܝܰܚ ܠܕܽܘܟܪܳܢܳܟ ܫܒܺܝܚܳܐ: ܘܰܢܒܰܪܶܟ ܠܫܰܒܪ̈ܶܐ ܘܠܰܛܠܳܝ̈ܶܐ ܕܚܳܕܶܝܢ ܒܝܽܘܡ ܥܽܘܗܕܳܢܳܟ ܡܝܰܩܪܳܐ: ܢܩܰܒܶܠ ܬܶܫܡ̈ܫܳܬܳܐ ܘܰܨܠܰܘ̈ܳܬܳܐ ܕܗ̇ܳܢܽܘܢ ܕܶܐܫܬܰܘܬܰܦܘ ܘܡܶܫܬܰܘܬܦܺܝܢ ܒܝܽܘܡ ܚܰܓܳܐ ܕܟܽܘܠܳܠܳܟ: ܘܢܰܣܡܶܟ ܠܣܳܒ̈ܶܐ ܘܠܰܡܚܺܝ̈ܠܐ ܕܝܰܩܰܪ ܠܰܫܟܺܝܢܬܳܐ ܕܦܰܓܪܳܟ: ܘܰܢܙܰܗܶܐ ܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܕܙܳܡܪܺܝܢ ܩܽܘܠܳܣܰܝ̈ܟ ܘܰܠܟܽܠܗܽܘܢ ܐܰܝܠܶܝܢ ܕܶܐܬܟܰܢܰܫܘ ܒܚܰܕܽܘܬܳܐ ܕܢܶܬܒܰܪܟܽܘܢ ܡ̣ܶܢ ܣܺܝܡܰܬ ܓܰܪ̈ܡܰܝܟ: ܢܰܫܘܶܐ ܐܶܢܽܘܢ ܠܛܳܒ̈ܳܬܳܐ ܕܰܡܠܺܝ̈ܟܳܢ: ܘܰܠܚܰܕ̈ܘܳܬܳܐ ܕܰܢܛܺܝܪ̈ܳܢ ܠܳܟ: ܒܢܽܘܗܪܳܐ ܗ̇ܰܘ ܕܒܶܗ ܡܶܬܒܰܣܰܡ ܐܰܢ̱ܬ: ܘܥܰܢܺܝ̈ܕܶܐ ܕܰܦܛܰܪܘ ܡ̣ܶܢ ܒܰܝܢܳܬܰܢ: ܢܶܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܫܽܘܒܚܳܐ ܠܰܡܫܺܝܚܳܐ ܕܰܡܟܰܠܶܠ ܠܢܰܨܺܝ̈ܚܶܐ: ܘܠܐܒܽܘܗܝ ܗ̇ܰܘ ܕܚܳܕܶܐ ܒܕܽܘܟܪܳܢܳܐ ܕܩܰܕܺܝ̈ܫܶܐ ܘܰܠܪܽܘܚܳܐ ܚܰܝܳܐ ܘܩܰܕܺܝܫܳܐ ܓܳܡܰܪ ܠܣܳܗ̈ܕܶܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܫܽܘܒܚܳܐ ܠܳܟ ܡܳܪܝ ܕܰܒܚܰܝܠܳܟ ܠܐ ܡܶܙܕܰܟܝܳܢܳܐ ܐܰܩܪܶܒܘ ܣܳܗ̈ܕܶܐ ܘܰܙܟܰܘ ܠܪ̈ܳܕܽܘܦܰܝܗܽܘܢ ܘܡܶܛܽܠ ܫܡܳܟ ܐܶܬܩܰܛܰܠܘ: ܘܗܳܐ ܝܰܘܡܳܢܳܐ ܡܰܠܟ̈ܶܐ ܘܪ̈ܺܝܫܳܢܶܐ ܡܝܰܩܪܺܝܢ ܕܽܘܟܪ̈ܳܢܰܝܗܽܘܢ ܘܫܺܐܕ̈ܶܐ ܡܶܬܪܰܕܦܺܝܢ ܩܕܳܡ ܕܰܚܺܝܚܗܽܘܢ: ܕܥܰܠ ܐܰܦ̈ܰܝ ܡܰܘܗ̈ܒܳܬܶܗ ܫܡܰܝܳܢ̈ܝܳܬܳܐ ܕܝܰܗܒܬ ܠܗܽܘܢ: ܫܽܘܒܚܳܐ ܘܺܐܝܩܳܪܳܐ ܢܰܣܶܩ: ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܡܶܠܬܳܐ ܕܡ̣ܶܢ ܐܰܒܳܐ ܗ̇ܰܘ ܕܰܒܚܰܪܰܬ ܙܰܒ̈ܢܶܐ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ ܐܠܰܗܳܐ ܐܶܬܒܰܣܰܪ: ܘܩܰܒܶܠ ܥܠܰܘܗܝ ܟܽܠܗܶܝܢ ܡܳܐܟ̈ܳܬܳܐ: ܟܰܕ ܐܺܝܬܰܘܗܝ ܡܥܰܠܝܳܐ ܘܣܰܓܺܝ ܗܶܕܪ̈ܶܐ ܘܰܓܢܺܝܙܳܐ: ܗ̇ܰܘ ܕܶܐܬܩܰܒܰܥ ܒܰܙܩܺܝܦܳܐ: ܘܰܫܩܰܠ ܚܛܺܝܬܶܗ ܕܥܳܠܡܳܐ: ܘܶܐܬܥܰܨܰܪ ܐܰܝܟ ܣܓܽܘܠܐ ܡܫܰܒܚܳܐ: ܘܰܒܚܰܡܪܶܗ ܐܰܪܘܺܝ ܠܐܬܠܺܝ̈ܛܶܐ ܢܰܨܺܝ̈ܚܶܐ: ܗ̇ܰܘ ܕܒܰܣܒܰܪܬܶܗ ܐܶܡܰܪ ܠܘܳܬܗܽܘܢ: ܕܠܐ ܬܶܕܚܠܽܘܢ ܡ̣ܶܢ ܐܰܝܠܶܝܢ ܕܩܳܛܠܺܝܢ ܠܦܰܓܪܳܐ ܒܗܳܝ ܢܰܦܫܳܐ ܠܐ ܡܶܫܟܚܺܝܢ ܠܡܶܩܛܰܠ: ܬܽܘܒ ܦܰܩܶܕ ܐܶܢܽܘܢ ܒܶܐܘܢܓܶܠܝܽܘܢ ܕܺܝܠܶܗ: ܕܠܐ ܬܺܐܨܦܽܘܢ: ܐܰܝܟܰܢܳܐ ܐܰܘ ܡܳܢܳܐ ܬܡܰܠܠܽܘܢ: ܡܶܬܺܝܗܶܒ ܠܟܽܘܢ ܓܶܝܪ ܒܗܳܝ ܫܳܥܬܳܐ: ܡܶܕܶܡ ܕܘܳܠܐܷ ܕܰܬܡܰܠܠܽܘܢ: ܡܶܛܽܠ ܕܪܽܘܚܶܗ ܕܰܐܒܽܘܟܽܘܢ ܡܰܡܠܠܐ ܒܟܽܘܢ ܘܥܰܠ ܗܳܕܶܐ ܚܰܝܠܬܳܢܳܐ ܒܢܰܨܺܝ̈ܚܶܐ: ܘܰܛܒܺܝܒܳܐ ܒܣܳܗ̈ܕܶܐ ܐܶܬܚܰܘܺܝ ܡܳܪܝ ܦܠܳܢ: ܕܗܳܢܳܐ ܕܗܳܫܳܐ ܡܰܠܐܟ̈ܶܐ ܙܡܺܝܢܺܝܢ ܠܕܽܘܟܪܳܢܶܗ: ܘܡܰܫܪ̈ܝܳܬܳܐ ܕܪ̈ܽܘܚܳܢܶܐ ܘܟܶܢ̈ܫܶܐ ܕܰܒܢܰܝ̈ܢܳܫܳܐ: ܗܳܢܳܐ ܕܰܒܚܽܘܒܳܐ ܕܡܳܪܶܗ ܐܶܬܓܰܘܙܰܠ ܘܰܒܪܶܚܡܬܶܗ ܕܰܚܠܳܦ ܫܪܳܪܳܐ: ܘܫܳܛ ܘܒܰܣܰܪ ܥܰܠ ܫܶܢ̈ܕܶܐ ܘܰܐܩܠܺܝ ܥܰܠ ܠܽܘܚܳܡ̈ܶܐ ܕܪ̈ܳܕܽܘܦܶܐ: ܗܳܢܳܐ ܕܚܳܕܝܳܐܝ̣ܬ ܠܽܘܩܒܰܠ ܣܰܝܦܳܐ ܪܗܶܛ: ܣܘܰܚ ܠܚܰܡܺܝܡܽܘܬܳܐ ܕܢܽܘܪܳܐ: ܗܳܢܳܐ ܕܰܠܣܽܘܟܳܟ ܐܺܝܕܰܝ̈ܳܐ ܘܰܠܣ̈ܶܟܶܐ ܚܰܪ̈ܺܝܦܳܬܳܐ: ܐܰܝܟ ܗ̇ܰܘ ܡܰܘܗܰܒܬܳܐ ܡܶܕܶܡ ܘܺܐܝܩܳܪܳܐ ܕܝܰܬܺܝܪ ܡܗܰܝܡܶܢ ܚܫܰܒ: ܗܳܢܳܐ ܕܰܒܥܰܝܢܳܐ ܕܪܽܘܚܳܐ ܐܰܨܶܕ: ܘܰܠܡܽܘܠܟܳܢܳܐ ܗ̇ܰܘ ܫܡܰܝܳܢܳܐ ܕܰܢܛܺܝܪ ܠܶܗ ܚܙܳܐ: ܗ̇ܰܘ ܕܥܰܝܢܳܐ ܠܐ ܚܙܳܬ݀ ܘܶܐܕܢܳܐ ܕܒܶܣܪܳܐ ܠܐ ܫܶܡܥܰܬ݀: ܘܥܰܠ ܠܶܒܳܐ ܕܒܰܪܢܳܫܳܐ ܠܐ ܣܠܶܩ ܗܳܢܳܐ ܕܰܒܕܰܝ̈ܳܢܶܐ ܘܫܰܠܺܝ̈ܛܳܢܶܐ ܕܥܳܠܡܳܐ ܗܳܢܳܐ ܐܰܗܶܠ: ܘܥܰܠ ܐܽܘܠܨܳܢ̈ܶܐ ܘܢܶܓ̈ܕܶܐ ܕܺܝܠܗܽܘܢ ܐܰܡܣܰܪ: ܡܶܢܳܟ ܡܫܺܝܚܳܐ ܣܰܒܪܳܐ ܫܰܪܺܝܪܳܐ ܠܐ ܦܪܰܫ: ܗܳܢܳܐ ܕܠܐ ܚܰܠܶܦ ܫܡܳܟ ܒܰܐܠܳܗ̈ܶܐ ܕܰܓܳܠܰܝ̈ ܫܡܳܐ ܘܳܐܦܠܐ ܒܰܥܒܳܕ ܐܺܝܕܰܝ̈ܳܐ ܕܐ̱ܢܳܫ̈ܳܐ ܘܒܰܢܟܺܝ̈ܣܶܐ ܕܝܽܘܬܪܳܢܳܐ ܠܰܝܬ ܠܗܽܘܢ: ܗܳܢܳܐ ܕܝܰܗܒ ܗܰܕܳܡܰܘ̈ܗܝ ܠܦܽܘܣܳܩܳܐ: ܪ̈ܶܓܠܰܘܗܝ ܠܣܽܘܟܳܟܳܐ: ܕܺܐܝܕܰܘ̈ܗܝ ܠܦܽܘܫܳܚܳܐ ܘܦܰܓܪܶܗ ܠܡܰܚ̈ܘܳܬܳܐ: ܘܨܰܘܪܶܗ ܠܢܶܟܣܬܳܐ: ܐܶܣܬܰܝܰܛ ܒܢܽܘܪܳܐ ܘܫܰܗܺܝ ܠܓܰܘܙܰܠܬܳܐ ܒܚܰܝܠܳܟ: ܐܰܚܶܡ ܠܰܓܠܺܝܕܳܐ ܒܰܡܥܰܕܪܳܢܽܘܬܳܟ: ܘܟܽܠܗܶܝܢ ܒܰܦܨܺܝܚܽܘܬܳܐ ܓܡܰܪ ܘܫܰܡܠܺܝ: ܘܥܰܡ ܡܙܰܡܪܳܢܳܐ ܕܰܘܺܝܕ ܩܳܥܶܐ ܗܘܳܐ: ܕܗܳܠܶܝܢ ܟܽܠܗܶܝܢ ܓܕܰܫ̈ܝ ܠܰܢ ܘܠܐ ܛܥܰܝܢܳܟ: ܘܳܐܦܠܐ ܕܰܓܶܠܢܰܢ ܒܰܩܝܳܡܳܟ: ܬܗܰܪܘ ܥܶܠܳܝ̈ܶܐ ܒܰܡܚܰܡܣܢܳܢܽܘܬܶܗ: ܘܶܐܬܕܰܡܰܪܘ ܡܰܠܐܟ̈ܶܐ ܒܰܡܥܰܙܝܳܢܽܘܬܶܗ: ܚܳܪܘ ܘܰܚܙܰܘ ܠܰܟܠܺܝܠܶܗ ܘܰܠܛܽܘܒܳܐ ܕܰܢܛܺܝܪ ܠܶܗ: ܘܝܰܗܒܘ ܬܶܫܒܽܘܚܬܳܐ ܠܚܰܝܠܐ ܕܰܢܚܶܬ ܥܰܡܶܗ ܠܓܰܘ ܐܰܓܽܘܢܳܐ: ܘܓܽܘ̈ܕܶܐ ܕܣܳܗ̈ܕܶܐ ܚܰܒܪ̈ܰܘܗܝ ܠܘܳܬܶܗ ܒܰܦܨܺܝܚܽܘܬܳܐ: ܐܳܡܪ̈ܳܢ ܗܘܰܝ̈: ܬܳܐ ܒܰܫܠܳܡܳܐ ܛܽܘܒܳܢܳܐ ܘܫܳܘܶܐ ܠܛܽܘ̈ܒܶܐ: ܘܒܰܪ ܥܶܢܝܳܢܳܐ ܕܣܳܗܕܽܘܬܳܐ: ܬܳܐ ܒܰܫܠܳܡܳܐ ܣܳܗܕܳܐ ܕܰܐܩܠܺܝ ܥܰܠ ܠܽܘ̈ܚܳܡܶܐ: ܘܰܩܢܳܐ ܡܰܠܟܽܘܬܳܐ ܕܰܫܡܰܝܳܐ: ܬܳܐ ܒܰܫܠܳܡܳܐ ܣܳܗܕܳܐ ܕܰܡܗܰܝܡܰܢ ܥܰܠ ܒܶܝܬ ܓܰܙܶܗ ܕܡܳܪܳܐ ܕܺܝܠܶܗ: ܬܳܐ ܒܰܫܠܳܡܳܐ ܒܰܪ ܬܰܪܒܺܝܬܳܐ ܕܪܽܘܚܳܐ ܩܰܕܺܝܫܳܐ: ܬܳܐ ܒܰܫܠܳܡܳܐ ܝܳܪܬܳܐ ܕܰܓܢܽܘܢ ܢܽܘܗܪܳܐ: ܬܳܐ ܒܰܫܠܳܡܳܐ ܢܶܫܪܳܐ ܩܰܠܺܝܠܐ ܕܡ̣ܶܢ ܥܽܘܡܩܳܐ ܓܕܰܠ ܓܶܦܳܐ ܘܰܠܪܰܘܡܳܐ ܕܰܫܡܰܝܳܐ ܣܠܶܩ: ܬܳܐ ܒܰܫܠܳܡܳܐ ܘܩܰܕܳܐ ܟܠܺܝܠܳܟ ܡܦܰܬܰܟ ܒܡܰܪ̈ܓܳܢܝܳܬܳܐ ܝܰܩܺܝܪ̈ܳܬܳܐ ܕܡ̣ܶܢ ܡܫܺܝܚܳܐ ܐܠܰܗܰܢ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܩܕܳܡܰܝܟ ܕܰܒܝܰܕ ܨܠܰܘ̈ܳܬܶܗ ܕܰܐܬܠܺܝܛܳܟ ܗܳܢܳܐ ܥܛܺܝܦ ܙܳܟܽܘܬܳܐ ܡܳܪܝ ܦܠܳܢ: ܕܰܬܫܰܟܶܢ ܠܰܢ ܙܰܒ̈ܢܶܐ ܕܚܰܕ̈ܘܳܬܳܐ: ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܚܰܝ̈ܶܐ ܪ̈ܰܚܺܝܩܶܐ ܡ̣ܶܢ ܥܳܩ̈ܳܬܳܐ: ܘܕܽܘܒܳܪ̈ܶܐ ܫܰܦܺܝܪ̈ܶܐ ܕܡܶܬܬܢܺܝܚ ܒܗܽܘܢ ܨܶܒܝܳܢܳܟ: ܘܥܰܕܰܪ ܠܰܢ ܒܟܽܠ ܕܩܳܪܶܝܢܰܢ ܠܳܟ ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܐܰܢܺܝܚ ܐܶܢܽܘܢ ܒܰܐܘ̈ܳܢܶܐ ܕܺܝܠܳܟ ܫܡܰܝ̈ܳܢܶܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܛܟܣܐ ܕܥܠ ܩܕܝܫܐ ܡܪܝ ܐܣܝܐ

 

ܨܠܘܬܐ ܕܫܘܪܝܐ

 

 

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܡܪܰܚܡܳܢܳܐ ܘܪܳܚܶܡ ܐ̱ܢܳܫܳܐ ܕܰܒܢܰܦܫܳܐ ܕܟܺܝܬܳܐ ܘܩܰܕܺܝܫܬܳܐ: ܘܰܒܦܰܓܪܳܐ ܕܠܐ ܡܟܰܬܰܡ ܒܰܚܛܺܝܬܳܐ: ܢܩܰܠܶܣ ܠܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ ܕܩܰܕܺܝܫܳܐ ܘܓܰܒܝܳܐ ܡܳܪܝ ܐܳܣܝܳܐ: ܗܳܢܳܐ ܕܶܐܬܓܒܺܝ ܡ̣ܶܢ ܟܰܪܣܳܐ ܕܶܐܡܶܗ: ܕܢܶܗܘܶܐ ܠܳܟ ܢܰܘܣܳܐ ܕܰܟܝܳܐ: ܘܫܰܟܶܢ ܠܰܢ ܒܰܨܠܰܘ̈ܳܬܶܗ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܰܫܠܳܡܳܐ ܠܥܺܕܬܳܟ ܘܫܰܝܢܳܐ ܠܡܰܪܥܺܝܬܳܟ: ܕܢܰܘܕܶܐ ܠܳܟ܀

 

 

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܕܺܐܝܬܰܘܗܝ ܗܘܳܐ ܘܺܐܝܬܰܘܗܝ: ܘܢܶܗܘܶܐ ܐܺܝܬܰܘܗܝ ܘܰܩܕܺܝܡ ܘܩܰܕܡܳܝ ܡ̣ܶܢ ܡܰܕܪܟܳܢܽܘܬܳܐ ܕܰܒܪ̈ܰܝܳܐ ܘܰܥܒܺܝ̈ܕܶܐ ܡܚܰܝܶܕ ܡܦܰܠܓܳܐܝ̣ܬ: ܘܰܡܦܰܠܶܓ ܡܚܰܝܕܳܐܝ̣ܬ: ܐܽܘܣܺܝܰܐ ܕܠܐ ܡܶܬܕܰܪܟܳܐ: ܐܺܝܬܽܘܬܳܐ ܕܠܐ ܡܶܬܒܰܨܝܳܐ: ܚܰܕ ܐܠܰܗܳܐ ܕܠܐ ܥܳܐܶܠ ܬܚܶܝܬ ܡܶܢܝܳܢܳܐ ܕܰܐܪܺܝܬܡܰܐܛܺܝܩܺܝ ܣܒܺܝܣܰܬ݀ ܒܡܶܢܝܳܢܳܐ ܕܣܽܘܢܽܘܠܽܘܓܺܝܣܡܺܝܣܝܰܐ ܐܳܦܠܐ ܡܶܬܕܪܶܟ ܒܡܰܐܬܶܡܰܛܺܝܩܽܘܬܳܐ: ܘܠܐ ܒܣܽܘܠܳܓܳܐ ܡܶܬܒܨܶܐ ܐܽܘܛܽܘܩܪܰܐܛܽܘܪ ܕܠܶܗ ܡܶܬܬܚܺܝܒܳܐ ܣܶܓܕܬܳܐ ܡ̣ܶܢ ܟܽܠ: ܗ̇ܰܘ ܕܰܓܒܳܝܗܝ ܠܥܰܒܕܶܗ ܢܰܨܺܝܚܳܐ ܡܳܪܝ ܐܳܣܝܳܐ ܡ̣ܶܢ ܡܥܰܝ̈ܳܐ ܐܶܡܗܳܝ̈ܶܐ: ܘܚܰܝܠܶܗ ܒܰܐܓܽܘܢܳܐ ܕܠܽܘܩܒܰܠ ܚܰܫ̈ܶܐ ܘܫܶܚܪ̈ܶܐ ܐܰܢܛܺܝܦܰܐܛܺܝ̈ܩܳܝܶܐ ܘܰܣܥܰܪ ܒܺܐܝܕܶܗ ܐܳܣ̈ܘܳܬܳܐ ܬܶܕܡܪ̈ܳܬܳܐ ܕܠܐ ܡܶܢܝܳܢ: ܘܗܳܐ ܢܳܒܥܺܝܢ ܡ̣ܶܢ ܓܰܪ̈ܡܰܘܗܝ ܚܽܘܠܡܳܢ̈ܶܐ ܠܓܶܢܣܳܐ ܐ̱ܢܳܫܳܝܳܐ: ܘܰܥܒܺܝܕ ܫܽܘܪܳܐ ܘܚܶܣܢܳܐ ܚܰܣܺܝܢܳܐ ܠܟܽܠ ܕܡܶܬܓܰܘܰܣ ܒܳܗ ܒܗܰܝܡܳܢܽܘܬܳܐ ܕܰܫܪܳܪܳܐ ܕܠܶܗ ܝܳܐܐ܀

 

 

 

ܣܕܪܐ

 

 

 

ܠܡܰܢܽܘ ܡ̣ܶܢ ܒܢܰܝ̈ܢܳܫܳܐ ܐܺܝܬ ܦܽܘܡܳܐ ܘܠܶܫܳܢܳܐ: ܕܡܶܫܟܰܚ ܠܰܡܣܰܠܓܳܣܽܘ ܪܗܺܝܛܪܳܐܝ̣ܬ: ܥܰܠ ܕܽܘܒܳܪ̈ܶܐ ܡܰܠܝ̈ܰܝ ܙܳܟܽܘܬܳܐ ܕܓܰܒܝܳܐ ܡܳܪܝ ܐܳܣܝܳܐ: ܗܳܢܳܐ ܕܶܐܬܓܒܺܝ ܡ̣ܶܢ ܟܰܪܣܳܐ ܐܰܝܟ ܪܰܒܳܐ ܫܡܽܘܐܶܝܠ ܗ̇ܰܘ ܢܙܺܝܪܳܐ: ܗܳܢܳܐ ܕܥܰܕܠܐ ܢܶܬܬܨܺܝܪ ܐܶܬܩܰܕܰܫ: ܘܶܐܬܺܝܕܰܥ ܠܡܳܪܶܗ ܐܰܝܟ ܐܶܪܰܡܝܳܐ: ܗܳܢܳܐ ܕܰܒܢܶܕܪ̈ܶܐ ܘܒܰܨܠܰܘ̈ܳܬܳܐ ܐܶܬܺܝܠܶܕ ܘܶܐܬܺܝܗܶܒ ܡ̣ܶܢ ܐܠܰܗܳܐ: ܗܳܢܳܐ ܕܡ̣ܶܢ ܛܽܘܗܡܳܐ ܡܫܰܡܗܳܐ ܐܺܝܬܰܘܗܝ ܗܘܳܐ: ܡ̣ܶܢ ܐܠܰܦܺܝܕܺܝܰܐ ܡܕܺܝܢ̱ܬܳܐ ܕܒܰܐܪܥܳܐ ܕܒܶܝܬ ܪ̈ܽܘܡܳܝܶܐ: ܗܳܢܳܐ ܕܰܐܒܽܘܗܝ ܦܰܢܬܶܪܽܘܣ ܡܶܬܩܪܶܐ ܗܘܳܐ: ܘܶܐܡܶܗ ܓܰܪܓܽܘܢܺܝܰܐ: ܒܓܶܢܣܳܐ ܦܰܪ̈ܢܺܝܓܳܝܶܐ : ܘܝܺܕܺܝ̈ܥܶܐ ܘܰܡܫܰܡ̈ܗܶܐ: ܩܕܳܡ ܡܰܠܟܳܐ ܬܶܐܘܳܕܳܘܣܝܳܘܣ ܫܽܘܒܗܳܪܳܐ ܕܡܰܠܟ̈ܶܐ ܡܗܰܝ̈ܡܢܶܐ: ܗܳܢܳܐ ܕܡ̣ܶܢ ܐܠܰܗܳܐ ܐܶܬܩܪܺܝ ܠܶܗ ܫܡܳܐ ܐܳܣܝܳܐ: ܡ̣ܶܢ ܐܰܒܳܐ ܡܰܪܩܽܘܣ ܕܡ̣ܶܢ ܛܽܘܪ ܣܺܝܢܰܝ ܐܶܬܳܐ ܠܘܳܬܶܗ: ܘܶܐܡܰܪ ܠܐܡܶܗ ܕܗܳܢܳܐ ܐܳܣܝܳܐ ܢܶܬܩܪܶܐ: ܡܶܛܽܠ ܕܣܰܓܺܝ ܐܳܣ̈ܘܳܬܳܐ ܥܬܺܝܕ ܐܠܰܗܳܐ ܕܢܶܣܥܽܘܪ ܒܺܐܝ̈ܕܰܘܗܝ: ܗܳܢܳܐ ܕܶܐܬܪܰܒܺܝ ܒܝܰܕ ܚܶܟܡܬܳܐ ܐܠܰܗܳܝܬܳܐ ܘܝܽܘܠܦܳܢܳܐ ܥܺܕܬܳܢܳܝܳܐ: ܘܶܐܬܝܰܬܰܪ ܥܰܠ ܛܠܳܝ̈ܶܐ ܒܢ̈ܰܝ ܫܢܰܘ̈ܗܝ: ܗܳܢܳܐ ܕܰܡܟܰܪ ܠܶܗ ܐܰܒܽܘܗܝ ܒܰܪܬ ܪ̈ܺܝܫܳܢܶܐ ܡܝܰܩܪ̈ܶܐ: ܛܠܺܝܬܳܐ ܢܰܟܦܬܳܐ ܕܰܫܡܳܗ̇ ܐܽܘܪܺܢܝܰܐ: ܗܳܢܳܐ ܕܰܚܣܰܟ ܦܰܓܪܶܗ ܡ̣ܶܢ ܪ̈ܓܺܝܓܳܬܶܗ ܕܥܳܠܡܳܐ ܗܳܢܳܐ: ܡ̣ܶܢ ܙܽܘܘܳܓܳܐ ܢܳܡܽܘܣܳܝܳܐ: ܗܳܢܳܐ ܕܣܳܡ ܒܢܰܦܫܶܗ ܕܢܶܬܢܰܟܪܶܐ ܡ̣ܶܢ ܐܰܒܳܗܰܘ̈ܗܝ ܡܶܛܽܠ ܚܽܘܒܶܗ ܕܰܡܫܺܝܚܳܐ: ܗܳܢܳܐ ܕܶܐܬܪܰܓܪܰܓ ܠܢܺܝܪܳܐ ܢܰܟܦܳܐ ܕܕܰܝܪܳܝܽܘܬܳܐ ܘܩܰܒܠܶܗ ܚܘܺܝܚܳܐܝ̣ܬ: ܗܳܢܳܐ ܕܡ̣ܶܢ ܛܰܠܝܽܘܬܶܗ ܢܶܦܠܰܬ݀ ܒܠܶܒܶܗ ܢܽܘܪܳܐ ܐܠܰܗܳܝܬܳܐ ܕܰܐܪܡܺܝ ܡܳܪܰܢ ܒܥܳܠܡܳܐ: ܘܰܫܒܰܩ ܟܽܠܡܶܕܶܡ ܘܶܐܙܰܠ ܒܳܬܪܶܗ: ܗܳܢܳܐ ܕܰܪܚܶܡ ܚܽܘܒܶܗ ܕܰܡܫܺܝܚܳܐ ܛܳܒ ܡ̣ܶܢ ܥܳܠܡܳܐ ܘܟܽܠ ܕܺܐܝܬ ܒܶܗ: ܘܶܐܙܰܠ ܒܳܬܰܪ ܦܽܘܩ̈ܕܳܢܰܘܗܝ: ܗܳܢܳܐ ܕܰܪܕܳܐ ܒܝܰܡܳܐ ܘܶܐܙܰܠ ܠܐܘܪܫܠܶܡ: ܘܶܐܬܒܰܪܰܟ ܡ̣ܶܢ ܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܕܕܰܝܰܪ ܒܗܶܝܢ ܡܳܪܰܢ: ܗܳܢܳܐ ܕܟܰܬܰܪ ܒܽܐܘܪܫܠܶܡ ܡܶܬܚܳܐ ܕܚܰܡܫܳܐ ܝܰܪ̈ܚܺܝܢ: ܘܩܰܒܶܠ ܐܶܣܟܺܝܡܳܐ ܢܰܟܦܳܐ ܕܕܰܝܪܳܝܽܘܬܳܐ: ܗܳܢܳܐ ܕܰܠܡܰܕܒܪܳܐ ܚܽܘܪܒܳܐ ܢܦܰܩ: ܘܶܐܫܟܰܚ ܕܰܝܪܳܐ ܕܺܐܝܬ ܒܳܗ̇ ܥܶܣܪܳܐ ܐܰܚ̈ܶܐ ܛܽܘ̈ܒܳܢܶܐ ܘܶܐܬܒܰܪܰܟ ܡܶܢܗܽܘܢ: ܗܳܢܳܐ ܕܰܠܛܽܘܪܳܐ ܕܣܺܝܢܰܝ ܐܶܬܪܰܓܪܰܓ: ܕܢܺܐܙܰܠ ܘܢܶܬܒܰܪܰܟ ܡ̣ܶܢ ܫܟܺܝܢܬܳܐ ܕܪܳܡܳܐ ܕܫܶܟܢܰܬ݀ ܥܰܠ ܛܽܘܪ ܣܺܝܢܰܝ: ܗܳܢܳܐ ܕܒܰܣܡܶܗ ܐܠܰܗܳܐ ܒܦܶܓܥܳܐ ܘܰܚܙܳܬܳܐ ܕܣܳܒܳܐ ܐܠܰܗܳܝܳܐ ܡܳܪܝ ܕܺܝܡܶܛ: ܗܳܢܳܐ ܕܗܰܠܶܟ ܒܛܽܘܪܳܐ ܕܣܺܝܢܰܝ ܘܶܐܫܟܰܚ ܠܶܗ ܡܥܰܪܬܳܐ: ܘܟܰܕ ܥܡܰܪ ܒܳܗ̇ ܢܽܘܓܪܳܐ ܕܥܶܣܪܺܝܢ ܘܚܰܡܶܫ ܫܢܺܝ̈ܢ: ܗܳܢܳܐ ܕܢܰܟܪܺܝ ܢܰܦܫܶܗ ܡ̣ܶܢ ܥܳܠܡܳܐ: ܘܰܒܥܶܩܳܪ̈ܶܐ ܕܕܰܒܪܳܐ ܡܶܣܬܰܝܒܰܪ ܗܘܳܐ: ܗܳܢܳܐ ܕܡܰܟܶܟ ܠܕܰܝ̈ܘܶܐ ܘܰܣܚܰܦ ܠܣܳܛܳܢܳܐ ܪܺܝܫܳܐ ܕܛܽܘܥܝܰܝ ܒܚܰܝܠܶܗ ܕܰܨܠܺܝܒܳܐ: ܗܳܢܰܘ ܕܚܰܘܺܝ ܠܶܗ ܐܠܰܗܳܐ ܕܢܶܦܽܘܩ ܡ̣ܶܢ ܡܥܰܪܬܳܐ ܘܢܺܐܙܰܠ ܠܥܳܠܡܳܐ: ܘܢܶܣܥܽܘܪ ܬܶܕܡܪ̈ܳܬܳܐ ܐܰܝܟ ܢܒܺܝܽܘܬܳܐ ܕܰܗܘܳܬ ܥܠܰܘܗܝ: ܗܳܢܳܐ ܕܠܰܩܪܺܝܬܳܐ ܕܰܫܡܳܗ̇ ܣܰܢܕܰܩ ܐܶܬܳܐ ܩܰܕܡܳܐܝ̣ܬ: ܘܰܢܦܰܩ ܛܶܒܶܗ ܒܗܰܘ ܐܰܬܪܳܐ: ܗܳܢܳܐ ܕܫܰܡܶܫ ܘܨܰܠܺܝ ܒܰܩܪܺܝܬܳܐ ܗ̇ܳܝ ܘܒܰܛܶܠ ܡܶܢܳܗ̇ ܒܰܪܕܳܐ ܕܚܳܒܶܛ ܗܘܳܐ ܠܳܗ̇ ܟܽܠ ܫܰܢ̱ܬܳܐ: ܗܳܢܳܐ ܕܶܐܬܳܐ ܡ̣ܶܢ ܬܰܡܳܢ ܠܰܡܕܺܝܢ̱ܬܳܐ ܕܰܫܡܳܗ̇ ܐܰܘܦܘܡܺܝܰܐ ܕܗ̣ܺܝ ܚܶܡܶܨ: ܘܰܐܘܩܶܕ ܠܒܶܝܬ ܦܬܰܟܪ̈ܶܐ ܕܺܐܝܬ ܗܘܳܐ ܒܳܗ̇ ܒܳܐܬܳܐ ܕܰܨܠܺܝܒܳܐ ܕܰܪܫܰܡ ܥܠܰܘܗܝ: ܗܳܢܳܐ ܕܒܰܪܶܟ ܠܰܒ̈ܢܰܝ ܡܕܺܝܢ̱ܬܳܐ: ܘܰܐܥܡܶܕ ܠܡܳܐܐ ܘܫܰܒܥܺܝܢ ܟܽܘܡܪ̈ܶܐ: ܘܰܒܢܰܝ̈ܗܽܘܢ ܘܢܶܫܰܝ̈ܗܽܘܢ: ܕܗܳܘܶܝܢ ܐܠܰܦܳܐ ܘܚܰܡܶܫܡܳܐܐ ܢܰܦ̈ܫܳܢ ܒܡܶܢܝܳܢܳܐ: ܗܳܢܳܐ ܕܒܳܬܰܪ ܕܰܢܦܰܩ ܡ̣ܶܢ ܡܕܺܝܢ̱ܬܳܐ: ܐܰܓܥܶܠ ܐܶܢܽܘܢ ܠܛܰܝܒܽܘܬܳܐ ܐܠܰܗܳܝܬܳܐ: ܘܰܬܪܰܨ ܐܰܦܰܘ̈ܗܝ ܠܐܦ̈ܰܝ ܐܰܢܛܺܝܽܘܟܺܝܰܐ ܡܕܺܝܢ̱ܬܳܐ: ܗܳܢܳܐ ܕܰܥܒܰܪ ܒܰܩܪܺܝܬܳܐ ܕܰܫܡܳܗ̇ ܓܰܢܕܰܪܺܝܣ: ܘܰܐܣܺܝ ܠܗܰܘ ܓܰܒܪܳܐ ܕܡܰܣܪ̈ܚܳܢ ܗܘܰܝ̈ ܥܰܝܢܰܘ̈ܗܝ: ܘܰܦܬܰܚ ܐܶܢܶܝܢ ܒܚܰܝܠܶܗ ܕܰܡܫܺܝܚܳܐ: ܗܳܢܳܐ ܕܘܰܥܶܕ ܠܘܳܬܶܗ ܠܗܰܘ ܛܰܠܝܳܐ ܕܥܳܡܰܪ ܗܘܳܐ ܒܒܶܝܬ ܩܒܽܘܪ̈ܶܐ: ܘܡ̣ܶܢ ܫܺܐܕ̈ܶܐ ܡܶܬܬܰܥܒܰܕ ܗܘܳܐ: ܘܰܛܪܰܕ ܐܶܢܽܘܢ ܒܚܰܝܠܶܗ ܕܨܠܺܝܒܳܐ ܙܰܟܳܝܳܐ: ܗܳܢܳܐ ܕܰܬܗܰܪ ܒܺܝܠܕܰܪܳܐ ܕܡܰܠܟܳܐ ܕܦܳܪ̈ܣܳܝܶܐ ܟܰܕ ܐܰܣܝܶܗ ܡ̣ܶܢ ܡܚܽܘܬܳܐ ܕܪܽܘܚܳܐ ܕܢܶܫܒܰܬ݀ ܥܠܰܘܗܝ: ܗܳܢܳܐ ܕܰܐܘܒܶܠ ܒܺܝܠܕܰܪܳܐ ܛܶܒܶܗ ܠܡܰܠܟܳܐ ܕܦܳܪ̈ܣܳܝܶܐ: ܘܫܰܕܰܪ ܡܰܠܟܳܐ ܠܰܒܪܶܗ ܕܰܡܫܰܪܰܝ ܗܘܳܐ ܘܰܐܣܝܶܗ: ܕܰܫܡܶܗ ܗܘܳܐ ܡܺܝܙܰܕ: ܗܳܢܳܐ ܕܕܰܟܺܝ ܓܰܪ̈ܒܶܐ ܘܰܐܣܺܝ ܟܪ̈ܺܝܗܶܐ: ܘܰܛܪܰܕ ܫܺܐܕ̈ܶܐ ܡ̣ܶܢ ܐܰܬܪܳܐ ܕܰܐܢܛܺܝܟ: ܘܰܐܦܶܩ ܠܚܶܘܝܳܐ ܕܰܢܚܶܬ ܗܘܳܐ ܠܟܰܪܣܳܐ ܕܗ̇ܳܝ ܐܰܢ̱ܬܬܳܐ ܛܠܺܝܬܳܐ: ܗܳܢܳܐ ܕܕܳܫ ܥܰܠ ܚܰܝܽܘܬܳܐ ܗ̇ܳܝ ܕܰܡܚܰܒܠܐ ܗܘܳܬ ܠܐܬܪܳܐ ܕܬܰܐܓܳܪ̈ܶܐ ܘܰܐܨܛܰܪܝܰܬ݀ ܠܰܬܪܶܝܢ: ܗܳܢܳܐ ܕܘܳܝܳܐ ܝܰܗܒ ܠܐܟܶܠܩܰܪܨܳܐ ܘܚܰܝܠܰܘ̈ܳܬܶܗ: ܘܰܛܪܰܕ ܐܶܢܽܘܢ ܡ̣ܶܢ ܐܰܬܪܳܐ ܕܰܐܢܛܺܝܟ: ܗܳܢܳܐ ܕܰܢܓܰܒ ܠܰܟܢܺܝܫܽܘܬ ܡܰܝ̈ܳܐ ܕܗ̇ܳܝ ܐܰܢ̱ܬܬܳܐ ܕܶܐܬܟܰܫܦܰܬ݀ ܠܶܗ: ܗܳܢܳܐ ܕܰܓܒܳܐ ܠܶܗ ܕܢܺܐܙܰܠ ܠܐܬܪܳܐ ܕܰܩܠܽܘܕܺܝܰܐ: ܐܰܝܟܰܢܳܐ ܕܢܶܬܒܰܪܰܟ ܡ̣ܶܢ ܕܰܝܪ̈ܳܬܳܐ ܩܰܕܺܝ̈ܫܳܬܳܐ ܕܺܐܝܬ ܗܘܳܐ ܒܶܗ: ܗܳܢܳܐ ܕܒܰܝܰܐܐ ܠܺܝܚܺܝ̈ܕܳܝܶܐ ܗ̇ܳܢܽܘܢ ܕܥܳܡܪܺܝܢ ܗܘܰܘ ܒܳܐܬܳܐ ܕܰܩܠܽܘܕܺܝܰܐ ܒܦܶܬܓܳܡܰܘ̈ܗܝ ܪ̈ܽܘܚܳܢܳܝܶܐ: ܗܳܢܳܐ ܕܝܰܗܒ ܢܰܦܫܶܗ ܠܛܽܘܪ̈ܳܦܶܐ ܘܥܰܡ̈ܠܐ ܘܦܽܘܠܚܳܢܳܐ ܒܟܰܪܡܳܐ ܕܡܳܪܶܗ: ܗܳܢܳܐ ܕܰܐܪܡܺܝ ܗ̣ܽܘ ܠܶܗ ܒܫܰܗܪܳܐ ܘܥܰܡܠܐ ܘܬܶܫܡܫܬܳܐ ܕܰܩܕܳܡ ܡܳܪܶܗ ܕܠܐ ܩܽܘܛܳܥܳܐ: ܗܳܢܳܐ ܕܡܰܠܟܳܐ ܡܗܰܝܡܢܳܐ ܬܶܐܘܳܕܳܘܣܝܳܘܣ ܫܡܰܥ ܛܶܒܶܗ: ܘܫܰܕܰܪ ܐܺܝܙܓܰܕܶܗ ܒܳܬܪܶܗ ܕܢܰܘܒܠܽܘܢܳܝܗܝ ܠܰܡܕܺܝܢܰܬ ܡܰܠܟܽܘܬܳܐ: ܗܳܢܳܐ ܕܰܪܕܰܦ ܠܫܺܐܕܳܐ ܒܺܝܫܳܐ ܕܡܰܐܠܶܙ ܗܘܳܐ ܠܗ̇ܳܝ ܐܰܢ̱ܬܬܳܐ: ܘܰܢܦܰܩ ܡܶܢܳܗ̇ ܓܰܠܝܳܐܝ̣ܬ: ܘܟܽܠ ܕܰܚܙܳܐ ܫܰܒܰܚ ܠܐܠܳܗܳܐ: ܗܳܢܳܐ ܕܝܰܗܒ ܚܽܘܠܡܳܢܳܐ ܠܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܕܶܐܬܰܘ ܠܘܳܬܶܗ ܒܰܡܕܺܝܢܰܬ ܡܰܠܟܽܘܬܳܐ: ܗܳܢܳܐ ܕܶܐܬܰܘ ܒܢ̈ܰܝ ܢܺܝܩܽܘܡܕܺܝܰܐ ܡܕܺܝܢ̱ܬܳܐ ܘܶܐܬܒܰܪܰܟܘ ܡܶܢܶܗ: ܘܰܒܥܰܘ ܕܢܶܗܘܶܐ ܠܘܳܬܗܽܘܢ ܘܠܐ ܟܰܬܰܪ ܨܶܝܕܰܝ̈ܗܽܘܢ: ܗܳܢܳܐ ܕܰܣܥܰܪ ܐܠܰܗܳܐ ܒܺܐܝ̈ܕܰܘܗܝ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܕܥܳܒܪ̈ܳܢ ܠܚܰܝܠܐ: ܗܳܢܳܐ ܕܝܰܗܒ ܠܶܗ ܡܰܠܐܟܶܗ ܕܡܳܪܝܳܐ ܐܳܬܳܐ: ܕܰܩܪܶܒ ܠܶܗ ܝܽܘܡ ܡܰܦܩܳܢܶܗ ܕܡ̣ܶܢ ܥܳܠܡܳܐ ܗܳܢܳܐ ܕܥܳܩ̈ܳܬܳܐ ܠܰܠܡܺܐܢܳܐ ܕܚܰܝ̈ܶܐ ܘܰܕܚܰܕ̈ܘܳܬܳܐ: ܗܳܢܳܐ ܕܶܐܬܳܐ ܠܕܰܝܪܶܗ ܡ̣ܶܢ ܐܰܬܪܳܐ ܕܰܐܢܛܺܝܽܘܟܺܝܰܐ: ܕܬܰܡܳܢ ܒܶܗ ܒܰܐܬܪܳܐ ܐܺܝܬܶܝܗ̇: ܘܶܐܬܬܢܺܝܚ ܡ̣ܶܢ ܥܰܡܠܶܗ ܘܛܽܘܪܳܦܶܗ: ܒܰܕܓܽܘܢ ܥܺܕܬܳܐ ܩܰܕܺܝܫܬܳܐ ܒܣܺܝܡܰܬ ܓܰܪ̈ܡܰܘܗܝ ܡܶܬܓܰܘܣܳܐ: ܘܒܰܦܨܺܝܚܽܘܬܳܐ ܪܽܘܚܳܢܳܝܬܳܐ ܠܘܳܬܶܗ ܡܰܙܥܩܳܐ ܘܳܐܡܪܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ: ܐܰܪܙܳܐ ܪܳܡܳܐ ܕܰܒܛܶܠܳܠܶܗ ܡܶܣܬܰܬܪܳܐ ܒܰܪܬ ܐܳܪ̈ܳܡܳܝܶܐ ܡ̣ܶܢ ܫܰܘܒܳܐ ܕܶܐܪ̈ܶܣܺܝܣ ܚܰܒܳ̈ܠܳܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܒܰܪ ܬܶܓܡܳܐ ܕܰܢܒܺܝ̈ܶܐ: ܘܬܰܠܡܺܝܕܳܐ ܕܰܫܠܺܝ̈ܚܶܐ: ܘܚܰܒܪܳܐ ܘܰܐܚܝܳܢܳܐ ܕܣܳܗ̈ܕܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܓܺܝܙܰܒܪܳܐ ܚܰܟܺܝܡܳܐ: ܕܶܐܬܗܰܝܡܰܢ ܥܰܠ ܒܶܝܬ ܓܰܙܶܗ ܕܡܳܪܰܢ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ: ܕܚܺܝܠܐ ܥܰܠ ܫܺܐܕ̈ܶܐ: ܘܛܳܪܽܘܕܳܐ ܕܕܰܝ̈ܘܶܐ ܡܳܪ̈ܽܘܕܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܗܰܝܟܠܐ ܫܒܺܝܚܳܐ ܘܒܶܝܬ ܡܰܥܡܪܳܐ ܕܰܐܠܳܗܽܘܬܳܐ ܡܪܰܝܰܡܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ: ܘܰܪܕܳܐ ܒܰܣܺܝܡ ܪܺܝܚܳܐ ܕܰܒܣܶܡ ܠܰܡܗܰܝ̈ܡܢܶܐ ܒܣܰܘܩܳܐ ܕܥܽܘܕܪ̈ܳܢܰܘܗܝ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܙܰܝܬܳܐ ܫܒܺܝܚܳܐ ܕܥܰܠ ܬܰܦܳܐ ܕܡܰܥܡܽܘܕܺܝܬܳܐ ܐܶܬܚܙܺܝ ܘܕܰܗܶܢ ܠܪܺܝܫܳܐ ܘܰܠܕܰܩܢܳܐ ܐܰܝܟ ܡܶܠܬܳܐ ܢܒܺܝܳܝܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܚܶܣܢܳܐ ܚܰܣܺܝܢܳܐ ܕܒܶܗ ܡܶܬܚܰܣܢܳܐ ܥܺܕܬܳܐ ܩܰܕܺܝܫܬܳܐ ܡ̣ܶܢ ܓܰܝ̈ܳܣܶܐ ܡܶܬܝܰܕ̈ܥܳܢܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܛܰܒܥܳܐ ܛܳܒܳܐ ܪܨܺܝܦ ܒܟܺܐܦ̈ܶܐ ܝܽܘܩܢܳܬܺܝ̈ܢܳܝܳܬܳܐ ܘܶܐܬܬܣܺܝܡ ܒܬܳܓܶܗ ܕܡܰܠܟܳܐ ܫܡܰܝܳܢܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܝܽܘܩܢܳܐ ܡܥܰܠܝܳܐ ܘܰܫܒܺܝܚܳܐ ܕܶܐܬܬܨܺܝܪܘ ܒܶܗ ܟܽܠܗܽܘܢ ܣܰܡ̈ܡܳܢܶܐ ܪ̈ܽܘܚܳܢܳܝܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܟܳܗܢܳܐ ܙܰܗܝܳܐ ܘܕܶܒܚܳܐ ܡܩܰܒܠܐ ܕܟܰܗܶܢ ܢܰܦܫܶܗ ܩܽܘܪܒܳܢܳܐ ܡܩܰܒܠܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܠܚܺܝܡܳܐ ܥܰܠ ܣܳܛܳܢܳܐ: ܘܰܪܚܺܝܡܳܐ ܥܰܠ ܡܰܠܐܟ̈ܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܡܒܰܝܳܐܢܳܐ ܕܰܟܡܺܝܪ̈ܶܐ ܘܰܡܠܰܒܒܳܢܳܐ ܕܰܡܥܳܩ̈ܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܢܰܘܣܳܐ ܕܰܟܝܳܐ ܘܒܶܝܬ ܡܰܥܡܪܳܐ ܕܪܽܘܚܳܐ ܩܰܕܺܝܫܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ: ܣܳܚܽܘܦܳܐ ܕܫܺܐܕ̈ܶܐ ܘܰܡܛܰܠܩܳܢܳܐ ܕܕܰܝ̈ܘܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ: ܥܰܒܕܳܐ ܛܳܒܳܐ ܕܥܰܦܶܦ ܠܟܰܟܪܶܗ ܐܰܝܟ ܡܶܠܬܳܐ ܐܶܘܢܓܶܠܳܝܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ: ܦܳܥܠܐ ܟܰܫܺܝܪܳܐ ܕܰܦܠܰܚ ܒܟܰܪܡܳܐ ܕܡܳܪܶܗ ܡ̣ܶܢ ܨܰܦܪܳܐ ܠܪܰܡܫܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܨܰܝܳܪܳܐ ܡܗܺܝܪܳܐ ܕܨܳܪ ܒܰܩܢܽܘܡܶܗ ܟܽܠܗܽܘܢ ܝܽܘܩ̈ܢܶܐ ܪ̈ܽܘܚܳܢܳܝܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܩܽܘܒܰܪܢܺܝܛܺܝ ܡܗܺܝܪܳܐ ܕܰܕܒܰܪ ܠܐܠܦܶܗ ܒܝܰܡܳܐ ܕܥܳܠܡܳܐ ܗܳܢܳܐ ܡܠܐܷ ܒܺܝ̈ܫܳܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ: ܪܰܝܡܳܐ ܪܳܡܳܐ ܕܶܐܬܦܰܠܰܛ ܡ̣ܶܢ ܓܰܝ̈ܳܣܶܐ ܡܶܬܝܰܕ̈ܥܳܢܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܫܽܘܪܳܐ ܪܳܡܳܐ ܕܥܺܕܬܳܐ ܩܰܕܺܝܫܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܬܰܠܡܺܝܕܳܐ ܫܰܪܺܝܪܳܐ ܕܰܡܫܺܝܚܳܐ ܐܠܰܗܳܐ: ܕܰܫܒܰܩ ܟܽܠܡܶܕܶܡ ܘܶܐܙܰܠ ܒܳܬܪܶܗ: ܐܰܢ̱ܬ ܐܺܝܬܰܝܟ ܬܗܺܝܪܳܐ ܒܥܳܢ̈ܘܳܝܶܐ: ܐܰܢ̱ܬ ܐܺܝܬܰܝܟ ܫܽܘܒܗܳܪܳܐ ܕܺܝܚܺܝ̈ܕܳܝܶܐ ܪܰܒܳܐ ܕܕܰܝܪ̈ܳܝܶܐ: ܩܳܝܽܘܡܳܐ ܕܕܰܒܪ̈ܰܝܳܐ ܨܶܒܬܳܐ ܕܥܺܕ̈ܳܬܳܐ ܥܳܩܽܘܪܳܐ ܕܛܳܥܝܽܘܬܳܐ: ܣܳܚܽܘܦܳܐ ܕܰܦܬܰܟܪܽܘܬܳܐ: ܢܶܒܥܳܐ ܒܪܺܝܟܳܐ ܕܩܰܕܺܝܫܽܘܬܳܐ: ܡܡܰܠܝܳܢܳܐ ܕܚܰܣܺܝܪܽܘܬܳܐ: ܠܶܫܳܢܳܐ ܕܰܟܪܺܝܣܛܝܳܢܽܘܬܳܐ ܟܰܘܟܒܳܐ ܨܰܡܽܘܚܬܳܢܳܐ: ܝܳܨܽܘܦܳܐ ܡܶܬܚܰܦܛܳܢܳܐ: ܙܰܝܢܳܐ ܠܐ ܡܶܙܕܰܟܝܳܢܳܐ: ܘܺܝܠܐ ܕܗܰܘܢܳܐ ܪܺܝܫܳܢܳܐ: ܗܶܕܪܳܐ ܕܕܰܝܪ̈ܳܬܳܐ ܕܚܺܝܠܐ ܥܰܠ ܪ̈ܽܘܚܶܐ ܫܰܩܳܪ̈ܳܬܳܐ: ܓܰܙܳܐ ܕܥܽܘܕܪ̈ܳܢܶܐ ܒܶܝܬ ܓܰܘܣܳܐ ܕܰܡܗܰܝ̈ܡܢܶܐ: ܐܰܪܕܺܟܠܐ ܕܒܶܢ̈ܝܳܢܶܐ ܪ̈ܽܘܚܳܢܳܝܶܐ: ܐܰܣܺܝܪ̈ܶܐ ܒܳܟ ܡܶܫܬܪܶܝܢ: ܐܠܰܝ̈ܨܶܐ ܒܳܟ ܡܶܬܪܰܘܚܺܝܢ: ܒܳܥ̈ܘܳܬܳܐ ܒܳܟ ܢܶܬܩܰܒ̈ܠܳܢ: ܒܽܘܪ̈ܟܳܬܳܐ ܒܳܟ ܢܶܣܓ̈ܝܳܢ ܓܰܢ̈ܳܒܶܐ ܒܳܟ ܢܶܬܒܰܛܠܽܘܢ: ܓܰܝ̈ܳܣܶܐ ܒܳܟ ܢܶܫܬܰܬܩܽܘܢ: ܕܶܚ̈ܠܳܬܳܐ ܒܳܟ ܢܶܥܒܪ̈ܳܢ: ܗܶܪ̈ܳܬܳܐ ܒܳܟ ܢܶܬܒ̈ܰܛܠܳܢ: ܘܳܝ̈ܶܐ ܒܳܟ ܢܶܫܠܽܘܢ: ܫܽܘ̈ܟܳܢܶܐ ܒܳܟ ܢܶܬܝܰܗܒܽܘܢ: ܙܰܕܺܝ̈ܩܶܐ ܒܳܟ ܢܶܬܓܰܡܪܽܘܢ: ܙܰܠܺܝ̈ܠܐ ܒܳܟ ܢܶܙܕܰܕܩܽܘܢ: ܚܰܛܳܝ̈ܶܐ ܒܳܟ ܢܶܬܦܢܽܘܢ: ܚܰܝ̈ܳܒܶܐ ܒܳܟ ܢܶܬܟܰܢܟܽܘܢ: ܛܳܥܰܝ̈ܳܐ ܒܳܟ ܢܶܫܬܰܟܚܽܘܢ: ܛܳܠܽܘ̈ܡܶܐ ܒܳܟ ܢܶܬܚܰܢܢܽܘܢ: ܝܽܘܩܪ̈ܶܐ ܒܳܟ ܢܶܬܩܰܠܠܽܘܢ: ܝܰܩܺܝܪ̈ܶܐ ܒܳܟ ܢܶܬܚܰܣܢܽܘܢ: ܟܺܐܒ̈ܶܐ ܒܳܟ ܢܶܬܰܐܣܽܘܢ: ܟܽܘܪ̈ܗܳܢܶܐ ܒܳܟ ܢܶܬܚܰܠܡܽܘܢ: ܠܽܘ̈ܚܳܡܶܐ ܒܳܟ ܢܶܥܒܪܽܘܢ: ܡܰܚܘ̈ܳܬܳܐ ܒܳܟ ܢܶܫܬܰܬܩ̈ܳܢ: ܡܰܪ̈ܕܘܳܬܳܐ ܒܳܟ ܢܶܒ̈ܛܠܳܢ: ܢܶܟ̈ܝܳܢܶܐ ܒܳܟ ܢܶܙܕܰܓܪܽܘܢ: ܣܰܩܽܘ̈ܒܠܐ ܒܳܟ ܢܶܫܬܰܝܢܽܘܢ: ܥܳܫܽܘ̈ܩܶܐ ܒܳܟ ܢܶܫܬܰܦܽܘܢ: ܦܰܐܝ̈ܳܬܳܐ ܒܳܟ ܢܶܣܓ̈ܝܳܢ: ܦܳܠܰܓ̈ܘܳܬܳܐ ܒܳܟ ܢܶܬܚܰܝ̈ܕܳܢ: ܨܳܐܝ̈ܘܳܬܳܐ ܒܳܟ ܢܶܬܡܰܪ̈ܩܳܢ ܨܽܘܥ̈ܨܳܥܶܐ ܒܳܟ ܢܶܬܚܰܠܠܽܘܢ: ܩܰܠܽܘ̈ܛܶܐ ܒܳܟ ܢܶܫܬܰܦܥܽܘܢ: ܪ̈ܳܕܽܘܦܶܐ ܒܳܟ ܢܶܬܛܰܠܩܽܘܢ: ܪ̈ܺܝܫܳܢܶܐ ܒܳܟ ܢܶܬܝܰܩܪܽܘܢ: ܫܰܝܢܰܢ ܒܳܟ ܢܶܣܓܶܐ: ܫܠܳܡܳܟ ܒܳܟ ܢܶܫܬܰܪܬܰܚ: ܬܶܫܒܽܘܚܬܰܢ ܒܳܟ ܬܶܬܡܬܰܚ: ܬܰܘܕܺܝܬܰܢ ܒܳܟ ܬܶܬܢܰܨܰܚ: ܥܰܢܺܝ̈ܕܶܐ ܡܗܰܝ̈ܡܢܶܐ ܕܥܰܠ ܣܰܒܪܶܗ ܕܡܳܪܳܟ ܫܟܶܒܘ: ܒܰܨܠܰܘ̈ܳܬܳܟ ܒܰܐܘ̈ܳܢܶܐ ܐܽܘܪ̈ܫܠܶܡܳܝܶܐ ܢܶܬܬܢܺܝܚܽܘܢ: ܟܽܠܰܢ ܒܰܚܕܳܐ ܒܰܪܬ ܩܳܠܐ ܥܙܺܝܠܰܬ݀ ܒܫܽܘܒܚܳܐ: ܘܰܡܚܰܪܪܰܬ݀ ܡ̣ܶܢ ܫܶܬܩܳܐ: ܢܩܰܪܶܒ ܫܽܘܒܚܳܐ ܘܢܰܣܶܩ ܬܰܘܕܺܝܬܳܐ: ܠܐܒܳܐ ܓܢܺܝܙܳܐ ܕܰܓܒܳܟ: ܘܠܰܒܪܳܟ ܣܓܺܝܕܳܐ ܕܝܰܩܪܳܟ: ܘܰܠܪܽܘܚܳܐ ܩܰܕܺܝܫܳܐ ܕܟܰܠܠܳܟ ܒܰܟܠܺܝܠܐ ܕܙܳܟܽܘܬܳܐ: ܗܳܫܳܐ܀

 

 

 

ܥܛܪܐ

 

 

 

ܩܰܒܶܠ ܡܳܪܝܳܐ ܐܠܰܗܳܐ ܠܦܺܝܪܡܳܐ ܗܳܢܳܐ ܕܰܡܩܰܪܒܳܐ ܒܨܺܝܪܽܘܬܰܢ ܘܚܰܛܳܝܽܘܬܰܢ ܩܕܳܡܰܝܟ: ܒܕܽܘܟܪܳܢܶܗ ܕܩܰܕܺܝܫܳܐ ܘܓܰܒܝܳܐ ܡܳܪܝ ܐܳܣܝܳܐ ܢܶܬܬܢܺܝܚ ܒܶܗ ܨܶܒܝܳܢܳܟ: ܘܬܶܬܪܰܥܶܐ ܒܶܗ ܡܳܪܽܘܬܳܟ: ܢܶܬܚܰܣܽܘܢ ܒܶܗ ܚܰܛܳܝ̈ܶܐ: ܢܶܬܩܰܒܠܽܘܢ ܒܶܗ ܬܰܝ̈ܳܒܶܐ: ܘܢܶܫܬܰܝܢܽܘܢ ܒܶܗ ܪ̈ܓܺܝܙܶܐ: ܢܶܫܬܰܦܽܘܢ ܒܶܗ ܐܰܟܬܳܢ̈ܶܐ: ܢܶܙܕܰܗܽܘܢ ܒܶܗ ܟܳܗ̈ܢܶܐ: ܘܢܶܬܟܰܢܟܽܘܢ ܒܶܗ ܡܫܰܡ̈ܫܳܢܶܐ: ܢܶܬܪܰܒܽܘܢ ܒܶܗ ܛܠܳܝ̈ܶܐ ܘܫܰܒܪ̈ܶܐ: ܢܶܬܪܰܥܽܘܢ ܒܶܗ ܡܰܠܟ̈ܶܐ ܘܪ̈ܺܝܫܳܢܶܐ: ܘܢܶܫܬܰܝܢܽܘܢ ܒܶܗ ܫܰܠܺܝ̈ܛܳܢܶܐ: ܘܢܶܬܚܰܝܠܽܘܢ ܒܶܗ ܣܳܒ̈ܶܐ: ܘܢܶܬܢܰܛܪܽܘܢ ܒܶܗ ܓܰܒܪ̈ܶܐ: ܢܶܣܬܰܬܪ̈ܳܢ ܒܶܗ ܢܶܫ̈ܶܐ: ܘܢܶܬܢܰܛܪ̈ܳܢ ܒܶܗ ܒܬܽܘ̈ܠܳܬܳܐ: ܘܢܶܣܬܰܥܪܽܘܢ ܒܶܗ ܥܰܢܺܝ̈ܕܶܐ ܡܗܰܝ̈ܡܢܶܐ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ܀

 

 

 

ܩܘܡܐ ܕܠܠܝܐ

 

ܦܪܘܡܝܘܢ

 

 

 

ܬܶܫܒܽܘܚܬܳܐ: ܠܗܰܘ ܡܳܪܳܐ ܛܳܒܳܐ ܘܒܰܣܺܝܡܳܐ: ܕܚܰܝܶܠ ܠܥܰܒܕܶܗ ܡܳܪܝ ܐܳܣܝܳܐ ܒܟܽܠܗܽܘܢ ܕܽܘܒܳܪ̈ܶܐ ܫܰܦܺܝܪ̈ܶܐ: ܘܝܽܘܠܦܳܢ̈ܶܐ ܕܟܰܝ̈ܳܐ ܕܪܽܘܚܳܐ ܩܰܕܺܝܫܳܐ: ܠܗܰܘ ܕܰܐܣܓܺܝ ܘܝܰܩܰܪ ܝܰܘܡܳܐ ܕܕܽܘܟܪܳܢܶܗ ܒܥܺܕ̈ܳܬܳܐ ܕܰܒܟܽܠܳܗ̇ ܥܳܡܰܪܬܳܐ: ܘܗܳܐ ܟܽܠ ܥܰܡܡܺܝ̈ܢ ܙܳܡܪܺܝܢ ܫܽܘܒܚܳܐ ܠܡܳܪܝܳܐ ܕܝܰܗܒ ܒܺܐܝ̈ܕܰܘܗܝ ܥܽܘܕܪ̈ܳܢܶܐ ܘܳܐܣ̈ܘܳܬܳܐ: ܘܡܰܒܰܥ ܡ̣ܶܢ ܓܰܪ̈ܡܰܘܗܝ ܟܽܠ ܚܽܘܠܡܳܢ̈ܶܐ ܠܟܺܐܒܰܝ̈ܗܽܘܢ ܘܳܐܦ ܐܳܣܝܽܘܬܳܐ ܠܚܰܒܪ̈ܳܬܗܽܘܢ ܡ̣ܶܢ ܚܰܝܠܐ ܐܠܰܗܳܝܳܐ ܕܫܳܪܶܐ ܒܓܰܪ̈ܡܰܘܗܝ ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܨܶܡܚܳܐ ܡܬܽܘܡܳܝܳܐ: ܘܢܽܘܗܪܳܐ ܫܰܪܺܝܪܳܐ ܠܐ ܡܶܬܕܰܪܟܳܢܳܐ: ܘܠܐ ܡܶܬܥܰܩܒܳܢܳܐ ܘܠܐ ܡܶܬܒܰܨܝܳܢܳܐ: ܕܗ̣ܽܘ ܨܒܳܐ ܕܢܶܥܒܶܕ ܠܶܗ ܣܳܓܽܘ̈ܕܶܐ ܘܒܰܝܬܳܝ̈ܶܐ ܡ̣ܶܢ ܥܰܦܪ̈ܳܢܶܐ: ܘܰܥܒܰܕ ܐܶܢܽܘܢ ܦܳܠܚ̈ܶܐ ܪ̈ܽܘܚܳܢܳܝܶܐ: ܟܰܕ ܐܶܫܬܰܕܰܪ ܓܰܒܪܺܐܶܝܠ ܡܰܠܐܟܳܐ ܡ̣ܶܢ ܣܶܕܪ̈ܶܐ ܕܰܫܡܰܝ̈ܳܢܶܐ ܕܰܢܣܰܒܰܪ ܥܰܠ ܒܰܛܢܶܗ: ܘܶܐܬܺܝܠܶܕ ܡ̣ܶܢ ܒܬܽܘܠܬܳܐ ܠܐ ܡܢܰܣܝܰܬ݀ ܒܙܽܘܘܳܓܳܐ ܝܳܠܕܰܬ ܐܠܰܗܳܐ ܡܰܪܝܰܡ: ܘܫܰܡܠܺܝ ܟܽܠܳܗ̇ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ: ܘܰܓܒܳܐ ܠܶܗ ܣܳܓܽܘ̈ܕܶܐ ܫܰܪܺܝܪ̈ܶܐ ܥܰܠ ܐܰܪܥܳܐ: ܕܚܰܕ ܡܶܢܗܽܘܢ ܐܺܝܬܰܘܗܝ ܢܰܨܺܝܚ ܫܽܘܦܪ̈ܶܐ ܡܳܪܝ ܐܳܣܝܳܐ ܗܳܢܳܐ ܕܠܐ ܣܳܦܩܺܝܢ ܦܽܘܡܰܝ̈ܢ ܕܰܢܡܰܠܠܽܘܢ ܬܡܺܝ̈ܗܳܬܶܗ: ܐܳܦܠܐ ܠܶܫܳܢܰܝ̈ܢ ܕܢܶܫܬܰܥܽܘܢ ܬܶܕܡܪ̈ܳܬܶܗ: ܗܳܢܳܐ ܕܰܐܝܟ ܡܰܚܙܺܝܬܳܐ ܐܶܬܚܙܺܝ ܒܥܳܠܡܳܐ ܗܳܢܳܐ: ܘܗܳܐ ܠܝܰܘܡܳܐ ܕܕܽܘܟܪܳܢܶܗ ܡܥܰܕܥܕܺܝܢܰܢ: ܘܒܰܦܨܺܝܚܽܘܬܳܐ ܕܶܝܢ ܪܽܘܚܳܢܳܝܬܳܐ ܠܘܳܬܶܗ ܐܳܡܪܺܝܢܰܢ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܐܰܪܕܺܝܟܠܐ ܚܰܟܺܝܡܳܐ ܕܰܒܢܳܐ ܠܥܺܕܬܳܐ ܥܰܠ ܦܶܛܪܽܘܣ ܟܺܐܦܳܐ ܕܰܫܪܳܪܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܒܽܘܟܪܳܐ ܕܰܐܬܠܺܝ̈ܛܶܐ ܘܒܰܪ ܬܶܓܡܳܐ ܕܰܓܡܺܝܪ̈ܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܓܰܒܪܳܐ ܓܰܢ̱ܒܳܪܳܐ ܕܰܙܟܳܝܗܝ ܠܰܢܟܺܝܠܐ ܘܕܳܫܶܗ ܠܰܛܪܽܘܢܳܐ ܒܥܶܠܕܒܳܒܰܢ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܘܢܰܨܺܝܚܳܐ ܡܳܪܝ ܐܳܣܝܳܐ ܕܕܽܘܡܣܳܐ ܠܐ ܡܶܙܕܰܥܙܥܳܢܳܐ ܕܶܐܬܬܣܺܝܡ ܒܥܺܕܬܳܐ ܩܰܕܺܝܫܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܗܰܝܟܠܐ ܫܒܺܝܚܳܐ ܕܒܶܗ ܗ̣ܽܘ ܥܳܡܰܪ ܪܽܘܚܳܐ ܩܰܕܺܝܫܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܐܳܣܝܳܐ: ܘܰܥܕܳܐ ܕܚܰܝ̈ܶܐ ܕܰܠܘܳܬܶܗ ܨܳܝܒܺܝܢ ܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ: ܙܰܝܢܳܐ ܚܰܣܺܝܢܳܐ ܕܒܶܗ ܚܳܒ ܒܺܝܫܳܐ ܒܥܶܠܕܰܪܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܚܰܝܠܬܳܢܳܐ ܘܰܙܪܺܝܙܳܐ ܠܽܘܩܒܰܠ ܐܶܪ̈ܶܣܺܝܣ ܕܰܓ̈ܳܠܳܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܛܳܪܽܘܢܳܐ ܕܫܺܐܕ̈ܶܐ ܒܺܝ̈ܫܶܐ ܡ̣ܶܢ ܥܳܢ̈ܳܐ ܙܒܺܝܢܰܬ ܒܰܕܡܶܗ ܕܰܡܫܺܝܚܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܝܽܘܩܢܳܐ ܫܰܦܺܝܪܳܐ ܘܨܽܘܪܬܳܐ ܪܚܺܝܡܰܬ݀ ܥܰܠ ܡܰܠܐܟ̈ܶܐ: ܛܽܘܒܰܝܟ ܐܰܒܽܘܢ ܢܰܨܺܝܚܳܐ ܡܳܪܝ ܐܳܣܝܳܐ ܟܶܢܳܪܳܐ ܚܰܠܝܳܐ ܕܪܽܘܚܳܐ ܩܰܕܺܝܫܳܐ ܙܡܰܪ ܒܶܗ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܐܳܣܝܳܐ ܠܡܺܐܢܳܐ ܘܢܰܘܚܳܐ ܕܰܐܠܺܝ̈ܨܶܐ ܘܡܛܪ̈ܦܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܐܳܣܝܳܐ ܢܽܘܪܒܳܐ ܫܰܦܺܝܪܳܐ ܕܰܫܘܰܚ ܘܰܣܠܶܩ ܥܰܠ ܬܰܦܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܣܳܚܽܘܦܳܐ ܕܫܺܐܕ̈ܶܐ ܘܰܡܛܰܠܩܳܢܳܐ ܕܚܰܫ̈ܶܐ ܒܺܝ̈ܫܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܝ ܐܳܣܝܳܐ ܦܺܝܪܡܳܐ ܡܪܰܥܝܳܢܳܐ ܕܒܰܣܺܝܡ ܪܺܝܚܶܗ ܠܥܶܠܳܝ̈ܶܐ ܕܶܝܢ ܘܰܠܬܰܚ̈ܬܳܝܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܢܰܨܺܝܚܳܐ ܡܳܪܝ ܐܳܣܝܳܐ ܨܰܝܳܪܳܐ ܡܗܺܝܪܳܐ ܕܨܳܪ ܥܰܠ ܒܶܝܬ ܥܰܝܢܰܘ̈ܗܝ ܨܠܺܝܒܳܐ ܡܝܰܩܪܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܩܰܕܺܝܫܳܐ ܡܳܪܝ ܐܳܣܝܳܐ ܪܺܝܫܳܐ ܪܰܒܳܐ ܘܩܳܝܽܘܡܳܐ ܚܰܝܠܬܳܢܳܐ ܕܺܝܚܺܝ̈ܕܳܝܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܓܰܒܝܳܐ ܡܳܪܝ ܐܳܣܝܳܐ ܫܽܘܪܳܐ ܚܰܣܺܝܢܳܐ ܕܰܡܢܰܛܰܪ ܠܰܡܗܰܝ̈ܡܢܶܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ ܚܠܺܝܨܳܐ ܡܳܪܝ ܐܳܣܝܳܐ: ܬܰܦܳܐ ܡܚܰܕܝܳܢܳܐ ܕܰܐܫܩܺܝ ܠܰܡܗܰܝ̈ܡܢܶܐ ܡܰܝ̈ܳܐ ܚܰܝ̈ܶܐ: ܬܳܐ ܒܰܫܠܳܡܳܐ ܬܳܓܳܐ ܡܥܰܠܝܳܐ ܕܥܺܕܬܳܐ ܒܰܪܬ ܐܳܪ̈ܳܡܳܝܶܐ: ܬܳܐ ܒܰܫܠܳܡܳܐ ܫܶܬܶܐܣܬܳܐ ܫܰܪܺܝܪܬܳܐ ܘܦܶܛܪܽܘܣܳܝܬܳܐ: ܬܳܐ ܒܰܫܠܳܡܳܐ ܪܽܘܡܪܳܡܳܐ ܕܟܳܗܢܽܘܬܳܐ ܫܠܺܝܚܳܝܬܳܐ: ܬܳܐ ܒܰܫܠܳܡܳܐ ܩܽܘܒܰܪܢܺܝܛܺܝ ܡܗܺܝܪܳܐ ܘܚܰܟܺܝܡܳܐ: ܬܳܐ ܒܰܫܠܳܡܳܐ ܨܶܒܬܳܐ ܘܚܽܘܬܪܳܐ ܗܕܺܝܪܳܐ ܕܕܰܝܪ̈ܳܬܳܐ: ܬܳܐ ܒܰܫܠܳܡܳܐ ܦܺܝܠܺܝܣܽܘܦܳܐ ܒܥܰܡ̈ܠܐ ܕܺܝܚܺܝܕܳܝܽܘܬܳܐ: ܬܳܐ ܒܰܫܠܳܡܳܐ ܥܳܕܽܘܪܳܐ ܘܰܡܣܰܝܥܳܢܳܐ ܕܒܳܝ̈ܫܶܐ ܘܡܶܣ̈ܟܺܢܶܐ: ܬܳܐ ܒܰܫܠܳܡܳܐ ܣܓܽܘܠܐ ܚܰܠܝܳܐ ܕܰܒܣܰܬܳܐ ܒܪܺܝܟܬܳܐ ܒܟܰܪ: ܬܳܐ ܒܰܫܠܳܡܳܐ ܢܶܒܥܳܐ ܚܰܠܝܳܐ ܡܦܰܝܶܓ ܠܰܨ̈ܗܰܝܳܐ: ܬܳܐ ܒܰܫܠܳܡܳܐ ܡܥܺܝܢܳܐ ܕܚܰܝ̈ܶܐ ܘܪܶܕܝܳܐ ܕܒܰܣܺܝܡܽܘܬܳܐ: ܬܳܐ ܒܰܫܠܳܡܳܐ ܠܽܘܒܳܒܳܐ ܕܟܽܠܗܽܘܢ ܥܰܝܺܝ̈ܩܶܐ ܘܰܐܠܺܝ̈ܨܶܐ: ܬܳܐ ܒܰܫܠܳܡܳܐ ܟܰܘܟܒܳܐ ܨܰܦܪܳܝܳܐ ܕܡܰܢܗܰܪ ܩܕܳܡ ܡܳܪܶܗ: ܬܳܐ ܒܰܫܠܳܡܳܐ ܝܰܡܳܐ ܕܚܶܟ̈ܡܳܬܳܐ ܘܡܰܒܽܘܥܳܐ ܕܚܰܠܝܽܘܬܳܐ ܚܠܽܘܠܐ ܦܰܪܕܰܝܣܳܝܳܐ: ܘܒܽܘܣܳܡܳܐ ܪܽܘܚܳܢܳܝܳܐ: ܬܳܐ ܒܰܫܠܳܡܳܐ ܘܰܪܕܳܐ ܕܰܚܠܐܷ ܪܺܝܚܶܗ ܡ̣ܶܢ ܗܶܪ̈ܽܘܡܶܐ: ܬܳܐ ܒܰܫܠܳܡܳܐ ܗܰܡܢܺܝܟܳܐ ܕܰܬܠܐܷ ܒܨܰܘܪܳܗ̇ ܕܥܺܕܬܳܐ ܩܰܕܺܝܫܬܳܐ: ܬܳܐ ܒܰܫܠܳܡܳܐ ܒܽܘܝܳܐܳܐ ܕܰܡܥܳܩ̈ܶܐ: ܘܠܽܘܒܳܒܳܐ ܕܰܐܒܺܝ̈ܠܐ: ܬܳܐ ܒܰܫܠܳܡܳܐ ܐܰܓܽܘܢܺܝܣܛܳܐ ܚܠܺܝܨܳܐ ܘܢܰܚܫܺܝܪܬܳܢܳܐ: ܬܳܐ ܒܰܫܠܳܡܳܐ ܢܰܨܺܝܚ ܫܽܘܦܪ̈ܶܐ ܓܰܒܝܳܐ ܡܳܪܝ ܐܳܣܝܳܐ ܫܳܘܶܐ ܠܛܽܘ̈ܒܶܐ ܫܡܰܝ̈ܳܢܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܐܰܢ̱ܬ ܐܺܝܬܰܝܟ ܒܶܝܬ ܓܰܘܣܳܐ ܪܰܒܳܐ ܕܬܰܝ̈ܳܒܶܐ: ܐܰܢ̱ܬ ܐܺܝܬܰܝܟ ܐܰܒܳܐ ܕܝܰܬܡ̈ܶܐ ܘܝܳܨܽܘܦܳܐ ܕܰܐܪ̈ܡܠܳܬܳܐ: ܐܰܢ̱ܬ ܐܺܝܬܰܝܟ ܓܰܢܬܳܐ ܕܒܽܘ̈ܣܳܡܶܐ ܘܦܰܪܕܰܝܣܳܐ ܥܕܶܢܳܝܳܐ: ܐܰܢ̱ܬ ܐܺܝܬܰܝܟ ܗܶܕܪܳܐ ܕܟܳܗ̈ܢܶܐ ܘܰܡܫܰܡ̈ܫܳܢܶܐ: ܐܰܢ̱ܬ ܐܺܝܬܰܝܟ ܘܺܝܠܐ ܕܚܰܝ̈ܶܐ ܪ̈ܽܘܚܳܢܳܝܶܐ ܘܣܶܬܳܪܳܐ ܕܰܦܪ̈ܺܝܩܶܐ: ܐܰܢ̱ܬ ܐܺܝܬܰܝܟ ܙܳܪܽܘܥܳܐ ܕܫܰܝܢܳܐ ܘܕܰܫܠܳܡܳܐ ܒܰܦܢܺܝܬܰܢ: ܐܰܢ̱ܬ ܐܺܝܬܰܝܟ ܚܽܘܪܳܪܳܐ ܕܥܰܒ̈ܕܶܐ ܘܰܡܚܰܘܪܳܢܳܐ ܕܰܡܟܰܬܡ̈ܶܐ: ܐܰܢ̱ܬ ܐܺܝܬܰܝܟ ܛܽܘܝܳܒܳܐ ܕܰܩܪ̈ܰܝܳܐ: ܘܒܶܝܬ ܓܰܘܣܳܐ ܕܰܐܠܺܝ̈ܨܶܐ: ܐܰܢ̱ܬ ܐܺܝܬܰܝܟ ܝܳܨܽܘܦܳܐ ܕܒܳܝ̈ܫܶܐ: ܘܰܡܦܰܪܢܣܳܢܳܐ ܕܰܨܪ̈ܺܝܟܶܐ: ܐܰܢ̱ܬ ܐܺܝܬܰܝܟ ܟܽܘܢܳܫܳܐ ܕܰܡܒܰܕܪ̈ܶܐ: ܘܰܡܣܰܬܪܳܢܳܐ ܕܡܶܣ̈ܟܺܢܶܐ: ܐܰܢ̱ܬ ܐܺܝܬܰܝܟ ܠܶܘܝܳܐ ܕܚܳܙܽܘ̈ܩܶܐ: ܘܰܠܡܺܐܢܳܐ ܕܰܡܛܰܪ̈ܦܶܐ: ܐܰܢ̱ܬ ܐܺܝܬܰܝܟ ܡܛܰܠܩܳܢܳܐ ܕܚܽܘ̈ܫܳܒܶܐ ܨ̈ܳܐܶܐ ܘܪ̈ܶܥܝܳܢܶܐ ܒܺܝ̈ܫܶܐ: ܐܰܢ̱ܬ ܐܺܝܬܰܝܟ ܢܳܛܽܘܪܳܐ ܕܫܰܒܪ̈ܶܐ: ܘܰܡܢܰܛܪܳܢܳܐ ܕܰܛܠܳܝ̈ܶܐ: ܐܰܢ̱ܬ ܐܺܝܬܰܝܟ ܣܳܡܽܘܟܳܐ ܕܣܳܒ̈ܶܐ ܡܚܺܝ̈ܠܐ ܘܰܬܥܺܝ̈ܫܶܐ: ܐܰܢ̱ܬ ܐܺܝܬܰܝܟ ܥܽܘܬܪܳܐ ܕܰܣܢܺܝ̈ܩܶܐ: ܘܫܽܘܒܗܳܪܳܐ ܕܰܡܗܰܝ̈ܡܢܶܐ: ܐܰܢ̱ܬ ܐܺܝܬܰܝܟ ܦܽܘܢܳܝܳܐ ܕܰܛܪ̈ܺܝܕܶܐ ܘܰܡܩܰܪܒܳܢܳܐ ܕܪ̈ܰܚܺܝܩܶܐ: ܐܰܢ̱ܬ ܐܺܝܬܰܝܟ ܨܳܝܽܘܒܳܐ ܕܰܫܒܰܝ̈ܳܐ ܘܰܡܥܰܕܪܳܢܳܐ ܕܰܬܒܺܝܪ̈ܶܐ: ܐܰܢ̱ܬ ܐܺܝܬܰܝܟ ܩܳܝܽܘܡܳܐ ܕܢܰܦܺܝ̈ܠܐ: ܘܣܳܡܽܘܟܳܐ ܕܰܡܚܺܝ̈ܠܐ: ܐܰܢ̱ܬ ܐܺܝܬܰܝܟ ܪܘܳܚܬܳܐ ܕܰܐܠܺܝ̈ܨܶܐ ܘܰܢܦܺܐܫܳܐ ܕܰܡܛܰܪ̈ܦܶܐ: ܐܰܢ̱ܬ ܐܺܝܬܰܝܟ ܫܽܘܘܙܳܒܳܐ ܕܡ̣ܶܢ ܢܶܣܝܽܘ̈ܢܶܐ ܩܫܰܝ̈ܳܐ: ܐܰܢ̱ܬ ܐܺܝܬܰܝܟ ܐܳܣܝܳܐ ܕܦܰܓܪ̈ܶܐ ܘܡܰܚܠܡܳܢܳܐ ܕܢܰܦ̈ܫܳܬܳܐ: ܥܰܠܗܳܕܶܐ ܒܳܥܶܝܢܰܢ ܘܡܶܬܟܰܫܦܺܝܢܰܢ ܠܳܟ ܡܳܪܝܳܐ ܡܳܪܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܳܟ ܒܕܽܘܟܪܳܢ ܐܰܬܠܺܝܛܳܟ: ܫܰܟܶܢ ܠܰܢ ܒܶܗ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܩܰܘܡܳܐ ܠܐ ܥܕܺܝܠܐ ܩܳܢܶܝܢܰܢ: ܘܦܰܪܶܗܣܺܝܰܐ ܕܰܩܕܳܡ ܒܺܐܡܰܐ ܕܺܝܠܳܟ ܙܺܝܥܬܳܐ ܘܰܕܚܺܝܠܬܳܐ: ܘܚܰܣܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܕܡܶܢܰܢ ܦܪܰܫܘ ܘܰܠܘܳܬܳܟ ܡܰܢܰܥܘ: ܐܰܢܺܝܚ ܐܶܢܽܘܢ ܒܰܐܘ̈ܳܢܶܐ ܕܺܝܠܳܟ ܛܽܘܒ̈ܬܳܢܶܐ: ܘܒܰܡ̈ܛܰܠܠܐ ܕܢܽܘܗܪܳܐ ܘܕܰܪܘܳܙܳܐ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ܀

 

 

 

ܦܪܘܡܝܘܢ ܕܨܦܪܐ

 

 

 

ܬܶܫܒܽܘܚܬܳܐ: ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܓܒܳܐ ܠܶܗ ܟܳܗ̈ܢܶܐ ܙܰܕܺܝ̈ܩܶܐ ܒܕܳܪ̈ܺܝܢ ܕܳܪ̈ܺܝܢ: ܕܰܢܩܽܘܡܽܘܢ ܥܰܠ ܬܶܫܡܫܬܶܗ ܘܰܢܫܰܡܫܽܘܢ ܐܰܝܟ ܕܰܟܬܺܝܒܳܐ: ܘܝܺܕܰܥ ܐܶܢܽܘܢ ܡ̣ܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ: ܗ̇ܰܘ ܕܰܓܒܳܝܗܝ ܠܢܰܨܺܝܚܳܐ ܡܳܪܝ ܐܳܣܝܳܐ: ܘܦܰܪܫܶܗ ܡ̣ܶܢ ܟܰܪܣܳܐ ܐܶܡܗܳܝܬܳܐ: ܘܥܰܒܕܶܗ ܡܳܐܢܳܐ ܠܐܝܩܳܪܶܗ: ܕܢܶܬܬܢܺܝܚ ܒܶܗ ܐܰܝܟ ܨܶܒܝܳܢܶܗ: ܘܰܐܓܥܶܠ ܒܺܐܝ̈ܕܰܘܗܝ ܒܶܝܬ ܓܰܙܶܗ ܕܰܢܦܰܪܢܶܣ ܐܰܝܟ ܦܽܘܩܕܳܢܶܗ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܥܳܒܽܘܕܳܐ ܘܰܡܬܰܩܢܳܢܳܐ ܕܥܳܠܡ̈ܶܐ: ܗ̇ܰܘ ܕܰܒܨܶܒܝܳܢܳܐ ܕܺܝܠܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܒܪܰܝܬ ܠܳܟ ܣܶܕܪ̈ܶܐ ܘܬܶܓ̈ܡܶܐ ܕܢܽܘܪܳܐ ܐܳܟܶܠܬܳܐ: ܥܶܣܪܳܐ ܛܶܟ̈ܣܶܐ ܪ̈ܽܘܚܳܢܳܝܶܐ ܕܢܶܗܘܽܘܢ ܥܰܠ ܬܶܫܡܫܬܳܐ ܕܰܐܠܳܗܽܘܬܳܟ: ܘܰܠܗܰܘ ܕܡܳܪܽܘܕܽܘܬܳܐ ܐܶܬܪܰܥܺܝ: ܡ̣ܶܢ ܒܰܝܢܳܬܗܽܘܢ ܙܢܰܩܬ ܐܰܝܟ ܟܺܐܦܳܐ ܕܕܶܚܪܳܐ: ܘܡ̣ܶܢ ܨܶܝܕܰܝ̈ܗܽܘܢ ܦܪܰܩܬ: ܘܫܶܦܪܰܬ݀ ܠܪܰܒܽܘܬܳܟ: ܘܐ̱ܢܳܫܳܐ ܒܨܰܠܡ ܐܠܰܗܽܘܬܳܟ ܥܒܰܕܬ: ܗ̇ܰܘ ܕܶܝܢ ܡܳܪܽܘܕܳܐ ܘܣܳܢܳܐܐ: ܚܣܳܡܳܐ ܐܶܬܡܠܺܝ: ܡܶܛܽܠ ܕܰܒܦܰܪܕܰܝܣܳܐ ܕܒܽܘ̈ܣܳܡܶܐ ܐܰܥܒܰܪܬܳܝܗܝ: ܘܰܠܚܶܘܝܳܐ ܡ̇ܰܢ ܥܩܰܠܩܠܐ ܐܶܬܕܰܡܺܝ: ܘܩܰܪ̈ܨܶܐ ܕܪܰܒܽܘܬܳܟ ܩܕܳܡ ܗ̇ܰܘ ܕܰܓܒܰܠܬ ܐܶܟܰܠ ܘܰܠܡܶܠܟܶܗ ܣܪܺܝܚܳܐ ܐܶܬܪܰܢܺܝ: ܒܢܰܩܺܝܦܽܘܬܳܐ ܕܥܰܕܪܶܗ ܘܰܒܫܶܕܠܐ ܐ̱ܢܳܫܳܝܳܐ ܐܶܬܬܰܛܥܺܝ: ܘܰܐܘܫܶܛ ܐܺܝܕܶܗ ܠܡܶܡܪܰܛ ܦܺܐܪ ܡܰܘܬܳܐ ܐܶܬܪܡܺܝ: ܘܥܶܨܝܳܝܳܐ ܕܪܰܒܽܘܬܳܟ ܐܶܬܚܙܺܝ: ܘܰܛܪܽܘܕܝܳܐ ܘܰܡܣܳܡ ܒܪܺܝܫܳܐ ܡܶܢܳܟ ܕܺܝܢܳܐ ܟܺܐܢܳܐ ܩܰܒܶܠ: ܘܡܺܝܙܪ̈ܳܢܶܐ ܚܶܣܕܳܢܳܝ̈ܶܐ ܐܶܬܟܒܶܢ: ܘܰܠܒܰܪܬ ܩܳܠܐ ܥܰܙܺܝܙܬܳܐ ܕܡܶܢܳܟ ܐܶܬܬܰܙܥܩܰܬ݀ ܕܡ̣ܶܢ ܥܰܦܪܳܐ ܐܰܢ̱ܬ ܘܰܠܥܰܦܪܳܐ ܬܶܗܦܽܘܟ ܫܡܰܥ: ܘܰܒܗܰܘܬܳܐ ܕܛܳܥܝܽܘܬܳܐ ܐܶܣܬܰܦܰܚ ܘܡ̣ܶܢ ܗܳܪܟܳܐ ܐܶܫܬܰܠܰܛ ܡܰܘܬܳܐ ܥܰܠ ܨܰܠܡܳܐ ܘܙܽܘܙܳܐ ܡܰܠܟܳܝܳܐ: ܟܰܕ ܚܙܰܝܬ ܐܳܘ ܒܪܳܐ ܘܡܶܠܬܶܗ ܕܰܐܒܳܐ: ܠܨܰܠܡܳܐ ܘܰܥܒܳܕ ܐܺܝܕܰܝ̈ܟ ܕܡ̣ܶܢ ܥܳܫܽܘܩܳܐ ܐܶܬܥܰܒܕܰܕ: ܠܐ ܣܰܝܒܰܪܬ ܕܰܥܒܳܕܳܐ ܕܺܐܝܕܰܝ̈ܟ ܡ̣ܶܢ ܚܽܘܨܳܦܶܗ ܕܒܺܝܫܳܐ ܢܶܬܡܪܰܕ: ܫܰܕܰܪܬ ܠܽܘܩܕܰܡ ܢܒܺܝ̈ܶܐ ܘܚܰܙܳܝ̈ܶܐ ܠܡܰܟܙܳܪܽܘ ܒܟܽܠ ܡܢܰܘ̈ܳܢ ܘܰܒܟܽܠ ܕܶܡܘ̈ܳܢ ܥܰܠ ܦܽܘܪܩܳܢ ܨܰܠܡܳܟ: ܒܚܰܪܬܳܐ ܕܶܝܢ ܕܝܰܘ̈ܡܳܬܳܐ ܘܰܕܙܰܒ̈ܢܶܐ: ܒܰܙܢܳܐ ܕܰܡܥܰܠܰܝ  ܡ̣ܶܢ ܡܶܠܬܳܐ: ܐܶܬܓܰܫܰܡܬ ܡ̣ܶܢ ܪܽܘܚܳܐ ܩܰܕܺܝܫܳܐ: ܘܡ̣ܶܢ ܠܐ ܡܢܰܣܝܰܬ݀ ܒܙܽܘܘܳܓܳܐ ܝܳܠܕܰܬ ܐܠܰܗܳܐ ܡܰܪܝܰܡ ܒܬܽܘܠܬܳܐ ܘܶܐܬܺܝܠܶܕܬ ܡܶܢܳܗ̇ ܟܰܕ ܢܛܺܝܪܺܝܢ ܛܰܒ̈ܥܶܐ ܕܰܒܬܽܘܠܬܳܐ ܩܰܕܺܝܫܬܳܐ: ܘܶܐܬܗܰܦܰܟܬ ܥܰܡܰܢ ܡܕܰܒܪܳܢܳܐܝ̣ܬ ܠܬܽܘܪܳܨܰܢ ܘܰܒܫܽܘܠܳܡ ܡܕܰܒܪܳܢܽܘܬܳܟ ܐܠܰܗܳܝܬܳܐ ܥܰܠܺܝܬ ܝܳܬܳܟ ܠܪܰܘܡܳܐ ܕܰܙܩܺܝܦܳܐ ܘܰܢܓܰܕܬ ܠܟܽܠ ܠܘܳܬܳܟ: ܘܚܰܠܶܠܬܳܝܗܝ ܠܗܰܘ ܕܒܰܣܝܳܢܳܐ ܐܶܨܛܰܥܨܰܥ ܗܘܳܐ: ܘܪܰܨܶܨܬܳܝܗܝ ܠܪܺܝܫܶܗ ܕܚܰܪܡܳܢܳܐ: ܘܰܐܦܢܺܝܬ ܛܪܺܝܕܳܐ ܠܝܳܪܬܽܘܬܶܗ ܘܰܐܥܒܰܕܬܳܝܗܝ ܠܡܳܪܽܘܕܳܐ ܒܶܙܚܳܐ ܘܰܕܝܳܫܳܐ ܩܕܳܡ ܝܰܠܕܰܘ̈ܗܝ: ܘܰܐܪܡܺܝܬ ܢܽܘܪܳܐ ܕܰܐܠܳܗܽܘܬܳܟ ܒܥܳܠܡܳܐ: ܗ̇ܳܝ ܕܣܶܦܰܬ݀ ܒܥܰܒܕܳܐ ܕܺܝܠܳܟ ܡܳܪܝ ܐܳܣܝܳܐ: ܗܳܢܳܐ ܕܶܐܬܓܒܺܝ ܡ̣ܶܢ ܟܰܪܣܳܐ ܕܶܐܡܶܗ ܕܢܶܗܘܶܐ ܡܳܐܢܳܐ ܠܐܝܩܳܪܳܟ: ܘܰܫܒܰܩ ܥܳܠܡܳܐ ܘܰܪ̈ܓܺܝܓܳܬܶܗ ܘܶܐܙܰܠ ܒܳܬܰܪ ܦܽܘܩ̈ܕܳܢܰܝܟ ܗܳܢܳܐ ܕܰܫܒܰܩ ܠܐܒܽܘܗܝ ܘܠܐܡܶܗ: ܘܰܠܥܽܘܬܪܳܐ ܕܙܰܒܢܳܐ ܐܰܪܦܺܝ: ܐܰܝܟܰܢܳܐ ܕܠܶܗ ܒܰܠܚܽܘܕ ܢܶܫܦܰܪ: ܗܳܢܳܐ ܕܪܰܚܡܳܟ ܘܰܢܛܰܪ ܦܽܘ̈ܩܕܳܢܰܝܟ: ܘܐܰܢ̱ܬ ܐܰܒܳܐ ܠܘܳܬܶܗ ܐܶܬܰܝܬ ܘܰܐܘܳܢܳܐ ܠܘܳܬܶܗ ܥܒܰܕܬ: ܗܳܢܳܐ ܕܠܐ ܩܢܳܐ ܡܶܕܶܡ ܥܰܡ ܥܽܘܬܪܳܐ ܕܺܝܠܳܟ ܫܡܰܝܳܢܳܐ: ܗܳܢܳܐ ܕܫܰܡܥܳܟ ܟܰܕ ܐܳܡܰܪ ܐܰܢ̱ܬ: ܕܟܽܠ ܕܠܐ ܣܳܢܶܐ ܠܐܒܽܘܗܝ ܘܠܐܡܶܗ ܠܐ ܫܳܘܶܐ ܠܺܝ: ܗܳܢܳܐ ܕܫܰܡܠܺܝ ܦܽܘܩ̈ܕܳܢܰܝܟ ܘܰܫܩܰܠ ܙܩܺܝܦܶܗ ܘܶܐܬܳܐ ܒܳܬܰܪ ܥܶܩ̈ܒܳܬܳܟ: ܘܥܰܠ ܗܳܕܶܐ ܥܺܕܬܳܐ ܡܟܺܝܪܬܳܟ ܕܰܙܒܶܢܬ ܒܰܕܡܳܟ ܝܰܩܺܝܪܳܐ ܘܰܦܪܰܩܬ ܒܰܨܠܺܝܒܳܟ ܙܰܟܳܝܳܐ: ܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܒܦܽܘܡ ܝܰܠܕܶܝ̈ܗ̇ ܡܰܙܥܩܳܐ ܠܘܳܬܶܗ ܟܰܕ ܐܳܡܪܳܐ: ܡܳܪܝ ܐܳܣܝܳܐ ܐܰܢܛܺܝܩܽܘܣ ܚܰܠܝܳܐ: ܕܰܒܣܶܡ ܠܡܰܪܺܝܪ̈ܰܝ ܚܶܢ̈ܟܶܐ ܕܒܶܗ ܐܶܬܓܰܘܰܣܘ: ܡܳܪܝ ܐܳܣܝܳܐ ܐܰܢܰܐܓܢܺܝܣܛܽܘ ܡܗܺܝܪܳܐ: ܕܦܳܪܶܫ ܙܡܺܝܪ̈ܳܬܳܐ ܕܪܽܘܚܳܐ ܡ̣ܶܢ ܙܡܺܝܪ̈ܳܬܳܐ ܕܫܽܘܩܪܳܐ: ܡܳܪܝ ܐܳܣܝܳܐ ܒܺܝܠܕܰܪܳܐ ܕܰܪܗܶܛ ܒܶܐܣܛܰܕܘܳܢ ܕܥܳܢܘܳܝܽܘܬܳܐ ܩܕܳܡ ܡܳܪܶܗ: ܡܳܪܝ ܐܳܣܝܳܐ ܒܶܠܐܱܩܘܣ ܒܰܣܺܝܡ ܛܰܥܡܳܐ: ܕܰܐܝܢܶܩ ܠܐܡܪ̈ܰܘܗܝ ܕܰܡܫܺܝܚܳܐ: ܡܳܪܝ ܐܳܣܝܳܐ ܓܳܘܡܺܝܢܺܝܩܳܘܢ ܡܗܺܝܪܳܐ ܕܰܡܫܰܚ ܘܰܬܩܰܠ ܒܪܶܥܝܳܢܶܗ ܐܽܘܪ̈ܚܳܬܶܗ ܕܥܳܠܡܳܐ ܗܳܢܳܐ ܘܰܐܣܠܺܝ ܐܶܢܶܝܢ: ܡܳܪܝ ܐܳܣܝܳܐ ܦܺܝܦܽܘܢ ܫܒܺܝܚܳܐ ܕܶܐܬܬܰܨܡܰܚ ܡ̣ܶܢ ܐܶܣܦܺܝܪܳܐ ܐܠܰܗܳܝܬܳܐ: ܡܳܪܝ ܐܳܣܝܳܐ ܕܳܡܺܝܬܩܽܘܣ ܟܺܐܢܳܐ ܕܚܰܝܶܒ ܠܐܟܶܠܩܰܪܨܳܐ ܘܚܰܝܠܰܘ̈ܳܬܶܗ: ܡܳܪܝ ܐܳܣܝܳܐ ܗܶܢܺܝܩܽܘܢ ܫܒܺܝܚܳܐ ܕܶܐܬܬܨܺܝܪ̈ܝ ܒܶܗ ܟܽܠܗܶܝܢ ܨܽܘܪ̈ܳܬܳܐ ܕܥܺܕܬܳܐ ܩܰܕܺܝܫܬܳܐ: ܡܳܪܝ ܐܳܣܝܳܐ ܦܶܛܪܺܝܩܽܘܢ ܗܰܢܺܝܳܐܐ ܕܰܒܣܶܡ ܪܺܝܚܶܗ ܠܡܰܠܟܳܐ ܫܡܰܝܳܢܳܐ: ܡܳܪܝ ܐܳܣܝܳܐ ܘܰܢܟܽܘܣ ܣܢܺܝܢܳܐ ܕܰܒܬܳܓܶܗ ܕܡܰܠܟܳܐ ܫܡܰܝܳܢܳܐ ܐܶܬܚܫܶܠ: ܡܳܪܝ ܐܳܣܝܳܐ ܘܰܪܕܳܐ ܒܰܣܺܝܡ ܪܺܝܚܳܐ: ܕܰܒܣܶܡ ܠܡܶܬܓܰܘ̈ܣܰܝ ܒܣܺܝܡܰܬ݀ ܓܰܪ̈ܡܰܘܗܝ: ܡܳܪܝ ܐܳܣܝܳܐ ܦܳܥܠܐ ܛܳܒܳܐ ܕܰܦܠܰܚ ܒܟܰܪܡܳܐ ܕܡܳܪܶܗ ܡ̣ܶܢ ܨܰܦܪܳܐ ܥܕܰܡܳܐ ܠܪܰܡܫܳܐ: ܡܳܪܝ ܐܳܣܝܳܐ ܚܰܙܽܘܪ ܕܰܗܒܳܐ ܕܒܺܐܝ̈ܕܰܝ ܡܗܰܝ̈ܡܢܶܐ ܡܶܬܗܰܦܰܟ: ܡܳܪܝ ܐܳܣܝܳܐ ܛܪܺܝܓܽܘܕܳܐ ܗܰܢܺܝ ܩܳܠܐ ܕܰܒܣܰܡ ܒܰܙܡܺܝܪ̈ܳܬܶܗ ܠܥܺܕܬܳܐ ܩܰܕܺܝܫܬܳܐ: ܡܳܪܝ ܐܳܣܝܳܐ ܝܰܣܩܺܝܣܳܐ ܘܢܰܨܺܝܚܳܐ ܕܰܙܟܳܐ ܠܐܟܶܠܩܰܪܨܳܐ ܘܰܠܕܰܝ̈ܘܶܐ ܒܰܩܪܳܒܳܐ: ܡܳܪܝ ܐܳܣܝܳܐ ܝܰܡܦܺܝܣ ܫܒܺܝܚܳܐ: ܕܰܡܟܰܪ ܢܰܦܫܶܗ ܠܡܰܠܟܳܐ ܡܫܺܝܚܳܐ: ܡܳܪܝ ܐܳܣܝܳܐ ܟܰܘܟܒܳܐ ܨܰܡܽܘܚܬܳܢܳܐ ܕܶܐܬܰܙܠܰܓ ܒܰܪܩܺܝܥܳܐ ܕܥܺܕܬܳܐ ܩܰܕܺܝܫܬܳܐ: ܡܳܪܝ ܐܳܣܝܳܐ ܟܠܺܝܠܐ ܘܗܶܕܪܳܐ ܘܫܽܘܒܗܳܪܳܐ ܕܳܐܪܬܳܕܽܘܟܣܺܝܰܐ: ܡܳܪܝ ܐܳܣܝܳܐ ܠܽܘܓܺܝܩܽܘܣ ܚܰܟܺܝܡܳܐ ܕܕܰܘܺܝܕܳܐܝ̣ܬ ܡܰܠܶܠ ܠܰܝ̈ܠܰܝ ܐܺܝܡܳܡ: ܡܳܪܝ ܐܳܣܝܳܐ ܠܽܘܣܺܝܡܰܐܟܽܘܣ ܥܰܬܺܝܪ ܙܰܠܓ̈ܶܐ ܕܰܐܢܗܰܪ ܠܥܺܕܬܶܗ ܕܰܡܫܺܝܚܳܐ: ܡܳܪܝ ܐܳܣܝܳܐ ܡܺܝܟܰܐܢܽܘܣ ܕܰܐܝܟ ܟܺܐܦ̈ܶܐ ܡܶܬܝܰܕ̈ܥܳܢܝܳܬܳܐ ܗܘܰܘ ܦܶܬܓܳܡܰܘ̈ܗܝ: ܘܰܦܠܰܫܘ ܫܽܘܪ̈ܶܝܗ̇ ܕܣܽܘܢܰܗܕܳܘܣ ܪܰܫܺܝܥܬܳܐ ܕܟܰܠܩܺܝܕܽܘܢܰܐ: ܡܳܪܝ ܐܳܣܝܳܐ ܡܽܘܣܺܝܦܽܘܣ ܗܰܢܺܝ ܩܳܠܐ ܕܰܒܣܶܡ ܠܬܰܠܡܺܝ̈ܕܰܘܗܝ ܒܝܰܕ ܡܰܠܦܳܢܽܘܬܶܗ ܐܠܰܗܳܝܬܳܐ: ܡܳܪܝ ܐܳܣܝܳܐ: ܡܳܐܢܳܐ ܕܰܟܝܳܐ: ܘܒܶܝܬ ܡܰܥܡܪܳܐ ܕܪܽܘܚܳܐ ܩܰܕܺܝܫܳܐ: ܡܳܪܝ ܐܳܣܝܳܐ ܢܰܗܪܳܐ ܕܡܰܝ̈ܳܐ ܚܰܝ̈ܶܐ ܕܡ̣ܶܢ ܦܰܪܕܰܝܣܳܐ ܕܓܳܓܽܘܠܬܳܐ ܪܕܳܐ ܠܰܢ: ܡܳܪܝ ܐܳܣܝܳܐ ܣܪܰܐܦܺܝܣ ܙܰܗܝܳܐ ܕܰܥܡܰܠ ܒܟܰܪܡܳܐ ܕܡܳܪܶܗ ܟܰܫܺܝܪܳܐܝ̣ܬ: ܡܳܪܝ ܐܳܣܝܳܐ ܣܽܘܢܰܩܠܺܝܛܽܘܣ ܕܰܡܠܶܟ ܡܰܠܟ̈ܶܐ ܫܡܰܝܳܢܳܐ: ܡܳܪܝ ܐܳܣܝܳܐ ܥܪܺܝܡܳܐ ܕܰܢܛܰܪ ܢܰܦܫܶܗ ܪܺܝܫܶܗ ܕܺܐܝܬܶܝܗ̇ ܗܰܝܡܳܢܽܘܬܶܗ: ܡ̣ܶܢ ܓܰܝ̈ܣܶܐ ܠܺܝ̈ܛܶܐ: ܡܳܪܝ ܐܳܣܝܳܐ ܥܰܒܕܳܐ ܕܶܐܬܗܰܝܡܰܢ ܥܰܠ ܒܶܝܬ ܓܰܙܳܐ ܕܡܳܪܶܗ: ܡܳܪܝ ܐܳܣܝܳܐ ܦܽܘܪܩܳܣܳܐ ܚܰܣܺܝܢܳܐ ܕܒܶܗ ܡܶܣܬܰܬܪܳܐ ܥܺܕܬܳܐ ܡ̣ܶܢ ܪ̈ܽܘܚܶܐ ܫܰܩܳܪ̈ܳܬܳܐ ܕܗܳܪ̈ܳܢ ܥܰܡܳܗ̇ ܡܳܪܝ ܐܳܣܝܳܐ ܕܰܐܥܪܶܩ ܠܦܳܪ̈ܚܳܬܳܐ ܢܕܺܝ̈ܕܳܬܳܐ ܕܺܐܝܬܰܝܗܶܝܢ ܪ̈ܽܘܚܶܐ ܫܰܩܳܪ̈ܳܬܳܐ ܡ̣ܶܢ ܟܰܪܡܶܗ ܕܰܡܫܺܝܚܳܐ: ܡܳܪܝ ܐܳܣܝܳܐ ܨܶܡܚܳܐ ܫܒܺܝܚܳܐ ܕܰܐܢܗܰܪ ܠܰܡܗܰܝ̈ܡܢܶܐ ܒܳܐܣ̈ܘܳܬܳܐ ܬܡܺܝ̈ܗܳܬܳܐ: ܡܳܪܝ ܐܳܣܝܳܐ ܩܰܝܛܽܘܢܩܳܢܶܗ ܕܡܰܠܟܳܐ ܫܡܰܝܳܢܳܐ ܘܒܰܪ ܒܰܝܬܶܗ: ܡܳܪܝ ܐܳܣܝܳܐ ܩܽܘܒܰܪܢܺܝܛܺܝ ܡܗܰܝܡܢܳܐ ܕܰܕܒܰܪ ܠܐܠܦܳܗ̇ ܕܥܺܕܬܳܐ ܠܰܠܡܺܐܢܳܐ ܕܫܰܝܢܳܐ: ܡܳܪܝ ܐܳܣܝܳܐ ܪܰܝܡܳܐ ܘܪܺܝܫܳܐ ܡܥܰܠܝܳܐ ܕܶܐܬܪܟܶܢ ܐܰܡܺܝܢܳܐܝ̣ܬ ܩܕܳܡ ܨܠܺܝܒܳܐ: ܡܳܪܝ ܐܳܣܝܳܐ ܫܰܪܘܰܝܢܳܐ ܡܥܰܠܝܳܐ ܕܰܡܛܳܐ ܪܺܝܫܶܗ ܠܰܫܡܰܝܳܐ: ܡܳܪܝ ܐܳܣܝܳܐ ܬܶܐܘܳܦܳܘܪܳܘܣ ܕܰܐܠܒܶܫ ܢܰܦܫܶܗ ܙܰܝܢܳܐ ܕܪܽܘܚܳܐ ܩܰܕܺܝܫܳܐ: ܡܳܪܝ ܐܳܣܝܳܐ ܬܶܐܘܳܪܺܝܛܺܝܩܽܘܣ ܕܰܐܕܺܝܩ ܒܥܰܝܢܳܐ ܕܪܽܘܚܳܐ ܩܰܕܺܝܫܳܐ: ܘܰܚܙܳܐ ܠܒܽܘ̈ܣܳܡܶܐ ܕܰܢܛܺܝܪܺܝܢ ܠܩܰܕܺܝ̈ܫܶܐ: ܥܰܠ ܗܳܕܶܐ ܒܳܥܶܝܢܰܢ ܡܶܢܳܟ ܐܳܘ ܡܢܺܝܚܳܢܶܗ ܕܰܡܫܺܝܚܳܐ ܐܰܝܟܰܢܳܐ ܕܒܰܨܠܰܘ̈ܳܬܳܟ ܬܰܘܕܺܝܬܰܢ ܬܶܬܢܰܨܰܚ: ܘܒܰܨܠܽܘܬܳܟ ܫܰܝܢܰܢ ܢܶܬܟܰܗܰܢ: ܒܰܨܠܽܘܬܳܟ ܪ̈ܰܚܡܶܐ ܢܶܫܬܰܟܢܽܘܢ ܠܰܢ: ܒܰܨܠܰܘ̈ܳܬܳܟ ܩܪ̈ܳܒܶܐ ܢܶܬܒܰܛܠܽܘܢ: ܒܰܨܠܰܘ̈ܳܬܳܟ ܨܠܰܘ̈ܳܬܰܢ ܢܶܬܩܰܒ̈ܠܳܢ: ܦܰܚ̈ܶܐ ܕܒܺܝܫܳܐ ܢܶܬܬܰܒܪܽܘܢ: ܥܳܩ̈ܳܬܳܐ ܢܶܥܒܪ̈ܳܢ: ܣܳܩܽܘܪ̈ܶܐ ܢܶܬܕܰܚܩܽܘܢ: ܢܶܣܝܽܘ̈ܢܶܐ ܢܶܥܒܪܽܘܢ: ܒܰܨܠܰܘ̈ܳܬܳܟ ܡܰܪ̈ܕܘܳܬܳܐ ܢܶܬܒܰܛܠܽܘܢ: ܠܽܘ̈ܚܳܡܶܐ ܢܶܫܬܰܬܩܽܘܢ: ܘܰܟܠܺܝܠܐ ܕܫܰܢ̱ܬܳܐ ܢܶܬܒܰܪܰܟ: ܒܰܨܠܰܘ̈ܳܬܳܟ ܝܰܘܡܺܝ̈ܢ ܘܝܰܪ̈ܚܺܝܢ ܢܶܬܦܰܨܚܽܘܢ: ܛܳܠܽܘ̈ܡܶܐ ܢܶܬܕܰܚܩܽܘܢ: ܚܛܳܗ̈ܶܐ ܢܶܬܚܰܣܽܘܢ: ܙܰܠܺܝ̈ܠܐ ܢܶܙܕܰܕܩܽܘܢ: ܗܶܪ̈ܳܬܳܐ ܢܶܬܒ̈ܰܛܠܳܢ: ܒܰܨܠܰܘ̈ܳܬܳܟ ܕܰܝܪ̈ܳܬܰܢ ܢܶܬܗܰܕܪ̈ܳܢ: ܒܽܘܪ̈ܟܳܬܰܢ ܢܶܫܦ̈ܥܳܢ: ܒܰܨܠܰܘ̈ܳܬܳܟ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܶܬܚܰܣܽܘܢ: ܘܰܚܢܰܢ ܘܗܶܢܽܘܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܠܰܡܫܺܝܚܳܐ ܕܚܰܝܠܳܟ ܒܰܐܓܽܘܢܳܐ ܘܠܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

 

 

ܥܛܪܐ

 

 

 

ܫܽܘܒܚܳܐ ܠܟ ܡܳܪܝܳܐ ܐܠܰܗܳܐ ܡܩܰܒܶܠ ܬܶܫܡܫܬܳܐ ܕܥܰܒܕܰܘ̈ܗܝ: ܘܚܳܕܶܐ ܒܕܽܘܟܪܳܢ ܚܰܒܺܝܒܰܘ̈ܗܝ ܩܰܒܶܠ ܡܳܪܝ ܬܶܫܡ̈ܫܳܬܰܢ ܒܰܨܠܽܘܬܶܗ ܕܪܳܚܡܳܟ: ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ ܒܒܳܥ̈ܘܳܬܶܗ ܕܰܐܬܠܺܝܛܳܟ ܐܳܣܝܳܐ ܕܢܰܦ̈ܫܳܬܳܐ ܕܰܡܗܰܝ̈ܡܢܶܐ: ܘܡ̣ܶܢ ܣܺܝܡܰܬ ܓܰܪ̈ܡܰܘܗܝ ܫܰܝܢܳܐ ܢܶܫܬܰܟܰܢ ܠܰܢ ܒܰܚܢܳܢܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܗܳܫܳܐ܀

 

 

 

ܦܪܘܡܝܘܢ ܕܬܠܬܫܥܝ̈ܢ

 

 

 

ܬܶܫܒܽܘܚܬܳܐ: ܠܗܰܘ ܡܥܰܠܝܳܐ ܒܛܽܘܒܬܳܢܽܘܶܬܶܗ ܘܠܐ ܡܶܬܕܰܪܟܳܢܳܐ ܒܰܐܠܳܗܽܘܬܶܗ: ܠܗܰܘ ܕܰܓܒܳܐ ܠܥܰܒܕܶܗ ܡܳܪܝ ܐܳܣܝܳܐ ܡ̣ܶܢ ܟܰܪܣܳܐ ܕܶܐܡܶܗ: ܘܚܰܝܠܶܗ ܒܰܐܓܽܘܢܳܐ ܕܠܽܘܩܒܰܠ ܒܺܝܫܳܐ ܒܥܶܠܕܰܪܳܐ: ܘܗܳܐ ܥܺܕܬܳܐ ܘܝܰܠܕܶܝ̈ܗ̇ ܚܳܕܝܳܐ ܒܥܰܕܥܺܐܕܶܗ: ܘܙܳܡܪܳܐ ܬܶܫܒܽܘܚܬܳܐ ܠܡܳܪܝܳܐ ܡܟܰܠܠܳܢܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

 

 

ܣܕܪܐ

 

 

 

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܒܟܽܠ ܕܳܪ̈ܺܝܢ ܒܟܺܐܢ̈ܶܐ ܕܪܰܚܡܽܘܟ ܡܶܬܢܰܨܰܚ ܐܰܢ̱ܬ: ܘܰܒܕܽܘܒܳܪ̈ܶܐ ܕܙܰܕܺܝ̈ܩܶܐ ܡܶܫܬܰܒܰܚ ܐܰܢ̱ܬ: ܘܰܒܩܶܛܠܐ ܕܣܳܗ̈ܕܶܐ ܘܡܰܘܕ̈ܝܳܢܶܐ ܡܶܬܪܰܥܶܐ ܐܰܢ̱ܬ: ܗ̇ܰܘ ܕܰܒܕܽܘܡܝܳܐ ܕܰܫܠܺܝ̈ܚܶܐ ܐܶܬܢܰܨܰܚ ܩܕܳܡܰܝܟ ܓܰܒܝܳܐ ܡܳܪܝ ܐܳܣܝܳܐ: ܗܳܢܳܐ ܕܰܙܥܽܘܪ ܗ̣ܽܘ ܦܽܘܡܰܢ ܠܩܽܘܠܳܣܰܘ̈ܗܝ: ܘܰܒܨܺܝܪ ܠܶܫܳܢܰܢ ܕܢܶܫܬܰܥܶܐ ܦܰܐܝ̈ܳܬܶܗ: ܘܠܐ ܣܳܦܩܳܐ ܬܰܪܥܺܝܬܰܢ ܠܡܶܚܫܰܒ ܡܝܰܬܪ̈ܳܬܳܐ ܕܺܝܠܶܗ: ܬܰܐܓܳܪܳܐ ܚܰܟܺܝܡܳܐ ܕܙܰܒܶܢ ܩܶܢܝܳܢܶܗ: ܘܰܩܢܳܐ ܣܺܝܡܬܳܐ ܫܡܰܝܳܢܺܝܬܳܐ ܠܢܰܦܫܶܗ: ܙܡܺܝܢܳܐ ܡܛܰܝܒܳܐ ܠܡܶܫܬܽܘܬܳܐ ܕܶܐܙܕܰܡܰܢ ܠܳܗ̇ ܡܶܛܽܠ ܡܝܰܬܪ̈ܳܬܶܗ: ܐܰܬܠܺܝܛܳܐ ܢܰܨܺܝܚܳܐ ܕܰܒܚܰܫ̈ܶܐ ܕܰܩܢܽܘܡܶܗ ܫܩܰܠ ܙܳܟܽܘܬܳܐ ܕܢܶܨܚܳܢܶܗ: ܡܰܠܦܳܢܳܐ ܪܰܒܳܐ ܡܗܺܝܪ ܒܬܶܐܘܰܪ̈ܺܝܰܐܣ ܐܠܰܗܳܝ̈ܳܬܳܐ: ܫܪܳܓܳܐ ܢܰܗܺܝܪܳܐ ܕܠܐ ܙܳܥܰܪ: ܢܽܘܗܪܳܐ ܕܠܰܡܦܺܐܕܶܗ ܕܰܒܡܶܫܚܳܐ ܕܙܰܕܺܝܩܽܘܬܳܐ ܡܶܬܢܰܒܪܰܫ ܗܘܳܐ ܕܰܠܩܶܗ: ܗܳܢܳܐ ܕܟܽܠܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܠܶܗ ܡܝܰܩܪܺܝܢܰܢ ܘܰܡܙܰܝܚܺܝܢܰܢ: ܘܗܳܫܳܐ ܫܠܳܡܳܐ ܝܳܗܒܺܝܢܰܢ ܠܶܗ ܟܰܕ ܐܳܡܪܺܝܢܰܢ: ܫܠܳܡܠܳܟ ܡܳܪܝ ܐܳܣܝܳܐ ܐܰܪܕܺܝܟܠܐ ܚܰܟܺܝܡܳܐ: ܫܠܳܡܠܳܟ ܡܳܪܝ ܐܳܣܝܳܐ ܕܳܝܽܘܩܳܐ ܕܰܣܬܺܝܪ̈ܳܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܣܳܡܽܘܟܳܐ ܕܰܡܚܺܝܠܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܡܰܒܽܘܥܳܐ ܕܩܰܕܺܝܫܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܗܡܰܝܪܳܐ ܕܬܰܪܥܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܠܰܡܦܺܐܕܳܐ ܕܢܽܘܗܪܳܐ ܕܙܰܕܺܝܩܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܢܰܨܺܝܚܳܐ ܒܟܰܫܺܝܪܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܣܰܒܪܳܐ ܕܦܽܘܠܚܳܢ ܥܳܢܘܳܝܽܘܬܳܐ: ܫܠܳܡܠܳܟ ܕܰܝܪܳܐ ܕܰܒܬܽܘܠܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܪܺܝܚܳܐ ܗܰܢܺܝܳܐܐ ܕܒܰܣܺܝܡܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܐܰܒܽܘܒܳܐ ܕܰܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܛܰܪܩܳܐ ܚܺܝܨܳܐ ܕܒܰܩܪܰܒܬܳܢܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܠܒܽܘܫܳܐ ܕܠܐ ܡܶܬܚܰܒܠܳܢܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܝܽܘܩܢܳܐ ܫܰܪܺܝܪܳܐ ܕܰܡܝܰܬܪܽܘܬܳܐ: ܫܠܳܡܠܳܟ ܡܳܪܝ ܐܳܣܝܳܐ ܚܰܟܺܝܡܳܐ ܘܰܐܪܕܺܝܟܠܐ ܘܰܡܒܰܢܝܳܢܳܐ ܕܥܺܕ̈ܳܬܳܐ ܘܕܰܝܪ̈ܳܬܳܐ: ܘܥܰܠ ܗܳܕܶܐ ܐܳܘ ܬܡܺܝܗ ܢܰܨܺܝܚܳܐ ܡܳܪܝ ܐܳܣܝܳܐ ܫܳܘܶܐ ܠܛܽܘ̈ܒܶܐ: ܥܰܘ̈ܳܠܐ ܒܳܟ ܢܶܬܟܰܢܟܽܘܢ: ܟܽܘܬܟ̈ܶܐ ܒܳܟ ܢܶܬܛܰܠܩܽܘܢ: ܡܰܚܘ̈ܳܬܳܐ ܒܳܟ ܢܶܙܕܰܓܪ̈ܳܢ: ܪ̈ܰܘܒܶܐ ܒܳܟ ܢܶܬܒܰܛܠܽܘܢ: ܝܽܘܬܪ̈ܳܢܶܐ ܒܳܟ ܢܶܬܝܰܗܒܽܘܢ: ܐܰܒܺܝ̈ܕܶܐ ܒܳܟ ܢܶܫܬܰܟܚܽܘܢ: ܗܶܪ̈ܳܬܳܐ ܒܳܟ ܢܶܫܬܰܬܩ̈ܳܢ: ܪ̈ܽܘܓܙܶܐ ܒܳܟ ܢܶܫܬܰܗܽܘܢ: ܘܰܐܣܺܝܪ̈ܶܐ ܒܳܟ ܢܶܫܬܪܽܘܢ: ܢܶܣܝܽܘ̈ܢܶܐ ܒܳܟ ܢܶܥܒܪܽܘܢ: ܣܳܢ̈ܶܐܐ ܒܳܟ ܢܶܬܚܰܝܕܽܘܢ: ܐܠܰܝ̈ܨܶܐ ܒܳܟ ܢܶܬܪܰܘܚܽܘܢ: ܪ̈ܰܫܺܝܥܶܐ ܒܳܟ ܢܶܫܬܰܚܠܦܽܘܢ: ܚܛܳܗ̈ܶܐ ܒܳܟ ܢܶܫܬܰܒܩܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܳܟ ܢܶܬܬܢܺܝܚܽܘܢ: ܘܰܚܢܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܬܚܶܝܬ ܟܶܢ̈ܦܶܐ ܕܰܨܠܰܘ̈ܳܬܳܟ ܢܶܣܬܰܬܰܪ: ܘܥܰܡܳܟ ܒܕܺܝܢܳܐ ܠܡܰܠܟܽܘܬܳܐ ܕܰܫܡܰܝܳܐ ܢܶܫܘܰܪ: ܘܢܰܣܶܩ ܥܰܡ ܥܰܢܺܝ̈ܕܰܝܢ ܫܽܘܒ̈ܚܶܐ ܠܐ ܡܛܰܘ̈ܫܶܐ: ܠܐܒܳܐ ܕܚܰܝܠܳܟ ܒܰܐܓܽܘܢܳܐ ܕܺܝܠܳܟ ܕܠܽܘܩܒܰܠ ܫܺܐܕ̈ܶܐ ܫܳܓܽܘ̈ܫܶܐ: ܘܠܰܒܪܳܐ ܕܝܰܩܰܪ ܕܽܘܟܪܳܢܳܟ ܒܰܐܪܒܰܥ ܦܶܢ̈ܝܳܬܶܗ ܕܥܳܠܡܳܐ: ܘܰܠܪܽܘܚܳܐ ܩܰܕܺܝܫܳܐ ܕܙܰܡܢܳܟ ܠܰܚܠܽܘܠܶܗ: ܘܡܰܢܥܳܟ ܠܘܳܬܶܗ ܒܰܫܠܳܡܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܡ ܘܫܘܒܚܐ ܠܐܠܗܐ ܕܠܐ ܫܠܡ