ܩܕܡܝܬ݀ ܛܟܣܐ ܩܕܡܝܐ ܕܚܕ ܒܫܒܐ ܪܒܐ ܕܩܝܡܬܐ ܬܘܒ ܕܥܕܢܐ ܕܫܠܡܐ ܬܘܒ ܕܝܘܡܐ ܕܬܪܝܢ ܕܚܘܪ̈ܐ ܛܟܣܐ ܕܚܕ ܒܫܒܐ ܩܕܡܝܐ ܕܦܢܛܝܩܘܣܛܝ ܬܘܒ ܛܟܣܐ ܕܝܘܡ ܐܪܒܥܐ ܕܚܘܪ̈ܐ ܬܘܒ ܛܟܣܐ ܕܝܘܡ ܚܡܫܐ ܕܚܘܪ̈ܐ ܬܘܒ ܛܟܣܐ ܕܝܘܡ ܥܪܘܒܬܐ ܕܡܘܕܝ̈ܢܐ ܕܒܬܪ ܥܐܕܐ ܪܒܐ ܕܩܝܡܬܐ ܦܪܘܩܝܬܐ ܬܘܒ ܛܟܣܐ ܕܚܕ ܒܫܒܐ ܫܒܝܥܝܐ ܕܩܝܡܬܐ

ܬܘܒ ܛܟܣܐ ܥܠ ܚܕ ܒܫܒܐ ܚܕܬܐ ܛܟܣܐ ܕܚܕ ܒܫܒܐ ܕܬܪܝܢ ܕܒܬܪ ܩܝܡܬܐ ܦܪܘܩܝܬܐ ܛܟܣܐ ܕܚܕ ܒܫܒܐ ܕܬܠܬܐ ܒܬܪ ܩܝܡܬܐ ܛܟܣܐ ܕܚܕ ܒܫܒܐ ܕܐܪܒܥܐ ܒܬܪ ܩܝܡܬܐ ܛܟܣܐ ܕܚܕ ܒܫܒܐ ܕܚܡܫܐ ܕܒܬܪ ܩܝܡܬܐ ܛܟܣܐ ܕܚܕ ܒܫܒܐ ܫܬܝܬܝܐ ܕܒܬܪ ܣܘܠܩܐ ܛܟܣܐ ܕܚܕ ܒܫܒܐ ܩܕܡܝܐ ܕܦܢܛܝܩܘܣܛܝ ܛܟܣܐ ܕܚܕ ܒܫܒܐ ܬܡܝܢܝܐ ܕܩܝܡܬܐ ܦܪܘܩܝܬܐ

ܬܡܢܝܐ ܛܟ̈ܣܐ ܡܨܥܝ̈ܐ ܕܩܝܡܬܐ ܦܪܘܩܝܬܐ ܩܕܡܝܬ ܛܟܣܐ ܩܕܡܝܐ ܛܟܣܐ ܕܬܪܝܢ ܕܚܕ ܒܫܒܐ ܕܩܝܡܬܐ ܕܛܟܣܐ ܡܨܥܝܐ ܛܟܣܐ ܕܚܕ ܒܫܒܐ ܬܠܝܬܝܐ ܕܩܝܡܬܐ ܕܛܟܣܐ ܡܨܥܝܐ ܛܟܣܐ ܕܚܕ ܒܫܒܐ ܪܒܝܥܝܐ ܕܛܟܣܐ ܡܨܥܝܐ ܕܩܝܡܬܐ ܛܟܣܐ ܕܚܕ ܒܫܒܐ ܪܒܝܥܝܐ ܕܛܟܣܐ ܡܨܥܝܐ ܕܩܝܡܬܐ ܛܟܣܐ ܕܚܕ ܒܫܒܐ ܚܡܝܫܝܐ ܕܩܝܡܬܐ ܕܛܟܣܐ ܡܨܥܝܐ ܛܟܣܐ ܫܬܝܬܝܐ ܕܩܝܡܬܐ ܕܛܟܣܐ ܡܨܥܝܐ ܛܟܣܐ ܕܚܕ ܒܫܒܐ ܫܒܝܥܝܐ ܕܩܝܡܬܐ ܦܪܘܩܝܬܐ ܕܛܟܣܐ ܡܨܥܝܐ ܛܟܣܐ ܕܚܕ ܒܫܒܐ ܬܡܝܢܝܐ ܕܩܝܡܬܐ ܦܪܘܩܝܬܐ ܕܛܟܣܐ ܡܨܥܝܐ

ܩܕܡܝܬ ܛܟܣܐ ܩܕܡܝܐ ܕܐܚܪ̈ܝܐ ܕܩܝܡܬܐ ܛܟܣܐ ܕܚܕ ܒܫܒܐ ܬܪܝܢܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ ܛܟܣܐ ܕܚܕ ܒܫܒܐ ܬܠܝܬܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ ܛܟܣܐ ܕܚܕ ܒܫܒܐ ܪܒܝܥܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ ܛܟܣܐ ܕܚܕ ܒܫܒܐ ܚܡܝܫܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ ܛܟܣܐ ܕܚܕ ܒܫܒܐ ܫܬܝܬܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ ܛܟܣܐ ܕܚܕ ܒܫܒܐ ܫܒܝܥܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ ܛܟܣܐ ܕܚܕ ܒܫܒܐ ܬܡܝܢܝܐ ܕܩܝܡܬܐ ܕܛܟܣܐ ܐܚܪܝܐ

ܬܡܢܝܐ ܛܟ̈ܣܐ ܕܥܠ ܡܕܒܪܢܘܬܐ ܦܪܘܩܝܬܐ ܩܕܡܝܬ ܚܕ ܒܫܒܐ ܩܕܡܝܐ ܛܟܣܐ ܕܚܕ ܒܫܒܐ ܬܪܝܢܐ ܕܥܠ ܡܕܒܪܢܘܬܐ ܦܪܘܩܝܬܐ ܛܟܣܐ ܕܚܕ ܒܫܒܐ ܬܠܝܬܝܐ ܕܡܕܒܪܢܘܬܐ ܦܪܘܩܝܬܐ ܛܟܣܐ ܕܚܕ ܒܫܒܐ ܪܒܝܥܝܐ ܕܡܕܒܪܢܘܬܐ ܦܪܘܩܝܬܐ ܛܟܣܐ ܚܡܝܫܝܐ ܕܡܕܒܪܢܘܬܐ ܦܪܘܩܝܬܐ ܛܟܣܐ ܕܚܕ ܒܫܒܐ ܫܬܝܬܝܐ ܕܡܕܒܪܢܘܬܐ ܦܪܘܩܝܬܐ ܛܟܣܐ ܕܚܕ ܒܫܒܐ ܫܒܝܥܝܐ ܕܓܘܢܝ̈ܐ ܛܟܣܐ ܕܚܕ ܒܫܒܐ ܬܡܝܢܝܐ ܕܓܘܢܝ̈ܐ

 

 

ܥܠ ܚܝܠܐ ܕܬܠܝܬܝܘܬܐ ܩܕܝܫܬܐ ܘܫܘܝܬ݀ ܒܐܘܣܝܐ ܡܫܪܝܢܢ ܠܡܟܬܒ ܛܟܣܐ ܕܩܝܡܬܐ ܡܚܕܬܬ݀ ܟܠ ܕܡܫܝܚܐ ܐܠܗܢ

ܐܢܬ ܡܪܝ ܠܗܘܢܝ̱ ܬܪܘܨ ܘܗܰܕܳܐ

 

ܩܕܡܝܬ݀ ܛܟܣܐ ܩܕܡܝܐ ܕܚܕ ܒܫܒܐ ܪܒܐ ܕܩܝܡܬܐ

 

ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܕܥܰܡ  ܚܰܝ̈ܠܰܘܳܬܳܐ ܫܡܰܝ̈ܳܢܶܐ ܕܰܟܝܳܐܝܬ ܘܩܰܕܺܝܫܳܐܝܬ ܢܪܰܡܪܶܡ ܠܗܳܢܳܐ ܝܰܘܡܳܐ ܕܰܩܝܳܡܬܳܟ ܬܠܺܝܬܳܝܰܬ݀ ܝܰܘ̈ܡܶܐ: ܐܰܝܟܰܢܳܐ ܕܟܰܕ ܒܕܽܘܒܳܪ̈ܶܐ ܢܰܟ̈ܦܶܐ ܡܰܦܪܓܺܝܢܰܢ ܩܕܳܡܰܝܟ: ܢܫܰܒܚܳܟ ܕܠܐ ܫܶܠܝܳܐ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܘܰܡܪܰܚܡܳܢܳܐ: ܕܰܢܚܶܬ ܘܶܐܬܒܰܣܰܪ ܒܛܰܝܒܽܘܬܶܗ: ܘܰܛܥܶܡ ܡܰܘܬܳܐ ܚܠܳܦ ܡܳܝܽܘ̈ܬܶܐ ܒܨܶܒܝܳܢܶܗ: ܘܰܢܚܶܬ ܘܓܰܫ ܬܗܽܘ̈ܡܶܐ ܬܰܚܬܳܝ̈ܶܐ ܒܝܰܕ ܢܰܦܫܶܗ: ܘܬܰܒܰܪ ܡܽܘ̈ܟܠܐ ܥܰܫܺܝ̈ܢܶܐ ܕܰܫܝܽܘܠ ܒܬܽܘܩܦܶܗ ܘܰܐܥܪܶܩ ܠܩܶܣܛܽܘܢܳܪ̈ܶܐ ܕܢܳܛܪܺܝܢ ܗܘܰܘ ܩܰܒܪܶܗ: ܘܰܐܟܶܣ ܠܰܛܪ̈ܽܘܢܶܐ ܒܰܩܝܳܡܬܶܗ: ܘܚܰܕܺܝ ܘܰܐܦܨܰܚ ܠܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܒܢܽܘܚܳܡܶܗ: ܘܰܐܕܢܰܚ ܠܟܽܠܗܽܘܢ ܥܰܡ̈ܡܶܐ ܦܽܘܪܩܳܢܶܗ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

ܣܕܪܐ

ܡܰܢܽܘ ܕܰܐܝܟ ܕܫܳܘܶܐ ܢܫܰܒܰܚ ܠܝܰܡܳܐ ܫܦܺܝܥܳܐ ܕܰܚܢܳܢܳܟ ܐܳܘ ܡܶܠܬܳܐ ܐܠܰܗܳܐ: ܐܰܘ ܐܰܝܠܶܝܢ ܒܢ̈ܳܬ ܩ̈ܳܠܐ ܣܳܦ̈ܩܳܢ ܕܰܢܒܰܪ̈ܟܳܢ ܘܰܢܩܰܠܣ̈ܳܢ ܠܳܟ ܐܳܘ ܕܡܶܢܟܽܠ ܫܽܘܒ̈ܚܶܐ ܡܰܒܥܰܕ ܐܰܢ̱ܬ: ܓܳܗܪܺܝܢ ܕܶܝܢ ܗܰܘ̈ܢܶܐ ܕܟܽܠ: ܘܚܳܝܒܺܝܢ ܠܶܫܳܢ̈ܶܐ ܕܰܢܡܰܠܠܽܘܢ ܬܶܕܡܪ̈ܳܬܳܐ ܕܶܐܣܬܥܰܪ̈ܝ ܒܗܳܢܳܐ ܝܰܘܡܳܐ ܩܰܪܝܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܘܥܰܠܗܳܝ ܥܰܡ ܡܙܰܡܰܪ ܟܳܗ̈ܢܳܝܳܬܳܐ ܕܰܘܺܝܕ ܡܰܙܥܩܺܝܢܰܢ ܘܳܐܡܪܺܝܢܰܢ: ܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ: ܗܳܢܰܘ ܝܰܘܡܳܐ ܕܠܐ ܗܘܳܐ ܩܕܳܡܰܘܗܝ ܐܰܟܘܳܬܶܗ ܘܳܐܦܠܐ ܒܳܬܪܶܗ ܐ̱ܚܪܺܢܳܐ ܕܕܳܡܶܐ ܠܶܗ: ܗ̇ܳܢܰܘ ܥܰܕܥܺܐܕܳܐ ܪܰܒܳܐ ܘܰܟܠܺܝܠܐ ܦܰܐܝܳܐ ܘܫܽܘܒܗܳܪܳܐ ܕܟܽܠܗܽܘܢ ܥܺܐܕ̈ܶܐ ܐܰܚܝܳܢܰܘ̈ܗܝ ܠܗܳܢܳܐ ܝܰܘܡܳܐ ܪܚܺܝܡܳܐ ܟܰܕ ܪܳܦܬܺܝܢ ܚܽܘܫܳܒܰܝ̈ܢ ܘܪܳܦܣܺܝܢ ܙܰܘ̈ܥܰܝܢ ܒܚܰܕܽܘܬܳܐ ܪܰܒܬܳܐ ܢܰܙܥܶܩ ܘܢܺܐܡܰܪ: ܬܳܐ ܒܰܫܠܳܡܳܐ ܐܺܝܡܳܡܳܐ ܚܰܕܬܳܐ ܕܶܐܫܬܪܺܝ ܒܫܽܘܠܛܳܢܳܟ ܚܶܫܽܘܟܳܐ ܥܰܬܺܝܩܳܐ: ܬܳܐ ܒܰܫܠܳܡܳܐ ܒܽܘܟܪܳܐ ܕܝܰܘ̈ܡܳܬܳܐ: ܕܰܬܪ̈ܰܝܗܽܘܢ ܥܳܠܡ̈ܶܐ ܒܳܟ ܐܶܨܛܰܒܰܬܘ ܘܶܐܬܢܰܗܰܪܘ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܕܰܩܝܳܡܬܳܐ. ܓܺܙܰܒܪܳܐ ܫܰܪܺܝܪܳܐ ܕܥܳܢ̈ܳܐ ܛܳܥܳܝܬܳܐ ܒܳܟ ܐܶܬܦܰܪܩܰܬ݀: ܬܳܐ ܒܰܫܠܳܡܳܐ ܕܶܢܚܳܐ ܢܰܗܺܝܪܳܐ ܕܰܕܢܰܚ ܝܰܘܡܳܢܳܐ ܥܰܠ ܬܺܒܶܝܠ ܘܶܐܬܦܰܨܚܰܬ݀: ܬܳܐ ܒܰܫܠܳܡܳܐ ܗܰܒܳܒܳܐ ܕܰܩܝܳܡܬܳܐ ܕܒܶܗ ܡܰܘܬܳܐ ܩܳܛܽܘܠܶܗ ܕܳܐܕܳܡ ܐܶܬܬܰܒܰܪ: ܬܳܐ ܒܰܫܠܳܡܳܐ ܘܰܥܕܳܐ ܕܚܰܝ̈ܶܐ ܕܘܰܥܶܕ ܠܟܽܠ ܥܰܡ̈ܡܺܝܢ ܠܚܰܕܽܘܬܳܐ ܘܰܦܨܺܝܚܽܘܬܳܐ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܕܰܩܝܳܡܬܳܐ ܚܰܝܠܐ ܚܰܣܺܝܢܳܐ ܕܒܳܟ ܐܶܬܥܰܛܝܰܬ݀ ܡܰܦܽܘܠܬܳܐ ܕܰܥܪܽܘܒܬܳܐ: ܬܳܐ ܒܰܫܠܳܡܳܐ ܙܰܝܢܳܐ ܙܪܺܝܙܳܐ ܕܒܶܗ ܐܶܙܕܰܝܰܢܘ ܦܳܠܚ̈ܶܐ ܕܡܰܠܟܳܐ ܫܡܰܝܳܢܳܐ. ܬܳܐ ܒܰܫܠܳܡܳܐ ܛܰܒܥܳܐ ܛܳܒܳܐ ܕܪܺܝܫ ܬܰܦܢܟܳܐ ܕܒܶܗ ܐܶܬܛܰܒܥܰܬ݀ ܓܒܺܝܠܬܰܢ ܡ̣ܶܢ ܕܪܺܝܫ ܘܶܐܬܚܰܕܬܰܬ݀: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܠܐ ܕܳܡܶܐ ܠܗ̇ܰܘ ܕܰܡܢܳܬܡܳܠܝ: ܬܳܐ ܒܰܫܠܳܡܳܐ ܟܰܘܟܰܒ ܢܽܘܗܪܳܐ ܕܙܰܕܺܝܩܽܘܬܳܐ: ܕܒܶܗ ܐܶܬܢܰܗܰܪܢܰܢ ܡ̣ܶܢ ܚܶܫܽܘܟܳܐ ܡܚܰܕܝܳܢܳܐ ܕܰܟܡܺܝܪ̈ܶܐ: ܘܰܡܟܰܢܫܳܢܳܐ ܕܰܡܒܰܕܪ̈ܶܐ. ܬܳܐ ܒܰܫܠܳܡܳܐ ܢܽܘܗܪܳܐ ܕܰܐܢܗܰܪ ܠܚܶܫܽܘܟܽܘܬܳܐ ܕܺܝܠܳܗ̇ ܕܰܒܪܺܝܬܳܐ: ܬܳܐ ܒܰܫܠܳܡܳܐ ܣܰܒܪܳܐ ܘܦܽܘܪܩܳܢܳܐ ܕܰܐܝܠܶܝܢ ܕܰܕܠܐ ܣܰܒܪܳܐ: ܬܳܐ ܒܰܫܠܳܡܳܐ ܥܰܡܽܘܕܳܐ ܠܐ ܡܶܙܕܰܥܙܥܳܢܳܐ ܕܰܛܥܺܝܢ ܣܰܘ̈ܦܶܐ ܘܦܶܢ̈ܝܳܬܳܐ: ܬܳܐ ܒܰܫܠܳܡܳܐ ܦܳܪܽܘܩܳܐ ܕܰܚܒܺܝ̈ܫܶܐ ܘܰܡܚܰܪܪܳܢܳܐ ܕܰܐܣܺܝܪ̈ܶܐ: ܬܳܐ ܒܰܫܠܳܡܳܐ ܨܰܦܪܳܐ ܦܨܺܝܚܳܐ ܕܠܐ ܡܰܟܡܰܪ ܠܶܗ ܪܰܡܫܳܐ: ܘܺܐܝܡܳܡܳܐ ܕܠܐ ܡܰܕܪܶܟ ܠܶܗ ܦܳܢܝܳܐ:  ܬܳܐ ܒܰܫܠܳܡܳܐ ܩܽܘܒܰܪܢܺܝܛܺܝ ܚܰܟܺܝܡܳܐ ܕܰܡܕܰܒܰܪ ܐܠܶܦܰܢ ܠܰܠܡܺܐܢܳܐ ܕܫܰܝܢܳܐ: ܬܳܐ ܒܰܫܠܳܡܳܐ ܪܰܒܳܐ ܘܪܺܝܫܳܐ ܘܫܽܘܠܳܡܳܐ ܕܰܬܪ̈ܰܝܗܽܘܢ ܥܳܠܡ̈ܶܐ: ܬܳܐ ܒܰܫܠܳܡܳܐ ܫܰܝܢܳܐ ܕܫܰܝܶܢ ܠܰܪ̈ܓܺܝܙܶܐ: ܘܚܰܝܶܕ ܠܩܰܪ̈ܺܝܒܶܐ ܘܰܠܪ̈ܰܚܺܝܩܶܐ: ܬܳܐ ܒܰܫܠܳܡܳܐ ܬܳܓܳܐ ܘܰܟܠܺܝܠܐ ܕܟܽܠܗܽܘܢ ܥܺܐܕ̈ܶܐ ܐܰܚܝܳܢܰܘ̈ܗܝ: ܝܰܘܡܳܢܳܐ ܓܶܝܪ ܐܶܬܟܰܪܟܰܬ݀ ܠܳܗ̇ ܓܺܝܓܠܐ ܕܚܰܫ̈ܶܐ: ܘܟܽܠܗܶܝܢ ܬܰܚܬܳܝ̈ܳܬܳܐ ܥܶܒܕܰܬ݀ ܐܶܢܶܝܢ ܥܶܠܳܝ̈ܳܬܳܐ: ܡܢܳܬܡܳܠܝ ܒܠܰܥ ܪܳܥܝܳܐ ܘܶܐܬܒܰܕܰܪܘ ܐܶܡܪ̈ܰܘܗܝ: ܘܝܰܘܡܳܢܳܐ ܐܶܬܟܰܢܰܫܘ ܗܘܰܘ ܒܚܰܕܽܘܬܳܐ ܘܒܰܪܘܳܙܳܐ: ܡܢܳܬܡܳܠܝ ܝܺܗܽܘܕܳܐ ܩܰܒܶܠ ܟܶܣܦܳܐ ܘܩܰܝܳܦܳܐ ܡܳܠܶܟ ܘܡܶܫܬܡܰܥ ܘܚܰܢܳܢ ܡܩܰܛܪܶܓ ܘܪ̈ܺܝܫܰܝܟܳܗܢܶܐ ܪܳܝܒܺܝܢ: ܣܳܦܪ̈ܶܐ ܡܶܫܬܰܓܫܺܝܢ: ܦܺܝܠܰܛܳܘܣ ܝܳܬܶܒ: ܘܡܳܪܰܢ ܩܳܐܶܡ: ܝܰܘܡܳܢܳܐ ܩܰܝܳܦܳܐ ܒܰܗܺܝܬ ܘܚܰܢܳܢ ܡܟܰܐܰܪ ܘܝܽܘܕܳܐ ܚܢܺܝܩ: ܘܟܶܣܦܳܐ ܡܰܣܠܰܝ ܘܣܳܦܪ̈ܶܐ ܠܐ ܡܡܰܠܠܺܝܢ: ܪ̈ܺܝܫܰܝ ܟܢܽܘܫܬܳܐ ܕܰܣܚܺܝܦܺܝܢ: ܦܪ̈ܺܝܫܶܐ ܕܡܶܬܥܰܕܠܺܝܢ ܒܰܚܕ̈ܳܕܶܐ ܥܰܠ ܓܽܘܢܚܳܐ ܕܰܣܥܰܪܘ ܘܒܶܗܬܬܳܐ ܠܗܽܘܢ ܨܶܦܚܰܬ݀: ܝܰܘܡܳܢܳܐ ܐܽܘܪܚܶܗ ܕܩܰܒܪܳܐ ܪܳܥܡܳܐ ܒܣܰܒܪ̈ܳܬܳܐ: ܘܕܽܘܟܰܬ݀ ܓܳܓܽܘܠܬܳܐ ܡܰܠܝܳܐ ܥܳܩ̈ܳܬܳܐ: ܝܰܘܡܳܢܳܐ ܒܰܪ ܬܽܘܠܡܰܝ ܘܡܰܬܰܝ ܚܳܕܶܝܢ: ܘܝܰܥܩܽܘܒ ܘܰܐܢܕܪܶܐܘܳܣ ܪܳܘܙܺܝܢ ܒܢܽܘܚܳܡܳܐ: ܝܰܘܡܳܢܳܐ ܫܠܺܝ̈ܚܶܐ ܓܠܰܘ ܪ̈ܺܝܫܰܝܗܽܘܢ: ܘܬܰܠܡܺܝ̈ܕܶܐ ܨܒܰܘ ܡ̣ܶܢ ܡܰܛܫ̈ܝܳܬܗܽܘܢ: ܝܰܘܡܳܢܳܐ ܕܰܘܩܳܐ ܢܶܩܥܶܐ ܘܢܺܐܡܰܪ ܢܶܦܠܰܬ݀ ܢܶܦܠܰܬ݀ ܒܳܒܶܝܠ ܕܓܰܢ̱ܒܳܪ̈ܶܐ ܘܶܐܣܬܰܚܦܰܬ݀ ܫܝܽܘܠ ܕܳܘܺܝܬܳܐ: ܝܰܘܡܳܢܳܐ ܗܳܡܳܢ ܒܳܠܥܰܬ݀ ܫܰܪ̈ܒܳܬܳܐ ܢܦܰܩ ܡܶܢܳܗ̇ ܡܰܠܟܳܐ: ܘܰܐܚܪܶܒ ܓܰܙܶܝ̈ܗ̇ ܘܰܥܩܰܪ ܣܳܚܪ̈ܳܬܳܗ̇: ܝܰܘܡܳܢܳܐ ܘܳܝܳܐ ܪܰܒܳܐ ܠܚܰܢܳܢ ܘܩܰܝܳܦܳܐ: ܘܰܟܡܺܝܪܽܘܬܳܐ ܠܥܰܡܳܐ ܕܝܽܘ̈ܕܳܝܶܐ ܝܰܘܡܳܢܳܐ ܙܩܺܝܦܳܐ ܒܚܰܫܰܘ̈ܗܝ ܥܰܠ ܘܰܐܚܪܶܒ ܓܰܙܰܘ̈ܗܝ ܕܡܰܘܬܳܐ ܘܣܳܛܳܢܳܐ: ܝܰܘܡܳܢܳܐ ܚܰܘܺܝ ܡܳܪܝܳܐ ܦܽܘܪܩܳܢܶܗ ܘܰܠܥܺܝܢ ܥܰܡ̈ܡܶܐ ܓܠܐܴ ܙܰܕܺܝܩܽܘܬܶܗ: ܝܰܘܡܳܢܳܐ ܛܥܺܝܢܳܐ ܡܰܪܝܰܡ ܣܰܒܪ̈ܳܬܳܐ ܫܰܦܺܝܪ̈ܳܬܳܐ ܘܫܳܠܽܘܡ ܦܨܺܝܚܳܐ ܘܡܳܪܬܳܐ ܚܳܕܝܳܐ. ܝܰܘܡܳܢܳܐ ܝܰܒܶܒܘ ܥܺܝܪ̈ܶܐ ܨܶܝܕ ܩܰܒܪܳܐ ܘܥܰܓܶܠܘ ܟܺܐܦܳܐ ܘܝܺܬܶܒܘ ܥܠܶܝܗ̇. ܝܰܘܡܳܢܳܐ ܟܽܘܪܣܝܶܗ ܕܡܰܘܬܳܐ ܢܦܰܠ ܘܬܳܓܶܗ ܐܶܫܬܪܺܝ: ܝܰܘܡܳܢܳܐ ܠܰܝܬ ܐܶܢܽܘܢ ܢܳܛܽܘܪ̈ܶܐ ܕܚܶܙܘܳܐ ܕܰܚܙܰܘ ܐܰܥܪܶܩ ܐܶܢܽܘܢ. ܝܰܘܡܳܢܳܐ ܡܰܘܕܶܐ ܬܽܐܘܡܰܐ ܘܰܡܫܰܒܰܚ ܦܺܝܠܺܝܦܳܘܣ: ܝܰܘܡܳܢܳܐ ܢܒܺܝ̈ܶܐ ܟܽܠܗܽܘܢ ܓܳܠܝ̈ܳܢ ܐܰܦܰܝ̈ܗܽܘܢ ܕܶܐܬܳܬ݀ ܠܰܗܘܳܝܳܐ ܢܒܺܝܽܘܬܗܽܘܢ: ܝܰܘܡܳܢܳܐ ܣܳܦܪ̈ܶܐ ܘܰܦܪ̈ܺܝܫܶܐ ܒܰܗܺܝܬܺܝܢ ܘܪ̈ܰܒܰܝ ܟܢܽܘܫܬܳܐ ܒܰܚܕ̈ܳܕܶܐ ܡܶܬܥܰܕܠܺܝܢ ܝܰܘܡܳܢܳܐ ܥܪܽܘܩܝܳܐ ܠܰܒ̈ܢܰܝ ܣܶܡܳܠܐ: ܘܰܪܘܳܙܳܐ ܠܰܒܢܰܝ̈ܳܐ ܕܝܰܡܺܝܢܳܐ ܓܽܘܕܳܐ ܫܠܺܝܚܳܝܬܳܐ: ܝܰܘܡܳܢܳܐ ܦܺܝܠܰܛܳܘܣ ܡܶܬܕܰܡܰܪ: ܘܗܶܪܳܘܕܶܣ ܬܰܥܠܐ ܫܺܝܛܳܐ ܡܰܪܟܶܢ ܪܺܝܫܶܗ ܝܰܘܡܳܢܳܐ ܨܠܺܝܒܳܐ ܡܶܬܪܰܡܪܰܡ ܘܣܳܓܽܘ̈ܕܰܘܗܝ ܡܶܫܬܰܒܗܪܺܝܢ ܐܳܦ ܪܳܘܙܺܝܢ: ܝܰܘܡܳܢܳܐ ܩܳܡ ܒܽܘܝܳܐܳܐ ܠܰܒܢܰܝ̈ ܝܰܡܺܝܢܳܐ: ܘܰܐܥܒܰܪ ܐܶܒܠܐܴ ܠܣܶܡܳܠܐܴ: ܝܰܘܡܳܢܳܐ ܪܳܥܝܳܐ ܛܳܒܳܐ ܡܰܠܶܠ ܥܰܡ ܢܶܫ̈ܶܐ ܒܰܕܡܽܘܬ ܓܰܢܳܢܳܐ: ܝܰܘܡܳܢܳܐ ܫܶܡܥܽܘܢ ܘܝܽܘܚܰܢܳܢ ܠܘܳܬ ܩܰܒܪܳܐ ܡܰܥܒܶܕ ܚܰܝ̈ܶܐ ܪܳܗܛܺܝܢ ܗܘܰܘ: ܝܰܘܡܳܢܳܐ ܬܰܪܥܶܗ ܕܩܰܒܪܳܐ ܒܶܝܬ ܓܢܽܘܢܶܗ ܕܰܩܛܺܝܠܐ ܪܳܥܶܡ ܒܬܶܫܒܽܘܚܬܳܐ ܒܬܰܠܡܺܝ̈ܕܶܐ ܘܡܰܠܐܟ̈ܶܐ ܕܰܡܣܰܒܪܺܝܢ ܚܰܕܽܘܬܳܐ ܠܰܫܡܰܝ̈ܳܢܶܐ ܘܠܐܪ̈ܥܳܢܳܝܶܐ: ܝܰܘܡܳܢܳܐ ܥܰܡ ܗ̇ܰܘ ܡܡܰܠܶܠ ܐܠܰܗܳܝ̈ܳܬܳܐ ܢܶܥܢܶܐ ܘܢܺܐܡܰܪ: ܐܶܬܡܳܠܝ ܥܰܡܶܗ ܡܳܐܶܬ ܗܘܺܝܬ: ܝܰܘܡܳܢܳܐ ܥܰܡܶܗ ܚܳܝܶܐ ܐ̱ܢܳܐ ܡܢܳܬܡܳܠܝ ܥܰܡܶܗ ܡܶܬܩܒܰܪ ܗ̱ܘܺܝܬ: ܝܰܘܡܳܢܳܐ ܥܰܡܶܗ ܩܳܐܶܡ ܐ̱ܢܳܐ: ܘܶܐܣܬܰܢܰܩܢܰܢ ܥܰܠ ܐܠܰܗܳܐ ܕܡܺܝܬ ܒܰܒܣܰܪ ܥܰܡܶܗ ܡܺܝܬܢܰܢ ܘܥܰܡܶܗ ܐܶܬܩܒܰܪܢܰܢ: ܘܥܰܡܶܗ ܓܶܝܪ ܐܶܫܬܰܒܰܚܢܰܢ: ܡܶܛܽܠ ܕܥܰܡܶܗ ܩܳܡܢܰܢ. ܘܳܐܦ ܗܳܫܳܐ ܒܳܥܶܝܢܰܢ ܘܰܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܒܗܳܢܳܐ ܝܰܘܡܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܕܰܬܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ: ܘܰܐܪܘܰܚ ܠܐܠܺܝ̈ܨܶܐ ܒܰܝܰܐܐ ܠܰܡܥܳܩ̈ܶܐ: ܓܶܕ ܠܪ̈ܰܚܺܝܩܶܐ: ܕܒܰܪ ܠܩܰܪ̈ܺܝܒܶܐ ܗܰܕܳܐ ܠܪ̈ܳܥܰܘܳܬܳܐ: ܢܰܟܶܦ ܠܟܳܗ̈ܢܶܐ ܙܰܗܳܐ ܠܰܡܫܰܡ̈ܫܳܢܶܐ: ܚܰܣܳܐ ܠܚܰܛܳܝ̈ܶܐ: ܛܰܪ ܠܙܰܕܺܝ̈ܩܶܐ: ܠܝܰܬܡ̈ܶܐ ܙܰܘܶܢ ܘܦܰܪܢܶܣ: ܠܰܟܠܺܝ̈ܠܐ ܕܫܰܢ̱ܬܳܐ ܒܰܪܶܟ: ܠܠܽܘ̈ܚܳܡܶܐ ܕܪܽܘܓܙܳܐ ܫܰܗܳܐ: ܡܰܪ̈ܕܘܳܬܳܐ ܐܰܥܒܰܪ: ܠܢܽܘܟܪ̈ܳܝܰܝ ܠܕܶܚܠܬܳܟ ܣܬܽܘܪ: ܠܣܳܒ̈ܶܐ ܣܰܡܶܟ ܒܚܰܝܠܳܟ: ܠܥܽܘ̈ܠܐ ܘܫܰܒܪ̈ܶܐ ܘܰܛܠܳܝ̈ܶܐ ܪܰܒܳܐ: ܘܕܰܒܰܪ ܠܦܳܠܰܓ̈ܘܳܬܳܐ ܕܚܽܘܩ ܒܰܚܢܳܢܳܟ ܠܰܨܪ̈ܺܝܟܶܐ ܘܡܶܣ̈ܟܺܢܶܐ ܙܰܘܶܢ ܘܦܰܪܢܶܣ: ܠܩܳܝܽܘ̈ܡܶܐ ܕܥܺܕ̈ܳܬܳܐ ܘܕܰܝܪ̈ܳܬܳܐ ܚܰܝܶܠ ܘܥܰܕܰܪ: ܠܪ̈ܳܕܝܰܝ ܒܽܐܘܪ̈ܚܳܬܳܐ ܢܰܛܰܪ: ܫܰܝܢܳܟ ܘܰܫܠܳܡܳܟ ܢܰܡܠܶܟ ܒܰܝܢܳܬܰܢ: ܬܒܽܘܪ ܩܰܪܢܶܗ ܕܰܒܥܶܠܕܒܳܒܳܐ ܕܰܙܪܰܥ ܐܰܟܬܳܐ ܘܰܒܥܶܠܕܒܳܒܽܘܬܳܐ ܒܰܝܢܳܬܰܢ ܘܕܰܠܰܚ ܠܰܢ: ܘܰܠܥܰܢܺܝ̈ܕܶܐ ܡܗܰܝܡ̈ܢܶܐ ܥܒܶܕ ܕܽܘܟܪܳܢܳܐ ܛܳܒܳܐ ܘܰܐܢܺܝܚ ܐܶܢܽܘܢ ܒܡܰܠܟܽܘܬܳܟ ܫܡܰܝܳܢܺܝܬܳܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܥܰܕܥܶܕ ܠܳܟ ܗ̇ܰܘ ܥܺܐܕܳܐ ܪܰܒܳܐ ܕܠܐ ܥܳܒܰܪ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܐ ܩܰܕܺܝܫܳܐ ܗܳܫܳܐ܀

 

ܥܛܪܐ

ܪܰܒ ܟܽܘܡܪ̈ܶܐ ܡܪܰܝܡܳܐ ܡܳܪܝܳܐ ܕܰܒܦܺܝܪܡܶܗ ܙܰܩܦܳܗ̇ ܠܰܚܛܺܝܬܳܐ ܘܰܒܝܰܕ ܪܺܝܚܳܐ ܕܗܶܪ̈ܽܘܡܶܐ ܕܰܐܠܳܗܽܘܬܶܗ ܩܰܛܠܶܗ ܠܡܰܘܬܳܐ ܩܳܛܽܘܠܰܢ: ܘܒܰܩܝܳܡܬܶܗ ܡܫܰܒܰܚܬܳܐ ܐܰܦܨܰܚ ܠܰܫܡܰܝ̈ܳܢܶܐ ܘܠܐܪ̈ܥܳܢܳܝܶܐ: ܐܰܦܨܰܚ ܡܳܪܝ ܐܳܦ ܗܳܫܳܐ ܠܠܶܒܰܘ̈ܳܬܰܢ ܒܝܰܘܡܳܐ ܕܰܩܝܳܡܬܳܟ: ܒܗܰܢܺܝܽܐܘܬ ܪܺܝܚܶܗ ܕܚܽܘܒܳܟ: ܘܰܐܫܘܳܐ ܠܰܢ ܕܢܶܪܗܰܛ ܠܩܰܒܪܳܟ ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ: ܘܰܢܣܰܒܪܳܟ ܒܬܰܪ̈ܥܝܳܬܰܢ ܐܰܝܟ ܢܶܫ̈ܶܐ ܩܰܕܺܝ̈ܫܳܬܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܘܬܡܐ

ܪܰܡܪܶܡ ܡܳܪܝ ܠܥܺܕܬܳܟ ܒܥܽܘܕܪ̈ܳܢܰܝܟ ܘܰܠܥܰܡܳܟ ܒܡܰܘ̈ܗܒܳܬܳܟ: ܘܰܠܥܳܢ̈ܳܟ ܒܰܙܡܺܝܪ̈ܳܬܳܐ ܩܰܕܺܝ̈ܫܳܬܳܐ ܕܰܩܝܳܡܬܳܟ: ܘܰܠܟܳܗ̈ܢܶܐ ܙܰܗܳܐ ܘܩܰܕܶܫ ܕܰܒܪܺܝܫ ܡܰܪܥܺܝܬܳܟ ܩܳܝܡܺܝܢ ܘܰܡܫܰܡܫܺܝܢ ܐܰܝܟܰܢܳܐ ܕܟܰܕ ܡܦܰܬܟܺܐܝܬ ܡܶܢܰܢ ܡܶܫܬܰܒܰܚ ܐܰܢ̱ܬ: ܘܰܫܦܺܝܥܳܐܝܬ ܬܫܰܕܰܪ ܠܰܢ ܡ̣ܶܢ ܒܶܝܬ ܓܰܙܳܐ ܕܪ̈ܰܚܡܰܝܟ ܟܽܠ ܥܽܘܬܪ̈ܶܐ ܕܡܰܘܗ̈ܒܳܬܳܟ ܐܠܰܗܳܝ̈ܳܬܳܐ ܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ ܠܗ̇ܰܘ ܢܽܘܗܪܳܐ ܕܡ̣ܶܢ ܢܽܘܗܪܳܐ ܫܰܪܺܝܪܳܐ ܫܒܺܝܚ ܙܰܠܺܝ̈ܩܶܐ ܩܕܳܡ ܟܽܠ ܥܳܠܡܺܝܢ ܠܥܶܠ ܡ̣ܶܢ ܡܶܠܬܳܐ ܘܒܶܗ ܐܶܬܒܪ̈ܺܝ ܟܽܠ ܒܶܪ̈ܝܳܢ: ܘܒܶܗ ܢܳܗܪܺܝܢ ܟܽܠ ܣܰܘ̈ܦܺܝܢ: ܠܗ̇ܰܘ ܕܶܢܚܳܐ ܓܰܐܝܳܐ ܘܨܶܡܚܳܐ ܡܫܰܒܚܳܐ ܕܰܐܒܳܐ ܓܢܺܝܙܳܐ: ܕܰܒܕܶܢܚܶܗ ܐܠܰܗܳܝܳܐ ܟܽܠ ܚܶܫܽܘ̈ܟܺܝܢ ܐܰܢܗܰܪ: ܘܒܺܝܕܰܥܬܳܐ ܢܰܗܺܝܪܬܳܐ ܕܡܶܢܶܗ ܬܰܪ̈ܥܝܳܬܳܐ ܕܺܝܠܗܽܘܢ ܐܶܬܬܰܨܡܰܚܘ: ܠܗ̇ܰܘ ܛܳܪܽܘܕܳܐ ܘܡܰܥܪܩܳܢܳܐ ܕܚܶܫܽܘܟܳܐ ܠܺܠܝܳܝܳܐ ܕܰܒܝܰܕ ܢܽܘܗܪܶܗ ܐܠܰܗܳܝܳܐ ܕܡ̣ܶܢ ܩܰܒܪܳܐ ܛܪܰܕ ܠܚܶܫܽܘܟܳܐ ܕܰܩܦܺܝܠ ܗܘܳܐ ܥܰܠ ܠܶܒܰܘ̈ܳܬܳܐ ܕܬܰܠܡܺܝ̈ܕܶܐ ܕܰܐܒܺܝܠܺܝܢ ܗܘܰܘ: ܕܠܶܗ ܝܳܐܐ܀

 

ܣܕܪܐ

ܒܳܪܽܘܝܳܐ ܕܥܳܠܡ̈ܶܐ ܐܠܰܗܳܐ ܚܰܝܠܬܳܢܳܐ ܘܩܰܕܺܝܫܳܐ: ܗ̇ܰܘ ܕܡ̣ܶܢ ܩܕܺܝܡ ܒܪܳܐ ܠܰܝܬ ܫܡܰܝܳܐ ܗܰܘ ܠܐ ܡܟܰܘܟܒܳܐ ܕܡ̣ܶܢ ܡܰܕܢܚܳܐ ܠܡܰܥܪܒܳܐ ܡܶܬܬܙܺܝܥ: ܘܙܰܘܥܳܐ ܝܰܘܡܳܢܳܐ ܡܫܰܡܠܐ: ܗ̇ܰܘ ܕܥܰܡ ܪܺܝܫܺܝܬܳܐ ܒܪܳܐ ܠܝܳܬ ܐܰܪܥܳܐ: ܘܚܰܘܺܝ ܒܝܳܬ ܐܰܪܥܳܐ ܠܰܒܪܺܝܬܳܐ ܕܓܽܘܫ̈ܡܳܢܶܐ: ܘܰܠܟܽܠ ܚܰܕ ܝܰܘܡܳܐ ܦܪܰܫ ܡܶܕܶܡ ܕܺܝܠܳܢܳܝܳܐ ܘܛܶܟܣܳܐ ܣܕܺܝܪܳܐ ܕܒܶܪ̈ܝܳܬܳܐ ܢܶܬܛܰܟܰܣ: ܢܽܘܗܪܳܐ ܫܰܪܺܝܪܳܐ ܗ̇ܰܘ ܕܒܺܐܝܕܶܗ ܐܶܬܒܪܺܝ ܢܽܘܗܪܳܐ ܗ̇ܰܘ ܕܡܰܢܗܰܪ ܠܥܳܠܡܳܐ: ܘܚܰܘܺܝ ܕܠܰܘ ܓܽܘܫܡܳܐ ܗ̇ܘ ܢܽܘܗܪܳܐ: ܘܒܰܐܫܺܝܕܽܘܬܶܗ ܡܶܬܦܰܪܫܺܝܢ ܐܺܝ̈ܡܳܡܶܐ ܘܠܰܝܠܰܘ̈ܳܬܳܐ: ܒܝܰܕ ܡܽܘܫܶܐ ܪܺܝܫܳܐ ܕܰܢܒܺܝ̈ܶܐ ܫܰܪܰܪ ܦܽܘܪܫܳܢܳܐ ܕܠܺܠܝܳܐ ܘܕܺܐܝܡܳܡܳܐ ܘܶܐܡܰܪ ܕܰܗܘܳܐ ܪܰܡܫܳܐ ܘܰܗܘܳܐ ܨܰܦܪܐܳ ܝܰܘܡܳܐ ܚܰܕ ܠܚܶܫܽܘܟܳܐ ܫܡܶܗ ܠܺܠܝܳܐ: ܘܰܠܢܽܘܗܪܳܐ ܐܺܝܡܳܡܳܐ ܒܰܡܛܰܟܣܽܘܬ ܫܳܥ̈ܶܐ ܥܶܣܪ̈ܺܝܢ ܘܰܐܪܒܰܥ ܟܪܽܘܟܝܳܐ ܝܰܘܡܳܢܳܝܳܐ ܠܓܺܝܓܠܐ ܗ̇ܳܝ ܩܺܝܩܠܽܘܣܳܝܬܳܐ: ܡ̣ܶܢ ܡܰܕܢܚܳܐ ܠܡܰܥܪܒܳܐ ܥܒܰܕ: ܘܰܠܟܽܠ ܚܕܳܐ ܚܕܳܐ ܡ̣ܶܢ ܓܺܝܓ̈ܠܐ ܗܰܦܟܳܝ̈ܳܬܳܐ ܒܡܽܘܪ̈ܰܐܣ ܕܡܰܪ̈ܕܝܳܬܳܐ ܐܰܝܠܶܝܢ ܕܠܳܚ̈ܡܳܢ ܠܗܶܝܢ ܛܰܟܶܣ ܘܰܣܕܰܪ: ܐܳܕܳܡ ܓܒܺܝܠܐ ܩܰܕܡܳܝܳܐ ܒܨܰܠܡܶܗ ܡ̇ܰܢ ܗܰܘܢܳܐ ܩܰܕܡܳܝܳܐ ܒܪܳܝܗܝ: ܘܰܒܦܰܪܕܰܝܣܳܐ ܥܕܶܢܳܝܳܐ ܕܰܡܡܰܨܰܥ ܒܰܝܢܳܬ ܬܪ̈ܶܝܢ ܓܰܒܺܝ̈ܢ ܐܰܥܡܪܶܗ: ܘܦܽܘܩܕܳܢܳܐ ܠܚܽܘܕܳܝܳܐ ܒܢܳܛܽܘܪܽܘܬ ܢܳܡܽܘܣܳܐ ܡܰܠܟܳܝܳܐ ܠܶܗ ܣܳܡ ܡܰܘܒܕܳܢܳܐ ܗ̇ܰܘ ܣܳܢܳܐܐ ܩܰܕܡܳܝܳܐ ܕܠܽܘܩܒܰܠ ܐܠܰܗܽܘܬܳܐ ܡܪܰܝܰܡܬܳܐ ܠܐܕܳܡ ܡܠܰܟ: ܘܡ̣ܶܢ ܪܰܘܡܳܐ ܪܽܘܚܳܢܳܐ ܠܐܪܥܳܐ ܕܠܰܘ̈ܛܳܬܳܐ ܢܦܰܠ: ܩܛܺܝܠܐ ܩܰܕܡܳܝܳܐ ܘܨܰܦܪܳܝܳܐ ܠܦܽܘܪܩܳܢܳܐ ܘܒܽܘܝܳܐܐ ܕܰܒܝܰܕ ܩܛܺܝܠܐ ܦܳܪܽܘܩܳܝܳܐ ܕܠܶܗ ܐܶܬܝܰܐܝܰܒ ܘܶܐܬܒܰܝܰܐܐ ܒܚܽܘܬܳܡ ܛܽܘܦܣܳܐ ܕܰܪܫܰܡ: ܫܽܘܪܳܝ ܡܰܛܰܪܬܳܐ ܩܰܕܡܳܝܬܳܐ ܠܐܟܶܠܩܰܪܨܳܐ ܡܳܪܽܘܕܳܐ ܐܶܬܥܰܒܕܰܕ ܪܺܝܫ ܓܶܢܣܰܢ ܘܝܰܠܕܰܘ̈ܗܝ ܘܰܠܒܶܝܬ ܬܰܚܬܳܝܺܝ̈ܢ ܐܶܫܬܰܪܓܰܠ ܘܰܐܟܣܽܘܪܺܝܣܬܺܝܢܳܝܳܐ ܠܐܬܪܶܗ ܩܰܕܡܳܝܳܐ ܦܳܫ: ܘܰܒܫܽܘܠܳܡ ܡܰܛܪ̈ܳܬܳܐ ܢܽܘܗܪܳܐ ܫܒܺܝܚܳܐ ܕܺܐܝܬܽܘܬܳܐ ܠܦܽܘܪܩܳܢܰܢ ܓܶܢܣܳܐ ܐ̱ܢܳܫܳܝܳܐ ܕܢܰܚ ܘܰܠܟܽܠ ܐ̱ܢܳܫ ܒܢܽܘܗܪܶܗ ܐܰܨܡܰܚ ܒܡܰܛܰܪܬܳܐ ܕܚܰܕ ܡ̣ܶܢ ܛܰܛܪܰܓܢܽܘܢ ܠܒܽܘܫܳܐ ܢܰܨܺܝܚܳܐ ܒܒܶܙܚܳܐ ܡ̣ܶܢ ܗܶܪܳܘܕܶܣ ܐܶܬܥܰܛܰܦ ܘܰܠܘܳܬ ܦܺܝܠܰܛܳܘܣ ܐܺܝܓܡܽܘܢܳܐ ܐܰܝܟ ܫܳܘܶܐ ܠܡܰܘܬܳܐ ܐܶܫܬܰܕܰܪ: ܒܝܰܕ ܡܶܠܟܳܐ ܡܶܪܬܳܢܳܝܳܐ ܕܥܰܡܳܐ ܩܰܕܡܳܝܳܐ ܘܒܽܘܪܟܬܳܢܳܝܳܐ: ܟܰܕ ܒܪܺܝܫܽܘܬ ܟܳܗܢܽܘܬܳܐ ܕܚܰܢܳܢ ܘܩܰܝܳܦܳܐ ܠܒܶܝܬ ܕܺܝܢܳܐ ܕܥܰܘܠܐ ܐܰܝܟ ܥܳܒܶܕ ܒܺܝ̈ܫܳܬܳܐ ܐܶܬܢܰܓܰܕ ܘܶܐܬܚܰܝܰܒ: ܥܰܠ ܩܰܝܣܳܐ ܕܰܙܩܺܝܦܳܐ ܐܶܬܬܠܺܝ: ܘܚܰܠܐ ܘܰܡܪ̈ܳܪܶܐ ܐܶܫܬܺܝ: ܘܰܒܕܰܦܢܶܗ ܒܠܽܘܟܳܝܬܳܐ ܐܶܬܡܚܺܝ: ܘܡ̣ܶܢ ܩܶܢܛܪܽܘܢܳܐ ܐܠܰܗܳܐ ܐܶܬܬܰܘܕܺܝ: ܘܡ̣ܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܐܶܬܥܰܦܺܝ: ܒܡܰܛܰܪܬܳܐ ܩܰܕܡܳܝܬܳܐ ܕܢܳܓܰܗ ܚܰܕ ܒܫܰܒܳܐ ܡ̣ܶܢ ܩܰܒܪܳܐ ܒܙܳܟܽܘܬܳܐ ܩ̣ܳܡ ܘܰܠܓܶܢܣܰܢ ܕܢܰܦܺܝܠ ܗܘܳܐ ܒܰܩܝܳܡܬܶܗ ܐܰܩܺܝܡ ܘܠܐܬܪܶܗ ܩܰܕܡܳܝܳܐ ܐܰܦܢܺܝ: ܒܡܰܛܰܪܬܳܐ ܩܰܕܡܳܝܬܳܐ ܕܚܶܫܽܘܟܳܐ ܡܰܡܠܶܟ ܢܽܘܗܪܳܐ ܠܝܳܬܒ̈ܰܝ ܒܚܶܫܽܘܟܳܐ ܕܢܰܚ: ܘܰܒܨܶܡܚܳܐ ܕܡܰܨܡܚܽܘܬܳܐ ܐܠܰܗܳܝܬܳܐ ܐܶܬܬܰܨܡܰܚܘ: ܒܡܰܛܰܪܬܳܐ ܕܫܽܘܠܛܳܢ ܚܶܫܽܘܟܳܐ ܡܶܫܬܩܶܠ: ܫܽܘܠܛܳܢ ܐܠܰܗܽܘܬܶܗ ܚܰܘܺܝ: ܘܰܠܫܽܘܠܛܳܢ ܡܳܪܽܘܕܳܐ ܕܠܐ ܨܒܳܐ ܕܰܢܩܰܒܶܠ ܬܽܘܪܳܨܳܐ ܒܰܛܶܠ ܒܡܰܛܰܪܬܳܐ ܕܒܳܗ̇ ܫܺܐܕ̈ܶܐ ܕܠܐ ܪ̈ܰܚܡܶܐ ܡܶܬܢܰܓܕܺܝܢ: ܚܒܺܝ̈ܫܰܝ ܫܝܽܘܠ ܡ̣ܶܢ ܐܰܣܽܘܪܷ̈ܐ ܐܶܫܬܪܺܝܘ: ܘܗ̇ܳܢܽܘܢ ܟܰܕ ܠܐ ܨܳܒܶܝܢ ܡܫܰܒܚܺܝܢ: ܘܗܳܠܶܝܢ ܒܨܶܒܝܳܢܳܐ ܚܺܐܪܳܝܳܐ ܗܰܠܶܠܘ: ܒܡܰܛܰܪܬܳܐ ܗܳܕܶܐ ܡܰܪܝܰܡ ܡܰܓܕܠܳܝܬܳܐ: ܘܡܰܪܝܰܡ ܒܬܽܘܠܬܳܐ ܠܩܰܒܪܳܐ ܡܰܢܰܥ̈ܝ: ܘܰܠܥܺܝܪܳܐ ܕܰܡܥܰܓܰܠ ܟܺܐܦܳܐ ܚܙܰܝ̈: ܘܰܕܩܳܡ ܠܶܗ ܗ̇ܰܘ ܕܶܐܨܛܠܶܒ ܐܶܣܬܰܒܰܪ̈ܝ: ܒܡܰܛܰܪܬܳܐ ܗܳܕܶܐ ܦܓܰܥ̈ܝ ܒܦܳܪܽܘܩܳܐ ܘܶܐܡܰܪ ܠܗܶܝܢ ܫܠܳܡ ܠܟܶܝ̈ܢ: ܚܕܳܝܶܝ̈ܢ ܠܐ ܬܶܕܚ̈ܠܳܢ: ܙܶܠܶܝ̈ܢ ܣܰܒܰܪ̈ܝ ܠܐܚ̈ܰܝ ܕܩܳܡܶܬ ܠܺܝ ܘܰܕܢܺܐܙܽܠ̱ܘܢ ܠܰܓܠܺܝܠܐ: ܒܡܰܛܰܪܬܳܐ ܗܳܕܶܐ ܐܰܝܟ ܓܽܘܪܝܳܐ ܕܰܐܪܝܳܐ ܣܠܶܩ ܟܰܕ ܢܰܩܺܝܦܳܐ ܠܶܗ ܓܰܢ̱ܒܳܪܽܘܬܳܐ: ܘܒܳܗ̇ ܐܳܬܶܐ ܠܡܶܐܬܺܝܬܳܐ ܐ̱ܚܪܳܝܬܳܐ ܠܰܡܕܳܢ ܛܽܘܗ̈ܡܶܐ ܘܫܰܪ̈ܒܳܬܳܐ: ܒܢܺܝܣܳܢ ܝܰܪܚܳܐ ܩܰܕܡܳܝܳܐ ܫܰܪܺܝ ܒܒܳܪܽܘܝܽܘܬܳܐ ܕܒܶܪ̈ܝܳܬܳܐ ܘܳܐܕܳܡ ܘܚܰܘܳܐ ܒܦܰܪܕܰܝܣܳܐ ܐܶܬܬܣܺܝܡܘ: ܘܡ̣ܶܢ ܪܰܘܡܳܐ ܪܽܘܚܳܢܳܝܳܐ ܐܶܫܬܕܺܝܘ: ܒܢܺܝܣܳܢ ܫܠܰܚܘ ܫܰܦܺܝܪ̈ܶܐ ܫܽܘܒܚܳܐ ܕܰܠܒܺܝܫܺܝܢ ܗܘܰܘ: ܘܒܶܗ ܢܰܚ̈ܬܶܐ ܕܬܶܫܒܽܘܚܬܳܐ ܒܰܩܝܳܡܬܶܗ ܕܡܳܪܗܽܘܢ ܐܶܬܥܰܛܰܦܘ ܗܘܰܘ: ܘܡ̣ܶܢ ܫܶܦܠܐ ܘܡܽܘܟܳܟܳܐ ܐܶܬܥܰܠܺܝܘ ܗܘܰܘ: ܒܢܺܝܣܳܢ ܐܶܬܰܐܫܕܰܬ݀ ܡܶܪܬܶܗ ܩܳܛܽܘܠܬܳܐ ܕܚܶܘܝܳܐ ܚܰܪܡܳܢܳܐ: ܘܒܶܗ ܕܶܥܟܰܬ݀ ܡܶܪܬܶܗ ܘܶܐܬܩܰܛܰܠ ܒܩܶܛܠܶܗ ܕܦܳܪܶܩ ܟܽܠ: ܒܢܺܝܣܳܡ ܐܶܨܛܰܒܬܰܬ݀ ܟܰܠܬܳܐ ܕܠܐ ܩܰܕܝܰܬ݀ ܓܰܒܪܳܗ̇: ܘܒܶܗ ܒܰܪܬ݀ ܥܰܡ̈ܡܶܐ ܐܶܬܗܰܕܪܰܬ݀ ܒܫܽܘܦܪ̈ܶܐ ܘܨܶܒ̈ܬܶܐ ܐܠܰܗܳܝ̈ܶܐ: ܒܢܺܝܣܳܢ ܝܰܪܚܳܐ ܐܶܬܚܰܪܪܰܬ݀ ܙܳܢܺܝܬܳܐ ܡ̣ܶܢ ܥܰܒܕܽܘܬܳܐ ܡܶܨܪܳܝܬܳܐ ܘܦܶܪܥܽܘܢܳܝܬܳܐ: ܘܰܒܢܺܝܣܳܢ ܒܰܪܬ݀ ܥܰܡ̈ܡܶܐ ܐܶܬܚܰܪܪܰܬ݀ ܡ̣ܶܢ ܩܛܺܝܪܶܗ ܕܣ̇ܳܛܳܢܳܐ ܕܝܰܬܺܝܪ ܒܺܝܫ ܡ̣ܶܢ ܡܶܨܪܳܝܳܐ: ܒܢܺܝܣܳܢ ܝܰܪܚܳܐ ܒܺܐܝ̈ܕܰܝ ܡܽܘܫܶܐ ܒܰܪ ܥܰܡܪܰܡ ܠܙܳܢܺܝܬܳܐ ܒܛܽܘܪ ܣܺܝܢܰܝ ܚܠܽܘܠܐ ܐܶܨܛܰܒܰܬ݀ ܘܰܒܦܶܨܚܳܐ ܡ̣ܶܢ ܡܚܰܒܠܳܢܳܐ ܐܶܫܬܰܘܙܒܰܬ݀: ܘܰܒܢܺܝܣܳܢ ܥܺܕܬܳܐ ܩܰܕܺܝܫܬܳܐ ܒܩܶܛܠܶܗ ܕܦܶܨܚܳܐ ܡܰܦܨܰܚ ܟܽܠ ܐܶܬܚܰܪܪܰܬ݀ ܡ̣ܶܢ ܣܳܛܳܢܳܐ ܡܚܰܒܠܳܢܳܐ ܕܢܰܦܫ̈ܳܬܳܐ ܐܶܬܦܰܨܝܰܬ݀ ܒܚܰܕ ܒܫܰܒܳܐ ܕܰܩܕܳܡ ܗܳܢܳܐ ܠܐܘܪܫܠܶܡ ܥܰܠ ܟܰܕ ܪܟܺܝܒ ܥܺܝܠܐ: ܘܰܒܣܰܘ̈ܟܰܝ ܙܰܝܬܳܐ ܒܩܳܠ ܝܰܠܽܘ̈ܕܶܐ ܐܶܫܬܰܒܰܚ: ܘܰܒܚܰܕ ܒܫܰܒܳܐ ܕܝܰܘܡܳܢ ܡ̣ܶܢ ܩܰܒܪܳܐ ܩܳܡ ܘܡ̣ܶܢ ܢܶܫ̈ܶܐ ܘܬܰܠܡܺܝ̈ܕܶܐ ܐܶܬܝܰܩܰܪ: ܒܚܰܕ ܒܫܰܒܳܐ ܕܰܩܕܳܡ ܗܳܢܳܐ ܣܳܒ̈ܶܐ ܣܰܟ̈ܠܐ ܛܠܰܡܘ ܬܶܫܒܽܘܚܬܶܗ: ܘܝܰܠܽܘ̈ܕܶܐ ܘܫܰܒܪ̈ܶܐ ܓܠܰܘ ܫܽܘܒܚܳܐ ܕܰܐܠܳܗܽܘܬܶܗ: ܒܗ̇ܰܘ ܛܪܰܕ ܐܶܢܽܘܢ ܡ̣ܶܢ ܒܰܝܬܶܗ: ܘܰܒܗܳܢܳܐ ܐܰܥܶܠ ܥܰܡ̈ܡܶܐ ܠܝܳܪܬܽܘܬܶܗ: ܒܚܰܕ ܒܫܰܒܳܐ ܕܰܩܕܳܡ ܗܳܢܳܐ ܥܒܰܕ ܦܪܳܓܶܠܐ ܡ̣ܶܢ ܚܰܒܠܐ ܠܰܛܪܽܘܕܝܳܐ ܕܙܳܒܽܘ̈ܢܶܐ ܘܰܡܙܰܒܢܳܢ̈ܶܐ ܡ̣ܶܢ ܗܰܝܟܠܐ: ܘܰܒܚܰܕ ܒܫܰܒܳܐ ܕܝܰܘܡܳܢ ܫܽܘܠܛܳܢܳܐ  ܕܪܺܝܫܽܘܬ ܟܳܗܢܽܘܬܳܐ ܒܝܳܗܽܘܒܽܘܬ ܕܰܪܓܳܐ ܕܟܳܗܢܽܘܬܳܐ ܒܥܶܠܺܝܬܳܐ ܠܬܰܠܡܺܝ̈ܕܶܐ ܘܰܒܫܰܒܬܳܐ ܐܶܬܛܰܫܺܝܘ ܒܓܰܘ ܟܡܺܐܢ̈ܶܐ: ܘܰܒܚܰܕ ܒܫܰܒܳܐ ܨܒܰܘ ܡ̣ܶܢ ܡܰܛܫ̈ܝܳܬܗܽܘܢ: ܘܰܚܠܳܦ ܟܰܪܝܽܘܬܳܐ ܘܥܳܩܬܳܐ ܕܨܶܦܚܰܬ݀ ܠܗܽܘܢ: ܚܰܕܽܘܬܳܐ ܕܡܶܢܫܶܠܝ ܐܰܕܪܶܟܘ: ܒܝܽܘܡ ܥܪܽܘܒܬܳܐ ܒܟܰܝ̈ ܢܶܫ̈ܶܐ ܥܶܒܪ̈ܳܝܳܬܳܐ: ܘܰܒܫܰܒܬܳܐ ܛܰܝܶܒ̈ܝ ܒܶܣ̈ܡܶܐ ܘܗܶܪ̈ܽܘܡܶܐ: ܘܰܒܚܰܕ ܒܫܰܒܳܐ ܡܰܢܰܥ̈ܝ ܠܩܰܒܪܳܐ ܘܰܚ̈ܙܰܝ ܢܽܘܚܳܡܶܗ: ܘܶܐܣܬܰܒܰܪ̈ܝ ܡ̣ܶܢ ܦܳܪܽܘܩܳܐ ܚܰܕܽܘܬܳܐ: ܒܚܰܕ ܒܫܰܒܳܐ ܢܚܶܬܘ ܡܰܠܐܟ̈ܶܐ ܒܰܠܒܽܘ̈ܫܶܐ ܚܶܘܳܪ̈ܶܐ ܘܝܰܩܰܪܘ ܩܝܳܡܬܶܗ: ܘܙܳܥܘ ܢܳܛܽܘܪ̈ܶܐ ܕܰܚܙܰܘ ܢܽܘܚܳܡܶܗ ܘܰܒܗܶܬܘ ܩܰܝܳܦܳܐ ܘܚܰܢܳܢ ܘܰܦܪ̈ܺܝܫܶܐ ܒܪܽܘܡܪܳܡܶܗ: ܘܝܰܗܒܘ ܚܰܨܳܐ ܠܰܥܪܽܘܩܝܳܐ ܒܫܶܡܥܳܐ ܕܙܳܟܽܘܬܶܗ: ܒܚܰܕ ܒܫܰܒܳܐ ܕܰܩܕܳܡ ܗܳܢܳܐ ܥܺܕܬܳܐ ܒܩܳܠ ܟܶܢܫܳܐ ܕܰܒܢܶܝ̈ܗ̇ ܫܰܒܰܚܬܳܟ: ܘܰܒܚܰܕ ܒܫܰܒܳܐ ܕܝܰܘܡܳܢ ܕܠܐ ܫܶܠܝܳܐ ܡܝܰܒܒܳܐ ܠܳܟ: ܘܰܠܢܽܘܚܳܡܳܟ ܕܡ̣ܶܢ ܩܰܒܪܳܐ ܡܝܰܩܪܳܐ: ܒܚܰܕ ܒܫܰܒܳܐ ܕܰܩܕܳܡ ܗܳܢܳܐ ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ ܐܶܬܬܰܙܥܰܩ ܠܳܟ: ܘܰܒܚܰܕ ܒܫܰܒܳܐ ܗܳܢܳܐ ܕܝܰܘܡܳܢ ܩܰܕܺܝܫ ܩܰܕܺܝܫ ܡܳܪܝܳܐ ܐܶܙܕܰܡܰܪ̈ܝ ܠܳܟ: ܒܚܰܕ ܒܫܰܒܳܐ ܗܳܢܳܐ ܕܝܰܘܡܳܢ ܡܦܺܝܣܺܝܢܰܢ ܠܳܟ ܡܶܠܬܳܐ ܡܬܽܘܡܳܝܶܗ ܕܰܐܒܳܐ: ܕܥܰܠ ܥܶܛܪܳܐ ܗܳܢܳܐ ܕܒܶܣ̈ܡܳܐ ܕܠܳܟ ܡܩܰܪܒܺܝܢܰܢ ܕܰܒܢܽܘܗܪܳܟ ܐܠܰܗܳܝܳܐ ܢܶܬܢܰܗܰܪ: ܘܠܐܬܪܰܢ ܩܰܕܡܳܝܳܐ ܢܶܦܢܶܐ: ܘܡ̣ܶܢ ܢܺܝܪܶܗ ܕܣܳܛܳܢܳܐ ܢܶܬܚܰܪܰܪ: ܘܒܰܟܪܽܘܟܝܳܐ ܦܳܪܽܘܩܳܝܳܐ ܕܰܡܕܰܒܪܳܢܽܘܬܳܟ ܕܠܐ ܙܽܘܥܙܳܥ ܒܗܰܝܡܳܢܽܘܬܳܐ ܢܶܫܬܰܪܰܪ: ܘܡ̣ܶܢ ܡܰܛܪ̈ܳܬܳܐ ܕܫܺܐܕ̈ܶܐ ܒܺܝ̈ܫܶܐ ܨܰܗܝ̈ܰܝ ܠܰܕܡܳܐ ܕܢܰܦ̈ܫܳܬܰܢ ܢܶܫܬܰܘܙܰܒ ܘܡ̣ܶܢ ܠܒܽܘܟܳܝܗܽܘܢ ܕܐ̱ܢܳܫ̈ܳܐ ܥܰܢ̈ܳܬܶܐ ܢܶܬܦܪܶܩ: ܘܥܰܡ ܡܰܠܐܟ̈ܶܐ ܘܢܶܫ̈ܶܐ ܩܰܕܺܝ̈ܫܳܬܳܐ ܘܬܰܠܡܺܝ̈ܕܶܐ: ܕܫܰܒܰܚܘ ܨܶܝܕ ܩܰܒܪܳܟ ܢܫܰܒܰܚ: ܘܚܰܕܽܘܬܳܐ ܢܶܬܥܰܛܰܦ. ܘܰܒܢܰܚ̈ܬܶܐ ܚܶܘܳܪ̈ܶܐ ܕܰܥܒܳܕ̈ܶܐ ܛܳܒ̈ܶܐ ܢܩܰܒܠܳܟ ܒܝܽܘܡ ܓܶܠܝܳܢܳܟ ܟܰܕ ܢܺܐܪܥܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܒܰܓܡܺܝܪܽܘܬܳܐ ܕܫܽܘ̈ܟܳܢܶܐ ܪ̈ܽܘܚܳܢܳܝܶܐ ܢܙܰܝܚܳܟ: ܘܥܰܡ ܟܽܠ ܕܰܫܦܰܪܘ ܠܨܶܒܝܳܢܳܟ ܛܳܒܳܐ ܢܪܰܡܪܡܳܟ: ܘܰܚܢܳܢ ܘܥܰܢܺܝ̈ܕܶܐ ܘܟܽܠܗܽܘܢ ܡܗܰܝܡ̈ܢܶܐ ܐܰܝܠܶܝܢ ܕܰܫܟܶܒܘ ܥܰܠ ܣܰܒܪܳܐ ܕܰܫܡܳܟ ܒܰܬܪܺܝܨܽܘܬ ܫܽܘܒܚܳܐ: ܢܩܽܘܡ ܡ̣ܶܢ ܝܰܡܺܝܢܳܟ: ܘܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܘܬܰܘܕܺܝܬܳܐ ܘܗܶܕܪܳܐ ܡܥܰܠܝܳܐ ܘܰܕܢܺܝܚܳܐ ܘܩܽܘܠܳܣܳܐ ܪܓܺܝܓܳܐ: ܘܪܽܘܡܪܳܡܳܐ ܢܰܨܺܝܚܳܐ: ܘܣܶܓܕܬܳܐ ܪܟܺܝܢܬܳܐ ܢܶܫܬܘܶܐ ܕܰܢܩܰܪܶܒ: ܠܗ̇ܰܘ ܚܰܝܠܐ ܕܺܐܝܬܝܳܐ ܩܰܕܡܳܝܳܐ: ܠܗ̇ܰܘ ܨܶܡܚܳܐ ܕܰܐܒܳܐ ܓܢܺܝܙܳܐ ܘܰܡܬܽܘܡܳܝܳܐ: ܠܗܳܝ ܬܰܪܥܺܝܬܳܐ ܕܗܰܘܢܳܐ ܠܐ ܡܶܬܕܰܪܟܳܢܳܐ: ܠܗܳܝ ܡܰܚܫܰܒܬܳܐ ܘܡܶܠܬܳܐ ܠܐ ܡܶܬܒܰܨܝܳܢܺܝܬܳܐ: ܠܗ̇ܳܝ ܝܰܡܺܝܢܳܐ ܕܛܳܒܽܘܬܳܐ ܠܐ ܡܶܫܬܰܪܝܳܢܺܝܬܳܐ: ܠܗ̇ܰܘ ܕܡ̣ܶܢ ܥܺܝܪ̈ܶܐ ܕܠܐ ܫܶܠܝܳܐ ܡܶܫܬܰܒܰܚ: ܘܡ̣ܶܢ ܟܪ̈ܽܘܒܶܐ ܕܠܐ ܫܶܬܩܳܐ ܡܶܬܒܰܪܰܟ: ܘܡ̣ܶܢ ܣܪ̈ܳܦܶܐ ܠܐ ܡܰܘܦܝܳܢܳܐܝܬ ܡܶܬܪܰܡܪܰܡ ܒܗܳܢܳܐ ܥܶܕܳܢܳܐ܀

ܣܕܪܐ

ܣܳܓܕܺܝܢܰܢ ܘܡܰܘܕܶܝܢܰܢ ܠܳܗ̇ ܠܐܝܬܽܘܬܳܟ: ܐܠܰܗܳܐ ܕܥܰܒܕܰܢ ܒܨܰܠܡܶܗ ܘܒܰܕܡܽܘܬܶܗ: ܡܪܰܡܪܡܺܝܢܰܢ ܠܳܟ ܒܪܳܐ ܝܺܚܺܝܕܳܝܳܐ: ܗ̇ܰܘ ܕܰܒܡܶܐܬܺܝܬܳܟ ܫܒܺܝܚܬܳܐ ܫܰܝܶܢܬ ܠܰܢ: ܡܗܰܝܡܢܺܝܢܰܢ ܒܳܟ ܦܺܐܪܳܐ ܡܰܚܝܳܢܳܐ ܕܡ̣ܶܢ ܐܰܒܳܐ ܓܢܺܝܙܳܐ ܕܰܒܝܰܕ ܡܰܘܬܳܐ ܕܺܝܠܳܟ ܡܰܥܒܶܕ ܚܰܝ̈ܶܐ ܘܠܐ ܡܳܝܽܘܬܽܘܬܳܐ ܚܰܣܺܝܬ ܠܰܢ: ܐܰܢ̱ܬ ܓܶܝܪ ܐܺܝܬܰܝܟ ܐܠܰܗܳܐ ܠܐ ܚܳܫܽܘܫܳܐ ܘܰܡܥܰܠܰܝ ܡ̣ܶܢ ܚܰܫ̈ܶܐ ܥܕܺܝ̈ܠܐ: ܨܒܰܝܬ ܓܶܝܪ ܕܰܒܪ̈ܰܚܡܰܝܟ ܨܶܒܝܳܢ̈ܳܝܶܐ ܬܶܗܘܶܐ ܒܰܪܢܳܫܳܐ ܡܶܛܽܠܳܬܰܢ ܚܰܛܳܝ̈ܶܐ: ܘܬܶܣܥܽܘܪ ܠܰܩܒܺܝܪ̈ܶܐ ܒܝܰܕ ܢܰܦܫܳܟ ܘܬܶܚܕܶܐ ܐܶܢܽܘܢ ܒܰܚܙܳܬܳܟ: ܗ̇ܰܘ ܕܫܽܘܠܛܳܢܳܟ ܡܙܺܝܥ ܟܽܠܗܽܘܢ ܣܰܘ̈ܦܶܐ: ܘܰܒܩܰܒܪܳܐ ܚܶܫܽܘܟܳܝܳܐ ܐܶܬܚܒܶܫܬ ܐܰܢ̱ܬ ܕܺܐܝܬܰܝܟ ܢܽܘܗܪܳܐ ܫܰܪܺܝܪܳܐ ܘܠܐ ܡܶܣܬܰܝܟܳܢܳܐ: ܐܶܬܩܒܰܪܬ ܩܒܽܘܪܬܳܐ ܐ̱ܢܳܫܳܝܬܳܐ: ܐܰܢ̱ܬ ܕܰܒܩܳܠܳܟ ܠܰܩܒܺܝܪ̈ܶܐ ܕܡ̣ܶܢ ܥܳܠܰܡ ܡܢܰܚܶܡ ܐܰܢ̱ܬ: ܘܟܰܕ ܬܽܘܒ ܠܣܳܥܽܘܪܽܘܬܳܐ ܕܡܺܝ̈ܬܶܐ ܫܰܡܠܺܝܬ ܘܰܦܪܰܩܬ ܒܝܰܡܺܝܢܳܟ ܠܐܝܠܶܝܢ ܕܰܥܓܺܝܢܺܝܢ ܗܘܰܘ ܥܰܠ ܥܰܦܪܳܐ: ܠܘܳܬ ܚܰܝ̈ܶܐ ܠܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܕܡܶܟܘ ܫܶܢܬܳܐ ܝܰܩܺܝܪܬܳܐ ܕܡܰܘܬܳܐ. ܘܰܫܪܰܝܬ ܘܒܰܛܶܠܬ ܠܐܘܚܕܳܢܶܗ ܕܳܐܟܶܠܩܰܪܨܳܐ ܘܰܕܟܽܠܗܽܘܢ ܚܰܝܠܰܘ̈ܳܬܶܗ: ܘܰܐܥܒܰܪܬ ܠܐܷܒܠܐܴ ܩܰܕܡܳܝܳܐ ܗ̇ܰܘ ܕܰܡܢܳܬܡܳܠܝ ܦܪܺܝܣ ܗܘܳܐ ܥܰܠ ܟܽܠܗܶܝܢ ܒܶܪ̈ܝܳܬܳܐ: ܡܢܳܬܡܳܠܝ ܙܩܺܝܦ ܗܘܳܐ ܡܰܠܟܳܐ ܘܰܡܠܐܷ ܚܰܫ̈ܶܐ: ܝܰܘܡܳܢܳܐ ܢܳܨܚܳܐ ܩܝܳܡܬܶܗ ܡܫܰܒܰܚܬܳܐ ܒܙܳܟܽܘܬܳܐ: ܡܢܳܬܡܳܠܝ ܬܪܺܝܥܳܐ ܕܰܦܢܶܗ ܒܠܽܘܟܳܝܬܳܐ: ܝܰܘܡܳܢܳܐ ܦܬܰܚ ܡܰܥܡܽܘܕܺܝܬܳܐ ܒܰܚܢܳܢܶܗ ܠܫܽܘܒܩܳܢܳܐ ܕܰܚܛܳܗ̈ܶܐ: ܡܢܳܬܡܳܠܝ ܡܟܰܠܶܠ ܪܺܝܫܶܗ ܒܟܽܘ̈ܒܶܐ ܥܰܡܳܐ ܚܰܪܡܳܐ ܘܡܰܚܪܡܳܐ: ܝܰܘܡܳܢܳܐ ܗܰܕܰܪ ܠܥܺܕܬܶܗ ܒܠܐܴ ܡܶܬܚܰܒܠܳܢܽܘܬܳܐ: ܡܢܳܬܡܳܠܝ ܩܛܺܝܪ ܐܶܒܠܐ ܥܰܠ ܟܽܠܗܶܝܢ ܒܶܪ̈ܝܳܬܳܐ: ܝܰܘܡܳܢܳܐ ܪܳܘܙܺܝܢ ܘܰܡܫܰܒܚܺܝܢ ܟܽܠܗܽܘܢ ܣܰܘ̈ܦܶܐ ܒܢܽܘܗܪܳܐ ܕܰܩܝܳܡܬܳܐ ܐܶܬܬܰܒܪܰܩ ܥܠܰܝܗܽܘܢ: ܡܢܳܬܡܳܠܝ ܡܒܰܕܪܺܝܢ ܬܰܠܡܺܝ̈ܕܶܐ ܘܰܙܪܺܝܩܺܝܢ ܪ̈ܰܚܡܶܐ: ܝܰܘܡܳܢܳܐ ܟܽܘܢܳܫܳܐ ܘܠܽܘܒܳܒܳܐ ܠܓܽܘܕܳܐ ܪܚܺܝܡܬܳܐ ܕܬܰܠܡܺܝ̈ܕܶܐ: ܡܢܳܬܡܳܠܝ ܓܰܒܳܐ ܕܣܶܡܳܠܐ ܒܙܳܟܽܘܬܳܐ ܢܳܨܰܚ ܗܳܐ ܝܰܘܡܳܢܳܐ ܒܢ̈ܰܝ ܝܰܡܺܝܢܳܐ ܪܘܳܙܳܐ ܥܛܺܝܦܺܝܢ: ܘܰܡܣܰܒܪܺܝܢ ܠܰܚܕ̈ܳܕܶܐ ܕܩ̣ܳܡ ܚܰܝܳܐ ܡ̣ܶܢ ܒܶܝܬ ܡܺܝ̈ܬܶܐ: ܡܢܳܬܡܳܠܝ ܪܟܺܝܒ  ܩܰܝܣܳܐ ܕܚܶܣܕܳܐ ܓܰܢ̱ܒܳܪܳܐ ܕܥܳܠܡ̈ܶܐ: ܝܰܘܡܳܢܳܐ ܕܶܝܢ ܐܰܩܺܝܡ ܥܰܡܶܗ ܡ̣ܶܢ ܒܶܝܬ ܡܺܝ̈ܬܶܐ ܠܰܫܟܺܝ̈ܒܰܝ ܥܰܦܪܳܐ: ܡܢܳܬܡܳܠܝ ܡܢܺܝܕܳܐ ܟܢܽܘܫܬܳܐ ܪܺܝܫܳܗ̇ ܘܰܡܚܰܣܕܳܐ ܠܡܳܪܳܗ̇: ܝܰܘܡܳܢܳܐ ܪܳܡ ܩܳܠܳܗ̇ ܕܥܺܕܬܳܐ ܡܗܰܝܡܰܢܬܳܐ ܘܰܡܟܰܢܫܳܐ ܠܰܒܢܶܝ̈ܗ̇ ܕܰܩܝܳܡܬܳܐ ܠܚܰܕܽܘܬܳܐ ܠܐ ܡܶܫܬܰܪܝܳܢܺܝܬܳܐ. ܡܢܳܬܡܳܠܝ ܥܰܪܺܝܩܺܝܢ ܪ̈ܳܚܡܶܐ ܘܰܡܒܰܕܪܺܝܢ ܬܰܠܡܺܝ̈ܕܶܐ: ܝܰܘܡܳܢܳܐ ܪܳܘܙܺܝܢ ܚܰܒܺܝ̈ܒܶܐ: ܘܡܶܣܬܰܒܪܺܝܢ ܡ̣ܶܢ ܡܰܠܐܟ̈ܶܐ ܥܰܠ ܢܽܘܚܳܡܶܗ ܕܡܳܪܗܽܘܢ: ܝܰܘܡܳܢܳܐ ܥܺܕܬܳܐ ܐܶܬܦܰܨܚܰܬ݀: ܘܥܰܠ ܛܽܘܪ̈ܶܐ ܡܩܰܝܙܳܐ ܘܙܳܡܪܳܐ ܬܶܫܒܽܘܚܬܳܐ: ܟܰܕ ܚܳܙܝܳܐ ܠܬܰܠܡܺܝ̈ܕܶܐ ܕܰܒܚܰܕܽܘܬܳܐ ܡܶܬܟܰܢܫܺܝܢ ܨܶܝܕ ܩܰܒܪܳܐ: ܝܰܘܡܳܢܳܐ ܡܰܠܐܟ̈ܶܐ ܒܚܶܘܳܪ̈ܰܝܗܽܘܢ ܠܩܰܒܪܳܐ ܟܪܺܝܟܺܝܢ ܗܘܰܘ: ܝܰܘܡܳܢܳܐ ܢܶܫ̈ܶܐ ܟܰܕ ܕܳܝ̈ܨܳܢ ܣܰܒܰܪ̈ܝ ܠܰܫܠܺܝ̈ܚܶܐ ܥܰܠ ܩܝܳܡܬܳܐ ܡܰܠܝܰܬ݀ ܚܰܕ̈ܘܳܬܳܐ: ܝܰܘܡܳܢܳܐ ܫܶܡܥܽܘܢ ܘܝܽܘܚܰܢܳܢ ܠܩܰܒܪܳܐ ܕܪܰܒܗܽܘܢ ܘܡܳܪܗܽܘܢ ܥܰܠܘ: ܘܠܐ ܐܶܫܟܰܚܘ ܬܰܡܳܢ ܐܶܠܐ ܟܶܬܳܢ̈ܶܐ ܒܰܠܚܽܘܕ ܘܣܽܘܕܳܪܳܐ ܕܪܺܝܫܶܗ ܠܰܣܛܰܪ: ܝܰܘܡܳܢܳܐ ܢܚܶܬܘ ܥܺܝܪ̈ܶܐ ܒܚܶܘܳܪ̈ܰܝܗܽܘܢ ܕܰܢܣܰܒܪܽܘܢ ܠܰܒܢܰܝ̈ܢܳܫܳܐ ܥܰܠ ܩܝܳܡܬܶܗ ܕܡܳܪܗܽܘܢ: ܝܰܘܡܳܢܳܐ ܥܰܠܘ: ܢܽܘܪ̈ܳܢܶܐ ܘܣܶܕܪ̈ܶܐ ܘܓܽܘ̈ܕܶܐ ܕܪ̈ܽܘܚܳܢܶܐ ܠܰܡܙܰܝܳܚܽܘ ܠܥܶܠܳܝܳܐ ܕܶܐܬܬܰܚܬܺܝ ܒܚܽܘܒܶܗ ܠܰܫܝܽܘܠ ܕܢܶܦܪܽܘܩ ܠܓܶܢܣܳܐ ܕܰܒܢܰܝ̈ܢܳܫܳܐ ܡ̣ܶܢ ܛܪܽܘܢܽܘܬܳܐ ܕܒܺܝܫܳܐ ܡܳܪܽܘܕܳܐ: ܝܰܘܡܳܢܳܐ ܩܛܰܪܘ ܓܽܘ̈ܕܶܐ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ: ܘܰܡܣܰܒܪܺܝܢ ܥܶܠܳܝ̈ܶܐ ܠܬܰܚܬܳܝ̈ܶܐ ܥܰܠ ܢܽܘܚܳܡܶܗ ܕܒܰܪ ܚܰܝܳܐ. ܝܰܘܡܳܢܳܐ ܐܶܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܡ̣ܶܢ ܒܶܝܬ ܡܺܝ̈ܬܶܐ ܘܰܡܚܳܐ ܠܰܒܥܶܠܕ̈ܒܳܒܰܘܗܝ ܠܒܶܣܬܪܶܗ: ܝܰܘܡܳܢܳܐ ܐܶܬܢܰܩܫܰܬ݀ ܣܶܟܬܳܐ ܕܚܰܝ̈ܶܐ ܒܰܐܪܥܳܐ ܕܡܺܝ̈ܬܶܐ: ܘܰܕܢܰܚ ܢܽܘܚܳܡܳܐ ܒܰܐܬܪܳܐ ܕܰܩܒܺܝܪ̈ܶܐ. ܝܰܘܡܳܢܳܐ ܐܰܙܠܶܓ ܢܽܘܗܪܳܐ ܒܬܰܘ̈ܳܢܶܝܗ̇ ܚܰܕ̈ܬܶܐ ܕܗܳܡܳܢ ܘܰܣܘܰܚܘ ܠܐܘܪܥܶܗ ܟܺܐܢ̈ܶܐ ܘܙܰܕܺܝ̈ܩܶܐ ܡ̣ܶܢ ܩܰܒܪ̈ܰܝܗܽܘܢ: ܝܰܘܡܳܢܳܐ ܣܳܓܶܕ ܘܰܡܫܰܒܰܚ ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܕܒܰܩܝܳܡܬܶܗ ܕܡܳܪܗܽܘܢ ܕܡ̣ܶܢ ܩܰܒܪܳܐ ܩܢܳܐ ܚܰܝ̈ܶܐ ܚܰܕ̈ܬܶܐ: ܘܰܦܢܳܐ ܠܰܥܕܶܝܢ ܝܳܪܬܽܘܬܶܗ: ܝܰܘܡܳܢܳܐ ܡܩܰܠܣܺܝܢ ܠܳܟ ܡܰܠܟ̈ܶܐ ܘܟܳܗ̈ܢܶܐ ܘܰܢܒܺܝ̈ܶܐ ܕܶܐܫܬܰܪܰܪ̈ܝ ܡܶܠܰܝ̈ܗܽܘܢ: ܝܰܘܡܳܢܳܐ ܡܪܰܡܪܡܺܝܢ ܠܳܟ ܥܓܺܝ̈ܢܰܝ ܥܰܦܪܳܐ ܕܒܰܩܝܳܡܬܳܟ ܐܶܬܚܰܪܰܪܘ ܡ̣ܶܢ ܛܪܽܘܢܽܘܬܶܗ ܕܣܳܛܳܢܳܐ: ܝܰܘܡܳܢܳܐ ܚܶܕܝܰܬ݀ ܥܺܕܬܳܐ ܡܟܺܝܪܬܳܟ: ܒܳܟ ܚܰܬܢܳܐ ܩܛܺܝܠܐ ܕܰܐܘܪܶܒܬܳܗ̇ ܒܝܰܘܡܳܐ ܕܰܙܩܺܝܦܽܘܬܳܟ. ܘܡܶܛܽܠܗܳܕܶܐ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܢܶܬܚܰܕܰܬ݀ ܝܽܘܩܢܳܐ ܕܺܝܠܰܢ ܕܰܒܠܺܝ ܒܰܚܛܺܝܬܳܐ: ܘܢܶܬܪܰܟܰܒ ܨܰܠܡܳܐ ܕܺܝܠܰܢ ܒܳܟ ܕܺܐܝܬܰܝܟ ܨܰܝܳܪܳܐ ܡܗܺܝܪܳܐ: ܘܰܚܢܰܢ ܘܥܰܢܺܝ̈ܕܰܝܢ ܘܰܐܚܰܝ̈ܢ ܘܰܐܒܳܗܰܝ̈ܢ ܘܪ̈ܰܒܳܢܰܝܢ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܢܶܫܬܘܶܐ ܕܢܶܚܙܶܝܟ ܡܳܐ ܕܳܐܬܶܐ ܐܰܢ̱ܬ ܒܡܰܠܟܽܘܬܳܟ: ܘܰܢܫܰܒܰܚ ܠܝܰܡܳܐ ܫܦܺܝܥܳܐ ܕܰܚܢܳܢܳܟ: ܡܳܪܳܐ ܕܰܬܪ̈ܰܝܗܽܘܢ ܥܳܠܡ̈ܶܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

ܐܰܢܗܰܪ ܡܳܪܝ ܠܥܰܝ̈ܢܶܐ ܒܙܰܠܓ̈ܶܐ ܛܽܘܒܬܳܢ̈ܶܐ ܡܰܠܝ̈ܰܝ ܢܽܘܗܪܳܐ. ܘܚܰܕܳܐ ܠܰܢ ܒܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܘܰܐܦܨܰܚ ܠܰܢ ܒܕܶܢܚܳܐ ܕܡܳܪܽܘܬܳܟ ܘܥܰܕܰܪ ܠܰܢ ܒܥܽܘܕܪܳܢܳܐ ܕܛܰܝܒܽܘܬܳܟ: ܡܫܺܝܚܳܐ ܣܰܒܪܐ ܕܚܰܝܰܝ̈ܢ ܘܦܳܪܽܘܩܳܐ ܕܢܰܦ̈ܫܳܬܰܢ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ ܠܗ̇ܰܘ ܡܳܪܳܐ ܡܪܰܚܡܳܢܳܐ ܕܰܢܚܶܬ ܘܶܐܬܒܰܣܰܪ ܒܛܰܝܒܽܘܬܶܗ: ܘܰܛܥܶܡ ܡܰܘܬܳܐ ܚܠܳܦ ܡܳܝܽܘ̈ܬܶܐ ܒܨܶܒܝܳܢܶܗ ܘܰܢܚܶܬ ܓܰܫ ܬܗܽܘ̈ܡܶܐ ܬܰܚܬܳܝ̈ܶܐ ܒܝܰܕ ܢܰܦܫܶܗ. ܘܬܰܒܰܪ ܡܽܘܟ̈ܠܐ ܥܰܫܺܝ̈ܢܶܐ ܒܬܽܘܩܦܶܗ: ܘܰܐܥܪܶܩ ܠܩܶܣܛܽܘܢܳܪ̈ܶܐ ܒܰܩܒܽܘܪܬܶܗ ܘܰܐܒܗܶܬ ܐܶܢܽܘܢ ܒܰܩܝܳܡܬܶܗ: ܘܚܰܕܺܝ ܘܰܐܦܨܰܚ ܠܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܒܢܽܘܚܳܡܶܗ: ܘܚܰܘܺܝ ܘܰܕܢܰܚ ܠܟܽܠܗܽܘܢ ܥܰܡ̈ܡܶܐ ܦܽܘܪܩܳܢܶܗ: ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܚܽܘܣܳܝܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܶܠܬܳܐ ܝܺܚܺܝܕܳܝܳܐ ܘܰܡܬܽܘܡܳܝܳܐ ܘܰܟܣܶܐ ܒܺܐܝܬܽܘܬܶܗ ܕܕܳܠ ܡ̣ܶܢ ܡܶܕܝܳܪ̈ܰܘܗܝ ܓܢܺܝ̈ܙܶܐ ܕܢܶܣܥܽܘܪ ܠܰܓܒܺܝܠܬܶܗ: ܘܶܐܬܥܰܛܰܦ ܦܰܓܪܳܐ ܕܐ̱ܢܳܫܽܘܬܰܢ: ܘܶܐܬܓܠܺܝ ܒܶܗ ܠܒܶܪ̈ܝܳܬܳܐ ܕܺܝܠܶܗ: ܗ̇ܰܘ ܪܳܡܳܐ ܘܰܡܥܰܠܝܳܐ ܕܰܐܪܟܶܢ ܪܰܘܡܳܐ ܕܪܰܒܽܘܬܶܗ ܘܶܐܬܢܰܚܰܬ ܠܥܽܘ̈ܡܩܶܐ ܬܰܚܬܳܝ̈ܶܐ ܒܣܽܘܓܳܐܐ ܕܛܰܝܒܽܘܬܶܗ. ܘܶܐܬܗܰܦܰܟ ܥܰܡܰܢ ܡܕܰܒܪܳܢܳܐܝܬ ܒܝܰܕ ܚܽܘܒܶܗ: ܘܫܰܡܠܺܝ ܐ̱ܪ̈ܳܙܶܐ ܘܛܽܘܦ̈ܣܶܐ ܕܚܰܙܳܝ̈ܶܐ ܒܰܩܢܽܘܡܶܗ: ܘܡܰܠܺܝ ܦ̈ܶܠܐܬܳܐ ܕܟܺܐܢ̈ܶܐ ܒܡܽܘܟܳܟܶܗ: ܥܰܬܺܝܪܳܐ ܕܶܐܬܡܰܣܟܰܢ ܡܶܛܽܠܳܬܰܢ ܒܰܚܢܳܢܶܗ: ܓܰܢ̱ܒܳܪܳܐ ܕܩܰܛܠܶܗ ܠܩܳܛܽܘܠܰܢ ܒܩܶܛܠܶܗ: ܘܰܐܡܺܝܬ ܠܡܰܘܬܳܐ ܡܡܺܝܬܳܢܰܢ ܒܡܰܘܬܶܗ: ܚܰܝܳܐ ܕܰܐܚܺܝ ܠܐܕܳܡ ܒܢܽܘܚܳܡܶܗ: ܘܚܰܕܶܬ ܨܽܘܪ̈ܳܬܳܐ ܕܨܰܠܡܶܗ ܒܰܩܝܳܡܬܶܗ: ܘܚܰܕܺܝ ܠܥܶܠܳܝ̈ܶܐ ܒܙܳܟܽܘܬܶܗ. ܘܰܐܦܨܰܚ ܠܬܰܚܬܳܝ̈ܶܐ ܒܰܚܙܳܬܶܗ: ܘܰܢܚܶܬܘ ܪ̈ܽܘܚܳܢܶܐ ܠܐܝܩܳܪܶܗ: ܘܶܐܬܘܰܥܰܕܘ ܡܰܠܐܟ̈ܶܐ ܨܶܝܕ ܩܰܒܪܶܗ ܘܶܐܬܚܰܠܰܛܘ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ ܘܶܐܫܬܰܝܰܢܘ ܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ: ܣܠܶܩ ܒܫܽܘܒܚܳܐ ܕܡ̣ܶܢ ܥܺܝܪ̈ܰܝ ܪܰܘܡܳܐ ܘܰܒܢܰܝ̈ܢܳܫܳܐ: ܘܝܰܒܶܒܘ ܪܽܘ̈ܚܳܢܶܐ ܥܰܡ ܦܰܓܪ̈ܳܢܶܐ: ܐܳܦ ܐܰܣܪܰܚܘ ܬܶܫܒܽܘܚܬܳܐ ܓܫܺܝ̈ܡܶܐ ܥܰܡ ܠܐ ܓܫܺܝܡܳܐ ܘܰܐܒܗܶܬ ܙܳܩܽܘ̈ܦܶܐ ܝܽܘܕܳܝ̈ܶܐ ܕܰܟܦܰܪܘ ܒܶܗ: ܘܰܪܘܰܙܘ ܬܰܠܡܺܝ̈ܕܶܐ ܕܗܰܝܡܶܢܘ ܒܶܗ. ܐܶܬܟܰܦܰܪ̈ܝ ܕܶܡ̈ܥܶܐ ܕܚܰܘܳܐ ܐܶܡܰܢ ܩܰܕܡܳܝܬܳܐ ܘܰܐܥܒܰܪ ܐܶܒܠܐ ܡ̣ܶܢ ܐܳܕܳܡ. ܝܰܘܡܳܢܳܐ ܐܶܬܚܰܕܰܬ݀ ܟܽܠܶܗ ܟܝܳܢܳܐ ܕܺܝܠܰܢ ܕܰܒܪܶܓܰܬ݀ ܐܺܝܠܳܢܳܐ ܚܳܒ ܘܶܐܙܕܟܺܝ: ܝܰܘܡܳܢܳܐ ܒܰܙ ܓܰܢ̱ܒܳܪܳܐ ܠܡܺܐܢ̈ܶܐ ܕܚܰܣܺܝܢܳܐ ܘܠܰܫܒܺܝܬܶܗ ܐܰܗܦܶܟ: ܝܰܘܡܳܢܳܐ ܓܳܠܽܘܬܳܐ ܕܡ̣ܶܢ ܥܳܠܡܺܝܢ ܐܶܬܦܰܪܩܰܬ݀ ܘܰܙܡܺܝܪܬܳܐ ܕܦܽܘܢܳܝܳܐ ܒܝܽܘܒܳܒܳܐ ܐܶܫܬܰܡܥܰܬ݀. ܝܰܘܡܳܢܳܐ ܕܰܘܺܝܕ ܒܩܺܝܬܳܪܶܗ ܡܰܙܥܶܩ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ: ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܝܰܘܡܳܢܳܐ ܗܶܪܓܳܐ ܙܺܐܦܳܢܳܐ ܕܝܽܘ̈ܕܳܝܶܐ ܕܺܐܒ̈ܶܐ ܪ̈ܰܡܫܳܝܶܐ: ܐܶܬܦܰܪܣܺܝ ܒܨܰܦܪܳܐ ܚܰܕܬܳܐ ܕܰܕܢܰܚ ܒܰܐܪܥܳܐ ܘܰܐܢܗܰܪ ܠܦܶܢ̈ܝܳܬܳܐ: ܝܰܘܡܳܢܳܐ ܘܰܥܕܳܐ ܕܚܰܝ̈ܶܐ ܡ̣ܶܢ ܒܶܝܬ ܡܺܝ̈ܬܶܐ ܠܰܫܠܺܝ̈ܚܶܐ ܐܶܬܓܠܺܝ ܘܒܶܗ ܫܽܘܠܛܳܢ ܡܰܘܬܳܐ ܛܪܽܘܢܳܐ ܐܶܫܬܪܺܝ: ܝܰܘܡܳܢܳܐ ܙܺܝܘܳܐ ܕܬܶܫܒܽܘܚܬܳܐ ܠܐ ܡܶܬܚܰܒܠܳܢܺܝܬܳܐ ܡ̣ܶܢ ܫܝܽܘܠ ܒܳܠܰܥܬܳܐ ܕܢܰܚ: ܝܰܘܡܳܢܳܐ ܚܰܟܺܝ̈ܡܳܬܳܐ ܬܰܠܡܺܝ̈ܕܳܬܳܐ ܒܗܶܪ̈ܽܘܡܶܐ ܢܦܰܩ̈ܝ ܗܘ̈ܰܝ ܕܰܢܒܰܣ̈ܡܳܢ ܠܦܰܓܪܳܟ ܝܰܩܺܝܪܳܐ ܘܰܠܩܰܒܪܳܟ ܡܰܥܒܶܕ ܚܰܝ̈ܶܐ ܘܠܰܣܒܰܪܬܳܐ ܕܰܩܝܳܡܬܳܟ ܒܚܰܕܽܘܬܳܐ ܩܰܒ̈ܶܠܝ: ܝܰܘܡܳܢܳܐ ܛܳܣܘ ܥܶܠܳܝ̈ܶܐ ܟܰܕ ܡܰܒܪܩܺܝܢ ܒܰܠܒܽܘ̈ܫܶܐ ܚܶܘܳܪ̈ܶܐ: ܘܰܐܟܪܶܙܘ ܕܠܰܝܬܰܘܗܝ ܒܶܝܬ ܡܺܝ̈ܬܶܐ ܚܰܝܳܐ ܒܰܪ ܚܺܐܪ̈ܶܐ. ܝܰܘܡܳܢܳܐ ܝܰܗ̈ܠܐ ܕܢܽܘܪܳܐ ܘܰܕܪܽܘܚܳܐ ܐܰܪܺܝܡܘ ܩܳܠܰܝ̈ܗܽܘܢ ܘܙܰܠܚܽܘܗ̇ ܠܐܪܥܳܐ ܒܫܽܘܒܚܳܐ ܕܗܽܘܠܳܠܰܝ̈ܗܽܘܢ: ܝܰܘܡܳܢܳܐ ܟܡܺܝܪܽܘܬܳܐ ܘܰܒܟܳܬܳܐ ܪܰܡܫܳܝܬܳܐ ܡ̣ܶܢ ܬܰܠܡܺܝ̈ܕܶܐ ܐܶܬܛܰܠܩܰܬ݀: ܘܚܰܕܽܘܬܳܐ ܘܰܦܨܺܝܚܽܘܬܳܐ ܬܰܪܥܺܝܬܗܽܘܢ ܐܶܬܡܰܠܝܰܬ݀: ܝܰܘܡܳܢܳܐ ܠܽܘܬܳܟܳܐ ܦܪܺܝܫܳܝܳܐ ܐܶܙܕܰܝܰܦ. ܘܛܽܘܟܳܢܳܐ ܕܣܳܦܪ̈ܶܐ ܒܕܶܢܚܶܗ ܕܢܽܘܚܳܡܳܐ ܐܶܬܒܰܛܰܠ. ܝܰܘܡܳܢܳܐ ܡܺܝܬܽܘܬܰܢ ܒܠܐܴ ܡܳܝܽܘܬܽܘܬܳܐ ܐܶܬܚܰܠܦܰܬ݀: ܘܡܶܬܚܰܒܠܳܢܽܘܬܶܗ ܕܰܟܝܳܢܰܢ ܐܶܬܚܰܕܬܰܬ݀ ܒܠܐܴ ܡܶܬܚܰܒܠܳܢܽܘܬܳܐ: ܝܰܘܡܳܢܳܐ ܢܽܘܗܪܳܐ ܕܠܐ ܥܝܳܕܳܐ ܪܗܶܒ ܠܩܶܣܛܽܘܢܳܪ̈ܶܐ ܘܟܳܣܳܐ ܕܪܶܥܠܐ ܘܰܕܩܽܘܛܳܦܳܐ ܡܥܺܝܩܳܢܳܐ ܠܗܽܘܢ ܐܰܪܘܺܝ: ܝܰܘܡܳܢܳܐ ܣܰܦܣܺܪܶܗ ܠܛܺܝܫܬܳܐ ܕܡܰܘܬܳܐ ܩܗܳܬ: ܘܚܰܓܰܘ̈ܗܝ ܡܰܪܺܝܪ̈ܶܐ ܠܡܰܪܩܽܘܕܬܳܐ ܐܶܬܗܰܦܰܟܘ. ܝܰܘܡܳܢܳܐ ܥܠܰܝܡܽܘܬܳܐ ܒܬܽܘܠܳܝܬܳܐ ܘܣܰܝܒܽܘܬܳܐ ܙܗܺܝܬܳܐ ܠܩܰܒܪܶܗ ܕܡܰܚܶܐ ܡܺܝ̈ܬܶܐ ܪ̈ܳܗܛܳܢ ܗܘ̈ܰܝ. ܝܰܘܡܳܢܳܐ ܦܳܓ ܢܳܡܽܘܣܳܐ ܕܛܶܠܳܢܳܝ̈ܳܬܳܐ: ܘܥܰܠ ܚܠܳܦܰܘܗܝ ܢܳܡܽܘܣܳܐ ܕܪ̈ܽܘܚܳܢܳܝܳܬܳܐ. ܝܰܘܡܳܢܳܐ ܨܡܰܚ ܡ̣ܶܢ ܚܶܫܽܘܟܳܐ ܢܽܘܗܪܳܐ: ܘܡ̣ܶܢ ܥܰܡܛܳܢܳܐ ܫܶܡܫܳܐ ܗ̇ܰܘ ܕܰܥܪܰܒ ܒܰܥܪܽܘܒܬܳܐ: ܝܰܘܡܳܢܳܐ ܩܳܠܐ ܕܰܡܣܰܒܰܪ̈ܰܝ ܫܠܳܡܳܐ ܘܰܕܡܰܫ̈ܡܰܥܝ ܚܰܕܽܘܬܳܐ ܕܳܐܡܪܺܝܢ ܠܨܶܗܝܽܘܢ ܡܣܰܒܰܪܬܳܐ: ܕܶܐܬܬܥܺܝܪܝ ܐܶܬܬܥܺܝܪܝ ܡܕܺܝܢܬܳܐ ܕܦܽܘܪܩܳܢܳܐ ܘܰܠܒܰܫܝ ܥܽܘܫܢܳܐ ܕܰܕܪܳܥܶܗ ܕܡܳܪܝܳܐ: ܝܰܘܡܳܢܳܐ ܪܺܝܫ ܓܽܘܢܝܳܐ ܕܙܳܘܺܝܬܳܐ ܚܰܝܶܕ ܘܰܐܠܘܶܬ ܙܡܺܝܪ̈ܳܬܳܐ ܡܰܠܐܟܰܝ̈ܳܬܳܐ ܕܒܰܚܕܳܐ ܫܰܘܝܽܘܬ ܩܺܝܢܬܳܐ ܢܰܣ̈ܩܳܢ ܬܶܫܒܽܘܚܬܳܐ: ܝܰܘܡܳܢܳܐ ܫܰܝܢܳܐ ܫܰܪܺܝܪܳܐ ܘܰܫܠܳܡܳܐ ܫܰܦܝܳܐ ܐܶܬܺܝܗܶܒ ܒܥܶܠܺܝܬܳܐ ܠܫܽܘܘܕܳܥܳܐ ܕܪܶܚܡܰܬ݀ ܐ̱ܢܳܫܽܘܬܳܐ. ܝܰܘܡܳܢܳܐ ܬܳܐܘܡܰܐ ܡܶܫܬܰܪܰܪ ܡ̣ܶܢ ܒܳܬܰܪ ܦܽܘܠܳܓܳܐ ܒܓܶܫܬܳܐ ܚܰܝܬܳܐ ܘܡܰܚܝܳܢܺܝܬܳܐ: ܝܰܘܡܳܢܳܐ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܰܢ: ܚܢܰܢ ܗ̇ܳܢܽܘܢ ܕܶܐܙܕܰܕܰܩܢܰܢ ܒܛܰܝܒܽܘܬܳܟ ܡܰܓܳܢ ܘܶܐܬܚܢܢܶܢ ܡܶܢܳܟ: ܟܰܕ ܠܗܳܕܶܐ ܡܰܘܗܰܒܬܳܐ ܠܐ ܫܳܘܶܝܢ ܗܘܰܝܢ ܡܶܛܽܠ ܫܟܺܝܪܽܘܬܳܐ ܕܣܳܥܽܘܪ̈ܘܳܬܰܢ: ܐܶܠܐ ܬܽܘܒ ܐܰܝܟ ܡܳܪܳܐ ܚܰܟܺܝܡܳܐ ܚܰܕܶܬ ܠܰܢ: ܘܰܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܫܰܪܰܪ ܠܰܢ. ܐܰܘܳܐ ܠܰܣܕܺܝ̈ܩܶܐ ܕܡܰܪܥܺܝܬܳܟ: ܒܰܝܬܳܐ ܠܰܓܙܳܪ̈ܶܐ ܕܥܳܢ̈ܳܟ: ܓܶܕ ܠܐܡܪ̈ܶܐ ܕܶܐܬܠܰܣܛܺܝܘ ܡ̣ܶܢ ܛܝܳܪܳܟ: ܕܰܒܰܪ ܠܥܶܪ̈ܒܶܐ ܕܡܶܬܝܰܐܝܒܺܝܢ ܠܪܶܥܝܳܟ: ܗܰܕܳܐ ܠܰܢܩܰܘ̈ܳܬܳܐ ܕܣܳܘ̈ܚܳܢ ܠܩܳܠܳܟ: ܘܰܥܶܕ ܠܚܶܪ̈ܝܳܝܶܐ ܕܰܡܪܰܕܘ ܡ̣ܶܢ ܢܺܝܪܳܟ. ܙܰܡܶܢ ܠܪ̈ܰܚܺܝܩܶܐ ܕܶܐܬܢܰܟܪܺܝܘ ܡ̣ܶܢ ܫܳܪܽܘܬܳܟ. ܚܰܝܶܕ ܠܰܦܠܺܝ̈ܓܶܐ ܕܥܰܡܳܟ. ܛܰܪ ܠܰܦܪ̈ܺܝܩܰܝ ܒܰܕܡܳܟ: ܝܰܒܶܠ ܠܪ̈ܰܚܺܝܩܶܐ ܡܣܰܟ̈ܝܰܝ ܠܣܰܒܪܳܟ: ܟܰܢܶܫ ܠܓܳܠܽܘܬܳܐ ܕܡܰܘܕ̈ܝܰܝ ܒܰܫܡܳܟ: ܠܰܚܶܡ ܠܗܰܕ̈ܳܡܶܐ ܚܬܺܝ̈ܡܰܝ ܒܰܨܠܺܝܒܳܟ: ܡܰܟܶܟ ܠܪ̈ܳܡܶܐ ܘܰܠܩܰܫ̈ܝܰܝ ܩܕܳܠܐ ܫܰܗܳܐ. ܢܰܛܰܪ ܠܪ̈ܳܥܰܘܳܬܳܐ ܘܥܰܠܠܳܢ̈ܶܐ. ܣܰܬܶܬ ܠܥܳܢ̈ܳܟ ܡܗܰܝܡܰܢܬܳܐ: ܥܰܫܶܢ ܠܰܥܠܺܝ̈ܒܶܐ ܕܓܳܥܶܝܢ ܠܘܳܬܳܟ: ܦܰܓܶܕ ܠܪ̈ܶܥܝܳܢܶܐ ܕܰܢܦܰܪܘ ܡ̣ܶܢ ܫܪܳܪܳܟ: ܨܰܠܶܡ ܠܬܰܪ̈ܥܝܳܬܳܐ ܕܰܐܚܓܰܪ̈ܝ ܡ̣ܶܢ ܢܳܡܽܘܣܳܟ: ܩܒܽܘܥ ܠܪ̈ܶܓܠܐ ܕܰܕܪ̈ܰܟܝ ܠܒܰܪ ܡ̣ܶܢ  ܫܒܺܝ̈ܠܰܝܟ: ܪܰܝܰܚ ܠܣܶܢܶܐܬܳܐ ܘܠܰܚܣܳܡܳܐ ܕܰܙܩܺܝܦ ܠܩܽܘܒܠܶܗ: ܫܰܗܳܐ ܠܡܶܪܬܶܗ ܕܚܶܘܝܳܐ ܥܩܰܠܩܳܠܐ: ܬܰܗܳܐ ܘܰܐܥܒܰܪ ܠܚܰܫ̈ܶܐ ܕܶܐܬܒܰܛܰܠܘ ܒܚܰܫܶܗ ܕܰܙܩܺܝܦܳܟ. ܘܰܥܒܶܕ ܕܽܘܟܪܳܢܳܐ ܛܳܒܳܐ ܠܐܒܳܗܰܝ̈ܢ ܘܠܐܚܰܝ̈ܢ ܘܪ̈ܰܒܳܢܰܝܢ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܘܰܐܥܶܠ ܐܶܢܽܘܢ ܠܰܓܢܽܘܢܳܟ ܒܝܰܘܡܳܐ ܕܡܶܬܓܰܠܝܳܐ ܪܰܒܽܘܬܳܟ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܬܘܒ ܕܥܕܢܐ ܕܫܠܡܐ

ܩܕܡܝܬ ܨܠܘܬܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܫܰܝܢܳܐ ܢܰܓܺܝܪܳܐ ܕܡܶܢܳܟ: ܘܒܰܫܠܳܡܳܐ ܐܰܡܺܝܢܳܐ ܕܡ̣ܶܢ ܠܘܳܬܳܟ: ܒܗܺܝܠܐܝܬ ܢܥܰܕܥܶܕ ܠܳܟ: ܘܰܡܫܰܝܢܳܐܝܬ ܢܚܰܓܶܐ ܠܳܟ: ܘܢܰܘܕܶܐ ܠܳܟ ܐܰܡܺܝܢܳܐܝܬ ܘܰܢܫܰܒܰܚ ܠܳܟ ܦܨܺܝܚܳܐܝܬ: ܟܰܕ ܝܳܗܒܺܝܢܰܢ ܟܽܠܰܢ ܫܠܳܡܳܐ ܩܰܕܺܝܫܳܐ ܠܰܚܕ̈ܳܕܶܐ ܒܢܽܘܫܰܩܬܳܐ ܩܰܕܺܝܫܬܳܐ ܘܰܐܠܳܗܳܝܬܳܐ ܕܫܳܦܪܳܐ ܠܳܟ: ܘܢܰܣܶܩ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܫܠܡܐ

ܫܽܘܒܚܳܐ ܠܳܟ ܐܰܒܳܐ ܫܰܝܢܳܐ ܕܰܫܡܰܝ̈ܳܢܶܐ: ܬܰܘܕܺܝ ܠܳܟ ܒܪܳܐ ܫܠܳܡܳܐ ܕܰܐܪ̈ܥܳܢܳܝܶܐ: ܣܓܺܝܕ ܐܰܢ̱ܬ ܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܕܫܽܘ̈ܟܳܢܶܐ: ܐܰܒܳܐ ܕܝܰܗܒ ܠܺܝܚܺܝܕܳܝܶܗ ܠܡܰܘܬܳܐ ܡܶܛܽܠ ܦܽܘܪܩܳܢܰܢ: ܒܪܳܐ ܕܰܥܨܳܝܗܝ ܚܽܘܒܶܗ ܘܡܶܛܽܠܳܬܰܢ ܡܺܝܬ: ܪܽܘܚܳܐ ܩܰܕܺܝܫܳܐ ܚܳܕܶܐ ܒܛܳܒ̈ܳܬܰܢ ܘܒܶܗ ܡܶܬܝܰܗ̈ܒܳܢ ܠܰܢ ܫ̈ܶܐܠܳܬܰܢ. ܐܰܢ̱ܬ ܐܺܝܬܰܝܟ ܬܠܺܝܬܳܝܳܐ ܘܰܠܚܽܘܕܳܝܳܐ ܕܚܰܕ ܐܺܝܬܰܝܟ ܐܽܘܣܝܳܐܝܬ ܘܒܰܬܠܳܬܳܐ ܩܢܽܘ̈ܡܶܐ ܣܓܺܝܕ ܐܰܢ̱ܬ: ܗܰܒܠܰܢ ܕܢܶܬܶܠ ܫܠܳܡܳܐ ܠܰܚܕ̈ܳܕܶܐ ܫܰܦܝܳܐܝܬ: ܘܰܢܥܰܦܶܩ ܚܰܕ ܠܚܰܕ ܒܚܽܘܒܳܐ ܐܠܰܗܳܐܝܬ ܘܰܢܫܰܒܰܚ ܠܐܠܳܗܽܘܬܳܟ ܦܨܺܝܚܳܐܝܬ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܚܰܝܠܐ ܘܚܶܟܡܬܳܐ ܕܰܐܒܳܐ ܡܬܽܘܡܳܝܳܐ ܘܰܫܡܰܝܳܢܳܐ: ܗ̇ܰܘ ܕܺܐܝܬܰܝܟ: ܟܝܳܢܳܐܝܬ ܘܳܐܣܝܳܐܝܬ ܫܰܝܢܳܐ ܘܰܫܠܳܡܳܐ ܡܪܰܥܶܐ ܟܽܠ: ܗ̇ܰܘ ܕܒܳܟ ܐܶܫܬܰܝܢܰܬ݀ ܢܟܺܝܠܽܘܬܳܐ ܕܰܐܪܡܺܝ ܚܶܘܝܳܐ ܢܟܺܝܠܐ ܒܶܝܬ ܐܰܒܳܐ ܘܠܐܕܳܡ: ܘܒܳܟ ܗܘܳܐ ܫܠܳܡܳܐ ܒܶܝܬ ܬܪ̈ܰܝܗܽܘܢ ܓܰܒ̈ܶܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܐܰܢ̱ܬ ܫܰܝܶܢܬ ܠܩܺܐܒܽܘܬܳܐ ܕܢܽܘܚ ܕܡ̣ܶܢ ܡܰܚܫܽܘ̈ܠܐ ܝܰܡ̈ܡܳܝܶܐ ܡܶܬܛܰܪܦܳܐ ܗܘܳܬ݀: ܘܰܐܢ̱ܬ ܫܰܝܶܢܬ ܠܐܪܥܳܐ ܡ̣ܶܢ ܛܰܘܦܳܢܳܐ ܕܰܚܛܺܝܬܳܐ ܕܰܠܟܽܠܳܗ̇ ܐܰܪܥܳܐ ܚܰܒܶܠ ܗܘܳܐ: ܫܰܝܢܳܐ ܕܺܝܠܳܟ ܫܰܒܶܠ ܫܒܺܝ̈ܠܐ ܒܠܶܒܶܗ ܕܝܰܡܳܐ ܣܽܘܡܳܩܳܐ. ܘܰܫܠܳܡܳܟ ܬܰܪܶܨ ܠܐܝܣܪܳܐܶܝܠ ܕܒܰܝܢܳܬ ܓܰܠܠܰܘ̈ܗܝ ܢܗܰܠܶܟ: ܫܰܝܢܳܐ ܕܺܝܠܳܟ ܐܰܥܒܰܪ ܠܡܰܨܽܘܬܳܐ ܕܰܐܫܪܰܩ ܚܶܘܝܳܐ ܠܚܰܘܳܐ ܒܶܝܬ ܐܺܝܠܳܢ̈ܶܐ: ܘܰܫܠܳܡܳܟ ܕܰܒܝܰܕ ܓܰܒܪܺܐܶܝܠ ܩܦܰܠ ܠܠܰܘܛܬܳܐ ܪܨܺܝܦܰܬ݀ ܒܬܶܢܚ̈ܳܬܳܐ ܡ̣ܶܢ ܓܶܢܣܳܐ ܕܰܒܢܰܝ̈ܢܳܫܳܐ: ܒܫܰܝܢܳܐ ܕܺܝܠܳܟ ܐܠܰܗܳܝܳܐ ܐܶܫܬܰܝܢܰܬ݀ ܡܥܰܪܡܽܘܬܶܗ ܕܝܰܡܳܐ ܕܶܐܙܕܩܶܦ ܠܽܘܩܒܰܠ ܬܰܠܡܺܝ̈ܕܶܐ: ܘܰܫܠܳܡܳܟ ܐܰܥܒܰܪ ܠܟܰܪܝܽܘܬܳܐ ܡ̣ܶܢ ܠܶܒܳܐ ܕܬܰܠܡܺܝ̈ܕܶܐ ܒܥܶܠܺܝܬܳܐ: ܫܰܝܢܳܐ ܕܺܝܠܳܟ ܛܪܰܕ ܦܠܺܝܓܽܘܬܳܐ ܡ̣ܶܢ ܪ̈ܶܥܝܳܢܰܝܗܽܘܢ: ܘܰܫܠܳܡܳܟ ܐܰܥܒܰܪ ܘܟܰܢܶܫ ܠܰܡܒܰܕܪܽܘܬܳܐ ܕܺܝܠܗܽܘܢ ܠܰܚܕܳܐ ܨܡܺܝܕܽܘܬܳܐ: ܫܰܝܢܳܐ ܕܺܝܠܳܟ ܓܠܺܝ ܘܰܐܦܶܩ ܠܰܡܚܰܦ̈ܝܰܝ ܡ̣ܶܢ ܡܛܝ̈ܫܬܗܽܘܢ: ܘܰܫܠܳܡܳܟ ܠܰܒܶܒ ܐܶܢܽܘܢ ܥܰܠ ܣܰܒܪ̈ܳܬܳܐ: ܫܰܝܢܳܐ ܕܺܝܠܳܟ ܐܰܦܢܺܝ ܠܓܳܠܽܘܬܳܐ ܠܦܰܪܕܰܝܣܳܐ: ܘܰܫܠܳܡܳܐ ܕܺܝܠܳܟ ܡܠܐܴ ܐܶܢܽܘܢ ܚܰܝܠܐ ܘܓܰܢ̱ܒܳܪܽܘܬܳܐ: ܫܰܝܢܳܐ ܕܺܝܠܳܟ ܫܪܳܐ ܠܰܫܢܳܢܳܐ ܫܰܠܗܶܒܺܝܬܳܢܳܝܬܳܐ ܕܡܶܬܗܰܦܟܳܐ ܗܘܳܬ݀ ܠܡܶܛܰܪ ܐܺܝܠܳܢܳܐ: ܘܰܫܠܳܡܳܟ ܐܰܥܒܰܪ ܠܚܰܪܒܳܐ ܕܰܣܘܳܬܳܐ ܕܰܩܕܳܡ ܦܬܰܟܪܽܘܬܳܐ: ܫܰܝܢܳܐ ܕܺܝܠܳܟ ܟܰܦܰܪ ܠܕܶܡܥܬܳܐ ܡ̣ܶܢ ܦܰܪܨܽܘܦܳܐ ܕܐ̱ܢܳܫܽܘܬܳܐ: ܘܰܫܠܳܡܳܐ ܕܺܝܠܳܟ ܡܠܐܴ ܚܰܕܽܘܬܳܐ ܠܟܽܠܳܗ̇ ܡܶܬܥܰܡܪܳܢܺܝܬܳܐ ܐܰܢ̱ܬ ܡܳܪܝܳܐ ܫܰܝܢܶܗ ܕܰܐܒܳܐ ܕܒܳܟ ܐܶܫܬܰܝܰܢܘ ܫܡܰܝܳܐ ܘܰܐܪܥܳܐ: ܫܰܟܶܢ ܠܰܢ ܒܝܰܘܡܳܐ ܗܳܢܳܐ ܕܥܺܐܕܳܐ ܕܰܩܝܳܡܬܳܟ ܘܰܒܪܰܬܚܳܐ ܕܪܽܘܚܳܐ ܩܰܕܺܝܫܳܐ ܢܥܰܦܶܩ ܠܰܚܕ̈ܳܕܶܐ ܒܢܽܘܫܰܩܬܳܐ ܐܠܰܗܳܝܬܳܐ: ܘܒܳܗ̇ ܢܶܬܶܐܣܰܪ ܥܰܡ ܚܕ̈ܳܕܶܐ ܒܚܽܘܒܳܐ ܘܥܰܡܳܟ ܒܰܚܕܳܐ ܚܕܳܝܽܘܬܳܐ ܪܽܘܚܳܢܳܝܬܳܐ: ܘܢܶܬܡܠܐܷ ܫܰܝܢܳܐ ܕܺܝܠܳܟ: ܘܰܫܠܳܡܳܐ ܕܡܶܢܳܟ ܢܶܫܬܰܟܰܢ ܠܰܢ ܒܫܰܝܢܳܐ ܕܺܝܠܳܟ ܫܰܝܶܢ ܠܥܺܕܬܳܟ ܡ̣ܶܢ ܟܽܠ ܟܶܫ̈ܠܐ ܕܶܐܪ̈ܶܣܺܝܣ ܫܰܩܳܪ̈ܳܬܳܐ: ܘܰܫܠܳܡܳܐ ܕܺܝܠܳܟ ܢܪܰܡܪܶܡ ܩܰܪܢܳܗ̇ ܒܪ̈ܳܥܰܘܳܬܳܐ ܕܚܳܐܫܺܝܢ ܚܠܳܦܶܝܗ̇: ܫܰܝܢܳܐ ܕܺܝܠܳܟ ܢܶܡܠܐܷ ܠܣܳܚܪ̈ܳܬܳܗ̇ ܡ̣ܶܢ ܡܢܺܝܚܳܢ̈ܶܐ ܕܡܳܪܽܘܬܳܟ: ܘܰܫܠܳܡܳܐ ܕܺܝܠܳܟ ܢܶܛܪܽܘܕ ܣܶܕ̈ܩܶܐ ܘܚܶܪ̈ܝܳܢܶܐ ܕܗܳܪܺܝܢ ܥܰܡܳܗ̇ ܕܥܺܕܬܳܟ ܒܚܶܪܝܳܝܽܘܬܳܐ: ܫܰܝܢܳܐ ܕܺܝܠܳܟ ܢܨܰܒܶܬ ܓܽܘܕܶܝ̈ܗ̇ ܒܟܳܗ̈ܢܶܐ ܘܰܡܫܰܡ̈ܫܳܢܶܐ ܕܰܡܪܰܥܶܝܢ ܠܳܟ: ܘܰܫܠܳܡܳܐ ܕܺܝܠܳܟ ܢܗܰܕܰܪ ܐܶܢܽܘܢ ܒܚܽܘܒܳܐ ܫܰܦܝܳܐ ܘܰܒܪܶܚܡܬܳܐ ܠܐ ܚܰܫܳܢܳܝܬܳܐ: ܫܰܝܢܳܐ ܕܺܝܠܳܟ ܢܢܰܒܪܶܫ ܐܶܢܽܘܢ ܒܚܽܘܒܳܐ ܪܽܘܚܳܢܳܝܳܐ: ܘܰܫܠܳܡܳܐ ܕܺܝܠܳܟ ܢܶܡܠܐܷ ܐܶܢܽܘܢ ܢܺܝܚܽܘܬܳܐ ܘܒܰܣܺܝܡܽܘܬܳܐ: ܫܰܝܢܳܐ ܕܺܝܠܳܟ ܢܫܰܡܠܐܷ ܐܶܢܽܘܢ ܒܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ: ܘܰܫܠܳܡܳܐ ܕܺܝܠܳܟ ܢܚܰܘܶܐ ܐܶܢܽܘܢ ܓܳܡܽܘܪܳܐ ܕܦܽܘܩ̈ܕܳܢܶܐ ܕܺܝܠܳܟ ܡܰܥܒ̈ܕܰܝ ܚܰܝ̈ܶܐ. ܫܰܝܢܳܐ ܕܺܝܠܳܟ ܢܕܰܟܶܐ ܠܰܢ ܡ̣ܶܢ ܟܽܠ ܢܶܟܠܐ ܘܡܰܣܰܒ ܒܰܐܦ̈ܶܐ: ܘܰܫܠܳܡܳܐ ܕܺܝܠܳܟ ܢܶܕܚܽܘܩ ܡܶܢܰܢ ܠܟܶܫܠܐ ܘܰܪܓܺܝܙܽܘܬܳܐ: ܫܰܝܢܳܐ ܕܺܝܠܳܟ ܢܶܣܬܽܘܪ ܡܶܢܰܢ ܩܪ̈ܳܒܶܐ ܘܬܰܟܬܽܘ̈ܫܶܐ ܘܰܫܠܳܡܳܐ ܕܺܝܠܳܟ ܢܶܡܠܐܷ ܠܰܢ ܚܽܘܒܳܐ ܘܰܐܘܝܽܘܬܳܐ: ܘܟܰܕ ܒܣܽܘܬܳܬܶܗ ܕܫܰܝܢܳܐ ܐܳܕܫ̈ܶܐ ܚܠܰܝ̈ܳܐ ܕܰܡܝܰܬܪܽܘܬܳܐ ܠܰܢ ܡܨܰܒܶܬ ܐܰܢ̱ܬ: ܘܰܐܫܘܳܐ ܠܰܢ ܕܢܶܗܘܶܐ ܠܳܟ ܗܰܝܟ̈ܠܐ ܘܢܰܘ̈ܣܶܐ ܕܪܽܘܚܳܐ ܩܰܕܺܝܫܳܐ ܘܬܶܥܡܰܪ ܒܰܢ ܐܠܰܗܽܘܬܳܟ: ܘܟܰܕ ܒܫܽܘܟܳܢܰܝ̈ܟ ܐܠܰܗܳܝ̈ܶܐ ܟܽܠܰܢ ܡܶܬܬܰܨܡܚܺܝܢܰܢ ܒܰܡܪܺܝܩܽܘܬܳܐ ܕܚܽܘ̈ܫܳܒܶܐ ܘܙܰܗܝܽܘܬܳܐ ܕܗܰܘ̈ܢܶܐ ܡܰܒܪܩܺܝܢܰܢ ܟܰܕ ܒܢܽܘܫܰܩܬܳܐ ܐܠܰܗܳܝܬܳܐ ܠܰܚܕ̈ܳܕܶܐ ܡܶܬܠܰܚܡܺܝܢܰܢ: ܟܰܕ ܒܰܡܡܰܪܝܳܢܽܘܬܳܐ ܕܥܺܝܪ̈ܶܐ ܪ̈ܽܘܚܳܢܶܐ ܠܰܚܕ̈ܳܕܶܐ ܡܶܬܬܰܠܘܬܺܝܢܰܢ: ܘܟܰܕ ܥܒܳܕܰܝ̈ܢ ܡܶܬܚܙܶܝܢ ܠܥܰܡ̈ܡܶܐ ܢܽܘܟܪ̈ܳܝܶܐ: ܘܡܶܫܬܰܘܕܥܺܝܢ ܕܶܝܢ ܕܙܰܪܥܳܐ ܚܢܰܢ ܕܒܰܪܟܶܗ ܡܳܪܝܳܐ: ܘܰܕܫܳܘܶܐ ܠܰܛܝܳܪܳܐ ܕܰܠܥܶܠ ܗ̇ܰܘ ܕܠܐ ܦܳܛܪ̈ܳܢ ܚܰܕ̈ܘܳܬܶܗ: ܘܰܠܥܳܠܰܡ ܡܩܰܘܶܝܢ ܒܽܘܣܳܡܰܘ̈ܗܝ: ܘܰܠܥܰܢܺܝ̈ܕܶܐ ܕܒܰܬܪܺܝܨܽܘܬ ܫܽܘܒܚܳܐ ܫܰܢܺܝܘ: ܐܰܢܺܝܚ ܐܶܢܽܘܢ ܒܰܐܘ̈ܳܢܶܐ ܛܽܘܒ̈ܬܳܢܶܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ܀

 

ܥܛܪܐ

ܥܒܶܕ ܡܳܪܝ ܠܠܶܒܰܘ̈ܳܬܰܢ ܐܰܘܳ̈ܢܶܐ ܕܫܰܝܢܳܐ ܘܬܰܪ̈ܥܝܳܬܰܢ ܠܡܺܐܢ̈ܶܐ ܕܰܫܠܳܡܳܐ: ܘܰܙܪܽܘܥ ܒܢܰܦ̈ܫܳܬܰܢ ܚܽܘܒܳܐ ܫܰܪܺܝܪܳܐ: ܐܰܝܟܰܢܳܐ ܕܢܶܬܶܠ ܫܠܳܡܳܐ ܙܰܗܝܳܐܝܬ ܟܰܕ ܒܟܽܠܗܶܝܢ ܐܰܝܠܶܝܢ ܕܡܶܢܰܢ ܡܶܣܬܰܥܪ̈ܳܢ ܡܶܬܬܢܺܝܚ ܨܶܒܝܳܢܳܟ ܐܰܝܟ ܥܶܛܪܳܐ ܓܰܒܝܳܐ ܘܪܺܝܚܳܐ ܗܰܢܺܝܳܐܐ: ܐܰܢ̱ܬ ܕܰܡܒܰܣܶܡ ܟܽܠ ܒܰܫܠܳܡܶܗ ܘܰܡܚܰܕܶܐ ܟܽܠ ܒܫܰܝܢܳܐ ܕܡܶܢܶܗ: ܘܠܐܒܽܘܟ ܗ̇ܰܘ ܠܐ ܡܛܰܘܫܳܐ ܕܫܰܠܚܳܟ ܠܦܽܘܪܩܳܢܰܢ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܫܡܰܝܳܢܳܐ ܘܡܰܠܟܳܐ ܕܰܫܠܳܡܳܐ: ܠܗ̇ܰܘ ܫܰܝܢܳܐ ܡܰܦܨܚܳܢܳܐ ܕܰܒܡܶܬܢܰܚܬܳܢܽܘܬܶܗ ܕܠܐܪܥܳܐ ܗܳܕܶܐ: ܥܒܶܕ ܫܰܝܢܳܐ ܥܰܡ ܥܳܡܽܘܪ̈ܶܝܗ̇ ܘܰܬܪܰܥ ܠܰܣܝܳܓܳܐ ܕܰܪܓܺܝܙܽܘܬܶܗ ܒܰܨܠܺܝܒܶܗ ܘܒܰܩܝܳܡܬܶܗ ܚܰܠܶܛ ܐܶܢܽܘܢ ܒܰܚܕ̈ܳܕܶܐ: ܘܶܐܬܳܐ ܘܣܰܒܰܪ ܫܠܳܡܳܐ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܘܒܰܝܬܺܝ ܠܥܰܡܳܐ ܘܰܠܥܰܡ̈ܡܶܐ ܘܫܰܝܶܢ ܠܢܰܦ̈ܫܳܬܳܐ ܘܰܠܦܰܓܪ̈ܶܐ ܘܫܰܝܢܳܐ ܘܰܫܠܳܡܳܐ ܐܰܓܥܶܠ ܠܬܰܠܡܺܝ̈ܕܰܘܗܝ ܕܰܢܝܰܒܠܽܘܢ ܣܒܰܪܬܶܗ ܠܟܽܠ ܣܰܘ̈ܦܺܝܢ: ܘܠܶܗ ܝܳܐܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܫܰܝܢܳܐ ܐܰܡܺܝܢܳܐ ܕܒܶܪ̈ܝܳܬܳܐ: ܘܰܫܠܳܡܳܐ ܫܰܪܺܝܪܳܐ ܕܦܶܢ̈ܝܳܬܳܐ: ܗ̇ܰܘ ܕܟܰܕ ܚܽܘܒܳܐ ܐܺܝܬܰܝܟ ܘܚܽܘܒܳܐ ܡܶܬܟܰܢܶܐ ܐܰܢ̱ܬ: ܘܰܒܗܳܢܳܐ ܫܡܳܐ ܛܳܒ ܡ̣ܶܢ ܟܽܠ ܫܡܳܗܺܝ̣̈ܢ ܚܳܕܶܐ ܐܰܢ̱ܬ: ܘܒܶܗ ܪܳܚܶܡ ܐ̱ܢܳܫ̈ܳܐ ܡܶܬܺܝܕܰܥ ܐܰܢ̱ܬ: ܘܠܐܝܠܶܝܢ ܕܠܶܗ ܡܰܚܒܺܝܢ ܡܝܰܩܰܪ ܐܰܢ̱ܬ: ܗ̇ܰܘ ܕܩܰܪܶܒܬ ܠܳܟ ܚܠܳܦܰܝܢ ܩܽܘܪܒܳܢܳܐ ܡܩܰܒܠܐ ܠܐܒܽܘܟ ܘܶܐܬܪܰܥܺܝ ܠܰܢ ܒܡܰܘܬܳܟ ܗ̇ܰܘ ܚܰܒܺܝܒܳܐ: ܘܟܰܕ ܒܰܙܩܺܝܦܳܐ ܕܺܝܠܳܟ ܬܪܰܥܬ ܠܰܣܝܳܓܳܐ ܥܰܬܺܝܩܳܐ ܕܰܒܥܶܠܕܒܳܒܽܘܬܳܐ ܘܒܰܕܡܳܐ ܕܰܩܢܽܘܡܳܟ ܫܰܝܶܢܬ ܡܳܐ ܕܒܰܫܡܰܝܳܐ ܘܡܳܐ ܕܒܰܐܪܥܳܐ: ܘܰܐܪܺܝܡܬ ܠܰܪܓܺܝܙܽܘܬܳܐ ܡ̣ܶܢ ܡܨܰܥܬܳܐ ܕܰܥܒܰܕܬ ܠܬܰܪ̈ܬܰܝܗܶܝܢ ܚܕܳܐ: ܒܰܚܕܳܝܽܘܬܳܐ ܡܬܽܘܡܳܝܬܳܐ ܕܰܐܠܳܗܽܘܬܳܟ ܘܐ̱ܢܳܫܽܘܬܳܟ ܗ̇ܳܝ ܙܰܒܢܳܝܬܳܐ: ܕܒܳܗ̇ ܩܪܰܝܬܳܢ ܘܶܐܣܰܪܬܳܢ ܒܰܐܘܝܽܘܬܳܐ ܕܪܶܚܡܬܳܟ ܘܰܒܒܰܝܬܳܝܽܘܬܳܐ ܕܡܽܘܠܟܳܢܰܝ̈ܟ ܫܡܰܝ̈ܳܢܶܐ: ܘܡ̣ܶܢ ܗܳܪܟܳܐ ܫܠܳܡܳܐ ܘܫܰܝܢܳܐ ܣܰܒܰܪܬ ܘܬܰܟܬܽܘܫܳܐ ܡ̣ܶܢ ܣܰܘ̈ܦܶܝܗ̇ ܒܰܛܶܠܬ. ܟܰܕ ܡ̣ܶܢ ܥܺܝܪܳܐ ܕܢܽܘܪܳܐ ܓܰܒܪܺܐܶܝܠ ܒܰܫܠܳܡܳܐ ܣܰܒܰܪ ܒܰܛܢܳܟ ܠܰܒܬܽܘܠܬܳܐ ܡܰܪܝܰܡ ܐܶܡܳܟ: ܘܒܰܫܠܳܡܳܐ ܐܶܡܳܟ ܦܶܓܥܰܬ݀ ܗܘܳܬ݀ ܒܶܐܠܺܝܫܒܰܥ ܐܶܡܶܗ ܕܟܳܪܽܘܙܳܟ: ܘܒܰܫܠܳܡܳܐ ܒܰܕܶܩܘ ܥܺܝܪ̈ܰܝ ܪܰܘܡܳܐ ܠܪ̈ܳܥܰܘܳܬܳܐ ܥܰܠ ܡܰܘܠܳܕܳܟ: ܘܒܰܫܠܳܡܳܐ ܦܓܰܥܘ ܡܰܠܐܟܳܐ ܒܢܶܫ̈ܶܐ ܕܶܐܬܰܝ̈ ܕܰܢܒܰܣ̈ܡܳܢ ܠܦܰܓܪܳܟ ܩܰܕܺܝܫܳܐ: ܘܒܰܫܠܳܡܳܐ ܥܰܠܬ ܠܥܶܠܺܝܬܳܐ ܕܰܟܢܺܝܫܺܝܢ ܗܘܰܘ ܒܳܗ̇ ܬܰܠܡܺܝ̈ܕܰܝܟ: ܘܫܰܪܰܪܬ ܐܶܢܽܘܢ ܥܰܠ ܢܽܘܚܳܡܳܟ ܘܰܫܠܳܡܳܐ ܝܰܗܒܬ ܠܗܽܘܢ ܟܰܕ ܐܶܬܥܰܠܺܝܬ ܠܘܳܬ ܫܳܠܽܘܚܳܟ: ܘܶܐܡܰܪܬ ܠܗܽܘܢ ܕܰܫܠܳܡܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ: ܠܐ ܐܰܝܟ ܕܝܳܗܶܒ ܥܳܠܡܳܐ ܝܳܗܶܒ ܐ̱ܢܳܐ ܠܟܽܘܢ: ܗܳܢܰܘ ܦܽܘܩܕܳܢܝ ܕܬܰܚܒܽܘܢ ܠܰܚܕ̈ܳܕܶܐ ܐܰܝܟܰܢܳܐ ܕܶܐܢܳܐ ܐܰܚܶܒܬܟܽܘܢ: ܠܗܳܢܳܐ ܚܽܘܒܳܐ ܛܰܪ ܠܘܳܬܰܢ ܦܳܪܽܘܩܰܢ: ܒܗܳܢܳܐ ܚܽܘܒܳܐ ܫܰܪܰܪ ܠܰܢ: ܘܰܒܚܽܘܒܳܟ ܥܒܶܕ ܠܰܢ ܢܳܛܽܘܪ̈ܶܐ ܕܦܽܘܩ̈ܕܳܢܰܝܟ ܩܰܕܺܝ̈ܫܶܐ ܒܚܽܘܒܳܟ ܚܰܘܳܐ ܠܰܢ ܒܢܰܝ̈ܳܐ ܕܫܰܝܢܳܐ ܘܕܰܫܠܳܡܳܐ ܒܚܽܘܒܳܟ ܐܰܘܳܐ ܠܪ̈ܳܥܰܘܳܬܳܐ ܘܰܓܙܳܪ̈ܰܝܗܽܘܢ. ܒܚܽܘܒܳܟ ܒܰܣܶܡ ܠܟܳܗ̈ܢܶܐ ܒܐܪ̈ܳܙܰܝܗܽܘܢ. ܒܰܫܠܳܡܳܟ ܓܡܽܘܪ ܠܥܺܕܬܳܐ ܘܰܠܝܰܠܕܶܝ̈ܗ̇: ܒܰܫܠܳܡܳܟ ܕܰܒܰܪܶܝܗ̇: ܘܰܒܫܰܝܢܳܟ ܨܰܒܰܬܶܝܗ̇: ܒܰܫܠܳܡܳܟ ܗܰܕܳܐ ܠܟܶܢܫܶܝ̈ܗ̇: ܒܰܫܠܳܡܳܟ ܘܰܥܶܕ ܠܪ̈ܰܚܺܝܩܶܝܗ̇: ܒܰܫܠܳܡܳܟ ܚܰܝܶܕ ܠܟܳܗ̈ܢܶܝܗ̇ ܘܰܒܫܰܝܢܳܟ ܛܰܟܶܣ ܟܽܠܗܽܘܢ ܬܶܓܡܶܝ̈ܗ̇: ܒܰܫܠܳܡܳܟ ܝܰܒܶܠ ܥܰܕܥܺܐܕܶܝ̈ܗ̇ ܒܰܫܠܳܡܳܟ: ܘܒܰܫܠܳܡܳܟ ܟܰܢܶܫ ܠܰܪ̈ܓܺܝܙܶܝܗ̇: ܘܰܒܫܰܝܢܳܟ ܠܰܚܶܡ ܠܰܣܕܺܝ̈ܩܶܐ: ܒܰܫܠܳܡܳܟ ܡܠܺܝ ܠܰܢ ܚܰܕܽܘܬܳܐ: ܘܰܒܫܰܝܢܳܟ ܢܰܛܰܪ ܠܟܽܠܰܢ: ܒܰܫܠܳܡܳܟ ܣܰܬܶܬ ܪ̈ܶܥܝܳܢܰܝܢ: ܘܰܒܫܰܝܢܳܟ ܥܰܫܶܢ ܘܕܰܟܳܐ ܠܚܽܘ̈ܫܳܒܰܝܢ: ܒܰܫܠܳܡܳܟ ܦܪܽܘܩ ܠܰܢ ܡ̣ܢ ܡܰܪ̈ܕܘܳܬܳܐ: ܘܰܒܫܰܝܢܳܟ ܨܰܒܶܬ ܠܰܢ ܒܥܺܐܕܳܟ: ܒܰܫܠܳܡܳܟ ܩܰܒܶܠ ܡܳܪܝ ܨܰܘܡܰܢ: ܘܰܒܫܰܝܢܳܟ ܪ̈ܰܚܡܶܐ ܘܰܚܢܳܢܳܐ ܫܰܟܶܢ ܠܰܢ: ܘܒܰܫܠܳܡܳܟ ܫܪܺܝ ܡܶܢܰܢ ܩܶܛܪ̈ܶܐ ܕܰܚܛܺܝܬܳܐ: ܘܰܒܫܰܝܢܳܟ ܬܒܽܘܪ ܠܪܺܝܫܶܗ ܕܰܛܪܽܘܢܳܐ ܒܥܶܠܕܒܳܒܰܢ: ܫܠܳܡܳܟ ܢܶܗܘܶܐ ܥܰܡܰܢ: ܘܫܰܝܢܳܟ ܢܰܡܠܶܟ ܒܰܝܢܳܬܰܢ: ܘܚܽܘܒܳܟ ܐܰܣܶܢ ܒܠܶܒܰܘ̈ܳܬܰܢ: ܘܪܶܚܡܬܳܟ ܐܰܚܶܡ ܒܢܰܦ̈ܫܳܬܰܢ: ܫܠܳܡܳܟ ܢܶܗܘܶܐ ܥܰܡܰܢ ܘܒܰܝܢܳܬܰܢ: ܘܚܽܘܒܳܟ ܢܟܰܬܰܪ ܒܰܢ ܥܕܰܡܳܐ ܠܫܽܘܠܳܡܳܐ: ܘܢܶܗܘܶܐ ܠܳܟ ܥܳܢ̈ܳܐ ܢܰܨܺܝܚܬܳܐ ܘܰܕܠܐ ܛܽܘܠܫܳܐ: ܘܢܰܘܕܶܐ ܠܳܟ ܝܳܗܽܘܒܶܗ ܕܰܫܠܳܡܳܐ: ܘܠܐܒܽܘܟ ܡܰܫܟܢܳܢܶܗ ܕܫܰܝܢܳܐ ܘܰܠܪܽܘܚܳܟ ܩܰܕܺܝܫܳܐ ܓܳܡܽܘܪܳܐ ܕܚܽܘܒܳܐ ܫܰܪܺܝܪܳܐ: ܗܳܫܳܐ܀

ܫܠܡ ܛܟܣܐ ܩܕܡܝܐ

 

ܬܘܒ ܕܝܘܡܐ ܕܬܪܝܢ ܕܚܘܪ̈ܐ

ܩܕܡܝܬ ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܒܰܥ̈ܒܳܕܶܐ ܛܳܒ̈ܶܐ ܕܰܡܪܰܥܶܝܢ ܠܳܟ: ܒܢܰܚ̈ܬܶܐ ܚܶܘܳܪ̈ܶܐ ܕܫܳܦܪܺܝܢ ܠܳܟ ܢܰܦܪܶܓ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܰܩܝܳܡܬܳܟ ܘܰܢܚܰܓܶܐ ܘܢܶܬܦܨܰܚ ܘܢܶܪܘܰܙ ܘܰܢܕܽܘܨ ܒܥܺܐܕ̈ܶܐ ܘܰܒܦܶܨ̈ܚܶܐ ܕܰܡܕܰܒܪܳܢܽܘܬܳܟ ܦܨܺܝܚܬܳܐ: ܘܥܰܡ ܚܶܘܳܪܽܘܬܶܗ ܕܝܰܘܡܳܐ ܗܳܢܳܐ ܒܢܰܚ̈ܬܶܐ ܚܶܘܳܪ̈ܶܐ ܠܡܶܐܬܺܝܬܳܟ ܗ̇ܳܝ ܡܶܣܬܰܟܝܳܢܺܝܬܳܐ ܢܶܐܪܽܘܥ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ ܠܗ̇ܰܘ ܡܳܪܝܳܐ ܡܪܰܚܡܳܢܳܐ: ܕܡܶܛܽܠ ܪ̈ܰܚܡܰܘܗܝ ܣܰܓܺܝ̈ܶܐܐ ܐܶܬܳܐ ܠܡܰܘܠܳܕܳܐ ܐ̱ܢܳܫܳܝܳܐ. ܘܰܕܠܐ ܙܽܘܘܳܓ ܕܢܰܚ: ܕܰܠܨܰܠܡܳܐ ܡܰܠܟܳܝܳܐ ܢܶܦܪܽܘܩ ܘܰܢܫܰܘܙܶܒ: ܠܗ̇ܰܘ ܕܡ̣ܶܢ ܬܰܠܡܺܝܕܳܐ ܙܺܐܦܳܢܳܐ ܐܶܫܬܠܶܡ ܠܡܰܘܬܳܐ ܨܶܒܝܳܢܳܝܳܐ: ܘܟܰܕ ܐܶܬܕܒܰܚ ܥܰܠ ܩܰܝܣܳܐ ܩܰܕܶܕ ܐܶܫܛܳܪܳܐ ܚܽܘܒܳܢܳܝܳܐ: ܘܰܠܒܶܙܬܳܐ ܕܰܚܡܺܝܠܐ ܒܗܳܡܳܢ ܦܪܰܩ ܡ̣ܶܢ ܫܰܒܳܝܳܐ: ܠܗ̇ܰܘ ܕܰܒܢܽܘܚܳܡܶܗ ܐܠܰܗܳܝܳܐ ܫܰܪܰܪ ܠܣܶܕܪܳܐ ܫܠܺܝܚܳܝܳܐ: ܘܰܠܟܶܢܫܳܐ ܦܪܺܝܩܳܐ: ܘܫܰܒܥܺܝܢܳܝܳܐ ܘܰܠܥܰܡܳܐ ܦܰܩܪܳܐ ܕܝܽܘܕܳܝ̈ܶܐ ܥܒܰܕ ܐܶܢܽܘܢ ܒܰܒܪܺܝܬܳܐ ܚܶܣܕܳܐ ܘܡܽܘܝܳܩܳܐ ܪܺܝܫܳܢܳܝܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܕܪܐ

ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܠܝܰܠܕܳܐ ܫܒܺܝܚܳܐ ܕܡ̣ܶܢ ܐܰܒܳܐ ܓܢܺܝܙܳܐ ܕܰܕܠܐ ܚܰܫܳܐ: ܘܰܕܠܐ ܙܰܘܥܳܐ ܐܶܬܺܝܠܶܕ ܡ̣ܶܢ ܡܰܪܝܰܡ ܒܬܽܘܠܬܳܐ ܕܠܐ ܙܽܘܘܳܓܳܐ ܕܢܰܚ ܦܰܓܪܳܐ ܢܣܰܒ ܕܰܨܒܳܐ ܒܢܰܦܫܳܐ ܘܰܡܠܺܝܠܬܳܐ ܘܝܰܕܽܘܥܬܳܢܺܝܬܳܐ: ܠܐܕܳܡ ܨܰܠܡܳܐ ܕܪܰܒܽܘܬܶܗ ܒܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ ܡ̣ܶܢ ܒܺܝܫܳܐ ܦܪܰܩ: ܘܰܠܡܰܘܬܳܐ ܘܣܳܛܳܢܳܐ ܒܡܰܘܬܶܗ ܠܫܽܘܠܛܳܢܳܐ ܕܺܝܠܗܽܘܢ ܒܰܛܶܠ: ܘܠܰܫܝܽܘܠ ܒܚܰܝܠܬܳܢܽܘܬܶܗ ܕܳܫ ܘܰܣܚܰܦ. ܘܰܠܡܽܘ̈ܟܠܐ ܥܰܫܺܝ̈ܢܶܐ ܓܰܕܶܡ: ܘܠܰܫܟܺܝ̈ܒܶܐ ܕܡ̣ܶܢ ܥܳܠܰܡ ܣܥܰܪ: ܘܰܒܢܽܘܚܳܡܳܐ ܕܺܝܠܶܗ ܕܡ̣ܶܢ ܩܰܒܪܳܐ ܠܰܩܒܺܝܪ̈ܶܐ ܐܰܩܺܝܡ: ܘܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܕܰܐܒܺܝܠܺܝܢ ܗܘܰܘ ܥܰܠ ܡܰܘܬܶܗ ܒܰܝܰܐܐ ܘܠܰܒܶܒ. ܘܰܠܝܽܘܕܳܝ̈ܶܐ ܛܳܠܽܘ̈ܡܶܐ ܕܠܐ ܗܰܝܡܶܢܘ ܠܰܫܒܺܝܚܽܘܬ ܬܶܕܡܪ̈ܳܬܳܐ ܒܰܒܪܺܝܬܳܐ ܙܢܰܩ ܘܰܙܪܰܩ. ܟܰܕ ܠܐܚ̈ܶܐ ܬܪܶܝܢ ܩܠܶܝܽܘܦܰܐ ܘܠܽܘܩܳܐ ܕܪܳܕܶܝܢ ܗܘܰܘ ܒܽܐܘܪܚܳܐ ܕܥܶܡܰܐܘܳܣ ܘܰܡܡܰܠܠܺܝܢ ܗܘܰܘ ܒܚܰܫܳܐ ܥܰܠ ܡܰܘܬܶܗ ܢܩܶܦ: ܘܰܐܝܟ ܠܐ ܝܳܕܰܥ ܫܰܐܷܠ ܡܳܢܳܐ ܗܳܫܳܐ ܡܡܰܠܠܺܝܢ ܐܢ̱ܬܽܘܢ: ܗ̣ܶܢܽܘܢ ܕܶܝܢ ܫܰܪ̈ܺܝܪܶܐ ܦܰܢܺܝܘ: ܕܰܠܡܳܐ ܢܽܘܟܪܳܝܳܐ ܐܰܢ̱ܬ ܡ̣ܶܢ ܐܽܘܪܫܠܶܡ: ܘܠܐ ܪܓܺܝܫ ܐܰܢ̱ܬ ܒܡܶܕܶܡ ܕܰܣܥܰܪܘ ܝܽܘܕܳܝ̈ܶܐ ܡܰܪ̈ܳܚܶܐ ܕܰܠܒܰܪ ܛܳܒܳܐ ܒܰܚܣܳܡܗܽܘܢ ܥܰܠ ܩܰܝܣܳܐ ܬܠܰܘ: ܘܰܚܢܰܢ ܣܳܒܪܺܝܢ ܗܘܰܝܢ ܕܗ̣ܽܘ ܦܳܪܶܩ ܠܐܝܣܪܳܐܶܝܠ: ܘܗܳܐ ܬܠܳܬܳܐ ܝܰܘ̈ܡܺܝܢ ܐܺܝܬ ܠܶܗ: ܕܡܰܓܰܣ ܒܗܳܡܳܢ ܐܰܝܟ ܕܶܐܡܰܪ ܕܒܰܬܠܺܝܬܳܝܳܐ ܩܳܐܷܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ: ܘܰܠܟܽܘܢ ܡܚܰܕܶܐ ܐ̱ܢܳܐ: ܥܕܰܡܳܐ ܠܐܡܰܬܝ ܠܐ ܡܗܰܝܡܢܺܝܢ ܐܢ̱ܬܽܘܢ ܚܰܣܺܝܪ̈ܰܝ ܪܶܥܝܳܢܳܐ: ܗܳܐ ܗܳܠܶܝܢ ܟܽܠܗܶܝܢ ܕܰܟܬܺܝ̈ܒܳܢ ܗܘܰܝ̈ ܥܠܰܘܗܝ: ܙܳܕܶܩ ܗܘܳܐ ܕܢܶܓܡܽܘܪ ܐܶܢܽܘܢ ܘܢܶܛܥܰܡ ܡܰܘܬܳܐ ܘܰܢܫܰܠܶܡ ܟܽܠܡܳܐ ܕܶܐܫܬܰܘܕܺܝ: ܘܟܰܕ ܠܒܰܘܬܳܐ ܪܰܡܫܳܝܳܐ ܡܛܰܘ: ܘܰܕܢܶܬܬܢܺܝܚܽܘܢ ܥܰܡ ܚܕ̈ܳܕܶܐ ܨܒܰܘ: ܘܰܒܠܰܚܡܳܐ ܕܰܐܘܫܶܛܘ ܠܶܗ ܕܰܢܒܰܪܶܟ: ܘܒܰܪܟܶܗ ܡܶܚܕܳܐ ܥܰܡ ܢܣܺܝܒܽܘܬܶܗ ܥܰܝܢܰܝ̈ܗܽܘܢ ܐܶܬܦܰܬܰܚ̈ܝ: ܠܦܽܘܠܳܓܳܐ ܚܰܫܳܢܳܝܳܐ ܡ̣ܶܢ ܪ̈ܶܥܝܳܢܰܝܗܽܘܢ ܛܪܰܕ ܘܰܡܫܰܪܪܳܐܝܬ ܒܒܽܘܪܟܬܳܐ ܕܠܰܚܡܳܐ ܥܰܠ ܩܝܳܡܬܶܗ ܬܠܺܝܬܳܝܰܬ݀ ܝܰܘ̈ܡܶܐ ܫܰܪܰܪ: ܘܕܳܐܦ ܠܚܰܒܪ̈ܰܝܗܽܘܢ ܗ̣ܶܢܽܘܢ ܢܫܰܪܪܽܘܢ: ܠܐܘܪܫܠܶܡ ܨܳܠܒܰܬ݀ ܡܳܪܳܗ̇ ܥܰܡ ܚܰܕܽܘܬܳܐ ܗܦܰܟܘ: ܘܣܰܒܰܪܘ ܠܬܰܠܡܺܝ̈ܕܶܐ ܟܽܠܡܳܐ ܕܰܓܕܰܫ ܠܗܽܘܢ ܘܳܐܦ ܗ̣ܶܢܽܘܢ ܐܶܣܬܰܒܰܪܘ ܕܩܳܡ ܡܳܪܝܳܐ ܘܶܐܬܚܙܺܝ ܠܟܺܐܦܳܐ ܒܰܥܛܽܘܦܝܳܐ ܕܡ̣ܶܢ ܩܰܒܪܳܐ ܠܥܶܠܺܝܬܳܐ ܐ̱ܪܳܙܳܢܳܝܬܳܐ ܡ̣ܶܢ ܝܰܕ ܕܶܚ̈ܠܳܬܳܐ ܕܝܽܘܕܳܝ̈ܶܐ ܟܽܠܗܽܘܢ ܟܢܰܫܘ: ܘܰܠܬܰܪ̈ܥܶܐ ܘܣܽܘܟܪ̈ܶܐ ܐܶܚܰܕܘ: ܘܠܐܝܠܶܝܢ ܕܶܐܣܬܥܰܪܘ ܠܘܳܬ ܟܽܠ ܚܰܕ ܡܶܢܗܽܘܢ ܫܰܪܺܝܘ ܕܰܢܡܰܠܠܽܘܢ ܘܢܶܗܦܟܽܘܢ ܠܐܪܳܙܳܐ: ܫܶܡܫܳܐ ܡܰܢܗܪܳܢܳܐ ܕܒܶܪ̈ܝܳܬܳܐ ܒܡܶܨܥܰܬ݀ ܐܶܣܦܺܝܪܳܐ ܕܬܰܠܡܺܝ̈ܕܶܐ ܩܳܡ ܘܶܐܡܰܪ ܠܗܽܘܢ: ܫܠܳܡܳܐ ܥܰܡܟܽܘܢ ܠܐ ܬܶܕܚܠܽܘܢ: ܐܶܢܳܐ ܐܺܝܬܰܝ ܪܰܒܟܽܘܢ: ܠܡܳܢܳܐ ܫܓܺܝܫܺܝܢ ܐܢ̱ܬܽܘܢ ܘܰܪ̈ܗܺܝܒܳܢ ܢܰܦ̈ܫܳܬܟܽܘܢ: ܘܣܳܠܩ̈ܳܢ ܡܰܪ̈ܢܝܳܬܳܐ ܒܠܶܒܰܘ̈ܳܬܟܽܘܢ: ܐܶܬܒܰܩܰܘ ܘܰܐܨܶܕܘ ܘܰܚܙܰܘ ܕܰܒܗܳܠܶܝܢ ܐܺܝ̈ܕܰܝܳܐ ܘܪ̈ܶܓܠܐ ܘܕܰܦܢܳܐ ܒܳܠܥܰܬ ܚܰܫ̈ܶܐ ܡ̣ܶܢ ܨܳܠܽܘ̈ܒܶܐ: ܘܠܐ ܬܶܬܬܰܘܗܽܘܢ: ܐܶܠܐ ܗܰܝܡܶܢܘ ܕܶܐܢܳܐ ܐ̱ܢܳܐ ܪܰܒܟܽܘܢ: ܘܰܕܗܳܠܶܝܢ ܟܽܠܗܶܝܢ ܦܳܩ̇ܚܳܐ ܗܘܳܬ݀ ܕܶܐܣܒܽܘܠ ܚܰܫ̈ܶܐ ܘܡܰܘܬܳܐ ܘܰܙܩܺܝܦܳܐ: ܘܕܶܐܩܽܘܡ ܡ̣ܶܢ ܡܺܝ̈ܬܶܐ ܠܝܰܘ̈ܡܶܐ ܬܠܳܬܳܐ ܐܰܝܟ ܕܶܐܡܪܶܬ ܠܟܽܘܢ: ܠܡܳܐ ܡܶܕܶܡ ܕܡܶܐܟܽܘܠܬܳܐ ܐܺܝܬ ܠܟܽܘܢ ܐܰܝܬܰܘ: ܘܝܰܗܒܘ ܠܶܗ ܢܽܘܢܳܐ ܕܰܡܛܰܘܰܝ ܘܟܰܟܳܪܺܝܬܳܐ ܕܕܶܒܫܳܐ ܘܰܢܣܰܒ ܘܶܐܟܰܠ ܠܥܺܝܢܰܝ̈ܗܽܘܢ ܘܫܰܪܰܪ ܐܶܢܽܘܢ ܥܰܠ ܩܝܳܡܬܶܗ: ܠܫܽܘܪܳܪ ܦܰܓܪܳܐ ܕܰܢܣܰܒ ܡܶܢܰܢ ܐܶܟܰܠ ܩܕܳܡ ܩܝܳܡܬܳܐ ܘܒܳܬܰܪ ܕܶܐܬܢܰܚܰܡ: ܘܰܒܢܽܘܢܳܐ ܨܳܪ ܠܰܟܝܳܢܰܢ ܕܒܰܪ̈ܓܺܝܓܳܬܳܐ ܡܛܰܒܰܥ: ܘܕܰܒܚܽܘܝܳܕܳܐ ܕܢܽܘܪܳܐ ܕܰܐܠܳܗܽܘܬܶܗ ܐܶܬܚܰܝܰܨ: ܘܰܐܝܟ ܡܛܰܘܰܝ ܐܶܫܬܰܪܰܪ ܠܐܝܠܶܝܢ ܕܰܪܬܰܚܘ ܒܒܽܘܪܢܳܫܶܗ: ܐܶܫܬܰܘܬܰܦܘ ܒܰܐܠܳܗܽܘܬܶܗ: ܒܟܰܟܳܪܺܝܬܳܐ ܕܕܶܒܫܳܐ ܕܶܐܟܰܠ ܫܰܘܕܰܥ: ܘܰܕܢܺܐܡܰܪ ܕܰܐܝܟܰܢ ܐܶܟܰܠ ܠܐ ܡܨܶܝܢܰܢ: ܘܕܶܐܟܰܠ ܘܶܐܫܬܺܝ ܒܡ̈ܶܠܐ ܫܠܺܝܚܳܝ̈ܳܬܳܐ ܕܪ̈ܝܫܰܝ ܫܠܺܝ̈ܚܶܐ ܡܶܫܬܰܪܪܺܝܢܰܢ: ܟܰܕ ܬܰܠܡܺܝ̈ܕܶܐ ܕܰܐܒܺܝܠܺܝܢ ܗܘܰܘ ܥܰܠ ܡܰܘܬܶܗ ܒܰܫܠܳܡܶܗ ܘܒܰܚܙܳܬܶܗ ܘܰܒܝܰܕ ܡܶܐܟܽܘܠܬܶܗ ܚܰܕܺܝ ܘܰܐܦܨܰܚ ܘܫܰܪܰܪ: ܫܠܳܡܳܐ ܬܶܢܝܳܢܳܐ ܫܰܟ̣ܶܢ ܠܗܽܘܢ ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘܢ: ܘܰܠܬܽܘܠܡܳܕܳܐ ܕܟܽܠܶܗ ܥܳܠܡܳܐ ܕܰܣܐܷܒ ܒܰܚܛܺܝܬܳܐ ܡܫܰܪܰܪ ܐ̱ܢܳܐ ܠܟܽܘܢ: ܘܰܐܝܟܰܢܳܐ ܕܫܰܕܪܰܢܝ ܐܰܒܳܐ ܠܟܽܘܢ ܡܫܰܕܰܪ ܐ̱ܢܳܐ ܕܓܶܢܣܳܐ ܕܐ̱ܢܳܫ̈ܳܐ ܢܶܬܦܪܶܩ. ܠܪܽܘܚܳܐ ܩܰܕܺܝܫܳܐ ܣܰܒܘ ܒܡܰܦܽܘܚܺܝܬܳܐ ܩܰܕܺܝܫܬܳܐ ܕܰܠܟܽܘܢ ܡܫܰܟܶܢ ܐ̱ܢܳܐ ܘܶܐܢ ܬܶܫܒܩܽܘܢ ܚܛܳܗ̈ܶܐ ܠܐܢܳܫ ܢܶܫܬܰܒܩܽܘܢ ܚܛܳܗ̈ܶܐ ܠܐܢܳܫ ܢܶܫܬܰܒܩܽܘܢ: ܘܶܐܢ ܬܶܐܚܕܽܘܢ ܠܐܢܳܫ ܢܶܗܘܶܐ ܐܰܚܺܝܕ: ܠܫܽܘܟܳܢܳܐ ܡܥܰܠܝܳܐ ܕܟܳܗܢܽܘܬܳܐ ܠܰܫܠܺܝ̈ܚܶܐ ܥܶܣܪܳܐ ܝܰܗܒ: ܘܠܰܬܪܶܝܢ ܡܣܰܒܪ̈ܳܢܶܐ ܩܠܶܝܽܘܦܰܐ ܘܠܽܘܩܳܐ: ܒܰܕ ܬܳܐܘܡܰܐ ܥܰܪܺܝܩ ܗܘܳܐ: ܘܝܽܘܕܳܐ ܐܰܒܺܝܕ ܗܘܳܐ: ܕܰܐܝܟܰܢ ܕܠܐ ܢܶܚܣܰܪ ܡܶܢܝܳܢܳܐ ܬܪܶܥܣܰܪܳܝܳܐ: ܬܳܐܘܡܰܐ ܗ̇ܰܘ ܕܡܶܬܶܐܡܰܪ ܬܳܐܡܳܐ ܐܶܡܰܪܘ ܫܠܺܝ̈ܚܶܐ ܕܰܚܙܰܝܢܰܢ ܠܡܳܪܰܢ ܘܠܐ ܗܰܝܡܶܢ ܠܡܶܠܰܬܗܽܘܢ: ܘܦܰܢܺܝ ܘܶܐܡܰܪ ܕܶܐܢ ܠܐ ܚܳܙܶܐ ܐ̱ܢܳܐ ܠܕܽܘܟܬܳܐ ܕܨ̈ܶܨܶܐ ܐܰܟܘܳܬܟܽܘܢ ܠܐ ܡܗܰܝܡܢ ܐ̱ܢܳܐ ܠܟܽܘܗܳܢܳܐ ܕܰܡܟܰܗܢܳܢܽܘܬܳܐ ܩܰܕܺܝܫܬܳܐ ܐܰܫܘܝܶܗ ܒܰܕܡܽܘܬ ܐܠܶܕܳܕ ܘܡܺܝܕܳܕ ܕܶܐܫܬܚܰܪܘ ܒܡܰܫܪܺܝܬܳܐ ܘܰܫܪܳܬ݀ ܥܠܰܝܗܽܘܢ ܪܽܘܚܳܐ ܘܫܰܪܺܝܘ ܠܡܶܬܢܰܒܳܝܽܘ ܠܚܰܫܳܐ ܡܥܺܝܩܳܢܳܐ ܕܫܳܚܶܩ ܗܘܳܐ ܠܗܽܘܢ ܡ̣ܶܢ ܓܰܘ ܫܶܪ̈ܫܶܐ ܕܬܰܪ̈ܥܝܳܬܗܽܘܢ ܬܠܰܫ: ܘܰܚܠܳܦ ܟܰܪܝܽܘܬܳܐ ܕܨܶܦܚܰܬ݀ ܠܗܽܘܢ ܚܰܕܽܘܬܳܐ ܘܰܦܨܺܝܚܽܘܬܳܐ ܠܗܽܘܢ ܐܠܰܒܶܫ: ܘܰܚܠܳܦ ܟܡܺܐܢ̈ܶܐ ܪܺܝܫܳܐ ܓܰܠܝܳܐ ܐܰܪܺܝܡ: ܥܒܰܪ̈ܝ ܥܳܩ̈ܳܬܳܐ ܡ̣ܶܢ ܠܶܒܰܘ̈ܳܬܗܽܘܢ: ܐܰܡܠܶܟ ܕܝܳܨܳܐ ܒܢܰܦ̈ܫܳܬܗܽܘܢ: ܐܶܬܪܺܝܡܰܬ݀ ܩܰܪܢܳܐ ܕܺܝܠܗܽܘܢ ܕܰܡܡܰܟܟܳܐ ܗܘܳܬ݀ ܘܶܐܬܒܰܣܪܰܬ݀ ܟܢܽܘܫܬܳܐ ܕܰܠܗܽܘܢ ܣ̇ܳܩܪܳܐ ܗܘܳܬ݀. ܘܒܰܕܓܽܘܢ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܢܽܘܚܳܡܳܐ ܘܚܰܝ̈ܶܐ ܕܟܽܠ ܢܶܫܡܳܐ: ܒܗܳܢܳܐ ܝܰܘܡܳܐ ܕܡܶܬܓܰܠܝܳܢܽܘܬܳܟ ܠܬܰܠܡܺܝ̈ܕܰܝܟ: ܕܰܐܝܟܰܢܳܐ ܕܰܐܥܒܰܪܬ ܠܚܰܫ̈ܶܐ ܡ̣ܶܢ ܠܶܒܰܘ̈ܳܬܗܽܘܢ ܘܰܒܒܽܘܪܟܬܳܐ ܕܠܰܚܡܳܐ ܢܗܰܪܬ ܡܰܕܥܰܝ̈ܗܽܘܢ ܐܰܥܒܰܪ ܚܰܫܳܐ ܡ̣ܶܢ ܠܶܒܰܘ̈ܳܬܰܢ ܘܰܐܦܨܰܚ ܠܰܢ ܒܝܽܘܡ ܓܶܠܝܳܢܳܟ: ܘܰܐܝܟܰܢܳܐ ܕܫܰܝܶܢܬ ܫܓܺܝܫܽܘܬܗܽܘܢ ܘܚܰܘܺܝܬ ܐܶܢܽܘܢ ܫܽܘ̈ܡܳܬܳܟ ܫܰܝܶܢ ܬܰܪ̈ܥܝܳܬܰܢ ܘܚܰܘܳܐ ܠܰܢ ܢܽܘܗܪܳܟ: ܘܚܰܕܳܐ ܠܰܢ ܐܰܝܟ ܚܰܕܽܘܬܳܐ ܕܰܫܠܺܝ̈ܚܰܝܟ: ܘܰܐܝܟ ܕܰܙܪܰܥܬ ܫܰܝܢܳܟ ܘܰܫܠܳܡܳܟ ܒܠܶܒܰܘ̈ܳܬܗܽܘܢ: ܙܪܽܘܥܳܝܗܝ ܡܳܪܝ ܒܢܰܦ̈ܫܳܬܰܢ ܘܰܒܦܰܓܪ̈ܰܝܢ ܘܗܰܒ ܠܰܢ ܕܢܶܙܟܶܝܘܗܝ ܠܣܳܛܳܢܳܐ: ܘܰܐܝܟ ܕܫܰܟܶܢ̣ܬ ܠܗܽܘܢ ܪܽܘܚܳܐ ܡܒܰܝܳܐܢܳܐ. ܫܰܟܶܢ ܠܰܢ ܕܠܐ ܢܰܪܚܶܩ ܡܶܢܰܢ: ܘܰܢܩܰܕܶܫ ܠܰܢ ܡ̣ܶܢ ܟܽܠܳܗ̇ ܛܰܡܽܐܘܬܳܐ ܕܒܶܣܪܳܐ ܘܰܕܪܽܘܚܳܐ: ܘܰܐܝܟ ܕܚܰܕܺܝܬ ܐܶܢܽܘܢ ܒܰܚܙܳܬܳܐ ܕܦܰܪܨܽܘܦܳܟ: ܘܚܰܕܳܢ ܒܰܚܙܳܬܳܟ ܒܡܶܐܬܺܝܬܳܟ: ܘܰܐܢܺܝܚ ܠܥܰܢܺܝ̈ܕܶܐ ܡܗܰܝܡ̈ܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ܀

 

ܥܛܪܐ

ܒܒܳܥܽܘ ܡܶܢܳܟ ܡܳܪܝܳܐ ܡܳܪܰܢ ܠܐ ܬܶܫܕܶܐ ܠܰܢ ܡ̣ܶܢ ܩܕܳܡܰܝܟ: ܘܠܐ ܬܰܣܠܐܷ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܒܝܰܘܡܳܐ ܗܳܢܳܐ ܕܥܺܐܕܳܐ ܩܰܕܺܝܫܳܐ ܕܚܰܕ̈ܘܳܬܳܐ ܐܶܠܐ ܩܰܒܶܠܳܝܗܝ ܠܦܺܝܪܡܰܢ ܐܰܝܟ ܦܺܝܪܡܳܐ ܕܰܐܒܳܗ̈ܳܬܳܐ ܩܰܕܺܝ̈ܫܶܐ: ܕܰܫܦܰܪܘ ܩܕܳܡܰܝܟ: ܘܫܰܟܶܢ ܠܰܢ ܕܰܒܚܶܘܳܪ̈ܰܘܗܝ ܕܝܰܘܡܳܐ ܗܳܢܳܐ ܢܰܦܪܶܓ: ܘܢܰܚ̈ܬܶܐ ܚܶܘܳܪ̈ܶܐ ܠܡܶܫܬܽܘܬܳܐ ܕܺܝܠܳܟ ܢܛܰܝܶܒ: ܘܠܰܓܢܽܘܢܳܐ ܕܺܝܠܳܟ ܢܶܥܽܘܠ ܘܥܰܡ ܙܡܺܝ̈ܢܶܐ ܘܰܩܪ̈ܰܝܳܐ ܢܶܬܒܰܣܰܡ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܘܬܡܐ

ܟܺܐܢܳܐ ܘܰܬܪܺܝܨܳܐ ܕܥܰܡ ܠܐ ܢܳܡܽܘ̈ܣܳܝܶܐ ܕܺܝܢܳܐ ܩܰܒܶܠ: ܟܰܕ ܐܺܝܬܰܘܗܝ ܕܰܝܳܢܳܐ ܕܕܰܝ̈ܳܢܶܐ: ܘܙܰܟܺܝ ܠܓܶܢܣܰܢ ܕܒܰܥܒܳܪ ܦܽܘܩܕܳܢܳܐ ܐܶܬܚܰܝܰܒ ܐܰܢ̱ܬ ܡܳܪܝ ܒܰܛܶܠ ܠܣܶܕ̈ܩܶܐ ܘܚܶܪ̈ܝܳܢܶܐ ܡ̣ܶܢ ܒܰܝܢܳܬܰܢ ܘܰܫܚܽܘܩ ܠܣܳܛܳܢܳܐ ܬܚܶܝܬ ܪ̈ܶܓܠܰܝܢ: ܘܰܬܒܽܘܪ ܚܰܝܠܶܗ ܕܠܐ ܢܫܰܥܒܶܕ ܠܰܢ: ܐܶܠܐ ܟܰܢܶܫ ܐܰܒܺܝܕܽܘܬܰܢ: ܘܚܽܘܢ ܠܚܰܛܳܝ̈ܶܐ ܘܡܰܣܟܠܳܢ̈ܶܐ: ܘܒܰܝܰܐܐ ܠܐܝܠܶܝܢ ܕܰܐܠܺܝܨܺܝܢ: ܘܚܰܪܰܪ ܠܐܝܠܶܝܢ ܕܰܫܟܺܝܒܺܝܢ: ܘܰܐܩܺܝܡ ܐܶܢܽܘܢ ܡ̣ܶܢ ܝܰܡܺܝܢܳܟ ܕܢܰܘܕܶܐ ܠܳܟ: ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܡܰܠܟܳܐ ܕܡܰܠܟ̈ܶܐ ܕܶܐܬܪܟܶܢ ܡ̣ܶܢ ܪ̈ܰܘܡܶܐ ܥܶܠܳܝ̈ܶܐ ܠܥܽܘܡ̈ܩܶܐ ܬܰܚܬܳܝ̈ܶܐ ܒܛܰܝܒܽܘܬܶܗ ܘܰܛܥܶܡ ܡܰܘܬܳܐ ܒܨܶܒܝܳܢܶܗ ܕܢܶܦܪܽܘܩ ܠܐܕܳܡ ܨܰܠܡܳܐ ܕܪܰܒܽܘܬܶܗ. ܠܗ̇ܰܘ ܓܰܢ̱ܒܳܪܳܐ ܕܰܢܚܶܬ ܠܰܫܝܽܘܠ ܒܪܶܚܡܰܬ݀ ܐ̱ܢܳܫܽܘܬܶܗ ܘܩܰܛܠܶܗ ܠܡܰܘܬܳܐ ܩܳܛܽܘܠܰܢ ܒܡܰܘܬܶܗ: ܘܰܐܬܗܰܪ ܠܡܰܠܐܟ̈ܶܐ ܘܠܰܒܢܰܝ̈ܢܳܫܳܐ ܒܰܩܝܳܡܬܶܗ: ܘܢܰܟ̈ܦܳܬܳܐ ܢܶܫ̈ܶܐ ܩܰܕܺܝ̈ܫܳܬܳܐ ܣܰܒܰܪ̈ܝ ܩܝ̇ܳܡܬܶܗ: ܘܬܰܠܡܺܝ̈ܕܶܐ ܐܶܬܦܨܰܚܘ ܟܰܕ ܫܡܰܥܘ ܕܩܳܡ ܪܰܒܗܽܘܢ ܡ̣ܶܢ ܩܰܒܪܳܐ: ܘܰܪܗܶܛܘ ܠܰܚܙܳܬܶܗ: ܘܰܐܒܗܶܬ ܠܥܰܡܳܐ ܕܨܳܠܽܘ̈ܒܶܐ ܕܰܢܛܰܪܘ ܩܰܒܪܶܗ ܒܳܐܬܳܐ ܕܢܽܘܚܳܡܶܗ: ܕܠܶܗ ܝܳܐܐ ܫܽܘܒܚܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܒܚܰܝܠܐ ܕܰܐܠܳܗܽܘܬܳܟ ܐܰܩܺܝܡܬ ܠܰܟܝܳܢܰܢ ܕܰܪܡܶܐ ܗܘܳܐ ܘܰܡܚܰܒܰܠ ܒܚܶܙ̈ܶܐ ܬܰܚܬܳܝ̈ܶܐ ܕܗܳܡܳܢ: ܒܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܟܰܕ ܩܳܡܬ ܕܠܐ ܚܒܳܠܐ ܘܠܐ ܡܶܬܚܰܒܠܳܢܽܘܬܳܐ ܐܰܩܢܰܝܬ ܠܓܶܢܣܳܐ ܕܺܝܠܰܢ ܒܫܽܘܘܕܳܥܳܐ ܕܰܩܝܳܡܬܳܟ ܦܰܐܝܰܬ݀ ܠܐܠܳܗܳܐ. ܘܠܐ ܡܶܟܺܝܠ ܝܰܘܡܳܢ ܒܐ̱ܢܳܫܳܝ̈ܳܬܳܐ ܡܶܬܺܝܕܰܥ ܐܰܢ̱ܬ ܠܰܡܗܰܝ̈ܡܢܰܝܟ ܐܶܠܐ ܚܰܕ ܐܠܰܗܳܐ: ܚܰܕ ܟܝܳܢܳܐ ܠܐ ܡܶܫܬܰܚܠܦܳܢܳܐ: ܘܠܐ ܚܒܺܝܟܳܐ ܘܰܠܚܽܘܕܳܝܳܐ ܘܰܩܢܽܘܡܳܐ ܐܺܝܬܰܝܟ ܕܰܠܥܶܠ ܡ̣ܶܢ ܡܶܠܬܳܐ ܘܳܐܦܶܢ ܓܰܫܽܘܟ ܘܶܐܫܬܰܘܕܥܽܘܟ ܬܰܠܡܺܝ̈ܕܶܐ ܕܺܝܠܳܟ ܘܰܚܙܰܐܘܽܘܟ ܒܰܕܡܽܘܬܳܐ ܓܽܘܫܡܳܢܳܝܬܳܐ: ܘܡ̣ܶܢ ܢܽܘܚܳܡܳܐ ܘܰܩܝܳܡܬܳܐ ܠܐ ܗܘܳܐ ܒܦܰܢܛܰܣܺܝܰܐ: ܐܶܠܐ ܫܰܪܺܝܪܳܐܝܬ ܘܰܠܥܶܠ ܡ̣ܶܢ ܡܶܠܬܳܐ: ܘܰܐܝܟܰܢܳܐ ܕܒܰܙܒܰܢ ܡܕܰܒܪܳܢܽܘܬܳܟ ܚܰܘܺܝܬ ܐܠܰܗܳܝ̈ܳܬܳܐ ܬܡܺܝܗܳܐܝܬ: ܘܗܳܟܰܢܳܐ ܡ̣ܶܢ ܒܳܬܰܪ ܩܝܳܡܬܳܟ ܚܰܘܺܝܬ ܓܫܺܝ̈ܡܳܬܳܐ ܫܒܺܝܚܳܐܝܬ: ܘܰܒܗܳܕܶܐ ܡܶܬܡܰܨܝܳܢܽܘܬܳܟ ܗ̇ܳܝ ܐܺܝܬܝܳܝܬܳܐ ܒܰܕܶܩܬ ܘܚܰܘܺܝܬ ܠܰܡܗܰܝ̈ܡܢܶܐ ܕܺܝܠܳܟ: ܘܗܳܟܰܢܳܐ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܕܰܐܣܒܰܪܘ ܡܶܬܦܰܫܟܳܢ̈ܝܳܬܳܐ ܒܰܩܝܳܡܬܳܐ ܡܳܪܳܢܳܝܬܳܐ: ܕܓܽܘܫܽܘܢܳܢܝ ܘܕܰܥܘ: ܡܶܛܽܠ ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇: ܐܰܟܡܳܐ ܕܚܳܙܶܝܢ ܐܢ̱ܬܽܘܢ ܕܺܐܝܬ ܠܺܝ. ܟܰܕ ܠܰܩܠܶܝܽܘܦܰܐ ܘܚܰܒܪܶܗ ܒܢܰܩܺܝܦܽܘܬܳܐ ܚܽܘܒܳܢܳܝܬܳܐ: ܘܰܒܝܰܕ ܦܽܘܬܳܦܳܐ ܘܦܽܘܫܳܩܳܐ ܕܡܶܠܰܝ̈ ܢܒܺܝܰܘ̈ܳܬܳܐ ܕܰܥܠܰܝܟ: ܘܒܰܩܨܳܝܬܳܐ ܕܶܝܢ ܕܠܰܚܡܳܐ ܥܰܝ̈ܢܶܐ ܕܢܰܦ̈ܫܳܬܗܽܘܢ ܐܶܬܦܰܬܰܚ̈ܝ ܠܡܶܫܬܰܘܕܳܥܽܘ ܕܚܰܬܺܝܬܳܐܝܬ ܘܫܰܪܺܝܪܳܐܝܬ ܩܳܡܬ. ܘܡ̣ܶܢ ܚܰܕܘܰܬܗܽܘܢ ܒܳܗ̇ ܒܫܳܥܬܳܐ ܪܽܘܚܳܢܳܐܝܬ ܗܦܰܟܘ: ܟܰܕ ܣܰܒܰܪܘ ܠܰܫܠܺܝ̈ܚܶܐ ܚܕܰܥܣܰܪ ܕܰܒܓܰܘ ܥܶܠܺܝܬܳܐ ܟܢܺܝܫܺܝܢ ܗܘܰܘ ܕܓܰܠܝܳܐܝܬ ܚܙܰܘ ܠܰܩܝܳܡܬܳܟ ܗܳܟܘܳܬ ܘܬܰܠܡܺܝ̈ܕܶܐ ܚܰܘܺܝܘ ܠܗܳܠܶܝܢ ܬܪܶܝܢ ܡܣܰܒܪ̈ܳܢܶܐ: ܐܰܝܠܶܝܢ ܕܶܐܬܒܰܕܰܩܘ ܠܗܽܘܢ ܡ̣ܶܢ ܚܽܘܒܳܟ ܘܪܶܚܡܰܬ݀ ܐ̱ܢܳܫܽܘܬܳܟ ܕܰܠܘܳܬ ܓܶܢܣܰܢ: ܘܶܐܫܬܰܪܪܰܬ݀ ܠܰܬܪ̈ܰܝܗܽܘܢ ܓܰܒ̈ܶܐ ܚܰܬܺܝܬܳܐܝܬ ܩܝܳܡܬܳܟ ܫܰܪܺܝܪܬܳܐ ܘܰܐܠܳܗܳܝܬܳܐ: ܘܰܠܬܰܠܡܺܝ̈ܕܶܐ ܩܨܳܝܳܐ ܕܽܐܘܟܰܪܣܛܺܝܰܐ ܐܠܰܦܬ ܐܶܢܽܘܢ ܟܰܕ ܢܦܰܚܬ ܒܰܐܦܰܝ̈ܗܽܘܢ ܐܰܝܟܰܢܳܐ ܕܰܢܩܰܒܠܽܘܢ ܪܽܘܚܳܐ ܕܩܽܘܕܫܳܐ: ܘܶܐܡܰܪܬ ܠܗܽܘܢ ܕܶܐܢ ܬܶܫܒܩܽܘܢ ܠܐܢܳܫ ܚܛܳܗ̈ܶܐ ܢܶܗܘܽܘܢ ܫܒܺܝܩܺܝܢ ܠܶܗ: ܘܶܐܢ ܬܶܐܚܕܽܘܢ ܕܐ̱ܢܳܫ ܐܰܚܺܝܕܺܝܢ ܠܶܗ: ܘܕܰܢܬܰܠܡܕܽܘܢ ܠܟܽܠ ܥܰܡ̈ܡܺܝܢ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܦܩܰܕܬ ܐܶܢܽܘܢ ܡܫܰܠܛܳܐܝܬ: ܘܚܰܙܶܩܬ ܐܶܢܽܘܢ ܒܚܰܝܠܐ ܕܪܺܝܫܽܘܬ ܟܳܗܢܽܘܬܳܐ ܘܕܰܥܕܰܡܳܐ ܠܫܽܘܠܳܡܳܐ ܠܐ ܬܶܫܒܽܘܩ ܐܶܢܽܘܢ: ܘܫܰܪܰܪܬ ܐܰܘܟܺܝܬ ܒܰܐܝܠܶܝܢ ܕܡܶܢܗܽܘܢ ܡܩܰܒܠܺܝܢ ܣܝܳܡ ܐܺܝܕܳܐ ܕܟܳܗܢܽܘܬܳܐ: ܗܳܟܰܢܳܐ ܠܰܡܣܰܒܪ̈ܳܢܶܐ ܠܰܚܡܳܐ ܕܒܽܘܪܟܬܳܐ ܒܰܪܶܟܬ ܠܗܽܘܢ ܘܶܐܫܬܰܘܕܥܽܘܟ ܐ̱ܪܳܙܳܐ ܗ̇ܰܘ ܪܰܒܳܐ ܗܳܢܳܐ ܘܢܳܡܽܘܣܳܐ ܦܰܐܝܳܐ ܘܰܐܠܳܗܳܝܳܐ ܕܡ̣ܶܢ ܒܳܬܰܪ ܡܶܬܢܰܣܒܳܢܽܘܬܶܗ ܒܢܰܦ̈ܫܳܬܳܐ ܕܺܝܠܗܽܘܢ ܒܠܰܚܡܳܐ ܕܒܽܘܪܟܬܳܐ ܢܚܰܬܡܽܘܢ ܠܐܪ̈ܳܙܶܐ ܐܠܰܗܳܝ̈ܶܐ: ܘܒܰܕܟܰܝ̈ܳܐ ܕܰܟܝܳܐܝܬ ܢܶܓܫܦܽܘܢ: ܘܰܕܠܰܘ ܡܶܐܟܽܘܠܬܳܐ ܫܚܺܝܡܬܳܐ ܢܩܰܒܠܽܘܢ ܒܳܬܰܪ ܦܰܓܪܳܐ ܐܠܰܗܳܝܳܐ. ܟܰܕ ܗ̇ܰܘ ܠܪ̈ܺܝܫܰܝ ܟܳܗ̈ܢܶܐ ܐܰܓܥܶܠܬ ܩܰܕܡܳܐܝܬ: ܗܳܢܰܘ ܕܶܝܢ ܠܰܡܣܰܒܪ̈ܳܢܶܐ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܗܰܝܡܶܢܬ ܐܰܝܟܰܢܳܐ ܕܒܺܐܝ̈ܕܰܝܗܽܘܢ ܢܶܬܦܰܠܰܓ ܠܟܽܠܗܽܘܢ ܡܗܰܝ̈ܡܢܶܐ: ܐܳܘ ܟܡܳܐ ܬܡܺܝܗܺܝܢ ܐ̱ܪ̈ܳܙܶܐ ܕܰܐܫܠܶܡܬ ܠܰܢ ܐܳܘ ܡܶܠܬܳܐ ܐܠܰܗܳܐ: ܐܳܘ ܟܡܳܐ ܫܒܺܝܚ ܘܰܡܠܐܷ ܕܽܘܡܳܪܳܐ ܐ̱ܪܳܙܳܐ ܗܳܢܳܐ ܕܰܐܓܥܶܠܬ ܠܰܢ ܒܺܐܝ̈ܕܰܝ ܫܠܺܝ̈ܚܶܐ ܩܰܕܺܝ̈ܫܶܐ: ܘܰܡܣܰܒܪ̈ܳܢܶܐ ܕܰܫܪܳܪܳܐ: ܐܳܘ ܠܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ: ܡܳܪܰܢ ܝܶܫܽܘܥ ܡܫܺܝܚܳܐ ܡܰܢܽܘ ܕܠܐ ܣܳܓܶܕ ܠܫܽܘ̈ܡܳܬܳܟ ܕܰܚܠܳܦܰܝܢ ܘܠܰܩܝܳܡܬܳܟ ܡܚܰܕܬܳܢܺܝܬܳܐ ܕܰܟܝܳܢܰܢ: ܡܰܢܽܘ ܕܠܐ ܬܳܗܰܪ ܒܐܪ̈ܳܙܶܐ ܕܰܡܕܰܒܪܳܢܽܘܬܳܟ ܕܰܚܠܳܦܰܝܢ ܐܳܘ ܡܶܠܬܳܐ ܐܠܰܗܳܐ ܒܳܥܶܝܢܰܢ ܡܶܢܳܟ ܘܡܶܬܟܰܫܦܺܝܢܰܢ ܠܳܗ̇ ܠܰܡܪܰܚܡܳܢܽܘܬܳܟ ܕܬܶܓܡܽܘܪ ܘܰܬܫܰܡܠܐܷ ܠܰܢ ܒܟܽܠܗܽܘܢ ܕܰܪ̈ܓܰܝ ܫܽܘܡܠܳܝܰܢ: ܘܡܶܣܬܰܠܩܳܢܽܘܬܰܢ ܒܕܽܘܪ̈ܳܓܶܐ ܫܡܰܝ̈ܳܢܶܐ: ܘܰܬܦܰܬܰܚ ܠܥܰܝ̈ܢܶܐ ܕܠܶܒܰܘ̈ܳܬܰܢ: ܐܰܝܟܰܢܳܐ ܕܢܶܫܬܰܘܕܰܥ ܢܳܡܽܘ̈ܣܰܝܟ ܘܢܳܛܽܘܪܽܘܬܳܐ ܕܦܽܘܩ̈ܕܳܢܰܝܟ: ܘܰܐܠܶܦ ܠܰܢ ܠܡܰܟܪܳܙܽܘ ܬܡܺܝ̈ܗܳܬܳܟ ܘܰܓܢ̱ܒܰܪ̈ܘܳܬܳܟ: ܘܰܠܡܶܬܢܰܗܳܪܽܘ ܒܟܽܠܗܶܝܢ ܝܰܕ̈ܥܳܬܳܟ ܐܠܰܗܳܝ̈ܳܬܳܐ: ܐܰܝܟܰܢܳܐ ܕܠܐܷܣܛܕܰܘ̈ܳܬܳܐ ܐܰܘܟܺܝܬ ܡܽܘܫ̈ܚܳܬܳܐ ܙܰܒܢܳܝ̈ܳܬܳܐ ܒܚܰܝܠܐ ܕܪܽܘܚܳܐ ܩܰܠܺܝܠܐܝܬ ܢܶܡܛܶܐ: ܘܡ̣ܶܢ ܥܳܠܡܳܐ ܗܳܢܳܐ ܚܶܫܽܘܟܳܝܳܐ ܠܘܳܬܳܟ ܢܽܘܗܪܳܐ ܫܰܪܺܝܪܳܐ ܢܶܬܥܰܠܐܷ: ܐܰܝܟܰܢܳܐ ܕܢܰܘܕܶܐ ܠܐ ܫܰܠܘܳܐܝܬ: ܘܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܥܰܠ ܦܳܬܽܘܪܳܟ ܢܶܣܬܡܶܟ: ܘܬܰܡܳܢ ܢܰܣܶܩ ܫܽܘܒܚܳܐ ܦܰܐܝܳܐ ܠܐܝܬܽܘܬܳܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

ܥܛܪܐ

ܗܰܒܠܰܢ ܡܳܪܝ ܕܰܒܢܰܚ̈ܬܶܐ ܦܰܐܝ̈ܳܐ ܘܫܰܦܺܝܪ̈ܶܐ ܕܕܽܘܒܳܪ̈ܶܐ ܠܐ ܥܕܺܝ̈ܠܐ ܢܩܰܕܶܡ ܐܰܦܰܝ̈ܟ ܒܬܰܘܕܺܝܬܳܐ ܐܰܝܟ ܢܶܫ̈ܶܐ ܩܰܕܺܝ̈ܫܳܬܳܐ ܕܰܒܒܶܣ̈ܡܳܢܶܐ ܐܶܙ̈ܰܠܝ: ܕܰܢܒܰܣ̈ܡܳܢ ܦܰܓܪܳܟ ܝܰܩܺܝܪܳܐ: ܘܠܐܷܣܟ̈ܦܳܬܳܐ ܕܕܳܪ̈ܰܝ ܒܰܝܬܳܟ ܢܢܰܫܶܩ ܘܰܢܥܰܦܶܩ ܐܰܟܘܳܬܗܶܝܢ ܟܰܕ ܐܶܚܰܕ̈ܝ ܠܪ̈ܶܓܠܰܝܟ ܩܰܕܺܝ̈ܫܳܬܳܐ ܘܰܣܓܶܕ̈ܝ ܠܳܟ ܢܶܬܒܰܣܰܡ ܟܽܠܰܢ ܒܰܫܠܳܡܳܐ ܗ̇ܰܘ ܕܡܶܢܳܟ ܘܢܰܘܕܶܐ ܒܰܫܠܳܡܳܐ ܗ̇ܰܘ ܕܡܶܢܳܟ ܘܢܰܘܕܶܐ ܠܛܰܝܒܽܘܬܳܟ ܘܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܫܽܘܒ̈ܚܶܐ ܫܦܰܝ̈ܳܐ ܘܗܶܕܪ̈ܶܐ ܘܙܽܘܡܳܪ̈ܶܐ ܚܠܰܝ̈ܳܐ: ܘܩܽܘ̈ܠܳܣܶܐ ܕܟܰܝ̈ܳܐ ܘܕܽܘܟ̈ܣܶܐ ܓܒܰܝ̈ܳܐ ܒܠܶܥ̈ܙܶܐ ܪ̈ܽܘܚܳܢܳܝܶܐ ܘܚܰܕ̈ܳܬܳܐ. ܘܩܺܝ̈ܢܳܬܳܐ ܡܨ̈ܰܠܠܳܬܳܐ: ܘܢܶܥ̈ܡܳܬܳܐ ܦܰܐܝ̈ܳܬܳܐ ܢܶܫܬܘܶܐ ܕܰܢܩܰܪܶܒ. ܠܗ̇ܰܘ ܕܚܰܕܶܬ ܠܓܶܢܣܳܐ ܕܰܒܢܰܝ̈ܢܳܫܳܐ ܒܰܩܝܳܡܬܶܗ: ܘܚܰܪܰܪ ܐܶܢܽܘܢ ܡ̣ܶܢ ܫܽܘܥܒܳܕܳܐ ܕܒܺܝܫܳܐ ܒܢܽܘܚܳܡܶܗ: ܘܪܰܥܺܝ ܐܶܢܽܘܢ ܒܰܕܡܳܐ ܕܰܩܢܽܘܡܶܗ ܠܐܒܳܐ ܫܳܠܽܘܚܶܗ: ܠܗ̇ܰܘ ܪܳܥܝܳܐ ܛܳܒܳܐ ܕܣܳܡ ܢܰܦܫܶܗ ܚܠܳܦ ܥܳܢ̈ܶܗ ܘܟܰܢܫܳܗ̇ ܘܣܳܡܳܗ̇ ܒܰܛܝܳܪܶܗ ܕܠܶܗ ܝܳܐܐ ܫܽܘܒܚܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܨܶܡܚܳܐ ܘܕܶܢܚܳܐ ܕܡ̣ܶܢ ܐܰܒܳܐ: ܕܒܰܩܝܳܡܬܳܟ ܗ̇ܳܝ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܠܰܫܡܰܝ̈ܳܢܶܐ ܘܠܐܪ̈ܥܳܢܳܝܶܐ ܚܰܕܺܝܬ ܘܰܐܦܨܰܚܬ ܘܰܒܢܽܘܚܳܡܳܟ ܫܒܺܝܚܳܐ ܕܡ̣ܶܢ ܩܰܒܪܳܐ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܟܰܢܶܫܬ ܘܚܰܠܶܛܬ ܟܰܕ ܚܕܳܐ ܓܽܘܕܳܐ ܪܽܘܚܳܢܳܝܬܳܐ ܘܩܰܕܺܝܫܬܳܐ ܡ̣ܶܢ ܪ̈ܽܘܚܳܢܶܐ ܘܥܰܦܪ̈ܳܢܶܐ ܥܒܰܕܬ ܘܫܰܡܠܺܝܬ ܒܰܩܝܳܡܬܳܟ: ܘܟܰܕ ܨܒܰܝܬ ܒܪܶܚܡܰܬ݀ ܐ̱ܢܳܫܽܘܬܳܟ ܕܰܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܬܶܣܥܽܘܪ ܒܰܚܢܳܢܳܟ ܘܰܬܣܰܒܰܪ ܐܶܢܽܘܢ ܢܽܘܚܳܡܳܟ: ܘܰܬܚܰܪܰܪ ܐܶܢܽܘܢ ܒܰܩܝܳܡܬܳܟ: ܘܬܰܘܕܰܥ ܐܶܢܽܘܢ ܒܙܳܟܽܘܬܳܟ: ܘܰܬܠܰܒܶܒ ܐܶܢܽܘܢ ܒܰܚܙܳܬܳܟ: ܗܳܝܕܶܝܢ ܠܥܶܠܺܝܬܳܐ ܕܒܳܗ̇ ܟܢܺܝܫܺܝܢ ܗܘܰܘ: ܟܰܕ ܬܰܪ̈ܥܶܐ ܐܰܚܺܝܕܺܝܢ ܗܘܰܘ ܨܶܝܕܰܝܗܽܘܢ ܥܳܐܶܠ ܗܘܰܝܬ ܘܚܰܘܺܝܬ ܒܝܰܕ ܗܳܕܶܐ ܕܰܐܝܟܰܢܳܐ ܕܶܐܬܺܝܠܶܕܬ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܘܰܠܛܰܒ̈ܥܶܐ ܕܰܒܬܽܘ̈ܠܶܝܗ̇ ܠܐ ܫܪܰܝܬ: ܘܰܐܝܟܰܢܳܐ ܕܩܳܡܬ ܡ̣ܶܢ ܩܰܒܪܳܐ ܘܰܐܝܟ ܕܺܐܝܬܰܝܗܽܘܢ ܚܬܳܡ̈ܶܐ ܘܛܰܒ̈ܥܶܐ ܕܩܰܒܪܳܐ ܢܛܰܪܬ ܗܳܟܰܢܳܐ ܘܰܠܥܶܠܺܝܬܳܐ ܥܰܠܬ ܟܰܕ ܠܬܰܪ̈ܥܶܐ ܘܰܠܟܰܘ̈ܶܐ ܠܐ ܦܬܰܚܬ: ܘܟܰܕ ܒܰܝܢܳܬܗܽܘܢ ܦܰܓܪܳܢܳܐܝܬ ܘܰܐܠܳܗܳܐܝܬ ܩܳܐܶܡ ܗܘܰܝܬ. ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܓܒܰܝ̈ܳܐ ܕܩܽܘܫܬܳܐ ܚܕܰܘ ܕܩܳܡܶܬ ܠܺܝ ܡ̣ܶܢ ܒܶܝܬ ܡܺܝ̈ܬܶܐ ܒܫܽܘܒܚܳܐ: ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܕܶܐܢܰܐ ܗ̱ܘ ܪܰܒܟܽܘܢ ܫܰܪܺܝܪܳܐ. ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܕܩܽܘܫܬܳܐ ܕܶܐܫܬܪܺܝ ܠܶܗ ܫܽܘܠܛܳܢ ܡܰܘܬܳܐ ܡ̣ܶܢ ܓܶܢܣܳܐ ܕܡܳܝܽܘ̈ܬܶܐ: ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܕܰܥܒܰܪ ܚܰܫܳܐ ܡ̣ܶܢ ܠܶܒܰܘ̈ܳܬܟܽܘܢ: ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܦܽܘܩܘ ܐܰܟܪܶܙܘ ܣܒܰܪܬܳܐ ܒܟܽܠܳܗ̇ ܒܪܺܝܬܳܐ. ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܓܒܰܝ̈ܳܐ ܕܩܽܘܫܬܳܐ ܕܰܗܘܳܐ ܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ: ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܕܶܐܫܬܰܝܰܢܘ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ ܘܰܐܥܒܪܶܬ ܠܥܳܩܬܳܐ ܘܰܠܠܰܘܛܬܳܐ ܡ̣ܶܢ ܓܶܢܣܶܗ ܕܳܐܕܳܡ ܥܰܦܪܳܢܳܐ: ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܕܰܣܒܰܪܬܳܐ ܕܰܩܝܳܡܬܳܐ ܡ̣ܶܢ ܢܶܫ̈ܶܐ ܩܰܕܺܝ̈ܫܳܬܳܐ ܩܰܒܶܠܬܽܘܢ. ܫܠܳܡܳܐ ܥܰܡܟܽܘܢ ܓܽܘܕܳܐ ܕܬܰܠܡܺܝ̈ܕܰܝ: ܛܥܰܢܘ ܫܠܳܡܳܐ ܘܰܫܠܳܡܳܐ ܕܢܽܘܚܳܡܝ ܘܰܐܟܪܶܙܘ ܒܶܝܬ ܥܰܡ̈ܡܶܐ ܕܩܳܡܶܬ ܠܺܝ ܡ̣ܶܢ ܩܰܒܪܳܐ ܒܚܰܝܠܐ ܪܰܒܳܐ. ܫܠܳܡܳܐ ܥܰܡܟܽܘܢ ܢܒܺܝ̈ܶܐ ܕܰܥܠܰܝ ܐܶܬܢܰܒܺܝܬܽܘܢ: ܝܰܘܡܳܢܳܐ ܗܘܳܐ ܫܽܘܠܳܡܳܐ ܠܡܶܠܰܝ̈ܟܽܘܢ ܘܚܽܘܬܳܡܳܐ ܠܟܳܪܽܘܙܽܘܬܳܐ ܕܺܝܠܟܽܘܢ. ܘܡܶܛܽܠ ܗܳܕܶܐ ܐܳܦ ܚܢܰܢ ܚܰܛܳܝ̈ܶܐ ܥܰܒ̈ܕܶܐ ܕܺܝܠܳܟ ܡܳܪܝܳܐ: ܕܰܐܘܕܺܝܢܰܢ ܒܳܟ ܡܳܪܝܳܐ ܘܗܰܝܡܶܢܢܰܢ ܒܐܢܳܫܽܘܬܳܟ: ܘܣܳܓܕܺܝܢܰܢ ܠܐܠܳܗܽܘܬܳܟ ܘܰܡܚܰܒܒܺܝܢܰܢ ܠܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܘܟܰܕ ܠܐ ܚܙܰܝܢܰܢ ܐ̱ܢܳܫܽܘܬܳܟ ܒܰܒܣܰܪ ܡܦܺܝܣܺܝܢܰܢ ܠܛܰܝܒܽܘܬܳܟ: ܕܠܶܗ ܟܰܕ ܠܶܗ ܠܛܽܘܒܳܐ ܕܰܡܠܰܟܬ ܒܰܣܒܰܪܬܳܐ ܕܺܝܠܳܟ ܐܶܘܢܓܶܠܳܝܬܳܐ: ܕܛܽܘܒܰܝܗܽܘܢ ܠܐܝܠܶܝܢ ܕܠܐ ܚܙܰܐܘܽܘܢܝ ܘܗܰܝܡܶܢܘ: ܕܬܰܫܘܶܐ ܠܰܢ ܒܛܰܝܒܽܘܬܳܟ ܘܗܰܒ ܠܰܢ ܬܰܘܕ̈ܝܳܬܳܐ ܕܰܟ̈ܝܳܬܳܐ: ܘܬܶܫܒ̈ܚܳܬܳܐ ܚܰܕ̈ܬܳܬܳܐ ܠܳܟ ܢܩܰܪܶܒ. ܒܝܰܘܡܳܐ ܕܡܶܐܬܺܝܬܳܟ ܕܬܰܪܬܶܝܢ: ܘܰܕܡܶܬܓܰܠܝܳܢܽܘܬܳܟ ܕܡ̣ܶܢ ܫܡܰܝܳܐ: ܘܢܶܦܪܰܚ ܠܐܘܪܥܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܰܒܗܳܢܳܐ ܥܳܠܡܳܐ ܫܰܟܶܢ ܠܰܢ ܕܚܰܕܬܳܐܝܬ ܘܝܰܬܺܝܪ ܦܨܺܝܚܳܐܝܬ ܢܶܚܕܶܐ ܘܢܶܪܘܰܙ ܒܰܩܝܳܡܬܳܟ ܡܫܰܒܰܚܬܳܐ: ܟܰܕ ܡܰܪܚܶܩ ܐܰܢ̱ܬ ܡܶܢܰܢ ܟܽܠ ܦܽܘܠܳܓܳܐ ܡܰܚܣܪܳܢܳܐ: ܘܟܽܠ ܡܰܚܫܰܒܬܳܐ: ܟܰܕ ܡܰܪܚܶܩ ܐܰܢ̱ܬ ܡܶܢܰܢ ܟܽܠ ܦܽܘܠܳܓܳܐ ܡܰܚܣܪܳܢܳܐ: ܘܟܽܠ ܡܰܚܫܰܒܬܳܐ ܐܰܝܕܳܐ ܕܠܳܟ ܠܐ ܫܳܦܪܳܐ: ܘܥܽܘܩܒܳܐ ܗ̇ܰܘ ܡܰܘܒܕܳܢܳܐ ܘܰܒܨܳܬܳܐ ܕܰܥܠܰܝܟ: ܐܰܝܟܰܢܳܐ ܕܢܶܫܬܰܘܕܥܳܟ ܕܰܐܢ̱ܬ ܐܺܝܬܰܝܟ ܐܠܰܗܳܐ ܫܰܪܺܝܪܳܐ ܕܶܐܬܳܐ ܠܦܽܘܪܩܳܢܰܢ ܕܠܐ ܦܽܘܠܳܓܳܐ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܥܰܡ ܗܳܢܽܘܢ ܕܡ̣ܶܢ ܥܳܠܰܡ ܫܦܰܪܘ ܠܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

ܕܚܘܬܡܐ

ܒܳܪܽܘܝܳܐ ܚܰܟܺܝܡܳܐ ܘܰܡܨܰܒܬܳܢܳܐ ܕܟܽܠ ܒܶܪ̈ܝܳܬܳܐ: ܕܰܒܚܰܝܠܐ ܕܦܽܘܩܕܳܢܶܗ ܡܳܪܳܢܳܝܳܐ: ܒܪܳܐ ܠܰܪܩܺܝܥܳܐ ܒܝܰܘܡܳܐ ܬܪܰܝܳܢܳܐ ܡܶܨܥܰܬ݀ ܡܰܝ̈ܳܐ ܥܶܠܳܝ̈ܶܐ ܘܰܠܬܰܚܬܳܝ̈ܶܐ: ܐܰܢ̱ܬ ܡܳܪܝܳܐ ܐܠܰܗܳܐ ܐܰܦܨܰܚ ܠܰܢ ܒܕܶܢܚܳܐ ܫܒܺܝܚܳܐ ܕܡܳܪܽܘܬܳܟ: ܘܥܰܕܰܪ ܠܰܢ ܒܥܘܽܕܪܳܢܳܐ ܕܛܰܝܒܽܘܬܳܟ: ܘܚܰܕܳܐ ܠܰܢ ܒܝܰܘܡܳܐ ܕܰܩܝܳܡܬܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܓܳܒܽܘܠܐ ܡܗܺܝܪܳܐ ܘܨܰܝܳܪܳܐ ܚܰܟܺܝܡܳܐ ܕܰܒܪܶܡܙܳܐ ܕܥܳܒܽܘܕܽܘܬܶܗ ܒܪܳܐ ܡܰܠܐܟ̈ܶܐ ܘܪ̈ܰܒܰܝ ܡܰܠܐܟ̈ܶܐ ܡ̣ܶܢ ܢܽܘܪܳܐ ܘܪܽܘܚܳܐ ܘܰܡܫܰܡ̈ܫܳܢܶܐ ܠܐܠܳܗܽܘܬܶܗ: ܘܠܐܕܳܡ ܨܰܠܡܳܐ ܕܪܰܒܽܘܬܶܗ ܨܰܒܶܬ ܒܢܰܦܫܳܐ ܘܰܒܦܰܓܪܳܐ ܒܪܳܝܗܝ ܠܬܶܫܒܽܘܚܬܳܐ ܕܡܳܪܽܘܬܶܗ: ܠܗ̇ܰܘ ܣܳܝܽܘܡܳܐ ܕܰܬܪܶܝܢ: ܪܰܡܫܳܐ ܘܨܰܦܪܳܐ ܘܠܰܬܪ̈ܰܝܗܽܘܢ ܝܰܗܒ ܫܽܘܠܛܳܢܳܐ ܕܰܢܨܽܘܪܽܘܢ ܐ̱ܪܳܙܳܐ ܕܡܰܘܬܳܐ ܘܢܽܘܚܳܡܳܐ: ܟܰܕ ܠܠܺܠܝܳܐ ܟܡܺܝܪܳܐ ܘܚܶܫܽܘܟܳܐ ܠܡܰܘܬܳܐ ܫܰܡܰܗ: ܘܺܐܝܡܳܡܳܐ ܕܡܰܕܢܰܚ ܢܽܘܗܪܳܐ ܠܝܰܘܡܳܐ ܕܢܽܘܚܳܡܳܐ ܕܰܡܺܝ: ܕܠܶܗ ܝܳܐܐ ܫܽܘܒܚܳܐ܀

ܣܕܪܐ

ܡܪܰܝܡܳܐ ܕܰܠܥܳܠܡܺܝܢ ܘܰܐܠܳܗܳܐ ܠܐ ܡܶܣܬܰܝܟܳܢܳܐ ܕܰܠܕܳܪܕܳܪ̈ܺܝܢ: ܕܫܽܘܠܛܳܢܶܗ ܠܥܳܠܰܡ ܠܐ ܓܳܡܰܪ: ܘܰܫܡܶܗ ܠܥܳܠܰܡ ܠܐ ܦܳܛܰܪ: ܗ̇ܰܘ ܕܰܒܚܶܟܡܬܶܗ ܠܐ ܡܶܬܕܰܪܟܳܢܺܝܬܳܐ ܒܪܳܐ ܠܰܪܩܺܝܥܳܐ ܒܝܰܘܡܳܐ ܬܪܰܝܳܢܳܐ: ܘܰܦܪܰܫ ܒܶܝܬ ܡܰܝ̈ܳܐ ܥܶܠܳܝ̈ܶܐ ܘܰܠܬܰܚܬܳܝ̈ܶܐ: ܘܥܰܠ ܕܓܽܘܫܡܳܐ ܗ̇ܰܘ ܛܶܠ̈ܳܠܐ ܫܟܺܝܚܺܝܢ ܒܶܗ: ܘܠܰܢ ܓܫܺܝ̈ܡܶܐ ܘܡܳܐܢ̈ܶܐ ܓܫܺܝ̈ܡܶܐ ܥܒܰܕ: ܘܥܰܠ ܚܰܨܶܗ ܕܰܪܩܺܝܥܳܐ ܫܳܪܶܝܢ ܙܰܕܺܝ̈ܩܶܐ: ܘܰܐܪܥܳܐ ܕܰܬܚܽܘ̈ܡܰܝܗܽܘܢ ܡܕܰܝܪܺܝܢ ܘܫܳܪܶܝܢ ܒܳܗ̇ ܒܢ̈ܰܝ ܢܽܘܗܪܳܐ: ܒܝܰܘܡܳܐ ܬܪܰܝܳܢܳܐ ܩܳܡ ܪܩܺܝܥܳܐ ܘܶܐܬܬܣܺܝܡ ܓܶܝܪ ܬܚܽܘܡܳܐ ܒܶܝܬ ܒܶܪ̈ܝܳܬܳܐ ܓܽܘܫܡܳܢܳܝ̈ܳܬܳܐ ܠܪ̈ܽܘܚܳܢܳܝܳܬܳܐ: ܘܡܰܝ̈ܳܐ ܕܶܐܬܪܰܩܰܥܘ ܐܰܝܟ ܓܒܶܬܳܐ ܡ̣ܶܢ ܚܰܠܒܳܐ: ܘܪܽܘܚܳܐ ܩܰܕܺܝܫܳܐ ܚܙܰܩ ܠܐܱܫܺܝܕܽܘܬܗܽܘܢ ܘܰܗܘܰܘ ܐܰܝܟ ܡܰܫܟܢܳܐ. ܩܳܡ ܪܩܺܝܥܳܐ ܒܰܝܬܳܐ: ܕܥܳܠܡܳܐ ܟܰܕ ܠܐ ܡܫܰܡܠܰܝ ܐܰܝܟ ܒܰܝܬܳܐ ܕܠܐ ܬܰܨܒܺܝܬܳܐ: ܕܰܒܝܰܘܡܳܐ ܪܒܺܝܥܳܝܳܐ ܢܶܣܬܰܕܪܽܘܢ ܒܶܗ ܬܪܶܝܢ ܢܰܗܺܝܪ̈ܶܐ ܚܰܕ ܠܫܽܘܠܛܳܢܳܐ ܕܺܐܝܡܳܡܳܐ ܘܰܐ̱ܚܪܺܢܳܐ ܠܫܽܘܠܛܳܢܳܐ ܕܺܝܠܶܗ ܕܠܺܠܝܳܐ: ܘܡ̣ܶܢ ܡܠܺܝ̈ܠܐ ܘܠܐ ܡܠܺܝ̈ܠܐ ܬܳܒܰܥ ܕܰܘܺܝܕ ܡܰܕܰܐܬܳܐ ܕܫܽܘܒܚܳܐ ܠܡܳܪܝܳܐ ܒܪܶܡܙܶܗ ܡ̇ܰܢ ܐܶܬܒܪܺܝܘ: ܘܢܳܡܽܘܣܳܐ ܣܳܡ ܠܐܷܣܛܽܘܟ̈ܣܶܐ ܕܢܶܬܡܰܙܓܽܘܢ ܘܠܰܫܡܰܝܳܐ ܕܢܶܬܡܰܬܚܽܘܢ: ܘܰܠܢܰܗܺܝܪ̈ܶܐ ܕܢܶܪܕܽܘܢ ܠܙܰܒ̈ܢܶܐ ܘܥܶܕܳܢ̈ܶܐ ܕܢܶܬܛܰܟܣܽܘܢ: ܠܐܕܳܡ ܨܰܠܡܳܐ ܕܪܰܒܽܘܬܳܐ ܕܫܽܘܒܚܶܗ ܡ̣ܶܢ ܬܪܶܝܢ ܥܰܒܕܶܗ ܡ̣ܶܢ ܓܫܺܝ̈ܡܶܐ ܘܠܐ ܓܫܺܝ̈ܡܶܐ: ܘܰܒܢܰܦܫܳܐ ܘܦܰܓܪܳܐ ܨܰܒܬܶܗ: ܘܰܒܡܶܨܥܳܝܽܘܬܳܐ ܕܒܰܝܢܳܬ ܬܪܶܝܢ ܓܰܒ̈ܶܐ ܒܦܰܪܕܰܝܣܳܐ ܥܕܶܢܳܝܳܐ ܣܳܡܶܗ ܒܶܝܬ ܥܶܠܳܝ̈ܶܐ ܘܬܰܚܬܳܝ̈ܶܐ ܥܒܰܕ ܕܽܘܝܳܪܶܗ: ܘܢܳܡܽܘܣܳܐ ܡܳܪܳܢܳܝܳܐ ܐܰܓܥܶܠ ܠܶܗ: ܕܟܰܕ ܠܦܽܘܩܕܳܢܳܐ ܗ̇ܰܘ ܡܰܚܝܳܢܳܐ ܢܶܛܽܘܪ ܘܠܰܫܡܰܝܳܐ ܡܥܰܠܐܷ ܠܶܗ: ܘܥܰܡ ܪ̈ܽܘܚܳܢܶܐ ܡܚܰܠܶܛ ܠܶܗ: ܘܟܰܕ ܥܰܠ ܦܽܘܩܕܳܢܳܐ ܕܩܰܒܶܠ ܒܰܣܰܪ ܘܰܠܡܶܠܬܳܐ ܐܠܰܗܳܝܬܳܐ ܫܳܛ ܡ̣ܶܢ ܦܰܪܕܰܝܣܳܐ ܠܐܪܥܳܐ ܕܟܽܘ̈ܒܶܐ ܐܶܫܬܕܺܝ ܘܥܰܡ ܚܰܝܘ̈ܳܬܳܐ ܘܰܒܥܺܝܪܳܐ ܥܡܰܪ: ܗܳܠܶܝܢ ܣܳܛܳܢܳܝܳܐ ܓܕܰܫ̈ܝ ܠܶܗ: ܬܰܪܬܶܝܢ ܨܶܦܪ̈ܺܝܢ ܚܰܝ̈ܳܬܳܐ ܦܩܰܕ ܡܽܘܫܶܐ ܕܢܰܝܬܽܘܢ ܠܗ̇ܰܘ ܕܡܶܬܕܰܟܶܐ: ܚܕܳܐ ܠܕܽܘܟܳܝ ܢܰܦܫܶܗ ܘܰܐ̱ܚܪܺܬܳܐ ܠܕܽܘܟܳܝ ܦܰܓܪܶܗ: ܬܪܶܝܢ ܓܰܒܪ̈ܶܐ ܡ̣ܶܢ ܓܳܫܽܘ̈ܫܶܐ ܕܰܠܘܳܬ ܐܺܝܪ̈ܺܝܚܽܘܢܳܝܶܐ ܦܣܰܩܘ ܫܰܒܽܘܩܳܐ ܘܰܣܓܽܘܠܐ ܚܰܕ ܕܥܶܢ̈ܒܶܐ ܘܛܰܥܢܽܘܗܝ ܒܩܽܘܦܳܐ ܒܰܝܢܳܬ ܬܪܶܝܢ: ܠܰܘ ܕܢܰܛܺܝܠ ܗܘܳܐ ܐܶܠܐ ܕܠܐ ܢܶܬܥܨܰܪ: ܬܪܶܝܢ ܛܥܺܝܢܺܝܢ ܗܘܰܘ ܠܶܗ ܡ̣ܶܢ ܐܰܪܥܳܐ ܢܽܘܟܪܳܝܬܳܐ: ܚܰܕ ܚܳܙܶܐ ܠܶܗ ܘܰܐ̱ܚܪܺܢܳܐ ܠܐ ܚܳܙܶܐ ܠܶܗ: ܕܡܽܘܬ ܥܰܡܳܐ ܕܰܚܙܰܐܘܽܘܗܝ ܡ̣ܶܢ ܚܰܡܪܶܗ ܠܐ ܛܥܶܡܘ: ܘܥܰܡ̈ܡܶܐ ܕܠܐ ܚܙܰܐܘܽܘܗܝ ܗܰܝܡ̣ܶܢܘ ܒܶܗ: ܬܰܪܬܶܝܢ ܓܽܘܕܺܝ̈ܢ ܪ̈ܽܘܚܳܢܳܝܶܐ ܕܰܚܙܳܐ ܐܶܫܰܥܝܳܐ ܢܒܺܝܳܐ ܒܗܰܝܟܰܠ ܩܽܘܕܫܳܐ: ܕܰܡܫܰܒܚܺܝܢ ܘܩܳܥܶܝܢ ܬܠܺܝܬܳܐܝ̣ܬ ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܘܒܰܬܪܶܝܢ ܓܶܦܺܝ̈ܢ ܡܚܰܦܶܝܢ ܐܰܦܰܝ̈ܗܽܘܢ: ܘܒܰܬܪܶܝܢ ܡܟܰܣܶܝܢ ܪ̈ܶܓܠܰܝܗܽܘܢ: ܘܒܰܬܪܶܝܢ ܩܳܥܶܝܢ ܩܽܘܕ̈ܳܫܶܐ: ܬܪܶܝܢ ܚܽܘܛܪ̈ܶܐ ܢܶܣܒܶܬ ܠܺܝ: ܡܰܠܟܽܘܬܳܐ ܘܟܳܗܢܽܘܬܳܐ ܩܥܳܐ ܙܟܰܪܝܳܐ: ܠܚܰܕ ܩܪܺܝܬ ܒܰܣܺܝܡܳܐ ܐܳܦ ܠܐܚܪܺܢܳܐ ܚܒܳܠܐ: ܠܰܡܢܰܘ̈ܳܬܳܐ ܬܰܪܬܶܝܢ ܕܰܢܕܰܒܪܽܘܢ ܕܢܰܦܫܳܐ ܘܦܰܓܪܳܐ ܘܰܢܬܰܪܨܽܘܢ: ܬܰܪܬܶܝܢ ܒܺܝ̈ܫܳܢ ܥܒܰܕܘ ܒܢ̈ܰܝ ܥܰܡܝ ܐܶܬܢܰܒܺܝ ܐܶܪܰܡܝܳܐ ܢܒܺܝܳܐ: ܚܕܳܐ ܗ̱ܝ ܕܰܠܡܳܪܝܳܐ ܡܰܒܽܘܥܳܐ ܕܚܰܝ̈ܶܐ ܫܒܰܩܘ. ܘܰܐ̱ܚܪܺܬܳܐ ܗ̱ܝ ܕܶܐܙܰܠܘ ܚܦܰܪܘ ܠܗܽܘܢ ܓܽܘ̈ܒܶܐ ܪ̈ܥܺܝܥܶܐ ܕܠܐ ܩܰܒܰܘ ܡܰܝ̈ܳܐ: ܕܺܐܝܬܰܝܗܽܘܢ ܨܰܠܡ̈ܶܐ ܓܠܺܝ̈ܙܰܝ ܡ̣ܶܢ ܚܰܝ̈ܶܐ: ܬܰܪܬܶܝܢ ܕܺܝܰܐܬܺܝ̈ܩܰܐܣ ܩܰܕܺܝ̈ܫܳܬܳܐ ܓܠܐܴ ܢܒܺܝܳܐ ܚܰܙܩܺܝܶܐܝܠ ܟܰܕ ܐܳܡܰܪ ܓܺܝܓܠܐ ܒܓܰܘ ܓܺܝܓܠܐ ܚܰܕܬܳܐ ܕܰܒܥܽܘܒ ܥܰܬܺܝܩܬܳܐ ܨܪܺܝܪܳܐ ܘܡܶܬܓܰܫܡܳܢܽܘܬܳܐ ܕܰܒܪܳܐ ܡܬܽܘܡܳܝܳܐ ܡܫܺܝܚܳܐ ܝܰܠܕܳܐ ܕܡ̣ܶܢ ܐܰܒܳܐ ܡܚܰܘܝܳܐ ܗܘܳܬ݀. ܬܪܶܝܢ ܬܕܰܝ̈ܳܐ ܠܟܰܠܬܳܐ ܫܠܶܝܡܽܘܢܳܝܬܳܐ: ܬܪܶܝܢ ܝܽܘܠܦܳܢ̈ܶܐ ܦܰܓܪ̈ܳܢܳܝܶܐ ܘܪ̈ܽܘܚܳܢܳܝܶܐ: ܘܰܬܪܶܝܢ ܥܽܘܙܰܝ̈ܠܐ ܕܢܰܦܫܳܐ ܘܦܰܓܪܳܐ ܕܡܶܬܕܰܒܪܺܝܢ ܐܰܟܚܕܳܐ ܬܪܶܝܢ ܡܰܘܠܳܕܺܝ̈ܢ ܫܰܡܶܫ ܗ̣ܽܘ ܝܰܠܕܳܐ ܩܰܕܡܳܝܳܐ ܡ̣ܶܢ ܐܰܒܳܐ ܕܠܐ ܙܰܘܥܳܐ: ܐܳܦ ܕܰܬܪܶܝܢ ܕܡ̣ܶܢ ܐܶܡܳܐ ܕܠܐ ܐܰܒܳܐ ܘܠܐ ܚܰܫܳܐ: ܬܰܪܬܶܝܢ ܓܽܘ̈ܕܶܐ ܓܒܳܐ ܠܶܗ ܟܳܪ̈ܽܘܙܶܐ ܘܰܡܣܰܒܪ̈ܳܢܶܐ ܠܰܣܒܰܪܬܶܗ ܡܰܚܝܳܢܺܝܬܳܐ: ܚܕܳܐ ܗ̱ܝ ܬܪܶܥܣܺܝܪܳܝܬܳܐ ܘܰܐ̱ܚܪܺܬܳܐ ܫܒܺܝܥܳܝܬܳܐ: ܬܰܪܬܶܝܢ ܙܰܒܢܺܝ̈ܢ ܒܟܳܐ ܦܳܪܽܘܩܰܢ ܥܰܠ ܨܶܗܝܽܘܢ ܨܳܠܽܘܒܬܳܐ ܚܕܳܐ ܒܢܽܘܚܳܡܶܗ ܕܠܳܥܳܙܳܪ: ܘܰܐ̱ܚܪܺܬܳܐ ܟܰܕ ܥܰܠ ܠܳܗ̇ ܒܫܽܘܒܚܳܐ ܕܰܛܠܳܝ̈ܶܐ ܘܰܕܓܰܕܽܘ̈ܕܶܐ: ܬܪܶܝܢ ܬܰܠܡܺܝ̈ܕܶܐ ܫܰܕܰܪ ܗܘܳܐ ܡܳܪܰܢ ܕܢܰܝܬܽܘܢ ܥܺܝܠܐ ܘܰܚܡܳܪܳܐ ܠܰܪܟܽܘܒܶܗ: ܥܰܠ ܚܰܨܳܐ ܕܰܬܪ̈ܰܝܗܽܘܢ ܐܶܙܕܰܝܚܰܬ݀ ܪܰܒܽܘܬܶܗ: ܬܪܶܝܢ ܬܰܠܡܺܝ̈ܕܶܐ ܫܰܕܰܪ ܦܳܪܽܘܩܰܢ ܕܰܢܛܰܝܒܽܘܢ ܠܶܗ ܦܶܨܚܳܐ ܒܥܶܠܺܝܬܳܐ ܕܐ̱ܪ̈ܳܙܶܐ: ܘܠܰܬܪܶܝܢ ܦܶܨܚܺܝ̈ܢ ܫܰܡܶܫ ܒܗ̇ܰܘ ܠܺܠܝܳܐ ܠܦܶܨܚܳܐ ܡܽܘܫܳܝܳܐ ܒܰܛܶܠ: ܘܦܶܨܚܳܐ ܕܦܰܓܪܶܗ ܘܰܕܡܶܗ ܠܬܰܠܡܺܝ̈ܕܰܘܗܝ ܐܰܓܥܶܠ: ܬܪܶܝܢ ܟܳܗ̈ܢܶܐ ܠܺܝ̈ܛܶܐ ܚܰܢܳܢ ܘܩܰܝܳܦܳܐ ܐܰܝܟ ܚܰܝܳܒܳܐ ܕܫܳܘܶܐ ܠܡܰܘܬܳܐ ܕܳܢܽܘܗܝ: ܘܡ̣ܶܢ ܬܪܶܝܢ ܗܺܓܡܽܘܢܺܝ̈ܢ ܗܶܪܳܘܕܶܣ ܘܦܺܝܠܰܛܳܘܣ ܐܶܬܒܰܙܰܚ ܘܶܐܬܢܰܓܰܕ. ܬܪܶܝܢ ܓܰܝ̈ܳܣܶܐ ܥܳܒ̈ܕܰܝ ܒܺܝ̈ܫܳܬܳܐ ܠܰܙܩܺܝܦܳܐ ܐܶܬܕܰܒܰܪܘ ܥܰܡܶܗ: ܘܒܰܝܢܳܬ ܬܪܰܝܗܽܘܢ ܐܶܙܕܩܶܦ: ܘܒܰܦܫܳܛܳܐ ܕܬܰܪܬܶܝܢ ܐܺܝܕܰܘ̈ܗܝ ܠܰܬܪܶܝܢ ܫܰܠܺܝ̈ܛܶܐ ܕܚܶܫܽܘܟܳܐ ܐܰܒܗܶܬ: ܬܪܶܝܢ ܡܰܒܽܘ̈ܥܶܐ ܪܕܰܘ ܡ̣ܶܢ ܕܰܦܢܶܗ ܕܡܳܐ ܘܡܰܝ̈ܳܐ: ܕܡܳܐ ܫܰܘܕܰܥ ܕܚܰܝ ܒܰܐܠܳܗܽܘܬܶܗ: ܘܡܰܝ̈ܳܐ ܚܰܘܺܝܘ ܕܰܛܥܶܡ ܡܰܘܬܳܐ ܒܦܰܓܪܳܢܽܘܬܶܗ: ܬܰܪܬܶܝܢ ܢܶܫ̈ܶܐ ܩܰܕܺܝ̈ܫܳܬܳܐ ܡܰܪܝܰܡ ܡܰܓܕܠܳܝܬܳܐ ܘܡܰܪܝܰܡ ܐܶܡܶܗ ܠܘܳܬ ܩܰܒܪܳܐ ܩܰܕܺܝܫܳܐ ܐܶܙܰܠܝ̈: ܘܰܬܪܰܝܳܢܽܘܬ ܚܰܕ̈ܘܳܬܳܐ ܐܶܣܬܰܒܰܪ̈ܝ ܡ̣ܶܢ ܡܰܠܐܟܳܐ ܕܥܰܓܶܠ ܟܺܐܦܳܐ: ܘܡ̣ܶܢ ܡܫܺܝܚܳܐ ܕܡܰܠܶܠ ܥܰܡܗܶܝܢ: ܬܪܶܝܢ ܬܰܠܡܺܝ̈ܕܶܐ ܒܽܐܘܪܚܳܐ ܕܥܶܡܰܐܘܳܣ ܪܕܰܘ: ܘܟܰܕ ܗ̣ܶܢܽܘܢ ܡܡܰܠܠܺܝܢ ܥܰܠ ܚܰܫܶܗ: ܢܩܶܦ ܠܗܽܘܢ ܘܶܐܡܰܪ ܡܳܢܳܐ ܐܶܢܶܝܢ ܗܳܠܶܝܢ ܕܰܡܡܰܠܠܺܝܢ ܐܢ̱ܬܽܘܢ: ܗ̣ܶܢܽܘܢ ܕܶܝܢ ܐܶܡܰܪܘ ܠܶܗ ܢܽܘܟܪܳܝܳܐ ܐܰܢ̱ܬ ܡ̣ܶܢ ܐܽܘܪܫܠܶܡ: ܕܰܠܡܳܐ ܠܐ ܫܡܺܝܥ ܠܳܟ ܡܶܕܶܡ ܕܰܗܘܳܐ ܒܳܗ̇ ܒܗܳܠܶܝܢ ܝܰܘ̈ܡܳܬܳܐ: ܥܰܠ ܝܶܫܽܘܥ: ܓܰܒܪܳܐ ܕܡ̣ܶܢ ܐܠܰܗܳܐ: ܕܟܽܠܶܗ ܥܰܡܳܐ ܣܳܒܰܪ ܗܘܳܐ ܕܗ̣ܽܘ ܦܳܪܶܩ ܠܶܗ ܠܐܝܣܪܳܐܶܝܠ: ܘܰܐܚܕܽܘܗܝ ܪ̈ܰܒܰܝ ܟܳܗ̈ܢܶܐ ܘܰܠܕܺܝܢܳܐ ܕܡܰܘܬܳܐ ܐܰܫܠܡܽܘܗܝ ܘܗܳܐ ܬܠܳܬܳܐ ܝܰܘ̈ܡܺܝܢ ܐܺܝܬ ܠܶܗ ܡ̣ܶܢ ܕܗܳܠܶܝܢ ܟܽܠܗܶܝܢ ܐܶܫܬܰܡ̈ܠܺܝ: ܗ̣ܽܘ ܕܶܝܢ ܡܰܠܶܠ ܠܗܽܘܢ ܟܽܠܡܳܐ ܕܰܐܟܪܶܙܘ ܢܒܺܝ̈ܶܐ ܥܠܰܘܗܝ: ܘܰܕܗܳܠܶܝܢ ܙܳܕܶܩ ܗܘܳܐ ܕܢܶܚܰܫ: ܬܰܪܬܶܝܢ ܙܰܒܢܺܝ̈ܢ ܒܢܳܓܰܗ ܬܪܶܝܢ ܒܫܰܒܳܐ ܥܰܦܶܦ ܫܠܳܡܶܗ ܠܬܰܠܡܺܝ̈ܕܰܘܗܝ ܒܥܶܠܺܝܬܳܐ ܟܰܕ ܐܰܚܺܝܕܺܝܢ ܬܰܪ̈ܥܶܐ ܘܣܽܘܟܪ̈ܶܐ ܡ̣ܶܢ ܕܶܚܠܰܬܗܽܘܢ: ܘܶܐܡܰܪ ܠܗܽܘܢ ܫܠܳܡܳܐ ܥܰܡܟܽܘܢ: ܬܰܪܬܶܝܢ ܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ ܫܰܟܶܢ ܠܗܽܘܢ ܒܗ̇ܰܘ ܪܰܡܫܳܐ: ܡܰܥܡܽܘܕܺܝܬܳܐ ܘܟܳܗܢܽܘܬܳܐ ܒܝܰܕ ܡܰܦܽܘܚܺܝܬܳܐ ܩܰܕܺܝܫܬܳܐ: ܬܪܶܝܢ ܐܳܕܫܺܝ̈ܢ ܐܶܟܰܠ ܒܗܰܘ ܪܰܡܫܳܐ ܠܥܺܝܢ ܟܶܢܫܳܐ ܕܬܰܠܡܺܝ̈ܕܰܘܗܝ ܢܽܘܢܳܐ ܕܰܡܛܰܘܰܝ ܘܟܰܟܳܪܺܝܬܳܐ ܕܕܶܒܫܳܐ ܐܰܝܟܰܢܳܐ ܕܰܢܫܰܪܰܪ ܐܶܢܽܘܢ ܥܰܠ ܩܝܳܡܬܶܗ ܡܰܥܒܕܰܬ݀ ܚܰܝ̈ܶܐ: ܬܰܪܬܶܝܢ ܡܶܠܺܝ̈ܢ ܡܡܰܠܶܠ ܡܳܪܰܢ ܒܡܶܐܬܝܳܐ ܬܪܰܝܳܢܳܐ ܠܥܺܝܢ ܡܰܠܐܟ̈ܶܐ ܘܰܒܢܰܝ̈ܢܳܫܳܐ: ܕܬܰܘ ܒܪ̈ܺܝܟܰܘܗܝ ܕܳܐܒܝ ܝܺܪܰܬܘ ܚܰܝ̈ܶܐ ܠܘܳܬ ܥܳܒ̈ܕܰܝ ܨܶܒܝܳܢ ܡܳܪܽܘܬܶܗ ܪܳܡܶܙ: ܘܥܰܘ̈ܳܠܐ ܙܳܥܶܦ ܠܚܶܫܟܳܐ ܒܰܪܳܝܳܐ: ܬܪܶܝܢ ܓܰܒܺܝ̈ܢ ܠܰܬܪܶܝܢ ܡܢܰܘ̈ܳܬܳܐ ܡܶܬܦܰܪܫܺܝܢ ܛܳܒ̈ܶܐ ܘܒܺܝ̈ܫܶܐ ܠܝܰܡܺܝܢܳܐ ܘܰܠܣܶܡܳܠܐ: ܛܳܒ̈ܶܐ ܠܪܰܘܡܳܐ ܡܶܬܥܰܠܶܝܢ: ܘܒܺܝ̈ܫܶܐ ܠܚܶܫܽܘܟܳܐ ܒܰܪܳܝܳܐ ܡܶܫܬܰܕܪܺܝܢ: ܒܗ̇ܰܘ ܝܰܘܡܳܐ ܡܳܪܝܳܐ ܡܪܰܚܡܳܢܳܐ ܬܶܟܪܶܐ ܠܰܡܪܰܚܡܳܢܽܘܬܳܟ ܥܰܠ ܥܶܪ̈ܒܶܐ ܛܒܺܝ̈ܥܰܝ ܒܰܕܡܳܟ ܝܰܩܺܝܪܳܐ: ܐܶܠܐ ܚܽܘܣ ܥܰܠ ܨܰܠܡܳܐ ܕܺܝܠܳܟ ܚܰܢܳܢܳܐ: ܘܠܐ ܬܶܥܽܘܠ ܠܕܺܝܢܳܐ ܥܰܡ ܥܰܒܕܰܝ̈ܟ: ܐܰܫܘܳܐ ܠܰܢ ܕܟܽܠܰܢ ܢܩܰܒܠܳܟ ܒܰܐܦ̈ܶܐ ܓܰܠܝ̈ܳܬܳܐ ܒܡܶܐܬܺܝܬܳܟ ܕܬܰܪܬܶܝܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܛܪܐ

ܕܶܒܚܳܐ ܡܚܰܣܝܳܢܳܐ: ܘܦܺܝܪܡܳܐ ܡܪܰܥܝܳܢܳܐ ܕܥܰܠ ܪܰܘܡܳܐ ܕܓܳܓܽܘܠܬܳܐ ܐܶܬܩܰܪܰܒ: ܘܚܰܣܺܝ ܥܰܘܠܶܗ ܕܥܳܠܡܳܐ ܒܥܽܘܠܳܝܶܗ ܕܥܰܠ ܩܰܝܣܳܐ: ܐܰܢ̱ܬ ܡܳܪܝ ܩܰܒܶܠ ܒܪܶܚܡܰܬ݀ ܐ̱ܢܳܫܽܘܬܳܟ: ܠܦܺܝܪܡܳܐ ܒܨܺܝܪܳܐ ܕܩܰܪܶܒܢܰܢ ܚܢܰܢ ܥܰܒܕܰܝ̈ܟ ܒܨܺܝܪ̈ܶܐ: ܘܢܶܥܽܘܠ ܠܰܩܕܽܘܫܩܽܘܕ̈ܫܺܝܢ ܕܺܐܝܩܳܪܳܟ: ܘܫܰܕܰܪ ܠܰܢ ܡ̣ܶܢ ܠܘܳܬܳܟ ܚܽܘܣܳܝܳܐ ܘܫܽܘܒܩܳܢܳܐ ܕܚܰܘ̈ܒܰܝܢ ܘܰܚܛܳܗܰܝ̈ܢ: ܘܰܐܢܺܝܚ ܠܥܰܢܺܝ̈ܕܰܝܢ ܒܪܶܚܡܰܬ݀ ܐ̱ܢܳܫܽܘܬܳܟ ܡܳܪܰܢ ܘܰܐܠܳܗܰܢ܀

ܚܘܬܡܐ

ܟܠܺܝ ܡܳܪܝ ܡ̣ܶܢ ܡܰܪܥܺܝܬܳܟ ܠܟܽܠ ܣܶܕ̈ܩܶܐ ܡܕܰܘ̈ܕܳܢܶܐ ܘܠܰܩܪ̈ܳܒܶܐ ܘܬܰܟܬܽܘ̈ܫܶܐ ܘܚܶܪ̈ܝܳܢܶܐ: ܘܰܥܩܽܘܪ ܡ̣ܶܢ ܒܰܝܢܳܬܰܢ ܚܣܳܡܳܐ ܘܰܐܟܬܳܐ ܘܡܶܐܟܰܠܩܰܪܨܳܐ: ܘܗܰܒܠܰܢ ܫܰܝܢܳܐ ܘܰܫܠܳܡܳܐ ܘܚܽܘܒܳܐ ܘܰܐܘܝܽܘܬܳܐ: ܕܢܰܘܕܶܐ ܠܪ̈ܰܚܡܶܐ ܣܰܓܺܝ̈ܶܐܐ ܕܛܰܝܒܽܘܬܳܟ: ܘܰܢܫܰܒܰܚ ܠܝܰܡܳܐ ܕܰܚܢܳܢܳܟ ܒܗܳܢܳܐ ܥܺܐܕܳܐ ܕܰܩܝܳܡܬܳܟ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܒܳܪܽܘܝܳܐ ܘܰܡܬܰܩܢܳܢܳܐ ܕܥܳܠܡ̈ܶܐ ܕܰܒܪܶܡܙܳܐ ܘܦܽܘܩܕܳܢܳܐ ܕܥܳܒܽܘܕܽܘܬܶܗ ܒܪܳܐ ܡ̣ܶܢ ܢܽܘܪܳܐ ܘܪܽܘܚܳܐ ܠܶܓܝܽܘ̈ܢܶܐ ܡܢܰܒܪ̈ܫܳܬܳܐ ܦܣܺܝ̈ܩܰܝ ܡ̣ܶܢ ܓܰܘܙܰܠܬܳܐ: ܠܗ̇ܰܘ ܡܛܰܟܣܳܢܳܐ ܕܥܶܕ̈ܳܢܶܐ ܕܛܰܟܶܣ ܗܘܳܐ ܪܰܡܫܳܐ ܘܨܰܦܪܳܐ ܝܰܘܡܳܐ ܚܰܕ: ܘܰܣܕܰܪ ܬܪܶܝܢ ܢܰܗܺܝܪ̈ܶܐ ܫܶܡܫܳܐ ܘܣܰܗܪܳܐ ܐ̱ܪܳܙ ܐܠܰܗܽܘܬܳܐ ܘܐ̱ܢܳܫܽܘܬܳܐ: ܚܰܕ ܠܫܽܘܠܛܳܢܳܐ ܕܺܐܝܡܳܡܳܐ ܘܰܐ̱ܚܪܺܢܳܐ ܠܫܽܘܠܛܳܢܳܐ ܕܠܺܠܝܳܐ: ܕܠܶܗ ܠܗ̇ܰܘ ܕܛܰܟܶܣ ܐܶܢܽܘܢ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܕܪܐ

ܐܠܰܗ ܐܠܰܗܺܝ̈ܢ ܘܡܰܠܟܳܐ ܕܟܽܠ ܡܰܠܟܺܝ̈ܢ: ܘܫܰܠܺܝܛܳܐ ܕܟܽܠ ܫܰܠܺܝܛܳܢܺܝ̈ܢ ܐܽܘܡܳܢ ܥܳܠܡ̈ܶܐ ܘܰܡܕܰܒܰܪ ܟܽܠ ܣܰܘ̈ܦܺܝܢ: ܘܡܰܢܗܰܪ ܟܽܠ ܚܶܫܽܘ̈ܟܺܝܢ: ܘܰܡܚܰܟܶܡ ܟܽܠ ܗܶܕܝܽܘ̈ܛܺܝܢ ܩܰܕܡܳܝ ܡܶܢܟܽܠ: ܘܡܰܒܥܰܕ ܡܶܢܟܽܠ: ܘܩܰܪܺܝܒ ܘܰܫܟܺܝܚ ܠܟܽܠ: ܘܰܡܨܶܐ ܚܺܝܠ ܟܽܠ: ܘܰܦܫܺܝܩ ܠܶܗ ܟܽܠ: ܘܰܕܠܺܝܠ ܠܪܶܡܙܶܗ ܟܰܣܝܳܐ ܕܰܒܝܰܘܡܳܐ ܩܰܕܡܳܝܳܐ: ܘܰܒܝܰܘܡܳܐ ܬܪܰܝܳܢܳܐ ܒܪܳܐ ܠܰܪܩܺܝܥܳܐ ܒܰܝܬܳܐ ܕܥܳܠܡ̈ܶܐ ܕܰܥܠܰܘܗܝ ܕܰܘܺܝܕ ܡܙܰܡܰܪ ܟܰܕ ܐܳܡܰܪ: ܕܫܰܒܰܚܘ ܫܡ̈ܰܝ ܫܡܰܝ̈ܳܐ ܠܡܳܪܝܳܐ ܘܡܰܝ̈ܳܐ ܕܰܠܥܶܠ ܡ̣ܶܢ ܫܡܰܝ̈ܳܐ. ܘܗ̣ܽܘ ܦܩܰܕ ܘܶܐܬܒܪܺܝܘ: ܘܣܳܡ ܠܗܽܘܢ ܢܳܡܽܘܣܳܐ ܘܠܐ ܥܳܒܰܪ: ܬܪܶܝܢ ܫܰܦܺܝܪ̈ܶܐ ܐܳܕܳܡ ܘܚܰܘܳܐ ܒܦܰܪܕܰܝܣܳܐ ܐܶܬܬܣܺܝܡܘ: ܘܡ̣ܶܢ ܪܰܘܡܳܐ ܡܥܰܠܝܳܐ ܕܺܝܕܰܥܬܳܐ ܐܰܣܛܺܝܘ. ܘܠܐܪܥܳܐ ܟܽܘܒܳܢܳܝܬܳܐ ܘܕܰܪܕܪܳܝܬܳܐ ܐܶܫܬܕܺܝܘ ܒܕܰܫܡܰܥܘ ܠܡܰܠܟ̈ܶܐ ܚܰܪ̈ܡܳܢܳܝܶܐ. ܬܰܪܬܶܝܢ ܙܰܒܢܺܝ̈ܢ ܐܰܥܶܠ ܡܽܘܫܶܐ ܐܺܝܕܶܗ ܠܥܽܘܒܶܗ ܘܰܐܦܩܶܗ: ܒܩܰܕܡܳܝܬܳܐ ܢܶܦܩܰܬ݀ ܟܰܕ ܡܓܰܪܒܳܐ ܘܕܳܡܝܳܐ ܠܬܰܠܓܳܐ: ܘܚܰܘܝܰܬ݀ ܕܰܕܟܰܝ̈ܳܐ ܥܰܠܘ ܒܢ̈ܰܝ ܐܺܝܣܪܳܐܶܝܠ ܠܡܶܨܪܶܝܢ ܘܛܰܡ̈ܶܐܐ ܢܦܰܩܘ: ܘܒܰܬܪܰܝܳܢܺܝܬܳܐ ܐܰܝܟ ܐܶܬܬܰܩܢܰܬ݀ ܕܰܒܦܽܘܪܩܳܢܳܐ ܕܺܝܠܗܽܘܢ: ܬܰܪܬܶܝܢ ܠܽܘ̈ܚܶܐ ܕܣܳܗܕܽܘܬܳܐ ܕܰܟܬܺܝ̈ܒܳܢ ܒܨܶܒܥܳܐ ܕܰܐܠܳܗܳܐ ܢܣܰܒ ܘܰܢܚܶܬ ܠܘܳܬ ܡܰܫܪܺܝܬܳܐ: ܘܟܰܕ ܚܙܳܐ ܕܰܣܓܶܕܘ ܠܒܰܥܠܐ: ܬܰܒܰܪ ܐܶܢܽܘܢ ܒܰܫܦܽܘ̈ܠܰܝ ܛܽܘܪܳܐ ܐ̱ܪܳܙ ܒܽܘܛܳܠ ܥܰܡܳܐ ܩܰܕܡܳܝܳܐ: ܬܰܪܬܶܝܢ ܓܶܝܪ ܙܰܒܢܺܝ̈ܢ ܐܰܣܶܩ ܠܗܽܘܢ ܣܰܠܘܰܝ ܡ̣ܶܢ ܝܰܡܳܐ: ܘܬܰܪܬܶܝܢ ܙܰܒܢܺܝ̈ܢ ܡܚܳܐ ܠܟܺܐܦܳܐ ܒܫܰܒܛܶܗ: ܒܩܰܕܡܳܝܬܳܐ ܡܚܳܗ̇ ܘܠܐ ܐܰܪܕܝܰܬ݀ ܡܰܝ̈ܳܐ ܒܗ̇ܳܝ ܕܶܐܡܰܪ ܕܡ̣ܶܢ ܗܳܕܶܐ ܢܳܒܰܥ ܠܟܽܘܢ ܡܰܝ̈ܐ: ܘܒܰܬܪܰܝܳܢܺܝܬܳܐ ܐܰܪܕܝܰܬ݀ ܢܰܗܪ̈ܰܘܳܬܳܐ ܣܰܓܺܝ̈ܶܐܐ: ܬܪܶܝܢ ܒܢ̈ܰܝ ܥܰܡܪܰܡ ܕܠܐ ܗܰܝܡܶܢܘ ܠܰܡܩܰܕܳܫܽܘ ܠܡܳܪܝܳܐ ܥܰܠ ܟܺܐܦܳܐ: ܠܐ ܐܶܫܬܘܺܝܘ ܕܢܶܥܠܽܘܢ ܠܡܰܫܪܺܝܬܳܐ ܠܐܪܥܳܐ ܕܡܽܘܠܟܳܢܳܐ ܕܶܐܬܝܰܗܒܰܬ݀ ܠܝܽܘܬܪܳܢܳܐ: ܬܪܶܝܢ ܥܶܓܠܺܝ̈ܢ ܕܕܰܗܒܳܐ ܐܰܩܺܝܡ ܝܽܘܪܒܥܰܡ ܒܰܫܟܺܝܡ ܕܢܰܦܢܽܘܢ ܠܥܰܡܶܗ ܡ̣ܶܢ ܣܶܓܕܬܳܐ ܕܰܐܠܳܗܶܗ ܕܺܐܝܣܪܳܐܶܝܠ: ܬܪܶܝܢ ܕܶܝܢ ܣܰܡ̈ܡܳܢܺܝܢ ܢܨܰܠ ܥܰܠ ܡܰܚܘ̈ܳܬܶܗ ܕܪܰܡܝܳܐ. ܚܰܡܪܳܐ ܘܡܶܫܚܳܐ ܕܺܐܝܬܰܝܗܽܘܢ ܦܰܓܪܶܗ ܘܰܕܡܶܗ ܕܦܳܪܽܘܩܰܢ: ܬܪܶܝܢ ܙܰܘܥܺܝ̈ܢ ܐܰܩܢܺܝ ܠܨܳܠܽܘܒܬܳܐ ܚܰܕ ܒܡܶܐܬܺܝܬܳܐ ܕܰܡܓܽܘ̈ܫܶܐ: ܘܰܐ̱ܚܪܺܢܳܐ ܒܡܰܥܠܳܗ̇ ܕܰܠܘܳܬܳܗ̇ ܒܙܰܘܚܳܐ ܕܝܰܠܽܘ̈ܕܶܐ: ܬܰܪܬܶܝܢ ܙܰܒܢܺܝ̈ܢ ܐܰܦܩܳܗ̇ ܡ̣ܶܢ ܗܰܝܟܠܐ ܘܛܰܪܕܳܗ̇ ܡ̣ܶܢ ܒܰܝܬܶܗ ܬܪܶܝܢ ܨܰܥܪ̈ܺܝܢ ܣܒܰܠ ܒܒܶܝܬ ܚܰܢܳܢ: ܦܰܟܳܐ ܡ̣ܶܢ ܥܰܒܕܳܐ: ܘܰܐܣܽܘܪܝܳܐ ܕܺܐܝ̈ܕܰܝܳܐ ܘܰܬܪܶܝܢ ܢܶܓ̈ܕܶܐ ܡ̣ܶܢ ܦܺܝܠܰܛܳܘܣ ܗܺܓܡܽܘܢܳܐ ܡܰܚܘ̈ܳܬܳܐ ܕܒܰܦܪ̈ܳܓܶܠܐ ܘܰܐ̱ܚܪܺܬܳܐ ܡܰܫܠܡܳܢܽܘܬܳܐ ܕܰܠܩܶܛܠܐ. ܬܪܶܝܢ ܓܰܒܺܝ̈ܢ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ ܕܰܪܓܺܝܙܺܝܢ ܗܘܰܘ ܥܰܡ ܚܕ̈ܳܕܶܐ ܠܨܶܝܕ ܩܰܒܪܳܐ ܡܳܪܳܢܳܝܳܐ ܐܶܬܘܰܥܰܕܘ ܘܫܰܝܢܳܐ ܥܰܡ ܚܕ̈ܳܕܶܐ ܥܒܰܕܘ: ܬܰܪܬܶܝܢ ܙܰܒܢܺܝ̈ܢ ܚܙܳܬܶܗ ܡܰܪܝܰܡ ܒܬܽܘܠܬܳܐ ܠܺܝܚܺܝܕܳܝܳܗ̇ ܒܝܰܘܡܳܐ ܕܢܽܘܚܳܡܶܗ ܒܪܰܡܫܳܐ ܥܰܡ ܡܰܓܕܠܳܝܬܳܐ ܘܰܒܨܰܦܪܳܐ ܥܰܡ ܢܶܫ̈ܶܐ ܩܰܕܺܝ̈ܫܳܬܳܐ ܟܰܕ ܕܢܰܚ ܫܶܡܫܳܐ: ܬܪܶܝܢ ܬܰܠܡܺܝ̈ܕܶܐ ܫܰܪܺܝܪ̈ܶܐ ܫܶܡܥܽܘܢ ܘܝܽܘܚܰܢܳܢ ܒܚܰܕܘܰܬ݀ ܠܶܒܳܐ ܠܩܰܒܪܳܐ ܩܰܕܺܝܫܳܐ ܪܗܶܛܘ ܘܰܬܪ̈ܰܝܗܽܘܢ ܠܒܶܝܬ ܩܒܽܘܪܳܐ ܥܰܠܘ: ܘܰܠܟܶܬܳܢ̈ܶܐ ܘܣܽܘܕܳܪܳܐ ܕܣܺܝܡ ܟܽܠܚܰܕ ܠܰܣܛܰܪ ܚܙܰܘ ܘܗܰܝܡܶܢܘ ܗ̣ܽܘ. ܬܪܶܝܢ ܡܰܠܐܟ̈ܶܐ ܒܰܠܒܽܘ̈ܫܶܐ ܚܶܘܳܪ̈ܶܐ ܕܝܳܬܒܺܝܢ ܚܕܳܪ̈ܰܝ ܩܰܒܪܳܐ ܚܙܳܬ ܡܰܪܝܰܡ ܡܰܓܕܠܳܝܬܳܐ ܟܰܕ ܒܳܟ̇ܝܳܐ: ܬܪܶܝܢ ܓܰܒܺܝ̈ܢ ܝܽܘ̈ܕܳܝܶܐ ܘܪ̈ܽܘܡܳܝܶܐ ܢܳܛܪܺܝܢ ܗܘܰܘ ܠܩܰܒܪܳܐ ܘܰܚܙܰܘ ܬܪ̈ܰܝܗܽܘܢ ܩܰܒܶܠܘ ܫܽܘܚܕܳܐ ܘܕܰܓܶܠܘ ܠܰܩܝܳܡܬܳܐ. ܬܪܶܝܢ ܡܣܰܒܪ̈ܳܢܶܐ ܐܶܬܢܰܗܰܪܘ ܒܰܩܨܳܝܬܳܐ ܬܪܰܝܳܢܺܝܬܳܐ ܕܠܰܚܡܳܐ ܘܰܠܟܽܠܶܗ ܚܰܫܳܐ ܕܰܥܛܺܝܦܺܝܢ ܗܘܰܘ: ܒܳܗ̇ ܛܰܠܶܩ ܘܰܡܠܐܴ ܠܶܒܗܽܘܢ ܚܰܕܽܘܬܳܐ ܘܰܕܝܳܨܳܐ: ܘܰܠܬܰܪܬܶܝܢ ܓܽܘ̈ܕܶܐ ܕܢܶܫ̈ܶܐ ܘܰܕܬܰܠܡܺܝ̈ܕܶܐ ܗܦܰܟܘ ܘܣܰܒܰܪܘ ܢܽܘܚܳܡܳܐ: ܬܰܪܬܶܝܢ ܓܽܘ̈ܕܺܝܢ ܕܰܫܠܺܝ̈ܚܶܐ ܘܰܡܣܰܒܪ̈ܳܢܶܐ ܠܥܶܠܺܝܬܳܐ ܐܶܬܟܰܢܰܫܘ: ܘܒܰܫܠܳܡܶܗ ܬܶܢܝܳܢܽܘܬ ܚܕܺܝܘ ܘܶܐܬܦܨܰܚܘ ܘܰܠܛܰܒ̈ܥܶܐ ܒܬܽܘܠܳܝ̈ܶܐ ܘܰܚܬܳܡ̈ܶܐ ܕܩܶܣܛܽܘܢܳܪ̈ܶܐ ܫܰܪܰܪ: ܘܰܠܥܶܠܺܝܬܳܐ ܟܰܕ ܐܰܚܺܝܕܺܝܢ ܬܰܪ̈ܥܶܐ ܥܰܠ ܘܬܰܪܬܶܝܢ ܣܺܝ̈ܡܳܬܳܐ ܫܰܟܶܢ ܠܗܽܘܢ ܡܰܥܡܽܘܕܺܝܬܳܐ ܘܟܳܗܢܽܘܬܳܐ ܘܰܒܝܰܕ ܡܰܦܽܘܚܺܝܬܳܐ ܠܓܽܘܕܳܐ ܕܰܫܠܺܝ̈ܚܶܐ ܘܰܡܣܰܒܪ̈ܳܢܶܐ ܐܰܓܥܶܠ: ܬܰܪܬܶܝܢ ܙܰܒܢܺܝ̈ܢ ܫܡܰܥܘ ܬܰܠܡܺܝ̈ܕܶܐ ܡ̣ܶܢ ܪܰܒܗܽܘܢ ܟܰܕ ܐܳܡܰܪ ܠܗܽܘܢ ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܰܝ ܘܰܠܟܽܠܶܗ ܚܰܫܳܐ ܘܥܳܩܬܳܐ ܡ̣ܶܢ ܪܶܥܝܳܢܗܽܘܢ ܛܪܰܕ: ܘܒܰܫܠܳܡܳܐ ܕܫܰܟܶܢ ܠܗܽܘܢ ܫܰܝܶܢ ܬܰܪ̈ܥܝܳܬܗܽܘܢ: ܘܥܰܠ ܕܒܰܫܠܳܡܳܐ ܕܪܺܝܫܳܐ ܗܘܳܬ݀ ܐܽܘܪܚܶܗ: ܫܠܳܡܳܐ ܝܰܗܒ ܠܗܽܘܢ ܘܒܰܫܠܳܡܳܐ ܒܢܶܫ̈ܶܐ ܩܰܕܺܝ̈ܫܳܬܳܐ ܦܓܰܥ: ܘܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܟܰܗܺܝܢܳܐ. ܘܰܡܫܰܝܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܕܰܒܩܶܛܠܶܗ ܫܰܝܶܢ ܠܰܪ̈ܓܺܝܙܶܐ ܘܒܰܩܝܳܡܬܶܗ ܐܠܰܘܶܬ ܠܰܦܠܺܝ̈ܓܶܐ ܘܰܐܘܺܝ ܠܣܳܕܽܘ̈ܩܶܐ: ܠܳܟ ܡܦܺܝܣܺܝܢܰܢ ܡܳܪܝܳܐ ܡܪܰܚܡܳܢܳܐ ܒܝܰܘܡܳܐ ܗܳܢܳܐ ܕܰܫܠܳܡܳܐ ܘܫܰܝܢܳܐ ܠܬܰܠܡܺܝ̈ܕܶܐ ܕܺܝܠܳܟ  ܫܰܟܶܢܬ: ܘܰܠܕܶܚܠܬܳܐ ܕܝܽܘ̈ܕܳܝܶܐ ܡ̣ܶܢ ܠܶܒܗܽܘܢ ܐܰܥܒܰܪܬ: ܘܬܰܪܥܺܝܬܗܽܘܢ ܕܰܫܓܺܝܫܳܐ ܗܘܳܬ݀ ܫܰܝܶܢܬ: ܐܰܝܟܰܢܳܐ ܕܬܶܬܶܠ ܠܰܢ ܡ̣ܶܢ ܒܶܝܬ ܓܰܙܳܟ ܫܰܝܢܳܐ ܘܰܫܠܳܡܳܐ: ܘܚܽܘܒܳܐ ܘܰܐܘܝܽܘܬܳܐ: ܘܗܰܝܡܳܢܽܘܬܳܐ ܡܫܰܪܰܪܬܳܐ ܘܠܐ ܣܕܺܝܩܬܳܐ: ܘܫܰܟܶܢ ܠܰܢ ܚܽܘܣܳܝ ܚܰܘ̈ܒܶܐ ܘܰܚܛܳܗ̈ܶܐ: ܘܰܥܛܳܝܳܐ ܕܟܽܠܗܶܝܢ ܣܰܟܠܘ̈ܳܬܰܢ ܘܰܡܫܰܪܬܰܚ ܐܰܢ̱ܬ ܡܰܥܨܪ̈ܳܬܰܢ ܘܩܰܢܳܝ̈ܘܳܬܰܢ. ܘܗܰܒ ܠܰܢ ܕܰܠܬܰܪܬܶܝܢ ܡܢܰܘ̈ܳܬܳܐ ܕܢܰܦܫܳܐ ܘܰܕܦܰܓܪܳܐ ܢܩܰܕܶܫ: ܘܥܰܡ ܬܰܠܡܺܝ̈ܕܶܐ ܢܶܪܗܰܛ ܠܩܰܒܪܳܟ: ܘܥܰܡ ܫܠܺܝ̈ܚܶܐ ܘܰܡܣܰܒܪ̈ܳܢܶܐ ܢܰܓܥܶܠ ܠܰܢ ܟܰܟܪ̈ܶܐ ܕܠܐ ܒܶܗܬܬܳܐ: ܐܰܝܟܰܢܳܐ ܕܰܚܢܰܢ ܘܥܰܢܺܝ̈ܕܰܝܢ ܒܦܶܣܳܐ ܥܰܡܗܽܘܢ ܢܶܬܚܰܠܰܛ ܘܰܠܩܳܠ ܐܠܰܗܽܘܬܳܟ ܡܚܰܕܝܳܢܺܝܬܳܐ ܢܶܫܡܰܥ. ܘܡ̣ܶܢ ܩܳܠܐ ܡܰܪܺܝܪܳܐ ܢܶܬܦܰܨܶܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

ܫܠܡ ܕܝܘܡ ܬܪܝܢ

 

ܛܟܣܐ ܕܚܕ ܒܫܒܐ ܩܕܡܝܐ ܕܦܢܛܝܩܘܣܛܝ

ܩܕܡܝܬ ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܕܰܟܝܳܐܝܬ ܘܩܰܕܺܝܫܳܐܝܬ ܢܙܰܡܰܪ ܠܳܟ ܬܶܫܒ̈ܚܳܬܳܐ ܪ̈ܽܘܚܳܢܳܝܬܳܐ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܥܺܐܕܳܐ ܕܡܰܚܰܬܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܕܰܫܪܳܐ ܘܰܐܓܶܢ ܥܰܠ ܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܘܰܐܚܶܡ ܐܶܢܽܘܢ ܒܰܕܡܽܘܬ ܢܽܘܪܳܐ ܘܚܰܟܶܡ ܐܶܢܽܘܢ ܘܢܰܗܰܪ ܐܶܢܽܘܢ ܒܟܽܠܗܶܝܢ ܐܠܰܗܳܝ̈ܳܬܳܐ: ܐܰܢ̱ܬ ܡܳܪܝܳܐ ܪܳܚܶܡܢܳܫܳܐ ܚܰܟܶܡ   ܘܰܐܢܗܰܪ ܠܰܢ ܒܡܰܘ̈ܗܒܳܬܳܐ ܐܠܰܗܳܝ̈ܳܬܳܐ ܘܰܒܠܶܫ̈ܳܢܶܐ ܚܰܕ̈ܬܶܐ ܘܰܕܟܰܝ̈ܳܐ ܢܰܣܶܩ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܪܡܫܐ

ܬܶܫܒܽܘܚܳܬܐ ܠܰܚܕܳܐ ܐܠܰܗܽܘܬܳܐ ܡܥܰܠܰܝܬܳܐ ܕܒܰܠܚܽܘܕܳܝܽܘܬܳܐ ܕܪܺܝܫܳܢܽܘܬܳܐ ܪ̈ܺܝܫܝܳܬܳܐ ܡܶܬܝܰܕܥܳܐ ܘܒܰܬܠܺܝܬܳܝܽܘܬ ܩܢܽܘ̈ܡܶܐ ܩܰܕܺܝ̈ܫܶܐ ܡܶܣܬܰܓܕܳܐ: ܐܰܒܳܐ ܛܳܒܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ ܟܰܕ ܠܐܴ ܚܳܣܰܪ: ܒܰܪ ܛܽܘܒܬܳܢܳܐ ܕܶܐܫܬܰܘܬܰܦ ܠܰܟܝܳܢܰܢ ܘܰܦܪܰܩ ܠܰܢ ܟܰܕ ܠܐܴ  ܣܒܰܠ ܒܽܘܨܳܪܳܐ: ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ ܕܰܢܚܶܬ ܘܫܰܟܶܢ ܠܰܢ ܫܽܘ̈ܟܳܢܶܐ ܘܡܰܘܗ̈ܒܳܬܳܐ ܡܦܰܬܟ̈ܳܬܳܐ: ܟܰܕ ܒܶܗ ܦܽܘܠܳܓܳܐ ܠܐܴ ܓܳܫܶܦ ܬܠܳܬܳܐ ܩܢܽܘ̈ܡܶܐ ܡܶܫܬܰܒܰܚ ܐܰܢ̱ܬ: ܘܰܬܠܳܬܳܐ ܚܰܕ ܠܐܴ ܡܶܬܦܰܠܓܳܢܳܐܝ̣ܬ ܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܚܰܕ ܐܠܰܗܳܐ ܫܰܪܺܝܪܳܐ ܕܰܠܥܶܠ ܡ̣ܶܢ ܡܰܕܪܟܳܢܽܘܬܳܐ ܕܰܒܪ̈ܰܝܳܐ ܘܰܥܒܺܝ̈ܕܶܐ ܡܥܰܠܰܝ ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܟܰܕ ܨܒܰܝܬ ܕܬܶܬܥܰܠܐܷ ܒܫܽܘܒܚܳܐ ܠܘܳܬ ܐܰܒܽܘܟ ܠܐܱܝܟܳܐ ܕܡ̣ܶܢ ܬܰܡܳܢ ܠܐܴ ܫܰܢܺܝܬ: ܐܰܪܺܝܡܬ ܐܻܝܕܰܝ̈ܟ ܩܰܕܺܝ̈ܫܳܬܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ: ܘܰܡܠܰܝܬ ܐܶܢܽܘܢ ܒܽܘܪ̈ܟܳܬܳܐ ܘܒܰܪܶܟܬ ܐܶܢܽܘܢ: ܘܦܰܩܶܕܬ ܐܶܢܽܘܢ ܕܰܢܣܰܟܽܘܢ ܠܫܽܘܘܕܳܝܶܗ ܕܰܐܒܳܐ ܗ̇ܰܘ ܕܝܰܘܡܳܢ ܚܰܘܺܝ ܡܶܐܬܺܝܬܶܗ ܪܽܘܚܳܐ ܦܰܪܰܩܠܺܝܛܳܐ: ܗ̇ܰܘ ܕܰܢܚܶܬ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܘܰܡܠܐܴ ܐܶܢܽܘܢ ܫܽܘ̈ܟܳܢܶܐ ܬܡܺܝ̈ܗܶܐ: ܪܽܘܚܳܐ ܩܰܕܺܝܫܳܐ ܕܶܝܢ ܒܩܳܠܐܴ: ܢܽܘܪܳܐ ܒܰܚܙܳܬܳܐ: ܒܰܪ̈ܳܝܶܐ ܕܡܶܬܟܰܢܫܺܝܢ ܓܰܘܳܝ̈ܶܐ ܕܡܶܬܢܰܗܪܺܝܢ ܗܶܕܝܽܘ̈ܛܐ ܕܝܳܠܦܺܝܢ ܣܶܦܪ̈ܶܐ: ܨܰܝܳܕ̈ܶܐ ܕܢܽܘ̈ܢܶܐ ܕܚܶܟܡܬܳܐ ܐܠܰܗܳܝܬܳܐ ܡܶܬܡܠܶܝܢ: ܒܽܘܪ̈ܶܐ ܘܰܦܫܺܝ̈ܛܶܐ ܕܒܺܝܕܰܥܬܳܐ ܕܪܽܘܚܳܐ ܡܰܨܡܚܺܝܢ: ܦܽܘܠܳܓܳܐ ܕܠܶܫ̈ܳܢܶܐ ܕܰܠܗܽܘܢ ܡܶܫܬܰܟܢܺܝܢ: ܚܰܝ̈ܠܐܷ ܘܳܐܣܘ̈ܳܬܳܐ ܕܒܺܐܝ̈ܕܰܝܗܽܘܢ ܕܰܡܚܰܝ̈ܛܰܝ ܡܨܺܝ̣̈ܕܳܬܳܐ ܕܰܒܠܶܫ̈ܳܢܶܐ ܕܥܰܡ̈ܡܶܐ ܐܶܬܚܰܟܰܡܘ: ܘܥܰܛܠܰܝ̈ ܡܰܡܠܠܐܴ ܕܰܒܟܳܪܽܘܙܽܘܬܳܐ ܕܳܪܫܺܝܢ: ܡܚܺܝ̈ܠܰܝ ܢܽܘܗܪܳܐ ܕܰܒܙܰܠܓ̈ܰܝ ܪܽܘܚܳܐ ܩܰܕܺܝܫܳܐ ܡܰܙܠܓܺܝܢ: ܓܡܺܝܪ̈ܶܐ ܕܰܒܗܰܝܡܳܢܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ ܡܰܘܕܶܝܢ ܗܘܰܘ: ܥܰܓܪ̈ܰܝ ܠܶܫܳܢ̈ܶܐ ܕܪܽܘܚܳܐ ܩܰܕܺܝܫܳܐ ܦܬܰܚ ܡܰܕܥܰܝ̈ܗܽܘܢ ܨܰܝ̈ܳܕܶܐ ܕܢܽܘ̈ܢܶܐ ܕܪܽܘܚܳܐ ܩܰܕܺܝܫܳܐ ܨܰܝ̈ܳܕܶܐ ܕܰܒܢܰܝ̈ܢܳܫܳܐ ܥܒܰܕ ܐܶܢܽܘܢ: ܒܨܺܝܪ̈ܰܝ ܒܓܶܢܣܳܐ ܕܰܒܪܽܘܚܳܐ ܩܰܕܺܝܫܳܐ ܐܶܬܚܰܝܰܠܘ ܗܘܰܘ: ܗ̇ܰܘ ܕܳܐܦ ܚܢܰܢ ܟܰܕ ܕܽܘܡܳܪܳܐ ܡܶܬܡܠܶܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܕܫܰܪܺܝܪܳܐܝ̣ܬ ܕܶܝܢ ܐܶܬܚܙܺܝ ܐܠܰܗܳܐ ܥܰܠ ܐܰܪܥܳܐ: ܘܰܒܝܰܕ ܪܽܘܚܳܦܶܗ ܩܰܕܺܝܫܳܐ ܚܰܬܶܡ ܐܶܢܽܘܢ ܠܰܫܠܺܝ̈ܚܰܘܗܝ ܘܓܰܡܰܪ ܐܶܢܽܘܢ: ܘܨܰܒܶܬ ܐܶܢܽܘܢ ܒܫܽܘ̈ܟܳܢܰܘܗܝ: ܗܰܕܺܝ ܐܶܢܽܘܢ ܒܽܐܘܪ̈ܚܳܬܶܗ: ܘܬܰܪܶܨ ܐܶܢܽܘܢ ܒܰܫܒܺܝ̈ܠܰܘܗܝ: ܝܰܘܡܳܢܳܐ ܐܶܫܬܰܪܝܰܬ݀ ܐܶܦܽܘܦܰܐܣܺܝܣ ܗ̇ܳܝ ܕܠܐܴ ܬܶܥܡܰܪܝ ܪܽܘܚܝ ܒܐܢܳܫܳܐ ܠܥܳܠܰܡ ܡ̣ܶܢ ܐܰܒܳܐ ܐܶܬܰܐܡܪܰܬ݀ ܗܘܳܬ݀: ܝܰܘܡܳܢܳܐ ܒܠܶܫܳܢ̈ܶܐ ܕܢܽܘܪܳܐ ܪܽܘܚܳܐ ܩܰܕܺܝܫܳܐ ܐܶܬܚܙܺܝ: ܘܰܠܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ ܐܰܫܠ̣ܶܡ ܐܶܢܽܘܢ ܘܰܠܟܽܘ̈ܒܶܐ ܕܰܥܒܳܪ ܦܽܘܩܕܳܢܳܐ ܛܰܠܶܩ ܡ̣ܶܢ ܟܽܠܶܗ ܥܳܠܡܳܐ: ܝܰܘܡܳܢܳܐ ܓܶܠܝܳܢܳܐ ܕܪܽܘܚܳܐ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܐܶܬܚܰܘܺܝ: ܘܚܰܟܶܡ ܡܰܕܥܰܝ̈ܗܽܘܢ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܕܢܰܚ ܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܶܐ ܒܓܰܘ ܥܶܠܺܝܬܳܐ ܘܰܐܩܶܠ ܡܶܢܗܽܘܢ ܠܢܽܘܬܳܥܳܐ ܗ̇ܰܘ ܩܰܕܡܳܝܳܐ: ܝܰܘܡܳܢܰܐ ܗ̇ܰܘ ܕܒܰܢܒܺܝ̈ܶܐ ܡܰܠܶܠ ܘܠܰܫܠܺܝ̈ܚܶܐ ܡ̇ܰܢ ܫܰܪܺܝܪܳܐܝ̣ܬ ܕܰܢܡܰܠܠܽܘܢ ܒܠܶܫܳܢ ܠܶܫܳܢ ܐܠܰܦ ܘܫܰܪܰܪ ܓܰܠܝܳܐܝ̣ܬ: ܝܰܘܡܳܢܳܐ ܘܳܝܳܐ ܘܒܶܗܬܬܳܐ ܐܶܬܥܰܛܰܦ ܝܽܘܕܳܐ ܣܟܰܪܝܽܘܛܳܐ: ܟܰܕ ܚܙܳܐ ܠܰܫܠܺܝ̈ܚܶܐ ܚܰܒܪ̈ܰܘܗܝ ܗܳܢܽܘܢ ܕܰܒܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܐܶܬܢܰܗܰܪܘ: ܘܐ̱ܪ̈ܳܙܶܐ ܐܠܰܗܳܝ̈ܶܐ ܠܗܽܘܢ ܐܶܫܬܰܟܰܢܘ: ܝܰܘܡܳܢܳܐ ܙܳܚ ܘܰܢܚܶܬ ܪܽܘܚܳܐ ܩܰܕܺܝܫܳܐ ܘܦܰܪܰܩܠܺܝܛܳܐ ܥܰܠ ܟܶܢܫܳܐ ܕܬܰܠܡܺܝ̈ܕܶܐ: ܣܰܬܶܬ ܪܶܥܝܳܢܗܽܘܢ ܒܗܰܝܡܳܢܽܘܬܳܐ ܫܰܪܺܝܪܬܳܐ: ܝܰܘܡܳܢܳܐ ܚܰܕܽܘܬܳܐ ܐܶܬܡܠܺܝܘ ܫܠܺܝܚ̈ܶܐ ܟܡܺܝܪ̈ܶܐ ܒܡܶܐܬܺܝܬܶܗ ܕܪܘܚܳܐ ܩܰܕܺܝܫܳܐ ܡܒܰܝܳܐܢܳܐ: ܝܰܘܡܳܢܳܐ ܛܳܣ ܘܰܢܚܶܬ ܪܽܘܚܳܐ ܩܰܕܺܝܫܳܐ ܠܥܶܠܺܝܬܳܐ ܘܦܰܠܶܓ ܬܰܡܳܢ ܡܰܘܗ̈ܒܳܬܳܐ ܬܡܺܝ̈ܗܳܬܳܐ ܠܰܒ̈ܢܰܝ ܐ̱ܪܳܙܶܗ: ܝܰܘܡܳܢܳܐ ܝܰܒܶܒܘ ܒܠܶܥ̈ܙܶܐ ܚܠܰܝ̈ܳܐ ܓܠܺܝܠܳܝ̈ܶܐ ܕܶܐܬܥܰܛܰܦ ܫܽܘܟܳܢ̈ܶܐ ܕܪܽܘܚܳܐ: ܐܶܬܡܠܺܝܘ ܚܣܳܡܳܐ: ܘܶܐܡܰܪܘ ܕܗܳܠܶܝܢ ܡܶܐܪܺܝܬܳܐ ܐܶܫܬܺܝܘ ܘܰܪܘܺܝܘ ܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܠܝܽܘܕܳܝ̈ܶܐ ܟܰܪܝܽܘܬܳܐ ܘܰܠܣܳܛܳܢܳܐ ܒܶܗܬܬܳܐ: ܒܰܐܪ̈ܙܶܐ ܬܪܶܥܣܰܪ ܕܰܫܘܰܚܘ ܡ̣ܶܢ ܥܶܠܺܝܬܳܐ: ܝܰܘܡܳܢܳܐ ܡ̣ܶܢ ܪܰܘܡܳܐ ܪܽܘܚܳܐ ܩܰܕܺܝܫܐ ܐܰܙܠܶܓ ܥܰܠ ܬܰܠܡܺܝ̈ܕܶܐ ܘܰܪܕܰܦ ܠܚܶܫܟܳܐ ܡܶܢܗܽܘܢ ܘܰܛܪܰܕ ܠܦܽܘܠܳܓ̈ܶܐ ܡ̣ܶܢ ܠܶܒܰܘ̈ܳܬܗܽܘܢ: ܝܰܘܡܳܢܳܐ ܢܰܗܺܝܪܳܐܝ̣ܬ ܐܶܬܚܰܟܰܡܘ ܫܠܺܝ̈ܚܶܐ ܩܰܕܺܝ̈ܫܶܐ ܒܪܽܘܚܳܐ ܩܰܕܺܝܫܳܐ ܘܰܐܒܗܶܬܘ ܠܣ̇ܳܦܪ̈ܶܐ ܘܰܦܪ̈ܺܝܫܶܐ ܕܥܰܡܳܐ ܕܝܽܘܕ̈ܳܝܶܐ: ܝܰܘܡܳܢܳܐ ܣܶܦܪ̈ܶܐ ܕܚܶܟܡܬܳܐ ܐܠܰܗܳܝܬܳܐ ܠܰܫܠܺܝ̈ܚܶܐ ܐܶܬܺܝܗܶܒܘ ܘܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܥܳܠܡܳܐ ܐܰܟܪܙܶܘ ܗܘܰܘ: ܝܰܘܡܳܢܳܐ ܥܶܠܺܝܬܳܐ ܕܒܽܐܘܪܫܠܶܡ ܒܳܒܶܝܠ ܕܬܰܪܬܶܝܢ ܗܘܳܬ݀: ܠܰܘ ܒܰܡܣܳܡ ܒܪܺܝܫܳܐ ܐܠܐܴ ܒܦܽܘ̈ܠܳܓܶܐ ܕܠܶܫܳܢ̈ܶܐ ܒܝܰܕ ܪܽܘܚܳܐ ܩܰܕܺܝܫܳܐ: ܝܰܘܡܳܢܳܐ ܦܳܪܽܘܩܰܢ ܢܰܨܒܳܗ̇ ܠܨܶܗܝܽܘܢ ܫܰܪܺܝܪܬܳܐ ܥܺܕܬܳܐ ܩܰܕܺܝܫܬܳܐ: ܚܠܳܦ ܟܰܪܡܳܐ ܗ̇ܰܘ ܕܝܰܗܒ ܚܰܪ̈ܽܘܒܶܐ ܨܶܗܝܽܘܢ ܨܳܠܽܘܒܬܳܐ ܝܰܘܡܳܢܳܐ ܨܰܝ̈ܳܕܰܝ ܢܽܘ̈ܢܶܐ ܘܠܐܷܣܦܺܝܪ̈ܶܐ ܐܶܬܚܰܟܰܡܘ ܕܰܢܨܽܘܕܽܘܢ ܐ̱ܢܳܫ̈ܳܐ ܠܚܰܝ̈ܶܐ ܘܢܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ: ܝܰܘܡܳܢܳܐ ܩܰܒܠܰܬ݀ ܐܰܪܥܳܐ ܫܶܩܝܳܐ ܕܚܰܝ̈ܶܐ ܚܠܳܦ ܚܰܡܪܳܐ: ܗ̇ܰܘ ܕܦܰܪܣܺܝ ܗܘܳܐ ܠܢܽܘܚ ܬܡܺܝܢܳܐ: ܝܰܘܡܳܢܳܐ ܪܰܦܶܣܘ ܒܠܶܥ̈ܙܶܐ ܫܰܦܺܝܪ̈ܶܐ ܦܰܪ̈ܽܘܓܶܐ ܕܚܰܕܺܝ ܐܶܢܽܘܢ ܢܶܫܪܶܐ ܫܡܰܝܳܢܳܐ ܒܡܰܘ̈ܡܳܬܶܗ ܢܰܗܺܝܪ̈ܳܬܳܐ: ܝܰܘܡܳܢܳܐ ܫܶܡܥܽܘܢ ܚ̇ܳܕܶܐ: ܘܰܐܢܕܪܶܐܘܳܣ ܘܰܒܢ̈ܰܝ ܙܰܒܕܰܝ ܡܫܰܒܚܺܝܢ: ܘܫܰܪܟܳܐ ܕܰܫܠܺܝ̈ܚܶܐ ܒܚܰܕܽܘܬܳܐ ܘܒܰܪܘܳܙܳܐ ܩܳܝܡܺܝܢ ܟܰܕ ܚܳܙܶܝܢ ܕܗ̇ܰܘ ܡܶܕܶܡ ܕܶܐܫܬܰܘܕܺܝ ܠܗܽܘܢ ܒܪܳܐ ܝܺܚܺܝܕܳܝܳܐ ܟܰܕ ܣܳܠܶܩ ܐܶܫܬܰܡܠܺܝ: ܝܰܘܡܳܢܳܐ ܬܶܗܪܳܐ ܘܕܽܘܡܳܪܳܐ ܘܰܪܘܳܙܳܐ ܐܶܬܡܰܠܝܰܬ݀ ܥܺܕܬܳܐ ܩܰܕܺܝܫܬܳܐ: ܟܰܕ ܬܰܘܕܶܐ ܒܗܰܝܡܳܢܽܘܬܳܐ ܠܗ̇ܰܘ ܕܢܰܨܒܳܗ̇ ܘܗܰܕܪܳܗ̇ ܒܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܘܡܶܟܺܝܠ ܐܳܦ ܚܢܰܢ ܒܫܽܘ̈ܟܳܢܶܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܡܶܬܕܰܡܪܺܝܢܰܢ ܘܳܐܡܪܺܝܢܰܢ: ܕܰܒܪܺܝܟ ܗ̣ܽܘ ܚܰܝܠܐܴ ܕܺܝܠܳܟ ܐܠܰܗܳܐ ܘܪܰܘܪ̈ܒܳܢ ܘܰܫܒܺܝ̈ܚܳܢ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܺܝܠܳܟ ܬܗܺܝܪ̈ܳܬܳܐ ܘܰܫܒܺܝ̈ܚܳܬܳܐ: ܘܫܽܘ̈ܟܳܢܶܐ ܕܺܝܠܳܟ ܐܠܰܗܳܝ̈ܳܐ ܠܥܺܕܬܳܐ ܕܺܝܠܳܟ ܩܰܕܺܝܫܬܳܐ ܝܰܗܒܬ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ: ܘܡܶܬܟܰܫܦܺܝܢܰܢ ܠܳܟ ܕܰܬܨܰܒܶܬ ܠܰܢ ܒܪܽܘܚܳܐ ܩܰܕܺܝܫܳܐ ܘܰܒܚܰܝܠܳܟ ܠܐܴ ܡܶܬܕܰܪܟܳܢܳܐ: ܘܰܗܘܺܝ ܡܳܪܝܳܐ ܫܽܘܪܳܐ ܠܢܰܦ̈ܫܳܬܰܢ: ܘܩܰܕܶܫ ܠܰܢ ܒܩܰܕܺܝܫܽܘܬܳܐ ܕܡܶܢܳܟ: ܘܙܰܗܳܐ ܠܬܰܪ̈ܥܝܳܬܰܢ ܒܡܰܘܗ̈ܒܳܬܳܐ ܕܺܝܠܳܟ ܫܡܰܝܳܢ̈ܳܝܳܬܳܐ: ܘܨܰܠܶܠ ܠܚܽܘ̈ܫܳܒܰܝܢ ܡ̣ܶܢ ܟܽܠܗܽܘܢ ܚܰܫ̈ܶܐ ܘܰܪ̈ܓܺܝܓܳܬܳܐ ܛܰܡ̈ܳܐܬܳܐ: ܘܰܥܒܶܕ ܠܰܢ ܢܰܘ̈ܣܶܐ ܕܟܰܝ̈ܳܐ ܕܚܳܫܚܺܝܢ ܠܰܥܡܽܘܪܝܳܐ ܕܺܝܠܳܟ ܩܰܕܺܝܫܳܐ: ܘܰܐܪܟܶܢ ܪ̈ܰܚܡܰܝܟ ܠܘܳܬܰܢ: ܘܰܐܕܢܰܚ ܢܽܘܗܪܳܐ ܕܺܝܕܰܥܬܳܐ ܒܠܶܒܰܘ̈ܳܬܰܢ ܘܦܰܨܳܐ ܠܰܢ ܡ̣ܶܢ ܚܶܫܽܘܟܳܐ ܘܡ̣ܶܢ ܥܰܡܛܳܢܳܐ: ܐܰܫܘܳܐ ܠܰܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܠܒܽܘܣܳܡܳܐ ܕܰܒܡܰܠܟܽܘܬܳܟ ܫܡܰܝܳܢܺܝܬܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܥܛܪܐ

ܬܠܺܝܬܳܝܽܘܬܳܐ ܩܰܕܺܝܫܬܳܐ ܕܰܠܥܶܠ ܡ̣ܶܢ ܐܽܘܣܺܝ̈ܰܐܣ: ܘܰܠܥܶܠ ܡ̣ܶܢ ܟܽܠ ܪ̈ܺܝܫܳܢܘܳܬܳܐ: ܘܰܡܥܰܠܝܰܬ݀ ܡ̣ܶܢ ܟܽܠ ܐܠܰܗܽܘܬܳܐ: ܠܐܴ ܐܳܕܫܳܢܳܝܬܳܐ ܘܠܐܴ ܟܡܳܢܳܝܬܳܐ ܗ̇ܰܘ ܕܒܰܠܚܽܘܕܳܝܽܘܬ ܐܠܰܗܽܘܬܳܐ: ܘܽܐܘܣܺܝܰܐ ܘܰܟܝܳܢܳܐ: ܘܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܕܰܒܠܐܴ ܝܺܠܺܝܕܽܘܬܳܐ ܘܢܳܦܽܘܩܽܘܬܳܐ ܡܶܬܝܰܩܢܳܐ ܘܡܶܬܝܰܩܪܳܐ ܘܡܶܣܬܰܓܕܳܐ: ܘܰܠܒܰܪ ܡܶܢܳܗ̇ ܘܠܐܴ ܣܳܟ ܡܶܣܬܓܶܕ ܩܰܒܶܠ ܡܶܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܘܰܬܪܽܘܨܝ ܠܰܢ ܠܘܳܬ ܩܰܪܩܰܦܬܳܐ ܗ̇ܳܝ ܛܽܘܒܬܳܢܳܝܬܳܐ: ܠܐܱܝܟܳܐ ܕܐ̱ܪ̈ܳܙܶܐ ܦܫܺܝ̈ܛܶܐ ܘܰܫܪ̈ܳܝܶܐ ܕܠܐܴ ܐܰܣܺܝܪܺܝܢ: ܘܩܰܪܶܒܝ ܠܰܢ ܠܘܳܬ ܢܽܘܗܪܳܐ ܕܺܝܠܳܟ: ܕܢܰܘܕܶܐ ܐܰܡܺܝܢܳܐܝ̣ܬ ܘܢܶܣܓܽܘܕ ܠܐܴ ܡܶܬܦܰܫܩܳܢܳܐܝ̣ܬ ܗܳܫܳܐ܀

ܚܘܬܡܐ

ܗܰܒܠܰܢ ܡܳܪܝܳܐ ܡܳܪܰܢ ܕܰܒܣܰܘ̈ܟܶܐ ܪ̈ܽܘܚܳܢܳܝܶܐ ܘܰܫܡܰܝ̈ܳܢܶܐ: ܘܰܒܝܰܕ ܕܽܘܒܳܪ̈ܶܐ ܛܳܒ̈ܶܐ ܕܟܽܠ ܫܳܥ ܢܶܢܗܰܪ ܒܳܟ: ܘܰܒܬܶܫܒ̈ܚܳܬܳܐ ܦܰܐܝ̈ܳܬܳܐ ܟܽܠ ܢܶܫܦܰܪ ܠܳܟ: ܘܰܡܠܺܝ ܠܰܢ ܡ̣ܶܢ ܪܽܘܚܳܟ ܩܰܕܺܝܫܳܐ ܗ̇ܰܘ ܕܫܰܟܶܢ̣ܬ ܝܰܘܡܳܢܳܐ ܠܰܫܠܺܝ̈ܚܰܝܟ ܓܒܰܝ̈ܳܐ ܘܩܰܕܺܝ̈ܫܶܐ: ܘܰܐܫܘܳܐ ܠܰܢ ܠܰܓܢܽܘܢܳܟ ܗ̇ܰܘ ܕܠܐܴ ܦܳܛܪ̈ܳܢ ܚܰܕ̈ܘܳܬܶܗ: ܘܰܚܢܰܢ ܘܥܰܢܺܝ̈ܕܰܝܢ ܐܳܦ ܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܚܰܕ ܟܝܳܢܳܐ ܐܠܰܗܳܐ ܕܰܐܠܳܗܽܘܬܳܐ ܣܓܺܝܕܬܳܐ ܘܰܡܬܽܘܡܳܝܬܳܐ: ܘܚܰܕ ܡܶܬܺܝܕܰܥ ܘܚܰܕ ܐܻܝܬܰܘܗܝ: ܐܻܝܬܽܘܬܳܐ ܕܠܐܴ ܙܰܒܢ̈ܶܐ: ܟܝܳܢܳܐ ܕܠܐܴ ܚܰܫܳܐ ܝܺܕܰܥܬܳܐ ܕܠܐܴ ܝܽܘܠܦܳܢ: ܚܶܟܡܬܳܐ ܕܩܰܕܺܝܡܳܐ ܠܥܰܒ̈ܕܶܐ: ܐܽܘܣܺܝܰܐ ܕܠܐܴ ܡܶܬܥܰܩܒܳܐ: ܡܬܽܘܡܳܝܽܘܬܳܐ ܕܠܐܴ ܡܶܬܕܰܪܟܳܐ: ܛܶܟܣܳܐ ܢܛܺܝܪܳܐ ܕܠܰܝܬ ܠܶܗ ܩܰܕܡܳܝܽܘܬܳܐ ܘܰܐ̱ܚܪܳܝܽܘܬܳܐ: ܗ̇ܰܘ ܕܶܐܬܡܳܠܝ ܘܝܰܘܡܳܢܳܐ: ܗ̣ܽܘ ܟܰܕ ܗ̣ܽܘ ܘܠܐܴ ܡܶܬܚܒܶܫ: ܘܳܐܦܠܐܴ ܬܗܽܘܡܳܐ ܚܳܒܶܫ ܠܶܗ: ܓܡܺܝܪܳܐ ܕܠܐܴ ܚܳܣܰܪ: ܥܳܒܽܘܕܳܐ ܕܠܐܴ ܠܐܴܐܷ: ܘܠܐܴ ܡܰܠܟܳܐ ܗ̇ܰܘ ܕܡ̣ܶܢ ܐ̱ܚܪܺܝܢ ܘܡܰܠܟܳܐ ܕܡ̣ܶܢ ܥܳܠܰܡ: ܘܠܐܴ ܡ̣ܶܢ ܕܽܘܟ ܩܰܒܶܠ ܫܽܘܠܛܳܢܳܐ ܐܰܘ ܝܳܗܶܒ ܠܐܱܚܪܺܝܢ: ܪܰܚܺܝܩ ܘܩܰܪܺܝܒ ܘܝܳܕܰܥ ܠܕܺܝܠܶܗ: ܘܡܶܬܺܝܕܰܥ ܡ̣ܶܢ ܕܺܝܠܶܗ: ܕܠܶܗ ܝ̇ܳܐܶܐ ܫܽܘܒܚܳܐ܀

ܣܕܪܐ ܕܠܘܬ ܐܒܐ

ܐܠܰܗܳܐ ܐܰܒܳܐ ܕܰܡܥܰܠܰܝ ܥܽܘܡܩܳܐ ܦܰܐܝܳܐ ܕܺܐܝܬܽܘܬܶܗ ܡ̣ܶܢ ܡܰܕܪܟܳܢܽܘܬܳܐ ܘܡܶܬܥܰܩܒܳܢܽܘܬܳܐ ܕܽܐܘܣܺܝ̈ܰܐܣ ܡܶܬܗܰܘ̈ܢܳܢܳܝܳܬܳܐ ܘܰܕܠܐܴ ܓܫܽܘܡ: ܗ̇ܰܘ ܕܰܠܡܶܠܬܳܐ ܕܡܶܢܳܟ: ܘܫܳܘܶܐ ܠܳܟ ܒܽܐܘܣܺܝܰܐ ܐܳܦ ܒܰܡܬܽܘܡܳܝܽܘܬܳܐ ܡ̣ܶܢ ܩܕܳܡ ܕܬܶܗܘܶܐ ܡܶܐܬܺܝܬܶܗ ܦܳܪܽܘܩܳܝܬܳܐ: ܠܡܰܚܰܬܬܳܐ ܕܥܰܠ ܛܽܘܪ ܣܺܝܢܰܝ ܐ̱ܪܳܙܳܢܳܐܝ̣ܬ ܚܰܘܺܝܬ: ܘܟܰܕ ܡܢܺܝܚܳܢܳܐ ܕܺܝܠܳܟ ܡܽܘܫܶܐ ܣܠܶܩ ܠܛܽܘܪܳܐ ܠܰܡܩܰܒܠܳܢܽܘܬܳܐ ܕܠܽܘ̈ܚܶܐ ܟܬܺܝ̈ܒܳܬ݀ ܡ̣ܶܢ ܛܰܝܒܽܘܬܳܐ ܠܥܰܡܳܐ ܐܻܝܣܰܪܠܳܝܳܐ: ܗ̇ܰܘ ܕܰܒܣܰܓܺܝܽܐܘܬܳܐ ܕܪ̈ܰܚܡܰܝܟ ܐܽܘܣܝ̈ܳܝܶܐ ܘܰܫܦܺܝ̈ܥܶܐ ܠܺܝܚܺܝܕܳܝܳܐ ܗ̇ܰܘ ܕܡܶܢܳܟ ܘܨܰܠܡܳܐ ܕܺܐܝܬܽܘܬܳܟ ܫܰܕܰܪܬ ܠܥܳܠܡܳܐ ܡܶܛܽܠ ܦܽܘܪܩܳܢܳܐ ܕܨܰܠܡܳܐ ܕܺܝܠܳܟ ܗ̇ܰܘ ܕܰܢܦܰܠ ܗܘܳܐ ܡܶܢ ܐܺܝܩܳܪܳܐ ܡܰܠܟܳܝܳܐ: ܘܟܰܕ ܠܐܴ ܡܶܬܚܰܙܝܳܢܳܐ ܘܠܐܴ ܡܶܬܕܰܪܟܳܢܳܐ ܐܺܝܬܰܘܗܝ ܗܘܳܐ ܘܡ̣ܶܢ ܠܩܽܘܕܡܺܝܢ ܥܰܡܳܟ ܘܥܰܡ ܪܽܘܚܳܐ ܩܰܕܺܝܫܳܐ ܐܺܝܬܰܘܗܝ ܬܰܚܬܺܝ ܗ̣ܽܘ ܠܶܗ ܠܡܽܘܫ̈ܚܳܬܳܐ ܐ̱ܢܳܫܳܝ̈ܳܬܳܐ ܕܢܰܦܢܶܐ ܠܰܢ ܡ̣ܶܢ ܛܳܥܝܽܘܬܳܐ ܠܣܶܓܕܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܗ̇ܳܝ ܕܰܒܪܽܘܚܳܐ ܘܒܰܫܪܳܪܳܐ ܡܶܣܬܰܓܕܳܐ ܗ̇ܰܘ ܕܟܰܕ ܫܰܡܠܺܝ ܒܰܩܢܽܘܡܶܗ ܐ̱ܪ̈ܳܙܶܐ ܓܢܺܝ̈ܙܶܐ ܕܰܢܒܺܝܽܘܬܳܐ ܓܡܰܪ ܘܫܰܡܠܺܝ ܠܡ̈ܶܠܐܷ ܕܗܳܢܽܘܢ ܕܰܗܘܰܘ ܚܰܙܳܝ̈ܶܐ ܕܺܝܠܶܗ ܕܡܶܠܬܳܐ ܐܠܰܗܳܐ: ܘܟܰܕ ܠܘܳܬ ܣܽܘܠܳܩܳܐ ܕܰܫܡܰܘ̈ܗܝ ܪܳܡܳܐ ܘܡܰܘܬܒܳܐ ܫܰܘܝܳܐ ܥܰܡܳܟ: ܐܰܒܳܐ ܓܢܺܝܙܳܐ ܘܰܡܥܰܠܝܳܐ ܐܶܬܥܰܬܰܕ: ܐܰܣܶܩ ܐܶܢܽܘܢ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܠܘܳܬ ܛܽܘܪܳܐ ܕܙܰܝ̈ܬܶܐ: ܘܒܰܪܶܟ ܘܩܰܕܶܫ ܐܶܢܽܘܢ: ܘܰܒܫܽܘܠܛܳܢܳܐ ܦܐܶܐ ܠܐܱܠܳܗܳܐ ܐܶܡ̣ܰܪ ܠܗܽܘܢ ܫܠܳܡܳܐ ܕܺܝܠܝ ܝܳܗ̇ܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ: ܘܠܰܒܶܒ ܐܶܢܽܘܢ ܡܶܛܽܠ ܡܰܣܩܽܘܬܳܐ ܠܐܴ ܡܫܰܢܝܳܢܳܝܬܳܐ ܕܳܐܦܶܢ ܡܶܣܬܰܠܰܩ ܐ̱ܢܳܐ ܡܶܢܟܽܘܢ ܦܰܓܪܳܢܳܐܝ̣ܬ ܐܶܠܐܴ ܥܰܡܟܽܘܢ ܐ̱ܢܳܐ ܪܽܘܚܳܐܝ̣ܬ ܒܚܰܝ̈ܠܐܷ ܕܪܽܘܚܳܐ ܘܒܰܓܢ̱ܒܰܪ̈ܘܳܬܳܐ: ܘܶܐܢ ܐܶܢܳܐ ܠܐܴ ܐܳܙܶܠ ܐ̱ܢܳܐ ܦܰܪܰܩܠܺܝܛܳܐ ܪܽܘܚܳܐ ܕܰܫܪܳܪܳܐ ܠܐܴ ܐܳܬܶܐ ܠܘܳܬܟܽܘܢ ܘܢܰܐܠܶܦܟܽܘܢ ܫܪܳܪܳܐ ܟܽܠܶܗ ܘܢܶܡܠܶܝܟܽܘܢ ܫܽܘ̈ܟܳܢܶܐ ܕܰܥܬܺܝ̈ܕܳܬܳܐ ܘܰܢܫܰܪܰܪܟܽܘܢ ܒܝܽܘܠܦܳܢܳܐ ܕܪܽܘܚܳܐ ܩܰܕܺܝܫܳܐ: ܘܟܰܕ ܐܰܝܟ ܫܽܘܘܕܳܝܳܐ ܗ̇ܰܘ ܕܶܐܫܬܰܘܕܺܝ ܠܰܫܠܺܝ̈ܚܶܐ ܩܰܕܺܝ̈ܫܶܐ ܕܺܝܠܶܗ ܡܶܛܽܠ ܡܰܐܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ ܗ̇ܰܘ ܕܰܐܓܶܢ ܘܰܫܪܳܐ ܥܠܰܝܗܽܘܢ ܒܥܶܠܺܝܬܐ ܘܰܡܠܐܴ ܐܶܢܽܘܢ ܡ̣ܶܢ ܢܽܘܗܪܳܐ ܦܰܐܝܳܐ ܕܺܝܕܰܥܬܳܐ ܕܺܝܠܶܗ: ܡ̣ܶܢ ܡܰܠܦܳܢܽܘܬܳܐ ܚܰܬܺܝܬܬܳܐ ܕܺܝܠܶܗ ܡܫܰܡܠܳܝܬܳܐ ܘܚܰܟܶܡ ܪ̈ܶܥܝܳܢܶܐ ܕܺܝܠܗܽܘܢ ܒܣܽܘ̈ܟܳܠܐܷ ܡܥܰܠܰܝ̈ܳܐ: ܘܰܐܢܗܰܪ ܡܰܕܥܰܝ̈ܗܽܘܢ ܒܬܶܐܘܳܪܺܝܰܐ ܕܚܶܟܡܬܳܐ ܪܺܝܫܳܝܬܳܐ ܘܗܰܕܺܝ ܐܶܢܽܘܢ ܒܢܽܘܗܪܳܐ ܕܺܝܕܰܥܬܶܗ: ܠܘܳܬ ܟܳܪܽܘܙܽܘܬܳܐ ܕܰܣܒܰܪܬܳܐ ܐܶܘܢܓܶܠܳܝܬܳܐ: ܘܝܰܗܒ ܒܺܐܝܕܰܝ̈ܗܽܘܢ ܩܠܺܝ̈ܕܶܐ ܕܪܰܘܡܳܐ ܘܟܽܠܗܽܘܢ ܥܰܡ̈ܡܶܐ ܕܰܒܣܰܘ̈ܦܶܝܗ̇ ܕܟܽܠܳܗ̇ ܒܪܺܝܬܳܐ: ܘܡܶܛܽܠ ܗܳܕܶܐ ܟܰܕ ܠܝܰܘܡܳܐ ܗܳܢܳܐ ܩܰܕܺܝܫܳܐ ܘܰܡܥܰܠܝܳܐ ܕܦܰܢܛܺܝܩܽܘܣܛܺܝ ܡܥܰܕܥܕܺܝܢܰܢ ܘܠܰܦܪܽܘܬܶܣܡܺܝܰܐ ܐܰܘܟܺܝܬ ܫܽܘܘܕܳܝܳܐ ܕܰܒܪܳܐ ܡܫܺܝܚܳܐ ܒܡܰܕ̈ܥܶܐ ܕܬܰܪ̈ܥܝܳܬܰܢ ܚܳܙܶܝܢܰܢ: ܘܰܠܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܐ ܕܡ̣ܶܢ ܠܘܳܬܳܟ ܐܠܰܗܳܐ ܐܰܒܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܡܶܫܬܰܘܕܥܺܝܢܰܢ: ܘܰܕܡܶܢܳܟ ܐܰܒܳܐ ܡܬܽܘܡܳܝܳܐ ܢܰܦ̇ܶܩ ܘܡ̣ܶܢ ܒܪܳܐ ܐܺܝܬܝܳܝܳܐ ܢܳܣ̇ܶܒ: ܘܰܫܘܶܐ ܒܽܐܘܣܺܝܰܐ ܘܒܰܡܬܽܘܡܳܝܽܘܬܳܐ ܘܒܺܐܝܬܽܘܬܳܐ ܡܗܰܝܡܢܺܝܢܰܢ: ܝܰܘܡܳܢܳܐ ܓܶܝܪ ܠܘܰܥܕܳܐ ܛܶܠܳܢܳܝܳܐ ܕܫܳܒܽܘܥܳܐ ܗ̇ܰܘ ܕܰܒܝܰܕ ܡܽܘܫܶܐ ܐܶܬܝܰܠܰܦ ܡܫܰܡܠܶܝܢܰܢ: ܐܶܠܐܴ ܥܺܐܕܳܐ ܡܶܬܗܰܘܢܳܢܳܐ ܘܶܐܘܢܓܶܠܺܝܰܐ ܗ̇ܰܘ ܕܰܒܝܰܕ ܫܽܘ̈ܟܳܢܶܐ ܦܰܐܝ̈ܳܐ ܕܦܰܪܰܩܠܺܝܛܳܐ ܡܚܰܓܶܝܢܰܢ: ܝܰܘܡܳܢܳܐ ܠܳܘܬ ܡܰܓܕܠܐܴ ܕܰܒܒܰܠܐܱܢܺܝ ܒܳܒܶܠܳܝܬܳܐ ܚܳܙܶܝܢܰܢ ܕܡܶܬܗܓܶܡ: ܐܶܠܐܴ ܡܰܓܕܠܐܴ ܡܶܬܝܰܕܥܳܢܳܐ ܥܺܕܬܳܐ ܩܰܕܺܝܫܬܳܐ ܗ̇ܳܝ ܕܡܶܬܒܰܢܝܳܐ ܒܡܰܚܬܬܳܐ ܕܪܽܘܚܳܐ ܦܰܪܰܩܠܺܝܛܳܐ: ܝܰܘܡܳܐ ܫܠܺܝ̈ܚܶܐ ܩܰܕܺܝ̈ܫܶܐ ܐܶܫܬܰܡܠܺܝܘ ܒܫܽܘ̈ܟܳܢܶܐ ܡܩܰܕ̈ܫܳܢܶܐ ܘܶܐܬܢܰܗܰܪܘ ܡܰܕܥܰܝ̈ܗܽܘܢ ܕܰܢܡܰܠܠܽܘܢ ܒܠܶܫܳܢ̈ܶܐ ܚܰܕ̈ܬܶܐ ܬܶܕܡܪ̈ܳܬܳܐ ܕܰܐܠܳܗܳܐ: ܝܰܘܡܳܢܳܐ ܥܶܠܺܝܬܳܐ ܢܳܗܪܳܐ ܒܢܽܘܗܪܳܐ ܡܰܢܗܪܳܢܳܐ ܕܡ̣ܶܢ ܙܰܗܪ̈ܺܝܪ̈ܶܐ ܐܠܰܗܳܝ̈ܶܐ: ܫܶܕܬܳܐ ܡܶܬܬܰܙܠܓܳܐ ܘܡܶܬܬܰܨܡܚܳܐ ܡܰܐܪ̈ܙܳܢܘܳܬܳܐ ܕܰܣܒܰܪܬܳܐ ܐܠܰܗܳܝܬܳܐ: ܝܰܘܡܳܢܳܐ ܢܚܰܕܽܘܢ ܢܒܺܝ̈ܶܐ ܒܐܪ̈ܳܙܰܝܗܽܘܢ ܕܪܽܘܚܶܗ ܕܡܳܪܝܳܐ ܡܰܠܠܰܬ݀ ܒܓܽܘܕܳܐ ܗ̇ܳܝ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܝܽܘܐܶܝܠ ܢܒܺܝܳܐ ܢܙܺܝܥ ܡܶܢ̈ܰܝ ܩܺܝܬܳܪܶܗ ܕܗܳܐ ܒܢܰܝ̈ܳܐ ܕܰܓܒ̣ܳܐ ܪܽܘܚܳܐ ܩܰܕܺܝܫܳܐ  ܡܶܬܢܰܒܶܝܢ ܗܘܰܘ ܒܪܽܘܚܳܐ ܦܰܪܰܩܠܺܝܛܳܐ: ܝܰܘܡܳܢܳܐ ܢܕܽܘܨ ܐܶܫܰܥܝܳܐ: ܝܰܘܡܳܢܳܐ ܢܶܪܘܰܙ ܐܶܪܰܡܝܳܐ ܕܗܳܐ ܪܽܘܚܳܐ ܩܰܕܺܝܫܳܐ ܗ̇ܰܘ ܕܶܐܥܒܶܕ ܒܗܽܘܢ ܒܕܶܡ̈ܘܳܬܳܐ ܗܳܐ ܢܰܗܺܝܪܳܐܝ̣ܬ ܕܠܐܴ ܬܰܚܦܺܝܬܳܐ ܒܰܫܠܺܝ̈ܚܶܐ ܩܰܕܺܝ̈ܫܶܐ ܕܰܥܠܰܘܗܝ ܡܰܠܶܠܘ: ܓܰܡܰܪ ܠܰܫܠܺܝ̈ܚܶܐ ܒܥܶܠܺܝܬܳܐ: ܝܰܘܡܳܢܳܐ ܡܽܘܫܶܐ ܢܒܺܝܳܐ ܘܫܰܪܟܳܐ ܕܰܢܒܺܝ̈ܶܐ ܚܰܒܪ̈ܰܘܗܝ ܪܳܘܙܺܝܢ ܘܰܦܨܺܝܚܺܝܢ: ܕܪܽܘܚܳܐ ܩܰܕܺܝܫܳܐ ܗ̇ܰܘ ܕܒܰܡ̈ܢܰܘܳܢ ܡܢܰܘ̈ܳܢ ܚܰܘܺܝ ܠܗܽܘܢ ܕܶܡܘ̈ܳܬܶܗ ܕܰܒܪܳܐ ܕܗܳܐ ܓܰܠܝܳܐܝ̣ܬ ܠܟܽܠ ܒܣܰܪ ܫܰܘܕܰܥ ܝܰܘܡܳܢܳܐ ܐ̱ܪܳܙܳܐ ܫܒܺܝܚܳܐ ܕܰܬܠܺܝܬܳܝܽܘܬܳܐ ܡܫܰܒܰܚܬܳܐ ܘܠܐܴ ܡܶܬܕܰܪܟܳܢܺܝܬܳܐ ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ ܐܠܰܗܰܢ ܗ̇ܰܘ ܕܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܘܕܺܝܠܳܝ̈ܳܬܳܐ ܡܶܬܺܝܕܰܥ ܘܒܰܠܚܽܘܕܳܝܽܘܬ ܪܺܝܫܳܢܽܘܬܳܐ ܡܳܪܳܢܳܝܬܳܐ ܡܶܬܬܰܘܕܶܐ: ܐܰܝܟܰܢܳܐ ܕܰܬܫܰܟܶܢ ܠܰܢ ܒܥܺܐܕܳܐ ܗܳܢܳܐ ܩܰܕܺܝܫܳܐ ܡܰܐܓܢܳܢܽܘܬܳܐ ܕܛܰܝܒܽܘܬܳܐ ܘܰܬܚܰܕܶܬ ܬܰܪ̈ܥܝܳܬܳܐ ܘܡܰܕ̈ܥܶܐ ܕܺܝܠܰܢ ܒܚܰܣܝܽܘܬܳܐ ܘܩܰܕܺܝܫܽܘܬܳܐ ܕܺܝܠܳܟ: ܘܰܡܫܰܟܶܢ ܐܰܢ̱ܬ ܠܰܢ ܫܰܝܢܳܐ ܐܰܡܺܝܢܳܐ: ܘܰܫܠܳܡܳܐ ܡܚܰܕܝܳܢܳܐ ܘܙܳܓܰܪ ܐܰܢ̱ܬ ܡܶܢܰܢ ܠܟܽܠ ܡܰܪ̈ܕܘܳܬܳܐ ܘܰܡܫܺܝܡܳܢ̈ܳܝܳܬܳܐ ܕܰܒܝܰܕ ܚܛܳܗܰܝ̈ܢ ܡܶܬܬܰܝ̈ܬܝܳܢ ܥܠܰܝܢ: ܘܟܰܕ ܚܳܕܶܝܢܰܢ ܘܪܳܘܙܺܝܢܰܢ ܒܣܰܒܪܳܐ ܕܡܽܘ̈ܠܟܳܢܰܝܟ ܢܫܰܡܠܐܷ ܠܥܺܐܕܰܝ̈ܟ ܡܳܪ̈ܳܢܳܝܶܐ ܒܩܰܕܺܝܫܽܘܬܳܐ ܘܰܒܕܽܘܒܳܪ̈ܶܐ ܕܰܡܪܰܥܶܝܢ ܠܳܟ: ܘܢܶܫܬܘܶܐ ܟܽܠܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܠܪ̈ܰܚܡܶܐ ܥܰܬܺܝܪ̈ܶܐ ܕܡܶܢܳܟ: ܘܰܚܢܰܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ: ܢܶܚܕܶܐ ܘܰܢܕܽܘܨ ܒܫܽܘܒܚܳܐ ܕܡܰܠܟܽܘܬܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ ܐܰܡܺܝܢܬܳܐ ܘܣܶܓܕܬܳܐ ܪܟܺܝܢܬܳܐ ܘܬܰܘܕܺܝܬܳܐ ܥܦܺܝܦܬܳܐ ܘܗܰܝܡܳܢܽܘܬܳܐ ܬܪܺܝܨܬܳܐ ܢܶܫܬܘܶܐ ܕܰܢܩܰܕܶܫ ܠܗ̇ܰܘ ܫܶܡܫܳܐ ܦܰܐܝܳܐ ܕܙܰܕܺܝܩܽܘܬܳܐ: ܘܨܶܡܚܳܐ ܠܐܴ ܡܶܬܕܰܪܟܳܢܳܐ: ܕܰܐܨܡܰܚ ܙܰܠܺܝ̈ܩܰܘܗܝ ܒܓܰܘ ܥܶܠܺܝܬܳܐ ܘܫܰܪܰܪ ܠܚܽܘ̈ܫܳܒܶܐ ܕܰܬܪܶܥܣܰܪ ܫܠܺܝ̈ܚܶܐ ܕܗܶܕܝܽܘܛܽܘܬܳܐ: ܘܦܰܠܶܓ ܠܶܫܳܢ̈ܶܐ ܠܰܬܪܶܥܣܰܪ ܒܽܘܪ̈ܶܐ ܕܰܡܡܰܠܠܺܝܢ ܒܝܰܕ ܡܠܰܚܡܽܘܬܳܐ ܕܰܢܦܰܚ ܒܗܽܘܢ ܘܩܰܒܶܠ ܪܽܘܚܳܐ ܩܰܕܺܝܫܳܐ ܠܗ̇ܰܘ ܚܰܟܺܝܡܳܐ ܘܛܽܘܒܬܳܢܳܐ ܕܚܰܟܶܡ ܐܶܢܽܘܢ ܠܬܰܠܡܺܝ̈ܕܰܘܗܝ ܘܶܐܡܰܪ ܠܗܽܘܢ ܕܦܽܘܩܘ ܠܐܱܪܒܰܥ ܦܶܢ̈ܝܳܬܳܐ ܘܰܐܟܪܶܙܘ ܘܰܠܥܰܡ̈ܡܶܐ ܗܰܝܡܳܢܽܘܬܳܐ ܕܰܫܪܳܪܳܐ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܫܶܡܫܳܐ ܦܰܐܝܳܐ ܘܢܽܘܗܪܳܐ ܠܐܴ ܡܶܙܕܰܟܝܳܢܳܐ ܗ̇ܰܘ ܕܡ̣ܶܢ ܚܰܝܠܰܘ̈ܳܬܳܐ ܡܰܠܐܱܟܳܝ̈ܶܐ ܘܢܽܘܪ̈ܳܢܳܝܶܐ ܡܶܬܒܰܪܰܟ ܘܡܶܬܗܰܠܰܠ ܘܡܶܬܩܰܕܰܫ: ܘܡܶܛܽܠ ܕܰܨܒܳܐ ܕܰܠܘܳܬܰܢ ܢܶܬܬܰܚܬܶܐ ܘܢܶܚܠܽܘܛ ܝܳܬܶܗ ܥܰܡ ܓܒܺܝܠܬܰܢ ܘܰܢܚܰܕܶܬ ܨܰܠܡܗ ܕܥܰܡܰܢ: ܡ̣ܶܢ ܡܒܰܪܰܟܬܳܐ ܘܫܰܘܝܰܬ݀ ܠܛܽܘ̈ܒܶܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܩܰܒܶܠ ܘܶܐܬܺܝܠܶܕ ܒܶܣܪܳܢܳܐܝ̣ܬ ܘܰܓܡܰܪ ܗܳܠܶܝܢ ܕܰܒܗܽܘܢ ܐܶܬܦܪܶܩܢܰܢ: ܝܰܠܕܳܐ ܘܰܥܡܳܕܳܐ ܘܚܰܫܳܐ ܘܰܙܩܺܝܦܳܐ ܘܡܰܘܬܳܐ ܘܰܩܒܽܘܪܬܳܐ ܘܰܩܝܳܡܬܳܐ ܡܫܰܒܰܚܬܳܐ: ܘܟܰܕ ܨܒܐ ܕܰܠܘܳܬ ܐܰܒܽܘܗܝ ܒܫܽܘܒܚܳܐ ܢܶܣܬܰܠܰܩ: ܘܢܰܣܶܩ ܥܰܡܶܗ ܠܰܫܡܰܝܐ ܠܨܰܠܡܳܐ ܡܰܠܟܳܝܳܐ ܠܰܒܢ̈ܰܝ ܐ̱ܪܳܙܶܗ ܠܛܽܘܪ ܙܰܝ̈ܬܶܐ ܟܰܢܶܫ ܘܡܰܘܗ̈ܒܳܬܳܐ ܠܗܽܘܢ ܫܰܟܶܢ: ܘܰܢܦܰܚ ܒܗܽܘܢ ܪܽܘܚܶܗ ܩܰܕܺܝܫܳܐ ܘܶܐܡ̣ܰܪ: ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̈ܡܶܐ ܕܢܶܗܘܽܘܢ ܚܰܕ ܥܰܡܳܐ ܓܰܒܝܳܐ ܕܰܚܒܺܝܫ ܒܰܡܨܺܝܕܬܳܐ ܐܶܘܢܓܶܠܳܝܬܳܐ ܐܰܢ̱ܬܽܘܢ ܕܶܝܢ ܒܰܡܕܺܝܢ̱ܬܳܐ ܐܽܘܪܫܠܶܡ ܩܰܘܰܘ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܟܽܘܢ ܪܽܘܚܳܐ ܦܰܪܰܩܠܺܝܛܳܐ: ܡ̣ܶܢ ܠܘܳܬ ܐܰܒܳܐ ܗ̣ܽܘ ܢܗܰܕܶܐ ܘܢܰܢܗܰܪܟܽܘܢ ܘܰܢܚܰܟܶܡܟܽܘܢ ܒܡܰܘ̈ܗܒܳܬܳܐ ܫܒܺܝ̈ܚܳܬܳܐ: ܘܶܐܢ ܐܶܢܳܐ ܠܐܴ ܐܳܙܶܠ ܐ̱ܢܳܐ ܠܘܳܬ ܐܰܒܳܐ ܦܰܪܰܩܠܺܝܛܳܐ ܠܐܴ ܐܳܬܶܐ ܠܘܳܬܟܽܘܢ: ܘܟܰܕ ܗ̣ܽܘ ܡܡܰܠܶܠ ܗܘܳܐ ܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܐܶܬܚܛܶܦ ܡܶܢܗܽܘܢ ܘܰܣܠܶܩ ܠܰܫܡܰܝܳܐ ܘܺܝܬܶܒ ܥܰܠ ܬܪܽܘܢܳܘܣ ܕܫܽܘܒܚܶܗ ܡ̣ܶܢ ܝܰܡܺܝܢܳܐ ܕܫܳܠܽܘܚܶܗ: ܘܗ̣ܶܢܽܘܢ ܕܝܢ ܫܠܺܝ̈ܚܶܐ ܩܰܕܺܝ̈ܫܶܐ ܒܥܶܠܺܝܬܳܐ ܒܰܡܕܺܝܢ̱ܬܳܐ ܐܽܘܪܫܠܶܡ ܩܳܝܡܺܝܢ ܗܘܰܘ ܟܰܕ ܚܳܝܪܝܢ ܕܢܶܫܬܰܠܰܡ ܠܘܳܬܗܽܘܢ ܗ̇ܰܘ ܫܽܘܘܕܳܝܳܐ ܕܰܒܪܳܐ ܫܰܪܺܝܪܳܐ: ܒܥܺܐܕܳܐ ܕܶܝܢ ܪܰܒܳܐ ܕܦܰܢܛܺܝܩܳܘܣܛܺܝ ܘܟܰܕ ܗ̣ܶܢܽܘܢ ܫܠܺܝ̈ܚܶܐ ܒܥܶܠܺܝܬܳܐ ܝܳܬܒܺܝܢ ܗܘܰܘ ܘܡ̣ܶܢ ܫܶܠܝܳܐ ܫܠܺܝ̈ܚܐ ܪܽܘܚܳܐ ܩܰܕܺܝܫܳܐ ܐܰܓܶܢ ܥܠܰܝܗܽܘܢ ܫܟܶܢܘ: ܝܰܘܡܳܢܳܐ ܬܰܠܡܺܝ̈ܕܶܐ ܩܰܕܺܝ̈ܫܶܐ ܒܚܶܟ̈ܡܳܬܳܐ ܐܠܰܗܳܝ̈ܳܬܳܐ ܐܶܬܢܰܗܰܪܘ ܘܰܒܡܰܡܠܠܐܴ ܕܟܽܠܗܽܘܢ ܥܰܡ̈ܡܶܐ ܐܶܬܚܰܟܰܡܘ: ܝܰܘܡܳܢܳܐ ܝܽܘ̈ܕܳܝܶܐ ܪ̈ܰܫܺܝܥܶܐ ܒܶܐܒܠܐܴ ܝܳܬܒܺܝܢ ܗܘܰܘ: ܟܰܕ ܚܳܙܝܶܢ ܠܗܽܘܢ ܕܺܐܝܬܰܝܗܽܘܢ ܗܘܰܘ ܗܶܕܝܽܘ̈ܛܶܐ: ܕܰܡܚܰܟܡܳܢ̈ܶܐ ܘܓܳܡܽܘܪ̈ܶܐ ܕܐ̱ܪ̈ܳܙܶܐ ܐܶܬܚܙܺܝܘ: ܝܰܘܡܳܢܳܐ ܐܶܫܬܪܺܝܘ ܫܠܺܝ̈ܚܶܐ ܩܰܕܺܝ̈ܫܶܐ ܡ̣ܶܢ ܚܰܡܪܳܐ ܐܠܰܗܳܝܳܐ ܘܡܰܘܗܰܒܬܳܐ ܕܪܽܘܚܳܐ ܗ̇ܰܘ ܡܰܥܒܶܕ ܚܰܝ̈ܶܐ ܩܰܒܶܠܘ: ܘܒܰܕܓܽܘܢ ܒܰܚܣܳܡܳܐ ܡ̣ܶܢ ܝܽܘܕܳܝ̈ܶܐ ܡܶܬܡܰܠܠܐܴ ܗܘܳܬ݀ ܕܗܳܠܶܝܢ ܐ̱ܢܳܫ̈ܳܐ ܡܶܐܪܺܝܬܳܐ ܐܶܫܬܺܝܘ ܘܰܪܘܺܝܘ: ܝܰܘܡܳܢܳܐ ܫܶܡܥܽܘܢ ܟܺܐܦܳܐ ܕܳܐܶܨ: ܘܰܐܢܕܪܶܐܘܳܣ ܘܰܒܢ̈ܰܝ ܙܰܒܕܰܝ ܘܫܰܪܟܳܐ ܕܰܫܠܺܝ̈ܚܶܐ ܟܽܠܗܽܘܢ ܒܚܰܕܽܘܬܳܐ ܘܒܰܪܘܳܙܳܐ ܩܳܝܡܺܝܢ ܗܘܰܘ ܟܰܕ ܚ̇ܳܙܶܝܢ ܕܗ̇ܰܘ ܡܶܕܶܡ ܕܰܠܗܽܘܢ ܐܶܫܬܰܘܕܝ ܒܪܳܐ ܝܺܚܺܝܕܳܝܳܐ ܐܶܫܬܰܡܠܺܝ ܠܘܳܬܗܽܘܢ ܝܰܘܡܳܢܳܐ ܒܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܘܥܶܠܺܝܬܳܐ ܗܘܳܬ݀ ܒܳܒܶܝܠ ܕܬܰܪܬܶܝܢ ܠܰܘ ܓܶܝܪ ܒܰܡܣܳܡ ܒܪܺܝܫܳܐ ܐܶܬܦܰܠܰܓܘ ܒܳܗ̇ ܠܶܫܳܢ̈ܶܐ ܐܰܝܟ ܗ̇ܳܝ ܩܰܕܡܳܝܬܳܐ ܐܶܠܐܴ ܒܚܰܝܠܶܗ ܕܪܽܘܚܳܐ ܩܰܕܺܝܫܳܐ ܐܶܬܢܰܗܪܰܬ݀: ܕܰܢܚܰܟܡܽܘܢ ܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܡܶܛܽܠ ܟܳܪܽܘܙܽܘܬܳܐ ܕܰܫܪܳܪܳܐ: ܝܰܘܡܳܢܳܐ ܢܒܺܝ̈ܶܐ ܚܳܕܶܝܢ ܕܓܶܠܝܳܢܰܝ̈ܗܽܘܢ ܒܐܪܳܙܳܐ ܐܶܫܬܰܠܰܡܘ: ܝܰܘܡܳܢܳܐ ܝܺܗܽܘܕܳܐ ܣܟܰܪܝܽܘܛܳܐ ܒܒܶܗܬܬܳܐ ܩܳܐܶܡ ܟܰܕ ܚܳܙܶܐ ܠܰܫܠܺܝ̈ܚܶܐ ܩܰܕܺܝ̈ܫܶܐ ܚܰܒܪ̈ܰܘܗܝ ܕܡܶܫܬܰܚܠܦܺܝܢ ܘܡܶܬܢܰܗܪܺܝܢ ܡܰܕܥܰܝ̈ܗܽܘܢ: ܝܰܘܡܳܢܳܐ ܢܶܠܒܰܫ ܒܶܗܬܬܳܐ ܗ̇ܰܘ ܙܺܐܦܳܢܳܐ ܕܟܰܕ ܒܚܺܐܪܽܘܬܳܐ ܗ̇ܳܝ ܕܡܶܢܶܗ ܐܶܬܢܰܣܒܰܬ݀ ܬܶܫܡܫܬܶܗ ܘܠܐܱܚܪܺܢܳܐ ܕܶܝܢ ܐܶܬܝܰܗܒܰܬ݀: ܝܰܘܡܳܢܳܐ ܢܕܽܘܨ ܡܰܬܺܝܰܐ ܕܰܚܠܳܦ ܣܟܰܪܝܽܘܛܳܐ ܥܰܠ: ܘܩܰܒܶܠ ܘܺܝܪܶܬ ܟܽܘܡܪܽܘܬܶܗ: ܘܰܡܠܺܝ ܕܽܘܟܰܬ݀ ܫܠܺܝܚܽܘܬܶܗ ܝܰܘܡܳܢܳܐ ܢܶܚܕܶܐ ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܘܢܶܪܘܰܙ ܐܰܒܳܐ ܕܰܬܪܶܥܣܰܪ ܫܰܒ̈ܛܶܐ: ܕܗ̇ܳܢܽܘܢ ܕܩܰܒܠܽܘܗ̇ ܠܕܽܘܟܬܶܗ: ܘܰܗܘܰܘ ܡܰܠܟ̈ܶܐ ܘܟܳܗ̈ܢܶܐ ܘܰܢܒܺܝ̈ܶܐ: ܝܰܘܡܳܢܳܐ ܢܕܽܘܨ ܐܶܫܰܥܝܳܐ ܘܢܶܪܘܰܙ ܐܺܝܽܘܒ: ܝܰܘܡܳܢܳܐ ܢܶܚܕܶܐ ܢܽܘܚ ܟܺܐܢܳܐ ܕܢܰܚ ܥܳܠܡܳܐ ܡ̣ܶܢ ܛܰܘܦܳܢܳܐ ܘܰܠܒܶܟܘ ܬܪܶܥܣܰܪ ܠܐܱܪܒܰܥ ܦܶܢ̈ܝܳܬܳܐ: ܘܗ̣ܶܢܽܘܢ ܐܰܢܺܝܚܽܘܗ̇ ܗܘܰܘ ܠܩܺܐܒܽܘܬܳܐ: ܘܰܠܛܰܘܦܳܢܳܐ ܕܰܚܛܺܝܬܳܐ ܒܝܰܕ ܣܒܰܪܬܶܗ ܕܰܒܪܳܐ ܘܰܒܗܽܘܢ ܐܶܬܓܰܡܪܰܬ݀: ܘܰܐܦܺܝܛܘ ܠܐܴܟܳܠܩܰܪܨܳܐ ܘܛܰܒܥܽܘܗܝ ܒܓܰܘ ܬܗܽܘ̈ܡܶܐ ܥܰܡܺܝ̈ܩܶܐ ܘܰܠܟܽܠܶܗ ܚܰܝܠܶܗ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܕܦܰܢܛܺܝܩܳܘܣܛܺܝ ܨܳܐܰܪ ܗܘܳܐ ܡܽܘܫܶܐ ܡܢܺܝܚܳܢܳܐ ܘܰܐܠܳܗܽܘܬܳܟ ܟܰܕ ܩܰܒܶܠ ܗܘܳܐ ܢܳܡܽܘܣܳܐ ܘܦܽܘܩܕ̈ܳܢܶܐ ܕܰܒܝܰܕ ܠܽܘ̈ܚܶܐ ܐܺܝܣܰܪ̈ܠܳܝܳܬܳܐ ܗ̇ܳܢܶܝ̈ܢ ܕܰܒܨܶܒܥܳܐ ܕܰܐܠܳܗܳܐ ܪܽܘܚܳܢܳܐܝ̣ܬ ܐܶܬܪ̈ܫܶܡܶܝܢ ܠܗܳܢܳܐ ܥܺܐܕܳܐ ܩܰܕܺܝܫܳܐ ܨܳܐܰܪ ܗܘܳܐ ܕܡܳܐ ܫܰܒܥܳܐ ܫܪ̈ܳܓܺܝܢ ܕܰܡܢܳܪܰܬ݀ ܩܽܘܕ̈ܫܶܐ ܒܗܽܘܢ ܡܨܰܒܬܳܐ ܗܘܳܬ݀: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܕܡܳܐ ܗ̇ܰܘ ܕܰܫܒܰܥ ܙܰܒܢܺܝ̈ܢ ܠܐܱܦ̈ܰܝ ܩܽܘܕܫܳܐ ܕܡܳܪܝܳܐ ܘܕܶܒܚܬܳܐ ܡܶܬܪܣܶܣ ܗܘܳܐ ܐ̱ܪܳܙܳܢܳܐܝ̣ܬ ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܝܶܫܽܘܥ ܒܰܪܢܽܘܢ ܒܫܰܒܥܳܐ ܟܳܗ̈ܢܶܐ ܩܳܪ̈ܝܰܝ ܩܰܪ̈ܢܳܬܳܐ ܘܩܺܐܒܽܘܬܳܐ ܥܰܠ ܐܺܝܪܺܝܚܽܘ ܡܶܬܬܢܺܝܚܳܐ ܗܘܳܬ݀: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܕܰܘܺܝܕ ܡܰܠܟܳܐ ܘܰܢܒܺܝܳܐ ܟܰܕ ܐܳܡܰܪ ܕܡܺܐܡܪܶܗ ܕܡܳܪܝܳܐ ܡܺܐܡܪܰܐ ܗ̱̇ܘ ܕܰܟܝܳܐ: ܘܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ: ܘܰܡܕܰܟܰܝ ܚܰܕ ܒܫܰܒܥܳܐ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܠܶܝܳܐ ܢܒܺܝܳܐ ܟܰܕ ܐܳܡ̇ܰܪ ܠܐܷܠܺܝܫܳܥ ܬܰܠܡܺܝܕܶܗ ܕܰܢܚܽܘܪ ܠܐܘܪܚܳܐ ܕܝܰܡܳܐ ܒܡܰܪܟܰܒܬܳܐ ܘܓܺܝ̈ܓܠܐܷ ܕܢܽܘܪܳܐ ܣܠܶܩ ܠܰܫܡܰܝܳܐ ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܠܶܝܫܳܥ ܢܒܺܝܳܐ ܟܰܕ ܐܳܡܰܪ ܠܗܰܘ ܓܰܪܒܳܢܳܐ ܢܶܥܡܳܢ ܕܰܫܒܰܥ ܙܰܒܢܺܝ̈ܢ ܢܺܐܙܰܠ ܢܶܣܚܶܐ ܒܝܽܘܪܕܢܳܢ ܢܰܗܪܳܐ ܘܢܶܬܕܰܟܶܐ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܒܝܰܕ ܫܒܰܥ ܡܝܰܩܪ̈ܳܬܳܐ ܟܰܕ ܪܽܘܚܶܗ ܒܡܰܥܒܕܳܢܽܘܬܳܐ ܕܪܽܘܚܳܐ ܩܰܕܺܝܫܳܐ: ܐܶܬܺܝܗܶܒ ܢܳܡܽܘܣܳܐ ܚܰܕܬܳܐ ܕܗ̣ܽܘ ܐܶܘܢܓܶܠܝܽܘܢ ܩܰܕܺܝܫܳܐ ܠܰܟܪ̈ܺܝܣܛܝܳܢܶܐ ܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ: ܘܗܳܫܳܐ ܡܦܺܝܣܺܝܢܰܢ ܠܳܟ ܐܳܘ ܡܶܠܬܳܐ ܐܠܰܗܳܐ: ܒܗܳܢܳܐ ܥܺܐܕܳܐ ܩܰܕܺܝܫܳܐ ܕܦܰܢܛܺܝܩܽܘܣܛܺܝ ܕܬܶܐܫܽܘܕ ܥܠܰܝܢ ܪܽܘܚܳܐ ܩܰܕܺܝܫܳܐ ܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ: ܘܢܶܗܘܶܐ ܠܰܢ ܢܽܘܪܳܐ ܡܰܘܩܕܳܢܺܝܬܳܐ ܕܟܽܠܶܗ ܝܰܥܪܳܐ ܕܰܚܛܺܝܬܳܐ: ܐܰܝܟܰܢܳܐ ܕܒܶܗ ܒܪܽܘܚܳܐ ܩܰܕܺܝܫܳܐ ܡܶܬܢܰܗܪܺܝܢܰܢ ܢܶܫܬܘܶܐ ܕܰܢܩܰܪܶܒ ܦܺܐܪ̈ܶܐ ܪ̈ܽܘܚܳܢܳܝܶܐ ܘܰܕܟܰܝ̈ܳܐ ܕܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܫܒܺܝ̈ܚܳܬܳܐ ܕܰܡܪܰܥܶܝܢ ܠܳܟ: ܟܰܕ ܗܳܘܶܐ ܐܰܢ̱ܬ ܠܥܺܕܬܳܐ ܩܰܕܺܝܫܬܳܐ ܡܢܰܛܪܳܢܳܐ ܡ̣ܶܢ ܟܽܠ ܩܺܝܢܕܽܘ̈ܢܽܘ ܘܰܠܪ̈ܳܥܰܘܳܬܳܐ ܕܺܝܠܳܗ̇ ܘܰܠܓܰܐܝ̈ܳܐ ܘܰܡܫܰܒ̈ܚܶܐ ܡܓܰܢ̱ܒܪ̈ܳܢܶܐ ܕܰܠܟܳܗ̈ܢܶܝܗ̇ ܘܠܰܡܫܰܡ̈ܫܳܢܶܝܗ̇ ܡܙܰܗܝܳܢܳܐ ܠܣܳܒ̈ܶܐ ܘܠܰܡܚܺܝ̈ܠܐܷ ܡܣܰܡܟܳܢܳܐ: ܠܰܥܠܰܝ̈ܡܶܐ ܘܠܰܛܠܳܝ̈ܶܐ ܡܢܰܟܦܳܢܳܐ: ܠܫܰܒܪ̈ܶܐ ܘܰܠܝܰܬܡ̈ܶܐ ܡܪܰܒܝܳܢܳܐ: ܠܐܱܪ̈ܡܠܳܬܳܐ ܗܘܺܝ ܩܳܝܽܘܡܳܐ ܘܰܡܬܰܪܣܝܳܢܳܐ ܘܰܗܘܺܝ ܠܰܟܪ̈ܺܝܗܶܐ ܐܳܣܝܳܐ ܘܠܐܱܣܺܝܪ̈ܶܐ ܥܳܕܽܘܪܳܐ: ܠܛܳܥܰܝ̈ܳܐ ܡܦܰܢܝܳܢܳܐ: ܠܐܱܒܺܝ̈ܕܶܐ ܡܟܰܢܫܳܢܳܐ: ܠܪ̈ܰܚܺܝܩܶܐ ܡܰܝܬܝܳܢܳܐ: ܠܩܰܪ̈ܺܝܒܶܐ ܡܢܰܛܪܳܢܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܡܚܰܣܝܳܢܳܐ: ܐܰܝܟܰܢܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

ܕܶܢܚܳܐ ܫܰܦܝܳܐ ܘܕܰܟܝܳܐ ܐܠܰܗܳܐ: ܪܽܘܚܳܐ ܦܰܪܰܩܠܺܝܛܳܐ ܕܰܐܢܗܰܪ ܠܰܫܠܺܝ̈ܚܶܐ ܩܰܕܺܝ̈ܫܶܐ ܒܫܽܘ̈ܟܳܢܶܐ ܕܺܝܠܳܗ ܢܽܘܪ̈ܳܢܳܝܶܐ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܕܰܟܳܐ ܠܚܽܘ̈ܫܳܒܰܝܢ ܡܶܢܟܽܠ ܣܰܢ̈ܝܳܬܳܐ: ܐܰܝܟܰܢܳܐ ܕܟܰܕ ܒܙܰܗ̈ܪܺܝܪܶܐ ܕܪܽܘܚܳܐ ܦܰܪܰܩܠܺܝܛܳܐ ܡܶܬܢܰܗܪܺܝܢܰܢ ܘܰܒܚܰܕܽܘܬܳܐ ܘܒܰܦܨܺܝܚܽܘܬܳܐ ܢܫܰܡܠܐܷ ܠܥܺܐܕܳܐ ܗܳܢܳܐ ܕܡܰܚܰܬܬܳܐ ܕܪܽܘܚܳܐ ܩܰܕܺܝܫܳܐ: ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

ܦܪܘܡܝܘܢ

ܬܶܫܒܽܘܚܬܳܐ ܠܰܬܠܺܝܬܳܝܽܘܬܳܐ ܡܫܰܒܰܚܬܳܐ ܘܰܣܓܺܝܕܬܳܐ ܘܰܚܕܳܝܽܘܬܳܐ ܠܐܴ ܡܶܬܦܰܠܓܳܢܺܝܬܳܐ: ܪܽܘܡܪܳܡܳܐ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܐܰܒܳܐ ܕܡܰܠܶܠ ܒܰܢܒܺܝ̈ܶܐ: ܘܰܒܪܳܐ ܕܶܐܬܟܪܶܙ ܒܰܫܠܺܝ̈ܚܶܐ: ܘܪܽܘܚܳܐ ܕܚܰܟܶܡ ܠܬܰܠܡܺܝ̈ܕܶܐ ܐܰܒܳܐ ܝܳܠܽܘܕܳܐ ܘܠܐܴ ܝܺܠܺܝܕܳܐ: ܘܰܒܪܳܐ ܝܺܠܺܝܕܳܐ ܘܠܐܴ ܝܳܠܽܘܕܳܐ: ܘܪܽܘܚܳܐ ܩܰܕܺܝܫܳܐ ܢܳܦܽܘܩܳܐ ܘܢܳܣܽܘܒܳܐ: ܕܡ̣ܶܢ ܐܰܒܳܐ ܢܳܦܶܩ ܡܬܽܘܡܳܐܝ̣ܬ: ܘܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܐܰܓܶܢ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܠܐܴ ܡܰܘܩܕܳܢܳܐܝ̣ܬ: ܘܚܰܟܶܡ ܐܶܢܽܘܢ ܒܝܽܘܠܦܳܢܶܗ ܢܰܗܺܝܪܳܐܝ̣ܬ ܐܰܝܟܰܢܳܐ ܕܰܣܒܰܪܬܶܗ ܢܰܟܪܙܽܘܢ ܠܟܽܠ ܥܰܡ̈ܡܺܝܢ ܒܠܶܫܳܢܰܝ̈ܗܽܘܢ ܘܰܫܪܳܪܶܗ ܕܶܐܘܢܓܶܠܝܽܘܢ ܩܰܕܺܝܫܳܐ ܢܣܰܒܪܽܘܢ ܠܟܽܠ ܐܰܝܟ ܣܶܦܪ̈ܰܝܗܽܘܢ ܕܠܶܗ ܘܰܚܢܰܢ ܢܶܣܓܽܘܕ ܣܶܓܕܬܳܐ ܚܕܰܬܳܐ ܕܟܽܠ ܬܶܗܪ̈ܺܝܢ: ܘܰܢܩܰܪܶܒ ܬܰܘܕܺܝܬܳܐ ܒܟܽܠ ܠܶܫܳܢܺܝ̈ܢ: ܒܗܳܢܳܐ ܥܶܕܳܢܳܐ ܕܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ܀

ܣܕܪܐ

ܕܨܰܦܪܳܐ ܛܰܪܩܳܐ ܐ̱ܪܳܙܳܐ ܪܰܒܳܐ ܘܰܡܥܰܠܝܳܐ ܘܰܡܠܐܷ ܬܶܕܡܽܘܪܬܳܐ ܕܥܺܐܕܳܐ ܩܰܕܺܝܫܐ ܕܦܰܢܛܺܝܩܽܘܣܛܺܝ ܥܰܡ ܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܡܥܰܕܥܕܺܝܢܰܢ ܝܰܘܡܳܢܳܐ: ܗ̇ܰܘ ܕܚܰܡܫܺܝܢܳܝܳܐ ܡ̇ܰܢ ܐܺܝܬܰܘܗܝ: ܘܡ̣ܶܢ ܫܰܒܥܳܐ ܫܳܒܽܘ̈ܥܶܐ ܕܝܰܘ̈ܡܳܬܳܐ ܗܳܠܶܝܢ ܕܗܳܫܳܐ ܡܫܰܡܠܶܝܢܰܢ ܡ̣ܶܢ ܩܝܳܡܬܳܐ ܦܳܪܽܘܩܳܝܬܳܐ: ܘܰܥܕܰܡܳܐ ܠܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܕܝܰܘܡܳܢܳܐ ܡܚܰܓܶܝܢܰܢ: ܡܶܬܟܰܢܰܫ ܠܰܢ ܚܰܡܫܺܝܢ ܝܰܘ̈ܡܳܬܳܐ ܗܳܠܶܝܢ ܕܗܳܫܳܐ ܡܫܰܡܠܶܝܢܰܢ ܒܝܰܕ ܫܽܘܘ̈ܕܳܥܶܐ ܘܛܽܘ̈ܦܣܶܐ ܐ̱ܪ̈ܳܙܳܢܳܝܶܐ: ܠܗܳܢܳܐ ܝܰܘܡܳܐ ܓܶܝܪ ܡܫܰܘܕܰܥ ܗܘܳܐ ܐ̱ܪܳܙܳܐ ܕܫܰܒܥܳܐ ܐܠܰܦܺܝ̈ܢ ܕܡ̣ܶܢ ܫܽܘܪܳܝܳܐ ܕܰܒܪܺܝܬܳܐ ܘܰܥܕܰܡܳܐ ܠܫܽܘܠܳܡܳܐ: ܬܽܘܒ ܕܶܝܢ ܘܐ̱ܪܳܙ ܫܰܒܥܳܐ ܫܳܒܽܘ̈ܥܶܐ ܕܫܰܢ̱ܬܳܐ ܕܡܶܬܟܰܪܟܳܢܽܘܬܳܗ̇ ܕܓܺܝܓܠܐܴ: ܘܫܰܒܥܳܐ ܝܰܘ̈ܡܺܝܢ ܕܰܥܠܶܝܗ̇ ܗܳܦܟܳܐ ܡܰܪܕܺܝܬܶܗ ܕܣܰܗܪܳܐ ܘܰܕܙܰܒ̈ܢܶܐ ܘܥܶܕ̈ܳܢܶܐ: ܗܳܠܶܝܢ ܕܳܐܦ ܒܡܶܢܝܳܢܳܐ ܡܫܰܡܠܶܝܢܰܢ ܟܰܕ ܡܶܬܢܰܣܒܺܝܢ ܠܡܰܘܠܳܕܳܐ ܕܫܰܒܥܺܝܢ ܡܰܘ̈ܠܳܕܺܝܢ: ܟܰܕ ܡܫܰܘܕܥܺܝܢ ܠܫܰܒܥܺܝܢ ܫܰܪ̈ܒܳܬܳܐ ܕܡ̣ܶܢ ܐܳܕܳܡ ܘܰܥܕܰܡܳܐ ܠܡܳܪܰܢ: ܫܰܒܥܺܝܢ ܬܽܘܒ ܠܶܫܳܢ̈ܶܐ ܕܥܰܡ̈ܡܶܐ ܕܰܒܗܽܘܢ ܡܶܫܬܰܒܰܚ ܡܳܪܝܳܐ ܡܰܟܪܙܺܝܢ: ܗܳܟܰܢܳܐ ܐܶܬܢܰܗܰܪ ܢܒܺܝܳܐ ܐܠܰܗܳܝܳܐ ܡܽܘܫܶܐ: ܕܰܒܫܰܒܥܺܝܢ ܣܳܒ̈ܶܐ ܢܶܣܰܩ ܠܛܽܘܪܳܐ ܠܘܳܬ ܥܶܢܝܳܢܳܐ ܐܠܰܗܳܝܳܐ: ܘܰܡܩܰܒܠܳܢܽܘܬܳܐ ܟܺܝܬ ܕܦܽܘܩܕ̈ܳܢܶܐ: ܟܰܕ ܐ̱ܪ̈ܳܙܶܐ ܕܶܝܢ ܠܐܪ̈ܳܙܶܐ ܡܝܰܒܠܺܝܢ: ܫܰܒܥܺܝܢ ܡܦܰܫ̈ܩܳܢܶܐ ܗ̇ܳܢܽܘܢ ܕܰܠܕܺܝܰܬܺܝܩܺܝ ܥܰܬܺܝܩܬܳܐ ܐܰܥܒܰܪܘ ܠܘܳܬ ܥܰܡ̈ܡܶܐ ܕܰܥܬܺܝܕܺܝܢ ܗܘܰܘ ܕܰܡܗܰܝܡܢܺܝܢ ܒܶܐܘܢܓܶܠܝܽܘܢ ܕܢܶܫܬܰܪܪܽܘܢ ܘܐ̱ܪܳܙܳܐ ܕܶܝܢ ܕܫܰܒܥܺܝܢ ܡܣܰܒܪܺܝܢܰܢ ܗܘܰܘ ܘܰܗܘܰܘ ܡܣܰܒܪ̈ܳܢܶܐ ܕܰܣܒܰܪܬܳܐ ܐܶܘܢܓܶܠܳܝܬܳܐ ܐܰܟܪܶܙܘ ܫܰܒܥܺܝܢ ܬܽܘܒ ܢܰܦ̈ܫܳܢ ܥܰܠܝ̈ ܥܰܡ ܐܰܒܽܘܢ ܝܰܥܩܽܘܒ ܠܓܰܘ ܠܡܶܨܪܶܝܢ: ܘܡ̣ܶܢ ܗܳܠܶܝܢ ܣܽܘܓܳܐܐ ܐܶܬܩܰܝܰܡܘ: ܐ̱ܪܳܙܳܐ ܬܽܘܒ ܕܫܰܒܥܺܝܢ ܕܩܳܠܺܝ̈ܢ ܗܳܠܶܝܢ ܬܽܘܒ ܕܰܒܠܺܝܡ ܡܰܟܪܶܙ ܢܳܡܽܘܣܳܐ: ܠܗܳܠܶܝܢ ܬܽܘܒ ܫܰܒܥܳܐ ܫܳܒܽܘ̈ܥܶܐ ܡܰܐܪܙܳܐ ܗܘܳܬ݀ ܫܰܢ̱ܬܳܐ ܫܒܺܝܥܳܝܬܳܐ ܗ̇ܳܝ ܕܥܳܒܕܳܐ ܗܘܳܬ݀ ܚܪ̈ܽܘܪܶܐ ܦܰܐܝ̈ܳܐ ܠܥܰܒ̈ܕܶܐ ܫܒܰܥ ܙܰܒܢ̈ܳܬܳܐ ܡܶܬܦܩܶܕ ܢܶܥܡܳܢ ܐܳܪܳܡܳܝܳܐ: ܡ̣ܶܢ ܐܠܶܝܫܳܥ ܢܒܺܝܳܐ ܕܢܶܣܚܶܐ ܒܡܰܝ̈ܳܐ ܕܝܽܘܪܕܢܳܢ ܕܢܶܬܕܰܟܶܐ ܫܰܒܥܳܐ ܫܪ̈ܳܓܺܝܢ ܐܶܬܬܣܺܝܡܘ ܥܰܠ ܡܢܳܪܬܳܐ ܕܒܶܝܬ ܚܽܘܣܳܝܳܐ ܐܰܝܟ ܕܡܳܪܝܳܐ ܦܰܩܶܕ: ܒܫܰܒܥܳܐ ܥܰܡܽܘ̈ܕܝܢ ܒܰܝܬܳܐ ܕܚܶܟܡܬܳܐ ܐܶܫܬܰܡܠܺܝ: ܐܰܟܡܳܐ ܕܫܽܘܠܳܡܽܘܢ ܡܰܠܶܦ ܠܰܫܒܰܥ ܪ̈ܽܘܚܰܝ ܫܡܰܝܳܐ ܩܰܕܶܡ ܚܙܳܐ ܢܒܺܝܳܐ ܐܠܰܗܳܝܳܐ ܐܶܫܰܥܝܳܐ: ܫܒܰܥ ܓܶܝܪ ܙܰܒܢܺܝ̈ܢ ܐܶܬܟܰܪܟܰܬ݀ ܩܺܐܒܽܘܬܶܗ ܕܡܳܪܝܳܐ ܚܕܳܪ̈ܰܝ ܫܰܒܥܳܐ ܫܽܘܪ̈ܶܐ ܐܺܝܪ̈ܺܝܚܽܘܢܳܝܶܐ ܘܰܢܦܰܠܘ: ܘܰܒܫܰܒܥܳܐ ܝܰܘ̈ܡܺܝܢ ܢܣܰܒ ܝܶܫܽܘܥ ܒܰܪܢܽܘܢ ܙܳܟܘ̈ܳܬܳܐ: ܗܳܢܳܐ ܕܡܰܐܪܶܙ ܥܰܠ ܫܒܰܥ ܬܶܕܡܪ̈ܳܬܐ ܕܰܗܘ̈ܰܝ ܝܽܘܡ ܚܰܫܶܗ ܕܝܶܫܽܘܥ ܦܳܪܽܘܩܰܢ ܕܒܰܒܣܰܪ: ܘܳܐܦ ܥܰܠ ܫܒܰܥ ܡ̈ܶܠܐܷ ܕܡܰܠܶܠ ܡܳܪܰܢ ܒܰܙܩܺܝܦܳܐ: ܫܰܒܥܳܐ ܠܰܡ ܓܶܝܪ ܟܰܕ ܫܒܺܝܥܳܐܝ̣ܬ ܡܶܬܪܰܟܒܺܝܢ ܒܝܰܕ ܡܶܬܟܰܪܟܳܢܽܘܬܳܐ ܩܺܝܩܠܳܣܳܝܬܳܐ ܥܰܠ ܢܰܦܫܗܽܘܢ ܠܗܰܘ ܕܚܰܡܫܺܝܢ ܡܰܘܠܳܕܺܝ̈ܢ: ܟܰܕ ܚܰܕ ܝܰܘܡܳܐ ܚܳܣܪܺܝܢ ܠܗ̇ܰܘ ܕܡ̣ܶܢ ܥܳܠܡܳܐ ܕܰܥܬܺܝܕ ܐܰܟܚܕܳܐ ܢܳܣܒܺܝܢ ܠܶܗ ܩܰܕܺܝ̈ܫܶܐ: ܕܺܐܝܬܰܘܗܝ ܗ̣ܽܘ ܟܰܕ ܗ̣ܽܘ ܬܡܺܝܢܳܝܳܐ ܘܩܰܕܡܳܝܳܐ: ܡܰܐܠܽܘܢ ܕܶܝܢ ܘܚܰܕ ܠܐܴ ܡܶܫܬܰܪܝܳܢܳܐ: ܗ̇ܰܘ ܕܒܶܗ ܥܳܐܠܺܝܢ ܓܡܺܝܪ̈ܶܐ ܠܰܢܝ̇ܳܚܬܳܐ ܕܛܽܘ̈ܒܶܐ ܘܒܽܘ̈ܣܳܡܶܐ ܡܰܠܟܽܘ̈ܬܳܢܳܝܶܐ ܙܳܕܶܩ ܬܽܘܒ ܕܬܰܡܳܢ ܢܶܫܬܰܠܡܽܘܢ ܫܽܘܒܳܬܳܐ ܕܗܳܪܟܳܐ ܕܢܰܦ̈ܫܳܬܳܐ ܢܰܟ̈ܦܳܬܳܐ ܕܰܪ̈ܚܶܡܶܝܢ ܠܐܱܠܳܗܳܐ ܘܰܢܩܰܦ̈ܝ ܒܳܬܰܪ ܥܶܩ̈ܒܳܬܶܗ: ܐܰܝܟܳܐ ܕܶܝܢ ܕܬܶܬܺܝܗܶܒ ܡܢܳܬܳܐ ܠܫܰܒܥܳܐ ܐܳܦ ܠܰܬܡܳܢܝܳܐ ܐܰܝܟ ܕܰܐܓܽܘܪ ܒܰܪ ܝܰܩܺܝ ܡܩܰܠܗܳܢܳܐ ܡܡܰܠܶܠ ܣܬܺܝܪ̈ܳܬܳܐ ܘܰܡܛܰܫ̈ܝܳܬܳܐ ܡܒܰܕܶܩ: ܕܰܟܝ̈ܳܢ ܕܶܝܢ ܡܶܠܰܘ̈ܗܝ ܕܡܳܪܝܳܐ ܥܦܺܝ̈ܦܳܬ ܫܒܺܝܥܳܐܝ̣ܬ: ܟܰܕ ܠܫܰܒܥܳܐ ܛܶܟ̈ܣܶܐ ܥܺܕܬܳܢܳܝ̈ܶܐ ܡܛܰܦܶܣ ܐܰܝܟ ܕܳܐܦ ܫܠܺܝܚܳܐ ܐܠܰܗܳܝܳܐ ܡܦܰܫܶܩ: ܕܺܐܝܬܰܝܗܽܘܢ ܡܰܠܟ̈ܶܐ ܕܚܰܝܠܰܘ̈ܳܬܳܐ ܕܡܶܬܟܰܢܫܝܢ ܫܽܘܦܪܶܗ ܕܒܰܝܬܳܟ ܡܦܰܠܓܺܝܢ ܒܶܙܬܳܐ: ܙܰܕܺܝܩܳܐ ܡ̇ܰܢ ܫܬܺܝܬܳܐܝ̣ܬ ܡ̣ܶܢ ܐܽܘܠܨܳܢ̈ܶܐ ܘܥܳܩ̈ܳܬܳܐ ܡܶܬܦܰܨܶܐ: ܒܗ̇ܳܝ ܕܶܝܢ ܕܰܫܒܰܥ ܐܳܦܠܐܴ ܒܡܶܕܶܡ ܡܶܬܢܰܟܶܐ ܐܰܘ ܡܶܣܬܰܓܰܦ: ܠܡܰܣܟܠܳܢ̈ܶܐ ܕܶܝܢ ܠܰܘ ܫܒܺܝܥܳܐܝ̣ܬ ܒܰܠܚܽܘܕ ܐܶܠܐܴ ܘܳܐܦ ܫܒܺܝܥܳܐܝ̣ܬ ܫܒܰܥ ܡܶܫܬܒܶܩ ܠܶܗ: ܕܰܒܟܽܠܗܶܝܢ ܗܳܠܶܝܢ ܥܰܝ̈ܢܶܐ ܟܺܐܦܳܐ ܗ̇ܳܝ ܙܽܘܪܒܳܒܶܠܳܝܬܳܐ ܡܶܨܛܰܒܬܳܐ ܗܘܳܬ݀ ܟܰܕ ܒܰܬܠܺܝܬܳܝܽܘܬ ܫܳܒܽܘ̈ܥܶܐ ܡܶܬܚܣܶܠ ܡ̣ܶܢ ܕܳܢܺܝܶܐܝܠ ܢܒܺܝܳܐ ܡ̣ܶܢ ܦܰܛܒܳܓ̈ܶܐ ܕܡܰܠܟܳܐ ܟܰܕ ܒܬܰܪܣܺܝܬܳܐ ܫܚܺܝܡܬܳܐ ܕܙܰܪ̈ܥܽܘܢܶܐ ܡܶܣܬܰܝܒܰܪ: ܘܰܪܓܺܝܓܳܐ ܠܡܰܠܐܱܟ̈ܶܐ ܘܰܠܚܰܝ̈ܠܰܘܳܬܳܐ ܫܡܰܝܳܢ̈ܶܐ ܡܶܬܚܙܶܐ: ܗܳܟܰܢܳܐ ܕܶܝܢ ܘܒܰܗܦܽܘܟܝܳܐ ܫܒܺܝܥܳܝܳܐ ܕܶܐܠܺܝܳܐ ܛܰܢܳܢܳܐ ܘܰܢܒܺܝܳܐ ܡܫܰܒܚܳܐ: ܘܡܰܦܽܘܚܺܝܬܳܐ ܗ̇ܳܝ ܬܠܺܝܬܳܝܬܳܐ ܘܐ̱ܪܳܙܳܢܳܝܬܳܐ ܕܺܝܠܶܗ ܕܰܢܦܰܚ ܗܘܳܐ ܒܡܶܬܬܰܝܚܳܢܽܘܬܶܗ ܕܰܒܪܳܐ ܕܰܐܪܡܰܠܬܳܐ ܨܳܪܦܳܝܬܳܐ: ܬܽܘܒ ܕܶܝܢ ܫܽܘܒܳܥܳܐ ܫܳܘܶܐ ܒܡܶܢܝܳܢܳܐ ܕܥܰܠ ܨܠܺܝ̈ܚܶܐ ܟܰܕ ܒܢܽܘܪܳܐ ܡܫܰܕܪܰܬ݀ ܡ̣ܶܢ ܐܠܰܗܳܐ ܠܕܶܒܚܳܐ ܡܩܰܒܠܐܴ ܡܛܰܠܶܩ ܘܠܰܢܒܺܝ̈ܶܐ ܕܒܰܥܠܐܴ ܘܰܕܒܶܗܬܬܳܐ ܩܰܛܶܠ ܕܠܐܴ ܐܶܬܡܨܺܝܘ ܠܗ̇ܳܝ ܕܫܳܘܝܳܐ ܡ̣ܶܢ ܩܰܕܺܝܡܽܘܬ ܩܪܺܝܬܳܐ: ܗܳܟܰܢܳܐ ܕܶܝܢ ܘܒܽܘܕܳܩܳܐ ܫܒܺܝܥܳܝܳܐ ܕܶܐܬܦܩܶܕ ܠܛܰܠܝܳܐ: ܘܒܰܪ ܟܽܘܢܳܝܳܐ ܫܰܘܝܳܐ ܕܶܐܠܺܝܫܳܥ ܕܰܠܘܳܬ ܒܪܳܗ̇ ܕܫܺܝܠܽܘܡܳܝܬܳܐ ܗ̇ܰܘ ܕܰܠܣܰܘܩܳܐ ܫܶܐܠܬܳܢܳܝܳܐ ܐܰܚܺܝ: ܒܗܳܢܳܐ ܕܶܝܢ ܗ̇ܰܘ ܕܒܰܫܒܺܝܥܳܝܽܘܬܳܐ ܕܶܝܢ ܕܝܰܘ̈ܡܳܬܳܐ ܡܶܫܬܰܡܠܐܷ: ܓܰܪܒܳܢܳܐ ܕܶܝܢ ܕܰܒܫܰܒܥܳܐ ܡܶܬܕܰܟܶܐ: ܗܰܝܟܠܐܴ ܕܶܝܢ ܕܰܒܕܰܐܝܟ ܗܳܠܶܝܢ ܡܶܬܚܰܕܰܬ: ܥܰܡܳܐ ܕܶܝܢ ܕܰܒܫܰܢ̱ܬܳܐ ܕܫܰܒܥܺܝܢ ܡ̣ܶܢ ܥܰܒܕܽܘܬܳܐ ܗ̇ܳܝ ܒܳܒܶܠܳܝܬܳܐ ܘܫܶܒܝܳܐ ܦܳܢܶܝܢ: ܘܣܳܠܩܺܝܢ ܠܰܡܕܺܝܢ̱ܬܳܐ ܐ̱ܪ̈ܳܙܶܐ: ܐܰܝܟܰܢܳܐ ܡ̇ܰܢ ܕܺܐܝܬ ܠܳܗ̇ ܒܰܠܚܽܘܕܳܝܽܘܬܳܐ ܕܒܰܥܣܺܝܪܳܝܽܘܬܳܐ ܘܰܒܡܶܢܝܳܢܳܐ ܕܝܰܬܺܝܪ ܓܒܶܐ ܐ̱ܪܳܙܳܐ ܕܫܰܒܥܳܐ ܢܶܬܝܰܩܰܪ: ܘܡ̣ܶܢ ܗܳܪܟܳܐ ܐܳܦ ܚܢܰܢ ܚܰܛܳܝ̈ܶܐ ܕܶܐܫܬܰܘܕܺܝܢܰܢ ܠܰܡܪܰܚܡܳܢܽܘܬܳܟ ܡܳܪܝܳܐ ܕܶܐܫܬܘܶܝܢܰܢ ܠܫܽܘܠܳܡܳܐ ܘܰܠܫܽܘܡܠܳܝܳܐ ܕܝܽܘ̈ܩܢܶܐ ܗܳܠܶܝܢ ܡܨܰܠܡܳܢ̈ܶܐ ܘܨܽܘܪ̈ܬܳܢܳܝܶܐ ܗܳܠܶܝܢ ܕܒܰܡܦܰܬܟܽܘܬܳܐ ܪܰܒܬܳܐ ܐܶܬܺܝܕܰܥܘ: ܘܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܘܟܳܪ̈ܽܘܙܶܐ ܟܰܕ ܦܰܢܛܺܝܩܽܘܣܛܺܝܢܳܐܝ̣ܬ ܟܽܠܰܢ ܡܶܬܟܰܢܫܺܝܢܰܢ: ܠܰܘ ܒܥܶܠܺܝܬܳܐ ܝܰܬܺܝܪܳܐܝ̣ܬ: ܐܶܠܐܴ ܒܬܶܐܘܳܪܺܝܰܐ ܗ̇ܳܝ ܕܪܳܡܳܐ ܡ̣ܶܢ ܟܽܠܗܶܝܢ ܗܽܘܠܳܢܳܝ̈ܳܬܳܐ ܐ̱ܪܳܙܳܢܳܐܝ̣ܬ: ܠܩܳܠܐܴ ܕܝܰܘܡܳܢܳܐ ܗܘܳܐ ܡܶܢܫܶܠܝ ܡ̣ܶܢ ܫܡܰܝܳܐ ܐܰܝܟ ܡܰܫܒܳܐ ܕܪܽܘܚܳܐ ܥܰܙܺܝܙܬܳܐ: ܘܢܶܣܬܰܟܰܠ ܠܥܶܠ ܡ̣ܶܢ ܣܽܘܟܳܝܰܢ ܐܶܬܺܝܗܶܒ ܠܰܢ: ܡܽܘܠܟܳܢܳܐ ܕܪܽܘܚܳܐ ܗ̇ܰܘ ܕܥܳܡܰܪ ܒܰܫܡܰܝ̈ܳܐ ܪ̈ܳܡܶܐ ܘܡ̣ܶܢ ܬܰܡܳܢ ܐܳܬܶܐ ܕܰܢܚܰܘܶܐ ܓܰܢ̱ܒܳܪܽܘܬܶܗ ܘܫܽܘܒܚܳܐ ܕܡܰܠܟܽܘܬܶܗ: ܟܰܕ ܣܳܓܕܺܝܢܰܢ ܘܡܰܘܕܶܝܢܰܢ ܠܰܚܙܳܬܶܗ ܕܪܽܘܚܳܐ ܕܚܺܝܠܬܳܐ ܠܐܴ ܡܣܰܝܒܪܺܝܢܰܢ ܘܰܐܟܚܕܳܐ ܢܶܒܪܽܘܟ: ܟܰܕ ܒܟܽܠܗܶܝܢ ܬܡܺܝ̈ܗܳܬܳܐ ܘܰܓܒܰܪ̈ܘܳܬܳܐ ܕܚܰܘܝܰܬ݀ ܡܳܪܽܘܬܶܗ ܡܶܫܬܰܘܕܥܺܝܢܰܢ: ܘܒܗ ܟܰܕ ܒܶܗ ܐܳܦ ܠܐܱܒܳܐ ܥܰܡܶܗ ܣܳܓܕܺܝܢܰܢ ܘܰܩܕܳܡ ܒܪܳܐ ܢܶܬܓܰܪܓܰܚ ܒܰܣܝܳܡ ܒܽܘܪ̈ܟܶܐ ܬܠܺܝܬܳܝ̈ܗܽܘܢ ܗ̇ܳܢܽܘܢ ܕܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܟܰܗܢܺܝܢ: ܟܰܕ ܡܦܺܝܣܺܝܢܰܢ ܠܳܗ̇ ܕܰܬܫܰܕܰܪ ܠܰܢ ܪ̈ܰܚܡܶܐ ܫܦܺܝ̈ܥܶܐ ܘܥܰܬܺܝܪ̈ܶܐ ܘܒܽܘܪ̈ܟܳܬܳܐ ܦܰܢܛܺܝܩܽܘܣܛܺܝ̈ܢܳܝܳܬܳܐ ܕܡܶܢܳܗ̇ ܘܰܐܬܢܳܢܳܐܝ̣ܬ ܥܰܬܺܝܪ̈ܶܐ ܕܠܐܴ ܡܶܬܦܰܣܩܺܝܢ ܘܠܐܴ ܡܨܰܦܪܺܝܢ ܘܠܐܴ ܡܪܰܡܫܺܝܢ: ܝܰܬܺܝܪ ܓܡܺܝܪܳܐܝ̣ܬ ܥܰܡ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܩܰܕܶܡܘ ܫܟܶܒܘ ܘܶܐܬܬܢܺܝܚܘ: ܡܶܛܽܠ ܕܠܳܗ̇ ܝ̇ܳܐܶܐ ܬܶܫܒܽܘܚܬܳܐ ܘܬܰܘܕܺܝܬܳܐ ܘܺܐܝܩܳܪܳܐ ܘܽܐܘܚܕܳܢܳܐ ܘܪܰܒܽܘܬ ܝܳܐܝܽܘܬܳܐ ܗܳܫܳܐ܀

ܦܝܪܡܐ

ܩܰܕܺܝܫܳܐ ܘܰܡܩܰܕܫܳܢܳܐ ܕܟܽܠ ܡܳܪܝܳܐ ܘܰܐܒܳܐ ܕܰܫܪܳܪܳܐ: ܗ̇ܰܘ ܕܩܰܕܶܫܬ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܒܝܰܕ ܠܶܫܳܢ̈ܶܐ ܕܢܽܘܪܳܐ ܘܚܰܘܺܝ ܒܗܽܘܢ ܡܰܥܒܕܳܢܽܘܬܶܗ ܘܚܰܝܠܶܗ: ܩܰܕܶܫܳܝܗܝ ܡܳܪܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ ܕܡܶܬܚܰܘܝܳܢܽܘܬܶܗ ܕܪܽܘܚܳܐ ܩܰܕܺܝܫܳܐ: ܘܫܰܟܶܢ ܠܰܢ ܒܶܗ ܚܽܘܣܳܝܳܐ ܘܫܽܘܒܩܳܢܳܐ ܕܺܝܠܰܢ ܘܕܰܟܳܐ ܠܠܶܒܰܘ̈ܳܬܰܢ ܡ̣ܶܢ ܟܽܠܶܗ ܝܰܥܪܳܐ ܕܰܚܛܺܝܬܳܐ: ܘܢܶܬܥܰܬܰܕ ܘܢܶܬܬܣܺܝܡ ܠܰܢ ܒܰܫܡܳܟ ܩܰܕܺܝܫܳܐ ܥܶܠܬܳܐ ܕܦܽܘܪܩܳܢܳܐ: ܟܰܕ ܟܽܠܫܳܥ ܒܪ̈ܰܚܡܶܐ ܡܶܣܬܰܥܪܺܝܢܰܢ: ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܚܘܬܡܐ

ܩܰܒܶܠ ܡܳܪܝ ܬܶܫܡ̈ܫܳܬܢܰ ܘܰܨܠܰܘ̈ܳܬܰܢ: ܕܰܒܥܺܐܕܳܐ ܗܳܢܳܐ ܕܦܰܢܛܺܝܩܽܘܣܛܺܝ ܩܰܪܶܒܢܰܢ ܠܳܟ ܥܰܡ ܬܶܫܒ̈ܚܳܬܳܐ ܘܗܽܘ̈ܠܳܠܐܷ ܕܥܺܝܪ̈ܶܐ ܫܡܰܝ̈ܳܢܶܐ: ܗ̇ܳܢܽܘܢ ܕܠܐܴ ܫܳܠܶܝܢ ܡ̣ܶܢ ܩܳܠܐܴ ܕܪܽܘܡܪܳܡܳܟ: ܘܗܰܒ ܠܰܢ ܕܪܽܘܚܳܢܳܐܝ̣ܬ ܐܰܟܘܳܬܗܽܘܢ ܢܙܰܡܰܪ ܠܳܟ ܫܽܘܒܚܳܐ ܠܐܴ ܫܰܠܘܳܐܝ̣ܬ: ܘܠܐܱܒܳܐ ܝܳܠܽܘܕܳܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܟܝܳܢܳܐ ܟܰܣܝܳܐ ܘܰܓܢܺܝܙܳܐ ܕܠܶܗ ܟܰܕ ܠܶܗ ܐܝ̣ܬ ܒܰܠܚܽܘܕܳܝܽܘܬܳܐ ܫܽܘܠܛܳܢܳܐ ܡܬܽܘܡܳܝܳܐ ܦܪܺܝܫ ܒܰܬܠܳܬܳܐ ܘܰܚܠܺܝܛ ܒܺܐܝܬܽܘܬܳܐ: ܚܰܕ ܐܰܒܳܐ ܕܒܰܒܪܳܐ ܡܶܬܺܝܕܰܥ: ܚܰܕ ܒܪܳܐ ܕܒܰܐܒܳܐ ܡܶܫܬܰܒܰܚ: ܚܰܕ ܪܽܘܚܳܐ ܕܒܰܐܒܳܐ ܘܒܰܒܪܳܐ ܬܽܘܒ ܡܶܬܗܰܝܡܰܢ: ܐܺܝܬܝܳܐ ܓܢܺܝܙܳܐ ܕܠܐܴ ܦܽܘܪܳܫ ܫܽܘ̈ܟܳܢܰܘܗܝ ܘܫܽܘܡܳܗܰܘ̈ܗܝ ܡ̣ܶܢ ܒܪ̈ܰܝܳܐ ܘܰܥܒܺܝ̈ܕܶܐ ܡܶܬܬܰܪܓܡܺܝܢ: ܘܝܽܘܩܢܳܐ ܕܰܩܢܽܘ̈ܡܰܘܗܝ ܠܐܴ ܡܶܬܡܰܠܠܺܝܢ: ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܡܒܰܝܳܢܳܐ ܪܽܘܚܳܐ ܩܰܕܺܝܫܳܐ ܗ̇ܰܘ ܢܰܨܺܝܚܳܐ ܘܰܗܕܺܝܪ ܒܫܽܘ̈ܟܳܢܶܐ ܐܠܰܗܳܝ̈ܶܐ: ܗ̇ܰܘ ܕܗ̣ܽܘ ܐܰܪܶܙ ܠܚܰܙܳܝ̈ܶܐ ܕܡ̣ܶܢ ܩܕܺܝܡ ܐ̱ܪ̈ܳܙܶܐ ܫܒܺܝ̈ܚܶܐ ܘܰܐܠܳܗܳܝ̈ܶܐ: ܟܰܕ ܡܗܰܕܶܐ ܗܘܳܐ ܘܰܡܫܰܒܶܠ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ ܠܘܳܬ ܒܰܝܬܳܝܽܘܬܳܐ ܐܠܰܗܳܝܬܳܐ ܘܰܡܫܰܟܢܳܢܺܝܬܳܐ ܕܚܰܝ̈ܶܐ ܛܽܘܒܬܳܢ̈ܶܐ: ܡܰܥܒܕܳܢ̈ܘܳܬܳܐ ܐܠܰܗܳܝ̈ܳܬܳܐ ܒܗܽܘܢ ܐܰܒܪܶܩ ܒܝܰܕ ܡܰܘܗ̈ܒܳܬܳܐ ܘܫܽܘ̈ܟܳܢܶܐ ܕܡܶܢܶܗ: ܗ̇ܰܘ ܓܳܡܽܘܪܳܐ ܕܡܰܥܒܕܳܢܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ: ܟܰܕ ܥܰܠ ܫܠܺܝ̈ܚܶܐ ܒܰܕܡܽܘܬ ܠܶܫܳܢ̈ܶܐ ܢܽܘܪ̈ܳܢܳܝܶܐ ܐܰܙܠܶܓ: ܘܰܠܗܰܘ̈ܢܶܐ ܘܠܶܒܰܘ̈ܳܬܳܐ ܕܺܝܠܗܽܘܢ ܫܰܠܗܶܒ ܒܪܶܬܚܳܐ ܕܚܽܘܒܳܐ ܘܠܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ ܒܟܽܠܳܗ̇ ܥܳܡܰܪܬܳܐ ܐܰܟܪܶܙܘ ܫܰܪܰܪܘ: ܗ̇ܰܘ ܕܟܰܕ ܚܰܕ ܡܶܢܳܗ̇ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܛܽܘܒܬܳܢܳܝܬܳܐ ܐܺܝܬܰܘܗܝ ܥܰܡܗܽܘܢ ܐܶܬܚܙܺܝ ܩܕܳܡ ܥܰܡ̈ܡܶܐ ܘܡܰܠܟ̈ܶܐ ܘܫܰܠܺܝܛܳܢ̈ܐ ܘܶܐܡܘ̈ܳܬܳܐ ܘܰܒܢܰܝ̈ܳܐ ܕܺܐܝܣܪܳܐܶܝܠ ܒܝܰܕ ܐܳܬܘ̈ܳܬܳܐ ܐܳܦ ܬܶܕܡܪ̈ܳܬܳܐ ܕܒܺܐܝ̈ܕܰܝܗܽܘܢ ܣܳܥܰܪ ܗܘܳܐ ܘܰܡܥܰܕܰܪ ܗܘܳܐ ܠܗܽܘܢ ܒܰܐܓܽܘ̈ܢܶܐ ܕܺܝܠܗܽܘܢ: ܡܨܰܒܬܳܢܳܐ ܕܥܺܕܬܳܟ ܒܫܽܘ̈ܟܳܢܶܐ ܐܠܰܗܳܝ̈ܶܐ ܘܰܡܩܰܕܫܳܢܳܐ ܘܡܰܐܠܗܳܢܳܐ ܕܓܶܢܣܳܐ ܕܺܝܠܰܢ ܕܰܟܪ̈ܺܝܣܛܝܳܢܶܐ: ܕܠܳܟ ܘܰܚܢܰܢ ܐܰܚܺܝ̈ܕܰܝ ܬܰܩܕܳܐ ܐܰܘܟܺܝܬ ܝܽܘܠܦܳܢܗܽܘܢ ܣܳܓܕܺܝܢܰܢ: ܘܟܽܠܰܢ ܡܥܰܕܥܕܺܝܢܰܢ ܥܺܐܕ̈ܶܐ ܕܰܡܕܰܒܪܳܢܽܘܬܳܐ ܡܶܬܟܰܫܦܺܝܢܰܢ: ܕܬܶܫܪܶܐ ܘܬܶܥܡܰܪ ܒܰܢ ܡܦܺܝܣܺܝܢܰܢ: ܘܡܶܢܟܽܠ ܙܢܰܝ̈ܳܐ ܘܚܽܘ̈ܫܳܒܶܐ ܫܟܺܝܪ̈ܶܐ ܕܰܚܛܺܝܬܳܐ ܕܰܟܳܐ ܠܰܢ: ܐܰܝܟܰܢܳܐ ܕܢܶܫܬܰܘܥܳܟ ܕܰܐܠܳܗܳܐ ܫܰܪܺܝܪܳܐ ܕܠܐܴ ܦܽܘܠܳܓ ܐܺܝܬܰܝܟ ܘܰܦܫܽܘܛ ܠܠܶܫܳܢܰܝ̈ܢ ܠܡܰܘܕܳܝܽܘ ܠܳܟ ܒܢܰܦܫܳܐ ܕܟܺܝܬܳܐ: ܘܰܐܪܟܶܢ ܠܨܰܘܪ̈ܰܝܢ ܠܡܶܣܓܰܕ ܠܳܟ ܒܚܽܘܒܳܐ ܥܰܡ ܪܶܚܡܬܳܐ ܘܣܶܓܕܬܳܐ ܫܰܪܺܝܪܬܳܐ ܕܡܶܬܬܚܺܝܒܳܐ ܠܡܳܪܽܘܬܳܟ: ܘܢܰܕܥܳܟ ܫܰܪܺܝܪܳܐܝ̣ܬ ܥܰܡ ܐܰܒܳܐ ܘܰܒܪܳܐ ܚܰܕ ܚܰܝܠܐܴ ܚܰܕ ܨܶܒܝܳܢܳܐ: ܚܕܳܐ ܐܽܘܣܺܝܰܐ ܚܕܳܐ ܪܺܝܫܳܢܽܘܬܳܐ: ܚܰܕ ܫܽܘܠܛܳܢܳܐ ܕܰܠܟܽܠ ܐܰܚܺܝܕ ܡܳܪܳܢܳܐܝ̣ܬ ܘܟܽܠ ܒܶܗ ܡܶܬܬܩܺܝܡ ܬܽܘܩܳܢܳܐܝ̣ܬ: ܘܠܐܴ ܒܠܺܝܠܐܴܝܬ ܘܠܐܴ ܐܰܫܺܝܕܳܐܝ̣ܬ ܡܶܢܳܟ ܢܩܰܒܶܠ ܘܡܶܢܳܟ ܢܶܣܰܒ: ܢܽܘܗܪܳܐ ܠܡܰܕ̈ܥܰܝܢ ܘܚܶܟܡܬܳܐ ܠܣܽܘܟܳܠܰܢ ܘܰܥܛܳܝܳܐ ܠܣܰܟ̈ܠܘܳܬܰܢ: ܘܕܽܘܟܳܝܳܐ ܘܚܽܘܠܡܳܢܳܐ ܠܦܰܓܪ̈ܰܝܢ: ܘܩܰܕܺܝܫܽܘܬܳܐ ܠܢܰܦ̈ܫܳܬܰܢ: ܘܚܽܘܣܳܝܳܐ ܘܫܽܘܒܩܳܢܳܐ ܠܰܢ ܘܰܠܥܰܢܺܝ̈ܕܰܝܢ: ܘܟܽܠܰܢ ܒܚܰܕܽܘܬܳܐ ܢܰܣܶܩ ܫܽܘܒܳܚܐ ܘܬܰܘܕܺܝܬܳܐ: ܘܢܶܦܪܽܘܥ ܩܽܘܒܳܠ ܛܰܝܒܽܘܬܳܐ ܠܳܟ ܐܠܰܗܳܐ ܪܽܘܚܳܐ ܩܰܕܺܝܫܳܐ: ܘܠܐܱܒܳܐ ܗ̇ܰܘ ܕܡܶܢܶܗ ܢܳܣ̇ܶܒ: ܘܠܰܒܪܳܐ ܫܘܶܐ ܒܰܡܬܽܘܡܳܝܽܘܬܳܐ ܗܳܫܳܐ܀

 

 

 

ܬܘܒ ܛܟܣܐ ܕܝܘܡ ܐܪܒܥܐ ܕܚܘܪ̈ܐ

ܩܕܡܝܬ ܨܠܘܬܐ ܕܫܘܪܝܐ

ܚܰܕܳܐ ܠܰܢ ܡܳܪܝܳܐ ܐܠܰܗܳܐ ܒܝܰܘܡܳܐ ܕܰܩܝܳܡܬܳܟ: ܘܰܐܦܨܰܚ ܠܟܽܠܰܢ ܒܥܰܕܥܺܐܕܰܝ̈ܟ ܘܰܐܢܗܰܪ ܠܰܢ ܒܢܽܘܗܪܳܟ ܡܰܢܗܰܪ ܟܽܠ: ܘܚܰܪܰܪ ܠܰܢ ܡ̣ܶܢ ܥܰܒܕܽܘܬܳܐ ܕܳܐܟܶܠܩܰܪܨܳܐ: ܐܰܝܟܰܢܳܐ ܕܢܶܦܠܽܘܚ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܟܰܕ ܥܳܒܕܺܝܢܰܢ ܨܶܒܝܳܢܳܟ ܘܠܐܴ ܣܳܛܶܝܢܰܢ ܡ̣ܶܢ ܦܽܘܩܕܳܢܰܝ̈ܟ: ܢܶܫܬܘܶܐ ܟܽܠܰܢ ܠܚܰܪܬܳܐ ܛܳܒܬܳܐ ܕܰܡܠܰܟܬ ܠܥܳܒ̈ܕܰܝ ܨܶܒܝܳܢܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܢܽܘܗܪܳܐ ܢܰܗܺܝܪܳܐ ܘܩܰܕܡܳܝܳܐ ܕܰܒܢܽܘܗܪܶܗ ܢܳܗܪܺܝܢ ܢܰܗܺܝܪ̈ܶܐ: ܘܡܶܬܬܰܨܡܚܺܝܢ ܟܽܠ ܨܶܡܚܺܝ̈ܢ ܘܡܰܢܗܰܪ ܟܽܠ ܣܰܘ̈ܦܺܝܢ: ܘܢܳܛܰܚ ܥܰܠ ܟܽܠ ܓܰܒܺܝ̈ܢ ܘܡܶܬܬܰܙܠܓܺܝܢ: ܠܗ̇ܰܘ ܢܽܘܗܪܳܐ ܫܰܪܺܝܪܳܐ ܕܰܒܝܰܘܡܳܐ ܪܒܺܝܥܳܝܳܐ ܒܪܳܐ ܘܰܐܬܩܶܢ ܬܪܶܝܢ ܢܰܗܺܝܪ̈ܶܐ ܪܰܘܪ̈ܒܶܐ: ܚܰܕ ܠܫܽܘܠܛܳܢܳܐ ܕܺܐܝܡܳܡܳܐ: ܘܰܐ̱ܚܪܺܢܳܐ ܠܫܽܘܠܛܳܢܳܐ ܕܠܺܠܝܳܐ: ܘܰܒܝܰܕ ܡܶܬܬܙܺܝܥܳܢܽܘܬܗܽܘܢ ܘܡܰܪܕܺܝܬܗܽܘܢ ܥܰܠ ܬܶܫܒܽܘܚܬܶܗ ܢܩܺܝܡܽܘܢ ܠܐܱܪܒܰܥ ܦܶܢ̈ܝܳܢ: ܠܗ̇ܰܘ ܕܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܐܰܢܛܺܝܦܰܛܺܝ̈ܩܳܝܶܐ ܒܪܳܝܗܝ ܠܒܰܪܢܳܫܳܐ ܘܰܒܨܰܠܡܶܗ ܡܰܠܟܳܝܳܐ ܨܳܪܶܗ ܘܨܰܒܬܶܗ: ܘܫܰܠܺܝܛܳܐ ܥܰܠ ܐܰܪܒܰܥ ܦܶܢ̈ܝܳܬܳܐ ܥܰܒܕܶܗ: ܘܰܕܢܶܗܘܶܐ ܡܫܰܒܰܚ ܠܚܰܝܠܐܴ ܛܥܺܝܢ ܟܽܠܐܴ ܥܰܡ ܐܰܪܒܰܥ ܚܰܝ̈ܘܳܢ ܟܕܺܝ̈ܢܰܝ ܒܡܰܪܟܰܒܬܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܕܪܐ

ܐܠܰܗܳܐ ܗ̇ܰܘ ܬܡܺܝܗܳܐ ܘܠܐܴ ܡܶܬܡܰܠܠܳܢܳܐ: ܓܰܐܝܳܐ ܘܓܰܢ̱ܒܳܪܳܐ ܘܠܐܴ ܡܶܣܬܰܝܟܳܢܳܐ: ܗ̇ܰܘ ܕܥܰܠ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ ܡܶܬܓܰܝܰܐܐ ܘܡܶܬܝܰܩܰܪ: ܘܰܐܪܒܰܥ ܚܰܝ̈ܘܳܢ ܟܕܰܢ ܒܳܗ̇ ܠܫܽܘܒܚܳܐ ܕܺܐܝܬܽܘܬܶܗ: ܢܽܘܗܪܳܐ ܘܡܰܢܗܪܳܢܳܐ ܕܟܽܠ ܒܶܪ̈ܝܳܬܳܐ: ܘܡܰܘܗܰܒܬܳܐ ܛܳܒܬܳܐ ܘܰܡܫܰܡܠܳܝܬܳܐ ܕܡܶܢܳܗ̇ ܪ̈ܳܕܝܳܢ ܘܡܶܬܬܰܝ̈ܬܝܳܢ ܡܶܬܢܰܗܪ̈ܳܢܘܳܬܳܐ ܠܐܴ ܡܶܬܡܰܠܠܳܢ̈ܝܳܬܳܐ ܘܡܶܬܬܰܨܡܚܳܢ̈ܘܳܬܳܐ ܠܰܥܒܺܝ̈ܕܶܐ ܘܡܶܢܳܗ̇ ܥܳܬܪܺܝܢ ܡܠܺܝ̈ܠܐܷ ܘܠܐܴ ܡܠܺܝ̈ܠܐܷ. ܗ̇ܰܘ ܕܰܒܦܽܘܩܕܳܢܶܗ ܡܳܪܳܢܳܝܳܐ: ܒܝܰܘܡܳܐ ܪܒܺܝܥܳܝܳܐ ܣܕܰܪ ܠܢܰܗܺܝܪ̈ܶܐ ܪܰܘܪ̈ܒܶܐ ܘܟܰܘ̈ܟܒܶܐ ܣܕܺܝܪ̈ܶܐ ܡܦܰܬܟ̈ܰܝ ܒܟܽܠ ܐܶܣܟܺܝ̈ܡܺܝܢ: ܒܝܰܕ ܡܶܬܕܰܪܓܳܢܽܘܬܳܐ ܕܓܺܝ̈ܓܠܐܷ ܡܗܰܠܟܳܢ̈ܝܳܬܳܐ ܫܶܡܫܳܐ ܪܰܒܳܐ ܥܰܒܕܶܗ ܡܰܠܟܳܐ ܥܰܠ ܟܽܠ ܢܰܗܺܝܪ̈ܶܐ: ܒܝܰܘܡܳܐ ܪܒܺܝܥܳܝܳܐ ܐܰܝܟ ܒܰܪ ܟܶܣܐܴܐ ܒܪܳܐ ܠܣܰܗܪܳܐ ܘܰܐܝܟ ܚܰܝ̈ܘܳܬܳܐ ܘܺܐܝܠܳܢ̈ܶܐ ܘܒܰܪܢܳܫܳܐ ܡܫܰܡ̈ܠܝܰܝ ܩܰܘ̈ܡܳܬܳܐ ܘܡ̣ܶܢ ܫܶܡܫܳܐ ܡܰܠܟܳܝܳܐ ܢܩܰܒܶܠ ܢܽܘܗܪܳܐ. ܒܝܰܘܡܳܐ ܪܒܺܝܥܳܝܳܐ ܐܰܪܒܰܥ ܦܶܢ̈ܝܳܢ ܐܶܬܟ̈ܰܢܺܝ ܐܳܦ ܐܶܫܬܰܡܰܗ̈ܝ: ܕܡ̣ܶܢ ܡܰܕܢܚܳܐ ܕܢܰܚ ܫܶܡܫܳܐ ܠܡܰܢܗܳܪܽܘ: ܘܰܒܬܰܝܡܢܳܐ ܥܰܡ ܡܶܐܙܰܠܬܶܗ ܪܳܕܶܐ ܘܡܶܬܪܰܒܶܐ: ܘܰܒܡܰܥܪܒܳܐ ܡܶܬܬܢܺܝܚ ܘܡܶܬܩܒܰܪ: ܘܰܒܓܰܪܒܝܳܐ ܒܓܶܠܝܳܐ ܥܳܒܰܪ ܕܢܺܐܬܶܐ ܠܕܶܢܚܳܐ: ܘܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܣܰܩܽܘ̈ܒܠܳܝܰܝ ܟܝ̈ܳܢܶܐ: ܡܰܝ̈ܳܐ ܘܥܰܦܪܳܐ ܘܳܐܐܰܪ ܘܢܽܘܪܳܐ ܪܰܟܶܒ ܠܒܰܪܢܳܫܳܐ: ܟܰܕ ܡ̣ܶܢ ܐܰܪܒܰܥ ܟܶܢ̈ܦܶܝܗ̇ ܕܰܐܪܥܳܐ ܕܰܓܒܺܝܠܬܶܗ ܥܰܠ ܐܺܝܕܰܘ̈ܗܝ ܩܰܕܺܝ̈ܫܳܬܳܐ ܫܩܰܠ ܘܰܒܝܽܘܩܢܳܐ ܦܰܐܝܳܐ ܕܪܰܒܽܘܬܶܗ ܥܰܒܕܶܗ ܘܚܰܕ ܟܝܳܢܳܐ ܣܳܡ ܒܶܗ ܒܰܐܪܒܥܳܐ ܐܶܣܛܽܘ̈ܟܣܶܐ ܩܰܝܳܡ ܠܥܳܠܡܳܐ ܘܠܐܱܪܒܰܥ ܡܰܛܪ̈ܳܢ ܡܶܬܦܰܠܓܺܝܢ ܫܳܥ̈ܰܝ ܐܺܝܡܳܡܳܐ ܘܠܺܠܝܳܐ: ܠܟܽܠ ܡܰܛܰܪܬܳܐ ܥܒܰܕ ܫܳܥ̈ܶܐ ܬܠܳܬ: ܐܰܪܒܰܥ ܐܺܝܡܳܡܳܝ̈ܳܬܳܐ ܐܳܦ ܐܰܪܒܰܥ ܠܺܠܝ̈ܳܝܳܬܳܐ: ܐܰܪܒܰܥ ܪ̈ܽܘܚܺܝܢ ܦܩܰܕ ܕܰܢܕܰܒܪ̈ܳܢ ܠܫܶܡܫܳܐ ܗܳܢܳܐ ܩܰܐܐܱܩܺܝܣ ܡܰܐܐܱܣܺܝܣ ܡܰܥܪܒܳܝܬܳܐ ܕܰܡܩܰܒܠܐܴ ܠܶܗ: ܒܰܐܪܺܝܣ ܓܰܪܒܝܳܝܬܳܐ ܕܬܳܪܨܳܐ ܠܶܗ: ܘܩܰܐܛܺܝܳܘܣ ܬܰܝܡܢܳܝܬܳܐ ܕܰܡܣܰܡܟܳܐ ܠܶܗ: ܪܒܺܝܥܳܐܺܝܬ ܦܰܠܶܓ ܟܪܽܘܟܝܳܐ ܕܫܰܢ̱ܬܳܐ ܘܰܕܡܽܘܙܳܓܶܝ̈ܗ̇: ܠܬܰܕܐܴܐ: ܘܩܰܝܛܳܐ ܘܰܪܒܺܝܥܳܐ: ܘܣܰܬܘܳܐ ܘܰܐܪܒܥܳܐ ܫܽܘܚ̈ܠܳܦܺܝܢ ܣܳܡ ܒܶܗ ܕܰܐܪܒܰܥ ܪ̈ܽܘܚܺܝܢ ܕܰܢܕܰܒܪ̈ܳܢ ܠܶܗ. ܟܰܕ ܡܰܕܢܚܳܐ ܝܰܒܺܝܫܳܐ ܐܰܝܟ ܪܒܺܝܥܳܐ: ܘܓܰܪܒܝܳܐ ܕܩܰܪܺܝܪܳܐ ܐܰܝܟ ܣܰܬܘܳܐ: ܘܡܰܥܪܒܳܐ ܪܰܛܺܝܒܳܐ ܐܰܝܟ ܬܰܕܐܴܐ. ܘܬܰܝܡܢܳܐ ܚܰܡܺܝܡܳܐ ܐܰܝܟ ܩܰܝܛܳܐ. ܒܰܐܪ̈ܒܰܥܦܶܢܝܳܢ ܛܰܟܶܣ ܠܰܒܪܺܝܬܳܐ ܕܡܶܢܗܽܘܢ ܟܰܕ ܡܶܢܗܽܘܢ ܪܰܟܶܒ ܠܒܰܪܢܳܫܳܐ: ܘܥܰܠ ܕܰܪܚܺܝܡ ܥܠܰܘܗܝ ܟܽܠܗܽܘܢ ܦܰܪܢܶܣ ܠܰܡܫܰܡܳܫܽܘܬܶܗ: ܠܐܱܪܒܥܳܐ ܓܰܒܪ̈ܺܝܢ ܘܰܐܪܒܰܥ ܢܶܫܺܝ̈ܢ ܦܩܰܕ ܕܢܶܥܠܽܘܢ ܠܩܺܐܒܽܘܬܳܐ ܘܠܐܱܪܒܰܥ ܦܶܢ̈ܝܳܢ ܛܳܣܰܬ݀ ܒܛܽܘܦܣܳܐ ܕܰܨܠܺܝܒܳܐ: ܘܰܠܢܽܘܚ ܘܠܰܒܢܰܘ̈ܗܝ ܘܰܠܢܶܫܰܘ̈ܗܝ ܡ̣ܶܢ ܛܽܘܒܳܥܳܐ ܛܰܘܦܳܢܳܝܳܐ ܘܰܡܛܰܦܣܳܢܽܘܬܳܐ ܕܰܐܪܒܥܳܐ ܐܶܣܛܽܘ̈ܟܣܰܝ ܥܳܠܡܳܐ ܥܒܰܕܬ: ܠܡܽܘܫܶܐ ܒܛܽܘܪ ܣܺܝܢܰܝ ܐܰܦܶܣ ܕܡ̣ܶܢ ܐܰܪܒܥܳܐ ܥܶܩܳܪ̈ܶܐ ܢܪܰܟܶܒ ܠܰܡܫܺܝܚܳܐ ܕܰܡܫܺܝܚܽܘܬܳܐ ܕܡܰܠܟ̈ܶܐ ܘܰܢܒܺܝ̈ܶܐ ܘܟܳܗ̈ܢܶܐ: ܘܡ̣ܶܢ ܡܽܘܪܳܐ ܘܩܺܝܢܽܘܡܽܘܢ: ܘܩܰܣܝܳܐ: ܘܙܰܝܬܳܐ ܪܰܟܒܶܗ ܘܰܦܩܰܕ ܕܒܰܝܬܳܝ̈ܶܐ ܢܶܬܡܰܫܚܽܘܢ ܒܶܗ: ܘܢܽܘܟܪ̈ܳܝܶܐ ܠܐܴ ܢܶܬܩܰܪܒܽܘܢ ܠܶܗ: ܘܰܐܪܒܰܥ ܦܶܢ̈ܝܳܢ ܩܢܶܐ ܗܘܳܐ ܛܽܘܪܳܐ ܣܺܝܢܳܝܳܐ ܘܰܠܦܽܘܬ ܦܶܢ̈ܝܳܬܶܗ ܫܡܳܗܰܘ̈ܗܝ ܡܶܫܬܰܚܠܦܺܝܢ: ܣܺܝܢܰܝ: ܘܣܳܥܺܝܪ: ܘܦܳܪܳܢ: ܘܚܽܘܪܺܝܒ: ܘܰܐܪܶܙ ܒܶܗ ܛܽܘܦܣܳܐ ܕܡܰܪܟܰܒܬܳܐ ܦܬܺܝܟܰܬ݀ ܚܶܙܘ̈ܶܐ ܕܰܐܪܒܰܥ ܕܶܡܘ̈ܳܢ: ܐܰܪܒܰܥ ܩܰܪ̈ܢܳܢ ܐܶܫܬܰܡ̈ܰܛܝ ܥܰܠ ܐܺܝܣܪܳܐܶܝܠ ܠܰܡܚܰܒܠܳܢܽܘܬܶܗ: ܬܰܓܠܰܬܦܰܠܣܰܪ: ܘܫܰܠܶܡܢܰܥܣܰܪ: ܘܣܰܢܚܳܪܺܝܒ: ܘܢܰܒܽܘܟܰܕܢܳܨܰܪ: ܟܰܕ ܠܰܕܡܽܘܬܳܐ ܐܳܕܳܡܳܝܬܳܐ ܡ̇ܰܢ ܕܰܪܒܺܝܥܳܝܽܘܬ ܐܶܣܛܽܘ̈ܟܣܶܐ ܐܶܬܥܰܛܰܦ ܘܠܐܱܪܒܥܳܐ ܗ̇ܳܢܽܘܢ ܕܰܢܦܰܠܘ ܒܰܐܪܒܥܳܐ ܕܰܠܒܶܫ ܐܰܩܺܝܡ: ܘܥܰܠ ܗ̇ܳܝ ܡ̣ܶܢ ܐܰܪܒܥܳܐ ܥܒܰܕ ܬܽܘܪܣܳܝܶܗ: ܘܰܒܚܰܕ ܟܝܳܢܳܐ ܕܰܡܠܰܚܡܺܝܢ ܠܗ̇ܰܘ ܩܰܕܡܳܝܳܐ ܣܳܡ ܐܶܢܽܘܢ: ܠܩܰܒܪܳܐ ܩܰܕܡܳܝܳܐ ܣܳܡ ܐܶܢܽܘܢ: ܠܩܰܒܪܳܐ ܐܰܪܒܰܥ ܙܰܒ̈ܢܳܬܳܐ ܢܶܫ̈ܶܐ ܐܶܙ̈ܰܠܝ: ܒܢܳܓܰܗ ܚܰܕ ܕܫܰܒܰܝܴ̈ܐ: ܘܰܒܨܰܦܪܳܐ ܚܶܫܽܘܟܳܐ ܘܰܒܫܰܦܪܳܐ ܥܰܡܺܝܩܳܐ ܘܟܰܕ ܕܢܰܚ ܫܶܡܫܳܐ: ܘܰܐܪܒܰܥ ܙܰܒܢܺܝ̈ܢ ܗܦܰܟ̈ܝ ܢܶܫ̈ܶܐ ܠܥܶܠܺܝܬܳܐ ܟܰܕ ܛܥܺܝ̈ܢܳܢ ܣܰܒܪ̈ܳܬܳܐ ܕܢܽܘܚܳܡܳܐ. ܠܐܱܪܒܰܥ ܓܽܘܕܺܝ̈ܢ ܐܶܬܚܰܘܝܰܬ݀ ܩܝܳܡܬܳܐ ܡܫܰܒܰܚܬܳܐ: ܠܡܰܠܐܱܟ̈ܶܐ ܕܰܢܚܶܬܘ ܨܶܝܕ ܩܰܒܪܳܐ: ܘܰܠܢܳܛܽܘܪ̈ܶܐ ܕܰܚܙܰܘ ܚܬܳܡ̈ܶܐ ܘܛܰܒ̈ܥܶܐ ܕܫܰܪܺܝܪ̈ܺܝܢ: ܘܰܠܢܶܫ̈ܶܐ ܕܛܰܝܶܒ̈ܝ ܗܶܪ̈ܽܘܡܶܐ ܠܰܩܒܽܘܪܬܶܗ: ܐܳܦ ܠܬܰܠܡܺܝ̈ܕܶܐ ܕܰܢܗܰܝܡܢܽܘܢ ܗ̇ܰܘ ܡܳܐ ܕܶܐܬܡܰܠܰܠ ܠܗܽܘܢ: ܠܐܱܪܒܰܥ ܦܶܢ̈ܝܳܢ ܛܳܣܰܬ݀ ܣܒܰܪܬܳܐ ܐܶܘܢܓܶܠܳܝܬܳܐ: ܒܺܐܝ̈ܕܰܝ ܐܶܘܢܓܶܠܺܝ̈ܣܛܶܐ ܐܰܪܒܥܳܐ ܕܰܠܗܽܘܢ ܚܙܳܐ ܢܒܺܝܳܐ ܒܫܽܘܥܒܳܕ ܡܰܪܟܰܒܬܳܐ ܗ̇ܳܝ ܢܽܘܪܳܢܳܝܬܳܐ. ܘܟܰܕ ܠܡܺܐܢܳܐ ܗ̇ܰܘ ܕܰܐܣܺܝܪ ܒܰܐܪܒܰܥ ܩܰܪ̈ܢܳܢ: ܘܫܳܐܶܒ ܡ̣ܶܢ ܫܡܰܝܳܐ ܠܐܱܪܥܳܐ ܚܙܳܐ ܫܶܡܥܽܘܢ ܟܰܕ ܐܶܫܬܠܰܚ ܠܰܡܣܰܒܳܪܽܘ ܩܝܳܡܬܳܐ ܡܳܪܳܢܳܝܬܳܐ ܕܡܶܠܬܳܐ ܝܺܚܺܝܕܳܝܳܐ ܕܶܐܬܒܰܣܰܪ ܠܦܽܘܪܩܳܢܰܢ: ܟܰܕ ܠܡܺܐܢܳܐ ܗ̇ܰܘ ܕܰܚܙܳܐ ܫܶܡܥܽܘܢ ܐܶܬܒܰܠܗܺܝ: ܘܰܠܚܰܝ̈ܘܳܬܳܐ ܕܡܶܢܗܶܝܢ ܕܰܟ̈ܝܳܢ ܘܡܶܢܗܶܝܢ ܛܰܡ̈ܳܐܢ: ܒܒܰܪܬ ܩܳܠܐܴ ܬܠܺܝܬܳܝܬܳܐ ܕܶܐܡܪܰܬ݀ ܠܶܗ ܐܳܘ ܫܶܡܥܽܘܢ ܠܐܴ ܬܣܰܝܶܒ: ܩܽܘܡ ܟܽܘܣ ܘܰܐܟܽܘܠ: ܗ̇ܳܝ ܕܶܐܫܰܕܰܪ ܠܟܽܠ ܥܰܡ̈ܡܺܝܢ ܡܩܰܒܶܠ ܡܳܪܝܳܐ: ܕܟܽܠ ܕܰܡܗܰܝܡܶܢ ܘܡܶܬܬܰܠܡܰܕ ܠܰܣܒܰܪܬܳܐ ܐܶܘܢܓܶܠܳܝܬܳܐ ܡܶܬܥܰܠܐܷ ܠܪܰܘܡܳܐ ܕܡܰܠܟܽܘܬܳܐ ܕܰܫܡܰܝܳܐ: ܟܰܕ ܠܗܳܠܶܝܢ ܟܽܠܗܶܝܢ ܕܰܣܥܰܪܬ ܐܳܘ ܡܶܠܬܳܐ ܐܠܰܗܳܐ: ܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ ܟܳܬܒܺܝܢܰܢ: ܘܰܒܓܰܘ ܫܶܪ̈ܫܶܐ ܡܰܕܥܳܢܳܝ̈ܶܐ ܕܬܰܪ̈ܥܝܳܬܰܢ ܢܳܨܒܺܝܢܰܢ: ܘܰܒܪܰܒܽܘܬ ܬܶܕܡܪ̈ܳܬܳܟ ܬܳܗܪܺܝܢܰܢ ܘܡܶܬܕܰܡܪܺܝܢܰܢ: ܘܥܰܡ ܒܶܣ̈ܡܶܐ ܗܳܠܶܝܢ ܒܰܣܺܝ̈ܡܰܝ ܪܺܝܚܳܐ ܪܽܘܚܳܢܳܐܺܝܬ ܒܚܰܡܺܝܡܽܘܬܳܐ ܕܢܰܦܫܳܐ ܘܒܰܚܠܺܝܡܽܘܬܳܐ ܕܰܐܪܒܥܳܐ ܐܶܣܛܽܘ̈ܟܣܶܐ ܡܩܰܪܒܺܝܢܰܢ ܠܳܟ. ܒܝܰܘܡܳܐ ܗܳܢܳܐ ܕܥܺܐܕܳܐ ܕܰܩܝܳܡܬܳܟ ܦܳܪܽܘܩܳܝܬܳܐ: ܘܗܰܒ ܠܰܢ ܕܰܐܪܒܺܝܥܳܐܺܝܬ ܢܶܬܟܕܰܢ ܒܬܶܫܡܫܬܳܟ: ܘܰܐܢܗܰܪ ܠܢܰܦܫܳܐ ܘܦܰܓܪܳܐ ܒܢܽܘܗܪܳܟ: ܘܒܰܐܪܒܰܥ ܡܰܛܪ̈ܳܬܳܐ ܢܙܰܡܰܪ ܬܶܫܒ̈ܚܳܬܳܟ: ܘܥܰܠ ܐܰܦ̈ܰܝ ܦܽܘܪ̈ܢܳܣܰܝܟ ܕܰܠܘܳܬܰܢ ܢܶܩܥܶܐ ܬܰܘܕ̈ܝܳܬܳܟ: ܘܕܰܠܐܴ ܠܰܢ ܡ̣ܶܢ ܝܰܡܳܐ ܛܰܘܦܳܢܳܝܳܐ: ܘܩܰܕܶܫ ܠܰܢ ܒܡܶܫܚܳܐ ܐܠܰܗܳܝܳܐ: ܘܰܦܪܽܘܩ ܠܰܢ ܡ̣ܶܢ ܫܰܒܛܳܐ ܚܺܐܦܳܢܳܝܳܐ: ܘܫܰܟܶܢ ܠܰܢ ܕܢܶܚܙܶܝܟ ܒܰܪܒܺܝܥܳܝܽܘܬܳܐ ܗ̇ܳܝ ܕܶܐܣܛܽܘ̈ܟܣܶܐ: ܘܰܕܢܰܣܠܐܷ ܦܽܘܠܚܳܢ ܐܺܝܕܰܝ̈ܳܐ ܘܢܰܘܕܶܐ ܠܛܰܝܒܽܘܬܳܟ ܒܦܽܘܪܩܳܢܳܐ ܕܺܝܠܰܢ: ܘܰܒܫܽܘܘܙܳܒܰܢ ܕܡ̣ܶܢ ܒܥܶܠܕ̈ܒܳܒܰܝܢ ܡܰܘܬܳܐ ܘܣܳܛܳܢܳܐ ܘܰܒܡܶܬܬܪܺܝܡܳܢܽܘܬܳܟ ܕܥܰܠ ܩܰܝܣܳܐ ܚܰܪܰܪܬ ܐܶܢܽܘܢ ܠܐܷܣܛܽܘ̈ܟܣܶܐ: ܘܒܳܟ ܢܶܬܩܰܕܰܫ ܒܟܳܪܽܘܙܽܘܬܳܐ ܕܰܐܪܒܥܳܐ ܐܶܘܢܓܶܠܺܝ̈ܣܛܶܐ ܢܰܘ̈ܣܶܐ ܕܕܰܟܝܽܘܬܳܐ ܘܥܰܡ ܫܠܺܝ̈ܚܶܐ ܘܬܰܠܡܺܝ̈ܕܳܬܳܐ: ܘܡܰܠܐܱܟ̈ܶܐ ܘܢܳܛܽܘܪ̈ܶܐ ܢܰܟܪܶܙ ܩܝܳܡܬܳܟ ܡܰܠܝܰܬ݀ ܚܰܕ̈ܘܳܬܳܐ: ܘܰܒܗܰܝܡܳܢܽܘܬܳܐ ܠܐܴ ܦܠܺܝܓܬܳܐ ܢܝܰܩܰܪ ܢܽܘܚܳܡܳܟ: ܘܰܒܬܰܘܕܺܝܬܳܐ ܠܐܴ ܣܕܺܝܩܬܳܐ ܢܚܰܒܶܒ ܐܶܢܶܝܢ ܠܫܽܘ̈ܡܳܬܳܟ: ܘܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܘܢܶܫܬܘܶܐ ܕܢܶܦܓܰܥ ܒܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܢܰܣܶܩ ܠܳܟ ܫܽܘܒܚܳܐ: ܘܬܰܘܕܺܝܬܳܐ܀

ܥܛܪܐ

ܦܺܝܪܡܳܐ ܡܰܚܝܳܢܳܐ ܕܪܰܥܺܝ ܠܐܱܒܽܘܗܝ ܥܰܡ ܒܶܪ̈ܝܳܬܶܗ: ܘܰܩܢܰܘ ܒܶܗ ܥܳܠܡ̈ܶܐ ܚܽܘ̈ܕܳܬܶܐ ܘܚܽܘܪܳܪܳܐ: ܐܰܫܘܳܐ ܠܰܢ ܕܥܰܡ ܫܶܡܥܽܘܢ ܘܝܽܘܚܰܢܳܢ ܢܗܰܝܡܶܢ ܘܢܰܫܰܪ ܕܠܰܛܝܳܪܳܐ ܕܚܰܝ̈ܶܐ ܥܰܠܢܰܢ: ܘܒܰܓܙܳܪܳܐ ܪܽܘܚܳܢܳܝܳܐ ܟܽܠܰܢ ܐܶܬܛܰܟܰܣܢܰܢ. ܘܥܰܡ ܥܺܝܪ̈ܶܐ ܘܡܰܠܐܱܟ̈ܶܐ ܐܶܬܚܰܠܰܛܢܰܢ ܘܰܣܒܰܪܬܳܐ ܡܰܚܝܳܢܺܝܬܳܐ ܩܰܒܶܠܢܰܢ: ܘܡ̣ܶܢ ܛܰܡܽܐܘܬܳܐ ܕܒܶܣܪܳܐ ܘܰܕܪܽܘܚܳܐ ܐܶܬܦܪܶܩܢܰܢ: ܘܟܰܕ ܒܳܟ ܚܳܕܶܝܢܰܢ ܘܡܰܘܕܶܝܢܰܢ ܘܰܡܫܰܒܚܺܝܢܰܢ ܘܣܳܓܕܺܝܢܰܢ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

ܚܘܬܡܐ

ܥܰܡ ܦܰܘܠܳܘܣ ܐܠܰܗܳܝܳܐ ܩܳܥܶܝܢܰܢ ܕܡ̣ܶܢ ܪܰܘܡܳܐ ܠܥܽܘܡܩܳܐ ܢܚܶܬܬ ܘܰܠܗܳܡܳܢ ܣܥܰܪܬ: ܘܠܰܚܒܺܝ̈ܫܶܐ ܕܒܳܗ̇ ܫܪܰܝܬ: ܘܚܰܝ̈ܶܐ ܥܰܡܳܟ ܐܰܝܬܺܝܬ ܘܰܠܟܽܠܰܢ ܦܰܠܶܓܬ: ܟܰܕ ܡ̣ܶܢ ܡܬܽܘܡܳܝܽܘܬܳܟ ܠܐܴ ܫܰܢܺܝܬ: ܐܰܡܠܶܟ ܡܳܪܝ ܒܰܝܢܳܬܰܢ ܫܰܝܢܳܐ ܘܰܫܠܳܡܳܐ: ܘܚܽܘܒܳܐ ܘܰܐܘܝܽܘܬܳܐ: ܘܫܰܪܬܰܚ ܟܽܠܶܗ ܩܰܢܳܝܽܘܬܰܢ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܗܳܫܳܐ ܘܰܒܟܽܠܙܒܰܢ܀

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܠܐܴ ܡܳܝܽܘܬܳܐ: ܘܠܐܴ ܚܳܫܽܘܫܳܐ ܕܚܰܫ ܒܰܒܣܰܪ ܒܨܶܒܝܳܢܶܗ: ܠܗ̇ܰܘ ܕܰܒܡܰܘܬܶܗ ܕܰܚܠܳܦܰܝܢ ܐܰܡܺܝܬܳܗ̇ ܠܡܺܝܬܽܘܬܰܢ ܘܒܰܩܝܳܡܬܶܗ ܦܳܪܽܘܩܳܝܬܳܐ ܕܡ̣ܶܢ ܩܰܒܪܳܐ ܫܰܟܶܢ ܠܰܢ ܠܐܴ ܡܶܬܚܰܒܠܳܢܽܘܬܳܐ: ܘܡ̣ܶܢ ܠܰܘܛܬܳܐ ܕܰܥܒܳܪ ܦܽܘܩܕܳܢܳܐ ܚܰܪܪܰܢ ܕܠܶܗ ܗ̣ܽܘ ܙܳܕܩܳܐ ܬܶܫܒܽܘܚܬܳܐ: ܘܠܶܗ ܗ̣ܽܘ ܦܰܐܝܳܐ ܬܰܘܕܺܝܬܳܐ: ܘܠܶܗ ܝܳܐܷܐ ܫܽܘܒܚܳܐ܀

ܣܕܪܐ

ܚܰܝܠܬܳܢܳܐ ܘܰܫܒܺܝܚ ܒܓܰܐܝܽܘܬܳܐ ܡܳܪܝܳܐ ܐܺܝܬܝܳܐ ܕܰܩܕܳܡ ܒܶܪ̈ܝܳܬܳܐ: ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܰܡܩܰܒܶܠ ܒܽܘܪ̈ܟܳܬܳܐ ܟܪ̈ܽܘܒܳܝܳܬܳܐ. ܡܬܽܘܡܳܝܳܐ ܕܡܰܟܶܟ ܢܰܦܫܶܗ ܒܨܶܒܝܳܢܶܗ ܘܰܢܚܶܬ ܠܐܱܪܥܳܐ ܘܣܰܝܒܰܪ ܟܽܠܗܶܝܢ ܐ̱ܢܳܫܳܝ̈ܳܬܳܐ ܪܳܡܳܐ ܕܰܡܬܰܚ ܫܡܰܝܳܐ ܐܰܝܟ ܝܳܪܺܝܥܬܳܐ: ܘܶܐܬܚܒܶܫ ܒܩܰܒܪܳܐ ܕܰܬܠܳܬ ܐܰܡܺܝ̈ܢ ܡܫܽܘܚܬܶܗ: ܟܰܣܝܳܐ ܘܰܓܢܺܝܙܳܐ ܕܠܐܴ ܡܰܨܝܳܐ ܥܰܝܢܳܐ ܢܽܘܪܳܢܳܝܬܳܐ ܕܬܶܬܒܰܩܶܐ ܒܰܗܕܺܝܪܽܘܬܳܐ ܕܓܰܐܝܽܘܬܶܗ: ܕܰܒܥܰܝ̈ܢܶܐ ܒܶܣܪ̈ܳܢܳܝܳܬܳܐ ܚܙܰܐܘܽܘܗܝ ܣܳܢ̈ܶܐܐ ܘܚܰܒܺܝ̈ܒܶܐ ܒܝܽܘܡ ܢܽܘܚܳܡܶܗ. ܓܳܒܽܘܠܐܴ ܕܥܳܠܡ̈ܶܐ ܕܰܓܒܺܝܠܐܴ ܡܶܫܬܰܢܶܝܢ ܥܰܠ ܩܶܛܠܶܗ: ܠܐܴ ܡܶܬܚܰܒܠܳܢܳܐ ܕܰܒܥܽܘܡܪܳܐ ܡܚܰܒܶܠ ܟܽܠ ܫܰܦܺܝܪ̈ܶܐ ܥܰܓܢܽܘܗܝ ܡܶܬܚܰܒܠܳܢ̈ܶܐ: ܙܰܟܳܝܳܐ ܘܪܰܒ ܙܰܟܳܝ̈ܶܐ ܕܰܐܝܟ ܚܰܝܳܒ ܡܰܘܬܳܐ ܐܰܫܠܡܽܘܗܝ ܡܳܝܽܘ̈ܬܶܐ: ܚܰܝܳܐ ܘܡܰܚܝܳܢܳܐ ܕܡܶܫܬܰܥܠܶܝܢ ܡܰܪ̈ܳܚܶܐ ܥܰܠ ܡܰܟܺܝܟܽܘܬܶܗ ܘܠܐܴ ܡܶܬܬܦܺܝܣܺܝܢ ܠܟܽܠ ܫܶܡܥܳܐ ܕܰܢܒܺܝ̈ܰܘܳܬܳܐ ܕܟܽܠ ܝܽܘܡ ܡܶܬܟܰܪ̈ܙܳܢ ܡܶܛܽܠ ܦܰܓܪܳܢܽܘܬܶܗ: ܟܰܕ ܚܰܕ ܕܒܰܕܡܳܐ ܕܥܶܢ̈ܒܶܐ ܬܰܟܣܺܝܬܶܗ ܡܚܰܘܰܪ: ܟܰܕ ܡܚܰܘܶܐ ܕܒܰܕܡܶܗ ܡܫܺܝܓ ܠܥܳܠܡܳܐ ܡ̣ܶܢ ܚܛܺܝܬܳܐ ܘܰܕܠܰܘ ܡ̣ܶܢ ܙܰܪܥܰܐ ܗ̱̇ܘ ܕܓܰܒܪܳܐ ܐܰܝܟ ܕܡܳܐ ܕܥܶܢ̈ܒܶܐ. ܘܰܐ̱ܚܪܺܢܳܐ ܐܶܡܰܪ ܐܶܢ ܫܰܦܺܝܪ ܒܥܰܝ̈ܢܰܝܟܽܘܢ ܗܰܒ ܠܺܝ ܐܰܓܪܝ ܘܠܐܴ ܛܳܠܡܺܝܢ ܐܢ̱ܬܽܘܢ ܠܺܝ: ܘܰܐ̱ܚܪܺܢܳܐ ܝܰܗܒܘ ܬܠܳܬܺܝܢ ܕܟܶܣ̈ܦܶܐ ܕܡܰܘ̈ܗܝ ܕܝܰܩܺܝܪܳܐ: ܚܰܕ ܐܶܡܰܪ ܕܘ̇ܝ ܠܪܰܫܺܝܥܳܐ ܒܺܝܫܳܐ ܡܶܛܽܠ ܕܰܥܒܳܕ̈ܰܘܗܝ ܡܶܬܦܪܰܥ: ܘܰܐ̱ܚܪܺܢܳܐ ܕܥܰܡܳܐ ܗܳܢܳܐ ܟܽܘ̈ܒܶܐ ܕܰܚܛܳܗܰܘ̈ܗܝ ܐܰܟܪܟܰܢܝ ܘܚܶܣܕܳܐ ܗܘܰܝܬ ܘܡܽܘܝܳܩܳܐ: ܚܰܕ ܐܶܡܰܪ ܠܐܴ ܢܶܗܘܶܐ ܒܝܰܘܡܳܐ ܗ̇ܰܘ ܢܽܘܗܪܳܐ: ܘܰܐ̱ܚܪܺܢܳܐ ܐܶܡܰܪ ܕܬܰܪ̈ܥܶܐ ܕܰܡܕܺܝܢ̱ܬܳܐ ܐܶܬܦܬܰܚܘ: ܘܒܶܝܬ ܡܰܠܟܽܘܬܳܐ ܢܦܰܠ: ܘܢܶܟ̈ܣܶܐ ܐܶܬܓܰܠܺܝܘ: ܘܗ̣ܺܝ ܢܰܦܫܳܐ ܥܰܡ ܐܶܡܗ̈ܳܬܗܽܘܢ ܣܶܠܩܰܬ݀. ܚܰܕ ܐܶܡܰܪ ܕܡ̣ܶܢ ܩܶܛܠܐܴ ܣܳܠܶܩ: ܘܰܐ̱ܚܪܺܢܳܐ ܐܶܡܰܪ ܕܓܰܐܝܽܘܬܳܐ ܘܥܽܘܫܢܳܐ ܠܳܒܶܫ: ܘܰܐ̱ܚܪܺܢܳܐ ܬܠܺܝܬܳܝܳܐ ܡܶܬܢܰܚܰܡ ܕܠܐܴ ܚܒܳܠܐܴ: ܠܰܢܒܺܝ̈ܰܘܳܬܳܐ ܕܰܢܒܺܝ̈ܶܐ ܫܰܡܠܺܝ: ܘܠܐܱܘ̈ܳܢܶܐ ܗܳܡܳܢܳܝ̈ܶܐ ܨܶܝܕ ܚܒܺܝ̈ܫܶܐ ܕܬܰܡܳܢ ܥܰܠ: ܘܰܠܡܽܘ̈ܟܠܐܷ ܦܰܣܶܩ ܘܣܽܘܛܡ̈ܶܐ ܬܰܒܰܪ ܘܠܐܱܣܺܝܪ̈ܶܐ ܚܰܪܰܪ ܘܰܠܣܳܛܳܢܳܐ ܫܰܦܶܠ. ܘܰܐܝܟܰܢܳܐ ܕܠܐܴ ܐܶܬܡܨܺܝܘ ܐܰܪ̈ܥܳܢܳܝܶܐ ܕܢܶܚܙܽܘܢܳܝܗܝ ܒܰܐܠܳܗܽܘܬܶܗ: ܦܰܓܪܳܐ ܐܶܬܥܰܛܰܦ ܘܡܰܠܶܠ ܥܰܡܗܽܘܢ: ܗܳܟܰܢܳܐ ܒܰܫܝܽܘܠ ܗܘܳܬ݀ ܢܰܦܫܶܗ: ܠܦܰܓܪܳܐ ܒܟܰܪܣܳܐ ܘܒܰܩܝܳܡܬܳܐ: ܟܰܕ ܐܠܰܗܽܘܬܶܗ ܕܠܐܴ ܦܽܘܪܫܳܢܳܐ ܗ̇ܳܝ ܡ̣ܶܢ ܐ̱ܢܳܫܽܘܬܶܗ: ܒܕܰܚܕܳܝܽܘܬܳܐ ܗ̇ܳܝ ܠܐܴ ܡܶܣܬܰܕܩܳܢܺܝܬܳܐ ܪ̈ܰܚܺܝܩܺܝܢ ܡܶܢܳܗ̇ ܩܢܽܘ̈ܡܶܐ ܘܰܟܝ̈ܳܢܶܐ ܘܦܰܪ̈ܨܽܘܦܶܐ ܬܪ̈ܰܝܳܢܶܐ. ܐܶܬܥܰܛܰܦ ܕܡܽܘܬܳܐ ܕܒܶܣܪܳܐ ܕܰܚܛܺܝܬܳܐ ܕܡܶܛܽܠܳܬܳܗ̇ ܕܰܢܚܰܝܒܺܝܗ̇ ܒܰܒܣܰܪ: ܘܩܳܡ ܘܰܗܘܳܐ ܪܺܝܫܺܝܬܳܐ ܕܕܰܡ̈ܟܶܐ: ܘܣܰܒܰܪ ܐܶܢܽܘܢ ܠܐܴ ܡܳܝܽܘܬܽܘܬܳܐ ܘܠܐܴ ܡܶܬܚܰܒܠܳܢܽܘܬܳܐ: ܐܰܝܠܶܠ ܒܺܝܫܳܐ ܒܰܚܙܳܬܶܗ: ܓܰܘܢܳܐ ܟܡܺܝܪܳܐ ܡܰܘܬܳܐ ܐܶܬܥܰܛܰܦ ܒܡܰܚܬܶܗ: ܙܰܘܥܳܐ ܠܶܒܫܰܬ݀ ܗܳܡܳܢ ܒܡܰܓܣܳܢܽܘܬܶܗ: ܣܳܛܳܢܳܐ ܩܦܰܣ ܫܽܘܠܛܳܢܶܗ: ܡܦܰܢܩܬܳܐ ܣܰܦܩܰܬ݀ ܓܽܘܥܠܳܢܳܗ̇: ܡܺܝ̈ܬܶܐ ܣܘܰܚܘ ܠܐܘܪܥܶܗ: ܚܰܝ̈ܠܐܷ ܫܡܰܝ̈ܳܢܶܐ ܚܰܘܺܝܘ ܢܽܘܚܳܡܶܗ: ܢܶܫ̈ܶܐ ܘܬܰܠܡܺܝ̈ܕܶܐ ܚܰܕܺܝܘ ܒܰܩܝܳܡܬܶܗ: ܘܚܰܨܳܐ ܝܰܗܒܘ ܙܳܩܽܘ̈ܦܶܐ ܒܕܶܢܚܶܗ. ܚܢܰܢ ܡܳܪܝ ܕܰܠܥܺܐܕܳܐ ܕܰܩܝܳܡܬܳܟ ܙܰܝܰܚܢܰܢ: ܘܥܶܛܪܳܐ ܕܒܶܣ̈ܡܶܐ ܠܐܻܝܩܳܪܳܐ ܕܡܳܪܽܘܬܳܟ ܐܰܥܛܰܪܢܰܢ: ܘܰܕܚܰܕ ܗ̣ܽܘ ܐܺܝܬܰܝܟ ܘܠܐܴ ܗܘܳܐ ܬܪܶܝܢ ܡܗܰܝܡܢܺܝܢܰܢ. ܐܰܘܕܳܐ ܒܰܢ ܕܰܐܘܕܺܝܢܰܢ ܒܳܟ ܘܫܰܘ̈ܬܳܦܶܐ ܕܰܚܠܽܘܠܳܟ ܥܒܶܕ ܠܰܢ: ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܢܽܘܚܳܡܳܐ ܕܟܽܠܳܗ̇ ܒܪܺܝܬܳܐ ܘܚܰܝ̈ܶܐ ܕܟܽܠ ܕܚܰܝ ܥܰܠ ܐܰܪܥܳܐ: ܠܗ̇ܰܘ ܕܰܐܡܺܝܬ ܠܡܰܘܬܳܐ ܒܢܶܩܥܶܗ ܘܚܰܕܺܝ ܠܰܟܡܺܝܪ̈ܶܐ ܒܒܽܘܝܳܐܴܐ ܪܰܒܳܐ ܕܰܩܝܳܡܬܶܗ. ܠܗ̇ܰܘ ܕܣܰܚܦܶܗ ܘܕܳܫܶܗ ܠܡܰܘܬܳܐ ܕܥܰܓܢܰܢ: ܘܫܰܘܙܒܰܢ ܘܦܰܨܝܰܢ ܡ̣ܶܢ ܐܺܝ̈ܕܰܘܗܝ: ܘܰܠܒܶܝܬ ܐܰܒܽܘܗܝ ܠܰܫܡܰܝܳܐ ܒܫܽܘܒܚܳܐ ܐܰܣܩܰܢ: ܘܡ̣ܶܢ ܝܰܡܺܝܢ ܫܳܠܽܘܚܶܗ ܐܰܘܬܒܰܢ: ܕܠܶܗ ܝܳܐܷܐ ܫܽܘܒܚܳܐ܀

ܣܕܪܐ

ܡܳܪܝܳܐ ܗ̇ܰܘ ܕܺܐܝܬܰܝܟ ܚܰܝܳܐ ܒܰܟܝܳܢܳܐ ܘܰܗܘܰܝܬ ܠܰܢ ܩܝܳܡܬܳܐ ܒܦܽܘܪܩܳܢܳܐ ܕܺܝܠܳܟ: ܗ̇ܰܘ ܕܰܒܠܶܒܰܘ̈ܳܬܳܐ ܕܰܐܝܠܶܝܢ ܕܰܡܗܰܝܡܢܺܝܢ ܒܳܟ ܠܚܰܝ̈ܶܐ ܫܳܪܶܐ ܐܰܢ̱ܬ: ܘܰܒܣܶܦܘ̈ܳܬܳܐ ܕܰܐܝܠܶܝܢ ܕܡܰܘܕܶܝܢ ܒܳܟ ܠܦܽܘܪܩܳܢܳܐ ܡܰܫܘܶܐ ܐܰܢ̱ܬ: ܪܳܡ ܕܽܘܟܪܳܢܳܟ ܡ̣ܶܢ ܡܰܘܬܳܐ: ܘܬܰܘܕܺܝܬܳܐ ܡܶܢ ܫܝܽܘܠ. ܐܶܨܛܒܺܝܬ ܩܰܕܺܝܫܳܐܺܝܬ ܘܚܰܝܠܬܳܢܳܐܺܝܬ ܘܶܐܬܡܨܺܝܬ ܠܡܶܛܥܰܡ ܡܰܘܬܳܐ: ܘܰܠܡܰܚܶܬ ܠܰܫܝܽܘܠ ܒܫܽܘܒܚܳܐ ܪܰܒܳܐ: ܐܰܝܟܰܢܳܐ ܕܰܠܦܰܓܪ̈ܶܐ ܐ̱ܢܳܫܳܝ̈ܶܐ ܒܝܰܕ ܒܶܣܪܳܐ ܕܺܝܠܳܟ ܐܶܬܚܰܝܰܕܬ: ܘܰܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܰܠܢܰܦܫ̈ܳܬܳܐ ܡܠܺܝ̈ܠܳܬܳܐ ܒܝܰܕ ܢܰܦܫܳܐ ܕܺܝܠܳܟ ܬܰܢܗܰܪ: ܕܚܰܕ ܐܺܝܬܰܝܟ ܡ̣ܶܢ ܬܠܺܝܬܳܝܽܘܬܳܐ ܡܪܰܝܰܡܬܳܐ ܘܒܳܪܝܰܬ݀ ܥܳܠܡ̈ܶܐ: ܗ̇ܰܘ ܕܒܰܩܒܽܘܪܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܦܽܘܪܩܳܢܳܐ ܥܒܰܕܬ ܠܰܬܠܳܬܳܐ ܛܶܟ̈ܣܶܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܘܕܰܠܬܰܚܬ ܡ̣ܶܢ ܐܰܪܥܳܐ. ܘܠܐܘܚܕܳܢܳܐ ܕܰܬܠܳܬܳܐ ܒܥܶܠܕ̈ܒܳܒܶܐ ܣܰܬܰܪܬ: ܕܳܐܟܶܠܩܰܪܨܳܐ ܘܡܰܘܬܳܐ ܘܰܚܛܺܝܬܳܐ ܗܳܠܶܝܢ ܕܗ̣ܽܘ ܐܰܥܶܠ. ܟܰܕ ܕܶܝܢ ܠܰܒܬܽܘܠܬܳܐ ܡܰܪܝܰܡ ܐܶܡܳܐ ܕܺܝܠܳܟ ܗ̇ܳܝ ܚܰܕܳܝܬܳܐ ܘܰܡܒܰܪܰܟܬܳܐ: ܗ̇ܳܝ ܕܺܐܝܬܶܝܗ̇ ܥܶܩܳܪܳܐ ܕܰܩܝܳܡܬܳܐ ܘܚܰܝ̈ܶܐ ܘܰܡܥܺܝܢܳܐ ܕܠܐܴ ܡܳܝܽܘܬܽܘܬܳܐ: ܘܥܰܡܳܗ̇ ܠܩܰܕܺܝ̈ܫܶܐ ܗ̇ܳܢܽܘܢ ܕܡ̣ܶܢ ܥܳܠܰܡ ܚܰܝܺܝ̈ܢ ܠܳܟ: ܒܪܺܝܫ ܬܰܟܫܶܦܬܰܢ ܡܩܺܝܡܺܝܢܰܢ ܘܒܺܐܝܕܶܝ̈ܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܶܢܳܟ ܒܳܥܶܝܢܰܢ: ܐܰܝܟܰܢܳܐ ܕܠܰܘ ܐܰܥܺܝܦܳܐܺܝܬ ܘܰܐܟܡܳܐ ܕܫܳܘܶܝܢܰܢ ܐܶܠܐܴ ܐܰܝܟ ܪܰܒܽܘܬ ܚܽܘܒܳܟ ܕܰܠܘܳܬ ܗܳܝ ܡܝܰܩܪܰܬ݀ ܒܳܟ ܬܩܰܒܶܠ ܠܰܢ: ܘܰܐܝܟ ܗܰܢܺܝܐܘܽܬ ܦܝܳܣܳܐ ܡܪܰܥܝܳܢܳܐ ܘܠܐܴ ܡܶܬܥܰܨܝܳܢܳܐ ܠܘܳܬ ܡܢܺܝܚܳܢ̈ܶܐ ܕܺܝܠܳܟ ܡܰܝܬܶܐ ܐܰܢ̱ܬ. ܘܡ̣ܶܢ ܗܳܪܟܳܐ ܒܰܣܺܝܡܳܐܺܝܬ ܥܰܡܰܢ ܡܶܬܚܰܫܰܚ ܐܰܢ̱ܬ: ܐܰܪܬܰܚ ܐܰܢ̱ܬ ܠܳܟ ܒܪ̈ܰܚܡܶܐ ܫܦܺܝ̈ܥܶܐ ܥܠܰܝܢ ܘܚܰܕܶܬ ܒܰܢ ܦܰܪܨܽܘܦܳܟ ܘܦܽܘܪܩܳܢܳܟ ܘܰܒܬܽܘܩܦܳܐ ܕܰܕܪܳܥܳܟ ܬܰܪܶܨ ܗܰܠܟ̈ܳܬܰܢ ܘܡ̣ܶܢ ܕܪܺܝܫ ܥܰܡܳܟ ܐܰܩܺܝܡ ܠܰܢ: ܘܰܩܕܳܡܰܝܟ ܠܐܴ ܗܽܘܠܳܢܳܐܺܝܬ ܢܚܰܓܶܐ ܒܢܰܚ̈ܬܶܐ ܕܠܐܴ ܡܶܬܚܰܒܠܳܢܽܘܬܳܐ ܡܦܰܪܓܺܝܢܰܢ: ܘܰܒܚܽܘܒܳܐ ܘܪܶܚܡܬܳܐ ܒܠܐܴ ܡܳܝܽܘܬܽܘܬܳܐ ܠܰܚܕ̈ܳܕܶܐ ܢܥܰܦܶܩ: ܟܰܕ ܫܰܝܢܳܐ ܕܡܶܢܳܟ ܕܰܟܝܳܐܺܝܬ ܝܳܗܒܺܝܢܰܢ: ܘܢܳܣܒܺܝܢܰܢ ܐܰܝܟ ܕܒܰܩܕܽܘܫ ܩܽܘ̈ܕܫܺܝܢ: ܘܰܒܬܶܐܘܳܪܺܝܰܐ ܕܩܰܒܪܳܟ ܢܶܗܘܶܐ: ܘܥܰܡ ܚܰܝܠܰܘ̈ܳܬܳܐ ܥܶܠܳܝ̈ܶܐ ܕܬܰܡܳܢ ܡܰܒܪܩܺܝܢ ܢܰܨܡܰܚ: ܘܟܰܕ ܒܣܰܒܪܳܐ ܕܰܩܝܳܡܬܳܟ ܡܫܰܒܰܚܬܳܐ ܠܢܰܦ̈ܫܳܬܰܢ ܡܚܰܕܶܬ ܐܰܢ̱ܬ: ܐܰܦܨܰܚ ܠܰܢ ܒܢܽܘܗܪܳܐ ܠܐܴ ܡܶܬܡܰܠܠܳܢܳܐ ܕܦܰܪܨܽܘܦܳܟ ܘܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܗܳܠܶܝܢ ܕܰܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ ܣܰܝܒܰܪ ܠܚܶܣ̈ܕܶܐ ܕܰܡܓܰܕܦܳܢ̈ܶܐ ܘܰܒܣܰܒܪܳܐ ܗ̇ܰܘ ܕܺܝܠܳܟ ܚܰܡܣܶܢܘ ܘܰܠܟܽܠܰܢ ܐܰܫܘܳܐ ܕܰܢܥܰܕܥܶܕ ܠܥܺܐܕܳܟ ܒܗܰܝܡܳܢܽܘܬܳܐ: ܥܺܐܕܳܐ ܗ̇ܰܘ ܪܰܒܳܐ ܘܰܕܠܐܴ ܦܳܛܰܪ: ܘܰܢܦܺܝܣܳܟ ܚܠܳܦ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܘܰܢܫܰܒܚܳܟ ܒܪܰܘܒܳܐ ܕܗ̇ܳܢܽܘܢ ܕܪܳܦܣܺܝܢ ܘܚܳܕܶܝܢ ܒܳܟ: ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܨܠܘܬܐ  ܕܫܘܪܝܐ ܕܨܦܪܐ

ܬܠܺܝܬܳܝܳܐ ܘܰܠܚܽܘܕܳܝܳܐ ܪܺܝܫܳܐ ܕܚܰܝ̈ܶܐ ܘܰܐܠܳܗܳܐ ܕܥܰܠ ܟܽܠ: ܗ̇ܰܘ ܕܰܒܨܶܒܝܳܢܶܗ ܕܒܰܚ ܢܰܦܫܶܗ ܥܰܠ ܪܰܘܡܳܐ ܕܺܝܠܳܗ̇ ܕܓܳܓܽܘܠܬܳܐ: ܘܫܰܝܶܢ ܠܐܱܪ̈ܥܳܢܶܐ ܥܰܡ ܫܡܰܝ̈ܳܢܶܐ. ܐܰܫܘܳܐ ܠܟܽܠܰܢ ܡܳܪܝܳܐ ܕܰܒܢܰܚ̈ܬܶܐ ܚܶܘܳܪ̈ܶܐ ܘܢܰܟ̈ܦܶܐ: ܘܒܰܥܒܳܕ̈ܶܐ ܕܙܰܕܺܝܩܽܘܬܳܐ ܢܡܰܢܰܥ ܠܰܩܝܳܡܬܳܐ ܡܫܰܒܰܚܬܳܐ: ܘܓܰܘܳܢܳܝܬܳܐ ܘܰܢܥܰܕܥܶܕ ܠܳܟ ܥܺܐܕ̈ܶܐ ܕܬܶܫܒܽܘܚܬܳܐ ܥܰܡ ܐܰܝܠܶܝܢ ܕܰܫܦܰܪܘ ܠܳܟ ܡܳܪܰܢ܀

ܦܪܘܡܝܘܢ

ܫܽܘܒܚܳܐ ܠܰܬܠܺܝܬܳܝܽܘܬܳܐ ܡܫܰܒܚܰܬ݀ ܒܟܽܠ: ܘܰܣܓܺܝܕܰܬ݀ ܒܟܽܠ: ܘܕܰܟܝܰܬ݀ ܒܟܽܠ: ܘܰܠܥܶܠ ܡ̣ܶܢ ܟܽܠ ܐܽܘܣܺܝܰܐ ܘܛܳܒܽܘܬܳܐ: ܘܫܰܘܝܰܬ݀ ܒܰܟܝܳܢܳܐ ܘܰܒܫܽܘܠܛܳܢܳܐ ܘܰܒܡܰܠܟܽܘܬܳܐ ܘܰܒܒܳܪܽܘܝܽܘܬܳܐ. ܗ̇ܳܝ ܕܒܰܟܝܳܢܳܐ ܚܕܳܢܳܝܳܐ ܘܰܬܠܺܝܬܳܝܳܐ: ܡܶܛܽܠ ܗ̣ܺܝ ܟܰܕܗܺܝܽܘܬܳܐ ܕܽܐܘܣܺܝܰܐ: ܘܰܡܦܰܪܫܽܘܬܳܐ ܕܰܩܢܽܘ̈ܡܶܐ ܡܶܣܬܰܟܠܐܴ: ܘܠܰܩܝܳܡܬܳܐ ܡܳܪܳܢܳܝܬܳܐ ܟܳܦܳܐ ܟܽܠ ܒܽܘܪܟܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܘܕܰܠܬܰܚܬ ܡ̣ܶܢ ܐܰܪܥܳܐ: ܘܟܽܠ ܠܶܫܳܢܳܐ ܡܰܘܕܶܐ ܘܰܡܪܰܡܪܶܡ ܘܰܡܩܰܠܶܣ: ܣܳܓܶܕ ܟܺܝܬ ܘܰܡܫܰܒܰܚ ܠܐܱܒܳܐ ܝܳܠܽܘܕܳܐ ܘܰܡܬܽܘܡܳܝܳܐ: ܘܠܰܒܪܳܐ ܝܺܠܺܝܕܳܐ ܕܡܶܢܶܗ ܕܰܒܚܰܪܰܬ݀ ܙܰܒ̈ܢܶܐ ܨܒܳܐ ܘܶܐܬܒܰܣܰܪ: ܘܡܺܝܬ ܘܩܳܡ ܠܰܬܠܳܬܳܐ ܝܰܘ̈ܡܺܝܢ: ܘܰܐܩܺܝܡ ܠܓܶܢܣܰܢ ܡܳܝܽܘܬܳܐ ܘܰܐܣܩܶܗ ܒܫܽܘܒܚܳܐ ܘܰܐܘܬܒܶܗ ܡ̣ܶܢ ܝܰܡܺܝܢ ܐܰܒܽܘܗܝ ܒܬܶܫܒܽܘܚܬܳܐ ܕܠܐܴ ܡܶܬܡܰܠܠܐܴ. ܘܥܰܡܶܗ ܢܫܰܒܰܚ ܠܪܽܘܚܳܐ ܩܰܕܺܝܫܳܐ ܕܡܶܢܶܗ ܕܰܐܒܳܐ ܢܳܦܶܩ ܘܡ̣ܶܢ ܒܪܳܐ ܢܳܣܶܒ: ܘܰܫܘܶܐ ܠܶܗ ܒܽܐܘܣܺܝܰܐ ܘܚܰܝܠܐܴ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

ܣܕܪܐ

ܡܳܪܝܳܐ ܡܪܰܝܡܳܐ ܘܰܕܚܺܝܠܐܴ ܘܥܰܬܺܝܪܳܐ: ܕܛܳܒܽܘܬܶܗ ܫܦܺܝܥܬܳܐ ܠܐܴ ܡܶܬܬܟܺܝܠܐܴ: ܘܪܰܒܽܘܬ ܝܳܐܝܽܘܬܳܐ ܕܥܳܒܽܘܕܽܘܬܶܗ ܒܠܶܫ̈ܳܢܶܐ ܘܦܽܘ̈ܡܶܐ ܕܡܶܕܪ̈ܳܢܶܐ ܠܐܴ ܡܶܬܡܰܠܠܐܴ ܘܟܰܕ ܡ̣ܶܢ ܗ̇ܳܝ ܕܺܐܝܬܶܝܗ̇ ܠܐܴ ܡܶܬܡܰܚܠܐܴ: ܢܽܘܗܪܳܐ ܡܬܽܘܡܳܝܳܐ ܕܥܶܠܳܝ̈ܶܐ ܘܬܰܚܬܳܝ̈ܶܐ ܕܰܒܦܽܘܩܕܳܢܶܗ ܐܠܰܗܳܝܳܐ ܒܝܰܘܡܳܐ ܪܒܺܝܥܳܝܳܐ ܒܪܳܐ ܘܰܐܬܩܶܢ ܙܰܘܓܳܐ ܕܢܰܗܺܝܪ̈ܶܐ ܒܰܪܩܺܝܥܳܐ ܠܡܰܢܗܳܪܽܘ ܒܠܺܠܝܳܐ ܘܒܺܐܝܡܳܡܳܐ: ܟܪܽܘܟܝܳܐ ܕܫܰܢ̱ܬܳܐ ܕܒܰܐܪܒܥܳܐ ܥܶܕ̈ܳܢܶܐ ܟܰܠܶܠ ܐܰܝܟܳܐ ܕܳܐܦ ܐܰܪܒܰܥ ܦܶܢ̈ܝܳܢ ܕܰܒܪܺܝܬܳܐ: ܘܰܠܟܽܠ ܝܰܘܡܳܐ ܐܰܪܒܰܥ ܡܰܛܪ̈ܳܢ ܥܒܰܕ: ܘܕܰܐܪܒܰܥ ܪ̈ܽܘܚܺܝܢ ܠܶܗ ܐܰܩܺܝܡ ܕܰܢܕܰܒܪ̈ܳܢ: ܘܡ̣ܶܢ ܐܰܪܒܰܥ ܟܶܢ̈ܦܰܝ ܐܰܪܥܳܐ ܥܰܦܪܳܐ ܫܩܰܠ ܘܰܓܒܰܠ ܠܐܴܕܳܡ ܒܨܰܠܡܶܗ ܘܒܰܕܡܽܘܬܶܗ: ܒܦܰܓܪܳܐ ܦܰܪܕܰܝܣܳܝܳܐ ܕܰܡܛܰܟܰܣ ܒܰܐܪܒܥܳܐ ܢܰܗܪ̈ܰܘܳܬܳܐ ܐܰܫܪܝܶܗ: ܗ̇ܰܘ ܚܰܝܠܐܴ ܚܰܝܽܘܬܳܢܳܐ ܕܰܒܠܶܒܳܐ: ܘܢܰܦܫܳܢܳܝܳܐ ܕܰܒܡܽܘܚܳܐ: ܘܰܟܝܳܢܳܝܳܐ ܕܰܒܟܶܒܕܳܐ: ܘܝܽܘܒܳܠܳܝܳܐ ܕܰܒܦܶܚ̈ܠܳܬܳܐ: ܐܰܪܒܥܳܐ ܢܰܗܪ̈ܰܘܳܬܳܐ ܣܳܡ ܠܡܰܫܩܳܝܽܘ ܠܐܱܦܰܝ̈ ܐܰܪܥܳܐ: ܫܡܶܗ ܕܚܰܕ ܦܺܝܫܽܘܢ ܕܚܳܕܰܪ ܠܟܽܠܳܗ̇ ܐܰܪܥܳܐ ܕܰܚܘܺܝܠܐܴ: ܘܓܺܝܚܽܘܢ ܕܚܳܕܰܪ ܠܟܽܠܳܗ̇ ܐܰܪܥܳܐ ܕܟܽܘܫ: ܘܕܶܩܠܰܬ݀ ܕܚܳܕܰܪ ܠܐܱܪܡܶܢܝܰܐ ܓܰܘܳܝܬܳܐ: ܘܰܦܪܳܬ ܠܐܱܪܡܶܢܝܰܐ ܒܰܪܳܝܬܳܐ: ܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܣܰܩܽܘܒ̈ܠܳܝܶܐ ܐܰܩܺܝܡ ܠܰܟܝܳܢܳܐ ܐ̱ܢܳܫܳܝܳܐ. ܘܥܰܠܗ̇ܳܝ ܣܽܘܓܳܐܐ ܕܰܢܒܺܝ̈ܶܐ ܒܰܪܒܺܝܥܳܝܽܘܬ ܐܳܬܘ̈ܳܬܳܐ ܨܰܒܶܬ: ܡܽܘܫܶܐ ܘܝܶܫܽܘܥ ܘܶܐܠܺܝܳܐ ܘܕܰܘܺܝܕ ܘܗܽܘܫܳܥ ܘܝܰܘܢܳܢ ܘܡܺܝܟܳܐ. ܒܰܪܒܺܝܥܳܝܳܐ ܕܡܰܠܟܳܐ ܕܰܫܡܶܗ ܪܰܚܒܥܰܡ ܕܠܐܴ ܫܡܰܥ ܡܶܠܟܳܐ ܕܣܳܒ̈ܶܐ ܡܰܠܟܽܘܬܳܐ ܐܶܬܦܰܠܓܰܬ݀: ܘܥܰܠ ܥܶܣܪܳܐ ܫܰܒ̈ܛܺܝܢ ܐܰܡܠܶܟ ܝܽܘܪܒܥܰܡ ܒܬܰܪܨܳܐ: ܘܫܰܒܛܳܐ ܕܺܝܗܽܘܕܳܐ ܘܰܕܒܶܢܝܳܡܶܝܢ ܦܳܫ ܠܶܗ: ܒܝܰܪܚܳܐ ܪܒܺܝܥܳܝܳܐ ܥܰܠ ܢܰܗܪܳܐ ܟܒܰܪ ܚܙܳܐ ܚܰܙܩܺܝܶܐܝܠ ܠܪܳܡܳܐ ܕܝܳܬܶܒ ܥܰܠ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ: ܘܰܟܕܺܝ̈ܢܳܢ ܒܳܗ̇ ܐܰܪܒܰܥ ܚܰܝ̈ܘܳܢ: ܐܰܪܝܳܐ ܐ̱ܪܳܙ ܟܽܠ ܚܰܝܽܘܬ ܫܶܢ̈ܶܐ: ܘܬܰܘܪܳܐ ܐ̱ܪܳܙ ܒܥܺܝܪ̈ܳܐ: ܘܢܶܫܪܳܐ ܐ̱ܪܳܙ ܦܳܪܰܚܬܳܐ: ܘܒܰܪܢܳܫܳܐ ܐ̱ܪܳܙ ܟܽܠܶܗ ܥܳܠܡܳܐ: ܪܽܘܚܳܐ ܡ̣ܶܢ ܐܰܪܒܰܥ ܪ̈ܽܘܚܺܝܢ ܚܙܳܐ ܢܒܺܝܳܐ ܕܟܳܢܫܳܐ: ܘܰܠܢܽܘܚܳܡܳܐ ܕܫܶܬܡܳܐܐ ܐܠܰܦܰܝܳ̈ܐ ܕܰܢܦܰܩܘ ܡ̣ܶܢ ܡܶܨܪܶܝܢ ܡܚܰܘܝܳܐ ܠܩܽܘܦܳܚ ܥܶܒܪ̈ܳܝܶܐ ܕܠܐܴ ܡܗܰܝܡܢܺܝܢ ܕܦܳܢܶܝܢ ܠܐܘܪܫܠܶܡ: ܐܰܪܒܰܥ ܙܰܒ̈ܢܺܝܢ ܣܠܶܩ ܗܘܳܐ ܢܰܒܽܘܟܰܕܢܳܨܰܪ ܥܰܠ ܐܽܘܪܫܠܶܡ ܘܟܰܒܫܳܗ̇ ܘܰܐܚܪܒܳܗ̇ ܘܰܐܘܩܶܕ ܠܗܰܝܟܠܐܴ: ܘܰܢܣܰܒ ܡܳܐܢ̈ܰܝ ܬܶܫܡܫܬܳܐ ܕܒܰܝܬܶܗ ܕܡܳܪܝܳܐ: ܘܰܐܪܒܥܳܐ ܛܠܳܝ̈ܶܐ ܒܢ̈ܰܝ ܕܳܪ̈ܶܐ ܕܳܢܺܝܐܶܝܠ ܘܚܰܢܰܢܝܳܐ ܘܥܶܙܰܪܝܳܐ ܘܡܺܝܫܳܐܶܝܠ ܠܶܗ ܐܶܬܕܰܫܰܢܘ ܒܬܰܫܕܳܪܬܳܐ ܗܡܰܝܪ̈ܶܐ ܘܰܓܒܰܝ̈ܳܐ. ܘܟܰܕ ܚܙܳܐ ܡܳܪܝܳܐ ܡܪܰܚܡܳܢܳܐ ܕܰܠܨܰܠܡܳܐ ܪܒܺܝܥܳܝ ܐܰܦ̈ܶܐ ܣܓܶܕ ܥܰܡܳܐ ܐܺܝܣܰܪܠܳܝܳܐ: ܘܰܐܪܒܰܥ ܦܶܢ̈ܝܳܢ ܡܩܰܪ̈ܒܳܢ ܣܶܓܕ̈ܳܬܳܐ ܠܕܶܡ̈ܘܳܬܳܐ ܕܰܐܪܒܥܳܬ݀ ܪ̈ܶܓܠܐܷ: ܢܚܶܬ ܒܰܒܥܳܬ ܨܰܠܡܶܗ ܕܶܐܬܚܰܒܰܠ ܘܕܰܡܪܰܟܰܒ ܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ: ܟܰܕ ܒܡܰܛܰܪܬܳܐ ܪܒܺܝܥܳܝܬܳܐ ܕܫܳܥ̈ܰܝ ܐܺܝܡܳܡܳܐ ܐܶܬܳܐ ܦܳܪܩܳܐ ܠܦܽܘܪܩܳܢ ܓܒܺܝܠܬܶܗ ܡܢܰܦܰܫܬܳܐ ܘܰܪܒܺܝܥܳܐܺܝܬ ܐܶܣܛܽܘ̈ܟܣܶܐ ܕܰܒܡܰܛܰܪܬܳܐ ܬܠܳܬ ܫܰܕܰܪ ܠܳܗ̇ ܢܒܺܝ̈ܶܐ ܘܚܰܙ̈ܳܝܶܐ: ܘܠܐܴ ܐܶܫܟܰܚܘ ܠܡܶܦܪܩܳܗ̇. ܟܰܕ ܒܡܶܬܥܰܛܦܳܢܽܘܬܳܐ ܕܰܪܒܺܝܥܳܝܽܘܬ ܐܶܣܛܽܘ̈ܟܣܶܐ ܠܡܰܘܬܳܐ ܗ̇ܰܘ ܕܰܐܡܠܰܟ ܒܕܳܪܳܐ ܪܒܺܝܥܳܝܳܐ ܕܰܐܪܒܰܥ ܙܰܒܢܺܝ̈ܢ ܥܦܺܝܦܳܐܺܝܬ ܒܡܰܘܬܶܗ ܕܥܰܠ ܐܰܦܰܝ̈ܢ ܩܰܛܶܠ ܘܰܠܫܽܘܠܛܳܢܶܗ ܬܰܒܰܪ: ܘܠܰܒܪܺܝܬܳܐ ܟܽܠܳܗ̇ ܚܰܝ̈ܶܐ ܫܰܟܶܢ. ܟܰܕ ܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܚܰܡܺܝܡܳܐ ܘܩܰܪܺܝܪܳܐ ܘܪܰܛܺܝܒܳܐ ܘܝܰܒܺܝܫܳܐ: ܟܽܠ ܓܽܘܫܡܳܐ ܐܰܩܺܝܡ: ܘܠܰܡܢܰܦܫܳܐ ܡ̣ܶܢ ܐܰܪܒܥܳܐ ܩܰܝܳܡ: ܩܰܡܚܳܐ ܚܠܳܦ ܥܰܦܪܳܐ: ܘܡܰܝ̈ܳܐ ܐ̱ܪܳܙ ܡܰܝ̈ܳܐ: ܘܡܶܠܚܳܐ ܐ̱ܪܳܙ ܢܽܘܪܳܐ: ܚܡܺܝܪܳܐ ܐ̱ܪܳܙ ܐܳܐܰܪ: ܘܡܶܫܚܳܐ ܛܽܘܦܣܳܐ ܕܢܰܦܫܳܐ: ܘܰܠܗܳܠܶܝܢ ܥܺܕܬܳܐ ܩܰܕܺܝܫܬܳܐ ܢܳܩܦܳܐ: ܟܰܕ ܡ̇ܰܢ ܡ̣ܶܢ ܝܽܘܒܳܠܐܴ ܕܰܐܪܒܰܥ ܢܶܫ̈ܶܐ ܙܳܢܝ̈ܳܬܳܐ ܕܡ̣ܶܢ ܥܰܡ̈ܡܶܐ ܕܶܐܫܬܰܘ̈ܬܰܦܝ ܘܠܰܒ̈ܢܰܝ ܥܰܡܳܐ ܠܚܽܘܪܳܪܳܐ ܕܰܐܪܒܰܥ ܦܶܢ̈ܝܳܢ ܕܢܰܚ: ܡ̣ܶܢ ܬܳܡܳܪ ܥܰܡܳܡܳܝܬܳܐ ܕܒܰܚܡܽܘܗ̇ ܙܰܢܝܰܬ݀ ܘܪܳܚܳܒ ܕܩܰܒܠܰܬ݀ ܠܓܳܫܽܘ̈ܫܶܐ: ܘܪܰܥܽܘܬ ܡܽܘܐܶܒܳܝܬܳܐ ܘܒܰܪܬ ܫܒܰܥ ܚܺܝܬܳܝܬܳܐ. ܟܰܕ ܒܡܰܣܩܳܗ̇ ܕܠܰܨܠܺܝܒܳܐ ܠܐܱܪ̈ܒܰܥܦܶܢܝܳܢ ܕܶܐܣܬܰܝܰܒ̈ܝ ܒܕܶܒ̈ܚܶܐ ܕܰܥܠܰܘ̈ܳܬܳܐ ܩܰܕܶܫ: ܐܰܝܟ ܐܰܪܒܰܥ ܙܳܢܝ̈ܳܬܳܐ ܕܡ̣ܶܢ ܥܰܡ̈ܡܶܐ ܕܰܒܢܶܩܦܳܐ ܕܰܒܢ̈ܰܝ ܥܰܡܳܐ ܐܶܬܩܰܕܰܫ̈ܝ: ܟܰܕ ܡ̣ܶܢ ܐܰܪܒܥܳܐ ܪ̈ܺܝܫܰܝ ܩܶܣܛܽܘܢܳܪ̈ܶܐ ܠܐܱܪܒܰܥ ܡܢܰܘ̈ܳܢ ܐܶܬܦܰܠܰܓܘ ܢܰܚ̈ܬܰܘܗܝ: ܟܽܘܬܺܝܢܳܐ ܘܓܰܐܠܐܴ ܘܥܶܪܩܬܳܐ ܘܣܶܕܠܐܴ ܕܰܚܠܳܦ ܚܛܺܝܬܳܐ ܕܰܐܪܒܰܥ ܦܶܢ̈ܝܳܢ ܠܒ̣ܶܫ ܐܶܢܽܘܢ. ܟܰܕ ܟܽܘܬܺܝܢܳܐ ܗ̇ܳܝ ܕܠܐܴ ܐܶܣܬܰܕܩܰܬ݀ ܘܰܠܥܰܡ̈ܡܶܐ ܡܛܳܬ݀ ܐ̱ܪܳܙ ܗܰܝܡܳܢܽܘܬܳܐ ܫܰܘܕܥܰܬ݀. ܘܰܕܒܺܐܝ̈ܕܰܝ ܐܶܘܢܓܶܠܺܝ̈ܣܛܶܐ ܐܰܪܒܥܳܐ ܣܒܰܪܬܳܐ ܐܠܰܗܳܝܬܳܐ ܡܰܢܥܰܬ݀ ܟܰܕ ܠܐܴ ܐܶܣܬܰܕܩܰܬ݀: ܟܰܕ ܒܰܐܪܒܥܳܐ ܥܶܕ̈ܳܢܶܐ ܕܶܐܙ̈ܰܠܝ ܢܶܫ̈ܶܐ ܠܩܰܒܪܳܐ ܡܰܥܒܶܕ ܚܰܝ̈ܶܐ ܣܒܰܪܬܳܐ ܗ̇ܳܝ ܕܢܽܘܚܳܡܶܗ: ܘܠܐܱܪܒܥܳܐ ܕܰܢܦܰܠܘ ܐܰܩܺܝܡ ܘܫܰܪܰܪ: ܐܳܦ ܠܐܱܪܒܥܳܐ ܓܰܒܺܝ̈ܢ ܕܡܰܠܐܱܟ̈ܶܐ ܘܢܳܛܽܘܪ̈ܶܐ ܘܢܶܫ̈ܶܐ ܘܬܰܠܡܺܝ̈ܕܶܐ ܩܝܳܡܬܶܗ ܒܰܕܶܩ ܘܰܓܠܐܴ. ܟܰܕ ܠܐܱܪܒܰܥ ܦܶܢ̈ܝܳܢ ܒܺܐܝ̈ܕܰܝ ܐܰܪܒܥܳܐ ܐܶܘܢܓܶܠܺܝ̈ܣܛܶܐ ܦܶܪܚ̣ܰܬ݀ ܣܒܰܪܬܳܐ ܐܠܰܗܳܝܬܳܐ: ܡܕܰܡ̈ܝܰܝ ܒܡܰܪܟܰܒܬܳܐ ܟܪܽܘܒܳܝܬܳܐ ܘܰܛܥܺܝܢܰܬ݀ ܠܐܻܝܬܽܘܬܳܐ ܡܪܰܝܰܡܬܳܐ: ܟܰܕ ܒܰܐܪܒܰܥ ܕܶܡ̈ܘܳܢ ܡܰܪܟܰܒܬܳܐ ܢܽܘܪܳܢܳܝܬܳܐ ܐܶܬܕܰܡܺܝܘ ܐܰܪܒܥܳܐ ܐܶܘܢܓܶܠܺܝ̈ܣܛܶܐ: ܒܰܐܪܝܳܐ ܐ̱ܪܳܙ ܠܒܺܝܒܽܘܬܗܽܘܢ ܘܚܽܘܦܳܝ ܥܶܩ̈ܒܳܬܗܽܘܢ: ܘܬܰܘܪܳܐ ܐܰܟܳܪܽܘܬܗܽܘܢ ܘܡܰܪܽܘܚܳܢܽܘܬ ܚܛܽܘ̈ܛܶܐ: ܘܢܶܫܪܳܐ ܨܳܝܽܘܕܽܘܬܗܽܘܢ ܘܚܰܪܺܝܦܽܘܬ ܚܙܳܝܳܐ ܘܰܦܪܳܚܳܐ: ܘܒܰܪܢܳܫܳܐ ܟܝܳܢܗܽܘܢ ܡܠܺܝܠܐܴ: ܟܰܕ ܒܚܽܘܝܳܕܳܐ ܕܰܐܪ̈ܒܰܥܦܶܢܝܳܢ ܕܶܐܬܩܛܰܪ̈ܝ ܒܰܣܒܰܪܬܶܗ ܘܥܽܘܠܳܝܳܐ ܕܡܳܐܢܳܐ ܠܰܫܡܰܝܳܐ: ܠܡܶܬܬܪܺܝܡܳܢܽܘܬܳܐ ܕܟܽܠ ܥܰܡ̈ܡܺܝܢ ܠܡܰܠܟܽܘܬܳܐ ܫܡܰܝܳܢܺܝܬܳܐ: ܟܰܕ ܠܐܱܪܒܥܳܐ ܓܰܒܺܝ̈ܢ ܦܰܠܶܓ ܦܰܘܠܳܘܣ ܠܙܰܒܢܳܐ ܕܰܡܕܰܒܪܳܢܽܘܬܶܗ: ܟܰܕ ܠܪܰܘܡܳܐ ܠܰܡܬܽܘܡܳܝܽܘܬܶܗ: ܠܥܽܘܡܩܳܐ ܠܡܶܬܢܰܚܬܳܢܽܘܬܶܗ: ܘܽܐܘܪܟܳܐ ܘܰܦܬܳܝܳܐ ܠܡܰܚܬܬܶܗ ܕܰܠܗܳܡܳܢ ܐܰܝܟ ܕܰܪܫܰܡ ܐܰܒܪܳܗܳܡ ܒܰܦ̈ܣܳܥܳܬܶܗ ܘܕܽܘܪ̈ܟܳܬܶܗ: ܟܰܕ ܒܰܪܒܺܝܥܳܝܽܘܬ ܡܰܠܟܽܘܬܳܐ ܕܺܝܠܺܝܕܽܘܬܶܗ: ܨܠܺܝܒܳܐ ܩܰܕܺܝܫܳܐ ܒܺܐܝ̈ܕܰܝ ܦܪܽܘܛܽܘܢܺܝܩܺܝ ܡܰܠܟܬܳܐ ܠܝܰܥܩܽܘܒ ܐܰܚܽܘܗܝ ܐܰܓܥܶܠ ܘܰܠܥܰܡܳܐ ܗ̇ܰܘ ܝܽܘܕܳܝܳܐ ܐܰܒܗܶܬ ܘܰܠܬܰܠܡܺܝ̈ܕܶܐ ܫܠܺܝ̈ܚܶܐ ܩܰܕܺܝ̈ܫܶܐ ܒܰܐܪ̈ܒܰܥܦܶܢܝܳܢ ܩܕܳܡ ܟܽܠ ܥܰܡ̈ܡܺܝܢ ܢܰܨܰܚ. ܘܥܰܠ ܗܳܕܶܐ ܒܝܰܘܡܳܐ ܗܳܢܳܐ ܕܰܐܪܒܥܳܐ ܕܚܶܘܳܪ̈ܶܐ ܕܰܩܝܳܡܬܳܟ ܦܳܪܽܘܩܳܝܬܳܐ ܡܫܺܝܚܳܐ ܐܠܰܗܰܢ ܡܦܺܝܣܺܝܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܠܐܱܠܳܗܽܘܬܳܟ ܐܰܥܛܰܪܢܰܢ ܕܰܬܩܰܕܶܫ ܠܰܢ ܒܛܰܝܒܽܘܬܳܟ: ܘܰܬܫܰܪܰܪ ܠܰܢ ܒܗܰܝܡܳܢܽܘܬܳܐ ܕܒܳܟ. ܘܬܶܡܢܶܐ ܠܰܢ ܒܰܓܙܳܪܳܟ: ܘܰܬܚܰܕܶܬ ܠܰܢ ܒܒܰܣܺܝܡܽܘܬܳܟ: ܘܰܬܫܰܝܶܢ ܬܰܪ̈ܥܝܳܬܰܢ ܒܚܽܘܒܳܟ: ܘܬܰܐܘܶܐ ܦܠܺܝܓܽܘܬܰܢ ܒܣܰܒܪܳܟ: ܘܰܬܒܰܪܶܟ ܠܟܽܠܰܢ ܒܝܰܡܺܝܢܳܟ ܘܰܬܣܰܝܰܥ ܠܰܢ ܒܰܚܢܳܢܳܟ: ܘܰܬܚܰܘܰܪ ܣܰܢ̈ܝܳܬܰܢ ܒܙܽܘܦܳܟ: ܘܰܬܚܰܣܶܐ ܠܰܢ ܘܰܠܥܰܢܺܝ̈ܕܰܝܢ ܒܩܰܕܺܝܫܽܘܬܳܟ: ܘܠܰܢ ܘܰܠܗܽܘܢ ܬܩܺܝܡ ܒܓܰܒܳܟ ܕܝܰܡܺܝܢܳܐ: ܒܝܰܘܡܳܐ ܕܡܶܬܓܰܠܝܳܢܽܘܬܳܟ ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܛܪܐ

ܕܶܒܚܳܐ ܡܚܰܣܝܳܢܳܐ ܕܶܐܬܕܒܰܚ ܚܠܳܦ ܚܰܛܳܝ̈ܶܐ ܒܰܙܩܺܝܦܳܐ ܘܠܐܱܪܒܰܥ ܦܶܢ̈ܝܳܢ ܢܓܰܕ ܠܣܶܓܕܬܶܗ: ܘܠܐܱܪܒܥܳܐ ܐܶܣܛܽܘ̈ܟܣܶܐ ܕܰܢܦܰܠܘ ܐܰܩܺܝܡ ܒܰܩܝܳܡܬܶܗ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܩܰܒܶܠ ܦܺܝܪܡܰܢ ܘܶܐܬܬܢܺܝܚ ܒܥܶܛܪܳܐ ܕܰܨܠܰܘ̈ܳܬܰܢ: ܘܰܐܘܒܶܕ ܡܶܢܰܢ ܠܐܱܪܒܥܳܐ ܚܰܫ̈ܶܐ ܕܡܰܚܫܺܝܢ ܠܰܢ: ܙܳܢܝܽܘܬܳܐ ܠܰܥܒܽܘܬܳܐ: ܪܰܘܳܝܽܘܬܳܐ: ܫܰܢ̱ܬܳܐ: ܐܰܝܟ ܕܰܐܘܒܶܕܬ ܠܥܽܘܪܺܝܒ ܘܙܺܝܒ ܘܙܳܒܰܚ ܘܨܰܠܡܢܰܥ ܒܝܰܘ̈ܡܰܝ ܓܶܕܥܽܘܢ: ܘܒܰܣܶܡ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܟ ܥܰܡ ܟܽܠܗܽܘܢ ܩܰܕܺܝ̈ܫܰܝܟ: ܘܢܰܣܶܩ ܠܳܟ ܫܽܘܒܚܳܐ܀

ܚܘܬܡܐ

ܒܪܳܐ ܕܡܶܬܓܰܝܰܐܐ ܥܰܠ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ: ܘܥܰܠ ܚܰܝܽܘܬܳܐ ܪܒܺܝܥܳܝܰܬ݀ ܪ̈ܶܓܠܐܷ ܪܟܶܒ ܕܰܫܦܰܪ ܠܶܗ: ܘܒܰܐܪܒܰܥ ܓܽܘܕܺܝ̈ܢ ܐܶܙܕܰܝܚܰܬ݀ ܪܰܒܽܘܬܶܗ. ܗܰܒܠܰܢ ܕܰܒܡܰܛܪ̈ܳܬܳܐ ܐܰܪܒܰܥ ܕܺܐܝ̈ܡܳܡܶܐ ܘܠܰܝܠܰܘ̈ܳܬܳܐ ܢܫܰܒܰܚ ܘܰܢܩܰܠܶܣ ܠܰܩܝܳܡܬܳܟ ܕܡ̣ܶܢ ܩܰܒܪܳܐ. ܘܥܰܡ ܟܪ̈ܽܘܒܶܐ ܪܒܺܝܥܳܝܰܝ ܦܰܪ̈ܨܽܘܦܶܐ ܢܶܒܪܽܘܟ ܘܢܶܣܓܽܘܕ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܀

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝ ܘܠܐܴܕܳܡ ܨܰܠܡܳܐ ܕܪܰܒܽܘܬܶܗ ܡ̣ܶܢ ܓܰܘ ܣܝܳܢܳܐ ܕܰܠܺܝ: ܘܠܰܫܡܰܝܳܐ ܒܬܶܫܒܽܘܚܬܳܐ ܥܰܠܺܝ. ܠܗ̇ܰܘ ܠܰܚܡܳܐ ܕܚܰܝ̈ܶܐ ܕܰܒܚܰܪܰܬ݀ ܙܰܒ̈ܢܶܐ ܠܦܽܘܪܩܳܢܰܢ ܐܶܬܓܠܺܝ: ܘܡ̣ܶܢ ܡܰܪ̈ܳܚܶܐ ܒܩܰܝܣܳܐ ܐܶܬܬܠܺܝ: ܘܰܒܡܳܐܢ̈ܶܐ ܪ̈ܺܝܫܳܝܶܐ ܐܶܬܥܰܦܺܝ: ܘܡ̣ܶܢ ܟܽܠ ܐܠܰܗ ܒܰܪܢܳܫ ܐܶܬܬܰܘܕܺܝ: ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܟܰܕ ܠܺܝܠܺܝܕܽܘܬܳܟ ܡܬܽܘܡܳܝܬܳܐ ܘܕܰܠܥܶܠ ܡ̣ܶܢ ܡܶܠܬܳܐ ܘܰܕܠܐܴ ܐܶܡܳܐ: ܘܰܠܗ̇ܳܝ ܦܰܓܪܳܢܳܝܬܳܐ ܕܠܐܴ ܐܰܒܳܐ ܘܰܕܠܐܴ ܪܶܕܝܳܐ ܘܚܰܫܳܐ ܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ ܟܳܬܒܺܝܢܰܢ: ܘܰܒܟܽܠܗܶܝܢ ܕܰܗܘ̈ܰܝ ܒܗܶܝܢ ܬܳܗܪܺܝܢܰܢ ܘܠܰܨܠܺܝܒܽܘܬܳܟ ܒܢܰܦ̈ܫܳܬܰܢ ܢܳܣܒܺܝܢܰܢ. ܒܰܥܒܺܝܕܬܳܐ ܢܽܘܚܳܝܬܳܐ ܠܰܩܪ̈ܳܒܶܐ ܡܶܬܛܰܝܒܺܝܢܰܢ: ܘܰܩܪܳܒܳܐ ܥܰܡ ܣܳܛܳܢܳܐ ܣܳܕܪܺܝܢܰܢ: ܘܰܠܥܺܕܬܳܐ ܗ̇ܳܝ ܟܶܐܘܶܝܠܳܝܬܳܐ ܥܳܐܠܺܝܢܰܢ ܒܡܰܕܢܚܳܐ ܡܶܬܚܰܙܝܳܢܳܐ ܟܽܠܰܢ ܡܶܣܬܰܟܠܺܝܢܰܢ: ܘܰܒܪܺܝܫ ܟܽܘܡܪ̈ܶܐ ܕܩܳܐܶܡ ܠܳܟ ܪܺܝܫ ܟܳܗ̈ܢܶܐ ܡܫܺܝܚܳܐ ܕܰܗܘܰܝܬ ܚܠܳܦܰܝܢ ܩܽܘܪܒܳܢܳܐ ܡܶܫܬܰܪܪܺܝܢܰܢ: ܠܠܰܚܡܳܐ ܘܚܰܡܪܳܐ ܦܰܓܪܳܟ ܘܰܕܡܳܟ ܗ̇ܰܘ ܕܡ̣ܶܢ ܒܬܽܘܠܬܳܐ ܡܰܪܝܰܡ ܝܳܕܥܺܝܢܰܢ: ܘܰܒܦܺܝܪܡܳܐ ܠܰܚܕܳܝܽܘܬܳܐ ܕܰܒܟܰܪܣܳܐ ܐܳܦ ܕܽܘܝܳܪܳܟ ܕܰܒܥܳܠܡܳܐ ܘܫܰܠܡܽܘܬܰܢ ܠܳܟ ܡܰܓܥܠܺܝܢܰܢ ܘܺܐܠܐܴ ܕܥܰܠ ܡܰܕܒܚܳܐ ܨܳܐܰܪ ܠܰܪܩܺܝܥܳܐ ܕܒܶܝܬ ܠܰܢ ܘܠܐܱܬܪܳܐ ܫܡܰܝܳܢܳܐ: ܘܩܰܢܕܺܝ̈ܠܐܷ ܠܙܰܠܓ̈ܶܐ ܪ̈ܽܘܚܳܢܳܝܶܐ ܘܒܺܐܡܰܐ ܠܥܶܠܺܝܬܳܐ: ܘܛܶܒܠܺܝܬܳܐ ܠܰܨܠܺܝܒܳܐ ܦܳܪܽܘܩܳܝܳܐ: ܘܰܬܪܽܘܢܳܘܣ ܠܩܰܒܪܳܐ ܡܳܪܳܢܳܝܳܐ: ܘܬܰܠܒܶܫܬܳܐ ܠܡܳܐܢ̈ܰܝ ܥܽܘܦܳܝܳܐ: ܘܶܐܣܳܪܳܐ ܠܣܽܘܪܳܕܳܐ: ܘܦܺܝܢܟܳܐ ܘܟܳܣܳܐ ܠܗ̇ܳܝ ܫܳܪܽܘܬܳܐ ܐ̱ܪܳܙܳܢܳܝܬܳܐ: ܘܫܽܘܫܶܦܳܐ ܘܦܶܕܬܳܐ ܠܟܺܐܦܳܐ ܩܰܒܪܳܢܳܝܬܳܐ. ܐܽܘܪܳܪܳܐ ܕܰܡܫܰܡܫܳܢܳܐ ܠܓܶܦ̈ܶܐ ܕܰܣܪ̈ܳܦܶܐ: ܟܽܘܬܺܝܢܳܐ ܓܠܺܝܠܬܳܐ ܘܚܶܘܳܪܬܳܐ ܠܚ̈ܰܝܶܐ ܠܐܴ ܦܠܺܝ̈ܓܶܐ: ܘܰܫܪܺܝܗ̇ ܠܚܽܘܪܳܪܳܐ ܕܡ̣ܶܢ ܒܥܶܠܕ̈ܒܳܒܶܐ: ܘܗ̇ܳܝ ܕܠܳܒܫܺܝܢ ܟܳܗ̈ܢܶܐ ܘܰܡܚܰܙܩܺܝܢ ܒܟܽܠ ܦܽܘܩ̈ܕܳܢܶܐ: ܦܺܕ̈ܝܳܬܳܐ ܓܠܺܝ̈ܠܳܬܳܐ ܠܫܽܘܪܳܪܳܐ ܕܢܳܛܽܘܪܽܘܬ ܢܳܡܽܘ̈ܣܶܐ: ܘܦܰܝܢܳܐ ܠܓܰܠܐܴ ܐܰܘܟܺܝܬ ܡܰܪܛܽܘܛܳܐ: ܘܰܓܠܺܝܠܽܘܬܶܗ ܠܚܰܝ̈ܶܐ ܠܐܴ ܣܕܺܝ̈ܩܶܐ: ܐܳܦ ܡܰܨܢܰܦܬܳܐ ܠܣܽܘܕܳܪܳܐ ܘܗ̣ܺܝ ܚܶܘܳܪܽܘܬܳܗ̇ ܠܕܰܟܝܽܘܬ ܚܽܘ̈ܫܳܒܶܐ: ܘܟܰܠܒܬܳܐ ܗ̇ܳܝ ܣܪܳܦܳܝܬܳܐ: ܠܰܚܡܳܐ ܚܰܕܬܳܐ ܕܡܶܬܰܐܦܶܐ ܘܡܶܬܢܣܶܒ ܠܕܽܘܒܳܪ̈ܶܐ ܚܰܕ̈ܬܶܐ: ܘܚܰܕ ܕܚܰܕ ܐܺܝܬܰܝܟ ܡܶܠܬܳܐ ܕܶܐܬܒܰܣܰܪ: ܘܰܬܪܶܝܢ ܠܐܱܠܳܗܽܘܬܳܐ ܘܚܰܕ ܒܪܳܐ ܠܳܟ ܝܳܕܥܺܝܢܰܢ: ܘܰܬܠܳܬܳܐ ܕܚܰܕ ܗ̣ܽܘ ܟܝܳܢܳܐ ܕܰܐܠܳܗܽܘܬܳܐ ܘܰܩܢܽܘ̈ܡܶܐ ܬܠܳܬܳܐ. ܟܳܣܳܐ ܕܡ̣ܶܢ ܝܰܡܺܝܢܳܐ ܐ̱ܪܳܙ ܟܰܒܕܳܐ ܐܶܡܳܐ ܕܰܕܡܳܐ ܕܰܒܓܰܒܳܐ ܝܰܡܺܝܢܳܐ: ܘܦܰܓܪܳܐ ܕܡ̣ܶܢ ܡܰܥܪܒܳܐ ܐ̱ܪܳܙ ܗ̇ܳܝ ܕܦܰܓܪܳܐ ܕܡܽܘܟܳܟܰܢ ܠܒܶܫܬ ܘܕܰܕܡܶܗ ܕܰܩܛܺܝܠܐܴ ܠܰܩܕܳܡܰܘܗܝ ܕܳܪ̈ܶܐ: ܫܠܳܡܳܐ ܕܝܳܗܒܺܝܢܰܢ ܠܰܫܠܳܡܳܐ ܥܶܠܺܝܬܳܢܳܝܳܐ: ܘܕܰܢܩܽܘܡ ܡ̇ܰܢ ܢܰܟܦܳܐܺܝܬ ܕܠܐܴ ܐܰܝܟ ܣܳܛܳܢܳܐ ܢܶܬܬܰܚܬܶܐ. ܘܓܰܠܝܽܘܬܳܐ ܕܐ̱ܪ̈ܳܙܶܐ ܠܢܽܘܚܳܡܳܟ ܘܡܰܪ̈ܘܳܚܶܐ ܠܰܣܪ̈ܳܦܶܐ ܘܰܡܫܰܡ̈ܫܳܢܶܐ ܠܡܰܠܐܱܟ̈ܶܐ ܕܰܢܚܶܬܘ ܩܳܡܘ ܚܕܳܪ̈ܰܝ ܩܰܒܪܳܟ: ܩܨܳܝܬܳܐ ܗ̇ܳܝ ܠܐܴ ܣܕܺܝܩܬܳܐ ܠܰܩܨܳܝܬܳܐ ܙܩܺܝܦܳܢܳܝܬܳܐ ܕܠܐܴ ܐܶܬܦܰܪܫܰܬ ܐܠܰܗܽܘܬܳܟ ܠܐܴ ܡ̣ܶܢ ܢܰܦܫܳܟ ܘܠܐܴ ܡ̣ܶܢ ܦܰܓܪܳܟ: ܒܰܚܕܳܝܽܘܬܳܐ ܠܐܴ ܚܒܺܝܟܬܳܐ. ܒܽܘܪ̈ܟܳܬܳܐ ܥܰܡ ܩܽܘ̈ܕܳܫܶܐ ܕܠܰܚܡܳܐ ܘܚܰܡܪܳܐ ܠܦܰܓܪܳܐ ܘܰܕܡܳܐ ܕܡ̣ܶܢ ܒܬܽܘܠܬܳܐ: ܕܪܽܘܚܳܐ ܩܰܕܺܝܫܬܳܐ ܠܰܣܒܰܪܬܳܐ ܗ̇ܳܝ ܡܰܠܐܱܟܳܝܬܳܐ: ܘܡܶܬܕܰܟܪܳܢܽܘܬܳܐ ܕܚܰܝ̈ܶܐ ܘܡܺܝ̈ܬܶܐ ܐ̱ܢܳܫ̈ܳܐ ܓܒܰܝ̈ܳܐ ܠܰܡܡܰܪܝܳܢܽܘܬܳܐ ܕܰܒܥܶܩ̈ܒܳܬܗܽܘܢ: ܩܨܳܝܬܳܐ ܕܠܰܬܪܶܝܢ ܦܶܠܓܺܝ̈ܢ ܠܫܰܪܺܝܪܽܘܬ ܚܰܫܳܐ ܘܰܙܩܺܝܦܳܐ ܕܒܰܒܣܰܪ: ܘܰܡܢܳܬܳܐ ܕܡ̣ܶܢ ܦܰܓܪܳܐ ܒܰܛܡܫܬܳܐ ܕܡܳܢܳܝܬܳܐ ܘܰܚܬܳܡܳܐ ܕܥܰܠ ܦܰܓܪܳܐ ܠܰܕܩܰܪܬܳܐ ܕܰܦܢܳܝܬܳܐ: ܘܰܡܦܰܠܦܠܽܘܬܳܐ ܕܒܰܕܡܳܐ. ܡܰܝܬܝܽܘܬܳܐ ܕܡ̣ܶܢ ܕܡܳܐ ܘܰܪܫܳܡܳܐ ܥܰܠ ܦܰܓܪܳܐ ܩܰܕܺܝܫܳܐ ܒܛܽܘܦܣܳܐ ܕܰܨܠܺܝܒܳܐ ܠܗ̇ܳܝ ܕܰܚܕܳܝܽܘܬܳܐ ܕܢܰܦܫܳܐ ܥܰܡ ܦܰܓܪܳܐ: ܘܕܳܐܦܶܢ ܐܶܬܦܪܶܫܘ ܐܶܠܐܴ ܐܠܰܗܽܘܬܳܐ ܩܰܘܝܰܬ݀ ܒܰܚܕܳܝܽܘܬܳܐ. ܚܽܘܝܳܕܳܐ ܕܦܶܠܓ̈ܶܐ ܠܰܚܕܳܝܽܘܬܳܐ ܟܰܪܣܳܢܳܝܬܳܐ ܘܠܰܝܬ ܦܽܘܠܳܓܳܐ ܠܰܬܪܰܝܳܢܽܘܬ ܟܝ̈ܳܢܶܐ: ܘܚܽܘܝܳܕ ܫܡܰܝܳܢ̈ܶܐ ܘܰܐܪ̈ܥܳܢܳܝܶܐ: ܟܪܽܘܟܝܳܐ ܚܽܘܕܪܳܢܳܝܳܐ ܘܝܰܡܺܝܢܳܝܳܐ ܠܰܕܒܺܝܚܽܘܬܳܐ ܕܰܚܠܳܦ ܟܽܠܳܗ̇ ܚܛܺܝܬܳܐ ܕܚܽܘܕܪܶܗ ܕܥܳܠܡܳܐ: ܘܗ̇ܳܝ ܕܰܒܗܶܦܟܳܐ ܡ̇ܰܢ ܠܦܽܘܢܳܝܳܐ ܕܡ̣ܶܢ ܕܽܘܒܳܪܳܐ ܣܶܡܳܠܳܝܳܐ ܠܝܰܡܺܝܢܳܝܳܐ: ܫܕܳܝܬܳܐ ܕܰܓܡܽܘܪܬܳܐ ܒܟܳܣܳܐ ܠܫܽܘܘܕܳܥܳܐ ܕܰܕܡܳܐ ܕܗܳܢܳܐ ܐܺܝܬܰܘܗܝ ܘܠܰܘ ܕܰܐ̱ܚܪܺܢܳܐ ܘܰܓܡܽܘܪܬܳܐ ܣܰܓܺܝ̈ܳܐܬܳܐ ܠܰܩܨܳܝܬܳܐ ܕܰܒܥܶܠܺܝܬܳܐ: ܨܠܽܘܬܳܐ ܡܳܪܳܢܳܝܬܳܐ ܕܰܠܡܶܬܪܰܣܝܳܢܽܘܬ ܢܰܦܫܳܐ ܘܦܰܓܪܳܐ ܘܙܽܘܝܳܚ ܐ̱ܪ̈ܳܙܶܐ ܠܣܽܘܠܳܩܳܐ ܕܡ̣ܶܢ ܐܰܪܥܳܐ ܠܰܫܡܰܝܳܐ: ܬܶܫܒܽܘܚܬܳܐ ܠܰܚܕܳܝܽܘܬܳܐ ܗ̇ܳܝ ܬܠܺܝܬܳܝܬܳܐ: ܚܽܘܦܳܝܳܐ ܠܟܺܐܦܳܐ ܕܩܰܒܪܳܐ: ܘܰܩܦܽܘܠܝܳܐ ܠܰܩܝܳܡܬܳܐ ܡܳܪܳܢܳܝܬܳܐ. ܫܰܘܬܳܦܽܘܬܳܐ ܩܰܕܡܳܝܬܳܐ ܠܗ̇ܳܝ ܩܰܕܡܳܝܬܳܐ: ܘܒܳܬܰܪܟܶܢ ܠܥܰܡܳܐ ܠܗ̇ܳܝ ܕܰܫܠܺܝܚܽܘܬܳܐ ܠܚܽܘܣܳܝܳܐ ܘܰܪܟܺܝܢܽܘܬ ܨܰܘܪܳܐ ܠܰܫܟܳܚܬܳܐ ܕܪ̈ܰܚܡܶܐ: ܘܒܽܘܪܟܬܳܐ ܠܗ̇ܳܝ ܥܶܡܰܐܘܳܣܳܝܬܳܐ. ܗܳܕܶܐ ܗܰܝܡܳܢܽܘܬܳܐ ܐܰܚܺܝܕܺܝܢܰܢ ܡܳܪܝܳܐ: ܘܗܳܟܰܢܳܐ ܡܗܰܝܡܢܺܝܢܰܢ ܟܰܕ ܫܳܐܠܺܝܢܰܢ ܘܒܳܥܶܝܢܰܢ ܒܶܢܝܳܢ ܢܰܦ̈ܫܳܬܰܢ: ܟܰܕ ܡܦܰܨܶܐ ܐܰܢ̱ܬ ܠܰܢ ܡ̣ܶܢ ܗ̇ܰܘ ܕܰܠܩܽܘܒܠܐܴ ܘܰܒܥܶܠܕܒܳܒܳܐ ܕܺܝܠܰܢ: ܘܥܳܒܶܕ ܐܰܢ̱ܬ ܪ̈ܰܚܡܶܐ ܥܰܠ ܢܰܦ̈ܫܳܬܰܢ: ܘܰܡܢܺܝܚ ܐܰܢ̱ܬ ܠܥܰܢܺܝ̈ܕܰܝܢ ܒܡܰܠܟܽܘܬܳܟ ܠܐܴ ܡܶܫܬܰܪܝܳܢܺܝܬܳܐ: ܕܰܚܢܰܢ ܐܳܦ ܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

ܫܠܡ ܕܝܘܡ ܐܪܒܥܐ ܕܚܘܪ̈ܐ

 

ܘܠܒܪܝ̣ܬܐ ܟܠܗ̇ ܚܝ̈ܐ ܫܟܢ܀ ܟܕ ܡ̣ܢ ܐܪܒܥܐ ܐܣܛܘ̈ܟܣܐ ܚܡܝ̣ܡܐ: ܘܩܪܝܪܐ: ܘܪܛܝ̣ܒܐ: ܘܝܒܝ̣ܫܐ: ܟܠ ܓܘܫܡܐ ܐܩܝ̣ܡ: ܘܠܡܢܦܫܐ ܡ̣ܢ ܐܪܒܥܐ ܩܝܡ: ܩܡܚܐ ܚܠܦ ܥܦܪܐ: ܘܡܝ̈ܐ ܐ̱ܪܙ ܡܝ̈ܐ: ܘܡܚܐ ܐ̱ܪܙ ܢܘܪܐ: ܚܡܝ̣ܪܐ ܐ̱ܪܙ ܐܐܪ: ܘܡܫܚܐ ܛܘܦܣܐ ܕܢܦܫܐ: ܘܠܗܠܝܢ ܥܕܬܐ ܩܕܝܫܬܐ ܢܩ̇ܦܐ: ܟܕ ܡ̇ܢ ܡ̣ܢ ܝܘܒܠܐ ܕܐܪܒܥ ܢܫ̈ܐ ܙܢܝ̈ܬܐ ܕܡ̣ܢ ܥܡ̈ܡܐ ܕܐܫܬܘ̈ܬܦܝ ܘܠܒ̈ܢܝ ܥܡܐ ܠܚܘܪܪܐ ܕܐܪܒܥ ܦܢ̈ܝܢ ܕܢ̣ܚ: ܡ̣ܢ ܬܡܪ ܥܡܡܝܬܐ ܕܒܚܡܘܗ̇ ܙܢܝ̣ܬ݀ ܘܪܚܒ ܕܩܒ̣ܠܬ݀ ܠܓܫܘ̈ܫܐ: ܘܪܥܘ̣ܬ ܡܘ̣ܐܒܝܬܐ ܘܒܪܬ ܫܒܥ ܚܝ̣ܬܝܬܐ܀ ܟܕ ܒܡܣܩܗ̇ ܕܠܨܠܝܒܐ ܠܐܪ̈ܒܥܦܢܝܢ ܕܐܣܬܝ̈ܒܝ ܒܕܒ̈ܚܐ ܕܥܠܘ̈ܬܐ ܩܕܫ: ܐܝܟ ܐܪܒܥ ܙܢܝ̈ܬܐ ܕܡ̣ܢ ܥܡ̈ܡܐ ܕܒܢܩ̣ܦܐ ܕܒܢ̈ܝ ܥܡܐ ܐܬܩܕ̈ܫܝ: ܟܕ ܡ̣ܢ ܐܪܒܥܐ ܪ̈ܝܫܝ ܩܣܛܘܢܪ̈ܐ ܠܐܪܒܥ ܡܢܘ̈ܢ ܐܬܦܠܓܘ ܢܚ̈ܬܘܗܝ: ܟܘ̣ܬܝ̣ܢܐ ܘܓܐܠܐ ܘܥܪܩܬܐ ܘܣܕܠܐ ܕܚܠܦ ܚܛܝ̣ܬܐ ܕܐܪܒܥ ܦܢܝ̈ܢ ܠܒ̣ܫ ܐܢܘܢ܀ ܟܕ ܟܘ̣ܬܝ̣ܢܐ ܗ̇ܝ ܕܠܐ ܐܣܬܕܩܬ݀ ܘܠܥܡ̈ܡܐ ܡܛܬ݀ ܐ̱ܪܙ ܗܝܡܢܘܬܐ ܫܘܕܥܬ݀܀ ܘܕܒܐܝ̈ܕܝ ܐܘܢܓܠܝ̈ܣܛܐ ܐܪܒܥܐ ܣܒ̣ܪܬܐ ܐܠܗܝ̇ܬܐ ܡܢ̣ܥܬ݀ ܟܕ ܠܐ ܐܣܬܕܩ̣ܬ݀ ܟܕ ܒܐܪܒܥܐ ܥܕ̈ܢܐ ܕܐܙ̈ܠܝ ܢܫ̈ܐ ܠܩܒܪܐ ܡܥܒܕ ܚܝ̈ܐ ܣܒܪܬܐ ܗ̇ܝ ܕܢܘܚܡܗ: ܘܠܐܪܒܥܐ ܕܢܦ̣ܠܘ ܐܩܝ̣ܡ ܘܫܪܪ: ܐܦ ܠܐܪܒܥܐ ܓܒܝ̣̈ܢ ܕܡܠܐܟ̈ܐ ܘܢܛܘܪ̈ܐ ܘܢܫ̈ܐ ܘܬܠܡܝ̣̈ܕܐ ܩܝܡܬܗ ܒܕܩ ܘܓܠܐ܀ ܟܕ ܠܐܪܒܥ ܦܢ̈ܝܢ ܒܐܝ̈ܕܝ ܐܪܒܥܐ ܐܘܢܓܠܝ̣̈ܣܛܐ ܦܪܚ̣ܬ݀ ܣܒ̣ܪܬܐ ܐܠܗܝܬܐ: ܡܕܡ̈ܝܝ ܒܡܪܟܒܬܐ ܟܪܘ̣ܒܝܬܐ ܘܛܥܝ̣ܢܬ݀ ܠܐܝܬܘܬܐ ܡܪܝܡܬܐ: ܟܕ ܒܐܪܒܥ ܕܡ̈ܘܢ ܡܪܟܒܬܐ ܢܘܪܢܝܬܐ ܐܬܕܡܝ̣ܘ ܐܪܒܥܐ ܐܘܢܓܠܝ̣̈ܣܛܐ: ܒܐ ܪܝܐ ܐ̱ܪܙ ܠܒܝ̣ܒܘܬܗܘܢ ܘܚܘ̣ܦܝ ܥܩܒ̣̈ܬܗܘܢ: ܘܬܘܪܐ ܐܟܪܘܬܗܘܢ ܘܡܪܘܚܢܘ̣ܬ ܚܛܘ̣̈ܛܐ: ܘܢܫ̣ܪܐ ܨܝܘܕܘܬܗܘܢ ܘܚܪܝ̣ܦܘܬ ܚܙܝܐ ܘܦܪܚܐ: ܘܒܪܢܫܐ ܟܝ̇ܢܗܘܢ ܡܠܝ̣ܠܐ: ܟܕ ܒܚܘ̣ܝܕܐ ܕܐܪ̈ܒܥܦܢܝܢ ܕܐܬܩܛܪ̈ܝ ܒܣܒ̣ܪܬܗ ܘܥܘ̣ܠܝܐ ܕܡܐܢܐ ܠܫܡܝܐ: ܠܡܬܬܪܝ̣ܡܘܢܬܐ ܕܟܠ ܥܡ̈ܡܝܢ ܠܡܠܟܘܬܐ ܫܡܝܢܝ̣ܬܐ: ܟܕ ܠܐܪܒܥܐ ܓܒܝ̣̈ܢ ܦܠܓ ܦܘܠܘܣ ܠܙܒܢܐ ܕܡܕܒܪܢܘܬܗ: ܟܕ ܠܪܘܡܐ ܠܡܬܘܡܝܘܬܗ: ܟܕ ܠܪܘܡܐ ܠܡܬܘܡܝܘ̣ܬܗ: ܠܥܘܡܩܐ ܠܡܬܢܚܬܢܘܬܗ: ܘܐܘܪܟܐ ܘܦܬܝܐ ܠܡܚܬܬܗ ܕܠܗܡܢ ܐܝܟ ܕܪܫ̣ܡ ܐܒܪܗܡ ܒܦܣ̈ܥܬܗ ܘܕܘܪ̈ܟܬܗ: ܟܕ ܒܪܒܝ̣ܥܝܘ̣ܬ ܡܠܟܘܬܐ ܕܝ̣ܠܝ̣ܕܘܬܗ: ܨܠܝܒܐ ܩܕܝܫܐ ܒܐܝ̈ܕܝ ܦܪܘܛܘ̣ܢܝܩܝ ܡܠܟܬܐ ܠܝܥܩܘܒ ܐܚܘܗܝ ܐܓܥ̣ܠ ܘܠܥܡܐ ܗ̇ܘ ܝܘܕܝܐ ܐܒ̣ܗܬ ܘܠܬܠܡܝ̈ܕܐ ܫܠܝ̈ܚܐ ܩܕܝ̣̈ܫܐ ܒܐܪ̈ܒܥܦܢܝܢ ܩܕܡ ܟܠ ܥܡ̈ܡܝܢ ܢܨܚ܀ ܘܥܠ ܗܕܐ ܒܝܘܡܐ ܗܢܐ ܕܐܪܒܥܐ ܕܚܘܪ̈ܐ ܕܩܝ̇ܡܬܟ ܦܪܘܩܝܬܐ ܡܫܝܚܐ ܐܠܗܢ ܡܦܝ̣ܣܝ̣ܢܢ ܠܟ ܥܠ ܥܛܪܐ ܗܢܐ ܕܒܣ̈ܡܐ ܕܠܐܠܗܘܬܟ ܐܥ̣ܛܪܢܢ ܕܬܩܕܫ ܠܢ ܒܛܝܒܘܬܟ: ܘܬܫܪܪ ܠܢ ܒܗܝܡܢܘܬܐ ܕܒܟ܀ ܘܬܡ̣ܢܐ ܠܢ ܒܓܙܪܟ: ܘܬܚܕܬ ܠܢ ܒܒܣܝܡܘܬܟ: ܘܬܫܝܢ ܬܪ̈ܥܝܬܢ ܒܚܘܒܟ: ܘܬܐܘܐ ܦܠܝܓܘܬܢ ܒܣܒܪܟ: ܘܬܒܪܟ ܠܟܠܢ ܒܝܡܝܢܟ ܘܬܣܝܥ ܠܢ ܒܚܢܢܟ: ܘܬܚܘܪ ܣܢ̈ܝܬܢ ܒܙܘ̣ܦܟ: ܘܬܚܣܐ ܠܢ ܘܠܥܢܝ̣̈ܕܝܢ ܒܩܕܝܫܘܬܟ: ܘܠܢ ܘܠܗܘܢ ܬܩܝ̣ܡ ܒܓܒܟ ܕܝܡܝܢܐ: ܒܝܘܡܐ ܕܡܬܓܠܝܢܘܬܟ ܐܝܟܢܐ ܕܢܣܩ ܠܟ ܫܘܒܚܐ ܘܬܘܕܝܬܐ ܘܠܐܒܘܟ ܘܠܪܘܚܟ ܩܕܝܫܐ܀

ܥܛܪܐ

ܕܒܚܐ ܡܚܣܝܢܐ ܕܐܬܕܒ̣ܚ ܚܠܦ ܚܛܝ̈ܐ ܒܙܩܝ̣ܦܐ ܘܠܐܪܒܥ ܦܢ̈ܝܢ ܢܓܕ ܠܣܓܕܬܗ: ܘܠܐܪܒܥܐ ܐܣܛܘ̈ܟܣܐ ܕܢܦ̣ܠܘ ܐܩܝ̣ܡ ܒܩܝ̇ܡܬܗ ܐܢ̱ܬ ܐܦ ܗܫܐ ܡܪܝܐ ܩܒ̣ܠ ܦܝܪܡܢ ܘܐܬܬܢܝ̣ܚ ܒܥܛܪܐ ܕܨܠܘ̈ܬܢ: ܘܐܘܒܕ ܡܢܢ ܠܐܪܒܥܐ  ܚܫ̈ܐ ܕܡܚܫܝ̣ܢ ܠܢ: ܙܢܝܘܬܐ ܠܥܒܘ̣ܬܐ: ܪܘܝܘܬܐ: ܫܢ̱ܬܐ: ܐܝܟ ܕܐܘܒ̣ܕܬ ܠܥܘ̣ܪܝ̣ܒ ܘܙܝ̣ܒ ܘܙܒܚ ܘܨܠܡܢܥ ܒܝܘ̈ܡܝ ܓܕܥܘܢ: ܘܒܣܡ ܠܢ ܘܠܥܢܝ̈ܕܝܢ ܒܡܠܟܘܬܟ ܥܡ ܟܠܗܘܢ ܩܕܝ̈ܫܝܟ: ܘܢܣܩ ܠܟ ܫܘܒܚܐ ܚܘܬܡܐ ܒܪܐ ܕܡܬܓܝܐܐ ܥܠ ܡܪܟܒܬܐ ܕܐܪܒܥ ܐܦܝ̈ܢ: ܘܥܠ ܚܝܘܬܐ ܪܒܝ̣ܥܝܬ݀ ܪ̈ܓܠܐ ܪܟ̣ܒ ܕܫܦ̣ܪ ܠܗ: ܘܒܐܪܒܥ ܓܘܕܝ̈ܢ ܐܙܕܝܚ̣ܬ݀ ܪܒܘܬܗ܀ ܗܒܠܢ ܕܒܡܛܪ̈ܬܐ ܐܪܒܥ ܕܐܝ̈ܡܡܐ ܘܠܝܠܘ̈ܬܐ ܢܫܒܚ ܘܢܩ̇ܠܣ ܠܩܝ̇ܡܬܟ ܕܡ̣ܢ ܩܒܪܐ܀ ܘܥܡ ܟܪ̈ܘܒܐ ܪܒܝ̣ܥܝܝ ܦܪ̈ܨܘܦܐ ܢܒܪܘܟ ܘܢܣܓܘܕ ܠܟ ܘܠܐܒܘܟ ܘܠܪܘܚܟ ܩܕܝܫܐ ܗܫܐ ܘܒܟܠܙܒܢ ܠܥܠܡܝܢ ܐܡܝܢ܀

ܦܪܘܡܝܘܢ ܕܬܠܬܫ̈ܥܝܢ

ܬܫܒܘܚܬܐ: ܠܗ̇ܘ ܪܡܐ ܘܡܥܠܝܐ ܕܐܬܬܚܬܝ̣ ܘܠܐܕܡ ܨܠܡܐ ܕܪܒܘܬܗ ܡ̣ܢ ܓܘ ܣܝ̇ܢܐ ܕܰܠܺܝ̣: ܘܠܫܡܝܐ ܒܬܫܒܘܚܬܐ ܥܠܝ܀ ܠܗ̇ܘ ܠܚܡܐ ܕܚܝ̈ܐ ܕܒܚܪܬ݀ ܙܒ̈ܢܐ ܠܦܘܪܩܢܢ ܐܬܓܠܝ̣: ܘܡ̣ܢ ܡܪ̈ܚܐ ܒܩܝܣܐ ܐܬܬܠܝ̣: ܘܒܡܐܢ̈ܐ ܪ̈ܝܫܝܐ ܐܬܥܦܝ̣: ܘܡ̣ܢ ܟܠ ܐܠܗ ܒܪܢܫ ܐܬܬܘܕܝ̣: ܕܠܗ ܝ̇ܐܐ ܫܘܒܚܐ܀

ܣܕܪܐ

ܟܕ ܠܝ̣ܠܝ̣ܕܘܬܟ ܡܬܘܡܝܬܐ ܘܕܠܥܠ ܡ̣ܢ ܡܠܬܐ ܘܕܠܐ ܐܡܐ: ܘܠܗ̇ܝ ܦܓܪܢܝܬܐ ܕܠܐ ܐܒܐ ܘܕܠܐ ܪܕܝܐ ܘܚܫܐ ܥܠ ܠܘ̈ܚܐ ܕܠܒܘ̈ܬܢ ܟܬܒܝ̣ܢܢ: ܘܒܟܠܗܝܢ ܕܗܘ̈ܝ ܒܗܝܢ ܬܗ̇ܪܝܢܢ ܘܠܨܠܝܒܘܬܟ ܒܢܦ̈ܫܬܢ ܢܣ̇ܒܝܢܢ܀ ܒܥܒܝ̣ܕܬܐ ܢܘܚܝܬܐ ܠܩܪ̈ܒܐ ܡܬܛܝܒܝ̣ܢܢ: ܘܩܪܒܐ ܥܡ ܣܛܢܐ ܣ̇ܕܪܝ̣ܢܢ: ܘܠܥܕܬܐ ܗ̇ܝ ܟܘܝܠܝܬܐ ܥ̇ܐܠܝܢܢ ܒܡܕܢܚܐ ܡܬܚܙܝܢܐ ܟܠܢ ܡܣܬܟܠܝ̣ܢܢ: ܘܒܪܝܫ ܟܘܡܪ̈ܐ ܕܩ̇ܐܡ ܠܟ ܪܝܫ ܟܗ̈ܢܐ ܡܫܝܚܐ ܕܗܘ̣ܝܬ ܚܠܦܝܢ ܩܘܪܒܢܐ ܡܫܬܪܪܝܢܢ: ܠܠܚܡܐ ܘܚܡܪܐ ܦܓܪܟ ܘܕܡܟ ܗ̇ܘ ܕܡ̣ܢ ܒܬܘܠܬܐ ܡܪܝܡ ܝܕܥܝ̣ܢܢ: ܘܒܦܝ̣ܪܡܐ ܠܚܕܝܘܬܐ ܕܒܟܪܣܐ ܐܦ ܕܘܝܪܟ ܕܒܥܠܡܐ ܘܫܡܘ̣ܬܢ ܠܟ ܡܓܥܠܝ̣ܢܢ ܘܐܠܐ ܕܥܠ ܡܕܒܚܐ ܨ̈ܐܪ ܠܪܩܝ̣ܥܐ ܕܒܝܬ ܠܢ ܘܠܐܬ ܪܐ ܫܡܝܢܐ: ܘܩܢܕܝ̣̈ܠܐ ܠܙܠܓ̈ܐܐ ܪ̈ܘܚܢܝܐ ܘܒܐܡܐ ܠܥܠܝ̣ܬܐ: ܘܛܒܠܝ̣ܬܐ ܠܨܠܝܒܐ ܦܪܘܩܝܐ: ܘܬܪܘܢܘܣ ܠܩܒܪܐ ܡܪܢܝܐ: ܘܬܠܒܫ̣ܬܐ ܠܡܐܢ̈ܝ ܥܘ̣ܦܝܐ: ܘܐܣܪܐ ܠܣܘܪܕܐ: ܘܦܝ̣ܢܟܐ ܘܟܣܐ ܠܗ̇ܝ ܫܪܘܬܐ ܐ̱ܪܙܢܝܬܐ: ܘܫܘܫܦܐ ܘܦܕܬܐ ܠܟܐܦܐ ܩܒܪܢܝܬܐ܀ ܐܘܪܪܐ ܕܡܫܡܫܢܐ ܠܓܦ̈ܐ ܕܣܪ̈ܦܐ: ܟܘ̣ܬܝ̣ܢܐ ܓܠܝ̣ܠܬܐ ܘܚܘܪܬܐ ܠܚ̈ܫܐ ܠܐ ܦܠܝ̣̈ܓܐ: ܘܫܪܝܗ̇ ܠܚܘ̣ܪܪܐ ܕܡ̣ܢ ܒܥܠܕ̈ܒܒܐ: ܘܗ̇ܝ ܕܠܒ̇ܫܝܢ ܟܗ̈ܢܐ ܘܡܚܙܩܝ̣ܢ ܒܟܠ ܦܘܩܕ̈ܢܐ: ܦܕܝ̈ܬܐ ܓܠܝ̈ܠܬܐ ܠܫܘܪܪܐ ܕܢܛܘ̣ܪܘܬ ܢܡܘ̈ܣܐ: ܘܦܝܢܐ ܠܓܠܐ ܐܘܟܝ̣ܬ ܡܪܛܘܛܐ: ܘܓܠܝ̣ܠܘܬܗ ܠܚܝ̈ܐ ܠܐ ܣܕܝ̣̈ܩܐ: ܐܦ ܡܨܢܦܬܐ ܠܣܘ̣ܕܪܐ ܘܗ̣ܝ ܚܘܪܘܬܗ̇ ܠܕܟܝܘܬ ܚܘ̈ܫܒܐ: ܘܟܠܒܬܐ ܗ̇ܝ ܣܪܦܝܬܐ: ܠܚܡܐ ܚܕܬܐ ܕܡܬܐܦܐ ܘܡܬܢܣܒ ܠܕܘܒܪ̈ܐ ܚܕ̈ܬܐ: ܘܚܕ ܕܚܕ ܐܝܬܝܟ ܡܠܬܐ ܕܐܬܒܣܪ: ܘܬܪ̈ܝܢ ܠܐܠܗܘܬܐ ܘܚܕ ܒܪܐ ܠܟ ܝܕܥܝ̣ܢܢ: ܘܬܠܬܐ ܕܚܕ ܗ̣ܘ ܟܝܢܐ ܕܐܠܗܘܬܐ ܘܩܢܘ̈ܡܐ ܬܠܬܐ܀ ܟܣܐ ܕܡ̣ܢ ܝܡܝܢܐ ܐ̱ܪܙ ܟܒܕܐ ܐܡܐ ܕܕܡܐ ܕܒܓܒܐ ܝܡܝܢܐ: ܘܦܓܪܐ ܕܡ̣ܢ ܡܥܪܒܐ ܐ̱ܪܙ ܗ̇ܝ ܕܦܓܪܐ ܕܡܘܟܟܢ ܠܒ̣ܫܬ ܘܕܕܡܗ ܕܩܛܝ̣ܠܐ ܠܩܕܡܘܗܝ ܕܪ̈ܐ: ܫܠܡܐ ܕܝܗܒܝ̣ܢܢ ܠܫܠܡܐ ܥܠܝ̣ܬܢܝܐ: ܘܕܢܩܘܡ ܡ̇ܢ ܢܟܦܐܝ̣ܬ ܕܠܐ ܐܝܟ ܣܛܢܐ ܢܬܬܚܬܐ܀ ܘܓܠܝܘܬܐ ܕܐ̱ܪ̈ܙܐ ܠܢܘܚܡܟ ܘܡܪ̈ܘܚܐ ܠܣܪ̈ܦܐ ܘܡܫܡ̈ܫܢܐ ܠܡܠܐܟ̈ܐ ܕܢܚ̣ܬܘ ܩܡ̣ܘ ܚܕܪ̈ܝ ܩܒܪܟ: ܩܨܝ̇ܬܐ ܗ̇ܝ ܠܐ ܣܕܝ̣ܩܬܐ ܠܩܨܝ̇ܬܐ ܙܩܝ̣ܦܢܝܬܐ ܕܠܐ ܐܬܦ̣ܪܫܬ ܐܠܗܘܬܟ ܠܐ ܡ̣ܢ ܢܦܫܟ ܘܠܐ ܡ̣ܢ ܦܓܪܟ: ܒܚܕܝܘܬܐ ܠܐ ܚܒܝ̣ܟܬܐ܀ ܒܘܪ̈ܟܬܐ ܥܡ ܩܘ̈ܕܫܐ ܕܠܚܡܐ ܘܚܡܪܐ ܠܦܓܪܐ ܘܕܡܐ ܕܡ̣ܢ ܒܬܘܠܬܐ: ܕܪܘܚܐ ܩܕܝ̣ܫܬܐ ܠܣܒܪܬܐ ܗ̇ܝ ܡܠܐܟܝܬܐ: ܘܡܬܕܟܪܢܘܬܐ ܕܚܝ̈ܐ ܘܡܝ̈ܬܐ ܐ̱ܢܫ̈ܐ ܓܒܝ̈ܐ ܠܡܡܪܝܢܘܬܐ ܕܒܥܩ̈ܒܬܗܘܢ: ܩܨܝ̇ܬܐ ܕܠܬܪ̈ܝܢ ܦܠܓܝ̣̈ܢ ܠܫܪܝܪܘܬ ܚܫܐ ܘܙܩܝ̣ܦܐ ܕܒܒܣܪ: ܘܡܢܬܐ ܕܡ̣ܢ ܦܓܪܐ ܒܛܡܫܬܐ ܕܡܢܝ̇ܬܐ ܘܚܬܡܐ ܕܥܠ ܦܓܪܐ ܠܕܩܪܬܐ ܕܦܢܝ̇ܬܐ: ܘܡܦܠܦܠܘ̣ܬܐ ܕܒܕܡܐ܀ ܡܝܬܝܘܬܐ ܕܡ̣ܢ ܕܡܐ ܘܪܫܡܐ ܥܠ ܦܓܪܐ ܩܕܝܫܐ ܒܛܘܦܣܐ ܕܨܠܝܒܐ ܠܗ̇ܝ ܕܚܕܝܘܬܐ ܕܢܦܫܐ ܥܡ ܦܓܪܐ: ܘܕܐܦܢ ܐܬܦܪܫܘ ܐܠܐ ܐܠܗܘܬܐ ܩܘܝܬ݀ ܒܚܕܝܘܬܐ܀ ܚܘܝܕܐ ܕܦܠܓ̈ܐ ܠܚܕܝܘܬܐ ܟܪܣܢܝܬܐ ܘܠܝܬ ܦܘܠܓܐ ܠܬܪܝܢܘܬ ܟܝ̈ܢܐ: ܘܚܘ̣ܝܕ ܫܡܝܢ̈ܐ ܘܐܪ̈ܥܢܝܐ: ܟܪܘܟܝܐ ܚܘܕܪܢܝܐ ܘܝܡܝ̣ܢܝܐ ܠܕܒܝ̣ܚܘܬܐ ܕܚܠܦ ܟܠܗ̇ ܚܛܝ̣ܬܐ ܕܚܘܕܪܗ ܕܥܠܡܐ: ܘܗ̇ܝ ܕܒܗܦܟܐ ܡ̇ܢ ܠܦܘܢܝܐ ܕܡ̣ܢ ܕܘܒܪܐ ܣܡܠܝܐ ܠܝܡܝܢܝܐ: ܫܕܝܬܐ ܕܓܡܘܪܬܐ ܒܟܣܐ ܠܫܘܘܕܥܐ ܕܕܡܐ ܕܗܢܐ ܐܝܬܘܗܝ ܘܠܘ ܕܐ̱ܚܪܢܐ ܘܓܡܘܪܬܐ ܣܓܝ̈ܐܬܐ ܠܩܨܝܬܐ ܕܒܥܠܝ̣ܬܐ: ܨܠܘܬܐ ܡܪܢܝܬܐ ܕܠܡܬܪܣܝܢܘܬ ܢܦܫܐ ܘܦܓܪܐ ܘܙܘܝܚ ܐ̱ܪ̈ܙܐ ܠܣܘܠܩܐ ܕܡ̣ܢ ܐܪܥܐ ܠܫܡܝܐ: ܬܫܒܘܚܬܐ ܠܚܕܝܘܬܐ ܗ̇ܝ ܬܠܝܬܝܬܐ: ܚܘ̣ܦܝܐ ܠܟܐܦܐ ܕܩܒܪܐ: ܘܩܦܘܠܝܐ ܠܩܝܡܬܐ ܡܪܢܝܬܐ܀ ܫܘܬܦܘܬܐ ܩܕܡܝܬܐ ܠܗ̇ܝ ܩܕܡܝܬܐ: ܘܒܬܪܟܢ ܠܥܡܐ ܠܗ̇ܝ ܕܫܠܝ̣ܚܘܬܐ ܠܚܘܣܝܐ ܘܪܟܝ̣ܢܘ̣ܬ ܨܘܪܐ ܠܫܟ̣ܚܬܐ ܕܪ̈ܚܡܐ: ܘܒܘܪܟܬܐ ܠܗ̇ܝ ܥܡܐܘܣܝܬܐ܀ ܗܕܐ ܗܝܡܢܘܬܐ ܐܚܝ̣ܕܝܢܢ ܡܪܝܐ: ܘܗܟܢܐ ܡܗܝܡܢܝܢܢ ܟܕ ܫ̇ܐܠܝܢܢ ܘܒ̇ܥܝܢܢ ܒܢ̣ܝܢ ܢܦܫ̈ܬܢ: ܟܕ ܡܦܨܐ ܐܢ̱ܬ ܠܢ ܡ̣ܢ ܗ̇ܘ ܕܠܩܘܒܠܐ ܘܒܥܠܕܒܒܐ ܕܝܠܢ: ܘܥܒ̇ܕ ܐܢ̱ܬ ܪ̈ܚܡܐ ܥܠ ܢܦܫ̈ܬܢ: ܘܡܢܝ̣ܚ ܐܢ̱ܬ ܠܥܢܝ̈ܕܝܢ ܒܡܠܟܘܬܟ ܠܐ ܡܫܬܪܝܢܝ̣ܬܐ: ܕܚܢܢ ܐܦ ܗ̣ܢܘܢ ܢܣܩ ܠܟ ܫܘܒܚܐ ܘܬܘܕܝܬܐ ܗܫܐ܀

ܫܠܡ ܕܝܘܡ ܐܪܒܥܐ ܕܚܘܪ̈ܐ

 

ܬܘܒ ܛܟܣܐ ܕܝܘܡ ܚܡܫܐ ܕܚܘܪ̈ܐ

ܩܕܡܝܬ ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܡܪܰܚܡܳܢܳܐ ܘܪܳܚܶܡ ܐ̱ܢܳܫܳܐ: ܕܰܒܠܶܫ̈ܳܢܶܐ ܕܟܰܝ̈ܳܐ ܘܰܒܩ̈ܳܠܐܷ ܡܰܠܝ̈ܰܝ ܫܽܘܒܚܳܐ ܢܩܰܠܶܣ ܠܥܺܐܕܳܐ ܕܰܩܝܳܡܬܳܟ ܦܳܪܽܘܩܳܝܬܳܐ ܘܡܰܠܝܰܬ݀ ܚܰܕ̈ܘܳܬܳܐ: ܟܰܕ ܚܶܘܳܪܺܝܢ ܢܰܚ̈ܬܺܝܢ ܕܰܥܒܳܕܰܝ̈ܢ ܡܰܨܡܚܺܝܢ ܝܰܬܺܝܪ ܡ̣ܶܢ ܫܶܡܫܳܐ ܒܕܽܘܒܳܪ̈ܶܐ ܕܙܰܕܺܝܩܽܘܬܳܐ. ܘܥܰܡ ܫܶܡܥܽܘܢ ܘܝܽܘܚܰܢܳܢ ܘܚܰܒܪ̈ܰܝܗܽܘܢ ܒܟܽܠܙܒܰܢ ܢܶܚܕܶܐ ܘܢܶܪܘܰܙ ܘܰܢܫܰܒܚܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܚܰܝܠܐܴ ܡܥܰܕܪܳܢܳܐ ܕܰܒܚܰܝܠܶܗ ܠܐܴ ܡܰܘܦܝܳܢܳܐ ܥܬܰܪܘ ܝܰܡ̈ܡܶܐ ܘܢܰܗܪ̈ܰܘܳܬܳܐ ܒܨܰܘܬܳܐ ܕܪ̈ܰܚܫܳܐ ܘܚܰܝ̈ܘܳܬܳܐ: ܘܶܐܬܡܠܺܝܘ ܗܘܰܘ ܓܶܢ̈ܣܶܐ ܦܪ̈ܺܝܫܶܐ ܕܟܽܠ ܕܶܡܘ̈ܳܬܳܐ. ܠܗ̇ܰܘ ܕܰܒܦܽܘܩܕܳܢܶܗ ܡܳܪܳܢܳܝܳܐ ܨܒܰܝܬ ܠܒܰܪܢܳܫܳܐ ܒܚܰܡܫܳܐ ܪ̈ܶܓܫܶܐ ܦܰܓܪ̈ܳܢܳܝܶܐ: ܘܰܒܚܰܡܫܳܐ ܪ̈ܽܘܚܳܢܳܝܶܐ ܕܰܒܗܽܘܢ ܡܶܬܬܙܺܝܥ ܠܬܶܫܒܽܘܚܬܳܐ ܕܰܐܠܳܗܽܘܬܳܐ. ܘܰܒܗܽܘܢ ܨܰܒܬܶܗ ܘܟܰܠܠܶܗ ܠܪܰܒܽܘܬ ܩܽܘܠܳܣܶܗ ܡܥܰܠܝܳܐ ܘܚܽܘܒܳܐ ܕܒܳܪܽܘܝܶܗ. ܠܗ̇ܰܘ ܝܰܡܳܐ ܠܐܴ ܡܶܬܡܰܫܚܳܢܳܐ: ܘܰܬܗܽܘܡܳܐ ܠܐܴ ܡܶܬܓܰܫܫܳܢܳܐ ܕܰܒܚܽܘܒܶܗ ܐܺܝܬܝܳܝܳܐ ܓܰܡܰܪ ܠܒܰܪܢܳܫܳܐ ܒܚܰܡܫܳܐ ܟܰܟܪ̈ܺܝܢ: ܘܥܰܠ ܚܰܡܶܫ ܡܕܺܝ̈ܢܳܢ ܐܰܫܠܛܶܗ ܕܰܬܪܺܝܨܳܐܺܝܬ ܢܶܬܕܒܰܪ ܒܟܽܠܳܗ̇ ܟܺܐܢܽܘܬܳܐ ܕܠܶܗ ܝܳܐܶܐ܀

ܣܕܪܐ

ܡܳܪܝܳܐ ܐܠܰܗܳܐ ܚܰܝܠܬܳܢܳܐ ܠܐܴ ܡܶܙܕܰܟܝܳܢܰܐ ܗ̇ܰܘ ܕܰܒܪܶܡܙܶܗ ܐܠܰܗܳܝܳܐ ܒܝܰܘܡܳܐ ܚܡܺܝܫܳܝܳܐ ܥܬܰܪܘ ܝܰܡ̈ܡܶܐ ܘܢܰܗܪ̈ܰܘܳܬܳܐ ܒܩܳܠܐܴ ܕܪ̈ܰܚܫܳܐ ܘܰܣܓܺܝܘ ܢܽܘ̈ܢܶܐ ܘܰܩܢ̈ܰܝ ܓܶܦ̈ܶܐ ܟܽܠ ܦܳܪ̈ܚܳܬܳܐ ܠܡܶܦܪܰܚ ܒܳܐܐܰܪ. ܒܝܰܘܡܳܐ ܕܚܰܡܫܳܐ ܠܥܳܠܡܳܐ ܐܰܩܺܝܡ ܘܰܒܚܰܡܫܳܐ ܪ̈ܶܓܫܺܝܢ ܟܰܠܠܶܗ: ܘܛܽܘܦܣܳܐ ܪܫܰܡ ܠܐܴܕܳܡ ܕܰܒܚܰܡܫܳܐ ܪ̈ܶܓܫܺܝܢ ܦܰܓܪ̈ܳܢܳܝܶܐ ܘܚܰܡܫܳܐ ܪ̈ܽܘܚܳܢܳܝܶܐ ܢܗܰܕܰܪ ܘܰܢܨܰܒܬ ܐܰܝܟ ܒܳܪܽܘܝܳܐ ܚܰܟܺܝܡܳܐ: ܚܰܡܫܳܐ ܣܶܦܪ̈ܶܐ ܕܽܐܘܪܳܝܬܳܐ ܩܰܒܶܠ ܡܽܘܫܶܐ ܢܒܺܝܳܐ ܡ̣ܶܢ ܪܰܘܡܳܐ ܘܶܐܬܬܰܓܰܪ ܘܰܩܢܳܐ ܒܗܽܘܢ ܪ̈ܶܓܫܶܐ ܕܓܰܘܳܝ̈ܶܐ ܘܒܰܪ̈ܳܝܶܐ. ܘܒܰܐܥ̈ܦܶܐ ܢܣܰܒ ܢܳܛܽܘܪܽܘܬ ܦܽܘܩܕ̈ܳܢܶܐ: ܘܰܒܗܽܘܢ ܗܰܕܺܝ ܠܰܒ̈ܢܰܝ ܐܺܝܣܪܳܐܶܝܠ. ܐܰܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܒܚܰܡܶܫ ܐܳܬܘ̈ܳܬܳܐ ܐܶܬܟܰܠܰܠܘ: ܘܰܒܚܰܡܫܳܐ ܪ̈ܶܓܫܶܐ ܒܰܐܥ̈ܦܶܐ ܝܺܬܰܪܘ: ܘܰܒܚܰܡܶܫ ܡܽܘ̈ܫܚܳܢ ܐܶܨܛܰܒܰܬܘ ܘܒܰܒܥܶܠܕ̈ܒܳܒܰܝܗܽܘܢ ܒܰܙܰܚܘ. ܟܰܕ ܠܙܽܘܙܳܐ ܥܣܺܝܪܳܝܳܐ ܕܰܐܒܺܝܕ ܗܘܳܐ ܡ̣ܶܢ ܐܰܢ̱ܬܬܳܐ ܐܶܫܟܰܚ ܘܰܒܚܰܝ̈ܶܐ ܛܽܘܒ̈ܬܳܢܶܐ ܒܪܺܝܫ ܣܶܕܪܳܐ ܥܣܺܝܪܳܝܳܐ ܛܰܟܶܣ. ܘܰܠܥܶܣܪܳܐ ܪ̈ܶܓܫܰܘܗܝ ܒܛܰܝܒܽܘܬܶܗ ܩܰܕܶܫ ܘܡ̣ܶܢ ܡܽܘܟܳܟܳܐ ܠܘܳܬ ܪܰܘܡܳܐ ܪܳܡܳܐ ܕܪܽܘܚܳܢܽܘܬܳܐ ܐܶܬܥܰܠܺܝ: ܒܚܰܡܶܫ ܓܪ̈ܺܝܨܳܢ ܕܰܣܥܳܪ̈ܶܐ ܠܚܰܡܫܳܐ ܐܠܰܦܺܝ̈ܢ ܬܰܪܣܺܝ ܒܡܰܕܒܪܳܐ: ܘܰܠܚܰܡܫܳܐ ܪ̈ܶܓܫܶܐ ܐܰܥܦܳܐ ܕܰܐܣܺܝܪܺܝܢ ܥܰܡ ܚܕ̈ܳܕܶܐ ܒܦܰܓܪܳܐ ܕܚܰܪܽܘܒ ܡ̣ܶܢ ܛܳܒ̈ܳܬܳܐ ܬܰܪܣܺܝ ܒܡܶܠܬܳܐ ܚܰܝܬܳܐ ܘܡܰܚܝܳܢܺܝܬܳܐ: ܒܚܰܡܶܫ ܒܬܽܘ̈ܠܳܢ ܘܰܒܚܰܡܶܫ ܣܰܟ̈ܠܳܢ ܒܡܶܢܝܳܢܳܐ ܓܡܺܝܪܳܐ ܕܰܡܺܝ ܠܡܰܠܟܽܘܬܳܐ ܕܰܫܡܰܝܳܐ: ܚܰܡܶܫ ܚܰܟܺܝ̈ܡܳܬܳܐ ܗܳܢܶܝܢ ܕܩܰܢ̈ܝܳܢ ܗܘ̈ܰܝ ܡܪܰܚܡܳܢܽܘܬܳܐ: ܒܚܰܡܶܫ ܡ̇ܰܢ ܗܳܠܶܝܢ ܨܳܪ ܙܰܒܢܳܐ ܕܰܡܕܰܒܪܳܢܽܘܬܶܗ: ܘܰܒܚܰܡܫܳܐ ܣܶܦܪ̈ܶܐ ܕܶܐܘܢܓܶܠܺܝ̈ܣܛܶܐ: ܡܰܬܰܝ ܘܡܰܪܩܽܘܣ ܘܠܽܘܩܳܐ ܘܝܽܘܚܰܢܳܢ ܘܦܰܘܠܳܘܣ: ܦܰܠܬ ܠܚܰܡܫܳܐ ܣܶܦܪ̈ܶܐ ܕܥܰܬܺܝܩܬܳܐ ܕܝܰܗܒ ܒܺܐܝ̈ܕܰܝ ܡܽܘܫܶܐ ܠܝܽܘܬܪܳܢܳܐ ܕܺܐܝܣܪܳܐܶܝܠ. ܚܰܡܶܫ ܟܰܟܪ̈ܺܝܢ ܩܰܒܶܠܘ ܫܠܺܝ̈ܚܶܐ ܡ̣ܶܢ ܡܫܺܝܚܳܐ ܡܳܪܗܽܘܢ: ܡ̣ܶܢ ܟܳܗܢܽܘܬܳܐ ܡܶܬܟܰܗ̈ܢܳܢܶܐ: ܘܡ̣ܶܢ ܡܰܥܡܽܘܕܺܝܬܳܐ ܥܡܺܝ̈ܕܶܐ: ܘܡ̣ܶܢ ܐ̱ܪ̈ܳܙܶܐ ܝܺܬܰܪܘ ܚܽܘܣܳܝ ܚܰܘ̈ܒܶܐ: ܘܡ̣ܶܢ ܡܰܠܦܳܢܽܘܬܳܐ ܗܰܝܡܳܢܽܘܬܳܐ ܘܰܥܒܳܕ̈ܶܐ ܕܟܰܝ̈ܳܐ: ܘܡ̣ܶܢ ܪ̈ܳܥܰܘܳܬܳܐ ܣܰܓܺܝܐܘܽܬ ܥܶܪ̈ܒܶܐ. ܘܰܒܚܰܡܶܫ ܗܳܠܶܝܢ ܟܰܟܪ̈ܺܝܢ ܢܰܗܰܪ ܠܒܰܪܢܳܫܳܐ ܒܚܰܡܫܳܐ ܪ̈ܶܓܫܶܐ ܓܰܘܳܝ̈ܶܐ ܘܒܰܪ̈ܳܝܶܐ ܕܰܒܝܰܕ ܓܶܫܬܳܐ: ܘܰܚܙܳܬܳܐ: ܘܫܶܡܥܳܐ ܘܣܰܘܩܳܐ: ܘܰܛܥܳܡܬܳܐ: ܢܶܫܬܰܪܰܪ ܒܗܰܘܢܳܐ: ܘܣܽܘܟܳܠܐܴ: ܘܡܰܕܥܳܐ: ܘܡܰܚܫܰܒܬܳܐ: ܘܪܶܥܝܳܢܳܐ ܢܶܬܬܰܨܡܰܚ: ܚܰܡܶܫ ܬܡܺܝ̈ܗܳܬܳܐ ܚܙܳܐ ܥܰܡܳܐ ܩܳܛܽܘܠܐܴ ܕܝܽܘ̈ܕܳܝܶܐ ܒܰܙܩܺܝܦܽܘܬܳܐ ܦܳܪܽܘܩܳܝܬܳܐ: ܚܶܫܟܳܐ ܕܰܗܘܳܐ ܥܰܠ ܟܽܠܳܗ̇ ܬܺܒܶܝܠ: ܐܰܪܥܳܐ ܕܶܐܬܬܙܺܝܥܰܬ݀ ܘܪܶܥܠܰܬ݀: ܐܰܦ̈ܰܝ ܬܰܪܥܳܐ ܕܗܰܝܟܠܐܴ ܕܶܐܣܬܕܶܩ: ܘܫܽܘ̈ܥܶܐ ܕܶܐܨܛܰܪܺܝܘ: ܘܩܰܒܪ̈ܶܐ ܕܡܺܝ̈ܬܶܐ ܐܶܬܦܬܰܚܘ: ܚܰܡܶܫ ܡܰܪܝܰܡ ܡܒܰܟ̈ܝܳܢ ܗܘ̈ܰܝ ܠܶܗ ܠܘܳܬ ܙܩܺܝܦܳܐ: ܘܟܰܕ ܩܳܡ ܡ̣ܶܢ ܩܰܒܪܳܐ ܣܗܶܕ̈ܝ ܥܰܠ ܢܽܘܚܳܡܶܗ. ܡܰܪܝܰܡ ܕܺܝܠܶܕܬܶܗ ܘܡܰܪܝܰܡ ܗ̇ܳܝ ܕܰܩܠܶܝܽܘܦܰܐ: ܘܡܰܪܝܰܡ ܚܳܬܶܗ ܕܠܳܥܳܙܳܪ ܘܡܰܪܝܰܡ ܡܰܓܕܠܳܝܬܳܐ: ܘܡܰܪܝܰܡ ܐܶܡܶܗ ܕܝܽܘܚܰܢܳܢ ܘܡܰܪܩܽܘܣ. ܐܳܦ ܚܰܡܫܳܐ ܬܶܗܪ̈ܺܝܢ ܡܰܠܝ̈ܰܝ ܬܶܡܗܳܐ ܩܢܰܘ ܢܳܛܽܘܪ̈ܶܐ ܒܝܽܘܡ ܢܽܘܚܳܡܶܗ ܕܰܡܫܺܝܚܳܐ: ܟܺܐܦܳܐ ܕܛܰܒܺܝܥܳܐ ܘܰܡܫܺܝܚܳܐ ܕܶܐܬܢܰܚܰܡ ܘܡܰܠܐܱܟܳܐ ܕܢܳܚܶܬ ܘܰܡܥܰܓܶܠ ܟܺܐܦܳܐ: ܘܰܕܚܶܠܘ ܢܳܛܽܘܪ̈ܶܐ ܘܰܗܘܰܘ ܐܰܝܟ ܡܺܝ̈ܬܶܐ: ܘܰܒܙܰܘܥܳܐ ܥܰܠܘ ܠܰܡܕܺܝܢ̱ܬܳܐ ܘܣܰܒܰܪܘ ܢܽܘܚܳܡܶܗ: ܚܰܡܶܫ ܙܰܒ̈ܢܺܝܢ ܐܶܙܰܠ̱ܬ݀ ܡܰܓܕܠܳܝܬܳܐ ܠܩܰܒܪܳܐ. ܟܰܕ ܫܩܺܝܠܐܴ ܐ̱ܪ̈ܳܙܶܐ ܚܰܡܫܳܐ ܗܶܪ̈ܽܘܡܶܐ: ܘܡܽܘܪܳܐ: ܘܚܽܘܒܳܐ: ܘܣܰܒܪܳܐ: ܘܗܰܝܡܳܢܽܘܬܳܐ: ܐܳܦ ܢܶܣܒܰܬ݀ ܕܽܘܟܳܝܳܐ ܡܫܰܡܠܝܳܐ ܠܚܰܡܫܳܐ ܪ̈ܶܓܫܶܝܗ̇. ܚܰܡܶܫ ܙܰܒܢܺܝ̈ܢ ܚܰܘܺܝ ܡܳܪܰܢ ܢܽܘܚܳܡܶܗ ܠܰܫܠܺܝ̈ܚܶܐ ܒܥܶܠܺܝܬܳܐ: ܢܳܓܰܗ ܬܪܶܝܢ ܒܫܰܒܳܐ: ܘܰܒܚܰܕ ܒܫܰܒܳܐ ܚܰܕܬܳܐ: ܘܰܒܛܽܘܪܳܐ ܕܰܓܠܺܝܠܐܴ: ܘܟܰܕ ܚܰܣܶܕ ܗܘܳܐ ܠܰܙܥܽܘܪܽܘܬ ܗܰܝܡܳܢܽܘܬܗܽܘܢ ܘܰܒܛܽܘܪ ܙܰܝ̈ܬܶܐ ܒܝܽܘܡ ܣܽܘܠܳܩܶܗ: ܒܚܰܡܫܳܐ ܟܰܕ ܒܰܪܶܟ ܐܶܢܽܘܢ ܘܰܣܠܶܩ ܠܰܫܡܰܝܳܐ: ܩܰܕܡܳܐܝܰܬ݀ ܐܶܬܚܙܺܝ ܠܰܫܠܺܝ̈ܚܶܐ ܘܰܡܣܰܒܪ̈ܳܢܶܐ ܠܫܶܡܥܽܘܢ ܐܳܦ ܠܒܶܝܬ ܩܠܶܝܽܘܦܰܐ. ܬܰܪܬܶܝܢ ܙܰܒܢܺܝ̈ܢ ܒܥܶܠܺܝܬܳܐ: ܘܥܰܠ ܝܰܡܳܐ ܕܛܺܝܒܶܪܺܝܳܘܣ: ܘܰܒܛܽܘܪܳܐ ܕܰܓܠܺܝܠܐܴ ܠܝܰܬܺܝܪ ܡ̣ܶܢ ܚܰܡܶܫܡܳܐܐ ܐܰܚܺܝ̈ܢ ܘܰܒܥܶܠܺܝܬܳܐ ܟܰܕ ܣܡܺܝܟܺܝܢ: ܘܰܠܝܰܥܩܽܘܒ ܘܰܠܓܽܘܕܳܐ ܕܫܰܒܥܺܝܢ ܘܰܠܟܽܠܗܽܘܢ ܬܰܠܡܺܝ̈ܕܶܐ ܒܝܽܘܡ ܣܽܘܠܳܩܶܗ: ܒܚܰܡܫܳܐ ܕܰܩܕܳܡ ܗܳܢܳܐ ܦܰܩܶܕ ܠܫܶܡܥܽܘܢ ܘܰܠܝܽܘܚܰܢܳܢ ܕܰܢܛܰܝܒܽܘܢ ܠܶܗ ܦܶܨܚܳܐ ܒܥܶܠܺܝܬܳܐ ܕܐ̱ܪ̈ܳܙܶܐ: ܟܰܕ ܠܐܴ ܓܠܐܴ ܠܗܽܘܢ ܥܰܠ ܡܳܪܶܐ ܒܰܝܬܳܐ ܕܠܐܴ ܢܶܬܥܰܘܟܽܘܢ ܡ̣ܶܢ ܝܽܘܕܳܐ ܡܰܪܳܚܳܐ: ܘܟܰܢܶܫ ܘܫܰܠܶܡ ܥܰܬܺܝ̈ܩܳܬܳܐ ܘܰܐܠܶܦ ܐܶܢܽܘܢ ܚܰܕ̈ܬܳܬܳܐ. ܒܝܽܘܡ ܚܰܡܫܳܐ ܕܰܩܕܳܡ ܗܳܢܳܐ ܦܰܩܶܕ ܠܫܶܡܥܽܘܢ ܘܰܠܝܽܘܚܰܢܳܢ ܘܰܐܫܺܝܓ ܪ̈ܶܓܠܐܷ ܕܬܰܠܡܺܝ̈ܕܰܘܗܝ ܒܡܽܘܟܳܟܶܗ: ܘܶܐܫܬܶܐܠ ܫܶܡܥܽܘܢ ܘܰܐܣܡܶܟ ܠܝܽܘܚܰܢܳܢ ܒܥܽܘܒܶܗ: ܘܶܐܬܓܠܺܝ ܙܺܐܦܶܗ ܕܺܝܗܽܘܕܳܐ ܢܟܺܝܠܐܴ. ܘܚܰܫܘ ܬܰܠܡܺܝ̈ܕܶܐ ܓܡܺܝܪܳܐܺܝܬ: ܘܶܐܟܰܠ ܦܶܨܚܳܐ ܥܰܡܗܽܘܢ ܘܫܰܡܠܺܝ ܢܳܡܽܘܣܳܐ ܥܰܬܺܝܩܳܐ ܕܡܽܘܫܶܐ: ܘܫܰܪܺܝ ܒܚܰܕܬܳܐ ܒܠܰܚܡܳܐ ܘܰܒܚܡܪܳܐ: ܘܰܐܠܶܦ ܐܶܢܽܘܢ ܕܰܢܩܰܕܫܽܘܢ ܡܽܘܪܽܘܢ ܐܠܰܗܳܝܳܐ: ܒܗ̇ܳܝ ܕܰܠܚܰܡܫܳܐ ܪ̈ܶܓܫܶܐ ܡܩܰܕܶܫ ܘܰܡܚܰܝܶܕ: ܒܰܚܙܳܬܳܐ ܠܢܰܗܺܝܪ̈ܶܐ: ܒܢܶܥ̈ܡܳܬܳܐ ܠܐܷܕ̈ܢܶܐ: ܠܣܰܘܩܳܐ ܒܪ̈ܺܝܚܳܢܶܐ ܠܦܽܘܡܳܐ ܒܬܶܫܒ̈ܚܳܬܳܐ: ܠܐܻܝܕܰܝ̈ܳܐ ܒܓܶܫܬܳܐ ܦܰܐܝܰܬ݀ ܠܐܱܠܳܗܳܐ. ܒܚܰܡܫܳܐ ܕܝܰܘܡܳܢܳܐ ܦܰܩܶܕ ܠܗܽܘܢ ܕܰܒܦܶܨܚܳܐ ܡܽܘܫܳܝܳܐ ܠܐܴ ܢܶܬܚܰܫܚܽܘܢ: ܘܰܠܦܶܨܚܳܐ ܡܫܺܝܚܳܝܳܐ ܢܫܰܡܠܽܘܢ: ܘܰܒܚܽܘܒܳܐ ܘܰܒܡܽܘܟܳܟܳܐ ܥܰܡ ܚܕ̈ܳܕܶܐ ܢܩܰܘܽܘܢ ܘܰܢܟܰܬܪܽܘܢ. ܒܗܳܢܳܐ ܝܰܘܡܳܐ ܐܰܒܺܝܕ ܝܽܘܕܳܐ ܘܰܚܢܺܝܩ: ܒܗܳܢܳܐ ܝܰܘܡܳܐ ܫܶܡܥܽܘܢ ܦܨܺܝܚ ܐܳܦ ܝܽܘܚܰܢܳܢ ܚܳܕܶܐ ܘܰܫܠܺܝ̈ܚܶܐ ܕܳܝܨܺܝܢ ܘܥܰܡܗܽܘܢ ܥܺܕܬܳܐ ܒܰܪܬ݀ ܥܰܡ̈ܡܶܐ ܥܰܠ ܛܽܘܪ̈ܶܐ ܡܩܰܝܙܳܐ: ܘܒܰܒ̈ܢܳܬ ܩ̈ܳܠܐܷ ܫܰܦ̈ܝܳܬܳܐ ܡܰܥܢܝܳܐ ܘܳܐܡܪܳܐ. ܫܽܘܒܚܳܐ ܠܳܟ ܒܳܪܽܘܝܳܐ ܚܰܟܺܝܡܳܐ ܕܨܰܒܶܬܬ ܠܒܶܪ̈ܝܳܬܳܟ ܒܟܽܠ ܫܽܘܦܪ̈ܺܝܢ. ܘܰܠܓܽܘܕܳܐ ܕܬܰܠܡܺܝ̈ܕܰܝܟ ܒܟܽܠ ܢܶܨܚܳܢܺܝ̈ܢ: ܘܰܥܒܰܕܬ ܐܶܢܽܘܢ ܡܩܺܝ̈ܡܳܢܶܐ ܘܰܡܫܰܟܠܠܳܢ̈ܶܐ ܕܟܽܠ ܒܶܢܝܳܢܺܝ̈ܢ: ܘܗܳܫܳܐ ܠܳܟ ܡܦܺܝܣܺܝܢܰܢ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ: ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܶܐܬܬܰܥܛܰܪ ܠܐܻܝܩܳܪܳܐ ܕܰܐܠܳܗܽܘܬܳܟ: ܘܰܠܥܽܘܗܕܳܢܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܐܰܝܟܰܢܳܐ ܕܰܬܨܰܒܶܬ ܠܰܢ ܒܢܰܟܦܽܘܬܳܐ ܘܫܰܘܫܶܛ ܠܰܢ ܒܰܓܡܺܝܪܽܘܬܳܐ: ܘܰܥܒܶܕ ܠܰܢ ܫܰܘ̈ܬܳܦܶܐ ܠܚܰܫܰܝ̈ܟ ܦܳܪ̈ܽܘܩܳܝܶܐ: ܘܥܰܛܶܦ ܠܰܢ ܢܰܚ̈ܬܶܐ ܚܶܘܳܪ̈ܶܐ ܥܒܳܕ̈ܶܐ ܛܳܒ̈ܶܐ ܕܚܳܫܚܺܝܢ ܠܡܶܫܬܽܘܬܳܐ: ܘܗܰܒܠܰܢ ܕܢܶܗܘܶܐ ܚܰܒܪ̈ܶܐ ܠܦܳܥ̈ܠܐܷ ܟܰܫܺܝܪ̈ܶܐ ܕܚܰܡܫܳܐ ܥܶܕ̈ܳܢܶܐ: ܐܰܣܡܶܟ ܠܰܢ ܒܚܰܓܳܐ ܕܰܓܢܽܘܢܳܟ ܕܠܐܴ ܥܳܒܰܪ: ܘܰܐܒܥܶܕ ܡܶܢܰܢ ܟܽܠ ܐܶܕܫܳܐ ܡܣܰܓܦܳܢܳܐ ܕܡܰܟܶܐ ܠܰܢ: ܘܰܐܢܺܝܚ ܠܥܰܢܺܝ̈ܕܰܝܢ ܒܰܐܘܳ̈ܢܶܐ ܕܢܽܘܗܪܳܐ: ܘܰܐܩܺܝܡ ܐܶܢܽܘܢ ܡ̣ܶܢ ܝܰܡܺܝܢܳܟ: ܟܰܕ ܚܶܘܳܪ̈ܺܝܢ ܡܳܐܢ̈ܶܐ ܕܺܝܠܗܽܘܢ ܒܡܶܫܚܳܐ ܕܓܰܠܝܽܘܬ ܐܰܦ̈ܶܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܒܥܺܐܕܳܐ ܠܐܴ ܥܳܒܽܘܪܳܐ ܗܳܫܳܐ܀

ܥܛܪܐ

ܩܰܒܶܠ ܡܳܪܝܳܐ ܐܠܰܗܳܐ ܠܥܶܛܪܳܐ ܗܳܢܳܐ ܕܦܺܝܪܡܰܢ ܐܰܝܟ ܦܺܝܪܡܶܗ ܕܰܐܗܪܽܘܢ ܘܕܰܘܺܝܕ ܕܰܒܣܶܡ ܠܳܟ ܪܺܝܚ ܦܺܝܪ̈ܡܰܝܗܽܘܢ: ܘܰܐܝܟ ܩܽܘܪܒܳܢܶܗ ܕܰܐܒܪܳܗܳܡ ܘܰܐܝܟ ܨܠܽܘܬܶܗ ܕܚܶܙܰܩܝܳܐ: ܘܰܓܥܳܬܶܗ ܕܰܡܢܰܫܶܐ ܡܰܠܟܳܐ ܕܺܝܗܽܘܕܳܐ: ܘܗܰܒܠܰܢ ܕܢܶܫܦܰܪ ܠܳܟ ܒܚܰܡܫܳܐ ܪ̈ܶܓܫܺܝܢ ܦܰܓܪ̈ܳܢܳܝܶܐ ܘܰܒܚܰܡܫܳܐ ܪ̈ܽܘܚܳܢܳܝܶܐ: ܘܗܰܒܠܰܢ ܕܥܰܡ ܚܰܡܶܫ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܢܶܥܽܘܠ ܠܰܓܢܽܘܢܳܟ: ܘܢܺܐܪܥܳܟ ܒܰܐܦ̈ܶܐ ܓܰܠܝ̈ܳܬܳܐ ܟܰܕ ܚܶܘܳܪ̈ܺܝܢ ܢܰܚ̈ܬܰܝܢ ܘܢܳܗܪܺܝܢ ܠܰܡܦܺܐܕܰܝ̈ܢ ܒܡܶܫܚܳܐ ܕܰܡܪܰܚܡܳܢܽܘܬܳܐ: ܘܢܰܣܶܩ ܠܳܟ ܫܽܘܒܚܳܐ܀

ܚܘܬܡܐ

ܐܰܦܨܰܚ ܠܰܢ ܡܳܪܝ ܒܥܺܐܕܳܟ ܠܐܴ ܥܳܒܽܘܪܳܐ: ܘܚܰܕܳܐ ܠܰܢ ܒܚܰܕܽܘܬܳܐ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܘܰܓܡܽܘܪ ܠܰܢ ܒܚܰܡܶܫ ܟܰܟܪ̈ܝܺܢ ܕܛܽܘܒܬܳܢܽܘܬܳܐ: ܘܫܰܘܬܶܦ ܠܰܢ ܥܰܡ ܚܰܡܶܫ ܡܰܪܝܰܡ ܗܳܢܶܝܢ ܕܫܰܡܶܫ̈ܝ ܠܕܰܟܝܽܘܬܳܟ: ܘܡ̣ܶܢ ܚܰܡܫܳܐ ܘܳܝ̈ܶܐ ܦܪܽܘܩ ܘܫܰܘܙܶܒ ܠܰܢ: ܘܗܰܒ ܘܫܰܟܶܢ ܠܰܢ ܕܰܒܗܳܢܳܐ ܥܳܠܡܳܐ ܢܶܦܠܽܘܚ ܠܳܟ ܒܕܶܚܠܬܳܐ: ܘܰܒܗ̇ܰܘ ܕܰܥܬܺܝܕ ܢܩܽܘܡ ܩܕܳܡܰܝܟ ܕܠܐܴ ܒܶܗܬܬܳܐ: ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܚܰܕ ܐܰܒܳܐ ܩܰܕܺܝܫܳܐ ܛܳܒܳܐ ܘܰܡܪܰܚܡܳܢܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ. ܠܚܰܕ ܒܪܳܐ ܚܰܢܳܢܳܐ ܡܶܠܬܳܐ ܕܡ̣ܶܢ ܐܰܒܳܐ ܠܐܴ ܡܶܬܕܰܪܟܳܢܳܐ: ܕܰܒܡܶܠܬܶܗ ܐܰܣܺܝ ܚܒܰܪ̈ܳܬܰܢ: ܘܚܰܫ ܘܡܺܝܬ ܘܩܳܡ ܡ̣ܶܢ ܩܰܒܪܳܐ ܘܰܦܪܰܩ ܠܰܢ. ܠܚܰܕ ܪܽܘܚܳܐ ܚܰܝܽܘܣܬܳܢܳܐ ܐܠܰܗܳܐ ܕܠܐܴ ܫܰܒܩܶܗ ܠܚܰܣܝܶܗ ܕܢܶܚܙܶܐ ܚܒܳܠܐܴ ܒܥܽܘܡܪܳܗ̇ ܕܰܫܝܽܘܠ ܐܶܠܐܴ ܥܰܡܶܗ ܣܠܶܩ ܠܰܨܠܺܝܒܳܐ: ܘܥܰܡܶܗ ܢܚܶܬ ܠܥܽܘܡ̈ܩܶܐ ܬܰܚܬܳܝ̈ܶܐ ܕܗܳܡܳܢ. ܘܥܰܡܶܗ ܣܠܶܩ ܠܰܫܡܰܝܳܐ ܒܫܽܘܒܚܳܐ ܘܺܝܬܶܒ ܡ̣ܶܢ ܝܰܡܺܝܢܳܐ ܕܰܐܒܳܐ ܫܳܠܽܘܚܶܗ ܐܰܝܟ ܕܶܐܡܰܪ ܦܰܘܠܳܘܣ: ܕܠܶܗ ܝܳܐܶܐ܀

ܣܕܪܐ

ܡܰܢܽܘ ܡ̣ܶܢ ܒܪ̈ܰܝܳܐ ܘܰܥܒܺܝ̈ܕܶܐ ܡܶܫܟܰܚ ܡܳܢܶܐ ܚܰܝ̈ܠܐܷ ܬܡܺܝ̈ܗܶܐ ܘܥܽܘܕܪ̈ܳܢܶܐ ܕܰܣܥܰܪܬ ܘܫܰܟܶܢܬ ܠܓܶܢܣܳܐ ܡܚܺܝܠܐܴ ܘܐ̱ܢܳܫܳܝܳܐ: ܐܰܘ ܡܰܢܽܘ ܡܰܕܪܶܟ ܠܰܬܡܺܝ̈ܗܳܬܳܐ ܘܰܡܥܰܠܝ̈ܳܬܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܡܶܠܬܳܐ ܐܠܰܗܳܐ: ܕܟܽܠ ܡ̇ܰܢ ܕܒܳܥܶܐ ܕܰܢܥܰܩܶܒ ܡܶܬܡܚܶܠ ܠܶܗ: ܘܰܒܥܽܘܡܩܳܐ ܬܰܚܬܳܝܳܐ ܦܳܐܶܫ: ܒܗ̇ܳܝ ܕܕܽܘܡܳܪܰܐ ܗ̱̇ܘ ܐܠܰܗܳܐ: ܘܕܽܘܡܳܪܳܐ ܠܐܴ ܡܶܬܥܰܩܰܒ ܐܰܘ ܡܶܬܒܨܶܐ. ܕܽܘܡܳܪܳܐ ܐܰܟܪܙܶܗ ܐܶܫܰܥܝܳܐ ܒܰܢܒܺܝܽܘܬܶܗ: ܘܰܒܕܽܘܡܳܪܳܐ ܗܘܳܐ ܒܰܛܢܶܗ ܘܝܰܠܕܶܗ ܠܥܶܠ ܡ̣ܶܢ ܡܶܠܬܳܐ ܘܺܝܕܰܥܬܳܐ: ܒܗ̇ܳܝ ܕܠܐܴ ܫܪܳܐ ܛܰܒ̈ܥܶܐ ܘܰܒܬܽܘ̈ܠܐܷ ܕܝܳܠܶܕܬܶܗ: ܕܽܘܡܳܪܳܐ ܐܶܚܰܕ ܠܥܶܠܳܝ̈ܶܐ ܟܰܕ ܚܳܙܶܝܢ ܗܘܰܘ ܠܶܗ ܕܡܶܙܕܰܝܰܚ ܥܰܠ ܒܽܘܪ̈ܟܶܝܗ̇ ܕܡܰܪܝܰܡ: ܗ̇ܰܘ ܕܡܶܙܕܰܝܰܚ ܥܰܠ ܓܺܝ̈ܓܠܐܷ ܚܰܝ̈ܳܬܳܐ ܕܰܟܪ̈ܽܘܒܶܐ ܣܰܓܺܝ̈ܰܐܝ ܥܰܝ̈ܢܶܐ. ܕܽܘܡܳܪܳܐ ܐܶܚܰܕ ܠܰܫܡܰܝ̈ܳܢܶܐ ܟܰܕ ܚܳܙܶܝܢ ܗܘܰܘ ܠܶܗ ܕܡܶܬܗܰܦܰܟ ܥܰܡ ܐܰܪ̈ܥܳܢܶܐ: ܘܠܐܴ ܟܰܝ ܡܶܬܪܰܗܒܺܝܢ ܐܰܘ ܝܳܩܕܺܝܢ ܡ̣ܶܢ ܥܽܘܙܳܐ ܠܐܴ ܡܶܣܬܰܝܒܪܳܢܳܐ ܕܝܳܩܽܘܕܽܘܬܶܗ: ܕܽܘܡܳܪܰܐ ܗ̱̇ܘ ܕܰܣܒܰܠ ܘܣܰܝܒܰܪ ܚܠܳܦ ܥܰܒܕܶܗ ܚܰܫ̈ܶܐ ܘܒܶܙܚܳܐ ܘܰܙܩܺܝܦܳܐ ܘܡܰܘܬܳܐ ܡ̣ܶܢ ܥܰܡܳܐ ܠܺܝܛܳܐ ܕܝܽܘ̈ܕܳܝܶܐ. ܕܽܘܡܳܪܰܐ ܗ̱̇ܘ ܕܰܣܠܶܩ ܠܰܨܠܺܝܒܳܐ ܥܰܪܛܶܠ: ܘܰܫܠܰܚ ܒܶܣܪܶܗ ܦܰܪܣܺܝ ܠܐܱܪ̈ܟܰܐܣ ܘܫܰܠܺܝ̈ܛܳܢܶܐ ܕܚܶܫܽܘܟܳܐ: ܘܠܐܴܕܳܡ ܪܳܚܡܶܗ ܟܰܣܺܝ ܦܽܘܪܣܳܝܶܗ ܒܫܽܘܒܚܳܐ ܕܰܐܠܒܫܶܗ. ܕܽܘܡܳܪܰܐ ܗ̱̇ܘ ܕܰܛܥܶܡ ܡܰܘܬܳܐ ܒܨܶܒܝܳܢܶܗ ܘܰܢܚܶܬ ܠܰܫܝܽܘܠ ܒܳܠܥܬܳܐ ܒܰܒܥܳܬܶܗ ܘܟܰܕ ܩܳܡ ܡ̣ܶܢ ܩܰܒܪܳܐ ܘܥܰܡܶܗ ܐܰܩܺܝܡܶܗ ܒܬܶܫܒܽܘܚܬܳܐ: ܕܽܘܡܳܪܰܐ ܗ̱̇ܘ ܕܩܳܡ ܠܰܬܠܳܬܳܐ ܝܰܘ̈ܡܺܝܢ ܐܰܝܟ ܕܶܐܡܰܪ ܠܬܰܠܡܺܝ̈ܕܰܘܗܝ ܟܰܕ ܟܺܐܦܳܐ ܢܛܺܝܪܳܐ ܘܛܰܒ̈ܥܶܐ ܘܰܚܬܳܡ̈ܶܐ ܕܥܰܠ ܩܰܒܪܳܐ ܩܰܝ̇ܡܺܝܢ: ܕܽܘܡܳܪܰܐ ܗ̱̇ܘ ܕܠܐܴ ܡܶܬܡܰܠܰܠ ܐܶܚܰܕ ܠܢܳܛܽܘܪ̈ܶܐ ܟܰܕ ܚܙܰܐܘܽܘܗܝ ܕܰܢܦܰܩ ܒܳܗ̇ ܒܟܺܐܦܳܐ: ܘܡ̣ܶܢ ܡܥܰܠܝܽܘܬ ܕܽܘܡܳܪܳܐ ܗܘܰܘ ܠܗܽܘܢ ܒܕܶܚܠܬܳܐ ܘܰܪܬܺܝܬܳܐ. ܐܰܝܟܰܢܳܐ ܕܠܐܴ ܐܶܫܟܰܚܘ ܕܢܶܥܪܩܽܘܢ ܡ̣ܶܢ ܕܶܚܠܬܗܽܘܢ: ܕܽܘܡܳܪܳܐ ܐܶܚܰܕ ܠܡܰܠܐܱܟ̈ܶܐ ܟܰܕ ܥܰܓܶܠ ܟܺܐܦܳܐ ܡ̣ܶܢ ܬܰܪܥܶܗ ܕܩܰܒܪܳܐ: ܘܚܰܘܺܝ ܗܘܳܐ ܒܗܳܕܶܐ ܕܰܢܦܰܩ ܠܶܗ ܡܫܺܝܚܳܐ ܡ̣ܶܢ ܩܰܒܪܳܐ ܒܫܽܘܒܚܳܐ ܘܙܳܟܽܘܬܳܐ. ܕܽܘܡܳܪܳܐ ܐܶܚܰܕ ܠܡܰܪܝܰܡ ܘܰܠܚܰܒܪ̈ܳܬܳܗ̇ ܟܰܕ ܦܓܰܥ ܒܗܶܝܢ ܡܰܠܐܱܟܳܐ ܘܶܐܡܰܪ ܠܗܶܝܢ ܗܳܐ ܗ̇ܰܘ ܕܒܳܥ̈ܝܳܢ ܐܢ̱ܬܶܝܢ ܩܳܡ ܠܶܗ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܙܶܠܶܝ̈ܢ ܣܰܒܰܪ̈ܶܝܢ ܠܬܰܠܡܺܝ̈ܕܰܘܗܝ ܕܩܳܡ ܠܶܗ ܘܗܳܐ ܩܳܕܶܡ ܠܟܽܘܢ ܠܰܓܠܺܝܠܐܴ: ܕܽܘܡܳܪܳܐ ܐܶܚܰܕ ܠܡܰܪܝܰܡ ܡܰܓܕܠܳܝܬܳܐ ܘܰܠܡܰܪܝܰܡ ܐܶܡܶܗ ܟܰܕ ܦܓܰܥ ܒܗܶܝܢ ܦܳܪܽܘܩܰܢ ܘܶܐܡܰܪ ܠܗܶܝܢ ܫܠܳܡ ܠܟܶܝܢ: ܘܟܰܕ ܩܪ̈ܶܒܝ ܠܘܳܬܶܗ ܐܶܚܰܕܶܝ̈ܢ ܪ̈ܶܓܠܰܘܗܝ ܩܰܕܺܝ̈ܫܳܬܳܐ ܘܶܐܫܬܰܪܰܪ̈ܶܝܢ. ܒܕܽܘܡܳܪܳܐ ܘܰܒܙܰܘܥܳܐ ܐܶܬܒܰܠܗܺܝܘ ܢܳܛܽܘܪ̈ܶܐ ܟܰܕ ܥܰܠܘ ܗܘܰܘ ܠܰܡܕܺܝܢ̱ܬܳܐ ܘܣܰܒܰܪܘ ܠܪ̈ܺܝܫܰܝ ܟܳܗ̈ܢܶܐ ܕܰܩܒܺܝܪܳܐ ܩܳܡ ܠܶܗ ܘܰܚܬܳܡ̈ܶܐ ܘܛܰܒ̈ܥܶܐ ܕܩܰܒܪܳܐ ܟܰܕ ܫܰܪܺܝܪܺܝܢ ܘܡ̣ܶܢ ܙܺܝܘܳܐ ܕܫܽܘܒܚܶܗ ܟܽܠܰܢ ܐܶܬܒܰܠܗܺܝܢܰܢ. ܕܽܘܡܳܪܳܐ ܘܙܰܘܥܳܐ ܩܢܰܘ ܬܰܠܡܺܝ̈ܕܶܐ ܟܰܕ ܫܡܰܥܘ ܕܰܓܢܺܝܒ ܪܰܒܗܽܘܢ ܡ̣ܶܢ ܩܰܒܪܳܐ: ܘܡܶܚܕܳܐ ܩܳܡܘ ܫܶܡܥܽܘܢ ܘܝܽܘܚܰܢܳܢ ܘܡܰܪܝܰܡ ܡܰܓܕܠܳܝܬܳܐ ܥܰܡܗܽܘܢ ܘܡܰܢܰܥܘ ܠܩܰܒܪܳܐ: ܘܰܚܙܰܘ ܟܶܬܳܢ̈ܶܐ ܘܶܐܫܬܰܪܰܪܘ ܕܩܳܡ ܠܶܗ ܡܫܺܝܚܳܐ ܫܰܪܺܝܪܳܐܺܝܬ. ܒܕܽܘܡܳܪܳܐ ܩܳܡܰܬ݀ ܡܰܪܝܰܡ: ܘܰܒܚܰܕܽܘܬܳܐ ܦܰܢܝܰܬ݀ ܪܰܒܽܘܠܺܝ ܕܡܶܬܶܐܡܰܪ ܡܰܠܦܳܢܳܐ ܡܳܪܝܳܐ ܡܶܬܕܰܡܪܳܢܳܐܺܝܬ. ܘܗܶܦܟܰܬ݀ ܘܠܰܫܠܺܝ̈ܚܶܐ ܣܰܒܪܰܬ݀ ܙܒܰܢ̱ܬܳܐ ܕܬܰܪܬܶܝܢ ܕܰܚܙܺܝܬܶܗ ܠܡܳܪܝܳܐ ܐܰܝܟ ܓܰܢܳܢܳܐ ܘܢܳܛܰܪ ܓܰܢܬܳܐ ܡܰܠܶܠ ܥܰܡܝ: ܘܟܰܕ ܒܥܶܠܰܬ݀ ܗܳܠܶܝܢ ܬܶܕܡܪ̈ܳܬܳܐ ܗܕܺܝܪ̈ܳܬܳܐ ܘܪܰܘܪ̈ܒܳܬܳܐ ܐܳܘ ܕܽܘܡܳܪܳܐ ܘܓܰܢ̱ܒܳܪܳܐ ܕܥܳܠܡ̈ܶܐ ܕܩܳܡܬ ܡ̣ܶܢ ܩܰܒܪܳܐ ܠܥܶܠ ܡ̣ܶܢ ܗܰܘܢܳܐ ܘܡܰܚܫܰܒܬܳܐ ܘܰܒܨܳܬܳܐ ܕܰܒܪ̈ܰܝܳܐ ܘܰܥܒܺܝ̈ܕܶܐ ܡܶܬܟܰܫܦܺܝܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܥܰܡ ܥܺܝܪ̈ܰܝ ܪܰܘܡܳܐ ܢܙܰܡܰܪ ܬܶܫܒܽܘܚܬܳܟ. ܘܥܰܡ ܡܰܠܐܱܟ̈ܶܐ ܘܢܶܫ̈ܶܐ ܘܬܰܠܡܺܝ̈ܕܶܐ ܢܶܩܥܶܐ ܬܰܘܕܺܝܬܳܐ ܘܰܢܩܰܒܠܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܚܝܳܢܳܐ ܒܰܟܝܳܢܳܐ ܕܺܝܠܶܗ ܕܶܐܬܳܐ ܥܕܰܡܳܐ ܠܣܳܟܳܗ̇ ܕܰܙܥܽܘܪܽܘܬܳܐ ܒܨܶܒܝܳܢܶܗ ܠܗ̇ܰܘ ܪܳܡܳܐ ܘܰܡܥܰܠܝܳܐ ܡ̣ܶܢ ܚܰܫ̈ܶܐ ܕܰܐܝܟ ܒܰܪܢܳܫܳܐ ܡܳܝܽܘܬܳܐ ܘܚܳܫܽܘܫܳܐ ܩܰܒܶܠ ܥܠܰܘܗܝ ܚܰܫ̈ܶܐ ܘܡܰܘܬܳܐ ܘܒܶܙܚܳܐ ܕܰܢܥܰܕܰܪ ܠܐܴܕܳܡ ܒܛܰܝܒܽܘܬܶܗ. ܠܗ̇ܰܘ ܡܰܟܺܝܟܳܐ ܘܢܺܝܚܳܐ ܘܒܰܣܺܝܡܳܐ ܕܶܐܬܬܣܺܝܡ ܒܓܰܘ ܩܰܒܪܳܐ ܐܰܝܟ ܥܰܢܺܝܕܳܐ ܘܰܐܝܟ ܓܰܢ̱ܒܳܪܳܐ ܐܶܬܢܰܚܰܡ ܒܬܶܫܒܽܘܚܬܳܐ. ܘܠܐܴܕܳܡ ܘܰܠܝܰܠܕܰܘ̈ܗܝ ܕܰܥܓܺܝܢܺܝܢ ܗܘܰܘ ܬܚܶܝܬ ܢܺܝܪܶܗ ܕܡܳܪܽܘܕܳܐ ܫܪܳܐ ܐܶܢܽܘܢ ܒܥܰܡܶܗ ܐܰܣܶܩ ܐܶܢܽܘܢ ܠܒܶܝܬ ܚܰܝ̈ܶܐ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܐܠܰܗܳܐ ܗ̇ܰܘ ܝܰܡܳܐ ܕܪ̈ܰܚܡܶܐ ܛܳܒܳܐ ܘܛܽܘܒܬܳܢܳܐ ܕܰܒܛܰܝܒܽܘܬܶܗ ܫܦܺܝܥܰܬ݀ ܪ̈ܰܚܡܶܐ ܠܛܽܘ̈ܒܳܢܶܐ ܒܫܽܘܒܚܳܐ ܡܒܰܣܶܡ ܠܗܽܘܢ: ܘܰܠܪ̈ܰܚܺܝܩܶܐ ܘܢܽܘܟܪ̈ܳܝܰܝ ܡ̣ܶܢ ܕܶܚܠܬܶܗ ܠܘܳܬ ܫܪܳܪܳܐ ܕܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ ܡܒܰܝܬܳܐ: ܡܪܰܚܡܳܢܳܐ ܘܰܡܠܐܷ ܪ̈ܰܚܡܶܐ ܕܠܐܴ ܨܳܒܶܐ ܒܰܐܒܕܳܢܳܐ ܕܰܓܒܺܝܠܬܶܗ ܗ̇ܳܝ ܕܒܰܚܢܳܢܶܗ ܠܡܶܬܥܰܛܦܳܢܽܘܬܳܐ ܒܶܣܪܳܢܳܝܬܳܐ ܐܶܬܳܐ: ܐܠܰܗܳܐ ܓܰܢ̱ܒܳܪ ܥܳܠܡ̈ܶܐ ܕܰܒܟܰܪܣܳܐ ܕܒܶܣܪܳܐ ܝܰܪ̈ܚܶܐ ܬܶܫܥܳܐ ܥܡܰܪ: ܘܡ̣ܶܢ ܓܰܘ ܡܰܪܒܥܳܐ ܕܰܒܬܽܘܠܬܳܐ ܡܰܪܝܰܡ ܕܠܐܴ ܚܒܳܠܐܴ ܢܦܰܩ ܘܰܠܟܽܠܗܽܘܢ ܐܰܝܠܶܝܢ ܕܥܳܫܩܺܝܢ ܗܘܰܘ ܠܳܗ̇ ܘܛܳܠܡܺܝܢ ܒܠܰܡ: ܪܟܺܝܒ ܥܰܠ ܟܪ̈ܽܘܒܶܐ ܣܰܓܺܝ̈ܰܐܝ ܥܰܝ̈ܢܶܐ ܘܓܺܝ̈ܓܠܐܷ ܚܰܝ̈ܳܬܳܐ ܕܰܛܥܺܝܢܳܐ ܠܶܗ ܛܠܺܝܬܳܐ ܥܰܠ ܒܽܘܪ̈ܟܶܝܗ̇. ܡܶܙܕܰܝܰܚ ܥܰܠ ܚܰܨܳܐ ܕܰܟܪ̈ܽܘܒܶܐ ܘܡܶܬܒܰܪܰܟ ܡ̣ܶܢ ܥܺܝܪ̈ܶܐ: ܕܰܡܢܰܨܪܳܐ ܠܶܗ ܒܰܪܬ ܕܰܘܺܝܕ ܥܰܠ ܕܪ̈ܳܥܶܝܗ̇: ܡܶܬܩܰܕܰܫ ܡ̣ܶܢ ܣܪ̈ܳܦܶܐ ܕܰܡܚܰܒܒܳܐ ܠܶܗ ܒܰܪܬ݀ ܡܶܣ̈ܟܺܢܶܐ ܒܢܽܘܨܪ̈ܳܬܳܐ ܐܰܝܟ ܒܶܣܪ̈ܳܢܶܐ. ܪܳܡܳܐ ܕܶܐܬܢܰܚܰܬ: ܓܰܐܝܳܐ ܕܶܐܬܡܰܟܰܟ: ܥܰܬܺܝܪܳܐ ܕܡܰܣܟܶܢ ܪܰܒܽܘܬܶܗ: ܫܡܰܝܳܢܳܐ ܕܰܠܒܶܫ ܕܡܽܘܬܳܐ ܕܰܐܪ̈ܥܳܢܶܐ: ܡܰܟܺܝܟܳܐ ܘܰܡܥܰܠܝܳܐ ܕܪܰܡܪܶܡ ܠܫܰܦ̈ܠܐܷ ܒܡܽܘܟܳܟܶܗ: ܚܰܝܠܬܳܢܳܐ ܘܝܳܗܶܒ ܚܰܝܠܐܴ ܠܚܰܝܠܬܳܢ̈ܶܐ: ܕܰܒܚܰܝܠܶܗ ܬܰܩܺܝܦܳܐ ܫܰܦܶܠ ܠܚܰܝܠܶܗ ܕܒܺܝܫܳܐ ܡܳܪܽܘܕܳܐ. ܠܥܶܠ ܙܳܝܥܺܝܢ ܡܶܢܶܗ ܥܶܠܳܝ̈ܶܐ. ܘܰܠܬܰܚܬ ܒܢ̈ܰܝ ܥܰܦܪܳܐ ܫܺܝܛܳܐ ܣܳܢܶܝܢ ܠܶܗ. ܠܥܶܠ ܢܽܘܪ̈ܳܢܶܐ ܡܶܬܪܰܗܒܺܝܢ ܡ̣ܶܢ ܙܺܝܘܶܗ: ܘܰܠܬܰܚܬ ܒܰܐܪܥܳܐ ܥܰܦܪ̈ܳܢܶܐ ܪܽܘܩܳܐ ܒܰܐܦܰܘ̈ܗܝ ܙܳܠܚܺܝܢ ܠܶܗ. ܠܥܶܠ ܡܫܰܕܪܺܝܢ ܠܶܗ ܪ̈ܽܘܚܳܢܶܐ ܩܽܘ̈ܕܳܫܶܐ ܚܠܰܝ̈ܳܐ ܒܝܽܘܒܳܒ̈ܶܐ ܦܰܐܝ̈ܳܐ ܠܐܱܬܪܳܐ ܕܰܫܟܺܝܢܬܶܗ: ܘܰܠܬܰܚܬ ܫܳܡܪܳܝܳܐ ܘܥܳܒܶܕ ܒܺܝ̈ܫܳܬܳܐ ܡܟܰܢܶܝܢ ܗܘܰܘ ܠܶܗ: ܠܥܶܠ ܥܰܙܺܝܙܳܐ ܕܙܳܝܥܺܝܢ ܘܪܳܥܠܺܝܢ ܡܶܢܶܗ ܚܰܝܠܰܘ̈ܳܬܳܐ ܫܡܰܝ̈ܳܢܶܐ: ܘܰܠܬܰܚܬ ܡܢܺܝܕܺܝܢ ܪ̈ܺܝܫܰܝܗܽܘܢ ܪ̈ܺܝܫܰܝ ܟܳܗ̈ܢܶܐ ܘܣܳܦܪ̈ܶܐ ܡܰܗܠܺܝܢ ܒܶܗ: ܠܥܶܠ ܓܢܺܝܙ ܡ̣ܶܢ ܥܺܝܪ̈ܶܐ ܐܳܦ ܡܶܙܕܰܝܰܚ ܒܩܺܝ̈ܢܳܬܗܽܘܢ: ܘܰܠܬܰܚܬ ܓܢܶܐ ܥܰܡ ܒܢܰܝ̈ܢܳܫܳܐ ܡܶܬܡܰܝܰܩ ܒܣܶܦܘ̈ܳܬܳܐ ܕܺܝܠܗܽܘܢ ܡܦܰܠܓ̈ܳܬܳܐ. ܠܥܶܠ ܕܚܺܝܠܐܴ ܥܰܠ ܟܶܢ̈ܫܶܐ ܫܓܺܝܪ̈ܶܐ ܕܓܰܘܙܰܠܬܳܐ: ܘܰܠܬܰܚܬ ܩܽܘ̈ܠܥܶܐ ܒܢ̈ܰܝ ܥܰܦܪܳܐ ܠܒܺܝܟܺܝܢ ܠܶܗ. ܘܠܐܴ ܝܳܩܕܺܝܢ ܡ̣ܶܢ ܢܽܘܪܶܗ ܝܳܩܕܬܳܐ: ܠܥܶܠ ܥܶܠܳܝ̈ܶܐ ܡܫܰܡܪܺܝܢ ܒܽܘܪ̈ܟܳܬܳܐ ܣܒܺܝ̈ܣܳܬܳܐ ܠܘܰܥܕܳܐ ܕܺܐܝܬܽܘܬܶܗ: ܘܠܐܴ ܡܡܰܪܚܺܝܢ ܕܰܢܚܽܘܪܽܘܢ ܒܶܗ: ܘܰܠܬܰܚܬ ܕܠܐܴ ܕܶܚܠܐܴ ܘܠܐܴ ܙܰܘܥܬܳܐ ܒܰܦܪ̈ܳܓܶܠܐܷ ܡܢܰܓܕܺܝܢ ܠܶܗ: ܠܥܶܠ ܩܳܥܶܝܢ ܠܶܗ ܩܰܕܺܝܫ ܩܰܕܺܝܫ ܡܳܪܝܳܐ: ܚܰܝܠܬܳܢܳܐ: ܘܰܠܬܰܚܬ ܢܽܘܟܪܳܝ ܡ̣ܶܢ ܐܰܒܳܐ ܘܒܰܪܢܳܫܳܐ ܫܚܺܝܡܳܐ ܡܳܢܶܝܢ ܗܘܰܘ ܠܶܗ. ܠܥܶܠ ܒܚܰܝܠܶܗ ܣܺܝܡܳܐ ܘܰܣܡܺܝܟܳܐ ܐܰܪܥܳܐ: ܘܰܠܬܰܚܬ ܥܰܦܺܝܩ ܐܶܣܛܽܘܢܳܐ ܘܡܶܬܢܰܓܰܕ ܒܰܦܪ̈ܳܓܶܠܐܷ ܐܰܝܟ ܚܰܠܳܫܳܐ: ܠܥܶܠ ܙܳܝܥܺܝܢ ܟܰܘ̈ܟܒܰܝ ܪܰܘܡܳܐ ܘܰܫܡ̈ܰܝ ܫܡܰܝ̈ܳܐ ܒܡܶܬܬܪܺܝܡܳܢܽܘܬܶܗ ܕܥܰܠ ܩܰܝܣܳܐ ܕܚܶܣܕܳܐ: ܘܰܠܬܰܚܬ ܦܨܺܝܚܺܝܢ ܒܩܶܛܠܶܗ ܘܠܐܴ ܪܓܺܝܫܺܝܢ ܒܰܐܒܕܳܢܳܐ ܕܡܰܝܬܶܐ ܥܠܰܝܗܽܘܢ. ܠܥܶܠ ܡܚܰܦܶܝܢ ܡܶܢܶܗ ܢܰܗܺܝܪ̈ܶܐ ܒܰܪܩܺܝܥܳܐ ܕܰܢܚܽܘܪܽܘܢ ܒܶܗ: ܘܰܠܬܰܚܬ ܕܳܚ̈ܠܳܢ ܡܶܢ ܒܶܪ̈ܝܳܬܳܐ ܡܶܢܶܗ ܒܶܪ̈ܝܳܬܳܐ ܡ̈ܰܠܠܳܬܳܐ ܘܫܰܬܺܝ̈ܩܳܬܳܐ: ܐܰܪܥܳܐ ܕܙܳܝܥܳܐ: ܫܽܘ̈ܥܶܐ ܕܡܶܨܛܰܪܺܝܢ: ܩܰܒܪ̈ܶܐ ܕܡܺܝ̈ܬܶܐ ܕܡܶܬܦܰܬܚܺܝܢ: ܘܥܰܢܺܝ̈ܕܶܐ ܕܰܫܟܺܝܒܺܝܢ ܒܗܽܘܢ ܕܩܳܝܡܺܝܢ ܘܡܶܬܢܰܚܡܺܝܢ ܘܠܐܱܒܳܗܰܝ̈ܗܽܘܢ ܘܰܠܝܳܕܽܘ̈ܥܰܝܗܽܘܢ ܡܰܒܗܬܺܝܢ ܘܡܰܟܣܶܝܢ: ܡܺܝ̈ܬܶܐ ܕܥܰܡ ܚܰܝܳܐ ܡܶܣܬܰܘܕܺܝܢ: ܩܝܳܡܬܳܐ ܕܢܳܨܚܳܐ ܒܰܐܪܒܰܥ ܦܶܢ̈ܝܳܢ: ܢܽܘܚܳܡܳܐ ܕܡܶܬܟܪܶܙ: ܫܶܡܥܽܘܢ ܘܝܽܘܚܰܢܳܢ ܕܰܠܩܰܒܪܳܐ ܪܳܗܛܺܝܢ ܘܡܶܬܘܰܥܕܺܝܢ: ܥܰܡ̈ܡܶܐ ܕܒܰܐܪܒܰܥ ܦܶܢ̈ܝܳܢ ܕܠܰܣܒܰܪܬܳܟ ܡܩܰܒܠܺܝܢ ܘܰܡܗܰܝܡܢܺܝܢ. ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܒܗܳܢܳܐ ܝܰܘܡܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ. ܐܰܣܳܐ ܠܰܟܪ̈ܺܝܗܰܝ ܠܶܒܳܐ: ܥܨܽܘܒ ܠܡܰܪ̈ܥܰܝ ܢܰܦܫܳܐ. ܒܰܝܰܐܐ ܠܰܟܡܺܝܪ̈ܶܐ ܠܰܒܶܒ ܠܰܡ̈ܥܳܩܶܐ: ܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܰܐܢܺܝܚ ܠܥܰܢܺܝ̈ܕܰܝܢ ܘܟܽܠܰܢ ܢܶܩܥܶܐ ܠܳܟ ܫܽܘܒܚܳܐ ܒܡܶܐܬܺܝܬܳܟ ܕܬܰܪܬܶܝܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܨܠܘܬܐ ܕܫܘܪܝܐ ܕܨܦܪܐ

ܐܰܦܨܰܚ ܡܳܪܝ ܠܡܰܕ̈ܥܰܝܢ ܒܙܰܠܓ̈ܶܐ ܚܶܘܳܪ̈ܶܐ ܕܰܩܝܳܡܬܳܟ: ܘܰܐܢܗܰܪ ܠܰܢ ܒܢܽܘܗܪܳܐ ܕܺܝܕܰܥܬܳܟ: ܘܚܰܟܶܡ ܠܰܢ ܒܚܶܟܡܬܳܐ ܕܝܽܘܠܦܳܢܳܟ: ܘܚܰܕܳܐ ܠܰܢ ܒܚܰܕܽܘܬܶܗ ܕܢܽܘܚܳܡܳܟ: ܐܰܦܪܶܓ ܠܰܢ ܒܚܰܓܳܐ ܕܰܩܝܳܡܬܳܟ ܐܰܣܡܶܟ ܠܰܢ ܒܫܳܪܽܘܬܶܗ ܕܦܶܨܚܳܟ. ܘܰܐܩܺܝܡ ܠܰܢ ܡ̣ܶܢ ܝܰܡܺܝܢܳܟ ܒܝܰܘܡܳܐ ܕܡܶܐܬܺܝܬܳܟ: ܘܰܐܫܘܳܐ ܠܰܢ ܠܰܓܢܽܘܢܳܟ ܕܢܰܘܕܶܐ ܘܢܶܣܓܽܘܕ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܘܡܝܘܢ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ: ܠܳܟ ܐܺܝܩܳܪܳܐ ܘܣܶܓܕܬܳܐ ܦܺܐܪܳܐ ܕܚܰܝ̈ܶܐ ܕܰܫܘܰܚ ܡ̣ܶܢ ܡܰܪܝܰܡ ܒܬܽܘܠܬܳܐ ܩܰܕܺܝܫܬܳܐ ܘܶܐܬܚܙܺܝ ܒܥܳܠܡܰܢ ܐܰܟܘܳܬܰܢ ܣܛܰܪ ܡ̣ܶܢ ܥܶܕܠܳܝܳܐ ܕܰܚܛܺܝܬܳܐ ܟܰܕ ܐܺܝܬܰܘܗܝ ܥܰܡ ܐܰܒܽܘܗܝ ܐܺܝܬܝܳܐܺܝܬ ܘܰܡܬܽܘܡܳܐܺܝܬ ܘܠܐܴ ܡܶܬܡܰܠܠܳܢܳܐܺܝܬ: ܠܗ̇ܰܘ ܕܰܠܓܶܢܣܰܢ ܕܶܐܬܥܰܒܕܰܕ ܠܡܰܘܬܳܐ ܘܰܚܛܺܝܬܳܐ: ܦܪܰܩ ܘܫܰܘܙܶܒ: ܘܚܽܘܪܳܪܳܐ ܠܰܢ ܫܰܟܶܢ: ܘܬܰܠܰܚ ܒܰܩܢܽܘܡܶܗ ܠܚܰܘܒܬܳܐ ܗ̇ܳܝ ܕܚܳܒܢܰܢ ܒܰܥܒܳܪ ܦܽܘܩܕܳܢܳܐ ܘܰܒܢܰܝ̈ܳܐ ܕܰܐܒܳܐ ܫܡܰܝܳܢܳܐ ܟܬܰܒ ܠܰܢ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܕܪܐ

ܐܠܰܗܳܐ ܓܢܺܝܙܳܐ ܘܠܐܴ ܡܶܬܚܰܙܝܳܢܳܐ: ܟܰܣܝܳܐ ܘܰܣܬܺܝܪܳܐ ܘܠܐܴ ܡܶܬܥܰܩܒܳܢܳܐ. ܡܰܠܝܳܐ ܘܥܰܬܺܝܪܳܐ ܘܠܐܴ ܡܰܘܦܝܳܢܳܐ: ܕܰܒܪܶܡܙܳܐ ܫܒܺܝܚܳܐ ܘܠܐܴ ܡܶܬܡܰܠܠܳܢܳܐ: ܕܰܒܚܰܝܠܶܗ ܗܕܺܝܪܳܐ ܘܠܐܴ ܡܶܬܚܰܣܢܳܢܳܐ ܨܰܒܶܬ ܠܐܱܪܥܳܐ ܒܝܰܡ̈ܡܶܐ ܘܰܬܗܽܘ̈ܡܶܐ: ܘܟܽܠ ܛܰܝܪܳܐ ܘܦܳܪܰܚܬܳܐ: ܘܟܽܠ ܐܳܕܫܳܐ ܡܶܬܪܰܓܫܳܢܳܐ: ܠܥܶܠ ܒܳܐܐܰܪ ܘܰܒܟܽܠ ܡܥܺܝܢܳܐ ܡܓܺܚܝܳܢܳܐ: ܒܝܰܘܡܳܐ ܕܚܰܡܫܳܐ ܥܬܰܪܘ ܝܰܡ̈ܡܶܐ ܘܢܰܗܪ̈ܰܘܳܬܳܐ ܕܨܳܐܰܪ ܒܰܛܝܳܣܳܐ ܪܚܺܝܡܳܐ ܕܦܳܪ̈ܚܳܬܳܐ: ܘܛܽܘܦܣܳܐ ܗܘܳܬ݀ ܠܐܴܕܳܡ ܪܺܝܫ ܛܽܘܗ̈ܡܶܐ: ܕܰܒܚܰܡܫܳܐ ܪ̈ܶܓܫܺܝܢ: ܥܬܺܝܕ ܗܘܳܐ ܕܢܶܬܟܰܠܰܠ. ܒܚܰܡܫܳܐ ܪ̈ܶܓܫܺܝܢ ܦܰܓܪ̈ܳܢܳܝܶܐ ܟܰܠܠܶܗ ܒܳܪܽܘܝܶܗ: ܓܶܫܬܳܐ: ܕܰܡܟܳܢܳܐ ܕܬܶܗܘܶܐ ܠܟܽܠ ܚܰܝ̈ܘܳܬܳܐ: ܛܥܳܡܬܳܐ: ܚܰܝܠܐܴ ܕܰܫܪܶܐ ܒܰܓܝܳܕܳܐ ܕܠܶܫܳܢܳܐ. ܣܰܘܩܳܐ ܕܰܒܥܽܘܒܳܐ ܩܰܕܡܳܐ ܕܡܽܘܚܳܐ ܫܪܶܐ: ܫܶܡܥܳܐ: ܘܒܰܓܝ̈ܳܕܶܐ ܕܰܫܛܺܝܚܽܘܬ ܐܶܕܢܳܐ ܡܛܰܟܰܣ ܚܙܳܝܳܐ: ܕܰܫܪܶܐ ܒܙܰܘܓܳܐ ܕܰܓܝ̈ܳܕܶܐ ܚܠܺܝ̈ܠܐܷ ܕܡ̣ܶܢ ܡܽܘܚܳܐ ܠܘܳܬ ܪܰܛܺܝܒܽܘܬܳܐ ܓܠܺܝܕܳܢܳܝܬܳܐ ܡܶܬܬܰܝܬܶܝܢ: ܘܰܒܚܰܡܫܳܐ ܪ̈ܶܓܫܶܐ ܕܢܰܦܫܳܐ ܨܰܒܬܶܗ: ܦܰܢܛܰܣܺܝܰܐ: ܗ̇ܰܘ ܕܰܡܛܰܟܰܣ ܒܩܽܘܕܡܳܐ ܗ̇ܰܘ ܕܥܽܘܒܳܐ ܩܰܕܡܳܐ ܕܡܽܘܚܳܐ ܘܰܠܘܳܬܶܗ ܟܳܢ̈ܫܳܢ ܐܰܝܢܳܝ̈ܘܳܬܳܐ ܕܡܶܬܪ̈ܰܓܫܳܢܶܐ: ܗܰܓܳܓܳܐ ܕܰܡܛܰܟܰܣ ܒܒܶܣܬܪܳܐ ܕܥܽܘܒܳܐ ܩܰܕܡܳܝܳܐ ܡܶܬܚܰܫܒܳܢܳܐ ܕܰܫܟܺܝܚ ܠܘܳܬ ܡܠܺܝ̈ܠܐܷ ܘܠܐܴ ܡܠܺܝ̈ܠܐܷ ܘܰܡܛܰܟܰܣ ܒܥܽܘܒܳܐ ܡܶܨܥܳܝܳܐ: ܡܶܬܗܰܓܳܓܳܢܳܐ ܕܰܡܛܰܟܰܣ ܠܘܳܬ ܬܰܘܠܥܳܐ ܕܥܽܘܒܳܐ ܡܶܨܥܳܝܳܐ: ܡܶܬܥܰܗܕܳܢܳܐ ܕܰܒܥܽܘܒܳܐ ܐ̱ܚܪܳܝܳܐ ܕܡܽܘܚܳܐ ܘܰܠܟܽܠ ܚܳܟܶܡ: ܚܰܡܶܫ ܨܶܒ̈ܥܳܢ ܥܒܰܕ ܠܟܽܠ ܚܕܳܐ ܚܕܳܐ ܐܺܝܕܳܐ ܕܐ̱ܢܳܫܳܐ: ܘܰܒܗܶܝܢ ܨܳܪ ܚܰܡܶܫ ܡܽܘ̈ܫܚܳܢ ܗܢܶܝܢ ܕܡܶܬܕܰܪܓܳܢܽܘܬܳܐ ܕܺܝܠܶܗ: ܘܰܕܢܶܗܘܶܐ ܡܶܬܒܰܩܶܐ ܕܰܐܝܟܰܢ ܨܳܝܪܺܝܢ ܠܥܶܠܳܝܺܝ̈ܢ ܘܡܶܨܥܳܝܺܝ̈ܢ ܘܬܰܚܬܳܝܺܝ̈ܢ ܡ̣ܶܢ ܚܕ̈ܳܕܶܐ: ܘܰܒܗܽܘܢ ܢܶܥܗܰܕ ܝܽܘܡ ܥܽܘܢܕܳܢܶܗ. ܥܰܠ ܗ̇ܳܝ ܣܽܘܓܳܐܐ ܕܰܢܒܺܝ̈ܶܐ ܒܚܰܡܶܫ ܐܳܬܘ̈ܳܢ ܟܰܠܶܠ: ܐܠܶܝܫܳܥ: ܘܶܐܫܰܥܝܳܐ: ܘܶܐܪܰܡܝܳܐ: ܘܝܽܘܐܝܠ: ܘܰܨܦܰܢܝܳܐ: ܘܥܽܘܒܺܝܕ: ܘܚܰܒܩܽܘܩ: ܘܰܙܟܰܪܝܳܐ: ܫܰܪܟܳܐ ܕܰܫܠܺܝ̈ܚܶܐ ܫܶܡܥܽܘܢ ܦܶܛܪܽܘܣ: ܘܝܽܘܚܰܢܳܢ: ܘܝܰܥܩܽܘܒ: ܘܬܳܐܘܡܰܐ: ܒܚܰܡܶܫ ܡܽܘ̈ܫܚܳܢ ܓܳܡܪܺܝܢ ܚܰܡܫܳܐ ܙܰܘܓܺܝ̈ܢ ܢܰܚ̈ܬܶܐ ܙܩܺܝܪ̈ܰܝ ܡ̣ܶܢ ܒܽܘܨܳܐ ܥܙܺܝܠܐܴ ܝܰܗܒ ܝܰܘܣܶܦ ܠܐܱܚܽܘܗܝ ܒܶܢܝܳܡܶܝܢ: ܘܚܰܡܫܳܐ ܛܰܥܢܺܝ̈ܢ ܕܚܰܡܪܳܐ ܘܥܳܒܽܘܪܳܐ ܘܰܒܝܰܕ ܗܳܠܶܝܢ ܗܰܝܡܶܢ ܝܰܥܩܽܘܒ ܕܚܰܝ ܗ̣ܽܘ ܒܪܶܗ ܝܰܘܣܶܦ. ܚܰܡܫܳܐ ܓܰܒܪ̈ܺܝܢ ܡܕܰܒܪܺܝܢ ܗܘܰܘ ܠܥܰܡܳܐ ܐܺܝܣܰܪܠܳܝܳܐ: ܡܽܘܫܶܐ: ܘܰܐܗܪܽܘܢ: ܘܚܽܘܪ: ܘܝܶܫܽܘܥ ܒܰܪܢܽܘܢ: ܘܟܳܠܶܒ ܒܰܪ ܝܽܘܦܰܢܳܐ: ܘܒܺܐܝ̈ܕܰܝܗܽܘܢ ܦܰܪܩܶܗ ܡܳܪܝܳܐ ܡ̣ܶܢ ܡܶܨܪܳܝܳܐ ܘܰܐܥܠܶܗ ܠܐܱܪܥܳܐ ܕܡܽܘܠܟܳܢܳܐ: ܕܰܘܺܝܕ ܢܒܺܝܳܐ ܚܦܰܛ ܠܰܡܙܰܡܳܪܽܘ ܘܒܰܚܡܺܝܫܳܝܽܘܬ ܪ̈ܶܓܫܶܐ ܓܰܘ̈ܳܝܶܐ ܘܒܰܪ̈ܳܝܶܐ ܕܰܐܝܟ ܚܕܳܐ ܕܫܳܘܶܝܢ: ܟܰܕ ܩܺܝܬܳܪܳܐ ܕܰܥܣܰܪ ܡܶܢܺܝ̈ܢ ܠܒܰܪܢܳܫܳܐ ܡܫܰܘܕܰܥ ܘܟܶܢܳܪܳܐ ܠܩܳܠܐܴ ܡܫܰܡܰܗ: ܘܰܠܚܰܡܫܳܐ ܣܶܦܪ̈ܶܐ ܦܰܠܓܰܬ݀ ܥܺܕܬܳܐ ܠܰܙܡܺܝܪ̈ܳܬܳܗ̇: ܚܰܡܶܫ ܪ̈ܶܒܘܳܢ ܡ̣ܶܢ ܝܽܘܕܳܝ̈ܶܐ ܕܰܫܒܺܝܬܳܐ ܕܢܰܒܽܘܟܰܕܢܳܨܰܪ ܦܰܩܶܕ ܟܽܘܪܳܫ ܦܳܪܣܳܝܳܐ ܘܰܚܡܺܝܫܳܝܳܐ ܕܡܰܠܟ̈ܶܐ ܒܳܒܠܳܝ̈ܶܐ ܕܢܰܣܩܽܘܢ ܠܐܘܪܫܠܶܡ ܘܢܶܒܢܽܘܢ ܗܰܝܟܠܐܴ ܠܡܳܪܝܳܐ: ܒܫܽܘܠܳܡ ܚܰܡܫܳܐ ܚܽܘ̈ܡܳܫܶܐ ܕܰܢܒܺܝ̈ܶܐ ܒܨܺܝܪ̈ܰܝ ܚܰܕ: ܕܢܰܚ ܒܪܳܐ ܝܺܚܺܝܕܳܝܳܐ ܒܓܰܘ ܥܳܠܡܳܐ: ܘܰܠܗ̇ܰܘ ܕܶܐܬܟܰܠܰܠ ܒܰܐܥܦܳܐ ܕܰܚܡܺܝܫܳܝܽܘܬ ܪ̈ܶܓܫܶܐ ܕܰܟܺܝ: ܘܝܰܗܒ ܠܶܗ ܚܰܝܠܐܴ ܕܰܒܥܶܣܪܳܐ ܐܠܰܦܺܝ̈ܢ: ܒܩܰܘܡܬܳܐ ܚܡܺܝܫܳܝܬܳܐ ܗܦܰܟ ܡ̣ܶܢ ܡܶܨܪܶܝܢ ܥܰܡ ܡܰܪܝܰܡ ܘܝܰܘܣܶܦ: ܘܚܰܡܫܳܐ ܡܶܢ̈ܝܳܢܶܐ ܕܰܫܢܰܝ̈ܳܐ ܐܶܬܪܰܒܺܝ ܒܢܳܨܪܰܬ݀ ܕܰܓܠܺܝܠܐܴ ܘܰܒܩܰܘܡܬܳܐ ܗ̇ܳܝ ܚܡܺܝܫܳܝܬܳܐ ܐܶܬܳܐ ܠܰܥܡܳܕܳܐ. ܘܰܠܗ̇ܰܘ ܕܶܐܬܬܰܛܥܰܢܝ ܒܚܰܡܫܳܐ ܕܰܪ̈ܓܶܐ ܦܪܰܩ. ܒܚܰܡܫܳܐ ܥܶܕ̈ܳܢܶܐ ܐܰܓܰܪ ܦܳܥ̈ܠܐܷ ܠܟܰܪܡܶܗ: ܒܨܰܦܪܳܐ ܠܰܕܒܶܝܬ ܐܳܕܳܡ: ܒܰܬܠܳܬܫܳܥܺܝ̈ܢ ܠܐܱܒܪܳܗܳܡ ܘܰܒܫܶܬܫܳܥܺܝ̈ܢ ܠܓܽܘܕܳܐ ܕܰܢܒܺܝ̈ܶܐ: ܘܒܰܬܫܰܥ ܠܡܳܟ̈ܶܐ ܘܕܰܝܳܢ̈ܶܐ: ܘܒܰܚܕܰܥܶܣܪ̈ܶܐ ܠܐܱܝܠܶܝܢ ܕܶܐܬܬܰܠܡܰܕܘ ܠܢܺܝܪܳܐ ܕܰܣܒܰܪܬܳܐ. ܒܚܰܡܶܫ ܟܰܟܪ̈ܺܝܢ ܘܡܶܬܬܰܓܪ̈ܳܢܘܳܬܗܶܝܢ ܪܫܰܡ ܥܒܳܕܳܐ ܕܥܰܒܕܳܐ ܡܗܰܝܡܢܳܐ: ܘܰܒܝܰܕ ܚܰܡܫܳܐ ܟܰܟܪ̈ܺܝܢ ܟܳܗܢܽܘܬܳܐ ܘܡܰܥܡܽܘܕܺܝܬܳܐ ܘܐ̱ܪ̈ܳܙܶܐ ܥܰܡ ܡܰܠܦܳܢܽܘܬܳܐ ܘܪܳܥܝܽܘܬܳܐ ܐܽܘܪܚܳܐ ܚܕܰܬܳܐ ܕܰܡܡܰܢܥܳܐ ܠܚܰܝ̈ܶܐ: ܚܰܡܶܫ ܬܡܺܝ̈ܗܳܬܳܐ ܚܰܘܺܝ ܠܬܰܠܡܺܝ̈ܕܰܘܗܝ ܒܚܰܡܫܳܐ ܗ̇ܰܘ ܕܰܩܕܳܡ ܗܳܢܳܐ: ܩܰܘܡܳܐ ܕܡ̣ܶܢ ܚܫܳܡܺܝܬܳܐ: ܘܡܶܬܚܰܙܩܳܢܽܘܬܳܐ ܕܰܒܣܶܕܽܘܢܳܐ: ܪܡܳܝ ܡܰܝ̈ܳܐ ܒܰܡܫܳܓܬܳܐ: ܘܰܫܝܳܓܬܳܐ ܥܰܡ ܟܽܘܦܳܪܳܐ ܕܪ̈ܶܓܠܐܷ: ܚܰܡܫܳܐ ܓܰܒܪ̈ܺܝܢ ܐܶܫܬܰܘܬܰܦܘ ܒܕܺܝܢܶܗ ܕܰܡܫܺܝܚܳܐ ܝܽܘܕܳܐ ܕܢܳܟܶܠ: ܚܰܢܳܢ ܕܰܡܫܰܩܶܦ: ܩܰܝܳܦܳܐ ܕܰܡܩܰܦܰܚ: ܦܺܝܠܰܛܳܘܣ ܕܕܳܐܶܢ. ܗܶܪܳܘܕܶܣ ܕܰܡܒܰܙܰܚ: ܚܰܡܶܫ ܢܰܦ̈ܫܳܢ ܗܰܝܡܶܢ̈ܝ ܒܰܙܩܺܝܦܶܗ ܕܡܳܪܰܢ: ܦܪܽܘܩܠܐܱ ܐܰܢ̱ܬܬܶܗ ܕܦܺܝܠܰܛܳܘܣ: ܫܶܡܥܽܘܢ ܩܽܘܪܺܝܢܳܝܳܐ ܕܰܛܥܶܢ ܙܩܺܝܦܶܗ: ܦܺܝܠܰܛܳܘܣ ܕܰܡܫܺܝܓ ܐܺܝܕܰܘ̈ܗܝ: ܓܰܝܳܣܳܐ ܕܰܡܗܰܝܡܶܢ ܒܡܳܪܽܘܬܶܗ: ܩܶܢܛܪܽܘܢܳܐ ܕܡܰܟܪܶܙ ܐܠܰܗܽܘܬܶܗ: ܚܰܡܶܫ ܐܳܬܘ̈ܳܬܳܐ ܡܩܰܠܣ̈ܳܬܳܐ ܐܶܬܚܙܺܝܶܝ̈ܢ ܒܓܰܝܳܣܳܐ ܝܰܡܺܝܢܳܝܳܐ ܕܰܟܐܴܐ ܒܚܰܒܪܶܗ: ܘܕܰܐܘܕܺܝ ܒܒܺܝܫܽܘܬܶܗ ܘܕܰܙܟܺܝ ܠܰܡܫܺܝܚܳܐ: ܘܰܐܘܕܝܶܗ ܡܰܠܟܳܐ: ܘܰܕܫܶܐܠ ܕܢܰܬܕܟܪܶܗ ܒܝܽܘܡ ܡܶܐܬܺܝܬܶܗ ܚܰܡܶܫ ܙܰܒ̈ܢܺܝܢ ܐܶܙܰܠ̱ܬ݀ ܡܰܓܕܠܳܝܬܳܐ ܠܩܰܒܪܳܐ: ܘܚܰܡܫܳܐ ܒܽܘ̈ܝܳܐܷܐ ܦܓܰܥܘ ܒܳܗ̇: ܟܰܕ ܫܶܡܥܰܬ݀ ܕܠܐܴ ܬܶܕܚܰܠܝ ܘܬܶܒܟܶܐ ܘܰܕܗܳܐ ܩܳܡ ܦܳܪܽܘܩܳܐ: ܘܬܳܝ ܚܙܳܝ ܕܽܘܟܬܶܗ ܘܙܶܠܝ ܣܰܒܰܪܝ ܢܽܘܚܳܡܶܗ ܠܰܫܠܺܝ̈ܚܶܐ: ܘܥܰܡܗܽܘܢ ܙܶܠܝ ܠܶܟܝ ܠܰܓܠܺܝܠܐܴ: ܚܰܡܫܳܐ ܪ̈ܘܳܙܶܐ ܢܶܣܒܰܬ݀ ܡܰܪܝܰܡ ܡܰܓܕܠܳܝܬܳܐ ܚܠܳܦ ܟܡܺܝܪܽܘܬܳܐ: ܢܽܘܚܳܡܶܗ ܕܺܝܚܺܝܕܳܝܳܐ ܢܰܘܚܶܗ ܕܒܶܟܝܳܗ̇ ܟܽܘܢܳܝܶܗ ܕܰܫܡܳܗ̇: ܠܒܽܘܟܝܳܐ ܕܪ̈ܶܓܠܰܘܗܝ ܩܰܕܺܝ̈ܫܳܬܳܐ: ܡܶܫܬܰܠܚܳܢܽܘܬܳܐ ܕܺܝܠܳܗ̇ ܕܠܰܣܒܰܪܬܳܐ: ܚܰܡܫܳܐ ܓܰܒܺܝ̣̈ܢ ܗܘܰܘ ܣܳܗ̈ܕܶܐ ܠܰܩܝܳܡܬܶܗ ܫܒܺܝܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܡܰܠܐܱܟ̈ܶܐ ܗ̇ܳܢܽܘܢ ܕܒܰܠܒܽܘ̈ܫܶܐ ܚܶܘܳܪ̈ܳܝܶܐ ܡܰܦܪܓܺܝܢ: ܢܳܛܽܘܪ̈ܶܐ ܕܡܶܣܬܰܪܕܺܝܢ: ܟܳܗ̈ܢܶܐ ܕܰܡܫܰܚܕܺܝܢ: ܢܶܫ̈ܶܐ ܕܡܶܣܬܰܒܪ̈ܳܢ ܫܠܺܝ̈ܚܶܐ ܕܠܰܓܠܺܝܠܐܴ ܡܶܬܘܰܥܕܺܝܢ: ܠܚܰܡܫܳܐ ܪ̈ܶܓܫܶܐ ܕܰܫܠܺܝ̈ܚܶܐ ܩܰܕܶܫ: ܒܚܰܡܫܳܐ ܟܰܟܪ̈ܺܝܢ ܓܡܰܪ ܐܶܢܽܘܢ: ܘܥܰܠ ܚܰܡܶܫ ܡܕܺܝ̈ܢܳܢ ܐܰܫܠܶܛ ܐܶܢܽܘܢ: ܘܰܒܚܰܡܫܳܐ ܦܶܬܓܳܡ̈ܶܐ ܐܠܰܦ ܐܶܢܽܘܢ ܕܰܢܨܰܠܽܘܢ ܘܰܢܩܰܕܫܽܘܢ ܠܚܰܡܫܳܐ ܪ̈ܶܓܫܶܐ ܘܥܰܠܗ̇ܳܝ ܒܝܰܘܡܳܐ ܗܳܢܳܐ ܕܚܰܡܫܳܐ ܕܚܶܘܳܪ̈ܶܐ ܡܶܬܟܰܫܦܺܝܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܡܫܺܝܚܳܐ ܐܠܰܗܳܐ ܕܺܝܠܰܢ: ܒܪ̈ܰܚܡܰܝܟ ܨܰܒܶܬ ܠܥܰܡܳܟ ܒܚܰܡܫܳܐ ܪ̈ܶܓܫܶܐ ܒܩܰܕܺܝܫܽܘܬܳܐ: ܘܰܒܚܰܡܫܳܐ ܡܽܘ̈ܫܚܳܢ: ܘܗܰܒ ܠܶܗ ܕܢܶܗܘܶܐ ܚܰܒܪܳܐ ܠܦܳܥ̈ܠܐܷ ܟܰܫܺܝܪ̈ܶܐ ܕܙܰܡܶܢܬ ܠܟܰܪܡܳܟ: ܘܰܢܩܰܒܠܳܟ ܥܰܡ ܬܰܠܡܺܝ̈ܕܶܐ ܘܢܶܫ̈ܶܐ ܕܰܪ̈ܗܶܛܝ ܠܩܰܒܪܳܟ: ܘܒܰܐܦ̈ܶܐ ܦܨܺܝ̈ܚܳܬܳܐ ܢܺܐܪܥܳܟ: ܘܗܰܒ ܠܶܗ ܕܰܒܚܽܘܡܳܫܳܐ ܕܠܐܴ ܒܶܗܬܬܳܐ ܢܶܦܠܚܳܟ ܟܽܠ ܝܰܘ̈ܡܰܝ ܚܰܝܰܘ̈ܗܝ. ܘܰܚܢܰܢ ܐܳܦ ܥܰܢܺܝ̈ܕܰܝܢ: ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬ ܬܪܺܝܨܰܬ݀ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܛܪܐ

ܐܶܨܛܒܰܝ ܡܳܪܝܳܐ ܡܪܰܚܡܳܢܳܐ ܘܩܰܒܶܠ ܒܪܶܚܡܰܬ݀ ܐ̱ܢܳܫܽܘܬܳܟ ܠܦܺܝܪܡܳܐ ܗܳܢܳܐ ܕܩܰܪܒܰܬ݀ ܡܰܪܥܺܝܬܳܟ ܙܒܺܝܢܰܬ݀ ܒܰܕܡܳܟ ܝܰܩܺܝܪܳܐ ܕܰܦܪܰܩܬܳܗ̇ ܒܚܰܫܰܝ̈ܟ: ܘܰܐܚܺܝܬܳܗ̇ ܒܡܰܘܬܳܟ: ܘܚܰܪܰܪܬܳܗ̇ ܒܰܨܠܺܝܒܳܟ ܘܰܐܩܺܝܡܬܳܗ̇ ܒܰܩܝܳܡܬܳܟ. ܘܪܰܡܪܶܡܬܳܗ̇ ܒܣܽܘܠܳܩܳܟ: ܘܰܓܡܰܪܬܳܗ̇ ܒܡܰܚܬܬܳܐ ܕܪܽܘܚܳܐ ܩܰܕܺܝܫܳܐ. ܐܰܚܕܰܪ ܠܳܗ̇ ܫܽܘܪܳܐ ܕܪ̈ܰܚܡܶܐ ܒܝܰܨܺܝܦܽܘܬܳܟ: ܕܬܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܚܘܬܡܐ

ܗܘܺܝ ܡܳܪܝܳܐ ܠܥܺܕܬܳܟ ܫܽܘܪܳܐ ܪܳܡܳܐ ܕܠܐܴ ܡܶܬܚܣܶܢ: ܡ̣ܶܢ ܝܽܘܠܦܳܢ̈ܶܐ ܒܺܝ̈ܫܶܐ ܕܶܐܪ̈ܶܣܺܝܣ: ܘܡ̣ܶܢ ܟܽܠ ܟܶܫ̈ܠܐܷ ܘܰܦܠܺܝ̈ܓܘܳܬܳܐ ܕܥܳܒ̈ܕܰܝ ܥܒܳܕ̈ܶܐ ܕܠܐܴ ܢܳܡܽܘܣܳܝ̈ܘܳܬܳܐ ܘܫܰܪܪܶܝܗ̇ ܒܗܰܝܡܳܢܽܘܬܳܐ ܐܳܪܬܳܕܽܘܟܣܳܝܬܳܐ ܥܰܠ ܫܽܘܥܳܐ ܦܶܛܪܽܘܣܳܝܳܐ ܘܰܐܥܒܰܪ ܡܶܢܳܗ̇ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ ܒܰܨܠܽܘܬ ܐܶܡܳܟ ܘܩܰܕܺܝ̈ܫܰܝܟ: ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܡܫܰܡܠܝܳܢܳܐ ܘܓܳܡܽܘܪܳܐ ܕܟܽܠ ܐ̱ܪ̈ܳܙܺܝܢ ܘܰܡܚܰܬܡܳܢܳܐ ܕܟܽܠ ܦ̈ܶܠܐܴܬܳܐ: ܠܗ̇ܰܘ ܡܒܰܕܩܳܢܳܐ ܘܰܡܚܰܘܝܳܢܳܐ ܕܰܣܬܺܝܪ̈ܳܬܳܐ ܕܚܰܬܶܡ ܘܰܓܡܰܪ ܘܫܰܡܠܺܝ ܟܽܠ ܢܒܺܝ̈ܰܘܳܬܳܐ ܕܰܢܒܺܝ̈ܶܐ ܘܦ̈ܶܠܐܴܬܳܐ ܕܟܽܠ ܚܰܙܳܝ̈ܶܐ ܒܰܕܶܩ ܒܡܶܬܢܰܚܬܳܢܽܘܬܶܗ ܕܰܠܘܳܬܰܢ. ܠܗ̇ܰܘ ܕܶܐܡܰܪ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܕܙܶܠܘ ܐܰܟܪܶܙܘ ܒܟܽܠ ܐܰܬܪ̈ܰܘܳܢ ܣܒܰܪܬܳܐ ܚܕܰܬܳܐ ܕܰܐܝܢܳܐ ܕܠܐܴ ܡܗܰܝܡܶܢ ܡܶܬܚܰܝܰܒ: ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܡܳܪܝܳܐ ܡܬܽܘܡܳܝ ܡ̣ܶܢ ܟܽܠ ܘܩܰܕܡܳܝ ܘܩܰܫܺܝܫ ܡܶܢܟܽܠ: ܗ̇ܰܘ ܕܒܰܫ̈ܡܰܝ ܫܡܰܝ̈ܳܐ ܥܳܡܰܪ: ܘܒܰܩܕܽܘܫ ܩܽܘ̈ܕܫܺܝܢ ܗ̇ܰܘ ܕܺܐܝܩܳܪܳܐ ܥܰܡ ܐܰܒܽܘܗܝ ܡܶܬܓܰܝܰܐܐ ܒܰܬܪܽܘܢܳܘܣ ܡܥܰܠܝܳܐ ܕܓܰܐܝܽܘܬܶܗ. ܘܡ̣ܶܢ ܠܶܓܝܽܘ̈ܢܶܐ ܢܰܒܪ̈ܫܳܢܳܝܳܬܳܐ ܡܶܫܬܰܒܰܚ ܒܩܺܝ̈ܢܳܬܳܐ ܠܐܴ ܫܰܠܘܳܝ̈ܳܬܳܐ ܡܶܬܪܰܡܪܰܡ: ܗ̇ܰܘ ܚܰܟܺܝܡ ܒܟܽܠ ܘܰܡܦܰܪܢܣܳܢܳܐ ܕܟܽܠ: ܘܰܡܕܰܒܰܪ ܟܽܠ ܒܺܝܕܰܥܬܶܗ ܠܐܴ ܡܶܬܕܰܪܟܳܢܺܝܬܳܐ. ܩܰܕܶܡ ܓܒܳܐ ܠܶܗ ܟܳܪ̈ܽܘܙܶܐ ܢܒܺܝ̈ܶܐ ܘܚܰܙܳܝ̈ܶܐ ܕܰܢܨܽܘܪܽܘܢܳܝܗܝ ܒܓܶܠܝܳܢܰܝ̈ܗܽܘܢ ܘܒܰܕܩܽܘܗܝ ܒܦ̈ܶܠܐܴܬܗܽܘܢ. ܘܟܽܠ ܚܰܕ ܡܶܢܗܽܘܢ ܐܶܚܰܕ ܡܰܥܒܕܳܢܽܘܬܳܐ ܕܪܽܘܚܳܐ ܩܰܕܺܝܫܳܐ ܕܶܐܬܺܝܗܶܒ ܠܶܗ ܘܠܰܒ̈ܢܰܝ ܥܰܡܶܗ ܐܶܬܢܰܒܺܝ ܗܘܳܐ ܥܰܠ ܕܶܢܚܶܗ ܕܡܳܪܝܳܐ ܡܶܠܬܳܐ ܐܠܰܗܳܐ ܕܶܐܬܳܐ ܠܥܳܠܡܳܐ ܕܰܢܚܰܕܶܬ ܨܰܠܡܶܗ ܡܰܠܟܳܝܳܐ ܕܰܒܚ̈ܶܙܶܐ ܗܳܡܳܢܳܝ̈ܶܐ ܒܠܺܝ: ܘܡ̣ܶܢ ܝܺܕܰܥܬܳܐ ܪܽܘܚܳܢܳܝܬܳܐ ܐܶܬܬܰܥܡܰܛ ܘܠܰܒܥܶܠܕܒܳܒܳܐ ܐܶܬܥܰܒܕܰܕ: ܚܰܕ ܐܶܡܰܪ ܕܡ̣ܶܢ ܩܶܛܠܐܴ ܒܶܪܝ ܣܠܶܩܬ ܒܪܰܟ ܘܰܪܒܰܥ ܒܰܕܡܽܘܬ ܐܰܪܝܳܐ ܘܰܢܫܺܝܓ ܒܚܰܡܪܳܐ ܠܒܽܘܫܶܗ ܘܒܰܕܡܳܐ ܕܥܶܢ̈ܒܶܐ ܬܰܟܣܺܝܬܶܗ: ܟܰܕ ܪܳܡܶܙ ܒܰܕܡܶܗ ܡܫܺܝܓ ܠܥܳܠܡܳܐ ܡ̣ܶܢ ܚܛܺܝܬܳܐ ܕܡܰܦܽܘܠܬܳܐ ܕܰܥܒܳܪ ܦܽܘܩܕܳܢܳܐ: ܚܰܕ ܐܶܡܰܪ ܕܓܽܘܫܡܝ ܝܶܗܒܶܬ ܠܡܰܚ̈ܘܳܬܳܐ ܘܦܰܟ̈ܰܝ ܠܫܽܘ̈ܩܳܦܶܐ: ܘܰܐܦ̈ܰܝ ܠܐܴ ܐܰܗܦܟܶܬ ܡ̣ܶܢ ܪܽܘܩܳܐ ܘܡ̣ܶܢ ܒܶܙܚܳܐ: ܚܰܕ ܐܶܡܰܪ ܕܶܐܢܳܐ ܐܰܝܟ ܐܶܡܪܳܐ ܒܪܺܝܪܳܐ ܕܡܶܬܕܒܰܪ ܠܢܶܟܣܬܳܐ: ܘܰܥܠܰܝ ܬܽܘܒ ܐܶܬܚܰܫܰܒܘ ܗܘܰܘ ܡܰܚܫܰܒܬܳܐ ܘܶܐܡܰܪܘ ܕܬܰܘ ܕܰܢܚܰܒܶܠ ܒܩܰܝܣܳܐ ܠܙܰܕܺܝܩܳܐ ܘܢܰܓܗܶܐ ܡܶܢܶܗ. ܚܰܕ ܐܶܡܰܪ ܕܠܺܝܛ ܟܽܠ ܕܢܳܣܶܒ ܫܽܘܚܕܳܐ ܠܡܶܩܛܰܠ ܢܰܦܫܳܐ ܕܰܕܡܳܐ ܙܰܕܺܝܩܳܐ: ܘܰܐ̱ܚܪܺܢܳܐ ܐܶܡܰܪ ܡܚܺܝ ܠܪܳܥܝܳܐ ܘܢܶܬܒܰܕܪܽܘܢ ܐܶܡܪ̈ܶܐ ܕܥܳܢ̈ܶܗ. ܚܰܕ ܐܶܡܰܪ ܕܒܳܬܰܪ ܫܳܒܽܘ̈ܥܶܐ ܫܬܺܝܢ ܢܶܬܩܛܶܠ ܡܫܺܝܚܳܐ ܡܰܠܟܳܐ ܘܰܒܩܶܛܠܶܗ ܩܽܘܪܝܰܬ݀ ܥܽܘܫܢܳܐ ܬܶܦܶܠ ܘܬܶܬܚܰܒܰܠ: ܐ̱ܚܪܺܢܳܐ ܐܶܡܰܪ ܕܢܶܚܫܰܟ ܒܝܰܘܡܳܐ ܗ̇ܰܘ ܫܶܡܫܳܐ ܒܛܰܗܪܳܐ ܕܠܐܴ ܢܶܚ̈ܙܝܳܢ ܒܶܪ̈ܝܳܬܳܐ ܦܽܘܪܣܳܝܳܐ ܕܒܳܪܽܘܝܳܐ ܕܺܝܠܗܶܝܢ: ܚܰܕ ܐܶܡܰܪ ܕܰܢܚܽܘܪܽܘܢ ܒܡ̇ܰܢ ܕܰܕܩܰܪܘ: ܘܰܐ̱ܚܪܺܢܳܐ ܐܶܡܰܪ ܕܝܰܗܒ ܪܰܫܺܝܥܳܐ ܩܰܒܪܶܗ ܘܥܰܬܺܝܪܳܐ ܒܡܰܘܬܶܗ. ܚܰܕ ܐܶܡܰܪ ܕܗܳܐ ܒܶܝܬ ܡܺܝ̈ܬܶܐ ܒܰܪ ܚܺܐܪ̈ܶܐ ܐܰܝܟ ܩܛܺܝ̈ܠܐܷ ܐܰܝܠܶܝܢ ܕܰܫܟܺܝܒܺܝܢ ܒܩܰܒܪ̈ܶܐ. ܚܰܕ ܐܶܡܰܪ ܐܰܝܟܰܘ ܥܽܘܩܣܳܟ ܡܰܘܬܳܐ ܝܰܥܢܳܐ: ܘܰܐܝܟܳܐ ܗ̱̇ܝ ܙܳܟܽܘܬܶܟܝ ܫܝܽܘܠ ܕܳܘܺܝܬܳܐ. ܘܰܐ̱ܚܪܺܢܳܐ ܐܶܡܰܪ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܡ̣ܶܢ ܒܶܝܬ ܡܺܝ̈ܬܶܐ: ܘܰܐ̱ܚܪܺܝܢ ܐܶܡܰܪ ܢܩܽܘܡ ܐܠܰܗܳܐ ܘܢܶܬܒܰܕܪܽܘܢ ܟܽܠܗܽܘܢ ܒܥܶܠܕ̈ܒܳܒܰܘܗܝ. ܚܰܕ ܐܶܡܰܪ ܕܒܰܕܡܳܐ ܕܕܺܝܰܬܺܝܩܺܝ ܕܺܝܠܳܟ ܫܪܰܝܬ ܠܐܱܣܺܝܪ̈ܶܐ ܡ̣ܶܢ ܓܽܘܒܳܐ ܕܠܰܝܬ ܒܶܗ ܡܰܝ̈ܳܐ: ܘܰܐ̱ܚܪܺܢܳܐ ܐܶܡܰܪ ܩܽܘܡ ܐܠܰܗܳܐ ܘܕܽܘܢܶܝܗ̇ ܠܐܱܪܥܳܐ ܡܶܛܽܠ ܕܰܐܢ̱ܬ ܬܺܐܪܰܬ ܠܟܽܠܗܽܘܢ ܥܰܡ̈ܡܶܐ. ܚܰܕ ܐܶܡܰܪ ܢܺܐܙܰܠ ܡ̇ܰܢ ܕܰܡܚܳܢܝ ܕܢܰܐܣܶܝܢܝ: ܘܰܒܝܰܘܡܳܐ ܬܠܺܝܬܳܝܳܐ ܢܩܺܝܡܰܢܝ: ܚܰܕ ܐܶܡܰܪ ܕܬܰܪ̈ܥܶܐ ܕܰܫܝܽܘܠ ܐܶܬܰܒܰܪ: ܘܡܽܘ̈ܟܠܐܷ ܕܦܰܪܙܠܐܴ ܐܶܓܰܕܶܡ: ܘܠܐܱܣܺܝܪ̈ܶܐ ܕܦܽܘܩܘ ܘܶܐܫܬܪܰܘ ܘܰܐܝܠܶܝܢ ܕܰܒܚܶܫܽܘܟܳܐ ܐܶܬܓܠܰܘ ܘܟܰܕ ܠܗܳܠܶܝܢ ܟܽܠܗܶܝܢ ܕܡܰܠܶܠܘ ܢܒܺܝ̈ܶܐ ܘܚܰܙܳܝ̈ܶܐ ܒܰܩܢܽܘܡܶܗ ܓܡܰܪ ܘܫܰܡܠܺܝ: ܘܰܒܫܽܘܠܳܡ ܡܰܠܟܽܘܬܳܐ ܘܟܳܗܢܽܘܬܳܐ: ܘܰܢܒܺܝܽܘܬܳܐ ܕܢܰܚ: ܘܰܐܝܟ ܐܶܡܪܳܐ ܠܢܶܟܣܬܳܐ ܐܶܬܕܒܰܪ: ܘܰܒܩܰܢܝܳܐ ܥܰܠ ܪܺܝܫܶܗ ܐܶܬܩܰܦܰܚ: ܐܰܚܫܶܟ ܫܶܡܫܳܐ ܒܛܰܗܪܳܐ: ܩܥܳܐ ܒܩܳܠܶܗ ܘܬܰܒܰܪ ܓܠܺܝ̈ܦܶܐ: ܕܡܶܟ ܒܗܳܡܳܢ ܕܰܩܒܺܝܪ̈ܶܐ ܘܰܫܪܳܐ ܫܽܘܠܛܳܢܶܗ ܕܡܰܘܬܳܐ: ܘܰܫܒܺܝܬܳܐ ܕܰܚܡܺܝܠܐܴ ܗܘܳܬ݀ ܒܶܝܬ ܐܺܝܕܰܘ̈ܗܝ ܐܰܦܶܩ ܡ̣ܶܢ ܒܶܝܬ ܫܶܢ̈ܶܐ ܕܰܐܒܕܳܢܳܐ: ܣܥܰܪ ܩܒܺܝܪ̈ܶܐ: ܐܰܢܗܰܪ ܚܶܫܽܘ̈ܟܶܐ: ܦܪܰܩ ܠܰܫܒܰܝ̈ܳܐ: ܘܚܰܪܰܪ ܚܒܺܝ̈ܫܶܐ: ܘܰܐܦܨܰܚ ܠܰܫܠܺܝ̈ܚܶܐ: ܐܰܟܡܰܪ ܠܣ̈ܳܢܶܐܐ: ܐܰܒܗܶܬ ܠܙܳܩܽܘܦ̈ܶܐ: ܟܰܢܶܫ ܠܰܡܒܰܕܪ̈ܶܐ: ܒܰܝܬܺܝ ܠܪ̈ܰܚܺܝܩܶܐ: ܕܚܰܩ ܠܩܰܪ̈ܺܝܒܶܐ ܘܟܰܕ ܒܗܳܠܶܝܢ ܘܕܰܐܝܟ ܗܳܠܶܝܢ ܣܒܰܪܬܳܐ ܕܢܽܘܚܳܡܶܗ ܪܳܥܡܳܐ ܗܘܳܬ݀: ܘܡܶܢܟܽܠ ܓܰܒܺܝ̈ܢ ܕܳܢܚܳܐ ܗܘܳܬ݀. ܡܫܺܝܚܳܐ ܐܠܰܗܰܢ ܕܡܶܬܢܰܚܰܡ: ܟܺܐܦܳܐ ܕܛܰܒܺܝܥܳܐ: ܢܳܛܽܘܪ̈ܶܐ ܕܡܶܬܒܰܠܗܺܝܢ. ܩܰܒܪܳܐ ܕܩܳܥܶܐ ܕܠܰܝܬ ܒܶܗ ܡܶܕܶܡ: ܡܰܠܐܱܟ̈ܶܐ ܕܡ̣ܶܢ ܪܰܘܡܳܐ ܠܥܽܘܡܩܳܐ ܢܳܚܬܺܝܢ: ܘܰܠܟܺܐܦܳܐ ܡܥܰܓܠܺܝܢ: ܢܶܫ̈ܶܐ ܕܡܶܣܬܰܒܪ̈ܳܢ ܩܝܳܡܬܳܐ: ܥܺܝܪ̈ܶܐ ܕܢܽܘܪܳܐ ܕܰܠܢܰܟ̈ܦܳܬܳܐ ܡܒܰܕܩܺܝܢ: ܩܶܣܛܽܘܢܳܪ̈ܶܐ ܕܡܰܟܪܙܺܝܢ ܢܽܘܚܳܡܳܐ: ܬܰܠܡܺܝ̈ܕܶܐ ܕܢܺܐܙܽܠ̱ܘܢ ܠܰܓܠܺܝܠܐܴ ܡܶܬܦܰܩܕܺܝܢ: ܫܶܡܥܽܘܢ ܘܝܽܘܚܰܢܳܢ ܕܰܠܩܰܒܪܳܐ ܪܳܗܛܺܝܢ: ܘܟܶܬܳܢ̈ܶܐ ܘܣܽܘܕܳܪܳܐ ܕܠܰܣܛܰܪ ܟܪܺܝܟܺܝܢ ܘܣܺܝܡܺܝܢ: ܟܰܕ ܡܶܬܩܰܦܠܳܢܽܘܬܳܐ ܕܰܚܛܺܝܬܳܐ ܡܰܢܗܪܺܝܢ ܘܰܡܫܰܘܕܥܺܝܢ: ܘܢܰܚ̈ܬܶܐ ܚܶܘܳܪ̈ܶܐ ܦܨܺܝܚܽܘܬܳܐ ܡܫܰܟܢܺܝܢ: ܘܚܽܘܕܳܬܳܐ ܕܡ̣ܶܢ ܕܪܺܝܫ ܡܰܐܪܙܺܝܢ. ܘܗܳܠܶܝܢ ܟܽܠܗܶܝܢ ܕܰܗܘ̈ܰܝ ܕܰܐܠܳܗܳܐ ܘܒܰܪ ܐܠܰܗܳܐ ܘܰܡܣܰܒܪܺܝܢ: ܡܰܠܐܱܟ̈ܶܐ ܥܰܒ̈ܕܰܝ ܡܰܠܟܳܐ ܕܰܡܫܰܡܫܺܝܢ ܘܰܠܟܺܐܦܳܐ ܪܰܒܬܳܐ ܡܥܰܓܠܺܝܢ. ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܕܥܰܡ ܢܒܺܝ̈ܶܐ ܕܩܰܕܶܡܘ ܐܶܬܢܰܒܺܝܘ ܥܰܠ ܓܶܠܝܳܢܳܟ: ܢܶܚܕܶܐ ܘܢܶܪܘܰܙ ܒܦܽܘܪܩܳܢܳܟ. ܘܥܰܡ ܫܠܺܝ̈ܚܶܐ ܘܢܰܟ̈ܦܳܬܳܐ ܕܰܪܗܶܛܘ ܠܩܰܒܪܳܟ ܢܶܚܕܶܐ ܒܰܩܝܳܡܬܳܟ: ܘܢܶܣܘܰܚ ܠܐܘܪܥܳܟ ܒܡܶܐܬܺܝܬܳܟ ܕܬܰܪܬܶܝܢ ܘܒܰܥܒܳܕ̈ܶܐ ܕܟܰܝ̈ܳܐ ܕܝܰܬܺܝܪ ܚܶܘܳܪ̈ܺܝܢ ܢܩܰܒܠܳܟ: ܘܚܺܝܨܳܐܺܝܬ ܢܶܫܬܰܪܰܪ ܒܣܰܒܪܳܟ: ܢܶܪܗܰܛ ܠܒܶܝܬ ܘܰܥܕܳܟ ܘܢܰܣܶܩ ܠܳܟ ܫܽܘܒܚܳܐ܀

ܫܠܡ ܕܝܘܡ ܚܡܫܐ ܕܚܘܪ̈ܐ

 

ܬܘܒ ܛܟܣܐ ܕܝܘܡ ܥܪܘܒܬܐ ܕܡܘܕܝ̈ܢܐ ܕܒܬܪ ܥܐܕܐ ܪܒܐ ܕܩܝܡܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܥܰܠ ܟܽܠ: ܕܰܒܚܰܕܽܘܬܳܐ ܕܠܶܒܳܐ ܘܰܒܕܰܟܝܽܘܬܳܐ ܕܢܰܦܫܳܐ: ܘܰܒܩܰܕܺܝܫܽܘܬܳܐ ܕܦܰܓܪܳܐ: ܢܚܰܓܶܐ ܘܰܢܥܰܕܥܶܕ ܠܝܰܘܡܳܐ ܗܳܢܳܐ ܩܰܕܺܝܫܳܐ: ܐܰܘܟܺܝܬ ܥܽܘܗܕܳܢܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܥܳܠܰܡ: ܗ̇ܳܢܽܘܢ ܕܣܰܟܺܝܘ ܠܡܶܐܬܺܝܬܳܟ ܘܰܕܚܰܙܳܝ̈ܶܐ ܕܒܰܕܶܩܘ ܥܰܠ ܓܶܠܝܳܢܳܟ: ܘܕܰܫܠܺܝ̈ܚܶܐ ܕܰܚܙܰܐܘܽܘܟ ܘܰܐܟܪܶܙܘ ܟܽܠܳܗ̇ ܡܕܰܒܪܳܢܽܘܬܳܟ: ܘܰܕܣܳܗ̈ܕܶܐ ܘܡܰܘܕܝ̈ܳܢܶܐ ܕܶܐܬܩܛܶܠܘ ܡܶܛܽܠ ܚܽܘܒܳܟ: ܘܰܐܘܕܺܝܘ ܒܰܙܩܺܝܦܽܘܬܳܟ: ܘܰܕܩܰܕܺܝ̈ܫܶܐ ܕܩܳܡܘ ܡ̣ܶܢ ܩܰܒܪ̈ܰܝܗܽܘܢ ܒܥܶܕܳܢ ܚܰܫܳܟ: ܥܰܠܘ ܥܰܡܳܟ ܠܐܘܪܫܠܶܡ ܒܰܩܝܳܡܬܳܟ: ܘܰܠܣܰܓܺܝ̈ܶܐܐ ܐܰܟܪܶܙܘ ܢܽܘܚܳܡܳܟ ܘܓܰܢ̱ܒܳܪܽܘܬܳܟ: ܐܰܝܟܰܢܳܐ ܕܢܶܬܥܰܕܰܪ ܒܰܨܠܰܘ̈ܳܬܗܽܘܢ: ܘܥܰܡܗܽܘܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܕܥܳܠܡ̈ܶܐ. ܕܶܐܬܳܐ ܠܘܳܬܰܢ ܒܚܽܘܒܶܗ: ܘܰܠܒܶܫ ܦܰܓܪܳܐ ܕܐ̱ܢܳܫܽܘܬܰܢ ܒܛܰܝܒܽܘܬܶܗ: ܘܰܗܘܳܐ ܒܰܪܢܳܫܳܐ ܐܰܟܘܳܬܰܢ: ܟܰܕ ܐܺܝܬܰܘܗܝ ܐܠܰܗܳܐ ܒܰܟܝܳܢܶܗ: ܘܣܰܝܒܰܪ ܚܰܫ̈ܶܐ ܘܰܙܩܺܝܦܳܐ ܡܶܛܽܠܳܬܰܢ ܒܨܶܒܝܳܢܶܗ: ܟܰܕ ܗ̣ܽܘ ܪܳܡ ܘܰܡܥܰܠܰܝ ܒܰܚܢܳܢܶܗ: ܘܣܰܒܰܪ ܚܰܝ̈ܶܐ ܘܰܩܝܳܡܬܳܐ ܠܐܴܕܳܡ ܘܰܠܝܰܠܕ̈ܰܘܗܝ ܒܪܶܚܡܰܬ݀ ܐ̱ܢܳܫܽܘܬܶܗ: ܘܩܳܡ ܒܫܽܘܒܚܳܐ ܘܰܐܩܺܝܡ ܠܟܽܠܶܗ ܓܶܢܣܰܢ ܕܢܰܦܺܝܠ ܗܘܳܐ ܒܗܰܘܬܳܐ ܕܰܫܝܽܘܠ ܘܰܚܛܺܝܬܳܐ ܒܬܽܘܩܦܳܐ ܕܰܕܪܳܥܶܗ: ܘܰܡܠܰܟ ܛܽܘ̈ܒܶܐ ܘܡܰܠܟܽܘܬܳܐ ܠܟܽܠܗܽܘܢ ܥܰܡ̈ܡܶܐ ܕܗܰܝܡܶܢܘ ܒܶܗ: ܘܰܚܠܳܦ ܚܽܘܒܶܗ ܟܽܠ ܡܰܘ̈ܬܺܝܢ ܣܳܒܠܺܝܢ ܡ̣ܶܢ ܥܰܘ̈ܳܠܐܷ ܒܰܫܪܳܪܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܪܰܒܳܐ ܘܦܳܪܽܘܩܳܐ: ܗ̇ܰܘ ܕܶܐܬܢܰܚܰܬ݀ ܒܨܶܒܝܳܢܶܗ ܠܘܳܬ ܡܶܣܟܺܢܽܘܬܰܢ ܟܰܕ ܥܰܬܺܝܪܰܐ ܗ̱̇ܘ ܒܰܟܝܳܢܶܗ ܕܠܰܢ ܨܒܳܐ ܕܢܰܥܬܰܪ: ܘܛܽܘ̈ܒܶܐ ܘܒܽܘ̈ܣܳܡܶܐ ܕܡܰܠܟܽܘܬܶܗ ܠܰܢ ܢܫܰܟܶܢ ܒܪ̈ܰܚܡܰܘܗܝ: ܗ̇ܰܘ ܕܟܰܕ ܗܘܰܝܬ ܒܰܪܢܳܫܳܐ ܡ̣ܶܢ ܐܶܡܳܐ ܠܐܴ ܡܛܰܘܫܰܬ݀ ܒܰܚܒܳܠܐܴ ܘܫܽܘܓܢܳܝܳܐ: ܘܰܡܕܰܒܪܳܢܳܐܺܝܬ ܗܰܠܶܟܬ ܒܥܳܠܡܳܐ: ܐܰܟܘܳܬܰܢ ܕܠܐܴ ܥܶܕܠܳܝ: ܘܟܽܠܗܶܝܢ ܡܳܐܟ̈ܳܬܳܐ ܕܺܝܠܰܢ ܫܩܰܠܬ ܒܰܩܢܽܘܡܳܟ: ܘܗܳܠܶܝܢ ܪܳܡܬܳܐ ܕܺܝܠܳܟ ܝܰܗܒܬ ܠܦܰܓܪܳܐ ܕܺܝܠܳܟ ܗ̇ܰܘ ܕܡܶܢܰܢ ܢܣܰܒܬ: ܘܒܶܗ ܟܰܕ ܒܶܗ ܒܦܰܓܪܳܐ ܒܰܪ ܟܝܳܢܰܢ ܐܰܥܒܰܪܬ ܐܠܰܗܳܝ̈ܳܬܳܐ ܟܺܝܬ ܘܐ̱ܢܳܫܳܝ̈ܳܬܳܐ: ܒܰܚܕܳܝܽܘܬܳܐ ܠܐܴ ܡܶܬܦܰܫܩܳܢܺܝܬܳܐ ܘܠܐܴ ܡܶܬܦܰܠܓܳܢܺܝܬܳܐ: ܟܰܕ ܠܟܽܠܗܶܝܢ ܐܰܝܠܶܝܢ ܕܚܰܝܳܒ ܗܘܳܐ ܟܝܳܢܰܢ ܩܰܒܶܠܬ ܥܠܰܝܟ: ܨܰܥܪܳܐ ܘܒܶܙܚܳܐ ܘܫܺܝܛܽܘܬܳܐ: ܘܚܰܫܳܐ ܘܰܙܩܺܝܦܳܐ ܘܡܰܘܬܳܐ: ܘܰܩܒܽܘܪܬܳܐ ܘܰܩܝܳܡܬܳܐ ܬܠܺܝܬܳܝܰܬ݀ ܝܰܘ̈ܡܶܐ: ܘܰܒܝܰܕ ܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܠܙܰܒܢܳܐ ܕܥܳܩܬܳܐ ܘܰܕܟܰܪܝܽܘܬܳܐ: ܒܰܥܪܽܘܒܬܳܐ ܕܰܥܒܰܪܬ: ܠܚܰܕܽܘܬܳܐ ܘܠܐܱܪܘܳܙܳܐ ܕܠܐܴ ܡܶܬܡܰܠܰܠ ܫܰܚܠܶܦܬ: ܕܒܰܥܪܽܘܒܬܳܐ ܡ̇ܰܢ ܕܥܶܒܪܰܬ݀ ܐܰܝܟ ܐܶܡܪܳܐ ܠܢܶܟܣܬܳܐ ܐܶܬܕܒܰܪܬ: ܪܳܥܝܳܐ ܛܳܒܳܐ ܘܫܰܪܺܝܪܳܐ ܕܶܐܬܰܝܬ ܠܡܶܒܥܳܐ ܐܰܒܺܝܕܽܘܬܰܢ: ܘܒܰܥܪܽܘܒܬܳܐ ܕܶܝܢ ܕܝܰܘܡܳܢ: ܩܳܡܬ ܐܰܝܟ ܓܰܢ̱ܒܳܪܳܐ ܘܰܐܝܟ ܐܰܪܝܳܐ ܕܢܳܗܶܡ: ܘܟܰܢܶܫܬ ܠܥܳܢ̈ܳܟ ܕܰܡܒܰܕܪܳܐ ܠܰܚܕܳܐ ܐܰܘܝܽܘܬܳܐ: ܒܰܥܪܽܘܒܬܳܐ ܕܥܶܒܪܰܬ݀ ܩܳܡܬ ܒܶܝܬ ܕܺܝܢܳܐ ܐܰܝܟ ܚܰܝܳܒܳܐ: ܘܰܒܠܰܥܬ ܦܰܟܳܐ ܐܰܝܟ ܥܰܒܕܳܐ: ܘܒܰܥܪܽܘܒܬܳܐ ܕܝܰܘܡܳܢ ܩܳܡܬ ܡ̣ܶܢ ܩܰܒܪܳܐ ܒܟܶܢ̈ܫܶܐ ܕܡܰܠܐܱܟ̈ܶܐ ܐܰܝܟ ܕܰܝܳܢܳܐ: ܘܠܐܱܝܠܶܝܢ ܕܕܳܢܽܘܟ ܘܚܰܝܒܽܘܟ ܠܡܰܘܬܳܐ: ܒܕܺܝܢܳܐ ܕܟܺܐܢܽܘܬܳܐ ܒܟܽܠ ܥܰܡ̈ܡܺܝܢ ܒܰܕܰܪܬ ܒܰܥܪܽܘܒܬܳܐ ܕܥܶܒܪܰܬ݀: ܐܶܫܬܠܰܚܬ ܡ̣ܶܢ ܢܰܚ̈ܬܰܝܟ ܘܶܐܬܥܰܠܺܝܬ ܠܰܨܠܺܝܒܳܐ ܥܰܡ ܥܰܘ̈ܳܠܐܷ: ܘܒܰܥܪܽܘܒܬܳܐ ܕܝܰܘܡܳܢ: ܠܟܶܬܳܢ̈ܶܐ ܕܰܒܗܽܘܢ ܡܰܟܪܶܟ ܗܘܰܝܬ ܒܩܰܒܪܳܐ ܫܒܰܩܬ: ܘܙܺܝܘܳܐ ܘܫܽܘܒܚܳܐ ܕܠܐܴ ܡܶܬܡܰܠܰܠ ܐܶܬܥܰܛܰܦܬ: ܒܰܥܪܽܘܒܬܳܐ ܕܥܶܒܪܰܬ݀ ܨܳܠܽܘ̈ܒܶܐ ܚܰܠܐܴ ܘܰܡܪ̈ܳܪܶܐ ܐܰܘܫܶܛܘ ܠܳܟ: ܘܒܰܥܪܽܘܒܬܳܐ ܕܝܰܘܡܳܢ ܟܰܟܳܪܺܝܬܳܐ ܕܕܶܒܫܳܐ ܐܰܘܫܶܛܘ ܠܳܟ ܬܰܠܡܺܝ̈ܕܰܝܟ ܒܚܰܕܽܘܬܳܐ: ܒܰܥܪܽܘܒܬܳܐ ܕܥܶܒܪܰܬ݀: ܓܽܘܫܡܳܟ ܠܡܰܚ̈ܘܳܬܳܐ ܘܢܶܓ̈ܕܶܐ ܒܺܐܝܕܳܐ ܕܡܰܪ̈ܳܚܶܐ ܐܰܫܠܶܡܬ: ܘܒܰܥܪܽܘܒܬܳܐ ܕܝܰܘܡܳܢ ܐܺܝܕܰܝ̈ܟ ܘܪ̈ܶܓܠܰܝܟ ܕܶܐܣܬܰܟܰܟ̈ܝ ܒܨ̈ܶܨܶܐ ܒܺܐܝ̈ܕܰܝ ܪ̈ܳܚܡܰܝܟ ܣܳܡܬ ܠܡܶܒܨܳܐ ܒܰܪܘܳܙܳܐ: ܒܰܥܪܽܘܒܬܳܐ ܕܥܶܒܪܰܬ݀ ܕܰܦܢܳܟ ܒܠܽܘܟܳܝܬܳܐ ܐܶܬܬܰܪܥܰܬ݀ ܘܡܶܢܳܗ̇ ܕܡܳܐ ܘܡܰܝ̈ܳܐ ܪܕܰܘ ܒܬܶܕܡܽܘܪܬܳܐ: ܘܒܰܥܪܽܘܒܬܳܐ ܕܝܰܘܡܳܢ ܣܶܛܪܳܟ ܗ̇ܰܘ ܕܶܐܬܬܰܪܰܥ ܒܠܽܘܟܳܝܬܳܐ: ܐܰܫܶܐܠܬ ܠܬܳܐܘܡܰܐ ܬܰܠܡܺܝܕܳܟ: ܕܰܒܨܶܒܥܶܗ ܢܓܽܘܫܺܝܘܗܝ: ܘܰܢܗܰܝܡܶܢ ܕܰܐܢ̱ܬ ܐܺܝܬܰܝܟ ܗ̇ܰܘ ܕܚܰܫܬ ܘܶܐܬܩܒܰܪܬ ܘܩܳܡܬ ܫܰܪܺܝܪܳܐܺܝܬ ܐܰܝܟ ܐܠܰܗܳܐ: ܒܰܥܪܽܘܒܬܳܐ ܗ̇ܳܝ ܕܥܶܒܪܰܬ݀ ܚܶܫܽܘܟܳܐ ܐܰܡܠܶܟ ܥܰܠ ܬܺܒܶܝܠ ܬܠܳܬ ܫܳܥܺܝ̈ܢ: ܒܰܥܪܽܘܒܬܳܐ ܕܶܝܢ ܕܝܰܘܡܳܢ: ܢܽܘܗܪܳܐ ܫܰܪܺܝܪܳܐ ܐܰܡܠܶܟ ܥܰܠ ܬܺܒܶܝܠ ܕܠܐܴ ܥܳܪܶܒ: ܒܰܥܪܽܘܒܬܳܐ ܗ̇ܳܝ ܕܥܶܒܪܰܬ݀ ܟܰܪܝܽܘܬܳܐ ܘܥܳܩܬܳܐ ܨܶܦܚܰܬ݀ ܠܬܰܠܡܺܝ̈ܕܶܐ ܒܡܰܘܬܳܟ ܘܰܠܨܳܠܽܘ̈ܒܶܐ ܚܰܕܽܘܬܳܐ: ܒܰܥܪܽܘܒܬܳܐ ܕܶܝܢ ܕܝܰܘܡܳܢ: ܐܶܬܟܰܪܟܰܬ݀ ܓܺܝܓܠܐܴ ܒܰܩܝܳܡܬܳܟ ܘܰܠܬܰܠܡܺܝ̈ܕܶܐ ܡܠܳܬ݀ ܚܰܕܽܘܬܳܐ ܘܒܽܘܝܳܐܳܐ: ܠܨܳܠܽܘ̈ܒܶܐ ܒܶܗܬܬܳܐ ܘܰܟܡܺܝܪܽܘܬܳܐ: ܒܰܥܪܽܘܒܬܳܐ ܗ̇ܳܝ ܕܥܶܒܪܰܬ݀ ܡ̣ܶܢ ܩܳܠܐܴ ܕܰܩܥܰܝܬ ܥܰܠ ܩܰܝܣܳܐ ܫܽܘ̈ܥܶܐ ܐܶܨܛܰܪܺܝܘ: ܘܩܰܒܪ̈ܶܐ ܐܶܬܦܰܬܰܚܘ: ܘܦܰܓܪ̈ܶܐ ܣܰܓܺܝ̈ܶܐܐ ܕܩܰܕܺܝ̈ܫܶܐ ܩܳܡܘ: ܒܰܥܪܽܘܒܬܳܐ ܕܶܝܢ ܕܝܰܘܡܳܢ. ܠܐܱܝܠܶܝܢ ܕܰܐܩܺܝܡܬ ܒܚܰܫܳܟ ܘܰܠܗܳܠܶܝܢ ܕܰܐܦܶܩܬ ܡ̣ܶܢ ܫܝܽܘܠ ܥܰܡܳܟ ܠܰܡܕܺܝܢܰܬ݀ ܩܽܘ̈ܕܳܫܶܐ ܐܰܥܶܠܬ ܘܰܣܒܰܪܬܳܟ ܐܰܟܪܶܙܘ ܐܰܘܟܺܝܬ ܩܝܳܡܬܳܟ: ܘܬܽܘܒ ܠܦܰܪܕܰܝܣܳܐ ܐܰܦܢܺܝܬ: ܒܰܥܪܽܘܒܬܳܐ ܗ̇ܳܝ ܕܥܶܒܪܰܬ݀ ܣܳܗ̈ܕܶܐ ܘܡܰܘ̈ܕܝܳܢܶܐ ܥܰܠ ܓܳܓܽܘܠܬܳܐ ܚܙܰܐܘܽܘܟ ܒܰܝܢܳܬ ܓܰܝ̈ܳܣܶܐ: ܟܰܕ ܬܠܰܝܬ ܥܰܪܛܶܠܐܴܝܬ: ܘܗ̣ܶܢܽܘܢ ܒܚܽܘܒܳܟ ܐܶܬܓܰܘܙܰܠܘ ܘܰܒܪܶܚܡܬܳܟ ܒܠܰܥܘ: ܘܰܚܠܳܦܰܝܟ ܣܰܝܒܰܪܘ ܟܽܠ ܐܽܘܠܨܳܢܺܝ̈ܢ ܘܫܶܢ̈ܕܺܝܢ ܚܘܺܝܚܳܐܺܝܬ: ܟܰܕ ܐܰܣܠܺܝܘ ܘܫܳܛܘ ܠܥܳܠܡܳܐ ܘܰܠܟܽܠ ܡܳܐ ܕܺܐܝܬ ܒܶܗ: ܘܰܟܦܰܪܘ ܒܚܰܝ̈ܶܐ ܙܰܒܢܳܝ̈ܶܐ: ܘܰܒܓܶܢܣܳܐ ܘܛܽܘܗܡܳܐ ܘܠܳܟ ܢܩܶܦܘ ܒܡܰܘܬܳܐ: ܒܰܥܪܽܘܒܬܳܐ ܕܶܝܢ ܗܳܕܶܐ: ܚܢܰܢ ܡܗܰܝ̈ܡܢܶܐ ܡܰܘܕ̈ܝܰܝ ܒܰܫܡܳܟ: ܘܰܦܪ̈ܺܝܩܰܝ ܒܰܕܡܳܟ. ܘܰܪ̈ܫܺܝܡܰܝ ܒܰܨܠܺܝܒܳܟ ܝܰܩܺܝܪܳܐ: ܥܽܘܗܕܳܢܳܐ ܕܗܳܠܶܝܢ ܥܰܡ ܟܽܠܗܽܘܢ ܩܰܕܺܝ̈ܫܶܐ: ܕܡ̣ܶܢ ܥܳܠܰܡ ܫܦܰܪܘ ܠܳܟ ܥܳܒܕܺܝܢܰܢ: ܘܰܠܚܰܫܰܝ̈ܗܽܘܢ ܥܰܡ ܥܽܘܗܕܳܢܳܐ ܕܚܰܫܰܝ̈ܟ ܣܓܺܝ̈ܕܶܐ ܡܫܰܡܠܶܝܢܰܢ ܘܰܠܕܽܘܟܪܳܢܗܽܘܢ ܥܰܡ ܕܽܘܟܪܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܡܙܰܝܚܺܝܢܰܢ: ܐܰܝܟܰܢܳܐ ܕܢܶܫܬܘܶܐ ܥܰܡܗܽܘܢ ܠܰܟܠܺܝ̈ܠܐܷ ܡܰܠܝ̈ܰܝ ܙܳܟܽܘܬܳܐ ܕܰܢܛܺܝܪܺܝܢ ܠܗܽܘܢ: ܟܰܕ ܠܽܘܩܒܰܠ ܟܽܠ ܚܰܫܳܐ ܩܳܛܽܘܠܐܴ ܐܰܓܽܘܢܳܐ ܥܳܒܕܺܝܢܰܢ: ܘܙܳܟܽܘܬܳܐ ܥܠܰܝܗܽܘܢ ܡܶܢܳܟ ܘܒܳܟ ܢܳܣܒܺܝܢܰܢ: ܡܰܘܕܝ̈ܳܢܶܐ ܢܶܬܚܙܶܐ ܕܶܝܢ ܩܕܳܡܰܝܟ. ܘܰܐܬܠܺܝ̈ܛܶܐ ܦܰܐܝ̈ܰܝ ܢܶܨܚ̈ܳܢܶܐ: ܘܰܕܫܳܘܶܝܢ ܠܡܰܠܟܽܘܬܳܐ ܕܰܫܡܰܝܳܐ: ܘܥܰܡܗܽܘܢ ܕܡܰܘܕ̈ܝܳܢܶܐ ܢܶܫܡܰܥ ܡܶܢܳܟ ܒܰܪܬ ܩܳܠܐܴ ܗ̇ܳܝ ܕܰܩܕܳܡ ܐܰܒܽܘܟ ܘܡܰܠܐܱܟܰܝ̈ܟ ܩܰܕܺܝ̈ܫܶܐ ܡܰܘܕܶܐ ܐܰܢ̱ܬ ܒܰܢ: ܘܰܠܡܰܥܠܬܳܐ ܕܠܰܓܢܽܘܢܳܟ ܐܰܫܘܳܐ ܠܰܢ: ܘܬܰܡܳܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܛܪܐ

ܟܽܠ ܬܰܘܕܺܝܬܳܐ ܘܫܽܘܒܚܳܐ ܠܐܴ ܡܶܬܦܰܣܩܳܢܳܐ ܢܰܣܶܩ ܠܳܟ ܡܳܪܝ ܒܝܰܘܡܳܐ ܗܳܢܳܐ ܕܰܥܪܽܘܒܬܳܐ: ܕܒܶܗ ܥܶܪܒܰܬ݀ ܫܶܡܫܶܗ ܕܥܰܡܳܐ ܛܳܠܽܘܡܳܐ: ܕܰܚܠܳܦ ܛܳܒ̈ܳܬܳܐ ܦܰܪܥܳܟ ܒܺܝ̈ܫܳܬܳܐ: ܘܒܶܗ ܥܒܰܕܬ ܦܽܘܪܩܳܢܳܐ ܠܥܺܕܬܳܟ܀

ܚܘܬܡܐ

ܬܶܫܒܽܘܚܬܳܐ ܘܥܶܛܪܳܐ ܗܰܢܺܝܳܐܐ ܢܶܬܩܰܪܰܒ ܠܡܳܪܽܘܬܳܟ ܒܥܶܕܳܢܳܐ ܗܳܢܳܐ ܕܥܽܘܗܕܳܢܳܐ ܕܝܳܠܶܕܬܳܟ ܡܒܰܪܰܟܬܳܐ ܘܛܽܘܒܳܢܺܝܬܳܐ ܡܰܪܝܰܡ: ܘܕܰܢܒܺܝ̈ܶܐ ܘܕܰܫܠܺܝ̈ܚܶܐ ܘܰܕܣܳܗ̈ܕܶܐ: ܘܰܕܡܰܘܕܝ̈ܳܢܶܐ ܘܰܕܟܳܗ̈ܢܶܐ: ܘܰܕܙܰܕܺܝ̈ܩܶܐ ܡܶܫܬܰܡܰܫ: ܩܰܒܶܠ ܐܶܢܽܘܢ ܡܶܢܰܢ ܚܰܛܳܝ̈ܶܐ ܥܰܒܕܰܝ̈ܟ: ܘܢܶܗܘܽܘܢ ܠܰܢܝܳܚܳܐ ܕܪ̈ܰܚܡܰܝܟ: ܘܰܠܚܽܘܣܳܝܳܐ ܕܚܰܘ̈ܒܰܝܢ ܘܰܠܬܰܪܥܽܘܬܳܐ ܕܡܳܪܽܘܬܳܟ: ܘܰܠܫܽܘܒܩܳܢܳܐ ܕܰܚܛܳܗܰܝ̈ܢ: ܘܰܠܕܽܘܟܪܳܢܳܐ ܕܟܽܠܗܽܘܢ ܗ̇ܳܢܽܘܢ ܕܒܳܟ ܫܟܶܒܘ: ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܰܐܫܘܳܐ ܠܰܢ ܘܰܠܗܽܘܢ ܠܐܱܘܳ̈ܢܶܐ ܒܪ̈ܺܝܟܶܐ ܕܕܳܚܠܰܝ̈ܟ ܘܰܡܪ̈ܰܥܝܳܢܰܝܟ: ܕܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ ܠܗ̇ܰܘ ܕܒܰܡܨܰܥܬܳܗ̇ ܕܰܐܪܥܳܐ ܥܒܰܕ ܦܽܘܪܩܳܢܳܐ ܠܓܶܢܣܳܐ ܕܰܒܢܰܝ̈ܢܳܫܳܐ ܠܗ̇ܰܘ ܕܩܰܕܶܡ ܠܓܽܘܕܳܐ ܕܬܰܠܡܺܝܕܽܘܬܳܐ: ܥܰܠ ܙܩܺܝܦܽܘܬܶܗ ܘܡܰܘܬܶܗ ܘܰܩܝܳܡܬܶܗ ܕܠܰܬܠܳܬܳܐ ܝܰܘ̈ܡܺܝܢ: ܠܗ̇ܰܘ ܕܰܐܪܡܺܝ ܪܗܳܒܬܳܐ ܒܶܝܬ ܡܺܝ̈ܬܶܐ: ܘܓܰܪ̈ܡܶܐ ܝܰܒܺܝ̈ܫܶܐ ܩܢܰܘ ܚܽܘܕܳܬܳܐ: ܠܗ̇ܰܘ ܕܰܐܙܥܶܩ ܒܡܰܘܬܳܐ ܘܙܳܥ: ܘܰܪ̈ܫܶܠܝ ܐܺܝ̈ܕܰܘܗܝ: ܘܒܽܘܪ̈ܟܰܘܗܝ ܪ̈ܥܶܠܝ: ܘܦܰܓܪ̈ܶܐ ܣܰܓܺܝ̈ܶܐܐ ܕܩܰܕܺܝ̈ܫܶܐ ܩܳܡܘ ܘܥܰܠܘ ܠܐܘܪܫܠܶܡ: ܘܚܰܘܺܝܘ ܢܰܦܫܗܽܘܢ ܠܣܰܓܺܝ̈ܶܐܐ: ܘܒܰܕܶܩܘ ܐ̱ܪܳܙܳܐ ܕܰܩܝܳܡܬܳܐ ܕܰܥܬܺܝܕܳܐ ܕܬܶܗܘܶܐ ܠܟܽܠܗܽܘܢ ܒܰܫܡܶܗ: ܕܠܶܗ ܘܰܚܢܰܢ ܢܩܰܪܶܒ ܫܽܘܒܚܳܐ ܕܙܳܕܶܩ ܠܶܗ: ܘܬܰܘܕܺܝܬܳܐ ܕܝܳܐܝܳܐ ܠܶܗ: ܒܥܽܘܗܕܳܢܳܐ ܕܚܰܫܶܗ ܘܕܰܩܝܳܡܬܶܗ: ܘܰܒܕܽܘܟܪܳܢܳܐ ܕܶܐܡܳܐ ܕܺܝܠܶܕܬܶܗ: ܘܕܰܢܒܺܝ̈ܶܐ: ܘܕܰܫܠܺܝ̈ܚܶܐ: ܘܰܕܣܳܗ̈ܕܶܐ ܘܰܕܡܰܘ̈ܕܝܳܢܶܐ ܩܛܺܝ̈ܠܰܝ ܥܰܠ ܣܰܒܪܶܗ: ܘܰܕܩܰܕܺܝ̈ܫܶܐ ܡܢܺܝ̈ܚܳܢܶܐ ܕܺܝܠܶܗ: ܘܰܕܥܰܢܺܝ̈ܕܶܐ ܡܗܰܝܡ̈ܢܶܐ ܡܣܰܟ̈ܝܰܝ ܠܡܶܐܬܺܝܬܶܗ ܘܰܠܝܰܘܡܳܐ ܕܓܶܠܝܳܢܶܗ: ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡ ܪܰܒܽܘܬܶܗ: ܘܰܢܚܰܣܶܐ ܚܰܘ̈ܒܶܐ ܕܺܝܠܰܢ ܘܕܺܝܠܗܽܘܢ ܒܣܰܓܺܝܐܘܽܬ ܚܢܳܢܶܗ: ܘܠܰܢ ܘܰܠܗܽܘܢ ܢܰܫܘܶܐ ܠܩܰܘܡܳܐ ܕܡ̣ܶܢ ܝܰܡܺܝܢܶܗ: ܥܰܡ ܟܽܠܗܽܘܢ ܓܳܡܪ̈ܰܝ ܨܶܒܝܳܢܶܗ: ܕܢܰܘܕܶܐ ܠܶܗ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܒܗܳܢܳܐ ܥܶܕܳܢܳܐ܀

ܣܕܪܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ: ܡܫܺܝܚܳܐ ܐܠܰܗܳܐ ܕܺܝܠܰܢ ܚܶܟܡܬܳܐ ܟܝܳܢܳܝܬܳܐ ܘܚܰܝܠܐܴ ܬܰܩܺܝܦܳܐ ܕܰܐܒܳܐ ܝܳܠܽܘܕܳܐ: ܨܶܡܚܳܐ ܫܒܺܝܚܳܐ ܘܢܽܘܗܪܳܐ ܒܪܳܐ ܐܺܝܬܽܘܬܶܗ ܡܥܰܠܝܳܐ ܘܠܐܴ ܡܶܬܕܰܪܟܳܢܳܐ ܘܠܐܴ ܡܶܬܩܰܪܒܳܢܳܐ. ܥܰܡ ܪܽܘܚܳܐ ܩܰܕܺܝܫܳܐ ܒܫܽܘܒܚܳܐ ܕܪܰܒܽܘܬܶܗ: ܗ̇ܰܘ ܕܒܶܗ ܘܒܰܐܒܽܘܗܝ ܘܰܒܪܽܘܚܶܗ ܩܰܕܺܝܫܳܐ ܐܶܬܬܰܚ̈ܬܺܝ ܟܽܠܗܶܝܢ ܒܶܪ̈ܝܳܬܳܐ: ܓܫܺܝ̈ܡܳܬܳܐ ܘܠܐܴ ܓܫܺܝ̈ܡܳܬܳܐ ܠܰܗܘܳܝܳܐ: ܘܒܶܠܥܳܕܰܘ̈ܗܝ ܐܳܦܠܐ ܚܕܳܐ ܗܘܳܬ݀: ܗ̇ܰܘ ܕܰܒܨܶܒܝܳܢܶܗ ܬܠܺܝܬܳܝܳܐ ܘܰܠܚܽܘܕܳܝܳܐ: ܡܶܛܽܠ ܨܰܠܡܳܐ ܩܰܕܡܳܝܳܐ ܕܰܐܫܚܶܬ ܒܰܚܛܺܝܬܳܐ ܒܥܶܠܬܳܐ ܕܰܥܒܳܪ ܦܽܘܩܕܳܢܳܐ ܘܡܶܐܟܽܘܠܬܳܐ ܕܦܺܐܪܳܐ ܡܶܬܝܰܕܥܳܢܳܐ ܘܰܛܪܽܘܕܝܳܐ ܕܡ̣ܶܢ ܛܰܝܪܳܐ ܦܰܪܕܰܝܣܳܝܳܐ ܘܰܕܚܽܘܩܝܳܐ ܢܽܘܓܪܳܝܳܐ ܘܰܐܟܣܽܘܪܺܝܣܬܺܝܢܳܝܳܐ: ܫܪܳܐ ܒܡܰܪܝܰܡ ܒܢܳܨܪܰܬ݀: ܘܶܐܬܺܝܠܶܕ ܒܒܶܝܬܠܚܶܡ: ܘܰܐܬܪܰܒܺܝ ܒܰܓܠܺܝܠܐܴ: ܘܰܥܪܰܩ ܠܡܶܨܪܶܝܢ ܘܰܥܡܰܪ ܒܝܽܘܪܕܢܳܢ: ܘܨܳܡ ܒܡܰܕܒܪܳܐ: ܘܰܠܥܰܣ ܒܥܶܠܺܝܬܳܐ ܦܶܨܚܳܐ: ܘܶܐܙܕܰܒܰܢ ܡ̣ܶܢ ܝܺܗܽܘܕܳܐ ܣܟܰܪܝܽܘܛܳܐ ܘܶܐܫܬܠܶܡ ܠܕܰܝܳܢܳܐ ܘܶܐܬܢܰܓܰܕ ܒܰܦܪ̈ܳܓܶܠܐܷ ܘܶܐܬܓܕܶܠ ܠܶܗ ܟܠܺܝܠܐܴ ܕܟܽܘ̈ܒܶܐ ܘܩܰܒܶܠ ܚܰܫ̈ܶܐ ܘܰܨܠܺܝܒܳܐ: ܘܡܶܬܬܙܺܝܥܳܢܽܘܬܳܐ ܕܶܐܣܛܽܘ̈ܟܣܶܐ ܚܰܘܺܝ ܒܰܟܝܳܢܶܗ ܕܠܐܴ ܒܰܥܝܳܕ: ܒܰܥܪܽܘܒܬܳܐ ܚܰܫ ܦܳܪܽܘܩܰܢ ܚܠܳܦ ܐܳܕܳܡ ܗ̇ܰܘ ܕܒܰܥܪܽܘܒܬܳܐ ܒܓܰܢܬܳܐ ܡܶܢܩܕܺܝܡ ܐܶܬܓܒܶܠ: ܒܰܥܪܽܘܒܬܳܐ ܐܶܬܕܩܰܪ ܣܶܛܪܶܗ ܒܠܽܘܟܳܝܬܳܐ ܘܡܶܢܶܗ ܢܒܰܥܘ ܚܰܝ̈ܶܐ ܠܗ̇ܰܘ ܕܰܡܡܰܚܰܝ ܗܘܳܐ ܒܚܰܫ̈ܶܐ: ܘܕܺܝܡܳܘܣ ܕܢܰܦܫܳܐ ܘܰܕܦܰܓܪܳܐ: ܒܰܥܪܽܘܒܬܳܐ ܕܶܝܢ ܐܶܬܟܰܣܺܝ ܒܢܰܚ̈ܬܶܐ ܕܒܶܙܚܳܐ ܘܰܕܡܽܘܝܳܩܳܐ ܕܰܢܪܺܝܡ ܦܽܘܪܣܳܝܶܗ ܕܗ̇ܰܘ ܕܶܐܬܟܰܣܺܝ ܛܰܪ̈ܦܶܐ ܕܬܺܐܢ̈ܶܐ ܥܰܠ ܥܰܪܛܶܠܳܝܽܘܬܶܗ: ܒܰܥܪܽܘܒܬܳܐ ܐܶܬܢܰܚܰܬ ܠܒܶܝܬ ܡܺܝ̈ܬܶܐ ܠܐܱܬܪܳܐ ܕܢܽܘܟܪܳܝ ܠܰܟܝܳܢܶܗ: ܕܰܠܗ̇ܰܘ ܕܶܐܬܛܪܶܕ ܠܐܱܪܥܳܐ ܢܽܘܟܪܳܝܬܳܐ ܕܡܰܠܝܳܐ ܟܽܘ̈ܒܶܐ ܘܕܰܪܕܪ̈ܶܐ ܢܰܦܢܶܐ ܠܝܳܪܬܽܘܬܶܗ ܕܡ̣ܶܢ ܩܕܺܝܡ: ܒܰܥܪܽܘܒܬܳܐ ܫܶܐܠ ܓܰܝܳܣܳܐ ܒܰܙܩܺܝܦܳܐ ܡܶܬܕܰܟܪܳܢܽܘܬܳܐ ܒܡܶܐܬܺܝܬܳܐ ܬܪܰܝܳܢܺܝܬܳܐ: ܘܶܐܬܦܬܰܚ ܠܶܗ ܥܰܡ ܡܶܠܬܶܗ ܦܰܪܕܰܝܣܳܐ ܥܕܶܢܳܝܳܐ ܗ̇ܰܘ ܕܶܐܬܬܚܶܕ ܗܘܳܐ ܡ̣ܶܢ ܩܕܺܝܡ ܩܕܳܡ ܐܳܕܳܡ ܘܚܰܘܳܐ: ܒܰܥܪܽܘܒܬܳܐ ܢܚܶܬ ܡܳܪܰܢ ܠܒܶܝܬ ܡܺܝ̈ܬܶܐ: ܘܣܳܩܘ ܪܺܝܚܶܗ ܓܰܪ̈ܡܶܐ ܝܰܒܺܝ̈ܫܶܐ: ܘܰܪܦܳܬܘ ܘܶܐܬܬܙܺܝܥܘ ܠܣܶܓܕܬܶܗ: ܣܓܶܕܘ ܠܶܗ ܐܳܕܳܡ ܩܰܕܡܳܝܳܐ ܪܺܝܫ ܛܽܘ̈ܗܡܶܐ: ܕܰܒܨܰܠܡܶܗ ܐܶܬܓܒܶܠ: ܘܗܳܒܶܝܠ ܕܰܟܝܳܐ ܕܕܶܒܚܶܗ ܨܳܪ: ܘܫܺܝܬ ܘܰܐܢܽܘܫ ܘܡܰܬܽܘܫܠܰܚ ܥܰܡ ܢܽܘܚ ܚܠܳܦܬܳܐ ܕܥܳܠܡܳܐ ܘܫܺܝܡ: ܘܝܰܦܬ. ܣܓܶܕ ܠܶܗ ܡܰܠܟܺܝܙܕܶܩ ܟܽܘܡܪܳܐ ܪܰܒܳܐ ܕܚܰܘܺܝ ܐ̱ܪܳܙ ܦܰܓܪܶܗ ܘܰܕܡܶܗ ܒܠܰܚܡܳܐ ܘܚܰܡܪܳܐ ܕܩܰܪܶܒ: ܘܰܐܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܘܺܐܝܽܘܒ ܘܝܰܘܣܶܦ. ܣܓܶܕ ܠܶܗ ܡܽܘܫܶܐ ܪܺܝܫܳܐ ܕܰܢܒܺܝܽܘܬܳܐ: ܘܰܐܗܪܽܘܢ ܟܳܗܢܳܐ ܘܶܐܠܺܝܥܳܙܳܪ ܘܦܺܝܢܚܶܣ: ܘܝܶܫܽܘܥ ܒܰܪܢܽܘܢ ܒܥܶܠܫܡܶܗ. ܘܚܽܘܪ ܘܟܳܠܶܒ ܒܰܪ ܝܽܘܦܰܢܳܐ: ܣܓܶܕ ܠܶܗ ܫܡܽܘܐܶܝܠ ܢܕܺܝܪܳܐ: ܘܢܳܬܳܢ ܘܕܰܘܺܝܕ ܘܶܐܠܺܝܳܐ ܘܶܐܠܺܝܫܳܥ ܘܶܐܫܰܥܝܳܐ ܘܶܐܪܰܡܝܳܐ: ܘܚܰܙܩܺܝܶܐܝܠ ܘܕܳܢܺܝܶܐܝܠ: ܣܓܶܕܘ ܠܶܗ ܗܽܘܫܳܥ ܘܝܽܘܐܶܝܠ ܘܥܰܡܽܘܣ ܘܥܽܘܒܰܕܝܳܐ ܘܝܰܘܢܳܢ ܘܰܙܟܰܪܝܳܐ ܘܡܰܠܐܱܟܺܝ ܘܚܰܓܺܝ ܘܡܺܝܟܳܐ ܘܢܰܚܽܘܡ ܘܚܰܒܩܽܘܩ ܘܰܨܦܰܢܝܳܐ: ܣܓܶܕܘ ܠܶܗ ܡܰܠܟ̈ܶܐ ܘܟܳܗ̈ܢܶܐ ܘܰܢܒܺܝ̈ܶܐ: ܘܟܺܐܢ̈ܶܐ ܘܙܰܕܺܝ̈ܩܶܐ ܘܳܐܦ ܒܝܰܘܡܳܐ ܗܳܢܳܐ ܕܰܥܪܽܘܒܬܳܐ ܒܬܰܪܬܶܝܢ ܥܽܘܗܕܳܢܳܐ ܥܳܒܕܳܐ ܥܺܕܬܳܐ ܘܰܡܫܰܡܠܝܳܐ ܘܡܰܠܽܘܬܳܐ: ܕܽܘܟܪܳܢܳܐ ܕܟܽܠܗܽܘܢ ܐܰܝܠܶܝܢ ܕܰܐܘܕܺܝܘ ܒܰܙܩܺܝܦܽܘܬܳܐ: ܐܰܒܳܗ̈ܳܬܳܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ ܘܰܕܪ̈ܶܒܘܳܬܳܐ ܕܣܳܗ̈ܕܶܐ ܩܰܕܺܝ̈ܫܶܐ ܘܰܕܡܰܘܕ̈ܝܳܢܶܐ ܕܰܚܠܳܦ ܗܰܝܡܳܢܽܘܬܳܐ ܕܒܳܟ ܐܶܬܩܛܶܠܘ: ܘܕܰܐܝܠܶܝܢ ܕܟܽܠ ܙܢܳܐ ܘܫܶܢ̈ܕܶܐ ܘܽܐܘܠܨ̈ܳܢܶܐ ܘܰܪ̈ܓܽܘܡܝܶܐ ܘܝܰܩܕ̈ܳܢܶܐ ܩܰܒܶܠܘ ܚܠܳܦܰܝܟ: ܘܰܡܚܰܘܝܳܐ ܠܳܟ ܚܰܫܰܝ̈ܗܽܘܢ ܘܡܰܥܗܕܳܐ ܕܺܝܰܬܺܝܩܺܝ ܕܒܰܕܡܳܟ ܐܶܬܟܰܬܒܰܬ݀: ܘܰܡܩܰܪܒܳܐ ܠܳܟ ܥܰܡܗܽܘܢ ܡܦܺܝ̈ܣܳܢܶܐ ܘܰܡܪ̈ܰܥܝܳܢܶܐ ܕܺܝܠܳܟ: ܘܡܶܬܚܰܢܢܳܐ ܚܠܳܦ ܩܽܘܝܳܡܳܐ ܕܝܰܠܕܶܝ̈ܗ̇ ܘܢܽܘܛܳܪܳܐ ܕܰܒܢܶܝ̈ܗ̇: ܫܠܺܝ̈ܚܶܐ ܩܰܕܺܝ̈ܫܶܐ ܚܰܙܳܝ̈ܶܐ ܕܐ̱ܪ̈ܳܙܰܝܟ ܘܡܰܟܪ̈ܙܳܢܶܐ ܕܰܣܒܰܪܬܳܟ: ܩܰܕܡܳܐܺܝܬ ܦܶܛܪܽܘܣ ܪܺܝܫܳܐ ܕܣܺܝܣܰܪܬܳܐ ܫܠܺܝܚܳܝܬܳܐ: ܘܫܶܬܶܐܣܬܳܐ ܕܗܰܝܡܳܢܽܘܬܳܐ ܘܰܐܚܺܝܕ ܩܠܺܝ̈ܕܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܘܦܰܘܠܳܘܣ ܡܳܐܢܳܐ ܓܰܒܝܳܐ ܕܟܳܪ̈ܽܘܙܶܐ ܘܰܡܣܰܒܪ̈ܳܢܶܐ ܘܟܽܠܗܽܘܢ ܩܰܕܺܝ̈ܫܶܐ: ܝܰܬܺܝܪܳܐܺܝܬ ܕܶܝܢ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܒܬܽܘܠܬܳܐ ܡܒܰܪܰܟܬܳܐ ܡܰܠܝܰܬ݀ ܛܰܝܒܽܘܬܳܐ: ܘܰܡܥܰܠܝܰܬ݀ ܡ̣ܶܢ ܢܶܫ̈ܶܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܘܝܽܘܚܰܢܳܢ ܡܰܥܡܽܘܕܺܝܬܳܐ ܘܶܣܛܶܦܰܢܳܘܣ ܡܫܰܡܫܳܢܳܐ: ܘܥܶܛܪܳܐ ܕܒܶܣ̈ܡܶܐ ܘܰܡܩܰܪܒܳܐ ܠܳܟ: ܐܰܝܟܰܢܳܐ ܕܬܶܬܚܰܢܰܢ ܒܪ̈ܰܚܡܶܐ ܫܦܺܝ̈ܥܶܐ ܕܺܝܠܳܟ: ܥܰܠ ܟܽܠܗܽܘܢ ܝܰܠܕܶܝ̈ܗ̇: ܘܬܶܪܕܽܘܦ ܡܶܢܳܗ̇ ܩܪ̈ܳܒܶܐ ܕܰܒܥܶܠܕ̈ܒܳܒܶܐ ܕܟܰܡܺܝܢܺܝܢ ܠܳܗ̇ ܘܰܬܪܰܚܶܦ ܒܚܽܘܒܳܐ ܕܚܰܕܽܘܬܳܐ ܕܺܝܠܳܟ ܥܰܠ ܟܽܠܗܽܘܢ ܝܰܠܕܶܝ̈ܗ̇: ܢܰܛܰܪܶܝܗ̇ ܡ̣ܶܢ ܪ̈ܰܘܒܶܐ ܡܰܕܚ̈ܠܳܢܶܐ ܕܳܐܟܶܠܩܰܪܨܳܐ: ܣܰܬܰܪܶܝܗ̇ ܡ̣ܶܢ ܟܽܠ ܙܢܳܐ ܕܽܐܘܠܨܳܢ̈ܶܐ ܡܥܺܝ̈ܩܳܢܶܐ ܕܫܺܐܕ̈ܶܐ: ܫܰܘܙܶܒܶܝܗ̇ ܡ̣ܶܢ ܢܶܟ̈ܠܐܷ ܡܰܟܝ̈ܳܢܶܐ ܕܚܰܣ̈ܳܡܶܐ: ܦܰܨܳܗ̇ ܡ̣ܶܢ ܥܫܽܘܩܝܳܐ ܕܣܳܢ̈ܶܐܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ: ܣܰܝܰܥܶܝܗ̇ ܒܝܰܡܺܝܢܳܟ ܥܳܒܕܰܬ݀ ܥܳܠܡ̈ܶܐ: ܦܪܽܘܩܶܝܗ̇ ܡ̣ܶܢ ܫܶܚܪ̈ܶܐ ܠܙܺܝ̈ܙܶܐ ܕܥܰܢ̈ܳܬܶܐ: ܨܰܒܰܬܶܝܗ̇ ܒܫܰܝܢܳܐ ܕܡܶܢܳܟ: ܗܰܕܰܪܶܝܗ̇ ܒܰܫܠܳܡܳܐ ܕܡ̣ܶܢ ܠܘܳܬܳܟ: ܗܘܺܝ ܠܳܗ̇ ܫܽܘܪܳܐ ܥܰܫܺܝܢܳܐ ܕܦܽܘܪܩܳܢܳܐ: ܐܰܦܬܳܐ ܬܚܽܘ̈ܡܶܝܗ̇: ܪܰܘܰܚ ܣܳܚܪ̈ܳܬܳܗ̇: ܚܰܣܳܐ ܚܛܳܗܶܝ̈ܗ̇: ܫܒܽܘܩ ܚܰܘ̈ܒܶܝܗ̇: ܠܚܺܝ ܒܽܘܨܳܪ̈ܶܝܗ̇ ܥܛܺܝ ܣܰܟܠܘ̈ܳܬܳܗ̇: ܕܰܠܳܗ̇ ܒܰܕܪܳܥܳܟ ܬܰܩܺܝܦܳܐ ܡ̣ܶܢ ܓܽܘܡܳܨܳܐ ܕܰܐܒܕܳܢܳܐ: ܘܰܫܠܺܝܗ̇ ܒܣܽܘܝܳܥܳܐ ܕܝܰܡܺܝܢܳܟ ܡ̣ܶܢ ܓܽܘܡܬܳܐ ܕܰܣܝܳܢܳܐ: ܘܠܐܴ ܬܪܰܦܶܐ ܒܳܗ̇ ܐܺܝܕܳܐ ܕܰܡܪܰܚܡܳܢܽܘܬܳܟ: ܘܠܐܴ ܬܶܫܒܽܘܩܶܝܗ̇ ܕܬܶܗܘܶܐ ܠܚܶܣܕܳܐ ܘܰܠܡܽܘܝܳܩܳܐ: ܘܠܐܴ ܢܶܬܓܰܙ̈ܝܳܢ ܓܽܘܕܶܝ̈ܗ̇ ܡ̣ܶܢ ܬܶܫܒ̈ܚܳܬܳܟ: ܠܐܴ ܢܶܨ̈ܕܝܳܢ ܕܳܪ̈ܳܬܳܗ̇ ܡ̣ܶܢ ܫܽܘܒܚܳܟ: ܠܐܴ ܢܶܒܛܠܽܘܢ ܗܰܝܟ̈ܠܶܝܗ̇ ܡ̣ܶܢ ܗܽܘܠܳܠܰܝ̈ܟ: ܠܐܴ ܢܶܫܬܰܬܩܽܘܢ ܟܳܗ̈ܢܶܝܗ̇ ܡ̣ܶܢ ܪܽܘܡܪܳܡܳܟ: ܠܐܴ ܢܶܬܟܠܐܷ ܡܰܕܒܚܳܗ̇ ܡ̣ܶܢ ܕܶܒܚܰܝ̈ܟ: ܠܐܴ ܢܶܚܣܰܪ ܦܳܬܽܘܪܳܗ̇ ܡ̣ܶܢ ܩܽܘܪ̈ܒܳܢܰܝܟ: ܠܐܴ ܢܪܺܝܡܽܘܢ ܩܳܠܰܝ̈ܗܽܘܢ ܣܳܢ̈ܝܰܝ ܠܰܫܪܳܪܳܟ: ܠܐܴ ܢܢܺܝܕܽܘܢ ܪ̈ܺܝܫܰܝܗܽܘܢ ܒܥܶܠܕ̈ܒܳܒܶܐ ܕܬܰܘܕܺܝܬܳܟ: ܠܐܴ ܢܶܦܛܪܽܘܢ ܘܰܢܦܺܝܛܽܘܢ ܥܠܶܝܗ̇ ܣܶܦܘ̈ܳܬܗܽܘܢ ܘܠܶܫܳܢܰܝ̈ܗܽܘܢ ܥܰܡ̈ܡܶܐ ܒܰܪܒܪ̈ܳܝܶܐ ܟܳܦܪ̈ܰܝ ܒܰܙܩܺܝܦܳܟ: ܠܐܴ ܠܨܽܘܚܺܝܬܳܐ ܘܰܠܡܰܫܪܽܘܩܺܝܬܳܐ ܬܶܗܘܶܐ ܐܰܡܬܳܐ ܕܺܝܠܳܟ: ܐܶܠܐܴ ܗܰܒ ܠܳܗ̇ ܕܰܒܝܰܕ ܨܠܰܘ̈ܳܬܳܐ ܕܰܫܠܺܝ̈ܚܰܝܟ ܬܶܬܢܰܛܰܪ: ܘܰܒܬܰܟܫ̈ܦܳܬܳܐ ܕܣܳܗ̈ܕܰܝܟ ܬܶܬܥܰܕܰܪ: ܘܰܒܒܳܥܘ̈ܳܬܳܐ ܕܟܳܪ̈ܽܘܙܰܝܟ ܬܶܬܚܰܣܰܢ: ܒܰܦܝܳܣܳܐ ܕܰܡܣܰܒܪ̈ܳܢܰܝܟ ܬܶܫܬܰܪܰܪ: ܘܰܒܥܰܕܥܺܐܕ̈ܶܐ ܕܩܰܕܺܝ̈ܫܰܝܟ ܬܶܬܒܰܪܰܟ: ܘܰܒܕܽܘܟܪܳܢܳܐ ܕܰܡܢܺܝ̈ܚܳܢܰܝܟ ܬܶܬܗܰܕܰܪ: ܘܰܒܥܽܘܗܕܳܢܳܐ ܕܣܳܗ̈ܕܰܝܟ ܬܶܨܛܰܒܰܬ: ܒܚܰܫܰܝ̈ܟ ܬܶܫܬܰܒܗܰܪ: ܒܫܽܘ̈ܡܳܬܳܟ ܬܶܬܚܬܰܪ. ܒܡܰܘܬܳܟ ܬܶܬܪܰܡܪܰܡ: ܒܰܩܒܽܘܪܬܳܟ ܬܶܬܢܰܚܰܡ: ܒܰܩܝܳܡܬܳܟ ܬܩܽܘܡ. ܘܥܰܡܳܟ ܬܶܫܬܰܒܰܚ: ܘܰܒܡܰܠܟܽܘܬܳܟ ܬܶܚܕܶܐ: ܘܒܰܓܢܽܘܢܳܟ ܬܶܪܘܰܙ: ܒܰܣܡܳܟܳܟ ܬܶܬܦܰܛܰܡ: ܘܥܰܡܳܟ ܒܢܽܘܗܪܳܐ ܘܰܠܥܳܠܰܡ ܬܶܬܒܰܣܰܡ: ܒܛܰܝܒܽܘܬܳܐ ܕܺܝܠܳܟ ܘܰܒܫܰܦܺܝܪܽܘܬ ܨܶܒܝܳܢܳܐ ܕܰܐܒܽܘܟ: ܘܡܰܥܒܕܳܢܽܘܬܶܗ ܕܪܽܘܚܳܟ ܚܰܝܳܐ ܩܰܕܺܝܫܳܐ: ܛܳܒܳܐ ܘܰܣܓܺܝܕܳܐ ܘܰܫܘܶܐ ܠܳܟ ܒܽܐܘܣܺܝܰܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܣܳܗܕܳܐ ܩܰܕܡܳܝܳܐ ܕܶܐܬܕܒܰܚ ܒܰܙܩܺܝܦܳܐ ܡܶܛܽܠܳܬܰܢ ܘܰܕܪܰܫ ܠܰܢ ܐܽܘܪܚܳܐ ܐܰܝܟܰܢܳܐ ܕܰܢܥܰܠܐܷ ܠܓܶܢܣܳܐ ܕܺܝܠܰܢ ܬܰܚܽܘܒܳܐ ܠܪܰܘܡܳܐ ܕܰܫܡܰܝܳܐ: ܘܢܰܘܬܒܰܢ ܡ̣ܶܢ ܝܰܡܺܝܢ ܐܰܒܽܘܗܝ ܡܫܰܒܚܳܐ: ܡܳܢܳܐ ܢܶܦܪܽܘܥ ܠܛܰܝܒܽܘܬܶܗ ܥܰܠ ܐܰܦ̈ܰܝ ܟܽܠܗܶܝܢ ܕܰܣܥܰܪ ܠܘܳܬܰܢ ܒܰܡܪܰܚܡܳܢܽܘܬܶܗ: ܠܗܳܢܳܐ ܡܽܘܠܟܳܢܳܐ ܫܡܰܥܘ ܟܽܠܗܽܘܢ ܐܰܒܳܗ̈ܳܬܳܐ ܩܰܕ̈ܡܳܝܶܐ ܥܰܡ ܣܳܗ̈ܕܶܐ ܘܡܰܘܕ̈ܝܳܢܶܐ ܘܨܰܘܪ̈ܰܝܗܽܘܢ ܝܰܗܒܘ ܠܣܰܝܦܳܐ ܘܦܰܓܪ̈ܰܝܗܽܘܢ ܠܡܰܚ̈ܘܳܬܳܐ ܡܶܛܽܠ ܚܽܘܒܶܗ ܕܰܡܫܺܝܚܳܐ: ܘܶܐܫܬܘܺܝܘ ܕܰܢܥܰܕܥܶܕ ܘܰܢܝܰܩܰܪ ܠܝܰܘܡܳܐ ܕܕܽܘܟܪܳܢܗܽܘܢ ܒܰܨܠܰܘ̈ܳܬܗܽܘܢ ܘܰܒܬܰܟܫ̈ܦܳܬܗܽܘܢ ܢܶܫܬܘܶܐ ܠܚܽܘܣܳܝܳܐ ܕܚܰܘ̈ܒܰܝܢ ܘܰܠܫܽܘܒܩܳܢܳܐ ܕܰܚܛܳܗܰܝ̈ܢ ܘܥܽܘܗܕܳܢܳܐ ܕܟܽܠܗܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܕܩܰܕܶܡܘ ܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܒܗܳܢܳܐ ܥܶܕܳܢܳܐ܀

ܣܕܪܐ

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ ܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܓܳܒܽܘܠܶܗ ܕܳܐܕܳܡ ܡ̣ܶܢ ܥܰܦܪܳܐ ܡܚܰܕܬܳܢܳܐ ܕܨܰܠܡܶܗ ܒܪܽܘܚܳܐ: ܘܰܡܩܺܝܡܳܢܳܐ ܕܕܰܚܺܝܚܶܗ ܡ̣ܶܢ ܩܰܒܪܳܐ: ܐܰܝܟ ܒܰܪܬ݀ ܩܳܠܐܴ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܕܥܰܠ ܗܳܕܶܐ ܡܺܝܬ ܘܩܳܡ: ܕܢܶܗܘܶܐ ܡܳܪܳܐ ܠܡܺܝ̈ܬܶܐ ܘܰܠܚܰܝ̈ܶܐ: ܒܰܕܓܽܘܢ ܡ̣ܶܢ ܒܳܬܰܪ ܕܚܰܫ ܘܡܺܝܬ ܘܶܐܬܩܒܰܪ ܘܰܚܝܳܐ ܘܩܳܡ: ܘܰܐܚܺܝ ܥܰܡܶܗ ܒܰܩܝܳܡܬܶܗ ܡܫܰܒܰܚܬܳܐ ܠܟܽܠܗܽܘܢ ܐܰܝܠܶܝܢ ܕܰܫܦܰܪܘ ܒܪܽܘܚ ܡ̣ܶܢ ܩܕܺܝܡ ܘܳܐܦ ܡ̣ܶܢ ܕܪܺܝܫ: ܐܰܝܠܶܝܢ ܬܽܘܒ ܕܪܰܥܝܽܘܗܝ ܠܐܱܠܳܗܳܐ ܒܕܽܘܒܳܪ̈ܰܝܗܽܘܢ: ܟܰܕ ܐܰܝܟ ܕܰܒܝܰܕ ܫܺܝܦܽܘܪܳܐ ܐܶܬܬܰܙܥܰܩ ܕܣܳܦܶܩ ܚܰܕ ܡܰܘܬܳܐ ܡܰܥܒܶܕ ܚܰܝ̈ܶܐ ܕܦܳܪܽܘܩܳܐ ܕܺܝܠܰܢ ܡܫܺܝܚܳܐ: ܕܢܶܫܪܶܐ ܠܐܘܚܕܳܢܶܗ ܕܡܰܘܬܳܐ ܛܪܽܘܢܳܐ ܕܶܐܬܥܰܫܰܢ ܥܠܰܝܢ: ܘܰܒܝܰܕ ܩܝܳܡܬܶܗ ܡܫܰܒܰܚܬܳܐ ܢܰܢܗܰܪ ܠܥܰܝ̈ܢܶܐ ܕܚܶܫܽܘ̈ܟܳܢ ܗܘ̈ܰܝ: ܘܰܢܫܰܟܶܢ ܠܐܴ ܡܶܬܚܰܒܠܳܢܽܘܬܳܐ: ܕܰܐܠܳܗܳܐ ܓܶܝܪ ܐܺܝܬܶܝܗ̇ ܗ̇ܳܝ ܕܰܚܠܳܦ ܟܽܠܗܽܘܢ ܒܢܰܝ̈ܢܳܫܳܐ ܠܰܕܡܳܐ ܡܝܰܩܪܳܐ ܐܶܫܰܕ: ܡܶܛܽܠ ܕܒܳܐܕܳܡ ܟܽܠܗܽܘܢ ܡܺܝܬܘ: ܗܳܟܺܝܠ ܠܟܽܠܗܽܘܢ ܟܺܐܢ̈ܶܐ ܒܩܽܘ̈ܠܳܣܶܐ ܘܰܒܬܶܫ̈ܒܚܳܬܳܐ ܐܠܰܗܳܝ̈ܳܬܳܐ: ܘܢܶܗܘܶܐ ܒܚܽܘܒܳܐ: ܒܫܽܘܦܪܳܐ: ܘܒܰܡܝܰܬܪܽܘܬܳܐ ܕܟܽܠܗܽܘܢ: ܠܰܢܒܺܝ̈ܶܐ ܢܝܰܩܰܪ ܕܰܗܘܰܘ ܡܳܐܢ̈ܶܐ ܕܟܰܝ̈ܳܐ: ܘܚܰܘܺܝ ܒܺܐܝܕܰܝ̈ܗܽܘܢ ܐ̱ܪܳܙܳܐ ܬܡܺܝܗܳܐ ܕܡܶܬܒܰܪܢܫܳܢܽܘܬܳܟ ܐܠܰܗܳܝܬܳܐ ܕܡ̣ܶܢ ܒܬܽܘܠܬܳܐ ܩܰܕܺܝܫܬܳܐ: ܠܚܰܫܶܗ ܘܡܰܘܬܶܗ ܡܰܥܒܶܕ ܚܰܝ̈ܶܐ: ܠܡܰܚܰܬܬܳܐ ܕܠܰܫܝܽܘܠ ܘܠܰܩܝܳܡܬܳܐ ܫܒܺܝܚܬܳܐ ܠܡܰܘܬܒܳܐ ܕܥܰܠ ܝܰܡܺܝܢܳܐ ܕܰܐܒܳܐ. ܠܰܫܠܺܝ̈ܚܶܐ ܢܝܰܩܰܪ: ܕܰܗܘܰܘ ܚܰܙܳܝ̈ܶܐ ܘܰܡܫܰܡ̈ܫܳܢܶܐ ܘܪ̈ܰܒܰܝ ܒ̈ܳܬܶܐ ܚܰܟܺܝ̈ܡܶܐ ܕܰܣܒܰܪܬܳܐ ܦܳܪܽܘܩܳܝܬܳܐ ܘܰܠܐܪܳܙܳܐ ܕܰܡܟܰܣܰܝ ܗܘܳܐ ܡ̣ܶܢ ܥܳܠܡ̈ܶܐ ܘܡ̣ܶܢ ܕܳܪ̈ܶܐ. ܠܣܳܗ̈ܕܶܐ ܫܰܦܺܝܪ̈ܰܝ ܙܳܟܽܘܬܳܐ: ܕܰܒܫܽܘܦܳܥ ܕܶܡܗܽܘܢ ܝܰܩܰܪܘ ܠܰܕܡܳܐ ܐܠܰܗܳܝܳܐ ܕܶܐܫܰܕ ܚܠܳܦܰܝܢ ܗ̇ܰܘ ܐܶܡܪܶܗ ܕܰܐܠܳܗܳܐ ܚܰܝܳܐ ܕܫܳܩܶܠ ܚܛܺܝܬܶܗ ܕܥܳܠܡܳܐ. ܠܡܰܘܕܝ̈ܳܢܶܐ ܢܝܰܩܰܪ ܕܰܐܘܕܺܝܘ ܒܰܒܪܳܐ ܕܰܐܠܳܗܳܐ ܘܗܰܝܡܶܢܘ ܒܶܗ ܘܰܐܟܪܙܽܘܗܝ: ܠܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ ܢܝܰܩܰܪ: ܐܰܝܟ ܕܰܠܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܐܪ̈ܙܳܢܶܐ ܒܚܺܝܪ̈ܶܐ: ܕܰܦܣܰܩܘ ܠܰܢ ܬܪܺܝܨܳܐܺܝܬ ܠܡܶܠܬܳܐ ܘܰܣܚܰܦܘ ܠܛܽܘܥܝܰܝ: ܢܝܰܩܰܪ ܕܶܝܢ ܠܰܒܬܽܘܠܰܬ݀ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܕܝܶܠܕܰܬ݀ ܠܰܢ ܠܐܱܠܳܗܳܐ ܦܳܪܽܘܩܶܗ ܕܓܶܢܣܰܢ ܐܰܝܟ ܕܠܰܢܒܺܝܬܳܐ ܕܶܝܢ: ܘܰܐܝܟ ܕܠܰܫܠܺܝ̈ܚܶܐ ܘܣܳܗ̈ܕܶܐ ܠܗ̇ܳܝ ܕܰܡܝܰܩܪ̈ܳܢ ܦܳܠܰܚ̈ܘܳܬܳܐ ܫܡܰܝܳܢ̈ܝܳܬܳܐ ܕܙܰܕܺܝ̈ܩܶܐ ܕܶܐܬܓܡܰܪܘ: ܘܰܐܡܺܝܬ ܠܡܰܘܬܳܐ ܘܒܰܛܶܠ ܠܰܚܛܺܝܬܳܐ: ܘܡܶܛܽܠ ܕܛܰܝܒܽܘܬܳܐ ܕܣܺܝܡܰܬ݀ ܒܢܰܝ̈ܳܐ: ܕܩܳܝܡܺܝܢܰܢ ܥܰܡܶܗ ܒܰܩܝܳܡܬܶܗ: ܘܰܐܦܢܺܝ ܠܥܶܪܒܳܐ ܐܰܒܺܝܕܳܐ ܠܒܶܝܬ ܐܰܒܽܘܗܝ ܡܫܰܒܚܳܐ: ܘܶܐܫܟܚܶܗ ܕܰܒܚܶܫܽܘܟܳܐ ܕܠܐܴ ܝܺܕܰܥܬܳܐ ܘܥܰܠ ܟܰܬܦ̈ܳܬܶܗ ܗܳܠܶܝܢ ܕܰܥܠܰܝܗܶܝܢ ܛܥܺܝܢ ܩܰܝܣܳܐ ܕܰܨܠܺܝܒܶܗ ܙܰܝܚܶܗ: ܥܺܐܕܰܐ ܗ̱̇ܘ ܓܶܝܪ ܐܰܝܟ ܕܒܰܫܪܳܪܳܐ ܘܚܽܘܕܳܬܳܐ ܪܽܘܚܳܢܳܝܳܐ: ܘܝܰܬܺܝܪܳܐܺܝܬ ܥܺܐܕܳܐ ܕܒܶܣ̈ܡܶܐ ܘܥܽܘܗܕܳܢܳܐ ܪܚܺܝܡܳܐ ܕܐ̱ܢܳܫܳ̈ܐ ܟܺܐܢ̈ܶܐ ܕܠܐܴ ܫܒܰܩܘ ܕܬܶܫܬܰܠܰܛ ܚܛܺܝܬܳܐ ܒܦܰܓܪ̈ܰܝܗܽܘܢ ܘܠܐܴ ܐܶܫܬܰܥܒܰܕܘ ܠܰܪ̈ܓܺܝܓܳܬܳܐ ܒܦܰܓܪ̈ܰܝܗܽܘܢ ܐܶܠܐܴ ܘܰܒܩܺܝܬܳܪܳܐ ܕܰܥܣܰܪ ܡܶܢܺܝ̈ܢ ܢܙܰܡܪܽܘܢ ܠܶܗ: ܘܰܕܢܶܗܘܽܘܢ ܪܺܝܚܳܐ ܒܰܣܺܝܡܳܐ ܒܰܐܝܠܶܝܢ ܕܚܳܐܶܝܢ: ܘܒܰܐܝܠܶܝܢ ܕܳܐܒܕܺܝܢ: ܐܰܝܟܰܢܳܐ ܕܰܒܝܰܕ ܬܰܟܫ̈ܦܳܬܗܽܘܢ ܩܰܕܺܝ̈ܫܳܬܳܐ ܢܶܬܶܠ ܠܰܢ ܡܳܪܰܢ ܘܰܒܕܽܘܒܳܪ̈ܰܝܗܽܘܢ ܢܶܪܕܶܐ: ܐܰܝܟܰܢܳܐ ܕܟܰܕ ܡܡܰܪ̈ܝܳܢܶܐ ܕܰܡܝܰܬܪ̈ܳܬܗܽܘܢ ܗܳܘܶܝܢܰܢ: ܘܰܠܫܽܘܠܳܡܳܐ ܛܳܒܳܐ ܡܡܰܢܥܺܝܢܰܢ ܒܰܡ̈ܛܰܠܠܐܷ ܕܺܝܠܗܽܘܢ ܢܶܬܩܰܒܰܠ: ܘܥܰܡܗܽܘܢ ܢܥܰܕܥܶܕ ܠܳܟ ܒܥܺܐܕܳܐ ܗ̇ܰܘ ܕܠܐܴ ܦܳܛܰܪ: ܘܰܠܥܰܢܺܝ̈ܕܶܐ ܕܰܫܟܶܒܘ ܥܰܠ ܣܰܒܪܶܗ ܒܗܰܝܡܳܢܽܘܬܳܐ ܕܰܫܪܳܪܳܐ: ܢܛܰܟܶܣ ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܡܰܠܟܳܐ ܕܪܰܘܡܳܐ ܕܶܐܬܡܰܟܰܟ ܒܨܶܒܝܳܢܶܗ ܘܰܠܒܶܫ ܕܡܽܘܬܰܢ: ܘܰܣܠܶܩ ܠܰܨܠܺܝܒܳܐ ܒܝܰܕ ܚܽܘܒܶܗ ܕܢܶܓܡܽܘܪ ܦܽܘܪܩܳܢܰܢ ܘܒܰܦܫܳܛܳܐ ܕܺܐܝ̈ܕܰܘܗܝ ܕܒܰܙܩܺܝܦܳܐ ܠܟܽܠܗܽܘܢ ܦܶܢ̈ܝܳܬܳܐ ܢܓܰܕ ܘܰܐܝܬܺܝ ܠܣܶܓܕܬܶܗ: ܘܢܶܬܒܰܩܽܘܢ ܒܚܰܫܶܗ ܘܢܶܬܡܰܙܓܽܘܢ ܒܚܽܘܒܶܗ ܘܢܶܫܬܽܘܢ ܡ̣ܶܢ ܚܰܡܪܶܗ: ܘܰܢܡܽܘܬܽܘܢ ܒܡܰܘܬܶܗ ܘܢܶܬܩܰܒܪܽܘܢ ܥܰܡܶܗ ܘܰܢܩܽܘܡܽܘܢ ܥܰܡܶܗ: ܘܢܶܡܠܟܽܘܢ ܒܫܽܘܒܚܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܝܽܘܡ ܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܘܗܝ ܘܰܒܟܽܠܗܽܘܢ ܝܰܘ̈ܡܳܬܳܐ ܒܗܳܢܳܐ ܥܶܕܳܢܳܐ܀

ܣܕܪܐ

ܡܳܪܝܳܐ ܡܫܺܝܚܳܐ ܡܰܠܟܶܗ ܕܺܐܝܣܪܳܐܶܝܠ ܚܰܕܬܳܐ ܘܰܐܠܳܗܳܐ ܕܟܽܠ ܒܶܪ̈ܝܳܢ ܡܰܥܗܕܺܝܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܩܳܐܶܡ ܠܟܽܠܳܗ̇ ܐܶܣܦܺܝܪ ܕܩܰܕܺܝ̈ܫܶܐ: ܘܰܐܒܳܗ̈ܳܬܳܐ ܟܺܐܢ̈ܶܐ ܘܙܰܕܺܝ̈ܩܶܐ ܕܪܰܚܡܽܘܟ ܗ̇ܳܢܽܘܢ ܕܡܶܢ ܥܳܠܰܡ ܥܰܠ ܣܰܒܪܳܐ ܕܰܩܝܳܡܬܳܟ ܡܫܰܒܰܚܬܳܐ ܫܟܶܒܘ: ܗܳܕܶܐ ܕܒܳܗ̇ ܟܽܠܗܽܘܢ ܒܽܘܝܳܐܳܐ ܩܢܰܘ ܡ̣ܶܢ ܐܽܘܠܨܳܢܰܝ̈ܗܽܘܢ: ܘܒܳܗ̇ ܬܽܘܒ ܐ̱ܪ̈ܳܙܰܝܗܽܘܢ ܘܦ̈ܶܠܐܴܬܗܽܘܢ ܐܶܬܓܡܰܪܘ ܘܶܐܫܬܰܡܠܺܝܘ: ܘܥܰܡܗܽܘܢ ܕܣܳܗ̈ܕܶܐ ܘܡܰܘܕ̈ܝܳܢܶܐ: ܕܡܶܛܽܠܳܬܳܟ ܣܰܝܒܰܪܘ ܟܽܠ ܚܰܫܺܝ̈ܢ ܘܫܶܢܕܺܝ̈ܢ ܘܠܐܴ ܦܰܕܘ ܡ̣ܶܢ ܫܪܳܪܳܟ: ܘܰܗܘܰܘ ܕܽܘܡܝܳܐ ܘܡܰܚܙܺܝܬܳܐ ܠܣܰܓܺܝ̈ܶܐܐ ܕܢܶܪܕܽܘܢ ܒܥܶܩ̈ܒܳܬܳܐ ܕܰܙܩܺܝܦܽܘܬܳܐ ܕܺܝܠܳܟ ܝܳܗܒܰܬ݀ ܚܰܝ̈ܶܐ: ܝܰܘܡܳܢܳܐ ܐܳܕܳܡ ܘܚܰܘܳܐ ܪܳܦܣܺܝܢ ܒܚܰܕܽܘܬܳܐ ܕܩܳܡܘ ܡ̣ܶܢ ܡܰܦܽܘܠܬܗܽܘܢ: ܘܰܒܨܶܨ̈ܶܐ ܐܶܬܬܰܠܰܚ ܐ̱ܫܛܳܪ ܚܰܘ̈ܒܳܬܗܽܘܢ: ܘܒܰܨܠܺܝܒܳܟ ܐܶܬܥܰܛܝܰܬ݀ ܠܰܘܛܰܬܗܽܘܢ: ܝܰܘܡܳܢܳܐ ܗܳܒܶܝܠ ܚܳܕܶܐ ܒܰܕܡܳܟ ܝܰܩܺܝܪܳܐ ܕܙܰܟܺܝ ܠܰܕܡܶܗ: ܝܰܘܡܳܢܳܐ ܢܽܘܚ ܪܳܘܶܙ ܕܒܰܕܡܳܐ ܘܡܰܝ̈ܳܐ ܕܰܪܕܰܘ ܡ̣ܶܢ ܕܰܦܢܳܟ ܐܰܛܺܝܦܘ ܠܰܚܛܺܝܬܳܐ ܕܟܽܠܶܗ ܥܳܠܡܳܐ: ܝܰܘܡܳܢܳܐ ܡܰܠܟܺܝܙܕܶܩ ܕܳܐܶܨ ܒܫܽܘܡܠܳܝ ܐ̱ܪ̈ܳܙܰܘܗܝ ܕܠܰܚܡܳܐ ܘܚܰܡܪܳܐ ܐܰܫܠܶܡܬ ܠܥܺܕܬܳܟ ܐ̱ܪܳܙ ܦܰܓܪܳܟ ܘܰܕܡܳܟ ܩܰܕܺܝܫܳܐ ܕܒܶܗ ܬܺܚܶܐ: ܝܰܘܡܳܢܳܐ ܐܰܒܪܳܗܳܡ ܢܳܨܰܚ ܘܡܶܬܦܨܰܚ ܕܠܳܟ ܐܶܡܪܳܐ ܕܰܐܠܳܗܽܘܬܳܐ ܚܙܳܐ ܕܰܬܠܰܝܬ ܒܰܙܩܺܝܦܳܐ: ܐܺܝܣܚܳܩ ܡܰܘܕܶܐ ܕܰܚܙܳܟ ܕܒܰܦܟܳܪ̈ܰܝܟ ܐܶܫܬܪܺܝ ܥܳܠܡܳܐ ܟܽܠܶܗ ܡ̣ܶܢ ܐܰܣܽܘܪ̈ܶܐ ܕܡܰܘܬܳܐ ܘܕܰܚܛܺܝܬܳܐ: ܝܰܘܡܳܢܳܐ ܝܰܥܩܽܘܒ ܡܫܰܒܰܚ ܕܰܚܙܳܟ ܥܰܠ ܪܺܝܫ ܩܰܝܣܳܐ ܘܰܡܨܰܒܰܥ ܓܽܘܫܡܳܟ ܐܰܝܟ ܕܰܒܚܰܡܪܳܐ: ܝܰܘܡܳܢܳܐ ܝܰܘܣܶܦ ܡܪܰܡܪܶܡ ܘܶܐܬܓܡܰܪܘ ܚܰܫܰܝ̈ܟ ܘܰܐܡܠܶܟܬ ܥܰܠ ܟܽܠܳܗ̇ ܛܽܘܥܝܰܝ ܘܰܚܛܺܝܬܳܐ: ܝܰܘܡܳܢܳܐ ܡܽܘܫܶܐ ܡܝܰܒܶܒ ܒܰܦܫܳܛܳܐ ܕܺܐܝܕܰܝ̈ܟ ܥܰܠ ܩܰܝܣܳܐ ܕܰܣܚܰܦܬ ܠܰܥܡܳܠܺܝܩ ܡܶܬܝܰܕܥܳܢܳܐ ܘܰܠܟܽܠܳܗ̇ ܡܰܫܪܺܝܬܶܗ ܘܦܰܟܰܗܬ ܠܡܳܪܶܗ ܕܬܰܢܺܝܢܳܐ ܥܰܬܺܝܩܳܐ: ܘܰܠܡܰܪܺܝܪܽܘܬܳܐ ܕܥܰܡ̈ܡܶܐ ܚܰܠܺܝܬ ܘܰܠܟܽܠܗܽܘܢ ܐܰܚܺܝܬ ܒܰܨܠܺܝܒܳܟ: ܝܰܘܡܳܢܳܐ ܐܰܗܪܽܘܢ ܟܳܗܢܳܐ: ܒܪܺܝܚ ܕܶܒܚܳܟ ܡܶܬܒܰܣܰܡ ܕܒܶܗ ܐܶܬܟܠܺܝ ܡܰܘܬܳܢܳܐ ܕܰܚܛܺܝܬܳܐ ܡ̣ܶܢ ܬܺܒܶܝܠ: ܝܰܘܡܳܢܳܐ ܦܺܝܢܚܶܣ ܛܰܢܳܢܳܐ ܡܰܘܕܶܐ: ܕܰܒܚܽܘܛܪܶܗ ܕܰܨܠܺܝܒܳܟ ܩܛܰܠܬ ܠܒܺܝܫܳܐ ܘܰܠܛܽܘܥܝܰܝ ܛܰܡ̈ܳܐܬܳܐ: ܘܰܟܠܰܝܬ ܠܫܽܘܠܛܳܢܶܗ ܕܡܰܘܬܳܐ ܡ̣ܶܢ ܟܽܠܳܗ̇ ܒܪܺܝܬܳܐ: ܝܰܘܡܳܢܳܐ ܝܶܫܽܘܥ ܒܰܪܢܽܘܢ ܢܩܰܠܶܣ ܕܰܒܝܰܕ ܢܰܝܙܟܶܗ ܕܰܨܠܺܝܒܳܟ ܐܰܚܪܶܒܬ ܠܰܫܝܽܘܠ ܠܕܳܪܕܳܪ̈ܺܝܢ ܘܓܰܢ̱ܒܳܪ̈ܶܐ ܕܺܝܠܳܗ̇ ܐܰܘܒܶܕܬ ܘܰܠܥܰܡܳܐ ܕܺܝܠܳܟ ܠܐܘܪܫܠܶܡ ܥܶܠܳܝܬܳܐ ܫܰܕܰܪܬ: ܝܰܘܡܳܢܳܐ ܕܰܘܺܝܕ ܡܙܰܡܰܪ: ܕܰܒܝܰܕ ܟܽܠܶܗ ܙܡܺܝܪ̈ܳܬܶܗ ܐܰܝܬܺܝܬ ܠܫܽܘܡܠܳܝܳܐ ܒܚܰܫܰܝ̈ܟ ܣܓܺܝ̈ܕܶܐ ܘܰܐܝܟ ܩܛܺܝܠܐܴ ܒܶܝܬ ܡܺܝ̈ܬܶܐ ܐܶܬܚܒܶܫܬ ܘܩܳܡܬ ܕܠܐܴ ܚܒܳܠܐܴ ܘܒܰܕܰܪܬ ܠܰܒܥܶܠܕ̈ܒܳܒܰܝܟ: ܝܰܘܡܳܢܳܐ ܐܶܫܰܥܝܳܐ ܡܶܬܕܰܡܰܪ ܕܰܚܙܳܟ ܕܶܐܬܕܒܰܪܬ ܐܰܝܟ ܐܶܡܪܳܐ ܠܢܶܟܣܬܳܐ: ܘܰܛܥܶܢܬ ܚܰܫܺܝ̈ܢ ܟܽܠܶܗ ܝܰܘܡܳܢܳܐ: ܘܰܕܝܰܗܒ ܦܺܝܠܰܛܳܘܣ ܩܰܒܪܳܟ ܘܢܰܚ̈ܬܰܝܟ ܕܰܡܦܰܠܦܠܺܝܢ ܒܰܕܡܳܐ ܕܰܩܢܽܘܡܳܟ: ܝܰܘܡܳܢܳܐ ܬܳܗܰܪ ܕܰܚܙܳܐ ܫܽܘ̈ܡܳܬܳܐ ܕܺܐܝ̈ܕܰܝܟ ܘܪ̈ܶܓܠܰܝܟ: ܘܡܺܝܟܳܐ ܡܰܟܪܶܙ ܕܰܚܙܳܟ ܕܶܐܬܕܩܰܪܬ ܒܠܽܘܟܳܝܬܳܐ ܘܥܰܡܽܘܣ ܒܫܶܡܫܳܐ ܕܰܚܫܶܟ ܒܛܰܗܪܳܐ: ܝܰܘܡܳܢܳܐ ܝܰܘܢܳܢ ܢܒܺܝܳܐ ܣܳܓܶܕ: ܕܰܫܟܶܒܬ ܐܰܝܟ ܡܺܝܬܳܐ ܒܰܫܝܽܘܠ ܘܠܰܬܠܳܬܳܐ ܝܰܘ̈ܡܺܝܢ ܩܳܡܬ ܘܰܠܥܺܕܬܳܐ ܡܟܺܝܪܬܳܟ ܒܰܪܬ ܥܰܡ̈ܡܶܐ ܚܰܕܺܝܬ: ܝܰܘܡܳܢܳܐ ܗܽܘܫܳܥ ܡܰܗܶܠ ܒܡܰܘܬܳܐ ܘܒܰܫܝܽܘܠ ܕܰܫܩܰܠܬ ܥܠܰܝܗܽܘܢ ܙܳܟܽܘܬܳܐ ܒܰܨܠܺܝܒܳܟ ܘܰܩܝܳܡܬܳܟ: ܝܰܘܡܳܢܳܐ ܟܽܠܗܽܘܢ ܢܒܺܝ̈ܶܐ ܬܰܘܕ̈ܝܳܬܳܐ ܦܳܪܥܺܝܢ. ܘܰܫܠܺܝ̈ܚܶܐ ܘܰܡܣܰܒܪ̈ܳܢܶܐ ܣܰܒܪܳܐ ܘܚܰܝ̈ܶܐ ܡܣܰܒܪܺܝܢ: ܘܣܳܗ̈ܕܶܐ ܘܡܰܘܕ̈ܝܳܢܶܐ ܚܰܫ̈ܶܐ ܘܫܶܢ̈ܕܶܐ ܕܰܣܒܰܠܘ ܗܰܕܳܡܰܝ̈ܗܽܘܢ: ܒܰܕܡܳܐ ܚܰܣܝܳܐ ܕܡ̣ܶܢ ܨܰܘܪ̈ܰܝܗܽܘܢ ܪܽܘܡܝܳܢܳܐ ܡܩܰܪܒܺܝܢ: ܘܰܟܠܺܝܠ ܣܶܓܕ̈ܳܬܳܐ ܪܺܝܫܳܟ ܡܝܰܩܪܳܐ ܓܳܕܠܺܝܢ: ܘܠܰܩܝܳܡܬܳܟ ܡܫܰܒܰܚܬܳܐ ܡܚܰܓܶܝܢ ܘܰܡܥܰܕܥܕܺܝܢ: ܘܥܰܡ ܗܳܠܶܝܢ ܘܰܩܕܳܡ ܗܳܠܶܝܢ ܡܶܬܥܰܗܕܺܝܢܰܢ ܒܝܰܘܡܳܐ ܗܳܢܳܐ ܩܰܕܺܝܫܳܐ ܠܰܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܗ̇ܳܝ ܕܺܝܠܶܕܬܳܟ ܒܬܶܕܡܽܘܪܬܳܐ ܘܰܒܬܽܘ̈ܠܶܝܗ̇ ܠܐܴ ܫܪܰܝܬ: ܗ̇ܳܝ ܕܒܰܨܠܰܘ̈ܳܬܳܗ̇ ܕܰܟܝ̈ܳܬܳܐ ܘܰܕܟܽܠܗܽܘܢ ܩܰܕܺܝ̈ܫܶܐ ܕܡ̣ܶܢ ܥܳܠܰܡ: ܡܦܺܝܣܺܝܢܰܢ ܠܳܟ: ܝܺܕܺܝܥܳܐܺܝܬ ܕܶܝܢ ܕܝܽܘܚܰܢܳܢ ܡܰܥܡܕܳܢܳܐ ܕܪܰܒܽܘܬܳܟ: ܘܕܶܣܛܶܦܰܢܳܘܣ ܒܽܘܟܪܳܐ ܕܣܳܗܕܽܘܬܳܐ ܕܺܝܠܳܟ: ܘܦܶܛܪܽܘܣ ܪܺܝܫܳܐ ܕܰܫܠܺܝܚܽܘܬܳܐ: ܘܰܕܝܽܘܚܰܢܳܢ ܕܰܐܓܶܣ ܥܰܠ ܚܰܕܝܳܟ ܒܰܚܫܳܡܺܝܬܳܐ: ܘܰܕܦܰܘܠܳܘܣ ܟܳܪܽܘܙܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ: ܘܕܰܐܪܒܥܳܐ ܐܶܘܢܓܶܠܺܝ̈ܣܛܶܐ ܢܽܘܗܪܳܐ ܕܥܳܡܰܪܬܳܐ: ܘܰܕܝܰܥܩܽܘܒ ܐܰܝܟ ܕܺܝܠܳܟ ܒܛܰܝܒܽܘܬܳܐ ܘܰܕܟܽܠܗܽܘܢ ܐܰܒ̈ܳܗܳܬܳܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܘܕܰܐܪܒܥܺܝܢ ܣܳܗ̈ܕܶܐ ܢܰܨܺܝ̈ܚܶܐ: ܘܰܕܟܽܠܗܽܘܢ ܡܰܘܕܝ̈ܳܢܶܐ ܬܪ̈ܺܝܨܶܐ: ܘܰܕܩܰܕܺܝܫܳܐ ܡܳܪܝ ܡܰܬܰܝ ܘܚܰܒܪ̈ܰܘܗܝ: ܘܰܕܡܳܪܝ ܒܶܗܢܰܡ ܘܣܰܪܳܐ ܚܳܬܶܗ ܘܰܕܣܺܝܥܬܶܗ ܢܰܨܺܝܚܬܳܐ: ܐܰܫܪܳܐ ܫܰܝܢܳܟ ܘܰܫܠܳܡܳܟ ܒܟܽܠܳܗ̇ ܡܰܪܥܺܝܬܳܟ ܙܒܺܝܢܰܬ݀ ܒܰܕܡܳܟ ܝܰܩܺܝܪܳܐ: ܘܒܰܛܶܠ ܡ̣ܶܢ ܓܰܘܳܗ̇ ܣܶܕ̈ܩܶܐ ܘܚܶܪ̈ܝܳܢܶܐ ܘܟܽܠܗܶܝܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܘܥܰܕܰܪ ܠܪ̈ܳܥܰܘܳܬܳܐ: ܘܢܰܛܰܪ ܠܟܳܗ̈ܢܶܝܗ̇ ܘܠܰܡܫܰܡ̈ܫܳܢܶܝܗ̇ ܘܰܐܘܪܶܒ ܐܶܢܽܘܢ. ܣܰܬܰܪ ܠܟܽܠܶܗ ܡܽܘܠܳܝܳܐ ܕܥܺܕܬܳܐ ܕܺܝܠܳܟ ܬܚܶܝܬ ܟܶܢ̈ܦܰܘܗܝ ܕܰܨܠܺܝܒܳܟ ܡܝܰܩܪܳܐ: ܡ̣ܶܢ ܟܽܠ ܒܺܝܫܳܐ ܡܰܟܝܳܢܳܐ: ܘܚܰܣܳܐ ܚܰܘ̈ܒܶܐ ܕܡܰܣܟ̈ܠܳܢܶܐ ܒܰܚܢܳܢܳܟ: ܘܰܐܣܳܐ ܘܰܐܚܠܶܡ ܠܰܟܪ̈ܺܝܗܶܐ ܘܠܐܱܠܺܝ̈ܨܶܐ ܒܛܰܝܒܽܘܬܳܟ: ܘܦܰܢܳܐ ܫ̈ܶܐܠܳܬܳܐ ܫܰܦܺܝܪ̈ܳܬܳܐ ܕܟܽܠ ܕܩܳܪܶܐ ܠܳܟ: ܘܠܐܱܝܠܶܝܢ ܕܫܶܐܠܘ ܘܫܳܐܠܺܝܢ ܨܠܰܘ̈ܳܬܳܐ ܡܚܺܝ̈ܠܳܬܳܐ ܕܡܶܢܰܢ: ܥܢܺܝ ܘܥܰܕܰܪ ܒܰܡܪܰܚܡܳܢܽܘܬܳܟ ܘܰܐܢܺܝܚ ܠܥܰܢܺܝ̈ܕܶܐ ܕܰܫܟܶܒܘ ܥܰܠ ܣܰܒܪܳܟ ܒܰܓܢܽܘܢܳܐ ܕܡܰܠܟܽܘܬܳܟ ܕܥܰܡ ܩܰܕܺܝ̈ܫܶܐ ܕܰܐܘܕܺܝܘ ܒܳܟ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

ܠܗ̇ܰܘ ܕܰܟܢܰܫ ܠܘܳܬܶܗ ܓܒܰܘ̈ܗܝ: ܘܰܩܪܳܐ ܠܰܚܠܽܘܠܶܗ ܪ̈ܳܚܡܰܘܗܝ: ܘܙܰܡܶܢ ܠܰܓܢܽܘܢܗ ܢܶܨܚ̈ܳܢܰܘܗܝ: ܘܚܰܝܶܠ ܒܰܐܓܽܘܢܳܐ ܠܐܱܬܠܺܝ̈ܛܰܘܗܝ: ܘܒܰܣܶܡ ܒܰܣܡܳܟܶܗ ܠܩܰܕܺܝ̈ܫܰܘܗܝ: ܗ̇ܰܘ ܕܪܰܡܪܶܡ ܒܰܒܪܺܝܬܳܐ ܠܡܰܠܝܰܬ݀ ܫܽܘܦܪ̈ܶܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܘܰܐܣܓܺܝ ܚܢܳܢܶܗ ܠܘܳܬܳܗ̇: ܗ̇ܳܝ ܕܠܳܗ̇ ܡܝܰܩܪ̈ܳܢ ܢܰܦ̈ܫܳܬܳܐ ܕܟܺܐܢ̈ܶܐ. ܘܰܡܪܰܡܪ̈ܡܳܢ ܪ̈ܽܘܚܳܬܳܐ ܕܙܰܕܺܝ̈ܩܶܐ: ܘܝܳܗ̈ܒܳܢ ܠܳܗ̇ ܛܽܘܒܳܐ ܟܽܠܗܶܝܢ ܫܰܪ̈ܒܳܬܳܐ ܕܥܰܡ̈ܡܶܐ: ܗ̇ܳܝ ܕܝܰܘܡܳܢܳܐ ܕܽܘܟܪܳܢܳܗ̇ ܥܰܡ ܕܰܢܒܺܝ̈ܶܐ ܘܕܰܫܠܺܝ̈ܚܶܐ ܘܰܕܣܳܗ̈ܕܶܐ ܘܡܰܘܕ̈ܝܳܢܶܐ: ܘܰܐܒܳܗ̈ܳܬܳܐ ܩܰܕܺܝ̈ܫܶܐ ܡܫܰܡܠܶܝܢܰܢ: ܚܠܳܦ ܚܽܘܣܳܝܳܐ ܕܚܰܘ̈ܒܰܝܢ: ܘܥܽܘܗܕܳܢܳܐ ܕܟܽܠܗܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܒܗܳܢܳܐ ܥܶܕܳܢܳܐ܀

ܣܕܪܐ

ܡܳܪܝܳܐ ܕܟܽܠ ܐܳܦ ܡܰܚܝܳܢܳܐ ܕܟܽܠ: ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܰܡܪܰܚܡܳܢܽܘܬܳܟ ܓܳܒܽܘܠܐܴ ܘܒܳܪܽܘܝܳܐ ܕܰܓܒܺܝܠܬܳܐ ܕܺܝܠܰܢ ܘܨܰܠܡܳܐ ܕܪܰܒܽܘܬܳܟ: ܕܰܒܚܽܘܒܳܟ ܠܐܴ ܡܶܬܡܰܠܠܳܢܳܐ ܐܰܘܪܶܒܬ ܠܓܶܢܣܰܢ ܬܰܚܽܘܒܳܐ: ܘܣܳܡܬܳܝܗܝ ܥܰܡܳܟ ܒܰܫܡܰܝܳܐ ܥܰܡ ܥܺܝܪ̈ܶܐ ܘܬܶܓ̈ܡܶܐ ܪ̈ܽܘܚܳܢܳܝܶܐ: ܘܝܰܗܒܬ ܡܰܘܗ̈ܒܳܬܳܐ ܠܰܒܢܰܝ̈ܢܳܫܳܐ ܒܛܰܝܒܽܘܬܳܟ: ܘܰܒܪܶܚܡܰܬ݀ ܐ̱ܢܳܫܽܘܬܳܟ ܕܰܠܘܳܬܰܢ: ܘܰܓܒܰܝܬ ܘܰܐܘܪܶܒܬ ܠܰܒܢ̈ܰܝ ܐ̱ܪ̈ܳܙܶܐ ܕܰܡܕܰܒܪܳܢܽܘܬܳܟ: ܡܶܛܽܠ ܗܳܕܶܐ ܡܶܬܕܰܟܪܺܝܢܰܢ ܒܥܺܐܕܳܐ ܗܳܢܳܐ ܕܩܳܐܶܡ: ܠܢܰܦ̈ܫܳܬܳܐ ܘܪ̈ܽܘܚܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ: ܕܰܫܠܺܝ̈ܚܶܐ ܘܕܰܢܒܺܝ̈ܶܐ ܘܰܕܣܳܗ̈ܕܶܐ ܘܰܕܡܰܘܕܝ̈ܳܢܶܐ: ܘܕܰܐܒܳܗ̈ܳܬܳܐ ܩܰܕܺܝ̈ܫܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ. ܝܺܕܺܝܥܳܐܺܝܬ ܘܰܡܫܰܡܗܳܐܺܝܬ ܠܐܴܕܳܡ ܗ̇ܰܘ ܪܺܝܫܳܐ ܕܛܽܘ̈ܗܡܶܐ ܘܰܕܫܰܪ̈ܒܳܬܳܐ ܗ̇ܰܘ ܕܒܺܐܝ̈ܕܰܝܳܐ ܕܺܝܠܳܟ ܩܰܕܺܝ̈ܫܳܬܳܐ ܐܶܬܬܰܩܰܢ: ܘܰܒܝܰܕ ܡܰܦܽܘܚܺܝܬܳܐ ܕܺܝܠܳܟ ܐܠܰܗܳܝܬܳܐ ܐܶܬܡܠܺܝ ܢܰܦܫܳܐ ܪܳܡܰܬ݀ ܡ̣ܶܢ ܡܰܘܬܳܐ ܘܰܚܒܳܠܐܴ ܠܗܳܒܶܝܠ ܕܶܒܚܳܐ ܝܰܩܕܳܐ ܫܰܠܡܳܐ ܘܰܕܠܐܴ ܡܽܘܡܳܐ: ܠܫܺܝܬ ܫܰܦܺܝܪܳܐ ܘܠܐܱܢܽܘܫ ܕܰܒܨܰܠܡܳܐ ܐܶܬܝܰܩܰܪ: ܠܰܚܢܽܘܟ ܕܰܫܦܰܪ ܘܶܐܬܥܰܠܺܝ: ܘܰܠܢܽܘܚ ܕܰܒܟܶܐܘܶܝܠܐܴ ܫܰܘܙܶܒ ܠܐܢܳܫܽܘܬܳܐ: ܘܠܐܱܒܪܳܗܳܡ ܐܰܒܳܐ ܕܥܰܡ̈ܡܶܐ ܕܶܐܫܬܰܘܕܺܝ ܕܢܰܣܡܶܟ ܠܰܬܠܺܝܬܳܝܽܘܬܳܐ ܥܰܠ ܦܳܬܽܘܪܶܗ: ܠܐܻܝܣܚܳܩ ܗ̇ܰܘ ܦܟܰܪ ܠܥܶܠ ܡ̣ܶܢ ܥܶܠܬܳܐ: ܘܰܪܫܰܡ ܛܽܘܦܣܳܐ ܕܺܝܚܺܝܕܳܝܳܐ ܒܪܳܟ: ܠܝܰܥܩܽܘܒ ܗ̇ܰܘ ܕܩܰܒܶܠ ܗܘܳܐ ܒܽܘܪܟܬܳܐ ܘܛܽܘ̈ܒܶܐ ܕܰܐܪܥܳܐ ܘܛܰܠܐܴ ܕܰܫܡܰܝܳܐ: ܘܶܐܬܡܨܺܝ ܚܰܝܠܐܴ ܕܡܰܠܐܱܟܳܐ: ܘܰܐܩܺܝܡ ܛܽܘܦܣܳܐ ܕܥܺܕܬܳܐ ܟܺܐܦܳܐ ܘܰܢܣܰܟ ܥܠܶܝܗ̇ ܡܶܫܚܳܐ ܕܐ̱ܪ̈ܳܙܶܐ: ܠܝܰܘܣܶܦ ܗ̇ܰܘ ܥܠܺܝܒ ܡ̣ܶܢ ܐܰܚܰܘ̈ܗܝ ܘܰܢܛܺܝܪ ܡ̣ܶܢ ܛܰܝܒܽܘܬܳܐ. ܠܡܽܘܫܶܐ ܗ̇ܰܘ ܕܡ̣ܶܢ ܡܰܓܢܳܢܽܘܬܳܐ ܐܠܰܗܳܝܬܳܐ ܡܶܫܟܳܐ ܕܰܐܦܰܘ̈ܗܝ ܐܶܙܕܰܗܺܝ: ܘܡ̣ܶܢ ܪܽܘܚܳܐ ܩܰܕܺܝܫܳܐ ܐܶܬܚܰܟܰܡ ܘܡ̣ܶܢ ܐܠܰܗܽܘܬܳܐ ܘܥܺܝܪ̈ܶܐ ܘܡܰܠܐܱܟ̈ܶܐ ܐܶܬܥܰܦܺܝ: ܠܐܱܗܪܽܘܢ ܘܠܐܷܠܺܝܥܳܙܳܪ ܟܳܗ̈ܢܶܐ: ܠܡܰܠܟܺܝܙܕܶܩ ܟܽܘܡܪܳܐ ܪܰܒܳܐ: ܠܝܶܫܽܘܥ ܒܰܪܢܽܘܢ ܗ̇ܰܘ ܚܰܪܺܝܦ ܢܰܝܙܟܳܐ ܥܰܠ ܒܥܶܠܕ̈ܒܳܒܰܘܗܝ ܕܡܳܪܝܳܐ: ܠܰܫܡܽܘܐܶܝܠ ܢܙܺܝܪܳܐ ܘܟܳܗܢܳܐ ܘܓܰܒܝܳܐ ܕܡ̣ܶܢ ܟܪܶܣ ܐܶܡܶܗ: ܠܕܰܘܺܝܕ ܡܰܠܟܳܐ ܘܰܢܒܺܝܳܐ ܘܢܰܘܣܳܐ ܕܪܽܘܚܳܐ ܩܰܕܺܝܫܳܐ: ܠܝܽܘܫܺܝܳܐ ܡܰܠܟܳܐ: ܠܚܶܙܰܩܝܳܐ ܗ̇ܰܘ ܕܰܒܝܰܕ ܨܠܰܘ̈ܳܬܶܗ ܐܶܬܬܰܘܣܰܦ ܥܰܠ ܚܰܝܰܘ̈ܗܝ: ܠܐܷܫܰܥܝܳܐ ܘܠܐܷܪܰܡܝܳܐ: ܠܰܬܪܶܥܣܰܪ ܢܒܺܝ̈ܶܐ ܕܶܐܬܢܰܒܺܝܘ ܥܰܠ ܡܶܐܬܺܝܬܳܟ ܫܒܺܝܚܬܳܐ: ܠܚܰܙܩܺܝܶܐܝܠ ܕܰܚܙܳܐ ܡܰܪܟܰܒܬܳܐ ܘܰܥܠܶܝܗ̇ ܥܰܬܺܝܩ ܝܰܘ̈ܡܳܬܳܐ: ܠܕܳܢܺܝܶܐܝܠ ܕܰܙܟܳܐ ܠܡܰܠܟܳܐ: ܘܰܐܪ̈ܝܰܘܳܬܳܐ ܠܐܴ ܩܪܶܒܘ ܠܶܗ ܒܓܽܘܒܳܐ: ܠܰܕܒܶܝܬ ܚܰܢܰܢܝܳܐ ܕܶܐܫܬܰܘܙܰܒܘ ܡ̣ܶܢ ܢܽܘܪܳܐ ܘܰܐܒܗܶܬܘ ܠܒܳܒܠܳܝ̈ܶܐ: ܘܰܠܟܽܠܗܽܘܢ ܡܢܺܝ̈ܚܳܢܶܐ ܕܺܝܠܳܟ ܘܓܰܢ̱ܒܳܪ̈ܶܐ ܒܰܩܪ̈ܳܒܰܘܗܝ ܕܡܳܪܝܳܐ: ܠܐܷܠܺܝܳܐ ܢܒܺܝܳܐ ܕܰܟܠܐܴ ܡܶܛܪܳܐ ܘܛܰܠܐܴ: ܘܰܣܠܶܩ ܒܡܰܪܟܰܒܬܳܐ ܠܰܫܡܰܝܳܐ: ܠܐܷܠܺܝܫܳܥ ܕܰܐܚܺܝ ܡܺܝܬܳܐ ܒܚܰܝܰܘ̈ܗܝ ܘܰܒܡܰܘܬܶܗ: ܠܝܶܫܽܘܥ ܒܰܪ ܝܽܘܙܳܕܳܩ ܟܳܗܢܳܐ ܪܰܒܳܐ ܘܰܠܪ̈ܰܒܰܝ ܚܰܝܠܐܴ ܕܥܰܡܶܗ: ܕܰܒܢܰܘ ܘܚܰܕܶܬܘ ܠܗܰܝܟܠܶܗ ܕܡܳܪܝܳܐ ܒܽܐܘܪܫܠܶܡ: ܘܰܐܣܶܩܘ ܠܰܫܒܺܝܬܳܐ ܕܺܝܗܽܘܕܳܐ ܡ̣ܶܢ ܒܳܒܶܝܠ: ܡܶܬܕܰܟܪܺܝܢܰܢ ܬܽܘܒ ܒܥܺܐܕܳܐ ܗܳܢܳܐ ܠܩܰܕܺܝܫܬܳܐ ܘܠܐܴ ܡܢܰܣܝܰܬ݀ ܒܙܽܘܘܳܓܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܠܰܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ: ܠܦܰܘܠܳܘܣ ܫܠܺܝܚܳܐ ܕܥܰܡܳܐ: ܠܣܺܝܥܬܳܐ ܕܫܰܒܥܺܝܢ ܘܰܬܪܶܝܢ ܡܣܰܒܪ̈ܳܢܶܐ: ܠܝܽܘܚܰܢܳܢ ܡܰܥܡܕܳܢܳܐ: ܠܶܣܛܶܦܰܢܳܘܣ ܗ̇ܰܘ ܕܰܪܓܺܝܡ ܡܶܛܽܠ ܫܡܳܟ ܘܠܐܱܠܦ̈ܶܐ ܘܪ̈ܶܒܘܳܬܳܐ ܕܰܒܪܽܘܚܳܐ ܩܰܕܺܝܫܳܐ ܠܳܥܙܺܝܢ ܗܘܰܘ ܘܰܒܟܽܠ ܬܶܕܡܪ̈ܳܬܳܐ ܘܩܽܘ̈ܠܳܣܶܐ ܡܰܘܪܒܺܝܢ ܗܘܰܘ ܠܳܟ ܐܠܰܗܳܐ ܕܥܰܠ ܟܽܠ: ܠܣܳܗ̈ܕܶܐ ܕܠܐܴ ܡܶܢ̈ܝܳܢ ܕܶܐܬܩܛܶܠܘ: ܘܰܪ̈ܓܽܘܡܝܶܐ ܡܰܪܺܝܪ̈ܶܐ ܣܰܝܒܰܪܘ: ܠܓܽܘܕܳܐ ܗ̇ܳܝ ܕܰܐܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ ܠܣܽܘ̈ܢܢܰܗܕܽܘ ܩܰܕܺܝ̈ܫܳܬܳܐ ܘܬܺܒܶܝܠܳܝ̈ܳܬܳܐ ܐܰܝܠܶܝܢ ܕܰܐܟܪܶܙܘ ܠܰܢ ܗܰܝܡܳܢܽܘܬܳܐ ܫܰܪܺܝܪܬܳܐ. ܠܦܰܛܪܝܰܪ̈ܟܽܘ ܐܳܪܬܳܕܳܘܟܣܽܘ: ܠܐܷܦܣܩܽܘ̈ܦܶܐ ܢܦܺܝ̈ܚܰܝ ܡ̣ܶܢ ܐܠܰܗܳܐ: ܠܣܳܥܽܘܪ̈ܶܐ: ܘܰܠܪ̈ܺܝܫܰܝ ܕܰܝܪ̈ܳܬܳܐ: ܘܪ̈ܺܝܫܰܝ ܥܺܕ̈ܳܬܳܐ: ܠܩܰܫܺܝ̈ܫܶܐ ܠܰܡܫܰܡ̈ܫܳܢܶܐ: ܠܐܱܦܘܕ̈ܝܰܩܢܽܘ ܠܰܦܠܰܣ̈ܛܽܘ: ܠܩܳܪ̈ܽܘܝܶܐ: ܠܰܡܙܰܡܪ̈ܳܢܶܐ. ܠܰܡܦܰܫ̈ܩܳܢܶܐ: ܘܠܰܡܦܰܪ̈ܫܰܝ ܩܺܝ̈ܢܳܬܳܐ: ܘܰܠܗܳܢܽܘܢ ܕܥܰܠ ܐܶܣܛܽܘ̈ܢܶܐ ܘܒܶܝܬ ܚܒܽܘܫ̈ܝܶܐ ܕܰܐܪܥܳܐ ܠܳܟ ܡܫܰܒܚܺܝܢ: ܕܒܰܨܠܰܘ̈ܳܬܗܽܘܢ ܘܰܒܬܰܟ̈ܫܦܳܬܗܽܘܢ ܢܶܬܩܰܒ̈ܠܳܢ ܨܠܰܘ̈ܳܬܳܐ ܕܥܰܒܕܰܝ̈ܟ ܗ̇ܳܢܽܘܢ ܕܰܡܩܰܪܒܺܝܢ ܩܕܳܡܰܝܟ ܒܥܶܕܳܢܳܐ ܗܳܢܳܐ: ܘܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܙܽܘܦܶܗ ܕܰܚܢܳܢܳܟ: ܘܢܶܬܡܰܟܰܟ ܒܺܝܫܳܐ ܘܚܰܝܠܶܗ: ܘܢܶܫܬܰܒܰܚ ܘܢܶܬܩܰܠܰܣ ܫܡܳܐ ܕܺܝܠܳܟ ܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ ܘܡ̣ܶܢ ܥܽܘ̈ܡܩܶܐ ܬܰܚܬܳܝ̈ܶܐ: ܢܰܣ̈ܩܳܢ ܬܶܫܒ̈ܚܳܬܳܐ ܕܰܐܪ̈ܥܳܢܶܐ ܘܢܶܬܚ̈ܰܠܛܳܢ ܒܩܽܘ̈ܕܳܫܶܐ ܕܰܫܡܰܝ̈ܳܢܶܐ: ܢܫܰܒܚܳܟ ܝܰܒܫܳܐ ܡ̣ܶܢ ܟܽܠ ܦܶܢ̈ܝܳܢ: ܘܰܢܗܰܠܠܳܟ ܝܰܡܳܐ ܒܓܳܙܪ̈ܳܬܶܗ: ܘܬܶܪܘܰܙ ܐܰܪܥܳܐ ܒܰܡܠܐܴܗ̇: ܘܢܶܬܒܰܪܟܽܘܢ ܦܺܐܪ̈ܶܐ ܘܙܰܪ̈ܥܶܐ ܒܛܰܝܒܽܘܬܳܟ ܘܰܒܪ̈ܰܚܡܰܝܟ: ܘܬܶܬܒܰܪܰܟ ܕܰܝܪܳܐ ܗܳܕܶܐ ܘܥܳܡܽܘܪ̈ܶܝܗ̇: ܘܰܐܬܪܳܐ ܗܳܢܳܐ ܘܝܳܬܒܰܘ̈ܗܝ ܡܗܰܝܡ̈ܢܶܐ: ܘܩܰܒܶܠ ܥܰܠ ܡܰܕܒܚܳܟ ܡܠܺܝܠܐܴ ܘܕܰܠܥܶܠ ܡ̣ܶܢ ܫܡܰܝܳܐ ܩܽܘ̈ܕܳܫܶܐ ܘܦܺܝܪ̈ܡܶܐ ܘܰܨܠܰܘ̈ܳܬܳܐ ܕܺܝܠܰܢ ܚܰܛܳܝ̈ܶܐ ܥܰܒܕܰܝ̈ܟ: ܘܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ ܕܰܫܟܶܒܘ ܒܰܡܫܺܝܚܳܐ ܢܶܫܬܘܶܐ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܰܬܠܺܝܬܳܝܽܘܬܳܐ ܡܫܰܒܰܚܬܳܐ: ܗܳܫܳܐ ܘܰܒܟܽܠܙܒܰܢ܀

ܫܠܡ ܛܟܣܐ ܫܬܝܬܝܐ

 

ܬܘܒ ܛܟܣܐ ܕܚܕ ܒܫܒܐ ܫܒܝܥܝܐ ܕܩܝܡܬܐ

ܩܕܡܝܬ ܨܠܘܬܐ ܕܫܘܪܝܐ

ܚܰܠܶܛ ܡܳܪܝ ܠܰܨܠܰܘ̈ܳܬܳܐ ܕܺܝܠܰܢ ܘܰܠܒܳܥ̈ܘܳܬܰܢ ܥܰܡ ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܦܠܰܚܘ ܒܟܰܪܡܳܟ ܡܶܬܝܰܕܥܳܢܳܐ ܡ̣ܶܢ ܨܰܦܪܳܐ ܠܪܰܡܫܳܐ: ܘܡܺܝܬܘ ܡܶܛܽܠ ܣܰܒܪܶܗ ܕܶܐܘܢܓܶܠܝܽܘܢ ܕܺܝܠܳܟ: ܦܰܢܳܐ ܫ̈ܶܐܠܳܬܰܢ ܒܒܳܥ̈ܘܳܬܳܐ ܕܡܰܘܕܝ̈ܳܢܶܐ ܕܪܰܚܡܽܘܟ ܘܰܐܒ̈ܳܗܳܬܳܐ ܘܡܰܠܦ̈ܳܢܶܐ ܕܰܐܟܪܶܙܘ ܫܪܳܪܳܟ: ܘܰܥܒܶܕ ܪ̈ܰܚܡܰܝܟ ܥܰܠ ܢܰܦ̈ܫܳܬܰܢ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܐܺܝܬܝܳܐ ܡܬܽܘܡܳܝܳܐ ܕܗ̣ܽܘ ܐܺܝܬܰܘܗܝ ܗܘܳܐ: ܘܺܐܝܬܰܘܗܝ ܘܡ̣ܶܢ ܐܺܝܬܽܘܬܶܗ ܠܐܴ ܫܰܢܺܝ: ܕܩܰܕܺܝܡ ܠܟܽܠ ܘܠܰܝܬ ܣܳܟܳܐ ܠܰܡܬܽܘܡܳܝܽܘܬܶܗ: ܠܗ̇ܰܘ ܩܰܕܡܳܝܳܐ ܘܰܐ̱ܚܪܺܢܳܐ ܕܠܐܴ ܡܰܕܪܟܺܝܢ ܠܶܗ ܚܽܘ̈ܫܳܒܶܐ ܕܰܐܪ̈ܥܳܢܳܝܶܐ: ܘܠܐܴ ܒܳܨܶܝܢ ܠܶܗ ܗܰܘ̈ܢܶܐ ܡܰܕܪ̈ܟܳܢܶܐ ܘܠܐܴ ܚܳܙܶܝܢ ܠܶܗ ܫܡܰܝ̈ܳܢܶܐ: ܠܗ̇ܰܘ ܡܛܰܟܣܳܢܳܐ ܕܒܶܪ̈ܝܳܬܳܐ ܕܰܒܚܰܝܠܐܴ ܕܥܳܒܽܘܕܽܘܬܶܗ ܐܰܬܩܶܢ ܠܥܳܠܡܳܐ ܗܳܢܳܐ ܡܶܬܪܰܓܫܳܢܳܐ ܘܰܒܫܳܒܽܘ̈ܥܶܐ ܕܝܰܘ̈ܡܳܬܳܐ ܟܰܠܠܶܗ ܘܰܥܕܰܡܳܐ ܠܫܳܒܽܘܥܳܐ ܐ̱ܚܪܳܝܳܐ ܕܢܶܪܗܰܛ ܫܽܘܕܳܥܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

ܣܕܪܐ

ܡܳܪܝܳܐ ܐܠܰܗܳܐ ܒܳܪܽܘܝܳܐ ܕܟܽܠܗܶܝܢ ܒܶܪ̈ܝܳܬܳܐ: ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܐܴ ܡܶܬܚܰܙ̈ܝܳܢ: ܘܰܐܒܳܐ ܘܡܳܪܳܐ ܕܰܬܪ̈ܰܝܗܽܘܢ ܥܳܠܡ̈ܶܐ: ܘܝܳܨܽܘܦܳܐ ܕܰܐܝܠܶܝܢ ܕܠܐܴ ܐܺܝܬܰܝܗܶܝܢ ܗܘ̈ܰܝ ܠܘܳܬ ܗ̇ܳܝ ܕܢܺܐܬܝ̈ܳܢ ܘܢܶܗܘ̈ܝܳܢ: ܒܳܪܽܘܝܳܐ ܘܰܡܛܰܟܣܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܗ̇ܰܘ ܕܫܽܘܪܳܝܳܐ ܐܳܦ ܫܽܘܠܳܡܳܐ ܠܰܝܬ ܠܶܗ: ܘܠܐܴ ܡܶܬܕܰܪܟܳܐ ܪܰܒܽܘܬ ܝܳܐܝܽܘܬܶܗ ܕܰܒܚܶܟܡܬܳܐ ܐܺܝܬܝܳܝܬܳܐ ܩܰܝܶܡ ܠܟܽܠ ܐܽܘܡܳܢܳܐ ܡܗܺܝܪܳܐ ܕܰܒܪܶܡܙܶܗ ܩܳܡ̈ܝ ܒܶܪ̈ܝܳܬܳܐ: ܘܒܶܫܬܺܝܬܳܝܽܘܬ ܝܰܘ̈ܡܶܐ ܐܰܝܬܺܝ ܐܶܢܶܝܢ ܠܫܽܘܡܠܳܝܳܐ ܓܡܺܝܪܳܐ: ܘܰܒܝܰܘܡܳܐ ܫܒܺܝܥܳܝܳܐ ܚܰܘܺܝ ܕܶܐܬܬܢܺܝܚ ܡ̣ܶܢ ܥܒܳܕܰܘ̈ܗܝ ܟܽܠܗܽܘܢ. ܗ̇ܰܘ ܕܺܐܝܬܰܘܗܝ ܠܐܴ ܠܐܴܐܷ ܘܰܡܚܰܝܠܳܢܳܐ ܕܰܡܚܺܝ̈ܠܐܷ: ܗ̇ܰܘ ܕܰܒܚܶܟܡܰܬ݀ ܛܳܒܽܘܬܶܗ ܝܰܩܰܪ ܠܡܶܢܝܳܢܳܐ ܫܒܺܝܥܳܝܳܐ ܕܒܶܗ ܦܽܘܪܩܳܢܳܐ ܘܰܢܝܳܚܳܐ ܩܰܕܶܡ ܪܫܰܡ. ܒܫܰܒܥܳܐ ܝܰܘ̈ܡܺܝܢ ܨܰܒܶܬ ܨܰܝܳܪܳܐ ܡܗܺܝܪܳܐ ܠܰܒܪܺܝܬܳܐ: ܘܰܒܫܰܒܥܳܐ ܝܰܘ̈ܡܺܝܢ ܣܕܰܪ ܕܽܘܡܣܶܝ̈ܗ̇ ܘܫܰܟܠܶܠ ܘܰܐܩܺܝܡ ܒܶܢܝܳܢܶܝ̈ܗ̇ ܘܒܰܫܒܺܝܥܳܝܽܘܬ ܓܺܝܓܠܐܴ ܡܰܘܙܰܠܬܳܢܺܝܬܳܐ ܟܰܠܶܠ: ܘܰܒܫܰܒܥܳܐ ܚܰܝ̈ܠܐܷ ܐܳܕܫܳܢܳܝ̈ܶܐ ܕܰܐܪܥܳܐ ܠܩܽܘܝܳܡ ܟܽܠܳܗ̇ ܓܒܺܝܠܬܳܐ ܐ̱ܢܳܫܳܝܬܳܐ ܫܰܟܶܢ. ܒܝܰܘܡܳܐ ܫܒܺܝܥܳܝܳܐ ܫܰܠܶܡܘ ܫܡܰܝܳܐ ܘܰܐܪܥܳܐ ܘܰܡܛܰܟܣܽܘܬܳܐ ܕܢܽܘܗܪܳܐ ܣܕܺܝܪܽܘܬܳܐ ܕܟܰܘܟ̈ܒܶܐ ܡܰܦܪܥܳܢܽܘܬܳܐ ܕܟܽܠ ܓܢܶܣ. ܡܰܘܠܕܳܢܽܘܬܳܐ ܕܝܰܡ̈ܡܶܐ. ܒܡܰܪܚܫܳܢܽܘܬܳܐ ܕܥܰܦܪܳܐ. ܒܝܰܘܡܳܐ ܫܒܺܝܥܳܝܳܐ ܐܶܬܬܢܺܝܚ ܒܳܪܽܘܝܳܐ ܘܰܡܬܰܩܢܳܢܳܐ ܕܰܬܪ̈ܰܝܗܽܘܢ ܥܳܠܡ̈ܶܐ. ܐ̱ܪܳܙ ܐܠܰܦܳܐ ܕܫܰܒܥܳܐ ܕܒܶܗ ܡܫܰܪܶܐ ܥܳܠܡܳܐ ܪܽܘܚܳܢܳܐ ܕܰܢܝܳܚܳܐ. ܟܰܕ ܠܝܰܘܡܳܐ ܗ̇ܰܘ ܫܒܺܝܥܳܝܳܐ ܒܰܪܶܟ ܘܩܰܕܶܫ ܡܳܪܝܳܐ ܦܶܚܡܳܐ ܕܰܐܠܦܳܐ ܗ̇ܰܘ ܫܒܺܝܥܳܝܳܐ ܕܒܶܗ ܒܳܛܶܠ ܥܳܠܡܳܐ ܗܳܢܳܐ ܡܶܬܪܰܓܫܳܢܳܐ ܘܡܶܬܬܢܺܝܚ ܘܥܳܐܠܺܝܢ ܥܰܡ̈ܠܐܷ ܘܠܐܱܝ̈ܳܐ ܘܰܒܢܰܝ̈ܳܐ: ܠܰܢܝܳܚܳܐ ܠܐܴ ܡܶܬܦܰܣܩܳܢܳܐ ܘܰܠܩܽܘܕܳܫܳܐ ܗ̇ܰܘ ܡܰܘܦܝܳܢܳܐ. ܩܳܐܶܝܢ ܩܳܛܽܘܠܐܴ ܫܒܺܝܥܳܐܺܝܬ ܐܶܬܬܠܺܝܛ ܘܰܒܕܳܪܳܐ ܫܒܺܝܥܳܝܳܐ ܕܝܽܘܳܒܠ ܘܰܕܬܰܘܒܰܠܩܺܝܢ ܡ̣ܶܢ ܠܰܡܟ ܐܶܬܩܛܶܠ ܘܫܶܠܡܰܬ݀ ܗ̇ܳܝ ܕܩܳܐܶܝܢ ܚܰܕ ܒܫܰܒܥܳܐ ܢܶܬܦܪܰܥ: ܘܠܰܡܟ ܗ̇ܰܘ ܕܰܩܛܰܠ ܠܩ̇ܳܐܶܝܢ ܠܫܰܒܥܺܝܢ ܘܫܰܒܥܳܐ ܕܳܪ̈ܶܐ ܚܛܳܗܶܗ ܐܶܬܥܛܺܝ: ܚܢܽܘܟ ܕܳܪܳܐ ܫܒܺܝܥܳܝܳܐ ܟܰܕ ܫܦܰܪ ܠܐܱܠܳܗܳܐ ܥܢܳܢܳܐ ܗ̇ܳܝ ܕܢܽܘܗܪܳܐ ܚܛܰܦܬܶܗ ܘܰܠܪܰܘܡܳܐ ܕܦܰܪܕܰܝܣܳܐ ܐܶܫܬܰܢܺܝ: ܘܒܰܛܢܳܢܳܐ ܕܣܰܟܠܽܘܬܶܗ ܕܪܺܝܫ ܓܶܢܣܰܢ ܕܶܐܬܪܰܡܪܰܡ: ܘܰܒܥܶܠܬܶܗ ܐܰܪܓܶܫܘ ܟܺܐܢ̈ܶܐ ܘܙܰܕܺܝ̈ܩܶܐ ܕܟܰܕ ܫܳܦܪܺܝܢ ܠܐܱܠܳܗܳܐ ܠܐܱܬܪܗܽܘܢ ܩܰܕܡܳܝܳܐ ܢܶܬܥܰܠܽܘܢ. ܢܽܘܚ ܙܰܕܺܝܩܳܐ ܫܰܒܥܳܐ ܫܰܒܥܳܐ ܡ̣ܶܢ ܕܰܟ̈ܝܳܬܳܐ ܐܶܬܦܩܶܕ ܕܢܰܥܶܠ ܠܩܺܐܒܽܘܬܳܐ ܡܶܛܽܠ ܬܰܪܣܺܝܬܳܐ ܘܶܐܬܶܐܡܰܪ ܠܶܗ ܕܡܶܟܳܐ ܠܫܰܒܥܳܐ ܝܰܘ̈ܡܺܝܢ ܡܰܝܬܶܐ ܐ̱ܢܳܐ ܡܶܛܪܳܐ ܕܰܢܚܰܒܶܠ ܠܐܱܪܥܳܐ: ܘܰܒܝܰܪܚܳܐ ܫܒܺܝܥܳܝܳܐ ܐܶܬܬܢܺܝܚܰܬ݀ ܩܺܐܒܽܘܬܳܐ ܠܥܶܠ ܡ̣ܶܢ ܛܽܘܪ̈ܰܝ ܩܰܪܕܽܘ ܒܝܰܘ̈ܡܰܝ ܦܳܠܳܓ ܫܒܺܝܥܳܝܳܐ: ܘܟܰܕ ܫܰܪܺܝܘ ܒܰܣܪܺܝܩܽܘܬ ܡܰܚܫ̈ܒܳܬܳܐ ܒܒܶܢ̈ܝܳܢ ܡܰܓܕܠܐܴ ܘܰܓܪܰܦ ܐܶܢܽܘܢ ܡܳܡܽܘܠܐܴ ܛܰܘܦܳܢܳܝܳܐ ܘܠܶܫܳܢ̈ܶܐ ܕܟܽܠܳܗ̇ ܐܰܪܥܳܐ ܒܰܠܒܶܠ ܡܳܪܝܳܐ: ܘܡܶܛܽܠ ܗܳܕܶܐ ܐܶܬܩܪܺܝ ܐܰܬܪܳܐ ܗ̇ܰܘ ܒܳܒܠܳܝܳܐ. ܝܰܘܣܶܦ ܢܰܟܦܳܐ ܒܰܕܪܳܚܶܡ ܫܽܘܦܪܳܐ ܕܢܰܟܦܽܘܬܳܐ ܘܒܰܫܒܺܝܥܳܝܽܘܬ ܫܢ̈ܰܝܳܐ ܕܰܓܠܐܴ ܠܶܗ ܕܟܰܦܢܳܐ ܘܣܰܒܥܳܐ ܐܰܩܺܝܡܶܗ ܦܶܪܥܽܘܢ ܡܰܠܟܳܐ ܘܫܰܠܺܝܛܳܐ ܥܰܠ ܟܽܠܳܗ̇ ܡܶܨܪܶܝܢ: ܡܽܘܫܶܐ ܕܳܪܳܐ ܫܒܺܝܥܳܝܳܐ ܠܐܱܒܳܐ ܡ̣ܶܢ ܐܠܰܗܳܐ ܐܶܬܬܰܡܠܰܟ ܕܢܰܘܪܶܬ ܠܰܒ̈ܢܰܝ ܥܰܡܶܗ ܫܒܺܝܥܳܝܽܘܬ ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ. ܝܶܫܽܘܥ ܒܰܪܢܽܘܢ ܫܰܒܥܳܐ ܝܰܘ̈ܡܺܝܢ ܐܶܬܟܰܪܟܳܗ̇ ܠܐܻܝܪܺܝܚܽܘ ܘܰܒܫܽܘܠܳܡ ܫܰܒܥܳܐ ܝܰܘ̈ܡܺܝܢ ܕܺܐܝܬܰܘܗܝ ܝܽܘܡ ܫܰܒܬܳܐ ܘܰܠܫܽܘܪ̈ܶܝܗ̇ ܫܰܒܥܳܐ ܗܓܰܡ: ܘܰܬܠܳܬܺܝܢ ܘܚܰܕ ܡܰܠܟ̈ܶܐ ܩܰܛܶܠ ܒܳܗ̇ ܘܰܠܫܰܒܥܳܐ ܥܰܡ̈ܡܺܝܢ ܕܒܳܗ̇ ܒܦܽܘܡܳܐ ܕܣܰܝܦܳܐ ܓܰܡܰܪ: ܕܰܘܺܝܕ ܒܡܰܠܟܳܐ ܘܰܢܒܺܝܳܐ ܒܰܫܒܰܥ ܓܽܘ̈ܕܶܐ ܙܰܝܰܚ ܠܩܺܐܒܽܘܬܶܗ ܕܡܳܪܝܳܐ ܟܰܕ ܐܰܣܩܳܗ̇ ܡ̣ܶܢ ܠܘܳܬ ܥܽܘܟܳܪ ܐܰܕܽܘܡ ܓܳܬܳܝܳܐ ܕܡ̣ܶܢ ܥܰܡ̈ܡܶܐ ܕܰܒܫܰܒܥܳܐ ܟܳܗ̈ܢܶܐ: ܘܒܰܫܒܰܥ ܩܰܪ̈ܢܳܢ ܦܩܺܝܕ ܗܘܳܐ ܒܢܳܡܽܘܣܳܐ ܕܬܶܙܕܰܝܰܚ: ܫܠܶܝܡܽܘܢ ܡܰܠܟܳܐ ܠܰܫܒܰܥ ܫܢܺܝ̈ܢ ܫܰܡܠܺܝ ܒܶܢܝܳܢܳܐ ܕܗܰܝܟܠܐܴ ܕܰܒܢܳܐ ܠܡܳܪܝܳܐ ܐܠܰܗܳܐ: ܒܶܐܕܪܳܐ ܕܰܙܒܰܢ ܐܰܒܽܘܗܝ ܡ̣ܶܢ ܐܳܪܳܡ ܝܳܒܽܘܣܝܳܐ ܒܛܽܘܪܳܐ ܕܳܐܡܽܘܪ̈ܳܝܶܐ. ܘܪܰܒ ܡ̣ܶܢ ܡܰܫܟܰܢܙܰܒܢܳܐ ܒܰܐܥܦܳܐ ܣܳܡܶܗ: ܒܚܺܝܪܰܐܡ ܡܰܠܟܳܐ ܕܨܽܘܪ ܒܰܪܬ݀ ܥܶܒܪܳܝܬܳܐ ܫܰܟܠܠܶܗ ܘܨܰܒܬܶܗ: ܘܶܐܫܬܺܝܢ ܐܰܡܺܝ̈ܢ ܥܒܰܕ ܐܽܘܪܟܶܗ: ܘܥܶܣܪܺܝܢ ܐܰܡܺܝ̈ܢ ܠܰܦܬܳܝܶܗ: ܘܰܬܠܳܬܺܝܢ ܐܰܡܺܝ̈ܢ ܪܰܘܡܶܗ: ܘܰܒܫܰܒܥܳܐ ܝܰܘ̈ܡܺܝܢ ܚܰܕܶܬ ܘܩܰܕܫܶܗ ܐܰܝܟ ܕܰܦܩܰܕ ܢܳܡܽܘܣܶܗ ܕܡܳܪܝܳܐ. ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܫܒܰܥ ܪ̈ܽܘܚܶܐ ܡܝܰܩܪ̈ܳܬܳܐ ܫܰܡܰܗ ܠܡܰܥܒܕܳܢ̈ܘܳܬܳܐ ܗܳܢܶܝܢ ܕܪܽܘܚܳܐ: ܪܽܘܚܳܐ ܗ̇ܰܘ ܕܝܰܗܒ ܐܠܰܗܳܐ ܠܡܽܘܫܶܐ: ܪܽܘܚܳܐ ܗ̇ܳܝ ܕܓܰܢ̱ܒܳܪܽܘܬܳܐ ܠܝܶܫܽܘܥ ܒܰܪܢܽܘܢ: ܪܽܘܚܳܐ ܕܣܽܘܟܳܠܐܴ ܗ̇ܳܝ ܕܝܰܗܒ ܠܒܰܨܰܠܝܶܐܝܠ ܕܩܰܝܶܡ ܠܡܰܫܟܰܢ ܙܰܒܢܳܐ: ܪܽܘܚܳܐ ܕܕܶܚܠܰܬ ܐܠܰܗܳܐ ܠܕܰܘܺܝܕ ܗ̇ܳܝ ܕܠܐܴ ܢܶܬܶܒ ܒܓܰܘ ܒܰܝܬܝ ܕܥܳܒܶܕ ܢܶܟܠܐܴ: ܪܽܘܚܳܐ ܕܚܶܟܡܬܳܐ ܠܰܫܠܶܝܡܽܘܢ: ܪܽܘܚܳܐ ܕܬܰܪܥܺܝܬܳܐ ܠܐܷܠܺܝܳܐ: ܕܰܩܛܰܠ ܗܘܳܐ ܠܰܢܒܺܝ̈ܰܝ ܒܰܥܠܐܴ: ܪܽܘܚܳܐ ܕܺܝܕܰܥܬܳܐ ܠܝܽܘܚܰܢܳܢ ܡܰܥܡܽܘܕܺܝܬܳܐ ܕܶܐܬܢܰܒܺܝ ܥܰܠ ܡܫܺܝܚܳܐ ܡܳܪܶܗ: ܘܕܳܨ ܠܩܽܘܒܠܶܗ ܟܰܕ ܗ̣ܽܘ ܒܟܰܪܣܳܐ ܕܶܐܡܶܗ ܘܰܒܨܶܒܥܳܐ ܚܰܘܝܶܗ ܠܟܶܢܫܳܐ ܥܰܠ ܝܽܘܪܕܢܳܢ ܢܰܗܪܳܐ: ܘܰܐܘܕܥܶܗ ܕܗܽܘܝܽܘ ܕܫܳܩܶܠ ܚܛܺܝܬܶܗ ܕܥܳܠܡܳܐ ܘܦܳܪܶܩ ܠܶܗ: ܫܰܒܥܳܐ ܝܰܘ̈ܡܺܝܢ ܫܓܰܪ ܗܘܳܐ ܡܰܠܟܳܐ ܢܰܒܽܘܟܰܕܢܳܨܰܪ ܠܐܱܬܽܘܢܳܐ ܘܰܐܪܡܺܝ ܒܶܗ ܬܠܳܬܳܐ ܚܰܣܺܝ̈ܢܶܐ: ܚܰܢܰܢܝܳܐ ܘܥܰܙܪܝܐ ܘܡܺܝܫܳܐܶܝܠ: ܘܠܐܴ ܐܰܟܝܰܬ݀ ܐܶܢܽܘܢ ܢܽܘܪܳܐ: ܫܰܒܥܳܐ ܥܶܕܳܢܺܝ̈ܢ ܚܰܠܶܦ ܐܠܰܗܳܐ ܠܰܕܡܽܘܬܶܗ ܥܰܠ ܕܶܐܬܪܰܡܪܰܡ ܘܰܪܓܶܙ ܐܠܰܗܳܐ ܥܠܰܘܗܝ ܘܰܗܘܳܐ ܬܶܗܪܳܐ ܠܕܳܪ̈ܶܐ ܕܳܐܬܶܝܢ: ܐܠܶܝܳܐ ܢܒܺܝܳܐ ܫܒܰܥ ܙܰܒܢܺܝ̈ܢ ܦܰܩܶܕ ܠܬܰܠܡܺܝܕܶܗ ܕܢܺܐܙܰܠ ܠܐܱܦܰܝ̈ ܝܰܡܳܐ: ܘܰܫܒܰܥ ܙܰܒܢܺܝ̈ܢ ܦܰܩܶܕ ܠܐܷܠܶܝܫܺܥ ܬܰܠܡܺܝܕܶܗ ܕܢܶܣܚܶܐ ܒܡܰܝ̈ܳܐ ܕܝܽܘܪܕܢܳܢ ܠܢܶܥܡܳܢ ܓܰܪܒܳܢܳܐ ܐܳܪܳܡܳܝܳܐ: ܫܒܰܥ ܙܰܒܢܺܝ̈ܢ ܣܚܳܐ ܘܰܥܒܰܕ ܡܰܥܒܰܪܬܳܐ ܒܓܰܘܶܗ ܘܰܚܠܳܦ ܪ̈ܽܘܚܶܐ ܡܝܰܩܪ̈ܳܬܳܐ ܕܫܰܟܶܢ ܐܠܰܗܳܐ ܠܰܒ̈ܢܰܝ ܐܺܝܣܪܳܐܶܝܠ ܫܰܒܥܳܐ ܨܰܠܡܺܝ̈ܢ ܐܰܩܺܝܡܘ ܘܰܣܓܶܕܘ ܠܗܽܘܢ: ܘܒܰܫܒܰܥ ܪ̈ܽܘܚܶܐ ܛܰܥܝ̈ܳܬܳܐ ܥܰܠܶܝ̈ܢ ܐܳܦ ܥܡܰܪ̈ܝ ܒܶܗ. ܘܰܚܢܰܢ ܗܳܟܺܝܠ ܡܳܪܝܳܐ ܥܰܒܕܰܝ̈ܟ ܕܰܒܢܳܓܰܗ ܕܗܳܢܳܐ ܝܰܘܡܳܐ ܫܒܺܝܥܳܝܳܐ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܠܪܰܒܽܘܬܳܟ ܐܰܥܛܰܪܢܰܢ: ܡܦܺܝܣܺܝܢܰܢ ܠܳܟ ܚܢܺܝܓܳܐܺܝܬ ܕܬܶܥܢܶܐ ܠܰܢ ܡܪܰܚܡܳܢܳܐܺܝܬ: ܘܬܰܦܢܶܐ ܠܰܢ ܫ̈ܶܐܠܳܬܰܢ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐܺܝܬ: ܘܰܓܡܽܘܪ ܘܚܰܟܶܡ ܘܢܰܗܰܪ ܠܰܢ ܫܒܺܝܥܳܐܺܝܬ: ܘܨܰܒܶܬ ܟܽܠܶܗ ܒܰܪܢܳܫܰܢ ܓܰܘܳܝܳܐ ܘܒܰܪܳܝܳܐ ܘܰܒܟܽܠ ܛܳܒ̈ܳܢ ܫܰܪܬܰܚ ܠܰܢ ܫܦܺܝܥܳܐܺܝܬ: ܐܰܢܗܰܪ ܠܰܢ ܒܢܽܘܗܪܳܟ: ܐܰܦܪܰܥ ܒܰܢ ܦܺܐܪ̈ܶܐ ܕܬܰܘܕܺܝܬܳܐ: ܐܰܘܠܶܕ ܒܰܢ ܚܽܘ̈ܫܳܒܶܐ ܕܰܡܪܰܥܶܝܢ ܠܳܟ: ܐܰܪܚܶܫ ܒܠܶܒܰܘ̈ܳܬܰܢ ܝܺܕܰܥܬܳܐ ܕܢܳܛܽܘܪܽܘܬ ܦܽܘܩ̈ܕܳܢܰܝܟ ܩܰܕܺܝ̈ܫܶܐ: ܒܰܪܶܟ ܘܩܰܕܶܫ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܕܰܢܡܰܢܰܥ ܠܰܠܡܺܐܢܳܐ ܕܰܢܝܳܚܳܐ: ܘܫܰܘܙܶܒܰܝܢ ܡ̣ܶܢ ܓܙܳܡ̈ܶܐ ܗ̇ܳܢܽܘܢ ܫܒܺܝܥܳܝ̈ܶܐ: ܘܚܰܪܰܪ ܠܫܰܒܥܳܐ ܬܰܪ̈ܥܶܐ ܕܰܒܪܺܝܫܰܢ ܡ̣ܶܢ ܟܽܠ ܛܥܳܡܬܳܐ ܘܪܺܝܚܳܐ ܘܚܰܘܪܳܐ ܙܰܠܺܝܠܐܴ ܕܠܳܟ ܠܐܴ ܫܳܦܪܺܝܢ: ܘܪܽܘܚܳܟ ܩܰܕܺܝܫܳܐ ܠܐܴ ܬܶܣܰܒ ܡܶܢܰܢ: ܘܦܰܨܳܐ ܠܰܢ ܡ̣ܶܢ ܢܽܘܪܳܐ ܕܰܢܛܺܝܪܳܐ ܠܥܳܒ̈ܕܰܝ ܥܰܘܠܐܴ: ܘܫܰܟܶܢ ܠܰܢ ܕܰܒܢܰܦܫܳܐ ܕܟܺܝܬܳܐ ܢܶܫܬܰܘܕܥܳܟ ܕܺܐܝܬܰܝܟ ܐܠܰܗܳܐ ܫܰܪܺܝܪܳܐ. ܘܰܚܢܰܢ ܘܥܰܢܺܝ̈ܕܰܝܢ ܢܶܫܬܘܶܐ ܠܒܽܘܣܳܡܳܐ ܗ̇ܰܘ ܥܕܶܢܳܝܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܫܽܘܒܚܳܐ ܠܳܟ ܡܫܺܝܚܳܐ ܦܺܝܪܡܳܐ ܕܬܰܪܥܽܘܬܳܐ: ܕܰܒܩܶܛܠܳܟ ܐܶܬܒܰܛܰܠ ܡ̣ܶܢ ܒܪܺܝܬܳܐ: ܪܺܝܚ ܙܰܗܡܽܘܬܳܐ ܕܰܦܬܰܟܪ̈ܶܐ ܘܕܶܒܚܳܐ ܕܛܽܘܥܝܰܝ: ܘܰܒܪܺܝܫ ܩܰܝܣܳܐ ܕܰܙܩܺܝܦܳܟ ܐܶܬܢܰܚܰܡܘ ܡܺܝ̈ܬܶܐ ܩܒܺܝܪ̈ܶܐ ܘܰܪܗܶܛܘ ܠܦܰܪܕܰܝܣܳܐ ܗ̇ܰܘ ܥܕܶܢܳܝܳܐ: ܐܰܢ̱ܬ ܡܳܪܝܳܐ ܒܛܰܝܒܽܘܬܳܟ ܒܰܪܶܟ ܐܶܢܽܘܢ ܠܒܶܣ̈ܡܶܐ ܗܳܠܶܝܢ ܕܰܒܗܰܝܟܠܳܟ ܩܰܕܺܝܫܳܐ ܐܶܬܩܰܪܰܒܘ: ܘܰܒܥܺܐܕܳܐ ܕܰܩܝܳܡܬܳܟ ܐܶܬܬܰܥܛܰܪܘ ܘܰܐܝܟܰܢܳܐ ܕܰܒܝܰܕ ܦܺܝܪܡܶܗ ܕܠܶܘܺܝ ܐܶܬܟܠܺܝ ܡܰܘܬܳܢܳܐ ܡ̣ܶܢ ܡܰܫܪܺܝܬܳܐ ܟܠܺܝ ܡܶܢܰܢ ܡܰܘܬܳܢܳܐ ܕܰܚܛܺܝܬܳܐ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ ܗܳܫܳܐ܀

ܚܘܬܡܐ

ܐܶܬܬܢܺܝܚ ܡܳܪܝܳܐ ܐܠܰܗܳܐ ܒܩܳܠܐܴ ܕܰܨܠܰܘ̈ܳܬܰܢ ܘܶܐܬܪܰܥܳܐ ܒܬܰܟܫ̈ܦܳܬܰܢ ܘܒܰܛܶܠ ܡ̣ܶܢ ܐܰܬܪܰܢ ܘܡ̣ܶܢ ܒܰܝܢܳܬܰܢ ܟܽܠ ܢܶܟܝ̈ܳܢܶܐ ܟܽܠ ܚܶܪ̈ܝܳܢܶܐ ܟܽܠ ܦܠܺܝ̈ܓܘܳܬܳܐ ܘܣܶܕ̈ܩܶܐ: ܘܰܐܫܪܳܐ ܒܰܝܢܳܬܰܢ ܚܽܘܒܳܐ ܘܰܐܘܝܽܘܬܳܐ ܘܫܰܝܢܳܐ ܘܪܶܚܡܰܬ݀ ܐ̱ܢܳܫܽܘܬܳܐ: ܐܰܝܟܰܢܳܐ ܕܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܝܰܠܕܳܐ ܠܐܴ ܙܰܒܢܳܝܳܐ ܘܰܡܬܽܘܡܳܝܳܐ ܕܶܐܬܳܐ ܠܡܰܘܠܳܕܳܐ ܐ̱ܢܳܫܳܝܳܐ ܘܣܰܝܒܰܪ ܚܰܫ̈ܶܐ ܘܰܨܠܺܝܒܳܐ ܒܪܶܚܡܰܬ݀ ܐ̱ܢܳܫܽܘܬܶܗ ܗ̇ܰܘ ܪܰܚܡܳܢܳܝܳܐ. ܠܗ̇ܰܘ ܠܐܴ ܚܳܫܽܘܫܳܐ ܘܠܐܴ ܡܳܝܽܘܬܳܐ ܕܰܠܚܰܫܰܝ̈ܢ ܐܰܚܶܫ ܒܚܰܫ̈ܶܐ: ܘܰܠܚܳܫܽܘ̈ܫܶܐ ܚܰܪܰܪ ܡ̣ܶܢ ܚܰܫ̈ܶܐ ܥܕܺܝ̈ܠܐܷ: ܠܗ̇ܰܘ ܠܐܴ ܡܳܝܽܘܬܳܐ ܕܡܺܝܬ ܒܰܒܣܰܪ: ܘܰܠܡܺܝܬܽܘܬܰܢ ܒܡܰܘܬܶܗ ܒܰܛܶܠ ܘܚܰܝ̈ܶܐ ܫܰܟܶܢ ܠܡܳܝܽܘ̈ܬܶܗ ܒܰܚܢܳܢܶܗ: ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܢܫܰܡܬܳܐ ܦܳܪܽܘܩܳܝܬܳܐ ܕܥܳܠܡ̈ܶܐ ܘܪܺܝܚܳܐ ܒܰܣܺܝܡܳܐ ܕܠܐܴ ܡܳܝܽܘܬܽܘܬܳܐ: ܘܟܰܣܝܳܐ ܘܠܐܴ ܡܶܬܚܰܙܝܳܢܳܐ ܕܰܒܦܰܓܪܳܐ ܓܰܠܝܳܐ ܐܶܬܚܙܺܝ: ܠܐܴ ܡܶܬܥܰܩܒܳܢܳܐ ܘܠܐܴ ܡܶܬܒܰܨܝܳܢܳܐ ܕܰܒܦܰܓܪܳܐ ܕܰܢܣܰܒ ܡܶܢܰܢ ܐܶܬܓܫܶܫ: ܝܳܗܶܒ ܡܶܠܬܳܐ ܠܰܡܠܺܝ̈ܠܐܷ ܟܰܕ ܗ̣ܽܘ ܠܐܴ ܡܶܬܡܰܠܰܠ: ܣܰܟ̈ܠܐܷ ܘܗܶܕܝܽܘ̈ܛܶܐ ܒܳܥܶܝܢ ܕܢܶܒܨܽܘܢܳܝܗܝ ܘܠܐܴ ܡܶܬܥܰܩܰܒ: ܘܕܳܪܫܺܝܢ ܒܥܽܘܪ̈ܙܠܰܝܗܽܘܢ ܗܰܦܟܳܝ̈ܶܐ ܘܠܐܴ ܡܶܬܕܪܶܟ: ܕܽܘܡܳܪܳܐ ܕܠܐܴ ܡܳܛܶܝܢ ܠܶܗ ܗܰܘ̈ܢܶܐ ܕܰܒܪ̈ܰܝܳܐ ܕܢܺܐܡܪܽܘܢܳܝܗܝ ܐܰܝܟ ܕܶܐܡܰܪ ܐܶܫܰܥܝܳܐ ܘܠܐܴ ܡܶܫܟܚܺܝܢ ܬܽܘܒ ܡܡ̈ܰܠܠܰܝ ܗܰܦܟܳܝ̈ܳܬܳܐ ܐܰܝܟ ܕܢܰܕܪܟܽܘܢܳܝܗܝ: ܐܠܰܗܳܐ ܕܶܐܬܒܰܪܢܰܫ ܘܗ̣ܽܘ ܟܰܕ ܗ̣ܽܘ: ܡܶܠܬܳܐ ܕܶܐܬܓܰܫܰܡ: ܡܪܰܝܡܳܐ ܕܶܐܬܒܰܣܰܪ ܘܡ̣ܶܢ ܨܶܝܕ ܐܰܒܽܘܗܝ ܠܐܴ ܫܰܢܺܝ: ܥܶܠܳܝܳܐ ܕܬܰܚܬܺܝ ܝܳܬܶܗ ܠܰܙܥܽܘܪܽܘܬܳܐ: ܪܳܡܳܐ ܕܶܐܬܡܰܟܰܟ ܘܶܐܬܗܰܦܰܟ ܥܰܡ ܐܰܪ̈ܥܳܢܶܐ: ܕܚܺܝܠܐܴ ܕܕܰܝܰܪ ܥܰܡ ܥܰܦܪ̈ܳܢܶܐ. ܢܽܘܪܳܐ ܝܳܩܶܕܬܳܐ ܕܶܐܬܠܰܒܟܰܬ݀ ܡ̣ܶܢ ܒܶܣܪ̈ܳܢܶܐ. ܫܰܠܺܝܛܳܐ ܕܶܐܬܬܚܶܕ ܡ̣ܶܢ ܫܺܝ̈ܛܶܐ: ܘܕܰܝܳܢܳܐ ܕܕܰܝ̈ܳܢܶܐ ܕܶܐܬܬܕܺܝܢ ܡ̣ܶܢ ܡܶܕܪ̈ܳܢܶܐ: ܬܰܩܺܝܦܳܐ ܕܶܐܨܛܰܥܰܪ ܡ̣ܶܢ ܡܚܺܝ̈ܠܐܷ: ܫܡܰܝܳܢܳܐ ܕܶܐܬܪܩܶܩ ܠܶܗ ܒܰܐܦܰܘ̈ܗܝ ܡ̣ܶܢ ܬܰܚܽܘ̈ܒܶܐ: ܒܳܪܽܘܝܳܐ ܕܒܶܪ̈ܝܳܬܳܐ ܕܶܐܬܓܰܕܰܦ ܡ̣ܶܢ ܥܒܺܝ̈ܕܶܐ: ܓܳܒܽܘܠܐܴ ܕܥܳܠܡ̈ܶܐ ܘܰܐܠܳܗܳܐ ܕܟܽܠܐܴ ܕܰܡܙܰܝܚܺܝܢ ܘܰܡܒܰܙܚܺܝܢ ܒܶܗ ܣܳܦܪ̈ܶܐ ܘܰܦܪ̈ܺܝܫܶܐ: ܓܰܢ̱ܒܳܪܳܐ ܚܰܝܠܬܳܢܳܐ ܕܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ ܒܪܶܡܙܶܗ ܬܠܶܝ: ܘܥܰܠ ܪܺܝܫ ܩܰܝܣܳܐ ܒܓܳܓܽܘܠܬܳܐ ܐܰܝܟ ܥܳܒܶܕ ܒܺܝ̈ܫܳܬܳܐ ܐܶܬܬܠܺܝ. ܠܐܴ ܡܳܝܽܘܬܳܐ ܐܠܰܗܳܐ ܕܰܠܡܰܘܬܳܐ ܡܡܺܝܬܳܢܳܐ ܝܰܗܒܽܘܗܝ ܡܳܝܽܘ̈ܬܶܐ: ܩܳܛܽܘܠܶܗ ܕܡܰܘܬܳܐ ܝܰܥܢܳܐ ܕܩܰܛܠܽܘܗܝ ܝܽܘ̈ܕܳܝܶܐ: ܡܡܺܝܬܳܢܶܗ ܕܡܰܘܬܳܐ ܘܰܡܣܰܦܩܳܢܳܐ ܕܰܫܝܽܘܠ ܕܶܐܬܩܰܪܰܒ ܠܶܗ ܣܶܓܕ̈ܳܬܳܐ ܡ̣ܶܢ ܫܟܺܝ̈ܒܶܐ ܐܰܝܟ ܐܠܰܗܳܐ. ܢܚܶܬ ܠܗܳܡܳܢ ܗ̇ܳܝ ܕܰܩܒܺܝܪ̈ܶܐ ܐܰܝܟ ܫܺܝܛܳܐ: ܘܕܶܢܚܰܬ݀ ܣܒܰܪܬܶܗ ܬܰܡܳܢ ܐܰܝܟ ܡܳܪܳܐ ܘܫܰܠܺܝܛܳܐ: ܡܺܝܬ ܒܰܦܓܰܪ ܘܰܚܝܳܐ ܒܪܽܘܚ ܟܰܕ ܐܠܰܗܽܘܬܶܗ ܠܐܴ ܐܶܬܦܰܪܫܰܬ݀ ܡܶܢܶܗ ܘܠܐܴ ܡ̣ܶܢ ܢܰܦܫܶܗ ܘܠܐܴ ܡ̣ܶܢ ܦܰܓܪܶܗ: ܘܰܐܟܪܶܙ ܣܒܰܪܬܳܐ ܕܦܽܘܪܩܳܢܳܐ ܘܣܰܒܰܪ ܒܰܫܝܽܘܠ ܢܽܘܚܳܡܳܐ ܠܰܫܟܺܝ̈ܒܶܐ: ܥܰܠ ܒܦܰܓܪܶܗ ܠܘܳܬ ܦܰܓܪ̈ܶܐ ܕܚܰܫܺܝܫܺܝܢ ܗܘܰܘ ܒܩܰܒܪ̈ܶܐ ܘܣܰܒܰܪ ܐܶܢܽܘܢ ܩܝܳܡܬܳܐ ܚܕܰܬܳܐ ܕܗܳܘܝܳܐ ܠܗܽܘܢ: ܘܰܐܠܶܦ ܐܶܢܽܘܢ ܕܦܰܓܪܳܢܳܐܺܝܬ ܗ̇ܳܢܽܘܢ ܡܶܬܢܰܚܡܺܝܢ ܒܝܰܕ ܢܰܦܫܶܗ ܣܥܰܪ ܠܢܰܦ̈ܫܳܬܳܐ ܕܙܰܕܺܝ̈ܩܶܐ ܘܚܰܛܳܝ̈ܶܐ ܕܬܰܡܳܢ ܚܒܺܝ̈ܫܳܢ ܗܘ̈ܰܝ: ܘܶܐܫܬܰܘܕܺܝ ܠܗܶܝܢ ܦܽܘܢܳܝܳܐ ܕܰܠܘܳܬ ܦܰܓܪ̈ܰܝܗܶܝܢ: ܘܫܰܪܰܪ ܐܶܢܶܝ̈ܢ ܥܰܠ ܩܝܳܡܬܳܐ ܕܗܳܘܝܳܐ ܠܦܰܓܪ̈ܶܐ: ܘܢܰܦ̈ܫܳܬܳܐ ܕܰܐܝܠܶܝܢ ܕܗܰܝܡܶܢܘ ܒܶܗ ܥܰܡܶܗ ܐܰܣܶܩ ܢܰܦ̈ܫܳܬܗܽܘܢ ܠܦܰܪܕܰܝܣܳܐ: ܘܥܰܡ ܓܰܝܳܣܳܐ ܒܰܣܶܡ ܐܶܢܶܝܢ. ܘܰܐܝܠܶܝܢ ܕܶܐܬܦܰܠܰܓܘ ܥܠܰܘܗܝ ܐܰܝܟ ܥܝܳܕܳܐ ܕܰܚܙܰܘ ܡ̣ܶܢ ܐܰܪܟܽܘܢܳܐ ܡܰܛܥܝܳܢܳܐ: ܫܒܰܩ ܐܶܢܶܝ̈ܢ ܒܕܽܘܟ̈ܝܳܬܗܽܘܢ: ܘܟܰܕ ܠܚܰܝ̈ܶܐ ܣܰܒܰܪ ܒܰܩܢܽܘܡܶܗ: ܘܺܐܝܬ ܕܗܰܝܡܶܢܘ ܒܶܗ: ܘܺܐܝܬ ܕܠܐܴ ܗܰܝܡܶܢܘ ܒܶܗ: ܘܗܳܟܰܢܳܐ ܒܰܫܝܽܘܠ ܐܰܬܪܳܐ ܕܥܰܢܺܝ̈ܕܶܐ ܡܶܢܗܽܘܢ ܕܶܝܢ ܠܐܴ ܩܰܒܠܽܘܗܝ: ܘܰܐܝܠܶܝܢ ܕܶܝܢ ܕܗܰܝܡܶܢܘ ܒܶܗ ܝܰܗܒ ܠܗܽܘܢ ܫܽܘܠܛܳܢܳܐ ܕܰܒܢܰܝ̈ܳܐ ܕܰܐܠܳܗܳܐ ܢܶܗܘܽܘܢ: ܘܰܠܗ̇ܳܢܽܘܢ ܕܰܟܦܰܪ ܒܶܗ: ܫܰܕܰܪ ܐܶܢܽܘܢ ܠܣܰܘ̈ܦܶܐ ܒܰܪ̈ܳܝܶܐ ܕܢܶܫܬܰܢܩܽܘܢ. ܥܰܠ ܐܰܪܥܳܐ ܐܶܬܚܙܺܝ ܒܦܰܓܪܳܐ ܘܰܣܥܰܪ ܚܰܝ̈ܠܐܷ ܘܰܬܡܺܝ̈ܗܳܬܳܐ: ܘܒܰܫܝܽܘܠ ܐܶܬܚܙܺܝ ܒܝܰܕ ܢܰܦܫܶܗ ܟܰܕ ܡܰܢܗܰܪ ܗܘܳܐ ܒܢܽܘܗܪܶܗ ܠܰܫܟܺܝ̈ܒܶܐ. ܥܰܠ ܐܰܪܥܳܐ ܙܟܳܐ ܘܫܰܦܶܠ ܠܡܳܪ̈ܽܘܕܶܐ: ܘܒܰܫܝܽܘܠ ܫܪܳܐ ܫܽܘܠܛܳܢܶܗ ܕܡܰܘܬܳܐ ܘܰܦܣܰܩ ܢܺܝܪܶܗ ܕܳܐܟܶܠܩܰܪܨܳܐ: ܥܰܠ ܐܰܪܥܳܐ ܕܶܢܚܰܬ݀ ܡܰܠܦܳܢܽܘܬܶܗ ܘܰܦܬܰܚ ܡܰܕܥܳܐ ܕܰܥܘܺܝܪ̈ܰܝ ܠܶܒܳܐ: ܘܰܫܪܳܐ ܠܐܢܳܫܽܘܬܳܐ ܡ̣ܶܢ ܩܛܺܝܪܶܗ ܕܣܳܛܳܢܳܐ. ܘܒܰܫܝܽܘܠ ܕܶܢܚܰܬ݀ ܟܳܪܽܘܙܽܘܬܶܗ: ܘܢܽܘܚܳܡܳܐ ܘܚܰܝ̈ܶܐ ܣܰܒܰܪ ܠܰܫܟܺܝ̈ܒܶܐ: ܘܰܛܥܶܡ ܡܰܘܬܳܐ ܐܰܝܟ ܫܰܪܟܳܐ ܕܺܝܠܺܝ̈ܕܶܐ ܘܦܽܘܪܫܳܢܳܐ ܕܢܰܦܫܳܐ ܡ̣ܶܢ ܦܰܓܪܳܐ ܟܰܕ ܠܐܱܒܳܐ ܝܳܗܒܳܗ̇: ܐܶܠܐܴ ܐܠܰܗܽܘܬܶܗ ܠܐܴ ܣܳܟ ܐܶܬܦܰܪܫܰܬ݀ ܠܐܴ ܡ̣ܶܢ ܢܰܦܫܶܗ ܘܠܐܴ ܡ̣ܶܢ ܦܰܓܪܶܗ. ܚܕܳܐ ܗܘܳܬ ܚܕܳܝܽܘܬܳܐ ܠܐܴ ܚܒܺܝܟܬܳܐ: ܘܠܐܴ ܡܶܣܬܰܕܩܳܢܺܝܬܳܐ ܗ̇ܳܝ ܕܰܗܘܳܬ݀ ܒܡܰܪܒܥܳܐ ܒܬܽܘܠܳܝܳܐ ܘܺܐܝܬܶܝܗ̇ ܕܠܐܴ ܫܽܘܓܢܳܝܳܐ ܘܡܽܘܙܳܓܳܐ: ܚܰܕ ܐܺܝܬܰܘܗܝ ܗܘܳܐ ܩܢܽܘܡܳܐ ܕܶܐܬܒܰܣܰܪ ܘܚܰܫ ܘܶܐܨܛܠܶܒ: ܘܗܽܘܝܽܘ ܕܰܢܚܶܬ ܠܰܫܝܽܘܠ ܘܰܐܚܪܒܳܗ̇ ܘܰܠܓܰܙ̈ܶܐ ܕܺܝܠܳܗ̇ ܚܰܠܶܨ. ܘܗ̣ܽܘ ܟܰܕ ܗ̣ܽܘ ܕܩܳܡ ܡ̣ܶܢ ܩܰܒܪܳܐ ܟܰܕ ܠܐܴ ܫܒܰܩ ܠܦܰܓܪܶܗ ܕܢܶܒܠܐܷ ܒܰܫܝܽܘܠ ܐܰܝܟ ܡܶܠܬܳܐ ܢܒܺܝܳܝܬܳܐ ܘܩܳܡ ܡ̣ܶܢ ܒܶܝܬ ܡܺܝ̈ܬܶܐ ܘܰܗܘܳܐ ܪܺܝܫܺܝܬܳܐ ܕܕܰܡ̈ܟܶܐ. ܘܟܰܕ ܩܳܡ ܐܰܩܺܝܡ ܠܦܰܓܪܳܐ ܕܰܢܣܰܒ ܡܶܢܰܢ ܠܰܘ ܡܶܬܚܰܒܠܳܢܳܐ: ܐܶܠܐܴ ܠܐܴ ܡܶܬܚܰܒܠܳܢܳܐ. ܚܕܺܝܘ ܙܳܩܽܘ̈ܦܶܐ ܒܩܶܛܠܶܗ: ܘܕܳܨܰܬ݀ ܫܝܽܘܠ ܒܡܰܥܠܬܶܗ: ܢܩܰܫܘ ܬܰܥ̈ܠܐܷ ܫܺܝ̈ܛܶܐ ܟܰܦܳܐ ܒܝܽܘܡ ܙܩܺܝܦܽܘܬܶܗ: ܘܗܳܡܳܢ ܦܶܬܚܰܬ݀ ܠܶܗ ܬܰܪ̈ܥܶܝܗ̇ ܠܰܡܩܰܒܠܽܘܬܶܗ: ܣܳܦܪ̈ܰܝ ܥܰܡܳܐ ܒܰܙ ܚܽܘܒܶܗ: ܘܰܫܟܺܝ̈ܒܶܐ ܕܳܨܘ ܗܘܰܘ ܠܩܽܘܒܠܶܗ: ܟܺܐܢ̈ܶܐ ܒܪܶܟܘ ܘܰܣܓܶܕܘ ܠܐܻܝܩܳܪܶܗ: ܙܰܕܺܝ̈ܩܶܐ ܝܰܒܶܒܘ ܬܶܫܒܽܘܚܬܶܗ. ܥܓܺܝ̈ܢܰܝ ܚܶܦܪܳܐ ܗܰܠܶܠܘ ܬܰܘܕܺܝܬܶܗ: ܥܺܝܪ̈ܶܐ ܢܚܶܬܘ ܠܰܫܠܳܡܶܗ: ܡܰܠܐܱܟ̈ܶܐ ܦܬܰܚܘ ܬܪܰܥ ܩܰܒܪܶܗ ܫܡܰܝ̈ܳܢܶܐ ܩܰܠܶܣܘ ܠܢܽܘܚܳܡܶܗ ܕܡ̣ܶܢ ܩܰܒܪܳܐ: ܪ̈ܽܘܚܳܢܶܐ ܐܰܟܪܶܙܘ ܙܳܟܽܘܬܶܗ ܘܰܫܠܺܝ̈ܚܶܐ ܪܦܰܣܘ ܒܙܰܘܚܶܗ: ܬܰܠܡܺܝ̈ܕܶܐ ܨܳܒܘ ܡ̣ܶܢ ܟܡܺܐܢ̈ܶܐ: ܙܳܩܽܘ̈ܦܶܐ ܐܶܬܒܰܕܰܪܘ ܒܪܽܘܡܪܳܡܶܗ: ܘܰܚܢܰܢ ܡܳܪܝ ܠܰܩܝܳܡܬܳܟ ܒܩ̈ܳܠܐܷ ܫܒܺܝ̈ܚܶܐ ܙܰܝܰܚܢܰܢ: ܘܥܶܛܪܳܐ ܕܒܶܣ̈ܡܶܐ ܗܰܢܺܝ̈ܶܐܐ ܠܡܳܪܽܘܬܳܟ ܩܰܪܶܒܢܰܢ: ܐܶܬܪܰܥܳܐ ܠܚܰܝܳܒܽܘܬܰܢ: ܒܥܺܝ ܘܶܐܫܟܰܚ ܠܐܱܒܺܝܕܽܘܬܰܢ: ܫܒܽܘܩ ܘܰܥܛܺܝ ܚܰܘ̈ܒܰܝܢ ܘܣܰܟܠܘ̈ܳܬܰܢ: ܫܰܪܬܰܚ ܐܰܕܪ̈ܳܬܰܢ ܘܟܰܪ̈ܡܰܝܢ ܘܡܰܥܨܪ̈ܝܳܬܰܢ ܘܰܒܟܽܠܗܶܝܢ ܛܳܒ̈ܳܬܳܐ ܐܰܥܬܰܪ ܠܰܢ: ܘܰܐܢܺܝܚ ܢܰܦ̈ܫܳܬܰܢ ܘܪ̈ܽܘܚܳܬܰܢ ܘܰܕܥܰܢܺܝ̈ܕܰܝܢ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܡܫܰܡܠܝܳܢܳܐ ܘܓܳܡܽܘܪܳܐ ܕܟܽܠ ܐ̱ܪ̈ܳܙܺܝܢ ܕܰܒܚܰܝܠܐܴ ܓܳܡܽܘܪܳܐ ܕܨܶܒܝܳܢܶܗ ܓܡܰܪ ܘܚܰܬܶܡ ܐܰܝܟ ܝܳܕܰܥ ܟܰܣ̈ܝܳܬܳܐ ܟܽܠܗܶܝܢ ܠܰܫܒܺܝܥܳܝܽܘܬ ܝܰܘ̈ܡܶܐ ܕܰܗܘܳܝܳܐ ܕܰܒܪܺܝܬܳܐ ܘܦܰܪܩܳܗ̇ ܡ̣ܶܢ ܥܰܒܕܽܘܬܳܐ ܣܳܛܳܢܳܝܬܳܐ. ܠܗ̇ܰܘ ܒܳܪܽܘܝܳܐ ܘܰܡܬܰܩܢܳܢܳܐ ܚܰܟܺܝܡܳܐ ܕܰܒܫܳܒܽܘܥܳܐ ܫܒܺܝܥܳܝܳܐ ܕܰܐܠܦܰܝ̈ܳܐ ܐܰܝܟ ܕܰܝܳܢܳܐ ܟܺܐܢܳܐ ܐܳܬܳܐ ܒܡܶܬܥܰܛܦܳܢܽܘܬܳܐ ܒܶܣܪܳܢܳܝܬܳܐ ܠܰܡܕܳܢ ܟܽܠܗܶܝܢ ܫܰܪ̈ܒܳܬܳܐ ܘܰܠܟܳܘܐܳܪܳܐ ܘܒܶܗܬܬܳܐ ܕܰܐܝܠܶܝܢ ܕܠܐܴ ܗܰܝܡܶܢܘ ܒܶܗ: ܕܠܶܗ ܝܳܐܶܐ܀

ܣܕܪܐ

ܐܠܰܗ ܐܠܰܗܺܝ̈ܢ ܘܡܳܪܶܐ ܡܳܪ̈ܰܘܳܢ: ܫܰܠܺܝܛܳܐ ܕܫܰܠܺܝ̈ܛܳܢܶܐ: ܘܡܰܠܟܳܐ ܕܟܽܠ ܡܰܠܟܺܝ̈ܢ: ܕܰܝܳܢܳܐ ܕܕܰܝ̈ܳܢܶܐ ܘܰܕܚܺܝܠܐܴ ܥܰܠ ܟܽܠ ܕܳܚܠܺܝ̈ܢ: ܕܰܒܪܶܡܙܳܐ ܪܰܒܳܐ ܕܥܳܒܽܘܕܽܘܬܶܗ ܥܒܰܕ ܫܽܘܡܠܳܝܳܐ ܓܡܺܝܪܳܐ: ܘܣܽܘܝܳܟܳܐ ܡܫܰܪܪܳܐ: ܒܪܺܝܬܳܐ ܗܽܘܠܳܢܳܝܬܳܐ ܕܬܺܐܬܶܐ ܠܰܗܘܳܝܳܐ. ܒܫܳܒܽܘܥܳܐ ܗܳܢܳܐ ܕܝܰܘ̈ܡܳܬܳܐ ܒܢܳܐ ܘܰܐܩܺܝܡ ܐܶܢܽܘܢ ܠܫܽܘܪ̈ܶܝܗ̇ ܕܥܰܠ ܫܒܺܝܥܳܝܽܘܬܳܐ ܕܡܶܢܝ̈ܳܢܶܐ ܬܪܰܗܶܛ ܒܣܰܪܢܳܐ ܫܰܒܥܳܢܝܳܐ ܠܫܳܒܽܘ̈ܥܶܐ ܕܝܰܘ̈ܡܶܐ ܠܰܚܶܡ: ܥܕܰܡܳܐ ܫܳܒܽܘܥܳܐ ܫܰܒܥܳܢܝܳܐ ܕܰܫܢܰܝ̈ܳܐ ܐܰܘܟܺܝܬ ܕܰܐܠܦ̈ܶܐ. ܒܢܰܓܺܝܪܽܘܬ ܡܰܘܙܰܠܬܳܐ ܘܡܶܬܗܰܦܟܳܢܽܘܬܳܐ ܘܡܶܫܬܰܘܫܛܳܢܽܘܬܳܐ ܕܡ̣ܶܢ ܚܰܕ ܠܚܰܕ ܒܗܶܦܟܳܐ ܒܶܣܬܰܪܢܳܝܳܐ. ܠܫܳܒܽܘܥܳܐ ܫܰܒܥܺܝܢܳܝܳܐ ܕܰܫܢܰܝ̈ܳܐ ܟܰܕ ܒܰܫܒܺܝܥܽܘܬ ܕܳܪ̈ܶܐ ܟܕܰܢ ܘܦܰܚܶܡ: ܒܕܳܪܳܐ ܩܰܕܡܳܝܳܐ ܠܰܕܒܶܝܬ ܐܳܕܳܡ ܘܫܺܝܬ ܒܰܡܬܺܝܚܽܘܬ ܚܰܝ̈ܶܐ: ܘܒܰܬܪܰܝܳܢܳܐ ܠܰܕܒܶܝܬ ܢܽܘܚ  ܒܚܰܟܺܝܡܽܘܬ ܦܽܘܪܢܳܣܳܐ: ܒܰܬܠܺܝܬܳܝܳܐ ܠܰܕܒܶܝܬ ܐܰܒܪܳܗܳܡ ܒܰܛܢܳܢܳܐ ܚܰܪܺܝܦܳܐ: ܘܒܰܪܒܺܝܥܳܝܳܐ ܠܰܕܒܶܝܬ ܡܽܘܫܶܐ ܒܢܰܗܺܝܪܽܘܬ ܓܶܠܝ̈ܳܢܶܐ ܘܨܶܡ̈ܚܶܐ ܢܒܺܝ̈ܳܝܶܐ ܒܰܚܡܺܝܫܳܝܳܐ ܠܰܕܒܶܝܬ ܩܰܝܳܦܳܐ ܒܗܽܘ̈ܦܳܟܶܐ ܠܐܘܠܝ̈ܳܝܶܐ:  ܒܰܫܬܺܝܬܳܝܳܐ ܠܰܕܒܶܝܬ ܡܳܪܰܢ ܒܰܡܗܺܝܪܽܘܬ ܝܺܕܰܥܬܳܐ ܢܰܦܫܳܢܳܝܬܳܐ: ܘܒܰܫܒܺܝܥܳܝܳܐ ܕܶܝܢ ܠܕܳܪܰܢ ܐ̱ܚܪܳܝܳܐ ܕܩܰܪܺܝܒ ܠܐܱܪܥܳܐ: ܒܫܽܘܠܳܡ ܫܳܒܽܘܥܳܐ ܕܝܰܘ̈ܡܳܬܳܐ ܐܶܬܬܢܺܝܚ ܐܰܒܳܐ ܡ̣ܶܢ ܟܽܠܗܽܘܢ ܥܒܳܕ̈ܰܘܗܝ: ܘܰܒܫܽܘܠܳܡ ܫܳܒܽܘܥܳܐ ܕܝܰܘ̈ܡܳܬܳܐ: ܐܶܬܬܢܺܝܚ ܒܪܳܐ ܡ̣ܶܢ ܟܽܠܗܽܘܢ ܚܰܫ̈ܶܐ ܘܽܐܘܠܨ̈ܳܢܶܐ ܕܰܐܦܓܰܥܘ ܒܶܗ ܝܽܘ̈ܕܳܝܶܐ: ܒܫܳܒܽܘܥܳܐ ܩܰܕܡܳܝܳܐ ܡܰܘܕܶܐ ܝܽܘܕܳܝܳܐ ܕܰܠܐܻܝ ܐܰܒܳܐ ܟܰܕ ܠܐܴ ܠܐܴܐܷ: ܐܳܦ ܒܫܳܒܽܘܥܳܐ ܬܪܰܝܳܢܳܐ ܟܳܦܰܪ ܝܽܘܕܳܝܳܐ ܘܠܐܴ ܡܰܘܕܶܐ ܕܰܠܐܻܝ ܒܪܳܐ ܝܺܚܺܝܕܳܝܳܐ ܗ̇ܰܘ ܕܶܐܬܓܰܫܰܡ ܡܶܛܽܠ ܦܽܘܪܩܳܢܶܗ: ܠܐܻܝ ܒܪܳܐ ܡܫܺܝܚܳܐ ܟܰܕ ܬܠܐܱܘܽܘܗܝ ܒܰܙܩܺܝܦܳܐ: ܘܝܽܘܕܳܝܳܐ ܟܳܦܽܘܪܳܐ ܠܐܴ ܡܰܘܕܶܐ ܕܰܒܪܳܐ ܟܝܳܢܳܝܰܐ ܗ̱̇ܘ ܕܰܐܒܳܐ ܫܰܪܺܝܪܳܐ. ܒܰܫܒܺܝܥܳܝܳܐ ܥܰܠ ܠܰܢܝܳܚܬܳܐ ܗ̇ܰܘ ܠܐܴ ܠܐܴܐܷ: ܘܛܽܘܦܣܳܐ ܚܰܘܺܝ ܕܡܶܛܽܠ ܦܽܘܪܩܳܢܶܗ ܕܳܐܕܳܡ ܠܐܻܝ ܡܳܪܶܗ ܘܶܐܬܬܢܺܝܚ: ܘܰܒܫܽܘܠܳܡ ܫܰܒܥܳܐ ܫܳܒܽܘ̈ܥܶܐ ܡܶܫܬܪܶܐ ܥܳܠܡܳܐ ܘܥܳܐܠܺܝܢ ܒܢܰܝ̈ܢܳܫܳܐ ܠܰܢܝܳܚܬܳܐ: ܒܫܳܒܽܘܥܳܐ ܕܰܩܕܳܡ ܗܳܢܳܐ ܝܰܘܣܶܦ ܫ̇ܳܐܶܠ ܦܰܓܪܶܗ ܘܦܺܝܠܰܛܳܘܣ ܝܳܗ̇ܶܒ ܠܶܗ: ܘܢܺܝܩܳܘܕܺܝܡܳܘܣ ܡܚܰܢܶܛ ܠܶܗ ܘܰܒܩܰܒܪܳܐ ܚܰܕܬܳܐ ܢܩܺܝܪ ܒܫܽܘܥܳܐ ܣܳܝܡܺܝܢ ܠܶܗ. ܒܫܳܒܽܘܥܳܐ ܕܰܩܕܳܡ ܗܳܢܳܐ ܫܠܺܝ̈ܚܶܐ ܩܰܕܺܝ̈ܫܶܐ ܒܰܟܡܺܐܢ̈ܶܐ ܡܶܬܛܰܫܶܝܢ ܗܘܰܘ: ܘܢܶܫ̈ܶܐ ܒܶܐܒܠܐܴ ܝܳܬܒ̈ܳܢ ܗܘ̈ܰܝ ܘܒܶܣ̈ܡܶܐ ܘܗܶܪ̈ܽܘܡܶܐ ܛܰܝ̈ܶܒܝ ܗܘ̈ܰܝ ܒܫܳܒܽܘܥܳܐ ܕܰܩܕܳܡ ܗܳܢܳܐ ܡܰܪܝܰܡ ܝܳܠܕܰܬ݀ ܐܠܰܗܳܐ ܘܚܰܒܪ̈ܳܬܳܗ̇ ܒܶܝܬ ܒܳܟܶܐ ܥܳܒ̈ܕܳܢ ܗܘ̈ܰܝ ܘܟܳܗ̈ܢܶܐ ܘܣܳܦܪ̈ܶܐ ܘܰܦܪ̈ܺܝܫܶܐ ܠܘܳܬ ܦܺܝܠܰܛܳܘܣ ܡܶܬܟܰܢܫܺܝܢ ܗܘܰܘ: ܥܰܠ ܢܳܛܽܘܪܽܘܬ ܩܰܒܪܳܐ ܡܶܬܡܰܠܟܺܝܢ ܗܘܰܘ: ܘܡ̣ܶܢ ܢܽܘܚܳܡܶܗ ܕܳܚܠܺܝܢ ܘܡܶܣܬܰܪܕܺܝܢ ܗܘܰܘ: ܘܰܒܗܳܢܳܐ ܫܳܒܽܘܥܳܐ ܕܝܰܘܡܳܢ ܡܰܘܕܶܐ ܝܰܘܣܶܦ ܕܡ̣ܶܢ ܪܳܡܬܳܐ ܘܰܡܫܰܒܰܚ ܢܺܝܩܳܘܕܺܝܡܳܘܣ ܘܡܶܬܕܰܡܰܪ ܦܺܝܠܰܛܳܘܣ ܘܗܳܘܶܝܢ ܫܰܘ̈ܬܳܦܶܐ ܘܚܰܒܪ̈ܶܐ ܠܓܽܘܕܳܐ ܕܬܰܠܡܺܝ̈ܕܶܐ ܒܫܳܒܽܘܥܳܐ ܗܳܢܳܐ ܕܝܰܘܡܳܢ ܫܠܺܝ̈ܚܶܐ ܕܠܐܴ ܕܶܚܠܐܴ ܡ̣ܶܢ ܟܡܺܐܢܰܝ̈ܗܽܘܢ ܦܳܢܶܝܢ: ܘܠܰܩܝܳܡܬܳܐ ܬܠܺܝܬܳܐܝܰܬ݀ ܝܰܘ̈ܡܶܐ ܕܡܳܪܗܽܘܢ ܡܒܰܕܩܺܝܢ ܘܪܶܗܛܳܐ ܚܺܝܨܳܐ ܠܳܒܟܺܝܢ ܘܰܓܠܐܷ ܪܺܝܫܗܽܘܢ ܘܠܐܴ ܣܳܟ ܡܰܪܟܢܺܝܢ: ܒܫܳܒܽܘܥܳܐ ܗܳܢܳܐ ܕܝܰܘܡܳܢ ܝܳܠܕܰܬ݀ ܐܠܰܗܳܐ ܘܚܰܒܪ̈ܳܬܳܗ̇ ܕܰܠܩܰܒܪܳܐ ܒܶܝܬ ܓܢܽܘܢܳܐ ܕܚܰܝ̈ܶܐ ܚܰܕ̈ܬܶܐ ܡܶܬܡܰܢ̈ܥܳܢ ܘܰܒܢܽܘܚܳܡܶܗ ܡܶܫܬܰܪܪ̈ܳܢ: ܘܣܰܒܪܳܐ ܕܚܰܝ̈ܶܐ ܘܚܰܕ̈ܘܳܬܳܐ ܩܳܢ̈ܝܳܢ. ܒܫܳܒܽܘܥܳܐ ܗܳܢܳܐ ܕܝܰܘܡܳܢ ܪ̈ܰܒܰܝ ܟܳܗ̈ܢܶܐ ܘܣܳܦܪ̈ܶܐ ܕܒܳܗܬܺܝܢ: ܘܢܳܛܽܘܪ̈ܶܐ ܕܫܽܘܚܕܳܐ ܢܳܣܒܺܝܢ: ܘܠܰܩܝܳܡܬܳܐ ܡܕܰܓܠܺܝܢ: ܘܰܚܠܳܦ ܫܽܘܒܗܳܪܗܽܘܢ ܟܡܺܝܪܽܘܬܳܐ ܥܛܺܝܦܺܝܢ: ܒܫܰܒܬܳܐ ܕܰܩܕܳܡ ܗܳܕܶܐ ܡܰܠܐܱܟ̈ܶܐ ܐܰܝܟ ܥܰܒܕ̈ܶܐ ܠܐܻܝܩܳܪܳܐ ܘܰܠܬܶܫܡܫܬܳܐ ܕܡܳܪܗܽܘܢ ܡܶܬܘܰܥܕܺܝܢ: ܘܥܰܠ ܩܽܘܠܳܣܶܗ ܕܰܒܪܳܐ ܡܶܬܚܰܦܛܺܝܢ ܘܡܰܢܗܪܺܝܢ. ܩܰܕܺܝܫܰܬ ܐܠܰܗܳܐ: ܩܰܕܺܝܫܰܬ ܚܰܝܠܬܳܢܳܐ: ܩܰܕܺܝܫܰܬ ܠܐܴ ܡܳܝܽܘܬܳܐ: ܒܫܳܥܬܳܐ ܕܩܺܒܽܘܬܶܗ ܡܙܰܡܪܺܝܢ ܐܳܦ ܡܢܰܨܪܺܝܢ: ܘܰܠܗ̇ܳܝ ܕܶܐܨܛܠܶܒ ܚܠܳܦܰܝܢ ܝܰܘܣܶܦ ܘܢܺܝܩܳܘܕܺܝܡܳܘܣ ܘܡܰܘܣܦܺܝܢ ܕܰܚܠܳܦ ܒܢܰܝ̈ܢܳܫܳܐ ܐܶܨܛܠܶܒ ܘܠܰܘ ܚܠܳܦ ܡܰܠܐܱܟ̈ܶܐ. ܒܫܽܘܠܳܡ ܫܳܒܽܘܥܳܐ ܕܰܩܝܳܡܬܳܟ ܡܫܺܝܚܳܐ ܐܠܰܗܰܢ ܡܶܬܟܰܫܦܺܝܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܬܰܫܘܶܐ ܠܰܢ ܒܛܰܝܒܽܘܬܳܟ ܫܦܺܝܥܬܳܐ ܦܽܘܢܳܝܳܐ ܕܫ̈ܶܐܠܳܬܰܢ ܫܰܦܺܝܪ̈ܳܬܳܐ: ܚܰܝ̈ܶܐ ܡܬܺܝ̈ܚܶܐ ܘܪ̈ܰܚܺܝܩܰܝ ܡ̣ܶܢ ܢܶܟܝ̈ܳܢܶܐ. ܝܺܕܰܥܬܳܐ ܡܫܰܡܠܳܝܬܳܐ ܘܰܛܢܳܢܳܐ ܡܩܰܠܣܳܐ: ܡܰܨܡܚܽܘܬ ܕܽܘܒܳܪ̈ܶܐ ܕܟܰܝ̈ܳܐ ܡܶܬܪܰܚܩܳܢܽܘܬܳܐ ܕܡ̣ܶܢ ܟܽܠܗܶܝܢ ܒܺܝ̈ܫܳܬܳܐ: ܘܢܶܬܢܰܗܰܪ ܒܝܽܘܠܦܳܢܰܝ̈ܟ ܡܰܚ̈ܝܳܢܶܐ: ܘܢܶܬܒܰܝܰܐܐ ܒܡܳܪܽܘܬܳܟ ܘܢܰܣܠܐܷ ܫܳܝܽܘܛܽܘܬ ܢܳܡܽܘܣܳܐ ܕܺܝܠܳܟ: ܘܢܶܕܚܽܘܩ ܠܰܡܫܰܩ̈ܠܰܝ ܥܰܠ ܦܽܘܩܕܳܢܰܝ̈ܟ: ܘܢܰܚܶܒ ܘܰܢܝܰܩܰܪ ܠܰܪ̈ܚܽܘܡܰܝܟ: ܘܢܶܓܥܽܘܪ ܕܶܝܢ ܒܰܐܝܠܶܝܢ ܕܕܳܝܫܺܝܢ ܩܳܢܽܘ̈ܢܰܝܟ: ܘܢܶܕܥܳܟ ܕܰܐܢ̱ܬ ܐܺܝܬܰܝܟ ܐܠܰܗܳܐ ܫܰܪܺܝܪܳܐ: ܘܢܶܬܦܰܨܶܐ ܡ̣ܶܢ ܡܳܡܽܘܠܐܴ ܛܰܘܦܳܢܝܳܐ ܕܰܚܛܺܝܬܳܐ ܘܢܶܫܬܰܘܙܰܒ ܡ̣ܶܢ ܕܶܚܠܰܬ݀ ܫܺܐܕ̈ܶܐ: ܘܢܶܬܚܰܪܰܪ ܡ̣ܶܢ ܚܰܫ̈ܶܐ ܒܺܝ̈ܫܶܐ: ܘܢܶܬܚܰܟܰܡ ܒܝܽܘܠܦܳܢܰܝ̈ܟ ܡܰܚ̈ܝܳܢܶܐ: ܘܢܰܘܕܶܐ ܠܳܟ ܕܰܐܢ̱ܬ ܐܺܝܬܰܝܟ ܢܝ̇ܳܚܬܳܐ ܕܰܡܛܰܪܦܺܝܢ: ܘܥܰܡ ܝܰܘܣܶܦ ܘܢܺܝܩܳܘܕܺܝܡܳܘܣ ܘܦܺܝܠܰܛܳܘܣ ܢܶܬܬܰܠܡܰܕ ܠܰܣܒܰܪܬܳܟ: ܘܥܰܡ ܢܶܫ̈ܶܐ ܢܰܟ̈ܦܳܬܳܐ ܢܝܰܩܰܪ ܠܰܩܒܽܘܪܬܳܟ: ܘܥܰܡ ܬܰܠܡܺܝ̈ܕܶܐ ܢܶܪܗܰܛ ܘܢܶܚܙܶܐ ܩܝܳܡܬܳܟ. ܘܥܰܡ ܡܰܠܐܱܟ̈ܶܐ ܢܙܰܡܰܪ ܬܶܫܒ̈ܚܳܬܳܟ: ܘܗܰܒ ܠܰܢ ܒܝܰܘܡܳܐ ܗܳܢܳܐ ܚܽܘܒܳܐ ܘܰܐܘܝܽܘܬܳܐ: ܘܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܘܰܢܝܳܚܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ܀

 

ܨܠܘܬܐ ܕܫܘܪܝܐ ܕܨܦܪܐ

ܨܒܺܝ ܐܰܢܗܰܪ ܡܳܪܝ ܡܰܕ̈ܥܶܐ ܕܪ̈ܶܥܝܳܢܰܝܢ ܕܢܶܬܒܰܩܶܐ ܐܺܝܡܳܡܳܐ ܘܠܺܠܝܳܐ ܒܬܶܕܡܪ̈ܳܬܳܐ ܕܰܒܢܳܡܽܘ̈ܣܰܝܟ ܘܗܰܒ ܠܰܢ ܕܰܒܫܽܘܠܳܡ ܫܳܒܽܘܥܺܝܢ ܢܶܫܦܰܪ ܠܳܟ ܟܰܕ ܡܰܨܡܚܺܝܢܰܢ ܒܙܰܠܓ̈ܶܐ ܕܰܩܝܳܡܬܳܟ: ܘܟܽܠܰܢ ܡܶܬܦܰܨܶܝܢܰܢ ܡ̣ܶܢ ܫܒܰܥ ܪ̈ܽܘܚܶܐ ܒܺܝ̈ܫܳܬܳܐ ܕܠܐܴ ܢܶܥܡܪ̈ܳܢ ܒܰܢ. ܐܶܠܐܴ ܐܰܥܶܠ ܚܠܳܦܰܝܗܶܝܢ ܐܳܘ ܡܳܪܝܳܐ ܪܽܘܚܳܐ ܕܺܝܠܳܟ ܩܰܕܺܝܫܳܐ ܕܢܶܫܪܶܐ ܒܰܢ ܘܰܢܕܰܟܶܐ ܘܰܢܩܰܕܫܰܢ ܘܢܰܣܶܩ ܠܳܟ ܫܽܘܒܚܳܐ܀

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܠܐܴ ܡܣܰܝܟܳܐ ܕܣܰܝܶܟ ܗ̣ܽܘ ܠܶܗ ܒܟܰܪܣܳܐ ܒܶܣܪܳܢܳܝܬܳܐ ܡܶܛܽܠ ܦܽܘܪܩܳܢܳܐ ܕܺܝܠܰܢ: ܘܚܰܘܺܝ ܐ̱ܪܳܙܳܐ ܕܰܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܠܐܱܒܳܗ̈ܳܬܳܐ ܩܰܕܺܝ̈ܫܶܐ ܘܰܪܫܰܡܘ ܛܽܘܦܣܶܗ ܡܽܘܫܶܐ ܘܕܰܘܺܝܕ ܘܟܽܠܗܽܘܢ ܚܰܙܳܝ̈ܶܐ ܘܰܡܒܰܕ̈ܩܳܢܶܐ ܕܫܰܪܺܝܪ̈ܳܬܳܐ. ܠܗ̇ܰܘ ܕܩܰܒܶܠ ܕܶܡܘ̈ܳܬܳܐ ܕܰܡܢܺܝ̈ܚܳܢܰܘܗܝ ܒܐܪܳܙܶܐ ܕܦ̈ܶܠܐܴܬܳܐ ܕܺܝܠܗܽܘܢ ܘܶܐܨܛܒܺܝ ܒܡܶܢܝܳܢܳܐ ܓܡܺܝܪܳܐ ܕܰܡܛܰܦܣܳܢܽܘܬܗܽܘܢ ܘܰܓܡܰܪ ܘܩܰܕܶܫ ܒܰܩܢܽܘܡܶܗ ܠܰܢܒܺܝܰܘ̈ܳܬܗܽܘܢ ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܒܪܳܐ ܘܡܶܠܬܳܐ ܘܰܐܒܳܐ ܡܬܽܘܡܳܝܳܐ ܗ̇ܰܘ ܕܡ̣ܶܢ ܐܰܒܽܘܗܝ ܠܐܴ ܫܰܢܺܝ ܘܺܐܝܬܝܳܐܺܝܬ ܘܰܡܬܽܘܡܳܐܺܝܬ ܩܕܳܡ ܥܳܠܡ̈ܶܐ ܘܒܶܪ̈ܝܳܬܳܐ ܡܶܢܶܗ ܝܺܠܺܝܕ ܠܥܶܠ ܡ̣ܶܢ ܡܶܠܬܳܐ ܘܗܰܘܢܳܐ ܘܡܰܚܫܰܒܬܳܐ ܐ̱ܢܳܫܳܝܬܳܐ: ܓܢܺܝܙܳܐ ܕܰܠܒܶܫ ܦܰܓܪܳܐ ܡܢܰܦܫܳܐ ܘܰܡܡܰܕܥܳܐ: ܟܰܕ ܠܐܴ ܐܶܫܬܰܚܠܰܦ ܡ̣ܶܢ ܗ̇ܳܝ ܕܺܐܝܬܰܘܗܝ ܐܠܰܗܳܐ: ܕܡܽܘܬܳܐ ܓܶܝܪ ܕܳܐܕܳܡ ܐܶܬܥܰܛܰܦ ܕܒܶܗ: ܢܫܰܡܠܐܷ ܟܽܠܗܽܘܢ ܛܽܘܦ̈ܣܶܐ ܕܨܳܪܘ ܠܶܗ ܚܰܙܳܝ̈ܶܐ ܒܓܶܠܝܳܢܰܝ̈ܗܽܘܢ: ܐܺܝܣܚܳܩ ܕܳܪܳܐ ܫܒܺܝܥܳܝܳܐ ܠܦܽܘܠܳܓ ܠܶܫܳܢ̈ܶܐ ܐ̱ܪܳܙܳܐ ܕܺܝܠܶܗ ܡܥܰܛܰܦ ܗܘܳܐ ܕܰܒܫܽܘܠܳܡ ܫܳܒܽܘܥܳܐ ܕܢܰܚ ܘܰܠܓܳܓܽܘܠܬܳܐ ܐܶܬܥܰܠܺܝ ܘܒܰܝܢܳܬ ܬܪܶܝܢ ܓܰܝ̈ܳܣܶܐ ܐܶܬܡܬܰܚ. ܡܽܘܫܶܐ ܫܒܺܝܥܳܝܳܐ ܠܐܱܒܳܐ ܕܥܰܡ̈ܡܶܐ: ܚܠܳܦ ܒܢ̈ܰܝ ܥܰܡܶܗ ܛܽܘܪ̈ܳܦܶܐ ܣܰܓܺܝ̈ܶܐܐ ܣܒܰܠ ܛܽܘܦܣܶܗ ܕܰܡܫܺܝܚܳܐ ܪܫܰܡ ܕܰܚܠܳܦܰܝܢ ܚܰܫ. ܘܰܡܪܳܪ̈ܶܐ ܘܚܰܠܐܴ ܐܶܫܬܺܝ ܘܰܟܠܺܝܠܐܴ ܟܽܘܒܳܢܳܝܳܐ ܩܰܒܶܠ ܘܪܽܘܩܳܐ ܘܫܽܘ̈ܩܳܦܶܐ ܒܰܐܦܰܘ̈ܗܝ ܒܠܰܥ. ܡܽܘܫܶܐ ܦܩܰܕ ܕܰܒܫܰܢ̱ܬܳܐ ܫܒܺܝܥܳܝܬܳܐ ܥܰܒ̈ܕܶܐ ܢܶܬܚܰܪܪܽܘܢ ܓܽܘ̈ܦܢܶܐ ܠܰܣܢܺܝ̈ܩܶܐ ܢܶܬܝܰܗ̈ܒܳܢ ܦܺܐܪ̈ܶܐ ܕܚܰܩ̈ܠܳܬܳܐ ܠܡܶܣ̈ܟܺܢܶܐ ܕܢܶܬܬܰܪܣܽܘܢ ܡܽܘܫܶܐ ܦܩܰܕ ܕܟܳܗܢܳܐ ܒܫܰܒܥܳܐ ܝܰܘ̈ܡܺܝܢ ܢܶܫܬܰܡܠܐܷ: ܘܰܦܩܰܕ ܕܰܫܒܰܥ ܫܪ̈ܳܓܺܝܢ ܕܢܶܗܘܽܘܢ ܒܡܰܫܟܰܢ ܙܰܒܢܳܐ ܐ̱ܪܳܙ ܫܳܒܽܘܥܳܐ ܕܰܥܠܰܘܗܝ ܥܳܠܡܳܐ ܟܳܪܶܟ ܘܡܶܬܬܙܺܝܥ. ܒܫܰܒܥܳܐ ܝܰܘ̈ܡܺܝܢ ܕܰܟܺܝ ܠܡܰܪܝܰܡ ܚܳܬܶܗ ܕܰܐܗܪܽܘܢ ܕܰܐܓܪܒܰܬ݀ ܟܰܕ ܚܰܣܕܬܶܗ: ܘܰܒܗܳܠܶܝܢ ܫܰܒܥܳܐ ܝܰܘ̈ܡܺܝܢ ܓܰܪܒܳܢܳܐ ܒܢܳܡܽܘܣܳܐ ܡܶܬܕܰܟܶܐ ܗܘܳܐ. ܕܰܘܺܝܕ ܡܰܠܟܳܐ ܦܰܩܶܕ ܗܘܳܐ: ܕܰܫܒܰܥ ܙܰܒܢܺܝ̈ܢ ܒܝܰܘܡܳܐ ܢܫܰܒܰܚ ܠܙܰܕܺܝܩܳܐ ܥܰܠ ܕܺܝܢܰܘ̈ܗܝ ܟܰܕ ܓܳܠܐܷ ܘܰܡܚܰܘܶܐ ܩܪܺܝܚܳܐܺܝܬ. ܒܰܛܢܳܐ ܝܰܠܕܳܐ ܬܰܪܒܺܝܬܳܐ ܨܰܘܡܳܐ ܚܰܫܳܐ ܩܒܽܘܪܬܳܐ: ܩܝܳܡܬܳܐ. ܘܰܡܙܰܡܰܪ ܟܳܗ̈ܢܳܝܳܬܳܐ: ܕܰܘܺܝܕ ܐܶܡܰܪ ܕܡܺܐܡܪܶܗ ܕܡܳܪܝܳܐ ܡܺܐܡܪܰܐ ܗ̱̇ܘ ܕܰܟܝܳܐ: ܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ ܘܰܡܕܰܟܰܝ ܚܰܕ ܒܫܰܒܥܳܐ. ܘܰܒܗܳܠܶܝܢ ܐܰܪܶܙ ܫܰܒܥܳܐ ܛܶܟ̈ܣܶܐ: ܢܒܺܝ̈ܶܐ ܫܠܺܝ̈ܚܶܐ: ܡܰܠܦܳܢ̈ܶܐ ܣܳܥܪ̈ܰܝ ܚܰܝ̈ܠܐܷ ܡܰܘ̈ܗܒܳܬܳܐ ܕܳܐܣܝܽܘܬܳܐ: ܡܥܰܕܪ̈ܳܢܶܐ ܘܰܡܕܰܒܪ̈ܳܢܶܐ. ܕܰܘܺܝܕ ܫܶܐܠ ܡ̣ܶܢ ܡܳܪܝܳܐ ܕܢܶܬܦܰܨܶܐ ܡ̣ܶܢ ܒܢ̈ܰܝ ܥܰܡܶܗ ܥܰܠ ܕܰܣܓܶܕܘ ܠܫܰܒܥܳܐ ܨܰܠܡ̈ܶܐ: ܘܒܰܒ̈ܢܰܝ ܥܶܣܽܘ ܠܗܽܘܢ ܕܰܡܺܝ ܕܰܫܒܰܥ ܙܰܒܢܺܝ̈ܢ ܡܶܬܟܰܪܟܺܝܢ ܗܘܰܘ ܒܟܽܠ ܫܢܳܐ ܓܰܒܪ̈ܶܐ ܘܢܶܫ̈ܶܐ ܟܰܕ ܫܠܺܝ̈ܚܺܝܢ ܒܛܽܘܪܳܐ ܕܰܦܠܶܣܛܺܝܢܺܝ ܩܕܳܡ ܒܺܝܠ ܘܒܶܠܰܬܺܝ ܦܬܰܟܪ̈ܶܐ ܟܰܕ ܡܶܬܛܰܢܦܺܝܢ: ܫܠܶܝܡܽܘܢ ܗ̇ܰܘ ܝܰܡܳܐ ܕܚܶܟ̈ܡܳܬܳܐ ܩܥܳܐ ܕܚܶܟܡܬܳܐ ܒܢܳܬ݀ ܠܳܗ̇ ܒܰܝܬܳܐ ܥܳܠܡܳܐ ܗܳܢܳܐ: ܘܰܐܩܺܝܡܰܬ݀ ܒܶܗ ܫܰܒܥܳܐ ܥܰܡܽܘ̈ܕܶܐ ܡܰܠܐܱܟ̈ܶܐ: ܫܡܰܝܳܐ ܢܽܘܗܪܳܐ: ܘܰܐܪܒܥܳܐ ܐܶܣܛܽܘ̈ܟܣܶܐ: ܙܟܰܪܝܳܐ ܡܰܟܪܶܙ ܕܰܫܒܰܥ ܕܶܝܢ ܥܰܝ̈ܢܰܘܗܝ ܕܡܳܪܝܳܐ ܚܳܝܪ̈ܳܢ ܒܟܽܠܳܗ̇ ܐܰܪܥܳܐ ܡܰܥܒܕܳܢ̈ܘܳܬܳܐ ܕܪܽܘܚܳܐ ܕܰܒܟܽܠܗܶܝܢ ܟܺܐܦܳܐ ܙܽܘܪܒܳܒܳܠܳܝܬܳܐ ܡܫܰܡܠܝܳܐܺܝܬ ܥܰܝܢܶܝ̈ܗ̇ ܦܬܺܝ̈ܚܳܢ ܘܰܡܨܰܒ̈ܬܳܢ. ܡܺܝܟܳܐ ܢܒܺܝܳܐ ܐܶܬܢܰܒܺܝ ܕܰܢܩܺܝܡ ܡܳܪܝܳܐ ܠܐܻܝܣܪܳܐܶܝܠ ܫܰܒܥܳܐ ܪ̈ܳܥܰܘܳܬܳܐ ܕܰܢܪܰܥܽܘܢܳܝܗܝ: ܕܳܢܺܝܶܐܝܠ ܢܒܺܝܳܐ ܠܫܳܒܽܘ̈ܥܶܐ ܫܰܒܥܺܝ̈ܢܳܝܶܐ ܪܬܰܡ ܘܢܰܗܰܪ ܠܡܶܫܠܰܡ ܚܰܘ̈ܒܶܐ: ܘܰܠܡܶܫܒܰܩ ܚܛܳܗ̈ܶܐ ܘܰܕܢܺܐܬܶܐ ܡܫܺܝܚܳܐ ܡܰܠܟܳܐ ܕܚܰܝ̈ܶܐ ܘܕܰܫܠܳܡܳܐ: ܫܡܽܘܢܺܝ ܢܰܟܦܬܳܐ ܘܰܐܢ̱ܬܬܳܐ ܡܗܰܝܡܰܢܬܳܐ ܫܰܒܥܳܐ ܒܢܶܝ̈ܗ̇ ܕܶܒܚܳܐ ܩܰܪܒܰܬ݀ ܗܘܳܬ݀ ܒܗ̇ܳܝ ܕܰܐܪܓܫܰܬ݀ ܗܘܳܬ݀ ܒܕܶܒܚܳܐ ܡܚܰܣܝܳܢܳܐ ܕܰܥܬܺܝܕ ܕܢܺܐܬܶܐ ܠܰܒܪܺܝܬܳܐ: ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܠܐܪܳܙܳܐ ܦܰܐܝܳܐ ܕܰܡܕܰܒܪܳܢܽܘܬܳܟ ܕܒܰܒܣܰܪ ܨܳܝܪܺܝܢ ܗܘܰܘ: ܘܰܠܡܶܬܓܰܠܝܳܢܽܘܬܳܟ ܡܶܬܝܰܐܺܝܒܺܝܢ ܗܘܰܘ: ܝܽܘܚܰܢܳܢ ܟܳܪܽܘܙܳܟ ܒܝܰܪܚܳܐ ܫܒܺܝܥܳܝܳܐ ܐܶܣܬܰܒܰܪ ܒܰܛܢܶܗ ܒܥܺܐܕܳܐ ܚܽܘܣܳܝܳܐ: ܕܢܳܡܽܘܣܳܐ ܡܽܘܫܳܝܳܐ ܕܥܰܠ ܫܒܺܝܥܳܝܽܘܬܳܐ ܪܳܗܶܛ ܘܰܥܦܺܝܦܳܐܺܝܬ ܡܰܟܪܶܟ ܝܰܘ̈ܡܳܬܳܐ ܘܰܫܢܰܝ̈ܳܐ: ܫܒܰܥ ܡܰܥܡܽܘܕ̈ܝܳܬܳܐ ܐܶܬܺܝ̈ܗܶܒܝ ܠܕܽܘܟܳܝܳܐ ܫܒܰܥ ܐܶܪ̈ܶܣܺܝܣ ܢܒܰܥ̈ܝ ܒܥܰܡܳܐ ܐܺܝܣܰܪܠܳܝܳܐ: ܫܒܰܥ ܙܰܒܢܺܝ̈ܢ ܟܬܰܒ ܫܠܺܝܚܳܐ ܕܡܶܫܬܒܶܩ ܠܶܗ ܠܚܰܛܳܝܳܐ ܐܶܢܗܽܘ ܕܬܳܐܶܒ: ܘܰܫܒܰܥ ܥܰܠ ܫܰܒܥܺܝܢ ܙܰܒܢܺܝ̈ܢ. ܘܰܒܫܰܒܥܳܐ ܥܰܠ ܫܰܒܥܺܝܢ ܙܰܒܢܺܝ̈ܢ. ܘܰܒܫܰܒܥܳܐ ܠܰܚܡܺܝ̈ܢ ܠܫܰܒܥܳܐ ܐܠܰܦܺܝ̈ܢ ܬܰܪܣܺܝ: ܘܫܰܒܥܳܐ ܐܶܣܦܪ̈ܺܝܕܺܝܢ ܕܰܩܨܳܝ̈ܶܐ ܐܰܘܬܰܪ. ܫܰܒܥܳܐ ܫܺܐܕܺܝ̈ܢ ܡ̣ܶܢ ܡܰܓܕܠܳܝܬܳܐ ܛܪܰܕ ܘܰܐܦܶܩ ܘܰܫܒܰܥ ܡܶܠܺܝ̈ܢ ܚܰܝ̈ܳܬܳܐ ܡܰܠܶܠ ܡ̣ܶܢ ܒܰܙܩܺܝܦܽܘܬܳܐ ܘܰܫܒܰܥ ܬܶܕܡܪ̈ܳܢ ܕܡܰܠܝ̈ܳܢ ܕܽܘܡܳܪܳܐ ܣܥܰܪ ܒܰܙܩܺܝܦܽܘܬܶܗ: ܚܶܫܽܘܟܳܐ ܕܶܐܬܩܪܶܡ ܥܰܠ ܟܽܠܳܗ̇ ܬܺܒܶܝܠ ܐܰܦ̈ܰܝ ܬܰܪܥܳܐ ܕܰܣܕܺܝܩ: ܐܰܪܥܳܐ ܕܶܐܬܬܙܺܝܥܰܬ݀: ܫܽܘ̈ܥܶܐ ܐܶܨܛܰܪܺܝܘ: ܩܰܒܪ̈ܶܐ ܕܶܐܬܦܰܬܰܚܘ: ܕܡܳܐ ܘܡܰܝ̈ܳܐ ܕܰܢ̣ܛܰܦܘ ܡ̣ܶܢ ܓܰܒܶܗ ܕܰܡܫܺܝܚܳܐ ܘܰܒܫܰܒܥܳܐ ܥܺܐܕܺܝ̈ܢ ܡܰܠܺܝ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ: ܒܝܰܠܕܳܐ ܒܰܥܡܳܕܳܐ: ܒܽܐܘܫܰܥ̈ܢܶܐ. ܒܰܚܫܳܡܺܝܬܳܐ: ܒܰܙܩܺܝܦܽܘܬܳܐ: ܒܰܩܝܳܡܬܳܐ ܦܳܪܽܘܩܳܝܬܳܐ: ܒܣܽܘܠܳܩܳܐ: ܘܰܠܫܰܒܥܳܐ ܐܰܚܺܝ̈ܢ ܐܶܬܚܰܘܺܝ ܥܰܠ ܝܰܡ ܛܺܝܒܶܪܺܝܳܘܣ ܘܥܰܠ ܩܝܳܡܬܶܗ ܫܰܪܰܪ ܐܶܢܽܘܢ ܘܰܒܫܳܒܽܘܥܳܐ ܫܒܺܝܥܳܝܳܐ ܕܰܩܝܳܡܬܳܐ ܪܽܘܚܳܐ ܩܰܕܺܝܫܳܐ ܥܰܠ ܟܽܠܗܽܘܢ ܬܰܠܡܺܝ̈ܕܶܐ ܫܰܕܰܪ: ܘܰܒܠܶܫܳܢ̈ܶܐ ܫܰܒܥܺܝ̈ܢܳܝܶܐ  ܠܗܽܘܢ ܚܰܟܶܡ ܘܢܰܗܰܪ: ܫܒܰܥ ܪ̈ܽܘܚܶܐ ܡܝܰܩܪ̈ܳܬܳܐ ܡ̣ܶܢ ܒܢ̈ܰܝ ܐܺܝܣܪܳܐܶܝܠ ܢܣܰܒ ܘܰܠܥܰܡ̈ܡܶܐ ܫܳܘ̈ܝܰܝ ܠܰܡܩܰܒܳܠܽܘ ܐܰܓܥ̣ܶܠ ܐܶܢܶܝ̈ܢ ܐܰܝܟ ܡܶܠܬܳܐ ܫܠܺܝܚܳܝܬܳܐ ܕܶܐܡܪܰܬ݀: ܫܒܰܥ ܪ̈ܽܘܚܶܐ ܛܰܢ̈ܦܳܬܳܐ ܕܰܐܦܶܩ ܗܘܳܐ ܡܽܘܫܶܐ ܢܒܺܝܳܐ ܡ̣ܶܢ ܒܢ̈ܰܝ ܐܺܝܣܪܳܐܶܝܠ: ܒܫܳܥܰܬ݀ ܙܩܺܝܦܽܘܬܶܗ ܕܰܡܫܺܝܚܳܐ: ܗܦܰܟ̈ܝ ܘܥܰܠܶܝ̈ܢ ܒܶܗ ܒܗ̇ܰܘ ܕܶܐܫܟܚܽܘܗܝ ܠܥܰܡܳܐ ܕܝܽܘ̈ܕܳܝܶܐ ܕܰܣܪܺܝܩ ܘܚܰܡܺܝܡ ܘܰܡܨܰܒܰܬ݀: ܘܟܰܕ ܐܶܫܟܰܚ̈ܝ ܗܘܰܝ̈ ܢܝ̇ܳܚܳܐ ܒܥܰܡ̈ܡܶܐ ܢܽܘܟܪ̈ܳܝܶܐ ܕܠܐܴ ܗܰܝܡܶܢܘ ܗܘܰܘ ܒܰܩܝܳܡܬܳܐ. ܫܰܒܥܳܐ ܡܫܰܡ̈ܫܳܢܶܐ ܐܰܩܺܝܡܘ ܗܘܰܘ ܫܠܺܝ̈ܚܶܐ ܩܰܕܺܝ̈ܫܶܐ ܒܰܚܕܰܬܳܐ ܒܥܺܕܬܳܐ ܩܰܕܺܝܫܬܳܐ: ܠܬܶܫܡܫܬܳܐ ܕܰܐܚ̈ܶܐ ܘܰܐܪ̈ܡܠܳܬܳܐ ܐܰܝܠܶܝܢ ܕܡܶܬܬܰܠܡܕܺܝܢ ܠܰܣܒܰܪܬܳܐ ܡܳܪܳܢܳܝܬܳܐ: ܒܫܳܒܽܘ̈ܥܶܐ ܫܒܺܝ̈ܥܳܢܳܝܶܐ ܡܫܺܝܚܳܐ ܐܶܬܩܛܶܠ ܒܰܡܕܺܝܢܰܬ݀ ܩܽܘܕ̈ܫܶܐ ܐܰܝܟ ܡܶܠܬܳܐ ܢܒܺܝܳܝܬܳܐ: ܘܰܩܪܺܝܬܳܐ ܕܩܽܘ̈ܕܫܶܐ ܐܶܬܚܰܒܠܰܬ݀: ܒܶܙܚܳܐ ܘܰܩܠܳܠܐܴ ܘܒܶܗܬܬܳܐ ܗܘܳܬ݀ ܒܰܝܢܳܬ ܥܰܡ̈ܡܶܐ: ܛܺܝܛܳܘܣ ܪܽܘܡܳܝܳܐ ܒܰܪ ܐܶܣܦܺܝܣܺܝܢܳܘܣ ܫܒܺܝܥܳܝܳܐ ܕܡܰܠܟ̈ܶܐ ܫܪܳܐ ܥܰܠ ܨܳܠܽܘܒܬܳܐ ܒܚܰܝܠܐܴ ܣܰܓܺܝܳܐܐ ܘܰܐܚܪܒܳܗ̇ ܘܰܐܪܒܥܳܐ ܝܰܪܚܺܝܢ ܚܰܒܫܳܗ̇ ܒܽܐܘܠܨܳܢܳܐ ܡ̣ܶܢ ܟܶܣܶܗ ܕܢܺܝܣܳܢ ܝܰܪܚܳܐ: ܥܕܰܡܳܐ ܠܟܶܣܶܗ ܕܳܐܒ ܝܰܪܚܳܐ: ܫܺܝܬ ܪ̈ܶܒܘܳܬܳܐ ܩܰܛܶܠ ܒܳܗ̇ ܘܰܥܣܰܪ ܪ̈ܶܒܘܳܬܳܐ ܫܒܳܐ ܡܶܢܳܗ̇: ܘܡܳܐܐ ܪ̈ܶܒܘܳܬܳܐ ܒܟܰܦܢܳܐ ܡܺܝܬܘ ܗܘܰܘ ܘܫܶܠܡܰܬ݀ ܒܳܗ̇ ܗ̇ܳܝ ܕܰܐܡܺܝܪܳܐ ܕܢܺܐܬܽܘܢ ܝܰܘ̈ܡܳܬܳܐ ܕܢܶܚܕܪܽܘܢܶܟܝ ܒܥܶܠܕ̈ܒܳܒܰܝܟܝ ܘܰܢܣܺܝܦܽܘܢ ܠܰܒܢܰܝ̈ܟܝ ܒܓܰܘܶܟܝ: ܘܶܐܠܽܘܠܐܴ ܐܶܬܟܪܺܝܘ ܝܰܘ̈ܡܳܬܳܐ ܗ̇ܳܢܽܘܢ ܠܐܴ ܚܳܝܶܐ ܗܘܳܐ ܟܽܠ ܒܶܣܪܳܐ: ܒܰܕܓܽܘܢ ܡܦܺܝܣܺܝܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܦܳܪܽܘܩܳܝܬܳܐ: ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܠܰܢܝܳܚܳܐ ܕܰܐܠܳܗܽܘܬܳܟ ܐܰܥܛܰܪܢܰܢ ܐܰܝܟܰܢܳܐ ܕܰܒܫܽܘܠܳܡ ܫܳܒܽܘܥܳܐ ܗܳܢܳܐ ܬܰܦܢܶܐ ܠܰܢ ܥܰܠ ܝܳܪܬܽܘܬܰܢ ܩܰܕܡܳܝܬܳܐ: ܘܰܐܫܘܳܐ ܠܟܽܠܰܢ ܒܫܽܘܠܳܡ ܫܳܒܽܘܥܳܐ ܕܝܰܘ̈ܡܳܬܳܐ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܕܰܠܫܽܘܒܩܳܢܳܐ ܓܡܺܝܪܳܐ ܕܰܡܪܰܥܶܐ ܠܳܟ ܘܰܫܒܺܝܥܳܐܺܝܬ ܒܡܰܥܒܕܳܢܽܘܬܳܐ ܕܪܽܘܚܳܐ ܩܰܕܺܝܫܳܐ ܢܶܨܛܰܒܰܬ݀. ܘܰܠܪܶܗܛܳܐ ܫܒܺܝܥܳܝܳܐ ܗ̇ܳܝ ܘܒܶܐܣܛܰܕܝܽܘܢ ܢܰܨܺܝܚܬܳܐ ܢܫܰܡܠܐܷ ܘܰܠܝܰܘܡܳܐ ܬܡܺܝܢܳܝܳܐ ܠܰܠܡܺܐܢܳܐ ܕܚܰܝ̈ܶܐ ܡܰܢܰܥ: ܘܡ̣ܶܢ ܐܶܪ̈ܶܣܺܝܣ ܡܫܰܟܪ̈ܳܬܳܐ ܢܶܬܦܰܨܶܐ: ܘܒܰܬܝܳܒܽܘܬܳܐ ܠܟܽܠܰܢ ܩܰܒܶܠ: ܘܰܒܡܶܠܰܝ̈ܟ ܡܰܠܝ̈ܰܝ ܚܰܝ̈ܶܐ ܢܶܬܬܰܪܣܶܐ. ܘܡ̣ܶܢ ܫܺܐܕ̈ܶܐ ܡܳܪ̈ܽܘܕܶܐ ܢܶܬܚܰܪܰܪ. ܘܒܰܩܝܳܡܬܳܐ ܕܺܝܠܳܟ ܦܳܪܽܘܩܳܝܬܳܐ ܢܰܘܕܶܐ: ܘܡ̣ܶܢ ܫܰܒ̈ܳܝܶܐ ܡܰܪܺܝܪ̈ܶܐ ܦܪܽܘܩ ܠܰܢ: ܘܒܺܐܝܕܰܝ̈ܳܐ ܕܶܝܢ ܕܡܳܪ̈ܰܝܳܐ ܠܐܴ ܡܪ̈ܰܚܡܳܢܶܐ ܠܐܴ ܬܶܥܒܶܕ ܠܰܢ. ܘܠܐܱܒܳܗ̈ܶܐ ܘܰܐܚ̈ܶܐ ܘܪ̈ܰܒܳܢܶܐ ܕܰܥܢܰܕܘ ܡ̣ܶܢ ܒܰܝܢܳܬܰܢ ܐܰܢܺܝܚ ܐܶܢܽܘܢ ܡܳܪܝ ܒܰܐܘ̈ܳܢܶܐ ܛܽܘܒܬܳܢ̈ܶܐ ܒܚܰܝ̈ܶܐ ܕܰܠܥܳܠܰܡ ܘܢܰܣܶܩ ܠܳܟ ܫܽܘܒܚܳܐ: ܘܬܰܘܕܺܝܬܳܐ܀

ܥܛܪܐ

ܐܰܢ̱ܬ ܡܳܪܝܳܐ ܡܳܪܰܢ ܕܩܰܒܶܠܬ ܕܶܒܚ̈ܶܐ ܘܩܽܘܪ̈ܒܳܢܶܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܒܕܳܪ̈ܺܝܢ ܕܳܪ̈ܺܝܢ ܩܰܪܶܒܘ ܠܪܰܒܽܘܬܳܟ ܘܰܒܗܽܘܢ ܐܶܬܬܢܺܝܚ ܨܶܒܝܳܢܳܟ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܠܰܗܳܐ ܨܒܺܝ ܘܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܡ̣ܶܢ ܥܺܕܬܳܟ ܩܰܕܺܝܫܬܳܐ ܡܶܬܩܰܪܰܒ ܠܳܟ ܒܥܺܐܕܳܐ ܗܳܢܳܐ ܕܰܩܝܳܡܬܳܟ: ܘܢܺܐܬܶܐ ܠܰܢ ܥܰܡ ܣܘܳܬܶܗ ܚܢܳܢܳܐ ܘܪ̈ܰܚܡܶܐ ܡ̣ܶܢ ܒܶܝܬ ܓܰܙܳܟ ܡܰܠܝܳܐ ܘܥܰܬܺܝܪܳܐ: ܡܫܺܝܚܳܐ ܣܰܒܪܳܐ ܕܚܰܝܰܝ̈ܢ܀

ܚܘܬܡܐ

ܬܶܫܡ̈ܫܳܬܰܢ ܡܳܪܝܳܐ ܢܶܗܘ̈ܝܳܢ ܠܰܢܝܳܚܳܟ: ܘܰܨܠܰܘ̈ܳܬܰܢ ܒܗܶܝܢ ܢܶܬܬܢܺܝܚ ܨܶܒܝܳܢܳܟ: ܘܬܰܟܦ̈ܫܳܬܰܢ ܠܰܦܝܳܣܳܟ: ܘܒܳܥܘ̈ܳܬܰܢ: ܢܶܬܩܰܒ̈ܠܳܢ ܩܕܳܡ ܪܰܒܽܘܬܳܟ: ܒܥܶܕܳܢܳܐ ܗܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܕܰܡܕܰܒܪܳܢܽܘܬܳܟ: ܘܢܶܣܬܰܝܰܥ ܡ̣ܶܢ ܛܰܝܒܽܘܬܳܟ: ܘܢܶܬܥܰܕܰܪ ܒܥܽܘܕܪ̈ܳܢܰܝܟ: ܘܢܶܬܚܰܣܶܐ ܒܝܰܕ ܦܰܓܪܳܟ ܘܰܕܡܳܟ ܚܰܝܳܐ ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܩܕܳܡܰܝܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܣܳܝܽܘܡܳܐ ܕܰܐܓܽܘܢܳܐ ܡܥܰܠܝܳܐ ܕܶܐܬܠܺܝܣܽܘܬܳܐ ܗ̇ܳܝ ܪܽܘܚܳܢܳܝܬܳܐ: ܠܗ̇ܰܘ ܣܰܒܪܳܐ ܫܰܪܺܝܪܳܐ ܕܟܽܠܗܽܘܢ ܡܗܰܝ̈ܡܢܶܐ ܘܬܽܘܟܠܳܢܳܐ ܠܐܴ ܕܰܓܳܠܐܴ ܕܟܺܐܢ̈ܶܐ ܘܙܰܕܺܝ̈ܩܶܐ: ܠܗ̇ܰܘ ܕܰܒܩܶܫܝܳܐ ܕܰܕܡܶܗ ܕܥܰܠ ܪܺܝܫ ܓܳܓܽܘܠܬܳܐ ܐܶܫܬܰܦܰܥ ܐܰܪܘܺܝ ܒܶܗ ܠܰܡܟ̈ܰܠܠܰܝ ܒܙܳܟܽܘܬܳܐ ܒܬܰܟܬܽܘ̈ܫܶܐ ܕܥܰܠ ܐܳܟܶܠܩܰܪܨܳܐ ܫܘܰܪܘ. ܠܗ̇ܰܘ ܕܰܒܝܰܘܡܳܐ ܫܒܺܝܥܳܝܳܐ ܐܶܬܬܢܺܝܚ ܡ̣ܶܢ ܥܒܳܕ̈ܰܘܗܝ ܟܽܠܗܽܘܢ ܘܰܒܝܰܘܡܳܐ ܬܡܺܝܢܳܝܳܐ ܥܳܒܶܕ ܫܽܘܠܳܡܳܐ ܠܰܒܪܺܝܬܳܐ: ܕܠܶܗ ܝܳܐܶܐ܀

ܣܕܪܐ

ܡܳܪܝܳܐ ܐܠܰܗܳܐ ܕܟܽܠ ܡܢܺܝܚܳܢܳܐ ܕܟܽܠ ܡܶܕܶܡ ܠܳܟ ܡܦܺܝܣܺܝܢܰܢ ܓܳܒܽܘܠܐܴ ܘܒܳܪܽܘܝܳܐ ܕܰܓܒܺܝܠܬܰܢ ܕܰܒܚܽܘܒܳܟ ܠܐܴ ܡܶܬܡܰܠܠܳܢܳܐ ܐܰܘܪܶܒܬ ܠܓܶܢܣܰܢ ܬܰܚܽܘܒܳܐ: ܘܥܰܡ ܬܶܓ̈ܡܶܐ ܘܥܺܝܪ̈ܶܐ ܪ̈ܽܘܚܳܢܶܐ ܚܰܠܶܛܬܳܝܗܝ: ܘܝܰܗܒܬ ܠܰܢ ܡܰܘܗ̈ܒܳܬܳܟ ܒܰܣܺܝ̈ܡܳܬܳܐ: ܘܰܓܒܰܝܬ ܘܰܐܘܪܶܒܬ ܠܰܒ̈ܢܰܝ ܐ̱ܪ̈ܳܙܶܐ ܕܰܡܕܰܒܪܳܢܽܘܬܳܟ ܥܕܰܡܳܐ ܠܪܰܘܡܳܐ ܕܪܽܘܡܪ̈ܳܡܶܐ ܥܰܡ ܪ̈ܽܘܚܳܢܶܐ: ܘܡܶܛܽܠ ܗܳܕܶܐ ܗܳܫܳܐ ܡܶܬܕܰܟܪܺܝܢܰܢ ܩܕܳܡܰܝܟ ܒܥܺܐܕܳܐ ܗܳܢܳܐ ܕܩܳܐܶܡ ܠܟܽܠܗܶܝܢ ܪ̈ܽܘܚܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ: ܢܒܺܝ̈ܶܐ ܘܰܫܠܺܝ̈ܚܶܐ: ܘܣܳܗ̈ܕܶܐ ܘܡܰܘܕ̈ܝܳܢܶܐ ܘܰܐܒܳܗ̈ܳܬܳܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܡܰܠܽܘܢ ܕܶܝܢ ܝܺܕܺܝܥܳܐܺܝܬ ܠܐܴܕܳܡ ܗ̇ܰܘ ܪܺܝܫܳܐ ܕܛܽܘܗ̈ܡܶܐ ܗ̇ܰܘ ܕܒܺܐܝ̈ܕܰܝܳܐ ܕܺܝܠܳܟ ܩܰܕܺܝ̈ܫܳܬܳܐ ܐܶܬܓܒܶܠ: ܘܰܒܡܰܦܽܘܚܺܝܬܳܐ ܕܺܝܠܳܟ ܐܶܬܡܠܺܝ ܢܰܦܫܳܐ ܪܳܡܰܬ݀ ܡ̣ܶܢ ܡܰܘܬܳܐ ܘܰܚܒܳܠܐܴ ܠܗܳܒܶܝܠ ܗ̇ܰܘ ܩܛܺܝܠܐܴ ܩܰܕܡܳܝܳܐ ܘܕܶܒܚܳܐ ܫܰܠܡܳܐ: ܠܫܺܝܬ ܗ̇ܰܘ ܫܰܦܺܝܪܳܐ ܕܰܒܨܽܘܪܬܳܐ ܕܰܒܪܳܟ ܝܺܚܺܝܕܳܝܳܐ ܐܶܬܒܪܺܝ ܘܶܐܬܬܰܩܰܢ. ܠܐܱܢܽܘܫ ܗ̇ܰܘ ܕܰܒܨܰܠܡܳܟ ܐܶܬܝܰܩܰܪ. ܠܰܚܢܽܘܟ ܗ̇ܰܘ ܕܰܫܦܰܪ ܐܳܦ ܐܶܬܥܰܠܺܝ ܘܠܐܴ ܛܥܶܡ ܡܰܘܬܳܐ: ܘܰܠܢܽܘܚ ܟܺܐܢܳܐ ܕܰܒܟܶܐܘܶܝܠܐܴ ܫܰܘܙܶܒ ܠܰܬܡܳܢܶܐ ܢܰܦ̈ܫܳܬܳܐ ܘܰܢܛܰܪ ܒܬܽܘܠܽܘܬܳܐ: ܠܐܱܒܪܳܗܳܡ ܗ̇ܰܘ ܐܰܒܳܐ ܕܥܰܡ̈ܡܶܐ ܕܶܐܫܬܰܘܕܺܝ ܕܢܰܣܡܶܟ ܠܰܬܠܺܝܬܳܝܽܘܬܳܐ ܥܰܠ ܦܳܬܽܘܪܶܗ: ܘܠܐܻܝܣܚܳܩ ܗ̇ܰܘ ܦܟܺܝܪ ܘܰܢܟܺܝܣ ܠܥܶܠ ܡ̣ܶܢ ܥܶܠܬܳܐ: ܘܰܪܫܰܡ ܛܽܘܦܣܳܐ ܕܺܝܚܺܝܕܳܝܳܐ ܒܪܳܟ: ܠܝܰܥܩܽܘܒ ܗ̇ܰܘ ܐܰܒܳܐ ܕܰܬܪܶܥܣܰܪ ܫܰܒ̈ܛܶܐ: ܗܰ̇ܘ ܕܩܰܒܶܠ ܒܽܘܪ̈ܟܳܬܳܐ ܡ̣ܶܢ ܐܰܒܽܘܗܝ ܘܛܽܘܒܳܐ ܕܰܐܪܥܳܐ ܘܛܰܠܐܴ ܕܰܫܡܰܝܳܐ: ܘܶܐܬܡܨܺܝ ܚܰܝܠܐܱ ܕܡܰܠܐܱܟܳܐ: ܘܰܐܩܺܝܡ ܟܺܐܦܳܐ ܛܽܘܦܣܳܐ ܕܥܺܕܬܳܐ ܘܰܢܣܰܟ ܥܠܶܝܗ̇ ܡܶܫܚܳܐ ܕܐ̱ܪ̈ܳܙܶܐ. ܠܝܰܘܣܶܦ ܗ̇ܰܘ ܥܠܺܝܒ ܡ̣ܶܢ ܐܰܚܰܘ̈ܗܝ ܘܰܢܛܺܝܪ ܡ̣ܶܢ ܛܰܝܒܽܘܬܳܐ ܐܠܰܗܳܝܬܳܐ ܕܰܗܘܳܐ ܫܽܘܠܛܳܢܳܐ ܥܰܠ ܡܶܨܪܶܝܢ. ܠܡܽܘܫܶܐ ܗ̇ܰܘ ܡܢܺܝܚܳܢܳܐ ܕܰܐܠܳܗܽܘܬܳܟ: ܗ̇ܰܘ ܕܡ̣ܶܢ ܡܰܓܢܳܢܽܘܬܳܐ ܐܠܰܗܳܝܬܳܐ ܡܶܫܟܳܐ ܕܰܐܦܰܘ̈ܗܝ ܐܶܙܕܰܗܺܝ: ܘܡܶܢܳܟ ܘܡ̣ܶܢ ܥܺܝܪ̈ܰܝ ܪܰܘܡܳܐ ܐܶܬܥܰܦܺܝ. ܠܐܱܗܪܽܘܢ ܐܳܦ ܠܐܷܠܺܝܥܳܙܳܪ ܒܪܶܗ ܟܳܗ̈ܢܶܐ ܩܰܕܺܝ̈ܫܶܐ ܡܶܬܕܰܟܪܺܝܢܰܢ: ܠܡܰܠܟܺܝܙܕܶܩ ܟܽܘܡܪܳܐ ܪܰܒܳܐ ܕܨܳܪ ܛܽܘܦܣܳܟ ܒܠܰܚܡܳܐ ܘܚܰܡܪܳܐ ܕܩܰܪܶܒ ܗܘܳܐ ܠܝܶܫܽܘܥ ܒܰܪܢܽܘܢ ܚܰܪܺܝܦ ܢܰܝܙܟܳܐ ܥܰܠ ܒܥܶܠܕ̈ܒܳܒܰܝܟ ܗ̇ܰܘ ܕܰܒܥܶܠ ܫܡܳܟ ܐܶܬܟܰܢܺܝ: ܠܰܢܕܺܝܪܳܐ ܫܡܽܘܐܶܝܠ ܓܰܒܝܳܐ ܘܰܢܙܺܝܪܳܐ ܕܡ̣ܶܢ ܟܪܶܣ ܐܶܡܶܗ ܐܶܬܓܒܺܝ ܕܢܶܗܘܶܐ ܟܳܗܢܳܐ ܠܐܱܠܳܗܳܐ. ܠܕܰܘܺܝܕ ܡܰܠܟܳܐ ܘܰܢܒܺܝܳܐ: ܘܢܰܘܣܳܐ ܕܪܽܘܚܳܐ ܩܰܕܺܝܫܳܐ ܠܝܽܘܫܺܝܳܐ ܡܰܠܟܳܐ ܙܰܕܺܝܩܳܐ ܠܚܶܙܰܩܝܳܐ ܗ̇ܰܘ ܕܰܒܙܰܕܺܝܩܽܘܬܶܗ ܐܶܬܬܰܘ̈ܣܰܦܝ ܥܰܠ ܚܰܝܰܘ̈ܗܝ ܚܰܡܫܬܰܥܣܰܪ ܫܢܺܝ̈ܢ. ܠܐܷܪܰܡܝܳܐ ܗ̇ܰܘ ܢܣܺܝܪܳܐ ܘܰܥܠܺܝܒܳܐ: ܠܐܷܪܰܡܝܳܐ ܗ̇ܰܘ ܚܢܺܝܓ ܐܽܘܠܝ̈ܳܬܳܐ: ܠܰܢܒܺܝܳܐ ܚܰܙܩܺܝܶܐܝܠ ܗ̇ܰܘ ܬܡܺܝܗ ܒܓܶܠܝܳܢ̈ܶܐ ܕܰܚܙܳܐ ܡܰܪܟܰܒܬܳܐ ܕܰܟܪ̈ܽܘܒܶܐ ܕܝ̇ܳܬܶܒ ܥܠܶܝܗ̇ ܥܰܬܺܝܩ ܝܰܘ̈ܡܳܬܳܐ: ܠܕܳܢܺܝܶܐܝܠ ܕܰܙܟܳܐ ܠܚܰܝ̈ܘܳܬܳܐ: ܘܰܒܠܰܡ ܦܽܘܡܳܐ ܕܰܐܪ̈ܝܰܘܳܬܳܐ ܘܰܐܪܡܺܝ ܠܥܰܡܳܐ ܕܟܰܠܕܳܝ̈ܶܐ ܒܓܰܘ ܓܽܘܒܳܐ ܨܶܝܕ ܐܰܪ̈ܝܰܘܳܬܳܐ. ܠܰܬܪܶܥܣܰܪ ܢܒܺܝ̈ܶܐ ܩܰܕܺܝ̈ܫܶܐ ܘܰܠܚܰܒܪ̈ܰܝܗܽܘܢ ܕܶܐܬܢܰܒܺܝܘ ܥܰܠ ܡܶܐܬܺܝܬܳܟ: ܠܰܛܠܳܝ̈ܶܐ ܕܒܶܝܬ ܚܰܢܰܢܝܳܐ ܕܶܐܫܬܰܘܙܰܒܘ ܡ̣ܶܢ ܢܽܘܪܳܐ ܝܳܩܕܬܳܐ ܘܰܐܒܗܶܬܘ ܠܡܰܠܟܳܐ ܢܰܒܽܘܟܰܕܢܳܨܰܪ. ܘܰܠܟܽܠܗܽܘܢ ܡܢܺܝ̈ܚܳܢܶܐ ܕܺܝܠܳܟ ܓܰܢ̱ܒܳܪ̈ܶܐ ܒܰܩܪܳܒܶܗ ܕܡܳܪܝܳܐ: ܠܐܷܠܺܝܳܐ ܢܒܺܝܳܐ ܡܶܬܕܰܟܪܺܝܢܰܢ ܕܰܟܠܐܴ ܡܶܛܪܳܐ ܘܛܰܠܐܴ ܡ̣ܶܢ ܐܰܪܥܳܐ ܬܠܳܬ ܫܢܺܝ̈ܢ ܘܫܬܳܐ ܝܰܪ̈ܚܺܝܢ: ܘܰܒܡܰܪܟܰܒܬܳܐ ܐܶܬܥܰܠܺܝ ܠܰܫܡܰܝܳܐ: ܠܐܷܠܺܝܫܳܥ ܕܰܐܚܺܝ ܡܺܝܬܳܐ ܒܚܰܝܰܘ̈ܗܝ ܘܡ̣ܶܢ ܒܳܬܰܪ ܕܰܒܠܺܝ ܢܰܚܶܡ ܠܰܩܛܺܝܠܐܴ ܕܓܰܝ̈ܳܣܶܐ. ܠܝܶܫܽܘܥ ܒܰܪ ܝܽܘܙܳܕܳܩ ܟܳܗܢܳܐ ܪܰܒܳܐ: ܐܳܦ ܠܟܽܠܗܽܘܢ ܪ̈ܰܒܰܝ ܚܰܝ̈ܠܐܷ ܕܥܰܡܶܗ ܕܚܰܕܶܬܘ ܠܗܰܝܟܠܶܗ ܕܡܳܪܝܳܐ: ܘܰܐܣܶܩܘ ܠܰܫܒܺܝܬܳܐ ܕܰܒܢ̈ܰܝ ܐܺܝܣܪܳܐܶܝܠ ܡ̣ܶܢ ܒܳܒܶܝܠ: ܡܶܬܕܰܟܪܺܝܢܰܢ ܕܶܝܢ ܒܥܺܐܕܳܐ ܗܳܢܳܐ ܠܰܒܬܽܘܠܬܳܐ ܩܰܕܺܝܫܬܳܐ ܘܠܐܴ ܡܢܰܣܝܰܬ݀ ܒܙܽܘܘܳܓܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ. ܠܰܬܪܶܥܣܰܪ ܫܠܺܝ̈ܚܶܐ ܩܰܕܺܝ̈ܫܶܐ ܘܰܓܒܰܝ̈ܳܐ: ܠܦܰܘܠܳܘܣ ܗ̇ܰܘ ܫܠܺܝܚܳܐ ܘܓܰܒܝܳܐ ܕܡ̣ܶܢ ܥܰܡ̈ܡܶܐ ܐܳܦ ܐܰܣܺܝܪܳܐ ܕܶܐܘܢܓܶܠܝܽܘܢ: ܠܣܺܝܥܬܳܐ ܕܫܰܒܥܺܝܢ ܘܰܬܪܶܝܢ ܡܣܰܒܪ̈ܳܢܶܐ: ܠܝܽܘܚܰܢܳܢ ܡܰܥܡܕܳܢܳܐ: ܘܠܶܣܛܶܦܰܢܳܘܣ ܗ̇ܰܘ ܕܰܪܓܺܝܡ ܡܶܛܽܠ ܫܡܳܟ ܩܰܕܺܝܫܳܐ: ܘܰܠܪ̈ܶܒܘܳܬܳܐ ܘܰܐܠܦ̈ܶܐ ܕܩܰܕܺܝ̈ܫܶܐ ܕܰܒܪܽܘܚܳܐ ܩܰܕܺܝܫܳܐ ܠܳܥ̇ܙܺܝܢ ܗܘܰܘ: ܘܰܒܬܶܕܡܪ̈ܳܬܳܐ ܘܩܽܘ̈ܠܳܣܶܐ ܠܳܟ ܡܰܘܪܒܺܝܢ ܗܘܰܘ: ܠܣܳܗ̈ܕܶܐ ܕܶܐܬܩܛܶܠܘ ܡܶܛܽܠ ܚܽܘܒܳܟ: ܘܰܪ̈ܓܽܘܡܝܶܐ ܡܰܪܺܝܪ̈ܶܐ ܣܰܝܒܰܪܘ ܠܓܽܘܕܳܐ ܗ̇ܳܝ ܕܰܐܪܒܥܺܝܢ ܣܳܗ̈ܕܶܐ ܢܰܨܺܝ̈ܚܶܐ: ܠܣܽܘܢܢܶܗ̈ܕܽܘ ܩܰܕܺܝ̈ܫܳܬܳܐ ܘܬܺܐܒܳܠܳܝ̈ܳܬܳܐ ܕܰܐܟܪܶܙܘ ܠܰܢ ܗܰܝܡܳܢܽܘܬܳܐ ܫܰܪܺܝܪܬܳܐ ܠܦܰܛܪܝܰܪ̈ܟܽܘ ܐܳܘܪܬܽܘܕܳܟܣܽܘ ܘܠܐܷܦܣ̈ܩܽܘܦܶܐ ܢܦܺܝ̈ܚܰܝ ܡ̣ܶܢ ܪܽܘܚܳܐ ܕܰܐܠܳܗܳܐ. ܠܣܳܥܽܘܪ̈ܶܐ ܠܪ̈ܺܝܫܰܝ ܥܺܕ̈ܳܬܳܐ ܠܪ̈ܺܝܫܰܝ ܕܰܝܪ̈ܳܬܳܐ: ܠܩܰܫܺܝ̈ܫܶܐ: ܠܰܡܫܰܡ̈ܫܳܢܶܐ: ܠܐܱܦܽܘܕܝܰܩ̈ܢܽܘ: ܠܰܦܣ̈ܰܠܛܽܘ: ܠܐܱܢܰܓܢܺܝ̈ܣܛܽܘ: ܠܩܳܪ̈ܽܘܝܶܐ: ܠܰܡܙܰܡܪ̈ܳܢܶܐ: ܠܰܡܦܰܫ̈ܩܳܢܶܐ: ܠܰܡܦܰܪ̈ܫܰܝ ܩܺܝ̈ܢܳܬܳܐ ܘܰܠܗ̇ܳܢܽܘܢ ܕܥܰܠ ܐܶܣܛܽܘ̈ܢܶܐ ܘܒܶܝܬ ܚܒܽܘܫ̈ܝܶܐ ܕܰܐܪܥܳܐ ܠܳܟ ܗ̣ܽܘ ܡܫܰܒܚܺܝܢ: ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܘܰܒܒܳܥܘ̈ܳܬܗܽܘܢ ܢܶܬܩܰܒ̈ܠܳܢ ܨܠܰܘ̈ܳܬܳܐ ܕܥܰܒܕܰܝ̈ܟ ܒܥܶܕܳܢܳܐ ܗܳܢܳܐ: ܘܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܒܺܝܫܳܐ ܘܚܰܝܠܶܗ ܢܶܬܡܰܟܰܟ ܩܕܳܡܰܝܢ: ܘܢܶܫܬܰܒܰܚ ܘܢܶܬܩܰܠܰܣ ܡ̣ܶܢ ܡܪܰܘܡܳܐ ܫܡܳܐ ܕܺܝܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܢܶܫܬܘܶܐ ܠܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܘܰܠܓܰܠܝܽܘܬ ܐܰܦ̈ܶܐ ܒܝܰܘܡܳܐ ܕܕܺܝܢܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡܘ ܛܟ̈ܣܐ ܗܠܝܢ ܕܥܠ ܫܒܬܐ ܩܕܝܫܬܐ ܕܚܘܪ̈ܐ ܒܥܘܕܪܢܐ ܕܡܢ ܐܠܗܐ ܡܪܢ ܘܐܠܗܢ ܠܥܠܡ ܥܠܡܝܢ

 

ܬܘܒ ܛܟܣܐ ܥܠ ܚܕ ܒܫܒܐ ܚܕܬܐ

ܩܕܡܝܬ ܨܠܘܬܐ ܕܪܡܫܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ: ܕܢܶܬܚܰܕܰܬ݀ ܒܝܰܕ ܕܡܳܐ ܘܡܰܝ̈ܳܐ ܕܰܪܕܰܘ ܡ̣ܶܢ ܕܰܦܢܳܟ ܩܰܕܺܝܫܬܳܐ ܘܡܰܥܒܕܰܬ݀ ܚܰܝ̈ܶܐ. ܘܫܰܪܰܪ ܠܰܢ ܒܗܰܝܡܳܢܽܘܬܳܐ ܕܒܳܟ ܐܰܝܟ ܬܽܐܘܡܰܐ ܫܠܺܝܚܳܐ: ܐܰܝܟܰܢܳܐ ܕܢܶܫܬܘܶܐ ܠܛܽܘ̈ܒܶܐ ܗܳܢܽܘܢ ܕܶܐܡܰܪܬ: ܕܛܽܘܒܰܝ̈ܗܽܘܢ ܠܐܱܝܠܶܝܢ ܕܠܐܴ ܚܙܰܐܘܽܘܢܝ ܘܗܰܝܡܶܢܘ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܱܒܽܘܟ܀

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܝܳܗܽܘܒܳܐ ܕܚܰܝ̈ܶܐ: ܕܰܒܡܰܘܬܶܗ ܐܰܚܺܝ ܡܺܝܬܽܘܬܰܢ: ܘܒܰܩܝܳܡܬܶܗ ܐܰܩܺܝܡ ܠܰܢ ܡ̣ܶܢ ܡܰܦܽܘܠܬܰܢ ܕܰܚܛܺܝܬܳܐ: ܗ̇ܰܘ ܕܗ̣ܽܘ ܩܢܽܘܡܳܐܺܝܬ ܐܶܬܚܙܺܝ ܠܬܰܠܡܺܝ̈ܕܰܘܗܝ ܒܥܶܠܺܝܬܳܐ ܗ̇ܳܝ ܡܰܠܝܰܬ݀ ܐ̱ܪ̈ܳܙܶܐ ܘܦ̈ܶܠܐܴܬܳܐ: ܘܥܰܠ ܠܘܳܬܗܽܘܢ ܟܰܕ ܬܰܪ̈ܥܶܐ ܐܰܚܺܝܕܺܝܢ: ܘܫܰܪܰܪ ܐܶܢܽܘܢ ܥܰܠ ܩܝܳܡܬܶܗ ܟܰܕ ܚܰܘܺܝ ܠܗܽܘܢ ܐܺܝ̈ܕܰܘܗܝ ܘܣܶܛܪܶܗ: ܘܒܰܝܰܐܐ ܐܶܢܽܘܢ ܡ̣ܶܢ ܟܰܪܝܽܘܬܳܐ ܘܥܳܩܬܳܐ ܕܨܶܦܚܰܬ݀ ܐܶܢܽܘܢ ܡܶܛܽܠ ܡܰܘܬܶܗ ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܡܶܠܬܳܐ ܝܺܚܺܝܕܳܝܶܗ ܕܰܐܒܳܐ: ܝܰܠܕܳܐ ܓܢܺܝܙܳܐ ܠܐܴ ܡܶܬܕܰܪܟܳܢܳܐ: ܕܰܐܠܳܗܳܐܺܝܬ ܘܰܡܬܽܘܡܳܐܺܝܬ: ܘܰܠܥܶܠ ܡ̣ܶܢ ܙܰܒ̈ܢܶܐ ܡܶܢܶܗ ܨܡܰܚܬ ܠܐܴ ܡܶܬܡܰܠܠܳܢܳܐܺܝܬ. ܐܶܬܬܰܚܬܺܝܬ ܒܛܰܝܒܽܘܬܳܟ: ܘܰܗܘܰܝܬ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ ܒܢ̈ܰܝ ܡܰܥܡܽܘܕܺܝܬܳܐ: ܘܪܽܘܚܳܢܳܐܺܝܬ ܥܒܰܕܬ ܠܰܢ ܐܰܚ̈ܶܐ ܘܰܒܢ̈ܰܝ ܝܳܪܬܽܘܬܳܐ ܕܺܝܠܳܟ: ܘܟܰܕ ܡܶܛܽܠܳܬܰܢ ܥܰܡ ܡܰܘܬܳܐ ܐܶܬܥܰܪܙܰܠܬ: ܐܶܬܢܰܚܰܡܬ ܘܩܳܡܬ ܓܰܢ̱ܒܳܪܳܐܺܝܬ ܒܝܰܘܡܳܐ ܬܠܺܝܬܳܝܳܐ: ܘܰܗܘܰܝܬ ܒܽܘܟܪܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܒܚܰܕ ܒܫܰܒܳܐ ܕܺܐܝܬܰܘܗܝ ܒܽܘܟܪܳܐ ܕܟܽܠܗܽܘܢ ܝܰܘ̈ܡܳܬܳܐ ܕܒܶܗ ܐܶܬܒܪܺܝܘ ܫܡܰܝܳܐ ܘܰܐܪܥܳܐ ܒܡܶܠܬܳܟ ܒܳܪܽܘܝܬܳܐ: ܘܒܶܗ ܚܕܺܝܘ ܘܶܐܬܦܨܰܚܘ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ ܒܰܩܝܳܡܬܳܟ: ܘܬܶܫܒܽܘܚܬܳܐ ܚܕܰܬܳܐ ܝܰܒܶܒܘ ܠܳܟ: ܘܒܶܗ ܐܶܬܦܣܶܩ ܘܒܰܛܶܠ ܫܽܘܠܛܳܢܶܗ ܕܡܰܘܬܳܐ: ܘܒܶܗ ܣܰܓܺܝ ܒܽܘܝܳܐܳܐ ܠܚܰܝ̈ܶܐ ܕܗܰܝܡܶܢܘ ܒܰܐܠܳܗܽܘܬܳܟ ܬܪܺܝܨܳܐܺܝܬ. ܘܒܶܗ ܒܗܳܢܳܐ ܬܽܘܒ ܝܰܘܡܳܐ ܪܰܒܳܐ ܘܰܫܒܺܝܚܳܐ ܕܚܰܕ ܒܫܰܒܳܐ ܚܰܕܬܳܐ: ܕܡ̣ܶܢ ܒܳܬܰܪ ܩܝܳܡܬܳܐ ܡܰܥܒܕܰܬ݀ ܚܰܝ̈ܶܐ: ܘܰܡܙܰܡܢܳܢܺܝܬܳܐ ܕܟܽܠܗܶܝܢ ܛܳܒ̈ܳܬܳܐ: ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܘܡܶܬܟܰܫܦܺܝܢܰܢ ܘܰܡܦܺܝܣܺܝܢܰܢ ܠܒܰܣܺܝܡܽܘܬܳܟ ܒܗܳܢܳܐ ܝܰܘܡܳܐ ܕܺܐܝܬܰܘܗܝ ܡܚܰܕܬܳܢܳܐ ܕܰܩܝܳܡܬܳܟ ܘܒܶܝܬ ܝܰܠܕܳܐ ܕܦܽܘܪܩܳܢܳܐ ܕܺܝܠܳܟ ܗܳܢܳܐ ܕܒܶܗ ܚܰܕܬܳܐܺܝܬ ܥܰܠܬ ܨܶܝܕ ܬܰܠܡܺܝ̈ܕܶܐ ܕܺܝܠܳܟ ܠܥܶܠܺܝܬܳܐ: ܘܰܫܠܳܡܳܐ ܚܰܕܬܳܐ ܝܰܗܒܬ ܠܗܽܘܢ: ܘܫܰܪܰܪܬ ܐܶܢܽܘܢ ܥܰܠ ܩܝܳܡܬܳܟ ܗ̇ܳܝ ܕܗ̣ܺܝ ܗܘܳܬ݀ ܩܝܳܡܬܳܐ ܫܰܪܺܝܪܬܳܐ ܕܡܰܦܽܘܠܬܰܢ: ܗܳܢܳܐ ܕܒܶܗ ܩܰܒܶܠܬ݀ ܥܺܕܬܳܟ ܚܕܰܬܳܐ ܢܳܡܽܘܣܳܐ ܕܺܝܠܳܟ: ܘܫܰܒܚܰܬ݀ ܬܶܫܒܽܘܚܬܳܐ ܚܕܰܬܳܐ ܠܰܫܡܳܟ ܩܰܕܺܝܫܳܐ: ܗܳܢܳܐ ܕܒܶܗ ܩܰܒܶܠܘ ܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܪܽܘܚܳܐ ܩܰܕܺܝܫܳܐ: ܒܡܰܦܽܘܚܺܝܬܳܐ ܕܺܝܠܳܟ ܚܕܰܬܳܐ ܩܰܕܺܝܫܬܳܐ ܗ̇ܳܝ ܕܰܢܦܰܚܬ ܒܗܽܘܢ: ܐܰܝܟܰܢܳܐ ܕܠܰܣܒܰܪܬܳܐ ܚܕܰܬܳܐ ܕܰܩܝܳܡܬܳܟ ܚܰܕܬܳܐܺܝܬ: ܕܢܰܟܪܙܽܘܢ ܒܣܰܘ̈ܦܶܝܗ̇ ܕܡܶܬܥܰܡܪܳܢܺܝܬܳܐ: ܗܳܢܳܐ ܕܟܰܕ ܐܰܨܶܕܘ ܒܶܗ ܢܒܺܝܶ̈ܐ ܘܚܰܙܳܝ̈ܶܐ ܡ̣ܶܢ ܪܽܘܚܩܳܐ: ܒܦ̈ܶܠܐܴܬܳܐ ܘܛܽܘܦ̈ܣܶܐ ܕܰܙܢܺܝ̈ܢ ܙܢܺܝ̈ܢ ܠܶܗ ܡܚܰܘܶܝܢ ܗܘܰܘ: ܒܡܰܫܟܢܳܐ ܕܣܳܗܕܽܘܬܳܐ ܕܝܰܬܺܝܪ ܡܰܠܝܳܐܺܝܬ ܡܶܬܚܰܕܰܬ݀: ܗ̇ܰܘ ܐܠܰܗܳܐ ܚܰܘܺܝ: ܘܡܽܘܫܶܐ ܩܒܰܥ: ܘܒܰܨܠܺܝܐܶܝܠ ܫܰܡܠܺܝ ܒܓܳܙܪ̈ܳܬܳܐ ܕܰܠܘܳܬ ܐܶܫܰܥܝܳܐ ܡܶܬܚܰܕ̈ܬܳܢ: ܕܺܐܝܬܰܝܗܶܝܢ ܥܺܕ̈ܳܬܳܐ ܕܥܰܡ̈ܡܶܐ ܒܡܰܠܟܽܘܬܶܗ ܕܕܰܘܺܝܕ ܕܡܶܬܚܰܕܬܳܐ ܒܰܡܫܺܝܚܳܝܽܘܬܳܐ ܘܰܒܟܳܪܽܘܙܽܘܬܳܐ: ܒܚܽܘܕܳܬܳܐ ܕܗܰܝܟܠܐܴ ܕܰܒܟܽܠ ܫܢܳܐ ܕܰܒܗܽܘܢ ܚܰܕ̈ܬܳܬܳܐ ܡܶܬܝܰܩܪ̈ܳܢ: ܗܳܠܶܝܢ ܕܟܰܕ ܠܟܽܠܗܶܝܢ ܒܢܰܦ̈ܫܳܬܰܢ ܨܳܝܪܺܝܢܰܢ: ܠܶܒܳܐ ܕܰܟܝܳܐ ܘܪܽܘܚܳܐ ܬܩܰܢܬܳܐ ܚܰܕܬܳܐܺܝܬ ܬܶܒܪܶܐ ܒܓܰܘܰܢ ܐܰܡܺܝܢܳܐܺܝܬ ܫܳܐܠܺܝܢܰܢ: ܘܒܳܟ ܐܳܕܳܡ ܚܰܕܬܳܐ: ܠܥܰܬܺܝܩܽܘܬܳܐ ܕܡ̣ܶܢ ܐܳܕܳܡ ܩܰܕܡܳܝܳܐ ܐܶܬܥܰܛܰܦܢܰܢ ܡܛܰܠܩܺܝܢܰܢ: ܘܰܠܢܰܚ̈ܬܶܐ ܚܰܕ̈ܬܶܐ ܕܡ̣ܶܢ ܪܽܘܚܳܐ ܩܰܕܺܝܫܳܐ ܡܶܬܥܰܛܦܺܝܢܰܢ: ܘܒܰܙ̈ܢܰܘܗܝ ܕܒܰܪܢܳܫܳܐ ܚܰܕܬܳܐ ܕܒܳܟ ܐܠܰܗܳܐ ܐܶܬܒܪܺܝ ܚܰܕܬܳܐܺܝܬ ܡܶܬܗܰܦܟܺܝܢܰܢ: ܘܠܳܟ ܐܠܰܗܳܐ ܕܶܐܬܒܰܣܰܪܬ ܚܠܳܦܰܝܢ ܡ̣ܶܢ ܗܳܫܳܐ ܚܰܕܬܳܐ ܒܪܽܘܚ ܘܒܰܦܓܰܪ ܡܫܰܒܚܺܝܢܰܢ: ܘܰܠܥܰܬܺܝ̈ܩܳܬܳܐ ܡܰܒܥܕܺܝܢܰܢ ܣܳܝܡܺܝܢܰܢ ܡܶܢܰܢ: ܘܟܽܠ ܡܶܕܶܡ ܒܳܟ ܢܶܗܘܶܐ ܠܰܢ ܚܰܕܬܳܐ: ܐܰܝܟܰܢܳܐ ܕܥܶܛܪܳܐ ܗܳܢܳܐ ܕܗܶܪ̈ܽܘܡܶܐ ܕܰܩܕܳܡ ܪܰܒܽܘܬܳܟ ܡܩܰܪܒܺܝܢܰܢ ܒܥܺܐܕܳܐ ܗܳܢܳܐ ܕܚܽܘܕܳܬܳܐ: ܢܶܬܩܰܒܰܠ ܒܪ̈ܰܚܡܰܝܟ ܘܢܶܬܚ̈ܰܠܛܳܢ ܒܶܗ ܨܠܰܘ̈ܳܬܳܐ ܡܚܺܝ̈ܠܳܬܳܐ ܒܛܰܝܒܽܘܬܳܟ: ܘܢܶܗܘܶܐ ܠܚܽܘܣܳܝܳܐ ܕܚܰܘ̈ܒܶܐ: ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܕܟܽܠܳܗ̇ ܡܰܪܥܺܝܬܳܟ: ܦܪܺܝܩܰܬ݀ ܒܰܨܠܺܝܒܳܟ ܙܰܟܳܝܳܐ. ܘܰܠܥܽܘܗܕܳܢܳܐ ܘܳܐܣܝܽܘܬܳܐ ܕܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ: ܘܰܠܦܽܘܢܳܝܳܐ ܕܟܽܠܗܶܝܢ ܫ̈ܶܐܠܳܬܳܐ ܫܰܦܺܝܪ̈ܳܬܳܐ ܕܰܐܝܠܶܝܢ ܕܶܐܬܓܰܘܰܣܘ ܘܡܶܬܓܰܘܣܺܝܢ ܒܪ̈ܰܚܡܰܝܟ: ܘܰܠܥܽܘܗܕܳܢܳܐ ܘܰܢܝܳܚܳܐ ܕܟܽܠܗܽܘܢ ܥܰܢܺܝ̈ܕܶܐ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܰܚܢܰܢ ܘܗ̣ܶܢܽܘܢ ܢܶܫܬܶܐ ܥܰܡܳܟ ܡ̣ܶܢ ܝܰܠܕܳܐ ܕܰܓܦܶܬܳܐ: ܘܰܢܫܰܒܰܚ ܠܳܟ ܚܰܕܬܳܐܺܝܬ ܘܠܐܴ ܡܶܬܦܰܣܩܳܢܳܐܺܝܬ ܬܶܫܒܽܘܚܬܳܐ ܚܕܰܬܳܐ ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܛܪܐ

ܡܫܺܝܚܳܐ ܦܳܪܽܘܩܰܢ ܕܰܒܬܰܪ̈ܥܶܐ ܐܰܚܺܝ̈ܕܶܐ ܥܰܠܬ ܨܶܝܕ ܬܰܠܡܺܝ̈ܕܰܝܟ: ܘܰܫܪܳܪܳܐ ܕܗܰܝܡܳܢܽܘܬܳܐ ܠܬܽܐܘܡܰܐ ܚܰܘܺܝܬ: ܘܰܠܗܰܝܡܳܢܽܘܬܶܗ ܫܰܪܰܪܬ: ܒܓܶܫܬܳܐ ܕܕܰܦܢܳܟ ܡܰܥܒܕܰܬ݀ ܚܰܝ̈ܶܐ: ܦܬܰܚ ܬܰܪܥܳܐ ܕܪ̈ܰܚܡܰܝܟ ܠܒܳܥ̈ܘܳܬܰܢ: ܘܢܶܥܽܘܠ ܥܶܛܪܳܐ ܕܦܺܝܪܡܰܢ ܠܐܱܬܪܳܐ ܓܢܺܝܙܳܐ ܕܺܐܝܬܽܘܬܳܟ: ܘܢܺܐܬܶܐ ܠܰܢ ܥܽܘܕܪܳܢܳܐ ܡ̣ܶܢ ܒܶܝܬܓܰܙܳܟ ܥܰܬܺܝܪܳܐ ܘܰܫܦܺܝܥܳܐ: ܘܢܶܗܘܶܐ ܒܶܗ ܚܰܕ̈ܬܶܐ ܒܝܰܘܡܳܐ ܚܰܕܬܳܐ: ܘܟܰܕ ܒܰܠܒܽܘ̈ܫܶܐ ܢܰܗܺܝܪ̈ܶܐ ܘܒܰܥܒܳܕ̈ܶܐ ܢܰܨܺܝ̈ܚܶܐ ܦܳܓܥܺܝܢܰܢ ܒܳܟ: ܒܝܰܘܡܳܟ ܪܰܒܳܐ ܒܰܥ̈ܢܳܢܶܐ ܠܐܘܪܥܳܟ ܢܶܬܚܛܶܦ ܘܥܰܡ ܟܶܢ̈ܫܶܐ ܕܩܰܕܺܝ̈ܫܰܝܟ ܢܫܰܒܚܳܟ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܕܚܘܬܡܐ

ܫܠܳܡܳܐ ܕܶܐܬܺܝܗܶܒ ܡ̣ܶܢ ܡܳܪܰܢ ܝܰܘܡܳܢܳܐ ܒܥܶܠܺܝܬܳܐ ܠܬܰܠܡܺܝ̈ܕܶܐ: ܘܒܶܗ ܐܶܫܬܰܪܰܪܘ ܦܠܺܝ̈ܓܶܐ: ܗ̣ܽܘ ܢܶܗܘܶܐ ܠܟܶܢܫܳܐ ܕܰܦܪ̈ܺܝܩܶܐ: ܘܒܶܗ ܢܶܬܚܰܝܕܽܘܢ ܗܰܕܳܡ̈ܶܐ ܣܕܺܝ̈ܩܶܐ: ܘܒܶܗ ܢܶܬܒܰܝܽܐܘܢ ܟܽܠܗܽܘܢ ܐܰܒܺܝ̈ܠܐܷ ܘܰܡܥܳܩ̈ܶܐ: ܘܒܶܗ ܬܶܬܦܰܨܶܐ ܥܺܕܬܳܐ ܡ̣ܶܢ ܒܺܝ̈ܫܳܬܳܐ ܡܳܪܰܢ ܘܰܐܠܳܗܰܢ܀

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܡܚܰܕܬܳܢܳܐ ܕܥܳܠܡ̈ܶܐ. ܕܒܽܐܘܪܚܳܐ ܚܰܕܬܳܐ ܐܶܬܳܐ ܠܰܒܪܺܝܬܳܐ: ܕܰܢܚܰܕܶܬ ܠܰܓܒܺܝܠܬܶܗ ܕܰܐܥܬܩܰܬ݀: ܒܛܳܥܝܽܘܬܳܐ ܕܰܚܛܺܝܬܳܐ: ܠܗ̇ܰܘ ܡܰܢܗܪܳܢܳܐ ܕܟܽܠ ܢܽܘܗܪܳܐ: ܕܢܽܘܗܪܳܐ ܚܰܕܬܳܐ ܡܶܬܝܰܕܥܳܢܳܐ ܡܠܐܷ ܠܬܺܒܶܝܠ ܒܰܩܝܳܡܬܶܗ ܡܫܰܒܰܚܬܳܐ: ܘܚܰܕܽܘܬܳܐ ܚܕܰܬܳܐ ܫܰܟܶܢ ܠܥܳܡܰܪܬܳܐ ܒܢܽܘܚܳܡܶܗ: ܠܗ̇ܰܘ ܕܽܘܡܳܪܳܐ ܬܗܺܝܪܳܐ: ܕܬܶܕܡܽܘܪܬܳܐ ܚܕܰܬܳܐ ܥܒܰܕ ܒܡܰܥܠܬܶܗ ܕܰܠܥܶܠܺܝܬܳܐ: ܘܰܦܨܺܝܚܽܘܬܳܐ ܚܕܰܬܳܐ ܐܰܩܢܺܝ ܠܠܶܒܳܐ ܕܰܫܠܺܝܚܽܘܬܳܐ: ܠܗ̇ܰܘ ܦܳܪܽܘܩܳܐ ܕܟܽܠ: ܕܚܰܘܺܝ ܦܽܘܪܩܳܢܳܐ ܚܰܕܬܳܐ ܠܟܶܢܫܳܐ ܕܬܰܠܡܺܝ̈ܕܰܘܗܝ: ܘܰܠܥܺܝܢ ܥܰܡ̈ܡܶܐ ܓܠܐ̣ܴ ܒܝܰܕ ܟܳܪ̈ܽܘܙܰܘܗܝ ܙܰܕܺܝܩܽܘܬܶܗ ܡܥܰܠܰܝܬܳܐ: ܘܗܳܐ ܡ̣ܶܢ ܣܰܘ̈ܦܶܐ ܠܣܰܘ̈ܦܶܝܗ̇ ܕܰܐܪܥܳܐ: ܬܶܫܒ̈ܚܳܬܳܐ ܚܰܕ̈ܬܳܬܳܐ ܡܶܬܩܰܪ̈ܒܳܢ ܠܶܗ ܒܗܰܝܡܳܢܽܘܬܳܐ ܘܬܰܘܕ̈ܝܳܬܳܐ ܦܰܐܝ̈ܳܬܳܐ ܡܶܙܕܰܡܪ̈ܳܢ ܠܶܗ ܒܰܦܨܺܝܚܽܘܬܳܐ: ܘܣܶܓ̈ܕܳܬܳܐ ܪ̈ܟܺܝܢܳܬܳܐ ܡܶܬܟܰܦ̈ܦܳܢ ܠܶܗ ܒܰܓܗ̈ܳܢܳܬܳܐ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܚܰܕܬܳܐ ܒܝܰܕ ܪ̈ܰܚܡܰܝܟ: ܠܥܰܬܺܝܩܽܘܬ ܥܳܠܡܳܐ ܕܰܐܫܶܚܬ ܒܛܳܥܝܽܘܬ ܚܛܺܝܬܳܐ: ܒܝܰܕ ܡܰܘܬܳܐ ܕܒܰܒܣܰܪ ܘܚܽܘܕܳܬܳܐ ܕܰܩܝܳܡܬܳܟ ܡܫܰܒܰܚܬܳܐ: ܡܶܢܕܪܺܝܫ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܒܓܰܘ ܥܶܠܺܝܬܳܐ ܐܰܚܺܝܕܰܬ݀ ܬܰܪ̈ܥܶܐ ܥܒܰܪܬ ܟܰܕ ܠܶܗ ܥܰܠܬ: ܠܰܘ ܪܽܘܚܳܐ ܗܰܓܳܓܳܝܳܐ ܕܫܰܪܓܪܳܓܪܳܝܳܐ: ܐܶܠܐܴ ܟܰܕ ܒܒܶܣܪܳܐ ܘܓܰܪ̈ܡܶܐ: ܦܰܓܪܳܐ ܕܠܐܴ ܚܙܳܐ ܚܒܳܠܐܴ ܕܺܐܝܬ ܠܳܟ ܡܰܠܽܘܢ ܕܶܝܢ ܐܠܰܗܳܐ ܕܰܡܒܰܣܰܪ ܐܶܬܢܰܚܰܡܬ. ܫܽܘܘܕܳܥܳܐ ܕܠܶܗ ܟܰܕ ܠܶܗ ܠܦܰܓܪܳܐ ܕܰܟܝܳܢܰܢ ܒܢܽܘܚܳܡܳܐ ܠܐܴ ܡܶܬܚܰܒܠܳܢܳܐ ܡܶܬܥܰܛܦܺܝܢܰܢ: ܘܫܰܪܰܪܬ ܐܶܢܽܘܢ ܒܗܰܝܡܳܢܽܘܬܳܐ ܕܒܳܟ: ܒܚܽܘܘܳܝ ܨܶܨ̈ܶܐ ܕܒܺܐܝ̈ܕܰܝܟ ܐܶܣܬܰܟܰܟ̈ܝ ܘܰܬܪܰܥ ܕܰܦܢܳܟ ܗ̇ܳܝ ܕܰܐܪܕܝܰܬ݀ ܠܰܢ ܡܥܺܝܢܳܐ ܕܚܰܝ̈ܶܐ ܘܠܐܴ ܡܳܝܽܘܬܽܘܬܳܐ ܘܟܰܕ ܒܚܰܕܘܰܬ݀ ܪܽܘܚܳܐ ܢܗܰܠܟܽܘܢ ܐܰܘܟܺܝܬ ܢܰܠܦܽܘܢ: ܕܒܳܟ ܠܰܒܢܰܝ̈ܢܳܫܳܐ: ܢܶܫܕܽܘܢ ܘܰܢܕܽܘܫܽܘܢ ܠܟܽܠܳܗ̇ ܥܰܡܽܘܛܽܘܬܳܐ ܗܽܘܠܳܢܳܝܬܳܐ: ܘܡ̣ܶܢ ܗܳܪܟܳܐ ܒܢܰܩܺܝܦܽܘܬܳܐ ܠܚܰܣܺܝܪܽܘܬ ܗܰܝܡܳܢܽܘܬܳܐ ܕܬܽܐܘܡܰܐ ܫܠܺܝܚܳܐ ܕܶܐܬܦܰܠܰܓ ܐܰܣܺܝܬ: ܐܰܘܟܺܝܬ ܬܰܘܕܺܝܬܳܐ ܚܰܬܺܝܬܬܳܐ ܐܠܰܦ ܠܰܢ: ܘܡܳܪܝܳܐ ܐܠܰܗܳܐ ܐܺܝܬܰܘܗܝ ܕܚܰܫ ܘܡܺܝܬ ܚܠܳܦܰܝܢ ܨܶܒܝܳܢܳܐܺܝܬ ܕܓܰܫܳܟ ܐܰܝܟ ܓܫܺܝܡܳܐ: ܘܶܐܫܬܰܘܕܥܳܟ ܐܰܝܟ ܠܐܴ ܓܫܺܝܡܳܐ: ܒܝܰܕ ܕܚܰܕ ܒܰܠܚܽܘܕ ܡܶܬܺܝܕܰܥ ܐܰܢ̱ܬ: ܘܗ̣ܽܘ ܟܰܕ ܗ̣ܽܘ ܡ̣ܶܢ ܒܳܬܰܪ ܚܕܳܝܽܘܬܳܐ ܐܠܰܗܽܘܬܳܐ ܡܪܰܝܰܡܬܳܐ: ܘܐ̱ܢܳܫܽܘܬܳܐ ܕܟܺܝܬܳܐ ܘܰܡܕܰܒܪܳܢܳܐܺܝܬ ܐܶܟܰܠ̣ܬ ܥܰܡܗܽܘܢ ܘܶܐܫܬܺܝܬ ܠܥܺܢܰܝ̈ܗܽܘܢ: ܕܰܬܚܰܘܶܐ ܕܗ̇ܰܘ ܕܚܰܫ ܘܡܺܝܬ ܗܽܘܝܽܘ ܕܩܳܡ ܘܶܐܬܢܰܚܰܡ: ܐܰܝܟ ܕܶܐܫܬܰܘܕܺܝܬ ܕܒܳܬܰܪ ܩܝܳܡܬܳܐ ܥܰܡ ܓܽܘܕܳܐ ܪܚܺܝܡܬܳܐ ܕܬܰܠܡܺܝ̈ܕܰܝܟ ܬܶܫܬܶܐ ܠܝܰܠܕܳܐ ܕܰܓܦܶܬܳܐ ܚܰܕܬܳܐܺܝܬ ܒܡܰܠܟܽܘܬܳܟ ܥܺܕܬܳܐ ܩܰܕܺܝܫܬܳܐ: ܟܰܕ ܠܰܘ ܦܰܓܪܳܐ ܚܳܫܽܘܫܳܐ ܐܺܝܬ ܠܳܟ: ܐܶܠܐܴ ܠܐܴ ܡܶܬܚܰܒܠܳܢܳܐ: ܡܶܟܺܝܠ ܐܳܦܠܐܴ ܡܶܫܬܰܓܢܝܳܢܳܐ ܘܶܐܬܬܢܺܝܚܰܬ ܘܰܐܢܺܝܚܬ ܒܝܰܘܡܳܐ ܫܒܺܝܥܳܝܳܐ ܠܟܽܠܗܽܘܢ ܫܟܺܝ̈ܒܶܐ: ܢܝ̇ܳܚܬܳܐ ܪܽܘܚܳܢܳܝܬܳܐ ܕܠܐܴ ܣܳܟ ܡܶܫܬܰܪܝܳܐ ܕܒܳܗ̇ ܐܳܦ ܥܬܺܝܕ ܕܢܶܗܘܶܐ ܫܽܘܒܳܬܳܐ ܠܛܳܒ̈ܶܐ ܘܒܺܝ̈ܫܶܐ ܟܰܕ ܫܳܩܠܐܴ ܣܳܟܳܐ ܫܒܺܝܥܳܝܽܘܬܳܐ ܕܥܳܠܡܳܐ ܗܳܢܳܐ: ܕܠܰܬܡܺܝܢܳܝܽܘܬܳܐ ܕܝܰܘܡܳܐ ܗ̇ܰܘ ܚܰܕܬܳܐ: ܘܚܰܕ ܐܺܝܡܳܡܳܐ ܩܰܕܡܳܝܳܐ ܘܰܐ̱ܚܪܺܢܳܐ ܕܠܐܴ ܐܠܶܝܳܐ ܗܳܘܶܐ: ܕܪܰܡܫܳܐ ܘܨܰܦܪܳܐ ܐܳܦ ܦܳܢܝܳܐ ܠܐܴ ܡܰܥܒܶܕ ܠܶܗ: ܕܒܶܗ ܬܶܢܝܳܢܽܘܬ ܬܶܕܢܰܚ ܡ̣ܶܢ ܫܡܰܝܳܐ: ܘܠܐܷܣܟܺܝܡܳܐ ܒܰܠܚܽܘܕ ܕܰܒܪܺܝܬܳܐ ܗܽܘܠܳܢܳܝܬܳܐ ܬܶܥܒܰܪ: ܘܠܰܘ ܠܐܘܣܺܝܰܐ ܕܺܝܠܳܗ̇: ܘܚܽܘܕܳܬܳܐ ܕܠܐܴ ܣ̇ܳܐܶܒ ܓܡܺܝܪܳܐܺܝܬ ܠܟܽܠ ܗܰܘܢܳܐ ܠܐܴ ܡܶܬܚܰܒܠܳܢܳܐ ܬܶܥܒܶܕ: ܒܝܰܕ ܗܰܘܢܳܐ ܗ̇ܰܘ ܒܺܝܫܳܐ ܐܳܒܶܕ. ܗܘܰܝܬ ܒܰܡܨܰܥܬܳܗ̇ ܕܡܶܬܥܰܡܪܳܢܺܝܬܳܐ ܒܠܶܒܳܗ̇ ܕܰܐܪܥܳܐ ܬܠܳܬܳܐ ܝܰܘ̈ܡܺܝܢ: ܘܰܦܫܰܛܬ ܠܒܰܪܢܳܫܳܐ ܕܶܐܙܕܩܬ ܒܛܳܥܝܽܘܬܳܐ ܠܘܳܬ ܪܰܒܽܘܬܳܐ: ܘܰܒܚܰܫܳܟ ܚܰܫܳܐ ܠܚܰܫܰܝ̈ܢ ܗܘܳܐ. ܘܰܐܚܺܝܬ ܠܰܢ: ܘܰܒܡܰܘܬܳܟ ܡܰܘܬܶܗ ܕܡܰܘܬܳܢ ܗܘܳܐ ܘܢܰܚܶܡܬ ܠܰܢ: ܘܡܶܛܽܠ ܗܳܠܶܝܢ ܘܕܰܐܝܟ ܗܳܠܶܝܢ ܡܶܬܟܰܫܦܺܝܢܰܢ ܠܳܟ ܐܳܘ ܛܳܒܳܐ ܚܰܝܳܐ ܕܡܺܝܬ ܘܰܚܝܳܐ ܒܚܰܝ̈ܶܐ ܐ̱ܢܳܫܳܝ̈ܶܐ: ܟܰܕ ܒܚܰܝ̈ܶܐ ܐܺܝܬܝ̈ܳܝܶܐ ܚܰܝܳܐ ܗ̇ܰܘ ܕܠܐܴ ܡܳܐܶܬ: ܕܰܒܝܰܘܡܳܐ ܗ̇ܰܘ ܩܰܕܡܳܝܳܐ ܘܰܐ̱ܚܪܳܝܳܐ ܕܒܶܗ ܚܽܘܕܳܬܳܐ ܡܒܰܛܠܳܢܳܐ ܕܰܚܛܺܝܬܳܐ ܐܳܒܶܕ ܠܥܳܠܡܺܝܢ: ܕܬܰܫܘܶܐ ܠܰܢ ܠܚܽܘܕܳܬܳܐ ܕܗ̇ܰܘ ܛܽܘܒܬܳܢܳܐ ܕܩܰܕܺܝ̈ܫܶܐ. ܘܰܕܫܳܘܶܐ ܠܰܣܡܳܟܳܐ ܗ̇ܰܘ ܚܰܕܬܳܐ ܕܪ̈ܽܘܚܳܢܶܐ: ܘܰܒܝܰܕ ܒܛܺܝܠܽܘܬܳܐ ܕܛܰܝܒܽܘܬܳܟ ܕܰܥܠܰܝܢ ܬܶܬܶܠ ܠܰܢ ܡ̣ܶܢ ܬܢܳܢ ܪܰܗܒܽܘܢܳܐ ܪܽܘܚܳܢܳܝܳܐ ܠܗܳܠܶܝܢ ܕܬܰܡܳܢ: ܕܢܶܬܚܰܕܰܬ ܒܕܽܘܒܳܪ̈ܶܐ ܕܡܰܫܠܚܺܝܢ ܠܥܰܬܺܝܩܳܐ: ܘܰܐܥܛܶܦ ܠܰܢ ܠܗ̇ܰܘ ܚܰܕܬܳܐ ܘܡܰܦܪܓܳܐ ܕܡܶܬܚܰܕܰܬ ܒܺܝܕܰܥܬܳܐ ܕܒܳܪܝܶܗ: ܕܰܒܚܰܕܽܘܬܳܐ ܕܪܽܘܚܳܐ ܩܕܳܡܰܝܟ ܢܗܰܠܶܟ ܘܰܗܘܳܐ ܒܣܰܝܒܽܘܬܳܐ ܐܰܘܟܺܝܬ ܒܥܰܬܺܝܩܽܘܬܳܐ ܕܰܟܬܳܒܳܐ ܘܚܰܝ̈ܶܐ ܠܐܴ ܚܳܫܽܘ̈ܫܶܐ ܒܰܙܢܰܝ̈ܳܐ ܕܰܡܝܰܬܪܽܘܬܳܐ ܫܰܟܶܢ ܠܰܢ ܐܰܝܟܰܢܳܐ ܕܢܶܬܚܙܶܐ ܠܘܳܬܳܟ ܣܰܚܺܝ̈ܚܶܐ: ܘܰܨܠܺܝ̈ܠܐܷ ܘܰܪ̈ܓܺܝܓܶܐ: ܐܰܝܟ ܕܳܐܕܳܡ ܩܕܳܡ ܥܒܳܪ ܦܽܘܩܕܳܢܳܐ: ܒܝܰܕ ܡܰܥܒܕܳܢܽܘܬܳܐ ܕܚܰܝ̈ܶܐ ܕܠܐܴ ܡܳܝܽܘܬܽܘܬܳܐ: ܕܡܶܢܳܟ ܢܳܣܒܺܝܢ ܓܒܰܝ̈ܳܐ ܒܰܢܝ̈ܳܚܳܬܳܐ ܕܢܰܦ̈ܫܳܬܳܐ ܡܗܰܝܡ̈ܢܳܬܳܐ ܕܰܐܚܶܒ̈ܝ ܠܫܽܘܢܳܝܳܐ ܕܡ̣ܶܢ ܗܳܪܟܳܐ: ܒܝܰܕ ܕܶܐܬܪܰܓܪ̈ܰܓܝ ܕܥܰܡܳܟ ܘܰܠܘܳܬܳܟ ܢܶܗܘ̈ܝܳܢ: ܘܢܶܫܬܘܶܐ ܕܰܢܩܽܘܡ ܚܰܕܬܳܐܺܝܬ ܥܰܡ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܩܰܕܶܡܘ ܚܰܫܘ ܫܰܪܝܳܐ ܕܦܰܓܪ̈ܳܐ: ܘܰܒܓܽܘܕܰܝ̈ܗܽܘܢ ܕܠܐܴ ܫܶܠܝܳܐ: ܢܰܣܶܩ ܠܳܟ ܬܶܫܒܽܘܚܬܳܐ ܚܕܰܬܳܐ: ܕܰܒܝܰܘܡܳܐ ܗ̇ܰܘ ܚܰܕܬܳܐ ܕܒܶܗ ܡܚܰܕܶܬ ܐܰܢ̱ܬ ܐܰܦܶܝ̈ܗ̇ ܕܰܐܪܥܳܐ: ܘܒܺܐܝ̈ܕܰܝܟ ܘܥܰܡܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܠܐܴ ܡܶܣܬܰܝܟܳܢܳܐ ܘܠܐܴ ܡܶܬܡܰܠܠܳܢܳܐ ܘܠܐܴ ܡܶܬܚܰܙܝܳܢܳܐ: ܕܥ̣ܰܠ ܠܥܶܠܺܝܬܳܐ ܠܘܳܬ ܬܰܠܡܺܝ̈ܕܶܐ ܟܰܕ ܐܰܚܺܝܕܺܝܢ ܬܰܪ̈ܥܶܐ: ܘܚܰܘܺܝ ܠܗܽܘܢ ܕܰܦܢܶܗ ܩܰܕܺܝܫܬܳܐ ܘܕܽܘܟܰܬ݀ ܠܽܘܟܳܝܬܳܐ ܘܨܶܨ̈ܶܐ: ܘܰܩܪܳܐ ܠܬܳܐܘܡܰܐ ܘܚܰܘܺܝ ܠܶܗ ܣܶܛܪܶܗ ܘܗܰܝܡܶܢ ܘܰܐܘܕܺܝ ܘܫܰܒܰܚ ܘܰܣܓܶܕ ܘܶܐܡܰܪ: ܡܳܪܝ ܘܰܐܠܳܗܝ: ܠܗ̇ܰܘ ܕܟܰܠܶܠ ܠܰܫܠܺܝ̈ܚܰܘܗܝ: ܘܫܰܪܰܪ ܐܶܢܽܘܢ ܒܥܶܠܺܝܬܳܐ ܗ̇ܳܝ ܐ̱ܪܳܙܳܢܳܝܬܳܐ: ܢܦܰܚ ܪܽܘܚܳܐ ܩܰܕܺܝܫܳܐ ܘܰܡܠܐܴ ܐܶܢܽܘܢ ܪܽܘܚܳܐ ܘܚܰܝܠܐܴ: ܠܗ̇ܰܘ ܕܰܐܫܩܺܝ ܐܶܢܽܘܢ ܚܰܡܪܳܐ ܚܰܕܬܳܐ ܕܰܐܠܳܗܽܘܬܶܗ ܘܥܰܫܶܢ ܐܶܢܽܘܢ ܒܚܰܝܠܶܗ ܕܠܶܗ ܝ̇ܳܐܶܐ ܫܽܘܒܚܳܐ܀

ܣܕܪܐ

ܟܰܕ ܠܝܰܘܡܳܐ ܗܳܢܳܐ ܩܰܕܺܝܫܳܐ ܡܥܰܕܥܕܺܝܢܰܢ: ܘܰܠܥܶܠܺܝܬܳܐ ܕܐ̱ܪ̈ܳܙܶܐ ܡܶܬܕܰܟܪܺܝܢܰܢ ܕܒܶܗ ܫܠܺܝ̈ܚܶܐ ܩܰܕܺܝ̈ܫܶܐ ܬܰܠܡܺܝ̈ܕܰܘܗܝ ܕܰܒܪܳܐ ܠܶܗ ܐܰܩܒܶܠܘ: ܘܟܰܕ ܡܶܬܒܰܩܶܝܢܰܢ: ܠܐܱܒܳܐ ܣܳܓܕܺܝܢܰܢ ܒܰܒܪܳܐ: ܘܠܰܒܪܳܐ ܒܰܐܒܳܐ ܘܰܠܪܽܘܚܳܐ ܩܰܕܺܝܫܳܐ: ܡܶܛܽܠ ܕܝܰܘܡܳܢܳܐ ܚܰܕܬܳܐ ܗܘܳܐ ܠܰܢ: ܚܰܕ ܒܫܰܒܳܐ ܕܰܩܝܳܡܬܳܐ ܗܳܟܺܝܠ ܐ̱ܪܳܙܰܐ ܗ̱̇ܘ ܕܦܽܘܪܩܳܢܳܐ: ܗܳܢܳܐ ܝܰܘܡܳܐ ܬܡܺܝܢܳܝܳܐ ܘܩܰܕܡܳܝܳܐ ܘܰܡܚܰܕܬܳܢܶܗ ܕܦܽܘܪܩܳܢܳܐ: ܟܰܕ ܕܶܝܢ ܒܪܰܡܫܳܐ ܕܚܰܕ ܒܫܰܒܳܐ ܚܰܕܬܳܐ: ܐܶܬܳܐ ܝܶܫܽܘܥ ܘܩ̣ܳܡ ܒܰܝܢܳܬܗܽܘܢ ܟܰܕ ܬܰܪ̈ܥܶܐ ܐܰܚܺܝܕܺܝܢ: ܘܐܶܡܰܪ ܠܗܽܘܢ ܫܳܠܡܳܐ ܥܰܡܟܽܘܢ: ܘܚܰܘܺܝ ܠܗܽܘܢ ܐܺܝܕܰܘ̈ܗܝ ܘܣܶܛܪܶܗ: ܘܕܽܘܟܰܬ ܠܽܘܟܳܝܬܳܐ ܘܨ̈ܶܨܶܐ: ܘܶܐܡܰܪ ܠܗܽܘܢ: ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇. ܐܰܝܟ ܕܚܳܙܶܝܢ ܐܢ̱ܬܽܘܢ ܕܺܐܝܬ ܠܺܝ: ܘܰܐܟܙܢܳܐ ܕܦܰܠܶܓ ܡܽܘܫܶܐ ܝܰܡܳܐ ܒܚܽܘܛܪܶܗ ܕܠܐܴ ܒܰܥܝ̇ܳܕܳܐ: ܘܰܐܦܪܰܥ ܫܰܒܛܶܗ ܕܰܐܗܪܽܘܢ ܘܰܐܣܺܝ ܚܶܘܝܳܐ ܕܰܢܚܳܫܳܐ: ܘܟܺܐܦܳܐ ܕܢܰܗܪ̈ܰܘܳܬܳܐ ܝܶܗܒ̣ܰܬ݀ ܕܠܐܴ ܒܰܥܝܳܕܳܐ: ܘܰܐܪܕܺܝ ܦܰܟܳܐ ܕܰܚܡܳܪܳܐ ܡܰܝ̈ܳܐ ܕܠܐܴ ܒܰܟܝܳܢܳܐ: ܘܟܽܠܗܽܘܢ ܗܳܠܶܝܢ ܕܶܐܣܬܥܰܪ̈ܝ ܡ̣ܶܢ ܩܕܺܝܡ: ܘܗܳܠܶܝܢ ܕܒܺܐܝ̈ܕܰܝܟ ܡܫܺܝܚܳܐ: ܕܬܶܗܪܳܐ ܐܶܢܶܝܢ ܘܕܽܘܡܳܪܳܐ: ܕܰܐܝܟܰܢܳܐ ܕܥܰܠ ܒܬܰܪ̈ܥܶܐ ܐܰܚܺܝ̈ܕܶܐ ܕܰܒܬܽܘܠܬܳܐ ܘܠܐܴ ܦܬܰܚ ܐܶܢܽܘܢ: ܗܳܟܰܢܳܐ ܩܳܡ ܘܰܢܦܰܩ ܡ̣ܶܢ ܩܰܒܪܳܐ ܘܛܰܒ̈ܥܶܐ ܘܰܚܬܳܡ̈ܶܐ ܠܐܴ ܐܶܫܬܪܺܝܘ: ܟܰܕ ܕܶܝܢ ܚܕܺܝܘ ܒܰܚܙܳܬܶܗ ܐܶܡܰܪ ܠܗܽܘܢ ܕܰܐܝܟܰܢܳܐ ܕܫܰܕܪܰܢܝ ܐܳܒܝ ܐܳܦ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ: ܘܰܢܦܰܚ ܒܗܽܘܢ ܘܩܰܒܶܠ ܗܘܰܘ ܪܽܘܚܳܐ ܕܩܽܘܕܫܳܐ: ܘܶܐܡܰܪ ܠܗܽܘܢ: ܕܶܐܢ ܬܶܫܒܩܽܘܢ ܚܛܳܗ̈ܶܐ ܕܐ̱ܢܳܫ ܢܶܫܬܰܒܩܽܘܢ ܠܶܗ: ܘܶܐܢ ܬܶܚܕܽܘܢ ܕܐ̱ܢܳܫ ܐܰܚܺܝܕܺܝܢ: ܘܰܕܢܶܐܣܪܽܘܢ ܘܢܶܫܪܽܘܢ ܒܰܫܡܰܝܳܐ ܘܒܰܐܪܥܳܐ: ܘܰܕܢܶܣܥܪܽܘܢ ܬܶܕܡܪ̈ܳܬܳܐ ܘܚܰܝ̈ܠܐܷ ܘܳܐܣܘ̈ܳܬܳܐ: ܕܰܢܩܺܝܡܽܘܢ ܡܺܝ̈ܬܶܐ ܒܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܐܶܫܬܰܘܕܺܝ ܠܗܽܘܢ: ܘܟܰܕ ܗܰܝܡܶܢ ܬܽܐܘܡܰܐ ܘܓܰܫ ܕܰܦܢܶܗ ܕܡܳܪܰܢ: ܘܶܐܡܰܪ ܡܳܪܝ ܘܰܐܠܳܗܝ: ܪܰܒ ܫܽܘܠܛܳܢܳܐ ܕܶܐܬܺܝܗܶܒ ܠܰܫܠܺܝ̈ܚܶܐ ܩܰܕܺܝ̈ܫܶܐ ܡ̣ܶܢ ܡܫܺܝܚܳܐ: ܘܰܠܗܽܘܢ ܚܰܘܺܝ ܢܰܦܫܶܗ: ܟܰܕ ܩܳܡ ܡ̣ܶܢ ܩܰܒܪܳܐ: ܗ̣ܶܢܽܘܢ ܐܶܢܽܘܢ ܪ̈ܺܝܫܳܢܶܐ ܕܡܰܠܟܽܘܬܳܐ ܕܰܫܡܰܝܳܐ ܘܰܠܗܽܘܢ ܥܒܰܕ ܒܽܘܟܪ̈ܶܐ ܕܥܳܠܡܳܐ ܚܰܕܬܳܐ: ܘܰܠܗܽܘܢ ܐܶܫܬܰܘܕܺܝ ܟܽܘܪ̈ܣܰܘܳܬܳܐ: ܕܢܶܬܒܽܘܢ ܘܰܢܕܽܘܢܽܘܢ ܫܰܒ̈ܛܶܐ ܕܺܐܝܣܪܳܐܶܝܠ: ܘܰܠܗܽܘܢ ܐܰܘܪܶܒ ܘܰܩܪܳܐ ܐܶܢܽܘܢ ܐܰܚܰܘ̈ܗܝ ܘܪ̈ܳܚܡܰܘܗܝ: ܘܰܐܫܠܶܛ ܐܶܢܽܘܢ ܥܰܠ ܡܰܠܟܽܘܬܶܗ: ܘܰܩܠܺܝ̈ܕܶܐ ܕܰܫܡܰܝܳܐ ܝܰܗܒ ܒܺܐܝ̈ܕܰܝܗܽܘܢ: ܥܰܡ ܫܽܘܒܩܳܢܳܐ ܕܰܚܛܳܗ̈ܶܐ ܕܰܒܢܰܝ̈ܢܳܫܳܐ: ܘܰܥܠܰܝܗܽܘܢ ܒܢܳܐ ܠܥܺܕܬܶܗ: ܘܗ̣ܶܢܽܘܢ ܐܶܢܽܘܢ ܕܰܐܝܟ ܥܢ̈ܳܢܶܐ ܦܳܪܚܺܝܢ: ܘܰܐܝܟ ܝܰܘ̈ܢܶܐ ܠܟܰܘܰܝ̈ܗܶܝܢ: ܗ̣ܶܢܽܘܢ ܐܶܢܽܘܢ ܢܰܗܪ̈ܰܘܳܬܳܐ ܕܰܡܚܰܕܶܝܢ ܠܰܡܕܺܝܢ̱ܬܶܗ ܕܰܐܠܳܗܳܐ ܕܺܐܝܬܶܝܗ̇ ܥܺܕܬܶܗ ܩܰܕܺܝܫܬܳܐ: ܗ̣ܶܢܽܘܢ ܐܶܢܽܘܢ ܙܰܠܺܝ̈ܩܰܘܗܝ ܕܫܶܡܫܳܐ ܕܙܰܕܺܝܩܽܘܬܳܐ ܡܫܺܝܚܳܐ ܕܪܰܕܦܽܘܗܝ ܠܚܶܫܽܘܟܳܐ ܕܛܳܥܝܽܘܬܳܐ ܕܰܚܛܺܝܬܳܐ: ܗ̣ܶܢܽܘܢ ܐܶܢܽܘܢ ܡܶܠܚܳܐ ܛܰܥܡܳܢܺܝܬܳܐ ܘܰܚܡܺܝܪܳܐ ܚܰܕܬܳܐ. ܗ̣ܶܢܽܘܢ ܐܶܢܽܘܢ ܐܰܟܳܪ̈ܶܐ ܚܠܺܝ̈ܨܶܐ: ܕܰܥܩܰܪܘ ܝܰܥܪܳܗ̇ ܕܚܰܢܦܽܘܬܳܐ. ܗ̣ܶܢܽܘܢ ܐܶܢܽܘܢ ܦܳܠܚ̈ܶܐ ܟܰܫܺܝܪ̈ܶܐ ܒܟܰܪܡܶܗ ܕܰܡܫܺܝܚܳܐ: ܗ̣ܶܢܽܘܢ ܐܶܢܽܘܢ ܪ̈ܰܒܰܝ ܚܰܝ̈ܠܐܷ: ܕܰܢܦܰܩܘ ܥܰܠ ܡܰܫܪܺܝܬܶܗ ܕܳܐܟܶܠܩܰܪܨܳܐ ܘܰܪܕܰܦܘ ܠܚܰܝܠܰܘ̈ܳܬܶܗ ܕܣܳܛܳܢܳܐ: ܘܰܐܥܕܺܝܘ ܡܶܢܶܗ ܫܒܺܝܬܳܐ ܕܐ̱ܢܳܫܽܘܬܳܐ: ܗ̣ܶܢܽܘܢ ܐܶܢܽܘܢ ܐܳܣܘ̈ܳܬܳܐ ܚܰܟܺܝ̈ܡܶܐ: ܕܰܐܣܺܝܘ ܟܺܐܒ̈ܶܐ ܘܟܽܘܪ̈ܗܳܢܶܐ ܢܰܦܫܳܢܳܝ̈ܶܐ ܘܦܰܓܪ̈ܳܢܳܝܶܐ: ܗ̣ܶܢܽܘܢ ܐܶܢܽܘܢ ܕܰܐܟܪܶܙܘ ܒܬܺܒܶܝܠ ܣܒܰܪܬܶܗ ܕܰܒܪܳܐ: ܘܰܐܦܢܺܝܘ ܠܥܰܡ̈ܡܶܐ ܛܳܥܰܝ̈ܳܐ ܠܐܘܪܚܳܐ ܕܰܫܪܳܪܳܐ: ܗ̣ܶܢܽܘܢ ܐܶܢܽܘܢ ܕܰܟܬܺܝܒܺܝܢ ܫܡܳܗܰܝ̈ܗܽܘܢ ܒܣܶܦܪܳܐ ܕܚܰܝ̈ܶܐ ܒܰܫܡܰܝܳܐ ܐܰܝܟܰܢܳܐ ܕܰܒܝܰܕ ܨܠܰܘ̈ܳܬܗܽܘܢ ܬܶܫܬܘܶܐ ܥܺܕܬܳܐ ܥܰܡ ܝܰܠܕܶܝ̈ܗ̇ ܠܰܩܝܳܡܬܳܐ ܕܡ̣ܶܢ ܝܰܡܺܝܢܳܟ: ܘܬܰܣܶܩ ܫܽܘܒܚܳܐ ܘܬܰܘܕܺܝܬܳܐ ܒܗ̇ܰܘ ܥܳܠܡܳܐ ܕܠܐܴ ܥܳܒܰܪ ܠܐܱܒܳܐ ܘܠܰܒܪܳܐ܀

 

ܨܠܘܬܐ ܕܫܘܪܝܐ ܕܨܦܪܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ: ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܥܺܐܕܳܐ ܕܢܽܘܚܳܡܳܟ ܫܒܺܝܚܳܐ: ܕܢܶܬܢܰܗܪ̈ܳܢ ܢܰܦ̈ܫܳܬܰܢ ܒܝܽܘܠܦܳܢܳܟ: ܐܰܝܟ ܕܶܐܢܰܗܰܪܬ ܒܙܰܠܺܝ̈ܩܰܝܟ ܠܬܰܠܡܺܝ̈ܕܰܝܟ: ܘܰܓܠܺܝ ܠܬܰܚܦܺܝܬܳܐ ܗ̇ܳܝ ܚܶܫܽܘܟܬܳܐ: ܡ̣ܶܢ ܬܰܪ̈ܥܝܳܬܰܢ: ܐܰܝܟ ܕܡ̣ܶܢ ܫܠܺܝ̈ܚܶܐ ܥܰܠ ܝܰܡܬܳܐ ܕܛܺܝܒܶܪܺܝܳܘܣ: ܕܢܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܳܪܰܢ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܦܳܪܽܘܩܳܐ ܕܟܽܠ: ܕܚܰܘܺܝ ܦܽܘܪܩܳܢܶܗ ܚܰܕܬܳܐ ܠܟܶܢܫܳܐ ܕܬܰܠܡܺܝܕܽܘܬܳܐ: ܘܰܠܥܺܝܢ ܥܰܡ̈ܡܶܐ ܓܠܐܴ ܙܰܕܺܝܩܽܘܬܶܗ ܩܕܳܡ ܟܳܪ̈ܽܘܙܰܘܗܝ ܒܰܡܥܰܠܝܽܘܬܶܗ ܘܫܰܪܰܪ ܠܬܽܐܘܡܰܐ ܫܠܺܝܚܳܐ ܒܓܶܫܬܳܐ ܕܕܰܦܢܶܗ ܘܰܒܫܽܘ̈ܡܳܬܶܗ: ܘܕܽܘܟܰܬ݀ ܨܶܨ̈ܶܐ ܕܚܰܘܺܝ ܠܶܗ ܒܛܰܝܒܽܘܬܶܗ: ܘܰܕܡܳܪܝ ܐܰܢ̱ܬ ܘܰܐܠܳܗܝ ܐܰܙܥܶܩ ܕܠܐܴ ܦܽܘܠܳܓܳܐ: ܘܗܳܐ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ ܬܶܫܒ̈ܚܳܬܳܐ ܡܶܬܩܰܪ̈ܒܳܢ ܠܶܗ ܒܰܐܡܺܝܢܽܘܬܳܐ: ܘܬܰܘܕ̈ܝܳܬܳܐ ܦܰܐܝ̈ܳܬܳܐ ܡܶܙܕܰܡܪ̈ܳܢ ܠܶܗ ܒܰܐܟܺܝܦܽܘܬܳܐ: ܘܣܶܓܕ̈ܳܬܳܐ ܪ̈ܟܺܝܢܳܬܳܐ ܡܶܫܬܰܘܫ̈ܛܳܢ ܠܶܗ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܒܫܰܘܝܽܘܬܳܐ: ܒܗܳܢܳܐ ܥܶܕܳܢܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܠܗ̇ܰܘ ܕܰܥܒܰܕܬ ܠܟܽܠ ܒܚܶܟܡܬܳܟ ܐܺܝܬܝܳܝܬܳܐ: ܘܚܰܕܶܬܬ ܠܟܽܠ ܒܰܩܝܳܡܬܳܟ: ܡܫܰܒܰܚܬܳܐ: ܘܰܡܠܰܝܬ ܪܘܳܙܳܐ ܘܚܰܕܽܘܬܳܐ ܠܟܽܠܳܗ̇ ܒܪܺܝܬܳܐ ܒܦܽܘܪܩܳܢܳܐ ܚܰܕܬܳܐ ܕܝܰܗܒܬ ܠܓܶܢܣܳܐ ܕܰܒܢܰܝ̈ܢܳܫܳܐ: ܗ̇ܰܘ ܕܰܐܒܗܶܬܬ ܒܰܩܝܳܡܬܳܟ: ܠܰܟܢܽܘܫܬܳܐ ܕܨܳܠܽܘ̈ܒܶܐ ܘܒܰܕܰܪܬ ܒܰܨܠܺܝܒܳܟ ܠܨܶܗܝܽܘܢ ܩܳܛܽܘܠܬܳܐ ܘܙܰܡܶܢܬ ܦܨܺܝܚܽܘܬܳܐ ܠܥܺܕܬܳܐ ܡܟܺܝܪܬܳܟ ܟܰܠܬܳܐ ܩܰܕܺܝܫܬܳܐ. ܗ̇ܳܝ ܕܡ̣ܶܢ ܩܶܢܛܳܐ ܕܝܽܘܕܳܝ̈ܶܐ ܙܪܺܝܩܳܐ ܗܘܳܬ݀: ܝܰܘܡܳܢܳܐ ܕܶܝܢ ܠܥܶܠܺܝܬܳܐ ܕܐ̱ܪ̈ܳܙܶܐ ܟܰܢܶܫܬܳܗ̇: ܕܰܠܟܽܠ ܦܽܘ̈ܠܳܓܶܐ ܬܪܺܝܡ ܡܶܢܳܗ̇ ܒܰܚܢܳܢܳܟ: ܚܰܕ ܒܫܰܒܳܐ ܗ̇ܰܘ ܕܰܥܒܰܪ ܢܶܫ̈ܶܐ ܩܰܕܺܝ̈ܫܳܬܳܐ ܦܳܓ̈ܥܳܢ ܒܳܟ ܘܶܐܚܰܕܶܝ̈ܢ ܪ̈ܶܓܠܰܝܟ ܘܣܓ̈ܕܝܢ ܠܳܟ: ܘܫܶܡܥܽܘܢ ܪܺܝܫܳܐ ܕܬܰܠܡܺܝ̈ܕܶܐ: ܘܬܰܠܡܺܝܕܳܐ ܙܥܽܘܪܳܐ ܝܽܘܚܰܢܳܢ ܚܙܰܐܘܽܘܟ: ܘܒܶܗ ܒܝܰܘܡܳܐ ܕܒܶܝܬ ܩܠܶܝܽܘܦܰܐ ܟܰܕ ܐܶܣܬܡܶܟܬ ܥܰܡܗܽܘܢ ܘܰܩܨܰܝܬ ܠܰܚܡܳܐ ܘܶܐܫܬܰܘܕܥܽܘܟ ܘܠܰܬܪܶܥܣܰܪ ܟܰܕ ܣܡܺܝܟܺܝܢ ܐܶܬܚܙܰܝܬ ܘܝܰܕܥܽܘܟ: ܬܽܐܘܡܰܐ ܕܶܝܢ ܒܰܠܚܽܘܕ ܒܰܕܠܐܴ ܚܙܳܟ: ܠܐܴ ܨܒܳܐ ܕܰܢܗܰܝܡܶܢ: ܒܶܠܥܳܕ ܚܙܳܬܳܐ ܓܠܺܝܬܳܐ: ܘܓܶܫܬܳܐ ܦܰܓܪܳܢܳܝܬܳܐ ܕܕܰܦܢܳܐ ܕܶܐܬܬܰܪܥܰܬ݀ ܒܠܽܘܟܳܝܬܳܐ ܘܺܐܝܕܰܝ̈ܳܐ ܘܪ̈ܶܓܠܐܷ ܕܶܐܬܒܰܙܰܥ̈ܝ ܒܨ̈ܶܨܶܐ: ܘܠܐܴ ܐܶܬܪܟܶܢ ܠܰܦܝ̇ܳܣܳܐ ܕܰܫܠܺܝ̈ܚܶܐ: ܘܠܐܴ ܗܰܝܡܶܢ ܐܰܝܟ ܕܰܐܣܗܶܕܘ ܬܰܠܡܺܝ̈ܕܶܐ: ܘܠܐܴ ܐܰܣܶܩܘ ܒܶܢܝܳܢܶܗ ܥܰܠ ܫܶܬܶܐܣܬܳܐ ܕܰܐ̱ܚܪ̈ܳܢܶܐ: ܡܶܛܽܠ ܗܳܕܶܐ ܐܰܝܟ ܕܰܠܫܽܘܪܳܪܳܐ ܕܗܰܝܡܳܢܽܘܬܶܗ. ܘܠܰܥܛܳܝܳܐ ܕܦܽܘܠܳܓܶܗ: ܝܰܘܡܳܢܳܐ ܠܶܗ ܐܶܬܚܰܙܝܰܬ݀. ܟܰܕ ܟܢܺܝܫܺܝܢ ܬܰܠܡܺܝ̈ܕܶܐ ܘܬܰܪ̈ܥܶܐ ܐܰܚܺܝܕܺܝܢ ܡ̣ܶܢ ܕܶܚܠܬܳܐ ܕܝܽܘܕܳܝ̈ܶܐ: ܘܡܶܢܫܶܠܝ ܩܳܡܬ ܒܰܝܢܳܬܗܽܘܢ: ܘܶܐܡܰܪܬ ܠܗܽܘܢ ܫܠܳܡܳܐ ܥܰܡܟܽܘܢ ܬܰܠܡܺܝ̈ܕܶܐ ܕܩܽܘܫܬܳܐ ܫܠܳܡܳܐ ܥܰܡܟܽܘܢ ܒܢܰܝ̈ܳܐ ܕܰܫܠܳܡܳܐ: ܫܠܳܡܳܐ ܥܰܡܟܽܘܢ ܟܳܪ̈ܽܘܙܶܐ ܕܰܫܪܳܪܳܐ ܠܐܴ ܬܶܕܚܠܽܘܢ ܘܠܐܴ ܬܙܽܘܥܽܘܢ: ܕܶܐܢܳܐ ܐܺܝܬܰܝ ܗ̇ܰܘ ܕܶܐܡܪܶܬ ܠܟܽܘܢ ܕܢܶܐܚܕܽܘܢܳܢܝ ܪ̈ܺܝܫܰܝ ܟܳܗ̈ܢܶܐ ܘܢܶܙܩܦܽܘܢܳܢܝ ܘܢܶܩܛܠܽܘܢܳܢܝ ܐܶܢܳܐ ܐܺܝܬܰܝ ܗ̇ܰܘ ܕܶܐܡܪܶܬ ܠܟܽܘܢ ܕܡ̣ܶܢ ܒܳܬܰܪ ܬܠܳܬܳܐ ܝܰܘ̈ܡܺܝܢ ܩܳܐܶܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ ܘܩܳܕܶܡ ܐ̱ܢܳܐ ܠܟܽܘܢ ܠܰܓܠܺܝܠܐܴ: ܐܶܢܳܐ ܐܺܝܬܰܝ ܪܰܒܟܽܘܢ ܗ̇ܰܘ ܕܩܳܡܶܬ ܡ̣ܶܢ ܩܰܒܪܳܐ: ܐܶܢܳܐ ܐܺܝܬܰܝ ܗ̇ܰܘ ܕܶܐܫܬܰܘܕܺܝܬ ܠܟܽܘܢ ܟܽܘܪ̈ܣܰܘܳܬܳܐ: ܒܡܶܐܬܺܝܬܳܐ ܕܺܝܠܝ ܬܪܰܝܳܢܺܝܬܳܐ. ܠܐܴ ܬܶܬܪܰܗܒܽܘܢ ܘܠܐܴ ܬܶܕܚܠܽܘܢ: ܕܶܐܢܳܐ ܐܺܝܬܰܝ ܪܰܒܟܽܘܢ ܗ̇ܰܘ ܕܶܐܬܚܙܺܝܬ ܠܟܽܘܢ ܒܚܰܕ ܒܫܰܒܳܐ ܕܰܥܒܰܪ: ܘܗܳܐ ܬܽܘܒ  ܡܶܛܽܠ ܫܽܘܪܳܪܟܽܘܢ ܐܶܬܚܰܘܺܝܬ ܠܟܽܘܢ ܝܰܘܡܳܢܳܐ: ܘܰܐܝܟܰܢܳܐ ܕܥܶܠܶܬ ܠܘܳܬܟܽܘܢ ܦܰܓܪܳܢܳܐܺܝܬ: ܟܰܕ ܒܶܣܪܳܐ ܘܓܰܪ̈ܡܶܐ ܡܥܰܛܰܦ ܐ̱ܢܳܐ ܘܬܰܪ̈ܥܶܐ ܠܐܴ ܐܶܬܦܬܰܚܘ: ܗܳܟܰܢܳܐ ܐܶܬܝܰܠܕܶܬ ܡ̣ܶܢ ܡܰܪܒܥܳܐ ܒܬܽܘܠܳܝܳܐ ܟܰܕ ܢܛܺܝܪܺܝܢ ܛܰܒ̈ܥܶܐ ܕܰܒܬܽܘ̈ܠܐܷ: ܘܗܳܟܰܢܳܐ ܐܳܦ ܡ̣ܶܢ ܩܰܒܪܳܐ ܩܳܡܶܬ ܟܰܕ ܢܳܛܽܘܪ̈ܶܐ ܙܗܺܝܪܺܝܢ ܘܩܶܣܛܽܘܢܳܪ̈ܶܐ ܝܳܬܒܺܝܢ: ܘܛܰܒ̈ܥܶܐ ܘܰܚܬܳܡ̈ܶܐ ܛܒܺܝܥܺܝܢ: ܘܟܰܕ ܗ̣ܶܢܽܘܢ ܫܠܺܝ̈ܚܶܐ ܒܬܶܗܪܳܐ ܘܰܒܕܽܘܡܳܪܳܐ ܩܳܝܡܺܝܢ ܗܘܰܘ: ܘܒܽܘܝܳܐܳܐ ܥܰܡ ܠܽܘܒܳܒܳܐ ܐܶܬܡܠܺܝܘ: ܘܗܳܝܕܶܝܢ ܐܳܦ ܠܚܰܣܺܝܪܽܘܬ ܗܰܝܡܳܢܽܘܬܶܗ ܕܬܽܐܘܡܰܐ ܫܰܪܰܪܬ: ܘܝܰܗܒܬ ܠܶܗ ܒܛܰܝܒܽܘܬܳܟ ܕܽܘܟ̈ܝܳܬܳܐ ܕܨܶܨ̈ܶܐ ܕܢܰܪܡܶܐ ܒܗܶܝܢ ܨܶܒܥܶܗ ܐܰܝܟ ܕܰܒܥܳܐ: ܘܰܐܘܫܶܛ ܐܺܝܕܶܗ ܒܕܰܦܢܳܟ ܐܰܟܡܳܐ ܕܫܶܐܠ: ܚܙܳܐ ܗܘܳܐ ܘܗܰܝܡܶܢ ܘܓܰܫ ܗܘܳܐ ܘܺܝܕܰܥ: ܬܗܰܪ ܗܘܳܐ ܘܶܐܬܕܰܡܰܪ: ܘܙܳܥ ܗܘܳܐ ܘܶܐܬܒܰܠܗܺܝ: ܘܰܐܘܕܺܝ ܗܘܳܐ ܘܫܰܒܰܚ: ܚܕܺܝ ܗܘܳܐ ܘܶܐܬܦܨܰܚ. ܪܘܰܙ ܗܘܳܐ ܘܶܐܬܠܰܒܰܒ: ܐܰܙܥܶܩ ܗܘܳܐ ܒܩܳܠܐܴ ܪܳܡܳܐ ܘܶܐܡܰܪ: ܐܰܢ̱ܬ ܗ̣ܽܘ ܡܳܪܝ ܘܰܐܠܳܗܝ ܕܠܐܴ ܫܽܘܚܠܳܦܳܐ: ܐܰܢ̱ܬ ܗ̣ܽܘ ܡܳܪܝ ܘܰܐܠܳܗܝ ܕܠܐܴ ܫܽܘܓܢܳܝܳܐ: ܘܶܐܫܬܰܪܰܪ ܘܫܰܪܰܪ ܘܶܐܬܦܰܠܰܓ ܘܰܐܘܬܰܪ: ܐܰܘܕܺܝ ܘܰܥܛܳܐ ܠܟܽܠ ܦܽܘܠܳܓܺܝ̈ܢ: ܒܰܛܶܠ ܒܬܰܘܕܺܝܬܶܗ ܠܦܽܘܠܳܓܳܐ ܕܗ̇ܳܢܽܘܢ ܕܰܡܦܰܠܓܺܝܢ ܠܳܟ ܠܰܬܪܰܝܳܢܺܝܬܳܐ ܕܰܟܝ̈ܳܢܶܐ ܡ̣ܶܢ ܒܳܬܰܪ ܚܕܳܝܽܘܬܳܐ ܠܰܬܪܰܝܳܢܽܘܬܳܐ ܠܐܴ ܡܶܬܦܰܫܩܳܢܺܝܬܳܐ: ܐܰܪܺܝܡ ܘܰܥܛܳܐ ܒܓܶܫܬܶܗ ܠܚܶܪ̈ܝܳܢܶܐ ܗ̇ܳܢܽܘܢ ܕܰܒܦܰܢܛܰܣܺܝܰܐ ܐܰܘ ܒܗܰܒܳܒܽܘܬܳܐ ܗܘܳܬ݀ ܡܕܰܒܪܳܢܽܘܬܳܟ: ܐܠܰܦ ܘܚܰܘܺܝ ܕܚܰܕ ܐܺܝܬܰܝܟ ܒܰܐܠܳܗܽܘܬܳܐ ܘܰܒܐ̱ܢܳܫܽܘܬܳܐ: ܘܚܰܕ ܐܺܝܬܰܝܟ ܒܺܐܝܬܽܘܬܳܐ ܘܰܒܡܶܬܒܰܣܪܳܢܽܘܬܳܐ. ܘܚܰܕ ܐܺܝܬܰܝܟ ܒܪ̈ܰܘܡܶܐ ܥܶܠܳܝ̈ܶܐ ܘܰܒܥܽܘ̈ܡܩܶܐ ܬܰܚܬܰܝ̈ܶܐ: ܘܡܶܛܽܠ ܗܳܕܶܐ ܚܢܰܢ ܦܪ̈ܺܝܩܶܐ ܐܶܬܟܰܢܰܫܢܰܢ ܠܝܰܘܡܳܐ ܗܳܢܳܐ ܕܥܰܕܥܺܐܕܳܟ ܚܰܕܬܳܐ ܘܪܽܘܚܳܢܳܝܳܐ: ܒܰܕܡܽܘܬܶܗ ܕܬܽܐܘܡܰܐ ܫܠܺܝܚܳܐ ܩܳܥܶܝܢܰܢ ܘܳܐܡܪܺܝܢܰܢ: ܕܰܐܢ̱ܬ ܗ̣ܽܘ ܡܳܪܰܢ ܘܰܐܠܳܗܰܢ ܕܡܶܛܽܠܳܬܰܢ ܚܰܫܬ ܘܶܐܨܛܠܶܒܬ. ܐܰܢ̱ܬ ܗ̣ܽܘ ܡܳܪܰܢ ܘܰܐܠܳܗܰܢ ܕܡܶܛܽܠܳܬܰܢ ܐܶܬܩܒܰܪܬ: ܘܩܳܡܬ ܕܠܐܴ ܚܒܳܠܐܴ ܠܰܬܠܳܬܳܐ ܝܰܘ̈ܡܺܝܢ ܘܰܦܪܰܩܬ ܠܰܢ ܘܥܰܠܗ̇ܳܝ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܬܶܗܘܶܐ ܠܰܢ ܡܥܰܕܪܳܢܳܐ ܒܙܰܒ̈ܢܶܐ ܕܽܐܘܠܨܳܢ̈ܶܐ ܘܦܳܪܽܘܩܳܐ ܕܡ̣ܶܢ ܟܽܠ ܢܶܣܝܽܘ̈ܢܶܐ ܘܩܺܝܢܕܽܘܢܽܘ: ܗܰܒܠܰܢ ܫܰܝܢܳܐ ܘܰܫܠܳܡܳܐ: ܘܰܡܠܺܝ ܠܰܢ ܚܽܘܒܳܐ ܘܬܰܪܥܽܘܬܳܐ: ܥܒܶܕ ܠܰܢ ܚܰܕ ܟܶܢܫܳܐ ܬܪܺܝܨܳܐ ܘܠܐܴ ܣܕܺܝܩܳܐ: ܚܰܕ ܥܰܡܳܐ ܫܰܠܡܳܐ ܘܠܐܴ ܦܠܺܝܓܳܐ ܐܰܛܶܠ ܝܰܡܺܝܢܳܟ ܥܰܠ ܥܺܕܬܳܟ: ܣܰܬܰܪ ܒܥܽܘܫܢܶܗ ܕܰܕܪܳܥܳܟ ܠܝܰܠܕܶܝ̈ܗ̇ ܐܰܦܨܰܚ ܠܟܶܢ̈ܫܶܝܗ̇ ܣܰܡܶܟ ܠܣܳܒ̈ܶܐ ܕܥܰܡܰܢ ܚܰܕܳܐ ܠܰܛܠܳܝ̈ܶܐ ܐܰܦܨܰܚ ܘܰܣܒܰܥ ܠܟܰܦ̈ܢܶܐ: ܐܰܣܳܐ ܠܰܬܒܺܝܪ̈ܰܝ ܠܶܒܳܐ. ܥܨܽܘܒ ܠܰܟܪ̈ܺܝܗܶܐ ܒܚܽܘܠܡܳܢܳܐ: ܫܰܪܰܪ ܠܢܰܦ̈ܠܐܷ: ܕܚܽܘܩ ܘܰܛܪܽܘܕ ܠܫܺܐܕ̈ܶܐ: ܚܰܣܳܐ ܚܛܳܗ̈ܶܐ ܘܒܽܘܨܳܪ̈ܶܐ ܕܡܰܪܥܺܝܬܳܟ ܠܚܺܝ: ܘܰܫܒܽܘܩ ܣܰܟܠܘܴ̈ܬܳܐ ܘܣܰܢ̈ܝܳܬܳܐ ܕܟܽܠܶܗ ܓܙܳܪܳܟ: ܢܰܛܰܪ ܒܕܰܟܝܽܘܬܳܐ ܠܪ̈ܳܥܰܘܳܬܳܐ. ܙܰܗܳܐ ܠܛܶܟܣܳܐ ܕܟܳܗܢܽܘܬܳܐ: ܚܰܟܶܡ ܘܢܰܟܶܦ ܠܰܡܫܰܡ̈ܫܳܢܶܐ: ܥܒܶܕ ܒܟܽܠܗܽܘܢ ܛܶܟ̈ܣܶܐ ܥܺܕܬܳܢܳܝ̈ܶܐ ܠܓܰܒܪ̈ܶܐ ܘܰܠܢܶܫ̈ܶܐ ܛܰܪ ܒܢܰܟܦܽܘܬܳܐ: ܠܰܒܬܽܘ̈ܠܐܷ ܘܠܰܡܙܰܘ̈ܓܶܐ ܚܰܪܰܪ ܡ̣ܶܢ ܟܽܠܗܽܘܢ ܚܰܫ̈ܶܐ ܕܰܚܛܺܝܬܳܐ ܠܕܰܝܪ̈ܳܝܶܐ ܘܺܝܚܺܝ̈ܕܳܝܶܐ ܕܰܣܢܰܘ ܠܥܳܠܡܳܐ ܘܰܢܩܶܦܘ ܠܳܟ: ܘܰܐܘܪܶܬ ܐܶܢܽܘܢ ܛܽܘ̈ܒܶܐ ܘܒܽܘ̈ܣܳܡܶܐ ܕܰܒܡܰܠܟܽܘܬܳܟ: ܘܰܠܥܰܢܺܝ̈ܕܶܐ ܡܗܰܝܡ̈ܢܶܐ ܫܰܟܶܢ ܢܝܳܚܳܐ ܘܒܽܘ̈ܣܳܡܶܐ ܘܰܥܒܶܕ ܠܗܽܘܢ ܕܽܘܟܪܳܢܳܐ ܛܳܒܳܐ ܒܛܰܝܒܽܘܬܳܟ: ܡܳܪܰܢ ܝܶܫܽܘܥ ܡܫܺܝܚܳܐ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܦܺܝܪܡܳܐ ܚܰܕܬܳܐ ܕܗ̣ܽܘ ܠܶܗ ܐܰܥܛܰܪ ܚܰܕܬܳܐܺܝܬ ܩܕܳܡ ܝܳܠܽܘܕܶܗ: ܘܰܒܗܰܢܺܝܽܐܘܬ ܪܺܝܚܶܗ ܚܰܠܝܳܐ ܚܰܕܶܬ ܠܒܶܪ̈ܝܳܬܳܐ ܕܰܒܥܶܛܪܳܐ ܕܰܥܠܰܘ̈ܳܬܳܐ ܘܙܰܗܡܽܘܬܳܐ ܕܰܦܬܰܟܪ̈ܶܐ ܐܰܥܬܶܩ̈ܝ: ܘܰܒܝܰܕ ܩܝܳܡܬܶܗ ܕܡ̣ܶܢ ܒܶܝܬ ܡܺܝ̈ܬܶܐ ܚܰܕܽܘܬܳܐ ܚܕܰܬܳܐ: ܕܚܽܘܕܳܬܶܗ ܕܰܟܝ̇ܳܢܰܢ ܒܰܗܘܳܝܳܐ ܕܡܶܢܕܪܺܝܫ ܫܰܟܶܢ ܠܰܢ ܘܰܒܡܰܥܠܬܶܗ ܬܗܺܝܪܬܳܐ ܕܰܠܥܶܠܺܝܬܳܐ ܚܰܕܶܬ ܦܽܘܩܕܳܢܰܘ̈ܗܝ ܠܘܳܬ ܬܰܠܡܺܝ̈ܕܰܘܗܝ: ܘܫܰܕܰܪ ܐܶܢܽܘܢ ܒܽܐܘܪܚܳܐ ܚܰܕܬܳܐ ܕܢܰܟܪܙܽܘܢ ܣܒܰܪܬܶܗ ܚܕܰܬܳܐ: ܠܰܘ ܒܰܬܚܽܘܡܳܐ ܕܺܐܝܣܪܳܐܶܝܠ ܒܰܠܚܽܘܕ ܐܶܠܐܴ ܒܟܽܠܶܗ ܥܳܠܡܳܐ: ܚܰܕܶܬ ܡܳܪܝ ܗܳܫܳܐ ܒܝܰܕ ܦܺܝܪܡܳܐ ܕܩܰܪܶܒܢܰܢ ܩܕܳܡܰܝܟ: ܠܢܰܦ̈ܫܳܬܳܐ ܕܳܘ̈ܝܳܬܳܐ ܕܺܝܠܰܢ: ܕܒܰܣܺܝܡܽܘܬܳܐ ܕܰܚܛܳܗ̈ܶܐ ܐܰܥܬܶܩ̈ܝ: ܐܰܝܟܰܢܳܐ ܕܟܰܕ ܚܰܕ̈ܬܶܐ ܡ̣ܶܢ ܥܰܬܺܝ̈ܩܶܐ ܗܳܘܶܝܢܰܢ: ܘܰܐܡܺܝܢܳܐܺܝܬ ܘܰܒܟܽܠܙܒܰܢ ܡܶܬܚܰܕܬܺܝܢܰܢ: ܢܶܫܬܘܶܐ ܕܰܒܟܽܠ ܫܳܥ ܚܰܕܬܳܐܺܝܬ ܢܫܰܒܰܚ ܠܳܟ ܬܶܫܒܽܘܚܬܳܐ ܚܕܰܬܳܐ: ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܘܡܝܘܢ ܕܬܠܬܫܥܝ̈ܢ

ܫܽܘܒ̈ܚܶܐ ܫܦܰܝ̈ܳܐ: ܘܩܽܘܠܳܣ̈ܶܐ ܕܟܰܝ̈ܳܐ: ܘܙܽܘܡܳܪ̈ܶܐ ܚܠܰܝ̈ܳܐ: ܘܗܶܕܪ̈ܶܐ ܓܒܰܝ̈ܳܐ: ܠܶܥܙ̈ܶܐ ܚܰܕ̈ܬܶܐ ܘܪ̈ܽܘܚܳܢܶܐ: ܘܩܺܝ̈ܢܳܬܳܐ ܡܨ̈ܰܠܠܳܬܳܐ: ܘܢܶܥ̈ܡܳܬܳܐ ܦܰܐܝ̈ܳܬܳܐ: ܠܗ̇ܰܘ ܪܳܥܝܳܐ ܛܳܒܳܐ ܕܣܳܡ ܢܰܦܫܶܗ ܚܠܳܦ ܥܳܢ̈ܶܗ: ܘܟܰܢܫܳܗ̇ ܘܣܳܡܳܗ̇ ܒܰܛܝܳܪܶܗ ܘܰܠܓܽܘܕܳܐ ܕܬܰܠܡܺܝ̈ܕܰܘܗܝ ܙܰܡܶܢ ܘܰܩܪܳܐ ܠܥܶܠܺܝܬܳܐ ܕܐ̱ܪ̈ܳܙܶܐ ܘܫܰܪܰܪ ܪ̈ܶܥܝܳܢܰܝܗܽܘܢ ܒܝܰܕ ܓܶܫܬܳܐ ܕܕܰܦܢܶܗ: ܘܰܕܚܰܩ ܡܶܢܗܽܘܢ ܠܦܽܘܠܳܓ̈ܶܐ: ܟܰܕ ܚܰܘܺܝ ܠܗܽܘܢ ܫܽܘ̈ܡܳܬܶܗ: ܘܰܢܦܰܚ ܒܰܐܦܰܝ̈ܗܽܘܢ: ܘܰܡܠܐܴ ܐܶܢܘܢ ܪܽܘܚܶܗ ܘܫܰܕܰܪ ܐܶܢܽܘܢ ܠܟܽܠ ܣܰܘ̈ܦܺܝܢ: ܘܢܰܟܪܙܽܘܢ ܫܪܳܪܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

ܣܕܪܐ

ܟܰܕ ܐܶܬܒܰܣܰܡܢܰܢ ܘܶܐܬܡܠܺܝܢܰܢ ܚܰܕܽܘܬܳܐ ܡ̣ܶܢ ܩܝܳܡܬܳܐ ܕܺܝܠܳܟ ܐܶܡܰܢ ܩܰܒܪܳܐ ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܒܳܟ ܟܽܠ ܡܶܕܶܡ ܗܘܳܐ ܚܰܕܬܳܐ: ܘܰܥܒܰܪ̈ܝ ܥܰܬܺܝ̈ܩܳܬܳܐ ܘܛܶܠܳܢܳܝ̈ܳܬܳܐ: ܟܰܕ ܗܘܰܝܬ ܪܺܝܫܺܝܬܳܐ ܕܕܰܡ̈ܟܶܐ. ܘܒܽܘܟܪܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܪܺܝܫܺܝܬܳܐ ܕܚܰܝ̈ܶܐ ܚܰܕ̈ܬܶܐ: ܘܫܽܘܪܳܝܳܐ ܕܛܳܒܬܳܐ: ܝܰܘܡܳܢܳܐ ܕܶܝܢ ܟܰܕ ܬܰܪ̈ܥܶܐ ܐܰܚܺܝܕܺܝܢ ܗܘܰܘ: ܘܬܰܠܡܺܝ̈ܕܶܐ ܡ̣ܶܢ ܩܶܢܛܳܐ ܘܕܶܚܠܬܳܐ ܕܝܽܘܕܳܝ̈ܶܐ ܒܥܶܠܺܝܬܳܐ ܟܢܺܝܫܺܝܢ ܗܘܰܘ: ܘܬܰܠܡܺܝ̈ܕܶܐ ܡ̣ܶܢ ܩܶܢܛܳܐ ܘܕܶܚܠܬܳܐ ܕܝܽܘ̈ܕܳܝܶܐ ܒܥܶܠܺܝܬܳܐ ܟܢܺܝܫܺܝܢ ܗܘܰܘ: ܫܠܳܡܳܐ ܝܰܗܒܬ ܠܗܽܘܢ ܐܰܟܡܰܢ ܕܢܶܫܬܰܝܢܽܘܢ: ܫܠܳܡܳܐ ܥܰܡܟܽܘܢ ܐܶܡܰܪܬ ܠܗܽܘܢ ܕܢܶܬܠܰܒܒܽܘܢ: ܕܠܐܴ ܕܶܝܢ ܬܶܬܗܰܝܰܡܢ ܠܗܽܘܢ ܕܪܽܘܚܳܐ ܚܳܙܶܝܢ: ܐܰܙܥܶܩܬ ܠܘܳܬܗܽܘܢ ܕܓܽܘܫܽܘܢܳܢܝ ܘܕܰܥܘ ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇: ܐܰܟܡܳܐ ܕܚܳܙܶܝܢ ܐܢ̱ܬܽܘܢ ܕܺܐܝܬ ܠܺܝ: ܐܶܬܚܙܺܝܬ ܠܡܰܪܝܰܡ ܒܓܰܢܬܳܐ ܘܠܐܴ ܗܰܝܡܶܢܬܽܘܢ: ܘܒܳܬܪܳܗ̇ ܠܫܶܡܥܽܘܢ ܘܰܠܝܽܘܚܰܢܳܢ ܚܰܘܺܝܬ ܢܰܦܫܝ ܘܠܐܴ ܐܰܫܰܪܬܽܘܢ: ܠܰܕܒܶܝܬ ܩܠܶܝܽܘܦܰܐ ܫܰܪܰܪܬ ܥܰܠ ܢܽܘܚܳܡܝ ܒܣܰܓܺܝ̈ܳܐܬܳܐ ܘܠܐܴ ܩܰܒܶܠܬܽܘܢ: ܘܰܠܝܰܥܩܽܘܒ ܐܶܬܓܠܺܝܬ ܘܶܐܬܦܰܠܰܓܬܽܘܢ: ܘܰܠܝܰܬܺܝܪ ܡ̣ܶܢ ܚܰܡܶܫ ܡܳܐܐ ܐܰܚܺܝ̈ܢ ܘܠܐܴ ܫܡܰܥܬܽܘܢ: ܬܳܐ ܠܗܳܪܟܳܐ ܬܽܐܘܡܰܐ ܚܙܺܝ ܘܗܰܝܡܶܢ: ܘܰܐܘܫܶܛ ܐܺܝܕܳܟ ܒܓܰܒܝ ܘܰܚܙܺܝ ܕܽܘܟܰܬ ܪܽܘܡܚܳܐ: ܐܰܝܬܳܐ ܨܶܒܥܳܟ ܘܰܚܙܺܝ ܕܽܘܟܰܬ ܨܶܨ̈ܶܐ ܕܰܩܒܰܥܘ ܒܺܐܝ̈ܕܰܝ ܘܰܒܪ̈ܶܓܠܰܝ ܐܰܝܟܰܢܳܐ ܕܫܰܕܪܰܢܝ ܐܳܒܝ: ܐܳܦ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ: ܩܰܒܶܠܘ ܪܽܘܚܳܐ ܕܩܽܘܕܫܳܐ ܘܙܶܠܘ ܐܰܟܪܶܙܘ. ܐܶܢ ܬܶܫܒܩܽܘܢ ܚܛܳܗ̈ܶܐ ܕܐ̱ܢܳܫ ܢܶܫܬܰܒܩܽܘܢ: ܘܶܐܢ ܬܶܐܚܕܽܘܢ ܕܐ̱ܢܳܫ ܐܰܚܺܝܕܺܝܢ: ܐܰܝܟ ܡܰܠܟܳܐ ܘܰܐܝܟ ܐܠܰܗܳܐ ܫܰܪܺܝܪܳܐܺܝܬ ܝܰܗܒܬ ܒܺܐܝܕܰܝ̈ܗܽܘܢ ܫܽܘܠܛܳܢܳܐ: ܐܶܬܬܪܺܝܡ ܡܶܢܗܽܘܢ ܦܽܘܠܳܓܳܐ ܕܪܶܥܝܳܢܳܐ: ܘܶܐܫܬܰܩܠܰܬ݀ ܡܶܢܗܽܘܢ ܚܰܣܺܝܪܽܘܬ ܗܰܝܡܳܢܽܘܬܳܐ: ܘܶܐܬܡܠܺܝܘ ܚܶܟܡܬܳܐ: ܘܠܰܡܣܰܒܳܪܽܘ ܐܶܬܥܰܬܰܕܘ: ܐܰܙܥܶܩ ܬܽܐܘܡܰܐ ܘܫܰܪܺܝ ܒܰܣܒܰܪܬܳܐ ܡܳܪܝ ܘܰܐܠܳܗܝ ܫܰܪܺܝ ܠܡܰܟܪܳܙܽܘ ܐܠܰܗܳܐܺܝܬ: ܐܶܫܬܰܘܕܥܳܟ ܡܳܪܳܐ ܘܰܐܠܳܗܳܐ: ܡܬܽܘܡܳܝ̈ܳܬܳܐ ܫܰܪܺܝ ܕܳܐܦ ܫܶܡܥܽܘܢ ܕܰܒܪܶܗ ܕܰܐܠܳܗܳܐ ܐܰܟܪܙܳܟ: ܐܰܝܟ ܕܺܝܠܶܦ ܡ̣ܶܢ ܐܰܒܽܘܟ ܕܒܰܫܡܰܝܳܐ: ܘܠܳܗ̇ ܠܗܳܕܶܐ ܐܳܦ ܝܽܘܚܰܢܳܢ ܟܬܰܒ: ܕܰܒܪܺܝܫܺܝܬ ܐܺܝܬܰܘܗܝ ܗܘܳܐ ܡܶܠܬܳܐ: ܟܽܠܗܽܘܢ ܚܰܕ ܪܽܘܚܳܐ ܐܶܫܬܺܝܘ ܘܡ̣ܶܢ ܡܰܒܽܘܥܳܗ̇ ܕܰܐܠܳܗܽܘܬܳܐ ܕܠܰܘ: ܘܫܶܩܝܳܐ ܚܰܕܬܳܐ ܠܟܽܠ ܥܰܡ̈ܡܺܝܢ ܐܰܫܩܺܝܘ: ܘܥܰܠܗܳܕܶܐ ܠܰܘ ܠܗ̇ܳܢܽܘܢ ܕܰܚܙܰܐܘܽܘܟ ܒܰܠܚܽܘܕ ܘܗܰܝܡܶܢܘ ܝܰܗܒܬ ܛܽܘܒܳܐ: ܐܶܠܐܴ ܠܟܽܠܗܽܘܢ ܐܰܝܠܶܝܢ ܕܠܐܴ ܚܙܰܐܘܽܘܟ ܒܥܰܝ̈ܢܶܐ ܡܶܬܪ̈ܰܓܫܳܢܝܳܬܳܐ ܘܗܰܝܡܶܢܘ ܒܳܟ: ܐܰܫܘܳܐ ܠܟܽܠܰܢ ܡܗܰܝܡ̈ܢܶܐ ܠܗܳܢܳܐ ܛܽܘܒܳܐ: ܕܰܒܥܰܝ̈ܢܶܐ ܕܬܰܪܥܺܝܬܳܐ ܚܳܙܶܝܢܰܢ ܠܳܟ ܟܽܠ ܝܽܘܡ: ܘܒܳܟ ܡܶܬܒܰܩܶܝܢܰܢ ܒܗܰܝܡܳܢܽܘܬܳܐ ܕܠܐܴ ܩܰܪܺܝܒ ܠܳܗ̇ ܦܽܘܠܳܓܳܐ: ܘܡܰܘܕܶܝܢܰܢ ܕܰܐܠܳܗܳܐ ܐܰܢ̱ܬ ܘܰܒܪܳܐ ܕܰܐܠܳܗܳܐ: ܐܺܝܬܝܳܐ ܕܡ̣ܶܢ ܐܺܝܬܝܳܐ: ܘܰܡܬܽܘܡܳܝܳܐ ܕܡ̣ܶܢ ܡܬܽܘܡܳܝܳܐ: ܘܢܽܘܗܪܳܐ ܕܡ̣ܶܢ ܢܽܘܗܪܳܐ: ܗܘܰܝܬ ܒܰܪܢܳܫܳܐ ܕܰܐܠܳܗܳܐ ܡܨܶܐ ܟܽܠ ܐܺܝܬܰܝܟ: ܐܶܬܚܰܝܰܕܬ ܠܒܶܣܪܳܐ ܒܰܪ ܟܝܳܢܰܢ: ܘܠܰܟܝܳܢܳܐ ܕܰܐܠܳܗܽܘܬܳܟ ܠܐܴ ܐܰܪܦܺܝܬ: ܠܐܴ ܡܶܫܬܰܚܠܰܦ ܗ̇ܰܘ ܐܠܰܗܳܐ ܕܟܽܠ ܐܺܝܬܰܝܟ: ܘܰܦܫܺܝܩ ܠܶܗ ܟܽܠ: ܟܰܕ ܦܰܓܪܳܢܳܐܺܝܬ ܐܶܬܚܙܰܝܬ ܒܥܳܠܡܰܢ ܐܠܰܗܳܐ ܐܶܫܬܰܘܕܥܳܢܳܟ: ܘܟܰܕ ܡܺܝܬܬ ܒܰܙܩܺܝܦܳܐ: ܡܳܪܳܗ̇ ܕܰܒܪܺܝܬܳܐ ܝܺܕܰܥܢܳܟ: ܘܰܟܝ̈ܳܢܶܐ ܚܰܪ̈ܫܶܐ ܥܰܡܰܢ ܕܰܐܠܳܗܳܐ ܐܰܢ̱ܬ ܐܰܟܪܶܙܘ: ܘܰܐܝܢܳܐ ܕܡܶܬܦܰܠܰܓ ܠܳܟ ܒܶܗܬܬܳܐ ܢܶܬܥܰܛܰܦ: ܘܟܽܘܐܪܳܐ ܢܶܠܒܰܫ: ܬܽܐܘܡܰܐ ܟܰܕ ܓܰܫܳܟ ܐܠܰܗܳܐ ܐܰܘܕܥܳܟ ܘܰܐܘܕܺܝ ܘܶܐܡܰܪ ܡܳܪܝ ܘܰܐܠܳܗܝ: ܘܠܐܴ ܒܰܛܶܠܬ ܠܣܳܗܕܽܘܬܶܗ ܐܶܠܐܴ ܫܰܪܰܪܬܳܗ̇ ܒܗ̇ܳܝ ܕܶܐܡܰܪܬ: ܗܳܫܳܐ ܕܰܚܙܰܝܬܳܢܝ ܗܰܝܡܶܢܬ: ܡܶܢܳܟ ܗܳܟܺܝܠ ܐܠܰܗܰܢ ܫܰܪܺܝܪܳܐ ܫܳܐܠܺܝܢܰܢ: ܕܰܬܫܰܟܶܢ ܠܰܢ ܛܰܝܒܽܘܬܳܟ: ܘܥܽܘܬܪܳܐ ܪܰܒܳܐ ܕܰܡܪܰܚܡܳܢܽܘܬܳܟ: ܘܠܐܴ ܬܢܰܟܪܶܐ ܠܰܢ ܡ̣ܶܢ ܡܰܠܟܽܘܬܳܟ ܡܶܛܽܠ ܣܽܘܓܳܐܐ ܕܒܺܝ̈ܫܳܬܰܢ ܕܥܰܦܪ̈ܳܢܶܐ: ܠܐܴ ܟܺܐܢ̈ܶܐ ܘܠܐܴ ܙܰܕܺܝ̈ܩܶܐ: ܐܶܠܐܴ ܥܰܒܕ̈ܶܐ ܘܡܰܣܟܠܳܢ̈ܶܐ: ܘܰܒܢܰܝ̈ܳܐ ܠܐܴ ܡܶܫܬܰܡܥܳܢ̈ܶܐ: ܪܰܚܶܡܥܠܰܝܢ ܡܳܪܝܳܐ ܡܪܰܚܡܳܢܳܐ: ܚܽܘܣ ܥܠܰܝܢ ܢܰܓܺܝܪ ܪܽܘܚܳܐ ܘܒܰܣܺܝܡܳܐ: ܚܽܘܣ ܥܰܠ ܡܰܪܥܺܝܬܳܟ ܪܳܥܝܳܐ ܛܳܒܳܐ: ܚܽܘܣ ܥܰܠ ܓܙܳܪܳܟ: ܘܥܰܠ ܐܶܡܪ̈ܶܐ ܟܢܺܝ̈ܫܰܝ ܒܰܫܡܳܟ ܢܛܰܪ ܒܚܰܣܝܽܘܬܳܐ ܠܪ̈ܺܝܫܰܝ ܟܳܗ̈ܢܶܐ ܡܕܰܒܪ̈ܳܢܰܝܢ: ܫܰܟܶܢ ܕܰܟܝܽܘܬܳܐ ܠܟܳܗ̈ܢܶܐ ܕܥܺܕ̈ܳܬܰܢ: ܡܠܺܝ ܢܰܟܦܽܘܬܳܐ ܠܰܡܫܰܡ̈ܫܳܢܶܐ ܕܒܶܝܬ ܩܽܘܕܫܳܐ: ܨܰܒܶܬ ܠܥܰܬܺܝܪ̈ܶܐ ܒܝܰܕ ܡܰܘܗ̈ܒܳܬܳܟ: ܗܰܒ ܠܰܣܢܺܝ̈ܩܶܐ ܡܽܘܠܳܝܳܐ ܕܚܰܣܺܝܪ̈ܳܬܳܐ: ܪܰܒܳܐ ܠܰܛܠܳܝ̈ܶܐ ܒܚܶܟܡܬܳܟ: ܥܰܕܰܪ ܠܰܡܚܺܝ̈ܠܰܝ ܒܰܣܺܝܒܽܘܬܳܐ ܛܰܟܶܣ ܕܽܘܒܳܪ̈ܶܐ ܕܰܥܠܰܝܡܽܘܬܳܐ: ܝܰܩܰܪ ܠܰܡܙܰܘ̈ܓܶܐ ܒܢܰܟܦܽܘܬܳܐ: ܐܰܥܬܰܪ ܠܫܰܢ̱ܬܳܐ ܒܒܽܘܪ̈ܟܳܬܳܐ: ܐܰܡܛܰܪ ܠܐܱܪ̈ܥܳܬܳܐ ܨܰܗܝ̈ܳܬܳܐ: ܘܫܰܕܰܪ ܠܗܶܝܢ ܛܰܠܐܴ ܕܗܰܢܺܝܐܘܽܬܳܐ: ܘܢܶܗܘܶܐ ܠܰܢ ܢܺܝܣܳܢ ܝܰܪܚܳܐ ܕܚܰܕ̈ܘܳܬܳܐ ܘܬܶܨܛܰܒܰܬ݀ ܐܰܪܥܳܐ ܒܗܰܒܳܒ̈ܶܐ ܕܦܰܐܝܽܘܬܳܐ ܘܙܰܪ̈ܥܶܐ ܢܰܝܬܽܘܢ ܚܰܕ ܒܡܳܐܐ ܥ̈ܰܠܠܳܬܳܐ ܕܡܶܣ̈ܟܺܢܶܐ ܢܶܐܟܠܽܘܢ ܘܰܢܫܰܒܚܽܘܢ: ܘܝܰܬܡ̈ܶܐ ܘܒܳܝ̈ܫܶܐ ܢܶܣܒܥܽܘܢ ܘܰܢܩܰܠܣܽܘܢ: ܘܟܶܢ̈ܫܶܐ ܕܰܡܗܰܝܡ̈ܢܶܐ ܢܶܚܕܽܘܢ ܘܰܢܕܽܘܨܽܘܢ ܘܥܺܐܕ̈ܶܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܒܚܰܕܽܘܬܳܐ ܢܫܰܡܠܽܘܢ: ܘܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ ܚܰܢܳܢܳܐ ܘܪ̈ܰܚܡܶܐ ܢܩܰܒܠܽܘܢ: ܘܚܽܘܣܳܝܳܐ ܘܫܽܘܒܩܳܢܳܐ ܢܶܣܒܽܘܢ: ܘܥܰܢܺܝ̈ܕܶܐ ܕܰܒܩܰܒܪ̈ܶܐ ܢܶܪܓܫܽܘܢ ܘܰܢܫܰܒܚܽܘܢ: ܛܰܠܐܴ ܕܪ̈ܰܚܡܶܐ ܥܠܰܝܗܽܘܢ ܢܶܬܪܣܶܣ ܕܰܒܟܽܠ ܦܽܘ̈ܡܺܝܢ ܫܡܳܟ ܩܰܕܺܝܫܳܐ ܢܶܫܬܰܒܰܚ: ܘܰܐܒܽܘܟ ܡܒܰܪܟܳܐ ܢܶܬܪܰܡܪܰܡ: ܘܪܽܘܚܳܟ ܩܰܕܺܝܫܳܐ ܢܶܬܩܰܠܰܣ: ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܫܠܡ ܕܚܕ ܒܫܒܐ ܚܕܬܐ

 

ܛܟܣܐ ܕܚܕ ܒܫܒܐ ܕܬܪܝܢ ܕܒܬܪ ܩܝܡܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ: ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܒܥܺܐܕܳܐ ܕܢܽܘܚܳܡܳܟ ܫܒܺܝܚܳܐ ܕܢܶܬܢܰܗܪ̈ܳܢ ܢܰܦ̈ܫܳܬܰܢ ܒܝܽܘܠܦܳܢܳܟ: ܐܰܝܟ ܕܰܐܢܗܰܪܬ ܒܙܰܠܓܰܝ̈ܟ ܠܬܰܠܡܺܝ̈ܕܰܝܟ: ܘܰܓܠܺܝ ܠܬܰܚܦܺܝܬܳܐ ܗ̇ܳܝ ܚܶܫܽܘܟܳܝܬܳܐ ܡ̣ܶܢ ܬܰܪ̈ܥܝܳܬܰܢ: ܐܰܝܟ ܕܡ̣ܶܢ ܫܠܺܝ̈ܚܶܐ ܥܰܠ ܝܰܡܬܳܐ ܕܛܺܝܒܶܪܺܝܳܘܣ: ܕܢܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ ܐܰܡܺܝܢ܀

ܦܪܘܡܝܘܢ ܕܪܡܫܐ

ܫܽܘ̈ܒܚܶܐ ܠܐܴ ܫܶܬܩܳܢܳܝ̈ܶܐ ܘܰܬܠܺܝܬܳܝ̈ܶܐ: ܒܩ̈ܳܠܐܷ ܚܠܰܝ̈ܳܐ ܘܗܰܘ̈ܢܶܐ ܬܠܺܝܬܳܝ̈ܶܐ: ܡ̣ܶܢ ܦܽܘ̈ܡܶܐ ܫܦܰܝ̈ܳܐ ܕܰܬܠܺܝܬܳܝܽܘܬ ܛܶܟ̈ܣܶܐ ܥܺܕܬܳܢܳܝ̈ܶܐ: ܒܡܶܨܥܳܝܽܘܬ ܬܶܓܡܳܐ ܠܐܴ ܫܰܠܝܳܐ ܘܰܬܠܺܝܬܳܝ̈ܶܐ: ܠܰܬܠܰܬܳܐ ܩܢܽܘ̈ܡܶܐ ܐܰܘܟܺܝܬ ܬܠܳܬܳܐ ܦܰܪ̈ܨܽܘܦܶܐ: ܕܰܬܠܳܬܳܐ ܫܡܳܗ̈ܶܐ: ܕܰܒܚܰܕ ܟܝܳܢܳܐ ܚܕܳܢܳܝܳܐ ܕܗܰܘܢܳܐ ܩܰܕܡܳܝܳܐ ܘܰܠܚܽܘܕܳܝܳܐ: ܬܠܺܝܬܳܝܽܘܬܳܐ ܠܐܴ ܣܕܺܝܩܬܳܐ: ܕܡܶܬܦܰܪܫܳܐ ܠܐܴ ܒܠܺܝܠܐܴܝܬ: ܘܡܶܬܚܰܝܕܳܐ ܠܐܴ ܡܶܬܦܰܠܓܳܢܳܐܺܝܬ: ܐܰܒܳܐ ܡ̇ܰܢ ܥܶܠܬܳܐ ܕܥܶܠܬܳܢ̈ܶܐ: ܘܰܕܠܰܘ ܡ̣ܶܢ ܥܶܠܬܳܐ. ܐ̱ܚܪܺܬܳܐ ܐܺܝܬܰܘܗܝ ܘܰܒܪܳܐ ܘܪܽܘܚܳܐ ܕܡܶܢܶܗ ܡܬܽܘܡܳܐܺܝܬ ܕܠܐܴ ܦܣܳܩܳܐ ܘܰܕܠܐܴ ܙܰܒܢܳܐ: ܐܰܒܳܐ ܝܳܠܽܘܕܳܐܺܝܬ: ܘܰܒܪܳܐ ܝܺܠܺܝܕܳܐܺܝܬ: ܘܪܽܘܚܳܐ ܢܳܦܽܘܩܳܐܺܝܬ: ܚܰܕ ܐܠܰܗܳܐ ܕܠܶܗ ܣܳܓܕܺܝܢ ܥܶܠܳܝ̈ܶܐ ܘܬܰܚܬܳܝ̈ܶܐ: ܘܕܰܠܬܰܚܬ ܡ̣ܶܢ ܐܰܪܥܳܐ ܠܶܗ ܝܳܕܥܺܝܢ: ܕܠܰܝܬ ܒܶܗ ܩܢܽܘܡܳܐ ܕܰܛܠܐܷ ܐܰܘ̇ ܕܩܰܫܺܝܫ: ܐܰܘ ܕܰܒܨܺܝܪ ܡ̣ܶܢ ܚܰܒܪܶܗ: ܐܶܠܐܴ ܕܫܳܘܶܝܢ ܘܰܐܘܶܝܢ ܒܚܰܕ ܨܶܒܝܳܢܳܐ ܘܫܽܘܠܛܳܢܳܐ ܘܽܐܘܚܕܳܢܳܐ ܘܽܐܘܣܺܝܰܐ: ܘܺܐܝܬܰܘܗܝ ܚܰܕ ܬܠܳܬܳܐ ܘܰܬܠܳܬܳܐ ܚܰܕ: ܐܠܰܗ ܐܠܰܗܺܝ̈ܢ ܘܡܳܪܶܐ ܡܳܪ̈ܰܘܳܢ: ܕܠܶܗ ܟܽܠܰܢ ܡܦܺܝܣܺܝܢܰܢ: ܐܳܦ ܡܶܬܟܰܫܦܺܝܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܒܗܳܢܳܐ܀

ܣܕܪܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ: ܠܳܟ ܣܶܓܕܬܳܐ: ܬܠܺܝܬܳܝܳܐ ܕܰܐܠܳܗܽܘܬܳܐ ܪܳܡܰܬ݀ ܡܶܢܟܽܠ: ܗ̇ܳܝ ܕܪ̈ܰܚܺܝܩܶܐ ܠܟܽܠ ܦܽܘܠܳܓ̈ܶܐ ܕܚܶܪ̈ܝܳܝܶܐ: ܘܰܬܠܺܝܬܳܐܺܝܬ ܒܢܰܦܫܳܐ ܘܗܰܘܢܳܐ ܘܪܽܘܚܳܐ ܡܶܬܢܰܗܪܺܝܢܰܢ: ܘܰܠܐܪܳܙܳܐ ܪܰܒܳܐ ܕܰܬܡܺܝܗܽܘܬ ܬܡܺܝ̈ܗܳܬܳܟ ܒܢܰܦ̈ܫܳܬܰܢ ܡܶܣܬܰܟܠܺܝܢܰܢ: ܘܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ ܠܰܫܪܳܪܳܐ ܕܰܡܕܰܒܪܳܢܽܘܬܳܟ ܪܳܫܡܺܝܢܰܢ: ܘܰܕܠܐܴ ܦܽܘܠܳܓܳܐ ܐܰܝܟ ܡܰܠܦܳܢܽܘܬܳܐ ܫܠܺܝܚܳܝܬܳܐ ܗܳܟܰܢܳܐ ܡܗܰܝܡܢܺܝܢܰܢ ܘܡܰܘܕܶܝܢܰܢ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܬܠܺܝܬܳܝܽܘܬܳܐ ܠܐܴ ܒܪܺܝܬܳܐ: ܐܳܦ ܫܰܘܝܰܬ݀ ܒܽܐܘܣܺܝܰܐ ܘܺܐܝܩܳܪܳܐ: ܕܒܰܩܢܽܘ̈ܡܶܐ ܡ̇ܰܢ ܡܦܰܪܫܳܐ ܘܠܐܴ ܒܠܺܝܠܐܴܝܬ ܐܺܝܬ ܠܳܗ̇: ܒܚܰܕ ܕܶܝܢ ܘܗ̣ܺܝ ܟܰܕ ܗ̣ܺܝ ܐܰܘܟܺܝܬ ܕܽܐܘܣܺܝܰܐ ܘܰܐܠܳܗܽܘܬܳܐ: ܠܒܰܪ ܡ̣ܶܢ ܦܽܘܠܳܓܳܐ ܘܡܶܢܝܳܢܳܐ ܩܳܝܡܳܐ ܡ̣ܶܢ ܗܳܪܟܳܐ ܘܕܰܚܕܳܐ ܡܰܥܒܕܳܢܽܘܬܳܐ ܐܺܝܬ ܠܳܗ̇: ܚܰܝܠܐܴ ܘܫܽܘܠܛܳܢܳܐ ܘܰܡܬܽܘܡܳܝܽܘܬܳܐ ܘܨܶܒܝܳܢܳܐ: ܘܡ̣ܶܢ ܗ̇ܳܝ ܕܢܺܐܡܰܪ ܚܰܕ ܩܢܽܘܡܳܐ ܬܠܺܝܬܳܝ ܦܰܪ̈ܨܽܘܦܶܐ ܠܰܬܠܺܝܬܳܝܽܘܬܳܐ ܡܰܪܚܩܺܝܢܰܢ. ܕܒܰܙܒܰܢ ܠܘܳܬ ܗ̇ܳܝ ܕܢܶܣܬܒܰܪ ܐܰܒܳܐ: ܘܒܰܙܒܰܢ ܒܪܳܐ. ܪܽܘܚܳܐ ܩܰܕܺܝܫܳܐ ܗܦܰܟ ܡܶܣܬܰܟܰܡ ܠܐܴ ܣܳܟ ܡܶܬܝܰܕܥܺܝܢ: ܬܠܳܬܳܐ ܩܢܽܘ̈ܡܶܐ ܫܳܘ̈ܝܰܝ ܒܽܐܘܣܺܝܰܐ: ܘܰܒܕܺܠܳܝܽܘܬ ܩܽܘܝܳܡܳܐ ܕܡܶܢܗܽܘܢ ܘܰܠܗܽܘܢ ܡܩܺܝܡܺܝܢ ܡܰܘܕܶܝܢܰܢ: ܕܰܬܠܺܝܬܳܝܽܘܬܳܐ ܠܐܴ ܡܶܬܕܰܪܟܳܢܺܝܬܳܐ: ܟܰܕ ܠܐܴ ܐܰܒܳܐ ܠܰܒܪܳܐ ܐܰܘ ܠܪܽܘܚܳܐ ܥܳܒܰܪ ܢܳܦܶܠ ܘܡܶܬܗܰܦܰܟ: ܘܠܐܴ ܒܪܳܐ ܠܐܱܒܳܐ: ܐܰܘ ܠܪܽܘܚܳܐ ܡܫܰܢܶܐ ܘܡܶܫܬܰܚܠܰܦ: ܘܠܐܴ ܪܽܘܚܳܐ ܩܰܕܺܝܫܳܐ ܠܐܱܒܳܐ ܐܰܘ ܠܰܒܪܳܐ ܥܳܒܰܪ ܩܳܐܶܡ ܘܡܶܫܬܰܚܠܰܦ: ܠܡܶܢܝܳܢܳܐ ܪܒܺܝܥܳܝܳܐ ܠܬܰܘܕܺܝܬܳܐ ܠܐܴ ܡܰܩܦܺܝܢܰܢ: ܘܠܰܕܡܰܘܕܶܝܢ ܪܒܺܝܥܳܝܽܘܬܳܐ ܡܰܣܠܶܝܢܰܢ: ܘܟܽܠ ܡܶܕܶܡ ܕܰܠܒܰܪ ܡ̣ܶܢ ܬܠܺܝܬܳܝܽܘܬܳܐ ܠܐܴ ܡܶܣܬܰܓܕܳܢܰܐ ܗ̱̇ܘ ܘܰܒܣܳܓܽܘ̈ܕܶܐ ܡܛܰܟܰܣ: ܘܟܰܕ ܠܟܽܠ ܚܰܕ ܡܶܢܗܽܘܢ ܕܰܠܗܽܘܢ ܬܠܳܬܳܐ ܩܢܽܘ̈ܡܶܐ: ܟܰܕ ܡܶܢܶܗ ܘܠܶܗ ܡܶܬܚܙܶܐ ܐܰܘܟܺܝܬ ܡܶܬܗܰܘܢܰܢ ܡܳܪܳܢܳܐܺܝܬ ܘܫܰܪܺܝܪܳܐܺܝܬ: ܐܠܰܗܳܐ ܘܰܟܝܳܢܳܐ ܘܽܐܘܣܺܝܰܐ ܡܰܘܕܶܝܢܰܢ ܘܠܐܱܝܠܶܝܢ ܕܫܳܛܪܺܝܢ ܬܠܳܬ ܐܠܰܗ̈ܘܳܬܳܐ: ܘܰܬܠܳܬܳܐ ܐܽܘܣܺܝ̈ܰܐܣ ܘܰܟܝ̈ܳܢܶܐ ܡ̣ܶܢ ܥܺܕܬܳܐ ܕܳܚܩܺܝܢܰܢ ܬܠܳܬܳܐ ܦܰܪ̈ܨܽܘܦܶܐ ܡܫܰܘ̈ܬܦܶܐ ܠܰܚܕ̈ܳܕܶܐ: ܘܒܽܐܘܣܺܝܰܐ ܘܰܟܝܳܢܳܐ ܒܰܐܠܳܗܽܘܬܳܐ ܐܳܡܪܺܝܢܰܢ: ܘܕܰܦܪܺܝܫܺܝܢ ܡ̣ܶܢ ܚܕ̈ܳܕܶܐ ܒܕܺܝܠܳܝܬܳܐ ܡܝܰܩܢܳܢ̈ܝܳܬܳܐ ܡܚܰܘܶܝܢ: ܟܰܕ ܠܐܱܒܳܐ ܝܳܠܽܘܕܽܘܬܳܐ: ܘܕܰܒܪܳܐ ܝܺܠܺܝܕܽܘܬܳܐ: ܘܰܕܪܽܘܚܳܐ ܢܳܦܽܘܩܽܘܬܳܐ: ܘܕܰܡܟܰܬܰܪ ܟܽܠ ܦܰܪܨܽܘܦܳܐ ܐܰܘܟܺܝܬ ܩܢܽܘܡܳܐ: ܒܫܽܘܘܕܳܥܳܐ ܘܕܺܝܠܳܝܬܳܐ ܕܺܝܠܶܗ ܕܠܐܴ ܒܽܘܠܒܳܠܐܴ: ܘܕܰܡܚܰܝܰܕ ܘܰܡܦܰܪܶܫ ܠܐܴ ܣܕܺܝܩܳܐܺܝܬ: ܘܗ̣ܽܘ ܟܰܕ ܗ̣ܽܘ ܡܶܬܡܰܢܝܳܢܳܐ ܘܕܰܡܦܰܠܓܳܢܳܐ ܡܶܬܚܙܶܐ: ܘܒܰܠܚܽܘܕܳܝܽܘܬܳܐ ܡܶܬܕܪܶܟ: ܘܟܰܕ ܚܰܕ ܡܶܢܳܗ̇ ܐܺܝܬܰܝܟ ܕܗܳܕܶܐ ܬܠܺܝܬܳܝܽܘܬܳܐ: ܐܰܢ̱ܬ ܒܪܳܐ ܝܺܚܺܝܕܳܝܳܐ ܕܰܐܠܳܗܳܐ ܐܰܒܳܐ: ܕܠܐܴ ܫܽܘܪܳܝ ܩܕܳܡ ܥܳܠܡ̈ܶܐ ܕܠܐܴ ܚܰܫܳܐ ܡ̣ܶܢ ܐܽܘܣܺܝܰܐ ܕܰܐܒܳܐ ܐܶܬܺܝܠܶܕܬ: ܘܟܰܕ ܨܒܰܝܬ ܕܬܶܚܽܘܢ ܠܰܓܒܺܝܠܬܳܟ: ܐܰܪܟܶܢܬ ܐܰܢ̱ܬ ܠܳܟ ܠܐܱܪܥܳܐ: ܟܰܕ ܠܐܴ ܫܢܰܝܬ ܡ̣ܶܢ ܥܽܘܒܳܐ ܐܰܒܳܗܳܝܳܐ ܕܝܳܠܽܘܕܳܟ: ܘܰܒܡܰܪܒܥܳܐ ܕܰܒܬܽܘܠܬܳܐ ܐܰܓܶܢܬ: ܘܡ̣ܶܢ ܕܡܳܐ ܒܬܽܘܠܳܝܳܐ ܘܡ̣ܶܢ ܪܽܘܚܳܐ ܩܰܕܺܝܫܳܐ: ܦܰܓܪܳܐ ܐܰܢ̱ܬ ܠܳܟ ܓܒܰܠܬ ܣܛܰܪ ܡ̣ܶܢ ܙܰܪܥܳܐ ܐ̱ܢܳܫܳܝܳܐ: ܒܰܪ ܟܝܳܢܰܢ ܘܰܫܘܶܐ ܠܰܢ ܒܽܐܘܣܺܝܰܐ: ܘܰܡܕܰܡܰܝ ܒܚܰܫܰܝ̈ܢ: ܘܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܘܝܰܕܽܘܥܬܳܢܺܝܬܳܐ ܟܰܕ ܠܐܴ ܩܰܕܶܡ ܐܶܬܩܰܝܰܡ ܒܶܣܪܳܐ ܡ̣ܶܢ ܩܕܳܡ ܚܕܳܝܽܘܬܳܐ: ܐܶܠܐܴ ܫܰܘܝܳܐܺܝܬ: ܒܪܶܗܛܳܐ ܠܰܚܕܳܝܽܘܬܳܐ ܩܢܰܝܬ ܒܙܰܒܢܳܐ ܙܥܽܘܪܳܐ ܘܰܐܝܟ ܕܰܠܡܺܐܡܰܪ ܪܦܳܦ ܥܰܝܢܳܐ: ܕܒܶܗ ܓܰܒܪܺܐܶܝܠ ܐܶܡܰܪ ܚܕܳܝ ܚܰܕܳܝܬܳܐ ܡܳܪܝܳܐ ܥܰܡܶܟܝ: ܡܶܚܕܳܐ ܓܶܝܪ ܕܒܶܣܪܳܐ: ܒܶܣܪܳܐ ܕܰܐܠܳܗܳܐ ܡܶܠܬܳܐ: ܘܰܡܢܰܦܫܳܐ ܡܠܺܝܠܐܴ: ܡܢܰܦܫܳܐ ܡܠܺܝܠܐܴ ܕܰܐܠܳܗܳܐ ܡܶܠܬܳܐ: ܘܟܰܕ ܟܽܠܶܗ ܙܰܒܢܳܐ ܢܳܡܽܘܣܳܝܳܐ ܕܰܒܛܺܝ̈ܢܶܐ ܫܰܡܠܺܝܬ: ܘܠܐܷܣܳܪܳܐ ܕܰܒܬܽܘܠܽܘܬܳܐ ܠܐܴ ܣܕܰܩܬ: ܘܫܰܪܺܝܪܳܐܺܝܬ ܒܰܟܝܳܢܳܐ ܒܰܪܢܳܫܳܐ ܗܘܰܝܬ: ܘܟܰܕ ܗ̇ܰܘ ܡܳܐ ܕܺܐܝܬܰܝܟ ܐܠܰܗܳܐ ܟܰܬܰܪܬ ܕܠܐܴ ܫܽܘܚܠܳܦ: ܘܡ̣ܶܢ ܬܪܶܝܢ ܟܝ̈ܳܢܶܐ ܐܠܰܗܽܘܬܳܐ ܘܐ̱ܢܳܫܽܘܬܳܐ ܐܳܡܪܺܝܢܰܢ ܠܳܟ: ܘܰܕܥܰܡ ܚܕܳܝܽܘܬܳܐ ܠܐܴ ܡܶܬܡܰܠܠܳܢܺܝܬܳܐ: ܚܰܕ ܡܰܘܕܶܝܢܰܢ ܠܳܟ: ܚܰܕ ܡܳܪܝܳܐ ܚܰܕ ܡܫܺܝܚܳܐ ܚܰܕ ܩܢܽܘܡܳܐ ܘܦܰܪܨܽܘܦܳܐ ܚܰܕ ܟܝܳܢܳܐ: ܣܛܰܪ ܡܶܢܟܽܠ ܡܽܘܙܳܓܳܐ ܘܒܽܘܠܒܳܠܐܴ ܘܰܬܪܰܝܳܢܽܘܬܳܐ: ܘܟܰܕ ܐܰܝܟ ܡ̇ܰܢ ܕܚܰܕ ܠܳܟ ܝܳܕܥܺܝܢܰܢ: ܘܰܠܡܰܥܒܕܳܢܽܘܬܳܟ ܗ̇ܳܝ ܐܠܰܗܳܐܺܝܬ ܘܐ̱ܢܳܫܳܐܺܝܬ: ܘܚܰܕ ܨܶܒܝܳܢܳܐ: ܟܰܕ ܠܰܘ ܬܪܶܝܢ ܐܺܝܬܰܝܟ ܐܶܠܐܴ ܕܚܰܕ ܬܪܶܝܢ ܚܰܕ ܐܺܝܬܰܝܟ ܐܠܰܗܳܐ ܘܒܰܪܢܳܫܳܐ: ܘܕܰܫܘܰܝܬ ܠܐܱܒܳܐ ܒܰܐܠܳܗܽܘܬܳܐ: ܘܠܰܟܝܳܢܰܢ ܒܐܢܳܫܽܘܬܳܐ: ܠܐܴ ܚܳܫܽܘܫܳܐ ܘܠܐܴ ܡܳܝܽܘܬܳܐ ܒܪܽܘܚ: ܕܚܰܫ ܘܡܺܝܬ ܒܦܰܓܪܳܐ: ܕܡ̣ܶܢ ܙܰܪܥܶܗ ܕܰܐܒܪܰܡ ܦܰܓܪܳܐ ܐܶܬܥܰܛܰܦܬ: ܘܠܰܘ ܡ̣ܶܢ ܡܰܠܐܱܟܳܐ: ܘܰܣܛܰܪ ܡ̣ܶܢ ܚܛܺܝܬܳܐ ܠܰܢ ܐܶܬܕܰܡܺܝܬ: ܘܟܰܕ ܐܰܝܟ ܚܰܢ̈ܦܶܐ ܘܟܳܦܽܘܪ̈ܶܐ ܠܐܴ ܟܳܦܪܺܝܢܰܢ ܘܰܡܦܰܠܓܺܝܢܰܢ ܠܳܟ: ܘܰܬܪܶܝܢ ܒܢܰܝ̈ܳܐ ܘܰܬܪܶܝܢ ܡܫܺܝ̈ܚܶܐ: ܐܰܘ̇ ܬܪܶܝܢ ܐܰܘ ܒܰܬܪܶܝܢ ܟܝܳܢ̈ܶܐ: ܡ̣ܶܢ ܒܳܬܰܪ ܚܕܳܝܽܘܬܳܐ ܟܝܳܢܳܝܬܳܐ ܘܰܩܢܽܘܡܳܝܬܳܐ: ܠܐܴ ܡܳܢܶܝܢܰܢ ܠܳܟ: ܘܰܕܚܰܕ ܗ̣ܽܘ ܟܝܳܢܳܐ ܕܡܶܠܬܳܐ ܕܰܡܒܰܣܰܪ ܡܰܘܕܶܝܢܰܢ ܠܳܟ: ܘܰܠܡܶܢܝܳܢ ܟܝ̈ܳܢܶܐ ܙܳܢܩܺܝܢܰܢ: ܘܕܰܢܛܺܝܪ ܘܩܰܝܳܡ ܫܽܘܘܕܳܥܗܽܘܢ ܕܠܐܴ ܒܽܘܠܒܳܠ: ܟܰܕ ܠܐܴ ܐܰܒܺܝܕ ܚܰܕ ܡܶܢܗܽܘܢ ܐܰܘ̇ ܕܰܐܘܒܶܕ ܠܚܰܒܪܶܗ: ܘܟܰܕ ܒܪܶܚܡܰܬ݀ ܐ̱ܢܳܫܽܘܬܳܟ ܠܡ̈ܶܠܐܷ ܕܰܢܒܺܝ̈ܶܐ ܓܡܰܪܬ: ܘܰܬܠܺܝܬܳܐܺܝܬ ܠܟܽܠܳܗ̇ ܡܕܰܒܪܳܢܽܘܬܳܟ ܚܰܬܶܡܬ: ܒܝܰܠܕܳܐ ܘܬܰܪܒܺܝܬܳܐ: ܘܰܥܡܳܕܳܐ: ܘܚܰܫܳܐ ܘܰܨܠܺܝܒܳܐ ܘܡܰܘܬܳܐ: ܘܰܩܒܽܘܪܬܳܐ ܬܠܺܝܬܳܐܝܰܬ݀ ܝܰܘ̈ܡܶܐ: ܘܟܰܕ ܬܠܺܝܬܳܐܺܝܬ ܠܰܩܝܳܡܬܳܟ ܕܡ̣ܶܢ ܒܶܝܬ ܩܰܒܪܳܐ: ܠܥܶܠܳܝ̈ܶܐ ܘܡܶܨܥܳܝ̈ܶܐ ܘܬܰܚܬܳܝ̈ܶܐ ܒܬܶܡܗܳܐ ܐܰܩܺܝܡܬ. ܘܰܬܠܺܝܬܳܐܺܝܬ ܠܬܰܠܡܺܝ̈ܕܰܝܟ ܐܰܢ̱ܬ ܠܳܟ ܓܠܰܝܬ: ܒܥܶܠܺܝܬܳܐ ܘܥܰܠ ܝܰܡܬܳܐ ܕܛܺܝܒܶܪܺܝܳܘܣ: ܬܠܺܝܬܳܐܺܝܬ ܒܝܰܘܡܳܐ ܗܳܢܳܐ ܚܰܝܠܰܝ̈ܟ ܡܶܣܬܰܥܪܺܝܢ ܗܘܰܘ ܡܶܬܚܰܘܝܳܢܽܘܬܳܟ ܕܰܒܥܶܕܳܢ ܨܰܦܪܳܐ: ܘܫܽܘܘܳܠܐܴܟ ܕܥܰܠ ܐܽܘܟܠܐܴ: ܘܰܫܕܳܝܳܐ ܕܰܡܨܺܝܕܬܳܐ ܠܓܰܒܳܐ ܕܝܰܡܺܝܢܳܐ ܟܰܕ ܒܕܶܢܚܳܐ ܠܺܠܝܳܝܳܐ ܥܰܡܽܘܛܳܐ ܕܥܰܬܺܝܩܬܳܐ ܐܰܥܒܰܪܬ: ܘܰܠܗ̇ܳܝ ܕܰܛܠܳܝ̈ܶܐ ܩܪܰܝܬ ܕܰܥܕܰܟܺܝܠ ܠܐܴ ܐܶܬܓܡܰܪܘ ܒܪ̈ܽܘܚܳܢܳܝܳܬܳܐ ܓܠ̣ܰܝ̣ܬ ܘܰܪܡܳܝܳܐ ܕܰܡܨܺܝܕܬܳܐ ܠܝܰܡܺܝܢܳܐ: ܗ̇ܰܘ ܕܠܐܴ ܢܶܦܠܚܽܘܢ ܥܒܳܕ̈ܶܐ ܣܶܡܳܠܳܝ̈ܶܐ ܢܰܗܺܝܪܳܐܺܝܬ ܢܗܰܪܬ ܬܠܺܝܬܳܐܺܝܬ ܨܶܝܕ ܫܶܡܥܽܘܢ ܬܶܗܪ̈ܶܐ ܡܶܫܬܰܡܫܺܝܢ ܗܘܰܘ: ܡܨܺܝܕܬܳܐ ܕܚܳܡܠܐܴ ܢܽܘ̈ܢܶܐ ܣܰܓܺܝ̈ܶܐܐ: ܘܝܰܡܳܐ ܕܛܳܥܶܢ ܠܶܗ ܠܥܶܠ ܡ̣ܶܢ ܓܰܠܠܰܘ̈ܗܝ ܘܰܚܙܳܬܳܟ ܕܰܡܫܰܪܪܳܐ ܠܶܗ ܒܟܽܠ ܣܰܒܪ̈ܺܝܢ. ܬܠܺܝܬܳܐܺܝܬ ܠܰܬܡܺܝ̈ܗܳܬܳܟ ܣܥܰܪܬ ܠܥܺܢܰܝ̈ܗܽܘܢ ܘܰܚܙܰܘ ܓܽܘܡܪ̈ܶܐ ܟܰܕ ܣܺܝ̈ܡܳܢ: ܢܽܘܢܳܐ ܕܣܺܝܡ ܥܠܰܝܗܶܝܢ: ܘܠܰܚܡܳܐ ܘܢܽܘܪܳܐ ܕܠܐܴ ܩܰܝ̈ܣܶܐ: ܘܢܽܘܢܳܐ ܕܠܐܴ ܨܶܝܕ ܡ̣ܶܢ ܡܰܝ̈ܳܐ: ܘܠܰܚܡܳܐ ܕܠܐܴ ܢܰܚܬܽܘ̈ܡܶܐ ܬܠܺܝܬܳܐܺܝܬ ܡܰܠܶܠܬ ܥܰܡܗܽܘܢ ܘܫܰܪܰܪܬ ܐܶܢܽܘܢ ܥܰܠ ܩܝܳܡܬܳܟ: ܕܰܬܠܺܝܬܳܝܰܬ݀ ܬܶܬܗܰܝܡܰܢ: ܟܰܕ ܛܠܳܝ̈ܶܐ ܩܪܰܝܬ: ܘܕܰܐܪܡܰܘ ܡܨܺܝܕܬܳܐ: ܘܕܰܐܝܬܰܘ ܡ̣ܶܢ ܗ̇ܳܢܽܘܢ ܢܽܘ̈ܢܶܐ ܕܨܳܕܬܽܘܢ ܬܠܺܝܬܳܐܺܝܬ ܪܰܘܪ̈ܒܳܬܳܐ ܡܶܬܥܰܒ̈ܕܳܢ ܗܘ̈ܰܝ ܢܶܓܕܳܐ ܕܰܡܨܺܝܕܬܳܐ ܕܡ̣ܶܢ ܝܰܡܳܐ: ܘܡܰܠܝܽܘܬܳܗ̇ ܕܡ̣ܶܢ ܢܽܘ̈ܢܶܐ: ܘܠܐܴ ܡܶܨܛܰܪܝܳܢܽܘܬܳܗ̇ ܡ̣ܶܢ ܝܰܬܺܝܪܽܘܬܳܐ ܘܚܰܡܠܰܬ݀: ܬܠܺܝܬܳܐܺܝܬ ܚܰܡܫܺܝܢ ܘܰܬܠܳܬܳܐ ܠܰܬܠܳܬܳܐ ܠܰܙܡܺܝܪ̈ܳܬܳܐ ܕܰܘܺܝܕܳܝ̈ܳܬܳܐ: ܘܰܬܠܳܬܳܐ ܠܰܬܠܳܬ ܬܶܫܒ̈ܚܳܬܳܐ ܡܽܘܫܳܝ̈ܳܬܳܐ ܡܰܐܪܙܳܐ ܘܰܡܚܰܘܝܳܐ: ܬܠܺܝܬܳܐܺܝܬ ܠܥܺܕܬܳܐ ܩܰܕܺܝܫܬܳܐ ܡܛܰܦܣܳܐ ܘܠܐܱܝܠܶܝܢ ܕܩܳܦܶܝܢ ܒܳܗ̇ ܒܰܫܡܳܗ̈ܶܐ ܬܠܺܝܬܳܝ̈ܶܐ ܕܺܝܠܳܟ ܘܕܰܐܒܽܘܟ ܘܰܕܪܽܘܚܳܟ ܛܳܒܥܳܐ: ܘܰܒܢܰܝ̈ܳܐ ܘܰܐܚ̈ܶܐ ܘܚܰܒܺܝ̈ܒܶܐ ܥܳܒܕܳܐ: ܬܠܺܝܬܳܐܺܝܬ ܚܰܡܫܺܝܢ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܰܐܪܙܺܝܢ: ܕܰܒܗܽܘܢ ܐ̱ܪ̈ܳܙܶܐ ܚܰܬܺܝ̈ܬܶܐ ܐܰܝܟ ܚܙܳܝܳܐ ܢܰܗܺܝܪܳܐ ܕܰܢܒܺܝܽܘܬܳܐ ܚܡܺܝܠܺܝܢ: ܬܠܺܝܬܳܐܺܝܬ ܫܡܳܗ̈ܶܐ ܬܠܺܝܬܳܝ̈ܶܐ ܡܶܬܬܰܙܥܩܺܝܢ ܐܠܰܗܳܐ ܙܰܕܺܝܩܳܐ: ܐܠܰܗܳܐ ܦܳܪܽܘܩܳܐ: ܐܠܰܗܳܐ ܕܰܝ̇ܳܢܳܐ ܕܩܽܘܫܬܳܐ ܘܰܒܗ̇ܰܘ ܕܰܬܪܶܝܢ: ܐܶܕܰܥ ܕܰܐܠܳܗܳܐ ܐܺܝܬ ܠܺܝ: ܠܡܶܠܬܳܐ ܕܺܝܠܶܗ ܕܰܐܠܳܗܳܐ ܐܶܫܰܒܰܚ: ܒܰܐܠܳܗܳܐ ܬܟܺܝܠ ܐ̱ܢܳܐ ܠܐܴ ܐܶܕܚܰܠ: ܘܰܬܠܺܝܬܳܐܺܝܬ ܒܰܬܠܺܝܬܳܝܽܘܬܳܐ: ܙܥܰܩ ܢܒܺܝܳܐ: ܫܰܒܰܚ ܢܰܦܫܝ ܠܡܳܪܝܳܐ ܒܚܰܝ̈ܰܝ. ܘܶܐܙܡܰܪ ܠܐܱܠܳܗܳܐ ܥܰܕ ܩܰܝ̇ܳܡ ܐ̱ܢܳܐ ܕܦܰܨܝܰܢ ܘܦܰܪܩܰܢ: ܘܕܳܢ ܣܳܢܰܐܝ̈ܢ: ܕܺܝܕܰܥܢܳܝܗܝ ܘܫܰܒܰܚܢܳܝܗܝ ܘܰܥܠܰܘܗܝ ܬܟܺܝܠܺܝܢܰܢ: ܘܢܰܦ̈ܫܳܬܰܢ ܘܦܰܓܪ̈ܰܝܢ ܘܪ̈ܽܘܚܳܬܰܢ ܒܶܗ ܡܰܘܕ̈ܝܳܢ ܬܠܺܝܬܳܐܺܝܬ ܬܠܳܬܳܐ ܕܰܬܠܳܬ ܬܶܫܒ̈ܚܳܬܳܐ ܬܠܺܝܬܳܝܽܘܬܳܐ ܡܰܢܗܪܺܝܢ: ܕܰܒܗܽܘܢ ܦܪܺܝܩܺܝܢ ܥܰܡ̈ܡܶܐ ܐܺܣܰܪ̈ܠܳܝܶܐ: ܬܠܺܝܬܳܐܺܝܬ ܡܽܘܫܶܐ ܡܰܘܕܶܐ ܥܰܠ ܐܰܦ̈ܰܝ ܦܽܘܪܩܳܢܳܐ: ܒܰܫܡܶܗ ܕܡܳܪܝܳܐ ܐܶܩܪܶܐ: ܘܗܰܒ ܪܰܒܽܘܬܳܐ ܠܐܱܠܳܗܰܢ ܬܰܩܺܝܦܳܐ: ܘܰܐܠܳܗܳܐ ܗ̇ܰܘ ܡܗܰܝܡܢܳܐ ܕܒܰܛܶܠ ܟܽܠ ܕܶܚ̈ܠܳܢ: ܬܠܺܝܬܳܐܺܝܬ ܠܳܟ ܘܠܐܱܒܽܘܟ ܘܪܽܘܚܳܟ ܡܫܰܒ̈ܚܳܢ ܢܰܦ̈ܫܳܬܰܢ ܘܪ̈ܽܘܚܳܬܰܢ ܘܗܰܘ̈ܢܰܝܢ. ܘܰܒܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ ܒܳܟ ܡܶܫܬܰܪܪ̈ܳܢ ܬܠܺܝܬܳܐܺܝܬ ܡܶܢܳܟ ܫܳܐܠܺܝܢܰܢ: ܘܠܳܟ ܡܶܬܚܰܢ̈ܳܢܳܢ ܪ̈ܽܘܚܳܬܰܢ: ܘܰܐܝܟ ܕܰܒܪܰܝܬܳܢ ܘܰܦܪܰܩܬܳܢ: ܦܪܽܘܩ ܠܰܢ ܒܝܽܘܡ ܕܺܝܢܳܐ ܡ̣ܶܢ ܢܽܘܪܳܐ ܕܓܺܗܰܢܳܐ: ܬܠܳܬ ܛܳܒ̈ܳܬܳܐ ܥܒܰܕ ܘܫܰܡܠܐܴ ܥܰܡܰܢ ܫܰܟܶܢ ܠܰܢ: ܚܽܘܣܳܝܳܐ ܕܚܰܘ̈ܒܶܐ ܫܽܘܒܩܳܢܳܐ ܕܰܚܛܳܗ̈ܶܐ ܘܰܢܝ̇ܳܚܬܳܐ ܕܰܒܡܰܠܟܽܘܬܳܐ ܫܡܰܝܳܢܺܝܬܳܐ ܠܰܢ ܘܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܟܰܕ ܬܶܫܒܽܘܚܬܳܐ ܘܺܐܝܩܳܪܳܐ ܘܣܶܓܕܬܳܐ ܢܫܰܘܫܶܛ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܛܪܐ

ܐܶܨܛܒܰܝ ܡܳܪܝ ܒܥܶܛܪܳܐ ܗܳܢܳܐ ܐܠܰܗܳܐ ܕܠܳܟ ܩܰܪܶܒܢܰܢ ܒܝܰܘܡܳܐ ܗܳܢܳܐ ܕܓܶܠܝܳܢܳܟ ܠܬܰܠܡܺܝ̈ܕܰܝܟ ܥܰܠ ܝܰܡܬܳܐ ܕܛܺܝܒܶܪܺܝܳܘܣ: ܘܰܐܝܟ ܕܶܐܬܢܰܗܪܰܬ݀ ܒܬܽܘܠܽܘܬܳܐ: ܘܺܝܕܰܥܬܳܟ: ܟܰܕ ܩܥܳܬ݀ ܠܘܳܬ ܫܶܡܥܽܘܢ ܕܗܳܢܳܐ ܡܳܪܰܢ ܗ̣ܽܘ ܗܰܘܢܰܝ̈ܢ ܕܢܶܣܬܰܟܠܳܟ: ܕܰܐܢ̱ܬ ܗ̣ܽܘ ܐܠܰܗܳܐ ܕܥܰܠ ܟܽܠ: ܘܚܰܕܳܐ ܠܰܢ ܒܰܓܢܽܘܢܳܟ ܥܰܡܗܽܘܢ ܚܢܰܢ ܘܟܽܠܗܽܘܢ ܒܢ̈ܰܝ ܥܺܕܬܳܐ ܕܰܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ܀

ܚܘܬܡܐ

ܥܳܒܽܘܕܳܐ ܕܥܳܠܡ̈ܶܐ ܠܳܟ ܡܫܰܒܚܺܝܢܰܢ: ܘܰܒܝܰܘܡܳܐ ܗܳܢܳܐ ܕܢܽܘܚܳܡܳܟ ܕܡ̣ܶܢ ܩܰܒܪܳܐ ܠܳܟ ܣܳܓܕܺܝܢܰܢ: ܘܰܠܩܰܛܺܝܢܽܘܬ ܣܽܘܟܳܠܐܴ ܘܢܰܗܺܝܪܽܘܬ ܢܰܦܫܳܐ ܕܒܰܪ ܐ̱ܪܳܙܳܟ: ܘܶܐܠܽܘܠܐܴ ܚܛܳܐ ܓܶܢܣܰܢ ܗܳܟܰܢ ܢܰܗܺܝܪ ܗܘܳܐ ܚܳܟܡܺܝܢܰܢ: ܐܰܢܗܰܪ ܬܰܪ̈ܥܝܳܬܰܢ: ܘܕܰܟܳܢ ܡ̣ܶܢ ܚܛܺܝܬܳܐ ܕܢܰܘܕܶܐ ܠܳܟ ܘܠܐܱܒܽܘܟ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܡܰܠܟܳܐ ܕܡܰܠܟ̈ܶܐ ܕܶܐܬܪܟܶܢ ܡ̣ܶܢ ܪ̈ܰܘܡܶܐ ܥܶܠܳܝ̈ܶܐ ܠܥܽܘ̈ܡܩܶܐ ܬܰܚܬܳܝ̈ܶܐ ܒܛܰܝܒܽܘܬܶܗ ܘܰܛܥܶܡ ܡܰܘܬܳܐ ܒܨܶܒܝܳܢܶܗ ܕܢܶܦܪܽܘܩ ܠܐܴܕܳܡ ܘܰܠܝܰܠܕ̈ܰܘܗܝ ܨܰܠܡܳܐ ܕܪܰܒܽܘܬܶܗ: ܘܰܢܚܶܬ ܠܰܫܝܽܘܠ ܒܪܶܚܡܰܬ݀ ܐ̱ܢܳܫܽܘܬܶܗ ܘܩܰܛܠܶܗ ܠܡܰܘܬܳܐ ܩܳܛܽܘܠܰܢ: ܘܰܐܬܗܰܪ ܠܡܰܠܐܱܟ̈ܶܐ ܘܠܰܒܢܰܝ̈ܢܳܫܳܐ ܒܰܩܝܳܡܬܶܗ: ܘܰܐܒܗܶܬ ܠܥܰܡܳܐ ܕܨܳܠܽܘ̈ܒܶܐ ܒܳܐܬܳܐ ܕܢܽܘܚܳܡܶܗ: ܘܢܰܟ̈ܦܳܬܳܐ ܣܰܒܰܪ̈ܝ ܠܰܫܠܺܝ̈ܚܶܐ ܥܰܠ ܩܝܳܡܬܶܗ: ܘܬܰܠܡܺܝ̈ܕܶܐ ܟܰܕ ܫܡܰܥܘ ܕܶܐܬܢܰܚܰܡ ܪܗܶܛܘ ܠܰܚܙܳܬܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ:

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܒܚܰܝܠܐܴ ܕܺܝܠܳܟ ܐܰܩܺܝܡܬ ܠܰܟܝܳܢܰܢ ܕܰܪܡܶܐ ܗܘܳܐ ܒܚ̈ܶܙܶܐ ܬܰܚܬܳܝ̈ܶܐ ܕܰܫܝܽܘܠ: ܒܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܩܳܡܬ ܕܠܐܴ ܚܒܳܠܐܴ: ܘܠܐܴ ܡܶܬܚܰܒܠܳܢܽܘܬܳܐ ܐܰܩܢܰܝܬ ܠܓܶܢܣܳܐ ܕܺܝܠܰܢ ܦܰܐܝܰܬ݀ ܠܐܱܠܳܗܳܐ. ܘܠܐܴ ܡܶܟܺܝܠ ܒܐܢܳܫܳܝ̈ܳܬܳܐ ܝܰܘܡܳܢ ܡܶܬܺܝܕܰܥ ܐܰܢ̱ܬ ܡ̣ܶܢ ܟܶܢܫܳܐ ܕܰܡܗܰܝ̈ܡܢܰܝܟ: ܐܶܠܐܴ ܚܰܕ ܐܠܰܗܳܐ ܘܚܰܕ ܟܝܳܢܳܐ ܠܐܴ ܡܶܫܬܚܠܦܳܢܳܐ ܘܠܐܴ ܚܒܺܝܟܳܐ ܘܰܠܚܽܘܕܳܝܳܐ: ܘܰܩܢܽܘܡܳܐ ܐܺܝܬܰܝܟ ܘܰܠܥܶܠ ܡ̣ܶܢ ܡܶܠܬܳܐ: ܘܳܐܦܶܢ ܓܰܫܽܘܟ ܘܶܐܫܬܰܘܕܥܽܘܟ ܬܰܠܡܺܝ̈ܕܶܐ ܘܰܚܙܰܐܘܽܘܟ ܒܰܕܡܽܘܬܳܐ ܓܽܘܫܡܳܢܳܝܬܳܐ ܡ̣ܶܢ ܒܳܬܰܪ ܢܽܘܚܳܡܳܐ ܘܰܩܝܳܡܬܳܐ: ܠܐܴ ܗܘܳܐ ܒܦܰܢܛܰܣܺܝܰܐ ܐܶܠܐܴ ܫܰܪܺܝܪܳܐܺܝܬ ܘܰܠܥܶܠ ܡ̣ܶܢ ܡܶܠܬܳܐ: ܘܰܐܝܟܰܢܳܐ ܕܒܰܙܒܰܢ ܡܕܰܒܪܳܢܽܘܬܳܟ ܚܰܘܺܝܬ ܐܠܰܗܳܝ̈ܳܬܳܐ ܬܡܺܝܗܳܐܺܝܬ: ܐܳܦ ܗܳܟܰܢܳܐ ܡ̣ܶܢ ܒܳܬܰܪ ܩܝܳܡܬܳܟ ܚܰܘܺܝܬ ܓܫܺܝ̈ܡܳܬܳܐ ܫܒܺܝܚܳܐܺܝܬ ܟܰܕ ܥܰܠ ܝܰܡܬܳܐ ܕܛܺܝܒܶܪܺܝܳܘܣ ܐܶܬܚܙܰܝܬ ܠܬܰܠܡܺܝ̈ܕܰܝܟ ܓܒܰܝ̈ܳܐ ܘܰܫܠܳܡܳܐ ܘܚܰܕܽܘܬܳܐ ܡܠܰܝܬ ܠܠܶܒܰܘ̈ܳܬܗܽܘܢ: ܘܶܐܟܰܠܬ ܘܶܐܫܬܺܝܬ ܥܰܡܗܽܘܢ ܡ̣ܶܢ ܒܳܬܰܪ ܩܝܳܡܬܳܟ ܡܫܰܒܰܚܬܳܐ: ܚܰܡܶܫ ܬܶܕܡܪ̈ܳܬܳܐ ܦܰܐܝ̈ܳܬܳܐ ܣܥܰܪܬ ܠܘܳܬܗܽܘܢ ܒܗ̇ܳܝ ܫܳܥܬܳܐ. ܓܽܘܡܪ̈ܶܐ ܟܰܕ ܣܺܝܡܺܝܢ: ܘܢܽܘܢܳܐ ܕܰܡܛܰܘܰܝ ܘܠܰܚܡܳܐ ܟܰܕ ܡܰܬܩܰܢ: ܘܟܰܟܳܪܺܝܬܳܐ ܕܕܶܒܫܳܐ ܕܰܡܛܰܝܒܳܐ ܘܰܒܗܳܕܶܐ ܡܶܬܡܰܨܝܳܢܽܘܬܳܟ ܐܺܝܬܝܳܝܬܳܐ ܒܰܕܶܩܬ ܘܚܰܘܺܝܬ ܠܰܡܗܰܝ̈ܡܢܶܐ ܕܺܝܠܳܟ ܗܳܟܰܢܳܐ ܘܰܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܕܰܐܣܒܰܪܘ ܡܶܬܦܰܫ̈ܟܳܢܳܝܳܬܳܐ ܒܰܩܝܳܡܬܳܟ ܡܳܪܳܢܳܝܬܳܐ: ܕܓܽܘܫܽܘܢܳܢܝ ܘܕܰܥܘ ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇ ܐܰܟܡܳܐ ܕܚܳܙܶܝܢ ܐܢ̱ܬܽܘܢ ܕܺܐܝܬ ܠܺܝ. ܟܰܕ ܠܰܩܠܶܝܽܘܦܰܐ ܘܚܰܒܪܶܗ ܒܢܰܩܺܝܦܽܘܬܳܐ ܚܽܘܒܳܢܳܝܬܳܐ ܘܰܒܝܰܕ ܦܽܘܬܳܚܳܐ ܕܡܶܠܰܝ̈ ܢܒܺܝ̈ܰܘܳܬܳܐ ܕܰܥܠܰܝܟ ܒܰܩܨܳܝܬܳܐ ܕܠܰܚܡܳܐ ܥܰܝ̈ܢܐܶ ܕܢܰܦ̈ܫܳܬܗܽܘܢ ܐܶܬܦܬܰܚ̈ܝ ܠܡܶܫܬܰܘܕܳܥܽܘ ܚܰܬܺܝܬܳܐܺܝܬ ܕܩܳܡܬ ܫܰܪܺܝܪܳܐܺܝܬ ܘܚܰܙܶܩܬ ܐܶܢܽܘܢ ܒܚܰܝܠܐܴ ܕܪܺܝܫܽܘܬ ܟܳܗܢܽܘܬܳܐ: ܟܰܕ ܒܚܰܕ ܒܫܰܒܳܐ ܕܰܩܕܳܡ ܗܳܢܳܐ ܠܥܶܠܺܝܬܳܐ ܥܰܠܬ: ܘܟܰܕ ܬܰܪ̈ܥܶܐ ܘܟܰܘ̈ܳܬܳܐ ܕܥܶܠܺܝܬܳܐ ܐܰܚܺܝܕܺܝܢ ܡ̣ܶܢ ܙܰܘܥܳܐ ܘܩܶܢܛܳܐ ܕܒܶܝܬ ܩܰܝܳܦܳܐ. ܘܫܰܪܰܪܬ ܠܬܽܐܘܡܰܐ ܘܰܐܓܶܫܬܳܝܗܝ ܕܰܦܢܳܟ ܘܰܒܚܰܕ ܒܫܰܒܳܐ ܗܳܢܳܐ ܕܝܰܘܡܳܢ ܙܒܰܢ̱ܬܳܐ ܕܰܬܠܳܬ ܐܶܬܚܰܘܝܰܬ݀ ܠܬܰܠܡܺܝ̈ܕܰܝܟ ܥܰܠ ܝܰܡܬܳܐ ܕܛܺܝܒܳܪܺܝܳܘܣ: ܒܚܕܰ ܒܫܰܒܳܐ ܕܰܩܕܳܡ ܗܳܢܳܐ ܐܶܫܬܰܪܰܪ ܬܽܐܘܡܰܐ ܘܰܐܘܕܺܝ ܘܶܐܡܰܪ ܕܰܐܢ̱ܬ ܐܺܝܬܰܝܟ ܡܳܪܝ ܘܰܐܠܳܗܝ ܕܠܐܴ ܦܽܘܠܳܓܳܐ ܗܳܫܳܐ ܡܳܪܝ ܢܳܦܶܩ ܐ̱ܢܳܐ ܠܰܣܒܰܪܬܳܐ: ܐܳܦ ܚܰܝ̈ܶܐ ܘܰܫܪܳܪܳܐ ܕܰܣܒܰܪܬܳܐ ܡܰܟܪܶܙ ܐ̱ܢܳܐ: ܘܰܒܚܰܕ ܒܫܰܒܳܐ ܗܳܢܳܐ ܕܝܰܘܡܳܢ ܠܰܒܶܒܬ ܪ̈ܶܥܝܳܢܰܝܗܽܘܢ ܘܚܰܣܶܕܬ ܠܰܙܥܽܘܪܽܘܬ ܗܰܝܡܳܢܽܘܬܗܽܘܢ ܘܰܐܠܶܦܬ ܐܶܢܽܘܢ ܕܰܚܠܳܦ ܨܰܝܕܳܐ ܕܢܽܘܢ̈ܶܐ ܒܢܰܝ̈ܢܳܫܳܐ ܢܶܗܘܽܘܢ ܨܳܝܕܺܝܢ ܠܚܰܝ̈ܶܐ: ܐܳܘ ܟܡܳܐ ܬܡܺܝܗܺܝܢ ܐ̱ܪ̈ܳܙܶܐ ܕܰܐܫܠܶܡܬ ܠܰܢ ܐܳܘ ܡܶܠܬܳܐ ܐܠܰܗܳܐ: ܐܳܘ ܫܒܺܝܚ ܘܰܡܠܐܷ ܕܽܘܡܳܪܳܐ ܐ̱ܪܳܙܳܐ ܗܳܢܳܐ ܕܰܐܓܥܶܠܬ ܠܰܢ ܒܺܐܝ̈ܕܰܝ ܫܠܺܝ̈ܚܶܐ ܩܰܕܺܝ̈ܫܶܐ ܘܰܡܣܰܒܪ̈ܳܢܶܐ ܕܰܫܪܳܪܳܐ. ܐܳܘ ܠܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ ܕܶܐܫܬܰܟܢܰܬ݀ ܠܰܢ: ܘܡܳܪܰܢ ܝܶܫܽܘܥ ܡܰܢܽܘ ܕܠܐܴ ܣܳܓܶܕ ܠܳܟ ܘܰܠܫܽܘ̈ܡܳܬܳܟ ܕܰܚܠܳܦܰܝܢ ܘܠܰܩܝܳܡܬܳܟ ܡܚܰܕܬܳܢܺܝܬܶܗ ܕܰܟܝܳܢܰܢ: ܡܰܢܽܘ ܕܠܐܴ ܬܳܗܰܪ ܒܐܪ̈ܳܙܶܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܟܰܕ ܒܳܥܶܝܢܰܢ ܘܡܶܬܟܰܫܦܺܝܢܰܢ ܠܳܟ ܕܬܶܓܡܽܘܪ ܘܰܬܫܰܡܠܐܷ ܠܰܢ ܒܟܽܠܗܽܘܢ ܕܰܪ̈ܓܰܝ ܫܽܘܡܠܳܝܰܢ ܘܡܶܣܬܰܠܩܳܢܽܘܬܰܢ ܕܰܒܕܽܘܪ̈ܳܓܶܐ ܫܡܰܝ̈ܳܢܶܐ: ܘܰܬܦܰܬܰܚ ܠܥܰܝ̈ܢܶܐ ܕܬܰܪ̈ܥܝܳܬܰܢ: ܐܰܝܟܰܢܳܐ ܕܢܶܫܬܰܘܕܰܥ ܢܳܡܽܘܣܰܝ̈ܟ ܘܢܳܛܽܘܪܽܘܬ ܦܽܘܩܕܳܢܰܝ̈ܟ ܕܚܰܝ̈ܶܐ: ܘܬܰܐܠܶܦ ܠܰܢ ܠܡܰܟܪܳܙܽܘ ܬܡܺܝ̈ܗܳܬܳܟ ܘܰܓܢ̱ܒܰܪ̈ܘܳܬܳܟ ܘܰܠܡܶܬܢܗܳܪܽܘ ܒܟܽܠܗܶܝܢ ܝܰܕ̈ܥܳܬܳܐ ܐܠܰܗܳܝ̈ܳܬܳܐ ܘܠܐܷܣܛܕܰܘ̈ܳܬܳܐ ܐܰܘܟܺܝܬ ܡܽܘܫܳܝ̈ܳܬܳܐ ܙܰܒܢܳܝ̈ܳܬܳܐ ܒܚܰܝܠܐܴ ܕܪܽܘܚܳܐ ܩܰܠܺܝܠܐܴܝܬ ܢܶܡܛܶܐ: ܘܡ̣ܶܢ ܥܳܠܡܳܐ ܗܳܢܳܐ ܚܶܫܽܘܟܳܝܳܐ ܠܘܳܬܳܟ ܢܽܘܗܪܳܐ ܕܰܫܪܳܪܳܐ ܢܶܬܥܰܠܐܷ: ܐܰܝܟܰܢܳܐ ܕܢܰܘܕܶܐ ܠܐܴ ܫܰܠܘܳܐܺܝܬ. ܘܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܡܗܰܝܡ̈ܢܶܐ: ܕܥܰܠ ܦܳܬܽܘܪܳܐ ܕܡܰܠܟܽܘܬܳܟ ܢܶܣܬܡܶܟ ܒܫܽܘܒܚܳܐ ܕܺܐܝܬܽܘܬܳܟ ܡ̣ܶܢ ܝܰܡܺܝܢܳܟ ܢܶܬܒܰܣܰܡ: ܘܬܰܡܳܢ ܢܰܣܶܩ ܫܽܘܒܚܳܐ ܠܐܱܠܳܗܽܘܬܳܟ ܪܳܡܰܬ݀ ܡ̣ܶܢ ܟܽܠ ܡܰܕܰܥ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܟܝܳܢܳܐ ܛܽܘܒܬܳܢܳܐ ܘܰܡܥܰܠܝܳܐ ܘܫܽܘܦܪ̈ܶܐ ܠܐܴ ܡܶܬܦܰܚܡܳܢܳܐ ܗ̇ܰܘ ܥܳܒܽܘܕܳܐ ܘܒܳܪܽܘܝܳܐ ܕܗܳܠܶܝܢ ܕܺܐܝܬܰܝܗܶܝܢ: ܘܢܽܘܗܪܳܐ ܠܐܴ ܡܶܬܚܰܙܝܳܢܳܐ ܘܝܰܕܽܘܥܬܳܢܳܐ ܗ̇ܰܘ ܠܐܴ ܡܶܬܚܰܙܝܳܢܳܐ ܘܝܰܕܽܘܥܬܳܢܳܐ ܗ̇ܰܘ ܠܐܴ ܡܶܬܕܰܪܟܳܢܳܐ ܒܺܐܝܬܽܘܬܶܗ ܗ̇ܳܝ ܛܳܒܽܘܬܳܐ ܕܠܐܴ ܚܣܳܡ: ܗ̇ܳܝ ܚܶܟܡܬܳܐ ܪܰܒܬܳܐ ܘܠܐܴ ܡܶܣܬܰܝܟܳܢܺܝܬܳܐ ܕܪܰܚܺܝܩܳܐ ܘܡܰܒܥܕܳܐ ܡܶܢܟܽܠ ܬܰܪܥܺܝܬܳܐ ܐ̱ܢܳܫܳܝܬܳܐ. ܗ̇ܰܘ ܕܰܫܟܺܝܚ ܘܩܰܪܺܝܒ: ܘܰܥܢܳܐ ܠܟܽܠܗܽܘܢ ܕܩܳܪܶܝܢ ܠܶܗ ܒܫܰܦܺܝܪܽܘܬ ܕܶܚܠܬܳܐ ܘܰܒܨܶܒܝܳܢܳܐ ܛܳܒܳܐ: ܗ̇ܰܘ ܒܳܪܽܘܝܳܐ ܘܓܳܒܽܘܠܐܴ ܕܟܽܠܗܽܘܢ ܗܘܳܝ̈ܶܐ ܗ̇ܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܳܪܰܢ ܝܶܫܽܘܥ ܡܫܺܝܚܳܐ ܡܰܠܟܳܐ ܕܡܰܠܟ̈ܶܐ ܐܠܰܗܳܐ ܫܰܪܺܝܪܳܐ ܡܳܪܝܳܐ ܡܪܰܝܡܳܐ ܘܰܡܥܰܠܝܳܐ: ܗ̇ܰܘ ܕܺܐܝܬܰܝܟ ܬܗܽܘܡܳܐ ܕܪ̈ܰܚܡܶܐ ܒܽܘܟܪܳܐ ܕܠܐܴ ܫܽܘܪܳܝ: ܘܢܽܘܗܪܳܐ ܠܚܽܘܕܳܝܳܐ ܘܰܓܢܺܝܙܳܐ ܘܺܝܚܺܝܕܳܝܳܐ ܕܰܐܒܳܐ: ܘܫܽܘܒܚܳܐ ܕܪܰܒܽܘܬܶܗ ܘܨܶܡܚܳܐ ܫܘܶܐ ܒܰܡܬܽܘܡܳܝܽܘܬܳܐ: ܣܰܒܪܳܐ ܘܰܩܝܳܡܬܳܐ ܘܪܺܝܫ ܡܰܠܗܳܢܽܘܬܳܐ ܕܺܝܠܰܢ: ܐܽܘܪܚܳܐ ܘܰܫܪܳܪܳܐ ܕܰܐܝܠܶܝܢ ܕܰܚܦܺܝܛܺܝܢ ܒܶܗ: ܟܰܕ ܗܳܟܺܝܠ ܒܡܶܬܢܰܚܬܳܢܽܘܬܳܟ ܗ̇ܳܝ ܕܰܠܘܳܬܰܢ ܒܥܰܝ̈ܢܶܐ ܕܪ̈ܶܥܝܳܢܰܝܢ ܡܰܨܕܶܝܢܰܢ ܘܰܒܟܽܠܶܗ ܡܽܘܠܳܝܳܐ ܕܰܡܕܰܒܪܳܢܽܘܬܳܟ ܘܣܽܘܪܳܩܳܟ ܨܶܒܝܳܢܳܝܳܐ ܕܰܚܠܳܦܰܝܢ ܡܶܬܒܰܩܶܝܢܰܢ. ܝܺܕܺܝܥܳܐܺܝܬ ܕܶܝܢ ܒܰܩܒܽܘܪܬܳܟ ܡܰܠܝܰܬ݀ ܟܽܠ ܬܶܗܪ̈ܺܝܢ ܘܰܩܝܳܡܬܳܟ ܘܕܶܢܚܳܐ ܕܺܝܠܳܟ ܫܒܺܝܚܳܐ ܕܡ̣ܶܢ ܩܰܒܪܳܐ ܒܬܶܫܒܽܘܚܬܳܐ ܕܠܐܴ ܡܶܬܕܰܪܟܳܐ: ܘܰܒܬܶܕܡܽܘܪܬܳܐ ܕܠܐܴ ܡܶܬܡܰܠܠܐܴ ܡ̣ܶܢ ܒܶܝܬ ܡܺܝ̈ܬܶܐ ܩܳܡܬ ܘܰܐܟܪܶܙܬ ܚܰܝ̈ܶܐ ܘܚܰܕܘ̈ܳܬܳܐ ܠܟܽܠܗܽܘܢ ܥܓܺܝ̈ܢܰܝ ܥܰܠ ܥܰܦܪܳܐ. ܘܟܰܕ ܣܳܡܬ ܐܰܦܰܝ̈ܟ ܐܰܝܟܰܢܳܐ ܕܬܶܣܥܽܘܪ ܠܟܺܐܢ̈ܶܐ ܘܙܰܕܺܝ̈ܩܶܐ ܗ̇ܳܢܽܘܢ ܕܰܪܒܺܝܚܺܝܢ ܗܘܰܘ ܒܫܶܢܬܳܐ ܝܰܩܺܝܪܬܳܐ ܕܡܰܘܬܳܐ: ܘܰܐܣܺܝܪܺܝܢ ܗܘܰܘ ܬܚܶܝܬ ܛܪܽܘܢܽܘܬܶܗ ܕܡܰܘܬܳܐ: ܠܐܴܕܳܡ ܗ̇ܰܘ ܨܰܠܡܳܐ ܡܰܠܟܳܝܳܐ ܕܰܐܠܳܗܽܘܬܳܟ ܗ̇ܰܘ ܕܰܒܚܰܫܳܐ ܪܰܒܳܐ ܡܒܰܓܶܢ ܗܘܳܐ ܡ̣ܶܢ ܓܰܘ ܐܰܪܥܳܐ: ܠܫܺܝܬ ܗ̇ܰܘ ܫܰܦܺܝܪܳܐ ܕܰܒܨܽܘܪܬܳܟ ܐܶܬܕܰܡܺܝ. ܠܢܽܘܚ ܗ̇ܰܘ ܬܰܡܺܝܡܳܐ ܘܟܺܐܢܳܐ ܘܙܰܕܺܝܩܳܐ ܗ̇ܰܘ ܕܚܰܡܶܫܡܳܐܐ ܫܢܺܝ̈ܢ ܢܛܰܪ ܒܬܽܘܠܽܘܬܳܐ ܘܰܫܚ̈ܳܩܶܐ ܥܰܡ ܛܽܘܪ̈ܳܦܶܐ ܣܒܰܠ ܡ̣ܶܢ ܒܢ̈ܰܝ ܕܳܪ̈ܶܗ: ܘܰܢܚܶܬܬ ܒܪ̈ܰܚܡܰܝܟ ܠܘܳܬ ܐܰܒܪܳܗܳܡ ܪܳܚܡܳܟ: ܕܰܠܘܳܬ ܐܺܝܣܚܳܩ ܘܝܰܥܩܽܘܒ ܚܰܒܺܝ̈ܒܰܝܟ: ܟܺܐܢ̈ܶܐ ܘܙܰܕܺܝ̈ܩܶܐ ܕܰܫܡܳܗ̈ܳܬܳܐ ܗ̇ܳܢܽܘܢ ܕܡ̣ܶܢ ܢܽܘܓܪܳܐ ܪܰܒܳܐ ܡܣܰܟܶܝܢ ܗܘܰܘ ܠܳܟ ܐܳܦ ܠܡܶܐܬܺܝܬܳܟ ܚܳܝܪܺܝܢ ܗܘܰܘ: ܡܽܘܫܶܐ ܘܶܐܠܺܝܳܐ ܥܰܠ ܛܽܘܪܳܐ ܕܬܳܒܽܘܪ ܠܘܳܬܳܟ ܐܶܬܛܰܝܰܒܘ ܗܘܰܘ: ܘܒܰܚܢܰܓܬܳܐ ܠܳܟ ܡܦܝܣܺܝܢ ܗܘܰܘ ܟܰܕ ܐܳܡܪܺܝܢ ܗܘܰܘ ܠܳܟ ܡܳܪܝ ܕܬܶܚܽܘܬ ܠܒܶܝܬ ܡܺܝ̈ܬܶܐ ܘܬܶܦܪܽܘܩ ܡ̣ܶܢ ܥܰܒܕܽܘܬܶܗ ܕܳܐܟܶܠܩܰܪܨܳܐ ܠܨܰܠܡܳܟ ܗ̇ܰܘ ܕܶܐܬܕܰܚܰܚ ܥܰܠ ܥܰܦܪܳܐ ܘܰܛܡܺܝܪ ܒܚ̈ܶܙܶܐ ܕܰܫܝܽܘܠ ܘܶܐܢ ܐܰܢ̱ܬ ܡܳܪܝܳܐ ܠܐܴ ܬܶܦܪܩܺܝܘܗܝ ܗܳܐ ܡܰܗܶܠ ܒܶܗ ܡܰܘܬܳܐ ܝܰܥܢܳܐ ܒܥܽܘܡܪܳܗ̇ ܕܰܫܝܽܘܠ ܘܟܰܕ ܩܳܡܬ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܚܰܝ̈ܶܐ ܘܢܽܘܚܳܡܳܐ ܪܰܣܶܣܬ ܥܰܠ ܓܰܪ̈ܡܰܝܗܽܘܢ ܕܥܰܒܕܰܝ̈ܟ ܗ̇ܳܢܽܘܢ ܕܰܦܪܰܩܬ ܘܰܐܥܕܺܝܬ ܡ̣ܶܢ ܐܺܝ̈ܕܰܝ ܒܺܝܫܳܐ ܡܳܪܽܘܕܳܐ: ܘܒܰܕܓܽܘܢ ܟܰܕ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܳܐ. ܐܳܬܘ̈ܳܬܳܐ ܘܰܓܢ̱ܒܰܪ̈ܘܳܬܳܐ ܚܰܘܺܝܬ: ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܕܰܦܪܰܩܬܳܢ ܡ̣ܶܢ ܐܺܝ̈ܕܰܝ ܡܰܘܬܳܐ ܘܰܐܦܶܩܬܳܢ ܡ̣ܶܢ ܚܠܺܝ̈ܠܶܝܗ̇ ܕܰܐܪܥܳܐ: ܘܰܐܥܶܠܬܳܢ ܠܰܛܝܳܪܳܟ ܕܚܰܝ̈ܶܐ ܘܰܒܫܽܘܒܚܳܐ ܕܒܶܝܬ ܐܰܒܽܘܟ ܡܫܰܒܚܳܐ ܐܰܡܠܶܟܬܳܢ: ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܪ̈ܰܚܡܰܝܟ: ܘܰܡܫܰܒܚܺܝܢܰܢ ܠܒܰܣܺܝܡܽܘܬܳܟ: ܘܡܶܬܟܰܫܦܺܝܢܰܢ ܠܳܟ ܡܳܪܝܳܐ ܕܬܶܣܥܽܘܪ ܠܰܢ ܒܣܳܥܽܘܪܽܘܬܳܐ ܕܡܶܢܳܟ. ܟܰܕ ܠܰܟܪ̈ܺܝܗܶܐ ܒܚܰܝܠܳܟ ܡܰܚܠܶܡ ܐܰܢ̱ܬ: ܘܠܐܱܠܺܝ̈ܨܶܐ ܪܘܰܚܬܳܐ ܘܰܢܦܺܐܫܳܐ ܡܫܰܪܰܪ ܐܰܢ̱ܬ: ܟܰܕ ܠܥܰܝܺܝ̈ܩܰܝ ܪܽܘܚܳܐ ܒܒܽܘ̈ܝܳܐܰܝܟ ܡܒܰܝܰܐܐ ܐܰܢ̱ܬ: ܘܠܐܱܝܠܶܝܢ ܕܰܐܠܺܝܨܺܝܢ ܘܰܡܛܰܪܦܺܝܢ ܡܶܢܟܽܠ ܙܢܺܝ̈ܢ ܕܢܶܣܝܽܘ̈ܢܶܐ ܡܶܬܢܰܘܠܺܝܢ ܘܡܶܫܬܰܚܩܺܝܢ ܣܡܽܘܟ ܐܶܢܽܘܢ ܒܪ̈ܰܚܡܰܝܟ ܣܰܓܺܝ̈ܶܐܐ: ܘܰܠܝܰܬܡ̈ܶܐ ܗܘܺܝ ܐܰܒܳܐ: ܘܠܐܱܪ̈ܡܠܳܬܳܐ ܩܳܝܽܘܡܳܐ: ܘܰܠܟܳܗ̈ܢܶܐ ܘܰܡܫܰܡ̈ܫܳܢܶܐ ܒܪܺܝܫ ܥܰܡܳܟ ܢܰܛܰܪ ܐܶܢܽܘܢ. ܠܚܰܛܳܝ̈ܶܐ ܗܘܺܝ ܡܳܪܝܳܐ ܡܚܰܣܝܳܢܳܐ ܘܰܡܩܺܝܡܳܢܳܐ ܠܥܰܢܺܝ̈ܕܶܐ ܡܗܰܝܡ̈ܢܶܐ ܕܡ̣ܶܢ ܓܰܒܳܐ ܕܝܰܡܺܝܢܳܐ: ܘܟܽܠܰܢ ܢܶܫܬܘܶܐ ܠܚܰܪܬܳܐ ܛܳܒܬܳܐ ܗ̇ܳܝ ܕܰܡܠܺܝܟܳܐ ܠܓܰܒܪ̈ܶܐ ܕܰܫܠܳܡܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܩܽܘܠܳܣܳܐ ܠܐܴ ܡܰܘܦܝܳܢܳܐ: ܘܠܐܱܒܽܘܟ ܡܒܰܪܟܳܐ. ܘܛܽܘܒܬܳܢܳܐ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܠܰܩܝܳܡܬܳܟ ܡܫܰܒܰܚܬܳܐ ܘܰܠܡܶܬܓܰܠܝܳܢܽܘܬܳܟ ܫܒܺܝܚܬܳܐ ܥܰܡ ܟܺܐܢ̈ܶܐ ܘܙܰܕܺܝ̈ܩܶܐ ܕܰܫܦܰܪܘ ܠܳܟ ܘܰܡܣܰܟܶܢ ܠܣܰܒܪܳܐ ܦܰܐܝܳܐ ܕܡܽܘܠܟܳܢܰܝ̈ܟ ܫܰܪܺܝܪ̈ܶܐ ܘܠܐܴ ܕܰܓ̈ܳܠܐܷ: ܡܫܺܝܚܳܐ ܣܰܒܪܳܐ ܕܚܰܝܰܝ̈ܢ: ܘܦܳܪܽܘܩܳܐ ܕܢܰܦ̈ܫܳܬܰܢ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܐܺܝܬܝܳܐ ܡܬܽܘܡܳܝܳܐ ܘܠܐܴ ܡܶܬܕܰܪܟܳܢܳܐ: ܠܗ̇ܰܘ ܕܶܢܚܳܐ ܫܒܺܝܚܳܐ ܘܠܐܴ ܡܶܬܡܰܫܚܳܢܳܐ: ܠܗ̇ܰܘ ܚܰܝܠܬܳܢܳܐ ܘܓܰܢ̱ܒܳܪܳܐ ܕܰܠܟܽܠܗܽܘܢ ܓܰܢ̱ܒܳܪ̈ܶܐ ܡܫܰܦܶܠ: ܠܗ̇ܰܘ ܕܰܒܪ̈ܰܚܡܰܘܗܝ ܣܰܓܺܝ̈ܶܐܐ ܠܘܳܬܰܢ ܐܶܬܬܰܚܬܺܝ ܠܩܰܒܪܳܐ ܥܰܠ ܘܰܠܡܰܘܬܳܐ ܛܪܽܘܢܳܐ ܒܰܙ: ܘܚܰܠܶܨ ܘܰܐܦܶܩ ܠܣܳܚܪ̈ܳܬܳܗ̇ ܟܰܗܺܝ̈ܢܳܬܳܐ: ܘܰܠܩܰܒܪ̈ܶܐ ܣܰܦܶܩ ܘܰܠܡܺܝ̈ܬܶܐ ܕܰܒܗܽܘܢ ܐܰܩܺܝܡ: ܘܰܠܚܰܝ̈ܶܐ ܫܰܪܰܪ ܒܣܰܒܪܳܐ ܒܪܺܝܟܳܐ ܕܰܩܝܳܡܬܳܐ: ܘܰܠܕܰܘܺܝܕ ܢܒܺܝܳܐ ܚܰܕܺܝ ܗ̇ܰܘ ܕܶܐܬܢܰܒܺܝ ܥܠܰܘܗܝ ܘܶܐܡܰܪ: ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܡܚܳܐ ܠܰܒܥܶܠܕ̈ܒܳܒܰܘܗܝ ܠܒܶܣܬܪܶܗ: ܘܚܶܣܕܳܐ ܠܥܳܠܡܳܐ ܥܒܰܕ ܐܶܢܽܘܢ ܒܰܩܝܳܡܬܶܗ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܳܪܝܳܐ ܡܳܪܰܢ ܟܰܕ ܒܰܡܕܰܒܪܳܢܽܘܬܳܟ ܘܒܰܒܛܺܝܠܽܘܬܳܟ ܕܰܠܘܳܬܰܢ ܡܶܠܬܳܐ ܐܠܰܗܳܐ ܡܶܬܒܰܩܶܝܢܰܢ: ܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠ ܘܒܰܫܒܺܝܚܽܘܬܶܗ ܕܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܬܰܪܥܺܝܬܳܐ ܕܺܝܠܰܢ ܡܶܬܢܰܗܪܳܐ: ܒܣܽܘܟܳܠܐܴ ܪܰܒܳܐ ܕܐ̱ܪܳܙܳܐ ܗܳܢܳܐ ܠܐܴ ܡܶܬܡܰܠܠܳܢܳܐ ܚܳܝܪܺܝܢܰܢ ܒܶܗ ܠܳܟ ܗ̣ܽܘ ܚܳܙܶܝܢܰܢ ܘܝܳܕܥܺܝܢܰܢ ܫܰܪܺܝܪܳܐܺܝܬ ܕܰܐܢ̱ܬ ܗ̣ܽܘ ܗ̇ܰܘ ܕܰܒܪܺܝܫܺܝܬ ܡ̣ܶܢ ܠܐܴ ܡܶܕܶܡ ܠܰܫܡܰܝܳܐ ܘܠܐܱܪܥܳܐ ܥܒܰܕܬ ܘܨܰܒܶܬܬ: ܘܰܠܟܽܠܳܗ̇ ܒܪܺܝܬܳܐ ܘܬܽܘܩ̈ܳܢܶܝܗ̇ ܠܗ̇ܳܝ ܕܬܶܗܘܶܐ ܐܰܝܬܺܝܬ: ܘܒܶܗ ܒܝܰܘܡܳܐ ܩܰܕܡܳܝܳܐ ܚܰܘܺܝܬ ܪܰܒܽܘܬܳܐ ܕܚܰܝܠܳܟ ܠܐܴ ܡܶܬܕܰܪܟܳܢܳܐ: ܠܢܽܘܗܪܳܐ ܠܐܴ ܗܽܘܠܳܢܳܝܳܐ ܣܰܬܶܬܬ ܘܩܰܝܶܡܬ ܘܰܫܪܰܝܬ ܘܦܰܠܗܶܕܬ ܠܚܶܫܽܘܟܳܐ ܘܰܠܠܐܴ ܡܛܰܟܣܽܘܬܳܐ ܕܥܰܠ ܟܽܠ ܦܪܺܝܣܳܐ ܗܘܳܬ݀: ܘܰܒܦܽܘܩܕܳܢܳܟ ܡܨܶܐ ܚܺܝܠ ܟܽܠ ܠܟܽܠ ܡܶܕܶܡ ܬܰܩܶܢܬ ܘܫܰܪܰܪܬ. ܘܰܒܗܳܢܳܐ ܝܰܘܡܳܐ ܩܰܕܡܳܝܳܐ ܘܰܬܡܺܝܗܳܐ ܠܟܽܠܳܗ̇ ܒܪܺܝܬܳܐ ܝܰܗܒܬ ܫܽܘܪܳܝܳܐ ܕܡܰܪܕܺܝܬܳܐ ܕܺܝܠܳܗ̇ ܐܰܝܟ ܗܳܝ ܕܥܳܒܪܳܐ ܠܡܶܠܬܳܐ ܘܬܰܪܥܺܝܬܳܐ ܕܐ̱ܢܳܫܳܐ. ܟܰܝ ܠܩܰܛܶܣܛܰܣܺܝܣ ܕܰܠܥܶܠ ܡܰܝܬܶܐ: ܕܰܥܠܶܝܗ̇ ܐܳܦ ܫܽܘܠܡܽܘܢ ܦܶܠܐܷܬܳܢܳܐܺܝܬ ܡܶܣܬܰܒܪܳܐ ܕܪܳܡܳܐ: ܒܗ̇ܳܝ ܕܶܐܡܰܪ ܕܢܶܬܶܠ ܡܢܳܬܳܐ ܠܫܰܒܥܳܐ ܐܳܦ ܠܰܬܡܳܢܝܳܐ ܕܺܐܝܬܶܝܗ̇ ܗ̇ܳܝ ܕܟܰܕ ܕܽܘܒܳܪ̈ܶܐ ܕܙܰܕܺܝܩܽܘܬܳܐ ܙܳܪܥܺܝܢܰܢ ܒܥܳܠܡܳܐ ܗܳܢܳܐ ܕܺܐܝܬ ܓܺܝܓܠܐܴ ܚܽܘܕܪܳܢܳܐܺܝܬ ܡܶܬܟܪܶܟ ܘܰܒܦܽܘܢܳܝܳܐ ܦܽܘܪܥܳܢܳܐ ܕܡ̣ܶܢ ܬܰܡܳܢ ܩܳܦܛܺܝܢܰܢ ܦܺܐܪ̈ܶܐ ܒܝܰܘܡܳܐ ܗ̇ܰܘ ܐ̱ܚܪܳܝܳܐ ܘܰܬܡܺܝܢܳܝܳܐ: ܗ̇ܰܘ ܕܠܐܴ ܡܰܕܪܶܟ ܠܶܗ ܠܐܴ ܠܺܠܝܳܐ ܘܠܐܴ ܐܺܝܡܳܡܳܐ: ܘܬܽܘܒ ܕܶܝܢ ܐܶܡܰܬܝ ܕܥܰܡܳܐ ܗ̇ܰܘ ܐܺܝܣܰܪܠܳܝܳܐ ܒܡܰܕܒܪܳܐ ܪܳܕܶܐ ܗܘܳܐ. ܟܰܕ ܡܽܘܫܶܐ ܗ̇ܰܘ ܡܢܺܝܚܳܢܳܐ ܕܺܝܠܳܟ ܡܰܫܟܢܳܐ ܡܰܬܩܶܢ ܗܘܳܐ ܠܰܫܡܳܐ ܕܺܝܠܳܟ ܩܰܕܺܝܫܳܐ ܐܰܝܟ ܩܰܕܺܝܡܽܘܬ ܪܽܘܫܡܳܐ ܘܛܽܘܦܣܳܐ ܕܚܰܘܺܝܬ ܠܶܗ ܒܛܽܘܪܳܐ: ܐܰܩܺܝܡ ܘܰܩܒܰܥ: ܡܫܺܝܚܳܐ ܡܳܪܰܢ ܝܰܘܡܳܢܳܐ ܡܰܫܟܢܳܐ ܠܩܰܘܡܳܐ ܠܐܴ ܡܶܬܕܰܥܙܥܳܢܳܐ ܥܺܕܬܳܐ ܩܰܕܺܝܫܬܳܐ. ܢܒܺܝܽܘܬܳܐ ܒܰܕܶܩ ܘܚܰܘܺܝ: ܘܠܶܗ ܟܰܕ ܠܶܗ ܠܗܳܢܳܐ ܝܰܘܡܳܐ ܩܰܕܺܝܫܳܐ ܬܡܺܝܢܳܝܳܐ ܕܚܰܕ ܒܫܰܒܳܐ ܩܳܕܡܺܝܢ ܘܰܡܝܰܩܪܺܝܢ ܗܘܰܘ ܪ̈ܺܝܫܰܝ ܐܰܒܳܗ̈ܳܬܳܐ ܒܰܓܙܽܘܪܬܳܐ ܗ̇ܳܝ ܬܡܺܝܢܳܝܰܬ݀ ܝܰܘ̈ܡܶܐ. ܘܟܰܕ ܫܶܩܠܰܬ݀ ܒ̇ܳܩܢܳܐ ܢܒܺܝܽܘܬܳܐ ܕܰܥܠܰܝܟ ܐܳܘ ܡܶܠܬܳܐ ܐܠܰܗܳܐ: ܠܣܽܘܪܳܩܳܐ ܨܶܒܝܳܢܳܝܳܐ ܒܚܰܪܬܳܐ ܕܙܰܒܢ̈ܶܐ ܐܶܬܰܝܬ: ܘܒܰܪܢܳܫܳܐ ܕܠܐܴ ܫܽܘܚܠܳܦܳܐ ܡܶܛܽܠܳܬܰܢ ܗܘܰܝܬ ܘܠܰܡܕܰܒܪܳܢܽܘܬܳܐ ܕܰܚܠܳܦܰܝܢ ܒܰܩܢܽܘܡܳܐ ܫܰܡܠܺܝܬ ܘܚܰܫܳܐ ܘܰܙܩܺܝܦܳܐ ܘܡܰܘܬܳܐ ܡܶܛܽܠܳܬܰܢ ܚܰܛܳܝ̈ܶܐ ܣܰܝܒܰܪܬ: ܘܠܰܫܝܽܘܠ ܒܝܰܕ ܢܰܦܫܳܟ ܢܚܶܬܬ: ܘܰܠܢܰܦ̈ܫܳܬܳܐ ܕܒܳܗ̇ ܐܰܚܺܝܕܳܢ ܗܘ̈ܰܝ ܣܰܒܪܳܐ ܘܦܽܘܪܩܳܢܳܐ ܕܰܩܝܳܡܬܳܐ ܫܰܟܶܢܬ ܘܰܒܗܳܢܳܐ ܝܰܘܡܳܐ ܒܬܶܗܪܳܐ ܘܰܒܫܽܘܒܚܳܐ ܡ̣ܶܢ ܒܶܝܬ ܡܺܝ̈ܬܶܐ ܩܳܡܬ: ܘܠܰܟܝܳܢܰܢ ܕܰܒܠܺܝ ܒܰܚܛܺܝܬܳܐ ܡ̣ܶܢ ܡܰܘܬܳܐ ܘܰܚܒܳܠܐܴ ܫܰܘܙܶܒܬ. ܟܰܕ ܐܳܡܰܪ ܐܰܢ̱ܬ ܐܶܬܠܰܒܰܒ ܕܶܐܢܳܐ ܙܟܺܝܬܶܗ ܠܡܰܘܬܳܐ ܘܰܠܥܳܠܡܳܐ: ܘܠܐܱܪܟܽܘܢܳܐ ܐܳܐܰܪܳܝܳܐ ܘܡܺܝܬܳܐ ܘܡܰܣܠܝܳܐ ܥܒܰܕܬܶܗ: ܝܰܘܡܳܢܳܐ ܓܶܝܪ ܡܰܠܐܱܟ̈ܶܐ ܥܰܠ ܩܝܳܡܬܳܟ ܡܰܠܝܰܬ݀ ܬܶܗܪܳܐ ܒܰܦܨܺܝܚܽܘܬܳܐ ܡܰܟܪܙܺܝܢ ܘܢܳܛܽܘܪ̈ܶܐ ܨܶܝܕ ܩܰܒܪܳܐ ܒܒܶܗܬܬܳܐ ܘܰܒܟܽܘܐܳܪܳܐ ܩܳܝܡܺܝܢ ܘܟܺܐܦܳܐ ܥܰܠ ܩܰܒܪܳܐ ܠܫܽܘܪܳܪܳܐ ܕܰܩܝܳܡܬܳܟ ܡ̣ܶܢ ܐܺܝ̈ܕܰܝ ܡܰܠܐܱܟܳܐ ܡܶܬܥܰܓܠܐܴ: ܘܡܰܪܝܰܡ ܐܶܡܳܟ ܠܽܘܒܳܒܳܐ ܘܒܽܘܝܳܐܳܐ ܡܰܠܝܳܐܺܝܬ ܐܰܩܢܰܝܬ. ܘܣܰܒܪܳܐ ܕܰܩܝܳܡܬܳܐ ܘܚܰܝ̈ܶܐ ܠܬܰܠܡܺܝ̈ܕܶܐ ܡܰܟܪܙܳܐ ܗܘܳܬ݀ ܚܠܳܦ ܣܒܰܪܬܳܐ ܕܚܰܘܳܐ ܐܶܡܳܐ ܩܰܕܡܳܝܬܳܐ ܗ̇ܳܝ ܕܰܐܥܠܰܬ݀ ܥܠܰܝܢ ܡܰܘܬܳܐ ܘܰܚܒܳܠܐܴ: ܝܰܘܡܳܢܳܐ ܬܰܠܡܺܝ̈ܕܳܬܳܐ ܥܰܡ ܗܶܪ̈ܽܘܡܶܐ ܠܐܻܝܩܳܪܳܐ ܕܡܳܪܽܘܬܳܟ ܐܶܬܛܰܝ̈ܒܶܝܢ: ܘܩܰܕܺܝܫܽܘܬܳܐ ܥܰܡ ܒܬܽܘܠܽܘܬܳܐ ܘܕܰܘܨܳܐ ܘܚܰܕܽܘܬܳܐ ܠܘܳܬ ܩܰܒܪܳܐ ܡܶܬܘܰܥ̈ܕܳܢ: ܕܢܶܚ̈ܙܝܳܢ ܘܰܢܩܰܒ̈ܠܳܢ ܫܪܳܪܳܐ ܕܰܩܝܳܡܬܳܟ: ܝܰܘܡܳܢܳܐ ܟܽܠܰܢ ܕܠܐܴ ܕܶܚܠܬܳܐ ܐܰܘܟܺܝܬ ܙܳܟܽܘܬܳܐ ܕܥܰܠ ܡܰܘܬܳܐ ܐܳܡܪܺܝܢܰܢ: ܐܰܝܟܳܐ ܗ̱̇ܝ ܙܳܟܽܘܬܳܟ ܡܰܘܬܳܐ ܝܰܥܢܳܐ: ܘܰܐܝܟܰܐ ܗ̱̇ܘ ܥܽܘܩܣܶܟܝ ܫܝܽܘܠ ܕܳܘܺܝܬܳܐ. ܕܗܳܐ ܒܰܙܩܺܝܦܳܐ ܗܓܺܝܡ ܐܰܢ̱ܬܝ. ܘܰܒܡܰܥܒܶܕ ܚܰܝ̈ܶܐ ܡܰܐܝܺܝܬܰܬܝ. ܘܒܰܕܓܽܘܢ ܟܰܕ ܬܳܗ̇ܪܺܝܢܰܢ ܐܳܡܪܺܝܢܰܢ ܐܳܘ ܠܛܽܘܦ̈ܣܶܐ ܙܥܽܘܪ̈ܝܳܬܳܐ ܕܰܠܟܽܠܶܗ ܥܳܠܡܳܐ ܚܰܕ̈ܶܬܝ ܡܶܢܕܪܺܝܫ ܘܰܗܘ̈ܰܝ ܐܰܝܟ ܡܣܳܬܳܐ ܠܚܰܠܒܳܐ ܠܛܽܘܗܡܳܐ ܕܺܝܠܰܢ: ܘܟܰܕ ܠܘܳܬ ܚܕ̈ܳܕܶܐ ܐܳܣܪ̈ܳܢ ܠܰܢ ܘܰܡܟܰܢ̈ܫܳܢ: ܐܶܠܐܴ ܒܪܰܡ ܠܝܰܘܡܳܐ ܗܳܢܳܐ ܕܦܽܘܪܩܳܢܳܐ ܟܰܕ ܐܰܝܟ ܕܰܒܢܰܦܫܳܐ ܚܳܝܪܺܝܢܰܢ ܒܶܗ ܐܳܡܪܺܝܢܰܢ: ܐܳܘ ܦܰܣܟܰܐ ܪܰܒܳܐ ܘܟܳܗܢܳܝܳܐ: ܐܳܦ ܕܽܘܟܳܝܳܐ ܕܟܽܠܶܗ ܥܳܠܡܳܐ: ܕܕܰܐܝܟ ܐܰܝܠܶܝܢ ܬܡܺܝ̈ܗܳܬܳܐ ܐܶܫܬܰܟܰܢ̈ܝ ܠܰܢ ܒܳܟ: ܗܳܠܶܝܢ ܕܥܳܒܪ̈ܳܢ ܠܟܽܠ ܡܶܠܬܳܐ ܕܬܰܪܥܺܝܬܳܐ: ܡܰܠܽܘܢ ܕܶܝܢ ܡܶܬܟܰܫܦܺܝܢܰܢ ܠܳܟ ܐܳܘ ܡܶܠܬܳܐ ܐܠܰܗܳܐ ܥܽܘܬܪܳܐ ܘܚܰܝ̈ܶܐ ܘܚܶܟܡܬܳܐ ܘܟܰܕ ܚܳܝܪܺܝܢܰܢ ܒܟܽܠܗܽܘܢ ܫܡܳܗܰܝ̈ܟ ܐܳܘ ܝܰܠܕܳܐ ܕܗܰܘܢܳܐ ܪܰܒܳܐ ܘܬܰܦܢܟܳܐ ܘܛܰܒܥܳܐ ܫܰܪܺܝܪܳܐ ܐܳܘ ܡܶܠܬܳܐ ܕܡܶܬܗܰܘܢܰܢ: ܘܗ̣ܽܘ ܟܰܕ ܗ̣ܽܘ ܒܰܪܢܳܫܳܐ ܡܶܬܪܰܢܶܐ ܗ̇ܰܘ ܕܰܠܟܽܠ ܡܰܝܬܶܐ ܐܰܢ̱ܬ ܘܳܐܣܰܪ ܐܰܢ̱ܬ ܒܡܶܠܬܳܐ ܐܽܘܡܳܢܳܝܬܳܐ ܕܚܰܝܠܐܴ ܕܺܝܠܳܟ. ܗܳܫܳܐ ܩܰܒܶܠ ܡܶܢܰܢ ܒܨܺܝܪ̈ܶܐ ܘܚܰܛܳܝ̈ܶܐ ܦܺܝܪܡܳܐ ܗܳܢܳܐ ܕܰܡܩܰܪܒܺܝܢܰܢ ܩܕܳܡܰܝܟ ܠܐܻܝܩܳܪܳܐ ܕܡܳܪܽܘܬܳܟ ܘܠܳܟ ܟܰܕ ܠܳܟ ܬܰܘܕܺܝܬܳܐ ܘܬܰܟܫܶܦܬܳܐ ܚܠܳܦ ܫܰܝܢܳܐ ܕܒܰܝܢܳܬ݀ ܡܰܠܟܘ̈ܳܬܳܐ: ܘܢܽܘܛܳܪܳܐ ܘܫܽܘܘܙܳܒܳܐ ܕܟܽܠܶܗ ܥܳܠܡܳܐ: ܠܒܶܢܝܳܢܳܐ ܕܥܺܕܬܳܐ ܩܰܕܺܝܫܬܳܐ ܕܺܝܠܳܟ: ܘܠܐܴܣܝܽܘܬܳܐ ܘܰܠܚܽܘܪܳܪܳܐ ܘܰܠܕܽܘܟܳܝܳܐ ܕܟܽܠܗܶܝܢ ܢܰܦ̈ܫܳܬܳܐ ܘܦܰܓܪ̈ܶܐ ܕܺܝܠܰܢ: ܘܰܡܦܺܝܣܺܝܢܰܢ ܠܳܟ ܡܳܪܝܳܐ ܕܠܐܴ ܡܶܕܶܡ ܢܶܬܛܰܪܰܦ ܒܗܳܠܶܝܢ ܚܰܝ̈ܶܐ ܠܒܰܪ ܡ̣ܶܢ ܐܠܳܨܳܝ̈ܳܬܳܐ ܘܰܟܝܳܢܳܝ̈ܳܬܳܐ ܕܥܰܡܶܗ ܚ̇ܳܐܶܝܢܰܢ: ܐܶܠܐܴ ܟܠܺܝ ܡܶܢܰܢ ܟܽܠ ܐܰܢܰܢܩܺܝ ܐܰܝܕܳܐ ܕܠܐܱܒܕܳܢܳܐ ܡܰܝܬܝܳܐ ܥܰܡ ܚܰܫ̈ܶܐ ܢܰܦܫܳܢܳܝ̈ܶܐ ܘܦܰܓܪ̈ܳܢܳܝܶܐ ܕܰܠܩܽܘܒܠܰܢ ܣܳܕܪܺܝܢ: ܘܰܐܝܕܳܐ ܕܥܳܕܪܳܐ ܠܚܰܝ̈ܰܝ ܐܰܝܟ ܦܣ̈ܳܩܶܐ ܕܺܝܠܳܟ ܫܰܟܶܢ ܠܰܢ: ܘܰܐܫܘܳܐ ܠܰܢ ܕܢܶܬܦܰܨܶܐ ܡ̣ܶܢ ܬܰܫܢܺܝ̈ܩܶܐ ܕܰܢܛܺܝܪܺܝܢ ܠܚܰܝ̈ܳܒܶܐ: ܘܢܶܬܩܰܒܰܠ ܡܶܢܳܟ ܒܰܡ̈ܛܰܠܠܐܷ ܫܡܰܝܳܢܳܝ̈ܳܬܳܐ ܘܬܰܡܳܢ ܡܶܫܬܘܶܝܢܰܢ ܕܢܶܕܒܰܚ ܠܳܟ ܡܩܰܒ̈ܠܳܬܳܐ ܥܰܠ ܡܰܕܒܚܳܐ ܕܺܝܠܳܟ ܪܽܘܚܳܢܳܝܳܐ ܐܰܘ ܗܰܘܢܳܐ ܘܡܶܠܬܳܐ ܘܪܽܘܚܳܐ ܗ̇ܰܘ ܕܠܳܟ ܦܐܶܐ ܟܽܠ ܫܽܘܒܚܳܐ ܘܺܐܝܩܳܪܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܛܪܐ

ܣܳܓܕܺܝܢܰܢ ܠܰܡܪܰܚܡܳܢܽܘܬܳܟ ܐܠܰܗܰܢ ܣܓܺܝܕܳܐ ܝܶܫܽܘܥ ܡܫܺܝܚܳܐ ܗ̇ܰܘ ܚܰܝ̈ܶܐ ܫܰܪܺܝܪ̈ܶܐ ܘܠܐܴ ܡܶܬܚܰܒܠܳܢ̈ܶܐ ܕܰܒܝܰܕ ܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܪܺܝܚܳܐ ܒܰܣܺܝܡܳܐ ܕܠܐܴ ܡܳܝܽܘܬܽܘܬܳܐ ܙܪܰܥܬ ܒܰܢ. ܩܰܒܶܠ ܐܳܦ ܗܳܫܳܐ ܡ̣ܶܢ ܚܰܛܳܝܽܘܬܰܢ ܦܺܝܪܡܳܐ ܕܝܰܘܡܳܢ ܐܶܬܩܰܪܰܒ ܠܳܟ ܒܥܽܘܗܕܳܢܳܐ ܪܚܺܝܡܳܐ ܕܰܩܝܳܡܬܳܟ ܘܗܰܒ ܠܰܢ ܕܰܒܓܰܠܝܽܘܬ ܐܰܦ̈ܶܐ ܘܦܰܪܶܗܣܺܝܰܐ ܫܰܪܺܝܪܬܳܐ ܫܽܘܒܩܳܢܳܐ ܕܟܽܠܗܶܝܢ ܣܰܟܠܘ̈ܳܬܰܢ ܐܰܝܟܰܢܳܐ ܕܕܰܟܝܳܐܺܝܬ ܢܥܰܕܥܶܕ ܠܰܩܝܳܡܬܳܟ: ܘܰܢܫܰܒܰܚ ܠܳܟ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ܀

ܚܘܬܡܐ

ܒܳܪܽܘܝܳܐ ܕܥܳܠܡ̈ܶܐ ܘܰܡܚܰܕܬܳܢܳܐ ܕܟܽܠ ܐܠܰܗܳܐ: ܚܰܕܶܬ ܥܰܬܺܝܩܽܘܬܰܢ ܒܚܰܫܰܝ̈ܟ ܡܰܚ̈ܝܳܢܶܐ: ܘܚܰܘܰܪ ܟܽܘܬܡ̈ܳܬܰܢ ܒܐܪܳܙܶܗ ܕܰܨܠܺܝܒܳܟ ܡܰܥܒܶܕ ܚܰܝ̈ܶܐ: ܘܰܐܚܳܐ ܡܺܝܬܽܘܬܰܢ ܒܡܰܘܬܳܟ: ܘܰܐܦܨܰܚ ܪ̈ܶܥܝܳܢܰܝܢ ܒܕܶܢܚܳܐ ܕܰܩܝܳܡܬܳܟ: ܘܫܰܪܰܪ ܢܰܦ̈ܫܳܬܰܢ ܒܣܰܒܪܳܐ ܕܡܽܘܠܟܳܢܰܝ̈ܟ: ܐܰܝܟܰܢܳܐ ܕܰܐܡܺܝܢܳܐܺܝܬ ܢܥܰܕܥܶܕ ܠܥܺܐܕܳܐ ܗܳܢܳܐ ܕܚܽܘܕܳܬܳܐ ܕܰܩܝܳܡܬܳܐ ܕܺܝܠܳܟ ܡܰܥܒܕܰܬ݀ ܚܰܝ̈ܶܐ ܡܫܺܝܚܳܐ ܐܠܰܗܳܐ ܕܺܝܠܰܢ ܣܰܒܪܳܐ ܕܚܰܝܰܝ̈ܢ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܡܶܠܬܳܐ ܡܬܽܘܡܳܝܳܐ ܕܶܐܬܚܰܝܰܕ ܠܒܶܣܪܳܐ ܕܺܝܠܰܢ ܐ̱ܢܳܫܳܝܳܐ: ܘܶܐܬܥܰܪܙܰܠ ܥܰܡ ܡܰܘܬܳܐ ܚܠܳܦܰܝܢ ܚܰܝ̈ܳܒܶܐ: ܘܰܣܒܰܠ ܚܰܫ̈ܶܐ ܘܰܙܩܺܝܦܳܐ ܡܶܛܽܠ ܚܰܛܳܝ̈ܶܐ: ܠܗ̇ܰܘ ܓܰܢ̱ܒܳܪܳܐ ܕܥܰܠ ܠܰܫܝܽܘܠ ܘܰܐܓܶܣ ܒܳܗ̇ ܝܰܘ̈ܡܶܐ ܬܠܳܬܳܐ ܥܰܠ ܐܰܦ̈ܰܝ ܓܶܢܣܳܐ ܕܥܰܦܪ̈ܳܢܶܐ: ܘܩܳܡ ܒܫܽܘܒܚܳܐ ܘܫܰܟܶܢ ܙܳܟܽܘܬܳܐ ܘܚܰܕܽܘܬܳܐ ܠܒܶܪ̈ܝܳܬܳܐ. ܘܰܒܢܽܘܚܳܡܶܗ ܟܰܢܶܫܶܝܗ̇ ܠܥܺܕܬܳܐ ܕܰܐܒܺܝܠܐܴ ܗܘܳܬ݀ ܥܰܠ ܡܰܘܬܶܗ: ܘܙܰܡܶܢ ܟܰܪܝܽܘܬܳܐ ܠܰܟܢܽܘܫܬܳܐ ܗ̇ܳܝ ܡܰܪܳܚܬܳܐ ܕܰܨܠܰܒܬܶܗ. ܘܰܩܪܳܐ ܠܥܰܡ̈ܡܶܐ ܠܣܶܓܕܬܶܗ: ܘܰܟܢܰܫ ܐܶܢܽܘܢ ܠܰܛܝܳܪܶܗ: ܒܗܳܢܳܐ ܥܶܕܳܢܳܐ ܚܽܘܣܳܝܳܐ܀

ܣܕܪܐ

ܟܰܕ ܠܰܩܝܳܡܬܳܐ ܕܺܝܠܳܟ ܡܰܥܒܕܰܬ݀ ܚܰܝܶܐ ܕܡ̣ܶܢ ܒܶܝܬ ܡܺܝ̈ܬܶܐ ܡܩܰܠܣܺܝܢܰܢ ܟܽܠܰܢ: ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܒܪܶܚܡܰܬ݀ ܐ̱ܢܳܫܽܘܬܳܟ ܠܓܰܘ ܩܰܒܪܳܐ ܥܰܠܬ. ܘܰܒܫܽܘܒܚܳܐ ܦܐܷܐ ܠܐܱܠܳܗܳܐ ܠܰܫܝܽܘܠ ܐܰܚܪܶܒܬ. ܘܰܠܡܰܘܬܳܐ ܩܳܛܽܘܠܐܴ ܩܛܰܠܬ. ܘܰܠܢܰܦ̈ܫܳܬܳܐ ܐܰܝܠܶܝܢ ܕܒܰܫܝܽܘܠ ܐܰܚܺܝ̈ܕܳܢ ܗܘ̈ܰܝ ܣܒܰܪܬܳܐ ܡܚܰܕܝܳܢܺܝܬܳܐ ܣܰܒܰܪܬ: ܘܒܶܗ ܒܗܳܢܳܐ ܝܰܘܡܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܺܝܠܳܟ ܡܰܪܝܰܡ ܘܡܳܪܬܳܐ ܘܫܰܪܟܳܐ ܕܚܰܒܪ̈ܳܬܳܗ̇ ܒܶܣ̈ܡܶܐ ܫܳܩܠܺܝܢ ܘܰܠܘܳܬ ܩܰܒܪܳܐ ܕܺܝܠܳܟ ܡܰܥܒܶܕ ܚܰܝ̈ܶܐ ܪ̈ܳܗܛܳܢ ܗܘ̈ܰܝ ܕܰܢܣܰܒܪ̈ܳܢ: ܘܟܰܕ ܠܐܴ ܐܶܫܟܰܚ̈ܝ ܠܦܰܓܪܳܟ ܒܬܶܗܪܳܐ ܘܕܽܘܡܳܪܳܐ ܩܳܝ̈ܡܳܢ ܗܘ̈ܰܝ ܘܡ̣ܶܢ ܡܰܠܐܱܟ̈ܶܐ ܡܶܣܬܰܒܪ̈ܳܢ ܗܘ̈ܰܝ ܥܰܠ ܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ. ܝܰܘܡܳܢܳܐ ܡܰܠܐܱܟ̈ܶܐ ܒܰܠܒܽܘ̈ܫܶܐ ܚܶܘܳܪ̈ܶܐ ܠܐܻܝܩܳܪܳܟ ܢܚܶܬܘ ܗܘܰܘ ܕܰܢܫܰܒܚܽܘܢ ܠܳܟ ܚܰܬܢܳܐ ܫܒܺܝܚܳܐ ܕܰܢܦܰܩܬ ܡ̣ܶܢ ܒܶܝܬ ܓܢܽܘܢܳܐ: ܝܰܘܡܳܢܳܐ ܐܽܘܪܫܠܶܡ ܡܕܺܝܢܰܬ݀ ܨܳܠܽܘ̈ܒܶܐ ܒܶܐܒ̣ܠܐܷ ܘܟܰܪܝܽܘܬܳܐ ܝܳܬܒܳܐ: ܘܟܰܠܬܳܐ ܒܰܪܬ݀ ܥܰܡ̈ܡܶܐ ܚܳܕܝܳܐ ܘܰܦܨܺܝܚܳܐ. ܝܰܘܡܳܢܳܐ ܨܳܠܽܘ̈ܒܶܐ ܟܡܺܝܪܺܝܢ: ܘܢܳܛܽܘܪ̈ܶܐ ܒܰܗܺܝܬܺܝܢ: ܝܰܘܡܳܢܳܐ ܚܰܢܳܢ ܡܚܰܦܰܝ ܪܺܝܫܶܗ: ܘܩܰܝܳܦܳܐ ܐܰܒܺܝܠ ܘܚܰܫܺܝܫ: ܝܰܘܡܳܢܳܐ ܨܶܗܝܽܘܢ ܨܳܠܽܘܒܬܳܐ ܐܠܶܝܳܐ ܟܰܕ ܩܳܥܝܳܐ ܕܫܰܒܩܰܢܝ ܡܳܪܝܳܐ ܨܳܕܺܝܬܳܐ: ܘܡܳܪܝܳܐ ܛܥܰܢܝ ܘܕܰܚܩܰܢܝ ܡ̣ܶܢ ܝܳܪܬܽܘܬܶܗ: ܝܰܘܡܳܢܳܐ ܥܺܕܬܳܐ ܩܰܕܺܝܫܬܳܐ ܚܳܕܝܳܐ ܘܰܕܝܳܨܳܐ ܒܬܶܫܒܽܘܚܬܳܐ ܪܰܒܬܳܐ ܥܰܡ ܕܰܘܺܝܕ ܢܒܺܝܳܐ ܡܰܙܥܩܳܐ ܟܰܕ ܐܳܡܪܳܐ: ܕܩܳܡ ܐܠܰܗܳܐ ܘܶܐܬܒܰܕܰܪܘ ܟܽܠܗܽܘܢ ܒܥܶܠܕ̈ܒܳܒܰܘܗܝ: ܝܰܘܡܳܢܳܐ ܫܶܡܥܽܘܢ ܚ̇ܳܕܶܐ: ܘܰܐܢܕܪܶܐܘܳܣ ܡܫܰܒܰܚ: ܝܰܘܡܳܢܳܐ ܝܰܥܩܽܘܒ ܘܝܽܘܚܰܢܳܢ ܡܰܘܕܶܝܢ ܘܡܰܬܰܝ ܘܒܰܪ ܬܽܘܠܡܰܝ ܣܒܰܪܬܳܐ ܕܚܰܝ̈ܶܐ ܡܰܟܪܙܺܝܢ ܝܰܘܡܳܢܳܐ ܬܳܐܘܡܰܐ ܘܦܺܝܠܺܝܦܳܘܣ ܡܫܰܒܚܺܝܢ: ܝܰܘܡܳܢܳܐ ܐܰܕܰܝ ܫܠܺܝܚܳܐ ܟܳܪܽܘܙܽܘܬܳܐ ܕܚܰܝ̈ܶܐ ܡܰܟܪܶܙ: ܘܫܶܡܥܽܘܢ ܩܢܳܢܳܝܳܐ ܩܝܳܡܬܳܐ ܡܚܰܘܶܐ. ܘܳܐܦ ܚܢܰܢ ܡܳܪܝ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܚܳܕܶܝܢܰܢ ܘܪܳܘܙܺܝܢܰܢ ܘܥܰܡ ܩܺܝܬܳܪܽܘܕܳܐ: ܕܰܘܺܝܕ ܡܰܙܥܩܺܝܢܰܢ ܘܳܐܡܪܺܝܢܰܢ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ: ܘܰܐܝܟ ܓܰܒܪܳܐ  ܕܢܰܦܨܶܗ ܚܰܡܪܶܗ: ܘܳܐܦ ܚܢܰܢ ܡܳܪܝ ܡܦܺܝܣܺܝܢܰܢ ܠܳܟ ܕܬܰܫܘܶܐ ܠܟܽܠܰܢ ܕܰܒܚܰܕܽܘܬܳܐ ܢܝܰܩܰܪ ܠܰܩܝܳܡܬܳܟ: ܘܢܶܗܘܶܐ ܡܛܰܝ̈ܒܶܐ ܠܡܰܠܟܽܘܬܳܟ ܐܰܝܟ ܫܶܡܥܽܘܢ ܘܝܽܘܚܰܢܳܢ ܕܰܒܪܶܗܛܳܐ ܪܗܺܝܒܳܐ ܠܩܰܒܪܳܟ ܪܳܗܛܺܝܢ ܗܘܰܘ. ܘܒܰܣܶܡ ܠܣܰܘ̈ܩܰܝܢ ܒܪ̈ܺܝܚܳܢܶܐ ܗܰܢܺܝ̈ܶܐܐ ܘܒܰܣܺܝ̈ܡܶܐ ܐܰܝܟ ܗܶܪ̈ܽܘܡܶܐ ܕܒܺܐܝ̈ܕܰܝ ܢܶܫ̈ܶܐ ܩܰܕܺܝ̈ܫܳܬܳܐ ܠܩܰܒܪܳܟ ܐܰܝܬܺܝ̈ܝܶܢ. ܟܰܕ ܡܰܫܘܶܐ ܐܰܢ̱ܬ ܠܰܢ ܐܶܡܰܬܝ ܕܡ̣ܶܢ ܚܰܝ̈ܶܐ ܗܳܠܶܝܢ ܡܶܫܬܪܶܝܢܰܢ ܢܡܰܢܰܥ ܠܫܽܘܠܳܡܳܐ ܛܽܘܒܬܳܢܳܐ ܘܰܠܡܰܠܟܽܘܬܳܟ ܕܒܰܫܡܰܝܳܐ: ܘܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܢܶܫܬܘܶܐ ܠܒܽܘܣܳܡܳܐ ܕܰܒܥܺܕܬܳܐ ܐܽܘܪܫܠܶܡܳܝܬܳܐ: ܘܢܶܬܒܰܣܰܡ ܒܚܰܝ̈ܶܐ ܛܽܘ̈ܒܬܳܢܶܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ܀

ܫܠܡ

ܛܟܣܐ ܕܚܕ ܒܫܒܐ ܕܬܠܬܐ ܒܬܪ ܩܝܡܬܐ

ܩܕܡܝܬ ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ: ܕܰܢܥܰܕܥܶܕ ܠܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܒܚܰܕܽܘܬܳܐ ܪܰܒܬܳܐ ܘܒܰܪܘܳܙܳܐ ܕܠܐܴ ܡܶܬܡܰܠܰܠ: ܘܰܒܬܶܫܒ̈ܚܳܬܳܐ ܐܠܰܗܳܝ̈ܳܬܳܐ ܨܰܒܶܬ ܠܢܰܦ̈ܫܳܬܰܢ: ܘܒܰܥܒܳܕ̈ܶܐ ܕܙܰܕܺܝܩܽܘܬܳܐ ܚܰܝܶܠ ܘܰܓܡܽܘܪ ܠܰܢ: ܘܰܒܦܽܘܠܚܳܢܳܐ ܕܰܡܝܰܬܪ̈ܳܬܳܐ ܐܰܥܬܰܪ ܠܰܢ: ܐܰܝܟܰܢܳܐ ܕܟܽܠܰܢ ܕܰܟܝܳܐܺܝܬ ܘܩܰܕܺܝܫܳܐܺܝܬ ܢܫܰܒܰܚ ܠܳܟ ܘܠܐܱܒܽܘܟ ܘܰܠܪܽܘܚܳܟ܀

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܥܺܝܪܳܐ ܕܰܕܡܶܟ ܒܰܫܝܽܘܠ ܐܰܝܟ ܥܰܢܺܝܕܳܐ. ܠܗ̇ܰܘ ܚܰܝܳܐ ܕܶܐܬܬܣܺܝܡ ܒܓܰܘ ܩܰܒܪܳܐ ܐܰܝܟ ܡܺܝܬܳܐ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܰܐܪܡܺܝ ܢܰܦܫܶܗ ܒܗܳܡܳܢ ܕܰܩܒܺܝܪ̈ܶܐ ܐܰܝܟ ܡܚܺܝܠܐܴ: ܠܗ̇ܰܘ ܙܩܺܝܦܳܐ ܘܰܩܛܺܝܠܐܴ ܕܦܰܟܪܶܗ ܗܘܳܐ ܠܚܰܣܺܝܢܳܐ ܘܩܰܛܠܶܗ ܠܡܰܘܬܳܐ ܛܪܽܘܢܳܐ: ܠܗ̇ܽܘ ܕܢܽܘܚܳܡܶܗ ܒܰܕܰܪ ܠܨܳܠܽܘ̈ܒܶܐ ܘܟܰܢܶܫ ܠܬܰܠܡܺܝ̈ܕܶܐ: ܘܡܰܘܬܶܗ ܢܰܚܶܡ ܠܡܺܝ̈ܬܶܐ: ܘܝܰܗܒ ܣܰܒܪܳܐ ܘܠܽܘܒܳܒܳܐ ܠܓܶܢܣܳܐ ܕܥܰܦܪ̈ܳܢܶܐ: ܘܚܰܕܺܝ ܘܰܐܦܨܰܚ ܠܒܶܪ̈ܝܳܬܳܐ: ܗܳܐ ܡܰܣ̈ܩܳܢ ܠܶܗ ܫܽܘܒܚܳܐ ܘܬܰܘܕܺܝܬܳܐ܀

ܣܕܪܐ

ܠܰܩܝܳܡܬܳܐ ܕܺܝܠܳܟ ܡܫܺܝܚܳܐ ܐܠܰܗܰܢ ܡܶܬܥܰܗܕܺܝܢܰܢ: ܘܰܒܢܽܘܚܳܡܳܟ ܫܒܺܝܚܳܐ ܘܰܡܚܰܕܬܳܢܳܐ ܕܡܺܝܬܽܘܬܰܢ ܡܶܬܒܰܩܶܝܢܰܢ ܐܳܘ ܚܰܬܢܳܐ ܕܰܫܪܳܪܳܐ ܘܡܳܟܽܘܪܳܐ ܕܥܺܕܬܳܐ ܩܰܕܺܝܫܬܳܐ. ܘܥܰܡ ܬܶܓ̈ܡܶܐ ܥܶܠܳܝ̈ܶܐ ܘܛܶܟ̈ܣܶܐ ܡܬܶܝܰܕ̈ܥܳܢܶܐ: ܬܶܫܒܽܘܚܬܳܐ ܚܕܰܬܳܐ ܠܳܟ ܡܩܰܪܒܺܝܢܰܢ: ܒܗܳܢܳܐ ܓܶܝܪ ܝܰܘܡܳܐ ܫܒܺܝܚܳܐ ܘܡܳܪܳܢܳܝܳܐ ܩܳܡܬ ܒܫܽܘܒܚܳܐ ܕܙܳܟܽܘܬܳܐ ܡ̣ܶܢ ܩܰܒܪܳܐ ܘܶܐܬܒܰܕܰܪܘ ܟܽܠܗܽܘܢ ܒܥܶܠܕ̈ܒܳܒܰܝܟ ܟܣܰܝ̈ܳܐ ܘܰܓܠܰܝ̈ܳܐ: ܘܚܰܪܰܪܬ ܠܐܴܕܳܡ ܘܰܠܝܰܠܕ̈ܰܘܗܝ ܡ̣ܶܢ ܫܽܘܥܒܳܕܳܐ ܕܰܚܛܺܝܬܳܐ ܘܰܕܡܰܘܬܳܐ: ܘܰܐܢ̱ܬ ܐܠܰܒܶܫܬ ܠܶܗ ܐܶܣܛܠܐܴ ܗ̇ܳܝ ܕܰܐܫܠܰܚ ܗܘܳܐ ܚܶܘܝܳܐ ܡܶܢܶܗ ܒܓܰܘ ܦܰܪܕܰܝܣܳܐ ܟܰܕ ܥܒܰܪ ܦܽܘܩܕܳܢܳܐ ܠܗܳܢܳܐ ܓܶܝܪ ܝܰܘܡܳܐ ܡܶܬܥܰܗܰܕ ܗܘܳܐ ܫܒܺܝܚܳܐ ܒܰܢܒܺܝ̈ܶܐ ܕܰܘܺܝܕ ܐܠܰܗܳܝܳܐ ܟܰܕ ܠܛܰܝܒܽܘܬܳܟ ܐܠܰܗܳܝܬܳܐ ܘܩܰܕܡܳܝܬܳܐ ܕܰܥܒܰܕܬ ܒܓܶܢܣܰܢ ܡܶܢܩܕܺܝܡ ܡܙܰܡܰܪ ܗܘܳܐ ܘܳܐܡܰܪ. ܕܶܐܬܕܰܟܪ ܡܳܪܝܳܐ ܠܥܺܕܬܳܟ ܗ̇ܳܝ ܕܰܩܢ̣ܰܝܬ ܡܶܢܩܕܺܝܡ ܘܰܦܪܰܩܬ ܫܰܒܛܳܐ ܕܝܳܪܬܽܘܬܳܟ: ܟܰܕ ܕܬܶܬܓܠܐܷ: ܚܳܐܰܪ ܗܘܳܐ ܥܰܬܺܝܪ ܒܓܶܠܝ̈ܳܢܶܐ ܕܪܽܘܚܳܐ ܘܰܐܝܟ ܕܰܒܨܶܒܥܶܗ ܚܰܘܝܶܗ ܠܝܰܘܡܳܐ ܗܳܢܳܐ ܩܰܕܺܝܫܳܐ ܟܰܕ ܐܳܡܰܪ. ܕܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ: ܒܝܰܘܡܳܐ ܗܳܢܳܐ ܕܶܐܬܩܦܶܠ ܚܶܫܽܘܟܳܐ ܡ̣ܶܢ ܐܰܦ̈ܰܝ ܬܺܒܶܝܠ ܘܒܶܗ ܐܰܢܗܰܪܬ ܠܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ ܕܚܶܫܽܘ̈ܟܳܢ ܗܘ̈ܰܝ ܒܥܰܡܛܳܢܳܐ ܕܰܚܛܺܝܬܳܐ: ܒܗܳܢܳܐ ܓܶܝܪ ܝܰܘܡܳܐ ܐܶܬܦܰܫܩܰܬ݀ ܡܶܠܬܶܗ ܕܰܢܒܺܝܳܐ ܟܰܕ ܒܢܽܘܨܪ̈ܳܬܳܐ ܡ̇ܰܢ ܪ̈ܚܺܝܡܳܬܳܐ ܠܥܺܕܬܳܐ ܡܰܦܨܰܚ ܗܘܳܐ ܘܰܡܚܰܕܶܐ ܟܰܕ ܐܳܡܰܪ: ܕܒܰܪܬ݀ ܡܰܠܟܳܐ ܒܫܽܘܒܚܳܐ ܩܳܡܰܬ݀ ܘܡܰܠܟܬܳܐ ܡ̣ܶܢ ܝܰܡܺܝܢܳܟ: ܝܰܘܡܳܢܳܐ ܓܶܝܪ ܐܶܫܰܥܝܳܐ ܗ̇ܰܘ ܡܫܰܒܚܳܐ ܒܰܢܒܺܝ̈ܶܐ ܐܰܙܥܶܩ ܕܗܳܐ ܡܛܳܐ ܢܽܘܗܪܳܗ̇ ܕܟܰܠܬܳܐ ܒܰܪܬ ܐܺܝܡܳܡܳܐ ܘܺܐܝܩܳܪܶܗ ܕܡܳܪܝܳܐ ܒܳܗ̇ ܐܰܙܠܶܓ ܒܫܽܘܒܚܳܐ ܪܰܒܳܐ ܕܰܩܝܳܡܬܶܗ: ܒܗܳܢܳܐ ܓܶܝܪ ܝܰܘܡܳܐ ܢܫܰܒܚܽܘܢ ܡܰܠܟ̈ܶܐ ܒܬܳܓܰܝ̈ܗܽܘܢ ܘܢܶܣܓܕܽܘܢ ܕܰܝ̈ܳܢܶܐ ܒܛܶܟܣܰܝ̈ܗܽܘܢ: ܕܗܳܐ ܗ̇ܰܘ ܕܡܰܠܟܽܘܬܶܗ ܡܰܠܟܽܘܬ ܟܽܠ ܥܳܠܡܺܝ̈ܢ ܘܫܽܘܠܛܳܢܶܗ ܒܟܽܠ ܕܳܪܕܳܪ̈ܺܝܢ ܐܰܡܠܶܟ ܥܰܠ ܟܽܠ ܥܰܡ̈ܡܶܐ: ܘܩܳܛܰܪ ܬܳܓ̈ܶܐ ܠܫܰܠܺܝܛܳܢ̈ܶܐ ܘܡܳܪ̈ܰܘܳܬܳܐ: ܐܰܡܺܝܬ ܠܡܰܘܬܳܐ ܘܩܰܛܠܶܗ ܠܰܚܛܺܝܬܳܐ ܒܗܳܢܳܐ ܝܰܘܡܳܐ ܓܶܝܪ ܕܺܐܝܬܰܘܗܝ ܫܽܘܪܳܝܗܽܘܢ ܕܙܰܒ̈ܢܶܐ ܘܫܽܘܠܳܡܳܐ ܕܒܶܪ̈ܝܳܬܳܐ: ܒܶܗ ܕܢܰܚ ܠܰܢ ܢܽܘܗܪܳܐ ܪܰܒܳܐ ܕܙܰܕܺܝܩܽܘܬܳܐ: ܘܒܶܗ ܐܶܬܛܰܠܰܩ ܛܶܠܳܠܶܗ ܕܠܺܠܝܳܐ ܚܶܫܽܘܟܳܐ. ܘܒܶܗ ܪܕܰܘ ܚܰܝ̈ܶܐ ܠܡܳܝܽܘ̈ܬܶܐ ܘܒܶܗ ܐܶܫܬܰܪܰܪ ܒܣܰܒܪܳܐ: ܘܒܶܗ ܐܶܬܥܰܩܪܰܬ݀ ܫܝܽܘܠ: ܨܳܠܽܘ̈ܒܶܐ ܟܽܠܗܽܘܢ ܐܶܬܒܰܕܰܪܘ: ܘܒܶܗ ܐܶܬܬܰܒܰܪܘ ܬܰܪ̈ܥܰܘܗܝ ܕܰܐܒܕܳܢܳܐ: ܘܒܶܗ ܡܺܝ̈ܬܶܐ ܐܶܬܢܰܚܰܡܘ ܒܬܶܫܒܽܘܚܬܳܐ: ܘܶܐܬܚܙܺܝܘ ܠܣܰܓܺܝ̈ܶܐܐ ܒܽܐܘܪܫܠܶܡ: ܒܗܳܢܳܐ ܓܶܝܪ ܝܰܘܡܳܐ ܐܽܘܪܫܠܶܡ ܡܥܳܩܳܐ ܘܚܰܫܺܝܫܳܐ ܘܰܟܡܺܝܪܳܐ: ܘܥܺܕܬܳܐ ܒܰܪܬ݀ ܥܰܡ̈ܡܶܐ ܕܳܝܨܳܐ ܘܰܦܨܺܝܚܳܐ ܒܝܰܠܕܶܝ̈ܗ̇ ܕܡܶܬܪܰܒܶܝܢ ܥܰܠ ܬܰܦܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ: ܒܗܳܢܳܐ ܝܰܘܡܳܐ ܕܚܰܕܽܘܬܳܐ ܘܕܰܪܘܳܙܳܐ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ ܚܰܕܽܘܬܳܐ ܡܶܬܡܠܶܝܢ: ܘܟܰܕ ܪܳܘܙܺܝܢ ܘܚܳܕܶܝܢ ܘܰܡܫܰܒܚܺܝܢ ܘܰܡܗܰܕܪܺܝܢ ܕܶܐܬܢܰܚܰܡ ܘܩܳܡ ܡ̣ܶܢ ܒܶܝܬ ܡܺܝ̈ܬܶܐ: ܘܰܐܩܺܝܡ ܥܰܡܶܗ ܠܰܟܝܳܢܰܢ ܕܰܒܠܺܝ ܘܰܐܥܬܶܩ ܒܰܚܛܺܝܬܳܐ: ܒܗܳܢܳܐ ܓܶܝܪ ܝܰܘܡܳܐ ܐܶܬܦܰܬܰܚܘ ܬܰܪ̈ܥܶܐ ܕܰܓܢܽܘܢܳܐ: ܘܶܐܬܟܰܢܰܫܘ ܗܘܰܘ ܬܰܠܡܺܝ̈ܕܶܐ ܕܰܥܪܰܩܘ ܗܘܰܘ ܡ̣ܶܢ ܕܶܚܠܬܳܐ ܕܺܝܠܶܗ ܕܰܙܩܺܝܦܳܐ: ܝܰܘܡܰܐ ܗ̱̇ܘ ܕܚܰܕܽܘܬܳܐ ܘܕܰܪܘܳܙܳܐ: ܝܰܘܡܰܐ ܗ̱̇ܘ ܕܪ̈ܶܦܣܶܐ ܘܩܽܘ̈ܝܳܙܶܐ: ܝܰܘܡܰܐ ܗ̱̇ܘ ܕܟܽܠܳܗ̇ ܒܪܺܝܬܳܐ ܣܳܓܕܳܐ ܘܰܦܨܺܝܚܳܐ ܕܒܶܗ ܡܶܐܬܺܝܬܳܟ ܕܳܢܚܳܐ ܘܪܰܒܽܘܬܳܟ ܡܶܬܓܰܠܝܳܐ ܘܥܰܙܺܝܙܽܘܬܳܟ ܡܰܒܪܩܳܐ: ܒܶܗ ܩܰܪ̈ܢܳܬܳܐ ܘܫܺܝܦܽܘܪ̈ܶܐ ܡܝܰܒܒܺܝܢ: ܘܒܶܗ ܬܳܩܶܢ ܟܽܘܪܣܝܳܐ ܕܒܽܘܚܪܳܢܳܐ: ܘܒܶܗ ܡܶܬܬܕܺܝ̈ܢܳܢ ܟܰܣ̈ܝܳܬܳܐ ܘܓܰܠܝ̈ܳܬܳܐ: ܘܒܶܗ ܡܰܠܟܽܘܬܳܐ ܒܰܒܢܶܝ̈ܗ̇ ܡܰܦܪܓܳܐ: ܘܒܶܗ ܓܺܗܰܢܳܐ ܡܩܰܕܝܳܐ ܠܝܳܪܬܽܘܬܳܗ̇: ܘܒܶܗ ܣܺܝܥܬܶܗ ܕܫܶܡܥܽܘܢ ܒܰܥܢܳܢ̈ܶܐ ܡܶܬܓܰܝܳܐܐ: ܘܰܕܩܰܝܳܦܳܐ ܘܕܺܝܗܽܘܕܳܐ ܒܰܐܪܥܳܐ ܡܶܫܬܰܒܩܳܐ ܘܡܶܬܕܰܚܩܳܐ: ܘܗܳܫܳܐ ܡܦܺܝܣܳܐ ܠܳܟ ܥܺܕܬܳܐ ܐܳܘ ܚܰܬܢܳܐ ܡܫܺܝܚܳܐ ܕܰܒܝܰܘܡܳܐ ܗܳܢܳܐ ܕܰܩܝܳܡܬܳܟ ܘܰܕܟܽܠ ܒܣܰܪ: ܕܢܶܢܗܰܪ ܒܢܽܘܗܪܳܟ. ܘܢܶܚܕܶܐ ܒܰܚܙܳܬܳܟ ܘܢܰܨܡܚܽܘܢ ܒܰܢ ܙܰܠܺܝ̈ܩܶܐ ܕܡܶܐܬܺܝܬܳܟ: ܘܒܳܟ ܢܶܫܬܰܘܙܰܒ ܡ̣ܶܢ ܠܺܠܝܳܐ ܗ̇ܰܘ ܟܡܺܝܪܳܐ ܘܡ̣ܶܢ ܚܶܫܽܘܟܳܐ ܕܓܺܗܰܢܳܐ: ܘܢܶܗܘܶܐ ܠܰܢ ܨܰܦܪܳܐ ܕܺܝܠܳܟ ܗ̇ܰܘ ܪܰܒܳܐ ܐܺܝܡܳܡܳܐ ܕܚܰܕ̈ܘܳܬܳܐ ܝܳܪܬܽܘܬܳܐ ܡܩܰܘܝܳܢܺܝܬܳܐ ܘܚܰܝ̈ܶܐ ܕܒܳܟ ܟܽܠܫܳܥ ܡܶܬܥܰܠܡܺܝܢ ܘܟܰܕ ܠܥܺܐܕܳܟ ܘܰܠܢܽܘܚܳܡܳܟ ܡܠܐܷ ܬܶܗܪܳܐ ܘܰܫܒܺܝܚܳܐ ܒܬܶܫܒ̈ܚܳܬܳܐ ܘܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܩܰܠܣܺܝܢܰܢ: ܢܶܫܬܘܶܐ ܕܢܶܬܡܰܢܰܥ ܠܚܰܓܳܟ ܗ̇ܰܘ ܠܐܴ ܡܶܫܬܰܪܝܳܢܳܐ: ܘܠܰܓܢܽܘܢܳܟ ܠܐܴ ܥܳܒܽܘܪܳܐ. ܘܰܠܦܰܪܕܰܝܣܳܟ ܡܶܬܝܰܕܥܳܢܳܐ: ܕܒܶܗ ܢܒܺܝ̈ܶܐ ܚܳܕܶܝܢ: ܘܰܫܠܺܝ̈ܚܶܐ ܕܳܝܨܺܝܢ: ܘܣܳܗ̈ܕܶܐ ܡܶܬܒܰܣܡܺܝܢ ܐܰܝܟܰܢܳܐ ܕܠܶܗ ܢܶܫܬܘܶܐ ܟܽܠܰܢ ܕܰܢܡܰܢܰܥ ܒܛܰܝܒܽܘܬܳܟ ܘܰܒܫܰܦܺܝܪܽܘܬ ܨܶܒܝܳܢܳܟ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܛܪܐ

ܗܳܫܳܐ ܡܳܪܝܳܐ ܐܠܰܗܳܐ ܥܳܒܽܘܕܳܐ ܘܒܳܪܽܘܝܳܐ ܕܟܽܠܗܽܘܢ ܒܢܰܝ̈ܢܳܫܳܐ: ܗ̇ܰܘ ܕܒܰܩܝܳܡܬܶܗ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܪܰܥܺܝ ܠܰܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ. ܘܝܰܩܪܽܘܗܝ ܥܺܝܪܳܐ ܒܚܶܘܳܪ̈ܶܐ: ܘܬܰܠܡܺܝ̈ܕܶܐ ܒܕܽܘܒܳܪ̈ܶܐ ܕܰܡܝܰܬܪܽܘܬܳܐ: ܘܢܶܫ̈ܶܐ ܒܥܶܛܪܳܐ ܕܗܶܪ̈ܽܘܡܶܐ. ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܥܶܛܪܳܐ ܕܦܺܝܪܡܰܢ: ܘܰܒܩܰܕܺܝܫܽܘܬܳܐ ܕܰܥܒܳܕܰܝ̈ܢ ܘܰܒܢܰܗܺܝܪܽܘܬܳܐ ܕܰܠܒܽܘ̈ܫܰܝܟ ܢܝܰܩܰܪ ܘܰܢܪܰܡܪܶܡ ܠܰܫܡܳܟ ܩܰܕܺܝܫܳܐ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܒܽܘܣܳܡܳܐ ܘܰܪܘ̇ܳܙܳܐ ܘܚܰܕܽܘܬܳܐ ܕܡܶܢܳܟ ܫܰܟܶܢ ܠܰܢ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܕܰܩܝܳܡܬܳܟ: ܐܰܝܟܰܢܳܐ ܕܒܳܟ ܢܶܬܒܰܣܰܡ: ܘܢܶܚܕܶܐ ܒܥܺܐܕܳܟ ܗ̇ܰܘ ܕܠܐܴ ܥܳܒܰܪ. ܒܫܽܘܒܚܳܐ ܡܠܐܷ ܝܽܘܬܪ̈ܳܢܶܐ: ܘܰܒܗ̇ܰܘ ܥܺܐܕܳܐ ܪܰܒܳܐ ܘܰܬܡܺܝܗܳܐ ܕܒܶܗ ܡܰܦܪܓܺܝܢ ܟܽܠܗܽܘܢ ܓܒܰܝ̈ܳܐ ܕܺܝܠܳܟ. ܐܰܝܟܰܢܳܐ ܕܥܰܡܗܽܘܢ ܘܒܰܝܢܳܬܗܽܘܢ ܢܙܰܡܰܪ ܠܳܟ ܬܶܫܒ̈ܚܳܬܳܐ ܦܰܐܝ̈ܳܬܳܐ ܘܬܰܘܕ̈ܝܳܬܳܐ ܕܠܐܴ ܫܶܠܝܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܡܳܪܰܢ ܘܰܐܠܳܗܰܢ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܢܽܘܗܪܳܐ ܫܒܺܝܚܳܐ ܕܰܕܢܰܚ ܠܰܫܟܺܝ̈ܒܶܐ: ܠܗ̇ܰܘ ܫܶܡܫܳܐ ܕܙܰܕܺܝܩܽܘܬܳܐ ܐܶܬܚܒܶܫ ܒܶܝܬ ܡܺܝ̈ܬܶܐ: ܠܗ̇ܰܘ ܨܶܡܚܳܐ ܕܰܐܒܳܐ ܓܢܺܝܙܳܐ ܕܶܐܬܡܢܺܝ ܥܰܡ ܥܰܢܺܝ̈ܕܶܐ. ܠܗ̇ܰܘ ܚܰܝܳܐ ܕܰܒܡܰܘܬܶܗ ܐܰܚܺܝ ܠܡܳܝܽܘ̈ܬܶܐ: ܘܢܽܘܚܳܡܶܗ ܐܰܒܗܶܬ ܠܢܳܛܽܘܪ̈ܶܐ: ܘܰܩܝܳܡܬܶܗ ܐܰܦܨܚܰܬ݀ ܠܰܫܠܺܝ̈ܚܶܐ: ܘܗܳܐ ܡܠܶܝܢ ܫܽܘܒܚܶܗ ܫܡܰܝܳܐ ܘܰܐܪܥܳܐ: ܘܰܛܥܺܝܢܺܝܢ ܠܳܗ̇ ܠܣܰܒܪܶܗ ܟܽܠ ܣܰܘ̈ܦܺܝܢ ܘܡܶܬܒܰܣܡܺܝܢ ܒܰܫܠܳܡܶܗ ܟܽܠ ܥܰܡ̈ܡܺܝܢ: ܘܚܳܕܶܝܢ ܒܦܰܓܪܶܗ ܟܽܠ ܦܽܘ̈ܡܺܝܢ: ܘܒܳܣܡܺܝܢ ܒܰܕܡܶܗ ܟܽܠ ܠܶܫܳܢܺܝ̈ܢ: ܘܪܳܘܙܺܝܢ ܒܥܺܐܕܶܗ ܟܽܠ ܬܶܓܡܺܝ̈ܢ: ܘܙܳܡܪܺܝܢ ܬܶܫܒܽܘܚܬܶܗ ܒܟܽܠ ܩܳܠܺܝ̈ܢ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܢܽܘܗܪܳܐ ܡܬܽܘܡܳܝܳܐ ܕܰܐܢܗܰܪ ܥܰܠ ܥܰܡ̈ܡܶܐ ܒܓܶܠܝܳܢܶܗ: ܨܶܡܚܳܐ ܐܺܝܬܝܳܝܳܐ ܕܰܦܪܰܩ ܠܐܷܡܘ̈ܳܬܳܐ ܒܡܶܐܬܺܝܬܶܗ: ܟܰܣܝܳܐ ܘܰܓܢܺܝܙܳܐ ܕܶܐܬܳܐ ܕܢܶܦܪܽܘܩ ܠܰܢ ܒܰܩܢܽܘܡܶܗ ܠܐܴ ܡܶܬܚܰܙܝܳܢܳܐ ܕܶܐܬܚܙܺܝ ܒܰܒܣܰܪ ܕܢܰܐܚܶܝܢ ܒܛܰܝܒܽܘܬܶܗ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝ ܘܥܰܠ ܝܰܕ ܝܰܡܳܐ ܕܰܓܠܺܝܠܐܴ ܗܰܠܶܟ ܘܰܠܫܶܡܥܽܘܢ ܘܠܐܱܢܕܪܶܐܘܳܣ ܐܰܚ̈ܶܐ ܡ̣ܶܢ ܨܰܝܕܳܐ ܕܢܽܘ̈ܢܳܐ ܨܳܕ: ܘܨܰܝܳܕ̈ܰܝ ܐ̱ܢܳܫ̈ܳܐ ܠܚܰܝ̈ܶܐ ܣܳܡ ܐܶܢܽܘܢ. ܒܪܳܐ ܕܰܐܠܳܗܳܐ ܚܰܝܳܐ ܫܶܡܥܽܘܢ ܐܰܘܕܝܶܗ: ܘܛܽܘ̈ܒܐ ܠܶܗ ܝܰܗܒ ܘܶܐܡܰܪ ܛܽܘܒܰܝܟ ܫܶܡܥܽܘܢ ܒܰܪ ܝܳܘܢܰܐ ܕܳܐܒܝ ܓܠܐܴ ܠܳܟ ܗܳܠܶܝܢ: ܟܺܐܦܳܐ ܐܰܢ̱ܬ ܘܥܰܠ ܗܳܕܶܐ ܟܺܐܦܳܐ ܐܶܒܢܶܝܗ̇ ܠܥܺܕܬܝ: ܘܡܽܘ̈ܟܠܐܷ ܕܰܫܝܽܘܠ ܠܐܴ ܢܶܚܣܢܽܘܢܳܗ̇ ܘܟܽܠ ܕܬܶܐܣܽܘܪ ܘܬܶܫܪܶܐ ܒܰܐܪܥܳܐ ܢܗܶܐ ܐܰܣܺܝܪ ܘܰܫܪܶܐ ܒܰܫܡܰܝܳܐ. ܩܶܛܠܶܗ ܡܰܚܝܳܢܳܐ ܕܡ̣ܶܢ ܪ̈ܰܒܰܝ ܟܳܗ̈ܢܶܐ: ܘܢܽܘܚܳܡܶܗ ܬܠܺܝ̈ܬܳܝ ܝܰܘ̈ܡܶܐ ܓܠܐܴ ܠܶܗ: ܘܰܕܢܰܪܡܶܐ ܒܰܠܽܘܥܳܐ ܒܝܰܡܳܐ ܘܢܶܬܶܠ ܐܶܣܬܺܝܪܳܐ ܡܰܟܣܳܐ ܦܰܩܕܶܗ. ܠܝܰܡܳܐ ܐܰܝܟ ܡܳܪܳܐ ܦܩܰܕ ܕܰܢܛܰܒܥܶܗ ܕܰܚܙܳܐ ܠܰܦܠܺܝܓܽܘܬ ܪܶܥܝܳܢܶܗ: ܘܰܕܫܶܐܠ ܦܽܘܪܩܳܢܶܗ ܛܰܥܢܶܗ ܘܰܠܘܳܬܶܗ ܕܥ̇ܳܒܽܘܕܳܐ ܕܠܐܴ ܢܶܟ̈ܝܳܢ ܐܰܡܛܝܶܗ ܟܽܠ ܚܰܝܠܺܝ̈ܢ ܘܟܽܠ ܬܶܗܪ̈ܺܝܢ ܕܥܳܒܽܘܕܽܘܬܶܗ ܚܰܘܝܶܗ: ܘܡ̣ܶܢ ܟܽܠ ܨܳܐܝܽܘܬܳܐ ܡܰܪܩܶܗ: ܘܰܒܦܰܓܪܶܗ ܘܰܕܡܶܗ ܫܰܘܬܦܶܗ. ܘܥܰܠ ܟܦܽܘܪܝܶܗ ܐܰܘܕܥܶܗ: ܘܒܰܬܝܳܒܽܘܬܳܐ ܗ̇ܳܝ ܪܚܺܝܡܬܳܐ ܕܩܰܪܶܒ ܩܰܒܠܶܗ. ܝܽܘܚܰܢܳܢ ܠܩܰܒܪܳܐ ܩܰܕܺܝܫܳܐ ܡܰܢܥܶܗ: ܘܒܰܚܙܳܬܶܗ ܕܟܶܬܳܢ̈ܶܐ ܘܰܕܣܽܘܕܳܪܳܐ ܕܰܟܪܺܝܟܺܝܢ ܘܣܺܝܡܺܝܢ ܟܽܠ ܚܰܕ ܠܰܣܛܰܪ ܢܽܘܚܳܡܶܗ ܫܒܺܝܚܳܐ ܐ̱ܪܳܙܶܗ ܘܰܒܡܶܐܙܰܠܬܶܗ ܕܬܰܪܬܶܝܢ ܕܰܠܩܰܒܪܳܐ ܦܓܰܥ ܒܶܗ: ܘܥܰܡ ܦܽܘܩܳܕܳܐ ܕܰܠܓܽܘܕܳܐ ܕܢܶܫ̈ܶܐ ܕܢܺܐܙ̈ܳܠ̱ܢ: ܘܰܠܫܶܡܥܽܘܢ ܘܠܰܫܠܺܝ̈ܚܰܘܗܝ ܢܣܰܒܪ̈ܳܢ ܩܝܳܡܬܳܐ ܘܡܰܣܰܩܬܳܐ ܕܠܰܓܠܺܝܠܐܴ ܘܫܽܘܪܳܪܳܐ ܕܡܶܬܦܰܢܝܳܢܽܘܬܶܗ ܘܒܽܘܝܳܐܳܐ ܐܰܩܢܝܶܗ. ܥܰܠ ܫܶܬܶܐܣܬܳܐ ܗ̇ܳܝ ܩܰܕܡܳܝܬܳܐ ܕܪܰܒܽܘܬܳܐ ܘܰܕܪܺܝܫܳܢܽܘܬ ܬܰܠܡܺܝܕܽܘܬܳܐ ܐܰܩܺܝܡܶܗ: ܘܥܰܠ ܐܶܡܪ̈ܶܐ ܘܥܶܪ̈ܒܶܐ ܘܰܢܩܰܘ̈ܳܬܳܐ ܕܥܳܢ̈ܶܗ ܐܰܫܠܛܶܗ: ܘܡ̣ܶܢ ܠܐܘܳܠܝܳܝܳܐ ܚܰܪܪܶܗ: ܕܽܘܡܝܳܐ ܠܟܽܠ ܬܰܝ̈ܳܒܶܐ ܥܰܒܕܶܗ: ܘܰܒܕܰܪܳܐ ܕܠܽܘܩܒܰܠ ܣܳܛܳܢܳܐ ܙܰܟܝܶܗ: ܘܡ̣ܶܢ ܒܶܝܬ ܚܒܽܘܫܝܳܐ ܝܽܘܕܳܝܳܐ ܦܰܠܛܶܗ: ܩܕܳܡ ܫܳܡܪ̈ܳܝܶܐ ܠܣܺܝܡܽܘܢ ܚܰܪܫܳܐ ܡ̣ܶܢ ܒܶܝܬ ܐܺܝ̈ܕܰܘܗܝ ܒܒܶܗܬܬܳܐ ܐܰܩܺܝܡܶܗ: ܘܰܒܪܽܘܡܺܝ ܒܶܙܚܳܐ ܘܡܽܘܝܳܩܳܐ ܘܬܰܗܠܰܠܬܳܐ ܥܰܒܕܶܗ: ܘܡ̣ܶܢ ܪ̈ܰܘܡܶܐ ܥܶܠܳܝ̈ܶܐ ܐܰܝܟ ܪܰܒܶܗ ܐܰܪܡܝܶܗ: ܘܰܒܗܳܕܶܐ ܩܕܳܡ ܟܽܠܳܗ̇ ܪܽܘܡܺܝ ܐܰܣܓܺܝ ܘܰܠܥܰܡ̈ܡܶܐ ܥܰܬܕܶܗ: ܘܠܰܡܫܰܪܝܳܐ ܐܰܢܺܝܶܐܐ ܒܰܫܡܶܗ ܕܰܡܫܺܝܚܳܐ ܐܰܚܠܡܶܗ ܘܡ̣ܶܢ ܐܰܣܽܘܪܝܳܐ ܕܰܐܓܪܺܝܦܳܘܣ ܡܰܠܟܶܗ ܫܽܘܙܳܒܶܗ: ܘܰܕܠܐܴ ܕܶܚܠܐܴ ܠܒܰܝܬܶܗ ܬܰܪܨܶܗ. ܠܟܽܠ ܐܰܝܢܳܐ ܕܰܡܬܰܠܡܰܕ ܗܘܳܐ ܡܫܰܪܰܪ ܗܘܳܐ ܓܰܠܝܳܐܺܝܬ ܩܝܳܡܬܶܗ: ܠܥܰܡܳܐ ܕܝܽܘܕܳܝ̈ܶܐ ܨܰܠܒܶܗ: ܘܰܒܩܰܒܪܳܐ ܕܰܬܠܳܬ ܐܰܡܺܝ̈ܢ ܚܰܒܫܶܗ: ܘܰܕܠܐܴ ܢܶܚܙܶܐ ܚܒܳܠܐܴ ܐܰܩܺܝܡ ܠܦܰܓܪܶܗ: ܘܰܠܟܽܠ ܥܰܡ̈ܡܺܝܢ ܫܳܠܰܚ ܗܘܳܐ ܒܶܐܓܪ̈ܳܬܶܗ ܕܰܡܫܺܝܚܳܐ ܚܕܳܐ ܙܒܰܢ ܡܺܝܬ ܘܩܰܪܒܰܢ ܠܝ̇ܳܠܽܘܕܶܗ: ܘܰܢܚܶܬ ܠܰܫܝܽܘܠ ܘܰܫܪܳܐ ܫܽܘܠܛܳܢ ܚܶܫܽܘܟܳܐ ܘܰܦܪܰܩ ܠܰܓܒܺܝܠܬܶܗ: ܩܳܡ ܘܰܐܩܺܝܡܰܢ ܥܰܡܶܗ: ܘܠܰܒܥܶܠܕܒܳܒܳܐ ܕܰܐܛܥܺܝ ܒܶܗ ܫܰܦܠܶܗ: ܘܡ̣ܶܢ ܨܰܘܪܶܐ ܕܟܽܠ ܫܪܳܐ ܫܽܘܠܛܳܢܶܗ: ܘܒܰܐܪܥܳܐ ܣܰܚܦܶܗ ܘܰܫܕܳܐ ܠܬܳܓܶܗ. ܚܢܰܢ ܗܳܟܺܝܠ ܡܳܪܝܳܐ ܕܠܰܣܒܰܪܬܳܐ ܕܚܰܝ̈ܶܐ ܒܝܰܕ ܟܳܪܽܘܙܽܘܬܶܗ ܩܰܒܶܠܢܰܢ ܘܒܰܓܙܳܪܳܐ ܗ̇ܰܘ ܕܡܶܬܬܰܓܥܠܳܢܽܘܬܶܗ ܕܟܽܠܰܢ ܐܶܬܡܢܶܝܢܰܢ ܥܰܡܶܗ ܠܳܟ ܒܪܳܐ ܚܰܝܳܐ ܕܰܐܠܳܗܳܐ ܡܰܘܕܶܝܢܰܢ ܘܥܰܡܶܗ ܠܩܰܒܪܳܟ ܡܰܥܒܶܕ ܚܰܝ̈ܶܐ ܪܽܘܚܳܢܳܐܺܝܬ ܪܳܗܛܺܝܢܰܢ: ܘܰܒܢܽܘܚܳܡܶܗ ܕܠܐܴ ܚܒܳܠܐܴ ܡܶܫܬܰܪܪܺܝܢܰܢ: ܘܕܰܐܢ̱ܬ ܗ̣ܽܘ ܚܰܝ̈ܶܐ ܕܟܽܠ ܒܣܰܪ ܝܳܕܥܺܝܢܰܢ: ܥܰܡܶܗ ܥܶܛܪ̈ܶܐ ܕܟܰܝ̈ܳܐ ܘܰܕܠܐܴ ܡܽܘܡ ܕܣܳܠܩܺܝܢ ܡ̣ܶܢ ܓܰܘ ܠܶܒܳܐ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܡܫܺܝܚܳܐ ܐܠܰܗܳܐ ܡܰܥܛܪܺܝܢܰܢ: ܟܰܕ ܫܳܐܠܺܝܢܰܢ ܡܶܢܳܟ ܕܬܰܫܘܶܐ ܠܰܢ ܕܰܠܩܽܘܫܬܳܐ ܘܰܫܪܳܪܳܐ ܕܰܩܝܳܡܬܳܟ ܢܶܪܚܰܡ: ܘܒܳܬܰܪ ܢܽܘܗܪܳܐ ܘܚܰܝ̈ܶܐ ܕܢܽܘܚܳܡܳܟ ܢܶܪܗܰܛ: ܘܰܟܠܺܝܠ ܩܽܘܠܳܣ̈ܶܐ ܠܰܡܥܰܠܝܽܘܬܳܟ ܢܶܓܕܽܘܠ: ܘܫܽܘܒܚܳܐ ܘܢܰܚ̈ܬܶܐ ܫܒܺܝ̈ܚܶܐ ܘܰܡܦܰܬܟ̈ܶܐ ܠܡܶܫܬܽܘܬܳܟ ܢܥܰܬܶܕ: ܘܠܰܚܬܺܝܪܽܘܬܳܐ ܐܶܡܳܐ ܡܚܰܒܠܳܢܺܝܬܳܐ ܢܶܒܣܽܘܪ: ܘܠܰܚܣܳܡܳܐ ܘܡܶܐܟܰܠܩܰܪܨܳܐ ܒܦܰܓܪܳܟ ܩܰܕܺܝܫܳܐ ܢܶܙܟܶܐ: ܘܠܰܛܢܳܢܳܐ ܒܺܝܫܳܐ ܘܡܰܘܠܕܳܢܳܐ ܕܚܶܪ̈ܝܳܢܶܐ ܢܶܕܚܽܘܩ ܘܠܰܪ̈ܓܺܝܓܳܬܳܐ ܫܓܺܝܪ̈ܶܐ ܢܕܺܝܫ ܘܰܢܛܰܠܶܩ: ܘܰܠܚܽܘ̈ܫܳܒܶܐ ܒܺܝ̈ܫܶܐ ܘܰܡܨܰܥܪ̈ܶܐ ܢܩܰܦܰܚ: ܘܰܠܡܶܐܬܺܝܬܳܟ ܕܬܰܪܬܶܝܢ ܢܣܰܟܶܐ: ܘܠܰܓܢܽܘܢܳܐ ܕܢܽܘܗܪܳܐ ܥܰܡܳܟ ܢܶܥܘܽܠ ܘܡ̣ܶܢ ܝܰܡܺܝܢܳܟ ܒܚܰܕܽܘܬܳܐ ܢܕܰܝܶܨ. ܘܰܚܢܰܢ ܘܥܰܢܺܝ̈ܕܰܝܢ ܢܰܣܶܩ ܫܽܘܒܚܳܐ: ܘܢܶܬܶܠ ܬܰܘܕܺܝܬܳܐ ܠܳܟ ܡܳܪܝ ܘܒܺܐܝ̈ܕܰܝܟ ܥܰܡܶܗ ܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܕܰܛܥܶܡ ܡܰܘܬܳܐ ܒܨܶܒܝܳܢܶܗ: ܕܢܰܐܚܶܐ ܠܡܳܝܽܘ̈ܬܶܐ ܒܰܚܢܳܢܶܗ: ܘܰܗܘܳܐ ܐܰܝܟ ܚܰܕ ܡ̣ܶܢ ܡܺܝ̈ܬܶܐ ܕܢܰܟܪܶܙ ܠܰܩܒܺܝܪ̈ܶܐ ܦܽܘܪܩܳܢܶܗ ܠܗ̇ܰܘ ܥܺܝܪܳܐ ܕܥܺܝܪ̈ܰܝ ܪܰܘܡܳܐ ܥܺܝܪܳܐܺܝܬ ܡܥܰܕܥܕܺܝܢ ܠܶܗ: ܘܰܕܡܶܟ ܒܶܝܬ ܥܰܢܺܝ̈ܕܶܐ ܕܰܫܦܰܪ ܠܶܗ: ܘܩܳܡ ܡ̣ܶܢ ܩܰܒܪܳܐ ܒܚܰܝܠܬܳܢܽܘܬܶܗ: ܘܰܐܩܺܝܡ ܠܐܴܕܳܡ ܨܰܠܡܳܐ ܕܪܰܒܽܘܬܶܗ ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܩܕܳܡܰܝܟ ܐܠܰܗܳܐ ܡܶܠܬܳܐ ܗ̇ܰܘ ܕܡܶܡܬܽܘܡ ܐܺܝܬܰܝܟ ܘܰܠܥܳܠܰܡ ܩܰܝܳܡ ܐܰܢ̱ܬ: ܡܩܰܪܒܺܝܢܰܢ ܨܠܰܘ̈ܳܬܳܐ ܘܬܰܟܫ̈ܦܳܬܳܐ ܒܥܺܐܕܳܐ ܗܳܢܳܐ ܫܒܺܝܚܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ. ܐܰܢ̱ܬ ܗ̣ܽܘ ܓܶܝܪ ܒܪܳܐ ܝܺܚܺܝܕܳܝܳܐ ܕܨܳܪܽܘܟ ܢܒܺܝ̈ܶܐ ܒܐܪ̈ܳܙܰܝܗܽܘܢ. ܘܰܐܟܪܙܽܘܟ ܟܺܐܢ̈ܶܐ ܒܦ̈ܶܠܐܴܬܗܽܘܢ: ܘܪܰܫܡܽܘܟ ܙܰܕܺܝ̈ܩܶܐ ܒܫܰܪ̈ܒܰܝܗܽܘܢ: ܘܰܓܠܐܱܘܽܘܟ ܫܠܺܝ̈ܚܶܐ ܒܝܽܘܒܳܠܰܝ̈ܗܽܘܢ. ܘܙܰܝܚܽܘܟ ܥܺܝܪ̈ܶܐ ܘܡܰܠܐܱܟ̈ܶܐ ܒܬܶܫܒ̈ܚܳܬܗܽܘܢ: ܘܰܐܘܕܰܥܬ ܪܰܒܽܘܬܳܟ ܒܩܽܘܠܳܣܰܝ̈ܗܽܘܢ: ܘܰܐܕܢܚܽܘܟ ܒܝܽܘܒܳܒܰܝ̈ܗܽܘܢ ܕܨܶܝܕ ܩܰܒܪܳܐ: ܕܰܐܢ̱ܬ ܐܺܝܬܰܝܟ ܢܽܘܗܪܳܐ ܕܡ̣ܶܢ ܢܽܘܗܪܳܐ ܘܨܶܡܚܳܐ ܘܕܶܢܚܳܐ ܕܙܰܕܺܝܩܽܘܬܳܐ. ܗ̇ܰܘ ܕܡ̣ܶܢ ܐܰܒܳܐ ܕܠܐܴ ܐܶܡܳܐ ܐܶܬܺܝܠܶܕܬ: ܘܡ̣ܶܢ ܐܶܡܳܐ ܕܺܝܠܳܟ ܝܳܠܕܰܬ݀ ܐܠܰܗܳܐ ܕܰܢܚܶܬ: ܗ̇ܰܘ ܕܟܰܕ ܣܒܰܠܬ ܗܳܠܶܝܢ ܟܽܠܗܶܝܢ ܐ̱ܢܳܫܳܝ̈ܳܬܳܐ: ܒܟܽܠܗܶܝܢ ܐܠܰܗܳܝ̈ܳܬܳܐ ܐܶܬܪܰܡܪܰܡܬ. ܟܰܕ ܕܶܝܢ ܨܶܝܕ ܡܺܝ̈ܬܶܐ ܥܰܠܬ: ܘܡ̣ܶܢ ܩܰܒܪܳܐ ܕܠܐܴ ܚܒܳܠܐܴ ܩܳܡܬ: ܘܒܶܙܬܳܐ ܕܡ̣ܶܢ ܕܳܪܕܳܪ̈ܺܝܢ ܚܡܺܝܠܐܴ ܗܘܳܬ݀ ܒܙܳܟܽܘܬܳܐ ܪܰܒܬܳܐ ܐܰܦܶܩܬ: ܘܓܳܠܽܘܬܳܐ ܗ̇ܳܝ ܕܰܚܒܰܫ ܗܘܳܐ ܡܰܘܬܳܐ ܒܚܶܫܽܘܟܳܐ: ܥܰܡܳܟ ܠܐܱܬܪܳܐ ܕܚܰܝ̈ܶܐ ܘܰܕܢܽܘܗܪܳܐ ܐܰܦܢܺܝܬ. ܘܰܠܡܰܪܓܳܢܺܝܬܳܐ ܗ̇ܳܝ ܝܰܩܺܝܪܰܬ݀ ܕܡܰܝ̈ܳܐ ܨܰܠܡܶܗ ܕܳܐܕܳܡ ܡ̣ܶܢ ܥܽܘܒܶܗ ܕܡܰܘܬܳܐ ܐܰܦܶܩܬ ܘܰܐܣܶܩܬ ܘܰܠܫܽܘܪ̈ܶܐ ܕܰܫܝܽܘܠ ܡܫܰܩ̈ܠܐܷ ܒܥܽܘܫܢܳܐ ܕܰܕܪܳܥܳܟ ܣܰܚܶܦܬ. ܘܰܠܟܽܠܗܽܘܢ ܝܰܠܕ̈ܰܘܗܝ ܕܳܐܕܳܡ ܣܰܒܪܳܐ ܕܰܩܝܳܡܬܳܐ ܡܠܰܝܬ: ܪܶܒܽܘ ܬܶܕܡܪ̈ܳܬܳܐ ܦܰܐܝܳܬ݀ ܠܐܱܠܳܗܳܐ ܒܶܗ ܒܗܳܢܳܐ ܝܰܘܡܳܐ ܚܰܘܺܝܬ: ܐܰܝܟܰܢܳܐ ܕܬܶܚܙܶܐ ܘܬܰܒܗܶܬ ܫܳܛܺܝܬܳܐ ܗ̇ܳܝ ܕܟܶܦܪܰܬ݀ ܒܳܟ: ܘܦܰܩܰܪܬ ܒܫܳܢܝܽܘܬܳܗ̇ ܥܰܠ ܡܰܘܬܳܟ: ܘܬܶܚܕܶܐ ܘܬܶܪܘܰܙ ܥܺܕܬܳܐ ܗ̇ܳܝ ܕܰܒܪܽܘܡܪ̈ܳܡܶܐ ܙܰܝܰܚܬܳܟ: ܘܕܰܐܠܳܗܳܐ ܫܰܪܺܝܪܳܐ ܐܺܝܬܰܝܟ ܐܶܫܬܰܘܕܰܥܬ: ܗ̇ܳܝ ܕܰܦܪܰܩܬ ܒܚܰܫܳܟ ܘܰܐܚܺܝܬ ܒܡܰܘܬܳܟ: ܘܚܰܪܰܪܬ ܒܩܶܛܠܳܟ: ܘܰܚܬܰܡܬ ܒܰܨܠܺܝܒܳܟ: ܘܰܦܨܰܚ̣ܬ ܘܚܰܕܺܝܬܳܗ̇ ܒܰܩܝܳܡܬܳܟ: ܘܗܳܐ ܓܳܥܝܳܐ ܠܘܳܬܳܟ ܒܗܳܢܳܐ ܝܰܘܡܳܐ: ܘܒܳܥܽܘܬܳܐ ܥܰܡ ܥܶܛܪܳܐ ܕܒܶܣ̈ܡܶܐ ܛܽܘ̈ܒܶܐ ܡܫܰܕܪܳܐ ܠܐܱܬܪܳܐ ܕܰܫܟܺܝܢܬܳܟ: ܘܝܳܬܒܳܐ ܥܰܠ ܣܰܒܪܳܐ ܕܺܝܠܳܟ ܘܰܡܣܰܟܝܳܐ ܠܰܚܢܳܢܳܟ: ܘܰܡܚܰܒܒܳܐ ܠܰܒܢܶܝ̈ܗ̇ ܕܺܐܝܬܰܝܗܽܘܢ ܥܠܰܠܬܶܗ ܕܰܙܩܺܝܦܳܟ: ܘܫܳܐܠܐܴ ܪ̈ܰܚܡܶܐ ܒܰܩܝܳܡܬܳܟ ܚܠܳܦ ܟܽܠܗܽܘܢ ܟܶܢ̈ܫܶܝܗ̇. ܐܰܝܟܰܢܳܐ ܕܚܰܛܳܝ̈ܶܐ ܘܡܰܣܟܠܳܢ̈ܶܐ ܒܶܗ ܢܶܙܕܰܕܩܽܘܢ: ܛܳܥܰܝ̈ܳܐ ܘܰܐܒܺܝ̈ܕܶܐ ܒܶܗ ܢܶܫܬܰܟܚܽܘܢ: ܪ̈ܓܺܝܙܶܐ ܘܰܐܟܬܳܢ̈ܶܐ ܒܶܗ ܢܶܫܬܰܦܽܘܢ: ܛܰܡ̈ܶܐܐ ܘܙܰܠܺܝ̈ܠܐܷ ܒܶܗ ܢܶܬܩܰܕܫܽܘܢ: ܡܳܪ̈ܽܘܕܶܐ ܘܒܰܥܪܺܝܪ̈ܳܝܶܐ ܒܶܗ ܢܶܫܬܰܝܢܽܘܢ ܡܥܳܩ̈ܶܐ ܘܰܐܒܺܝ̈ܠܐܷ ܒܶܗ ܢܶܬܦܰܨܝܽܘܢ: ܢܒܺܝ̈ܶܐ ܒܶܗ ܢܶܚܕܽܘܢ: ܫܠܺܝ̈ܚܶܐ ܒܶܗ ܢܶܪܽܘܙܽܘܢ: ܘܣܳܗ̈ܕܶܐ ܒܶܗ ܢܕܽܘܨܽܘܢ: ܐܳܦ ܡܰܘܕ̈ܝܳܢܶܐ ܒܶܗ ܢܶܙܕܰܝܢܽܘܢ: ܘܟܶܢ̈ܫܶܐ ܫܡܰܝ̈ܳܢܶܐ ܒܶܗ ܢܶܬܦܰܨܚܽܘܢ: ܘܰܒܢܰܝ̈ܢܳܫܳܐ ܫܠܳܡܳܐ ܘܚܰܕܽܘܬܳܐ ܢܶܣܬܰܒܪܽܘܢ: ܚܰܝ̈ܶܐ ܒܶܗ ܢܶܬܢܰܛܪܽܘܢ: ܘܡܶܢ ܟܽܠ ܣܰܘ̈ܦܺܝܢ ܟܢܺܝܫܳܐܺܝܬ: ܘܡ̣ܶܢ ܟܽܠ ܥܰܡ̈ܡܺܝܢ ܫܰܘܝܳܐܺܝܬ: ܘܡ̣ܶܢ ܟܽܠ ܬܶܓܡܺܝ̈ܢ ܓܡܺܝܪܳܐܺܝܬ: ܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܨܠܘܬܐ ܕܫܘܪܝܐ ܕܨܦܪܐ

 

ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܘܰܫܪܳܐ ܫܽܘܠܛܳܢܶܗ ܕܡܰܘܬܳܐ: ܥܰܙܺܝܙܳܐ ܕܰܓܣܰܪ ܒܰܫܝܽܘܠ: ܘܶܐܬܦܪܶܬܘ ܥܽܘ̈ܒܶܝܗ̇: ܓܽܘܪܝܳܐ ܕܰܐܪܝܳܐ ܕܰܐܡܶܟ ܢܰܦܫܶܗ ܒܨܶܒܝܳܢܶܗ: ܘܰܒܡܰܘܬܶܗ ܩܰܛܠܶܗ ܠܡܰܘܬܳܐ ܩܳܛܽܘܠܶܗ ܕܳܐܕܳܡ. ܡܰܘܕܶܝܢܰܢ ܡܳܪܝ ܠܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܡܫܺܝܚܳܐ ܫܽܘܒܗܳܪܳܐ ܕܥܺܕܬܶܗ ܘܰܡܚܰܕܶܐ ܘܡܰܦܨܰܚ ܝܰܠܕܶܝ̈ܗ̇ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܠܐܴܡܳܝܽܘܬܳܐ ܕܡܺܝܬ ܒܰܒܣܰܪ: ܘܰܐܚܺܝ ܠܓܶܢܣܳܐ ܕܡܳܝܽܘ̈ܬܶܐ ܘܶܐܬܬܣܺܝܡ ܒܓܰܘ ܩܰܒܪܳܐ ܘܢܰܚܶܡ ܠܰܩܒܺܝܪ̈ܶܐ ܘܰܕܡܶܟ ܒܶܝܬ ܡܺܝ̈ܬܶܐ: ܘܰܐܥܺܝܪ ܠܕܰܡ̈ܟܶܐ: ܘܩܳܡ ܒܫܽܘܒܚܳܐ ܘܰܐܩܺܝܡ ܠܢܰܦ̈ܠܐܷ ܘܶܐܬܢܰܚܰܡ ܒܬܶܫܒܽܘܚܬܳܐ: ܘܚܰܕܺܝ ܠܬܰܠܡܺܝ̈ܕܶܐ: ܘܶܐܬܥܰܠܺܝ ܠܪܰܘܡܳܐ ܘܰܐܣܶܩ ܠܬܰܚܬܳܝ̈ܶܐ: ܘܫܰܡܠܺܝ ܫܽܘܘܕܳܝܶܗ ܘܰܓܡܰܪ ܠܚܰܣܺܝܪ̈ܶܐ: ܘܳܐܬܶܐ ܒܫܽܘܒܚܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܠܐܴ ܡܶܬܦܰܫܩܳܢܳܐܺܝܬ ܘܠܐܴ ܡܶܬܡܰܠܠܳܢܳܐܺܝܬ ܡ̣ܶܢ ܥܽܘܒܳܐ ܐܰܒܳܗܳܝܳܐ ܠܰܢ ܕܢܰܚܬ: ܘܰܩܝܳܡܬܳܐ ܘܢܽܘܚܳܡܳܐ ܠܟܽܠܗܽܘܢ ܫܟܺܝ̈ܒܰܝ ܥܰܦܪܳܐ ܫܰܟܶܢܬ ܘܐ̱ܪܳܙܳܐ ܕܰܡܟܰܣܰܝ ܗܘܳܐ ܡ̣ܶܢ ܟܽܠܗܶܝܢ ܒܶܪ̈ܝܳܬܳܐ ܠܰܒܢܰܝ̈ܢܳܫܳܐ ܓܠܰܝܬ. ܘܚܰܘܒܬܳܐ ܥܰܬܺܝܩܬܳܐ ܕܰܥܒ̇ܳܪ ܦܽܘܩܕܳܢܳܐ ܕܳܐܕܳܡ ܥܠܰܝܢ ܐܶܬܟܰܬܒܰܬ݀ ܒܰܩܢܽܘܡܳܟ ܬܰܠܰܚܬ: ܘܰܒܝܰܕ ܚܰܫ̈ܶܐ ܕܺܝܠܳܟ ܩܰܕܺܝ̈ܫܶܐ ܠܟܽܠܶܗ ܓܶܢܣܳܐ ܕܺܝܠܰܢ ܐ̱ܢܳܫܳܝܳܐ: ܠܐܴ ܚܳܫܽܘܫܽܘܬܳܐ ܫܰܟܶܢܬ: ܐܳܦ ܠܰܣܝ̇ܳܓܳܐ ܕܰܒܥܶܠܕܒܳܒܽܘܬܳܐ ܗ̇ܰܘ ܕܩܳܐܶܡ ܗܘܳܐ ܒܰܡܨܰܥܬܳܐ ܥܩܰܪܬ. ܒܰܚܕܳܝܽܘܬܳܐ ܡܦܰܠܰܓܬܳܐ ܘܰܒܝܰܕ ܡܰܚܰܬܬܳܟ ܕܠܰܫܝܽܘܠ ܠܰܬܪ̈ܰܝܗܽܘܢ ܓܰܒ̈ܶܐ ܥܒܰܕܬ ܘܰܠܡܰܪܺܝܪܽܘܬܶܗ ܕܚܶܘܝܳܐ ܚܰܪܡܳܢܳܐ ܒܝܰܕ ܕܡܳܐ ܘܡܰܝ̈ܳܐ ܕܰܪܕܰܘ ܡ̣ܶܢ ܕܰܦܢܳܟ ܦܰܟܰܗܬ: ܘܡܰܠܟܽܘܬܳܐ ܫܡܰܝܳܢܺܝܬܳܐ ܘܚܰܝ̈ܶܐ ܠܐܴ ܡܶܫܬܰܪ̈ܝܳܢܶܐ ܠܟܽܠܗܽܘܢ ܝܰܠܕ̈ܰܘܗܝ ܕܳܐܕܳܡ ܡܠܰܟܬ: ܘܟܰܕ ܢܚܶܬܬ ܠܬܰܚܬܰܝ̈ܳܬܳܗ̇ ܕܰܐܪܥܳܐ ܘܥܰܡ ܡܺܝ̈ܬܶܐ ܐܶܬܡܢܺܝܬ: ܘܰܠܫܽܘܠܛܳܢܳܐ ܗ̇ܰܘ ܕܰܐܚܺܝܕ ܗܘܳܐ ܡܰܘܬܳܐ ܛܪܽܘܢܳܐ ܫܩܰܠܬ: ܘܠܐܴܟܶܠܩܰܪܨܳܐ ܘܰܠܣܳܛܳܢܳܐ ܩܛܰܠܬ: ܘܠܰܚܛܺܝܬܳܐ ܩܰܕܡܳܝܬܳܐ ܕܰܐܒܽܘܢ ܐܳܕܳܡ ܐܰܥܒܰܪܬ. ܘܰܐܙܥܶܩܬ ܒܩܳܠܳܟ ܥܰܫܺܝܢܳܐ ܘܰܠܩܰܒܪ̈ܶܐ ܨܰܪܺܝܬ: ܘܠܰܫܠܰܕ̈ܶܐ ܡܺܝ̈ܬܶܐ ܠܒܶܝܬ ܚܰܝ̈ܶܐ ܐܰܦܢܺܝܬ ܘܰܐܪܺܝܡܬ ܩܳܠܳܟ ܒܰܫܝܽܘܠ ܘܶܐܬܬܙܺܝܥܰܬ݀: ܘܰܓܣܰܪܬ ܒܣܳܚܪ̈ܳܬܳܗ̇ ܘܢܶܦܠܰܬ݀ ܘܰܠܡܽܘ̈ܟܠܐܷ ܕܦܰܪܙܠܐܴ ܓܰܕܶܡܬ: ܘܰܠܦܰܓܪ̈ܶܐ ܛܡܺܝܪ̈ܰܝ ܕܰܚܺܝܚܳܐ ܠܐܱܬܪܳܐ ܕܚܰܝ̈ܶܐ ܫܰܕܰܪܬ ܘܰܐܙܠܶܓܬ ܢܽܘܗܪܳܟ ܒܗܳܡܳܢ ܘܢܰܗܪܰܬ݀: ܘܰܠܟܽܠܶܗ ܥܰܡܛܳܢܳܐ ܚܶܫܽܘܟܳܝܳܐ ܡ̣ܶܢ ܓܰܘܳܗ̇ ܕܚܰܩܬ: ܘܒܰܣܒܰܪܬܳܐ ܚܕܰܬܳܐ ܠܟܽܠܗܽܘܢ ܒܢܰܝ̈ܢܳܫܳܐ ܐܰܦܨܰܚܬ: ܟܳܪܽܘܙܽܘܬܳܐ ܫܠܺܝܚܳܝܬܳܐ ܠܥܰܡ̈ܡܶܐ ܘܶܐܡܘ̈ܳܬܳܐ ܬܰܠܡܶܕܬ ܘܡ̣ܶܢ ܛܳܥܝܽܘܬܳܐ ܚܰܢܦܳܝܬܳܐ ܕܰܦܬܰܟܪ̈ܶܐ ܐܰܦܢܺܝܬ ܘܰܪܘܳܙܳܐ ܪܽܘܚܳܢܳܝܳܐ ܘܚܰܓܳܐ ܦܨܺܝܚܳܐ ܟܽܠܳܗ̇ ܒܪܺܝܬܳܐ ܐܶܬܡܰܠܝ̣ܰܬ݀. ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܕܒܶܗ ܠܢܽܘܗܪܳܐ ܐܰܫܺܝܕܳܐ ܕܡ̣ܶܢ ܒܪܺܝܫܺܝܬ ܒܪܰܝܬ: ܘܡ̣ܶܢ ܥܺܝܪ̈ܶܐ ܘܡܰܠܐܱܟ̈ܶܐ ܒܬܶܗܪܳܐ ܪܰܒܳܐ ܐܶܫܬܰܒܰܚܬ: ܘܡ̣ܶܢ ܟܪ̈ܽܘܒܶܐ ܘܰܣܪ̈ܳܦܶܐ ܒܬܶܗܪܳܐ ܪܰܒܳܐ ܘܩܽܘ̈ܠܳܣܶܐ ܬܠܺܝ̈ܬܳܝܶܐ ܐܶܬܩܰܠܰܣܬ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܡ̣ܶܢ ܡܰܠܐܱܟ̈ܶܐ ܒܚܶܘܳܪ̈ܶܐ ܨܶܝܕ ܩܰܒܪܳܐ ܐܶܬܝܰܩܰܪܬ: ܘܡ̣ܶܢ ܡܺܝ̈ܬܶܐ ܕܰܫܝܽܘܠ ܒܙܰܘܚܳܐ ܪܰܒܳܐ ܐܶܙܕܰܝܰܚܬ. ܘܡ̣ܶܢ ܪ̈ܳܚܡܶܐ ܕܺܝܠܳܟ ܝܰܘܣܶܦ ܘܢܺܝܩܳܘܕܺܝܡܳܘܣ ܐܶܬܥܰܦܺܝܬ: ܘܡ̣ܶܢ ܬܰܠܡܺܝ̈ܕܶܐ ܕܺܝܠܳܟ ܒܬܶܕܡܽܘܪܬܳܐ ܪܰܒܬܳܐ ܐܶܬܥܰܦܰܩܬ: ܘܡ̣ܶܢ ܚܰܝ̈ܶܐ ܕܥܰܠ ܐܰܪܥܳܐ ܒܫܽܘܒܚܳܐ ܐܶܬܪܰܡܪܰܡܬ. ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܐܰܪܥܳܐ ܡ̣ܶܢ ܛܰܢܦܽܘܬܳܐ ܐܶܬܕܰܟܝܰܬ݀ ܘܶܐܬܩܰܕܫܰܬ݀ ܕܶܐܬܬܪܺܝܡܰܬ݀ ܡܶܢܳܗ̇ ܠܰܘܛܬܳܐ ܕܰܒܝܰܕ ܚܰܘܳܐ ܘܳܐܕܳܡ ܥܠܰܝܢ ܐܶܬܟܰܬܒܰܬ݀ ܘܰܒܢܰܗܺܝܪ̈ܶܐ ܫܒܺܝ̈ܚܶܐ ܘܙܰܠܺܝ̈ܩܶܐ ܕܰܩܝܳܡܬܳܟ ܐܰܨܡܰܚܬ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܫܡܰܝܳܐ ܘܰܐܪܥܳܐ ܘܶܐܬܦܨܰܚܘ ܘܰܒܩ̈ܳܠܐܷ ܚܠܰܝ̈ܳܐ ܘܢܰܨܺܝ̈ܚܶܐ ܠܰܒܢܰܝ̈ܢܳܫܳܐ ܣܰܒܪ̈ܳܬܳܐ ܚܰܕ̈ܬܳܬܳܐ ܐܰܫܡܰܥܘ ܕܗܳܐ ܩܳܡ ܠܶܗ ܚܰܬܢܳܐ ܡܰܠܟܳܐ ܡܫܺܝܚܳܐ: ܘܰܫܝܽܘܠ ܐܶܬܒܰܙܰܙܬ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ: ܢܒܺܝ̈ܶܐ ܚܳܕܶܝܢ. ܘܰܫܠܺܝ̈ܚܶܐ ܕܳܝܨܺܝܢ: ܘܰܡܣܰܒܪ̈ܳܢܶܐ ܪܳܘܙܺܝܢ ܘܟܳܗ̈ܢܶܐ ܘܟܽܠܶܗ ܛܶܟܣܳܐ ܥܺܕܬܳܢܳܝܳܐ ܒܰܦܨܺܝܚܽܘܬܳܐ ܩܳܝܡܺܝܢ: ܘܟܽܠܗܽܘܢ ܡܗܰܝ̈ܡܢܶܐ ܩܺܝ̈ܢܳܬܳܐ ܚܰܠܝ̈ܳܬܳܐ ܠܐܱܬܪܳܐ ܕܰܫܟܺܝܢܬܳܟ ܡܫܰܕܪܺܝܢ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܡܰܪܝܰܡ ܘܚܰܒܪ̈ܳܬܳܗ̇ ܒܚܰܕܽܘܬܳܐ ܩܳܝ̈ܡܳܢ: ܘܰܠܓܰܢܬܳܐ ܕܺܝܠܶܗ ܕܝܰܘܣܶܦ ܒܽܘܠܺܝܛܺܝ ܒܪܶܗܛܳܐ ܡܚܰܕܝܳܢܳܐ ܐܳܙ̈ܳܠ̱ܢ: ܘܰܠܪ̈ܶܓܠܰܝܟ ܩܰܕܺܝ̈ܫܳܬܳܐ ܒܣܶܓ̈ܕܳܬܳܐ ܘܰܒܢܽܘ̈ܫܩܳܬܳܐ ܡܩܰܒ̈ܠܳܢ: ܘܠܰܟܢܽܘܫܝܳܐ ܕܥܰܡܳܐ ܚܰܪܡܳܐ ܘܳܝܳܐ ܝܳܗ̈ܒܳܢ: ܘܰܠܨܶܗܝܽܘܢ ܘܠܰܒܢܶܝ̈ܗ̇ ܚܰܪܒܳܐ ܘܫܶܒܝܳܐ ܡܙܰܡ̈ܢܳܢ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܫܰܟܶܢ ܠܰܢ ܫܽܘܒܩܳܢܳܐ ܘܕܽܘܟܳܝܳܐ ܡ̣ܶܢ ܟܽܠܗܶܝܢ ܣܰܟܠܘ̈ܳܬܰܢ ܘܰܠܚܺܝ ܡܶܢܰܢ ܠܪ̈ܽܘܫܥܶܐ ܘܥܰܘ̈ܠܐܷ ܕܰܚܛܺܝܬܳܐ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܐܽܘܪܫܠܶܡ ܚܶܪܒܰܬ݀ ܘܪܽܘܚܳܐ ܩܰܕܺܝܫܳܐ ܡܶܢܳܗ̇ ܢܶܦܩܰܬ݀ ܘܠܐܱܦ̈ܰܝ ܬܰܪܥܳܐ ܗ̇ܰܘ ܕܗܰܝܟܠܐܴ ܣܰܕܩܰܬ݀. ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܙܰܡܶܢ ܠܟܽܠܰܢ ܠܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ: ܘܰܐܒܰܥ ܒܰܢ ܐܰܡܺܝܢܳܐܺܝܬ ܝܺܕܥܬܳܐ ܘܣܽܘܟܳܠܐܴ ܕܐ̱ܪ̈ܳܙܰܝܟ ܐܠܰܗܳܝ̈ܶܐ: ܘܰܐܫܘܳܐ ܠܟܽܠܰܢ ܠܒܽܘܣܳܡܳܐ ܗ̇ܰܘ ܥܳܠܡܺܝܢܳܝܳܐ ܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ: ܘܢܶܫܬܘܶܐ ܕܢܺܐܪܥܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܢܰܣܶܩ ܠܳܟ ܫܽܘܒܚܳܐ܀

 

ܥܛܪܐ

ܩܰܒܶܠܳܝܗܝ ܡܳܪܝܳܐ ܐܠܰܗܳܐ ܠܦܺܝܪܡܳܐ ܕܥܰܒܕܰܝ̈ܟ ܕܰܒܥܺܐܕܳܐ ܗܳܢܳܐ ܐܶܬܩܰܪܰܒ ܠܳܟ. ܐܰܝܟ ܕܡܽܘܫܶܐ ܘܰܐܗܪܽܘܢ ܟܳܗ̈ܢܶܐ ܦܺܝܢܚܶܣ ܘܶܐܠܺܝܥܳܙܳܪ. ܘܩܰܒܶܠ ܬܶܫܡ̈ܫܳܬܰܢ ܘܰܨܠܰܘ̈ܳܬܰܢ: ܐܰܝܟ ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܫܦܰܪܘ ܠܳܟ ܒܕܳܪ̈ܰܝܗܽܘܢ ܘܰܒܙܰܒܢܰܝ̈ܗܽܘܢ ܘܫܰܟܶܢ ܠܰܢ ܕܢܶܗܘܶܐ ܡܕܰܡܝ̈ܳܢܶܐ ܕܩܰܕܺܝ̈ܫܰܝܟ ܘܢܶܫܟܰܚ ܪ̈ܰܚܡܶܐ ܘܫܽܘܒܩܳܢܳܐ ܡ̣ܶܢ ܒܶܝܬ ܓܰܙܳܐ ܕܰܡܪܰܚܡܳܢܽܘܬܳܟ ܗܳܫܳܐ܀

 

ܚܘܬܡܐ

ܙܡܺܝܪ̈ܳܬܳܐ ܗܰܢܺܝ̈ܳܐܬܳܐ ܕܡ̣ܶܢ ܢܰܦܫܳܐ ܕܟܺܝܬܳܐ ܡܶܙܕܰܡܪ̈ܳܢ ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܢܩܰܪܶܒ ܠܳܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܥܰܡ ܢܶܫ̈ܶܐ ܕܰܚܙܰܝ̈ ܢܽܘܚܳܡܳܟ: ܘܰܫܠܺܝ̈ܚܶܐ ܓܒܰܝ̈ܳܐ ܕܶܐܣܬܰܒܰܪ ܩܝܳܡܬܳܟ ܘܥܺܝܪ̈ܶܐ ܕܰܐܟܪܶܙܘ ܬܶܫܒܽܘܚܬܳܟ ܘܥܰܡ̈ܡܶܐ ܕܠܐܴ ܚܙܰܐܘܽܘܟ ܘܗܰܝܡܶܢܘ ܒܳܟ ܘܰܐܘܕܺܝܘ ܠܐܱܠܳܗܽܘܬܳܟ ܡܥܰܠܰܝܬܳܐ ܘܢܰܣܶܩ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܟܝܳܢܳܐ ܡܥܰܠܝܳܐ ܘܰܓܢܺܝܙܳܐ: ܐܺܝܬܝܳܐ ܡܬܽܘܡܳܝܳܐ ܘܰܠܚܽܘܕܳܝܳܐ ܘܕܰܐܡܺܝܢܳܐܺܝܬ ܠܥܳܠܰܡ ܐܺܝܬܰܘܗܝ ܘܰܕܠܐܴ ܫܽܘܚܠܳܦܳܐ ܘܫܽܘܓܢܳܝܳܐ ܡܩܰܘܶܐ: ܠܗܰܘ ܥܳܒܽܘܕܳܐ ܘܒܳܪܽܘܝܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ ܕܡܶܬܺܝܕܰܥ ܒܰܬܠܳܬܳܐ ܣܕܺܝ̈ܩܶܐ ܘܠܐܴ ܦܠܺܝ̈ܓܶܐ: ܕܟܰܕ ܡܚܰܕܶܝܢ ܦܠܺܝܓܺܝܢ: ܕܠܰܝܬ ܒܗܽܘܢ ܩܰܕܡܳܝܳܐ ܘܰܐ̱ܚܪܳܝܳܐ: ܐܰܘ ܕܰܡܥܰܠܰܝ ܐܰܘ ܕܰܒܨܺܝܪ: ܬܠܺܝܬܳܝܽܘܬܳܐ ܠܰܘ ܕܡܶܢܝܳܢܳܐ: ܘܠܰܘ ܕܢܰܩܺܝܦܳܐ ܠܳܗ̇ ܪܒܺܝܥܳܝܽܘܬܳܐ: ܐܶܠܐܴ ܡܰܐܠܽܘܢ ܡܶܬܬܰܘܕܝܳܐ ܟܺܝܬ ܘܡܶܬܗܰܝܡܢܳܐ ܚܰܕ ܐܠܰܗܳܐ ܒܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܒܗܳܢܳܐ ܥܶܕܳܢܳܐ ܚܽܘܣܳܝܳܐ ܕܰܬܠܳܬܫܳܥܺܝ̈ܢ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܦܳܪܽܘܩܳܐ ܘܰܡܫܰܘܙܒܳܢܳܐ ܕܟܽܠܗܶܝܢ ܒܶܪ̈ܝܳܬܳܐ ܘܡܶܠܬܳܐ ܕܰܐܠܳܗܳܐ ܐܰܒܳܐ. ܕܶܒܚܳܐ ܘܪܺܝܫ ܟܳܗ̈ܢܶܐ ܕܺܝܠܰܢ: ܡܩܰܪܒܳܢܳܐ ܘܰܡܩܰܒܠܳܢܳܐ. ܗ̇ܰܘ ܕܒܰܫܦܺܝܥܽܘܬ ܛܳܒܽܘܬܳܟ ܡ̣ܶܢ ܫܽܘܪܳܝܳܐ ܠܒܰܪܢܳܫܳܐ ܒܪܰܝܬ: ܐܰܝܟܰܢܳܐ ܕܢܶܫܬܰܘܬܰܦ ܒܛܳܒ̈ܳܬܳܟ: ܘܡ̣ܶܢ ܟܽܠ ܕܒܰܐܪܥܳܐ ܘܨܰܠܡܳܟ ܨܰܒܶܬܬܳܝܗܝ: ܒܰܡܠܺܝܠܽܘܬܳܐ ܘܰܒܫܰܠܺܝܛܽܘܬ ܒܝܳܬܳܐ ܝܰܩܰܪܬܳܝܗܝ: ܘܰܐܬܪܳܐ ܕܒܽܘ̈ܣܳܡܶܐ: ܘܦܽܘܩܕ̈ܳܢܰܝܟ ܐܠܰܗܳܝ̈ܶܐ ܘܰܡܥܰܒ̈ܕܰܝ ܚܰܝ̈ܶܐ ܗܰܝܡܶܢܬܳܝܗܝ: ܘܟܰܕ ܠܗܳܠܶܝܢ ܡܳܪܝܳܐ ܒܚܺܐܪܽܘܬܶܗ ܕܳܫ ܘܰܥܒܰܪ ܥܠܰܝܗܶܝܢ ܘܰܒܣܰܪ: ܘܰܗܘܳܐ ܡܫܰܥܒܕܳܐ ܠܰܚܛܺܝܬܳܐ ܘܰܠܡܰܘܬܳܐ ܥܶܠܬܳܐ ܝܰܗܒ ܕܢܶܣܥܶܐ ܥܠܰܘܗܝ. ܐܰܢ̱ܬ ܡܳܪܝ ܒܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳܢܺܝܬܳܐ: ܠܚܰܝ̈ܶܐ ܗܳܠܶܝܢ ܫܕܰܝܬܳܝܗܝ ܠܥܽܘܕܪܳܢܶܗ: ܡܶܛܽܠ ܕܬܶܬܦܣܶܩ ܘܬܶܬܥܛܶܐ ܚܛܺܝܬܶܗ: ܘܟܰܕ ܬܽܘܒ ܠܐܴ ܡܶܬܰܐܣܝܳܢܳܐܺܝܬ ܟܰܬܰܪ ܘܟܽܠ ܙܢܳܐ ܕܒܺܝܫܽܘܬܳܐ ܚܰܘܺܝ: ܘܟܽܠ ܐܳܕܫܳܐ ܕܰܡܫܰܟܪܽܘܬܳܐ ܣܥܰܪ: ܘܰܠܡܰܘܬܳܐ ܛܥܳܐ: ܘܰܚܠܳܦ ܐܠܰܗܽܘܬܳܟ ܒܣܶܓܕܬܳܐ ܕܰܦܬܰܟܪ̈ܶܐ. ܐܰܢ̱ܬ ܡܳܪܝ ܐܰܝܟ ܛܳܒܳܐ ܘܪܳܚܶܡ ܐ̱ܢܳܫ̈ܳܐ ܠܐܴ ܐܰܗܡܺܝܬ ܡܶܢܶܗ ܘܠܐܴ ܫܒܰܩܬܳܝܗܝ: ܐܶܠܐܴ ܓܳܠܘ ܪ̈ܰܚܡܰܝܟ ܡܬܽܘ̈ܡܳܝܶܐ ܥܰܠ ܓܒܺܝܠܬܳܐ ܕܺܝܠܳܟ: ܘܠܐܴ ܫܒܰܩܬܳܗ̇ ܕܬܶܒܠܐܷ ܒܰܚܒܳܠܐܴ: ܟܰܕ ܓܶܝܪ ܡܥܰܠܝܳܐ ܐܰܝܟ ܕܺܐܝܬܰܝܟ ܩܰܘܺܝܬ ܒܰܐܠܳܗܽܘܬܳܟ: ܘܰܐܢ̱ܬ ܠܳܟ ܣܰܪܶܩܬ: ܘܰܕܡܽܘܬܳܐ ܕܺܝܠܰܢ ܢܣܰܒܬ. ܕܰܚܢܰܢ ܕܶܐܫܬܰܥܒܰܕܢܰܢ ܠܰܚܛܺܝܬܳܐ ܒܨܶܒܝܳܢܰܢ ܚܺܐܪܽܘܬܳܐ ܡ̣ܶܢ ܕܪܺܝܫ ܢܶܩܢܶܐ: ܫܩܰܠܬ ܓܶܝܪ ܗܳܠܶܝܢ ܕܨܰܥܪܳܐ ܡܶܛܽܠ ܕܬܶܬܶܠ ܠܰܢ ܗܳܠܶܝܢ ܕܰܡܝܰܬܪ̈ܳܢ. ܐܶܬܡܰܣܟܰܢܬ ܕܶܝܢ ܡܶܛܽܠ ܒܶܣܪܳܐ: ܕܰܚܢܰܢ ܢܶܥܬܰܪ ܒܰܐܠܳܗܽܘܬܳܐ: ܐܶܬܬܰܚܬܺܝܬ ܡܶܛܽܠܳܬܰܢ ܠܐܴ ܡܶܫܬܰܚܠܦܳܢܳܐܺܝܬ ܠܟܽܠܶܗ ܗܳܢܳܐ ܣܽܘܪܳܩܳܐ ܨܶܒܝܳܢܳܝܳܐ: ܗ̇ܰܘ ܕܒܶܗ ܐܰܢܗܰܪܬ ܠܟܽܠܳܗ̇ ܕܰܬܚܶܝܬ ܫܡܰܝܳܐ: ܕܰܚܢܰܢ ܢܶܬܦܪܶܩ ܘܢܶܬܦܰܠܰܛ ܡ̣ܶܢ ܦܟܳܪ̈ܶܐ ܘܫܺܫ̈ܠܳܬܳܐ ܕܡܰܪܡܝܳܢܳܐ: ܘܡ̣ܶܢ ܢܶܫܒܰܘ̈ܗܝ ܕܣܳܛܳܢܳܐ: ܟܠܺܝܠܐܴ ܟܽܘܒܳܢܳܝܳܐ ܩܰܒܶܠܬ ܥܠܰܝܟ ܚܠܳܦܰܝܢ: ܕܬܶܦܪܽܘܩ ܠܰܢ ܡ̣ܶܢ ܥܰܒܕܽܘܬܶܗ ܕܥܰܘܳܠܐܴ ܕܫܽܘܠܛܳܢܶܗ ܕܒܺܝܫܳܐ ܚܶܫܽܘܟܳܝܳܐ: ܣܠܶܩܬ ܠܰܨܠܺܝܒܳܐ ܘܒܰܛܶܠܬ ܠܰܚܛܺܝܬܰܢ ܘܰܠܠܰܘܛܬܰܢ: ܡܺܝܬܬ ܒܰܒܣܰܪ ܨܶܒܝܳܢܳܐܺܝܬ ܡܰܘܬܳܐ ܡܳܪܳܢܳܝܳܐ: ܕܰܚܢܰܢ ܢܰܚܶܐ ܘܰܢܫܰܢܶܐ ܠܘܳܬܳܟ ܘܰܠܘܳܬ ܚܰܝ̈ܶܐ ܛܽܘܒܬܳܢ̈ܶܐ ܕܰܠܥܳܠܰܡ: ܢܚܶܬܬ ܠܰܫܝܽܘܠ ܒܝܰܕ ܢܰܦܫܳܟ. ܕܰܚܢܰܢ ܢܩܽܘܡ ܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܟܽܠܰܢ ܢܰܣܶܩ ܠܘܳܬܳܟ ܠܥܶܠ ܒܰܫܡܰܝܳܐ: ܘܶܐܬܢܰܚܰܡܬ ܘܩܳܡܬ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܕܰܚܢܰܢ ܢܶܬܚܰܕܰܬ ܒܪܽܘܚܳܐ ܕܣܺܝܡܰܬ݀ ܒܢܰܝ̈ܳܐ: ܟܽܠܗܶܝܢ ܡܳܪܝ ܗܳܠܶܝܢ ܐ̱ܢܳܫܳܝ̈ܳܬܳܐ. ܕܰܣܥܰܪܬ ܚܠܳܦܰܝܢ ܒܰܡܕܰܒܪܳܢܽܘܬܳܐ ܕܺܝܠܳܟ ܐܠܰܗܳܝܬܳܐ: ܐܰܝܟ ܐܠܰܗܳܐ ܫܰܪܺܝܪܳܐ ܠܥܽܘܕܪܳܢܳܐ ܘܦܽܘܪܩܳܢܳܐ ܘܳܐܣܝܽܘܬܳܐ ܗܘ̈ܰܝ ܠܰܢ: ܘܟܰܕ ܠܗܳܠܶܝܢ ܥܳܗܕܺܝܢܰܢ ܡܳܪܝܳܐ ܘܰܐ̱ܚܪ̈ܳܢܝܳܬܳܐ ܛܰܝܒܘ̈ܳܬܳܐ ܕܺܝܠܳܟ ܣܰܓܺܝ̈ܳܐܬܳܐ ܕܰܠܘܳܬܰܢ: ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܺܝܠܳܟ: ܕܬܰܫܘܶܐ ܠܰܢ ܕܰܢܩܰܪܶܒ ܠܳܟ ܕܶܒܚܳܐ ܡܠܺܝܠܐܴ ܘܰܕܠܐܴ ܛܽܘܠܫܳܐ ܥܰܡ ܨܠܰܘ̈ܳܬܰܢ ܘܬܰܟܫ̈ܦܳܬܳܐ ܕܺܝܠܰܢ: ܘܬܶܬܶܠ ܠܰܢ ܒܪܶܚܡܰܬ݀ ܐ̱ܢܳܫܽܘܬܳܟ ܕܟܽܠܫܳܥ ܢܶܬܒܰܝܰܢ ܡܶܫܬܰܘܕܰܥ ܐܺܝܩܳܪܳܐ ܕܺܝܠܰܢ. ܐܰܝܟܰܢܳܐ ܕܟܰܕ ܢܳܛܪܺܝܢܰܢ ܨܰܠܡܳܐ ܕܺܝܠܳܟ ܒܢܰܦ̈ܫܳܬܰܢ: ܕܠܐܴ ܚܒܳܠܐܴ ܘܰܕܠܐܴ ܛܽܘܠܫܳܐ ܢܶܫܬܘܶܐ ܕܢܶܗܘܶܐ ܠܳܟ ܥܰܡܳܐ ܩܰܕܺܝܫܳܐ: ܘܟܽܘܗܳܢܳܐ ܡܰܠܟܳܝܳܐ ܘܟܶܢܫܳܐ ܦܪܺܝܩܳܐ: ܘܰܢܥܰܕܥܶܕ ܠܳܟ ܥܺܐܕܳܐ ܕܫܽܘܒܩܳܢܳܐ ܠܰܘ ܒܰܚܡܺܝܪܳܐ ܥܰܬܺܝܩܳܐ ܕܒܺܝܫܽܘܬܳܐ ܘܰܕܡܰܗܡܝܳܢܽܘܬܳܐ ܐܶܠܐܴ ܕܦܰܛܺܝܪܳܐ ܕܫܰܦܝܽܘܬܳܐ ܘܰܕܩܰܕܺܝܫܽܘܬܳܐ ܘܰܢܕܰܒܰܚ ܠܳܟ ܕܶܒܚ̈ܶܐ ܕܫܽܘܒܚܳܐ ܒܥܺܐܕܳܐ ܪܰܒܳܐ ܕܠܐܴ ܥܳܒܰܪ. ܒܝܰܘܡܳܐ ܗ̇ܰܘ ܕܡܶܬܓܰܠܝܳܢܽܘܬܳܟ ܫܒܺܝܚܬܳܐ: ܘܰܒܟܽܠܗܶܝܢ ܢܰܣܶܩ ܠܳܟ ܫܽܘܒܚܳܐ܀

ܫܠܡ

 

ܛܟܣܐ ܕܚܕ ܒܫܒܐ ܕܐܪܒܥܐ ܒܬܪ ܩܝܡܬܐ

ܩܕܡܝܬ݀ ܨܠܘܬܐ ܕܫܘܪܝܐ

 

ܛܳܒܳܐ ܡܠܐܷ ܪ̈ܰܚܡܶܐ ܡܳܪܝܳܐ: ܛܰܝܶܒ ܠܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܡ̣ܶܢ ܩܰܒܪܳܐ. ܕܢܶܗܘܶܐ ܙܡܺܝ̈ܢܶܐ ܘܰܡܛܰܝ̈ܒܶܐ: ܘܢܶܬܚܙܶܐ ܠܡܰܠܟܽܘܬܳܐ ܕܺܝܠܳܟ ܫܡܰܝܳܢܺܝܬܳܐ: ܘܢܶܚܕܶܐ ܘܢܶܬܒܰܣܰܡ ܒܰܓܢܽܘܢܳܐ ܕܺܝܠܳܟ ܡܫܰܒܚܳܐ: ܥܰܡ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܥܳܠܰܡ ܫܦܰܪܘ ܠܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܥܒܶܕ ܚܰܝ̈ܶܐ ܕܰܛܥܶܡ ܡܰܘܬܳܐ ܒܨܶܒܝܳܢܶܗ. ܠܗ̇ܰܘ ܠܐܴ ܡܳܝܽܘܬܳܐ ܕܡܺܝܬ ܒܰܒܣܰܪ ܘܰܐܚܺܝ ܠܡܳܝܽܘ̈ܬܶܐ ܘܰܒܓܰܘ ܩܰܒܪܳܐ ܐܶܬܬܣܺܝܡ ܘܢܰܚܶܡ ܠܰܩܒܺܝܪ̈ܶܐ. ܘܰܕܡܶܟ ܒܶܝܬ ܡܺܝ̈ܬܶܐ: ܘܰܐܥܺܝܪ ܠܕܰܡ̈ܟܶܐ: ܘܩܳܡ ܡ̣ܶܢ ܩܰܒܪܳܐ ܘܰܐܩܺܝܡ ܠܢܰܦ̈ܠܐܷ: ܘܶܐܬܢܰܚܰܡ ܒܫܽܘܒܚܳܐ ܘܚܰܕܺܝ ܠܬܰܠܡܺܝ̈ܕܶܐ ܘܶܐܬܥܰܠܺܝ ܠܪܰܘܡܳܐ ܘܰܐܣܶܩ ܠܬܰܚܬܳܝ̈ܶܐ: ܘܫܰܡܠܺܝ ܫܽܘܘܕܳܝܶܗ ܘܰܓܡܰܪ ܠܚܰܣܺܝܪ̈ܶܐ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܟܰܕ ܒܚܽܘܕܳܬܳܐ ܕܪܽܘܚܳܐ ܩܰܕܺܝܫܳܐ ܠܝܰܘܡܳܐ ܗܳܢܳܐ ܕܰܩܝܳܡܬܳܟ ܒܚܰܕܽܘܬܳܐ ܪܰܒܬܳܐ ܡܫܰܡܠܶܝܢܰܢ ܐܳܘ ܡܶܠܬܳܐ ܐܠܰܗܳܐ: ܘܰܒܗܰܘܢܳܐ ܕܰܡܥܰܠܰܝ ܡ̣ܶܢ ܚܰܫ̈ܶܐ ܡܚܰܓܶܝܢܰܢ: ܟܰܕ ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܒܰܡܕܰܒܪܳܢܽܘܬܳܟ ܕܰܚܠܳܦܰܝܢ ܟܰܕ ܩܳܥܶܝܢܰܢ ܘܳܐܡܪܺܝܢܰܢ: ܕܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ ܡܶܛܽܠ ܕܬܶܕܡܽܘܪܬܳܐ ܣܥܰܪ: ܬܶܕܡܽܘܪܬܳܐ ܗ̇ܳܝ ܓܶܝܪ ܒܰܫܪܳܪܳܐ ܙܩܺܝܦܽܘܬܳܟ ܡܰܐܚܝܳܢܺܝܬܳܐ: ܘܰܩܒܽܘܪܬܳܟ ܦܳܪܽܘܩܳܝܬܳܐ: ܘܰܩܝܳܡܬܳܟ ܡܰܠܝܰܬ݀ ܬܶܗܪܳܐ: ܐܶܬܥܰܠܺܝܬ ܓܶܝܪ ܥܰܠ ܪܰܘܡܳܗ̇ ܕܓܳܓܽܘܠܬܳܐ: ܘܶܐܬܬܙܺܝܥܘ ܐܶܣܛܽܘ̈ܟܣܰܘܗܝ ܕܥܳܠܡܳܐ: ܡܬܰܚܬ ܢܰܦܫܳܟ ܒܶܝܬ ܓܰܝ̈ܳܣܶܐ: ܘܶܐܬܪܗܶܒܘ ܟܝܳܢ̈ܶܐ ܠܐܴ ܪ̈ܓܽܘܫܶܐ: ܦܪܰܥ ܠܳܟ ܫܶܡܫܳܐ ܕܳܫܢ̈ܶܐ ܕܡܶܬܬܚܺܝܒܺܝܢ ܠܐܻܝܩܳܪܳܟ: ܘܰܩܦܰܠ ܢܽܘܗܪܶܗ ܘܰܚܡܰܠ ܙܰܠܺܝ̈ܩܰܘܗܝ: ܒܰܓܶܢܘ ܛܽܘܪ̈ܶܐ ܐܶܨܛܰܪܺܝܘ ܫܽܘ̈ܥܶܐ ܘܶܐܬܚܰܙܝܰܬ݀ ܗܰܝܡܳܢܽܘܬܳܐ ܒܦܽܘܡܳܐ ܕܡܺܝܬܳܐ: ܐܰܝܠܶܠ ܡܰܘܬܳܐ: ܒܶܗܬܰܬ݀ ܫܝܽܘܠ: ܐܶܬܒܰܙܰܙܘ ܓܰܙܶܝ̈ܗ̇ ܥܰܡ ܣܳܚܪ̈ܳܬܳܗ̇: ܘܩܳܡܘ ܡܺܝ̈ܬܶܐ ܘܰܙܡܰܪܘ ܬܶܫܒܽܘܚܬܳܐ: ܢܦܰܩܘ ܥܰܢܺܝ̈ܕܶܐ ܘܰܦܪܰܥܘ ܛܰܝܒܽܘܬܳܐ ܐܶܬܢܰܦܰܫܘ ܓܰܪ̈ܡܰܝܗܽܘܢ ܡ̣ܶܢ ܩ̈ܳܠܐܷ ܣܒܺܝ̈ܣܶܐ: ܫܩܰܠܘ ܢܒܺܝ̈ܶܐ ܩܺܝܬܳܪ̈ܰܝܗܽܘܢ: ܘܝܰܒܶܒܘ ܒܰܪܘܳܙܳܐ: ܛܳܣܘ ܥܺܝܪ̈ܶܐ ܘܰܛܥܺܝܢܺܝܢ ܣܰܒܪ̈ܳܬܳܐ. ܦܪܰܚܘ ܪ̈ܽܘܚܳܢܶܐ ܘܡܰܟܪܙܺܝܢ ܚܰܕ̈ܬܳܬܳܐ ܢܩܰܫܘ ܓܶܦ̈ܶܐ ܕܰܣܪ̈ܳܦܶܐ ܘܙܳܠܚܺܝܢ ܒܩܽܘܕܳܫܰܝ̈ܗܽܘܢ: ܘܨܳܪܶܝܢ ܠܐܴܐܰܪ ܘܩܳܥ̇ܶܝܢ ܒܫܺܝܦܽܘܪ̈ܰܝܗܽܘܢ ܡܰܟܺܝܟܺܝܢ ܒܰܪ̈ܩܶܐ ܕܫܰܠܗܶܒܺܝܬܳܐ ܘܰܡܡܰܛܪܺܝܢ ܥܰܠ ܩܶܣܛܽܘܢܳܪ̈ܶܐ: ܟܪܺܝܟܺܝܢ ܠܶܗ ܥܛܺܝ̈ܦܰܝ ܓܰܘܙܰܠܬܳܐ ܘܰܚܕܳܪ̈ܰܝ ܩܰܒܪܳܐ ܩܳܝܡܺܝܢ: ܘܰܚܕܺܝܪܺܝܢ ܠܶܗ ܐܰܝܟ ܕܠܰܓܢܽܘܢܳܐ ܘܰܠܚܰܬܢܳܐ ܣܳܓܕܺܝܢ: ܥܰܓܶܠܘ ܟܺܐܦܳܐ ܘܶܐܣ̈ܛܠܐܷ ܚܶܘܳܪ̈ܳܬܳܐ ܠܒܺܝܫܺܝܢ: ܫܠܳܡܳܐ ܒܦܽܘܡܗܽܘܢ ܘܠܰܒܢܰܝ̈ܢܳܫܳܐ ܚܰܕܽܘܬܳܐ ܡܣܰܒܪܺܝܢ: ܡܕܰܝܶܨ ܫܶܡܥܽܘܢ ܘܰܪܗܺܝܒ ܝܽܘܚܰܢܳܢ: ܟܡܺܝܪܺܝܢ ܙܳܩܽܘ̈ܦܶܐ ܘܬܰܠܡܺܝ̈ܕܶܐ ܪܳܘܙܺܝܢ. ܥܺܕܬܳܐ ܝܶܪܒܰܬ݀ ܘܨܶܗܝܽܘܢ ܐܶܬܟܰܡܪܰܬ݀ ܕܩܰܒܠܰܬ݀ ܟܬܳܒܳܐ ܕܕܽܘܠܳܠܐܴ: ܒܰܪܬ݀ ܐܳܪ̈ܳܡܳܝܶܐ ܚܳܕܝܳܐ: ܘܬܶܫܒܽܘܚܬܳܐ ܠܚܰܬܢܳܐ ܕܶܐܬܢܰܚܰܡ ܡܩܰܪܒܳܐ: ܡܬܺܝܚܺܝܢ ܣܶܕܪ̈ܶܝܗ̇ ܘܰܩܒܺܝܥܺܝܢ ܣܳܟܶܝ̈ܗ̇ ܘܪܳܥܡܺܝܢ ܚܰܓܶܝ̈ܗ̇ ܒܬܶܫܒܽܘܚܬܳܐ: ܘܰܡܫܰܪܪܺܝܢ ܛܽܘܢ̈ܒܶܝܗ̇: ܘܡܶܟܺܝܠ ܪܘܳܙܳܐ ܘܚܰܕܽܘܬܳܐ ܥܛܺܝܦܺܝܢ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܡܫܺܝܚܳܐ ܐܠܰܗܳܐ ܕܺܝܠܰܢ ܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܡܩܰܪܒܺܝܢܰܢ: ܘܪ̈ܰܚܡܶܐ ܘܰܚܢܳܢܳܐ ܡ̣ܶܢ ܛܰܝܒܽܘܬܳܟ: ܫܳܐܠܺܝܢܰܢ: ܫܡܰܥ ܠܰܓܥܳܬܳܐ ܕܺܝܠܰܢ ܘܰܕܟܽܠܶܗ ܥܰܡܳܐ ܕܺܝܠܳܟ ܡܗܰܝܡܢܳܐ: ܘܚܰܝܶܕ ܠܰܡܒܰܕܪ̈ܶܐ ܕܥܳܢ̈ܳܟ ܘܟܰܢܶܫ ܠܗܰܘ̈ܢܰܝܢ ܡ̣ܶܢ ܦܶܗܝܳܐ ܕܰܣܪ̈ܺܝܩܳܬܳܐ: ܘܰܕܚܽܘܩ ܡܶܢܰܢ ܠܡܰܪܕܽܘܬܳܐ ܛܪܽܘܢܳܝܬܳܐ ܘܰܠܚܶܫܽܘܟܽܘܬܳܐ ܣܳܛܳܢܳܝܬܳܐ ܘܰܠܦܰܢܛܰܣܺܝܰܐ ܠܺܠܝܳܝܬܳܐ: ܘܶܐܬܓܠܰܝ ܥܰܠ ܥܶܪ̈ܒܶܐ ܕܡܰܪܥܺܝܬܳܟ ܒܰܪܶܟ ܡܳܪܝܳܐ ܒܝܰܡܺܝܢܳܟ ܠܐܷܡܪ̈ܶܐ ܘܠܰܢܩܰܘ̈ܳܬܳܐ ܦܪ̈ܺܝܩܰܝ ܒܰܫܡܳܟ ܩܰܕܺܝܫܳܐ: ܚܬܽܘܡ ܒܢܺܝܫܶܗ ܕܰܨܠܺܝܒܳܟ ܠܡܰܠܟ̈ܶܐ ܕܺܝܠܰܢ ܕܒܰܩܪܳܒܳܐ ܪܡܶܝܢ: ܘܰܐܥܒܰܪ ܘܒܰܛܶܠ ܡܶܢܰܢ ܡܳܪܝܳܐ ܟܽܠܗܶܝܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ. ܘܟܰܕ ܒܫܰܝܢܳܐ ܠܐܴ ܥܕܺܝܠܐܴ ܡ̣ܶܢ ܚܰܝ̈ܶܐ ܗܳܠܶܝܢ ܚܳܙܩܺܝܢܰܢ: ܠܗ̇ܰܘ ܥܳܠܡܳܐ ܚܰܕܬܳܐ ܚܰܕܬܳܐܺܝܬ ܡܶܬܡܰܢܥܺܝܢܰܢ. ܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܡܗܰܝܡ̈ܢܶܐ ܠܰܩܝܳܡܬܳܐ ܡܥܰܠܰܝܬܳܐ ܘܠܰܦܨܺܝܚܽܘܬܳܐ ܡܰܠܐܱܟܳܝܬܳܐ ܘܰܠܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܘܟܽܠܰܢ ܢܶܫܬܘܶܐ ܕܢܰܣܶܩ ܠܳܟ ܫܽܘܒܚܳܐ܀

 

ܥܛܪܐ

ܐܰܢ̱ܬ ܗ̣ܽܘ ܡܳܪܝܳܐ ܪܺܝܚܳܐ ܒܰܣܺܝܡܳܐ ܕܣܳܩܽܘܟ ܡܺܝ̈ܬܶܐ ܥܓܺܝ̈ܢܰܝ ܕܰܚܺܝܚܳܐ: ܘܰܢܦܰܩܘ ܠܐܘܪܥܳܐ ܕܺܝܠܳܟ ܒܬܶܫܒܽܘܚܬܳܐ: ܐܰܢ̱ܬ ܗ̣ܽܘ ܝܰܠܕܳܐ ܡܬܽܘܡܳܝܳܐ ܕܒܰܫܝܽܘܠ ܕܰܢܚܶܬ ܚܰܕܬܳܐܺܝܬ: ܘܰܐܢܗܰܪܬ ܠܟܽܠܗܽܘܢ ܐܰܝܠܶܝܢ ܕܰܒܚ̈ܶܙܶܐ ܕܗܳܡܳܢ ܚܶܫܽܘܟܳܝ̈ܶܐ ܚܒܺܝܫܺܝܢ ܗܘܰܘ. ܐܰܢ̱ܬ ܗ̣ܽܘ ܛܰܠܐܴ ܕܚܰܝ̈ܶܐ ܕܥܰܠ ܓܰܪ̈ܡܶܐ ܕܥܰܢܺܝ̈ܕܶܐ ܐܰܪܣܶܣܬ ܘܰܩܢܰܘ ܚܰܝ̈ܶܐ ܘܠܐܴ ܡܶܬܚܰܒܠܳܢܽܘܬܳܐ ܡܶܬܟܰܫܦܺܝܢܰܢ ܠܳܟ ܡܳܪܝܳܐ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ: ܕܰܬܚܰܣܶܐ ܒܶܗ ܠܡܰܪܥܺܝܬܳܟ ܘܬܶܥܒܶܕ ܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܗܰܝܡܳܢܽܘܬܳܐ ܕܰܫܪܳܪܳܐ ܕܡܳܪܰܢ܀

 

ܚܘܬܡܐ

ܡܰܘܕܶܝܢܰܢ ܠܳܟ ܐܠܰܗܳܐ ܕܰܐܚܺܝܬ ܡܺܝܬܽܘܬܰܢ ܒܡܰܘܬܳܟ ܘܢܰܚܶܡܬ ܩܛܺܝܠܽܘܬܰܢ ܒܰܙܩܺܝܦܳܟ ܘܰܣܥܰܪܬ ܚܰܝܳܒܽܘܬܰܢ ܒܰܩܒܽܘܪܬܳܟ ܕܥܰܡ ܡܺܝ̈ܬܶܐ: ܘܰܐܦܨܰܚܬ ܟܡܺܝܪܽܘܬܰܢ ܒܰܩܒܽܘܪܬܳܟ ܘܙܰܡܶܢܬ ܠܰܢ ܚܰܝ̈ܶܐ ܚܰܕ̈ܬܶܐ ܘܠܐܴ ܡܳܝܽܘ̈ܬܶܐ. ܗܰܒܠܰܢ ܡܳܪܝ ܕܰܢܫܰܒܚܳܟ ܐܰܡܺܝܢܳܐܺܝܬ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܫܰܪܺܝܪܳܐ ܕܫܰܪܰܪ ܠܬܰܠܡܺܝ̈ܕܰܘܗܝ ܥܰܠ ܩܝܳܡܬܶܗ ܡܫܰܒܰܚܬܳܐ ܘܚܰܘܺܝ ܐܶܢܽܘܢ ܫܽܘ̈ܡܳܬܶܗ: ܠܗ̇ܰܘ ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܘܟܰܢܶܫ ܠܚܰܒܺܝ̈ܒܰܘܗܝ ܟܽܠܗܽܘܢ ܕܶܐܬܒܰܕܰܪܘ ܗܘܰܘ ܒܥܶܕܳܢ ܙܩܺܝܦܽܘܬܶܗ. ܠܗ̇ܰܘ ܠܐܴ ܐܰܝܢܳܝܳܐ ܘܠܐܴ ܟܡܳܢܳܝܳܐ ܕܶܐܬܚܙܺܝ ܒܳܬܰܪ ܩܝܳܡܬܶܗ ܠܐܱܚܰܘ̈ܗܝ ܙܰܒܢ̈ܳܬܳܐ ܣܰܓܺܝ̈ܳܐܬܳܐ ܒܕܽܘܟ̈ܝܳܬܳܐ ܡܫܰܚ̈ܠܦܳܬܳܐ: ܕܠܶܗ ܠܰܡܫܺܝܚܳܐ ܕܩܳܡ ܡ̣ܶܢ ܩܰܒܪܳܐ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܒܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܒܰܝܺܐܬ ܠܠܶܒܰܘ̈ܳܬܳܐ ܕܬܰܠܡܺܝ̈ܕܰܝܟ ܩܰܕܺܝ̈ܫܶܐ ܗ̇ܳܝ ܕܰܒܓܶܫܬܳܐ ܕܕܰܦܢܳܟ ܡܰܥܒܕܰܬ݀ ܚܰܝ̈ܶܐ ܘܰܡܥܺܝܢܳܐ ܕܚܰܝ̈ܶܐ ܪ̈ܽܘܚܳܢܳܝܶܐ ܝܰܗܒܬܳܗ̇ ܠܬܽܐܘܡܰܐ ܕܰܢܓܽܘܫܶܝܗ̇. ܟܰܕ ܡ̣ܶܢ ܒܳܬܰܪ ܬܡܳܢܝܳܐ ܝܰܘ̈ܡܺܝܢ ܐܶܬܚܙܰܝܬ ܠܬܰܠܡܺܝ̈ܕܰܝܟ ܐܰܝܟ ܕܰܠܫܽܘܪܳܪܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ. ܟܰܕ ܒܗܳܢܳܐ ܝܰܘܡܳܐ ܕܰܩܝܳܡܬܳܐ ܕܺܝܠܳܟ ܡܰܠܝܰܬ݀ ܚܰܕ̈ܘܳܬܳܐ: ܐܶܬܚܙܰܝܬ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ: ܐܰܢ̱ܬ ܕܺܐܝܬܰܝܟ ܠܐܴ ܡܶܬܚܰܙܝܳܢܳܐ ܘܠܐܴ ܡܶܬܕܰܪܟܳܢܳܐ. ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܒܬܰܪ̈ܥܶܐ ܐܰܚܺܝ̈ܕܶܐ ܕܥܶܠܺܝܬܳܐ ܥܰܠܬ. ܠܘܳܬ ܬܰܠܡܺܝ̈ܕܰܝܟ ܐܰܝܟ ܕܰܢܦܰܩܬ ܡ̣ܶܢ ܟܰܪܣܳܐ ܘܡ̣ܶܢ ܩܰܒܪܳܐ ܘܰܚܬܳܡ̈ܶܐ ܟܰܕ ܢܛܺܝܪܺܝܢ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܡܰܠܝܰܬ݀ ܚܰܕܘ̈ܳܬܳܐ ܐܶܬܚܙܰܝܬ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ ܐܰܢ̱ܬ ܕܚܰܘܺܝܬ ܒܥܰܡ̈ܡܶܐ ܥܽܘܫܢܳܟ: ܘܰܦܪܰܩܬ ܠܥܺܕܬܳܟ ܒܰܩܝܳܡܬܳܟ: ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕܘ̈ܳܬܳܐ ܕܢܰܚ ܢܽܘܗܪܳܐ ܕܰܩܝܳܡܬܳܟ ܒܠܶܒܰܘ̈ܳܬܳܐ ܕܰܡܗܰܝܡ̈ܢܶܐ ܕܺܝܠܳܟ ܘܰܐܒܺܝܠܺܝܢ ܗܘܰܘ: ܘܚܰܫܺܝܫܺܝܢ ܥܰܠ ܙܩܺܝܦܽܘܬܳܟ ܕܰܐܪܗܒܰܬ݀ ܐܶܢܽܘܢ. ܒܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܕܗܰܝܡܶܢ ܬܽܐܘܡܳܐ ܕܶܐܬܦܰܠܰܓ: ܘܰܐܘܕܺܝ ܒܳܟ ܕܺܐܝܬܰܝܟ ܐܰܢ̱ܬ ܡܳܪܝܳܐ ܐܠܰܗܳܐ ܕܥܰܠ ܟܽܠ: ܒܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܘܰܥܕܳܐ ܕܛܽܘ̈ܒܶܐ ܠܐܴ ܡܰܘܦܝ̈ܳܢܶܐ ܐܶܫܬܰܘܕܺܝܬ ܒܰܣܒܰܪܬܳܟ ܠܗ̇ܳܢܽܘܢ ܕܠܐܴ ܚܙܰܐܘܽܘܟ ܘܗܰܝܡܶܢܘ ܒܳܟ ܘܰܐܘܕܺܝܘ ܒܰܩܝܳܡܬܳܟ ܕܰܐܢ̱ܬ ܐܺܝܬܰܝܟ ܐܠܰܗܳܐ ܫܰܪܺܝܪܳܐ: ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܠܛܽܘܪܳܐ ܕܰܓܠܺܝܠܐܴ ܠܬܰܠܡܺܝ̈ܕܶܐ ܕܺܝܠܳܟ ܟܰܢܶܫܬ ܘܡ̣ܶܢ ܦܠܺܝ̈ܓܶܐ ܣܶܓ̈ܕܳܬܳܐ ܩܰܒܶܠܬ: ܘܠܰܚܕܳܐ ܐܰܘܝܽܘܬܳܐ ܐܰܝܬܺܝܬ ܒܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܡ̈ܶܠܐܷ ܚܰܝ̈ܳܬܳܐ ܠܗܽܘܢ ܐܰܫܡܰܥܬ ܘܡ̣ܶܢ ܛܽܘܪܳܐ ܕܩܽܘܕܫܳܐ ܠܗܽܘܢ ܥܰܪܓܶܠܬ: ܒܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܫܽܘܠܛܳܢ ܡܳܪܽܘܬܳܟ ܠܗܽܘܢ ܚܰܘܺܝܬ: ܘܰܕܢܺܐܙܽܠ̱ܘܢ ܢܬܰܠܡܕܽܘܢ ܠܟܽܠ ܥܰܡ̈ܡܺܝܢ ܦܰܩܶܕܬ. ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܙܰܗܪܺܝܪ̈ܶܐ ܛܽܘܒܬܳܢ̈ܶܐ ܕܰܩܝܳܡܬܳܐ ܐܰܙܠ̣ܶܓܬ ܥܰܠ ܥܺܕܬܳܐ ܟܰܠܬܳܐ ܒܰܪܬ݀ ܐܺܝܡܳܡܳܐ ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܚܰܕܶܬܬ ܥܰܬܺܝܩܽܘܬ ܓܶܢܣܰܢ ܐܰܢ̱ܬ ܕܺܐܝܬܰܝܟ ܚܰܕܽܘܬܳܐ ܘܣܰܒܪܳܐ ܕܰܐܒܺܝ̈ܠܐܷ ܘܰܡܥܳܩ̈ܶܐ. ܒܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܛܰܝܒܽܘܬܳܟ ܣܥܰܪܬ ܠܘܳܬܰܢ ܒܚܰܕܽܘܬܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕ̈ܘܳܬܳܐ ܕܥܺܕܬܳܟ ܩܰܕܺܝܫܬܳܐ ܡܰܘܕܝܳܐ ܒܚܰܫܰܝ̈ܟ ܘܰܡܚܰܒܒܳܐ ܠܫܽܘ̈ܡܳܬܳܟ ܘܣܳܓܕܳܐ ܠܰܩܝܳܡܬܳܟ. ܘܡܶܬܟܰܫܦܺܝܢܰܢ ܠܛܰܝܒܽܘܬܳܟ: ܕܠܐܴ ܬܶܥܽܘܠ ܠܕܺܝܢܳܐ ܥܰܡܗܽܘܢ ܕܥܰܢܺܝ̈ܕܺܝܢ ܘܥܰܡܰܢ: ܡܶܛܽܠ ܕܠܐܴ ܙܳܟ̇ܶܐ ܩܕܳܡܰܝܟ ܟܽܠ ܕܚܰܝ ܘܠܐܴ ܬܰܒܗܶܬ ܠܰܢ ܒܝܰܘܡܳܐ ܗ̇ܰܘ ܐ̱ܚܪܳܝܳܐ ܕܦܳܣܺܝ̈ܩܳܬܳܐ: ܠܰܢ ܗ̇ܳܢܽܘܢ ܕܠܐܴ ܒܗܶܬܢܰܢ ܒܚܰܫܰܝ̈ܟ ܦܳܪ̈ܽܘܩܳܝܶܐ ܘܰܬܢܰܟܪܶܐ ܠܰܢ ܡ̣ܶܢ ܛܽܘܒܳܐ ܗ̇ܰܘ ܕܶܐܫܬܰܘܕܺܝܬ ܠܗ̇ܳܢܽܘܢ ܕܗܰܝܡܶܢܘ ܒܳܟ ܬܪܺܝܨܳܐܺܝܬ: ܘܠܐܴ ܬܶܪܕܶܐ ܠܰܢ ܒܪܽܘܓܙܳܐ ܘܰܒܚܶܡܬܳܐ: ܠܰܢ ܗ̇ܳܢܽܘܢ ܐܰܝܠܶܝܢ ܕܰܐܪܓܶܙܢܳܟ ܒܡܰܗܡܝܳܢܽܘܬܰܢ: ܐܶܠܐܴ ܫܰܟܶܢ ܠܰܢ ܚܰܝ̈ܶܐ ܠܐܴ ܥܕܺܝ̈ܠܐܷ. ܘܗܰܒ ܠܰܢ ܥܺܐܕܳܐ ܕܫܰܝܢܳܐ ܘܕܰܫܠܳܡܳܐ ܘܰܠܥܰܢܺܝ̈ܕܶܐ ܕܡܶܢܰܢ ܦܛܰܪܘ ܒܰܬܪܺܝܨܽܘܬ ܫܽܘܒܚܳܐ ܫܰܟܶܢ ܢܝܳܚܬܳܐ ܘܒܽܘܣܳܡܳܐ ܒܰܐܘ̈ܳܢܶܐ ܕܰܪܘܳܙܳܐ ܘܰܕܚܰܕ̈ܘܳܬܳܐ ܐܰܝܟܰܢܳܐ ܕܰܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܒܡܰܫܟ̈ܢܶܐ ܕܟܺܐܢ̈ܶܐ ܒܥܽܘ̈ܒܶܐ ܕܙܰܕܺܝ̈ܩܶܐ ܒܰܡ̈ܛܰܠܠܐܷ ܕܢܰܨܺܝ̈ܚܶܐ: ܐܰܫܪܳܐ ܡܳܪܝܳܐ ܠܥܰܒܕܰܝ̈ܟ ܗ̇ܳܢܽܘܢ ܕܰܥܡܰܠܘ ܥܰܠ ܣܰܒܪܳܟ: ܘܩܰܒܶܠܳܝܗܝ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܠܳܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܰܦܨܚܳܢܺܝܬܰܢ ܘܰܡܚܰܕܬܳܢܺܝܬܰܢ ܐܰܝܟܰܢܳܐ ܕܢܰܘܕܶܐ ܠܳܟ ܘܠܐܱܒܽܘܟ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܰܒܽܘܥܳܐ ܕܚܰܝ̈ܐ ܘܰܡܥܺܝܢܳܐ ܕܠܐܴ ܓܳܝܙܳܐ ܘܥܽܘܕܪ̈ܳܢܶܐ ܘܳܐܣܘ̈ܳܬܳܐ: ܠܗ̇ܰܘ ܕܢܰܚܡܶܗ ܠܓܶܢܣܰܢ ܒܰܩܝܳܡܬܶܗ: ܘܰܐܣܓܺܝ ܠܶܗ ܒܣܰܒܪ̈ܰܘܗܝ ܫܰܪܺܝܪ̈ܶܐ ܟܽܠ ܥܽܘܕܪ̈ܳܢܶܐ: ܠܗ̇ܰܘ ܕܰܐܩܺܝܡ ܠܰܢ ܡ̣ܶܢ ܡܰܦܽܘܠܬܰܢ: ܘܰܐܬܪܳܐ ܕܒܽܘ̈ܣܳܡܶܐ ܘܚܰܕ̈ܘܳܬܳܐ ܐܶܫܬܰܘܕܺܝ ܕܢܶܬܶܠ ܠܰܢ: ܠܗ̇ܰܘ ܕܰܐܙܥܶܩ ܒܶܗ ܒܡܰܘܬܳܐ ܘܰܐܡܺܝܬܶܗ: ܘܒܰܫܝܽܘܠ ܘܰܐܚܪܒܳܗ̇: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

 

ܡܳܪܰܢ ܝܶܫܽܘܥ ܡܫܺܝܚܳܐ ܗ̇ܰܘ ܕܰܐܠܒܶܫܬܳܢ ܠܐܴ ܡܶܬܚܰܒܠܳܢܽܘܬܳܐ ܒܝܰܕ ܩܝܳܡܬܳܐ ܕܺܝܠܳܟ ܡܰܠܝܰܬ݀ ܬܶܗܪܳܐ ܕܡ̣ܶܢ ܡܺܝ̈ܬܶܐ: ܐܰܢ̱ܬ ܡܳܪܝ ܫܰܪܰܪܬܳܗ̇ ܠܰܩܝܳܡܬܳܟ ܡܥܰܠܰܝܬܳܐ ܒܙܰܒ̈ܢܳܬܳܐ ܣܒܺܝ̈ܣܳܬܳܐ ܘܣܰܓܺܝ̈ܳܐܬܳܐ: ܒܠܶܒܰܘ̈ܳܬܐ ܕܬܰܠܡܺܝ̈ܕܶܐ ܕܺܝܠܳܟ ܕܟܰܝ̈ܳܐ ܘܩܰܕܺܝ̈ܫܶܐ. ܘܰܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܚܰܘܺܝܬ ܠܗܽܘܢ ܢܰܦܫܳܟ ܘܚܰܣܶܕܬ ܠܰܦܠܺܝܓܽܘܬ ܗܰܝܡܳܢܽܘܬܗܽܘܢ ܒܗ̇ܳܝ ܕܠܐܴ ܗܰܝܡܶܢܘ ܠܗ̇ܳܢܽܘܢ ܕܩܰܕܶܡܘ ܐܶܬܚܰܘܺܝ ܠܗܽܘܢ ܐ̱ܪܳܙܳܐ ܪܰܒܳܐ ܕܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ: ܘܛܽܘܒܳܐ ܝܰܗܒܬ ܠܐܱܝܠܶܝܢ ܕܠܐܴ ܚܙܰܐܘܽܘܟ ܘܗܰܝܡܶܢܘ ܒܳܟ. ܠܦܽܘܩܕܳܢܳܟ ܡܳܪܳܢܳܝܳܐ ܕܶܐܡܰܪܬ ܠܗܽܘܢ ܒܠܺܠܝܳܐ ܐ̱ܚܪܳܝܳܐ ܕܚܰܫܳܟ ܕܒܳܬܰܪ ܕܩܳܐܶܡ ܐ̱ܢܳܐ ܩܳܕܶܡ ܐ̱ܢܳܐ ܠܟܽܘܢ ܠܰܓܠܺܝܠܐܴ ܫܡܰܥܘ: ܠܛܽܘܪܳܐ ܕܰܓܠܺܝܠܐܴ ܟܰܢܶܫܘ ܗ̣ܘܰܘ ܬܰܠܡܺܝ̈ܕܶܐ ܘܰܡܣܰܒܪ̈ܳܢܶܐ ܘܰܐܚܺܝ̈ܢ ܚܰܡܶܫܡܳܐܐ: ܐܰܝܟ ܦܽܘܩܕܳܢܳܐ ܕܪܰܒܽܘܬܳܟ: ܘܰܐܝܟ ܣܰܒܪ̈ܳܬܳܐ ܕܩܰܒ̈ܶܠܝ ܢܰܟ̈ܦܳܬܳܐ: ܠܛܽܘܪܳܐ ܕܰܓܠܺܝܠܐܴ ܕܕܽܘܟܬܳܐ ܓܠܺܝܠܬܳܐ ܗ̇ܰܘ ܘܡܶܬܥܰܪܓܠܳܢܺܝܬܳܐ ܟܰܢܶܫܬ ܠܪ̈ܰܚܡܰܝܟ ܕܰܠܗܽܘܢ ܬܥܰܪܓܶܠ ܡ̈ܶܠܐܷ ܐܠܰܗܳܝ̈ܳܬܳܐ ܘܰܕܪ̈ܳܡܳܢ ܡ̣ܶܢ ܛܽܘܪܳܐ: ܒܰܚܙܳܬܳܟ ܡܰܠܝܰܬ݀ ܬܶܗܪܳܐ ܠܓܽܘܕܳܐ ܕܚܰܒܺܝ̈ܒܰܝܟ ܕܥܰܠ ܩܝܳܡܬܳܟ ܬܫܰܪܰܪ ܐܶܢܽܘܢ: ܘܡܶܢܗܽܘܢ ܐܶܬܦܰܠܰܓܘ ܗܘܰܘ: ܘܡܶܢܗܽܘܢ ܗܰܝܡܶܢܘ ܘܰܣܓܶܕܘ ܠܳܟ: ܒܡܶܣܬܰܘܕܳܢܽܘܬܳܟ ܕܥܰܡ ܫܶܡܥܽܘܢ ܘܥܰܡ ܚܰܒܪ̈ܰܘܗܝ ܚܰܕܽܘܬܳܐ ܘܰܪܘܳܙܳܐ ܡܠܰܝܬ ܠܶܒܰܝ̈ܗܽܘܢ ܟܰܕ ܐܶܡܰܪܬ ܠܗܽܘܢ ܠܺܝ ܐܶܬܺܝܗܶܒ ܟܽܠ ܫܽܘܠܛܳܢ ܒܰܫܡܰܝܳܐ ܘܥܰܠ ܐܰܪܥܳܐ: ܕܫܽܘܠܛܳܢܳܟ ܩܰܫܺܝܫ ܗܘܳܐ ܥܰܡ ܡܬܽܘܡܳܝܽܘܬܳܟ: ܘܥܰܠ ܗ̇ܳܝ ܒܰܫܡܰܝܳܐ ܘܒܰܐܪܥܳܐ ܡܬܺܝܚ ܗܘܳܐ: ܘܒܰܫܡܳܟ ܒܪܶܟܘ ܘܟܳܦܘ ܕܰܠܬܰܚܬ ܡ̣ܶܢ ܐܰܪܥܳܐ: ܠܘܳܬ ܟܽܠ ܥܰܡ̈ܡܺܝܢ ܕܒܰܒܪܺܝܬܳܐ ܫܰܕܰܪܬ ܐܶܢܽܘܢ: ܘܕܰܢܬܰܠܡܕܽܘܢ ܠܟܽܠ ܐܶܡܘ̈ܳܢ: ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܦܰܩܶܕܬ ܐܶܢܽܘܢ. ܙܶܠܘ ܠܟܽܘܢ ܐܠܰܦܘ ܠܡܶܛܰܪ ܦܽܘܩܕ̈ܳܢܰܝ ܘܢܳܡܽܘ̈ܣܰܝ ܕܰܚܘܺܝܬܟܽܘܢ ܘܰܐܠܶܦܬܟܽܘܢ ܘܰܕܥܰܡܟܽܘܢ ܐܺܝܬܰܝ ܥܕܰܡܳܐ ܠܫܽܘܠܳܡ ܥܳܠܡܳܐ: ܟܽܠ ܐ̱ܪ̈ܳܙܺܝܢ: ܘܟܽܠ ܛܽܘܦܣܺܝ̈ܢ ܕܟܽܠ ܦ̈ܶܠܐܴܬܳܐ ܕܨܳܪܘ ܠܳܟ ܚܰܙܳܝ̈ܶܐ ܘܰܡܣܰܒܪ̈ܳܢܶܐ ܒܓܶܠܝܳܢܰܝ̈ܗܽܘܢ ܓܠܰܝܬ ܠܗܽܘܢ ܘܰܠܪ̈ܶܥܝܳܢܰܝܗܽܘܢ ܢܰܗܰܪܬ. ܥܶܠܳܝ̈ܶܐ ܪ̈ܽܘܚܳܢܳܝܶܐ ܕܺܝܠܺܝܕܽܘܬܳܟ ܗ̇ܳܝ ܡܬܽܘܡܳܝܬܳܐ ܘܠܐܴ ܙܰܒܢܳܝܬܳܐ ܡܒܰܕܩܺܝܢ ܠܗܽܘܢ ܫܰܘܕܰܥܬ ܘܠܰܢܒܺܝܰܘ̈ܳܬܳܐ ܕܚܰܙܳܝ̈ܶܐ ܕܶܐܬܢܰܒܺܝܘ ܥܰܠ ܝܰܠܕܳܟ ܕܒܰܒܣܰܪ ܕܡ̣ܶܢ ܒܬܽܘܠܬܳܐ ܡܰܪܝܰܡ ܠܦܽܘܪܩܳܢܳܐ ܕܳܐܕܳܡ ܚܰܘܺܝܬ ܐܶܢܽܘܢ ܘܰܓܡܰܪܬ ܐܶܢܽܘܢ: ܠܚܰܫܰܝ̈ܟ ܨܶܒܝܳܢ̈ܳܝܶܐ ܘܠܐܴ ܥܕܺܝ̈ܠܐܷ: ܘܗܳܠܶܝܢ ܙܳܕܶܩ ܗܘܳܐ ܠܺܝ ܕܶܐܚܰܫ ܡ̣ܶܢ ܩܰܫܺܝ̈ܫܶܐ ܘܣܳܦܪ̈ܶܐ ܕܥܰܡܳܐ ܠܗܽܘܢ ܦܰܫܶܩܬ: ܠܢܽܘܚܳܡܳܟ ܬܠܺܝܬܳܝ ܝܰܘ̈ܡܶܐ ܕܡ̣ܶܢ ܩܰܒܪܳܐ: ܐܰܝܟ ܕܶܐܫܬܰܘܕܺܝܬ ܥܺܝܢ ܒܰܓܠܐܷ ܙܰܒܢ̈ܳܬܳܐ ܣܰܓܺܝ̈ܳܐܬܳܐ ܚܰܘܺܝܬ ܐܶܢܽܘܢ. ܠܛܽܘܪܳܐ ܗܳܢܳܐ ܕܰܓܠܺܝܠܐܴ ܘܰܐܦܨܰܚܬ ܠܐܱܝܟܳܐ ܕܰܠܗܽܘܢ ܘܰܥܶܕܬ ܘܨܰܝܶܒܬ ܐܶܢܽܘܢ: ܘܡ̣ܶܢ ܪܰܘܒܳܐ ܝܽܘܕܳܝܳܐ ܫܰܘܙܶܒܬ ܐܶܢܽܘܢ: ܘܰܒܢܰܘܚܳܐ ܡܚܰܪܰܪ ܡ̣ܶܢ ܩܶܢܛܳܐ ܐܰܩܺܝܡܬ ܐܶܢܽܘܢ. ܠܩܳܠܳܟ ܡܚܰܕܝܳܢܳܐ ܘܡܰܥܒܰܪ ܡ̣ܶܢ ܟܽܠ ܐܰܫܡܰܥܬ ܐܶܢܽܘܢ: ܘܡ̣ܶܢ ܛܽܘܪܳܐ ܡܥܰܠܝܳܐ ܗ̇ܰܘ ܕܺܐܝܬܽܘܬܳܟ ܡ̈ܶܠܐܷ ܚܰܝ̈ܳܬܳܐ ܡܠܰܝܬ ܐܶܢܽܘܢ: ܘܰܐܝܟ ܦܽܘܩܕܳܢܳܟ ܫܒܺܝܚܳܐ ܘܰܡܠܐܷ ܬܶܗܪܳܐ ܠܰܣܒܰܪܬܳܐ ܐܶܘܢܓܶܠܳܝܬܳܐ ܢܦܰܩܘ ܘܰܠܥܰܡ̈ܡܶܐ ܕܰܟܦܺܝ̈ܦܳܢ ܗܘ̈ܰܝ ܩܰܘ̈ܡܳܬܗܽܘܢ ܒܕܶܚܠܰܬ݀ ܨܰܠܡ̈ܶܐ ܬܰܪܶܨܘ: ܘܡ̈ܶܠܐܷ ܩܰܕܺܝ̈ܫܳܬܳܐ ܡ̣ܶܢ ܪܰܘܡܳܐ ܘܰܡܥܰܠܝܳܐ ܕܰܐܠܳܗܽܘܬܳܟ: ܐܰܝܟ ܟܺܐܦ̈ܶܐ ܦܰܣܶܠܘ ܘܥܰܪܓܶܠܘ ܠܒܶܢܝܳܢ ܟܽܠܶܗ ܥܳܠܡܳܐ ܫܰܟܠܶܠܘ ܘܰܐܩܺܝܡܘ ܐܰܝܟ ܨܶܒܝܳܢܳܟ: ܐܰܫܡܰܥ ܠܰܢ ܡܳܪܝܳܐ ܩܳܠܳܟ ܐܰܟܘܳܬܗܽܘܢ ܘܒܰܝܰܐܐ ܠܰܢ ܒܰܚܙܳܬܳܟ ܘܰܥܢܺܝ ܠܰܓܥܳܬܰܢ ܘܰܣܡܽܘܟ ܬܰܪ̈ܥܝܳܬܰܢ ܘܩܰܕܶܫ ܬܺܐܪ̈ܳܬܰܢ: ܘܰܐܫܘܳܐ ܠܰܢ ܕܢܶܬܒܢܶܐ ܒܒܶܢܝܳܢܗܽܘܢ ܘܥܰܡܗܽܘܢ ܟܽܠܰܢ ܒܢ̈ܰܝ ܥܺܕܬܳܐ ܡܰܣܩܺܝܢܰܢ ܠܳܟ ܟܽܠ ܬܶܫܒ̈ܚܳܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܒܰܟܠܺܝܠ ܒܽܘܪ̈ܟܳܬܳܐ ܐܠܰܗܳܝ̈ܳܬܳܐ ܘܫܽܘ̈ܟܳܢܶܐ ܪ̈ܽܘܚܳܢܳܝܶܐ ܨܰܒܶܬ ܡܳܪܝ ܠܥܺܕܬܳܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܰܠܝܰܬ݀ ܚܰܕ̈ܘܳܬܳܐ. ܘܛܰܠܶܩ ܡܶܢܰܢ ܠܟܽܠ ܚܽܘܫܳܒܳܐ ܣܪܺܝܩܳܐ: ܘܙܰܘܥܳܐ ܐܰܝܢܳܐ ܕܠܳܟ ܠܐܴ ܫܳܦܰܪ: ܘܚܰܕܳܐ ܠܰܢ ܒܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܒܝܰܕ ܡܰܥܒܕܳܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܶܠܬܳܐ ܐܠܰܗܳܐ ܕܶܐܬܒܰܣܰܪ ܘܝܰܩܰܪ ܠܰܟܝܳܢܳܐ ܐ̱ܢܳܫܳܝܳܐ ܕܡܶܢܶܗ ܐܶܬܓܥܶܠ: ܠܗ̇ܰܘ ܠܐܴ ܡܳܝܽܘܬܳܐ ܕܥܰܡ ܡܰܘܬܳܐ ܐܶܬܥܰܪܙܰܠ ܘܒܰܛܶܠ ܠܐܘܚܕܳܢܶܗ ܕܒܺܝܫܳܐ ܡܳܪܽܘܕܳܐ: ܠܗ̇ܰܘ ܚܰܝܳܐ ܕܶܐܬܬܣܺܝܡ ܒܓܰܘ ܩܰܒܪܳܐ ܘܰܠܥܽܘܒܳܗ̇ ܕܰܫܝܽܘܠ ܕܳܘܺܝܬܳܐ ܢܰܦܶܨ: ܠܗ̇ܰܘ ܡܪܰܚܡܳܢܳܐ ܕܰܠܓܶܢܣܰܢ ܕܶܐܫܬܰܥܒܰܕ ܠܰܚܒܳܠܐܴ ܠܘܳܬ ܚܺܐܪܽܘܬܳܐ ܩܰܕܡܳܝܬܳܐ ܒܰܩܝܳܡܬܶܗ ܐܠܰܗܳܝܬܳܐ ܐܰܦܢܺܝ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܚܰܝܳܐ ܕܡܺܝܬ ܒܰܒܣܰܪ: ܗ̇ܰܘ ܠܐܴ ܡܳܝܽܘܬܳܐ ܒܰܟܝܳܢܳܐ ܕܰܛܥܶܡ ܡܰܘܬܳܐ ܥܰܠ ܕܶܐܬܒܰܪܢܰܫ. ܩܛܺܝܠܐܴ ܕܩܰܛܠܶܗ ܠܰܚܛܺܝܬܳܐ ܒܩܶܛܠܶܗ. ܡܺܝܬܳܐ ܕܰܐܚܪܒܳܗ̇ ܠܰܫܝܽܘܠ ܒܢܽܘܚܳܡܶܗ: ܫܺܝܛܳܐ ܒܰܚܙܳܬܳܐ ܕܣܽܘܪܳܩܶܗ: ܘܰܡܫܰܒܚܳܐ ܒܰܓܢܺܝܙܽܘܬܳܐ ܕܰܐܠܳܗܽܘܬܶܗ ܡܡܰܟܟܳܐ ܕܐ̱ܢܳܫܳܐ ܒܝܰܕ ܚܰܫ̈ܶܐ ܕܩܰܒܶܠ ܒܨܶܒܝܳܢܶܗ: ܘܰܡܪܰܡܪܡܳܐ ܒܳܐܬܘ̈ܳܬܳܐ ܕܰܣܥܰܪ ܒܰܙܩܺܝܦܶܗ: ܘܒܺܝܫܳܐ ܚܰܪܡܳܢܳܐ ܒܝܰܕ ܚܣܳܡܶܗ ܩܶܛܠܐܴ ܥܰܬܶܕ ܠܶܗ: ܘܡܰܘܬܳܐ ܛܪܽܘܢܳܐ ܒܶܝܬ ܥܰܢܺܝ̈ܕܶܐ ܐܰܥܶܠ ܣܳܡܶܗ. ܘܥܰܠ ܠܒܶܝܬ ܡܺܝ̈ܬܶܐ ܒܰܪ ܚܺܐܪ̈ܶܐ: ܘܰܐܡܠܶܟ ܒܶܝܬ ܫܟܺܝ̈ܒܶܐ ܝܳܗܶܒ ܥܽܘܕܪ̈ܳܢܐ ܘܰܡܦܰܠܶܓ ܚܰܝ̈ܶܐ: ܫܝܽܘܠ ܒܠܰܥܬܶܗ ܘܰܓܢܶܐ ܒܳܗ̇ ܘܰܪܦܳܬ݀ ܒܳܗ̇ ܘܰܪܥܶܠܘ ܫܶܬܶܐܣܶܝ̈ܗ̇ ܢܗܰܡ ܒܳܗ̇ ܐܰܝܟ ܐܰܪܝܳܐ ܘܶܐܬܬܙܺܝܥܘ ܥܳܡܽܘܪ̈ܶܝܗ̇ ܐܰܦܢܝܰܬ݀ ܓܽܘܥܠܳܢܳܐ ܕܫܶܩܠܰܬ݀ ܘܣܶܦܩܰܬ݀ ܓܰܙ̈ܶܐ ܕܚܰܡܠܰܬ݀ ܫܪܳܬ݀ ܠܡܺܝ̈ܬܶܐ ܕܚܶܠܨܰܬ݀ ܘܰܐܗܦܟܰܬ݀ ܠܓܳܠܽܘܬܳܐ ܕܛܶܡܪܰܬ݀ ܫܒܺܝܬܳܐ ܕܡ̣ܶܢ ܕܳܪ̈ܰܝ ܥܳܠܡ̈ܶܐ: ܡܰܠܟܳܐ ܥܰܫܺܝܢܳܐ ܕܥܰܠ ܥܰܠ ܚܰܣܺܝܢܳܐ ܘܣܰܚܦܶܗ ܘܰܗܦܰܟ ܠܫܽܘܠܛܳܢܶܗ ܕܰܛܪܽܘܢܳܐ ܘܩܰܛܠܶܗ: ܘܰܪܨܶܗ ܠܪܺܝܫܶܗ ܕܚܶܘܝܳܐ ܠܺܝܛܳܐ ܕܩܰܛܠܶܗ ܠܐܴܕܳܡ ܒܰܙܩܺܝܦܳܐ: ܘܩܳܡ ܒܝܰܘܡܳܐ ܬܠܺܝܬܳܝܳܐ ܬܠܺܝܬܳܝܳܗ̇ ܕܰܐܠܳܗܽܘܬܳܐ: ܘܚܰܕܺܝ ܘܰܐܦܨܰܚ ܠܟܽܠܗܶܝܢ ܒܶܪ̈ܝܳܬܳܐ: ܘܰܐܢܗܰܪ ܠܣܰܘ̈ܦܶܐ ܘܦܶܢ̈ܝܳܬܳܐ ܠܐܴ ܟܰܬܰܪ ܒܰܫܝܽܘܠ ܕܠܐܴ ܫܰܒܩܶܗ ܐܰܒܽܘܗܝ: ܘܠܐܴ ܚܙܳܐ ܚܒܳܠܐܴ ܕܠܰܚܒܳܠܐܴ ܕܰܒܩܰܒܪ̈ܶܐ ܫܪܳܐ: ܚܰܣܝܳܐ ܠܐܴ ܡܶܬܚܰܒܠܳܢܳܐ ܕܶܐܬܢܰܚܰܡ: ܘܠܐܴ ܡܳܝܽܘܬܳܐ ܕܰܐܟܪܶܙ ܚܰܝ̈ܶܐ ܠܡܳܝܽܘ̈ܬܶܐ ܒܰܩܝܳܡܬܶܗ: ܣܥܰܪ ܐܽܘܪܚܶܗ ܘܰܢܦܰܩ ܡ̣ܶܢ ܩܰܒܪܳܐ ܐܰܝܟ ܚܰܬܢܳܐ ܡ̣ܶܢ ܒܶܝܬ ܓܢܽܘܢܶܗ ܘܰܫܒܰܩ ܟܶܬܳܢ̈ܶܐ ܘܫܽܘ̈ܘܕܳܥܶܐ ܕܚܰܫ̈ܶܐ ܕܰܡܚܺܝܠܽܘܬܳܐ ܕܰܡܥܰܛܰܦ ܗܘܳܐ: ܘܶܐܬܥܰܛܰܦ ܒܶܪ̈ܝܳܬܳܐ ܢܰܚ̈ܬܶܐ ܕܫܽܘܒܚܳܐ ܟܰܕ ܢܳܦܶܩ ܗܘܳܐ. ܐܰܪܓܶܫܘ ܒܶܗ ܥܺܝܪ̈ܰܝ ܪܰܘܡܳܐ: ܘܰܢܚܶܬܘ ܠܐܻܝܩܳܪ ܩܝܳܡܬܶܗ: ܘܰܚܙܰܘ ܐܶܢܽܘܢ ܩܶܣܛܽܘܢܳܪ̈ܶܐ ܘܰܪܥܶܠܘ: ܝܺܬܶܒܘ ܪ̈ܽܘܚܳܢܶܐ ܨܶܝܕ ܩܰܒܪܳܐ ܘܢܳܛܪܺܝܢ ܠܶܗ: ܘܰܒܠܰܥܘ ܒܰܬܘܳܪܳܐ ܢܳܛܽܘܪ̈ܶܐ ܘܰܕܚܶܠܘ: ܫܒܰܩܘ ܩܰܒܪܳܐ ܘܰܥܪܰܩܘ ܒܰܪܗܺܝܒܽܘܬܳܐ ܟܰܕ ܕܰܚܺܝܠܺܝܢ. ܚܰܦܝܽܘܗܝ ܠܰܫܪܳܪܳܐ ܒܒܶܗܬܰܬܗܽܘܢ: ܘܠܐܴ ܐܰܟܪܶܙܘ ܬܶܕܡܽܘܪܬܳܐ ܚܕܰܬܳܐ ܕܶܐܣܬܰܥܪܰܬ݀: ܡܰܠܐܱܟ̈ܶܐ ܗܘܰܘ ܟܳܪ̈ܽܘܙܶܐ ܠܰܩܝܳܡܬܳܐ ܒܦܽܘܡ ܪ̈ܽܘܚܳܢܶܐ ܐܶܬܟܪܶܙ ܣܰܒܪܳܐ ܛܳܒܳܐ ܠܒܶܪ̈ܝܳܬܳܐ. ܐܶܬܶܐܡܰܪ ܓܶܝܪ ܡܶܢܗܽܘܢ ܠܢܶܫ̈ܶܐ ܕܝܳܕܥܺܝܢܰܢ ܕܰܠܝܶܫܽܘܥ ܗ̇ܰܘ ܕܶܐܙܕܩܶܦ ܒܳܥ̈ܝܳܢ ܐܢ̱ܬܶܝܢ ܠܰܝܬܰܘܗܝ ܬܢܳܢ: ܩܳܡ ܠܶܗ ܒܫܽܘܒܚܳܐ ܘܠܰܫܡܰܝܳܐ ܓܶܝܪ ܐܶܬܥܰܠܺܝ: ܡܶܛܽܠܡܳܢܳܐ ܒܳܥ̈ܝܳܢ ܐܢ̱ܬܶܝ̈ܢ ܚܰܝܳܐ ܒܶܝܬ ܡܺܝ̈ܬܶܐ: ܠܰܒ̈ܢܳܬ ܚܰܘܳܐ ܕܰܐܥܠܰܬ݀ ܠܰܘܛܬܳܐ ܠܥܳܠܡܳܐ ܐܶܣܬܰܒܪܰܬ݀ ܚܰܕܽܘܬܳܐ ܒܩܰܕܡܳܝܬܳܐ: ܘܰܐܝܟܳܐ ܕܣܶܓܝܰܬ݀ ܠܳܗ̇ ܚܛܺܝܬܳܐ ܬܰܡܳܢ ܐܶܬܝܰܬܪܰܬ݀ ܛܰܝܒܽܘܬܳܐ: ܗܳܠܶܝܢ ܗܘ̈ܰܝ ܡܣܰܒܪ̈ܳܢܝܳܬܳܐ ܕܰܩܝܳܡܬܳܐ ܠܰܫܠܺܝ̈ܚܶܐ. ܠܗܳܠܶܝܢ ܦܰܩܶܕܘ ܕܰܢܕܺܝ̈ܩܳܢ ܘܢܶܫܬܰܪܪ̈ܳܢ ܘܰܠܗܳܠܶܝܢ ܐܶܫܬܰܡܥܰܬ݀ ܠܐܴ ܬܶܕܚ̈ܠܳܢ ܬܳܐܝܶܝ̈ܢ ܘܰܚܙܰܐܝܶܝ̈ܢ ܕܽܘܟܬܳܐ ܕܣܺܝܡ ܗܘܳܐ ܒܳܗ̇ ܡܳܪܰܢ: ܙܶܠܶܝ̈ܢ ܒܰܥܓܰܠ ܣܰܒܰܪ̈ܶܝܢ ܠܰܫܠܺܝ̈ܚܶܐ ܕܰܐܒܺܝܠܺܝܢ: ܪ̈ܗܶܛܝ ܡܶܢܫܶܠܝ ܨܶܝܕ ܬܰܠܡܺܝ̈ܕܶܐ ܕܰܡܒܰܕܪܺܝܢ: ܙܶܠܶܝ̈ܢ ܟܰܢܰܫܶܝ̈ܢ ܠܰܚܕܽܘ̈ܓܶܐ ܕܰܡܛܰܫܶܝܢ: ܫܡܰܥܘ ܡܶܢܗܶܝܢ ܫܶܡܥܽܘܢ ܘܝܽܘܚܰܢܳܢ ܘܰܪܗܶܛܘ ܟܰܕ ܪܗܺܝܒܺܝܢ ܘܰܡܬܰܚ ܪܶܗܛܶܗ ܒܰܪ ܙܰܒܕܰܝ ܘܩܰܕܡܶܗ ܠܣܳܒܳܐ ܒܰܪ ܝܳܘܢܰܐ: ܡܛܳܐ ܠܩܰܒܪܳܐ ܥܠܰܝܡܳܐ ܩܰܕܡܳܝܳܐ ܘܠܐܴ ܥܰܠ: ܢܛܰܪ ܛܶܟܣܳܐ ܠܪܺܝܫ ܬܰܠܡܺܝ̈ܕܶܐ ܐܰܝܟ ܘܳܠܝ̈ܳܬܳܐ. ܘܡ̣ܶܢ ܚܰܕܽܘܬܳܐ ܕܠܶܒܗܽܘܢ ܟܰܢܶܫ̈ܝ ܠܓܽܘܕܳܐ ܕܰܫܠܺܝ̈ܚܶܐ: ܘܰܠܬܽܐܘܡܰܐ ܕܶܐܬܦܰܠܰܓ ܥܰܠ ܩܝܳܡܬܶܗ ܡܰܠܝܰܬ݀ ܚܰܕ̈ܘܳܬܳܐ ܘܫܰܪܪܶܗ ܡܳܪܰܢ ܒܓܶܫܬܳܐ ܘܰܕܕܰܦܢܶܗ ܡܰܐܚܝܳܢܺܝܬܳܐ: ܟܰܕ ܓܰܫ ܠܕܽܘܟ̈ܝܳܬܳܐ ܕܨܶܨ̈ܶܐ ܘܰܠܣܶܛܪܶܗ ܗ̇ܰܘ ܕܶܐܬܬܰܪܰܥ ܒܠܽܘܟܳܝܬܳܐ: ܘܰܩܥܳܐ ܕܰܐܢ̱ܬ ܗ̣ܽܘ ܡܳܪܝ ܘܰܐܠܳܗܝ ܒܩܽܘܫܬܳܐ ܘܒܰܫܪܳܪܳܐ: ܛܽܘܒܰܝܗܽܘܢ ܠܐܱܝܠܶܝܢ ܕܠܐܴ ܚܙܰܐܘܽܘܟ ܘܗܰܝܡܶܢܘ ܒܳܟ. ܡܶܛܽܠ ܕܚܰܣܺܝܪܽܘܬ ܪܶܥܝܳܢܳܐ ܡ̣ܶܢ ܠܐܴ ܗܰܝܡܳܢܽܘܬܳܐ ܗܘܳܬ݀ ܠܐܻܝܣܪܳܐܶܝܠ: ܛܽܘܒܳܐ ܠܥܰܡ̈ܡܶܐ ܐܰܝܠܶܝܢ ܕܗܰܝܡܶܢܘ ܒܳܟ. ܘܒܶܗܬܬܳܐ ܠܐܱܝܠܶܝܢ ܕܰܟܦܰܪܘ ܒܳܟ: ܘܳܐܦ ܡܳܪܝ ܢܰܛܰܪ ܠܥܺܕܬܳܟ ܦܪܺܝܩܰܬ݀ ܒܰܩܝܳܡܬܳܟ ܗ̇ܳܝ ܕܗܰܝܡܢܰܬ݀ ܒܚܰܫܳܟ ܘܰܒܡܰܘܬܳܟ ܡܰܥܒܶܕ ܚܰܝ̈ܶܐ: ܒܰܪܶܟ ܠܝܰܠܕܶܝ̈ܗ̇ ܙܒܺܝ̣̈ܢܰܝ ܒܰܕܡܳܟ ܝܰܩܺܝܪܳܐ: ܘܰܐܦܨܰܚ ܠܐܱܝܠܶܝܢ ܕܰܒܥܺܐܕܳܟ ܚܳܕܶܝܢ: ܚܰܕܳܐ ܐܶܢܽܘܢ ܒܰܩܝܳܡܬܳܟ ܦܨܺܝܚܬܳܐ. ܘܰܡܠܺܝ ܐܶܢܽܘܢ ܫܪܳܪܳܟ: ܘܒܰܣܶܡ ܐܶܢܽܘܢ ܒܚܽܘܒܳܟ: ܘܰܐܥܶܠ ܐܶܢܽܘܢ ܠܩܰܘܡܳܐ ܕܡ̣ܶܢ ܝܰܡܺܝܢܳܟ ܐܰܝܟܰܢܳܐ ܕܡܶܢܟܽܠ ܘܡܶܛܽܠ ܟܽܠ ܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܥܛܪܐ

ܗܰܒܠܰܢ ܡܳܪܝ ܕܰܒܢܰܚ̈ܬܶܐ ܫܰܦܺܝܪ̈ܶܐ ܕܰܥܒܳܕ̈ܶܐ ܛܳܒ̈ܶܐ ܘܰܒܨܶܒ̈ܬܶܐ ܪ̈ܽܘܚܳܢܶܐ: ܘܰܒܕܽܘܒܳܪ̈ܶܐ ܠܐܴ ܥܕܺܝ̈ܠܐܷ ܘܰܚܦܺܝ̈ܛܶܐ: ܢܩܰܕܶܡ ܐܰܦܰܝ̈ܟ ܦܨܺܝ̈ܚܳܬܳܐ ܒܬܰܘܕܺܝܬܳܐ. ܐܰܝܟ ܢܶܫ̈ܶܐ ܩܰܕܺܝ̈ܫܳܬܳܐ ܕܰܢܦܰܩ̈ܝ ܒܨܰܦܪܳܐ ܕܰܢܒܰܣ̈ܡܳܢ ܦܰܓܪܳܟ ܝܰܩܺܝܪܳܐ ܘܰܐܫܘܳܐ ܠܰܢ ܕܥܰܡ ܬܰܠܡܺܝ̈ܕܶܐ ܕܰܠܩܰܒܪܳܟ ܡܰܥܒܶܕ ܚܰܝ̈ܶܐ ܐܶܬܘܰܥܰܕܘ: ܢܶܬܒܰܣܰܡ ܒܰܫܠܳܡܳܐ ܕܡܶܢܳܟ ܘܢܶܚܕܶܐ ܒܢܽܘܚܳܡܳܟ ܘܢܰܘܕܶܐ ܘܰܢܫܰܒܰܚ ܠܝܰܡܳܐ ܕܰܚܢܳܢܳܟ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

ܚܘܬܡܐ

ܥܰܙܺܝܙܳܐ ܘܠܐܴ ܡܶܬܕܰܪܟܳܢܳܐ ܡܳܪܝܳܐ ܕܰܫܒܰܩ ܒܰܡܪ̈ܰܘܡܶܐ ܡܰܪܟܰܒܬܳܐ ܕܢܽܘܪܳܐ ܘܶܐܬܥܰܠܺܝ ܥܰܠ ܙܩܺܝܦܳܐ ܕܚܶܣܕܳܐ ܡܶܛܽܠ ܦܽܘܪܩܳܢܳܐ ܕܺܝܠܰܢ ܘܒܰܩܝܳܡܬܶܗ ܒܰܛܶܠ ܫܽܘܠܛܳܢܶܗ ܕܡܰܘܬܳܐ ܝܰܥܢܳܐ: ܗܰܒܠܰܢ ܡܳܪܝ ܕܰܢܫܰܒܚܳܟ ܫܒܺܝܚܳܐܺܝܬ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܡܫܺܝܚܳܐ ܣܰܒܪܳܐ ܕܥܺܕܬܶܗ: ܘܡܰܦܨܚܳܢܳܐ ܕܝܰܠܕܶܝ̈ܗ̇ ܝܽܘܡ ܥܰܕ̈ܥܺܐܕܰܘܗܝ ܐܠܰܗܳܝ̈ܶܐ ܡܳܪܰܢ܀

 

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ: ܘܝܰܡܳܐ ܠܐܴ ܡܰܘܦܝܳܢܳܐ ܕܛܳܒܽܘܬܳܐ: ܠܗ̇ܰܘ ܫܰܝܢܳܐ ܐܰܡܺܝܢܳܐ ܘܡܰܦܨܚܳܢܳܐ ܕܒܶܪ̈ܝܳܬܳܐ. ܠܗ̇ܰܘ ܕܰܒܫܰܝܢܳܐ ܕܺܝܠܶܗ ܚܙܺܝܩܺܝܢ ܘܩܳܝܡܺܝܢ ܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ ܘܰܫܠܳܡܳܐ ܕܺܝܠܶܗ ܐܰܓܥܶܠ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܟܰܕ ܐܳܡܰܪ: ܕܰܫܠܳܡܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ ܒܗܳܢܳܐ ܥܶܕܳܢܳܐ܀

ܣܕܪܐ

ܡܳܪܝܳܐ ܐܠܰܗܳܐ ܚܰܝܠܬܳܢܳܐ: ܘܓܰܢ̱ܒܳܪܳܐ ܡܳܪܳܐ ܕܥܳܠܡ̈ܶܐ: ܘܰܐܒܳܐ ܕܰܫܪܳܪܳܐ: ܪܳܡܳܐ ܘܰܡܥܰܠܝܳܐ ܒܬܶܫܒܽܘܚܬܶܗ: ܗ̇ܰܘ ܕܠܐܴ ܡܶܣܬܰܝܟܳܢܳܐ ܘܠܐܴ ܡܶܣܬܰܝܟܳܐ ܛܰܝܒܽܘܬܳܟ: ܘܠܐܴ ܡܶܬܬܟܺܝܠܐܴ ܪܶܚܡܰܬ݀ ܐ̱ܢܳܫܽܘܬܳܟ ܡ̣ܶܢ ܟܽܠܗܶܝܢ ܒܶܪ̈ܝܳܬܳܐ. ܗ̇ܰܘ ܕܒܰܫܦܺܝܥܽܘܬ ܪ̈ܰܚܡܰܝܟ ܡܬܽܘܡܳܝ̈ܶܐ ܐܰܢ̱ܬ ܠܳܟ ܒܨܶܒܝܳܢܳܟ ܐܶܬܬܰܚܬܺܝܬ ܕܰܫܦܰܪ ܠܳܟ: ܘܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ ܘܰܫܡܰܝ̈ܳܢܶܐ ܕܬܶܫܒܽܘܚܬܳܟ: ܠܦܽܘܬ ܦܽܘܪܩܳܢܳܐ ܕܺܝܠܰܢ ܘܰܕܓܶܢܣܰܢ ܡܚܺܝܠܐܴ ܘܬܰܚܽܘܒܳܐ: ܘܶܐܬܪܟܶܢܬ ܥܕܰܡܳܐ ܠܟܽܠܳܗ̇ ܗܳܕܶܐ ܡܰܟܺܝܟܽܘܬܳܐ ܕܒܰܪܢܳܫܳܐ ܬܶܗܘܶܐ: ܚܠܳܦ ܐܳܕܳܡ ܥܰܦܪܳܢܳܐ ܨܰܠܡܳܐ ܕܪܰܒܽܘܬܳܟ: ܚܠܳܦ ܡܰܪܟܰܒܬܳܐ ܗ̇ܳܝ ܕܰܟܪ̈ܽܘܒܶܐ: ܗ̇ܳܝ ܕܰܕܠܐܴ ܫܶܠܝܳܐ ܡܒܰܪܟܳܐ ܠܐܻܝܩܳܪ ܪܰܒܽܘܬܳܟ ܠܩܰܒܪܳܐ ܕܡܺܝ̈ܬܶܐ ܥܰܠܬ ܕܰܨܒܰܝܬ ܒܪܶܚܡܰܬ݀ ܐ̱ܢܳܫܽܘܬܳܟ: ܘܩܰܒܶܠܬ ܥܠܰܝܟ ܟܽܠܗܶܝܢ ܡܳܐܟ̈ܳܬܳܐ ܘܫܺܝ̈ܛܳܬܳܐ ܚܶܣܕܳܐ ܘܒܶܙܚܳܐ ܘܡܽܘܝܳܩܳܐ ܘܚܰܫ̈ܶܐ ܘܡܰܘܬܳܐ ܘܰܙܩܺܝܦܳܐ ܐܰܝܟܰܢܳܐ ܘܰܠܪܳܡܽܘܬܳܐ ܘܰܢܦܺܝܚܽܘܬܳܐ ܕܳܐܟܶܠܩܰܪܨܳܐ ܘܰܕܫܺܐܕ̈ܶܐ ܬܶܣܚܽܘܦ ܐܳܦ ܬܶܫܕܶܐ ܘܬܶܗܓܽܘܡ: ܘܰܠܥܰܡ̈ܡܶܐ ܘܟܶܢ̈ܫܶܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܣܚܺܝܦܺܝܢ ܗܘܰܘ ܘܰܥܓܺܝܢܺܝܢ ܒܓܽܘܡܳܨܳܐ ܘܚܰܒܪܳܐ ܕܰܚܛܺܝܬܳܐ ܘܛܳܥܝܽܘܬܳܐ ܕܰܦܬܰܟܪ̈ܶܐ: ܘܦܳܠܚܽܘܬܳܐ ܢܕܺܝܕܬܳܐ ܕܫܺܐܕ̈ܶܐ ܡܳܪ̈ܽܘܕܶܐ ܠܰܢ ܬܩܺܝܡ ܘܬܶܬܪܽܘܨ ܘܰܠܘܳܬ ܛܰܝܒܽܘܬܳܐ ܕܣܺܝܡܰܬ݀ ܒܢܰܝ̈ܳܐ ܐܶܡܳܐ ܕܺܝܠܰܢ ܩܰܕܡܳܝܬܳܐ ܐܰܘܟܺܝܬ ܝܳܪܬܽܘܬܰܢ ܬܥܰܠܐܷ ܠܰܢ ܘܬܰܦܢܶܐ: ܘܦܰܪܗܣܺܝܰܐ ܕܺܝܠܳܟ ܬܫܰܟܶܢ ܠܰܢ. ܘܒܰܒ̈ܢܳܬ ܩ̈ܳܠܐܷ ܕܫܽܘܒܚܳܐ ܘܰܕܩܽܘܒܳܠܛܰܝܒܽܘܬܳܐ ܕܰܦܐܶܐ ܠܐܱܠܳܗܳܐ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ ܟܽܠܰܢ ܥܰܒܕܰܝ̈ܟ ܡܗܰܓ̈ܓܰܝ ܒܥܳܒܽܘܪ̈ܝܳܬܳܐ: ܟܰܕ ܡܰܙܥܩܺܝܢܰܢ ܐܳܡܪܺܝܢܰܢ: ܒܪܺܝܟܳܐ ܗ̱̇ܝ ܡܶܐܬܺܝܬܳܟ ܕܰܠܘܳܬܰܢ ܐܠܰܗܰܢ: ܒܪܺܝܟܳܐ ܗ̱̇ܝ ܛܰܝܒܽܘܬܳܟ ܕܰܕܠܐܴ ܣܳܟܳܐ ܗ̱̇ܝ: ܒܪܺܝܟܳܐ ܗ̱̇ܝ ܡܪܰܚܡܳܢܽܘܬܳܟ ܕܡ̣ܶܢ ܡܪ̈ܰܘܡܶܐ ܪ̈ܳܡܶܐ ܕܺܝܠܳܟ ܠܘܳܬܰܢ ܐܰܪܟܶܢܬܳܟ: ܒܪܺܝܟܳܐ ܗ̱̇ܝ ܩܒܽܘܪܬܳܟ ܕܥܰܡ ܡܺܝ̈ܬܶܐ ܕܰܫܪܳܬ݀ ܠܫܽܘܠܛܳܢܶܗ ܕܡܰܘܬܳܐ: ܒܪܺܝܟܳܐ ܗ̱̇ܝ ܩܝܳܡܬܳܟ: ܦܰܐܝܰܬ݀ ܠܐܱܠܳܗܳܐ: ܕܰܒܫܽܘܒܚܳܐ ܪܰܒܳܐ ܩܳܡܬ ܡ̣ܶܢ ܩܰܒܪܳܐ: ܘܰܚܒܳܠܐܴ ܕܰܒܩܰܒܪ̈ܶܐ ܫܪܰܝܬ ܘܦܰܠܗܶܕܬ: ܘܒܰܕܓܽܘܢ ܥܰܡ ܬܰܠܡܺܝ̈ܕܶܐ ܕܰܠܩܰܒܪܳܟ ܘܶܐܬܘܰܥܰܕܘ ܗܘܰܘ ܪܽܘܚܳܢܳܐܺܝܬ ܠܒܶܝܬ ܨܰܘܒܳܟ ܡܶܬܡܰܛܶܝܢܰܢ: ܘܥܰܡ ܩܰܕܺܝ̈ܫܳܬܳܐ ܕܒܶܣ̈ܡܶܐ ܛܳܒ̈ܶܐ ܘܗܶܪ̈ܽܘܡܶܐ ܪ̈ܺܝܫܳܝܶܐ ܛܰܝܶܒ̈ܝ ܘܶܐܬܰܝ̈ ܕܰܢܒܰܣ̈ܡܳܢ ܠܳܟ ܐܶܠܐܴ ܒܕܽܘܒܳܪ̈ܶܐ ܛܳܒ̈ܶܐ ܕܰܡܪܰܥܶܝܢ ܠܳܟ ܪ̈ܺܝܚܳܢܶܐ ܒܰܣܺܝ̈ܡܶܐ ܕܡ̣ܶܢ ܢܰܦ̈ܫܳܬܰܢ ܢܶܬܚܙܶܐ ܩܕܳܡܰܝܟ ܕܰܡܩܰܪܒܺܝܢܰܢ ܠܳܟ: ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܘܰܡܦܺܝܣܺܝܢܰܢ ܠܰܡܪܰܚܡܳܢܽܘܬܳܟ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܡܳܪܽܘܬܳܟ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܥܰܡ ܒܳܥܘ̈ܳܬܳܐ ܕܺܝܠܰܢ ܘܰܕܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܘܰܐܫܘܳܐ ܠܰܢ ܒܝܰܘܡܳܐ ܗ̇ܰܘ ܪܰܒܳܐ ܠܓܰܠܝܽܘܬ ܐܰܦ̈ܶܐ ܕܰܥܒܳܕ̈ܶܐ ܛܳܒ̈ܶܐ: ܘܰܒܗܰܝܡܳܢܽܘܬܳܐ ܕܠܐܴ ܡܶܨܛܰܠܝܳܐ ܘܰܬܪܺܝܨܬܳܐ ܢܶܦܽܘܩ ܠܐܘܪܥܳܟ: ܡܶܐܬܺܝܬܳܟ ܡܶܣܬܰܟܝܳܢܺܝܬܳܐ ܗ̇ܳܝ ܕܰܒܫܽܘܠܳܢ ܕܙܰܒ̈ܢܶܐ ܗܳܘܝܳܐ ܡܳܐ ܕܳܐܬܶܐ ܐܰܢ̱ܬ: ܕܬܶܦܪܽܘܥ ܠܟܽܠ ܐ̱ܢܳܫ ܐܰܝܟ ܥܒܳܕ̈ܰܘܗܝ ܥܰܡ ܫܽܘܒܚܳܐ ܘܩܽܘܒܳܠܛܰܝܒܽܘܬܳܐ ܢܺܐܡܰܪ: ܒܪܺܝܟ ܗ̣ܽܘ ܕܶܐܬܳܐ ܘܚܰܪܰܪ ܡ̣ܶܢ ܛܳܥܝܽܘܬܳܐ ܠܓܶܢܣܶܗ ܕܳܐܕܳܡ ܥܰܦܪܳܢܳܐ ܡ̣ܶܢ ܫܽܘܥܒܳܕܳܐ ܕܳܐܟܶܠܩܰܪܨܳܐ ܘܰܕܫܺܐܕ̈ܶܐ ܒܺܝ̈ܫܶܐ ܣܳܢ̈ܝܰܝ ܠܰܒܢܰܝ̈ܢܳܫܳܐ: ܘܬܽܘܒ ܐܳܬܶܐ ܡܶܛܽܠ ܩܝܳܡܬܰܢ ܘܦܽܘܢܳܝܳܐ ܕܺܝܠܰܢ ܕܰܠܦܰܪܕܰܝܣܳܐ: ܗ̇ܳܝ ܕܢܶܫܬܘܶܐ ܟܽܠܰܢ ܕܰܒܚܰܕܽܘܬܳܐ ܘܰܒܕܰܘܨܳܐ ܢܩܰܒܠܶܝܗ̇: ܚܢܰܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ ܕܰܫܟܶܒܘ ܥܰܠ ܣܰܒܪܳܟ ܘܰܡܣܰܟܶܝܢ ܠܡܶܐܬܺܝܬܳܟ ܕܬܰܪܬܶܝܢ: ܒܛܰܝܒܽܘܬܳܐ ܕܺܝܠܳܟ ܘܰܒܪ̈ܰܚܡܶܐ ܕܺܝܚܺܝܕܳܝܳܐ ܒܪܳܟ ܘܰܕܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܫܠܡ

 

ܛܟܣܐ ܕܚܕ ܒܫܒܐ ܕܚܡܫܐ ܕܒܬܪ ܩܝܡܬܐ

ܩܕܡܝܬ ܨܠܘܬܐ ܕܫܘܪܝܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܐܡܺܝܢܳܐܺܝܬ ܢܶܚܕܶܐ ܘܢܶܪܘܰܙ ܒܝܰܘܡܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܘܕܰܟܳܐ ܠܰܢ ܡ̣ܶܢ ܟܽܘܬܡ̈ܳܬܳܐ ܕܰܚܛܺܝܬܳܐ ܘܣܰܟܠܘ̈ܳܬܳܐ: ܐܰܝܟܰܢܳܐ ܕܟܽܠܢ ܐܶܘܢܓܶܠܐܴܝܬ ܢܶܬܕܒܰܪ ܩܕܳܡܰܝܟ ܥܰܡ ܚܰܕܽܘܬܳܐ ܘܰܪܘܳܙܳܐ ܪܰܒܳܐ: ܥܰܡ ܡܙܰܡܪܳܢܳܐ ܐܠܰܗܳܝܳܐ ܢܰܙܥܶܩ ܘܢܺܐܡܰܪ ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ: ܡܶܛܽܠ ܕܬܶܕܡܽܘܪܬܳܐ ܥܒܰܕܬ ܡܳܪܝܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܚܰܝܠܐܴ ܡܥܰܠܝܳܐ: ܘܰܕܪܳܥܳܐ ܬܰܩܺܝܦܳܐ ܕܝܳܠܽܘܕܶܗ: ܗ̇ܰܘ ܕܒܰܩܝܳܡܬܶܗ ܚܰܕܶܬ ܠܰܓܒܺܝܠܬܰܢ ܘܰܒܢܽܘܚܳܡܶܗ ܕܡ̣ܶܢ ܒܶܝܬ ܡܺܝ̈ܬܶܐ ܐܰܡܺܝܬ ܠܡܰܘܬܳܐ ܕܟܽܠܰܢ ܐܶܫܬܰܥܠܺܝ: ܗ̇ܰܘ ܕܒܰܫܦܺܝܥܽܘܬ ܛܳܒܽܘܬܶܗ ܪܰܡܪܶܡ ܫܰܦܠܽܘܬܰܢ ܘܰܒܪ̈ܰܚܡܰܘܗܝ ܣܰܓܺܝ̈ܶܐܐ ܘܠܐܴ ܡܶܬܬܰܘܝ̈ܳܢܶܐ ܚܰܕܺܝ ܘܰܐܦܨܰܚ ܟܡܺܝܪܽܘܬܰܢ ܕܠܶܗ ܡܶܬܟܰܫܦܺܝܢܰܢ ܒܥܺܐܕܳܐ ܗܳܢܳܐ ܕܰܩܝܳܡܬܶܗ ܢܰܫܘܶܐ ܠܰܢ ܠܚܰܘܣܳܢܰܘ̈ܗܝ: ܘܰܢܒܰܝܰܐܐ ܠܰܢ ܒܥܽܘܕܪ̈ܳܢܰܘܗܝ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܗ̇ܰܘ ܡܥܰܠܝܳܐ ܘܪܳܡܳܐ ܒܰܠܚܽܘܕܰܘܗܝ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ: ܗ̇ܰܘ ܕܟܰܕ ܡ̣ܶܢ ܚܰܝܠܰܘ̈ܳܬܳܐ ܘܛܶܟ̈ܣܶܐ ܠܐܴ ܗܽܘܠܳܢܳܝ̈ܶܐ ܡܶܫܬܰܒܰܚ ܐܰܢ̱ܬ: ܘܳܐܦܠܐܴ ܣܳܦ̈ܩܳܢ ܕܰܢܫܰܒ̈ܚܳܢ ܠܳܟ ܟܽܠ ܒܶܪ̈ܝܳܢ: ܐܶܠܐܴ ܐܰܝܟܰܢܳܐ ܕܒܰܫܡܰܝܳܐ ܚܰܝܠܰܘ̈ܳܬܳܐ ܕܠܐܴ ܓܫܽܘܡ ܩܰܝܶܡܬ ܠܬܶܫܒܽܘܚܬܳܐ ܕܺܝܠܳܟ: ܐܰܩܺܝܡܬ ܠܚܰܛܳܝ̈ܶܐ ܘܡܶܣܟܺܢ̈ܶܐ ܥܰܒܕܰܝ̈ܟ ܩܕܳܡ ܬܶܫܒܽܘܚܬܳܐ ܕܺܝܠܳܟ ܡܳܪܝܳܐ. ܐܰܝܟܰܢܳܐ ܕܰܢܫܰܡܶܫ ܠܳܟ ܬܶܫܡܫܬܳܐ ܗܳܕܶܐ ܕܟܺܝܬܳܐ ܘܩܰܕܺܝܫܬܳܐ: ܟܰܕ ܡܚܰܪܪܺܝܢܰܢ ܡ̣ܶܢ ܟܽܠܗܽܘܢ ܚܰܫ̈ܶܐ ܗܽܘܠܳܢܳܝ̈ܶܐ ܘܰܫܟܺܝܪ̈ܶܐ ܗܳܠܶܝܢ ܕܰܠܢܰܦܫܳܐ ܡܰܥܕܶܝܢ ܠܡܰܚܫܳܟܽܘ ܐܳܦ ܠܰܡܥܰܡܳܛܽܘ ܡ̣ܶܢ ܢܽܘܗܪܳܟ ܐܠܰܗܳܝܳܐ ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܕܰܬܩܰܒܶܠ ܡ̣ܶܢ ܐܺܝܕܰܝ̈ܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܕܠܰܬܠܳܬܳܐ ܝܰܘܡܺܝ̈ܢ: ܗ̇ܳܝ ܕܰܗܘܳܬ݀ ܠܰܢ ܪܺܝܫܺܝܬܳܐ ܩܰܕܡܳܝܬܳܐ ܘܚܰܝ̈ܶܐ ܫܰܪܺܝܪ̈ܶܐ ܘܒܽܘܣܳܡܳܐ ܡܩܰܘܝܳܢܳܐ ܡܰܢܽܘ ܗ̇ܰܘ ܕܟܰܕ ܦܰܓܪܳܐ ܠܒܺܝܫ ܘܥܰܡ ܚܰܫ̈ܶܐ ܡܥܰܪܙܰܠ ܡܶܫܟܰܚ ܕܰܢܡܰܠܶܠ ܐܰܘܟܺܝܬ ܕܰܢܦܰܫܶܩ ܝܰܡܳܐ ܕܰܡܪܰܚܡܳܢܽܘܬܳܟ ܡܳܪܝܳܐ. ܗ̇ܰܘ ܕܟܰܕ ܓܳܠ̣ܘ ܪ̈ܰܚܡܰܘܗܝ ܡܬܽܘܡܳܝ̈ܶܐ ܡܶܛܽܠ ܐܳܕܳܡ ܪܺܝܫ ܓܶܢܣܰܢ: ܐܰܝܟܰܢܳܐ ܕܠܐܱܬܪܶܗ ܩܰܕܡܳܝܳܐ ܡܶܬܦܰܢܝܳܢܽܘܬܳܐ ܬܶܥܒܶܕ ܠܶܗ. ܠܗ̇ܰܘ ܕܥܰܕ ܩܰܠܺܝܠ ܐܶܒܰܕ ܗ̣ܘܳܐ ܒܟܽܠܗܶܝܢ ܐ̱ܢܳܫܳܝ̈ܳܬܳܐ: ܐܶܬܗܰܦܰܟܬ ܥܰܡܰܢ ܣܛܰܪ ܡ̣ܶܢ ܚܛܺܝܬܳܐ ܒܰܠܚܽܘܕ ܠܩܰܒܪܳܐ ܐܰܝܟ ܒܰܪܢܳܫܳܐ ܥܰܠܬ: ܘܠܰܚܒܳܠܐܴ ܕܰܒܩܰܒܪ̈ܶܐ ܫܪܰܝܬ: ܘܓܰܙ̈ܶܐ ܡ̇ܰܢ ܥܰܬܺܝܪ̈ܶܐ ܕܰܫܝܽܘܠ ܘܰܕܡܰܘܬܳܐ ܐܰܚܪܶܒܬ ܘܰܠܡܰܘܬܳܐ ܘܣܳܛܳܢܳܐ ܒܬܶܡܗܳܐ ܪܰܒܳܐ ܐܰܩܺܝܡܬ: ܘܝܰܘ̈ܡܶܐ ܬܠܳܬܳܐ ܫܰܡܠܺܝܬ: ܘܰܒܬܶܫܒܽܘܚܬܳܐ ܩܳܡܬ ܡ̣ܶܢ ܒܶܝܬ ܡܺܝ̈ܬܶܐ ܘܰܐܩܺܝܡܬ ܠܓܶܢܣܰܢ ܕܰܥܓܺܝܢ ܗ̣ܘܳܐ ܒܰܚܒ̇ܳܠܐܴ ܒܥܽܘܡܪܳܐ ܕܰܫܝܽܘܠ ܕܳܘܺܝܬܳܐ ܘܰܒܕܶܚܠܬܳܐ ܘܒܰܪܬܺܝܬܳܐ ܠܗ̇ܳܢܽܘܢ ܕܰܠܩܰܒܪܳܟ ܚܰܕܽܘܬܳܐ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ. ܘܚܰܕܽܘܬܳܐ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ. ܟܰܕ ܚܕܳܐ ܓܽܘܕܳܐ ܩܰܕܺܝܫܬܳܐ ܘܪܽܘܚܳܢܳܝܬܳܐ ܫܰܡܠܺܝܬ ܡ̣ܶܢ ܥܶܠܳܝ̈ܶܐ ܘܬܰܚܬܳܝ̈ܶܐ ܕܠܳܟ ܡܫܰܒܚܳܐ ܪܽܘܚܳܢܳܐܺܝܬ: ܥܰܡ ܢܒܺܝܳܐ ܪܰܒܳܐ ܕܰܘܺܝܕ ܟܰܕ ܐܳܡ̇ܰܪ: ܕܩܳܡ ܐܠܰܗܳܐ ܘܶܐܬܒܰܕܰܪܘ ܟܽܠܗܽܘܢ ܒܥܶܠܕ̈ܒܳܒܰܘܗܝ ܗ̇ܳܢܽܘܢ ܕܰܐܡܪܰܚܘ ܥܠܰܘܗܝ ܟܰܕ ܕܰܩܪܽܘܗܝ ܒܰܙܩܺܝܦܳܐ: ܘܫܰܟܶܢ ܠܰܢ ܐܳܦ ܗܳܫܳܐ ܡܳܪܝܳܐ: ܒܗܳܢܳܐ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܕܺܝܠܰܢ ܘܫܰܝܢܳܟ ܢܶܥܡ̣ܰܪ ܒܢܰܦ̈ܫܳܬܰܢ: ܟܰܕ ܡܳܪܶܩ ܐܰܢ̱ܬ ܠܰܢ ܡ̣ܶܢ ܟܽܠܳܗ̇ ܛܰܐܡܽܘܬܳܐ ܢܕܺܝܕܬܳܐ ܗ̇ܳܝ ܕܰܣܪܺܝܟܳܐ ܒܗܰܕܳܡܰܝ̈ܢ: ܘܰܐܢܗܰܪ ܠܢܰܦ̈ܫܳܬܰܢ ܘܰܠܥܰܝ̈ܢܶܐ ܡܶܬܝܰܕܥܳܢܳܝ̈ܳܬܳܐ ܘܡܶܬܪ̈ܰܓܫܳܢܳܝܳܬܳܐ ܕܬܰܪܥܺܝܬܳܐ ܕܺܝܠܰܢ ܒܨܶܡ̈ܚܶܐ ܕܪܽܘܚܳܐ: ܐܰܝܟܰܢܳܐ ܕܰܠܢܶܫ̈ܶܐ ܩܰܕܺܝ̈ܫܳܬܳܐ ܕܰܠܩܰܒܪܳܟ ܢܦܰܩ̈ܝ: ܘܚܰܕܽܘܬܳܐ ܪܰܒܬܳܐ ܡܠܰܝܬ ܠܠܶܒܰܝ̈ܗܶܝܢ. ܐܰܝܟܰܢܳܐ ܕܳܐܦ ܗ̇ܳܢܶܝܢ ܠܓܽܘܕܳܐ ܫܠܺܝܚܳܝܬܳܐ ܣܒܰܪܬܳܐ ܡܰܠܝܰܬ݀ ܚܰܕ̈ܘܳܬܳܐ ܣܰܒܰܪ̈ܝ ܟܰܕ ܐܳܡ̇ܪ̈ܳܢ: ܕܩܳܡ ܠܶܗ ܡܳܪܰܢ ܘܗܳܐ ܩܳܕܶܡ ܠܟܽܘܢ ܠܰܓܠܺܝܠܐܴ: ܘܚܰܕܳܐ ܠܰܢ ܐܰܝܟ ܕܰܠܫܶܡܥܽܘܢ ܘܝܽܘܚܰܢܳܢ: ܕܟܰܕ ܠܩܰܒܪܳܐ ܕܺܝܠܳܟ ܡܰܥܒܶܕ ܚܰܝ̈ܶܐ ܥܰܠܘ ܘܰܠܟܶܬܳܢ̈ܶܐ ܕܦܰܓܪܳܟ ܟܪܺܝܟ ܗ̣ܘܳܐ ܒܗܽܘܢ ܥܰܡ ܣܽܘܕܳܪܳܐ ܕܪܺܝܫܳܐ ܕܺܝܠܳܟ ܕܣܺܝܡ ܗ̣ܘܳܐ ܠܰܣܛܰܪ: ܘܰܐܫܘܳܐ ܠܰܢ ܕܰܢܥܰܕܥܶܕ ܠܳܟ ܠܐܴ ܗ̣ܘܳܐ ܦܰܓܪܳܢܳܐܺܝܬ ܐܶܠܐܴ ܪܽܘܚܳܢܳܐܺܝܬ: ܠܐܴ ܟܰܕ ܠܒܺܝܫܺܝܢܰܢ ܗܳܠܶܝܢ ܕܡ̣ܶܢ ܛܰܝܒܽܘܬܳܟ ܐܶܬܥܰܬܰܕܘ ܘܶܐܫܬܰܡܠܺܝܘ: ܗܳܠܶܝܢ ܕܺܐܝܬܰܝܗܽܘܢ: ܢܰܟܦܽܘܬܳܐ ܘܕܰܟܝܽܘܬܳܐ: ܩܰܕܺܝܫܽܘܬܳܐ ܒܰܣܺܝܡܽܘܬܳܐ ܢܰܗܺܝܪܽܘܬܳܐ ܕܒܳܟ ܬܶܫܒ̈ܚܳܬܳܐ ܐܰܡܺܝ̈ܢܳܬܳܐ ܕܠܳܟ ܡܶܢܰܢ ܟܽܠܝܽܘܡ ܡܶܬܩܰܪ̈ܒܳܢ. ܐܰܝܟܰܢܳܐ ܕܟܰܕ ܡܳܐܢ̈ܶܐ ܕܟܰܝ̈ܳܐ ܗܳܘܶܝܢܰܢ ܘܪ̈ܽܘܚܳܢܶܐ ܚܠܳܦ ܦܰܓܪ̈ܳܢܶܐ ܡܶܬܚܙܶܝܢܰܢ: ܢܶܫܬܘܶܐ ܕܰܢܥܰܕܥܶܕ ܠܳܟ ܗ̇ܰܘ ܥܺܐܕܳܐ ܕܠܐܴ ܥܳܒ̇ܰܪ ܘܠܐܴ ܡܶܫܬܪܶܐ: ܘܕܰܥܬܺܝܕ ܕܢܶܗܘܶܐ ܠܩܰܕܺܝ̈ܫܰܝܟ: ܘܰܐܝܟܰܢܳܐ ܕܰܐܢ̱ܬ ܒܟܽܠܗܶܝܢ ܐ̱ܢܳܫܳܝ̈ܳܬܳܐ ܐܶܫܬܰܡܠܺܝܬ ܡܶܛܽܠ ܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܐ̱ܢܳܫܳܝܳܐ: ܟܰܕ ܠܐܴ ܣܢܺܝܩܳܐ ܐܺܝܬܰܝܟ ܘܝܳܗܽܘܒܳܐ ܕܟܽܠܳܗ̇ ܡܫܰܡܠܝܽܘܬܳܐ ܗܳܟܰܢܳܐ ܫܰܡܠܐܴ ܐܳܦ ܠܰܢ ܒܟܽܠܗܶܝܢ ܡܰܘܗ̈ܒܳܬܳܐ ܕܺܝܠܳܟ ܐܠܰܗܳܝ̈ܳܬܳܐ ܗܳܠܶܝܢ ܕܡܶܢܳܟ ܫܳܐܠܺܝܢܰܢ ܐܰܝܟܰܢܳܐ ܕܢܶܫܬܘܶܐ ܕܰܢܩܰܪܶܒ ܠܳܟ ܫܽܘܒܚܳܐ ܘܺܐܝܩܳܪܳܐ ܘܪܽܘܡܪܳܡܳܐ ܘܪܰܒܽܘܬ ܝܳܐܝܽܘܬܳܐ ܠܳܟ ܡܳܪܝ ܘܠܐܱܒܽܘܟ ܕܫܰܠܚܳܟ ܠܘܳܬܰܢ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܒܰܕܡܳܟ ܝܰܩܺܝܪܳܐ ܫܰܝܶܢܬ ܠܰܫܡܰܝܳܢ̈ܶܐ ܥܰܡ ܐܰܪ̈ܥܳܢܶܐ: ܘܒܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܠܰܚܒܳܠܐܴ ܕܰܒܓܰܘ ܩܰܒܪ̈ܶܐ ܫܪܰܝܬ ܘܒ̣ܰܛܶܠܬ: ܘܠܰܢ ܕܝܳܬܒܺܝܢ ܗܘ̣ܰܝܢ ܒܚܶܫܽܘܟܳܐ ܘܰܒ̈ܛܶܠܳܠܰܝ ܡܰܘܬܳܐ ܒܢܰܝ̈ܳܐ ܕܢܽܘܗܪܳܐ ܘܕܰܩܝܳܡܬܳܐ ܚܰܘܺܝܬ ܒܛܰܝܒܽܘܬܳܟ ܘܰܐܩܺܝܡܬ ܠܰܢ ܡ̣ܶܢ ܡܺܝܬܽܘܬܳܐ ܕܰܚܛܺܝܬܳܐ ܒܝܰܕ ܩܝܳܡܬܳܐ ܕܺܝܠܳܟ ܡܰܥܒܕܰܬ݀ ܚܰܝ̈ܶܐ. ܐܳܦ ܗܳܫܳܐ ܡܳܪܝܳܐ ܩܰܒܶܠܳܝܗܝ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܠܰܢܝ̇ܳܚܳܐ ܕܰܐܠܳܗܽܘܬܳܟ ܘܰܠܩܰܘܡܳܐ ܒܪܺܝܟܳܐ ܕܡ̣ܶܢ ܝܰܡܺܝܢܳܟ ܡܳܪܰܢ܀

 

ܚܘܬܡܐ

ܠܳܟ ܬܶܫܒܽܘܚܬܳܐ ܡܫܺܝܚܳܐ ܚܰܬܢܳܐ ܕܰܫܪܳܪܳܐ ܘܰܐܠܳܗܳܐ ܕܥܰܠ ܟܽܠ ܒܰܩܝܳܡܬܳܟ ܡܫܰܒܰܚܬܳܐ ܦܪܰܩܬ ܠܒܶܪ̈ܝܳܬܳܐ: ܘܰܒܢܽܘܚܳܡܳܟ ܐܰܦܨܰܚܬ ܘܚܰܪܰܪܬ ܠܥܳܠܡܳܐ ܘܰܒܥܺܐܕܳܟ ܚܰܕܺܝܬ ܠܬܺܐܒܶܝܠ ܐܰܦܨܰܚ ܡܳܪܝ ܐܳܦ ܗܳܫܳܐ ܠܠܶܒܰܘ̈ܳܬܰܢ: ܘܚܰܕܳܐ ܠܟܽܠܰܢ ܒܚܰܕܽܘܬܳܐ ܕܺܝܠܳܟ ܗ̇ܳܝ ܠܐܴ ܡܶܫܬܰܪܝܳܢܺܝܬܳܐ: ܕܰܢܫܰܒܰܚ ܠܰܫܡܳܟ ܩܰܕܺܝܫܳܐ ܘܰܢܩܰܠܶܣ ܠܐܱܠܳܗܽܘܬܳܟ ܡܪܰܝܰܡܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܦܳܪܽܘܩܳܐ ܕܒܰܩܝܳܡܬܳܐ ܕܺܝܠܶܗ ܦܳܪܽܘܩܳܝܬܳܐ ܦܰܪܩܳܗ̇ ܠܥܺܕܬܶܗ ܡ̣ܶܢ ܛܳܥܝܽܘܬܳܐ: ܠܗ̇ܰܘ ܕܚܰܕܺܝ ܘܰܐܦܨܰܚ ܠܝܳܪܬܽܘܬܶܗ ܒܝܽܘܡ ܢܽܘܚܳܡܶܗ: ܘܒܰܫܠܳܡܶܗ ܫܰܪܰܪ ܠܰܫܠܺܝ̈ܚܰܘܗܝ: ܘܰܒܚܽܘܒܶܗ ܚܰܟܶܡ ܠܬܰܠܡܺܝ̈ܕܰܘܗܝ ܘܰܒܝܽܘܡ ܣܽܘܠܳܩܶܗ ܚܰܘܺܝ ܐܶܢܽܘܢ ܪܶܚܡܬܶܗ: ܕܪܽܘܚܳܐ ܩܰܕܺܝܫܳܐ ܕܰܢܫܰܕܰܪ ܠܗܽܘܢ ܕܰܢܒܰܝܰܐܐ ܐܶܢܽܘܢ ܕܠܶܗ ܝ̇ܳܐܶܐ܀

 

ܣܕܪܐ

ܫܽܘܒܚܳܐ ܠܳܟ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܡܳܪ̈ܰܘܳܬܳܐ ܝܰܠܕܶܗ ܕܰܐܒܳܐ ܡܬܽܘܡܳܝܳܐ: ܡܶܠܬܳܐ ܝܺܚܺܝܕܳܝܳܐ ܕܶܐܬܓܰܫܰܡ ܘܶܐܬܒܰܣܰܪ ܠܐܴ ܡܶܫܬܰܚܠܦܳܢܳܐܺܝܬ ܡ̣ܺܢ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܘܰܡܠܺܝ ܟܽܠܳܗ̇ ܡܕܰܒܪܳܢܽܘܬܶܗ ܚܠܳܦܰܝܢ ܚܰܛܳܝ̈ܶܐ: ܘܰܥܡܰܕ ܡ̣ܶܢ ܝܽܘܚܰܢܳܢ ܥܰܒܕܶܗ ܒܝܽܘܪܕܢܳܢ ܢܰܗܪܳܐ. ܘܰܣܥܰܪ ܐܳܬܘ̈ܳܬܳܐ ܬܡܺܝ̈ܗܳܬܳܐ: ܘܬܶܕܡܪ̈ܳܬܳܐ ܣܰܓܺܝ̈ܳܐܬܳܐ: ܘܰܣܠܶܩ ܠܰܨܠܺܝܒܳܐ ܕܚܶܣܕܳܐ ܡܶܛܽܠ ܦܽܘܪܩܳܢܰܢ: ܘܩܰܒܶܠ ܥܠܰܘܗܝ ܩܒܽܘܪܬܳܐ ܐ̱ܢܳܫܳܝܬܳܐ. ܘܡܺܝܬ ܐܰܝܟ ܕܰܫܦܰܪ ܠܶܗ ܚܰܝܳܐ ܕܠܐܴ ܡ̇ܳܐܶܬ: ܘܶܐܬܢܰܚܰܡ ܘܩܳܡ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܰܦܪܰܩ ܠܓܶܢܣܰܢ ܡ̣ܶܢ ܛܳܥܝܽܘܬܳܐ ܒܰܩܝܳܡܬܶܗ. ܘܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗܝ ܥܰܠ ܢܽܘܚܳܡܶܗ: ܘܰܠܝܰܘܡܳܐ ܬܡܺܝܢܳܝܳܐ ܗ̇ܰܘ ܕܺܐܝܬܰܘܗܝ ܕܚܰܕ ܒܫܰܒܳܐ ܬܡܺܝܢܳܝܳܐ ܗ̇ܰܘ ܕܺܐܝܬܰܘܗܝ ܕܚܰܕ ܒܫܰܒܳܐ ܬܡܺܝܢܳܝܳܐ ܕܗܳܢܳܐ ܥܳܠܡܳܐ: ܘܫܽܘܪܳܝܳܐ ܕܥܳܠܡܳܐ ܚܰܕܬܳܐ: ܥ̣ܰܠ ܠܥܶܠܺܝܬܳܐ ܒܬܰܪ̈ܥܶܐ ܐܰܚܺܝ̈ܕܶܐ: ܟܰܕ ܟܢܺܝܫܺܝܢ ܟܽܠܗܽܘܢ ܬܰܠܡܺܝ̈ܕܶܐ ܩܳܡ ܒܰܡܨܰܥܬܳܐ: ܟܰܕ ܚܙܰܐܘܽܘܗܝ ܙܳܥܘ ܘܶܐܬܒܰܠܗܺܝܘ: ܘܠܰܒܶܒ ܐܶܢܽܘܢ ܘܶܐܡܰܪ ܠܗܽܘܢ ܕܶܐܢܳܐ ܐܺܝܬܰܝ ܠܐܴ ܬܶܕܚܠܽܘܢ: ܫܠܳܡܳܐ ܥܰܡܟܽܘܢ ܐܳܘ ܬܰܠܡܺܝ̈ܕܰܝ ܕܩܳܡܶܬ ܠܺܝ ܡ̣ܶܢ ܒܶܝܬ ܡܺܝ̈ܬܶܐ ܠܰܬܠܳܬܳܐ ܝܰܘ̈ܡܺܝܢ: ܘܕܳܫܶܬ ܠܡܰܘܬܳܐ ܘܰܙܟܺܝܬ ܠܣܳܛܳܢܳܐ: ܘܫܽܘܒܚܳܐ ܕܠܐܴ ܡܶܬܡܰܠܰܠ ܐܶܬܢܰܚܡܶܬ: ܘܢܶܚܬܶܬ ܘܰܐܟܪܙܶܬ ܘܙܶܪܥܶܬ ܚܰܝܰܬ݀ ܡܺܝ̈ܬܶܐ ܒܗܳܡܳܢ ܕܰܩܒܺܝܪ̈ܶܐ: ܡܶܟܺܝܠ ܫܠܳܡܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ: ܗܳܢܳܐ ܫܠܳܡܳܐ ܢܶܗܘܶܐ ܥܰܡܟܽܘܢ: ܘܰܒܗܳܢܳܐ ܫܠܳܡܳܐ ܙܶܠܘ ܐܰܟܪܶܙܘ ܣܒܰܪܬܝ ܒܟܽܠܶܗ ܥܳܠܡܳܐ: ܟܰܕ ܠܰܟܪ̈ܺܝܗܶܐ ܒܚܰܝܠܐܴ ܕܺܝܠܝ ܡܰܐܣܶܝܢ ܐܢ̱ܬܽܘܢ: ܘܰܠܡܺܝ̈ܬܶܐ ܡ̣ܶܢ ܩܰܒܪ̈ܶܐ ܡܩܺܝܡܺܝܢ ܐܢ̱ܬܽܘܢ: ܘܟܽܠ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܒܫܶܡܝ ܪܰܒܳܐ ܬܶܥܒܕܽܘܢ. ܘܟܰܕ ܐܰܪܡܺܝܘ ܦܶܣ̈ܶܐ ܫܠܺܝ̈ܚܶܐ ܘܰܢܦܰܩܘ ܣܰܒܰܪܘ ܒܒܶܪ̈ܝܳܬܳܐ ܣܒܰܪܬܳܐ ܡܰܠܝܰܬ݀ ܚܰܝ̈ܶܐ ܘܚܰܕ̈ܘܳܬܳܐ. ܚܰܕ ܐܠܰܗܳܐ ܕܶܐܬܺܝܠܶܕ ܡ̣ܶܢ ܒܬܽܘܠܬܳܐ: ܚܰܕ ܡܳܪܝܳܐ ܕܰܣܠܶܩ ܠܰܨܠܺܝܒܳܐ ܘܗ̣ܽܘ ܟܰܕ ܗ̣ܽܘ ܕܶܐܬܬܣܺܝܡ ܒܓܰܘ ܩܰܒܪܳܐ: ܘܩܳܡ ܒܚܰܝܠܐܴ ܕܙܳܟܽܘܬܳܐ ܠܰܬܠܳܬܳܐ ܝܰܘ̈ܡܺܝܢ ܘܰܦܪܰܩ ܠܰܢ: ܘܗ̣ܽܘ ܟܰܕ ܗ̣ܽܘ ܕܰܣܠܶܩ ܠܰܫܡܰܝܳܐ ܘܺܝܬܶܒ ܡ̣ܶܢ ܝܰܡܺܝܢܳܐ ܕܰܐܒܳܐ ܫܳܠܽܘܚܶܗ: ܘܰܥܬܺܝܕ ܕܢܺܐܬܶܐ ܠܫܽܘܠܳܡܳܐ ܕܙܰܒ̈ܢܶܐ ܕܢܶܦܪܽܘܥ ܠܟܽܠܢܳܫ ܐܰܝܟ ܥܒܳܕ̈ܰܘܗܝ ܒܕܺܝܢܳܐ ܟܺܐܢܳܐ ܘܰܬܪܺܝܨܳܐ ܕܠܰܝܬ ܒܶܗ ܡܰܣܰܒ ܒܰܐܦ̈ܶܐ. ܐܶܠܐܴ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܰܢ ܚܢܰܢ ܗ̇ܳܢܽܘܢ ܕܰܠܒܶܫܢܳܟ ܡ̣ܶܢ ܡܰܥܡܽܘܕܺܝܬܳܐ ܕܰܬܫܰܟܶܢ ܠܰܢ ܕܢܶܗܘܶܐ ܝܳܪ̈ܬܶܐ ܕܛܽܘ̈ܒܶܐ ܗ̇ܳܢܽܘܢ ܫܡܰܝ̈ܳܢܶܐ ܘܚܰܝ̈ܠܐܷ ܠܐܴ ܡܶܬܚܰܒܠܳܢ̈ܶܐ ܘܢܶܗܘܶܐ ܡ̣ܶܢ ܥܰܬܺܝ̈ܩܶܐ ܚܰܕ̈ܬܶܐ ܘܡ̣ܶܢ ܒܺܝ̈ܫܶܐ ܛܳܒ̈ܶܐ ܘܰܐܫܘܳܐ ܠܰܢ ܡܳܪܰܢ ܒܛܰܝܒܽܘܬܳܟ ܘܰܠܥܰܢܺܝ̈ܕܰܝܢ ܒܰܡܪܰܚܡܳܢܽܘܬܳܟ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܓܰܠܝܽܘܬ ܐܰܦ̈ܶܐ ܕܰܩܕܳܡ ܒܺܐܡܰܐ ܕܺܝܠܳܟ ܕܠܐܴ ܒܶܗܬܬܳܐ ܕܰܚܛܺܝܬܳܐ ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܶܠܬܳܐ ܐܠܰܗܳܐ ܕܶܐܬܒܰܪܢܰܫ ܕܠܐܴ ܫܽܘܚܠܳܦܳܐ ܘܝܰܩܰܪ ܠܰܟܝܳܢܳܐ ܐ̱ܢܳܫܳܝܳܐ ܕܡܶܢܶܗ ܐܶܬܓܒܶܠ ܠܗ̇ܰܘ ܠܐܴ ܡܳܝܽܘܬܳܐ ܐܰܚܺܝ ܥܳܠܡ̈ܶܐ ܕܶܐܬܥܰܪܙܰܠ ܥܰܡ ܡܰܘܬܳܐ ܠܐܘܚܕܳܢܶܗ ܒܰܛܶܠ ܕܰܠܓܶܢܣܰܢ ܢܰܐܚܶܐ: ܠܗ̇ܰܘ ܕܰܒܓܰܘ ܩܰܒܪܳܐ ܐܶܬܬܣܺܝܡ ܘܣܰܦܶܩ ܥܽܘܒܳܗ̇ ܕܰܫܝܽܘܠ: ܠܗ̇ܰܘ ܡܢܰܚܡܳܢܳܐ ܕܡܺܝ̈ܬܶܐ ܕܠܰܚܒܳܠܐܴ ܐܶܫܬܰܥܒܰܕ: ܕܠܰܢ ܠܘܳܬ ܚܺܐܪܽܘܬܳܐ ܩܰܕܡܳܝܬܳܐ ܕܢܰܦܢܶܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܚܰܝܠܬܳܢܳܐ ܘܰܫܒܺܝܚ ܒܓܰܐܝܽܘܬܳܐ ܡܳܪܝܳܐ: ܐܺܝܬܝܳܐ ܕܩܳܐܶܡ ܒܶܪ̈ܝܳܬܳܐ: ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܰܡܩܰܒܶܠ ܒܽܘܪ̈ܟܳܬܳܐ ܟܪ̈ܽܘܒܳܝܳܬܳܐ ܘܰܡܬܽܘܡܳܝܳܐ ܕܰܐܡܶܟ ܢܰܦܫܶܗ ܒܨܶܒܝܳܢܶܗ: ܘܰܢܚܶܬ ܠܐܱܪܥܳܐ ܘܣܰܝܒܰܪ ܟܽܠܗܶܝܢ ܐ̱ܢܳܫܳܝ̈ܳܬܳܐ. ܪܳܡܳܐ ܕܰܡܬܰܚ ܫܡܰܝܳܐ ܐܰܝܟ ܝܳܪܺܝܥܬܳܐ ܘܶܐܬܚܒܶܫ ܒܓܰܘ ܩܰܒܪܳܐ ܕܰܬܠܳܬ ܐܰܡܺܝ̈ܢ ܡܫܽܘܚܬܶܗ: ܟܰܣܝܳܐ ܘܰܓܢܺܝܙܳܐ ܕܠܐܴ ܡܰܡܪܚܳܐ ܢܽܘܪܳܐ ܕܬܶܚܽܘܪܝ ܒܺܐܝܬܽܘܬܶܗ ܗ̇ܳܝ ܡܰܘܩܕܳܢܺܝܬܳܐ: ܣܓܺܝܕܳܐ ܕܰܣܒܰܠ ܦܰܓܪܶܗ ܚܝ̈ܳܨܶܐ ܕܟܶܬܳܢ̈ܶܐ ܕܰܩܒܽܘܪܬܶܗ: ܠܐܴ ܡܳܝܽܘܬܳܐ ܘܚ̈ܰܝ ܥܳܠܡ̈ܶܐ ܕܟܽܠ ܢܶܫ̈ܡܳܬܳܐ ܕܶܐܬܳܐ ܠܰܙܩܺܝܦܽܘܬܳܐ ܒܪܶܚܡܰܬ݀ ܐ̱ܢܳܫܽܘܬܶܗ ܬܗܺܝܪܬܳܐ: ܬܶܕܡܪ̈ܳܬܶܗ ܘܣܳܥܽܘܪ̈ܘܳܬܶܗ: ܕܡ̣ܶܢ ܡܰܪܟܰܒܬܳܐ ܕܰܟܪ̈ܽܘܒܶܐ ܓܳܗܪܺܝܢ ܥܺܝܪ̈ܶܐ ܕܢܽܘܪܳܐ ܘܰܕܫܰܠܗܶܒܺܝܬܳܐ ܕܰܢܚܽܘܪܽܘܢ ܒܶܗ: ܘܶܐܬܪܟܶܢ ܠܡܰܟܺܝܟܽܘܬܳܐ ܘܰܠܫܺܝܛܽܘܬܳܐ ܐ̱ܢܳܫܳܝܬܳܐ ܒܨܶܒܝܳܢܶܗ. ܠܥܶܠ ܒܰܡܪ̈ܰܘܡܶܐ ܡܶܬܗܰܕܰܪ ܒܥܽܘܫܢܳܐ ܘܙܺܝܘܳܐ ܘܓܰܐܝܽܘܬܳܐ: ܘܰܠܬܰܚܬ ܣܺܝܡ ܒܶܝܬ ܡܺܝ̈ܬܶܐ ܐܰܝܟ ܥܰܢܺܝܕܳܐ ܗ̇ܰܘ ܡܳܪܶܐ ܡܳܪ̈ܰܘܳܬܳܐ. ܠܥܶܠ ܡܰܪܗܶܒ ܠܬܶܐܓ̈ܡܶܐ ܥܶܠܳܝ̈ܶܐ ܥܰܠ ܒܽܘܪ̈ܟܳܬܳܐ: ܘܰܠܬܰܚܬ ܐܰܩܺܝܡܘ ܢܳܛܽܘܪ̈ܶܐ ܥܰܠ ܩܰܒܪܶܗ ܕܠܐܴ ܢܶܬܓܢܶܒ ܡ̣ܶܢ ܓܽܘܕܳܐ ܕܬܰܠܡܺܝܕܽܘܬܳܐ: ܠܥܶܠ ܪܘܺܝܚ ܠܶܗ ܥܽܘܫܢܳܐ ܓܰܐܝܳܐ ܕܺܐܝܬܽܘܬܳܐ: ܘܰܠܬܰܚܬ ܒܕܽܘܟܬܳܐ ܕܰܬܠܳܬ ܐܰܡܺܝ̈ܢ ܥܰܦܝܽܘܗܝ ܠܗ̇ܰܘ ܡܳܪܶܐ ܡܳܪ̈ܰܘܳܬܳܐ: ܠܥܶܠ ܝܳܬܶܒ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܘܰܡܙܺܝܥ ܠܰܬܗܽܘ̈ܡܶܐ ܕܰܐܪܥܳܐ ܒܬܰܩܺܝܦܽܘܬܶܗ: ܘܰܠܬܰܚܬ ܓܢܶܐ ܒܶܝܬ ܡܺܝ̈ܬܶܐ ܘܡܰܒܰܥ ܚܰܝ̈ܶܐ ܠܢܰܦ̈ܫܳܬܳܐ ܡܓܰܙ̈ܝܳܬܳܐ: ܠܥܶܠ ܦܳܩܶܕ ܠܟܶܢ̈ܫܶܐ ܫܓܺܝܪ̈ܶܐ ܒܶܝܬ ܓܰܒܪܺܐܶܝܠ ܕܢܶܚܬܽܘܢ ܠܐܻܝܩܳܪܶܗ ܒܰܕܚܺܝܠܽܘܬܳܐ: ܘܰܠܬܰܚܬ ܙܗܺܝܪܺܝܢ ܒܶܗ ܩܶܣܛܽܘܢܳܪ̈ܶܐ ܕܰܢܚܰܦܽܘܢ ܩܰܒܪܶܗ ܒܟܰܕܳܒܽܘܬܳܐ: ܠܥܶܠ ܪܳܡ̇ܶܙ ܠܥܺܝܪܳܐ ܕܰܢܥܰܓܶܠ ܟܺܐܦܳܐ ܡ̣ܶܢ ܩܰܒܪܶܗ ܩܰܕܺܝܫܳܐ ܒܰܙܗܺܝܪܽܘܬܳܐ: ܘܰܠܬܰܚܬ ܛܥܶܢ̈ܝ ܢܶܫ̈ܶܐ ܗܶܪ̈ܽܘܡܶܐ ܕܰܢܒܰܣ̈ܡܳܢ ܦܰܓܪܶܗ ܐܰܝܟ ܡܺܝܬܳܐ. ܠܥܶܠ ܝ̇ܳܗܶܒ ܣܰܘܩܳܐ ܠܟܽܠ ܒܣܰܪ ܒܪܶܡܙܶܗ ܫܒܺܝܚܳܐ ܕܒܳܪܽܘܝܽܘܬܳܐ: ܘܰܠܬܰܚܬ ܡܫܰܐܠܐܴ ܡܰܪܝܰܡ ܕܡ̇ܰܢ ܓܰܢܒܶܗ ܡ̣ܶܢ ܩܰܒܪܳܐ ܠܗ̇ܰܘ ܠܐܴ ܡܳܝܽܘܬܳܐ. ܠܥܶܠ ܘܰܠܬܰܚܬ ܩܝܳܡܬܳܐ ܘܚܰܕܽܘܬܳܐ ܠܡܰܪܝܰܡ ܘܚܰܒܪ̈ܳܬܳܗ̇ ܠܬܰܠܡܺܝ̈ܕܰܘܗܝ ܦܨܺܝܚܽܘܬܳܐ: ܘܰܪܘܳܙܳܐ ܘܚܰܕܽܘܬܳܐ ܠܓܽܘܕܳܐ ܕܰܬܪܶܥܣܰܪܬܳܐ ܠܚܰܢܳܢ ܘܰܠܩܰܝ̇ܳܦܳܐ ܒܶܗܬܬܳܐ ܠܫܳܠܽܘܡ ܘܰܠܡܰܪܝܰܡ ܦܨܺܝܚܽܘܬܳܐ ܠܐܷܣܦܺܝܪ ܕܚܰܪ̈ܡܳܢܶܐ ܕܓܳܠܽܘܬܳܐ: ܠܥܺܕܬܳܐ ܚܠܽܘܠܐܴ ܥܰܡ ܟܠܺܝܠܐܴ ܕܬܶܫܒܽܘܚܬܳܐ ܠܝܰܘܣܶܦ ܘܰܠܢܺܝܩܳܘܕܺܝܡܳܘܣ ܛܽܘܒܳܐ ܠܥܰܡ̈ܡܶܐ ܡܰܘܗܰܒܬܳܐ ܘܠܰܨܠܺܝܒܳܐ ܣܶܓܕܬܳܐ: ܘܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܕܬܶܚܽܘܢ ܠܰܢ ܒܰܩܝܳܡܬܳܟ ܡܰܐܚܝܳܢܺܝܬܳܐ: ܘܬܰܠܒܶܫ ܠܰܢ ܚܰܕܽܘܬܳܐ ܐܰܝܟ ܓܽܘܕܳܐ ܫܠܺܝܚܳܝܬܳܐ: ܘܰܫܠܳܡܳܐ ܕܺܝܠܳܟ ܫܰܟܶܢ ܠܰܢ ܒܰܐܡܺܝܢܽܘܬܳܐ ܘܠܰܓܢܽܘܢܳܟ ܐܰܫܘܳܐ ܠܟܽܠܰܢ ܡܫܺܝܚܳܐ ܡܰܠܟܰܢ ܡܳܪܳܗ̇ ܕܬܶܫܒܽܘܚܬܳܐ ܘܰܐܝܟ ܕܰܠܓܰܝܳܣܳܐ ܐܰܘܪܶܬ ܠܰܢ ܡܳܪܝܳܐ ܡܰܠܟܽܘܬܳܐ ܫܡܰܝܳܢܺܝܬܳܐ: ܘܗܰܒܠܰܢ ܡܳܪܝܳܐ ܕܰܒܢܰܚ̈ܬܶܐ ܦܰܐܝ̈ܳܐ ܘܰܪ̈ܓܺܝܓܶܐ ܢܶܥܽܘܠ ܠܰܓܢܽܘܢܳܟ ܡܠܐܷ ܚܰܕ̈ܘܳܬܳܐ: ܘܢܰܣܶܩ ܠܳܟ ܫܽܘܒܚܳܐ܀

 

ܨܠܘܬܐ ܕܨܦܪܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܢܰܚ̈ܬܶܐ ܫܰܦܺܝܪ̈ܶܐ ܕܰܥܒ̇ܳܕ̈ܶܐ ܛܳܒ̈ܶܐ ܘܰܒܕܽܘܒܳܪ̈ܶܐ ܡܝܰܬܪ̈ܶܐ ܕܫܳܦܪܺܝܢ ܠܳܟ ܢܶܪܥܳܟ ܐܰܝܟ ܟܶܢܫܳܐ ܕܬܰܠܡܺܝ̈ܕܳܬܳܐ ܕܰܛܥܶܢ̈ܝ ܗܶܪ̈ܽܘܡܶܐ ܘܰܢܦܰܩ̈ܝ ܕܰܢܒܰܣ̈ܡܳܢ ܦܰܓܪܳܟ ܝܰܩܺܝܪܳܐ: ܘܐܶܫܟܰܚ̈ܝ ܠܡܰܠܐܱܟܳܐ ܕܢܽܘܗܪܳܐ ܕܥܰܓܶܠ ܟܺܐܦܳܐ ܘܺܝܬܶܒ ܥܠܶܝܗ̇ ܘܰܥܢ̣ܳܐ ܘܶܐܡܰܪ ܕܠܰܝܬܰܘܗܝ ܚܰܝܳܐ ܒܶܝܬ ܡܺܝ̈ܬܶܐ: ܐܰܢ̱ܬ ܥܺܝܪܳܐ ܕܰܐܥܺܝܪ ܕܰܡܟܽܘܬܰܢ ܘܩܰܒܶܠ ܦܺܝܪܡܰܢ ܘܰܨܠܰܘ̈ܳܬܰܢ ܘܰܐܥܒܰܪ ܣܰܟܠܘ̈ܳܬܰܢ ܒܝܰܡܳܐ ܫܦܺܝܥܳܐ ܕܰܡܪܰܚܡܳܢܽܘܬܳܟ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܝܰܠܕܳܐ ܒܪܺܝܟܳܐ ܘܰܡܒܰܪܟܳܐ ܕܒܰܪܶܟ ܠܰܢ ܒܺܝܠܺܝܕܽܘܬܶܗ ܫܒܺܝܚܬܳܐ ܘܕܰܟܺܝ ܠܰܢ ܒܰܥܡܳܕܶܗ ܩܰܕܺܝܫܳܐ: ܘܰܐܚܺܝ ܠܰܢ ܒܡܶܐܬܺܝܬܶܗ ܒܪܺܝܟܬܳܐ: ܘܰܐܢܗܰܪ ܠܰܢ ܒܰܩܒܽܘܪܬܶܗ ܦܨܺܝܚܬܳܐ ܘܰܐܩܺܝܡ ܠܰܢ ܒܰܩܝܳܡܬܶܗ ܡܫܰܒܰܚܬܳܐ: ܘܥܰܠܺܝ ܠܰܢ ܒܣܽܘܠܳܩܶܗ ܗܕܺܝܪܳܐ ܘܰܐܘܬܶܒ ܠܰܢ ܡ̣ܶܢ ܝܰܡܺܝܢܶܗ ܒܫܽܘܒܚܳܐ ܘܓܐܝܽܘܬܳܐ: ܘܩܰܕܶܫ ܠܰܢ ܒܪܽܘܚܶܗ ܩܰܕܺܝܫܳܐ: ܘܰܓܡܰܪ ܘܫܰܡܠܺܝ ܠܘܳܬܰܢ ܟܽܠܗܽܘܢ ܫܽܘܘ̈ܕܳܝܰܘܗܝ ܐܠܰܗܳܝ̈ܶܐ ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

 

ܝܰܠܕܳܐ ܡܬܽܘܡܳܝܳܐ ܕܶܐܬܺܝܠܶܕ ܡ̣ܶܢ ܐܰܒܳܐ ܡܬܽܘܡܳܝܳܐ: ܘܒܶܗ ܐܶܬܒܪ̈ܺܝ ܒܶܪ̈ܝܳܬܳܐ: ܘܶܐܬܺܝܠܶܕ ܡ̣ܶܢ ܐܰܢ̱ܬܬܳܐ ܒܬܽܘܠܬܳܐ ܒܚܰܪܰܬ݀ ܙܰܒܢ̈ܶܐ: ܘܺܝܠܶܕܬܶܗ ܡܰܥܡܽܘܕܺܝܬܳܐ ܩܰܕܺܝܫܬܳܐ ܘܚܰܘܰܪ ܟܽܘܬܡ̈ܳܬܳܐ ܕܚܰܛܳܝ̈ܶܐ ܘܚܰܺܣܝ ܚܰܘ̈ܒܳܬܳܐ ܕܡܰܣܟܠܳܢ̈ܶܐ: ܘܺܝܠܶܕܬܶܗ ܫܝܽܘܠ ܘܒܶܗ ܐܶܣܬܰܪ̈ܰܩܝ ܣܺܝ̣̈ܡܳܬܳܐ: ܦܳܪܽܘܩܳܐ  ܪܰܒܳܐ ܕܒܽܐܘܪܚܳܐ ܕܺܝܠܺܝ̣̈ܕܶܐ ܐܶܬܳܐ ܡ̣ܶܢ ܨܶܝܕ ܝ̇ܳܠܽܘܕܶܗ ܘܒܽܐܘܪܚܳܐ ܕܡܳܝܽܘ̈ܬܶܐ ܗܦ̣ܰܟ ܕܢܺܐܙܰܠ ܨܶܝܕ ܫܳܠܽܘܚܶܗ. ܒܪܳܐ ܚܰܒܺܝܒܳܐ ܕܰܢܦܰܩ ܒܝܰܠܕܳܐ ܕܬܶܬܚܙܶܐ ܡܶܐܬܺܝܬܶܗ: ܘܰܗܦܰܟ ܒܢܽܘܚܳܡܳܐ ܐܰܝܟܰܢܳܐ ܕܬܶܫܬܰܪܰܪܝ ܡܶܐܙܰܠܬܶܗ. ܡܰܠܟܳܐ ܫܡܰܝܳܢܳܐ ܕܶܐܫܬܰܥܒܰܕ ܘܰܛܥܶܡ ܡܰܘܬܳܐ ܒܨܶܒܝܳܢܶܗ ܚܠܳܦܰܝܢ ܒܛܰܝܒܽܘܬܶܗ ܕܰܢܪܺܝܡ ܠܡܰܘܬܳܐ ܕܰܐܡܠܶܟ ܥܠܰܝܢ ܒܦܽܘܩܕܳܢܶܗ. ܬܰܩܺܝܦܳܐ ܕܒܰܙܩܺܝܦܶܗ ܙܰܩܦܳܗ̇ ܠܰܚܛܺܝܬܳܐ ܕܳܐܕܳܡ ܪܺܝܫ ܓܒܺܝܠܬܰܢ: ܓܰܢ̱ܒܳܪܳܐ ܕܰܒܥܶܕܳܢ ܚܰܫܶܗ ܐܰܬܗܰܪ ܠܒܶܪ̈ܝܳܬܳܐ ܒܣܽܘܓܐܳܐ ܕܬܶܕܡܪ̈ܳܬܶܗ: ܘܰܒܝܰܘܡܳܐ ܕܢܽܘܚܳܡܶܗ ܚܰܘܺܝ ܥܽܘܫܢܳܐ ܘܚܰܝܠܐܴ ܕܓܰܢ̱ܒܳܪܽܘܬܶܗ: ܫܝܽܘܠ ܕܡܶܣܬܰܚܦܺܝܢ ܫܽܘܪ̈ܶܝܗ̇: ܘܬܰܪ̈ܥܶܝܗ̇ ܥܰܫܺܝ̈ܢܶܐ ܕܡܶܬܬܰܒܪܺܝܢ: ܚܒܺܝ̈ܫܶܐ ܘܰܐܣܺܝܪ̈ܶܐ ܕܡܶܬܚܰܪܪܺܝܢ: ܫܽܘ̈ܥܶܐ ܕܡܶܨܛܰܪܶܝܢ: ܘܩܰܒܪ̈ܶܐ ܕܡܶܬܦܰܬܚܺܝܢ: ܘܡܺܝ̈ܬܶܐ ܫܟܺܝ̈ܒܶܐ ܕܩܳܝܡܺܝܢ: ܘܡܰܘܬܳܐ ܘܰܚܒ̇ܳܠܐܴ ܕܡܶܬܒܰܛܰܠ: ܐܳܕܳܡ ܘܝܰܠܕ̈ܰܘܗܝ ܕܡܶܬܦܰܪܩܺܝܢ ܒܰܪ̈ܩܶܐ ܕܢܽܘܪܳܐ ܕܡ̣ܶܢ ܓܰܘ ܩܰܒܪܳܐ ܢܳܦܩܺܝܢ: ܢܳܛܽܘܪ̈ܶܐ ܕܥܳܪܩܺܝܢ ܘܩܶܣܛܽܘܢܳܪ̈ܶܐ ܕܡܶܣܬܰܪܕܺܝܢ: ܙܳܩܽܘ̈ܦܶܐ ܕܪܳܥܠܺܝܢ: ܟܳܗ̈ܢܶܐ ܘܰܦܪ̈ܺܝܫܶܐ ܕܝܽܘܕܳܝ̈ܶܐ ܕܫܽܘܚܕܳܐ ܣܰܓܺܝܳܐܐ ܕܝܳܗܒܺܝܢ: ܓܠܺܝܠܳܝ̈ܶܐ ܕܡܶܬܟܰܢܫܺܝܢ: ܫܠܺܝ̈ܚܶܐ ܐܠܰܗܳܝ̈ܶܐ ܕܳܝܨܺܝܢ ܬܰܠܡܺܝ̈ܕܶܐ ܕܡ̣ܶܢ ܢܶܫ̈ܶܐ ܢܰܟ̈ܦܳܬܳܐ ܩܝܳܡܬܶܗ ܕܪܰܒܗܽܘܢ ܘܡܳܪܗܽܘܢ ܡܶܣܬܰܒܪܺܝܢ. ܡܰܠܐܱܟ̈ܶܐ ܕܰܡܫܰܒܚܺܝܢ: ܟܪ̈ܽܘܒܶܐ ܕܰܡܒܰܪܟܺܝܢ ܣܪ̈ܳܦܶܐ ܩܰܕܺܝ̈ܫܶܐ ܕܰܡܩܰܕܫܺܝܢ: ܘܡܰܘ̈ܬܒܶܐ ܘܡܳܪ̈ܰܘܳܬܳܐ ܕܰܡܗܰܠܠܺܝܢ ܥܶܠܳܝ̈ܶܐ ܕܪܳܘܙܺܝܢ: ܬܰܚܬܳܝ̈ܶܐ ܕܡܶܬܦܰܨܚܺܝܢ: ܫܡܰܝ̈ܳܢܶܐ ܕܥܰܡ ܐܰܪ̈ܥܳܢܶܐ ܡܶܬܚܰܠܛܺܝܢ ܘܰܒܬܶܫܒ̈ܚܳܬܳܐ ܘܪܽܘܡܪ̈ܳܡܶܐ ܠܝܰܘܡܳܐ ܫܒܺܝܚܳܐ ܕܢܽܘܚܳܡܳܟ ܡܝܰܩܪܺܝܢ ܘܰܡܙܰܝܚܺܝܢ ܘܰܚܢܰܢ ܐܳܦ ܗܳܫܳܐ ܡܳܪܝܳܐ ܟܰܕ ܒܦܰܐܝܽܘܬܶܗ ܕܝܰܘܡܳܐ ܗܳܢܳܐ ܡܝܰܩܪܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܡܫܰܒܰܚܬܳܐ ܩܳܥܶܝܢܰܢ ܘܳܐܡܪܺܝܢܰܢ. ܗܳܢܰܘ ܝܰܘܡܳܐ ܕܰܥܒ̣ܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ: ܗܳܢܰܘ ܝܰܘܡܳܐ ܕܠܐܴ ܗ̣ܘܳܐ ܩܕܳܡܰܘܗܝ ܐܰܟܘܳܬܶܗ ܐܳܦܠܐܴ ܒܳܬܪܶܗ ܐ̱ܚܪܺܢܳܐ ܕܕܳܡ̇ܶܐ ܠܶܗ: ܗܳܢܰܘ ܝܰܘܡܳܐ ܕܒܶܗ ܫܽܘܪܳܝܳܐ ܕܚܰܕ̈ܘܳܬܳܐ ܐܶܬܒܪ̈ܺܝ: ܘܒܶܗ ܚܰܘܺܝ ܡܳܪܝܳܐ ܦܽܘܪܩܳܢܶܗ: ܗܳܢܰܘ ܝܰܘܡܳܐ ܕܒܶܗ ܢܽܘܗܪܳܐ ܐܰܫܺܝܕܳܐ ܡ̣ܶܢ ܒܪܺܝܫܺܝܬ ܐܶܬܚܙܺܝ: ܘܒܶܗ ܣܪ̈ܳܦܶܐ ܒܩܽܘ̈ܕܳܫܶܐ ܬܠܺܝܬܳܝ̈ܶܐ ܩܰܠ̣ܶܣܘ ܠܰܩܝܳܡܬܳܟ ܕܡ̣ܶܢ ܩܰܒܪܳܐ: ܗܳܢܰܘ ܝܰܘܡܳܐ ܕܒܶܗ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ ܐܶܬܚܰܪܰܪܝ: ܘܒܶܗ ܚܰܝ̈ܶܐ ܚܰܕ̈ܬܶܐ ܠܰܒܢܰܝ̈ܢܳܫܳܐ ܐܶܫܬܰܟܰܢܘ: ܗܳܢܰܘ ܝܰܘܡܳܐ ܕܒܶܗ ܫܽܘܠܛܳܢ ܡܰܘܬܳܐ ܐܶܬܒܰܛܰܠ ܒܶܗ ܐܰܣܽܘܪ̈ܶܐ ܕܰܚܛܺܝܬܳܐ ܐܶܬܚܰܒܰܠܘ ܘܶܐܫܬܪܺܝܘ: ܗܳܢܰܘ ܝܰܘܡܳܐ ܕܒܶܗ ܡܺܝ̈ܬܶܐ ܕܰܫܝܽܘܠ ܐܶܬܢܰܚܰܡܘ: ܘܒܶܗ ܚܰܝ̈ܶܐ ܥܰܠ ܐܰܪܥܳܐ ܒܣܰܒܪܳܐ ܕܰܩܝܳܡܬܳܐ ܐܶܬܒܰܣܰܡܘ: ܗܳܢܰܘ ܝܰܘܡܳܐ ܕܒܶܗ ܬܰܠܡܺܝ̈ܕܶܐ ܡ̣ܶܢ ܕܶܚܠܬܳܐ ܕܨܳܠܽܘ̈ܒܶܐ ܐܶܫܬܰܘܙܰܒܘ: ܘܰܒܩ̈ܳܠܐܷ ܢܰܨܺܝ̈ܚܶܐ ܘܪ̈ܽܘܚܳܢܳܝܶܐ ܠܰܩܝܳܡܬܳܐ ܣܰܒ̣ܰܪܘ: ܕܩܳܡ ܐܠܰܗܳܐ ܡ̣ܶܢ ܩܰܒܪܳܐ ܘܰܒܥܶܠܕ̈ܒܳܒܰܘܗܝ ܐܶܬܒܰܕܰܪܘ: ܗܳܢܰܘ ܝܰܘܡܳܐ ܕܒܶܗ ܡܰܠܐܱܟ̈ܶܐ ܒܰܠܒܽܘ̈ܫܶܐ ܚܶܘܳܪ̈ܶܐ ܡܰܦܪܓܺܝܢ: ܘܨܶܝܕ ܩܰܒܪܳܐ ܡܰܥܒܶܕ ܚܰܝ̈ܶܐ ܒܫܽܘܒܚܳܐ ܐܶܬܚܙܺܝܘ: ܗܳܢܰܘ ܝܰܘܡܳܐ ܕܒܶܗ ܢܒܺܝ̈ܶܐ ܚܳܕܶܝܢ ܘܰܫܠܺܝ̈ܚܶܐ ܕܳܝܨܺܝܢ: ܘܟܽܠܗܽܘܢ ܡܣܰܒܪ̈ܳܢܶܐ ܪܳܘܙܺܝܢ ܘܡܶܬܦܰܨܚܺܝܢ: ܗܳܢܰܘ ܝܰܘܡܳܐ ܕܒܶܗ ܟܳܗ̈ܢܶܐ ܥܺܕܬܳܢܳܝ̈ܶܐ ܒܰܦܨܺܝܚܽܘܬܳܐ ܩܳܝܡܺܝܢ: ܘܟܽܠܗܽܘܢ ܡܗܰܝܡ̈ܢܶܐ ܫܰܪܺܝܪ̈ܶܐ ܡܒܰܪܟܺܝܢ ܘܰܡܩܰܕܫܺܝܢ: ܗܳܢܰܘ ܝܰܘܡܳܐ ܕܒܶܗ ܝܽܘܕܳܝ̈ܶܐ ܘܳܝܳܐ ܠܰܩܢܽܘܡܰܝ̈ܗܽܘܢ ܝܳܗܒܺܝܢ ܘܨܶܗܝܽܘܢ ܘܰܒܢܶܝ̈ܗ̇ ܒܶܐܒܠܐܴ ܘܰܒܟܰܪܝܽܘܬܳܐ ܝܳܬܒܺܝܢ: ܗܳܢܰܘ ܝܰܘܡܳܐ ܕܒܶܗ ܐܽܘܪܫܠܶܡ ܨܳܠܽܘܒܬܳܐ ܚܶܪܒܰܬ݀: ܘܒܶܗ ܪܽܘܚܳܐ ܩܰܕܺܝܫܳܐ ܡ̣ܶܢ ܒܶܝܬ ܩܽܘܕܫܳܐ ܘܡ̣ܶܢ ܗܰܝܟܠܳܗ̇ ܢܶܦܩܰܬ݀. ܗܳܢܰܘ ܝܰܘܡܳܐ ܕܒܶܗ ܐܰܪܥܳܐ ܡ̣ܶܢ ܛܰܢܦܽܘܬܳܐ ܐܶܬܕܰܟܝ̣ܰܬ݀: ܘܒܶܗ ܠܰܘܛܬܳܐ ܗ̇ܳܝ ܕܰܒܝܰܕ ܚܰܘܳܐ ܘܳܐܕܳܡ ܐܶܬܬܪܺܝܡ̣ܰܬ݀: ܗܳܢܰܘ ܝܰܘܡܳܐ ܕܒܶܗ ܟܢܽܘܫܬܳܐ ܒܣܺܝܪܬܳܐ ܚܶܫܟܰܬ݀ ܘܚܶܪܒܰܬ݀: ܘܒܶܗ ܥܺܕܬܳܐ ܩܰܕܺܝܫܬܳܐ ܒܝܰܕ ܙܰܠܓ̈ܶܐ ܫܒܺܝ̈ܚܶܐ ܒܢܽܘܗܪܳܐ ܕܰܩܝܳܡܬܳܐ ܐܰܨܡܚܰܬ݀: ܘܒܰܕܓܽܘܢ ܡܦܺܝܣܺܝܢܰܢ ܘܠܳܟ ܡܶܬܟܰܫܦܺܝܢܰܢ ܕܰܬܫܰܟܶܢ ܠܰܢ ܒܽܘܪ̈ܟܳܬܶܗ ܕܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܺܝܠܳܟ: ܘܚܽܘܠܳܠܐܴ ܘܕܽܘܟܳܝܳܐ ܕܡܶܢܟܽܠ ܛܰܐܡܽܘܬܳܐ ܕܒܶܣܪܳܐ ܘܰܕܪܽܘܚܳܐ: ܘܰܠܚܺܝ ܘܰܐܥܒ̣ܰܪ ܡܶܢܰܢ ܣܶܢܶܐܬܳܐ ܕܰܒܥܶܠܕܒܳܒܽܘܬܳܐ ܘܰܡܠܺܝ ܠܰܢ ܚܽܘܒܳܐ ܘܕܰܟܝܽܘܬܳܐ ܘܩܰܕܺܝܫܽܘܬܳܐ ܘܗܰܒ ܡܳܪܝܳܐ ܒܛܰܝܒܽܘܬܳܟ ܠܡܰܠܟ̈ܶܐ ܡܫܰܝܢܽܘܬܳܐ: ܘܰܠܦܳܠܚ̈ܶܐ ܒܗܺܝܠܽܘܬܳܐ. ܠܰܪ̈ܕܺܝܦܶܐ ܢܽܘܚܳܐ: ܠܰܥܠܺܝ̈ܒܶܐ ܦܽܘܨܳܝܳܐ: ܠܰܥܠܰܝ̈ܡܶܐ ܢܰܟܦܽܘܬܳܐ: ܠܣܳܒ̈ܶܐ ܣܡܺܝܟܽܘܬܳܐ: ܘܠܰܡܙܰܘ̈ܓܶܐ ܟܢܺܝܟܽܘܬܳܐ. ܘܠܰܒܬܽܘ̈ܠܐܷ ܙܰܗܝܽܘܬܳܐ: ܠܕܰܝܪ̈ܳܝܶܐ ܬܪܺܝܨܽܘܬܳܐ. ܠܰܢܙܺܝܪ̈ܶܐ ܡܚܰܡܣܢܳܢܽܘܬܳܐ: ܠܥܰܬܺܝܪ̈ܶܐ ܡܰܟܺܝܟܽܘܬܳܐ: ܠܡܶܣ̈ܟܺܢܶܐ ܡܣܰܝܒܪܳܢܽܘܬܳܐ: ܠܚܰܛܳܝ̈ܶܐ ܡܰܝܬܳܝܽܘܬ ܦܺܐܪ̈ܶܐ ܕܙܰܕܺܝܩܽܘܬܳܐ ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܥܽܘܗܕܳܢܳܐ ܛܳܒܳܐ ܕܚܰܣܝܽܘܬܳܐ ܐܰܝܟܰܢܳܐ ܕܡܶܢܰܢ ܘܡܶܢܗܽܘܢ ܘܡ̣ܶܢ ܟܽܠܳܗ̇ ܒܪܺܝܬܳܐ: ܬܶܫܒܽܘܚܬܳܐ ܘܬܰܘܕܺܝܬܳܐ ܬܶܣܰܩܝ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܒܰܣܶܡ ܠܰܢ ܡܳܪܝ ܒܰܫܠܳܡܳܐ ܕܡܶܢܳܟ ܐܰܝܟ ܢܶܫ̈ܶܐ ܩܰܕܺܝ̈ܫܳܬܳܐ ܕܶܐܬܒܰܣܰܡ̈ܝ ܦܰܐܝܳܐܺܝܬ ܒܰܫܠܳܡܳܐ: ܘܰܒܝܰܕ ܒܶܣܡܳܢܰܝ̈ܗܶܝܢ ܗܽܘܠܳܢܳܝ̈ܶܐ ܕܒܰܣܶܡ̈ܝ ܦܰܓܪܳܟ ܩܰܕܺܝܫܳܐ ܕܰܒܠܐܴ ܗܽܘܠܳܢܳܝܽܘܬܳܐ ܩܳܡ̣ܬ ܡ̣ܶܢ ܩܰܒܪܳܐ. ܘܢܶܒܣܰܡ ܠܳܟ ܦܺܝܪܡܰܢ ܕܠܐܻܝܩܳܪܳܐ ܕܰܩܝܳܡܬܳܟ ܡܫܰܒܰܚܬܳܐ ܐܶܬܩܰܪܰܒ ܘܶܐܬܪܰܥܳܐ ܒܒܰܣܺܝܡܽܘܬܳܟ ܐܰܝܟ ܝܰܩ̈ܕܶܐ ܫܰܠܡ̈ܶܐ ܘܕܶܒܚ̈ܶܐ ܐܰܗܪ̈ܽܘܢܳܝܶܐ: ܕܰܐܢ̱ܬ ܗ̣ܽܘ ܕܒܰܣܶܡ̣ܬ ܠܰܒܪܺܝܬܳܐ ܒܪܺܝܚܳܐ ܚܰܠܝܳܐ ܕܢܽܘܚܳܡܳܟ: ܘܠܳܟ ܦܰܐܝܳܐ ܬܶܫܒܽܘܚܬܳܐ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

ܚܘܬܡܐ

ܡܳܪܝܳܐ ܐܠܰܗܳܐ ܪܰܡܪܶܡ ܠܥܺܕܬܳܟ ܩܰܕܺܝܫܬܳܐ ܒܥܽܘܕܪ̈ܳܢܰܝܟ ܐܠܰܗܳܝ̈ܶܐ: ܘܰܠܥܰܡܳܟ ܡܗܰܝܡܢܳܐ ܒܒܽܘܪ̈ܟܳܬܳܐ ܕܺܝܠܳܟ ܣܒܺܝ̈ܣܶܐ: ܘܰܠܡܰܪܥܺܝܬܳܟ ܒܰܙܡܺܝܪ̈ܳܬܳܐ ܕܰܩܝܳܡܬܳܐ: ܐܰܝܟܰܢܳܐ ܕܟܰܕ ܡܦܰܬܟܳܐܺܝܬ ܡܶܫܬܰܒܰܚ ܐܰܢ̱ܬ ܒܝܰܘܡܳܐ ܗܳܢܳܐ ܪܰܒܳܐ ܘܰܫܒܺܝܚܳܐ ܘܰܫܦܺܝܥܳܐܺܝܬ ܬܫܰܕܰܪ ܠܰܢ ܡ̣ܶܢ ܓܰܙܳܐ ܕܪ̈ܰܚܡܰܝܟ ܠܐܴ ܡܶܬܡܰܠܠܳܢ̈ܶܐ ܡܰܘܗ̈ܒܳܬܳܐ ܕܺܝܠܳܟ ܐܠܰܗܳܝ̈ܳܬܳܐ ܗܳܫܳܐ ܘܰܒܟܽܠܙܒܰܢ܀

 

ܦܪܘܡܝܘܢ ܕܬܠܬܫܥܝ̈ܢ

ܬܶܫܒܽܘܚܬܳܐ: ܠܗ̇ܰܘ ܕܩܳܡ ܡ̣ܶܢ ܒܶܝܬ ܡܺܝ̈ܬܶܐ ܒܫܽܘܒܚܳܐ ܕܪܰܒܽܘܬܶܗ ܘܶܐܬܢܰܚܰܡ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܒܙܳܟܽܘܬܳܐ ܕܝܰܡܺܝܢܶܗ ܠܳܗ̇ ܕܰܐܒ̣ܗܶܬ ܠܙܳܩܽܘ̈ܦܶܐ ܒܢܽܘܚܳܡܶܗ: ܘܟܰܐܐܰܪ ܠܛܳܢܽܘܪ̈ܶܐ ܒܰܩܝܳܡܬܶܗ: ܠܗ̇ܰܘ ܕܚܰܕܺܝ ܠܟܶܢܫܳܐ ܕܬܰܠܡܺܝ̈ܕܰܘܗܝ ܒܰܚܙܳܬܶܗ: ܘܰܐܦܨܰܚ ܠܰܡܣܰܒܪ̈ܳܢܶܐ ܒܰܣܒܰܪܬܶܗ: ܘܫܰܕܰܪ ܐܶܢܽܘܢ ܠܐܱܪܒܰܥ ܦܶܢ̈ܝܳܢ ܕܢܰܟܪܙܽܘܢ ܩܝܳܡܬܶܗ ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܠܳܟ ܣܳܓܕܺܝܢܰܢ ܝܰܠܕܳܐ ܡܬܽܘܡܳܝܳܐ ܕܩܰܫܺܝܫ ܡ̣ܶܢ ܟܽܠ ܕܰܒܚܰܪܰܬ݀ ܙܰܒ̈ܢܶܐ ܒܰܒܥܳܬ ܨܰܠܡܳܐ ܡܰܠܟܳܝܳܐ ܐܶܬܰܝܬ: ܡܶܛܽܠ ܦܽܘܪܩܳܢܶܗ ܒܨܶܒܝܳܢܳܐ ܫܰܘܝܳܐ ܘܰܚܕܳܢܳܝܳܐ ܕܺܝܠܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܦܰܓܪܳܐ ܐܶܬܥܰܛܰܦܬ ܛܰܒܥܳܐ ܒܬܽܘܠܳܝܳܐ ܕܝܳܠܶܕܬܳܟ ܢܛܰܪܬ ܟܰܕ ܡ̣ܶܢ ܗ̇ܳܝ ܕܺܐܝܬܰܝܟ ܐܠܰܗܳܐ ܠܐܴ ܫܰܢܺܝܬ: ܣܽܘܟܳܝ ܢܒܺܝ̈ܶܐ ܗܘ̣ܰܝܬ ܘܰܠܕܶܢܚܰܝ̈ܗܽܘܢ ܫܰܡܠܺܝܬ: ܘܡ̣ܶܢ ܥܰܡܳܐ ܥܶܒܪܳܝܳܐ ܕܰܢܚ̣ܶܬ: ܠܓܽܘ̈ܕܶܐ ܬܰܪܬܶܝܢ ܕܬܰܠܡܺܝ̈ܕܶܐ ܓܒܰܝܬ ܘܟܽܠ ܚܰܝܠܺܝ̈ܢ ܩܕܳܡܰܝܗܽܘܢ ܣܥܰܪܬ: ܐܽܘܪܚܳܐ ܕܰܫܪܳܪܳܐ ܠܗܽܘܢ ܕܪܰܫ̣ܬ. ܣܳܥܽܘܪܽܘܬ ܚܰܝ̈ܠܐܷ ܠܗܽܘܢ ܐܰܓܥ̣ܶܠܬ: ܘܥܰܠ ܒܺܝܫܳܐ ܘܟܽܠܶܗ ܚܰܝܠܶܗ ܫܽܘܠܛܳܢܳܐ ܝܰܗ̣ܒܬ: ܘܥܰܠ ܚܰܫܳܟ ܘܰܩܒܽܘܪܬܳܟ ܘܢܽܘܚܳܡܳܟ ܒܰܐܡܺܝܢ ܘܰܐܡܺܝܢ ܠܗܽܘܢ ܡܰܠܶܠ̣ܬ. ܥܰܡܗܽܘܢ ܦܶܨܚܳܐ ܡܽܘܫܳܝܳܐ ܐܶܟܰܠ̣ܬ: ܘܰܠܪ̈ܶܓܠܐܷ ܕܰܬܪܶܥܣܰܪ ܫܠܺܝ̈ܚܶܐ ܐܰܫܺܝܓܬ ܘܐ̱ܪ̈ܳܙܶܐ ܩܰܕܺܝ̈ܫܶܐ ܠܗܽܘܢ ܐܰܫܠ̣ܶܡܬ: ܘܡ̣ܶܢ ܝܽܘܕܳܐ ܩܳܛܽܘܠܐܴ ܐܶܙܕܰܒܰܢ̣ܬ: ܘܰܐܝܟ ܐܶܡܪܳܐ ܠܕܶܒܚܳܐ ܐܶܬܩ̣ܰܪܰܒܬ. ܥܰܠ ܪܺܝܫ ܓܳܓܽܘܠܬܳܐ ܐܶܬܬܠܺܝܬ: ܘܰܠܢܰܗܺܝܪ̈ܶܐ ܒܛܰܗܪܳܐ ܐܰܚܫ̣ܶܟܬ ܘܰܒܩܳܠܳܟ ܠܫܽܘ̈ܥܶܐ ܘܟܺܐܦ̈ܶܐ ܨܰܕܺܝܬ. ܒܟܶܬܳܢ̈ܶܐ ܐܰܝܟ ܡܡܰܚܝܳܐ ܐܶܬܟ̣ܪܶܟܬ: ܘܠܰܡܣܰܟܝܳܢܳܐ ܕܕܶܢܚܳܟ ܣܥ̣ܰܪܬ: ܘܰܠܢܺܝܪܳܐ ܡܶܢ ܨܰܘܪ̈ܰܝܗܽܘܢ ܫ̣ܪܰܝܬ: ܘܠܰܬܠܺܝ̈ܬܳܝ ܝܰܘ̈ܡܶܐ ܐܶܬܢܰܚ̣ܰܡܬ: ܠܰܬܪܶܝܢ ܓܰܒܺܝ̈ܢ ܕܰܫܠܺܝ̈ܚܶܐ ܒܥܶܠܺܝܬܳܐ ܬܰܪܬܶܝܢ ܙܰܒܢܺܝ̈ܢ ܥܰܠ ܩܝܳܡܬܳܟ ܕܡ̣ܶܢ ܩܰܒܪܳܐ ܫܰܪܰܪܬ: ܘܰܠܣܰܓܺܝ̈ܶܐܐ ܥܰܠ ܛܽܘܪܳܐ ܕܰܓܠܺܝܠܐܴ ܠܗܽܘܢ ܐܶܬܚܰܘܺܝܬ ܘܰܠܪܶܥܝܳܢܗܽܘܢ ܢܰܗ̣ܰܪܬ. ܒܥܶܠܺܝܬܳܐ ܟܰܕ ܚܕܰܥܣܰܪ ܣܡܺܝܟܺܝܢ ܙܒܰܢ̱ܬܳܐ ܬܠܺܝܬܳܝܬܳܐ ܕܒܳܗ̇ ܢܰܦܫܳܟ ܠܗܽܘܢ ܓܠܰܝܬ: ܘܰܠܚܰܣܺܝܪܽܘܬ ܗܰܝܡܳܢܽܘܬܗܽܘܢ ܚܰܣ̣ܶܕܬ ܦܽܘܩܕܳܢܳܐ ܡܳܪܳܢܳܝܳܐ ܕܰܛܝܳܣܳܐ ܕܰܣܒܰܪܬܳܐ ܡܳܪܳܢܳܝܬܳܐ ܕܠܐܱܪܒܰܥ ܦܶܢ̈ܝܳܬܳܐ ܐܰܣ̣ܪܰܚܬ ܘܰܠܡܰܥܡܳܕܽܘ ܠܟܽܠ ܥܰܡ̈ܡܺܝܢ ܦܰܩ̣ܶܕܬ ܘܰܕܢܶܛܪܕܽܘܢ ܫܺܐܕ̈ܶܐ ܘܢܰܚܠܡܽܘܢ ܟܽܠ ܟܽܘܪ̈ܗܳܢܺܝܢ ܙܰܗ̣ܰܪܬ: ܟܰܕ ܠܗ̇ܳܝ ܕܶܐܢ ܣܰܡܳܐ ܕܡܰܘܬܳܐ ܢܶܫܬܽܘܢ ܠܐܴ ܢܰܗܰܪ ܐܶܢܽܘܢ: ܘܰܐܝܟ ܕܰܪܫܰܡ̣ܬ ܒܚܰܕ ܡ̣ܶܢ ܡܣܰܒܪ̈ܳܢܶܐ ܕܶܝܢ ܐܶܫܬܰܡܠܝ̣ܰܬ݀ ܕܶܐܫܬܺܝ ܗ̣ܘܳܐ ܣܰܡܳܐ ܕܡܰܘܬܳܐ ܘܠܐܴ ܐܶܬܢܰܟܺܝ ܐܰܝܟ ܕܫܰܘܕܰܥ̣ܬ. ܒܠܶܫ̈ܳܢܶܐ ܚܰܕ̈ܬܶܐ ܕܟܽܠ ܥܰܡ̈ܡܺܝܢ ܨܰܒ̣ܶܬܬ: ܘܟܽܠ ܚܘܰܘ̈ܳܬܳܐ ܠܰܡܕܰܝܳܫܽܘ ܐܰܪܺܝܡܬ: ܘܠܰܡܦܰܢܳܝܽܘ ܠܐܱܒܺܝ̈ܕܶܐ ܠܰܛܝܳܪܳܟ ܕܚܰܝ̈ܶܐ ܨܒ̣ܰܝܬ ܘܒܺܐܝ̈ܕܰܝܗܽܘܢ ܠܟܽܠ ܥܰܡ̈ܡܺܝܢ ܐܶܫܟ̣ܰܚܬ: ܘܟܰܕ ܡ̣ܶܢ ܒܳܬܰܪ ܗܳܠܶܝܢ ܠܝܰܥܩܽܘܒ ܒܰܪ ܝܰܘܣܶܦ ܗ̇ܰܘ ܕܰܐܚܽܘܟ ܐܶܬܟܰܢܺܝ ܐܶܬܚܰܘܺܝܬ: ܘܥܰܠ ܩܝܳܡܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܕܰܠܟܽܠ ܥܰܡ̈ܡܺܝܢ ܐܰܬܗܪܰܬ݀ ܫ̣ܰܪܰܪܬ: ܠܚܰܫܳܐ ܡܰܐܚܫܳܢܳܐ ܕܩܶܛܠܳܟ ܡܰܐܚܝ̇ܳܢܳܐ ܡ̣ܶܢ ܠܶܒܶܗ ܐܰܥܒ̣ܰܪܬ: ܘܒܰܚܙܳܬܳܟ ܠܶܗ ܐܰܦܨܰܚ̣ܬ ܘܰܠܟܰܪܝܽܘܬܶܗ ܒܰܐܺܝܬ: ܘܰܒܦܶܓܥܳܟ ܡܠܐܷ ܪܘ̇ܳܙܳܐ ܠܶܗ ܚܰܕܺܝܬ: ܘܒܰܫܠܳܡܳܟ ܐܠܰܗܳܝܳܐ ܠܰܒܶܒ̣ܬ ܘܰܒܟܽܠܗܽܘܢ ܫܽܘ̈ܟܳܢܶܐ ܪܽܘܚܩܽܘܕܫܳܢܳܝ̈ܶܐ ܠܶܗ ܓܡ̣ܰܪܬ ܪܺܝܫ ܟܳܗ̈ܢܶܐ ܘܥܰܠܠܳܢܳܐ ܥܺܝܪܳܐ ܠܨܶܗܝܽܘܢ ܐܶܡܳܐ ܕܟܽܠܗܶܝܢ ܥܺܕ̈ܳܬܳܐ ܐܰܣܪܰܚ̣ܬ: ܘܠܰܡܕܰܒܳܪܽܘ ܠܥܳܢ̈ܳܟ ܕܰܟܝܳܐܺܝܬ ܘܩܰܕܺܝܫܳܐܺܝܬ ܙܰܗ̣ܰܪܬ. ܘܟܰܕ ܒܪܶܚܡܰܬ݀ ܐ̱ܢܳܫܽܘܬܳܟ ܪܰܒܬܳܐ ܘܠܐܴ ܡܶܬܡܰܠܠܳܢܺܝܬܳܐ: ܠܓܽܘܕܳܐ ܕܫܰܒܥܺܝܢ ܠܛܽܘܪܳܐ ܕܰܓܠܺܝܠܐܴ ܕܡܶܬܩܪܶܐ ܕܒܶܝܬ ܙܰܝ̈ܬܶܐ ܨܰܝܶܒ̣ܬ: ܒܰܚܙܳܬܳܟ ܠܰܬܒܺܝܪܽܘܬ ܠܶܒܳܐ ܘܰܦܠܺܝܓܽܘܬ ܚܽܘ̈ܫܳܒܶܐ ܡ̣ܶܢ ܬܰܪ̈ܥܝܳܬܗܽܘܢ ܛܪܰܕܬ: ܘܰܠܥܰܝ̈ܢܶܐ ܕܒܰܪܢܳܫܗܽܘܢ ܓܰܘܳܝܳܐ ܐܰܢܗ̣ܰܪܬ. ܥܰܡ ܬܪܶܥܣܰܪ ܫܠܺܝ̈ܚܶܐ ܘܚܰܡܶܫܡܳܐܐ ܐܰܚܺܝ̣̈ܢ ܡ̈ܶܠܐܷ ܕܝܰܩܺܝܪ̈ܳܢ ܡ̣ܶܢ ܛܽܘܪ̈ܶܐ ܘܰܦܣܺܝ̣̈ܠܳܢ ܡ̣ܶܢ ܪ̈ܰܘܡܶܐ ܪ̈ܳܡܶܐ ܕܰܐܠܳܗܽܘܬܳܟ ܠܗܽܘܢ ܥܰܪܓܶܠ̣ܬ. ܒܰܙܒܰܢ̱ܬܳܐ ܗ̇ܳܝ ܩܰܕܡܳܝܬܳܐ ܦܽܘܩܕܳܢ̈ܶܐ ܕܚܰܝ̈ܶܐ ܐܰܫܡܰܥ̣ܬ ܘܟܳܪܽܘܙܽܘܬܳܐ ܐܠܰܗܳܝܬܳܐ ܘܰܒܗܳܕܶܐ ܫܽܘܪܳܪܳܐ ܕܰܩܝܳܡܬܳܟ ܠܐܴ ܕܰܓܳܠܐܴ ܫ̣ܰܪܰܪܬ. ܦܽܘܩܕܳܢܳܐ ܠܐܴ ܡܶܬܕܰܓܠܳܢܳܐ ܕܰܬܠܺܝܬܳܐܺܝܬ ܕܶܝܢ ܠܛܽܘܪܳܐ ܗܳܢܳܐ ܟܽܠܗܽܘܢ ܥܰܡ ܟܽܠܗܽܘܢ ܢܶܨܛܰܝܒܽܘܢ ܐܶܡ̣ܰܪܬ: ܘܰܕܢܶܚܙܽܘܢ ܣܽܘܠܳܩܳܟ ܫܒܺܝܚܳܐ ܠܗܽܘܢ ܚܰܘܺܝܬ: ܘܕܰܢܩܰܘܽܘܢ ܒܥܶܠܺܝܬܳܐ ܠܗ̇ܰܘ ܫܽܘܘܕܳܝܳܐ ܫܰܪܺܝܪܳܐ ܦܰܩ̣ܶܕܬ. ܘܟܽܠܗܽܘܢ ܠܗܳܢܳܐ ܛܽܘܪܳܐ ܡܥܰܠܝܳܐ ܟܰܢܶܫ̣ܬ ܘܣܽܘܠܳܩܳܟ ܫܒܺܝܚܳܐ ܠܗܽܘܢ ܚܰܘܺܝܬ. ܘܪܽܘܚܳܐ ܩܰܕܺܝܫܳܐ ܥܰܠ ܟܽܠܗܽܘܢ ܐܶܫ̣ܰܕܬ. ܐܳܘ ܟܡܳܐ ܬܡܺܝܗܺܝܢ ܫܽܘܘ̈ܕܳܝܰܝܟ ܘܐ̱ܪ̈ܳܙܰܝܟ ܕܠܰܢ ܠܥܰܦܪ̈ܳܢܶܐ ܐܰܫܠܶܡ̣ܬ ܘܰܟܡܳܐ ܫܒܺܝܚܺܝܢ ܘܝܰܩܺܝܪܺܝܢ ܡ̣ܶܢ ܡܶܠܬܳܐ ܕܰܠܗܳܠܶܝܢ ܕܒܺܐܝ̈ܕܰܝ ܟܳܪ̈ܽܘܙܶܐ ܕܰܣܒܰܪܬܳܟ ܐܰܓܥܶܠ̣ܬ. ܟܰܕ ܒܟܽܠܳܗ̇ ܟܪܽܘܟܝܳܐ ܕܰܡܕܰܒܪܳܢܽܘܬܳܟ ܡܶܬܒܰܩܶܝܢܰܢ: ܘܰܒܝܰܠܕܳܟ ܗ̇ܰܘ ܕܠܐܴ ܫ̣ܪܳܐ ܛܰܒ̈ܥܶܐ ܕܝܳܠܶܕܬܶܟ ܬܳܗܪܺܝܢܰܢ ܘܰܠܣܳܥܽܘܪ̈ܘܳܬܳܟ ܬܡܺܝ̈ܗܳܬܳܐ ܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ ܟܳܬܒܺܝܢܰܢ. ܠܚܰܫܳܟ ܘܡܰܘܬܳܟ ܘܰܩܒܽܘܪܬܳܟ ܘܰܩܝܳܡܬܳܟ ܒܩ̈ܳܠܐܷ ܫܦܰܝ̈ܳܐ ܡܢܰܨܪܺܝܢܰܢ ܘܡ̣ܶܢ ܓܽܘܕܳܐ ܨܳܠܽܘܒܬܳܐ ܕܝܽܘ̈ܕܳܝܶܐ ܡܰܪܚܩܺܝܢܰܢ ܘܰܒܓܽܘܕܳܐ ܫܠܺܝܚܳܝܬܳܐ ܡܶܬܚܰܠܛܺܝܢ ܘܥܰܡ ܫܠܺܝ̈ܚܶܐ ܘܰܡܣܰܒܪ̈ܳܢܶܐ ܘܰܐܚ̈ܶܐ ܠܛܽܘܪܳܟ ܡܶܬܡܰܢܥܺܝܢܰܢ: ܘܰܒܢܰܦ̈ܫܳܬܰܢ ܢܰܘ̈ܣܶܐ ܕܪܰܒܽܘܬܳܟ ܘܢܽܘܚܳܡܳܟ ܡܫܰܪܪܺܝܢܰܢ ܘܥܰܡ ܫܠܺܝ̈ܚܶܐ ܕܩܽܘܫܬܳܐ ܘܝܰܥܩܽܘܒ ܐܰܚܽܘܟ ܘܚܰܒܪ̈ܰܘܗܝ ܒܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ ܥܳܬܪܺܝܢܰܢ: ܘܰܐܚ̈ܶܐ ܠܳܟ ܗܳܘܶܝܢܰܢ: ܘܥܰܡ ܓܽܘܕܳܐ ܫܒܺܝܚܬܳܐ ܣܰܒܪܳܐ ܫܰܪܺܝܪܳܐ ܡܶܬܡܠܶܝܢܰܢ: ܘܰܠܕܶܢܚܳܟ ܕܡ̣ܶܢ ܫܡܰܝܳܐ ܡܣܰܟܶܝܢܰܢ: ܘܰܐܟܚܕܳܐ ܥܰܡܗܽܘܢ ܕܩܰܢ̈ܝܳܢ ܦܰܪܶܗܣܺܝܰܐ ܠܳܟ ܡܩܰܒܠܺܝܢܰܢ ܘܥܰܡ ܟܽܠܗܽܘܢ ܒܢ̈ܰܝ ܥܺܕܬܳܐ ܩܰܕܺܝܫܬܳܐ ܚܢܰܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ ܒܰܚܠܽܘܠܳܟ ܡܶܬܒܰܣܡܺܝܢܰܢ: ܘܫܽܘܒܚܳܐ ܠܳܟ ܦܳܪܥܺܝܢܰܢ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܫܠܡ

 

ܛܟܣܐ ܕܚܕ ܒܫܒܐ ܫܬܝܬܝܐ ܕܒܬܪ ܣܘܠܩܐ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܕܶܒܚ̈ܶܐ ܕܫܽܘܒܚܳܐ ܘܩܽܘܪ̈ܒܳܢܶܐ ܡܩܰܒ̈ܠܐܷ ܘܰܕܟܰܝ̈ܳܐ ܢܩܰܪܶܒ ܠܳܟ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܦܳܪܽܘܩܳܝܬܳܐ ܕܟܰܕ ܙܳܓ̇ܰܪ ܐܰܢ̱ܬ ܘܰܡܒܰܛܶܠ ܡܶܢܰܢ ܩܪ̈ܳܒܶܐ ܘܬܰܟܬܽܘ̈ܫܶܐ ܒܺܝ̣̈ܫܶܐ ܘܥܰܣ̈ܩܶܐ ܕܰܒܥܶܠܕܰܪܰܢ ܐܰܝܟܰܢܳܐ ܕܕܰܟܝܳܐܺܝܬ ܘܩܰܕܺܝܫܳܐܺܝܬ ܢܥܰܕܥܶܕ ܠܳܟ ܘܰܢܫܰܒܚܳܟ ܐܰܡܺܝܢܳܐܺܝܬ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܫܽܘܒܚܳܐ ܦܰܐܝܳܐ ܘܰܗܕܺܝܪܳܐ ܘܪܽܘܡܪܳܡܳܐ ܕܢܺܝܚܳܐ ܘܩܽܘܠܳܣܳܐ ܪܓܺܝܓܳܐ ܘܢܰܨܺܝܚܳܐ: ܘܗܶܕܪܳܐ ܬܡܺܝܗܳܐ ܘܰܡܦܰܬܟܳܐ ܢܶܫܬܘܶܐ ܕܰܢܩܰܪܶܒ ܠܗ̇ܰܘ ܫܶܡܫܳܐ ܘܝܰܠܕܳܐ ܕܰܐܒܳܐ ܡܬܽܘܡܳܝܳܐ: ܠܗ̇ܰܘ ܚܰܝܠܐܴ ܘܺܐܝܬܝܳܐ ܩܰܕܡܳܝܳܐ: ܠܗ̇ܳܝ ܛܳܒܽܘܬܳܐ ܕܝܰܡܺܝܢܳܐ ܠܐܴ ܡܶܫܬܰܪܝܳܢܺܝܬܳܐ: ܠܗ̇ܰܘ ܬܰܪܥܺܝܬܳܐ ܕܰܐܒܳܐ ܗ̇ܰܘ ܠܐܴ ܡܶܫܬܰܠܡܳܢܳܐ: ܠܗ̇ܰܘ ܡܰܠܟܳܐ ܕܡܰܠܟ̈ܶܐ ܘܩܳܛܰܪ ܬܳܓ̈ܶܐ ܠܫܰܠܺܝܛܳܢ̈ܶܐ: ܠܗ̇ܰܘ ܡܶܠܬܳܐ ܡܬܽܘܡܳܝܳܐ ܘܡܰܚܫܰܒܬܳܐ ܠܐܴ ܡܶܬܒܰܨܝܳܢܺܝܬܳܐ ܠܗ̇ܰܘ ܕܡ̣ܶܢ ܥܺܝܪ̈ܶܐ ܕܢܽܘܪܳܐ ܕܠܐܴ ܫܶܠܝܳܐ ܡܶܫܬܰܒܰܚ: ܘܡ̣ܶܢ ܟܪ̈ܽܘܒܶܐ ܕܠܐܴ ܫܶܬܩܳܐ ܦܰܐܝܽܘܬ ܐܠܰܗܐܺܝܬ ܡܶܬܒܰܪܰܟ ܘܡ̣ܶܢ ܣܪ̈ܳܦܶܐ ܩܰܕܺܝ̈ܫܶܐ ܠܐܴ ܡܰܘܦܝܳܢܳܐܺܝܬ ܡܶܬܩܰܕܰܫ: ܠܗ̇ܰܘ ܕܰܒܡܽܘܟܳܟܶܗ ܪܰܡܪܶܡ ܠܡܰܟܺܝ̈ܟܶܐ: ܘܰܒܡܰܘܬܶܗ ܐܰܚܺܝ ܠܡܳܝܽܘ̈ܬܶܐ: ܘܒܰܩܝܳܡܬܶܗ ܐܰܩܺܝܡ ܠܢܰܦ̈ܠܐܷ ܘܰܒܢܽܘܚܳܡܶܗ ܚܰܕܺܝ ܘܰܐܦܨܰܚ ܠܰܟܡܺܝܪ̈ܶܐ. ܒܗܳܢܳܐ ܝܰܘܡܳܐ ܕܥܽܘܗܕܳܢܳܐ ܕܰܩܝܳܡܬܳܟ ܕܡ̣ܶܢ ܩܰܒܪܳܐ ܠܳܟ ܣܳܓܕܺܝܢܰܢ ܘܰܡܫܰܒܚܺܝܢܰܢ ܒܗܳܢܳܐ܀

 

ܣܕܪܐ

ܐܠܰܗܳܐ ܒܳܪܽܘܝܳܐ ܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠܳܗ̇ ܒܪܺܝܬܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ. ܗ̇ܰܘ ܕܥܰܠ ܡܰܪܟܰܒܬܳܐ ܗ̇ܳܝ ܕܰܟܪ̈ܽܘܒܶܐ ܒܕܶܚܠܐܴ ܡܶܙܕܰܝܰܚ ܐܰܢ̱ܬ. ܘܡ̣ܶܢ ܟܶܢ̈ܫܶܐ ܕܰܣܪ̈ܳܦܶܐ ܡܶܬܩܰܕܰܫ ܐܰܢ̱ܬ ܗ̇ܰܘ ܕܺܐܝܬܰܝܟ ܠܥܶܠ ܡ̣ܶܢ ܡܶܠܬܳܐ ܕܟܽܠ ܡܠܺܝ̈ܠܐܷ: ܘܰܠܥܶܠ ܡ̣ܶܢ ܬܶܓܡ̈ܶܐ ܠܐܴ ܗܽܘܠܳܢܳܝ̈ܶܐ ܐܺܝܬܰܘܗܝ ܡܰܥܡܪܳܟ: ܐܰܝܟܳܐ ܕܠܰܝܬ ܐܰܬܪܳܐ ܠܡܶܬܚܰܫܳܒܽܘ ܐܰܝܟܳܐ ܕܟܽܠܗܽܘܢ ܟܝܳܢ̈ܶܐ ܥܶܠܳܝ̈ܶܐ ܙܳܝܥܺܝܢ ܡܶܢܳܟ ܕܰܢܚܽܘܪܽܘܢ ܒܳܟ: ܗ̇ܰܘ ܕܨܶܒܝܳܢܳܐܺܝܬ ܕܒܰܚ̣ܬ ܢܰܦܫܳܟ ܥܰܠ ܓܳܓܽܘܠܬܳܐ ܘܰܗܘܰܝܬ ܐܳܕܳܡ ܬܪܰܝܳܢܳܐ: ܘܟܰܕ ܣܳܡܬ ܐܰܦܰܝ̈ܟ ܕܬܶܥܽܘܠ ܠܓܰܘ ܩܰܒܪܳܐ ܘܬܶܗܘܶܐ ܡܰܢܝܳܐ ܒܰܩܒܺܝܪ̈ܶܐ: ܘܟܰܕ ܥܰܠ ܥܰܦܪܶܗ ܕܳܐܕܳܡ ܡܬܰܚܬ ܢܰܦܫܳܟ ܘܰܓܠܰܝܬ ܡ̣ܶܢ ܐܰܦܰܘ̈ܗܝ ܠܬܰܚܦܺܝܬܳܐ ܚܶܫܽܘܟܬܳܐ ܕܡܰܘܬܳܐ. ܘܟܰܕ ܡܠܰܝܬܳܝܗܝ ܣܰܒܪܳܐ ܪܰܒܳܐ ܘܢܽܘܚܳܡܳܐ: ܘܟܰܕ ܩܳܡܬ ܡ̣ܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ ܘܰܙܟܰܝܬܳܝܗܝ ܠܡܰܘܬܳܐ ܝܰܥܢܳܐ ܒܡܰܘܬܳܟ: ܘܰܕܒܰܪܬ ܥܰܡܳܟ ܠܰܫܒܺܝܬܳܐ ܕܺܝܠܶܗ. ܗܳܢܰܘ ܕܶܝܢ ܨܰܠܡܳܐ ܕܺܝܠܳܟ ܠܓܶܢܣܳܐ ܕܺܝܠܰܢ ܐ̱ܢܳܫܳܝܳܐ ܘܥܰܡ ܙܳܟܽܘܬܳܐ ܪܰܒܬܳܐ ܘܢܰܨܺܝܚܬܳܐ ܢܦܰܩܬ ܡ̣ܶܢ ܩܰܒܪܳܐ ܘܶܐܬܬܰܒܰܪ ܠܶܒܳܐ ܕܰܛܪ̈ܽܘܢܶܐ ܒܥܶܠܕ̈ܒܳܒܶܐ: ܘܡܶܟܺܝܠ ܟܰܕ ܒܢܽܘܗܪܳܐ ܕܺܝܠܳܟ ܐܶܬܒܰܐܝܘ ܟܺܐܢ̈ܶܐ ܩܰܕ̈ܡܳܝܶܐ ܒܓܰܘ ܩܰܒܪ̈ܰܝܗܽܘܢ: ܘܒܰܩܝܳܡܬܳܐ ܕܺܝܠܳܟ ܡ̣ܶܢ ܕܰܚܺܝܚܳܐ ܐܶܬܢܰܦܰܨܘ: ܩܳܠܰܝ̈ ܫܽܘܒܚܳܐ ܡܰܙܥܩܺܝܢ ܗܘܰܘ ܠܳܟ ܟܰܕ ܐܳܡܪܺܝܢ ܒܚܰܕܽܘܬܳܐ ܘܒܰܪܘܳܙܳܐ ܕܡ̣ܶܢ ܠܶܒܗܽܘܢ: ܒܪܺܝܟ ܗ̣ܽܘ ܐܺܝܩܳܪܶܗ ܕܡܳܪܝܳܐ ܡ̣ܶܢ ܐܰܬܪܶܗ ܠܥܳܠܡܺܝܢ: ܒܪܺܝܟ ܗ̣ܽܘ ܕܶܐܬܬܰܚܬܺܝ ܡܶܛܽܠܳܬܰܢ ܘܦܰܪܩܰܢ ܒܚܰܫܳܐ ܕܰܩܢܽܘܡܶܗ. ܒܪܺܝܟ ܗ̣ܽܘ ܐܺܝܬܝܳܐ ܡܬܽܘܡܳܝܳܐ ܕܡ̣ܶܢ ܐܰܒܳܐ ܕܒܰܩܝܳܡܬܶܗ ܐܰܩܺܝܡ ܠܰܢ ܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ ܕܰܪܡܶܝܢ ܗܘܰܝܢ ܒܳܗ̇: ܒܪܺܝܟ ܝ̇ܳܗܽܘܒܳܐ ܕܚܰܝ̈ܶܐ ܕܰܗܘܳܐ ܡܺܝܬܳܐ ܟܰܕ ܕܰܢܛܺܝܪܺܝܢ ܚܰܝ̈ܶܐ ܒܰܩܢܽܘܡܶܗ: ܒܪܝܺܟ ܗ̣ܽܘ ܕܰܫܒܰܩ ܡܰܪܟܰܒܬܳܐ ܕܰܟܪ̈ܽܘܒܶܐ ܕܰܕܠܐܴ ܫܶܠܝܳܐ ܡܒܰܪܟܺܝܢ ܠܶܗ: ܘܰܢܚܶܬ ܕܡ̣ܶܟ ܒܓܰܘ ܩܰܒܪܳܐ ܥܰܠ ܥܰܦܪܶܗ ܕܳܐܕܳܡ ܒܪܺܝܟ ܕܒܰܩܝܳܡܬܶܗ ܐܰܩܺܝܡ ܠܰܢ ܥܰܡܶܗ: ܘܰܐܘܬܶܒ ܠܰܢ ܡ̣ܶܢ ܝܰܡܺܝܢܶܗ ܕܰܐܒܳܐ ܡܫܰܒܚܳܐ ܒܪܺܝܟ ܗ̣ܽܘ ܕܰܥܡܰܕ ܒܰܫܝܽܘܠ ܐܰܝܟ ܣܰܚܳܝܳܐ ܘܰܐܦܶܩ ܠܥܰܢܺܝ̈ܕܶܐ ܕܰܒܓܰܘܳܗ̇ ܚܡܺܝܠܺܝܢ ܗܘܰܘ: ܒܪܺܝܟ ܗ̣ܽܘ ܕܙܰܝܚܽܘܗܝ ܥܺܝܪ̈ܶܐ ܘܡܰܠܐܱܟ̈ܶܐ ܒܰܩܝܳܡܬܶܗ: ܝܰܩܪܽܘܗܝ ܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܒܢܽܘܚܳܡܶܗ: ܒܪܺܝܟ ܗ̣ܽܘ ܕܰܢܩܰܫ ܒܰܫܝܽܘܠ ܡܺܝ̣̈ܠܐܷ ܕܫܰܝܢܳܐ ܘܕܰܫܠܳܡܳܐ: ܘܰܙܠܰܚ ܒܳܗ̇ ܣܰܒܪܳܐ ܘܦܽܘܪܩܳܢܳܐ. ܒܪܺܝܟ ܗ̣ܽܘ ܕܰܩܪܳܝܗܝ ܠܐܴܕܳܡ ܘܰܐܥܺܝܪܶܗ ܡ̣ܶܢ ܫܶܢܬܶܗ: ܘܰܐܥܒܰܪ ܡܶܢܶܗ ܓܙܳܪ ܕܺܝܢܳܐ ܕܰܥܒ̇ܳܪ ܦܽܘܩܕܳܢܳܐ: ܘܦܰܢܝܶܗ ܠܰܥܕܶܝܢ ܝܳܪܬܽܘܬܶܗ. ܒܪܺܝܟ ܗ̣ܽܘ ܕܰܐܦܢܺܝ ܛܪ̈ܺܝܕܶܐ ܠܰܥܕܶܝܢ ܝܳܪܬܽܘܬܗܽܘܢ ܘܚܰܕܺܝ ܠܥܺܝܪ̈ܶܐ ܘܡܰܠܐܱܟ̈ܶܐ ܒܦܽܘܢܳܝܗܽܘܢ: ܒܪܺܝܟ ܗ̣ܽܘ ܕܫܰܟܶܢ ܠܰܓܒܺܝܠܬܶܗ ܕܒܶܝܬ ܐܳܕܳܡ ܟܽܠܗܝܢ ܬܡܺܝ̈ܗܳܬܳܐ ܘܣܰܒܰܥ ܣܢܺܝ̈ܩܶܐ ܡ̣ܶܢ ܡܰܘܗ̈ܒܳܬܶܗ ܘܡܶܛܽܠ ܗܳܕܶܐ ܚܢܰܢ ܦܳܪ̈ܩܰܝ ܒܰܨܠܺܝܒܶܗ ܘܰܡܚܰܪܪ̈ܰܝ ܡ̣ܶܢ ܚܰܫ̈ܶܐ ܒܚܰܫܶܗ: ܘܰܡܫܰܘܙ̈ܒܰܝ ܡ̣ܶܢ ܡܺܝܬܽܘܬܳܐ ܒܡܰܘܬܶܗ: ܚܳܕܶܝܢܰܢ ܘܕܳܝܨܺܝܢܰܢ ܒܙܳܟܽܘܬܶܗ ܟܰܕ ܪܳܘܙܺܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ ܕܩ̣ܳܡ ܐܠܰܗܶܐ ܡ̣ܶܢ ܩܰܒܪܳܐ ܘܰܐܩܺܝܡ ܥܰܡܶܗ ܠܓܶܢܣܰܢ ܚܰܠܳܫܳܐ ܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ: ܗ̇ܳܝ ܕܰܒܝܰܕ ܥܒܳܪ ܦܽܘܩܕܳܢܳܐ ܠܥܽܘܡܩܳܐ ܐܶܫܬܰܪܓܶܠܢܰܢ ܘܡܶܛܽܠܗܳܕܶܐ ܬܰܟܫܶܦܬܳܐ ܠܳܟ ܡܩܰܪܒܺܝܢܰܢ: ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܕܰܬܫܰܟܶܢ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܠܥܺܕܬܳܟ ܗ̇ܳܝ ܕܰܦܪܰܩܬܳܗ̇ ܒܚܰܫ̈ܶܐ ܕܰܩܢܽܘܡܳܟ: ܒܰܪܶܟ ܠܰܒܢܶܝ̈ܗ̇ ܒܝܰܡܺܝܢܳܟ ܚܰܝܠܬܳܢܺܝܬܳܐ ܒܰܕܪܳܥܳܟ ܥܰܫܺܝܢܳܐ: ܐܰܪܺܝܡ ܩܪ̈ܳܒܶܐ ܡ̣ܶܢ ܥܰܡܳܟ: ܘܒܰܛܶܠ ܪܽܘܓܙܳܐ ܡ̣ܶܢ ܡܰܪܥܺܝܬܳܟ: ܚܬܽܘܡ ܠܥܺܕܬܳܟ ܒܢܺܝܫܶܗ ܕܰܨܠܺܝܒܳܟ ܘܢܰܛܰܪ ܠܝܰܠܕܶܝ̈ܗ̇ ܡ̣ܶܢ ܦܰܚܰܘ̈ܗܝ ܘܨܶܢ̈ܥܳܬܶܗ ܕܰܢܟܺܝܠܐܴ: ܘܢܶܬܚ̈ܰܠܛܳܢ ܙܡܺܝܪ̈ܳܬܳܐ ܕܺܝܠܗܽܘܢ ܥܰܡ ܓܽܘ̈ܕܶܐ ܘܣܶܕܪ̈ܶܐ ܕܺܝܠܳܟ ܢܰܨܺܝ̈ܚܶܐ: ܢܶܬܥܰܛܦܽܘܢ ܪ̈ܳܥܰܘܳܬܳܐ ܬܰܨܒܺܝܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ: ܘܰܢܗܰܕܽܘܢ ܘܢܶܪܥܽܘܢ ܠܡܰܪ̈ܥܝܳܬܳܐ ܕܺܝܠܗܽܘܢ ܥܰܠ ܡܰܪ̈ܓܶܐ ܥܰܫܺܝ̈ܢܶܐ ܘܗܰܢܺܝ̈ܶܐܐ ܕܬܶܐܘܳܪ̈ܺܝܰܐܣ ܕܺܝܠܳܟ ܐܠܰܗܳܝ̈ܳܬܳܐ: ܘܥܰܠ ܟܽܠ ܬܶܐܓܡܺܝ̈ܢ ܕܰܡܗܰܝ̈ܡܢܶܐ ܕܒܳܗ̇ ܫܰܝܢܳܐ ܘܰܫܠܳܡܳܐ ܕܡܶܢܳܟ ܢܰܡܠܶܟ. ܐܰܝܟܰܢܳܐ ܕܡ̣ܶܢ ܚܰܝܳܐ ܕܰܦ̣ܪܰܩܬ ܒܰܨܠܺܝܒܳܟ: ܘܡ̣ܶܢ ܡܺܝ̈ܬܶܐ ܕܰܐܚܺܝܬ ܒܡܰܘܬܳܟ: ܘܡ̣ܶܢ ܥܓܺܝ̈ܢܶܐ ܕܚܰܪܰܪܬ ܒܢܽܘܚܳܡܳܟ: ܬܶܫܒܽܘܚܬܳܐ ܘܬܰܘܕܺܝܬܳܐ ܬܶܣܰܩ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܣܳܓܕܺܝܢܰܢ ܠܳܟ ܐܠܰܗܳܐ ܡܳܪܰܢ ܝܶܫܽܘܥ ܡܫܺܝܚܳܐ ܚܰܝ̈ܶܐ ܫܰܪܺܝܪ̈ܶܐ ܘܠܐܴ ܡܶܬܚܰܒܠܳܢ̈ܶܐ ܕܰܒܝܰܕ ܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܪܺܝܚܳܐ ܒܰܣܺܝܡܳܐ ܕܠܐܴ ܡܳܝܽܘܬܽܘܬܳܐ ܙܪܰܥܬ ܒܰܢ. ܘܟܰܕ ܠܰܩܝܳܡܬܳܟ ܣܳܓܕܺܝܢܰܢ ܘܰܡܫܰܒܚܺܝܢܰܢ ܩܰܒܶܠ ܐܳܦ ܗܳܫܳܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡ̣ܶܢ ܡܚܺܝܠܽܘܬܰܢ ܐܶܬܩܰܪܰܒ ܠܳܟ: ܒܝܽܘܡ ܥܽܘܗܕܳܢܳܐ ܪܚܺܝܡܳܐ ܕܰܩܝܳܡܬܳܟ: ܟܰܕ ܝܳܗܶܒ ܐܰܢ̱ܬ ܠܰܢ ܓܰܠܝܽܘܬ ܐܰܦ̈ܶܐ ܫܰܪܺܝܪܬܳܐ: ܘܚܽܘܣܳܝܳܐ ܕܟܽܠܗܶܝܢ ܣܰܢ̈ܝܳܬܰܢ: ܐܰܝܟܰܢܳܐ ܕܕܰܟܝܳܐܺܝܬ ܢܥܰܕܥܶܕ ܠܰܩܝܳܡܬܳܟ: ܘܰܢܫܰܒܰܚ ܠܐܱܠܳܗܽܘܬܳܟ܀

 

ܚܘܬܡܐ

ܬܰܪܥܳܐ ܕܚܰܝ̈ܶܐ ܕܒܶܗ ܥܶܠܰܬ݀ ܥܳܢ̈ܳܐ ܛܰܥܳܝܬܳܐ ܠܐܱܬܪܳܐ ܕܚܰܝ̈ܶܐ: ܘܒܶܗ ܐܶܬܦܰܢܝܰܬ݀ ܓܳܠܽܘܬܳܐ ܕܥܰܡ̈ܡܶܐ ܠܰܠܡܺܐܢܳܐ ܕܫܰܝܢܳܐ ܘܕܰܫܠܳܡܳܐ: ܒܳܟ ܢܶܫܬܘܶܐ ܠܰܩܝܳܡܬܳܐ ܦܨܺܝܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܘܒܳܟ ܢܶܬܦܢܶܐ ܠܐܱܬܪܳܐ ܕܺܝܠܰܢ ܩܰܕܡܳܝܳܐ ܕܰܐܢ̱ܬ ܐܺܝܬܰܝܟ ܕܰܐܩܺܝܡܬ ܡܰܦܽܘܠܬܰܢ ܒܰܩܝܳܡܬܳܟ ܘܬܰܪܶܨܬܳܗ̇ ܠܰܟܦܺܝܦܽܘܬܰܢ ܒܢܽܘܚܳܡܳܟ: ܘܠܳܟ ܫܽܘܒܚܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܠܐܴ ܡܳܝܽܘܬܳܐ ܒܰܟܝܳܢܶܗ ܘܡܺܝܬ ܒܰܦܓܰܪ ܥܰܡܰܢ ܒܛܰܝܒܽܘܬܶܗ: ܘܶܐܬܩܒܰܪ ܒܛܰܝܒܽܘܬܳܐ ܐܰܟܘܳܬܰܢ ܕܰܢܩܽܘܡ ܐܰܟܘܳܬܶܗ ܘܰܠܒ̣ܶܫ ܓܰܐܝܽܘܬܳܐ ܕܢܶܠܒܫܰܢ ܫܽܘܒܚܶܗ: ܘܶܐܬܥܰܛܰܦ ܥܽܘܫܢܳܐ ܕܰܢܥܰܫܢܰܢ ܒܓܰܢ̱ܒܳܪܽܘܬܶܗ ܘܰܣܠܶܩ ܠܰܫܡܰܝܳܐ ܘܥܰܠܝܰܢ ܒܫܽܘܒܚܳܐ ܘܺܝܬܶܒ ܡ̣ܶܢ ܝܰܡܺܝܢ ܐܰܒܳܐ ܕܫܰܠܚܶܗ: ܘܰܐܘܬܒܰܢ ܒܫܽܘܒܚܳܐ ܘܰܒܪܽܘܡܪܳܡܳܐ ܕܠܶܗ ܝܳܐܶܐ܀

 

ܣܕܪܐ

ܐܠܰܗܳܐ ܡܶܠܬܳܐ ܡܪܰܝܡܳܐ ܗ̇ܰܘ ܕܰܒܛܰܝܒܽܘܬܶܗ ܛܥܶܡ ܡܰܘܬܳܐ ܚܠܳܦ ܟܽܠܢܳܫ ܒܨܶܒܝܳܢܶܗ ܟܰܕ ܗܘܳܐ ܒܰܪܢܳܫܳܐ ܕܠܐܴ ܫܽܘܚܠܳܦܳܐ: ܦܫܺܝܛܳܐ ܕܶܐܬܥܰܛܰܦ ܦܰܓܪܳܐ ܡܪܰܟܒܳܐܺܝܬ ܘܒܰܛܶܠ ܓܡܺܝܪܳܐܺܝܬ ܠܰܚܒ̇ܳܠܐܴ ܕܰܓܕܰܫ ܠܐܢܳܫܽܘܬܰܢ ܒܰܥܒ̇ܳܪ ܦܽܘܩܕܳܢܳܐ: ܟܰܣܝܳܐ ܘܰܓܢܺܝܙܳܐ ܕܰܒܡܶܐܬܺܝܬܶܗ ܕܠܐܱܪܥܳܐ ܟܽܘܒܳܢܳܝܬܳܐ ܐܰܦܢܺܝ ܛܪ̈ܺܝܕܶܐ ܠܐܱܬܪܗܽܘܢ ܩܰܕܡܳܝܳܐ ܡܰܠܟܳܐ ܪܰܒܳܐ ܕܰܒܓܰܙܳܐ ܕܰܚܢܳܢܶܗ ܚܰܪܪܰܢ ܡ̣ܶܢ ܠܰܘܛܬܳܐ ܕܰܥܒ̇ܳܪ ܢܳܡܽܘܣܳܐ. ܫܰܝܢܳܐ ܫܡܰܝܳܢܳܐ ܕܰܒܡܰܣܩܶܗ ܕܠܰܨܠܺܝܒܳܐ ܬܰܪܥܶܗ ܠܰܣܝ̇ܳܓܳܐ ܕܰܒܥܶܠܕܒܳܒܽܘܬܳܐ ܥܰܬܺܝܩܬܳܐ: ܩܪܰܒܬܳܢܳܐ ܕܣܳܡ ܪܶܓܠܶܗ ܥܰܠ ܨܰܘܪܳܐ ܕܰܚܛܺܝܬܳܐ ܡܰܪܺܝܪܬܳܐ ܘܕܳܫܶܗ ܠܡܰܘܬܳܐ ܛܪܽܘܢܳܐ. ܓܰܢ̱ܒܳܪܳܐ ܕܰܒܡܰܥܠܶܗ ܠܒܶܝܬ ܡܺܝ̈ܬܶܐ ܟܰܕ ܗܘܳܐ ܐܰܝܟ ܚܰܕ ܡ̣ܶܢ ܡܺܝ̈ܬܶܐ ܐܰܗܦܶܟ ܫܒܺܝܬܰܢ ܐܰܝܟ ܦܨܺܝ̈ܕܶܐ ܕܰܒܬܰܝܡܢܳܐ: ܘܺܐܝܬܰܘܗܝ ܚܰܕ ܡ̣ܶܢ ܩܢܽܘ̈ܡܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܢܽܘܪܳܐ ܐܳܟܶܠܬܳܐ ܕܶܐܬܟܪܶܟ ܒܟܶܬܳܢ̈ܶܐ ܘܶܐܬܬܣܺܝܡ ܒܓܰܘ ܩܰܒܪܳܐ ܐܰܝܟ ܥܰܢܺܝܕܳܐ: ܟܰܕ ܠܥܶܠ  ܒܓܰܘ ܩܽܘܒܬܳܐ ܕܰܫܡܰܝܳܢ̈ܶܐ ܡܰܬܗܰܪ ܠܢܽܘܪ̈ܳܢܶܐ ܒܕܶܚܠܬܳܐ: ܢܽܘܚܳܡܳܐ ܫܰܪܺܝܪܳܐ ܘܚܰܝ̈ܶܐ ܕܟܽܠ ܢܶܫܡܳܐ ܕܒܰܩܝܳܡܬܶܗ ܕܡ̣ܶܢ ܩܰܒܪܳܐ: ܕܳܫ ܚܰܝܠܬܳܢܳܐܺܝܬ ܥܰܠ ܥܽܘܩܣܶܗ ܕܡܰܘܬܳܐ ܝܰܥܢܳܐ: ܘܫܰܪܰܪ ܩܝܳܡܬܳܐ ܠܪܺܝܫ ܛܽܘ̈ܗܡܶܐ ܘܫܰܪ̈ܒܳܬܳܐ ܚܰܬܢܳܐ ܩܰܕܺܝܫܳܐ ܕܰܢܦܰܩ ܡ̣ܶܢ ܓܢܽܘܢܳܗ̇ ܕܰܫܝܽܘܠ ܟܰܕ ܥܛܺܝܦ ܢܰܨܺܝܚܽܘܬܳܐ ܘܓܰܢ̱ܒܳܪܽܘܬܳܐ: ܘܰܦܢܳܐ ܡ̣ܶܢ ܡܰܘܬܳܐ ܟܰܕ ܠܒܺܝܫ ܟܽܠܳܗ̇ ܙܳܟܽܘܬܳܐ. ܡܫܺܝܚܳܐ ܕܡܰܟܪܳܗ̇ ܠܥܺܕܬܶܗ ܩܰܕܺܝܫܬܳܐ ܒܚܰܫܰܘ̈ܗܝ ܡܰܚ̈ܝܳܢܶܐ: ܘܰܐܩܺܝܡܳܗ̇ ܥܰܡܶܗ ܒܰܩܝܳܡܬܶܗ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܒܰܕܓܽܘܢ ܡܫܺܝܚܳܐ ܐܠܰܗܳܐ ܕܺܝܠܰܢ: ܡܦܺܝܣܺܝܢܰܢ ܘܒܳܥܶܝܢܰܢ ܡܶܢܳܟ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܚܠܳܦ ܥܺܕܬܳܐ ܕܺܝܠܳܟ ܩܰܕܺܝܫܬܳܐ ܗ̇ܳܝ ܕܝܳܬܒܳܐ ܒܰܝܢܳܬ݀ ܦܰܚ̈ܶܐ: ܘܰܟܪܺܝܟܺܝܢ ܠܳܗ̇ ܢܶܫ̈ܒܶܐ ܕܰܒܥܶܠܕ̈ܒܳܒܶܐ. ܕܬܰܫܰܪ ܡܳܪܝ ܫܽܘܘܕܳܝܰܝ̈ܟ ܠܘܳܬܳܗ̇ ܘܫܰܡܠܐܴ ܩܝܳܡܳܟ ܗ̇ܰܘ ܕܥܰܡܳܗ̇: ܕܗܳܐ ܐܶܢܳܐ ܥܰܡܶܟܝ ܐܺܝܬܰܝ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ: ܪܕܽܘܦ ܠܰܒܥܶܠܕ̈ܒܳܒܶܝܗ̇ ܒܚܰܝܠܳܟ ܬܰܩܺܝܦܳܐ: ܘܒܰܕܰܪ ܐܶܢܽܘܢ: ܣܚܽܘܦ ܠܣܳܢ̈ܶܐܝܗ̇ ܒܥܽܘܫܢܳܟ ܚܰܝܠܬܳܢܳܐ ܘܰܐܒܗܶܬ ܐܶܢܽܘܢ: ܐܰܘܪܶܒ ܛܽܘܢ̈ܒܶܝܗ̇ ܒܟܰܗܺܝܢܽܘܬܳܐ ܕܡܶܢܳܟ ܘܫܰܡܠܐܴ ܐܶܢܽܘܢ: ܣܺܝܡ ܬܚܽܘ̈ܡܶܝܗ̇ ܒܰܫܠܳܡܳܐ ܘܪܰܡܪܶܡ ܐܶܢܽܘܢ. ܥܰܠܐܴ ܒܶܢܝܳܢܶܝ̈ܗ̇ ܒܬܽܘܩܦܳܟ ܘܰܣܡܽܘܟ ܐܶܢܽܘܢ: ܡܬܽܘܚ ܣܶܕܪ̈ܶܝܗ̇ ܒܰܐܘܝܽܘܬܳܐ ܘܛܰܟܶܣ ܐܶܢܽܘܢ. ܠܰܚܶܡ ܓܽܘ̈ܕܶܝܗ̇ ܒܚܽܘܒܳܐ ܘܚܰܝܶܕ ܐܶܢܽܘܢ: ܣܰܬܰܪ ܐܶܢܽܘܢ: ܦܰܨܳܐ ܠܰܒ̈ܢܶܝܗ̇ ܡܶܢܟܽܠ ܢܶܟܝܳܢܺܝ̈ܢ ܘܫܰܘܙܶܒ ܐܶܢܽܘܢ: ܘܶܐܡܰܬܝ ܕܫܳܦܰܪ ܠܨܶܒܝܳܢܳܟ ܡ̣ܶܢ ܚܰܝ̈ܶܐ ܐܰܓܥܶܠ ܢܰܦ̈ܫܳܬܰܢ: ܠܐܱܘ̈ܳܢܶܐ ܛܽܘܒܬܳܢ̈ܶܐ ܐܰܣܡܶܟ ܠܰܢ: ܘܠܰܣܡܳܟܳܐ ܪܽܘܚܳܢܳܝܳܐ ܥܰܡ ܩܰܕܺܝ̈ܫܶܐ ܛܰܝܶܒ ܠܰܢ. ܘܠܐܱܝܠܶܝܢ ܕܰܒܗܰܝܡܳܢܽܘܬܳܐ ܕܰܚܛܳܗܰܝ̈ܗܽܘܢ ܚܰܕܳܐ ܐܶܢܽܘܢ ܘܒܰܥܛܳܝܳܐ ܕܣܰܟܠܘ̈ܳܬܗܽܘܢ ܐܰܦܨܰܚ ܐܶܢܽܘܢ: ܒܰܚܙܳܬܳܟ ܐܠܰܗܳܝܬܳܐ ܒܰܣܶܡ ܐܶܢܽܘܢ: ܡܶܛܽܠ ܕܛܳܒܳܐ ܘܥܰܬܺܝܪ ܒܫܽܘ̈ܟܳܢܶܐ ܘܰܒܡܰܘ̈ܗܒܳܬܳܐ ܐܺܝܬܰܝܟ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܐܱܒܽܘܟ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܘܰܡܪܰܚܡܳܢܳܐ ܕܪܶܚܡܰܬ݀ ܐ̱ܢܳܫܽܘܬܶܗ ܒܓܰܘ ܩܰܒܪܳܐ ܣܳܡܬܶܗ: ܘܝܰܡܺܝܢܶܗ ܚܰܝܠܬܳܢܺܝܬܳܐ ܡ̣ܶܢ ܡܰܘܬܳܐ ܦܪܰܩܬܶܗ ܘܰܕܪܳܥܶܗ ܩܰܕܺܝܫܳܐ ܒܫܽܘܒܚܳܐ ܪܰܡܪܡܶܗ: ܘܚܰܝܠܶܗ ܬܰܩܺܝܦܳܐ ܒܙܳܟܽܘܬܳܐ ܐܰܩܺܝܡܶܗ: ܘܡ̣ܶܢ ܓܰܘ ܩܰܒܪܳܐ ܐܶܬܢܰܚܰܡ ܐܰܝܟ ܓܰܒܪܳܐ ܕܢܰܦܨܶܗ ܚܰܡܪܶܗ. ܘܬܽܘܩܦܳܐ ܕܺܝܠܶܗ ܪܳܡܳܐ ܠܰܫܡܰܝܳܐ ܥܰܠܝܶܗ: ܘܡ̣ܶܢ ܝܰܡܺܝܢܳܐ ܕܰܐܒܽܘܗܝ ܒܫܽܘܒܚܳܐ ܐܰܘܬܒܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܫܽܘܒܚܳܐ ܠܳܟ ܒܽܘܟܪܳܐ ܫܡܰܝܳܢܳܐ ܝܰܠܕܳܐ ܓܢܺܝܙܳܐ ܕܡ̣ܶܢ ܐܰܒܳܐ: ܕܰܐܠܳܗܳܐܺܝܬ ܘܠܐܴ ܡܶܬܓܰܫܡܳܢܳܐܺܝܬ ܘܰܡܬܽܘܡܳܐܺܝܬ ܘܰܠܥܶܠ ܡ̣ܶܢ ܙܰܒ̈ܢܶܐ ܡܶܢܶܗ ܨܡܰܚܬ: ܘܟܰܕ ܠܐܴ ܣܢܺܝܩ ܐܰܢ̱ܬ ܐܶܬܬܰܚܬܺܝܬ ܘܰܗܘܰܝܬ ܒܰܪܢܳܫܳܐ ܨܶܒܝܳܢܳܐܺܝܬ ܐܰܚܳܐ ܘܒܽܘܟܪܳܐ ܕܰܥܡܺܝ̈ܕܶܐ ܐܰܝܟܰܢܳܐ ܕܰܬܩܰܕܶܫ ܠܰܢ ܡܫܰܡܠܝܳܐܺܝܬ ܒܡܰܘܠܳܕܶܗ ܬܪܰܝܳܢܳܐ ܕܡܰܥܡܽܘܕܺܝܬܳܐ ܘܬܶܥܒܶܕ ܠܰܢ ܪܽܘܚܳܢܳܐܺܝܬ ܐܰܚ̈ܶܐ ܘܰܒܢ̈ܰܝ ܝܳܪܬܽܘܬܳܐ ܕܺܝܠܳܟ. ܐܰܢ̱ܬ ܗ̣ܽܘ ܓܶܝܪ ܒܽܘܟܪܳܐ ܕܡ̣ܶܢ ܡܺܝ̈ܬܶܐ ܩܳܡܬ ܒܫܽܘܒܚܳܐ ܪܰܒܳܐ: ܕܚܰܝܽܘܣܬܳܢܳܐܺܝܬ ܘܰܡܪܰܚܡܳܢܳܐܺܝܬ ܐܰܝܟ ܪܶܚܡܰܬ݀ ܐ̱ܢܳܫܽܘܬܳܟ ܗܘ̣ܰܝܬ ܘܶܐܫܬܰܡܰܗܬ ܒܰܒܣܰܪ ܘܶܐܬܢܰܚܰܡܬ ܘܩܳܡܬ ܓܰܢ̱ܒܳܪܳܐܺܝܬ ܡ̣ܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ ܕܚܰܕ ܒܫܰܒܳܐ ܕܺܐܝܬܰܘܗܝ ܒܽܘܟܪܳܐ ܕܝܰܘ̈ܡܳܬܳܐ: ܕܒܶܗ ܐܶܬܒܪܺܝܘ ܫܡܰܝܳܐ ܘܰܐܪܥܳܐ ܒܡܶܠܬܳܟ ܦܳܩܽܘܕܬܳܐ ܘܰܡܫܰܠܰܛܬܳܐ ܘܒܶܗ ܚܕܺܝܘ ܘܶܐܬܦܨܰܚܘ ܒܶܪ̈ܝܳܬܳܐ ܘܬܶܫܒܽܘܚܬܳܐ ܚܕܰܬܳܐ ܝܰܒܶܒܘ ܫܡܰܝ̈ܳܢܶܐ ܘܰܐܪ̈ܥܳܢܳܝܶܐ ܒܰܩܝܳܡܬܳܟ ܡܫܰܒܰܚܬܳܐ: ܘܒܶܗ ܗ̣ܽܘ ܓܶܝܪ ܕܰܢܚܶܬ ܠܰܢ ܡ̣ܶܢ ܩܰܒܪܳܐ ܟܡܺܝܪܳܐ ܢܽܘܗܪܳܐ ܫܰܪܺܝܪܳܐ ܡܚܰܕܝܳܢܶܗ ܕܥܳܠܡܳܐ: ܘܡܰܦܨܚܳܢܳܐ ܕܒܶܪ̈ܝܳܬܳܐ ܘܒܶܗ ܐܶܬܦܣܶܩ ܣܰܒܪܳܐ ܘܬܽܘܟܠܳܢܶܗ ܕܡܰܘܬܳܐ ܝܰܥܢܳܐ ܘܒܰܛܶܠ ܫܽܘܠܛܳܢܶܗ ܘܽܐܘܚܕܳܢܶܗ ܕܰܛܪܽܘܢܳܐ: ܘܰܣܓܺܝ ܣܰܒܪܳܐ ܘܒܽܘܝܳܐܳܐ ܠܚܰܝ̈ܶܐ ܘܡܺܝ̈ܬܶܐ ܕܰܐܘܕܺܝܘ ܒܡܳܪܽܘܬܳܟ ܫܰܪܺܝܪܳܐܺܝܬ: ܘܗܰܝܡ̣ܶܢܘ ܒܰܐܠܳܗܽܘܬܳܟ ܟܽܠܗܽܘܢ ܬܪܺܝܨܳܐܺܝܬ: ܒܗܳܢܳܐ ܝܰܘܡܳܐ ܕܺܐܝܬܰܘܗܝ ܡܚܰܘܝܳܢܳܐ ܕܰܩܝܳܡܬܳܟ ܗ̇ܳܝ ܕܰܗܘܳܬ݀ ܩܝܳܡܬܳܐ ܫܰܪܺܝܪܬܳܐ ܕܡܰܦܽܘܠܬܰܢ: ܐܰܝܟܰܢܳܐ ܕܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܩܕܳܡ ܬܪܽܘܢܳܘܣ ܡܥܰܠܝܳܐ ܕܰܐܠܳܗܽܘܬܳܟ: ܒܥܶܕܳܢܳܐ ܗܳܢܳܐ ܢܶܬܩܰܒܰܠ ܩܕܳܡ ܪ̈ܰܚܡܰܝܟ: ܘܢܶܬܚܰܠܰܛ ܒܶܗ ܥܶܛܪܳܐ ܡܩܰܒܠܐܴ ܕܰܨܠܰܘ̈ܳܬܰܢ ܡܚܺܝ̈ܠܳܬܳܐ ܒܛܰܝܒܽܘܬܳܟ: ܘܢܶܗܘܶܐ ܠܚܽܘܣܳܝܳܐ ܕܚܰܘ̈ܒܶܐ ܕܟܽܠܳܗ̇ ܡܰܪܥܺܝܬܳܟ ܦܪܺܝܩܰܬ݀ ܒܰܨܠܺܝܒܳܟ ܙܰܟܳܝܳܐ: ܘܰܠܥܽܘܕܪܳܢܳܐ ܘܠܐܴܣܝܽܘܬܳܐ ܕܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̈ܨܶܐ ܘܰܠܦܽܘܢܳܝܳܐ ܕܟܽܠܗܶܝܢ ܫ̈ܶܐܠܳܬܳܐ ܫܰܦܺܝܪ̈ܳܬܳܐ: ܕܰܐܝܠܶܝܢ ܕܶܐܬܓܰܘܰܣܘ ܒܰܡܪܰܚܡܳܢܽܘܬܳܟ: ܘܫܳܐܠܺܝܢܰܢ ܨܠܰܘ̈ܳܬܳܐ ܕܰܒܨܺܝܪܽܘܬܰܢ: ܠܰܢܝܳܚܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ ܕܡ̣ܶܢ ܟܽܠ ܠܳܟ ܦܐܶܐ ܡܳܪܳܐ ܕܟܽܠ ܫܽܘܒܚܳܐ ܘܺܐܝܩܳܪܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܛܳܒ̈ܳܬܳܐ ܠܐܴ ܡܶܬܬܪ̈ܺܝܡܳܢܝܳܬܳܐ ܘܒܽܘܪ̈ܟܳܬܳܐ ܐܰܡܺܝ̈ܢܳܬܳܐ ܫܰܟܶܢ ܠܰܢ ܡܳܪܝܳܐ ܒܥܺܐܕܳܐ ܗܳܢܳܐ ܗܕܺܝܪ ܒܚܰܕ̈ܘܳܬܳܐ ܘܣܰܓܺܝ ܦܨܺܝܚ̈ܘܳܬܳܐ ܣܒܺܝܣ ܒܚܽܘ̈ܓܳܝܶܐ ܕܝܰܘܡܳܐ ܕܰܩܝܳܡܬܳܟ ܐܰܝܟܰܢܳܐ ܕܟܰܕ ܒܗܳܠܶܝܢ ܡܰܥܬܰܪ ܐܰܢ̱ܬ ܠܰܢ: ܠܛܰܝܒܽܘܬܳܟ ܪܰܒܬܳܐ ܘܠܐܴ ܡܶܬܡܰܠܠܳܢܺܝܬܳܐ ܕܰܐܦܨܰܚܬ ܠܰܢ ܒܰܩܝܳܡܬܳܟ ܡܫܰܒܰܚܬܳܐ ܡܫܺܝܚܳܐ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܬܠܺܝܬܳܝܳܐ ܘܰܠܚܽܘܕܳܝܳܐ ܗ̇ܰܘ ܕܒܰܠܚܽܘܕܰܘܗܝ ܐܠܰܗܳܐ ܫܰܪܺܝܪܳܐ: ܠܐܴ ܥܒܺܝܕܳܐ ܘܠܐܴ ܒܰܪܝܳܐ ܘܠܐܴ ܡܶܬܕܰܪܟܳܢܳܐ ܗ̇ܰܘ ܕܰܠܚܽܘܕܳܐܺܝܬ ܘܰܬܠܺܝܬܳܐܺܝܬ ܡܶܣܬܓܶܕ ܘܡܶܫܬܰܒܰܚ ܠܐܴ ܐܰܫܺܝܕܳܐܺܝܬ ܠܰܘ ܒܠܺܝܠܐܴܝܬ ܠܰܘ ܣܰܓܺܝܐܘܽܬ ܐܠܰܗ̈ܶܐ ܡܶܛܽܠ ܬܠܺܝܬܳܝܰܬ ܩܢܽܘ̈ܡܶܐ: ܐܶܠܐܴ ܫܒܺܝܚܳܐܺܝܬ ܡܶܛܽܠ ܡܥܰܠܝܽܘܬܳܐ ܕܟܽܠ ܚܰܕ. ܟܰܕ ܠܰܬܠܳܬܳܐ ܡ̇ܰܢ ܩܽܘ̈ܕܳܫܶܐ ܚܕܳܐ ܡܳܪܽܘܬܳܐ ܘܚܰܕ ܗ̣ܽܘ ܫܽܘܠܛܳܢܳܐ ܘܰܚܕܳܐ ܐܠܰܗܽܘܬܳܐ ܝܳܕܥܺܝܢܰܢ ܕܒܰܠܚܽܘܕܳܝܽܘܬ ܙܢܳܐ ܕܠܳܗ̇ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ  ܡܶܬܬܰܘܕܶܐ ܘܡܶܣܬܓܶܕ ܐܳܦ ܡܶܫܬܰܒܰܚ ܒܗܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܚܰܝܠܐܴ ܐܺܝܬܝܳܝܳܐ ܘܚܶܟܡܬܳܐ ܘܩܰܕܺܝܫܽܘܬܳܐ ܕܰܐܠܳܗܳܐ ܐܰܒܳܐ: ܠܰܘ ܐܰܝܟ ܩܰܢܳܝܽܘܬܳܐ ܘܳܐܦܠܐܴ ܐܰܝܟ ܡܛܰܝܒܽܘܬܳܐ ܐܰܘܟܺܝܬ ܥܳܗܢܽܘܬܳܐ. ܐܶܠܐܴ ܐܽܘܣܺܝܰܐ ܚܰܝܬܳܐ ܕܡܰܥܒܕܳܐ ܠܟܽܠܳܗ̇ ܬܶܫܒܽܘܚܬܳܐ ܕܰܐܒܳܐ ܗ̣ܺܝ ܒܳܗ̇ ܡܰܝܬܝܳܐ. ܝܰܠܕܳܐ ܡܬܽܘܡܳܝܳܐ ܕܠܐܴ ܒܨܺܝܪ ܡ̣ܶܢ ܝܳܠܽܘܕܶܗ: ܕܗܽܘܝܽܘ ܕܰܡܫܰܡܠܐܷ: ܬܠܺܝܬܳܝܽܘܬܳܐ ܒܰܐܒܳܐ ܕܡܰܫܚܶܗ ܡܶܫܚܳܐ ܕܚܰܕܽܘܬܳܐ ܘܰܕܪܽܘܚܳܐ ܩܰܕܺܝܫܳܐ ܘܰܡܩܰܕܶܫ ܟܽܠ. ܟܰܕ ܕܶܝܢ ܐܶܬܚܙܺܝ ܕܰܚܛܺܝܬܳܐ ܕܥܶܠܬܳܐ ܕܡܰܘܬܳܐ ܠܥܳܠܡܳܐ ܒܝܰܕ ܒܰܪܢܳܫܳܐ ܒܒܶܣܪܳܐ ܕܺܝܠܶܗ ܕܰܗܘܳܐ ܬܚܶܝܬ ܢܳܡܽܘܣܳܐ ܕܡܰܘܬܳܐ: ܘܝܰܗܒ ܠܰܢ ܦܽܘܩܕ̈ܳܢܶܐ ܕܕܺܝܰܐܬܺܝܺܩܝ ܕܦܽܘܪܩܳܢܳܐ ܘܰܐܦܢܺܝ ܠܰܢ ܡ̣ܶܢ ܛܳܥܝܽܘܬܳܐ ܕܰܦܬܰܟܪ̈ܶܐ ܘܠܺܝܕܰܥܬܶܗ ܐܰܝܬܺܝ ܠܰܢ. ܘܰܩܢܳܢ ܠܶܗ ܥܰܡܳܐ ܡܛܰܝܒܳܐ ܡܰܠܟܽܘܬܳܐ ܓܒܺܝܬܳܐ ܘܰܡܫܰܪܬܰܚܬܳܐ ܟܶܢܫܳܐ ܡܶܬܬܦܺܝܣܳܢܳܐ. ܘܕܰܟܺܝ ܒܡܰܝ̈ܳܐ ܘܩܰܕܶܫ ܒܪܽܘܚܳܐ ܩܰܕܺܝܫܳܐ: ܘܝܰܗܒ ܗ̣ܽܘ ܠܶܗ ܬܰܚܠܽܘܦܳܐ: ܠܗ̇ܰܘ ܕܒܺܐܝ̈ܕܰܘܗܝ ܐܰܚܺܝܕܺܝܢ ܗܘܰܝܢ ܘܰܡܙܰܒܢܺܝܢ ܗܘܰܝܢ ̣ܡ̣ܶܢ ܚܛܺܝܬܳܐ: ܘܰܢܚܶܬ ܒܝܰܕ ܨܠܺܝܒܳܐ ܠܰܫܝܽܘܠ ܕܰܢܡܰܠܐܷ ܒܶܗ ܢܒܺܝܰܘ̈ܳܬܳܐ ܕܰܢܒܺܝ̈ܶܐ: ܘܩܳܡ ܗܘܳܐ ܠܰܬܠܳܬܳܐ ܝܰܘ̈ܡܺܝܢ ܘܰܕܪܰܫ ܐܽܘܪܚܳܐ ܠܥܶܠ ܡ̣ܶܢ ܒܶܣܪܳܐ ܡܗܰܘܢܳܐ ܘܰܡܠܺܝܠܐܴ: ܘܰܩܝܳܡܬܳܐ ܘܚܰܝ̈ܶܐ ܘܢܽܘܚܳܡܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܒܗ̇ܳܝ ܕܠܐܴ ܡܰܨܝܳܐ ܗܘܳܬ݀ ܘܢܶܬܠܒܶܟ ܡ̣ܶܢ ܚܒ̇ܳܠܐܴ: ܘܠܐܴ ܕܰܫܝܽܘܠ ܕܳܘܺܝܬܳܐ ܬܟܽܘܡܝ ܥܠܰܘܗܝ ܕܗ̇ܰܘ ܪܺܝܫܳܐ ܕܚܰܝ̈ܶܐ: ܘܰܒܗ̇ܰܘ ܡܳܐ ܕܡܶܨܛܰܪܶܝܢ ܗܘܰܝܢ ܒܶܗ ܗ̣ܽܘ ܫܩܰܠ ܐܺܝܩܳܪܳܐ ܘܰܐܦܶܩ ܡ̣ܶܢ ܓܰܘ ܫܝܽܘܠ ܠܢܰܦ̈ܫܳܬܳܐ ܡܗܰܝ̈ܡܢܳܬܳܐ ܐܰܝܠܶܝܢ ܕܶܐܬܢܰܗܰܪ̈ܝ ܒܶܗ. ܝܰܠܽܘ̈ܕܶܐ ܠܚܽܘܕ ܘܗ̇ܳܢܽܘܢ ܕܰܢܛܰܪܘ ܢܳܡܽܘܣܳܐ ܟܝܳܢܳܝܳܐ ܘܒܳܬܰܪܟܶܢ ܟܬܳܒܳܝܳܐ ܘܠܐܱܬܪܳܐ ܕܰܡܥܰܕܰܢ ܒܓܶܐܘ̈ܳܬܳܐ ܠܢܰܦܫܶܗ ܕܓܰܝܳܣܳܐ ܫܰܕܰܪ ܘܠܰܫܝܽܘܠ ܡܥܰܕܰܢܬܳܐ ܒܰܙ. ܘܰܠܓܰܙܶܝ̈ܗ̇ ܣܰܦܶܩ: ܐܳܦ ܠܰܚܒܺܝ̈ܫܶܐ ܕܒܳܗ̇ ܐܰܦܶܩ: ܘܰܠܩܰܕܺܝ̈ܫܶܐ ܕܡ̣ܶܢ ܢܽܘܓܪܳܐ ܠܶܗ ܡܣܳܟܶܝܢ ܗܘܰܘ ܠܰܡܕܺܝܢ̱ܬܳܐ ܩܰܕܺܝܫܬܳܐ ܫܰܕܰܪ ܘܰܠܣܰܓܺܝ̈ܶܐܐ ܕܗܰܝܡܶܢܘ ܚܰܘܺܝ ܘܰܠܡܰܠܐܱܟ̈ܶܐ ܥܰܡ ܥܰܦܪ̈ܳܢܶܐ ܚܰܠܛ: ܘܰܠܢܶܫ̈ܶܐ ܒܬܶܗܪܳܐ ܩܝܳܡܬܶܗ ܣܰܒܰܪ: ܘܰܠܢܳܛܽܘܪ̈ܶܐ ܐܰܪܗܶܒ ܘܰܠܝܽܘ̈ܕܳܝܶܐ ܒܺܝ̈ܫܰܝ ܗܰܝܡܳܢܽܘܬܳܐ ܐܰܒܗܶܬ. ܘܰܠܬܰܠܡܺܝ̈ܕܶܐ ܩܰܕܺܝ̈ܫܶܐ ܢܽܘܚܳܡܶܗ ܫܰܪܰܪ: ܘܰܠܕܽܘܟ̈ܝܳܬܳܐ ܕܨܶܨ̈ܶܐ ܒܦܰܓܪܶܗ ܢܰܛܰܪ. ܘܰܠܦܽܘܠܳܓܳܐ ܕܺܝܠܗܽܘܢ ܒܓܶܫܬܳܐ ܕܕܰܦܢܶܗ ܐܰܣܺܝ: ܘܒܰܫܠܳܡܳܐ ܕܝܰܗܒ ܠܗܽܘܢ ܚܽܘܒܶܗ ܫܰܪܺܝܪܳܐ ܒܢܰܦ̈ܫܳܬܗܽܘܢ ܣܰܬܶܬ ܘܒܰܝܬܳܝܽܘܬܳܐ ܕܫܽܘܠܛܳܢܳܐ ܥܰܡ ܕܰܐܒܽܘܗܝ ܐܠܰܦ: ܒܗ̇ܳܝ ܕܶܐܡܰܪ ܕܣܳܠܶܩ ܐ̱ܢܳܐ ܠܘܳܬ ܐܳܒܝ ܟܝܳܢܳܐܺܝܬ ܘܰܐܒܽܘܟܽܘܢ ܒܛܰܝܒܽܘܬܳܐ: ܘܰܐܠܳܗܝ ܕܺܝܠܝ ܡܕܰܒܪܳܢܳܐܺܝܬ ܘܰܐܠܳܗܟܽܘܢ ܟܝܳܢܳܐܺܝܬ: ܘܠܐܘܚܕܳܢܳܐ ܕܫܺܐܕ̈ܶܐ ܫܪܳܐ ܘܰܠܥܽܘܡܩܳܐ ܕܰܚܛܺܝܬܳܐ ܬܰܒܰܪ ܘܰܫܚܰܩ ܘܰܠܚܰܫ̈ܶܐ ܒܠܐܴ ܚܳܫܽܘܫܽܘܬܳܐ ܕܰܐܠܳܗܽܘܬܳܟ ܕܰܥܶܟ ܘܠܰܪ̈ܓܺܝܓܳܬܳܐ ܒܰܛܶܠ ܘܠܰܓܙܳܪ ܕܺܝܢܳܐ ܥܛܳܐ ܘܰܠܡܰܘܬܳܐ ܝܰܥܢܳܐ ܘܰܡܡܺܝܬܳܢܳܐ ܐܰܡܺܝܬ: ܘܰܩܝܳܡܬܳܐ ܘܚܰܝ̈ܐ ܐܰܕܢܰܚ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܳܪܝܳܐ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܗܳܫܳܐ ܦܳܐܰܚ ܐܰܝܟܰܢܳܐ ܕܰܠܚܰܘ̈ܒܶܐ ܘܰܚܛܳܗ̈ܶܐ ܕܺܝܠܰܢ ܬܰܥܒܰܪ. ܘܚܽܘܒܳܐ ܡܫܰܡܠܝܳܐ ܘܰܓܡܺܝܪܳܐ ܒܢܰܦ̈ܫܳܬܰܢ ܫܰܪܰܪ ܘܟܰܦ̈ܢܶܐ ܘܬܽܘ̈ܟܶܐ ܩܫܰܝ̈ܳܐ ܘܽܐܘܠܨܳܢ̈ܶܐ ܘܡܰܘܬܳܢ̈ܶܐ ܘܒܳܙܽܘ̈ܙܝܶܐ ܡܶܢܰܢ ܦܰܠܗܶܕ: ܠܟܳܗ̈ܢܶܐ ܘܠܰܡܫܰܡ̈ܫܳܢܶܐ ܙܰܗܳܐ ܘܰܒܬܽܘ̈ܠܐܷ ܘܰܡܙܰܘ̈ܓܶܐ ܢܰܟܶܦ ܘܫܰܒܪ̈ܶܐ ܪܰܒܳܐ: ܠܐܱܒܺܝ̈ܠܐܷ ܘܰܡܥܳܩ̈ܶܐ ܠܰܒܶܒ ܠܡܰܠܟ̈ܶܐ ܘܠܐܘܚܕ̈ܳܢܶܐ ܕܺܝܠܗܽܘܢ ܫܰܝܶܢ: ܘܩܺܐܪ̈ܣܶܐ ܫܰܗܳܐ: ܚܺܐܦ̈ܶܐ ܘܪ̈ܰܘܒܶܐ ܬܰܗܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܒܢ̈ܰܝ ܥܺܕܬܳܐ ܕܺܝܠܳܟ ܒܬܶܫܒܽܘܚܬܳܐ ܗ̇ܳܝ ܪܳܡܰܬ݀ ܡ̣ܶܢ ܗܽܘ̈ܠܐܷ ܒܰܐܬܪܳܟ ܡܠܐܷ ܢܽܘܗܪܳܐ ܠܰܢ ܘܰܠܗܽܘܢ ܐܰܫܪܳܐ: ܘܰܚܢܰܢ ܕܶܐܫܬܰܚܰܪܢ ܒܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܒܰܣܶܡ ܘܰܐܢܺܝܚ ܠܰܢ ܒܡܰܠܟܽܘܬܳܐ ܕܺܝܠܳܟ ܡܬܽܘܡܳܝܬܳܐ ܘܪܰܘܪܒܳܐܺܝܬ ܘܠܐܴ ܙܰܒܢܳܐܺܝܬ ܘܰܡܬܽܘܡܳܐܺܝܬ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

 

ܥܛܪܐ

ܫܽܘܒܚܳܐ ܠܳܟ ܒܽܘܟܪܳܐ ܕܡ̣ܶܢ ܡܺܝ̈ܬܶܐ: ܕܢܰܚܶܡܬ ܠܡܺܝ̈ܬܶܐ ܒܚܰܕ ܒܫܰܒܳܐ ܒܽܘܟܪܳܐ ܕܝܰܘ̈ܡܳܬܳܐ ܒܝܰܘܡܳܐ ܗܳܢܳܐ ܡܳܪܝ ܕܰܐܝܟ ܕܰܡܟ̈ܶܐ ܡ̣ܶܢ ܫܶܢܬܳܐ ܠܥܰܢܺܝ̈ܕܶܐ ܡܥܺܝܪ ܐܰܢ̱ܬ: ܐܰܥܺܝܪ ܠܶܫܳܢܰܝ̈ܢ ܠܬܶܫܒܽܘܚܬܳܟ: ܘܥܺܕܬܳܟ ܕܚܳܕܝܳܐ ܒܥܽܘܗܕܳܢܳܐ ܕܰܩܝܳܡܬܳܟ ܬܶܚܕܶܐ ܒܰܓܢܽܘܢܳܟ: ܘܟܺܐܢ̈ܶܐ ܐܶܬܢܰܦܰܫܘ ܒܓܰܘ ܩܰܒܪ̈ܰܝܗܽܘܢ ܕܰܚܙܰܐܘܽܘܟ ܙܡܺܝܢܳܐ ܒܰܝܢܳܬܗܽܘܢ: ܘܗܳܐ ܝܰܘܡܳܢܳܐ ܟܶܢ̈ܫܶܐ ܪܳܘܙܺܝܢ ܒܥܺܐܕܳܐ ܦܰܐܝܳܐ ܕܢܽܘܚܳܡܳܟ: ܢܶܗܘܽܘܢ ܙܡܺܝ̈ܢܶܐ ܒܡܰܠܟܽܘܬܳܟ ܟܳܗ̈ܢܶܐ ܕܩܰܪܶܒ ܠܳܟ ܥܶܛܪܳܐ ܗܳܢܳܐ ܒܶܝܬ ܩܽܘܕܫܳܐ: ܘܢܶܗܘܶܐ ܗܰܢܺܝܳܐܐ ܘܰܡܩܰܒܠܐܴ ܠܡܳܪܽܘܬܳܟ ܗܳܫܳܐ܀

 

ܚܘܬܡܐ

ܥܺܝܪܳܐ ܕܡ̣ܶܢ ܥܺܝܪ̈ܰܝ ܪܰܘܡܳܐ ܐܶܬܝܰܩܰܪ ܒܰܩܝܳܡܬܶܗ: ܘܡ̣ܶܢ ܬܰܠܡܺܝ̈ܕܶܐ ܐܶܣܬܓܶܕ ܒܢܽܘܚܳܡܶܗ: ܘܡ̣ܶܢ ܢܶܫ̈ܶܐ ܐܶܫܬܰܒܰܚ ܒܝܰܘܡܶܗ ܫܒܺܝܚܳܐ ܐܰܢ̱ܬ ܡܳܪܝܳܐ ܐܠܰܗܳܐ ܗܰܒܠܰܢ ܕܢܶܗܘܽܘܢ ܠܳܟ ܠܶܫܳܢܰܝ̈ܢ ܟܶܢܳܪ̈ܶܐ ܚܠܰܝ̈ܳܐ: ܘܣܶܦܘ̈ܳܬܰܢ ܐܰܪ̈ܓܘܳܢܶܐ ܠܰܫܡܳܟ ܩܰܕܺܝܫܳܐ: ܘܢܶܚܕܶܐ ܟܽܠܰܢ ܒܥܺܐܕܳܟ ܕܠܐܴ ܥܳܒܰܪ. ܐܶܡܰܬܝ ܕܙܰܕܺܝ̈ܩܶܐ ܒܰܥܢ̈ܳܢܶܐ ܠܐܘܪܥܳܟ ܡܶܬܚܰܛܦܺܝܢ ܢܶܫܬܘܶܐ ܕܰܢܙܰܡܰܪ ܠܳܟ ܫܽܘܒܚܳܐ ܦܰܐܝܳܐ ܒܰܡܛܰܠܠܰܝ̈ܗܽܘܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܠܗ̇ܰܘ ܝܰܠܕܳܐ ܠܐܴ ܙܰܒܢܳܝܳܐ: ܕܰܗܘܳܐ ܒܙܰܒܢܳܐ ܠܒܰܪܬ݀ ܐ̱ܢܳܫܳܐ: ܘܶܐܬܚܰܝܰܕ ܥܰܡ ܒܶܣܪܳܐ ܡܢܰܦܫܳܐ ܚܕܳܝܽܘܬܳܐ ܟܝܳܢܳܝܬܳܐ ܘܰܡܬܽܘܡܳܝܬܳܐ: ܘܰܒܦܰܓܪܳܐ ܗܳܢܳܐ ܡܳܝܽܘܬܳܐ ܘܡܶܬܚܰܒܠܳܢܳܐ ܣܥ̣ܰܪ ܚܰܝ̈ܠܐܷ ܘܳܐܬܘ̈ܳܬܳܐ ܬܡܺܝܗ̈ܳܬܳܐ ܒܰܒܪܺܝܬܳܐ. ܘܰܣܰܒ̣ܠ ܚܰܫ̈ܶܐ ܘܰܙܩܺܝܦܳܐ ܘܡܰܘܬܳܐ: ܘܰܩܝܳܡܬܳܐ ܡܫܰܒܰܚܬܳܐ ܬܠܺܝܬܳܝܰܬ݀ ܝܰܘ̈ܡܶܐ ܘܩܳܡ ܒܬܶܫܒܽܘܚܬܳܐ ܒܠܐܴ ܡܶܬܚܰܒܠܳܢܽܘܬܳܐ. ܘܶܐܬܥܰܠܺܝ ܠܰܫܡܰܝܳܐ ܒܳܬܰܪ ܫܽܘܡܠܳܝܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ: ܘܰܒܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ ܐܰܥܬܰܪ ܠܓܶܢܣܰܢ ܥܰܦܪ̈ܳܢܶܐ. ܠܓܽܘܕܳܐ ܕܰܫܠܺܝܚܽܘܬܳܐ: ܐܳܦܶܢ ܐܶܬܚܙܺܝ ܒܫܺܝܛܽܘܬܳܐ ܘܶܐܬܺܝܕܰܥ ܠܶܗ ܒܡܰܟܺܝܟܽܘܬܳܐ: ܘܠܐܴ ܬܽܘܒ ܡܶܬܚܙܶܐ ܒܰܡܚܺܝܠܽܘܬܳܐ. ܐܶܠܐܴ  ܡܶܛܽܠ ܕܰܠܒܶܫ ܥܽܘܫܢܳܐ ܘܓܰܐܝܽܘܬܳܐ ܡܶܬܚܙܶܐ ܠܶܗ ܒܬܶܫܒܽܘܚܬܳܐ ܐܰܝܟ ܕܰܦܐܶܐ ܠܐܱܠܳܗܽܘܬܶܗ ܡܫܰܒܰܚܬܳܐ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܰܠܟܳܐ ܕܚܰܝ̈ܶܐ ܘܦܳܪܽܘܩܳܐ ܕܟܽܠ ܝܶܫܽܘܥ ܡܫܺܝܚܳܐ ܢܽܘܗܪܳܐ ܫܰܪܺܝܪܳܐ ܗ̇ܰܘ ܕܺܐܝܬܰܝܟ ܬܗܽܘܡܳܐ ܕܪ̈ܰܚܡܶܐ ܘܡܰܒܽܘܥܳܐ ܕܰܚܢܳܢܳܐ ܘܰܡܥܺܝܢܳܐ ܕܛܳܒܽܘܬܳܐ: ܝܰܡܳܐ ܕܠܐܴ ܓܳܐܶܙ: ܓܰܙܳܐ ܕܰܡܠܐܷ ܥܽܘܕܪ̈ܳܢܶܐ: ܟܰܕ ܗܳܟܺܝܠ ܒܡܶܬܢܰܚܬܳܢܽܘܬܳܟ ܕܰܠܘܳܬܰܢ ܒܥܰܝܢܳܐ ܕܬܰܪ̈ܥܝܳܬܰܢ ܡܰܨܕܺܝܢܰܢ: ܘܰܒܟܽܠܶܗ ܟܪܽܘܟܝܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܡܶܬܒܰܩܶܝܢܰܢ ܝܺܕܺܝܥܳܐܺܝܬ ܕܶܝܢ ܒܰܩܒܽܘܪܬܳܟ ܡܰܠܝܰܬ݀ ܬܶܗܪܳܐ ܒܰܩܝܳܡܬܳܟ ܡܰܦܨܚܰܬ݀ ܠܟܽܠ ܥܰܡ̈ܡܺܝܢ ܕܳܫܢ̈ܶܐ ܕܫܽܘܒܚܳܐ ܘܦܺܐܪ̈ܶܐ ܕܬܰܘܕܺܝܬܳܐ ܘܩ̈ܳܠܐܷ ܡܰܠܝ̈ܰܝ ܩܽܘ̈ܠܳܣܶܐ ܠܡܳܪܽܘܬܳܟ ܡܰܣܩܺܝܢܰܢ ܘܪܽܘܡܪ̈ܳܡܶܐ ܚܠܰܝ̈ܳܐ ܘܗܰܢܺܝ̈ܰܐܝ ܪܺܝܚܳܐ ܠܪܰܒܽܘܬܳܟ ܡܩܰܪܒܺܝܢܰܢ ܟܰܕ ܐܳܡܪܺܝܢܰܢ: ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ ܓܢܺܝܙܳܐ ܕܶܐܬܡܰܟܰܟܬ ܡܶܛܽܠ ܦܽܘܪܩܳܢܰܢ ܒܪܝܟ ܐܺܝܩܳܪܳܟ ܡ̣ܶܢ ܐܰܬܪܳܟ ܪܺܝܫ ܟܳܗ̈ܢܶܐ ܕܬܰܘܕܺܝܬܰܢ ܝܶܫܽܘܥ ܡܫܺܝܚܳܐ: ܫܽܘܒܚܳܐ ܠܳܟ ܕܶܒܚܳܐ ܡܪܰܥܝܳܢܳܐ ܕܒܰܕܒܺܝܚܽܘܬܳܐ ܕܺܝܠܳܟ ܕܰܚܠܳܦܰܝܢ ܩܰܕܶܫܬܳܢ ܡ̣ܶܢ ܛܰܐܡܽܘܬܳܐ: ܒܪܺܝܟ ܗ̣ܽܘ ܡܳܪܰܢ ܚܽܘܒܳܟ ܕܡ̣ܶܢ ܪ̈ܰܘܡܶܐ ܥܶܠܳܝ̈ܶܐ ܐܰܪܟܢܳܟ ܠܰܒܥܳܬܳܐ ܕܺܝܠܰܢ. ܫܽܘܒܚܳܐ ܠܳܟ ܢܽܘܗܪܳܐ ܫܰܪܺܝܪܳܐ ܕܰܐܢܗܰܪܬ ܠܥܰܝ̈ܢܶܐ ܕܬܰܪ̈ܥܝܳܬܰܢ: ܒܪܺܝܟ ܗ̣ܽܘ ܡܳܪܝ ܝܰܘܡܳܟ ܡܚܰܕܝܳܢܳܐ ܕܰܐܦܨܰܚ ܟܡܺܝܪܽܘܬܰܢ: ܫܽܘܒܚܳܐ ܠܳܟ ܠܐܴ ܡܳܝܽܘܬܳܐ: ܕܰܢܚܶܬܬ ܠܒܶܝܬ ܡܺܝ̈ܬܶܐ ܕܰܠܡܺܝܬܽܘܬܰܢ ܬܰܚܶܐ: ܒܪܺܝܟ ܗ̣ܽܘ ܚܰܝܠܳܟ ܚܰܣܺܝܢܳܐ ܕܰܐܩܺܝܡ ܠܰܢ ܡ̣ܶܢ ܡܰܦܽܘܠܬܰܢ: ܫܽܘܒܚܳܐ ܠܳܟ ܒܪܳܐ ܝܺܚܺܝܕܳܝܳܐ ܘܦܳܪܽܘܩܳܐ ܕܢܰܦ̈ܫܳܬܰܢ: ܒܪܺܝܟ ܗ̣ܽܘ ܢܽܘܚܳܡܳܟ ܕܡ̣ܶܢ ܩܰܒܪܳܐ ܕܡ̣ܶܢ ܡܰܘܬܳܐ ܡܰܪܺܝܪܳܐ ܦܰܨܺܝ ܠܰܢ: ܫܽܘܒܚܳܐ ܠܳܟ ܒܳܪܽܘܝܳܐ ܕܥܳܠܡܳܐ ܕܶܐܬܰܝܬ ܠܚܽܘܕܳܬܰܢ: ܒܪܺܝܟ ܨܶܒܝܳܢܳܟ ܕܰܛܥܶܡܬ ܡܰܘܬܳܐ ܡܶܛܽܠܳܬܰܢ. ܫܽܘܒܚܳܐ ܠܳܟ ܡܶܠܬܳܐ ܡܬܽܘܡܳܝܳܐ: ܫܽܘܒܚܳܐ ܠܳܟ ܡܶܠܬܳܐ ܡܶܛܽܠܳܬܰܢ. ܫܽܘܒܚܳܐ ܠܳܟ ܡܶܠܬܳܐ ܡܬܽܘܡܳܝܳܐ: ܫܽܘܒܚܳܐ ܠܳܟ ܡܰܠܟܳܐ ܚܰܝܠܬܳܢܳܐ ܕܒܰܕܡܳܟ ܝܰܩܺܝܪܳܐ ܡ̣ܶܢ ܛܳܥܝܽܘܬܳܐ ܙܒܶܢܬ ܠܰܢ: ܒܪܺܝܟ ܗ̣ܽܘ ܡܳܪܝ ܚܽܘܒܳܟ ܕܥܰܕܰܪ ܡܚܺܝܠܽܘܬܰܢ ܫܽܘܒܚܳܐ ܠܳܟ ܪܳܥܝܳܐ ܛܳܒܳܐ ܕܰܣܥܰܪܬ ܘܟܰܢܶܫܬ ܐܰܒܺܝܕܽܘܬܰܢ: ܒܪܺܝܟ ܗ̣ܽܘ ܦܽܘܪܩܳܢܳܟ ܕܡ̣ܶܢ ܡܽܘ̈ܡܶܐ ܘܫܶܦ̈ܠܐܷ ܕܰܚܛܺܝܬܳܐ ܚܰܪܰܪܬ ܠܰܢ. ܫܽܘܒܚܳܐ ܠܳܟ ܢܶܒܥܳܐ ܕܚܰܠܝܽܘܬܳܐ ܕܦܰܝܶܓܬ ܡܰܪܺܝܪܽܘܬܳܐ ܕܨܰܗܝܽܘܬܰܢ: ܒܪܺܝܟ ܗ̣ܽܘ ܓܰܙܳܟ ܡܠܐܷ ܪ̈ܰܚܡܶܐ ܕܣܰܒܰܥ ܘܬܰܪܣܺܝ ܟܰܦܢܽܘܬܰܢ: ܫܽܘܒܚܳܐ ܠܳܟ ܕܰܣܥܰܪܬ ܬܶܕܡܪ̈ܳܬܳܐ ܦܰܐܝ̈ܳܬܳܐ ܡܚܰܕܬܳܢܳܐ ܕܫܰܪ̈ܒܳܬܰܢ: ܘܰܒܪܺܝܟ ܗ̣ܽܘ ܡܰܘܬܳܟ ܕܥܰܠ ܐܰܦܰܝ̈ܢ ܕܰܐܦܢܺܝ ܠܰܢ ܠܝܳܪܬܽܘܬܰܢ: ܫܽܘܒܚܳܐ ܠܳܟ ܙܰܪܥܳܐ ܒܪܺܝܟܳܐ ܕܰܙܪܰܥܬ ܦܰܓܪܳܟ ܘܰܕܡܳܟ ܩܰܕܺܝܫܳܐ ܒܢܰܦ̈ܫܳܬܰܢ ܘܰܒܪܺܝܟ ܚܽܘܒܳܟ ܕܫܰܠܚܳܟ ܠܚܽܘܣܳܝܰܢ ܫܽܘܒܚܳܐ ܠܳܟ ܕܶܐܬܢܰܚܰܡܬ ܘܫܰܪܰܪܬ ܢܽܘܚܳܡܳܐ ܕܥܰܦܪܳܢܽܘܬܰܢ ܬܰܘܕܺܝ ܠܳܟ ܡ̣ܶܢ ܡܰܪܥܺܝܬܳܟ ܦܪܺܝܩܰܬ݀ ܒܰܨܠܺܝܒܳܟ: ܘܗܳܫܳܐ ܡܳܪܝܳܐ ܐܠܰܗܳܐ ܠܰܡܪܰܚܡܳܢܽܘܬܳܟ ܡܦܺܝܣܺܝܢܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܘܝܳܗܽܘܒܳܐ ܕܛܳܒ̈ܳܬܰܢ. ܕܬܰܫܘܶܐ ܠܰܢ ܒܰܚܢܳܢܳܟ ܕܥܰܡ ܡܰܠܐܱܟ̈ܶܐ ܩܰܕܺܝ̈ܫܶܐ ܒܰܠܒܽܘ̈ܫܶܐ ܚܶܘܳܪ̈ܶܐ ܡܰܦܪܓܺܝܢܰܢ: ܘܥܰܡ ܬܰܠܡܺܝ̈ܕܶܐ ܛܽܘܒܬܳܢ̈ܶܐ ܒܚܰܕܽܘܬܳܐ ܘܒܰܪܘܳܙܳܐ ܠܩܰܒܪܳܟ ܪܳܗܛܺܝܢܰܢ: ܘܥܰܡ ܢܶܫ̈ܶܐ ܢܰܟ̈ܦܳܬܳܐ ܗܶܪ̈ܽܘܡܶܐ ܠܐܻܝܩܳܪܳܟ ܡܛܰܝܒܺܝܢܰܢ: ܘܥܰܡ ܢܳܛܽܘܪ̈ܶܐ ܕܩܰܒܪܳܟ ܡܰܥܒܶܕ ܚܰܝ̈ܶܐ ܫܪܳܪܳܐ ܕܢܽܘܚܳܡܳܐ ܕܺܝܠܳܟ ܡܰܟܪܙܺܝܢܰܢ: ܘܰܒܫܰܝܢܳܐ ܐܰܡܺܝܢܳܐ ܕܰܠܘܳܬܳܟ ܚܳܐܶܝܢܰܢ: ܘܒܰܫܠܳܡܳܟ ܫܰܪܺܝܪܳܐ ܡܶܬܒܰܣܡܺܝܢܰܢ: ܘܰܠܪܰܘܡܳܐ ܪܳܡܳܐ ܕܰܫܡܰܝܳܐ ܥܰܡܳܟ ܐܰܣܶܩ ܠܰܢ: ܘܡ̣ܶܢ ܝܰܡܺܝܢܳܐ ܕܰܐܒܽܘܟ ܐܰܘܬܶܒ ܠܰܢ: ܘܰܠܘܳܬܳܟ ܒܰܦܨܺܝܚܽܘܬܳܐ ܩܰܪܶܒ ܠܰܢ: ܘܰܠܝܳܪܬܽܘܬܰܢ ܩܰܕܡܳܝܬܳܐ ܡܰܢܰܥ ܠܰܢ: ܘܒܰܓܢܽܘܢܳܟ ܡܠܐܷ ܚܰܝ̈ܶܐ ܚܰܕܳܐ ܠܰܢ: ܘܡ̣ܶܢ ܦܳܬܽܘܪܳܟ ܡܠܐܷ ܛܽܘ̈ܒܶܐ ܫܡܰܝ̈ܳܢܶܐ ܒܰܣܶܡ ܠܰܢ. ܘܬܰܡܳܢ ܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܢܰܘܕܶܐ ܘܢܶܣܓܽܘܕ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܩܰܕܺܝܫܳܐ ܡܢܰܚܡܳܢܰܢ ܘܰܡܚܰܕܬܳܢܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܫܠܡ

 

ܛܟܣܐ ܕܚܕ ܒܫܒܐ ܩܕܡܝܐ ܕܦܢܛܝܩܘܣܛܝ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܕܰܟܝܳܐܝܬ ܘܩܰܕܺܝܫܳܐܝܬ ܢܙܰܡܰܪ ܠܳܟ ܬܶܫܒ̈ܚܳܬܳܐ ܪ̈ܽܘܚܳܢܳܝܬܳܐ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܥܺܐܕܳܐ ܕܡܰܚܰܬܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܕܰܫܪܳܐ ܘܰܐܓܶܢ ܥܰܠ ܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ: ܘܰܐܚܶܡ ܐܶܢܽܘܢ ܒܰܕܡܽܘܬ ܢܽܘܪܳܐ ܘܚܰܟܶܡ ܐܶܢܽܘܢ ܘܢܰܗܰܪ ܐܶܢܽܘܢ ܒܟܽܠܗܶܝܢ ܐܠܰܗܳܝ̈ܳܬܳܐ: ܐܰܢ̱ܬ ܡܳܪܝܳܐ ܪܳܚܶܡܢܳܫܳܐ ܚܰܟܶܡ   ܘܰܐܢܗܰܪ ܠܰܢ ܒܡܰܘ̈ܗܒܳܬܳܐ ܐܠܰܗܳܝ̈ܳܬܳܐ ܘܰܒܠܶܫ̈ܳܢܶܐ ܚܰܕ̈ܬܶܐ ܘܰܕܟܰܝ̈ܳܐ ܢܰܣܶܩ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܪܡܫܐ

ܬܶܫܒܽܘܚܳܬܐ ܠܰܚܕܳܐ ܐܠܰܗܽܘܬܳܐ ܡܥܰܠܰܝܬܳܐ ܕܒܰܠܚܽܘܕܳܝܽܘܬܳܐ ܕܪܺܝܫܳܢܽܘܬܳܐ ܪ̈ܺܝܫܝܳܬܳܐ ܡܶܬܝܰܕܥܳܐ ܘܒܰܬܠܺܝܬܳܝܽܘܬ ܩܢܽܘ̈ܡܶܐ ܩܰܕܺܝ̈ܫܶܐ ܡܶܣܬܰܓܕܳܐ: ܐܰܒܳܐ ܛܳܒܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ ܟܰܕ ܠܐܴ ܚܳܣܰܪ: ܒܰܪ ܛܽܘܒܬܳܢܳܐ ܕܶܐܫܬܰܘܬܰܦ ܠܰܟܝܳܢܰܢ ܘܰܦܪܰܩ ܠܰܢ ܟܰܕ ܠܐܴ  ܣܒܰܠ ܒܽܘܨܳܪܳܐ: ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ ܕܰܢܚܶܬ ܘܫܰܟܶܢ ܠܰܢ ܫܽܘ̈ܟܳܢܶܐ ܘܡܰܘܗ̈ܒܳܬܳܐ ܡܦܰܬܟ̈ܳܬܳܐ: ܟܰܕ ܒܶܗ ܦܽܘܠܳܓܳܐ ܠܐܴ ܓܳܫܶܦ ܬܠܳܬܳܐ ܩܢܽܘ̈ܡܶܐ ܡܶܫܬܰܒܰܚ ܐܰܢ̱ܬ: ܘܰܬܠܳܬܳܐ ܚܰܕ ܠܐܴ ܡܶܬܦܰܠܓܳܢܳܐܝ̣ܬ ܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܚܰܕ ܐܠܰܗܳܐ ܫܰܪܺܝܪܳܐ ܕܰܠܥܶܠ ܡ̣ܶܢ ܡܰܕܪܟܳܢܽܘܬܳܐ ܕܰܒܪ̈ܰܝܳܐ ܘܰܥܒܺܝ̈ܕܶܐ ܡܥܰܠܰܝ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܟܰܕ ܨܒܰܝܬ ܕܬܶܬܥܰܠܐܷ ܒܫܽܘܒܚܳܐ ܠܘܳܬ ܐܰܒܽܘܟ ܠܐܱܝܟܳܐ ܕܡ̣ܶܢ ܬܰܡܳܢ ܠܐܴ ܫܰܢܺܝܬ: ܐܰܪܺܝܡܬ ܐܻܝܕܰܝ̈ܟ ܩܰܕܺܝ̈ܫܳܬܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ: ܘܰܡܠܰܝܬ ܐܶܢܽܘܢ ܒܽܘܪ̈ܟܳܬܳܐ ܘܒܰܪܶܟܬ ܐܶܢܽܘܢ: ܘܦܰܩܶܕܬ ܐܶܢܽܘܢ ܕܰܢܣܰܟܽܘܢ ܠܫܽܘܘܕܳܝܶܗ ܕܰܐܒܳܐ ܗ̇ܰܘ ܕܝܰܘܡܳܢ ܚܰܘܺܝ ܡܶܐܬܺܝܬܶܗ ܪܽܘܚܳܐ ܦܰܪܰܩܠܺܝܛܳܐ: ܗ̇ܰܘ ܕܰܢܚܶܬ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܘܰܡܠܐܴ ܐܶܢܽܘܢ ܫܽܘ̈ܟܳܢܶܐ ܬܡܺܝ̈ܗܶܐ: ܪܽܘܚܳܐ ܩܰܕܺܝܫܳܐ ܕܶܝܢ ܒܩܳܠܐܴ: ܢܽܘܪܳܐ ܒܰܚܙܳܬܳܐ: ܒܰܪ̈ܳܝܶܐ ܕܡܶܬܟܰܢܫܺܝܢ ܓܰܘܳܝ̈ܶܐ ܕܡܶܬܢܰܗܪܺܝܢ ܗܶܕܝܽܘ̈ܛܐ ܕܝܳܠܦܺܝܢ ܣܶܦܪ̈ܶܐ: ܨܰܝܳܕ̈ܶܐ ܕܢܽܘ̈ܢܶܐ ܕܚܶܟܡܬܳܐ ܐܠܰܗܳܝܬܳܐ ܡܶܬܡܠܶܝܢ: ܒܽܘܪ̈ܶܐ ܘܰܦܫܺܝ̈ܛܶܐ ܕܒܺܝܕܰܥܬܳܐ ܕܪܽܘܚܳܐ ܡܰܨܡܚܺܝܢ: ܦܽܘܠܳܓܳܐ ܕܠܶܫ̈ܳܢܶܐ ܕܰܠܗܽܘܢ ܡܶܫܬܰܟܢܺܝܢ: ܚܰܝ̈ܠܐܷ ܘܳܐܣܘ̈ܳܬܳܐ ܕܒܺܐܝ̈ܕܰܝܗܽܘܢ ܕܰܡܚܰܝ̈ܛܰܝ ܡܨܺܝ̣̈ܕܳܬܳܐ ܕܰܒܠܶܫ̈ܳܢܶܐ ܕܥܰܡ̈ܡܶܐ ܐܶܬܚܰܟܰܡܘ: ܘܥܰܛܠܰܝ̈ ܡܰܡܠܠܐܴ ܕܰܒܟܳܪܽܘܙܽܘܬܳܐ ܕܳܪܫܺܝܢ: ܡܚܺܝ̈ܠܰܝ ܢܽܘܗܪܳܐ ܕܰܒܙܰܠܓ̈ܰܝ ܪܽܘܚܳܐ ܩܰܕܺܝܫܳܐ ܡܰܙܠܓܺܝܢ: ܓܡܺܝܪ̈ܶܐ ܕܰܒܗܰܝܡܳܢܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ ܡܰܘܕܶܝܢ ܗܘܰܘ: ܥܰܓܪ̈ܰܝ ܠܶܫܳܢ̈ܶܐ ܕܪܽܘܚܳܐ ܩܰܕܺܝܫܳܐ ܦܬܰܚ ܡܰܕܥܰܝ̈ܗܽܘܢ ܨܰܝ̈ܳܕܶܐ ܕܢܽܘ̈ܢܶܐ ܕܪܽܘܚܳܐ ܩܰܕܺܝܫܳܐ ܨܰܝ̈ܳܕܶܐ ܕܰܒܢܰܝ̈ܢܳܫܳܐ ܥܒܰܕ ܐܶܢܽܘܢ: ܒܨܺܝܪ̈ܰܝ ܒܓܶܢܣܳܐ ܕܰܒܪܽܘܚܳܐ ܩܰܕܺܝܫܳܐ ܐܶܬܚܰܝܰܠܘ ܗܘܰܘ: ܗ̇ܰܘ ܕܳܐܦ ܚܢܰܢ ܟܰܕ ܕܽܘܡܳܪܳܐ ܡܶܬܡܠܶܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܕܫܰܪܺܝܪܳܐܝ̣ܬ ܕܶܝܢ ܐܶܬܚܙܺܝ ܐܠܰܗܳܐ ܥܰܠ ܐܰܪܥܳܐ: ܘܰܒܝܰܕ ܪܽܘܚܳܦܶܗ ܩܰܕܺܝܫܳܐ ܚܰܬܶܡ ܐܶܢܽܘܢ ܠܰܫܠܺܝ̈ܚܰܘܗܝ ܘܓܰܡܰܪ ܐܶܢܽܘܢ: ܘܨܰܒܶܬ ܐܶܢܽܘܢ ܒܫܽܘ̈ܟܳܢܰܘܗܝ: ܗܰܕܺܝ ܐܶܢܽܘܢ ܒܽܐܘܪ̈ܚܳܬܶܗ: ܘܬܰܪܶܨ ܐܶܢܽܘܢ ܒܰܫܒܺܝ̈ܠܰܘܗܝ: ܝܰܘܡܳܢܳܐ ܐܶܫܬܰܪܝܰܬ݀ ܐܶܦܽܘܦܰܐܣܺܝܣ ܗ̇ܳܝ ܕܠܐܴ ܬܶܥܡܰܪܝ ܪܽܘܚܝ ܒܐܢܳܫܳܐ ܠܥܳܠܰܡ ܡ̣ܶܢ ܐܰܒܳܐ ܐܶܬܰܐܡܪܰܬ݀ ܗܘܳܬ݀: ܝܰܘܡܳܢܳܐ ܒܠܶܫܳܢ̈ܶܐ ܕܢܽܘܪܳܐ ܪܽܘܚܳܐ ܩܰܕܺܝܫܳܐ ܐܶܬܚܙܺܝ: ܘܰܠܦܽܘܩ̈ܕܳܢܶܐ ܐܶܘܢܓܶܠܳܝ̈ܶܐ ܐܰܫܠ̣ܶܡ ܐܶܢܽܘܢ ܘܰܠܟܽܘ̈ܒܶܐ ܕܰܥܒܳܪ ܦܽܘܩܕܳܢܳܐ ܛܰܠܶܩ ܡ̣ܶܢ ܟܽܠܶܗ ܥܳܠܡܳܐ: ܝܰܘܡܳܢܳܐ ܓܶܠܝܳܢܳܐ ܕܪܽܘܚܳܐ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܐܶܬܚܰܘܺܝ: ܘܚܰܟܶܡ ܡܰܕܥܰܝ̈ܗܽܘܢ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܕܢܰܚ ܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܶܐ ܒܓܰܘ ܥܶܠܺܝܬܳܐ ܘܰܐܩܶܠ ܡܶܢܗܽܘܢ ܠܢܽܘܬܳܥܳܐ ܗ̇ܰܘ ܩܰܕܡܳܝܳܐ: ܝܰܘܡܳܢܰܐ ܗ̇ܰܘ ܕܒܰܢܒܺܝ̈ܶܐ ܡܰܠܶܠ ܘܠܰܫܠܺܝ̈ܚܶܐ ܡ̇ܰܢ ܫܰܪܺܝܪܳܐܝ̣ܬ ܕܰܢܡܰܠܠܽܘܢ ܒܠܶܫܳܢ ܠܶܫܳܢ ܐܠܰܦ ܘܫܰܪܰܪ ܓܰܠܝܳܐܝ̣ܬ: ܝܰܘܡܳܢܳܐ ܘܳܝܳܐ ܘܒܶܗܬܬܳܐ ܐܶܬܥܰܛܰܦ ܝܽܘܕܳܐ ܣܟܰܪܝܽܘܛܳܐ: ܟܰܕ ܚܙܳܐ ܠܰܫܠܺܝ̈ܚܶܐ ܚܰܒܪ̈ܰܘܗܝ ܗܳܢܽܘܢ ܕܰܒܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܐܶܬܢܰܗܰܪܘ: ܘܐ̱ܪ̈ܳܙܶܐ ܐܠܰܗܳܝ̈ܶܐ ܠܗܽܘܢ ܐܶܫܬܰܟܰܢܘ: ܝܰܘܡܳܢܳܐ ܙܳܚ ܘܰܢܚܶܬ ܪܽܘܚܳܐ ܩܰܕܺܝܫܳܐ ܘܦܰܪܰܩܠܺܝܛܳܐ ܥܰܠ ܟܶܢܫܳܐ ܕܬܰܠܡܺܝ̈ܕܶܐ: ܣܰܬܶܬ ܪܶܥܝܳܢܗܽܘܢ ܒܗܰܝܡܳܢܽܘܬܳܐ ܫܰܪܺܝܪܬܳܐ: ܝܰܘܡܳܢܳܐ ܚܰܕܽܘܬܳܐ ܐܶܬܡܠܺܝܘ ܫܠܺܝܚ̈ܶܐ ܟܡܺܝܪ̈ܶܐ ܒܡܶܐܬܺܝܬܶܗ ܕܪܘܚܳܐ ܩܰܕܺܝܫܳܐ ܡܒܰܝܳܐܢܳܐ: ܝܰܘܡܳܢܳܐ ܛܳܣ ܘܰܢܚܶܬ ܪܽܘܚܳܐ ܩܰܕܺܝܫܳܐ ܠܥܶܠܺܝܬܳܐ ܘܦܰܠܶܓ ܬܰܡܳܢ ܡܰܘܗ̈ܒܳܬܳܐ ܬܡܺܝ̈ܗܳܬܳܐ ܠܰܒ̈ܢܰܝ ܐ̱ܪܳܙܶܗ: ܝܰܘܡܳܢܳܐ ܝܰܒܶܒܘ ܒܠܶܥ̈ܙܶܐ ܚܠܰܝ̈ܳܐ ܓܠܺܝܠܳܝ̈ܶܐ ܕܶܐܬܥܰܛܰܦ ܫܽܘܟܳܢ̈ܶܐ ܕܪܽܘܚܳܐ: ܐܶܬܡܠܺܝܘ ܚܣܳܡܳܐ: ܘܶܐܡܰܪܘ ܕܗܳܠܶܝܢ ܡܶܐܪܺܝܬܳܐ ܐܶܫܬܺܝܘ ܘܰܪܘܺܝܘ ܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܠܝܽܘܕܳܝ̈ܶܐ ܟܰܪܝܽܘܬܳܐ ܘܰܠܣܳܛܳܢܳܐ ܒܶܗܬܬܳܐ: ܒܰܐܪ̈ܙܶܐ ܬܪܶܥܣܰܪ ܕܰܫܘܰܚܘ ܡ̣ܶܢ ܥܶܠܺܝܬܳܐ: ܝܰܘܡܳܢܳܐ ܡ̣ܶܢ ܪܰܘܡܳܐ ܪܽܘܚܳܐ ܩܰܕܺܝܫܐ ܐܰܙܠܶܓ ܥܰܠ ܬܰܠܡܺܝ̈ܕܶܐ ܘܰܪܕܰܦ ܠܚܶܫܟܳܐ ܡܶܢܗܽܘܢ ܘܰܛܪܰܕ ܠܦܽܘܠܳܓ̈ܶܐ ܡ̣ܶܢ ܠܶܒܰܘ̈ܳܬܗܽܘܢ: ܝܰܘܡܳܢܳܐ ܢܰܗܺܝܪܳܐܝ̣ܬ ܐܶܬܚܰܟܰܡܘ ܫܠܺܝ̈ܚܶܐ ܩܰܕܺܝ̈ܫܶܐ ܒܪܽܘܚܳܐ ܩܰܕܺܝܫܳܐ ܘܰܐܒܗܶܬܘ ܠܣ̇ܳܦܪ̈ܶܐ ܘܰܦܪ̈ܺܝܫܶܐ ܕܥܰܡܳܐ ܕܝܽܘܕ̈ܳܝܶܐ: ܝܰܘܡܳܢܳܐ ܣܶܦܪ̈ܶܐ ܕܚܶܟܡܬܳܐ ܐܠܰܗܳܝܬܳܐ ܠܰܫܠܺܝ̈ܚܶܐ ܐܶܬܺܝܗܶܒܘ ܘܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܥܳܠܡܳܐ ܐܰܟܪܙܶܘ ܗܘܰܘ: ܝܰܘܡܳܢܳܐ ܥܶܠܺܝܬܳܐ ܕܒܽܐܘܪܫܠܶܡ ܒܳܒܶܝܠ ܕܬܰܪܬܶܝܢ ܗܘܳܬ݀: ܠܰܘ ܒܰܡܣܳܡ ܒܪܺܝܫܳܐ ܐܠܐܴ ܒܦܽܘ̈ܠܳܓܶܐ ܕܠܶܫܳܢ̈ܶܐ ܒܝܰܕ ܪܽܘܚܳܐ ܩܰܕܺܝܫܳܐ: ܝܰܘܡܳܢܳܐ ܦܳܪܽܘܩܰܢ ܢܰܨܒܳܗ̇ ܠܨܶܗܝܽܘܢ ܫܰܪܺܝܪܬܳܐ ܥܺܕܬܳܐ ܩܰܕܺܝܫܬܳܐ: ܚܠܳܦ ܟܰܪܡܳܐ ܗ̇ܰܘ ܕܝܰܗܒ ܚܰܪ̈ܽܘܒܶܐ ܨܶܗܝܽܘܢ ܨܳܠܽܘܒܬܳܐ ܝܰܘܡܳܢܳܐ ܨܰܝ̈ܳܕܰܝ ܢܽܘ̈ܢܶܐ ܘܠܐܷܣܦܺܝܪ̈ܶܐ ܐܶܬܚܰܟܰܡܘ ܕܰܢܨܽܘܕܽܘܢ ܐ̱ܢܳܫ̈ܳܐ ܠܚܰܝ̈ܶܐ ܘܢܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ: ܝܰܘܡܳܢܳܐ ܩܰܒܠܰܬ݀ ܐܰܪܥܳܐ ܫܶܩܝܳܐ ܕܚܰܝ̈ܶܐ ܚܠܳܦ ܚܰܡܪܳܐ: ܗ̇ܰܘ ܕܦܰܪܣܺܝ ܗܘܳܐ ܠܢܽܘܚ ܬܡܺܝܢܳܐ: ܝܰܘܡܳܢܳܐ ܪܰܦܶܣܘ ܒܠܶܥ̈ܙܶܐ ܫܰܦܺܝܪ̈ܶܐ ܦܰܪ̈ܽܘܓܶܐ ܕܚܰܕܺܝ ܐܶܢܽܘܢ ܢܶܫܪܶܐ ܫܡܰܝܳܢܳܐ ܒܡܰܘ̈ܡܳܬܶܗ ܢܰܗܺܝܪ̈ܳܬܳܐ: ܝܰܘܡܳܢܳܐ ܫܶܡܥܽܘܢ ܚ̇ܳܕܶܐ: ܘܰܐܢܕܪܶܐܘܳܣ ܘܰܒܢ̈ܰܝ ܙܰܒܕܰܝ ܡܫܰܒܚܺܝܢ: ܘܫܰܪܟܳܐ ܕܰܫܠܺܝ̈ܚܶܐ ܒܚܰܕܽܘܬܳܐ ܘܒܰܪܘܳܙܳܐ ܩܳܝܡܺܝܢ ܟܰܕ ܚܳܙܶܝܢ ܕܗ̇ܰܘ ܡܶܕܶܡ ܕܶܐܫܬܰܘܕܺܝ ܠܗܽܘܢ ܒܪܳܐ ܝܺܚܺܝܕܳܝܳܐ ܟܰܕ ܣܳܠܶܩ ܐܶܫܬܰܡܠܺܝ: ܝܰܘܡܳܢܳܐ ܬܶܗܪܳܐ ܘܕܽܘܡܳܪܳܐ ܘܰܪܘܳܙܳܐ ܐܶܬܡܰܠܝܰܬ݀ ܥܺܕܬܳܐ ܩܰܕܺܝܫܬܳܐ: ܟܰܕ ܬܰܘܕܶܐ ܒܗܰܝܡܳܢܽܘܬܳܐ ܠܗ̇ܰܘ ܕܢܰܨܒܳܗ̇ ܘܗܰܕܪܳܗ̇ ܒܡܰܘܗ̈ܒܳܬܳܐ ܕܪܽܘܚܳܐ ܩܰܕܺܝܫܳܐ: ܘܡܶܟܺܝܠ ܐܳܦ ܚܢܰܢ ܒܫܽܘ̈ܟܳܢܶܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܡܶܬܕܰܡܪܺܝܢܰܢ ܘܳܐܡܪܺܝܢܰܢ: ܕܰܒܪܺܝܟ ܗ̣ܽܘ ܚܰܝܠܐܴ ܕܺܝܠܳܟ ܐܠܰܗܳܐ ܘܪܰܘܪ̈ܒܳܢ ܘܰܫܒܺܝ̈ܚܳܢ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܺܝܠܳܟ ܬܗܺܝܪ̈ܳܬܳܐ ܘܰܫܒܺܝ̈ܚܳܬܳܐ: ܘܫܽܘ̈ܟܳܢܶܐ ܕܺܝܠܳܟ ܐܠܰܗܳܝ̈ܳܐ ܠܥܺܕܬܳܐ ܕܺܝܠܳܟ ܩܰܕܺܝܫܬܳܐ ܝܰܗܒܬ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ: ܘܡܶܬܟܰܫܦܺܝܢܰܢ ܠܳܟ ܕܰܬܨܰܒܶܬ ܠܰܢ ܒܪܽܘܚܳܐ ܩܰܕܺܝܫܳܐ ܘܰܒܚܰܝܠܳܟ ܠܐܴ ܡܶܬܕܰܪܟܳܢܳܐ: ܘܰܗܘܺܝ ܡܳܪܝܳܐ ܫܽܘܪܳܐ ܠܢܰܦ̈ܫܳܬܰܢ: ܘܩܰܕܶܫ ܠܰܢ ܒܩܰܕܺܝܫܽܘܬܳܐ ܕܡܶܢܳܟ: ܘܙܰܗܳܐ ܠܬܰܪ̈ܥܝܳܬܰܢ ܒܡܰܘܗ̈ܒܳܬܳܐ ܕܺܝܠܳܟ ܫܡܰܝܳܢ̈ܳܝܳܬܳܐ: ܘܨܰܠܶܠ ܠܚܽܘ̈ܫܳܒܰܝܢ ܡ̣ܶܢ ܟܽܠܗܽܘܢ ܚܰܫ̈ܶܐ ܘܰܪ̈ܓܺܝܓܳܬܳܐ ܛܰܡ̈ܳܐܬܳܐ: ܘܰܥܒܶܕ ܠܰܢ ܢܰܘ̈ܣܶܐ ܕܟܰܝ̈ܳܐ ܕܚܳܫܚܺܝܢ ܠܰܥܡܽܘܪܝܳܐ ܕܺܝܠܳܟ ܩܰܕܺܝܫܳܐ: ܘܰܐܪܟܶܢ ܪ̈ܰܚܡܰܝܟ ܠܘܳܬܰܢ: ܘܰܐܕܢܰܚ ܢܽܘܗܪܳܐ ܕܺܝܕܰܥܬܳܐ ܒܠܶܒܰܘ̈ܳܬܰܢ ܘܦܰܨܳܐ ܠܰܢ ܡ̣ܶܢ ܚܶܫܽܘܟܳܐ ܘܡ̣ܶܢ ܥܰܡܛܳܢܳܐ: ܐܰܫܘܳܐ ܠܰܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܠܒܽܘܣܳܡܳܐ ܕܰܒܡܰܠܟܽܘܬܳܟ ܫܡܰܝܳܢܺܝܬܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܥܛܪܐ

ܬܠܺܝܬܳܝܽܘܬܳܐ ܩܰܕܺܝܫܬܳܐ ܕܰܠܥܶܠ ܡ̣ܶܢ ܐܽܘܣܺܝ̈ܰܐܣ: ܘܰܠܥܶܠ ܡ̣ܶܢ ܟܽܠ ܪ̈ܺܝܫܳܢܘܳܬܳܐ: ܘܰܡܥܰܠܝܰܬ݀ ܡ̣ܶܢ ܟܽܠ ܐܠܰܗܽܘܬܳܐ: ܠܐܴ ܐܳܕܫܳܢܳܝܬܳܐ ܘܠܐܴ ܟܡܳܢܳܝܬܳܐ ܗ̇ܰܘ ܕܒܰܠܚܽܘܕܳܝܽܘܬ ܐܠܰܗܽܘܬܳܐ: ܘܽܐܘܣܺܝܰܐ ܘܰܟܝܳܢܳܐ: ܘܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܕܰܒܠܐܴ ܝܺܠܺܝܕܽܘܬܳܐ ܘܢܳܦܽܘܩܽܘܬܳܐ ܡܶܬܝܰܩܢܳܐ ܘܡܶܬܝܰܩܪܳܐ ܘܡܶܣܬܰܓܕܳܐ: ܘܰܠܒܰܪ ܡܶܢܳܗ̇ ܘܠܐܴ ܣܳܟ ܡܶܣܬܓܶܕ ܩܰܒܶܠ ܡܶܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܘܰܬܪܽܘܨܝ ܠܰܢ ܠܘܳܬ ܩܰܪܩܰܦܬܳܐ ܗ̇ܳܝ ܛܽܘܒܬܳܢܳܝܬܳܐ: ܠܐܱܝܟܳܐ ܕܐ̱ܪ̈ܳܙܶܐ ܦܫܺܝ̈ܛܶܐ ܘܰܫܪ̈ܳܝܶܐ ܕܠܐܴ ܐܰܣܺܝܪܺܝܢ: ܘܩܰܪܶܒܝ ܠܰܢ ܠܘܳܬ ܢܽܘܗܪܳܐ ܕܺܝܠܳܟ: ܕܢܰܘܕܶܐ ܐܰܡܺܝܢܳܐܝ̣ܬ ܘܢܶܣܓܽܘܕ ܠܐܴ ܡܶܬܦܰܫܩܳܢܳܐܝ̣ܬ ܗܳܫܳܐ܀

 

ܚܘܬܡܐ

ܗܰܒܠܰܢ ܡܳܪܝܳܐ ܡܳܪܰܢ ܕܰܒܣܰܘ̈ܟܶܐ ܪ̈ܽܘܚܳܢܳܝܶܐ ܘܰܫܡܰܝ̈ܳܢܶܐ: ܘܰܒܝܰܕ ܕܽܘܒܳܪ̈ܶܐ ܛܳܒ̈ܶܐ ܕܟܽܠ ܫܳܥ ܢܶܢܗܰܪ ܒܳܟ: ܘܰܒܬܶܫܒ̈ܚܳܬܳܐ ܦܰܐܝ̈ܳܬܳܐ ܟܽܠ ܢܶܫܦܰܪ ܠܳܟ: ܘܰܡܠܺܝ ܠܰܢ ܡ̣ܶܢ ܪܽܘܚܳܟ ܩܰܕܺܝܫܳܐ ܗ̇ܰܘ ܕܫܰܟܶܢ̣ܬ ܝܰܘܡܳܢܳܐ ܠܰܫܠܺܝ̈ܚܰܝܟ ܓܒܰܝ̈ܳܐ ܘܩܰܕܺܝ̈ܫܶܐ: ܘܰܐܫܘܳܐ ܠܰܢ ܠܰܓܢܽܘܢܳܟ ܗ̇ܰܘ ܕܠܐܴ ܦܳܛܪ̈ܳܢ ܚܰܕ̈ܘܳܬܶܗ: ܘܰܚܢܰܢ ܘܥܰܢܺܝ̈ܕܰܝܢ ܐܳܦ ܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܚܰܕ ܟܝܳܢܳܐ ܐܠܰܗܳܐ ܕܰܐܠܳܗܽܘܬܳܐ ܣܓܺܝܕܬܳܐ ܘܰܡܬܽܘܡܳܝܬܳܐ: ܘܚܰܕ ܡܶܬܺܝܕܰܥ ܘܚܰܕ ܐܻܝܬܰܘܗܝ: ܐܻܝܬܽܘܬܳܐ ܕܠܐܴ ܙܰܒܢ̈ܶܐ: ܟܝܳܢܳܐ ܕܠܐܴ ܚܰܫܳܐ ܝܺܕܰܥܬܳܐ ܕܠܐܴ ܝܽܘܠܦܳܢ: ܚܶܟܡܬܳܐ ܕܩܰܕܺܝܡܳܐ ܠܥܰܒ̈ܕܶܐ: ܐܽܘܣܺܝܰܐ ܕܠܐܴ ܡܶܬܥܰܩܒܳܐ: ܡܬܽܘܡܳܝܽܘܬܳܐ ܕܠܐܴ ܡܶܬܕܰܪܟܳܐ: ܛܶܟܣܳܐ ܢܛܺܝܪܳܐ ܕܠܰܝܬ ܠܶܗ ܩܰܕܡܳܝܽܘܬܳܐ ܘܰܐ̱ܚܪܳܝܽܘܬܳܐ: ܗ̇ܰܘ ܕܶܐܬܡܳܠܝ ܘܝܰܘܡܳܢܳܐ: ܗ̣ܽܘ ܟܰܕ ܗ̣ܽܘ ܘܠܐܴ ܡܶܬܚܒܶܫ: ܘܳܐܦܠܐܴ ܬܗܽܘܡܳܐ ܚܳܒܶܫ ܠܶܗ: ܓܡܺܝܪܳܐ ܕܠܐܴ ܚܳܣܰܪ: ܥܳܒܽܘܕܳܐ ܕܠܐܴ ܠܐܴܐܷ: ܘܠܐܴ ܡܰܠܟܳܐ ܗ̇ܰܘ ܕܡ̣ܶܢ ܐ̱ܚܪܺܝܢ ܘܡܰܠܟܳܐ ܕܡ̣ܶܢ ܥܳܠܰܡ: ܘܠܐܴ ܡ̣ܶܢ ܕܽܘܟ ܩܰܒܶܠ ܫܽܘܠܛܳܢܳܐ ܐܰܘ ܝܳܗܶܒ ܠܐܱܚܪܺܝܢ: ܪܰܚܺܝܩ ܘܩܰܪܺܝܒ ܘܝܳܕܰܥ ܠܕܺܝܠܶܗ: ܘܡܶܬܺܝܕܰܥ ܡ̣ܶܢ ܕܺܝܠܶܗ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ ܕܠܘܬ ܐܒܐ

ܐܠܰܗܳܐ ܐܰܒܳܐ ܕܰܡܥܰܠܰܝ ܥܽܘܡܩܳܐ ܦܰܐܝܳܐ ܕܺܐܝܬܽܘܬܶܗ ܡ̣ܶܢ ܡܰܕܪܟܳܢܽܘܬܳܐ ܘܡܶܬܥܰܩܒܳܢܽܘܬܳܐ ܕܽܐܘܣܺܝ̈ܰܐܣ ܡܶܬܗܰܘ̈ܢܳܢܳܝܳܬܳܐ ܘܰܕܠܐܴ ܓܫܽܘܡ: ܗ̇ܰܘ ܕܰܠܡܶܠܬܳܐ ܕܡܶܢܳܟ: ܘܫܳܘܶܐ ܠܳܟ ܒܽܐܘܣܺܝܰܐ ܐܳܦ ܒܰܡܬܽܘܡܳܝܽܘܬܳܐ ܡ̣ܶܢ ܩܕܳܡ ܕܬܶܗܘܶܐ ܡܶܐܬܺܝܬܶܗ ܦܳܪܽܘܩܳܝܬܳܐ: ܠܡܰܚܰܬܬܳܐ ܕܥܰܠ ܛܽܘܪ ܣܺܝܢܰܝ ܐ̱ܪܳܙܳܢܳܐܝ̣ܬ ܚܰܘܺܝܬ: ܘܟܰܕ ܡܢܺܝܚܳܢܳܐ ܕܺܝܠܳܟ ܡܽܘܫܶܐ ܣܠܶܩ ܠܛܽܘܪܳܐ ܠܰܡܩܰܒܠܳܢܽܘܬܳܐ ܕܠܽܘ̈ܚܶܐ ܟܬܺܝ̈ܒܳܬ݀ ܡ̣ܶܢ ܛܰܝܒܽܘܬܳܐ ܠܥܰܡܳܐ ܐܻܝܣܰܪܠܳܝܳܐ: ܗ̇ܰܘ ܕܰܒܣܰܓܺܝܽܐܘܬܳܐ ܕܪ̈ܰܚܡܰܝܟ ܐܽܘܣܝ̈ܳܝܶܐ ܘܰܫܦܺܝ̈ܥܶܐ ܠܺܝܚܺܝܕܳܝܳܐ ܗ̇ܰܘ ܕܡܶܢܳܟ ܘܨܰܠܡܳܐ ܕܺܐܝܬܽܘܬܳܟ ܫܰܕܰܪܬ ܠܥܳܠܡܳܐ ܡܶܛܽܠ ܦܽܘܪܩܳܢܳܐ ܕܨܰܠܡܳܐ ܕܺܝܠܳܟ ܗ̇ܰܘ ܕܰܢܦܰܠ ܗܘܳܐ ܡ̣ܶܢ ܐܺܝܩܳܪܳܐ ܡܰܠܟܳܝܳܐ: ܘܟܰܕ ܠܐܴ ܡܶܬܚܰܙܝܳܢܳܐ ܘܠܐܴ ܡܶܬܕܰܪܟܳܢܳܐ ܐܺܝܬܰܘܗܝ ܗܘܳܐ ܘܡ̣ܶܢ ܠܩܽܘܕܡܺܝܢ ܥܰܡܳܟ ܘܥܰܡ ܪܽܘܚܳܐ ܩܰܕܺܝܫܳܐ ܐܺܝܬܰܘܗܝ ܬܰܚܬܺܝ ܗ̣ܽܘ ܠܶܗ ܠܡܽܘܫ̈ܚܳܬܳܐ ܐ̱ܢܳܫܳܝ̈ܳܬܳܐ ܕܢܰܦܢܶܐ ܠܰܢ ܡ̣ܶܢ ܛܳܥܝܽܘܬܳܐ ܠܣܶܓܕܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܗ̇ܳܝ ܕܰܒܪܽܘܚܳܐ ܘܒܰܫܪܳܪܳܐ ܡܶܣܬܰܓܕܳܐ ܗ̇ܰܘ ܕܟܰܕ ܫܰܡܠܺܝ ܒܰܩܢܽܘܡܶܗ ܐ̱ܪ̈ܳܙܶܐ ܓܢܺܝ̈ܙܶܐ ܕܰܢܒܺܝܽܘܬܳܐ ܓܡܰܪ ܘܫܰܡܠܺܝ ܠܡ̈ܶܠܐܷ ܕܗܳܢܽܘܢ ܕܰܗܘܰܘ ܚܰܙܳܝ̈ܶܐ ܕܺܝܠܶܗ ܕܡܶܠܬܳܐ ܐܠܰܗܳܐ: ܘܟܰܕ ܠܘܳܬ ܣܽܘܠܳܩܳܐ ܕܰܫܡܰܘ̈ܗܝ ܪܳܡܳܐ ܘܡܰܘܬܒܳܐ ܫܰܘܝܳܐ ܥܰܡܳܟ: ܐܰܒܳܐ ܓܢܺܝܙܳܐ ܘܰܡܥܰܠܝܳܐ ܐܶܬܥܰܬܰܕ: ܐܰܣܶܩ ܐܶܢܽܘܢ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܠܘܳܬ ܛܽܘܪܳܐ ܕܙܰܝ̈ܬܶܐ: ܘܒܰܪܶܟ ܘܩܰܕܶܫ ܐܶܢܽܘܢ: ܘܰܒܫܽܘܠܛܳܢܳܐ ܦܐܶܐ ܠܐܱܠܳܗܳܐ ܐܶܡ̣ܰܪ ܠܗܽܘܢ ܫܠܳܡܳܐ ܕܺܝܠܝ ܝܳܗ̇ܶܒ ܐ̱ܢܳܐ ܠܟܽܘܢ: ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ: ܘܠܰܒܶܒ ܐܶܢܽܘܢ ܡܶܛܽܠ ܡܰܣܩܽܘܬܳܐ ܠܐܴ ܡܫܰܢܝܳܢܳܝܬܳܐ ܕܳܐܦܶܢ ܡܶܣܬܰܠܰܩ ܐ̱ܢܳܐ ܡܶܢܟܽܘܢ ܦܰܓܪܳܢܳܐܝ̣ܬ ܐܶܠܐܴ ܥܰܡܟܽܘܢ ܐ̱ܢܳܐ ܪܽܘܚܳܐܝ̣ܬ ܒܚܰܝ̈ܠܐܷ ܕܪܽܘܚܳܐ ܘܒܰܓܢ̱ܒܰܪ̈ܘܳܬܳܐ: ܘܶܐܢ ܐܶܢܳܐ ܠܐܴ ܐܳܙܶܠ ܐ̱ܢܳܐ ܦܰܪܰܩܠܺܝܛܳܐ ܪܽܘܚܳܐ ܕܰܫܪܳܪܳܐ ܠܐܴ ܐܳܬܶܐ ܠܘܳܬܟܽܘܢ ܘܢܰܐܠܶܦܟܽܘܢ ܫܪܳܪܳܐ ܟܽܠܶܗ ܘܢܶܡܠܶܝܟܽܘܢ ܫܽܘ̈ܟܳܢܶܐ ܕܰܥܬܺܝ̈ܕܳܬܳܐ ܘܰܢܫܰܪܰܪܟܽܘܢ ܒܝܽܘܠܦܳܢܳܐ ܕܪܽܘܚܳܐ ܩܰܕܺܝܫܳܐ: ܘܟܰܕ ܐܰܝܟ ܫܽܘܘܕܳܝܳܐ ܗ̇ܰܘ ܕܶܐܫܬܰܘܕܺܝ ܠܰܫܠܺܝ̈ܚܶܐ ܩܰܕܺܝ̈ܫܶܐ ܕܺܝܠܶܗ ܡܶܛܽܠ ܡܰܐܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ ܗ̇ܰܘ ܕܰܐܓܶܢ ܘܰܫܪܳܐ ܥܠܰܝܗܽܘܢ ܒܥܶܠܺܝܬܐ ܘܰܡܠܐܴ ܐܶܢܽܘܢ ܡ̣ܶܢ ܢܽܘܗܪܳܐ ܦܰܐܝܳܐ ܕܺܝܕܰܥܬܳܐ ܕܺܝܠܶܗ: ܡ̣ܶܢ ܡܰܠܦܳܢܽܘܬܳܐ ܚܰܬܺܝܬܬܳܐ ܕܺܝܠܶܗ ܡܫܰܡܠܳܝܬܳܐ ܘܚܰܟܶܡ ܪ̈ܶܥܝܳܢܶܐ ܕܺܝܠܗܽܘܢ ܒܣܽܘ̈ܟܳܠܐܷ ܡܥܰܠܰܝ̈ܳܐ: ܘܰܐܢܗܰܪ ܡܰܕܥܰܝ̈ܗܽܘܢ ܒܬܶܐܘܳܪܺܝܰܐ ܕܚܶܟܡܬܳܐ ܪܺܝܫܳܝܬܳܐ ܘܗܰܕܺܝ ܐܶܢܽܘܢ ܒܢܽܘܗܪܳܐ ܕܺܝܕܰܥܬܶܗ: ܠܘܳܬ ܟܳܪܽܘܙܽܘܬܳܐ ܕܰܣܒܰܪܬܳܐ ܐܶܘܢܓܶܠܳܝܬܳܐ: ܘܝܰܗܒ ܒܺܐܝܕܰܝ̈ܗܽܘܢ ܩܠܺܝ̈ܕܶܐ ܕܪܰܘܡܳܐ ܘܟܽܠܗܽܘܢ ܥܰܡ̈ܡܶܐ ܕܰܒܣܰܘ̈ܦܶܝܗ̇ ܕܟܽܠܳܗ̇ ܒܪܺܝܬܳܐ: ܘܡܶܛܽܠ ܗܳܕܶܐ ܟܰܕ ܠܝܰܘܡܳܐ ܗܳܢܳܐ ܩܰܕܺܝܫܳܐ ܘܰܡܥܰܠܝܳܐ ܕܦܰܢܛܺܝܩܽܘܣܛܺܝ ܡܥܰܕܥܕܺܝܢܰܢ ܘܠܰܦܪܽܘܬܶܣܡܺܝܰܐ ܐܰܘܟܺܝܬ ܫܽܘܘܕܳܝܳܐ ܕܰܒܪܳܐ ܡܫܺܝܚܳܐ ܒܡܰܕ̈ܥܶܐ ܕܬܰܪ̈ܥܝܳܬܰܢ ܚܳܙܶܝܢܰܢ: ܘܰܠܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܐ ܕܡ̣ܶܢ ܠܘܳܬܳܟ ܐܠܰܗܳܐ ܐܰܒܳܐ ܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܡܶܫܬܰܘܕܥܺܝܢܰܢ: ܘܰܕܡܶܢܳܟ ܐܰܒܳܐ ܡܬܽܘܡܳܝܳܐ ܢܰܦ̇ܶܩ ܘܡ̣ܶܢ ܒܪܳܐ ܐܺܝܬܝܳܝܳܐ ܢܳܣ̇ܶܒ: ܘܰܫܘܶܐ ܒܽܐܘܣܺܝܰܐ ܘܒܰܡܬܽܘܡܳܝܽܘܬܳܐ ܘܒܺܐܝܬܽܘܬܳܐ ܡܗܰܝܡܢܺܝܢܰܢ: ܝܰܘܡܳܢܳܐ ܓܶܝܪ ܠܘܰܥܕܳܐ ܛܶܠܳܢܳܝܳܐ ܕܫܳܒܽܘܥܳܐ ܗ̇ܰܘ ܕܰܒܝܰܕ ܡܽܘܫܶܐ ܐܶܬܝܰܠܰܦ ܡܫܰܡܠܶܝܢܰܢ: ܐܶܠܐܴ ܥܺܐܕܳܐ ܡܶܬܗܰܘܢܳܢܳܐ ܘܶܐܘܢܓܶܠܺܝܰܐ ܗ̇ܰܘ ܕܰܒܝܰܕ ܫܽܘ̈ܟܳܢܶܐ ܦܰܐܝ̈ܳܐ ܕܦܰܪܰܩܠܺܝܛܳܐ ܡܚܰܓܶܝܢܰܢ: ܝܰܘܡܳܢܳܐ ܠܳܘܬ ܡܰܓܕܠܐܴ ܕܰܒܒܰܠܐܱܢܺܝ ܒܳܒܶܠܳܝܬܳܐ ܚܳܙܶܝܢܰܢ ܕܡܶܬܗܓܶܡ: ܐܶܠܐܴ ܡܰܓܕܠܐܴ ܡܶܬܝܰܕܥܳܢܳܐ ܥܺܕܬܳܐ ܩܰܕܺܝܫܬܳܐ ܗ̇ܳܝ ܕܡܶܬܒܰܢܝܳܐ ܒܡܰܚܬܬܳܐ ܕܪܽܘܚܳܐ ܦܰܪܰܩܠܺܝܛܳܐ: ܝܰܘܡܳܐ ܫܠܺܝ̈ܚܶܐ ܩܰܕܺܝ̈ܫܶܐ ܐܶܫܬܰܡܠܺܝܘ ܒܫܽܘ̈ܟܳܢܶܐ ܡܩܰܕ̈ܫܳܢܶܐ ܘܶܐܬܢܰܗܰܪܘ ܡܰܕܥܰܝ̈ܗܽܘܢ ܕܰܢܡܰܠܠܽܘܢ ܒܠܶܫܳܢ̈ܶܐ ܚܰܕ̈ܬܶܐ ܬܶܕܡܪ̈ܳܬܳܐ ܕܰܐܠܳܗܳܐ: ܝܰܘܡܳܢܳܐ ܥܶܠܺܝܬܳܐ ܢܳܗܪܳܐ ܒܢܽܘܗܪܳܐ ܡܰܢܗܪܳܢܳܐ ܕܡ̣ܶܢ ܙܰܗܪ̈ܺܝܪ̈ܶܐ ܐܠܰܗܳܝ̈ܶܐ: ܫܶܕܬܳܐ ܡܶܬܬܰܙܠܓܳܐ ܘܡܶܬܬܰܨܡܚܳܐ ܡܰܐܪ̈ܙܳܢܘܳܬܳܐ ܕܰܣܒܰܪܬܳܐ ܐܠܰܗܳܝܬܳܐ: ܝܰܘܡܳܢܳܐ ܢܚܰܕܽܘܢ ܢܒܺܝܷ̈ܐ ܒܐܪ̈ܳܙܰܝܗܽܘܢ ܕܪܽܘܚܶܗ ܕܡܳܪܝܳܐ ܡܰܠܠܰܬ݀ ܒܓܽܘܕܳܐ ܗ̇ܳܝ ܕܰܫܠܺܝ̈ܚܶܐ ܩܰܕܺܝ̈ܫܶܐ: ܝܰܘܡܳܢܳܐ ܝܽܘܐܶܝܠ ܢܒܺܝܳܐ ܢܙܺܝܥ ܡܶܢ̈ܰܝ ܩܺܝܬܳܪܶܗ ܕܗܳܐ ܒܢܰܝ̈ܳܐ ܕܰܓܒ̣ܳܐ ܪܽܘܚܳܐ ܩܰܕܺܝܫܳܐ  ܡܶܬܢܰܒܶܝܢ ܗܘܰܘ ܒܪܽܘܚܳܐ ܦܰܪܰܩܠܺܝܛܳܐ: ܝܰܘܡܳܢܳܐ ܢܕܽܘܨ ܐܶܫܰܥܝܳܐ: ܝܰܘܡܳܢܳܐ ܢܶܪܘܰܙ ܐܶܪܰܡܝܳܐ ܕܗܳܐ ܪܽܘܚܳܐ ܩܰܕܺܝܫܳܐ ܗ̇ܰܘ ܕܶܐܥܒܶܕ ܒܗܽܘܢ ܒܕܶܡ̈ܘܳܬܳܐ ܗܳܐ ܢܰܗܺܝܪܳܐܝ̣ܬ ܕܠܐܴ ܬܰܚܦܺܝܬܳܐ ܒܰܫܠܺܝ̈ܚܶܐ ܩܰܕܺܝ̈ܫܶܐ ܕܰܥܠܰܘܗܝ ܡܰܠܶܠܘ: ܓܰܡܰܪ ܠܰܫܠܺܝ̈ܚܶܐ ܒܥܶܠܺܝܬܳܐ: ܝܰܘܡܳܢܳܐ ܡܽܘܫܶܐ ܢܒܺܝܳܐ ܘܫܰܪܟܳܐ ܕܰܢܒܺܝ̈ܶܐ ܚܰܒܪ̈ܰܘܗܝ ܪܳܘܙܺܝܢ ܘܰܦܨܺܝܚܺܝܢ: ܕܪܽܘܚܳܐ ܩܰܕܺܝܫܳܐ ܗ̇ܰܘ ܕܒܰܡ̈ܢܰܘܳܢ ܡܢܰܘ̈ܳܢ ܚܰܘܺܝ ܠܗܽܘܢ ܕܶܡܘ̈ܳܬܶܗ ܕܰܒܪܳܐ ܕܗܳܐ ܓܰܠܝܳܐܝ̣ܬ ܠܟܽܠ ܒܣܰܪ ܫܰܘܕܰܥ ܝܰܘܡܳܢܳܐ ܐ̱ܪܳܙܳܐ ܫܒܺܝܚܳܐ ܕܰܬܠܺܝܬܳܝܽܘܬܳܐ ܡܫܰܒܰܚܬܳܐ ܘܠܐܴ ܡܶܬܕܰܪܟܳܢܺܝܬܳܐ ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ ܐܠܰܗܰܢ ܗ̇ܰܘ ܕܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܘܕܺܝܠܳܝ̈ܳܬܳܐ ܡܶܬܺܝܕܰܥ ܘܒܰܠܚܽܘܕܳܝܽܘܬ ܪܺܝܫܳܢܽܘܬܳܐ ܡܳܪܳܢܳܝܬܳܐ ܡܶܬܬܰܘܕܶܐ: ܐܰܝܟܰܢܳܐ ܕܰܬܫܰܟܶܢ ܠܰܢ ܒܥܺܐܕܳܐ ܗܳܢܳܐ ܩܰܕܺܝܫܳܐ ܡܰܐܓܢܳܢܽܘܬܳܐ ܕܛܰܝܒܽܘܬܳܐ ܘܰܬܚܰܕܶܬ ܬܰܪ̈ܥܝܳܬܳܐ ܘܡܰܕ̈ܥܶܐ ܕܺܝܠܰܢ ܒܚܰܣܝܽܘܬܳܐ ܘܩܰܕܺܝܫܽܘܬܳܐ ܕܺܝܠܳܟ: ܘܰܡܫܰܟܶܢ ܐܰܢ̱ܬ ܠܰܢ ܫܰܝܢܳܐ ܐܰܡܺܝܢܳܐ: ܘܰܫܠܳܡܳܐ ܡܚܰܕܝܳܢܳܐ ܘܙܳܓܰܪ ܐܰܢ̱ܬ ܡܶܢܰܢ ܠܟܽܠ ܡܰܪ̈ܕܘܳܬܳܐ ܘܰܡܫܺܝܡܳܢ̈ܳܝܳܬܳܐ ܕܰܒܝܰܕ ܚܛܳܗܰܝ̈ܢ ܡܶܬܬܰܝ̈ܬܝܳܢ ܥܠܰܝܢ: ܘܟܰܕ ܚܳܕܶܝܢܰܢ ܘܪܳܘܙܺܝܢܰܢ ܒܣܰܒܪܳܐ ܕܡܽܘ̈ܠܟܳܢܰܝܟ ܢܫܰܡܠܐܷ ܠܥܺܐܕܰܝ̈ܟ ܡܳܪ̈ܳܢܳܝܶܐ ܒܩܰܕܺܝܫܽܘܬܳܐ ܘܰܒܕܽܘܒܳܪ̈ܶܐ ܕܰܡܪܰܥܶܝܢ ܠܳܟ: ܘܢܶܫܬܘܶܐ ܟܽܠܰܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܠܪ̈ܰܚܡܶܐ ܥܰܬܺܝܪ̈ܶܐ ܕܡܶܢܳܟ: ܘܰܚܢܰܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ: ܢܶܚܕܶܐ ܘܰܢܕܽܘܨ ܒܫܽܘܒܚܳܐ ܕܡܰܠܟܽܘܬܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ ܐܰܡܺܝܢܬܳܐ ܘܣܶܓܕܬܳܐ ܪܟܺܝܢܬܳܐ ܘܬܰܘܕܺܝܬܳܐ ܥܦܺܝܦܬܳܐ ܘܗܰܝܡܳܢܽܘܬܳܐ ܬܪܺܝܨܬܳܐ ܢܶܫܬܘܶܐ ܕܰܢܩܰܕܶܫ ܠܗ̇ܰܘ ܫܶܡܫܳܐ ܦܰܐܝܳܐ ܕܙܰܕܺܝܩܽܘܬܳܐ: ܘܨܶܡܚܳܐ ܠܐܴ ܡܶܬܕܰܪܟܳܢܳܐ: ܕܰܐܨܡܰܚ ܙܰܠܺܝ̈ܩܰܘܗܝ ܒܓܰܘ ܥܶܠܺܝܬܳܐ ܘܫܰܪܰܪ ܠܚܽܘ̈ܫܳܒܶܐ ܕܰܬܪܶܥܣܰܪ ܫܠܺܝ̈ܚܶܐ ܕܗܶܕܝܽܘܛܽܘܬܳܐ: ܘܦܰܠܶܓ ܠܶܫܳܢ̈ܶܐ ܠܰܬܪܶܥܣܰܪ ܒܽܘܪ̈ܶܐ ܕܰܡܡܰܠܠܺܝܢ ܒܝܰܕ ܡܠܰܚܡܽܘܬܳܐ ܕܰܢܦܰܚ ܒܗܽܘܢ ܘܩܰܒܶܠ ܪܽܘܚܳܐ ܩܰܕܺܝܫܳܐ ܠܗ̇ܰܘ ܚܰܟܺܝܡܳܐ ܘܛܽܘܒܬܳܢܳܐ ܕܚܰܟܶܡ ܐܶܢܽܘܢ ܠܬܰܠܡܺܝ̈ܕܰܘܗܝ ܘܶܐܡܰܪ ܠܗܽܘܢ ܕܦܽܘܩܘ ܠܐܱܪܒܰܥ ܦܶܢ̈ܝܳܬܳܐ ܘܰܐܟܪܶܙܘ ܘܰܠܥܰܡ̈ܡܶܐ ܗܰܝܡܳܢܽܘܬܳܐ ܕܰܫܪܳܪܳܐ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܫܶܡܫܳܐ ܦܰܐܝܳܐ ܘܢܽܘܗܪܳܐ ܠܐܴ ܡܶܙܕܰܟܝܳܢܳܐ ܗ̇ܰܘ ܕܡ̣ܶܢ ܚܰܝܠܰܘ̈ܳܬܳܐ ܡܰܠܐܱܟܳܝ̈ܶܐ ܘܢܽܘܪ̈ܳܢܳܝܶܐ ܡܶܬܒܰܪܰܟ ܘܡܶܬܗܰܠܰܠ ܘܡܶܬܩܰܕܰܫ: ܘܡܶܛܽܠ ܕܰܨܒܳܐ ܕܰܠܘܳܬܰܢ ܢܶܬܬܰܚܬܶܐ ܘܢܶܚܠܽܘܛ ܝܳܬܶܗ ܥܰܡ ܓܒܺܝܠܬܰܢ ܘܰܢܚܰܕܶܬ ܨܰܠܡܗ ܕܥܰܡܰܢ: ܡ̣ܶܢ ܡܒܰܪܰܟܬܳܐ ܘܫܰܘܝܰܬ݀ ܠܛܽܘ̈ܒܶܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܩܰܒܶܠ ܘܶܐܬܺܝܠܶܕ ܒܶܣܪܳܢܳܐܝ̣ܬ ܘܰܓܡܰܪ ܗܳܠܶܝܢ ܕܰܒܗܽܘܢ ܐܶܬܦܪܶܩܢܰܢ: ܝܰܠܕܳܐ ܘܰܥܡܳܕܳܐ ܘܚܰܫܳܐ ܘܰܙܩܺܝܦܳܐ ܘܡܰܘܬܳܐ ܘܰܩܒܽܘܪܬܳܐ ܘܰܩܝܳܡܬܳܐ ܡܫܰܒܰܚܬܳܐ: ܘܟܰܕ ܨܒܐ ܕܰܠܘܳܬ ܐܰܒܽܘܗܝ ܒܫܽܘܒܚܳܐ ܢܶܣܬܰܠܰܩ: ܘܢܰܣܶܩ ܥܰܡܶܗ ܠܰܫܡܰܝܐ ܠܨܰܠܡܳܐ ܡܰܠܟܳܝܳܐ ܠܰܒܢ̈ܰܝ ܐ̱ܪܳܙܶܗ ܠܛܽܘܪ ܙܰܝ̈ܬܶܐ ܟܰܢܶܫ ܘܡܰܘܗ̈ܒܳܬܳܐ ܠܗܽܘܢ ܫܰܟܶܢ: ܘܰܢܦܰܚ ܒܗܽܘܢ ܪܽܘܚܶܗ ܩܰܕܺܝܫܳܐ ܘܶܐܡ̣ܰܪ: ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̈ܡܶܐ ܕܢܶܗܘܽܘܢ ܚܰܕ ܥܰܡܳܐ ܓܰܒܝܳܐ ܕܰܚܒܺܝܫ ܒܰܡܨܺܝܕܬܳܐ ܐܶܘܢܓܶܠܳܝܬܳܐ ܐܰܢ̱ܬܽܘܢ ܕܶܝܢ ܒܰܡܕܺܝܢ̱ܬܳܐ ܐܽܘܪܫܠܶܡ ܩܰܘܰܘ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܟܽܘܢ ܪܽܘܚܳܐ ܦܰܪܰܩܠܺܝܛܳܐ: ܡ̣ܶܢ ܠܘܳܬ ܐܰܒܳܐ ܗ̣ܽܘ ܢܗܰܕܶܐ ܘܢܰܢܗܰܪܟܽܘܢ ܘܰܢܚܰܟܶܡܟܽܘܢ ܒܡܰܘ̈ܗܒܳܬܳܐ ܫܒܺܝ̈ܚܳܬܳܐ: ܘܶܐܢ ܐܶܢܳܐ ܠܐܴ ܐܳܙܶܠ ܐ̱ܢܳܐ ܠܘܳܬ ܐܰܒܳܐ ܦܰܪܰܩܠܺܝܛܳܐ ܠܐܴ ܐܳܬܶܐ ܠܘܳܬܟܽܘܢ: ܘܟܰܕ ܗ̣ܽܘ ܡܡܰܠܶܠ ܗܘܳܐ ܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܐܶܬܚܛܶܦ ܡܶܢܗܽܘܢ ܘܰܣܠܶܩ ܠܰܫܡܰܝܳܐ ܘܺܝܬܶܒ ܥܰܠ ܬܪܽܘܢܳܘܣ ܕܫܽܘܒܚܶܗ ܡ̣ܶܢ ܝܰܡܺܝܢܳܐ ܕܫܳܠܽܘܚܶܗ: ܘܗ̣ܶܢܽܘܢ ܕܝܢ ܫܠܺܝ̈ܚܶܐ ܩܰܕܺܝ̈ܫܶܐ ܒܥܶܠܺܝܬܳܐ ܒܰܡܕܺܝܢ̱ܬܳܐ ܐܽܘܪܫܠܶܡ ܩܳܝܡܺܝܢ ܗܘܰܘ ܟܰܕ ܚܳܝܪܝܢ ܕܢܶܫܬܰܠܰܡ ܠܘܳܬܗܽܘܢ ܗ̇ܰܘ ܫܽܘܘܕܳܝܳܐ ܕܰܒܪܳܐ ܫܰܪܺܝܪܳܐ: ܒܥܺܐܕܳܐ ܕܶܝܢ ܪܰܒܳܐ ܕܦܰܢܛܺܝܩܳܘܣܛܺܝ ܘܟܰܕ ܗ̣ܶܢܽܘܢ ܫܠܺܝ̈ܚܶܐ ܒܥܶܠܺܝܬܳܐ ܝܳܬܒܺܝܢ ܗܘܰܘ ܘܡ̣ܶܢ ܫܶܠܝܳܐ ܫܠܺܝ̈ܚܐ ܪܽܘܚܳܐ ܩܰܕܺܝܫܳܐ ܐܰܓܶܢ ܥܠܰܝܗܽܘܢ ܫܟܶܢܘ: ܝܰܘܡܳܢܳܐ ܬܰܠܡܺܝ̈ܕܶܐ ܩܰܕܺܝ̈ܫܶܐ ܒܚܶܟ̈ܡܳܬܳܐ ܐܠܰܗܳܝ̈ܳܬܳܐ ܐܶܬܢܰܗܰܪܘ ܘܰܒܡܰܡܠܠܐܴ ܕܟܽܠܗܽܘܢ ܥܰܡ̈ܡܶܐ ܐܶܬܚܰܟܰܡܘ: ܝܰܘܡܳܢܳܐ ܝܽܘ̈ܕܳܝܶܐ ܪ̈ܰܫܺܝܥܶܐ ܒܶܐܒܠܐܴ ܝܳܬܒܺܝܢ ܗܘܰܘ: ܟܰܕ ܚܳܙܝܶܢ ܠܗܽܘܢ ܕܺܐܝܬܰܝܗܽܘܢ ܗܘܰܘ ܗܶܕܝܽܘ̈ܛܶܐ: ܕܰܡܚܰܟܡܳܢ̈ܶܐ ܘܓܳܡܽܘܪ̈ܶܐ ܕܐ̱ܪ̈ܳܙܶܐ ܐܶܬܚܙܺܝܘ: ܝܰܘܡܳܢܳܐ ܐܶܫܬܪܺܝܘ ܫܠܺܝ̈ܚܶܐ ܩܰܕܺܝ̈ܫܶܐ ܡ̣ܶܢ ܚܰܡܪܳܐ ܐܠܰܗܳܝܳܐ ܘܡܰܘܗܰܒܬܳܐ ܕܪܽܘܚܳܐ ܗ̇ܰܘ ܡܰܥܒܶܕ ܚܰܝ̈ܶܐ ܩܰܒܶܠܘ: ܘܒܰܕܓܽܘܢ ܒܰܚܣܳܡܳܐ ܡ̣ܶܢ ܝܽܘܕܳܝ̈ܶܐ ܡܶܬܡܰܠܠܐܴ ܗܘܳܬ݀ ܕܗܳܠܶܝܢ ܐ̱ܢܳܫ̈ܳܐ ܡܶܐܪܺܝܬܳܐ ܐܶܫܬܺܝܘ ܘܰܪܘܺܝܘ: ܝܰܘܡܳܢܳܐ ܫܶܡܥܽܘܢ ܟܺܐܦܳܐ ܕܳܐܶܨ: ܘܰܐܢܕܪܶܐܘܳܣ ܘܰܒܢ̈ܰܝ ܙܰܒܕܰܝ ܘܫܰܪܟܳܐ ܕܰܫܠܺܝ̈ܚܶܐ ܟܽܠܗܽܘܢ ܒܚܰܕܽܘܬܳܐ ܘܒܰܪܘܳܙܳܐ ܩܳܝܡܺܝܢ ܗܘܰܘ ܟܰܕ ܚ̇ܳܙܶܝܢ ܕܗ̇ܰܘ ܡܶܕܶܡ ܕܰܠܗܽܘܢ ܐܶܫܬܰܘܕܝ ܒܪܳܐ ܝܺܚܺܝܕܳܝܳܐ ܐܶܫܬܰܡܠܺܝ ܠܘܳܬܗܽܘܢ ܝܰܘܡܳܢܳܐ ܒܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܘܥܶܠܺܝܬܳܐ ܗܘܳܬ݀ ܒܳܒܶܝܠ ܕܬܰܪܬܶܝܢ ܠܰܘ ܓܶܝܪ ܒܰܡܣܳܡ ܒܪܺܝܫܳܐ ܐܶܬܦܰܠܰܓܘ ܒܳܗ̇ ܠܶܫܳܢ̈ܶܐ ܐܰܝܟ ܗ̇ܳܝ ܩܰܕܡܳܝܬܳܐ ܐܶܠܐܴ ܒܚܰܝܠܶܗ ܕܪܽܘܚܳܐ ܩܰܕܺܝܫܳܐ ܐܶܬܢܰܗܪܰܬ݀: ܕܰܢܚܰܟܡܽܘܢ ܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܡܶܛܽܠ ܟܳܪܽܘܙܽܘܬܳܐ ܕܰܫܪܳܪܳܐ: ܝܰܘܡܳܢܳܐ ܢܒܺܝ̈ܶܐ ܚܳܕܶܝܢ ܕܓܶܠܝܳܢܰܝ̈ܗܽܘܢ ܒܐܪܳܙܳܐ ܐܶܫܬܰܠܰܡܘ: ܝܰܘܡܳܢܳܐ ܝܺܗܽܘܕܳܐ ܣܟܰܪܝܽܘܛܳܐ ܒܒܶܗܬܬܳܐ ܩܳܐܶܡ ܟܰܕ ܚܳܙܶܐ ܠܰܫܠܺܝ̈ܚܶܐ ܩܰܕܺܝ̈ܫܶܐ ܚܰܒܪ̈ܰܘܗܝ ܕܡܶܫܬܰܚܠܦܺܝܢ ܘܡܶܬܢܰܗܪܺܝܢ ܡܰܕܥܰܝ̈ܗܽܘܢ: ܝܰܘܡܳܢܳܐ ܢܶܠܒܰܫ ܒܶܗܬܬܳܐ ܗ̇ܰܘ ܙܺܐܦܳܢܳܐ ܕܟܰܕ ܒܚܺܐܪܽܘܬܳܐ ܗ̇ܳܝ ܕܡܶܢܶܗ ܐܶܬܢܰܣܒܰܬ݀ ܬܶܫܡܫܬܶܗ ܘܠܐܱܚܪܺܢܳܐ ܕܶܝܢ ܐܶܬܝܰܗܒܰܬ݀: ܝܰܘܡܳܢܳܐ ܢܕܽܘܨ ܡܰܬܺܝܰܐ ܕܰܚܠܳܦ ܣܟܰܪܝܽܘܛܳܐ ܥܰܠ: ܘܩܰܒܶܠ ܘܺܝܪܶܬ ܟܽܘܡܪܽܘܬܶܗ: ܘܰܡܠܺܝ ܕܽܘܟܰܬ݀ ܫܠܺܝܚܽܘܬܶܗ ܝܰܘܡܳܢܳܐ ܢܶܚܕܶܐ ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܘܢܶܪܘܰܙ ܐܰܒܳܐ ܕܰܬܪܶܥܣܰܪ ܫܰܒ̈ܛܶܐ: ܕܗ̇ܳܢܽܘܢ ܕܩܰܒܠܽܘܗ̇ ܠܕܽܘܟܬܶܗ: ܘܰܗܘܰܘ ܡܰܠܟ̈ܶܐ ܘܟܳܗ̈ܢܶܐ ܘܰܢܒܺܝ̈ܶܐ: ܝܰܘܡܳܢܳܐ ܢܕܽܘܨ ܐܶܫܰܥܝܳܐ ܘܢܶܪܘܰܙ ܐܺܝܽܘܒ: ܝܰܘܡܳܢܳܐ ܢܶܚܕܶܐ ܢܽܘܚ ܟܺܐܢܳܐ ܕܢܰܚ ܥܳܠܡܳܐ ܡ̣ܶܢ ܛܰܘܦܳܢܳܐ ܘܰܠܒܶܟܘ ܬܪܶܥܣܰܪ ܠܐܱܪܒܰܥ ܦܶܢ̈ܝܳܬܳܐ: ܘܗ̣ܶܢܽܘܢ ܐܰܢܺܝܚܽܘܗ̇ ܗܘܰܘ ܠܩܺܐܒܽܘܬܳܐ: ܘܰܠܛܰܘܦܳܢܳܐ ܕܰܚܛܺܝܬܳܐ ܒܝܰܕ ܣܒܰܪܬܶܗ ܕܰܒܪܳܐ ܘܰܒܗܽܘܢ ܐܶܬܓܰܡܪܰܬ݀: ܘܰܐܦܺܝܛܘ ܠܐܴܟܳܠܩܰܪܨܳܐ ܘܛܰܒܥܽܘܗܝ ܒܓܰܘ ܬܗܽܘ̈ܡܶܐ ܥܰܡܺܝ̈ܩܶܐ ܘܰܠܟܽܠܶܗ ܚܰܝܠܶܗ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܕܦܰܢܛܺܝܩܳܘܣܛܺܝ ܨܳܐܰܪ ܗܘܳܐ ܡܽܘܫܶܐ ܡܢܺܝܚܳܢܳܐ ܘܰܐܠܳܗܽܘܬܳܟ ܟܰܕ ܩܰܒܶܠ ܗܘܳܐ ܢܳܡܽܘܣܳܐ ܘܦܽܘܩܕ̈ܳܢܶܐ ܕܰܒܝܰܕ ܠܽܘ̈ܚܶܐ ܐܺܝܣܰܪ̈ܠܳܝܳܬܳܐ ܗ̇ܳܢܶܝ̈ܢ ܕܰܒܨܶܒܥܳܐ ܕܰܐܠܳܗܳܐ ܪܽܘܚܳܢܳܐܝ̣ܬ ܐܶܬܪ̈ܫܶܡܶܝܢ ܠܗܳܢܳܐ ܥܺܐܕܳܐ ܩܰܕܺܝܫܳܐ ܨܳܐܰܪ ܗܘܳܐ ܕܡܳܐ ܫܰܒܥܳܐ ܫܪ̈ܳܓܺܝܢ ܕܰܡܢܳܪܰܬ݀ ܩܽܘܕ̈ܫܶܐ ܒܗܽܘܢ ܡܨܰܒܬܳܐ ܗܘܳܬ݀: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܕܡܳܐ ܗ̇ܰܘ ܕܰܫܒܰܥ ܙܰܒܢܺܝ̈ܢ ܠܐܱܦ̈ܰܝ ܩܽܘܕܫܳܐ ܕܡܳܪܝܳܐ ܘܕܶܒܚܬܳܐ ܡܶܬܪܣܶܣ ܗܘܳܐ ܐ̱ܪܳܙܳܢܳܐܝ̣ܬ ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܝܶܫܽܘܥ ܒܰܪܢܽܘܢ ܒܫܰܒܥܳܐ ܟܳܗ̈ܢܶܐ ܩܳܪ̈ܝܰܝ ܩܰܪ̈ܢܳܬܳܐ ܘܩܺܐܒܽܘܬܳܐ ܥܰܠ ܐܺܝܪܺܝܚܽܘ ܡܶܬܬܢܺܝܚܳܐ ܗܘܳܬ݀: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܕܰܘܺܝܕ ܡܰܠܟܳܐ ܘܰܢܒܺܝܳܐ ܟܰܕ ܐܳܡܰܪ ܕܡܺܐܡܪܶܗ ܕܡܳܪܝܳܐ ܡܺܐܡܪܰܐ ܗ̱̇ܘ ܕܰܟܝܳܐ: ܘܣܺܐܡܳܐ ܓܰܒܝܳܐ ܕܰܒܚܺܝܪ ܒܰܐܪܥܳܐ: ܘܰܡܕܰܟܰܝ ܚܰܕ ܒܫܰܒܥܳܐ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܠܶܝܳܐ ܢܒܺܝܳܐ ܟܰܕ ܐܳܡ̇ܰܪ ܠܐܷܠܺܝܫܳܥ ܬܰܠܡܺܝܕܶܗ ܕܰܢܚܽܘܪ ܠܐܘܪܚܳܐ ܕܝܰܡܳܐ ܒܡܰܪܟܰܒܬܳܐ ܘܓܺܝ̈ܓܠܐܷ ܕܢܽܘܪܳܐ ܣܠܶܩ ܠܰܫܡܰܝܳܐ ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܠܶܝܫܳܥ ܢܒܺܝܳܐ ܟܰܕ ܐܳܡܰܪ ܠܗܰܘ ܓܰܪܒܳܢܳܐ ܢܶܥܡܳܢ ܕܰܫܒܰܥ ܙܰܒܢܺܝ̈ܢ ܢܺܐܙܰܠ ܢܶܣܚܶܐ ܒܝܽܘܪܕܢܳܢ ܢܰܗܪܳܐ ܘܢܶܬܕܰܟܶܐ: ܠܗܳܢܳܐ ܝܰܘܡܳܐ ܩܰܕܺܝܫܳܐ ܨܳܐܰܪ ܗܘܳܐ ܐܶܫܰܥܝܳܐ ܡܫܰܒܚܳܐ ܒܰܢܒܺܝ̈ܶܐ ܒܝܰܕ ܫܒܰܥ ܡܝܰܩܪ̈ܳܬܳܐ ܟܰܕ ܪܽܘܚܶܗ ܒܡܰܥܒܕܳܢܽܘܬܳܐ ܕܪܽܘܚܳܐ ܩܰܕܺܝܫܳܐ: ܐܶܬܺܝܗܶܒ ܢܳܡܽܘܣܳܐ ܚܰܕܬܳܐ ܕܗ̣ܽܘ ܐܶܘܢܓܶܠܝܽܘܢ ܩܰܕܺܝܫܳܐ ܠܰܟܪ̈ܺܝܣܛܝܳܢܶܐ ܒܝܰܕ ܫܠܺܝ̈ܚܶܐ ܩܰܕܺܝ̈ܫܶܐ: ܘܗܳܫܳܐ ܡܦܺܝܣܺܝܢܰܢ ܠܳܟ ܐܳܘ ܡܶܠܬܳܐ ܐܠܰܗܳܐ: ܒܗܳܢܳܐ ܥܺܐܕܳܐ ܩܰܕܺܝܫܳܐ ܕܦܰܢܛܺܝܩܽܘܣܛܺܝ ܕܬܶܐܫܽܘܕ ܥܠܰܝܢ ܪܽܘܚܳܐ ܩܰܕܺܝܫܳܐ ܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ: ܘܢܶܗܘܶܐ ܠܰܢ ܢܽܘܪܳܐ ܡܰܘܩܕܳܢܺܝܬܳܐ ܕܟܽܠܶܗ ܝܰܥܪܳܐ ܕܰܚܛܺܝܬܳܐ: ܐܰܝܟܰܢܳܐ ܕܒܶܗ ܒܪܽܘܚܳܐ ܩܰܕܺܝܫܳܐ ܡܶܬܢܰܗܪܺܝܢܰܢ ܢܶܫܬܘܶܐ ܕܰܢܩܰܪܶܒ ܦܺܐܪ̈ܶܐ ܪ̈ܽܘܚܳܢܳܝܶܐ ܘܰܕܟܰܝ̈ܳܐ ܕܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܫܒܺܝ̈ܚܳܬܳܐ ܕܰܡܪܰܥܶܝܢ ܠܳܟ: ܟܰܕ ܗܳܘܶܐ ܐܰܢ̱ܬ ܠܥܺܕܬܳܐ ܩܰܕܺܝܫܬܳܐ ܡܢܰܛܪܳܢܳܐ ܡ̣ܶܢ ܟܽܠ ܩܺܝܢܕܽܘ̈ܢܽܘ ܘܰܠܪ̈ܳܥܰܘܳܬܳܐ ܕܺܝܠܳܗ̇ ܘܰܠܓܰܐܝ̈ܳܐ ܘܰܡܫܰܒ̈ܚܶܐ ܡܓܰܢ̱ܒܪ̈ܳܢܶܐ ܕܰܠܟܳܗ̈ܢܶܝܗ̇ ܘܠܰܡܫܰܡ̈ܫܳܢܶܝܗ̇ ܡܙܰܗܝܳܢܳܐ ܠܣܳܒ̈ܶܐ ܘܠܰܡܚܺܝ̈ܠܐܷ ܡܣܰܡܟܳܢܳܐ: ܠܰܥܠܰܝ̈ܡܶܐ ܘܠܰܛܠܳܝ̈ܶܐ ܡܢܰܟܦܳܢܳܐ: ܠܫܰܒܪ̈ܶܐ ܘܰܠܝܰܬܡ̈ܶܐ ܡܪܰܒܝܳܢܳܐ: ܠܐܱܪ̈ܡܠܳܬܳܐ ܗܘܺܝ ܩܳܝܽܘܡܳܐ ܘܰܡܬܰܪܣܝܳܢܳܐ ܘܰܗܘܺܝ ܠܰܟܪ̈ܺܝܗܶܐ ܐܳܣܝܳܐ ܘܠܐܱܣܺܝܪ̈ܶܐ ܥܳܕܽܘܪܳܐ: ܠܛܳܥܰܝ̈ܳܐ ܡܦܰܢܝܳܢܳܐ: ܠܐܱܒܺܝ̈ܕܶܐ ܡܟܰܢܫܳܢܳܐ: ܠܪ̈ܰܚܺܝܩܶܐ ܡܰܝܬܝܳܢܳܐ: ܠܩܰܪ̈ܺܝܒܶܐ ܡܢܰܛܪܳܢܳܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܡܚܰܣܝܳܢܳܐ: ܐܰܝܟܰܢܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܕܶܢܚܳܐ ܫܰܦܝܳܐ ܘܕܰܟܝܳܐ ܐܠܰܗܳܐ: ܪܽܘܚܳܐ ܦܰܪܰܩܠܺܝܛܳܐ ܕܰܐܢܗܰܪ ܠܰܫܠܺܝ̈ܚܶܐ ܩܰܕܺܝ̈ܫܶܐ ܒܫܽܘ̈ܟܳܢܶܐ ܕܺܝܠܳܗ ܢܽܘܪ̈ܳܢܳܝܶܐ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܕܰܟܳܐ ܠܚܽܘ̈ܫܳܒܰܝܢ ܡܶܢܟܽܠ ܣܰܢ̈ܝܳܬܳܐ: ܐܰܝܟܰܢܳܐ ܕܟܰܕ ܒܙܰܗܪܺܝܪ̈ܶܐ ܕܪܽܘܚܳܐ ܦܰܪܰܩܠܺܝܛܳܐ ܡܶܬܢܰܗܪܺܝܢܰܢ ܘܰܒܚܰܕܽܘܬܳܐ ܘܒܰܦܨܺܝܚܽܘܬܳܐ ܢܫܰܡܠܐܷ ܠܥܺܐܕܳܐ ܗܳܢܳܐ ܕܡܰܚܰܬܬܳܐ ܕܪܽܘܚܳܐ ܩܰܕܺܝܫܳܐ: ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ ܠܰܬܠܺܝܬܳܝܽܘܬܳܐ ܡܫܰܒܰܚܬܳܐ ܘܰܣܓܺܝܕܬܳܐ ܘܰܚܕܳܝܽܘܬܳܐ ܠܐܴ ܡܶܬܦܰܠܓܳܢܺܝܬܳܐ: ܪܽܘܡܪܳܡܳܐ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܐܰܒܳܐ ܕܡܰܠܶܠ ܒܰܢܒܺܝ̈ܶܐ: ܘܰܒܪܳܐ ܕܶܐܬܟܪܶܙ ܒܰܫܠܺܝ̈ܚܶܐ: ܘܪܽܘܚܳܐ ܕܚܰܟܶܡ ܠܬܰܠܡܺܝ̈ܕܶܐ ܐܰܒܳܐ ܝܳܠܽܘܕܳܐ ܘܠܐܴ ܝܺܠܺܝܕܳܐ: ܘܰܒܪܳܐ ܝܺܠܺܝܕܳܐ ܘܠܐܴ ܝܳܠܽܘܕܳܐ: ܘܪܽܘܚܳܐ ܩܰܕܺܝܫܳܐ ܢܳܦܽܘܩܳܐ ܘܢܳܣܽܘܒܳܐ: ܕܡ̣ܶܢ ܐܰܒܳܐ ܢܳܦܶܩ ܡܬܽܘܡܳܐܝ̣ܬ: ܘܥܰܠ ܫܠܺܝ̈ܚܶܐ ܩܰܕܺܝ̈ܫܶܐ ܐܰܓܶܢ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܠܐܴ ܡܰܘܩܕܳܢܳܐܝ̣ܬ: ܘܚܰܟܶܡ ܐܶܢܽܘܢ ܒܝܽܘܠܦܳܢܶܗ ܢܰܗܺܝܪܳܐܝ̣ܬ ܐܰܝܟܰܢܳܐ ܕܰܣܒܰܪܬܶܗ ܢܰܟܪܙܽܘܢ ܠܟܽܠ ܥܰܡ̈ܡܺܝܢ ܒܠܶܫܳܢܰܝ̈ܗܽܘܢ ܘܰܫܪܳܪܶܗ ܕܶܐܘܢܓܶܠܝܽܘܢ ܩܰܕܺܝܫܳܐ ܢܣܰܒܪܽܘܢ ܠܟܽܠ ܐܰܝܟ ܣܶܦܪ̈ܰܝܗܽܘܢ ܕܠܶܗ ܘܰܚܢܰܢ ܢܶܣܓܽܘܕ ܣܶܓܕܬܳܐ ܚܕܰܬܳܐ ܕܟܽܠ ܬܶܗܪ̈ܺܝܢ: ܘܰܢܩܰܪܶܒ ܬܰܘܕܺܝܬܳܐ ܒܟܽܠ ܠܶܫܳܢܺܝ̈ܢ: ܒܗܳܢܳܐ ܥܶܕܳܢܳܐ ܕܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ܀

 

ܣܕܪܐ

ܕܨܰܦܪܳܐ ܛܰܪܩܳܐ ܐ̱ܪܳܙܳܐ ܪܰܒܳܐ ܘܰܡܥܰܠܝܳܐ ܘܰܡܠܐܷ ܬܶܕܡܽܘܪܬܳܐ ܕܥܺܐܕܳܐ ܩܰܕܺܝܫܐ ܕܦܰܢܛܺܝܩܽܘܣܛܺܝ ܥܰܡ ܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܡܥܰܕܥܕܺܝܢܰܢ ܝܰܘܡܳܢܳܐ: ܗ̇ܰܘ ܕܚܰܡܫܺܝܢܳܝܳܐ ܡ̇ܰܢ ܐܺܝܬܰܘܗܝ: ܘܡ̣ܶܢ ܫܰܒܥܳܐ ܫܳܒܽܘ̈ܥܶܐ ܕܝܰܘ̈ܡܳܬܳܐ ܗܳܠܶܝܢ ܕܗܳܫܳܐ ܡܫܰܡܠܶܝܢܰܢ ܡ̣ܶܢ ܩܝܳܡܬܳܐ ܦܳܪܽܘܩܳܝܬܳܐ: ܘܰܥܕܰܡܳܐ ܠܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܕܝܰܘܡܳܢܳܐ ܡܚܰܓܶܝܢܰܢ: ܡܶܬܟܰܢܰܫ ܠܰܢ ܚܰܡܫܺܝܢ ܝܰܘ̈ܡܳܬܳܐ ܗܳܠܶܝܢ ܕܗܳܫܳܐ ܡܫܰܡܠܶܝܢܰܢ ܒܝܰܕ ܫܽܘܘ̈ܕܳܥܶܐ ܘܛܽܘ̈ܦܣܶܐ ܐ̱ܪ̈ܳܙܳܢܳܝܶܐ: ܠܗܳܢܳܐ ܝܰܘܡܳܐ ܓܶܝܪ ܡܫܰܘܕܰܥ ܗܘܳܐ ܐ̱ܪܳܙܳܐ ܕܫܰܒܥܳܐ ܐܠܰܦܺܝ̈ܢ ܕܡ̣ܶܢ ܫܽܘܪܳܝܳܐ ܕܰܒܪܺܝܬܳܐ ܘܰܥܕܰܡܳܐ ܠܫܽܘܠܳܡܳܐ: ܬܽܘܒ ܕܶܝܢ ܘܐ̱ܪܳܙ ܫܰܒܥܳܐ ܫܳܒܽܘ̈ܥܶܐ ܕܫܰܢ̱ܬܳܐ ܕܡܶܬܟܰܪܟܳܢܽܘܬܳܗ̇ ܕܓܺܝܓܠܐܴ: ܘܫܰܒܥܳܐ ܝܰܘ̈ܡܺܝܢ ܕܰܥܠܶܝܗ̇ ܗܳܦܟܳܐ ܡܰܪܕܺܝܬܶܗ ܕܣܰܗܪܳܐ ܘܰܕܙܰܒ̈ܢܶܐ ܘܥܶܕ̈ܳܢܶܐ: ܗܳܠܶܝܢ ܕܳܐܦ ܒܡܶܢܝܳܢܳܐ ܡܫܰܡܠܶܝܢܰܢ ܟܰܕ ܡܶܬܢܰܣܒܺܝܢ ܠܡܰܘܠܳܕܳܐ ܕܫܰܒܥܺܝܢ ܡܰܘ̈ܠܳܕܺܝܢ: ܟܰܕ ܡܫܰܘܕܥܺܝܢ ܠܫܰܒܥܺܝܢ ܫܰܪ̈ܒܳܬܳܐ ܕܡ̣ܶܢ ܐܳܕܳܡ ܘܰܥܕܰܡܳܐ ܠܡܳܪܰܢ: ܫܰܒܥܺܝܢ ܬܽܘܒ ܠܶܫܳܢ̈ܶܐ ܕܥܰܡ̈ܡܶܐ ܕܰܒܗܽܘܢ ܡܶܫܬܰܒܰܚ ܡܳܪܝܳܐ ܡܰܟܪܙܺܝܢ: ܗܳܟܰܢܳܐ ܐܶܬܢܰܗܰܪ ܢܒܺܝܳܐ ܐܠܰܗܳܝܳܐ ܡܽܘܫܶܐ: ܕܰܒܫܰܒܥܺܝܢ ܣܳܒ̈ܶܐ ܢܶܣܰܩ ܠܛܽܘܪܳܐ ܠܘܳܬ ܥܶܢܝܳܢܳܐ ܐܠܰܗܳܝܳܐ: ܘܰܡܩܰܒܠܳܢܽܘܬܳܐ ܟܺܝܬ ܕܦܽܘܩܕ̈ܳܢܶܐ: ܟܰܕ ܐ̱ܪ̈ܳܙܶܐ ܕܶܝܢ ܠܐܪ̈ܳܙܶܐ ܡܝܰܒܠܺܝܢ: ܫܰܒܥܺܝܢ ܡܦܰܫ̈ܩܳܢܶܐ ܗ̇ܳܢܽܘܢ ܕܰܠܕܺܝܰܬܺܝܩܺܝ ܥܰܬܺܝܩܬܳܐ ܐܰܥܒܰܪܘ ܠܘܳܬ ܥܰܡ̈ܡܶܐ ܕܰܥܬܺܝܕܺܝܢ ܗܘܰܘ ܕܰܡܗܰܝܡܢܺܝܢ ܒܶܐܘܢܓܶܠܝܽܘܢ ܕܢܶܫܬܰܪܪܽܘܢ ܘܐ̱ܪܳܙܳܐ ܕܶܝܢ ܕܫܰܒܥܺܝܢ ܡܣܰܒܪܺܝܢܰܢ ܗܘܰܘ ܘܰܗܘܰܘ ܡܣܰܒܪ̈ܳܢܶܐ ܕܰܣܒܰܪܬܳܐ ܐܶܘܢܓܶܠܳܝܬܳܐ ܐܰܟܪܶܙܘ ܫܰܒܥܺܝܢ ܬܽܘܒ ܢܰܦ̈ܫܳܢ ܥܰܠܝ̈ ܥܰܡ ܐܰܒܽܘܢ ܝܰܥܩܽܘܒ ܠܓܰܘ ܠܡܶܨܪܶܝܢ: ܘܡ̣ܶܢ ܗܳܠܶܝܢ ܣܽܘܓܳܐܐ ܐܶܬܩܰܝܰܡܘ: ܐ̱ܪܳܙܳܐ ܬܽܘܒ ܕܫܰܒܥܺܝܢ ܕܩܳܠܺܝ̈ܢ ܗܳܠܶܝܢ ܬܽܘܒ ܕܰܒܠܺܝܡ ܡܰܟܪܶܙ ܢܳܡܽܘܣܳܐ: ܠܗܳܠܶܝܢ ܬܽܘܒ ܫܰܒܥܳܐ ܫܳܒܽܘ̈ܥܶܐ ܡܰܐܪܙܳܐ ܗܘܳܬ݀ ܫܰܢ̱ܬܳܐ ܫܒܺܝܥܳܝܬܳܐ ܗ̇ܳܝ ܕܥܳܒܕܳܐ ܗܘܳܬ݀ ܚܪ̈ܽܘܪܶܐ ܦܰܐܝ̈ܳܐ ܠܥܰܒ̈ܕܶܐ ܫܒܰܥ ܙܰܒܢ̈ܳܬܳܐ ܡܶܬܦܩܶܕ ܢܶܥܡܳܢ ܐܳܪܳܡܳܝܳܐ: ܡ̣ܶܢ ܐܠܶܝܫܳܥ ܢܒܺܝܳܐ ܕܢܶܣܚܶܐ ܒܡܰܝ̈ܳܐ ܕܝܽܘܪܕܢܳܢ ܕܢܶܬܕܰܟܶܐ ܫܰܒܥܳܐ ܫܪ̈ܳܓܺܝܢ ܐܶܬܬܣܺܝܡܘ ܥܰܠ ܡܢܳܪܬܳܐ ܕܒܶܝܬ ܚܽܘܣܳܝܳܐ ܐܰܝܟ ܕܡܳܪܝܳܐ ܦܰܩܶܕ: ܒܫܰܒܥܳܐ ܥܰܡܽܘ̈ܕܝܢ ܒܰܝܬܳܐ ܕܚܶܟܡܬܳܐ ܐܶܫܬܰܡܠܺܝ: ܐܰܟܡܳܐ ܕܫܽܘܠܳܡܽܘܢ ܡܰܠܶܦ ܠܰܫܒܰܥ ܪ̈ܽܘܚܰܝ ܫܡܰܝܳܐ ܩܰܕܶܡ ܚܙܳܐ ܢܒܺܝܳܐ ܐܠܰܗܳܝܳܐ ܐܶܫܰܥܝܳܐ: ܫܒܰܥ ܓܶܝܪ ܙܰܒܢܺܝ̈ܢ ܐܶܬܟܰܪܟܰܬ݀ ܩܺܐܒܽܘܬܶܗ ܕܡܳܪܝܳܐ ܚܕܳܪ̈ܰܝ ܫܰܒܥܳܐ ܫܽܘܪ̈ܶܐ ܐܺܝܪ̈ܺܝܚܽܘܢܳܝܶܐ ܘܰܢܦܰܠܘ: ܘܰܒܫܰܒܥܳܐ ܝܰܘ̈ܡܺܝܢ ܢܣܰܒ ܝܶܫܽܘܥ ܒܰܪܢܽܘܢ ܙܳܟܘ̈ܳܬܳܐ: ܗܳܢܳܐ ܕܡܰܐܪܶܙ ܥܰܠ ܫܒܰܥ ܬܶܕܡܪ̈ܳܬܐ ܕܰܗܘ̈ܰܝ ܝܽܘܡ ܚܰܫܶܗ ܕܝܶܫܽܘܥ ܦܳܪܽܘܩܰܢ ܕܒܰܒܣܰܪ: ܘܳܐܦ ܥܰܠ ܫܒܰܥ ܡ̈ܶܠܐܷ ܕܡܰܠܶܠ ܡܳܪܰܢ ܒܰܙܩܺܝܦܳܐ: ܫܰܒܥܳܐ ܠܰܡ ܓܶܝܪ ܟܰܕ ܫܒܺܝܥܳܐܝ̣ܬ ܡܶܬܪܰܟܒܺܝܢ ܒܝܰܕ ܡܶܬܟܰܪܟܳܢܽܘܬܳܐ ܩܺܝܩܠܳܣܳܝܬܳܐ ܥܰܠ ܢܰܦܫܗܽܘܢ ܠܗܰܘ ܕܚܰܡܫܺܝܢ ܡܰܘܠܳܕܺܝ̈ܢ: ܟܰܕ ܚܰܕ ܝܰܘܡܳܐ ܚܳܣܪܺܝܢ ܠܗ̇ܰܘ ܕܡ̣ܶܢ ܥܳܠܡܳܐ ܕܰܥܬܺܝܕ ܐܰܟܚܕܳܐ ܢܳܣܒܺܝܢ ܠܶܗ ܩܰܕܺܝ̈ܫܶܐ: ܕܺܐܝܬܰܘܗܝ ܗ̣ܽܘ ܟܰܕ ܗ̣ܽܘ ܬܡܺܝܢܳܝܳܐ ܘܩܰܕܡܳܝܳܐ: ܡܰܐܠܽܘܢ ܕܶܝܢ ܘܚܰܕ ܠܐܴ ܡܶܫܬܰܪܝܳܢܳܐ: ܗ̇ܰܘ ܕܒܶܗ ܥܳܐܠܺܝܢ ܓܡܺܝܪ̈ܶܐ ܠܰܢܝ̇ܳܚܬܳܐ ܕܛܽܘ̈ܒܶܐ ܘܒܽܘ̈ܣܳܡܶܐ ܡܰܠܟܽܘ̈ܬܳܢܳܝܶܐ ܙܳܕܶܩ ܬܽܘܒ ܕܬܰܡܳܢ ܢܶܫܬܰܠܡܽܘܢ ܫܽܘܒܳܬܳܐ ܕܗܳܪܟܳܐ ܕܢܰܦ̈ܫܳܬܳܐ ܢܰܟ̈ܦܳܬܳܐ ܕܰܪ̈ܚܶܡܶܝܢ ܠܐܱܠܳܗܳܐ ܘܰܢܩܰܦ̈ܝ ܒܳܬܰܪ ܥܶܩ̈ܒܳܬܶܗ: ܐܰܝܟܳܐ ܕܶܝܢ ܕܬܶܬܺܝܗܶܒ ܡܢܳܬܳܐ ܠܫܰܒܥܳܐ ܐܳܦ ܠܰܬܡܳܢܝܳܐ ܐܰܝܟ ܕܰܐܓܽܘܪ ܒܰܪ ܝܰܩܺܝ ܡܩܰܠܗܳܢܳܐ ܡܡܰܠܶܠ ܣܬܺܝܪ̈ܳܬܳܐ ܘܰܡܛܰܫ̈ܝܳܬܳܐ ܡܒܰܕܶܩ: ܕܰܟܝ̈ܳܢ ܕܶܝܢ ܡܶܠܰܘ̈ܗܝ ܕܡܳܪܝܳܐ ܥܦܺܝ̈ܦܳܬ ܫܒܺܝܥܳܐܝ̣ܬ: ܟܰܕ ܠܫܰܒܥܳܐ ܛܶܟ̈ܣܶܐ ܥܺܕܬܳܢܳܝ̈ܶܐ ܡܛܰܦܶܣ ܐܰܝܟ ܕܳܐܦ ܫܠܺܝܚܳܐ ܐܠܰܗܳܝܳܐ ܡܦܰܫܶܩ: ܕܺܐܝܬܰܝܗܽܘܢ ܡܰܠܟ̈ܶܐ ܕܚܰܝܠܰܘ̈ܳܬܳܐ ܕܡܶܬܟܰܢܫܝܢ ܫܽܘܦܪܶܗ ܕܒܰܝܬܳܟ ܡܦܰܠܓܺܝܢ ܒܶܙܬܳܐ: ܙܰܕܺܝܩܳܐ ܡ̇ܰܢ ܫܬܺܝܬܳܐܝ̣ܬ ܡ̣ܶܢ ܐܽܘܠܨܳܢ̈ܶܐ ܘܥܳܩ̈ܳܬܳܐ ܡܶܬܦܰܨܶܐ: ܒܗ̇ܳܝ ܕܶܝܢ ܕܰܫܒܰܥ ܐܳܦܠܐܴ ܒܡܶܕܶܡ ܡܶܬܢܰܟܶܐ ܐܰܘ ܡܶܣܬܰܓܰܦ: ܠܡܰܣܟܠܳܢ̈ܶܐ ܕܶܝܢ ܠܰܘ ܫܒܺܝܥܳܐܝ̣ܬ ܒܰܠܚܽܘܕ ܐܶܠܐܴ ܘܳܐܦ ܫܒܺܝܥܳܐܝ̣ܬ ܫܒܰܥ ܡܶܫܬܒܶܩ ܠܶܗ: ܕܰܒܟܽܠܗܶܝܢ ܗܳܠܶܝܢ ܥܰܝ̈ܢܶܐ ܟܺܐܦܳܐ ܗ̇ܳܝ ܙܽܘܪܒܳܒܶܠܳܝܬܳܐ ܡܶܨܛܰܒܬܳܐ ܗܘܳܬ݀ ܟܰܕ ܒܰܬܠܺܝܬܳܝܽܘܬ ܫܳܒܽܘ̈ܥܶܐ ܡܶܬܚܣܶܠ ܡ̣ܶܢ ܕܳܢܺܝܶܐܝܠ ܢܒܺܝܳܐ ܡ̣ܶܢ ܦܰܛܒܳܓ̈ܶܐ ܕܡܰܠܟܳܐ ܟܰܕ ܒܬܰܪܣܺܝܬܳܐ ܫܚܺܝܡܬܳܐ ܕܙܰܪ̈ܥܽܘܢܶܐ ܡܶܣܬܰܝܒܰܪ: ܘܰܪܓܺܝܓܳܐ ܠܡܰܠܐܱܟ̈ܶܐ ܘܰܠܚܰܝ̈ܠܰܘܳܬܳܐ ܫܡܰܝܳܢ̈ܶܐ ܡܶܬܚܙܶܐ: ܗܳܟܰܢܳܐ ܕܶܝܢ ܘܒܰܗܦܽܘܟܝܳܐ ܫܒܺܝܥܳܝܳܐ ܕܶܐܠܺܝܳܐ ܛܰܢܳܢܳܐ ܘܰܢܒܺܝܳܐ ܡܫܰܒܚܳܐ: ܘܡܰܦܽܘܚܺܝܬܳܐ ܗ̇ܳܝ ܬܠܺܝܬܳܝܬܳܐ ܘܐ̱ܪܳܙܳܢܳܝܬܳܐ ܕܺܝܠܶܗ ܕܰܢܦܰܚ ܗܘܳܐ ܒܡܶܬܬܰܝܚܳܢܽܘܬܶܗ ܕܰܒܪܳܐ ܕܰܐܪܡܰܠܬܳܐ ܨܳܪܦܳܝܬܳܐ: ܬܽܘܒ ܕܶܝܢ ܫܽܘܒܳܥܳܐ ܫܳܘܶܐ ܒܡܶܢܝܳܢܳܐ ܕܥܰܠ ܨܠܺܝ̈ܚܶܐ ܟܰܕ ܒܢܽܘܪܳܐ ܡܫܰܕܪܰܬ݀ ܡ̣ܶܢ ܐܠܰܗܳܐ ܠܕܶܒܚܳܐ ܡܩܰܒܠܐܴ ܡܛܰܠܶܩ ܘܠܰܢܒܺܝ̈ܶܐ ܕܒܰܥܠܐܴ ܘܰܕܒܶܗܬܬܳܐ ܩܰܛܶܠ ܕܠܐܴ ܐܶܬܡܨܺܝܘ ܠܗ̇ܳܝ ܕܫܳܘܝܳܐ ܡ̣ܶܢ ܩܰܕܺܝܡܽܘܬ ܩܪܺܝܬܳܐ: ܗܳܟܰܢܳܐ ܕܶܝܢ ܘܒܽܘܕܳܩܳܐ ܫܒܺܝܥܳܝܳܐ ܕܶܐܬܦܩܶܕ ܠܛܰܠܝܳܐ: ܘܒܰܪ ܟܽܘܢܳܝܳܐ ܫܰܘܝܳܐ ܕܶܐܠܺܝܫܳܥ ܕܰܠܘܳܬ ܒܪܳܗ̇ ܕܫܺܝܠܽܘܡܳܝܬܳܐ ܗ̇ܰܘ ܕܰܠܣܰܘܩܳܐ ܫܶܐܠܬܳܢܳܝܳܐ ܐܰܚܺܝ: ܒܗܳܢܳܐ ܕܶܝܢ ܗ̇ܰܘ ܕܒܰܫܒܺܝܥܳܝܽܘܬܳܐ ܕܶܝܢ ܕܝܰܘ̈ܡܳܬܳܐ ܡܶܫܬܰܡܠܐܷ: ܓܰܪܒܳܢܳܐ ܕܶܝܢ ܕܰܒܫܰܒܥܳܐ ܡܶܬܕܰܟܶܐ: ܗܰܝܟܠܐܴ ܕܶܝܢ ܕܰܒܕܰܐܝܟ ܗܳܠܶܝܢ ܡܶܬܚܰܕܰܬ: ܥܰܡܳܐ ܕܶܝܢ ܕܰܒܫܰܢ̱ܬܳܐ ܕܫܰܒܥܺܝܢ ܡ̣ܶܢ ܥܰܒܕܽܘܬܳܐ ܗ̇ܳܝ ܒܳܒܶܠܳܝܬܳܐ ܘܫܶܒܝܳܐ ܦܳܢܶܝܢ: ܘܣܳܠܩܺܝܢ ܠܰܡܕܺܝܢ̱ܬܳܐ ܐ̱ܪ̈ܳܙܶܐ: ܐܰܝܟܰܢܳܐ ܡ̇ܰܢ ܕܺܐܝܬ ܠܳܗ̇ ܒܰܠܚܽܘܕܳܝܽܘܬܳܐ ܕܒܰܥܣܺܝܪܳܝܽܘܬܳܐ ܘܰܒܡܶܢܝܳܢܳܐ ܕܝܰܬܺܝܪ ܓܒܶܐ ܐ̱ܪܳܙܳܐ ܕܫܰܒܥܳܐ ܢܶܬܝܰܩܰܪ: ܘܡ̣ܶܢ ܗܳܪܟܳܐ ܐܳܦ ܚܢܰܢ ܚܰܛܳܝ̈ܶܐ ܕܶܐܫܬܰܘܕܺܝܢܰܢ ܠܰܡܪܰܚܡܳܢܽܘܬܳܟ ܡܳܪܝܳܐ ܕܶܐܫܬܘܶܝܢܰܢ ܠܫܽܘܠܳܡܳܐ ܘܰܠܫܽܘܡܠܳܝܳܐ ܕܝܽܘ̈ܩܢܶܐ ܗܳܠܶܝܢ ܡܨܰܠܡܳܢ̈ܶܐ ܘܨܽܘܪ̈ܬܳܢܳܝܶܐ ܗܳܠܶܝܢ ܕܒܰܡܦܰܬܟܽܘܬܳܐ ܪܰܒܬܳܐ ܐܶܬܺܝܕܰܥܘ: ܘܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܘܟܳܪ̈ܽܘܙܶܐ ܟܰܕ ܦܰܢܛܺܝܩܽܘܣܛܺܝܢܳܐܝ̣ܬ ܟܽܠܰܢ ܡܶܬܟܰܢܫܺܝܢܰܢ: ܠܰܘ ܒܥܶܠܺܝܬܳܐ ܝܰܬܺܝܪܳܐܝ̣ܬ: ܐܶܠܐܴ ܒܬܶܐܘܳܪܺܝܰܐ ܗ̇ܳܝ ܕܪܳܡܳܐ ܡ̣ܶܢ ܟܽܠܗܶܝܢ ܗܽܘܠܳܢܳܝ̈ܳܬܳܐ ܐ̱ܪܳܙܳܢܳܐܝ̣ܬ: ܠܩܳܠܐܴ ܕܝܰܘܡܳܢܳܐ ܗܘܳܐ ܡܶܢܫܶܠܝ ܡ̣ܶܢ ܫܡܰܝܳܐ ܐܰܝܟ ܡܰܫܒܳܐ ܕܪܽܘܚܳܐ ܥܰܙܺܝܙܬܳܐ: ܘܢܶܣܬܰܟܰܠ ܠܥܶܠ ܡ̣ܶܢ ܣܽܘܟܳܝܰܢ ܐܶܬܺܝܗܶܒ ܠܰܢ: ܡܽܘܠܟܳܢܳܐ ܕܪܽܘܚܳܐ ܗ̇ܰܘ ܕܥܳܡܰܪ ܒܰܫܡܰܝ̈ܳܐ ܪ̈ܳܡܶܐ ܘܡ̣ܶܢ ܬܰܡܳܢ ܐܳܬܶܐ ܕܰܢܚܰܘܶܐ ܓܰܢ̱ܒܳܪܽܘܬܶܗ ܘܫܽܘܒܚܳܐ ܕܡܰܠܟܽܘܬܶܗ: ܟܰܕ ܣܳܓܕܺܝܢܰܢ ܘܡܰܘܕܶܝܢܰܢ ܠܰܚܙܳܬܶܗ ܕܪܽܘܚܳܐ ܕܚܺܝܠܬܳܐ ܠܐܴ ܡܣܰܝܒܪܺܝܢܰܢ ܘܰܐܟܚܕܳܐ ܢܶܒܪܽܘܟ: ܟܰܕ ܒܟܽܠܗܶܝܢ ܬܡܺܝ̈ܗܳܬܳܐ ܘܰܓܒܰܪ̈ܘܳܬܳܐ ܕܚܰܘܝܰܬ݀ ܡܳܪܽܘܬܶܗ ܡܶܫܬܰܘܕܥܺܝܢܰܢ: ܘܒܗ ܟܰܕ ܒܶܗ ܐܳܦ ܠܐܱܒܳܐ ܥܰܡܶܗ ܣܳܓܕܺܝܢܰܢ ܘܰܩܕܳܡ ܒܪܳܐ ܢܶܬܓܰܪܓܰܚ ܒܰܣܝܳܡ ܒܽܘܪ̈ܟܶܐ ܬܠܺܝܬܳܝ̈ܗܽܘܢ ܗ̇ܳܢܽܘܢ ܕܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܟܰܗܢܺܝܢ: ܟܰܕ ܡܦܺܝܣܺܝܢܰܢ ܠܳܗ̇ ܕܰܬܫܰܕܰܪ ܠܰܢ ܪ̈ܰܚܡܶܐ ܫܦܺܝ̈ܥܶܐ ܘܥܰܬܺܝܪ̈ܶܐ ܘܒܽܘܪ̈ܟܳܬܳܐ ܦܰܢܛܺܝܩܽܘܣܛܺܝ̈ܢܳܝܳܬܳܐ ܕܡܶܢܳܗ̇ ܘܰܐܬܢܳܢܳܐܝ̣ܬ ܥܰܬܺܝܪ̈ܶܐ ܕܠܐܴ ܡܶܬܦܰܣܩܺܝܢ ܘܠܐܴ ܡܨܰܦܪܺܝܢ ܘܠܐܴ ܡܪܰܡܫܺܝܢ: ܝܰܬܺܝܪ ܓܡܺܝܪܳܐܝ̣ܬ ܥܰܡ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܩܰܕܶܡܘ ܫܟܶܒܘ ܘܶܐܬܬܢܺܝܚܘ: ܡܶܛܽܠ ܕܠܳܗ̇ ܝ̇ܳܐܶܐ ܬܶܫܒܽܘܚܬܳܐ ܘܬܰܘܕܺܝܬܳܐ ܘܺܐܝܩܳܪܳܐ ܘܽܐܘܚܕܳܢܳܐ ܘܪܰܒܽܘܬ ܝܳܐܝܽܘܬܳܐ ܗܳܫܳܐ܀

 

ܦܝܪܡܐ

ܩܰܕܺܝܫܳܐ ܘܰܡܩܰܕܫܳܢܳܐ ܕܟܽܠ ܡܳܪܝܳܐ ܘܰܐܒܳܐ ܕܰܫܪܳܪܳܐ: ܗ̇ܰܘ ܕܩܰܕܶܫܬ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܒܝܰܕ ܠܶܫܳܢ̈ܶܐ ܕܢܽܘܪܳܐ ܘܚܰܘܺܝ ܒܗܽܘܢ ܡܰܥܒܕܳܢܽܘܬܶܗ ܘܚܰܝܠܶܗ: ܩܰܕܶܫܳܝܗܝ ܡܳܪܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ ܕܡܶܬܚܰܘܝܳܢܽܘܬܶܗ ܕܪܽܘܚܳܐ ܩܰܕܺܝܫܳܐ: ܘܫܰܟܶܢ ܠܰܢ ܒܶܗ ܚܽܘܣܳܝܳܐ ܘܫܽܘܒܩܳܢܳܐ ܕܺܝܠܰܢ ܘܕܰܟܳܐ ܠܠܶܒܰܘ̈ܳܬܰܢ ܡ̣ܶܢ ܟܽܠܶܗ ܝܰܥܪܳܐ ܕܰܚܛܺܝܬܳܐ: ܘܢܶܬܥܰܬܰܕ ܘܢܶܬܬܣܺܝܡ ܠܰܢ ܒܰܫܡܳܟ ܩܰܕܺܝܫܳܐ ܥܶܠܬܳܐ ܕܦܽܘܪܩܳܢܳܐ: ܟܰܕ ܟܽܠܫܳܥ ܒܪ̈ܰܚܡܶܐ ܡܶܣܬܰܥܪܺܝܢܰܢ: ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܚܘܬܡܐ

ܩܰܒܶܠ ܡܳܪܝ ܬܶܫܡ̈ܫܳܬܢܰ ܘܰܨܠܰܘ̈ܳܬܰܢ: ܕܰܒܥܺܐܕܳܐ ܗܳܢܳܐ ܕܦܰܢܛܺܝܩܽܘܣܛܺܝ ܩܰܪܶܒܢܰܢ ܠܳܟ ܥܰܡ ܬܶܫܒ̈ܚܳܬܳܐ ܘܗܽܘ̈ܠܳܠܐܷ ܕܥܺܝܪ̈ܶܐ ܫܡܰܝ̈ܳܢܶܐ: ܗ̇ܳܢܽܘܢ ܕܠܐܴ ܫܳܠܶܝܢ ܡ̣ܶܢ ܩܳܠܐܴ ܕܪܽܘܡܪܳܡܳܟ: ܘܗܰܒ ܠܰܢ ܕܪܽܘܚܳܢܳܐܝ̣ܬ ܐܰܟܘܳܬܗܽܘܢ ܢܙܰܡܰܪ ܠܳܟ ܫܽܘܒܚܳܐ ܠܐܴ ܫܰܠܘܳܐܝ̣ܬ: ܘܠܐܱܒܳܐ ܝܳܠܽܘܕܳܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܟܝܳܢܳܐ ܟܰܣܝܳܐ ܘܰܓܢܺܝܙܳܐ ܕܠܶܗ ܟܰܕ ܠܶܗ ܐܝ̣ܬ ܒܰܠܚܽܘܕܳܝܽܘܬܳܐ ܫܽܘܠܛܳܢܳܐ ܡܬܽܘܡܳܝܳܐ ܦܪܺܝܫ ܒܰܬܠܳܬܳܐ ܘܰܚܠܺܝܛ ܒܺܐܝܬܽܘܬܳܐ: ܚܰܕ ܐܰܒܳܐ ܕܒܰܒܪܳܐ ܡܶܬܺܝܕܰܥ: ܚܰܕ ܒܪܳܐ ܕܒܰܐܒܳܐ ܡܶܫܬܰܒܰܚ: ܚܰܕ ܪܽܘܚܳܐ ܕܒܰܐܒܳܐ ܘܒܰܒܪܳܐ ܬܽܘܒ ܡܶܬܗܰܝܡܰܢ: ܐܺܝܬܝܳܐ ܓܢܺܝܙܳܐ ܕܠܐܴ ܦܽܘܪܳܫ ܫܽܘ̈ܟܳܢܰܘܗܝ ܘܫܽܘܡܳܗܰܘ̈ܗܝ ܡ̣ܶܢ ܒܪ̈ܰܝܳܐ ܘܰܥܒܺܝ̈ܕܶܐ ܡܶܬܬܰܪܓܡܺܝܢ: ܘܝܽܘܩܢܳܐ ܕܰܩܢܽܘ̈ܡܰܘܗܝ ܠܐܴ ܡܶܬܡܰܠܠܺܝܢ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܡܒܰܝܳܢܳܐ ܪܽܘܚܳܐ ܩܰܕܺܝܫܳܐ ܗ̇ܰܘ ܢܰܨܺܝܚܳܐ ܘܰܗܕܺܝܪ ܒܫܽܘ̈ܟܳܢܶܐ ܐܠܰܗܳܝ̈ܶܐ: ܗ̇ܰܘ ܕܗ̣ܽܘ ܐܰܪܶܙ ܠܚܰܙܳܝ̈ܶܐ ܕܡ̣ܶܢ ܩܕܺܝܡ ܐ̱ܪ̈ܳܙܶܐ ܫܒܺܝ̈ܚܶܐ ܘܰܐܠܳܗܳܝ̈ܶܐ: ܟܰܕ ܡܗܰܕܶܐ ܗܘܳܐ ܘܰܡܫܰܒܶܠ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ ܠܘܳܬ ܒܰܝܬܳܝܽܘܬܳܐ ܐܠܰܗܳܝܬܳܐ ܘܰܡܫܰܟܢܳܢܺܝܬܳܐ ܕܚܰܝ̈ܶܐ ܛܽܘܒܬܳܢ̈ܶܐ: ܡܰܥܒܕܳܢ̈ܘܳܬܳܐ ܐܠܰܗܳܝ̈ܳܬܳܐ ܒܗܽܘܢ ܐܰܒܪܶܩ ܒܝܰܕ ܡܰܘܗ̈ܒܳܬܳܐ ܘܫܽܘ̈ܟܳܢܶܐ ܕܡܶܢܶܗ: ܗ̇ܰܘ ܓܳܡܽܘܪܳܐ ܕܡܰܥܒܕܳܢܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ: ܟܰܕ ܥܰܠ ܫܠܺܝ̈ܚܶܐ ܒܰܕܡܽܘܬ ܠܶܫܳܢ̈ܶܐ ܢܽܘܪ̈ܳܢܳܝܶܐ ܐܰܙܠܶܓ: ܘܰܠܗܰܘ̈ܢܶܐ ܘܠܶܒܰܘ̈ܳܬܳܐ ܕܺܝܠܗܽܘܢ ܫܰܠܗܶܒ ܒܪܶܬܚܳܐ ܕܚܽܘܒܳܐ ܘܠܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ ܒܟܽܠܳܗ̇ ܥܳܡܰܪܬܳܐ ܐܰܟܪܶܙܘ ܫܰܪܰܪܘ: ܗ̇ܰܘ ܕܟܰܕ ܚܰܕ ܡܶܢܳܗ̇ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܛܽܘܒܬܳܢܳܝܬܳܐ ܐܺܝܬܰܘܗܝ ܥܰܡܗܽܘܢ ܐܶܬܚܙܺܝ ܩܕܳܡ ܥܰܡ̈ܡܶܐ ܘܡܰܠܟ̈ܶܐ ܘܫܰܠܺܝܛܳܢ̈ܐ ܘܶܐܡܘ̈ܳܬܳܐ ܘܰܒܢܰܝ̈ܳܐ ܕܺܐܝܣܪܳܐܶܝܠ ܒܝܰܕ ܐܳܬܘ̈ܳܬܳܐ ܐܳܦ ܬܶܕܡܪ̈ܳܬܳܐ ܕܒܺܐܝ̈ܕܰܝܗܽܘܢ ܣܳܥܰܪ ܗܘܳܐ ܘܰܡܥܰܕܰܪ ܗܘܳܐ ܠܗܽܘܢ ܒܰܐܓܽܘ̈ܢܶܐ ܕܺܝܠܗܽܘܢ: ܡܨܰܒܬܳܢܳܐ ܕܥܺܕܬܳܟ ܒܫܽܘ̈ܟܳܢܶܐ ܐܠܰܗܳܝ̈ܶܐ ܘܰܡܩܰܕܫܳܢܳܐ ܘܡܰܐܠܗܳܢܳܐ ܕܓܶܢܣܳܐ ܕܺܝܠܰܢ ܕܰܟܪ̈ܺܝܣܛܝܳܢܶܐ: ܕܠܳܟ ܘܰܚܢܰܢ ܐܰܚܺܝ̈ܕܰܝ ܬܰܩܕܳܐ ܐܰܘܟܺܝܬ ܝܽܘܠܦܳܢܗܽܘܢ ܣܳܓܕܺܝܢܰܢ: ܘܟܽܠܰܢ ܡܥܰܕܥܕܺܝܢܰܢ ܥܺܐܕ̈ܶܐ ܕܰܡܕܰܒܪܳܢܽܘܬܳܐ ܡܶܬܟܰܫܦܺܝܢܰܢ: ܕܬܶܫܪܶܐ ܘܬܶܥܡܰܪ ܒܰܢ ܡܦܺܝܣܺܝܢܰܢ: ܘܡܶܢܟܽܠ ܙܢܰܝ̈ܳܐ ܘܚܽܘ̈ܫܳܒܶܐ ܫܟܺܝܪ̈ܶܐ ܕܰܚܛܺܝܬܳܐ ܕܰܟܳܐ ܠܰܢ: ܐܰܝܟܰܢܳܐ ܕܢܶܫܬܰܘܥܳܟ ܕܰܐܠܳܗܳܐ ܫܰܪܺܝܪܳܐ ܕܠܐܴ ܦܽܘܠܳܓ ܐܺܝܬܰܝܟ ܘܰܦܫܽܘܛ ܠܠܶܫܳܢܰܝ̈ܢ ܠܡܰܘܕܳܝܽܘ ܠܳܟ ܒܢܰܦܫܳܐ ܕܟܺܝܬܳܐ: ܘܰܐܪܟܶܢ ܠܨܰܘܪ̈ܰܝܢ ܠܡܶܣܓܰܕ ܠܳܟ ܒܚܽܘܒܳܐ ܥܰܡ ܪܶܚܡܬܳܐ ܘܣܶܓܕܬܳܐ ܫܰܪܺܝܪܬܳܐ ܕܡܶܬܬܚܺܝܒܳܐ ܠܡܳܪܽܘܬܳܟ: ܘܢܰܕܥܳܟ ܫܰܪܺܝܪܳܐܝ̣ܬ ܥܰܡ ܐܰܒܳܐ ܘܰܒܪܳܐ ܚܰܕ ܚܰܝܠܐܴ ܚܰܕ ܨܶܒܝܳܢܳܐ: ܚܕܳܐ ܐܽܘܣܺܝܰܐ ܚܕܳܐ ܪܺܝܫܳܢܽܘܬܳܐ: ܚܰܕ ܫܽܘܠܛܳܢܳܐ ܕܰܠܟܽܠ ܐܰܚܺܝܕ ܡܳܪܳܢܳܐܝ̣ܬ ܘܟܽܠ ܒܶܗ ܡܶܬܬܩܺܝܡ ܬܽܘܩܳܢܳܐܝ̣ܬ: ܘܠܐܴ ܒܠܺܝܠܐܴܝܬ ܘܠܐܴ ܐܰܫܺܝܕܳܐܝ̣ܬ ܡܶܢܳܟ ܢܩܰܒܶܠ ܘܡܶܢܳܟ ܢܶܣܰܒ: ܢܽܘܗܪܳܐ ܠܡܰܕ̈ܥܰܝܢ ܘܚܶܟܡܬܳܐ ܠܣܽܘܟܳܠܰܢ ܘܰܥܛܳܝܳܐ ܠܣܰܟ̈ܠܘܳܬܰܢ: ܘܕܽܘܟܳܝܳܐ ܘܚܽܘܠܡܳܢܳܐ ܠܦܰܓܪ̈ܰܝܢ: ܘܩܰܕܺܝܫܽܘܬܳܐ ܠܢܰܦ̈ܫܳܬܰܢ: ܘܚܽܘܣܳܝܳܐ ܘܫܽܘܒܩܳܢܳܐ ܠܰܢ ܘܰܠܥܰܢܺܝ̈ܕܰܝܢ: ܘܟܽܠܰܢ ܒܚܰܕܽܘܬܳܐ ܢܰܣܶܩ ܫܽܘܒܳܚܐ ܘܬܰܘܕܺܝܬܳܐ: ܘܢܶܦܪܽܘܥ ܩܽܘܒܳܠ ܛܰܝܒܽܘܬܳܐ ܠܳܟ ܐܠܰܗܳܐ ܪܽܘܚܳܐ ܩܰܕܺܝܫܳܐ: ܘܠܐܱܒܳܐ ܗ̇ܰܘ ܕܡܶܢܶܗ ܢܳܣ̇ܶܒ: ܘܠܰܒܪܳܐ ܫܘܶܐ ܒܰܡܬܽܘܡܳܝܽܘܬܳܐ ܗܳܫܳܐ܀ ܫܠܡ

 

ܛܟܣܐ ܕܚܕ ܒܫܒܐ ܬܡܝܢܝܐ ܕܩܝܡܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܕܰܒܠܶܫ̈ܳܢܶܐ ܫܦܰܝ̈ܳܐ ܘܰܒܩ̈ܳܠܐܷ ܡܰܠܝ̈ܰܝ ܫܽܘܒܚܳܐ ܢܩܰܠܶܣ ܠܝܰܘܡܳܐ ܕܰܩܝܳܡܬܳܟ ܡܫܰܒܰܚܬܳܐ: ܐܰܝܟܰܢܳܐ ܕܥܰܡ ܡܰܪܝܰܡ ܘܚܰܒܪ̈ܳܬܳܗ̇: ܘܥܰܡ ܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܘܚܰܒܪ̈ܰܘܗܝ. ܒܟܽܠܙܒܰܢ ܢܶܚܕܶܐ ܘܢܶܪܘܰܙ ܘܥܰܡ ܟܽܠܗܽܘܢ ܐܰܝܠܶܝܢ ܕܰܫܦ̣ܰܪܘ ܠܳܟ ܢܫܰܒܰܚ ܘܢܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܨܶܡܚܳܐ ܕܰܐܒܳܐ ܡܬܽܘܡܳܝܳܐ ܘܠܐܴ ܙܰܒܢܳܝܳܐ ܠܗ̇ܰܘ ܚܰܝܠܐܴ ܕܺܐܝܬܽܘܬܳܐ ܩܰܕܡܳܝܬܳܐ: ܠܗ̇ܳܝ ܝܰܡܺܝܢܳܐ ܕܛܳܒܽܘܬܳܐ ܠܐܴ ܡܶܫܬܰܪܝܳܢܺܝܬܳܐ: ܠܗ̇ܳܝ ܬܰܪܥܺܝܬܳܐ ܕܗܰܘܢܳܐ ܡܫܰܡܠܝܳܐ: ܠܗ̇ܳܝ ܡܶܠܬܳܐ ܕܡܰܚܫܰܒܬܳܐ ܠܐܴ ܡܶܬܒܰܨܝܳܢܺܝܬܳܐ: ܗ̇ܰܘ ܕܡ̣ܶܢ ܟܪ̈ܽܘܒܶܐ ܕܠܐܴ ܫܶܠܝܳܐ ܡܶܬܗܰܕܰܪ: ܘܡ̣ܶܢ ܣܪ̈ܳܦܶܐ ܕܠܐܴ ܦܣܳܩ ܡܶܬܪܰܡܪܰܡ: ܘܡ̣ܶܢ ܥܺܝܪ̈ܶܐ ܕܠܐܴ ܫܶܬܩܳܐ ܡܶܫܬܰܒܰܚ ܘܡܶܬܝܰܩܰܪ ܗ̇ܰܘ ܕܰܒܡܽܘܟܳܟܶܗ ܪܰܡܪܶܡ ܠܰܡܫܰܥ̈ܒܕܶܐ ܘܒܰܩܝܳܡܬܶܗ ܐܰܩܺܝܡ ܠܢܰܦ̈ܠܐܷ. ܘܰܒܢܽܘܚܳܡܶܗ ܚܰܕܺܝ ܘܰܐܦܨܰܚ ܠܰܟܡܺܝܪ̈ܶܐ ܕܠܶܗ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܚܰܝܠܐܴ ܠܐܴ ܡܶܬܡܰܠܠܳܢܳܐ: ܘܪܽܘܚܳܐ ܠܐܴ ܡܶܬܦܰܫܩܳܢܳܐ: ܚܶܣܢܳܐ ܘܥܽܘܫܢܳܐ ܠܐܴ ܡܶܬܚܰܣܢܳܢܳܐ: ܘܪܰܘܡܳܐ ܠܐܴ ܡܶܬܟܰܒܫܳܢܳܐ ܪܟܺܝܒ ܥܰܠ ܚܰܨܳܐ ܕܰܟܪ̈ܽܘܒܶܐ ܒܰܡܪ̈ܰܘܡܶܐ ܥܶܠܳܝ̈ܶܐ. ܘܣܳܡ ܠܥܽܘ̈ܡܩܶܐ ܬܰܚܬܳܝ̈ܶܐ ܟܽܘܒܫܳܐ ܬܚܶܝܬ ܪ̈ܶܓܠܰܘܗܝ. ܣܺܝܡ ܥܰܠ ܟܽܘܪܣܝܳܐ ܪܳܡܳܐ ܒܰܡܫܰܩܠܽܘܬܳܐ: ܕܰܛܥܺܝܢܳܐ ܠܶܗ ܒܬܽܘܠܬܳܐ ܡܓܰܙܳܝܬܳܐ ܒܶܝܬ ܐܰܪ̈ܥܳܢܶܐ: ܝܳܩܕܳܐ ܡ̣ܶܢ ܢܽܘܪܶܗ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ ܟܰܪܣܳܐ ܥܪܳܬܳܟ: ܐܳܦ ܐܽܘܪܝܳܐ ܠܡܶܓܢܝܳܟ ܡܥܰܪܬܳܐ ܓܢܽܘܢܳܟ ܘܰܐܪܥܳܐ ܙܰܪܬܳܟ: ܘܝܰܡܳܐ ܫܽܘܥܠܳܟ: ܘܩܰܒܪܳܐ ܣܰܝܟܳܟ: ܘܰܣܪ̈ܳܦܶܐ ܚܰܦܺܝܘ ܐܰܦܰܝ̈ܗܽܘܢ ܡ̣ܶܢ ܙܺܝܘܳܟ. ܒܒܶܝܬ ܝܰܘܣܶܦ ܬܶܫܡܫܬܳܟ ܘܩܳܠ ܒܽܘܪ̈ܟܳܬܳܐ ܒܙܰܘܥܳܐ ܕܓܺܝ̈ܓܠܐܷ ܡ̈ܰܠܳܠܳܬܳܐ. ܘܢܽܘܨܪ̈ܳܬܳܐ ܒܦܽܘܡܳܐ ܕܰܥܠܰܝ̈ܡܳܬܳܐ: ܛܥܺܝܢ ܪܶܡܙܳܟ ܠܰܥܢ̈ܳܢܶܐ ܕܳܐܐܰܪ ܘܢܶܡܛܪܽܘܢ ܒܽܘܪ̈ܟܳܬܳܐ: ܘܢܽܘ̈ܛܦܳܬܳܐ ܕܚܰܠܒܳܐ ܒܦܽܘܡܳܟ. ܘܗܳܐ ܒܟܶܢ̈ܦܶܐ ܫܝܽܘܠ ܐܰܢ̱ܬ: ܘܥܰܠ ܬܪܽܘܢܳܘܣ ܡܶܬܪܰܡܪܰܡ ܘܡܶܙܕܰܝܰܚ ܐܰܢ̱ܬ: ܒܟܶܣܝܳܐ ܘܰܒܓܶܠܝܳܐ ܐܶܬܚܰܙܝܰܬ݀ ܬܡܺܝܗܽܘܬܳܟ: ܬܡܺܝܗ ܡܰܫܩܠܳܟ ܡܰܢܽܘ ܣܳܦ̇ܶܩ ܠܚܽܘܒܳܟ ܡܰܬܡܰܗ ܠܒܳܨܽܘ̈ܝܶܐ: ܡܰܢܽܘ ܡܰܡܪܰܚ ܓܽܘܡܪ̈ܰܝ ܢܽܘܪܳܐ ܠܡܰܗܦܳܟܽܘ: ܐܰܘ ܡܰܢܽܘ ܡܶܫܟܰܚ ܛܽܘ̈ܦܰܝ ܡܶܛܪܳܐ ܠܡܶܚܫܰܒ ܐܰܘ ܠܡܶܡܢܳܐ: ܡܰܢܽܘ ܡܶܫܟܰܚ ܝܰܡܳܐ ܠܰܡܫܽܘܪ: ܘܝܰܒܫܳܐ ܠܡܶܡܫܰܚ ܡܰܢܽܘ ܢܨܽܘܪ ܡܰܝ̈ܳܐ ܒܫܽܘܫܶܦܳܐ: ܐܰܘ ܙܰܠܺܝ̈ܩܰܝ ܫܶܡܫܳܐ ܒܟܶܢܦܳܐ ܠܡܶܚܒܰܫ. ܢܦܰܩܬ ܡ̣ܶܢ ܟܰܣܝܽܘܬܳܐ ܕܒܶܝܬ ܐܰܒܽܘܟ ܠܓܶܠܝܳܐ ܕܒܶܝܬ ܐܳܕܳܡ: ܕܬܰܥܕܶܐ ܠܰܓܙܳܪܳܐ ܕܺܝܠܳܟ ܠܒܰܝܬܳܝܽܘܬܳܐ ܐܠܰܗܳܝܬܳܐ ܕܒܽܘܣܳܡܳܟ: ܐܶܬܚܙܰܝܬ ܐܰܝܟ ܫܶܡܫܳܐ ܥܰܠ ܦܶܢ̈ܝܳܬܳܐ ܘܰܪܕܰܦܬ ܠܚܶܫܽܘܟܳܐ ܟܡܺܝܪܳܐ ܕܛܳܥܝܽܘܬܳܐ ܘܰܗܘܰܝܬ ܐܰܝܟ ܢܺܝܣܳܢ ܪܰܒܳܐ: ܘܰܐܥܬܰܪܬܳܗ̇ ܠܐܱܪܥܳܐ ܒܡܰܚܰܬܬܳܟ ܘܰܗܘܰܝܬ ܐܰܝܟ ܡܶܛܪܳܐ ܕܚܰܝ̈ܶܐ ܣܳܩܽܘܟ ܡܺܝ̈ܬܶܐ ܘܪܳܦܬܘ ܘܶܐܬܪܓܺܝܘ ܐܰܝܟ ܥܶܩܳܪ̈ܶܐ: ܘܰܐܝܟ ܡܰܘܥ̈ܝܳܬܳܐ ܫܰܦܺܝܪ̈ܳܬܳܐ ܫܘܰܚܘ: ܘܰܐܘܫܶܛܬ ܐܺܝܕܳܟ ܒܚܽܘܪܳܐ ܕܶܐܣܦܶܣ ܗ̇ܳܝ ܚܰܪܫܬܳܐ: ܘܰܐܦܶܩܬ ܡ̣ܶܢ ܒܶܝܬ ܫܶܢܶܝ̈ܗ̇ ܠܨܽܘܪܬܳܐ ܕܨܰܠܡܳܟ ܪܓܺܝܓܳܐ ܕܰܡܢܰܟܰܬ ܗܘܳܐ ܘܰܡܢܰܥܰܓ ܗܘܳܐ ܡܶܢܳܗ̇. ܫܩܰܠܬ ܒܚܰܫ̈ܰܝ ܙܩܺܝܦܽܘܬܳܟ ܥܰܘܠܐܴ ܕܒܶܝܬ ܐܳܕܳܡ: ܘܩܰܘܺܝܬ ܒܰܫܝܽܘܠ ܬܠܳܬܳܐ ܝܰܘ̈ܡܺܝܢ ܘܨܽܘܪ̈ܳܬܳܐ ܕܰܐܒܽܘܟ ܚܰܬܶܡܬ. ܗܰܠܶܟܬ ܘܕܰܝܰܪܬ ܒܰܦܠܰܛܘ̈ܳܬܳܐ ܕܒܳܠܥܰܬ݀ ܫܰܪ̈ܒܳܬܳܐ ܘܪܰܣܶܣܬ ܒܳܗ̇ ܚܰܝ̈ܶܐ ܘܰܙܪܰܥܬ ܒܳܗ̇ ܢܽܘܚܳܡܳܐ ܘܰܩܝܳܡܬܳܐ: ܬܰܠܰܚܬ ܒܨܶܨܰܝ̈ܟ ܠܐܷܫܛܳܪܳܐ ܕܟܶܬܒܰܬ݀ ܚܰܘܳܐ ܢܟܺܝܠܬܳܐ: ܥܡܰܕܬ ܒܰܫܝܽܘܠ ܐܰܝܟ ܣܰܚܳܝܳܐ ܠܒܺܝܒܳܐ ܘܰܠܒܺܝܟܳܐ ܘܰܐܣܶܩܬ ܡܶܢܳܗ̇ ܠܡܰܪܓܳܢܺܝܬܳܐ ܨܰܠܡܶܗ ܕܰܐܒܽܘܟ ܫܒܺܝܚܳܐ: ܕܡܶܟܬ ܒܶܝܬ ܡܺܝ̈ܬܶܐ ܘܫܶܢܬܳܟ ܐܰܥܺܝܪܰܬ݀ ܠܓܰܢ̱ܒܳܪ̈ܶܐ ܕܗܳܡܳܢ ܘܰܦܪܰܥܘ ܠܳܟ ܬܰܘܕ̈ܝܳܬܳܐ ܒܰܫܝܽܘܠ ܥܳܡܪ̈ܰܝ ܩܰܒܪ̈ܶܐ ܐܶܬܬܰܒܰܪܘ ܟܶܒ̈ܠܐܷ ܘܡܽܘ̈ܟܠܐܷ ܕܰܐܝܠܶܝܢ ܕܰܐܣܺܝܪܺܝܢ ܗܘܰܘ ܘܰܪܒܳܒܬܳܐ ܕܫܽܘܒܚܳܐ ܡܶܬܬܙܺܝܥܳܐ ܗܘܳܬ݀ ܡܶܢܗܽܘܢ. ܣܶܕܪ̈ܺܝܢ ܣܶܕܪ̈ܺܝܢ ܫܰܪ̈ܒܳܢ ܫܰܪ̈ܒܳܢ ܕܥܰܡ̈ܡܺܝܢ ܥܰܡ̈ܡܺܝܢ ܝܰܒܶܒܘ ܬܶܫܒ̈ܚܳܬܳܟ: ܘܟܰܕ ܕܶܢܚܰܬ݀ ܩܝܳܡܬܳܟ ܒܓܰܘ ܬܺܒܶܝܠ ܐܰܪܦܺܝ ܪܶܡܙܳܟ ܠܚܰܝ̈ܠܰܝ ܪܰܘܡܳܐ: ܘܛܳܣܘ ܥܺܝܪ̈ܶܐ ܒܚܶܘܳܪ̈ܰܝܗܽܘܢ ܐܰܣܶܩܘ ܬܶܫܒ̈ܚܳܬܳܐ ܘܬܰܘܕ̈ܝܳܬܳܐ ܚܕܳܪ̈ܰܝ ܩܰܒܪܳܐ: ܚܰܕܪܽܘܗܝ ܠܩܰܒܪܳܐ ܓܢܽܘܢܳܐ ܚܰܕܬܳܐ ܒܨܶܡ̈ܚܶܐ ܘܙܰܗܪ̈ܶܐ ܕܟܶܢ̈ܫܰܝ ܪܰܘܡܳܐ. ܪܥܶܠܘ ܩܶܣܛܽܘܢܳܪ̈ܶܐ ܘܰܗܘܰܘ ܐܰܝܟ ܡܺܝ̈ܬܶܐ ܘܰܢܦܰܠܘ ܐܰܝܟ ܡܺܝ̈ܬܶܐ ܥܰܠ ܐܰܦܰܝ̈ܗܽܘܢ ܚܶܫܟܰܬ݀ ܫܶܡܫܶܗ ܕܥܰܡܳܐ ܕܨܳܠܽܘ̈ܒܶܐ ܘܰܕܢܳܛܽܘܪ̈ܶܐ: ܚܰܕ ܥܺܝܪܳܐ ܠܟܺܐܦܳܐ ܪܰܒܬܳܐ ܡܥܰܓܶܠ ܗܘܳܐ: ܘܫܽܘܪܳܪ ܢܽܘܚܳܡܳܟ ܡܰܟܪܶܙ ܗܘܳܐ. ܘܰܐ̱ܚܪܺܢܳܐ ܠܬܰܠܡܺܝ̈ܕܳܬܳܐ ܢܰܟ̈ܦܳܬܳܐ ܡܣܰܒܰܪ ܗܘܳܐ ܕܩܳܡ ܠܶܗ ܡܳܪܰܢ ܘܠܐܴ ܗܘܳܐ ܬܢܳܢ ܐܳܡ̇ܰܪ ܗܘܳܐ: ܘܰܐ̱ܚܪܺܢܳܐ ܕܙܶܠܶܝ̈ܢ ܣܰܒܰܪ̈ܶܝܢ ܠܰܫܠܺܝ̈ܚܶܐ ܕܰܐܒܺܝܠܺܝܢ ܗܘܰܘ ܘܒ̇ܳܟܶܝܢ ܡܰܫܡܰܥ ܗܘܳܐ: ܕܪܺܝܫܳܐ ܐܽܘܪܚܳܐ ܡ̣ܶܢ ܫܡܰܝܳܐ ܠܐܱܪܥܳܐ ܕܡܺܝ̈ܬܶܐ: ܕܳܝܨܺܝܢ ܥܺܝܪ̈ܶܐ ܘܡܰܠܐܱܟ̈ܶܐ ܘܰܠܬܶܫܡܫܬܶܗ ܕܚܰܬܢܳܐ ܩܛܺܝܠܐܴ ܪܳܗܛܺܝܢ ܟܰܕ ܡܰܦܪܓܺܝܢ ܣܒܺܝܣ ܐܳܐܰܪ ܒܙܰܠܺܝ̈ܩܶܐ ܢܽܘܪ̈ܳܢܳܝܶܐ: ܘܰܒܥܶܪ̈ܩܳܬܳܐ ܛܳܝܣܺܝܢ ܘܠܶܓܝܽܘ̈ܢܶܐ ܢܰܒܪ̈ܫܳܢܳܝܳܬܳܐ ܕܠܰܩܝܳܡܬܳܐ ܡܢܰܨܪܺܝܢ: ܘܠܰܒܢܰܝ̈ܢܳܫܳܐ ܣܰܒܪ̈ܳܬܳܐ ܡܰܟܪܙܺܝܢ: ܘܰܟܪ̈ܺܝܟܳܢ ܠܶܗ ܣܶܓܕ̈ܳܬܳܐ ܡ̣ܶܢ ܟܶܢ̈ܫܶܐ ܕܒܶܝܬ ܓܰܒܪܺܐܶܝܠ: ܘܬܶܫܒܽܘܚܬܶܗ ܒܰܡܪ̈ܰܘܡܶܐ ܐܰܟܡܳܐ ܕܺܐܝܬܶܝܗ̇: ܚܕܳܪ̈ܰܝ ܩܰܒܪܳܐ ܚܕܳܐ ܪܒܳܒܬܳܐ ܕܚܰܝ̈ܶܐ ܘܰܕܡܺܝ̈ܬܶܐ ܒܬܶܗܪܳܐ ܘܕܽܘܡܳܪܳܐ ܡܶܫܬܰܡܥܳܐ ܗܘܳܬ݀ ܟܡܺܝܪ̈ܶܐ ܐܶܬܒܰܝܰܐܘ ܕܶܐܬܩܰܦܠܰܬ݀ ܬܰܚܦܺܝܬܳܐ ܡ̣ܶܢ ܐܰܦܰܝ̈ܗܽܘܢ: ܘܕܶܡܥܬܰܐ ܡ̣ܶܢ ܥܰܝܢܰܝ̈ܗܽܘܢ ܐܶܬܟܰܦܪܰܬ݀ ܐܶܬܦܰܨܚܘ ܐܳܘ ܥܓܺܝ̈ܢܰܝ ܥܰܦܪܳܐ ܕܚܶܣܕܳܐ ܥܒܰܪ ܡ̣ܶܢ ܓܶܢܣܳܐ ܕܡܳܝܽܘ̈ܬܶܐ: ܕܗܳܐ ܪܺܝܫܶܗ ܕܚܶܘܝܳܐ ܕܡܳܝܽܘ̈ܬܶܐ: ܕܗܳܐ ܪܺܝܫܶܗ ܕܚܶܘܝܳܐ ܪܨܺܝܨ: ܘܪܽܘܡܚܳܐ ܥܶܒܪܰܬ݀ ܘܰܕܪܰܫ ܐܽܘܪܚܳܐ ܕܚܰܝ̈ܶܐ ܠܦܰܪܕܰܝܣܳܐ ܕܠܐܴ ܥܽܘܟܳܪ: ܥܺܕܬܳܐ ܚ̇ܳܕܝܳܐ: ܘܰܓܢܽܘܢܳܗ̇ ܕܒܰܪܬ݀ ܥܰܡ̈ܡܶܐ ܢܩܺܝܫ: ܘܰܟܢܽܘܫܬܳܐ ܥܒܰܪ ܐܺܝܩܳܪܳܗ̇. ܢܒܺܝ̈ܶܐ ܙܳܥܩܺܝܢ ܫܺܝܦܽܘܪ̈ܰܝܗܽܘܢ ܕܶܐܬܰܝ̈ ܠܓܶܠܝܳܐ ܣܬܺܝܪ̈ܳܬܗܽܘܢ: ܚܰܝ̈ܶܐ ܚ̇ܳܕܶܝܢ ܒܥܽܘܗܕܳܢܳܐ ܫܒܺܝܚܳܐ ܕܥܺܐܕܳܟ: ܘܡܺܝ̈ܬܶܐ ܡܣܰܟܶܝܢ ܠܡܶܐܬܺܝܬܳܟ: ܕܒܳܗ̇ ܝܰܬܺܝܪܳܐܺܝܬ ܢܶܬܚܰܕܬܽܘܢ: ܘܟܽܠ ܕܰܡܣܰܟܶܐ ܠܳܟ ܕܺܐܝܬܰܝܟ ܐܠܰܗܳܐ ܕܥܰܠ ܟܽܠ. ܕܰܐܢ̱ܬ ܗ̣ܽܘ ܫܰܝܢܳܐ ܕܰܪ̈ܓܺܝܙܶܐ: ܐܳܦ ܒܽܘܝ̇ܳܐܳܐ ܕܰܐܒܺܝ̈ܠܐܷ ܘܣܰܒܪܳܐ ܕܰܐܝܠܶܝܢ ܕܰܕܠܐܴ ܣܰܒܪܳܐ: ܘܰܡܢܰܛܪܳܢܳܐ ܕܚܰܝ̈ܶܐ: ܘܰܡܢܰܚܡܳܢܳܐ ܕܡܺܝ̈ܬܶܐ: ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܚܝܳܢܳܐ ܘܦܳܪܶܩ ܥܳܠܡܷ̈ܐ ܕܒܰܙܩܺܝܦܽܘܬܶܗ ܙܰܩܦܳܗ̇ ܠܰܚܛܺܝܬܶܗ ܕܳܐܕܳܡ ܪܺܝܫ ܓܒܺܝܠܬܰܢ: ܘܰܒܡܰܘܬܶܗ ܐܰܡܺܝܬ ܠܡܰܘܬܳܐ ܝܰܥܢܳܐ ܕܰܓܫܰܦ ܒܶܗ: ܘܒܰܩܝܳܡܬܶܗ ܐܰܒܗ̣ܶܬ ܠܥܰܡܳܐ ܕܝܽܘܕ̈ܳܝܶܐ ܕܰܟܦܰܪܘ ܒܶܗ: ܘܰܒܢܽܘܚܳܡܶܗ ܚܰܕܺܝ ܠܟܶܢ̈ܫܶܐ ܕܥܰܡ̈ܡܶܐ ܘܶܐܡܘ̈ܳܬܳܐ ܕܰܐܘܕܺܝܘ ܒܶܗ. ܘܗܳܐ ܟܡܺܝܪܺܝܢ ܨܳܠܽܘ̈ܒܶܐ ܕܨܰܠܒܽܘܗܝ: ܘܰܦܨܺܝܚܺܝܢ ܐܳܪ̈ܳܡܳܝܶܐ ܕܩܰܒܠܽܘܗܝ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܐܠܰܗܳܐ ܗ̇ܰܘ ܕܺܐܝܬܰܝܟ ܪܰܒܳܐ ܘܰܡܥܰܠܝܳܐ ܘܠܐܴ ܡܶܬܕܰܪܟܳܢܳܐ: ܬܡܺܝܗܳܐ ܘܕܽܘܡܳܪܳܐ ܠܐܴ ܡܶܬܒܰܨܝܳܢܳܐ. ܗ̇ܰܘ ܝܺܚܺܝܕܳܝܶܗ ܕܰܐܒܳܐ ܘܨܶܡܚܳܐ ܫܒܺܝܚܳܐ ܕܺܐܝܬܽܘܬܶܗ: ܗ̇ܰܘ ܝܽܘܩܢܳܐ ܓܢܺܝܙܳܐ ܕܰܐܒܳܐ ܘܢܽܘܗܪܳܐ ܫܰܪܺܝܪܳܐ: ܗ̇ܰܘ ܪܳܥܝܳܐ ܛܳܒܳܐ ܘܰܡܬܰܩܢܳܢܳܐ ܚܰܟܺܝܡܳܐ: ܗ̇ܰܘ ܙܳܝܽܘܢܳܐ ܘܰܡܬܰܪܣܝܳܢܳܐ ܕܟܽܠ ܐܶܬܚܙܰܝܬ: ܗ̇ܰܘ ܕܡ̣ܶܢ ܪܰܘܡܳܐ ܠܥܽܘܡܩܳܐ ܢܚ̣ܶܬܬ ܘܥܰܡ ܡܰܘܬܳܐ ܒܒܶܣܪܳܐ ܕܺܝܠܰܢ ܐܶܬܥܰܪܙܰܠܬ ܕܠܰܢ ܬܶܦܪܽܘܩ ܡ̣ܶܢ ܫܽܘܥܒܳܕܳܐ ܕܰܚܛܺܝܬܳܐ ܐܰܢ̱ܬ ܕܺܐܝܬܰܝܟ ܠܐܴ ܡܶܬܚܰܙܝܳܢܳܐ ܘܰܡܕܰܒܰܪ ܠܟܽܠ. ܗ̇ܰܘ ܕܰܟܪ̈ܽܘܒܶܐ ܘܰܣܪ̈ܳܦܶܐ ܘܬܶܓ̈ܡܶܐ ܟܽܠܗܽܘܢ ܕܰܫܡܰܝ̈ܳܢܶܐ ܒܕܶܚܠܬܳܐ ܘܒܰܪܬܺܝܬܳܐ ܩܳܝܡܺܝܢ ܩܕܳܡܰܝܟ ܟܰܕ ܠܐܴ ܒܳܛܠܺܝܢ ܡ̣ܶܢ ܫܽܘܒܚܳܟ: ܘܠܐܴ ܫ̇ܳܠܶܝܢ ܡ̣ܶܢ ܬܶܫܒܽܘܚܬܳܟ: ܐܰܢ̱ܬ ܕܺܐܝܬܰܝܟ ܡܥܺܝܢܳܐ ܕܚܰܝ̈ܶܐ ܘܰܕܪܶܚܡܰܬ݀ ܐ̱ܢܳܫܽܘܬܳܐ ܘܝܳܗܽܘܒܳܐ ܕܩܰܕܺܝܫܽܘܬܳܐ ܘܰܡܒܰܛܠܳܢܳܐ ܕܟܽܠܗܶܝܢ ܒܺܝ̈ܫܳܬܳܐ: ܐܰܢ̱ܬ ܕܺܐܝܬܰܝܟ ܫܶܡܫܳܐ ܕܙܰܕܺܝܩܽܘܬܳܐ ܘܰܐܠܳܗܳܐ ܕܥܰܠ ܟܽܠ: ܐܰܢ̱ܬ ܕܺܐܝܬܰܝܟ ܢܽܘܗܪܳܐ ܢܰܨܺܝܚܳܐ ܘܰܩܝܳܡܬܳܐ ܘܚܰܝ̈ܶܐ ܕܺܝܠܰܢ: ܐܰܢ̱ܬ ܕܺܐܝܬܰܝܟ ܡܢܰܚܡܳܢܳܐ ܕܡܺܝ̈ܬܶܐ ܩܳܛܽܘܠܶܗ ܕܡܰܘܬܳܐ: ܐܰܢ̱ܬ ܕܺܐܝܬܰܝܟ ܡܰܚܪܒܳܢܳܗ̇ ܕܰܫܝܽܘܠ: ܘܰܡܚܰܠܨܳܢܳܐ ܕܓܰܙܶܝ̈ܗ̇: ܐܰܢ̱ܬ ܗ̣ܽܘ ܓܶܝܪ ܕܰܒܝܰܕ ܡܰܚܰܬܬܳܟ ܕܠܰܫܝܽܘܠ: ܘܡܺܝܬܽܘܬܳܟ ܗ̇ܳܝ ܡܰܥܒܕܰܬ݀ ܚܰܝ̈ܶܐ: ܚܰܝ̈ܶܐ ܚܰܕ̈ܬܶܐ ܘܠܐܴ ܡܳܝܽܘܬܽܘܬܳܐ ܫܰܟܶܢܬ ܠܗ̇ܳܢܽܘܢ ܕܰܡܗܰܝܡܢܺܝܢ ܘܡܰܘܕܶܝܢ ܒܰܩܝܳܡܬܳܟ. ܐܰܢ̱ܬ ܓܶܝܪ ܐܺܝܬܰܝܟ ܚܰܝܠܐܴ ܘܚܶܟܡܬܳܐ ܕܰܐܒܳܐ ܕܒܳܟ ܐܶܬܬܰܩܰܢ ܟܽܠ ܡܶܕܶܡ ܘܶܐܬܒܪܺܝܘ ܫܡܰܝܳܐ ܘܰܐܪܥܳܐ: ܝܰܘܡܳܢܳܐ ܩܳܡܬ ܡ̣ܶܢ ܩܰܒܪܳܐ ܒܚܰܝܠܐܴ ܘܓܰܢ̱ܒܳܪܽܘܬܳܐ: ܘܣܶܕܪ̈ܶܐ ܘܓܽܘ̈ܕܶܐ ܕܡܰܠܐܱܟ̈ܶܐ ܒܬܶܫܒ̈ܚܳܬܳܐ ܡܗܰܕܪܺܝܢ ܘܰܡܪܰܡܪܡܺܝܢ: ܐܰܟܡ̇ܰܢ ܕܶܐܬܬܰܒܪܰܩ ܠܗܽܘܢ ܢܽܘܗܪܳܐ ܦܨܺܝܚܳܐ ܕܰܩܝܳܡܬܳܟ ܡܫܰܒܰܚܬܳܐ ܘܩܰܕܺܝܫܬܳܐ. ܝܰܘܡܳܢܳܐ ܣܪ̈ܳܦܶܐ ܕܚܺܝܠܐܴܝܬ ܠܳܟ ܡܩܰܕܫܺܝܢ: ܘܚܰܝܠܰܘ̈ܳܬܳܐ ܫܡܰܝ̈ܳܢܶܐ ܬܶܫܒܽܘܚܬܳܟ ܙܳܡܪܺܝܢ. ܝܰܘܡܳܢܳܐ ܫܶܡܫܳܐ ܕܙܰܕܺܝܩܽܘܬܳܐ ܐܶܬܢܰܚܰܡ ܡ̣ܶܢ ܩܰܒܪܳܐ: ܘܶܐܬܟܰܪܙܰܬ݀ ܬܶܫܒܽܘܚܬܳܟ ܝܽܘܡ ܩܝܳܡܬܳܐ ܡܥܰܠܰܝܬܳܐ: ܝܰܘܡܳܢܳܐ ܛܰܝܒܽܘܬܳܐ ܐܠܰܗܳܝܬܳܐ ܐܶܬܓܰܠܝܰܬ݀. ܘܣܰܒܪܳܐ ܕܗܳܠܶܝܢ ܕܠܐܴ ܡܶܬܚܰܙ̈ܝܳܢ ܐܶܬܡܠܶܟ ܠܰܢ: ܝܰܘܡܳܢܳܐ ܥܶܛܪܳܐ ܕܡܽܘܪܽܘܢ ܒܰܣܺܝܡܳܐ ܡ̣ܶܢ ܩܰܒܪܳܐ ܦ̇ܳܐܰܚ: ܘܰܠܚܰܝܠܰܘ̈ܳܬܳܐ ܫܡܰܝ̈ܳܢܶܐ ܡܢܺܝܚ ܘܠܐܴܐܰܪ ܡܩܰܕܶܫ. ܝܰܘܡܳܢܳܐ ܚܶܫܽܘܟܳܐ ܐܶܬܪܕܶܦ ܡ̣ܶܢ ܬܺܒܶܝܠ: ܘܳܐܟܶܠܩܰܪܨܳܐ ܐܶܣܬܰܚܰܦ ܘܶܐܒܰܕ ܫܽܘܠܛܳܢܶܗ: ܝܰܘܡܳܢܳܐ ܙܳܩܽܘ̈ܦܶܐ ܒܬܶܡܗܳܐ ܘܒܰܪܬܺܝܬܳܐ ܩܳܝܡܺܝܢ ܕܰܠܡܳܪܰܢ ܚܙܰܘ ܕܶܐܬܢܰܚܰܡ ܘܩܳܡ ܡ̣ܶܢ ܩܰܒܪܳܐ: ܝܰܘܡܳܢܳܐ ܙܩܺܝܦܽܘܬܳܐ ܡܶܣܬܰܓܕܳܐ ܘܥܺܕܬܳܐ ܡܶܬܪܰܡܪܡܳܐ ܟܰܕ ܪܳܘܙܳܐ: ܘܬܶܫܒܽܘܚܬܳܐ ܕܠܐܴ ܫܶܠܝܳܐ ܡܰܙܥܩܳܐ. ܝܰܘܡܳܢܳܐ ܬܰܠܡܺܝ̈ܕܶܐ ܒܓܰܠܝܽܘܬ ܐܰܦ̈ܶܐ ܡܰܟܪܙܺܝܢ: ܕܰܫܪܳܪܳܗ̇ ܕܗܰܝܡܳܢܽܘܬܳܐ ܢܦܰܩ ܠܓܶܠܝܳܐ: ܘܰܟܠܺܝ̈ܠܐܷ ܕܙܳܟܽܘܬܳܐ ܒܪ̈ܺܝܫܰܝܗܽܘܢ ܡܰܦܪܓܺܝܢ. ܝܰܘܡܳܢܳܐ ܐܶܒܠܐܴ ܘܰܟܡܺܝܪܽܘܬܳܐ ܠܨܳܠܽܘ̈ܒܶܐ: ܘܚܰܕܽܘܬܳܐ ܘܰܕܝܳܨܳܐ ܠܰܫܠܺܝ̈ܚܶܐ: ܝܰܘܡܳܢܳܐ ܓܢܳܚ ܠܶܒܳܐ ܠܝܽܘܕܳܝ̈ܶܐ ܘܰܐܦ̈ܶܐ ܢܰܗܺܝܪ̈ܳܬܳܐ ܠܰܒܢܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ. ܝܰܘܡܳܢܳܐ ܠܚܰܫܶܗ ܘܠܰܙܩܺܝܦܶܗ ܕܦܳܪܽܘܩܰܢ ܢܪܰܡܪܶܡ ܘܰܒܬܶܫܒ̈ܚܳܬܳܐ ܢܝܰܩܰܪ ܘܰܠܪܺܝܫܳܐ ܡܝܰܩܪܳܐ ܕܰܥܠܰܘܗܝ ܐܶܬܬܣܺܝܡ ܢܶܣܓܽܘܕ. ܘܰܟܠܺܝܠܐܴ ܕܬܰܘܕܺܝܬܳܐ ܘܰܕܬܶܫܒܽܘܚܬܳܐ ܟܽܠܰܢ ܢܶܓܕܽܘܠ: ܠܗ̇ܰܘ ܕܰܣܒ̣ܰܠ ܚܰܫ̈ܶܐ ܒܨܶܒܝܳܢܶܗ ܘܰܨܠܺܝܒܳܐ ܚܠܳܦܰܝܢ ܣܰܝܒܰܪ: ܘܠܰܢ ܕܡܰܝܺܝܬܺܝܢ ܗܘܰܝܢ ܒܰܚܛܳܗ̈ܶܐ ܕܰܐܠܺܝ ܘܰܐܣܶܩ ܠܰܢ ܡ̣ܶܢ ܨܳܡܰܪܬܳܐ ܕܰܐܒܕܳܢܳܐ: ܝܰܘܡܳܢܳܐ ܐܰܙܠܶܓ ܢܽܘܗܪܳܐ ܕܰܩܝܳܡܬܳܟ ܦܳܪܽܘܩܰܢ ܡ̣ܶܢ ܗܰܘܬܳܐ ܚܶܫܽܘܟܬܳܐ ܕܡܺܝ̈ܬܶܐ: ܝܰܘܡܳܢܳܐ ܢܚܶܬ ܡܰܠܐܱܟܳܐ ܡ̣ܶܢ ܫܡܰܝܳܐ ܘܥܰܓܶܠ ܠܟܺܐܦܳܐ ܡ̣ܶܢ ܬܰܪܥܳܐ ܕܩܰܒܪܳܐ ܩܰܕܺܝܫܳܐ ܘܥܠܶܝܗ̇ ܝܺܬܶܒ ܗܘܳܐ ܘܚܰܘܺܝ ܒܝܰܕ ܗܳܕܶܐ ܕܺܐܝܬܰܘܗܝ ܡܫܰܥܒܕܳܐ ܕܰܐܠܳܗܽܘܬܳܐ: ܝܰܘܡܳܢܳܐ ܢܶܫ̈ܶܐ ܩܰܕܺܝ̈ܫܳܬܳܐ ܥܰܡ ܒܶܣ̈ܡܶܐ ܘܗܶܪ̈ܽܘܡܶܐ ܢܦܰܩܶܝ̈ܢ: ܠܘܳܬ ܩܰܒܪܳܐ ܕܺܝܠܳܟ ܡܰܥܒܶܕ ܚܰܝ̈ܶܐ: ܘܶܐܣܬܰܒܰܪ̈ܝ ܡ̣ܶܢ ܡܰܠܐܱܟ̈ܶܐ ܩܰܕܺܝ̈ܫܶܐ: ܩܝܳܡܬܳܐ ܕܺܝܠܳܟ. ܝܰܘܡܳܢܳܐ ܩܳܡܬ ܡ̣ܶܢ ܩܰܒܪܳܐ ܓܰܢ̱ܒܳܪܳܐܺܝܬ ܐܰܢ̱ܬ ܕܺܐܝܬܰܝܟ ܢܽܘܗܪܳܐ ܕܥܰܡ̈ܡܶܐ ܘܡܰܦܨܚܳܢܳܐ ܕܒܶܪ̈ܝܳܬܳܐ: ܘܳܐܦ ܚܢܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܣܳܓܕܺܝܢܰܢ ܩܕܳܡܰܝܟ ܘܡܰܘܕܶܝܢܰܢ ܠܳܟ: ܘܥܶܛܪܳܐ ܕܒܶܣ̈ܡܶܐ ܡܩܰܪܒܺܝܢܰܢ ܠܡܳܪܽܘܬܳܟ ܘܰܡܦܺܝܣܺܝܢܰܢ ܠܳܟ ܘܒܳܥܶܝܢܰܢ ܡ̣ܶܢ ܡܪܰܚܡܳܢܽܘܬܳܟ: ܕܬܥܡܪ ܘܰܬܕܰܝܰܪ ܒܢܰܦ̈ܫܳܬܰܢ ܟܰܕ ܡܩܰܕܶܫ ܐܰܢ̱ܬ ܓܡܺܝܪܳܐܺܝܬ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܘܥܳܒܶܕ ܐܰܢ̱ܬ ܠܰܢ ܚܰܕ̈ܬܶܐ ܒܝܰܕ ܪܽܘܚܳܟ ܩܰܕܺܝܫܳܐ: ܟܰܕ ܠܒܺܝܫܺܝܢܰܢ ܙܰܝܢܳܐ ܕܚܽܘܒܳܟ ܘܰܠܒܺܝܒܽܘܬܳܟ ܐܰܥܛܶܦ ܠܟܽܠܰܢ: ܘܚܰܙܶܩ ܠܰܢ ܒܰܫܪܳܪܳܟ ܘܟܰܠܶܠ ܠܰܢ ܒܪܶܚܡܬܳܟ ܘܨܰܒܶܬ ܠܰܢ ܒܕܽܘܒܳܪ̈ܶܐ ܫܰܦܺܝܪ̈ܶܐ ܥܰܡ ܟܽܠܗܶܝܢ ܐܰܝܠܶܝܢ ܕܠܳܟ ܪ̈ܚܺܝܡܳܢ ܘܦܰܐܝ̈ܳܢ: ܘܚܽܘܣ ܘܪܰܚܶܡ ܒܛܰܝܒܽܘܬܳܟ: ܥܰܠ ܟܽܠܗܽܘܢ ܚܰܛܳܝ̈ܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܗ̇ܳܝ ܕܰܩܢ̣ܰܝܬܳܗ̇ ܒܰܕܡܳܟ ܝܰܩܺܝܪܳܐ ܡܫܺܝܚܳܐ ܡܳܪܰܢ. ܘܰܥܒܶܕ ܕܽܘܟܪܳܢܳܐ ܛܳܒܳܐ ܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܟܰܕ ܡܰܫܘܶܐ ܐܰܢ̱ܬ ܠܰܢ ܘܰܠܗܽܘܢ ܠܩܰܘܡܳܐ ܡܳܪܳܢܳܝܳܐ ܡ̣ܶܢ ܓܰܒܳܐ ܕܺܝܠܳܟ ܕܝܰܡܺܝܢܳܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܐܚܝܳܢܳܐ ܕܥܳܠܡ̈ܶܐ ܕܰܛܥܶܡ ܡܰܘܬܳܐ ܒܨܶܒܝܳܢܶܗ: ܘܰܒܡܰܘܬܶܗ ܫ̣ܪܳܐ ܠܰܚܒܳܠܐܴ ܕܰܒܩܰܒܪ̈ܶܐ ܠܗ̇ܰܘ ܡܶܠܬܶܗ ܕܰܐܒܳܐ ܫܡܰܝܳܢܳܐ ܕܰܗܘܳܐ ܐ̱ܢܳܫܳܐ ܒܨܶܒܝܳܢܶܗ ܘܰܢܚܶܬ ܠܰܫܝܽܘܠ ܕܢܶܒܕܽܘܩ ܨܰܠܡܶܗ ܕܰܫܚܶܬ ܘܰܒܠܺܝ ܒܚܶܙ̈ܶܐ ܥܰܡܺܝ̈ܩܶܐ ܕܗܳܡܳܢ: ܘܚܰܕܬܶܗ ܐܰܝܟ ܕܰܫܦܰܪ ܠܶܗ ܘܰܐܩܺܝܡܶܗ ܒܫܽܘܒܚܳܐ ܕܠܐܴ ܚܒܳܠܐܴ: ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܘܰܡܗܰܝܡܢܺܝܢܰܢ ܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ: ܗ̇ܳܝ ܕܒܳܗ̇ ܩܳܡܢܰܢ ܡ̣ܶܢ ܡܰܦܽܘܠܬܳܐ ܕܰܥܒܳܪ ܦܽܘܩܕܳܢܳܐ ܣܶܓܕܬܳܐ ܠܢܽܘܚܳܡܳܟ ܕܰܐܒܗܶܬܬ ܠܒܺܝܫܳܐ ܡܳܪܽܘܕܳܐ ܕܟܰܡܺܝܢ ܠܐܱܒܕܳܢܰܢ: ܘܰܐܛܥܝܰܢ ܒܣܶܓܕܬܳܐ ܕܰܓܠܺܝ̈ܦܶܐ: ܘܰܒܛܳܥܝܽܘܬܳܐ ܕܰܣܪܺܝܩܽܘܬܳܐ ܒܦܰܓܪܳܟ ܚܰܝܳܐ ܘܡܰܚܝܳܢܳܐ ܕܝܰܗܒܬ ܠܰܢ: ܘܰܩܝܳܡܬܳܐ ܡܳܪܳܢܳܝܬܳܐ ܫܰܟܶܢܬ ܠܰܢ: ܠܟܽܠܶܗ ܓܶܢܣܰܢ ܥܰܦܪܳܢܳܐ ܘܡܳܝܽܘܬܳܐ: ܘܰܐܩܢܰܝܬ ܠܰܢ ܣܰܒܪܳܐ ܕܚܰܝ̈ܶܐ ܚܰܕ̈ܬܶܐ ܘܠܐܴ ܡܶܫܬܰܪ̈ܝܳܢܶܐ: ܕܰܒܗܽܘܢ ܗܳܘܶܐ ܚܽܘܕܳܬܳܐ ܠܦܰܓܪ̈ܶܐ ܕܺܝܠܰܢ ܢܕܺܝ̈ܕܶܐ ܘܡܰܣܠܰܝ̈ܳܐ. ܘܚܽܘܝܳܕܳܐ ܠܢܰܦ̈ܫܳܬܰܢ ܡܟܰܪ̈ܗܳܬܳܐ ܘܰܡܛܰܪ̈ܦܶܐ ܘܰܡܢܰܘ̈ܠܳܬ ܒܟܺܐܒ̈ܶܐ ܡܰܪܺܝܪ̈ܶܐ ܕܰܥܒܳܪ ܦܽܘܩܕܳܢܳܐ ܘܰܕܚܰܘܒܬܳܐ ܥܰܒܕܳܢܳܝܬܳܐ ܕܚܳܒܢܰܢ ܠܰܢ ܒܰܢ. ܒܰܩܝܳܡܬܳܐ ܓܰܘܳܢܳܝܬܳܐ ܕܟܽܠܢܳܫ ܟܰܕ ܠܒܶܫܬܳܝܗܝ ܠܦܰܓܪܳܐ ܕܺܝܠܰܢ ܡܳܝܽܘܬܳܐ ܘܰܗܘܰܝܬ ܪܺܝܫܺܝܬܳܐ ܘܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ ܗ̇ܳܢܽܘܢ ܕܩܳܝܡܺܝܢ ܒܠܐܴ ܡܶܬܚܰܒܠܳܢܽܘܬܳܐ ܘܰܚܡܺܝܪ ܚܰܝ̈ܶܐ ܗܘܳܐ ܦܰܓܪܳܐ ܐܠܰܗܳܝܳܐ ܒܰܢ ܘܰܠܟܽܠܳܗ̇ ܓܒܺܝܠܬܰܢ ܐܠܰܗ ܘܠܐܴ ܬܽܘܒ ܠܰܚܒܳܠܐܴ ܘܡܺܝܬܽܘܬܳܐ. ܐܶܫܬܰܪܓܰܠ ܒܗ̇ܳܝ ܕܟܽܠܗܶܝܢ ܐ̱ܢܳܫܳܝ̈ܳܬܳܐ ܒܰܩܢܽܘܡܳܟ ܫܰܡܠܺܝܬ ܐܶܬܺܝܠܶܕܬ ܒܒܶܝܬܠܚܶܡ ܘܰܥܡܰܕܬ ܡ̣ܶܢ ܝܽܘܚܰܢܳܢ ܥܰܒܕܳܟ ܒܝܽܘܪܕܢܳܢ ܢܰܗܪܳܐ ܙܥܽܘܪܳܐ: ܐܰܝܟܰܢܳܐ ܕܰܠܨܰܚܢܽܘܬܶܗ ܕܗ̇ܰܘ ܝܰܥܢܳܐ ܬܚܰܠܶܠ ܘܬܶܡܪܽܘܩ ܡ̣ܶܢ ܛܰܡܽܐܘܬܳܐ ܕܰܥܒ̇ܳܪ ܦܽܘܩܕܳܢܳܐ: ܨܰܘܡܳܐ ܨܶܒܝܳܢܳܝܳܐ ܥܠܰܝܟ ܩܰܒܶܠܬ ܘܰܢܚܶܬܬ ܥܰܡ ܐܳܟܶܠܩܰܪܨܳܐ ܠܕܰܐܪܳܐ ܬܠܺܝܬܳܝܳܐ ܘܚܰܝܶܒܬܳܝܗܝ ܚܰܫܬ ܚܠܳܦܰܝܢ ܘܰܠܚܰܫܰܝ̈ܢ ܒܰܛܶܠܬ ܘܰܠܒܶܝܬ ܕܺܝܢܳܐ ܐܰܝܟ ܚܰܝܳܒܳܐ ܥܰܠܬ: ܐܰܢ̱ܬ ܕܺܐܝܬܰܝܟ ܕܰܝܳܢܳܐ ܕܕܰܝ̈ܳܢܶܐ: ܥܰܠ ܩܰܝܣܳܐ ܥܰܠܝܽܘܟ ܪ̈ܰܚܡܰܝܟ ܘܰܠܒܶܝܬ ܡܺܝ̈ܬܶܐ ܐܰܢ̱ܬ ܒܰܩܢܽܘܡܳܟ ܢܚܶܬܬ. ܠܘܳܬ ܨܰܠܡܳܐ ܡܝܰܩܪܳܐ ܕܺܝܠܳܟ ܕܰܬܚܰܘܶܐ ܠܘܳܬ ܪ̈ܰܚܡܰܝܟ ܪܶܚܡܰܬ݀ ܐ̱ܢܳܫܽܘܬܳܟ: ܘܰܐܟܪܶܙܬ ܢܽܘܚܳܡܳܐ ܕܚܰܝ̈ܶܐ ܠܰܫܟܺܝ̈ܒܰܝ ܥܰܦܪܳܐ ܢܽܘܓܪܳܐ ܕܰܬܠܳܬܳܐ ܝܰܘ̈ܡܺܝܢ ܘܩܳܡܬ ܡ̣ܶܢ ܩܰܒܪܳܐ ܕܠܐܴ ܚܒ̇ܳܠܐܴ: ܘܠܐܴܕܳܡ ܨܰܠܡܳܐ ܕܪܰܒܽܘܬܳܟ ܐܰܩܺܝܡܬ ܘܰܕܪܰܫܬ ܠܶܗ ܐܽܘܪܚܳܐ ܕܚܰܝ̈ܶܐ ܠܦܰܪܕܰܝܣܳܐ ܡܠܐܷ ܛܽܘ̈ܒܶܐ ܘܒܰܕܓܽܘܢ ܐܳܦ ܚܢܰܢ ܡܚܺܝ̈ܠܐܷ ܘܚܰܛܳܝ̈ܶܐ ܒܳܥܶܝܢܰܢ ܡ̣ܶܢ ܡܪܰܚܡܳܢܽܘܬܳܟ: ܕܬܶܬܶܠ ܠܰܢ ܕܥܰܡ ܡܰܠܐܱܟ̈ܶܐ ܕܣܰܒܰܪܘ ܢܽܘܚܳܡܳܟ ܢܰܦܪܶܓ ܒܶܐܣ̈ܛܠܐܷ ܢܰܗܺܝܪ̈ܳܬܳܐ ܕܚܶܘܳܪ̈ܺܝܢ ܘܰܡܪܳܡܳܐ ܡܶܢܗܽܘܢ ܚܶܫܽܘܟܽܘܬܳܐ ܕܰܥܒܳܕ̈ܶܐ ܒܺܝ̈ܫܶܐ ܕܚܶܫܽܘܟܳܐ ܘܙܰܠܺܝ̈ܩܶܐ ܕܡ̣ܶܢ ܩܰܒܪܳܟ ܐܰܨܡܰܚ ܠܰܢ: ܘܙܰܗܝܳܐܺܝܬ ܝܰܘܡܳܢܳܐ ܢܰܒܪܶܩ: ܘܡ̣ܶܢ ܡܶܠܬܳܟ ܡܳܪܳܢܳܝܬܳܐ ܕܟܽܠܰܢ ܢܶܬܗܰܕܶܐ ܘܰܡܛܰܝܒܳܐܺܝܬ ܢܶܦܓܰܥ ܒܳܟ ܒܨܰܦܪܳܐ ܕܢܽܘܚܳܡܳܐ ܕܗܳܘܶܐ ܠܟܽܠܢܳܫ: ܚܠܳܦ ܗ̇ܳܝ ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̈ܡܶܐ ܒܰܫܡܳܐ ܕܰܬܠܺܝܬܳܝܽܘܬܳܐ ܢܶܫܡܰܥ ܠܗ̇ܳܝ ܕܬܰܘ ܒܪ̈ܺܝܟܰܘܗܝ ܕܳܐܒܝ ܝܰܪܬܽܘܢܳܝܗܝ ܠܰܓܢܽܘܢܳܐ ܕܰܢܛܺܝܪ ܠܟܽܘܢ. ܘܢܶܬܠܰܚ̈ܝܳܢ ܣܰܢ̈ܝܳܬܰܢ ܘܢܶܬܥܰܛܝ̈ܳܢ ܚܰܒܪ̈ܳܬܳܢ: ܘܢܶܬܚܰܣ̈ܝܳܢ ܒܶܗ ܚܰܘ̈ܒܳܬܰܢ: ܘܢܶܬܬܢܺܝܚܽܘܢ ܥܰܢܺܝ̈ܕܰܝܢ ܒܗ̇ܰܘ ܦܰܪܕܰܝܣܳܐ ܡܠܐܷ ܛܽܘ̈ܒܶܐ ܘܓܶܐܘ̈ܳܬܳܐ: ܘܢܶܫܟܰܚ ܟܽܠܰܢ ܫܽܘܠܳܡܳܐ ܕܫܳܦܰܪ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܠܶܫܳܢ̈ܶܐ ܫܦܰܝ̈ܳܐ ܘܰܒܩ̈ܳܠܐܷ ܡܰܠܝ̈ܰܝ ܫܽܘܒܚܳܐ ܢܩܰܠܶܣ ܠܝܰܘܡܳܐ ܕܰܩܝܳܡܬܳܟ ܡܫܰܒܰܚܬܳܐ: ܐܰܝܟܰܢܳܐ ܕܥܰܡ ܡܰܪܝܰܡ ܘܚܰܒܪ̈ܳܬܳܗ̇: ܘܥܰܡ ܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܘܚܰܒܪ̈ܰܘܗܝ: ܒܟܽܠܙܒܰܢ ܢܶܚܕܶܐ ܘܢܶܪܘܰܙ: ܘܥܰܡ ܟܽܠܗܽܘܢ ܐܰܝܠܶܝܢ ܕܰܫܦܰܪܘ ܠܳܟ ܢܫܰܒܰܚ ܘܢܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ ܠܚܰܕ ܐܰܒܳܐ ܩܰܕܺܝܫܳܐ ܕܡܶܢܶܗ ܪܳܕܝܳܐ ܘܡܶܬܬܰܝܬܝܳܐ ܟܽܠܳܗ̇ ܡܪܰܚܡܳܢܽܘܬܳܐ ܘܩܰܕܺܝܫܽܘܬܳܐ ܟܝܳܢܳܐܺܝܬ: ܠܚܰܕ ܒܪܳܐ ܩܰܕܺܝܫܳܐ ܕܚܰܫ ܘܡܺܝܬ ܒܰܒܣܰܪ ܘܳܐܦ ܐܶܬܩܒܰܪ ܘܩܳܡ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܚܠܳܦ ܓܶܢܣܳܐ ܕܰܒܢܰܝ̈ܢܳܫܳܐ ܨܶܒܝܳܢܳܐܺܝܬ: ܠܚܰܕ ܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܕܩܰܕܺܝܫܽܘܬܳܐ ܠܩܰܕܺܝ̈ܫܶܐ ܩܰܕܺܝܫܳܐܺܝܬ. ܕܠܶܗ ܢܶܫܬܘܶܐ ܟܽܠܰܢ ܕܰܢܩܰܪܶܒ ܠܶܗ ܬܶܫܒ̈ܚܳܬܳܐ ܘܩܽܘ̈ܠܳܣܶܐ ܘܣܶܓܕ̈ܳܬܳܐ ܡܳܪܳܢܳܐܺܝܬ ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܚܰܝ̈ܶܐ ܫܰܪܺܝܪ̈ܶܐ ܘܽܐܘܣܝ̈ܳܝܶܐ ܘܪ̈ܰܚܺܝܩܰܝ ܡ̣ܶܢ ܡܰܘܬܳܐ: ܗ̇ܰܘ ܕܣܰܓܺܝ̈ܳܐܬܳܐ ܪܰܘܪ̈ܒܳܬܳܐ ܐܶܢܶܝ̈ܢ ܓܒܰܪ̈ܘܳܬܳܐ ܘܰܬܡܺܝ̈ܗܳܬܳܐ ܕܺܝܠܳܟ ܕܰܠܘܳܬܰܢ ܐܶܬܥܰܛܰܦܬ ܐܳܕܫܳܢܳܝܽܘܬܳܐ ܕܺܝܠܳܟ ܕܳܐܕܳܡ ܕܬܶܥܒܶܕ ܠܰܢ ܚܽܘܕܳܬܳܐ ܡܫܰܡܠܝܳܐ: ܘܠܰܡܚܺܝܠܽܘܬܶܗ ܕܓܶܢܣܰܢ ܡܳܐܟܳܐ ܘܬܰܚܽܘܒܳܐ ܘܫܰܦܠܐܴ ܬܚܰܕܬܺܝܘܗܝ ܒܰܩܝܳܡܬܳܟ ܒܡܶܐܬܺܝܬܳܟ ܘܰܒܝܰܕ ܡܰܚܰܬܬܳܟ ܕܰܠܗܳܕܶܐ ܐܰܪܥܳܐ ܟܽܘܒܳܢܳܝܬܳܐ: ܐܶܬܕܰܪܰܪܬ ܥܰܡ ܡܰܘܬܳܐ ܒܰܩܒܽܘܪܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܕܰܙܪܰܥ̣ܬ ܚܽܘܕܳܬܳܐ ܘܣܰܒܪܳܐ ܒܥܳܡܪ̈ܰܝ ܩܰܒܪ̈ܶܐ ܘܰܐܦܨܰܚ̣ܬ ܠܗ̇ܳܢܽܘܢ ܕܒܰܫܒܳܒܽܘܬܶܗ ܕܰܚܒܳܠܐܴ ܝܳܬܒܺܝܢ ܗܘܰܘ: ܐܶܬܬܥܺܝܪܬ ܐܰܝܟ ܕܰܡܟܳܐ ܡ̣ܶܢ ܒܶܝܬ ܡܺܝ̈ܬܶܐ. ܘܚܰܬܶܡܬ ܒܢ̈ܳܬ ܩ̈ܳܠܐܷ ܕܰܥܠܰܝܟ ܐܶܬܡ̈ܰܠܰܠܝ: ܐܰܪܥܽܘܟ ܒܰܩܝܳܡܬܳܟ ܚܰܝ̈ܠܰܝ ܪܰܘܡܳܐ ܒܗܽܘܠܳܠܰܝ̈ܗܽܘܢ ܘܚܰܕܪܽܘܗܝ ܠܩܰܒܪܳܟ ܒܩ̈ܳܠܐܷ ܕܚܰܕ̈ܘܳܬܳܐ: ܕܳܨܘ ܡܰܠܐܱܟ̈ܶܐ ܥܛܺܝ̣̈ܦܰܝ ܢܽܘܗܪܳܐ ܘܰܟܪ̈ܺܝܟܰܝ ܓܰܘܙܰܠܬܳܐ. ܝܰܒܶܠܘ ܣܒܰܪܬܳܟ ܕܢܽܘܚܳܡܳܐ ܕܰܩܝܳܡܬܳܟ ܠܢܶܫ̈ܶܐ ܢܰܟ̈ܦܳܬܳܐ: ܙܳܚ̈ܝ ܠܶܓܝܽܘ̈ܢܶܐ ܡܢܰܒܪ̈ܫܳܬܳܐ ܘܰܫܓܺܝܪ̈ܳܬܳܐ ܕܓܰܘܙܰܠܬܳܐ ܘܝܰܒܶܒܘ ܩܽܘܕ̈ܳܫܶܐ ܥܛܺܝ̈ܦܰܝ ܒܰܪ̈ܩܶܐ ܢܰܨܺܝ̈ܚܶܐ ܕܰܦܨܺܝܚܽܘܬܳܐ ܘܢܳܨܪ̈ܰܝ ܢܽܘܚܳܡܳܟ ܕܡ̣ܶܢ ܩܰܒܪܳܐ. ܢܚܶܬܘ ܠܓܰܢܬܳܐ ܝܰܘܣܶܦܳܝܬܳܐ ܛܰܟܣܺܝ̈ܣ ܪ̈ܳܬܚܳܬ݀ ܒܢܽܘܪܳܐ ܐܳܟܶܠܬܳܐ ܘܡܰܘܩܕܳܢܺܝܬܳܐ ܘܶܐܬܬܙܺܝܥܘ ܘܥܰܓܶܠܘ ܟܺܐܦܳܐ ܕܥܰܠ ܬܰܪܥܶܗ ܕܩܰܒܪܳܟ ܡܰܥܒܶܕ ܚܰܝ̈ܶܐ: ܘܫܽܘܪܳܪ ܢܽܘܚܳܡܳܟ ܡܒܰܕܩܺܝܢ ܗܘܰܘ ܠܣܺܝܣܰܪܬܳܐ ܘܚܽܘܓܬܳܐ ܟܽܠܳܗ̇ ܕܰܥܠܰܝܟ ܐܰܒܺܝܠܐܴ ܗܘܳܬ݀. ܫܩܰܠܘ ܣܒܰܪܬܳܐ ܕܚܰܕܽܘܬܳܐ ܒܦܽܘ̈ܡܶܐ ܟܺܝܬ ܘܰܒܡܰܫܡܰܥܬܳܐ ܕܡܰܐܪ̈ܙܳܢܰܝܟ ܘܩܳܠ ܪܒܳܒܬܳܐ ܬܗܺܝܪܬܳܐ ܒܣܶܦܘ̈ܳܬܳܐ ܕܰܐܪ̈ܥܳܢܳܝܶܐ. ܒܰܣܒܺܝܣܽܘܬ ܣܽܘܟܳܠܐܴ ܡܶܫܬܰܡܥܳܐ ܗܘܳܬ݀: ܘܙܳܥܩ̈ܳܬܳܐ ܕܠܶܓܝܽܘ̈ܢܶܐ ܗܕܺܝܪ̈ܳܬܳܐ ܒܰܐܬܪܳܐ ܕܪܰܚܺܝܩ ܡ̣ܶܢ ܪܓܶܫܬܳܐ: ܘܥܰܬܺܝܪ ܒܫܶܠܝܳܐ ܘܰܒܫܶܬܩܳܐ ܡܶܫܬܰܡ̈ܥܳܢ ܚܰܕ̈ܬܳܬܳܐ ܘܟܽܠ ܩܳܠܺܝ̈ܢ: ܬܶܫܒ̈ܚܳܬܳܐ ܒܟܽܠ ܦܽܘܡܺܝ̈ܢ: ܘܬܰܘܕ̈ܝܳܬܳܐ ܒܟܽܠ ܠܶܫܳܢܺܝ̈ܢ: ܒܰܚܕܳܐ ܩܥܳܬܳܐ ܠܡܺܝܬܳܐ ܕܰܒܡܰܘܬܶܗ ܚܰܠܨܳܗ̇ ܠܰܫܝܽܘܠ: ܘܰܥܩܰܪ ܐܶܢܽܘܢ ܠܓܰܙܶܝ̈ܗ̇ ܘܰܐܚܪܶܒ ܠܙܳܘ̈ܝܳܬܳܗ̇ ܟܰܗܺܝ̈ܢܳܬܳܗ̇: ܝܰܘܡܳܢܳܐ ܡܰܗܶܠ ܢܒܺܝܳܐ ܒܰܫܝܽܘܠ ܘܰܒܡܰܘܬܳܐ ܘܳܐܡ̇ܰܪ: ܕܰܐܝܟܰܐ ܗ̱̇ܘ ܥܽܘܩܣܳܟ ܡܰܘܬܳܐ ܝܰܥܢܳܐ: ܘܰܐܝܟܳܐ ܗ̱̇ܝ ܙܳܟܽܘܬܶܟܝ ܫܝܽܘܠ ܕܳܘܺܝܬܳܐ: ܝܰܘܡܳܢܳܐ ܬܰܘܕܶܐ ܥܺܕܬܳܐ ܒܰܪܬ ܐܳܪ̈ܳܡܳܝܶܐ: ܘܥܰܠ ܛܽܘܪ̈ܶܐ ܪ̈ܳܡܶܐ ܬܶܣܰܩ ܘܬܰܩܶܢ: ܝܰܘܡܳܢܳܐ ܢܕܽܘ̈ܨܳܢ ܥܠܰܝ̈ܡܳܬܳܐ ܘܥܰܡ ܡܰܪܝܰܡ ܢܒܺܝܬܳܐ ܒܰܦܠܰܓܰܝ̈ܗܶܝܢ ܢܶܥܢ̈ܝܳܢ ܠܐܻܝܠ ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܒܚܰܝܠܶܗ ܥܰܙܺܝܙܳܐ: ܝܰܘܡܳܢܳܐ ܬܶܓܠܐܷ ܪܺܝܫܳܗ̇ ܢܒܺܝܽܘܬܳܐ ܘܥܰܡ ܕܰܘܺܝܕ ܢܒܺܝܳܐ ܬܝܰܒܶܒܝ ܠܡܳܪܝܳܐ ܕܰܦܪܰܩܬܶܗ ܝܰܡܺܝܢܶܗ ܘܣܰܡܟܶܗ ܕܪܳܥܶܗ ܥܰܫܺܝܢܳܐ ܘܚܰܝܠܬܳܢܳܐ: ܝܰܘܡܳܢܳܐ ܒܬܶܫܒ̈ܚܳܬܳܐ ܠܓܰܢܰܬ݀ ܓܰܘ̈ܙܶܐ ܢܶܚܽܘܬ: ܘܢܶܚܕܶܐ ܒܶܐܒܳܐ ܕܢܰܚ̈ܠܐܷ. ܘܢܶܚܙܶܐ ܐܶܢ ܐܰܦܪܥܰܬ݀ ܬܺܬܳܐ: ܘܶܐܢ ܦܩܰܚ ܘܪܕܳܐ: ܘܶܐܢ ܒܠܰܨ ܪܽܘܡܳܢܳܐ: ܘܶܐܢ ܣܡܳܕܪܳܐ ܝܰܗܒ ܪܺܝܚܳܐ. ܝܰܘܡܳܢܳܐ ܪܶܗܛܳܐ ܪܗܺܝܒܳܐ ܢܶܠܒܽܘܟ: ܘܢܶܠܽܘܥ ܚܰܝ̈ܶܐ ܡ̣ܶܢ ܣܓܽܘܠ ܟܽܘܦܪܳܐ: ܘܰܢܒܰܣܶܡ ܠܣܰܘ̈ܩܰܝܢ ܒܫܽܘܫܢܰܬ݀ ܒܫܰܪ̈ܘܰܝܢܶܐ ܐܳܦ ܒܫܽܘܫܢܰܬ݀ ܥܽܘܡܩܳܐ ܘܡ̣ܶܢ ܡܽܘܪܽܘܢ ܡܣܰܦܩܳܐ ܘܡ̣ܶܢ ܐܶܣܛܰܩܛܳܐ ܡܥܰܠܝܳܐ: ܝܰܘܡܳܢܳܐ ܒܫܰܦܪܳܐ ܢܩܰܕܶܡ ܠܚܰܩܠܐܴ ܘܢܶܩܛܽܘܦ ܠܦܺܐܪܳܐ ܕܚܰܝ̈ܶܐ: ܘܰܢܣܰܒܰܥ ܟܰܦܢܽܘܬܳܐ ܡܰܪܺܝܪܬܳܐ ܗ̇ܳܝ ܕܒܰܩܛܳܦ ܦܺܐܪܳܐ ܩܰܕܡܳܝܳܐ ܐܶܬܦܰܫܛܰܬ݀ ܥܠܰܝܢ. ܝܰܘܡܳܢܳܐ ܢܰܦܪܶܓ ܒܚܰܓܳܐ ܘܰܢܝܰܒܶܒ ܒܬܶܫܒܽܘܚܬܳܐ: ܒܰܠܒܽܘ̈ܫܶܐ ܚܰܕ̈ܬܶܐ ܘܫܰܦܺܝܪ̈ܰܝ ܡܰܒܪܩܽܘܬܳܐ ܕܰܡܒܰܣܡܺܝܢ: ܘܟܽܘܪܟܡܳܐ ܘܩܰܢܝܳܐ: ܝܰܘܡܳܢܳܐ ܢܶܓܠܽܘܦ ܩܺܝ̈ܢܳܬܰܢ ܘܰܢܩܰܢܩܶܢ ܒܩܳܠܰܝ̈ܢ ܘܰܒܓܰܓܪ̈ܳܬܰܢ ܢܶܓܥܶܐ ܘܠܐܴ ܢܶܚܽܘܣ ܘܢܶܩܥܶܐ ܒܫܺܝܦܽܘܪ̈ܰܝܢ ܘܠܐܴ ܢܶܫܠܐܷ: ܘܢܰܟܪܶܙ ܫܰܝܢܳܐ ܘܰܫܠܳܡܳܐ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܘܥܰܡ ܝܰܗ̈ܠܐܷ ܟܪ̈ܽܘܒܳܝܳܬܳܐ ܢܺܐܡܰܪ ܒܪܺܝܟ ܗ̣ܽܘ ܐܺܝܩܳܪܳܟ ܡ̣ܶܢ ܐܰܬܪܳܟ ܡܰܠܟܳܐ ܕܰܠܥܳܠܡܺܝܢ: ܝܰܘܡܰܐ ܗ̱̇ܘ ܕܰܦܨܺܝܚܽܘܬܳܐ ܘܰܕܪ̈ܶܦܣܶܐ: ܝܰܘܡܰܐ ܗ̱̇ܘ ܕܚܰܕܽܘܬܳܐ ܘܕܰܪܘܳܙܳܐ: ܝܰܘܡܰܐ ܗ̱̇ܘ ܕܬܳܪܶܨ ܡܰܦܽܘܠܬܰܢ: ܝܰܘܡܰܐ ܗ̱̇ܘ ܕܰܡܩܺܝܡ ܕܰܡܟܽܘܬܰܢ: ܘܰܡܛܰܠܐܷ ܥܰܬܺܝܩܽܘܬܰܢ ܘܡܶܟܺܝܠ ܕܰܒܗܳܢܳܐ ܝܰܘܡܳܢܳܐ ܐܶܬܚܰܕܰܬܢܰܢ: ܢܶܫܶܐܠ ܚܢܺܝܓܳܐܺܝܬ ܘܢܶܒܥܶܐ ܫܰܝܢܳܐ ܐܰܡܺܝܢܳܐ ܘܰܚܘܺܝܚܳܐ ܘܚܽܘܒܳܐ ܠܐܴ ܡܶܬܦܰܣܩܳܢܳܐ: ܘܟܰܕ ܠܚܰܝ̈ܶܐ ܥܰܬܺܝܪ̈ܰܝ ܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ: ܒܝܰܘ̈ܡܳܬܳܐ ܕܟܰܝ̈ܳܐ ܡܰܨܡܰܚ ܐܰܢ̱ܬ ܘܰܒܡܰܘܬܳܐ ܗ̇ܰܘ ܕܰܐܡܠ̣ܶܟ ܥܠܰܝܢ ܡܰܗܶܠ ܐܰܢ̱ܬ: ܬܶܕܡܪ̈ܳܬܳܟ ܘܰܓܢ̱ܒܰܪ̈ܘܳܬܳܟ ܢܶܬܚܰܙ̈ܝܳܢ ܒܰܛܡܺܝܪ̈ܰܝ ܕܰܚܺܝܚܳܐ: ܘܒܽܐܘܪܳܥܳܐ ܗ̇ܰܘ ܬܪܰܝܳܢܳܐ ܢܩܰܒܠܳܟ: ܘܫܽܘܒܚܳܐ ܕܢܽܘܟܪܳܝ ܡ̣ܶܢ ܗܽܘܠܐܷ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܦܳܪܽܘܩܳܐ ܕܰܒܚܰܝܠܐܴ ܕܬܽܘܩܦܶܗ ܦܰܪܩܳܗ̇ ܠܥܺܕܬܶܗ: ܠܗ̇ܰܘ ܕܒܰܩܝܳܡܬܶܗ ܡܫܰܒܰܚܬܳܐ ܫܰܝܶܢ ܠܡܰܪܥܺܝܬܶܗ: ܠܗ̇ܰܘ ܕܰܒܢܽܘܚܳܡܶܗ ܫܒܺܝܚܳܐ ܐܰܦܨܰܚ ܠܝܳܪܬܽܘܬܶܗ: ܠܗ̇ܰܘ ܕܒܰܫܠܳܡܶܗ ܩܰܕܺܝܫܳܐ ܐܰܪܘܺܝ ܠܰܫܠܺܝ̈ܚܰܘܗܝ ܘܰܒܓܶܫܬܶܗ ܦܰܓܪܳܢܳܝܬܳܐ ܐܰܪܝܺܡ ܦܽܘܠܳܓܳܐ ܡ̣ܶܢ ܠܶܒܰܘ̈ܳܬܳܐ ܕܬܰܠܡܺܝ̈ܕܰܘܗܝ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܣܳܓܕܺܝܢܰܢ ܠܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܡܫܺܝܚܳܐ ܐܠܰܗܳܐ ܕܺܝܠܰܢ ܘܰܠܝܽܘܡ ܢܽܘܚܳܡܳܟ ܬܗܺܝܪܳܐ ܡܩܰܠܣܺܝܢܰܢ ܕܒܶܗ ܐܶܬܚܰܪܪܰܬ݀ ܐ̱ܢܳܫܽܘܬܳܐ ܡ̣ܶܢ ܚܛܺܝܬܳܐ ܘܰܒܪܺܝܬܳܐ ܟܽܠܳܗ̇ ܡ̣ܶܢ ܥܰܬܺܝܩܽܘܬܳܐ ܐܶܬܚܰܕܬܰܬ݀ ܘܓܳܠܽܘܬܳܐ ܡ̣ܶܢ ܐܺܝ̈ܕܰܝ ܫܰܒܳܝܳܐ ܐܶܬܦܰܪܩܰܬ݀: ܘܗܳܡܳܢ ܕܰܩܒܺܝܪ̈ܶܐ ܐܶܣܬܰܚܦܰܬ݀: ܘܰܫܝܽܘܠ ܒܶܝܬ ܚܒܽܘܫܝܳܐ ܕܰܒܢܰܝ̈ܢܳܫܳܐ ܐܶܬܗܰܓܡܰܬ݀. ܘܙܳܟܽܘܬܶܗ ܕܰܨܠܺܝܒܳܐ ܦܳܪܽܘܩܳܝܳܐ ܐܶܬܢܰܨܚܰܬ݀ ܘܚܰܘܒܬܶܗ ܕܳܐܕܳܡ ܥܰܦܪܳܢܳܐ ܐܶܬܦܰܪܥܰܬ݀. ܘܰܛܪܽܘܢܽܘܬܶܗ ܕܫܰܠܺܝܛܳܐ ܕܢܳܛܰܪ ܐܳܐܰܪ ܐܶܫܬܰܦܠܰܬ݀ ܘܝܰܥܢܽܘܬܶܗ ܡܰܪܺܝܪܬܳܐ ܕܡܰܘܬܳܐ ܕܰܚܛܺܝܬܳܐ ܐܶܣܬܰܕܩܰܬ݀: ܟܢܽܘܫܬܶܗ ܕܝܽܘܕܳܐ ܡܰܫܠܡܳܢܳܐ ܬܰܠܡܺܝܕ ܙܺܐܦܳܐ ܐܶܬܒܰܕܪܰܬ݀: ܘܰܠܒܺܝܒܽܘܬܶܗ ܕܥܰܡܳܐ ܨܳܠܽܘܒܳܐ ܐܶܬܪܰܦܝܰܬ݀: ܒܳܗ̇ ܒܰܡܕܺܝܢ̱ܬܶܗ ܡܥܰܕܰܢܬܳܐ ܗ̇ܳܝ ܣܰܩܽܘܒܠܳܝܬܳܐ ܐܶܬܟܰܒܫܰܬ݀: ܘܰܢܟܺܝܠܽܘܬܶܗ ܕܚܶܘܝܳܐ ܚܰܪܡܳܢܳܐ ܐܶܬܦܰܪܣܝܰܬ݀: ܒܳܗ̇ ܒܰܣܒܰܪܬܳܐ ܕܚܰܝ̈ܶܐ ܠܟܽܠܗܽܘܢ ܥܰܡ̈ܡܶܐ ܐܶܬܟܰܪܙܰܬ݀: ܘܗܰܝܡܳܢܽܘܬܳܐ ܫܠܺܝܚܳܝܬܳܐ ܐܶܬܢܰܨܚܰܬ݀: ܘܒܶܗ ܟܡܺܝܪܽܘܬܳܐ ܕܥܰܠ ܒܢ̈ܰܝ ܝܰܡܺܝܢܳܐ ܐܶܬܩܰܦܠܰܬ݀: ܘܰܦܨܺܝܚܽܘܬܳܐ ܥܰܠ ܟܽܠܗܽܘܢ ܦܪ̈ܺܝܩܰܝ ܒܰܨܠܺܝܒܳܐ ܐܰܡܠܟܰܬ݀: ܘܥܳܩܬܳܐ ܥܰܠ ܒܢ̈ܰܝ ܣܶܡܳܠܐܴ ܨܶܦܚܰܬ݀: ܒܶܗ ܨܶܗܝܽܘܢ ܡܫܰܩܰܠܬܳܐ ܐܶܬܡܰܟܟܰܬ݀ ܘܰܡܕܺܝܢܰܬ݀ ܨܳܠܽܘ̈ܒܶܐ ܐܶܬܥܰܩܪܰܬ݀: ܒܶܗ ܩܝܳܡܬܳܐ ܡܫܰܒܰܚܬܳܐ ܠܢܶܫ̈ܶܐ ܩܰܕܺܝ̈ܫܳܬܳܐ ܐܶܣܬܰܒܪܰܬ݀: ܘܬܽܘܪܰܥܬܳܐ ܚܶܘܝܳܝܬܳܐ ܐܶܬܬܣܺܝܓܰܬ݀ ܒܶܗ ܦܶܪܢܺܝܬܳܐ ܠܥܺܕܬܳܐ ܩܰܕܺܝܫܬܳܐ ܒܰܕܡܳܐ ܚܰܣܝܳܐ ܕܕܺܝܰܬܺܝܩܺܝ ܐܶܬܟܰܬܒܰܬ݀ ܘܟܰܠܬܳܐ ܨܳܠܽܘܒܬܳܐ ܘܡܰܣܠܳܝܬܳܐ ܡ̣ܶܢ ܒܶܝܬ ܐܰܒܳܐ ܐܶܬܛܰܪܕܰܬ݀. ܗ̇ܳܝ ܕܠܰܢܒܺܝ̈ܶܐ ܒܢܰܝ̈ܳܐ ܕܺܝܠܳܗ̇ ܩܶܛܠܰܬ݀ ܘܠܰܫܠܺܝ̈ܚܶܐ ܡܳܟܽܘܪ̈ܶܝܗ̇ ܪܶܓܡܰܬ݀: ܘܰܠܡܳܪܳܗ̇ ܥܰܠ ܩܰܝܣܳܐ ܙܶܩܦܰܬ݀: ܘܒܰܕܓܽܘܢ ܝܰܘܡܳܢܳܐ ܠܥܺܐܕܳܐ ܗܳܢܳܐ ܠܰܡܚܰܓܳܝܽܘ ܐܰܩܒܶܠܢܰܢ. ܗܳܢܳܐ ܝܰܘܡܳܢܳܐ ܕܒܶܗ ܥܺܕܬܳܐ ܩܰܕܺܝܫܬܳܐ ܚܳܕܝܳܐ: ܘܰܐܝܟ ܟܰܠܬܳܐ ܫܰܪܺܝܪܬܳܐ ܒܗܰܝܡܳܢܽܘܬܳܐ ܡܨܰܒܬܳܐ ܘܰܡܗܰܕܪܳܐ. ܘܰܒܚܽܘܒܳܐ ܚܰܡܺܝܡܳܐ ܘܕܰܟܝܳܐ ܡܢܰܒܪܫܳܐ: ܕܠܶܗ ܠܝܰܘܡܳܐ ܗܳܢܳܐ ܩܰܕܺܝܫܳܐ ܦܰܐܝܽܘܬ ܐܠܰܗܳܐܺܝܬ ܡܚܰܓܝܳܐ: ܟܰܕ ܩܳܪܝܳܐ ܒܩܰܪ̈ܢܳܬܳܐ ܢܒܺܝ̈ܳܝܳܬܳܐ: ܘܪܳܥܡܳܐ ܫܺܝܦܽܘܪ̈ܶܐ ܫܠܺܝ̈ܚܳܝܶܐ: ܟܰܕ ܒܰܒ̈ܢܳܬ ܩ̈ܳܠܐܷ ܕܫܽܘܒܚܳܐ ܠܳܥܙܳܐ ܚܰܠܝ̈ܳܬܳܐ ܘܕܳܝܨܳܐ ܪܽܘܚܳܢܳܐܺܝܬ: ܘܩܳܪܝܳܐ ܠܰܒܢܶܝ̈ܗ̇ ܒܟܽܠ ܥܺܐܕܳܐ ܘܠܳܥܙܳܐ ܘܰܡܢܰܨܪܳܐ ܒܦܽܘܡܳܗ̇ ܠܝܰܘܡܳܐ ܗܳܢܳܐ ܕܰܩܝܳܡܬܳܟ ܦܰܐܝܳܐܺܝܬ ܘܰܡܫܰܒܚܳܐ ܟܰܕ ܐܳܡܪܳܐ: ܒܪܺܝܟ ܗ̣ܽܘ ܥܺܐܕܳܐ ܕܰܩܝܳܡܬܳܟ ܕܒܶܗ ܗܘܳܐ ܫܰܝܢܳܐ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܒܪܺܝܟ ܗ̣ܽܘ ܥܰܕܥܺܐܕܳܐ ܕܰܩܝܳܡܬܳܟ ܕܒܶܗ ܗܘܳܬ݀ ܚܰܕܽܘܬܳܐ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ: ܒܪܺܝܟ ܗ̣ܽܘ ܥܺܐܕܳܐ ܕܒܶܗ ܐܶܬܓܡܰܪܘ ܛܽܘܦ̈ܣܶܐ ܘܒܶܗ ܐܶܣܬܰܝܰܟ̈ܝ ܦ̈ܶܠܐܴܬܳܐ: ܒܪܺܝܟ ܗ̣ܽܘ ܥܺܐܕܳܐ ܕܒܶܗ ܥܬܰܪܢܰܢ ܘܶܐܫܬܰܪܬܰܚܢܰܢ ܒܒܽܘܪ̈ܟܳܬܳܐ: ܒܰܕܓܽܘܢ ܡܦܺܝܣܺܝܢܰܢ ܠܳܟ ܡܳܪܝܳܐ ܐܠܰܗܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܕܰܬܩܰܒܶܠ ܡ̣ܶܢ ܐܺܝ̈ܕܰܝܳܐ ܕܺܝܠܰܢ ܚܰܛܳܝ̈ܶܐ ܥܰܒܕܰܝ̈ܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܘܰܐܥܒܰܪ ܘܒܰܛܶܠ ܡܶܢܰܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܒܝܰܕ ܒܽܘܪ̈ܟܳܬܶܗ ܕܝܰܘܡܳܐ ܗܳܢܳܐ ܩܰܕܺܝܫܳܐ: ܘܰܥܒܶܕ ܒܶܗ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܝܳܠܶܕܬܳܟ ܘܰܠܩܰܕܺܝ̈ܫܰܝܟ ܘܰܠܥܰܢܺܝ̈ܕܶܐ ܡܗܰܝܡ̈ܢܶܐ ܕܰܫܟܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܰܐܫܘܳܐ ܠܰܢ ܘܰܠܗܽܘܢ ܠܚܰܪܬܳܐ ܛܳܒܬܳܐ ܘܠܰܩܝܳܡܬܳܐ ܒܪܺܝܟܬܳܐ: ܘܰܠܓܰܠܝܽܘܬ ܐܰܦ̈ܶܐ ܕܰܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ: ܐܰܒܳܐ ܕܡܶܣܬܓܶܕ ܡ̣ܶܢ ܥܶܠܳܝ̈ܶܐ: ܘܰܒܪܳܐ ܕܡܶܣܬܰܒܪܳܐ ܩܝܳܡܬܶܗ ܡ̣ܶܢ ܬܰܚܬܳܝ̈ܶܐ: ܪܽܘܚܳܐ ܩܰܕܺܝܫܳܐ ܕܠܐܴ ܡܶܬܡܰܠܰܠ ܡ̣ܶܢ ܒܳܨܽܘܝ̈ܶܐ ܚܰܕ ܐܠܰܗܳܐ ܫܰܪܺܝܪܳܐ ܕܠܶܗ ܬܶܫܒ̈ܚܳܢ ܘܒܽܘܪ̈ܟܳܢ ܗܳܫܳܐ܀

ܫܠܡ

 

ܒܫܡ ܡܪܢ ܝܫܘܥ ܡܫܝܚܐ ܕܗܘܐ ܡܨܥܝܐ ܒܝܬ ܐܒܐ ܠܒܢܝ̈ܢܫܐ ܡܫܪܝܢܢ ܠܡܟܬܒ

ܬܡܢܝܐ ܛܟ̈ܣܐ ܡܨܥܝ̈ܐ ܕܩܝܡܬܐ ܦܪܘܩܝܬܐ

 

ܩܕܡܝܬ ܛܟܣܐ ܩܕܡܝܐ

ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܫܺܝܚܳܐ ܐܠܰܗܳܐ ܕܺܝܠܰܢ ܐܰܝܟܰܢܳܐ ܕܠܰܩܝܳܡܬܳܟ ܦܳܪܽܘܩܳܝܬܳܐ ܒܢܰܦ̈ܫܳܬܰܢ ܢܙܰܝܰܚ: ܘܒܳܗ̇ ܟܽܠ ܛܳܒ̈ܳܬܳܐ ܠܘܳܬܰܢ ܡܶܢܳܟ ܢܶܫܬܰܪܬܰܚ: ܘܰܠܘܳܬܳܟ ܒܓܰܠܝܽܘܬ ܐܰܦ̈ܶܐ ܢܶܦܪܰܚ ܟܰܕ ܥܠܰܘܗܝ ܕܰܨܠܺܝܒܳܐ ܩܰܕܺܝܫܳܐ ܛܳܝܣܺܝܢܰܢ: ܬܰܪܥܳܐ ܕܪ̈ܰܚܡܶܐ ܠܰܢ ܢܶܬܦܬܰܚ: ܘܥܰܠ ܥܰܦܪܳܐ ܣܝܳܢܳܝܳܐ ܡܶܫܬܪܶܐ ܪܽܘܟܳܒܰܢ: ܓܽܘܫܡܰܢ ܢܶܬܕܰܚܰܚ: ܐܰܫܘܳܐ ܠܰܢ ܠܫܽܘܠܳܡܳܐ ܛܳܒܳܐ ܡܰܪܘܰܚ ܘܰܠܡܰܦܩܳܢܳܐ ܒܪܺܝܟܳܐ ܕܠܳܟ ܚܳܫܰܚ: ܕܠܰܫܡܳܟ ܩܰܕܺܝܫܳܐ ܢܫܰܒܰܚ ܘܢܶܣܓܽܘܕ ܘܠܐܱܒܽܘܟ ܕܰܠܦܽܘܪܩܳܢܰܢ ܠܳܟ ܫܠܰܚ ܘܰܠܪܽܘܚܳܟ ܩܰܕܺܝܫܳܐ ܬܰܘܕܺܝܬܳܐ ܢܕܰܒܰܚ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܕܰܠܥܶܙ ܒܰܢܒܺܝܰܘ̈ܗܝ ܘܦ̈ܶܠܐܴܬܳܐ ܐܰܟܡܳܐ ܕܠܰܥܙܽܘܗܝ: ܘܶܐܬܥܰܠܺܝ ܠܰܨܠܺܝܒܳܐ ܐܰܟܡܳܐ ܕܪܰܡܙܽܘܗܝ ܘܶܐܫܬܺܝ ܚܰܠܐܴ ܘܰܡܪܳܪܳܐ ܕܠܶܗ ܪܰܫܡܽܘܗܝ: ܘܡܺܝܬ ܕܰܨܒܳܐ ܡ̣ܶܢ ܒܺܝ̈ܫܶܐ ܕܰܐܪܓܙܽܘܗܝ: ܐܳܦ ܐܶܬܩܒܰܪ ܟܰܕ ܚܰܝܰܘ̈ܗܝ ܐܺܝܬܝ̈ܳܝܶܐ ܠܐܴ ܫܰܒܩܽܘܗܝ. ܘܩܳܡ ܡ̣ܶܢ ܩܰܒܪܳܐ ܘܡܰܠܐܱܟ̈ܶܐ ܣܰܥܪܽܘܗܝ ܘܶܐܬܚܙܺܝ ܠܰܫܠܺܝ̈ܚܶܐ: ܘܗ̣ܶܢܽܘܢ ܒܟܽܠ ܦܶܢ̈ܝܳܢ ܐܰܟܪܙܽܘܗܝ ܕܠܶܗ ܝܳܐܶܐ ܫܽܘܒܚܳܐ ܡ̣ܶܢ ܦܽܘ̈ܡܶܐ ܕܠܐܴ ܛܰܠܡܽܘܗܝ ܣܶܓܕܬܳܐ ܘܺܐܝܩܳܪܳܐ ܡ̣ܶܢ ܥܰܡ̈ܡܶܐ ܕܗܰܝܡܳܢܽܘܬܶܗ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܐܰܒܳܐ ܗ̇ܰܘ ܕܰܕܠܐܴ ܫܽܘܪܳܝܳܐ ܐܺܝܬܰܝܟ ܐܺܝܬܝܳܐܺܝܬ: ܘܰܡܩܰܘܶܐ ܐܰܢ̱ܬ ܕܠܐܴ ܫܽܘܚܠܳܦܳܐ ܘܠܐܴ ܫܽܘܠܳܡܳܐ ܡܬܽܘܡܳܐܺܝܬ. ܗ̇ܰܘ ܕܟܰܕ ܠܐܴ ܫܶܦܪܰܬ݀ ܠܛܳܒܽܘܬܳܟ ܕܬܶܬܒܰܣܰܡ ܒܬܶܐܘܳܪܺܝܰܐ ܕܡܰܠܟܽܘܬܳܟ ܠܚܽܘܕܳܐܺܝܬ: ܒܪܰܝܬ ܠܡܰܠܐܱܟ̈ܶܐ ܘܰܩܪܰܝܬ ܐܶܢܽܘܢ ܗܰܘ̈ܢܶܐ ܬܪ̈ܰܝܳܢܶܐ ܚܰܟܺܝܡܳܐܺܝܬ ܕܢܶܗܘܽܘܢ ܡܫܰܡܫܺܝܢ ܠܳܟ ܗܰܘܢܳܐ ܩܰܕܡܳܝܳܐ ܒܳܪܽܘܝܗܽܘܢ ܐܠܰܗܳܐܺܝܬ. ܡ̣ܶܢ ܗ̇ܳܝ ܕܠܐܴ ܐܺܝܬܰܝܗܽܘܢ ܗܘܰܘ ܟܽܠܳܢܳܐܺܝܬ ܐܰܝܬܺܝܬ ܐܶܢܽܘܢ ܠܗ̇ܳܝ ܕܢܶܗܘܽܘܢ ܡܝܰܬܬܺܝܢ ܦܳܩܽܘܕܳܐܺܝܬ: ܘܒܳܬܰܪܟܶܢ ܫܦ̣ܰܪ ܠܨܶܒܝܳܢܳܟ ܛܳܒܳܐ ܠܐܴ ܡܶܬܕܰܪܟܳܢܳܐܺܝܬ ܒܰܡܕܰܒܪܳܢܽܘܬܳܟ ܗ̇ܳܝ ܕܠܐܴ ܡܶܬܡܰܠܠܐܴ ܡ̣ܶܢ ܒܢܰܝ̈ܢܳܫܳܐ ܡܶܬܥܰܩܒܳܢܳܐܺܝܬ. ܘܡ̣ܶܢ ܐܰܪܒܰܥ ܦܶܢ̈ܝܳܬܳܐ ܕܝܰܒܺܝܫܬܳܐ ܫܩܰܠܬ ܐܰܢ̱ܬ ܐܰܒܳܐ ܟܶܬܳܐ ܡܶܕܪܳܢܳܝܬܳܐ ܨܠܺܝܒܳܐܺܝܬ: ܒܳܬܰܪ ܕܫܰܡܠܺܝܬ ܟܽܠܗܶܝܢ ܗ̇ܳܢܶܝ̈ܢ ܕܰܗܘ̈ܰܝ ܘܶܐܬܒܪܺܝ ܬܡܺܝܗܳܐܺܝܬ: ܘܠܰܒܪܳܟ ܘܰܠܪܽܘܚܳܟ ܩܰܕܺܝܫܳܐ ܠܥܰܙܬ ܪܶܡܙܳܢܳܐܺܝܬ: ܟܰܕ ܡܫܰܘܕܰܥ ܐܰܢ̱ܬ ܥܰܠ ܫܰܘܝܽܘܬ ܟܝܳܢܳܐ ܘܨܶܒܝܳܢܳܐ ܕܺܝܠܳܟ ܠܰܕܡܶܣܬܰܟܰܠ ܚܰܟܺܝܡܳܐܺܝܬ ܕܬܰܘ ܕܢܶܥܒܶܕ ܐ̱ܢܳܫܳܐ ܒܨܰܠܡܰܢ ܘܒܰܕܡܽܘܬܰܢ ܕܢܶܬܒܰܣܰܡ ܒܰܥܒܳܕ̈ܶܐ ܕܺܝܠܰܢ ܘܰܒܬܶܐܘܳܪܺܝܰܐ ܕܫܽܘܒܚܰܢ ܐܰܡܺܝܢܳܐܺܝܬ: ܘܰܒܪܰܝܬ ܒܨܰܠܡܳܟ ܗ̇ܰܘ ܪܰܒܳܐ ܘܠܐܴ ܡܶܬܡܰܠܠܳܢܳ……..ܚܣܝܪ

 

 

ܛܟܣܐ ܕܬܪܝܢ ܕܚܕ ܒܫܒܐ ܕܩܝܡܬܐ ܕܛܟܣܐ ܡܨܥܝܐ

ܩܕܡܝܬ ܨܠܘܬܐ ܕܫܘܪܝܐ

 

ܢܽܘܗܪܳܐ ܡܫܺܝܚܳܐ ܕܰܣܠܶܩ ܠܰܨܠܺܝܒܳܐ: ܘܶܐܬܡܬܰܚ ܒܪܰܘܡܶܗ ܕܰܙܩܺܝܦܳܐ: ܘܰܦܫܰܛ ܐܺܝܕܰܘ̈ܗܝ ܘܰܐܙܺܝܥ ܠܐܱܪܒܰܥ ܦܶܢ̈ܝܳܬܳܐ ܘܰܐܬܺܝ ܠܣܶܓܕܬܶܗ ܥܰܡ̈ܡܶܐ ܘܶܐܡܘ̈ܳܬܳܐ. ܘܶܐܬܥܰܦܺܝ ܒܓܰܘ ܩܰܒܪܳܐ: ܘܶܐܬܡܢܺܝ ܥܰܡ ܥܰܢܺܝ̈ܕܶܐ: ܐܰܢ̱ܬ ܡܳܪܝ ܒܛܰܝܒܽܘܬܳܟ ܐܰܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܥܰܡ ܓܒܰܝ̈ܳܐ ܕܰܓܒܰܝܬ ܠܐܻܝܩܳܪܳܐ ܕܰܫܡܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܠܐܴ ܡܳܝܽܘܬܳܐ ܕܡܺܝܬ ܒܰܒܣܰܪ ܘܰܐܚܺܝ ܠܡܳܝܽܘ̈ܬܶܐ: ܘܶܐܬܬܣܺܝܡ ܒܓܰܘ ܩܰܒܪܳܐ ܘܢܰܚܶܡ ܠܰܩܒܺܝܪ̈ܶܐ: ܠܗ̇ܰܘ ܚܰܝܳܐ ܕܰܕܡܶܟ ܒܶܝܬ ܥܰܢܺܝ̈ܕܶܐ: ܘܰܐܥܺܝܪ ܠܕܰܡ̈ܟܶܐ: ܘܩܳܡ ܡ̣ܶܢ ܩܰܒܪܳܐ ܘܰܐܩܺܝܡ ܠܢܰܦ̈ܠܐܷ: ܘܶܐܬܢܰܚܰܡ ܒܫܽܘܒܚܳܐ ܘܚܰܕܺܝ ܠܬܰܠܡܺܝ̈ܕܰܘܗܝ. ܘܶܐܬܥܰܠܺܝ ܠܪܰܘܡܳܐ ܘܥܰܠܺܝ ܠܬܰܚܬܳܝ̈ܶܐ: ܘܫܰܡܠܺܝ ܫܽܘܘܕܳܝܶܗ ܘܰܓܡܰܪ ܠܚܰܣܺܝܪ̈ܶܐ ܘܶܐܬܳܐ ܒܫܽܘܒܚܳܐ ܕܰܢܕܽܘܢ ܠܒܶܪ̈ܝܳܬܳܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܳܪܝܳܐ ܡܪܰܝܡܳܐ ܘܰܕܚܺܝܠܐܴ ܘܰܗܕܺܝܪܳܐ ܒܚܰܝܠܐܴ ܕܝܰܡܺܝܢܶܗ: ܘܰܓܡܺܝܪܳܐ ܒܥܽܘܫܢܳܐ ܬܰܩܺܝܦܳܐ ܕܓܰܐܝܽܘܬܶܗ. ܓܰܢ̱ܒܳܪܳܐ ܕܰܒܣܽܘܓܳܐܐ ܕܬܽܘܩܦܶܗ ܣܚܰܦ ܠܣܳܢܰܐܘ̈ܗܝ ܘܰܒܥܽܘܫܢܳܐ ܕܚܰܝܠܶܗ ܒܰܕܰܪ ܠܰܒܥܶܠܕ̈ܒܳܒܶܐ ܕܟܺܐܢܽܘܬܶܗ ܬܰܩܺܝܦܳܐ ܕܰܫܕܳܐ ܒܝܰܡܳܐ ܠܦܶܪܥܽܘܢ ܡܶܬܝܰܕܥܳܢܳܐ ܘܰܠܚܰܝܠܶܗ: ܘܠܰܓܒܰܝ̈ܳܐ ܕܓܰܢ̱ܒܳܪ̈ܶܐ ܛܰܒܰܥ ܒܥܽܘܡܩܳܐ ܕܰܬܗܽܘܡܳܐ ܕܪܶܡܙܶܗ ܕܚܺܝܠܐܴ ܕܶܐܨܛܰܪܺܝܘ ܫܽܘ̈ܥܶܐ ܒܥܶܕܳܢܳܐ ܕܰܙܩܺܝܦܽܘܬܶܗ: ܡܥܰܠܝܳܐ ܕܶܐܬܦܰܟܰܪ ܒܰܐܣܽܘܪ̈ܶܐ ܕܡܰܘܬܳܐ ܡܶܛܽܠ ܒܶܪ̈ܝܳܬܶܗ: ܘܦܰܣܶܩ ܣܽܘ̈ܛܡܶܐ ܕܰܚܒܳܠܐܴ ܡ̣ܶܢ ܓܒܺܝܠܬܶܗ: ܡܳܪܝܳܐ ܕܡ̣ܶܢ ܫܶܢ̈ܶܐ ܕܰܫܝܽܘܠ ܒܳܠܰܥܬܳܐ ܐܰܦܶܩ ܠܨܰܠܡܶܗ ܘܡ̣ܶܢ ܓܰܘ ܥܓܳܢܳܐ. ܦܳܪܽܘܩܳܐ ܕܰܐܨܡܰܚ ܐܶܢܽܘܢ ܠܡܰܠܐܱܟ̈ܶܐ. ܒܝܰܘܡܳܐ ܕܢܽܘܚܳܡܶܗ: ܘܚܰܕܺܝ ܠܥܰܦܪ̈ܳܢܶܐ ܒܫܽܘܒܚܳܐ ܕܰܩܝܳܡܬܶܗ: ܝܰܘܡܳܢܳܐ ܒܗ̣ܶܬܘ ܙܳܩܽܘ̈ܦܶܐ ܕܰܟܦܰܪܘ: ܘܰܪܘܰܙܘ ܗܘܰܘ ܬܰܠܡܺܝ̈ܕܶܐ ܩܰܕܺܝ̈ܫܶܐ ܕܗܰܝܡܶܢܘ ܒܶܗ. ܐܶܬܟܰܦܰܪ̈ܝ ܕܶܡ̈ܥܶܐ ܕܚܰܘܳܐ ܕܚܶܕܝܰܬ݀ ܒܶܗ: ܘܰܥܒܰܪ ܐܶܒܠܐܴ ܕܳܐܕܳܡ ܕܰܛܦܰܣ ܒܶܗ. ܝܰܘܡܳܢܳܐ ܪ̈ܕܰܝ ܢܶܫ̈ܶܐ ܟܰܕ ܛܥܺܝ̈ܢܳܢ ܒܶܣ̈ܡܶܐ ܘܗܶܪ̈ܽܘܡܶܐ ܕܰܢܒܰܣ̈ܡܳܢ ܦܰܓܪܶܗ: ܘܰܗܦܰܟ̈ܝ ܡ̣ܶܢ ܩܰܒܪܳܐ ܟܰܕ ܛܥܺܝ̈ܢܳܢ ܫܽܘܘܕܳܥܳܐ ܕܰܩܝܳܡܬܶܗ: ܝܰܘܡܳܢܳܐ ܪܗܶܛܘ ܫܶܡܥܽܘܢ ܘܝܽܘܚܰܢܳܢ ܕܰܢܕܺܝܩܽܘܢ ܒܩܰܒܪܶܗ: ܘܣܰܒܰܪ ܐܶܢܽܘܢ ܡܰܠܐܱܟܳܐ ܩܰܕܺܝܫܳܐ ܥܰܠ ܢܽܘܚܳܡܶܗ. ܝܰܘܡܳܢܳܐ ܒܗܶܬܘ ܚܰܢܳܢ ܘܩܰܝܳܦܳܐ ܕܰܛܠܰܡܘ ܗܘܰܘ ܫܽܘܒܚܶܗ: ܘܰܪܘܰܙܘ ܦܶܛܪܽܘܣ ܘܰܐܢܕܪܶܐܘܳܣ ܕܗܰܝܡܶܢܘ ܒܶܗ. ܝܰܘܡܳܢܳܐ ܐܶܬܒܰܕܰܪܘ ܙܳܩܽܘ̈ܦܶܐ: ܘܰܒܗܶܬܘ ܩܶܣܛܽܘܢܳܪ̈ܶܐ ܕܢܳܛܪܺܝܢ ܗܘܰܘ ܩܰܒܪܶܗ. ܘܰܪܗܶܛܘ ܗܘܰܘ ܥܰܡ̈ܡܶܐ ܕܢܶܚܙܽܘܢ ܘܢܶܪܽܘܙܽܘܢ ܒܝܰܘܡܳܐ ܕܰܩܝܳܡܬܶܗ: ܝܰܘܡܳܢܳܐ ܛܪܺܝܕܳܐ ܨܶܗܝܽܘܢ ܘܦܳܗܝܳܐ ܒܶܝܬ ܥܰܡ̈ܡܶܐ ܕܰܐܣܠܝܰܬܶܗ. ܘܚܳܕܝܳܐ ܘܪܳܘܙܳܐ ܥܺܕܬܳܐ ܡܗܰܝܡܰܢܬܳܐ ܕܩܰܒܶܠܬܶܗ: ܝܰܘܡܳܢܳܐ ܚܳܕܶܝܢ ܘܪܳܘܙܺܝܢ ܥܰܡ̈ܡܶܐ ܕܗܰܝܡܶܢܘ ܒܶܗ: ܘܒܰܗܺܝܬ ܥܰܡܳܐ ܠܺܝܛܳܐ ܕܰܟܦܰܪ ܒܶܗ. ܝܰܘܡܳܢܳܐ ܚܰܕܽܘܬܳܐ ܪܰܒܬܳܐ. ܘܬܰܪܥܽܘܬܳܐ ܘܰܪܘܳܙܳܐ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܕܰܒܢܽܘܚܳܡܶܗ ܐܶܫܬܰܝܰܢܘ ܓܰܒ̈ܶܐ ܬܪ̈ܰܝܗܽܘܢ ܕܰܪܓܺܝܙܺܝܢ ܗܘܰܘ: ܠܳܟ ܡܳܪܝܳܐ ܕܗܳܠܶܝܢ ܟܽܠܗܶܝܢ ܛܰܝܒ̈ܘܳܬܳܐ ܠܐܴ ܡܶܬܦܰܪ̈ܥܢܳܝܳܬܳܐ ܣܥܰܪܬ ܠܘܳܬܰܢ ܒܚܽܘܒܳܟ ܣܰܓܺܝܳܐܐ. ܒܳܥܶܝܢܰܢ ܘܠܳܟ ܡܶܬܟܰܫܦܺܝܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬܩܰܒܶܠ ܐܶܢܽܘܢ ܒܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳܢܺܝܬܳܐ: ܘܰܥܒܰܕ ܐܶܢܽܘܢ ܠܰܢܝ̇ܳܚܳܐ ܕܰܐܠܳܗܽܘܬܳܟ ܘܰܠܬܰܪܥܽܘܬܳܐ ܘܠܰܡܫܰܝܢܽܘܬܳܐ ܕܰܡܪܰܚܡܳܢܽܘܬܳܟ ܘܰܐܢܗܰܪ ܠܥܰܝ̈ܢܶܐ ܕܪ̈ܶܥܝܳܢܰܝܢ: ܒܢܽܘܗܪܳܐ ܫܰܪܺܝܪܳܐ ܕܰܩܝܳܡܬܳܟ: ܐܰܝܟ ܕܰܠܢܶܫ̈ܶܐ ܩܰܕܺܝ̈ܫܳܬܳܐ ܕܰܚ̈ܙܰܝ ܢܽܘܚܳܡܳܟ. ܘܰܐܠܒܶܫ ܐܶܢܽܘܢ ܠܒܽܘ̈ܫܶܐ ܦܰܐܝ̈ܳܐ ܕܬܶܫܒܽܘܚܬܳܐ ܐܰܝܟ ܕܰܠܡܰܠܐܱܟ̈ܶܐ ܕܶܐܬܘܰܥܰܕܘ ܗܘܰܘ ܠܩܰܒܪܳܟ ܩܰܕܺܝܫܳܐ. ܘܟܰܠܶܠ ܐܶܢܽܘܢ ܒܰܟܠܺܝ̈ܠܐܷ ܕܙܳܟܽܘܬܳܐ: ܘܡܰܢܰܥ ܐܶܢܽܘܢ ܒܓܰܠܝܽܘܬ ܐܰܦ̈ܶܐ ܠܝܰܘܡܳܐ ܕܓܶܠܝܳܢܳܟ: ܘܰܐܫܘܳܐ ܐܶܢܽܘܢ ܘܠܰܢ ܥܰܡܗܽܘܢ: ܕܥܰܡ ܦܰܪܶܗܣܺܝܰܐ ܢܶܦܓܰܥ ܒܳܟ. ܘܰܒܚܰܕܽܘܬܳܐ ܢܩܰܒܠܳܟ: ܘܒܰܪܘܳܙܳܐ ܢܶܣܓܽܘܕ ܠܛܰܝܒܽܘܬܳܟ: ܘܒܰܕܝܳܨܳܐ ܢܫܰܒܰܚ ܠܫܳܠܽܘܚܳܟ ܘܰܢܗܰܕܰܪ ܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܗܰܒܳܒܳܐ ܗܰܢܺܐܝ ܪܺܝܚܳܐ ܗ̇ܰܘ ܕܒܰܫܝܽܘܠ ܒܳܠܥܰܬ݀ ܓܰܢ̱ܒܳܪ̈ܶܐ ܪܺܝܚܶܗ ܦܳܚ: ܘܰܠܡܺܝ̈ܬܶܐ ܥܓܺܝ̈ܢܶܐ ܕܚܰܠܶܨ ܘܰܫܪܳܐ ܒܳܗ̇ ܒܺܝܫܳܐ ܚܰܝܠܬܳܢܳܐܺܝܬ ܒܰܣܶܡ: ܘܰܬܠܳܬܳܐ ܝܰܘ̈ܡܺܝܢ ܒܳܗ̇ ܟܰܬܰܪ: ܒܗ̇ܳܝ ܠܰܬܠܳܬܳܐ ܒܥܶܠܕ̈ܒܳܒܶܐ ܫܰܦܶܠ ܒܰܩܝܳܡܬܶܗ: ܠܐܴܟܶܠܩܰܪܨܳܐ ܘܰܚܛܺܝܬܳܐ ܘܡܰܘܬܳܐ. ܐܰܢ̱ܬ ܡܳܪܝ ܠܙܰܦܪܽܘܬܳܐ ܕܰܚܛܳܗܰܝ̈ܢ ܒܝܰܕ ܗܰܢܺܝܐܘܽܬ ܪܺܝܚܳܐ ܕܰܩܝܳܡܬܳܟ ܡܫܰܒܰܚܬܳܐ. ܘܰܐܫܺܝܓ ܘܰܡܪܽܘܩ ܡܶܢܰܢ ܒܝܰܕ ܥܶܛܪܳܐ ܕܒܶܣ̈ܡܶܐ ܗܳܠܶܝܢ ܕܡ̣ܶܢ ܒܨܺܝܪܽܘܬܰܢ ܐܶܬܩܰܪܰܒ ܠܳܟ ܡܳܪܝܳܐ ܡܒܰܣܶܡ ܠܥܳܢ̈ܳܗ̇ ܒܢܽܘܗܪܳܐ ܦܰܐܝܳܐ ܕܰܩܝܳܡܬܶܗ: ܗܳܫܳܐ܀

 

ܚܘܬܡܐ

ܡܫܺܝܚܳܐ ܚܰܬܢܳܐ ܕܰܫܪܳܪܳܐ ܕܰܠܥܺܕܬܳܟ ܩܰܕܺܝܫܬܳܐ ܨܰܒܶܬܬܳܗ̇: ܒܦܰܐܝܽܘܬܳܐ ܒܝܰܘܡܳܐ ܕܰܩܝܳܡܬܳܟ. ܐܠܰܒܶܫ ܠܰܢ ܠܒܽܘ̈ܫܶܐ ܚܶܘܳܪ̈ܶܐ ܕܰܥܒܳܕ̈ܶܐ ܛܳܒ̈ܶܐ ܕܢܶܪܕܶܐ ܒܽܐܘܪܚܳܐ ܕܢܳܡܽܘ̈ܣܰܝܟ ܐܺܝܡܳܡܳܐ ܘܠܺܠܝܳܐ. ܘܨܰܒܶܬ ܠܰܢ ܒܶܐܣܛܠܐܴ ܕܬܶܫܒܽܘܚܬܳܐ ܐܰܝܟܰܢܳܐ ܕܥܰܡ ܚܕܽܘ̈ܓܶܐ ܕܰܚܠܽܘܠܳܟ ܒܰܓܢܽܘܢܳܐ ܡܠܐܷ ܢܽܘܗܪܳܐ ܢܫܰܒܚܳܟ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܢܽܘܗܪܳܐ ܫܒܺܝܚܳܐ ܘܰܐܠܳܗܳܝܳܐ ܠܗ̇ܰܘ ܕܶܐܬܬܰܚܬܺܝ ܠܒܶܝܬ ܡܺܝ̈ܬܶܐ ܒܪܶܚܡܰܬ݀ ܐ̱ܢܳܫܽܘܬܶܗ: ܠܗ̇ܰܘ ܕܰܣܥܰܪ ܐܶܢܽܘܢ ܠܰܩܒܺܝܪ̈ܶܐ ܒܛܰܝܒܽܘܬܶܗ: ܘܶܐܫܬܰܘܕܺܝ ܠܗܽܘܢ ܢܽܘܚܳܡܳܐ ܘܰܐܬܪܳܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܒܳܬܰܪ ܩܝܳܡܬܶܗ ܕܡ̣ܶܢ ܩܰܒܪܳܐ: ܠܗ̇ܰܘ ܡܶܛܪܳܐ ܕܚܰܝ̈ܶܐ ܕܪܰܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܛܰܠܐܴ ܕܪ̈ܰܚܡܶܐ ܘܕܰܚܢܳܢܳܐ ܘܰܕܚܰܝܽܘܣܬܳܢܽܘܬܳܐ ܕܠܶܗ ܝܳܐܶܐ ܫܽܘܒܚܳܐ܀

ܣܕܪܐ

 

ܡܳܪܝܳܐ ܐܠܰܗܳܐ ܐܰܚܺܝܕ ܟܽܠ ܕܚܺܝܠܐܴ ܘܰܡܫܰܒܚܳܐ ܕܣܳܥܰܪ ܬܶܕܡܪ̈ܳܬܳܐ ܓܰܢ̱ܒܳܪܳܐ ܘܦܳܪܽܘܩܳܐ ܕܥܳܠܡ̈ܶܐ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܘܡܰܢܗܪܳܢܳܐ ܕܚܶܫܽܘ̈ܟܶܐ. ܗ̇ܰܘ ܕܟܰܕ ܚܙܰܝܬ ܠܓܶܢܣܰܢ ܡܚܺܝܠܐܴ ܘܬܰܚܽܘܒܳܐ ܕܰܠܚܰܙܶܝ̈ܗ̇ ܕܰܫܝܽܘܠ ܢܚܶܬ: ܘܒܰܥܒ̇ܳܪ ܦܽܘܩܕܳܢܳܐ ܐܶܫܬܰܪܓܰܠ ܘܰܢܦܰܠ. ܚܰܝܽܘܣܬܳܢܳܐܺܝܬ ܘܪܶܚܡܰܬ݀ ܐ̱ܢܳܫܳܐܺܝܬ ܥܰܡܰܢ ܐܶܬܚܰܫܰܚܬ: ܐܰܪܟܶܢܬ ܫܡܰܝܳܐ ܘܰܢܚܶܬܬ: ܘܠܐܱܪܥܳܐ ܕܟܽܘ̈ܒܶܐ ܒܨܶܒܝܳܢܳܟ ܐܶܬܬܰܚܬܺܝܬ: ܘܰܫܩܰܠܬ ܟܽܠܳܗ̇ ܡܕܰܒܪܳܢܽܘܬܳܐ ܒܥܳܠܡܳܐ: ܐܳܦ ܐܶܬܚܙܰܝܬ ܥܠܰܘܗܝ ܐܠܰܗܳܐܺܝܬ ܘܐ̱ܢܳܫܳܐܺܝܬ. ܘܟܰܕ ܣܳܡܬ ܐܰܦܰܝ̈ܟ ܕܬܶܥܽܘܠ ܠܒܶܝܬ ܡܺܝ̈ܬܶܐ: ܘܬܶܣܥܽܘܪ ܠܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܥܳܠܰܡ ܠܳܟ ܡܣܰܟܶܝܢ ܗܘܰܘ: ܘܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܚܰܘܺܝܬ: ܢܽܘܗܪܳܐ ܕܙܳܟܶܐ ܠܚܶܫܽܘܟܳܐ: ܟܺܐܢ̈ܶܐ ܘܙܰܕܺܝ̈ܩܶܐ ܕܰܡܒܰܪܟܺܝܢ ܓܰܪ̈ܡܶܐ ܡܺܝ̈ܬܶܐ ܕܩܳܺܢܶܝܢ ܡܰܪܓܫܳܢܽܘܬܳܐ. ܩܰܒܪ̈ܶܐ ܛܡܺܝ̈ܡܶܐ ܕܡܶܬܦܰܬܚܺܝܢ: ܗܳܡܳܢ ܕܡܶܬܥܰܩܪܳܐ ܡ̣ܶܢ ܫܶܪ̈ܫܶܝܗ̇. ܡܰܘܬܳܐ ܛܪܽܘܢܳܐ ܕܡܰܝܠܶܠ. ܘܟܰܕ ܒܒܶܝܬ ܡܺܝ̈ܬܶܐ ܝܰܘ̈ܡܶܐ ܬܠܳܬܳܐ ܩܰܘܺܝܬ: ܘܰܒܫܽܘܒܚܳܐ ܪܰܒܳܐ ܩܳܡܬ ܘܶܐܬܢܰܚܰܡܬ: ܘܡ̣ܶܢ ܗܳܪܟܳܐ ܥܺܝܪ̈ܶܐ ܘܡܰܠܐܱܟ̈ܶܐ ܕܰܡܝܰܒܒܺܝܢ ܘܰܒܢ̈ܝ ܢܽܘܗܪܳܐ ܕܰܒܚܶܘܳܪ̈ܰܝܗܽܘܢ ܡܰܙܗܪܺܝܢ: ܡܫܰܡ̈ܫܳܢܶܐ ܕܫܰܠܗܶܒܺܝܬܳܐ ܕܫܰܝܢܳܐ ܘܰܫܠܳܡܳܐ ܡܰܟܪܙܺܝܢ: ܗܳܡܳܢ ܕܡܺܝ̈ܬܶܐ ܕܡܰܠܝܳܐ ܡܫܰܒ̈ܚܳܢܶܐ ܢܶܫ̈ܶܐ ܕܰܡܣܰܒܳܪ̈ܢ ܚܰܕܽܘܬܳܐ ܬܰܠܡܺܝ̈ܕܶܐ ܕܠܰܚܕ̈ܳܕܶܐ ܐܳܡܪܺܝܢ. ܕܩܳܡ ܠܗܽܘܢ ܪܰܒܗܽܘܢ. ܪܘܳܙܳܐ ܘܕܰܘܨܳܐ ܕܡܶܫܬܡܰܥ ܒܝܽܘܡ ܚܰܕ ܒܫܰܒܳܐ ܕܰܩܝܳܡܬܳܐ ܦܽܘܪܩܳܢܳܐ ܕܡܶܬܟܪܶܙ: ܥܶܠܳܝ̈ܶܐ ܕܡܶܬܚܰܠܛܺܝܢ ܥܰܡ ܬܰܚܬܳܝ̈ܶܐ: ܛܪ̈ܺܝܕܶܐ ܬܽܘܒ ܕܰܡܥܰܢܶܝܢ ܦܨܺܝܚܽܘܬܳܐ ܕܥܰܡ ܚܰܕܽܘܬܳܐ ܦܢܰܘ ܠܐܱܬܪܗܽܘܢ ܩܰܕܡܳܝܳܐ ܘܰܚܢܰܢ ܥܰܡܗܽܘܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܕܝܰܘܡܰܐ ܗ̱̇ܘ ܕܚܰܕܽܘܬܳܐ ܘܰܕܝܳܨܳܐ: ܝܰܘܡܰܐ ܗ̱̇ܘ ܡܰܢܗܪܳܢܳܐ ܕܚܶܫܽܘ̈ܟܶܐ: ܝܰܘܡܰܐ ܗ̱̇ܘ ܕܩܳܪܶܐ ܠܳܟ ܠܘܳܬ ܫܠܳܡܳܐ: ܝܰܘܡܰܐ ܗ̱̇ܘ ܕܒܶܗ ܫܰܝܶܢ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܕܰܪܓܺܝܙܺܝܢ ܗܘܰܘ. ܝܰܘܡܰܐ ܗ̱̇ܘ ܕܒܶܗ ܐܶܬܬܰܪܰܥ ܣܝ̇ܳܓܳܐ ܕܰܒܥܶܠܕܒܳܒܽܘܬܳܐ: ܗ̇ܰܘ ܕܩܳܐܶܡ ܗܘܳܐ ܒܰܡܨܰܥܬܳܐ: ܝܰܘܡܰܐ ܗ̱̇ܘ ܕܒܶܗ ܐܶܬܬܪܨܶܨ ܪܺܝܫܶܗ ܕܚܶܘܝܳܐ ܛܰܪܟܳܢܳܐ: ܝܰܘܡܰܐ ܗ̱̇ܘ ܕܒܶܗ ܐܶܙܕܟܺܝ ܐܳܟܶܠܩܰܪܨܳܐ: ܘܶܐܬܒܰܕܰܪܘ ܚܰܝܠܰܘ̈ܳܬܶܗ. ܝܰܘܡܰܐ ܗ̱̇ܘ ܕܒܶܗ ܐܶܬܒܰܙܙܰܬ݀ ܫܝܽܘܠ ܕܳܘܺܝܬܳܐ ܘܶܐܬܬܰܒܰܪܘ ܡܽܘܟ̈ܠܶܝܗ̇: ܝܰܘܡܰܐ ܗ̱̇ܘ ܕܒܶܗ ܐܶܬܦܰܢܺܝ ܐܳܕܳܡ ܛܪܺܝܕܳܐ ܠܰܥܕܶܝܢ ܝܳܪܬܽܘܬܶܗ. ܝܰܘܡܰܐ ܗ̱̇ܘ ܕܒܶܗ ܩܳܡ ܡܢܰܚܡܳܢܳܐ ܕܡܺܝ̈ܬܶܐ ܘܰܡܩܺܝܡܳܢܳܐ ܕܰܩܒܺܝܪ̈ܶܐ ܝܰܘܡܰܐ ܗ̱̇ܘ ܕܒܶܗ ܚܳܕܶܝܢ ܬܰܠܡܺܝ̈ܕܶܐ ܘܰܟܡܺܝܪܺܝܢ ܝܽܘ̈ܕܳܝܶܐ: ܝܰܘܡܰܐ ܗ̱̇ܘ ܕܒܶܗ ܐܶܬܛܰܠܰܩ̈ܝ ܥܰܪ̈ܦܶܠܐܷ ܕܚܶܫܽܘܟܳܐ ܡ̣ܶܢ ܦܶܢ̈ܝܳܬܳܐ: ܘܰܕܢܰܚ ܢܽܘܗܪܳܐ ܪܰܒܳܐ ܥܰܠ ܟܽܠܗܶܝܢ ܒܶܪ̈ܝܳܬܳܐ: ܘܡܶܛܽܠ ܗܳܕܶܐ ܠܳܟ ܡܦܺܝܣܺܝܢܰܢ ܡܳܪܝܳܐ ܡܪܰܚܡܳܢܳܐ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܕܒܶܗ ܠܟܽܠܰܢ ܢܰܛܰܪ ܘܫܰܘܙܶܒ ܡ̣ܶܢ ܢܶܟܝ̈ܳܢܶܐ. ܘܰܠܥܺܕܬܳܟ ܩܰܕܺܝܫܬܳܐ ܪܰܡܪܶܡ ܩܰܪܢܳܗ̇ ܒܰܐܪܒܰܥ ܦܶܢ̈ܝܳܬܳܐ: ܠܪ̈ܳܥܰܘܳܬܳܗ̇ ܕܰܒܰܪ ܒܕܶܚܠܬܳܟ ܠܟܳܗ̈ܢܶܐ ܙܰܗܳܐ ܒܢܰܟܦܽܘܬܳܐ ܘܰܠܣܳܓܽܘ̈ܕܰܝܟ ܦܪܽܘܩ ܘܫܰܘܙܶܒ ܠܚܰܛܳܝ̈ܶܐ ܚܰܣܳܐ: ܠܬܰܝ̈ܳܒܶܐ ܩܰܕܶܫ ܠܰܕܩܳܪܶܝܢ ܠܳܟ ܥܢܺܝ ܐܳܦ ܠܰܫܟܺܝ̈ܒܰܝ ܥܰܠ ܣܰܒܪܳܟ ܐܰܢܺܝܚ ܐܶܢܽܘܢ ܒܰܡ̈ܛܰܠܠܐܷ ܕܢܽܘܗܪܳܐ: ܘܰܠܟܽܠܗܽܘܢ ܡ̣ܶܢ ܓܰܒܳܟ ܝܰܡܺܝܢܳܝܳܐ ܐܰܩܺܝܡ: ܘܠܰܢ ܥܰܡܗܽܘܢ. ܐܰܝܟܰܢܳܐ ܕܰܚܢܰܢ ܘܥܰܢܺܝ̈ܕܰܝܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܚܰܕ ܟܝܳܢܳܐ ܡܥܰܠܝܳܐ ܘܰܓܢܺܝܙܳܐ: ܐܺܝܬܝܳܐ ܡܬܽܘܡܳܝܳܐ ܘܰܕܠܐܴ ܫܽܘܚܠܳܦܳܐ ܘܫܽܘܓܢܳܝܳܐ ܡܩܰܘܶܐ: ܒܳܪܽܘܝܳܐ ܘܥܳܒܽܘܕܳܐ ܕܟܽܠ ܘܰܡܬܰܩܢܳܢܳܐ ܘܰܐܚܺܝܕ ܟܽܠ: ܗ̇ܰܘ ܕܒܰܬܠܳܬܳܐ ܩܢܽܘ̈ܡܶܐ ܡܶܬܺܝܕܰܥ: ܫܘܰܝ̈ܳܐ ܟܺܝܬ ܘܠܐܴ ܣܕܺܝ̈ܩܶܐ ܘܠܐܴ ܦܠܺܝ̈ܓܶܐ ܕܟܰܕ ܡܚܰܝܕܺܝܢ ܦܠܺܝܓܺܝܢ ܘܟܰܕ ܦܠܺܝܓܺܝܢ ܡܚܰܝܕܺܝܢ ܕܠܰܝܬ ܒܗܽܘܢ ܩܰܕܡܳܝܳܐ ܘܰܐ̱ܚܪܳܝܳܐ ܐܰܘ ܕܰܡܥܰܠܰܝ ܐܰܘ ܕܰܒܨܺܝܪ: ܬܠܺܝܬܳܝܽܘܬܳܐ ܠܰܘ ܕܡܶܢܝܳܢܳܐ: ܘܠܰܘ ܕܢܰܩܺܝܦܳܐ ܠܳܗ̇ ܪܒܺܝܥܳܝܽܘܬܳܐ: ܐܶܠܐܴ ܕܡܶܬܬܰܘܕܝܳܐ ܘܡܶܬܗܰܝܡܢܳܐ ܚܰܕ ܐܠܰܗܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܠܚܰܕ ܐܰܒܳܐ ܩܰܕܺܝܫܳܐ ܡܰܘܕܶܝܢܰܢ ܘܠܰܒܪܳܐ ܝܺܚܺܝܕܳܝܳܐ ܣܳܓܕܺܝܢܰܢ ܘܡܰܘܕܶܝܢܰܢ ܒܰܐܝܠܶܝܢ ܕܺܐܝܬ ܠܶܗ: ܠܰܘ ܥܦܺܝ̈ܦܶܐ: ܐܶܠܐܴ ܦܫܺܝܛܳܐ ܕܶܐܬܪܰܟܰܒ. ܪܽܘܚܳܢܳܐ ܕܶܐܬܓܰܫܰܡ: ܐܠܰܗܳܐ ܕܶܐܬܒܰܪܢܰܫ ܟܰܣܝܳܐ ܕܶܐܬܓܠܺܝ ܚܶܟܡܬܳܐ ܕܶܐܬܢܰܦܰܫ: ܡܰܠܝܳܐ ܕܶܐܣܬܰܪܰܩ ܥܰܬܺܝܪܳܐ ܕܶܐܬܡܰܣܟܰܢ: ܕܰܐܝܟ ܕܰܒܛܰܝܒܽܘ ܦܢܳܐ ܘܰܫܩܰܠ ܗܳܠܶܝܢ ܕܺܝܠܰܢ ܐܺܝܬܰܘܗܝ ܟܽܠܶܗ ܒܰܪܢܳܫܳܐ ܘܟܽܠܶܗ ܐܠܰܗܳܐ. ܥܰܠ ܕܠܐܴ ܐܶܫܬܰܚܠܰܦ: ܡܶܠܬܳܐ ܕܰܗܘܳܐ ܒܶܣܪܳܐ ܐܶܬܢܣܶܒ ܡ̣ܶܢ ܡܶܠܬܳܐ: ܘܶܐܬܺܝܕܰܥ ܒܰܪܢܳܫܳܐ: ܕܢܰܦܫܶܗ ܠܰܩܢܽܘܡܶܗ ܦܳܪܽܘܫܳܐܺܝܬ: ܗ̇ܰܘ ܕܺܝܠܺܝܕ ܡ̣ܶܢ ܩܕܳܡ ܥܳܠܡ̈ܶܐ ܕܠܐܴ ܐܶܡܳܐ ܘܶܐܬܒܰܣܰܪ ܘܶܐܬܺܝܠܶܕ ܡ̣ܶܢ ܒܰܪܬ ܕܰܘܺܝܕ ܦܰܓܪܳܢܳܐܺܝܬ ܕܢܰܘܠܶܕ ܠܰܢ ܪܽܘܚܳܢܳܐܺܝܬ. ܘܰܫܪܳܐ ܒܡܰܪܒܥܳܐ ܘܶܐܬܒܛܶܢ ܕܠܐܴ ܪܶܓܬܳܐ: ܘܶܐܬܺܝܠܶܕ ܕܠܐܴ ܙܽܘܘܳܓܳܐ ܘܰܢܦܰܩ ܡ̣ܶܢ ܟܰܪܣܳܗ̇ ܕܰܛܠܺܝܬܳܐ: ܘܰܒܬܽܘܠܬܳܐ ܩܰܘܝܰܬ݀ ܒܳܬܰܪ ܝܰܠܕܳܗ̇ ܐܰܝܟ ܕܺܐܝܬܶܝܗ̇: ܘܰܐܝܟ ܕܟܰܬܰܪ ܗ̣ܽܘ ܐܠܰܗܳܐ ܟܰܕ ܗܘܳܐ ܒܰܪܢܳܫܳܐ: ܘܗܳܠܶܝܢ ܥܒܰܕ ܘܗܰܠܶܟ ܥܰܡܰܢ ܐܰܟܘܳܬܰܢ ܒܥܳܠܡܳܐ: ܘܰܫܪܳܐ ܒܰܬܠܳܬܳܐ ܐܰܘܳܢܺܝ̈ܢ ܒܝܰܠܕܳܐ ܒܶܐܡܳܐ ܕܺܝܠܶܗ ܡܰܪܝܰܡ ܒܰܥܡܳܕܶܗ ܒܝܽܘܪܕܢܳܢ ܢܰܗܪܳܐ: ܘܒܰܩܒܽܘܪܬܳܐ ܒܰܫܝܽܘܠ ܒܳܥܠܰܬ݀ ܓܰܢ̱ܒܳܪ̈ܶܐ ܐܰܝܟܳܐ ܕܰܚܒܺܝܫ ܗܘܳܐ ܨܰܠܡܳܐ ܡܰܠܟܳܝܳܐ ܕܶܐܬܚܰܒܰܠ ܒܰܚܛܺܝܬܳܐ. ܡܶܛܽܠ ܕܠܐܴ ܡܰܨܝܳܐ ܗܘܳܬ݀ ܕܢܶܥܽܘܠ ܠܗܳܡܳܢ ܕܠܐܴ ܡܳܐܶܬ ܘܠܐܴ ܕܠܺܝܠܐܴ ܗܘܳܬ݀ ܕܰܢܡܽܘܬ ܡ̇ܰܢ ܕܠܐܴ ܡܓܰܫܰܡ: ܐܶܬܒܰܪܢܰܫ ܕܢܶܗܘܶܐ ܦܫܺܝܩ ܠܶܗ ܕܰܢܡܽܘܬ: ܘܡܺܝܬ ܟܰܕ ܢܛܺܝܪܺܝܢ ܠܶܗ ܚܰܝ̈ܶܐ ܕܰܟܝܳܢܶܗ. ܗ̇ܰܘ ܕܳܐܦܶܢ ܒܳܗ̇ ܒܰܡܚܺܝܠܽܘܬܳܐ ܐܶܙܕܩܶܦ ܐܶܠܐܴ ܒܡܰܘܬܶܗ ܗܰܝܡܶܢܢܰܢ ܘܺܝܕܰܥܢܰܢ: ܕܠܰܘ ܡܶܛܽܠ ܕܢܶܚܰܫ ܚܰܫ: ܐܶܠܐܴ ܕܢܶܚܰܫ ܐܶܢܽܘܢ ܠܚܰܫ̈ܶܐ ܒܚܰܫܶܗ: ܐܳܦ ܢܶܩܛܽܘܠ ܠܡܰܘܬܳܐ ܒܰܐܬܪܶܗ. ܘܒܳܬܰܪ ܕܶܐܬܡܰܠܝܰܬ݀ ܟܽܠܳܗ̇ ܡܕܰܒܪܳܢܽܘܬܶܗ ܐܠܰܗܳܝܬܳܐ: ܗܦܰܟ ܣܠܶܩ ܠܐܱܬܰܪ ܕܺܐܝܬܰܘܗܝ ܗܘܳܐ ܡ̣ܶܢ ܩܕܺܝܡ: ܪܽܘܚܳܐ ܫܘܶܐ ܠܶܗ ܒܽܐܘܣܺܝܰܐ ܒܪܶܚܡܰܬ݀ ܐ̱ܢܳܫܽܘܬܳܐ ܕܺܝܠܶܗ ܘܕܰܐܒܽܘܗܝ: ܘܟܰܕ ܠܦܳܠܚܰܘ̈ܗܝ ܫܠܺܝ̈ܚܶܐ ܩܰܕܺܝ̈ܫܶܐ ܫܰܕܰܪ. ܘܡ̣ܶܢ ܗܳܪܟܳܐ ܟܽܠܰܢ ܡܶܬܟܰܫܦܺܝܢܰܢ ܠܶܗ: ܕܰܐܝܟܰܢܳܐ ܕܰܒܡܰܘܠܳܕܶܗ ܐܶܬܺܝܠܶܕܢܰܢ ܘܰܒܬܰܪܒܺܝܬܶܗ ܐܶܬܝܰܬܰܪܢܰܢ: ܘܒܰܥܡܳܕܶܗ ܙܰܟܳܝܳܐ ܐܶܬܕܰܟܺܝܢܰܢ: ܘܰܒܬܰܟܬܽܘܫܶܗ ܢܨܰܚܢܰܢ: ܘܰܒܟܶܢܦܶܗ ܣܒܰܥܢܰܢ ܘܰܒܨܶܗܝܶܗ ܐܬܦܰܝܰܓܢܰܢ ܘܰܒܚܰܫܶܗ ܐܶܬܚܰܪܰܪܢܰܢ: ܘܰܒܡܰܘܬܶܗ ܚܝܰܝܢܰܢ ܘܒܰܩܒܽܘܪܬܶܗ ܐܶܬܢܰܚܰܡܢܰܢ ܘܒܰܩܝܳܡܬܶܗ ܕܡ̣ܶܢ ܩܰܒܪܳܐ ܐܶܬܬܰܪܰܨܢܰܢ: ܕܢܰܫܘܶܐ ܠܰܢ ܠܩܰܘܡܳܐ ܕܠܐܴ ܒܶܗܬܬܳܐ ܕܰܩܕܳܡܰܘܗܝ ܘܰܠܪ̈ܰܚܡܶܐ ܘܰܠܫܽܘܒܩܳܢܳܐ ܕܣܰܟܠܘ̈ܳܬܳܐ: ܘܰܒܝܰܕ ܡܕܰܒܪܳܢܽܘܬܳܐ ܕܚܰܝ̈ܶܐ ܕܠܐܴ ܡܳܝܽܘܬܽܘܬܳܐ ܕܺܝܠܶܗ: ܢܶܣܰܒ ܡܳܝܽܘܬܽܘܬܳܐ ܗ̇ܳܝ ܕܡܶܣܬܰܟܝܳܐ ܠܩܰܕܺܝ̈ܫܶܐ ܒܰܐܬܪܳܐ ܕܢܽܘܗܪܳܐ: ܕܰܡܪܰܝܰܡ ܡ̣ܶܢ ܚܰܫ̈ܶܐ ܘܥܳܩ̈ܳܬܳܐ: ܘܡܰܠܟܽܘܬܳܐ ܕܰܫܡܰܝܳܐ ܕܠܐܴ ܦܳܛܪܳܐ ܘܠܐܴ ܡܶܫܬܰܪܝܳܐ: ܗ̇ܰܘ ܕܰܒܛܰܝܒܽܘܬܶܗ ܘܰܒܪ̈ܰܚܡܰܘܗܝ ܘܕܰܐܒܽܘܗܝ ܘܰܕܪܽܘܚܶܗ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܚܰܕܳܐ ܠܠܶܒܰܘ̈ܳܬܰܢ ܒܚܽܘܒܳܟ: ܘܰܐܦܨܰܚ ܪ̈ܶܥܝܳܢܰܝܢ ܒܪܶܚܡܬܳܟ: ܘܰܐܫܦܰܥ ܒܽܘܪ̈ܟܳܬܳܟ ܥܰܠ ܟܽܠܰܢ. ܒܝܰܘܡܳܐ ܕܰܩܝܳܡܬܳܟ ܡܫܺܝܚܳܐ ܡܰܠܟܰܢ ܡܳܪܳܗ̇ ܕܬܶܫܒܽܘܚܬܳܐ: ܘܰܐܫܘܳܐ ܠܰܢ ܕܰܓܡܺܝܪܳܐܺܝܬ ܒܟܽܠܶܗ ܒܰܪܢܳܫܰܢ ܡܫܰܡܠܝܳܐ: ܕܢܰܘܕܶܐ ܘܰܢܫܰܒܰܚ ܠܡܳܪܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܐܺܝܬܝܳܐ ܡܬܽܘܡܳܝܳܐ ܘܠܐܴ ܡܶܣܬܰܝܟܳܢܳܐ ܠܗ̇ܰܘ ܕܶܢܚܳܐ ܫܒܺܝܚܳܐ ܘܠܐܴ ܡܶܬܡܰܫܚܳܢܳܐ: ܠܗ̇ܰܘ ܓܰܢ̱ܒܳܪܳܐ ܕܰܠܟܽܠܗܽܘܢ ܓܰܢ̱ܒܳܪ̈ܶܐ ܡܫܰܦܶܠ: ܠܗ̇ܰܘ ܕܰܒܪ̈ܰܚܡܰܘܗܝ ܣܰܓܺܝ̈ܶܐܐ ܘܠܐܴ ܡܶܬܡܰܠܠܳܢ̈ܶܐ ܠܘܳܬܰܢ ܐܶܬܬܰܚܬܺܝ: ܘܰܠܩܰܒܪܳܐ ܐܶܬܢܰܚܰܬ݀: ܘܰܠܡܰܘܬܳܐ ܛܪܽܘܢܳܐ ܒܰܙ: ܠܰܫܝܽܘܠ ܕܳܘܺܝܬܳܐ ܐܰܚܪܶܒ: ܘܰܠܓ̈ܰܙܶܐ ܕܺܝܠܳܗ̇ ܟܰܗܺܝ̣̈ܢܶܐ ܚܰܠܶܨ: ܘܰܠܡܺܝ̈ܬܶܐ ܕܰܒܩܰܒܪ̈ܶܐ ܐܰܩܺܝܡ: ܘܰܠܕܰܘܺܝܕ ܢܒܺܝܳܐ ܚܰܕܺܝ ܗ̇ܰܘ ܕܶܐܬܢܰܒܺܝ ܥܠܰܘܗܝ ܘܶܐܡܰܪ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ: ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܘܰܡܚܳܐ ܠܰܒܥܶܠܕ̈ܒܳܒܰܘܗܝ ܠܒܶܣܬܪܶܗ ܘܚܶܣܕܳܐ ܕܥܳܠܡܳܐ ܥܒܰܕ ܐܶܢܽܘܢ ܒܰܩܝܳܡܬܶܗ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܳܪܝܳܐ ܐܠܰܗܳܐ ܗ̇ܰܘ ܕܰܒܝܰܕ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܦܪܰܩ ܠܥܳܠܡܳܐ ܟܽܠܶܗ ܡ̣ܶܢ ܛܳܥܝܽܘܬܳܐ ܕܒܺܝܫܳܐ ܕܰܐܛܥܺܝ ܒܰܢ: ܘܰܓܒܳܐ ܠܟܰܪܡܳܐ ܕܰܢܨܰܒ ܝܳܪܬܽܘܬܳܐ ܕܺܝܠܶܗ ܗ̇ܰܘ ܕܟܰܕ ܨܒܳܐ ܕܢܶܬܺܝܠܶܕ ܦܰܓܪܳܢܳܐܺܝܬ ܘܠܰܚܛܺܝܬܳܐ ܕܥܳܠܡܳܐ ܢܶܡܪܽܘܩ ܡ̣ܶܢ ܟܰܕܽܘ: ܫܰܘܕܰܥ ܒܝܰܕ ܢܒܺܝ̈ܶܐ ܕܺܝܠܶܗ ܘܡܰܠܐܱܟܰܘ̈ܗܝ ܩܰܕܺܝ̈ܫܶܐ ܡܶܛܽܠ ܐ̱ܪܳܙܳܐ ܪܰܒܳܐ ܕܰܡܕܰܒܪܳܢܽܘܬܶܗ. ܕܒܶܗ ܗܘܰܝܢܰܢ ܒܢܰܝ̈ܳܐ ܕܛܰܝܒܽܘܬܳܐ ܡܳܪܳܢܳܐܺܝܬ: ܘܡܶܛܽܠ ܗܳܠܶܝܢ ܕܰܣܥܰܪ ܠܘܳܬܰܢ ܒܥܺܐܕܳܐ ܗܳܢܳܐ ܕܰܩܝܳܡܬܳܐ ܕܺܝܠܶܗ ܦܳܪܽܘܩܳܝܬܳܐ ܡܚܰܓܶܝܢܰܢ ܟܰܕ ܐܳܡܪܺܝܢܰܢ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܠܓܰܒܪܺܐܶܝܠ ܪܺܝܫ ܡܰܠܐܱܟ̈ܶܐ ܫܰܕܰܪ ܠܢܳܨܪܰܬ݀ ܕܰܓܠܺܝܠܐܴ ܠܘܳܬ ܒܬܽܘܠܬܳܐ ܡܰܪܝܰܡ: ܐܰܝܟܰܢܳܐ ܕܰܢܣܰܒܪܶܝܗ̇ ܡܰܘܠܳܕܳܐ ܕܬܶܕܡܽܘܪܬܳܐ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܒܡܰܘܠܳܕܶܗ ܕܡ̣ܶܢ ܐܶܡܳܐ ܒܬܽܘܠܬܳܐ ܚܰܪܰܪ ܒܶܪ̈ܝܳܬܳܐ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܒܝܽܘܪܕܢܳܢ ܢܰܗܪܳܐ ܥܡܰܕ ܡ̣ܶܢ ܝܽܘܚܰܢܳܢ ܘܰܠܚܳܐ ܐܶܫܛܳܪ ܚܰܘ̈ܒܳܬܶܗ ܕܳܐܕܳܡ ܪܺܝܫ ܓܶܢܣܰܢ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ: ܕܰܓܡܰܪ ܘܫܰܡܠܺܝ ܛܶܟܣܶܗ ܕܢܳܡܽܘܣܳܐ ܒܰܓܙܽܘܪܬܳܐ ܘܰܒܗܰܝܟܠܐܴ ܟܰܕ ܛܰܥܢܶܗ ܣܳܒܳܐ ܫܶܡܥܽܘܢ ܥܰܠ ܕܪ̈ܳܥܰܘܗܝ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܕܰܟܺܝ ܘܚܰܘܰܪ ܟܽܘ̈ܬܡܳܬܳܐ ܕܒܶܝܬ ܐܳܕܳܡ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܗܰܪܕܰ ܠܦܳܠܚܰܘ̈ܗܝ ܫܠܺܝ̈ܚܶܐ ܩܰܕܺܝ̈ܫܶܐ ܘܰܐܠܒܶܫ ܐܶܢܽܘܢ ܙܺܝܘܳܐ ܘܦܽܘܪܩܳܢܳܐ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܙܰܕܶܩ ܠܡܳܟ̈ܣܶܐ ܘܰܠܚܰܛܳܝ̈ܶܐ: ܘܰܥܒܰܕ ܬܶܕܡܪ̈ܳܬܳܐ ܒܙܰܒܢܳܐ ܦܰܐܝܳܐ ܕܰܡܕܰܒܪܳܢܽܘܬܶܗ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܶܐܬܓܠܺܝ ܥܰܠ ܛܽܘܪܳܐ ܕܬܳܒܽܘܪ ܘܚܰܘܺܝ ܫܽܘܒܚܶܗ ܠܬܰܠܡܺܝ̈ܕܰܘܗܝ ܘܰܠܡܽܘܫܶܐ ܘܶܐܠܺܝܳܐ ܢܒܺܝܰܘ̈ܗܝ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܢܨܰܒ ܘܨܰܒܶܬ ܠܥܺܕܬܶܗ ܩܰܕܺܝܫܬܳܐ ܘܰܐܣܗܶܕ ܥܠܰܘܗܝ ܐܰܒܳܐ ܡ̣ܶܢ ܪܰܘܡܳܐ: ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ ܠܶܗ ܫܡܰܥܘ ܕܒܶܗ ܐܶܨܛܒܺܝܬ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܛܠܳܝ̈ܶܐ ܘܫܰܒܪ̈ܶܐ ܩܥܰܘ ܠܶܗ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ: ܕܶܐܬܳܐ ܠܚܰܫܳܐ ܒܨܶܒܝܳܢܶܗ ܘܠܐܴ ܐܰܪܚܶܩ ܡ̣ܶܢ ܗ̇ܳܝ ܕܺܐܝܬܰܘܗܝ ܐܠܰܗܳܐ ܟܝܳܢܳܐܺܝܬ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ: ܕܶܐܬܳܐ ܠܰܨܠܺܝܒܳܐ ܒܨܶܒܝܳܢܶܗ: ܘܶܐܬܥܰܠܺܝ ܥܰܠ ܪܰܘܡܶܗ ܕܰܙܩܺܝܦܳܐ: ܘܰܥܒܰܕ ܦܽܘܪܩܳܢܳܐ ܠܥܳܠܡ̈ܶܐ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܡܺܝܬ ܒܰܒܣܰܪ ܘܰܚܝܳܐ ܒܪܽܘܚ ܐܰܝܟ ܒܰܪܬ݀ ܩܳܠܐܴ ܫܠܺܝܚܳܝܬܳܐ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܒܰܩܒܽܘܪܬܶܗ ܫܰܟܶܢ ܚܰܝ̈ܶܐ ܚܰܕ̈ܬܶܐ ܠܓܶܢܣܰܢ ܥܰܦܪܳܢܳܐ: ܬܶܗܪܳܐ ܐܺܝܬܰܘܗܝ ܘܕܽܘܡܳܪܳܐ ܕܰܐܠܳܗܳܐ ܕܩܳܡ ܡ̣ܶܢ ܩܰܒܪܳܐ ܘܰܐܩܺܝܡ ܥܰܡܶܗ ܠܐܴܕܳܡ ܨܰܠܡܶܗ: ܬܶܗܪܳܐ ܘܕܽܘܡܳܪܳܐ: ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܣܰܦܶܩ  ܓܰܙܶܝ̈ܗ̇ ܘܣܳܚܪ̈ܳܬܳܗ̇ ܕܰܫܝܽܘܠ ܕܳܘܺܝܬܳܐ: ܘܰܐܦܶܩ ܡܶܢܳܗ̇ ܠܰܫܟܺܝ̈ܒܶܐ ܘܰܐܣܶܩ ܐܶܢܽܘܢ ܥܰܡܶܗ ܠܪܰܘܡܳܐ ܒܗܳܢܳܐ ܝܰܘܡܳܐ ܕܚܰܕ ܒܫܰܒܳܐ ܕܰܩܝܳܡܬܳܐ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܕܳܫܶܗ ܠܡܰܘܬܳܐ ܒܢܶܩܥܶܗ ܘܰܣܚܰܦ ܬܳܓܶܗ ܘܫܽܘܠܛܳܢܶܗ: ܘܠܐܱܣܺܝܪ̈ܶܐ ܕܰܦܟܺܝܪܺܝܢ ܗܘܰܘ ܫܪܳܐ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܣܥܰܪ ܠܬܰܠܡܺܝ̈ܕܰܘܗܝ ܒܥܶܠܺܝܬܳܐ ܐ̱ܪܳܙܳܢܳܝܬܳܐ ܟܰܕ ܐܰܚܺܝܕܺܝܢ ܬܰܪ̈ܥܶܝܗ̇. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ: ܕܶܐܬܗܰܦܰܟ ܥܰܡ ܬܰܠܡܺܝ̈ܕܰܘܗܝ ܒܳܬܰܪ ܩܝܳܡܬܶܗ ܐܰܪܒܥܺܝܢ ܝܰܘ̈ܡܺܝܢ ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܰܣܠܶܩ ܠܰܫܡܰܝܳܐ ܒܩܳܠܐܴ ܕܬܶܫܒ̈ܚܳܬܳܐ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ: ܕܰܐܝܟ ܫܽܘܘܕܳܝܶܗ ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ ܫܰܕܰܪ ܠܰܫܠܺܝ̈ܚܰܘܗܝ ܘܚܰܟܶܡ ܪ̈ܶܥܝܳܢܰܝܗܽܘܢ. ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ ܡܶܬܟܰܪܙܳܐ ܡܕܰܒܪܳܢܽܘܬܶܗ: ܬܶܗܪܳܐ ܘܕܽܘܡܳܪܳܐ ܐܺܝܬܰܘܗܝ ܐܠܰܗܳܐ ܕܳܐܬܶܐ ܬܽܘܒ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ ܕܠܶܗ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܕܰܢܢܰܛܰܪ ܠܰܢ ܒܰܨܠܺܝܒܶܗ ܘܰܢܣܰܬܰܪ ܠܰܢ ܒܰܚܢܳܢܶܗ ܘܰܢܦܰܨܶܐ ܠܰܢ ܡ̣ܶܢ ܢܶܟܝ̈ܳܢܶܐ ܘܣܽܘܓܦܳܢ̈ܶܐ ܘܰܢܩܰܒܶܠ ܬܶܫܡ̈ܫܳܬܰܢ ܒܛܰܝܒܽܘܬܶܗ ܘܰܢܪܺܝܡ ܡܶܢܰܢ ܟܶܫ̈ܠܐܷ ܘܡܰܟܫܽܘ̈ܠܐܷ ܒܝܰܡܺܝܢܶܗ: ܘܢܶܬܶܠ ܠܰܢ ܓܰܠܝܽܘܬ ܐܰܦ̈ܶܐ ܩܕܳܡ ܒܺܐܡܰܐ ܕܪܰܒܽܘܬܶܗ: ܘܢܰܫܘܶܐ ܠܰܢ ܘܰܠܥܰܢܺܝ̈ܕܰܝܢ ܠܒܽܘ̈ܣܳܡܶܐ ܕܥܰܡ ܓܒܰܝ̈ܳܐ ܕܺܝܠܶܗ ܒܡܰܠܟܽܘܬܶܗ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

ܥܛܪܐ

ܡܳܪܝܳܐ ܐܠܰܗܳܐ ܩܰܒܶܠ ܡ̣ܶܢ ܐܺܝܕܰܝ̈ܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܗܳܐ ܡܩܰܪܒܺܝܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ: ܘܰܐܫܶܐܒ ܒܰܢ ܡܳܪܝ ܚܰܝܠܳܟ ܐܰܡܺܝܢܳܐܺܝܬ ܕܡܶܢܳܟ ܕܩܳܠܳܟ ܢܳܦ̇ܶܩ: ܘܰܒܡܰܫ̈ܒܶܐ ܕܪܽܘܚܳܐ ܚܰܝܳܐ ܘܩܰܕܺܝܫܳܐ ܢܶܬܒܰܣܰܡ ܘܰܠܚܰܝܠܶܗ ܕܒܺܝܫܳܐ ܘܩܰܕܺܝܫܳܐ ܢܶܬܒܰܣܰܡ ܘܰܠܚܰܝܠܶܗ ܕܒܺܝܫܳܐ ܣܳܩܽܘܪܰܢ ܢܶܒܣܽܘܪ: ܘܠܳܟ ܡܩܰܕܶܫ ܠܩܰܕܺܝ̈ܫܶܐ ܘܓܳܡܰܪ ܠܰܕܟܰܝ̈ܳܐ ܘܨܳܒܶܐ ܒܚܰܝ̈ܶܐ ܕܟܽܠ ܘܡܰܦܢܶܐ ܠܐܱܒܺܝ̈ܕܶܐ: ܢܫܰܒܰܚ ܘܰܢܪܰܡܪܶܡ ܘܢܶܣܓܽܘܕ ܠܳܟ ܡܳܪܝ܀

 

ܚܘܬܡܐ

ܫܰܝܢܳܐ ܕܫܰܝܶܢ ܠܥܶܠܳܝ̈ܶܐ ܥܰܡ ܬܰܚܬܳܝ̈ܶܐ ܘܚܰܝܶܕ ܠܓܰܒ̈ܶܐ ܣܕܺܝ̈ܩܶܐ ܒܰܩܝܳܡܬܶܗ: ܫܰܝܶܢ ܠܢܰܦ̈ܫܳܬܰܢ ܥܰܡ ܦܰܓܪ̈ܰܝܢ: ܘܚܰܝܶܕ ܠܰܦܠܺܝܓܽܘܬܰܢ ܒܚܽܘܒܳܟ ܘܫܰܟܶܢ ܠܰܢ ܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ: ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܒܡܰܠܟܽܘܬܳܟ ܕܰܢܫܰܒܚܳܟ ܩܰܕܺܝܫܳܐܺܝܬ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܓܰܢ̱ܒܳܪܳܐ ܕܒܰܩܝܳܡܬܶܗ ܐܰܥܪܶܩ ܠܣܳܩܽܘܪ̈ܰܘܗܝ: ܘܰܒܢܽܘܚܳܡܶܗ ܐܰܒܗܶܬ ܠܨܳܠܽܘ̈ܒܰܘܗܝ. ܘܒܰܫܠܳܡܶܗ ܐܰܦܨܰܚ ܠܬܰܠܡܺܝ̈ܕܰܘܗܝ: ܘܒܰܚܙܳܬܶܗ ܫܰܪܰܪ ܠܰܫܠܺܝ̈ܚܰܘܗܝ: ܒܝܽܘܠܦܳܢܶܗ ܙܪܰܥ ܒܟܽܠܳܗ̇ ܒܪܺܝܬܳܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܡܶܠܬܳܐ ܡܫܰܒܚܳܐ ܕܰܗܘܳܐ ܒܰܪܢܳܫܳܐ ܒܪܶܚܡܰܬ݀ ܐ̱ܢܳܫܽܘܬܶܗ ܕܠܰܢ ܢܶܥܒܶܕ ܐܠܰܗܳܝ̈ܶܐ ܒܛܰܝܒܽܘܬܶܗ: ܒܳܪܽܘܝܳܐ ܕܠܐܴ ܐܶܬܒܰܨܰܪ ܚܰܝܠܶܗ ܡܶܢ ܒܳܪܽܘܝܽܘܬܶܗ ܟܰܕ ܐܶܬܢܰܚܬ݀ ܒܨܶܒܝܳܢܶܗ ܠܡܽܘܟܳܟܳܐ: ܐܳܦܠܐܴ ܐܶܫܬܰܚܠܦܰܬ݀ ܐܠܰܗܽܘܬܶܗ ܡܪܰܝܰܡܬܳܐ ܟܰܕ ܗܘܳܐ ܒܰܪܢܳܫܳܐ ܚܠܳܦܰܝܢ: ܘܠܐܴ ܐܰܘܒܶܕ ܫܽܘܠܛܳܢܳܐ ܕܰܡܥܰܠܝܽܘܬܶܗ: ܟܰܕ ܢܣܰܒ ܕܡܽܘܬܰܢ ܡܶܛܽܠܳܬܰܢ: ܘܠܐܴ ܐܶܫܬܰܓܢܺܝ ܡ̣ܶܢ ܝܳܬܶܗ ܡܬܽܘܡܳܝܬܳܐ ܟܰܕ ܐܶܬܚܙܺܝ ܐܰܝܟ ܡܺܝܬܳܐ ܡܕܰܒܪܳܢܳܐܺܝܬ ܒܓܰܘ ܥܳܠܡܳܐ ܓܰܢ̱ܒܳܪܳܐ ܕܰܪܟܶܒ ܕܰܐܪܒܰܥ ܐܰܝܟ ܐܰܪܝܳܐ ܒܩܶܛܠܐܴ: ܘܰܐܦܶܩ ܓܳܠܽܘܬܳܐ ܕܰܚܒܺܝ̈ܫܶܐ ܠܢܽܘܗܪܳܐ: ܠܐܴ ܚܳܫܽܘܫܳܐ ܕܰܒܚܰܫܶܗ ܒܺܝܫܳܐ ܐܶܫܬܰܦܰܠ: ܘܰܒܡܰܘܬܶܗ ܡܰܘܬܳܐ ܐܶܬܩܰܛܰܠ ܘܒܰܩܒܽܘܪܬܶܗ ܐܰܪܓܶܫܘ ܩܒܺܝܪ̈ܶܐ: ܘܰܒܢܽܘܚܳܡܶܗ ܐܶܬܓܠܺܝܘ ܚܰܝ̈ܶܐ: ܠܳܟ ܡܶܬܟܰܫܦܺܝܢܰܢ ܡܫܺܝܚܳܐ ܐܠܰܗܳܐ ܕܬܰܒܪܶܩ ܥܠܰܝܢ ܙܰܠܓ̈ܶܐ ܢܰܨܺܝ̈ܚܶܐ ܕܰܩܝܳܡܬܳܟ. ܘܬܰܢܗܰܪ ܠܥܰܝ̈ܢܰܝ ܡܰܕܥܰܝ̈ܢ ܕܰܢܚܽܘܪ̈ܳܢ ܒܰܬܡܺܝ̈ܗܳܬܳܐ ܕܰܣܥܰܪ ܢܽܘܚܳܡܳܟ: ܟܰܕ ܡܰܩܢܶܐ ܐܰܢ̱ܬ ܠܰܢ ܒܣܽܘܓܳܐܐ ܪܰܒܳܐ ܕܰܚܢܳܢܳܟ: ܬܰܪܥܺܝܬܳܐ ܛܳܒܬܳܐ ܕܦܳܪܥܳܐ ܒܟܽܠ ܥܶܕܳܢ ܩܽܘܒܳܠ ܛܰܝܒܽܘܬܳܐ ܥܰܠ ܐܰܦ̈ܰܝ ܥܽܘܕܪ̈ܳܢܰܝܟ ܕܰܠܘܳܬܰܢ ܘܡܰܚܫܰܒܬܳܐ ܕܰܡܩܰܪܒܳܐ ܟܽܠ ܫܳܥ ܕܶܒܚ̈ܶܐ ܕܬܰܘܕܺܝܬܳܐ ܕܟܺܝܬܳܐ ܡܶܛܽܠ ܚܽܘܒܳܟ ܕܨܶܝܕܰܝܢ: ܐܰܝܟܰܢܳܐ ܕܰܐܡܺܝܢܳܐܺܝܬ ܢܶܥܽܘܠ ܠܕܳܪ̈ܳܬܳܐ ܩܰܕܺܝ̈ܫܳܬܳܐ ܒܬܶܫܒܽܘܚܬܳܐ: ܘܰܒܬܰܪ̈ܥܰܝܟ ܡܫܰܒ̈ܚܶܐ ܕܰܢܩܰܒܶܠ ܡܶܢܳܟ ܙܰܗܪܺܝܪ̈ܶܐ ܕܢܽܘܗܪܳܐ ܕܺܝܕܰܥܬܳܟ ܘܢܶܬܒܰܣܰܡ ܒܛܽܘܒܬܳܢܽܘܬܳܐ ܕܬܶܫܒܽܘܚܬܳܐ ܕܪܰܒܽܘܬ ܦܰܐܝܽܘܬܳܐ ܕܛܳܒܽܘܬܳܟ ܡܶܛܽܠ ܕܛܳܒܳܐ ܘܪܳܚܶܡܢܳܫܳܐ ܐܺܝܬܰܝܟ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܫܠܡ ܬܪܝܢܐ ܕܛܟܣܐ ܕܡܨܥܝܐ

 

ܛܟܣܐ ܕܚܕ ܒܫܒܐ ܬܠܝܬܝܐ ܕܩܝܡܬܐ ܕܛܟܣܐ ܡܨܥܝܐ

ܩܕܡܝܬ ܨܠܘܬܐ ܕܫܘܪܝܐ

 

ܡܫܰܒܚܳܐ ܠܳܟ ܡܳܪܝ ܫܡܰܝܳܐ ܕܺܐܝܬܶܝܗ̇ ܡܰܥܡܪܳܟ: ܘܰܡܒܰܪܟܳܐ ܠܳܟ ܐܰܪܥܳܐ ܘܟܽܠ ܕܰܥܠܶܝܗ̇ ܕܰܗܘܳܬ݀ ܟܽܘܪܣܝܳܐ ܠܪܰܒܽܘܬܳܟ. ܐܰܢ̱ܬ ܗ̣ܽܘ ܕܠܐܴ ܡܶܣܬܰܝܟܳܐ ܡܥܰܠܝܽܘܬܳܟ ܘܕܰܨܒܰܝܬ ܘܩܰܒܪܳܟ ܣܰܝܟܳܟ ܕܰܫܦ̣ܰܪ ܠܨܶܒܝܳܢܳܟ. ܐܰܢ̱ܬ ܡܳܪܝ ܒܪ̈ܰܚܡܰܝܟ ܣܰܓܺܝ̈ܶܐܐ ܫܰܟܶܢ ܫܰܝܢܳܐ ܘܰܫܠܳܡܳܐ ܠܐܱܪܥܳܐ ܘܟܽܠܗܽܘܢ ܥܳܡܽܘܪ̈ܶܝܗ̇: ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܡܰܐܚܝ̇ܳܢܳܐ ܕܒܰܙܩܺܝܦܶܗ ܡܒܰܪܟܳܐ ܥܒܰܕ ܠܰܢ ܦܽܘܪܩܳܢܳܐ: ܘܰܒܚܰܫܰܘ̈ܗܝ ܩܰܕܺܝ̈ܫܶܐ ܚܽܘܕܳܬܳܐ ܫܰܟܶܢ ܠܰܢ. ܠܗ̇ܰܘ ܕܰܒܡܰܘܬܶܗ ܡܰܚܝܳܢܳܐ ܚܰܝ̈ܶܐ ܚܰܕ̈ܬܶܐ ܐܰܩܢܺܝ ܠܰܢ. ܘܰܒܢܽܘܚܳܡܶܗ ܡܫܰܒܚܳܐ ܫܽܘܒܚܳܐ ܦܰܐܝܳܐ ܐܠܰܒܶܫ ܠܰܢ: ܘܒܰܩܝܳܡܬܶܗ ܡܫܰܒܰܚܬܳܐ ܒܰܕܰܪ ܠܰܒܥܶܠܕ̈ܒܳܒܰܘܗܝ: ܘܟܰܢܶܫ ܠܓܽܘܕܳܐ ܕܬܰܠܡܺܝ̈ܕܰܘܗܝ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܫܽܘܒܚܳܐ ܠܳܟ ܡܫܺܝܚܳܐ ܒܪܳܐ ܠܐܴ ܡܶܬܕܰܪܟܳܢܳܐ ܕܪܳܡ ܘܰܡܥܰܠܰܝ ܡܶܢܟܽܠ ܕܶܡܘ̈ܳܢ. ܟܰܣܝܳܐ ܕܕܳܠ ܡ̣ܶܢ ܨܶܝܕ ܐܰܒܽܘܗܝ ܓܢܺܝܙܳܐ: ܘܰܫܪܳܐ ܒܰܒܬܽܘܠܬܳܐ: ܘܠܐܴ ܪܰܚܺܝܩ ܡ̣ܶܢ ܥܽܘܒܳܐ ܓܢܺܝܙܳܐ ܕܰܐܒܽܘܗܝ. ܐܶܬܒܰܣܰܪ ܒܪܽܘܚܳܢܽܘܬܶܗ ܘܶܐܬܒܰܪܢܰܫ ܘܺܐܝܬܰܘܗܝ ܐܠܰܗܳܐ ܕܥܰܠ ܟܽܠ ܒܥܳܠܡܳܐ ܗܳܢܳܐ ܗܘܳܐ ܘܰܩܕܳܡ ܕܢܺܐܬܶܐ ܠܥܳܠܡܳܐ ܗܘܳܐ: ܠܐܴ ܣܳܦܶܩ ܐܰܬܪܳܐ ܘܟܶܢ ܫܪܳܐ ܒܰܐܚܪܺܢܳܐ: ܘܟܰܕ ܙܳܐܶܢ ܥܳܠܡ̈ܶܐ ܗ̣ܽܘ: ܝܺܢܶܩ ܚܰܠܒܳܐ ܡ̣ܶܢ ܛܠܺܝܬܳܐ. ܡܙܺܝܥ ܒܪܰܘܡܳܐ ܠܓܺܝ̈ܓܠܐܷ ܡ̈ܰܠܳܠܳܬܳܐ ܕܰܢܒܰܪ̈ܟܳܢܳܝܗܝ ܒܙܰܘܥܳܐ: ܘܶܐܬܛܥܶܢ ܟܽܠ ܒܽܘܪ̈ܟܶܐ ܕܒܰܪܬ݀ ܐ̱ܢܳܫܳܐ ܒܬܶܗܪܳܐ: ܡܶܬܩܰܠܰܣ ܡ̣ܶܢ ܣܪ̈ܳܦܶܐ ܕܪ̈ܳܬܡܳܢ ܠܶܗ ܣܶܦܘ̈ܳܬܳܐ ܕܥܰܦܪ̈ܳܢܶܐ ܒܢܽܘܨܪ̈ܳܬܳܐ. ܨܳܐܰܪ ܡܰܝ̈ܳܐ ܒܰܥܢ̈ܳܢܶܐ: ܕܰܢܚܶܬ ܠܢܰܗܪܳܐ ܙܥܽܘܪܳܐ ܘܰܥܡܰܕ ܒܶܗ: ܡܩܰܕܶܫ ܠܰܣܪ̈ܳܦܶܐ ܕܰܥܡܰܕ ܡ̣ܶܢ ܐܺܝ̈ܕܰܝ ܥܰܒܕܶܗ ܝܽܘܚܰܢܳܢ: ܡܳܪܳܐ ܕܰܬܗܽܘ̈ܡܶܐ: ܕܰܣܓܶܕ ܠܶܗ ܢܰܗܪܳܐ: ܒܰܣܺܝܡܳܐ ܕܫܶܦ̈ܥܶܐ ܕܝܽܘܪܕܢܳܢ ܣܘܰܚܘ ܠܶܗ: ܛܥܺܝܢ ܠܐܱܪܥܳܐ ܘܠܰܫܡܰܝܳܐ ܒܪܶܡܙܶܗ  ܕܶܐܬܛܥܶܢ ܥܰܠ ܕܪ̈ܳܥܶܐ ܕܰܒܬܽܘܠܬܳܐ ܐܰܝܟ ܫܰܒܪܳܐ: ܡܩܰܒܠܳܢܳܐ ܕܕܶܒܚ̈ܶܐ ܘܩܽܘܪ̈ܒܳܢܶܐ ܕܩܰܪܶܒ ܩܽܘܪ̈ܒܳܢܶܐ ܘܫܰܡܠܺܝ ܢܳܡܽܘܣܳܐ ܘܶܐܬܛܥܶܢ ܥܰܠ ܕܪ̈ܳܥܶܐ ܕܣܳܒܳܐ ܫܶܡܥܽܘܢ: ܪܟܺܝܒ ܥܰܠ ܚܰܨܳܐ ܕܰܟܪ̈ܽܘܒܶܐ: ܕܰܪܟܶܒ ܥܰܠ ܥܺܝܠܐܴ. ܘܶܐܫܬܰܒܰܚ ܡ̣ܶܢ ܛܠܳܝ̈ܶܐ ܘܫܰܒܪ̈ܶܐ ܒܽܐܘܫܰܥ̈ܢܶܐ: ܥܰܦܺܝܩ ܚܰܝܠܶܗ ܠܰܒܪܺܝܬܳܐ ܟܽܠܳܗ̇: ܕܥܰܦܶܩ ܐܶܣܛܽܘܢܳܐ ܒܶܝܬ ܕܺܝܢܳܐ ܐܰܝܟ ܡܚܺܝܠܐܴ: ܩܰܒܶܠ ܨܰܥܪܳܐ ܒܥܽܘܠܝܶܗ ܕܠܰܙܩܺܝܦܳܐ ܘܫܰܦܶܠ ܠܰܚܬܺܝܪ̈ܶܐ ܟܰܕ ܩܥܳܐ ܥܰܠ ܩܰܝܣܳܐ ܘܢܳܕ̈ܝ ܒܶܪ̈ܝܳܬܳܐ ܘܶܐܨܛܰܪܺܝܘ ܫܽܘ̈ܥܶܐ: ܥܰܠ ܠܳܗ̇ ܠܰܫܝܽܘܠ ܐܰܝܟ ܡܺܝܬܳܐ: ܘܕܰܨܒܳܐ ܥܶܩܳܪܶܗ ܐܰܝܟ ܓܰܢ̱ܒܳܪܳܐ ܘܩܳܡ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ: ܘܕܰܝܰܪ ܒܰܐܬܪܳܐ ܕܥܰܢܺܝ̈ܕܶܐ ܬܠܳܬܳܐ ܐܺܝܡܳܡܺܝ̈ܢ ܘܰܬܠܳܬܳܐ ܠܰܝܠܰܘ̈ܳܢ: ܘܰܐܟܪܶܙ ܒܳܗ̇ ܣܒܰܪܬܳܐ ܠܰܩܒܺܝܪ̈ܶܐ. ܘܰܒܝܰܘܡܳܐ ܬܠܺܝܬܳܝܳܐ ܩܳܡ ܡ̣ܶܢ ܩܰܒܪܳܐ: ܘܰܐܩܺܝܡ ܥܰܡܶܗ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ: ܕܡ̣ܶܢ ܢܽܘܓܪܳܐ ܪܰܒܳܐ ܚܳܝܪܺܝܢ ܗܘܰܘ ܠܶܗ. ܣܠܶܩ ܠܰܫܡܰܝܳܐ ܘܫܰܕܰܪ ܪܽܘܚܳܐ ܩܰܕܺܝܫܳܐ ܥܰܠ ܬܰܠܡܺܝ̈ܕܰܘܗܝ: ܘܰܩܥ̈ܰܝ ܟܺܐܦ̈ܶܐ ܕܡܰܢܽܘ: ܐܰܟܪܙܽܘܗܝ ܫܽܘ̈ܥܶܐ ܕܨܶܡܚܶܗ ܕܰܐܒܳܐ. ܡܺܝܬ ܐܰܟܘܳܬܰܢ ܘܠܐܴ ܡܶܬܦܰܫܰܩ: ܕܳܡܶܐ ܠܐܱܒܽܘܗܝ ܘܠܐܴ ܡܶܬܕܪܶܟ: ܕܳܡܶܐ ܠܰܢ ܒܟܽܠܡܶܕܶܡ ܣܛܰܪ ܡ̣ܶܢ ܚܛܺܝܬܳܐ ܘܠܐܴ ܡܶܬܥܰܩܰܒ. ܠܐܴ ܥܰܪܝܳܐ ܠܶܗ ܫܡܰܝܳܐ: ܘܠܐܴ ܒܨܺܝܪ ܡ̣ܶܢ ܝܳܠܽܘܕܶܗ: ܚܰܕ ܗ̣ܽܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܐܰܝܟ ܕܰܟܬܰܒ ܠܰܢ ܝܽܘܚܰܢܳܢ: ܠܐܴ ܡܣܰܝܟܳܐ ܠܶܗ ܐܰܪܥܳܐ ܕܗ̣ܽܘ ܣܳܡ ܫܶܬܶܐܣ̈ܶܝܗ̇: ܚܰܕ ܗ̣ܽܘ ܡܳܪܝܳܐ ܐܰܝܟ ܕܰܐܟܬܒܽܘܗܝ ܢܒܺܝ̈ܶܐ: ܚܰܕ ܗ̣ܽܘ ܡܫܺܝܚܳܐ ܐܰܝܟ ܕܰܐܟܪܙܽܘܗܝ ܫܠܺܝ̈ܚܶܐ: ܚܰܕ ܐܺܝܬܰܘܗܝ ܐܶܡܪܳܗ̇ ܕܰܐܠܳܗܽܘܬܳܐ ܗ̇ܰܘ ܕܰܫܩ̣ܰܠ ܚܛܺܝܬܶܗ ܕܥܳܠܡܳܐ ܘܰܦܪܰܩ ܠܰܢ: ܚܰܕ ܗ̣ܽܘ ܕܩܰܪܺܝܒܳܐ ܠܶܗ ܣܶܓܕܬܳܐ ܘܪܰܚܺܝܩܳܐ ܡܶܢܶܗ ܒܨܳܬܳܐ. ܡܶܛܽܠ ܗܳܕܶܐ ܒܳܥܶܝܢܰܢ ܘܰܡܦܺܝܣܺܝܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܗܳܐ ܡܩܰܪܒܺܝܢܰܢ ܠܳܟ: ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܩܰܕܺܝܫܬܳܐ ܘܡܰܥܒܕܰܬ݀ ܚܰܝ̈ܶܐ: ܕܰܬܫܰܟܶܢ ܠܰܢ ܩܰܘܡܳܐ ܕܠܐܴ ܡܰܦܽܘܠܬܳܐ ܕܰܒܓܰܠܝܽܘܬ ܐܰܦ̈ܶܐ ܢܩܽܘܡ ܡ̣ܶܢ ܝܰܡܺܝܢܳܟ: ܘܠܐܴ ܢܶܫܬܟܰܚ ܩܕܳܡܰܝܟ ܚܰܝܳܒܺܝܢܰܢ: ܐܶܠܐܴ ܐܰܫܘܳܐ ܠܰܢ ܛܽܘ̈ܒܶܐ ܗ̇ܳܢܽܘܢ ܕܰܡܠܺܝܟܺܝܢ ܠܩܰܕܺܝ̈ܫܰܝܟ: ܘܥܰܡ ܗ̇ܳܢܽܘܢ ܕܰܡܥܰܕܥܕܺܝܢ ܘܚܳܕܶܝܢ ܒܳܟ. ܢܥܰܕܥܶܕ ܒܢܽܘܗܪܳܐ ܫܡܰܝܳܢܳܐ: ܘܥܰܡܳܟ ܘܥܰܡܗܽܘܢ ܢܶܚܕܶܐ ܘܢܶܬܒܰܣܰܡ: ܒܰܐܬܪܳܐ ܕܡܶܢܶܗ ܟܺܐܒ̈ܶܐ ܪܰܚܺܝܩܺܝܢ: ܘܥܳܩ̈ܳܬܳܐ ܡܰܒܥ̈ܕܳܢ ܘܚܰܝ̈ܶܐ ܕܡ̣ܶܢ ܐܠܰܗܳܐ ܡܠܺܝܟܺܝܢ. ܘܰܠܥܰܢܺܝ̈ܕܰܝܢ ܐܰܢܺܝܚ ܐܶܢܽܘܢ ܒܰܓܢܽܘܢܳܟ ܡܠܐܷ ܢܽܘܗܪܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܩܰܒܶܠ ܡܳܪܝܳܐ ܒܰܡܪܰܚܡܳܢܽܘܬܳܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܝܰܘܡܳܐ ܕܰܩܝܳܡܬܳܟ ܡܫܰܒܰܚܬܳܐ ܡ̣ܶܢ ܥܰܒܕܰܝ̈ܟ ܚܰܠܳܫ̈ܶܐ ܐܶܬܩܰܪܰܒ ܠܳܟ: ܘܰܐܝܟ ܦܺܝܪܡܳܐ ܕܩܰܪܶܒ ܠܳܟ ܐܰܗܪܽܘܢ ܘܩܰܒܶܠܬܳܝܗܝ. ܢܶܬܬܢܺܝܚ ܒܶܗ ܨܶܒܝܳܢܳܟ ܘܰܐܝܟ ܨܠܽܘܬܶܗ ܕܡܽܘܫܶܐ ܘܰܫܡܰܥ̣ܬܳܝܗܝ: ܘܰܐܝܟ ܛܢܳܢܶܗ ܕܦܺܝܢܚܶܣ ܘܙܳܟܽܘܬܳܐ ܒܩܶܛܠܐܴ ܚܫܰܒܬ ܠܶܗ: ܕܢܰܘܕܶܐ ܠܳܟ ܥܰܠ ܦܽܘܪܩܳܢܰܢ ܡܫܺܝܚܳܐ ܣܰܒܪܳܐ ܕܚܰܝܰܝ̈ܢ ܘܦܳܪܽܘܩܳܐ ܕܢܰܦ̈ܫܳܬܰܢ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܫܡܰܥ ܨܠܰܘ̈ܳܬܰܢ ܡܳܪܝܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ: ܘܩܰܒܶܠܶܝܗ̇ ܠܒܳܥܽܘܬܰܢ ܒܣܽܘܓܳܐܐ ܕܪ̈ܰܚܡܰܝܟ: ܘܫܰܗܳܐ ܘܕܰܥܶܟ ܡܶܢܰܢ ܟܽܠܗܽܘܢ ܚܽܘܬܚ̈ܳܬܰܘܗܝ ܕܰܢܟܺܝܠܐܴ ܒܥܶܠܕܒܳܒܳܐ ܕܓܶܢܣܳܐ ܕܺܝܠܰܢ: ܡܶܛܽܠ ܕܰܥܠܰܝܟ ܫܕܰܝܢܰܢ ܣܰܒܪܳܐ ܕܺܝܠܰܢ: ܘܰܠܒܰܪ ܡܶܢܳܟ ܐ̱ܚܪܺܝܢ ܠܐܴ ܝܳܕܥܺܝܢܰܢ: ܫܒܽܘܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܰܝܢ ܕܢܰܘܕܶܐ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܫܽܘܒܚܳܐ ܠܐܱܠܳܗܳܐ ܐܰܒܳܐ ܐܰܚܺܝܕ ܟܽܠ: ܣܶܓܕܬܳܐ ܠܰܒܪܳܐ ܦܳܪܽܘܩܳܐ ܘܺܝܚܺܝܕܳܝܳܐ ܘܰܡܫܰܘܙܒܳܢܳܐ ܕܟܽܠ: ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܕܟܽܠ: ܬܠܳܬܳܐ ܩܢܽܘ̈ܡܶܐ ܫܳܘ̈ܝܰܝ ܒܺܐܝܬܽܘܬܳܐ ܬܠܳܬܳܐ ܫܡܳܗ̈ܶܐ ܫܳܘ̈ܝܰܝ ܒܽܐܘܣܺܝܰܐ ܕܚܰܕ ܐܠܰܗܳܐ ܐܺܝܬܰܝܗܽܘܢ: ܘܚܰܕ ܟܝܳܢܳܐ ܡܶܬܝܰܕܥܺܝܢ: ܘܰܒܚܰܕ ܨܶܒܝܳܢܳܐ ܡܶܫܬܰܒܚܺܝܢ ܚܰܕ ܚܰܝܠܐܴ ܕܠܐܴ ܚܳܐܶܒ: ܚܰܕ ܥܽܘܫܢܳܐ ܕܠܐܴ ܬܳܚܶܒ: ܚܰܕ ܫܽܘܠܛܳܢܳܐ ܕܠܐܴ ܡܶܫܬܪܶܐ: ܚܰܕ ܐܽܘܚܕܳܢܳܐ ܕܠܐܴ ܥܳܒܰܪ. ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܣܰܒܪܳܐ ܫܰܪܺܝܪܳܐ ܘܬܽܘܟܠܳܢܳܐ ܕܰܒܢܰܝ̈ܢܳܫܳܐ: ܬܰܦܢܟܳܐ ܕܰܡܝܰܬܪ̈ܳܬܳܐ: ܘܝܽܘܩܢܳܐ ܫܰܦܺܝܪܳܐ ܕܰܥܬܺܝ̈ܕܳܬܳܐ. ܗ̇ܰܘ ܕܡܶܛܽܠ ܫܽܘܪܰܥܬܳܐ ܕܺܝܠܰܢ ܠܐܱܪܥܳܐ ܕܠܰܘ̈ܛܳܬܳܐ ܢܚܶܬܬ: ܕܠܰܢ ܬܫܰܟܶܢ ܡܰܘ̈ܗܒܳܬܳܐ ܐܠܰܗܳܝ̈ܳܬܳܐ ܕܒܰܥܒܳܪ ܦܽܘܩܕܳܢܳܐ ܐܰܘܒܶܕܢܰܢ. ܗ̇ܰܘ ܕܟܰܕ ܚܙܰܝܬ ܕܠܐܱܒܕܳܢܳܐ ܫܪܶܟܢܰܢ ܘܡܰܘܬܳܐ ܐܶܬܥܰܫܰܢ ܥܠܰܝܢ: ܘܒܺܝܫܳܐ ܩܛܰܪ ܬܳܓܶܗ ܥܰܠ ܟܽܠܳܗ̇ ܥܳܡܰܪܬܳܐ ܘܙܳܟܽܘܬܳܐ ܫܩܰܠ ܥܰܠ ܬܺܒܶܝܠ. ܘܰܒܝܰܕ ܛܪܽܘܢܽܘܬܶܗ ܟܒܰܫ ܠܥܳܠܡܳܐ: ܘܶܐܬܡܰܟܰܟܘ ܩܕܳܡܰܘܗܝ ܡܰܠܟ̈ܶܐ ܘܫܰܠܺܝ̈ܛܳܢܶܐ ܘܰܚܡܳܐ ܫܽܘܦܪܳܢ ܘܦܰܐܝܽܘܬܰܢ ܐܶܒܕܰܬ݀ ܗܘܳܬ݀: ܘܶܐܫܬܰܬܰܩ̈ܝ ܒܰܫܝܽܘܠ ܩ̈ܳܠܐܷ ܕܬܶܫܒ̈ܚܳܬܳܐ: ܘܣܶܓܕܬܳܐ ܕܠܳܟ ܡܶܬܬܚܺܝܒܳܐ ܗܘܳܬ݀ ܒܪܽܘܚܳܐ ܠܰܦܬܰܟܪ̈ܶܐ ܡܩܰܪܒܺܝܢ ܗܘܰܝܢ: ܘܶܐܬܟܰܦܰܦ ܟܽܠܶܗ ܓܶܢܣܳܐ ܐ̱ܢܳܫܳܝܳܐ ܩܕܳܡ ܕܶܡܘ̈ܳܬܳܐ ܘܕܶܚ̈ܠܳܬܳܐ ܕܟܽܠ ܓܢܶܣ: ܐܶܬܰܝܬ ܒܰܚܢܳܢܳܟ ܘܰܦܪܰܩܬܳܢ ܘܰܠܘܳܬܳܟ ܩܰܪܶܒܬܳܢ ܒܰܡܕܰܒܪܳܢܽܘܬܳܟ. ܘܟܰܕ ܗܘܰܝܬ ܠܰܢ ܪܺܝܫܳܐ ܘܪܳܥܝܳܐ ܫܰܪܺܝܪܳܐ: ܘܪ̈ܳܡܳܬܳܐ ܘܡܳܐܟ̈ܳܬܳܐ ܣܒܰܠܬ ܡܶܛܽܠܳܬܰܢ: ܘܝܽܘܕܳܝ̈ܶܐ ܛܰܡ̈ܶܐܐ ܐܶܬܥܰܬܰܕܘ ܥܰܠ ܩܶܛܠܳܟ ܘܛܰܝܶܒܘ ܩܰܝܣܳܐ ܠܰܙܩܺܝܦܳܟ: ܘܠܐܴ ܐܶܬܡܨܺܝܘ ܚܰܝܠܐܴ ܠܰܡܪܳܡܽܘ ܐܺܝܕܰܝ̈ܳܐ ܥܠܰܝܟ: ܒܰܕܠܐܴ ܥܕܰܟܺܝܠ ܡܛܳܐ ܗܘܳܐ ܙܰܒܢܳܐ ܕܺܝܠܳܟ: ܘܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ: ܘܰܣܥܰܪܬ ܬܶܕܡܪ̈ܳܬܳܐ ܣܰܓܺܝ̈ܳܐܬܳܐ: ܘܳܐܬܘ̈ܳܬܳܐ ܬܡܺܝ̈ܗܳܬܳܐ: ܟܽܠܗܶܝܢ ܐܰܝܠܶܝܢ ܕܰܪܫܰܡܘ ܠܳܟ ܢܒܺܝ̈ܶܐ ܩܰܕܺܝ̈ܫܶܐ: ܕܬܺܐܬܶܐ ܠܚܰܫܳܐ ܡܰܚܝܳܢܳܐ ܕܡ̣ܶܢ ܨܶܒܝܳܢܳܟ: ܘܰܛܥܶܡܬ ܡܰܘܬܳܐ ܕܰܫܦܰܪ ܠܳܟ: ܘܰܐܓܶܣܬ ܒܶܝܬ ܡܺܝ̈ܬܶܐ ܬܠܳܬܳܐ ܝܰܘ̈ܡܺܝܢ: ܘܩܳܡܬ ܒܬܶܫܒܽܘܚܬܳܐ ܘܰܒܙܳܟܽܘܬܳܐ ܘܰܐܩܺܝܡܬ ܥܰܡܳܟ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܰܫܟܺܝܒܺܝܢ ܗܘܰܘ. ܒܫܶܢܬܳܐ ܝܰܩܺܝܪܬܳܐ ܕܡܰܘܬܳܐ. ܘܡ̣ܶܢ ܢܽܘܓܪܳܐ ܪܰܒܳܐ ܠܳܟ ܡܣܰܟܶܝܢ ܗܘܰܘ: ܘܡ̣ܶܢ ܬܚܶܝܬ ܢܺܝܪܶܗ ܕܡܰܘܬܳܐ ܝܰܥܢܳܐ ܫܰܘܙܶܒܬ ܐܶܢܽܘܢ ܘܡܶܛܽܠܗܳܕܶܐ ܟܽܠܗܶܝܢ ܒܶܪ̈ܝܳܬܳܐ ܣܳܓܕ̈ܳܢ ܘܡܰܘܕ̈ܝܳܢ ܘܰܡܫܰܒ̈ܚܳܢ ܠܳܟ: ܥܰܠ ܣܰܓܺܝܽܐܘܬ ܛܰܝܒ̈ܘܳܬܳܟ ܕܰܠܘܳܬܰܢ: ܘܰܒܩܳ̈ܠܐܷ ܕܬܰܘܕ̈ܝܳܬܳܐ ܡܰܙܥ̈ܩܳܢ ܘܳܐܡܪ̈ܳܢ: ܒܪܺܝܟ ܗ̣ܽܘ ܡܫܺܝܚܳܐ ܕܩܳܡ ܒܫܽܘܒܚܳܐ ܡ̣ܶܢ ܩܰܒܪܳܐ: ܘܰܐܩܺܝܡ ܠܓܶܢܣܳܐ ܕܒܶܝܬ ܐܳܕܳܡ: ܒܪܺܝܟ ܕܰܢܚܶܬ ܠܰܫܝܽܘܠ ܕܳܘܺܝܬܳܐ: ܘܒܰܙܳܗ̇ ܘܗܰܓܡܳܗ̇ ܘܥܰܒܕܳܗ̇ ܕܝܳܫܳܐ ܠܟܽܠ ܕܰܡܗܰܝܡܶܢ ܘܡܰܘܕܶܐ ܒܳܟ ܕܰܐܢ̱ܬ ܐܺܝܬܰܝܟ ܐܠܰܗܳܐ ܫܰܪܺܝܪܳܐ. ܒܪܺܝܟ ܕܰܚܒܰܫ ܢܰܦܫܶܗ ܒܓܰܘ ܩܰܒܪܳܐ ܘܬܰܒܰܪ ܠܢܺܝܪܶܗ ܕܡܳܪܽܘܕܳܐ ܕܡ̣ܶܢ ܨܰܘܪ̈ܶܐ ܕܰܥܓܺܝ̈ܢܰܝ ܥܰܠ ܥܰܦܪܳܐ ܘܰܡܠ̣ܰܟ ܚܰܝ̈ܶܐ ܘܢܽܘܚܳܡܳܐ ܠܰܡܗܰܝ̈ܡܢܶܐ. ܘܥܰܠ ܗܳܕܶܐ ܡܳܪܝ ܡܦܺܝܣܺܝܢܰܢ ܘܒܳܥܶܝܢܰܢ ܡܶܢܳܟ ܒܥܺܐܕܳܐ ܫܒܺܝܚܳܐ ܕܰܩܝܳܡܬܳܟ ܕܬܶܬܶܠ ܠܰܢ ܚܰܕ̈ܘܳܬܳܟ: ܘܢܶܬܢܰܗܪ̈ܳܢ ܢܰܦ̈ܫܳܬܰܢ ܒܨܶܡܚܰܝ̈ܟ ܡܰܐܚܝ̈ܳܢܶܐ ܘܢܶܬܦܰܨܶܐ ܡ̣ܶܢ ܚܶܫܽܘܟܳܐ ܕܰܚܛܺܝܬܳܐ ܘܰܒܕܶܚܠܰܬ݀ ܐܠܰܗܳܐ ܢܶܫܬܰܘܫܰܛ. ܟܰܕ ܥܺܕܬܳܟ ܩܰܕܺܝܫܬܳܐ ܒܫܰܝܢܳܐ ܬܶܨܛܰܒܰܬܝ: ܘܟܳܗ̈ܢܶܐ ܕܺܝܠܳܗ̇ ܒܕܰܟܝܽܘܬܳܐ ܢܗܰܠܠܽܘܢ: ܘܟܶܢܫܶܝ̈ܗ̇ ܒܙܰܗܝܽܘܬܳܐ ܢܫܰܡܫܽܘܢ ܘܒܰܡܪܰܚܡܳܢܽܘܬܳܐ ܢܶܨܛܰܒܬܽܘܢ. ܘܰܟܪ̈ܺܝܗܶܐ ܕܒܳܗ̇ ܢܶܬܚܰܠܡܽܘܢ. ܘܰܐܠܺܝ̈ܨܶܐ ܢܶܬܪܰܘܚܽܘܢ: ܘܩܰܪ̈ܺܝܒܶܐ ܘܪ̈ܰܚܺܝܩܶܐ ܢܶܬܢܰܛܪܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܪܽܘܚܳܢܳܐܺܝܬ ܢܶܬܕܰܟܪܽܘܢ ܘܢܰܦ̈ܫܳܬܗܽܘܢ ܒܰܡ̈ܛܰܠܠܐܷ ܢܰܗܺܝܪ̈ܳܬܳܐ ܢܶܬܒܰܣ̈ܡܳܢ ܘܥܰܠ ܟܽܠܰܢ ܪ̈ܰܚܡܰܝܟ ܝܶܫܽܘܥ ܐܠܰܗܰܢ ܢܶܫܬܰܦܥܽܘܢ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܢܽܘܗܪܳܐ ܓܰܐܝܳܐ ܘܨܶܡܚܳܐ ܕܰܐܒܳܐ ܡܬܽܘܡܳܝܳܐ. ܠܗ̇ܰܘ ܕܺܐܝܬܰܘܗܝ ܒܪܳܐ ܘܡܶܠܬܳܐ ܚܰܝܳܐ ܘܠܐܴ ܡܶܫܬܚܠܳܦܳܢܳܐ ܕܝܳܠܽܘܕܳܐ ܠܐܴ ܡܶܫܬܰܚܠܦܳܢܳܐ ܘܰܐܒܳܐ ܕܰܫܪܳܪܳܐ: ܕܠܶܗ ܡܦܺܝܣܺܝܢܰܢ ܐܳܦ ܡܶܬܟܰܫܦܺܝܢܰܢ ܕܰܢܫܰܪܰܪ ܠܰܢ ܒܚܽܘܒܶܗ ܐܠܰܗܳܝܳܐ ܘܢܶܡܠܐܷ ܠܰܢ ܡ̣ܶܢ ܣܰܒܪܳܐ ܕܺܝܠܶܗ ܡܰܚܝܳܢܳܐ: ܘܰܢܩܰܒܶܠ ܨܠܰܘ̈ܳܬܰܢ ܥܰܠ ܡܰܕܒܚܶܗ ܫܡܰܝܳܢܳܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܠܐܴ ܡܶܫܬܰܚܠܦܳܢܳܐܺܝܬ ܡܶܫܬܰܒܰܚ ܐܰܢ̱ܬ ܘܡܶܣܬܓܶܕ: ܗ̇ܰܘ ܕܡ̣ܶܢ ܚܰܝܠܰܘ̈ܳܬܳܐ ܢܽܘܪ̈ܳܢܳܝܶܐ: ܘܕܰܠܥܶܠ ܡ̣ܶܢ ܚܰܝܠܐܴ ܘܰܠܥܶܠ ܡ̣ܶܢ ܥܳܠܡܳܐ: ܒܩܽܘܕ̈ܳܫܶܐ ܬܠܺܝ̈ܬܳܝܶܐ ܡܩܰܒܶܠ ܐܰܢ̱ܬ ܘܡ̣ܶܢ ܦܳܠܰܚܘ̈ܳܬܳܐ ܠܐܴ ܗܽܘܠܳܢܳܝ̈ܳܬܳܐ ܡܶܬܪܰܡܰܪܡ ܐܰܢ̱ܬ. ܥܰܠ ܓܺܝ̈ܓܠܐܷ ܡ̈ܰܠܳܠܳܬܳܐ ܡܶܙܕܰܝܰܚ ܐܰܢ̱ܬ ܡ̣ܶܢ ܝܰܗ̈ܠܐܷ: ܘܬܶܓܡ̈ܶܐ ܘܡܳܪ̈ܰܘܳܬܳܐ: ܘܟܰܕ ܨܒܰܝܬ ܒܪܶܚܡܰܬ݀ ܐ̱ܢܳܫܽܘܬܳܟ ܕܰܠܓܶܢܣܰܢ ܥܰܦܪܳܢܳܐ ܬܪܰܡܪܶܡ ܘܚܰܒܪܳܐ ܘܰܐܚܝܳܢܳܐ ܕܪ̈ܽܘܚܳܢܶܐ ܠܶܗ ܬܶܥܒܶܕ: ܘܰܕܫܳܘܶܐ ܠܰܛܝܳܪܳܐ ܕܚܰܝ̈ܶܐ ܚܰܕ̈ܬܶܐ: ܘܒܰܐܬܪ̈ܰܘܳܬܳܐ ܕܰܡܠܶܝܢ ܛܽܘ̈ܒܶܐ ܘܒܽܘ̈ܣܳܡܶܐ ܠܶܗ ܬܛܰܟܶܣ: ܘܠܐܴܕܳܡ ܗ̇ܰܘ ܩܰܕܡܳܝܳܐ ܘܰܕܡ̣ܶܢ ܛܺܝܢܳܐ ܒܰܣܝܳܐ ܠܗܰܘܢܳܐ ܐܰܝܬܺܝܬ ܘܰܠܗܳܢܳܐ ܨܰܒܬܶܬ ܒܫܽܘܠܛܳܢܳܐ ܘܡܰܠܟܽܘܬܳܐ: ܘܥܰܠ ܟܽܠ ܡܳܐ ܕܰܒܪܰܝܬ ܡܳܪܳܢܳܐܺܝܬ ܠܶܗ ܐܰܫܠܶܛܬ: ܘܟܰܕ ܠܘܳܬ ܟܝܳܢܳܐ ܕܺܝܠܶܗ ܐܰܪܥܳܢܳܝܳܐ ܐܶܫܬܰܪܓܰܠ ܘܰܠܘܳܬ ܡܶܕܪܳܢܳܝܽܘܬܶܗ ܐܶܬܬܰܚܬܺܝ ܘܡ̣ܶܢ ܫܽܘܒܚܳܐ ܗ̇ܰܘ ܥܶܠܳܝܳܐ ܕܺܝܠܶܗ ܢܦܰܠ ܒܝܰܕ ܥܒܳܪ ܦܽܘܩܕܳܢܳܐ ܕܥܰܠ ܡܶܠܬܳܐ ܕܺܝܠܳܟ ܡܳܪܳܢܳܝܬܳܐ: ܘܕܽܘܝܳܪܳܐ ܕܒܰܫܝܽܘܠ ܩܰܒܶܠ ܘܰܥܓܺܝܢܳܐ ܐܶܬܚܙܺܝ ܒܰܣܝܳܢܳܐ ܐܶܠܐܴ ܘܪ̈ܰܚܡܶܐ ܕܺܝܠܳܟ ܟܝܳܢܳܝ̈ܶܐ ܢܰܓܕܽܘܟ ܐܳܘ ܡܳܪܝܳܐ ܕܬܶܦܪܩܺܝܘܗܝ ܘܬܰܥܕܺܝܘܗܝ ܡ̣ܶܢ ܨܳܡܰܪܬܳܐ ܕܒܳܗ̇ ܛܰܒܺܝܥ ܗܘܳܐ ܘܰܠܘܳܬ ܫܽܘܒܚܳܐ ܕܺܝܠܳܟ ܗ̇ܰܘ ܩܰܕܡܳܝܳܐ ܬܰܦܢܶܝܘܗܝ. ܘܟܰܕ ܒܛܰܝܒܽܘܬܳܟ ܗ̇ܳܝ ܒܳܪܝܰܬ݀ ܟܽܠ ܘܰܒܪܶܚܡܰܬ݀ ܐ̱ܢܳܫܽܘܬܳܟ ܕܠܐܴ ܡܶܣܬܰܝܟܳܐ ܦܰܓܪܳܐ ܕܡܽܘܟܳܟܳܐ ܠܒܶܫܬ. ܘܰܠܘܳܬ ܥܽܘ̈ܡܩܶܐ ܕܰܫܝܽܘܠ ܢܚܶܬܬ: ܘܝܰܘ̈ܡܶܐ ܬܠܳܬܳܐ ܒܶܝܬ ܡܺܝ̈ܬܶܐ ܐܰܓܶܣܬ ܘܬܰܪ̈ܥܶܐ ܘܣܽܘܟܪ̈ܶܐ ܕܗܳܡܳܢ ܒܳܠܥܰܬ݀ ܕܳܪ̈ܶܐ ܘܫܰܪ̈ܒܳܬܳܐ ܓܕܰܡܬ ܘܠܐܴܕܳܡ ܗ̇ܰܘ ܨܰܠܡܳܐ ܦܰܐܝܳܐ ܕܰܐܠܳܗܽܘܬܳܟ ܡ̣ܶܢ ܐܺܝ̈ܕܰܝ ܒܺܝܫܳܐ ܫܰܘܙܶܒܬ ܘܰܦܪܰܩܬ. ܘܡ̣ܶܢ ܨܳܡܰܪܬܳܐ ܕܰܐܒܕܳܢܳܐ ܒܪܶܚܡܰܬ݀ ܐ̱ܢܳܫܽܘܬܳܟ ܕܰܐܠܺܝܬܳܝܗܝ: ܘܰܠܘܳܬ ܬܶܫܒܽܘܚܬܳܟ ܩܰܪܶܒܬܳܝܗܝ. ܗܳܝܕܶܝܢ ܫܪܰܝܬ ܕܰܬܚܰܘܶܐ ܠܓܶܢܣܰܢ ܡܚܺܝܠܐܴ: ܐ̱ܪ̈ܳܙܶܐ ܓܢܺܝ̈ܙܶܐ ܕܰܐܠܳܗܽܘܬܳܟ ܐܰܝܟܰܢܳܐ ܕܰܢܗܰܝܡܢܽܘܢ ܥܠܰܝܗܽܘܢ ܘܢܰܘܕܶܐ ܠܳܟ ܥܰܠ ܩܝܳܡܬܳܟ ܡܫܰܒܰܚܬܳܐ ܕܪܰܡܪܶܡܬ ܒܳܗ̇ ܫܰܦܠܽܘܬܶܗ ܕܓܶܢܣܰܢ: ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܳܟ ܐܳܘ ܡܳܪܝܳܐ ܛܳܒܳܐ ܘܣܰܓܺܝ ܪ̈ܰܚܡܶܐ ܕܬܰܢܗܰܪ ܠܰܢ ܒܢܽܘܗܪܳܟ ܘܰܬܨܰܒܶܬ ܠܥܺܕܬܳܟ ܒܨܶܒ̈ܬܶܐ ܕܰܡܠܶܝܢ ܦܰܐܝܽܘܬܳܐ ܘܰܬܫܰܪܰܪ ܠܰܢ ܥܰܠ ܫܶܬܶܐܣܬܳܐ ܕܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ. ܘܰܬܪܰܡܪܶܡ ܩܰܪܢܳܐ ܕܰܟܪ̈ܺܝܣܛܝܳܢܶܐ ܒܰܗܕܺܝܪܽܘܬܳܐ ܘܰܬܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܡܪܰܚܡܳܢܽܘܬܳܟ: ܘܬܶܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܒܰܡܢܺܝܚܽܘܬܳܐ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܓܰܘܙܶܠ ܠܰܢ ܡܳܪܝ ܒܚܽܘܒܳܟ: ܘܢܰܒܪܶܫ ܠܰܢ ܒܪܶܚܡܬܳܟ. ܘܚܰܟܶܡ ܠܰܢ ܒܚܶܟܡܬܳܟ ܘܰܐܩܺܝܡ ܠܰܢ ܡ̣ܶܢ ܝܰܡܺܝܢܳܟ ܘܫܰܪܰܪ ܠܰܢ ܒܣܰܒܪܳܐ ܒܪܺܝܟܳܐ ܕܰܩܝܳܡܬܳܟ: ܘܰܐܫܘܳܐ ܠܰܢ ܕܢܶܚܕܶܐ ܘܢܶܬܦܨܰܚ ܒܢܽܘܚܳܡܳܟ: ܕܢܶܬܓܠܐܷ ܒܰܢ ܚܽܘܒܳܟ ܐܠܰܗܳܝܳܐ ܒܪܶܚܡܬܳܐ ܕܦܽܘܩܕܳܢܰܝ̈ܟ ܡܰܥܒ̈ܕܰܝ ܚܰܝ̈ܶܐ ܡܳܪܰܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܰܚܕܳܐ ܡܳܪܽܘܬܳܐ ܡܬܽܘܡܳܝܬܳܐ ܘܰܐܠܳܗܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ ܬܠܺܝܬܳܐܺܝܬ ܡܶܬܦܰܠܓܳܐ ܘܡܶܬܚܰܝܕܳܐ ܘܡܶܬܬܰܠܽܘܬܳܐ ܚܕܳܢܳܐܺܝܬ: ܐܰܟܡܳܐ ܕܐܪܳܙܳܢܳܐܺܝܬ ܡܒܰܕܩܳܐ ܒܡܰܡܠܠܽܘܬ ܫܽܘܒܚܳܐ ܕܰܣܪ̈ܳܦܶܐ ܩܰܕܺܝ̈ܫܶܐ. ܒܰܕܓܽܘܢ ܕܶܝܢ ܐܺܝܬܶܝܗ̇ ܘܡܶܬܗܰܝܡܢܳܐ ܗ̣ܺܝ ܟܰܕ ܗ̣ܺܝ ܚܕܳܐ ܐܠܰܗܽܘܬܳܐ ܡܫܰܡܠܳܝܬܳܐ: ܘܒܰܬܠܳܬܳܐ ܩܢܽܘ̈ܡܶܐ ܘܒܰܬܠܳܬܳܐ ܕܺܝܠܳܝ̈ܳܬܳܐ ܡܶܬܗܰܘܢܳܢ̈ܝܳܬܳܐ ܟܺܝܬ ܡܶܬܝܰܩܢܳܐ: ܕܰܠܗܶܝܢ ܐܺܝܬܰܘܗܝ ܥܽܘܬܪܳܐ ܘܰܫܒܺܝܚܽܘܬܳܐ ܘܛܳܒܽܘܬܳܐ ܘܨܶܒܝܳܢܳܐ ܘܡܰܥܒܕܳܢܽܘܬܳܐ ܠܶܗ ܝܳܐܶܐ܀

 

ܣܕܪܐ

ܐܠܰܗܳܐ ܡܶܠܬܳܐ ܡܪܰܝܡܳܐ ܕܶܐܬܺܝܠܶܕ ܡ̣ܶܢ ܐܰܒܳܐ ܕܠܐܴ ܪܶܕܝܳܐ ܘܰܕܠܐܴ ܙܰܒܢܳܐ ܢܽܘܗܪܳܐ ܕܡ̣ܶܢ ܢܽܘܗܪܳܐ: ܐܠܰܗܳܐ ܫܰܪܺܝܪܳܐ ܕܡ̣ܶܢ ܐܠܰܗܳܐ ܫܰܪܺܝܪܳܐ: ܗ̇ܰܘ ܕܟܰܕ ܡ̣ܶܢ ܥܳܠܡܳܐ ܬܪܰܝܳܢܳܐ ܒ̣ܪܳܐ ܘܰܐܬܩܢܶ: ܘܒܳܪܽܘܝܽܘܬܳܐ ܕܳܐܕܳܡ ܒܨܰܠܡܶܗ ܘܒܰܕܡܽܘܬܶܗ ܘܰܒܫܰܦܺܝܪܽܘܬ ܡܠܰܚܡܽܘܬܳܐ ܝܰܩܪܶܗ: ܘܥܰܠ ܟܽܠ ܐܰܫܠܛܶܗ: ܘܰܒܦܰܪܕܰܝܣܳܐ ܕܰܥܕܶܝܢ ܡܳܪܳܐ ܥܰܒܕܶܗ: ܘܚܺܐܪܽܘܬܳܐ ܝܰܗܒ ܠܶܗ. ܘܰܬܚܽܘܡܳܐ ܣܳܡ ܠܶܗ: ܕܠܐܴ ܒܙܰܒܢܶܗ. ܘܟܰܕ ܠܦܰܐܝܽܘܬܶܗ ܕܦܺܐܪܳܐ ܪܓܺܝܓܳܐ ܐܶܬܪܰܓܪܰܓ ܐܶܟܰܠ ܘܰܥܒܰܪ ܦܽܘܩܕܳܢܳܐ: ܘܰܚ̣ܛܳܐ ܒܫܽܘܠܛܳܢܳܐ ܕܚܺܐܪܽܘܬܶܗ ܘܰܠܦܺܐܪܳܐ ܕܺܐܝܠܳܢܳܐ ܢܰܫܺܝܫܳܐܺܝܬ ܐܶܫܬܰܪܓܰܠ ܘܡ̣ܶܢ ܫܽܘܒܚܶܗ ܐܶܫܬܰܠܰܚ ܒܗ̇ܳܝ ܕܰܢܦܰܠ ܗܘܳܐ ܡܰܦܽܘܠܬܳܐ ܪܰܒܬܳܐ ܘܥܰܫܺܝܢܬܳܐ ܒܶܠܥܳܕ ܙܽܘܘܳܓܳܐ ܟܝܳܢܳܝܳܐ. ܟܰܕ ܕܶܝܢ ܚܙܳܐ ܒܳܪܽܘܝܳܐ ܠܨܰܠܡܶܗ ܕܶܐܬܚܰܒܰܠ ܘܰܫܪܶܟ ܠܰܚܒ̇ܳܠܐܴ: ܘܒܺܝܫܳܐ ܒܰܚܣܳܡܶܗ ܕܳܐܶܫ ܘܡܰܗܶܠ ܒܶܗ: ܟܶܪܝܰܬ݀ ܠܶܗ ܠܒܳܪܽܘܝܳܐ ܥܰܠ ܨܰܠܡܶܗ ܘܰܢܒܺܝ̈ܶܐ ܘܚܰܙܳܝ̈ܶܐ ܫܰܕܰܪ ܘܰܒܟܽܠ ܡܢܰܘ̈ܳܢ ܘܟܽܠ ܕܶܡܘ̈ܳܢ ܕܢܰܪܬܽܘܢܳܝܗܝ ܐܶܠܐܴ ܐܶܬܬܰܪܬܺܝ. ܘܡ̣ܶܢ ܬܰܡܳܢ ܥܨܳܝܗܝ ܚܽܘܒܶܗ ܣܰܓܺܝܳܐܐ ܘܚܰܝܽܘܣܬܳܢܽܘܬܶܗ ܕܠܐܴ ܡܶܬܬܟܺܝܠܐܴ ܘܰܠܝܰܠܕܳܐ ܕܡ̣ܶܢ ܥܽܘܒܶܗ ܘܨܶܡܚܳܐ ܕܺܐܝܬܽܘܬܶܗ ܫܰܕܪܶܗ ܠܐܱܪܥܳܐ ܟܽܘܒܳܢܳܝܬܳܐ ܕܺܝܠܰܢ ܕܢܶܛܥܰܢ ܟܺܐܒܰܝ̈ܢ: ܘܟܽܘܪ̈ܗܳܢܰܝܢ ܢܶܣܰܒ: ܘܰܗܘܳܐ ܕܶܒܚܳܐ ܡܚܰܣܝܳܢܳܐ ܡܶܛܽܠܳܬܰܢ: ܘܪܺܝܫܟܽܘܡܪ̈ܶܐ ܕܬܰܘܕܺܝܬܰܢ: ܘܰܠܒܶܫ ܦܰܓܪܳܐ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܘܠܐܴ ܡܢܰܣܝܰܬ݀ ܒܙܽܘܘܳܓܳܐ ܡܰܪܝܰܡ: ܡ̣ܶܢ ܓܶܢܣܶܗ ܕܕܰܘܺܝܕ: ܘܰܒܟܽܠܗܶܝܢ ܕܺܝܠܰܢ ܗܰܠܶܟ ܐܰܟܘܳܬܰܢ ܣܛܰܪ ܡ̣ܶܢ ܥܶܕܠܳܝܳܐ ܘܰܚܛܺܝܬܳܐ ܘܶܐܬܳܐ ܠܚܰܫܳܐ ܘܡܽܘܟܳܟܳܐ ܒܨܶܒܝܳܢܶܗ ܗ̇ܰܘ ܠܐܴ ܚܳܫܽܘܫܳܐ ܘܠܐܴ ܡܳܝܽܘܬܳܐ. ܐܶܬܕܒܰܪ ܠܒܶܝܬ ܕܺܝܢܳܐ ܐܰܝܟ ܚܰܝܳܒܳܐ. ܗ̇ܰܘ ܕܰܐܠܒ̣ܶܫ ܠܐܴܕܳܡ ܬܶܢܝܳܢܽܘܬ ܬܶܫܒܽܘܚܬܳܐ. ܒܩܰܢܝܳܐ ܡܚܰܘ ܥܰܠ ܪܺܝܫܶܗ ܡܝܰܩܪܳܐ: ܗ̇ܰܘ ܕܰܡܬܰܚ ܫܡܰܝܳܐ ܐܰܝܟ ܝܳܪܺܝܥܬܳܐ: ܘܰܪܩܰܥ ܐܰܪܥܳܐ ܥܰܠ ܡܰܝ̈ܳܐ ܕܠܐܴ ܫܶܬܶܐܣ̈ܶܐ: ܡܰܬܚܽܘܗܝ ܥܰܠ ܩܰܝܣܳܐ ܕܰܨܠܺܝܒܳܐ ܒܢ̈ܰܝ ܨܶܗܝܽܘܢ ܨܳܠܽܘܒܬܳܐ: ܘܰܐܝܬܺܝܘ ܠܶܗ ܚܰܠܐܴ ܘܰܡܪܳܪ̈ܶܐ ܒܥܶܕܳܢ ܨܶܗܝܶܗ: ܠܗ̇ܰܘ ܕܡܰܪܘܶܐ ܠܐܱܪܥܳܐ ܒܡܶܛܪ̈ܶܐ ܘܰܪ̈ܣܺܝܣܶܐ ܕܒܰܣܺܝܡܽܘܬܶܗ ܓܕܰܠܘ ܠܶܗ ܟܠܺܝܠܐܴ ܕܟܽܘ̈ܒܶܐ ܘܣܳܡܘ ܒܪܺܝܫܶܗ ܐܰܝܟ ܕܰܒܒܶܙܚܳܐ: ܟܰܕ ܗ̣ܽܘ ܐܺܝܬܰܘܗܝ ܕܡܰܦܪܶܓ ܠܐܱܪܥܳܐ ܒܦܰܩ̈ܚܶܐ ܕܟܽܠ ܓܢܶܣ ܕܒܳܪܽܘܝܽܘܬܶܗ: ܚܰܒܫܽܘܗܝ ܒܓܰܘ ܩܰܒܪܳܐ ܕܠܐܴ ܢܶܬܢܰܚܰܡ ܘܢܰܓܗܽܘܢ ܡܶܢܶܗ ܒܗ̇ܳܝ ܕܰܐܣܠܺܝ ܐܶܢܽܘܢ: ܘܰܬܠܳܬܳܐ ܝܰܘ̈ܡܺܝܢ ܟܰܬܰܪ ܒܶܝܬ ܡܺܝ̈ܬܶܐ ܟܰܕ ܙܳܪܰܥ ܫܰܝܢܳܐ ܘܰܫܠܳܡܳܐ ܠܟܽܠܗܽܘܢ ܫܟܺܝ̈ܒܶܐ ܕܒܰܫܝܽܘܠ ܩܳܡ ܡ̣ܶܢ ܩܰܒܪܳܐ ܕܠܐܴ ܚܒܳܠܐܴ ܒܳܬܰܪ ܫܟܺܝܒܽܘܬܳܐ ܘܒܳܬܰܪ ܡܰܪܬܝܳܢܽܘܬܳܐ ܕܺܝܠܶܗ ܠܪ̈ܳܚܡܰܘܗܝ ܘܰܣܒܰܪܬܳܐ ܕܚܰܕܽܘܬܳܐ ܐܰܟܪܶܙ: ܢܚܶܬ ܠܒܶܝܬ ܡܺܝ̈ܬܶܐ ܘܰܐܓܶܣ ܥܰܡ ܫܟܺܝ̈ܒܶܐ ܬܠܳܬܳܐ ܝܰܘ̈ܡܺܝܢ: ܘܕܳܫܶܗ ܠܡܰܘܬܳܐ ܝܰܥܢܳܐ ܘܠܰܫܝܽܘܠ ܕܳܘܺܝܬܳܐ ܐܰܚܪܶܒ: ܛܰܥܢܽܘܗܝ ܬܪܶܝܢ ܓܰܒܪ̈ܶܐ ܕܰܫܡܳܗ̈ܳܬܳܐ ܘܣܳܡܽܘܗܝ ܒܶܝܬ ܡܺܝ̈ܬܶܐ: ܘܛܰܥܢܶܗ ܠܐܴܕܳܡ ܥܶܪܒܳܐ ܕܶܐܒܰܕ ܘܰܣܠܶܩ ܒܙܰܘܚܳܐ ܪܰܒܳܐ ܡ̇ܰܢ: ܘܰܐܥܕܺܝ ܠܨܰܠܡܶܗ ܡ̣ܶܢ ܐܺܝܕܳܐ ܕܰܛܪܽܘܢܳܐ ܒܥܶܠܕܒܳܒܶܗ: ܘܟܰܬܰܪ ܥܰܠ ܐܰܪܥܳܐ ܐܰܪܒܥܺܝܢ ܝܰܘ̈ܡܺܝܢ ܒܳܬܰܪ ܩܝܳܡܬܶܗ ܡܫܰܒܰܚܬܳܐ: ܘܫܰܪܰܪ ܠܬܰܠܡܺܝ̈ܕܰܘܗܝ ܘܰܐܦܶܩ ܐܶܢܽܘܢ ܠܰܡܣܰܒܳܪܽܘ ܒܰܐܪܒܰܥ ܦܶܢ̈ܝܳܢ. ܫܰܕܰܪ ܥܠܰܝܗܽܘܢ ܪܽܘܚܳܐ ܩܰܕܺܝܫܳܐ ܘܰܐܢܗܰܪ ܐܶܢܽܘܢ ܘܩܰܕܶܫ ܚܽܘܫܳܒܰܝ̈ܗܽܘܢ ܘܡܰܕܥܰܝ̈ܗܽܘܢ ܘܰܠܥܳܡܰܪܬܳܐ ܐܰܦܶܩ ܐܶܢܽܘܢ: ܘܰܣܠܶܩ ܠܰܫܡܰܝܳܐ ܒܙܰܘܚܳܐ ܘܰܒܩ̈ܳܠܐܷ ܕܩܰܪ̈ܢܳܬܳܐ ܘܠܶܗ ܐܶܫܬܰܘܕܰܥܘ ܟܝ̈ܳܢܶܐ ܟܽܠܗܽܘܢ ܕܗܽܘܝܽܘ ܡܳܪܗܽܘܢ ܘܰܐܠܳܗܗܽܘܢ: ܩܰܒܠܽܘܗܝ ܛܶܟ̈ܣܶܐ ܕܰܫܡܰܝ̈ܳܢܶܐ ܘܰܐܙܥܶܩܘ ܟܽܠܗܽܘܢ ܡ̣ܶܢ ܕܽܘܟܝ̈ܳܬܗܽܘܢ ܒܪܺܝܟܳܐ ܗ̱̇ܝ ܡܶܐܬܺܝܬܳܟ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ. ܒܪܺܝܟ ܐܰܢ̱ܬ ܡܳܪܳܐ ܕܪܰܘܡܳܐ ܘܰܕܥܽܘܡܩܳܐ ܕܰܐܝܟ ܚܰܬܢܳܐ ܕܢܳܦ̇ܶܩ ܡ̣ܶܢ ܒܶܝܬ ܓܢܽܘܢܳܐ ܕܺܝܠܶܗ. ܗܳܟܰܢܳܐ ܩܳܡܬ ܡ̣ܶܢ ܩܰܒܪܳܐ ܠܰܬܠܰܬܳܐ ܝܰܘ̈ܡܺܝܢ: ܒܪܺܝܟܳܐ ܗ̱̇ܝ ܡܶܐܬܺܝܬܳܟ ܕܰܠܘܳܬܰܢ ܩܥܰܘ ܛܶܟ̈ܣܶܐ ܕܰܠܥܶܠ ܘܚܰܝܠܰܘ̈ܳܬܳܐ ܘܰܐܪ̈ܟܰܐܣ ܘܫܽܘܠܛܳܢ̈ܶܐ: ܒܪܺܝܟ ܫܽܘܘܕܳܝܳܟ ܕܰܠܘܳܬ ܪ̈ܰܚܡܰܝܟ ܟܺܐܢ̈ܶܐ ܘܙܰܕܺܝ̈ܩܶܐ: ܐܰܒܪܳܗܳܡ: ܘܺܐܝܣܚܳܩ ܘܝܰܥܩܽܘܒ ܘܡܽܘܫܶܐ: ܘܝܶܫܽܘܥ ܒܰܪܢܽܘܢ: ܘܰܐܗܪܽܘܢ ܘܶܐܠܺܝܥܳܙܳܪ: ܘܦܺܝܢܚܶܣ ܘܰܫܡܽܘܐܶܝܠ. ܘܟܽܠܳܗ̇ ܓܽܘܕܳܐ ܕܰܢܒܺܝ̈ܶܐ: ܘܰܐܒܳܗ̈ܳܬܳܐ ܕܡ̣ܶܢ ܢܽܘܓܪܳܐ ܪܰܒܳܐ ܡܣܰܟܶܝܢ ܗܘܰܘ ܠܳܟ: ܘܟܰܕ ܚܙܰܐܘܽܘܟ ܐܶܫܬܰܘܕܥܽܘܟ ܘܝܰܕܥܽܘܢ ܕܰܐܢ̱ܬ ܗ̣ܽܘ ܐܺܝܬܰܝܟ ܡܳܪܗܽܘܢ ܘܰܐܠܳܗܗܽܘܢ ܘܦܳܪܽܘܩܗܽܘܢ ܘܰܐܢܗܰܪܬܳܗ̇ ܠܗܳܡܳܢ ܥܠܰܝܗܽܘܢ ܘܰܐܕܢܰܚܬ ܒܳܗ̇ ܙܰܠܺܝ̈ܩܰܝܟ ܡܰܐܚܝ̈ܳܢܶܐ ܬܠܳܬܳܐ ܐܺܝܡ̈ܳܡܶܐ ܘܰܬܠܳܬܳܐ ܠܰܝܠܰܘ̈ܳܬܳܐ. ܘܰܠܗ̇ܰܘ ܨܰܚܢܳܐ ܐܳܕܳܡ ܕܰܛܥܳܐ: ܘܠܰܒܢܰܘ̈ܗܝ ܟܽܠܗܽܘܢ ܒܺܐܝܕܳܐ ܒܺܐܝܕܳܐ ܐܰܣܶܩܬ ܐܶܢܽܘܢ: ܘܡ̣ܶܢ ܥܰܒܕܽܘܬܳܐ ܘܫܽܘ̈ܢܳܩܶܐ ܕܡܳܪܽܘܕܳܐ ܐܰܓܗܺܝܬ ܐܶܢܽܘܢ. ܘܒܽܘܣܳܡܳܐ ܘܰܫܒܺܝܠܐܴ ܕܡܰܘܒܶܠ ܠܦܰܪܕܰܝܣܳܐ ܚܰܘܺܝܬ ܐܶܢܽܘܢ: ܘܡ̣ܶܢ ܚܶܫܽܘܟܬܳܐ ܕܡܺܝ̈ܬܶܐ ܗ̇ܳܝ ܕܡܰܠܝܳܐ ܗܘܳܬ݀ ܣܝܳܢܳܐ ܕܰܐܠܺܝܬ ܐܶܢܽܘܢ: ܡܳܐ ܫܒܺܝܚܺܝܢ ܥܒܳܕܰܝ̈ܟ ܡܳܪܝܳܐ ܘܡܳܐ ܣܰܓܺܝ̈ܳܐܢ ܬܶܕܡܪ̈ܳܬܳܟ: ܘܡܳܐ ܬܡܺܝܗܺܝܢ ܚܰܘܣܳܢܰܝ̈ܟ ܕܰܠܘܳܬ ܓܶܢܣܳܢ ܕܟܽܠܗܶܝܢ ܪ̈ܳܡܳܬܳܐ ܘܡܳܐܟ̈ܳܬܳܐ ܚܠܳܦܰܝܢ ܫܰܡܠܺܝܬ ܒܰܡܕܰܒܪܳܢܽܘܬܳܟ. ܘܩܳܡܬ ܡ̣ܶܢ ܩܰܒܪܳܐ: ܘܰܐܩܺܝܡܬ ܠܰܢ ܡܳܪܳܢܳܐܺܝܬ: ܡܦܺܝܣܺܝܢܰܢ ܐܳܦ ܡܶܬܟܰܫܦܺܝܢܰܢ ܠܳܟ ܐܠܰܗܳܐ ܕܰܐܢ̱ܬ ܗ̣ܽܘ ܐܺܝܬܰܝܟ ܐܠܰܗܳܐ ܡܫܰܠܡܳܢܳܐ: ܘܒܰܪܢܳܫܳܐ ܡܫܰܠܡܳܢܳܐ: ܕܠܐܴ ܒܽܘܨܳܪܳܐ ܘܬܰܘܣܶܦܬܳܐ ܡܰܘܕܶܝܢܰܢ ܠܳܟ. ܘܬܶܚܕܶܐ ܠܰܢ ܒܥܺܐܕܰܝ̈ܟ ܡܚܰܕ̈ܝܳܢܶܐ: ܘܬܶܕܚܽܘܩ ܡܶܢܰܢ ܠܟܶܫ̈ܠܐܷ ܐܶܪ̈ܺܝܛܺܝܩܳܝܶܐ: ܘܰܠܓܽܘܕ̈ܳܦܶܐ ܡܰܢܺܝ̈ܢܳܝܶܐ: ܘܒܶܗܬܬܳܐ ܘܦܶܚ̈ܬܶܐ ܟܰܠܩܺܝܕܽܘ̈ܢܳܝܶܐ. ܘܫܰܪܰܪܺܝܢ ܥܰܠ ܕܽܘܡ̈ܣܶܐ ܫܠܺܝ̈ܚܳܝܶܐ: ܘܚܰܝܶܠܺܝܢ ܠܡܶܛܰܪ ܦܽܘܩܕ̈ܳܢܶܐ ܐܶܘܢܓܶܠܳܝ̈ܶܐ: ܘܫܽܘܡ̈ܠܳܝܶܐ ܗ̇ܳܢܽܘܢ ܟܪ̈ܺܝܣܛܝܳܢܳܝܶܐ ܕܥܺܕܬܳܐ ܗ̇ܳܝ ܕܳܐܪܬܳܕܳܘܟܣܺܝܰܐ: ܘܰܒܝܰܘܡܳܐ ܐ̱ܚܪܳܝܳܐ ܡܳܐ ܕܳܐܬܶܐ ܐܰܢ̱ܬ ܘܡܶܬܚܰܘܝܳܐ ܐܠܰܗܽܘܬܳܟ ܠܟܽܠܗܽܘܢ ܥܰܡ̈ܡܶܐ ܕܠܐܴ ܬܰܚܦܺܝܬܳܐ. ܬܚܶܝܬ ܟܶܢ̈ܦܶܐ ܝܰܡܺܝ̈ܢܳܝܶܐ ܛܰܟܶܣ ܠܰܢ. ܘܡ̣ܶܢ ܒܽܘܣܳܡܳܐ ܕܺܝܠܳܟ ܦܰܛܶܡ ܠܰܢ. ܘܠܰܢ ܘܰܠܥܰܢܺܝ̈ܕܰܝܢ ܠܦܶܓܥܳܐ ܦܨܺܝܚܳܐ ܕܒܳܟ ܐܰܫܘܳܐ ܠܰܢ. ܡܶܛܽܠ ܕܒܳܟ    ܘܒܰܐܒܽܘܟ ܘܰܒܪܽܘܚܳܟ ܩܰܕܺܝܫܳܐ܀

 

ܥܛܪܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܒܰܥܒܳܕ̈ܶܐ ܛܳܒ̈ܶܐ ܘܒܰܙܡܺܝܪ̈ܳܬܳܐ ܒܰܣܺܝ̈ܡܳܬܳܐ ܘܰܒܕܽܘܒܳܪ̈ܶܐ ܪ̈ܽܘܚܳܢܳܝܶܐ ܢܝܰܩܰܪ ܘܰܢܪܰܡܪܶܡ ܠܝܰܘܡܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ: ܘܢܶܫܬܘܶܐ ܟܺܝܬ ܕܢܶܬܩܰܒܰܠ ܦܺܝܪܡܰܢ: ܘܢܶܬܥܰܠܐܷ ܩܕܳܡ ܐܰܒܽܘܟ ܡܫܰܒܚܳܐ: ܘܢܰܥܒܰܪ ܒܰܐܬܪܳܐ ܪܓܺܝܓܳܐ ܕܫܰܪܝܳܐ ܒܶܗ ܐܠܰܗܽܘܬܳܟ: ܘܰܢܫܰܒܰܚ ܘܰܢܙܰܡܰܪ ܠܓܰܢ̱ܒܳܪܽܘܬܳܟ ܗܳܫܳܐ܀

 

ܚܘܬܡܐ

ܩܰܒܶܠ ܡܳܪܝܳܐ ܨܠܰܘ̈ܳܬܰܢ ܘܒܳܥܘ̈ܳܬܰܢ ܕܩܰܪܶܒܢܰܢ ܩܕܳܡܰܝܟ ܡܳܪܝܳܐ ܡܪܰܚܡܳܢܳܐ: ܘܙܰܒ̈ܢܶܐ ܡܫܰܝ̈ܢܶܐ ܫܰܟܶܢ ܠܰܢ: ܘܰܫܢܰܝ̈ܳܐ ܟܰܗܺܝ̈ܢܳܬܳܐ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐ ܒܥܺܐܕܳܐ ܗܳܢܳܐ ܕܰܩܝܳܡܬܳܟ: ܘܰܐܩܺܝܡ ܠܰܢ ܡ̣ܶܢ ܝܰܡܺܝܢܳܟ: ܘܚܰܣܳܐ ܠܰܢ ܟܽܠ ܕܰܚܛܰܝܢܰܢ ܠܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܐܠܰܗܳܐ ܠܚܽܘܕܳܝܳܐ ܕܩܳܡ ܡ̣ܶܢ ܩܰܒܪܳܐ ܘܰܐܩܺܝܡ ܠܰܢ: ܘܚܰܘܺܝ ܢܰܦܫܶܗ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ ܒܰܓܠܺܝܠܐܴ: ܘܰܚܙܰܐܘܽܘܗܝ ܒܳܬܰܪ ܩܝܳܡܬܶܗ ܡ̣ܶܢ ܒܬܶܕܡܽܘܪܬܳܐ. ܐܰܢ̱ܬ ܡܳܪܝܳܐ ܐܠܰܗܳܐ ܚܰܕܳܐ ܒܫܽܘܒܩܳܢ ܚܰܘ̈ܒܰܝܢ ܘܣܰܟܠܘ̈ܳܬܰܢ ܕܰܢܫܰܒܚܳܟ ܠܐܴ ܫܰܠܘܳܐܺܝܬ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܰܢ̱ܬ ܗܳܟܺܝܠ ܡܫܺܝܚܳܐ ܐܠܰܗܳܐ ܕܺܝܠܰܢ ܒܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܰܒܣܳܥܽܘܪ̈ܘܳܬܳܟ: ܦܽܘܩܕܳܢ̈ܶܐ ܘܢܳܡܽܘ̈ܣܐ ܢܒܺܝ̈ܳܝܶܐ ܘܰܫܠܺܝ̈ܚܶܐ ܐܰܫܠܶܡܬ ܠܰܢ. ܐܰܝܟܰܢܳܐ ܕܰܒܟܽܠܙܒܰܢ ܘܟܽܠܝܽܘܡ ܥܽܘܗܕܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܢܫܰܡܠܐܷ ܘܰܢܥܰܕܥܶܕ: ܟܰܕ ܢܰܚ̈ܬܶܐ ܚܶܘܳܪ̈ܶܐ ܥܰܠ ܠܶܒܰܘ̈ܳܬܳܐ ܕܺܝܠܰܢ ܡܶܬܥܰܛܦܺܝܢܰܢ ܒܰܕܡܽܘܬ ܡܰܠܐܱܟ̈ܶܐ ܩܰܕܺܝ̈ܫܶܐ ܕܶܐܬܚܙܺܝܘ ܨܶܝܕ ܩܰܒܪܳܟ ܒܚܶܘܳܪ̈ܰܝܗܽܘܢ ܘܣܰܒܰܪܘ ܢܽܘܚܳܡܳܐ ܘܚܰܝ̈ܶܐ ܠܢܶܫ̈ܶܐ ܕܰܛܥܶܢ̈ܝ ܗܘ̈ܰܝ ܗܶܪ̈ܽܘܡܶܐ: ܕܰܢܒܰܣ̈ܡܳܢ ܦܰܓܪܳܟ ܝܰܩܺܝܪܳܐ. ܘܡ̣ܶܢ ܚܰܕ̈ܘܳܬܗܽܘܢ ܗܦܰܟ̈ܝ ܒܰܦܨܺܝܚܽܘܬܳܐ. ܕܩܳܡ ܡܳܪܰܢ ܒܬܶܫܒܽܘܚܬܳܐ: ܘܰܚܙܰܝܢܰܢ ܥܺܝܪܳܐ ܘܣܰܒܪܰܢ ܘܶܐܡܰܪ ܠܰܢ ܕܗܳܐ ܩܳܕܶܡ ܠܟܽܘܢ ܠܰܓܠܺܝܠܐܴ ܘܬܰܡܳܢ ܬܶܚܙܽܘܢܳܝܗܝ. ܘܰܪܗܶܛܘ ܫܶܡܥܽܘܢ ܘܝܽܘܚܰܢܳܢ ܥܰܡ ܚܰܕܽܘܬܳܐ ܘܰܚܙܰܘ ܠܩܰܒܪܳܐ ܕܰܣܦܺܝܩ ܡ̣ܶܢ ܐܠܰܗܽܘܬܳܐ. ܘܒܰܕܓܽܘܢ ܚܢܰܢ ܡܗܰܝ̈ܡܢܶܐ ܒܩ̈ܳܠܐܷ ܕܰܙܡܺܝܪ̈ܳܬܳܐ ܘܰܕܬܶܫܒ̈ܚܳܬܳܐ ܨܠܰܘ̈ܳܬܳܐ ܢܩܰܪܶܒ ܠܳܟ ܬܰܘܕ̈ܝܳܬܳܐ. ܘܫܰܟܶܢ ܠܰܢ ܒܪ̈ܰܚܡܰܝܟ ܕܰܚܦܺܝ̈ܛܶܐ ܢܶܗܘܶܐ ܠܰܡܫܰܡܠܳܝܽܘ ܠܥܺܐܕܳܐ ܕܰܩܝܳܡܬܳܟ ܡܫܰܒܰܚܬܳܐ ܡܫܺܝܚܳܐ ܐܠܰܗܰܢ ܒܰܕܝܳܨܳܐ ܘܥܰܡ ܚܰܕܽܘܬܳܐ ܪܽܘܚܳܢܳܝܬܳܐ ܢܳܛܽܘܪܽܘܬܳܐ ܕܬܰܘܕܺܝܬܰܐ ܫܠܺܝܚܳܝܬܳܐ ܒܚܽܘܪܳܪܳܐ ܕܡ̣ܶܢ ܚܰܫ̈ܶܐ ܒܕܰܟܝܽܘܬܳܐ ܕܦܰܓܪܳܐ: ܘܰܒܩܰܕܺܝܫܽܘܬܳܐ ܕܢܰܦܫܳܐ ܘܪܽܘܚܳܐ ܘܡܰܕܥܳܐ. ܒܰܙܗܺܝܪܽܘܬܳܐ ܕܗܰܘܢܳܐ. ܒܰܡܨܰܠܠܽܘܬܳܐ ܕܚܽܘܫ̈ܳܒܶܐ ܒܩܰܘܡܳܐ ܠܐܴ ܥܕܺܝܠܐܴ: ܒܦܰܪܶܗܣܺܝܰܐ ܓܡܺܝܪܬܳܐ ܕܰܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ. ܘܰܒܟܽܠܶܗ ܒܰܪܢܳܫܰܢ ܓܰܘܳܝܳܐ ܘܒܰܪܳܝܳܐ ܥܦܺܝܦܳܐܺܝܬ ܢܥܰܕܥܶܕ ܠܳܟ ܕܰܟܝܳܐܺܝܬ ܘܩܰܕܺܝܫܳܐܺܝܬ ܘܰܠܡܰܫܪ̈ܝܳܬܳܐ ܕܚܰܝܠܰܘ̈ܳܬܳܐ ܕܰܠܥܶܠ ܢܶܬܚܰܝܰܕ: ܢܶܗܘܶܐ ܕܶܒܚܬܳܐ ܡܩܰܒܰܠܬܳܐ ܠܐܱܠܳܗܽܘܬܳܟ: ܘܰܒܡܰܕܒܚܳܟ ܩܰܕܺܝܫܳܐ ܒܰܣܺܝܡܳܐܺܝܬ ܢܶܬܩܰܒܰܠ: ܘܩܽܘܪܳܒ ܦܺܐܪ̈ܶܐ ܘܦܺܝܪܡܳܐ ܗܰܢܺܝܳܐܐ ܘܕܶܒܚܳܐ ܡܩܰܒܠܐܴ ܘܐ̱ܪܳܙܳܝܳܐ ܕܰܠܛܰܝܒܽܘܬܳܟ ܕܺܝܠܳܟ ܡܶܢܰܢ ܡܶܬܩܰܪܰܒ: ܘܪܰܗܒܽܘܢܳܐ ܗ̇ܰܘ ܥܕܶܢܳܝܳܐ ܘܰܪܘܳܙܳܐ ܢܰܨܺܝܚܳܐ ܡ̣ܶܢ ܗܳܪܟܳܐ ܢܶܣܰܒ. ܘܒܰܐܦ̈ܶܐ ܓܰܠܝ̈ܳܬܳܐ ܠܐܘܪܥܳܐ ܕܡܶܐܬܺܝܬܳܟ ܢܡܰܢܰܥ ܘܬܶܫܒ̈ܚܳܬܳܐ ܕܙܳܟܽܘܬܳܐ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܢܙܰܡܰܪ ܠܳܟ ܫܽܘܒܚܳܐ ܕܠܐܴ ܫܶܠܝܳܐ ܘܰܐܟܣܺܝܣܝܳܐ: ܘܬܰܘܕܺܝܬܳܐ ܕܟܺܝܬܳܐ ܘܩܽܘܠܳܣܳܐ ܚܘܺܝܚܳܐ: ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܫܠܡ ܕܓ̄ ܕܛܟܣܐ ܕܚܕ ܒܫܒܐ ܡܨܥܝܐ ܕܩܝܡܬܐ ܦܪܘܩܝܬܐ ܕܡܪܢ ܝܫܘܥ ܡܫܝܚܐ

 

ܛܟܣܐ ܕܚܕ ܒܫܒܐ ܪܒܝܥܝܐ ܕܛܟܣܐ ܡܨܥܝܐ ܕܩܝܡܬܐ

ܩܕܡܝܬ ܨܠܘܬܐ ܕܫܘܪܝܐ

 

ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܒܙܳܟܽܘܬܳܐ ܘܰܫܪܳܐ ܫܽܘܠܛܳܢܶܗ ܕܡܰܘܬܳܐ ܥܰܙܺܝܙܳܐ ܕܰܓܣܰܪ ܒܗܳܡܳܢ ܘܶܐܬܦܪܶܬܘ ܥܽܘ̈ܒܶܝܗ̇ ܓܽܘܪܝܳܐ ܕܰܐܪܝܳܐ ܕܡܰܘܬܶܗ ܩܰܛܠܶܗ ܠܡܰܘܬܳܐ ܩܳܛܽܘܠܰܢ ܡܰܘܕܶܝܢܰܢ ܠܳܟ ܡܳܪܝ ܘܠܰܩܝܳܡܬܳܟ ܒܪܺܝܟܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܡܫܺܝܚܳܐ ܣܰܒܪܳܐ ܕܥܺܕܬܶܗ ܘܦܳܪܽܘܩܳܐ ܕܢܰܦ̈ܫܳܬܰܢ: ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ ܠܗ̇ܰܘ ܟܺܐܢܳܐ ܘܰܬܪܺܝܨܳܐ ܕܒܰܕܰܪ ܒܟܺܐܢܽܘܬܶܐ ܕܺܝܠܶܗ ܠܙܳܩܽܘ̈ܦܐ: ܘܰܒܛܰܝܒܽܘܬܶܗ ܟܰܢܶܫ ܠܚܰܒܺܝ̈ܒܰܘܗܝ. ܠܗ̇ܰܘ ܚܰܟܺܝܡܳܐ ܕܰܠܥܽܘܫܢܳܐ ܕܥܰܫܺܝ̈ܢܶܐ ܫܳܛ ܒܰܡܚܺܝܠܽܘܬܶܗ: ܘܩܰܦܰܚ ܠܪܳܡܽܘܬܳܐ ܒܡܰܟܺܝܟܽܘܬܶܗ: ܘܣܰܚܶܦ ܟܽܘܪܣܝܳܐ ܕܗ̇ܳܢܽܘܢ ܬܠܳܬܳܐ ܒܥܶܠܕ̈ܒܳܒܶܐ ܒܰܩܝܳܡܬܶܗ ܘܬܰܒܰܪ ܬܰܪ̈ܥܶܐ ܕܰܫܝܽܘܠ ܒܬܰܩܺܝܦܽܘܬܶܗ ܘܰܐܦܶܩ ܠܥܰܢܺܝ̈ܕܶܐ ܡ̣ܶܢ ܚܶܫܽܘܟܳܐ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܒܚܰܝܠܶܗ ܬܰܩܺܝܦܳܐ ܐܶܬܬܰܩܰܢ̈ܝ ܒܶܪ̈ܝܳܬܳܐ: ܘܰܒܪܶܡܙܳܐ ܕܨܶܒܝܳܢܶܗ ܡܕܰܒܰܪ ܠܣܰܘ̈ܦܶܐ ܘܦܶܢ̈ܝܳܬܳܐ: ܗ̇ܰܘ ܕܰܒܝܰܡܳܐ ܕܛܳܒܽܘܬܶܗ ܬܡܺܝܗܬܳܐ ܫܰܡܠܺܝ ܐ̱ܪܳܙܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ: ܘܡܺܝܬܳܐ ܐܰܝܟ ܕܰܨܒܳܐ ܘܶܐܬܢܰܚܰܡ ܐܰܝܟ ܕܰܫܦܰܪ ܠܶܗ. ܟܰܕ ܠܰܒܥܶܠܕ̈ܒܳܒܶܐ ܬܠܳܬܳܐ ܐܰܘܒܶܕ ܒܰܩܝܳܡܬܶܗ ܠܣܳܛܳܢܳܐ ܘܠܰܫܝܽܘܠ ܘܰܠܡܰܘܬܳܐ ܘܦܰܨܺܝ ܠܓܶܢܣܰܢ ܕܰܐܒܺܝܕ ܗܘܳܐ ܒܰܚܛܺܝܬܳܐ: ܘܡܽܘܠܟܳܢ̈ܶܐ ܫܰܪܺܝܪ̈ܶܐ ܝܰܗܒܘ ܠܰܦܪ̈ܺܝܩܰܘܗܝ ܕܰܐܝܢܳܐ ܕܰܡܗܰܝܡܶܢ ܡܶܬܚܰܝܰܒ. ܘܟܰܕ ܠܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ ܫܰܟܶܢ ܚܰܕܽܘܬܳܐ ܘܰܪܘܳܙܳܐ: ܘܚܰܘܺܝ ܠܟܽܠܗܽܘܢ ܦܪ̈ܺܝܩܶܐ ܘܰܡܚܰܪܪ̈ܶܐ: ܘܒܰܕܓܽܘܢ ܚܘܺܝܚܳܐܺܝܬ ܡܩܰܒܠܺܝܢܰܢ ܠܝܰܘܡܳܐ ܗܳܢܳܐ ܕܰܩܝܳܡܬܳܐ ܡܝܰܩܪܺܝܢܰܢ ܘܳܐܡܪܺܝܢܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܐܶܬܰܝ̈ ܠܰܢ ܟܽܠ ܛܳܒ̈ܳܬܳܐ ܫܡܰܝܳܢ̈ܳܝܳܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ ܗܘܰܝܢܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܓܢܽܘܢܳܐ ܒܡܰܠܟܽܘܬܳܐ ܕܰܫܡܰܝܳܐ ܐܶܬܬܰܩܰܢ ܠܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܕܢܰܚ ܠܰܢ ܢܽܘܗܪܳܐ ܪܰܒܳܐ ܘܫܰܪܺܝܪܳܐ ܘܰܡܝܰܬܰܪ ܡ̣ܶܢ ܫܶܡܫܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܗܘܰܝܢܰܢ ܒܢܰܝ̈ܳܐ ܐܳܦ ܝܳܪ̈ܬܶܐ ܕܡܰܠܟܽܘܬܳܐ ܕܰܫܡܰܝܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܘܰܥܕܳܐ ܕܚܰܝ̈ܶܐ ܕܰܠܥܳܠܰܡ ܐܶܫܬܰܟܰܢ ܠܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܙܳܟܽܘܬܳܐ ܡܫܰܡܠܳܝܬܳܐ ܐܶܫܬܰܟܢܰܬ݀ ܠܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ  ܕܒܶܗ ܚܰܕܽܘܬܳܐ ܡܰܠܝܰܬ݀ ܦܽܘܪ̈ܫܳܢܶܐ ܥܳܦܢܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܛܥܰܝܢܳܗ̇ ܠܡܰܦܽܘܠܬܳܐ ܕܰܥܪܽܘܒܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܝܳܗܽܘܒܳܐ ܕܚܰܝ̈ܶܐ ܫܰܟܶܢ ܠܰܢ ܚܰܝ̈ܶܐ ܕܠܐܴ ܣܳܐܒܶܝܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܟܬܰܒ ܠܰܢ ܒܣܶܦܪܳܐ ܕܡܰܠܟܽܘܬܳܐ ܕܰܫܡܰܝܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܠܐܘܚܕܳܢܶܗ ܕܡܰܘܬܳܐ ܝܰܥܢܳܐ ܫܪܳܐ ܘܒܰܛܶܠ ܦܳܪܽܘܩܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܡܺܝܬ ܒܰܒܣܰܪ ܘܰܚܝܳܐ ܒܪܽܘܚ ܚܰܝܳܐ ܕܠܐܴ ܡܳܐܶܬ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܢܶܫ̈ܶܐ ܩܰܕܺܝ̈ܫܳܬܳܐ ܐܶܣܬܰܒܰܪ̈ܝ ܩܝܳܡܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܣܒܰܪܬܳܐ ܒܪܺܝܟܳܬܐ ܕܚܰܝ̈ܶܐ ܚܰܕ̈ܬܶܐ ܕܰܩܝܳܡܬܳܐ ܐܶܬܕܰܢܚܰܬ݀ ܠܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܥܺܕܬܳܐ ܩܰܕܺܝܫܬܳܐ ܐܶܫܬܰܪܪܰܬ݀ ܒܗܰܝܡܳܢܽܘܬܳܐ ܬܪܺܝܨܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܦܳܠܰܚܘ̈ܳܬܳܐ ܕܡܰܠܐܱܟ̈ܶܐ ܩܰܕܺܝ̈ܫܶܐ ܝܰܒܶܒܘ ܨܶܝܕ ܩܰܒܪܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܨܒܳܐ ܡܳܪܳܐ ܕܒܶܪ̈ܝܳܬܳܐ ܕܢܶܬܢܰܚܰܡ ܒܬܶܫܒܽܘܚܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܩܳܡ ܡܳܪܰܢ ܡ̣ܶܢ ܩܰܒܪܳܐ ܘܰܐܩܺܝܡ ܥܰܡܶܗ ܠܓܶܢܣܳܐ ܕܥܰܦܪ̈ܳܢܶܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܪܰܘܡܳܐ ܘܥܽܘܡܩܳܐ ܩܢܰܘ ܚܰܕܽܘܬܳܐ ܒܰܩܝܳܡܬܶܗ ܕܺܝܚܺܝܕܳܝܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܫܰܕܰܪ ܐܠܰܗܳܐ ܛܰܝܒܽܘܬܶܗ ܘܪ̈ܰܚܡܰܘܗܝ ܠܥܰܡܶܗ ܝܳܪܬܽܘܬܳܐ ܕܺܝܠܶܗ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܶܒܗ ܬܳܐܓܳܐ ܕܢܽܘܗܪܳܐ ܠܥܺܕܬܳܐ ܩܰܕܺܝܫܬܳܐ ܐܶܬܩܛܰܪܘ ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܝܰܕ ܪ̈ܰܚܡܰܝܟ ܕܰܒܰܪ ܠܰܢ: ܘܰܒܫܰܝܢܳܟ ܘܒܰܫܠܳܡܳܟ ܗܰܕܳܐ ܠܰܢ: ܘܰܒܪܶܚܡܰܬ݀ ܐ̱ܢܳܫܽܘܬܳܟ ܡ̣ܶܢ ܫܰܒ̈ܛܶܐ ܕܪܽܘܓܙܳܐ ܘܡܰܪ̈ܕܘܳܬܳܐ ܫܰܘܙܶܒ ܠܰܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܺܝܢܳܟ: ܘܠܐܱܝܠܶܝܢ ܕܫܶܐܠܘ ܘܫ̇ܳܐܠܺܝܢ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܠܚܽܘܣܳܝܳܐ ܘܰܠܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ ܘܰܠܩܰܘܡܳܐ ܕܡ̣ܶܢ ܝܰܡܺܝܢܳܟ ܘܰܠܫܽܘܒܚܳܐ ܕܪܰܒܽܘܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

 

ܥܛܪܐ

ܡܫܺܝܚܳܐ ܚܰܝܠܐܴ ܕܡ̣ܶܢ ܐܰܒܳܐ ܘܥܶܠܬܳܐ ܩܰܕܡܳܝܳܐ: ܗ̇ܰܘ ܕܰܠܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܬܰܚܽܘܒܳܐ ܐܶܬܬܰܚܬܺܝ: ܐܰܢ̱ܬ ܡܳܪܝ ܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܘܰܬܪܽܘܨ ܠܠܶܒܰܘ̈ܳܬܳܐ ܠܢܳܛܽܘܪܽܘܬܳܐ ܕܦܽܘܩܕܳܢܰܝ̈ܟ ܩܰܕܺܝ̈ܫܶܐ: ܐܰܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܡ̣ܶܢ ܝܰܡܺܝܢܳܟ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܒܛܰܝܒܽܘܬܳܟ ܕܰܒܠܶܒܳܐ ܕܰܟܝܳܐ ܢܫܰܒܰܚ ܠܰܩܝܳܡܬܳܟ ܘܰܒܪܶܥܝܳܢܳܐ ܙܰܗܝܳܐ ܢܗܰܕܰܪ ܠܢܽܘܚܳܡܳܟ: ܘܰܒܦܽܘܡܳܐ ܩܰܕܺܝܫܳܐ ܢܩܰܠܶܣ ܠܙܳܟܽܘܬܳܟ ܘܰܒܠܶܫܳܢܳܐ ܫܰܦܝܳܐ ܢܶܫܬܰܥܶܐ ܥܽܘܫܢܳܟ: ܘܥܰܡ ܟܶܢ̈ܫܶܐ ܫܡܰܝ̈ܳܢܶܐ ܢܪܰܡܪܶܡ ܠܐܻܝܩܳܪܳܟ ܘܥܰܡ ܪ̈ܽܘܚܳܢܶܐ ܢܶܣܓܽܘܕ ܠܫܳܠܽܘܚܳܟ ܘܰܢܝܰܒܶܒ ܠܪܽܘܚܳܟ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܫܽܘܒܚܳܐ ܘܙܳܟܽܘܬܳܐ ܩܳܡ ܡ̣ܶܢ ܩܰܒܪܳܐ ܘܚܰܕܶܬ ܠܰܟܝܳܢܳܐ ܐ̱ܢܳܫܳܝܳܐ. ܠܗ̇ܰܘ ܕܰܐܒܗܶܬ ܠܨܳܠܽܘ̈ܒܶܐ ܒܢܽܘܚܳܡܶܗ ܘܚܰܕܺܝ ܠܬܰܠܡܺܝ̈ܕܶܐ ܩܰܕܺܝ̈ܫܶܐ ܒܰܚܙܳܬܶܗ: ܠܗ̇ܰܘ ܕܶܐܬܳܐ ܘܰܦܪܰܩ ܠܓܶܢܣܳܐ ܕܒܶܝܬ ܐܳܕܳܡ: ܘܬܽܘܒ ܐܳܬܶܐ ܠܚܰܪܬܳܐ ܒܫܽܘܒܚܳܐ ܪܰܒܳܐ ܠܕܺܝܢܳܐ ܘܠܰܬܒܰܥܬܳܐ ܕܟܳܦܽܘܪ̈ܶܐ ܕܠܶܗ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܟܰܕ ܒܣܽܘ̈ܟܳܠܐܷ ܪ̈ܳܡܰܝ ܡ̣ܶܢ ܥܳܠܡܳܐ ܒܰܩܝܳܡܬܳܐ ܕܺܝܠܳܟ ܡܶܬܒܰܩܶܝܢܰܢ ܐܳܘ ܡܶܠܬܳܐ ܐܠܰܗܳܐ: ܘܰܠܙܰܗܪܺܝܪ̈ܶܐ ܗ̇ܳܢܽܘܢ ܨܰܡܽܘܚ̈ܬܳܢܶܐ ܕܡ̣ܶܢ ܩܰܒܪܳܟ ܐܰܕܺܝܩܘ: ܒܥܰܝ̈ܢܶܐ ܕܬܰܪܥܺܝܬܰܢ ܟܰܣܝܳܐܺܝܬ ܚܳܙܶܝܢܰܢ: ܘܰܠܒܰܪ̈ܩܶܐ ܢܽܘܪ̈ܳܢܳܝܶܐ ܕܝܰܘܡܳܢ ܐܰܒܪܶܩܘ ܥܰܠ ܢܳܛܽܘܪ̈ܶܐ ܘܥܰܘܰܪܘ ܐܶܢܽܘܢ: ܒܡܰܕ̈ܥܰܝܢ ܪܽܘܚܳܢܳܐܺܝܬ ܢܳܣܒܺܝܢܰܢ: ܘܰܠܡܰܠܐܱܟ̈ܶܐ ܩܰܕܺܝ̈ܫܶܐ ܕܒܰܠܒܽܘܫ̈ܶܐ ܚܶܘܳܪ̈ܶܐ ܐܶܬܚܙܺܝܘ: ܘܥܰܡ ܢܶܫ̈ܶܐ ܡܶܣܬܰܘܕܶܝܢ ܐܰܟܡܰܢ ܕܰܠܢܰܦ̈ܫܳܬܰܢ ܡܠܰܒܒܺܝܢ ܕܠܐܴ ܬܶܕܚ̈ܠܳܢ ܒܗܰܘ̈ܢܰܝܢ ܫܳܩܠܺܝܢܰܢ: ܘܟܰܕ ܒܟܽܠܗܶܝܢ ܐ̱ܪܳܙܳܢܳܐܺܝܬ ܘܪܽܘܚܳܢܳܐܺܝܬ ܡܰܦܪܓܺܝܢܰܢ: ܘܰܠܒܽܘ̈ܫܶܐ ܚܶܘܳܪ̈ܶܐ ܘܕܽܘܒܳܪ̈ܶܐ ܪ̈ܽܘܚܳܢܶܐ ܡܶܬܥܰܛܦܺܝܢܰܢ ܘܚܰܕܽܘܬܳܢܳܐܺܝܬ ܟܰܕ ܪܳܘܙܺܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ ܝܰܘܡܰܐ ܗ̱̇ܘ ܕܚܰܕܽܘܬܳܐ ܘܕܰܪܘܳܙܳܐ: ܠܐܴ ܢܶܗܘܶܐ ܒܶܗ ܟܡܺܝܪ̈ܶܐ ܘܰܡܥ̈ܳܩܶܐ: ܝܰܘܡܰܐ ܗ̱̇ܘ ܕܢܽܘܗܪܳܐ ܨܡܰܚ ܘܰܦܨܺܝܚܽܘܬܳܐ ܐܰܡܠܟܰܬ݀ ܠܐܴ ܢܟܰܬܰܪ ܒܶܗ ܘܢܶܛܫܶܐ ܒܚܶܫܽܘܟܳܐ: ܝܰܘܡܰܐ ܗ̱̇ܘ ܕܨܶܡܚ̈ܶܐ ܕܰܩܝܳܡܬܳܐ: ܘܙܰܠܺܝ̈ܩܶܐ ܢܽܘܗܪ̈ܳܢܳܝܶܐ ܠܐܴ ܒܝܰܕ ܥܒܳܕܰܝ̈ܢ ܥܰܡܽܘ̈ܛܶܐ ܒܶܐܣ̈ܶܐ ܘܓܳܘܢܰܘ̈ܳܬܳܐ ܕܰܫܪܳܓܪ̈ܳܓܳܝܳܬܳܐ ܢܡܽܘܫ. ܝܰܘܡܰܐ ܗ̱̇ܘ ܕܒܰܪ̈ܩܶܐ ܕܚܰܕ̈ܘܳܬܳܐ: ܘܙܰܠܓ̈ܶܐ ܥܰܠ ܕܫܳܘܶܝܢ ܡܰܙܠܓܺܝܢ: ܠܐܴ ܐܰܝܟ ܦܪ̈ܰܚܕܽܘܕܶܐ ܢܰܚܶܒ ܠܛܽܘܫ̈ܝܳܬܳܐ ܘܰܠܛܰܠ̈ܠܐܷ ܠܺܠܝ̈ܳܝܶܐ. ܝܰܘܡܰܐ ܗ̱̇ܘ ܕܨܶܒ̈ܬܶܐ. ܘܕܰܠܒܽܘ̈ܫܶܐ ܚܶܘܳܪ̈ܶܐ ܕܚܳܫܚܺܝܢ ܠܐܷܡܪ̈ܶܐ ܡܫܺܝ̈ܚܳܝܶܐ: ܠܐܴ ܢܶܬܚܰܛܰܦ ܒܝܰܕ ܣܰܢ̈ܝܳܬܰܢ ܠܒܽܘ̈ܫܶܐ ܐܽܘܟܳܡ̈ܶܐ ܕܰܓܕܰܝ̈ܳܐ ܦܳܥܽܘܝ̈ܶܐ: ܝܰܘܡܰܐ ܗ̱̇ܘ ܕܰܙܡܺܝܪ̈ܳܬܳܐ ܘܗܽܘ̈ܠܳܠܐܷ ܫܒܺܝ̈ܚܶܐ ܠܐܴ ܢܡܰܠܶܠ ܒܶܗ ܡ̈ܶܠܐܷ ܕܪܶܛܢܳܐ ܘܰܕܡܶܐܟܰܠܩܰܪܨܳܐ ܘܫܽܘܥ̈ܝܳܬܳܐ ܦܰܟܺܝܗ̈ܳܬܳܐ. ܝܰܘܡܰܐ ܗ̱̇ܘ ܕܰܒܢ̈ܳܬ ܩ̈ܳܠܐܷ ܐܠܰܗܳܝ̈ܳܬܳܐ: ܡܶܬܠܰܥ̈ܙܳܢ ܒܶܗ. ܕܠܐܴ ܢܰܥܶܠ ܚܠܳܦܰܝܗܶܝܢ ܠܰܘ̈ܛܳܬܳܐ ܘܓܽܘܕܳܦ̈ܶܐ ܡܰܪܺܝܪ̈ܶܐ. ܝܰܘܡܰܐ ܗ̱̇ܘ ܕܩܺܝ̈ܢܳܬܳܐ ܨܠܺܝ̈ܠܳܬܳܐ ܘܬܶܫܒ̈ܚܳܬܳܐ ܦܪ̈ܺܝܫܳܬܳܐ: ܠܐܴ ܢܶܬܬܰܓܰܪ ܚܠܳܦܰܝܗܶܝܢ ܫܶܢܬܳܐ ܘܰܚܒܰܢܳܢܽܘܬܳܐ ܘܡܰܐܺܝܢܽܘܬܳܐ. ܝܰܘܡܰܐ ܗ̱̇ܘ ܕܚܽܘܒܳܐ ܘܰܕܪܶܚܡܰܬ݀ ܐ̱ܢܳܫܽܘܬܳܐ ܠܐܴ ܢܚܰܘܶܐ ܒܶܗ ܒܺܝܫܳܐ ܘܕܰܠܩܽܘܒܠܳܝܽܘܬܳܐ. ܝܰܘܡܰܐ ܗ̱̇ܘ ܕܰܫܠܳܡܳܐ ܘܰܕܡܰܟܺܝܟܽܘܬܳܐ ܠܐܴ ܢܰܥܒܪܺܝܘܗܝ ܒܚܶܪ̈ܝܳܢܶܐ: ܘܰܢܥܺܝܪ ܒܶܗ ܬܰܟܬܽܘ̈ܫܶܐ ܘܡܰܨ̈ܘܳܬܳܐ ܥܰܠ ܩܰܪ̈ܺܝܒܺܝܢ. ܝܰܘܡܰܐ ܗ̱̇ܘ ܕܰܡܢܺܝܚ ܠܐܴܚܽܘ̈ܕܰܘܗܝ ܡ̣ܶܢ ܬܥܳܫܳܐ ܣܪܺܝܩܳܐ ܘܦܽܘܠܚܳܢܳܐ ܕܺܐܝܕܰܝ̈ܳܐ: ܘܡܰܚܰܪ ܠܣܰܟܽܘܠܬܳܢ̈ܶܐ ܠܗ̇ܰܘ ܥܳܠܡܳܐ: ܕܗ̣ܽܘ ܡܰܘܩܶܕ ܠܰܢ ܗܳܪܟܳܐ ܘܬܰܡܳܢ: ܐܶܠܐܴ ܢܩܽܘܡ ܗܳܪܟܳܐ ܕܰܟܝܳܐܺܝܬ ܘܰܢܫܰܡܶܫ ܙܰܗܝܳܐܺܝܬ: ܘܰܢܨܰܠܐܷ ܚܦܺܝܛܳܐܺܝܬ: ܘܰܢܙܰܡܰܪ ܟܽܠܰܢ ܫܒܺܝܚܳܐܺܝܬ. ܘܰܢܫܰܒܰܚ ܩܰܕܺܝܫܳܐܺܝܬ ܘܰܢܩܰܠܶܣ ܬܗܺܝܪܳܐܺܝܬ: ܘܪܽܘܚܳܢܳܐܺܝܬ ܟܽܠܰܢ ܢܶܗܪܽܘܓ ܐܰܡܺܝܢܳܐܺܝܬ ܢܶܬܗܰܓܶܐ. ܘܢܳܡܽܘܣܳܐܺܝܬ ܢܶܬܚܰܫܰܒ ܘܟܰܕ ܒܥܳܠܡܳܐ ܗ̇ܰܘ ܣܰܓܺܝ ܬܶܗܪ̈ܶܐ ܘܰܣܒܺܝܣ ܒܛܽܘ̈ܒܶܐ: ܥܰܝ̈ܢܰܝ ܠܶܒܰܢ ܡܰܩܬܺܝܢܰܢ: ܠܬܰܡܳܢ ܢܣܰܟܶܐ ܠܬܰܡܳܢ ܢܶܚܒܽܘܨ: ܠܬܰܡܳܢ ܢܶܩܪܽܘܒ ܠܬܰܡܳܢ ܢܶܬܠܰܗܰܩ ܠܒܽܘܣܳܡܳܐ ܡܪܰܘܙܳܢܳܐ ܦܽܘܛܡ̈ܶܐ ܘܰܠܦܽܘܢܳܩ̈ܶܐ ܥܕܶܢܳܝ̈ܶܐ: ܠܗ̇ܰܘ ܕܠܶܗ ܟܽܠܰܢ ܡܨܰܠܶܝܢܰܢ ܕܢܶܫܬܘܶܐ ܘܰܒܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ: ܘܕܰܐܒܽܘܟ ܥܰܡ ܪܽܘܚܶܗ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܰܚܕܳܐ ܐܽܘܣܺܝܰܐ ܠܐܴ ܡܶܬܦܰܠܓܳܢܺܝܬܳܐ ܐܰܒܳܐ ܥܶܠܬܳܐ ܕܥܶܠܬܳܢ̈ܶܐ: ܘܰܒܪܳܐ ܡܶܠܬܳܐ ܠܐܴ ܡܶܬܡܰܠܠܐܴ ܒܠܶܫܳܢܳܐ ܕܰܡܠܺܝ̈ܠܐܷ: ܘܪܽܘܚܳܐ ܕܰܫܘܶܐ ܠܐܱܒܳܐ ܘܠܰܒܪܳܐ ܒܟܽܠ ܡܶܕܶܡ: ܘܝܳܗܶܒ ܡܶܠܬܳܐ ܘܚܰܝ̈ܶܐ ܠܥܰܒܕ̈ܶܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܐܰܒܳܐ ܕܫܰܕܰܪܬ ܠܰܒܪܳܟ ܚܰܒܺܝܒܳܐ ܡܶܛܽܠ ܦܽܘܪܩܳܢܰܢ ܘܰܐܬܕܰܡܺܝ ܠܰܢ ܒܟܽܠܡܶܕܶܡ ܣܛܰܪ ܡ̣ܶܢ ܚܛܺܝܬܳܐ: ܘܰܗܘܳܐ ܡܶܢܰܢ ܟܰܕ ܠܐܴ ܫܰܢܺܝ ܐܰܘ ܐܶܫܬܰܚܠܰܦ ܡ̣ܶܢ ܐܠܰܗܽܘܬܳܐ ܡܪܰܝܰܡܬܳܐ. ܘܰܡܠܺܝ ܟܽܠܳܗ̇ ܡܕܰܒܪܳܢܽܘܬܳܐ ܕܰܚܠܳܦܰܝܢ ܘܰܥܕܰܡܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܳܐ ܩܰܒܶܠ ܥܠܰܘܗܝ: ܘܩܳܡ ܒܝܰܘܡܳܐ ܬܠܺܝܬܳܝܳܐ: ܘܶܐܬܚܙܺܝ ܠܢܶܫ̈ܶܐ ܢܰܟ̈ܦܳܬܳܐ ܒܰܩܝܳܡܬܶܗ ܘܒܶܗ ܐܶܬܢܰܚܰܡܘ ܩܒܺܝܪ̈ܶܐ ܘܒܶܗ ܐܶܫܬܰܪܰܪܘ ܬܰܠܡܺܝ̈ܕܶܐ ܘܰܐܦܶܩ ܐܶܢܽܘܢ ܠܰܡܣܰܒܳܪܽܘ ܩܝܳܡܬܳܐ ܡܰܠܝܰܬ݀ ܚܰܕ̈ܘܳܬܳܐ. ܕܩܳܡ ܠܶܗ ܡܫܺܝܚܳܐ ܡ̣ܶܢ ܩܰܒܪܳܐ: ܚܕܰܘ ܥܰܡ̈ܡܶܐ ܘܕܽܘܨܘ ܕܰܗܘܳܐ ܠܟܽܘܢ ܦܽܘܪܩܳܢܳܐ ܐܶܬܒܰܣܰܡܘ ܥܰܡ̈ܡܶܐ ܥܰܡ ܥܰܡܶܗ ܕܰܗܘܳܬ݀ ܠܟܽܘܢ ܚܰܕܽܘܬܳܐ. ܐܶܬܬܥܺܝܪܘ ܕܰܡ̈ܟܶܐ ܘܩܽܘܡܘ ܡ̣ܶܢ ܫܶܢܬܳܐ ܕܪܳܡܶܝܢ ܐܢ̱ܬܽܘܢ ܒܳܗ̇: ܕܗܳܐ ܐܶܬܳܐ ܠܶܗ ܥܺܝܪܳܐ ܕܰܡܥܺܝܪ ܕܰܡܟܽܘܬܟܽܘܢ: ܘܰܢܦܰܩܘ ܫܠܺܝ̈ܚܶܐ ܠܰܣܒܰܪܬܳܐ ܘܰܐܟܪܶܙܘ ܠܟܽܠ ܥܰܡ̈ܡܺܝܢ ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܚܕܳܐ ܐܠܰܗܽܘܬܳܐ ܕܠܐܴ ܡܶܬܦܰܪܫܳܐ ܘܠܐܴ ܡܶܬܒܰܨܝܳܐ: ܘܒܳܬܰܪ ܐܰܪܒܥܺܝܢ ܝܰܘ̈ܡܺܝܢ ܕܩܳܡ ܡ̣ܶܢ ܩܰܒܪܳܐ: ܣܠܶܩ ܠܰܫܡܰܝܳܐ ܒܫܽܘܒܚܳܐ: ܘܡ̣ܶܢ ܒܳܬܰܪ ܕܰܦܩܰܕ ܠܬܰܠܡܺܝ̈ܕܰܘܗܝ ܕܰܢܩܰܘܽܘܢ ܠܫܽܘܘܕܳܝܶܗ: ܘܰܢܟܰܬܪܽܘܢ ܐܳܦ ܢܚܽܘܪܽܘܢ ܠܡܽܘܠܟܳܢܳܐ ܗ̇ܰܘ  ܕܶܐܫܬܰܘܕܺܝ ܠܗܽܘܢ ܕܠܐܴ ܢܶܪܚܩܽܘܢ ܡ̣ܶܢ ܐܽܘܪܫܠܶܡ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܗܽܘܢ ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ. ܘܫܰܕܰܪ ܥܠܰܝܗܽܘܢ ܘܶܐܬܡܠܺܝܘ ܗܘܰܘ ܚܰܝܠܐܴ ܕܪܽܘܚܳܐ ܩܰܕܺܝܫܳܐ ܘܰܐܛܺܝܦܘ ܠܟܽܠܳܗ̇ ܒܪܺܝܬܳܐ ܒܳܐܬܘ̈ܳܬܳܐ ܘܬܶܕܡܪ̈ܳܬܳܐ: ܘܰܒܚܰܝ̈ܠܐܷ ܟܰܕ ܠܰܟܪ̈ܺܝܗܶܐ ܡܰܐܣܶܝܢ ܗܘܰܘ ܘܠܰܡܫܰܪ̈ܰܝܳܐ ܡܩܺܝܡܺܝܢ ܗܘܰܘ ܘܠܐܱܒܺܝ̣̈ܠܐܷ ܒܽܘܝܳܐܳܐ ܡ̇ܳܠܶܝܢ ܗܘܰܘ: ܘܚܽܘܠܡܳܢܳܐ ܕܟܽܠ ܟܺܐܒ ܘܟܽܠ ܟܽܘܪܗܳܢ ܒܶܝܬ ܐܺܝܕܰܝ̈ܗܽܘܢ ܟܪ̈ܺܝܗܶܐ ܘܰܐܠܺܝ̣̈ܨܶܐ ܩܳܢܶܝܢ ܗܘܰܘ ܘܰܠܡܺܝ̈ܬܶܐ ܒܚܰܝܠܐܴ ܕܡܳܪܗܽܘܢ ܡܩܺܝܡܺܝܢ ܗܘܰܘ ܘܰܠܟܽܠܶܗ ܥܳܠܡܳܐ ܛܶܒܳܐ ܕܰܩܝܳܡܬܶܗ ܕܒܰܪ ܐܠܰܗܳܐ ܡܰܟܪܙܺܝܢ ܗܘܰܘ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܡܳܪܝܳܐ ܪܳܚܶܡܢܳܫܳܐ: ܕܩܳܡܬ ܒܫܽܘܒܚܳܐ ܡ̣ܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ: ܘܰܐܩܺܝܡܬ ܠܰܟܝܳܢܰܢ ܪܰܦܝܳܐ ܕܢܰܦܺܝܠ ܗܘܳܐ ܒܰܥܒܳܪ ܦܽܘܩܕܳܢܳܐ ܐܰܝܟܰܢܳܐ ܕܫܰܕܰܪܬ ܥܠܰܝܗܽܘܢ ܥܰܠ ܫܠܺܝ̈ܚܶܐ ܪܽܘܚܳܐ ܩܰܕܺܝܫܳܐ: ܗܳܟܰܢܳܐ ܫܰܕܰܪ ܥܠܰܝܢ ܪܽܘܚܳܟ ܩܰܕܺܝܫܳܐ: ܘܢܶܫܬܘܶܐ ܕܢܶܫܬܰܪܰܪ ܒܰܩܝܳܡܬܳܟ ܡܫܰܒܰܚܬܳܐ ܟܰܕ ܥܳܩܰܪ ܐܰܢ̱ܬ ܡ̣ܶܢ ܠܶܒܰܢ ܠܝܰܥܪܳܐ ܟܽܘܒܳܢܳܝܳܐ: ܕܢܶܬܢܰܗܪ̈ܳܢ ܢܰܦ̈ܫܳܬܰܢ: ܘܢܶܬܡܰܪ̈ܩܳܢ ܬܺܐܪ̈ܳܬܰܢ: ܘܢܶܬܚܰܣ̈ܝܳܢ ܚܰܘ̈ܒܳܬܰܢ: ܘܢܶܬܥܰܛܝ̈ܳܢ ܣܰܟܠܘ̈ܳܬܰܢ: ܘܢܶܫܬܰܒ̈ܩܳܢ ܡܶܬܥܰܒܪ̈ܳܢܘܳܬܰܢ: ܘܢܶܬܠܰܚ̈ܝܳܢ ܠܐܴ ܢܳܡܽܘܣܳܝ̈ܘܳܬܰܢ: ܘܢܶܬܬܢܺܝܚܽܘܢ ܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܡܣܰܟܶܝܢ ܠܡܶܬܓܰܠܝܳܢܽܘܬܳܟ ܕܰܬܢܰܚܶܡ ܘܰܬܩܺܝܡ ܐܶܢܽܘܢ ܒܓܰܒܳܟ ܝܰܡܺܝܢܳܝܳܐ ܘܪܽܘܣ ܥܰܠ ܢܰܦ̈ܰܫܳܬܰܢ ܛܰܠܳܟ ܡܦܰܝܓܳܢܳܐ: ܐܰܝܟܰܢܳܐ ܕܡ̣ܶܢ ܦܽܘ̈ܡܶܐ ܕܟܽܠܰܢ ܫܰܘܝܳܐܺܝܬ ܬܰܣܶܩ ܠܳܟ ܫܽܘܒܚܳܐ ܘܬܶܫܒܽܘܚܬܳܐ ܠܐܴ ܡܶܬܦܰܠܓܳܢܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܠܗܽܘܢ ܕܰܒܝܰܕ ܦܽܘܠܚܳܢ ܫܺܐܕ̈ܶܐ ܠܰܦܬܰܟܪ̈ܶܐ ܣܳܓܽܘ̈ܕܶܐ ܗܘܰܝܢܰܢ: ܐܰܫܘܳܐ ܠܰܢ ܕܢܶܗܘܶܐ ܣܳܓܽܘ̈ܕܶܐ ܫܰܪܺܝܪ̈ܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܫܰܘܝܰܬ݀ ܒܽܐܘܣܺܝܰܐ: ܡܰܦܪܓܺܝܢܰܢ ܒܚܰܓܳܐ ܪܽܘܚܳܢܳܝܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܘܰܢܕܽܘܨ ܥܰܡ ܢܶܫ̈ܶܐ ܩܰܕܺܝ̈ܫܳܬܐ ܕܶܐܬܘܰܥܰܕ̈ܝ ܠܩܰܒܪܳܟ ܡܰܥܒܶܕ ܚܰܝ̈ܶܐ: ܡܫܺܝܚܳܐ ܐܠܰܗܳܐ ܕܺܝܠܰܢ: ܗܳܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܽܐܘܣܺܝܰܐ ܡܥܰܠܰܝܬܳܐ ܘܠܐܴ ܡܶܬܕܰܪܟܳܢܺܝܬܳܐ ܕܚܰܕ ܟܝܳܢܳܐ ܐܺܝܬܶܝܗ̇: ܘܒܰܬܠܳܬܳܐ ܩܢܽܘ̈ܡܶܐ ܡܶܣܬܰܓܕܳܐ. ܐܰܒܳܐ ܕܟܰܕ ܠܐܴ ܝܺܠܺܝܕ ܐܰܘܠܶܕ: ܘܰܒܪܳܐ ܕܠܐܴ ܗܘܳܐ ܐܰܒܳܐ ܠܝܰܠܕܳܐ: ܐܳܦ ܪܽܘܚܳܐ ܩܰܕܺܝܫܳܐ ܕܢܳܦܶܩ ܡ̣ܶܢ ܐܰܒܳܐ ܘܢܳܣܶܒ ܡ̣ܶܢ ܒܪܳܐ ܘܠܐܴ ܡܶܬܥܰܩܰܒ ܡ̣ܶܢ ܚܽܘ̈ܫܳܒܶܐ ܕܰܡܠܺܝ̈ܠܐܷ: ܘܠܐܴ ܡܶܬܕܪܶܟ ܡ̣ܶܢ ܗܰܘ̈ܢܶܐ ܕܰܥܒܺܝ̈ܕܶܐ: ܘܚܰܕ ܐܠܰܗܳܐ ܡܶܬܬܰܘܕܶܐ ܒܰܬܠܳܬܳܐ ܩܢܽܘ̈ܡܶܐ: ܘܚܰܕ ܡܳܪܝܳܐ ܡܶܬܺܝܕܰܥ ܒܰܬܠܳܬܳܐ ܫܡܳܗ̈ܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܟܰܕ ܠܥܺܐܕܳܐ ܚܰܕܬܳܐ ܘܰܫܒܺܝܚܳܐ ܘܰܕܢܺܝܚܳܐ ܗ̇ܰܘ ܕܡܶܬܬܰܨܡܚܳܢܽܘܬܳܐ ܕܡ̣ܶܢ ܩܰܒܪܳܐ ܒܫܽܘܒܚܳܐ ܪܰܒܳܐ ܙܰܡܢܰܬ݀ ܠܰܢ ܛܰܝܒܽܘܬܳܟ ܐܠܰܗܳܐ ܐܰܒܳܐ ܘܰܠܝܰܘܡܳܐ ܫܒܺܝܚܳܐ ܘܢܰܨܺܝܚܳܐ ܕܒܶܗ ܠܥܺܕܬܳܐ ܩܰܕܺܝܫܬܳܐ ܐܰܢܗܪܰܬ݀ ܒܫܽܘ̈ܟܳܢܶܐ ܡܥܰܠܰܝ̈ܳܐ ܕܰܡܕܰܒܪܳܢܽܘܬܳܟ ܟܰܕ ܡܰܢܰܥܬ ܠܰܢ ܒܰܚܢܳܢܳܟ ܠܗܳܢܳܐ ܝܰܘܡܳܐ ܡܠܐܷ ܛܽܘ̈ܒܶܐ ܥܺܐܕܳܐ ܡܠܐܷ ܚܰܕ̈ܘܳܬܳܐ ܚܰܓܳܐ ܕܰܦܨܺܝܚ̈ܘܳܬܳܐ: ܢܽܘܗܪܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܫܰܟܶܢܬ ܠܰܢ ܒܪܶܚܡܰܬ݀ ܐ̱ܢܳܫܽܘܬܳܟ. ܗ̇ܳܝ ܕܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܥܬܰܪܘ ܒܡܰܘܗ̈ܒܳܬܳܐ ܐܠܰܗܳܝ̈ܳܬܳܐ ܘܒܰܣܒܰܪܬܳܐ ܐܶܬܦܢܺܝܘ ܡ̣ܶܢ ܬܰܘܫܳܐ ܕܰܚܛܺܝܬܳܐ: ܘܰܗܘܰܘ ܝܳܪ̈ܬܶܐ ܫܰܪܺܝܪ̈ܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ ܘܒܳܗ̇ ܟܽܠ ܦܶܢ̈ܝܳܢ ܝܰܘܡܳܢܳܐ  ܪ̈ܳܥܡܳܢ ܘܚܳܕ̈ܝܳܢ ܘܰܡܫܰܒ̈ܚܳܢ ܘܕܳܝ̈ܨܳܢ ܒܰܩܝܳܡܬܳܟ ܡܫܰܒܰܚܬܳܐ: ܬܶܫܒ̈ܚܳܬܳܐ ܘܗܽܘ̈ܠܳܠܐܷ ܘܙܽܘܡܳܪ̈ܶܐ ܚܠܰܝ̈ܳܐ ܡܩܰܪܒܺܝܢܰܢ ܠܳܟ: ܘܒܶܗ ܒܝܰܘܡܳܐ ܕܰܩܝܳܡܬܳܟ ܓܳܠܦܺܝܢܰܢ ܠܢܶܥ̈ܡܳܬܳܐ ܕܺܝܠܰܢ ܘܰܢܩܰܢܩܶܢ ܓܰܓܪ̈ܳܬܰܢ ܠܐܴ ܡܶܬܡܰܠܠܳܢܳܐ ܐܠܰܗܳܐ ܪܳܚܶܡ ܒܢܰܝ̈ܢܳܫܳܐ ܢܨܰܝܶܒ ܟܰܕ ܚܳܝܪܺܝܢܰܢ: ܟܰܕ ܒܰܠܒܽܘ̈ܫܶܐ ܚܶܘܳܪ̈ܶܐ: ܘܒܰܠܒܽܘ̈ܫܶܐ ܢܰܩ̈ܕܶܐ ܘܬܺܐܪ̈ܳܬܳܐ ܨܠܺܝ̈ܠܳܬܳܐ ܘܕܰܟܝ̈ܳܬܳܐ ܙܳܕܶܩ ܕܰܢܥܰܕܥܶܕ ܘܰܢܝܰܩܰܪ ܠܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ. ܗܳܢܳܐ ܕܒܶܗ ܕܰܘܺܝܕ ܢܒܺܝܳܐ ܐܠܰܗܳܝܳܐ ܡܣܰܓܶܐ ܗܘܳܐ ܘܳܐܡܰܪ: ܕܰܐܝܟ ܓܰܒܪܳܐ ܕܢܳܦܶܩ ܡ̣ܶܢ ܒܶܝܬ ܓܢܽܘܢܳܐ ܗܳܟܰܢܳܐ ܨܡܰܚܬ ܒܫܽܘܒܚܳܐ ܡ̣ܶܢ ܩܰܒܪܳܐ. ܘܗ̇ܳܝ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܘܰܡܚܳܐ ܘܒܰܕܰܪ ܠܟܽܠܗܽܘܢ ܒܥܶܠܕ̈ܒܳܒܰܘܗܝ ܘܒܶܗܬܬܳܐ ܘܰܩܠܳܠܐܴ ܥܒܰܕ ܐܶܢܽܘܢ ܒܰܩܝܳܡܬܶܗ ܟܰܕ ܠܟܽܠ ܥܰܡ̈ܡܺܝܢ ܐܠܰܦ ܘܶܐܡܰܪ ܕܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ. ܗܳܢܰܘ ܝܰܘܡܳܐ ܕܠܐܴ ܗܘܳܐ ܩܕܳܡܰܘܗܝ ܐܰܟܘܳܬܶܗ: ܐܳܦܠܐܴ ܒܳܬܪܶܗ ܐ̱ܚܪܺܢܳܐ ܕܕܳܡܶܐ ܠܶܗ: ܐܰܘ ܕܰܫܒܺܝܚ ܡܶܢܶܗ. ܗܳܢܰܘ ܥܰܕܥܺܐܕܶܗ ܕܰܐܠܳܗܰܢ ܕܒܶܗ ܪܽܘܚܳܐ ܩܰܕܺܝܫܳܐ ܙܳܐܰܚ ܘܢܳܚ̇ܶܬ ܡ̣ܶܢ ܪ̈ܰܘܡܶܐ ܥܶܠܳܝ̈ܶܐ. ܕܢܰܫܦܰܥ ܒܽܘܪ̈ܟܳܬܳܐ ܥܰܠ ܡܗܰܝ̈ܡܢܶܐ: ܗܳܢܰܘ ܝܰܘܡܳܐ ܩܰܕܺܝܫܳܐ ܕܒܶܗ ܡܶܫܬܰܕܪܺܝܢ ܪ̈ܰܚܡܶܐ ܥܰܠ ܟܶܢܫܳܐ ܙܰܗܝܳܐ ܕܰܠܗܽܘܢ ܫܳܘܶܐ ܘܡܶܬܩܰܕܰܫ ܒܶܗ ܦܰܓܪܳܐ ܩܰܕܺܝܫܳܐ ܘܰܕܡܳܐ ܡܚܰܣܝܳܢܳܐ ܕܰܐܠܳܗܳܐ ܕܺܝܠܰܢ. ܗ̇ܰܘ ܕܰܢܣܰܒ ܡ̣ܶܢ ܝܳܠܕܰܬ݀ ܐܠܰܗܳܐ ܡܰܪܝܰܡ ܫܰܪܺܝܪܳܐܺܝܬ. ܘܒܶܗ ܐܳܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒ̈ܢܶܐ ܥܰܠ ܥܢܳܢ̈ܰܝ ܬܶܫܒܽܘܚܬܳܐ: ܘܒܶܗ ܥܳܒܰܪ ܥܳܠܡܳܐ ܗܳܢܳܐ: ܘܒܶܗ ܥܳܒܶܕ ܕܺܝܢܳܐ ܘܰܢܩܰܡܬܳܐ ܘܰܬܒܰܥܬܳܐ ܘܦܽܘܪܥܳܢܽܘܬܳܐ ܘܒܶܗ ܦܳܪܶܫ ܠܛܳܒ̈ܶܐ ܡ̣ܶܢ ܒܺܝ̈ܫܶܐ. ܘܰܡܩܺܝܡ ܠܰܓܒܰܝ̈ܳܐ ܕܺܝܠܶܗ ܡ̣ܶܢ ܝܰܡܺܝܢܶܗ ܡܣܰܡܶܟ ܠܗܽܘܢ ܒܰܣܡܳܟܳܐ ܕܠܐܴ ܦܳܛܰܪ ܘܒܶܗ ܡܶܬܥܰܙܰܙ ܘܡܶܬܩܰܫܶܐ ܥܰܠ ܟܳܦܪ̈ܰܝ ܒܰܐܠܳܗܽܘܬܶܗ: ܘܰܒܐܢܳܫܽܘܬܶܗ ܠܐܴ ܗܰܝܡܶܢܘ ܘܥܰܠ ܐܰܝܠܶܝܢ ܕܰܐܒܣܺܝܘ ܘܠܐܴ ܝܰܩܰܪܘ ܗܘܰܘ ܠܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܘܡܰܫܠܰܛ ܥܠܰܝܗܽܘܢ ܡܰܠܐܱܟ̈ܶܐ ܕܪܽܘܓܙܳܐ ܕܰܕܢܰܓܕܽܘܢ ܐܶܢܽܘܢ ܕܠܐܴ ܨܰܚܡܳܐ. ܘܰܠܓܺܗܰܢܳܐ ܕܢܽܘܪܳܐ ܫ̇ܳܕܶܐ ܠܗܽܘܢ ܘܠܐܴ ܡܶܬܪܰܚܰܡ ܥܠܰܝܗܽܘܢ: ܒܗ̇ܰܘ ܝܰܘܡܳܐ ܡܳܪܰܢ ܠܐܴ ܬܶܬܥܰܙܰܙ ܥܰܠ ܥܰܒܕܰܝ̈ܟ ܐܰܝܠܶܝܢ ܕܰܐܘܕܺܝܘ ܘܗܰܝܡܶܢܘ ܒܳܟ ܘܰܒܡܶܬܒܰܪܢܫܳܢܽܘܬܳܟ: ܘܡܰܘܕܶܝܢ ܒܳܟ ܘܒܰܐܠܳܗܽܘܬܳܟ ܟܰܕ ܣܳܓܕܺܝܢ ܘܰܡܫܰܒܚܺܝܢ ܠܰܩܝܳܡܬܳܟ ܬܠܺܝܬܳܐܝܰܬ݀ ܝܰܘ̈ܡܶܐ ܕܡ̣ܶܢ ܒܶܝܬ ܡܺܝ̈ܬܶܐ: ܘܡܰܘܕܶܝܢ ܕܺܐܝܬܰܝܟ ܐܠܰܗܳܐ ܫܰܪܺܝܪܳܐ ܕܡ̣ܶܢ ܐܠܰܗܳܐ ܫܰܪܺܝܪܳܐ: ܘܡܶܛܽܠ ܨܰܠܡܳܟ ܕܶܐܬܚܰܒܰܠ ܘܰܓܒܺܝܠܬܳܐ ܕܺܝܠܳܟ ܦܰܓܪܳܐ ܠܒܶܫܬ ܕܬܰܥܕܺܝܘܗܝ ܡ̣ܶܢ ܐܺܝ̈ܕܰܝ ܒܺܝܫܳܐ ܡܳܪܽܘܕܳܐ ܕܡܰܗܶܠ ܗܘܳܐ ܘܰܡܒܰܙܰܚ ܒܶܗ ܢܚܶܬܬ ܠܒܶܝܬ ܡܺܝ̈ܬܶܐ ܠܘܳܬܶܗ ܡܶܛܽܠ ܪܶܚܡܰܬ݀ ܐ̱ܢܳܫܽܘܬܳܟ ܕܨܶܝܕܰܘܗܝ: ܘܰܢܓܰܕܬ ܘܰܐܣܶܩܬ ܠܨܰܠܡܳܟ ܠܐܱܬܪܳܐ ܕܪ̈ܽܘܚܳܢܶܐ: ܐܰܘܬܶܒܬܳܝܗܝ ܒܫܽܘܒܚܳܐ ܪܰܒܶܐ ܕܠܐܴ ܡܶܬܡܰܠܠܳܢܳܐ: ܘܗܳܐ ܝܰܘܡܳܢܳܐ ܟܽܠܗܶܝܢ ܒܶܪ̈ܝܳܬܳܐ ܚܳܕ̈ܝܳܢ ܘܕܳܝ̈ܨܳܢ ܘܰܡܫܰܒ̈ܚܳܢ ܘܡܰܘܕ̈ܝܳܢ ܠܳܟ ܥܰܠ ܦܽܘܪ̈ܢܳܣܰܝܟ ܠܐܴ ܡܶܬܕܰܪ̈ܟܳܢܶܐ ܕܰܠܘܳܬܰܢ ܡܦܺܝܣܺܝܢܰܢ ܠܳܟ ܕܰܠܥܺܕܬܳܟ  ܩܰܕܺܝܫܬܳܐ ܕܰܓܒܰܝܬ ܘܰܐܬܩܶܢܬ ܘܫܰܪܪܰܬ. ܕܬܰܫܰܪ ܫܽܘܘܕܳܝܰܝ̈ܟ ܠܘܳܬܳܗ̇ ܘܰܬܢܰܛܰܪܶܝܗ̇ ܡ̣ܶܢ ܟܽܠ ܐܶܪ̈ܶܣܺܝܣ ܡܙܺܝ̈ܦܳܬܳܐ ܘܰܡܚܰܒ̈ܠܳܬܳܐ ܘܰܬܪܺܝܡ ܩܰܪܢܳܗ̇ ܥܰܠ ܒܥܶܠܕ̈ܒܳܒܶܝܗ̇ ܐܰܝܠܶܝܢ ܕܡܶܫܬܰܩܠܺܝܢ ܒܥܽܘܫܢܳܐ ܥܰܠ ܥܰܡܳܟ ܡܗܰܝܡܢܳܐ: ܘܢܶܬܬܰܒܪ̈ܳܢ ܩܰܪ̈ܢܳܬܗܽܘܢ ܩܕܳܡܶܝܗ̇ ܘܨܰܘܪܳܐ ܕܺܝܠܗܽܘܢ ܢܶܬܡܰܟܰܟ: ܘܢܶܗܘܽܘܢ ܠܬܰܗܠܰܠܬܳܐ ܘܰܠܣܽܘܠܐܴܢܽܘܬܳܐ: ܘܰܐܢ̱ܬ ܡܳܪܝܳܐ ܡ̣ܶܢ ܟܽܠ ܥܰܡ̈ܡܺܝܢ  ܬܶܣܬܓܶܕ ܘܬܶܫܬܰܒܰܚ: ܘܥܺܕܬܳܟ ܩܰܕܺܝܫܬܳܐ ܬܶܬܩܰܝܰܡ: ܘܰܐܢܺܝܚ ܠܥܰܢܺܝ̈ܕܳܐ ܡܗܰܝܡ̈ܢܶܐ ܐܰܝܠܶܝܢ ܕܰܥܢܰܕܘ ܡܶܢܳܗ̇ ܒܰܬܪܺܝܨܽܘܬܳܐ ܕܫܽܘܒܚܳܐ: ܘܰܡܣܰܟܶܝܢ ܠܓܶܠܝܳܢܳܟ ܕܡ̣ܶܢ ܫܡܰܝܳܐ. ܕܒܶܗ ܪܰܒܽܘܬܳܟ ܡܰܒܪܩܳܐ ܘܓܰܐܝܽܘܬܳܟ ܡܶܙܕܰܝܚܳܐ: ܢܶܦܓܰܥ ܒܳܟ ܒܰܐܦ̈ܶܐ ܓܰܠܝ̈ܳܬܳܐ: ܗ̣ܶܢܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܡܗܽܘܢ ܚܢܰܢ ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܠܳܟ ܐܠܰܗܳܐ ܡܢܰܚܡܳܢܰܢ ܡ̣ܶܢ ܓܰܘ ܫܝܽܘܠ ܘܰܡܚܰܕܬܳܢܰܢ ܡ̣ܶܢ ܥܰܦܪܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܛܰܝܒܽܘܬܳܐ ܡܫܰܡܠܳܝܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ: ܡܠܰܝܬ ܠܠܶܒܰܘ̈ܳܬܳܐ ܕܺܝܠܰܢ ܡܳܪܝܳܐ ܒܝܰܕ ܙܰܠܓ̈ܶܐ ܢܰܨܺܝ̈ܚܶܐ ܕܰܩܝܳܡܬܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܘܶܐܨܛܒܰܝ ܡܳܪܝܳܐ ܕܢܶܬܩܰܒܰܠ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܘܰܒܥܶܕܳܢܳܐ ܕܨܰܦܪܳܐ. ܐܰܝܟܰܢܳܐ ܕܒܶܗ ܢܶܬܚܰܠܰܠ ܘܢܶܬܡܪܶܩ ܡ̣ܶܢ ܟܽܠ ܒܺܝ̈ܫܳܬܳܐ ܘܰܚܛܺܝܬܳܐ: ܘܰܒܙܽܘܦܳܐ ܡܚܰܘܪܳܢܳܐ ܕܰܚܢܳܢܳܟ ܢܶܬܕܰܟܶܐ ܘܢܶܬܚܰܪܰܪ ܘܢܶܨܛܰܠܰܠ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܚܘܬܡܐ

ܩܰܒܶܠ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ ܕܡܶܬܩܰܪܒܺܝܢܰܢ ܠܰܩܕܳܡ ܟܽܘܪܣܝܳܐ ܕܺܐܝܩܳܪܳܟ: ܘܰܐܢܗܰܪ ܘܩܰܕܶܫ ܠܢܰܦ̈ܫܳܬܰܢ ܒܢܽܘܗܪܳܐ ܕܬܶܐܘܳܠܳܘܓܺܝܰܐ ܘܰܒܨܶܡ̈ܚܶܐ ܕܰܩܝܳܡܬܳܟ ܕܰܢܛܰܚܘ ܥܠܰܝܢ: ܡ̣ܶܢ ܨܶܡܚ̈ܶܐ ܘܙܰܗܪܺܝܪ̈ܶܐ ܕܺܝܠܶܗ. ܘܰܐܒܪܶܩ ܠܡܰܕ̈ܥܰܝܢ ܕܰܒܢܽܘܗܪܳܐ ܕܦܽܘܩܕܳܢܰܝ̈ܟ ܢܶܪܕܶܐ: ܘܢܶܬܗܰܓܶܐ ܒܢܳܡܽܘ̈ܣܰܝܟ ܐܺܝܡܳܡܳܐ ܘܠܺܠܝܳܐ: ܘܛܽܘܒܬܳܢܳܐܺܝܬ ܢܫܰܒܚܳܟ ܡܳܪܰܢ ܘܰܐܠܳܗܰܢ܀

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ ܠܚܰܕ ܐܠܰܗܳܐ ܫܰܪܺܝܪܳܐ ܗ̇ܰܘ ܕܰܬܠܺܝܬܳܐܺܝܬ ܡܶܣܬܓܶܕ ܘܰܚܕܳܢܳܐܺܝܬ ܡܶܬܟܪܶܙ: ܘܡܶܬܗܰܝܡܰܢ ܡܬܽܘܡܳܐܺܝܬ: ܐܰܒܳܐ ܠܐܴ ܡܶܬܕܰܪܟܳܢܳܐ: ܘܰܒܪܳܐ ܠܐܴ ܡܶܬܥܰܩܒܳܢܳܐ: ܘܪܽܘܚܳܐ ܠܐܴ ܡܶܬܒܰܨܝܳܢܳܐ. ܬܠܳܬܳܐ ܩܢܽܘ̈ܡܶܐ ܠܐܴ ܥܒܺܝ̈ܕܶܐ: ܬܠܳܬܳܐ ܫܡܳܗ̈ܶܐ ܠܐܴ ܡܛܰܘ̈ܫܶܐ: ܚܕܳܐ ܐܽܘܣܺܝܰܐ ܠܐܴ ܣܕܺܝܩܬܳܐ: ܘܚܰܕ ܟܝܳܢܳܐ ܠܐܴ ܒܠܺܝܠܐܴ: ܕܠܶܗ ܝܳܐܶܐ ܫܽܘܒܚܳܐ ܘܬܰܘܕܺܝܬܳܐ܀

 

ܣܕܪܐ

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܡܫܰܟܢܳܢܳܐ ܕܪܽܘܚܳܐ ܩܰܕܺܝܫܳܐ: ܗ̇ܰܘ ܕܩܰܪܶܒܢܰܢ ܒܚܽܘܒܶܗ ܘܒܰܝܬܺܝ ܠܰܢ ܠܢܽܘܟܪ̈ܳܝܶܐ ܗܳܢܽܘܢ ܕܠܐܴ ܫܳܘܶܝܢ ܗܘܰܝܢ ܘܰܠܝܳܪܬܽܘܬܳܐ ܕܺܝܠܰܢ ܗ̇ܳܝ ܩܰܕܡܳܝܬܳܐ ܐܰܦܢܺܝ ܠܰܢ: ܒܝܰܕ ܦܰܓܪܳܐ ܕܰܢܣ̣ܰܒ ܡ̣ܶܢ ܓܶܢܣܰܢ ܘܰܥ̣ܛܳܐ ܗܘܳܐ ܠܫܽܘܪܰܥܬܳܐ ܕܗ̇ܰܘ ܕܰܚܛܳܐ ܘܰܥܒܰܪ ܦܽܘܩܕܳܢܳܐ: ܘܫܰܡܠܺܝ ܟܽܠܳܗ̇ ܐܽܘܪܚܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ. ܥܕܰܡܳܐ ܕܶܐܬܢܰܚܰܬ ܠܝܰܠܕܳܐ ܘܰܥܡܳܕܳܐ ܘܰܓܙܽܘܪܬܳܐ ܘܶܐܬܢܰܣܺܝ ܡ̣ܶܢ ܒܺܝܫܳܐ ܡܳܪܽܘܕܳܐ ܘܚܰܪܰܪ ܠܰܢ ܡ̣ܶܢ ܥܰܒܕܽܘܬܶܗ ܕܣܳܛܳܢܳܐ: ܘܰܣܠܶܩ ܠܰܨܠܺܝܒܳܐ ܘܪܰܥܺܝ ܟܽܠܗܶܝܢ ܒܶܪ̈ܝܳܬܳܐ ܠܐܱܒܽܘܗܝ ܓܢܺܝܙܳܐ. ܘܶܐܬܩܒܰܪ ܘܶܐܬܬܣܺܝܡ ܒܓܰܘ ܩܰܒܪܳܐ ܐܰܝܟ ܥܰܢܺܝܕܳܐ: ܩܳܡ ܘܶܐܬܢܰܚܰܡ ܐܰܝܟ ܐܠܰܗܳܐ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܘܠܰܫܒܺܝܬܳܐ ܟܽܠܳܗ̇ ܕܒܳܬܪܳܗ̇ ܢܚܶܬ ܦܪܰܩ ܘܰܐܥܕܝܳܗ̇ ܡ̣ܶܢ ܐܺܝ̈ܕܰܝ ܫܰܒܳܝܳܐ: ܘܰܐܦܶܩ ܒܶܙܬܳܐ ܗ̇ܳܝ ܕܡ̣ܶܢ ܥܳܠܰܡ ܚܡܺܝܠܐܴ ܗܘܳܬ݀ ܠܶܗ ܠܡܳܪܽܘܕܳܐ: ܘܺܐܝܬܶܝܗ̇ ܒܙܰܘܚܳܐ ܘܙܳܟܽܘܬܳܐ: ܘܰܠܦܰܪܕܰܝܣܳܐ ܐܰܥܠܳܗ̇ ܠܗ̇ܳܝ ܝܳܪܬܽܘܬܳܐ ܕܺܝܠܶܗ ܩܰܕܡܳܝܬܳܐ: ܘܚܶܟܡܬܳܐ ܘܚܰܝܠܐܴ ܘܩܰܕܺܝܫܽܘܬܳܐ ܡܠܐܴ ܠܟܽܠܳܗ̇ ܐ̱ܢܳܫܽܘܬܳܐ: ܐܰܝܟܰܢܳܐ ܕܣܶܓܕܬܳܐ ܫܰܪܺܝܪܬܳܐ ܘܰܡܫܰܡܠܳܝܬܳܐ ܕܡܶܬܬܚܺܝܒܳܐ ܬܰܣܶܩ ܠܶܗ ܥܰܠ ܐܰܦ̈ܰܝ ܦܽܘܪܩܳܢܶܗ ܕܰܠܘܳܬܰܢ ܢܩܰܪܶܒ ܠܶܗ ܫܽܘܒܚܳܐ ܕܠܐܴ ܫܶܠܝܳܐ: ܒܥܶܕܳܢܳܐ ܗܳܢܳܐ ܘܰܒܟܽܠܥܶܕܳܢܺܝ̈ܢ. ܘܗܳܫܳܐ ܡܦܺܝܣܺܝܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܘܡܰܠܟܳܐ ܕܰܫܠܳܡܳܐ: ܡܚܰܠܠܳܢܳܐ ܘܰܡܩܰܕܫܳܢܳܐ ܕܟܽܠ: ܕܫܳܘܶܝܢܰܢ ܥܒܶܕ ܠܫܽܘ̈ܟܳܢܰܝܟ ܐܠܰܗܳܝ̈ܶܐ ܘܡܰܥܒ̈ܕܰܝ ܚܰܝ̈ܶܐ. ܘܚܰܘܳܐ ܠܰܢ ܥܽܘܬܪܳܐ ܕܰܚܢܳܢܳܟ ܘܡܰܘܗ̈ܒܳܬܳܟ ܐܠܰܗܳܝ̈ܳܬܳܐ ܘܰܫܡܰܝܳܢ̈ܳܝܳܬܳܐ. ܗܳܠܶܝܢ ܐܰܝܠܶܝܢ ܕܰܦܬܺܝܟܳܐܺܝܬ ܘܰܒܣܰܓܺܝܽܐܘܬ ܙܢܰܝ̈ܳܐ ܕܺܝܠܳܟ ܠܟܽܠܢܳܫ ܐܰܝܟ ܕܫܳܘܶܐ ܡܦܰܠܶܓ ܐܰܢ̱ܬ: ܘܕܰܟܳܐ ܠܰܢ ܡ̣ܶܢ ܟܽܠܗܽܘܢ ܣܽܘܥܪ̈ܳܢܶܐ ܐܰܝܠܶܝܢ ܕܠܳܟ ܠܐܴ ܫܳܦܪܺܝܢ: ܘܩܰܕܶܫ ܠܦܰܓܪ̈ܶܐ ܘܢܰܦ̈ܫܳܬܳܐ ܘܪ̈ܽܘܚܳܬܳܐ ܕܺܝܠܰܢ ܒܩܰܕܺܝܫܽܘܬܳܐ ܕܡܶܢܳܟ: ܘܰܐܫܘܳܐ ܠܰܢ ܡܳܪܝܳܐ ܕܰܒܚܽܘ̈ܫܳܒܶܐ ܚܰܝܠܬܳܢ̈ܶܐ ܢܫܰܒܰܚ ܘܰܢܫܰܡܫܳܟ ܩܰܕܺܝܫܳܐܺܝܬ ܕܠܐܴ ܢܽܘܬܳܦܳܐ ܕܰܚܛܺܝܬܳܐ: ܘܰܢܩܽܘܡ ܡ̣ܶܢ ܝܰܡܺܝܢܳܟ ܕܠܐܴ ܒܶܗܬܬܳܐ: ܟܰܕ ܩܳܝܡܺܝܢܰܢ ܩܕܳܡܰܝܟ ܒܕܶܚܠܬܳܐ ܘܒܰܪܬܺܝܬܳܐ ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ: ܘܗܰܒܠܰܢ ܠܶܒܳܐ ܕܡܶܫܬܡܰܥ ܠܳܟ ܒܰܫܪܳܪܳܐ: ܘܣܶܦܘ̈ܳܬܳܐ ܕܰܡܫܰܒ̈ܚܳܢ ܠܳܟ ܩܰܕܺܝܫܳܐܺܝܬ ܒܟܽܠܙܒܰܢ: ܟܰܕ ܡܫܰܘܙܶܒ ܐܰܢ̱ܬ ܠܰܢ ܡ̣ܶܢ ܥܫܽܘܩܝܳܐ ܕܫܺܐܕ̈ܶܐ ܒܺܝ̈ܫܶܐ: ܘܡ̣ܶܢ ܫܓܺܝܫܽܘܬܳܐ ܕܚܰܫ̈ܶܐ ܕܒܶܣܪܳܐ. ܐܰܝܟܰܢܳܐ ܕܕܰܟܝܳܐܺܝܬ ܘܩܰܕܺܝܫܳܐܺܝܬ ܢܺܐܚܶܐ ܒܥܳܠܡܳܐ ܗܳܢܳܐ. ܘܠܐܴ ܡܚܰܝ̈ܒܶܐ ܢܩܽܘܡ ܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ: ܘܰܒܦܰܪܶܗܣܺܝܰܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡ ܛܟܣܐ ܪܒܝܥܝܐ

 

ܛܟܣܐ ܕܚܕ ܒܫܒܐ ܪܒܝܥܝܐ ܕܛܟܣܐ ܡܨܥܝܐ ܕܩܝܡܬܐ

ܩܕܡܝܬ ܨܠܘܬܐ ܕܫܘܪܝܐ

 

ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܒܙܳܟܽܘܬܳܐ ܘܰܫܪܳܐ ܫܽܘܠܛܳܢܶܗ ܕܡܰܘܬܳܐ ܥܰܙܺܝܙܳܐ ܕܰܓܣܰܪ ܒܗܳܡܳܢ ܘܶܐܬܦܪܶܬܘ ܥܽܘ̈ܒܶܝܗ̇ ܓܽܘܪܝܳܐ ܕܰܐܪܝܳܐ ܕܡܰܘܬܶܗ ܩܰܛܠܶܗ ܠܡܰܘܬܳܐ ܩܳܛܽܘܠܰܢ ܡܰܘܕܶܝܢܰܢ ܠܳܟ ܡܳܪܝ ܘܠܰܩܝܳܡܬܳܟ ܒܪܺܝܟܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܡܫܺܝܚܳܐ ܣܰܒܪܳܐ ܕܥܺܕܬܶܗ ܘܦܳܪܽܘܩܳܐ ܕܢܰܦ̈ܫܳܬܰܢ: ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ ܠܗ̇ܰܘ ܟܺܐܢܳܐ ܘܰܬܪܺܝܨܳܐ ܕܒܰܕܰܪ ܒܟܺܐܢܽܘܬܶܐ ܕܺܝܠܶܗ ܠܙܳܩܽܘ̈ܦܐ: ܘܰܒܛܰܝܒܽܘܬܶܗ ܟܰܢܶܫ ܠܚܰܒܺܝ̈ܒܰܘܗܝ. ܠܗ̇ܰܘ ܚܰܟܺܝܡܳܐ ܕܰܠܥܽܘܫܢܳܐ ܕܥܰܫܺܝ̈ܢܶܐ ܫܳܛ ܒܰܡܚܺܝܠܽܘܬܶܗ: ܘܩܰܦܰܚ ܠܪܳܡܽܘܬܳܐ ܒܡܰܟܺܝܟܽܘܬܶܗ: ܘܣܰܚܶܦ ܟܽܘܪܣܝܳܐ ܕܗ̇ܳܢܽܘܢ ܬܠܳܬܳܐ ܒܥܶܠܕ̈ܒܳܒܶܐ ܒܰܩܝܳܡܬܶܗ ܘܬܰܒܰܪ ܬܰܪ̈ܥܶܐ ܕܰܫܝܽܘܠ ܒܬܰܩܺܝܦܽܘܬܶܗ ܘܰܐܦܶܩ ܠܥܰܢܺܝ̈ܕܶܐ ܡ̣ܶܢ ܚܶܫܽܘܟܳܐ ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܒܚܰܝܠܶܗ ܬܰܩܺܝܦܳܐ ܐܶܬܬܰܩܰܢ̈ܝ ܒܶܪ̈ܝܳܬܳܐ: ܘܰܒܪܶܡܙܳܐ ܕܨܶܒܝܳܢܶܗ ܡܕܰܒܰܪ ܠܣܰܘ̈ܦܶܐ ܘܦܶܢ̈ܝܳܬܳܐ: ܗ̇ܰܘ ܕܰܒܝܰܡܳܐ ܕܛܳܒܽܘܬܶܗ ܬܡܺܝܗܬܳܐ ܫܰܡܠܺܝ ܐ̱ܪܳܙܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ: ܘܡܺܝܬܳܐ ܐܰܝܟ ܕܰܨܒܳܐ ܘܶܐܬܢܰܚܰܡ ܐܰܝܟ ܕܰܫܦܰܪ ܠܶܗ. ܟܰܕ ܠܰܒܥܶܠܕ̈ܒܳܒܶܐ ܬܠܳܬܳܐ ܐܰܘܒܶܕ ܒܰܩܝܳܡܬܶܗ ܠܣܳܛܳܢܳܐ ܘܠܰܫܝܽܘܠ ܘܰܠܡܰܘܬܳܐ ܘܦܰܨܺܝ ܠܓܶܢܣܰܢ ܕܰܐܒܺܝܕ ܗܘܳܐ ܒܰܚܛܺܝܬܳܐ: ܘܡܽܘܠܟܳܢ̈ܶܐ ܫܰܪܺܝܪ̈ܶܐ ܝܰܗܒܘ ܠܰܦܪ̈ܺܝܩܰܘܗܝ ܕܰܐܝܢܳܐ ܕܰܡܗܰܝܡܶܢ ܡܶܬܚܰܝܰܒ. ܘܟܰܕ ܠܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ ܫܰܟܶܢ ܚܰܕܽܘܬܳܐ ܘܰܪܘܳܙܳܐ: ܘܚܰܘܺܝ ܠܟܽܠܗܽܘܢ ܦܪ̈ܺܝܩܶܐ ܘܰܡܚܰܪܪ̈ܶܐ: ܘܒܰܕܓܽܘܢ ܚܘܺܝܚܳܐܺܝܬ ܡܩܰܒܠܺܝܢܰܢ ܠܝܰܘܡܳܐ ܗܳܢܳܐ ܕܰܩܝܳܡܬܳܐ ܡܝܰܩܪܺܝܢܰܢ ܘܳܐܡܪܺܝܢܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܐܶܬܰܝ̈ ܠܰܢ ܟܽܠ ܛܳܒ̈ܳܬܳܐ ܫܡܰܝܳܢ̈ܳܝܳܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ ܗܘܰܝܢܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܓܢܽܘܢܳܐ ܒܡܰܠܟܽܘܬܳܐ ܕܰܫܡܰܝܳܐ ܐܶܬܬܰܩܰܢ ܠܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܕܢܰܚ ܠܰܢ ܢܽܘܗܪܳܐ ܪܰܒܳܐ ܘܫܰܪܺܝܪܳܐ ܘܰܡܝܰܬܰܪ ܡ̣ܶܢ ܫܶܡܫܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܗܘܰܝܢܰܢ ܒܢܰܝ̈ܳܐ ܐܳܦ ܝܳܪ̈ܬܶܐ ܕܡܰܠܟܽܘܬܳܐ ܕܰܫܡܰܝܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܘܰܥܕܳܐ ܕܚܰܝ̈ܶܐ ܕܰܠܥܳܠܰܡ ܐܶܫܬܰܟܰܢ ܠܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܙܳܟܽܘܬܳܐ ܡܫܰܡܠܳܝܬܳܐ ܐܶܫܬܰܟܢܰܬ݀ ܠܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ  ܕܒܶܗ ܚܰܕܽܘܬܳܐ ܡܰܠܝܰܬ݀ ܦܽܘܪ̈ܫܳܢܶܐ ܥܳܦܢܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܛܥܰܝܢܳܗ̇ ܠܡܰܦܽܘܠܬܳܐ ܕܰܥܪܽܘܒܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܝܳܗܽܘܒܳܐ ܕܚܰܝ̈ܶܐ ܫܰܟܶܢ ܠܰܢ ܚܰܝ̈ܶܐ ܕܠܐܴ ܣܳܐܒܶܝܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܟܬܰܒ ܠܰܢ ܒܣܶܦܪܳܐ ܕܡܰܠܟܽܘܬܳܐ ܕܰܫܡܰܝܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܠܐܘܚܕܳܢܶܗ ܕܡܰܘܬܳܐ ܝܰܥܢܳܐ ܫܪܳܐ ܘܒܰܛܶܠ ܦܳܪܽܘܩܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܡܺܝܬ ܒܰܒܣܰܪ ܘܰܚܝܳܐ ܒܪܽܘܚ ܚܰܝܳܐ ܕܠܐܴ ܡܳܐܶܬ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܢܶܫ̈ܶܐ ܩܰܕܺܝ̈ܫܳܬܳܐ ܐܶܣܬܰܒܰܪ̈ܝ ܩܝܳܡܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܣܒܰܪܬܳܐ ܒܪܺܝܟܳܬܐ ܕܚܰܝ̈ܶܐ ܚܰܕ̈ܬܶܐ ܕܰܩܝܳܡܬܳܐ ܐܶܬܕܰܢܚܰܬ݀ ܠܰܢ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܥܺܕܬܳܐ ܩܰܕܺܝܫܬܳܐ ܐܶܫܬܰܪܪܰܬ݀ ܒܗܰܝܡܳܢܽܘܬܳܐ ܬܪܺܝܨܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܦܳܠܰܚܘ̈ܳܬܳܐ ܕܡܰܠܐܱܟ̈ܶܐ ܩܰܕܺܝ̈ܫܶܐ ܝܰܒܶܒܘ ܨܶܝܕ ܩܰܒܪܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܨܒܳܐ ܡܳܪܳܐ ܕܒܶܪ̈ܝܳܬܳܐ ܕܢܶܬܢܰܚܰܡ ܒܬܶܫܒܽܘܚܬܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܩܳܡ ܡܳܪܰܢ ܡ̣ܶܢ ܩܰܒܪܳܐ ܘܰܐܩܺܝܡ ܥܰܡܶܗ ܠܓܶܢܣܳܐ ܕܥܰܦܪ̈ܳܢܶܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܪܰܘܡܳܐ ܘܥܽܘܡܩܳܐ ܩܢܰܘ ܚܰܕܽܘܬܳܐ ܒܰܩܝܳܡܬܶܗ ܕܺܝܚܺܝܕܳܝܳܐ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܫܰܕܰܪ ܐܠܰܗܳܐ ܛܰܝܒܽܘܬܶܗ ܘܪ̈ܰܚܡܰܘܗܝ ܠܥܰܡܶܗ ܝܳܪܬܽܘܬܳܐ ܕܺܝܠܶܗ. ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܶܒܗ ܬܳܐܓܳܐ ܕܢܽܘܗܪܳܐ ܠܥܺܕܬܳܐ ܩܰܕܺܝܫܬܳܐ ܐܶܬܩܛܰܪܘ ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܝܰܕ ܪ̈ܰܚܡܰܝܟ ܕܰܒܰܪ ܠܰܢ: ܘܰܒܫܰܝܢܳܟ ܘܒܰܫܠܳܡܳܟ ܗܰܕܳܐ ܠܰܢ: ܘܰܒܪܶܚܡܰܬ݀ ܐ̱ܢܳܫܽܘܬܳܟ ܡ̣ܶܢ ܫܰܒ̈ܛܶܐ ܕܪܽܘܓܙܳܐ ܘܡܰܪ̈ܕܘܳܬܳܐ ܫܰܘܙܶܒ ܠܰܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܺܝܢܳܟ: ܘܠܐܱܝܠܶܝܢ ܕܫܶܐܠܘ ܘܫ̇ܳܐܠܺܝܢ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܠܚܽܘܣܳܝܳܐ ܘܰܠܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ ܘܰܠܩܰܘܡܳܐ ܕܡ̣ܶܢ ܝܰܡܺܝܢܳܟ ܘܰܠܫܽܘܒܚܳܐ ܕܪܰܒܽܘܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

 

ܥܛܪܐ

ܡܫܺܝܚܳܐ ܚܰܝܠܐܴ ܕܡ̣ܶܢ ܐܰܒܳܐ ܘܥܶܠܬܳܐ ܩܰܕܡܳܝܳܐ: ܗ̇ܰܘ ܕܰܠܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܬܰܚܽܘܒܳܐ ܐܶܬܬܰܚܬܺܝ: ܐܰܢ̱ܬ ܡܳܪܝ ܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܘܰܬܪܽܘܨ ܠܠܶܒܰܘ̈ܳܬܳܐ ܠܢܳܛܽܘܪܽܘܬܳܐ ܕܦܽܘܩܕܳܢܰܝ̈ܟ ܩܰܕܺܝ̈ܫܶܐ: ܐܰܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܡ̣ܶܢ ܝܰܡܺܝܢܳܟ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܒܛܰܝܒܽܘܬܳܟ ܕܰܒܠܶܒܳܐ ܕܰܟܝܳܐ ܢܫܰܒܰܚ ܠܰܩܝܳܡܬܳܟ ܘܰܒܪܶܥܝܳܢܳܐ ܙܰܗܝܳܐ ܢܗܰܕܰܪ ܠܢܽܘܚܳܡܳܟ: ܘܰܒܦܽܘܡܳܐ ܩܰܕܺܝܫܳܐ ܢܩܰܠܶܣ ܠܙܳܟܽܘܬܳܟ ܘܰܒܠܶܫܳܢܳܐ ܫܰܦܝܳܐ ܢܶܫܬܰܥܶܐ ܥܽܘܫܢܳܟ: ܘܥܰܡ ܟܶܢ̈ܫܶܐ ܫܡܰܝ̈ܳܢܶܐ ܢܪܰܡܪܶܡ ܠܐܻܝܩܳܪܳܟ ܘܥܰܡ ܪ̈ܽܘܚܳܢܶܐ ܢܶܣܓܽܘܕ ܠܫܳܠܽܘܚܳܟ ܘܰܢܝܰܒܶܒ ܠܪܽܘܚܳܟ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܫܽܘܒܚܳܐ ܘܙܳܟܽܘܬܳܐ ܩܳܡ ܡ̣ܶܢ ܩܰܒܪܳܐ ܘܚܰܕܶܬ ܠܰܟܝܳܢܳܐ ܐ̱ܢܳܫܳܝܳܐ. ܠܗ̇ܰܘ ܕܰܐܒܗܶܬ ܠܨܳܠܽܘ̈ܒܶܐ ܒܢܽܘܚܳܡܶܗ ܘܚܰܕܺܝ ܠܬܰܠܡܺܝ̈ܕܶܐ ܩܰܕܺܝ̈ܫܶܐ ܒܰܚܙܳܬܶܗ: ܠܗ̇ܰܘ ܕܶܐܬܳܐ ܘܰܦܪܰܩ ܠܓܶܢܣܳܐ ܕܒܶܝܬ ܐܳܕܳܡ: ܘܬܽܘܒ ܐܳܬܶܐ ܠܚܰܪܬܳܐ ܒܫܽܘܒܚܳܐ ܪܰܒܳܐ ܠܕܺܝܢܳܐ ܘܠܰܬܒܰܥܬܳܐ ܕܟܳܦܽܘܪ̈ܶܐ ܕܠܶܗ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܟܰܕ ܒܣܽܘ̈ܟܳܠܐܷ ܪ̈ܳܡܰܝ ܡ̣ܶܢ ܥܳܠܡܳܐ ܒܰܩܝܳܡܬܳܐ ܕܺܝܠܳܟ ܡܶܬܒܰܩܶܝܢܰܢ ܐܳܘ ܡܶܠܬܳܐ ܐܠܰܗܳܐ: ܘܰܠܙܰܗܪܺܝܪ̈ܶܐ ܗ̇ܳܢܽܘܢ ܨܰܡܽܘܚ̈ܬܳܢܶܐ ܕܡ̣ܶܢ ܩܰܒܪܳܟ ܐܰܕܺܝܩܘ: ܒܥܰܝ̈ܢܶܐ ܕܬܰܪܥܺܝܬܰܢ ܟܰܣܝܳܐܺܝܬ ܚܳܙܶܝܢܰܢ: ܘܰܠܒܰܪ̈ܩܶܐ ܢܽܘܪ̈ܳܢܳܝܶܐ ܕܝܰܘܡܳܢ ܐܰܒܪܶܩܘ ܥܰܠ ܢܳܛܽܘܪ̈ܶܐ ܘܥܰܘܰܪܘ ܐܶܢܽܘܢ: ܒܡܰܕ̈ܥܰܝܢ ܪܽܘܚܳܢܳܐܺܝܬ ܢܳܣܒܺܝܢܰܢ: ܘܰܠܡܰܠܐܱܟ̈ܶܐ ܩܰܕܺܝ̈ܫܶܐ ܕܒܰܠܒܽܘܫ̈ܶܐ ܚܶܘܳܪ̈ܶܐ ܐܶܬܚܙܺܝܘ: ܘܥܰܡ ܢܶܫ̈ܶܐ ܡܶܣܬܰܘܕܶܝܢ ܐܰܟܡܰܢ ܕܰܠܢܰܦ̈ܫܳܬܰܢ ܡܠܰܒܒܺܝܢ ܕܠܐܴ ܬܶܕܚ̈ܠܳܢ ܒܗܰܘ̈ܢܰܝܢ ܫܳܩܠܺܝܢܰܢ: ܘܟܰܕ ܒܟܽܠܗܶܝܢ ܐ̱ܪܳܙܳܢܳܐܺܝܬ ܘܪܽܘܚܳܢܳܐܺܝܬ ܡܰܦܪܓܺܝܢܰܢ: ܘܰܠܒܽܘ̈ܫܶܐ ܚܶܘܳܪ̈ܶܐ ܘܕܽܘܒܳܪ̈ܶܐ ܪ̈ܽܘܚܳܢܶܐ ܡܶܬܥܰܛܦܺܝܢܰܢ ܘܚܰܕܽܘܬܳܢܳܐܺܝܬ ܟܰܕ ܪܳܘܙܺܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ ܝܰܘܡܰܐ ܗ̱̇ܘ ܕܚܰܕܽܘܬܳܐ ܘܕܰܪܘܳܙܳܐ: ܠܐܴ ܢܶܗܘܶܐ ܒܶܗ ܟܡܺܝܪ̈ܶܐ ܘܰܡܥ̈ܳܩܶܐ: ܝܰܘܡܰܐ ܗ̱̇ܘ ܕܢܽܘܗܪܳܐ ܨܡܰܚ ܘܰܦܨܺܝܚܽܘܬܳܐ ܐܰܡܠܟܰܬ݀ ܠܐܴ ܢܟܰܬܰܪ ܒܶܗ ܘܢܶܛܫܶܐ ܒܚܶܫܽܘܟܳܐ: ܝܰܘܡܰܐ ܗ̱̇ܘ ܕܨܶܡܚ̈ܶܐ ܕܰܩܝܳܡܬܳܐ: ܘܙܰܠܺܝ̈ܩܶܐ ܢܽܘܗܪ̈ܳܢܳܝܶܐ ܠܐܴ ܒܝܰܕ ܥܒܳܕܰܝ̈ܢ ܥܰܡܽܘ̈ܛܶܐ ܒܶܐܣ̈ܶܐ ܘܓܳܘܢܰܘ̈ܳܬܳܐ ܕܰܫܪܳܓܪ̈ܳܓܳܝܳܬܳܐ ܢܡܽܘܫ. ܝܰܘܡܰܐ ܗ̱̇ܘ ܕܒܰܪ̈ܩܶܐ ܕܚܰܕ̈ܘܳܬܳܐ: ܘܙܰܠܓ̈ܶܐ ܥܰܠ ܕܫܳܘܶܝܢ ܡܰܙܠܓܺܝܢ: ܠܐܴ ܐܰܝܟ ܦܪ̈ܰܚܕܽܘܕܶܐ ܢܰܚܶܒ ܠܛܽܘܫ̈ܝܳܬܳܐ ܘܰܠܛܰܠ̈ܠܐܷ ܠܺܠܝ̈ܳܝܶܐ. ܝܰܘܡܰܐ ܗ̱̇ܘ ܕܨܶܒ̈ܬܶܐ. ܘܕܰܠܒܽܘ̈ܫܶܐ ܚܶܘܳܪ̈ܶܐ ܕܚܳܫܚܺܝܢ ܠܐܷܡܪ̈ܶܐ ܡܫܺܝ̈ܚܳܝܶܐ: ܠܐܴ ܢܶܬܚܰܛܰܦ ܒܝܰܕ ܣܰܢ̈ܝܳܬܰܢ ܠܒܽܘ̈ܫܶܐ ܐܽܘܟܳܡ̈ܶܐ ܕܰܓܕܰܝ̈ܳܐ ܦܳܥܽܘܝ̈ܶܐ: ܝܰܘܡܰܐ ܗ̱̇ܘ ܕܰܙܡܺܝܪ̈ܳܬܳܐ ܘܗܽܘ̈ܠܳܠܐܷ ܫܒܺܝ̈ܚܶܐ ܠܐܴ ܢܡܰܠܶܠ ܒܶܗ ܡ̈ܶܠܐܷ ܕܪܶܛܢܳܐ ܘܰܕܡܶܐܟܰܠܩܰܪܨܳܐ ܘܫܽܘܥ̈ܝܳܬܳܐ ܦܰܟܺܝܗ̈ܳܬܳܐ. ܝܰܘܡܰܐ ܗ̱̇ܘ ܕܰܒܢ̈ܳܬ ܩ̈ܳܠܐܷ ܐܠܰܗܳܝ̈ܳܬܳܐ: ܡܶܬܠܰܥ̈ܙܳܢ ܒܶܗ. ܕܠܐܴ ܢܰܥܶܠ ܚܠܳܦܰܝܗܶܝܢ ܠܰܘ̈ܛܳܬܳܐ ܘܓܽܘܕܳܦ̈ܶܐ ܡܰܪܺܝܪ̈ܶܐ. ܝܰܘܡܰܐ ܗ̱̇ܘ ܕܩܺܝ̈ܢܳܬܳܐ ܨܠܺܝ̈ܠܳܬܳܐ ܘܬܶܫܒ̈ܚܳܬܳܐ ܦܪ̈ܺܝܫܳܬܳܐ: ܠܐܴ ܢܶܬܬܰܓܰܪ ܚܠܳܦܰܝܗܶܝܢ ܫܶܢܬܳܐ ܘܰܚܒܰܢܳܢܽܘܬܳܐ ܘܡܰܐܺܝܢܽܘܬܳܐ. ܝܰܘܡܰܐ ܗ̱̇ܘ ܕܚܽܘܒܳܐ ܘܰܕܪܶܚܡܰܬ݀ ܐ̱ܢܳܫܽܘܬܳܐ ܠܐܴ ܢܚܰܘܶܐ ܒܶܗ ܒܺܝܫܳܐ ܘܕܰܠܩܽܘܒܠܳܝܽܘܬܳܐ. ܝܰܘܡܰܐ ܗ̱̇ܘ ܕܰܫܠܳܡܳܐ ܘܰܕܡܰܟܺܝܟܽܘܬܳܐ ܠܐܴ ܢܰܥܒܪܺܝܘܗܝ ܒܚܶܪ̈ܝܳܢܶܐ: ܘܰܢܥܺܝܪ ܒܶܗ ܬܰܟܬܽܘ̈ܫܶܐ ܘܡܰܨ̈ܘܳܬܳܐ ܥܰܠ ܩܰܪ̈ܺܝܒܺܝܢ. ܝܰܘܡܰܐ ܗ̱̇ܘ ܕܰܡܢܺܝܚ ܠܐܴܚܽܘ̈ܕܰܘܗܝ ܡ̣ܶܢ ܬܥܳܫܳܐ ܣܪܺܝܩܳܐ ܘܦܽܘܠܚܳܢܳܐ ܕܺܐܝܕܰܝ̈ܳܐ: ܘܡܰܚܰܪ ܠܣܰܟܽܘܠܬܳܢ̈ܶܐ ܠܗ̇ܰܘ ܥܳܠܡܳܐ: ܕܗ̣ܽܘ ܡܰܘܩܶܕ ܠܰܢ ܗܳܪܟܳܐ ܘܬܰܡܳܢ: ܐܶܠܐܴ ܢܩܽܘܡ ܗܳܪܟܳܐ ܕܰܟܝܳܐܺܝܬ ܘܰܢܫܰܡܶܫ ܙܰܗܝܳܐܺܝܬ: ܘܰܢܨܰܠܐܷ ܚܦܺܝܛܳܐܺܝܬ: ܘܰܢܙܰܡܰܪ ܟܽܠܰܢ ܫܒܺܝܚܳܐܺܝܬ. ܘܰܢܫܰܒܰܚ ܩܰܕܺܝܫܳܐܺܝܬ ܘܰܢܩܰܠܶܣ ܬܗܺܝܪܳܐܺܝܬ: ܘܪܽܘܚܳܢܳܐܺܝܬ ܟܽܠܰܢ ܢܶܗܪܽܘܓ ܐܰܡܺܝܢܳܐܺܝܬ ܢܶܬܗܰܓܶܐ. ܘܢܳܡܽܘܣܳܐܺܝܬ ܢܶܬܚܰܫܰܒ ܘܟܰܕ ܒܥܳܠܡܳܐ ܗ̇ܰܘ ܣܰܓܺܝ ܬܶܗܪ̈ܶܐ ܘܰܣܒܺܝܣ ܒܛܽܘ̈ܒܶܐ: ܥܰܝ̈ܢܰܝ ܠܶܒܰܢ ܡܰܩܬܺܝܢܰܢ: ܠܬܰܡܳܢ ܢܣܰܟܶܐ ܠܬܰܡܳܢ ܢܶܚܒܽܘܨ: ܠܬܰܡܳܢ ܢܶܩܪܽܘܒ ܠܬܰܡܳܢ ܢܶܬܠܰܗܰܩ ܠܒܽܘܣܳܡܳܐ ܡܪܰܘܙܳܢܳܐ ܦܽܘܛܡ̈ܶܐ ܘܰܠܦܽܘܢܳܩ̈ܶܐ ܥܕܶܢܳܝ̈ܶܐ: ܠܗ̇ܰܘ ܕܠܶܗ ܟܽܠܰܢ ܡܨܰܠܶܝܢܰܢ ܕܢܶܫܬܘܶܐ ܘܰܒܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ: ܘܕܰܐܒܽܘܟ ܥܰܡ ܪܽܘܚܶܗ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܰܚܕܳܐ ܐܽܘܣܺܝܰܐ ܠܐܴ ܡܶܬܦܰܠܓܳܢܺܝܬܳܐ ܐܰܒܳܐ ܥܶܠܬܳܐ ܕܥܶܠܬܳܢ̈ܶܐ: ܘܰܒܪܳܐ ܡܶܠܬܳܐ ܠܐܴ ܡܶܬܡܰܠܠܐܴ ܒܠܶܫܳܢܳܐ ܕܰܡܠܺܝ̈ܠܐܷ: ܘܪܽܘܚܳܐ ܕܰܫܘܶܐ ܠܐܱܒܳܐ ܘܠܰܒܪܳܐ ܒܟܽܠ ܡܶܕܶܡ: ܘܝܳܗܶܒ ܡܶܠܬܳܐ ܘܚܰܝ̈ܶܐ ܠܥܰܒܕ̈ܶܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܐܰܒܳܐ ܕܫܰܕܰܪܬ ܠܰܒܪܳܟ ܚܰܒܺܝܒܳܐ ܡܶܛܽܠ ܦܽܘܪܩܳܢܰܢ ܘܰܐܬܕܰܡܺܝ ܠܰܢ ܒܟܽܠܡܶܕܶܡ ܣܛܰܪ ܡ̣ܶܢ ܚܛܺܝܬܳܐ: ܘܰܗܘܳܐ ܡܶܢܰܢ ܟܰܕ ܠܐܴ ܫܰܢܺܝ ܐܰܘ ܐܶܫܬܰܚܠܰܦ ܡ̣ܶܢ ܐܠܰܗܽܘܬܳܐ ܡܪܰܝܰܡܬܳܐ. ܘܰܡܠܺܝ ܟܽܠܳܗ̇ ܡܕܰܒܪܳܢܽܘܬܳܐ ܕܰܚܠܳܦܰܝܢ ܘܰܥܕܰܡܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܳܐ ܩܰܒܶܠ ܥܠܰܘܗܝ: ܘܩܳܡ ܒܝܰܘܡܳܐ ܬܠܺܝܬܳܝܳܐ: ܘܶܐܬܚܙܺܝ ܠܢܶܫ̈ܶܐ ܢܰܟ̈ܦܳܬܳܐ ܒܰܩܝܳܡܬܶܗ ܘܒܶܗ ܐܶܬܢܰܚܰܡܘ ܩܒܺܝܪ̈ܶܐ ܘܒܶܗ ܐܶܫܬܰܪܰܪܘ ܬܰܠܡܺܝ̈ܕܶܐ ܘܰܐܦܶܩ ܐܶܢܽܘܢ ܠܰܡܣܰܒܳܪܽܘ ܩܝܳܡܬܳܐ ܡܰܠܝܰܬ݀ ܚܰܕ̈ܘܳܬܳܐ. ܕܩܳܡ ܠܶܗ ܡܫܺܝܚܳܐ ܡ̣ܶܢ ܩܰܒܪܳܐ: ܚܕܰܘ ܥܰܡ̈ܡܶܐ ܘܕܽܘܨܘ ܕܰܗܘܳܐ ܠܟܽܘܢ ܦܽܘܪܩܳܢܳܐ ܐܶܬܒܰܣܰܡܘ ܥܰܡ̈ܡܶܐ ܥܰܡ ܥܰܡܶܗ ܕܰܗܘܳܬ݀ ܠܟܽܘܢ ܚܰܕܽܘܬܳܐ. ܐܶܬܬܥܺܝܪܘ ܕܰܡ̈ܟܶܐ ܘܩܽܘܡܘ ܡ̣ܶܢ ܫܶܢܬܳܐ ܕܪܳܡܶܝܢ ܐܢ̱ܬܽܘܢ ܒܳܗ̇: ܕܗܳܐ ܐܶܬܳܐ ܠܶܗ ܥܺܝܪܳܐ ܕܰܡܥܺܝܪ ܕܰܡܟܽܘܬܟܽܘܢ: ܘܰܢܦܰܩܘ ܫܠܺܝ̈ܚܶܐ ܠܰܣܒܰܪܬܳܐ ܘܰܐܟܪܶܙܘ ܠܟܽܠ ܥܰܡ̈ܡܺܝܢ ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܚܕܳܐ ܐܠܰܗܽܘܬܳܐ ܕܠܐܴ ܡܶܬܦܰܪܫܳܐ ܘܠܐܴ ܡܶܬܒܰܨܝܳܐ: ܘܒܳܬܰܪ ܐܰܪܒܥܺܝܢ ܝܰܘ̈ܡܺܝܢ ܕܩܳܡ ܡ̣ܶܢ ܩܰܒܪܳܐ: ܣܠܶܩ ܠܰܫܡܰܝܳܐ ܒܫܽܘܒܚܳܐ: ܘܡ̣ܶܢ ܒܳܬܰܪ ܕܰܦܩܰܕ ܠܬܰܠܡܺܝ̈ܕܰܘܗܝ ܕܰܢܩܰܘܽܘܢ ܠܫܽܘܘܕܳܝܶܗ: ܘܰܢܟܰܬܪܽܘܢ ܐܳܦ ܢܚܽܘܪܽܘܢ ܠܡܽܘܠܟܳܢܳܐ ܗ̇ܰܘ  ܕܶܐܫܬܰܘܕܺܝ ܠܗܽܘܢ ܕܠܐܴ ܢܶܪܚܩܽܘܢ ܡ̣ܶܢ ܐܽܘܪܫܠܶܡ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܗܽܘܢ ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ. ܘܫܰܕܰܪ ܥܠܰܝܗܽܘܢ ܘܶܐܬܡܠܺܝܘ ܗܘܰܘ ܚܰܝܠܐܴ ܕܪܽܘܚܳܐ ܩܰܕܺܝܫܳܐ ܘܰܐܛܺܝܦܘ ܠܟܽܠܳܗ̇ ܒܪܺܝܬܳܐ ܒܳܐܬܘ̈ܳܬܳܐ ܘܬܶܕܡܪ̈ܳܬܳܐ: ܘܰܒܚܰܝ̈ܠܐܷ ܟܰܕ ܠܰܟܪ̈ܺܝܗܶܐ ܡܰܐܣܶܝܢ ܗܘܰܘ ܘܠܰܡܫܰܪ̈ܰܝܳܐ ܡܩܺܝܡܺܝܢ ܗܘܰܘ ܘܠܐܱܒܺܝ̣̈ܠܐܷ ܒܽܘܝܳܐܳܐ ܡ̇ܳܠܶܝܢ ܗܘܰܘ: ܘܚܽܘܠܡܳܢܳܐ ܕܟܽܠ ܟܺܐܒ ܘܟܽܠ ܟܽܘܪܗܳܢ ܒܶܝܬ ܐܺܝܕܰܝ̈ܗܽܘܢ ܟܪ̈ܺܝܗܶܐ ܘܰܐܠܺܝ̣̈ܨܶܐ ܩܳܢܶܝܢ ܗܘܰܘ ܘܰܠܡܺܝ̈ܬܶܐ ܒܚܰܝܠܐܴ ܕܡܳܪܗܽܘܢ ܡܩܺܝܡܺܝܢ ܗܘܰܘ ܘܰܠܟܽܠܶܗ ܥܳܠܡܳܐ ܛܶܒܳܐ ܕܰܩܝܳܡܬܶܗ ܕܒܰܪ ܐܠܰܗܳܐ ܡܰܟܪܙܺܝܢ ܗܘܰܘ ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܡܳܪܝܳܐ ܪܳܚܶܡܢܳܫܳܐ: ܕܩܳܡܬ ܒܫܽܘܒܚܳܐ ܡ̣ܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ: ܘܰܐܩܺܝܡܬ ܠܰܟܝܳܢܰܢ ܪܰܦܝܳܐ ܕܢܰܦܺܝܠ ܗܘܳܐ ܒܰܥܒܳܪ ܦܽܘܩܕܳܢܳܐ ܐܰܝܟܰܢܳܐ ܕܫܰܕܰܪܬ ܥܠܰܝܗܽܘܢ ܥܰܠ ܫܠܺܝ̈ܚܶܐ ܪܽܘܚܳܐ ܩܰܕܺܝܫܳܐ: ܗܳܟܰܢܳܐ ܫܰܕܰܪ ܥܠܰܝܢ ܪܽܘܚܳܟ ܩܰܕܺܝܫܳܐ: ܘܢܶܫܬܘܶܐ ܕܢܶܫܬܰܪܰܪ ܒܰܩܝܳܡܬܳܟ ܡܫܰܒܰܚܬܳܐ ܟܰܕ ܥܳܩܰܪ ܐܰܢ̱ܬ ܡ̣ܶܢ ܠܶܒܰܢ ܠܝܰܥܪܳܐ ܟܽܘܒܳܢܳܝܳܐ: ܕܢܶܬܢܰܗܪ̈ܳܢ ܢܰܦ̈ܫܳܬܰܢ: ܘܢܶܬܡܰܪ̈ܩܳܢ ܬܺܐܪ̈ܳܬܰܢ: ܘܢܶܬܚܰܣ̈ܝܳܢ ܚܰܘ̈ܒܳܬܰܢ: ܘܢܶܬܥܰܛܝ̈ܳܢ ܣܰܟܠܘ̈ܳܬܰܢ: ܘܢܶܫܬܰܒ̈ܩܳܢ ܡܶܬܥܰܒܪ̈ܳܢܘܳܬܰܢ: ܘܢܶܬܠܰܚ̈ܝܳܢ ܠܐܴ ܢܳܡܽܘܣܳܝ̈ܘܳܬܰܢ: ܘܢܶܬܬܢܺܝܚܽܘܢ ܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ: ܘܰܡܣܰܟܶܝܢ ܠܡܶܬܓܰܠܝܳܢܽܘܬܳܟ ܕܰܬܢܰܚܶܡ ܘܰܬܩܺܝܡ ܐܶܢܽܘܢ ܒܓܰܒܳܟ ܝܰܡܺܝܢܳܝܳܐ ܘܪܽܘܣ ܥܰܠ ܢܰܦ̈ܰܫܳܬܰܢ ܛܰܠܳܟ ܡܦܰܝܓܳܢܳܐ: ܐܰܝܟܰܢܳܐ ܕܡ̣ܶܢ ܦܽܘ̈ܡܶܐ ܕܟܽܠܰܢ ܫܰܘܝܳܐܺܝܬ ܬܰܣܶܩ ܠܳܟ ܫܽܘܒܚܳܐ ܘܬܶܫܒܽܘܚܬܳܐ ܠܐܴ ܡܶܬܦܰܠܓܳܢܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܫܘܪܝܐ ܕܨܦܪܐ

 

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܠܗܽܘܢ ܕܰܒܝܰܕ ܦܽܘܠܚܳܢ ܫܺܐܕ̈ܶܐ ܠܰܦܬܰܟܪ̈ܶܐ ܣܳܓܽܘ̈ܕܶܐ ܗܘܰܝܢܰܢ: ܐܰܫܘܳܐ ܠܰܢ ܕܢܶܗܘܶܐ ܣܳܓܽܘ̈ܕܶܐ ܫܰܪܺܝܪ̈ܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܫܰܘܝܰܬ݀ ܒܽܐܘܣܺܝܰܐ: ܡܰܦܪܓܺܝܢܰܢ ܒܚܰܓܳܐ ܪܽܘܚܳܢܳܝܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܘܰܢܕܽܘܨ ܥܰܡ ܢܶܫ̈ܶܐ ܩܰܕܺܝ̈ܫܳܬܐ ܕܶܐܬܘܰܥܰܕ̈ܝ ܠܩܰܒܪܳܟ ܡܰܥܒܶܕ ܚܰܝ̈ܶܐ: ܡܫܺܝܚܳܐ ܐܠܰܗܳܐ ܕܺܝܠܰܢ: ܗܳܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܽܐܘܣܺܝܰܐ ܡܥܰܠܰܝܬܳܐ ܘܠܐܴ ܡܶܬܕܰܪܟܳܢܺܝܬܳܐ ܕܚܰܕ ܟܝܳܢܳܐ ܐܺܝܬܶܝܗ̇: ܘܒܰܬܠܳܬܳܐ ܩܢܽܘ̈ܡܶܐ ܡܶܣܬܰܓܕܳܐ. ܐܰܒܳܐ ܕܟܰܕ ܠܐܴ ܝܺܠܺܝܕ ܐܰܘܠܶܕ: ܘܰܒܪܳܐ ܕܠܐܴ ܗܘܳܐ ܐܰܒܳܐ ܠܝܰܠܕܳܐ: ܐܳܦ ܪܽܘܚܳܐ ܩܰܕܺܝܫܳܐ ܕܢܳܦܶܩ ܡ̣ܶܢ ܐܰܒܳܐ ܘܢܳܣܶܒ ܡ̣ܶܢ ܒܪܳܐ ܘܠܐܴ ܡܶܬܥܰܩܰܒ ܡ̣ܶܢ ܚܽܘ̈ܫܳܒܶܐ ܕܰܡܠܺܝ̈ܠܐܷ: ܘܠܐܴ ܡܶܬܕܪܶܟ ܡ̣ܶܢ ܗܰܘ̈ܢܶܐ ܕܰܥܒܺܝ̈ܕܶܐ: ܘܚܰܕ ܐܠܰܗܳܐ ܡܶܬܬܰܘܕܶܐ ܒܰܬܠܳܬܳܐ ܩܢܽܘ̈ܡܶܐ: ܘܚܰܕ ܡܳܪܝܳܐ ܡܶܬܺܝܕܰܥ ܒܰܬܠܳܬܳܐ ܫܡܳܗ̈ܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܕܠܶܗ ܝܳܐܶܐ ܫܽܘܒܚܳܐ܀

 

ܣܕܪܐ

ܟܰܕ ܠܥܺܐܕܳܐ ܚܰܕܬܳܐ ܘܰܫܒܺܝܚܳܐ ܘܰܕܢܺܝܚܳܐ ܗ̇ܰܘ ܕܡܶܬܬܰܨܡܚܳܢܽܘܬܳܐ ܕܡ̣ܶܢ ܩܰܒܪܳܐ ܒܫܽܘܒܚܳܐ ܪܰܒܳܐ ܙܰܡܢܰܬ݀ ܠܰܢ ܛܰܝܒܽܘܬܳܟ ܐܠܰܗܳܐ ܐܰܒܳܐ ܘܰܠܝܰܘܡܳܐ ܫܒܺܝܚܳܐ ܘܢܰܨܺܝܚܳܐ ܕܒܶܗ ܠܥܺܕܬܳܐ ܩܰܕܺܝܫܬܳܐ ܐܰܢܗܪܰܬ݀ ܒܫܽܘ̈ܟܳܢܶܐ ܡܥܰܠܰܝ̈ܳܐ ܕܰܡܕܰܒܪܳܢܽܘܬܳܟ ܟܰܕ ܡܰܢܰܥܬ ܠܰܢ ܒܰܚܢܳܢܳܟ ܠܗܳܢܳܐ ܝܰܘܡܳܐ ܡܠܐܷ ܛܽܘ̈ܒܶܐ ܥܺܐܕܳܐ ܡܠܐܷ ܚܰܕ̈ܘܳܬܳܐ ܚܰܓܳܐ ܕܰܦܨܺܝܚ̈ܘܳܬܳܐ: ܢܽܘܗܪܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܫܰܟܶܢܬ ܠܰܢ ܒܪܶܚܡܰܬ݀ ܐ̱ܢܳܫܽܘܬܳܟ. ܗ̇ܳܝ ܕܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܥܬܰܪܘ ܒܡܰܘܗ̈ܒܳܬܳܐ ܐܠܰܗܳܝ̈ܳܬܳܐ ܘܒܰܣܒܰܪܬܳܐ ܐܶܬܦܢܺܝܘ ܡ̣ܶܢ ܬܰܘܫܳܐ ܕܰܚܛܺܝܬܳܐ: ܘܰܗܘܰܘ ܝܳܪ̈ܬܶܐ ܫܰܪܺܝܪ̈ܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ ܘܒܳܗ̇ ܟܽܠ ܦܶܢ̈ܝܳܢ ܝܰܘܡܳܢܳܐ  ܪ̈ܳܥܡܳܢ ܘܚܳܕ̈ܝܳܢ ܘܰܡܫܰܒ̈ܚܳܢ ܘܕܳܝ̈ܨܳܢ ܒܰܩܝܳܡܬܳܟ ܡܫܰܒܰܚܬܳܐ: ܬܶܫܒ̈ܚܳܬܳܐ ܘܗܽܘ̈ܠܳܠܐܷ ܘܙܽܘܡܳܪ̈ܶܐ ܚܠܰܝ̈ܳܐ ܡܩܰܪܒܺܝܢܰܢ ܠܳܟ: ܘܒܶܗ ܒܝܰܘܡܳܐ ܕܰܩܝܳܡܬܳܟ ܓܳܠܦܺܝܢܰܢ ܠܢܶܥ̈ܡܳܬܳܐ ܕܺܝܠܰܢ ܘܰܢܩܰܢܩܶܢ ܓܰܓܪ̈ܳܬܰܢ ܠܐܴ ܡܶܬܡܰܠܠܳܢܳܐ ܐܠܰܗܳܐ ܪܳܚܶܡ ܒܢܰܝ̈ܢܳܫܳܐ ܢܨܰܝܶܒ ܟܰܕ ܚܳܝܪܺܝܢܰܢ: ܟܰܕ ܒܰܠܒܽܘ̈ܫܶܐ ܚܶܘܳܪ̈ܶܐ: ܘܒܰܠܒܽܘ̈ܫܶܐ ܢܰܩ̈ܕܶܐ ܘܬܺܐܪ̈ܳܬܳܐ ܨܠܺܝ̈ܠܳܬܳܐ ܘܕܰܟܝ̈ܳܬܳܐ ܙܳܕܶܩ ܕܰܢܥܰܕܥܶܕ ܘܰܢܝܰܩܰܪ ܠܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ. ܗܳܢܳܐ ܕܒܶܗ ܕܰܘܺܝܕ ܢܒܺܝܳܐ ܐܠܰܗܳܝܳܐ ܡܣܰܓܶܐ ܗܘܳܐ ܘܳܐܡܰܪ: ܕܰܐܝܟ ܓܰܒܪܳܐ ܕܢܳܦܶܩ ܡ̣ܶܢ ܒܶܝܬ ܓܢܽܘܢܳܐ ܗܳܟܰܢܳܐ ܨܡܰܚܬ ܒܫܽܘܒܚܳܐ ܡ̣ܶܢ ܩܰܒܪܳܐ. ܘܗ̇ܳܝ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܘܰܡܚܳܐ ܘܒܰܕܰܪ ܠܟܽܠܗܽܘܢ ܒܥܶܠܕ̈ܒܳܒܰܘܗܝ ܘܒܶܗܬܬܳܐ ܘܰܩܠܳܠܐܴ ܥܒܰܕ ܐܶܢܽܘܢ ܒܰܩܝܳܡܬܶܗ ܟܰܕ ܠܟܽܠ ܥܰܡ̈ܡܺܝܢ ܐܠܰܦ ܘܶܐܡܰܪ ܕܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ. ܗܳܢܰܘ ܝܰܘܡܳܐ ܕܠܐܴ ܗܘܳܐ ܩܕܳܡܰܘܗܝ ܐܰܟܘܳܬܶܗ: ܐܳܦܠܐܴ ܒܳܬܪܶܗ ܐ̱ܚܪܺܢܳܐ ܕܕܳܡܶܐ ܠܶܗ: ܐܰܘ ܕܰܫܒܺܝܚ ܡܶܢܶܗ. ܗܳܢܰܘ ܥܰܕܥܺܐܕܶܗ ܕܰܐܠܳܗܰܢ ܕܒܶܗ ܪܽܘܚܳܐ ܩܰܕܺܝܫܳܐ ܙܳܐܰܚ ܘܢܳܚ̇ܶܬ ܡ̣ܶܢ ܪ̈ܰܘܡܶܐ ܥܶܠܳܝ̈ܶܐ. ܕܢܰܫܦܰܥ ܒܽܘܪ̈ܟܳܬܳܐ ܥܰܠ ܡܗܰܝ̈ܡܢܶܐ: ܗܳܢܰܘ ܝܰܘܡܳܐ ܩܰܕܺܝܫܳܐ ܕܒܶܗ ܡܶܫܬܰܕܪܺܝܢ ܪ̈ܰܚܡܶܐ ܥܰܠ ܟܶܢܫܳܐ ܙܰܗܝܳܐ ܕܰܠܗܽܘܢ ܫܳܘܶܐ ܘܡܶܬܩܰܕܰܫ ܒܶܗ ܦܰܓܪܳܐ ܩܰܕܺܝܫܳܐ ܘܰܕܡܳܐ ܡܚܰܣܝܳܢܳܐ ܕܰܐܠܳܗܳܐ ܕܺܝܠܰܢ. ܗ̇ܰܘ ܕܰܢܣܰܒ ܡ̣ܶܢ ܝܳܠܕܰܬ݀ ܐܠܰܗܳܐ ܡܰܪܝܰܡ ܫܰܪܺܝܪܳܐܺܝܬ. ܘܒܶܗ ܐܳܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒ̈ܢܶܐ ܥܰܠ ܥܢܳܢ̈ܰܝ ܬܶܫܒܽܘܚܬܳܐ: ܘܒܶܗ ܥܳܒܰܪ ܥܳܠܡܳܐ ܗܳܢܳܐ: ܘܒܶܗ ܥܳܒܶܕ ܕܺܝܢܳܐ ܘܰܢܩܰܡܬܳܐ ܘܰܬܒܰܥܬܳܐ ܘܦܽܘܪܥܳܢܽܘܬܳܐ ܘܒܶܗ ܦܳܪܶܫ ܠܛܳܒ̈ܶܐ ܡ̣ܶܢ ܒܺܝ̈ܫܶܐ. ܘܰܡܩܺܝܡ ܠܰܓܒܰܝ̈ܳܐ ܕܺܝܠܶܗ ܡ̣ܶܢ ܝܰܡܺܝܢܶܗ ܡܣܰܡܶܟ ܠܗܽܘܢ ܒܰܣܡܳܟܳܐ ܕܠܐܴ ܦܳܛܰܪ ܘܒܶܗ ܡܶܬܥܰܙܰܙ ܘܡܶܬܩܰܫܶܐ ܥܰܠ ܟܳܦܪ̈ܰܝ ܒܰܐܠܳܗܽܘܬܶܗ: ܘܰܒܐܢܳܫܽܘܬܶܗ ܠܐܴ ܗܰܝܡܶܢܘ ܘܥܰܠ ܐܰܝܠܶܝܢ ܕܰܐܒܣܺܝܘ ܘܠܐܴ ܝܰܩܰܪܘ ܗܘܰܘ ܠܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܘܡܰܫܠܰܛ ܥܠܰܝܗܽܘܢ ܡܰܠܐܱܟ̈ܶܐ ܕܪܽܘܓܙܳܐ ܕܰܕܢܰܓܕܽܘܢ ܐܶܢܽܘܢ ܕܠܐܴ ܨܰܚܡܳܐ. ܘܰܠܓܺܗܰܢܳܐ ܕܢܽܘܪܳܐ ܫ̇ܳܕܶܐ ܠܗܽܘܢ ܘܠܐܴ ܡܶܬܪܰܚܰܡ ܥܠܰܝܗܽܘܢ: ܒܗ̇ܰܘ ܝܰܘܡܳܐ ܡܳܪܰܢ ܠܐܴ ܬܶܬܥܰܙܰܙ ܥܰܠ ܥܰܒܕܰܝ̈ܟ ܐܰܝܠܶܝܢ ܕܰܐܘܕܺܝܘ ܘܗܰܝܡܶܢܘ ܒܳܟ ܘܰܒܡܶܬܒܰܪܢܫܳܢܽܘܬܳܟ: ܘܡܰܘܕܶܝܢ ܒܳܟ ܘܒܰܐܠܳܗܽܘܬܳܟ ܟܰܕ ܣܳܓܕܺܝܢ ܘܰܡܫܰܒܚܺܝܢ ܠܰܩܝܳܡܬܳܟ ܬܠܺܝܬܳܐܝܰܬ݀ ܝܰܘ̈ܡܶܐ ܕܡ̣ܶܢ ܒܶܝܬ ܡܺܝ̈ܬܶܐ: ܘܡܰܘܕܶܝܢ ܕܺܐܝܬܰܝܟ ܐܠܰܗܳܐ ܫܰܪܺܝܪܳܐ ܕܡ̣ܶܢ ܐܠܰܗܳܐ ܫܰܪܺܝܪܳܐ: ܘܡܶܛܽܠ ܨܰܠܡܳܟ ܕܶܐܬܚܰܒܰܠ ܘܰܓܒܺܝܠܬܳܐ ܕܺܝܠܳܟ ܦܰܓܪܳܐ ܠܒܶܫܬ ܕܬܰܥܕܺܝܘܗܝ ܡ̣ܶܢ ܐܺܝ̈ܕܰܝ ܒܺܝܫܳܐ ܡܳܪܽܘܕܳܐ ܕܡܰܗܶܠ ܗܘܳܐ ܘܰܡܒܰܙܰܚ ܒܶܗ ܢܚܶܬܬ ܠܒܶܝܬ ܡܺܝ̈ܬܶܐ ܠܘܳܬܶܗ ܡܶܛܽܠ ܪܶܚܡܰܬ݀ ܐ̱ܢܳܫܽܘܬܳܟ ܕܨܶܝܕܰܘܗܝ: ܘܰܢܓܰܕܬ ܘܰܐܣܶܩܬ ܠܨܰܠܡܳܟ ܠܐܱܬܪܳܐ ܕܪ̈ܽܘܚܳܢܶܐ: ܐܰܘܬܶܒܬܳܝܗܝ ܒܫܽܘܒܚܳܐ ܪܰܒܶܐ ܕܠܐܴ ܡܶܬܡܰܠܠܳܢܳܐ: ܘܗܳܐ ܝܰܘܡܳܢܳܐ ܟܽܠܗܶܝܢ ܒܶܪ̈ܝܳܬܳܐ ܚܳܕ̈ܝܳܢ ܘܕܳܝ̈ܨܳܢ ܘܰܡܫܰܒ̈ܚܳܢ ܘܡܰܘܕ̈ܝܳܢ ܠܳܟ ܥܰܠ ܦܽܘܪ̈ܢܳܣܰܝܟ ܠܐܴ ܡܶܬܕܰܪ̈ܟܳܢܶܐ ܕܰܠܘܳܬܰܢ ܡܦܺܝܣܺܝܢܰܢ ܠܳܟ ܕܰܠܥܺܕܬܳܟ  ܩܰܕܺܝܫܬܳܐ ܕܰܓܒܰܝܬ ܘܰܐܬܩܶܢܬ ܘܫܰܪܪܰܬ. ܕܬܰܫܰܪ ܫܽܘܘܕܳܝܰܝ̈ܟ ܠܘܳܬܳܗ̇ ܘܰܬܢܰܛܰܪܶܝܗ̇ ܡ̣ܶܢ ܟܽܠ ܐܶܪ̈ܶܣܺܝܣ ܡܙܺܝ̈ܦܳܬܳܐ ܘܰܡܚܰܒ̈ܠܳܬܳܐ ܘܰܬܪܺܝܡ ܩܰܪܢܳܗ̇ ܥܰܠ ܒܥܶܠܕ̈ܒܳܒܶܝܗ̇ ܐܰܝܠܶܝܢ ܕܡܶܫܬܰܩܠܺܝܢ ܒܥܽܘܫܢܳܐ ܥܰܠ ܥܰܡܳܟ ܡܗܰܝܡܢܳܐ: ܘܢܶܬܬܰܒܪ̈ܳܢ ܩܰܪ̈ܢܳܬܗܽܘܢ ܩܕܳܡܶܝܗ̇ ܘܨܰܘܪܳܐ ܕܺܝܠܗܽܘܢ ܢܶܬܡܰܟܰܟ: ܘܢܶܗܘܽܘܢ ܠܬܰܗܠܰܠܬܳܐ ܘܰܠܣܽܘܠܐܴܢܽܘܬܳܐ: ܘܰܐܢ̱ܬ ܡܳܪܝܳܐ ܡ̣ܶܢ ܟܽܠ ܥܰܡ̈ܡܺܝܢ  ܬܶܣܬܓܶܕ ܘܬܶܫܬܰܒܰܚ: ܘܥܺܕܬܳܟ ܩܰܕܺܝܫܬܳܐ ܬܶܬܩܰܝܰܡ: ܘܰܐܢܺܝܚ ܠܥܰܢܺܝ̈ܕܳܐ ܡܗܰܝܡ̈ܢܶܐ ܐܰܝܠܶܝܢ ܕܰܥܢܰܕܘ ܡܶܢܳܗ̇ ܒܰܬܪܺܝܨܽܘܬܳܐ ܕܫܽܘܒܚܳܐ: ܘܰܡܣܰܟܶܝܢ ܠܓܶܠܝܳܢܳܟ ܕܡ̣ܶܢ ܫܡܰܝܳܐ. ܕܒܶܗ ܪܰܒܽܘܬܳܟ ܡܰܒܪܩܳܐ ܘܓܰܐܝܽܘܬܳܟ ܡܶܙܕܰܝܚܳܐ: ܢܶܦܓܰܥ ܒܳܟ ܒܰܐܦ̈ܶܐ ܓܰܠܝ̈ܳܬܳܐ: ܗ̣ܶܢܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܡܗܽܘܢ ܚܢܰܢ ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܠܳܟ ܐܠܰܗܳܐ ܡܢܰܚܡܳܢܰܢ ܡ̣ܶܢ ܓܰܘ ܫܝܽܘܠ ܘܰܡܚܰܕܬܳܢܰܢ ܡ̣ܶܢ ܥܰܦܪܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܛܰܝܒܽܘܬܳܐ ܡܫܰܡܠܳܝܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ: ܡܠܰܝܬ ܠܠܶܒܰܘ̈ܳܬܳܐ ܕܺܝܠܰܢ ܡܳܪܝܳܐ ܒܝܰܕ ܙܰܠܓ̈ܶܐ ܢܰܨܺܝ̈ܚܶܐ ܕܰܩܝܳܡܬܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܘܶܐܨܛܒܰܝ ܡܳܪܝܳܐ ܕܢܶܬܩܰܒܰܠ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܘܰܒܥܶܕܳܢܳܐ ܕܨܰܦܪܳܐ. ܐܰܝܟܰܢܳܐ ܕܒܶܗ ܢܶܬܚܰܠܰܠ ܘܢܶܬܡܪܶܩ ܡ̣ܶܢ ܟܽܠ ܒܺܝ̈ܫܳܬܳܐ ܘܰܚܛܺܝܬܳܐ: ܘܰܒܙܽܘܦܳܐ ܡܚܰܘܪܳܢܳܐ ܕܰܚܢܳܢܳܟ ܢܶܬܕܰܟܶܐ ܘܢܶܬܚܰܪܰܪ ܘܢܶܨܛܰܠܰܠ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܚܘܬܡܐ

ܩܰܒܶܠ ܠܰܢ ܡܳܪܝܳܐ ܐܠܰܗܳܐ ܕܺܝܠܰܢ ܕܡܶܬܩܰܪܒܺܝܢܰܢ ܠܰܩܕܳܡ ܟܽܘܪܣܝܳܐ ܕܺܐܝܩܳܪܳܟ: ܘܰܐܢܗܰܪ ܘܩܰܕܶܫ ܠܢܰܦ̈ܫܳܬܰܢ ܒܢܽܘܗܪܳܐ ܕܬܶܐܘܳܠܳܘܓܺܝܰܐ ܘܰܒܨܶܡ̈ܚܶܐ ܕܰܩܝܳܡܬܳܟ ܕܰܢܛܰܚܘ ܥܠܰܝܢ: ܡ̣ܶܢ ܨܶܡܚ̈ܶܐ ܘܙܰܗܪܺܝܪ̈ܶܐ ܕܺܝܠܶܗ. ܘܰܐܒܪܶܩ ܠܡܰܕ̈ܥܰܝܢ ܕܰܒܢܽܘܗܪܳܐ ܕܦܽܘܩܕܳܢܰܝ̈ܟ ܢܶܪܕܶܐ: ܘܢܶܬܗܰܓܶܐ ܒܢܳܡܽܘ̈ܣܰܝܟ ܐܺܝܡܳܡܳܐ ܘܠܺܠܝܳܐ: ܘܛܽܘܒܬܳܢܳܐܺܝܬ ܢܫܰܒܚܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ ܠܚܰܕ ܐܠܰܗܳܐ ܫܰܪܺܝܪܳܐ ܗ̇ܰܘ ܕܰܬܠܺܝܬܳܐܺܝܬ ܡܶܣܬܓܶܕ ܘܰܚܕܳܢܳܐܺܝܬ ܡܶܬܟܪܶܙ: ܘܡܶܬܗܰܝܡܰܢ ܡܬܽܘܡܳܐܺܝܬ: ܐܰܒܳܐ ܠܐܴ ܡܶܬܕܰܪܟܳܢܳܐ: ܘܰܒܪܳܐ ܠܐܴ ܡܶܬܥܰܩܒܳܢܳܐ: ܘܪܽܘܚܳܐ ܠܐܴ ܡܶܬܒܰܨܝܳܢܳܐ. ܬܠܳܬܳܐ ܩܢܽܘ̈ܡܶܐ ܠܐܴ ܥܒܺܝ̈ܕܶܐ: ܬܠܳܬܳܐ ܫܡܳܗ̈ܶܐ ܠܐܴ ܡܛܰܘ̈ܫܶܐ: ܚܕܳܐ ܐܽܘܣܺܝܰܐ ܠܐܴ ܣܕܺܝܩܬܳܐ: ܘܚܰܕ ܟܝܳܢܳܐ ܠܐܴ ܒܠܺܝܠܐܴ: ܕܠܶܗ ܝܳܐܶܐ ܫܽܘܒܚܳܐ ܘܬܰܘܕܺܝܬܳܐ܀

 

ܣܕܪܐ

ܡܳܪܝܳܐ ܐܠܰܗܳܐ ܕܺܝܠܰܢ ܗ̇ܰܘ ܡܫܰܟܢܳܢܳܐ ܕܪܽܘܚܳܐ ܩܰܕܺܝܫܳܐ: ܗ̇ܰܘ ܕܩܰܪܶܒܢܰܢ ܒܚܽܘܒܶܗ ܘܒܰܝܬܺܝ ܠܰܢ ܠܢܽܘܟܪ̈ܳܝܶܐ ܗܳܢܽܘܢ ܕܠܐܴ ܫܳܘܶܝܢ ܗܘܰܝܢ ܘܰܠܝܳܪܬܽܘܬܳܐ ܕܺܝܠܰܢ ܗ̇ܳܝ ܩܰܕܡܳܝܬܳܐ ܐܰܦܢܺܝ ܠܰܢ: ܒܝܰܕ ܦܰܓܪܳܐ ܕܰܢܣ̣ܰܒ ܡ̣ܶܢ ܓܶܢܣܰܢ ܘܰܥ̣ܛܳܐ ܗܘܳܐ ܠܫܽܘܪܰܥܬܳܐ ܕܗ̇ܰܘ ܕܰܚܛܳܐ ܘܰܥܒܰܪ ܦܽܘܩܕܳܢܳܐ: ܘܫܰܡܠܺܝ ܟܽܠܳܗ̇ ܐܽܘܪܚܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ. ܥܕܰܡܳܐ ܕܶܐܬܢܰܚܰܬ ܠܝܰܠܕܳܐ ܘܰܥܡܳܕܳܐ ܘܰܓܙܽܘܪܬܳܐ ܘܶܐܬܢܰܣܺܝ ܡ̣ܶܢ ܒܺܝܫܳܐ ܡܳܪܽܘܕܳܐ ܘܚܰܪܰܪ ܠܰܢ ܡ̣ܶܢ ܥܰܒܕܽܘܬܶܗ ܕܣܳܛܳܢܳܐ: ܘܰܣܠܶܩ ܠܰܨܠܺܝܒܳܐ ܘܪܰܥܺܝ ܟܽܠܗܶܝܢ ܒܶܪ̈ܝܳܬܳܐ ܠܐܱܒܽܘܗܝ ܓܢܺܝܙܳܐ. ܘܶܐܬܩܒܰܪ ܘܶܐܬܬܣܺܝܡ ܒܓܰܘ ܩܰܒܪܳܐ ܐܰܝܟ ܥܰܢܺܝܕܳܐ: ܩܳܡ ܘܶܐܬܢܰܚܰܡ ܐܰܝܟ ܐܠܰܗܳܐ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܘܠܰܫܒܺܝܬܳܐ ܟܽܠܳܗ̇ ܕܒܳܬܪܳܗ̇ ܢܚܶܬ ܦܪܰܩ ܘܰܐܥܕܝܳܗ̇ ܡ̣ܶܢ ܐܺܝ̈ܕܰܝ ܫܰܒܳܝܳܐ: ܘܰܐܦܶܩ ܒܶܙܬܳܐ ܗ̇ܳܝ ܕܡ̣ܶܢ ܥܳܠܰܡ ܚܡܺܝܠܐܴ ܗܘܳܬ݀ ܠܶܗ ܠܡܳܪܽܘܕܳܐ: ܘܺܐܝܬܶܝܗ̇ ܒܙܰܘܚܳܐ ܘܙܳܟܽܘܬܳܐ: ܘܰܠܦܰܪܕܰܝܣܳܐ ܐܰܥܠܳܗ̇ ܠܗ̇ܳܝ ܝܳܪܬܽܘܬܳܐ ܕܺܝܠܶܗ ܩܰܕܡܳܝܬܳܐ: ܘܚܶܟܡܬܳܐ ܘܚܰܝܠܐܴ ܘܩܰܕܺܝܫܽܘܬܳܐ ܡܠܐܴ ܠܟܽܠܳܗ̇ ܐ̱ܢܳܫܽܘܬܳܐ: ܐܰܝܟܰܢܳܐ ܕܣܶܓܕܬܳܐ ܫܰܪܺܝܪܬܳܐ ܘܰܡܫܰܡܠܳܝܬܳܐ ܕܡܶܬܬܚܺܝܒܳܐ ܬܰܣܶܩ ܠܶܗ ܥܰܠ ܐܰܦ̈ܰܝ ܦܽܘܪܩܳܢܶܗ ܕܰܠܘܳܬܰܢ ܢܩܰܪܶܒ ܠܶܗ ܫܽܘܒܚܳܐ ܕܠܐܴ ܫܶܠܝܳܐ: ܒܥܶܕܳܢܳܐ ܗܳܢܳܐ ܘܰܒܟܽܠܥܶܕܳܢܺܝ̈ܢ. ܘܗܳܫܳܐ ܡܦܺܝܣܺܝܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܘܡܰܠܟܳܐ ܕܰܫܠܳܡܳܐ: ܡܚܰܠܠܳܢܳܐ ܘܰܡܩܰܕܫܳܢܳܐ ܕܟܽܠ: ܕܫܳܘܶܝܢܰܢ ܥܒܶܕ ܠܫܽܘ̈ܟܳܢܰܝܟ ܐܠܰܗܳܝ̈ܶܐ ܘܡܰܥܒ̈ܕܰܝ ܚܰܝ̈ܶܐ. ܘܚܰܘܳܐ ܠܰܢ ܥܽܘܬܪܳܐ ܕܰܚܢܳܢܳܟ ܘܡܰܘܗ̈ܒܳܬܳܟ ܐܠܰܗܳܝ̈ܳܬܳܐ ܘܰܫܡܰܝܳܢ̈ܳܝܳܬܳܐ. ܗܳܠܶܝܢ ܐܰܝܠܶܝܢ ܕܰܦܬܺܝܟܳܐܺܝܬ ܘܰܒܣܰܓܺܝܽܐܘܬ ܙܢܰܝ̈ܳܐ ܕܺܝܠܳܟ ܠܟܽܠܢܳܫ ܐܰܝܟ ܕܫܳܘܶܐ ܡܦܰܠܶܓ ܐܰܢ̱ܬ: ܘܕܰܟܳܐ ܠܰܢ ܡ̣ܶܢ ܟܽܠܗܽܘܢ ܣܽܘܥܪ̈ܳܢܶܐ ܐܰܝܠܶܝܢ ܕܠܳܟ ܠܐܴ ܫܳܦܪܺܝܢ: ܘܩܰܕܶܫ ܠܦܰܓܪ̈ܶܐ ܘܢܰܦ̈ܫܳܬܳܐ ܘܪ̈ܽܘܚܳܬܳܐ ܕܺܝܠܰܢ ܒܩܰܕܺܝܫܽܘܬܳܐ ܕܡܶܢܳܟ: ܘܰܐܫܘܳܐ ܠܰܢ ܡܳܪܝܳܐ ܕܰܒܚܽܘ̈ܫܳܒܶܐ ܚܰܝܠܬܳܢ̈ܶܐ ܢܫܰܒܰܚ ܘܰܢܫܰܡܫܳܟ ܩܰܕܺܝܫܳܐܺܝܬ ܕܠܐܴ ܢܽܘܬܳܦܳܐ ܕܰܚܛܺܝܬܳܐ: ܘܰܢܩܽܘܡ ܡ̣ܶܢ ܝܰܡܺܝܢܳܟ ܕܠܐܴ ܒܶܗܬܬܳܐ: ܟܰܕ ܩܳܝܡܺܝܢܰܢ ܩܕܳܡܰܝܟ ܒܕܶܚܠܬܳܐ ܘܒܰܪܬܺܝܬܳܐ ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ: ܘܗܰܒܠܰܢ ܠܶܒܳܐ ܕܡܶܫܬܡܰܥ ܠܳܟ ܒܰܫܪܳܪܳܐ: ܘܣܶܦܘ̈ܳܬܳܐ ܕܰܡܫܰܒ̈ܚܳܢ ܠܳܟ ܩܰܕܺܝܫܳܐܺܝܬ ܒܟܽܠܙܒܰܢ: ܟܰܕ ܡܫܰܘܙܶܒ ܐܰܢ̱ܬ ܠܰܢ ܡ̣ܶܢ ܥܫܽܘܩܝܳܐ ܕܫܺܐܕ̈ܶܐ ܒܺܝ̈ܫܶܐ: ܘܡ̣ܶܢ ܫܓܺܝܫܽܘܬܳܐ ܕܚܰܫ̈ܶܐ ܕܒܶܣܪܳܐ. ܐܰܝܟܰܢܳܐ ܕܕܰܟܝܳܐܺܝܬ ܘܩܰܕܺܝܫܳܐܺܝܬ ܢܺܐܚܶܐ ܒܥܳܠܡܳܐ ܗܳܢܳܐ. ܘܠܐܴ ܡܚܰܝ̈ܒܶܐ ܢܩܽܘܡ ܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ: ܘܰܒܦܰܪܶܗܣܺܝܰܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡ ܛܟܣܐ ܪܒܝܥܝܐ

 

ܛܟܣܐ ܕܚܕ ܒܫܒܐ ܚܡܝܫܝܐ ܕܩܝܡܬܐ ܕܛܟܣܐ ܡܨܥܝܐ

ܩܕܡܝܬ ܨܠܘܬܐ ܕܫܘܪܝܐ

 

ܐܠܰܗܳܐ ܫܰܪܺܝܪܳܐ ܕܡ̣ܶܢ ܐܠܰܗܳܐ ܫܰܪܺܝܪܳܐ: ܕܩܳܡ̣ܬ ܒܰܒܣܰܪ ܡ̣ܶܢ ܩܰܒܪܳܐ ܫܰܪܺܝܪܳܐܺܝܬ ܐܰܝܟ ܕܰܨܒ̣ܰܝܬ. ܘܶܐܬܢܰܚ̣ܰܡܬ ܒܫܽܘܒܚܳܐ ܐܰܝܟ ܕܰܫܦ̣ܰܪ ܠܳܟ. ܢܰܚܶܡ ܡܳܪܝ ܠܬܰܪ̈ܥܝܳܬܰܢ ܡ̣ܶܢ ܛܽܘܠܫܳܐ ܕܰܚܛܺܝܬܳܐ ܘܰܐܥܺܝܪ ܡܰܕ̈ܥܰܝܢ ܕܢܶܣܬܰܟܠܽܘܢ ܬܶܕܡܪ̈ܳܬܳܐ ܕܰܒܢܳܡܽܘ̈ܣܰܝܟ ܘܢܶܬܗܰܓܶܐ ܒܗܽܘܢ ܐܺܝܡܳܡܳܐ ܘܠܺܠܝܳܐ ܕܢܰܘܕܶܐ ܘܰܢܫܰܒܚܳܟ ܒܝܰܘܡܳܐ ܕܰܩܝܳܡܬܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܘܝܰܡܳܐ ܕܛܳܒܽܘܬܳܐ. ܕܰܢܚ̣ܶܬ ܠܐܱܪܥܳܐ ܒܨܶܒܝܳܢܶܗ ܡܶܛܽܠ ܚܰܛܳܝ̈ܶܐ: ܠܗ̇ܰܘ ܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܡܪܰܥܝܳܢܳܐ ܕܰܙܪܰܥ ܫܰܝܢܳܐ ܐܰܘܝܽܘܬܳܐ ܒܶܝܬ ܥܶܠܳܝ̈ܶܐ ܠܬܰܚܬܳܝ̈ܶܐ. ܠܗ̇ܰܘ ܕܰܒܫܰܝܢܳܐ ܨܳܒ̇ܶܐ ܘܰܒܫܰܝܢܳܐ ܡܶܬܪܰܥܶܐ ܠܗ̇ܰܘ ܕܫܰܝܢܳܐ ܐܺܝܬܰܘܗܝ ܘܒܰܫܠܳܡܳܐ ܡܶܬܬܢܺܝܚ: ܗ̇ܰܘ ܕܰܠܬܰܠܡܺܝ̈ܕܶܐ ܕܺܝܠܶܗ ܩܰܕܺܝ̈ܫܶܐ ܐܶܡ̣ܰܪ ܕܰܫܠܳܡܳܐ ܕܺܝܠܝ ܝܳܗ̇ܶܒ ܐ̱ܢܳܐ ܠܟܽܘܢ: ܘܰܫܠܳܡܳܐ ܕܺܝܠܝ ܫܳܒ̇ܶܩ ܐ̱ܢܳܐ ܠܟܽܘܢ. ܒܶܗ ܡܳܪܝ ܫܰܪܰܪ ܠܰܢ ܒܚܽܘܒܳܟ ܕܢܰܘܕܶܐ ܘܰܢܫܰܒܚܳܟ ܒܗܳܢܳܐ ܥܶܕܳܢܳܐ܀

 

ܣܕܪܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܝܰܠܕܳܐ ܫܰܪܺܝܪܳܐ ܒܪܶܗ ܕܰܐܒܳܐ ܓܢܺܝܙܳܐ: ܐܰܢ̱ܬ ܕܰܢܚ̣ܶܬܬ ܡ̣ܶܢ ܡܶܕܝܳܪ̈ܶܐ ܪ̈ܳܡܶܐ ܘܰܡܥܰܠܰܝ̈ܳܐ ܕܰܐܒܽܘܟ. ܘܶܐܬܥܰܛܰܦ̣ܬ ܕܡܽܘܬܳܐ ܥܰܒܕܳܢܳܝܬܳܐ ܟܰܕ ܐܺܝܬܰܝܟ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܟܽܠ ܡܳܪ̈ܰܘܳܬܳܐ: ܐܶܬܺܝܠܶܕܬ ܡ̣ܶܢ ܟܰܪܣܳܐ ܕܒܶܣܪܳܐ ܐܰܝܟ ܒܰܪܢܳܫܳܐ. ܟܰܕ ܐܺܝܬܰܝܟ ܗ̇ܰܘ ܕܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܕܳܐ ܐܠܰܗܽܘܬܳܐ ܫܽܘܪܳܝܳܐ ܘܫܽܘܠܳܡܳܐ ܠܰܝܬ ܠܳܟ. ܥܡ̣ܰܕܬ ܒܝܽܘܪܕܢܳܢ ܢܰܗܪܳܐ ܐܰܝܟ ܚܰܝܳܒܳܐ: ܡ̣ܶܢ ܐܺܝ̈ܕܰܝ ܝܽܘܚܰܢܳܢ ܥܰܒܕܳܟ: ܐܰܢ̱ܬ ܕܺܐܝܬܰܝܟ ܚܰܣܝܳܐ ܘܰܡܕܰܟܝܳܢܳܐ ܕܛܰܡ̈ܶܐܐ: ܘܰܡܚܰܣܝܳܢܳܐ ܕܰܡܟܰܬܡ̈ܶܐ ܩܰܒ̣ܶܠܬ ܥܠܰܝܟ ܨܰܘܡܳܐ ܨܶܒܝܳܢܳܝܳܐ ܐܰܪܒܥܺܝܢ ܝܰܘ̈ܡܺܝܢ ܘܰܐܪܒܥܺܝܢ ܠܰܝܠܰܘ̈ܳܢ ܕܰܬܡܰܠܐܷ ܐܽܘܪܚܳܐ ܗ̇ܳܝ ܕܰܕܪܰܫ ܠܳܟ ܢܒܺܝ̈ܶܐ ܕܰܐܒܽܘܟ. ܩܰܒ̣ܶܠܬ ܥܠܰܝܟ ܕܬܶܬܢܰܣܢܶܐ ܡ̣ܶܢ ܐܳܟܶܠܩܰܪܨܳܐ ܬܠܳܬܳܐ ܕܰܐܪ̈ܶܐ: ܘܰܒܗܽܘܢ ܕܳܫܬܳܝܗܝ ܘܰܠܟܽܠܶܗ ܚܰܝܠܶܗ ܘܰܥܒ̇ܰܕܬܳܝܗܝ ܒܶܙܚܳܐ ܘܡܽܘܝܳܩܳܐ ܠܕܳܪ̈ܶܐ ܕܳܐܬܶܝܢ ܩܕܳܡ ܨܰܝܳܡ̈ܶܐ ܕܦܳܪܽܘܫܽܘܬܳܐ. ܘܡ̣ܶܢ ܬܰܡܳܢ ܫܪܰܝܬ ܒܰܐܬܪ̈ܰܘܳܬܳܐ ܘܬܶܕܡܪ̈ܳܬܳܐ ܕܠܐܴ ܡܶܢܝܳܢܳܐ: ܘܰܪܟܶܒ̣ܬ ܥܺܝܠܐܴ ܙܥܽܘܪܳܐ ܕܰܐܬܳܢܳܐ ܒܨܶܒܝܳܢܳܟ: ܘܥܰܠ̣ܬ ܠܳܗ̇ ܠܨܶܗܝܽܘܢ ܡܰܟܺܝܟܳܐܺܝܬ: ܘܰܥܕܰܡܳܐ ܠܗܳܢܳܐ ܠܡܽܘܟܳܟܳܐ ܐܶܬܢܰܚ̣ܰܡܬ ܫܺܝܛܳܐܺܝܬ ܐܰܢ̱ܬ ܕܳܐܦܠܐܴ ܗܰܘ̈ܢܶܐ ܘܠܐܴ ܪ̈ܶܥܝܳܢܶܐ ܡܳܛܶܝܢ ܕܢܶܒܨܽܘܢܳܟ ܪܶܡܙܳܢܳܐܺܝܬ ܘܒܳܬܪܰ ܕܫܰܡܠܺܝܬ ܟܽܠܳܗ̇ ܡܕܰܒܪܳܢܽܘܬܳܟ ܠܐܴ ܡܶܬܕܰܪܟܳܢܺܝܬܳܐ ܥܰܠ̣ܬ ܠܒܶܝܬ ܕܺܝܢܳܐ ܐܰܝܟ ܚܰܝܳܒܳܐ ܟܰܕ ܐܺܝܬܰܝܟ ܕܰܝ̇ܳܢܳܐ ܕܕܰܝ̈ܳܢܶܐ. ܘܰܒܕܺܝܢܳܟ ܠܐܴܕܳܡ ܚܰܝܳܒܳܐ ܡ̣ܢ ܕܺܝܢܳܐ ܚܰܪܰܪܬ. ܘܰܠܚܰܣܺܝܢܳܐ ܒܝܰܕ ܚܰܝܠܳܟ ܦܟ̣ܰܪܬ: ܘܶܐܬܩܒ̣ܰܪܬ ܒܩܰܒܪܳܐ ܚܰܕܬܳܐ ܐܰܝܟ ܟܽܠ ܒܰܪܢܳܫ ܐܰܝܟܰܢܳܐ ܕܠܰܩܒܺܝܪ̈ܶܐ ܕܬܰܡܳܢ ܡ̣ܶܢ ܕܰܚܺܝܚܳܐ ܬܢܰܦܶܨ ܘܰܬܚܰܕܶܬ ܘܝܰܘ̈ܡܶܐ ܬܠܳܬܳܐ ܥܰܡܗܽܘܢ ܕܰܝܰܪܬ: ܘܠܰܟܡܺܝܪܽܘܬܳܐ ܕܺܝܠܗܽܘܢ ܒܰܐܺܝܬ: ܘܐܬܢܰܚܰܡ̣ܬ ܒܫܽܘܒܚܳܐ ܘܩܳܡ̣ܬ ܒܬܶܫܒܽܘܚܬܳܐ ܪܰܒܬܳܐ ܕܠܐܴ ܡܶܬܡܰܠܠܐܴ. ܘܰܠܟܽܠܗܽܘܢ ܐܰܝܠܶܝܢ ܕܗܰܝܡ̣ܶܢܘ ܒܳܟ ܐܰܩܺܝܡܬ ܥܰܡܳܟ: ܘܰܐܟ̣ܪܶܙܘ ܪܰܒܽܘܬܳܟ ܘܰܐܠܳܗܽܘܬܳܟ ܒܶܝܬ ܥܰܡܳܐ ܛܳܠܽܘܡܳܐ ܘܰܩܫܶܐ ܩܕܳܠܐܴ ܕܝܽܘܕܳܝ̈ܶܐ: ܘܒܳܬܰܪ ܩܝܳܡܬܳܟ ܡܫܰܒܰܚܬܳܐ ܠܢܶܫ̈ܶܐ ܩܰܕܡܳܐܝܰܬ݀ ܐܶܬܚܰܘܺܝܬ: ܘܶܐܡ̣ܰܪܬ ܠܗܶܝܢ ܘܢܺܐܡܪܽܘܢ ܠܰܫܠܺܝ̈ܚܶܐ ܕܢܺܐܙܽܠ̱ܘܢ ܠܰܓܠܺܝܠܐܴ ܘܬܰܡܳܢ ܢܶܚܙܽܘܢܳܟ. ܘܰܣܥ̣ܰܪܬ ܐܶܢܽܘܢ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܘܫ̣ܰܪܰܪܬ ܐܶܢܽܘܢ ܥܰܠ ܩܝܳܡܬܳܐ ܕܺܝܠܳܟ ܡܫܰܒܰܚܬܰܐ: ܘܰܒܝܰܕ ܫܠܳܡܳܟ ܠܥܳܩܬܳܐ ܘܟܰܪܝܽܘܬܳܐ ܡ̣ܶܢ ܠܶܒܰܘ̈ܳܬܗܽܘܢ ܕܚܰܝܬ: ܘܰܠܗܰܝܡܳܢܽܘܬܳܐ ܕܺܝܠܗܽܘܢ ܢܰܨܰܚ̣ܬ: ܘܰܠܬܳܐܘܡܰܐ ܕܶܐܬܦܰܠܰܓ ܒܓܶܫܬܳܐ ܕܕܰܦܢܳܟ ܫ̣ܰܪܰܪܬ ܘܦܰܩ̣ܶܕܬ ܐܶܢܽܘܢ ܕܠܰܒܪܺܝܬܳܐ ܢܶܦܩܽܘܢ: ܠܟܽܠܗܽܘܢ ܥܰܡ̈ܡܶܐ ܢܣܰܒܪܽܘܢ ܚܰܕ ܐܠܰܗܳܐ ܕܶܐܬܒܰܪܢܰܫ ܘܰܒܬܶܫܒܽܘܚܬܳܐ ܩܳܡ ܡ̣ܶܢ ܩܰܒܪܳܐ. ܚܰܕ ܡܫܺܝܚܳܐ ܕܶܐܬܓܰܫܰܡ: ܘܗ̣ܽܘ ܟܰܕ ܗ̣ܽܘ ܕܥܳܡ̇ܰܪ ܒܰܡܪ̈ܰܘܡܶܐ ܥܰܠ ܝ̇ܳܠܽܘܕܶܗ: ܘܒܰܕܓܽܘܢ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܐܰܚܺܝ̣̈ܕܰܝ ܫܪܳܪܳܐ ܕܺܝܠܗܽܘܢ ܘܰܪ̈ܕܺܝܦܰܝ ܡܶܛܽܠܳܬܰܢ ܘܰܡܩܰܦ̈ܚܰܝ ܚܠܳܦ ܗܰܝܡܳܢܽܘܬܳܐ ܗ̇ܳܝ ܕܰܐܫܠܶܡܘ ܠܰܢ ܫܠܺܝ̈ܚܶܐ ܩܰܕܺܝ̈ܫܶܐ: ܘܡܶܛܽܠ ܨܠܺܝܒܳܐ ܘܫܰܪܪܶܗ ܣܶܓܕܬܳܐ ܡܩܰܪܒܺܝܢܰܢ ܠܳܟ: ܟܰܕ ܐܳܡܪܺܝܢܰܢ ܫܽܘܒܚܳܐ ܠܳܟ ܐܠܰܗܳܐ ܠܐܴ ܚܳܫܽܘܫܳܐ ܕܚܰܫ̣ܬ ܒܰܒܣܰܪ ܡܶܛܽܠܳܬܰܢ ܘܰܦ̣ܪܰܩܬ ܠܰܢ. ܫܽܘܒܚܳܐ ܠܳܟ ܒܳܪܽܘܝܳܐ ܚܰܟܺܝܡܳܐ ܕܡ̣ܶܢ ܒܶܪ̈ܝܳܬܳܐ ܐܶܬܩܰܦ̣ܰܚܬ. ܫܽܘܒܚܳܐ ܠܳܟ ܓܰܐܝܳܐ ܘܓܰܢ̱ܒܳܪܳܐ ܕܩܳܡ̣ܬ ܡ̣ܶܢ ܩܰܒܪܳܐ ܒܫܽܘܒܚܳܐ ܘܙܳܟܽܘܬܳܐ ܕܠܐܴ ܡܶܬܡܰܠܠܐܴ: ܫܽܘܒܚܳܐ ܠܳܟ ܕܳܐܶܢ ܟܽܠܐܴ ܕܰܒܕܺܝܢܳܐ ܕܥܰܘܠܐܴ ܐܶܬܚܰܝܰܒ̣ܬ: ܫܽܘܒܚܳܐ ܠܳܟ ܚܰܢܳܢܳܐ ܕܰܒܥܶܕܳܢ ܨܶܗܝܳܟ ܚܰܠܐܴ ܐܰܫܩܝܽܘܟ ܒܢ̈ܰܝ ܨܶܗܝܽܘܢ ܨܳܠܽܘܒܬܳܐ. ܫܽܘܒܚܳܐ ܠܳܟ ܦܳܪܽܘܩܳܐ ܕܥܳܠܡ̈ܶܐ ܕܡ̣ܶܢ ܦܪ̈ܺܝܫܰܝܟ ܩܰܒ̣ܶܠܬ ܨܰܥܪܳܐ ܘܒܶܙܚܳܐ ܘܡܽܘܝ̇ܳܩܳܐ: ܫܽܘܒܚܳܐ ܠܳܟ ܬܰܩܺܝܦܳܐ ܘܰܡܫܰܒܚܳܐ ܕܰܒܬܽܘܩܦܳܟ ܪܰܒܳܐ ܠܳܟ ܡܕܰܒܰܪ ܐܰܢ̱ܬ ܬܰܩܺܝܦܳܐܺܝܬ. ܘܒܰܩܝܳܡܬܶܗ ܡܫܰܒܰܚܬܳܐ ܐܰܦܨܰܚ̣ܬ ܠܰܫܡܰܝܳܢ̈ܶܐ ܘܠܐܱܪ̈ܥܳܢܳܝܶܐ: ܘܬܶܗܪܳܐ ܘܕܽܘܡܳܪܳܐ ܐܶܬܡܠܺܝܘ ܚܰܝܠܰܘ̈ܳܬܳܐ: ܘܠܰܚܕ̈ܳܕܶܐ ܡܫܰܐܠܺܝܢ ܗ̣ܘܰܘ ܒܝܽܘܡ ܣܽܘܠܳܩܳܟ. ܡܰܢܽܘ ܗܳܢܳܐ ܕܩܳܡ ܡ̣ܶܢ ܩܰܒܪܳܐ ܒܚܰܝܠܐܴ ܘܫܽܘܒܚܳܐ ܪܰܒܳܐ ܡܰܢܽܘ ܗܳܢܳܐ ܕܩܳܡ ܡ̣ܶܢ ܩܰܒܪܳܐ ܘܰܡܒܰܙ̈ܥܳܢ ܐܺܝܕܰܘ̈ܗܝ ܘܪ̈ܶܓܠܰܘܗܝ ܘܥܺܝܪ̈ܶܐ ܣܳܓܕܺܝܢ ܠܶܗ. ܡܰܢܽܘ ܗܳܢܳܐ ܕܰܬܪܺܝܥ ܓܰܒܶܗ ܒܠܽܘܟܳܝܬܳܐ ܘܪܰܘܡܳܐ ܕܰܪܩܺܝܥܳܐ ܪܥܶܠ ܡܶܢܶܗ: ܘܙܳܥܩܺܝܢ ܣܪ̈ܳܦܶܐ ܒܝܽܘܒܳܒܰܝ̈ܗܽܘܢ ܘܰܡܦܰܢܶܝܢ ܒܚܰܕܽܘܬܳܐ ܟܰܕ ܐܳܡܪܺܝܢ ܗܳܢܰܘ ܡܳܪܝܳܐ ܚܰܝܠܬܳܢܳܐ ܐܺܝܬܰܘܗܝ: ܗܳܢܰܘ ܡܳܪܝܳܐ ܦܳܪܽܘܩܳܐ ܕܰܫܒܰܝ̈ܳܐ: ܗܳܢܰܘ ܡܳܪܝܳܐ ܡܚܰܪܪܳܢܳܐ ܕܰܚܒܺܝ̣̈ܫܶܐ. ܗܳܢܰܘ ܡܳܪܝܳܐ ܕܶܐܡ̣ܰܪ ܥܠܰܘܗܝ ܐܺܝܽܘܒ ܕܝܳܕܰܥ ܐ̱ܢܳܐ ܕܦܳܪܽܘܩܝ ܚܰܝ ܗ̣ܽܘ: ܘܥܰܠ ܐܰܪܥܳܐ ܒܣܰܘ̈ܦܶܐ ܡܶܬܓܠܐܷ: ܗܳܢܰܘ ܡܳܪܝܳܐ ܕܶܐܡ̣ܰܪ ܥܠܰܘܗܝ ܐܶܫܰܥܝܳܐ ܕܰܚ̣ܙܳܐ ܣܪ̈ܳܦܶܐ ܕܰܡܩܰܕܫܺܝܢ ܠܶܗ: ܒܪܺܝܟ ܡܳܪܝܳܐ ܕܕܳܫܶܗ ܠܐܴܟܶܠܩܰܪܨܳܐ. ܒܪܺܝܟ ܗ̣ܽܘ ܡܳܪܝܳܐ ܕܣܰܚܦܶܗ ܠܚܰܝܠܶܗ ܕܶܒܫܳܐ ܒܪܺܝܟ ܗ̣ܽܘ ܡܳܪܝܳܐ ܕܶܐܬܢܰܚܰܡ ܒܫܽܘܒܚܳܐ ܡ̣ܶܢ ܩܰܒܪܳܐ: ܘܰܒܢܽܘܚܳܡܶܗ ܐܰܦܨܰܚ ܠܰܫܡܰܝܳܢ̈ܶܐ ܘܠܐܱܪ̈ܥܳܢܳܝܶܐ. ܘܫܰܡܠܺܝ ܡܕܰܒܪܳܢܽܘܬܳܐ ܕܺܝܠܶܗ ܒܛܰܝܒܽܘܬܶܗ: ܘܰܐܣܶܩ ܐܶܢܽܘܢ ܠܥܰܦܪ̈ܳܢܶܐ ܠܰܫܡܰܝܳܐ ܘܰܥܬܺܝܕ ܬܽܘܒ ܕܢܺܐܬܶܐ ܕܰܢܚܰܘܶܐ ܫܽܘܒܚܳܐ ܕܪܰܒܽܘܬܶܗ: ܘܢܶܥܒܶܕ ܢܽܘܚܳܡܳܐ ܚܰܕܬܳܐ ܠܰܓܒܺܝܠܬܳܐ ܕܺܝܠܶܗ: ܘܢܶܚܕܶܐ ܐܶܢܽܘܢ ܒܰܚܙܳܬܳܐ ܕܦܰܪܨܽܘܦܶܗ: ܘܢܶܩܪܶܐ ܘܰܢܩܺܝܡ ܐܶܢܽܘܢ ܡ̣ܶܢ ܓܰܒܳܐ ܕܺܝܠܶܗ. ܠܐܱܝܠܶܝܢ ܕܗܰܝܡ̣ܶܢܘ ܒܶܗ ܡܒܰܣܶܡ ܒܰܓܢܽܘܢܶܗ ܘܰܡܢܺܝܚ ܒܡܰܠܟܽܘܬܶܗ: ܘܥܰܠ ܐܰܦ̈ܰܝ ܗܳܠܶܝܢ ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

ܥܛܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܕܒܰܕܡܳܟ ܝܰܩܺܝܪܳܐ ܫܰܝܶܢ̣ܬ ܠܰܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ: ܘܒܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܠܰܚܒܰܠܐܴ ܕܒܰܩܒܺܝܪ̈ܶܐ ܫ̣ܪܰܝܬ. ܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ: ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܘܰܐܫܘܳܐ ܠܰܢ ܕܰܢܥܰܕܥܶܕ ܠܳܟ ܪܽܘܚܳܢܳܐܺܝܬ. ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ: ܟܰܕ ܢܳܛܰܪ ܐܰܢ̱ܬ ܒܰܢ ܓܽܘܥܠܳܢܳܐ ܛܳܒܳܐ ܕܡܰܘܗ̈ܒܳܬܳܟ ܐܠܰܗܳܝ̈ܳܬܳܐ: ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܚܘܬܡܐ

ܥܺܝܪܳܐ ܕܡ̣ܶܢ ܥܺܝܪ̈ܰܝ ܪܰܘܡܳܐ ܐܶܬܝܰܩܰܪ ܒܰܩܝܳܡܬܶܗ: ܘܡ̣ܶܢ ܬܰܠܡܺܝ̈ܕܶܐ ܐܶܣܬܓܶܕ ܒܢܽܘܚܳܡܶܗ: ܘܡ̣ܶܢ ܢܶܫ̈ܶܐ ܐܶܫܬܰܒܰܚ ܒܝܰܘܡܳܐ ܦܰܐܝܳܐ ܕܰܩܝܳܡܬܶܗ: ܗܰܒܠܰܢ ܡܳܪܝܳܐ ܕܢܶܗܘܽܘܢ ܠܳܟ ܩܳܠܰܝ̈ܢ ܟܶܢܳܪ̈ܶܐ ܘܣܶܦܘ̈ܳܬܰܢ ܐܽܘܪܓܰܢܽܘܢ ܠܫܽܘܒܚܳܟ: ܘܢܰܘܕܶܐ ܠܰܫܡܳܟ ܒܥܰܕܥܺܐܕܳܟ ܗܳܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܝܳܐ ܡܰܥܒܶܕ ܚܰܝ̈ܶܐ: ܠܗ̇ܰܘ ܪܽܘܚܳܐ ܩܰܕܺܝܫܳܐ: ܠܗ̇ܰܘ ܚܰܝܳܐ ܡܰܐܚܝ̇ܳܢܳܐ ܕܰܐܚܺܝ ܠܡܳܝܽܘ̈ܬܶܐ ܟܰܕ ܢܛܺܝܪܺܝܢ ܚܰܝ̈ܶܐ ܒܰܩܢܽܘܡܶܗ: ܠܗ̇ܰܘ ܕܰܐܝܟ ܪܶܬܚܳܐ ܡ̣ܶܢ ܢܽܘܪܳܐ ܡ̣ܶܢ ܐܰܒܳܐ ܢܦ̣ܰܩ: ܘܒܰܕܡܽܘܬ ܚܽܘܡܳܐ ܡ̣ܶܢ ܢܰܒܪܰܫܬܳܐ ܒܪܳܐ ܢܳܣ̇ܶܒ: ܠܗ̇ܰܘ ܕܒܰܢܒܺܝ̈ܶܐ ܚܶܙܘ̈ܳܢܶܐ ܡܰܠܶܠ: ܘܥܰܠ ܫܠܺܝ̈ܚܶܐ ܐܰܓܶܢ: ܘܠܰܟܠܺܝ̣̈ܠܐܷ ܕܣܳܗ̈ܕܶܐ ܓܳܕܶܠ: ܘܒܰܩܝܳܡܬܶܗ ܠܟܽܠ ܥܰܡ̈ܡܺܝܢ ܐܰܦܨܰܚ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܣܰܒܪܳܐ ܘܒܽܘܝ̇ܳܐܳܐ ܕܟܽܠܗܽܘܢ ܒܢܰܝ̈ܢܳܫܳܐ: ܗܳܢܰܘ ܬܰܦܢܟܳܐ ܪܰܒܳܐ ܕܰܡܝܰܬܪ̈ܳܬܳܐ: ܘܝܽܘܩܢܳܐ ܚܰܬܺܝܬܳܐ ܕܫܰܦܺܝܪ̈ܳܬܳܐ. ܗ̇ܰܘ ܕܡܶܛܽܠ ܡܰܦܽܘܠܬܰܢ ܕܠܐܱܪܥܳܐ ܢܚ̣ܶܬܬ ܕܰܬܫܰܟܶܢ ܠܰܢ ܡܰܘܗ̈ܒܳܬܳܐ ܐܠܰܗܳܝ̈ܳܬܳܐ ܕܒܰܥ̇ܒܳܪ ܦܽܘܩܕܳܢܳܐ ܐܰܘܒܶܕܢܰܢ. ܗ̇ܰܘ ܕܟܰܕ ܚ̣ܙܰܝܬ ܠܰܢ ܕܠܐܱܒܕܳܢܳܐ ܓܡܺܝܪܳܐ ܪܗܶܛܢܰܢ. ܘܡܰܘܬܳܐ ܘܰܚܒ̇ܳܠܐܴ ܐܶܬܥܰܫܰܢܘ ܥܠܰܝܢ: ܘܒܺܝܫܳܐ ܩ̣ܛܰܪ ܬܳܐܓܶܗ ܥܰܠ ܟܽܠܳܗ̇ ܥܳܡܰܪܬܳܐ ܘܰܫܩ̣ܰܠ ܙܳܟܽܘܬܳܐ ܥܰܠ ܟܽܠܳܗ̇ ܬܺܐܒܶܝܠ. ܘܰܟܒ̣ܰܫ ܒܰܛܪܽܘܢܽܘܬܶܗ ܠܥܳܠܡܳܐ ܘܶܐܬܡܰܟܰܟܘ ܩܕܳܡܰܘܗܝ ܡܰܠܟ̈ܶܐ ܘܫܰܠܺܝ̈ܛܳܢܶܐ ܘܶܐܡܘ̈ܳܬܳܐ ܘܰܚܡ̣ܳܐ ܫܽܘܦܪܰܢ: ܘܦܰܐܝܽܘܬܰܢ ܐܶܒܕܰܬ݀: ܘܟܽܠ ܨܽܘܪ̈ܳܬܳܐ ܫܰܦܺܝܪ̈ܳܬܳܐ ܗ̣ܘ̈ܰܝ ܠܕܽܘܘܳܢܳܐ: ܘܶܐܫܬܰܬܰܩ̈ܝ ܒܓܰܘ ܫܝܽܘܠ ܩܺܝ̈ܢܳܬܳܐ ܕܬܶܫܒ̈ܚܳܬܳܐ ܘܠܐܴ ܗ̣ܘܳܐ ܒܡܰܘܬܳܐ ܕܽܘܟܪܳܢܳܐ ܕܰܩܝܳܡܬܳܐ: ܘܠܐܴ ܒܰܫܝܽܘܠ ܐ̱ܢܳܫ ܕܡܰܘܕܶܐ ܠܐܱܠܳܗܳܐ. ܘܟܰܕ ܗܘ̣ܰܝܢ ܐܰܝܟ ܥܶܪ̈ܒܶܐ ܕܠܰܝܬ ܠܗܽܘܢ ܡܟܰܢܫܳܢܳܐ: ܘܣܶܓܕܬܳܐ ܗ̇ܳܝ ܕܡܶܬܬܚܺܝܒܳܐ ܠܳܟ ܒܳܪܽܘܝܳܐ: ܠܰܦܬܰܟܪ̈ܶܐ ܩܰܪܶܒܢܰܢ ܘܶܐܬܟܰܦܰܦ ܓܶܢܣܳܐ ܐ̱ܢܳܫܳܝܳܐ ܩܕܳܡ ܕܶܚ̈ܠܳܬܳܐ ܕܟܽܠ ܕܶܡܘ̈ܳܢ: ܐܶܬܰܝܬ ܘܰܦ̣ܪܰܩܬ ܠܰܢ ܘܰܐܦܢܺܝܬ ܒܰܩܝܳܡܬܳܟ ܠܟܽܠܰܢ ܠܺܝܕܰܥܬܳܐ ܫܰܪܺܝܪܬܳܐ ܘܪܺܝܫܳܐ ܡܰܐܚܝ̇ܳܢܳܐ: ܘܟܰܕ ܗܳܠܶܝܢ ܟܽܠܗܶܝܢ ܣܰܝܒ̣ܰܪܬ ܡܶܛܽܠܳܬܰܢ: ܘܰܐܥܒ̣ܰܪܬ ܠܗ̇ܳܝ ܕܡܶܛܽܠ ܒܺܝ̣̈ܫܳܬܰܢ ܒܰܓܙܳܡ̈ܶܐ ܡܰܪܺܝܪ̈ܶܐ ܩܰܕܶܡ̣ܬ ܐܶܡ̣ܰܪܬ: ܕܠܐܴ ܬܶܥܡܰܪܝ ܪܽܘܚܝ ܒܐܢܳܫ̈ܶܐ ܠܥܳܠܰܡ. ܐܶܠܐܴ ܫܰܟܶܢ̣ܬ ܠܰܢ ܪܽܘܚܳܐ ܕܣܺܝܡܰܬ݀ ܒܢܰܝ̈ܳܐ ܒܡܰܘܠܳܕܳܐ ܕܡܶܢܕܪܺܝܫ ܒܝܰܕ ܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܘܚܰܘܺܝܬ ܠܰܢ ܐܽܘܪܚܳܐ ܕܰܫܪܳܪܳܐ ܐܰܢܗ̣ܰܪܬ ܠܰܢ ܒܙܰܠܺܝ̈ܩܶܐ ܕܡ̣ܶܢ ܩܰܒܪܳܟ ܐܠܰܗܳܝܳܐ: ܘܠܰܒܪܺܝܬܳܐ ܟܽܠܳܗ̇ ܐܰܦܢܺܝܬ ܠܺܝܕܰܥܬܳܐ ܕܺܝܠܳܟ ܕܡ̣ܶܢ ܣܶܓܕܰܬ݀ ܨܰܠܡ̈ܶܐ ܚ̣ܰܪܰܪܬ. ܘܒܰܕܓܽܘܢ ܡܶܬܟܰܫܦܺܝܢܰܢ ܠܳܟ ܒܗܳܢܳܐ ܝܰܘܡܳܐ ܕܰܩܝܳܡܬܳܐ ܕܺܝܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܢܶܬܢܰܗܪ̈ܳܢ ܢܰܦ̈ܫܳܬܰܢ ܒܡܰܥܒܕܳܢ̈ܘܳܬܳܟ ܐܠܰܗܳܝ̈ܳܬܳܐ: ܟܰܕ ܡܶܬܢܰܗܪܺܝܢܰܢ ܒܙܰܠܺܝ̈ܩܶܐ ܫܒܺܝ̈ܚܶܐ ܕܢܽܘܚܳܡܳܟ ܡܚܰܕܝܳܢܳܐ: ܘܢܶܬܦܰܨܶܐ ܡ̣ܶܢ ܚܶܫܽܘܟܳܐ ܕܰܚܛܺܝܬܳܐ ܘܡ̣ܶܢ ܓܽܘܡܳܨܳܐ ܕܰܐܒܕܳܢܳܐ ܐܳܦ ܢܶܫܬܰܘܫܰܛ ܒܕܶܚܠܰܬ݀ ܐܠܰܗܳܐ: ܒܢܰܟܦܽܘܬܳܐ ܘܰܒܩܰܕܺܝܫܽܘܬܳܐ: ܟܰܕ ܥܺܕܬܳܟ ܒܫܰܝܢܳܐ ܒܗܺܝܠܐܴ ܬܶܨܛܰܒܰܬܝ ܘܟܳܗ̈ܢܶܝܗ̇ ܩܰܕܺܝ̈ܫܶܐ ܒܙܰܗܝܽܘܬܳܐ ܢܫܰܡܫܽܘܢ ܘܰܟܪ̈ܺܝܗܶܝܗ̇ ܒܛܰܝܒܽܘܬܳܟ ܢܶܣܬܰܥܪܽܘܢ: ܘܰܐܠܺܝ̈ܨܶܐ ܒܰܡܪܰܚܡܳܢܽܘܬܳܟ ܢܶܬܪܰܘܚܽܘܢ ܘܪ̈ܰܚܺܝܩܶܐ ܒܰܫܠܳܡܳܐ ܢܶܬܘܰܥܕܽܘܢ. ܘܩܰܪ̈ܺܝܒܶܝܗ̇ ܒܪ̈ܰܚܡܶܐ ܢܶܬܢܰܛܪܽܘܢ: ܝܰܬܡ̈ܶܐ ܘܰܐܪ̈ܡܠܳܬܳܐ ܒܚܰܝܠܳܟ ܢܶܣܬܰܝܥܽܘܢ. ܘܡܶܣܟ̈ܺܢܶܐ ܘܰܣܢܺܝ̈ܩܶܐ ܡ̣ܶܢ ܒܶܝܬ ܓܰܙܳܟ ܢܶܥܬܪܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܥܰܠ ܡܰܕܒܚܳܟ ܪܽܘܚܳܢܳܐܺܝܬ ܢܶܬܕܰܟܪܽܘܢ: ܘܒܰܡ̈ܛܰܠܠܐܷ ܕܢܽܘܗܪܳܐ ܢܰܦ̈ܫܳܬܗܽܘܢ ܢܶܬܪܰܘܚܽܘܢ ܘܢܶܬܒܰܣܡܽܘܢ: ܘܥܰܠ ܟܽܠܰܢ ܪ̈ܰܚܡܰܝܟ ܡܳܪܰܢ ܝܶܫܽܘܥ ܡܫܺܝܚܳܐ ܢܶܫܬܰܦܥܽܘܢ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܒܝܰܘܡܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܠܬܰܠܡܺܝ̈ܕܰܘܗܝ ܩܰܕܺܝ̈ܫܶܐ: ܠܗ̇ܰܘ ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܘܟܰܢܶܫ ܠܚܰܒܺܝ̈ܒܰܘܗܝ ܘܶܐܬܒܰܕܰܪܘ ܗܘ̣ܰܘ ܒܥܶܕܳܢ ܙܩܺܝܦܽܘܬܶܗ ܠܗ̇ܰܘ ܠܐܴ ܐܰܝܢܳܝܳܐ ܘܠܐܴ ܟܡܳܢܳܝܳܐ ܕܐܬܚܙܺܝ ܒܳܬܰܪ ܩܝܳܡܬܶܗ ܠܐܱܚܰܘ̈ܗܝ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܒܕܽܘܟ̈ܝܳܬܳܐ ܡܫܰܚܠܦ̈ܳܬܳܐ. ܕܠܶܗ ܠܗ̇ܰܘ ܕܩܳܡ ܡ̣ܶܢ ܩܰܒܪܳܐ ܢܰܘܕܶܐ ܟܽܠܰܢ ܘܰܢܫܰܒܰܚ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܒܝܰܘܡܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܒܰܐܺܝܬ ܠܠܶܒܰܘ̈ܳܬܳܐ ܕܬܰܠܡܺܝ̈ܕܰܝܟ ܩܰܕܺܝ̈ܫܶܐ. ܗ̇ܰܘ ܕܰܒܓܶܫܬܳܐ ܕܕܰܦܢܳܟ ܡܰܥܒܕܰܬ݀ ܚܰܝ̈ܶܐ ܘܰܡܥܺܝܢܐ ܕܚܰܝ̈ܶܐ ܪ̈ܽܘܚܳܢܳܝܶܐ ܝܰܗܒܬܳܗ̇ ܠܬܳܐܘܡܰܐ ܕܢܶܓܽܘܫ ܠܣܶܛܪܳܟ: ܟܰܕ ܡ̣ܶܢ ܒܳܬܰܪ ܬܡܳܢܝܳܐ ܝܰܘ̈ܡܺܝܢ ܐܶܬܚܙܰܝܬ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܐܰܝܟ ܕܰܠܫܽܘܪܳܪܳܐ ܕܰܩܝܳܡܬܳܐ ܕܺܝܠܳܟ ܦܰܐܝܰܬ݀ ܠܐܱܠܳܗܳܐ. ܘܟܰܕ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܡܰܠܝܰܬ݀ ܚܰܕܘ̈ܳܬܳܐ ܐܶܬܚܙܰܝܬ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ ܐܰܢ̱ܬ ܕܺܐܝܬܰܝܟ ܠܐܴ ܡܶܬܚܰܙܝܳܢܳܐ ܘܠܐܴ ܡܶܬܕܰܪܟܳܢܳܐ ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕܽܘܬܳܐ ܣܰܒ̣ܰܪܬ ܫܰܝܢܳܐ ܘܰܫܠܳܡܳܐ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ. ܘܰܥܒ̣ܰܕܬ ܬܰܪܥܽܘܬܳܐ ܒܶܝܬ ܥܶܠܳܝ̈ܶܐ ܠܬܰܚܬܳܝ̈ܶܐ: ܘܒܶܝܬ ܪ̈ܽܘܚܳܬܳܐ ܠܢܰܦ̈ܫܳܬܳܐ. ܚܠܳܦ ܗ̇ܳܝ ܡܰܨܽܘܬܳܐ ܕܰܐܪܡܺܝ ܚܶܘܝܳܐ: ܘܰܛܪܰܕ ܠܐܴܕܳܡ ܘܚܰܘܳܐ ܡ̣ܶܢ ܦܰܪܕܰܝܣܳܐ. ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܦܢ̣ܳܐ ܐܳܕܳܡ ܥܰܡ ܝܰܠܕ̈ܰܘܗܝ ܠܝܳܪܬܽܘܬܗܽܘܢ ܘܗܳܐ ܡܰܗܠܺܝܢ ܒܶܗ ܒܚܰܪܡܳܢܳܐ: ܘܰܡܕܰܝܫܺܝܢ ܠܶܗ ܘܡܶܫܬܰܥܶܝܢ ܒܶܗ ܘܰܥܒܺܝܕ ܓܽܘܚܟܳܐ ܠܟܽܠ ܡ̇ܰܢ ܕܰܡܗܰܝܡܶܢ ܒܰܩܝܳܡܬܳܐ ܕܰܡܫܺܝܚܳܐ. ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܟܽܠܗܽܘܢ ܦܪ̈ܺܝܩܶܐ ܐܶܬܟܰܢܰܫܘ: ܘܰܡܥܰܕܥܕܺܝܢ ܥܺܐܕܳܐ ܕܚܰܕܽܘܬܳܐ ܘܕܰܪܘܳܙܳܐ. ܚܠܳܦ ܗ̇ܳܝ ܒܥܶܠܕܒܳܒܽܘܬܳܐ ܕܰܐܪܡܺܝ ܢܟܺܝܠܐܴ ܒܽܐܘܪܚܳܐ ܕܡܳܝܽܘ̈ܬܶܐ. ܗܳܐ ܝܰܘܡܳܢܳܐ ܪܳܫ̇ܶܦ ܥܰܠ ܟܰܪܣܶܗ ܘܰܥܒܺܝܕܳܐ ܡܶܐܟܽܘܠܬܶܗ ܥܰܦܪܳܐ ܘܰܣܝ̇ܳܢܳܐ: ܘܰܐܝܟܳܐ ܕܡܶܫܟܚܺܝܢ ܠܶܗ ܩܳܛܠܶܝܢ ܠܶܗ: ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܘܰܥܕܳܐ ܕܛܽܘ̈ܒܶܐ ܠܐܴ ܡܰܘܦܝ̈ܳܢܶܐ ܠܐܱܝܠܶܝܢ ܕܗܰܝܡ̣ܶܢܘ ܒܳܟ ܐܶܫܬܰܘܕܺܝܬ: ܘܙܰܗܪܳܐ ܕܰܩܝܳܡܬܳܟ ܐܰܙܠ̣ܶܓܬ ܥܰܠ ܥܺܕܬܳܟ ܡܶܠܬܳܐ ܒܰܪܬ݀ ܐܺܝܡܳܡܳܐ. ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܘܰܕܣܰܒܪ̈ܳܬܳܐ ܐܶܬܰܝ̈ ܠܰܢ ܟܽܠ ܛܳܒ̈ܳܬܳܐ ܫܡܰܝܳܢ̈ܳܝܳܬܳܐ: ܘܟܽܠ ܛܳܒ̈ܳܬܳܐ ܡܰܥܬܪ̈ܳܢܳܝܳܬܳܐ ܡ̣ܶܢ ܒܶܝܬ ܓܰܙܳܟ ܕܰܡܠܐܷ ܟܽܠ ܣܺܝ̈ܡܳܬܳܐ ܫܰܦܺܝܪ̈ܳܬܳܐ: ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܡܰܘܬܳܐ ܕܺܝܫ: ܘܣܳܛܳܢܳܐ ܩܛܺܝܠ ܘܚܰܪܡܳܢܳܐ ܐܶܣܬܚܶܦ ܘܰܫܕܶܐ ܘܰܒܛܺܝܠ: ܘܗܳܐ ܒܟܽܠ ܦܶܢ̈ܝܳܢ ܡܶܬܟܰܪܙܳܐ ܡܰܦܽܘܠܬܶܗ ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܚܠܳܦ ܚܰܘܳܐ ܐܶܡܳܐ ܩܰܕܡܳܝܬܳܐ ܕܰܐܥܠܰܬ݀ ܥܠܰܝܢ ܠܰܘ̈ܛܳܬܳܐ ܘܟܶܬܒܰܬ݀ ܠܰܢ ܒܢܰܝ̈ܳܐ ܐܳܦ ܝܳܪ̈ܬܶܐ ܕܡܰܠܟܽܘܬܳܐ ܕܰܫܡܰܝܳܐ. ܒܗܳܢܳܐ ܝܰܘܡܳܐ ܕܚܰܕ̈ܘܳܬܳܐ ܥܺܕܬܳܐ ܩܰܕܺܝܫܬܳܐ ܡܟܺܝܪܬܳܟ ܡܰܘܕܝܳܐ ܒܚܰܫܰܝ̈ܟ ܘܰܡܚܰܒܒܳܐ ܠܫܽܘ̈ܡܳܬܳܟ: ܘܣܳܓܕܳܐ ܠܰܩܝܳܡܬܳܟ: ܘܰܡܣܰܟܝܳܐ ܠܡܶܐܬܺܝܬܳܟ ܕܰܒܫܽܘܒܚܳܐ ܪܰܒܳܐ ܕܳܢ̇ܰܚ ܐܰܢ̱ܬ: ܘܡܶܬܟܰܫܦܺܝܢܰܢ ܠܳܟ ܕܠܐܴ ܬܶܥܽܘܠ ܠܕܺܝܢܳܐ ܥܰܡ ܝܰܠܕܶܝ̈ܗ̇: ܡܶܛܽܠ ܕܠܐܴ ܙܳܟ̇ܶܐ ܩܕܳܡܰܝܟ ܟܽܠ ܕܚܰܝ. ܘܠܐܴ ܬܰܒ̣ܗܶܬ ܠܰܢ ܒܝܰܘܡܳܐ ܗ̇ܰܘ ܐ̱ܚܪܳܝܳܐ ܕܒܶܗ ܥܳܒܶܕ ܐܰܢ̱ܬ ܦܽܘܪܥܳܢܽܘܬܳܐ ܘܕܺܝܢܳܐ ܘܰܬܒܰܥܬܳܐ ܡ̣ܶܢ ܟܳܦܽܘܪ̈ܶܐ: ܘܡ̣ܶܢ ܟܽܠܗܽܘܢ ܕܰܛܠܰܡ̣ܘ ܠܰܩܝܳܡܬܳܟ ܦܳܪܽܘܩܳܝܬܳܐ. ܘܠܐܴ ܬܶܪܕܶܐ ܠܰܢ ܒܪܽܘܓܙܳܐ ܘܰܒܚܶܡܬܳܐ ܠܰܢ ܗ̇ܳܢܽܘܢ ܕܰܐܪܓܶܙܢܳܟ ܒܡܰܗܡܝܳܢܽܘܬܳܐ: ܘܰܒܕܽܘܒܳܪ̈ܰܝܢ ܢܕܺܝ̣̈ܕܶܐ ܘܡܰܣܠܰܝ̈ܳܐ ܡܰܪܡܰܪܢܰܢ ܠܟܺܐܢܽܘܬܳܟ: ܐܶܠܐܴ ܫܰܟܶܢ ܙܰܒ̈ܢܶܐ ܕܫܰܝܢܳܐ ܘܕܰܫܠܳܡܳܐ ܘܰܕܚܰܕ̈ܘܳܬܳܐ ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܪ̈ܽܘܚܶܐ ܡܡܰܙ̈ܓܳܬܳܐ ܘܠܐܴ ܡܟܰܪ̈ܗܳܬܳܐ. ܘܰܠܥܰܢܺܝ̈ܕܰܝܢ ܕܡܶܢܰܢ ܦ̣ܛܰܪܘ ܒܰܬܪܺܝܨܽܘܬ ܫܽܘܒܚܳܐ ܫܰܟܶܢ ܢܝ̇ܳܚܬܳܐ ܘܒܽܘܣܳܡܳܐ ܒܰܐܘ̈ܘܳܢܶܐ ܕܰܪܘܳܙܳܐ ܘܰܕܚܰܕ̈ܘܳܬܳܐ: ܐܰܝܟܰܢܳܐ ܕܰܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܨܦܪܐ

 

ܛܳܒܳܐ ܘܣܰܓܺܝ ܪ̈ܰܚܡܶܐ ܡܳܪܝܳܐ ܗ̇ܰܘ ܕܛܰܝܒܽܘܬܳܐ ܪܰܒܬܳܐ ܐܰܩܢ̣ܰܝܬ ܠܰܢ ܒܝܰܘܡܳܐ ܕܰܩܝܳܡܬܳܟ ܕܡ̣ܶܢ ܩܰܒܪܳܐ. ܚܽܘܪܳܪܳܐ ܕܡ̣ܶܢ ܚܛܺܝܬܳܐ: ܦܽܘܨܳܝܳܐ ܕܡ̣ܶܢ ܡܰܘܬܳܐ ܘܣܳܛܳܢܳܐ: ܘܫܽܘܘܙܳܒܳܐ ܕܡ̣ܶܢ ܐܰܒܕܳܢܳܐ ܘܰܚܒܳܠܐܴ: ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܰܢܝ̇ܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܥܢ̣ܰܕܘ ܒܰܬܪܺܝܨܽܘܬ ܫܽܘܒܚܳܐ: ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܟܝܳܢܳܐ ܛܽܘܒܬܳܢܳܐ ܘܰܡܥܰܠܝܳܐ ܘܫܽܘܦܪܳܐ ܠܐܴ ܡܶܬܦܰܚܡܳܢܳܐ. ܗ̇ܰܘ ܥܳܒܽܘܕܳܐ ܘܒܳܪܽܘܝܳܐ ܕܗܳܠܶܝܢ ܕܺܐܝܬܰܝܗܶܝܢ ܘܢܽܘܗܪܳܐ ܠܚܽܘܕܳܝܳܐ ܘܝܰܕܽܘܥܬܳܢܳܐ ܘܠܐܴ ܡܶܬܚܰܙܝܳܢܳܐ. ܗ̇ܰܘ ܠܐܴ ܡܶܬܩܰܪܒܳܢܳܐ ܘܠܐܴ ܡܶܬܗܰܘܢܳܢܳܐ: ܗ̇ܳܝ ܛܳܒܽܘܬܳܐ ܕܠܐܴ ܚܣܳܡ ܘܰܡܥܺܝܢܳܐ ܕܚܰܝ̈ܶܐ: ܕܪܰܚܺܝܩ ܘܩܰܪܺܝܒ ܘܡܰܒܥܰܕ ܡ̣ܶܢ ܟܽܠ ܬܰܪܥܺܝܬܳܐ ܐ̱ܢܳܫܳܝܬܳܐ: ܘܥ̇ܳܢܶܐ ܠܟܽܠ ܕܩ̇ܳܪܶܝܢ ܠܶܗ ܒܫܰܦܺܝܪܽܘܬ ܨܶܒܝܳܢܳܐ ܘܕܶܚܠܬܳܐ: ܕܠܶܗ ܝ̇ܳܐܝܳܐ ܘܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܣܶܓܕܬܳܐ ܡ̣ܶܢ ܟܽܠܗܽܘܢ ܗܰܘ̈ܢܶܐ ܝܰܕܽܘܥ̈ܬܳܢܶܐ ܕܠܰܩܝܳܡܬܶܗ ܡܗܰܠܠܺܝܢ ܘܰܡܚܰܓܶܝܢ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܟܰܣܝܳܐ ܘܰܓܢܺܝܙܳܐ: ܕܕܳܠ ܡ̣ܶܢ ܡܶܕܝܳܪ̈ܰܘܗܝ ܪ̈ܳܡܶܐ ܘܰܡܥܰܠܰܝ̈ܳܐ ܕܢܶܣܥܽܘܪ ܠܰܓܒܺܝܠܬܶܗ ܕܰܐܥܬܩܰܬ݀ ܒܰܚܒܳܠܐܴ ܕܰܐܒܕܳܢܳܐ: ܘܰܠܒ̣ܶܫ ܦܰܓܪܳܐ ܕܐ̱ܢܳܫܽܘܬܰܢ ܘܶܐܬܓܠܺܝ ܒܶܗ ܠܰܒܪܺܝܬܳܐ. ܪܳܡܳܐ ܕܰܐܪܟܶܢ ܪܰܒܽܘܬܶܗ ܘܶܐܬܢܰܚܰܬ ܠܘܳܬܰܢ ܒܣܽܘܓܳܐܐ ܕܛܰܝܒܽܘܬܶܗ: ܘܶܐܬܗܰܦܰܟ ܥܰܡܰܢ ܡܕܰܒܪܳܢܳܐܺܝܬ ܒܝܰܕ ܚܽܘܒܶܗ: ܘܫܰܡܠܺܝ ܐ̱ܪ̈ܳܙܶܐ ܘܛܽܘܦ̈ܣܶܐ ܕܚܰܙܳܝ̈ܶܐ: ܘܡܰܠܺܝ ܦ̈ܶܠܐܴܬܳܐ ܕܟܺܐܢ̈ܶܐ ܒܡܽܘܟܳܟܶܗ: ܥܰܬܺܝܪܳܐ ܕܶܐܬܡܰܣܟܰܢ ܡܶܛܽܠܳܬܰܢ ܒܰܚܢܳܢܶܗ: ܘܰܐܥܬܰܪ ܡܶܣܟܺܢܽܘܬܰܢ ܒܪܶܚܡܰܬ݀ ܐ̱ܢܳܫܽܘܬܶܗ: ܕܽܘܡܳܪܳܐ ܕܠܐܴ ܣܳܦܩܺܝܢ ܥܶܠܳܝ̈ܶܐ ܠܰܡܡܰܠܳܠܽܘܬܶܗ ܘܠܐܴ ܡܰܘܦܶܝܢ ܬܰܚܬܳܝ̈ܶܐ ܠܡܰܕܪܳܟܽܘ ܐ̱ܪܳܙܳܐ ܫܒܺܝܚܳܐ ܕܚܶܟܡܬܶܗ ܠܐܴ ܡܶܬܕܰܪܟܳܢܺܝܬܳܐ. ܕܽܘܡܳܪܳܐ ܕܠܰܝܬ ܫܽܘܠܛܳܢܳܐ ܕܪܰܒ ܡ̣ܶܢ ܪܰܒܽܘܬܶܗ: ܘܠܐܴ ܫܰܠܺܝܛܳܐ ܗ̇ܰܘ ܕܰܠܥܶܠ ܡ̣ܶܢ ܐܺܝܩܳܪ ܡܰܘܬܒܶܗ ܘܠܐܴ ܡܩܰܒܶܠ ܫܽܘܠܳܡܳܐ ܟܽܘܪܣܝܶܗ. ܕܽܘܡܳܪܳܐ ܐܳܦ ܬܳܐܓܳܐ ܠܐܴ ܡܶܫܬܰܪܝܳܢܳܐ ܕܶܐܬܚܙܺܝ ܡ̣ܶܢ ܫܰܪܒܬܳܐ ܕܺܝܗܽܘܕܳܐ: ܟܰܕ ܐܺܝܬܰܘܗܝ ܚܰܕ ܡ̣ܶܢ ܩܢܽܘ̈ܡܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܕܽܘܡܳܪܳܐ ܕܶܐܬܕܰܡܺܝ ܠܰܢ ܒܟܽܠܗܶܝܢ ܐ̱ܢܳܫܳܝ̈ܳܬܳܐ ܘܰܒܟܽܠ ܡܶܕܶܡ ܣܛܰܪ ܡ̣ܶܢ ܚܛܺܝܬܳܐ: ܟܽܠ ܟܽܠܶܗ ܠܐܱܒܽܘܗܝ ܕܳܡ̇ܶܐ ܒܰܐܠܳܗܽܘܬܶܗ ܒܟܽܠܡܶܕܶܡ: ܣܛܰܪ ܡ̣ܶܢ ܚܰܫ̈ܶܐ ܘܰܙܩܺܝܦܳܐ ܘܡܰܘܬܳܐ: ܕܽܘܡܳܪܳܐ ܕܰܦ̣ܪܰܥ ܒܡܰܚܰܬܶܗ ܚܰܘܒܬܶܗ ܕܳܐܕܳܡ ܪܺܝܫ ܓܒܺܝܠܬܰܢ: ܘܰܒܝܰܕ ܒܽܘܪܢܳܫܶܗ ܝܰܗ̣ܒ ܠܰܢ ܣܒܰܪܬܳܐ ܕܚܰܝ̈ܶܐ ܚܰܕ̈ܬܶܐ ܒܰܩܝܳܡܬܶܗ. ܕܽܘܡܳܪܳܐ ܕܟܶܢ̈ܫܶܐ ܕܡܰܠܐܱܟ̈ܶܐ ܪܳܐܬܶܝܢ ܡ̣ܶܢ ܙܺܝܘܶܗ: ܘܶܐܬܬܕܺܝܢ ܡ̣ܶܢ ܟܶܬܳܐ ܕܓܰܒ̣ܠܰܬ݀ ܝܰܡܺܝܢܶܗ: ܕܽܘܡܳܪܳܐ ܕܟܰܕ ܚܰܨܶܗ ܕܰܪܩܺܝܥܳܐ ܝ̇ܳܩܶܕ ܡ̣ܶܢ ܢܽܘܪܶܗ: ܘܶܐܨܛܠܶܒ ܥܰܡ ܓܰܝ̈ܳܣܶܐ ܕܰܨܒ̣ܳܐ ܒܰܚܢܳܢܶܗ: ܕܽܘܡܳܪܳܐ ܕܰܫܡ̈ܰܝ ܫܡܰܝ̈ܳܐ ܪܳܥܠܺܝܢ ܡܶܢܶܗ ܘܩܰܒܪܳܐ ܚܰܕ ܙܥܽܘܪܳܐ ܐܰܚ̣ܕܶܗ ܘܶܐܣܬܰܝܰܟ ܒܶܗ ܒܨܶܒܝܳܢܶܗ. ܕܽܘܡܳܪܳܐ ܕܶܐܬܚܒܶܫ ܒܓܰܘ ܗܰܘܬܳܐ ܕܡܺܝ̈ܬܶܐ ܥܰܠ ܕܰܫܦ̣ܰܪ ܠܶܗ: ܘܩܳܡ ܒܬܶܫܒܽܘܚܬܳܐ ܪܰܒܬܳܐ ܘܰܐܩܺܝܡ ܥܰܡܶܗ ܠܨܰܠܡܶܗ ܕܳܐܕܳܡ ܥܰܦܪܳܢܳܐ: ܕܽܘܡܳܪܳܐ ܕܶܐܬܚܙܺܝ ܠܓܽܘܕܳܐ ܕܰܬܪܶܥܣܰܪܬܶܗ ܥܰܠ ܛܽܘܪܳܐ ܕܰܓܠܺܝܠܐܴ ܘܚܰܕܺܝ ܘܰܐܦܨܰܚ ܠܠܶܒܰܘ̈ܳܬܗܽܘܢ ܒܰܩܝܳܡܬܶܗ. ܕܽܘܡܳܪܳܐ ܕܥ̣ܰܠ ܠܥܶܠܺܝܬܳܐ ܟܰܕ ܐܰܚܺܝܕܺܝܢ ܣܽܘܟܪ̈ܶܝܗ̇ ܘܬܰܪ̈ܥܶܝܗ̇ ܕܒܰܝܰܐܐ ܐܶܢܽܘܢ ܠܰܫܠܺܝ̈ܚܰܘܗܝ ܓܒܰܝ̈ܳܐ: ܘܰܡܠܐܴ ܐܶܢܽܘܢ ܣܺܝ̈ܡܳܬܳܐ: ܘܒܰܫܠܳܡܳܐ ܫܰܕܰܪ ܐܶܢܽܘܢ ܠܐܱܪܒܰܥ ܦܶܢ̈ܝܳܢ. ܕܽܘܡܳܪܳܐ ܕܶܐܬܢܰܚܰܬ݀ ܒܰܠܚܽܘܕܰܘܗܝ ܫܚܺܝܡܳܐܺܝܬ ܒܢܺܝܚܽܘܬܳܐ: ܘܰܣܠ̣ܶܩ ܒܰܐܠܦ̈ܶܐ ܘܰܒܪ̈ܶܒܘܳܬܳܐ ܕܚܰܝ̈ܠܐܷ ܠܘܳܬ ܐܰܒܽܘܗܝ ܒܬܶܫܒܽܘܚܬܳܐ: ܕܽܘܡܳܪܳܐ ܕܰܢܚ̣ܶܬ ܘܰܣܠܶܩ ܘܺܐܝܬܰܘܗܝ ܒܡܰܚܰܬܶܗ ܥܶܠܳܝܳܐ ܘܰܒܡܰܣܰܩܬܶܗ ܬܰܚܬܳܝܳܐ: ܕܽܘܡܳܪܳܐ ܕܠܐܴ ܟܰܕ ܢܚ̣ܶܬ ܣܰܦܶܩ ܫܡܰܝܳܐ: ܘܠܐܴ ܟܰܕ ܣܠ̣ܶܩ ܫܰܢܺܝ ܡ̣ܶܢ ܠܘܳܬܰܢ. ܕܽܘܡܳܪܳܐ ܕܰܠܥܶܠ ܡ̣ܶܢ ܟܽܠ ܐܺܝܬܰܘܗܝ: ܕܽܘܡܳܪܳܐ ܘܬܶܕܡܽܘܪܬܳܐ ܬܗܺܝܪܬܳܐ ܒܰܫܒܺܝܚܽܘܬܶܗ ܕܕܽܘܡܳܪܳܐ. ܕܽܘܡܳܪܳܐ ܕܕܰܝܰܪ ܥܰܠ ܐܰܪܥܳܐ ܟܰܕ ܐܺܝܬܰܘܗܝ ܒܰܫܡܰܝܳܐ ܘܶܐܫܬܰܒܰܚ ܒܪܰܘܡܳܐ ܟܰܕ ܐܺܝܬܰܘܗܝ ܒܥܽܘܡܩܳܐ: ܕܽܘܡܳܪܳܐ ܕܠܰܝܬ ܪܰܘܡܳܐ ܕܡܳܛܶܐ ܠܶܗ: ܐܳܦܠܐܴ ܥܽܘܡܩܳܐ ܕܳܐܚ̇ܶܕ ܪܰܒܽܘܬܶܗ: ܕܽܘܡܳܪܳܐ ܕܰܦ̣ܪܰܩ ܠܐܱܪ̈ܥܳܢܶܐ ܒܡܰܚܰܬܶܗ: ܘܰܐܦܨܰܚ ܠܰܫܡܰܝ̈ܳܢܶܐ ܒܡܰܣܰܩܬܶܗ: ܘܳܐܦ ܚܢܰܢ ܥܰܦܪ̈ܳܢܶܐ ܘܰܡܚܺܝ̣̈ܠܐܷ ܟܰܕ ܠܰܩܝܳܡܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܒܬܶܫܒ̈ܚܳܬܳܐ ܕܰܟܝ̈ܳܬܳܐ ܢܪܰܡܪܶܡ: ܘܥܰܡ ܢܒܺܝܳܐ ܐܠܰܗܳܝܳܐ ܢܺܐܡܰܪ ܕܰܐܝܟܰܐ ܗ̱̇ܘ ܥܽܘܩܣܳܟ ܡܰܘܬܳܐ ܝܰܥܢܳܐ ܐܰܝܟܳܐ ܗ̱̇ܝ ܙܳܟܽܘܬܶܟܝ ܫܝܽܘܠ ܕܳܘܺܝܬܳܐ. ܘܒܰܕܓܽܘܢ ܠܳܟ ܕܽܘܡܳܪܳܐ ܠܐܴ ܡܶܬܕܰܪܟܳܢܳܐ ܡܦܺܝܣܺܝܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܟܰܕ ܫܳܐܠܺܝܢܰܢ ܡ̣ܶܢ ܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳܢܺܝܬܳܐ. ܕܰܬܣܺܝܡ ܐܺܝܕܳܟ ܗ̇ܳܝ ܡܰܠܝܰܬ݀ ܥܽܘܕܪ̈ܳܢܶܐ ܥܰܠ ܪܺܝܫܰܢ ܘܰܬܒܰܪܶܟ ܠܰܢ ܒܒܽܘܪ̈ܟܳܬܳܐ ܫܦܺܝ̈ܥܳܬܳܐ ܕܺܝܠܳܟ ܐܰܝܟ ܕܗܳܝܕܶܝܟ ܠܰܫܠܺܝ̈ܚܶܐ ܩܰܕܺܝ̈ܫܶܐ ܒܝܽܘܡ ܣܽܘܠܳܩܳܟ: ܘܰܐܣܶܩ ܠܗܰܘ̈ܢܶܐ ܕܺܝܠܶܗ ܠܐܱܬܪܳܐ ܕܰܫܟܺܝܢܬܳܟ ܘܰܠܪ̈ܶܥܝܳܢܰܝܢ ܠܘܰܥܕܳܐ ܕܪܰܒܽܘܬܳܟ ܠܐܱܝܟܳܐ ܕܪܺܝܫܺܝܬܳܐ ܕܺܝܠܰܢ ܐܺܝܬܰܘܗܝ ܗܘܳܐ ܡܰܥܡܪܶܗ: ܠܘܳܬ ܬܶܐܘܳܪ̈ܺܝܰܐܣ ܕܺܝܠܳܟ ܐܠܰܗܳܝ̈ܳܬܳܐ: ܘܰܐܫܘܳܐ ܠܰܢ ܕܰܢܝܰܒܶܒ ܠܳܟ ܬܶܫܒ̈ܚܳܬܳܐ ܕܰܟܝ̈ܳܬܳܐ: ܘܰܐܪܺܝܡ ܡܶܢܰܢ ܠܥܽܘܪ̈ܙܠܐܷ ܐܰܪ̈ܥܳܢܳܝܶܐ: ܘܰܐܣܽܘܪ ܠܰܢ   ܒܕܽܘܒܳܪ̈ܶܐ ܫܡܰܝ̈ܳܢܶܐ: ܘܰܐܫܘܳܐ ܠܰܢ ܠܽܘܒܳܒܳܐ ܕܚܰܝ̈ܠܰܘܳܬܳܐ ܡܰܠܐܱܟܳܝ̈ܶܐ ܒܝܰܘܡܳܐ ܕܡܶܐܬܺܝܬܳܟ ܕܬܰܪܬܶܝܢ ܘܰܡܢܺܝ ܠܰܢ ܒܓܽܘ̈ܕܶܐ ܕܩܰܕܺܝ̈ܫܰܝܟ: ܘܚܰܠܶܛ ܠܰܢ ܒܬܶܐܓ̈ܡܶܐ ܕܢܰܨܺܝܚܰܝ̈ܟ ܒܡܰܦܪܓܳܢܽܘܬܳܐ ܕܗ̇ܳܢܽܘܢ ܕܰܡܥܰܕܥܕܺܝܢ ܘܚ̇ܳܕܶܝܢ ܒܳܟ: ܘܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܐܠܰܗܳܐ ܩܰܕܺܝܫܳܐ ܕܩܰܕܺܝܫܳܐܺܝܬ ܡ̣ܶܢ ܣܪ̈ܳܦܶܐ ܩܰܕܺܝ̈ܫܶܐ ܒܰܬܪܽܘܢܳܘܣ ܕܺܝܠܳܟ ܡܥܰܠܝܳܐ ܡܶܬܩܰܕܰܫ ܐܰܢ̱ܬ: ܩܰܒܶܠ ܗܳܫܳܐ ܠܬܶܫܒ̈ܚܳܬܳܐ ܕܺܝܠܰܢ ܥܰܒܕܰܝ̈ܟ ܕܰܒܥܺܐܕܳܐ ܕܰܩܝܳܡܬܳܟ ܡܩܰܪܒܺܝܢܰܢ ܠܳܟ ܘܩܰܒܶܠܳܝܗܝ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܡܶܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܘܦܰܢܳܐ ܫ̈ܶܐܠܳܬܰܢ ܫܰܦܺܝܪ̈ܳܬܳܐ. ܘܫܰܕܰܪ ܠܰܢ ܡ̣ܶܢ ܠܘܳܬܳܟ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܐܰܝܟܰܢܳܐ ܕܟܰܕ ܕܟܰܝ̈ܳܐ ܢܰܨܺܝ̈ܚܶܐ ܢܶܬܚܙܶܐ ܩܕܳܡܰܝܟ ܘܰܢܩܰܪܶܒ ܠܳܟ ܬܰܘܕܝ̈ܳܬܳܐ ܐܰܡܺܝ̣̈ܢܳܬܳܐ: ܫܽܘܦܪܳܐ ܦܰܐܝܳܐ ܕܰܥܒ̇ܳܕ̈ܶܐ ܛܳܒ̈ܶܐ: ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܝܶܫܽܘܥ ܢܽܘܗܪܳܐ ܫܰܪܺܝܪܳܐ ܕܰܐܢܗ̣ܰܪܬ ܥܰܝ̈ܢܶܐ ܕܬܰܪ̈ܥܝܳܬܰܢ: ܕܢܶܕܰܥ ܐܰܝܠܶܝܢ ܕܘܳܠܝ̈ܳܢ: ܘܰܢܡܽܘܫ ܡ̣ܶܢ ܐܰܝܠܶܝܢ ܕܠܐܴ ܙܳܕ̈ܩܳܢ: ܘܢܶܬܟܰܫܰܪ ܒܰܐܝܠܶܝܢ ܕܦܳܩ̈ܚܳܢ: ܘܢܰܐܡܶܕ ܡ̣ܶܢ ܐܰܝܠܶܝܢ ܕܰܡܚܰܣܪ̈ܳܢ ܘܰܒܝܽܘܡ ܕܶܢܚܳܐ ܕܡܶܐܬܺܝܬܳܟ ܕܬܰܪܬܶܝܢ: ܚܢܰܢ ܘܥܰܢܺܝ̈ܕܰܝܢ ܕܰܫܟ̣ܶܒܘ ܥܰܠ ܣܰܒܪܳܟ ܢܙܰܡܰܪ ܫܽܘܒܚܳܐ ܠܐܱܠܳܗܽܘܬܳܟ ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܠܗ̇ܰܘ ܡܚܰܕܬܳܢܳܐ ܕܥܳܠܡ̈ܶܐ ܕܚܰܕܶܬ ܠܓܶܢܣܳܐ ܕܰܒܢܰܝ̈ܢܳܫܳܐ ܒܢܽܘܚܳܡܶܗ. ܠܗ̇ܰܘ ܚܰܕܽܘܬܳܐ ܕܰܫܠܺܝ̈ܚܶܐ ܐܰܦܨܰܚ ܠܟܽܠܗܶܝܢ ܒܶܪ̈ܝܳܬܳܐ ܒܰܩܝܳܡܬܶܗ. ܠܗ̇ܰܘ ܕܒܰܣܶܡ ܒܰܫܠܳܡܶܗ ܠܬܰܠܡܺܝ̈ܕܶܐ ܕܰܐܒܺܝܠܺܝܢ ܗ̣ܘܰܘ ܥܰܠ ܡܰܘܬܶܗ ܘܰܐܦܨܰܚ ܐܶܢܽܘܢ ܕܰܡܥܳܩܺܝܢ ܗ̣ܘܰܘ ܘܰܡܠܐܴ ܐܶܢܽܘܢ ܪܘܳܙܳܐ ܘܚܰܕܽܘܬܳܐ ܒܰܚܙܳܬܶܗ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܡ̣ܶܢ ܡܰܪܥܺܝܬܶܗ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܗ̇ܰܘ ܕܚ̣ܰܕܶܬܬ ܒܝܰܕ ܪ̈ܰܚܡܰܝܟ ܠܥܰܬܺܝܩܽܘܬ ܥܳܠܡܳܐ ܕܰܐܫܚ̣ܶܬ ܘܰܒܠܺܝ ܒܰܚܒܳܠܐܴ ܕܰܚܛܺܝܬܳܐ: ܒܡܰܘܬܳܟ ܡܰܥܒܶܕ ܚܰܝ̈ܶܐ ܘܚܽܘܕܳܬܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܕܪܺܝܫ: ܠܘܳܬ ܫܠܺܝ̈ܚܶܐ ܩܰܕܺܝ̈ܫܶܐ ܠܥܶܠܺܝܬܳܐ ܡܰܠܝܰܬ݀ ܐ̱ܪ̈ܳܙܶܐ ܥܰܠ̣ܬ ܘܠܰܘ ܒܗܰܓܳܓܽܘܬܳܐ: ܐܶܠܐܴ ܒܒܶܣܪܳܐ ܕܺܝܠܳܟ ܘܰܒܓܰܪ̈ܡܶܐ ܦܰܓܪܳܢܳܐܺܝܬ ܐܰܝܟܰܢܳܐ ܕܰܚܢܰܢ ܢܶܬܚܰܕܰܬ݀ ܒܳܟ ܡܫܺܝܚܳܐ ܐܠܰܗܰܢ: ܘܫ̣ܰܪܰܪܬ ܐܶܢܽܘܢ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ ܒܗܰܝܡܳܢܽܘܬܳܐ ܕܒܳܟ. ܟܰܕ ܚܰܘܺܝܬ ܠܗܽܘܢ ܕܽܘܟ̈ܝܳܬܳܐ ܕܨܶܨ̈ܶܐ ܕܒܺܐܝܕܰܝ̈ܟ ܘܰܒܪ̈ܶܓܠܰܝܟ ܐܶܣܬܰܟܰܟ̈ܝ: ܘܕܰܦܢܳܟ ܕܶܐܬܬܰܪܥܰܬ݀ ܘܰܐܪܕܝܰܬ݀ ܡܥܺܝܢܳܐ ܕܚܰܝ̈ܶܐ ܕܠܐܴ ܡܳܝܽܘܬܽܘܬܳܐ ܘܠܐܴ ܡܶܬܚܰܒܠܳܢܽܘܬܳܐ: ܗܳܝ ܕܫܶܩܝܳܐ ܕܚܰܝ̈ܶܐ ܗܘܳܬ݀ ܠܰܢ: ܘܢܽܘܗܪܳܐ ܘܰܫܪܳܪܳܐ ܡܶܢܳܗ̇ ܡܬܰܩܢܰܢ ܘܶܐܬܢܰܗܰܪܢܰܢ. ܗ̇ܳܝ ܕܡܶܢܳܗ̇ ܢܗܰܪܘ ܫܠܺܝ̈ܚܶܐ ܘܰܠܟܽܠ ܐܶܡܘ̈ܳܬܳܐ ܐܰܨܡܰܚ̣ܘ ܒܟܳܪܽܘܙܽܘܬܗܽܘܢ: ܗ̇ܳܝ ܕܰܒܚܰܕܽܘܬܳܐ ܕܪܽܘܚܳܐ ܢܗܰܠܟܽܘܢ ܘܢܰܐܠܶܦܟܽܘܢ ܝܺܕܰܥܬܳܐ ܕܒܳܟ ܠܰܒܢܰܝ̈ܢܳܫܳܐ. ܘܰܢܕܽܘܫܽܘܢ ܠܥܰܡܽܘܛܽܘܬܳܐ ܗܽܘܠܳܢܳܝܬܳܐ ܕܚܰܫ̈ܶܐ ܫܟܺܝܪ̈ܶܐ: ܘܒܰܙܩܺܝܦܽܘܬܳܟ ܦܳܪܽܘܩܳܝܬܳܐ ܟܰܕ ܦܫ̣ܰܛܬ ܐܺܝ̈ܕܰܝܟ ܒܳܐܐܰܪ ܠܰܒܪܺܝܬܳܐ ܟܽܠܳܗ̇ ܐܶܚ̣ܰܕܬ: ܘܰܒܩܳܠܐܴ ܕܰܐܙܥ̣ܶܩܬ ܥܰܠ ܩܰܝܣܳܐ ܐܰܙܺܝܥܬ ܐܶܢܽܘܢ ܠܐܷܣܛܶܟ̈ܣܶܐ ܕܰܡܝܰܬܰܒܬܳܐ: ܘܫܽܘ̈ܥܶܐ ܐܶܨܛܰܪܺܝܘ: ܘܩܰܒܪ̈ܶܐ ܐܶܬܦܰܬܰܚܘ: ܘܡܺܝ̈ܬܶܐ ܣܰܓܺܝ̈ܶܐܐ ܩܳܡ̣ܘ ܒܦܰܓܪ̈ܰܝܗܽܘܢ: ܘܕܰܝܰܪܘ ܒܫܽܘ̈ܩܶܝܗ̇ ܕܽܐܘܪܫܠܶܝܡ: ܘܶܐܬܺܝܕܰܥ ܗ̣ܘܰܘ ܠܐܱܒܳܗܰܝ̈ܗܽܘܢ ܘܰܐܚܰܝ̈ܗܽܘܢ ܘܰܐܚܝܳܢܰܝ̈ܗܽܘܢ ܘܰܒܢ̈ܰܝ ܓܶܢܣܳܐ ܘܩܰܪ̈ܺܝܒܰܝܗܽܘܢ. ܘܳܐܬܘ̈ܳܬܳܐ ܬܡܺܝ̣̈ܗܳܬܳܐ ܥܒ̣ܰܕܬ: ܘܟܰܕ ܒܩܰܒܪܳܐ ܚܰܕܬܳܐ ܐܶܬܬܣܺܝܡܬ ܐܰܝܟ ܟܽܠܢܳܫ: ܘܰܬܠܳܬܳܐ ܝܰܘ̈ܡܺܝܢ ܒܶܝܬ ܡܺܝ̈ܬܶܐ ܟܰܬܰܪܬ: ܘܢܽܘܚܳܡܳܐ ܘܚܰܝ̈ܶܐ ܠܰܫܟܺܝ̈ܒܶܐ ܐܰܟ̣ܪܶܙܬ: ܘܰܒܫܽܘܒܚܳܐ ܪܰܒܳܐ ܩܳܡ̣ܬ ܡ̣ܶܢ ܩܰܒܪܳܐ ܘܠܐܴ ܚ̣ܙܰܝܬ ܚܒܳܠܐܴ ܒܶܝܬ ܡܺܝ̈ܬܶܐ: ܘܰܣܚ̣ܰܦܬ ܠܡܰܘܬܳܐ ܘܰܗܓܰܡ̣ܬ ܠܰܫܝܽܘܠ ܒܳܥܰܠܬܳܐ: ܘܰܬܪܰܥ̣ܬ ܫܽܘܪ̈ܶܐ ܥܰܫܺܝ̈ܢܶܐ ܕܺܝܠܳܗ̇: ܘܫܰܪܰܪܬ ܐܶܢܽܘܢ ܠܬܰܠܡܺܝ̈ܕܰܝܟ ܥܰܠ ܩܝܳܡܬܳܟ ܡܫܰܒܰܚܬܳܐ: ܘܶܐܟܰܠ̣ܬ ܘܶܐܫܬܺܝܬ ܠܥܺܢܰܝ̈ܗܽܘܢ ܕܰܬܚܰܘܶܐ ܕܗ̇ܰܘ ܕܚܰܫ ܗܽܘܝܽܘ ܕܩܳܡ ܘܶܐܬܢܰܚܰܡ. ܐܰܝܟ ܡܳܐ ܕܶܐܫܬܰܘܕܺܝܬ ܩܕܳܡ ܩܝܳܡܬܳܟ ܡܰܐܚܝ̇ܳܢܺܝܬܳܐ ܠܓܽܘܕܳܐ ܪܚܺܝܡܬܳܐ ܕܬܰܠܡܺܝ̈ܕܰܝܟ ܩܰܕܺܝ̈ܫܶܐ: ܕܬܶܫܬܶܐ ܥܰܡܗܽܘܢ ܠܝܰܠܕܳܐ ܕܰܓܦܶܬܳܐ ܚܰܕܬܳܐܺܝܬ ܒܡܰܠܟܽܘܬܳܐ ܕܺܝܠܳܟ ܥܺܕܬܳܐ ܩܰܕܺܝܫܬܳܐ: ܘܟܰܕ ܐܰܢܺܝܚܬ ܒܝܰܘܡܳܐ ܫܒܺܝܥܳܝܳܐ ܠܰܫܟܺܝ̣̈ܒܶܐ ܟܽܠܗܽܘܢ ܢܝ̇ܳܚܬܳܐ ܪܽܘܚܳܢܳܝܬܳܐ: ܘܫܳܩܠܐܴ ܣܳܟܳܐ ܫܒܺܝܥܳܝܽܘܬܳܐ ܕܥܳܠܡܳܐ ܗܳܢܳܐ ܥܰܬܺܝܩܳܐ ܘܡܶܬܚܰܒܠܳܢܽܘܬܳܐ: ܘܟܰܕ ܕܶܝܢ ܠܡܶܬܚܰܘܝܳܢܽܘܬܳܐ ܕܗ̇ܰܘ ܚܰܕܬܳܐ ܪܳܫܡܳܐ: ܘܰܠܚܰܕ ܐܺܝܡܳܡܳܐ ܩܰܕܡܳܝܳܐ ܘܰܐ̱ܚܪܳܝܳܐ ܕܒܶܗ ܬܶܢܝܳܢܽܘܬ ܕܳܢ̇ܰܚ ܐܰܢ̱ܬ ܡ̣ܶܢ ܫܡܰܝܳܐ. ܕܠܰܒܪܺܝܬܳܐ ܗܳܕܶܐ ܡܣܰܟܰܡܬܳܐ ܬܰܥܒ̣ܰܪ ܘܬܰܡܛܰܪ ܘܥܰܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܚܰܝܳܐ ܕܡܺܝܬ ܘܰܚܝ̣ܳܐ. ܕܚܽܘܕܳܬܳܐ ܫܡܰܝܳܢܳܐ ܘܰܐܠܳܗܳܝܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܫܰܟܶܢ̣ܬ: ܘܪܰܗܒܽܘܢܳܐ ܒܚܽܘܪܳܪܳܐ ܕܡ̣ܶܢ ܚܛܺܝܬܳܐ ܡܰܘܗܰܒܬܳܐ ܪܰܒܬܳܐ ܒܛܰܝܒܽܘܬܶܗ ܘܰܒܪܶܚܡܰܬ݀ ܐ̱ܢܳܫܽܘܬܶܗ ܘܰܒܪ̈ܰܚܡܰܘܗܝ ܣܰܓܺܝ̈ܶܐܐ ܘܠܐܴ ܡܶܬܡܰܠܠܳܢ̈ܶܐ ܝܰܗܒܠܰܢ: ܘܰܠܒܽܘ̈ܫܶܐ ܚܰܕ̈ܬܶܐ ܘܡܰܦܪ̈ܓܰܝ ܒܺܝܕܰܥܬܳܐ ܘܰܒܚܰܕܽܘܬܳܐ ܕܪܽܘܚܳܐ ܥܰܛܶܦ ܠܰܢ: ܟܰܕ ܫܳܠܚܺܝܢܰܢ ܠܰܠܒܽܘ̈ܫܶܐ ܥܰܬܺܝ̈ܩܶܐ ܗ̇ܳܢܽܘܢ ܕܒܰܪܢܳܫܰܢ ܥܰܬܺܝܩܳܐ: ܘܰܒܡܰܥܒܕܳܢܽܘܬܳܐ ܕܚܰܝ̈ܶܐ ܠܐܴ ܡܳܝܽܘ̈ܬܶܐ ܒܫܽܘܢܳܩܳܐ ܕܡ̣ܶܢ ܗܳܪܟܳܐ ܥܰܬܶܕ ܠܰܢ. ܐܰܝܟܰܢܳܐ ܕܥܰܡ ܩܰܕܺܝ̈ܫܶܐ ܗ̇ܳܢܽܘܢ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ ܢܶܫܬܘܶܐ ܕܰܢܩܽܘܡ ܥܰܡܗܽܘܢ ܘܢܶܬܒܰܣܰܡ ܘܰܠܢܰܦ̈ܫܳܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܡ̣ܶܢ ܚܰܝ̈ܶܐ ܕܰܦܓܰܪ ܫܰܢܺܝܘ: ܥܰܡܗܽܘܢ ܛܰܟܶܣ ܘܰܡܢܺܝ ܠܰܢ ܘܰܒܚܰܕܽܘܬܳܐ ܕܪܽܘܚܳܐ ܩܰܕܺܝܫܳܐ: ܚܽܘܕܳܬܳܐ ܕܰܩܝܳܡܬܳܐ ܕܺܝܠܳܟ ܦܳܪܽܘܩܳܝܬܳܐ: ܫܰܟܶܢ ܠܰܢ. ܐܰܝܟܰܢܳܐ ܕܢܶܫܬܘܶܐ ܚܢܰܢ ܘܥܰܢܺܝܕܰܝ̈ܢ ܕܰܫܟ̣ܶܒܘ ܥܰܠ ܣܰܒܪܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܡ ܛܟܣܐ ܚܡܝܫܝܐ

 

ܛܟܣܐ ܫܬܝܬܝܐ ܕܩܝܡܬܐ ܕܛܟܣܐ ܡܨܥܝܐ

ܩܕܡܝܬ ܨܠܘܬܐ ܕܫܘܪܝܐ

 

ܛܪܽܘܕ ܡܳܪܝ ܡ̣ܶܢ ܠܶܒܰܘ̈ܳܬܰܢ ܠܟܽܠܳܗ̇ ܚܶܡܬܳܐ ܘܰܚܣܳܡܳܐ ܡܰܚܣܪܳܢܳܐ ܘܠܐܱܒܕܳܢܳܐ ܡܣܰܓܦܳܢܳܐ: ܐܰܟܡܳܐ ܕܰܕܚܰܩܬܳܗ̇ ܠܰܦܠܺܝܓܽܘܬܳܐ ܡ̣ܶܢ ܪܶܥܝܳܢܳܐ ܕܰܫܠܺܝ̈ܚܰܝܟ ܩܰܕܺܝ̈ܫܶܐ. ܐܰܝܟܰܢܳܐ ܕܰܒܥܰܝ̈ܢܶܐ ܕܠܶܒܳܐ ܢܶܚܙܶܝܟ: ܘܒܺܐܝܕܰܝ̈ܳܐ ܡܶܬܗܰܘܢܳܢ̈ܳܝܳܬܳܐ ܢܓܽܘܫܳܟ: ܘܰܒܦܽܘ̈ܡܶܐ ܕܟܰܝ̈ܳܐ ܢܶܐܟܠܳܟ ܘܰܒܣܶܦܘ̈ܳܬܳܐ ܠܐܴ ܡܛܰܘ̈ܫܳܬܳܐ ܐܶܫܬܶܝܟ. ܘܚܰܕ ܐܠܰܗܳܐ ܫܰܪܺܝܪܳܐ ܢܶܫܬܰܘܕܥܳܟ: ܘܰܕܠܐܴ ܫܶܠܝܳܐ ܢܫܰܒܚܳܟ: ܗܳܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ ܠܚܰܕ ܐܰܒܳܐ ܩܰܕܺܝܫܳܐ ܫܽܘܪܳܝܳܐ ܘܫܽܘܠܳܡܳܐ ܕܟܽܠܗܶܝܢ ܒܶܪ̈ܝܳܬܳܐ: ܘܒܶܗ ܐܬܬܰܝܬܝܶܝ̈ܢ ܠܰܗܘ̇ܳܝܳܐ: ܘܰܒܡܶܠܬܳܐ ܕܺܝܠܶܗ ܡܰܐܚܝ̇ܳܢܺܝܬܳܐ ܐܶܬܬܰܩܰܢ ܟܽܠܡܶܕܶܡ. ܠܚܰܕ ܒܪܳܐ ܩܰܕܺܝܫܳܐ ܝܰܠܕܳܐ ܡܬܽܘܡܳܝܳܐ ܕܰܨܡ̣ܰܚ ܡ̣ܶܢ ܥܽܘܒܳܐ ܕܰܐܒܽܘܗܝ ܐܺܝܬܝܳܐܺܝܬ ܘܰܡܬܽܘܡܳܐܺܝܬ: ܠܚܰܕ ܪܽܘܚܳܐ ܚܰܝܳܐ ܘܩܰܕܺܝܫܳܐ ܠܐܴ ܐܰܝܢܳܝܳܐ ܘܠܐܴ ܟܡܳܢܳܝܳܐ: ܢܳܦܽܘܩܳܐ ܘܢܳܣܽܘܒܳܐ ܘܓܳܡܽܘܪܳܐ ܘܰܡܫܰܡܠܐܷ ܟܽܠ ܒܰܐܠܳܗܽܘܬܶܗ ܕܠܶܗ ܣܳܓܕܳܐ ܘܡܶܬܕܰܪܟܳܐ ܡܶܫܬܰܥܒܕܳܐ ܒܪܺܝܬܳܐ ܟܽܠܳܗ̇ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܘܟܽܠ ܟܝܳܢܳܐ ܘܠܶܫܳܢܳܐ ܠܶܗ ܡܰܘܕܶܐ ܘܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܫܽܘܒܚܳܐ ܠܳܟ ܡܫܺܝܚܳܐ ܐܠܰܗܳܐ ܡܶܠܬܶܗ ܕܰܐܒܳܐ ܫܡܰܝܳܢܳܐ: ܨܶܡܚܳܐ ܕܫܽܘܒܚܶܗ ܘܝܽܘܩܢܳܐ ܕܺܐܝܬܽܘܬܶܗ ܕܰܠܒ̣ܶܫ ܦܰܓܪܰܢ ܡܳܝܽܘܬܳܐ ܘܶܐܬܬܰܚܬܺܝ ܠܟܽܠܶܗ ܡܽܘܟܳܟܳܐ ܥܕܰܡܳܐ ܠܰܨܠܺܝܒܳܐ ܘܡܰܘܬܳܐ: ܘܣܰܝܒܰܪ ܚܰܫ̈ܶܐ ܐܰܝܟ ܕܰܫܦ̣ܰܪ ܠܶܗ: ܘܰܙܟܳܝܗܝ ܠܒܺܝܫܳܐ ܒܥܶܠܕܰܐܪܳܐ ܗ̇ܰܘ ܕܰܐܛܥܺܝ ܒܰܐܒܽܘܢ ܐܳܕܳܡ ܩܰܕܡܳܐܺܝܬ ܘܰܗܦ̣ܰܟ ܪܰܨܶܗ ܡܫܺܝܚܳܐ ܡܳܪܰܢ ܒܰܨܠܺܝܒܶܗ ܡܰܐܚܶܐ ܟܽܠ ܘܰܢܚ̣ܶܬ ܠܰܫܝܽܘܠ ܒܳܥܠܰܬ݀ ܛܽܘ̈ܗܡܶܐ ܘܫܰܪ̈ܒܳܬܳܐ ܘܰܥܡ̣ܰܪ ܒܰܫܝܽܘܠ ܝܰܘ̈ܡܶܐ ܬܠܳܬܳܐ ܐܰܝܟ ܕܰܪܫ̣ܰܡ ܠܶܗ ܝܰܘܢܳܢ ܢܒܺܝܳܐ ܒܰܪ ܡܰܬܰܝ. ܘܣܰܒܰܪ ܢܽܘܚܳܡܳܐ ܘܚܰܝ̈ܶܐ ܠܢܰܦ̈ܫܳܬܳܐ ܕܰܐܚܺܝ̣̈ܕܳܢ ܗ̣ܘ̈ܰܝ ܒܰܫܝܽܘܠ: ܘܩܳܡ ܒܬܶܫܒܽܘܚܬܳܐ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܬܶܗܪܳܐ ܘܕܽܘܡܳܪܳܐ ܣܥ̣ܰܪ ܒܥܳܠܡܳܐ ܘܰܒܟܽܠܗܶܝܢ ܐܠܰܗܳܝ̈ܳܬܳܐ ܘܰܬܡܺܝ̈ܗܳܬܳܐ ܕܚܰܘܺܝ ܒܥܶܕܳܢ ܙܩܺܝܦܶܗ: ܫܝܽܘܠ ܕܡܶܬܥܰܩܪܺܝܢ ܫܽܘܪ̈ܶܝܗ̇: ܘܡܰܘܬܳܐ ܕܡܶܬܬܕܺܝܫ ܐܰܝܟ ܚܰܠܳܫܳܐ ܒܢܶܩܥܶܗ. ܫܽܘ̈ܥܶܐ ܛܡܺܝ̣̈ܡܶܐ ܕܡܶܨܛܰܪܶܝܢ: ܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܕܡܶܬܚܰܘ̈ܝܳܢ ܒܥܳܠܡܳܐ: ܡܺܝ̈ܬܶܐ ܕܩܳܝܡܺܝܢ ܘܰܠܝܳܕܽܘܥܰܝ̈ܗܽܘܢ ܕܶܝܢ ܡܟܰܣܶܝܢ ܘܡܰܒܗܬܺܝܢ: ܕܗܳܢܰܘ ܡܫܺܝܚܳܐ ܗ̇ܰܘ ܕܡܶܣܬܰܟܶܐ ܡ̣ܶܢ ܐܰܒܳܗܰܝ̈ܢ ܩܰܕܡܳܝ̈ܶܐ: ܘܶܐܬܒܰܕܰܩ ܡ̣ܶܢ ܢܒܺܝ̈ܶܐ ܠܗܽܘܢ ܐܳܡܪܺܝܢ ܗ̣ܘܰܘ. ܗܳܢܰܘ ܕܰܡܒܰܝܰܐܐ ܠܐܻܝܣܪܳܐܶܝܠ ܘܰܦ̣ܪܰܩ ܠܐܴܕܳܡ ܘܰܠܝܰܠܕ̈ܰܘܗܝ ܘܡ̣ܶܢ ܗܳܝܕܶܝܢ ܬܶܗܪܳܐ ܚܰܕܬܳܐ ܣܥ̣ܰܪ ܒܥܳܠܡܳܐ ܘܕܽܘܡܳܪܳܐ ܡܳܠܐܷ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ ܘܰܠܚܰܝ̈ܶܐ ܘܰܠܡܺܝ̈ܬܶܐ: ܘܰܠܢܶܫ̈ܶܐ ܢܰܟ̈ܦܳܬܳܐ ܗ̇ܳܢܶܝܢ ܕܰܢܦ̣ܰܩ̈ܝ ܒܫܰܦܪܳܐ ܕܰܢܒܰܣ̈ܡܳܢ ܦܰܓܪܶܗ ܝܰܩܺܝܪܳܐ. ܟܰܕ ܐܶܫܟ̣ܰܚ̈ܝ ܠܡܰܠܐܱܟܳܐ ܨܶܝܕ ܩܰܒܪܳܐ ܘܰܡܣܰܒܰܪ ܚܰܝ̈ܶܐ ܘܠܐܴ ܡܳܝܽܘܬܽܘܬܳܐ: ܘܶܐܡ̣ܰܪ ܠܢܶܫ̈ܶܐ ܕܰܠܝܶܫܽܘܥ ܗ̇ܰܘ ܕܶܐܨܛܠ̣ܶܒ ܒܳܥܝ̈ܳܢ ܐܢ̱ܬܶܝ̈ܢ ܗ̇ܰܘ ܕܰܩܒܺܝܪ ܗ̣ܘܳܐ ܒܪܰܡܫܳܐ ܗܳܪܟܳܐ: ܩܳܡ ܠܶܗ ܒܫܽܘܒܚܳܐ ܘܠܐܴ ܚ̣ܙܳܐ ܚܒܳܠܐܴ. ܙܶܠܶܝ̈ܢ ܣܰܒܰܪ̈ܶܝܢ ܠܰܫܠܺܝ̈ܚܰܘܗܝ: ܘܶܐܢ ܠܐܴ ܡܰܫܰܪ̈ܬܶܝܢ ܬܳܐܝܶܝ̈ܢ ܚܙܳܝܶܝ̈ܢ ܕܽܘܟܬܶܗ ܘܶܐܫܬܰܪܪܶܝܢ ܥܰܠ ܢܽܘܚܳܡܶܗ: ܗܳܝܕܶܝܢ ܡܰܪܝܰܡ ܪܶܗܛܰܬ݀ ܘܰܦܨܺܝܚܳܐ ܘܫܳܠܽܘܡ ܚܳܕܝܳܐ ܟܰܕ ܪܗܺܝܒܳܐ ܘܰܡܣܰܒܪܳܐ: ܘܝܽܘܚܰܢܰܐ ܟܢܺܝܟܬܳܐ ܡܰܟܪܙܳܐ ܟܰܕ ܪܳܘܙܳܐ: ܘܶܐܡܰܪ̈ܶܝܢ ܠܰܫܠܺܝ̈ܚܶܐ ܕܡܰܠܐܱܟ̈ܶܐ ܚ̣ܙܰܝܢܰܢ ܬܰܡܳܢ ܨܶܝܕ ܩܰܒܪܳܐ ܕܦܳܪܽܘܩܰܢ: ܘܣܰܒ̣ܰܪܘ ܠܰܢ ܕܩܳܡ ܡܳܪܰܢ ܘܰܠܛܽܘܪܳܐ ܕܰܓܠܺܝܠܐܴ ܣܠ̣ܶܩ: ܘܰܫܡ̣ܥ ܫܶܡܥܽܘܢ ܘܰܪܗ̣ܶܛ ܒܚܰܕܽܘܬܳܐ ܐܰܟܚܕܳܐ ܥܰܡ ܝܽܘܚܰܢܳܢ ܨܶܝܕ ܘܰܥܕܶܗ ܕܩܰܒܪܳܐ: ܘܩܰܕܡܶܗ ܥܠܰܝܡܳܐ ܠܣܳܒܳܐ: ܘܰܢܛܰܪ ܠܶܗ ܛܶܟܣܳܐ ܕܺܐܝܩܳܪܳܐ ܗ̣ܘܳܐ: ܘܰܐܕܺܝܩ ܒܩܰܒܪܳܐ ܘܠܐܴ ܥ̣ܰܠ ܩܰܕܡܳܝܳܐ ܕܢܶܥܽܘܠ ܣܳܒܳܐ ܘܪܺܝܫܳܐ ܕܬܰܠܡܺܝ̈ܕܶܐ ܢܶܫܬܰܪܰܪ ܩܰܕܡܳܐܺܝܬ. ܐ̱ܪܳܙܳܐ ܪܰܒܳܐ ܕܶܐܬܓܠܺܝ ܠܫܶܡܥܽܘܢ ܒܥܶܕܳܢܳܐ ܕܰܚܫܳܡܺܝܬܳܐ ܗ̣ܽܘ ܝܰܗ̣ܒ ܠܶܗ ܐܰܬܪܳܐ ܕܢܺܐܠܰܦ ܐ̱ܪܳܙܳܐ ܕܰܩܝܳܡܬܳܐ: ܘܡ̣ܶܢ ܬܰܡܳܢ ܩܳܡ ܠܶܗ ܡܫܺܝܚܳܐ ܘܢܳܛܽܘܪ̈ܶܐ ܕܩܳܝܡܺܝܢ ܒܕܶܚܠܬܳܐ: ܘܬܰܠܡܺܝ̈ܕܶܐ ܓܒܰܝ̈ܳܐ ܪܗܺܝܒܺܝܢ ܠܰܡܣܰܒܳܪܽܘ ܫܡܰܝ̈ܳܢܶܐ ܐܰܕܢܚܽܘܗ̇ ܠܰܣܒܰܪܬܳܐ ܠܬܰܠܡܺܝ̈ܕܶܐ ܘܥܺܝܪ̈ܶܐ ܒܰܕܩܽܘܗ̇ ܠܢܶܫ̈ܶܐ: ܘܢܶܫ̈ܶܐ ܣܰܒܰܪ̈ܝ ܗ̣ܘ̈ܰܝ ܠܰܫܠܺܝ̈ܚܶܐ: ܘܬܰܠܡܺܝ̈ܕܶܐ ܝܰܒܠܽܘܗ̇ ܠܥܰܡ̈ܡܶܐ ܒܚܰܕܽܘܬܳܐ: ܘܥܰܠܗܳܕܶܐ ܥܺܕܬܳܐ ܕܡܶܢܗܽܘܢ ܐܶܬܗܰܝܡܢܰܬ݀ ܡܙܰܝܚܳܐ ܘܰܡܥܰܕܥܕܳܐ ܠܰܩܝܳܡܬܟ ܦܰܐܝܰܬ݀ ܠܐܱܠܳܗܳܐ: ܘܰܒܩ̈ܳܠܐܷ ܫܒܺܝ̈ܚܶܐ ܘܒܰܙܡܺܝܪ̈ܳܬܳܐ ܠܳܥܙܳܐ ܒܩܽܘܠܳܣ̈ܶܐ ܥܰܡ ܝܰܠܕ̈ܶܝܗ̇: ܘܥܰܡ ܫܠܺܝ̈ܚܶܐ ܩܰܕܺܝ̈ܫܶܐ ܠܩܰܒܪܳܟ ܡܶܬܡܰܢܥܳܐ: ܘܰܒܚܰܕܽܘܬܳܐ ܟܰܕ ܐܳܡܪܳܐ: ܒܪܺܝܟ ܗ̣ܽܘ ܥܺܐܕܳܐ ܕܰܩܝܳܡܬܳܟ ܡܰܠܟܳܐ ܩܛܺܝܠܐܴ ܕܰܐܦܨܰܚ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ: ܒܪܺܝܟ ܗ̣ܽܘ ܢܽܘܚܳܡܳܟ ܕܰܐܟܡ̣ܰܪ ܠܨܳܠܽܘ̈ܒܶܐ. ܒܪܺܝܟ ܗ̣ܽܘ ܝܰܘܡܳܟ ܡ̣ܶܢ ܟܽܠ ܝܰܘ̈ܡܺܝܢ: ܒܪܺܝܟܳܐ ܗ̱̇ܝ ܙܳܟܽܘܬܳܟ ܡܰܠܟܳܐ ܕܰܦܪ̈ܺܝܩܶܐ. ܘܥܰܠܗ̇ܳܝ ܡܳܪܝ ܐܰܦܨܰܚ ܠܰܢ ܒܰܫܠܳܡܳܐ ܩܰܕܺܝܫܳܐ ܕܡ̣ܶܢ ܠܘܳܬܳܟ. ܒܰܝܬܳܐ ܘܣܰܬܰܪ ܠܝܰܠܕ̈ܶܝܗ̇ ܕܥܺܕܬܳܐ ܡܟܺܝܪܬܳܟ: ܓܶܕܶܝܗ̇ ܡܫܺܝܚܳܐ ܠܐܱܬܪܳܐ ܕܺܝܠܶܗ ܕܰܐܒܽܘܟ ܕܰܒܰܪܶܝܗ̇ ܥܰܠ ܡܰܪ̈ܓܶܐ ܪ̈ܓܺܝܓܶܐ ܕܡܰܠܟܽܘܬܳܟ: ܗܰܕܳܐ ܠܝܰܠܕܶܝ̈ܗ̇ ܒܰܫܒܺܝ̈ܠܐܷ ܕܺܝܠܳܟ ܒܚܰܝ̈ܶܐ ܛܽܘܒܬܳܢ̈ܶܐ ܘܰܥܕܶܝܗ̇ ܠܡܽܘܠܟ̈ܳܢܶܐ ܕܰܡܠ̣ܰܟܬ ܠܰܓܒܰܝ̈ܳܐ ܕܺܝܠܳܟ. ܙܰܝܢܶܝܗ̇ ܥܰܠ ܕܽܘܡܣ̈ܶܐ ܠܐܴ ܡܶܙܕܰܥܙܥܳܢ̈ܶܐ ܕܗܰܝܡܳܢܽܘܬܳܐ ܠܐܴ ܡܶܨܛܰܠܝܳܢܺܝܬܳܐ: ܚܰܠܶܛܶܝܗ̇ ܒܟܶܢ̈ܫܶܐ ܕܩܰܕܺܝ̈ܫܰܝܟ: ܛܰܝܶܒ ܩܽܘܕܡܶܝܗ̇ ܦܳܬܽܘܪ ܚܰܝ̈ܶܐ ܦܰܓܪܳܟ ܘܰܕܡܳܟ ܡܚܰܣܝܳܢܳܐ: ܝܰܡܺܝܢܳܟ ܬܣܰܬܰܪܝ ܠܝܰܠܕܶܝ̈ܗ̇ ܡ̣ܶܢ ܒܺܝܫܳܐ. ܟܽܠ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܐܰܥܒܰܪ ܡܶܢܳܗ̇: ܠܡܺܐܢܳܐ ܘܫܘܘܙܳܒܳܐ ܗܘܺܝ ܠܳܗ̇: ܡܥܺܝܢܳܐ ܕܠܐܴ ܓܳܝܙܳܐ ܣܕܽܘܪ ܘܛܰܝܶܒ ܠܳܗ̇: ܢܽܘܗܪܳܟ ܢܶܕܢܰܚ ܘܢܶܨܡܰܚ ܥܰܠ ܦܪ̈ܽܘܣܬܕܶܐ ܕܠܶܒܳܗ̇: ܣܰܒܪܳܟ ܡܰܐܚܝ̇ܳܢܳܐ ܢܶܡܠܐܷ ܣܳܚܪ̈ܳܬܳܗ̇: ܥܳܕܽܘܪܳܐ ܗܘܺܝ ܠܳܗ̇ ܘܰܠܟܽܠܗܽܘܢ ܐܰܝܠܶܝܢ ܕܩܳܪܶܝܢ ܠܰܫܡܳܟ ܩܰܕܺܝܫܳܐ: ܦܰܛܶܡܶܝܗ̇ ܒܰܐܬܪܳܐ ܪܘܺܝܚܳܐ ܕܓܶܐܘ̈ܳܬܳܐ ܨܠܺܝܒܳܐ ܙܰܟܳܝܳܐ ܫܽܘܪܳܐ ܢܶܗܘܶܐ ܠܳܗ̇: ܩܰܪܢܳܗ̇ ܪܳܡܬܳܐ ܬܶܬܪܺܝܡܝ ܥܰܠ ܟܽܠܗܽܘܢ ܒܥܶܠܕ̈ܒܳܒܶܝܗ̇ ܪܰܘܡܳܐ ܘܥܽܘܡܩܳܐ ܘܟܽܠ ܒܶܪ̈ܝܳܢ ܢܶܬܦܰܨܚܽܘܢ ܒܝܰܘܡܳܐ ܕܰܩܝܳܡܬܳܟ ܫܰܝܢܳܐ ܘܰܫܠܳܡܳܐ ܢܶܣܓܶܐ ܒܳܗ̇ ܥܕܰܡܳܐ ܠܫܽܘܠܳܡܳܐ: ܬܶܗܘܶܐ ܙܗܺܝܪܳܐ ܡ̣ܶܢ ܢܶܟܝ̈ܳܢܶܐ ܕܦܳܥ̈ܠܐܷ ܒܺܝ̈ܫܶܐ ܐܰܝܟܰܢܳܐ ܕܡ̣ܶܢ ܦܽܘܡܳܐ ܕܟܽܠܗܽܘܢ ܝܰܠܕ̈ܶܝܗ̇ ܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܩܰܒܶܠ ܡܳܪܝ ܡ̣ܶܢ ܐܺܝܕܰܝ̈ܢ ܚܰܠܳܫ̈ܳܬܳܐ: ܠܦܺܝܪܡܳܐ ܗܳܢܳܐ ܕܰܒܚܽܘܒܳܐ ܘܗܰܝܡܳܢܽܘܬܳܐ ܡܩܰܪܒܳܐ ܠܳܟ ܡܰܪܥܺܝܬܳܟ ܙܒܺܝܢܰܬ݀ ܒܰܕܡܳܐ ܕܺܝܠܳܟ ܝܰܩܺܝܪܳܐ: ܕܡܶܫܬܰܒܗܪܳܐ ܒܚܰܫܰܝ̈ܟ ܘܣܳܓܕܳܐ ܘܰܡܚܰܒܒܳܐ ܠܰܙܩܺܝܦܽܘܬܳܟ: ܘܡܰܘܕܝܳܐ ܠܰܩܝܳܡܬܳܟ ܡܫܰܒܰܚܬܳܐ ܕܰܫܪܳܬ݀ ܠܰܚܒܳܠܐܴ ܕܢܰܦ̈ܫܳܬܰܢ ܟܰܕ ܟܽܠܰܢ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܚܘܬܡܐ

 

ܡܫܺܝܚܳܐ ܪܳܥܝܳܐ ܫܰܪܺܝܪܳܐ ܗ̇ܰܘ ܕܥ̣ܰܠ ܒܬܰܪ̈ܥܶܐ ܐܰܚܺܝ̣̈ܕܶܐ ܕܥܶܠܺܝܬܳܐ ܠܘܳܬ ܫܠܺܝ̈ܚܶܐ ܩܰܕܺܝ̈ܫܶܐ ܕܺܝܠܶܗ: ܗ̣ܽܘ ܢܰܫܘܶܐ ܠܰܢ ܠܛܽܘܒܬܳܢܽܘܬܳܐ ܕܰܐܝܠܶܝܢ ܕܠܐܴ ܚܙܰܐܘܽܘܗܝ ܘܗܰܝܡ̣ܶܢܘ ܒܶܗ: ܘܥܰܡ ܐܰܝܠܶܝܢ ܕܓܰܫ̣ܘ ܠܕܰܦܢܶܗ ܡܰܐܚܝ̇ܳܢܺܝܬܳܐ ܘܰܐܘܕܺܝܘ ܒܶܗ: ܘܰܚ̣ܙܰܘ ܠܕܽܘܟܰܬ݀ ܠܽܘܟܳܝܬܳܐ ܘܠܐܴ ܐܶܬܦܰܠܰܓܘ ܥܠܰܘܗܝ ܚܢܰܢ ܡܰܘܕܶܝܢܰܢ ܠܳܟ ܕܰܐܢ̱ܬ ܐܺܝܬܰܝܟ ܐܠܰܗܳܐ ܫܰܪܺܝܪܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܦܳܪܽܘܩܳܐ ܕܒܰܩܝܳܡܬܶܗ ܦܳܪܽܘܩܳܝܬܳܐ ܦܰܪܩܳܗ̇ ܠܥܺܕܬܶܗ ܡ̣ܶܢ ܛܳܥܝܽܘܬܳܐ: ܠܗ̇ܰܘ ܕܰܒܢܽܘܚܳܡܶܗ ܚܰܕܺܝ ܘܰܐܦܨܰܚ ܠܝܳܪܬܽܘܬܶܗ: ܘܒܰܫܠܳܡܶܗ ܫܰܪܰܪ ܠܰܫܠܺܝ̈ܚܰܘܗܝ ܘܰܒܚܽܘܒܶܗ ܚܰܟܶܡ ܠܬܰܠܡܺܝ̈ܕܰܘܗܝ: ܘܰܒܝܽܘܡ ܣܽܘܠܳܩܶܗ ܚܰܘܺܝ ܐܶܢܽܘܢ ܪܶܚܡܬܶܗ: ܕܪܽܘܚܳܐ ܩܰܕܺܝܫܳܐ ܢܫܰܕܰܪ ܠܗܽܘܢ ܘܰܢܒܰܝܰܐܐ ܐܶܢܽܘܢ: ܕܠܶܗ ܝ̇ܳܐܶܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܡܰܠܟܳܐ ܕܡܰܠܟ̈ܶܐ ܘܡܳܪܶܐ ܡܳܪ̈ܰܘܳܬܳܐ: ܝܺܚܺܝܕܳܝܶܗ ܕܰܐܒܳܐ ܡܶܠܬܳܐ ܡܬܽܘܡܳܝܳܐ ܕܶܐܬܓܰܫܰܡ ܘܶܐܬܒܰܣܰܪ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܠܐܴ ܡܶܫܬܰܚܠܦܳܢܳܐܺܝܬ: ܘܰܡܠܺܝ ܟܽܠܳܗ̇ ܡܕܰܒܪܳܢܽܘܬܶܗ ܬܡܺܝܗܬܳܐ ܚܠܳܦܰܝܢ ܚܰܛܳܝ̈ܶܐ: ܘܰܥܡ̣ܰܕ ܒܝܽܘܪܕܢܳܢ ܢܰܗܪܳܐ ܡ̣ܶܢ ܝܽܘܚܰܢܳܢ ܟܳܪܽܘܙܶܗ: ܐܰܝܟܰܢܳܐ ܕܰܢܚܰܠܶܠ ܠܗ̇ܰܘ ܨܰܚܢܳܐ ܐܳܕܳܡ ܕܶܐܙܕܰܠܰܠ ܒܶܝܬ ܐܺܝܠܳܢ̈ܶܐ. ܘܰܣܥ̣ܰܪ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܘܰܓܒܰܪ̈ܘܳܬܳܐ ܣܰܓܺܝ̈ܳܐܬܳܐ ܡܶܛܽܠ ܦܽܘܪܩܳܢܰܢ: ܘܰܣܠ̣ܶܩ ܠܰܨܠܺܝܒܳܐ ܕܚܶܣܕܳܐ ܘܩܰܒܶܠ ܥܠܰܘܗܝ ܚܰܫ̈ܶܐ ܘܨܰܥܪܳܐ ܘܰܙܩܺܝܦܳܐ ܘܰܩܒܽܘܪܬܳܐ ܐ̱ܢܳܫܳܝܬܳܐ: ܘܡܺܝܬ ܐܰܝܟ ܟܽܠ ܒܰܪܢܳܫ ܕܰܫܦ̣ܰܪ ܠܶܗ ܚܰܝܳܐ ܕܠܐܴ ܡܳܐܶܬ: ܘܶܐܬܢܰܚܰܡ ܘܩܳܡ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܰܦ̣ܪܰܩ ܘܚܰܪܰܪ ܠܓܶܢܣܳܐ ܕܺܝܠܰܢ ܡ̣ܶܢ ܕܶܚܠܰܬ݀ ܫܺܐܕ̈ܶܐ ܒܰܩܝܳܡܬܶܗ: ܘܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗܝ ܥܰܠ ܢܽܘܚܳܡܶܗ ܫܒܺܝܚܳܐ: ܘܥ̣ܰܠ ܠܥܶܠܺܝܬܳܐ ܟܰܕ ܟܢܺܝܫܺܝܢ ܟܽܠܗܽܘܢ ܬܰܠܡܺܝ̈ܕܶܐ ܘܩܳܡ ܒܰܡܨܰܥܬܳܐ: ܘܟܰܕ ܚܙܰܐܘܽܘܗܝ ܘܙܳܥ̣ܘ ܘܶܐܬܒܰܠܗܺܝܘ ܘܠܰܒܶܒܘ ܐܶܢܽܘܢ ܘܶܐܡ̣ܰܪ ܠܗܽܘܢ ܕܶܐܢܳܐ ܐܺܝܬܰܝ ܠܐܴ ܬܶܕܚܠܽܘܢ: ܫܠܳܡܳܐ ܥܰܡܟܽܘܢ ܐܳܘ ܩܰܢܺܝ̈ܛܶܐ ܬܰܠܡܺܝ̈ܕܶܐ ܕܰܓܒܺܝܬ: ܚܕܰܘ ܘܶܐܬܦܰܨܰܚܘ ܕܩܳܡ̇ܶܬ ܠܺܝ ܡ̣ܶܢ ܒܶܝܬ ܡܺܝ̈ܬܶܐ ܠܰܬܠܳܬܳܐ ܝܰܘ̈ܡܺܝܢ: ܫܠܳܡܳܐ ܥܰܡܟܽܘܢ ܚܰܒܺܝ̈ܒܶܐ ܕܰܓܒܺܝܬ ܠܐܴ ܬܶܟܪܶܐ ܠܟܽܘܢ ܕܕܳܫ̇ܶܬ ܠܡܰܘܬܳܐ ܘܰܙܟܺܝܬ ܠܣܳܛܳܢܳܐ: ܘܰܒܫܽܘܒܚܳܐ ܪܰܒܳܐ ܩܳܡ̇ܶܬ ܕܠܐܴ ܚܒ̇ܳܠܐܴ. ܘܢܶܚ̇ܬܶܬ ܐܰܟܪܙ̇ܶܬ ܘܙܶܪܥ̇ܶܬ ܚܰܝܰܬ݀ ܡܺܝ̈ܬܶܐ ܒܗܳܡܳܢ ܕܰܩܒܺܝܪ̈ܶܐ: ܡܶܟܺܝܠ ܫܠܳܡܳܐ ܕܺܝܠܝ ܝܳܗ̇ܶܒ ܐ̱ܢܳܐ ܠܟܽܘܢ ܫܠܳܡܳܐ ܕܺܝܠܝ ܫܳܒ̇ܶܩ ܐ̱ܢܳܐ ܠܟܽܘܢ: ܘܰܒܗܳܢܳܐ ܫܠܳܡܳܐ ܙܶܠܘ ܐܰܟܪܶܙܘ ܣܒܰܪܬܳܐ ܕܺܝܠܝ ܒܟܽܠܶܗ ܥܳܠܡܳܐ: ܘܟܰܕ ܠܰܟܪ̈ܺܝܗܶܐ ܒܚܰܝܠܐܴ ܕܺܝܠܝ ܡܰܐܣܶܝܢ ܐܢ̱ܬܽܘܢ ܘܠܰܣܡܰܝ̈ܳܐ ܡܦܰܬܚܺܝܢ ܐܢ̱ܬܽܘܢ: ܘܰܠܡܺܝ̈ܬܶܐ ܡ̣ܶܢ ܩܰܒܪ̈ܶܐ ܡܩܺܝܡܺܝܢ ܐܢ̱ܬܽܘܢ: ܘܟܽܠ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܒܰܒܪܺܝܬܳܐ ܒܫܶܡܝ ܪܰܒܳܐ ܥܳܒܕܺܝܢ ܐܢ̱ܬܽܘܢ. ܘܟܰܕ ܐܰܪܡܺܝܘ ܦܶܣ̈ܶܐ ܫܠܺܝ̈ܚܶܐ ܩܰܕܺܝ̈ܫܶܐ ܘܰܢܦ̣ܰܩܘ ܐܰܟ̣ܪܶܙܘ ܒܰܒܪܺܝܬܳܐ: ܣܒܰܪܬܳܐ ܡܰܠܝܰܬ݀ ܚܰܝ̈ܶܐ ܘܚܰܕ̈ܘܳܬܳܐ ܠܰܡܗܰܝ̈ܡܢܶܐ: ܚܰܕ ܐܠܰܗܳܐ ܕܰܕܢܰܚ ܡ̣ܶܢ ܡܰܪܝܰܡ: ܚܰܕ ܡܳܪܝܳܐ ܕܰܣܠ̣ܶܩ ܠܰܨܠܺܝܒܳܐ ܘܦܰܪܩܰܢ: ܘܗ̣ܽܘ ܟܰܕ ܗ̣ܽܘ ܐܶܬܬܣܺܝܡ ܒܓܰܘ ܩܰܒܪܳܐ ܘܩܳܡ ܒܙܳܟܽܘܬܳܐ ܠܰܬܠܳܬܳܐ ܝܰܘ̈ܡܺܝܢ: ܘܰܣܠ̣ܶܩ ܠܰܫܡܰܝܳܐ ܒܫܽܘܒܚܳܐ ܘܙܰܘܚܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܘܺܝܬܶܒ ܡ̣ܶܢ ܝܰܡܺܝܢܳܐ ܕܰܐܒܳܐ ܫܳܠܽܘܚܶܗ: ܘܗ̣ܽܘ ܥܬܺܝܕ ܕܢܺܐܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒܢ̈ܶܐ: ܕܢܶܦܪܽܘܥ ܠܟܽܠ ܐ̱ܢܳܫ ܐܰܝܟ ܡܶܕܶܡ ܕܰܣܥ̣ܰܪ. ܘܗܳܫܳܐ ܚܢܰܢ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܳܢܽܘܢ ܕܰܠܒܶܫ̣ܢܳܟ ܡ̣ܶܢ ܡܰܝ̈ܳܐ ܕܡܰܥܡܽܘܕܺܝܬܳܐ: ܕܰܬܫܰܟܶܢ ܠܰܢ ܕܢܶܗܘܶܐ ܝܳܪ̈ܬܶܐ ܕܛܽܘ̈ܒܶܐ ܗ̇ܳܢܽܘܢ ܕܰܫܡܰܝ̈ܳܢܶܐ: ܘܚܰܝ̈ܶܐ ܠܐܴ ܡܶܬܚܰܒ̈ܠܳܢܶܐ: ܐܰܫܘܳܐ ܠܰܢ ܡܳܪܝܳܐ ܡܪܰܚܡܳܢܳܐ ܒܛܰܝܒܽܘܬܳܟ: ܘܰܠܥܰܢܺܝ̈ܕܰܝܢ ܒܰܡܪܰܚܡܳܢܽܘܬܳܟ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ: ܘܰܠܓܰܠܝܽܘܬ ܐܰܦ̈ܶܐ ܕܰܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ ܕܠܐܴ ܒܶܗܬܬܳܐ ܕܰܚܛܺܝܬܳܐ: ܘܰܐܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܥܢ̣ܰܕܘ ܡ̣ܶܢ ܚܰܝ̈ܶܐ ܗܳܠܶܝܢ ܒܰܬܪܺܝܨܽܘܬ ܫܽܘܒܚܳܐ ܘܰܐܩܺܝܡ ܐܶܢܽܘܢ ܡ̣ܶܢ ܝܰܡܺܝܢܳܟ ܒܝܰܘܡܳܐ ܕܓܶܠܝܳܢܳܟ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܢܽܘܗܪܳܐ ܠܐܴ ܡܶܬܩܰܪܒܳܢܳܐ: ܠܗ̇ܰܘ ܚܰܝܠܐܴ ܡܶܬܡܰܠܠܳܢܳܐ: ܘܚܶܟܡܬܳܐ ܠܐܴ ܡܶܬܦܰܫܩܳܢܺܝܬܳܐ: ܠܗ̇ܳܝ ܪܰܒܽܘܬܳܐ ܠܐܴ ܡܰܘܦܝܳܢܺܝܬܳܐ. ܘܫܽܘܦܪܳܐ ܠܐܴ ܡܶܬܦܰܚܡܳܢܳܐ ܟܝܳܢܳܐ ܠܐܴ ܒܰܪܝܳܐ: ܘܫܽܘܠܛܳܢܳܐ ܡܳܪܳܢܳܝܳܐ: ܗ̇ܰܘ ܕܒܰܩܝܳܡܬܶܗ ܦܳܪܽܘܩܳܝܬܳܐ ܫܰܟܶܢ ܠܰܢ ܥܽܘܕܪ̈ܳܢܶܐ ܘܰܡܫܰܡܠܰܝ̈ܳܐ ܘܰܕܪܰܫ̣ ܠܰܢ ܐܽܘܪܚܳܐ ܠܘܳܬ ܐܰܒܽܘܗܝ ܡܫܰܒܚܳܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ ܗ̇ܳܝ ܚܰܝ̈ܶܐ ܘܰܩܝܳܡܬܳܐ ܕܟܽܠܗܽܘܢ ܐܰܝܠܶܝܢ ܕܒܳܟ ܡܗܰܝܡܢܺܝܢ: ܡܶܠܬܳܐ ܘܚܰܝ̈ܶܐ ܕܡ̣ܶܢ ܐܠܰܗܳܐ ܐܰܒܳܐ: ܗ̇ܰܘ ܪܳܥܝܳܐ ܛܳܒܳܐ ܕܰܗ̣ܘܳܐ ܥܶܪܒܳܐ: ܘܶܐܬܕܒܰܚ ܥܰܠ ܐܰܦ̈ܰܝ ܡܰܪܥܺܝܬܶܗ: ܘܒܰܕܒܺܝܚܽܘܬܶܗ ܚܰܝܬܳܐ ܐܶܬܚܰܣܝܰܬ݀ ܟܽܠܳܗ̇ ܒܪܺܝܬܳܐ: ܗ̇ܰܘ ܕܫܽܘܠܛܳܢܳܐ ܐܺܝܬ ܠܳܟ ܐܰܝܟܰܢܳܐ ܕܰܬܣܺܝܡ ܢܰܦܫܳܟ ܚܠܳܦ ܥܶܪ̈ܒܰܝܟ ܡܠܺܝ̣̈ܠܐܷ: ܘܰܩܢܶܐ ܐܢ̱ܬ ܫܽܘܠܛܳܢܳܐ ܠܘܳܬ ܗ̇ܳܝ ܕܬܶܣܒܶܝܗ̇: ܒܗ̇ܳܝ ܕܰܫܘܶܐ ܐܰܢ̱ܬ ܒܰܡܬܽܘܡܳܝܽܘܬܳܐ ܘܰܒܒܳܪܽܘܝܽܘܬܳܐ ܠܐܱܒܳܐ ܘܰܠܪܽܘܚܳܐ ܩܰܕܺܝܫܳܐ: ܗ̇ܰܘ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܒܢ̈ܰܝ ܐ̱ܢܳܫ̈ܳܐ ܡܰܘܬܳܐ ܨܶܒܝܳܢܳܐܺܝܬ ܥܰܠ ܨܠܺܝܒܳܐ ܒܰܒܣܰܪ ܣܰܝܒ̣ܰܪܬ: ܘܰܒܝܰܕ ܡܰܘܬܳܟ ܡܰܥܒܶܕ ܚܰܝ̈ܶܐ ܐܰܡܺܝܬܬ ܠܡܰܘܬܳܐ ܕܰܥܠܰܝܢ ܐܰܡܠ̣ܶܟ ܡ̣ܶܢ ܣܰܓܺܝ̈ܶܐܐ ܘܰܠܒܰܪܢܳܫܳܐ ܗ̇ܰܘ ܕܡܺܝܬ ܒܰܚܛܺܝܬܳܐ ܘܶܐܬܚܰܒܰܠ ܐܰܚܺܝܬܳܝܗܝ: ܘܰܫ̣ܪܰܝܬ ܠܠܰܘܛܬܳܐ ܕܒܰܥܒ̇ܳܪ ܦܽܘܩܕܳܢܳܐ ܥܰܠ ܐܳܕܳܡ ܐܶܬܓܰܙܪܰܬ݀: ܘܰܒܠܐܴ ܡܳܝܽܘܬܽܘܬܳܐ ܫܰܘܬܶܦܬ ܐܶܢܽܘܢ. ܘܡܶܛܽܠ ܛܥܳܡܬܳܐ ܡܰܪܺܝܪܬܳܐ ܕܒܰܥܒ̇ܳܪ ܦܽܘܩܕܳܢܳܐ ܐܶܬܛܪܶܕ ܗ̣ܽܘ ܘܝܰܠܕ̈ܰܘܗܝ ܠܐܱܪܥܳܐ ܢܽܘܟܪܳܝܬܳܐ ܘܰܗ̣ܘܳܐ ܬܚܶܝܬ ܫܽܘܥܒܳܕܶܗ ܕܰܒܥܶܠܕܰܐܪܳܐ ܐܠܰܦ̈ܶܐ ܘܕܳܪ̈ܶܐ ܕܰܫܢܰܝ̈ܳܐ: ܘܰܒܝܰܕ ܩܝܳܡܬܳܟ ܡܫܰܒܰܚܬܳܐ ܡܠ̣ܰܝܬ ܚܰܕܽܘܬܳܐ ܘܰܦܨܺܝܚܽܘܬܳܐ ܠܰܫܡܰܝܳܐ ܘܠܐܱܪܥܳܐ: ܘܰܒܝܰܕ ܡܰܚܰܬܬܳܟ ܕܠܰܫܝܽܘܠ ܘܰܠܚ̈ܶܙܶܐ ܥܰܡܺܝ̈ܩܶܐ ܕܗܳܡܳܢ ܒܢܽܘܗܪܳܐ ܕܺܝܠܳܟ ܐܰܨܡ̣ܰܚܬ: ܘܰܠܢܰܦ̈ܫܳܬܳܐ ܕܩܰܕܺܝ̈ܫܶܐ ܕܬܰܡܳܢ ܚܒܺܝ̣̈ܫܳܢ ܗ̣ܘ̈ܰܝ ܡ̣ܶܢ ܥܰܒܕܽܘܬܳܐ ܚ̣ܰܪܰܪܬ. ܘܟܰܕ ܣܠ̣ܶܩܬ ܡ̣ܶܢ ܓܰܘ ܫܝܽܘܠ ܬܰܪ̈ܥܶܐ ܥܰܫܺܝ̣̈ܢܶܐ ܕܗܳܡܳܢ ܫܚ̣ܰܩܬ ܘܡܽܘ̈ܟܠܐܷ ܗ̇ܳܢܽܘܢ ܦܰܪ̈ܙܠܳܝܶܐ ܓܰܕܶܡ̣ܬ: ܘܒܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܚܰܝ̈ܶܐ ܘܚܰܕ̈ܘܳܬܳܐ ܠܰܒܪܺܝܬܳܐ ܫܰܟܶܢ̣ܬ. ܘܒܽܘܟܪܳܐ ܕܡ̣ܶܢ ܒܶܝܬ ܡܺܝ̈ܬܶܐ ܒܰܐܚ̈ܶܐ ܣܰܓܺܝ̈ܶܐܐ ܗܘ̣ܰܝܬ: ܘܪܺܝܫܺܝܬܳܐ ܕܠܐܴ ܡܳܝܽܘܬܽܘܬܳܐ ܘܠܐܴ ܡܶܬܚܰܒܠܳܢܽܘܬܳܐ ܐܰܩܺܝܡܬ ܠܰܢ: ܘܟܰܕ ܒܬܰܪ̈ܥܶܐ ܐܰܚܺܝ̣̈ܕܶܐ ܕܥܶܠܺܝܬܳܐ ܥܰܠ̣ܬ: ܘܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܐܶܬܚܙܰܝܬ. ܘܡ̣ܶܢ ܒܳܬܰܪ ܩܝܳܡܬܳܟ ܡܫܰܒܰܚܬܳܐ ܫ̣ܰܪܰܪܬ ܐܶܢܽܘܢ ܥܰܠ ܢܽܘܚܳܡܳܟ ܡܠܐܷ ܬܶܗܪܳܐ: ܗ̇ܰܘ ܕܠܐܴ ܡܶܫܬܰܚܠܦܳܢܳܐܺܝܬ ܡܶܛܽܠܳܬܰܢ ܐܶܬܒܰܪܢܰܫ̣ܬ: ܘܨܶܒܝܳܢܳܐܺܝܬ ܚܰܫ̣ܬ: ܘܡܰܘܬܳܐ ܒܰܒܣܰܪ ܛܥܶܡ̣ܬ. ܘܥܰܡ ܡܺܝ̈ܬܶܐ ܝܰܘ̈ܡܶܐ ܬܠܳܬܳܐ ܩܰܘܺܝܬ: ܘܰܒܫܽܘܒܚܳܐ ܕܠܐܴ ܚܒܳܠܐܴ ܩܳܡ̣ܬ ܘܶܐܬܢܰܚܰܡ̣ܬ: ܘܒܰܕܓܽܘܢ ܐܰܝܟ ܫܠܺܝ̈ܚܶܐ ܩܰܕܺܝ̈ܫܶܐ ܡܰܘܕܶܝܢܰܢ ܕܚܰܕ ܗ̣ܽܘ ܟܝܳܢܳܐ ܕܡܶܠܬܳܐ ܐܠܰܗܳܐ ܕܶܐܬܒܰܣܰܪ. ܘܰܠܛܽܘܡܣܳܐ ܚܰܢܦܳܝܳܐ ܕܠܐܷܘܳܢ ܡܰܣܠܶܝܢܰܢ ܘܰܠܣܽܘܢܢܰܗܕܳܘܣ ܪܰܫܺܝܥܬܳܐ ܘܚܰܢܦܳܝܬܳܐ ܡܰܚܪܡܺܝܢܺܢ: ܕܰܬܪܶܝܢ ܟܝܳܢ̈ܶܐ ܐܠܰܦܰܬ݀ ܒܗ̇ܰܘ ܕܠܐܴ ܡܶܬܥܰܩܰܒ ܘܰܚܒܳܠܐܴ ܡܰܘܒܕܳܢܳܐ ܥܰܠ ܥܺܕܬܳܟ ܐܰܥܠܰܬ݀: ܐܶܠܐܴ ܚܢܰܢ ܕܗܰܝܡܳܢܽܘܬܳܐ ܫܠܺܝܚܳܝܬܳܐ ܩܰܒܶܠܢܰܢ: ܗ̇ܳܝ ܕܥܰܠ ܐܰܦܶܝ̈ܗ̇ ܚܰܫ̈ܶܐ ܣܳܒܠܺܝܢܰܢ: ܘܰܠܣܰܒܪܳܐ ܠܐܴ ܡܰܒܗܬܳܢܳܐ ܡܣܰܟܶܝܢܰܢ: ܘܟܰܕ ܠܝܰܘܡܳܐ ܗܳܢܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܡܥܰܕܥܕܺܝܢܰܢ: ܟܰܕ ܒܚܰܝ̈ܶܐ ܚܰܕ̈ܬܶܐ ܡܶܬܕܰܒܪܺܝܢܰܢ: ܐܰܩܺܝܡ ܠܰܢ ܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܫܳܘ̈ܝܰܝ ܒܪ̈ܶܦܣܶܐ ܚܰܘܳܐ ܠܰܢ. ܥܰܡ ܗ̇ܳܢܽܘܢ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ: ܗ̇ܳܢܽܘܢ ܕܰܒܝܰܕ ܨܠܰܘ̈ܳܬܗܽܘܢ ܘܰܒܬܰܟܫ̈ܦܳܬܗܽܘܢ ܡܦܺܝܣܺܝܢܰܢ ܠܛܰܝܒܽܘܬܳܟ ܕܰܬܦܰܨܶܐ ܠܰܢ ܡ̣ܶܢ ܗܰܝܡܳܢܽܘܬܳܐ ܐܰܪܺܝܛܺܝܩܳܝܬܳܐ: ܘܠܐܴ ܬܡܺܝܬ ܠܰܢ ܡܰܘܬܳܐ ܬܶܢܝܳܢܳܐ ܗ̇ܰܘ ܕܰܚܛܺܝܬܳܐ. ܟܰܕ ܡܫܰܘܙܶܒ ܐܰܢ̱ܬ ܠܰܢ ܡ̣ܶܢ ܚܶܫܽܘܟܳܐ ܒܰܪܝܳܐ ܕܰܠܟܳܦܪ̈ܰܝ ܒܰܡܕܰܒܪܳܢܽܘܬܳܟ ܡܛܰܝܰܒ ܘܶܐܬܥܰܗܰܕ ܥܰܢܺܝ̈ܕܰܝܢ ܡܗܰܝܡ̈ܢܶܐ ܐܰܝܠܶܝܢ ܕܰܒܗܰܝܡܳܢܽܘܬܳܐ ܬܪܺܝܨܬܳܐ ܩܰܕܶܡܘ ܐܶܬܬܢܺܝܚܘ: ܒܪܶܚܡܰܬ݀ ܐ̱ܢܳܫܽܘܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܫܰܝܢܳܐ ܕܫܰܝܶܢ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ ܒܩܶܛܠܶܗ ܘܰܐܘܺܝ ܠܰܦܠܺܝ̈ܓܶܐ ܥܰܠ ܢܽܘܚܳܡܶܗ: ܘܪܰܥܺܝ ܠܰܬܪ̈ܰܝܗܽܘܢ ܓܰܒ̈ܶܐ ܒܡܶܐܬܺܝܬܶܗ: ܫܰܝܶܢ ܡܳܪܝ ܠܥܺܕܬܳܟ ܒܰܩܝܳܡܬܳܟ ܘܰܙܪܽܘܥ ܫܠܳܡܳܟ ܒܡܰܪܥܺܝܬܳܟ ܘܰܛܪܽܘܕ ܚܣܳܡܳܐ ܘܰܐܟܬܳܐ ܡ̣ܶܢ ܥܰܡܳܟ ܘܥܳܢ̈ܳܟ ܘܟܶܢܫܳܟ: ܐܰܝܟܰܢܳܐ ܕܰܒܠܶܒܳܐ ܫܰܦܝܳܐ ܘܕܰܟܝܳܐ ܢܰܘܕܶܐ ܠܳܟ: ܘܰܒܣܶܦܘ̈ܳܬܳܐ ܕܰܟܝ̈ܳܬܳܐ ܬܰܘܕ̈ܝܳܬܳܐܳ ܢܩܰܪܶܒ ܠܳܟ: ܘܰܢܫܰܒܰܚ ܠܳܟ ܬܶܫܒ̈ܚܳܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ ܠܗ̇ܰܘ ܝܰܠܕܳܐ ܠܐܴ ܙܰܒܢܳܝܳܐ ܕܰܗ̣ܘܳܐ ܒܪܳܐ ܠܰܒܬܽܘܠܬܳܐ: ܘܰܗ̣ܘܳܐ ܠܶܗ ܬܚܶܝܬ ܙܰܒܢܳܐ: ܘܶܐܬܚܰܝܰܕ ܥܰܡ ܒܶܣܪܳܐ ܡܢܰܦܫܳܐ: ܚܕܳܝܽܘܬܳܐ ܩܢܽܘܡܳܝܬܳܐ ܘܰܟܝܳܢܳܝܬܳܐ: ܠܗ̇ܰܘ ܕܰܒܦܰܓܪܳܐ ܡܳܝܽܘܬܳܐ ܘܡܶܬܚܰܒܠܳܢܳܐ ܣܥ̣ܰܪ ܚܰܝ̈ܠܐܷ ܘܳܐܬܘ̈ܳܬܳܐ ܒܰܒܪܺܝܬܳܐ: ܘܰܣܒ̣ܰܠ ܚܰܫ̈ܶܐ ܘܰܙܩܺܝܦܳܐ ܘܡܰܘܬܳܐ ܘܰܩܒܽܘܪܬܳܐ ܬܠܺܝܬܳܐܝܰܬ݀ ܝܰܘ̈ܡܶܐ: ܠܗ̇ܰܘ ܕܩܳܡ ܒܫܽܘܒܚܳܐ ܡ̣ܶܢ ܩܰܒܪܳܐ ܕܠܐܴ ܚܒܳܠܐܴ ܠܰܬܠܳܬܳܐ ܝܰܘ̈ܡܺܝܢ: ܘܶܐܬܥܰܠܺܝ ܠܰܫܡܰܝܳܐ ܒܳܬܰܪ ܫܽܘܡܠܳܝ ܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ: ܘܰܐܥ̣ܬܰܪ ܒܫܽܘܟܳܢܰܘ̈ܗܝ ܠܓܽܘܕܳܐ ܕܰܫܠܺܝܚܽܘܬܳܐ: ܘܝܰܗ̣ܒ ܒܺܐܝܕܰܝ̈ܗܽܘܢ ܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ ܘܰܕܟܽܠܳܗ̇ ܒܪܺܝܬܳܐ: ܕܠܶܗ ܠܗ̇ܰܘ ܕܰܐܫܠ̣ܶܛ ܐܶܢܽܘܢ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܫܽܘܒܚܳܐ ܠܳܟ ܪܳܥܝܳܐ ܛܳܒܳܐ ܘܒܰܣܺܝܡܳܐ: ܡܪܰܚܡܳܢܳܐ ܘܰܡܪܰܚܦܳܢܳܐ: ܕܪ̈ܰܚܡܰܝܟ ܢܰܓܕܽܘܟ ܠܰܒܥܳܬܶܗ ܕܥܶܪܒܳܐ ܐܰܒܺܝܕܳܐ ܘܰܐܦܶܩܬܳܝܗܝ ܡ̣ܶܢ ܚܠܺܝ̣̈ܠܐܷ ܕܰܐܪܥܳܐ. ܘܡ̣ܶܢ ܚܶܙ̈ܶܐ ܗܰܘܬܳܢܳܝ̈ܶܐ ܕܰܫܝܽܘܠ ܒܳܠܰܥܬܳܐ ܘܰܕܪܰܫ̣ܬ ܫܒܺܝ̈ܠܐܷ ܠܰܩܒܺܝܪ̈ܶܐ: ܕܢܶܪܕܽܘܢ ܒܳܬܪܳܟ ܠܒܶܝܬ ܚܰܝ̈ܶܐ: ܘܚܰܝ̣ܶܕܬ ܠܛܶܟ̈ܣܶܐ ܡܰܠܐܱܟܳܝ̈ܶܐ ܘܰܠܓܽܘܕܳܐ ܕܰܐܪ̈ܥܳܢܳܝܶܐ: ܕܰܐܡܺܝܢܳܐܺܝܬ ܡ̇ܰܢ ܢܩܰܠܣܽܘܢ ܠܐܱܠܳܗܽܘܬܳܟ ܪܳܡܰܬ݀ ܡ̣ܶܢ ܟܽܠ ܘܠܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ: ܬܰܘܕܺܝܬܳܐ ܠܳܟ ܢܽܘܗܪܳܐ ܡܬܽܘܡܳܝܳܐ ܕܰܐܙܠܶܓܬ ܕܶܢܚܳܟ ܥܰܠ ܥܰܡ̈ܡܶܐ ܒܡܶܬܓܰܠܝܳܢܽܘܬܳܟ: ܗܶܕܪܳܐ ܘܪܽܘܡܪܳܡܳܐ ܠܳܟ ܨܶܡܚܳܐ ܐܺܝܬܝܳܝܳܐ ܕܰܦ̣ܪܰܩ ܠܐܷܡܘ̈ܳܬܳܐ ܒܡܶܐܬܺܝܬܶܗ: ܩܽܘܠܳܣܳܐ ܠܳܟ ܟܰܣܝܳܐ ܕܶܐܬܓܠܺܝ ܒܰܒܣܪ ܠܡܶܬܥܰܡܪܳܢܺܝܬܳܐ ܘܦܰܪܩܰܢ ܡ̣ܶܢ ܐܺܝ̈ܕܰܝ ܒܺܝܫܳܐ ܒܰܩܢܽܘܡܶܗ: ܡܥܰܠܝܳܐ ܘܰܓܢܺܝܙܳܐ ܕܰܐܪܟܶܢ ܪܰܘܡܳܐ ܕܺܐܝܬܽܘܬܶܗ: ܘܰܢܚ̣ܶܬ ܓܳܫ ܬܗܽܘ̈ܡܶܐ ܕܰܫܝܽܘܠ ܒܓܰܢ̱ܒܳܪܽܘܬܶܗ: ܘܰܐܣܶܩ ܠܐܴܕܳܡ ܨܰܠܡܳܐ ܕܪܰܒܽܘܬܶܗ: ܦܳܪܽܘܩܳܐ ܕܰܐܕܢܰܚ ܒܶܝܬ ܡܺܝ̈ܬܶܐ ܣܰܒܪܳܐ ܕܰܩܝܳܡܬܶܗ: ܘܰܐܦܨܰܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܒܢܽܘܗܪܳܐ ܦܰܐܝܳܐ ܕܦܰܪܨܽܘܦܶܗ: ܚܰܝܳܐ ܘܡܰܐܚܝ̇ܳܢܳܐ ܕܰܐܚܺܝ ܡܺܝܬܽܘܬܰܢ ܒܡܰܘܬܶܗ ܘܢܰܚܶܡ ܩܒܺܝܪܽܘܬܰܢ ܒܰܩܒܽܘܪܬܶܗ ܘܚܰܕܶܬ ܥܰܬܺܝܩܽܘܬܰܢ ܒܢܽܘܚܳܡܶܗ ܘܰܐܥܺܝܪ ܕܰܡܟܽܘܬܰܢ ܒܩܳܠܶܗ. ܚܰܝܠܬܳܢܳܐ ܕܰܐܩܺܝܡܳܗ̇ ܠܡܰܦܽܘܠܬܰܢ ܒܙܳܟܽܘܬܶܗ ܘܬܰܪܶܨ ܟܦܺܝܦܽܘܬܰܢ ܒܚܶܟܡܬܶܗ: ܓܰܢ̱ܒܳܪܳܐ ܕܝܰܡܺܝܢܶܗ ܚܰܝܠܬܳܢܺܝܬܳܐ ܦܪܰܩܬܶܗ: ܘܰܕܪܳܥܶܗ ܩܰܕܺܝܫܳܐ ܪܰܡܪܡܶܗ: ܘܩܳܡ ܐܰܝܟ ܓܰܒܪܳܐ ܕܢܰܦܨܶܗ ܚܰܡܪܶܗ ܡܚ̣ܳܐ ܕܥܳܠܡܳܐ ܥܒ̣ܰܕ ܐܶܢܽܘܢ ܒܰܩܝܳܡܬܶܗ: ܝܰܘܡܳܢܳܐ ܐܰܪܦܺܝ ܐܶܢܽܘܢ ܠܢܰܚ̈ܬܶܐ ܕܰܩܒܽܘܪܬܶܗ: ܐܰܝܟ ܕܰܠܫܽܘܪܳܪܳܐ ܕܰܩܝܳܡܬܶܗ: ܘܶܐܬܥܰܛܰܦ ܗܶܕܪܳܐ ܘܓܰܐܝܽܘܬܳܐ ܘܶܐܬܬܰܨܡܰܚ ܢܽܘܗܪܶܗ ܒܰܒܪܺܝܬܳܐ. ܝܰܘܡܳܢܳܐ ܪܡ̣ܰܙ ܠܥܺܝܪ̈ܶܐ ܘܰܢܚ̣ܶܬ ܠܐܱܪܥܳܐ ܘܥܰܒܕܽܘܗ̇ ܫܡܰܝܳܐ ܚܕܰܬܳܐ: ܘܗܰܠܶܠ̣ܘ ܒܳܗ̇ ܒܙܰܘܥܳܐ: ܘܰܩ̣ܛܰܪܘ ܠܳܗ̇ ܟܠܺܝܠܐܴ ܘܬܳܐܓܳܐ ܒܬܰܘܕܺܝܬܳܐ ܕܟܺܝܬܳܐ. ܝܰܘܡܳܢܳܐ ܪ̈ܕܰܝ ܐܠܶܦ̈ܶܐ ܡܨܰܒ̈ܬܳܬܳܐ ܟܰܕ ܛܥܺܝ̣̈ܢܳܢ ܒܶܣ̈ܡܶܐ ܪ̈ܺܝܫܳܝܶܐ: ܕܰܢܒܰܣ̈ܡܳܢ ܠܦܰܓܪܶܗ ܩܰܕܺܝܫܳܐ: ܘܰܠܩܰܒܪܶܗ ܡܰܥܒܶܕ ܚܰܝ̈ܶܐ ܕܺܝܚܺܝܕܳܝܳܐ: ܘܰܗܦ̣ܰܟ̈ܝ ܐܰܝܬܺܝܶܝ̈ܢ ܚܠܳܦ ܗ̇ܳܢܽܘܢ ܣܰܒܪ̈ܳܬܳܐ ܚܰܕ̈ܬܳܬܳܐ ܠܬܰܠܡܺܝ̈ܕܶܐ: ܘܰܐܦܨܰܚ ܠܒܶܪ̈ܝܳܬܳܐ. ܝܰܘܡܳܢܳܐ ܛܳܣ̣ܘ ܢܶܫܪ̈ܶܐ ܩܰܠܺܝ̣̈ܠܐܷ ܒܶܐܒܪ̈ܶܐ ܕܪܶܚܡܬܳܐ ܨܶܝܕ ܩܰܒܪܳܐ ܝܰܡܳܐ ܕܰܚܢܳܢܳܐ ܘܰܡܬܰܩܘ ܡܶܢܶܗ ܝܽܘܠܦܳܢܳܐ ܡܚܰܕܝܳܢܳܐ ܠܩܶܢܳܐ ܕܦܰܪ̈ܽܘܓܶܐ ܕܰܒܥܶܠܺܝܬܳܐ. ܝܰܘܡܳܢܳܐ ܘܰܓܙܳܪܳܐ ܡܛܰܫܝܳܐ ܕܰܒܢ̈ܰܝ ܢܽܘܗܪܳܐ ܕܰܚܒܺܝܫ ܗ̣ܘܳܐ ܡ̣ܶܢ ܕܶܚܠܬܳܐ ܕܥܰܡܳܐ ܕܝܽܘ̈ܕܳܝܶܐ. ܝܰܘܡܳܢܳܐ ܐܰܝܟ ܓܰܝܳܣܳܐ ܚܰܠܨܳܗ̇ ܠܰܡܕܺܝܢ̱ܬܶܗ ܬܰܩܺܝܦܬܳܐ ܕܡܰܘܬܳܐ ܘܒܰܙ ܐܶܢܶܝܢ ܠܡܰܪ̈ܓܳܢܝܳܬܳܐ ܕܺܝܠܳܗ̇ ܝܰܩܺܝܪ̈ܳܬܳܐ ܘܓܽܘܢ̈ܒܶܝܗ̇ ܘܓܳܠܽܘܬܳܗ̇ ܐܰܥܕܺܝ ܘܰܐܪܡܺܝ ܠܒܶܝܬ ܡܺܝ̈ܬܶܐ ܢܽܘܚܳܡܳܐ: ܝܰܘܡܳܢܳܐ ܩܽܘܫܬܳܐ ܫܰܪܺܝܪܳܐ ܐܰܕܺܝܩ ܡ̣ܶܢ ܩܰܒܪܳܐ ܘܟܶܬܳܢ̈ܶܐ ܘܛܰܒ̈ܥܶܐ ܘܥܺܝܪ̈ܶܐ ܕܰܐܟ̣ܪܶܙܘ ܩܝܳܡܬܳܐ ܘܚܰܝ̈ܶܐ: ܝܰܘܡܳܢܳܐ ܒܶܝܬ ܬܰܚܬܳܝ̈ܶܐ ܐܶܣܬܰܒܰܪܘ ܢܽܘܚܳܡܶܗ ܦܨܺܝܚܳܐ ܘܒܶܝܬ ܥܶܠܳܝ̈ܶܐ ܩܽܘܕ̈ܳܫܶܐ ܡܫܰܕܪܺܝܢ ܠܐܱܬܪܳܐ ܕܰܫܟܺܝܢܬܶܗ ܕܡܰܠܟܳܐ ܕܡܰܠܟ̈ܶܐ ܕܰܦ̣ܪܰܩ ܠܡܰܪܥܺܝܬܶܗ ܡ̣ܶܢ ܐܺܝ̈ܕܰܝ ܒܥܶܠܕ̈ܒܳܒܶܐ: ܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܘܰܙܪܰܥ ܒܳܗ̇ ܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܡܪܰܥܝܳܢܳܐ. ܠܳܟ ܗܳܟܺܝܠ ܢܽܘܗܪܳܐ ܦܨܺܝܚܳܐ ܘܨܶܡܚܳܐ ܕܺܐܝܬܽܘܬܳܐ ܡܩܰܪܒܺܝܢܰܢ ܒܳܥܽܘܬܳܐ ܘܬܰܟܫܶܦܬܳܐ: ܘܥܰܡ ܥܶܛܪܳܐ ܕܒܶܣ̈ܡܶܐ ܛܳܒ̈ܶܐ ܒܗܳܢܳܐ ܝܰܘܡܳܐ ܩܰܕܺܝܫܳܐ ܘܥܺܐܕܳܐ ܕܚܰܕܽܘܬܳܐ ܘܕܰܕܝܳܨܳܐ: ܕܬܰܫܘܶܐ ܠܟܽܠܰܢ ܕܠܰܫܪܳܪܳܐ ܕܰܩܝܳܡܬܳܟ ܢܶܪܚܰܡ: ܘܒܳܬܰܪ ܢܽܘܗܪܳܐ ܕܢܽܘܚܳܡܳܟ ܢܶܪܗܰܛ: ܘܰܟܠܺܝܠ ܩܽܘ̈ܠܳܣܶܐ ܢܶܓܕܽܘܠ ܠܰܡܥܰܠܝܽܘܬܳܟ: ܘܢܰܚ̈ܬܶܐ ܫܒܺܝ̈ܚܶܐ ܠܡܶܫܬܽܘܬܳܟ ܢܥܰܬܶܕ: ܘܠܰܚܬܺܝܪܽܘܬܳܐ ܡܫܰܦܠܳܢܺܝܬܳܐ ܢܶܙܟܶܐ: ܘܰܠܣܶܢܶܐܬܳܐ ܘܰܚܣܳܡܳܐ ܢܶܒܣܽܘܪ: ܘܰܒܝܰܕ ܦܰܓܪܳܟ ܩܰܕܺܝܫܳܐ ܘܰܕܡܳܟ ܡܚܰܣܝܳܢܳܐ ܢܶܪܕܽܘܦ ܡܶܢܰܢ ܠܟܽܠܗܶܝܢ ܒܺܝ̈ܫܳܬܳܐ ܘܠܰܛܢܳܢܳܐ ܡܰܘܠܕܳܢܳܐ ܕܚܶܪ̈ܝܳܢܶܐ ܢܶܕܚܽܘܩ ܘܠܰܪ̈ܓܺܝܓܳܬܳܐ ܡܪ̈ܰܦܝܳܢܝܳܬܳܐ ܢܕܽܘܫ ܘܰܢܛܰܠܶܩ: ܘܰܠܚܽܘܫ̈ܳܒܶܐ ܫܟܺܝܪ̈ܶܐ ܘܰܡܨܰܥܪ̈ܶܐ ܢܩܰܦܰܚ: ܘܰܠܡܶܐܬܺܝܬܳܟ ܕܬܰܪܬܶܝܢ ܢܣܰܟܶܐ ܘܒܰܥܒ̇ܳܕ̈ܶܐ ܛܳܒ̈ܶܐ ܘܰܡܝܰܬܪ̈ܶܐ ܠܛܳܒܽܘܬܳܟ ܢܶܐܪܽܘܥ ܘܰܠܡܰܠܟܽܘܬܳܟ ܢܶܫܬܘܶܐ ܕܢܶܥܽܘܠ: ܘܠܰܓܢܽܘܢܳܟ ܫܒܺܝܚܳܐ ܘܰܡܠܐܷ ܚܰܕ̈ܘܳܬܳܐ ܢܡܰܢܰܥ: ܘܡ̣ܶܢ ܝܰܡܺܝܢܳܟ ܢܕܰܝܶܨ: ܘܰܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܒܟܶܢ̈ܫܶܐ ܕܰܡܢܺܝ̈ܚܳܢܰܝܟ ܢܶܬܡܢܶܐ. ܘܥܰܡܗܽܘܢ ܕܠܐܴ ܫܶܠܝܳܐ ܘܰܕܠܐܴ ܫܰܠܘܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܠܳܟ ܬܶܫܒܽܘܚܬܳܐ ܝܰܡܳܐ ܕܪ̈ܰܚܡܶܐ ܥܶܩܳܪ̈ܶܐ ܕܪ̈ܺܝܚܳܢܶܐ ܡܫܰܒ̈ܚܶܐ ܕܡ̣ܶܢ ܢܶܫ̈ܶܐ ܩܰܕܺܝ̣̈ܫܳܬܳܐ ܐܶܬܝܰܩ̣ܰܪܬ ܒܗܶܪ̈ܽܘܡܶܐ ܡܦܰܬܟ̈ܶܐ: ܟܰܕ ܐܰܢ̱ܬ ܝܳܗ̇ܶܒ ܐܰܢ̱ܬ ܣܰܘܩܳܐ ܘܰܢܫܰܡܬܳܐ ܠܟܽܠ ܕܚܰܝ ܗܰܒ ܐܳܦ ܠܰܢ ܡܳܪܝܳܐ ܕܰܢܩܰܪܶܒ ܠܳܟ ܥܶܛܪܳܐ ܡܪܰܥܝܳܢܳܐ: ܘܰܐܝܟ ܥܠܰܝ̈ܡܳܬܳܐ ܡܶܬܝܰܕܥܳܢ̈ܳܝܳܬܳܐ ܒܢܰܦ̈ܫܳܬܳܐ ܙܰܗܝ̈ܳܬܳܐ ܢܶܪܗܰܛ ܠܒܶܣ̈ܡܳܢܰܝܟ: ܘܥܰܡ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ ܢܶܥܽܘܠ ܠܩܰܝܛܽܘܢܳܐ ܕܺܝܠܳܟ ܘܰܢܝܰܒܶܒ ܠܳܟ ܬܶܫܒ̈ܚܳܬܳܐ ܦܰܐܝ̈ܳܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܚܘܬܡܐ

ܐܰܫܶܐܒ ܒܰܢ ܡܳܪܝ ܪܺܝܚ ܐܠܰܗܽܘܬܳܟ: ܘܦܽܘܚ ܒܰܢ ܪܽܘܚܳܟ ܩܰܕܺܝܫܳܐ: ܘܰܐܪܬܰܚ ܒܰܢ ܢܽܘܪ ܪܶܚܡܬܳܟ: ܘܰܐܫܪܺܝ ܒܠܶܒܰܢ ܚܽܘܒܳܟ ܫܰܪܺܝܪܳܐ: ܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ: ܘܰܐܫܦ̣ܰܥ ܥܠܰܝܢ ܪ̈ܰܚܡܰܝܟ ܘܰܚܢܳܢܳܟ ܘܰܐܣܓܳܐ ܠܘܳܬܰܢ ܒܽܘܪ̈ܟܳܬܳܟ: ܕܢܰܘܕܶܐ ܠܡܳܪܽܘܬܳܟ ܘܢܶܣܓܽܘܕ ܠܐܻܝܬܽܘܬܳܟ ܘܰܢܫܰܒܰܚ ܠܪܶܚܡܰܬ݀ ܐ̱ܢܳܫܽܘܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܐܺܝܬܝܳܐ ܡܬܽܘܡܳܝܳܐ ܕܡ̣ܶܢ ܒܪܺܝܫܺܝܬ ܐܺܝܬܰܘܗܝ: ܘܠܰܝܬ ܠܶܗ ܫܽܘܪܳܝܳܐ: ܘܰܠܥܳܠܡܺܝܢ ܘܰܡܩܰܘܶܐ ܘܫܽܘܠܳܡܳܐ ܠܰܝܬ ܠܶܗ. ܐܰܒܳܐ ܕܠܰܝܬ ܠܶܗ ܐܰܒܳܐ ܠܥܶܠ ܡܶܢܶܗ: ܘܰܒܪܳܐ ܕܠܰܝܬ ܠܶܗ ܐܰܚܳܐ ܕܕܳܡ̇ܶܐ ܠܶܗ: ܘܪܽܘܚܳܐ ܕܡܶܢܶܗ ܡܶܬܺܝܕܰܥ ܘܺܐܝܬܰܘܗܝ ܐܰܟܘܳܬܗܽܘܢ ܘܰܒܫܽܘܠܛܳܢܳܐ ܘܰܟܝܳܢܳܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܚܰܕ ܟܝܳܢܳܐ ܚܰܕ ܨܶܒܝܳܢܳܐ: ܘܰܚܕܳܐ ܡܳܪܽܘܬܳܐ ܚܰܕ ܐܠܰܗܳܐ ܫܰܪܺܝܪܳܐ ܕܡܶܢܟܽܠ ܡܶܫܬܰܒܰܚ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܝܰܠܕܳܐ ܓܢܺܝܙܳܐ ܕܡ̣ܶܢ ܐܰܒܳܐ ܡܬܽܘܡܳܝܳܐ ܠܗܰܠ ܡܶܢ ܙܰܒܢ̈ܶܐ ܡܶܢܶܗ ܨܡܰܚ̣ܬ. ܘܟܰܕ ܠܐܴ ܣܢܺܝܩܳܐ ܐܰܢ̱ܬ ܠܳܟ ܣܰܪܶܩ̣ܬ ܘܰܗܘ̣ܰܝܬ ܫܰܪܺܝܪܳܐܺܝܬ ܒܰܪܢܳܫܳܐ ܘܒܽܘܟܪܳܐ ܕܰܥܡܺܝ̈ܕܶܐ ܕܬܰܘܠܶܕ ܠܰܢ ܒܡܰܘܠܳܕܳܐ ܬܪܰܝܳܢܳܐ ܕܡܰܥܡܽܘܕܺܝܬܳܐ: ܘܪܽܘܚܳܢܳܐܺܝܬ ܬܶܥܒܶܕ ܠܰܢ ܐܰܚ̈ܶܐ ܘܰܒܢ̈ܰܝ ܝܳܪܬܽܘܬܳܐ ܕܺܝܠܳܟ: ܘܰܡܕܰܒܪܳܢܽܘܬܳܟ ܟܽܠܳܗ̇ ܚܠܳܦܰܝܢ ܫܰܡܠܺܝܬ: ܘܡܰܘܬܳܐ ܕܰܒܝܰܕ ܨܠܺܝܒܳܐ ܩܰܒܠ̣ܶܬ: ܘܰܒܩܰܒܪܳܐ ܝܰܘ̈ܡܶܐ ܬܠܳܬܳܐ ܩܰܘܺܝܬ: ܓܰܢ̱ܒܳܪܳܐܺܝܬ ܩܳܡ̣ܬ ܡ̣ܶܢ ܩܰܒܪܳܐ: ܘܰܒܫܽܘܒܚܳܐ ܕܠܐܴ ܡܶܬܡܰܠܰܠ ܐܶܬܢܰܚܰܡ̣ܬ ܘܰܠܢܰܟ̈ܦܳܬܳܐ ܐܶܬܚܰܘܺܝܬ ܘܚܰܕܽܘܬܳܐ ܡܠ̣ܰܝܬ ܠܠܶܒܰܘ̈ܳܬܗܶܝܢ: ܒܗ̇ܳܝ ܕܶܐܡ̣ܰܪܬ ܕܶܐܢܳܐ ܐܺܝܬܰܝ ܠܐܴ ܬܶܕܚ̈ܠܳܢ ܙܶܠܶܝ̈ܢ ܐܶܡܰܪ̈ܶܝܢ ܠܓܽܘܕܳܐ ܕܬܰܠܡܺܝ̈ܕܰܝ ܕܩܳܡ̇ܶܬ ܠܺܝ ܐܰܝܟ ܕܶܐܫܬܰܘܕܺܝܬ ܐܶܢܳܐ. ܘܠܰܓܠܺܝܠܐܴ ܩ̇ܳܕܶܡ ܐ̱ܢܳܐ ܠܟܽܘܢ: ܘܗ̇ܳܢܶܝ̈ܢ ܕܶܝܢ ܡ̣ܶܢ ܙܰܘܥܰܬܗܶܝܢ ܠܐܴ ܝܰܕܥܳܝܗܝ ܘܰܠܩܰܒܪܳܐ ܚ̣ܙܰܝ̈ ܕܰܡܣܰܦܰܩ: ܘܰܠܥܺܝܪܳܐ ܕܩܳܐܶܡ ܘܰܠܩܶܣܛܽܘܢܳܪ̈ܶܐ ܕܰܡܒܰܕܪܺܝܢ. ܘܡܶܢ ܬܰܡܳܢ ܡܰܠܐܱܟ̈ܶܐ ܕܰܡܝܰܒܒܺܝܢ: ܘܥܺܝܪ̈ܶܐ ܕܰܡܣܰܒܪܺܝܢ ܫܠܳܡܳܐ ܘܚܰܕܽܘܬܳܐ: ܩܰܒܪ̈ܶܐ ܕܡܶܬܦܰܬܚܺܝܢ: ܘܡܺܝ̈ܬܶܐ ܕܡܶܬܢܰܚܡܺܝܢ: ܘܰܫܠܺܝ̈ܚܶܐ ܕܡܶܬܟܰܢܫܺܝܢ: ܘܥܰܡ̈ܡܶܐ ܡܗܰܝ̈ܡܢܶܐ ܕܡܶܬܦܰܨܚܺܝܢ. ܒܗܳܢܳܐ ܓܶܝܪ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܰܢܚ̣ܶܬ ܠܰܢ ܡ̣ܶܢ ܩܰܒܪܳܐ ܟܡܺܝܪܳܐ: ܢܽܘܗܪܳܐ ܫܰܪܺܝܪܳܐ ܡܚܰܕܝܳܢܶܗ ܕܥܳܠܡܳܐ: ܘܡܰܦܨܚܳܢܳܐ ܕܒܶܪ̈ܝܳܬܳܐ: ܘܫܽܘܠܛܳܢܶܗ ܕܡܰܘܬܳܐ ܛܪܽܘܢܳܐ ܒܰܛܶܠ: ܘܰܣܓܺܝ ܣܰܒܪܳܐ ܘܒܽܘܝ̇ܳܐܳܐ ܠܚܰܝ̈ܶܐ ܘܰܠܡܺܝ̈ܬܶܐ ܕܰܐܘܕܺܝܘ ܒܰܩܝܳܡܬܳܟ ܫܰܪܺܝܪܳܐܺܝܬ: ܘܗܰܝܡ̣ܶܢܘ ܒܰܐܠܳܗܽܘܬܳܟ ܬܪܺܝܨܳܐܺܝܬ: ܘܒܶܗ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܰܩܝܳܡܬܳܟ ܘܰܡܙܰܡܢܳܢܺܝܬܳܐ ܕܛܳܒ̈ܳܬܰܢ: ܣܳܓܕܺܝܢܰܢ ܘܡܰܘܕܶܝܢܰܢ ܘܡܶܬܟܰܫܦܺܝܢܰܢ ܠܒܰܣܺܝܡܽܘܬܳܟ: ܕܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܢܶܬܩܰܒܰܠ ܩܕܳܡ ܬܪܽܘܢܳܘܣ ܕܪܰܒܽܘܬܳܟ: ܘܢܶܬܚܰܠܰܛ ܒܶܗ ܥܶܛܪܳܐ ܡܩܰܒܠܐܴ ܕܰܨܠܰܘ̈ܳܬܰܢ ܡܚܺܝ̣̈ܠܳܬܳܐ: ܘܢܶܗܘܶܐ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܕܟܽܠܳܗ̇ ܡܰܪܥܺܝܬܳܟ: ܘܰܠܥܽܘܕܪܳܢܳܐ ܘܠܐܴܣܝܽܘܬܳܐ ܕܟܽܠܗܽܘܢ ܟܪ̈ܺܝܗܶܐ ܘܰܐܠܺܝ̣̈ܨܶܐ: ܘܰܠܦܽܘܢܳܝܳܐ ܕܟܽܠܗܶܝܢ ܫ̈ܶܐܠܳܬܳܐ ܫܰܦܺܝܪ̈ܳܬܳܐ. ܘܕܰܐܝܠܶܝܢ ܕܫܶܐܠܘ ܘܫܳܐܠܶܝܢ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܘܰܠܥܽܘܗܕܳܢܳܐ ܛܳܒܳܐ ܕܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ: ܘܰܚܢܰܢ ܘܗ̣ܶܢܽܘܢ ܢܩܰܒܶܠ ܡܶܢܳܟ ܛܽܘ̈ܒܳܐ ܕܰܢܛܺܝܪܺܝܢ ܠܰܕܗܰܝܡܶܢ̣ܘ ܒܳܟ: ܘܢܰܣܶܩ ܠܳܟ ܫܽܘܒܚܳܐ ܘܺܐܝܩܳܪܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܫܠܡ ܫܬܝܬܝܐ ܕܛܟܣܐ ܡܨܥܝܐ ܕܩܝܡܬܐ

 

ܛܟܣܐ ܕܚܕ ܒܫܒܐ ܫܒܝܥܝܐ ܕܩܝܡܬܐ ܦܪܘܩܝܬܐ ܕܛܟܣܐ ܡܨܥܝܐ

 

ܩܕܡܝܬ ܨܠܘܬܐ ܕܫܘܪܝܐ

 

ܚܬܽܘܡ ܡܳܪܝ ܠܢܰܦ̈ܫܳܬܰܢ ܒܰܫܪܳܪܳܟ: ܘܢܰܛܰܪ ܠܚܰܝܰܝ̈ܢ ܒܰܨܠܺܝܒܳܟ: ܘܫܰܪܰܪ ܒܠܶܒܰܘ̈ܳܬܰܢ ܣܰܒܪܳܐ ܕܰܩܝܳܡܬܳܟ ܘܒܰܛܶܠ ܡܶܢܰܢ ܚܣܳܡܳܐ ܘܰܐܟܬܳܐ ܘܚܶܪܝܳܢܳܐ: ܘܕܰܥܶܟ ܡܶܢܰܢ ܒܰܚܢܳܢܳܟ ܠܟܽܠܗܽܘܢ ܩܪ̈ܳܒܰܘܗܝ ܕܰܒܥܶܠܕܒܳܒܳܐ: ܘܟܰܕ ܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܡܶܬܒܰܣܡܺܝܢܰܢ ܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܺܝܢܳܟ: ܒܝܰܘܡܳܐ ܕܡܶܐܬܺܝܬܳܟ: ܘܠܳܟ ܫܽܘܒܚܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܕܶܢܚܳܐ ܫܒܺܝܚܳܐ ܘܠܐܴ ܡܶܬܕܰܪܟܳܢܳܐ ܕܩܰܕܺܝܡ ܠܕܳܪ̈ܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ ܠܗ̇ܰܘ ܕܡ̣ܶܢ ܥܶܩܳܪܶܗ ܕܺܐܝܫܰܝ ܒܫܰܒܛܳܐ ܕܥܽܘܫܢܳܐ ܐܰܦ̣ܪܰܥ ܘܰܫܘܰܚ ܠܗ̇ܰܘ ܕܡܰܪܟܰܒܬܳܐ ܕܰܟܪ̈ܽܘܒܶܐ ܪܳܥܠܐܴ ܡ̣ܶܢ ܙܺܝܘܶܗ ܘܪܶܗܛܳܐ ܕܒܰܪ̈ܩܰܘܗܝ ܡܰܪܗܶܒ ܠܰܣܪ̈ܳܦܶܐ. ܠܗ̇ܰܘ ܕܰܪܟܺܝܒ ܥܰܠ ܥܢ̈ܳܢܶܐ ܘܛܳܐܶܣ ܥܰܠ ܟܶܢ̈ܦܶܐ ܕܪܽܘܚܳܐ: ܠܗ̇ܰܘ ܕܰܥܒ̣ܰܕ ܡܰܠܐܱܟܰܘ̈ܗܝ ܪܽܘܚ ܘܰܡܫܰܡ̈ܫܳܢܰܘܗܝ ܢܽܘܪ ܝܳܩܕܳܐ. ܗ̇ܰܘ ܕܒܶܗ ܘܒܺܐܝܕܰܘ̈ܗܝ ܟܽܠܡܶܕܶܡ ܗ̣ܘܳܐ ܘܶܐܬܩܰܝܰܡ: ܕܠܶܗ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ: ܘܫܽܘܒܚܳܐ ܘܣܶܓܕܬܳܐ ܘܩܽܘܒܳܠܛܰܝܒܽܘܬܳܐ ܡܰܣܩܺܝܢܰܢ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܰܠܟܳܐ ܕܡܰܠܟ̈ܶܐ ܡܳܪܰܢ ܝܶܫܽܘܥ ܡܫܺܝܚܳܐ: ܗ̇ܰܘ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܢܽܘܗܪܳܐ ܫܰܪܺܝܪܳܐ ܘܠܐܴ ܡܶܬܩܰܪܒܳܢܳܐ ܒܠܶܫܳܢܳܐ: ܘܠܐܴ ܡܶܬܰܐܡܪܳܢܳܐ ܒܡܶܠܬܳܐ ܗ̇ܰܘ ܕܡܶܛܽܠ ܛܰܝܒܽܘܬܳܟ ܓܠܺܝܬܳܐ ܠܰܫܡܰܝܳܐ ܘܠܐܱܪܥܳܐ ܩܰܝܶܡ̣ܬ ܒܡܶܠܬܳܟ: ܗ̇ܰܘ ܕܡܶܛܽܠ ܪܶܚܡܰܬ݀ ܐ̱ܢܳܫܽܘܬܳܟ ܠܗܳܠܶܝܢ ܢܶܬܒܰܣܰܡ ܒܬܶܐܘܳܪܺܝܰܐ ܕܫܽܘܒܚܳܟ: ܘܛܺܝܢܳܐ ܡ̣ܶܢ ܐܰܪܥܳܐ ܫܩܰܠ̣ܬ ܘܰܓܒ̣ܰܠܬ: ܘܰܠܒܰܪܢܳܫܳܐ ܡܰܠܟܳܐ ܕܗܳܠܶܝܢ ܕܥܰܠ ܐܰܪܥܳܐ ܐܰܘܪܶܒ̣ܬ: ܘܟܰܕ ܒܢܶܟܠܶܗ ܕܳܐܟ̇ܶܠܩܰܪܨܳܐ ܘܰܒܡܽܘܠܟܳܢܳܗ̇ ܕܰܐܢ̱ܬܬܳܐ ܡ̣ܶܢ ܦܰܪܕܰܝܣܳܐ ܐܶܬܛܪܶܕ: ܘܠܐܱܪܥܳܐ ܕܠܰܘ̈ܛܳܬܳܐ ܐܶܫܬܕܺܝ ܡܰܪܺܝܪܳܐܺܝܬ: ܘܶܐܫܬܰܥܒܰܕ ܠܡܰܘܬܳܐ ܛܪܽܘܢܳܐ: ܘܰܬܚܶܝܬ ܢܺܝܪܶܗ ܕܣܳܛܳܢܳܐ ܐܶܬܥܰܒܕܰܕ: ܘܟܰܕ ܚܙܰܝܬ ܐܳܘ ܛܳܒܳܐ ܠܨܰܠܡܳܟ ܘܠܰܕܡܽܘܬܳܟ ܕܶܐܬܒܰܙܰܚ ܡ̣ܶܢ ܫܺܐܕ̈ܶܐ ܒܺܝ̈ܫܶܐ: ܠܐܴ ܣܰܝܒܰܪ ܚܽܘܒܳܟ ܕܢܶܚܙܶܐ ܐܰܒܕܳܢܳܐ ܕܺܝܠܶܗ ܕܰܟܝܳܢܶܗ. ܐܶܠܐܴ ܒܝܰܕ ܢܒܺܝ̈ܶܐ ܘܰܐܒܳܗ̈ܳܬܳܐ ܩܰܕܶܡ̣ܬ ܣܰܒ̣ܰܪܬ ܥܰܠ ܡܶܐܬܺܝܬܳܟ ܦܳܪܽܘܩܳܝܬܳܐ: ܐܰܝܟܰܢܳܐ ܕܬܶܫܪܶܐ ܘܬܶܥܒܰܪ ܠܠܰܘܛܬܳܐ ܥܰܬܺܝܩܬܳܐ ܗ̇ܳܝ ܕܒܰܥܒ̇ܳܪ ܦܽܘܩܕܳܢܳܐ ܐܰܡܠܟܰܬ݀ ܥܠܰܝܢ ܐܶܬܰܝܬ ܠܝܰܠܕܳܐ: ܘܶܐܬܒܛܶܢ̣ܬ ܒܟܰܪܣܳܐ: ܐܰܢ̱ܬ ܕܺܐܝܬܰܝܟ ܨܰܝܳܪܳܐ ܕܥܽܘ̣̈ܠܐܷ ܒܓܰܘ ܟܰܪ̈ܣܳܬܳܐ ܕܶܐܡܗ̈ܳܬܳܐ ܐܶܬܺܝܠܶܕܬ ܡܰܘܠܳܕܳܐ ܬܪܰܝܳܢܳܐ ܘܐ̱ܢܳܫܳܝܳܐ: ܘܰܥܒ̣ܰܪܬ ܠܚܶܒ̈ܠܶܝܗ̇ ܕܚܰܘܳܐ ܐܶܡܰܢ ܩܰܕܡܳܝܬܳܐ: ܘܰܐܓܶܣ̣ܬ ܒܽܐܘܪܝܳܐ ܕܚܰܝ̈ܘܳܬܳܐ: ܟܰܕ ܡ̣ܶܢ ܥܽܘܒܳܐ ܕܝ̇ܳܠܽܘܕܳܟ ܠܐܴ ܐܰܪܚܶܩ̣ܬ ܐܰܘ ܫܰܢܺܝܬ. ܛܰܥܢܳܟ ܒܽܘܪ̈ܟܶܐ ܕܒܶܣܪܳܐ: ܟܰܕ ܡܶܙܕܰܝܰܚ ܐܰܢ̱ܬ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ: ܝ̣ܺܢܶܩܬ ܚܰܠܒܳܐ ܒܬܽܘܠܳܝܳܐ ܡ̣ܶܢ ܒܰܪܬ݀ ܡܶܣܟ̈ܺܢܶܐ: ܟܰܕ ܐܺܝܬܰܝܟ ܡܰܒܽܘܥܳܐ ܕܚܰܝ̈ܶܐ ܘܚܰܕ̈ܘܳܬܳܐ: ܐܶܬܪܰܒܺܝܬ ܒܶܝܬ ܝܰܘܣܶܦ ܘܰܗ̣ܘܳܐ ܠܳܟ ܐܰܒܳܐ ܕܛܰܝܒܽܘܬܳܐ: ܐܰܢ̱ܬ ܕܺܐܝܬܰܝܟ ܡܪܰܒܝܳܢܳܐ ܕܟܽܠ ܡܽܘܫ̈ܚܳܢ: ܩܰܒ̣ܶܠܬ ܥܠܰܝܟ ܓܙܽܘܪܬܳܐ ܐ̱ܢܳܫܳܝܬܳܐ ܘܰܓܙܰܪܬ ܘܚ̣ܰܪܰܪܬ ܠܠܶܒܳܐ ܕܥܰܡ̈ܡܶܐ ܡ̣ܶܢ ܛܳܥܝܽܘܬܳܐ ܕܰܦܬܰܟܪ̈ܶܐ: ܢܶܓܕܰܬ ܥܠܰܝܟ ܠܪܽܘܚܳܟ ܩܰܕܺܝܫܳܐ: ܕܠܰܢ ܬܰܠܒ̣ܶܫ ܡ̣ܶܢ ܥܡܳܕܳܐ ܐܶܣܛܠܐܴ ܕܣܺܝܡܰܬ݀ ܒܢܰܝ̈ܳܐ ܗ̇ܳܝ ܕܰܫܠܰܚ̣ܢܰܢ ܒܶܝܬ ܐܺܝܠܳܢ̈ܶܐ ܒܰܥܒ̇ܳܪ ܦܽܘܩܕܳܢܳܐ: ܨܳܡ̣ܬ ܡܕܰܒܪܳܢܳܐܺܝܬ ܐܰܝܟ ܒܰܪܢܳܫܳܐ ܟܰܕ ܡܶܬܢܰܣܶܝܬ ܡ̣ܶܢ ܒܥܶܠܕܰܐܪܳܐ ܣܳܢܳܐܐ ܕܫܰܦܺܝܪ̈ܳܬܳܐ: ܪܟܶܒ̣ܬ ܥܰܠ ܥܺܝܠܐܴ ܚܰܪܫܳܐ ܘܰܕܠܐܴ ܡܶܠܬܳܐ: ܘܡ̣ܶܢ ܫܰܒܪ̈ܶܐ ܠܐܴ ܡܨܰܥܨ̈ܳܥܶܐ ܐܶܫܬܰܒܰܚ̣ܬ: ܘܥܰܠ̣ܬ ܠܒܶܝܬ ܕܺܝܢܳܐ ܐܰܝܟ ܚܰܝ̇ܳܒܳܐ: ܐܰܢ̱ܬ ܕܺܐܝܬܰܝܟ ܕܰܝ̇ܳܢܳܐ ܕܕܰܝ̈ܳܢܶܐ: ܘܡ̣ܶܢ ܦܺܝܠܰܛܳܘܣ ܡܶܫܬܰܐܠ ܗܘ̣ܰܝܬ ܐܰܝܟ ܥܳܒܶܕ ܒܺܝ̈ܫܳܬܳܐ: ܐܰܢ̱ܬ ܕܫܽܘܠܛܳܢܳܟ ܫ̇ܳܪܶܐ ܠܰܫܡܰܝܳܐ ܘܠܐܱܪܥܳܐ: ܣܠܶܩ̣ܬ ܠܰܨܠܺܝܒܳܐ ܕܬܶܙܟܶܝܗ̇ ܠܰܚܛܺܝܬܳܐ: ܘܰܢܚ̣ܶܬܬ ܠܰܫܝܽܘܠ ܕܬܰܚܪܒܶܝܗ̇ ܘܬܶܥܩܪܶܝܗ̇: ܘܡܺܝܬܬ ܘܩܳܡ̣ܬ ܒܬܶܫܒܽܘܚܬܳܐ ܠܰܬܠܳܬܳܐ ܝܰܘ̈ܡܺܝܢ: ܘܒܰܐܺܝܬ ܠܓܽܘܕܳܐ ܒܪܺܝܟܬܳܐ ܕܰܫܠܺܝ̈ܚܶܐ ܕܺܝܠܳܟ ܕܰܐܒܺܝܠܺܝܢ ܗ̣ܘܰܘ ܥܰܠ ܡܰܘܬܳܟ: ܘܣܰܒ̣ܰܪܬ ܢܽܘܚܳܡܳܐ ܘܚܰܝ̈ܶܐ ܠܰܫܟܺܝ̣̈ܒܶܐ. ܕܶܐܢܳܐ ܐܺܝܬܰܝ ܡܢܰܚܡܳܢܳܐ ܘܦܳܪܽܘܩܳܐ ܕܰܙܟܺܝܬܶܗ ܠܡܰܘܬܳܐ ܘܣܳܛܳܢܳܐ: ܫܠܳܡܳܐ ܥܠܰܝܟܽܘܢ ܩܰܢܺܝ̣̈ܛܶܐ ܕܰܡܢܰܦܶܨ ܐ̱ܢܳܐ ܠܟܽܘܢ ܡ̣ܶܢ ܕܰܚܺܝܚܳܐ: ܕܰܪܒܺܝܚܺܝܢ ܐܢ̱ܬܽܘܢ ܥܠܰܘܗܝ: ܘܟܰܕ ܐܶܬܚ̣ܙܰܝܬ ܠܢܶܫ̈ܶܐ ܢܰܟ̈ܦܳܬܳܐ ܐܶܡ̣ܰܪܬ ܠܗܶܝܢ ܕܙܶܠܶܝ̈ܢ ܣܰܒܰܪ̈ܶܝܢ ܠܐܱܚܰܝ̈ ܕܠܰܓܠܺܝܠܐܴ ܕܢܺܐܙܽܠ̱ܘܢ ܘܢܶܚܙܽܘܢܳܢܝ ܬܰܡܳܢ ܟܽܠܗܽܘܢ: ܘܰܣܠ̣ܶܩܬ ܒܫܽܘܒܚܳܐ ܪܰܒܳܐ ܠܰܫܡܰܝܳܐ ܘܺܝܬܶܒܬ ܒܰܡܪ̈ܰܘܡܶܐ ܡ̣ܶܢ ܝܰܡܺܝܢܳܐ ܕܫܳܠܽܘܚܳܟ: ܘܫ̣ܰܕܰܪܬ ܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܰܝܟ ܩܰܕܺܝ̈ܫܶܐ ܘܚܰܟܶܡ ܐܶܢܽܘܢ: ܘܰܕܢܺܐܙܽܠ̱ܘܢ ܠܰܒܪܺܝܬܳܐ ܦܰܩ̣ܶܕܬ ܐܶܢܽܘܢ: ܘܰܕܢܰܟܪܙܽܘܢ ܠܥܰܡ̈ܡܶܐ ܘܶܐܡܘ̈ܳܬܳܐ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܙܰܗ̣ܰܪܬ ܐܶܢܽܘܢ: ܘܕܰܢܬܰܠܡܕܽܘܢ ܘܢܰܥܡܕܽܘܢ ܠܟܽܠ ܥܰܡ̈ܡܺܝܢ ܒܰܫܡܳܐ ܕܰܬܠܺܝܬܳܝܽܘܬܳܐ. ܘܟܰܕ ܠܗܳܠܶܝܢ ܕܰܡܕܰܒܪܳܢܽܘܬܳܟ ܒܡܰܕܥܰܢ ܚܰܠܳܫܳܐ ܢܳܣܒܺܝܢܰܢ ܐܳܘ ܡܶܠܬܳܐ ܐܠܰܗܳܐ: ܡܦܺܝܣܺܝܢܰܢ ܠܳܟ ܕܰܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ. ܕܰܬܚܰܣܶܐ ܠܰܚܛܳܗ̈ܶܐ ܕܟܽܠܰܢ ܘܬܶܙܓܽܘܪ ܡܶܢܰܢ ܡܣܳܡ ܒܪܺܝܫܳܐ ܩܰܫܝܳܐ ܘܫܰܒ̈ܛܶܐ ܕܪܽܘܓܙܳܐ ܘܢܶܣܝܽܘ̈ܢܶܐ ܥܰܣ̈ܩܶܐ ܘܦܽܘܨܳܝܳܐ ܕܡ̣ܶܢ ܠܒܽܘܟܝܳܐ ܕܪ̈ܽܘܚܶܐ ܒܺܝ̈ܫܳܬܳܐ. ܘܰܐܫܘܳܐ ܠܰܢ ܠܓܰܒܳܐ ܕܝܰܡܺܝܢܳܐ ܕܪܰܒܽܘܬܳܟ ܘܰܠܩܰܘܡܳܐ ܕܰܩܕܳܡܰܝܟ ܕܠܐܴ ܡܰܦܽܘܠܬܳܐ ܕܰܚܛܺܝܬܳܐ: ܘܰܠܟܽܠܗܽܘܢ ܐܰܚܰܝ̈ܢ ܘܪ̈ܰܒܳܢܰܝܢ ܕܩܰܕܶܡܘ ܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܡ̣ܶܢ ܡܺܝ̈ܬܶܐ ܕܰܐܚܺܝܬ ܒܡܰܘܬܳܟ ܘܡ̣ܶܢ ܚܰܝ̈ܶܐ ܕܰܦܪܰܩ̣ܬ ܒܰܨܠܺܝܒܽܘܬܳܟ: ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܩܰܒܶܠܳܝܗܝ ܡܳܪܝܳܐ ܐܠܰܗܳܐ ܠܦܺܝܪܡܳܐ ܗܳܢܳܐ ܕܒܺܐܝ̈ܕܰܝܟ ܚܰܠܳܫ̈ܳܬܳܐ ܐܶܬܩܰܪܰܒ ܠܳܟ ܐܰܝܟ ܦܺܝܪܡܶܗ ܕܰܐܗܪܽܘܢ: ܘܰܐܝܟ ܥܶܛܪܶܗ ܕܕܰܘܺܝܕ: ܘܰܨܠܽܘܬܶܗ ܕܚܶܙܰܩܝܳܐ ܡܰܠܟܳܐ: ܗܳܟܰܢܳܐ ܨܒܺܝ ܡܳܪܝܳܐ ܘܩܰܒܶܠ ܥܶܛܪܶܗ ܕܦܺܝܪܡܰܢ ܐܰܝܟ ܕܶܒܚܶܗ ܕܰܐܒܪܳܗܳܡ ܘܰܐܝܟ ܢܶܕܪܶܗ ܕܰܫܡܽܘܐܶܝܠ: ܘܫܰܟܶܢ ܠܰܢ ܒܳܗ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܠܐܴ ܬܰܣܠܐܷ ܠܦܺܝܪܡܰܢ ܐܰܝܟ ܕܶܒܚܳܐ ܕܰܒܢ̈ܰܝ ܩܽܘܪܰܚ: ܗ̇ܳܢܽܘܢ ܕܩܳܡ̣ܘ ܠܽܘܩܒܰܠ ܡܽܘܫܶܐ: ܘܺܝܩܶܕܘ ܗ̣ܶܢܽܘܢ ܘܦܺܝܪ̈ܡܰܝܗܽܘܢ ܐܶܠܐܴ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܒܝܰܕ ܦܺܝܪܡܰܢ ܘܰܨܠܰܘ̈ܳܬܰܢ ܕܢܰܘܕܶܐ ܠܛܰܝܒܽܘܬܳܟ ܘܢܶܣܓܽܘܕ ܠܐܱܠܳܗܽܘܬܳܟ ܗܳܫܳܐ܀

 

ܚܘܬܡܐ

ܚܰܣܳܐ ܡܳܪܝܳܐ ܐܠܰܗܳܐ ܠܰܚܛܳܗ̈ܶܐ ܘܰܠܫܳܪ̈ܥܳܬܳܐ ܕܰܣܥ̣ܰܪܘ ܥܰܒ̣ܕܰܝ̈ܟ: ܘܠܐܴ ܬܶܥܽܘܠ ܠܕܺܝܢܳܐ ܥܰܡܗܽܘܢ: ܘܫܰܘܬܶܦ ܠܰܢ ܒܰܩܝܳܡܬܳܟ ܡܳܪܳܢܳܝܬܳܐ: ܘܚܰܕܳܐ ܒܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ: ܐܰܝܟ ܕܚܰܕܺܝܬ ܠܢܶܫ̈ܶܐ ܩܰܕܺܝ̈ܫܳܬܳܐ ܕܶܐܣܬܰܒܰܪ̈ܝ ܡ̣ܶܢ ܡܰܠܐܱܟ̈ܶܐ ܩܰܕܺܝ̈ܫܶܐ ܕܰܐܢ̱ܬܶܝ̈ܢ ܠܐܴ ܬܶܕܚ̈ܠܳܢ ܠܗܶܝܢ ܐܶܬܶܐܡܰܪ. ܐܰܫܡܰܥ ܠܰܢ ܩܳܠܳܟ ܚܰܝܳܐ ܕܳܐܡ̇ܰܪ ܠܰܢ ܒܝܽܘܡ ܕܺܝܢܳܐ ܕܰܫܒܺܝܩܺܝܢ ܚܰܘ̈ܒܰܝܟܽܘܢ: ܗܳܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܚܰܕ ܐܠܰܗܐ ܫܰܪܺܝܪܳܐ ܕܰܢܚ̣ܶܬ ܠܐܱܪܥܳܐ ܡܶܛܽܠ ܦܽܘܪܩܳܢܰܢ: ܘܫܰܡܠܺܝ ܟܽܠܳܗ̇ ܡܕܰܒܪܳܢܽܘܬܶܗ ܕܰܚܠܳܦܰܝܢ ܘܩܳܡ ܡ̣ܶܢ ܩܰܒܪܳܐ ܒܫܽܘܒܚܳܐ ܘܥܰܡܶܗ ܠܰܫܡܰܝܳܐ ܐܰܣ̣ܶܩ ܠܰܢ: ܘܺܝܬܶܒ ܡ̣ܶܢ ܝܰܡܺܝܢ ܐܰܒܽܘܗܝ ܘܥܰܡܶܗ ܒܫܽܘܒܚܳܐ ܐܰܘܬܶܒ ܠܰܢ. ܠܗ̇ܰܘ ܕܡ̣ܶܢ ܣܪ̈ܳܦܶܐ ܡܶܬܩܰܕܰܫ ܘܡ̣ܶܢ ܟܪ̈ܽܘܒܶܐ ܕܠܐܴ ܫܶܠܝܳܐ ܡܶܬܒܰܪܰܟ ܘܡ̣ܶܢ ܦܳܠܰܚ̈ܘܳܬܳܐ ܢܽܘܪ̈ܳܢܳܝܳܬܳܐ ܒܕܶܚܠܬܳܐ ܡܶܬܪܰܡܪܰܡ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܝܰܠܕܳܐ ܕܕܽܘܡܳܪܳܐ ܕܠܐܴ ܣܳܦܩܺܝܢ ܥܶܠܳܝ̈ܶܐ ܠܰܡܡܰܠܳܠܽܘ ܥܽܘܬܪܳܐ ܕܛܰܝܒܽܘܬܶܗ: ܘܠܐܴ ܡܰܘܦܶܝܢ ܥܰܦܪ̈ܳܢܶܐ ܠܡܰܕܪܳܟܽܘ ܐ̱ܪܳܙܳܐ ܕܚܶܟܡܬܶܗ. ܥܶܠܳܝܳܐ ܕܶܐܬܢܰܚܰܬ: ܪܳܡܳܐ ܕܶܐܬܡܰܟܰܟ: ܓܰܐܝܳܐ ܕܶܐܨܛܰܥܰܪ ܟܰܣܝܳܐ ܕܶܐܬܚܙܺܝ: ܐܠܰܗܳܐ ܕܶܐܬܒܰܪܢܰܫ ܥܶܠܳܝܳܐ ܕܠܐܴ ܡܶܫܟܚܺܝܢ ܥܺܝܪ̈ܶܐ ܕܰܠܥܶܠ ܕܢܶܬܒܰܩܽܘܢ ܒܶܗ: ܠܬܰܚܬ ܓ̈ܶܠܐܷ ܒܢ̈ܰܝ ܥܰܦܪܳܐ ܠܒܺܝܟܺܝܢ ܠܶܗ ܘܠܐܴ ܝ̇ܳܩܕܺܝܢ ܡ̣ܶܢ ܓܰܘܙܰܠܬܶܗ. ܠܥܶܠ ܐܽܘܣܺܝ̈ܰܐܣ ܕܢܽܘܪܳܐ ܡܒܰܪ̈ܟܳܢ ܠܶܗ ܘܰܠܬܰܚܬ ܡܡܰܝܩܺܝܢ ܒܶܗ ܘܟܳܦܪܺܝܢ ܒܦܰܓܪܳܢܽܘܬܶܗ: ܠܥܶܠ ܩܳܥܶܝܢ ܠܶܗ ܒܪܺܝܟ ܗ̣ܽܘ ܐܺܝܩܳܪܶܗ ܕܡܳܪܝܳܐ ܨܒܰܐܘܳܬ ܡ̣ܶܢ ܐܰܬܪܶܗ ܠܥܳܠܰܡ: ܘܰܠܬܰܚܬ ܬܳܟܒܺܝܢ ܒܩܳܠܰܝ̈ܗܽܘܢ ܢܶܨܛܠܶܒ ܟܰܕ ܙܳܠܚܺܝܢ ܪܽܘܩܳܐ ܒܰܐܦܰܘ̈ܗܝ ܐܰܝܟ ܥܳܒ̇ܶܕ ܒܺܝ̈ܫܳܬܳܐ: ܠܥܶܠ ܒܩܺܝ̈ܢܳܬܗܽܘܢ ܕܰܒܪܰܐ ܗ̱̇ܘ ܟܝܳܢܳܝܳܐ ܕܰܐܒܳܐ ܡܶܫܬܰܘܕܥܺܝܢ: ܘܰܠܬܰܚܬ ܢܽܘܟܪܳܝ ܠܐܱܒܳܐ ܘܒܰܪ ܓܰܘܪܳܐ ܡܟܰܢܶܝܢ ܗ̣ܘܰܘ ܠܶܗ. ܠܥܶܠ ܒܰܪܩܺܝܥܳܐ ܐܶܣܛܽܘܟ̈ܣܶܐ ܠܐܴ ܡܠܺܝ̣̈ܠܐܷ ܚܺܝܠ ܪܰܒܽܘܬܶܗ ܡܰܟܪܙܺܝܢ: ܘܰܠܬܰܚܬ ܫܳܡܪܳܝܳܐ ܩ̇ܳܪܶܝܢ ܗ̣ܘܰܘ ܠܶܗ: ܘܰܕܫ̇ܳܘܶܐ ܠܡܰܘܬܳܐ: ܘܰܐܝܟ ܥܳܒ̇ܶܕ ܒܺܝ̈ܫܳܬܳܐ ܕܳܝܢܺܝܢ ܠܶܗ. ܠܥܶܠ ܒܳܐܐܰܪ ܐܠܰܗܽܘܬܶܗ ܟܝ̈ܳܢܶܐ ܚܰܪ̈ܫܶܐ ܡܰܕܢܚܺܝܢ: ܘܰܠܬܰܚܬ ܛܳܠܡܺܝܢ ܐܠܰܗܽܘܬܶܗ ܘܰܒܐܢܳܫܽܘܬܶܗ ܟܳܦܪܺܝܢ ܘܰܒܦܰܓܪܳܢܽܘܬܶܗ ܡܡܰܝܩܺܝܢ ܠܥܶܠ ܢܰܗܺܝܪ̈ܶܐ ܒܡܶܕܪ̈ܰܝܗܽܘܢ ܚܳܫܟܺܝܢ ܘܥܳܡܛܺܝܢ: ܘܰܠܬܰܚܬ ܠܡܳܐܢܰܘ̈ܗܝ ܒܦܶܣ̈ܶܐ ܪܳܡ̇ܶܝܢ ܘܰܡܦܰܠܓܺܝܢ: ܠܥܶܠ ܩܳܒܶܝܢ ܡܰܝ̈ܳܐ ܒܫܽܘܥܳܠܶܗ ܡܥܰܠܰܝܬܳܐ: ܘܠܐܴ ܡܶܬܕܪܶܟ: ܘܰܠܬܰܚܬ ܚܰܠܐܴ ܕܰܡܡܰܘܪܰܢ ܠܨܶܗܝܶܗ ܝܳܗܒܺܝܢ ܐܰܝܟ ܕܰܠܥܳܒ̇ܶܕ ܒܺܝ̈ܫܳܬܳܐ ܠܥܶܠ ܐܳܐܰܪ ܕܡܶܬܩܰܪܩܰܫ ܐܰܝܟ ܐܺܝܠܳܢ̈ܶܐ ܡ̣ܶܢ ܥܰܙܺܝܙܽܘܬܶܗ: ܘܰܠܬܰܚܬ ܐܰܪܥܳܐ ܕܢܳܝܕܳܐ ܐܰܝܟ ܥܰܪܙܳܠܐܴ ܒܥܶܕܳܢ ܙܩܺܝܦܽܘܬܶܗ. ܠܥܶܠ ܢܽܘܪ̈ܳܢܶܐ ܒܢ̈ܰܝ ܓܰܘܙܰܠܬܳܐ ܠܶܗ ܡܢܰܨܪܺܝܢ ܒܣܶܦܘ̈ܬܳܐ ܠܐܴ ܡܛܰܘ̈ܫܳܬܳܐ: ܘܰܠܬܰܚܬ ܡܺܝ̈ܬܶܐ ܠܶܗ ܡܫܰܒܚܺܝܢ ܘܩܳܝܡܺܝܢ ܡ̣ܶܢ ܩܰܒܪ̈ܰܝܗܽܘܢ ܒܫܳܥܰܬ݀ ܙܩܺܝܦܽܘܬܶܗ: ܠܥܶܠ ܡܶܬܓܰܝܶܐܐ ܥܰܠ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̣̈ܢ: ܘܰܠܬܰܚܬ ܡܰܓܰܣ ܒܩܰܒܪܳܐ ܕܰܬܠܳܬ ܐܰܡܝ̣̈ܺܢ ܐܰܝܟ ܥܰܢܺܝܕܳܐ: ܠܥܶܠ ܥܰܡ ܐܰܒܽܘܗܝ ܒܩܳܠܐܴ ܕܰܣܪ̈ܳܦܶܐ ܡܶܬܩܰܕܰܫ ܘܰܠܬܰܚܬ ܒܥܽܘܡܪܳܐ ܚܶܫܽܘܟܳܝܳܐ ܕܗܳܡܳܢ ܕܡܺܝ̈ܬܶܐ ܡܰܟܪܙܺܝܢ ܪܰܒܽܘܬܶܗ ܘܣܳܓܕܺܝܢ ܩܽܘܕܡܰܘܗܝ: ܠܥܶܠ ܡܫܰܦܶܠ ܠܒܺܝܫܳܐ ܘܰܠܚܰܝܠܶܗ: ܘܰܠܬܰܚܬ ܫ̇ܳܪܶܐ ܫܽܘܠܛܳܢܶܗ ܕܡܰܘܬܳܐ ܘܰܡܚܰܪܰܪ ܚܒܺܝ̣̈ܫܶܐ ܘܰܐܣܺܝܪ̈ܶܐ ܡ̣ܶܢ ܓܰܘ ܫܝܽܘܠ: ܡ̣ܶܢ ܟܶܢ̈ܫܶܐ ܕܥܶܠܳܝ̈ܶܐ ܥܺܝܪ̈ܶܐ ܢܳܚܬܺܝܢ ܠܐܻܝܩܳܪܳܐ ܡܥܰܠܝܳܐ ܕܰܩܝܳܡܬܶܗ: ܘܡ̣ܶܢ ܬܰܚܬܳܝ̈ܶܐ ܡܺܝ̈ܬܶܐ ܥܓܺܝ̣̈ܢܶܐ ܣܳܘܚܺܝܢ ܘܢܳܦܩܽܝܢ: ܚܰܝ̈ܠܰܝ ܪܰܘܡܳܐ ܕܰܡܫܰܒܚܺܝܢ. ܫܠܺܝ̈ܚܶܐ ܕܰܡܕܰܝܨܺܝܢ: ܠܶܓܝܽܘ̈ܢܶܐ ܡܢܰܒܪ̈ܫܳܬܳܐ ܕܰܡܗܰܠܠܺܝܢ: ܢܶܫ̈ܶܐ ܕܡܶܣܬܰܒܪ̈ܳܢ ܘܚܳܕ̈ܝܳܢ: ܫܝܽܘܠ ܕܡܶܣܬܰܦܩܳܐ: ܓܰܙܶܝ̈ܗ̇ ܕܡܶܬܒܰܙܙܺܝܢ: ܡܰܘܬܳܐ ܕܡܶܙܕܟܶܐ ܫܽܘܠܛܳܢ ܚܶܫܽܘܟܳܐ ܕܡܶܫܬܪܶܐ: ܫܰܪܺܝܪ̈ܶܐ ܕܢܳܨܚܺܝܢ: ܘܟܰܕ̈ܳܒܶܐ ܕܡܶܬܒܰܕܪܺܝܢ ܣܰܒܪ̈ܳܬܳܐ ܕܰܡܣܰܓ̈ܝܳܢ ܚܰܕ̈ܘܳܬܳܐ ܕܡܶܬܟܰܪ̈ܙܳܢ: ܫܰܝܢܳܐ ܘܰܪܘܳܙܳܐ ܘܟܽܘܢܳܫܳܐ ܘܠܽܘܒܳܒܳܐ ܕܡܶܙܕܰܪܥܺܝܢ: ܟܶܬܳܢ̈ܶܐ ܕܣܺܝܡܺܝܢ ܠܰܣܛܰܪ ܕܠܰܘ ܕܡܶܬܓܢܳܒܽܘ ܐܶܬܓܢܶܒ ܡܳܪܰܢ ܡܰܟܪܙܺܝܢܰܢ: ܐܶܠܐܴ ܒܰܟܪܽܘܟܝܳܐ ܕܢܰܚ̈ܬܶܐ ܕܠܐܴ ܐܶܣܬܰܪܰܕ ܡ̣ܶܢ ܡܰܘܬܳܐ ܡܚܰܘܶܝܢ ܘܡܰܠܦܺܝܢ ܡܶܫܬܰܒܩܳܢܽܘܬܳܐ ܕܢܰܚ̈ܬܶܐ ܕܚܳܫܚܺܝܢ: ܠܒܽܘ̈ܫܶܐ ܐܰܪ̈ܥܳܢܳܝܶܐ ܠܚܰܝ̈ܶܐ ܕܒܳܬܰܪ ܩܝܳܡܬܳܐ: ܓܳܠܶܝܢ ܘܡܰܢܗܪܺܝܢ: ܡ̣ܶܢ ܥܺܝܪ̈ܰܝ ܬܰܚܬܳܝ̈ܶܐ ܐܶܬܺܝܕܰܥ ܕܒܰܪ ܒܳܪܽܘܝܰܐ ܗ̱̇ܘ. ܐܰܝܟ ܐܠܰܗܳܐ ܡܪܰܚܡܳܢܳܐ ܠܰܒܪܺܝܬܳܐ ܐܶܬܳܐ: ܘܰܠܨܰܠܡܶܗ ܡܰܠܟܳܝܳܐ ܕܰܐܠܺܝ: ܘܰܐܝܟ ܒܰܪܢܳܫܳܐ ܥܰܠ ܐܰܪܥܳܐ ܐܶܬܚܙܺܝ: ܘܰܒܥܶܠܕܒܳܒܳܐ ܡܳܪܽܘܕܳܐ ܐܰܛܥܺܝ: ܘܰܐܝܟ ܐܠܰܗܳܐ ܠܢܺܝܪܶܗ ܬܰܒܰܪ: ܘܠܐܱܣܺܝܪ̈ܶܐ ܡ̣ܶܢ ܦܟܳܪ̈ܰܘܗܝ ܚܰܪܰܪ: ܘܥܰܠܗ̇ܳܝ ܕܽܘܡܳܪܳܐ ܘܡܰܠܟܳܐ ܘܫܰܠܺܝܛܳܐ ܠܶܗ ܡܰܟܪܙܺܝܢ: ܟܰܕ ܡܦܺܝܣܺܝܢܰܢ ܠܶܗ ܘܡܶܬܟܰܫܦܺܝܢܰܢ ܟܰܕ ܫܳܐܠܺܝܢܰܢ ܡ̣ܶܢ ܪܶܚܡܰܬ݀ ܐ̱ܢܳܫܽܘܬܶܗ ܕܬܰܐܓܶܢܝ ܝܰܡܺܝܢܶܗ ܗ̇ܳܝ ܡܰܠܝܰܬ݀ ܥܽܘܕܪ̈ܳܢܶܐ ܥܰܠ ܪ̈ܺܝܫܰܝܢ: ܘܰܢܒܰܪܶܟ ܠܰܢ ܒܒܽܘܪ̈ܟܳܬܳܐ ܫܦܺܝ̈ܥܳܬܳܐ ܐܰܝܟ ܕܠܰܫܠܺܝ̈ܚܶܐ ܩܰܕܺܝ̈ܫܶܐ ܘܢܰܣܶܩ ܠܗܰܘܢܳܐ ܕܺܝܠܰܢ ܠܘܳܬ ܘܰܥܕܳܐ ܕܰܫܟܺܝܢܬܶܗ ܘܓܶܕ ܠܰܢ ܡܳܪܝ ܠܰܫܒܺܝܠܐܴ ܕܚܰܝ̈ܶܐ ܘܬܽܘܒ ܪ̈ܶܥܝܳܢܰܝܢ ܠܘܳܬ ܬܶܐܘܳܪ̈ܺܝܰܐܣ ܐܠܰܗܳܝ̈ܳܬܳܐ ܕܺܝܠܳܟ: ܘܥܰܡ ܚܰܝܠܰܘ̈ܳܬܳܐ ܡܰܠܐܱܟܳܝ̈ܶܐ ܐܰܫܘܳܐ ܠܰܢ ܕܰܢܝܰܒܶܒ ܠܳܟ ܬܶܫܒ̈ܚܳܬܳܐ ܕܰܟܝ̈ܳܬܳܐ ܘܰܐܪܺܝܡ ܡܶܢܰܢ ܠܥܽܘܪ̈ܙܳܠܐܷ ܐܰܪ̈ܥܳܢܳܝܶܐ: ܘܰܐܣܽܘܪ ܠܰܢ ܒܕܽܘܒܳܪ̈ܶܐ ܫܡܰܝ̈ܳܢܶܐ: ܘܰܒܝܰܘܡܳܐ ܕܡܶܐܬܺܝܬܳܟ ܕܬܰܪܬܶܝܢ ܡܢܺܝ ܠܰܢ ܒܓܽܘ̈ܕܶܐ ܕܩܰܕܺܝ̈ܫܰܝܟ: ܘܚܰܠܶܛ ܠܰܢ ܒܬܶܐܓ̈ܡܶܐ ܕܢܰܨܺܝ̈ܚܶܐ. ܐܰܝܟܰܢܳܐ ܕܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܢܰܣܶܩ ܠܳܟ ܫܽܘܒܚܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܪܳܡܳܐ ܕܶܐܬܡܰܟܰܟ ܘܰܦ̣ܪܰܩ ܠܰܢ: ܠܗ̇ܰܘ ܒܪܶܗ ܕܰܐܠܳܗܳܐ ܘܰܡܬܽܘܡܳܝܳܐ ܕܶܐܬܒܰܣܰܪ ܟܰܕ ܠܐܴ ܐܶܫܬܰܓܢܺܝ ܐܰܘ ܐܰܪܚܶܩ ܡ̣ܶܢ ܐܠܰܗܽܘܬܶܗ ܘܰܡܬܽܘܡܳܝܽܘܬܶܗ: ܘܫܰܡܠܺܝ ܐܽܘܪܚܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ ܒܟܽܠܳܗ̇ ܡܰܟܺܝܟܽܘܬܳܐ ܘܫܺܝܛܽܘܬܳܐ: ܠܗ̇ܰܘ ܕܰܣܒ̣ܰܠ ܚܰܫ̈ܶܐ ܘܰܨܠܺܝܒܳܐ ܘܡܰܘܬܳܐ ܡܶܛܽܠ ܐܳܕܳܡ ܚܰܝܳܒܳܐ: ܘܩܳܡ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ: ܘܶܐܬܥܰܠܺܝ ܠܐܱܬܰܪ ܕܺܐܝܬܰܘܗܝ ܗ̣ܘܳܐ ܡܶܢܶܗ ܒܩܳܠܐܴ ܕܩܰܪ̈ܢܳܬܳܐ: ܕܠܶܗ ܢܫܰܒܰܚ ܒܬܰܘܕܺܝܬܳܐ: ܘܰܢܩܰܪܶܒ ܩ̈ܳܠܐܷ ܚܠܰܝ̈ܳܐ ܒܢܶܥ̈ܡܳܬܳܐ ܕܰܟܝ̈ܳܬܳܐ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܟܰܕ ܠܥܽܘܗܕܳܢܳܐ ܕܥܺܐܕܳܐ ܕܰܩܝܳܡܬܳܟ ܡܳܪܳܢܳܝܬܳܐ ܘܦܳܪܽܘܩܳܝܬܳܐ ܡܫܺܝܚܳܐ ܐܠܰܗܰܢ ܒܚܰܕܽܘܬܳܐ ܘܒܰܪܘܳܙܳܐ ܡܰܥܗܕܺܝܢܰܢ: ܘܰܒܬܶܫܒ̈ܚܳܬܳܐ ܘܩܽܘ̈ܠܳܣܶܐ ܠܝܰܘܡܳܐ ܕܰܩܝܳܡܬܳܟ ܕܡ̣ܶܢ ܩܰܒܪܳܐ ܕܒܳܗ̇ ܐܰܩܺܝܡܬ ܠܓܶܢܣܳܐ ܕܥܰܦܪ̈ܳܢܶܐ ܘܚܰܠ̣ܶܛܬ ܐܶܢܽܘܢ ܒܰܐܠܳܗܽܘܬܳܟ ܡܥܰܠܰܝܬܳܐ ܘܪܳܡܰܬ݀ ܡܶܢܟܽܠ ܡܕܰܥܰ: ܘܥܰܡ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܬܶܗܪܳܐ ܘܕܽܘܡܳܪܳܐ ܡܶܬܡܠܶܝܢܰܢ ܘܳܐܡܪܺܝܢܰܢ: ܕܡܰܢܽܘ ܗܳܢܳܐ ܓܰܐܝܳܐ ܘܓܰܢ̱ܒܳܪܳܐ ܘܡܰܠܟܳܐ ܪܰܒܳܐ ܕܬܶܫܒܽܘܚܬܳܐ ܕܰܫܒ̣ܳܐ ܫܒܺܝܬܶܗ ܕܡܰܠܟܳܐ ܛܪܽܘܢܳܐ. ܗܳܢܰܘ ܡܳܪܝܳܐ ܡܳܪܳܗ̇ ܕܟܽܠܳܗ̇ ܒܪܺܝܬܳܐ ܡܶܬܝܰܕܥܳܢܺܝܬܳܐ ܐܳܦ ܡܶܬܪܰܓܫܳܢܺܝܬܳܐ: ܕܰܩܥ̣ܳܐ ܒܗܳܡܳܢ ܘܰܢܦ̣ܰܠܘ ܫܽܘܪ̈ܶܝܗ̇ ܘܶܐܬܬܙܺܝܥܘ ܙܳܘܝ̈ܳܬܳܗ̇ ܘܣܳܚܪ̈ܳܬܳܗ̇ ܗܳܢܰܘ ܕܰܟܐܳܐ ܒܡܰܘܬܳܐ ܘܰܢܦ̣ܰܠ ܬܳܐܓܶܗ: ܘܶܐܬܬܕܺܝܫ ܒܰܐܪܥܳܐ ܘܶܐܫܬܪܺܝ ܫܽܘܠܛܳܢܶܗ: ܘܰܐܪܡܺܝ ܥܰܪܣܶܗ ܒܶܝܬ ܥܰܢܺܝ̈ܕܶܐ: ܗܳܢܰܘ ܡܳܪܝܳܐ ܓܰܢ̱ܒܳܪܳܐ ܕܥ̣ܰܠ ܠܰܡܕܺܝܢ̱ܬܶܗ ܕܚܰܣܺܝܢܳܐ ܘܚܰܒܫܶܗ ܘܬܰܒܪܶܗ ܒܓܰܘ ܢܶܩܥܶܗ: ܘܰܣܠ̣ܶܩ ܒܙܰܘܚܳܐ ܕܙܳܟܽܘܬܳܐ: ܘܰܒܬܶܫܒܽܘܚܬܳܐ ܩܳܡ ܡܶܢ ܩܰܒܪܳܐ: ܘܺܝܬܶܒ ܡ̣ܶܢ ܝܰܡܺܝܢܳܐ ܕܰܐܒܳܐ ܫܳܠܽܘܚܶܗ ܘܪܰܒ ܒܰܪܬ݀ ܩܳܠܐܴ ܘܚܰܙܳܝܳܐ ܕܰܓܢܺܝ̣̈ܙܳܬܳܐ ܦܰܘܠܳܘܣ ܡܰܠܶܦ ܟܰܕ ܐܳܡ̇ܰܪ: ܕܗ̇ܰܘ ܕܰܣܠ̣ܶܩ ܗܽܘܝܽܘ ܕܰܢܚ̣ܶܬ: ܢܚ̣ܶܬ ܓܶܝܪ ܠܬܰܚܬܳܝ̈ܳܬܳܗ̇ ܕܰܐܪܥܳܐ: ܘܡ̣ܶܢ ܬܰܡܳܢ ܕܰܐܠܺܝ ܘܰܐܣ̣ܶܩ ܠܐܴܕܳܡ ܨܰܠܡܳܐ ܕܪܰܒܽܘܬܶܗ ܢܚ̣ܶܬ ܘܶܐܫܟܰܚ ܠܟܽܠܡܶܕܶܡ ܕܰܐܒܺܝܕ ܗ̣ܘܳܐ: ܘܰܦܢܳܐ ܠܰܩܕܽܘܫܩܽܘܕ̈ܫܺܝܢ ܐܰܬܪܳܐ ܕܺܐܝܩܳܪܶܗ: ܘܥܰܡܶܗ ܐܰܣܶܩ ܠܰܥܒܳܕܳܐ ܕܺܐܝ̈ܕܰܘܗܝ ܐܳܕܳܡ ܨܰܠܡܳܐ ܡܰܠܟܳܝܳܐ ܕܶܐܬܚܰܒܰܠ ܒܰܚܛܺܝܬܳܐ: ܐܶܠܐܴ ܟܰܕ ܢܚ̣ܶܬ ܠܐܴ ܫܰܒܩܶܗ ܠܟܽܘܪܣܝܳܐ ܕܰܣܦ̣ܰܩ ܡܶܢܶܗ: ܘܠܐܴ ܟܰܕ ܣܠ̣ܶܩ ܦܳܫܰܬ݀ ܐܰܪܥܳܐ ܟܰܕ ܡܰܠܝܽܘܬܶܗ: ܢܚ̣ܶܬ ܕܠܐܴ ܦܰܓܪܳܐ ܡ̣ܶܢ ܪܰܘܡܳܐ ܡܥܰܠܝܳܐ ܕܺܐܝܬܽܘܬܶܗ: ܘܰܠܒ̣ܶܫ ܦܰܓܪܳܐ ܡ̣ܶܢ ܦܰܓܪܳܗ̇ ܕܰܒܬܽܘܠܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܘܰܢܚ̣ܶܬ ܓܰܫ ܬܗܽܘ̈ܡܶܝܗ̇ ܕܰܫܝܽܘܠ ܘܰܐܣ̣ܶܩ ܠܐܴܕܳܡ ܨܰܠܡܳܐ ܕܪܰܒܽܘܬܶܗ: ܘܡܶܛܽܠ ܗܳܕܶܐ ܓܽܘ̈ܕܶܐ ܕܥܺܝܪ̈ܶܐ ܡܗܰܠܠܺܝܢ ܠܶܗ: ܘܰܚܢܰܢ ܒܩ̈ܳܠܐܷ ܕܬܰܘܕܺܝܬܳܐ ܡܰܙܥܩܺܝܢܰܢ ܟܰܕ ܐܳܡܪܺܝܢܰܢ: ܫܽܘܒܚܳܐ ܠܳܟ ܐܠܰܗܳܐ ܕܶܐܬܬܰܚܬܺܝܬ ܘܪܰܡܪܶܡܬܳܢ: ܫܽܘܒܚܳܐ ܠܳܟ ܕܡܺܝܬܬ ܘܰܐܚܺܝܬܳܢ: ܫܽܘܒܚܳܐ ܠܳܟ ܕܰܣܠ̣ܶܩܬ ܠܰܫܡܰܝܳܐ ܘܥܰܡܳܟ ܐܰܘܬܶܒܬܳܢ: ܐܰܪܟܶܢ ܗܳܫܳܐ ܐܳܘ ܡܳܪܝܳܐ ܪ̈ܰܚܡܰܝܟ ܘܰܒܗܽܘܢ ܣܥܽܘܪܰܝܢܝ: ܘܫܰܕܰܪ ܚܢܳܢܳܟ ܘܕܰܟܳܐ ܠܰܢ: ܘܡ̣ܶܢ ܟܽܠܗܶܝܢ ܫܽܘܪ̈ܥܳܬܳܐ ܕܺܝܠܰܢ ܐܰܩܺܝܡ ܠܰܢ: ܘܡ̣ܶܢ ܓܽܘܡܳܨܳܐ ܕܰܚܛܺܝܬܳܐ ܕܰܠܐܴ ܠܰܢ. ܘܰܒܬܰܟܫ̈ܦܳܬܰܢ ܨܒܺܝ ܘܡ̣ܶܢ ܒܺܝܫܳܐ ܣܳܩܽܘܪܰܢ ܫܰܘܙܶܒ ܠܰܢ: ܘܩܰܒܶܠ ܨܠܰܘ̈ܳܬܰܢ: ܘܫܰܟܶܢ ܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܘܚܰܕܳܐ ܠܥܺܕܬܳܟ ܡܗܰܝܡܰܢܬܳܐ ܒܥܺܐܕܳܐ ܫܒܺܝܚܳܐ ܕܰܩܝܳܡܬܳܟ ܕܶܐܬܟܰܡܪܰܬ݀ ܒܰܙܩܺܝܦܽܘܬܳܟ: ܘܫܰܪܰܪ ܘܰܣܥܽܘܪ̈ܶܝܗ̇ ܒܫܽܘܕܳܝܳܟ ܒܕܶܢܚܳܐ ܕܪܽܘܚܳܐ ܩܰܕܺܝܫܳܐ ܘܰܒܡܰܘ̈ܗܒܳܬܳܐ ܕܺܝܠܳܟ ܫܡܰܝܳܢ̈ܳܝܳܬܳܐ: ܟܰܕ ܡܫܰܡܠܐܷ ܐܰܢ̱ܬ ܠܘܳܬܳܗ̇ ܫܽܘܘܕܳܝܳܐ ܕܶܐܫܬܰܘܕܺܝܬ ܠܳܗ̇ ܒܝܰܘܡܳܐ ܕܣܽܘܠܳܩܳܟ: ܟܰܕ ܐܳܫ̇ܶܕ ܐܰܢ̱ܬ ܥܠܶܝܗ̇ ܫܶܦ̈ܥܶܐ ܥܰܬܺܝܪ̈ܶܐ ܕܥܽܘܕܪ̈ܳܢܰܝܟ ܘܚܰܕܳܐ ܠܰܟܪ̈ܺܝܗܶܐ ܒܚܽܘܠܡܳܢܳܐ: ܘܰܠܡܶܣ̈ܟܺܢܶܐ ܒܦܽܘܪܢܳܣܳܐ ܕܚܰܝ̈ܶܐ ܙܰܒܢܳܝ̈ܶܐ. ܘܰܥܒܶܕ ܢܝܳܚܳܐ ܘܒܽܘܣܳܡܳܐ ܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܛܰܝܒܽܘܬܳܟ: ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܪܰܡܪܶܡ ܘܗܰܕܰܪ ܡܳܪܝܳܐ ܠܥܺܕܬܳܟ ܩܰܕܺܝܫܬܳܐ ܕܰܒܟܽܠ ܐܰܬܰܪ: ܒܪ̈ܳܥܰܘܳܬܳܐ ܬܪ̈ܺܝܨܰܝ ܫܽܘܒܚܳܐ ܘܰܒܡܰܠܦܳܢ̈ܶܐ ܐܳܘܪ̈ܬܽܘܕܳܘܟܣܽܘ. ܘܟܰܕ ܡܫܰܪܰܪ ܐܰܢ̱ܬ ܠܳܗ̇ ܒܝܽܘܠܦܳܢ̈ܶܐ ܐܶܘܢܓܶܠܳܝ̈ܶܐ: ܘܫܰܟܶܢ ܠܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܫܰܝܢܳܐ ܘܰܫܠܳܡܳܐ ܘܪ̈ܰܚܡܶܐ ܘܰܚܢܳܢܳܐ ܠܗܳܠܶܝܢ ܕܡܰܘܕܶܝܢ ܒܳܟ ܫܰܪܺܝܪܳܐܺܝܬ ܐܰܢ̱ܬ ܕܺܐܝܬܰܝܟ ܐܠܰܗܳܐ ܫܰܪܺܝܪܳܐ: ܘܰܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

 

ܫܽܘܒ̈ܚܶܐ ܠܐܴ ܡܶܬܦܰܣܩܳܢ̈ܶܐ: ܘܗܶܕܪ̈ܶܐ ܠܐܴ ܡܶܬܦܰܚܡܳܢ̈ܶܐ ܗܽܘ̈ܠܳܠܐܷ ܕܟܰܝ̈ܳܐ ܕܪܰܒܽܘܬ ܦܰܐܝܽܘܬܳܐ ܢܶܫܬܘܶܐ ܕܢܰܣܶܩ ܠܚܰܕ ܐܠܰܗܳܐ ܣܓܺܝܕܳܐ ܘܠܐܴ ܡܶܬܡܰܠܠܳܢܳܐ: ܗ̇ܰܘ ܕܒܰܬܠܳܬܳܐ ܩܢܽܘ̈ܡܶܐ ܝ̇ܳܠܽܘܕܳܐܺܝܬ ܘܺܝܠܺܝܕܳܐܺܝܬ ܘܢܳܦܽܘܩܳܐܺܝܬ ܒܕܺܝܠܳܝ̈ܳܬܳܐ ܡ̇ܰܢ ܡܦܰܪܫܳܐܺܝܬ ܘܠܐܴ ܒܠܺܝܠܐܴܝܬ: ܒܰܟܝܳܢܳܐ ܕܶܝܢ ܚܕܳܢܳܐܺܝܬ ܘܽܐܘܣܺܝܰܝܳܐܺܝܬ. ܘܒܰܠܚܽܘܕܳܝܽܘܬܳܐ ܡܶܬܪܰܡܪܰܡ ܘܡܶܬܩܰܕܰܫ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܗ̇ܰܘ ܕܰܡܥܰܠܰܝ ܡܶܢܟܽܠ ܒܺܐܝܩܳܪܳܐ ܘܰܒܫܽܘܒܚܳܐ ܘܪܰܒܽܘܬܳܐ ܕܶܐܬܬܰܚܬܺܝ ܒܨܶܒܝܳܢܶܗ ܠܣܽܘܪܳܩܳܐ ܘܰܠܚܰܫ̈ܶܐ ܡܰܠܝ̈ܰܝ ܫܺܝܛܽܘܬܳܐ. ܘܟܰܕ ܢܣ̣ܰܒ ܠܶܗ ܦܰܓܪܳܐ ܡܚܺܝܠܐܴ ܡ̣ܶܢ ܟܝܳܢܳܐ ܫܺܝܛܳܐ ܕܐ̱ܢܳܫܽܘܬܳܐ ܕܺܝܠܰܢ: ܘܒܶܗ ܚܰܕܶܬ ܠܰܓܒܺܝܠܬܰܢ ܕܒܶܠܥܳܬ݀ ܒܰܚܒܳܠܐܴ ܘܰܐܥܬܩܰܬ݀ ܒܚܰܫ̈ܶܐ ܕܰܚܛܺܝܬܳܐ: ܘܒܳܬܰܪ ܕܫܰܡܠܺܝ ܡܕܰܒܪܳܢܽܘܬܶܗ ܢܚ̣ܶܬ ܠܒܶܝܬ ܡܺܝ̈ܬܶܐ ܕܢܶܒܕܽܘܩ ܨܰܠܡܶܗ ܕܰܐܫܚ̣ܶܬ ܒܰܚܒܳܠܐܴ ܓܡܺܝܪܳܐ. ܘܢܶܙܪܽܘܥ ܒܶܝܬ ܡܺܝ̈ܬܶܐ ܘܢܽܘܚܳܡܳܐ ܘܚܰܝ̈ܶܐ ܚܰܕ̈ܬܶܐ ܠܢܰܦ̈ܫܳܬܳܐ ܕܰܐܚܺܝ̈ܕܳܢ ܗܘ̈ܰܝ ܒܰܫܝܽܘܠ: ܘܪܰܣ̣ ܛܰܐܠܐܴ ܕܢܽܘܚܳܡܳܐ ܥܰܠ ܓܰܪ̈ܡܰܝܗܽܘܢ: ܘܩܳܡ ܒܫܽܘܒܚܳܐ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܰܐܥܪܰܩ ܠܢܳܛܘܽܪ̈ܶܐ ܘܒܰܠܗܺܝ ܐܶܢܽܘܢ. ܘܥܳܩܬܳܐ ܘܰܪܬܺܝܬܳܐ ܐܰܘܪܶܬ ܐܶܢܽܘܢ: ܘܶܐܬܚܙܺܝ ܠܢܶܫ̈ܶܐ ܢܰܟ̈ܦܳܬܳܐ ܡ̣ܶܢ ܕܩܳܡ ܟܰܕ ܛܥܺܝ̣̈ܢܳܢ ܗܶܪ̈ܽܘܡܶܐ ܫܰܦܪܳܐܺܝܬ ܕܰܢܒܰܣ̈ܡܳܢ ܗܘ̈ܰܝ ܠܦܰܓܪܶܗ ܕܚܰܝܳܐ ܕܰܩܒܺܝܪ ܗ̣ܘܳܐ ܒܝܬ ܥܰܢܺܝ̈ܕܶܐ: ܘܣܰܒܰܪ ܐܶܢܶܝܢ ܡܰܠܐܱܟ̈ܶܐ ܕܠܰܝܬܰܘܗܝ ܚܰܝܳܐ ܬܢܳܢ ܩܳܡ ܠܶܗ ܒܬܶܫܒܽܘܚܬܳܐ ܐܶܠܐܴ ܙܶܠܶܝ̈ܢ ܐܶܡܰܪ̈ܶܝܢ ܠܐܱܚܰܘ̈ܗܝ ܕܢܺܐܙܽܠ̱ܘܢ ܠܰܓܠܺܝܠܐܴ ܘܬܰܡܳܢ ܢܶܚܙܽܘܢܳܝܗܝ. ܘܒܳܬܰܪ ܕܩܳܡ ܘܰܡܠܺܝ ܐܰܪܒܥܺܝܢ ܝܰܘ̈ܡܺܝܢ ܥܰܠ ܐܰܪܥܳܐ ܐܰܟܡܳܐ ܕܰܨܒ̣ܳܐ ܕܰܢܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗܝ: ܕܗ̣ܽܘ ܐܺܝܬܰܘܗܝ ܡܳܪܗܽܘܢ ܘܪܰܒܗܽܘܢ ܘܰܐܠܳܗܗܽܘܢ: ܘܰܣܠ̣ܶܩ ܠܶܗ ܠܐܱܬܪܳܐ ܕܺܐܝܬܰܘܗܝ ܗ̣ܘܳܐ ܡܶܢܶܗ: ܘܪܽܘܚܳܐ ܫܘܶܐ ܠܶܗ ܒܽܐܘܣܺܝܰܐ ܟܰܕ ܠܐܴ ܫܰܒܩܶܗ ܘܒܶܗ ܡܕܰܝܰܪ ܗ̣ܘܳܐ: ܘܥ̣ܰܠ ܠܰܩܕܽܘܫܩܽܘ̈ܕܫܺܝܢ ܓܰܘܳܝܳܐ: ܘܰܠܡܰܫܟܢܳܐ ܗ̇ܰܘ ܕܠܐܴ ܥܒܺܝܕ ܒܺܐܝܕܰܝ̈ܳܐ: ܕܡܶܬܝܰܕܥܳܢܳܐܺܝܬ ܡܶܣܬܰܟܰܠ ܠܗܰܘ̈ܢܶܐ ܕܰܒܪ̈ܰܝܳܐ. ܘܟܰܕ ܣܠ̣ܶܩ ܠܬܰܪ̈ܥܶܐ ܕܰܫܡܰܝܳܐ ܦܬܰܚ ܠܰܢ: ܗ̇ܳܢܽܘܢ ܕܡ̣ܶܢ ܙܰܒܢܳܐ ܕܰܐܒܽܘܢ ܐܳܕܳܡ ܩܰܕܡܳܝܳܐ ܒܠܐܴ ܡܶܫܬܰܡܥܳܢܽܘܬܳܐ ܕܺܝܠܰܢ ܘܰܥܒ̇ܳܪ ܦܽܘܩܕܳܢܳܐ ܐܶܚܰܕܢܰܢ: ܗ̣ܽܘ ܕܶܝܢ ܒܝܰܕ ܕܰܗ̣ܘܳܐ ܡܶܢܰܢ: ܠܝܳܪܬܽܘܬܰܢ ܩܰܕܡܳܝܬܳܐ ܐܰܦܢܺܝ ܠܰܢ. ܘܟܰܕ ܡ̣ܶܢ ܝܰܡܺܝܢ ܐܰܒܽܘܗܝ ܘܰܐܘܬܶܒ ܠܰܢ: ܒܝܰܕ ܪܺܝܫܺܝܬܳܐ ܕܦܰܓܪܶܗ ܡܢܰܦܫܳܐ ܗ̇ܰܘ ܕܰܢܣ̣ܰܒ ܡܶܢܰܢ. ܕܡ̣ܶܢ ܗܳܪܟܳܐ ܗܳܟܺܝܠ ܘܚܰܝܠܰܘ̈ܳܬܳܐ ܫܡܰܝ̈ܳܢܶܐ ܟܰܕ ܚ̣ܳܪܘ ܒܶܗ ܘܰܚܙܰܐܘܽܘܗܝ ܕܣ̇ܳܠܶܩ ܠܰܫܡܰܝܳܐ ܦܰܓܪܳܢܳܐܺܝܬ: ܘܰܐܝܟ ܚܕܳܐ ܬܽܘܒ ܥܰܡܶܗ ܠܰܟܝܳܢܳܐ ܕܰܒܢ̈ܰܝ ܐ̱ܢܳܫܳܐ ܡܥܰܠܐܷ: ܬܶܗܪܳܐ ܘܕܽܘܡܳܪܳܐ ܐܶܬܡܠܺܝܘ: ܘܰܕܡܰܢܽܘ ܗܳܢܳܐ ܠܰܚܕ̈ܳܕܶܐ ܡܫܰܐܠܺܝܢ ܗ̣ܘܰܘ: ܕܡܰܢܽܘ ܗܳܢܳܐ ܡܰܠܟܳܐ ܕܺܐܝܩܳܪ̈ܶܐ: ܘܰܡܦܰܢܶܝܢ ܗܳܟܺܝܠ ܘܳܐܡܪܺܝܢ ܗܳܢܰܘ ܡܳܪܝܳܐ ܥܰܫܺܝܢܳܐ ܘܰܩܪܰܒܬܳܢܳܐ. ܘܳܐܦ ܚܢܰܢ ܥܰܠ ܐܰܦ̈ܰܝ ܦܽܘܪܩܳܢܰܢ ܥܰܡ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܩܳܥܶܝܢܰܢ: ܒܪܺܝܟ ܗ̣ܽܘ ܕܶܐܬܬܰܚܬܝ ܘܪܰܡܪܶܡ ܠܰܢ: ܒܪܺܝܟ ܗ̣ܽܘ ܕܶܐܬܳܐ ܘܰܦ̣ܪܰܩ ܠܰܢ: ܒܪܺܝܟ ܗ̣ܽܘ ܕܰܢܚ̣ܶܬ ܠܓܰܘ ܩܰܒܪܳܐ ܡܶܛܽܠܳܬܰܢ: ܘܥܰܡܶܗ ܒܫܽܘܒܚܳܐ ܐܰܩܺܝܡ ܠܰܢ: ܘܰܒܪܺܝܟ ܗ̣ܽܘ ܡܳܪܝܳܐ ܕܶܐܬܡܰܟܰܟ ܘܰܗ̣ܘܳܐ ܡܺܝܬܳܐ ܒܓܰܘ ܩܰܒܪܳܐ ܘܰܐܦܢܺܝ ܠܐܴܕܳܡ ܡ̣ܶܢ ܛܳܥܝܽܘܬܳܐ ܘܡ̣ܶܢ ܗܳܘܬܳܐ ܕܰܐܒܕܳܢܳܐ ܐܰܦܩܶܗ: ܒܪܺܝܟ ܕܳܐܬܶܐ ܠܚܰܪܬܳܐ ܘܰܡܢܰܚܶܡ ܠܰܢ: ܒܪܺܝܟ ܗ̣ܽܘ ܕܰܒܪܽܘܚܳܦܳܐ ܕܺܐܝܕܰܘ̈ܗܝ ܩܰܕܺܝ̈ܫܳܬܳܐ ܐܠܰܒ̣ܶܫ ܠܰܫܠܺܝ̈ܚܰܘܗܝ ܓܢ̱ܒܰܪ̈ܘܳܬܳܐ. ܘܒܰܕܓܽܘܢ ܚܢܰܢ ܡܫܺܝܚܳܐ ܡܳܪܰܢ ܟܰܕ ܠܥܺܐܕܳܐ ܗܳܢܳܐ ܕܰܩܝܳܡܬܳܟ ܡܰܥܒܪܳܢܺܝܬܳܐ ܕܥܳܩ̈ܳܬܰܢ ܒܚܰܕܽܘܬܳܐ ܡܫܰܡܠܺܝܢܶܢ: ܘܕܰܢܩܰܒܶܠ ܠܡܶܐܬܺܝܬܳܟ ܕܬܰܪܬܶܝܢ ܒܚܰܕܽܘܬܳܐ ܘܒܰܕܝܳܨܳܐ ܡܣܰܟܶܝܢܰܢ ܘܰܠܪ̈ܰܚܡܰܝܟ ܡܦܺܝܣܺܝܢܰܢ ܕܰܒܚܰܝ̈ܶܐ ܕܰܬܢܳܢ ܕܠܳܟ ܫܳܦܪܺܝܢ ܢܶܬܕܰܒܰܪ: ܘܰܠܙܰܒܢܳܐ ܗܳܢܳܐ ܕܬܰܘܬܳܒܽܘܬܰܢ ܣܛܰܪ ܡ̣ܶܢ ܫܚ̈ܳܩܶܐ ܘܛܽܘܪ̈ܳܦܶܐ ܒܥܽܘܕܪܳܢܳܐ ܕܡܶܢܳܟ ܢܶܫܟܰܚ: ܘܒܰܫܠܳܡܳܐ ܕܥܰܡܳܟ ܢܶܬܒܰܣܰܡ ܘܡ̣ܶܢ ܟܽܠ ܡܰܪ̈ܕܘܳܬܳܐ ܒܺܝ̈ܫܳܬܳܐ ܘܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܢܶܫܬܰܘܙܰܒ: ܘܡܳܐ ܕܡܶܢ ܗܽܘܠܐܷ ܐܰܪܥܳܢܳܝܬܳܐ ܘܝܰܩܺܝܪܬܳܐ: ܘܰܕܝܰܬܺܝܪ ܥܒܺܝܬܳܐ ܡܶܬܚܰܪܪܺܝܢܰܢ: ܘܡ̣ܶܢ ܐܰܣܽܘܪ̈ܰܘܗܝ ܕܦܰܓܪܳܐ ܗܳܢܳܐ ܡܶܬܢܰܦܨܺܝܢܰܢ: ܢܶܣܰܒ ܠܠܐܴ ܡܳܝܽܘܬܽܘܬܳܐ ܗ̇ܳܝ ܕܡܶܢܳܟ ܡܠܺܝܟܳܐ ܠܰܢ: ܘܥܰܡ ܚܰܝܠܰܘ̈ܳܬܳܐ ܠܐܴ ܗܽܘܠܳܢܳܝ̈ܶܐ ܠܐܘܪܥܳܐ ܕܺܝܠܳܟ ܢܶܬܚܰܛܰܦ. ܘܰܒܟܽܠܙܒܰܢ ܥܰܡܳܟ ܠܥܳܠܰܡ: ܘܰܕܠܐܴ ܫܽܘܠܳܡܳܐ ܢܶܗܘܶܐ: ܘܰܚܢܰܢ ܟܺܝܬ ܘܥܰܢܺܝ̈ܕܰܝܢ ܡܗܰܝܡ̈ܢܶܐ ܕܰܒܫܰܦܺܝܪܽܘܬ ܬܰܘܕܺܝܬܳܐ ܕܒܳܟ ܐܶܬܬܢܺܝܚܘ ܢܶܫܟܰܚ ܦܰܪܶܗܣܺܝܰܐ ܒܩܰܘܡܳܐ ܕܡ̣ܶܢ ܝܰܡܺܝܢܳܟ: ܐܰܝܟܰܢܳܐ ܕܫܽܘܒ̈ܚܶܐ ܫܦܰܝ̈ܳܐ ܥܰܡ ܐܶܡܪ̈ܶܐ ܕܟܰܝ̈ܳܐ ܕܠܐܴ ܫܶܠܝܳܐ ܢܙܰܡܰܪ ܠܳܟ ܕܰܟܝܳܐܺܝܬ: ܒܪܳܐ ܝܺܚܺܝܕܳܝܳܐ ܕܒܰܩܝܳܡܬܳܟ ܐܶܬܚܰܪܰܪܢܰܢ ܘܠܐܱܒܽܘܟ ܗܰܘ ܠܐܴ ܡܶܬܚܰܙܝܳܢܳܐ ܕܡ̣ܶܢ ܝܰܡܺܝܢ ܪܰܒܽܘܬܳܐ ܒܳܟ ܝܺܬܶܒܢܰܢ: ܘܰܠܪܽܘܚܳܟ ܩܰܕܺܝܫܳܐ ܐܶܫܬܰܡܠܺܝܢܰܢ ܗܳܫܳܐ܀

 

ܥܛܪܐ

ܬܰܘܕܺܝ ܠܳܟ ܦܺܝܪܡܳܐ ܕܚܽܘܣܳܝܳܐ ܘܥܶܛܪܳܐ ܓܰܒܝܳܐ ܕܒܰܣܡܳܗ̇ ܠܰܒܪܺܝܬܳܐ ܟܽܠܳܗ̇ ܒܪܺܝܚܶܗ ܗܰܢܺܝܳܐܐ: ܘܩܳܡ ܡ̣ܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ ܘܰܣܠ̣ܶܩ ܘܺܝܬܶܒ ܒܰܡܪ̈ܰܘܡܶܐ ܡ̣ܢ ܝܰܡܺܝܢܳܐ ܕܫܳܠܽܘܚܶܗ ܒܰܣܶܡ ܡܳܪܝ ܒܛܰܝܒܽܘܬܳܟ: ܠܥܺܕܬܳܟ ܩܰܕܺܝܫܬܳܐ ܘܠܐܴ ܬܪܰܦܶܐ ܠܝܰܠܕܶܝ̈ܗ̇ ܝܰܬܡ̈ܶܐ ܡ̣ܶܢ ܐܺܝ̇ܳܠܐܴ ܕܥܽܘܕܪ̈ܳܢܰܝܟ ܐܶܠܐܴ ܐܰܫܰܪ ܠܘܳܬܳܗ̇ ܫܽܘܘܕܳܝܳܟ ܫܰܪܺܝܪܳܐ ܕܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܴܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܚܘܬܡܐ

ܛܰܪ ܠܰܢ ܡܫܺܝܚܳܐ ܐܠܰܗܳܐ ܫܽܘܘ̈ܕܳܝܶܐ ܕܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܐܶܫܬܰܘܕܺܝܬ: ܘܛܰܟܶܣ ܠܰܢ ܠܥܰܒܕܰܝ̈ܟ ܘܣܳܓܽܘ̈ܕܰܝܟ ܒܓܽܘ̈ܕܶܐ ܕܩܰܕܺܝ̈ܫܰܝܟ: ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܫܒܺܝܚܬܳܐ ܕܡ̣ܶܢ ܩܰܒܪܳܐ. ܘܗܰܒܠܰܢ ܕܢܶܗܘ̈ܝܳܢ ܬܰܪ̈ܥܝܳܬܰܢ ܘܡܰܚܫ̈ܒܳܬܰܢ ܗܳܪ̈ܓܳܢ ܘܗܳܪ̈ܣܳܢ ܒܢܳܡܽܘ̈ܣܰܝܟ ܗܳܢܽܘܢ ܡܰܐܚܝ̈ܳܢܶܐ ܘܫܽܘܒܚܳܐ ܕܠܐܴ ܫܶܠܝܳܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܡܳܪ̈ܰܘܳܬܳܐ ܕܨܶܒܝܳܢܳܐܺܝܬ ܢܚ̣ܶܬ ܠܐܱܪܥܳܐ ܒܪܶܚܡܬܳܐ ܡܶܛܽܠ ܐܳܕܳܡ ܨܰܠܡܳܐ ܕܪܰܒܽܘܬܶܗ ܕܢܶܦܪܩܺܝܘܗܝ ܡ̣ܢ ܚܛܺܝܬܳܐ: ܠܗ̇ܰܘ ܦܳܪܩܳܐ ܪܰܒܳܐ ܕܰܢܚ̣ܶܬ ܠܒܶܝܬ ܡܺܝ̈ܬܶܐ ܘܦܰܪܩܳܗ̇ ܠܰܒܪܺܝܬܳܐ ܡ̣ܶܢ ܩܛܺܝܪܶܗ ܕܒܺܝܫܳܐ ܡܳܪܽܘܕܳܐ: ܘܰܠܒܶܝܬ ܐܰܒܽܘܗܝ ܐܰܗܦܟܳܗ̇ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܠܳܟ ܒܪܳܐ ܡܶܠܬܳܐ ܘܚܶܟܡܬܳܐ ܕܰܐܠܳܗܳܐ ܐܰܒܳܐ ܡܩܰܪܒܺܝܢܰܢ ܣܶܓ̈ܕܳܬܳܐ ܘܪܽܘܡܪ̈ܳܡܶܐ ܒܥܺܐܕܳܐ ܗܳܢܳܐ ܕܢܽܘܚܳܡܳܟ ܫܒܺܝܚܳܐ ܘܠܐܴ ܡܶܬܡܰܠܠܳܢܳܐ ܘܰܡܠܐܷ ܬܶܗܪܳܐ. ܠܐܴ ܓܶܝܪ ܣܳܦ̇ܶܩ ܠܶܫܳܢܰܢ ܫܺܝܛܳܐ ܘܬܰܚܽܘܒܳܐ ܕܢܰܘܕܶܐ ܠܛܰܝܒܽܘܬܳܟ ܡܳܪܝܳܐ ܡܪܰܚܡܳܢܳܐ ܘܰܡܠܐܷ ܪ̈ܰܚܡܶܐ ܕܥܰܠ ܟܽܠ ܫܦܺܝܥܺܝܢ ܪ̈ܰܚܡܰܝܟ ܕܠܰܢ ܗ̇ܳܢܽܘܢ ܕܒܰܕܡܽܘܬ ܚܘܰܘ̈ܳܬܳܐ ܒܰܐܪܥܳܐ ܪܳܫܦܺܝܢ ܗ̣ܘܰܝܢ ܘܰܒܚܰܫ̈ܶܐ ܕܰܚܛܺܝܬܳܐ ܡܥܰܪܙܠܺܝܢ ܗ̣ܘܰܝܢ. ܠܐܴ ܢܳܕܬ ܠܳܗ̇ ܠܪܰܒܽܘܬܳܟ ܡܶܢܰܢ ܐܶܠܐܴ ܢܚ̣ܶܬܬ ܡ̣ܶܢ ܡܰܘܬܰܒ ܐܺܝܩܳܪܳܟ ܠܡܽܘܟܳܟܳܐ ܡܨܰܥܪܳܐ ܘܰܠܫܺܝܛܽܘܬܳܐ ܐ̱ܢܳܫܳܝܬܳܐ ܘܰܥܡ̣ܰܪܬ ܒܰܫܝܽܘܠ ܬܠܳܬܳܐ ܝܰܘ̈ܡܺܝܢ ܒܰܬܗܽܘ̈ܡܶܐ ܚܶܫܽܘܟܳܝ̈ܶܐ ܕܰܐܪܥܳܐ. ܘܡ̣ܶܢ ܒܶܝܬ ܫܶܢ̈ܶܐ ܕܡܰܘܬܳܐ ܝܰܥܢܳܐ ܐܰܦܶܩ̣ܬ ܐܶܢܽܘܢ ܠܟܽܠܗܽܘܢ ܚܒܺܝ̈ܫܶܐ ܕܡ̣ܶܢ ܢܽܘܓܪܳܐ ܪܰܒܳܐ ܠܳܟ ܡܣܰܟܶܝܢ ܗ̣ܘܰܘ: ܘܠܐܱܘ̈ܘܳܢܶܐ ܥܶܠܳܝ̈ܶܐ ܕܡܰܠܟܽܘܬܳܟ ܐܰܣ̣ܩܬ ܠܰܢ ܠܰܣܚܺܝ̣̈ܦܶܐ ܘܡܰܣܠܰܝ̈ܳܐ. ܘܰܗܘ̣ܰܝܬ ܬܰܪܥܳܐ ܘܡܰܥܠܬܳܐ ܠܰܢ ܠܘܳܬ ܐܰܒܽܘܟ ܫܡܰܝܳܢܳܐ: ܘܡ̣ܶܢ ܝܰܡܝܢܳܐ ܕܬܶܫܒܽܘܚܬܶܗ ܐܰܝܟ ܪܺܝܫܺܝܬܳܐ ܡܝܰܩܰܪܬܳܐ ܐܰܣܶܩ̣ܬ ܘܣܳܡ̣ܬ ܠܪܺܝܫܺܝܬܳܐ ܕܓܶܢܣܰܢ ܘܡܶܛܽܠ ܗܳܕܶܐ ܚܢܰܢ ܥܰܡ ܕܰܘܺܝܕ ܢܒܺܝܳܐ ܐܳܡܪܺܝܢܰܢ: ܕܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ ܡܶܛܽܠ ܕܬܶܕܡܽܘܪܬܳܐ ܥܒ̣ܰܕ: ܘܰܚܢܰܢ ܡܙܰܡܪܺܝܢܰܢ ܘܳܐܡܪܺܝܢܰܢ ܕܩܳܡ ܐܠܰܗܳܐ ܡ̣ܶܢ ܩܰܒܪܳܐ: ܘܶܐܬܒܰܕܰܪܘ ܟܽܠܗܽܘܢ ܒܥܶܠܕ̈ܒܳܒܰܘܗܝ ܒܰܩܝܳܡܬܶܗ: ܘܰܡܦܺܝܣܺܝܢܰܢ ܠܪ̈ܰܚܡܰܝܟ ܡܬܽܘ̈ܡܳܝܶܐ: ܪܳܚܶܡܢܳܫܳܐ ܕܬܺܐܨܰܦ ܠܥܺܕܬܳܟ ܩܰܕܺܝܫܬܳܐ ܗ̇ܳܝ ܕܰܩܢܰܝܬܳܗ̇ ܒܚܰܫܰܝ̈ܟ ܘܰܦܪܰܩܬܳܗ̇ ܒܰܡܕܰܒܪܳܢܽܘܬܳܟ: ܘܰܠܟܽܠ ܩܰܘ̈ܡܳܢ ܘܡܽܘܫ̈ܚܳܢ ܕܒܳܗ̇: ܛܰܝܒܽܘܬܳܟ ܬܢܰܛܰܪܝ: ܘܰܬܣܰܝܰܥܝ ܡܪܰܚܡܳܢܽܘܬܟ: ܘܠܐܱܝܠܶܝܢ ܕܰܚ̣ܙܰܩܘ ܡܶܢܳܗ̇ ܒܚܽܘܠܳܦܳܐ ܕܚܰܝ̈ܶܐ ܐ̱ܢܳܫܳܝ̈ܶܐ ܠܥܺܕܬܳܐ ܕܺܝܠܳܟ ܐܽܘܪܫܠܶܡܳܝܬܳܐ ܡܰܢܰܥ ܘܠܐܱܝܠܶܝܢ ܕܰܥܕܰܟܺܝܠ ܚܰܐܝܺܝ̈ܢ ܫܰܘܙܶܒ ܡ̣ܶܢ ܢܶܣܝܽܘ̈ܢܶܐ ܥܰܣ̈ܩܶܐ ܘܦܰܚ̈ܶܐ ܟܣܰܝ̈ܳܐ ܘܰܓܠܰܝ̈ܳܐ: ܘܗܰܒܠܰܢ ܕܰܐܝܟ ܣܽܘܓܳܐܐ ܕܪ̈ܰܚܡܰܝܟ ܢܝܰܩܰܪ ܘܰܢܥܰܕܥܶܕ ܐܰܝܟ ܕܰܦܐܷܐ ܠܝܰܘ̈ܡܳܬܳܐ ܡܝܰܩܪ̈ܶܐ ܘܩܰܕܺܝ̈ܫܶܐ ܕܥܰܕܥܺܐܕܰܝ̈ܟ ܦܳܪ̈ܽܘܩܳܝܶܐ: ܘܰܩܝܳܡܬܳܐ ܡܰܐܚܝܳܢܺܝܬܳܐ ܐܳܦ ܒܚܰܕܽܘܬܳܐ ܪܽܘܚܳܢܳܝܬܳܐ ܘܰܒܚܽܘܪܳܪܳܐ ܕܡ̣ܶܢ ܚܰܫ̈ܶܐ ܫܟܺܝܪ̈ܶܐ ܕܒܶܣܪܳܐ ܒܕܰܟܝܽܘܬܳܐ ܕܦܰܓܪܳܐ ܘܙܰܗܝܽܘܬܳܐ ܕܢܰܦܫܳܐ ܒܩܰܘܡܳܐ ܠܐܴ ܥܕܺܝܠܐܴ ܘܰܒܦܰܪܶܗܣܺܝܰܐ ܡܫܰܡܠܳܝܬܳܐ ܕܰܩܕܳܡ ܒܺܐܡܰܐ ܕܺܝܠܳܟ ܡܰܠܝܰܬ݀ ܪܬܺܝܬܳܐ ܒܥܺܐܕܳܐ ܗ̇ܰܘ ܕܠܐܴ ܥܳܒ̇ܰܪ ܘܠܐܴ ܦ̇ܳܛܰܪ ܘܠܐܴ ܡܶܫܬܪܶܐ. ܕܒܶܗ ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܡܥܰܕܥܕܺܝܢ ܘܪ̈ܽܘܚܳܬܳܐ ܕܙܰܕܺܝ̈ܩܶܐ ܒܡܰܠܟܽܘܬܳܐ ܡܶܬܒܰܣܡܺܝܢ ܘܒܰܡܕܺܝܢ̱ܬܳܟ ܪܽܘܚܳܢܳܝܬܳܐ ܝܰܬܺܝܪ ܫܒܺܝܚܳܐܺܝܬ ܢܚܰܓܶܐ ܘܰܢܥܰܕܥܶܕ ܠܳܟ ܡܳܪܝ ܘܒܐܺܝ̈ܕܰܝܟ ܠܐܱܒܽܘܟ ܗ̇ܰܘ ܡܒܰܪܟܳܐ ܘܛܽܘܒܬܳܢܳܐ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡ ܛܟܣܐ ܫܒܝܥܝܐ ܕܡܨܥܝ̈ܐ ܕܩܝܡܬܐ ܦܪܘܩܝܬܐ

 

ܛܟܣܐ ܕܚܕ ܒܫܒܐ ܬܡܝܢܝܐ ܕܩܝܡܬܐ ܦܪܘܩܝܬܐ ܕܛܟܣܐ ܡܨܥܝܐ

ܩܕܡܝܬ ܨܠܘܬܐ ܕܫܘܪܝܐ

 

ܚܰܕܳܐ ܠܰܢ ܡܳܪܝ ܒܝܰܘܡܳܐ ܕܰܩܝܳܡܬܳܟ ܘܰܐܦܨܰܚ ܠܰܢ ܒܥܰܕܥܺܐܕܳܟ ܫܒܺܝܚܳܐ: ܘܛܰܟܶܣ ܠܰܢ ܒܰܓܢܽܘܢܳܟ ܡܠܐܷ ܚܰܕ̈ܘܳܬܳܐ ܘܰܡܠܺܝ ܠܰܢ ܒܰܣܺܝܡܽܘܬܳܐ ܘܰܪܘܳܙܳܐ: ܕܰܢܚܰܓܶܐ ܠܳܟ ܒܝܰܘܡܳܟ ܬܶܫܒ̈ܚܳܬܳܐ ܦܰܐܝ̈ܳܬܳܐ: ܘܩ̈ܳܠܐܷ ܕܬܰܘܕܺܝܬܳܐ: ܘܙܽܘܡܳܪ̈ܶܐ ܕܩܽܘܒܳܠ ܛܰܝܒܽܘܬܳܐ: ܢܩܰܪܶܒ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܚܕܰܬܳܐ ܘܬܰܘܕܺܝܬܳܐ ܐܰܡܺܝܢܬܳܐ ܘܣܶܓܕܬܳܐ ܕܰܠܥܳܠܡܺܝܢ ܘܗܶܕܪܳܐ ܠܐܴ ܡܰܘܦܝܳܢܳܐ ܘܩܽܘܠܳܣܳܐ ܠܐܴ ܡܶܫܬܬܰܩܢܳܢܳܐ ܘܪܽܘܡܪܳܡܳܐ ܕܠܐܴ ܒܳܛܶܠ ܢܶܫܬܘܶܐ ܕܢܰܣܶܩ: ܠܗ̇ܰܘ ܕܒܰܩܢܽܘܡܶܗ ܫܰܡܠܺܝ ܐ̱ܪܳܙܳܐ ܕܰܦܪܰܩܢܰܢ: ܘܰܥܕܰܡܳܐ ܠܣܳܟܶܗ ܕܡܽܘܟܳܟܳܐ ܐܶܬܢܰܚܰܬ ܘܰܦ̣ܪܰܩ ܠܰܢ: ܒܰܩܝܳܡܬܶܗ ܐܰܩܺܝܡ ܠܰܢ: ܘܰܒܫܽܘܒܚܶܗ ܒܰܣܶܡ ܠܰܢ ܘܰܒܢܽܘܚܳܡܶܗ ܚܰܕܺܝ ܠܰܢ: ܘܒܰܬܡܺܝܗܬܳܐ ܕܰܢܩܶܦ̈ܝ ܒܗܰܝܡܳܢܽܘܬܳܐ ܠܐܴ ܙܺܐܦܳܢܳܝܬܳܐ ܣܰܬܶܬ ܠܰܢ. ܘܕܰܐܠܳܗܳܐ ܫܰܪܺܝܪܳܐ ܐܺܝܬܰܘܗܝ ܫܰܘܕܰܥ ܠܰܢ: ܘܰܒܫܽܘܒܚܳܐ ܕܠܐܴ ܦܽܘܠܳܓ ܩܳܡ ܡ̣ܶܢ ܩܰܒܪܳܐ ܘܥܰܡܶܗ ܐܰܩܺܝܡ ܠܰܢ: ܘܫܰܪܪܳܗ̇ ܠܰܩܝܳܡܬܳܐ ܡܰܐܚܝܳܢܺܝܬܳܐ ܘܢܽܘܚܳܡܳܐ ܘܚܰܝܰܬ݀ ܡܺܝ̈ܬܶܐ ܡܠܐܴ ܠܰܢ: ܘܰܓܠܐܴ ܘܰܐܘܕܰܥ ܠܰܢ ܕܰܒܗ̇ܰܘ ܦܰܓܪܳܐ ܘܕܰܛܥ̣ܶܡ ܡܰܘܬܳܐ: ܒܶܗ ܐܶܬܢܰܚܰܡ ܘܩܳܡ ܕܠܐܴ ܚܒܳܠܐܴ: ܘܒܶܗ ܐܳܬܶܐ ܠܚܰܪܬܳܐ ܕܰܢܢܰܚܶܡ ܠܰܢ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܶܣܓܽܘܕ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܚܰܝܠܐܴ ܘܚܶܟܡܬܳܐ ܕܰܐܒܳܐ ܘܰܫܘܶܐ ܠܶܗ ܒܽܐܘܣܺܝܰܐ ܥܰܡ ܪܽܘܚܳܐ ܩܰܕܺܝܫܳܐ. ܗ̇ܰܘ ܕܒܰܩܝܳܡܬܐ ܕܺܝܠܶܗ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܚܰܝܕܶ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܘܰܐܦܨܰܚ ܒܢܽܘܚܳܡܶܗ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ: ܘܰܫ̣ܪܳܐ ܪܓܺܝܙܽܘܬܳܐ ܕܒܰܡܨܰܥܬܳܐ ܘܰܥܒ̣ܰܕ ܕܽܘܡܝܳܐ ܕܡܰܠܐܱܟ̈ܶܐ ܩܰܕܺܝ̈ܫܶܐ ܘܰܕܥܺܕ̈ܳܬܳܐ ܗ̇ܳܢܶܝܢ ܕܒܰܫܡܰܝܳܐ ܢܶܗܘܽܘܢ ܐܰܪ̈ܥܳܢܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܘܰܐܟܡܳܐ ܕܗܳܠܶܝܢ ܡܫܰܡܫܺܝܢ ܓܢܺܝܙܽܘܬܳܐ ܕܐ̱ܪ̈ܳܙܰܘܗܝ ܫܡܰܝ̈ܳܢܶܐ ܘܰܐܠܳܗܳܝ̈ܶܐ: ܗܳܟܰܢܳܐ ܘܗܳܠܶܝܢ ܡܙܰܝܚܺܝܢ ܐ̱ܪܳܙܳܐ ܪܰܒܳܐ ܕܰܡܕܰܒܪܳܢܽܘܬܳܟ ܕܒܰܒܣܰܪ ܘܡܶܛܽܠܗܳܕܶܐ ܟܰܕ ܚܣ̣ܰܡ ܗ̇ܰܘ ܒܥܶܠܕܒܳܒܳܐ ܘܣܳܢܳܐܐ ܕܫܰܦܺܝܪ̈ܳܬܳܐ ܘܕܰܐܒܺܝܕ ܡ̣ܶܢ ܛܽܘܒܬܳܢܽܘܬܳܐ ܘܰܡܥܰܠܝܽܘܬܳܐ: ܒܡܶܠܟܶܗ ܢܟܺܝܠܐܴ ܘܩܳܛܽܘܠܐܴ ܫܰܪܓܶܠ ܣܰܚܦܶܗ ܠܓܶܢܣܳܐ ܐ̱ܢܳܫܳܝܳܐ ܒܥܽܘܡ̈ܩܶܐ ܠܐܴ ܡܶܬܕܰܠܝ̈ܳܢܶܐ ܕܰܚܛܺܝܬܳܐ ܘܥܰܓܢܶܗ ܒܰܚܒܳܠܐܴ ܟܰܕ ܡܠܐܷ ܫܽܘܚ̈ܢܶܐ ܘܰܚܒܳܪ̈ܳܬܳܐ ܠܐܴ ܡܶܬܰܐܣܝܳܢܳܝ̈ܳܬܳܐ ܘܰܒܠܺܝܥ ܡܚܽܘܬܳܐ ܩܫܺܝܬܳܐ ܕܡܰܘܬܳܐ: ܟܰܕ ܟܶܪܝܰܬ݀ ܠܶܗ ܥܠܰܘܗܝ ܠܒܳܪܽܘܝܶܗ ܘܓܳܠ̣ܘ ܪ̈ܰܚܡܰܘܗܝ ܡܬܽܘܡܳܝ̈ܶܐ: ܘܩܰܒܶܠ ܗ̣ܘܳܐ ܥܠܰܘܗܝ ܟܽܠܗܶܝܢ ܡܳܐܟ̈ܳܬܳܐ ܐܰܝܟ ܕܰܫܦ̣ܰܪ ܒܨܶܒܝܳܢܶܗ ܛܳܒܳܐ. ܘܟܰܕ ܠܰܡܕܰܒܪܳܢܽܘܬܳܐ ܗ̇ܳܝ ܕܦܽܘܪܩܳܢܳܐ ܟܽܠܳܗ̇ ܓܡ̣ܰܪ ܘܫܰܡܠܺܝ: ܘܰܥܕܰܡܳܐ ܠܰܫܝܽܘܠ ܕܡܺܝ̈ܬܶܐ ܡܶܛܽܠܳܬܶܗ ܐܶܬܬܰܚܬܺܝ: ܘܩܰܛܠܶܗ ܠܡܰܘܬܳܐ ܩܳܛܽܘܠܶܗ ܕܓܶܢܣܰܢ: ܘܩܳܡ ܒܫܽܘܒܚܳܐ ܡ̣ܶܢ ܩܰܒܪܳܐ ܘܰܐܩܺܝܡܶܗ ܠܐܴܕܳܡ ܕܰܚ̣ܛܳܐ ܘܦܰܢܝܶܗ ܠܛܶܟܣܶܗ ܩܰܕܡܳܝܳܐ ܘܣܰܬܶܬ ܚܰܟܡܶܗ ܘܫܰܪܪܶܗ ܘܰܐܠܦܶܗ ܐ̱ܪ̈ܳܙܶܐ ܫܒܺܝ̈ܚܶܐ ܕܰܡܕܰܒܪܳܢܽܘܬܳܐ ܦܳܪܽܘܩܳܝܬܳܐ: ܕܰܐܟܙܢܳܐ ܕܥ̣ܰܠ ܡ̣ܶܢ ܐܶܕܢܳܐ ܠܓܰܘ ܟܰܪܣܳܐ ܟܰܕ ܢܛܺܝܪܺܝܢ ܛܰܒ̈ܥܰܐ ܕܗ̇ܳܝ ܕܺܝܠܶܕܬܶܗ: ܗܳܟܰܢܳܐ ܥ̣ܰܠ ܠܥܶܠܺܝܬܳܐ ܨܶܝܕ ܬܰܠܡܺܝ̈ܕܰܘܗܝ ܟܰܕ ܬܰܪ̈ܥܐ ܐܰܚܺܝܕܺܝܢ ܗ̣ܘܰܘ. ܘܰܐܟܙܢܳܐ ܕܰܢܦ̣ܰܩ ܡ̣ܢ ܩܰܒܪܳܐ ܟܰܕ ܛܰܒܥ̈ܶܐ ܘܰܚܬܳܡ̈ܶܐ ܠܐܴ ܫ̣ܪܳܐ: ܗܳܟܰܢܳܐ ܐܳܬܺܝܠܶܕ ܒܰܒܣܰܪ ܟܰܕ ܒܬܽܘ̈ܠܐܷ ܘܛܰܒ̈ܥܶܐ ܕܝ̇ܳܠܶܕܬܶܗ ܠܐܴ ܫ̣ܪܳܐ: ܘܰܐܟܙܢܳܐ ܕܶܐܬܚܙܺܝ ܒܦܰܓܪܳܐ ܘܶܐܬܓܫܶܫ̈ܝ ܕܽܘܟ̈ܝܳܬܳܐ ܕܨܳܨ̈ܳܐ ܘܠܽܘܟܳܝܬܳܐ: ܗܳܟܰܢܳܐ ܫܰܪܺܝܪܳܐܺܝܬ ܩܳܡ ܡ̣ܶܢ ܩܰܒܪܳܐ ܕܠܐܴ ܚܒܳܠܐܴ ܒܦܰܓܪܳܐ ܕܶܐܨܛܠܶܒ ܘܶܐܬܩܒܰܪ: ܘܰܐܟܙܢܳܐ ܕܰܩܕܳܡ ܩܝܳܡܬܳܐ ܕܺܝܠܶܗ ܚܰܦܺܝ ܠܡܺܝܬܽܘܬܳܐ ܕܦܰܓܪܳܗ: ܒܫܽܘܒܚܳܐ ܕܠܐܴ ܡܳܝܽܘܬܽܘܬܳܐ ܕܰܐܠܳܗܽܘܬܶܗ: ܥܰܠ ܛܽܘܪܳܐ ܕܬܳܒܽܘܪ: ܟܰܕ ܟܝܳܢܶܗ ܠܐܴ ܐܶܫܬܰܚܠܰܦ: ܗܳܟܰܢܳܐ ܒܳܬܰܪ ܩܝܳܡܬܶܗ ܚܰܦܺܝ ܠܫܽܘܒܚܳܐ ܕܠܐܴ ܡܳܝܽܘܬܽܘܬܶܗ ܒܓܰܘܢܳܐ ܕܒܶܣܪܳܐ ܡܳܝܽܘܬܳܐ. ܘܰܛܥ̣ܶܡ ܟܽܠ ܫܽܘ̈ܡܳܬܳܐ ܟܰܕ ܟܝܳܢܶܗ ܣܳܟ ܠܐܴ ܐܶܫܬܰܚܠܰܦ: ܘܒܰܕܓܽܘܢ ܟܰܕ ܠܪܰܒܽܘܬܶܗ ܘܠܰܫܒܺܝܚܽܘܬܶܗ ܕܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܡܶܫܬܰܘܕܥܺܝܢܰܢ: ܘܰܕܗ̣ܽܘ ܐܺܝܬܰܘܗܝ ܩܰܕܡܳܝܳܐ ܐܰܟܚܕܳܐ ܘܰܬܡܺܝܢܳܝܳܐ: ܡܶܣܬܰܟܠܺܝܢܰܢ ܘܰܕܐ̱ܪ̈ܳܙܶܐ ܣܓܺܝ̈ܕܶܐ ܘܪ̈ܳܡܰܝ ܡ̣ܶܢ ܥܳܠܡܳܐ ܒܶܗ ܐܶܬܓܠܺܝ ܘܶܐܬܒܰܕܰܩ ܝܳܕܥܺܝܢܰܢ: ܒܡ̈ܶܠܐܷ ܕܬܶܫܒ̈ܚܳܬܳܐ: ܘܰܕܚܰܕܽܘܬܳܐ ܘܕܰܪܘܳܙܳܐ ܡܥܳܢܶܝܢܶܢ ܘܳܐܡܪܺܝܢܰܢ ܒܪܺܝܟ ܗ̣ܽܘ ܝܰܘܡܳܐ ܗܳܢܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܕܒܳܗ̇ ܐܶܬܰܝ̈ ܠܰܢ ܟܽܠ ܛܳܒ̈ܳܬܳܐ ܫܡܰܝܳܢܳܝ̈ܳܬܳܐ: ܒܪܺܝܟ ܗ̣ܽܘ ܝܰܘܡܳܟ ܡܰܦܨܰܚ ܠܰܟܡܺܝܪ̈ܶܐ. ܒܪܺܝܟ ܢܽܘܚܳܡܳܟ ܕܰܐܥܺܝܪ ܕܰܡ̈ܟܶܐ ܡ̣ܢ ܩܰܒܪ̈ܰܝܗܽܘܢ. ܒܪܺܝܟ ܗ̣ܽܘ ܝܰܘܡܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܕܒܶܗ ܐܶܫܬܰܪܪܰܬ݀ ܒܪܺܝܬܳܐ ܟܽܠܳܗ̇ ܒܰܣܒܰܪܬܳܐ ܕܢܽܘܚܳܡܳܐ: ܒܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܐܶܡ̣ܰܪ ܡܳܪܰܢ ܠܬܰܠܡܺܝ̈ܕܰܘܗܝ ܫܠܳܡܳܐ ܥܰܡܟܽܘܢ ܬܰܠܡܺܝ̣̈ܕܰܝ: ܘܰܐܝܟܰܢܳܐ ܕܫܰܕܪܰܢܝ ܐܰܒܳܐ: ܐܳܦ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ. ܘܒܶܗ ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܟܽܠܗܽܘܢ ܐ̱ܪ̈ܳܙܶܐ ܫܰܡܠܺܝܬ ܡܶܛܽܠ ܦܽܘܪܩܳܢܰܢ: ܘܗܰܝܡܳܢܽܘܬܳܐ ܗܳܕܶܐ ܪܳܡܰܬ݀ ܡ̣ܶܢ ܟܽܠ ܟܶܫ̈ܠܐܷ ܘܦܽܘܠܳܓ̈ܶܐ ܫ̣ܰܪܰܪܬ ܒܥܽܕܬܳܐ ܘܰܕܠܐܴ ܦܽܘܠܳܓ ܚܰܘܺܝܬܳܗ̇. ܡܶܛܽܠ ܗܳܕܶܐ ܡܦܺܝܣܺܝܢܰܢ ܠܪܶܚܡܰܬ݀ ܐ̱ܢܳܫܽܘܬܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܬܰܫܰܪ ܫܽܘܘܕܳܝܳܟ ܠܥܺܕܬܳܟ ܩܰܕܺܝܫܬܳܐ: ܐܰܘܟܺܝܬ ܥܰܡܳܟ ܡܗܰܝܡܰܢܬܳܐ ܘܰܐܪܚܶܩ ܡܶܢܳܗ̇ ܠܟܽܠܳܗ̇ ܦܠܺܝܓܽܘܬܳܐ ܕܗܰܝܡܳܢܽܘܬܳܐ ܕܡܰܘܠܕܳܐ ܟܶܫ̈ܠܐܷ. ܘܰܒܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ ܫܰܪܰܪܶܝܗ̇: ܟܰܕ ܠܐܴ ܣܳܟ ܡܶܙܕܰܥܙܥܳܐ ܡ̣ܶܢ ܪܰܘܒܳܐ ܕܒܳܨܽܘ̈ܝܶܐ ܘܕܳܪ̈ܽܘܫܶܐ ܘܚܰܝܠܶܗ ܕܰܬܕܽܘܫܝ ܟܰܕ ܠܐܴ ܡܟܰܬܡܳܐ ܗܰܝܡܳܢܽܘܬܳܐ ܕܰܦܫܺܝ̈ܛܶܐ ܘܬܰܡܺܝ̣̈ܡܶܐ: ܘܫܰܠܗܒܶܝܗ̇ ܕܰܬܩܰܒܶܠܝ ܘܰܬܚܰܒܶܒܝ ܟܰܕ ܠܐܴ ܡܶܬܦܰܠܓܳܐ ܡܰܥܡܽܘܕܺܝܬܳܐ ܩܰܕܺܝܫܬܳܐ ܕܺܐܝܬܶܝܗ̇ ܐܶܣܛܠܐܴ ܕܫܽܘܒܚܳܐ ܕܡ̣ܶܢ ܡܰܝ̈ܳܐ ܚܰܝ̈ܶܐ ܠܰܒܢܶܝ̈ܗ̇ ܐܠܰܒ̣ܶܫܬ: ܘܢܰܛܰܪ ܐܶܢܽܘܢ ܕܢܶܛܪܽܘܢܳܗ̇ ܟܰܕ ܠܐܴ ܡܟܰܬܡܳܐ ܡܽܘܢܺܝܛܺܝ ܕܨܰܠܡܳܐ ܐܠܰܗܳܝܳܐ ܕܰܪܫܺܝܡܺܝܢ ܒܶܗ: ܘܰܚܬܽܘܡ ܥܠܰܝܗܽܘܢ ܕܠܐܴ ܫܽܘܚܠܳܦܳܐ ܝܽܘܩܢܳܐ ܕܣܳܝܽܘܡܽܘܬ ܒܢܰܝ̈ܳܐ ܕܡ̣ܶܢ ܡܰܥܡܽܘܕܺܝܬܳܐ ܐܠܰܗܳܝܬܳܐ ܩܰܒܶܠܘ ܕܠܐܴ ܛܽܘܠܫܳܐ ܢܶܛܪܽܘܢ ܥܕܰܡܳܐ ܠܫܽܘܠܳܡܳܐ ܛܰܒܥܳܐ ܕܡܽܘܪܽܘܢ ܩܰܕܺܝܫܳܐ ܕܒܶܗ ܐܶܬܪܫܶܡܘ ܢܶܬܢܛܰܪ ܒܶܗ ܥܰܝܢܰܝ̈ܗܽܘܢ ܠܥܳܠܰܡ: ܘܪܽܘܚܳܐ ܩܰܕܺܝܫܳܐ ܬܣܰܡܟܶܝܗ̇ ܟܰܕ ܐܰܡܺܝܢܳܐܺܝܬ ܡܰܠܦܐ ܠܥܳܢܶܝ̈ܗ̇ ܐܽܘܪܚܳܐ ܕܰܫܪܳܪܳܐ. ܕܽܘܢ ܡܳܪܝܳܐ ܕܺܝܢܳܗ̇ ܘܶܐܬܟܰܬܰܫ ܥܰܡ ܡܶܬܟܰܬܫ̈ܳܢܶܝܗ̇: ܘܰܐܚܽܘܕ ܙܰܝܢܳܐ ܘܣܰܟܪܳܐ ܘܩܽܘܡ ܠܥܽܘܕܪܳܢܳܗ̇ ܘܰܫܡܽܘܛ ܣܰܦܣܺܝܪܳܟ ܘܰܐܒܪܶܩ ܥܰܠ ܪ̈ܳܕܽܘܦܶܝܗ̇: ܘܰܐܘܫܶܛ ܠܳܗ̇ ܐܺܝܕܳܐ ܕܥܽܘܪ̈ܳܢܶܐ ܡܠܺܝܗ̇ ܫܰܝܢܳܐ ܐܰܡܺܝܢܳܐ ܘܰܐܥܬܪܶܝܗ̇ ܒܰܫܠܳܡܳܐ ܟܰܗܺܝܢܳܐ: ܘܰܦܫܽܘܛ ܝܰܡܺܝܢܳܟ ܡ̣ܶܢ ܡܪܰܘܡܳܐ ܪܳܡܳܐ ܕܩܽܘܕܫܳܟ ܘܒܰܪܟܶܝܗ̇ ܐܳܦ ܠܰܒܢܶܝ̈ܗ̇ ܒܓܰܘܳܗ̇. ܕܰܐܠܳܗ̇ ܡ̣ܶܢ ܟܺܐܡܽܘ̈ܢܶܐ ܘܡܰܚ̈ܫܽܘܠܐܷ ܕܗܳܪܺܝܢ ܥܰܡܳܗ̇: ܘܰܬܚܶܝܬ ܟܽܘܒܫܳܐ ܕܪ̈ܶܓܠܶܝܗ̇ ܢܶܬܡܰܟܟܽܘܢ. ܡܶܣܟܺܢ̈ܶܐ ܘܰܣܢܺܝ̣̈ܩܶܐ ܕܒܳܗ̇ ܡܶܢܳܟ ܢܶܬܦܰܪܣܽܘܢ: ܗ̇ܳܢܽܘܢ ܕܶܐܬܥܰܫܰܢܘ ܡ̣ܶܢ ܣܳܛܳܢܳܐ ܘܶܐܬܬܚܶܕܘ ܒܦܰܚ̈ܶܐ ܕܰܚܛܺܝܬܳܐ ܒܪ̈ܰܚܡܶܐ ܕܡܶܢܳܟ ܢܶܬܚܰܪܪܽܘܢ ܘܰܡܥܳܩ̈ܶܐ ܘܰܐܒܺܝ̣̈ܠܐܷ ܢܶܬܒܰܝܽܐܘܢ ܘܝܰܬܡ̈ܶܐ ܘܰܐܪ̈ܡܠܳܬܳܐ ܢܶܬܝܰܨܦܽܘܢ ܪ̈ܓܺܝܙܶܐ ܘܰܐܟܬܳܢ̈ܶܐ ܢܶܫܬܰܝܢܽܘܢ: ܐܳܣܽܘ̈ܛܶܐ ܘܙܰܠܺܝ̣̈ܠܐܷ ܢܶܬܢܰܟܦܽܘܢ: ܒܬܽܘ̈ܠܐܷ ܘܰܡܙܰܘ̈ܓܶܐ ܢܶܬܩܰܕܫܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܫܟ̣ܶܒܘ ܒܰܐܘ̈ܘܳܢܶܐ ܛܽܘܒܬܳܢ̈ܶܐ ܢܶܬܬܢܺܝܚܽܘܢ: ܘܡ̣ܶܢ ܟܽܠ ܬܶܐܓܡܺܝ̣̈ܢ ܕܒܳܗ̇ ܟܢܺܝܫܳܐܺܝܬ: ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܢܰܣܶܩ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܛܪܐ

ܐܰܢ̱ܬ ܗ̣ܽܘ ܡܫܺܝܚܳܐ ܦܳܪܽܘܩܰܢ ܒܰܪ ܐܺܝܬܽܘܬܶܗ ܕܰܐܒܳܐ ܕܥܰܠ̣ܬ ܠܓܰܘ ܟܰܪܣܳܗ̇ ܕܰܒܬܽܘܠܬܳܐ ܡܰܪܝܰܡ ܘܰܒܬܽܘܠܬܳܐ ܩܰܘܝܰܬ݀ ܒܳܬܰܪ ܝܰܠܕܳܐ:: ܘܰܢܦ̣ܰܩܬ ܡ̣ܶܢ ܩܰܒܪܳܐ ܘܛܰܒ̈ܥܶܐ ܩܰܝܳܡܺܝܢ: ܦܬܰܚ ܡܳܪܝ ܬܰܪܥܳܐ ܕܪ̈ܰܚܡܰܝܟ ܠܒܳܥ̈ܘܳܬܰܢ: ܘܢܶܥܽܘܠ ܥܶܛܪܳܐ ܕܦܺܝܪܡܰܢ ܠܐܱܬܪܳܐ ܓܢܺܝܙܳܐ ܕܺܐܝܬܽܘܬܳܟ: ܘܢܺܐܬܶܐ ܠܰܢ ܥܽܘܕܪܳܢܳܐ ܡ̣ܶܢ ܒܶܝܬ ܓܰܙܳܟ ܫܦܺܝܥܳܐ ܘܥܰܬܺܝܪܳܐ: ܘܢܰܣܶܩ ܠܳܟ ܫܽܘܒܚܳܐ܀

 

ܚܘܬܡܐ

ܚܰܕܳܐ ܡܳܪܝ ܠܠܶܒܰܘ̈ܳܬܰܢ: ܘܰܐܦܨܰܚ ܪ̈ܶܥܝܳܢܰܝܢ ܒܪܶܚܡܬܳܟ: ܘܰܐܫܦܰܥ ܒܽܘܪ̈ܟܳܬܳܟ ܥܰܠ ܟܽܠܰܢ. ܘܰܐܫܪܳܐ ܫܰܝܢܳܟ ܘܰܫܠܳܡܳܟ ܘܚܽܘܒܳܟ ܒܣܳܚܪ̈ܳܬܳܗ̇ ܕܥܺܕܬܳܐ ܩܰܕܺܝܫܬܳܐ: ܐܰܝܟܰܢܳܐ ܕܰܒܢܰܘ̈ܣܶܐ ܕܰܒܗܺܝܠܽܘܬܳܐ ܬܫܰܡܠܐܷ ܠܥܺܐܕܰܝ̈ܟ ܐܠܰܗܳܝ̈ܶܐ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܕܠܐܴ ܒܶܗܬܰܬ݀ ܐܰܦ̈ܶܐ: ܕܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܦܐܺܝܬܳܐ ܘܩܽܘܠܳܣ̈ܶܐ ܫܒܺܝ̈ܚܶܐ: ܘܬܰܪ̈ܥܝܳܬܳܐ ܡܨ̈ܰܠܠܳܬܳܐ ܒܦܽܘܡܳܐ ܩܰܕܺܝܫܳܐ ܘܰܡܪܺܝܩܳܐ: ܘܰܒܠܶܫ̈ܳܢܶܐ ܠܐܴ ܡܛܰܘ̈ܫܶܐ: ܘܚܽܘܫ̈ܳܒܶܐ ܠܐܴ ܫܓܺܝ̣̈ܫܶܐ ܘܗܰܘܢܳܐ ܡܦܰܓܕܳܐ ܢܶܫܬܘܶܐ ܚܢܰܢ ܚܰܛܳܝ̈ܶܐ ܕܢܰܣܶܩ ܠܐܱܒܳܐ ܠܐܴ ܡܶܬܕܰܪܟܳܢܳܐ ܘܠܰܒܪܳܐ ܝܰܠܕܳܐ ܡܬܽܘܡܳܝܳܐ ܘܠܐܴ ܡܶܬܰܐܡܪܳܢܳܐ: ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܘܠܐܴ ܡܶܬܦܰܫܩܳܢܳܐ: ܘܺܐܝܬܰܘܗܝ ܚܰܕ ܐܠܰܗܳܐ ܠܐܴ ܡܶܬܥܰܩܒܳܢܳܐ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܢܦܺܝܣܽܘܢܳܟ ܕܶܝܢ ܚܠܳܦܰܝܢ ܘܡܶܛܽܠܳܬܰܢ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܰܦܠܰܚ̣ܘ ܒܟܰܪܡܳܟ ܡܶܬܝܰܕܥܳܢܳܐ ܡ̣ܶܢ ܨܰܦܪܳܐ ܠܪܰܡܫܳܐ. ܗܳܒܶܝܠ ܗ̇ܰܘ ܡܰܟܺܝܟܳܐ ܕܰܩܛܺܝܠ ܥܰܠ ܣܰܒܪܳܟ: ܢܽܘܚ ܟܺܐܢܳܐ ܘܙܰܕܺܝܩܳܐ ܕܰܫܦ̣ܰܪ ܗ̣ܘܳܐ ܠܐܱܠܳܗܽܘܬܳܟ ܡܰܠܟܺܝܙܕܶܩ ܟܽܘܡܪܳܐ ܪܰܒܳܐ ܕܨܳܪ ܛܽܘܦܣܳܟ ܒܠܰܚܡܳܐ ܐܳܦ ܚܰܡܪܳܐ ܕܩܰܪܶܒ ܗ̣ܘܳܐ: ܐܰܒܪܳܗܳܡ ܐܰܒܳܐ ܕܥܰܡ̈ܡܶܐ ܕܰܫܡ̣ܰܥ ܩܳܠܳܟ: ܐܺܝܣܚܳܩ ܕܰܚ̣ܙܳܟ ܒܰܦܟܳܪ̈ܰܘܗܝ ܘܡܺܝܟܳܐ ܕܒܰܕܶܩ ܥܰܠ ܕܶܢܚܳܟ. ܘܟܽܠܗܽܘܢ ܢܒܺܝ̈ܶܐ ܕܶܐܬܢܰܒܺܝܘ ܥܰܠ ܡܶܐܬܺܝܬܳܟ: ܘܰܫܠܺܝ̈ܚܶܐ ܕܰܐܟ̣ܪܶܙܘ ܣܒܰܪܬܳܟ: ܘܣܳܗ̈ܕܶܐ ܕܶܐܬܩܛܶܠܘ ܡܶܛܽܠ ܚܽܘܒܳܟ: ܘܰܡܡܰܪ̈ܝܳܢܶܐ ܕܣܰܝܒ̣ܰܪܘ ܚܰܫ̈ܶܐ ܚܠܳܦܰܝܟ: ܐܶܬܪܰܥܳܐ ܠܰܢ ܡܳܪܝܳܐ ܐܠܰܗܳܐ ܐܰܝܟ ܕܶܐܬܪܰܥܺܝܬܳܝܗܝ ܠܐܱܒܽܘܢ ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܘܰܐܒܳܐ ܕܫܰܪ̈ܒܳܬܳܐ: ܟܰܕ ܐܶܡ̣ܰܪܬ ܠܶܗ: ܕܥܰܠ ܕܰܨܒ̣ܰܝܬ ܕܬܶܗܘܶܐ ܐܠܰܗܳܐ ܘܰܢܩ̣ܶܦܬ ܠܡܶܠܟܳܐ ܕܒܰܪܬ ܙܰܘܓܳܟ ܐܰܘܟܺܝܬ ܥܶܕܪܳܐ ܕܺܝܠܳܟ ܒܝܰܕ ܡܶܠܟܶܗ ܕܳܐܟܶܠܩܰܪܨܳܐ ܡܳܪܽܘܕܳܐ. ܡ̣ܶܢ ܦܰܪܕܰܝܣܳܐ ܡܰܦܶܩ ܐ̱ܢܳܐ ܠܳܟ: ܘܠܐܱܪܥܳܐ ܕܟܽܘ̈ܒܶܐ ܘܕܰܪܕܪ̈ܶܐ ܡܰܚܶܬ ܐ̱ܢܳܐ ܠܳܟ: ܘܡ̣ܶܢ ܒܳܬܰܪ ܢܽܘܗܪܳܐ ܪܰܒܳܐ ܘܣܰܓܺܝܳܐܐ ܢܓܽܘܠܽܘܢ ܪ̈ܰܚܡܰܝ ܥܠܰܝܟ: ܘܡܶܛܽܠܳܬܳܟ ܐܳܕܳܡ ܡ̣ܶܢ ܫܡܰܝܳܐ ܠܐܱܪܥܳܐ ܢܳܚ̇ܶܬ ܐ̱ܢܳܐ: ܘܡ̣ܶܢ ܒܬܽܘܠܬܳܐ ܡܰܪܝܰܡ ܒܚܰܪܰܬ݀ ܙܰܒܢ̈ܶܐ ܦܰܓܪܰܐ ܢܳܣܶܒ ܐ̱ܢܳܐ: ܘܰܐܝܟ ܟܽܠ ܥܽܘ̣̈ܠܺܝܢ ܡܶܬܺܝܠܶܕ ܐ̱ܢܳܐ: ܘܒܰܡܥܰܪܬܳܐ ܒܓܰܘ ܥܰܙܪܽܘܪ̈ܶܐ ܡܶܬܟܪܶܟ ܐ̱ܢܳܐ: ܘܡ̣ܶܢ ܡܓܽܘ̈ܫܶܐ ܒܢ̈ܰܝ ܦܳܪܶܣ ܣܶܓܕܬܳܐ ܡܶܬܩܰܪܰܒ ܠܺܝ. ܡܶܛܽܠ ܐܳܕܳܡ ܠܰܥܡܳܕܳܐ ܩ̇ܳܪܶܒ ܐ̱ܢܳܐ: ܘܡ̣ܶܢ ܝܽܘܚܰܢܳܢ ܥܰܒ̣ܕܳܐ ܘܟܳܪܽܘܙܳܐ ܥܳܡ̇ܶܕ ܐ̱ܢܳܐ: ܘܺܐܝܕܶܗ ܥܰܠ ܪܺܝܫܝ ܣܳܐܶܡ ܗ̣ܘܳܐ: ܘܰܡܩܰܒܶܠ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܗܰܝܟܠܐܴ ܕܽܐܘܪܫܠܶܡ ܥܳܐܶܠ ܐ̱ܢܳܐ: ܘܥܰܠ ܕܪ̈ܳܥܰܘܗܝ ܕܣܳܒܳܐ ܫܶܡܥܽܘܢ ܡܶܬܛܥܶܢ ܐ̱ܢܳܐ ܘܡ̣ܶܢ ܦܟܳܪ̈ܶܐ ܕܡܰܘܬܳܐ ܠܳܟ ܫ̇ܳܪܶܐ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܐܴ ܡܶܙܕܰܡܰܢ ܐ̱ܢܳܐ: ܘܡܰܝ̈ܳܐ ܠܚܰܡܪܳܐ ܛܳܒܳܐ ܡܫܰܚܠܶܦ ܐ̱ܢܳܐ: ܘܰܠܚܰܬܢܳܐ ܘܠܰܙܡܺܝ̈ܢܶܐ ܒܚܰܡܪܳܐ ܛܳܒܳܐ ܡܚܰܕܶܐ ܐ̱ܢܳܐ ܘܡܰܦܨܰܚ ܐ̱ܢܳܐ. ܡܶܛܽܠܳܬܳܟ ܐܳܕܳܡ ܠܡܰܕܒܪܳܐ ܢܳܦ̇ܶܩ ܐ̱ܢܳܐ: ܘܨܰܘܡܳܐ ܕܰܐܪܒܥܺܝܢ ܝܰܘ̈ܡܺܝܢ ܠܳܒ̇ܶܟ ܐ̱ܢܳܐ. ܘܡ̣ܢ ܡܪܰܡܝܳܢܳܐ ܡܶܬܢܰܣܶܐ ܐ̱ܢܳܐ. ܘܠܶܓܝܽܘܢܳܐ ܕܫܺܐܕ̈ܶܐ ܒܝܰܡܳܐ ܡܛܰܒܰܥ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܐܘܪܫܠܶܡ ܡܕܺܝܢܰܬ ܨܳܠܽܘ̈ܒܶܐ ܥܳܐܶܠ ܐ̱ܢܳܐ: ܘܥܰܠ ܥܺܝܠܐܴ ܒܰܪ ܐܰܬܳܢܳܐ ܡܶܙܕܰܝܰܚ ܐ̱ܢܳܐ: ܘܡ̣ܶܢ ܛܠܳܝ̈ܶܐ ܘܫܰܒܪ̈ܶܐ ܙܥܽܘܪ̈ܶܐ ܒܛܰܪ̈ܦܶܐ ܘܰܒܣܰܘ̈ܟܶܐ ܕܙܰܝܬܳܐ ܘܰܕܕܶܩ̈ܠܐܷ ܡܶܬܩܰܠܰܣ ܐ̱ܢܳܐ. ܡܶܛܽܠܳܬܳܟ ܐܳܕܳܡ ܠܚܰܫܳܐ ܩ̇ܳܪܶܒ ܐ̱ܢܳܐ: ܘܒܰܦܟܳܪ̈ܶܐ ܡܶܬܶܐܣܰܪ ܐ̱ܢܳܐ: ܘܒܰܦܪ̈ܳܓܶܠܐܷ ܡܶܬܢܰܓܰܕ ܐ̱ܢܳܐ. ܘܟܽܠ ܐܽܘܠܨ̈ܳܢܺܝܢ ܘܪܽܘܩܳܐ ܥܰܡ ܫܽܘܩܳܦ ܦܰܟ̈ܶܐ ܚܠܳܦܰܝܟ ܣ̇ܳܒܶܠ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܰܨܠܺܝܒܳܐ ܡܶܬܥܰܠܐܷ ܐ̱ܢܳܐ: ܘܚܰܠܐܴ ܘܰܡܪܳܪ̈ܶܐ ܛܳܥ̇ܶܡ ܐ̱ܢܳܐ: ܘܰܠܩܰܒܪܳܐ ܥܳܐܶܠ ܐ̱ܢܳܐ ܘܡ̣ܶܢ ܒܳܬܰܪ ܬܠܳܬܳܐ ܝܰܘ̈ܡܺܝܢ ܩܳܐܶܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ: ܘܥܰܡܝ ܠܰܫܡܰܝܳܐ ܡܰܣܶܩ ܐ̱ܢܳܐ ܠܳܟ: ܘܡ̣ܶܢ ܝܰܡܺܝܢܝ ܡܰܘܬܶܒ ܐ̱ܢܳܐ ܠܳܟ: ܘܟܰܕ ܫܡ̣ܰܥ ܐܳܕܳܡ ܗܳܠܶܝܢ ܡ̣ܶܢ ܡܳܪܶܗ ܒܚܰܕܽܘܬܳܐ ܪܰܒܬܳܐ ܐܶܡ̣ܪܰ ܡܳܪܝ ܘܰܐܠܳܗܝ ܕܗܳܐ ܟܽܠܳܗ̇ ܡܕܰܒܪܳܢܽܘܬܳܐ ܡܰܐܚܝܳܢܺܝܬܳܐ ܝܰܗ̣ܒܬ ܠܓܶܢܣܳܐ ܬܰܚܽܘܒܳܐ ܒܳܥܶܐ ܐ̱ܢܳܐ ܡܳܪܝ ܡ̣ܶܢ ܛܰܝܒܽܘܬܳܟ ܕܬܶܚܽܘܣ ܥܠܰܝ ܘܥܰܠ ܝܰܠܕ̈ܰܝ: ܘܠܐܴ ܬܶܦܪܥܰܢܝ ܐܰܝܟ ܕܫ̇ܳܘܶܐ ܐ̱ܢܳܐ ܨܰܠܡܳܟ ܐܺܝܬܰܝ ܐܶܬܪܰܚܰܡܥܠܰܝ: ܘܰܚܢܰܢ ܡܚܺܝ̣̈ܠܐܷ ܘܥܰܦܪ̈ܳܢܶܐ ܝܰܠܕ̈ܰܝ ܕܒܰܩܝܳܡܬܳܟ ܐܰܩܺܝܡܬ ܠܰܢ ܡ̣ܶܢ ܡܰܦܽܘܠܬܰܢ ܘܚܰܣܺܝܬ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܡܪܰܚܡܳܢܽܘܬܳܟ ܐܰܝܟܰܢܳܐ ܕܥܰܠ ܐܰܦ̈ܰܝ ܟܽܠܗܶܝܢ ܬܡܺܝܗ̈ܳܬܳܟ ܫܽܘܒܚܳܐ ܘܪܽܘܡܪܳܡܳܐ ܘܩܽܘܒܳܠܛܰܝܒܽܘܬܳܐ ܢܰܣܶܩ ܠܳܟ ܒܝܰܘܡܳܐ ܕܰܩܝܳܡܬܳܟ: ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܚܰܝܳܐ ܘܩܰܕܺܝܫܳܐ܀

 

ܥܛܪܐ

ܡܳܪܝܳܐ ܐܠܰܗܳܐ ܥܒܶܕ ܪܽܘܡܪܳܡܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܕܰܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܳܟ ܝܰܘܡܳܢܳܐ: ܘܰܐܝܟ ܕܰܐܫܘܺܝܬܳܢ ܕܰܢܥܰܕܥܶܕ ܩܕܳܡܰܝܟ ܥܽܘܗܕܳܢܳܐ ܕܰܩܝܳܡܬܳܟ ܐܰܫܘܳܐ ܠܰܢ ܕܢܶܥܽܘܠ ܠܰܓܢܽܘܢܳܟ ܘܢܶܦܽܘܩ ܠܐܘܪܥܳܟ: ܒܡܶܐܬܺܝܬܳܟ ܕܬܰܪܬܶܝܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܰܒܽܘܥܳܐ ܕܚܰܝ̈ܶܐ ܘܰܡܥܺܝܢܳܐ ܕܪ̈ܰܚܡܶܐ ܕܠܐܴ ܓܳܝܙܳܐ: ܠܗ̇ܰܘ ܕܢܰܚܡܶܗ ܠܓܶܢܣܰܢ ܬܰܚܽܘܒܳܐ ܒܰܩܝܳܡܬܶܗ ܐܰܣܓܺܝ ܠܰܢ ܥܽܘܕܪ̈ܳܢܶܐ ܫܰܪܺܝܪ̈ܶܐ ܒܣܰܒܪܳܐ ܫܰܪܺܝܪܳܐ ܕܢܽܘܚܳܡܶܗ: ܠܗ̇ܰܘ ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ: ܘܟܰܢܶܫ ܐܶܢܽܘܢ ܠܰܡܒܰܕܪ̈ܶܐ ܕܡܰܪܥܺܝܬܶܗ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܳܪܰܢ ܝܶܫܽܘܥ ܡܫܺܝܚܳܐ ܗ̇ܰܘ ܕܰܐܠܒ̣ܶܫܬܳܢ ܠܐܴ ܡܶܬܚܰܒܠܳܢܽܘܬܳܐ ܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ ܘܚ̣ܰܪܰܪܬ ܠܰܢ ܘܰܦ̣ܪܰܩܬ ܡ̣ܶܢ ܐܺܝ̈ܕܰܝ ܡܰܘܬܳܐ ܘܣܳܛܳܢܳܐ. ܐܰܢ̱ܬ ܡܳܪܝ ܫܰܪܰܪܬܳܗ̇ ܠܰܩܝܳܡܬܳܟ ܡܫܰܒܰܚܬܳܐ ܒܙܰܒ̈ܢܳܬܳܐ ܣܰܓܺܝ̈ܳܐܬܳܐ ܘܰܣܒܺܝ̣̈ܣܳܬܳܐ ܒܠܶܒܰܘ̈ܳܬܳܐ ܕܬܰܠܡܺܝ̈ܕܰܝܟ ܕܟܰܝ̈ܳܐ ܘܩܰܕܺܝ̈ܫܶܐ ܘܰܒܕܽܘܟ̈ܝܳܬܳܐ ܡܫܰܚܠܦ̈ܳܬܳܐ ܚܰܘܺܝܬ ܠܗܽܘܢ ܢܰܦܫܳܟ ܘܚܰܣ̣ܶܕܬ ܠܚܰܣܺܝܪܽܘܬ ܗܰܝܡܳܢܽܘܬܗܽܘܢ ܒܗ̇ܳܝ ܕܠܐܴ ܗܰܝܡ̣ܶܢܘ ܠܗܳܢܽܘܢ ܕܩܰܕܡܳܝ ܐܶܬܚܰܘܺܝ ܠܗܽܘܢ ܒܪܳܐܙܳܐ ܕܢܽܘܚܳܡܳܟ ܡܠܐܷ ܬܶܗܪܳܐ: ܘܛܽܘܒܳܐ ܝܰܗ̣ܒܬ ܠܐܱܝܠܶܝܢ ܕܠܐܴ ܚܙܰܐܘܽܘܟ ܘܗܰܝܡ̣ܶܢܘ ܒܳܟ: ܚܢܰܢ ܕܶܝܢ ܡܳܪܝ ܥܰܒ̣ܕܰܝ̈ܟ ܘܣܳܓܽܘ̈ܕܰܝܟ ܐܳܦܶܢ ܠܐܴ ܚ̣ܙܰܝܢܳܟ ܦܰܓܪܳܢܳܐܺܝܬ: ܐܶܠܐܴ ܟܽܠܝܽܘܡ ܠܰܢ ܡܶܬܚܙܶܝܬ ܪܽܘܚܳܢܳܐܺܝܬ ܥܰܠ ܡܰܕܒܚܳܐ ܪܳܐܙܳܢܳܐܺܝܬ ܘܫܰܪܺܝܪܳܐܺܝܬ ܘܠܐܴ ܡܶܬܦܰܠܓܳܢܳܐܺܝܬ: ܠܦܰܓܪܳܟ ܩܰܕܺܝܫܳܐ ܡܶܫܬܰܘܕܥܺܝܢܰܢ ܗ̇ܰܘ ܕܺܐܝܬܰܘܗܝ ܡܰܐܠܗܳܢܳܐ ܕܦܰܓܪ̈ܰܝܢ ܘܢܰܦ̈ܫܳܬܰܢ ܘܒܶܗ ܠܳܟ ܚ̇ܳܙܶܝܢܰܢ ܘܰܡܗܰܝܡܢܺܝܢܰܢ ܕܰܐܢ̱ܬ ܗ̣ܽܘ ܒܰܫܪܳܪܳܐ ܡܳܪܰܢ ܘܰܐܠܳܗܰܢ ܐܳܦ ܡܰܐܚܝܳܢܰܢ ܣܓܺܝܕܳܐ: ܘܰܐܫܘܳܐ ܠܰܢ ܡܳܪܝ ܠܛܽܘܒܳܟ ܗ̇ܰܘ ܡܳܪܳܢܳܝܳܐ ܘܰܠܦܶܓܥܳܐ ܕܒܳܟ ܡܚܰܕܝܳܢܳܐ ܘܡܰܦܨܚܳܢܳܐ ܕܝܰܘܡܳܢܳܐ ܥܽܘܗܕܳܢܳܐ ܕܰܩܝܳܡܬܳܟ ܘܢܽܘܚܳܡܳܟ ܕܡ̣ܶܢ ܒܶܝܬ ܡܺܝ̈ܬܶܐ ܐܰܝܟ ܡܶܠܬܳܟ ܡܰܐܚܝܳܢܺܝܬܳܐ ܘܩܰܕܺܝܫܬܳܐ ܡܰܥܗܕܺܝܢܰܢ. ܘܠܳܗ̇ ܒܚܰܕܽܘܬܐ ܘܩܰܕܺܝܫܬܳܐ ܡܰܥܗܕܺܝܢܰܢ. ܘܠܳܗ̇ ܠܚܰܕܽܘܬܳܐ ܡܢܰܨܪܺܝܢܰܢ ܘܳܐܡܪܺܝܢܰܢ: ܐܳܘ ܩܝܳܡܬܳܐ ܦܳܪܽܘܩܳܝܬܳܐ ܘܡܰܐܚܝܳܢܺܝܬܶܗ ܕܓܶܢܣܰܢ ܕܒܶܗ ܐܶܫܬܰܟܰܢܘ ܚܰܝ̈ܶܐ ܚܰܕ̈ܬܶܐ ܠܰܒܪܺܝܬܳܐ. ܐܳܘ ܩܝܳܡܬܳܐ ܚܕܰܬܳܐ ܘܦܳܪܽܘܩܳܝܬܳܐ ܕܰܐܠܳܗܰܢ ܕܡ̣ܶܢ ܡܺܝܬܽܘܬܳܐ ܕܰܚܛܺܝܬܳܐ ܐܰܩܺܝܡܬ ܠܰܢ. ܐܳܘ ܩܝܳܡܬܳܐ ܡܰܐܚܝܳܢܺܝܬܳܐ ܕܰܐܠܳܗܰܢ ܕܒܳܗ̇ ܡ̣ܶܢ ܒܶܝܬ ܡܺܝ̈ܬܶܐ ܩܳܡ̣ܢܰܢ. ܐܳܘ ܩܝܳܡܬܳܐ ܡܰܐܚܝܳܢܺܝܬܶܗ ܕܓܶܢܣܰܢ ܕܰܠܝܳܪܬܽܘܬܰܢ ܗ̇ܳܝ ܩܰܕܡܳܝܬܳܐ ܕܰܐܘܒܶܕܢܰܢ ܒܰܥܒ̇ܳܪ ܦܽܘܩܕܳܢܳܐ ܙܰܡܢܰܬ݀ ܠܰܢ. ܐܳܘ ܩܝܳܡܬܳܐ ܒܪܺܝܟܬܳܐ ܕܰܐܠܳܗܰܢ ܕܽܐܘܪܚܳܐ ܠܡܰܠܟܽܘܬܳܐ ܕܰܫܡܰܝܳܐ ܬܰܪܨܰܬ݀ ܠܰܢ: ܘܚܰܝ̈ܶܐ ܚܰܕ̈ܬܶܐ ܐܰܩܢܰܝܬ݀ ܠܰܢ: ܘܒܰܕܓܽܘܢ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܠܝܰܘܡܳܐ ܕܰܩܝܳܡܬܳܟ ܒܚܰܕܽܘܬܳܐ ܡܥܰܕܥܕܺܝܢܰܢ: ܕܰܠܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ ܒܰܦܨܺܝܚܽܘܬܳܐ ܣܳܘܚܺܝܢܰܢ ܘܒܳܥܶܝܢܰܢ ܘܡܶܬܟܰܫܦܺܝܢܰܢ: ܕܰܬܫܰܟܶܢ ܠܰܢ ܒܝܰܘܡܳܐ ܗܳܢܳܐ ܕܥܰܕܥܺܐܕܳܟ ܚܽܘܣܳܝܳܐ ܘܫܽܘܒܩܳܢܳܐ ܠܟܽܠܗܶܝܢ ܠܐܴ ܢܳܡܽܘܣܳܝ̈ܘܳܬܳܐ ܕܺܝܠܰܢ: ܘܰܠܥܰܢܺܝ̈ܕܰܝܢ ܡܗܰܝ̈ܡܢܶܐ ܐܰܝܠܶܝܢ ܕܰܥܢ̣ܰܕܘ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܐܰܢܺܝܚ ܐܶܢܽܘܢ ܒܰܐܘ̈ܘܳܢܶܐ ܛܽܘܒܬܳܢ̈ܶܐ ܕܺܝܠܳܟ: ܘܒܰܣܶܡ ܐܶܢܽܘܢ ܒܰܡ̈ܛܰܠܠܐܷ ܢܰܗܺܝܪ̈ܳܬܳܐ: ܘܫܽܘܒܚܳܐ ܡܢܰܟܪܰܝ ܡ̣ܶܢ ܗܽܘܠܐܷ ܢܰܣܶܩ ܠܳܟ ܡܫܺܝܚܳܐ ܡܚܰܕܬܳܢܶܗ ܕܓܶܢܣܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܠܐܴ ܡܳܝܽܘܬܳܐ ܐܠܰܗܳܐ ܕܡܺܝܬ ܒܰܒܣܰܪ ܘܰܐܚܺܝ ܠܓܶܢܣܳܐ ܐ̱ܢܳܫܳܝܳܐ ܘܡܳܝܽܘܬܳܐ: ܘܰܒܫܽܘܒܚܳܐ ܪܰܒܳܐ ܩܳܡ ܡ̣ܶܢ ܩܰܒܪܳܐ ܘܠܰܟܝܳܢܰܢ ܚܰܕܶܬ ܡ̣ܶܢ ܬܶܫܒ̈ܚܳܬܳܟ ܒܦܽܘ̈ܡܰܝܢ: ܘܬܰܘܕ̈ܝܳܬܳܟ ܒܠܶܫܳܢܰܝ̈ܢ: ܘܣܰܒܪܳܐ ܕܰܩܝܳܡܬܳܟ ܐܰܨܡܰܚ ܒܢܰܦ̈ܫܳܬܰܢ ܡܳܪܰܢ ܘܰܐܠܳܗܰܢ.

 

ܦܪܘܡܝܘܢ ܕܨܦܪܐ ܡܢܛܝܩܝܐ

 

ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܘܪܰܒܽܘܬ ܝܳܐܝܽܘܬܳܐ ܢܶܫܬܘܶܐ ܕܰܢܩܰܪܶܒ: ܠܗ̇ܰܘ ܕܺܐܝܬܰܘܗܝ ܘܢܶܗܘܶܐ ܐܺܝܬܰܘܗܝ: ܡܫܰܪܝܳܢܳܐ ܘܰܡܫܰܠܡܳܢܳܐ: ܕܫܽܘܪܳܝܳܐ ܘܫܽܘܠܳܡܳܐ ܠܐܴ ܚܰܫ ܠܶܗ: ܫܶܠܝܳܐ ܘܰܒܗܺܝܠܐܴ ܘܠܐܴ ܡܶܬܕܰܪܟܳܢܳܐ ܕܰܐܚܺܝܕ ܐܰܬܪܳܐ ܘܰܐܬܪܳܐ ܕܢܰܦܫܶܗ ܕܟܽܠ ܠܘܳܬܶܗ ܗ̣ܽܘ ܡܶܬܬܙܺܝܥ ܐܰܝܟ ܩܺܝܢܛܪܽܘܢ ܕܚܽܘܓܬܳܐ: ܘܥܶܠܬܳܐ ܩܰܕܡܳܝܬܳܐ ܟܰܕ ܗ̣ܽܘ ܠܘܳܬ ܡܶܕܶܡ ܠܐܴ ܡܶܬܬܙܺܝܥ ܕܣܰܩܽܘܒܠܐܴ ܠܨܶܒܝܳܢܶܗ ܘܕܰܠܩܽܘܒܠܐܴ ܠܰܝܬ ܕܺܐܝܬܽܘܬܶܗ: ܕܟܽܠ ܡܶܕܶܡ ܕܰܗ̣ܘܳܐ ܘܰܕܗ̇ܳܘܶܐ ܒܨܶܒܝܳܢܶܗ ܐܶܬܬܟܺܝܢ ܘܡܶܬܟܰܝܰܢ: ܘܰܐܝܟ ܕܰܨܒ̣ܳܐ ܘܰܐܝܟܰܢܳܐ ܕܨܳܒ̇ܶܐ ܕܰܠܟܽܠ ܗ̣ܽܘ ܩܰܪܺܝܒ: ܘܟܽܠ ܠܶܗ ܩ̇ܳܪܶܒ. ܕܠܶܗ ܡܶܕܶܡ ܠܐܴ ܣܳܦ̇ܶܩ: ܐܳܚ̇ܶܕ ܘܠܐܴ ܡܶܬܬܚܶܕ: ܘܰܠܪܰܒܽܘܬܶܗ ܣܳܟܳܐ ܠܐܴ ܡܬܰܚܰܡ: ܐܠܰܗ ܐܠܰܗ̈ܺܝܢ ܘܡܳܪܶܐ ܡܳܪ̈ܰܘܳܢ ܕܡܶܢܶܗ ܕܡܶܫܬܰܡܗܳܐ ܟܽܠ ܐܰܒܳܗܽܘܬܳܐ ܕܒܰܫܡܰܝܳܐ ܘܒܰܐܪܥܳܐ: ܐܰܒܳܐ ܕܠܐܴ ܐܰܒܳܐ: ܒܪܳܐ ܕܶܝܢ ܕܠܐܴ ܒܪܳܐ: ܪܽܘܚܳܐ ܕܶܝܢ ܕܠܐܴ ܐܰܒܳܐ ܐܳܦ ܕܠܐܴ ܒܪܳܐ: ܕܰܫܘܶܝܢ ܘܰܣܕܺܝܩܺܝܢ ܘܰܐܘܶܝܢ ܘܰܡܫܰܚܠܦܺܝܢ ܘܠܐܴ ܚܒܺܝܟܺܝܢ. ܘܡܶܫܬܰܒܚ̈ܳܢܶܐ ܘܠܰܘ ܡܫܰܒܚ̈ܳܢܶܐ: ܡܶܣܬܰܓܕܳܢ̈ܶܐ ܘܠܰܘ ܣܳܓܽܘ̈ܕܶܐ: ܚܰܕ ܟܝܳܢܳܐ ܓܢܺܝܙܳܐ ܘܠܐܴ ܡܶܬܕܰܪܟܳܢܳܐ: ܕܦܽܘ̈ܡܶܐ ܡܠܺܝ̣̈ܠܐܷ ܘܟܽܠܗܽܘܢ ܒܪ̈ܰܝܳܐ ܘܰܥܒܺܝ̣̈ܕܶܐ ܗܳܠܶܝܢ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܙܳܝܥܺܝܢ ܘܪܳܥܠܺܝܢ ܬܳܡܗܺܝܢ ܘܡܶܬܒܰܠܗܺܝܢ ܡ̣ܶܢ ܬܶܫܒܽܘܚܬܶܗ ܠܶܗ ܬܶܫܒ̈ܚܳܬܳܐ ܣܒܺܝ̣̈ܣܳܬܳܐ ܒܝܽܘ̈ܒܳܒܶܐ ܡܨ̈ܰܠܠܐܷ: ܒܩܺܝ̣̈ܢܳܬܳܐ ܕܰܟܝ̈ܳܬܳܐ ܘܫܰܦ̈ܝܳܬܳܐ ܘܰܒܢܶܥ̈ܡܳܬܳܐ ܚܰܠܝ̈ܳܬܳܐ ܡܫܰܒܚܺܝܢ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗ ܐܠܰܗܺܝ̈ܢ ܡܳܪܶܐ ܡܳܪ̈ܰܘܳܢ ܡܳܪܝܳܐ ܫܡܳܟ: ܡܶܠܬܳܐ ܡܝܰܩܢܰܬ݀ ܟܽܠ ܦܽܘܡܳܐ ܠܐܴ ܓܫܺܝܡܳܐ: ܡܡܰܠܠܳܢܳܐ ܘܠܐܴ ܡܶܬܡܰܠܠܳܢܳܐ ܕܰܐܠܳܗܳܐ ܐܰܒܳܐ: ܚܶܟܡܰܬ݀ ܐܠܰܗܺܝ̈ܢ: ܘܝܳܗܒܰܬ݀ ܣܟܽܘܠܝܽܘܢ ܠܟܽܠ ܚܰܟܺܝ̈ܡܶܐ: ܕܶܐܬܪܕܺܝܘ ܒܚܶܟܡܬܳܐ ܐܠܰܗܳܝܬܳܐ: ܘܰܡܡܰܕܟܳܐ ܠܪ̈ܳܕܝܰܝ ܒܣܽܘܟܳܠܐܴ: ܚܰܝܠܐܴ ܡܬܽܘܡܳܝܳܐ ܕܰܩܢܽܘܡܳܐ ܕܡ̣ܶܢ ܚܰܝܠܬܳܢܽܘܬܳܐ ܩܢܽܘܡܳܝܬܳܐ ܘܝ̇ܳܗܶܒ ܬܽܘܩܦܳܐ ܠܟܽܠ ܚܰܝܠܬܳܢ̈ܶܐ: ܚܰܝܳܐ ܘܰܡܠܺܝܠܐܴ ܘܠܐܴ ܡܳܝܽܘܬܳܐ ܘܕܰܠܥܶܠ ܡ̣ܶܢ ܚܰܝ̈ܶܐ ܡ̣ܶܢ ܕܟܽܠ ܚܰܝܽܘܬܢܳܝ̈ܶܐ ܡܠܺܝ̣̈ܠܐܷ ܡ̣ܶܢ ܠܐܴ ܡܠܺܝ̣̈ܠܐܷ: ܘܰܬܚܶܝܬ ܚܰܝܽܘܬܳܐ ܡܩܰܛܪܓܺܝܢ ܗ̇ܰܘ ܕܰܒܝܰܕ ܡܶܬܝܰܠܕܳܢܽܘܬܳܟ ܠܐܴ ܙܰܒܢܳܝܬܳܐ: ܘܠܐܴ ܐܰܬܪܳܢܳܝܬܳܐ ܘܠܐܴ ܕܽܘܟܬܳܢܳܝܬܳܐ: ܗ̣ܘܳܐ ܢܽܘܗܪܳܐ ܘܶܐܬܟܰܝܢܰܬ݀ ܠܐܴ ܗܽܘܠܳܢܳܝܬܳܐ: ܘܕܰܠܥܶܠ ܡ̣ܶܢ ܗܽܘ̈ܠܐܷ: ܘܠܰܚܕܳܐ ܚܕܳܐ ܡܶܢܗܶܝܢ ܐܰܬܰܪ ܕܰܨܒ̣ܰܝܬ ܣܰܬܶܬܬ: ܘܰܒܠܐܴ ܓܫܺܝܡܬܳܐ ܟܰܣܝܽܘܬܳܐ ܫܰܒܰܚ̣ܬ ܒܠܐܴ ܗܽܘܠܳܢܳܝܬܳܐ ܓܰܢ̱ܒܳܪܽܘܬܳܟ ܐܰܘܕܰܥ̣ܬ ܟܰܕ ܐܰܣܗ̣ܶܕܬ ܘܶܐܡ̣ܰܪܬ: ܐܳܘ ܫܒܺܝܚ ܒܰܓܢܺܝܙܽܘܬܳܐ ܡܳܪܝܳܐ: ܕܡ̣ܶܢ ܦܽܘܡ ܥܶܠܳܝܳܐ ܢܶܦܩ̇ܶܬ ܘܰܠܟܽܠܶܗ ܕܰܬܚܶܝܬ ܫܡܰܝܳܐ ܟܰܣܺܝܬ: ܘܒܰܡܪ̈ܰܘܡܶܐ ܪ̈ܳܡܶܐ ܡܰܫܟܰܢܝ ܢܶܩܫ̇ܶܬ: ܘܰܒܥܽܘ̈ܡܩܰܝ ܬܗܽܘܡܳܐ ܐܽܘܪܚܝ ܣܳܡ̇ܶܬ. ܘܥܰܠ ܥܰܡܽܘ̈ܕܰܝ ܥܢ̈ܳܢܶܐ ܬܪܽܘܢܺܝܳܘܢ ܕܥܽܘܫܢܝ ܐܰܘܬܒܶܬ: ܘܰܒܣܰܘ̈ܦܰܝ ܬܺܐܒܶܝܠ ܥܳܡܰܪܬܳܐ ܬܽܘܩܦܝ ܐܰܘܕܥ̇ܶܬ: ܘܒܰܫܡ̈ܰܝ ܫܡܰܝܳܐ ܥܰܡ ܝ̇ܳܠܽܘܕܝ ܐ̱ܢܳܐ: ܘܒܰܡܨܰܥܬܳܗ̇ ܕܰܐܪܥܳܐ ܐܶܥܒܶܕ ܦܽܘܪܩܳܢܝ: ܟܰܕ ܕܶܝܢ ܓܰܡܪܰܬ݀ ܘܫܰܡܠܺܝܬ ܠܗܰܘ̈ܢܶܐ ܡ̇ܰܢ ܘܰܠܢܰܗܺܝܪ̈ܶܐ ܗ̇ܳܢܽܘܢ ܥܶܠܳܝ̈ܶܐ: ܘܰܠܟܽܘܟܺܝܬܳܐ ܗ̇ܳܝ ܬܽܘܗܽܘܒܽܘܗܢܳܝܬܳܐ ܡ̣ܶܢ ܐܰܦ̈ܰܝ ܐܳܕܰܡܬܳܐ ܕܚܰܝܬ ܐܳܦ ܓܰܠ̣ܶܓܬ. ܗܳܝܕܶܝܢ ܥܒ̇ܳܕ ܐܺܝܕܰܝ̈ܟ ܠܳܟ ܫܦ̣ܰܪ ܘܛܰܒܥܳܐ ܫܰܦܺܝܪܳܐ ܝܰܩ̣ܶܢܬ ܕܡܽܘܬ ܨܰܠܡܳܟ ܚܰܝܳܐ ܕܒܶܗ ܐܶܬܝܰܕܥܰܬ݀ ܪܰܒܽܘܬ ܪܰܒܽܘܬܳܟ: ܘܟܰܕ ܥܰܡ ܗܽܘܠܐܷ ܡܶܕܪܳܢܳܝܬܳܐ ܘܕܳܝܽܘܒܬܳܐ: ܐܳܦ ܪܒܺܝܥܳܝܰܬ݀ ܐܶܣܛܽܘ̈ܟܣܶܐ ܚܰܝܶܕܬܳܝܗܝ ܘܳܐܕܳܡ ܟܰܢܺܝܬ ܘܫܰܡܰܗܬܳܝܗܝ: ܘܫܰܡܳܫܳܐ ܘܦܰܠܳܚܳܐ ܕܟܰܪܡܳܐ ܠܐܴ ܗܽܘܠܳܢܳܝܳܐ ܐܰܣܪܰܚܬܳܝܗܝ: ܘܒܰܪܬ݀ ܨܰܘܒܳܐ ܥܰܡܶܗ ܣܳܡ̣ܬ ܐܰܝܟ ܕܰܠܚܰܒܪܽܘܬܶܗ: ܘܫܰܘܬܳܦܬܳܐ ܕܦܰܪܫܰܓܢܳܐ ܢܳܡܽܘܣܳܝܳܐ: ܒܳܚܽܘܪܳܐ ܕܚܺܐܪܽܘܬܶܗ ܡܶܢܳܟ ܐܶܬܬܣܺܝܡ ܥܠܰܘܗܝ. ܗ̣ܽܘ ܕܶܝܢ ܫܳܛܝܳܐ ܘܥܶܨܝܳܝܳܐ ܐܶܬܚܙܺܝ ܗ̣ܘܳܐ: ܒܢܰܩܺܝܦܽܘܬܳܐ ܕܺܝܠܶܗ ܕܰܠܥܶܕܪܶܗ: ܒܕܰܐܘܫܶܛ ܐܺܝܕܶܗ ܘܰܡ̣ܪܰܛ ܦܺܐܪ ܡܰܘܬܳܐ. ܒܳܬܰܪܟܶܢ ܐܶܣܬܰܪܰܩ ܡ̣ܶܢ ܫܽܘܒܚܶܗ ܘܫܽܘܦܪܶܗ ܫܠ̣ܰܚ. ܘܝܳܐܝܽܘܬܶܗ ܒܰܠܺܝ: ܘܡܺܝܙܪ̈ܳܢܶܐ ܚܶܣܕܳܢܳܝ̈ܶܐ ܐܶܬܟܒܶܢ ܘܶܐܫܬܠܶܡ ܠܰܥܪܳܕܳܐ ܘܶܐܬܕܰܡܺܝ ܠܳܗ̇. ܘܰܒܪܶܥܝܳܐ ܚܳܢܽܘܩܳܐ ܩܕܳܠܶܗ ܐܰܪܬܰܥ ܗ̣ܘܳܐ: ܘܥܳܝ̈ܳܬܳܐ ܟܽܘܒܳܢܳܝ̈ܳܬܳܐ ܠܐܴܝܰܥ ܗ̣ܘܳܐ ܗ̣ܽܘ ܘܟܽܠ ܕܰܐܦܪܺܝ. ܘܟܰܕ ܚ̣ܙܰܝܬ ܐܳܘ ܒܪܳܐ ܘܡܶܠܬܳܐ ܐܠܰܗܳܐ ܠܥܰܒܕܳܟ ܕܡ̣ܶܢ ܡܳܪ̈ܰܝܳܐ ܥܳܫܽܘ̈ܡܶܐ ܘܩܳܝܽܘ̈ܡܶܐ ܙܥܺܝ̈ܦܶܐ ܐܶܬܥܰܒܕܰܕ ܒܳܬܰܪ ܗܳܠܶܝܢ ܡܝܰܬܪ̈ܳܬܳܐ ܕܫܰܟ̣ܶܢܬ ܠܶܗ ܐܶܬܬܘܺܝܬ ܥܠܰܘܗܝ ܘܗ̇ܳܝ ܕܢܺܐܚܶܐ ܦܰܪܢܶܣ̣ܬ ܠܶܗ: ܘܰܒܕܰܨܠܰܝܬ ܫܡܰܝܳܐ ܘܰܢܚ̣ܶܬܬ: ܘܥܰܪ̈ܦܶܠܐܷ ܪܟܶܒ̣ܬ ܘܰܐܬܰܪ ܕܰܨܒ̣ܰܝܬ ܢܛܰܚ̣ܬ ܘܶܐܡ̣ܰܪܬ ܕܡ̣ܶܢ ܩܕܳܡ ܥܳܠܡ̈ܶܐ ܐܶܢܳܐ ܐܺܝܬܰܝ: ܘܒܺܐܝܣܪܳܐܶܝܠ ܐܶܫܪܶܐ: ܘܡ̣ܶܢ ܝܰܥܩܽܘܒ ܠܥܳܠܡܺܝܢ ܥܽܘܗܕܳܢܝ ܠܐܴ ܢܶܥܢܰܕ: ܘܰܡܫܰܚ̣ܬ ܩܢܽܘܡܳܝܬܳܟ ܒܒܶܣܪܳܐ ܡܢܰܦܫܳܐ ܘܰܡܡܰܕܥܳܐ ܕܠܶܗ ܐܰܬܚ̣ܰܝܰܕܬ ܒܰܩܪܺܝܬܳܐ ܕܡܶܢܳܗ̇ ܐܶܬܺܝܠܶܕܬ ܡܰܘܠܳܕܳܐ ܬܪܰܝܳܢܳܐ: ܒܙܰܒܢܳܐ ܘܰܒܕܽܘܟܬܳܐ ܘܒܰܐܬܪܳܐ ܟܰܕ ܠܐܴ ܣܳܟ ܥܳܐܶܠ ܐܰܢ̱ܬ ܒܝܰܕ ܒܽܘܪܢܳܫܳܟ ܬܚܶܝܬ ܐܰܪܺܝܬܡܰܛܺܝܩܺܝ ܣܒܺܝܣܰܬ݀ ܒܡܶܢܝܳܢܳܐ ܕܰܟܬܳܒ̈ܶܐ ܘܕܰܟܝܳܢܳܐ ܘܳܐܦܠܐܴ ܒܰܡܢܰܘ̈ܳܬܳܐ ܕܒܰܐܥܦܳܐ ܘܦܶܠܓܳܐ ܐܺܝܬܰܝܟ ܘܳܐܦܠܐܴ ܐ̱ܚܪܺܢܳܐ ܘܰܐܚܪܳܢܝܳܐܺܝܬ: ܐܶܠܐܴ ܚܰܕ ܐܠܰܗܳܐ ܕܡ̣ܶܢ ܐܰܒܳܐ: ܩܕܳܡ ܨܰܦܪܳܐ ܘܦܳܢܝܳܐ: ܘܚܰܕ ܡܫܺܝܚܳܐ ܡ̣ܶܢ ܡܰܪܝܰܡ ܒܪܰܡܫܳܐ ܐܶܬܚܙܰܝܬ: ܟܰܕ ܠܗܰܠ ܡ̣ܶܢ ܪܰܡܫܳܐ ܘܫܽܘܠܳܡܳܐ ܐܺܝܬܰܝܟ ܘܰܠܥܳܠܰܡ ܥܳܠܡܺܝܢ. ܕܰܒܥܰܡ̈ܡܶܐ ܪ̈ܰܚܺܝܩܶܐ ܐܶܬܚܰܘܺܝ ܫܽܘܠܛܳܢܳܐ ܕܺܝܠܳܟ: ܘܒܶܐܡܘ̈ܳܬܳܐ ܩܰܪ̈ܺܝܒܳܬܳܐ ܦܽܘܪܩܳܢܳܟ. ܡ̣ܶܢ ܡܶܨܪܶܝܢ ܐܰܒܳܐ ܚܰܕ ܒܪܳܐ ܩܪܳܟ ܣܳܗܕܳܐ ܠܐܴ ܡܶܬܕܰܓܠܳܢܳܐ: ܒܢܳܨܪܰܬ݀ ܓܙܽܘܪܬܳܐ ܢܳܡܽܘܣܳܝܬܳܐ ܫܰܡܠܺܝܬ: ܘܥܰܠ ܕܪ̈ܳܥܶܐ ܡܰܪ̈ܫܠܐܷ ܒܗܰܝܟܠܐܴ ܐܶܙܕܰܝܰܚܬ ܘܩܽܘܪ̈ܒܳܢܶܐ ܚܠܳܦܰܝܟ ܩܰܪܶܒ̣ܬ. ܘܩܰܒܶܠ̣ܬ ܠܰܗܡܰܝܪ̈ܶܐ ܡܠܺܝ̣̈ܠܐܷ ܕܺܐܝܪܽܘܕܝܰܢܽܘ: ܛܰܠܝܽܘܣܳܐ ܒܨܶܗܝܽܘܢ ܐܶܬܟܰܢܺܝܬ: ܘܥܰܡ ܝܽܘܢܶܣ̈ܩܶܐ ܕܽܐܘܪܫܠܶܡ ܠܰܓܠܶܓܬ ܘܰܒܥܰܡܳܐ ܝܰܩܺܝܪܳܐ ܐܶܬܓܰܕܘܰܕܬ. ܘܰܐܝܟ ܐܰܪ̈ܙܶܐ ܕܠܶܒܢܳܢ ܐܶܬܥܰܠܰܡ̣ܬ: ܘܰܐܝܟ ܐܺܝܠܳܢܳܐ ܕܡܶܫܚܳܐ ܕܰܒܣܳܢܺܝܪ ܫܰܘܚܰܬ݀ ܩܰܘܡܬܳܟ ܘܰܐܝܟ ܕܽܘܠܒܳܐ ܡܥܰܠܝܳܐ ܥܰܠ ܣܦܳܪ̈ܰܝ ܝܽܘܪܕܢܳܢ ܐܶܬܚܙܰܝܬ ܘܰܥܡ̣ܰܕܬ ܘܚܰܠܶܠܬܳܝܗܝ ܠܗ̇ܰܘ ܨܰܚܢܳܐ ܗ̇ܰܘ ܕܒܰܣܝܳܢܳܐ ܐܶܨܛܰܥܨܰܥ ܗ̣ܘܳܐ: ܘܰܐܝܟ ܙܰܝܬܳܐ ܥܰܒܺܝܛ ܫܽܘܒܚܳܐ ܪܕܰܝܬ ܒܰܦܩܰܥܬܳܐ ܘܰܒܨܰܘܡܳܐ ܐܰܪܒܥܺܝܢܳܝܳܐ ܫܰܚܺܝܬ ܘܫܰܦ̣ܶܠܬ ܠܰܡܢܰܣܝܳܢܳܟ ܘܟܰܕ ܒܩܺܝܢܽܘܡܽܘܢ ܒܰܣܺܝܡ ܪܺܝܚܳܐ ܣܰܡܣ̣ܶܡܬ ܠܣܰܪܝܽܘܬܳܐ ܫܽܘܚܢܳܢܳܝܬܳܐ ܕܰܐܝܠܶܝܢ ܕܠܐܴ ܪܥ̣ܰܘ ܒܥܽܘܕܪ̈ܳܢܰܝܟ: ܘܡ̣ܶܢ ܗܰܝܟܠܳܟ ܪܺܝܫܳܝܳܐ ܘܡ̣ܶܢ ܠܘܳܬ ܚܰܕܝܽܘܟ ܒܒܶܣ̈ܡܶܐ ܡ̣ܶܢ ܐܺܝ̈ܕܰܝ ܙܰܢܳܝܬܳܐ ܐܶܬܡܫܰܚ̣ܬ: ܘܡܰܘܒܠܐܴ ܚܛܺܝܬܳܢܳܝܬܳܐ ܡ̣ܶܢ ܦܳܪܩܰܬ݀ ܢܰܦܫܳܗ̇ ܫ̣ܪܰܝܬ: ܘܰܠܠܶܒܰܘ̈ܳܬܳܐ ܕܚܰܛܳܝ̈ܶܐ ܣܰܒܪܳܐ ܪܰܒܳܐ ܕܰܬܝܳܒܽܘܬܳܐ ܡܠ̣ܰܝܬ. ܥܺܝܠܐܴ ܕܶܝܢ ܒܰܣܝܳܐ ܘܫܺܝܛܳܐ ܪܰܟܶܒ̣ܬ ܘܡ̣ܶܢ ܡܨܰܥܨ̈ܳܥܶܐ ܒܫܽܘ̈ܩܰܝ ܨܶܗܝܽܘܢ ܐܶܫܬܰܒܰܚ̣ܬ. ܠܛܽܘܪܳܐ ܕܬܳܒܽܘܪ ܥܰܡ ܬܰܠܡܺܝ̈ܕܰܝܟ ܣܠܶܩ̣ܬ ܘܒܶܨܪܳܐ ܙܥܽܘܪܳܐ ܡ̣ܶܢ ܫܽܘܒܚܶܗ ܕܰܐܒܽܘܟ ܠܬܰܠܡܺܝ̈ܕܰܝܟ ܚܰܘܺܝܬ. ܘܚܰܫ̣ܬ ܒܶܗ ܒܒܽܘܪܢܳܫܳܟ ܕܰܚܠܳܦܰܝܢ ܟܰܕ ܠܥܶܠ ܡ̣ܶܢ ܚܰܫ̈ܶܐ ܐܺܝܬܰܝܟ: ܘܶܐܬܩܒ̣ܰܥܬ ܒܓܳܓܽܘܠܬܳܐ ܒܕܽܘܟܬܳܐ ܥܦܺܝܦܬܳܐ ܘܰܐܫܠܶܡ̣ܬ ܪܽܘܚܳܟ ܒܺܐܝ̈ܕܰܝ ܐܰܒܽܘܟ: ܘܒܰܙܩܽܘܪܳܐ ܟܶܬܳܢܳܝܳܐ ܐܶܬܟ̣ܰܪܰܟܬ: ܘܰܒܚܽܘܢܛܬܳܐ ܢܺܝܩܽܘܕܺܝܡܳܣܳܝܬܳܐ: ܒܩܰܒܪܳܐ ܢܩܺܝܪ ܒܓܰܢܬܳܐ ܕܺܝܠܶܗ ܕܝܰܘܣܶܦ ܒܽܘܠܽܘܛܺܝ ܐܶܬܥܰܦܺܝܬ: ܘܰܬܚܶܝܬ ܟܺܐܦܳܐ ܕܛܺܝܛܠܳܘܣ ܐܶܬܬܣܺܝܡܬ. ܗܳܝܕܶܝܢ ܩܛܺܝܠܐܴ ܨܰܦܪܳܝܳܐ ܚܕܺܝ ܕܶܐܫܬܰܘܕܥܳܟ: ܘܥܰܢܺܝܕܳܐ ܦܳܢܝܳܝܳܐ ܪܘܰܙ ܕܰܚ̣ܙܳܟ: ܡܺܝ̈ܬܰܝ ܥܳܠܰܡ ܐܰܪܥܽܘܟ: ܘܰܫܟܺܝ̣̈ܒܰܝ ܚܶܫܽܘܟܳܐ ܐܶܩܰܒܠܽܘܟ: ܥܳܡܪ̈ܰܝ ܚܶܦܪܳܐ ܗܰܠܠܽܘܟ: ܘܰܚܒܺܝ̣̈ܫܰܝ ܕܳܪܕܳܪ̈ܺܝܢ ܐܰܟܪܙܽܘܟ ܘܒܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܩܳܡ̣ܘ: ܘܠܳܟ ܒܶܝܬ ܚܰܝ̈ܶܐ ܣܗܶܕܘ ܘܣܰܒܪܽܘܟ: ܐܶܬܡܰܠܰܠ ܒܡܰܘܬܳܐ ܕܽܘܟܪܳܢܳܟ: ܘܒܰܫܝܽܘܠ ܐܶܬܟܪܶܙ ܛܶܐܒ ܢܽܘܚܳܡܳܟ: ܘܩܳܡ̣ܬ ܬܠܺܝ̈ܬܳܝ ܝܰܘ̈ܡܶܐ ܘܦܶܪܚܰܬ݀ ܣܒܰܪܬܳܟ ܡܥܰܠܰܝܬܳܐ ܘܰܩܝܳܡܬܳܢܳܝܬܳܐ ܕܟܽܠ ܥܰܡ̈ܡܺܝܢ: ܘܰܣܠ̣ܶܩܬ ܠܘܳܬ ܐܰܒܽܘܟ: ܘܥܰܡ ܪܽܘܚܳܟ ܩܰܕܺܝܫܳܐ ܡܶܬܓܰܝܶܐܐ ܐܰܢ̱ܬ. ܘܫܳܐܠܺܝܢܰܢ ܗܳܟܺܝܠ ܘܒܳܥܶܝܢܰܢ ܡܶܢܳܟ ܕܠܐܴ ܬܶܛܥܶܐ ܡܳܪܝܳܐ ܠܡܶܬܕܰܟܪܳܢܽܘܬܳܐ ܕܰܙܒܺܝܢܰܬ݀ ܣܽܘܪܳܩܳܐ ܕܺܝܠܳܟ ܨܶܒܝܳܢܳܝܳܐ: ܘܠܐܴ ܢܶܬܕܰܓܰܠ ܫܽܘܘܕܳܝ ܡܶܠܰܝ̈ܟ ܕܰܠܘܳܬܳܗ̇. ܕܰܐܝܟ ܕܕܽܘܕܰܦܢܳܐ ܐܶܩܽܘܫ ܥܶܩܳܪܶܟܝ: ܣܰܘ̈ܟܰܝܟܝ ܣܰܘ̈ܟܰܝ ܙܰܝܬܳܐ: ܘܳܐܦ ܓܦܶܬܳܐ ܝܳܐܝܰܬ݀ ܥܽܘܫܢܳܐ ܐܶܨܒܶܟܝ: ܢܽܘܪ̈ܒܰܝܟܝ ܢܽܘܪ̈ܒܰܝ ܬܶܫܒܽܘܚܬܳܐ: ܘܰܒܢܰܝ̈ܟܝ ܢܶܣܛܽܘܢ ܠܘܳܬܶܟܝ: ܘܡ̣ܶܢ ܦܳܬܽܘܪܶܟܝ ܢܶܬܒܰܣܡܽܘܢ ܡ̣ܶܢ ܫܽܘܡܢܶܟܝ ܪܽܘܚܳܢܳܝܺܐ ܢܶܫܬܽܘܢ ܘܢܶܪܘܽܘܢ: ܠܕܰܘܩܳܐ ܕܰܒܡܰܓܕܠܰܝ̈ܟܝ ܕܳܐܶܩ ܒܒ̈ܳܒܳܬܳܐ ܠܐܴ ܛܺܝܛܳܢܳܝ̈ܳܬܳܐ ܕܥܰܝ̈ܢܶܐ ܠܐܴ ܟܰܡܗܳܢܳܝ̈ܳܬܳܐ ܗܰܒ ܕܢܶܫܬܰܘܕܰܥ: ܘܠܐܱܝܠܶܝܢ ܕܒܰܟܡܺܐܢ̈ܶܐ ܫܰܩܽܘܪ̈ܘܳܬܳܐ ܘܥܽܘ̈ܢܳܬܶܐ ܥܠܶܝܗ̇ ܪܳܢܶܝܢ: ܠܐܱܚܺܝ̣̈ܕܰܝ ܬܰܩܕܳܐ ܕܺܝܠܳܗ̇ ܚܽܘܛܪܳܐ ܕܩܰܝܣܽܘܬܳܐ ܐܰܘܚܶܕ: ܘܡܰܫܪ̈ܽܘܩܝܳܬܳܐ ܪ̈ܽܘܚܳܢܳܝܳܬܳܐ ܐܠܰܒܶܟ: ܐܰܝܟܰܢܳܐ ܕܰܒܝܰܕ ܩܛܳܝ̈ܶܐ ܕܺܝܠܗܽܘܢ ܢܕܰܘܕܽܘܢ ܠܕܺܐܒ̈ܶܐ ܕܨܳܒܶܝܢ ܠܰܡܡܰܥܳܣܽܘ ܠܐܷܡܪ̈ܶܐ ܕܰܓܙܳܪܳܗ̇ ܠܰܕܥܰܠ ܫܽܘܪ̈ܶܝܗ̇ ܡܰܛܪ̈ܳܬܳܐ ܠܺܠܝ̈ܳܬܳܐ ܢܳܛܪܺܝܢ ܘܡܶܬܟܰܪܟܺܝܢ: ܗܰܘܢܳܐ ܥܺܝܪܳܐ ܘܰܕܠܐܴ ܡܶܬܥܠܶܒ ܡ̣ܶܢ ܡܰܕܡܟܳܐ ܡܙܰܡܶܢ ܚܽܘܠܳܨܳܐ ܕܡܰܘܬܳܐ ܫܰܟܶܢ: ܠܦܰܐܦܽܘܪܰܣ ܕܒܳܗ̇ ܐܰܦܽܘܩܪܰܐܣܺܝܢ ܡܫܰܒ̈ܠܳܬܳܐ ܐܰܥܛܶܦ: ܐܰܝܟܰܢܳܐ ܕܰܠܪܶܒܺܝܬܳܐ ܕܟܰܟܪ̈ܰܝܗܽܘܢ ܐܰܥܦܳܐ ܢܰܝܬܽܘܢ: ܘܰܒܝܰܕ ܙܳܥ̈ܩܳܬܗܽܘܢ ܫܰܘ̈ܝܳܬܳܐ ܠܛܰܪ̈ܦܳܢܣܰܘܗܝ ܕܒܶܠܳܐܰܪ ܡܶܬܝܰܕܥܳܢܳܐ ܢܩܰܠܩܠܽܘܢ: ܘܰܐܝܟ ܕܠܐܴ ܐܺܝܬܰܝܗܽܘܢ ܢܶܗܘܽܘܢ. ܘܰܠܕܺܝܰܩܳܢܽܘ ܕܕܺܝܰܐܪ̈ܽܘܢܺܝܣܶܐ ܙܰܒܢܳܝ̈ܶܐ ܥܳܡܪܺܝܢ ܒܳܗ̇: ܐܰܦܽܘܕܳܐ ܛܰܟܣܳܢܳܝܬܳܐ ܙܩܺܝܪܰܬ ܒܢܰܘܠܐܴ ܩܽܘܫܬܺܝܢܳܝܳܐ ܘܰܡܬܰܠܦܰܬ݀ ܒܣܺܝܪܶܙ ܠܐܴ ܡܶܣܬܰܕܩܳܢܳܐ ܐܠܰܒ̣ܶܫ ܐܰܝܟܰܢܳܐ ܕܟܰܕ ܡ̇ܰܢ ܗܳܪܟܳܐ ܢܫܰܢܽܘܢ: ܒܗ̇ܳܝ ܕܰܠܥܶܠ ܢܶܫܬܘܽܘܢ ܕܰܢܫܰܡܫܽܘܢ: ܘܚܰܟܶܡ ܠܰܡܙܰܡܪ̈ܳܢܶܐ ܕܒܳܗ̇. ܐܰܝܟܰܢܳܐ ܕܰܒܝܰܕ ܐܰܒܽܘ̈ܒܶܐ ܐܽܘܪ̈ܓܰܢܳܝܶܐ ܢܒܰܣܡܽܘܢ ܒܝܰܕ ܢܶܥ̈ܡܳܬܗܽܘܢ ܫܰܦܺܝܪ̈ܳܬܳܐ: ܒܢ̈ܳܬ ܩ̈ܳܠܐܷ ܬܡܺܝܢܳܝܰܬ݀ ܩܺܝ̣̈ܢܳܬܳܐ ܠܳܟ ܡܩܰܒܠܳܢܳܐ ܕܩܽܘܪ̈ܳܫܶܐ ܢܝܰܒܒܽܘܢ: ܗܳܟܘܳܬ ܘܰܠܟܽܠ ܕܒܰܛܝܳܪܶܗ ܚܒܺܝܫ ܛܰܪ ܘܰܐܫܘܺܝ: ܘܕܰܠܥܶܠ ܡ̣ܶܢ ܢܽܘܟ̈ܬܳܬܳܐ ܓܳܪ̈ܣܳܢܳܝܳܬܳܐ ܐܳܦ ܕܽܘܒܨ̈ܳܬܳܐ ܥܶܩܰܪ̈ܒܳܢܳܝܳܬܳܐ ܢܕܽܘܫܽܘܢ ܠܰܦܬܳܢܳܐ ܡܰܪܺܝܪܳܐ ܕܥܰܠ ܫܒܺܝܠ ܝܰܠܕܶܝ̈ܗ̇ ܪܒܺܝܥ: ܘܰܠܥܶܩܒܳܐ ܕܺܝܠܗܽܘܢ ܠܡܶܡܚܳܐ ܒܳܥܶܐ: ܒܩܽܘܢܛܳܪ ܨܠܺܝܒܳܟ ܢܶܦܥܽܘܢ ܪܺܝܫܶܗ: ܘܢܶܗܘܶܐ ܠܬܰܗܠܰܠܬܳܐ ܘܰܠܣܽܘܠܳܢܽܘܬܳܐ. ܘܶܐܡܰܬܝ ܕܨܳܦܰܚܬܳܐ ܩܶܨܳܢܳܝܬܳܐ ܠܡܰܪܕܺܝܬܳܐ ܩܳܛܥܳܐ ܘܙܰܘܥܳܐ ܥܬܺܝܕܳܐ ܕܡܶܐܬܝܳܐ ܬܪܰܝܳܢܳܐ ܕܦܽܘܪܥܳܢ ܕܳܪ̈ܶܐ ܘܫܰܪ̈ܒܳܬܳܐ ܥܳܒܶܕ ܐܰܢ̱ܬ ܢܶܫܬܘܶܐ ܚܢܰܢ ܘܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܡܗܰܝ̈ܡܢܶܐ: ܐܰܝܟܰܢܳܐ ܕܰܒܥܰܝ̈ܢܶܐ ܠܐܴ ܢܳܝܘ̈ܳܡܳܬܳܐ ܘܰܒܬܶܡܪ̈ܶܐ ܕܠܐܴ ܥܳܡܨܺܝܢ: ܘܒܰܓܒܺܝ̣̈ܢܶܐ ܕܠܐܴ ܡܬܺܝܚ ܥܠܰܝܗܽܘܢ ܫܢܰܬ݀ ܡܰܘܬܳܐ ܬܶܢܝܳܢܳܐ: ܐܶܠܐܴ ܟܰܕ ܐܰܣܺܝܪܺܝܢ ܚܰܨܰܝ̈ܢ: ܘܢܳܗܪܺܝܢ ܠܰܡܦܺܐܕܰܝ̈ܢ ܘܡܰܨܡܚܺܝܢ ܩܶܪ̈ܝܽܘܢܰܝܢ ܒܡܶܫܚܳܐ ܡܒܰܣܡܳܐ ܕܙܰܕܺܝܩܽܘܬܳܐ: ܐܰܝܟܰܢܳܐ ܕܰܒܦܺܝܪܽܘܦܽܘܪ̈ܺܝܰܐ ܗ̇ܳܝ ܕܰܡܪܰܝܡܽܘܬܳܐ ܕܺܝܠܳܟ ܪܳܒܘ ܘܺܝܪܶܒܘ ܟܰܕ ܢܶܬܬܕܺܝܢ: ܘܢܶܐܪܽܘܥ ܦܰܪܨܽܘܦܳܟ ܡܫܰܝܢܳܐ ܘܰܫܒܺܝܚ ܡ̣ܶܢ ܟܽܠ. ܢܰܣܓܶܐ ܠܶܒܰܢ ܫܰܘܒܳܟ: ܘܢܰܦܪܶܐ ܦܽܘܡܰܢ ܬܶܫܒܽܘܚܬܳܐ. ܘܰܢܡܰܠܶܠ ܠܶܫܳܢܰܢ ܬܰܘܕܺܝܬܳܐ ܕܩܽܘܠܳܣܰܝ̈ܟ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ܀

 

ܥܛܪܐ

ܠܳܟ ܒܪܳܐ ܕܰܐܠܳܗܳܐ ܘܝܰܠܕܳܐ ܡܬܽܘܡܳܝܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܡܩܰܪܒܺܝܢܰܢ: ܘܠܐܱܒܽܘܟ ܘܰܠܪܽܘܚܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ. ܐܰܝܟܰܢܳܐ ܕܒܰܣܺܝܡܳܐܺܝܬ ܢܶܬܩܰܒܰܠ ܦܺܝܪܡܰܢ ܩܕܳܡܰܝܟ ܠܪܺܝܚܳܐ ܒܰܣܺܝܡܳܐܺܝܬ ܘܟܰܕ ܗܳܠܶܝܢ ܫܳܐܠܺܝܢܰܢ ܡܶܢܳܟ ܪܶܚܡܰܬ݀ ܐ̱ܢܳܫܳܐܺܝܬ: ܕܰܬܫܰܟܶܢ ܠܰܢ ܕܢܶܫܬܘܶܐ ܠܒܶܣܡ̈ܳܢܰܝܟ ܛܳܒ̈ܶܐ ܘܰܠܫܽܘ̈ܟܳܢܰܝܟ ܪ̈ܽܘܚܳܢܳܝܶܐ ܘܰܠܚܰܓܰܝ̈ܟ ܐܠܰܗܳܝ̈ܶܐ ܡܳܪܰܢ܀

 

 

 

ܚܘܬܡܐ

 

ܐܰܥܬܰܪ ܠܰܢ ܡܳܪܝܳܐ ܐܠܰܗܳܐ ܒܥܽܘܬܪ̈ܶܐ ܟܣܰܝ̈ܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܘܚܰܕܳܐ ܠܰܢ ܒܝܽܘܡ ܢܽܘܚܳܡܳܟ: ܘܫܰܪܰܪ ܠܰܢ ܒܣܰܒܪܳܐ ܒܪܺܝܟܳܐ ܕܚܰܕܽܘܬܳܐ ܕܺܝܠܳܟ: ܘܰܒܝܰܘܡܳܐ ܕܡܶܐܬܺܝܬܳܟ ܢܶܪܽܘܥ ܓܶܠܝܳܢܳܟ ܫܒܺܝܚܳܐ: ܘܰܚܢܰܢ ܘܥܰܢܺܝ̈ܕܰܝܢ ܢܶܚܕܶܐ ܒܳܟ ܠܐܴ ܣܰܒܥܳܐܺܝܬ ܘܰܢܙܰܡܰܪ ܫܽܘܒܚܳܐ ܠܐܴ ܡܶܫܬܰܬܩܳܢܳܐܺܝܬ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܪܰܥܡܳܐ ܕܚܰܝ̈ܶܐ ܕܰܡܥܺܝܪ ܒܩܳܠܶܗ ܥܰܙܺܝܙܳܐ: ܘܰܡܢܰܚܶܡ ܠܡܺܝ̈ܬܶܐ ܒܝܽܘ̈ܒܳܒܶܐ ܕܚܺܝ̣̈ܠܐܷ: ܘܰܡܩܺܝܡ ܠܰܫܟܺܝ̣̈ܒܶܐ ܕܰܫܝܽܘܠ ܒܪܶܡܙܳܐ ܩܰܠܺܝܠܐܴ. ܘܰܡܣܰܪܶܩ ܠܗܳܡܳܢ ܒܚܰܝܠܶܗ ܬܰܩܺܝܦܳܐ ܘܰܡܚܰܕܶܬ ܠܥܳܠܡܳܐ ܒܝܰܕ ܚܶܟܡܬܶܗ ܬܗܺܝܪܬܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܒܶܗ ܗ̣ܘܳܐ ܫܪܳܝܳܐ ܕܡܰܘܬܳܐ ܘܒܽܘܛܳܠܐܴ ܕܰܚܛܺܝܬܳܐ: ܐܳܦ ܚܽܘܕܳܬܳܐ ܕܓܶܢܣܳܐ ܕܺܝܠܰܢ ܐ̱ܢܳܫܳܝܳܐ ܘܺܝܕܰܥܬܳܐ ܕܥܳܠܡܳܐ ܚܰܕܬܳܐ: ܛܳܒܳܐ: ܘܰܚܠܳܦ ܚܰܝ̈ܶܐ ܕܢܰܦ̈ܫܳܬܰܢ ܢܰܦܫܳܐ ܕܺܝܠܶܗ ܬܰܚܠܽܘܦܳܐ ܝܰܗ̣ܒ. ܪܳܡܳܐ ܕܰܢܚ̣ܶܬ ܒܰܒܣܰܪ ܠܓܰܘ ܩܰܒܪܳܐ: ܕܢܰܣܩܰܢ ܥܰܡܶܗ ܠܰܫܡܰܝܳܐ: ܘܢܰܡܠܶܟ ܒܚܰܝ̈ܶܐ ܕܰܩܝܳܡܬܳܐ ܡܫܰܒܰܚܬܳܐ. ܦܳܪܽܘܩܳܐ ܕܚܰܠܨܳܗ̇ ܠܰܫܝܽܘܠ ܒܝܰܘܡܳܐ ܬܠܺܝܬܳܝܳܐ ܘܰܐܦ̣ܶܩ ܠܐܱܣܺܝܪ̈ܶܐ ܡ̣ܶܢ ܚܶܫܽܘܟܳܐ ܒܟܰܫܺܝܪܽܘܬܳܐ ܐܰܝܟ ܣܳܗܕܽܘܬܳܐ ܢܒܺܝܳܝܬܳܐ: ܡܳܪܝܳܐ ܓܰܐܝܳܐ ܘܓܰܢ̱ܒܳܪܳܐ ܕܩܳܡ̣ܬ ܒܫܽܘܒܚܳܐ ܡ̣ܶܢ ܩܰܒܪܳܐ ܘܰܫܪܰܝܬ ܠܡܰܘܬܳܐ ܝܰܥܢܳܐ ܒܡܰܘܬܳܟ ܡܰܥܒܶܕ ܚܰܝ̈ܶܐ: ܠܳܟ ܐܠܰܗܳܐ ܕܟܽܠܳܗ̇ ܪܶܚܡܰܬ݀ ܐ̱ܢܳܫܽܘܬܳܟ ܚܰܘܺܝܬ ܠܘܳܬ ܓܶܢܣܳܐ ܕܺܝܠܰܢ: ܨܠܰܘ̈ܳܬܳܐ ܘܒܳܥܘ̈ܳܬܳܐ ܡܩܰܪܒܺܝܢܰܢ ܠܳܟ: ܒܥܶܕܳܢܳܐ ܗܳܢܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ: ܕܒܶܗ ܫܰܟܶܢ̣ܬ ܚܰܕܽܘܬܳܐ ܘܰܦܨܺܝܚܽܘܬܳܐ ܠܰܫܡܰܝ̈ܳܢܳܝܶܐ ܘܠܐܱܪ̈ܥܳܢܳܝܶܐ ܘܰܐܩ̣ܢܰܝܬ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܠܓܽܘܕܳܐ ܫܒܺܝܚܬܳܐ ܕܬܰܠܡܺܝܕܽܘܬܳܐ. ܘܰܠܢܶܫ̈ܶܐ ܢܰܟ̈ܦܳܬܳܐ ܕܶܐܬܘܰܥܰܕ̈ܝ ܗܘ̈ܰܝ ܥܰܕ ܚܶܫܽܘܟ ܠܩܰܒܪܳܟ: ܘܚܰܕܽܘܬܳܐ ܘܰܪܘܳܙܳܐ ܪܰܒܳܐ ܠܠܶܒܰܝ̈ܗܶܝܢ ܐܰܩܢ̣ܰܝܬ. ܐܰܢ̱ܬ ܕܶܝܢ ܡܳܪܳܐ ܛܳܒܳܐ ܘܒܰܣܺܝܡܳܐ ܩܰܒܶܠ ܨܠܰܘ̈ܳܬܳܐ ܘܒܳܥܘ̈ܳܬܳܐ ܕܺܝܠܰܢ: ܘܡ̣ܶܢ ܚܶܫܽܘܟܳܐ ܠܢܽܘܗܪܳܐ ܐܰܦ̣ܶܩ ܠܰܢ: ܘܡ̣ܶܢ ܒܶܝܬ ܐܰܣܺܝܪ̈ܶܐ ܕܰܫܝܽܘܠ ܒܳܠܰܥܬܳܐ ܐܰܫܪܺܝ ܠܰܢ. ܘܥܰܠ ܡܰܪ̈ܓܶܐ ܕܥܽܘܫܢܳܐ ܘܡܰܝ̈ܳܐ ܕܰܢܝܳܚܳܐ ܦܰܛܶܡ ܠܰܢ ܘܒܰܡܕܺܝܢ̱ܬܳܐ ܕܺܝܠܳܟ ܕܠܰܝܬ ܒܳܗ̇ ܩܶܢܛܳܐ ܐܰܥܡ̣ܰܪ ܠܰܢ ܘܰܒܚܽܘܣܳܝܳܐ ܘܫܽܘܒܩܳܢܳܐ ܕܣܰܟܠܘ̈ܳܬܰܢ ܚܰܕܳܐ ܠܰܢ. ܘܬܽܘܒ ܕܶܝܢ ܐܳܘ ܡܳܪܝܳܐ ܘܰܒܝܰܘܡܳܐ ܗ̇ܰܘ ܐ̱ܚܪܳܝܳܐ ܘܰܕܚܺܝܠܐܴ ܕܦܳܣܺܝ̣̈ܩܳܬܳܐ ܡ̣ܶܢ ܩܝܳܡܬܳܐ ܕܕܺܝܢܳܐ ܫܰܘܙܶܒ ܠܰܢ: ܘܠܰܩܝܳܡܬܳܐ ܕܚܰܝ̈ܶܐ ܚܰܕ̈ܬܷܐ ܡܰܢܰܥ ܠܰܢ. ܘܠܰܓܢܽܘܢܳܐ ܗ̇ܰܘ ܡܠܐܷ ܢܽܘܗܪܳܐ ܘܒܽܘܣܳܡܳܐ ܛܰܝܶܒ ܠܰܢ: ܘܰܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܐܰܫܘܳܐ ܠܰܢ: ܐܰܝܟܰܢܳܐ ܕܰܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܒܰܬܪܺܝܨܽܘܬ ܫܽܘܒܚܳܐ ܢܩܽܘܡ ܡ̣ܶܢ ܝܰܡܺܝܢܳܟ ܘܢܶܚܙܶܐ ܚܢܳܢܳܟ: ܘܢܶܙܡܰܪ ܫܽܘܒܚܳܐ ܠܐܱܠܳܗܽܘܬܳܟ ܪܳܡܰܬ݀ ܡܶܢܟܽܠ ܡܢܰܚܡܳܢܰܢ ܡ̣ܶܢ ܓܰܘ ܫܝܽܘܠ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

 

ܫܠܡ ܬܡܢܝܐ ܛܟ̈ܣܐ ܡܨܥܝ̈ܐ ܕܩܝܡܬܐ ܒܚܝܠܗ ܕܗܘ ܕܩܡ ܕܩܡ ܡܢ ܩܒܪܐ ܘܗܘܐ ܡܨܥܝܐ ܒܝܬ ܠܢ ܘܠܐܒܐ ܕܝܠܗ ܫܒܝܚܐ ܘܡܫܒܚܐ

 

ܒܫܡ ܪܘܚܐ ܩܕܝܫܐ ܓܡܘܪܐ ܘܡܫܡܠܝܢܐ ܕܟܠ ܟܬܒܝܢܢ ܬܡܢܝܐ ܛܟ̈ܣܐ ܐܚܪ̈ܢܐ ܘܐܚܪ̈ܝܐ ܕܩܝܡܬܐ ܦܪܘܩܝܬܐ ܒܡܬܒܥܝܢܝ̈ܬܐ ܕܝܠܗܝܢ

 

ܩܕܡܝܬ ܛܟܣܐ ܩܕܡܝܐ ܕܐܚܪ̈ܝܐ ܕܩܝܡܬܐ

 

ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܥܰܡ ܥܺܝܪ̈ܰܝ ܪܰܘܡܳܐ ܢܝܰܒܶܒ ܘܰܢܫܰܒܰܚ: ܘܰܢܙܰܡܰܪ ܠܳܟ ܬܶܫܒ̈ܚܳܬܳܐ ܠܐܴ ܫܰܠܘܴ̈ܝܳܬܳܐ: ܘܥܰܡ ܢܶܫ̈ܶܐ ܕܰܢܦܰܩ̈ܝ ܗ̣ܘ̈ܰܝ ܒܫܰܦܪܳܐ ܕܰܢܒܰܣ̈ܡܳܢ ܠܦܰܓܪܳܟ ܝܰܩܺܝܪܳܐ: ܢܶܚܕܶܐ ܘܢܶܪܘܰܙ ܘܰܢܕܽܘܨ: ܘܰܢܣܰܒܰܪ ܠܢܰܦ̈ܫܳܬܰܢ ܕܰܐܢ̱ܬܶܝ̈ܢ ܠܐܴ ܬܶܕܚ̈ܠܳܢ ܕܰܠܝܶܫܽܘܥ ܡܫܺܝܚܳܐ ܗ̇ܰܘ ܕܶܐܨܛܠܶܒ ܒܳܥܝ̈ܳܢ ܐܢ̱ܬܶܝ̈ܢ: ܕܩܳܡ ܠܶܗ: ܘܰܢܩܰܒܶܠ ܡܶܢܳܟ ܚܽܘܣܳܝܳܐ ܕܟܽܠܗܶܝܢ ܠܐܴ ܢܳܡܽܘܣܳܝ̈ܘܳܬܰܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܡܶܠܬܳܐ ܡܬܽܘܡܳܝܳܐ ܦܫܺܝܛܳܐ ܘܪܽܘܚܳܢܳܝܳܐ ܒܰܟܝܳܢܶܗ ܠܗ̇ܰܘ ܠܐܴ ܡܪܰܟܒܳܐ ܕܶܐܬܳܐ ܠܪܽܘܟܳܒܳܐ ܦܰܓܪܳܢܳܝܳܐ ܘܐ̱ܢܳܫܳܝܳܐ ܒܨܶܒܝܳܢܶܗ: ܐܰܝܟܰܢܳܐ ܕܢܰܝܬܶܐ ܠܦܰܓܪ̈ܳܢܶܐ ܘܥܰܦܪ̈ܳܢܶܐ ܠܰܕܡܽܘܬܶܗ. ܕܗ̇ܰܘ ܛܳܒܳܐ ܘܒܰܣܺܝܡܳܐ ܕܰܠܢܽܘܟܪ̈ܳܝܶܐ ܘܰܛܪ̈ܺܝܕܶܐ ܥܒ̣ܶܕ ܐܶܢܽܘܢ ܒܢ̈ܰܝ ܛܽܘܗܡܶܗ ܘܩܰܪܶܒ ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ ܠܘܳܬܶܗ: ܘܰܢܟܰܢܶܫ ܐܶܢܽܘܢ ܠܘܰܥܕܳܐ ܕܪܰܒܽܘܬܶܗ ܘܢܶܨܽܘܒ ܐܶܢܽܘܢ ܒܟܰܪܡܳܐ ܕܝܳܪܬܽܘܬܶܗ ܘܢܶܥܒܶܕ ܐܶܢܽܘܢ ܦܳܥ̈ܠܐܷ ܠܦܽܘܠܚܳܢܶܗ: ܘܢܰܘܪܶܬ ܐܶܢܽܘܢ ܛܽܘ̈ܒܶܐ ܕܡܰܠܟܽܘܬܶܗ: ܘܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܡܪܰܚܡܳܢܳܐ ܘܰܡܪܰܚܦܳܢܳܐ ܘܣܰܓܺܝ ܛܰܝܒܽܘܬܳܐ ܘܩܽܘܫܬܳܐ: ܚܰܢܳܢܳܐ ܘܢܰܓܺܝܪ ܪܽܘܚܳܐ: ܚܰܝܽܘܣܬܳܢܳܐ ܘܪܳܚܶܡܢܳܫܳܐ: ܗ̇ܰܘ ܕܚܺܝܠܐܴ ܘܥܰܙܺܝܙܳܐ ܕܶܐܬܗܰܦܰܟ ܥܰܡ ܒܢܰܝ̈ܢܳܫܳܐ ܡܕܰܒܪܳܢܳܐܺܝܬ. ܘܚܰܫ ܒܰܒܣܰܪ ܘܶܐܨܛܰܥܰܪ: ܗ̇ܰܘ ܠܐܴ ܚܳܫܽܘܫܳܐ ܘܠܐܴ ܡܳܝܽܘܬܳܐ: ܕܡܶܛܽܠ ܦܽܘܪܩܳܢܰܢ ܚܰܫ ܟܰܕ ܐܺܝܬܰܘܗܝ ܒܰܟܝܳܢܶܗ ܡܥܰܠܰܝ. ܘܰܐܠܶܦ ܠܰܢ ܕܠܰܥܒ̇ܳܕ̈ܶܐ ܗ̇ܳܢܽܘܢ ܕܰܚܛܺܝܬܳܐ ܢܕܰܟܶܐ ܘܢܶܡܪܽܘܩ ܡ̣ܶܢ ܢܰܦ̈ܫܳܬܰܢ: ܘܠܐܴ ܢܶܫܬܰܥܒܰܕ ܠܚܰܫ̈ܶܐ ܫܟܺܝܪ̈ܶܐ ܡܶܛܽܠ ܕܰܒܦܽܘܩܕ̈ܳܢܶܐ ܐܠܰܗܳܝ̈ܶܐ ܘܡܰܐܚܝ̈ܳܢܶܐ ܐܶܬܦܪܶܩܢܰܢ: ܘܰܒܡܰܚ̈ܘܳܬܳܐ ܕܰܡܫܺܝܚܳܐ ܡܳܪܰܢ ܐܶܬܚܰܪܰܪܢܰܢ: ܘܰܒܠܰܥ ܫܽܘ̈ܡܳܬܳܐ ܕܰܒܠ̣ܰܥ ܐܶܬܰܐܣܺܝܢܰܢ: ܘܥܰܠ ܗܳܕܶܐ ܣܳܓܕܺܝܢܰܢ ܘܰܡܫܰܒܚܺܝܢܰܢ ܠܶܗ: ܘܠܐܘܪܥܳܐ ܕܰܩܝܳܡܬܶܗ ܟܽܠܰܢ ܣܳܘܚܺܝܢܰܢ ܘܒܰܦܨܺܝܚܽܘܬܳܐ ܕܶܝܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܰܐܢ̱ܬ ܫܰܘܙܶܒܬܳܢ ܡ̣ܶܢ ܫܽܘ̈ܢܳܩܶܐ ܕܚܰܫ̈ܶܐ ܫܟܺܝܪ̈ܶܐ ܕܰܚܛܺܝܬܳܐ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܦܳܪܽܘܩܳܝܳܐ ܕܒܳܟ ܐܶܫܟܰܚ̣ܢܰܢ ܚܰܝ̈ܶܐ ܚܰܕ̈ܬܶܐ ܕܠܐܴ ܣܳܐܒܶܝܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܓܰܙܳܐ ܕܟܽܠ ܛܽܘ̈ܒܺܝܢ ܪ̈ܽܘܚܳܢܶܐ ܦܬܰܚ̣ܬ ܩܕܳܡܰܝܢ ܘܒܰܣܶܡ̣ܬ ܠܐܱܝܠܶܝܢ ܕܰܐܘܕܺܝܘ ܒܳܟ ܬܪܺܝܨܳܐܺܝܬ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ: ܕܕܽܘܟܳܝܳܐ ܕܡ̣ܶܢ ܙܰܗܡܽܘܬܳܐ ܕܰܚܛܺܝܬܳܐ ܐܰܩܢܰܝܬ ܠܰܢ. ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܰܗܘ̣ܰܝܬ ܠܰܢ ܐܽܘܪܚܳܐ ܘܰܫܒܺܝܠܐܴ ܕܡܰܘܒܶܠ ܠܡܰܠܟܽܘܬܳܐ ܕܰܫܡܰܝܳܐ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܘܰܥܕܳܐ ܕܟܽܠ ܛܳܒ̈ܳܬܳܐ ܒܺܐܝ̈ܕܰܝܟ ܐܶܬܘܰܥܰܕ̈ܝ ܠܰܢ ܘܶܐܬܰܝ̈ ܠܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܙܰܝܢܳܐ ܕܦܽܘܪܩܳܢܳܐ ܒܳܟ ܐܶܫܬܰܟܰܢ ܠܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܚܰܘܒܬܳܐ ܕܰܥܒ̇ܳܪ ܦܽܘܩܕܳܢܳܐ ܕܚܳܒ ܐܳܕܳܡ ܒܓܰܘ ܦܰܪܕܰܝܣܳܐ ܒܳܟ ܐܶܬܦܰܪܥܰܬ݀: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܰܩܝܳܡܬܳܐ ܦܳܪܽܘܩܳܝܬܳܐ ܕܝܰܘܡܳܢܳܐ ܒܟܽܠ ܦܶܢ̈ܝܳܢ ܡܶܙܕܰܝܰܚ ܡ̣ܶܢ ܟܽܠܗܽܘܢ ܥܰܡ̈ܡܶܐ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܟܺܐܒ̈ܶܐ ܘܟܽܘܪ̈ܗܳܢܶܐ ܕܺܝܠܰܢ ܐܶܬܥܰܛܰܝ̈ ܘܶܐܬܰܣ̈ܺܝ. ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܰܩܝܳܡܬܳܐ ܡܰܐܚܝܳܢܺܝܬܳܐ ܕܰܠܡܺܐܢܳܐ ܕܫܰܝܢܳܐ ܗܘ̣ܰܝܬ ܠܰܢ ܘܡ̣ܶܢ ܓ̈ܰܠܠܐܷ ܕܰܚܛܺܝܬܳܐ ܕܰܐܠܺܝܬ ܠܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܡܽܘ̣̈ܡܰܝܢ ܘܣܽܘܪ̈ܚܳܢܰܝܢ ܒܳܟ ܐܶܬܕܰܟܺܝܘ ܘܶܐܬܚܠܶܡܘ. ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܢܽܘܗܪܳܐ ܘܚܰܝ̈ܶܐ ܘܰܫܪܳܪܳܐ ܒܳܟ ܐܶܬܬܰܨܡܰܚ ܠܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܣܽܘ̈ܛܡܶܐ ܘܟܶܒ̈ܠܐܷ ܘܡܶܐܣܰܪ̈ܝܳܬܳܐ ܕܥܰܘܠܐܴ ܕܺܝܠܰܢ ܒܳܟ ܐܶܬܦܣܶܩܘ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܰܩܝܳܡܬܳܐ ܕܥܰܝܒܳܐ ܕܟܽܠ ܥܽܘܕܪ̈ܳܢܺܝܢ ܘܫܽܘܚ̈ܠܳܦܺܝܢ ܒܳܟ ܐܶܫܬܰܟܰܢܘ ܠܰܢ. ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܡܪܰܥܝܳܢܳܐ ܗܘ̣ܰܝܬ ܠܰܢ: ܘܥܶܛܪܳܐ ܡܚܰܣܝܳܢܳܐ ܐܶܬܩܰܪܰܒܬ ܘܚܰܣܺܝܬ ܠܰܢ. ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܨܰܠܡܶܗ ܕܳܐܕܳܡ ܥܰܦܪܳܢܳܐ ܒܳܟ ܐܶܬܚܰܕܰܬ݀ ܡ̣ܶܢ ܕܪܺܝܫ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܩܰܕܺܝܫܽܘܬܳܐ ܒܳܟ ܩܢܰܝܢܰܢ: ܘܡܰܠܟܽܘܬܳܐ ܗ̇ܳܝ ܕܰܫܡܰܝܳܐ ܒܳܟ ܐܶܬܬܰܓܰܪܢܰܢ ܘܺܝܪܶܬܢܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܪܽܘܡܪܳܡܳܐ ܡܥܰܠܝܳܐ ܠܰܫܡܰܝܳܐ ܒܳܟ ܐܶܬܥܰܠܺܝܢܰܢ. ܬܳܐ ܒܰܫܠܳܡܳܐ ܚܰܕ ܒܫܰܒܳܐ ܩܰܕܺܝܫܳܐ ܘܦܳܪܽܘܩܳܝܳܐ ܕܫܽܘܡܠܳܝܳܐ ܕܟܽܠܗܶܝܢ ܫܰܦܺܝܪ̈ܳܬܳܐ ܒܳܟ ܐܶܬܰܝ̈ ܠܰܢ: ܬܳܐ ܒܰܫܠܳܡܳܐ ܚܰܕ ܒܫܰܒܳܐ  ܩܰܕܺܝܫܳܐ ܘܦܳܪܽܘܩܳܝܳܐ ܕܬܰܪܥܳܐ ܗ̇ܰܘ ܕܶܐܚ̣ܰܕ ܐܳܕܳܡ ܟܰܕ ܥܒ̣ܰܪ ܦܽܘܩܕܳܢܳܐ ܒܳܟ ܐܶܬܦܬܰܚ ܠܰܢ: ܘܡܶܛܽܠܗܳܕܶܐ ܡܳܪܝܳܐ ܡܪܰܚܡܳܢܳܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܬܰܫܘܶܐ ܠܰܢ: ܕܰܐܝܟܰܢܳܐ ܕܚܰܫ̣ܬ ܚܠܳܦܰܝܢ ܨܶܒܝܳܢܳܐܺܝܬ: ܘܰܐܫܘܳܐ ܠܰܢ ܕܢܶܚܕܶܐ ܒܝܰܘܡܳܐ ܕܰܩܝܳܡܬܳܟ ܘܢܶܫܬܰܒܗܰܪ ܒܰܙܩܺܝܦܽܘܬܳܟ ܘܢܶܗܘܶܐ ܙܡܺܝ̣̈ܢܶܐ ܒܡܰܠܟܽܘܬܳܟ: ܘܰܚܕܽܘ̈ܓܶܐ ܠܐܴ ܡܟܰܬܡ̈ܶܐ ܒܡܶܫܬܽܘܬܳܟ: ܘܰܩܪ̈ܰܝܳܐ ܕܟܰܝ̈ܳܐ ܒܰܚܠܽܘܠܳܟ: ܘܒܳܟ ܢܶܬܚܰܣ̈ܝܳܢ ܢܰܦ̈ܫܳܬܰܢ: ܘܢܶܬܩܰܕ̈ܫܳܢ ܪ̈ܽܘܚܳܬܰܢ: ܘܢܶܬܟܰܘ̈ܢܳܢ ܬܺܐܪ̈ܳܬܰܢ ܘܢܶܫܬܰܒ̈ܩܳܢ ܣܰܟܠܘ̈ܳܬܰܢ: ܘܢܶܬܥܰܛܝܳ̈ܢ ܫܳܪ̈ܥܳܬܰܢ: ܘܢܶܗܘܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ: ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܥܛܪܐ

ܫܽܘܒܚܳܐ ܠܳܟ ܪܳܡܳܐ ܕܶܐܬܬܰܚܬܺܝ ܡܶܛܽܠܳܬܰܢ ܘܰܗ̣ܘܳܐ ܐ̱ܢܳܫܳܐ ܐܰܟܘܳܬܰܢ ܘܣܰܝܒܰܪ ܚܰܫ̈ܶܐ ܕܰܨܠܺܝܒܳܐ ܚܠܳܦܰܝܢ ܘܡܺܝܬ ܐܰܝܟ ܕܰܨܒ̣ܳܐ: ܘܶܐܬܢܰܚܰܡ ܐܰܝܟ ܕܰܫܦ̣ܰܪ ܠܶܗ. ܘܩܳܡ ܠܰܬܠܳܬܳܐ ܝܰܘ̈ܡܺܝܢ: ܘܚܰܕܺܝ ܠܰܢ ܒܰܩܝܳܡܬܶܗ ܐܠܰܗܳܝܬܳܐ ܘܠܳܟ ܡܶܬܟܰܫܦܺܝܢܰܢ ܡܳܪܝܳܐ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܫܡ̣ܰܥ ܨܠܰܘ̈ܳܬܰܢ ܘܦܰܢܳܐ ܫ̈ܶܐܠܳܬܰܢ: ܘܚܰܣܳܐ ܘܰܫܒܽܘܩ ܟܽܠܗܶܝܢ ܠܐܴ ܢܳܡܽܘܣܳܝ̈ܘܳܬܳܐ ܕܺܝܠܰܢ ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܚܰܣܳܐ ܠܰܢ ܐܠܰܗܳܐ ܒܰܡܪܰܚܡܳܢܽܘܬܳܟ ܒܥܺܐܕܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܘܠܐܴ ܬܶܥܽܘܠ ܠܕܺܝܢܳܐ ܥܰܡܰܢ ܒܰܩܝܳܡܬܳܐ ܕܟܽܠ ܒܣܰܪ ܘܠܐܴ ܬܺܐܡܰܪ ܠܰܢ ܕܠܐܴ ܝܳܕܰܥ ܐ̱ܢܳܐ ܠܟܽܘܢ. ܐܶܠܐܴ ܐܰܥܡܰܪ ܠܰܢ ܒܥܺܕܬܳܟ ܐܽܘܪܫܠܶܡܳܝܬܳܐ ܒܰܥܕܶܝܢ ܕܠܐܴ ܡܶܫܬܰܪܝܳܐ: ܘܒܰܣܶܡ ܠܰܢ ܒܰܚܙܳܬܳܟ ܐܠܰܗܳܝܬܳܐ ܕܡܰܦܨܚܳܐ ܠܩܰܕܺܝ̈ܫܶܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܕܰܝ̇ܳܢܳܐ ܕܕܰܝ̈ܳܢܶܐ ܕܶܐܬܕܺܝܢ ܘܙܰܟܺܝ ܠܚܰܝܳܒܽܘܬܰܢ ܒܫܶܬܩܶܗ: ܠܗ̇ܰܘ ܦܳܪܽܘܩܳܐ ܕܝܰܗ̣ܒ ܓܽܘܫܡܶܗ ܠܡܰܚ̈ܘܳܬܳܐ ܘܰܦ̣ܪܰܥ ܚܰܘ̈ܒܳܬܰܢ ܒܢܶܓ̈ܕܰܘܗܝ. ܠܗ̇ܰܘ ܠܐܴ ܚܳܫܽܘܫܳܐ ܕܰܐܚܶܫ ܠܚܰܫܰܝ̈ܢ ܒܚܰܫܶܗ: ܘܰܐܥܒ̣ܰܪ ܚܶܣܕܰܢ  ܒܨܰܥܪܶܗ ܘܰܫܩ̣ܰܠ ܠܰܘܛܬܰܢ ܒܰܟܠܺܝܠܶܗ: ܘܰܐܥ̣ܪܰܩ ܠܩܳܛܽܘܠܰܢ ܒܩܶܛܠܶܗ ܘܰܐܩܺܝܡ ܡܰܦܽܘܠܬܰܢ ܒܰܩܝܳܡܬܶܗ: ܘܰܐܡܺܝܬ ܠܡܰܘܬܰܢ ܒܡܰܘܬܶܗ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܫܰܡܠܺܝ ܟܽܠ ܐ̱ܪ̈ܳܙܺܝܢ ܒܰܩܢܽܘܡܶܗ ܘܫܰܚܠܶܦ ܠܚܰܬܺܝܬܽܘܬܳܐ ܠܗܳܠܶܝܢ ܕܶܐܬܬܡܪ̈ܰܝ ܠܰܥܓܳܐܺܝܬ ܒܠܶܫܳܢ ܢܳܡܽܘܣܳܐ. ܘܫܰܢܺܝ ܠܦܺܐܩܽܘܬܶܗ ܕܰܟܬܳܒܳܐ ܥܰܬܺܝܩܳܐ ܠܦܽܘܫܳܩܳܐ ܗܰܢܺܝ ܠܫܶܡܥܳܐ: ܫܰܝܢܳܐ ܪܰܒܳܐ ܕܰܫܪܳܐ ܣܝܳܓܳܐ ܕܒܰܡܨܰܥܬܳܐ ܣܺܝܡ ܗܳܕܶܐ: ܡܶܛܽܠ ܗ̣ܘܳܐ ܒܢܳܡܽܘܣܶܗ ܒܥܶܠܕܒܳܒܽܘܬܳܐ ܕܦܽܘܩܕ̈ܳܢܶܐ ܘܰܐܝܬܺܝ ܠܰܓܡܺܝܪܽܘܬܳܐ ܠܚܰܕ ܒܪܺܝܫܳܐ ܚܰܕܬܳܐ: ܘܰܠܗܳܠܶܝܢ ܕܡ̣ܶܢ ܓܳܙܪ̈ܳܬܳܐ ܘܰܠܗܳܠܶܝܢ ܕܰܠܒܰܪ ܡ̣ܶܢ ܢܳܡܽܘܣܳܐ: ܢܰܓܺܝܪ ܪܽܘܚܳܐ ܕܶܐܫܬܓܶܫ ܥܠܰܘܗܝ ܝܰܡܳܐ ܕܠܺܝܚܳܐ ܕܣ̇ܳܦܪ̈ܶܐ ܘܰܦܪ̈ܺܝܫܶܐ: ܟܰܕ ܡܶܬܥܰܙܰܙ ܥܠܰܘܗܝ ܡܳܡܽܘܠܐܴ ܒܺܝܫܳܐ ܕܟܳܗ̈ܢܶܐ ܚܰܪ̈ܡܶܐ. ܒܰܣܺܝܡܳܐ ܘܢܺܝܚܳܐ ܕܶܐܬܬܰܪܥܰܬ݀ ܥܠܰܘܗܝ ܡܶܪܬܶܗ ܕܬܰܢܺܝܢܳܐ ܕܢܶܬܬܨܺܝܪ ܒܰܚܣܳܡܳܐ: ܟܰܕ ܗ̣ܽܘ ܥܬܺܝܕ ܗ̣ܘܳܐ ܕܢܶܪܨܶܗ ܠܚܰܪܡܳܢܳܐ ܒܥܶܩܒܳܐ ܕܰܙܩܺܝܦܶܗ: ܬܰܩܺܝܦܳܐ ܕܝܰܗܒ ܢܰܦܫܶܗ ܘܶܐܬܠܒܶܟ: ܘܰܐܪܟܶܢ ܪܰܘܡܶܗ ܘܶܐܬܬܚܶܕ: ܘܥܰܠ ܕܰܨܒ̣ܳܐ ܘܶܐܬܓܰܫܰܡ ܐܶܬܚܒܶܫ: ܘܥܰܠ ܕܶܐܬܒܰܪܢܰܫ ܐܶܬܢܰܓܰܕ: ܘܥܰܠ ܕܰܣܦ̣ܰܩ ܠܶܗ ܡܰܪܒܥܳܐ: ܐܶܬܦܬܰܚ ܠܶܗ ܩܰܒܪܳܐ. ܛܳܒܳܐ ܕܩܰܒܶܠ ܐܶܢܽܘܢ ܠܚܰܫ̈ܶܐ ܚܠܳܦܰܝܢ ܕܠܐܴ ܪܶܛܢܳܐ ܘܣܰܝܰܒܪ ܙܩܺܝܦܳܐ ܕܠܐܴ ܪܽܘܥܡܳܐ: ܚܰܝܳܐ ܕܶܐܫܟܰܚ ܕܰܢܡܽܘܬ ܥܰܠ ܕܰܨܒ̣ܳܐ ܘܶܐܬܒܰܣܰܪ: ܘܶܐܬܩܒܰܪ ܥܰܠ ܕܰܗ̣ܘܳܐ ܐܰܟܘܳܬܰܢ: ܡܢܰܚܡܳܢܳܐ ܕܡܺܝ̈ܬܶܐ ܒܰܚܢܳܢܶܗ: ܟܰܕ ܢܛܺܝܪܺܝܢ ܒܶܗ ܚܰܝ̈ܶܐ ܒܰܩܢܽܘܡܶܗ: ܡܰܠܝܳܐ ܕܚܰܦܺܝ ܥܽܘܬܪܶܗ ܘܰܪܚܶܡ ܡܶܣܟܺܢܽܘܬܰܢ: ܘܢܰܣܺܝ ܐܠܰܗܽܘܬܶܗ ܒܐܢܳܫܽܘܬܰܢ ܘܰܐܚܺܝ̣̈ܕܰܝ ܥܳܠܡܳܐ ܠܐܴ ܝܰܕܥܽܘܗܝ: ܐܠܶܘ ܓܶܝܪ ܝܳܕܥܺܝܢ ܗ̣ܘܰܘ ܠܰܘ ܠܡܳܪܳܗ̇ ܕܬܶܫܒܽܘܚܳܬܐ ܙܳܩܦܺܝܢ ܗ̣ܘܰܘ. ܚܰܫܶܗ ܐܰܬܗܰܪ ܠܣܰܓܺܝ̈ܶܐܐ ܘܡܽܘܟܳܟܶܗ ܐܰܒܗ̣ܶܬ ܠܫܺܐܕ̈ܶܐ ܘܦܰܪܣܺܝ ܒܟܽܘܪܗܳܢܶܗ ܠܐܱܪ̈ܟܽܘܢܺܝܣܛܶܐ: ܘܒܰܛܶܠ ܒܫܺܝܛܽܘܬܶܗ ܠܚܰܟܺܝ̣̈ܡܶܐ. ܢܶܦܠܰܬ݀ ܒܥܳܬܶܗ ܒܶܝܬ ܕܳܪ̈ܽܘܫܶܐ ܘܶܐܬܬܚܶܕܘ ܒܶܗ ܟܽܠ ܒܳܨܽܘ̈ܝܶܐ ܘܒܳܥܶܝܢ ܕܰܢܦܰܫܩܽܘܢܳܝܗܝ ܠܐܴ ܡܶܬܦܰܫܰܩ ܘܣܳܒܟܺܝܢ ܕܰܢܥܰܩܒܽܘܢܳܝܗܝ ܘܠܐܴ ܡܶܬܥܰܩܰܒ: ܠܳܟ ܐܠܰܗܳܐ ܕܽܘܡܳܪܳܐ ܠܐܴ ܡܶܬܕܰܪܟܳܢܳܐ ܡܩܰܪܒܺܝܢܰܢ ܥܶܛܪܳܐ ܗܳܢܳܐ ܕܒܶܣ̈ܡܶܐ ܟܰܕ ܡܶܬܟܰܫܦܺܝܢܰܢ ܠܰܚܢܳܢܳܟ: ܐܰܝܟܰܢܳܐ ܕܬܶܣܥܽܘܪ ܒܰܒܛܺܝܠܽܘܬܳܟ ܠܥܺܕܬܳܟ ܩܰܕܺܝܫܬܳܐ ܦܪܺܝܩܰܬ ܒܚܰܫܰܝ̈ܟ ܡܰܐܚܝ̈ܳܢܶܐ: ܘܒܰܛܶܠ ܡܶܢܳܗ̇ ܣܶܕ̈ܩܶܐ ܘܚܶܪ̈ܝܳܢܶܐ: ܘܕܰܥܶܟ ܡܶܢܳܗ̇ ܫܽܘܒܗܳܪܳܐ ܕܥܰܡ̈ܡܶܐ ܣܳܩܽܘܪ̈ܶܐ ܘܰܣܬܽܘܪ ܠܩܰܘܡܳܐ ܒܺܝܫܳܐ ܕܶܐܪ̈ܶܣܺܝܣ ܡܚܰܒ̈ܠܳܬܳܐ ܘܰܗܘܺܝ ܡܶܬܢܰܩܡܳܐ ܚܠܳܦ ܥܺܕܬܳܟ ܘܝܳܪܬܽܘܬܳܐ ܕܺܝܠܳܟ. ܡܶܬܚܰܙܝܳܢܳܐܺܝܬ ܘܠܐܴ ܡܶܬܚܰܙܝܳܢܳܐܺܝܬ ܘܰܠܗܰܝܡܳܢܽܘܬܳܐ ܫܰܪܺܝܪܬܳܐ ܒܟܽܠܗܶܝܢ ܥܺܕ̈ܳܬܳܐ ܘܕܰܝܪ̈ܳܬܳܐ ܣܰܬܶܬ. ܘܰܠܗܳܠܶܝܢ ܕܥܳܕܪ̈ܳܢ ܘܦܳܩ̈ܚܳܢ ܠܰܢ ܫܰܟܶܢ ܘܰܠܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ ܠܡܰܠܟܽܘܬܳܟ ܐܰܫܘܳܐ: ܘܰܒܢܰܝ̈ܳܐ ܕܢܽܘܗܪܳܐ ܚܰܘܳܐ ܐܶܢܽܘܢ ܡܶܛܽܠ ܕܰܡܪܰܚܡܳܢܳܐ ܘܣܰܓܺܝ ܛܰܝܒܽܘܬܳܐ ܐܺܝܬܰܝܟ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܰܚܕܳܐ ܐܠܰܗܽܘܬܳܐ ܓܢܺܝܙܬܳܐ ܘܠܐܴ ܡܶܬܡܰܠܠܳܢܺܝܬܳܐ: ܚܰܕ ܡܳܪܝܳܐ ܚܰܝܠܬܳܢܳܐ ܘܡܳܪܳܐ ܕܡܳܪ̈ܰܘܳܬܳܐ. ܗ̇ܰܘ ܕܒܰܠܚܽܘܕܳܝܽܘܬܳܐ ܡܶܫܬܰܒܰܚ ܘܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܡܶܣܬܓܶܕ ܘܡܶܬܬܰܘܕܶܐ ܝܳܠܽܘܕܳܐܺܝܬ ܘܺܝܠܺܝܕܳܐܺܝܬ ܘܢܳܦܽܘܩܳܐܺܝܬ ܒܕܺܝܠܳܝ̈ܳܬܳܐ ܡܦܰܪܫܳܐܺܝܬ ܘܠܐܴ ܒܠܺܝܠܐܴܝܬ. ܒܰܟܝܳܢܳܐ ܕܶܝܢ ܚܕܳܢܳܐܺܝܬ ܘܠܐܴ ܡܶܨܛܰܠܝܳܢܳܐܺܝܬ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܰܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ ܐܶܬܚܰܘܺܝܬ. ܘܰܒܝܰܕ ܡܰܘ̈ܗܒܳܬܳܐ ܕܪܽܘܚܳܐ ܩܰܕܺܝܫܳܐ ܠܗܽܘܢ ܨܰܒܶܬܬ ܘܗܰܕܰܪܬ ܘܫ̣ܰܪܰܪܬ ܐܶܢܽܘܢ ܥܰܠ ܩܝܳܡܬܳܟ ܡܰܐܚܝܳܢܺܝܬܳܐ. ܘܕܰܢܩܰܘܽܘܢ ܠܫܽܘܕܳܝܶܗ ܕܰܐܒܳܐ ܦܩ̣ܰܕܬ ܐܶܢܽܘܢ: ܘܒܺܐܝ̈ܕܰܝ ܕܺܝܠܳܟ ܩܰܕܺܝ̈ܫܳܬܳܐ ܒܰܪܶܟ̣ܬ ܐܶܢܽܘܢ ܘܠܰܫܡܰܝܳܐ ܒܬܶܫܒܽܘܚܬܳܐ ܐܶܬܥܰܠܺܝܬ ܐܰܝܟ ܡܰܠܟܳܐ ܕܰܗܦܰܟ ܒܙܳܟܽܘܬܳܐ ܡ̣ܶܢ ܩܪܳܒܳܐ ܘܡܶܬܚܰܘ̈ܝܳܢ ܒܶܗ ܫܽܘ̈ܡܳܬܳܐ ܘܡܰܚܘ̈ܳܬܳܐ ܕܰܒܥܶܠܕ̈ܒܳܒܶܐ: ܗ̇ܳܢܽܘܢ ܕܒܶܙܬܳܐ ܘܰܫܒܺܝܬܳܐ ܕܺܝܠܗܽܘܢ ܐܰܥܕܺܝ ܘܰܠܟܽܠܗܽܘܢ ܚܰܝܠܰܘ̈ܳܬܳܐ ܕܰܫܡܰܝ̈ܳܢܶܐ ܒܬܶܗܪܳܐ ܘܕܽܘܡܳܪܳܐ ܐܰܩܺܝܡ: ܕܚ̇ܳܙܶܝܢ ܗ̣ܘܰܘ ܠܶܗ ܠܗ̇ܰܘ ܡܶܠܬܶܗ ܕܰܐܒܳܐ ܕܶܐܬܒܰܣܰܪ ܠܗ̇ܰܘ ܡܬܽܘܡܳܝܳܐ ܕܥܰܡ ܐܰܒܽܘܗܝ ܕܶܐܬܒܰܪܰܢܰܫ ܠܐܴ ܡܶܫܬܰܚܠܦܳܢܳܝܳܐܺܝܬ ܡܶܛܽܠܳܬܰܢ: ܠܗ̇ܰܘ ܐܳܕܳܡ ܕܰܬܪܶܝܢ ܠܗ̇ܰܘ ܡܳܪܳܗ̇ ܕܬܶܫܒܽܘܚܬܳܐ ܠܗ̇ܰܘ ܫܘܶܐ ܒܽܐܘܣܺܝܰܐ ܠܐܱܠܳܗܳܐ ܐܰܒܳܐ: ܕܦܰܓܪܳܢܳܐܺܝܬ ܩܳܡ ܡ̣ܶܢ ܩܰܒܪܳܐ ܒܦܰܓܪܳܐ ܕܡܶܢܰܢ ܐܶܬܥܰܛܰܦ: ܘܦܰܓܪܳܢܳܐܺܝܬ ܣܠ̣ܶܩ ܠܰܫܡܰܝܳܐ ܠܰܡܪ̈ܰܘܡܶܐ ܥܶܠܳܝ̈ܶܐ ܠܥܶܠ ܡ̣ܶܢ ܟܽܠܗܶܝܢ ܐܰܪ̈ܟܰܐܣ ܘܚܰܝܠܰܘ̈ܳܬܳܐ ܫܡܰܝ̈ܳܢܶܐ: ܘܥ̣ܰܠ ܠܡܰܫܟܢܳܐ ܪܰܒܳܐ ܘܰܡܫܰܡܠܝܳܐ ܘܠܐܴ ܥܒܺܝܕ ܒܺܐܝ̈ܕܰܝܳܐ: ܟܰܕ ܥܰܠܺܝ ܘܰܐܣ̣ܶܩ ܣܳܡܶܗ ܒܰܡܪ̈ܰܘܡܶܐ ܥܰܡܶܗ ܠܟܽܠܶܗ ܓܶܢܣܳܐ ܕܐ̱ܢܳܫܽܘܬܳܐ ܕܺܝܠܰܢ. ܠܗ̇ܰܘ ܕܰܐܝܟ ܕܒܰܬܗܽܘܡܳܐ ܕܓ̈ܰܠܠܐܷ ܕܰܚܛܺܝܬܳܐ ܡܛܰܒܰܥ ܗ̣ܘܳܐ: ܐܰܘܬܒܶܗ ܠܨܰܠܡܶܗ ܡ̣ܶܢ ܝܰܡܺܝܢܳܐ ܕܰܐܠܳܗܳܐ ܐܰܒܳܐ: ܠܗ̇ܳܢܽܘܢ ܕܺܐܝܬܰܝܗܶܝܢ ܛܪ̈ܺܝܕܶܐ ܘܡܰܣܠܰܝ̈ܳܐ ܘܡܶܛܽܠ ܥܰܘ̈ܠܐܷ ܘܪ̈ܽܘܫܥܶܐ ܕܺܝܠܰܢ ܐܳܦܠܐܴ ܠܳܗ̇ ܠܐܱܪܥܳܐ ܫܳܘܶܝܢ ܗ̣ܘܰܝܢ: ܟܶܢ̈ܫܶܐ ܫܡܰܝ̈ܳܢܶܐ ܐܰܙܥ̣ܶܩܘ ܘܶܐܡ̣ܰܪܘ ܕܡܰܢܽܘ ܗܳܢܳܐ ܕܳܐܬܶܐ ܡ̣ܶܢ ܐܰܕܽܘܡ ܘܣܽܘܡܳܩܺܝܢ ܢܰܚ̈ܬܶܐ ܕܺܝܠܶܗ ܡ̣ܶܢ ܕܡܳܐ: ܘܺܝܠܶܦܢܰܢ ܒܚܶܟܡܬܳܐ ܕܰܐܠܳܗܳܐ ܣܰܓܺܝܰܐܬ݀ ܦܽܘܪܫܳܢܳܐ: ܕܡܳܪܝܳܐ ܚܰܝܠܬܳܢܳܐ ܐܺܝܬܰܘܗܝ ܘܰܩܪܰܒܬܳܢܳܐ ܕܣܰܚܦܶܗ ܠܐܴܟܶܠܩܰܪܨܳܐ ܡܳܪܽܘܕܳܐ ܟܰܕ ܡ̣ܶܢ ܟܽܘܪܣܝܳܐ ܕܺܝܠܶܗ ܡܶܡܬܽܘܡ ܠܐܴ ܫܰܢܺܝ. ܕܦܰܓܪܳܢܳܐܺܝܬ ܐܰܝܟ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܝ̣ܺܬܶܒ ܘܰܐܝܟ ܫܽܘ̈ܘܕܳܝܶܐ ܫܰܪܺܝܪ̈ܶܐ ܘܠܐܴ ܕܰܓ̈ܳܠܐܷ. ܪܽܘܚܳܐ ܩܰܕܺܝܫܳܐ ܪܽܘܚܳܐ ܕܰܫܪܳܪܳܐ ܦܰܪܰܩܠܺܝܛܳܐ ܘܰܫܘܶܐ ܠܶܗ ܒܽܐܘܣܺܝܰܐ: ܠܬܰܠܡܺܝ̈ܕܶܐ ܕܺܝܠܶܗ ܫܰܕܰܪ: ܟܰܕ ܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܥܰܠ ܚܰܕ ܚܰܕ: ܡܶܢܗܽܘܢ ܝ̣ܺܬܶܒ: ܟܰܕ ܡܩܰܕܶܡ ܘܰܡܦܰܩܶܕ ܠܰܢ ܒܺܐܝܕܰܝ̈ܗܽܘܢ ܕܥܰܒ̣ܕ̈ܶܐ ܕܺܝܠܶܗ: ܕܰܠܡܶܐܬܺܝܬܳܐ ܕܺܝܠܶܗ ܕܬܰܪܬܶܝܢ ܕܚܺܝܠܬܳܐ ܘܰܡܫܰܒܰܚܬܳܐ ܕܡ̣ܶܢ ܫܡܰܝ̈ܳܐ ܡܛܰܝܒܳܐܺܝܬ ܒܚܰܕܽܘܬܳܐ ܥܰܡ ܦܰܪܶܗܣܺܝܰܐ ܢܶܐܪܽܘܥ: ܟܰܕ ܡܣܰܟܶܝܢܰܢ ܠܣܰܒܪܳܐ ܗ̇ܰܘ ܒܪܺܝܟܳܐ ܘܛܽܘܒܬܳܢܳܐ ܘܠܰܩܝܳܡܬܶܗ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܘܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܨܦܪܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܢܶܗܘܶܐ ܗܶܪܓܰܢ ܘܗܽܘܓܳܝܰܢ ܒܢܳܡܽܘ̈ܣܰܝܟ ܐܠܰܗܳܝ̈ܶܐ: ܗܰܒܠܰܢ ܕܢܰܦܪܶܓ ܒܝܰܘܡܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܘܢܶܗܘܶܐ ܠܰܢ ܥܺܐܕܳܐ ܕܚܰܕܽܘܬܳܐ ܘܕܰܕܝܳܨܳܐ ܘܢܶܠܒܰܫ ܒܶܗ ܚܽܘܕܳܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܘܰܢܣܺܝܡ ܣܰܢܘܰܪܬܳܐ ܕܦܽܘܪܩܳܢܳܐ ܥܰܠ ܪ̈ܺܝܫܰܝܢ ܘܒܳܗ̇ ܢܰܩܪܶܒ ܠܽܘܩܒܰܠ ܓܶܐܪ̈ܰܘܗܝ ܫܢܺܝ̣̈ܢܶܐ ܕܳܐܟܶܠܩܰܪܨܳܐ: ܘܢܶܫܟܰܚ ܒܺܐܝ̈ܕܰܝܟ ܓܗܳܝܬܳܐ ܡܫܰܡܠܳܝܬܳܐ ܡ̣ܶܢ ܦܰܚܘ̈ܗܝ ܡܰܘܒܕܳܢ̈ܶܐ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܢܽܘܗܪܳܐ ܪܺܝܫܳܝܳܐ ܘܠܐܴ ܡܶܬܩܰܪܒܳܢܳܐ ܠܗ̇ܰܘ ܕܽܘܡܳܪܳܐ ܠܐܴ ܡܶܬܕܰܪܟܳܢܳܐ ܠܗ̇ܰܘ ܕܽܘܡܳܪܳܐ ܠܐܴ ܡܶܬܕܰܪܟܳܢܳܐ ܠܐܴ ܡܶܣܬܰܝܟܳܢܳܐ. ܠܗ̇ܰܘ ܕܳܐܠܶܦ ܐܠܰܦܺܝ̣̈ܢ ܕܥܺܝܪ̈ܶܐ ܘܡܰܠܐܱܟ̈ܶܐ: ܘܪܶܒܽܘ ܪ̈ܶܒܘܳܢ ܕܪ̈ܺܝܫܰܝ ܡܰܠܐܱܟ̈ܶܐ ܡܫܰܡܫܺܝܢ ܠܶܗ: ܘܟܽܠܗܽܘܢ ܣܶܕܪ̈ܶܐ ܘܛܶܟ̈ܣܶܐ ܫܬܺܝܬܳܝ̈ܰܝ ܓܶܦ̈ܶܐ ܘܣܰܓܺܝ̈ܐܝܰܝ ܥܰܝ̈ܢܶܐ ܛܥܺܝ̈ܢܰܝ ܡܰܪܟܰܒܬܶܗ ܘܰܡܙܰܝ̈ܚܰܝ ܠܪܰܒܽܘܬܶܗ. ܗ̇ܰܘ ܕܰܒܝܰܕ ܐܽܘܣܺܝܰܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܡܶܣܬܓܶܕ ܘܡܶܫܬܰܒܰܚ ܡ̣ܶܢ ܟܽܠܗܽܘܢ ܒܶܪ̈ܝܳܬܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܝܰܘܡܳܢܳܐ ܠܰܩܝܳܡܬܳܐ ܕܺܝܠܳܟ ܡܥܰܕܥܕܺܝܢܰܢ: ܘܰܠܢܽܘܚܳܡܳܟ ܕܡ̣ܶܢ ܒܶܝܬ ܡܺܝ̈ܬܳܐ ܠܰܡܚܰܓܳܝܽܘ ܒܡܰܕ̈ܥܰܝܢ ܩܰܒܳܠܢܰܢ: ܗܳܢܳܐ ܕܒܶܗ ܢܶܫ̈ܶܐ ܩܰܕܺܝ̈ܫܳܬܳܐ ܥܰܡ ܒܶܣ̈ܡܶܐ ܛܳܒ̈ܶܐ ܘܗܶܪ̈ܽܘܡܶܐ ܠܘܳܬ ܩܰܒܪܳܟ ܝܰܩܺܝܪܳܐ ܐܶܬܘܰܥܰܕ̈ܝ ܗ̣ܘ̈ܰܝ ܘܥܰܠ ܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܩܰܒܪܳܐ ܒܰܕܶܩ̈ܝ ܗ̣ܘ̈ܰܝ ܘܗܶܢܶܝ̈ܢ ܠܘܳܬ ܫܠܺܝ̈ܚܶܐ ܪ̈ܗܶܛܝ ܠܰܡܣܰܒܳܪܽܘ ܟܰܕ ܐܳܡܪ̈ܳܢ ܬܳܐܝܶܝ̈ܢ ܚܙܳܝܶܝ̈ܢ ܠܫܰܠܗܶܒܺܝܬܳܐ ܕܢܽܘܪܳܐ ܡ̣ܶܢ ܡܰܠܐܱܟ̈ܶܐ ܐܶܬܶܐܡܰܪܘ ܠܗܶܝܢ ܕܩܳܡ ܚܰܝܳܐ ܡ̣ܶܢ ܒܶܝܬ ܡܺܝ̈ܬܶܐ: ܘܠܰܝܬܰܘܗܝ ܬܢܳܢ: ܘܗ̣ܶܢܶܝ̈ܢ ܟܰܕ ܐܶܫܬܰܘܕܰܥ̈ܝ ܗ̣ܘ̈ܰܝ ܪ̈ܗܶܛܝ ܒܚܰܕܽܘܬܳܐ ܘܠܰܫܠܺܝ̈ܚܶܐ ܕܰܒܛܽܘܫ̈ܝܳܬܳܐ ܘܒܰܟܡܺܐܢ̈ܶܐ ܙܪܺܝܒܺܝܢ ܗ̣ܘܰܘ: ܘܶܐܡܰܪ̈ܝ ܫܠܳܡܳܐ ܥܰܡܟܽܘܢ ܐ̱ܢܳܫ̈ܳܐ ܕܰܚܽܘܠܬܳܢ̈ܶܐ. ܣܒܰܪܬܳܐ ܥܠܰܝܟܽܘܢ ܫܠܺܝ̈ܚܶܐ ܓܒܰܝ̈ܳܐ ܕܩܳܡ ܠܶܗ ܪܰܒܟܽܘܢ ܡ̣ܶܢ ܩܰܒܪܳܐ: ܣܒܰܪܬܳܐ ܥܠܰܝܟܽܘܢ ܐ̱ܢܳܫ̈ܳܐ ܩܰܢܺܝ̣̈ܛܶܐ ܕܰܒܛܽܘܫ̈ܝܳܬܳܐ ܙܪܺܝܒܺܝܢ ܐܢ̱ܬܽܘܢ: ܬܰܘ ܦܽܘܩܘ ܡ̣ܶܢ ܟܡܺܐܢܰܝ̈ܟܽܘܢ: ܘܙܶܠܘ ܣܰܒ̣ܰܪܘ ܣܒܰܪܬܳܐ ܕܦܽܘܪܩܳܢܳܐ ܠܟܽܠܳܗ̇ ܒܪܺܝܬܳܐ: ܒܰܪ̈ܩܶܐ ܓܽܘܙܰܠܬܳܢܳܝ̈ܶܐ ܡ̣ܶܢ ܩܰܒܪܶܗ ܢܳܦܩܺܝܢ: ܚ̣ܙܰܝܢ ܢܳܛܽܘܪ̈ܶܐ ܟܰܕ ܥܰܪܺܝܩܺܝܢ ܘܰܪܬܺܝܬܺܝܢ ܘܰܠܥܰܡܳܐ ܕܝܽܘܕܳܝ̈ܶܐ ܡܚܰܣܕܺܝܢ ܘܳܐܡܪܺܝܢ: ܕܗ̇ܰܘ ܓܰܒܪܳܐ ܕܰܙܩܰܦ̣ܬܽܘܢ ܘܰܩ̣ܛܰܠܬܽܘܢ ܘܰܩܒ̣ܰܪܬܽܘܢ ܩܳܡ ܠܶܗ ܒܙܳܟܽܘܬܳܐ ܡ̣ܶܢ ܩܰܒܪܳܐ: ܘܠܐܴ ܝܳܕܥܺܝܢܰܢ ܐܰܝܟܰܘ: ܠܰܫܡܰܝܳܐ ܣܠ̣ܶܩ ܠܐܴܝܟܳܐ ܕܳܐܡ̇ܰܪ ܗ̣ܘܳܐ ܕܣ̇ܳܠܶܩ ܐ̱ܢܳܐ ܠܘܳܬ ܐܰܒܳܐ ܕܺܝܠܝ: ܒܰܪ̈ܩܶܐ ܕܚܺܝ̣̈ܠܐܷ ܡ̣ܶܢ ܩܰܒܪܶܗ ܚ̣ܙܰܝܢ ܟܰܕ ܢܳܦܩܺܝܢ: ܘܒܰܕܡܺܘܬ ܟܳܪ̈ܽܘܙܶܐ ܢܰܨܺܝ̈ܚܶܐ ܗ̣ܘܰܘ ܢܳܛܽܘܪ̈ܶܐ ܟܰܕ ܡܰܟܪܙܺܝܢ ܘܳܐܡܪܺܝܢ: ܕܩܳܡ ܩܛܺܝܠܐܴ ܡ̣ܶܢ ܩܰܒܪܳܐ: ܢܦ̣ܰܩ ܠܶܗ ܩܒܺܝܪܳܐ ܘܰܡܢܰܚܡܳܢܳܐ ܟܰܕ ܛܰܒ̈ܥܶܐ ܕܺܝܠܟܽܘܢ ܘܰܚܬܳܡ̈ܶܐ ܩܰܝܳܡܺܝܢ: ܚ̣ܙܝܢ ܡܰܠܐܱܟ̈ܶܐ ܕܓܰܘܙܰܠܬܳܐ ܕܥܰܓܶܠܘ ܗ̣ܘܰܘ ܟܺܐܦܳܐ ܡ̣ܶܢ ܦܽܘܡ ܩܰܒܪܳܐ: ܘܰܣܠ̣ܶܩܘ ܝ̣ܺܬܶܒܘ ܠܥܶܠ ܡܶܢܳܗ̇: ܚ̣ܙܰܝܢ ܥܺܝܪ̈ܶܐ ܕܠܐܴ ܡܶܢܝܳܢܳܐ ܘܪ̈ܽܘܚܳܢܶܐ ܕܠܐܴ ܚܽܘܫܒܳܢܳܐ ܢܽܘܪ̈ܳܢܶܐ ܕܠܐܴ ܓܽܘܫܡܳܐ ܕܶܡܘ̈ܳܬܳܐ ܕܠܐܴ ܫܽܘܚܠܳܦܳܐ: ܨܽܘܪ̈ܳܬܳܐ ܓܢܺܝ̣̈ܙܳܬܳܐ ܡܰܫܪ̈ܝܳܬܳܐ ܕܚܺܝ̣̈ܠܳܬܳܐ ܟܢܽܘ̈ܫܳܬܳܐ ܡܦܰܬܟ̈ܳܬܳܐ. ܠܶܓܝܽܘ̈ܢܶܐ ܫܓܺܝܪ̈ܳܬܳܐ: ܓܽܘ̈ܕܶܐ ܡܢܰܒܪ̈ܫܳܬܳܐ ܚ̣ܙܰܝܢ ܡܰܘܬܳܐ ܟܰܕ ܡܰܝܠܶܠ ܣܳܛܳܢܳܐ ܟܰܕ ܪܳܥܶܠ: ܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܟܰܕ ܛܳܝ̈ܣܳܢ ܪ̈ܽܘܚܳܬܳܐ ܕܰܢܒܺܝ̈ܶܐ ܟܰܕ ܦܳܪ̈ܚܳܢ ܩܰܘ̈ܡܳܬܳܐ ܕܪ̈ܺܝܫܰܝ ܐܰܒܳܗ̈ܳܬܳܐ ܟܰܕ ܡܨܰܒ̈ܬܳܢ: ܚ̣ܙܰܝܢ ܐܽܘܪܫܠܶܡ ܟܰܕ ܡܶܬܪܰܗܒܳܐ ܟܢܽܘܫܬܳܐ ܟܰܕ ܡܶܬܒܰܠܗܳܐ: ܚ̣ܙܰܝܢ ܫܡܰܝ̈ܳܢܶܐ ܟܰܕ ܡܨܰܒܬܺܝܢ ܘܡܶܨܛܰܝܒܺܝܢ ܘܰܐܪ̈ܥܳܢܶܐ ܕܶܐܬܘܰܥܰܕܘ: ܘܟܽܠܗܽܘܢ ܒܫܰܘܝܽܘܬܳܐ ܡܰܟܪܙܺܝܢ ܘܳܐܡܪܺܝܢ ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܥܒ̣ܰܕ ܫܰܝܢܳܐ ܒܶܝܬ ܥܶܠܳܝ̈ܶܐ ܠܬܰܚܬܳܝ̈ܶܐ ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܚܰܕܺܝ ܘܰܐܦܨܰܚ ܠܰܡܗܰܝܡ̈ܢܶܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܐܰܒܗܶܬ ܠܟܳܦܽܘܪ̈ܶܐ ܘܰܠܛܳܠܡ̈ܰܝ ܡܕܰܒܪܳܢܽܘܬܶܗ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܪܰܡܪܶܡ ܠܥܺܕܬܳܐ ܩܰܕܺܝܫܬܳܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܡܰܟܶܟ ܠܰܟܢܽܘܫܬܳܐ ܕܰܨܠܰܒܬܶܗ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܫܰܝܶܢ ܠܟܽܠܗܶܝܢ ܐܶܡܘ̈ܳܬܳܐ ܕܰܫܓܺܝ̈ܫܳܢ ܘܰܟܡܺܝܪ̈ܳܢ ܗ̣ܘ̈ܰܝ ܥܰܠ ܡܰܘܬܶܗ ܘܒܰܚܕܳܐ ܒܰܪܬ ܩܳܠܐܴ ܡܰܙܥ̈ܩܳܢ ܘܳܐܡܪ̈ܳܢ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܓܠܐܴ ܟܰܣ̈ܝܳܬܳܐ ܕܰܒܢ̈ܰܝ ܩܳܐܶܝܢ ܩܳܛܽܘܠܐܴ ܙܳܩܽܘ̈ܦܶܐ ܠܺܝ̣̈ܛܶܐ: ܫܽܘܒܚܳܐ ܠܐܱܠܳܗܳܐ ܕܒܰܩܝܳܡܬܶܗ ܐܰܟ̣ܪܶܙܘ ܢܽܘܚܳܡܳܐ ܘܚܰܝ̈ܶܐ ܠܰܡܗܰܝ̈ܡܢܶܐ ܫܟܺܝ̈ܒܶܐ ܕܰܫܝܽܘܠ ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܬܩܰܒܶܠ ܡ̣ܶܢ ܐܺܝ̈ܕܰܝܢ ܚܰܛܳܝ̈ܳܬܳܐ ܥܰܒ̣ܕ̈ܶܐ ܕܺܝܠܳܟ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܐ: ܘܢܶܬܬܢܺܝܚ ܒܶܗ ܡܳܪܝ ܨܶܒܝܳܢܳܟ ܛܳܒܳܐ ܘܒܰܣܺܝܡܳܐ ܘܰܥܒܶܕ ܒܶܗ ܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܺܝܬܘ ܥܰܠ ܣܰܒܪܳܟ ܘܚܳܝܪܺܝܢ ܠܡܶܐܬܺܝܬܳܟ ܬܪܰܝܳܢܺܝܬܳܐ ܕܗ̇ܰܝ ܕܡܶܣܬܰܟܝܳܐ ܡ̣ܶܢ ܛܳܒ̈ܶܐ ܘܡ̣ܶܢ ܒܺܝ̈ܫܶܐ: ܗ̇ܳܝ ܕܒܳܗ̇ ܡܶܬܦܪܰܥ ܟܽܠ ܐ̱ܢܳܫ ܐܰܟܡܳܐ ܕܰܣܥ̣ܰܪ: ܗ̇ܳܝ ܕܢܶܫܬܘܶܐ ܒܳܗ̇ ܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܡ̣ܶܢ ܝܰܡܺܝܢܳܟ ܢܩܽܘܡ ܘܰܢܙܰܡܰܪ ܫܽܘܒܚܳܐ ܠܐܱܠܳܗܽܘܬܳܟ ܡܳܪܳܐ ܕܰܬܪ̈ܰܝܗܽܘܢ ܥܳܠܡ̈ܶܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܺܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܠܐܴ ܡܳܪܝ ܬܶܡܢܶܐ ܠܰܢ ܥܰܡ ܦܳܥ̈ܠܐܷ ܒܰܛܺܝ̈ܠܐܷ ܕܠܐܴ ܦܠܰܚ̣ܘ ܒܟܰܪܡܳܟ ܟܰܫܺܝܪܳܐܺܝܬ ܡ̣ܶܢ ܨܰܦܪܳܐ ܠܪܰܡܫܳܐ: ܐܶܠܐܴ ܐܰܘܕܳܐ ܒܰܢ ܓܰܠܝܳܐܺܝܬ ܕܰܐܘܕܺܝܢܰܢ ܒܳܟ ܚܰܕܳܢܳܐܺܝܬ: ܘܰܐܫܘܳܐ ܠܰܢ ܕܥܰܡ ܗ̇ܳܢܽܘܢ ܕܰܦܠ̣ܰܚܘ ܒܟܰܪܡܳܟ ܟܰܫܺܝܪܳܐܺܝܬ: ܢܶܣܰܒ ܐܰܓܪܳܐ ܡܰܠܝܳܐܺܝܬ: ܘܢܶܬܩܰܒܰܠ ܦܺܝܪܡܳܐ ܕܩܰܪܶܒܢܰܢ ܩܕܳܡ ܪܰܒܽܘܬܳܟ ܒܰܣܺܝܡܳܐܺܝܬ: ܘܢܺܐܬܶܐ ܠܰܢ ܒܶܗ ܚܢܳܢܳܐ ܘܪ̈ܰܚܡܶܐ ܡ̣ܶܢ ܒܶܝܬ ܓܰܙܳܟ ܥܰܬܺܝܪܳܐܺܝܬ. ܐܰܝܟܰܢܳܐ ܕܥܰܡ ܩܰܕܺܝ̈ܫܰܝܟ ܒܓܽܘܕܰܝ̈ܗܽܘܢ ܢܫܰܒܚܳܟ ܠܐܴ ܫܰܠܘܳܐܺܝܬ: ܘܢܰܣܶܩ ܠܳܟ ܫܽܘܒܚܳܐ ܦܨܺܝܚܳܐܺܝܬ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܫܰܘܝܳܐܺܝܬ ܗܳܫܳܐ܀

 

ܚܘܬܡܐ

ܡܶܢܳܟ ܒܳܥܺܝܢܰܢ ܚܢܳܢܳܐ ܘܪ̈ܰܚܡܶܐ ܡܳܪܝܳܐ ܕܠܐܴ ܬܶܡܢܶܐ ܠܫܰܗܪܳܐ ܕܺܝܠܰܢ ܐܰܝܟ ܫܰܗܪܳܐ ܕܚܰܢ̈ܦܶܐ ܘܟܳܦܽܘܪ̈ܶܐ: ܘܰܠܒܶܗܬܬܳܐ ܘܟܽܘܐܳܪܳܐ ܕܺܝܠܗܽܘܢ ܢܶܗܘܶܐ. ܘܠܐܴ ܬܶܚܫܽܘܒ ܨܠܰܘ̈ܳܬܰܢ ܐܰܝܟ ܡܰܡܠܠܐܴ ܦܰܩܳܩܳܐ ܕܥܰܡ̈ܡܳܝܶܐ: ܐܶܠܐܴ ܐܶܬܪܰܥܳܐ ܒܨܰܘܡܢܰ ܘܒܰܨܠܰܘ̈ܳܬܰܢ ܐܰܟܡܳܐ ܕܶܐܬܪܰܥܺܝܬ ܒܬܶܫܡ̈ܫܳܬܳܐ ܕܰܐܒܳܗ̈ܳܬܳܐ ܩܰܕܺܝ̈ܫܶܐ: ܘܰܫܒܽܘܩ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܚܰܣܳܐ ܠܥܰܢܺܝ̈ܕܰܝܢ ܒܣܽܘܓܳܐܐ ܕܰܡܪܰܚܡܳܢܽܘܬܳܟ: ܕܢܰܘܕܶܐ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܕܪܶܚܡܰܬ݀ ܐ̱ܢܳܫܽܘܬܶܗ ܒܓܰܘ ܩܰܒܪܳܐ ܣܳܡܬܶܗ: ܘܝܰܡܺܝܢܶܗ ܚܰܝܠܬܳܢܺܝܬܳܐ ܡ̣ܶܢ ܡܰܘܬܳܐ ܦܪܰܩܬܶܗ. ܠܗ̇ܰܘ ܚܰܝܠܐܴ ܥܰܫܺܝܢܳܐ ܕܬܽܘܩܦܳܐ ܕܰܕܪܳܥܶܗ ܒܙܳܟܽܘܬܳܐ ܐܰܩܺܝܡܶܗ ܘܠܰܫܡܰܝܳܐ ܥܰܠܝܶܗ: ܘܫܽܘܠܛܳܢܶܗ ܡܥܰܠܝܳܐ ܡ̣ܶܢ ܝܰܡܺܝܢ ܐܰܒܽܘܗܝ ܐܰܘܬܒܶܗ ܘܰܥܬܺܝܕ ܕܢܺܐܬܶܐ ܠܚܰܪܬܳܐ ܒܫܽܘܒܚܳܐ ܕܪܰܒܽܘܬܶܗ: ܘܢܶܦܪܽܘܥ ܠܟܽܠ ܐ̱ܢܳܫ ܐܰܝܟ ܥܒ̇ܳܕ̈ܶܐ ܕܺܝܠܶܗ ܒܟܺܐܢܽܘܬܶܗ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܠܳܟ ܣܳܓܕܺܝܢܰܢ ܘܡܰܘܕܶܝܢܰܢ ܘܰܡܫܰܒܚܺܝܢܰܢ. ܘܰܒܩ̈ܳܠܐܷ ܡܰܠܝܰܝ ܪܘܳܙܳܐ ܬܶܫܒ̈ܚܳܬܳܐ ܐܰܝܠܶܝܢ ܕܡܶܬܬܚܺܝ̣̈ܒܳܢ ܠܰܫܒܺܝܚܽܘܬܳܟ ܐܳܘ ܝܰܠܕܳܐ ܣܓܺܝܕܳܐ ܡܩܰܪܒܺܝܢܰܢ: ܕܥܰܡܶܗ ܐܰܟܚܕܳܐ ܡܶܣܬܓܶܕ ܐܰܢ̱ܬ. ܘܥܰܡ ܪܽܘܚܳܐ ܩܰܕܺܝܫܳܐ ܡܶܬܬܰܘܕܶܐ ܐܰܢ̱ܬ ܘܡܶܬܗܰܝܡܰܢ: ܠܳܟ ܕܰܒܚܰܪܰܬ݀ ܙܰܒܢ̈ܶܐ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܕܰܢܚ̣ܶܬ. ܘܰܒܣܶܓܕܬܳܐ ܪܟܺܝܢܬܳܐ ܡ̣ܶܢ ܟܽܠܗܽܘܢ ܒܪ̈ܰܝܳܐ ܘܰܥܒܺܝ̣̈ܕܶܐ ܐܶܣܬܓܶܕܬ: ܫܡܰܝܳܐ ܡ̇ܰܢ ܒܡܰܠܐܱܟ̈ܶܐ ܘܪ̈ܰܒܰܝ ܡܰܠܐܱܟܷ̈ܐ ܥܰܡ ܓܽܘ̈ܕܶܐ ܡܢܰܒܪ̈ܫܳܬܳܐ ܘܬܶܐܓ̈ܡܶܐ ܕܫܰܠܗܶܒܺܝܬܳܐ ܣܶܓܕܬܳܐ ܒܕܶܚܠܬܳܐ ܡܩܰܪܒܳܐ ܠܳܟ: ܘܰܐܪܥܳܐ ܣܳܓܕܳܐ ܘܰܡܕܰܫܢܳܐ ܠܳܟ ܬܶܫܒ̈ܚܳܬܳܐ ܠܳܟ ܕܰܒܪܶܡܙܳܐ ܕܒܳܪܽܘܝܽܘܬܳܟ ܒܟܽܠ ܓܢܶܣ ܨܰܒܶܬܬ ܘܗܰܕܰܪܬܳܗ̇: ܡܰܕܢܚܳܐ ܣܳܓܕܳܐ ܠܳܟ ܒܢܰܗܺܝܪ̈ܶܐ ܡܰܦܪ̈ܓܰܝ ܒܨܶܡ̈ܚܶܐ: ܡܰܥܪܒܳܐ ܬܽܘܒ ܣܶܓܕܬܳܐ ܠܐܴ ܡܶܬܦܰܣܩܳܢܺܝܬܳܐ ܡܫܰܘܫܛܳܐ ܠܳܟ: ܥܰܠ ܕܦܰܪܨܽܘܦܳܟ ܒܰܙܩܺܝܦܽܘܬܳܟ ܐܰܗܦܶܟ̣ܬ ܠܩܽܘܒܠܳܗ̇ ܘܣܶܓܕ̈ܳܬܳܐ ܣܰܓܺܝ̈ܳܐܬܳܐ ܡܶܢܳܗ̇ ܐܶܬܩܰܪ̈ܰܒܝ ܠܳܟ: ܓܰܪܒܝܳܐ ܘܬܰܝܡܢܳܐ ܣܳܓ̈ܕܳܢ ܠܳܟ ܕܒܰܦܫܳܛܳܐ ܕܺܐܝܕܰܝ̈ܟ ܐܳܬܥܰܦܰܩܝ: ܘܣܶܓܕ̈ܳܬܳܐ ܬܡܺܝ̈ܗܳܬܳܐ ܡܶܢܗܶܝܢ ܠܳܟ ܐܶܬܩܰܪ̈ܰܒܝ. ܡܰܠܟ̈ܶܐ ܐܰܚܺܝ̣̈ܕܰܝ ܫܽܘܠܛܳܢܳܐ ܐܰܪܥܳܢܳܝܳܐ ܣܳܓܕܺܝܢ ܠܳܟ: ܒܗܳܝ ܕܫܽܘܠܛܳܢܳܟ ܠܥܳܠܰܡ ܩܰܝܳܡ: ܘܥܰܠ ܟܽܠ ܫܰܠܺܝܛ ܐܰܢ̱ܬ ܣܶܓ̈ܕܳܬܳܐ ܡܶܢܗܽܘܢ ܡܩܰܒܶܠ ܐܰܢ̱ܬ: ܥܰܬܺܝܪ̈ܶܐ ܘܪ̈ܰܒܰܝ ܒ̈ܳܬܶܐ ܣܳܓܕܺܝܢ ܠܳܟ ܕܒܶܝܬ ܓܰܙܳܟ ܠܐܴ ܚܳܣܰܪ ܡܶܛܽܠ ܕܥܰܬܺܝܪܰܐ ܗ̱̇ܘ: ܡܶܣܟ̈ܺܢܶܐ ܘܰܣܢܺܝ̈ܩܶܐ ܣܳܓܕܺܝܢ ܠܳܟ ܥܰܠ ܕܺܐܝܬܰܝܟ ܡܦܰܪܢܣܳܢܳܐ ܕܟܽܠ ܥܰܡ̈ܡܶܐ ܘܶܐܡܘ̈ܳܬܳܐ ܣܳܓܕܺܝܢ ܠܳܟ ܕܒܳܟ ܦܢ̣ܰܘ ܡ̣ܶܢ ܕܶܚܠܰܬ݀ ܦܬܰܟܪ̈ܶܐ ܘܠܳܟ ܝ̇ܳܐܶܐ ܣܶܓܕܬܳܐ ܒܪܽܘܚܳܐ ܘܒܰܫܪܳܪܳܐ: ܥܺܕܬܳܐ ܥܰܡ ܝܰܠܕ̈ܶܝܗ̇ ܣܳܓܕܳܐ ܠܳܟ ܕܡ̣ܶܢ ܣܶܓܕܰܬ݀ ܨܰܠܡ̈ܶܐ ܐܰܦܢܺܝܬܳܗ̇ ܣܓܶܕܘ ܠܳܟ ܢܒܺܝ̈ܶܐ ܒܪܽܘܚܳܐ ܕܰܩܢܽܘܡܳܟ ܫܰܡܠܺܝܬ ܐ̱ܪ̈ܳܙܶܐ ܕܡܶܠܰܝ̈ܗܽܘܢ ܚܰܝ̈ܳܬܳܐ. ܣܓܶܕܘ ܠܳܟ ܫܠܺܝ̈ܚܶܐ ܒܪܽܘܚܳܐ ܘܒܰܫܪܳܪܳܐ ܕܫ̣ܰܪܰܪܬ ܡܶܠܰܝ̈ܗܽܘܢ: ܘܚܰܬܶܡ̣ܬ ܟܳܪܽܘܙܽܘܬܗܽܘܢ: ܣܓܶܕܘ ܠܳܟ ܣܳܗ̈ܕܶܐ ܘܡܰܘܕ̈ܝܳܢܶܐ ܒܪܽܘܚܳܐ ܘܰܒܣܶܦܪܳܟ ܕܚܰܝ̈ܶܐ ܐܶܬܟܬܶܒܘ ܫܡܳܗܰܝ̈ܗܽܘܢ: ܘܳܐܦ ܚܢܰܢ ܒܰܝܬܳܝ̈ܶܐ ܘܰܒܢ̈ܰܝ ܝܳܪܬܽܘܬܳܐ ܕܺܝܠܳܟ ܒܪܽܘܚܳܐ ܘܒܰܫܪܳܪܳܐ ܣܳܓܕܺܝܢܰܢ ܠܳܟ: ܕܣܳܓܽܘ̈ܕܶܐ ܕܰܒܪܽܘܚܳܐ ܘܒܰܫܪܳܪܳܐ ܓܒ̣ܰܝܬ ܠܳܟ: ܣܶܓܕܬܳܐ ܡܩܰܪܒܺܝܢܰܢ ܠܳܟ ܒܝܰܘܡܳܐ ܗܳܢܳܐ ܩܰܕܺܝܫܳܐ ܕܥܺܐܕܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܠܳܟ ܝܰܠܕܳܐ ܣܓܺܝܕܳܐ ܕܡ̣ܶܢ ܐܰܒܳܐ: ܘܠܐܱܒܽܘܟ ܗ̇ܰܘ ܟܰܣܝܳܐ ܘܰܓܢܺܝܙܳܐ: ܘܠܐܴ ܡܶܬܕܰܪܟܳܢܳܐ ܕܫܰܠܚܳܟ ܠܘܳܬܰܢ ܘܰܠܪܽܘܚܟ ܩܰܕܺܝܫܳܐ ܗܳܫܳܐ܀

ܫܠܡ ܛܟܣܐ ܩܕܡܝܐ ܐܚܪܝܐ ܕܩܝܡܬܐ

 

ܛܟܣܐ ܕܚܕ ܒܫܒܐ ܬܪܝܢܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ

ܩܕܡܝܬ ܨܠܘܬܐ ܕܫܘܪܝܐ

 

ܫܰܟܶܢ ܠܰܢ ܡܳܪܝܳܐ ܐܠܰܗܳܐ ܕܰܒܠܶܒܳܐ ܫܰܦܝܳܐ ܘܪܽܘܚܳܐ ܡܰܟܺܝܟܬܳܐ ܘܝܺܕܰܥܬܳܐ ܡܫܰܡܠܳܝܬܳܐ ܕܰܒܟܽܠܙܒܰܢ ܬܩܰܪܶܒܝ ܠܳܟ ܕܳܫܢ̈ܶܐ ܦܰܐܝ̈ܳܐ ܕܫܽܘܒܚܳܐ ܘܬܰܘܕܺܝܬܳܐ. ܘܰܬܝܰܒܶܒܝ ܠܳܟ ܒܥܺܐܕܳܐ ܫܒܺܝܚܳܐ ܕܰܩܝܳܡܬܳܟ ܩܽܘ̈ܠܳܣܶܐ ܡܦܰܬܟ̈ܶܐ ܘܪܽܘܡܪ̈ܳܡܶܐ ܗܕܺܝܪ̈ܶܐ ܟܰܕ ܫܳܐܠܐܴ ܡܶܢܳܟ ܫܽܘܒܩܳܢܳܐ ܡܫܰܡܠܝܳܐ ܠܟܽܠܗܽܘܢ ܝܰܠܕ̈ܶܝܗ̇ ܘܬܰܣܶܩܝ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܚܰܕ ܟܝܳܢܳܐ ܫܒܺܝܚܳܐ ܘܠܐܴ ܡܶܬܡܰܠܠܳܢܳܐ: ܪܳܐܙܳܐ ܪܰܒܳܐ ܘܠܐܴ ܡܶܬܕܰܪܟܳܢܳܐ ܢܽܘܗܪܳܐ ܓܢܺܝܙܳܐ ܘܠܐܴ ܡܶܬܕܰܪܟܳܢܳܐ ܘܠܐܴ ܡܶܬܩܰܪܒܳܢܳܐ ܕܶܢܚܳܐ ܓܰܐܝܳܐ ܘܠܐܴ ܡܶܬܦܰܫܩܳܢܳܐ ܐܠܰܗܽܘܬܳܐ ܟܣܺܝܬܳܐ ܘܡܰܥܒܕܰܬ݀ ܚܰܝ̈ܶܐ: ܡܳܪܽܘܬܳܐ ܦܫܺܝܛܬܳܐ ܘܰܥܦܺܝܩܰܬ݀ ܠܟܽܠ ܗ̇ܳܝ ܕܰܠܥܶܠ ܡ̣ܶܢ ܟܽܠ ܐܺܝܬܶܝܗ̇ ܒܰܡܣܰܝܟܽܘܬܳܐ ܕܰܫܡܳܗ̈ܶܐ ܬܠܳܬܳܐ. ܐܰܒܳܐ ܡܰܢܗܪܳܢܳܐ ܕܒܶܪ̈ܝܳܬܳܐ: ܘܰܒܪܳܐ ܨܶܡܚܳܐ ܘܝܰܠܕܳܐ ܓܢܺܝܙܳܐ ܕܡ̣ܶܢ ܐܰܒܳܐ ܡܬܽܘܡܳܝܳܐ: ܘܪܽܘܚܳܐ ܩܰܕܺܝܫܳܐ ܙܰܠܓܳܐ ܕܟܽܠܳܗ̇ ܪܶܚܡܰܬ݀ ܐ̱ܢܳܫܽܘܬܳܐ. ܗ̇ܰܘ ܕܟܽܠ ܡܰܘܗܰܒܬܳܐ ܐܳܦ ܟܽܠ ܫܽܘܟܳܢܳܐ ܡܶܢܶܗ ܐܺܝܬܰܘܗܝ ܕܢܰܣܶܩ ܠܶܗ ܫܽܘܒܚܳܐ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܠܳܟ ܣܳܓܕܺܝܢܰܢ ܘܡܰܘܕܶܝܢܰܢ ܘܰܡܪܰܡܪܡܺܝܢܰܢ ܠܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝܬ ܘܥܰܠܺܝܬܳܢ ܠܪܰܘܡܳܐ: ܘܶܐܬܡܰܟ̣ܰܟܬ ܘܪܰܡܪܶܡܬܳܢ ܘܰܐܢ̱ܬ ܠܳܟ ܡܰܣܟ̣ܶܢܬ ܘܰܐܥܬܰܪܬܳܢ: ܘܰܒܓܰܘ ܟܰܪܣܳܐ ܕܰܒܬܽܘܠܬܳܐ ܫ̣ܪܰܝܬ ܘܶܐܬܒܛܶܢ̣ܬ ܘܒܰܪܶܟܬܳܢ: ܘܶܐܬܓܰܫܰܡ̣ܬ ܡ̣ܶܢ ܡܰܪܝܰܡ ܘܩܰܕܶܫܬܳܢ ܘܶܐܬܒܰܪܢܰܫ̣ܬ ܘܰܐܠܳܗܬܳܢ: ܘܶܐܬܺܝܠܶܕܬ ܘܰܐܘܠܶܕܬ ܠܰܢ ܪܽܘܚܳܢܳܐܺܝܬ: ܘܰܥܡ̣ܰܕܬ ܒܝܽܘܪܕܢܳܢ ܢܰܗܪܳܐ ܘܚܰܣܺܝܬ ܠܰܢ: ܘܨܳܡ̣ܬ ܚܠܳܦܰܝܢ ܒܕܰܒܪܳܐ ܘܬܰܪܣܺܝܬܳܢ: ܘܰܟܦ̣ܶܢܬ ܘܣܰܒܰܥܬܳܢ: ܘܶܐܬܢܰܣܺܝܬ ܡ̣ܶܢ ܣܳܛܳܢܳܐ ܘܚܰܪܰܪܬܳܢ ܘܰܪܟܶܒ̣ܬ ܥܰܠ ܥܺܝܠܐܴ ܫܺܝܠܐܴ ܡܫܰܠܚܳܐ ܘܙܰܝܰܚ̣ܬܳܢ ܘܰܐܝܟ ܚܰܝܳܒܳܐ ܐܶܬܕܰܒ̣ܰܪܬ ܠܒܶܝܬ ܕܺܝܢܳܐ ܘܩܰܪܶܒܬܳܢ. ܘܰܐܚܒ̣ܶܫܬ ܒܒܶܝܬ ܚܰܢܳܢ ܘܙܰܟܺܝܬܳܢ: ܘܶܐܬܬܕܺܝܢܬ ܐܰܝܟ ܥܳܒ̇ܶܕ ܒܺܝ̈ܫܳܬܳܐ ܘܚܰܪܰܪܬܳܢ: ܘܶܐܬܩܰܦ̣ܰܚܬ ܐܰܝܟ ܡܰܪܳܚܳܐ ܒܩܰܢܝܳܐ ܥܰܠ ܪܺܝܫܳܟ ܘܬܰܩܶܦܬܳܢ ܐܰܫܠܚܽܘܟ ܢܰܚܬܰܝ̈ܟ ܘܰܐܠܒܫܽܘܟ ܟܠܐܱܡܺܝܣ ܕܰܙܚܽܘܪܺܝܬܳܐ ܘܟܰܣܺܝܬܳܢ: ܘܰܛܥܶܡ̣ܬ ܚܰܠܐܴ ܘܰܡܪܳܪܳܐ ܘܶܐܬܟܰܠ̣ܰܠܬ ܒܰܟܠܺܝܠܐܴ ܕܟܽܘ̈ܒܶܐ ܘܟܰܢܶܟܬܳܢ ܘܡܺܝܬܬ ܡܶܛܽܠܳܬܰܢ ܘܶܐܬܬܣܺܝܡܬ ܒܓܰܘ ܩܰܒܪܳܐ ܘܰܐܚܺܝܬܳܢ: ܘܰܒܫܽܘܒܚܳܐ ܐܶܬܢܰܚܰܡܬ: ܘܥܽܘܫܢܳܐ ܐܠܰܒܶܫܬܳܢ: ܘܥܰܡܳܟ ܠܪܰܘܡܳܐ ܐܰܣܶܩ̣ܬܳܢ: ܘܫܰܡܠܺܝܬ ܠܰܢ ܒܪܽܘܚܳܟ ܩܰܕܺܝܫܳܐ ܘܗܰܕܰܪܬܳܢ: ܡ̇ܰܢ ܢܶܦܪܥܳܟ ܚܠܳܦ ܗܳܠܶܝܢ ܐܳܘ ܡܳܪܝܳܐ: ܡ̇ܰܢ ܣܳܦ̇ܶܩ ܕܢܰܘܕܶܐ ܠܳܟ ܐܳܘ ܛܳܒܳܐ: ܡ̇ܰܢ ܡܶܫܟܰܚ ܕܰܢܫܰܒܚܳܟ ܐܳܘ ܡܫܰܒܚܳܐ: ܡ̇ܰܢ ܡܰܕܪܶܟ ܕܰܢܩܰܠܣܳܟ ܐܳܘ ܡܳܪܶܐ ܡܳܪ̈ܰܘܳܬܳܐ ܐܰܝܢܳܐ ܦܽܘܡܳܐ ܡܰܘܕܶܐ ܠܳܟ ܬܗܺܝܪܳܐ: ܐܰܝܢܳܐ ܠܶܫܳܢܳܐ ܢܶܫܬܰܥܳܟ ܐܳܘ ܣܓܺܝܕܳܐ: ܐܰܝܢܳܐ ܡܰܕܥܳܐ ܢܶܕܥܳܟ ܐܳܘ ܡܥܰܠܝܳܐ: ܡܶܛܽܠ ܕܝܰܬܺܝܪ ܡ̣ܶܢ ܟܽܠ ܚܰܠܳܫܺܝܢܰܢ: ܬܫܰܒܚܳܟ ܚܠܳܦܰܝܢ ܟܰܪܣܳܐ ܙܗܺܝܬܳܐ ܕܰܛܥܶܢܬܳܟ: ܐܶܡܳܐ ܒܬܽܘܠܬܳܐ ܕܺܝܠܶܕܬܳܟ: ܝܽܘܪܕܢܳܢ ܢܰܗܪܳܐ ܕܰܣܘܰܚ ܠܳܟ: ܫܰܒܪ̈ܶܐ ܫܦܰܝ̈ܳܐ ܕܒܽܐܘܫܰܥ̈ܢܶܐ ܗܰܠܶܠܘ ܩܰܠܣܽܘܟ: ܪ̈ܰܚܡܶܐ ܕܢܰܓܕܽܘܟ ܠܒܶܝܬ ܕܺܝܢܳܐ ܚܠܳܦܰܝܢ: ܙܩܺܝܦܳܐ ܕܚܶܣܕܳܐ ܕܛܰܥܢܳܟ ܡܶܛܽܠܳܬܰܢ: ܓܳܓܽܘܠܬܳܐ ܥܰܠ ܪܰܘܡܳܐ ܪܳܡܳܐ ܡܶܛܽܠ ܦܽܘܪܩܳܢܰܢ: ܩܰܒܪܳܐ ܚܰܕܬܳܐ ܕܰܫ̣ܪܰܝܬ ܒܓܰܘܶܗ: ܩܰܕܺܝ̈ܫܶܐ ܕܶܐܬܢܰܚܰܡܘ ܒܰܩܝܳܡܬܳܟ: ܡܰܠܐܱܟ̈ܶܐ ܩܰܕܺܝ̈ܫܶܐ ܒܚܶܘܳܪ̈ܰܝܗܽܘܢ ܝܰܩܰܪܘ ܠܩܰܒܪܳܟ: ܬܰܠܡܺܝ̈ܕܳܬܳܐ ܕܰܪ̈ܗܶܛܝ ܒܒܶܣܡܳܢܰܝ̈ܗܶܝܢ ܠܘܰܥܕܳܟ: ܬܽܘܒ ܢܪܰܥܽܘܢܳܟ ܚܠܳܦܰܝܢ ܬܽܘܩ̈ܠܳܬܳܐ ܕܰܫܠܺܝ̈ܚܶܐ ܒܶܝܬ ܥܰܡ̈ܡܶܐ: ܘܰܢܒܺܝ̈ܶܐ ܒܰܪܕܺܝܦܽܘܬܗܽܘܢ ܕܡ̣ܶܢ ܥܰܡܳܐ ܥܩܺܝܪܳܐ: ܦܽܘܣܳܩ ܗܰܕܳܡܰܝ̈ܗܽܘܢ ܕܣܳܗ̈ܕܶܐ ܒܪ̈ܺܝܟܶܐ ܙܳܟܽܘܬܗܽܘܢ ܕܟܰܫܺܝܪ̈ܶܐ ܓܡܺܝܪܽܘܬܳܐ ܕܐ̱ܢܳܫ̈ܳܐ ܓܡܺܝܪ̈ܶܐ: ܐܺܝܢ ܡܳܪܝܳܐ ܐܳܦ ܚܢܰܢ ܗܳܫܳܐ ܒܳܥܶܝܢܰܢ ܡܶܢܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܐܰܝܟܰܢܳܐ ܕܬܶܫܬܰܚܠܰܦ ܩܰܠܺܝܠܐܴܝܬ ܠܘܳܬܰܢ: ܚܠܳܦ ܥܳܩ̈ܳܬܳܐ ܚܰܕ̈ܘܳܬܳܐ: ܚܠܳܦ ܩܰܫ̈ܝܳܬܳܐ ܕܠܺܝ̣̈ܠܳܬܳܐ: ܚܠܳܦ ܥܰܣ̈ܩܳܬܳܐ ܦܫܺܝ̈ܛܳܬܳܐ: ܚܠܳܦ ܪ̈ܓܺܝܙܳܬܳܐ ܒܗܺܝ̣̈ܠܳܬܳܐ: ܚܠܳܦ ܟܽܠܗܶܝܢ ܡܰܪ̈ܕܘܳܬܳܐ ܦܨܺܝ̈ܚܳܬܳܐ: ܚܠܳܦ ܒܺܝ̈ܫܳܬܳܐ ܛܳܒ̈ܳܬܐ: ܚܠܳܦ ܬܰܒ̈ܥܳܬܳܐ ܡܰܘܗ̈ܒܳܬܳܐ: ܚܠܳܦ ܒܽܘܚܳܢܳܐ ܫܽܘܒܩܳܢܳܐ: ܚܠܳܦ ܥܶܕܠܳܝܳܐ ܥܽܘܕܪܳܢܳܐ: ܚܠܳܦ ܩܽܘܛܪܳܓܳܐ ܩܽܘܠܳܣܳܐ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܚܰܕܬܳܐ ܘܬܰܘܕܺܝܬܳܐ ܒܰܦܨܺܝܚܽܘܬܳܐ: ܘܰܢܗܰܕܪܳܟ ܒܰܓܡܺܝܪܽܘܬܳܐ: ܘܰܢܗܰܠܠܳܟ ܒܰܬܟܺܝܠܽܘܬܳܐ: ܘܢܶܫܬܘܶܐ ܠܚܰܪܬܳܐ ܛܳܒܬܳܐ ܘܰܠܡܰܦܩܳܢܳܐ ܕܫܰܝܢܳܐ: ܘܠܰܩܝܳܡܬܳܐ ܕܙܰܕܺܝܩܽܘܬܳܐ ܒܛܰܝܒܽܘܬܳܟ ܡܫܰܒܰܚܬܳܐ: ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܦܺܝܪܡܳܐ ܡܚܰܣܝܳܢܳܐ ܕܣܩܳܘܽܗܝ ܡܺܝ̈ܬܶܐ ܘܶܐܬܢܰܚܰܡܘ ܒܶܗ: ܘܡܰܘܬܳܐ ܒܶܗ ܐܶܬܒܰܛܰܠ: ܘܰܫܝܽܘܠ ܕܳܘܺܝܬܳܐ ܒܶܗ ܐܶܣܬܰܚܦܰܬ݀ ܘܡܺܝ̈ܬܶܐ ܩܒܺܝܪ̈ܶܐ ܒܶܗ ܐܶܬܢܰܚܰܡܘ. ܐܰܢ̱ܬ ܡܳܪܝ ܗܳܫܳܐ ܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܰܒܥܶܕܳܢܳܐ ܗܳܢܳܐ ܡܶܬܩܰܪܰܒ ܠܳܟ: ܘܫܰܟܶܢ ܒܶܗ ܫܰܝܢܳܐ ܘܰܫܠܳܡܳܐ ܠܡܰܪܥܺܝܬܳܟ: ܘܚܽܘܒܳܐ ܘܰܐܘܝܽܘܬܳܐ ܠܰܓܙܳܪܳܟ: ܐܰܝܟܰܢܳܐ ܕܬܰܣܶܩܝ ܠܳܟ ܫܽܘܒܚܳܐ ܒܦܽܘܡܳܐ ܕܝܰܠܕ̈ܶܝܗ̇ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܚܘܬܡܐ

ܗܘܺܝ ܡܳܪܝܳܐ ܐܠܰܗܳܐ ܕܺܝܠܰܢ ܡܳܪܰܢ ܝܶܫܽܘܥ ܡܫܺܝܚܳܐ ܡܦܺܝܣܳܢܳܐ ܘܒܰܥܳܝܳܐ ܚܠܳܦܰܝܢ ܠܝܳܠܽܘܕܳܟ ܕܠܐܴ ܢܰܗܦܶܟ ܐܰܦܰܘ̈ܗܝ ܡܶܢܰܢ: ܐܶܠܐܴ ܐܰܪܟܶܢ ܠܰܢ ܐܶܕܢܳܟ ܘܰܫܡܰܥ ܠܩܳܠܐܴ ܕܒܳܥܽܘܬܰܢ ܩܰܒܶܠ ܨܠܰܘ̈ܳܬܰܢ: ܘܶܐܬܪܰܥܳܐ ܒܬܰܟܫ̈ܦܳܬܰܢ ܘܰܫܒܽܘܩ ܚܰܘ̈ܒܰܝܢ ܘܚܰܣܳܐ ܚܛܳܗܰܝ̈ܢ ܘܰܕܥܰܢܺܝ̈ܕܰܝܢ ܘܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܒܥܺܐܕܳܐ ܫܒܺܝܚܳܐ ܕܰܩܝܳܡܬܳܟ ܡܳܪܰܢ܀

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܘܪܳܚܶܡ ܐ̱ܢܳܫܳܐ ܕܨܶܒܝܳܢܶܗ ܠܡܰܘܬܳܐ ܐܰܝܬܝܶܗ: ܘܚܽܘܒܶܗ ܣܰܓܺܝܳܐܐ ܠܩܰܒܪܳܐ ܐܰܥܠܶܗ ܡܥܰܠܝܳܐ ܕܡ̣ܶܢ ܟܽܠ ܡܥܰܠܰܝ ܘܰܓܢܺܝܙ ܒܰܟܝܳܢܶܗ: ܥܰܬܺܝܪܳܐ ܕܟܽܠ ܥܽܘܬܪ̈ܺܝܢ ܡܶܬܕܰܠܶܝܢ ܡ̣ܶܢ ܓܰܙܶܗ: ܘܰܠܟܽܠ ܓܰܒܺܝ̣̈ܢ ܡܦܰܠܶܓ ܣܺܝ̣̈ܡܳܬܶܗ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܐܰܢ̱ܬ ܗܳܟܺܝܠ ܡܫܺܝܚܳܐ ܐܠܰܗܳܐ ܕܺܝܠܰܢ: ܒܝܰܕ ܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܰܒܪܶܚܡܰܬ݀ ܐ̱ܢܳܫܽܘܬܳܟ ܐܠܰܗܳܝܬܳܐ: ܠܥܺܕܬܳܟ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ ܓܒ̣ܰܝܬ ܡ̣ܶܢ ܥܰܡ̈ܡܶܐ ܟܽܠܗܽܘܢ. ܘܒܰܕܡܳܟ  ܩܰܕܺܝܫܳܐ ܙܒܰܢܬܳܗ̇ ܘܟܰܠܬܳܐ ܡܫܰܒܰܚܬܳܐ ܚܰܘܺܝܬܳܗ̇: ܘܰܒܢܰܝ̈ܳܐ ܕܺܝܠܳܟ ܘܝܳܪܬܽܘܬܳܟ ܥܒ̣ܰܕܬܳܢ: ܘܚܰܪܰܪܬܳܢ: ܘܰܦܪܰܩܬܳܢ ܡ̣ܶܢ ܫܽܘܥܒܳܕܳܐ ܕܡܰܘܬܳܐ ܘܣܳܛܳܢܳܐ ܘܰܒܢܽܘܗܪܳܐ ܦܰܐܝܳܐ ܕܺܝܕܰܥܬܳܟ ܐܰܢܗܰܪܬܳܢ. ܘܫܰܟܶܢ ܠܰܢ ܡܳܪܝܳܐ ܐܠܰܗܳܐ ܘܰܠܟܽܠܗܽܘܢ ܒܢܰܝ̈ܳܐ ܕܺܝܠܳܟ: ܘܗܰܒܠܰܢ ܕܦܽܘܩܕ̈ܳܢܰܝܟ ܐܠܰܗܳܝ̈ܶܐ ܢܶܛܰܪ ܘܢܶܬܗܰܓܶܐ ܒܗܽܘܢ ܘܰܒܢܳܡܽܘ̈ܣܰܝܟ ܢܶܪܕܶܐ ܐܺܝܡܳܡܳܐ ܘܠܺܠܝܳܐ ܘܰܒܩܰܕܺܝܫܽܘܬܳܐ ܕܡܶܢܳܟ ܢܶܬܩܰܕܰܫ ܘܢܶܫܬܰܡܠܐܷ ܘܢܶܚܕܶܐ ܒܳܟ: ܘܠܰܣܒܰܪܬܳܐ ܕܺܝܠܳܟ ܡܰܐܚܝܳܢܺܝܬܳܐ ܢܰܟܪܶܙ: ܘܠܐܷܘܢܓܶܠܝܽܘܢ ܕܺܝܠܳܟ ܒܰܝܢܳܬ ܥܰܡ̈ܡܶܐ ܘܶܐܡܘ̈ܳܬܳܐ ܢܶܛܥܰܢ: ܘܠܐܘܪܚܳܐ ܗ̇ܳܝ ܕܰܕܪܰܫ̣ܘ ܠܰܢ ܫܠܺܝ̈ܚܶܐ ܩܰܕܺܝ̈ܫܶܐ. ܘܰܢܒܺܝ̈ܶܐ ܡܒܰܕ̈ܩܳܢܶܐ ܢܶܩܰܦ ܘܒܳܗ̇ ܢܶܪܕܶܐ ܘܰܢܗܰܠܶܟ ܒܥܶܩ̈ܒܳܬܳܐ ܕܺܝܠܗܽܘܢ ܬܪ̈ܺܝܨܳܬܳܐ. ܘܰܒܨܶܒܝܳܢܳܐ ܕܰܐܠܳܗܽܘܬܳܟ ܢܶܬܓܡ̣ܰܪܘ ܟܽܠܰܢ ܘܒܰܫܒܺܝܚܽܘܬܳܐ ܕܫܰܟ̣ܶܢܬ ܠܗܽܘܢ ܒܳܗ̇ ܢܶܬܟܰܠܰܠ: ܘܰܠܥܰܡܳܐ ܕܺܝܠܳܟ ܡܗܰܝܡܢܳܐ ܐ̱ܪܳܙܳܐ ܕܦܽܘܩܕܳܢܰܝ̈ܟ ܢܶܬܶܠ. ܘܡܶܠܬܳܐ ܕܚܰܝ̈ܶܐ ܘܰܕܚܰܕ̈ܘܳܬܳܐ ܠܗܽܘܢ ܢܣܰܒܰܪ. ܘܰܒܢܽܘܗܪܳܐ ܕܺܝܠܳܟ ܫܒܺܝܚܳܐ ܢܶܬܗܰܪ: ܘܡ̣ܶܢ ܡܰܒܽܘܥܳܟ ܪܽܘܚܳܢܳܝܳܐ ܫܦܺܝܥܳܐܺܝܬ ܢܶܬܦܰܛܰܡ ܘܰܒܫܶܩܝܳܟ ܕܚܰܝ̈ܶܐ ܓܡܺܝܪܳܐܺܝܬ ܢܶܬܒܰܣܰܡ: ܘܟܽܠܝܽܘܡ ܩܺܝ̈ܢܳܬܳܐ ܚܰܠܝ̈ܳܬܳܐ ܘܬܶܫܒ̈ܚܳܬܳܐ ܦܰܐܝ̈ܳܬܳܐ ܒܥܺܐܕܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܩܰܒܪܳܐ ܠܳܟ ܢܰܣܶܩ: ܘܰܒܟܽܠܥܶܕܳܢ ܬܰܘܕ̈ܝܳܬܳܐ ܣܒܺܝ̣̈ܣܳܬܳܐ ܘܰܐܡܺܝ̣̈ܢܳܬܳܐ ܠܳܟ ܢܩܰܪܶܒ. ܘܝܰܬܺܝܪܳܐܺܝܬ ܠܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ ܥܰܡ ܣܳܥܽܘܪܽܘܬ ܬܶܕܡܪ̈ܳܬܳܟ ܫܒܺܝ̈ܚܳܬܳܐ ܘܰܬܡܺܝ̈ܗܳܬܳܟ ܘܰܫܠܳܡܳܐ ܫܰܟܶܢ ܠܡܰܪܥܺܝܬܳܟ: ܘܫܰܝܢܳܐ ܠܥܺܕܬܳܟ ܕܰܡܣܰܟܝܳܐ ܠܰܚܢܳܢܳܟ ܘܡܰܘܕܝܳܐ ܒܰܙܩܺܝܦܽܘܬܳܟ ܘܰܡܗܰܝܡܢܳܐ ܒܰܐܠܳܗܽܘܬܳܟ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܚ̣ܙܰܩܘ ܒܗܰܝܡܳܢܽܘܬܳܐ ܕܰܫܪܳܪܳܐ: ܫܰܟܶܢ ܒܽܘܣܳܡܳܐ ܘܰܦܨܺܝܚܽܘܬܳܐ ܕܡܶܢ̣ܰܢ ܓܰܒܳܐ ܝܰܡܺܝܢܳܝܳܐ ܒܝܰܘܡܳܐ ܕܡܶܐܬܺܝܬܳܟ ܕܡ̣ܶܢ ܫܡܰܝܳܐ: ܘܰܚܢܰܢ ܘܟܽܠܗܽܘܢ ܝܰܠܕ̈ܶܝܗ̇ ܕܥܺܕܬܳܐ ܡܗܰܝܡܰܢܬܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܕܶܐܬܳܐ ܠܘܳܬܰܢ ܒܨܶܒܝܳܢܶܗ ܟܰܕ ܠܐܴ ܒܥܰܝܢܳܝܗܝ ܕܠܰܢ ܢܶܥܒܶܕ ܠܐܴ ܡܳܝܽܘ̈ܬܶܐ ܒܛܰܝܒܽܘܬܶܗ: ܘܰܒܝܰܕ ܚܰܫ̈ܶܐ ܕܰܩܢܽܘܡܶܗ ܣܰܕܶܩ ܠܐܷܣܛܳܪܳܐ ܕܚܰܘ̈ܒܳܬܰܢ ܘܠܐܴ ܡܳܝܽܘܬܽܘܬܳܐ ܫܰܟܶܢ ܠܓܶܢܣܰܢ ܡܳܝܽܘܬܳܐ ܒܰܩܝܳܡܬܶܗ ܘܫܰܟܶܢ ܠܰܢ ܚܰܕܽܘܬܳܐ ܘܰܪܘܳܙܳܐ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܒܢܽܘܚܳܡܶܗ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܐܠܰܗܳܐ ܗ̇ܰܘ ܒܳܪܽܘܝܳܐ ܘܥܳܒܽܘܕܳܐ ܕܟܽܠ ܗ̇ܰܘ ܕܰܩܢܶܐ ܐܰܢ̱ܬ ܚܰܝܠܐܴ ܘܓܰܢ̱ܒܳܪܽܘܬܳܐ: ܗ̇ܰܘ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܒܚܽܘܒܳܟ ܠܘܳܬ ܚܰܫܳܐ ܘܡܰܘܬܳܐ ܘܰܨܠܺܝܒܳܐ ܒܨܶܒܝܳܢܳܟ ܐܶܬܰܝܬ. ܘܡ̣ܶܢ ܥܰܡܳܐ ܠܺܝܛܳܐ ܕܝܽܘ̈ܕܳܝܶܐ ܨܰܥܪܳܐ ܘܒܶܙܚܳܐ ܘܡܽܘܝܳܩܳܐ ܣܰܝܒܰܪܬ ܘܟܰܕ ܐܺܝܬܰܝܟ ܕܰܝ̇ܳܢܳܐ ܕܕܰܝ̈ܳܢܶܐ ܩܕܳܡ ܦܺܝܠܰܛܳܘܣ ܐܺܝܓܡܽܘܢܳܐ ܩܳܡ̣ܬ: ܘܡ̣ܶܢ ܩܽܘܠܳܥܳܐ ܒܕܰܝܪܳܐ ܐܰܝܟ ܥܳܒܶܕ ܒܺܝ̈ܫܳܬܳܐ ܘܚܰܝܳܒܳܐ ܐܶܫܬܰܐܠܬ. ܘܰܐܝܟ ܬܰܚܽܘܒܳܐ ܘܫܺܝܛܳܐ ܠܒܶܝܬ ܕܺܝܢܳܐ ܐܶܫܬܰܠܰܡ̣ܬ: ܘܟܰܕ ܥܰܠ ܚܰܨܳܐ ܕܰܟܪ̈ܽܘܒܶܐ ܒܕܶܚܠܐܴ ܪܰܒܳܐ ܒܰܡܪ̈ܰܘܡܶܐ ܡܶܙܕܰܝܰܚ ܐܰܢ̱ܬ: ܥܰܠ ܨܠܺܝܒܳܐ ܕܚܶܣܕܳܐ ܒܨܶܒܝܳܢܳܟ ܥܠܰܘܗܝ ܐܶܬܬܠܺܝܬ: ܘܟܰܕ ܥܰܪܛܶܠܐܴܝܬ ܒܰܙܩܺܝܦܳܐ ܐܶܬܩܒ̣ܰܥܬ ܘܰܠܫܶܡܫܳܐ ܒܰܐܬܪܶܗ ܐܶܫܟ̣ܰܚܬ: ܘܰܠܟܰܘܟ̈ܒܶܐ ܡ̣ܶܢ ܣܶܕܪ̈ܰܝܗܽܘܢ ܐܰܦܶܠ̣ܬ: ܘܰܠܣܰܗܪܳܐ ܓܰܘܢܳܐ ܕܕܳܡܶܐ ܝܰܗ̣ܒܬ: ܘܟܰܕ ܒܰܦܫܳܛܳܐ ܕܺܐܝܕܰܝ̈ܟ ܠܐܴܐܰܪ ܕܶܐܣܬܰܝܰܒ ܩܰܕܶܫ̣ܬ: ܘܒܰܩܥܳܬܳܟ ܥܰܙܺܝܙܬܳܐ ܐܰܦ̈ܰܝ ܬܰܪܥܳܐ ܕܗܰܝܟܠܐܴ ܣܰܕܶܩ̣ܬ: ܘܠܐܱܪܥܳܐ ܐܰܪܥܶܠ̣ܬ: ܘܫܽܘ̈ܥܶܐ ܨܰܪܺܝܬ: ܘܩܰܒܪ̈ܶܐ ܦܰܬܰܚ̣ܬ. ܘܰܒܡܰܥܠܬܳܟ ܕܠܰܫܝܽܘܠ ܠܡܰܘܬܳܐ ܘܣܳܛܳܢܳܐ ܩܰܛܶܠ̣ܬ: ܘܰܠܡܺܝ̈ܬܶܐ ܕܰܒܗܳܡܳܢ ܣܰܒܪܳܐ ܘܚܰܕܽܘܬܳܐ ܘܚܰܝ̈ܶܐ ܘܠܐܴ ܡܶܬܚܰܒܠܳܢܽܘܬܳܐ ܐܰܟ̣ܪܶܙܬ: ܘܠܐܱܣܺܝܪ̈ܶܐ ܕܒܰܫܝܽܘܠ ܫ̣ܪܰܝܬ: ܘܠܰܚܒܺܝ̣̈ܫܶܐ ܕܰܒܓܽܘܒܳܐ ܬܰܚܬܳܝܳܐ ܕܗܳܡܳܢ ܥܓܺܝܢܺܝܢ ܗ̣ܘܰܘ ܐܰܦܶܩ̣ܬ. ܘܨܰܘܪ̈ܰܝܗܽܘܢ ܕܰܐܝܠܶܝܢ ܕܰܒܩܰܒܪܳܐ ܡ̣ܶܢ ܢܺܝܪܶܗ ܕܒܺܝܫܳܐ ܡܳܪܽܘܕܳܐ ܚ̣ܰܪܰܪܬ ܘܦܰܨܺܝܬ: ܘܚܰܝ̈ܶܐ ܚܰܕ̈ܬܶܐ ܠܰܒܪܺܝܬܳܐ ܟܽܠܳܗ̇ ܫܰܟܶܢ̣ܬ: ܘܫܰܝܢܳܐ ܘܰܫܠܳܡܳܐ ܘܪܶܚܡܰܬ݀ ܐ̱ܢܳܫܽܘܬܳܐ ܠܟܽܠܶܗ ܥܳܠܡܳܐ ܡܠ̣ܰܝܬ: ܘܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܣܒܰܪܬܳܐ ܕܚܰܝ̈ܶܐ ܘܰܕܦܽܘܪܩܳܢܳܐ ܕܬܶܬܟܪܶܙܝ ܒܺܐܝܕܰܝ̈ܗܽܘܢ ܦܰܩ̣ܶܕܬ: ܕܩܳܡ ܐܠܰܗܳܐ ܡ̣ܶܢ ܩܰܒܪܳܐ ܘܰܒܥܶܠܕ̈ܒܳܒܰܘܗܝ ܐܶܬܒܰܕܰܪܘ ܒܟܽܠܶܗ ܥܳܠܡܳܐ ܣܰܒܰܪܘ. ܘܒܰܕܓܽܘܢ ܡܦܺܝܣܺܝܢܰܢ ܠܛܰܝܒܽܘܬܳܟ ܡܳܪܝܳܐ ܡܪܰܚܡܳܢܳܐ: ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܦܳܪܽܘܩܳܝܬܳܐ ܘܡܰܥܒܕܰܬ݀ ܚܰܝ̈ܶܐ ܕܬܶܥܒܶܕ ܠܰܢ ܠܐܴ ܡܳܝܽܘ̈ܬܶܐ ܘܠܐܴ ܡܶܬܚܰܒܠܳܢ̈ܶܐ: ܘܰܬܚܰܪܰܪ ܠܰܢ ܡ̣ܶܢ ܟܽܠܗܽܘܢ ܚܰܫ̈ܶܐ ܡܨܰܥܪ̈ܶܐ ܘܰܢܕܺܝ̈ܕܶܐ ܘܰܒܚܰܝܠܶܗ ܡܰܐܚܝܳܢܳܐ ܙܰܝܶܢ ܠܰܢ ܕܢܶܬܡܰܨܶܐ ܕܰܢܩܽܘܡ ܠܽܘܩܒܰܠ ܚܰܫ̈ܶܐ ܒܺܝ̈ܫܶܐ: ܘܒܳܟ ܢܶܙܟܶܐ ܠܐܴܟܶܠܩܰܪܨܳܐ ܘܰܠܟܽܠܶܗ ܚܰܝܠܐܴ ܕܺܝܠܶܗ ܕܕܰܠܩܽܘܒܠܐܴ. ܘܟܽܠܰܢ ܢܶܫܬܘܶܐ ܠܚܰܪܬܳܐ ܛܳܒܬܳܐ ܘܰܠܡܰܦܩܳܢܳܐ ܡܫܰܝܢܳܐ ܕܢܶܐܪܽܘܥ ܡܶܐܬܺܝܬܳܟ ܗ̇ܳܝ ܕܬܰܪܬܶܝܢ ܒܚܰܕܽܘܬܳܐ: ܘܰܫܒܽܘܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܚܰܣܳܐ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܥܢ̣ܰܕܘ ܒܳܟ ܒܰܬܪܺܝܨܽܘܬ ܫܽܘܒܚܳܐ: ܘܰܐܢܺܝܚ ܐܶܢܽܘܢ ܒܰܐܘ̈ܘܳܢܶܐ ܛܽܘܒܬܳܢ̈ܶܐ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܐܰܫܪܳܐ ܡܳܪܝ ܫܰܝܢܳܟ ܒܥܺܕܬܳܐ ܕܺܝܠܳܟ ܩܰܕܺܝܫܬܳܐ: ܘܰܫܠܳܡܳܟ ܒܟܽܠܳܗ̇ ܡܶܬܥܰܡܪܳܢܺܝܬܳܐ ܘܢܰܛܰܪ ܝܰܠܕ̈ܶܝܗ̇ ܒܚܰܝܠܐܴ ܕܰܨܠܺܝܒܳܟ ܘܦܰܬܳܐ ܣܳܚܪ̈ܳܬܶܗ ܘܰܐܘܪܶܒ ܫܡܳܗ̇: ܫܰܪܪܰ ܛܽܘܢ̈ܒܶܝܗ̇ ܘܩܰܝܶܡ ܣܶܟܶܝ̈ܗ̇ ܘܡܰܟܶܟ ܠܰܒܥܶܠܕ̈ܒܳܒܶܝܗ̇ ܩܕܳܡܶܝܗ̇: ܘܰܣܬܽܘܪ ܠܪܰܘܡܳܐ ܕܡܶܬܥܰܫܰܢ ܥܠܶܝܗ̇ ܘܰܡܠܺܝܝܳܗ̇ ܫܰܝܢܳܐ ܘܰܫܠܳܡܳܐ ܘܚܽܘܒܳܐ ܟܰܗܺܝܢܳܐ: ܕܬܰܘܕܶܐ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܰܬܠܺܝܬܳܝܽܘܬܳܐ ܣܓܺܝܕܬܳܐ ܕܠܐܴ ܡܶܬܒܰܨܝܳܢܺܝܬܳܐ ܡ̣ܶܢ ܕܳܪ̈ܽܘܫܶܐ: ܠܰܚܕܳܐ ܐܠܰܗܽܘܬܳܐ ܡܪܰܝܰܡܬܳܐ ܕܠܐܴ ܡܶܬܕܰܪܫܳܐ ܡ̣ܶܢ ܚܰܟܺܝ̣̈ܡܶܐ ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܪ̈ܳܡܶܝܢ ܡ̣ܶܢ ܝܺܕܰܥܬܳܐ ܕܰܒܢܰܝ̈ܢܳܫܳܐ: ܐܺܝܬܝܳܐ ܡܬܽܘܡܳܝܳܐ ܕܙܳܝܥܺܝܢ ܟܽܠܗܽܘܢ ܗܰܘ̈ܢܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܡ̣ܶܢ ܐܺܝܬܽܘܬܶܗ ܡܳܪܝܳܐ ܡܪܰܝܡܳܐ ܕܰܡܠܶܝܢ ܫܡܰܝܰܐ ܘܰܐܪܥܳܐ ܡ̣ܶܢ ܬܶܫܒܽܘܚܬܶܗ: ܕܠܶܗ ܡܶܬܬܚܺܝܒܳܐ ܒܰܠܚܽܘܕܰܘܗܝ ܣܶܓܕܬܳܐ ܡ̣ܶܢ ܥܶܠܳܝ̈ܶܐ ܘܬܰܚܬܳܝ̈ܶܐ ܕܰܒܪܳܬ݀ ܝܰܡܺܝܢܶܗ: ܡܰܠܐܱܟ̈ܶܐ ܘܰܒܢܰܝ̈ܢܳܫܳܐ ܫܳܘ̈ܝܰܝ ܕܶܚܠܬܳܐ ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܠܰܡܕܰܒܪܳܢܽܘܬܳܐ ܕܺܝܠܳܟ ܦܳܪܽܘܩܳܝܬܳܐ ܥܳܗܕܺܝܢܰܢ ܗ̇ܳܝ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܒܡܰܕܥܰܢ ܚܰܠܳܫܳܐ ܢܳܣܒܺܝܢܰܢ: ܘܰܒܚܰܫܳܐ ܕܺܝܠܳܟ ܡܶܫܬܰܒܗܪܺܝܢܰܢ ܘܠܰܨܠܺܝܒܳܟ ܚܰܝܳܐ ܣܳܓܕܺܝܢܰܢ ܘܰܡܝܰܩܪܺܝܢܰܢ: ܘܒܰܩܝܳܡܬܳܟ ܡܰܠܝܰܬ݀ ܬܶܗܪܳܐ ܚܳܕܶܝܢܰܢ ܘܪܳܘܙܺܝܢܰܢ ܟܰܕ ܠܐܴ ܡܶܬܦܰܠܓܺܝܢܰܢ ܘܰܒܣܽܘܠܳܩܳܟ ܡܥܰܠܝܳܐ ܕܡ̣ܶܢ ܐܰܪܥܳܐ ܠܰܫܡܰܝܳܐ ܚܳܕܶܝܢܰܢ ܘܕܳܝܨܺܝܢܰܢ: ܘܰܒܡܰܘܬܒܳܟ ܕܡ̣ܶܢ ܝܰܡܺܝܢ ܐܰܒܽܘܟ ܬܳܗܪܺܝܢܰܢ ܘܡܶܬܕܰܡܪܺܝܢܰܢ ܘܰܠܡܶܐܬܺܝܬܳܟ ܬܪܰܝܳܢܺܝܬܳܐ ܡܣܰܟܶܝܢܰܢ: ܗ̇ܳܝ ܕܒܳܗ̇ ܠܥܰܡܳܐ ܕܰܐܪܓܶܙ ܠܛܰܝܒܽܘܬܳܟ ܒܟܺܐܢܽܘܬܳܐ ܘܒܰܬܪܺܝܨܽܘܬܳܐ ܦܳܪܰܥ ܐܰܢ̱ܬ ܘܥܰܠܗܳܕܶܐ ܡܶܬܟܰܫܦܺܝܢ ܠܳܟ ܐܳܘ ܡܶܠܬܳܐ ܐܠܰܗܳܐ ܠܐܴ ܬܶܟܦܽܘܪ ܒܰܢ ܒܝܰܘܡܳܟ ܪܰܒܳܐ ܕܠܐܴ ܟܦ̣ܰܪܢܰܢ ܒܚܰܫ̈ܶܐ ܝܰܩܺܝܪ̈ܶܐ ܕܰܙܩܺܝܦܽܘܬܳܟ: ܠܰܘ ܓܶܝܪ ܬܪܶܝܢ ܟܝ̈ܳܢܶܐ ܐܰܘ ܬܪܶܝܢ ܩܢܽܘ̈ܡܶܐ ܡܰܘܕܶܝܢܰܢ ܠܳܟ: ܐܰܘ ܬܰܪܬܶܝܢ ܡܰܥܒܕܳܢ̈ܘܳܬܳܐ ܡܳܢܶܝܢܰܢ ܒܳܟ. ܘܠܐܴ ܝܳܕܥܺܝܢܰܢ ܦܰܓܪܳܐ ܕܠܐܴ ܐܠܰܗܳܐ: ܘܳܐܦܠܐܴ ܦܰܓܪܳܐ ܕܠܐܴ ܐܠܰܗܳܐ: ܘܳܐܦܠܐܴ ܦܰܓܪܳܐ ܕܠܐܴ ܡ̣ܶܢ ܒܬܽܘܠܬܳܐ: ܘܠܐܴ ܝܳܗܒܺܝܢܰܢ ܬܡܺܝ̈ܗܳܬܳܐ ܠܚܰܕ ܘܡܳܐܟ̈ܳܬܳܐ ܠܐܱܚܪܺܢܳܐ. ܘܠܐܴ ܐܳܡܪܺܝܢܰܢ ܕܶܐܬܓܒܶܠ ܦܰܓܪܳܐ ܘܗܳܝܕܶܝܢ ܐܰܓܢܰܬ݀ ܒܶܗ ܐܠܰܗܽܘܬܳܐ ܒܳܬܰܪ ܡܶܬܚܳܐ ܕܰܫܢܰܝ̈ܳܐ ܣܰܓܺܝ̈ܳܐܬܳܐ ܫܪܳܬ݀ ܥܠܰܘܗܝ ܪܽܘܚܳܐ ܕܩܽܘܕܫܳܐ ܕܰܟܦ̣ܰܪ ܘܶܐܡ̣ܰܪ ܢܶܣܛܽܘܪ ܪܰܫܺܝܥܳܐ ܠܺܝܛܳܐ. ܘܠܰܘ ܒܰܪܝܰܐ ܗ̱̇ܘ ܒܰܐܠܳܗܽܘܬܶܗ ܐܰܝܟ ܕܶܐܡ̣ܰܪ ܐܰܪܺܝܳܘܣ ܘܰܕܒܶܝܬ ܡܰܐܢܺܝ ܘܒܰܪܕܰܝܨܳܢ ܠܺܝ̈ܛܶܐ ܘܡܰܚܪ̈ܡܶܐ: ܘܠܰܘ ܒܕܰܓܳܠܽܘܬܳܐ ܕܕܽܘܡܝܳܐ ܦܰܓܪܳܐ ܗ̇ܳܘܶܐ ܗ̣ܘܳܐ: ܐܰܝܟ ܙܺܐܦܶܗ ܘܳܟܦܽܘܪܝܶܗ ܕܡܰܪܩܺܝܰܢܳܘܣ ܦܰܩܪܳܐ ܘܓܽܘܡܕܳܢܳܐ. ܘܠܰܘ ܡܶܫܬܰܚܠܳܦܽܘ ܐܶܫܬܰܚܠܰܦ ܐܰܝܟ ܛܳܥܝܽܘܬܳܐ ܕܽܐܘܛܽܘܟܰܐ ܡܰܚܪܡܳܐ: ܘܠܰܘ ܐܰܝܟ ܕܒܰܣܺܝܠܽܘܢܳܐ ܛܡܺܝܡܳܐ ܥܒ̣ܰܪ ܘܶܐܬܳܐ ܠܝܰܠܕܳܐ ܐܰܝܟ ܫܳܢܝܽܘܬܳܐ ܕܺܝܠܶܗ ܕܝܽܘܠܝܰܢܐܶ ܡܰܚܪܡܳܐ ܘܕܰܐܠܺܝܩܰܪܢܣܽܘܣ ܘܠܐܴ ܣܳܟ ܡܦܰܠܓܺܝܢܰܢ ܠܶܗ ܠܰܬܪܶܝܢ ܠܗ̇ܰܘ ܠܐܴ ܡܶܬܦܰܠܓܳܢܳܐ ܠܰܬܪܶܝܢ ܘܠܐܴ ܐܳܡܪܺܝܢܰܢ ܕܚܰܕ ܐܶܬܺܝܠܶܕ ܘܰܐ̱ܚܪܺܢܳܐ ܠܐܴ. ܘܠܐܴ ܡܰܘܕܶܝܢܰܢ ܠܶܗ ܬܪܶܝܢ ܐܺܝܬܝ̈ܳܝܶܐ ܚܰܕ ܛܳܒܳܐ ܘܚܰܕ ܒܺܝܫܳܐ ܐܰܝܟ ܕܶܐܡ̣ܰܪ ܠܺܝܛܳܐ ܐܰܪܺܝܳܘܣ ܕܡܺܝܬ ܒܰܓܙܳܪ ܕܺܝܢܳܐ ܕܫܳܘܶܐ ܗ̣ܘܳܐ ܠܶܗ. ܘܠܐܴ ܚܰܕ ܝ̇ܳܢܶܩ ܚܰܠܒܳܐ ܘܰܐ̱ܚܪܺܢܳܐ ܠܐܴ ܘܠܰܘ ܐܰܝܟ ܕܳܐܡܪܺܝܢ ܐܺܝܪ̈ܺܝܛܺܝܩܽܘ ܡܰܣܠܰܝ̈ܳܐ ܕܒܰܪܢܳܫܳܐ ܐܶܬܬܠܺܝ ܗ̣ܘܳܐ ܒܩܰܝܣܳܐ ܘܠܰܘ ܐܠܰܗܳܐ: ܚܢܰܢ ܕܶܝܢ ܡܰܘܕܶܝܢܰܢ ܠܶܗ ܠܐܱܠܳܗܳܐ ܗ̇ܰܘ ܕܰܠܒ̣ܶܫ ܠܶܗ ܦܰܓܪܳܐ ܡ̣ܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܠܐܴ ܡܢܰܣܝܰܬ݀ ܒܙܽܘܘܳܓܳܐ: ܠܰܘ ܦܰܓܪܳܐ ܐܠܰܗܳܝܳܐ ܬܠܰܘ ܒܰܙܩܺܝܦܳܐ: ܘܩܳܡ ܡ̣ܶܢ ܩܰܒܪܳܐ ܟܰܕ ܚܬܳܡ̈ܶܐ ܘܛܰܒ̈ܥܶܐ ܕܩܰܒܪܳܐ ܠܐܴ ܣܕܺܝܩܺܝܢ ܐܰܝܟ ܕܰܢܦ̣ܰܩ ܡ̣ܶܢ ܟܰܪܣܳܐ ܘܰܒܬܽܘ̈ܠܐܷ ܕܶܐܡܶܗ ܠܐܴ ܫ̣ܪܳܐ. ܡܶܛܽܠ ܗܳܕܶܐ ܚܢܰܢ ܠܳܗ̇ ܠܰܒܬܽܘܠܬܳܐ ܝܳܠܕܰܬ݀ ܐܠܰܗܳܐ ܡܰܟܪܙܺܝܢܰܢ: ܘܰܠܗܳܕܶܐ ܗܰܝܡܳܢܽܘܬܳܐ ܫܳܠܡܺܝܢܰܢ: ܘܡ̣ܶܢ ܬܚܽܘ̈ܡܶܐ ܕܣܳܡ̣ܘ ܠܰܢ ܐܰܒܳܗ̈ܳܬܳܐ ܩܰܕܺܝ̈ܫܶܐ ܠܐܴ ܡܫܰܢܶܝܢܰܢ: ܘܠܰܨܠܺܝܒܳܐ ܕܒܰܪܢܳܫܳܐ ܠܐܴ ܣܳܓܕܺܝܢܰܢ. ܐܶܠܐܴ ܠܶܗ ܠܰܨܠܺܝܒܳܐ ܕܰܐܠܳܗܳܐ ܚܰܝܳܐ: ܗ̇ܰܘ ܕܚܰܫ ܘܶܐܨܛܠܶܒ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘ̈ܡܺܝܢ: ܘܩܳܡ ܒܫܽܘܒܚܳܐ ܘܙܳܟܽܘܬܳܐ ܘܰܐܩܺܝܡ ܥܰܡܶܗ ܠܐܴܕܳܡ ܘܰܠܝܰܠܕ̈ܰܘܗܝ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܰܐܒܳܗ̈ܳܬܳܐ ܕܠܶܗ ܡܣܰܟܶܝܢ ܗ̣ܘܰܘ: ܘܠܶܗ ܡܶܬܝܰܐܺܝܒܺܝܢ ܕܡ̣ܶܢ ܢܽܘܓܪܳܐ ܪܰܒܳܐ ܢܺܐܬܶܐ ܘܢܶܦܪܽܘܩ ܐܶܢܽܘܢ ܡ̣ܶܢ ܐܺܝ̈ܕܰܝ ܒܺܝܫܳܐ: ܩܳܡ ܘܠܐܴ ܚ̣ܙܳܐ ܚܒܳܠܐܴ ܒܶܝܬ ܡܺܝ̈ܬܶܐ ܦܳܪܩܳܐ ܪܰܒܳܐ. ܡܳܕܶܝܢ ܒܳܗܬܺܝܢ ܐܺܝܪ̈ܺܝܛܺܝܩܽܘ ܡܰܣܠܰܝ̈ܳܐ ܕܟܳܦܪܺܝܢ ܕܩܳܡ ܡ̣ܶܢ ܩܰܒܪܳܐ ܘܰܐܪܒܥܺܝܢ ܝܰܘ̈ܡܺܝܢ ܟܰܬܰܪ ܥܰܠ ܐܰܪܥܳܐ: ܐܰܝܟܰܢܳܐ ܕܰܢܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗܝ ܥܰܠ ܩܝܳܡܬܶܗ ܡܰܐܚܝܳܢܺܝܬܳܐ: ܘܰܣܠ̣ܶܩ ܠܰܫܡܰܝܳܐ ܘܺܝܬܶܒ ܥܰܠ ܟܽܘܪܣܝܳܐ ܕܬܶܫܒܽܘܚܬܳܐ: ܘܰܥܬܺܝܕ ܕܢܺܐܬܶܐ ܒܗܶܕܪܳܐ ܘܓܰܐܝܽܘܬܳܐ ܕܒܶܝܬ ܐܰܒܽܘܗܝ: ܘܡܶܢܶܗ ܢܶܒܥܶܐ ܐܳܦ ܢܶܬܟܰܫܰܦ ܕܢܶܬܪܰܚܰܡ ܥܠܰܝܢ ܡܶܣܟ̈ܺܢܶܐ ܥܰܒ̣ܕ̈ܶܐ ܕܺܝܠܶܗ ܘܥܰܠ ܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܰܢ ܕܬܺܐܬܶܐ ܛܰܝܒܽܘܬܳܟ ܠܐܱܝܠܶܝܢ: ܘܰܬܣܰܬܰܪܝ ܠܰܢ: ܘܰܬܢܰܛܰܪܝ ܠܰܢ: ܘܰܬܣܰܝܰܥܝ ܠܰܢ: ܘܡ̣ܶܢ ܟܽܠܗܶܝܢ ܡܥܺܝܩܳܢ̈ܝܳܬܰܢ ܬܦܰܨܶܐ ܠܰܢ ܘܰܬܫܰܘܙܶܒܝ ܠܰܢ. ܘܬܶܫܒܽܘܩܝ ܚܛܳܗܰܝ̈ܢ: ܘܬܶܠܚܶܐ ܚܰܘ̈ܒܰܝܢ ܘܰܬܚܰܣܶܐ ܠܰܢ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ܀

 

ܥܛܪܐ

ܚܰܝܳܐ ܘܡܰܐܚܝ̇ܳܢܳܐ ܕܶܐܬܬܰܚܬܺܝ ܥܕܰܡܳܐ ܠܒܶܝܬ ܡܺܝ̈ܬܶܐ ܒܨܶܒܝܳܢܶܗ: ܘܰܣܥ̣ܰܪ ܠܥܰܢܺܝ̈ܕܶܐ ܒܰܚܢܳܢܶܗ ܘܢܰܚܶܡ ܘܰܐܚܺܝ ܠܡܺܝ̈ܬܶܐ ܒܰܩܒܽܘܪܬܶܗ ܘܰܐܩܺܝܡ ܠܰܩܒܺܝܪ̈ܶܐ ܒܢܽܘܚܳܡܶܗ ܘܫܰܕܰܪ ܐܶܢܽܘܢ ܠܦܰܪܕܰܝܣܳܐ ܕܒܽܘ̈ܣܳܡܐ: ܡܬܽܘܚ ܡܳܪܝ ܗܳܫܳܐ ܒܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳܢܺܝܬܳܐ ܠܒܰܣܺܝܡܽܘܬ ܪܺܝܚܳܐ ܕܚܽܘܒܶܗ ܠܘܳܬ ܟܽܠܗܽܘܢ ܝܰܠܕ̈ܶܝܗ̇ ܕܰܠܥܺܕܬܳܐ ܩܰܕܺܝܫܬܳܐ ܕܺܝܠܳܟ: ܘܩܰܒܶܠܳܝܗܝ ܠܦܺܝܪܡܳܐ ܗܳܢܳܐ ܕܰܡܩܰܪܒܳܐ ܠܳܟ ܒܦܽܘܡܳܐ ܕܝܰܠܕ̈ܶܝܗ̇ ܐܰܝܟܰܢܳܐ ܕܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܚܘܬܡܐ

ܗܘܺܝ ܡܳܪܝܳܐ ܒܪ̈ܰܚܡܶܐ ܫܦܺܝ̈ܥܶܐ ܕܛܰܝܒܽܘܬܳܟ: ܣܶܬܳܪܳܐ ܘܢܽܘܛܳܪܳܐ ܠܥܺܕܬܳܟ ܡܗܰܝܡܰܢܬܳܐ ܕܒܳܟ ܐܶܚܕܶܐ ܓܰܘܣܳܐ ܘܢܰܛܰܪܶܝܗ̇ ܡ̣ܶܢ ܟܽܠ ܢܶܟܝ̈ܳܢܺܝܢ ܘܫܰܘܙܶܒܶܝܗ̇ ܡ̣ܶܢ ܩܪ̈ܳܒܶܐ ܘܬܰܟܬܽܘ̈ܫܶܐ ܘܚܶܪ̈ܝܳܢܶܐ ܕܶܐܪ̈ܶܣܺܝܣ ܡܚܰܒ̈ܠܳܬܳܐ: ܘܕܰܒܰܪܶܝܗ̇ ܒܝܰܡܺܝܢܳܟ ܚܰܝܠܬܳܢܺܝܬܳܐ ܡܰܨܝܰܬ݀ ܟܽܠ ܡ̣ܶܢ ܣܽܘܓ̈ܦܳܢܶܐ: ܟܰܕ ܡܫܰܪܰܪ ܐܰܢ̱ܬ ܠܳܗ̇ ܥܰܠ ܫܽܘܥܳܐ ܠܐܴ ܡܶܙܕܰܥܙܥܳܢܳܐ ܘܦܶܛܪܽܘܣܳܝܳܐ ܕܬܰܣܶܩܝ ܠܳܟ ܫܽܘܒܚܳܐ ܒܦܽܘܡ ܝܰܠܕ̈ܶܝܗ̇ ܘܠܐܱܒܽܘܟ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܡܰܐܚܝܳܢܳܐ ܕܰܐܚܺܝ ܡܺܝܬܽܘܬܰܢ ܒܡܰܘܬܶܗ: ܠܗ̇ܰܘ ܥܺܝܪܳܐ ܕܰܐܥܺܝܪ ܕܰܡܟܽܘܬܰܢ ܒܢܽܘܚܳܡܶܗ ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܒܰܩܒܽܘܪܬܳܐ ܕܺܝܠܶܗ ܐܰܡܺܝܬ ܠܶܗ ܠܡܰܘܬܳܐ ܘܣܳܛܳܢܳܐ ܠܗ̇ܰܘ ܕܰܒܢܽܘܚܳܡܶܗ ܫܒܺܝܚܳܐ ܢܰܚܶܡ ܡܺܝܬܽܘܬܶܗ ܕܓܶܢܣܰܢ ܐ̱ܢܳܫܳܝܳܐ ܠܗ̇ܰܘ ܕܒܰܩܝܳܡܬܶܗ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܐܰܦܨܰܚ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܟܰܕ ܠܰܩܝܳܡܬܳܐ ܡܰܥܒܕܰܬ݀ ܚܰܝ̈ܶܐ ܡܩܰܠܣܺܝܢܰܢ ܐܳܘ ܡܶܠܬܳܐ ܐܠܰܗܳܐ: ܘܰܠܢܽܘܚܳܡܳܟ ܬܗܺܝܪܳܐ ܕܡ̣ܶܢ ܓܰܘ ܫܝܽܘܠ ܒܡܰܕܥܰܢ ܚܰܠܳܫܳܐ ܢܳܣܒܺܝܢܰܢ ܘܒܶܗ ܚܳܕܶܝܢܰܢ ܘܪܳܘܙܺܝܢܰܢ ܥܰܡ ܢܶܫ̈ܶܐ ܩܰܕܺܝ̈ܫܳܬܳܐ ܫܰܦܪܳܐܺܝܬ ܚܢܰܢ ܘܠܶܒܰܘ̈ܳܬܰܢ ܠܩܰܒܪܳܟ ܡܰܐܚܝܳܢܳܐ ܡܶܬܡܰܛܶܝܢܰܢ: ܘܰܠܪܶܚܡܰܬ݀ ܐ̱ܢܳܫܽܘܬܳܟ ܡܦܺܝܣܺܝܢܰܢ ܘܰܠܦܽܘܪܩܳܢܰܢ ܨܶܒܝܳܢܳܐܺܝܬ ܠܚܰܫܳܐ ܘܡܰܘܬܳܐ ܘܰܙܩܺܝܦܳܐ ܢܓܰܕܬܳܟ: ܘܡ̣ܶܢ ܝܽܘܕܳܐ ܩܳܛܽܘܠܐܴ ܒܰܬܠܳܬܺܝܢ ܕܟܶܣܦܳܐ ܐܶܙܕܰܒܰܢ̣ܬ: ܘܡ̣ܶܢ ܚܰܢܳܢ ܘܩܰܝܳܦܳܐ ܒܰܦܪ̈ܳܓܶܠܐܷ ܟܰܕ ܥܰܦܺܝܩ ܐܰܢ̱ܬ ܠܶܣܛܽܘܢܳܐ ܐܶܬܢܰܓܰܕܬ ܠܒܶܝܬ ܕܺܝܢܳܐ ܕܦܺܝܠܰܛܳܘܣ ܐܰܝܟ ܥܳܒ̇ܶܕ ܒܺܝ̈ܫܳܬܳܐ ܥܰܠ̣ܬ ܘܰܟܠܐܱܡܺܝܣ ܗ̇ܳܝ ܕܰܙܚܽܘܪܺܝܬܳܐ ܕܢܳܓܕܳܐ ܠܩܶܛܠܐܴ ܐܶܬܥܰܛܰܦ̣ܬ: ܘܒܰܟܠܺܝܠ ܟܽܘ̈ܒܶܐ ܕܰܒܪܺܝܫܳܟ ܠܠܰܘܛܬܳܐ ܕܳܐܕܳܡ ܥܩ̣ܰܪܬ: ܘܡ̣ܶܢ ܙܳܩܽܘ̈ܦܶܐ ܒܒܶܙܚܳܐ ܐܶܣܬܓܶܕܬ ܘܰܒܩܰܢܝܳܐ ܕܰܠܒ̣ܰܟܬ ܒܺܐܝܕܳܟ ܥܰܠ ܪܺܝܫܳܟ ܐܶܬܩܰܦܰܚ̣ܬ: ܘܥܰܠ ܐܰܦܰܝ̈ܟ ܐܶܫܬܰܩ̣ܰܦܬ ܘܰܠܘܳܬ ܩܶܛܠܐܴ ܟܰܕ ܛܥܺܝܢ ܐܰܢ̱ܬ ܨܠܺܝܒܳܟ ܥܰܠ ܟܰܬܦܳܟ ܐܶܬܕܰܒ̣ܰܪܬ ܐܰܝܟ ܥܳܒ̇ܶܕ ܒܺܝ̈ܫܳܬܳܐ. ܕܰܠܢܰܗܺܝܪ̈ܶܐ ܒܪܰܘܡܳܐ ܕܰܪܩܺܝܥܳܐ ܐܰܚܫ̣ܶܟܬ ܘܰܠܫܽܘ̈ܥܶܐ ܘܟܺܐܦ̈ܶܐ ܒܩܳܠܳܟ ܨܰܪܺܝܬ ܘܡ̣ܶܢ ܩܶܢܛܪܽܘܢܳܐ ܘܓܰܝ̇ܳܣܳܐ ܐܠܰܗܳܐ ܘܡܰܠܟܳܐ ܐܶܣܬܗ̣ܶܕܬ: ܘܡ̣ܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܒܟܶܬܳܢ̈ܶܐ ܐܶܬܥܰܦܺܝܬ: ܘܰܒܩܰܒܪܳܐ ܚܰܕܬܳܐ ܒܶܝܬ ܡܺܝ̈ܬܶܐ ܐܶܬܬܣܺܝܡܬ: ܘܰܠܢܰܦ̈ܫܳܬܰܢ ܕܰܚܒܺܝ̣̈ܫܳܢ ܗ̣ܘ̈ܰܝ ܒܰܫܝܽܘܠ ܣܥ̣ܰܪܬ: ܘܠܐܱܣܺܝܪ̈ܶܐ ܘܰܡܫܰܥܒ̈ܕܶܐ ܡ̣ܶܢ ܐܰܣܽܘܪ̈ܶܐ ܚܛܺܝ̈ܬܳܢܳܝܶܐ ܫ̣ܪܰܝܬ: ܘܰܠܬܳܐܓܳܐ ܕܡܰܘܬܳܐ ܕܺܐܝܬܰܘܗܝ ܣܳܛܳܢܳܐ ܣܚ̣ܰܦܬ. ܡ̣ܶܢ ܩܰܒܪܳܐ ܡܳܪܳܢܳܝܳܐ ܒܫܽܘܒܚܳܐ ܘܰܒܙܳܟܽܘܬܳܐ ܩܳܡ̣ܬ: ܘܠܰܬܠܳܬܳܐ ܝܰܘ̈ܡܺܝܢ ܐܶܬܢܰܚܰܡ̣ܬ: ܘܠܰܫܒܺܝܬܳܐ ܕܰܚܡܺܝܠܐܴ ܗܘܳܬ݀ ܒܰܫܝܽܘܠ ܥܰܡܳܟ ܐܰܦܶܩ̣ܬ ܘܡ̣ܶܢ ܡܰܦܽܘܠܬܳܐ ܐܰܩܺܝܡܬ: ܘܠܰܫܡܰܝܳܐ ܥܰܡܳܟ ܐܰܣܶܩ̣ܬ: ܠܡܰܠܐܱܟ̈ܶܐ ܩܝܳܡܬܳܟ ܚܰܘܝܬ: ܠܢܳܛܽܘܪ̈ܶܐ ܒܰܚܙܳܬܳܟ ܒܰܠܗܺܝܬ: ܘܰܠܢܶܫܷ̈ܐ ܩܰܕܺܝ̈ܫܳܬܳܐ ܒܦܶܓܥܳܟ ܚܰܕܺܝܬ: ܘܰܠܗܳܠܶܝܢ ܘܰܠܬܰܠܡܺܝ̈ܕܶܐ ܒܰܫܠܳܡܳܟ ܐܰܦܨܰܚ̣ܬ: ܘܠܰܫܠܺܝ̈ܚܶܐ ܘܰܡܣܰܒܪ̈ܳܢܶܐ ܡ̣ܶܢ ܟܡܺܐܢ̈ܶܐ ܨܰܝܶܒ̣ܬ: ܘܰܒܕܶܡ̈ܘܳܬܳܐ ܣܒܺܝ̣̈ܣܳܬܳܐ ܢܰܦܫܳܟ ܠܗܽܘܢ ܓܠ̣ܰܝܬ ܘܰܠܚܰܫܳܐ ܡ̣ܶܢ ܠܶܒܰܘ̈ܳܬܗܽܘܢ ܛܪܰܕܬ ܘܠܰܦܠܺܝܓܽܘܬ ܬܰܪܥܺܝܬܗܽܘܢ ܫ̣ܰܪܰܪܬ. ܒܰܩܨܳܝܬܳܐ ܗ̇ܳܝ ܒܽܘܪܟܬܳܢܺܝܬܳܐ ܠܥܰܝ̈ܢܶܐ ܕܪܶܥܝܳܢܗܽܘܢ ܐܰܢܗ̣ܰܪܬ ܘܰܠܥܶܠܺܝܬܳܐ ܐ̱ܪܳܙܳܢܳܝܬܳܐ ܟܰܕ ܟܰܘ̈ܶܐ ܘܬܰܪ̈ܥܶܐ ܐܰܚܺܝܕܺܝܢ ܥܰܠ̣ܬ: ܘܰܫܠܳܡܳܐ ܒܶܐܕܢܰܝ̈ܗܽܘܢ ܙܪܰܥ̣ܬ: ܘܡܰܘܗܰܒܬܳܐ ܟܳܗܢܳܝܬܳܐ ܠܗܽܘܢ ܐܰܓܥܶܠ̣ܬ: ܘܰܕܢܶܫܒܩܽܘܢ ܚܰܘ̈ܒܶܐ ܘܰܚܛܳܗ̈ܶܐ ܕܰܒܢܰܝ̈ܢܳܫܳܐ ܣܪܰܚ̣ܬ ܘܰܐܩܺܝܡܬ. ܠܡܰܪܙܳܢܽܘܬܳܐ ܢܒܺܝܳܝܬܳܐ ܒܰܩܢܽܘܡܳܟ ܓܡ̣ܰܪܬ ܘܡ̣ܶܢ ܗ̇ܳܝ ܕܺܐܝܬܰܝܟ ܐܠܰܗܳܐ ܠܐܴ ܫܰܢܺܝܬ: ܘܡ̣ܶܢ ܐܺܝ̈ܕܰܝ ܣܳܢܳܐܐ ܘܰܒܥܶܠܕܒܳܒܳܐ ܠܨܰܠܡܳܟ ܡܰܠܟܳܝܳܐ ܦܪܰܩ̣ܬ: ܘܠܐܱܬܪܶܗ ܩܰܕܡܳܝܳܐ ܕܰܥܕܶܝܢ ܐܰܗܦ̣ܶܟܬ. ܘܡܶܛܽܠܗܳܕܶܐ ܠܳܟ ܓܳܒܽܘܠܐܴ ܕܰܟܝܳܢܰܢ ܘܦܳܪܽܘܩܳܐ ܕܓܶܢܣܰܢ ܘܰܡܚܰܕܬܳܢܳܐ ܕܰܓܒܺܝܠܬܰܢ ܡܦܺܝܣܺܝܢܰܢ ܟܰܕ ܐܳܡܪܺܝܢܰܢ: ܐܰܡܠܶܟ ܫܰܝܢܳܟ ܒܰܝܢܳܬܰܢ: ܒܠܽܘܡ ܦܽܘܡܳܐ ܕܚܶܪ̈ܝܳܝܶܐ ܣܳܢ̈ܰܐܝܢ: ܠܰܢ ܥܰܕܰܪ ܒܟܽܠܗܽܘܢ ܙܰܒ̈ܢܶܐ ܕܚܰܝܰܝ̈ܢ: ܣܰܬܶܬ ܚܽܘܒܳܟ ܒܓܰܘ ܬܰܪ̈ܥܝܳܬܰܢ ܘܩܰܕܶܫ ܗܰܘ̈ܢܰܝܢ ܘܦܰܓܪ̈ܰܝܢ ܘܢܰܦ̈ܫܳܬܰܢ ܐܰܝܬܳܐ ܘܦܰܢܳܐ ܠܰܢ ܟܽܠ ܫ̈ܶܐܠܳܬܰܢ. ܡܰܟܶܟ ܥܽܘܫܢܶܗ ܕܒܺܝܫܳܐ ܕܠܐܴ ܢܕܰܘܶܕ ܠܰܢ: ܠܫܽܘܠܛܳܢܶܗ ܫܪܺܝ ܡܶܢܰܢ ܕܠܐܴ ܢܚܰܒܶܠ ܠܰܢ: ܟܠܺܝ ܠܚܺܐܦܶܗ ܕܠܐܴ ܢܫܰܓܶܫ ܠܰܢ: ܘܰܐܡܶܟ ܩܰܪܢܶܗ ܪܳܡܬܳܐ ܕܠܐܴ ܢܡܰܟܶܟ ܠܰܢ. ܚܰܝܠܬܳܢ̈ܶܐ ܥܒܶܕ ܠܰܢ ܒܕܰܐܪܶܗ ܕܰܢܟܺܝܠܐܴ  ܛܽܘܠܺܝ̈ܩܶܐ ܕܡܺܝܪ̈ܶܐ ܠܽܘܩܒܰܠ ܩܺܐܪܣܶܗ ܝܰܡܺܝܢܳܟ ܐܰܓܶܢ ܥܠܰܝܢ ܘܚܰܝܶܠܰܝܢ: ܐܰܝܟܰܢܳܐ ܕܠܐܴ ܕܶܚܠܐܴ ܢܕܰܥܶܟ ܓܶܐܪ̈ܰܘܗܝ ܠܐܴ ܡܶܣܬܰܝܒܪ̈ܳܢܶܐ. ܘܗܰܒܠܰܢ ܕܒܳܟ ܢܰܘܕܶܐ ܘܰܬܪܺܝܨܳܐܺܝܬ ܢܗܰܝܡܶܢ: ܕܰܐܢ̱ܬ ܐܺܝܬܰܝܟ ܐܠܰܗܳܐ ܫܰܪܺܝܪܳܐ ܝܰܠܕܳܐ ܘܠܐܴ ܥܒܺܝܕܳܐ ܕܰܒܚܰܫܰܝ̈ܟ ܨܶܒܝܳܢܳܝ̈ܶܐ ܠܰܓܒܺܝܠܬܳܟ ܡ̣ܶܢ ܥܰܒܕܽܘܬܳܐ ܣܳܛܳܢܳܝܬܳܐ ܒܰܕܡܳܟ ܝܰܩܺܝܪܳܐ ܙܒܶܢ̣ܬ. ܘܰܐܫܘܳܐ ܠܰܢ ܕܥܰܡ ܫܠܺܝ̈ܚܶܐ ܢܩܰܒܠܳܟ ܒܰܐܦ̈ܶܐ ܓܰܠܝ̈ܳܬܳܐ: ܘܥܰܡ ܢܶܫ̈ܶܐ ܢܰܟ̈ܦܳܬܳܐ ܕܶܐܬܘܰܥܰܕ̈ܝ ܠܩܰܒܪܳܟ ܩܰܕܺܝܫܳܐ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܠܒܽܘܣܳܡܳܐ ܒܥܺܕܬܳܐ ܐܽܘܪܫܠܶܡܳܝܬܳܐ: ܘܥܰܡ ܟܽܠܗܽܘܢ ܩܪ̈ܰܝܳܐ ܕܡܶܫܬܽܘܬܳܟ ܒܰܣܶܡ ܠܰܢ: ܘܒܰܣܡܳܟܳܟ ܗ̇ܰܘ ܠܐܴ ܥܳܒܽܘܪܳܐ ܐܶܬܓܢܺܝ ܠܰܢ: ܘܥܰܠ ܐܰܓܳܢܳܟ ܡܰܠܝܰܬ݀ ܚܰܡܪܳܐ ܪܽܘܚܳܢܳܝܳܐ ܥܰܡ ܙܡܺܝ̣̈ܢܰܝܟ ܐܰܪܘܳܐ ܠܰܢ: ܘܰܒܡܰܠܟܽܘܬܳܟ ܗ̇ܳܝ ܕܠܐܴ ܦܳܛܪܳܐ ܚܰܕܳܐ ܠܰܢ ܒܛܰܝܒܽܘܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܝܫܳܐ܀

ܫܠܡ ܬܪܝܢܐ ܕܛܟܣܐ ܐܚܪܝܐ

 

ܛܟܣܐ ܕܚܕ ܒܫܒܐ ܬܠܝܬܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ

 

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܦܰܐܝܽܘܬ ܒܰܪܬ݀ ܩܳܠܐܴ ܕܪܽܘܚܳܐ ܢܙܰܡܰܪ ܠܳܟ: ܕܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ: ܡܶܛܽܠ ܕܬܶܕܡܽܘܪܬܳܐ ܥܒ̣ܰܕ: ܡܶܛܽܠ ܕܬܶܕܡܽܘܪܬܳܐ ܗ̱̇ܝ ܒܰܫܪܳܪܳܐ ܩܝܳܡܬܳܟ ܡܰܠܝܰܬ݀ ܬܶܗܪܳܐ ܘܢܽܘܚܳܡܳܟ ܡܗܰܕܪܳܐ. ܒܪܺܝܟ ܗ̣ܽܘ ܝܰܘܡܳܟ ܡܚܰܕܶܐ ܘܡܰܦܨܰܚ ܠܰܟܡܺܝܪ̈ܶܐ: ܒܪܺܝܟܺܝܢ ܪ̈ܰܚܡܰܝܟ ܕܫܰܠܚܽܘܟ ܠܘܳܬ ܓܶܢܣܰܢ: ܬܰܘܕܺܝ ܠܳܟ ܥܰܡ ܐܰܒܽܘܟ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܡܚܰܕܬܳܢܳܐ ܕܥܳܠܡ̈ܶܐ ܕܒܽܐܘܪܚܳܐ ܚܰܕܬܳܐ ܐܶܬܳܐ ܠܰܒܪܺܝܬܳܐ: ܕܰܢܚܰܕܶܬ ܠܰܓܒܺܝܠܬܳܐ ܕܺܝܠܰܢ ܕܰܐܥܬܩܰܬ݀ ܒܛܳܥܝܽܘܬܳܐ ܕܰܚܛܺܝܬܳܐ ܠܗ̇ܰܘ ܢܽܘܗܪܳܐ ܡܬܽܘܡܳܝܳܐ ܘܡܰܢܗܪܳܢܳܐ ܕܥܳܠܡ̈ܶܐ ܕܢܽܘܗܪܳܐ ܚܰܕܬܳܐ ܘܡܶܬܝܰܕܥܳܢܳܐ ܡܠܐܴ ܠܬܺܐܒܶܝܠ ܒܰܩܝܳܡܬܶܗ ܡܫܰܒܰܚܬܳܐ: ܠܗ̇ܰܘ ܕܽܘܡܳܪܳܐ ܠܐܴ ܡܶܬܡܰܠܠܳܢܳܐ ܕܰܥܒ̣ܰܕ ܝܰܘܡܳܢܳܐ ܬܶܕܡܽܘܪܬܳܐ ܚܕܰܬܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

ܣܕܪܐ

ܠܳܟ ܣܳܓܕܺܝܢܰܢ ܘܰܡܫܰܒܚܺܝܢܢ ܘܡܰܘܕܶܝܢܰܢ ܝܶܫܽܘܥ ܡܫܺܝܚܳܐ ܡܶܠܬܳܐ ܡܬܽܘܡܳܝܳܐ ܕܰܬܠܺܝܬܳܐܺܝܬ ܡ̣ܶܢ ܬܠܳܬ ܥܺܕ̈ܳܬܳܐ ܕܒܰܫܡܰܝܳܐ ܒܰܬܠܺܝܬܳܝܽܘܬܳܐ ܠܐܴ ܡܶܣܬܰܕܩܳܢܺܝܬܳܐ ܡܶܫܬܰܒܰܚ. ܠܳܟ ܝܰܠܕܳܐ ܝܺܚܺܝܕܳܝܳܐ ܕܡ̣ܶܢ ܐܰܒܳܐ ܕܰܒܚܰܪܰܬ݀ ܙܰܒ̈ܢܶܐ ܐܶܬܒܰܣܰܪ ܡ̣ܶܢ ܒܬܽܘܠܬܳܐ ܡܰܪܝܰܡ ܡܶܛܽܠ ܦܽܘܪܩܳܢܰܢ ܡܩܰܠܣܺܝܢܰܢ: ܘܰܕܚܰܕ ܐܺܝܬܰܝܟ ܘܠܐܴ ܗ̣ܘܳܐ ܬܪܶܝܢ: ܕܚܰܕ ܝܰܠܕܶܗ ܐܰܒܳܐ ܘܰܐ̱ܚܪܺܢܳܐ ܒܬܽܘܠܬܳܐ ܐܶܠܐܴ ܚܰܕ ܩܕܳܡ ܚܕܳܝܽܘܬܳܐ ܘܒܳܬܰܪ ܚܕܳܝܽܘܬܳܐ ܕܰܒܟܰܪܣܳܐ: ܚܰܕ ܟܝܳܢܳܐ ܝܳܕܥܺܝܢܰܢ: ܟܰܕ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܒܚܰܕ ܟܝܳܢܳܐ ܘܨܶܒܝܳܢܳܐ ܘܽܐܘܚܕܳܢܳܐ: ܒܰܬܠܺܝ̈ܬܳܝ ܩܢܽܘ̈ܡܶܐ ܘܰܫܡܳܗ̈ܶܐ ܘܦܰܪ̈ܨܽܘܦܶܐ ܘܕܺܝܠܳܝ̈ܳܬܳܐ ܡܗܰܝܡܢܺܝܢܰܢ. ܘܰܨܠܰܘ̈ܳܬܳܐ ܕܺܝܠܰܢ ܘܒܳܥܘ̈ܳܬܰܢ ܒܺܐܝ̈ܕܰܝܟ ܠܐܱܒܽܘܟ ܡܥܰܠܶܝܢܰܢ: ܕܰܬܩܰܪܶܒ ܐܶܢܽܘܢ ܚܠܳܦܰܝܢ ܫܳܐܠܺܝܢܰܢ: ܘܦܽܘܢܳܝ ܫ̈ܶܐܠܳܬܰܢ ܡܶܢܳܟ ܢܳܣܒܺܝܢܰܢ. ܥܰܡ ܥܺܝܪ̈ܰܝ ܪܰܘܡܳܐ ܡܩܰܕ̈ܫܳܢܶܐ ܕܩܳܥܶܝܢ ܬܠܺܝܬܳܐܺܝܬ ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܒܪܺܝܫ ܨܠܰܘ̈ܳܬܰܢ: ܒܰܬܠܳܬ ܣܳܓܕܳܢ ܡܰܣܪܚܺܝܢܰܢ ܘܥܰܡ ܬܠܳܬ ܓܽܘ̈ܕܺܝܢ ܕܥܺܝܪ̈ܶܐ ܕܙܰܝ̈ܰܚ ܩܒܽܘܪܬܳܟ ܬܠܺܝܬܳܐܺܝܬ ܩܰܕܺܝܫܰܬ ܐܠܰܗܳܐ ܩܰܕܺܝܫܰܬ ܚܰܝܠܬܳܢܳܐ: ܩܰܕܺܝܫܰܬ ܠܐܴ ܡܳܝܽܘܬܳܐ ܒܰܬܠܳܬ ܒܽܘܪ̈ܟܳܢ ܡܰܙܥܩܺܝܢܰܢ. ܘܥܰܡ ܝܰܘܣܶܦ ܘܢܺܝܩܳܘܕܺܝܡܳܘܣ ܠܗ̇ܳܝ ܕܶܐܨܛܠܶܒ ܚܠܳܦ ܡܰܘܣܦܺܝܢܰܢ: ܘܥܰܠ ܒܶܝܬ ܥܰܝ̈ܢܰܝܢ ܠܪܽܘܫܡܳܐ ܚܰܝܳܐ ܕܰܨܠܺܝܒܳܐ ܛܳܒܥܺܝܢܰܢ: ܬܠܺܝܬܳܐܺܝܬ ܠܳܟ ܩܳܪܶܝܢܰܢ ܘܰܚܢܳܢܳܐ ܘܪ̈ܰܚܡܶܐ ܘܚܽܘܣܳܝܳܐ ܫܳܐܠܺܝܢܰܢ: ܘܰܬܠܳܬ ܬܶܫܒ̈ܚܳܬܳܐ ܓܳܗ̈ܢܳܢ ܠܳܟ ܡܩܰܪܒܺܝܢܰܢ. ܬܠܳܬ ܓܽܘܕܺܝ̈ܢ ܒܩܽܘܕܳܫ ܡܽܘܪܽܘܢ ܐܠܰܗܳܝܳܐ ܡܩܺܝܡܺܝܢܰܢ: ܒܰܬܠܳܬ ܥܺܕ̈ܳܬܳܐ ܡܛܰܦܣܺܝܢܰܢ ܘܠܰܬܠܳܬ ܙܳܥ̈ܩܳܬܳܐ ܕܰܥܠܰܝܟ ܕܡ̣ܶܢ ܠܥܶܠ ܡܶܣܬܰܟܠܺܝܢܰܢ: ܬܠܳܬ ܙܰܒܢܺܝ̣̈ܢ ܒܽܐܘܙܢܳܐ ܕܚܰܝ̈ܶܐ ܓܳܡܥܺܝܢܰܢ ܟܰܕ ܥܳܡܕܺܝܢܰܢ. ܘܠܰܬܠܳܬܳܐ ܝܰܘ̈ܡܺܝܢ ܕܰܩܒܽܘܪܬܳܟ ܡܶܫܬܰܘܕܥܺܝܢܰܢ ܬܠܳܬ ܬܠܺܝܬܰܝ̈ܘܳܢ ܕܡܽܘܪܰܐܣ ܗܳܠܶܝܢ ܕܫܰܡܠܺܝܬ ܒܡܰܣܒܗܽܘܬ ܬܠܳܬ ܬܠܺܝܬܰܝ̈ܘܳܢ ܕܥܶܠܳܝ̈ܶܐ ܗ̇ܳܢܶܘܢ ܕܰܪܫ̣ܰܡ ܡܽܘܫܶܐ ܒܰܬܠܳܬ ܬܠܺܝܬܰܝ̈ܘܳܢ ܕܟܺܐܦ̈ܶܐ ܡܫܰܡܠܶܝܢܰܢ: ܬܠܺܝܬܳܝܰܬ ܠܐܻܝܩܳܪܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܒܰܝܬܳܐ ܕܥܺܕܬܳܐ ܩܰܕܺܝܫܬܳܐ ܒܳܢܶܝܢܰܢ. ܩܕܽܘܫܩܽܘܕ̈ܫܺܝܢ ܘܡܰܕܒܚܳܐ ܘܗܰܝܟܠܐܴ ܐܰܝܟ ܗ̇ܰܘ ܕܡܽܘܫܶܐ ܩܳܒܥܺܝܢܰܢ: ܬܠܺܝܬܳܐܺܝܬ ܩܳܐܶܡ ܗ̣ܘܳܐ ܥܰܡܳܐ: ܫܳܡܽܘ̈ܥܶܐ ܒܕܳܪܬܳܐ: ܘܰܡܫܰܡ̈ܫܳܢܶܐ ܒܗܰܝܟܠܐܴ: ܘܰܐܗܪܽܘܢ ܒܰܩܕܽܘܫ ܩܽܘܕ̈ܫܺܝܢ ܫܳܐܠܺܝܢܰܢ: ܬܠܺܝܬܳܐܺܝܬ ܚܠܳܦ ܗܰܝܟܠܐܴ ܘܡܰܕܒܚܳܐ ܕܒܶܣ̈ܡܶܐ ܘܰܡܢܳܪܬܳܐ: ܫܠܺܝ̈ܚܶܐ ܘܰܡܣܰܒܪ̈ܳܢܶܐ ܘܡܰܠܦܳܢ̈ܶܐ ܣܳܕܪܺܝܢܰܢ ܘܰܚܠܳܦ ܩܺܐܒܽܘܬܳܐ ܘܠܽܘ̈ܚܶܐ ܘܩܶܣܛܳܐ: ܦܰܓܪܳܐ ܘܰܕܡܳܐ ܘܡܽܘܪܽܘܢ ܡܛܰܟܣܺܝܢܰܢ: ܬܠܳܬ ܨܠܰܘ̈ܳܢ ܕܰܒܩܰܕܡܳܝܽܘܬ ܩܽܘܪܒܳܢܳܐ ܠܰܬܠܳܬܳܐ ܝܰܘ̈ܡܺܝܢ ܕܰܩܒܽܘܪܬܳܟ ܡܰܐܪܙܺܝܢܰܢ: ܘܰܬܠܺܝܬܳܐܝܰܬ ܠܐܱܢܢܰܐܦܳܘܪܰܐ ܡܪܺܝܡܺܝܢܰܢ: ܠܰܙܥܳܩܬܳܐ ܬܠܺܝܬܳܐܝܰܬ ܕܰܠܘܳܬ ܫܶܡܥܽܘܢ ܕܽܘܟܳܝܳܐ ܡܰܐܠܽܘܢ ܡܶܬܢܰܗܪܺܝܢܰܢ: ܬܠܺܝܬܳܐܺܝܬ ܠܗܰܘ̈ܢܰܝܢ ܘܡܰܕ̈ܥܰܝܢ ܘܰܠܠܶܒܰܘ̈ܳܬܰܢ ܠܥܶܠ ܬܳܪܨܺܝܢܰܢ: ܘܰܬܠܺܝܬܳܐܺܝܬ ܥܰܡ ܗ̇ܳܢܽܘܢ ܕܩܳܥܶܝܢ ܩܽܘܕ̈ܳܫܶܐ ܬܠܺܝܬܳܝ̈ܶܐ ܠܡܶܬܒܰܣܪܳܢܽܘܬܳܟ ܡܩܰܕܫܺܝܢܰܢ: ܬܠܳܬ ܬܠܺܝܬܰܝ̈ܘܳܢ ܨܠܺܝ̈ܒܶܐ ܒܰܬܠܳܬ ܕܽܘܟ̈ܝܳܢ ܘܰܐܟܘ̈ܳܬܗܽܘܢ ܒܢܰܩܺܝܦܽܘܬܗܽܘܢ ܥܰܠ ܕܡܳܐ ܪܳܫܡܺܝܢܰܢ: ܘܰܬܠܳܬ ܬܠܺܝܬܳܐܺܝܬ ܕܥܰܠ ܟܽܠ ܚܰܕ ܚܰܕ ܠܚܽܘܝܳܕܳܐ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ ܡܰܟܪܙܺܝܢܰܢ: ܬܠܳܬ ܙܰܒܢܺܝ̈ܢ ܨܠܺܝ̈ܒܶܐ ܬܠܺܝ̈ܬܳܝܶܐ ܒܰܩܕܽܘܫܩܽܘܕ̈ܫܺܝܢ ܥܰܠ ܐܰܦܰܝ̈ܢ ܒܰܬܠܳܬ ܕܽܘܟ̈ܝܳܢ ܚܳܬܡܺܝܢܰܢ: ܒܰܡܠܰܚܡܽܘܬܗܽܘܢ ܘܰܡܕܰܡܝܽܘܬܳܐ ܕܗܳܠܶܝܢ ܥܰܠ ܥܰܡܳܐ ܠܚܽܘܝܳܕܳܐ ܕܗ̇ܳܢܽܘܢ ܘܰܕܗܳܠܶܝܢ ܘܕܰܐܝܟ ܗܳܠܶܝܢ ܡܶܫܬܰܪܪܺܝܢܰܢ: ܬܠܺܝܬܳܐܺܝܬ ܒܰܬܠܳܬ ܕܽܘܟ̈ܝܳܢ ܟܽܠܶܗ ܥܰܡܳܐ ܒܳܪܟܺܝܢܰܢ ܘܰܬܠܺܝܬܳܐܺܝܬ ܪ̈ܰܚܡܶܐ ܫܳܐܠܺܝܢܰܢ: ܘܰܬܠܺܝܬܳܐܺܝܬ ܠܚܰܫ̈ܶܐ ܚܛܺܝ̈ܬܳܢܳܝܶܐ ܕܢܳܒܗܺܝܢ ܒܰܢ ܡܛܰܠܩܺܝܢܰܢ ܘܰܠܢܰܚ̈ܬܶܐ ܚܰܕ̈ܬܶܐ ܕܡ̣ܶܢ ܪܽܘܚܳܐ ܩܰܕܺܝܫܳܐ ܡܶܬܥܰܛܦܺܝܢܰܢ: ܘܠܳܟ ܐܠܰܗܳܐ ܕܶܐܬܒܰܣܰܪ ܚܠܳܦܰܝܢ ܡ̣ܶܢ ܗܳܫܳܐ ܚܰܕܬܳܐܺܝܬ ܒܪܽܘܚ ܘܒܰܦܓܰܪ ܡܫܰܒܚܺܝܢܰܢ: ܐܰܝܟܰܢܳܐ ܕܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡ ܪܰܒܽܘܬܳܟ ܗܳܐ ܡܩܰܪܒܺܝܢܰܢ: ܒܥܺܐܕܳܐ ܗܳܢܳܐ ܕܰܩܝܳܡܬܳܟ ܢܶܬܩܰܒܰܠ ܒܪ̈ܰܚܡܰܝܟ ܘܢܶܬܚ̈ܰܠܛܳܢ ܒܶܗ ܨܠܰܘ̈ܳܬܰܢ ܡܚܺܝ̣̈ܠܳܬܳܐ ܒܛܰܝܒܽܘܬܳܟ ܘܢܶܗܘܶܐ ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܕܡܰܪܥܺܝܬܳܟ ܦܪܺܝܩܰܬ݀ ܒܰܕܡܳܟ. ܘܰܠܥܽܘܗܕܳܢܳܐ ܘܰܢܝܳܚܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܒܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܰܚܢܰܢ ܘܗ̣ܶܢܽܘܢ ܢܶܫܬܘܶܐ ܕܰܒܥܺܕܬܳܐ ܕܒܽܘܟܪ̈ܶܐ ܚܰܕܬܳܐܺܝܬ ܢܶܫܬܶܐ ܡ̣ܶܢ ܝܰܠܕܳܐ ܕܰܓܦܶܬܳܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܚܰܟܺܝܡܳܐ ܘܓܰܢ̱ܒܳܪܳܐ ܘܥܰܫܺܝܢܳܐ ܡܳܪܝܳܐ ܒܬܶܕܡܽܘܪܬܳܐ ܐܰܩܺܝܡ ܠܣܶܕܪ̈ܰܝ ܪܰܘܡܳܐ ܒܝܰܘܡܳܐ ܕܢܽܘܚܳܡܶܗ ܟܰܕ ܣܠ̣ܶܩ ܠܰܫܡܰܝܳܐ ܘܺܝܬܶܒ ܡ̣ܶܢ ܝܰܡܺܝܢ ܐܰܒܽܘܗܝ ܒܫܽܘܒܚܳܐ ܕܠܐܴ ܡܶܬܡܰܠܰܠ: ܩܰܒܶܠܳܝܗܝ ܒܥܶܕܳܢܳܐ ܗܳܢܳܐ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܘܰܐܫܘܳܐ ܠܰܢܰ ܕܰܐܡܺܝܢܳܐܺܝܬ ܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܚܘܬܡܐ

ܗܘܺܝ ܡܳܪܝܳܐ ܠܒܺܝܫܽܘܬܳܟ ܡܥܰܕܪܳܢܳܐ: ܘܡ̣ܶܢ ܢܶܣܝܽܘ̈ܢܶܐ ܡܦܰܨܝܳܢܳܐ: ܘܡ̣ܶܢ ܩܪ̈ܳܒܶܐ ܩܫܰܝ̈ܳܐ ܡܫܰܘܙܒܳܢܳܐ: ܕܠܐܴ ܬܶܬܶܠ ܠܣܳܛܳܢܳܐ ܥܠܰܝܢ ܫܽܘܠܛܳܢܳܐ: ܐܶܠܐܴ ܡܰܟܶܟ ܘܫܰܦܶܠܳܝܗܝ ܬܚܶܝܬ ܥܶܩܒܳܐ ܕܰܡܗܰܝ̈ܡܢܶܐ ܒܰܫܡܳܟ ܩܰܕܺܝܫܳܐ: ܘܡܰܘܕ̈ܝܰܝ ܒܰܩܝܳܡܬܳܟ: ܘܣܳܓ̈ܕܰܝ ܠܰܨܠܺܝܒܳܟ: ܘܕܰܒܰܪ ܠܰܢ ܢܽܘܓܪܳܐ ܕܙܰܒ̈ܢܶܐ ܛܳܒ̈ܶܐ ܘܰܒܗܺܝ̈ܠܐܷ ܕܫܳܦܪܺܝܢ ܠܳܟ ܡܳܪܰܢ ܘܰܐܠܳܗܰܢ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܫܽܘܒܚܳܐ ܠܳܟ ܣܓܽܘܠܐܴ ܚܰܝܳܐ ܕܒܽܘܪ̈ܟܳܬܳܐ ܕܶܐܬܺܝܠܶܕ ܡ̣ܶܢ ܣܰܬܳܐ ܒܬܽܘܠܬܳܐ ܘܶܐܬܩܛܶܦ ܡ̣ܶܢ ܫܰܪܒܬܳܐ ܒܺܝܫܬܳܐ: ܘܶܐܬܥܨܰܪ ܒܰܡܕܺܝܢ̱ܬܳܐ ܥܩܺܝܪܬܳܐ ܘܶܐܬܡܰܙܰܓ ܟܳܣܳܐ ܕܦܽܘܪܩܳܢܳܐ ܘܶܐܬܦܰܠܰܓ ܒܥܺܕܬܳܐ ܩܰܕܺܝܫܬܳܐ: ܠܟܽܠܗܽܘܢ ܡܗܰܝ̈ܡܢܶܐ ܕܢܳܣܒܺܝܢ ܠܶܗ ܒܗܰܝܡܳܢܽܘܬܳܐ ܕܠܐܴ ܛܽܘܠܫܳܐ ܕܒܶܗ ܡܶܬܚܰܣܶܝܢ ܚܰܘ̈ܒܰܝܗܽܘܢ ܘܡܶܫܬܰܒܩܺܝܢ ܒܽܘܨܳܪ̈ܰܝܗܽܘܢ ܒܗܳܢܳܐ ܥܶܕܳܢܳܐ܀

ܣܕܪܐ

ܝܰܘܡܳܢܳܐ ܐܰܚ̈ܰܝ ܠܗܳܢܳܐ ܚܰܕ ܒܫܰܒܳܐ ܕܰܩܝܳܡܬܳܐ ܠܰܡܚܰܓܳܝܽܘ ܩܰܒܶܠܢܰܢ: ܗܳܢܳܐ ܕܒܶܗ ܡܶܢܳܟ ܒܳܥܶܝܢܰܢ ܘܠܳܟ ܡܶܬܟܰܫܦܺܝܢܢ ܕܰܬܚܰܝܶܠ ܠܰܢ ܒܟܽܠܳܗ̇ ܚܰܕܽܘܬܳܐ: ܘܠܳܟ ܢܥܰܕܥܶܕ ܘܰܢܩܰܠܶܣ. ܟܰܕ ܣܳܓܕܺܝܢܰܢ ܠܳܟ ܐܳܘ ܡܳܪܝܳܐ ܐܳܕܳܡ ܚܰܕܬܳܐ: ܟܰܕ ܢܳܛܪܺܝܢܰܢ ܙܗܺܝܪܽܘܬܳܐ ܠܢܳܡܽܘܣܳܐ ܚܰܕܬܳܐ. ܟܰܕ ܡܚܰܓܶܝܢܰܢ ܘܰܡܙܰܝܚܺܝܢܰܢ ܠܥܺܐܕܳܐ ܗܳܢܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ: ܟܰܕ ܡܰܟܪܙܺܝܢܰܢ ܒܠܶܫܳܢܰܝ̈ܢ ܐܶܘܢܓܶܠܝܽܘܢ ܚܰܕܬܳܐ. ܟܰܕ ܙܳܩܪܺܝܢܰܢ ܢܰܚ̈ܬܶܐ ܠܰܣܡܳܟܳܐ ܚܰܕܬܳܐ: ܟܰܕ ܡܶܬܒܰܣܡܺܝܢܰܢ ܒܦܳܬܽܘܪܳܐ ܚܰܕܬܳܐ ܕܰܩܝܳܡܬܳܐ ܚܰܕܬܳܐ. ܟܰܕ ܡܫܰܒܚܺܝܢܰܢ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܟܰܕ ܟܽܠܰܢ ܡܰܦܪܓܺܝܢܰܢ ܒܕܺܝܰܬܺܝܩܺܝ ܚܕܰܬܳܐ: ܟܰܕ ܕܳܝܨܺܝܢܰܢ ܒܚܰܕܽܘܬܳܐ ܪܽܘܚܳܢܳܝܬܳܐ: ܘܟܰܕ ܡܶܬܥܰܠܶܝܢܰܢ ܠܥܶܠܺܝܬܳܐ ܚܕܰܬܳܐ. ܕܠܰܝܬ ܒܳܗ̇ ܬܽܘܩ̈ܠܳܬܳܐ: ܟܰܕ ܩܳܒܥܺܝܢܰܢ ܒܢܰܦ̈ܫܳܬܰܢ ܬܰܪܥܺܝܬܳܐ ܚܕܰܬܳܐ: ܟܰܕ ܗܳܘ̇ܶܝܢܰܢ ܟܽܠܰܢ ܚܕܳܐ ܥܺܕܬܳܐ ܚܕܰܬܳܐ. ܟܰܕ ܟܽܠܰܢ ܡܶܫܬܰܘܕܥܺܝܢܰܢ ܢܰܗܺܝܪܳܐܺܝܬ ܕܗ̣ܺܝ ܐܺܝܬܶܝܗ̇ ܠܰܡܫܺܝܚܳܐ ܟܰܠܬܳܐ ܚܕܰܬܳܐ: ܘܒܰܕܓܽܘܢ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܐܰܝܟܰܢܳܐ ܕܬܶܥܒܶܕ ܠܰܢ ܡ̣ܶܢ ܥܰܬܺܝ̈ܩܶܐ ܚܰܕ̈ܬܶܐ: ܘܡ̣ܶܢ ܥܰܬܺܝܩܽܘܬܳܐ ܢܕܺܝܕܬܳܐ ܕܰܚܡܺܝܪܳܐ ܥܰܬܺܝܩܳܐ ܬܚܰܪܰܪ ܠܰܢ. ܘܡ̣ܶܢ ܕܽܘܒܳܪ̈ܶܐ ܫܟܺܝܪ̈ܶܐ ܘܚܽܘ̈ܫܳܒܶܐ ܪ̈ܰܦܝܶܐ ܕܒܰܪܢܳܫܳܐ ܥܰܬܺܝܩܳܐ ܬܫܰܘܙܶܒ ܠܰܢ: ܘܰܥܒܶܕ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܡܳܐܢ̈ܶܐ ܚܰܕ̈ܬܶܐ ܘܰܕܫܳܘܶܝܢ ܠܚܽܘܕܳܬܳܐ ܓܡܺܝܪܳܐ ܘܥܳܠܡܳܐ ܗ̇ܰܘ ܚܰܕܬܳܐ. ܘܫܰܟܶܢ ܠܰܢ ܒܗ̇ܰܘ ܥܳܠܡܳܐ ܓܰܠܝܽܘܬ ܐܰܦ̈ܶܐ ܘܰܒܗܳܢܳܐ ܥܳܠܡܳܐ ܡܶܬܢܰܘܰܠܳܢܳܐ ܫܰܟܶܢ ܠܰܢ ܚܽܘܣܳܝܳܐ ܘܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ: ܘܰܠܚܳܝܳܐ ܕܟܽܠܗܶܝܢ ܠܐܴ ܢܳܡܽܘܣܳܝ̈ܘܳܬܰܢ: ܐܰܝܠܶܝܢ ܕܡܶܢܰܢ ܐܶܣܬܥܰܪ̈ܝ ܒܨܶܒܝܳܢܳܐ ܘܰܕܠܐܴ ܒܨܶܒܝܳܢܳܐ ܒܺܝܕܰܥܬܳܐ ܘܰܕܠܐܴ ܒܺܝܕܰܥܬܳܐ. ܘܰܚܢܰܢ ܘܥܰܢܺܝ̈ܕܰܝܢ ܢܶܫܬܘܶܐ ܠܩܰܘܡܳܐ ܗ̇ܳܝ ܝܰܡܺܝܢܳܝܳܐ: ܘܰܠܚܽܘܠܛܳܢܳܐ ܕܥܰܡ ܣܺܝ̈ܥܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܒܰܓܢܽܘܢܳܐ ܗ̇ܰܘ ܕܠܐܴ ܥܳܒ̇ܰܪ: ܘܠܐܴ ܡܶܫܬܪܶܐ: ܘܰܒܚܰܝ̈ܶܐ ܗ̇ܳܢܽܘܢ ܕܠܐܴ ܣܳܐܒܶܝܢ: ܙܡܺܝ̣̈ܢܶܐ ܐܰܝܠܶܝܢ ܕܡܶܬܓܰܘܣܺܝܢ ܒܗܽܘܢ ܘܥܰܡܗܽܘܢ ܘܒܰܝܢܳܬܗܽܘܢ ܢܣܩܰ ܶܠܳܟ ܫܽܘܒܚܳܐ ܠܐܴ ܡܶܬܦܰܣܩܳܢܳܐ ܘܩܽܘܠܳܣܳܐ ܠܐܴ ܡܶܬܥܰܟܪܳܢܳܐ ܘܬܰܘܕܺܝܬܳܐ ܠܐܴ ܡܰܘܦܝܳܢܺܝܬܳܐ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܒܰܟܝܳܢܶܗ ܘܝܳܗܽܘܒܳܐ ܕܚܰܝ̈ܶܐ ܟܝܳܢܳܐܺܝܬ: ܠܗ̇ܰܘ ܓܰܢ̱ܒܳܪܳܐ ܕܰܢܚ̣ܶܬ ܠܒܶܝܬ ܡܺܝ̈ܬܶܐ ܓܰܢ̱ܒܳܪܳܐܺܝܬ ܘܩܳܡ ܡ̣ܶܢ ܩܰܒܪܳܐ ܦܰܐܝܽܘܬ ܐܠܰܗܳܐܺܝܬ: ܘܰܐܩܺܝܡ ܥܰܡܶܗ ܠܐܴܕܳܡ ܪܺܝܫ ܓܒܺܝܠܬܰܢ ܡܳܪܳܢܳܐܺܝܬ ܠܗ̇ܰܘ ܡܳܪܳܐ ܡܪܰܚܡܳܢܳܐ ܕܰܐܣܩܶܗ ܠܐܴܕܳܡ ܡ̣ܶܢ ܡܰܦܽܘܠܬܶܗ: ܘܡ̣ܶܢ ܝܰܡܺܝܢ ܐܰܒܽܘܗܝ ܒܫܽܘܒܚܳܐ ܐܰܘܬܒܶܗ ܗܕܺܝܪܳܐܺܝܬ: ܘܗܳܐ ܡܶܬܒܰܣܰܡ ܒܛܽܘ̈ܒܶܐ ܛܽܘܒ̈ܬܳܢܶܐ ܕܡܰܠܟܽܘܬܳܐ ܓܰܐܝܳܐܺܝܬ ܕܠܶܗ ܠܡܳܪܝܳܐ ܡܳܪܰܢ ܕܚܳܢܶܗ ܘܦܰܪܩܶܗ ܠܐܴܕܳܡ ܒܪ̈ܰܚܡܰܘܗܝ ܡܶܬܚܰܢܳܢܳܐܺܝܬ ܕܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܠܳܟ ܣܳܓܕܳܐ ܘܰܡܫܰܒܚܳܐ ܡܰܪܥܺܝܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܪܳܥܝܳܐ ܛܳܒܳܐ ܕܶܐܬܢܟܶܣ ܚܠܳܦܰܝܢ ܘܰܒܡܰܘܬܶܗ ܚܝܳܬ݀ ܡܺܝܬܽܘܬܰܢ ܡܰܘܕܶܝܢܰܢ ܠܳܟ ܡܳܪܰܢ ܕܗܳܟܰܢܳܐ ܗ̣ܘܳܐ ܨܶܒܝܳܢܳܐ ܩܕܳܡܰܝܟ ܕܬܶܚܣܟܰܢ ܡ̣ܶܢ ܕܶܒܚ̈ܶܐ ܕܚܰܝ̈ܘܳܬܳܐ ܚܰܪ̈ܳܫܳܬܳܐ ܘܰܢܣܰܝ̈ܳܐ ܕܰܕܡܳܐ: ܘܰܢܕܰܒܰܚ ܠܳܟ ܬܰܘܕܺܝܬܳܐ ܕܟܺܝܬܳܐ ܘܰܡܩܰܒܰܠܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܥܰܡ ܥܶܛܪܳܐ ܕܒܶܣ̈ܡܶܐ ܘܪܺܝܚܳܐ ܗܰܢܺܝܳܐܐ: ܐܰܣܓܳܐ ܡܳܪܝ ܫܰܝܢܳܗ̇ ܕܥܺܕܬܳܐ ܕܺܝܠܳܟ ܩܰܕܺܝܫܬܳܐ ܩܰܐܬܽܘܠܺܝܩܺܝ ܘܰܫܠܺܝܚܳܝܬܳܐ ܗ̇ܳܝ ܕܰܩܢ̣ܰܝܬ ܒܰܕܡܳܐ ܕܺܝܠܳܟ ܝܰܩܺܝܪܳܐ ܘܰܦ̣ܪܰܩܬ ܒܚܰܝܠܐܴ ܕܰܨܠܺܝܒܳܟ ܙܰܟܳܝܳܐ. ܘܡܰܟܶܟ ܩܕܳܡ ܬܰܪ̈ܥܶܝܗ̇ ܠܡܰܠܟ̈ܶܐ ܛܪ̈ܽܘܢܶܐ ܘܰܐܚܺܝ̣̈ܕܰܝ ܫܽܘܠܛܳܢܳܐ ܕܥܳܠܡܳܐ ܗܳܢܳܐ: ܘܛܰܪ ܠܘܳܬܳܗ̇ ܫܽܘܘ̈ܕܳܝܰܝܟ ܫܰܪܺܝܪ̈ܶܐ ܘܠܐܴ ܕܰܓ̈ܳܠܐܷ ܥܕܰܡܳܐ ܠܫܽܘܠܳܡܳܐ ܕܺܝܠܶܗ ܕܥܳܠܡܳܐ: ܘܶܐܬܪܰܥܳܐ ܒܰܨܠܰܘ̈ܳܬܳܐ ܕܪ̈ܺܝܫܰܝ ܟܳܗ̈ܢܶܐ ܘܟܳܗ̈ܢܶܐ ܓܒܰܝ̈ܳܐ: ܘܚܰܣܳܐ ܡܰܪ̈ܥܝܳܬܳܐ ܕܺܝܠܗܽܘܢ ܘܢܰܛܰܪ ܬܳܐܓܳܐ ܕܡܰܠܟܳܐ ܡܗܰܝܡܢܳܐ ܘܰܐܚܺܝܕ ܓܰܘܣܳܐ ܒܰܨܠܺܝܒܳܐ ܕܺܝܠܳܟ ܙܰܟܳܝܳܐ: ܘܰܐܒܪܶܟ ܩܕܳܡܰܘܗܝ ܠܰܒܥܶܠܕ̈ܒܳܒܰܘܗܝ ܘܰܥܒܶܕ ܐܶܢܽܘܢ ܟܽܘܒܫܳܐ ܬܚܶܝܬ ܪ̈ܶܓܠܰܘܗܝ ܘܒܰܪܶܟ ܟܠܺܝܠܐܴ ܕܫܰܢ̱ܬܳܐ ܒܛܰܝܒܽܘܬܳܟ ܘܢܰܛܰܪ ܦܺܐܪ̈ܶܐ ܘܳܐܕܫ̈ܶܐ ܕܰܐܪܥܳܐ ܡ̣ܶܢ ܢܶܟܝ̈ܳܢܶܐ ܘܫܰܒ̈ܛܶܐ ܘܡܰܚܘ̈ܳܬܳܐ: ܘܰܗܘܺܝ ܡܳܪܝܳܐ ܥܳܕܽܘܪܳܐ ܠܐܱܠܺܝ̣̈ܨܶܐ ܘܒܶܝܬ ܓܰܘܣܳܐ ܠܰܡܥ̈ܳܩܶܐ ܘܰܡܪܰܘܚܳܢܳܐ ܠܰܡܛܰܪ̈ܦܶܐ ܙܳܝܽܘܢܳܐ ܠܰܣܢܺܝ̈ܩܶܐ: ܘܬܶܥܽܘܠܝ ܡܳܪܝܳܐ ܩܕܳܡܰܝܟ ܐܶܢܰܩܬܳܐ ܘܰܓܥܳܬܳܐ ܕܐ̱ܢܳܫ̈ܳܐ ܛܠܺܝ̣̈ܡܶܐ: ܘܡ̣ܶܢ ܬܶܐܢܚ̈ܳܬܳܐ ܕܰܐܝܠܶܝܢ ܕܰܐܣܺܝܪܺܝܢ ܘܰܫܒܶܝܢ ܠܐܷ ܬܶܟܠܐܷ ܪ̈ܰܚܡܰܝܟ: ܘܶܐܬܬܥܺܝܪ ܡܳܪܝܳܐ ܘܩܽܘܡ ܠܰܓܥܳܬܳܐ ܕܰܫܚܺܝ̈ܩܶܐ ܘܡ̣ܶܢ ܒܶܝܬ ܡܰܚܫܽܘ̈ܠܐܷ ܕܠܐܴ ܐܶܢܽܘܢ ܘܕܰܒܰܪ ܐܶܢܽܘܢ ܠܰܠܡܺܐܢܳܐ ܕܣܽܘܟܳܝܳܐ ܕܺܝܠܗܽܘܢ: ܘܐܶܬܥܰܗܕ ܡܳܪܝܳܐ ܒܛܰܝܒܽܘܬܳܟ ܠܢܰܦ̈ܫܳܬܳܐ ܕܰܐܒܳܗܰܝ̈ܢ ܕܰܐܚܰܝ̈ܢ ܘܰܕܪ̈ܰܒܳܢܰܝܢ ܐܰܝܠܶܝܢ ܕܩܰܕܶܡܘ ܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ. ܘܠܐܱܬܪܳܐ ܕܢܽܘܗܪܳܐ ܘܰܕܢܰܘܚܳܐ: ܒܳܟ ܢܶܨܛܰܝ̈ܒܳܢ ܘܢܶܬܟܰܢ̈ܫܳܢ: ܘܰܠܘܰܥܕܳܐ ܕܚܰܝ̈ܶܐ ܢܶܬܡܰܢ̈ܥܳܢ: ܘܰܠܟܽܠ ܕܰܥܢ̣ܰܕ ܒܚܰܪܒܳܐ: ܐܰܘ ܒܫܶܒܝܳܐ: ܐܰܘ ܒܟܰܦܢܳܐ: ܐܰܘ ܒܛܽܘܪܳܦܳܐ: ܐܰܘ ܒܟܽܠ ܐܰܢܰܢܩܺܝ ܐܰܝܕܳܐ ܕܗ̣ܺܝ: ܟܰܕ ܡܰܘܕܶܐ ܒܚܰܫܰܝ̈ܟ ܘܣܳܓܶܕ ܠܰܨܠܺܝܒܳܟ: ܡܰܢܰܥܳܝܗܝ ܠܰܓܢܽܘܢܳܟ ܡܠܐܷ ܚܰܝ̈ܶܐ ܘܰܐܫܘܳܝܗܝ ܠܡܰܠܟܽܘܬܳܟ ܕܒܰܫܡܰܝܳܐ: ܐܰܝܟܰܢܳܐ ܕܡ̣ܶܢ ܚܰܝ̈ܶܐ ܘܡܺܝ̈ܬܶܐ ܬܶܫܬܰܒܰܚܝ ܐܠܰܗܽܘܬܳܟ: ܘܢܰܣܶܩ ܫܽܘܒܚܳܐ ܠܡܳܪܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܨܦܪܐ

 

ܡܫܺܝܚܳܐ ܐܠܰܗܳܐ ܕܩܳܡ ܡ̣ܶܢ ܩܰܒܪܳܐ ܒܚܰܝܠܐܴ ܕܙܳܟܽܘܬܳܐ ܘܚܰܕܺܝ ܒܥܺܐܕܳܐ ܕܰܩܝܳܡܬܶܗ ܠܢܶܫ̈ܶܐ ܢܰܟ̈ܦܳܬܳܐ: ܘܰܠܓܽܘܕܳܐ ܕܰܫܠܺܝܚܽܘܬܳܐ ܘܪܰܥܺܝ ܠܐܱܒܽܘܗܝ ܕܥܰܠ ܐ̱ܢܳܫܽܘܬܳܐ ܪܓܺܝܙ ܗ̣ܘܳܐ ܘܰܐܠܶܦ ܠܰܢ ܕܰܒܟܽܠܙܒܰܢ ܢܩܰܪܶܒ ܠܶܗ ܨܠܰܘ̈ܳܬܳܐ ܘܢܶܫܒܽܘܩ ܠܐܱܚܰܝ̈ܢ: ܢܶܬܒܥܺܝܘܗܝ ܫܽܘܒܩܳܢܳܐ ܕܟܽܠܗܶܝܢ ܫܽܘܪ̈ܥܳܬܢܰ ܕܢܶܫܟܰܚ ܪ̈ܰܚܡܶܐ ܒܝܽܘܡ ܕܺܝܢܳܐ ܡܳܐ ܕܡܶܬܓܰܠܝ̈ܳܢ ܟܰܣ̈ܝܳܬܳܐ ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܐܰܡܺܝܢܬܳܐ ܕܠܐܴ ܫܶܠܝܳܐ ܘܬܰܘܕܺܝܬܳܐ ܕܟܺܝܬܳܐ ܕܠܐܴ ܡܰܘܦܝܳܐ: ܘܗܶܕܪܳܐ ܠܐܴ ܡܟܰܬܡܳܐ ܘܩܽܘܠܳܣܳܐ ܠܐܴ ܡܕܳܪܡܳܐ ܢܶܫܬܘܶܐ ܕܢܰܣܶܩ ܒܩܳܠܐܴ ܕܠܐܴ ܫ̇ܳܬܶܩ: ܠܐܱܒܳܐ ܡܪܰܚܡܳܢܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ ܘܠܰܒܪܳܐ ܚܰܢܳܢܳܐ ܕܶܐܨܛܠܶܒ ܡܶܛܽܠܳܬܰܢ ܘܰܠܪܽܘܚܳܐ ܚܰܝܽܘܣܬܳܢܳܐ ܕܫܰܡܠܺܝ ܘܰܓܡ̣ܰܪ ܚܽܘܣܳܝܰܢ ܐܰܒܳܐ ܓܢܺܝܙܳܐ ܕܠܐܴ ܡܶܫܬܰܚܠܰܦ ܘܰܒܪܳܐ ܐܺܝܬܝܳܝܳܐ ܕܠܐܴ ܡܶܬܥܰܩܰܒ: ܘܪܽܘܚܳܐ ܕܠܐܴ ܡܶܬܬܰܪܓܰܡ. ܐܰܒܳܐ ܕܠܐܴ ܝܺܠܺܝܕ ܘܰܐܘܠܶܕ ܘܰܒܪܳܐ ܕܺܝܠܺܝܕ ܘܠܐܴ ܐܰܘܠܶܕ ܘܪܽܘܚܳܐ ܩܰܕܺܝܫܳܐ ܕܢܳܦܶܩ ܡ̣ܶܢ ܐܰܒܳܐ: ܘܢܳܣܶܒ ܡ̣ܶܢ ܒܪܳܐ: ܘܠܐܴ ܝܺܠܺܝܕ ܘܠܐܴ ܐܰܘܠܶܕ: ܚܰܕ ܟܝܳܢܳܐ ܚܰܕ ܫܽܘܠܛܳܢܳܐ ܚܰܕ ܐܽܘܚܕܳܢܳܐ: ܚܰܕ ܚܰܝܠܐܴ: ܚܰܕ ܐܺܝܩܳܪܳܐ: ܚܰܕ ܨܶܒܝܳܢܳܐ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܰܢܛܺܝܩܳܝܳܐ ܡܫܺܝܚܳܐ ܐܶܬܰܐܘܳܣ ܗܶܠܝܳܘܣ ܪܰܒܳܐ ܕܙܰܕܺܝܩܽܘܬܳܐ: ܘܰܠܥܶܠ ܡ̣ܶܢ ܟܽܠܳܗ̇ ܥܒܺܝܛܽܘܬܳܐ ܕܚܶܟܡܬܳܐ ܕܚܰܟܺܝ̈ܡܶܐ ܘܣܰܟܽܘܠܬܳܢܽܘܬܳܐ ܕܣܰܟܽܘܠܬܳܢ̈ܶܐ ܐܺܝܬܶܝܗ̇ ܡܕܰܒܪܳܢܽܘܬܳܟ ܦܰܐܝܰܬ݀ ܠܐܱܠܳܗܳܐ ܬܳܚܒܺܝܢ ܓܶܝܪ ܡܶܢܳܗ̇ ܡܽܘܫ̈ܚܳܬܳܐ ܓܪ̈ܰܡܰܐܛܺܝܩܳܝܳܬܳܐ ܘܥܳܡ̇ܶܛ  ܡܶܢܳܗ̇ ܗܰܘܢܳܐ ܘܡܰܕܥܳܐ ܕܫܰܦܺܝܪܽܘܬ ܐܰܪܡܽܘܢܺܝܰܐ ܘܪܰܘܪܶܒ ܡ̈ܶܠܐܷ ܪܽܘܛܽܘܪ̈ܺܝܩܳܝܳܬܳܐ ܘܡܶܬܡܰܚܠܺܝܢ ܡܶܢܳܗ̇ ܬܰܫܥܝ̈ܳܬܳܐ ܕܶܐܣܛܪܽܘܠܽܘܓܽܘ ܕܶܐܣܛܪܽܘܢܽܘܡܽܘ ܗܳܠܶܝܢ ܕܰܩܢܶܝܢ ܝܺܕܰܥܬܳܐ ܠܘܳܬ ܩܒܺܝܥܽܘܬܳܐ: ܘܡܰܘܙܰܠܬܳܐ ܕܡܶܬܬܙܺܝܥܳܢܽܘܬܳܐ ܗܳܕܶܐ ܩܺܝܩܠܽܘܣܳܝܬܳܐ ܘܠܐܴܝ̇ܶܢ ܡܶܢܳܗ̇ ܟܽܠܗܽܘܢ ܣܽܘܦܺܝ̈ܣܛܶܐ ܗ̇ܳܢܶܘܢ ܕܰܪܗܺܝܛܪܽܘܬܳܐ ܣܰܓܺܝܐܬܳܐ ܘܰܣܩܺܝܠܽܘܬ ܡܰܡܠܠܐܴ ܡܰܫܦܥܺܝܢ ܘܰܪܦܶܝܢ ܟܰܕ ܠܗܰܠ ܡܶܢܳܗ̇ ܠܪܽܘܚܩܳܐ ܣܳܝܡܺܝܢ ܚܽܘܫ̈ܳܒܶܐ ܕܰܐܝܠܶܝܢ ܕܰܒܡܽܘܣܺܝܩܪܳܝܽܘܬܳܐ ܡܶܨܛܰܢܥܺܝܢ ܘܡܶܬܚܰܫܒܺܝܢ: ܘܰܟܪܶܝܢ ܡܶܢܳܗ̇ ܠܶܫܳܢ̈ܶܐ ܡܰܠܟܺܝܣܛܰܝܰܐ ܕܗ̇ܳܢܽܘܢ ܕܰܐܝܠܶܝܢ ܕܐܰܢܛܺܝܦܰܛܺܝܩܳܐܺܝܬ ܠܘܳܬܳܗ̇ ܩܳܝܡܺܝܢ: ܘܗܰܓܳܓܽܘܬܳܐ ܠܳܗ̇ ܡܫܰܡܗܺܝܢ. ܘܰܫܚܺܝܡܺܝܢ ܡܶܢܳܗ̇ ܐܰܝܠܶܝܢ ܕܠܽܘܓܺܝܩܳܐܺܝܬ ܘܪܽܘܛܽܘܪܺܝܩܳܐܺܝܬ ܐܰܝܟ ܕܰܠܡܰܕܪܳܟܽܘ ܠܳܗ̇ ܒܳܗ̇ ܡܠܰܓܠܓܺܝܢ: ܘܰܛܦܺܝܢܽܘܣܺܝܢ ܡܶܢܳܗ̇ ܐܰܝܠܶܝܢ ܕܰܦܪܽܘܛܺܐܣܺܝܣܳܐܺܝܬ ܒܳܥܶܝܢ ܕܰܒܦܪܽܘܣܕܺܝܩܽܘܪܺܝܡܳܘܣ ܢܶܚܫܒܽܘܢܶܝܗ̇ ܘܰܐܠܶܝܺܝܢ ܡܶܢܳܗ̇ ܡܰܕ̈ܥܶܐ ܕܗ̇ܳܢܽܘܢ ܕܰܒܩܽܘܛܪ̈ܶܐ ܕܽܐܘܡܳܢ̈ܘܳܬܳܐ ܘܰܫܪ̈ܳܝܶܐ ܕܣܽܘܠܽܘܓܺܝܣ̈ܡܽܘܣܳܝܶܐ ܥܰܡܶܗ ܡܥܰܪܙܠܺܝܢ ܕܰܢܚܰܦܽܘܢ ܠܐܻܝܡܳܡܳܗ̇: ܘܟܰܕ ܒܗܳܠܶܝܢ ܘܕܰܐܝܟ ܗܳܠܶܝܢ ܗܳܢܳܐ ܟܽܠܶܗ: ܘܝܰܬܺܝܪ ܡܶܢܳܗ̇ ܐܠܰܗܽܘܬܳܟ ܘܰܡܕܰܒܪܳܢܽܘܬܳܟ ܪܳܡܳܐ ܟܰܕ ܠܐܴ ܡܶܬܕܳܪܟܳܐ ܐܳܦܠܐܴ ܡܶܬܥܰܩܒܳܐ ܘܠܐܴ ܡܶܬܒܰܨܝܳܐ ܐܳܦ ܠܐܴ ܡܶܬܕܰܪܫܳܐ ܐܰܚܒܽܘܟ ܟܺܐܢ̈ܶܐ ܘܙܰܕܺܝ̈ܩܶܐ ܘܰܫܦ̣ܰܪܘ ܠܳܟ ܒܕܽܘܒܳܪ̈ܰܝܗܽܘܢ: ܗܳܒܶܝܠ ܩܰܪܶܒ ܠܳܟ ܫܡܰܝ̈ܳܢܶܐ ܘܒܽܘܟܪ̈ܶܐ ܕܥܳܢ̈ܶܗ: ܘܩܰܒ̣ܶܠܬ ܐܶܢܶܝܢ ܡܶܢܶܗ ܨܶܒܝܳܢܳܐܺܝܬ. ܘܰܐܢܽܘܫ ܐܰܝܟ ܦܳܪܽܘܫܳܐ ܫܰܒܚܳܟ ܘܰܐܠܶܦ ܬܶܫܒܽܘܚܬܳܐ ܠܰܒ̈ܢܰܝ ܕܳܪܶܗ ܬܰܩܢܳܐܺܝܬ. ܚܢܽܘܟ ܥܰܙܺܝ ܒܫܽܘܦܪ̈ܶܐ ܐܠܰܗܳܝ̈ܶܐ ܘܠܰܫܡܰܝܳܐ ܐܰܣܶܩܬܳܝܗܝ ܡܪܰܡܪܡܳܐܺܝܬ: ܢܽܘܚ ܟܺܐܢܳܐ ܕܰܚܠܶܦܬܳܐ ܗ̣ܘܳܐ ܕܥܳܠܡܳܐ: ܘܡܰܠܟܺܝܙܕܶܩ ܗ̇ܰܘ ܟܽܘܡܪܳܐ ܪܰܒܳܐ ܕܩܰܪܶܒ ܠܳܟ ܠܰܚܡܳܐ ܘܚܰܡܪܳܐ ܐ̱ܪܳܙܳܢܳܐܺܝܬ. ܘܰܐܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܕܰܫܦ̣ܰܪܘ ܠܳܟ ܒܕܽܘܒܳܪ̈ܰܝܗܽܘܢ ܬܪܺܝܨܳܐܺܝܬ. ܘܺܐܝܽܘܒ ܙܰܕܺܝܩܳܐ ܕܶܐܙܕܰܝܰܢ ܠܽܘܩܒܰܠ ܣܳܛܳܢܳܐ ܘܚܰܝܠܰܘ̈ܳܬܶܗ ܚܺܝܨܳܐܺܝܬ: ܝܰܘܣܶܦ ܟܺܐܢܳܐ ܕܰܪܕܳܐ ܒܽܐܘܪܚܳܐ ܕܙܰܕܺܝܩܽܘܬܳܐ ܟܰܫܺܝܪܳܐܺܝܬ ܡܽܘܫܶܐ ܪܰܒܳܐ ܕܰܐܣܠܺܝ ܗ̣ܘܳܐ ܠܣܺܝ̈ܡܳܬܳܐ ܕܟܽܠܳܗ̇ ܡܶܨܪܶܝܢ ܘܒܳܟ ܠܚܽܘܕܰܝܟ ܨܒ̣ܳܐ ܦܳܪܽܘܫܳܐܺܝܬ. ܦܺܝܢܚܶܣ ܕܰܩ̣ܛܰܠ ܠܙܰܢܳܝ̈ܶܐ ܘܚܰܘܺܝ ܛܢܳܢܶܗ ܠܳܟ ܝܰܨܺܝܦܳܐܺܝܬ: ܝܶܫܽܘܥ ܒܰܪܢܽܘܢ ܒܥܶܠܫܡܳܟ ܕܰܐܥܒ̣ܰܪ ܠܥܰܡܳܐ ܠܐܱܪܥܳܐ ܕܡܽܘܠܟܳܢܳܐ ܐ̱ܪܳܙܳܢܳܐܺܝܬ ܢܰܦܬܰܚ ܕܰܢܕܰܪ ܠܒܰܪܬܶܗ ܢܶܕܪܳܐ ܕܶܒܚܳܗ̇ ܠܳܟ ܩܽܘܪܒܳܢܳܐ ܡܩܰܒܠܐܴ ܙܰܕܺܝܩܳܐܺܝܬ ܒܳܪܳܩ ܘܓܶܕܥܽܘܢ ܕܰܡܠܶܝܢ ܗ̣ܘܰܘ ܗܰܝܡܳܢܽܘܬܳܐ ܙܰܗܝܳܐܺܝܬ ܢܕܺܝܪ̈ܶܐ ܫܶܡܫܽܘܢ ܘܰܫܡܽܘܐܶܝܠ ܕܰܐܦܶܩ̣ܘ ܚܰܝܰܝ̈ܗܽܘܢ ܢܙܺܝܪܳܐܺܝܬ ܐܠܶܝܳܐ ܘܶܐܠܺܝܫܳܥ ܬܰܠܡܺܝܕܶܗ ܕܠܰܘ ܠܢܰܦܫܗܽܘܢ ܚܝ̣ܰܘ: ܐܶܠܐܴ ܠܳܟ ܚܰܐܝܺܝܢ ܗ̣ܘܰܘ ܐܰܡܺܝܢܳܐܺܝܬ. ܢܒܺܝܳܐ ܙܰܗܝܳܐ ܐܶܫܰܥܝܳܐ ܕܰܒܚܶܙܘ̈ܳܢܶܐ ܐܰܥܬܰܪܬܳܝܗܝ ܡܰܓܳܢ ܥܰܬܺܝܪܳܐܺܝܬ ܡܰܓܳܢ ܥܰܬܺܝܪܳܐܺܝܬ ܘܶܐܪܰܡܝܳܐ ܢܒܺܝܳܐ ܕܰܠܚܽܘܪܒܳܐ ܢܳܦܶܩ ܗ̇ܘܳܐ ܟܽܠ ܝܰܘܡܳܐ ܠܚܽܘܕܳܐܺܝܬ: ܚܶܙܰܩܝܳܐ ܘܝܽܘܫܺܝܳܐ ܕܰܪܕܰܘ ܩܕܳܡܰܝܟ ܐܰܝܟ ܨܶܒܝܳܢܳܟ ܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ ܫܰܦܝܳܐܺܝܬ ܘܚܰܙܩܺܝܐܶܠ ܕܡܶܬܩܰܦܰܚ ܗ̣ܘܳܐ ܡ̣ܶܢ ܥܰܡܶܗ ܘܡ̣ܶܢ ܢܒܺܝܽܘܬܳܐ ܠܐܴ ܫ̇ܳܬܶܩ ܗ̣ܘܳܐ ܚܺܝܨܳܐܺܝܬ ܕܳܢܺܝܐܶܝܠ ܪܓܺܝܓܳܐ ܕܰܒܠܰܡ ܦܽܘ̈ܡܶܐ ܕܚܰܝ̈ܘܳܬܳܐ ܐܠܰܗܳܐܺܝܬ ܘܚܰܢܰܢܝܳܐ ܘܥܰܙܪܝܳܐ ܘܡܺܝܫܳܐܶܝܠ ܒܰܪܶܟܘ ܠܳܟ ܒܰܐܬܽܘܢܳܐ ܫܓܺܝܪܳܐ ܕܢܽܘܪܳܐ ܠܒܺܝܒܳܐܺܝܬ. ܘܟܰܕ ܒܗܳܠܶܝܢ ܬܳܗܰܪ ܗ̣ܘܳܐ ܥܳܠܡܳܐ ܕܚܽܘܒܳܐ ܣܰܓܺܝܳܐܐ ܐܰܚܒܽܘܟ: ܘܡܶܬܕܰܡܰܪ ܗ̣ܘܳܐ ܕܰܟܡܳܐ ܣܰܝܒ̣ܰܪܘ ܡܶܛܽܠܳܬܳܟ ܟܰܕ ܐܳܡ̇ܰܪ ܗ̣ܘܳܐ. ܚܰܕ ܕܡܶܗ ܐܶܫܬܰܦܰܥ ܥܰܠ ܩܽܘܪܒܳܢܶܗ: ܐ̱ܚܪܺܢܳܐ ܗܰܠܶܟ ܒܙܰܕܺܝܩܽܘܬܳܐ ܘܰܒܕܰܟܝܽܘܬܳܐ ܚܰܕ ܦܟ̣ܰܪ ܠܰܒܪܶܗ ܩܕܳܡ ܣܰܟܺܝܢܳܐ: ܘܰܐ̱ܚܪܺܢܳܐ ܠܳܒ̇ܶܫ ܟܽܘܡܪܽܘܬܳܐ ܕܡܰܠܝܳܐ ܙܰܗܝܽܘܬܳܐ: ܚܰܕ ܡܶܛܽܠ ܡܳܪܝܳܐ ܢܦ̣ܰܩ ܡ̣ܶܢ ܐܰܬܪܶܗ: ܐ̱ܚܪܺܢܳܐ ܣܰܝܒܰܪ ܚܰܫ̈ܶܐ ܒܰܚܘܺܝܚܽܘܬܳܐ. ܚܰܕ ܛܠܺܝܡ ܘܰܚܒܺܝܫ ܘܰܡܠܐܷ ܟܢܺܝܟܽܘܬܳܐ ܘܰܐ̱ܚܪܺܢܳܐ ܡܠܐܷ ܛܰܢܳܢܳܐ ܕܕܰܟܝܽܘܬܳܐ: ܚܰܕ ܠܒܺܝܫ ܙܰܕܺܝܩܽܘܬܳܐ ܘܕܳܒܰܚ ܠܺܝܚܺܝܕܳܝܬܶܗ ܘܰܐ̱ܚܪܺܢܳܐ ܣܳܒܶܠ ܪܕܺܝܦܽܘܬܳܐ: ܚܰܕ ܡܚܰܘܶܐ ܗ̣ܘܳܐ ܨܶܡܚܳܐ: ܘܰܐ̱ܚܪܺܢܳܐ ܡܩܰܪܶܒ ܨܠܰܘ̈ܳܬܳܐ. ܚܰܕ ܐܶܬܢܙܰܪ ܢܙܺܝܪܽܘܬܳܐ ܘܰܐ̱ܚܪܺܢܳܐ ܢ̣ܛܰܪ ܒܬܽܘܠܽܘܬܳܐ: ܚܰܕ ܐܶܬܶܐܠܶܨ: ܐ̱ܚܪܺܢܳܐ ܡܺܝܬ ܒܩܰܝܣܳܐ ܚܰܪܺܝܦܳܐ ܕܰܒܥܶܠܕܒܳܒܽܘܬܳܐ: ܚܰܕ ܦ̇ܳܗܶܐ ܗ̣ܘܳܐ ܒܡܰܕܒܪܳܐ ܒܰܡܓܰܙܝܽܘܬܳܐ. ܘܟܰܕ ܒܗܳܠܶܝܢ ܘܕܰܐܟܘܳܬܗܽܘܢ ܬܳܗ̇ܪܳܐ ܗܘܳܬ݀ ܟܽܠܳܗ̇ ܒܪܺܝܬܳܐ: ܢܒܰܓ ܠܶܗ ܚܽܘܒܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܕܠܐܴ ܦܳܚܶܡ ܠܶܗ ܚܽܘܒܳܐ ܕܗܳܠܶܝܢ ܕܰܣܥ̣ܰܪܘ ܩܕܳܡܰܝܟ ܒܳܛܶܠ ܬܶܗܪܳܐ ܕܚܽܘܒܳܐ ܕܗ̇ܳܢܽܘܢ ܘܶܐܬܒܰܩܺܝ ܗܰܘܢܳܐ ܒܚܽܘܒܶܗ ܕܰܐܒܽܘܟ: ܘܕܺܝܠܳܟ ܘܰܕܪܽܘܚܳܟ ܩܰܕܺܝܫܳܐ: ܕܰܐܚܒܽܘܟ ܓܶܝܪ ܟܰܕ ܠܐܴ ܐܰܣܟ̣ܶܠܬ ܘܰܐܚܶܒܬܳܢ ܒܳܬܰܪ ܕܰܐܪܫܰܥܢܰܢ: ܘܰܪܚܶܡܬܢܳ ܒܳܬܰܪ ܕܰܚܛܰܝܢܰܢ: ܗܳܠܶܝܢ ܟܽܠܗܶܝܢ ܕܚܰܝܳܒ ܗ̣ܘܳܐ ܐܳܕܳܡ ܐܰܢ̱ܬ ܦ̣ܪܰܥܬ: ܘܠܰܢܒܺܝܽܘܬܶܗ ܕܰܐܒܳܐ ܕܺܝܠܳܟ ܓܡ̣ܰܪܬ ܕܡܶܕܶܡ ܕܠܐܴ ܛܶܠܡ̇ܶܬ ܡܦܰܢܶܐ ܗ̣ܘܰܝܬ ܫܰܡܠܺܝܬ: ܫ̣ܪܰܥ ܐܳܕܳܡ ܘܰܢܦ̣ܰܠ: ܥܒ̣ܰܪ ܥܰܠ ܦܽܘܩܕܳܢܳܐ: ܫ̣ܳܛ ܠܡܳܪܶܗ: ܫܡ̣ܰܥ ܗ̣ܘܳܐ ܠܢܳܟܽܘܠܶܗ: ܦܫ̣ܰܛ ܐܺܝܕܶܗ ܠܦܺܐܪܳܐ: ܣ̣ܳܡ ܪܶܓܠܶܗ ܒܦܰܚܳܐ: ܬܪܰܥ̣ ܣܝܳܓܶܗ ܕܢܳܡܽܘܣܶܗ: ܬܰܒܰܪ ܢܺܝܪܶܗ ܕܦܽܘܩܕܳܢܳܐ ܥܰܡܶܩ ܚܦ̣ܰܪ ܠܶܗ ܩܰܒܪܳܐ: ܦܬܰܚ ܬܰܪܥܳܐ ܠܡܰܘܬܳܐ ܝܰܥܢܳܐ: ܐܰܢ̱ܬ ܐܰܫܠܶܡ̣ܬ ܚܠܳܦܰܘܗܝ ܩܢܽܘܡܳܟ ܠܒܶܙܚܳܐ: ܝܰܗ̣ܒܬ ܦܰܓܪܳܟ ܠܩܽܘ̈ܦܳܚܶܐ ܦܫ̣ܰܛܬ ܚܰܨܳܟ ܠܰܦܪ̈ܳܓܶܠܐܷ: ܩܰܘܡܬܳܟ ܠܰܙܩܺܝܦܳܐ: ܐܺܝܕܰܝ̈ܟ ܠܨ̈ܶܨܶܐ: ܪ̈ܶܓܠܰܝܟ ܠܐܱܣܽܘܪ̈ܶܐ: ܘܪܺܝܫܳܟ ܠܰܟܠܺܝܠܐܴ ܕܟܽܘ̈ܒܶܐ. ܘܰܐܦܰܝ̈ܟ ܠܪܽܘܩܳܐ ܣܰܢܝܳܐ: ܦܽܘܡܳܟ ܠܚܰܠܐܴ ܘܰܡܪܳܪ̈ܶܐ. ܐܶܬܕܰܩܰܪܬ ܒܕܰܦܢܳܟ ܒܪܽܘܡܚܳܐ: ܐܶܬܩܰܒ̣ܰܥܬ ܒܰܨܠܺܝܒܳܐ ܕܚܶܣܕܳܐ ܐܰܦܩ̣ܰܥܬ ܠܫܽܘ̈ܥܶܐ ܘܨܰܪܺܝܬ ܠܟܺܐܦ̈ܶܐ: ܘܠܐܱܦ̈ܰܝ ܬܰܪܥܳܐ ܕܗܰܝܟܠܐܴ ܣܰܕܶܩ̣ܬ ܠܐܱܪܥܳܐ ܐܰܪܥܶܠ̣ܬ ܘܰܐܙܺܝܥܬ: ܘܩܳܡ̣ܬ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܰܙܪܰܥ̣ܬ ܚܰܝ̈ܶܐ ܘܢܽܘܚܳܡܳܐ ܒܰܐܬܪܳܐ ܕܢܽܘܚܳܡܳܐ ܠܐܴ ܡܶܬܕܟܰܪ ܗ̣ܘܳܐ ܒܶܗ: ܘܡ̣ܶܢ ܚܶܫܽܘܟܳܐ ܐܰܦܶܩ̣ܬ ܠܰܛܡܺܝܪ̈ܰܝ ܒܕܰܚܺܝܚܳܐ: ܘܥܰܠ ܗܳܕܶܐ ܠܝܰܘܡܳܐ ܪܰܒܳܐ ܕܰܩܝܳܡܬܳܟ ܒܚܰܕܽܘܬܳܐ ܡܢܰܨܪܺܝܢܰܢ ܘܰܒܩܳܠܐܴ ܪܳܡܳܐ ܐܳܡܪܺܝܢܰܢ. ܕܩܳܡ ܐܠܰܗܳܐ ܡ̣ܶܢ ܩܰܒܪܳܐ ܒܚܰܝܠܐܴ ܘܙܳܟܽܘܬܳܐ: ܘܰܒܥܶܠܕ̈ܒܳܒܰܘܗܝ ܟܽܠܗܽܘܢ ܐܶܬܒܰܕܰܪܘ ܗ̣ܘܰܘ: ܡ̣ܶܢ ܫܶܡܥܶܗ ܕܰܐܪܗܶܒ ܐܶܢܽܘܢ: ܘܰܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܠܝܰܘܡܳܐ ܕܢܽܘܚܳܡܳܟ ܫܒܺܝܚܳܐ ܙܰܝܰܚ̣ܢܰܢ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܡܶܢܶܗ ܫܳܐܠܺܝܢܰܢ. ܠܰܟܠܺܝܠܐܴ ܕܫܰܢ̱ܬܳܐ ܢܒܰܪܶܟ ܒܛܰܝܒܽܘܬܶܗ: ܘܰܠܥ̈ܰܠܠܳܬܳܐ ܕܰܐܪܥܳܐ ܢܰܣܓܶܐ ܒܰܡܪܰܚܡܳܢܽܘܬܶܗ: ܘܰܠܩܰܫܺܝ̈ܫܶܐ ܢܢܰܗܰܪ ܘܰܢܚܰܟܶܡ: ܘܠܰܡܫܰܡ̈ܫܳܢܶܐ ܢܶܗܘܶܐ ܡܕܰܟܝܳܢܳܐ. ܠܣܳܒ̈ܶܐ ܚܽܘܛܪܳܐ ܠܐܴ ܡܶܙܕܰܥܙܥܳܢܳܐ: ܠܢܶܫ̈ܶܐ ܟܚܺܝܕܽܘܬܳܐ ܘܢܰܟܦܽܘܬܳܐ: ܠܚܰܛܳܝ̈ܶܐ ܫܽܘܒܩܳܢܳܐ: ܠܰܡܟܰܬܡ̈ܶܐ ܚܽܘܠܳܠܐܴ: ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܐܰܦܪܰܚ ܒܰܐܦ̈ܶܐ ܓܰܠܝ̈ܳܬܳܐ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܥܛܪܐ

ܠܐܴ ܬܪܰܦܶܐ ܒܰܢ ܐܺܝܕܰܝ̈ܳܐ: ܘܠܐܴ ܬܰܟܶܣ ܠܰܢ ܒܝܽܘܡ ܕܺܝܢܳܐ ܒܚܶܡܬܳܐ ܕܰܐܦܰܝ̈ܟ: ܘܠܐܴ ܡܳܪܝ ܬܶܪܕܶܐ ܠܰܢ ܥܰܡ ܒܥܶܠܕ̈ܒܳܒܰܝܟ ܐܶܠܐܴ ܐܰܫܘܳܐ ܠܰܢ ܕܢܶܛܰܪ ܦܽܘܩܕ̈ܳܢܰܝܟ: ܘܰܒܢܳܡܽܘ̈ܣܰܝܟ ܢܶܬܕܰܒܰܪ: ܘܢܶܬܩܰܒܰܠ ܦܺܝܪܡܰܢ ܒܨܺܝܪܳܐ ܩܕܳܡܰܝܟ: ܘܬܶܥܽܘܠܝ ܒܳܥܽܘܬܰܢ ܠܒܶܝܬ ܓܰܙܳܟ: ܘܬܰܝܬܶܐ ܠܰܢ ܥܽܘܕܪ̈ܳܢܶܐ ܡ̣ܶܢ ܠܘܳܬܳܟ: ܘܬܰܦܶܩܝ ܠܰܢ ܡܰܘܗ̈ܒܳܬܳܐ ܡ̣ܶܢ ܣܺܝ̈ܡܳܬܳܟ. ܐܰܝܟܰܢܳܐ ܕܢܰܘܕܶܐ ܘܰܢܫܰܒܚܳܟ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܥܢܺܝ ܠܰܢ ܕܩܳܪܶܝܢܰܢ ܠܳܟ ܡܳܪܝܳܐ: ܘܥܰܕܰܪ ܠܰܢ ܕܡܶܬܓܰܘܣܺܝܢܰܢ ܒܳܟ ܒܽܐܘܠܨܳܢܰܝ̈ܢ: ܘܰܦܬܰܚ ܬܰܪܥܳܐ ܕܪ̈ܰܚܡܰܝܟ ܠܰܨܠܰܘ̈ܳܬܰܢ: ܕܰܒܟܽܠܙܒܰܢ ܢܳܩܫܺܝܢܰܢ ܒܶܗ: ܘܠܐܴ ܬܶܫܒܽܘܩ ܠܰܢ ܡ̣ܶܢ ܐܺܝ̇ܳܠܐܴ ܕܛܰܝܒܽܘܬܳܟ: ܘܣܰܝܰܥ ܠܰܢ ܒܝܰܡܺܝܢܳܟ: ܘܚܰܕܳܐ ܠܰܢ ܒܰܩܝܳܡܬܳܟ ܘܰܐܦܨܰܚ ܠܰܢ ܒܢܽܘܚܳܡܳܟ: ܕܢܰܘܕܶܐ ܡܳܪܝ ܠܰܚܕܳܢܳܝܽܘܬܳܟ: ܗܳܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܕܶܒܚܳܐ ܡܚܰܣܝܳܢܳܐ ܘܩܽܘܪܒܳܢܳܐ ܡܩܰܒܠܐܴ: ܕܰܚܕܳܐ ܙܒܰܢ ܩܰܪܶܒ ܢܰܦܫܶܗ ܚܠܳܦܰܝܢ ܠܐܱܒܽܘܗܝ ܓܢܺܝܙܳܐ: ܠܗ̇ܰܘ ܚܰܝܳܐ ܘܡܰܐܚܝ̇ܳܢܳܐ ܕܰܢܚ̣ܶܬ ܗ̣ܘܳܐ ܠܰܫܝܽܘܠ ܕܰܩܒܺܝܪ̈ܶܐ ܘܪܰܣܶܣ ܢܽܘܚܳܡܳܐ ܠܰܫܟܺܝ̣̈ܒܶܐ: ܠܗ̇ܰܘ ܕܶܐܡ̣ܰܪ ܠܬܰܠܡܺܝ̈ܕܶܐ ܕܺܝܠܶܗ ܕܙܶܠܽܘܢ ܠܰܓܠܺܝܠܐܴ ܘܬܰܡܳܢ ܩܳܕܶܡ ܐ̱ܢܳܐ ܠܟܽܘܢ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ ܕܰܐܕܢܰܚ ܒܓܰܘ ܬܺܐܒܶܝܠ ܙܰܠܺܝ̈ܩܰܘܗܝ: ܘܦܰܪܣܺܝ ܗ̣ܘܳܐ ܠܟܽܠܗܽܘܢ ܕܶܚ̈ܠܳܬܳܐ ܣܪ̈ܺܝܩܳܬܳܐ ܨܶܡܚܳܐ ܡܰܢܗܪܳܢܳܐ ܕܚܶܫܽܘ̈ܟܶܐ ܕܰܨܡ̣ܰܚ ܡ̣ܶܢ ܐܰܒܳܐ ܩܕܳܡ ܙܰܒ̈ܢܶܐ: ܘܶܐܬܺܝܠܶܕ ܡ̣ܶܢ ܡܰܪܝܰܡ ܒܚܰܪܰܬ݀ ܙܰܒ̈ܢܶܐ: ܘܰܒܙܰܗܪܺܝܪ̈ܰܘܗܝ ܕܢܺܝ̣̈ܚܶܐ ܕܪܰܦ ܠܛܰܠܠܐܴ ܕܛܳܥܝܽܘܬܳܐ: ܡ̣ܶܢ ܐܰܦܶܝ̈ܗ̇ ܕܟܽܠܳܗ̇ ܒܪܺܝܬܳܐ ܘܠܐܴ ܐܶܬܒܰܝܢܰܬ݀ ܒܶܗ. ܓܰܢ̱ܒܳܪܳܐ ܕܰܢܚ̣ܶܬ ܠܗܳܡܳܢ ܕܰܩܒܺܝܪ̈ܶܐ ܘܰܣܥ̣ܰܪ ܐܶܢܽܘܢ ܒܬܰܚܬܳܝ̈ܳܬܳܗ̇ ܘܪܰܣ ܥܰܠ ܢܰܦ̈ܫܳܬܗܽܘܢ ܛܰܐܠܐܴ ܡܦܰܝܓܳܢܳܐ ܘܰܐܚܺܝ ܐܶܢܶܝܢ: ܪܰܥܡܳܐ ܕܩ̈ܳܠܐܷ ܘܡܰܐܚܝܳܢܳܐ ܕܥܰܢܺܝ̈ܕܶܐ ܢܰܚܶܡ ܗ̣ܽܘ ܠܶܗ ܠܝܰܘܡܳܐ ܬܠܺܝܬܳܝܳܐ: ܘܰܫ̣ܪܳܐ ܫܽܘܠܛܳܢܶܗ ܕܒܺܝܫܳܐ ܡܳܪܽܘܕܳܐ: ܘܰܐܥܕܺܝ ܠܰܫܒܺܝܬܳܐ ܡ̣ܶܢ ܐܺܝܕܰܘ̈ܗܝ ܚܰܣܺܝ̈ܢܳܬܳܐ. ܬܰܩܺܝܦܳܐ ܕܣܰܪܶܩ ܠܰܫܝܽܘܠ ܕܳܘܺܝܬܳܐ: ܘܚܰܠܶܨ ܠܓܰܙ̈ܶܝܗ̇ ܥܰܫܺܝ̈ܢܶܐ: ܘܰܡܠ̣ܰܟ ܚܰܝ̈ܶܐ ܘܢܽܘܚܳܡܳܐ ܠܓܶܢܣܳܐ ܕܐ̱ܢܳܫܽܘܬܰܢ. ܥܰܙܺܝܙܳܐ ܕܰܐܪܗܶܒ ܐܶܢܽܘܢ ܠܰܟܝ̈ܳܢܶܐ ܫܰܬܺܝ̈ܩܶܐ ܥܰܠ ܬܶܫܒܽܘܚܬܶܗ: ܘܩܳܡ̣ܘ ܡܺܝ̈ܬܶܐ ܘܰܦ̣ܪܰܥܘ ܠܶܗ ܬܰܘܕܺܝܬܳܐ ܠܐܴ ܡܳܝܽܘܬܳܐ ܐܠܰܗܳܐ ܕܡܺܝܬ ܒܰܒܣܰܪ ܘܩܳܡ ܒܫܽܘܒܚܳܐ ܕܠܐܴ ܚܒܳܠܐܴ: ܘܰܐܚܺܝ ܠܓܶܢܣܳܐ ܕܺܝܠܰܢ ܡܳܝܽܘܬܳܐ. ܦܳܪܩܳܐ ܪܰܒܳܐ ܡܳܪܝܳܐ ܡܫܺܝܚܳܐ ܚܶܣܢܳܐ ܠܐܴ ܡܶܬܚܰܣܢܳܢܳܐ ܕܰܚܣܰܢ ܗ̣ܘܳܐ ܠܰܡܕܺܝܢ̱ܬܶܗ ܡܥܰܕܰܢܬܳܐ ܕܡܰܘܬܳܐ ܛܪܽܘܢܳܐ: ܘܰܐܩܺܝܡ ܠܐܴܕܳܡ ܘܰܠܝܰܠܕ̈ܰܘܗܝ ܡ̣ܶܢ ܬܚܶܝܬ ܐܺܝ̈ܕܰܘܗܝ ܕܒܺܝܫܳܐ ܡܳܪܽܘܕܳܐ ܘܠܐܴ ܡܶܬܚܰܣܢܳܢܳܐ: ܚܰܟܺܝܡܳܐ ܕܚܶܟܡܬܶܗ ܐܰܥܠܬܶܗ ܠܓܰܘ ܩܰܒܪܳܐ ܘܡܽܘܟܳܟܶܗ ܐܰܚܬܶܗ ܕܢܶܬܒܰܣܰܪ ܘܢܶܬܺܝܠܶܕ ܘܢܶܬܬܫܺܝܛ ܡ̣ܶܢ ܥܰܒ̣ܕ̈ܶܐ ܒܺܝ̈ܫܶܐ ܐܰܝܟ ܕܣܰܝܒܰܪ ܨܶܒܝܳܢܶܗ. ܠܳܟ ܐܠܰܗܳܐ ܡܶܠܬܳܐ ܘܠܐܴ ܡܶܬܕܰܪܟܳܢܳܐ ܘܠܐܴ ܡܶܬܥܰܩܒܳܢܳܐ: ܕܗܳܠܶܝܢ ܟܽܠܗܶܝܢ ܡܳܐܟ̈ܳܬܳܐ ܘܐ̱ܢܳܫܳܝ̈ܳܬܳܐ ܣܒ̣ܰܠܬ ܘܣܰܝܒ̣ܰܪܬ ܡܶܛܽܠ ܦܽܘܪܩܳܢܶܗ ܕܓܶܢܣܰܢ ܚܰܠܳܫܳܐ: ܠܳܟ ܡܶܬܟܰܫܦܺܝܢܰܢ ܒܥܶܕܳܢܳܐ ܗܳܢܳܐ ܡܳܪܝܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ: ܕܶܐܬܪܰܚܰܡ ܥܰܠ ܟܽܠܰܢ ܚܰܛܳܝ̈ܶܐ ܥܰܒ̣ܕ̈ܶܐ ܕܺܝܠܳܟ: ܘܬܶܬܶܠ ܠܰܢ ܚܰܝܠܐܴ ܘܥܽܘܕܪܳܢܳܐ ܥܰܠ ܟܽܠܗܶܝܢ ܨܶܢܥ̈ܳܬܶܗ ܡܰܘܒܕܳܢ̈ܝܳܬܳܐ ܕܳܐܟܶܠܩܰܪܨܳܐ. ܘܰܩܪܺܝ ܘܩܰܪܶܒ ܠܰܢ ܠܘܳܬܳܟ: ܘܰܥܶܕ ܠܰܢ ܠܰܓܢܽܘܢܳܟ ܘܠܰܣܡܳܟܳܟ: ܙܰܡܶܢ ܠܰܢ ܠܰܚܠܽܘܠܐܴ ܕܢܰܨܺܝ̈ܚܰܝܟ ܚܰܕܶܬ ܘܚܰܝܶܕ ܠܰܢ ܠܚܰܕܽܘܬܳܐ ܕܰܩܪ̈ܝܝܟ: ܘܛܰܪ ܒܰܢ ܪܰܗܒܽܘܢܳܐ ܕܐ̱ܪ̈ܳܙܰܝܟ. ܙܰܡܶܢ ܠܰܢ ܠܫܳܪܽܘܬܳܐ ܕܰܓܒܰܝ̈ܟ: ܣܰܬܶܬ ܒܰܢ ܫܪܳܪܳܐ ܕܡܽܘܠܟܳܢܰܝ̈ܟ: ܥܰܠܐܴ ܠܰܢ ܠܰܡܪܰܘܡܳܐ ܕܰܫܡܰܝ̈ܟ ܘܰܪܚܰܝ ܡܶܢܰܢ ܠܗܶܪܬܳܐ ܕܣܳܢ̈ܰܐܝܟ ܫܺܐܕ̈ܶܐ ܒܺܝ̈ܫܶܐ ܕܡܰܩܪܒܺܝܢ ܥܰܡܰܢ: ܫܒܽܘܩ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܪ̈ܰܚܡܰܝܟ: ܘܚܰܣܳܐ ܠܰܢ ܒܽܘܨܳܪ̈ܰܝܢ  ܒܚܰܘ̈ܣܳܢܰܝܟ: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ: ܘܰܦ̣ܛܰܪܘ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܫܠܡ ܬܠܝܬܝܐ ܕܛܟܣܐ ܐܚܪܝܐ

 

ܛܟܣܐ ܕܚܕ ܒܫܒܐ ܪܒܝܥܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ

ܩܕܡܝܬ ܨܠܘܬܐ ܕܫܘܪܝܐ

 

ܗܰܒ ܘܫܰܟܶܢ ܠܰܢ ܒܟܽܠܳܗ̇ ܕܰܟܝܽܘܬܳܐ ܟܰܕ ܡܰܪܚܩܺܝܢܰܢ ܡ̣ܶܢ ܟܽܠܳܗ̇ ܚܶܡܬܳܐ ܘܒܺܝܫܽܘܬܳܐ: ܢܥܰܕܥܶܕ ܠܳܟ ܥܺܐܕܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܟܰܕ ܡܠܶܝܢܰܢ ܟܽܠܳܗ̇ ܒܰܣܺܝܡܽܘܬܳܐ: ܘܰܐܫܘܳܐ ܠܰܢ ܕܰܢܫܰܒܚܳܟ ܟܽܠܰܢ ܒܰܐܡܺܝܢܽܘܬܳܐ: ܘܠܐܱܒܽܘܟ ܕܰܐܩܺܝܡ ܠܰܢ ܡ̣ܶܢ ܪܰܡܝܽܘܬܳܐ: ܘܰܠܪܽܘܚܳܟ ܩܰܕܺܝܫܳܐ ܥ̇ܳܒܶܕ ܛܳܒ̈ܳܬܳܐ: ܘܰܡܦܰܢܶܐ ܫ̈ܶܐܠܳܬܳܐ ܫܰܦܺܝܪ̈ܳܬܳܐ: ܗܳܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܬܠܳܬ ܕܺܝܠܳܝ̈ܳܬܳܐ ܡܝܰܩܢܳܢ̈ܳܝܳܬܳܐ: ܐܰܒܳܐ ܥܶܩܳܪܳܐ ܘܰܒܪܳܐ ܦܺܐܪܳܐ ܘܪܽܘܚܳܐ ܣܰܘ̈ܟܶܐ: ܐܰܒܳܐ ܢܽܘܪܳܐ: ܘܰܒܪܳܐ ܪܶܬܚܳܐ ܕܺܝܠܳܗ̇ ܘܪܽܘܚܳܐ ܕܰܠܩܳܗ̇: ܚܕܳܐ ܓܰܘܙܰܠܬܳܐ ܒܢܽܘܪܳܐ ܘܰܒܚܰܡܺܝܡܽܘܬܳܐ ܕܺܝܠܳܗ̇. ܐܰܒܳܐ ܗܰܘܢܳܐ: ܘܰܒܪܳܐ ܡܶܠܬܳܐ: ܘܪܽܘܚܳܐ ܢܰܦܫܳܐ: ܐܰܒܳܐ ܫܽܘܒܚܳܐ: ܘܰܒܪܳܐ ܙܺܝܘܳܐ: ܘܪܽܘܚܳܐ ܗܶܕܪܳܐ ܚܰܕ ܬܠܳܬܳܐ ܘܰܬܠܳܬܳܐ ܚܰܕ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܕܠܐܴ ܣܳܟ ܡܶܬܦܰܠܓܺܝܢ ܐܶܢܽܘܢ ܠܰܡܢܰܘ̈ܳܬܳܐ ܘܠܐܱܠܦ̈ܶܐ ܣܰܓܺܝ̈ܶܐܐ ܐܶܠܐܴ ܕܫܳܘܶܝܢ ܘܠܰܝܬ ܒܥܳܬܳܐ ܕܡ̇ܳܛܝܳܐ ܠܗܽܘܢ ܬܠܺܝܬܳܝܽܘܬܳܐ ܕܠܐܴ ܫܽܘܪܳܝ ܘܰܕܠܐܴ ܫܽܘܠܳܡ: ܬܠܺܝܬܳܝܽܘܬܳܐ ܕܠܐܴ ܡܶܬܰܐܡܪܳܐ ܐܶܬܡܳܠܝ ܘܝܰܘܡܳܢܳܐ ܘܰܡܚܳܪ ܬܠܺܝܬܳܝܽܘܬܳܐ ܕܠܰܘ ܟܰܕ ܡܶܬܟܰܢܫܳܐ ܬܠܳܬܳܐ ܐܠܰܗ̈ܶܐ ܗܳܘܝܳܐ. ܘܠܰܘ ܟܰܕ ܡܶܬܦܰܠܓܳܐ ܬܽܘܠܬܳܐ ܘܰܐܥܦܳܐ ܡܶܬܩܰܪܝܳܐ ܐܶܠܐܴ ܐܠܰܗܳܐ ܡܫܰܡܠܝܳܐ ܐܰܒܳܐ ܘܰܐܠܳܗܳܐ ܡܫܰܡܠܝܳܐ ܒܪܳܐ: ܘܰܐܠܳܗܳܐ ܡܫܰܡܠܝܳܐ ܪܽܘܚܳܐ ܩܰܕܺܝܫܳܐ: ܘܰܬܠܳܬܰܝ̈ܗܽܘܢ ܚܰܕ ܐܠܰܗܳܐ ܫܰܪܺܝܪܳܐ ܐܺܝܬܰܝܗܽܘܢ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܟܰܕ ܒܚܽܘ̈ܕܳܬܶܐ ܘܰܒܪܽܘܡܪ̈ܳܡܶܐ ܕܪܽܘܚܳܐ ܩܰܕܺܝܫܳܐ ܠܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܡܚܰܓܶܝܢܰܢ: ܘܠܳܟ ܐܳܘ ܡܶܠܬܳܐ ܐܠܰܗܳܐ ܕܰܕܢܰܚ̣ܬ ܠܰܢ ܒܰܒܣܰܪ ܡ̣ܶܢ ܒܬܽܘܠܬܳܐ ܠܐܴ ܡܢܰܣܝܰܬ݀ ܒܙܽܘܘܳܓܳܐ ܡܰܪܝܰܡ ܠܐܴ ܡܶܬܦܰܫܩܳܢܳܐܺܝܬ. ܟܰܕ ܐܺܝܬܰܝܟ ܠܐܴ ܡܶܬܕܰܪܟܳܢܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܒܰܡܪ̈ܰܘܡܶܐ ܡܶܬܓܰܝܶܐܐ ܐܰܢ̱ܬ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܠܐܴ ܡܶܬܰܐܡܪܳܢܳܐܺܝܬ: ܫܰܕܰܪܬ ܠܪܺܝܫ ܡܰܠܐܱܟ̈ܶܐ ܓܰܒܪܺܐܶܝܠ ܪܶܡܙܳܢܳܐܺܝܬ ܕܢܰܟܪܶܙ ܠܥܳܠܡܳܐ ܣܒܰܪܬܳܐ ܚܕܰܬܳܐ ܦܽܘܪܩܳܢܳܐ ܘܚܰܝ̈ܶܐ ܠܓܶܢܣܶܗ ܕܳܐܕܳܡ ܡܫܰܟܢܳܢܳܐܺܝܬ ܘܶܐܬܳܐ ܠܝܰܠܕܳܐ ܘܰܥܡܳܕܳܐ ܘܟܽܠܗܶܝܢ ܐ̱ܢܳܫܳܝ̈ܳܬܳܐ ܩܰܒܶܠ ܥܠܰܘܗܝ ܡܰܟܺܝܟܳܐܺܝܬ ܟܰܕ ܠܕܰܒܪܳܐ ܢܦ̣ܰܩ ܨܰܘܡܳܐ ܠܒܰܟ ܗ̣ܘܳܐ ܡܶܛܽܠܳܬܰܢ: ܘܥܰܡ ܒܥܶܠܕܰܕܳܐ ܩܪܳܒܳܐ ܥܒ̣ܰܕ ܗ̣ܘܳܐ ܡܶܬܟܰܢܫܳܢܳܐܺܝܬ: ܟܰܕ ܠܘܳܬ ܚܰܫܳܐ ܦܳܪܽܘܩܳܝܳܐ ܒܨܶܒܝܳܢܶܗ ܐܶܬܳܐ ܕܰܢܚܰܬܶܡ ܐ̱ܪ̈ܳܙܶܐ ܕܨܳܪܘ ܠܶܗ ܢܒܺܝ̈ܶܐ ܕܰܐܒܽܘܗܝ ܓܢܺܝܙܳܐ ܦܶܠܐܴܬܳܢܳܐܺܝܬ: ܘܰܩܒܽܘܪܬܳܐ ܩܰܒܶܠ ܥܠܰܘܗܝ: ܘܰܒܓܰܘ ܩܰܒܪܳܐ ܐܶܬܬܣܺܝܡ ܘܠܐܴ ܚ̣ܙܳܐ ܚܒܳܠܐܴ ܒܰܫܝܽܘܠ ܕܰܩܒܺܝܪ̈ܶܐ ܡܳܪܳܢܳܐܺܝܬ. ܘܩܳܡ ܡ̣ܶܢ ܩܰܒܪܳܐ ܒܚܰܝܠܐܴ ܘܙܳܟܽܘܬܳܐ ܦܰܐܝܽܘܬ ܐܠܰܗܳܐܺܝܬ. ܘܰܫ̣ܪܳܐ ܐܰܣܺܝܪ̈ܶܐ ܕܡ̣ܶܢ ܥܳܠܰܡ. ܘܰܐܟ̣ܪܶܙ ܚܰܝܰܬ݀ ܡܺܝ̈ܬܶܐ: ܘܩܳܡ ܘܰܐܒܗ̣ܶܬ ܐܶܢܽܘܢ ܠܢܳܛܽܘܪ̈ܶܐ: ܘܕܳܫ̣ ܐܶܢܽܘܢ ܠܰܬܠܳܬܳܐ ܛܪ̈ܽܘܢܶܐ: ܒܺܝܫܳܐ: ܘܡܰܘܬܳܐ: ܘܣܳܛܳܢܳܐ ܘܩܳܡ ܘܰܣܚ̣ܰܦ ܠܨܳܠܽܘ̈ܒܶܐ ܘܰܥܒ̣ܰܕ ܐܶܢܽܘܢ ܚܶܣܕܳܐ ܘܡܽܘܝܳܩܳܐ ܠܕܳܪ̈ܶܐ ܕܳܐܬܶܝܢ. ܩܳܡ ܓܰܢ̱ܒܳܪܳܐ ܕܳܫ̣ ܐܶܢܽܘܢ ܣܳܩܽܘܪ̈ܰܘܗܝ ܬܚܶܝܬ ܐܶܣܟܽܘܦܬܳܐ ܕܰܫܝܽܘܠ ܘܠܳܟ ܚܰܝܳܐ ܘܡܰܐܚܝܳܢܳܐ ܒܥ̣ܰܘ ܡܰܪ̈ܳܚܶܐ ܕܢܶܛܠܡܽܘܢ: ܘܠܰܩܝܳܡܬܳܐ ܕܺܝܠܳܟ ܢܕܰܓܠܽܘܢ: ܐܰܝܟ ܕܰܛܠܰܡ̣ܘ ܐܳܣܘ̈ܳܬܳܐ ܘܳܐܬܘ̈ܳܬܳܐ ܘܬܶܕܡܪ̈ܳܬܳܐ ܘܰܓܒܰܪ̈ܘܳܬܳܐ ܬܡܺܝ̈ܗܳܬܳܐ ܕܰܣܥ̣ܰܪܬ ܩܕܳܡ ܨܠܺܝܒܽܘܬܳܟ. ܘܥܰܡ ܒܥܶܠܕ̈ܒܳܒܰܝܟ ܗ̇ܳܢܽܘܢ ܕܚܶܣܕܳܐ ܠܥܳܠܡܳܐ ܥܒ̣ܰܕܬ ܐܶܢܽܘܢ ܒܰܩܝܳܡܬܳܟ. ܐܶܡ̣ܰܪܘ ܟܳܗ̈ܢܶܐ ܠܢܳܛܽܘܪ̈ܶܐ ܟܰܕ ܡܰܪܟܢܺܝܢ ܪ̈ܺܝܫܰܝܗܽܘܢ ܐܰܝܟ ܬܰܥ̈ܠܐܷ ܘܰܡܚܰܦܶܝܢ ܐܰܦܰܝ̈ܗܽܘܢ ܒܒܶܗܬܬܳܐ ܓܰܒܪ̈ܶܐ ܫܡ̣ܰܥܘ ܡܶܢܰܢ ܫܩܽܘܠܘ ܕܰܗܒܳܐ ܟܡܳܐ ܕܨܳܒܶܝܢ ܐܢ̱ܬܽܘܢ ܘܰܐܛܶܐܒܘ ܠܣܽܘܥܪܳܢܳܐ ܗܳܢܳܐ: ܕܬܰܠܡܺܝ̈ܕܶܐ ܕܺܝܠܶܗ ܐܶܬܰܘ ܓܰܢܒܽܘܗܝ ܟܰܕ ܚܢܰܢ ܕܰܡܟܺܝܢܰܢ. ܐܳܘ ܥܘܺܝܪ̈ܰܝ ܠܶܒܳܐ ܘܣܰܡ̈ܝܰܝ ܗܰܘܢܳܐ: ܐܶܢܓܶܝܪ ܕܰܡܺܝܟܺܝܢ ܗܘܰܝܬܽܘܢ ܡ̣ܶܢ ܐܰܝܟܳܐ ܝܳܕܥܺܝܢ ܐܢ̱ܬܽܘܢ ܡ̣ܶܢ ܐܰܝܟܳܐ ܝܳܕܥܺܝܢ ܐܢ̱ܬܽܘܢ ܕܬܰܠܡܺܝ̈ܕܰܘܗܝ ܓܰܢܒܽܘܗܝ ܡܰܢܽܘ ܓܠܐܴ ܠܟܽܘܢ ܡܰܢܽܘ ܐܰܘܕܰܥܟܽܘܢ: ܡܰܢܽܘ ܚܰܘܺܝ ܠܟܽܘܢ: ܠܡܳܐ ܢܒܺܝ̈ܶܐ ܐܰܢ̱ܬܽܘܢ ܠܡܳܐ ܚܶܙܘ̈ܳܢܶܐ ܚ̣ܙܰܝܬܽܘܢ: ܠܡܳܐ ܓܶܠܝܳܢ̈ܶܐ ܩܰܒ̣ܶܠܬܽܘܢ ܘܶܐܢ ܥܺܝܪܺܝܢ ܗ̣ܘܰܝܬܽܘܢ ܠܡܽܘܢ ܠܐܴ ܠܒܰܟ̣ܬܽܘܢ ܐܶܢܽܘܢ ܠܓܰܢ̈ܳܒܶܐ: ܚܺܝܨܺܝܢ ܗ̣ܘܰܝܬܽܘܢ ܡ̣ܶܢ ܫܶܡܥܽܘܢ ܗ̇ܰܘ ܕܺܐܝܬܰܘܗܝ ܣܳܒܳܐ: ܩܰܠܺܝܠܺܝܢ ܗ̣ܘܰܝܬܽܘܢ ܡ̣ܶܢ ܛܰܠܝܳܐ ܝܽܘܚܰܢܳܢ: ܙܪܺܝܙܺܝܢ ܐܢ̱ܬܽܘܢ ܡ̣ܶܢ ܝܰܥܩܽܘܒ: ܚܰܨܺܝܦܺܝܢ ܐܢ̱ܬܽܘܢ ܡ̣ܶܢ ܬܳܐܘܡܰܐ ܘܰܐܢܕܪܶܐܘܳܣ: ܘܡ̣ܶܢ ܒܰܪ ܬܽܘܠܡܰܝ ܚܦܺܝܛܺܝܢ ܐܢ̱ܬܽܘܢ: ܢܰܫܺܝܫ ܡܶܢܟܽܘܢ ܦܺܝܠܺܝܦܳܘܣ ܫܦܶܠ ܡܶܢܟܽܘܢ ܡܰܬܰܝ: ܡܚܺܝܠ ܡܶܢܟܽܘܢ ܒܰܪ ܚܰܠܦܰܝ ܬܰܚܽܘܒ ܡܶܢܟܽܘܢ ܛܰܢܳܢܳܐ. ܠܡܳܐ ܠܐܴ ܠܒܰܟ̣ܬܽܘܢ ܐܶܢܽܘܢ ܠܓܰܢ̈ܳܒܶܐ ܐܳܘ ܕܰܓ̈ܳܠܐܷ ܨܰܗܝ̈ܰܝ ܠܰܕܡܳܐ: ܠܡܳܐ ܚܳܣ̣ܬܽܘܢ ܥܠܰܝܗܽܘܢ ܐܳܘ ܕܠܐܴ ܚܰܘܣܳܢܳܐ: ܠܡܳܢܳܐ ܪܰܚܶܡܬܽܘܢ ܥܠܰܝܗܽܘܢ ܐܳܘ ܓܠܺܝ̣̈ܙܰܝ ܡ̣ܶܢ ܪ̈ܰܚܡܶܐ. ܠܐܻܝܘ ܙܳܩܽܘ̈ܦܶܐ ܕܰܢܚܰܦܽܘܢ ܫܪܳܪܳܐ ܘܠܐܴ ܐܶܫܟ̣ܰܚܘ: ܝܰܗ̣ܒܘ ܫܽܘܚܕܳܐ ܣܰܓܺܝܳܐܐ ܕܰܢܩܺܝܡܽܘܢ ܕܰܓܳܠܽܘܬܳܐ: ܘܩܽܘܫܬܳܐ ܠܐܴ ܐܶܬܚܰܦܺܝ: ܟܺܝܣܰܝ̈ܗܽܘܢ ܓܡܰܪܘ ܘܰܐܘܦܺܝܘ ܘܰܫܪܳܪܳܐ ܠܐܴ ܐܶܬܛܰܫܺܝ. ܓܢܰܒ̣ܘ ܠܐܻܝܡܳܡܳܐ ܘܠܐܴ ܐܶܣܬܰܟܰܠܘ ܕܠܰܝܬ ܠܗܽܘܢ ܕܽܘܟܬܳܐ ܕܰܡܣܰܬܪܳܐ ܠܶܗ: ܣܳܡ̣ܘ ܫܶܡܫܳܐ ܒܥܽܘ̈ܒܰܝܗܽܘܢ ܕܠܐܴ ܢܶܬܠܽܘܢ ܕܬܶܬܦܰܪܢܰܣܝ ܒܪܺܝܬܳܐ ܒܢܽܘܗܪܶܗ: ܐܺܝܡܳܡܳܐ ܕܢܰܚ ܥܰܠ ܣܰܘ̈ܦܶܐ: ܘܰܐܓܰܪ ܦܳܥ̈ܠܐܷ ܕܢܺܐܡܪܽܘܢ ܫܶܡܫܳܐ ܠܐܴ ܣܰܠܺܝܩ: ܓܰܢ̈ܳܒܶܐ ܠ̈ܶܠܐܷ ܠܶܣܛܳܝ̈ܶܐ ܣܰܟ̈ܠܐܷ: ܓܰܝ̈ܳܣܶܐ ܥܘܺܝܪ̈ܶܐ: ܚܰܣ̈ܳܡܶܐ ܡܰܪܺܝܪ̈ܶܐ ܒܳܙܽܘ̈ܙܶܐ ܣܪ̈ܺܝܩܶܐ: ܡܚܰܠܨ̈ܳܢܶܐ ܣܦܺܝ̈ܩܶܐ: ܚܳܛܽܘ̈ܦܶܐ ܒܠܺܝ̣̈ܠܐܷ: ܕܰܓ̈ܳܠܐܷ ܢܟܺܝ̣̈ܠܐܷ: ܡܳܪܰܢ ܘܰܐܠܳܗܰܢ ܡܶܬܢܰܚܳܡܽܘ ܐܶܬܢܰܚܰܡ: ܘܠܰܘ ܡܶܬܓܢܳܒܽܘ ܐܶܬܓܢܶܒ: ܘܒܳܬܰܪܟܶܢ ܗ̣ܽܘ ܡܳܪܰܢ ܐܶܬܚܙܺܝ ܗ̣ܘܳܐ ܠܡܰܪܝܰܡ ܐܶܡܶܗ ܘܰܠܡܰܓܕܠܳܝܬܳܐ ܦܓܰܥ ܒܡܳܪܬܳܐ: ܚܰܘܺܝ ܗ̣ܘܳܐ ܢܰܦܫܶܗ ܠܓܽܘܕܳܐ ܕܬܰܠܡܺܝ̈ܕܰܘܗܝ: ܚܰܘܺܝ ܢܰܦܫܶܗ ܘܗܰܠܶܟ ܗ̣ܘܳܐ ܒܽܐܘܪܚܳܐ ܥܰܡ ܩܠܶܝܽܘܦܰܐ ܘܚܰܒܪܶܗ. ܚܒ̣ܰܨܘ ܛܶܐܒ̈ܶܐ ܣܰܓܺܝ̈ܶܐܐ ܕܰܩܝܳܡܬܳܐ: ܬܟܶܒ̣ܘ ܟܳܪ̈ܽܘܙܘܳܬܳܐ ܕܢܽܘܚܳܡܳܐ ܙܳܪ̈ܒܰܝ ܣܰܒܪ̈ܳܬܳܐ ܕܚܰܕ̈ܘܳܬܳܐ ܠܰܚܕ̈ܳܕܶܐ ܐܺܝܡܳܡܳܐ ܕܢܰܚ̣ ܢܰܗܺܝܪܳܐܺܝܬ: ܥ̣ܪܰܩܘ ܛܶܠ̈ܳܠܐܷ ܡ̣ܶܢ ܙܰܠܺܝ̈ܩܰܘܗܝ ܕܫܶܡܫܳܐ. ܐܶܬܛܰܠܰܩܘ ܓ̈ܶܐܠܐܷ ܡ̣ܶܢ ܩܕܳܡ ܢܽܘܪܳܐ. ܠܐܴ ܣܰܝܒܪܰܬ݀ ܚܰܒܬܳܐ ܩܕܳܡ ܫܰܠܗܶܒܺܝܬܳܐ ܐܶܒܕܰܬ݀ ܕܰܓܳܠܽܘܬܳܐ ܡܶܢ ܩܕܳܡ ܫܪܳܪܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܰܢ ܚܢܰܢ ܝܰܠܕ̈ܶܝܗ̇ ܕܰܐܩܠܰܣܺܝܣ ܕܺܝܠܳܟ ܩܰܕܺܝܫܬܳܐ ܕܥܰܡ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܠܰܩܝܳܡܬܳܟ ܡܫܰܒܰܚܬܳܐ ܒܰܐܟܰܕܺܝܰܐܣ ܕܪܽܘܚܳܐ ܩܰܕܺܝܫܳܐ ܡܥܰܕܥܕܺܝܢܰܢ ܥܒܶܕ ܠܰܢ ܠܰܘ ܐܰܝܟ ܕܫܳܘܶܝܢܰܢ ܐܶܠܐܴ ܐܰܟܡܳܐ ܕܰܐܠܳܗܽܘܬܳܟ ܡܦܳܣܳܐ ܘܝܳܕܥܳܐ ܕܡܰܘܬܰܪ ܠܰܢ. ܐܶܣܛܽܘܪܳܘܣ ܕܺܝܠܳܟ ܙܰܟܳܝܳܐ ܢܣܰܬܰܪ ܠܰܢ ܬܚܶܝܬ ܟܶܢ̈ܦܰܘܗܝ ܒܰܓܢܽܘܢܳܟ ܡܠܐܷ ܢܽܘܗܪܳܐ ܒܰܣܶܡ ܠܰܢ: ܓܶܕܰܝܢ ܠܐܘܪܰܐܢܳܘܣ ܠܘܳܬܳܟ ܒܰܕܥܰܬܺܝܪ ܗ̣ܽܘ ܐܽܘܡܺܝܪܳܘܣ ܕܺܝܠܳܟ: ܕܰܒܰܪ ܠܰܢ ܒܩܰܡܛܳܘܣ ܕܺܝܠܳܟ: ܕܡܰܘܒܶܠ ܠܡܰܠܟܽܘܬܳܟ. ܗܰܕܳܐ ܠܰܢ ܒܦܽܘܒܳܘܣ ܗ̇ܳܝ ܕܰܡܪܰܥܝܳܐ ܠܳܟ. ܘܰܥܶܕ ܠܰܢ ܠܘܳܬܳܟ: ܙܰܡܶܢ ܠܟܽܠܰܢ ܡ̣ܶܢ ܛܰܪܛܳܘܣ ܠܘܳܬ ܢܽܘܗܪܳܟ: ܚܰܙܶܩ ܠܰܢ ܒܠܺܝܣܺܕܺܝܢ ܗ̇ܳܝ ܕܚܽܘܒܳܐ ܕܒܳܟ ܘܒܰܚܕ̈ܳܕܶܐ. ܛܰܪ ܒܰܢ ܗܰܝܡܳܢܽܘܬܳܐ ܬܪܺܝܨܬܳܐ ܘܳܐܘܪܬܳܘܕܽܘܟܣܳܝܬܳܐ ܝܰܒܶܠ ܠܰܢ ܠܘܳܬ  ܬܶܐܓ̈ܡܶܐ ܦܺܝܠܽܘ̈ܟܣܳܝܶܐ ܥܰܡ ܢܰܦ̈ܫܳܬܳܐ ܕܰܐܓܝܽܘ̈ܣܶܐ: ܟܰܫܰܪ ܠܰܢ ܒܺܐܝܣܺܝܪܳܘܣ ܗ̇ܳܝ ܕܚܳܫܚܳܐ ܠܳܟ: ܠܰܚܶܡ ܠܰܢ ܒܫܰܦܺܝܪܽܘܬ ܣܽܘܢܛܰܟܣܺܝܣ ܐܰܪܡܽܘܢܳܝܬܳܐ: ܡܰܟܶܟ ܠܕܺܝܒܠܳܘܣ ܬܚܶܝܬ ܪ̈ܶܓܠܐܷ ܕܺܝܠܰܢ. ܢܰܛܰܪ ܠܰܢ ܒܟܽܠܗܶܝܢ ܐܰܝܠܶܝܢ ܕܠܳܟ ܦܰܐܝ̈ܳܢ ܘܰܪ̈ܚܺܝܡܳܢ. ܣܰܬܶܬ ܶܒܰܢ ܢܳܛܽܘܪܽܘܬܳܐ ܕܢܳܡܽܘ̈ܣܰܝܟ ܐܰܝܠܶܝܢ ܕܶܐܬܬܣܺܝܡܘ ܥܠܰܝܢ: ܥܰܕܰܪ ܠܰܢ ܒܟܽܠܗܶܝܢ ܥܒ̇ܳܕ̈ܶܐ ܕܰܡܪܰܥܶܝܢ ܠܳܟ. ܦܪܽܘܩ ܠܰܢ ܡ̣ܶܢ ܟܽܠܗܶܝܢ ܨܶܢܥ̈ܳܬܶܗ. ܨܰܠܶܡ ܠܰܢ ܒܶܣܪ̈ܳܢܶܐ ܥܰܒ̣ܕܰܝ̈ܟ ܒܪܽܘܚܳܢܳܝܽܘܬܳܐ ܡܣܰܬܬܳܐ ܕܠܐܴ ܙܽܘܥܙܳܥ: ܩܰܣܡܶܣ ܠܰܢ ܒܒܳܒ̈ܳܬܳܐ ܠܐܴ ܛܺܝܛܢܳܝ̈ܳܬܳܐ ܪܽܘܚܳܟ ܡܒܰܣܰܡܬܳܐ ܬܪܰܡܪܶܡܝ ܠܩܰܪܢܰܢ ܥܰܠ ܣܳܩܽܘܪ̈ܰܝܢ ܫܰܝܢܳܐ ܘܰܫܠܳܡܳܐ ܕܡ̣ܶܢ ܠܘܳܬܳܟ ܐܰܚ̣ܕܰܪ ܠܳܗ̇ ܠܥܺܕܬܳܟ ܩܰܕܺܝܫܬܳܐ ܬܶܗܘܶܐ ܡܳܪܝ ܛܰܝܒܽܘܬܳܟ ܡܚܰܣܝܳܢܺܝܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܢܫܰܒܰܚ ܐܰܟܣܺܝܣܳܐܺܝܬ ܘܠܐܱܒܽܘܟ ܢܙܰܡܰܪ ܘܰܢܕܰܒܰܚ ܠܐܴܕܺܝܰܐܬܐܣܺܝܣܳܐܺܝܬ ܘܰܠܪܽܘܚܳܟ ܩܰܕܺܝܫܳܐ ܢܗܰܠܶܠ ܠܐܴ ܫܰܠܘܳܐܺܝܬ ܗܳܫܳܐ ܘܰܒܟܽܠܙܒܰܢ܀

 

ܥܛܪܐ

ܩܰܒܶܠ ܡܳܪܝ ܡ̣ܶܢ ܡܚܺܝܠܽܘܬܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܐܥܛܰܪܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܒܶܗ ܐܰܦܨܰܚ̣ܬ ܠܬܰܠܡܺܝ̈ܕܰܝܟ ܩܰܕܺܝ̈ܫܶܐ: ܐܰܦܨܰܚ ܐܳܦ ܠܰܢ ܡܳܪܝ ܒܥܺܐܕ̈ܶܐ ܕܰܡܕܰܒܪܳܢܽܘܬܳܟ: ܘܚܰܕܳܐ ܠܰܢ ܒܚܰܓܰܝ̈ܟ ܦܨܺܝ̈ܚܶܐ ܘܰܐܣܓܳܐ ܠܘܳܬܰܢ ܫܽܘܟܳܢܰܝ̈ܟ ܐܠܰܗܳܝ̈ܶܐ: ܘܒܰܝܰܐܐ ܠܟܽܠܰܢ ܒܚܰܘ̈ܣܳܢܰܝܟ ܘܗܰܒܠܰܢ ܕܢܶܣܢܶܐ ܠܟܽܠܡܶܕܶܡ ܘܠܳܟ ܢܶܩܢܶܐ ܒܰܠܚܽܘܕܰܝܟ: ܘܠܐܴ ܬܪܰܦܶܐ ܒܰܢ ܐܺܝܕ̈ܰܝܳܐ ܕܰܒܥܶܠܕ̈ܒܳܒܶܐ ܕܣܳܐܢܶܝܢ ܠܰܢ: ܘܕܰܒܰܪ ܠܰܢ ܒܢܳܡܽܘ̈ܣܰܝܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܘܬܡܐ

ܐܰܩܺܝܡ ܠܰܢ ܡܳܪܝܳܐ ܐܠܰܗܳܐ ܥܰܡ ܐܶܡܪ̈ܰܝܟ ܘܒܰܪܶܟ ܠܰܢ ܒܥܰܕܥܺܐܕ̈ܰܝܟ ܘܰܒܚܰܓܰܝ̈ܟ: ܘܰܓܡܽܘܪ ܠܰܢ ܒܫܽܘ̈ܟܳܢܰܝܟ: ܘܗܰܕܳܐ ܠܰܢ ܒܽܐܘܪܚܳܐ ܕܢܳܡܽܘ̈ܣܰܝܟ: ܘܙܰܡܶܢ ܠܰܢ ܠܰܓܢܽܘܢܳܟ: ܘܰܥܶܕ ܠܰܢ ܠܰܣܡܳܟܳܟ: ܘܚܰܝܶܕ ܠܰܢ ܠܫܳܪܽܘܬܳܟ: ܘܛܰܪ ܒܰܢ ܪܰܗܒܽܘܢܳܐ ܕܐ̱ܪ̈ܳܙܰܝܟ ܘܰܟܢܽܘܫ ܠܰܢ ܠܰܟܢܽܘ̈ܫܝܶܐ ܕܰܢܒܺܝܰܝ̈ܟ: ܠܰܚܶܡ ܠܰܢ ܒܕܰܘܨܳܐ ܡܚܰܕܝܳܢܳܐ ܕܣܳܗ̈ܕܶܐ ܡܪ̈ܰܥܝܳܢܰܝܟ. ܚܰܣܳܐ ܚܰܘ̈ܒܰܝܢ ܘܰܫܒܽܘܩ ܠܰܚܛܳܗܰܝ̈ܢ ܘܰܐܢܺܝܚ ܠܥܰܢܺܝ̈ܕܰܝܢ ܕܰܫܟ̣ܶܒܘ ܥܰܠ ܣܰܒܪܳܟ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܒܚܰܝܠܐܴ ܘܓܰܢ̱ܒܳܪܽܘܬܳܐ: ܠܗ̇ܰܘ ܥܰܫܺܝܢܳܐ ܕܕܳܫ ܠܡܰܘܬܳܐ ܘܰܣܚ̣ܰܦ ܠܣܳܛܳܢܳܐ ܘܰܐܡܠܶܟ ܫܰܝܢܳܐ ܘܰܫܠܳܡܳܐ ܥܰܠ ܟܽܠܗܶܝܢ ܒܶܪ̈ܝܳܬܳܐ. ܠܗ̇ܰܘ ܫܶܡܫܳܐ ܕܙܰܕܺܝܩܽܘܬܳܐ: ܕܰܐܕܢܰܚ ܒܰܬܗܽܘ̈ܡܶܐ ܬܰܚܬܳܝ̈ܶܐ: ܢܽܘܗܪܳܐ ܦܰܐܝܳܐ ܕܰܐܠܳܗܽܘܬܶܗ: ܠܗ̇ܰܘ ܕܶܐܡ̣ܰܪ ܠܓܽܘܕܳܐ ܕܬܰܠܡܺܝ̈ܕܰܘܗܝ ܩܰܕܺܝ̈ܫܶܐ: ܕܙܶܠܘ ܟܰܬܰܪܘ ܠܺܝ ܒܰܓܠܺܝܠܐܴ ܘܬܰܡܳܢ ܬܶܚܙܽܘܢܳܢܝ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܳܪܰܢ ܝܶܫܽܘܥ ܡܫܺܝܚܳܐ ܡܶܬܟܰܫܦܺܝܢܰܢ ܠܳܟ ܒܗܳܢܳܐ ܝܰܘܡܳܐ ܕܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ: ܘܬܶܡܠܐܷ ܠܰܢ ܒܰܣܺܝܡܽܘܬܳܐ ܕܡܶܢܳܟ: ܘܢܰܚܶܡ ܠܰܢ ܡ̣ܶܢ ܡܺܝܬܽܘܬܳܐ ܕܰܚܛܳܗ̈ܶܐ ܕܣܰܪܺܝܟܳܐ ܒܗܰܕܳܡܰܝ̈ܢ ܘܰܐܝܟ ܚܰܠܳܕܺܝܬܳܐ ܡܰܐܩܢܳܐ ܒܢܰܦ̈ܫܳܬܰܢ ܘܰܒܦܰܓܪ̈ܰܝܢ: ܘܚܰܕܶܬ ܒܰܢ ܐܽܘܪܚܳܐ ܫܦܺܝܬܳܐ ܕܰܡܡܰܢܥܳܐ ܠܘܳܬܳܟ ܕܢܶܬܒܰܩܶܐ ܒܬܶܕܡܪ̈ܳܬܳܐ ܕܰܒܢܳܡܽܘ̈ܣܰܝܟ ܐܺܝܡܳܡܳܐ ܘܠܺܠܝܳܐ: ܘܗܰܒܠܰܢ ܢܶܚܕܶܐ ܒܝܰܘܡܳܐ ܕܰܩܝܳܡܬܳܟ ܕܒܳܗ̇ ܐܰܥܒ̣ܰܪܬ ܠܐܱܦܽܘܦܰܣܺܝܣ ܘܥܳܩܬܳܐ ܕܡܰܘܬܳܐ ܡ̣ܶܢ ܓܶܢܣܳܐ ܐ̱ܢܳܫܳܝܳܐ. ܘܥܰܠ ܗ̇ܳܝ ܒܚܽܘ̈ܓܳܝܶܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܢܥܰܕܥܶܕ ܠܳܟ ܕܩܳܡ̣ܬ ܡ̣ܶܢ ܩܰܒܪܳܐ ܘܰܦ̣ܪܰܩܬ ܠܰܢ: ܘܰܠܒܶܝܬ ܐܰܒܽܘܟ ܛܥܶܢ̣ܬ ܘܰܐܥܶܠ̣ܬ ܠܗ̇ܰܘ ܥܶܪܒܳܐ ܕܰܐܦܶܩ̣ܬ ܡ̣ܶܢ ܚܠܺܝ̣̈ܠܶܝܗ̇ ܕܰܐܪܥܳܐ: ܘܥܰܠ ܟܰܬܦܳܟ ܛܥܶܢܬܳܝܗܝ ܠܗ̇ܰܘ ܨܰܚܢܳܐ ܘܥܶܨܝܳܝܳܐ ܘܰܠܚܰܝ̈ܶܐ ܗ̇ܳܢܽܘܢ ܕܰܐܪܦܺܝ ܐܰܗܦܶܟܬܳܝܗܝ: ܘܚܰܝ̈ܶܐ ܚܰܕ̈ܬܶܐ ܘܠܐܴ ܡܳܝܽܘ̈ܬܶܐ ܣܳܡ̣ܬ ܩܽܘܕܡܰܘܗܝ: ܘܰܠܝܳܪܬܽܘܬܶܗ ܐܰܦܢܺܝܬܳܝܗܝ ܠܶܗ ܘܰܠܟܽܠܗܽܘܢ ܝܰܠܕ̈ܰܘܗܝ: ܘܰܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܰܥܓܺܝܢܺܝܢ ܗ̣ܘܰܘ ܬܚܶܝܬ ܫܽܘܠܛܳܢܶܗ ܕܡܳܪܽܘܕܳܐ: ܘܰܡܒܰܓܢܺܝܢ ܗ̣ܘܰܘ ܒܬܶܐܢܚ̈ܳܬܳܐ ܡܰܪܺܝܪ̈ܳܬܳܐ. ܐܶܬܪܰܚܰܡ̣ܬ ܥܠܰܝܗܽܘܢ ܘܰܫ̣ܪܰܝܬ ܠܰܓܙܳܪ ܕܺܝܢܳܐ ܕܰܦܣܺܝܩ ܗ̣ܘܳܐ ܥܠܰܝܗܽܘܢ ܘܰܫܩ̣ܰܠܬ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܘܡܰܚܘ̈ܳܬܰܢ ܘܫܽܘ̈ܡܳܬܰܢ ܕܡ̣ܶܢ ܒܺܝܫܳܐ ܒܠܰܥ̣ܢܰܢ ܘܰܐܣܶܩ̣ܬ ܐܶܢܶܝܢ ܠܰܨܠܺܝܒܳܐ: ܘܰܡܫܰܚ̣ܬ ܘܟܰܦ̣ܰܪܬ ܘܰܐܫܺܝܓܬ ܐܶܢܶܝܢ ܒܰܕܡܳܐ ܘܡܰܝ̈ܳܐ ܕܰܪܕܰܘ ܡ̣ܶܢ ܕܰܦܢܳܟ ܒܓܳܓܽܘܠܬܳܐ ܒܥܶܕܳܢ ܙܩܺܝܦܽܘܬܳܟ: ܘܣܰܓܺܝ ܬܶܕܡܪ̈ܳܬܳܐ ܣܥ̣ܰܪܬ ܒܥܽܘܠܳܝܳܟ ܕܥܰܠ ܩܰܝܣܳܐ ܐܰܪܥܳܐ ܕܢܳܝܕܳܐ ܐܰܝܟ ܥܰܪܙܠܐܴ ܛܽܘܪ̈ܶܐ ܘܪ̈ܳܡܳܬܳܐ ܕܒܳܟܶܝܢ ܫܡܰܝܳܐ ܘܰܐܪܥܳܐ ܕܡܶܬܬܰܢܚܺܝܢ ܘܡܰܝܠܠܺܝܢ ܘܘܳܝܳܐ ܠܥܰܡܳܐ ܠܺܝܛܳܐ ܕܝܽܘܕܳܝ̈ܶܐ ܝܳܗܒܺܝܢ ܫܶܡܫܳܐ ܕܚܳܫܶܟ: ܣܰܗܪܳܐ ܕܰܡܚܰܘܶܐ ܓܰܘܢܳܐ ܕܰܕܡܳܐ ܫܽܘ̈ܥܶܐ ܕܡܶܨܛܰܪܶܝܢ ܘܩܒܪ̈ܐ ܕܡܬܦܬܚܝܢ ܘܡܺܝ̈ܬܶܐ ܕܩܳܝܡܺܝܢ ܘܡܶܬܥܰܡܪܳܢܺܝܬܳܐ ܕܪܳܥܠܐܴ: ܒܪܺܝܬܳܐ ܟܽܠܳܗ̇ ܕܰܫܓܺܝܫܳܐ ܘܰܪܗܺܝܒܳܐ ܘܡܺܝ̈ܬܶܐ ܕܩܳܝܡܺܝܢ ܘܰܠܟܶܢܫܳܐ ܕܨܳܠܽܘ̈ܒܶܐ ܒܰܡܕܺܝܢ̱ܬܳܐ ܥܳܐܠܶܝܢ ܘܡܰܟܣܶܝܢ: ܠܘܳܬ ܐܰܚܰܝ̈ܗܽܘܢ ܘܪ̈ܳܚܡܰܝܗܽܘܢ ܘܰܐܒܳܗܰܝ̈ܗܽܘܢ ܘܠܐܴ ܫܳܡܥܺܝܢ: ܬܰܠܡܺܝ̈ܕܶܐ ܕܰܙܪܺܝܒܳܐ ܘܟܰܡܺܝܢܳܐ ܒܛܽܘܫ̈ܝܳܬܳܐ ܢܶܫ̈ܶܐ ܢܰܟ̈ܦܳܬܳܐ ܡܰܪܝܰܡ ܘܡܰܪܝܰܡ ܘܚܰܒܪ̈ܳܬܳܗ̇ ܕܒܳܟ̈ܝܳܢ: ܘܰܠܘܳܬ ܩܰܒܪܳܐ ܒܫܰܦܪܳܐ ܐܳܙ̈ܳܠ̱ܢ ܘܰܛܥܺܝ̣̈ܢܳܢ ܗܶܪ̈ܽܘܡܶܐ ܪ̈ܺܝܫܳܝܶܐ ܕܰܢܒܰܣ̈ܡܳܢ ܠܗ̇ܰܘ ܩܒܺܝܪܳܐ ܕܠܐܴ ܚ̣ܙܳܐ ܚܒܳܠܐܴ ܒܓܰܘ ܩܰܒܪܳܐ ܘܰܗܓܰܡ ܫܽܘܪ̈ܶܝܗ̇ ܕܰܫܝܽܘܠ ܘܰܐܦܶܩ ܠܐܴܕܳܡ ܨܰܠܡܳܐ ܦܰܐܝܳܐ ܕܪܰܒܽܘܬܶܗ ܘܰܠܒܶܙܬܳܐ ܘܰܫܒܺܝܬܳܐ ܕܒܺܐܝ̈ܕܰܝܗܽܘܢ ܕܰܛܪ̈ܽܘܢܶܐ: ܒܺܝܫܳܐ ܘܡܰܘܬܳܐ ܘܣܳܛܳܢܳܐ ܐܰܥܕܺܝ ܒܚܰܝܠܐܴ ܬܰܩܺܝܦܳܐ ܕܰܕܪܰܫ ܐܽܘܪܚܳܐ ܩܕܳܡܶܝܗ̇ ܠܡܰܠܟܽܘܬܳܐ ܕܰܫܡܰܝܳܐ ܘܰܡܠܶܟ ܠܰܢ ܚܰܝ̈ܶܐ ܚܰܕ̈ܬܶܐ ܕܠܐܴ ܣܳܐܒܶܝܢ ܘܠܐܴ ܡܶܫܬܪܶܝܢ: ܘܡܶܛܽܠܗܳܕܶܐ ܥܰܠ ܟܽܠܗܶܝܢ ܕܰܣܥ̣ܰܪܬ ܐܳܘ ܡܶܠܬܳܐ ܐܠܰܗܳܐ ܒܪ̈ܶܒܽܘ ܦܽܘ̈ܡܶܐ ܘܠܶܫܳܢ̈ܶܐ ܠܐܴ ܣܳܦܩܺܝܢ ܕܢܰܘܕܽܘܢ ܠܳܟ. ܐܶܠܐܴ ܒܳܥܶܝܢܰܢ ܡܶܢܳܟ ܕܠܐܴ ܬܶܥܒܶܕ ܥܰܡܰܢ ܐܰܝܟ ܕܫܳܘܶܝܢܰܢ ܐܶܠܐܴ ܒܰܡܪܰܚܡܳܢܽܘܬܳܟ ܐܶܬܚܰܫܰܚ ܥܰܡܰܢ ܘܳܐܦܶܢ ܡܰܪܳܚܺܝܢܰܢ ܘܠܐܴ ܫܳܘܶܝܢܰܢ ܠܪ̈ܰܚܡܶܐ. ܪܰܚܶܡ ܥܠܰܝܢ ܡܳܪܝܳܐ ܘܫܰܕܰܪ ܥܠܰܝܢ ܪܽܘܚܳܟ ܩܰܕܺܝܫܳܐ ܘܢܶܥܒ̣ܰܪ ܒܢܰܦ̈ܫܳܬܰܢ ܘܢܶܗ̈ܘܝܳܢ ܢܰܘ̈ܣܶܐ ܕܟܰܝ̈ܳܐ ܕܰܡܢܺܝ̣̈ܚܳܢ ܠܐܱܠܳܗܽܘܬܳܟ. ܟܰܕ ܫܳܒ̇ܶܩ ܐܰܢ̱ܬ ܚܰܘ̈ܒܰܝܢ ܘܰܚܛܳܗܰܝ̈ܢ: ܐܰܢ̱ܬ ܕܺܐܝܬܰܝܟ ܙܰܟܳܝܳܐ ܘܥܰܫܺܝܢܳܐ ܒܰܠܚܽܘܕܰܝܟ ܘܰܡܚܰܣܶܐ ܐܰܢ̱ܬ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܕܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܘܠܐܴ ܒܠܺܝ̣̈ܠܐܷ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܠܰܬܠܳܬܳܐ ܫܡܳܗ̈ܶܐ ܣܓܺܝ̈ܕܶܐ ܘܠܐܴ ܡܶܬܕܰܪ̈ܟܳܢܶܐ ܕܰܐܝܬܺܝܘ ܠܰܒܪܺܝܬܳܐ ܟܽܠܳܗ̇ ܠܰܗܘܳܝܳܐ ܚܕܳܐ ܐܠܰܗܽܘܬܳܐ ܒܳܪܝܰܬ݀ ܟܽܠ: ܘܰܡܟܰܝܢܰܬ݀ ܟܽܠ. ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܚܰܕ ܒܪܳܐ ܕܩܳܡ ܡ̣ܶܢ ܩܰܒܪܳܐ: ܘܰܐܩܺܝܡ ܠܓܶܢܣܰܢ ܕܥܰܦܪ̈ܳܢܶܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܟܰܕ ܠܰܩܝܳܡܬܳܐ ܕܺܝܠܳܟ ܡܥܰܕܥܕܺܝܢܰܢ ܡܫܺܝܚܳܐ ܐܠܰܗܳܐ ܕܺܝܠܰܢ: ܘܒܰܒ̈ܢܳܬ ܩ̈ܳܠܐܷ ܕܪܽܘܚܳܐ ܩܰܕܺܝܫܳܐ ܡܢܰܨܪܺܝܢܰܢ ܟܰܕ ܐܳܡܪܺܝܢܰܢ ܗܳܕܳܐ ܗ̱̇ܝ ܩܝܳܡܬܳܐ ܡܰܐܚܝܳܢܺܝܬܳܐ ܕܰܐܠܳܗܰܢ ܕܰܐܩܺܝܡܰܬ݀ ܠܰܢ ܡܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܠܰܫܡܰܝܳܐ ܒܫܽܘܒܚܳܐ ܪܰܒܳܐ ܥܰܠܝܰܬ݀ ܠܰܢ. ܗܳܕܳܐ ܗ̱̇ܝ ܩܝܳܡܬܳܐ ܡܰܐܚܝܳܢܺܝܬܳܐ ܕܰܐܠܳܗܰܢ ܕܒܳܗ̇ ܓܙܳܪ ܕܺܝܢܳܐ ܕܡܰܘܬܳܐ ܕܬܰܚܶܡ ܥܠܰܝܢ ܐܳܕܳܡ ܪܺܝܫ ܓܶܢܣܰܢ ܒܝܰܕ ܥܒ̇ܳܪ ܦܽܘܩܕܳܢܳܐ ܕܦܺܐܪܳܐ ܩܳܛܽܘܠܐܴ ܒܰܡܫܺܝܚܳܐ ܠܛܽܘ̈ܒܶܐ ܛܽܘܒ̈ܬܳܢܶܐ ܐܶܬܡܰܛܶܝܢܰܢ. ܗܳܢܰܘ ܝܰܘܡܳܐ ܕܰܥܒ̣ܰܕ ܡܳܪܝܳܐ ܬܰܘ ܢܕܽܘܨ: ܘܢܶܚܕܶܐ ܒܶܗ: ܘܠܐܴ ܐ̱ܢܳܫ ܡܶܢܰܢ ܢܶܫܬܟܰܚ ܒܶܗ ܡܰܐܺܝܢܳܐ ܘܒܰܛܺܝܠܐܴ ܡ̣ܶܢ ܬܶܫܒܽܘܚܬܳܐ ܗ̇ܰܘ ܕܰܩ̣ܪܳܐ ܠܰܢ ܠܬܶܫܒܽܘܚܬܶܗ ܠܐܴ ܡܶܬܡܰܠܠܳܢܺܝܬܳܐ: ܘܒܰܣܶܡ ܠܰܢ ܒܢܽܘܚܳܡܶܗ: ܘܰܐܪܘܺܝ ܠܰܢ ܒܰܚܙܳܬܶܗ ܡܪܰܘܙܳܢܺܝܬܳܐ: ܝܰܘܡܰܐ ܗ̱̇ܘ ܕܰܩܝܳܡܬܳܐ ܦܳܪܽܘܩܳܝܬܳܐ ܕܰܐܠܳܗܰܢ ܘܦܳܪܽܘܩܰܢ: ܠܐܴ ܢܶܪܚܰܡ ܡ̈ܶܠܐܷ ܒ̈ܰܛܳܠܳܬܳܐ ܘܠܐܴ ܢܡܰܠܶܠ ܦܰܟܺܝ̈ܗܳܬܳܐ ܕܫܶܥܝܳܐ ܘܕܶܒܚܳܐ ܕܰܡܢܰܟܪܺܝܢ ܠܰܢ ܡ̣ܶܢ ܬܶܘܳܪ̈ܺܝܰܐܣ ܕܡܶܐܬܺܝܬܳܟ ܕܬܰܪܬܶܝܢ: ܗ̇ܳܝ ܕܨܳܡܚܳܐ ܐܰܝܟ ܒܰܪܩܳܐ ܡ̣ܶܢ ܡܰܕܢܚܳܐ ܘܕܳܢܚܳܐ ܐܰܝܟ ܫܶܡܫܳܐ ܥܰܠ ܥܢ̈ܳܢܰܝ ܫܡܰܝܳܐ: ܠܺܠܝܰܐ ܗ̱̇ܘ ܕܡܰܪܗܶܒ ܠܰܢ ܘܰܡܙܺܝܥ ܒܰܢ ܚܽܘ̈ܫܳܒܶܐ ܛܳܒ̈ܶܐ ܕܢܶܐܪܽܘܥ ܠܪܽܘܚܳܐ ܕܰܩܝܳܡܬܳܐ ܕܟܽܠ ܒܣܰܪ: ܠܐܴ ܢܶܠܒܰܫ ܒܶܗ ܠܒܽܘ̈ܫܶܐ ܥܰܡܽܘ̈ܛܶܐ ܘܚܶܫܽܘ̈ܟܳܝܶܐ: ܠܺܠܝܰܐ ܗ̱̇ܘ ܕܚܰܕܽܘܬܳܐ ܘܰܪܘܳܙܳܐ ܘܰܦܨܺܝܚܽܘܬܳܐ ܕܒܶܗ ܩܳܡ ܡܳܪܰܢ ܡ̣ܶܢ ܩܰܒܪܳܐ ܘܠܐܴ ܚ̣ܙܳܐ ܚܒܳܠܐܴ ܒܶܝܬ ܡܺܝ̈ܬܶܐ: ܠܐܴ ܢܶܕܡܰܟ ܒܶܗ ܐܰܝܟ ܣܰܟ̈ܠܳܬܳܐ ܟܽܠܶܗ ܠܺܠܝܳܐ ܘܠܐܴ ܝܺܨܰܦ̈ܝ ܕܡܶܫܚܳܐ ܣܰܓܺܝܳܐܐ ܕܢܶܗܘܶܐ ܒܡܳܐܢ̈ܶܐ ܕܺܝܠܗܶܝܢ: ܘܟܰܕ ܐܶܬܳܐ ܚܰܬܢܳܐ ܘܶܐܬܬܚܶܕ ܬܰܪܥܳܐ: ܐܰܝܠܶܝܢ ܕܰܡܛܰܝ̈ܒܳܢ ܗ̣ܘ̈ܰܝ ܥܰܠ̣ܝ̈ ܗ̣ܘ̈ܰܝ ܥܰܡܶܗ ܠܰܓܢܽܘܢܳܐ: ܠܺܠܝܰܐ ܗ̱̇ܘ ܕܪ̈ܶܦܣܶܐ ܘܰܕܩܽܘܝ̈ܳܙܶܐ ܒܪܽܘܚ ܘܒܰܦܓܰܪ: ܠܐܴ ܢܶܕܡܰܟ ܣܰܓܺܝܳܐܺܝܬ ܘܢܶܬܶܠ ܦܰܓܪ̈ܰܝܢ ܘܰܢܦ̈ܫܳܬܰܢ ܕܢܶܗܘܽܘܢ ܒܶܝܬ ܡܰܥܡܪܳܐ ܠܕܰܝ̈ܘܶܐ: ܐܶܠܐܴ ܢܩܰܕܶܡ ܡ̣ܶܢ ܫܰܦܪܳܐ ܠܟܰܪܡܳܐ ܕܥܺܝܢܓܳܕ ܘܢܶܠܽܘܥ ܚܰܝ̈ܶܐ ܡ̣ܶܢ ܣܓܽܘܠ ܟܽܘܦܪܳܐ: ܘܢܶܣܽܘܩ ܣܰܘܩܳܐ ܪܽܘܚܳܢܳܝܳܐ ܕܽܘܪ̈ܳܕܶܐ ܘܫܽܘܫ̈ܰܢܶܐ. ܘܰܐܝܟ ܢܶܫ̈ܶܐ ܩܰܕܺܝ̈ܫܳܬܳܐ ܕܰܛܥܶܢ̈ܝ ܒܶܣ̈ܡܶܐ ܘܗܶܪ̈ܽܘܡܶܐ ܘܰܠܩܰܒܪܳܐ ܚܰܝܳܐ ܢܦ̣ܰܩ̈ܝ ܕܰܢܒܰܣ̈ܡܳܢ ܠܦܰܓܪܶܗ ܕܗ̇ܰܘ ܡܰܐܚܶܐ ܡܺܝ̈ܬܶܐ ܘܟܰܕ ܬܡܺܝ̣̈ܗܳܢ ܙܳܝ̈ܥܳܢ ܘܪ̈ܳܥܠܳܢ ܡ̣ܶܢ ܕܶܚܠܬܳܐ ܕܢܳܛܽܘܪ̈ܶܐ: ܦܓܰܥ ܒܗܶܝܢ ܡܰܠܐܱܟܳܐ ܟܰܕ ܝܳܬܶܒ ܚܕܳܪ̈ܰܝ ܩܰܒܪܳܐ: ܘܶܐܡ̣ܰܪ ܠܢܶܫ̈ܶܐ ܠܐܴ ܬܶܕܚ̈ܠܳܢ: ܝܳܕܰܥ ܐ̱ܢܳܐ ܓܶܝܪ ܒܰܫܪܳܪܳܐ ܕܰܠܝܶܫܽܘܥ ܗ̇ܰܘ ܕܶܐܨܛܠܶܒ ܡܢܳܬܡܳܠ ܒܳܥ̈ܝܳܢ ܐܢ̱ܬܶܝ̈ܢ: ܩܳܡ ܠܶܗ ܒܫܽܘܒܚܳܐ ܘܠܐܴ ܗ̣ܘܳܐ ܬܢܳܢ. ܐܶܠܐܴ ܙܶܠܶܝ̈ܢ ܠܰܓܠܺܝܠܐܴ: ܐܰܢ̱ܬܶܝ̈ܢ ܘܓܽܘܕܳܐ ܕܬܰܠܡܺܝ̈ܕܰܘܗܝ ܘܬܰܡܳܢ ܬܶܚܙܽܘܢܳܝܗܝ: ܘܰܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܥܰܒ̣̈ܕܶܐ ܕܺܝܠܳܟ ܡܳܪܝܳܐ: ܕܰܠܝܰܘܡܳܐ ܕܰܩܝܳܡܬܳܟ ܙܰܝܰܚܢܰܢ: ܘܰܐܫܘܳܐ ܠܰܢ ܕܢܶܦܽܘܩ ܟܽܠܳܢ ܠܐܘܪܥܳܐ ܕܡܶܐܬܺܝܬܳܟ ܕܬܰܪܬܶܝܢ ܒܙܰܘܚܳܐ. ܟܰܕ ܢܰܗܺܝܪܺܝܢ ܫܪ̈ܳܓܰܝܢ ܘܡܰܨܡܚܺܝܢ ܠܰܡܦܺܐܕܰܝ̈ܢ: ܘܰܡܠܶܝܢ ܡܳܐܢܰܝ̈ܢ ܘܡܰܫܦܥܺܝܢ: ܠܶܒܰܘ̈ܳܬܰܢ ܒܡܶܫܚܳܐ ܕܙܰܕܺܝܩܽܘܬܳܐ ܐܰܘܟܺܝܬ ܥܒ̇ܳܕ̈ܶܐ ܛܳܒ̈ܶܐ ܕܰܡܪܰܥܶܝܢ ܠܳܟ. ܘܰܢܥܰܕܥܶܕ ܠܳܟ ܥܺܐܕܳܐ ܪܰܒܳܐ ܕܽܐܘܫܰܥ̈ܢܶܐ ܡܶܬܝܰܕ̈ܥܳܢܶܐ: ܘܰܢܩܰܕܶܡ ܡ̣ܶܢ ܫܰܦܪܳܐ ܠܐܱܦܰܝ̈ܟ ܒܬܰܘܕܺܝܬܳܐ ܐܰܝܟ ܢܶܫ̈ܶܐ ܩܰܕܺܝ̈ܫܳܬܳܐ ܠܒܶܝܬ ܩܒܽܘܪܳܐ ܕܺܝܠܳܟ. ܘܰܡܨܰܠܠܺܝܢܰܢ ܡܶܢܟܽܠ ܣܰܢ̈ܝܳܬܳܐ ܕܠܳܟ ܠܐܴ ܫܳܦܪ̈ܳܢ: ܘܰܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ ܥܰܠ ܣܰܒܪܳܟ ܘܰܡܣܰܟܶܝܢ ܠܪ̈ܰܚܡܶܐ ܕܡܶܢܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ܀

 

ܨܠܘܬܐ ܕܨܦܪܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܟܰܕ ܒܰܥܒ̇ܳܕ̈ܶܐ ܛܳܒ̈ܶܐ ܘܰܒܓܰܠܝܽܘܬ ܐܰܦ̈ܶܐ ܠܐܴ ܟܡܺܝܪܽܘܬܳܐ ܕܰܡܚܰܦܝܳܐ ܘܰܡܢܰܟܪܝܳܐ ܠܰܢ ܡ̣ܶܢ ܦܶܓܥܳܐ ܕܒܳܟ. ܐܰܝܟܰܢܳܐ ܕܟܰܕ ܒܬܶܕܡܪ̈ܳܬܳܐ ܐܠܰܗܳܝ̈ܳܬܳܐ ܡܶܬܒܰܩܶܝܢܰܢ: ܘܰܒܡ̈ܶܠܐܷ ܡܶܬܗܰܘ̈ܢܳܢܝܳܬܳܐ ܘܰܒܢܳܡܽܘ̈ܣܰܝܟ ܡܰܠܝ̈ܰܝ ܚܰܝ̈ܶܐ ܡܶܬܗܰܓܶܝܢܰܢ. ܢܥܰܕܥܶܕ ܠܥܺܐܕܳܐ ܕܰܩܝܳܡܬܳܟ ܘܢܰܣܶܩ ܠܳܟ ܫܽܘܒܚܳܐ ܬܰܘܕܺܝܬܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܦܳܪܽܘܩܳܐ ܕܒܰܩܝܳܡܬܶܗ ܒܰܕܰܪ ܠܙܳܩܽܘ̈ܦܰܘܗܝ ܘܰܦ̣ܪܰܩ ܠܥܺܕܬܶܗ ܡܟܺܝܪܬܳܐ ܕܺܝܠܶܗ: ܒܰܪܬ ܥܰܡ̈ܡܶܐ ܗ̇ܳܝ ܕܚܶܫܰܬ݀ ܒܚܰܫܶܗ ܘܶܐܬܰܒܠܰܬ݀ ܥܰܠ ܡܰܘܬܶܗ: ܠܗ̇ܰܘ ܚܰܝܳܐ ܘܡܰܐܚܝܳܢܳܐ ܕܰܢܚ̣ܶܬ ܗ̣ܘܳܐ ܠܗܰܘܬܳܐ ܕܰܩܒܺܝܪ̈ܶܐ: ܘܪܰܣ ܛܰܐܠܐܴ ܕܢܽܘܚܳܡܳܐ ܠܰܫܟܺܝ̣̈ܒܰܝ ܥܰܠ ܣܰܒܪܶܗ: ܠܗ̇ܰܘ ܓܰܢ̱ܒܳܪܳܐ ܕܦܰܟܪܶܗ ܠܚܰܣܺܝܢܳܐ ܒܢܶܩܥܶܗ ܘܰܐܦܶܩ ܓܳܠܽܘܬܳܐ ܗ̇ܳܝ ܕܰܕܒܺܝܪܳܐ ܗܘܳܬ݀ ܠܰܛܪܽܘܢܳܐ ܘܰܐܥܕܝܳܗ̇ ܡ̣ܶܢ ܐܺܝܕܰܘ̈ܗܝ ܕܒܺܝܫܳܐ ܡܳܪܽܘܕܳܐ: ܘܗܶܦܟܰܬ݀ ܕܬܺܐܬܶܐ ܒܥܽܘܫܢܳܐ ܩܶܫܬܶܗ. ܠܗ̇ܰܘ ܕܚܰܕܺܝ ܠܰܢܒܺܝܳܐ ܕܰܘܺܝܕ ܕܶܐܬܢܰܒܺܝ ܟܰܕ ܐܶܡ̣ܰܪ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ ܘܰܣܠ̣ܶܩ ܡ̣ܶܢ ܩܶܛܠܐܴ ܘܢܰܩܺܝܦܳܐ ܠܶܗ ܓܰܢ̱ܒܳܪܽܘܬܳܐ: ܕܠܶܗ ܠܰܡܫܺܝܚܳܐ ܕܩܳܡ ܡ̣ܶܢ ܩܰܒܪܳܐ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܡܶܠܬܳܐ ܡܬܽܘܡܳܝܳܐ ܕܡ̣ܶܢ ܐܰܒܳܐ ܠܐܴ ܡܶܬܕܰܪܟܳܢܳܐ ܨܡܰܚ̣ܬ: ܓܢܺܝܙܳܐ ܘܠܐܴ ܡܶܬܥܰܩܒܳܢܳܐ ܝܰܠܕܳܐ ܦܰܐܝܳܐ ܘܠܐܴ ܡܶܬܰܐܡܪܳܢܳܐ ܘܠܐܴ ܗܽܘܠܳܢܳܝܳܐ ܕܡ̣ܶܢ ܐܰܒܳܐ ܕܢܰܚ̣ ܠܰܢ ܕܠܐܴ ܙܰܒܢܳܐ ܘܰܕܠܐܴ ܪܶܕܝܳܐ: ܘܰܕܠܐܴ ܡܶܬܚܳܐ ܠܥܶܠ ܡ̣ܶܢ ܙܰܒܢ̈ܶܐ ܠܐܴ ܡܶܬܦܰܫܩܳܢܳܐܺܝܬ. ܗ̇ܰܘ ܕܺܐܝܬܰܘܗܝ ܒܰܡܪ̈ܰܘܡܶܐ ܥܰܡ ܐܰܒܳܐ ܘܪܽܘܚܳܐ ܡܶܬܓܰܝܶܐܐ ܥܰܠ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̣̈ܢ ܦܬܺܝܟܰܬ݀ ܚܶܙܘ̈ܶܐ. ܗ̇ܰܘ ܕܟܰܕ ܫܦ̣ܰܪ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܕܰܠܨܰܠܡܳܐ ܗ̇ܰܘ ܕܰܒܪܰܝܬܳܝܗܝ ܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܘܡ̣ܶܢ ܗܽܘܠܐܷ ܗ̇ܳܝ ܡܶܕܪܳܢܳܝܬܳܐ. ܟܰܕ ܐܶܡ̣ܰܪ ܠܘܳܬܳܟ ܐܳܘ ܡܶܠܬܳܐ ܘܪܽܘܚܳܐ ܩܰܕܺܝܫܳܐ ܕܬܰܘ ܢܶܒܪܶܐ ܐ̱ܢܳܫܳܐ ܒܨܰܠܡܳܐ ܕܺܝܠܰܢ ܘܒܰܕܡܽܘܬܰܢ ܕܢܶܗܘܶܐ ܢܳܛܰܪ ܐܺܝܩܳܪܳܐ ܒܕܽܘܟܬܳܐ ܡܰܠܟܳܝܬܳܐ ܦܰܪܕܰܝܣܳܐ ܕܒܽܘ̈ܣܳܡܶܐ ܗ̇ܰܘ ܕܟܰܕ ܐܶܬܟܰܝܢܰܬ݀ ܠܶܗ ܐܰܝܟ ܕܰܠܓܰܐܝܽܘܬܳܐ ܘܺܐܝܩܳܪܳܐ ܕܰܒܪܳܐ ܚܰܒܺܝܒܳܐ: ܩܰܝܛܽܘܢܳܐ ܦܰܐܝܳܐ ܘܰܣܒܺܝܣ ܒܶܐܒ̈ܒܳܢܶܐ ܘܰܡܣܰܪܥܰܦ ܒܺܐܝܠܳܢ̈ܶܐ ܐܰܩܺܝܡܬ ܠܶܗ. ܘܡܰܠܟܳܐ ܘܡܳܪܳܐ ܥܰܠ ܟܽܠ ܕܒܰܐܪܥܳܐ ܫܰܡܰܗܬܳܝܗܝ: ܘܡ̣ܶܢ ܟܽܠܗܽܘܢ ܐܺܝܠܳܢ̈ܶܐ ܕܰܒܦܰܪܕܰܝܣܳܐ ܐܰܝܟܰܢܳܐ ܕܢܶܐܟܽܘܠ ܦܩ̣ܰܕܬܰܝܗܝ ܘܡ̣ܶܢ ܐܺܝܠܳܢܳܐ ܕܺܝܕܰܥܬܳܐ ܕܛܳܒܬܳܐ ܘܰܕܒܺܝܫܬܳܐ ܕܶܐܢ ܬܶܐܟܽܘܠ ܡܶܢܶܗ ܡܰܘܬܳܐ ܠܥܳܠܰܡ ܬܡܽܘܬ ܣܰܓܺܝ ܙܰܗܰܪܬܳܝܗܝ: ܘܟܰܕ ܠܗܳܢܳܐ ܦܽܘܩܕܳܢܳܐ ܡܳܪܳܢܳܝܳܐ ܐܰܫܠܶܡ̣ܬ ܠܶܗ: ܟܰܕ ܕܶܝܢ ܒܠ̣ܰܥ ܗ̣ܘܳܐ ܒܰܚܣܳܡܳܐ ܡܰܪܺܝܪܳܐ ܣܳܢܳܐܐ ܕܓܶܢܣܰܢ ܘܶܐܬܟܰܣܺܝ ܕܡܽܘܬ ܚܶܘܝܳܐ ܓܳܪܣܳܐ ܠܺܝܛܳܐ ܘܰܨܢܺܝܥܳܐ ܘܰܩܪܶܒ ܠܘܳܬ ܚܰܘܳܐ ܢܳܟܽܘܠܬܳܐ ܘܶܐܠܥܳܐ ܪܦܺܝܬܳܐ: ܘܰܠܚܰܫ ܠܳܗ̇ ܒܶܐܕܢܳܗ̇ ܣܰܡ ܡܰܘܬܳܐ ܩܳܛܽܘܠܐܴ: ܘܶܐܟ̣ܰܠܘ ܬܪ̈ܰܝܗܽܘܢ ܡ̣ܶܢ ܦܺܐܪܳܐ ܕܺܐܝܠܳܢܳܐ ܒܡܶܠܟܶܗ ܕܗ̇ܰܘ ܕܰܐܛܥܺܝ ܐܶܢܽܘܢ: ܘܶܐܫܬܰܠܰܚܘ ܬܪ̈ܰܝܗܽܘܢ ܡ̣ܶܢ ܫܽܘܒܚܳܐ ܕܺܝܠܗܽܘܢ ܘܬܰܟܣܺܝܬ ܒܶܗܬܬܳܐ ܐܶܬܥܰܛܰܦܘ ܥܰܠ ܓܽܘܫܡܰܝ̈ܗܽܘܢ. ܘܡܶܫ̈ܟܶܐ ܚܶܣܕ̈ܳܢܳܝܶܐ ܐܶܬܟܒܶܢܘ ܗ̣ܘܰܘ ܥܰܠ ܥܰܪܛܶܠܳܝܽܘܬܗܽܘܢ: ܘܡ̣ܶܢ ܪܰܘܡܶܗ ܕܦܰܪܕܰܝܣܳܐ ܢܦ̣ܰܠܘ ܠܐܱܪܥܳܐ ܕܠܰܘ̈ܛܳܬܳܐ ܐܶܫܬܕܺܝܘ ܘܰܓܙܳܪ ܕܺܝܢܳܐ ܕܡܰܘܬܳܐ ܡܰܪܺܝܪܳܐ ܩܰܒܶܠܘ: ܘܡ̣ܶܢ ܡܳܪܶܗ ܫܡ̣ܰܥ ܕܰܒܥܰܠܬܳܟ ܐܳܕܳܡ ܠܐܴ ܬܶܥܡܰܪܝ ܪܽܘܚܝ ܒܐܢܳܫܳܐ ܠܥܳܠܰܡ: ܘܟܰܕ ܟܶܪܝܰܬ݀ ܠܳܟ ܡܳܪܰܢ ܥܰܠ ܨܰܠܡܳܟ ܡܰܠܟܳܝܳܐ ܕܶܐܬܚܰܒܰܠ ܒܰܚܛܺܝܬܳܐ: ܒܠ̣ܰܥ ܒܰܡܚܽܘܬܳܐ ܘܰܒܛܳܥܝܽܘܬܳܐ ܕܨܰܠܡ̈ܶܐ ܚܰܪ̈ܒܶܐ ܒܰܩܛܺܝܪܳܐ ܕܡ̣ܶܢ ܣܳܛܳܢܳܐ ܠܗܽܘܢ ܣܳܓܕܺܝܢ: ܘܰܠܫܺܐܕ̈ܶܐ ܡܳܪ̈ܽܘܕܶܐ ܕܶܒܚ̈ܶܐ ܕܠܐܴ ܒܨܶܒܝܳܢܗܽܘܢ ܡܕܰܒܚܺܝܢ ܗ̣ܘܰܘ: ܢܚ̣ܶܬܬ ܠܐܱܪܥܳܐ ܟܽܘܒܳܢܳܝܬܳܐ ܘܰܠܒ̣ܶܫܬ ܕܡܽܘܬܳܐ ܗ̇ܰܘ ܕܰܢܦ̣ܰܠ: ܘܰܐܝܟܰܢܳܐ ܕܶܐܬܟܰܣܺܝ ܫܺܐܕܳܐ ܕܡܽܘܬ ܚܶܘܝܳܐ ܘܰܐܛܥܺܝ ܗ̣ܘܳܐ ܠܰܕܒܶܝܬ ܐܳܕܳܡ. ܗܳܟܰܢܳܐ ܡܫܺܝܚܳܐ ܡܳܪܰܢ ܐܶܬܥܰܛܰܦܬ ܕܡܽܘܬ ܦܰܓܪܰܢ ܡܳܝܽܘܬܳܐ ܘܚܳܫܽܘܫܳܐ: ܐܰܢ̱ܬ ܕܺܐܝܬܰܝܟ ܠܐܴ ܡܳܝܽܘܬܳܐ ܘܠܐܴ ܚܳܫܽܘܫܳܐ: ܢܚ̣ܶܬܬ ܠܒܶܝܬ ܡܺܝ̈ܬܶܐ ܨܶܝܕ ܪ̈ܳܚܡܶܐ ܕܺܝܠܳܟ ܘܒܰܙܰܥܬܳܗ̇ ܠܟܰܪܣܶܗ ܕܬܰܢܺܝܢܳܐ ܘܰܒܥܶܠܕܒܳܒܳܐ ܕܗ̇ܳܢܽܘܢ ܕܰܢܦ̣ܰܠܘ ܘܚ̣ܳܒܘ ܗ̣ܘܰܘ ܒܓܰܘ ܦܰܪܕܰܝܣܳܐ ܘܒܰܡܚܽܘܬܳܐ ܕܰܡܚ̣ܳܐ ܐܶܢܽܘܢ ܡܚܰܝܬܳܝܗܝ ܒܩܶܛܠܐܴ ܗ̇ܰܘ ܕܰܩ̣ܛܰܠ ܠܰܚܣܺܝ̣̈ܡܶܐ ܩ̣ܛܰܠܬ ܐܶܢܽܘܢ ܠܰܒܥܶܠܕ̈ܒܳܒܶܐ ܕܺܝܠܶܗ ܬܠܳܬܳܐ: ܒܺܝܫܳܐ ܘܡܰܘܬܳܐ ܘܣܳܛܳܢܳܐ. ܘܕܳܫ̣ܬ ܐܶܢܽܘܢ ܘܰܫ̣ܪܰܝܬ ܫܽܘܠܛܳܢܗܽܘܢ: ܕܰܢܚ̣ܶܬܬ ܠܒܶܝܬ ܡܺܝ̈ܬܶܐ ܘܰܐܣ̣ܶܩܬܳܝܗܝ ܠܨܰܠܡܳܟ ܚܰܒܺܝܒܳܐ ܠܝܳܪܬܽܘܬܶܗ ܐܳܦ ܠܰܥܕܶܝܢ ܕܒܽܘ̈ܣܳܡܶܐ ܘܰܐܦܢܺܝܬܳܝܗܝ ܘܰܐܣ̣ܶܩܬ ܥܰܡܳܟ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܢܽܘܓܪܳܐ ܪܰܒܳܐ ܡܣܰܟܶܝܢ ܗ̣ܘܰܘ ܠܳܟ: ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܘܰܕܫܰܪ̈ܒܳܬܳܐ ܘܰܐܒܳܐ ܕܟܽܠ ܕܳܪ̈ܺܝܢ ܘܗܳܒܶܝܠ: ܘܫܺܝܬ ܘܢܽܘܚ: ܘܰܐܒܪܳܗܳܡ ܘܺܐܝܣܚܳܩ: ܘܝܰܥܩܽܘܒ: ܘܺܐܝܽܘܒ ܙܰܕܺܝܩܳܐ: ܡܽܘܫܶܐ ܘܝܶܫܽܘܥ ܘܦܺܝܢܚܶܣ: ܘܰܫܡܽܘܐܶܝܠ: ܘܕܰܘܺܝܕ: ܘܝܶܫܽܘܥ ܒܰܪ ܝܽܘܙܳܕܳܩ ܟܳܗܢܳܐ ܪܰܒܳܐ: ܘܚܰܙܩܺܝܐܶܝܠ: ܘܶܐܫܰܥܝܳܐ ܡܫܰܒܚܳܐ. ܘܰܠܟܽܠ ܕܰܡܣܰܟܶܐ ܗ̣ܘܳܐ ܠܳܟ ܝܰܠܕܳܐ ܡܬܽܘܡܳܝܳܐ: ܘܰܒܫܽܘܒܚܳܐ ܪܰܒܳܐ ܐܰܡܠ̣ܶܟܬ ܐܶܢܽܘܢ: ܘܩܳܡ̣ܬ ܐܰܝܟ ܓܰܢ̱ܒܳܪܳܐ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܦܶܪܚܰܬ݀ ܣܒܰܪܬܳܐ ܕܰܩܝܳܡܬܳܐ ܕܺܝܠܳܟ ܒܦܽܘܡܳܐ ܕܰܫܠܺܝ̈ܚܶܐ ܒܟܽܠܳܗ̇ ܒܪܺܝܬܳܐ: ܟܰܕ ܠܟܽܠ ܥܰܡ̈ܡܺܝܢ ܐܰܟ̣ܪܶܙܘ ܘܬܰܠܡ̣ܶܕܘ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ. ܟܰܕ ܠܰܟܪ̈ܺܝܗܶܐ ܒܡܶܠܬܳܐ ܡܳܪܳܢܳܝܬܳܐ ܡܰܐܣܶܝܢ ܗ̣ܘܰܘ: ܟܰܕ ܠܟܽܠ ܟܺܐܒ ܘܟܽܘܪܗܳܢ ܕܰܒܢܰܝ̈ܢܳܫܳܐ ܡܡܰܚܰܝ̈ܳܐ ܡܰܚܠܡܺܝܢ ܗ̣ܘܰܘ: ܠܡܺܝ̈ܬܶܐ ܒܚܰܝܠܐܴ ܕܩܰܒ̣ܶܠܘ ܡ̣ܶܢ ܡܳܪܗܽܘܢ ܡܩܺܝܡܺܝܢ ܗ̣ܘܰܘ. ܟܰܕ ܠܰܚܛܳܗ̈ܶܐ ܫܳܒܩܺܝܢ ܗ̣ܘܰܘ ܘܰܠܒܽܘܨܳܪ̈ܶܐ ܘܚܰܘ̈ܒܶܐ ܡܚܰܣܶܝܢ ܗ̣ܘܰܘ ܟܰܕ ܠܫܺܐܕ̈ܶܐ ܡ̣ܶܢ ܒܢܰܝ̈ܢܳܫܳܐ ܛܳܪܕܺܝܢ ܗ̣ܘܰܘ: ܘܰܠܟܽܘܡܪ̈ܶܐ ܕܕܰܝ̈ܘܶܐ ܟܳܗ̈ܢܶܐ ܙܗܰܝ̈ܳܐ ܥܳܒܕܺܝܢ ܗ̣ܘܰܘ: ܟܰܕ ܟܽܠ ܬܶܕܡܪ̈ܳܢ ܘܚܰܝܠܺܝ̣̈ܢ ܣܳܥܪܺܝܢ ܗ̣ܘܰܘ: ܘܓܰܪ̈ܒܶܐ ܒܦܽܘܩܕܳܢ ܡܳܪܗܽܘܢ ܡܕܰܟܶܝܢ ܗܘܰܘ. ܘܰܠܗܰܝܡܳܢܽܘܬܳܐ ܬܪܺܝܨܬܳܐ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܡܰܟܪܙܺܝܢ ܗ̣ܘܰܘ: ܘܠܰܡܫܺܝܚܳܐ ܕܩܳܡ ܡ̣ܶܢ ܩܰܒܪܳܐ ܒܚܰܝܠܐܴ ܪܰܒܳܐ ܘܓܰܢ̱ܒܳܪܽܘܬܳܐ ܣܳܓܕܺܝܢ ܗ̣ܘܰܘ: ܒܰܩܝܳܡܬܶܗ ܕܡ̣ܶܢ ܒܶܝܬ ܡܺܝ̈ܬܶܐ ܡܰܘܕܶܝܢ ܗ̣ܘܰܘ ܘܡܶܛܽܠ ܗܳܕܶܐ ܚܢܰܢ ܘܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ ܕܠܰܩܝܳܡܬܳܐ ܕܺܝܠܳܟ ܒܚܰܕܽܘܬܳܐ ܪܰܒܬܳܐ ܡܪܰܡܪܡܺܝܢܰܢ: ܘܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܩܳܡ̣ܬ ܡ̣ܶܢ ܩܰܒܪܳܐ ܣܳܓܕܺܝܢܰܢ ܘܡܰܘܕܶܝܢܰܢ: ܕܰܬܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܕܡܶܢܳܟ ܟܽܠܗܽܘܢ ܝܰܘ̈ܡܳܬܳܐ ܕܩܳܐܶܡ ܥܳܠܡܳܐ: ܘܚܽܘܒܳܐ ܘܰܐܘܝܽܘܬܳܐ ܫܰܟܶܢ ܠܰܢ ܡ̣ܶܢ ܠܘܳܬܳܟ ܫܰܗܳܐ ܬܰܟܬܽܘ̈ܫܶܐ ܘܰܩܪ̈ܳܒܶܐ ܕܠܰܚܕ̈ܳܕܶܐ ܚܳܪܒܺܝܢ ܘܰܠܥܺܕ̈ܳܬܳܟ ܘܥܰܠ ܕܰܝܪ̈ܳܬܳܟ ܩܰܕܺܝ̈ܫܳܬܳܐ: ܒܺܝ̈ܫܳܬܳܐ ܪܳܢܶܝܢ ܘܡܶܬܚܰܫܒܺܝܢ: ܐܶܠܐܴ ܒܰܥܓܰܠ ܩܽܘܡ ܡܳܪܝܳܐ ܩܕܳܡ ܐܰܦܰܝ̈ܗܽܘܢ ܘܰܒܪܶܟ ܐܶܢܽܘܢ. ܘܠܐܴ ܬܶܬܶܠ ܠܰܬܒܳܪܳܐ ܢܰܦܫܳܐ ܕܡܰܘܕܝܳܐ ܠܳܟ. ܐܶܠܐܴ ܒܥܺܝ ܠܕܰܐܒܺܝܕܳܐ: ܩܢܺܝ ܠܰܕܡܰܪܥܶܐ: ܥܨܽܘܒ ܠܕܰܬܒܺܝܪܳܐ ܟܰܢܶܫ ܠܕܰܡܒܰܕܪ̈ܶܐ: ܩܽܘܡ ܡܳܪܝܳܐ ܒܥܶܕܪܶܗ ܕܥܰܡܳܟ. ܕܠܐܴ ܢܶܟܡܰܢ ܠܳܗ̇ ܕܰܐܒܳܐ ܡܚܰܒܠܳܢܳܐ ܘܰܢܛܰܒܚܺܝܗ̇ ܘܰܢܒܰܣܒܣܺܝܗ̇ ܕܰܐܢ̱ܬ ܐܺܝܬܰܝܟ ܪܳܥܝܳܐ ܫܰܪܺܝܪܳܐ ܐܶܬܦܰܢ ܥܠܶܝܗ̇ ܘܠܐܴ ܬܶܛܥܶܝܗ̇ ܐܳܘ ܪܳܥܝܶܗ ܕܺܐܝܣܪܳܐܶܝܠ ܘܰܫ̣ܪܳܐ ܫܰܝܢܳܟ ܘܰܫܠܳܡܳܟ ܒܰܝܢܳܬ ܡܰܠܟ̈ܶܐ ܘܟܳܗ̈ܢܶܐ ܘܟܽܠܶܗ ܩܠܺܝܪܳܘܣ ܕܥܰܡܳܟ ܡܗܰܝܡܢܳܐ: ܘܫܰܟܶܢ ܠܰܢ ܫܽܘܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܘܚܽܘܣܳܝܳܐ ܕܟܽܠܗܶܝܢ ܡܶܬܥܰܒܪ̈ܳܢܘܳܬܰܢ: ܘܰܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܰܫܟ̣ܶܒܘ ܥܰܠ ܣܰܒܪܳܟ ܠܐܴ ܕܰܓܳܠܐܴ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܰܐܦܨܰܚ ܠܰܢ ܒܰܚܙܳܬ݀ ܦܰܪܨܽܘܦܳܟ ܕܢܰܘܕܶܐ ܠܐܱܠܳܗܽܘܬܳܟ: ܘܢܶܣܓܽܘܕ ܟܽܠܰܢ ܠܰܚܕܳܢܳܝܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

 

ܥܛܪܐ

ܡܫܺܝܚܳܐ ܢܽܘܗܪܳܐ ܫܰܪܺܝܪܳܐ ܕܡ̣ܶܢ ܐܰܒܳܐ ܕܶܒܚܳܐ ܕܠܐܴ ܡܽܘܡܳܐ ܡܚܰܣܝܳܢܳܐ ܕܚܰܘ̈ܒܳܬܳܐ: ܘܰܡܩܰܒܠܳܢܳܐ ܕܰܨܠܰܘ̈ܳܬܳܐ ܕܰܟܝ̈ܳܬܳܐ ܘܰܡܦܰܢܝܳܢܳܐ ܕܫ̈ܶܐܠܳܬܳܐ. ܐܰܢ̱ܬ ܕܩܰܒ̣ܶܠܬ ܡ̣ܶܢ ܗܳܒܶܝܠ ܩܽܘܪܒܳܢܶܗ: ܘܠܰܚܡܳܐ ܘܚܰܡܪܳܐ ܕܩܰܪܶܒ ܠܳܟ ܡܰܠܟܺܝܙܕܶܩ: ܘܶܐܬܪܰܥܺܝܬ ܒܦܺܝܪܡܶܗ ܕܰܐܗܪܽܘܢ ܟܳܗܢܳܐ: ܘܡ̣ܶܢ ܡܰܫܪܺܝܬܳܐ ܕܺܐܝܣܰܪܠܳܝܬܳܐ ܙܓܰܪܬ ܠܡܰܘܬܳܐ ܡܰܪܺܝܪܳܐ: ܘܰܐܘܒ̣ܶܕܬ ܟܳܗ̈ܢܶܐ ܒܢ̈ܰܝ ܩܽܘܪܰܚ ܕܳܐܬܳܢ ܘܰܐܒܺܝܪܰܐܡ ܕܩܳܡ̣ܘ ܠܽܘܩܒܰܠ ܡܽܘܫܶܐ ܘܶܐܬܦܰܬܚܰܬ݀ ܐܰܪܥܳܐ ܘܒܶܠܥܰܬ݀ ܐܶܢܽܘܢ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܡܳܪܰܢ: ܐܶܨܛܒܰܝ ܒܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܘ ܥܰܒ̣ܕܰܝ̈ܟ ܡܚܺܝ̣̈ܠܐܷ: ܘܫܰܟܶܢ ܠܰܢ ܟܽܠܗܶܝܢ ܛܳܒ̈ܳܬܳܐ ܡܶܬܒܰܥܝܳܢ̈ܳܝܳܬܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܒܒܳܥܽܘ ܡܶܢܳܟ ܡܳܪܝܳܐ ܡܳܪܰܢ: ܠܐܴ ܬܰܣܠܐܷ ܘܠܐܴ ܬܶܫܕܶܐ ܠܰܢ ܡ̣ܶܢ ܩܕܳܡܰܝܟ: ܘܰܠܥܺܕܬܳܟ ܕܰܩܢ̣ܰܝܬ ܒܰܕܡܳܟ ܝܰܩܺܝܪܳܐ ܘܶܐܡ̣ܰܪܬ ܕܡܽܘ̈ܟܠܐܷ ܕܰܫܝܽܘܠ ܠܐܴ ܢܶܚܣܢܽܘܢܳܗ̇ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ: ܐܰܢ̱ܬ ܡܳܪܶܐ ܟܽܠ ܐܰܫܪܳܐ ܫܰܝܢܳܟ ܘܰܫܠܳܡܳܟ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ ܕܬܰܣܶܩܝ ܠܳܟ ܫܘܒܚܳܐ ܒܦܽܘܡܳܐ ܕܝܰܠܕܶܝ̈ܗ̇ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܣܰܒܪܳܐ ܕܚܰܝ̈ܶܐ ܘܰܡܢܰܚܡܳܢܳܐ ܕܥܰܢܺܝ̈ܕܶܐ: ܠܗ̇ܰܘ ܕܒܺܐܝ̈ܕܰܘܗܝ ܐܶܢܶܝܢ ܟܽܠܗܶܝܢ ܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܥܳܠܰܡ: ܠܗ̇ܰܘ ܕܰܡܚܰܕܶܬ ܠܦܰܓܪ̈ܶܐ ܕܰܒܠܺܝܘ ܒܰܩܝܳܡܬܶܗ: ܘܰܐܣܶܩ ܐܶܢܶܝܢ ܡ̣ܶܢ ܬܰܐܘ̈ܘܳܢܶܝܗ̇ ܕܰܫܝܽܘܠ ܒܢܽܘܚܳܡܶܗ ܠܗ̇ܰܘ ܕܦ̇ܳܪܰܥ ܠܟܺܐܢ̈ܶܐ ܘܙܰܕܺܝ̈ܩܶܐ ܐܰܓܪܳܐ ܕܥܰܡܠܰܝ̈ܗܽܘܢ: ܘܰܠܒܺܝ̈ܫܶܐ ܘܰܠܥܰܘ̈ܳܠܐܷ ܥܒ̇ܳܕܳܐ ܕܺܐܝܕܰܝ̈ܗܽܘܢ. ܘܡܰܡܠܠܐܴ ܕܣܶܦܘ̈ܳܬܗܽܘܢ ܒܗܳܢܳܐ ܥܶܕܳܢܳܐ܀

 

ܣܕܪܐ

ܠܳܟ ܫܽܘܒܚܳܐ ܡܫܺܝܚܳܐ ܦܳܪܩܳܐ ܪܰܒܳܐ ܕܰܦ̣ܪܰܩ ܠܓܶܢܣܰܢ ܡ̣ܶܢ ܐܺܝ̈ܕܰܝ ܡܰܘܬܳܐ ܘܣܳܛܳܢܳܐ: ܕܰܐܠܺܝ ܘܰܐܣܶܩ ܠܓܶܢܣܰܢ ܨܰܠܡܶܗ ܡܫܰܒܚܳܐ ܡ̣ܶܢ ܨܳܡܰܪܬܳܐ ܬܰܚܬܳܝܬܳܐ ܕܚܶܫܽܘܟܳܐ ܕܰܚܛܺܝܬܳܐ. ܠܳܟ ܬܰܘܕܺܝܬܳܐ ܒܪܳܐ ܚܰܒܺܝܒܳܐ ܝܰܠܕܳܐ ܡܬܽܘܡܳܝܳܐ: ܕܶܐܬܺܝܠܶܕ ܡ̣ܶܢ ܐܰܒܳܐ ܩܕܳܡ ܙܰܒ̈ܢܶܐ ܕܠܐܴ ܫܽܘܪܳܝܳܐ ܘܶܐܬܳܐ ܒܚܰܪܰܬ݀ ܙܰܒܢ̈ܶܐ: ܘܰܦ̣ܪܰܩ ܠܰܢ ܡ̣ܶܢ ܫܰܒܳܝܳܐ. ܠܳܟ ܣܶܓܕܬܳܐ ܪܽܘܚܳܐ ܕܩܽܘܕܫܳܐ ܚܰܝܳܐ ܡܰܐܚܝܳܢܳܐ: ܠܐܴ ܐܰܝܢܳܝܳܐ ܘܠܐܴ ܟܡܳܢܳܝܳܐ: ܗ̇ܰܘ ܕܟܰܕ ܫܦ̣ܰܪ ܠܨܶܒܝܳܢܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ: ܕܡܶܬܓܰܫܡܳܢܽܘܬܳܐ ܬܶܣܰܒ ܡ̣ܶܢ ܟܝܳܢܰܢ ܚܰܠܳܫܳܐ: ܐܶܬܥܰܛܰܦ̣ܬ ܦܰܓܪܳܐ ܡܳܝܽܘܬܳܐ ܘܰܡܚܰܒܰܠ ܒܫܽܘ̈ܡܳܬܳܐ ܘܒܰܚܛܳܗ̈ܶܐ ܘܥܰܡܳܟ ܠܰܨܠܺܝܒܳܐ ܐܰܣ̣ܶܩܬ ܐܶܢܽܘܢ: ܘܒܰܙܩܺܝܦܳܟ ܩܒ̣ܰܥܬ ܘܰܠܚ̣ܰܝܬ ܐܶܢܽܘܢ. ܘܰܐܡܺܝܬܬ ܠܰܚܛܺܝܬܳܐ ܗ̇ܳܝ ܕܰܐܝܟ ܚܰܠܳܕܺܝܬܳܐ ܐܰܩܢܰܬ݀ ܒܢܰܦ̈ܫܳܬܰܢ: ܘܰܢܚ̣ܶܬܬ ܠܒܶܝܬ ܡܺܝ̈ܬܶܐ ܐܰܝܟ ܫܰܪܟܳܐ ܕܡܳܝܽܘ̈ܬܶܐ: ܘܶܐܬܚ̣ܰܢܰܛܬ ܚܽܘܢܛܬܳܐ ܢܺܝܩܳܘܕܺܝܡܳܣܳܝܬܳܐ: ܐܳܦ ܐܶܬܥܰܦܺܝܬ ܥܽܘܦܳܝܳܐ ܡܠܐܷ ܬܶܗܪܳܐ: ܘܡ̣ܶܢ ܝܰܘܣܶܦ ܒܽܘܠܺܝܛܺܝ ܗ̇ܰܘ ܕܺܐܝܬܰܘܗܝ ܡ̣ܶܢ ܓܶܢܣܳܐ ܡܝܰܩܪܳܐ ܘܰܫܘܶܐ ܠܛܽܘ̈ܒܶܐ. ܘܩܳܡ̣ܬ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܐܰܢ̱ܬ ܕܰܐܩܺܝܡܬ ܠܰܫܡܰܝܳܐ ܘܠܐܱܪܥܳܐ ܡ̣ܶܢ ܫܽܘܪܳܝܳܐ ܥܰܡ ܝܳܠܽܘܕܳܟ. ܘܰܣܠ̣ܶܩܬ ܡ̣ܶܢ ܩܰܒܪܳܐ ܒܚܰܝܠܐܴ ܘܓܰܢ̱ܒܳܪܽܘܬܳܐ ܘܰܐܩܺܝܡܬ ܥܰܡܳܟ ܠܓܶܢܣܳܐ ܕܥܰܦܪ̈ܳܢܶܐ ܕܡܺܝܬܬ ܥܰܠ ܐܰܦܰܘ̈ܗܝ: ܘܟܰܕ ܠܰܫܠܺܝ̈ܚܶܐ ܩܰܕܺܝ̈ܫܶܐ ܐܰܦܶܣ̣ܬ ܘܰܡܢܰܘ̈ܳܬܳܐ ܘܦܶܣ̈ܶܐ ܠܗܽܘܢ ܐܰܪܡܺܝܬ ܕܟܽܠ ܚܰܕ ܡܶܢܗܽܘܢ ܢܶܦܽܘܩ ܠܰܦܢܺܝܬܳܐ ܐܰܝܕܳܐ ܕܡܳܛܝܳܐ ܠܶܗ ܢܰܐܠܶܦ ܘܢܰܟܪܶܙ. ܘܟܰܕ ܢܦ̣ܰܩܘ ܗ̣ܘܰܘ ܐܰܟ̣ܪܶܙܘ ܘܶܐܡ̣ܰܪܘ ܚܕܳܐ ܐܠܰܗܽܘܬܳܐ ܕܩܳܡܰܬ݀ ܡ̣ܶܢ ܩܰܒܪܳܐ: ܚܰܕ ܐܠܰܗܳܐ ܕܶܐܬܓܰܫܰܡ: ܘܗ̣ܽܘ ܟܰܕ ܗ̣ܽܘ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܡܶܬܓܰܝܶܐܐ ܘܥܰܠܗܳܕܶܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܡܳܪܝܳܐ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ: ܘܠܐܴ ܬܶܥܽܘܠ ܥܰܡܰܢ ܠܕܺܝܢܳܐ ܡܳܐ ܕܳܐܬܶܐ ܐܰܢ̱ܬ ܒܡܶܐܬܺܝܬܳܟ ܕܬܰܪܬܶܝܢ. ܐܰܝܟܰܢܳܐ ܕܬܶܬܪܰܚܰܡ ܥܰܠ ܥܺܕܬܳܟ ܩܰܕܺܝܫܬܳܐ ܘܰܬܪܺܝܨܰܬ݀ ܫܽܘܒܚܳܐ ܕܗܳܪܟܳܐ ܬܪܰܡܪܶܡ ܩܰܪܢܳܗ̇ ܥܰܠ ܒܥܶܠܕ̈ܒܳܒܶܝܗ̇: ܘܰܐܪܡܳܐ ܫܰܝܢܳܟ ܘܰܫܠܳܡܳܟ ܒܰܝܢܳܬ ܡܰܠܟܘ̈ܳܬܳܐ ܕܰܐܪܥܳܐ: ܘܠܐܴ ܬܶܬܶܠ ܒܰܢ ܐܺܝܕܳܐ ܠܰܒܥܶܠܕ̈ܒܳܒܰܝܢ ܗ̇ܳܢܽܘܢ ܕܰܥܠܰܝܢ ܡܢܺܝܕܺܝܢ ܪܺܝܫܳܐ. ܐܶܠܐܴ ܐܰܕܢܰܚ ܥܠܰܝܢ ܢܽܘܗܪܳܟ ܘܰܐܪܬܰܚ ܠܰܢ ܒܚܽܘܒܳܟ. ܘܰܐܙܠܶܓ ܥܠܰܝܢ ܙܰܗܪܺܝܪ̈ܶܐ ܕܰܩܝܳܡܬܳܟ: ܘܚܰܣܳܐ ܠܰܢ ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܟ: ܘܰܐܩܺܝܡ ܠܰܢ ܡ̣ܶܢ ܝܰܡܺܝܢܳܟ: ܐܰܝܟܰܢܳܐ ܕܢܶܚܙܶܐ ܚܢܳܢܳܟ ܒܝܽܘܡ ܕܺܝܢܳܐ ܡܳܐ ܕܡܶܬܓ̈ܰܠܝܳܢ ܟܰܣ̈ܝܳܬܳܐ ܘܓܰܠܝ̈ܳܬܳܐ ܕܰܒܢܰܝ̈ܢܳܫܳܐ: ܐܰܫܘܳܐ ܠܰܢ ܠܓܰܠܝܽܘܬ ܐܰܦ̈ܶܐ ܕܰܩܕܳܡܰܝܟ ܕܠܐܴ ܒܶܗܬܬܳܐ ܕܰܚܛܺܝܬܳܐ. ܘܡܳܐ ܕܳܐܬܶܐ ܐܰܢ̱ܬ ܠܰܩܝܳܡܬܳܐ ܕܟܽܠ ܒܣܰܪ ܩܪܺܝ ܩܰܪܶܒ ܠܰܢ ܠܘܳܬܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡ

 

ܛܟܣܐ ܕܚܕ ܒܫܒܐ ܚܡܝܫܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ

ܩܕܡܝܬ ܨܠܘܬܐ ܕܫܘܪܝܐ

 

ܡܰܢܰܥ ܠܰܢ ܡܳܪܝܳܐ ܠܥܺܐܕܳܟ ܗ̇ܰܘ ܚܰܕܽܘܬܳܢܳܝܳܐ: ܘܰܠܚܰܓܳܟ ܗ̇ܰܘ ܠܐܴ ܥܳܒܽܘܪܳܐ ܘܰܠܦܶܨܚܳܟ ܗ̇ܰܘ ܦܨܺܝܚܳܐ ܘܡܰܦܨܚܳܢܳܐ ܕܢܰܦ̈ܫܳܬܰܢ: ܘܠܰܓܢܽܘܢܳܟ ܗ̇ܰܘ ܠܐܴ ܡܶܫܬܰܪܝܳܢܳܐ ܘܰܠܒܽܘܣܳܡܳܐ ܕܰܒܡܰܠܟܽܘܬܳܟ ܗ̇ܳܝ ܕܠܐܴ ܦܳܛܪܳܐ ܘܰܠܚܰܝ̈ܶܐ ܥܬܺܝ̣̈ܕܶܐ ܕܥܰܡܳܟ: ܘܠܰܚܙܳܬܳܐ ܕܺܝܠܳܟ ܫܽܘܒܚܳܐ ܘܬܰܘܕܺܝܬܳܐ ܢܰܣܶܩ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܘܒܰܣܺܝܡܳܐ ܕܡܰܠܶܠ ܪܽܘܚܶܗ ܩܰܕܺܝܫܳܐ ܒܦܽܘܡܳܐ ܕܰܢܒܺܝܰܘ̈ܗܝ ܕܡ̣ܶܢ ܥܳܠܰܡ: ܘܒܰܩܢܽܘܡܶܗ ܐܶܬܳܐ ܘܫܰܡܠܺܝ ܐܰܟܡܳܐ ܕܡܰܠܶܠܘ ܥܠܰܘܗܝ ܘܰܪܫ̣ܰܡܘ ܦ̈ܶܠܐܴܬܶܗ: ܘܚܰܬܶܡ ܐܶܢܽܘܢ ܒܦܰܓܪܶܗ: ܘܶܐܬܥܰܠܺܝ ܠܩܰܝܣܳܐ ܕܰܨܠܺܝܒܳܐ ܕܚܶܣܕܳܐ ܐܰܟܡܳܐ ܕܰܐܪܙܽܘܗܝ ܘܶܐܫܬܺܝ ܚܰܠܐܴ ܘܰܡܪܳܪ̈ܶܐ ܐܰܟܡܳܐ ܕܪܰܫܡܽܘܗܝ: ܘܶܐܬܬܕܺܝܢ ܡ̣ܶܢ ܦܺܝܠܰܛܳܘܣ ܕܰܝ̇ܳܢܳܐ: ܟܰܕ ܠܕܰܝ̈ܳܢܶܐ ܒܕܺܝܢܳܐ ܟܺܐܢܳܐ ܦܳܟ̇ܰܪ: ܘܡܺܝܬ ܐܰܝܟ ܕܰܨܒ̣ܳܐ ܡ̣ܶܢ ܒܺܝ̈ܫܶܐ ܕܰܐܪܓܙܽܘܗܝ ܘܩܳܡ ܡ̣ܶܢ ܩܰܒܪܳܐ: ܘܡܰܠܐܱܟܳܐ ܥܰܓܶܠ ܟܺܐܦܳܐ ܡ̣ܶܢ ܩܰܒܪܶܗ: ܘܶܐܬܚܙܺܝ ܠܢܶܫ̈ܶܐ ܢܰܟ̈ܦܳܬܳܐ ܒܨܰܦܪܳܐ ܟܰܕ ܩܳܡ ܥܰܕ ܚܶܫܽܘܟ ܘܒܳܬܰܪܟܶܢ ܠܚܰܕܥܣܰܪ ܟܰܕ ܟܢܺܝܫܺܝܢ ܗ̣ܘܰܘ ܒܥܶܠܺܝܬܳܐ: ܘܶܐܬܥܰܠܺܝ ܠܰܫܡܰܝܳܐ ܒܙܰܘܚܳܐ ܕܡܰܠܐܱܟ̈ܶܐ: ܘܺܝܬܶܒ ܡ̣ܶܢ ܝܰܡܺܝܢܳܐ ܕܰܐܒܳܐ ܫܳܠܽܘܚܶܗ ܘܳܐܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒ̈ܢܶܐ ܕܥܶܕ̈ܳܢܶܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܕܪܐ

ܐܠܰܗܳܐ ܗ̇ܰܘ ܕܰܕܠܐܴ ܫܽܘܪܳܝ ܐܺܝܬܰܝܟ ܘܠܐܴ ܫܽܘܠܳܡܳܐ ܩܳܪܶܒ ܠܳܟ: ܘܰܠܥܳܠܰܡ ܥܳܠܡܺܝܢ ܡܟܰܬܰܪ ܐܰܢ̱ܬ: ܘܰܡܩܰܘܶܐ ܐܰܢ̱ܬ ܕܠܐܴ ܫܽܘܚܠܳܦܳܐ ܥܰܡ ܝܳܠܽܘܕܳܟ. ܗ̇ܰܘ ܕܟܰܕ ܠܐܴ ܫܶܦܪܰܬ݀ ܠܡܳܪܽܘܬܳܟ ܕܒܰܠܚܽܘܕܰܝܟ ܬܶܬܒܰܣܰܡ ܒܬܶܐܘܳܪܺܝܰܐ ܕܫܽܘܒܚܳܟ ܒ̣ܪܰܝܬ ܠܡܰܠܐܱܟ̈ܶܐ ܘܰܠܟܽܠܗܽܘܢ ܛܶܟ̈ܣܶܐ ܫܡܰܝ̈ܳܢܶܐ: ܟܰܢܺܝܬ ܐܶܢܽܘܢ ܒܺܝܕܰܥܬܳܟ ܗܰܘ̈ܢܶܐ ܬܪ̈ܰܝܳܢܶܐ ܕܢܶܗܘܽܘܢ ܡܫܰܡܫܺܝܢ ܠܳܟ ܗܰܘܢܳܐ ܩܰܕܡܳܝܳܐ ܘܰܠܚܽܘܕܳܝܳܐ ܒܰܠܚܽܘܕܰܝܟ. ܐܰܢ̱ܬ ܕܺܐܝܬܰܝܟ ܒܳܪܽܘܝܗܽܘܢ ܐܠܰܗܳܐܺܝܬ: ܘܒܳܬܰܪܟܶܢ ܫܦ̣ܰܪ ܠܨܶܒܝܳܢܳܟ ܗ̇ܰܘ ܛܳܒܳܐ ܠܐܴ ܡܶܬܕܰܪܟܳܢܳܐܺܝܬ: ܒܰܡܕܰܒܪܳܢܽܘܬܳܟ ܗ̇ܳܝ ܕܠܐܴ ܡܶܬܡܰܠܠܐܴ: ܘܡ̣ܶܢ ܝܰܒܺܝܫܬܳܐ ܫܩ̣ܰܠܬ ܡܶܕܪܳܐ ܐܰܘܟܺܝܬ ܟܶܬܳܐ ܚܶܐܠܳܢܳܝܬܳܐ ܘܰܓܒܰܠܬܳܝܗܝ ܒܨܰܠܡܳܟ ܘܒܰܕܡܽܘܬܳܟ: ܠܗ̇ܰܘ ܒܰܪܢܳܫܳܐ ܩܰܕܡܳܝܳܐ ܘܳܐܕܳܡ ܟܰܢܺܝܬܳܝܗܝ ܗܰܘܢܳܐ ܬܠܺܝܬܳܝܳܐ: ܘܟܰܕ ܚ̣ܛܳܐ ܘܰܥܒ̣ܰܪ ܦܽܘܩܕܳܢܳܟ ܡܺܝܬ ܡܰܘܬܳܐ ܡܰܪܺܝܪܳܐ ܕܫܳܘܶܐ ܗ̣ܘܳܐ ܘܶܐܬܥܰܒܕܰܕ ܠܰܚܛܺܝܬܳܐ ܘܰܗ̣ܘܳܐ ܟܬܺܝܫܳܐ ܘܩܰܢܺܝܛܳܐ ܒܝܰܕ ܫܶܦܠܐܴ ܗ̇ܰܘ ܕܒܶܗ ܐܶܬܢܰܟܪܺܝ ܡܶܢܳܟ ܐܠܰܗܳܐ. ܘܡ̣ܶܢ ܦܰܪܕܰܝܣܳܐ ܫܡܰܝܳܢܳܐ ܘܡܶܢܳܟ ܐܶܬܬܠܺܝܛ ܘܶܐܬܬܰܣܠܺܝ: ܘܟܰܕ ܠܒܶܝܬ ܡܺܝ̈ܬܶܐ ܐܶܬܬܰܚܬܺܝܬ ܡܶܛܽܠܳܬܶܗ: ܐܳܦ ܐܶܬܟܒܶܢ̣ܬ ܦܰܓܪܳܐ ܡܳܝܽܘܬܳܐ ܘܰܡܡܰܟܟܳܐ ܘܠܐܴ ܫܰܢܺܝܬ ܐܰܘ ܐܰܪܚܶܩ̣ܬ ܡ̣ܶܢ ܡܰܪܟܰܒܬܳܐ ܕܰܟܪ̈ܽܘܒܶܐ: ܐܰܘ ܡ̣ܶܢ ܡܪ̈ܰܘܡܶܐ ܠܐܴ ܡܶܬܚܰܙ̈ܝܳܢܶܐ ܕܰܐܠܳܗܽܘܬܳܟ ܐܶܬܺܝܠܶܕܬ ܐܰܝܟ ܒܰܪܢܳܫܳܐ: ܥܡ̣ܰܕܬ ܒܓܰܘ ܝܽܘܪܕܢܳܢ ܐܰܝܟ ܚܰܝܳܒܳܐ: ܩܰܒ̣ܶܠܬ ܥܠܰܝܟ ܨܰܘܡܳܐ ܐܰܝܟ ܚܰܝܳܒܳܐ: ܩܰܒ̣ܶܠܬ ܥܠܰܝܟ ܨܰܘܡܳܐ ܐܰܝܟ ܫܚܺܝܡܳܐ ܐܶܬܬܕܺܝܢܬ ܐܰܝܟ ܥܳܒ̇ܶܕ ܒܺܝ̈ܫܳܬܳܐ ܡ̣ܶܢ ܦܺܝܠܰܛܳܘܣ: ܥܰܠ̣ܬ ܠܒܶܝܬ ܕܺܝܢܳܐ ܐܰܝܟ ܠܐܴ ܢܳܡܽܘܣܳܝܳܐ: ܘܶܐܫܬܰܐܠܬ ܡ̣ܶܢ ܥܰܦܪܳܐ ܕܰܓܒ̣̈ܰܠܝ ܐܺܝ̈ܕܰܝܟ ܩܰܕܺܝ̈ܫܳܬܳܐ. ܐܶܬܬܣܺܝܡܬ ܒܩܰܒܪܳܐ ܘܰܐܝܟ ܥܰܢܺܝܕܳܐ ܐܶܬܥܰܦܺܝܬ ܘܡ̣ܶܢ ܪ̈ܰܚܡܰܝܟ ܝܰܘܣܶܦ ܘܢܺܝܩܳܘܕܺܝܡܳܘܣ ܐܶܬܚܰܢ̣ܛܬ ܐܰܝܟ ܥܰܢܺܝܕܳܐ ܡܢܰܚܡܳܢܳܐ ܕܟܽܠܗܽܘܢ ܥܰܢܺܝ̈ܕܶܐ: ܘܩܳܡ̣ܬ ܒܫܽܘܒܚܳܐ ܠܰܬܠܳܬܳܐ ܝܰܘ̈ܡܺܝܢ: ܘܠܰܬܠܳܬܳܐ ܒܥܶܠܕ̈ܒܳܒܶܐ ܐܰܘܒ̣ܶܕܬ ܒܰܩܝܳܡܬܳܟ ܠܰܫܝܽܘܠ ܘܰܠܡܰܘܬܳܐ ܘܣܳܛܳܢܳܐ: ܘܰܠܕܰܘܺܝܕ ܢܒܺܝܳܐ ܚܰܕܺܝܬ ܗ̇ܰܘ ܕܶܐܬܢܰܒܺܝ ܥܠܰܝܟ ܘܶܐܡ̣ܰܪ ܕܩܳܡ ܐܠܰܗܳܐ ܡ̣ܶܢ ܩܰܒܪܳܐ ܘܰܒܥܶܠܕ̈ܒܳܒܰܘܗܝ ܟܽܠܗܽܘܢ ܐܶܬܒܰܕܰܪܘ. ܝܰܘܡܳܢܳܐ ܥܰܡ ܕܰܘܺܝܕ ܢܒܺܝܳܐ ܢܰܙܥܶܩ ܘܢܺܐܡܰܪ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ. ܝܰܘܡܳܢܳܐ ܥܰܡ ܒܰܪ ܐܺܝܫܰܝ ܢܝܰܒܶܒ ܘܢܶܚܽܘܨ ܠܩܺܝܬܳܪ̈ܰܝܢ ܘܟܶܢܳܪ̈ܰܝܢ ܢܶܚܙܽܘܩ: ܘܰܒܓܰܓܪ̈ܳܬܰܢ ܢܶܩܥܶܐ ܘܠܐܴ ܢܶܫܬܽܘܩ ܘܰܢܩܰܢܩܶܢ ܕܝܢ ܠܩܳܠܰܝ̈ܢ ܘܰܠܓܰܢܰܬ݀ ܒܽܘ̈ܣܳܡܶܐ ܢܶܥܽܘܠ ܠܥܺܕܬܳܐ ܩܰܕܺܝܫܬܳܐ ܘܰܢܙܰܡܰܪ ܒܩܺܝ̈ܢܳܬܰܢ ܬܶܫܒ̈ܚܳܬܳܐ ܠܐܴ ܫܰܠܘ̈ܳܝܳܬܳܐ ܝܰܘܡܳܢܳܐ ܢܗܰܠܶܠ ܐܶܫܰܥܝܳܐ ܘܰܠܥܺܕܬܳܐ ܡܟܺܝܪܬܳܐ ܕܡܰܠܟܳܐ ܢܣܰܒܰܪ ܕܶܐܬܬܥܺܝܪ ܐܶܬܬܥܺܝܪ ܐܽܘܪܫܠܶܡ ܘܰܠܒ̣ܰܫܝ ܥܽܘܫܢܳܐ ܘܓܰܐܝܽܘܬܳܐ ܡܕܺܝܢ̱ܬܶܗ ܕܡܰܠܟܳܐ ܪܰܒܳܐ: ܝܰܘܡܳܢܳܐ ܐܺܝܽܘܒ ܐܶܬܢܰܒܺܝ ܕܝܳܕܰܥ ܐ̱ܢܳܐ ܕܦܳܪܽܘܩܝ ܚܰܝ ܗ̣ܽܘ: ܘܥܰܠ ܐܰܪܥܳܐ ܒܫܽܘܒܚܳܐ ܡܶܬܓܠܐܷ ܡܒܰܕܶܩ ܗ̣ܘܳܐ: ܝܰܘܡܳܢܳܐ ܙܟܰܪܝܳܐ ܢܶܬܦܨܰܚ: ܝܰܘܡܳܢܳܐ ܕܳܢܺܝܐܶܝܠ ܢܶܚܕܶܐ ܘܢܶܪܘܰܙ ܕܗ̇ܰܘ ܕܰܥܠܰܘܗܝ ܐܶܬܢܰܒܺܝ ܒܰܐܪܥܳܐ ܕܒܳܒܶܝܠ ܗܳܐ ܩܳܡ ܡ̣ܶܢ ܒܶܝܬ ܡܺܝ̈ܬܶܐ ܘܰܣܚ̣ܰܦ ܠܰܒܥܶܠܕ̈ܒܳܒܰܘܗܝ: ܐܰܟܡܳܐ ܕܰܙܟ̣ܳܐ ܗ̣ܽܘ ܠܟܰܠܕܳܝ̈ܶܐ ܘܰܒܓܽܘܒܳܐ ܫ̣ܕܳܐ ܐܶܢܽܘܢ ܠܗܽܘܢ ܘܰܠܝܰܠܕܰܝ̈ܗܽܘܢ. ܘܚܰܕܺܝ ܡܰܠܟܳܐ ܕܳܪܝܽܘܫ ܒܕܳܢܺܝܐܶܝܠ ܐܰܟܡܳܐ ܕܚܰܕܺܝ ܒܳܟ ܡܰܠܟܳܐ ܦܺܝܠܰܛܳܘܣ ܘܓܽܘܕܳܐ ܕܰܫܠܺܝ̈ܚܶܐ: ܘܢܶܫ̈ܶܐ ܩܰܕܺܝ̈ܫܳܬܳܐ ܗ̇ܳܢܶܝ̈ܢ ܕܶܐܬܶܐܒ̈ܶܠܝ ܥܰܠ ܡܰܘܬܳܟ ܡܰܥܒܶܕ ܚܰܝ̈ܶܐ: ܘܥܰܠ ܙܩܺܝܦܽܘܬܳܟ ܡܰܐܚܝܰܬ݀ ܠܓܶܢܣܳܐ ܕܡܳܝܽܘ̈ܬܶܐ ܝܰܘܡܳܢܳܐ ܝܽܘܚܰܢܳܢ ܒܪܶܗ ܕܰܙܟܰܪܝܳܐ ܡܣܳܟܶܐ ܠܳܟ ܕܰܩܕܳܡܰܝܟ ܐܶܙܰܠ ܘܣܰܒ̣ܰܪ ܒܶܝܬ ܡܺܝ̈ܬܶܐ ܕܗܳܐ ܡܰܛܺܝ ܠܶܗ ܡܢܰܚܡܳܢܟܽܘܢ ܗ̇ܰܘ ܕܠܐܴ ܫܳܘܶܐ ܐ̱ܢܳܐ ܠܰܡܣܳܐܢܰܘ̈ܗܝ ܠܡܶܛܥܰܢ. ܝܰܘܡܳܢܳܐ ܩܳܡ̣ܬ ܡ̣ܶܢ ܩܰܒܪܳܐ ܘܫ̣ܰܪܰܪܬ ܠܡܰܠܟܘ̈ܳܬܳܐ ܕܰܐܟܪܙܽܘܟ: ܘܚܰܬܶܡ̣ܬ ܣܒܰܪܬܳܟ ܘܰܐܦ̣ܨܰܚܬ ܠܰܟܡܺܝܪ̈ܶܐ ܕܗܳܡܳܢ ܒܡܰܚܬܬܳܟ ܕܰܠܘܳܬܗܽܘܢ ܡܶܛܽܠ ܗܳܕܶܐ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܕܰܠܥܺܐܕܳܐ ܕܰܩܝܳܡܬܳܟ ܒܚܰܕܽܘܬܳܐ ܡܫܰܡܠܶܝܢܰܢ: ܘܰܠܝܰܘܡܳܐ ܕܢܽܘܚܳܡܳܟ ܫܒܺܝܚܳܐ ܘܰܡܠܐܷ ܬܶܗܪܳܐ. ܐܰܝܟܰܢܳܐ ܕܬܶܬܶܠ ܠܰܢ ܡܳܪܝܳܐ ܕܢܶܚܕܶܐ ܒܥܰܕܥܺܐܕܰܝ̈ܟ ܘܰܢܕܽܘܨ ܒܚܰܓܰܝ̈ܟ: ܘܢܶܪܦܽܘܣ ܒܰܣܡܳܟܳܟ ܥܰܡ ܡܢܺܝ̣̈ܚܳܢܰܝܟ ܘܫܰܟܶܢ ܠܟܳܗ̈ܢܶܐ ܘܰܠܪ̈ܰܒܰܝ ܒ̈ܳܬܶܐ ܙܰܗܝܽܘܬܳܐ ܘܠܰܡܫܰܡ̈ܫܳܢܶܐ ܢܰܟܦܽܘܬܳܐ: ܘܰܠܟܽܠܶܗ ܩܠܺܝܪܳܘܣ ܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܪܶܚܡܰܬ݀ ܐ̱ܢܳܫܽܘܬܳܐ ܕܺܝܠܳܟ ܘܕܰܚܕ̈ܳܕܶܐ: ܘܫܰܝܢܳܟ ܘܰܫܠܳܡܳܟ ܐܰܡܠ̣ܶܟ ܒܰܝܢܳܬܰܢ: ܘܰܥܒܶܕ ܬܰܪܥܽܘܬܳܐ ܒܰܝܢܳܬ ܡܰܠܟ̈ܶܐ ܘܰܐܚܺܝ̣̈ܕܶܐ ܕܥܳܠܡܳܐ ܗܳܢܳܐ. ܘܫܰܟܶܢ ܠܰܢ ܕܰܡܫܰܝ̈ܢܳܬܳܐ ܘܒܰܣܺܝ̈ܡܳܬܳܐ ܘܛܳܒ̈ܳܬܳܐ ܢܶܬܪܰܥܽܘܢ ܘܠܐܴ ܬܽܘܒ ܬܰܫܠܶܡ ܠܰܢ ܒܺܐܝܕܳܐ ܕܥܰܡ̈ܡܶܐ ܒܰܪܒܪ̈ܳܝܶܐ ܘܢܽܘܟܪ̈ܳܝܶܐ ܕܠܐܴ ܝܳܕܥܺܝܢ ܠܰܫܡܳܟ ܩܰܕܺܝܫܳܐ ܐܶܠܐܴ ܡܳܐ ܕܩܳܝܡܺܝܢ ܥܠܰܝܢ: ܐܰܢ̱ܬ ܡܳܪܝܳܐ ܩܽܘܡ ܩܕܳܡ ܐܰܦܰܝ̈ܗܽܘܢ ܘܰܐܒܪܶܟ ܐܶܢܽܘܢ. ܘܰܗܘܺܝ ܠܰܢ ܒܶܝܬ ܓܰܘܣܳܐ ܘܣܶܬܳܪܳܐ. ܘܚܰܣܳܐ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܪ̈ܰܚܡܶܐ ܕܒܰܣܺܝܡܽܘܬܳܟ ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܐܘܕܺܝܘ ܒܰܡܕܰܒܪܳܢܽܘܬܳܟ: ܘܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܠܐܴ ܡܶܫܬܰܬܩܳܢܳܐܺܝܬ ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܟܰܕ ܫܰܠܚܳܟ ܠܦܽܘܪܩܳܢܰܢ ܥܰܡ ܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܪܺܝܚܳܐ ܗܰܢܺܝܳܐܐ ܕܣܳܩܽܘܗܝ ܡܺܝ̈ܬܶܐ ܘܰܚܝ̣ܰܘ ܒܶܗ: ܘܥܰܢܺܝ̈ܕܶܐ ܐܶܬܢܰܚܰܡܘ ܒܶܗ: ܘܟܺܐܢ̈ܶܐ ܘܙܰܕܺܝ̈ܩܶܐ ܐܶܬܬܥܺܝܪ ܘܩܳܡ̣ܘ ܡܶܢ ܩܰܒܪ̈ܰܝܗܽܘܢ ܘܰܒܪܶܟܘ ܘܰܣܓܶܕܘ ܠܶܗ. ܡܰܘܬܳܐ ܐܶܬܒܰܠܗܺܝ ܒܶܗ: ܘܣܳܛܳܢܳܐ ܟܽܘܐܳܪܳܐ ܣܰܓܺܝܳܐܐ ܐܶܬܬܰܘܣܰܦ ܠܶܗ. ܘܰܫܝܽܘܠ ܕܳܘܺܝܬܳܐ ܐܶܬܓܰܠܘܝܰܬ݀ ܘܓܰܙܶܝ̈ܗ̇ ܐܶܣܬܰܦܰܩܘ. ܐܰܢ̱ܬ ܡܳܪܝܳܐ ܐܠܰܗܳܐ ܐܳܦ ܗܳܫܳܐ ܦܩܽܘܕ ܘܢܶܬܥܰܠܐܷ ܥܶܛܪܶܗ ܕܦܺܝܪܡܰܢ ܠܰܩܕܳܡ ܪܰܒܽܘܬܳܟ: ܘܢܶܬܚܰܘܪ̈ܳܢ ܒܶܗ ܟܽܘܬܡ̈ܳܬܰܢ ܘܢܶܣܓܶܐ ܠܰܢ ܫܰܝܢܳܐ ܘܰܫܠܳܡܳܐ ܕܡܶܢܳܟ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܐܰܒܥܶܕ ܡܶܢܰܢ ܐܳܘ ܡܳܪܝܳܐ ܠܟܽܠ ܐܰܟܬܳܐ ܘܣܶܢܶܐܬܳܐ ܘܰܒܥܶܠܕܒܳܒܽܘܬܳܐ ܘܚܶܡܬܳܐ ܘܪܽܘܓܙܳܐ ܘܰܫܪܺܝܚܽܘܬܳܐ ܘܳܐܣܽܘܛܽܘܬܳܐ: ܘܰܡܠܺܝ ܠܰܢ ܚܽܘܒܳܐ ܘܰܐܘܝܽܘܬܳܐ ܘܪܶܚܡܰܬ݀ ܐ̱ܢܳܫܽܘܬܳܐ ܘܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܘܟܽܠܗܶܝܢ ܒܽܘܪ̈ܟܳܬܳܐ ܘܛܳܒ̈ܳܬܳܐ ܘܰܫܢܰܝ̈ܳܐ ܟܰܗܺܝ̣̈ܢܳܬܳܐ ܘܝܰܪ̈ܚܶܐ ܕܚܰܕ̈ܘܳܬܳܐ ܘܰܦܨܺܝ̈ܚܘܳܬܳܐ ܕܢܰܘܕܶܐ ܠܰܫܡܳܟ ܘܥܳܒ̇ܶܕ ܬܶܕܡܪ̈ܳܬܳܐ: ܗܳܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܠܐܴ ܡܳܝܽܘܬܳܐ ܕܡܺܝܬ ܒܰܒܣܰܪ ܘܰܒܡܰܘܬܶܗ ܐܰܚܺܝ ܠܓܶܢܣܰܢ ܡܳܝܽܘܬܳܐ: ܠܗ̇ܰܘ ܚܰܝܳܐ ܘܡܰܐܚܝܳܢܳܐ ܕܰܐܓܶܣ ܒܶܝܬ ܡܺܝ̈ܬܶܐ ܐܰܝܟ ܡܺܝܬܳܐ ܟܰܕ ܢܛܺܝܪܺܝܢ ܒܶܗ ܚܰܝ̈ܶܐ ܕܰܟܝܳܢܶܗ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܩܳܡ ܐܰܝܟ ܕܰܡܟܳܐ ܡ̣ܶܢ ܩܰܒܪܳܐ ܘܰܐܦܨܰܚ ܠܓܽܘܕܳܐ ܕܬܰܠܡܺܝ̈ܕܰܘܗܝ ܕܶܐܬܶܐܒܶܠܘ ܗ̣ܘܰܘ ܥܰܠ ܡܰܘܬܶܗ ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܐܠܰܗܳܐ ܒܳܪܽܘܝܳܐ ܕܥܳܠܡ̈ܶܐ ܘܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܡܫܺܝܚܳܐ ܢܫܰܡܬܳܐ ܕܚܰܝ̈ܶܐ ܘܪܽܘܚܳܐ ܡܰܐܚܝܳܢܺܝܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ: ܡܫܰܒܚܺܝܢܰܢ ܠܒܰܣܺܝܡܽܘܬܳܟ ܕܰܬܠܳܬܳܟ ܥܰܠ ܩܰܝܣܳܐ ܥܰܡ ܓܰܝ̈ܳܣܶܐ ܘܥܰܡ ܥܳܒܕ̈ܰܝ ܒܺܝ̈ܫܳܬܳܐ ܐܶܬܡܢܰܝܬ: ܐܰܢ̱ܬ ܕܪܰܚܺܝܩ ܐܰܢ̱ܬ ܡ̣ܶܢ ܟܽܠܗܶܝܢ ܠܐܴ ܢܳܡܽܘܣܳܝ̈ܘܳܬܳܐ: ܡܝܰܩܪܺܝܢܰܢ ܠܰܩܒܽܘܪܬܳܟ ܕܰܚܒ̣ܰܫܬܳܟ ܒܓܰܘ ܩܰܒܪܳܐ ܕܰܬܠܳܬ ܐܰܡܺܝ̣̈ܢ ܥܰܡ ܡܺܝ̈ܬܶܐ: ܡܪܰܡܪܡܺܝܢܰܢ ܠܡܰܚܰܬܬܳܟ ܕܰܠܓܰܘ ܫܝܽܘܠ ܗ̇ܳܝ ܒܳܠܥܰܬ ܓܰܢ̱ܒܳܪ̈ܶܐ ܕܒܳܗ̇ ܫ̣ܪܰܝܬ ܠܰܚܒܺܝ̣̈ܫܶܐ: ܘܚ̣ܰܪܰܪܬ ܠܐܱܣܺܝܪ̈ܶܐ ܡ̣ܶܢ ܓܽܘܒܳܐ ܗ̇ܰܘ ܕܠܰܝܬ ܒܶܗ ܡܰܝ̈ܳܐ. ܡܩܰܠܣܺܝܢܰܢ ܠܳܗ̇ ܠܰܩܝܳܡܬܳܟ ܡܫܰܒܰܚܬܳܐ ܘܡܳܪܳܢܳܝܬܳܐ ܕܒܳܗ̇ ܫ̣ܪܰܝܬ ܫܽܘܠܛܳܢܶܗ ܕܡܰܘܬܳܐ ܝܰܥܢܳܐ: ܘܒܰܛܶܠ̣ܬ ܠܙܳܟܽܘܬܶܗ ܕܰܥܠܰܝܢ: ܘܰܐܝܟ ܫܶܢܬܳܐ ܥܒ̣ܰܕܬܳܝܗܝ ܠܟܽܠܗܽܘܢ ܐܰܝܠܶܝܢ ܕܰܡܗܰܝܡܢܺܝܢ ܒܳܟ: ܒܳܪܟܺܝܢܰܢ ܥܰܠ ܐܰܦܰܝ̈ܢ ܠܣܽܘܠܳܩܳܟ ܗܕܺܝܪܳܐ ܕܡ̣ܶܢ ܐܰܪܥܳܐ ܠܰܫܡܰܝܳܐ: ܒܙܰܘܚܳܐ ܘܗܶܕܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܘܰܡܣܰܟܶܝܢܰܢ ܠܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ ܗ̇ܰܘ ܕܰܢܚ̣ܶܬ ܥܰܠ ܫܠܺܝ̈ܚܶܐ ܒܥܶܠܺܝܬܳܐ ܘܰܓܡ̣ܰܪ ܘܫܰܡܠܺܝ ܐܶܢܽܘܢ ܒܟܽܠܗܶܝܢ ܐܠܰܗܳܝ̈ܳܬܳܐ: ܘܰܡܨܰܠܶܝܢܰܢ ܘܒܳܥ̇ܝܶܢܰܢ ܕܢܺܐܬܶܐ ܘܢܶܥܡ̣ܰܪ ܒܢܰܦ̈ܫܳܬܰܢ ܘܰܢܒܰܝܰܐܐ ܠܰܢ ܒܒܽܘܝ̈ܳܐܝܰܘܗܝ ܡܒܰܝ̈ܳܐܢܶܐ ܘܢܶܗܘܶܐ ܢܺܝ̈ܚܶܐ ܘܡܰܟܺܝ̈ܟܶܐ ܘܰܡܛܰܝ̈ܒܶܐ ܠܡܶܐܬܺܝܬܳܟ ܕܬܰܪܬܶܝܢ ܗ̇ܳܝ ܕܰܐܝܟ ܒܰܪܩܳܐ ܡ̣ܶܢ ܫܡܰܝܳܐ ܕܳܢܰܚ ܐܰܢ̱ܬ ܘܰܠܟܽܠܗܽܘܢ ܣܰܘ̈ܦܰܝ ܬܺܐܒܝܶܠ ܕܳܐܶܢ ܐܰܢ̱ܬ: ܘܰܠܚܰܛܳܝ̈ܶܐ ܘܥܳܒ̇ܕ̈ܰܝ ܥܰܘܠܐܴ ܒܢܽܘܪܳܐ ܩܫܺܝܬܳܐ ܥܰܡ ܐܰܒܽܘܗܽܘܢ ܐܳܟܶܠܩܰܪܨܳܐ ܡܰܘܩܶܕ ܐܰܢ̱ܬ: ܘܰܟܐܳܬܳܟ ܩܫܺܝܬܳܐ ܠܗܽܘܢ ܡܚܰܘܶܐ ܐܰܢ̱ܬ. ܘܰܠܛܳܒ̈ܶܐ ܘܥ̇ܳܒܕ̈ܰܝ ܛܳܒ̈ܳܬܳܐ ܒܽܘܣ̈ܳܡܶܐ ܘܦܽܘܢ̈ܳܩܶܐ ܪ̈ܓܺܝܓܶܐ ܡܛܰܝܶܒ ܐܰܢ̱ܬ: ܘܒܰܐܬܪ̈ܰܘܳܬܳܐ ܕܓܶܐܘ̈ܳܬܳܐ ܠܗܽܘܢ ܡܰܫܪܶܐ ܐܰܢ̱ܬ: ܘܠܰܨܠܺܝܒܳܐ ܙܰܟܳܝܳܐ ܡ̣ܶܢ ܡܰܕܢܚܳܐ ܢܺܝܫܶܗ ܐܰܝܟ ܒܰܪܩܳܐ ܡܰܕܢܰܚ ܐܰܢ̱ܬ. ܒܗ̇ܰܘ ܝܰܘܡܳܐ ܡܳܪܝܳܐ ܚܰܢܳܢܳܐ ܘܰܡܪܰܚܡܳܢܳܐ ܬܶܟܪܶܐ ܠܰܡܪܰܚܡܳܢܽܘܬܳܟ ܥܰܠ ܥܺܕܬܳܟ ܙܒܺܝܢܰܬ݀ ܒܰܕܡܳܟ ܝܰܩܺܝܪܳܐ: ܐܰܝܟܰܢܳܐ ܕܬܰܫܰܪ ܫܽܘܘܕܳܝܰܝ̈ܟ ܠܘܳܬܳܗ̇: ܕܡܽܘ̈ܟܠܐܷ ܕܰܫܝܽܘܠ ܠܐܴ ܢܶܚܣܢܽܘܢܳܗ̇: ܘܰܥܒܶܕ ܡܳܪܝܳܐ ܒܛܰܝܒܽܘܬܳܟ ܣܰܒܪܳܐ ܒܪܺܝܟܳܐ ܘܛܳܒܳܐ ܘܦܽܘܪܩܳܢܳܐ ܓܡܺܝܪܳܐ ܠܟܽܠܶܗ ܥܰܡܳܐ ܕܺܝܠܳܟ ܡܗܰܝܡܢܳܐ: ܘܰܥܒܶܕ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܝܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܘܠܰܢܒܺܝ̈ܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ: ܘܣܳܗ̈ܕܶܐ ܘܡܰܘܕܝ̈ܳܢܶܐ ܘܟܳܗ̈ܢܶܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܫܟ̣ܶܒܘ ܥܰܠ ܣܰܒܪܳܟ ܒܰܬܪܺܝܨܽܘܬ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܐܰܡܺܝܢܬܳܐ ܘܬܰܘܕܺܝܬܳܐ ܕܟܺܝܬܳܐ ܘܗܶܕܪܳܐ ܘܠܐܴ ܡܟܰܬܡܳܐ ܘܩܽܘܠܳܣܳܐ ܠܐܴ ܡܛܰܘܫܝܳܐ: ܘܠܐܱܒܳܐ ܡܪܰܚܡܳܢܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ: ܘܠܰܒܪܳܐ ܚܰܢܳܢܳܐ ܕܶܐܨܛܠ̣ܶܒ ܡܶܛܽܠܳܬܰܢ ܕܩܳܡ ܡ̣ܶܢ ܩܰܒܪܳܐ ܘܥܰܡܶܗ ܒܫܽܘܒܚܳܐ ܐܰܩܺܝܡ ܠܰܢ. ܬܰܘܕܺܝܬܳܐ ܠܪܽܘܚܳܐ ܩܰܕܺܝܫܳܐ ܕܫܰܡܠܺܝ ܘܰܓܡ̣ܰܪ ܚܽܘܣܳܝܰܢ: ܘܳܐܬܶܐ ܠܚܰܪܬܳܐ ܕܰܢܢܰܚܶܡ ܠܰܢ: ܕܠܶܗ ܝ̇ܳܐܶܐ܀

 

ܣܕܪܐ

ܟܰܕ ܒܣܽܘ̈ܟܳܠܐܷ ܘܡܰܨܕܶܢ̈ܘܳܬܳܐ ܪ̈ܳܡܰܝ ܡ̣ܶܢ ܥܳܠܡܳܐ ܒܰܩܝܳܡܬܳܟ ܡܶܬܒܰܩܶܝܢܰܢ ܡܫܺܝܚܳܐ ܡܰܠܟܰܢ ܘܡܳܪܰܢ ܘܰܐܠܳܗܰܢ: ܘܰܒܙܰܠܓ̈ܶܐ ܪ̈ܽܘܚܳܢܳܝܶܐ ܠܩܰܒܪܳܟ ܡܰܥܒܶܕ ܚܰܝ̈ܶܐ ܐܳܪܥܺܝܢܰܢ: ܘܰܠܡܶܐܬܺܝܬܳܟ ܗ̇ܳܝ ܕܬܰܪܬܶܝܢ ܕܡ̣ܶܢ ܐܰܬܪܗܶ ܕܰܐܒܽܘܟ ܒܙܳܟܽܘܬܳܐ ܪܰܒܬܳܐ ܒܳܟ ܦܳܓܥܺܝܢܰܢ ܡܫܰܒܚܺܝܢܰܢ ܘܰܡܢܰܨܪܺܝܢܰܢ ܘܰܒܥܰܝ̈ܢܶܐ ܕܺܝܠܰܢ ܟܰܣ̈ܝܳܬܳܐ ܠܙܰܠܺܝ̈ܩܶܐ ܨܰܡܽܘܚ̈ܬܳܢܶܐ ܕܡ̣ܶܢ ܩܰܒܪܳܐ ܚܳܙܶܝܢܰܢ. ܘܰܠܒܰܪ̈ܩܶܐ ܢܽܘܪ̈ܳܢܳܝܶܐ ܕܰܐܒ̣ܪܶܩܘ ܥܰܠ ܢܳܛܽܘܪ̈ܶܐ ܘܥܰܘܰܪܘ ܐܶܢܽܘܢ: ܒܡܰܕ̈ܥܰܝܢ ܢܳܣܒܺܝܢܰܢ: ܘܰܠܥܺܝܪ̈ܶܐ ܘܡܰܠܐܱܟ̈ܶܐ ܥܰܡ ܢܶܫ̈ܶܐ ܡܶܣܬܰܘܕܺܝܢ ܗ̣ܘܰܘ: ܐܰܟܡܰܢ ܕܰܠܢܰܦ̈ܫܳܬܳܐ ܕܺܝܠܰܢ ܡܠܰܒ̈ܒܳܢ: ܕܰܐܢ̱ܬܶܝ̈ܢ ܠܐܴ ܬܶܕܚ̈ܠܳܢ ܒܗܰܘ̈ܢܰܝܢ ܚܰܠܳܫ̈ܶܐ ܫܳܩܠܺܝܢܰܢ. ܘܟܰܕ ܒܟܽܠܶܗ ܐ̱ܪܳܙܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܡܰܥܒܕܰܬ݀ ܚܰܝ̈ܶܐ ܡܶܬܕܰܡܪܺܝܢܰܢ: ܘܚܰܕܽܘܬܳܢܳܐܺܝܬ ܟܰܕ ܪܳܘܙܺܝܢܰܢ ܡܰܙܥܩܺܝܢܰܢ ܟܰܕ ܐܳܡܪܺܝܢܰܢ: ܕܝܰܘܡܰܐ ܗ̱̇ܘ ܕܚܰܕܽܘܬܳܐ ܘܕܰܪܘܳܙܳܐ ܠܐܴ ܢܶܗܘܶܐ ܒܶܗ ܚܰܫܳܐ ܘܰܟܡܺܝܪܽܘܬܳܐ: ܝܰܘܡܰܐ ܗ̱̇ܘ ܕܨܶܡ̈ܚܶܐ ܘܰܕܙܰܠܺܝ̈ܩܶܐ ܢܽܘܗܪ̈ܳܢܳܝܶܐ: ܠܐܴ ܒܝܰܕ ܥܒ̇ܳܕ̈ܶܐ ܕܺܝܠܰܢ ܥܰܡܽܘ̈ܛܶܐ ܒܶܐܣ̈ܶܐ ܘܰܒܓܳܢܰܘ̈ܳܬܳܐ ܕܰܫܪܰܓܪ̈ܓܳܝܳܬܳܐ ܢܡܽܘܫ. ܝܰܘܡܰܐ ܗ̱̇ܘ ܕܗܽܘ̈ܠܳܠܐܷ ܘܕܰܙܡܺܝܪ̈ܳܬܳܐ ܗܰܢܺܝ̈ܳܐܬܳܐ ܕܪܽܘܚܳܐ ܩܰܕܺܝܫܳܐ ܕܠܐܴ ܢܡܰܠܶܠ ܒܶܗ ܡܶܐܟܰܠܩܰܪܨܳܐ ܘܫܽܘܥ̈ܝܳܬܳܐ ܦܰܟܺܝ̈ܗܳܬܳܐ: ܝܰܘܡܰܐ ܗ̱̇ܘ ܕܰܒ̈ܢܳܬ ܩ̈ܳܠܐܷ ܕܰܘܺܝ̈ܕܳܝܳܬܳܐ ܒܶܗ ܡܶܙܕܰܡܪ̈ܳܢ: ܕܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ: ܘܢܶܚܕܽܘܢ ܫܡܰܝ̈ܳܐ ܘܰܬܕܽܘܨܝ ܐܰܪܥܳܐ ܒܰܩܝܳܡܬܶܗ ܕܡܰܠܟܳܐ ܡܫܺܝܚܳܐ. ܝܰܘܡܰܐ ܗ̱̇ܘ ܕܚܽܘܒܳܐ ܘܰܕܪܶܚܡܰܬ݀ ܐ̱ܢܳܫܽܘܬܳܐ ܠܐܴ ܢܶܥܒܶܕ ܒܶܗ ܒܺܝܫܽܘܬܳܐ ܘܰܪܓܺܝܙܽܘܬܳܐ. ܝܰܘܡܰܐ ܗ̱̇ܘ ܕܫܰܦܝܽܘܬܳܐ ܘܕܰܦܫܺܝܛܽܘܬܳܐ ܠܐܴ ܢܶܬܶܠ ܢܰܦܫܰܢ ܠܚܶܪܝܳܢܳܐ ܘܰܠܣܶܢܶܐܬܳܐ. ܝܰܘܡܰܐ ܗ̱̇ܘ ܕܚܶܘܳܪ̈ܶܐ ܘܕܰܠܒܽܘ̈ܫܶܐ ܡܰܦܪ̈ܓܶܐ: ܠܐܴ ܢܶܠܒܰܫ ܒܶܗ ܠܒܽܘ̈ܫܶܐ ܐܽܘܟܳܡ̈ܶܐ ܕܠܐܴ ܚܳܫܚܺܝܢ ܠܒܶܝܬ ܡܶܫܬܽܘܬܳܐ: ܘܡܶܛܽܠ ܗܳܕܐܶ ܥܺܕܬܳܟ ܡܦܺܝܣܳܐ ܠܳܟ ܘܡܶܬܟܰܫܦܳܐ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܪܳܥܝܳܐ ܚܰܝܳܐ ܕܶܐܬܢܟܶܣ ܚܠܳܦ ܡܰܪܥܺܝܬܶܗ: ܘܠܳܟ ܡܗܰܠܠܐܴ ܒܦܽܘܡܳܐ ܕܝܰܠܕ̈ܶܝܗ̇ ܡܦܰܢܝܳܢܳܗ̇ ܕܡ̣ܶܢ ܛܽܘܥܝܰܝ. ܠܳܟ ܗ̣ܽܘ ܚܳܝܪܺܝܢ ܐܰܣܺܝܪ̈ܶܐ ܫܳܪܽܘܝܳܐ ܕܰܦܟܳܪ̈ܰܝܗܽܘܢ: ܠܳܟ ܗ̣ܽܘ ܩܳܪܶܝܢ ܟܳܗ̈ܢܶܐ ܙܗܰܝ̈ܳܐ ܘܰܡܫܰܡ̈ܫܳܢܶܐ ܒܪ̈ܺܝܫܶܐ ܕܡܰܪ̈ܥܝܳܬܗܽܘܢ: ܐܶܨܛܒܰܝ ܡܳܪܝܳܐ ܐܠܰܗܳܐ ܒܥܶܛܪ̈ܶܐ ܕܟܰܝ̈ܳܐ ܕܺܝܠܗܽܘܢ: ܘܩܰܒܶܠ ܦܺܝܪ̈ܡܰܝܗܽܘܢ ܘܰܐܠܒܶܫ ܐܶܢܽܘܢ ܐܶܣܛܠܐܴ ܟܳܗܢܳܝܬܳܐ: ܘܰܠܒܽܘ̈ܫܶܐ ܦܰܐܝ̈ܳܐ ܕܬܶܫܒܽܘܚܬܳܐ ܐܰܥܛܶܦ ܐܶܢܽܘܢ. ܢܰܚ̈ܬܶܐ ܕܙܰܕܺܝܩܽܘܬܳܐ ܥܒ̇ܳܕ̈ܶܐ ܫܒܺܝ̈ܚܶܐ ܕܰܡܪܰܥܶܝܢ ܠܳܟ ܘܡܶܬܬܢܺܝܚ ܒܗܽܘܢ ܨܶܒܝܳܢܳܟ: ܘܗܰܒ ܫܰܝܢܳܐ ܘܰܫܠܳܡܳܐ ܠܟܽܠܳܗ̇ ܒܪܺܝܬܳܐ: ܘܒܰܛܶܠ ܩܪ̈ܳܒܶܐ ܘܚܶܪ̈ܝܳܢܶܐ ܘܰܫܓܽܘ̈ܫܝܶܐ ܡ̣ܶܢ ܒܰܝܢܳܬܰܢ: ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܘܰܐܢܺܝܚ ܐܶܢܽܘܢ ܒܰܓܢܽܘܢܳܟ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܨܦܪܐ

 

ܡܫܺܝܚܳܐ ܐܠܰܗܳܐ ܕܩܳܡ ܡ̣ܶܢ ܩܰܒܪܳܐ ܒܫܽܘܒܚܳܐ ܪܰܒܳܐ ܘܰܒܙܳܟܽܘܬܳܐ ܘܓܰܢ̱ܒܳܪܽܘܬܳܐ ܘܚܰܕܺܝ ܒܥܺܐܕܳܐ ܕܰܩܝܳܡܬܶܗ ܠܓܽܘܕܳܐ ܒܪܺܝܟܬܳܐ ܕܰܫܠܺܝܚܽܘܬܳܐ: ܗܰܒ ܠܰܢ ܡܳܪܝ ܕܟܰܕ ܡܰܪܚܩܺܝܢܰܢ ܡ̣ܶܢ ܟܽܠܳܗ̇ ܚܶܡܬܳܐ ܘܒܺܝܫܽܘܬܳܐ ܘܰܐܫܘܳܐ ܠܰܢ ܕܰܢܫܰܒܚܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܚܰܕ ܐܠܰܗܳܐ ܫܰܪܺܝܪܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܕܠܐܴ ܡܶܬܕܪܶܟ ܘܠܐܴ ܡܶܬܥܰܩܰܒ ܘܠܐܴ ܡܶܬܒܨܶܐ. ܬܠܳܬܳܐ ܫܡܳܗ̈ܶܐ ܘܰܬܠܳܬܳܐ ܩܢܽܘ̈ܡܶܐ: ܘܳܬܠܳܬ ܕܺܝܠܳܝ̈ܳܬܳܐ: ܘܰܬܠܳܬܳܐ ܚܰܕ ܕܡܶܬܦܰܠܓܺܝܢ ܘܡܶܬܚܰܝܕܺܝܢ: ܘܗܰܘ̈ܢܶܐ ܕܰܒܢܰܝ̈ܢܳܫܳܐ ܠܐܴ ܡܳܛܶܝܢ ܠܶܗ ܣܽܘ̈ܟܳܠܐܷ. ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܠܐܴ ܒܳܨܶܝܢ ܠܶܗ: ܘܠܐܴ ܚܳܙܶܝܢ ܫܽܘܒܚܳܐ ܕܪܰܒܽܘܬܶܗ ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܰܢܽܘ ܕܰܐܝܟ ܕܫܳܘܶܐ ܢܺܐܡܰܪ ܘܰܢܬܰܢܶܐ ܠܝܰܡܳܐ ܪܰܒܳܐ ܕܰܡܕܰܒܪܳܢܽܘܬܳܟ ܐܳܘ ܡܶܠܬܳܐ ܐܠܰܗܳܐ: ܐܰܘ ܐܰܝܠܶܝܢ ܒܢ̈ܳܬ ܩ̈ܳܠܐܷ ܣܳܦ̈ܩܳܢ ܕܰܢܒܰܪ̈ܟܳܢ ܘܰܡܩܰܕ̈ܫܳܢ ܠܳܟ ܐܳܘ ܕܡ̣ܶܢ ܫܽܘ̈ܒܚܶܐ ܡܰܒܥܰܕ ܐܰܢ̱ܬ. ܦܳܐܕܳܐ ܕܶܝܢ ܡܰܚܫܰܒܬܳܐ ܘܗܰܘܢܳܐ ܘܬܰܪܥܺܝܬܳܐ ܕܟܽܠܗܽܘܢ ܒܪ̈ܰܝܳܐ ܘܰܥܒܺܝ̣̈ܕܶܐ ܡ̣ܶܢ ܡܰܐܨܕܳܢܽܘܬܳܐ ܘܡܶܬܒܰܩܝܳܢܽܘܬܳܐ ܒܬܶܕܡܪ̈ܳܬܳܐ ܬܡܺܝ̣̈ܗܳܬܳܐ: ܘܒܳܐܬܘ̈ܳܬܳܐ ܣܰܓܺܝ̈ܳܐܬܳܐ ܗ̇ܳܢܶܝ̈ܢ ܕܰܡܕܰܒܪܳܢܽܘܬܳܟ ܕܠܐܴ ܣܳܟܳܐ: ܗ̇ܳܝ ܕܰܠܘܳܬ ܓܶܢܣܰܢ ܡܚܺܝܠܐܴ ܘܬܰܚܽܘܒܳܐ ܫܰܡܠܺܝܬ ܒܰܩܢܽܘܡܳܟ ܐܠܰܗܰܢ ܣܓܺܝܕܳܐ ܡܳܪܰܢ ܝܶܫܽܘܥ ܡܫܺܝܚܳܐ ܕܟܰܕ ܒܥܽܘܒܳܐ ܟܰܣܝܳܐ ܘܰܓܢܺܝܙܳܐ: ܕܝܳܠܽܘܕܳܟ ܥܰܡ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̣̈ܢ ܕܰܐܪܝܳܐ: ܘܰܕܬܰܘܪܳܐ: ܘܰܕܢܶܫܪܳܐ: ܘܰܕܒܰܪܢܳܫܳܐ: ܘܰܠܥܶܠ ܡܶܢܗܽܘܢ ܡܶܬܒܰܣܰܡ ܐܰܢ̱ܬ ܒܬܶܐܘܳܪܺܝܰܐ ܕܺܝܠܳܟ ܠܐܴ ܡܶܬܗܰܘܢܳܢܺܝܬܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܕܰܒ̣ܪܰܝܬ ܠܡܰܠܐܱܟ̈ܶܐ: ܘܛܶܟ̈ܣܶܐ ܠܐܴ ܗܽܘܠܳܢܳܝ̈ܶܐ ܘܓܽܘ̈ܕܶܐ ܢܽܘܪ̈ܳܢܳܝܳܬܳܐ: ܘܰܐܪ̈ܟܰܐܣ ܕܫܰܠܗܶܒܺܝܬܳܐ: ܘܡܳܪ̈ܰܘܳܬܳܐ ܡܢܰܒܪ̈ܫܳܬܳܐ ܕܰܦܣܺܝ̣̈ܩܳܢ ܡ̣ܶܢ ܢܽܘܪܳܐ ܝܳܩܕܬܳܐ ܡܶܢܗܽܘܢ ܕܶܝܢ ܒܣܰܓܺܝ ܓܶܦ̈ܶܐ ܦܳܪܚܺܝܢ ܡܶܢܗܽܘܢ ܕܶܝܢ ܒܣܰܓܺܝ ܐܰܦ̈ܶܐ ܚܳܝܪܺܝܢ: ܡܶܢܗܽܘܢ ܕܶܝܢ ܒܣܰܓܺܝ ܥܰܝ̈ܢܶܐ ܚܳܙܶܝܢ: ܡܶܢܗܽܘܢ ܕܶܝܢ ܡܒܰܪܟܺܝܢ ܘܰܡܩܰܕܫܺܝܢ: ܡܶܢܗܽܘܢ ܕܶܝܢ ܡܙܰܡܪܺܝܢ ܘܰܡܗܰܠܠܺܝܢ ܡܶܢܗܽܘܢ ܕܶܝܢ ܡܫܰܒܚܺܝܢ ܘܰܡܪܰܡܪܡܺܝܢ ܘܩ̈ܳܠܐܷ ܢܰܨܺܝ̈ܚܶܐ ܘܠܐܴ ܛܽܘܠܫܳܢܳܝ̈ܶܐ ܠܘܳܬ ܚܕ̈ܳܕܶܐ ܡܫܰܘܫܛܺܝܢ: ܘܦܳܪܚܺܝܢ ܒܓܶܦܰܝ̈ܗܽܘܢ ܟܰܕ ܛܳܝܣܺܝܢ ܘܠܐܱܠܳܗܽܘܬܳܟ ܠܐܴ ܚܳܙܶܝܢ: ܘܠܐܴ ܝܳܕܥܺܝܢ ܐܰܝܟܳܐ ܫܰܪܝܳܐ: ܘܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܕܰܙܟ̣ܳܐ ܠܰܛܪܽܘܢܳܐ: ܩܰܕܺܝܫ ܡܳܪܝܳܐ ܕܚܰܝܒܶܗ ܠܡܳܪܽܘܕܳܐ: ܩܰܕܺܝܫ ܡܳܪܝܳܐ ܕܰܬܪܰܥ ܫܽܘܪ̈ܶܐ ܟܰܗܺܝ̣̈ܢܶܐ ܕܰܫܝܽܘܠ ܕܳܘܺܝܬܳܐ: ܩܰܕܺܝܫ ܡܳܪܝܳܐ ܕܰܐܥܕܺܝ ܫܒܺܝܬܳܐ ܡ̣ܶܢ ܐܺܝܕܰܘ̈ܗܝ ܕܳܐܟܶܠܩܰܪܨܳܐ: ܟܰܕ ܠܳܟ ܚܳܙܶܝܢ ܒܪܰܘܡܳܐ: ܘܡܰܠܝܳܐ ܡܰܪܟܰܒܬܳܐ ܡܶܢܳܟ: ܘܠܳܟ ܚܳܙܶܝܢ ܒܥܽܘܡܩܳܐ ܟܰܕ ܡܶܬܗܰܦܰܟ ܐܰܢ̱ܬ ܒܶܝܬ ܐܰܪ̈ܥܳܢܶܐ: ܟܰܕ ܫܪܶܝܬ ܒܟܰܪܣܳܐ ܕܰܒܬܽܘܠܬܳܐ: ܟܰܕ ܥܡ̣ܰܕܬ ܐܰܝܟ ܚܰܝܳܒܳܐ ܒܝܽܘܪܕܢܳܢ ܢܰܗܪܳܐ ܡ̣ܶܢ ܐܺܝ̈ܕܰܝ ܥܰܒܕܳܟ ܝܽܘܚܰܢܳܢ: ܟܰܕ ܩܰܒ̣ܶܠܬ ܓܙܽܘܪܬܳܐ ܐ̱ܢܳܫܳܝܬܳܐ ܬܡܺܝܢܳܝܰܬ݀ ܝܰܘ̈ܡܶܐ: ܟܰܕ ܨܳܡ̣ܬ ܠܳܟ ܨܰܘܡܳܐ ܐܰܪܒܥܺܝܢܳܝܳܐ ܘܫܰܚܺܝܬܳܝܗܝ ܠܰܒܥܶܠܕܰܐܪܳܐ ܒܕܳܐܪ̈ܶܐ ܬܠܳܬܳܐ ܕܰܩ̣ܪܶܒ ܥܰܡܳܟ: ܟܰܕ ܐܶܬܛܥܶܢ̣ܬ ܥܰܠ ܕܪ̈ܳܥܶܐ ܡܰܪ̈ܫܠܐܷ ܘܣܳܒܳܝ̈ܶܐ: ܘܩܽܘܪ̈ܒܳܢܶܐ ܠܡܰܕܒܚܳܐ ܡܩܰܪܶܒ ܗ̣ܘܰܝܬ ܐܰܝܟ ܢܳܡܽܘܣܳܐ ܕܡܽܘܫܶܐ. ܐܰܢ̱ܬ ܗ̣ܽܘ ܕܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܕܶܒ̈ܚܶܐ ܘܩܽܘܪ̈ܒܳܢܶܐ ܡܩܰܒܶܠ ܐܰܢ̱ܬ: ܟܰܕ ܟܽܠ ܬܶܕܡܪ̈ܳܬܳܐ ܫܒܺܝ̣̈ܚܳܬܳܐ ܣܳܥܰܪ ܗ̣ܘܰܝܬ: ܘܥܰܡܳܐ ܠܺܝܛܳܐ ܕܝܽܘ̈ܕܳܝܶܐ ܒܰܚܣܳܡܳܐ ܡܰܪܺܝܪܳܐ ܒܳܠܥܺܝܢ ܗ̣ܘܰܘ: ܟܰܕ ܠܰܟܪ̈ܺܝܗܰܝܗܽܘܢ ܡܰܐܣܶܐ ܗ̣ܘܰܝܬ: ܘܰܠܓܰܪ̈ܒܰܝܗܽܘܢ ܬܽܘܒ ܡܕܰܟܶܐ ܗ̣ܘܰܝܬ. ܘܰܠܟܽܘܣ̈ܬܳܢܰܝܗܽܘܢ ܘܠܰܚܓܺܝܪ̈ܶܐ ܕܺܝܠܗܽܘܢ ܦܳܫܶܛ ܗ̣ܘܰܝܬ: ܟܰܕ ܠܡܺܝܬܰܝ̈ܗܽܘܢ ܡܩܺܝܡ ܗ̣ܘܰܝܬ: ܘܡ̣ܶܢ ܗܳܝܕܶܝܢ ܟܰܕ ܒܓܶܐܪ̈ܶܐ ܫܢܺܝ̣̈ܢܶܐ ܕܬܶܕܡܪ̈ܳܬܳܟ ܠܗܽܘܢ ܡܡܰܚܶܐ ܗ̣ܘܰܝܬ: ܗܳܝܕܶܝܢ ܫܡ̣ܰܥ ܛܶܐܒܳܟ ܐܰܒܓܰܪ ܡܰܠܟܳܐ ܐܽܘܟܳܡܳܐ ܘܫܰܕܰܪ ܠܘܳܬܳܟ. ܗܳܟܰܢ ܐܶܡ̣ܰܪ ܕܒ̇ܳܥܶܐ ܐ̱ܢܳܐ ܡܶܢܳܟ ܡܫܺܝܚܳܐ ܐܳܣܝܳܐ ܕܟܽܠ ܟܺܐܒܺܝ̣̈ܢ: ܬܳܐ ܨܶܝܕ ܬܰܚܽܘܒܽܘܬܝ ܡܚܺܝܠܬܳܐ: ܕܫܶܡܥ̇ܶܬ ܥܠܰܝܟ ܕܰܕܠܐܴ ܥܶܩܳܪ̈ܶܐ ܘܣܰܡ̈ܡܳܢܶܐ ܟܺܐܒ̈ܶܐ ܩܫܰܝ̈ܳܐ ܘܟܽܘܪ̈ܗܳܢܶܐ ܡܰܐܣܶܐ ܐܰܢ̱ܬ: ܘܡܺܝ̈ܬܶܐ ܡܩܺܝܡ ܐܰܢ̱ܬ: ܘܰܠܓܰܪ̈ܒܶܐ ܡܕܰܟܶܐ ܐܰܢ̱ܬ: ܘܟܽܠܗܽܘܢ ܟܺܐܒ̈ܶܐ ܘܟܽܘܪ̈ܗܳܢܶܐ ܥܳܪܩܺܝܢ ܡ̣ܶܢ ܩܽܘܕܡܰܝܟ: ܘܝܶܕܥܶܬ ܠܺܝ ܕܰܐܠܳܗܳܐ ܐܰܢ̱ܬ ܐܰܘ ܒܪܶܗ ܕܰܐܠܳܗܳܐ: ܕܰܢܚ̣ܶܬܬ ܡ̣ܶܢ ܫܡܰܝ̈ܳܐ ܕܗܳܠܶܝܢ ܣܳܥܰܪ ܐܰܢ̱ܬ: ܟܺܐܒܳܐ ܡܶܕܶܡ ܟܰܣܝܳܐ ܘܥܰܣܩܳܐ ܐܺܝܬ ܠܺܝ ܬܳܐ ܐܰܣܳܝܗܝ ܠܺܝ ܡܶܛܽܠ ܫܡܶܥ̇ܬܶ ܕܝܽܘ̈ܕܳܝܶܐ ܗܳܐ ܣܳܐܢܶܝܢ ܠܳܟ: ܘܣܳܩܪܺܝܢ ܠܳܟ: ܘܰܠܚܺܝܡܺܝܢ ܥܠܰܝܟ ܕܢܶܩܛܠܽܘܢܳܟ: ܘܟܰܪܟܳܐ ܙܥܽܘܪܳܐ ܐܺܝܬ ܠܺܝ ܐܽܘܪܗܳܝ ܡܕܺܝܢ̱ܬܳܐ ܟܰܗܺܝܢܬܳܐ ܘܣܳܦܩܳܐ ܠܰܬܪ̈ܰܝܢ ܒܳܥܶܐ ܐ̱ܢܳܐ ܡܶܢܳܟ ܡܫܺܝܚܳܐ ܠܐܴ ܬܰܣܠܐܷ ܒܳܥܽܘܬܳܐ ܕܥܰܒܕܳܟ ܕܣܰܓܺܝ ܠܗܺܝܩ ܐ̱ܢܳܐ ܠܰܚܙܳܬܳܟ: ܘܰܬܪ̈ܰܝܢ ܢܶܥܡܰܪ ܘܢܶܣܬܰܬܰܪ ܒܰܡܕܺܝܢ̱ܬܳܐ ܕܺܝܠܝ ܕܣܰܓܺܝ ܦܰܐܝܳܐ ܘܫܰܦܺܝܪܳܐ. ܐܰܢ̱ܬ ܕܶܝܢ ܐܰܝܟ ܡܳܪܳܐ ܛܳܒܳܐ ܘܰܡܪܰܚܡܳܢܳܐ. ܦܰܢ̣ܺܝܬ ܠܘܳܬܶܗ ܕܬܶܗܘܶܐ ܒܪܺܝܟ ܐܰܢ̱ܬ ܘܟܰܪܟܳܟ ܘܰܡܕܺܝܢ̱ܬܳܟ: ܐܶܠܐܴ ܐܺܝܬ ܠܺܝ ܡܕܰܒܪܳܢܽܘܬܳܐ ܘܒܳܥܶܐ ܐ̱ܢܳܐ ܕܶܐܫܰܡܠܐܷ ܘܣܳܠܶܩ ܐ̱ܢܳܐ ܠܰܫܡܰܝܳܐ ܠܘܳܬ ܐܰܒܳܐ ܓܢܺܝܙܳܐ ܕܫܰܕܪܰܢܝ: ܘܟܰܕ ܩܪܶܒ ܝܰܘܡܳܐ ܕܚܰܫܳܟ ܦܳܪܽܘܩܳܝܳܐ ܥܰܠ ܥܺܝܠܐܴ ܫܺܝܛܳܐ ܪܟܶܒ̣ܬ ܘܥܰܠ̣ܬ ܠܨܳܠܽܘܒܬܳܐ ܘܰܓܠ̣ܰܝܬ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ ܥܰܠ ܝܰܘܡܳܐ ܕܚܰܫܳܟ ܘܰܓܠ̣ܰܝܬ ܠܰܫܠܺܝ̈ܚܰܝܟ ܕܰܥܬܺܝܕ ܐܰܢ̱ܬ ܕܬܶܚܰܫ ܠܳܟ ܣܰܓܺܝ̈ܳܐܬܳܐ ܘܬܶܨܛܠܶܒ ܡ̣ܶܢ ܪ̈ܰܒܰܝ ܟܳܗ̈ܢܶܐ ܕܝܽܘ̈ܕܳܝܶܐ ܘܩܳܡ̣ܬ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ ܘܰܐܒ̣ܗܶܬܬ ܐܶܢܽܘܢ: ܘܣܰܒ̣ܰܪܬ ܢܽܘܚܳܡܳܐ ܠܰܫܟܺܝ̣̈ܒܶܐ ܕܰܫܝܽܘܠ ܘܫ̣ܰܪܰܪܬ ܐܶܢܽܘܢ ܠܰܫܠܺܝ̈ܚܶܐ ܕܺܝܠܳܟ ܥܰܠ ܩܝܳܡܬܳܟ ܡܰܐܚܝܳܢܺܝܬܳܐ: ܘܦܰܩ̣ܶܕܬ ܘܙܰܗ̣ܰܪܬ ܐܶܢܽܘܢ ܕܦܽܘܩܘ ܐܰܟܪܶܙܘ ܘܰܐܠܶܦܘ ܠܟܽܠ ܥܰܡ̈ܡܺܝܢ ܚܰܕ ܐܠܰܗܳܐ ܫܰܪܺܝܪܳܐ ܕܩܳܡ ܡ̣ܶܢ ܩܰܒܪܳܐ. ܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܕܰܦ̣ܪܰܩ ܠܰܢ ܡ̣ܶܢ ܛܳܥܝܽܘܬܳܐ ܕܰܦܬܰܟܪ̈ܶܐ: ܕܠܳܟ ܗܳܫܳܐ ܐܳܘ ܡܳܪܝܳܐ ܟܽܠܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ: ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܟܰܕ ܚܳܕܶܝܢܰܢ ܘܪܳܘܙܺܝܢܰܢ ܒܦܽܘܪܩܳܢܳܐ ܘܫܽܘܘܙܳܒܳܐ ܕܰܥܒ̣ܰܕܬ ܠܓܶܢܣܰܢ ܬܰܚܽܘܒܳܐ. ܘܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܒܥܶܕܳܢܳܐ ܗܳܢܳܐ: ܐܶܬܦܢܺܝ ܘܪܰܚܶܡ ܥܰܠ ܝܳܪܬܽܘܬܳܟ ܙܒܺܝܢܰܬ݀ ܒܰܕܡܳܟ ܝܰܩܺܝܪܳܐ: ܫܰܪܰܪܳܗ̇ ܥܰܠ ܦܰܣܰܬ݀ ܐܺܝܕܰܝ̈ܟ ܩܰܕܺܝ̈ܫܳܬܳܐ: ܘܨܽܘܒ ܐܶܢܽܘܢ ܠܝܰܠܕ̈ܶܝܗ̇ ܢܶܨܒܬܳܐ ܒܪܺܝܟܬܳܐ ܕܝܳܗܒܳܐ ܦܺܐܪ̈ܶܐ ܕܰܡܪܰܥܶܝܢ ܠܳܟ: ܘܟܰܢܶܫ ܠܰܒܢ̈ܶܝܗ̇ ܠܓܰܘ ܥܽܘܒܳܗ̇: ܐܰܪܘܰܚ ܠܐܱܠܺܝ̣̈ܨܶܐ ܕܓܳܥܶܝܢ ܠܘܳܬܳܟ. ܒܰܝܬܳܐ ܠܰܡܒܰܕܪ̈ܶܐ ܕܡܰܪܥܺܝܬܳܟ ܘܚܰܣܳܐ ܚܰܘ̈ܒܶܐ ܘܰܚܛܳܗ̈ܶܐ ܕܡܰܣܟܠܳܢ̈ܶܐ ܕܺܐܝܬ ܒܳܗ̇: ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܫܟܶܒ̣ܘ ܘܚܰܣܳܐ ܐܶܢܽܘܢ. ܦܪܽܘܣ ܡܳܪܝ ܩܕܳܡܰܝܗܽܘܢ ܒܽܘ̈ܣܳܡܶܐ ܪ̈ܓܺܝܓܶܐ ܘܚܰܕܳܐ ܐܶܢܽܘܢ ܘܰܐܩܺܝܡ ܐܶܢܽܘܢ ܡ̣ܶܢ ܓܰܒܳܐ ܕܝܰܡܺܝܢܳܟ ܘܰܐܦܨܰܚ ܐܶܢܽܘܢ: ܘܰܐܣܡܶܟ ܐܶܢܽܘܢ ܒܰܣܡܳܟܳܟ ܡܠܐܷ ܢܽܘܗܪܳܐ ܘܗܰܕܳܐ ܐܶܢܽܘܢ. ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܩܰܒܶܠ ܡܳܪܝ ܡ̣ܶܢ ܡܚܺܝܠܽܘܬܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܐܥܛܰܪܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܕܒܳܗ̇ ܐܰܦܨܰܚ̣ܬ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܳܐ ܘܰܠܢܶܫ̈ܶܐ ܩܰܕܺܝ̈ܫܳܬܳܐ ܕܛܰܝܶܒ̈ܝ ܗ̣ܘ̈ܰܝ ܒܶܣ̈ܡܶܐ ܘܗܶܪ̈ܽܘܡܶܐ ܠܡܶܡܚܰܫ ܦܰܓܪܳܟ ܡܰܥܒܶܕ ܚܰܝ̈ܶܐ: ܘܚܰܕܽܘܬܳܐ ܡܰܠܝܰܬ݀ ܠܠܶܒܰܝ̈ܗܶܝܢ: ܘܰܐܦܨܰܚ̣ܬ ܐܶܢܶܝܢ. ܐܰܦܨܰܚ ܠܰܢ ܡܳܪܝ ܒܥܰܕܥ̈ܺܐܕܰܝܟ ܘܚܰܕܳܐ ܠܰܢ ܒܰܣܡܳܟܳܐ ܕܚܰܓܰܝ̈ܟ: ܘܰܐܣܓܳܐ ܠܘܳܬܰܢ ܫܽܘ̈ܟܳܢܰܝܟ: ܘܕܰܒܰܪ ܠܰܢ ܒܢܳܡܽܘ̈ܣܰܝܟ ܕܢܰܘܕܶܐ ܠܳܟ ܥܰܠ ܚܰܘ̈ܣܳܢܰܝܟ ܕܰܠܘܳܬܰܢ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܐܰܩܺܝܡ ܠܰܢ ܡܳܪܝܳܐ ܐܠܰܗܳܐ ܥܰܡ ܐܶܡܪ̈ܶܐ ܒܢ̈ܰܝ ܝܰܡܺܝܢܳܟ: ܘܕܰܒܰܪ ܠܟܽܠܰܢ ܒܥܽܘܕܪ̈ܳܢܰܝܟ: ܘܝܰܒܶܠ ܠܰܢ ܠܘܳܬܳܟ: ܘܰܐܦܨܰܚ ܠܰܢ ܒܰܚܙܳܬܳܟ: ܘܗܰܕܳܐ ܠܰܢ ܒܽܐܘܪܚܳܐ ܕܢܳܡܽܘܣܳܐ ܕܺܝܠܳܟ: ܘܡܰܢܰܥ ܠܰܢ ܠܰܩܝܳܡܬܳܟ ܡܰܠܝܰܬ݀ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ: ܘܰܐܣܡܶܟ ܠܟܽܠܰܢ ܒܰܓܢܽܘܢܳܟ ܠܐܴ ܥܳܒܽܘܪܳܐ: ܘܡܰܢܰܥ ܠܰܢ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܘܰܡܠܺܝܟܳܐ ܡܶܢܳܟ ܠܓܰܒܪ̈ܶܐ ܕܰܫܠܳܡܳܐ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܡܰܠܟܳܐ ܕܡܰܠܟ̈ܶܐ ܕܒܰܩܝܳܡܬܶܗ ܣܰܚܦܳܗ̇ ܠܗܳܡܳܢ ܕܰܩܒܺܝܪ̈ܶܐ ܕܟܳܡܰܬ݀ ܥܰܠ ܨܰܠܡܳܐ ܕܰܐܠܳܗܽܘܬܶܗ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܛܰܝܒܽܘܬܶܗ ܡ̣ܶܢ ܪܰܘܡܳܐ ܐܰܚܬܬܶܗ ܘܰܠܘܳܬ ܥܽܘ̈ܡܩܶܐ ܬܰܚܬܳܝ̈ܶܐ ܫܰܪܓܰܠܬܶܗ: ܠܗ̇ܰܘ ܝܽܘܩܢܳܐ ܚܰܬܺܝܬܳܐ ܕܰܐܒܳܐ ܘܨܰܠܡܳܐ ܕܺܐܝܬܽܘܬܶܗ. ܕܝܰܡܺܝܢܶܗ ܚܰܝܠܬܳܢܺܝܬܳܐ ܣܡܰܟܬܶܗ. ܘܰܕܪܳܥܶܗ ܩܰܕܺܝܫܳܐ ܪܰܡܪܡܶܗ: ܠܗ̇ܰܘ ܠܐܴ ܡܰܝܽܘܬܳܐ ܕܰܠܘܳܬ ܐܳܕܳܡ ܐܶܬܢܰܚܰܬ݀ ܒܨܶܒܝܳܢܶܗ: ܘܩܳܡ ܡ̣ܶܢ ܩܰܒܪܳܐ ܕܠܐܴ ܚܒܳܠܐܴ: ܘܰܐܩܺܝܡܶܗ ܥܰܡܶܗ ܒܬܶܫܒܽܘܚܬܳܐ ܘܰܠܘܳܬ ܐܰܒܽܘܗܝ ܩܰܪܒܶܗ: ܘܡ̣ܶܢ ܝܰܡܺܝܢܳܐ ܒܫܽܘܒܚܳܐ ܪܰܒܳܐ ܐܰܡܠܟܶܗ ܒܗܳܢܳܐ ܥܶܕܳܢܳܐ܀

 

ܣܕܪܐ

ܟܰܕ ܠܝܰܘܡܳܐ ܗܳܢܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܡܫܺܝܚܳܐ ܐܠܰܗܳܐ ܡܫܰܡܠܺܝܢܰܢ. ܘܰܠܥܰܕ̈ܥܺܐܕܰܝܟ ܡܰܦܨ̈ܚܳܢܶܐ ܕܓܶܢܣܳܐ ܕܺܝܠܰܢ ܐ̱ܢܳܫܳܝܳܐ ܡܝܰܩܪܺܝܢܰܢ: ܘܰܒܫܽܘܒܚܳܐ ܪܰܒܳܐ ܘܺܐܝܩܳܪܳܐ ܡܥܰܠܝܳܐ ܠܢܽܘܚܳܡܳܟ ܠܐܴ ܡܶܬܕܰܪܟܳܢܳܐ ܘܰܐܠܳܗܳܝܳܐ ܡܚܰܓܶܝܢܰܢ ܘܰܡܩܰܠܣܺܝܢܰܢ. ܘܰܠܝܽܘܡ ܚܰܕ ܒܫܰܒܳܐ ܕܰܩܝܳܡܬܳܟ ܕܒܶܗ ܐܰܝܟ ܫܶܡܫܳܐ ܦܰܐܝܳܐ ܡ̣ܶܢ ܩܰܒܪܳܐ ܨܡܰܚ̣ܬ ܠܰܢ: ܘܩܽܘܠܳܣ̈ܶܐ ܘܪܽܘܡܪ̈ܳܡܶܐ ܠܰܫܡܳܟ ܣܓܺܝܕܳܐ ܡܩܰܪܒܺܝܢܰܢ: ܘܰܠܗ̇ܰܘ ܚܰܕ ܒܫܰܒܳܐ ܪܰܒܳܐ ܕܠܐܴ ܥܳܒ̇ܰܪ ܒܚܰܕܽܘܬܳܐ ܡܣܰܟܶܝܢܰܢ: ܕܒܶܗ ܐܰܝܟ ܒܰܪܩܳܐ ܙܳܐܰܚ ܗ̣ܽܘ ܢܺܝܫܶܗ ܕܰܨܠܺܝܒܳܐ ܡ̣ܶܢ ܡܰܕܢܚܳܐ: ܘܡܶܢܶܗ ܒܳܗܬܺܝܢ ܚܰܢ̈ܦܶܐ: ܘܡܰܚܦܪܺܝܢ ܟܳܦܽܘܪ̈ܶܐ ܡܳܐ ܕܡܰܙܠܶܓ ܢܽܘܗܪܳܐ ܪܰܒܳܐ ܡ̣ܶܢ ܒܶܝܬ ܟܶܢ̈ܦܰܘܗܝ ܥܰܠ ܟܽܠܗܶܝܢ ܒܶܪ̈ܝܳܬܳܐ. ܘܥܳܪܩܺܝܢ ܕܰܝ̈ܘܶܐ: ܘܳܐܒܕܺܝܢ ܫܺܐܕ̈ܶܐ: ܘܡܶܬܛܰܠܡܺܝܢ ܚܰܪ̈ܡܳܢܶܐ: ܘܒܳܗܬܳܐ ܝܽܘܕܳܝܽܘܬܳܐ: ܘܡܰܚܦܪܳܐ ܟܳܦܽܘܪܽܘܬܳܐ: ܘܡܶܬܠܰܚܰܡ ܟܺܐܢܳܐ. ܘܦܳܪܰܥ ܠܟܽܠܢܳܫ ܐܰܝܟ ܥܒ̇ܳܕ̈ܶܐ ܕܰܣܥܺܝܪܺܝܢ ܠܶܗ. ܢܳܦܩܺܝܢ ܡܰܠܐܱܟ̈ܶܐ ܐܰܝܟ ܒܰܪ̈ܩܶܐ ܠܐܱܪܒܰܥ ܦܶܢ̈ܝܳܬܳܐ ܘܰܡܟܰܢܫܺܝܢ ܠܝܰܠܕ̈ܰܘܗܝ ܕܳܐܕܳܡ ܠܕܺܝܢܳܐ ܕܚܺܝܠܐܴ ܕܟܺܐܢܽܘܬܳܐ ܕܠܰܝܬ ܒܶܗ ܡܰܣܰܒ ܒܰܐܦ̈ܶܐ. ܙܳܥܶܩ ܫܺܝܦܽܘܪܳܐ: ܘܩܳܪܝܳܐ ܩܰܪܢܳܐ: ܘܓܳܐܰܚ ܝܰܡܳܐ ܕܢܽܘܪܳܐ ܡ̣ܶܢ ܩܕܳܡܰܝܟ: ܘܰܕܓܰܘܙܰܠܬܳܐ ܩܫܺܝܬܳܐ ܡܶܬܦܰܪܥܺܝܢ ܟܺܐܢ̈ܶܐ ܐܰܓܪܳܐ ܕܥܰܡܠܰܝ̈ܗܽܘܢ ܘܡܶܬܺܝܗܶܒ ܠܒܺܝ̈ܫܶܐ ܥܒ̇ܳܕܳܐ ܕܺܐܝܕܰܝ̈ܗܽܘܢ: ܘܡܰܡܠܠܐܴ ܕܣܶܦܘ̈ܳܬܗܽܘܢ ܘܰܟܦܽܘܪܝܳܐ ܕܠܶܫܳܢܰܝ̈ܗܽܘܢ: ܘܓܽܘܕܳܦܳܐ ܕܦܽܘܡܰܝ̈ܗܽܘܢ: ܗܳܝܕܶܝܢ ܕܺܝܢܳܐ ܟܺܐܢܳܐ ܡܶܬܓܙܰܪ ܥܠܰܝܗܽܘܢ: ܘܒܰܪܬ ܩܳܠܐܴ ܙܺܝܥܬܳܐ: ܘܡܰܪܺܝܪܬܳܐ ܕܳܐܡܪܳܐ ܠܗܽܘܢ: ܕܙܶܠܘ ܠܟܽܘܢ ܡܶܢܝ ܠܺܝ̣̈ܛܶܐ ܠܢܽܘܪܳܐ ܡܶܟܺܝܠ ܠܐܴ ܝܺܕܰܥܬܟܽܘܢ: ܘܰܚܢܰܢ ܐܳܘ ܡܳܪܝܳܐ ܪܳܚܶܡ ܐ̱ܢܳܫܳܐ ܝܰܠܕ̈ܶܝܗ̇ ܕܥܺܕܬܳܐ ܩܰܕܝܫܬܳܐ ܙܒܺܝ̣̈ܢܰܝ ܒܰܕܡܳܟ ܝܰܩܺܝܪܳܐ ܦܪ̈ܺܝܩܰܝ ܒܰܨܠܺܝܒܽܘܬܳܟ ܗ̇ܳܝ ܕܰܚܠܳܦܰܝܢ: ܡܗܰܝ̈ܡܢܰܝ ܒܚܰܫ̈ܶܐ ܕܰܩܢܽܘܡܳܟ: ܘܡܰܘ̈ܕܝܰܝ ܒܰܐܠܳܗܽܘܬܳܟ ܘܣܳܓ̈ܕܰܝ ܠܰܨܠܺܝܒܳܟ: ܘܰܡܝܰܩܪ̈ܰܝ ܥܰܕܥܺܐܕܰܝ̈ܟ ܡܳܪ̈ܳܢܳܝܶܐ: ܒܳܥܶܝܢܰܢ ܡܶܢܳܟ ܡܪܰܚܡܳܢܳܐ: ܠܐܴ ܬܶܥܽܘܠ ܠܕܺܝܢܳܐ ܥܰܡܰܢ ܐܰܝܟ ܕܫܳܘܶܝܢܰܢ ܘܠܐܴ ܬܰܗܦܶܟ ܐܰܦܰܝ̈ܟ ܡܶܢܰܢ: ܘܠܐܴ ܬܶܫܕܶܐ ܠܰܢ ܡ̣ܶܢ ܩܕܳܡܰܝܟ ܒܪܽܘܓܙܳܐ ܘܚܶܡܬܳܐ: ܐܶܠܐܴ ܐܶܬܪܰܚܰܡ ܥܰܠ ܟܽܠܰܢ ܥܰܒ̣ܕܰܝ̈ܟ ܡܶܣ̈ܟܺܢܶܐ ܘܚܰܛܳܝ̈ܶܐ: ܘܰܩܪܺܝ ܘܩܰܪܶܒ ܠܰܢ ܠܘܳܬܳܟ: ܘܰܡܢܺܝ ܠܰܢ ܒܣܶܕܪ̈ܶܐ ܓܒܰܝ̈ܳܐ ܕܰܡܫܰܒ̈ܚܳܢܰܝܟ: ܘܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܣܽܘܓܳܐܐ ܪܰܒܳܐ ܕܒܰܣܺܝܡܽܘܬܳܟ: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܥܢ̣ܰܕܘ ܥܰܠ ܣܰܒܪܳܟ ܒܰܬܪܺܝܨܽܘܬ ܫܽܘܒܚܳܐ ܐܰܝܟܰܢܐ ܕܡ̣ܶܢ ܚܰܝ̈ܶܐ ܘܡܺܝ̈ܬܶܐ ܬܶܣܬܓܶܕܝ ܘܬܶܫܬܰܒܰܚ ܡܳܪܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܫܬܳܐ ܩܰܕܺܝܫܳܐ ܗܳܫܳܐ܀

ܫܠܡ

 

ܛܟܣܐ ܕܚܕ ܒܫܒܐ ܫܬܝܬܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ

ܩܕܡܝܬ ܨܠܘܬܐ ܕܫܘܪܝܐ

 

ܢܽܘܗܪܳܐ ܕܰܩܝܳܡܬܳܟ ܘܕܶܢܚܳܐ ܕܛܰܝܒܽܘܬܳܟ ܘܨܶܡܚܳܐ ܕܺܝܕܰܥܬܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܐܰܫܪܳܐ ܒܓܰܘ ܠܶܒܳܐ ܘܬܰܪ̈ܥܝܳܬܳܐ ܕܺܝܠܰܢ: ܘܰܡܠܺܝ ܐܶܢܶܝܢ ܚܰܕܽܘܬܳܐ ܘܰܪܘܳܙܳܐ ܕܡܶܢܳܟ ܐܰܝܟܰܢܳܐ ܕܢܰܨܡܰܚ ܒܰܥܒ̇ܳܕ̈ܶܐ ܫܰܦܺܝܪ̈ܶܐ ܕܰܡܪܰܥܶܝܢ ܠܳܟ ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܪܰܒܳܐ ܩܕܳܡܰܝܟ ܡܳܐ ܕܡܶܬܓܰܠܝܳܐ ܡܰܠܟܽܘܬܳܟ: ܥܰܡܳܟ ܢܶܥܽܘܠ ܠܰܓܢܽܘܢܳܐ ܡܠܐܷ ܢܽܘܗܪܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܐܚܝܳܢܳܐ ܕܰܢܚ̣ܶܬ ܐܰܓܶܣ ܒܩܰܒܪܳܐ ܒܶܝܬ ܡܺܝ̈ܬܶܐ ܕܰܫܦ̣ܰܪ ܠܶܗ: ܠܗ̇ܰܘ ܝܳܗܽܘܒܳܐ ܕܚܰܝ̈ܶܐ ܕܶܐܬܡܢܺܝ ܥܰܡ ܩܒܺܝܪ̈ܶܐ ܒܛܰܝܒܽܘܬܶܗ: ܘܫܰܘܺܝ ܗ̣ܘܳܐ ܬܰܫܘܺܝܬܶܗ ܨܶܝܕ ܥܰܒ̣ܕ̈ܰܘܗܝ ܒܰܐܬܪܳܐ ܕܥܰܢܺܝ̈ܕܶܐ. ܠܗ̇ܰܘ ܬܰܩܺܝܦܳܐ ܘܥܰܙܺܝܙܳܐ ܕܰܩܥ̣ܳܐ ܒܡܰܘܬܳܐ ܘܰܢܦ̣ܰܠ ܬܳܐܓܶܗ: ܘܰܢܗ̣ܰܡ ܒܰܫܝܽܘܠ ܘܰܐܚܪܶܒ ܙܳܘܝ̈ܳܬܳܗ̇ ܟܰܗܺܝ̈ܢܳܬܳܐ: ܠܗ̇ܰܘ ܚܰܣܺܝܢܳܐ ܕܰܐܣܪܶܗ ܠܡܰܘܬܳܐ ܛܪܽܘܢܳܐ ܡܳܪܳܗ̇ ܕܗܳܡܳܢ: ܗ̇ܰܘ ܕܫܰܥܒܶܕ ܬܚܶܝܬ ܢܺܝܪܶܗ ܕܳܪ̈ܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ ܘܥܰܒܕܶܗ ܫܶܢܬܳܐ ܠܰܡܗܰܝ̈ܡܢܶܐ ܘܡܰܗܠܶܝܢ ܒܶܗ ܝܰܠܕ̈ܰܘܗܝ ܕܳܐܕܳܡ ܥܰܦܪܳܢܳܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܐܰܒܳܐ ܠܐܴ ܡܶܬܕܰܪܟܳܢܳܐ ܘܠܐܴ ܡܶܬܒܰܨܝܳܢܳܐ: ܕܒܺܝܕܰܥܬܳܟ ܠܐܴ ܗܽܘܠܳܢܳܝܬܳܐ ܐܰܝܬܺܝܬ ܠܥܳܠܡܳܐ ܟܽܠܶܗ ܠܰܗܘܳܝܳܐ: ܫܽܘܒܚܳܐ ܠܳܟ ܐܠܰܗܳܐ ܒܪܳܐ ܝܰܠܕܳܐ ܓܢܺܝܙܳܐ ܘܠܐܴ ܡܶܬܰܐܡܪܳܢܳܐ ܕܰܩܕܳܡ ܙܰܒ̈ܢܶܐ ܡ̣ܶܢ ܡܰܪܝܰܡ ܕܢܰܚ̣ܬ ܠܐܴ ܡܶܬܦܰܫܩܳܢܳܐܺܝܬ: ܫܽܘܒܚܳܐ ܠܳܟ ܐܠܰܗܳܐ ܓܰܐܝܳܐ ܘܓܰܢ̱ܒܳܪܳܐ ܕܰܥܒ̣ܰܕܬ ܫܡܰܝܳܐ ܒܚܶܟܡܬܳܟ: ܘܠܐܴ ܦܳܚܡܺܝܢ ܠܳܟ ܪ̈ܰܘܡܶܐ ܘܥܽܘ̈ܡܩܶܐ ܘܟܽܠܗܶܝܢ ܦܶܢ̈ܝܳܬܳܐ: ܫܽܘܒܚܳܐ ܠܳܟ ܐܠܰܗܳܐ ܕܽܘܡܳܪܳܐ ܠܐܴ ܡܶܬܡܰܠܠܳܢܳܐ: ܕܕܽܘܡܳܪܳܐ ܐܺܝܬܶܝܗ̇ ܟܽܠܳܗ̇ ܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܣܳܥܽܘܪ̈ܘܳܬܳܟ ܐܠܰܗܳܝ̈ܳܬܳܐ. ܫܽܘܒܚܳܐ ܠܳܟ ܐܠܰܗܳܐ ܗܰܕܳܝܳܐ ܘܰܡܗܰܕܝܳܢܳܐ ܕܗܰܕܺܝܬ ܠܰܢ ܠܐܘܪܚܳܐ ܕܫܰܝܢܳܐ ܘܕܰܫܠܳܡܳܐ: ܘܠܰܫܒܺܝܠܐܴ ܕܰܡܠܐܷ ܚܰܕ̈ܘܳܬܳܐ: ܫܽܘܒܚܳܐ ܠܳܟ ܐܠܰܗܳܐ ܘܰܥܕܳܐ ܕܚܰܝ̈ܶܐ ܠܐܴ ܥܳܒܽܘܪ̈ܶܐ ܘܠܐܴ ܡܶܬܚܰܒܠܳܢ̈ܶܐ: ܕܰܒܝܰܕ ܒܪܳܟ ܚܰܒܺܝܒܳܐ ܟܽܠ ܒܽܘܪ̈ܟܳܬܳܐ ܫܰܟܶܢ̣ܬ ܠܰܢ. ܫܽܘܒܚܳܐ ܠܳܟ ܐܠܰܗܳܐ ܙܳܝܽܘܢܳܐ ܛܳܒܳܐ ܘܰܡܡܰܠܝܳܢܳܐ ܕܚܰܣܺܝܪ̈ܶܐ: ܘܰܡܣܰܒܥܳܢܳܐ ܕܟܰܦ̈ܢܶܐ ܘܰܨܪ̈ܺܝܟܶܐ: ܕܥܽܘܬܪܳܐ ܣܰܓܺܝܳܐܐ ܝܰܗ̣ܒܬ ܠܰܢ ܒܰܩܝܳܡܬܳܟ ܕܡ̣ܶܢ ܩܰܒܪܳܐ. ܫܽܘܒܚܳܐ ܠܳܟ ܐܠܰܗܳܐ ܚܰܢܳܢܳܐ ܘܰܡܪܰܚܡܳܢܳܐ ܕܪܰܚܶܡ̣ܬ ܥܰܠ ܓܶܢܣܰܢ ܕܰܬܚܶܝܬ ܠܰܘܛܬܳܐ ܟܕܺܝܢ ܗ̣ܘܳܐ ܘܡܰܪܺܝܪܳܐܺܝܬ ܕܠܐܴ ܚܰܘܣܳܢܳܐ ܡܶܬܢܰܘܰܠ ܗ̣ܘܳܐ ܫܽܘܒܚܳܐ ܠܳܟ ܐܠܰܗܳܐ ܛܳܒܳܐ ܘܛܽܘܒܬܳܢܳܐ ܕܒܰܩܝܳܡܬܳܟ ܫܒܺܝܚܬܳܐ ܕܡ̣ܶܢ ܩܰܒܪܳܐ ܛܽܘܒܬܳܢܽܘܬܳܐ ܡܥܰܠܰܝܬܳܐ ܐܠܰܒܶܫ̣ܬ ܠܰܢ: ܘܠܐܱܬܪܰܢ ܩܰܕܡܳܝܳܐ ܐܰܦܢܺܝܬ ܠܰܢ. ܫܽܘܒܚܳܐ ܠܳܟ ܐܠܰܗܳܐ ܝܰܡܳܐ ܠܐܴ ܡܶܬܬܓܰܫܫܳܢܳܐ ܕܪܶܚܡܰܬ݀ ܐ̱ܢܳܫܽܘܬܳܐ: ܘܢܽܘܗܪܳܐ ܦܰܐܝܳܐ ܕܰܡܬܽܘܡܳܝܳܐ. ܫܽܘܒܚܳܐ ܠܳܟ ܐܠܰܗܳܐ ܟܠܺܝܠܐܴ ܘܗܶܕܪܳܐ ܕܰܡܗܰܝ̈ܡܢܰܝ ܒܰܫܡܶܗ. ܫܽܘܒܗܳܪܳܐ ܕܡܰܘ̈ܕܝܰܝ ܒܐܢܳܫܽܘܬܶܗ: ܘܥܽܘܕܪܳܢܳܐ ܕܡܶܬܓܰܘܰܣܝ ܒܰܐܠܳܗܽܘܬܶܗ. ܫܽܘܒܚܳܐ ܠܳܟ ܐܠܰܗܳܐ ܠܡܺܐܢܳܐ ܘܢܰܘܚܳܐ ܕܰܡܛܰܪ̈ܦܶܐ ܘܫܽܘܘܙܳܒܳܐ ܕܥܰܡ̈ܠܐܷ ܘܠܐܱܝ̈ܳܐ: ܫܽܘܒܚܳܐ ܠܳܟ ܐܠܰܗܳܐ ܡܥܺܝܢܳܐ ܕܚܰܝ̈ܶܐ ܪ̈ܽܘܚܳܢܳܝܶܐ ܕܰܐܪܕܺܝ ܠܰܢ ܡ̣ܶܢ ܣܶܛܪܶܗ: ܫܶܩܝܳܐ ܕܚܰܝ̈ܶܐ ܘܡܰܒܽܘܥܳܐ ܕܚܰܕ̈ܘܳܬܳܐ. ܫܽܘܒܚܳܐ ܠܳܟ ܐܠܰܗܳܐ ܢܶܒܥܳܐ ܕܠܐܴ ܓܳܐܶܙ ܘܢܰܗܪܳܐ ܕܫܶܦ̈ܥܶܐ ܫܡܰܝ̈ܳܢܶܐ: ܕܟܽܠ ܬܶܕܡܪ̈ܳܬܳܐ ܬܡܺܝ̈ܗܳܬܳܐ ܚܰܘܺܝ ܠܟܽܠܰܢ ܒܰܩܝܳܡܬܶܗ: ܫܽܘܒܚܳܐ ܠܳܟ ܐܠܰܗܳܐ ܣܺܝܡܬܳܐ ܕܚܶܟ̈ܡܳܬܳܐ ܣܒܺܝ̣̈ܣܳܬܳܐ ܘܥܰܬܺܝܪ̈ܳܬܳܐ ܕܰܐܥܬܰܪ ܠܰܢ ܡ̣ܶܢ ܓܰܙܳܐ ܕܪ̈ܰܚܡܰܘܗܝ ܘܝܰܗ̣ܒ ܠܰܢ ܦܰܓܪܶܗ ܕܢܶܬܒܰܣܰܡ ܒܶܗ. ܫܽܘܒܚܳܐ ܠܳܟ ܐܠܰܗܳܐ ܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܘܰܐܬܩܶܢ̣ܬ ܠܒܰܪܢܳܫܳܐ ܩܰܕܡܳܝܳܐ ܡ̣ܶܢ ܒܪܺܝܫܺܝܬ. ܫܽܘܒܚܳܐ ܠܳܟ ܐܠܰܗܳܐ ܘܦܳܪܽܘܩܳܐ ܘܰܡܦܰܨܝܳܢܳܐ ܕܰܦ̣ܪܰܩ ܘܫܰܘܙܶܒ ܠܓܶܢܣܰܢ ܡ̣ܶܢ ܐܺܝ̈ܕܰܝ ܒܥܶܠܕ̈ܒܳܒܰܝܢ ܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܫܽܘܒܚܳܐ ܠܳܟ ܐܠܰܗܳܐ ܨܶܡܚܳܐ ܨܰܡܽܘܚܬܳܢܳܐ ܕܰܨܡܰܚ ܠܰܢ ܡ̣ܶܢ ܐܰܒܳܐ ܒܪܺܝܫܺܝܬ ܘܰܕܢܰܚ̣ ܠܰܢ ܡ̣ܶܢ ܡܰܪܝܰܡ ܒܚܰܪܰܬ݀ ܙܰܒ̈ܢܶܐ. ܫܽܘܒܚܳܐ ܠܳܟ ܐܠܰܗܳܐ ܩܪܰܒܬܳܢܳܐ ܘܬܰܩܺܝܦ ܥܽܘܫܢܳܐ ܕܬܰܒܰܪ ܒܰܩܝܳܡܬܶܗ ܠܢܺܝܪܶܗ ܕܡܰܘܬܳܐ ܘܣܳܛܳܢܳܐ: ܘܰܫ̣ܪܳܐ ܐܰܣܺܝܪ̈ܶܐ ܕܡ̣ܶܢ ܥܳܠܰܡ. ܫܽܘܒܚܳܐ ܠܳܟ ܪܳܡܳܐ ܘܰܡܥܰܠܝܳܐ ܕܪܰܡܪܶܡܬ ܘܥܰܠܺܝܬ ܠܓܶܢܣܳܐ ܕܥܰܦܪ̈ܳܢܶܐ: ܘܰܥܒ̣ܰܕܬ ܐܶܢܽܘܢ ܪ̈ܽܘܚܳܢܶܐ ܘܰܒܢ̈ܰܝ ܝܳܪܬܽܘܬܳܐ ܕܺܝܠܳܟ. ܫܽܘܒܚܳܐ ܠܳܟ ܐܠܰܗܳܐ ܫܰܝܢܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܐܰܢ̱ܬ ܕܰܥܒ̣ܰܕܬ ܫܠܳܡܳܐ ܘܰܐܘܝܽܘܬܳܐ: ܘܫܰܝܶܢ̣ܬ ܠܰܬܪ̈ܰܝܗܽܘܢ ܓܰܒ̈ܶܐ ܒܰܙܩܺܝܦܽܘܬܳܟ. ܫܽܘܒܚܳܐ ܠܳܟ ܐܠܰܗܳܐ ܬܠܺܝܬܳܝܳܗ̇ ܕܰܐܠܳܗܽܘܬܳܐ ܕܩܳܡ̣ܬ ܡ̣ܶܢ ܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܰܡܠ̣ܰܝܬܳܗ̇ ܠܟܽܠܳܗ̇ ܒܪܺܝܬܳܐ ܪܺܝܚܳܐ ܕܦܰܐܝܽܘܬ ܐܠܰܗܽܘܬܳܐ ܡܬܽܘܡܳܝܬܳܐ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܰܢ ܕܠܐܴ ܬܰܣܠܐܷ ܘܬܶܫܕܶܐ ܠܰܢ ܡ̣ܶܢ ܩܕܳܡ ܦܰܪܨܽܘܦܳܟ: ܐܶܠܐܴ ܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ ܘܚܽܘܒܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ. ܘܰܫܪܺܝ ܠܐܱܣܺܝܪ̈ܶܐ ܕܒܰܚܛܳܗ̈ܶܐ ܡܦܰܪܟܠܺܝܢ: ܐܰܪܘܰܚ ܠܐܱܠܺܝ̣̈ܨܶܐ: ܘܒܰܝܰܐܐ ܠܰܡܥ̈ܳܩܶܐ ܘܰܠܟܽܠܗܽܘܢ ܐܰܝܠܶܝܢ ܕܒܰܐܢܰܢܩܰܐܣ ܘܰܒܩܺܝܢܕܽܘܢܽܘ ܫܰܟܶܢ ܪ̈ܰܘܚܳܬܳܐ ܘܰܢܦܺܐܫܳܐ. ܘܰܐܫܘܳܐ ܠܟܽܠܰܢ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ ܘܰܓܗܳܝܬܳܐ ܡܫܰܡܠܳܝܬܳܐ ܕܡ̣ܶܢ ܢܶܣܝܽܘ̈ܢܶܐ: ܘܦܰܨܳܐ ܠܰܢ ܡ̣ܶܢ ܟܽܠܗܶܝܢ ܐܽܘܪ̈ܚܳܬܶܗ ܡܥܰܩ̈ܡܳܬܳܐ ܕܒܺܝܫܳܐ ܢܳܟܽܘܠܰܢ. ܘܠܐܴ ܬܶܬܶܠ ܠܶܗ ܐܰܬܪܳܐ ܕܢܶܓܚܰܟ ܒܰܢ: ܘܰܠܦܰܚ̈ܶܐ ܕܺܝܠܶܗ ܡ̣ܶܢ ܬܚܶܝܬ ܪ̈ܶܓܠܐܷ ܕܺܝܠܰܢ ܫܰܦܶܠ ܘܬܰܒܰܪ. ܘܚܰܘ̈ܒܶܐ ܘܰܚܛܳܗ̈ܶܐ ܕܟܽܠܰܢ ܚܰܣܳܐ ܘܰܫܒܽܘܩ: ܘܡ̣ܶܢ ܓܰܒܳܐ ܕܺܝܠܳܟ ܕܝܰܡܺܝܢܳܐ ܠܟܽܠܰܢ ܐܰܩܺܝܡ: ܘܰܐܢܺܝܚ ܢܰܦ̈ܫܳܬܳܐ ܘܦܰܓܪ̈ܶܐ ܕܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܐܰܝܟܰܢܳܐ ܕܢܰܣܶܩ ܠܳܟ ܫܽܘܒܚܳܐ ܒܓܽܘ̈ܕܶܐ ܕܢܰܨܺܝ̈ܚܰܝܟ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܐܶܬܪܰܥܳܐ ܡܳܪܝܳܐ ܐܠܰܗܳܐ ܒܬܰܟܫܶܦܬܳܐ ܘܰܨܠܰܘ̈ܳܬܳܐ ܕܠܳܟ ܡܶܬܩܰܪܒܺܝܢ ܡ̣ܶܢ ܥܺܕܬܳܟ ܩܰܕܺܝܫܬܳܐ: ܘܠܐܴ ܬܰܣܠܐܷ ܠܦܽܘܠܚܳܢ ܬܶܫܡܫܬܳܐ ܕܟܳܗ̈ܢܶܝܟ ܐܶܠܐܴ ܐܶܬܪܰܥܳܐ ܡܳܪܝܳܐ ܒܦܺܝܪ̈ܡܰܝܗܽܘܢ ܘܶܐܬܬܢܺܝܚ ܒܒܳܥ̈ܘܳܬܗܽܘܢ: ܘܩܰܒܶܠ ܡܳܪܝܳܐ ܨܠܰܘ̈ܳܬܗܽܘܢ ܘܫܰܟܶܢ ܫܰܝܢܳܐ ܘܰܫܠܳܡܳܐ ܠܐܱܪܥܳܐ ܘܟܽܠܗܽܘܢ ܥܳܡܽܘܪ̈ܶܝܗ̇ ܕܬܰܘܕܶܐ ܠܳܟ ܕܠܐܴ ܫܶܠܝܳܐ. ܘܬܶܣܓܽܘܕܝ ܠܳܟ. ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܚܘܬܡܐ

ܒܰܪܶܟ ܡܳܪܝܳܐ ܐܠܰܗܳܐ ܒܒܽܘܪ̈ܟܳܬܳܐ ܕܺܝܠܳܟ ܫܡܰܝܳܢ̈ܳܝܳܬܳܐ ܠܟܶܢܫܳܐ ܗܳܢܳܐ ܕܶܐܬܟܰܢܰܫ: ܕܰܠܥܺܐܕܳܐ ܕܰܩܝܳܡܬܳܟ ܢܫܰܡܠܐܷ ܒܚܰܕܽܘܬܳܐ: ܘܗܳܐ ܩܳܐܶܡ ܘܰܡܣܰܟܶܐ ܠܪ̈ܰܚܡܰܝܟ: ܐܰܢ̱ܬ ܡܳܪܳܐ ܛܳܒܳܐ ܫܰܕܰܪ ܚܢܳܢܳܟ ܠܐܻܝ̇ܳܠܳܗ ܘܣܰܝܰܥܳܝܗܝ ܒܚܰܝܠܐܴ ܕܥܽܘܕܪ̈ܳܢܰܝܟ ܕܠܐܴ ܡܰܘܦܶܝܢ: ܕܒܶܝܬ ܓܰܙܳܟ ܠܐܴ ܚ̇ܳܣܰܪ ܘܠܐܴ ܒ̇ܳܨܰܪ ܡ̣ܶܢ ܫܽܘ̈ܐܳܠܐܷ: ܘܣܰܓܺܝ ܡܰܘ̈ܗܒܳܬܳܐ ܐܺܝܬܰܝܟ ܡܳܪܝܳܐ ܘܠܳܟ ܫܽܘܒܚܳܐ ܡܰܣܩܺܝܢܰܢ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܕܩܰܕܺܝܡܳܐ ܠܟܽܠ ܒܶܪ̈ܝܳܢ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܥܳܒܽܘܕܳܐ ܕܟܽܠܗܶܝܢ ܒܶܪ̈ܝܳܬܳܐ ܬܠܺܝܬܳܝܽܘܬܳܐ ܕܡ̣ܶܢ ܟܽܠܗܽܘܢ ܥܰܡ̈ܡܶܐ ܒܟܽܠ ܠܶܫܳܢ ܐܳܦ ܡܶܫܬܰܒܚܳܐ ܘܡܶܬܪܰܡܪܡܳܐ ܘܺܐܝܬܶܝܗ̇ ܡܩܰܘܝܳܢܺܝܬܳܐ ܠܥܳܠܰܡ ܥܳܠܡܺܝܢ ܕܠܐܴ ܫܽܘܚܠܳܦܳܐ ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܫܶܡܫܳܐ ܦܰܐܝܳܐ ܕܙܰܕܺܝܩܽܘܬܳܐ ܕܰܕܢܰܚ ܒܰܐܪܥܳܐ ܘܰܐܢܗܪܳܗ̇ ܕܚܶܫܽܘܟܳܐ ܗܘܳܬ݀: ܨܶܡܚܳܐ ܢܰܗܺܝܪܳܐ ܕܰܐܨܡܰܚ ܒܬܺܐܒܶܝܠ ܙܰܗܪܳܐ ܕܙܰܠܺܝ̈ܩܰܘܗܝ: ܘܰܒܗܽܘܢ ܐܶܬܛܰܠܰܩ̣ܘ ܥܰܝ̈ܡܶܐ ܚܶܫܽܘ̈ܟܳܝܶܐ ܘܰܣܢ̈ܰܝܳܐ ܕܟܳܦܽܘܪܽܘܬܳܐ ܡ̣ܶܢ ܠܶܒܰܘ̈ܳܬܳܐ ܕܰܡܗܰܝ̈ܡܢܶܐ: ܕܶܢܚܳܐ ܡܫܺܝܚܳܐ ܕܰܪܕܳܐ ܡ̣ܶܢ ܪܰܘܡܳܐ ܨܶܝܕ ܬܰܚܬܳܝ̈ܶܐ ܠܥܽܘܡܩܳܐ ܘܰܐܣܺܝ ܟܺܐܒܰܝ̈ܗܽܘܢ ܒܰܚܢܳܢܶܗ. ܬܰܩܺܝܦܳܐ ܕܰܡ̣ܬܰܚ ܠܰܫܡܰܝܳܐ ܐܰܝܟ ܝܳܪܺܝܥܬܳܐ ܘܰܦܟ̣ܰܪ ܠܝܰܡܳܐ ܪܰܒܳܐ ܒܚܳܠܐܴ ܒܕܺܝܪܳܐ: ܘܣܳܡ ܠܶܗ ܬܚܽܘܡܳܐ ܕܠܐܴ ܥܳܒ̇ܰܪ. ܓܰܐܝܳܐ ܘܓܰܢ̱ܒܳܪܳܐ ܕܓܰܐܝܳܐܺܝܬ ܕܰܟܪ̈ܽܘܒܶܐ: ܘܶܐܬܥܪܺܝ ܒܟܰܪܣܳܐ ܕܒܶܣܪܳܐ ܘܶܐܬܚܒܶܫ ܒܩܰܒܪܳܐ ܙܥܽܘܪܳܐ ܕܰܬܠܳܬ ܐܰܡܺܝ̣̈ܢ ܡܫܽܘܚܬܶܗ: ܠܐܴ ܡܳܝܽܘܬܳܐ ܐܠܰܗܳܐ ܕܰܒܨܶܒܝܳܢܶܗ ܛܥܶܡ ܡܰܘܬܳܐ ܡܶܛܽܠܳܬܰܢ: ܘܩܰܛܠܶܗ ܠܡܰܘܬܳܐ ܩܳܛܽܘܠܰܢ ܒܝܰܘܡܳܐ ܕܩܶܛܠܶܗ: ܘܪܰܣ̣ ܢܽܘܚܳܡܳܐ ܘܚܰܝ̈ܶܐ ܠܰܫܟܺܝ̣̈ܒܰܝ ܥܰܠ ܣܰܒܪܶܗ. ܐܠܰܗܳܐ ܡܪܰܝܡܳܐ ܕܶܐܬܢܰܚ̣ܰܬ ܘܶܐܬܳܐ ܠܡܽܘܟܳܟܳܐ ܒܨܶܒܝܳܢܶܗ: ܐܰܝܟܰܢܳܐ ܕܢܶܦܪܽܘܩ ܠܐܴܕܳܡ ܨܰܠܡܳܐ ܕܪܰܒܽܘܬܶܗ. ܦܳܪܩܳܐ ܪܰܒܳܐ ܕܰܦ̣ܪܰܩ ܥܳܢ̈ܶܗ ܕܰܐܒܺܝܕܳܐ ܗܘܳܬ݀: ܘܟܰܢܫܳܗ̇ ܡ̣ܶܢ ܦܶܗܝܳܐ ܕܰܫܚܺܝܩܳܐ ܗܘܳܬ݀ ܒܽܐܘܠܨܳܢ̈ܶܐ ܘܚܰܫ̈ܶܐ ܘܛܽܘܪ̈ܳܦܶܐ: ܟܰܕ ܠܕܶܚ̈ܠܳܬܳܐ ܢܽܘܟܪ̈ܳܝܳܬܳܐ ܣܶܓܕ̈ܳܬܳܐ ܡܩܰܪܒܳܐ: ܘܰܠܗܽܘܢ ܐܠܰܗ̈ܶܐ ܩܳܪܝܳܐ ܗܘܳܬ݀ ܕܽܘܡܳܪܳܐ ܕܠܐܴ ܡܶܬܡܰܠܰܠ ܐܺܝܬܰܘܗܝ ܐܠܰܗܰܢ: ܕܰܒܥܶܕܳܢ ܚܰܫܶܗ ܐܰܪܗܶܒ ܐܶܢܽܘܢ ܠܐܷܣܛܽܘ̈ܟܣܶܐ ܠܐܴ ܪ̈ܳܓܽܘܫܶܐ: ܘܰܐܦܶܠ ܠܟܽܠܗܶܝܢ ܕܶܚ̈ܠܳܬܳܐ ܘܓܰܕ̈ܶܐ ܘܨܰܠܡ̈ܶܐ ܚܰܪ̈ܡܶܐ: ܘܰܐܙܺܝܥ ܠܰܫܡܰܝܳܐ ܘܠܐܱܪܥܳܐ ܒܰܩܥܳܬܳܐ ܕܥܰܠ ܩܰܝܣܳܐ ܒܥܶܕܳܢ ܙܩܺܝܦܽܘܬܶܗ: ܠܐܴ ܚܳܫܽܘܫܳܐ ܐܠܰܗܳܐ ܕܰܐܚܶܫ ܐܶܢܽܘܢ ܠܚܰܫ̈ܶܐ ܒܚܰܫܶܗ ܘܰܩ̣ܛܰܠ ܠܡܰܘܬܳܐ ܒܰܐܬܪܶܗ: ܠܳܟ ܐܠܰܗܳܐ ܡܪܰܝܡܳܐ ܕܗܳܠܶܝܢ ܟܽܠܗܶܝܢ ܣܒ̣ܰܠܬ ܘܣܰܝܒ̣ܰܪܬ ܡܶܛܽܠ ܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܚܰܠܳܫܳܐ ܘܰܚܒܰܢܳܢܳܐ: ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܥܰܠ ܐܰܦ̈ܰܝ ܡܽܘܟܳܟܳܟ ܕܰܠܘܳܬܰܢ ܐܠܰܗܰܢ: ܡܪܰܡܪܡܺܝܢܰܢ ܠܳܗ̇ ܠܰܩܝܳܡܬܳܟ ܕܒܳܗ̇ ܩܳܡܢܰܢ ܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܩܰܕܡܳܝܬܳܐ ܗ̇ܳܝ ܕܒܰܥܒܳܪ ܦܽܘܩܕܳܢܳܐ ܣܶܚܦܰܬ݀ ܠܰܢ. ܨܒܺܝ ܒܰܢ ܗܳܟܺܝܠ ܐܠܰܗܳܐ ܘܰܥܒܶܕ ܠܰܢ ܩܰܕܺܝ̈ܫܶܐ ܘܰܕܟܰܝ̈ܳܐ ܐܳܦ ܡܰܥܡܪܳܐ ܓܰܒܝܳܐ ܠܐܱܠܳܗܽܘܬܳܟ: ܘܰܫܪܺܝ ܘܰܐܓܶܢ ܒܰܢ ܘܩܰܕܶܫ ܠܠܶܒܰܘ̈ܳܬܰܢ: ܘܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܝܰܡܳܐ ܪܰܒܳܐ ܕܰܡܪܰܚܡܳܢܽܘܬܳܟ. ܐܰܝܟܰܢܳܐ ܕܠܳܟ ܡܶܬܬܚܺܝܒܳܐ ܣܶܓܕܬܳܐ ܘܬܰܘܕܺܝܬܳܐ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܒܳܪܽܘܝܳܐ ܫܰܦܺܝܪܳܐ ܕܒܰܕܡܽܘܬܶܗ ܨܳܪܰܢ: ܠܗ̇ܰܘ ܕܰܒܡܰܘܬܶܗ ܒܰܛܠܶܗ ܠܡܰܘܬܳܐ ܝܰܥܢܳܐ ܕܰܥܠܰܝܢ ܐܶܬܥܰܫܰܢ ܘܒܰܕܒܺܝܚܽܘܬܶܗ ܡܚܰܣܝܳܢܺܝܬܳܐ ܕܰܚܠܳܦܰܝܢ ܚܰܣܺܝ ܠܟܽܠܗܽܘܢ ܝܰܠܕ̈ܰܘܗܝ ܕܳܐܕܳܡ: ܘܰܐܩܺܝܡܶܗ ܥܰܡܶܗ ܒܫܽܘܒܚܳܐ ܘܰܐܡܠܟܶܗ ܒܰܫܡܰܝܳܐ. ܘܰܐܘܬܒܶܗ ܡ̣ܶܢ ܝܰܡܺܝܢ ܐܰܒܳܐ ܕܫܰܠܚܶܗ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܘܡܶܬܟܰܫܦܺܝܢܰܢ ܠܪ̈ܰܚܡܰܝܟ ܘܰܠܛܰܝܒܽܘܬܳܟ ܠܐܴ ܡܶܬܡܰܠܠܳܢܺܝܬܳܐ: ܐܰܝܟܰܢܳܐ ܕܰܬܒܰܪܶܟ ܐܶܢܽܘܢ ܠܥܰܒ̣ܕܰܝ̈ܟ ܘܣܳܓܽܘ̈ܕܰܝܟ ܗܳܠܶܝܢ ܕܒܰܫܡܳܟ ܩܰܕܺܝܫܳܐ ܘܰܒܡܰܥܒܕܳܢܽܘܬܳܐ ܟܣܺܝܬܳܐ ܕܰܐܠܳܗܽܘܬܳܟ ܗܳܫܳܐ ܟܢܺܝܫܺܝܢ: ܙܰܝܢܳܐ ܪܽܘܚܳܢܳܝܳܐ: ܘܶܐܣܛܠܐܴ ܕܡܰܥܡܽܘܕܺܝܬܳܐ ܕܺܝܠܳܟ ܐܠܰܒ̣ܶܫ ܐܶܢܽܘܢ. ܘܚܽܘܒܳܐ ܘܰܐܘܝܽܘܬܳܐ ܐܰܥ̣ܛܶܦ ܐܶܢܽܘܢ: ܘܰܒܫܰܝܢܳܐ ܘܒܰܫܠܳܡܳܐ ܕܺܝܠܳܟ ܐܠܰܗܳܝܳܐ ܚܰܙܶܩ ܐܶܢܽܘܢ: ܘܰܡܠܺܝ ܪܘܳܙܳܐ ܘܒܽܘܣܳܡܳܐ ܠܢܰܦ̈ܫܳܬܗܽܘܢ ܐܰܝܟܰܢܳܐ ܕܰܒܢܰܟܦܽܘܬܳܐ ܘܩܰܕܺܝܫܽܘܬܳܐ ܘܰܒܕܽܘܒܳܪ̈ܶܐ ܕܟܰܝ̈ܳܐ ܘܩܰܕܺܝ̈ܫܶܐ ܘܠܐܴ ܥܕܺܝ̣̈ܠܐܷ ܠܥܺܐܕܳܐ ܕܰܩܝܳܡܬܳܟ ܢܥܰܕܥܕܽܘܢ: ܟܰܕ ܪܰܚܺܝܩܺܝܢ ܡܶܢ ܟܽܠ ܚܽܘܫ̈ܳܒܶܐ ܨ̈ܳܐܶܐ: ܘܰܡܠܶܝܢ ܚܰܕܽܘܬܳܐ ܕܪܽܘܚܳܐ ܕܩܽܘܕܫܳܐ: ܟܰܕ ܡܨܰܒܬܺܝܢ ܒܨܶܒ̈ܬܶܐ ܕܢܽܘܚܳܡܳܐ ܕܺܝܠܳܟ: ܘܫܺܝܛܺܝܢ ܠܟܽܠ ܚܳܪܥܽܘܬܳܐ ܘܰܫܟܺܝܪܽܘܬܳܐ ܘܛܰܢܦܽܘܬܳܐ: ܘܰܒܪܶܚܡܬܳܐ ܕܺܝܠܳܟ ܐܠܰܗܳܝܬܳܐ ܡܢܰܒܪܫܺܝܢ ܘܰܒܙܰܠܓ̈ܶܐ ܕܰܩܝܳܡܬܳܟ ܡܰܙܠܓܺܝܢ: ܚܶܘܳܪ̈ܶܐ ܚܠܳܦ ܐܽܘܟܳܡ̈ܶܐ ܚܰܘܳܐ ܐܶܢܽܘܢ: ܘܛܳܒ̈ܶܐ ܘܒܰܣܺܝ̈ܡܶܐ ܚܠܳܦ ܒܺܝ̈ܫܶܐ ܫܰܚܠܶܦ ܐܶܢܽܘܢ: ܘܰܙܡܺܝ̣̈ܢܶܐ ܘܰܩܪ̈ܰܝܳܐ ܕܫܳܘܶܝܢ ܠܰܚܠܽܘܠܳܟ ܥܒܶܕ ܐܶܢܽܘܢ: ܘܡܳܐܢ̈ܶܐ ܕܟܰܝ̈ܳܐ ܘܩܰܕܺܝ̈ܫܶܐ ܚܰܘܳܐ ܐܶܢܽܘܢ ܕܢܶܗܘܽܘܢ: ܘܗܰܝ̈ܟܠܐܷ ܠܰܥܡܽܘܪܝܳܐ ܕܺܐܝܩܳܪܳܟ ܒܰܝܬܳܐ ܐܶܢܽܘܢ: ܘܰܠܢܽܘܪܳܐ ܩܫܺܝܬܳܐ ܕܓܺܗܰܢܳܐ ܠܐܴ ܬܰܫܠܶܡ ܐܶܢܽܘܢ ܦܰܓܪ̈ܰܝܗܽܘܢ ܡܶܛܽܠ ܕܰܒܚܰܫܰܝ̈ܟ ܝܰܩܺܝܪ̈ܶܐ ܙܒܰܢ̣ܬ ܐܶܢܽܘܢ: ܘܒܰܕܡܳܐ ܙܰܟܳܝܳܐ ܕܰܪܕܳܐ ܡ̣ܶܢ ܕܰܦܢܳܟ ܩܰܕܺܝܫܬܳܐ ܦ̣ܪܰܩܬ ܐܶܢܽܘܢ. ܠܐܴ ܬܶܥܽܘܠ ܠܕܺܝܢܳܐ ܥܰܡܗܽܘܢ ܘܠܐܴ ܬܶܬܕܟܰܪ ܠܗܽܘܢ ܫܽܘܪ̈ܥܳܬܳܐ ܘܒܽܘܨܳܪ̈ܶܐ ܕܺܝܠܗܽܘܢ ܡܶܛܽܠ ܕܰܫܡܳܟ ܪܰܒܳܐ ܐܶܬܩܪܺܝ ܥܠܰܝܗܽܘܢ. ܦܰܓܪܳܟ ܘܰܕܡܳܟ ܩܰܕܺܝܫܳܐ ܛܡܺܝܪ ܒܗܰܕܳܡܰܝ̈ܗܽܘܢ ܘܰܨܠܺܝܒܳܟ ܙܰܟܳܝܳܐ ܪܫܺܝܡ ܒܶܝܬ ܥܰܝܢܰܝ̈ܗܽܘܢ: ܢܽܘܪܳܐ ܩܫܺܝܬܳܐ ܕܓܺܗܰܢܳܐ ܥܠܰܝܗܽܘܢ ܠܐܴ ܬܶܫܬܰܠܰܛܝ ܡܶܛܽܠ ܕܡܰܥܡܽܘܕܺܝܬܳܟ ܩܰܕܺܝܫܬܳܐ ܐܠܰܒ̣ܶܫܬ ܐܶܢܽܘܢ. ܚܰܣܳܐ ܚܰܘܒܰܝ̈ܗܽܘܢ ܘܰܫܒܽܘܩ ܒܽܘܨܳܪ̈ܰܝܗܽܘܢ: ܘܰܥܛܺܝ ܚܛܳܗ̈ܶܐ ܕܺܝܠܗܽܘܢ: ܘܰܐܥܒ̣ܰܪ ܣܰܟܠܘ̈ܳܬܗܽܘܢ: ܘܰܐܫܺܝܓ ܟܽܘܬܡ̈ܳܬܗܽܘܢ ܘܠܐܴ ܬܶܬܕܟܰܪ ܡܶܬܥܰܒܪ̈ܳܢܘܳܬܗܽܘܢ: ܘܰܠܚܺܝ ܠܠܐܴ ܢܳܡܽܘܣܳܝ̈ܘܳܬܗܽܘܢ ܘܰܫܒܽܘܩ ܟܽܠ ܕܰܚ̣ܛܰܘ ܠܳܟ: ܐܶܢ ܒܨܶܒܝܳܢܳܐ ܘܶܐܢ ܕܠܐܴ ܒܨܶܒܝܳܢܳܐ: ܘܶܐܢ ܒܺܝܕܰܥܬܳܐ ܘܰܕܠܐܴ ܒܺܝܕܰܥܬܳܐ. ܐܶܢ ܗ̣ܽܘ ܓܶܝܪ ܐܺܝܬܰܝܟ ܗ̇ܰܘ ܕܰܢܚ̣ܶܬܬ ܠܐܱܪܥܳܐ ܚܠܳܦܰܝܗܽܘܢ ܘܰܛܥܶܡ̣ܬ ܡܰܘܬܳܐ ܒܨܶܒܝܳܢܳܟ ܡܶܛܽܠܳܬܗܽܘܢ ܘܚܰܫ̈ܶܐ ܘܰܨܠܺܝܒܳܐ ܘܢܶܓ̈ܕܶܐ ܘܫܽܘ̈ܩܳܦܶܐ ܘܚܰܠܐܴ ܘܰܡܪܳܪ̈ܶܐ ܐܶܫܬܺܝܬ ܒܝܶܬ ܕܺܝܢܳܐ ܘܰܦ̣ܪܰܩܬ ܐܶܢܽܘܢ: ܘܟܽܠܳܗ̇ ܡܕܰܒܪܳܢܽܘܬܳܐ ܦܳܪܽܘܩܳܝܬܳܐ ܚܠܳܦܰܝܗܽܘܢ ܫܰܡܠܺܝܬ ܕܬܶܫܟܰܚ ܐܶܢܽܘܢ: ܘܬܰܥܕܶܐ ܐܶܢܽܘܢ ܡ̣ܶܢ ܐܺܝ̈ܕܰܘܗܝ ܕܰܒܥܶܠܕܰܐܪܳܐ ܒܥܶܠܕܒܳܒܳܐ ܕܺܝܠܗܽܘܢ. ܨܰܠܡܳܐ ܕܪܰܒܽܘܬܳܟ ܐܺܝܬܰܝܗܽܘܢ ܩܢܺܝ ܐܶܢܽܘܢ ܘܰܐܫܦܰܥ ܪ̈ܰܚܡܰܝܟ ܥܠܰܝܗܽܘܢ: ܘܰܐܢܺܝܚ ܘܚܰܣܳܐ ܠܰܫܟܺܝ̣̈ܒܶܐ ܐܰܝܠܶܝܢ ܕܒܰܬܪܺܝܨܽܘܬ ܫܽܘܒܚܳܐ ܡܶܢܰܢ ܦܪܰܫ̣ܘ. ܡ̣ܶܢ ܝܰܡܺܝܢܳܐ ܕܰܐܠܳܗܽܘܬܳܟ ܐܰܩܺܝܡ ܐܶܢܽܘܢ ܘܰܒܡܰܫ̈ܟܢܶܐ ܕܟܺܐܢ̈ܶܐ ܐܰܥܡܰܪ ܐܶܢܽܘܢ: ܘܒܰܡ̈ܛܰܠܠܐܷ ܢܰܗܺܝܪ̈ܳܬܳܐ ܐܰܫܪܳܐ ܠܪ̈ܽܘܚܳܬܗܽܘܢ: ܘܒܰܚܙܳܬܳܐ ܕܦܰܪܨܽܘܦܳܟ ܒܰܣܶܡ ܐܶܢܽܘܢ. ܕܡ̣ܶܢ ܗܰܘܬܳܐ ܕܰܚܛܳܗ̈ܶܐ ܕܰܐܠܐܴ ܐܶܢܽܘܢ: ܡܶܛܽܠ ܕܰܐܢ̱ܬ ܗ̣ܽܘ ܐܺܝܬܰܝܟ ܡܳܪܳܐ ܕܰܬܪ̈ܰܝܗܽܘܢ ܥܳܠܡ̈ܶܐ ܘܦܳܪܽܘܩܗܽܘܢ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܛܳܒܳܐ ܘܒܰܣܺܝܡܳܐ ܡܳܪܝܳܐ ܡܪܰܚܡܳܢܳܐ ܘܰܡܪܰܚܦܳܢܳܐ: ܐܠܰܗܳܐ ܢܰܓܺܝܪ ܪܽܘܚܳܐ ܐܳܦ ܚܰܝܽܘܣܬܳܢܳܐ: ܗܰܘ ܕܚܰܕܺܝ ܠܟܽܠܗܶܝܢ ܒܶܪ̈ܝܳܬܳܐ ܒܝܰܘܡܳܐ ܕܢܽܘܚܳܡܶܗ ܕܡ̣ܶܢ ܩܰܒܪܳܐ: ܘܰܐܦܨܰܚ ܠܰܫܠܺܝ̈ܚܶܐ ܕܶܐܬܶܐܒܶܠܘ ܥܰܠ ܡܰܘܬܶܗ: ܘܰܐܒ̣ܗܶܬ ܠܥܳܠܡܳܐ ܕܝܽܘ̈ܕܳܝܶܐ ܕܰܛܠܰܡ̣ܘ ܠܰܩܝܳܡܬܗ: ܘܫܰܪܰܪ ܠܥܺܕܬܳܐ ܩܰܕܺܝܫܬܳܐ ܒܰܣܒܰܪܬܳܐ ܕܶܐܘܢܓܶܠܝܽܘܢ ܕܺܝܠܶܗ: ܘܰܐܫܘܳܐ ܠܰܢ ܡܳܪܝܳܐ ܐܠܰܗܳܐ ܕܢܶܬܡܰܪܶܐ ܒܟܽܠܗܶܝܢ ܡܝܰܬܪ̈ܳܬܳܐ. ܘܰܒܟܽܠܗܶܝܢ ܐܠܰܗܳܝ̈ܳܬܳܐ ܢܶܬܥܢܶܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܕܰܕܡܶܟ ܒܶܝܬ ܡܺܝ̈ܬܶܐ ܘܰܓܢ̣ܳܐ ܒܶܝܬ ܥܰܢܺܝ̈ܕܶܐ. ܠܗ̇ܰܘ ܡܢܰܚܡܳܢܳܐ ܕܰܫܟܺܝ̣̈ܒܶܐ ܘܰܡܩܺܝܡܳܢܳܐ ܕܰܩܒܺܝܪ̈ܶܐ: ܠܗ̇ܰܘ ܕܚܰܕܺܝ ܠܟܽܠܗܶܝܢ ܒܶܪ̈ܝܳܬܳܐ ܒܝܰܘܡܳܐ ܕܢܽܘܚܳܡܶܗ ܠܗ̇ܰܘ ܪܰܥܡܳܐ ܕܩ̈ܳܠܐܷ ܕܰܡܙܺܝܥ ܠܰܩܒܺܝܪ̈ܶܐ: ܠܗ̇ܰܘ ܥܰܙܺܝܙܳܐ ܕܰܢܗ̣ܰܡ ܒܰܫܝܽܘܠ ܕܳܘܺܝܬܳܐ ܘܰܐܚܪܒܳܗ̇: ܘܰܐܝܟ ܐܰܪܝܳܐ ܩܥ̣ܳܐ ܒܡܰܘܬܳܐ ܘܰܢܦ̣ܰܠ ܬܳܐܓܶܗ: ܘܦܰܟܪܶܗ ܠܰܛܪܽܘܢܳܐ ܥܰܫܺܝܢܳܐ ܘܚܰܒܫܶܗ ܒܓܰܘ ܢܶܩܥܳܐ ܕܺܝܠܶܗ: ܠܗ̇ܰܘ ܓܰܢ̱ܒܳܪܳܐ ܕܰܢܨܰܚ ܒܙܳܟܽܘܬܳܐ ܝܰܘܡܳܐ ܕܩܶܛܠܶܗ: ܘܰܡܚ̣ܳܐ ܐܶܢܽܘܢ ܠܰܒܥܶܠܕ̈ܒܳܒܰܘܗܝ ܠܒܶܣܬܪܶܗ: ܘܚܶܣܕܳܐ ܕܥܳܠܡܳܐ ܥܒ̣ܰܕ ܐܶܢܽܘܢ ܒܰܩܝܳܡܬܶܗ ܕܠܶܗ ܝ̇ܳܐܶܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܝܰܠܕܳܐ ܡܬܽܘܡܳܝܳܐ ܕܡ̣ܶܢ ܐܰܒܳܐ: ܗ̇ܰܘ ܨܶܡܚܳܐ ܫܒܺܝܚܳܐ ܕܡ̣ܶܢ ܐܰܒܳܐ ܓܰܘܙܰܠܬܳܐ ܡܢܰܒܪܰܫܬܳܐ: ܗ̇ܳܝ ܢܽܘܪܳܐ ܐܳܟܶܠܬܳܐ ܘܡܰܘܩܕܳܢܺܝܬܳܐ ܕܝܰܥܪܳܐ ܕܰܚܛܺܝܬܳܐ ܘܰܡܛܰܠܩܳܢܺܝܬܳܐ ܕܙܺܝ̣̈ܙܳܢܶܐ. ܗ̇ܰܘ ܕܰܩܕܳܡ ܫܶܡܫܳܐ ܐܺܝܬܰܘܗܝ ܫܡܶܗ: ܗ̇ܰܘ ܕܡ̣ܶܢ ܐܰܒܳܐ ܐܶܬܺܝܠܶܕ ܩܕܳܡ ܙܰܒ̈ܢܶܐ ܕܠܐܴ ܐܶܡܳܐ: ܗ̇ܰܘ ܕܰܕܠܐܴ ܪܶܕܝܳܐ ܘܰܕܠܐܴ ܦܣܳܩܳܐ ܘܰܕܠܐܴ ܐܳܕܫܳܐ ܘܰܕܠܐܴ ܬܚܽܘܡܳܐ: ܘܠܰܝܬ ܐܰܬܪܳܐ ܕܡܶܫܟܰܚ ܚܳܒܶܫ ܠܶܗ: ܘܠܐܴ ܕܽܘܟܬܳܐ ܡܬܰܚܰܡܬܳܐ ܕܥܳܪܝܳܐ ܠܶܗ: ܐܶܠܐܴ ܒܗܰܝ̈ܟܠܐܷ ܘܒܰܠܒܽܘ̈ܬܶܐ ܕܟܰܝ̈ܳܐ ܘܩܰܕܺܝ̈ܫܶܐ ܥܳܡ̇ܰܪ ܘܗ̣ܽܘ ܟܰܕ ܗ̣ܽܘ ܥܰܡ ܐܰܒܳܐ ܘܪܽܘܚܳܐ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܡܶܙܕܰܝܰܚ ܘܡܶܬܓܰܝܶܐܐ ܘܰܒܓܰܘ ܟܰܪܣܳܐ ܕܡܰܪܝܰܡ ܫ̣ܪܳܐ: ܘܠܐܴ ܡܶܣܬܰܝܰܟ ܒܰܐܬܪܳܐ ܕܰܡܥܰܠܰܝ ܡ̣ܶܢ ܟܺܐܒ̈ܶܐ: ܘܡ̣ܶܢ ܥܳܩ̈ܳܬܳܐ: ܘܰܐܝܟ ܫܰܒܪܳܐ: ܘܰܐܝܟ ܥܽܘܠܐܴ ܝ̣ܺܢܶܩ ܚܰܠܒܳܐ ܡ̣ܶܢ ܬܕܶܝ̈ܗ̇ ܕܒܰܪܬ ܡܶܣܟ̈ܺܢܶܐ: ܠܥܶܠ ܦܳܩ̇ܶܕ ܬܶܐܓ̈ܡܶܐ ܫܡܰܝ̈ܳܢܶܐ ܘܡܶܫܬܰܡܥܺܝܢ ܠܶܗ: ܘܰܠܬܰܚܬ ܒܰܐܪܥܳܐ ܥܰܡ ܫܰܒܪ̈ܶܐ ܘܝܰܠܽܘ̈ܕܶܐ ܕܰܝܰܪ ܐܰܝܟ ܕܰܫܦ̣ܰܪ ܠܶܗ: ܠܥܶܠ ܡܶܬܓܰܝܶܐܐ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܥܰܡ ܝܳܠܽܘܕܶܗ ܘܰܠܬܰܚܬ ܩܰܒܶܠ ܥܠܰܘܗܝ ܡܰܘܠܳܕܳܐ ܡ̣ܶܢ ܒܰܪܬ ܕܰܘܺܝܕ ܒܨܶܒܝܳܢܶܗ: ܠܥܶܠ ܥܰܙܺܝܙܳܐ ܘܬܰܩܺܝܦܳܐ ܘܰܡܫܰܒܚܳܐ ܒܰܐܬܪܳܐ ܪܳܡܳܐ ܘܠܐܴ ܡܳܛܶܝܢ ܠܶܗ ܗܰܘ̈ܢܶܐ ܕܰܒܢܰܝ̈ܢܳܫܐ ܒܪ̈ܰܝܳܐ ܘܰܥܒܺܝ̣̈ܕܶܐ ܘܰܠܬܰܚܬ ܐܰܝܟ ܚܰܝܳܒܳܐ ܩܰܒܶܠ ܥܡܳܕܳܐ ܘܕܽܘܟܳܝܳܐ ܡ̣ܶܢ ܐܺܝ̈ܕܰܝ ܥܰܒܕܶܗ ܝܽܘܚܰܢܳܢ. ܠܥܶܠ ܐܺܝܬܰܘܗܝ ܗ̇ܰܘ ܕܰܒ̣ܪܳܐ ܠܟܽܠܗܶܝܢ ܒܶܪ̈ܝܳܬܳܐ ܥܰܡ ܝܳܠܽܘܕܶܗ: ܘܰܠܬܰܚܬ ܓܙܽܘܪܬܳܐ ܐ̱ܢܳܫܳܝܬܳܐ ܩܰܒܶܠ ܥܠܰܘܗܝ ܐܰܝܟ ܢܳܡܽܘܣܳܐ ܕܡܽܘܫܶܐ. ܠܥܶܠ ܡܩܰܒܶܠ ܨܠܰܘ̈ܳܬܳܐ ܕܰܟܝ̈ܳܬܳܐ ܘܰܡܦܰܢܶܐ ܫ̈ܶܐܠܳܬܳܐ ܫܰܦܺܝܪ̈ܳܬܳܐ ܥܰܡ ܐܰܒܽܘܗܝ ܘܠܐܴ ܒܳܨܶܝܢ ܠܶܗ ܗܰܘ̈ܢܶܐ ܕܰܐܪ̈ܥܳܢܶܐ ܘܰܠܬܰܚܬ ܩܰܒܶܠ ܥܠܰܘܗܝ ܨܰܘܡܳܐ ܨܶܒܝܳܢܳܝܳܐ ܕܢܶܬܶܠ ܕܽܘܡܝܳܐ ܫܰܦܺܝܪܳܐ ܠܥܰܒ̣ܕ̈ܰܘܗܝ. ܠܥܶܠ ܡܫܰܕܰܪ ܡܶܛܪܳܐ ܘܛܰܐܠܐܴ ܠܐܱܪ̈ܥܳܬܳܐ ܨܰܗܝ̈ܳܬܳܐ: ܘܝܳܗ̇ܶܒ ܦܺܐܪ̈ܶܐ ܘܥ̈ܰܠܠܳܬܳܐ. ܘܰܡܣܰܒܰܥ ܠܟܰܦ̈ܢܶܐ ܘܡܶܣ̈ܟܺܢܶܐ ܡܰܠܝܽܘܬܶܗ ܘܰܠܬܰܚܬ ܐܶܣܬܢܶܩ ܥܰܠ ܪܟܽܘܒܳܐ ܫܺܝܛܳܐ ܘܰܡܡܰܟܟܳܐ ܒܰܪ ܐܰܬܳܢܳܐ: ܘܥ̣ܰܠ ܠܐܘܪܫܠܶܡ ܒܡܰܟܺܝܟܽܘܬܳܐ. ܐܺܝܬܰܘܗܝ ܗ̇ܰܘ ܕܝ̇ܳܗܶܒ ܢܳܡܽܘܣܳܐ ܠܥܰܡܳܐ ܕܥܶܒܪ̈ܳܝܶܐ ܥܰܠ ܐܺܝ̈ܕܰܝ ܡܽܘܫܶܐ ܒܛܽܘܪ ܣܺܝܢܰܝ: ܘܰܠܬܰܚܬ ܥܶܒܪ̈ܳܝܶܐ ܣ̇ܳܢܶܝܢ ܠܶܗ: ܘܛܳܠܡܺܝܢ ܐܳܬܘ̈ܳܬܶܗ ܘܬܶܕܡܪ̈ܳܬܶܗ ܥܕܰܡܳܐ ܠܗ̇ܳܝ ܠܡܰܘܬܳܐ ܐܰܫܠܡܽܘܗܝ: ܠܥܶܠ ܥܰܡ ܐܰܒܳܐ ܘܪܽܘܚܳܐ ܡܬܰܚ ܠܰܫܡܰܝܳܐ ܘܠܐܱܪܥܳܐ ܒܪܶܡܙܶܗ: ܘܰܠܬܰܚܬ ܥܰܬܶܕܘ ܠܰܙܩܺܝܦܶܗ ܕܗ̇ܰܘ ܕܰܐܣܺܝ ܠܰܟܪ̈ܺܝܗܰܝܗܽܘܢ ܒܪ̈ܰܚܡܶܐ ܫܦܺܝ̣̈ܥܶܐ ܕܰܚܢܳܢܶܗ. ܠܥܶܠ ܦܩ̣ܰܕ ܠܡܽܘܫܶܐ ܥܰܒ̣ܕܶܗ ܘܰܐܦ̣ܶܩ ܠܥܶܒܪ̈ܳܝܶܐ ܡ̣ܶܢ ܬܚܶܝܬ ܐܺܝܕܶܗ ܕܦܶܪܥܽܘܢ ܥܰܘܳܠܐܴ: ܘܰܠܬܰܚܬ ܚܰܠܐܴ ܘܰܡܪܳܪ̈ܶܐ ܩܰܪܶܒܘ ܠܶܗ ܠܗ̇ܰܘ ܕܰܦ̣ܪܰܩ ܐܶܢܽܘܢ ܡ̣ܶܢ ܥܰܒܕܽܘܬܳܐ: ܘܶܐܗܶܐ ܐܶܗܶܐ ܠܶܗ ܐܳܡܪܺܝܢ ܗ̣ܘܰܘ: ܘܪ̈ܺܝܫܰܝܗܽܘܢ ܥܠܰܘܗܝ ܡܢܺܝܕܺܝܢ ܗ̣ܘܰܘ ܠܗ̇ܰܘ ܕܰܩ̣ܛܰܪ ܬܳܐܓܳܐ ܠܡܰܠܟܰܝ̈ܗܽܘܢ: ܘܣܳܡ ܟܠܺܝܠܐܴ ܒܪ̈ܺܝܫܰܝܗܽܘܢ: ܠܥܶܠ ܒܰܐܬܪܶܗ ܪܳܡܳܐ ܟܪ̈ܽܘܒܶܐ ܘܰܣܪ̈ܳܦܶܐ ܡܫܰܒܚܺܝܢ ܠܶܗ: ܘܠܐܴ ܫܳܠܶܝܢ ܡ̣ܶܢ ܬܶܫܒܽܘܚܬܶܗ: ܟܰܕ ܡܰܪܟܰܒܬܳܐ ܡܰܠܝܳܐ ܡܶܢܶܗ ܘܰܠܬܰܚܬ ܚܰܒܫܽܘܗܝ ܒܓܰܘ ܩܰܒܪܳܐ ܕܰܬܠܳܬ ܐܰܡܺܝ̣̈ܢ ܡܫܽܘܚܬܶܗ: ܠܥܶܠ ܝ̇ܳܗܶܒ ܒܽܘܪ̈ܟܳܬܳܐ ܠܰܟܪ̈ܽܘܒܶܐ ܕܰܡܒܰܪܟܺܝܢ ܠܶܗ: ܘܰܠܬܰܚܬ ܐܰܩܺܝܡܘ ܝܽܘܕܳܝ̈ܶܐ ܢܳܛܽܘܪ̈ܶܐ ܥܰܠ ܩܰܒܪܶܗ ܕܠܐܴ ܢܶܬܓܢܶܒ ܗ̇ܰܘ ܠܐܴ ܡܳܝܽܘܬܳܐ ܠܥܶܠ ܠܐܴ ܡܳܛܶܝܢ ܠܶܗ ܐܰܪ̈ܟܰܐܣ ܘܫܽܘܠܛܳܢ̈ܶܐ ܕܢܶܕܥܽܘܢ ܐܰܝܢܰܘ ܐܰܬܪܶܗ: ܘܰܠܬܰܚܬ ܡܫܰܐܠܐܴ ܡܰܪܝܰܡ ܠܓܰܢܳܢܳܐ ܕܡܰܢܽܘ ܓܰܢܒܶܗ ܠܡܳܪܝ ܘܰܐܠܳܗܝ ܡ̣ܶܢ ܓܰܘ ܩܰܒܪܳܐ ܘܠܐܴ ܝܳܕܥܳܐ ܐ̱ܢܳܐ ܐܰܝܟܳܐ ܣܳܡܶܗ. ܠܥܶܠ ܥܺܝܪ̈ܶܐ ܘܡܰܠܐܱܟ̈ܶܐ ܓܳܗܪܺܝܢ ܡ̣ܶܢ ܙܺܝܘܳܗ̇ ܕܰܐܠܳܗܽܘܬܶܗ ܘܰܡܫܰܒܚܺܝܢ ܠܶܗ ܟܰܕ ܠܐܴ ܚܳܙܶܝܢ ܠܶܗ: ܘܰܠܬܰܚܬ ܥܰܠ ܩܰܝܣܳܐ ܕܰܨܠܺܝܒܳܐ ܐܰܫܠ̣ܶܡ ܪܽܘܚܶܗ ܒܺܐܝ̈ܕܰܝ ܐܰܒܽܘܗܝ: ܘܒܶܝܬ ܡܺܝ̈ܬܶܐ ܡܰܪܝܰܡ ܒܳܥܝܳܐ ܠܶܗ: ܘܰܠܓܰܢܳܢܳܐ ܡܦܺܝܣܳܐ ܘܰܡܫܰܐܠܐܴ ܠܶܗ ܕܶܐܢ ܐܰܢ̱ܬ ܫܩܰܠ̣ܬܳܝܗܝ ܠܺܝܚܺܝܕܝ ܐ̱ܡܰܪ ܠܺܝ ܐܰܝܟܳܐ ܣܳܡܬܳܝܗܝ: ܘܒܰܪ ܫܳܥܬܶܗ ܐܶܡ̣ܰܪ ܠܳܗ̇ ܐܰܢ̱ܬܬܳܐ ܠܐܴ ܬܶܒܟܶܝܢ ܐܶܢܳܐ ܐ̱ܢܳܐ ܓܶܝܪ ܝܺܚܺܝܕܶܟܝ ܩܳܡ̇ܶܬ ܠܺܝ ܡ̣ܶܢ ܒܶܝܬ ܡܺܝ̈ܬܶܐ. ܘܰܙܟܺܝܬ ܠܡܰܘܬܳܐ ܘܣܳܛܳܢܳܐ ܘܠܰܫܝܽܘܠ ܐܰܚܪܒ̇ܶܬ: ܟܰܕ ܩܶܪܒܰܬ݀ ܠܘܳܬܶܗ ܕܬܶܬܒܰܪܰܟܝ ܡܶܢܶܗ ܠܐܴ ܫܰܒܩܳܗ̇ ܕܬܶܩܪܽܘܒܝ ܠܶܗ: ܐܰܝܟܰܢܳܐ ܕܠܐܷܡܪܳܐ ܕܩܽܘܪܒܳܢܳܐ ܠܐܴ ܡܨܶܐ ܐ̱ܢܳܫ ܓܳܫܶܦ ܒܶܗ ܥܕܰܡܳܐ ܕܟܳܗܢܳܐ ܢܳܣܶܒ ܡܶܢܶܗ ܘܡܶܬܒܰܣܰܡ ܒܶܗ: ܘܗܳܝܕܶܝܢ ܟܽܠܗܽܘܢ ܥܰܡ̈ܡܶܐ ܡܦܰܠܶܓ ܠܶܗ. ܐܶܠܐܴ ܐܶܡ̣ܰܪ ܠܳܗ̇ ܕܙܶܠ ܣܰܒܰܪܝ ܠܐܱܚ̈ܰܝ ܕܢܺܐܙܽܠ̱ܘܢ ܠܰܓܠܺܝܠܐܴ ܘܬܰܡܳܢ ܢܶܚܙܽܘܢܳܢܝ ܘܟܰܕ ܚ̣ܙܰܘ ܢܳܛܽܘܪ̈ܶܐ ܠܡܶܕܶܡ ܕܰܗ̣ܘܳܐ ܒܰܪ̈ܩܶܐ ܕܢܳܦܩܺܝܢ ܡ̣ܶܢ ܩܰܒܪܳܐ: ܒܪܺܝܬܳܐ ܚܕܰܬܳܐ ܕܡܶܬܚܰܘܝܳܐ: ܥܺܝܪ̈ܶܐ ܘܡܰܠܐܱܟ̈ܶܐ ܕܰܚܕܺܝܪܺܝܢ ܠܩܰܒܪܳܐ: ܢܽܘܪ̈ܳܢܶܐ ܕܛܳܪܦܺܝܢ ܓܶܦܰܝ̈ܗܽܘܢ: ܐܰܝܟܰܢܳܐ ܕܰܠܥܰܡܳܐ ܕܝܽܘ̈ܕܳܝܶܐ ܢܰܘܩܕܽܘܢ ܗ̣ܘܰܘ: ܡܰܘܬܳܐ ܕܡܶܬܬܕܺܝܫ: ܣܳܛܳܢܳܐ ܕܥܰܪܺܝܩ: ܫܝܽܘܠ ܕܡܰܝܠܠܐܴ ܘܰܒܒܺܝܫܳܐ ܘܰܒܡܰܘܬܳܐ ܡܶܬܥܰܕܠܐܴ ܟܰܕ ܐܳܡܪܳܐ: ܠܡܽܘܢ ܐܰܥܶܠܬܽܘܢ ܠܐܴܦܰܕ̈ܢܰܝ ܗܳܢ ܡܺܝܬܳܐ ܕܰܐܚܪܒܰܢܝ: ܠܡܽܘܢ ܐܰܪܡܺܝܬܽܘܢ ܒܺܝ ܩܒܺܝܪܳܐ ܕܟܽܠܳܗ̇ ܗܳܡܳܢ ܪܰܒܬܳܐ ܣܰܦܩܳܗ̇: ܘܥܰܒܕܰܢܝ ܨܳܕܺܝܬܳܐ: ܘܰܗܓܰܡ ܬܰܪ̈ܥܰܝ ܘܰܓܕܰܡ ܡܽܘܟ̈ܠܰܝ ܘܥܰܒܕܰܢܝ ܕܝܳܫܳܐ ܘܬܽܘܢܳܝܳܐ ܒܶܝܬ ܐܶܡܘ̈ܳܬܳܐ: ܘܩܶܣܛܽܘܢܳܪ̈ܶܐ ܥܰܪܺܝܩܺܝܢ: ܝܽܘ̈ܕܳܝܶܐ ܒܰܗܺܝܬܺܝܢ: ܝܽܘܕܳܐ ܬܠܐܷ ܘܰܚܢܺܝܩ ܘܟܶܣܦܳܐ ܕܰܬܩܰܠ ܐܰܪܡܺܝ ܒܗܰܝܟܠܐܴ ܘܠܐܴ ܥܶܕܪܶܗ ܡܶܕܶܡ: ܚܰܢܳܢ ܠܺܝܛܳܐ ܕܰܒܠܺܝܡ ܘܩܰܝܳܦܳܐ ܕܶܐܬܢܰܒܺܝ ܗܳܐ ܒܣܺܝܪ ܘܰܟܡܺܝܪ: ܘܗܶܪܳܘܕܶܣ ܐܰܝܟ ܬܰܥܠܐܴ ܫܺܝܛܳܐ ܡܰܪܟܶܢ ܪܺܝܫܶܗ: ܝܰܘܣܶܦ ܘܢܺܝܩܳܘܕܺܝܡܳܘܣ ܕܫܶܐܠܘ ܦܰܓܪܶܗ ܡ̣ܶܢ ܦܺܝܠܰܛܳܘܣ ܘܩܰܒܪܽܘܗܝ. ܠܛܽܘܒܳܐ ܪܰܒܳܐ ܐܶܫܬܘܺܝܘ: ܠܰܟܢܽܘܫܬܳܐ ܗ̇ܳܝ ܨܳܠܽܘܒܬܳܐ ܥܩܽܘܪܝܳܐ: ܠܥܺܕܬܳܐ ܚܰܕܽܘܬܳܐ ܕܠܐܴ ܡܶܫܬܰܪܝܳܐ: ܚܢܰܢ ܕܶܝܢ ܕܺܐܝܬܰܝܢ ܝܰܠܕ̈ܶܝܗ̇ ܕܥܺܕܬܳܐ ܒܰܪܬ ܥܰܡ̈ܡܶܐ ܕܗܰܝܡܶܢܢܰܢ ܒܰܩܝܳܡܬܳܟ: ܘܰܐܘܕܺܝܢܰܢ ܟܽܠܰܢ ܒܰܐܠܳܗܽܘܬܳܟ: ܘܰܐܣܠܺܝܢܰܢ ܠܨܶܗܝܽܘܢ ܡܰܪܳܚܬܳܐ ܕܰܨܠܰܒܬܳܟ ܘܗܳܐ ܡܩܰܒܠܺܝܢܰܢ ܠܗܰܝܡܳܢܽܘܬܳܐ ܬܪܺܝܨܰܬ݀ ܫܽܘܒܚܳܐ ܕܰܐܒܳܗ̈ܳܬܰܢ: ܟܰܕ ܡܣܰܟܶܝܢܰܢ ܠܡܶܐܬܺܝܬܳܟ ܗ̇ܳܝ ܬܪܰܝܳܢܺܝܬܳܐ ܕܒܳܗ̇ ܥܬܺܝܕ ܐܰܢ̱ܬ ܕܬܶܦܪܽܘܥ ܠܐܱܝܠܶܝܢ ܕܨܰܠܒܽܘܟ ܘܰܛܠ̣ܰܡܘ ܠܚܰܫܰܝ̈ܟ ܦܳܪ̈ܽܘܩܳܝܶܐ ܒܟܺܐܢܽܘܬܳܐ ܘܰܒܙܰܕܺܝܩܽܘܬܳܐ ܠܐܴ ܡܳܪܝ ܬܶܡܢܶܐ ܠܰܢ ܥܰܡܗܽܘܢ ܕܰܐܘܕܺܝܢܰܢ ܒܳܟ: ܠܐܴ ܡܳܪܝ ܬܕܽܘܢ ܠܰܢ ܥܰܡ ܐܰܝܠܶܝܢ ܕܰܠܕܺܝܢܳܐ ܕܡܰܘܬܳܐ ܐܰܥܠܽܘܟ. ܐܶܠܐܴ ܐܶܬܪܰܚܰܡܥܠܰܝܢ ܚܢܰܢ ܡܶܣ̈ܟܺܢܶܐ ܘܚܰܛܳܝ̈ܶܐ ܥܰܒ̣ܕܰܝ̈ܟ ܕܩܳܪܶܝܢܰܢ ܠܳܟ ܘܡܶܬܬܰܢܚܺܝܢܰܢ ܠܘܳܬܳܟ: ܩܰܒܶܠ ܨܠܰܘ̈ܳܬܳܐ ܕܟܳܗ̈ܢܶܐ: ܘܶܐܬܪܰܥܳܐ ܠܰܢ ܡܶܣܟܺܢ̈ܶܐ ܕܗܳܐ ܢܳܩܫܺܝܢܰܢ ܒܰܬܪܰܥ ܪ̈ܰܚܡܰܝܟ: ܚܰܣܳܐ ܠܰܢ ܐܰܢ̱ܬ ܐܠܰܗܳܐ: ܫܒܽܘܩ ܠܰܢ ܐܰܢ̱ܬ ܐܳܘ ܚܰܢܳܢܳܐ: ܐܰܢܺܝܚ ܠܢܰܦ̈ܫܳܬܳܐ ܘܦܰܓܪ̈ܶܐ ܕܺܝܠܰܢ ܐܰܝܟܰܢܳܐ ܕܰܒܛܳܒ̈ܳܬܳܐ ܠܰܢ ܡܝܰܬܰܪ ܐܰܢ̱ܬ: ܘܡ̣ܶܢ ܟܽܠ ܬܰܣܶܩܝ ܠܳܟ ܬܶܫܒܽܘܚܬܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀

 

ܥܛܪܐ

ܐܺܝܢ ܡܳܪܝܳܐ ܡܶܬܟܰܫܦܺܝܢܰܢ ܠܳܟ ܒܥܶܕܳܢܳܐ ܗܳܢܳܐ ܕܥܽܘܗܕܳܢܳܐ ܕܰܩܝܳܡܬܳܟ ܘܰܕܡܰܚܰܬܬܳܟ ܕܠܰܫܝܽܘܠ ܘܢܽܘܚܳܡܳܟ ܕܡ̣ܶܢ ܩܰܒܪܳܐ ܥܳܗܕܺܝܢܰܢ: ܘܰܕܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܡܫܰܡܠܶܝܢܰܢ: ܘܥܶܛܪܳܐ ܕܒܶܣ̈ܡܶܐ ܩܰܪܶܒܢܰܢ ܕܠܐܴ ܬܶܥܽܘܠ ܠܕܺܝܢܳܐ ܥܰܡܰܢ: ܐܶܠܐܴ ܨܒܺܝ ܒܰܢ ܘܩܰܪܶܒ ܠܰܢ ܠܘܳܬܳܟ: ܘܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܚܢܳܢܳܟ: ܘܰܫܒܽܘܩ ܣܰܟܠܘ̈ܳܬܰܢ ܒܣܽܘܓܳܐܐ ܕܛܰܝܒܽܘܬܳܟ: ܕܢܰܘܕܶܐ ܘܢܶܣܓܽܘܕ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܚܘܬܡܐ

ܠܐܴ ܡܳܝܽܘܬܳܐ ܐܠܰܗܳܐ ܕܶܐܬܳܐ ܠܚܰܫܳܐ ܒܨܶܒܝܳܢܶܗ: ܘܰܛܥ̣ܶܡ ܡܰܘܬܳܐ ܕܰܫܦ̣ܰܪ ܠܶܗ. ܘܶܐܬܠܒܶܟ ܡ̣ܶܢ ܛܰܡ̈ܶܐܐ ܒܪܶܡܙܶܗ: ܘܶܐܬܬܣܺܝܡ ܒܓܰܘ ܩܰܒܪܳܐ ܙܥܽܘܪܳܐ ܐܰܝܟ ܫܰܪܟܳܐ ܕܡܳܝܽܘ̈ܬܶܐ ܘܩܳܡ ܡ̣ܶܢ ܩܰܒܪܳܐ ܘܰܐܥܺܝܪ ܠܕܰܡ̈ܟܶܐ ܘܰܙܪܰܥ ܢܽܘܚܳܡܳܐ ܘܚܰܝ̈ܶܐ ܒܰܫܝܽܘܠ ܠܰܫܟܺܝ̣̈ܒܶܐ: ܒܳܟ ܢܶܬܚܰܣܽܘܢ ܘܢܶܬܩܰܕ̈ܫܳܢ ܬܺܐܪ̈ܳܬܰܢ: ܘܢܶܬܬܢܺܝܚܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܰܐܘ̈ܘܳܢܶܐ ܕܢܽܘܗܪܳܐ: ܢܰܣܶܩ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܠܐܴ ܚܳܫܽܘܫܳܐ ܕܶܐܬܳܐ ܠܚܰܫܳܐ ܒܨܶܒܝܳܢܶܗ: ܠܗ̇ܰܘ ܠܐܴ ܡܳܝܽܘܬܳܐ ܕܰܛܥ̣ܶܡ ܡܰܘܬܳܐ ܐܰܝܟ ܕܰܫܦ̣ܰܪ ܠܶܗ: ܠܗ̇ܰܘ ܚܰܝܳܐ ܘܠܐܴ ܡܶܬܚܰܒܠܳܢܳܐ ܕܰܕܒ̣ܰܚ ܩܢܽܘܡܶܗ ܚܠܳܦ ܡܰܪܥܺܝܬܶܗ: ܘܰܬܪܰܥ ܕܡܶܗ ܫܶܩܝܳܐ ܕܚܰܝ̈ܶܐ ܠܥܳܢ̈ܶܗ: ܘܝܰܗ̣ܒ ܦܰܓܪܶܗ ܡܰܐܚܝܳܢܳܐ ܡܶܐܟܽܘܠܬܳܐ ܚܰܝܬܳܐ ܠܡܰܪܥܺܝܬܶܗ: ܕܠܶܗ ܝܳܐܶܐ ܫܽܘܒܚܳܐ ܕܙܳܕܶܩ ܠܶܗ: ܘܬܰܘܕܺܝܬܳܐ ܕܡܶܬܬܚܺܝܒܳܐ ܠܶܗ ܡ̣ܶܢ ܥܺܕܬܶܗ ܘܡܰܪܥܺܝܬܶܗ ܒܗܳܢܳܐ ܥܶܕܳܢܳܐ܀

 

ܣܕܪܐ

ܣܳܓܕܺܝܢܰܢ ܘܡܰܘܕܶܝܢܰܢ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ: ܒܳܪܽܘܝܳܐ ܕܟܽܠܳܗ̇ ܒܪܺܝܬܳܐ: ܡܶܬܝܰܕܥܳܢܺܝܬܳܐ ܘܡܶܬܪܰܓܫܳܢܺܝܬܳܐ ܗܽܘܠܳܢܳܝܬܳܐ ܘܠܐܴ ܡܶܬܗܰܘܢܺܝܬܳܐ. ܗ̇ܰܘ ܕܪܺܝܚܳܐ ܚܰܠܝܳܐ ܕܺܝܕܰܥܬܳܟ ܡܠ̣ܰܝܬ ܠܠܶܒܰܘ̈ܳܬܰܢ: ܘܰܐܫܘܰܝܬ ܠܰܢ ܠܡܳܐܟ̈ܶܐ ܘܥܰܦܪ̈ܳܢܶܐ ܥܰܒ̣ܕ̈ܶܐ ܕܺܝܠܳܟ ܕܰܩܕܳܡܰܝܟ ܢܩܽܘܡ ܘܬܶܫܡܫܬܳܐ ܕܐ̱ܪ̈ܳܙܰܝܟ ܐܠܰܗܳܝ̈ܶܐ ܘܠܐܴ ܡܶܬܡܰܠܠܳܢ̈ܶܐ ܢܫܰܡܶܫ. ܗ̇ܳܢܽܘܢ ܕܰܠܗܽܘܢ ܪܳܐܓܶܝܢ ܥܺܝܪ̈ܶܐ ܘܡܰܠܐܱܟ̈ܶܐ ܕܢܶܚܙܽܘܢ ܐܶܢܽܘܢ: ܘܠܐܴ ܡܶܬܒܨܶܐ ܐܰܬܪܳܐ ܕܺܝܠܳܟ ܘܠܐܴ ܚܳܙܶܝܢ ܠܰܓܢܺܝܙܽܘܬܳܟ ܠܐܴ ܡܶܬܚܰܙܝܳܢܺܝܬܳܐ: ܐܶܠܐܴ ܟܰܕ ܡܒܰܪܟܺܝܢ ܘܰܡܩܰܕܫܺܝܢ ܘܰܕܠܐܴ ܫܶܠܝܳܐ ܙܽܘܝܳܚ̈ܶܐ ܘܗܽܘ̈ܠܳܠܐܷ ܣܰܓܺܝ̈ܶܐܐ ܡܫܰܕܪܺܝܢ ܠܐܻܝܩܳܪܳܟ ܟܰܕ ܠܐܴ ܡܥܰܩܒܺܝܢ ܠܪܰܒܽܘܬܳܟ: ܐܰܢ̱ܬ ܕܪܳܡ ܐܰܢ̱ܬ ܡ̣ܶܢ ܟܽܠ ܒܨܳܬܳܐ ܘܥܽܘܩܳܒܳܐ ܠܐܴ ܡܶܬܕܰܪܟܳܐ ܐܠܰܗܽܘܬܳܟ ܘܠܐܴ ܡܶܬܒܰܨܝܳܐ ܡܳܪܽܘܬܳܟ: ܘܠܐܴ ܡܶܬܥܰܩܒܳܐ ܐ̱ܢܳܫܽܘܬܳܟ: ܘܕܰܠܟܽܠ ܗܰܘ̈ܢܶܐ ܕܰܥܒܺܝ̣̈ܕܶܐ ܡܰܬܡܗܳܐ ܡ̣ܶܢ ܡܰܕܪܟܳܢܽܘܬܳܐ ܕܟܽܠ ܡܟܰܣܝܳܐ: ܗ̇ܰܘ ܕܟܰܕ ܐܺܝܬܰܝܟ ܥܰܠ ܟܽܘܪܣܝܳܐ ܕܺܐܝܩܳܪܳܟ ܒܫܽܘܒܚܳܐ ܡܶܬܓܰܝܶܐܐ ܐܰܢ̱ܬ: ܘܰܒܬܶܐܘܳܪܺܝܰܐ ܕܰܐܠܳܗܽܘܬܳܟ ܡܶܬܒܰܣܰܡ ܐܰܢ̱ܬ. ܘܟܰܕ ܫܶܦܪܰܬ݀ ܠܛܳܒܽܘܬܳܟ ܕܥܳܒ̇ܕܳܐ ܠܐܻܝܕܰܝ̈ܟ ܬܰܬܩܶܢ: ܘܨܰܠܡܳܐ ܡܥܰܠܝܳܐ ܘܡܰܠܟܳܝܳܐ ܕܰܐܠܳܗܽܘܬܳܟ ܒܶܗ ܬܶܒܪܶܐ: ܘܪܽܘܚܳܐ ܚܰܝܬܳܐ ܘܡܰܐܚܝܳܢܺܝܬܳܐ ܒܶܗ ܢܦܰܚ̣ܬ. ܘܰܡܠܺܝܠܐܴ ܐܰܝܟ ܡܰܠܐܱܟ̈ܶܐ ܥܒ̣ܰܕܬܳܝܗܝ: ܦܰܪܕܰܝܣܳܐ ܕܛܽܘ̈ܒܶܐ ܘܰܐܬܪܳܐ ܫܰܡܺܝܢܳܐ ܕܒܽܘܣ̈ܳܡܶܐ ܘܓܰܢܬܳܐ ܕܰܥܕܶܝܢ ܐܰܘܚܶܕܬ ܠܶܗ: ܘܥܰܠ ܟܽܠ ܕܺܐܝܬ ܒܳܗ̇ ܒܓܰܢܬܳܐ ܫܽܘܠܛܳܢܳܐ ܝܰܗܒ̣ܬ ܠܶܗ: ܘܢܳܡܽܘܣܳܐ ܦܰܪܫܰܓܢܳܝܳܐ ܣܳܡ̣ܬ ܠܶܗ: ܘܫܰܘܬܳܦܬܳܐ ܒܰܪܬ ܙܰܘܓܳܢܳܝܬܳܐ ܐܰܝܟ ܕܰܠܥܶܕܪܶܗ ܐܰܩܺܝܡܬ ܥܰܡܶܗ: ܘܶܐܡ̣ܰܪܬ ܠܶܗ ܕܡ̣ܶܢ ܟܽܠܗܽܘܢ ܐܺܝܠܳܢ̈ܶܐ ܕܰܒܦܰܪܕܰܝܣܳܐ ܐܰܟܽܘܠ ܐܳܕܳܡ: ܘܠܐܻܝܠܳܢܳܐ ܕܺܝܕܰܥܬܳܐ ܕܺܐܝܬ ܒܰܡܨܰܥܬܳܐ ܕܛܳܒܳܬܳܐ ܘܰܕܒܺܝܫܬܳܐ ܠܐܴ ܬܶܬܩܰܪܰܒ ܠܶܗ ܡܰܘܬܳܐ ܟܳܣܳܐ ܒܶܗ. ܗ̣ܽܘ ܕܶܝܢ ܡܰܪܳܚܳܐ ܒܠ̣ܰܥ ܒܟܺܐܒܳܐ ܡܰܪܺܝܪܳܐ ܕܥܶܨܝܳܝܽܘܬܳܐ ܡ̣ܶܢ ܒܺܝܫܽܘܬܳܐ ܕܒܺܝܫܳܐ ܒܥܶܠܕܰܐܪܳܐ: ܘܫܳܛ ܠܢܳܡܽܘܣܳܐ ܘܠܰܣܝܳܓܳܐ ܐܰܘܟܺܝܬ ܬܚܽܘܡܳܐ ܕܣܳܡ ܠܶܗ ܡܳܪܶܗ ܦܣ̣ܰܥ ܘܰܥܒ̣ܰܪ ܘܰܚ̣ܛܳܐ ܘܰܢܦ̣ܰܠ ܓܳܠ̣ܘ ܪ̈ܰܚܡܶܐ ܡܬܽܘܡܳܝ̈ܶܐ ܕܺܝܠܳܟ ܥܠܰܘܗܝ ܘܰܦܪܰܩ̣ܬܳܝܗܝ ܡ̣ܶܢ ܐܺܝܕܰܝ̈ ܢܳܟܽܘܠܶܗ: ܘܥܰܠ ܨܰܠܡܳܟ ܐܶܬܪܰܚܰܡܬ ܘܰܐܣܺܝܬ ܡܰܚܘ̈ܳܬܶܗ ܘܟܺܐܒܰܘ̈ܗܝ ܘܰܥܨܰܒ̣ܬ ܫܽܘܚ̈ܢܰܘܗܝ. ܘܦܰܓܪܳܐ ܐܰܢ̱ܬ ܐܶܬܥܰܛܰܦ̣ܬ ܡ̣ܶܢ ܒܰܪܬܶܗ: ܘܒܶܗ ܩܰܒ̣ܶܠܬ ܘܣܰܝܒ̣ܰܪܬ ܚܰܫܳܐ ܘܡܰܘܬܳܐ ܘܰܙܩܺܝܦܳܐ ܘܫܽܘܩܳܦ ܦܰܟ̈ܶܐ ܘܚܰܠܐܴ ܘܰܡܪܳܪ̈ܶܐ ܡܶܛܽܠܳܬܶܗ: ܘܰܣܠ̣ܶܩܬ ܠܰܨܠܺܝܒܳܐ ܘܰܙܟ̣ܰܝܬ ܠܰܒܥܶܠܕܰܐܪܶܗ: ܘܩܳܡ̣ܬ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ ܘܰܒܙܳܟܽܘܬܳܐ ܘܥܰܡܳܟ ܐܰܩܺܝܡܬܳܝܗܝ ܒܫܽܘܒܚܳܐ: ܐܰܦܢܺܝܬܳܝܗܝ ܠܐܱܬܪܶܗ ܩܰܕܡܳܝܳܐ: ܘܫܽܘ̈ܟܳܢܶܐ ܫܰܦܺܝܪ̈ܶܐ ܝܰܗ̣ܒܬ ܠܶܗ: ܘܠܰܢ ܝܰܠܕ̈ܰܘܗܝ ܐܰܦܢܺܝܬ ܠܰܢ ܠܰܥܕܶܝܢ ܝܳܪܬܽܘܬܰܢ: ܘܫܰܟܶܢ̣ܬ ܠܰܢ ܚܰܝ̈ܶܐ ܚܰܕ̈ܬܶܐ ܕܠܐܴ ܣ̇ܳܐܒܶܝܢ ܒܰܩܝܳܡܬܳܟ ܡܫܰܒܰܚܬܳܐ: ܘܪܰܗܒܽܘܢܳܐ ܕܚܰܝ̈ܶܐ ܫܡܰܝܴ̈ܢܶܐ ܕܠܐܴ ܥܳܒܪܺܝܢ ܕܰܐܘܕܺܝܢܰܢ ܒܳܟ: ܘܗܰܒܠܰܢ ܕܢܶܬܒܰܣܰܡ ܒܰܓܢܽܘܢܳܟ: ܘܢܶܚܕܶܐ ܒܡܶܐܬܺܝܬܳܟ ܕܬܰܪܬܶܝܢ ܥܰܡ ܟܽܠܗܽܘܢ ܩܰܕܺܝ̈ܫܰܝܟ: ܘܰܐܫܘܳܐ ܠܥܰܢܺܝ̈ܕܰܝܢ ܕܰܫܟ̣ܶܒܘ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܡ̣ܶܢ ܝܰܡܺܝܢܳܟ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ܀

ܫܠܡ

 

ܛܟܣܐ ܕܚܕ ܒܫܒܐ ܫܒܝܥܝܐ ܕܩܝܡܬܐ ܦܪܘܩܝܬܐ ܕܛܟܣܐ ܐܚܪܝܐ

ܩܕܡܝܬ ܨܠܘܬܐ ܕܫܘܪܝܐ

 

ܢܰܚ̈ܬܶܐ ܪ̈ܓܺܝܓܶܐ ܕܠܐܴ ܡܶܬܚܰܒܠܳܢܽܘܬܳܐ ܘܢܰܚ̈ܬܶܐ ܦܰܐܝ̈ܳܐ ܕܬܶܫܒܽܘܚܬܳܐ: ܘܰܦܪ̈ܺܝܣܶܐ ܗܕܺܝܪ̈ܶܐ ܕܡ̣ܶܢ ܪܽܘܚܳܐ ܩܰܕܺܝܫܳܐ ܙܩܺܝܪܺܝܢ ܘܡܰܙܗܪܺܝܢ ܘܡܰܚܘܪܺܝܢ ܝܰܬܺܝܪ ܡ̣ܶܢ ܬܰܠܓܳܐ. ܐܰܥܦܶܛ ܠܰܢ ܡܳܪܝܳܐ ܐܠܰܗܳܐ ܒܥܺܐܕܳܐ ܕܰܩܝܳܡܬܳܟ ܦܳܪܽܘܩܳܝܬܳܐ: ܐܰܝܟܰܢܳܐ ܕܢܶܚܕܶܐ ܘܢܶܪܘܰܙ ܘܰܢܕܽܘܨ: ܘܥܰܡ ܡܰܠܐܱܟ̈ܶܐ ܢܫܰܒܰܚ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܫܽܘ̈ܒܚܶܐ ܠܐܴ ܡܶܫܬܰܬܩ̈ܳܢܶܐ ܘܬܰܘܕ̈ܝܳܬܳܐ ܠܐܴ ܡܰܘܦܳܢܝܳܢ̈ܝܳܬܳܐ ܘܠܐܴ ܡܶܬܦܰܣܩܳܢ̈ܝܳܬܳܐ: ܐܳܦ ܩܽܘ̈ܠܳܣܶܐ ܠܐܴ ܡܶܬܥܰܒܪ̈ܳܢܶܐ: ܘܗܶܕܪ̈ܶܐ ܠܐܴ ܡܶܬܢܫ̈ܝܳܢܶܐ: ܘܪ̈ܽܘܡܪܳܡܶܐ ܠܐܴ ܡܛܰܘ̈ܫܶܐ: ܢܶܥ̈ܡܳܬܳܐ ܚܰܠܝ̈ܳܬܳܐ ܘܒܰܣܺܝ̈ܡܳܬܳܐ ܒܰܢܩܳܫ ܡܶܢ̈ܶܐ ܘܪ̈ܶܟܢܶܐ ܥܣܺܝܪ̈ܳܝܶܐ ܟܽܠܰܢ ܡܗܰܝ̈ܡܢܶܐ ܢܶܫܬܘܶܐ ܕܢܰܣܶܩ. ܠܗ̇ܰܘ ܬܠܺܝܬܳܝܳܐ ܒܰܐܛܽܘܡܽܘ ܘܰܚܕܳܢܳܝܳܐ ܒܽܐܘܣܺܝܰܐ ܕܺܝܠܶܗ ܠܐܴ ܡܶܬܦܰܫܩܳܢܺܝܬܳܐ ܠܗ̇ܰܘ ܬܠܺܝܬܳܝܳܐ ܘܰܠܚܽܘܕܳܝܳܐ ܕܩܳܡ ܡ̣ܶܢ ܩܰܒܪܳܐ ܘܰܦ̣ܪܰܩ ܠܰܢ. ܘܥܰܡܶܗ ܠܰܫܡܰܝܳܐ ܐܰܣܩܰܢ ܘܡ̣ܶܢ ܐܰܡܺܝܢܳܐ ܕܰܐܒܳܐ ܫܳܠܽܘܚܶܗ ܐܰܘܬܶܒ ܠܰܢ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܢܽܘܗܪܳܐ ܠܐܴ ܡܶܬܩܰܪܒܳܢܳܐ: ܨܶܡܚܳܐ ܫܒܺܝܚܳܐ ܘܠܐܴ ܡܶܬܦܰܚܡܳܢܳܐ ܘܡܰܢܗܪܳܢܳܐ ܕܚܶܫܽܘ̈ܟܶܐ. ܕܶܢܚܳܐ ܕܢܺܝܚܳܐ ܕܰܐܕܢܰܚ ܒܬܺܐܒܶܝܠ ܙܰܠܺܝ̈ܩܶܐ ܕܺܝܠܶܗ ܨܰܡܽܘܚ̈ܬܳܢܶܐ ܘܰܛܪܰܕ ܠܥܰܝ̈ܡܶܐ ܚܶܫܽܘܟܳܝ̈ܶܐ ܡ̣ܶܢ ܢܰܦ̈ܫܳܬܳܐ ܕܺܝܠܰܢ ܘܕܽܘܒܳܪ̈ܶܐ ܛܳܒ̈ܶܐ ܘܰܥܒ̇ܳܕ̈ܶܐ ܫܰܦܺܝܪ̈ܶܐ ܡܠܐܴ ܐܶܢܶܝܢ. ܦܳܪܽܘܩܳܐ ܕܰܦ̣ܪܰܩ ܠܥܳܢ̈ܶܗ ܡ̣ܶܢ ܐܺܝ̈ܕܰܝ ܬܠܳܬܳܐ ܒܥܶܠܕ̈ܒܳܒܶܐ ܒܺܝ̈ܫܶܐ: ܡܰܘܬܳܐ ܘܣܳܛܳܢܳܐ ܘܰܫܝܽܘܠ. ܘܦܰܨܝܳܗ̇ ܡ̣ܶܢ ܕܺܐܒ̈ܶܐ ܡܚܰܒܠܳܢ̈ܶܐ: ܪܳܥܝܳܐ ܛܳܒܳܐ ܘܒܰܣܺܝܡܳܐ ܕܰܚܒ̣ܰܫ ܡܰܪܥܺܝܬܶܗ ܒܰܛܝܳܪܳܐ ܕܚܰܝ̈ܶܐ ܘܽܐܘܟܠܐܴ ܚܰܝܳܐ ܫ̣ܪܳܐ ܩܽܘܕܡܶܝܗ̇ ܦܰܓܪܶܗ ܩܰܕܺܝܫܳܐ ܠܬܽܘܪܣܳܝܳܐ ܘܰܠܚܽܘܠܡܳܢܳܐ: ܘܰܕܡܶܗ ܚܰܝܳܐ ܡܙܰܓ ܒܰܚܠܽܘܠܳܗ̇ ܘܫܶܩܝܳܐ ܪܽܘܚܳܢܳܝܳܐ ܐܰܫܩܺܝ ܠܳܗ̇ ܡܶܠܰܘ̈ܗܝ ܚܰܝ̈ܳܬܳܐ ܘܶܐܘܢܓܶܠܳܝ̈ܳܬܳܐ: ܝܰܠܕܳܐ ܫܰܪܺܝܪܳܐ ܕܝܰܠܕܽܘܗܝ ܬܪܶܝܢ ܥܽܘ̈ܒܺܝܢ ܐܶܬܺܝܠܶܕ ܡ̣ܶܢ ܡܰܪܝܰܡ ܒܚܰܪܰܬ݀ ܙܰܒܢ̈ܶܐ ܘܰܦ̣ܪܰܩ ܠܰܢ: ܘܶܐܬܺܝܠܶܕ ܡ̣ܶܢ ܟܰܪܣܳܐ ܫܝܽܘܠܳܝܬܳܐ: ܘܡ̣ܶܢ ܚܒܳܠܐܴ ܕܰܒܩܰܒܪ̈ܶܐ ܐܰܓܗܺܝ ܠܰܢ. ܚܰܝܳܐ ܘܡܰܐܚܝܳܢܳܐ ܕܰܐܓܶܣ ܒܓܰܘ ܩܰܒܪܳܐ ܬܠܳܬܳܐ ܝܰܘ̈ܡܺܝܢ: ܘܒܰܬܠܺܝܬܳܝܳܐ ܩܳܡ ܘܰܦ̣ܪܰܩ ܥܳܠܡ̈ܶܐ ܓܰܢ̱ܒܳܪܳܐ ܡܳܪܝܳܐ ܕܝܰܡܺܝܢܶܗ ܚܰܝܠܬܳܢܺܝܬܳܐ ܣܡ̣ܰܟܬܶܗ ܘܰܕܪܳܥܶܗ ܩܰܕܺܝܫܳܐ ܪܰܡܪܡܶܗ: ܘܰܒܫܽܘܒܚܳܐ ܩܳܡ ܘܶܐܬܢܰܚܰܡ ܕܰܫܦ̣ܰܪ ܠܶܗ. ܘܒܰܕܰܪ ܠܣܳܩܽܘܪ̈ܰܘܗܝ ܘܟܰܢ̣ܶܫ ܠܓܽܘܕܳܐ ܙܗܺܝܬܳܐ ܕܬܰܠܡܺܝ̈ܕܰܘܗܝ: ܘܰܐܦ̣ܨܰܚ ܐܶܢܽܘܢ ܠܪ̈ܰܚܡܶܐ ܕܺܝܠܶܗ: ܘܰܐܪܡܺܝ ܙܰܘܥܳܐ ܘܰܪܬܺܝܬܳܐ ܒܢܳܛܽܘܪ̈ܶܐ ܘܰܗ̣ܘܰܘ ܐܰܝܟ ܡܺܝ̈ܬܶܐ: ܘܰܐܥ̣ܪܰܩ ܘܥܰܠ̣ܘ ܠܰܡܕܺܝܢ̱ܬܳܐ ܩܰܕܺܝܫܬܳܐ ܐܽܘܪܫܠܶܡ: ܘܰܠܟܳܗ̈ܢܶܐ ܛܰܡ̈ܶܐܐ ܐܶܡ̣ܰܪܘ ܕܦܽܘܩܘ ܘܰܚ̣ܙܰܘ ܡܶܕܶܡ ܕܰܗ̣ܘܳܐ ܒܗܳܢ ܝܰܘܡܳܐ. ܘܒܰܙܗܺܝܪܽܘܬܳܐ ܚܢܰܢ ܢܳܛܪܺܝܢ ܗ̣ܘܰܝܢ ܘܫܳܗܪܺܝܢ ܗ̣ܘܰܝܢ ܘܥܺܝܪܺܝܢ ܗ̣ܘܰܝܢ: ܘܠܐܴ ܐ̱ܢܳܫ ܡܶܢܰܢ ܛܰܒܺܝܥ ܗ̣ܘܳܐ ܒܫܶܢܬܳܐ ܘܗܳܐ ܒܰܪ̈ܩܶܐ ܘܨܶܡܚ̈ܶܐ ܕܚܺܝ̣̈ܠܐܷ ܕܰܥܠܰܝܢ ܢܳܦܩܺܝܢ ܗ̣ܘܰܘ ܡ̣ܶܢ ܩܰܒܪܳܐ: ܘܙܰܘܥܳܐ ܘܰܪܬܺܝܬܳܐ ܢܶܦܠܰܬ݀ ܒܗܰܕ̈ܳܡܰܝܢ: ܘܰܚ̣ܙܰܝܢ ܡܰܠܐܱܟ̈ܶܐ ܕܢܽܘܪܳܐ ܕܢܳܚܬܺܝܢ ܡ̣ܶܢ ܪܰܘܡܳܐ: ܙܰܘ̈ܥܶܐ ܘܕܶܚ̈ܠܐܷ ܕܣܳܓܶܝܢ ܗ̣ܘܰܘ ܥܠܰܝܢ. ܘܡ̣ܶܢ ܟܰܕܽܘ ܥܪܰܩ̣ܢܰܢ ܘܰܠܩܰܒܪܳܐ ܫܒܰܩ̣ܢܰܢ ܟܰܕ ܣܦܺܝܩ ܘܰܩܒܺܝܪܳܐ ܩܳܡ ܠܶܗ: ܥܢ̣ܰܘ ܟܳܗ̈ܢܶܐ ܡܰܪ̈ܳܚܶܐ ܘܰܠܢܳܛܽܘܪ̈ܶܐ ܡܦܺܝܣܺܝܢ ܗ̣ܘܰܘ ܟܰܕ ܐܳܡܪܺܝܢ: ܕܟܰܪܝܳܐ ܕܕܰܗܒܳܐ ܝܳܗܒܺܝܢܰܢ ܠܟܽܘܢ ܘܶܐܡ̣ܰܪܘ ܒܶܝܬ ܥܰܡ̈ܡܶܐ: ܕܬܰܠܡܺܝ̈ܕܰܘܗܝ ܐܶܬܰܘ ܓܰܢܒܽܘܗܝ ܟܰܕ ܚܢܰܢ ܒܠܺܠܝܳܐ ܕܰܡܺܝܟܺܝܢܰܢ. ܐܳܘ ܕܳܘܰܝ̈ܳܐ ܘܣܳܢ̈ܶܐܐ ܕܰܫܪܳܪܳܐ: ܐܳܘ ܛܳܥܰܝ̈ܳܐ ܘܣܰܟ̈ܠܐܷ ܘܠܐܴ ܡܗܰܝ̈ܡܢܶܐ: ܐܶܢ ܕܰܡܺܝܟܺܝܢ ܗ̣ܘܰܝܬܽܘܢ ܡ̣ܶܢ ܐܰܝܟܳܐ ܝܳܕܥܺܝܢ ܐܢ̱ܬܽܘܢ ܕܬܰܠܡܺܝ̈ܕܰܘܗܝ ܐܶܬܰܘ ܓܰܢܒܽܘܗܝ ܟܰܕ ܐܰܢ̱ܬܽܘܢ ܒܫܶܢܬܳܐ ܪܡܶܝܢ ܐܢ̱ܬܽܘܢ: ܠܡܳܐ ܚܶܙܘ̈ܳܢܶܐ ܚ̣ܙܰܝܬܽܘܢ: ܐܰܘ ܪܽܘܚܳܐ ܕܛܳܥܝܽܘܬܳܐ ܗ̇ܳܝ ܕܰܐܒܽܘܟܽܘܢ ܐܳܟܶܠܩܰܪܨܳܐ ܐܰܘܕܥܰܬ݀ ܠܟܽܘܢ. ܘܶܐܢ ܬܰܠܡܺܝ̈ܕܰܘܗܝ ܓܰܢܒܽܘܗܝ ܠܡܽܘܢ ܠܐܴ ܠܒܰܟ̣ܬܽܘܢ ܐܶܢܽܘܢ ܠܓܰܢ̈ܳܒܶܐ. ܒܢܰܘ̈ܗܝ ܕܒܺܝܫܳܐ ܘܙܰܪܥܳܐ ܕܙܺܝ̈ܙܳܢܶܐ: ܡܫܺܝܚܳܐ ܡܳܪܰܢ ܘܰܐܠܳܗܰܢ ܩܳܡ ܘܶܐܬܢܰܚܰܡ: ܘܰܐܢ̱ܬܽܘܢ ܗܳܐ ܣܳܪܒܺܝܢ ܐܢ̱ܬܽܘܢ ܘܰܡܕܰܓܠܺܝܢ ܐܢ̱ܬܽܘܢ. ܐܠܰܗܳܐ ܘܒܰܪ ܐܠܰܗܳܐ ܐܶܬܚܙܺܝ ܠܢܶܫ̈ܶܐ ܢܰܟ̈ܦܳܬܳܐ: ܘܒܳܬܰܪܟܶܢ ܠܓܽܘܕܳܐ ܕܰܫܠܺܝ̈ܚܶܐ ܓܒܰܝ̈ܳܐ: ܘܰܐܢ̱ܬܽܘܢ ܒܰܚܛܳܗܰܝ̈ܟܽܘܢ ܟܰܬܰܪܬܽܘܢ ܫܰܝܢܳܐ ܘܰܫܠܳܡܳܐ ܘܣܰܒܪ̈ܳܬܳܐ ܕܚܽܘܒܳܐ ܒܟܽܠܶܗ ܥܳܠܡܳܐ ܐܶܙܕܪܰܥ: ܘܰܣܒܰܪܬܳܐ ܚܕܰܬܳܐ ܕܰܩܝܳܡܬܳܐ ܒܟܽܠܳܗ̇ ܒܪܺܝܬܳܐ ܐܶܫܬܰܪܪܰܬ݀: ܘܰܒܛܳܥܝܽܘܬܟܽܘܢ ܐܰܢ̱ܬܽܘܢ ܩܰܘܺܝܬܽܘܢ ܘܒܰܐܪܒܰܥ ܦܶܢ̈ܝܳܬܶܗ ܕܥܳܠܡܳܐ ܙܪܺܝܩܺܝܢ ܐܢ̱ܬܽܘܢ: ܘܡܶܛܽܠ ܗܳܕܶܐ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ: ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܐܘܕܺܝܢܰܢ ܒܰܐܠܳܗܽܘܬܳܟ ܘܠܐܴ ܟܳܦܪܺܝܢܰܢ ܒܰܫܡܳܟ ܩܰܕܺܝܫܳܐ: ܘܗܰܝܡܶܢܢܰܢ ܒܐܢܳܫܽܘܬܳܟ: ܘܰܐܘܕܺܝܢܰܢ ܒܰܩܝܳܡܬܳܟ ܘܠܐܴ ܒܳܗܬܺܝܢܰܢ ܒܣܰܒܪܳܐ ܫܰܪܺܝܪܳܐ ܕܰܡܠ̣ܰܟܬ ܠܰܢ: ܘܡܶܫܬܰܒܗܪܺܝܢܰܢ ܒܚܰܫܰܝ̈ܟ ܡܰܐܚܝ̈ܳܢܶܐ ܘܰܒܡܰܘܬܳܟ ܕܰܚܠܳܦܰܝܢ: ܘܰܡܦܺܝܣܺܝܢܰܢ ܠܛܰܝܒܽܘܬܳܟ ܘܰܠܪ̈ܰܚܡܰܝܟ: ܕܡܳܐ ܕܳܬܶܐ ܐܰܢ̱ܬ ܒܡܶܐܬܺܝܬܳܟ ܕܬܰܪܬܶܝܢ: ܘܡܶܬܥܰܛܰܦ ܐܰܢ̱ܬ ܓܰܐܝܽܘܬܳܐ ܘܬܶܫܒܽܘܚܬܳܐ ܕܒܶܝܬ ܐܰܒܽܘܟ: ܘܓ̇ܳܐܰܚ ܩܕܳܡܰܝܟ ܝܰܡܳܐ ܕܢܽܘܪܳܐ. ܘܡܶܫܬܰܕܪܺܝܢ ܡܰܠܐܱܟ̈ܶܐ ܐܰܝܟ ܫܺܝܦܽܘܪ̈ܶܐ ܠܐܱܪ̈ܒܰܥܦܶܢܝܳܢ ܕܰܒܪܺܝܬܳܐ: ܘܡܰܝܬܶܐ ܐܰܢ̱ܬ ܠܕܺܝܢܳܐ ܘܠܰܕܒܰܥܬܳܐ ܠܝܽܘ̈ܕܳܝܶܐ ܘܰܠܟܳܦܽܘܪ̈ܶܐ ܕܰܛܠܰܡ̣ܘ ܠܰܡܕܰܒܪܳܢܽܘܬܳܟ. ܘܕ̇ܳܐܶܢ ܐܰܢ̱ܬ ܒܢܽܘܪܳܐ ܡܫܰܠܗܰܒܬܳܐ ܠܨܳܠܽܘ̈ܒܶܐ ܕܨܰܠܒܽܘܟ: ܠܐܴ ܡܳܪܝ ܢܶܬܬܕܺܝܢ ܥܰܡܗܽܘܢ: ܘܠܐܴ ܬܶܫܕܶܐ ܠܰܢ ܡ̣ܶܢ ܩܕܳܡܰܝܟ ܡܳܪܝܳܐ: ܐܶܠܐܴ ܐܶܬܪܰܚܰܡ ܥܰܠ ܟܽܠܰܢ: ܘܚܽܘܣ ܥܰܠ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܒܢ̈ܰܝ ܡܰܥܡܽܘܕܺܝܬܳܐ ܘܰܒ̈ܢܰܝ ܝܳܪܬܽܘܬܳܐ ܕܺܝܠܳܟ: ܡܶܛܽܠ ܕܓܰܘܣܳܐ ܒܳܟ ܐܰܚܺܝܕܺܝܢܰܢ. ܘܰܠܒܰܪ ܡܶܢܳܟ ܐ̱ܚܪܺܝܢ ܠܐܴ ܝܳܕܥܺܝܢܰܢ ܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܡܪܰܚܡܳܢܽܘܬܳܟ: ܘܰܐܫܪܳܐ ܫܰܝܢܳܟ ܘܰܫܠܳܡܳܟ ܒܰܝܢܳܬ ܡܰܠܟ̈ܶܐ ܕܰܐܪܥܳܐ: ܘܚܽܘܢ ܘܚܰܣܳܐ ܠܟܽܠܰܢ ܥܰܒ̣ܕ̈ܶܐ ܕܺܝܠܳܟ ܘܠܐܴ ܬܶܥܽܘܠ ܠܕܺܝܢܳܐ ܥܰܡܰܢ. ܘܰܐܢܺܝܚ ܢܰܦ̈ܫܳܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܰܫܟ̣ܶܒܘ ܥܰܠ ܣܰܒܪܳܟ ܘܕܰܫܡܳܟ ܒܰܬܪܺܝܨܽܘܬ ܫܽܘܒܚܳܐ: ܘܕܽܘܒܳܪ̈ܶܐ ܟܺܐܢ̈ܶܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܛܪܐ

ܩܰܒܶܠܳܝܗܝ ܡܳܪܝܳܐ ܐܠܰܗܳܐ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܒܥܶܕܳܢ ܪܰܡܫܳܐ ܒܗܳܢܳܐ ܥܺܐܕܳܐ ܕܰܩܝܳܡܬܳܟ ܡܳܪܳܢܳܝܬܳܐ ܘܰܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ: ܕܒܶܗ ܫ̣ܪܰܝܬ ܠܰܚܒܳܠܐܴ ܕܰܒܩܰܒܪ̈ܶܐ ܘܶܐܬܪܰܥܳܐ ܠܰܢ ܐܠܰܗܳܐ ܐܰܝܟ ܕܶܐܬܪܰܥܺܝܬ ܒܥܶܛܪ̈ܶܐ ܘܰܨܠܰܘ̈ܳܬܳܐ ܘܬܶܫܡ̈ܫܳܬܳܐ: ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܫܦ̣ܰܪܘ ܠܳܟ ܒܕܽܘܒܳܪ̈ܰܝܗܽܘܢ ܘܰܒܙܰܒܢܰܝ̈ܗܽܘܢ: ܘܚܰܣܳܐ ܠܰܢ ܡܳܪܰܢ: ܘܚܰܣܳܐ ܘܰܐܢܺܝܚ ܠܥܰܢܺܝ̈ܕܰܝܢ ܕܩܰܒܠܽܘܟ ܡ̣ܶܢ ܡܰܥܡܽܘܕܺܝܬܳܐ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܘܰܥܶܕ ܠܰܢ ܡܫܺܝܚܳܐ ܡܳܪܰܢ ܠܡܰܠܟܽܘܬܳܐ ܕܺܝܠܳܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ ܡܰܠܟܰܢ ܙܰܟܳܝܳܐ ܘܡܳܪܳܗ̇ ܕܬܶܫܒܽܘܚܬܳܐ: ܘܰܥܒܶܕ ܠܰܢ ܫܰܘܬܳܦ̈ܶܐ ܒܚܰܫܰܝ̈ܟ ܐܳܦ ܒܰܩܝܳܡܬܳܟ ܘܢܰܘ̈ܣܶܐ ܠܰܥܡܽܘܪܝܳܐ ܕܺܐܝܩܳܪܳܟ: ܟܰܕ ܨܳܡܰܚ ܒܰܢ ܢܽܘܗܪܳܐ ܦܰܐܝܳܐ ܗ̇ܰܘ ܕܰܨܡܰܚ ܡ̣ܶܢ ܩܰܒܪܳܟ ܡܰܥܒܶܕ ܚܰܝ̈ܐ ܘܡܬܡܠܶܝܢܰܢ ܡ̣ܶܢ ܙܰܠܓ̈ܶܐ ܕܢܽܘܚܳܡܳܟ: ܘܟܽܠܰܢ ܢܫܰܒܰܚ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܘܪܰܒܽܘܬ ܝܳܐܝܽܘܬܳܐ ܢܶܫܬܘܶܐ ܕܰܢܩܰܪܶܒ: ܠܰܡܫܺܝܚܳܐ ܐܠܰܗܳܐ ܕܩܳܡ ܡ̣ܶܢ ܩܰܒܪܳܐ ܕܠܐܴ ܚܒܳܠܐܴ ܘܰܦ̣ܪܰܩ ܠܰܢ: ܘܶܐܬܬܣܺܝܡ ܐܰܝܟ ܡܺܝܬܳܐ ܒܶܝܬ ܥܰܢܺܝ̈ܕܶܐ ܘܡ̣ܶܢ ܒܶܝܬ ܫܶܢ̈ܶܐ ܕܡܰܘܬܳܐ ܐܰܦ̣ܩ ܠܰܢ: ܘܰܣܠ̣ܶܩ ܠܰܫܡܰܝܳܐ ܘܥܰܡܶܗ ܐܰܣܶܩ ܠܰܢ. ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ: ܐܠܰܗ ܐܠܰܗܺܝ̣̈ܢ ܘܡܳܪܶܐ ܡܳܪ̈ܰܘܳܬܳܐ ܗ̇ܰܘ ܕܰܥܩ̣ܰܪܬ ܘܒ̣ܰܛܶܠܬ ܠܟܽܠܗܶܝܢ ܕܶܚ̈ܠܳܬܳܐ ܣܪ̈ܺܝܩܳܬܳܐ ܘܠܐܴ ܢܳܡܽܘܣܳܝ̈ܘܳܬܳܐ ܗܳܠܶܝܢ ܕܰܠܟܺܐܦ̈ܶܐ ܘܩܰܝ̈ܣܶܐ ܘܢܽܘܪܳܐ ܘܫܶܡܫܳܐ ܘܣܰܗܪܳܐ ܘܟܽܠ ܕܶܡ̈ܘܳܢ ܕܰܣܢܶܐ ܘܰܡܫܰܟܰܪ ܐܶܥܒܶܕ ܒܗܽܘܢ ܘܣܳܛܳܢܳܐ ܐܰܝܟܰܢܳܐ ܕܢܶܣܓܕܽܘܢ ܘܰܢܨܰܒ̣ܬ ܘܰܐܩܺܝܡܬ ܘܰܐܬܩ̣ܶܢܬ ܘܫܰܪܰܪܬܳܗ̇ ܠܰܚܕܳܐ ܗܰܝܡܳܢܽܘܬܳܐ ܠܐܴ ܡܶܬܦܰܠܓܳܢܺܝܬܳܐ ܘܰܬܪܺܝܨܰܬ݀ ܫܽܘܒܚܳܐ ܕܰܬܠܳܬܡܳܐܐ ܘܰܬܡܳܢܬܰܥܣܰܪ ܐܰܒܳܗ̈ܳܬܳܐ ܩܰܕܺܝ̈ܫܶܐ ܕܩܰܒܶܠܘ ܡ̣ܶܢ ܫܠܺܝ̈ܚܶܐ ܘܰܡܣܰܒܪ̈ܳܢܶܐ: ܘܗ̣ܶܢܽܘܢ ܩܪ̈ܰܝܳܐ ܒܥܶܠܺܝܬܳܐ ܩܰܒܠܽܘܗ̇ ܡ̣ܶܢ ܪܽܘܚܳܐ ܦܰܪܰܩܠܺܝܛܳܐ ܕܫ̣ܰܕܰܪܬ ܠܗܽܘܢ: ܘܒܶܝܬ ܐܺܝܕܰܝ̈ܗܽܘܢ ܠܟܽܠܗܽܘܢ ܥܰܡ̈ܡܶܐ ܚܕܳܐ ܗܰܝܡܳܢܽܘܬܳܐ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܘܶܐܬܩܰܝܡܰܬ݀ ܐܳܦ ܐܶܫܬܰܪܪܰܬ݀ ܒܚܰܝܠܐܴ ܘܡܰܥܒܕܳܢܽܘܬܳܐ ܕܺܝܚܺܝܕܳܝܳܐ ܒܪܳܟ. ܟܰܕ ܠܰܕܡܳܐ ܗ̇ܰܘ ܕܰܢ̣ܛܰܦ ܡ̣ܶܢ ܕܰܦܢܳܟ: ܠܫܶܩܝܳܐ ܕܚܰܝ̈ܶܐ ܘܒܽܘܣܳܡܳܐ ܕܥܰܡܳܟ: ܘܰܕܚܰܝ̈ܶܐ ܐܺܝܬܰܝܟ ܥܰܡ ܝܳܠܽܘܕܳܟ ܘܠܐܴ ܡܳܝܽܘܬܳܐ ܒܰܟܝܳܢܳܟ ܒܶܗ ܫܰܘܕܰܥ̣ܬ. ܘܰܒܝܰܕ ܡܰܝ̈ܳܐ ܕܡ̣ܶܢ ܣܶܛܪܳܟ ܕܰܪܕܰܘ ܒܠܽܘܟܳܝܬܳܐ ܫܰܘܕܰܥܬ ܕܡܺܝܬܬ ܠܳܟ ܒܐܢܳܫܽܘܬܳܟ: ܟܰܕ ܢܛܺܝܪܺܝܢ ܒܳܟ ܚܰܝ̈ܶܐ ܕܰܟܝܳܢܳܐ ܕܰܐܠܳܗܽܘܬܳܟ: ܘܰܣܗܶܕ ܠܳܟ ܥܳܠܡܳܐ ܟܽܠܶܗ ܕܡܺܝܬܳܐ ܗ̣ܘܰܝܬ: ܘܚܰܝܳܐ ܒܰܐܠܳܗܽܘܬܳܟ ܐܺܝܬܰܝܟ: ܘܰܒܚܰܝ̈ܶܐ ܐ̱ܢܳܫܳܝ̈ܶܐ ܛܥܶܡ̣ܬܳܝܗܝ ܠܡܰܘܬܳܐ ܟܰܕ ܚܰܝܰܝ̈ܟ ܐܺܝܬܝ̈ܳܝܶܐ ܠܐܴ ܫܰܒܩܽܘܟ ܕܬܶܒܠܐܷ ܒܰܫܝܽܘܠ: ܐܳܦ ܐܶܬܩܒ̣ܰܪܬ ܐܰܝܟ ܫܰܪܟܳܐ ܕܰܒܢܰܝ̈ܢܳܫܳܐ ܟܰܕ ܠܰܩܒܺܝܪ̈ܶܐ ܕܡ̣ܶܢ ܥܳܠܰܡ ܡܢܰܚܶܡ ܐܰܢ̱ܬ ܘܰܐܩܺܝܡܬ ܐܶܢܽܘܢ ܡ̣ܶܢ ܕܰܚܺܝܚܳܐ ܕܰܥܓܺܝܢܺܝܢ ܗ̣ܘܰܘ ܒܶܗ. ܘܶܐܫܬܰܘܕܺܝܬ ܚܰܝ̈ܶܐ ܚܰܕ̈ܬܶܐ ܠܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܢܽܘܓܪܳܐ ܪܰܒܳܐ ܡܣܰܟܶܝܢ ܗ̣ܘܰܘ ܠܳܟ ܘܶܐܫܬܰܘܕܥܽܘܟ ܟܽܠܗܽܘܢ ܕܰܐܢ̱ܬ ܐܺܝܬܰܝܟ ܦܳܪܽܘܩܗܽܘܢ ܕܰܢܚ̣ܶܬܬ ܨܶܝܕܰܝ̈ܗܽܘܢ ܘܰܣܥ̣ܰܪܬ ܐܶܢܽܘܢ: ܣܘܰܚ̣ܘ ܠܳܟ ܡ̣ܶܢ ܩܰܒܪ̈ܶܐ: ܗܰܠܶܠܘ ܠܳܟ ܥܓܺܝ̣̈ܢܰܝ ܥܰܦܪܳܐ: ܫܰܒܰܚܘ ܠܳܟ ܥܺܝܪ̈ܶܐ ܘܐ̱ܢܳܫܳ̈ܐ ܨܶܝܕ ܩܰܒܪܳܐ. ܐܳܕܳܡ ܚܕܺܝ ܒܳܟ ܩܰܕܡܳܐܺܝܬ ܨܰܠܡܳܐ  ܦܰܐܝܳܐ ܕܪܰܒܽܘܬܳܟ ܕܰܢܚ̣ܶܬܬ ܒܰܒܥܳܬܶܗ ܘܥܰܠ ܟܰܬܦܳܟ ܛܥܶܢܬܳܝܗܝ ܠܨܰܠܡܳܟ ܗ̇ܰܘ ܡܰܠܟܳܝܳܐ: ܘܙܰܝܰܚܬܳܝܗܝ ܠܥܶܪܒܳܐ ܘܰܠܒܶܝܬ ܐܰܒܽܘܟ ܐܰܥܶܠܬܳܝܗܝ ܘܰܒܫܽܘܒܚܳܐ ܪܰܒܳܐ ܕܰܡܠܰܟ̣ܬܳܝܗܝ. ܘܰܚܢܰܢ ܟܽܠܰܢ ܝܰܠܕ̈ܰܘܗܝ ܡܰܘܕܶܝܢܰܢ ܠܳܟ ܕܰܐܩܺܝܡܬ ܠܰܢ ܡ̣ܶܢ ܫܝܽܘܠ ܗܰܘܬܳܐ ܥܰܡܽܘܛܬܳܐ: ܘܠܳܟ ܡܶܬܟܰܫܦܺܝܢܰܢ ܡܫܺܝܚܳܐ ܡܳܪܰܢ ܕܬܶܬܶܠ ܠܰܢ ܙܰܒ̈ܢܶܐ ܕܚܰܕ̈ܘܳܬܳܐ. ܘܰܫܢܰܝ̈ܳܐ ܟܰܗܺܝ̈ܢܳܬܳܐ: ܘܝܰܪ̈ܚܶܐ ܕܰܦܨܺܝ̈ܚܘܳܬܳܐ ܘܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܟܰܗܺܝܢܳܐ ܡ̣ܶܢ ܠܘܳܬܳܟ ܫܰܟܶܢ ܠܰܢ: ܘܚܰܣܳܐ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܘܰܫܒܽܘܩ ܟܽܠܗܶܝܢ ܣܰܟܠܘ̈ܳܬܰܢ ܘܰܐܢܺܝܚ ܢܰܦ̈ܫܳܬܳܐ ܕܥܰܢܺܝ̈ܕܰܝܢ ܐܰܝܠܶܝܢ ܕܒܰܬܪܺܝܨܽܘܬ ܫܽܘܒܚܳܐ ܡܰܢܰܥ̣ܘ ܠܘܳܬܳܟ. ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܡܳܪܝܳܐ ܓܰܐܝܳܐ ܘܓܰܢ̱ܒܳܪܳܐ ܕܩܳܡ ܡ̣ܶܢ ܩܰܒܪܳܐ ܒܚܰܝܠܐܴ ܘܙܳܟܽܘܬܳܐ: ܘܰܠܗ̇ܰܘ ܬܰܩܺܝܦܳܐ ܘܥܰܙܺܝܙܳܐ ܕܰܒܢܽܘܚܳܡܶܗ ܒܰܕܰܪ ܐܶܢܽܘܢ ܠܰܒܥܶܠܕ̈ܒܳܒܰܘܗܝ: ܠܗ̇ܰܘ ܥܰܫܺܝܢܳܐ ܕܩܳܡ ܒܫܽܘܒܚܳܐ ܡ̣ܶܢ ܒܶܝܬ ܡܺܝ̈ܬܶܐ: ܘܚܰܕܺܝ ܐܶܢܽܘܢ ܠܪ̈ܳܚܡܰܘܗܝ ܘܰܠܡܰܐܚ̈ܒܳܢܰܘܗܝ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

 

ܣܕܪܐ

ܟܰܕ ܒܐܪܳܙܳܐ ܦܰܐܝܳܐ ܘܰܫܒܺܝܚܳܐ ܕܰܡܕܰܒܪܳܢܽܘܬܳܟ ܡܶܬܒܰܩܶܝܢܰܢ ܐܳܘ ܡܶܠܬܳܐ ܐܠܰܗܳܐ ܕܺܝܠܰܢ: ܘܰܒܬܶܕܡܪ̈ܳܬܳܐ ܫܒܺܝ̈ܚܳܬܳܐ ܕܰܣܥ̣ܰܪܬ ܒܡܰܕ̈ܥܰܝܢ ܢܳܣܒܺܝܢܰܢ: ܟܰܕ ܠܰܩܝܳܡܬܳܟ ܫܒܺܝܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܡܩܰܠܣܺܝܢܰܢ ܘܰܡܫܰܒܚܺܝܢܰܢ: ܘܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܬܶܫܒܽܘܚܬܳܐ ܡܰܣܩܺܝܢܰܢ ܘܰܒܩ̈ܳܠܐܷ ܚܠܰܝ̈ܳܐ ܘܙܽܘܡܳܪ̈ܶܐ ܫܦܰܝ̈ܳܐ ܠܥܺܐܕܳܟ ܗ̇ܰܘ ܐܠܰܗܳܝܳܐ: ܘܕܶܢܚܳܐ ܕܢܽܘܚܳܡܳܟ ܕܡ̣ܶܢ ܩܰܒܪܳܐ ܡܳܪܳܢܳܝܳܐ: ܟܰܕ ܠܥܺܝܪ̈ܶܐ ܨܶܝܕ ܩܰܒܪܳܟ ܡܰܥܒܶܕ ܚܰܝ̈ܶܐ ܘܰܠܟܺܐܦܳܐ ܡ̣ܶܢ ܦܽܘܡ ܩܰܒܪܳܐ ܢܶܥܓܠܽܘܢ: ܘܟܰܕ ܠܢܶܫ̈ܶܐ ܢܰܟ̈ܦܳܬܳܐ ܕܰܛܥܶܢ̣̈ܝ ܒܶܣ̈ܡܶܐ ܘܗܶܪ̈ܽܘܡܶܐ ܒܨܰܦܪܳܐ ܐܰܝܟܳܐ ܕܰܩܒܺܝܪ ܗ̣ܘܰܝܬ ܒܓܰܢܬܳܐ ܢܳܦ̈ܩܳܢ: ܘܡ̣ܶܢ ܫܶܠܝܳܐ ܡܰܠܐܱܟܳܐ ܥܛܺܝܦ ܚܶܘܳܪ̈ܶܐ ܗ̇ܰܘ ܕܝܳܬܶܒ ܗ̣ܘܳܐ ܨܶܝܕ ܪܺܝܫܳܟ ܘܨܶܝܕ ܪ̈ܶܓܠܰܝܟ ܚܰܕܽܘܬܳܐ ܪܰܒܬܳܐ ܠܗܶܝܢ ܣܰܒܰܪ ܗ̣ܘܰܐ. ܕܢܶܫ̈ܶܐ ܠܡܽܘܢ ܒܳܟ̈ܝܳܢ ܐܢ̱ܬܶܝ̈ܢ: ܘܡܽܘܢ ܒܳܥ̈ܝܳܢ ܐܢ̱ܬܶܝ̈ܢ ܗܳܪܟܳܐ ܠܚܰܝܳܐ ܕܶܐܨܛܠ̣ܶܒ ܩܳܡ ܠܶܗ ܒܫܽܘܒܚܳܐ ܘܠܐܴ ܗ̣ܘܳܐ ܬܢܳܢ: ܘܶܐܬܥܰܠܺܝ ܠܶܗ ܠܰܫܡܰܝܳܐ: ܗ̇ܰܘ ܚܰܝܳܐ ܕܶܐܬܬܣܺܝܡ ܒܓܰܘ ܩܰܒܪܳܐ ܗ̇ܰܘ ܕܠܐܴ ܚ̣ܙܳܐ ܚܒܳܠܐܴ ܒܥܽܘܡܪܳܗ̇ ܕܰܫܝܽܘܠ: ܗ̇ܰܘ ܕܰܢܚ̣ܶܬ ܣܰܒ̣ܰܪ ܠܰܫܟܺܝ̣̈ܒܶܐ ܚܰܝܰܬ݀ ܡܺܝ̈ܬܶܐ: ܗܽܘܝܽܘ ܕܰܣܠ̣ܶܩ ܠܰܫܡܰܝܳܐ ܒܫܽܘܒܚܳܐ ܪܰܒܳܐ ܠܘܳܬ ܐܰܒܽܘܗܝ ܡܫܰܒܚܳܐ: ܡܶܢܟܽܠ: ܘܡܶܟܺܝܠ ܙܶܠܶܝ̈ܢ ܐܶܡܰܪ̈ܶܝܢ ܠܓܽܘܕܳܐ ܕܰܐܚܰܘ̈ܗܝ ܕܩܳܡ ܠܶܗ ܘܗܳܐ ܩܳܕܶܡ ܠܟܽܘܢ ܠܰܓܠܺܝܠܐܴ ܘܬܰܡܳܢ ܬܶܚܙܽܘܢܳܝܗܝ ܟܽܠܟܽܘܢ: ܘܟܰܕ ܐܶܙܰܠܝ̈ ܣܰܒܰܪ̈ܝ ܠܰܫܠܺܝ̈ܚܶܐ ܐܶܫܟܰܚ̈ܝ ܕܰܟܢܺܝܫܺܝܢ ܗ̣ܘܰܘ ܒܥܶܠܺܝܬܳܐ ܘܫܰܦܪܳܐ ܐܺܝܬܰܘܗܝ ܗ̣ܘܳܐ: ܚܕܺܝܘ ܣܰܓܺܝ ܚܰܕܽܘܬܳܐ ܪܰܒܬܳܐ: ܘܩܳܡ̣ܘ ܫܶܡܥܽܘܢ ܘܝܽܘܚܰܢܳܢ ܪܗܶܛܘ ܗ̣ܘܰܘ ܒܚܺܐܦܳܐ ܩܰܠܺܝܠܐܴ ܬܪ̈ܰܝܗܽܘܢ ܫܰܘܝܳܐܺܝܬ ܥܰܒܪܶܗ ܛܰܠܝܳܐ ܒܬܽܘܠܐܴ ܝܽܘܚܰܢܳܢ ܠܗ̇ܰܘ ܣܳܒܳܐ ܫܶܡܥܽܘܢ ܘܰܡ̣ܛܳܐ ܠܩܰܒܪܳܐ ܘܠܐܴ ܥ̣ܰܠ ܗ̣ܘܳܐ: ܘܰܢ̣ܛܰܪ ܕܽܘܟܬܳܐ ܠܗ̇ܰܘ ܕܪܺܝܫܳܐ ܗ̣ܘܳܐ: ܘܟܰܕ ܐܶܬܳܐ ܫܶܡܥܽܘܢ ܥܰܠ̣ܘ ܗ̣ܘܰܘ ܬܪ̈ܰܝܗܽܘܢ ܐܰܟܚܕܳܐ: ܘܰܚ̣ܙܰܘ ܟܶܬܳܢ̈ܶܐ ܟܰܕ ܣܺܝܡܺܝܢ ܗ̣ܘܰܘ ܘܰܠܣܽܘܕܳܪܳܐ ܕܪܺܝܫܶܗ ܕܰܟܪܺܝܟ ܗ̣ܘܳܐ ܘܣܺܝܡ ܗ̣ܘܳܐ ܠܰܣܛܰܪ: ܘܰܗܦ̣ܰܟܘ ܟܰܕ ܚܳܕܶܝܢ ܘܠܰܫܠܺܝ̈ܚܶܐ ܐܶܡ̣ܰܪܘ ܕܩܳܡ ܠܶܗ ܡܳܪܰܢ ܡ̣ܶܢ ܩܰܒܪܳܐ ܘܰܚ̣ܙܰܝܢ ܥܺܝܪܳܐ ܘܣܰܒܪܰܢ ܘܶܐܡ̣ܰܪ ܠܰܢ: ܕܙܶܠܽܘܢ ܠܰܓܠܺܝܠܐܴ ܘܬܰܡܳܢ ܬܶܚܙܽܘܢܳܝܗܝ ܟܽܠܟܽܘܢ: ܘܡܶܛܽܠ ܗܳܕܶܐ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܥܰܒ̣ܕܰܝ̈ܟ ܡܳܪܝܳܐ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ: ܕܰܬܫܰܡܠܐܷ ܫܽܘܘܕܳܝܳܟ ܠܘܳܬܰܢ ܕܛܽܘܒܰܝܗܽܘܢ ܠܐܱܝܠܶܝܢ ܕܠܐܴ ܚܙܰܐܘܽܢܝ ܘܗܰܝܡ̣ܶܢܘ ܒܺܝ: ܘܗܳܫܳܐ ܡܳܪܝܳܐ ܒܳܥܶܝܢܰܢ ܘܡܶܬܟܰܫܦܺܝܢܰܢ ܠܳܟ ܒܥܶܕܳܢܳܐ ܗܳܢܳܐ ܕܰܬܫܰܡܠܐܷ ܠܘܳܬܰܢ: ܡܶܠܬܳܟ ܡܰܐܚܝܳܢܺܝܬܳܐ ܕܳܐܡܪܳܐ ܠܰܢ ܫܒܺܝܩܺܝܢ ܚܰܘܒܰܝ̈ܟܽܘܢ ܕܰܐܘܕܺܝܬܽܘܢ ܒܚܰܫ̈ܰܝ ܦܳܪ̈ܽܘܩܳܝܶܐ: ܘܗܳܫܳܐ ܡܳܪܝܳܐ ܕܟܽܠܝܽܘܡ ܚܳܙܶܝܢܰܢ ܠܳܟ ܥܰܠ ܡܰܕܒܚܳܐ ܪܽܘܚܳܢܳܐܺܝܬ: ܘܒܰܩܝܳܡܬܳܟ ܡܗܰܝܡܢܺܝܢܰܢ ܘܡܰܘܕܶܝܢܰܢ: ܘܥܰܠ ܣܰܒܪܳܟ ܟܽܠܝܽܘܡ ܡܳܝܬܺܝܢܰܢ: ܐܰܝܟܰܢܳܐ ܕܬܶܥܒܶܕ ܠܰܢ ܪ̈ܰܚܡܶܐ ܘܫܰܘܬܳܦ̈ܶܐ ܕܚܰܫܰܝ̈ܟ: ܘܕܰܩܝܳܡܬܳܟ ܘܬܶܥܒܶܕ ܥܠܰܝܢ ܚܢܳܢܳܐ ܘܪ̈ܰܚܡܶܐ ܫܦܺܝ̈ܥܶܐ ܕܒܰܣܺܝܡܽܘܬܳܟ: ܘܰܬܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܣܽܘܓܳܐܐ ܕܰܡܪܰܚܡܳܢܽܘܬܳܟ: ܘܬܰܫܘܶܐ ܠܰܢ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܳܟ: ܘܰܠܡܰܠܟܽܘܬܳܐ ܕܰܫܡܰܝܳܐ ܕܡܶܢܳܟ ܡܠܺܝܟܳܐ ܠܥܳܒ̇ܕ̈ܰܝ ܨܶܒܝܳܢܳܟ ܐܰܝܟܰܢܳܐ ܕܬܶܬܪܰܚܰܡ ܥܰܠ ܢܰܦ̈ܫܳܬܳܐ ܕܰܡܦܺܝ̣̈ܣܳܢ ܠܳܟ: ܡܶܛܽܠ ܕܰܡܪܰܚܡܳܢܳܐ ܐܺܝܬܰܝܟ ܘܣܰܓܺܝ ܪ̈ܰܚܡܶܐ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ.

 

ܨܠܘܬܐ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܠܐܴ ܡܳܝܽܘܬܳܐ ܕܰܛܥܶܡ ܡܰܘܬܳܐ ܒܨܶܒܝܳܢܶܗ ܠܗ̇ܰܘ ܩܛܺܝܠܐܴ ܘܰܩܒܺܝܪܳܐ ܕܰܒܩܶܛܠܶܗ ܩܰܛܠܶܗ ܠܡܰܘܬܳܐ ܩܳܛܽܘܠܶܗ ܕܓܶܢܣܰܢ ܒܰܥܒ̇ܳܪ ܦܽܘܩܕܳܢܳܐ: ܠܗ̇ܰܘ ܓܰܢ̱ܒܳܪܳܐ ܕܰܥܩ̣ܰܪ ܫܽܘܪ̈ܶܝܗ̇ ܕܰܫܝܽܘܠ ܒܥܶܠܬܳܐ: ܘܬܰܒܰܪ ܡܽܘ̈ܟܠܐܷ ܥܰܫܺܝ̣̈ܢܶܐ ܕܗܳܡܳܢ: ܘܡ̣ܶܢ ܓܰܘ ܥܓܳܢܳܐ ܐܰܦ̣ܶܩ ܠܐܴܕܳܡ ܨܰܠܡܳܐ ܦܰܐܝܳܐ ܕܪܰܒܽܘܬܶܗ: ܠܗ̇ܰܘ ܥܰܙܺܝܙܳܐ ܘܰܕܚܺܝܠܐܴ ܕܶܐܬܦ̣ܰܟܰܪ ܡ̣ܶܢ ܚܰܠܳܫ̈ܶܐ ܟܳܗ̈ܢܶܐ ܚܰܪ̈ܡܶܐ: ܘܩܳܡ ܡ̣ܶܢ ܩܰܒܪܳܐ ܘܰܐܪܥܶܠ ܐܶܢܽܘܢ ܒܰܩܝܳܡܬܶܗ ܡܫܰܒܰܚܬܳܐ: ܘܰܐܒܗ̣ܶܬ ܠܚܶܠܐܴ ܒܕܺܝܪܳܐ ܕܰܓܒ̣̈ܰܠܝ ܐܺܝܕܰܘ̈ܗܝ ܩܰܕܺܝ̈ܫܳܬܳܐ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܐܠܰܗܳܐ ܗ̇ܰܘ ܠܐܴ ܡܶܬܚܰܙܝܳܢܳܐ ܘܠܐܴ ܡܶܣܬܰܝܟܳܢܳܐ ܘܠܐܴ ܡܶܬܕܰܪܟܳܢܳܐ ܒܰܐܠܳܗܽܘܬܶܗ. ܡܳܪܰܢ ܝܶܫܽܘܥ ܡܫܺܝܚܳܐ ܗ̇ܰܘ ܠܐܴ ܡܶܬܒܰܨܝܳܢܳܐ: ܘܠܐܴ ܡܶܬܰܐܡܪܳܢܳܐ ܕܶܐܣܬܰܝܰܟ ܒܟܰܪܣܳܐ ܕܒܶܣܪܳܐ: ܘܶܐܬܥܰܛܰܦ ܦܰܓܪܳܐ ܡܳܝܽܘܬܳܐ ܘܰܕܡܽܘܬܳܐ ܕܥܰܒ̣ܕܳܐ: ܘܒܶܗ ܦ̣ܪܰܩ ܠܓܶܢܣܰܢ ܚܰܠܳܫܳܐ ܡ̣ܶܢ ܛܳܥܝܽܘܬܳܐ. ܐܠܰܗܳܐ ܒܳܪܽܘܝܳܐ ܕܥܳܠܡ̈ܶܐ ܕܰܒܛܰܝܒܽܘܬܶܗ ܨܒ̣ܳܐ ܘܶܐܬܢܰܚܰܬ݀ ܠܰܫܝܽܘܠ ܒܡܽܘܟܳܟܳܐ ܪܰܒܳܐ ܘܰܠܫܶܦܠܐܴ ܬܰܚܬܳܝܳܐ ܠܣܳܟܳܗ̇ ܕܰܙܥܽܘܪܽܘܬܳܐ. ܥܶܠܳܝܳܐ ܕܰܐܪܟܢܽܘܗܝ ܪ̈ܰܚܡܰܘܗܝ ܨܶܝܕ ܬܰܚܬܳܝ̈ܶܐ: ܐܰܝܟܰܢܳܐ ܕܢܶܬܚܰܠܰܛ ܥܰܡܗܽܘܢ: ܘܰܢܚܰܠܶܛ ܐܶܢܽܘܢ ܒܰܐܠܳܗܽܘܬܶܗ. ܪܳܡܳܐ ܕܰܫܒ̣ܰܩ ܫܡܰܝ̈ܳܐ ܕܺܝܠܶܗ ܥܶܠܳܝ̈ܶܐ ܘܟܽܘܪܣܝܳܐ ܕܫܰܠܗܶܒܺܝܬܳܐ: ܘܰܢܚ̣ܶܬ ܠܥܽܘܡܩܳܐ ܬܰܚܬܳܝܳܐ ܕܰܫܝܽܘܠ ܘܰܗ̣ܘܳܐ ܡܺܝܬܳܐ ܟܰܕ ܢܛܺܝܪܺܝܢ ܒܶܗ ܚܰܝ̈ܶܐ ܕܰܟܝܳܢܶܗ: ܕܽܘܡܳܪܳܐ ܕܠܐܴ ܡܶܣܬܰܝܰܟ ܒܰܐܠܳܗܽܘܬܶܗ: ܘܠܐܴ ܡܶܬܥܰܩܰܒ ܒܐܢܳܫܽܘܬܶܗ: ܘܠܐܴ ܡܶܬܕܪܶܟ ܡ̣ܶܢ ܥܒܺܝ̣̈ܕܶܐ: ܘܠܐܴ ܡܶܬܒܨܶܐ ܡ̣ܶܢ ܥܰܦܪ̈ܳܢܶܐ. ܕܽܘܡܳܪܳܐ ܕܠܐܴ ܡܳܛܶܝܢ ܥܶܠܳܝ̈ܶܐ ܠܰܡܡܰܠܳܠܽܘܬܶܗ ܘܠܐܴ ܡܶܫܟܚܺܝܢ ܣܳܦܪ̈ܶܐ ܘܰܦܪ̈ܺܝܫܶܐ ܕܰܢܥܰܩܒܽܘܢ ܥܰܠ ܡܰܘܠܳܕܶܗ. ܕܽܘܡܳܪܳܐ ܕܟܰܕ ܫܪܶܐ ܒܰܛܠܺܝܬܳܐ ܘܠܐܴ ܐܶܣܬܰܦܰܩ ܡܶܢܶܗ ܟܽܘܪܣܝܳܐܳ ܡܥܰܠܝܳܐ ܕܺܐܝܩܳܪܶܗ: ܘܟܰܕ ܝ̇ܳܢܶܩ ܚܰܠܒܳܐ ܡ̣ܶܢ ܬܕܶܝ̈ܗ̇ ܕܒܰܪܬ݀ ܡܶܣܟ̈ܺܢܶܐ: ܡܕܰܒܰܪ ܠܐܱܬܪ̈ܰܘܳܬܳܐ ܥܶܠܳܝ̈ܶܐ ܒܪܶܡܙܶܗ. ܕܽܘܡܳܪܳܐ ܕܰܥܡ̣ܰܕ ܡ̣ܶܢ ܐܺܝ̈ܕܰܝ ܥܰܒ̣ܕܶܗ ܘܪܰܗܛܶܗ ܝܽܘܚܳܢܰܢ ܟܳܪܽܘܙܳܐ: ܘܩܰܒܶܠ ܕܽܘܟܳܝܳܐ ܐܰܝܟ ܚܰܝܳܒܳܐ: ܘܚܰܣܺܝ ܗ̣ܘܳܐ ܠܟܽܠܳܗ̇ ܒܪܺܝܬܳܐ ܡ̣ܶܢ ܨܽܘܥܨ̈ܳܥܶܐ ܕܰܚܛܺܝܬܳܐ ܐܳܦ ܚܰܠܶܠ ܠܗ̇ܰܘ ܨܰܚܢܳܐ ܐܳܕܳܡ ܕܶܐܨܛܰܐܝ ܒܰܣܝܳܢܳܐ: ܕܽܘܡܳܪܳܐ ܕܟܰܕ ܡܗܰܠܶܟ ܗ̣ܘܳܐ ܒܰܐܪܥܳܐ ܘܰܡܫܰܡܠܐܷ ܡܕܰܒܪܳܢܽܘܬܳܐ: ܘܗ̣ܽܘ ܟܰܕ ܗ̣ܽܘ ܐܺܝܬܰܘܗܝ ܕܰܡܕܰܒܰܪ ܠܣܰܘ̈ܦܶܐ ܘܦܶܢ̈ܝܳܬܳܐ. ܕܽܘܡܳܪܳܐ ܕܩܰܒܶܠ ܓܙܽܘܪܬܳܐ ܐ̱ܢܳܫܳܝܬܳܐ ܐܰܝܟ ܕܰܐܫܠ̣ܶܡ ܠܥܰܒ̣ܕܶܗ ܐܰܒܪܳܗܳܡ: ܘܗ̣ܽܘ ܟܰܕ ܗ̣ܽܘ ܐܺܝܬܰܘܗܝ ܕܰܐܫܠ̣ܶܡ ܕܺܝ̣̈ܢܶܐ ܘܢܳܡܽܘ̈ܣܶܐ ܠܥܰܡܳܐ ܕܥܶܒܪ̈ܳܝܶܐ ܕܥܰܠ ܠܽܘ̈ܚܶܐ ܕܟܺܐܦܳܐ ܟܬܺܝ̣̈ܒܳܢ ܗ̣ܘ̈ܰܝ ܒܛܽܘܪܳܐ ܕܣܺܝܢܰܝ. ܕܽܘܡܳܪܳܐ ܕܨܳܡ ܨܰܘܡܳܐ ܐܰܪܒܥܺܝܢܳܝܳܐ ܥܰܠ ܐܰܦܰܝ̈ܢ: ܟܰܕ ܗ̇ܰܘ ܡܩܰܒܶܠ ܨܠܰܘ̈ܳܬܳܐ ܕܰܟܝ̈ܳܬܳܐ ܒܰܡܪ̈ܰܘܡܶܐ ܥܰܡ ܝܳܠܽܘܕܶܗ. ܕܽܘܡܳܪܳܐ ܗ̇ܰܘ ܕܶܐܬܢܰܣܺܝ ܡ̣ܶܢ ܡܪܰܡܝܳܢܳܐ: ܘܶܐܫܬܚܰܪ ܠܟܳܐ ܘܰܠܟܳܐ ܐܰܝܟ ܥܰܒ̣ܕܳܐ ܫܚܺܝܡܳܐ ܟܰܕ ܗ̣ܽܘ ܐܺܝܬܰܘܗܝ ܕܰܛܒܰܥ ܒܝܰܡܳܐ ܕܣܽܘܦ ܠܗ̇ܰܘ ܝܰܩܺܝܪ ܠܶܒܳܐ ܦܶܪܥܽܘܢ: ܘܰܠܠܶܓܝܽܘܢ ܒܝܰܕ ܚܙܺܝܪ̈ܶܐ ܠܰܬܗܽܘܡܳܐ ܫܰܕܰܪ: ܕܽܘܡܳܪܳܐ ܕܫܶܐܠ ܠܶܗ ܪܟܽܘܒܳܐ ܥܺܝܠܐܴ ܫܺܝܛܳܐ ܕܢܶܥܽܘܠ ܠܐܘܪܫܠܶܡ: ܘܗ̣ܽܘ ܟܰܕ ܗ̣ܽܘ ܐܺܝܬܰܘܗܝ ܕܰܪܟܺܝܒ ܓܺܝ̈ܓܠܐܷ ܡ̈ܰܠܳܠܳܬܳܐ ܘܠܐܴ ܒܳܨܶܝܢ ܠܶܗ. ܕܽܘܡܳܪܳܐ ܕܶܐܬܩܰܠܰܣ ܒܫܽܘ̈ܩܰܝ ܨܶܗܝܽܘܢ ܐܰܝܟ ܒܰܪܢܳܫܳܐ ܡ̣ܶܢ ܝܰܠܽܘ̈ܕܶܐ ܘܫܰܒܪ̈ܶܐ ܫܦܰܝ̈ܳܐ. ܘܗ̣ܽܘ ܟܰܕ ܗ̣ܽܘ ܕܝ̇ܳܗܶܒ ܡܰܡܠܠܐܴ ܘܠܶܫܳܢܳܐ ܠܟܽܠ ܒܣܰܪ: ܘܰܠܟܽܠ ܢܶܫܡܳܐ ܕܰܢܫܰܒܚܽܘܢܳܝܗܝ ܐܰܟܡܳܐ ܕܙܳܕܶܩ ܕܽܘܡܳܪܳܐ ܕܚܰܫ: ܘܶܐܨܛܥܰܪ ܒܶܝܬ ܐܰܪ̈ܥܳܢܶܐ: ܘܗ̣ܽܘ ܟܰܕ ܗ̣ܽܘ ܐܺܝܬܰܘܗܝ ܠܐܴ ܡܳܝܽܘܬܳܐ ܘܠܐܴ ܚܳܫܽܘܫܳܐ ܘܰܡܥܰܠܰܝ ܡ̣ܶܢ ܚܰܫ̈ܶܐ. ܕܽܘܡܳܪܳܐ ܕܶܐܬܬܣܺܝܡ ܒܓܰܘ ܩܰܒܪܳܐ ܐܰܝܟ ܥܰܢܺܝܕܳܐ. ܘܗ̣ܽܘ ܟܰܕ ܗ̣ܽܘ ܐܺܝܬܰܘܗܝ ܕܰܐܪܡܺܝ ܒܗܽܘܢ ܙܰܘܥܳܐ ܘܰܪܬܺܝܬܳܐ ܘܩܳܡ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ ܐܰܝܟ ܐܠܰܗܳܐ. ܕܽܘܡܳܪܳܐ ܕܟܰܬܰܪ ܥܰܠ ܐܰܪܥܳܐ ܒܳܬܰܪ ܩܝܳܡܬܶܗ ܐܪܒܥܺܝܢ ܝܰܘ̈ܡܺܝܢ ܕܰܢܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗܝ ܐܰܝܟ ܒܰܪܢܳܫܳܐ: ܘܗ̣ܽܘ ܟܰܕ ܗ̣ܽܘ ܐܺܝܬܰܘܗܝ ܕܰܣܠ̣ܶܩ ܠܰܫܡܰܝܳܐ ܒܫܽܘܒܚܳܐ ܘܙܰܘܚܳܐ ܕܥܺܝܪ̈ܶܐ ܘܡܰܠܐܱܟ̈ܶܐ: ܘܺܝܬܶܒ ܡ̣ܶܢ ܝܰܡܺܝܢ ܓܢܺܝܙܳܐ ܗ̇ܰܘ ܕܫܰܠܚܶܗ ܠܥܶܠ ܡ̣ܶܢ ܡܰܪܟܰܒܬܳܐ ܕܰܟܪ̈ܽܘܒܶܐ ܘܳܐܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒܢ̈ܶܐ ܕܰܢܕܽܘܢ ܠܥܰܡ̈ܡܶܐ ܒܰܬܪܺܝܨܽܘܬܳܐ: ܘܡܶܛܽܠ ܗܳܕܶܐ ܡܦܺܝܣܺܝܢܰܢ ܠܪ̈ܰܚܡܰܝܟ ܐܠܰܗܳܐ ܕܺܝܠܰܢ ܒܰܣܺܝܡܳܐ: ܕܠܐܴ ܬܶܥܽܘܠ ܠܕܺܝܢܳܐ ܥܰܡܰܢ: ܘܠܐܴ ܬܶܡܢܶܐ ܠܰܢ ܥܰܡ ܝܽܘܕܳܝ̈ܶܐ ܕܨܰܠܒܽܘܟ: ܘܠܐܴ ܬܩܺܝܡ ܠܰܢ ܥܰܡ ܟܳܦܽܘܪ̈ܶܐ ܕܠܐܴ ܗܰܝܡ̣ܶܢܘ ܒܳܟ: ܘܠܐܴ ܬܰܣܠܐܷ ܠܰܢ ܥܰܡ ܣܳܦܪ̈ܶܐ ܘܰܦܪ̈ܺܝܫܶܐ ܕܰܛܠܰܡ̣ܘ ܠܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ. ܐܶܠܐܴ ܐܶܬܪܰܚܰܡ ܥܠܰܝܢ ܡܳܪܝܳܐ ܡܪܰܚܡܳܢܳܐ ܚܢܰܢ ܥܰܒ̣ܕܰܝ̈ܟ ܕܐܰܘܕܺܝܢܰܢ ܒܚܰܫܰܝ̈ܟ ܘܒܰܩܝܳܡܬܳܟ: ܘܗܰܝܡܶܢܢܰܢ ܒܰܡܕܰܒܪܳܢܽܘܬܳܟ ܘܰܠܢܽܘܚܳܡܳܟ ܝܰܩܰܪܢܰܢ. ܘܥܰܡ ܢܶܫ̈ܶܐ ܩܰܕܺܝ̈ܫܳܬܳܐ ܪܽܘܚܳܢܳܐܺܝܬ ܠܩܰܒܪܳܟ ܐܶܬܘܰܥܰܕܢܰܢ ܘܕܳܫܢ̈ܶܐ ܕܫܽܘܒܚܳܐ ܘܩ̈ܳܠܐܷ ܕܩܽܘܒܳܠܛܰܝܒܽܘܬܳܐ ܠܳܟ ܡܩܰܪܒܺܝܢܰܢ. ܐܰܝܟܰܢܳܐ ܕܰܬܚܰܣܶܐ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܝܰܡܳܐ ܫܦܺܝܥܳܐ ܕܪ̈ܰܚܡܰܝܟ: ܝܰܡܺܝܢܳܟ ܬܰܐܓܶܢܝ ܥܠܰܝܢ: ܘܰܒܛܺܝܠܽܘܬܳܟ ܬܣܰܝܰܥܝ ܠܰܢ: ܘܬܰܫܦܰܥ ܪ̈ܰܚܡܰܝܟ ܥܰܠ ܚܰܝܳܒܽܘܬܰܢ: ܘܬܶܩܪܶܐ ܠܥܰܢܺܝ̈ܕܰܝܢ ܘܰܬܩܺܝܡ ܐܶܢܽܘܢ ܡ̣ܶܢ ܓܰܒܳܐ ܕܺܝܠܳܟ ܕܝܰܡܺܝܢܳܐ: ܘܰܬܚܰܣܶܐ ܚܰܘ̈ܒܰܝܗܽܘܢ: ܘܬܶܫܒܽܘܩ ܒܽܘܨܳܪ̈ܰܝܗܽܘܢ: ܘܬܰܫܶܘܐ ܐܶܢܽܘܢ ܠܰܢܝܳܚܬܳܐ ܒܪܺܝܟܬܳܐ ܕܥܰܡ ܐܰܒܳܗ̈ܳܬܳܐ ܕܺܝܠܰܢ ܐܰܒܪܳܗܳܡ ܘܺܐܝܣܚܳܩ: ܘܝܰܥܩܽܘܒ ܘܬܰܫܘܶܐ ܐܶܢܽܘܢ ܠܒܽܘܣܳܡܳܐ ܕܡܶܢܳܟ ܡܠܰܟ ܘܰܠܚܰܝ̈ܶܐ ܛܽܘܒܬܳܢ̈ܶܐ ܘܰܕܠܐܴ ܣܳܐܒܶܝܢ: ܘܠܰܢܝܳܚܬܳܐ ܠܐܴ ܡܶܫܬܰܪܝܳܢܺܝܬܳܐ ܕܥܰܡ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܒܛܰܝܒܽܘܬܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܕܰܐܒܽܘܟ ܘܰܕܪܽܘܚܳܟ ܩܕܺܝܫܳܐ܀

 

ܥܛܪܐ

ܥܒܶܕ ܠܰܢ ܡܳܪܝ ܫܰܘܬܳܦܽܘܬܳܐ ܘܥܽܘܗܕܳܢܳܐ ܛܳܒܳܐ ܕܚܰܣܝܽܘܬܳܐ ܒܰܩܝܳܡܬܳܟ ܡܫܺܝܚܳܐ ܐܠܰܗܳܐ ܕܺܝܠܰܢ. ܘܩܰܒܶܠ ܡܶܢܰܢ ܠܦܺܝܪܡܳܐ ܗܳܢܳܐ ܕܰܐܣܶܩܢܰܢ ܝܰܘܡܳܢܳܐ ܠܰܩܕܳܡ ܟܽܘܪܣܝܳܐ ܕܺܐܝܩܳܪܳܟ: ܘܫܰܕܰܪ ܠܰܢ ܡ̣ܶܢ ܒܶܝܬܓܰܙܳܟ ܡܳܪܝܳܐ ܥܽܘܕܪܳܢܳܐ: ܘܚܽܘܠܡܳܢܳܐ ܠܰܟܪ̈ܺܝܗܶܐ: ܘܳܐܣܝܽܘܬܳܐ ܘܰܢܦܺܐܫܳܐ ܠܐܱܠܺܝ̣̈ܨܶܐ: ܘܚܽܘܠܳܠܐܴ ܘܕܽܘܟܳܝܳܐ ܠܰܡܟܰܬܡ̈ܶܐ: ܘܰܢܝܳܚܬܳܐ ܕܡܰܪܓܫܳܢܽܘܬܳܐ ܛܳܒܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܘܰܐܡܠܶܟ ܫܰܝܢܳܟ ܘܰܫܠܳܡܳܟ ܒܰܝܢܳܬ ܡܰܠܟ̈ܘܳܬܳܐ ܕܰܐܪܥܳܐ ܕܢܰܘܕܶܐ ܘܢܶܣܓܽܘܕ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܚܘܬܡܐ

ܐܠܰܗܳܐ ܛܳܒܳܐ ܘܰܡܪܰܚܡܳܢܳܐ ܡܳܪܝܳܐ: ܗ̇ܰܘ ܕܡܶܛܽܠ ܒܺܝ̣̈ܫܶܐ ܘܚܰܛܳܝ̈ܶܐ ܢܚ̣ܶܬ ܠܐܱܪܥܳܐ ܗܳܕܶܐ ܒܨܶܒܝܳܢܶܗ: ܫܡܰܥ ܨܠܰܘ̈ܳܬܰܢ: ܘܩܰܒܶܠ ܒܳܥ̈ܘܳܬܰܢ: ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ ܡ̣ܶܢ ܒܶܝܬ ܓܰܙܳܐ ܕܰܡܪܰܚܡܳܢܽܘܬܳܟ: ܒܥܺܐܕܳܐ ܗܳܢܳܐ ܕܰܩܝܳܡܬܳܟ ܦܳܪܽܘܩܳܝܬܳܐ ܒܰܨܠܽܘܬ ܐܶܡܳܐ ܕܺܝܠܶܕܬܳܟ: ܘܟܺܐܢ̈ܶܐ ܘܙܰܕܺܝ̈ܩܶܐ ܡܪ̈ܰܥܝܳܢܶܐ ܕܰܐܠܳܗܽܘܬܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܕܶܐܬܳܐ ܠܚܰܫܳܐ ܒܨܶܒܝܳܢܶܗ ܟܰܕ ܠܐܴ ܚܳܫܽܘܫܳܐ ܗ̱̇ܘ ܒܰܟܝܳܢܶܗ: ܠܗ̇ܰܘ ܕܶܐܬܬܣܺܝܡ ܒܩܰܒܪܳܐ ܙܥܽܘܪܳܐ ܐܰܝܟ ܒܰܪܢܳܫܳܐ: ܟܰܕ ܐܺܝܬܰܘܗܝ ܐܠܰܗܳܐ ܠܐܴ ܡܶܣܬܰܝܟܳܢܳܐ: ܗ̇ܰܘ ܕܡܰܠܝܳܐ ܫܡܰܝܳܐ ܘܰܐܪܥܳܐ ܡ̣ܶܢ ܬܶܫܒܽܘܚܬܶܗ: ܘܩܰܒܪܳܐ ܕܰܬܠܳܬ ܐܰܡܺܝ̣̈ܢ ܒܰܐܪܥܳܐ ܣܰܝܟܶܗ: ܘܟܽܠܡܶܕܶܡ ܠܶܗ ܠܐܴ ܡܣܰܝܶܟ: ܘܠܐܴ ܚܳܒ̇ܶܫ ܠܶܗ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ: ܒܗܳܢܳܐ܀

 

ܣܕܪܐ

ܝܰܘܡܳܢܳܐ ܐܰܚ̈ܰܝ ܟܽܠܰܢ ܟܶܢܫܳܐ ܕܰܡܗܰܝ̈ܡܢܶܐ ܒܙܶܕܩܳܐ ܕܠܳܚ̇ܶܡ: ܗܽܘ̈ܠܳܠܐܷ ܘܙܽܘܡܳܪ̈ܶܐ ܘܢܶܥ̈ܡܳܬܳܐ ܗܰܢܺܝ̈ܳܐܬܳܐ ܘܩܽܘ̈ܠܳܣܶܐ ܘܪܽܘܡܪ̈ܳܡܶܐ ܢܝܰܩܰܪ ܘܰܢܥܰܕܥܶܕ ܘܰܢܩܰܠܶܣ ܠܰܩܝܳܡܬܶܗ ܕܰܡܫܺܝܚܳܐ ܐܠܰܗܰܢ. ܗ̇ܳܝ ܕܰܐܩܺܝܡܰܬ݀ ܠܰܢ ܡ̣ܶܢ ܡܰܦܽܘܠܬܳܐ ܕܥܳܒ̇ܰܪ ܦܽܘܩܕܳܢܳܐ: ܗ̇ܳܝ ܕܡܰܢܥܰܬ݀ ܠܰܢ ܠܐܱܬܪܳܐ ܕܛܽܘ̈ܒܶܐ ܘܒܽܘ̈ܣܳܡܶܐ ܕܰܐܘܒܶܕܢܰܢ ܗ̇ܳܝ ܕܟܶܬܒܰܬ݀ ܠܰܢ ܒܢܰܝ̈ܐ ܘܝܳܪ̈ܽܘܬܶܐ ܕܡܰܠܟܽܘܬܳܐ ܕܰܫܡܰܝܳܐ ܗ̇ܳܝ ܕܰܐܣܩܰܬ݀ ܠܰܢ ܡ̣ܶܢ ܥܽܘܡܩܳܐ ܬܰܚܬܳܝܳܐ: ܠܪܰܘܡܳܐ ܪܳܡܳܐ ܗ̇ܰܘ ܕܦܰܪܕܰܝܣܳܐ ܨܶܝܕ ܥܺܝܪ̈ܶܐ ܥܶܠܳܝ̈ܶܐ: ܗ̇ܳܝ ܕܣܳܡ̣ܬ ܠܰܢ ܝܳܪܬܽܘܬܳܐ ܒܰܡܪ̈ܰܘܡܶܐ ܪ̈ܳܡܶܐ ܘܠܐܷܫܛܳܪ ܚܰܘ̈ܒܳܬܰܢ ܥܛܳܬ݀ ܘܩܰܕܕܰܬ݀ ܘܬܰܠܚܰܬ݀: ܗ̇ܳܝ ܕܟܰܕ ܡܰܣܠܰܝ̈ܳܐ ܘܰܛܪ̈ܺܝܕܶܐ ܐܺܝܬܰܝܢ ܗ̣ܘܰܝܢ ܘܩܰܪܺܝܒܽܘܬܳܐ ܘܒܰܝܬܳܝܽܘܬܳܐ ܕܰܠܘܳܬܳܟ ܥܶܒܕܰܬ݀ ܠܰܢ: ܘܠܐܱܬܪܳܐ ܕܒܽܘ̈ܣܳܡܶܐ ܡܰܢܥܰܬ݀ ܠܰܢ: ܗ̇ܳܝ ܕܰܒܢܰܝ̈ܳܐ ܚܰܒܺܝ̈ܒܶܐ ܘܝܳܪ̈ܽܘܬܶܐ ܕܡܰܠܟܽܘܬܳܐ ܕܰܫܡܰܝܳܐ ܩܶܪܒܰܬ݀ ܠܰܢ: ܘܚܰܝ̈ܶܐ ܚܰܕ̈ܬܶܐ ܘܪ̈ܽܘܚܳܢܳܝܶܐ ܛܰܝܒܰܬ݀ ܠܰܢ. ܗ̇ܳܝ ܕܟܰܕ ܠܐܷܣܛܠܐܴ ܫܒܺܝܚܬܳܐ ܒܶܝܬ ܐܺܝܠܳܢ̈ܶܐ ܫܠܰܚ̣ܢܰܢ: ܐܶܣܛܠܐܴ ܕܠܐܴ ܡܶܬܚܰܒܠܐܴ ܡ̣ܶܢ ܡܰܝ̈ܳܐ ܕܡܰܥܡܽܘܕܺܝܬܳܐ ܐܠܰܒ̣ܫܰܬ݀ ܠܰܢ. ܗ̇ܳܝ ܕܟܰܕ ܥܰܠ ܦܽܘܩܕܳܢܳܐ ܥܒ̣ܰܪܢܰܢ: ܘܢܳܡܽܘ̈ܣܶܐ ܩܰܕܺܝ̈ܫܶܐ: ܘܩܳܢܽܘ̈ܢܶܐ ܕܡܰܐܚܶܝܢ ܦܰܓܪ̈ܰܝܢ ܘܢܰܦ̈ܫܳܬܰܢ ܛܰܟܣܰܬ݀ ܘܣܳܡܰܬ݀ ܠܰܢ. ܗ̇ܳܝ ܕܟܰܕ ܡ̣ܶܢ ܪܰܘܡܳܐ ܪܳܡܳܐ ܕܚܺܐܪܽܘܬܰܢ ܐܶܫܬܰܥܠܺܝܢܰܢ ܢܦܰܠ̣ܢܰܢ: ܠܡܰܠܟܽܘܬܳܐ ܕܰܫܡܰܝܳܐ ܐܰܣܩܰܬ݀ ܠܰܢ: ܘܡ̣ܶܢ ܝܰܡܺܝܢܳܐ ܕܰܐܒܳܐ ܓܢܺܝܙܳܐ ܐܰܘܬܶܒܬܳܢ: ܗ̇ܳܝ ܕܡܶܛܽܠ ܥܒ̇ܳܪ ܦܽܘܩܕܳܢܳܐ ܠܐܱܪܥܳܐ ܕܟܽܘ̈ܒܶܐ ܘܰܕܠܰܘ̈ܛܳܬܳܐ ܐܶܫܬܕܺܝܢܰܢ ܒܚܺܐܪܽܘܬܰܢ ܗ̣ܺܝ ܩܝܳܡܬܳܟ ܡܰܐܚܝܳܢܺܝܬܳܐ ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ ܟܶܬܒܰܬ݀ ܠܰܢ: ܘܰܠܪܽܘܚܳܐ ܩܰܕܺܝܫܳܐ ܕܰܫܠܰܚ̣ܢܰܢ ܒܶܝܬ ܐܺܝܠܳܢ̈ܶܐ ܡ̣ܶܢ ܡܰܝ̈ܳܐ ܕܡܰܥܡܽܘܕܺܝܬܳܐ ܠܰܩܝܳܡܬܳܟ ܡܳܪܰܢ ܣܳܓܕܺܝܢܰܢ ܘܰܡܫܰܒܚܺܝܢܰܢ: ܕܟܽܠܗܶܝܢ ܗܳܠܶܝܢ ܐܠܳܨܳܝ̈ܳܬܳܐ ܝܶܨܦܰܬ݀ ܘܰܩܢܳܬ݀ ܠܰܢ ܘܚܰܟܡܰܬ݀ ܘܦܰܪܩܰܬ݀ ܘܫܰܘܙܒܰܬ݀ ܠܰܢ. ܘܰܐܝܟ ܕܠܰܒܪܺܝܬܳܐ ܚܰܒܺܝܒܬܳܐ ܕܺܝܠܶܗ ܥܰܕܪܰܬ݀ ܠܰܢ: ܡܦܺܝܣܺܝܢܰܢ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܒܝܰܘܡܳܐ ܗܳܢܳܐ ܕܥܽܘܗܕܳܢܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܥܰܠ ܒܳܠܰܢ ܡܰܝܬܶܝܢܰܢ ܘܠܰܣܒܰܪܬܳܐ ܕܢܽܘܚܳܡܳܟ ܒܠܶܒܰܘ̈ܳܬܰܢ ܩܳܒܥܺܝܢܰܢ ܘܰܠܢܰܦ̈ܫܳܬܰܢ ܐܳܡܪܺܝܢܰܢ ܕܰܐܢ̱ܬܶܝܢ ܠܐܴ ܬܶܕܚ̈ܠܳܢ ܝܳܕܥܺܝܢܰܢ ܓܶܝܪ ܕܰܠܝܶܫܽܘܥ ܡܫܺܝܚܳܐ ܦܳܪܽܘܩܳܐ ܕܺܝܠܟܶܝܢ ܡܣܰܟ̈ܝܳܢ ܐܢ̱ܬܶܝܢ: ܕܢܺܐܬܶܐ ܠܚܰܪܬܳܐ ܘܢܶܦܪܽܘܥ ܠܰܟܝܳܢ ܐܰܓܪܳܐ ܕܥܰܡܠܰܝ̈ܟܶܝܢ: ܘܢܶܥܒܶܕ ܕܺܝܢܳܐ ܬܪܺܝܨܳܐ ܠܟܽܠܗܶܝܢ ܒܶܪ̈ܝܳܬܳܐ: ܒܗ̇ܰܘ ܝܰܘܡܳܐ ܚܽܘܣ ܡܳܪܝܳܐ ܥܰܠ ܥܰܒ̣ܕܰܝ̈ܟ ܦܪ̈ܺܝܩܰܝ ܒܰܨܠܺܝܒܳܟ ܙܰܟܳܝܳܐ: ܫܩܺܝ̣̈ܠܰܝ ܪܽܘܫܡܳܟ ܩܰܕܺܝܫܳܐ: ܛܒܺܝ̣̈ܥܰܝ ܒܛܰܒܥܳܐ ܕܡܽܘܪܽܘܢ ܕܺܝܠܳܟ ܒܰܣܺܝܡ ܪܺܝܚܳܐ. ܘܰܐܢܺܝܚ ܐܶܢܽܘܢ ܒܰܐܘ̈ܘܳܢܶܐ ܛܽܘܒ̈ܬܳܢܶܐ ܘܰܡܫܰܒ̈ܚܶܐ ܘܒܰܣܶܡ ܢܰܦ̈ܫܳܬܗܽܘܢ ܕܰܐܒܳܗܰܝ̈ܢ ܘܕܰܐܚܰܝ̈ܢ ܘܰܕܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܗܳܫܳܐ܀

ܫܠܡ

 

ܛܟܣܐ ܕܚܕ ܒܫܒܐ ܬܡܝܢܝܐ ܕܩܝܡܬܐ ܕܛܟܣܐ ܐܚܪܝܐ

ܩܕܡܝܬ ܨܠܘܬܐ ܕܫܘܪܝܐ

 

ܫܰܟܶܢ ܠܰܢ ܡܳܪܝܳܐ ܐܠܰܗܳܐ ܝܺܕܰܥܬܳܐ ܕܡܶܠܰܝ̈ܟ ܐܠܰܗܳܝ̈ܳܬܳܐ ܘܣܽܘܟܳܠܐܴ ܕܰܩܝܳܡܬܳܟ ܦܳܪܽܘܩܳܝܬܳܐ: ܘܥܽܘܬܪܳܐ ܪܰܒܳܐ ܕܛܰܝܒܽܘܬܳܟ ܘܰܕܒܰܣܺܝܡܽܘܬܳܟ ܘܗܰܒܠܰܢ ܡܳܪܰܢ ܐܠܰܗܰܢ ܕܰܒܚܰܕܽܘܬܳܐ ܢܶܛܰܪ ܦܽܘܩܕܳܢܰܝ̈ܟ: ܘܢܶܓܡܽܘܪ ܘܰܢܫܰܡܠܐܷ ܨܶܒܝܳܢܳܟ: ܘܢܶܫܬܘܶܐ ܠܒܽܘܪ̈ܟܳܬܳܐ ܘܰܠܪ̈ܰܚܡܰܝܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ ܘܡܶܬܓܰܠܝܳܐ ܐܠܰܗܽܘܬܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܘܬܰܘܕܺܝܬܳܐ ܘܣܶܓܕܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ: ܥܰܡ ܣܳܥܽܘܪܽܘܬܳܐ ܕܰܥܒ̇ܳܕ̈ܶܐ ܛܳܒ̈ܶܐ: ܘܚܽܘܫ̈ܳܒܶܐ ܙܗܰܝ̈ܳܐ ܘܩܰܕܺܝ̈ܫܶܐ: ܘܪܺܝܚܳܐ ܒܰܣܺܝܡܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܘܪܺܝܫܺܝܬܳܐ ܡܩܰܒܰܠܬܳܐ ܕܕܽܘܒܳܪ̈ܶܐ ܢܰܨܺܝ̈ܚܶܐ ܕܠܐܴ ܡܳܝܽܘܬܽܘܬܳܐ ܢܶܫܬܘܶܐ ܕܰܢܩܰܪܶܒ. ܠܪܺܝܫ ܟܽܘܡܪ̈ܶܐ ܕܬܰܘܕܺܝܬܰܢ ܝܶܫܽܘܥ ܡܫܺܝܚܳܐ ܕܶܒܚܳܐ ܚܰܣܝܳܐ ܘܩܰܕܺܝܫܳܐ: ܗ̣ܽܘ ܒܰܩܢܽܘܡܶܗ ܥܒ̣ܰܕ ܕܽܘܟܳܝܳܐ ܕܰܚܛܳܗܰܝ̈ܢ: ܘܚܰܣܺܝ ܠܬܺܐܒܶܝܠ ܒܰܕܒܺܝܚܽܘܬܶܗ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܕܙܳܕܶܩ ܠܶܗ: ܘܬܰܘܕܺܝܬܳܐ ܕܡܶܬܬܚܺܝܒܳܐ ܠܶܗ ܘܥܳܢ̈ܶܗ ܕܦܰܪܩܳܗ̇ ܒܚܰܫ̈ܶܐ ܕܰܙܩܺܝܦܽܘܬܶܗ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܗ̇ܰܘ ܪܰܒܳܐ ܗ̇ܰܘ ܝܰܠܕܳܐ ܡܬܽܘܡܳܝܳܐ ܗ̇ܰܘ ܝܳܕܽܘܥܳܐ ܕܟܰܣ̈ܝܳܬܳܐ ܘܰܕܓܰܠܝ̈ܳܬܳܐ ܘܒܳܚܽܘܪܳܐ ܕܠܶܒܰܘ̈ܳܬܳܐ ܗ̇ܰܘ ܕܝܳܕܰܥ ܟܽܠ ܡܶܕܶܡ ܩܕܳܡ ܗܘ̇ܳܝܳܐ ܕܺܝܠܶܗ: ܘܠܰܝܬ ܡܶܕܶܡ ܣܳܟ ܕܰܛܫܶܐ ܩܕܳܡ ܥܰܝܢܰܝ̈ܟ: ܘܠܐܴ ܡܶܕܶܡ ܕܰܛܥܶܐ ܠܳܟ: ܐܶܠܐܴ ܟܽܠܗܶܝܢ ܟܰܣ̈ܝܳܬܳܐ ܥܰܪ̈ܛܶܠܳܝܳܬܳܐ ܘܓܰܠܝ̈ܳܬܳܐ ܐܺܝܬܰܝܗܶܝܢ ܠܳܟ. ܐܰܢ̱ܬ ܡܳܪܝܳܐ ܐܠܰܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ: ܘܢܳܛܰܪ ܩܽܘܫܬܳܐ ܠܐܴܠܶܦ ܕܳܪ̈ܺܝܢ ܐܶܬܕܰܟܪ ܒܥܶܕܳܢܳܐ ܗܳܢܳܐ ܕܰܩܝܳܡܬܳܐ ܕܺܝܠܳܟ ܘܰܕܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܘܕܰܨܠܺܝܒܽܘܬܳܟ ܡܰܐܚܝܳܢܺܝܬܳܐ: ܘܰܕܡܰܘܬܳܟ ܡܰܐܚܝܳܢܳܐ ܕܺܝܠܰܢ ܥܰܠ ܟܽܠܰܢ ܡܰܝܬܶܝܢܰܢ ܕܽܘܟܪܳܢܳܐ ܛܳܒܳܐ ܥܳܒܕܺܝܢܰܢ ܒܥܶܕܳܢܳܐ ܗܳܢܳܐ ܠܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܕܺܝܠܶܕܬܳܟ ܒܰܒܬܽܘܠܽܘܬܳܗ̇: ܘܕܰܢܒܺܝ̈ܶܐ ܕܐܬܢܰܒܺܝܘ ܥܠܰܝܟ ܫܰܪܺܝܪ̈ܳܬܳܐ. ܘܠܰܫܠܺܝ̈ܚܶܐ ܕܰܐܟ̣ܪܶܙܘ ܠܰܣܒܰܪܬܳܐ ܕܺܝܠܳܟ ܐܰܘܢܓܶܠܳܝܬܳܐ. ܘܰܐܝܟ ܡܰܝ̈ܳܐ ܚܰܝ̈ܶܐ ܐܰܫܩܺܝܘ ܠܰܒܪܺܝܬܳܐ ܫܶܩܝܳܐ ܚܰܝܳܐ ܕܝܽܘܠܦܳܢܳܟ: ܘܣܳܗ̈ܕܶܐ ܒܪ̈ܺܝܟܶܐ ܘܰܢܟܺܝ̣̈ܣܶܐ ܗ̇ܳܢܽܘܢ ܕܶܐܬܩܰܛܰܠܘ ܒܪܶܚܡܬܳܟ: ܘܣܰܝܒܰܪܘ ܫܶܢ̈ܕܶܐ ܘܽܐܘܠܨܳܢ̈ܶܐ ܡܶܛܽܠܳܬܳܟ: ܘܰܐܥܕܺܝܘ ܟܠܺܝ̣̈ܠܐܷ ܕܙܳܟܽܘܬܳܐ ܥܰܠ ܣܰܒܪܳܟ: ܐܳܦ ܡܰܘ̈ܕܝܳܢܶܐ ܕܰܐܘܕܺܝܘ ܒܡܳܪܽܘܬܳܟ: ܡܰܠܦܳܢ̈ܶܐ ܕܰܠܒ̣ܰܟܘ ܠܰܫܪܳܪܳܐ ܕܺܝܠܳܟ: ܟܰܫܺܝܪ̈ܶܐ ܕܰܦܠܰܚ̣ܘ ܒܟܰܪܡܳܟ ܘܰܡܫܰܡ̈ܫܳܢܶܐ ܕܰܥܒ̣ܰܕ ܨܶܒܝܳܢܳܟ: ܟܳܗ̈ܢܶܐ ܕܫܰܡ̣ܶܫܘ ܠܐܪ̈ܳܙܶܐ ܕܡܰܕܒܚܳܟ ܩܰܕܺܝܫܳܐ: ܘܥܰܡܗܽܘܢ ܕܶܝܢ ܡܶܬܕܰܟܪܺܝܢܰܢ ܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܠܰܒܫܽܘܟ ܒܰܥܡܳܕܳܐ ܘܰܐܘܕܺܝܘ ܘܗܰܝܡܶܢ̣ܘ ܒܰܡܕܰܒܪܳܢܽܘܬܳܟ: ܥܶܛܪܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܠܳܟ ܒܥܺܐܕܳܐ ܗܳܢܳܐ ܕܢܽܘܚܳܡܳܟ ܫܒܺܝܚܳܐ: ܒܗܳܢܳܐ ܝܰܘܡܳܐ ܓܶܝܪ ܕܚܰܕ ܒܫܰܒܳܐ ܬܡܺܝܢܳܝܳܐ ܘܩܰܕܡܳܝܳܐ ܕܒܶܗ ܡܚܰܘܝܳܐ ܒܪܺܝܬܳܐ ܫܽܘܘܕܳܥܳܐ ܕܫܽܘܪܳܝܳܐ ܘܫܽܘܠܳܡܳܐ. ܥܰܠ̣ܬ ܨܶܝܕ ܬܰܠܡܺܝ̈ܕܰܝܟ ܒܪܰܡܫܳܐ ܕܚܰܕ ܒܫܰܒܳܐ ܠܓܰܘ ܥܶܠܺܝܬܳܐ ܟܰܕ ܬܰܪ̈ܥܶܐ ܘܟܰܘ̈ܶܐ ܐܰܚܺܝܕܺܝܢ ܗ̣ܘܰܘ: ܘܶܐܡ̣ܰܪܬ ܠܗܽܘܢ ܫܠܳܡܳܐ ܥܰܡܟܽܘܢ ܬܰܠܡܺܝ̣̈ܕܰܝ ܐܶܢܳܐ ܐ̱ܢܳܐ ܠܐܴ ܬܶܕܚܠܽܘܢ: ܘܚܰܘܺܝܬ ܐܶܢܽܘܢ ܐܺܝܕܰܝ̈ܟ ܘܪ̈ܶܓܠܰܝܟ ܘܣܶܛܪܳܟ ܘܕܽܘܟܰܬ݀ ܠܽܘܟܳܝܬܳܐ: ܘܗܰܝܡ̣ܶܢܘ ܘܶܐܫܬܰܪܰܪܘ ܫܠܺܝ̈ܚܶܐ: ܘܰܒܗܳܢܳܐ ܪܰܡܫܳܐ ܕܚܰܕ ܒܫܰܒܳܐ ܩ̣ܪܰܝܬ ܠܬܳܐܘܡܰܐ ܫܠܺܝܚܳܐ ܕܶܐܬܦܰܠܰܓ ܘܰܐܓܶܫܬܳܝܗܝ ܕܰܦܢܳܟ ܡܰܪܕܝܰܬ݀ ܚܰܝ̈ܶܐ ܘܚܰܕ̈ܘܳܬܳܐ ܘܚܰܘܺܝܬ ܠܶܗ ܕܽܘܟܰܬ݀ ܨܶܨ̈ܶܐ ܘܠܽܘܟܳܝܬܳܐ: ܘܟܰܕ ܗܰܝܡܶܢ ܘܰܐܫ̣ܰܪ ܘܰܐܘܕܺܝ ܘܰܗ̣ܘܳܐ ܡܗܰܝܡܢܳܐ ܒܳܟ ܘܒܰܩܝܳܡܬܳܟ ܡܫܰܒܰܚܬܳܐ. ܒܗܳܢܳܐ ܪܰܡܫܳܐ ܕܚܰܕ ܒܫܰܒܳܐ ܬܡܺܝܢܳܝܳܐ ܘܩܰܕܡܳܝܳܐ ܕܰܩܝܳܡܬܳܟ ܡܫܰܒܰܚܬܳܐ: ܫܠܳܡܳܐ ܫܰܦܝܳܐ ܝܰܗ̣ܒܬ ܠܗܽܘܢ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ: ܘܶܐܡ̣ܰܪܬ ܠܗܽܘܢ ܕܝܶܗܒ̇ܶܬ ܠܟܽܘܢ ܚܰܝܠܐܴ ܕܰܬܕܽܘܫܽܘܢ ܚܘ̈ܰܘܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܐܴ ܕܰܒܥܶܠܕܒܳܒܳܐ. ܘܡܶܟܺܝܠ ܐܳܘ ܫܠܺܝ̣̈ܚܰܝ ܣܺܝܡܘ ܐܰܦܰܝ̈ܟܽܘܢ ܠܰܣܒܰܪܬܳܐ ܘܰܠܡܰܟܪܳܙܽܘ ܐܳܦ ܠܡܰܠܳܦܽܘ ܠܟܽܠܗܽܘܢ ܥܰܡ̈ܡܶܐ: ܘܰܠܡܰܥܡܳܕܽܘ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ. ܚܰܕ ܡܳܪܝܳܐ ܕܶܐܬܓܰܫܰܡ. ܚܰܕ ܐܠܰܗܳܐ ܕܶܐܬܒܰܪܢܰܫ: ܘܗ̣ܽܘ ܟܰܕ ܗ̣ܽܘ ܕܝܳܬܶܒ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ: ܘܡܶܬܓܰܝܶܐܐ ܥܰܠ ܓܺܝ̈ܓܠܐܷ ܕܚܺܝ̣̈ܠܳܬܳܐ: ܗ̣ܽܘ ܐܺܝܬܰܘܗܝ ܕܰܠܒ̣ܶܫ ܦܰܓܪܶܗ ܕܳܐܕܳܡ ܘܰܢܚ̣ܶܬ  ܒܰܒܥܳܬܶܗ: ܘܦܰܪܩܶܗ ܡ̣ܶܢ ܒܥܶܠܕܒܳܒܶܗ. ܘܳܐܬܶܐ ܠܚܰܪܬܶܗ ܕܥܳܠܡܳܐ ܘܰܡܢܰܚܶܡ ܠܶܗ: ܘܰܠܝܳܪܬܽܘܬܶܗ ܗ̇ܳܝ ܩܰܕܡܳܝܬܳܐ ܡܦܰܢܶܐ ܠܶܗ: ܘܰܒܛܽܘ̈ܒܶܐ ܪ̈ܓܺܝܓܶܐ ܕܡܰܠܟܽܘܬܶܗ ܘܰܡܒܰܣܶܡ ܠܶܗ. ܡܶܛܽܠ ܕܶܝܢ ܕܨܰܠܡܳܐ ܕܪܰܒܽܘܬܶܗ ܐܺܝܬܰܘܗܝ: ܘܥܰܠܗ̇ܳܝ ܚܳܢܶܗ ܘܦܰܪܩܶܗ: ܘܰܚܢܰܢ ܝܰܠܕܰܘ̈ܗܝ ܕܰܠܗܰܝܡܳܢܽܘܬܳܐ ܕܰܫܠܺܝ̈ܚܶܐ ܩܰܒܶܠܢܰܢ ܘܡ̣ܶܢ ܝܽܘܠܦܳܢܗܽܘܢ ܐܶܬܢܰܗܰܪܢܰܢ ܘܰܒܚܶܟܡܰܬܗܽܘܢ ܐܶܬܚܰܟܰܡܢܰܢ ܘܡܶܢܗܽܘܢ ܦܽܘܩܕܳܢ̈ܶܐ ܩܰܕܺܝ̈ܫܶܐ ܢܣܰܒܢܰܢ: ܘܰܣܒܰܪܬܳܐ ܕܚܰܝ̈ܶܐ ܒܺܐܝܕܰܝ̈ܗܽܘܢ ܐܶܬܝܰܗܒܰܬ݀ ܠܰܢ: ܘܡܰܠܟܽܘܬܳܐ ܕܰܫܡܰܝܳܐ ܐܰܘܪܶܬܘ ܠܰܢ: ܘܒܽܘ̈ܣܳܡܶܐ ܪ̈ܽܘܚܳܢܳܝܶܐ ܕܒܰܓܢܽܘܢܳܐ ܕܚܰܝ̈ܶܐ ܐܰܩܢܺܝܘ ܠܰܢ. ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܢܶܫܟܰܚ ܫܽܘܒܩܳܢܳܐ: ܘܰܒܒܳܥ̈ܘܳܬܗܽܘܢ ܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܒܰܦܝܳܣ̈ܳܬܗܽܘܢ ܢܶܬܬܢܺܝ̣̈ܚܳܢ ܪ̈ܽܘܚܳܬܗܽܘܢ ܕܥܰܢܺܝ̈ܕܰܝܢ ܘܢܶܫܬܰܒ̈ܩܳܢ ܣܰܟܠܘ̈ܳܬܰܢ: ܘܰܒܬܰܟ̈ܫܦܳܬܗܽܘܢ ܢܰܡܠܶܟ ܫܰܝܢܳܐ ܘܰܫܠܳܡܳܐ ܒܰܒܪܺܝܬܳܐ: ܘܢܶܬܦܰܨܽܘܢ ܦܰܓܪ̈ܶܐ ܘܢܰܦ̈ܫܳܬܳܐ ܘܪ̈ܽܘܚܳܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܰܕܪ̈ܰܒܳܢܰܝܢ ܕܰܫܟ̣ܶܒܘ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܘܒܰܬܪܺܝܨܽܘܬ ܫܽܘܒܚܳܐ ܘܰܡܣܰܟܶܝܢ ܠܓܶܠܝܳܢܳܟ ܕܡ̣ܶܢ ܫܡܰܝܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܦܺܝܪܡܳܐ ܕܚܽܘܣܳܝܳܐ ܡܫܺܝܚܳܐ ܕܶܐܬܬܠܺܝ ܥܰܠ ܩܰܝܣܳܐ ܕܰܨܠܺܝܒܳܐ ܘܰܗ̣ܘܳܐ ܕܶܒܚܳܐ ܚܠܳܦ ܟܽܠܰܢ: ܘܒܰܛܶܠ ܕܶܒ̈ܚܶܐ ܕܺܐܝܣܪܳܐܶܝܠ: ܘܢܳܚܰܬ݀ ܣܰܟܺܝܢܳܐ ܕܒܶܝܬ ܠܶܘܺܝ: ܘܒܶܛܠܰܬ݀ ܟܽܘܡܪܽܘܬܳܐ ܕܒܶܝܬ ܐܰܒܪܰܡ: ܘܣܰܒܪܳܐ ܘܒܽܘܝܳܐܳܐ ܐܰܩܢܺܝ ܠܰܦܪ̈ܺܝܩܶܐ. ܐܰܢ̱ܬ ܡܳܪܝ ܗܳܫܳܐ ܩܰܒܶܠ ܕܶܒܚܰܝ̈ܢ ܘܩܽܘܪ̈ܒܳܢܰܝܢ ܘܥܶܛܪ̈ܰܝܢ ܘܡܰܥܣܳܪ̈ܰܝܢ: ܘܰܥܒܶܕ ܪ̈ܰܚܡܶܐ ܕܛܰܝܒܽܘܬܳܟ ܥܰܠ ܟܽܠܰܢ: ܡܫܺܝܚܳܐ ܣܰܒܪܳܐ ܕܚܰܝܰܝ̈ܢ ܘܦܳܪܽܘܩܳܐ ܕܢܰܦ̈ܫܳܬܰܢ ܕܢܶܙܡܰܪ ܠܳܟ ܫܽܘܒܚܳܐ ܡ̣ܶܢ ܣܶܦ̈ܘܳܬܰܢ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܚܰܘܳܐ ܠܰܢ ܐܠܰܗܳܐ ܐܽܘܪܚܳܐ ܕܦܽܘܩܕ̈ܳܢܰܝܟ ܐܶܘܢܓܶܠܳܝ̈ܶܐ ܘܗܰܕܳܐ ܠܰܢ ܒܰܫܒܺܝ̈ܠܐܷ ܕܺܝܠܳܟ ܡܰܐܚܝ̈ܳܢܶܐ: ܘܕܰܒܰܪ ܠܰܢ ܒܚܰܝ̈ܶܐ ܠܐܴ ܥܕܺܝ̣̈ܠܐܷ ܘܚܰܕܳܐ ܠܰܢ ܒܰܓܢܽܘܢܳܟ ܕܠܐܴ ܥ̇ܳܒܰܪ: ܘܒܰܣܶܡ ܠܰܢ ܒܛܽܘ̈ܒܶܐ ܕܡܰܠܟܽܘܬܳܟ: ܘܰܐܫܪܳܐ ܠܰܢ ܒܰܣܡܳܟܳܟ ܕܰܡܠܐܷ ܓܶܐܘ̈ܳܬܳܐ: ܘܒܰܣܶܡ ܠܰܢ ܒܰܚܙܳܬܳܟ: ܕܢܰܣܶܩ ܠܳܟ ܫܽܘܒܚܳܐ ܒܡܶܐܬܺܝܬܳܟ: ܗ̇ܳܝ ܕܬܰܪܬܶܝܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܐܚܶܐ ܡܺܝ̈ܬܶܐ ܕܰܒܡܰܘܬܶܗ ܒܰܛܠܶܗ ܠܡܰܘܬܳܐ ܝܰܥܢܳܐ ܕܰܥܠܰܝܢ ܐܶܬܥܰܫܢ: ܠܗ̇ܰܘ ܦܳܪܽܘܩܳܐ ܕܒܰܕܒܺܝܚܽܘܬܶܗ ܕܰܚܠܳܦܰܝܢ ܚܰܣܺܝ ܠܟܽܠܗܽܘܢ ܝܰܠܕ̈ܰܘܗܝ ܕܳܐܕܳܡ ܠܗ̇ܰܘ ܒܽܘܝܳܐܳܐ ܕܰܟܡܺܝܪ̈ܶܐ ܘܢܽܘܚܳܡܳܐ ܕܰܫܟܺܝ̈ܒܶܐ: ܠܗ̇ܰܘ ܕܰܒܢܽܘܚܳܡܶܗ ܐܰܥܺܝܪ ܠܕܰܡ̈ܟܶܐ: ܘܒܰܩܝܳܡܬܶܗ ܚܰܕܺܝ ܘܰܐܦܨܰܚ ܠܰܟܡܺܝܪ̈ܶܐ: ܕܠܶܗ܀

 

ܣܕܪܐ

ܐܠܰܗܳܐ ܡܪܰܝܡܳܐ ܘܰܡܥܰܠܝܳܐ ܒܰܟܝܳܢܶܗ: ܒܪܳܐ ܡܶܠܬܳܐ ܘܺܝܚܺܝܕܳܝܳܐ ܕܡ̣ܶܢ ܐܠܰܗܳܐ ܐܰܒܳܐ ܠܚܽܘܕܳܝܳܐ ܨܡ̣ܰܚ. ܘܰܒܗܶܕܪ̈ܰܝ ܩܽܘܕ̈ܫܶܐ ܓܢܺܝ̈ܙܶܐ ܒܥܽܘܒܳܐ ܕܰܐܒܽܘܗܝ ܠܐܴ ܡܶܬܚܙܶܐ ܘܠܐܴ ܡܶܬܒܨܶܐ: ܘܠܐܴ ܡܶܬܕܰܪܰܫ ܘܠܐܴ ܡܶܬܡܰܠܰܠ. ܘܟܰܕ ܫܦ̣ܰܪ ܠܨܶܒܝܳܢܶܗ ܕܰܠܨܰܠܡܶܗ ܗ̇ܰܘ ܡܰܠܟܳܝܳܐ ܢܰܫܪܶܐ ܒܒܽܘܣܳܡܳܐ ܕܰܥܕܶܝܢ: ܐܶܬܳܐ ܠܘܳܬܰܢ ܐܰܝܟ ܕܰܨܒ̣ܳܐ ܘܰܢܚ̣ܶܬ ܠܐܱܪܥܳܐ ܟܽܘܒܳܢܳܝܬܳܐ ܨܶܝܕܰܝܢ ܘܰܠܒ̣ܶܫ ܦܰܓܪܳܐ ܕܺܝܠܰܢ ܕܰܡܠܐܷ ܗ̣ܘܳܐ ܫܽܘ̈ܡܳܬܳܐ ܘܟܽܠ ܡܽܘ̈ܡܺܝܢ ܘܒܶܗ ܣܰܝܒܰܪ ܟܽܠ ܐ̱ܢܳܫܳܝ̈ܳܬܳܐ ܡܶܛܽܠܳܬܰܢ ܘܶܐܬܗܰܦܰܟ ܥܰܡܰܢ ܐܰܟܘܳܬܰܢ ܐܰܝܢ ܐ̱ܢܳܫܳܐ: ܡܕܰܒܪܳܢܳܐܺܝܬ ܣܛܰܪ ܡ̣ܶܢ ܚܛܺܝܬܳܐ ܘܡܰܠܺܝ ܗ̣ܘܳܐ ܟܽܠܗܶܝܢ ܐ̱ܢܳܫܳܝ̈ܳܬܳܐ ܕܠܐܴ ܫܽܘܚܠܳܦܳܐ. ܢܚ̣ܶܬ ܠܒܶܝܬ ܡܺܝ̈ܬܶܐ ܘܶܐܬܡܢܺܝ ܥܰܡ ܥܰܢܺܝ̈ܕܶܐ ܘܰܐܟ̣ܪܶܙ ܚܰܝ̈ܶܐ ܚܰܕ̈ܬܶܐ ܘܢܽܘܚܳܡܳܐ ܠܰܩܒܺܝܪ̈ܶܐ ܕܰܒܗܳܡܳܢ: ܘܶܐܬܬܣܺܝܡ ܒܢܶܩܥܳܐ ܐܠܰܝܨܳܐ ܚܶܫܽܘܟܳܐ ܕܡܺܝ̈ܬܶܐ. ܘܪܰܣ̣ ܛܰܐܠܐܴ ܡܦܰܝܓܳܢܳܐ ܕܢܽܘܚܳܡܳܐ ܠܰܥܓܺܝ̣̈ܢܶܐ ܩܳܡ ܡ̣ܶܢ ܩܰܒܪܳܐ ܘܰܙܟ̣ܳܐ ܠܡܰܘܬܳܐ ܛܪܽܘܢܳܐ: ܘܕܳܫ ܠܣܳܛܳܢܳܐ: ܘܰܗܓܰܡ ܠܫܽܘܪ̈ܶܝܗ̇ ܥܰܫܺܝ̈ܢܶܐ ܕܰܫܝܽܘܠ: ܘܰܐܦ̣ܶܩ ܐܶܢܽܘܢ ܠܐܱܣܺܝܪ̈ܶܐ ܡ̣ܶܢ ܚܒܽܘܫܝܳܐ ܕܰܐܒܕܳܢܳܐ: ܘܰܐܡܠ̣ܶܟ ܚܰܝ̈ܶܐ ܘܚܰܕ̈ܘܳܬܳܐ ܘܣܰܒܪ̈ܳܬܳܐ ܛܳܒ̈ܳܬܳܐ ܠܢܰܦ̈ܫܳܬܳܐ ܕܪ̈ܰܡܝܳܢ ܗ̣ܘ̈ܰܝ ܒܚܶܙ̈ܶܐ ܥܰܡܺܝ̣̈ܩܶܐ ܕܰܫܝܽܘܠ: ܘܰܢ̣ܓܰܕ ܘܰܐܣ̣ܶܩ ܐܶܢܶܝܢ ܘܰܐܫܪܺܝ ܐܶܢܶܝܢ ܒܦܰܪܕܰܝܣܳܐ ܕܒܽܘ̈ܣܳܡܶܐ. ܠܐܴܕܳܡ ܗ̇ܰܘ ܨܰܠܡܳܐ ܦܰܐܝܳܐ ܕܰܐܠܳܗܽܘܬܶܗ ܘܰܠܚܰܘܳܐ ܗܳܝ ܕܦܺܐܪܳܐ ܩܳܛܽܘܠܐܴ ܠܐܴܕܳܡ ܐܰܘܫܛܰܬ݀ ܠܗܳܒܶܝܠ ܗ̇ܰܘ ܩܛܺܝܠܐܴ ܘܰܛܠܺܝܡܳܐ ܕܡ̣ܶܢ ܐܰܚܽܘܗܝ: ܠܫܺܝܬ ܘܰܐܢܽܘܫ ܗ̇ܳܢܽܘܢ ܕܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ ܒܳܥ̈ܘܳܬܳܐ ܘܩܽܘܪ̈ܒܳܢܶܐ ܠܐܱܠܳܗܳܐ ܚܠܳܦ ܐܰܒܽܘܢ ܐܳܕܳܡ ܡܰܣܩܺܝܢ ܗ̣ܘܰܘ: ܠܢܽܘܚ ܟܺܐܢܳܐ ܘܙܰܕܺܝܩܳܐ ܗ̇ܰܘ ܕܰܗ̣ܘܳܐ ܚܠܳܦܬܳܐ ܠܕܳܪ̈ܶܐ ܕܳܐܬܶܝܢ: ܠܐܱܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܘܰܠܡܰܠܟܺܝܙܕܶܩ ܟܽܘܡܪܳܐ ܕܪܰܒܽܘܬܳܟ: ܘܰܠܕܰܘܺܝܕ ܡܰܠܟܳܐ ܡܢܺܝܚܳܢܳܐ ܕܡܳܪܽܘܬܳܟ: ܘܰܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܰܐܒܳܗ̈ܳܬܳܐ ܘܰܢܒܺܝ̈ܶܐ ܕܠܳܟ ܡܣܰܟܶܝܢ ܗ̣ܘܰܘ ܡ̣ܶܢ ܢܽܘܓܪܳܐ ܪܰܒܳܐ ܠܳܟ ܚܳܝܪܺܝܢ ܗ̣ܘܰܘ. ܘܒܳܬܰܪ ܩܝܳܡܬܳܟ ܡܫܰܒܰܚܬܳܐ ܐܰܕܢܰܚ̣ܬ ܙܰܗܪܳܐ ܕܢܽܘܗܪܳܟ ܥܰܠ ܓܰܪ̈ܡܰܝܗܽܘܢ ܘܰܐܦ̣ܨܰܚܬ ܐܶܢܽܘܢ: ܣܠ̣ܶܩܬ ܠܰܫܡܰܝܳܐ ܒܙܰܘܚܳܐ ܕܙܳܟܽܘܬܳܐ ܘܩܳܠܐܴ ܕܩܰܪ̈ܢܳܬܳܐ ܕܡܰܠܐܱܟ̈ܶܐ ܘܝܽܘ̈ܒܳܒܶܐ ܣܰܓܺܝ̈ܶܐܐ ܕܥܺܝܪ̈ܰܝ ܪܰܘܡܳܐ ܕܡܰܙܥܩܺܝܢ ܗ̣ܘܰܘ ܠܘܳܬ ܚܕ̈ܳܕܶܐ ܟܰܕ ܐܳܡܪܺܝܢ ܕܰܐܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ ܕܡܰܠܟܳܐ ܕܺܐܝܩܳܪ̈ܶܐ ܒܟܽܘܢ ܥܬܺܝܕ ܕܢܶܥܽܘܠ: ܘܰܡܦܰܢܶܝܢ ܕܶܝܢ ܟܶܢ̈ܫܶܐ ܥܶܠܳܝ̈ܶܐ ܠܰܚܕ̈ܳܕܶܐ ܟܰܕ ܐܳܡܪܺܝܢ: ܕܡܰܢܽܘ ܗܳܢܳܐ ܡܰܠܟܳܐ ܕܺܐܝܩܳܪ̈ܶܐ ܗܳܫܳܐ ܕܳܐܡܪܺܝܢ ܐܢ̱ܬܽܘܢ ܕܰܒܬܶܫܒܽܘܚܬܳܐ ܐܬܶܐܳ: ܐܶܡ̣ܰܪܘ ܠܰܢ ܐܰܝܟܰܘ ܘܒܰܐܝܢܳܐ ܐܰܬܪܳܐ ܐܺܝܬܰܘܗܝ ܗ̣ܘܳܐ. ܘܰܥܢ̣ܰܘ ܘܳܐܡܪܺܝܢ ܒܰܐܬܪܳܐ ܕܰܒܢܰܝ̈ܢܳܫܳܐ ܡܶܬܗܰܦܰܟ ܗ̣ܘܳܐ: ܘܰܠܘܳܬ ܫܝܽܘܠ ܕܡܺܝ̈ܬܶܐ ܒܨܶܒܝܳܢܶܗ ܢܚ̣ܶܬ ܗ̣ܘܳܐ: ܘܓܳܠܽܘܬܳܐ ܪܰܒܬܳܐ ܐܰܥܕܺܝ ܗ̣ܘܳܐ ܡ̣ܶܢ ܐܺܝܕܳܐ ܕܰܒܥܶܠܕ̈ܒܳܒܰܘܗܝ: ܘܰܫܒܺܝܬܳܐ ܕܺܝܠܶܗ ܦ̣ܪܰܩ ܘܰܐܝܬܺܝ ܡ̣ܶܢ ܒܶܝܬ ܫܶܢ̈ܶܐ ܕܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܕܡ̣ܶܢ ܢܽܘܓܪܳܐ ܫܰܒܳܝܳܐ ܗܘܳܬ݀: ܘܒܰܩܛܺܝܪܳܐ ܪܰܒܳܐ ܒܚܶܫܽܘܟܳܐ ܕܛܽܘܥܝܰܝ ܝܳܬܒܳܐ ܗܘܳܬ݀: ܘܰܩܥ̣ܰܘ ܟܽܠܗܽܘܢ ܬܶܐܓ̈ܡܶܐ ܘܟܽܠܗܶܝܢ ܐܰܪ̈ܟܰܐܣ ܥܶܠܳܝ̈ܳܬܳܐ ܕܰܒܪܺܝܟܳܐ ܗ̱̇ܝ ܡܶܐܬܺܝܬܳܟ ܡܰܠܟܳܐ ܪܰܒܳܐ ܕܰܗܦܰܟ ܒܙܳܟܽܘܬܳܐ: ܒܪܺܝܟܳܐ ܗ̱ܝ ܙܳܟܽܘܬܳܟ ܕܬܶܒܪܰܬ݀ ܢܺܝܪܶܗ ܕܡܳܪܽܘܕܳܐ: ܒܪܺܝܟܳܐ ܗ̱̇ܝ ܡܰܥܠܬܳܟ ܕܠܰܩܕܽܘܫܩܽܘܕ̈ܫܺܝܢ ܕܺܐܝܩܳܪܳܟ ܡܳܪܝܳܐ ܓܰܐܝܳܐ ܘܓܰܢ̱ܒܳܪܳܐ ܥܰܫܺܝܢܳܐ ܘܰܩܪܰܒܬܳܢܳܐ: ܒܪܺܝܟ ܗ̣ܽܘ ܡܰܘܬܒܳܟ ܕܡ̣ܶܢ ܝܰܡܺܝܢ ܐܰܒܳܐ ܫܳܠܽܘܚܳܟ: ܘܡܶܛܽܠܗܳܕܶܐ ܟܽܠܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܦܪ̈ܺܝܩܰܝ ܒܚܰܫ̈ܶܐ ܕܰܨܠܺܝܒܽܘܬܳܟ ܘܰܡܚܰܪܪ̈ܰܝ ܡ̣ܶܢ ܡܺܝܬܽܘܬܳܐ ܕܡܰܘܬܳܟ. ܣܳܓܕܺܝܢܰܢ ܘܰܡܫܰܒܚܺܝܢܰܢ ܟܰܕ ܡܰܘܕܶܝܢܰܢ ܠܳܟ ܕܰܐܣܓܺܝܬ ܥܽܘܕܪ̈ܳܢܰܝܟ ܘܛܰܝܒܽܘܬܳܟ ܠܘܳܬܰܢ ܘܡܰܠܺܝܬ ܟܽܠܗܶܝܢ ܚܰܣܺܝܪ̈ܳܬܰܢ ܠܐܴ ܬܰܗܦܶܟ ܐܰܦܰܝ̈ܟ ܡܶܢܰܢ. ܐܶܠܐܴ ܥܢܺܝ ܠܚܰܛܳܝܽܘܬܰܢ ܘܩܰܒܶܠ ܬܶܫܡ̈ܫܳܬܰܢ: ܘܶܐܬܪܰܥܳܐ ܒܒܳܥ̈ܘܳܬܰܢ ܘܰܦܬܰܚ ܬܰܪܥܳܐ ܕܪ̈ܰܚܡܰܝܟ ܠܰܨܠܰܘ̈ܳܬܰܢ ܘܰܐܥܒ̣ܰܪ ܡܶܢܰܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ. ܘܚܰܣܳܐ ܠܰܢ ܚܰܘ̈ܒܳܬܰܢ ܘܰܫܒܽܘܩ ܣܰܟܠܘ̈ܳܬܰܢ: ܘܩܰܝܶܡ ܠܥܺܕܬܳܐ ܡܗܰܝܡܰܢܬܳܐ ܥܰܠ ܕܽܘܡ̈ܣܶܐ ܠܐܴ ܡܶܙܕܰܥܙ̈ܥܳܢܶܐ ܕܗܰܝܡܳܢܽܘܬܳܐ ܬܪܺܝܨܬܳܐ: ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܐ ܫܰܪܺܝܪܳܐ ܕܰܩܝܳܡܬܳܟ ܡܰܐܚܝܳܢܺܝܬܳܐ ܘܰܡܣܰܟܶܢ ܠܪ̈ܰܚܡܶܐ ܫܦܺܝ̣̈ܥܶܐ ܕܒܰܣܺܝܡܽܘܬܳܟ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܳܪܳܐ ܛܳܒܳܐ ܘܰܡܪܰܚܡܳܢܳܐ ܕܒܰܣܺܝܡܽܘܬܶܗ ܠܰܨܠܺܝܒܳܐ ܥܶܠܺܝܬܶܗ: ܘܛܳܒܽܘܬܶܗ ܠܚܰܫܳܐ ܘܰܠܚܶܣܕܳܐ ܘܫܽܘܩ̈ܳܦܶܐ ܘܰܙܩܺܝܦܳܐ ܡܰܢܰܥܬܶܗ. ܠܗ̇ܰܘ ܒܰܣܺܝܡܳܐ ܕܰܡܪܰܚܡܳܢܽܘܬܶܗ ܒܓܰܘ ܩܰܒܪܳܐ ܚܒܰܫ̣ܬܶܗ: ܘܫܽܘܠܛܳܢܶܗ ܥܰܡ ܡܰܘܬܳܐ ܥܰܪܙܠܶܗ: ܘܬܽܘܩܦܶܗ ܥܰܫܺܝܢܳܐ ܡܶܢ ܩܰܒܪܳܐ ܐܰܩܺܝܡܶܗ: ܘܰܕܪܳܥܶܗ ܩܰܕܺܝܫܳܐ ܒܙܳܟܽܘܬܳܐ ܪܰܡܪܡܶܗ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܠܳܟ ܐܠܰܗܳܐ ܡܶܠܬܳܐ ܕܡ̣ܶܢ ܐܰܒܳܐ ܡܩܰܕܡܺܝܢܰܢ ܘܟܰܕ ܣܳܓܕܺܝܢܰܢ ܘܡܰܘܕܶܝܢܰܢ: ܘܰܠܒܽܘܪܫܳܢܳܟ ܗ̇ܰܘ ܬܡܺܝܗܳܐ ܕܡ̣ܶܢ ܒܬܽܘܠܬܳܐ ܘܰܠܥܶܠ ܡ̣ܶܢ ܡܶܠܬܳܐ ܡܩܰܠܣܺܝܢܰܢ ܘܰܡܪܰܡܪܡܺܝܢܰܢ. ܘܠܺܝܠܺܝܕܽܘܬܳܟ ܗ̇ܳܝ ܐ̱ܢܳܫܳܝܬܳܐ ܕܡ̣ܶܢ ܒܰܪܬ݀ ܕܰܘܺܝܕ ܚ̇ܳܙܶܝܢܰܢ: ܘܟܰܕ ܓܶܝܪ ܒܡܽܘܟܳܟܳܟ ܕܠܐܴ ܣܳܟܳܐ: ܘܟܽܘܪܳܟܳܟ ܕܰܒܥܰܙܪܽܘܪ̈ܶܐ ܡܶܬܕܰܡܪܺܝܢܰܢ ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܥܰܠ ܐܰܦ̈ܰܝ ܗܳܠܶܝܢ ܟܽܠܗܶܝܢ ܡܰܣܩܺܝܢܰܢ: ܕܟܰܕ ܐܺܝܬܰܝܟ ܡܰܠܝܳܐ ܘܰܡܫܰܡܠܝܳܐ ܟܽܠܳܗ̇ ܡܕܰܒܪܳܢܽܘܬܳܟ: ܘܰܣܢܺܝܩܳܐ ܐܰܟܘܳܬܰܢ ܥܒ̣ܰܕܬ ܘܰܓܡ̣ܰܪܬ ܘܫܰܡܠܺܝܬ: ܐܰܢ̱ܬ ܕܺܐܝܬܰܝܟ ܠܐܴ ܣܢܺܝܩܳܐ ܘܠܐܴ ܚܰܣܺܝܪܳܐ: ܘܰܠܟܽܠ ܡ̇ܳܠܐܷ ܐܰܢ̱ܬ ܡ̣ܶܢ ܛܰܝܒ̈ܘܳܬܳܟ: ܘܟܽܠܳܗ̇ ܒܪܺܝܬܳܐ ܡܰܠܝܳܐ ܡܶܢܳܟ: ܘܠܐܴ ܡܣܰܝܟܳܐ ܠܳܟ ܫܡܰܝܳܐ ܘܰܐܪܥܳܐ ܘܰܙܥܽܘܪ̈ܺܝܢ ܠܳܟ: ܘܩܰܒܪܳܐ ܙܥܽܘܪܳܐ ܐܰܚ̣ܕܳܟ ܐܰܝܟ ܕܰܫܦ̣ܰܪ ܠܳܟ: ܘܟܽܠܗܶܝܢ ܐ̱ܢܳܫܳܝ̈ܳܬܳܐ ܕܺܝܠܰܢ ܫܰܡܠܺܝܬ ܣܛܰܪ ܡ̣ܶܢ ܚܛܺܝܬܳܐ ܒܰܠܚܽܘܕ. ܘܰܐܝܬܺܝܬ ܠܰܢ ܡ̣ܶܢ ܠܘܳܬ ܐܰܒܽܘܟ ܥܽܘܬܪ̈ܶܐ ܟܣܰܝ̈ܳܐ: ܘܟܽܠ ܡܰܘܗ̈ܒܳܬܳܐ ܫܦܺܝ̣̈ܥܳܬܳܐ ܘܠܐܴ ܡܶܬܕܰܪ̈ܟܳܢܳܝܳܬܳܐ ܘܦܰܪܢܶܣ̣ܬ ܐܶܢܽܘܢ ܠܥܽܘܕܪ̈ܳܢܰܝܟ ܐܽܘܣܝ̈ܳܝܶܐ ܠܰܡܚܺܝܠܽܘܬܰܢ ܘܡܰܓܳܢ ܐܰܣܺܝܬ ܘܰܐܚܠ̣ܶܡܬ ܠܟܺܐܒܰܝ̈ܢ ܘܟܽܘܪ̈ܗܳܢܰܝܢ ܛܥܶܢܬ ܘܥܰܡܳܟ ܠܪܺܝܫܶܗ ܕܰܨܠܺܝܒܳܐ ܐܰܣܶܩ̣ܬ ܐܶܢܽܘܢ ܘܰܚܛܺܝܬܳܐ ܕܺܝܠܰܢ ܐܰܫܺܝܓܬ. ܘܡܽܘ̈ܡܰܝܢ ܡܪܰܩ̣ܬ: ܘܟܽܠܶܗ ܥܰܘܠܐܴ ܣܰܪܝܳܐ ܕܰܒܢܰܦ̈ܫܳܬܰܢ ܐܰܣܺܝܢ ܗ̣ܘܳܐ ܘܚܰܠܺܝܬ: ܠܰܚܪܳܝܰܬ݀ ܕܶܝܢ ܟܰܕ ܐܶܬܬܠܺܝܬ ܥܰܠ ܩܰܝܣܳܐ ܕܚܶܣܕܳܐ ܘܰܐܫܺܝܓܬ ܠܫܽܘܪܰܥܬܰܢ ܩܰܕܡܳܝܬܳܐ: ܗ̇ܳܝ ܕܒܰܥܒ̇ܳܪ ܦܽܘܩܕܳܢܳܐ ܐܶܬܬܰܓܰܪܢܰܢ ܠܰܢ: ܘܡܶܛܽܠܗܳܕܶܐ ܣܳܓܕܺܝܢܰܢ: ܠܶܗ ܠܡܽܘܟܳܟܳܟ ܕܰܚܠܳܦܰܝܢ ܚܰܢܳܢܳܐ ܕܦܰܪܩܰܢ ܒܰܩܝܳܡܬܶܗ ܘܢܽܘܚܳܡܗ ܘܒܰܡܕܰܒܪܳܢܽܘܬܶܗ ܘܰܥ̣ܛܳܐ ܠܰܒܥܶܠܕ̈ܒܳܒܰܝܢ ܘܰܐܒ̣ܗܶܬ ܐܶܢܽܘܢ ܚܶܣܕܳܐ ܘܰܩܠܳܠܐܴ ܥܒ̣ܰܕ ܐܶܢܽܘܢ: ܘܬܰܒܰܪ ܪ̈ܺܝܫܰܝܗܽܘܢ ܕܬܢܺܝ̣̈ܢܶܐ ܥܰܠ ܡܰܝ̈ܳܐ: ܘܰܐܢ̱ܬ ܫܚ̣ܰܩܬ ܠܠܶܘܺܝܬܳܢ ܛܰܪܟܳܢܳܐ ܘܰܥܩܰܠܩܠܐܴ ܗ̇ܰܘ ܣܰܓܺܝ ܪ̈ܺܝܫܶܐ ܘܰܥܒ̣ܰܕܬܳܝܗܝ ܕܝ̇ܳܫܳܐ ܠܰܡܗܰܝ̈ܡܢܶܐ ܕܰܦ̣ܪܰܩܬ ܐܶܢܽܘܢ ܒܩܶܛܠܳܟ: ܘܰܐܚܺܝܬ ܒܡܽܘܟܳܟܳܟ ܘܰܒܡܰܘܬܳܟ ܘܢܰܚܶܡ̣ܬ ܒܢܽܘܚܳܡܳܟ ܘܒܰܣܶܡ̣ܬ ܒܚܰܫ̈ܶܐ ܕܰܙܩܺܝܦܽܘܬܳܟ. ܡܶܛܽܠ ܗܳܕܶܐ ܡܰܘܕܶܝܢܰܢ ܠܳܗ̇ ܠܰܩܝܳܡܬܳܟ: ܡܳܪܝܳܐ ܡܳܪܰܢ ܡܳܐ ܡܫܰܒܰܚ ܫܡܳܟ ܒܟܽܠܳܗ̇ ܐܰܪܥܳܐ: ܕܝܰܗ̣ܒܬ ܫܽܘܒܚܳܟ ܥܰܠ ܫܡܰܝܳܐ: ܘܫܽܘܒܚܳܐ ܘܺܐܝܩܳܪܳܐ ܐܰܥܛܶܦܬܳܝܗܝ ܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܒܰܥܒܳܕܳܐ ܕܺܐܝ̈ܕܰܝܟ ܐܰܫܠܶܛܬܳܝܗܝ. ܘܟܽܠ ܣܳܡ̣ܬ ܬܚܶܝܬ ܪ̈ܶܓܠܰܘܗܝ ܥܳܢ̈ܳܐ ܘܒܰܩܪ̈ܶܐ ܟܽܠܗܶܝܢ. ܡܰܠܐܱܟ̈ܶܐ ܘܰܒܢܰܝ̈ܢܳܫܳܐ ܘܪ̈ܰܚܫܳܐ ܕܰܐܪܥܳܐ ܗܳܢܰܘ ܕܶܝܢ ܓܶܢܣܳܐ ܕܫܺܐܕ̈ܶܐ ܡܳܪ̈ܽܘܕܶܐ ܕܣܳܥܶܝܢ ܥܰܠ ܒܢܰܝ̈ܢܳܫܳܐ ܒܝܰܡܳܐ ܘܰܒܝܰܒܫܳܐ. ܘܡܶܛܽܠܗܳܕܶܐ ܡܫܰܒܚܺܝܢܰܢ ܠܳܟ ܐܳܘ ܡܳܪܳܐ ܕܟܽܠܐܴ ܕܰܦ̣ܪܰܩܬܳܢܝ ܡ̣ܶܢ ܬܚܶܝܬ ܫܽܘܥܒܳܕܗܽܘܢ: ܘܦܰܨܺܝܬܳܢܝ ܡ̣ܶܢ ܫܽܘܠܛܳܢܗܽܘܢ: ܘܒܰܩܝܳܡܬܳܐ ܕܺܝܠܳܟ ܝܰܗ̣ܒܬ ܠܰܢ ܫܽܘܠܛܳܢܳܐ ܕܢܶܫܚܽܘܩ ܪ̈ܺܝܫܰܝܗܽܘܢ ܒܗ̇ܳܝ ܕܠܳܟ ܢܶܕܰܥ ܘܒܳܟ ܢܗܰܝܡܶܢ ܕܰܐܢ̱ܬ ܗ̣ܽܘ ܐܠܰܗܳܐ ܒܰܠܚܽܘܕܰܝܟ ܫܰܪܺܝܪܳܐܺܝܬ ܕܩܳܡ̣ܬ ܡ̣ܶܢ ܩܰܒܪܳܐ ܓܰܢ̱ܒܳܪܳܐܺܝܬ ܘܰܐܩܺܝܡܬ ܠܰܢ ܥܰܡܳܟ ܒܫܽܘܒܚܳܐ ܡܪܰܡܪܡܳܐܺܝܬ. ܘܡܺܝ̈ܬܶܐ ܥܓܺܝ̣̈ܢܶܐ ܣܘܰܚ̣ܘ ܠܐܘܪܥܳܟ ܥܰܠ ܥܰܦܪܳܗ̇ ܕܰܫܝܽܘܠ ܚܳܕܝܳܐܺܝܬ: ܘܰܐܣ̣ܶܩܘ ܠܳܟ ܫܽܘܒܚܳܐ ܘܬܰܘܕܺܝܬܳܐ ܦܨܺܝܚܳܐܺܝܬ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܫܰܘܝܳܐܺܝܬ: ܗܳܫܳܐ܀

ܨܠܘܬܐ ܕܨܦܪܐ

 

ܗܰܕܳܐ ܠܰܢ ܡܳܪܝ ܒܰܫܒܺܝܠ ܚܰܝ̈ܶܐ ܕܥܰܡ ܐܶܡܪ̈ܰܝܟ ܢܶܪܕܶܐ ܒܽܐܘܪܚܳܐ ܕܦܽܘܩ̈ܕܳܢܰܝܟ ܘܰܐܥܶܠ ܘܰܚܠܽܘܛ ܠܰܢ ܒܰܛܝܳܪܳܐ ܕܒܶܗ ܢܛܺܝܪܺܝܢ ܥܶܪ̈ܒܰܝܟ: ܘܫܰܘܙܶܒ ܠܰܢ ܡ̣ܶܢ ܕܺܐܒ̈ܶܐ ܡܶܬܝܰܕ̈ܥܳܢܶܐ ܕܰܠܗܺܝܩܺܝܢ ܕܰܢܒܰܣܒܣܽܘܢ ܠܐܷܡܪ̈ܰܝܟ ܘܠܰܢ̈ܩܰܘܳܬܳܟ ܘܚܰܒܰܪ ܠܰܢ ܥܰܡ ܚܕܽܘ̈ܓܰܝܟ ܘܰܐܓܢ̣ܳܐ ܠܰܢ ܥܰܠ ܦܳܬܽܘܪܳܟ ܘܰܐܫܩܳܐ ܠܰܢ ܫܶܩܝܳܐ ܕܚܰܝ̈ܶܐ ܡܶܢ ܕܰܦܢܳܟ: ܕܢܰܣܶܩ ܠܳܟ ܫܽܘܒܚܳܐ ܥܰܡ ܩܰܕܺܝ̈ܫܰܝܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ ܠܚܰܕ ܐܰܒܳܐ ܩܰܕܺܝܫܳܐ ܝܳܠܽܘܕܳܐ ܕܰܒܪܳܐ ܩܰܕܺܝܫܳܐ: ܠܚܰܕ ܒܪܳܐ ܩܰܕܺܝܫܳܐ ܝ̣ܺܠܺܝܕܳܐ ܘܠܐܴ ܝܳܠܽܘܕܳܐ ܕܶܐܬܺܝܠܶܕ ܒܚܰܪܰܬ݀ ܙܰܒܢ̈ܶܐ ܡ̣ܶܢ ܒܰܪܬ݀ ܕܰܘܺܝܕ. ܠܚܰܕ ܪܽܘܚܳܐ ܩܰܕܺܝܫܳܐ ܕܰܕܠܐܴ ܪܺܝܫܳܐ ܘܪܺܝܫܳܐ ܕܢܳܦ̇ܶܩ ܡ̣ܶܢ ܐܰܒܳܐ ܘܢܳܣ̇ܶܒ ܡ̣ܶܢ ܒܪܳܐ: ܘܝܳܗܽܘܒܳܐ ܘܰܡܫܰܡܠܝܳܢܳܐ ܕܫܽܘ̈ܟܳܢܶܐ ܐܠܰܗܳܝ̈ܶܐ ܠܥܰܒ̣ܕ̈ܰܘܗܝ. ܘܺܐܝܬܰܝܗܽܘܢ ܚܰܕ ܐܠܰܗܳܐ ܫܰܪܺܝܪܳܐ: ܚܰܕ ܚܰܝܠܐܴ: ܚܰܕ ܫܽܘܠܛܳܢܳܐ: ܚܕܳܐ ܐܽܘܣܺܝܰܐ: ܘܰܚܕܳܐ ܡܰܥܒܕܳܢܽܘܬܳܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܡ̣ܶܢ ܒܶܪ̈ܝܳܬܶܗ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܗ̇ܰܘ ܕܰܠܥܳܠܰܡ ܐܺܝܬܰܝܟ ܘܠܐܴ ܡܶܣܬܰܝܟܰܬ ܘܠܐܴ ܡܶܬܕܰܪܟܰܬ: ܘܰܠܕܳܪܕܳܪ̈ܺܝܢ ܡܟܰܬܰܪ ܐܰܢ̱ܬ: ܗ̇ܰܘ ܕܰܩܢܶܐ ܐܰܢ̱ܬ ܠܚܽܘܕܳܝܽܘܬܳܐ ܥܰܡ ܐܰܒܽܘܟ ܒܰܡܬܽܘܡܳܝܽܘܬܳܐ ܘܠܐܴ ܫܽܘܪܳܝܳܐ ܐܳܦܠܐܴ ܫܽܘܠܳܡܳܐ ܡܶܫܟܰܚ ܚܳܒ̇ܶܫ ܠܳܟ. ܗ̇ܰܘ ܕܟܰܕ ܠܐܴ ܫܶܦܪܰܬ݀ ܗܘܳܬ݀ ܠܛܳܒܽܘܬܳܟ ܕܰܐܢ̱ܬ ܒܰܠܚܽܘܕܰܝܟ ܬܶܬܒܰܣܰܡ ܐܰܢ̱ܬ ܒܬܶܐܘܳܪܺܝܰܐ ܕܫܽܘܒܚܳܟ ܐܶܠܐܴ ܐܰܨܡܰܚ̣ܬ ܠܰܒܪܳܟ ܝܺܚܺܝܕܳܝܳܐ ܡܶܠܬܳܐ ܚܰܝܬܳܐ ܕܡ̣ܶܢ ܥܽܘܒܳܟ ܘܪܽܘܚܳܟ ܩܰܕܺܝܫܳܐ: ܘܰܒ̣ܪܰܝܬ ܠܟܶܢ̈ܫܶܐ ܘܰܠܛܶܟ̈ܣܶܐ: ܘܬܶܐܓ̈ܡܶܐ ܘܓܽܘ̈ܕܶܐ ܕܡܰܠܐܱܟ̈ܶܐ ܘܰܐܪ̈ܟܰܐܣ ܘܫܽܘܠܛܳܢ̈ܶܐ ܘܠܶܓܝܽܘ̈ܢܶܐ ܕܢܽܘܪܳܐ ܝܳܩܕܬܳܐ. ܠܬܶܫܒܽܘܚܬܳܐ ܠܐܴ ܡܶܬܡܰܠܠܳܢܺܝܬܳܐ ܕܺܐܝܩܳܪܳܟ ܐܰܩܝ̣ܺܡܬ ܐܶܢܽܘܢ: ܘܰܠܫܽܘܒܚܳܟ ܛܰܟܶܣ̣ܬ ܐܶܢܽܘܢ: ܒܰܐܬܪ̈ܰܘܳܬܳܐ ܡܫܰܚܠܦ̈ܳܬܳܐ ܘܰܓܢܺܝ̣̈ܙܳܬܳܐ ܙܓܰܪܬ ܐܶܢܽܘܢ: ܘܝܰܗ̣ܒܬ ܒܦܽܘܡܰܝ̈ܗܽܘܢ ܬܶܫܒܽܘܚܬܳܐ ܠܐܴ ܡܶܫܬܰܬܩܳܢܺܝܬܳܐ. ܡܶܢܗܽܘܢ ܕܶܝܢ ܡܫܰܒܚܺܝܢ ܘܰܡܗܰܠܠܺܝܢ ܡܶܢܗܽܘܢ ܕܶܝܢ ܡܒܰܪܟܺܝܢ ܘܰܡܩܰܕܫܺܝܢ ܡܶܢܗܽܘܢ ܕܶܝܢ ܙܳܡܪܺܝܢ ܫܽܘܒܚܳܐ ܕܠܐܴ ܫܶܠܝܳܐ ܒܩܺܝ̣̈ܢܳܬܳܐ ܡܨ̈ܰܠܠܳܬܳܐ ܘܢܶܥ̈ܡܳܬܳܐ ܚܰܠܝ̈ܳܬܳܐ ܘܒܰܣܺܝ̈ܡܳܬܳܐ ܟܰܕ ܠܰܓܢܺܝܙܽܘܬܳܟ ܠܐܴ ܡܶܬܕܰܪܟܳܢܺܝܬܳܐ ܠܐܴ ܝܳܕܥܺܝܢ ܐܰܝܟܳܐ ܫܰܪܝܳܐ: ܡܶܢܗܽܘܢ ܕܶܝܢ ܬܚܶܝܬ  ܡܰܪܟܰܒܬܳܐ ܟܕܺܝܢܺܝܢ ܘܰܠܚܰܝܠܐܴ ܕܰܛܥܺܝܢ ܠܗܽܘܢ ܛܥܺܝܢܺܝܢ: ܘܡܰܒܥܰܕ ܡܶܢܗܽܘܢ ܘܠܐܴ ܚܳܙܶܝܢ ܠܶܗ. ܡܶܢܗܽܘܢ ܕܶܝܢ ܩܰܕܺܝܫ ܩܰܕܺܝܫ ܩܳܥܶܝܢ ܠܶܗ: ܘܰܐܦܰܝ̈ܗܽܘܢ ܡܚܰܦܶܝܢ ܕܠܐܴ ܢܚܽܘܪܽܘܢ ܒܶܗ: ܡܶܢܗܽܘܢ ܕܶܝܢ ܪ̈ܶܓܠܰܝܗܽܘܢ ܡܟܰܣܶܝܢ ܕܠܐܴ ܢܺܐܩܕܽܘܢ ܡ̣ܶܢ ܓܰܘܙܰܠܬܶܗ. ܡܶܢܗܽܘܢ ܕܶܝܢ ܒܰܦܪ̈ܳܚܰܝܗܽܘܢ ܛܳܝܣܺܝܢ ܟܰܕ ܩܰܠܺܝܠ: ܘܙܳܡܪܺܝܢ ܫܽܘܒܚܳܐ ܠܪܰܒܽܘܬܳܟ: ܟܰܕ ܠܐܱܬܪܳܐ ܕܰܫܟܺܝܢܬܳܟ ܠܐܴ ܝܳܕܥܺܝܢ ܐܰܝܟܳܐ ܐܺܝܬܶܝܗ̇: ܘܰܒܗܳܢܳܐ ܕܽܘܒܳܪܳܐ ܣܰܓܺܝ ܐܰܡܺܝܢܺܝܢ ܘܝܰܨܺܝܦܺܝܢ: ܘܠܐܴ ܢܳܝܚܺܝܢ ܘܠܐܴ ܒܳܛܠܺܝܢ: ܘܒܳܬܰܪܟܶܢ ܠܨܰܠܡܳܐ ܦܰܐܝܳܐ ܕܰܐܠܳܗܽܘܬܳܟ ܒ̣ܪܰܝܬ ܘܰܐܬܩܶܢ̣ܬ. ܘܡܶܕܪܳܐ ܗ̇ܰܘ ܟܶܬܳܢܳܝܳܐ ܡ̣ܶܢ ܡܶܨܥܰܬ݀ ܐܳܕܰܡܬܳܐ ܥܰܠ ܐܺܝ̈ܕܰܝܟ ܩܰܕܺܝ̈ܫܳܬܳܐ ܫܩ̣ܰܠܬ ܘܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܪܰܟܶܒ̣ܬܳܝܗܝ ܘܳܐܕܳܡ ܫܰܡ̣ܰܗܬ ܘܟܰܢܺܝܬܳܝܗܝ. ܘܓܰܢܬܳܐ ܕܒܽܘ̈ܣܳܡܶܐ ܡܦܰܬܟܰܬ݀ ܒܺܐܝܠܳܢ̈ܶܐ ܦܰܪ̈ܕܰܝܣܳܢܳܝܶܐ ܣܰܪ̈ܥܺܝܦܳܝܳܬܳܐ ܗܕܺܝܪ̈ܳܬܳܐ ܠܶܗ ܢܨܰܒ̣ܬ: ܘܰܐܝܟ ܡܰܠܟܳܐ ܒܓܰܘ ܩܰܝܛܽܘܢܳܐ ܠܶܗ ܨܰܒ̣ܶܬܬ ܘܟܰܠ̣ܶܠܬ. ܘܰܐܝܟ ܒܪܳܐ ܚܰܒܺܝܒܳܐ ܠܶܗ ܩܢ̣ܰܝܬ. ܘܰܒܝܰܕ ܡܶܠܟܳܐ ܒܺܝܫܳܐ ܕܰܐܢ̱ܬܬܳܐ ܩܳܛܽܘܠܬܳܐ ܫܡ̣ܰܥ ܘܶܐܟ̣ܰܠ ܘܶܐܒܰܕ: ܫܽܘܒܚܶܗ ܫܠܰܚ ܘܝܳܐܝܽܘܬܶܗ ܐܰܚܡܺܝ ܘܡ̣ܶܢ ܝܳܪܬܽܘܬܶܗ ܐܶܬܛܪܶܕ ܠܐܱܪܥܳܐ ܕܠܰܘ̈ܛܳܬܳܐ ܘܡܺܝܬ ܡܰܘܬܳܐ ܡܰܪܺܝܪܳܐ ܥܰܡ ܟܽܠܗܽܘܢ ܝܰܠܕ̈ܰܘܗܝ ܐܰܢ̱ܬ ܕܶܝܢ ܡܳܪܳܐ ܪܰܚܡܳܢܳܐ ܠܐܴ ܐܰܗܡܺܝܬ ܡ̣ܶܢ ܨܰܠܡܳܟ ܕܢܺܐܒܰܕ ܘܠܐܴ ܫܒ̣ܰܩܬܳܝܗܝ ܕܢܶܫܪܰܟ ܠܰܚܒܳܠܐܴ: ܘܠܐܴ ܢܦ̣ܰܠ ܒܰܐܒܕܳܢܳܐ ܐܶܠܐܴ ܫܰܕܰܪܬ ܩܕܳܡܰܝܟ ܠܰܢܒܺܝ̈ܶܐ ܒܛܽܘܦ̈ܣܶܐ ܘܦ̈ܶܠܐܴܬܳܐ ܕܰܙܢܺܝ̈ܢ ܙܢܺܝ̈ܢ ܕܢܰܪܬܽܘܢܳܝܗܝ ܘܠܐܴ ܐܶܬܬܰܪܬܺܝ: ܘܰܒܚܰܪܰܬ݀ ܙܰܒܢ̈ܶܐ ܠܰܒܪܳܟ ܚܰܒܺܝܒܳܐ ܫܠܰܚ̣ܬ ܠܘܳܬܶܗ ܡܶܠܬܳܐ ܐܠܰܗܳܐ ܕܡ̣ܶܢ ܥܽܘܒܳܟ ܝܽܘܩܢܳܐ ܘܨܶܡܚܳܐ ܕܺܐܝܬܽܘܬܳܟ ܘܢܽܘܗܪܳܐ ܦܰܐܝܳܐ ܕܰܡܬܽܘܡܳܝܽܘܬܳܟ: ܘܰܐܓܶܢ  ܘܰܫ̣ܪܳܐ ܒܒܰܪܬ݀ ܐ̱ܢܳܫܳܐ ܘܰܢܣ̣ܰܒ ܠܶܗ ܦܰܓܪܳܐ ܡܶܢ ܥܽܘܒܳܗ̇: ܘܒܶܗ ܣܒ̣ܰܠ ܚܰܫܳܐ ܘܡܰܘܬܳܐ ܨܶܒܝܳܢܳܝܳܐ: ܘܰܢܚ̣ܶܬ ܠܰܫܝܽܘܠ ܕܡܺܝ̈ܬܶܐ ܘܰܩ̣ܛܰܠ ܠܡܰܘܬܳܐ ܒܰܐܬܪܶܗ: ܘܰܣܚ̣ܰܦ ܠܒܺܝܫܳܐ ܡܳܪܽܘܕܳܐ ܘܬܰܒܪܶܗ ܒܢܶܩܥܶܗ: ܘܥܰܒܕܶܗ ܕܝ̇ܳܫܳܐ ܠܰܡܗܰܝ̈ܡܢܶܐ: ܘܰܦܬܰܚ ܬܰܪ̈ܥܶܝܗ̇ ܕܰܫܝܽܘܠ: ܘܣܽܘܟܪ̈ܶܝܗ̇ ܥܩ̣ܰܪ ܘܰܫ̣ܕܳܐ: ܘܠܐܱܣܺܝܪ̈ܶܐ ܕܰܒܓܰܘܳܗ̇ ܚܒܺܝܫܺܝܢ ܗ̣ܘܰܘ ܐܰܦ̣ܶܩ: ܘܒܶܙܬܳܐ ܣܰܓܺܝܐܬܳܐ ܚܡ̣ܰܠ ܘܰܐܝܬܺܝ. ܗ̇ܰܘ ܕܰܬܚܶܝܬ ܐܺܝܕܰܘ̈ܗܝ ܕܰܛܪܽܘܢܳܐ ܣܺܝܡܳܐ ܗܘܳܬ݀: ܘܰܫܒܺܝܬܳܐ ܪܰܒܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܫ̣ܪܳܐ ܘܓܰܠܘܺܝ ܘܰܐܦ̣ܶܩ: ܘܣܰܒܪܳܐ ܪܰܒܳܐ ܕܰܩܝܳܡܬܳܟ ܘܚܰܝܰܬ݀ ܡܺܝ̈ܬܶܐ ܡܠ̣ܰܝܬ ܐܶܢܽܘܢ ܘܰܠܒܶܝܬ ܐܰܒܽܘܟ ܠܪܰܘܡܳܐ ܕܰܫܡܰܝܳܐ ܐܰܣܶܩ̣ܬ ܐܶܢܽܘܢ: ܩܰܕܡܳܐܺܝܬ ܠܓܰܝܳܣܳܐ ܡ̣ܶܢ ܪܺܝܫ ܩܰܝܣܳܐ ܠܦܰܪܕܰܝܣܳܐ ܡܠܐܷ ܛܽܘ̈ܒܶܐ ܫܰܕܪܶܗ: ܘܢܳܛܽܘܪܳܐ ܕܬܰܪܥܳܐ ܥܕܶܢܳܝܳܐ ܕܓܰܢܬܳܐ ܚܠܳܦ ܟܪܽܘܒܶܐ ܣܳܡܶܗ: ܘܒܳܬܰܪܟܶܢ ܠܟܽܠܳܗ̇ ܓܳܠܽܘܬܳܐ ܕܟܺܐܢ̈ܶܐ ܘܰܠܣܺܝܣܰܪܬܳܐ ܕܩܰܕܺܝ̈ܫܶܐ ܕܰܒܚܰܫܳܐ ܘܬܶܐܢܚ̈ܳܬܳܐ ܡܒܰܓܢܺܝܢ ܗ̣ܘܰܘ: ܘܰܠܘܳܬܳܟ ܡܳܪܳܐ ܛܳܒܳܐ ܘܚܰܝܽܘܣܬܳܢܳܐ ܓܳܥ̇ܶܝܢ ܗ̣ܘܰܘ. ܕܬܺܐܬܶܐ ܠܐܻܝ̇ܳܠܗܽܘܢ: ܘܬܶܦܪܽܘܩ ܐܶܢܽܘܢ ܡ̣ܶܢ ܒܥܶܠܕ̈ܒܳܒܰܝܗܽܘܢ ܟܰܕ ܐܰܣܶܩ̣ܬ ܐܶܢܽܘܢ ܠܐܱܬܪܳܐ ܗ̇ܰܘ ܩܰܕܡܳܝܳܐ ܕܺܝܠܗܽܘܢ: ܘܰܠܓܰܢܬܳܐ ܗ̇ܳܝ ܕܡܶܢܳܗ̇ ܢܦ̣ܰܠܘ ܒܰܥܒ̇ܳܪ ܦܽܘܩܕܳܢܳܐ. ܘܡܶܛܽܠ ܗܳܕܶܐ ܡܫܰܒܚܺܝܢܰܢ ܠܳܟ ܡܳܪܝܳܐ ܥܰܠ ܐܰܦ̈ܰܝ ܚܰܘ̈ܣܳܢܰܝܟ ܘܛܰܝܒ̈ܘܳܬܳܟ ܕܰܠܘܳܬ ܓܶܢܣܰܢ ܡ̣ܶܢ ܫܽܘܪܳܝܳܐ ܠܫܽܘܠܳܡܳܐ ܘܠܰܩܝܳܡܬܳܟ ܕܡ̣ܶܢ ܒܶܝܬ ܡܺܝ̈ܬܶܐ ܒܚܰܕܽܘܬܳܐ ܘܒܰܪܘܳܙܳܐ ܣܳܓܕܺܝܢܰܢ ܕܒܳܗ̇ ܩܳܡ̣ܢܰܢ ܡ̣ܶܢ ܡܰܦܽܘܠܬܰܢ ܘܥܰܡܳܗ̇ ܕܶܝܢ ܥܳܗܕܺܝܢܰܢ ܠܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܕܰܚܠܳܦܰܝܢ ܘܰܡܩܰܒܠܺܝܢܰܢ ܛܰܝܒܽܘܬܳܟ ܘܡܰܘܕܶܝܢܰܢ ܠܪܶܚܡܰܬ݀ ܐ̱ܢܳܫܽܘܬܳܟ ܠܐܴ ܡܶܬܡܰܠܠܳܢܺܝܬܳܐ ܐܰܝܟܰܢܳܐ ܕܬܶܥܒܶܕ ܪ̈ܰܚܡܰܝܟ ܥܰܠ ܚܰܝ̈ܳܒܶܐ ܘܡܰܣܟ̈ܠܳܢܶܐ: ܘܥܰܠ ܒܳܝܫ̈ܶܐ ܘܡܶܣܟܺܢ̈ܶܐ: ܘܥܰܠ ܟܽܠܗܽܘܢ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܕܰܥܢ̣ܰܕܘ ܒܰܬܪܺܝܨܽܘܬ ܫܽܘܒܚܳܐ. ܘܰܩܢܺܝ ܘܰܐܩܺܝܡ ܠܰܢ ܡ̣ܶܢ ܓܰܒܳܟ ܕܝܰܡܺܝܢܳܐ: ܘܚܰܣܳܐ ܚܰܘ̈ܒܰܝܗܽܘܢ ܘܰܥܛܺܝ ܚܛܳܗܰܝ̈ܗܽܘܢ ܘܰܫܒܽܘܩ ܒܽܘܨܳܪ̈ܰܝܗܽܘܢ ܐܰܝܟܰܢܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܥܛܪܐ

ܐܠܰܗܳܐ ܡܳܪܳܐ ܛܳܒܳܐ ܕܰܒܛܰܝܒܽܘܬܶܗ ܒܪܳܐ ܒܶܪ̈ܝܳܬܳܐ: ܘܰܒܨܶܒܝܳܢܶܗ ܫ̇ܳܪܶܐ ܘܡܰܥܒܰܪ ܠܗܶܝܢ: ܘܰܒܛܳܒܽܘܬܶܗ ܒ̣ܪܳܐ ܠܒܰܪܢܳܫܳܐ ܩܰܕܡܳܝܳܐ ܡ̣ܶܢ ܥܰܦܪܳܐ: ܐܰܢ̱ܬ ܡܳܪܝ ܩܰܒܶܠ ܐܶܢܽܘܢ ܠܒܶܣ̈ܡܶܐ ܗܳܠܶܝܢ ܕܩܰܪܶܒܢܰܢ ܠܳܟ ܝܰܘܡܳܢܳܐ ܐܰܝܟ ܕܶܒܚ̈ܶܐ ܘܩܽܘܪ̈ܒܳܢܶܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܰܒܕܰܟܝܽܘܬܳܐ ܩܰܪܶܒܘ ܠܳܟ. ܘܫܰܕܰܪ ܠܰܢ ܒܪ̈ܰܚܡܰܝܟ ܡ̣ܶܢ ܒܶܝܬ ܓܰܙܳܟ ܚܽܘܣܳܝܳܐ ܘܫܽܘܒܩܳܢܳܐ ܠܰܢ ܘܰܠܥܰܢܺܝ̈ܕܰܝܟ ܡܳܪܰܢ܀

 

ܚܘܬܡܐ

ܫܰܦܳܐ ܡܳܪܝܳܐ ܐܽܘܪ̈ܚܳܬܰܢ ܕܰܒܬܰܘܫܳܐ ܣܰܢܝܳܐ ܕܛܳܥܝܽܘܬܳܐ ܗܳܐ ܗܳܡ̈ܣܳܢ: ܘܕܰܒܰܪ ܠܰܢ ܒܽܐܘܪ̈ܚܳܬܳܐ ܬܪ̈ܺܝܨܳܬܳܐ ܕܢܳܡܽܘ̈ܣܰܝܟ. ܘܝܰܒܶܠ ܠܰܢ ܠܘܳܬܳܟ ܕܢܶܗܘܶܐ ܡܛܰܝ̈ܒܶܐ ܥܰܡ ܚܕܽܘ̈ܓܰܝܟ ܠܡܶܫܬܽܘܬܳܟ ܘܰܙܡܺܝ̣̈ܢܶܐ ܠܰܣܡܳܟܳܟ ܕܢܰܘܕܶܐ ܠܳܟ ܥܰܠ ܫܳܪܽܘܬܳܟ ܘܢܶܙܡܰܪ ܫܽܘܒܚܳܐ ܠܐܱܠܳܗܽܘܬܳܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܠܳܟ ܬܶܫܒܽܘܚܬܳܐ: ܘܠܳܟ ܬܰܘܕܺܝܬܳܐ: ܘܠܳܟ ܡܶܬܬܚܺܝܒܳܐ ܣܶܓܕܬܳܐ ܣܓܽܘܠܐܴ ܦܰܐܝܳܐ ܕܶܐܬܩܛܶܦ ܡ̣ܶܢ ܫܰܪܒܬܳܐ ܕܰܘܺܝܕܳܝܬܳܐ ܘܶܐܬܥܨܰܪ ܒܰܡܕܺܝܢ̱ܬܳܐ ܩܰܕܺܝܫܬܳܐ: ܘܶܐܬܕܒܰܚ ܚܠܳܦ ܚܰܝ̈ܶܐ ܘܦܽܘܪܩܳܢܳܐ ܕܥܳܠܡܳܐ: ܘܶܐܬܺܝܗܶܒ ܠܥܰܡ̈ܡܶܐ ܡܶܐܟܽܘܠܬܳܐ ܒܪܺܝܟܬܳܐ: ܘܩܳܡ ܡ̣ܶܢ ܩܰܒܪܳܐ ܘܚܰܕܺܝ ܠܒܶܪ̈ܝܳܬܳܐ: ܕܠܳܟ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܚܰܝܳܐ ܕܡܺܝܬ ܒܨܶܒܝܳܢܶܗ: ܘܶܐܬܩܒܰܪ ܩܒܽܘܪܬܳܐ ܐ̱ܢܳܫܳܝܬܳܐ ܘܡ̣ܶܢ ܝܰܘܣܶܦ ܐܶܬܥܰܦܺܝ ܗ̇ܰܘ ܕܡܶܬܩܪܶܐ ܗ̣ܽܘ ܒܽܘܠܽܘܛܺܝܣ: ܘܢܺܝܩܳܘܕܺܝܡܳܘܣ ܕܡ̣ܶܢ ܪܳܡܬܳܐ ܚܽܘܢܛܬܳܐ ܝܰܩܺܝܪܰܬ݀ ܕܡܰܝ̈ܳܐ ܘܰܒܩܰܒܪܳܐ ܚܕܰܬܳܐ ܐܰܥܶܠܘ ܣܳܡܽܘܟ ܗ̇ܰܘ ܕܰܢܩܺܝܪ ܗ̣ܘܳܐ ܒܫܽܘܥܳܐ ܒܓܰܢܬܳܐ ܡܶܢ ܢܽܘܓܪܳܐ ܪܰܒܳܐ ܠܝܶܫܽܘܥ ܒܰܪܢܽܘܢ ܘܠܐܴ ܐܶܬܬܣܺܝܡ ܗ̣ܘܳܐ ܒܶܗ: ܘܶܐܬܢܛܰܪ ܥܕܰܡܳܐ ܠܝܰܘܡܳܐ ܕܰܠܦܰܓܪܳܟ ܩܰܕܺܝܫܳܐ ܢܶܡܛܶܐ ܙܰܒܢܳܐ ܕܒܶܗ ܢܶܬܬܣܺܝܡ: ܘܟܰܕ ܐܰܪܟܶܢ̣ܬ ܪܰܘܡܳܐ ܕܪܰܒܽܘܬܳܟ: ܐܰܝܟܰܢܳܐ ܕܠܰܢ ܕܠܰܣܚܺܝ̣̈ܦܶܐ ܬܥܰܠܐܷ ܠܐܱܬܪܳܐ ܡܥܰܠܝܳܐ ܕܬܶܫܒܽܘܚܬܳܟ: ܐܳܦ ܬܶܥܒܶܕ ܠܰܢ ܝܳܪܬܳܐ ܕܡܰܠܟܽܘܬܳܟ ܫܡܰܝܳܢܺܝܬܳܐ ܘܬܶܡܢܶܐ ܠܰܢ ܘܰܬܛܰܟܶܣ ܠܥܶܪ̈ܒܶܐ ܕܥܳܢ̈ܳܟ ܙܒܺܝ̣̈ܢܰܝ ܒܚܰܫܰܝ̈ܟ ܝܰܩܺܝܪ̈ܶܐ ܘܒܰܕܡܳܟ ܡܰܐܚܝܳܢܳܐ ܗ̇ܰܘ ܕܶܐܫܬܰܦܰܥ ܒܪܰܘܡܳܗ̇ ܕܓܳܓܽܘܠܬܳܐ. ܘܡܶܛܽܠܗܳܕܶܐ ܡܦܺܝܣܺܝܢܰܢ ܠܪܶܚܡܰܬ݀ ܐ̱ܢܳܫܽܘܬܳܟ ܣܰܓܺܝܐܬܳܐ ܘܰܠܛܰܝܒܽܘܬܳܟ ܠܐܴ ܡܶܬܡܰܠܠܳܢܺܝܬܳܐ  ܕܰܬܚܰܕܶܬ ܠܰܢ ܒܚܽܘܕܳܬܳܐ ܕܪܽܘܚܳܐ ܩܰܕܺܝܫܳܐ: ܘܬܰܨܡܰܚ ܠܰܢ ܒܨܶܡܚ̈ܶܐ ܕܺܝܕܰܥܬܳܟ: ܘܬܰܙܠܶܓ ܥܰܠ ܩܰܒܪܳܐ ܕܺܝܠܳܟ ܡܰܥܒܶܕ ܚܰܝ̈ܶܐ: ܘܬܶܡܠܐܷ ܠܰܢ ܪܺܝܚܳܐ ܒܰܣܺܝܡܳܐ ܕܦܰܐܝܽܘܬ ܐܠܰܗܽܘܬܳܐ ܡܬܽܘܡܳܝܬܳܐ ܘܰܬܩܰܕܶܫ ܢܰܦ̈ܫܳܬܰܢ ܘܦܰܓܪ̈ܰܝܢ ܘܰܬܕܰܟܶܐ ܡܰܚܫ̈ܒܳܬܰܢ ܘܬܶܥܒܶܕ ܐܶܢܶܝܢ ܡܰܥܡܪܳܐ ܓܰܒܝܳܐ ܠܐܱܠܳܗܽܘܬܳܟ: ܐܰܝܟܰܢܳܐ ܕܰܒܢܰܚ̈ܬܶܐ ܫܰܦܺܝܪ̈ܶܐ ܢܶܐܪܽܘܥ ܠܰܩܝܳܡܬܳܟ ܡܰܦܨܚܳܢܺܝܬܰܢ ܘܰܡܛܰܠܩܳܢܺܝܬܳܐ ܕܚܰܫܰܝ̈ܢ: ܘܡܰܥܒܪܳܢܺܝܬܳܐ ܕܥܳܩ̈ܳܬܰܢ ܘܥܰܡ ܫܶܡܥܽܘܢ ܘܝܽܘܚܰܢܳܢ ܠܩܰܒܪܳܟ ܡܰܥܒܶܕ ܚܰܝ̈ܶܐ ܢܶܪܗܰܛ ܘܰܠܒܶܝܬ ܘܰܥܕܳܟ ܢܶܣܘܰܚ: ܘܡ̣ܶܢ ܦܺܐܪ̈ܰܝ ܟܰܪܡܳܟ ܡܶܬܝܰܕܥܳܢܳܐ ܢܶܩܛܽܘܦ ܦܺܐܪ̈ܶܐ ܚܠܰܝ̈ܳܐ ܘܒܰܣܺܝ̈ܡܶܐ ܘܡܰܐܣܝ̈ܳܢܶܐ ܕܢܰܦ̈ܫܳܬܰܢ ܘܦܰܠܳܚ̈ܶܐ ܡܶܬܬܰܓܕ̈ܳܢܶܐ ܕܥܳܐܦܶܝܢ ܝܽܘܬܪ̈ܳܢܶܐ ܣܰܓܺܝ̈ܶܐܐ ܥܒܶܕ ܠܰܢ. ܫܰܡ̈ܳܫܶܐ ܕܬܶܫܡܫܬܳܐ ܕܺܝܠܳܟ ܪܽܘܚܳܢܳܝܬܳܐ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܐܰܫܘܳܐ ܠܰܢ ܕܢܶܗܘܶܐ. ܘܰܠܩܰܒܪܳܐ ܚܰܕܬܳܐ ܘܠܰܫܟܺܝܢܬܳܐ ܗ̇ܳܝ ܕܰܐܠܳܗܽܘܬܳܐ ܒܪܽܘܚ ܗܰܒܠܰܢ ܕܢܶܚܙܶܝܟ ܐܰܝܟ ܡܽܘܫܶܐ. ܟܰܕ ܠܘܳܬܳܟ ܡܶܬܡܰܢܥܺܝܢܰܢ. ܘܚܰܕ̈ܬܶܐ ܚܠܳܦ ܥܰܬܝ̈ܩܶܐ ܗ̇ܳܘܶܝܢܰܢ ܟܰܕ ܡܰܨܡܚܺܝܢܰܢ ܒܝܰܕ ܢܽܘܗܪܳܐ ܐܠܰܗܳܝܳܐ ܕܦܽܘܩ̈ܕܳܢܰܝܟ ܡܰܥܒ̈ܕܰܝ ܚܰܝ̈ܶܐ ܘܕܰܩܝܳܡܬܳܟ ܬܠܺܝܬܳܐܝܰܬ݀ ܝܰܘ̈ܡܶܐ ܕܡ̣ܶܢ ܒܶܝܬ ܡܺܝ̈ܬܶܐ: ܟܰܕ ܡܰܦܪܓܺܝܢܰܢ ܒܰܠܒܽܘ̈ܫܶܐ ܚܶܘܳܪ̈ܶܐ: ܚܠܳܦ ܐܽܘܟܳܡ̈ܶܐ. ܘܥܰܡ ܢܶܫ̈ܶܐ ܩܰܕܺܝ̈ܫܳܬܳܐ ܫܰܦܪܳܐܺܝܬ ܢܶܬܘܰܥܰܕ ܠܩܰܒܪܳܟ ܘܰܠܒܶܣ̈ܡܳܢܰܝܟ ܢܶܪܗܰܛ: ܘܰܚܠܳܦ ܚܰܝ̈ܘܳܬܳܐ ܡ̣ܶܢ ܛܽܘܪܳܟ ܩܰܕܺܝܫܳܐ ܢܶܬܒܰܪܰܟ. ܘܰܐܝܟ ܕܗܳܝܕܶܝܟ ܡܽܘܫܶܐ ܐܰܦܺܝ̣̈ܢ ܠܽܘܩܒܰܠ ܐܰܦܺܝ̣̈ܢ ܢܶܚܙܶܝܟ ܘܢܶܬܒܰܣܰܡ ܒܰܚܙܳܬܳܟ ܡܪܰܘܙܳܢܺܝܬܳܐ: ܘܰܒܦܶܓܥܳܐ ܕܰܐܦܰܝ̈ܟ ܦܨܺܝ̣̈ܚܳܬܳܐ: ܘܢܶܫܬܘܶܐ ܠܚܰܪܬܳܐ ܛܳܒܬܳܐ ܕܰܡܠܺܝܟܳܐ ܠܓܰܒܪ̈ܶܐ ܕܰܫܠܳܡܳܐ: ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܘܫܽܘܒܩܳܢܳܐ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܘܚܰܣܳܐ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܰܠܥܰܢܺܝ̈ܕܰܝܢ ܐܰܢܺܝܚ ܐܶܢܽܘܢ ܒܰܡ̈ܛܰܠܠܐܷ ܢܰܗܺܝܪ̈ܳܬܳܐ ܘܰܒܡܰܫ̈ܟܢܶܐ ܕܟܺܐܢ̈ܶܐ: ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡ

ܬܘܒ ܟܬܒܝܢܢ ܒܝܕ ܐܠܗܐ ܡܪܐ ܟܠ ܘܒܚܝܠܐ ܕܡܢܗ

ܠܬܡܢܝܐ ܛܟ̈ܣܐ ܕܥܠ ܡܕܒܪܢܘܬܐ ܦܪܘܩܝܬܐ

ܘܥܡܗܘܢ ܕܝܢ ܓܘܢܐܝܬ ܠܝܠܕܬ ܐܠܗܐ ܘܠܩܕܝ̈ܫܐ ܘܠܥܢܝ̈ܕܐ

 

ܩܕܡܝܬ ܚܕ ܒܫܒܐ ܩܕܡܝܐ

 

ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܒܽܐܘܪܚܳܐ ܛܳܒܬܳܐ ܕܨܶܒܝܳܢܳܟ ܢܶܪܕܶܐ ܘܒܰܫܒܺܝ̣̈ܠܐܷ ܫܦܰܝ̈ܳܐ ܕܢܳܡܽܘ̈ܣܰܝܟ ܕܟܰܝ̈ܳܐ ܙܰܗܝܳܐܺܝܬ ܢܗܰܠܶܟ ܘܒܰܥܒ̇ܳܕ̈ܶܐ ܡܝܰܬܪ̈ܶܐ ܕܰܡܪܰܥܶܝܢ ܠܳܟ ܓܡܺܝܪܳܐܺܝܬ ܢܶܥܬܰܪ: ܘܰܒܕܽܘܒܳܪ̈ܶܐ ܫܰܦܺܝܪ̈ܶܐ ܕܰܡܢܺܝܚܺܝܢ ܠܡܳܪܽܘܬܳܟ ܢܶܨܛܰܒܰܬ: ܐܰܝܟܰܢܳܐ ܕܰܒܝܰܘܡܳܐ ܗܳܢܳܐ ܕܩܳܐܶܡ: ܘܰܒܗ̇ܰܘ ܕܠܐܴ ܥܳܒ̇ܰܪ ܘܠܐܴ ܡܶܫܬܪܶܐ ܥܰܡ ܡܥܰܕܥ̈ܕܳܢܶܐ ܕܺܝܠܳܟ ܪ̈ܽܘܚܳܢܳܝܶܐ ܢܰܣܶܩ ܠܳܟ ܫܽܘܒܚܳܐ ܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܝܰܠܕܳܐ ܒܪܺܝܟܳܐ ܘܰܡܒܰܪܟܳܐ ܕܰܒܪܳܟ ܒܺܝܠܺܝܕܽܘܬܶܗ ܒܪܺܝܟܬܳܐ: ܘܕܰܟܺܝ ܠܰܢ ܒܰܥܡܳܕܶܗ ܩܰܕܺܝܫܳܐ: ܘܪܰܡܪܶܡ ܠܰܢ ܒܡܽܘܟܳܟܶܗ ܫܒܺܝܚܳܐ: ܘܙܰܟܺܝ ܠܰܢ ܒܕܰܐܪܶܗ ܕܥܰܡ ܒܺܝܫܳܐ ܘܝܰܗ̣ܒ ܠܰܢ ܙܳܟܽܘܬܳܐ ܥܰܠ  ܚܰܝܠܶܗ ܬܰܩܺܝܦܳܐ ܘܰܐܠܶܦ ܠܰܢ ܨܰܘܡܳܐ ܩܰܕܺܝܫܳܐ ܘܰܦ̣ܪܰܩ ܠܰܢ ܒܰܙܩܺܝܦܽܘܬܶܗ ܬܗܺܝܪܬܳܐ ܘܰܐܚܺܝ ܠܰܢ ܒܡܺܝܬܽܘܬܶܗ ܡܫܰܒܰܚܬܳܐ: ܘܰܐܢܗܰܪ ܠܰܢ ܒܰܩܒܽܘܪܬܶܗ ܬܗܺܝܪܬܳܐ ܘܰܐܩܺܝܡ ܠܟܽܠܰܢ ܒܣܽܘܠܳܩܶܗ ܗܕܺܝܪܳܐ ܘܩܰܕܶܫ ܠܰܢ ܒܪܽܘܚܶܗ ܩܰܕܺܝܫܳܐ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

 

ܣܕܪܐ

ܐܠܰܗܳܐ ܠܐܴ ܡܶܬܚܰܙܝܳܢܳܐ ܕܶܐܬܓܠܺܝ ܒܐܪܳܙܳܐ ܕܝܳܠܶܕܬܶܗ ܒܬܽܘܠܬܳܐ ܘܰܐܓܶܣܬܶܗ ܒܽܐܘܪܝܳܐ: ܙܳܝܽܘܢܳܐ ܕܥܳܠܡ̈ܶܐ ܕܰܐܝܢ̣ܶܩܬܶܗ ܛܠܺܝܬܳܐ ܚܰܠܒܳܐ ܡ̣ܶܢ ܬܕܶܝ̈ܗ̇ ܐܰܝܟ ܥܽܘܠܐܴ: ܡܥܰܛܰܦ ܓܰܘܙܰܠܬܳܐ ܕܶܐܬܟܪܶܟ ܒܥܰܙܪܽܘܪ̈ܶܐ: ܢܽܘܪܳܐ ܝܳܩܕܬܳܐ ܕܥܰܦܩܽܘܗܝ ܒܶܣܪ̈ܳܢܶܐ: ܡܰܥܬܰܪ ܠܰܣܢܺܝ̣̈ܩܶܐ ܒܥܽܘܬܪܶܗ ܕܩܰܪܶܒܘ ܠܶܗ ܡܓܽܘ̈ܫܶܐ ܕܳܫܢ̈ܶܐ ܘܩܽܘܪ̈ܒܳܢܶܐ: ܝܰܡܳܐ ܪܰܒܳܐ ܕܰܣܚ̣ܳܐ ܒܩܳܒܺܝܬܳܐ ܡܩܰܕܶܫ ܠܰܣܪ̈ܳܦܶܐ ܕܰܐܥܡ̣ܕܶܗ ܥܰܒ̣ܕܶܗ ܝܽܘܚܰܢܳܢ: ܕܚܺܝܠܐܴ ܥܰܠ ܟܽܠܢܳܫ ܕܰܣܓܶܕ ܠܶܗ ܢܰܗܪܳܐ: ܓܢܺܝܙ ܡ̣ܶܢ ܥܺܝܪ̈ܶܐ ܘܡܰܠܐܱܟ̈ܶܐ ܕܩܰܠܣܽܘܗܝ ܫܰܒܪ̈ܶܐ ܘܝܰܠܽܘ̈ܕܶܐ: ܪܟܺܝܒ ܥܰܠ ܥܺܝܠܐܴ ܫܺܝܛܳܐ ܟܰܕ ܥܳܐܶܠ ܠܐܘܪܫܠܶܡ. ܠܐܴ ܚܳܫܽܘܫܳܐ ܐܠܰܗܳܐ ܕܶܐܬܩܰܪܰܒ ܠܚܰܫܳܐ ܒܨܶܒܝܳܢܶܗ: ܫܶܡܫܳܐ ܢܰܨܺܝܚܳܐ ܕܟܰܪܟܽܘܗܝ ܛܶܠ̈ܶܠܐܷ: ܕܰܝ̇ܳܢܳܐ ܕܥܳܠܡ̈ܶܐ ܕܕܳܢܽܘܗܝ ܚܰܝ̈ܳܒܶܐ: ܡܨܰܒܰܬ ܠܰܫܡܰܝܳܐ ܒܢܰܗܺܝܪ̈ܶܐ ܦܰܐܝ̈ܳܐ ܕܰܐܠܒܫܽܘܗܝ ܟܠܐܱܡܺܝܣ ܕܰܙܚܽܘܪܺܝܬܳܐ ܒܒܶܙܚܳܐ: ܡܰܟܺܝܟܳܐ ܕܰܐܪܥܳܐ ܕܢܰܟܠܽܘܗܝ ܚܰܣ̈ܳܡܶܐ ܠܺܝ̈ܛܶܐ ܡܢܰܚܡܳܢܳܐ ܕܡܺܝ̈ܬܶܐ ܕܰܐܩܺܝܡ ܠܰܩܒܺܝܪ̈ܶܐ: ܠܐܴ ܚܳܫܽܘܫܳܐ ܒܪܳܐ ܕܰܐܠܳܗܳܐ ܕܶܐܬܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܳܐ ܡܶܛܽܠܳܬܰܢ. ܚܰܝܳܐ ܘܡܰܐܚܝܳܢܳܐ ܕܢܰܚܶܡ ܗ̣ܽܘ ܠܶܗ ܡ̣ܶܢ ܒܶܝܬ ܡܺܝ̈ܬܶܐ ܒܬܶܫܒܽܘܚܬܳܐ: ܘܩܳܡ ܘܠܐܴ ܚ̣ܙܳܐ ܚܒܳܠܐܴ. ܘܕܳܫܶܗ ܠܡܰܘܬܳܐ ܝܰܥܢܳܐ ܒܓܰܘ ܐܶܣܟܽܘܦܬܶܗ: ܘܰܣܠ̣ܶܩ ܠܰܫܡܰܝܳܐ ܒܙܰܘܚܳܐ ܕܡܰܠܐܱܟ̈ܶܐ ܘܫܰܕܰܪ ܠܰܢ ܪܽܘܚܶܗ ܩܰܕܺܝܫܳܐ ܘܺܝܬܶܒ ܡ̣ܶܢ ܝܰܡܺܝܢ ܐܰܒܽܘܗܝ ܒܫܽܘܒܚܳܐ ܘܺܐܝܩܳܪܳܐ: ܠܳܟ ܗܳܟܺܝܠ ܡܫܺܝܚܳܐ ܐܠܰܗܳܐ ܕܺܝܠܰܢ ܕܗܳܠܶܝܢ ܟܽܠܗܶܝܢ ܣܒ̣ܰܠܬ ܘܣܰܝܒ̣ܰܪܬ: ܡܶܛܽܠ ܦܽܘܪܩܳܢܰܢ: ܣܳܓܕܺܝܢܰܢ ܘܰܡܫܰܒܚܺܝܢܰܢ ܥܰܠ ܐܰܦ̈ܰܝ ܡܕܰܒܪܳܢܽܘܬܳܟ ܕܰܠܘܳܬܰܢ ܘܰܒܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܡܶܫܬܰܒܗܪܺܝܢܰܢ: ܐܰܝܟܰܢܳܐ ܕܰܒܚܰܕܽܘܬܳܐ ܘܒܰܪܘܳܙܳܐ ܕܡܶܢܳܟ ܢܶܫܬܰܟܰܢ ܠܰܢ ܢܝܰܩܰܪ ܘܰܢܩܰܠܶܣ ܠܺܝܠܺܝܕܽܘܬܳܟ: ܢܥܰܦܶܩ ܘܰܢܚܰܒܶܒ ܠܰܣܚܳܬܳܟ: ܢܶܚܕܶܐ ܘܢܺܐܪܰܒ ܒܡܽܘܟܳܟܳܟ: ܢܶܩܥܶܐ ܘܰܢܗܰܠܶܠ ܒܽܐܘܫܰܥ̈ܢܶܐ ܕܺܝܠܳܟ ܡܶܬܝܰܕ̈ܥܳܢܶܐ ܘܰܒܚܰܫܰܝ̈ܟ ܢܶܬܦܨܰܚ: ܘܢܶܣܓܽܘܕ ܠܶܗ ܠܰܨܠܺܝܒܳܟ ܦܳܪܽܘܩܳܝܳܐ: ܘܰܢܣܰܒܰܪ ܬܽܘܒ ܥܰܡ ܬܰܠܡܺܝ̈ܕܶܐ ܩܝܳܡܬܳܐ ܡܰܠܝܰܬ݀ ܚܰܕ̈ܘܳܬܳܐ: ܘܢܶܬܬܪܺܝܡ ܥܰܘܠܰܢ ܒܣܽܘܠܳܩܳܟ: ܐܳܦ ܢܶܬܩܰܕܰܫ ܒܡܶܐܬܺܝܬܶܗ ܕܪܽܘܚܳܐ ܦܰܪܰܩܠܺܝܛܳܐ: ܢܶܚܕܶܐ ܘܢܶܪܘܰܙ ܒܥܺܐܕܳܟ ܗ̇ܰܘ ܠܐܴ ܡܶܫܬܰܪܝܳܢܳܐ: ܒܰܚܠܽܘܠܳܟ ܗ̇ܰܘ ܠܐܴ ܡܰܘܦܝܳܢܳܐ. ܘܰܒܚܰܓܳܟ ܗ̇ܰܘ ܚܕܽܘܓܳܝܳܐ: ܒܦܰܪܕܰܝܣܳܐ ܗ̇ܰܘ ܥܕܶܢܳܝܳܐ: ܒܕܽܘܝܳܪܳܐ ܡܰܠܐܱܟܳܝܳܐ. ܒܢܽܘܗܪܳܐ ܓܰܐܝܳܐ ܕܡܰܠܟܽܘܬܳܟ: ܒܒܶܝܬ ܒܙܰܠܺܝ̈ܩܶܐ ܫܒܺܝ̈ܚܶܐ ܕܦܰܐܝܽܘܬܳܟ: ܘܰܐܒܪܶܩ ܠܰܢ ܒܡܰܒܪܩܽܘܬ ܨܶܡܚܳܐ ܕܺܐܝܬܽܘܬܳܟ: ܒܡܰܨܡܚܽܘܬܳܐ ܕܬܶܫܒܽܘܚܬܳܟ ܒܪܺܝܚܳܐ ܗܰܢܺܝܳܐܐ ܕܰܐܠܳܗܽܘܬܳܟ: ܘܰܒܒܽܘܣܳܡܳܐ ܦܰܐܝܳܐ ܕܩܰܕܺܝܫܽܘܬܳܟ ܘܣܰܬܰܪ ܠܰܢ ܬܚܶܝܬ ܟܶܢ̈ܦܶܐ ܕܛܰܝܒܽܘܬܳܟ: ܘܢܰܛܰܪ ܠܰܢ ܒܚܰܝܠܶܗ ܕܰܨܠܺܝܒܳܟ: ܘܰܐܕܢܰܚ ܥܠܰܝܢ ܢܽܘܗܪܳܐ ܕܦܰܪܨܽܘܦܳܟ: ܘܰܐܩܺܝܡ ܠܰܢ ܒܓܰܒܳܟ ܕܝܰܡܺܝܢܳܐ ܥܰܠ ܦܳܬܽܘܪܳܟ ܒܶܝܬ ܡܰܠܟܽܘܬܳܟ: ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܫܟ̣ܶܒܘ ܥܰܠ ܣܰܒܪܳܟ: ܠܚܽܘܣܳܝܳܐ ܕܚܰܘ̈ܒܶܐ ܘܰܠܫܽܘܒܩܳܢܳܐ ܕܰܚܛܳܗ̈ܶܐ. ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܫܽܘܒܚܳܐ ܠܳܟ ܡܫܺܝܚܳܐ ܐܠܰܗܳܐ ܕܚܰܕܺܝܬܳܢ ܒܡܰܘܠܳܕܳܟ ܘܚܰܕܶܬܬ ܥܰܬܺܝܩܽܘܬܶܗ ܕܓܶܢܣܰܢ ܒܰܥܡܳܕܳܟ ܡܚܰܣܝܳܢܳܐ ܘܒ̣ܰܛܶܠܬ ܡܰܠܟܽܘܬܶܗ ܕܣܳܛܳܢܳܐ ܒܕܰܐܪܳܐ ܘܬܰܟܬܽܘܫܳܐ ܕܰܣ̣ܕܰܪܬ ܚܠܳܦܰܝܢ: ܬܰܘܕܺܝܬܳܐ ܠܡܽܘܟܳܟܳܟ ܘܰܠܚܰܫܰܝ̈ܟ ܨܶܒܝܳܢܳܝ̈ܶܐ ܫܽܘܒܚܳܐ ܠܡܽܘܟܳܟܳܟ ܘܠܰܩܝܳܡܬܳܟ ܡܫܰܒܰܚܬܳܐ ܕܡ̣ܶܢ ܒܶܝܬ ܡܺܝ̈ܬܶܐ ܕܰܐܩܺܝܡܬ ܠܓܶܢܣܰܢ ܡ̣ܶܢ ܡܺܝܬܽܘܬܳܐ ܘܰܚܒܳܠܐܴ ܣܓܺܝܕ ܐܰܢ̱ܬ ܡ̣ܶܢ ܡܰܟܺܝ̈ܟܶܐ ܕܪܰܡܪܶܡ̣ܬ ܐܶܢܽܘܢ ܒܣܽܘܠܳܩܳܟ: ܘܥܰܠ ܐܰܦ̈ܰܝ ܟܽܠܗܶܝܢ ܛܰܝܒܘ̈ܳܬܳܟ ܫܽܘܒܚܳܐ ܘܺܐܝܩܳܪܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܚܘܬܡܐ

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܠܥܺܐܕܳܐ ܫܰܪܺܝܪܳܐ ܕܗ̇ܰܘ ܝܰܘܡܳܐ ܕܠܐܴ ܥ̇ܳܪܶܐ ܥܠܰܘܗܝ ܫܽܘܠܳܡܳܐ: ܘܠܐܴ ܪܰܡܫܳܐ ܕܥ̇ܳܪܶܒ ܫܶܡܫܳܐ ܘܠܐܴ ܚܶܫܟܳܐ ܕܰܪܕܰܦ ܠܢܽܘܗܪܶܗ: ܘܠܐܴ ܠܺܠܝܳܐ ܕܡܰܥܒܰܪ ܠܐܻܝܡܳܡܶܗ: ܐܰܝܟܰܢܳܐ ܕܥܰܡ ܟܺܐܢ̈ܶܐ ܕܕܳܝܨܺܝܢ ܒܨܰܦܪܶܗ: ܘܥܰܡ ܥܺܝܪ̈ܶܐ ܕܪܳܘܙܺܝܢ ܒܚܰܓܶܗ: ܘܰܚܢܰܢ ܚܰܛܳܝ̈ܶܐ ܢܶܬܦܨܰܚ ܒܫܽܘܒܚܶܗ: ܘܢܶܙܡܰܪ ܠܳܟ ܫܽܘܒܚܳܐ ܕܡܶܬܬܚܺܝܒ ܒܶܗ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܪܳܡܳܐ ܘܰܡܥܰܠܝܳܐ ܕܡ̣ܶܢ ܚܰܝܠܰܘ̈ܳܬܳܐ ܥܶܠܳܝ̈ܶܐ ܕܠܐܴ ܫܶܠܝܳܐ ܡܶܙܕܰܝܰܚ: ܘܡ̣ܶܢ ܐܰܪ̈ܥܳܢܶܐ ܡܶܣܬܓܶܕ ܘܡܶܫܬܰܒܰܚ ܠܗ̇ܰܘ ܬܰܦܢܟܳܐ ܕܠܐܴ ܡܶܬܚܰܒܰܠ: ܘܫܽܘܪܳܐ ܚܰܣܺܝܢܳܐ ܕܠܐܴ ܢܳܦܶܠ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܠܐܴ ܡܶܬܚܰܠܰܨ ܡ̣ܶܢ ܒܳܨܽܘ̈ܝܶܐ: ܬܠܺܝܬܳܝܽܘܬܳܐ ܕܠܐܴ ܡܶܬܕܰܪܟܳܐ ܡ̣ܶܢ ܕܳܪ̈ܽܘܫܶܐ: ܘܠܐܴ ܢܳܦܠܐܴ ܬܚܶܝܬ ܒܨܳܬܳܐ ܘܥܽܘܪ̈ܙܠܐܷ ܕܰܡܥ̈ܳܩܶܐ: ܕܠܶܗ ܝ̇ܳܐܶܐ ܫܽܘܒܚܳܐ ܡ̣ܶܢ ܟܽܠܗܶܝܢ ܒܶܪ̈ܝܳܬܳܐ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܨܰܒ̣ܶܬܬ ܠܗܰܝ̈ܟܠܐܷ ܕܠܶܒܰܘ̈ܳܬܰܢ ܒܨܶܒ̈ܬܶܐ ܗܕܺܝܪ̈ܶܐ ܘܪ̈ܽܘܚܳܢܳܝܶܐ ܕܢܰܦ̈ܫܳܬܰܢ ܒܗܽܘ̈ܠܳܠܐܷ ܟܢܺܝ̣̈ܟܶܐ ܕܰܡܢܺܝܚܺܝܢ ܠܳܟ. ܦܳܪܽܘܩܳܐ ܕܥܳܠܡ̈ܶܐ ܕܰܓܡ̣ܰܪ ܚܰܣܺܝܪ̈ܶܐ ܒܝܰܠܕܶܗ ܘܚܰܣܺܝ ܠܚܰܛܳܝ̈ܶܐ ܒܰܥܡܳܕܶܗ: ܘܰܐܚܺܝ ܠܡܳܝܽܘ̈ܬܶܐ ܒܩܶܛܠܶܗ: ܘܰܐܩܺܝܡ ܠܰܩܒܺܝܪ̈ܶܐ ܒܝܰܘܡܳܐ ܕܰܩܝܳܡܬܶܗ: ܘܰܐܘܪܶܬ ܐܶܢܽܘܢ ܡܰܠܟܽܘܬܶܗ ܘܥܰܠܺܝ ܠܓܰܒܳܐ ܕܬܰܚܬܳܝ̈ܶܐ ܒܣܽܘܠܳܩܶܗ ܘܫܰܡܠܺܝ ܠܘܳܬ ܫܠܺܝ̈ܚܶܐ ܫܽܘܘܕܳܝܶܗ ܘܩܰܕܶܫ ܠܟܶܢܫܳܐ ܕܣܳܓܽܘ̈ܕܰܘܗܝ ܒܪܽܘܚܶܗ. ܘܰܐܢܗܰܪ ܠܰܢ ܡܳܪܝ ܒܢܰܗܺܝܪܽܘܬܶܗ ܕܢܽܘܗܪܳܟ: ܫܶܡܫܳܐ ܦܰܐܝܳܐ ܕܙܰܕܺܝܩܽܘܬܳܐ ܕܰܒܝܰܠܕܶܗ ܟܰܘܟܒܳܐ ܐܰܨܡܰܚ ܒܓܰܘ ܐܳܐܰܪ: ܘܒܰܥܡܳܕܶܗ ܡܚܰܣܝܳܢܳܐ ܢܽܘܗܪܳܐ ܐܰܒ̣ܪܶܩ ܥܰܠ ܡܰܝ̈ܳܐ: ܘܒܰܣܚܳܬܶܗ ܡܕܰܟܝܳܢܺܝܬܳܐ ܐܶܣܬܰܕܰܩܘ ܫܡܰܝ̈ܳܐ: ܘܰܒܚܰܫܶܗ ܡܰܐܚܝܳܢܳܐ ܚܫܶܟ̣ܘ ܢܰܗܺܝܪ̈ܶܐ ܒܪܰܘܡܳܐ ܕܰܪܩܺܝܥܳܐ: ܘܰܒܡܰܘܬܶܗ ܡܰܐܚܝܳܢܳܐ ܐܶܬܢܰܚܰܡܘ ܡܺܝ̈ܬܶܐ: ܘܒܰܩܒܽܘܪܬܶܗ ܕܥܰܡ ܥܰܢܺܝ̈ܕܶܐ ܐܰܪܓܶܫܘ ܒܳܗ̇ ܟܽܠܗܽܘܢ ܐܰܝܠܶܝܢ ܕܰܩܒܺܝܪܺܝܢ ܘܒܰܩܝܳܡܬܶܗ ܡܰܦܨܚܳܢܺܝܬܳܐ ܐܶܬܦܨܰܚܘ ܟܡܺܝܪ̈ܶܐ. ܘܰܒܢܽܘܚܳܡܶܗ ܚܕܺܝܘ ܥܶܠܳܝ̈ܶܐ ܘܬܰܚܬܳܝ̈ܶܐ ܘܰܒܝܰܘܡܳܐ ܕܣܽܘܠܳܩܶܗ ܐܶܬܬܙܺܝܥܘ ܫܡܰܝ̈ܳܐ ܥܶܠܳܝ̈ܶܐ: ܘܰܐܙܥܶܩ̣ܘ ܠܘܳܬ ܚܕ̈ܳܕܶܐ ܕܡܰܢܽܘ ܗܳܢܳܐ ܡܰܠܟܳܐ ܪܰܒܳܐ ܕܺܐܝܩܳܪ̈ܶܐ ܕܰܣܠ̣ܶܩ ܒܙܰܘܚܳܐ ܕܬܶܫܒܽܘܚܬܳܐ ܘܰܡܦܰܢܶܝܢ ܒܚܰܕܽܘܬܳܐ ܘܒܰܪܘܳܙܳܐ ܟܶܢ̈ܫܶܐ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ ܟܰܕ ܐܳܡܪܺܝܢ: ܗܳܢܰܘ ܡܳܪܝܳܐ ܡܳܪܰܢ ܕܰܢܚ̣ܶܬ ܠܐܱܪܥܳܐ ܒܨܶܒܝܳܢܶܗ: ܘܶܐܬܓܰܫܰܡ ܘܰܠܒ̣ܶܫ ܦܰܓܪܳܐ ܡ̣ܶܢ ܓܶܢܣܳܐ ܕܡܳܝܽܘ̈ܬܶܐ ܕܰܫܦ̣ܰܪ ܠܶܗ. ܘܰܣܒ̣ܰܠ ܚܰܫ̈ܶܐ ܘܒܶܙ̈ܚܶܐ ܘܡܽܘܝ̈ܳܩܶܐ ܘܨܰܥܪܳܐ ܡ̣ܶܢ ܝܽܘ̈ܕܳܝܶܐ ܚܰܪ̈ܡܶܐ ܚܠܳܦ ܐܳܕܳܡ ܪܳܚܡܶܗ ܘܶܐܬܥܰܠܺܝ ܠܰܨܠܺܝܒܳܐ ܕܚܶܣܕܳܐ: ܘܩܰܒܶܠ ܥܠܰܘܗܝ ܦܰܟܳܐ ܘܟܽܠܗܽܘܢ ܫܽܘ̈ܩܳܦܶܐ: ܕܰܢܚܰܪܰܪ ܐܶܢܽܘܢ ܠܰܒ̈ܢܰܘܗܝ ܡ̣ܶܢ ܥܰܒܕܽܘܬܳܐ ܕܡܳܪ̈ܽܘܕܶܐ ܘܩܳܡ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ ܪܰܒܬܳܐ ܕܠܐܴ ܚܒܳܠܐܴ: ܘܰܐܩܺܝܡܶܗ ܥܰܡܶܗ ܒܝܰܘܡܳܐ ܕܰܩܝܳܡܬܶܗ ܘܶܐܫܬܰܘܕܺܝ ܠܶܗ ܕܡܳܐ ܕܳܐܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒ̈ܢܶܐ ܥܰܡܶܗ ܒܫܽܘܒܚܳܐ ܡܰܡܠܶܟ ܠܶܗ. ܘܗܳܫܳܐ ܣܳܓܕܺܝܢܰܢ ܠܳܟ ܐܠܰܗܰܢ ܒܰܣܺܝܡܳܐ: ܘܬܰܘܕܺܝܬܳܐ ܠܳܟ ܡܩܰܪܒܺܝܢܰܢ ܠܳܟ ܡܰܠܟܳܐ ܕܰܫܠܳܡܳܐ ܘܰܐܠܳܗܳܐ ܣܓܺܝܕܳܐ ܘܡܳܪܳܐ ܫܰܪܺܝܪܳܐ ܗ̇ܰܘ ܕܡ̣ܶܢ ܥܶܠܳܝ̈ܶܐ ܘܬܰܚܬܳܝ̈ܶܐ ܡܶܣܬܓܶܕ ܘܡܶܫܬܰܒܰܚ: ܘܳܐܦ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܡܰܘܕܶܝܢܰܢ ܘܣܳܓܕܺܝܢܰܢ ܠܰܡܕܰܒܪܳܢܽܘܬܳܟ ܐܠܰܗܳܝܬܳܐ. ܘܥܰܡܳܗ̇ ܬܽܘܒ ܡܶܬܥܰܗܕܺܝܢܰܢ ܠܝܳܠܕܰܬ݀ ܐܠܰܗܳܐ ܡܰܪܝܰܡ ܐܶܡܳܐ ܕܺܝܠܳܟ ܩܰܕܺܝܫܬܳܐ ܗ̇ܳܝ ܕܺܝܠܶܕܬܳܟ ܠܥܶܠ ܡ̣ܶܢ ܡܶܠܬܳܐ ܘܰܒܬܽܘ̈ܠܶܝܗ̇ ܠܐܴ ܫ̣ܪܰܝܬ: ܘܥܰܡܳܗ̇ ܠܰܢܒܺܝ̈ܶܐ ܘܠܰܫܠܺܝ̈ܚܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ: ܘܟܺܐܢ̈ܶܐ ܘܟܳܗ̈ܢܶܐ ܚܣܰܝ̈ܳܐ ܘܩܰܕܺܝ̈ܫܶܐ: ܘܥܳܢ̈ܘܳܝܶܐ ܓܡܺܝܪ̈ܶܐ ܥܰܡ ܐܰܬܠܺܝ̈ܛܶܐ ܫܰܪܺܝܪ̈ܶܐ. ܘܠܰܟܪ̈ܺܝܗܶܐ ܬܽܘܒ ܘܠܐܱܠܺܝ̣̈ܨܶܐ ܘܠܐܱܝܠܶܝܢ ܕܰܒܩܺܝ̣̈ܢܕܽܘܢܽܘ ܘܕܺܝܢܳܐ ܕܡܰܘܬܳܐ ܐܰܣܺܝܪܺܝܢ ܓܗܳܝܬܳܐ ܘܰܢܦܺܐܫܳܐ ܫܰܟܶܢ ܠܗܽܘܢ ܡܳܪܝܳܐ: ܘܠܐܱܝܠܶܝܢ ܕܩܰܪܶܒܘ ܩܽܘܪ̈ܒܳܢܶܐ ܘܶܐܫܬܰܘܬܰܦܘ ܒܰܣܢܺܝܩܽܘܬܳܐ ܕܡܶܣ̈ܟܺܢܶܐ: ܦܪܽܘܥ ܐܶܢܽܘܢ ܡܳܪܝܳܐ ܡܪܰܚܡܳܢܽܘܬܳܟ. ܘܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܐܰܝܠܶܝܢ ܕܰܥܢ̣ܰܕܘ ܒܰܬܪܺܝܨܽܘܬ ܫܽܘܒܚܳܐ: ܒܚܰܝ̈ܶܐ ܫܚܺܝ̣̈ܩܶܐ ܘܡܰܙܠܗ̈ܳܢܶܐ ܘܰܒܛܽܘܪ̈ܳܦܶܐ ܥܳܠܡܳܢܳܝ̈ܶܐ ܫܰܟܶܢ ܠܰܢ ܘܰܠܗܽܘܢ ܢܝܳܚܬܳܐ ܛܳܒܬܳܐ: ܘܰܪܘܳܚܬܳܐ ܕܰܒܡܰܠܟܽܘܬܳܐ ܕܺܝܠܳܟ: ܘܦܶܓܥܳܐ ܦܨܺܝܚܳܐ ܕܳܐܪܰܥ ܠܳܟ ܒܫܰܝܢܳܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܐܱܒܳܐ ܡܬܽܘܡܳܝܳܐ ܘܠܐܴ ܙܰܒܢܳܝܳܐ: ܫܶܡܫܳܐ ܦܰܐܝܳܐ ܘܡܰܢܗܪܳܢܳܐ ܕܟܽܠ ܒܶܪ̈ܝܳܬܳܐ. ܘܰܒܪܳܐ ܨܶܡܚܳܐ ܘܝܰܠܕܳܐ ܡܬܽܘܡܳܝܳܐ ܕܡ̣ܶܢ ܐܰܒܳܐ ܡܬܽܘܡܳܝܳܐ ܕܶܐܬܺܝܠܶܕ ܒܚܰܪܬܳܐ ܕܙܰܒ̈ܢܶܐ: ܘܰܢܣ̣ܰܒ ܠܶܗ ܦܰܓܪܳܐ ܡ̣ܶܢ ܓܶܢܣܳܐ ܐ̱ܢܳܫܳܝܳܐ: ܘܪܽܘܚܳܐ ܩܰܕܺܝܫܳܐ ܠܐܴ ܐܰܝܢܳܝܳܐ ܘܠܐܴ ܟܡܳܢܳܝܳܐ: ܙܰܠܓܳܐ ܢܰܗܺܝܪܳܐ ܘܡܰܒܽܘܥܳܐ ܕܟܽܠܳܗ̇ ܪܶܚܡܰܬ݀ ܐ̱ܢܳܫܽܘܬܳܐ: ܗ̇ܰܘ ܕܟܽܠ ܡܰܘܗܰܒܬܳܐ ܛܳܒܬܳܐ ܘܰܡܫܰܡܠܳܝܬܳܐ ܘܟܽܠ ܫܽܘ̈ܟܳܢܶܐ ܡܫܰܡܠܰܝ̈ܳܐ ܡܶܢܶܗ ܡܶܫܬܰܕܪܺܝܢ ܠܒܶܪ̈ܝܳܬܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܐܠܰܗܳܐ ܡܶܠܬܳܐ ܡܪܰܝܡܳܐ ܘܰܕܚܺܝܠܐܴ: ܗ̇ܰܘ ܕܰܒܡܶܬܢܰܚܬܳܢܽܘܬܳܟ ܕܰܠܘܳܬܰܢ ܠܐܱܪܥܳܐ ܗܳܕܶܐ ܟܽܘܒܳܢܳܝܬܳܐ ܣܰܓܺܝ ܐܶܬܥܰܠܺܝܢܰܢ ܘܶܐܬܝܰܬܰܪܢܰܢ ܘܰܒܡܽܘܟܳܟܳܟ ܗ̇ܰܘ ܬܡܺܝܗܳܐ ܐܶܬܪܰܡܪܶܡܢܰܢ: ܘܰܒܣܽܘܪܳܩܳܟ ܬܗܺܝܪܳܐ ܕܰܚܠܳܦܰܝܢ ܐܶܬܗܰܕܰܪܢܰܢ ܘܰܒܡܰܣܰܩܬܳܟ ܬܡܺܝܗܬܳܐ ܐܶܫܬܰܪܰܪܢܰܢ: ܘܒܰܒܛܺܝܢܽܘܬܳܟ ܒܪܺܝܟܬܳܐ ܐܶܬܒܰܪܰܟܢܰܢ: ܘܰܒܡܶܬܓܰܫܡܳܢܽܘܬܳܟ ܩܰܕܺܝܫܬܳܐ ܐܶܬܩܰܕܰܫܢܢܰ: ܘܰܒܡܶܬܒܰܪܢܫܳܢܽܘܬܳܐ ܫܰܪܺܝܪܬܳܐ ܕܺܝܠܳܟ ܐܶܬܰܐܠܰܗܢܰܢ: ܘܒܺܝܠܺܝܕܽܘܬܳܟ ܦܳܪܽܘܩܳܝܬܳܐ ܐܶܬܦܨܰܚܢܰܢ: ܘܰܒܬܰܪܒܺܝܬܳܟ ܚܰܟܺܝܡܬܳܐ ܐܶܫܬܰܘܫܰܛܢܰܢ: ܘܒܰܥܡܳܕܳܟ ܚܰܣܝܳܐ ܐܶܬܕܰܟܺܝܢܰܢ ܘܰܒܨܰܘܡܳܟ ܙܰܗܝܳܐ ܐܶܙܕܰܝܰܢܢܰܢ: ܘܰܒܬܰܟܬܽܘܫܳܟ ܚܠܺܝܨܳܐ ܐܶܬܢܰܨܰܚܢܰܢ: ܘܰܒܙܰܝܢܳܟ ܙܰܟܳܝܳܐ ܙܰܟܺܝܢܰܢ: ܘܰܒܚܰܫܰܝ̈ܟ ܨܶܒܝܳܢܳܝ̈ܶܐ ܐܶܬܚܰܝܶܠܢܰܢ: ܘܰܒܫܽܘ̈ܡܳܬܳܟ ܡܫܰܒ̈ܚܶܐ ܐܶܬܚܠܶܡܢܰܢ ܐܳܦ ܐܶܬܰܐܣܺܝܢܰܢ. ܘܰܒܫܺܝܛܽܘܬܳܟ ܚܰܟܺܝܡܬܳܐ ܐܶܬܚܰܟܰܡܢܰܢ ܘܰܒܨܰܥܪܳܟ ܝܰܩܺܝܪܳܐ ܐܶܬܝܰܩܰܪܢܰܢ: ܘܰܒܫܽܘܥܒܳܕܳܟ ܣܰܓܺܝܳܐܐ ܐܶܬܚܰܪܰܪܢܰܢ ܘܰܒܢܶܓܕܰܝ̈ܟ ܕܰܚܠܳܦܰܝܢ ܐܶܬܓܰܒܰܪܢܰܢ. ܘܰܒܫܽܘ̈ܩܳܦܰܝܟ ܕܡܶܛܽܠܳܬܰܢ ܐܶܬܥܰܫܰܢܢܰܢ: ܘܰܒܙܰܕܺܝܩܽܘܬܳܟ ܕܥܰܠ ܐܰܦܰܝ̈ܢ ܐܶܬܦܪܶܩܢܰܢ: ܘܒܰܩܒܽܘܪܬܳܐ ܡܩܰܠܰܣܬܐ ܕܺܝܠܳܟ ܐܶܬܢܰܚܰܡܢܰܢ: ܘܒܰܩܝܳܡܬܳܟ ܡܫܰܒܰܚܬܳܐ ܐܶܬܬܰܪܰܨܢܰܢ: ܘܰܒܣܽܘܠܳܩܳܟ ܬܡܺܝܗܳܐ ܐܶܬܪܰܡܪܶܡܢܰܢ: ܘܰܒܡܰܘܬܒܳܟ ܕܥܰܡ ܐܰܒܳܐ ܐܶܫܬܰܒܰܚܢܰܢ: ܘܰܒܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܘܦܰܪܰܩܠܺܝܛܳܐ ܐܶܬܢܰܗܰܪܢܰܢ: ܘܒܰܕܓܽܘܢ ܬܶܫܒܽܘܚܬܳܐ ܡܰܣܩܺܝܢܰܢ ܠܳܟ: ܘܬܰܘܕܺܝܬܳܐ ܠܳܟ ܡܕܰܒܚܺܝܢܰܢ ܘܩܽܘܠܳܣ̈ܶܐ ܗܕܺܝܪ̈ܶܐ ܘܪܽܘܡܪ̈ܳܡܶܐ ܚܠܰܝ̈ܳܐ ܠܳܟ ܓܳܕܠܺܝܢܰܢ: ܘܺܐܝܩܳܪܳܐ ܠܡܳܪܽܘܬܳܟ ܦܳܪܥܺܝܢܰܢ: ܘܩܽܘ̈ܕܳܫܶܐ ܬܠܺܝܬܳܝܷ̈ܐ ܠܐܱܬܪܳܐ ܕܰܫܟܺܝܢܬܳܟ ܡܫܰܕܪܺܝܢܰܢ ܘܡ̣ܶܢ ܚܽܘܒܳܟ ܫܦܺܝܥܳܐ ܫܳܐܠܺܝܢܰܢ. ܘܥܰܡ ܗܳܢܳܐ ܥܶܛܪܳܐ ܕܒܶܣ̈ܡܶܐ ܠܳܟ ܡܶܬܟܰܫܦܺܝܢܰܢ: ܕܠܐܴ ܡܳܪܝ ܬܶܥܒܶܕ ܥܰܡܰܢ ܐܰܝܟ ܕܫܳܘܶܝܢܰܢ ܕܚܰܛܳܝ̈ܶܐ ܘܡܰܣܟܠܳܢ̈ܶܐ ܐܺܝܬܰܝܢ ܡܰܘܕܶܝܢܰܢ. ܐܶܠܐܴ ܠܝ̇ܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܚܠܳܦܰܝܢ ܡܩܰܪܒܺܝܢܰܢ ܘܥܰܡܳܗ̇ ܕܶܝܢ ܠܰܢܒܺܝ̈ܶܐ ܘܠܰܫܠܺܝ̈ܚܶܐ ܘܣܳܗ̈ܕܶܐ ܘܡܰܘܕ̈ܝܳܢܶܐ ܒܰܥܳܝ̈ܶܐ ܘܰܡܦܺܝ̈ܣܳܢܶܐ ܩܕܳܡܰܝܟ ܠܗܽܘܢ ܣܳܝܡܺܝܢܰܢ ܐܰܝܟܰܢܳܐ ܕܒܶܝܬ ܐܺܝܕܰܝ̈ܗܽܘܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܐܰܣܪܰܚ ܠܰܢ: ܘܚܶܟܡܬܳܐ ܕܺܝܕܰܥܬܳܟ ܐܠܰܗܳܝܬܳܐ ܐܰܫܪܳܐ ܒܰܢ: ܘܗܰܝܡܳܢܽܘܬܳܐ ܫܰܪܺܝܪܬܳܐ ܫܰܪܰܪ ܘܰܩܒܽܘܥ ܒܰܢ: ܘܰܒܝܰܡܺܝܢܳܟ ܡܰܠܝܰܬ݀ ܟܽܠ ܒܽܘܪ̈ܟܳܬܳܐ ܒܰܪܶܟ ܠܰܢ: ܘܰܬܚܶܝܬ ܟܶܢ̈ܦܶܐ ܕܛܰܝܒܽܘܬܳܟ ܣܰܬܰܪ ܠܰܢ: ܘܡ̣ܶܢ ܟܽܠ ܢܶܟܝܴ̈ܢܶܐ ܫܰܘܙܶܒ ܠܰܢ: ܘܡ̣ܶܢ ܟܽܠ ܣܽܘܓܦܳܢ̈ܶܐ ܦܰܨܳܐ ܠܰܢ ܘܰܠܫܽܘܠܳܡܳܐ ܡܫܰܝܢܳܐ ܕܫܳܦ̇ܰܪ ܠܳܟ ܡܰܢܰܥ ܠܰܢ: ܘܡܰܦܩܳܢܳܐ ܕܪ̈ܰܚܡܶܐ ܕܡ̣ܶܢ ܗܳܢܳܐ ܥܳܠܡܳܐ ܠܥܳܠܡܳܐ ܚܰܕܬܳܐ ܐܰܫܘܳܐ ܠܰܢ: ܘܰܒܓܰܒܳܐ ܝܰܡܺܝܢܳܝܳܐ ܥܰܡ ܐܶܡܪ̈ܰܝܟ ܐܰܩܺܝܡ ܠܰܢ. ܘܰܓܢܽܘܢ ܚܰܕ̈ܘܳܬܳܐ ܐܰܘܪܶܬ ܠܰܢ: ܘܥܰܠ ܦܳܬܽܘܪ ܚܰܝ̈ܶܐ ܐܰܣܡܶܟ ܠܰܢ: ܘܡ̣ܶܢ ܐܰܓܳܢܳܟ ܗ̇ܳܝ ܡܰܠܝܰܬ݀ ܚܰܡܪܳܐ ܚܰܝܳܐ ܐܰܫܩܳܐ ܠܰܢ: ܘܰܒܢܽܘܗܪܳܟ ܓܰܐܝܳܐ ܚܰܕܳܐ ܠܰܢ ܘܥܰܡ ܩܪ̈ܰܝܳܐ ܕܡܶܫܬܽܘܬܳܟ ܘܰܚܕܽܘ̈ܓܶܐ ܕܰܚܠܽܘܠܳܟ ܙܰܡܶܢ ܘܰܚܠܽܘܛ ܠܰܢ: ܘܒܰܚܙܳܬܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܐܰܦܓܰܥ ܠܰܢ: ܘܥܰܡܗܽܘܢ ܘܒܰܝܢܳܬܗܽܘܢ ܫܽܘܒܚܳܐ ܠܳܟ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܨܠܘܬܐ ܕܨܦܪܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܕܰܒܫܰܝܢܳܐ ܢܰܓܺܝܪܳܐ ܕܡܶܢܳܟ: ܘܒܰܫܠܳܡܳܐ ܫܰܦܝܳܐ ܕܡ̣ܶܢ ܠܘܳܬܳܟ: ܘܰܒܚܽܘܒܳܐ ܕܝ̇ܳܐܶܐ ܘܰܪܚܺܝܡ ܠܳܟ: ܒܗܺܝܠܐܴܝܬ ܢܥܰܕܥܶܕ ܠܳܟ: ܘܰܡܫܰܝܢܳܐܺܝܬ ܢܓܰܚܶܐ ܠܳܟ: ܘܰܦܨܺܝܚܳܐܺܝܬ ܢܰܘܕܶܐ ܠܳܟ: ܘܒܰܣܺܝܡܳܐܺܝܬ ܢܫܰܒܚܳܟ ܘܢܶܣܓܽܘܕ ܠܳܟ ܘܢܰܘܪܶܒ ܠܳܟ. ܐܰܝܟܰܢܳܐ ܕܰܒܟܽܠܗܽܘܢ ܚܰܓ̈ܶܐ ܘܥܺܐܕ̈ܶܐ ܘܦܶܨ̈ܚܶܐ ܘܝܰܘ̈ܡܳܬܳܐ ܕܚܰܝܰܝ̈ܢ: ܢܶܗܘܶܐ ܥܳܒܽܘ̈ܕܶܐ ܘܢܳܛܽܘܪ̈ܶܐ ܕܦܽܘ̈ܩܕܳܢܶܐ ܕܺܝܠܳܟ ܡܰܥܒ̈ܕܰܝ ܚܰܝ̈ܶܐ ܘܢܰܣܶܩ ܠܟ ܫܽܘܒܚܳܐ܀

 

ܦܪܘܡܝܘܢ ܕܨܦܪܐ

 

ܫܽܘܒܚܳܐ ܚܰܠܝܳܐ ܘܒܰܣܺܝܡܳܐ: ܘܣܶܓܕܬܳܐ ܪܟܺܝܢܬܳܐ ܘܰܥܦܺܝܦܬܳܐ: ܘܬܰܘܕܺܝܬܳܐ ܐܰܡܺܝܢܬܳܐ ܘܒܰܣܺܝܡܬܳܐ ܘܒܳܥܽܘܬܳܐ ܐܰܟܺܝܦܬܳܐ ܘܶܡܬܚܰܢܳܢܺܝܬܳܐ ܢܶܫܬܘܶܐ ܕܰܢܩܰܪܶܒ ܠܚܰܕ ܟܝܳܢܳܐ ܫܒܺܝܚܳܐ ܘܰܡܥܰܠܝܳܐ ܘܰܡܫܰܡܠܝܳܢܳܐ ܕܐ̱ܪܳܙܳܐ ܪܰܒܳܐ ܘܠܐܴ ܡܶܬܡܰܠܠܳܢܳܐ: ܚܰܝܠܐܴ ܐܳܚܽܘܕܳܐ ܘܠܐܴ ܡܶܬܕܰܪܟܳܢܳܐ: ܢܽܘܗܪܳܐ ܓܢܺܝܙܳܐ ܠܐܴ ܡܶܬܩܰܪܒܳܢܳܐ: ܕܶܢܚܳܐ ܓܰܐܝܳܐ ܘܠܐܴ ܡܶܬܦܰܫܩܳܢܳܐ ܐܠܰܗܽܘܬܳܐ ܟܣܺܝܬܳܐ ܘܡܰܥܒܕܰܬ݀ ܠܟܽܠ: ܡܳܪܽܘܬܳܐ ܦܫܺܝܛܬܳܐ ܘܰܥܦܺܝܩܰܬ݀ ܟܽܠ. ܗ̇ܰܘ ܕܰܠܥܶܠ ܡ̣ܶܢ ܟܽܠ ܐܽܘܣ̈ܺܝܰܐܣ ܘܰܠܥܶܠ ܡ̣ܶܢ ܟܽܠ ܡܰܚܫܰܒܬܳܐ ܐܺܝܬܶܝܗ̇: ܒܰܡܣܰܝܟܽܘܬܳܐ ܡ̇ܰܢ ܫܡܳܗ̈ܶܐ ܠܐܴ ܡܶܬܚܰܫܒܳܐ: ܐܰܒܳܐ ܢܽܘܗܪܳܐ ܘܰܒܪܳܐ ܨܶܡܚܳܐ ܘܪܽܘܚܳܐ ܕܶܢܚܳܐ ܐܰܒܳܐ ܡܬܽܘܡܳܝܳܐ: ܘܰܒܪܳܐ ܕܪܶܚܡܰܬ݀ ܐ̱ܢܳܫܽܘܬܳܐ ܚܰܕ ܐܠܰܗܳܐ ܫܰܪܺܝܪܳܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ܀

 

ܣܕܪܐ

ܡܪܰܡܪܡܺܝܢܰܢ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝܬ ܡ̣ܶܢ ܫܡܰܝ̈ܟ ܪ̈ܳܡܶܐ ܘܥܰܠܺܝܬܳܢ: ܘܶܐܬܡܰܟܰܟ̣ܬ ܠܚܰܫܳܐ ܘܡܰܘܬܳܐ ܘܰܙܩܺܝܦܳܐ ܘܪܰܡܪܶܡܬܳܢ ܘܶܐܬܡܰܣܟ̣ܰܢܬ ܘܰܐܥܬܰܪܬܳܢ: ܘܶܐܬܒ̣ܛܶܢܬ ܒܓܰܘ ܟܰܪܣܳܐ ܕܰܒܬܽܘܠܬܳܐ ܩܰܕܺܝܫܬܳܐ ܘܒܰܪܶܟܬܳܢ. ܘܶܐܬܒܰܣ̣ܰܪܬ ܡ̣ܶܢ ܡܰܪܒܥܳܐ ܘܗܰܕܰܪܬܳܢ: ܘܶܐܬܓܰܫܰܡ̣ܬ ܦܰܓܪܳܐ ܡ̣ܶܢ ܒܰܪܬ ܕܰܘܺܝܕ ܘܩܰܕܶܫܬܳܢ: ܘܶܐܬܒ̣ܰܪܢܰܫܬ ܘܰܐܠܰܗܬܳܢ: ܘܶܐܬܺܝܠܶܕܬ ܒܓܰܘ ܒܶܝܬ ܠܚܶܡ ܘܰܐܘܠܶܕܬܳܢ ܪܽܘܚܳܢܳܐܺܝܬ: ܘܰܥܡ̣ܰܕܬ ܒܝܽܘܪܕܢܳܢ ܢܰܗܪܳܐ ܘܚܰܣܺܝܬܳܢ: ܘܨܳܡ̣ܬ ܒܕܰܒܪܳܐ ܐܰܪܒܥܺܝܢ ܝܰܘ̈ܡܺܝܢ ܘܬܰܪܣܺܝܬܳܢ: ܟܦ̣ܰܢܬ ܘܣܰܒ̣ܰܥܬܳܢ: ܘܶܐܬܢܰܣܺܝܬ ܡ̣ܶܢ ܣܳܛܳܢܳܐ ܘܚܰܪܰܪܬܳܢ ܡ̣ܶܢ ܢܺܝܪܶܗ: ܐܶܬܟܰܬܰܫ̣ܬ ܚܠܳܦܰܝܢ ܘܚܰܝܶܠܬܳܢ: ܘܰܪܟܶܒ̣ܬ ܥܺܝܠܐܴ ܒܰܪ ܐܰܬܳܢܳܐ ܘܙܰܝܰܚܬܳܢ: ܘܶܐܬܕܰܒ̣ܰܪܬ ܠܶܒܝܬ ܕܺܝܢܳܐ ܐܰܝܟ ܚܰܝܳܒܳܐ ܘܙܰܟܺܝܬܳܢ: ܘܶܐܬܚܒ̣ܶܫܬ ܒܒܶܝܬ ܕܺܝܢܳܐ ܕܒܶܝܬ ܚܰܢܳܢ ܘܡ̣ܶܢ ܚܒܽܘܫܝܳܐ ܐܰܦܶܩܬܳܢ. ܘܶܬܕܺܝܢܬ ܐܰܝܟ ܚܰܝܳܒܳܐ ܘܡ̣ܶܢ ܕܝܢܳܐ ܕܒܺܝܫܳܐ ܚܰܪܰܪܬܳܢ: ܘܶܐܫܬܰܐܠܬ ܐܰܝܟ ܥܳܒ̇ܶܕ ܒܺܝ̈ܫܳܬܳܐ ܡ̣ܶܢ ܦܺܝܠܰܛܳܘܣ ܐܺܝܓܡܽܘܢܳܐ ܘܫܰܒܰܚܬܳܢ. ܘܰܫ̣ܬܶܩܬ ܐܰܝܟ ܐܶܡܪܳܐ ܩܕܳܡ ܓܳܙܽܘܙܳܐ ܘܚܰܟܶܡܬܳܢ: ܘܶܐܬܢ̣ܰܓܰܕܬ ܒܰܦܪ̈ܳܓܶܠܐܷ ܐܰܝܟ ܠܶܣܛܳܝܳܐ ܘܡ̣ܶܢ ܕܺܝܢܳܐ ܦܰܨܺܝܬܳܢ: ܘܰܒܠ̣ܰܥܬ ܦܰܟܳܐ ܡ̣ܶܢ ܥܰܒܕܳܐ ܘܚܰܪܰܪܬܳܢ ܡ̣ܶܢ ܥܰܒܕܽܘܬܳܐ. ܘܶܐܬܩܰܦ̣ܰܚܬ ܒܩܰܢܝܳܐ ܥܰܠ ܪܺܝܫܳܟ ܘܬܰܩܶܦܬܳܢ: ܘܰܐܫܠܚܽܘܟ ܢܰܚܬܰܝ̈ܟ ܐܰܢ̱ܬ ܕܰܐܠܒ̣ܶܫܬ ܠܰܒܪܺܝܬܳܐ ܟܽܠܳܗ̇ ܦܰܐܝܽܘܬܳܐ ܘܰܐܠܒ̣ܶܫܬܳܢ. ܘܶܐܬܶܐܣ̣ܰܪܬ ܥܰܡ ܐܶܣܛܽܘܢܳܐ ܘܡ̣ܶܢ ܦܟܳܪ̈ܶܐ ܕܰܚܛܺܝܬܳܐ ܫ̣ܪܰܝܬܳܢ: ܐܶܬܬܠܺܝܬ ܥܰܠ ܩܰܝܣܳܐ ܕܰܙܩܺܝܦܳܐ ܘܰܦ̣ܪܰܩܬܳܢ: ܘܰܣܒ̣ܰܠܬ ܚܰܫ̈ܶܐ ܘܡܰܘܬܳܐ ܘܰܚܒܳܠܐܴ ܫܰܘܙܶܒܬܳܢ: ܘܰܛܥܶܡ̣ܬ ܚܰܠܐܴ ܘܰܡܪܳܪ̈ܶܐ ܘܚܰܠܺܝܬܳܢ: ܘܶܐܬܟܰܠ̣ܰܠܬ ܒܰܟܠܺܝܠܐܴ ܕܟܽܘ̈ܒܶܐ ܕܥܰܠ ܪܺܝܫܳܟ ܘܰܐܡܠܶܟ̣ܬܳܢ: ܘܡܺܝܬܬ ܒܨܶܒܝܳܢܳܟ ܘܰܐܚܺܝܬܳܢ: ܘܰܒܓܰܘ ܩܰܒܪܳܐ ܐܶܬܬܣܺܝܡܬ ܘܰܐܥܺܝܪܬܳܢ: ܘܶܐܬܢܰܚ̣ܰܡܬ ܒܫܽܘܒܚܳܐ ܘܓܰܐܝܽܘܬܳܐ ܘܚܰܕܺܝܬܳܢ: ܘܰܐܠܒ̣ܶܫܬ ܠܰܢ ܥܽܘܫܢܳܐ ܘܓܰܢ̱ܒܳܪܽܘܬܳܐ ܘܚܰܝܠܐܴ ܘܰܐܦܨܰܚ̣ܬܳܢ: ܘܶܐܬܥܰܠܺܝܬ ܠܰܡܪܰܘܡܳܐ ܠܘܳܬ ܐܰܒܽܘܟ ܠܰܫܡܰܝ̈ܳܐ ܥܶܠܳܝ̈ܶܐ ܘܪܰܡܪܶܡܬܳܢ: ܘܫܰܕܰܪܬ ܥܠܰܝܢ ܪܽܘܚܳܟ ܩܰܕܺܝܫܳܐ ܘܫܰܡܠܺܝܬ ܠܰܢ: ܡ̇ܰܢ ܢܶܦܪܥܳܟ ܚܠܳܦ ܗܳܠܶܝܢ ܐܳܘ ܡܳܪܝܳܐ: ܡ̇ܰܢ ܣܳܦ̇ܶܩ ܕܠܳܟ ܢܰܘܕܶܐ ܐܳܘ ܛܳܒܳܐ: ܡ̇ܰܢ ܡܶܫܟܰܚ ܕܰܢܫܰܒܚܳܟ ܐܳܘ ܡܫܰܒܚܳܐ: ܡ̇ܰܢ ܡܨܶܐ ܕܰܢܩܰܠܣܳܟ ܐܳܘ ܡܳܪܶܐ ܡܳܪ̈ܰܘܳܬܳܐ. ܐܰܝܢܳܐ ܦܽܘܡܳܐ ܡܰܘܕܶܐ ܠܳܟ ܐܳܘ ܬܗܺܝܪܳܐ: ܐܰܝܢܳܐ ܠܶܫܳܢܳܐ ܢܶܫܬܰܥܶܝܟ ܐܳܘ ܣܓܺܝܕܳܐ: ܐܰܝܢܳܐ ܡܰܕܥܳܐ ܢܶܕܥܳܟ ܐܳܘ ܡܥܰܠܝܳܐ: ܡܶܛܽܠ ܕܝܰܬܺܝܪ ܡ̣ܶܢ ܟܽܠ ܚܰܠܳܫܺܝܢܰܢ: ܬܫܰܒܚܳܟ ܚܠܳܦܰܝܢ ܟܰܪܣܳܐ ܙܗܺܝܬܳܐ ܕܰܛܥܶܢ̣ܬܳܟ: ܐܶܡܳܐ ܒܬܽܘܠܬܳܐ ܕܺܝܠܶܕܬܳܟ: ܘܰܬܕܰܝ̈ܳܐ ܕܟܰܝ̈ܳܐ ܕܰܐܝܢܩܽܘܟ ܚܰܠܒܳܐ: ܝܽܘܪܕܢܳܢ ܢܰܗܪܳܐ ܕܰܣ̣ܘܰܚ ܠܳܟ: ܫܰܒܪ̈ܶܐ ܫܦܰܝ̈ܳܐ ܕܒܽܐܘܫܰܥ̈ܢܶܐ ܫܰܒܚܽܘܟ: ܪ̈ܰܚܡܶܐ ܕܢܰܓܕܽܘܟ ܠܒܶܝܬ ܕܺܝܢܳܐ ܚܠܳܦܰܝܢ: ܢܶܓ̈ܕܶܐ ܘܩܽܘܦܳܚ̈ܶܐ ܕܣܰܝܒ̣ܰܪܬ ܡܶܛܽܠ ܦܽܘܪܩܳܢܰܢ ܚܰܫ̈ܶܐ ܘܒܶܙ̈ܚܶܐ ܕܰܣܒ̣ܰܠܬ ܥܰܠ ܐܰܦܰܝ̈ܢ: ܙܩܺܝܦܳܐ ܕܚܶܣܕܳܐ ܕܰܛܥܶܡ̣ܬ ܡܶܛܽܠܳܬܰܢ. ܓܳܓܽܘܠܬܳܐ ܕܙܰܝܰܚܬܳܟ ܥܰܠ ܪܰܘܡܳܗ̇ ܪܳܡܳܐ ܘܰܡܥܰܠܝܳܐ: ܡܰܘܬܳܐ ܕܰܛܥܶܡ̣ܬ ܚܠܳܦ ܟܽܠܰܢ: ܩܰܒܪܳܐ ܚܰܕܬܳܐ ܕܰܫ̣ܪܰܝܬ ܒܓܰܘܶܗ. ܩܰܕܺܝ̈ܫܶܐ ܘܐ̱ܢܳܫ̈ܳܐ ܟܺܐܢ̈ܶܐ ܕܶܐܬܢܰܚܰܡܘ ܒܰܙܩܺܝܦܽܘܬܳܟ: ܡܰܠܐܱܟ̈ܶܐ ܒܚܶܘܳܪ̈ܰܝܗܽܘܢ ܝܰܩܰܪܘ ܠܩܰܒܪܳܟ: ܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܕܰܪ̈ܗܶܛܝ ܕܰܢܒܰܣܡ̈ܢܳܝܗܝ ܠܦܰܓܪܳܟ: ܢܪܰܥܽܘܢܳܟ ܬܽܘܒ ܚܠܳܦܰܝܢ ܬܽܘܩ̈ܠܳܬܗܽܘܢ ܕܰܫܠܺܝ̈ܚܶܐ ܒܶܝܬ ܥܰܡ̈ܡܶܐ ܪܕܺܝܦܽܘܬܗܽܘܢ ܕܰܢܒܺܝ̈ܶܐ ܕܡ̣ܶܢ ܥܰܡܳܐ ܥܩܺܝܪܳܐ ܕܝܽܘ̈ܕܳܝܶܐ: ܦܽܘܣܳܩ ܗܰܕܳܡܰܝ̈ܗܽܘܢ ܕܣܳܗ̈ܕܶܐ ܒܪ̈ܺܝܟܶܐ. ܬܽܘܒ ܢܦܺܝܣܽܘܢܳܟ ܚܠܳܦܰܝܢ ܥܰܡܠܰܝ̈ܗܽܘܢ ܕܐ̱ܢܳܫ̈ܳܐ ܙܰܕܺܝ̈ܩܶܐ. ܬܪܺܝܨܽܘܬܗܽܘܢ ܕܟܺܐܢ̈ܶܐ ܫܰܦܝܽܘܬܗܽܘܢ ܕܩܰܕܺܝ̈ܫܶܐ: ܙܳܟܽܘܬܗܽܘܢ ܕܟܰܫܺܝܪ̈ܶܐ. ܬܽܘܒ ܡܩܰܪܒܺܝܢܰܢ ܩܕܳܡܰܝܟ ܓܡܺܝܪܽܘܬܳܐ ܕܰܓܡܺܝܪ̈ܶܐ: ܐܳܦ ܬܶܐܢܚ̈ܳܬܗܽܘܢ ܕܰܐܒܺܝ̣̈ܠܐܷ: ܨܰܘܡܰܝ̈ܗܽܘܢ ܕܰܢܙܺܝܪ̈ܶܐ: ܡܣܰܪܩܳܐܺܝܬ ܡܣܰܪܩܽܘܬܗܽܘܢ ܕܺܝܚܺܝ̈ܕܳܝܶܐ: ܙܶܕܩ̈ܳܬܗܽܘܢ ܕܰܡܪ̈ܰܚܡܳܢܶܐ. ܬܽܘܒ ܕܶܝܢ ܡܦܺܝܣܺܝܢܰܢ ܠܳܟ ܐܳܘ ܡܳܪܝܳܐ: ܚܠܳܦ ܢܰܦ̈ܫܳܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܗܳܪܟܳܐ ܘܕܰܒܟܽܠ ܐܰܬܰܪ. ܐܰܝܟܰܢܳܐ ܕܟܽܠܰܢ ܢܶܫܬܘܶܐ ܠܚܰܪܬܳܐ ܛܳܒܬܳܐ: ܘܰܠܡܰܦܩܳܢܳܐ ܒܪܺܝܟܳܐ ܕܰܪܘܳܚܬܳܐ: ܘܰܠܡܰܠܐܱܟܳܐ ܕܫܰܝܢܳܐ: ܘܠܰܫܟܺܝܒܽܘܬܳܐ ܕܰܢܝܳܚܬܳܐ: ܘܠܰܩܝܳܡܬܳܐ ܕܙܰܕܺܝܩܽܘܬܳܐ ܘܰܠܝܳܪܬܽܘܬܳܐ ܡܒܰܪܰܟܬܳܐ: ܘܰܠܡܰܠܟܽܘܬܳܐ ܗ̇ܳܝ ܕܰܫܡܰܝܳܐ ܘܰܠܒܽܘܣܳܡܳܐ ܥܕܶܢܳܝܳܐ: ܘܰܠܡܶܫܬܽܘܬܳܐ ܗ̇ܳܝ ܕܠܐܴ ܥܳܒܪܳܐ ܘܠܐܴ ܡܶܫܬܰܪܝܳܐ ܐܳܦ ܠܰܓܢܽܘܢܳܐ ܗ̇ܰܘ ܕܠܐܴ ܦܳܛܪ̈ܳܢ ܚܰܕ̈ܘܳܬܶܗ: ܒܛܰܝܒܽܘܬܳܟ ܡܳܪܝ ܡܬܽܘܡܳܝܬܳܐ ܘܕܰܐܒܽܘܟ ܡܰܠܟܳܐ ܕܪܰܒܽܘܬܳܐ ܘܰܕܪܽܘܚܳܟ ܦܐܶܐ ܘܰܫܒܺܝܚ ܒܓܰܐܝܽܘܬܳܐ ܗܳܫܳܐ܀

 

ܥܛܪܐ

ܫܽܘܒܚܳܐ ܠܳܟ ܦܺܝܪܡܳܐ ܩܰܕܺܝܫܳܐ ܘܥܶܛܪܳܐ ܡܚܰܣܝܳܢܳܐ ܕܩܰܕܶܫ̣ܬ ܐܰܢ̱ܬ ܢܰܦܫܳܟ ܥܰܠ ܐܰܦܰܝ̈ܢ ܒܰܨܠܺܝܒܽܘܬܳܟ ܕܡܶܛܽܠ ܦܽܘܪܩܳܢܰܢ: ܐܰܢ̱ܬ ܡܳܪܝܳܐ ܡܠܐܷ ܪ̈ܰܚܡܶܐ ܪܰܚܶܡܥܠܰܝܢ: ܘܩܰܕܶܫ ܘܰܓܡܽܘܪ ܠܰܢ ܒܟܽܠܳܗ̇ ܩܰܕܺܝܫܽܘܬܳܐ: ܒܗܳܠܶܝܢ ܐܰܝܠܶܝܢ ܕܐܫܬܰܡ̈ܠܺܝܝܶܢ ܒܳܟ ܡܕܰܒܪܳܢܳܐܺܝܬ ܘܶܐܬܡܰܛܺܝ̣̈ܝܶܢ ܠܘܳܬܳܟ ܡܪܰܚܡܳܢܳܐܺܝܬ: ܐܰܝܟܰܢܳܐ ܕܕܰܟܝܳܐܺܝܬ ܘܩܰܕܺܝܫܳܐܺܝܬ ܠܳܟ ܢܩܰܪܶܒ ܕܶܒܚ̈ܶܐ ܬܰܘܕܺܝ̈ܬܳܢܳܝܶܐ: ܘܩܽܘܪ̈ܒܳܢܶܐ ܡܪ̈ܰܥܝܳܢܶܐ ܕܰܡܪܰܥܶܝܢ ܠܐܱܠܳܗܽܘܬܳܟ ܡܥܰܠܝܰܬ݀ ܡ̣ܶܢ ܟܽܠ: ܡܳܪܰܢ܀

 

ܚܘܬܡܐ

ܝܰܠܕܳܐ ܡܬܽܘܡܳܝܳܐ ܕܰܓܡ̣ܰܪ ܠܚܰܣܺܝܪ̈ܶܐ ܒܝܰܠܕܶܗ: ܘܚܰܣܺܝ ܠܚܰܛܳܝ̈ܶܐ ܒܰܥܡܳܕܶܗ: ܘܰܐܚܺܝ ܠܡܳܝܽܘ̈ܬܶܐ ܒܡܰܘܬܶܗ ܘܰܐܩܺܝܡ ܠܰܩܒܺܝܪ̈ܶܐ ܒܰܩܝܳܡܬܶܗ ܐܰܩܺܝܡ ܠܰܢ ܡܳܪܝ ܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ: ܘܕܰܠܐܴ ܠܰܢ ܡ̣ܶܢ ܥܽܘܡܩܳܐ ܕܰܫܟܺܝܪ̈ܳܬܳܐ: ܘܩܰܕܶܫ ܠܰܢ ܒܪܽܘܚܳܟ ܩܰܕܺܝܫܳܐ: ܘܰܐܢܗܰܪ ܠܰܢ ܒܢܽܘܗܪܳܐ ܕܦܰܪܨܽܘܦܳܟ: ܐܰܝܟܰܢܳܐ ܕܥܰܬܺܝܪܳܐܺܝܬ ܢܰܘܕܶܐ ܘܢܶܣܓܽܘܕ ܠܳܟ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܝܰܠܕܳܐ ܡܬܽܘܡܳܝܳܐ ܘܰܠܚܽܘܕܳܝܳܐ ܕܡ̣ܶܢ ܐܰܒܳܐ ܩܕܳܡ ܙܰܒ̈ܢܶܐ ܐܶܬܺܝܠܶܕ ܕܠܐܴ ܫܽܘܪܳܝܳܐ: ܘܰܒܚܰܪܰܬ݀ ܙܰܒ̈ܢܶܐ ܐܶܬܺܝܠܶܕ ܡ̣ܶܢ ܒܬܽܘܠܬܳܐ ܡܰܪܝܰܡ ܕܠܐܴ ܫܽܘܚܠܳܦܳܐ: ܘܶܐܬܳܐ ܠܡܽܘܟܳܟܳܐ ܨܶܒܝܳܢܳܝܳܐ ܘܩܰܒܶܠ ܥܠܰܘܗܝ ܟܽܠܗܶܝܢ ܐ̱ܢܳܫܳܝ̈ܳܬܳܐ ܚܰܫܳܐ ܘܡܰܘܬܳܐ ܘܰܙܩܺܝܦܳܐ: ܘܫܰܡܠܺܝ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܕܰܚܠܳܦܰܝܢ: ܕܰܢܥܰܕܰܪ ܠܰܓܒܺܝܠܬܳܐ ܕܺܐܝ̈ܕܰܘܗܝ ܩܰܕܺܝ̈ܫܳܬܳܐ: ܘܢܶܦܪܩܺܝܘܗܝ ܠܨܰܠܡܶܗ ܩܰܕܺܝܫܳܐ ܕܰܐܫܚ̣ܶܬ ܒܰܚܛܺܝܬܳܐ: ܘܶܐܬܚܰܒܰܠ ܠܶܗ ܒܺܐܝ̈ܕܰܝ ܡܳܪܽܘܕܳܐ ܕܠܶܗ ܠܐܱܠܳܗܳܐ ܡܶܠܬܳܐ ܕܟܽܠܗܶܝܢ ܗܳܠܶܝܢ ܣܰܝܒܰܪ ܚܠܳܦܰܝܢ ܒܨܶܒܝܳܢܶܗ: ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܫܽܘܒܚܳܐ ܠܳܟ ܐܠܰܗܳܐ ܡܶܠܬܳܐ ܡܬܽܘܡܳܝܳܐ ܕܡܶܫܬܰܒܰܚ ܐܰܢ̱ܬ ܫܒܺܝܚܳܐܺܝܬ ܠܥܶܠ ܡ̣ܶܢ ܡܰܕܪܟܳܢܽܘܬܳܐ ܕܗܰܘ̈ܢܶܐ ܒܺܐܝܬܽܘܬܳܟ: ܡܪܰܡܪܶܡ ܐܰܢ̱ܬ ܒܺܐܝܩܳܪܳܟ ܘܰܒܪܰܒܽܘܬܳܟ ܡܥܰܠܝܳܐܺܝܬ: ܘܥܰܬܺܝܪ ܐܰܢ̱ܬ ܒܛܳܒܽܘܬܳܟ ܠܐܴ ܡܶܣܬܰܝܟܳܢܳܐܺܝܬ: ܘܰܫܦܺܝܥ ܐܰܢ̱ܬ ܒܫܽܘ̈ܟܳܢܰܝܟ ܠܐܴ ܡܶܬܡܰܫܚܳܢܳܐܺܝܬ: ܕܰܐܢ̱ܬ ܐܺܝܬܰܝܟ ܥܶܠܬܳܐ ܕܟܽܠ ܛܳܒ̈ܳܢ. ܘܡܰܒܽܘܥܳܐ ܕܟܽܠܗܶܝܢ ܚܰܕ̈ܘܳܢ: ܘܣܺܝܡܬܳܐ ܕܒܽܘܪ̈ܟܳܬܳܐ: ܘܓܰܙܳܐ ܕܥܽܘܕܪ̈ܳܢܶܐ. ܘܓܳܡܽܘܪܳܐ ܕܰܓܡܺܝܪ̈ܶܐ: ܘܰܡܩܰܕܫܳܢܳܐ ܕܩܰܕܺܝ̈ܫܶܐ ܘܚܰܝ̈ܶܐ ܕܣܳܝܩܺܝܢ ܡܠܺܝ̣̈ܠܐܷ. ܫܽܘܦܪ̈ܶܐ ܕܫܰܦܺܝܪ̈ܶܐ ܛܳܒܽܘܬܳܐ ܕܛܽܘܒܬܳܢ̈ܶܐ: ܣܰܘܩܳܐ ܕܪ̈ܽܘܚܳܢܶܐ: ܡܰܐܚܝܳܢܳܐ ܕܥܳܠܡ̈ܶܐ: ܡܰܠܟܳܐ ܕܥܶܠܳܝ̈ܶܐ: ܘܡܳܪܳܐ ܕܬܰܚܬܳܝ̈ܶܐ: ܐܽܘܣܺܝܰܐ ܕܟܽܠܗܶܝܢ ܐܽܘܣܺܝ̈ܰܐܣ ܠܐܴ ܡܶܬܗܰܘܢܳܢ̈ܳܝܳܬܳܐ: ܐܰܒܳܐ ܕܟܽܠ ܐܰܒܳܗܽܘܬܳܐ ܛܳܒܬܳܐ ܡܶܫܬܰܡܗܳܐ ܒܰܫܡܰܝܳܐ ܘܒܰܐܪܥܳܐ ܠܳܟ ܐܠܰܗܳܐ ܡܪܰܝܡܳܐ ܕܥܳܒܪܳܐ ܠܟܽܠ ܗܰܘܢܳܐ ܘܡܰܕܥܳܐ ܕܰܥܒܺܝ̣̈ܕܶܐ ܡܡܰܠܠܽܘܬ ܬܶܫܒܽܘܚܬܳܐ ܕܦܰܐܝܳܐ ܠܳܟ. ܘܪܰܒܳܐ ܡ̣ܶܢ ܟܽܠܗܽܘܢ ܦܽܘ̈ܡܶܐ ܘܠܶܫܳܢ̈ܶܐ ܕܰܒܪ̈ܰܝܳܐ: ܘܩܽܘܒܳܠܛܰܝܒܽܘܬܳܐ ܕܡܶܬܬܚܺܝܒܳܐ ܠܳܟ: ܡܶܬܟܰܫܦܺܝܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܟܰܕ ܫܳܐܠܺܝܢܰܢ ܡ̣ܶܢ ܪܰܒܽܘܬ ܥܽܘܬܪܳܟ ܘܣܰܓܺܝܐܝܽܘܬ ܛܳܒܽܘܬܳܟ ܕܰܬܫܰܕܰܪ ܠܰܢ ܡ̣ܶܢ ܥܽܘ̈ܡܩܶܐ ܫܒܺܝ̈ܚܶܐ ܕܺܐܝܬܽܘܬܳܟ: ܪܽܘܚܳܐ ܩܰܕܺܝܫܳܐ ܕܰܢܩܰܕܶܫ ܠܰܢ: ܘܥܰܡܶܗ ܠܝܳܚܳܐ ܕܫܳܪ̈ܥܳܬܰܢ ܥܛܳܝܳܐ ܕܣܰܟܠܘ̈ܳܬܰܢ ܠܐܴ ܡܶܬܥܰܗܕܳܢܽܘܬܳܐ ܠܠܐܴ ܢܳܡܽܘܣܳܝ̈ܘܳܬܰܢ: ܚܽܘܣܳܝܳܐ ܕܚܰܘ̈ܒܳܬܰܢ ܫܽܘܒܩܳܢܳܐ ܕܰܚܛܳܗܰܝ̈ܢ ܠܐܴ ܡܶܬܕܰܟܪܳܢܽܘܬܳܐ ܠܟܽܠܗܶܝܢ ܡܶܬܥܰܒܪ̈ܳܢܘܳܬܰܢ ܫܽܘܪܬܳܚܳܐ ܕܥ̈ܰܠܠܳܬܰܢ ܒܽܘܪ̈ܟܳܬܳܐ ܠܐܴ ܡܰܘܦܝܳܢ̈ܳܝܳܬܳܐ ܠܟܰܪ̈ܡܰܝܢ ܐܳܦ ܠܐܷܕܪ̈ܳܬܰܢ: ܢܽܘܛܳܪܳܐ ܛܳܒܳܐ ܕܠܐܴ ܢܶܟܝܳܢܳܐ ܕܡ̣ܶܢ ܒܺܝܫܳܐ ܠܦܰܓܪ̈ܰܝܢ ܘܢܰܦ̈ܫܳܬܰܢ: ܐܰܝܟܰܢܳܐ ܕܒܳܟ ܐܠܰܗܳܐ ܩܳܢܶܝܢܰܢ ܪ̈ܽܘܚܳܬܰܢ ܘܢܰܦ̈ܫܳܬܰܢ: ܘܒܳܟ ܢܶܬܬܰܓܰܪ ܥܽܘܬܪܳܐ ܫܒܺܝܚܳܐ ܕܰܡܝܰܬܪ̈ܳܬܰܢ: ܘܒܰܒܪܳܟ ܚܰܒܺܝܒܳܐ ܡܳܪܰܢ ܝܶܫܽܘܥ ܡܫܺܝܚܳܐ ܦܳܪܽܘܩܳܐ ܕܚܰܝܰܝ̈ܢ. ܗ̇ܰܘ ܕܫܰܡܠܺܝ ܟܽܠܳܗ̇ ܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ ܡܶܛܽܠܳܬܰܢ: ܘܩܰܒܶܠ ܥܠܰܘܗܝ ܟܽܠܗܶܝܢ ܐ̱ܢܳܫܳܝ̈ܳܬܳܐ ܚܠܳܦܰܝܢ: ܘܡܺܝܬ ܘܰܐܚܺܝ ܡܺܝܬܽܘܬܰܢ: ܘܩܳܡ ܡ̣ܶܢ ܩܰܒܪܳܐ ܒܬܶܫܒܽܘܚܬܳܐ ܘܠܐܴ ܚ̣ܙܳܐ ܚܒܳܠܐܴ ܒܶܝܬ ܡܺܝ̈ܬܶܐ ܘܰܦ̣ܪܰܩ ܠܰܢ ܡ̣ܶܢ ܥܰܒܕܽܘܬܶܗ ܕܣܳܛܳܢܳܐ ܡܳܪܽܘܕܳܐ ܫܰܘܙܶܒ ܠܰܢ: ܘܰܣܠ̣ܶܩ ܒܫܽܘܒܚܳܐ ܕܙܳܟܽܘܬܳܐ. ܘܺܝܬܶܒ ܡ̣ܶܢ ܝܰܡܺܝܢ ܐܰܒܽܘܗܝ ܘܥܰܡܶܗ ܐܰܘܬܶܒ ܠܰܢ: ܘܰܒܪܽܘܚܳܐ ܕܺܝܠܶܗ ܩܰܕܺܝܫܳܐ ܫܰܪܰܪ ܠܰܢ ܘܚܰܟܶܡ ܠܰܢ: ܘܒܺܐܝ̈ܕܰܝ ܫܠܺܝ̈ܚܶܐ ܕܺܝܠܶܗ ܩܰܕܺܝ̈ܫܶܐ ܐܶܬܢܰܗܰܪܢܰܢ: ܘܒܺܐܝ̈ܕܰܝܳܐ ܕܺܝܠܗܽܘܢ ܐܶܫܬܰܘܕܺܝ ܠܰܢ: ܘܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܐܰܘܪܶܬ ܠܰܢ: ܘܰܒܝܰܘܡܳܐ ܕܳܐܬܶܐ ܠܚܰܪܬܳܐ ܫܽܘܠܳܡܳܐ ܕܙܰܒ̈ܢܶܐ ܡܰܒܪܶܩ ܢܺܝܫܶܗ ܕܰܨܠܺܝܒܳܐ ܩܰܕܺܝܫܳܐ ܩܕܳܡܰܘܗܝ ܡ̣ܶܢ ܡܰܕܢܚܳܐ: ܘܳܐܬܶܐ ܥܰܠ ܥܢ̈ܳܢܰܝ ܫܡܰܝܳܐ ܒܬܶܫܒܽܘܚܬܳܐ ܘܒܳܗܬܺܝܢ ܟܳܦܽܘܪ̈ܶܐ: ܘܡܰܚܦܪܺܝܢ ܝܽܘ̈ܕܳܝܶܐ ܕܰܛܠܰܡ̣ܘ ܠܰܡܕܰܒܪܳܢܽܘܬܶܗ: ܢܶܫܬܘܶܐ ܚܢܰܢ ܘܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܶܗ: ܕܗܰܝܡܶܢܢܰܢ ܒܟܽܠܗܶܝܢ ܣܳܥܽܘܪ̈ܘܳܬܶܗ. ܘܰܢܛܰܪܢܰܢ ܦܽܘܩ̈ܕܳܢܰܘܗܝ ܘܢܳܡܽܘ̈ܣܰܘܗܝ ܘܽܐܘܪ̈ܚܳܬܶܗ: ܢܰܫܘܶܐ ܠܰܢ ܕܢܶܦܪܰܚ ܠܐܘܪܥܶܗ ܒܰܐܦ̈ܶܐ ܓܰܠܝ̈ܳܬܳܐ ܒܝܰܘܡܳܐ ܕܰܗܘܳܝܳܐ ܡܶܐܬܺܝܬܶܗ ܕܬܰܪ̈ܬܶܝܢ: ܘܟܽܠܰܢ ܢܙܰܡܰܪ ܫܽܘܒܚܳܐ ܠܓܶܠܝܳܢܶܗ: ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܗܳܫܳܐ܀

ܫܠܡ

 

ܛܟܣܐ ܕܚܕ ܒܫܒܐ ܬܪܝܢܐ ܕܥܠ ܡܕܒܪܢܘܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܨܶܡܚܳܐ ܕܺܝܠܶܗ ܕܰܐܒܳܐ ܡܬܽܘܡܳܝܳܐ ܕܫܰܡܠܺܝ ܟܽܠܳܗ̇ ܡܕܰܒܪܳܢܽܘܬܶܗ ܕܰܚܠܳܦܰܝܢ: ܘܚܰܪܰܪ ܠܰܢ ܡ̣ܶܢ ܛܳܥܝܽܘܬܳܐ ܕܰܦܬܰܟܪ̈ܶܐ ܒܝܰܘܡܳܐ ܕܰܩܝܳܡܬܶܗ. ܘܰܒܢܽܘܗܪܳܐ ܦܰܐܝܳܐ ܕܝܽܘܠܦܳܢܳܟ ܡܰܐܚܝܳܢܳܐ ܐܰܢܗܰܪ ܠܬܺܐܒܶܝܠ ܕܚܶܫܽܘܟܳܐ ܗܘܳܬ݀ ܒܛܳܥܝܽܘܬܳܐ ܕܰܦܬܰܟܪ̈ܶܐ ܘܰܒܝܰܕ ܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ ܕܺܝܠܳܟ: ܡܠܰܝܬܳܝܗܝ ܠܥܳܠܡܳܐ ܝܺܕܰܥܬܳܐ ܕܰܐܠܳܗܽܘܬܳܟ ܡܫܰܒܰܚܬܳܐ ܢܰܛܰܪ ܠܰܢ ܡܳܪܝ ܒܰܨܠܰܘ̈ܳܬܗܽܘܢ ܕܰܫܠܺܝ̈ܚܶܐ ܕܺܝܠܳܟ ܕܺܐܝܬܰܝܗܶܝܢ ܡܩܰܒ̈ܠܳܬܳܐ: ܘܰܐܫܘܳܐ ܠܰܢ ܠܰܡܢܳܬܳܐ ܛܳܒܬܳܐ ܘܰܠܫܽܘܠܳܡܳܐ ܡܫܰܝܢܳܐ ܕܫܳܦ̇ܰܪ ܠܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܚܰܕ ܐܺܝܬܝܳܐ ܡܬܽܘܡܳܝܳܐ ܕܰܓܢܺܝܙ ܘܰܟܣܶܐ: ܘܡܰܒܰܥ ܟܽܠ ܛܳܒ̈ܳܬܳܐ ܠܰܕܩ̇ܳܪܶܝܢ ܠܶܗ. ܘܡܰܒܥܰܕ ܡ̣ܶܢ ܟܽܠܗܽܘܢ ܙܰܘ̈ܥܶܐ ܘܚܽܘ̈ܫܳܒܶܐ ܐ̱ܢܳܫܳܝ̈ܶܐ: ܗ̇ܰܘ ܕܡܶܢܶܗ ܐܺܝܬܰܘܗܝ: ܘܗ̇ܰܘ ܠܶܗ ܝܳܕܰܥ: ܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ ܗ̇ܳܢܶܝܢ ܡܶܬܚܰܙܝܳܢ̈ܳܝܳܬܳܐ ܟܺܝܬ ܘܠܐܴ ܡܶܬܚܰܙܝܳܢ̈ܳܝܳܬܳܐ: ܚܰܕ ܐܠܰܗܳܐ ܫܰܪܺܝܪܳܐ ܕܡܶܣܬܓܶܕ ܘܡܶܫܬܰܒܰܚ ܒܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܕܠܰܝܬ ܒܶܗ ܫܡܳܐ ܕܠܐܴ ܩܢܽܘܡܳܐ: ܘܠܐܴ ܩܢܽܘܡܳܐ ܕܰܛܠܐܷ ܘܩܰܫܺܝܫ ܡ̣ܶܢ ܩܢܽܘܡܳܐ: ܘܠܐܴ ܫܽܘܓܢܳܝܳܐ: ܘܠܐܴ ܫܽܘܚܠܳܦܳܐ ܒܪܰܒܽܘܬܳܐ ܘܒܰܙܥܽܘܪܽܘܬܳܐ. ܐܶܠܐܴ ܐܶܢ ܐܰܒܳܐ ܡܶܬܶܐܡܰܪ ܒܪܳܐ: ܘܪܽܘܚܳܐ ܡܶܢܶܗ ܐܺܝܬܰܘܗܝ: ܘܶܐܢ ܒܪܳܐ ܡܶܬܶܐܡܰܪ ܐܰܒܳܐ ܘܪܽܘܚܳܐ ܒܶܗ ܡܶܬܺܝܕܰܥ. ܘܶܐܢ ܪܽܘܚܳܐ ܕܶܝܢ ܡܶܬܶܐܡܰܪ ܐܰܒܳܐ ܘܰܒܪܳܐ ܒܶܗ ܡܫܰܡܠܰܝ: ܐܰܒܳܐ ܝܳܠܽܘܕܳܐ ܘܠܐܴ ܝܺܠܺܝܕܳܐ: ܒܪܳܐ ܝܺܠܺܝܕܳܐ ܘܠܐܴ ܝܳܠܽܘܕܳܐ: ܘܪܽܘܚܳܐ ܕܢܳܦ̇ܶܩ ܡ̣ܶܢ ܐܰܒܳܐ: ܘܺܐܝܬܰܘܗܝ ܒܰܪ ܐܺܝܬܽܘܬܶܗ ܕܰܒܪܳܐ. ܚܕܳܐ ܐܠܰܗܽܘܬܳܐ: ܚܕܳܐ ܡܳܪܽܘܬܳܐ ܚܰܕ ܫܽܘܠܛܳܢܳܐ: ܚܰܕ ܐܺܝܩܳܪܳܐ ܚܕܳܐ ܐܽܘܣܺܝܰܐ ܚܰܕ ܐܠܰܗܳܐ ܫܰܪܺܝܪܳܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܡܶܢܟܽܠ ܥܰܠ ܐܰܦ̈ܰܝ ܟܽܠ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܡܶܠܬܳܐ ܕܶܐܬܺܝܠܶܕ ܡ̣ܶܢ ܐܰܒܳܐ ܪܶܕܝܳܐ ܘܰܕܠܐܴ ܙܰܒܢܳܐ: ܠܗܰܠ ܡ̣ܶܢ ܙܰܒ̈ܢܶܐ ܘܥܶܕ̈ܳܢܶܐ: ܐܶܬܺܝܠܶܕ ܝܺܠܺܝܕܽܘܬܳܐ ܐܠܰܗܳܝܬܳܐ ܘܦܳܪܽܘܩܳܝܬܳܐ. ܢܽܘܗܪܳܐ ܕܡ̣ܶܢ ܢܽܘܗܪܳܐ: ܘܰܐܠܳܗܳܐ ܫܰܪܺܝܪܳܐ ܕܡ̣ܶܢ ܐܠܰܗܳܐ ܫܰܪܺܝܪܳܐ: ܗ̇ܰܘ ܕܟܰܕ ܡ̣ܶܢ ܥܳܠܡܳܐ ܬܪܰܝܳܢܳܐ ܕܒܳܪܽܘܝܽܘܬܳܐ ܕܺܝܠܶܗ: ܒܪܳܐ ܘܰܓܒ̣ܰܠ ܠܐܴܕܡ ܒܨܰܠܡܶܗ ܘܒܰܕܡܽܘܬܶܗ: ܘܰܒܫܰܠܺܝܛܽܘܬ ܒܝܳܬܶܐ ܝܰܩܪܶܗ: ܘܥܰܠ ܟܽܠ ܐܰܫܠܛܶܗ ܘܰܬܚܽܘܡܳܐ ܠܶܗ ܣܳܡ ܗ̣ܘܳܐ. ܕܠܐܴ ܢܶܐܟܽܘܠ ܡ̣ܶܢ ܐܺܝܠܳܢܳܐ ܕܺܝܕܰܥܬܳܐ ܗ̇ܰܘ ܕܰܟܣܶܐ ܗ̣ܘܳܐ ܒܶܗ ܡܰܘܬܳܐ ܡܶܬܝܰܕܥܳܢܳܐ: ܕܠܐܴ ܢܶܬܩܰܪܰܒ ܠܶܗ: ܘܶܐܢ ܥܳܒ̇ܰܪ ܦܽܘܩܕܳܢܳܐ ܕܓܳܒܽܘܠܶܗ ܢܳܦ̇ܶܠ ܡ̣ܶܢ ܫܽܘܒܚܶܗ. ܟܰܕ ܕܶܝܢ ܚ̣ܛܳܐ ܘܰܥܒ̣ܰܪ ܥܰܠ ܦܽܘܩܕܳܢܳܐ ܕܶܐܬܪܰܓܪܰܓ ܗ̣ܘܳܐ ܠܦܺܐܪܳܐ ܕܺܐܝܠܳܢܳܐ: ܐܶܟ̣ܰܠ ܘܰܢܦ̣ܰܠ ܗ̣ܘܳܐ ܡܰܦܽܘܠܬܳܐ ܪܰܒܬܳܐ ܘܥܰܫܺܝܢܬܳܐ. ܐܰܪܟܶܢ ܟܰܬܦܳܐ ܕܺܝܠܶܗ ܠܣܶܓܕܬܳܐ ܕܰܦܬܰܟܪ̈ܶܐ ܘܶܐܫܬܰܥܒܰܕ ܠܨܰܠܡ̈ܶܐ ܢܕܺܝ̈ܕܶܐ: ܘܰܗܘ̣ܳܐ ܣܳܓܶܕ ܘܰܡܝܰܩܰܪ ܠܗܽܘܢ ܚܠܳܦ ܒܳܪܽܘܝܶܗ. ܟܰܕ ܕܶܝܢ ܚ̣ܙܳܐ ܐܠܰܗܳܐ ܡܶܠܬܳܐ ܠܨܰܠܡܶܗ ܕܶܐܬܚܰܒܰܠ ܘܡܶܬܒܰܙܰܚ ܗ̣ܘܳܐ ܒܺܐܝ̈ܕܰܝ ܒܥܶܠܕܰܐܪܳܐ ܣܳܐܢܶܗ: ܢܚ̣ܶܬ ܡ̣ܶܢ ܫܡܰܝܳܐ ܥܰܡ ܒܰܪܬ ܩܳܠܶܗ ܕܓܰܒܪܺܐܶܝܠ ܪܺܝܫ ܡܰܠܐܱܟ̈ܶܐ: ܘܒܰܒܬܽܘܠܬܳܐ ܡܰܪܝܰܡ ܫ̣ܪܳܐ ܘܰܥܡ̣ܰܪ ܒܳܗ̇ ܝܰܪ̈ܚܶܐ ܬܶܫܥܳܐ ܒܨܶܒܝܳܢܶܗ ܐܰܝܟ ܒܰܪܢܳܫܳܐ: ܟܰܕ ܡܕܰܒܰܪ ܠܥܳܠܡܳܐ ܒܛܰܝܒܽܘܬܶܗ ܐܰܝܟ ܐܠܰܗܳܐ: ܐܶܬܺܝܠܶܕ ܡܶܢܳܗ̇ ܒܛܶܟܣܳܐ ܕܟܽܠ ܥܽܘ̣̈ܠܺܝܢ ܐܰܝܟ ܒܰܪܢܳܫܳܐ ܐܶܠܐܴ ܢ̣ܛܰܪ ܠܛܰܒ̈ܥܶܐ ܕܰܒܬܽܘ̈ܠܶܝܗ̇ ܐܰܝܟ ܐܠܰܗܳܐ. ܐܶܬܟܰܪܰܟ ܒܥܰܙܪܽܘܪ̈ܶܐ ܘܶܐܬܬܣܺܝܡ ܒܽܐܘܪܝܳܐ ܕܚܰܝ̈ܘܳܬܳܐ ܐܰܝܟ ܒܰܪܢܳܫܳܐ: ܐܶܠܐܴ ܐܰܝܟ ܕܰܢܓܰܕ ܠܰܡܓܽܘ̈ܫܶܐ ܡ̣ܶܢ ܦܳܪܶܣ ܠܣܶܓܕܬܶܗ ܐܰܝܟ ܐܠܰܗܳܐ: ܥ̣ܪܰܩ ܠܡܶܨܪܶܝܢ ܡ̣ܶܢ ܩܕܳܡ ܗܶܪܳܘܕܶܣ ܐܰܝܟ ܒܰܪܢܳܫܳܐ: ܐܶܠܐܴ ܫܰܡܠܺܝ ܢܒܺܝܰܘ̈ܳܬܳܐ ܕܰܢܒܺܝ̈ܶܐ ܕܶܐܬܢܰܒܺܝܘ ܥܠܰܘܗܝ ܐܰܝܟ ܐܠܰܗܳܐ. ܣܠ̣ܶܩ ܗ̣ܘܳܐ ܠܗܰܝܟܠܐܴ ܥܰܡ ܡܰܪܝܰܡ ܘܝܰܘܣܶܦ ܕܰܢܩܰܪܶܒ ܕܶܒܚ̈ܶܐ ܘܩܽܘܪ̈ܒܳܢܶܐ ܐܰܝܟ ܕܰܒܢܳܡܽܘܣܳܐ ܐܰܝܟ ܒܰܪܢܳܫܳܐ ܐܶܠܐܴ ܫ̣ܪܳܝܗܝ ܠܣܳܒܳܐ ܫܶܡܥܽܘܢ ܡ̣ܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ ܐܰܝܟ ܐܠܰܗܳܐ. ܐܶܬܥܡ̣ܶܕ ܒܝܽܘܪܕܢܳܢ ܢܰܗܪܳܐ ܡ̣ܶܢ ܝܽܘܚܰܢܳܢ ܟܳܪܽܘܙܶܗ ܐܰܝܟ ܒܰܪܢܳܫܳܐ: ܐܶܠܐܴ ܢܶܚܬܰܬ݀ ܥܠܰܘܗܝ ܪܽܘܚܳܐ ܕܩܽܘܕܫܳܐ ܘܩܰܕܶܫ ܡܰܝ̈ܳܐ ܒܰܥܡܳܕܶܗ ܐܰܝܟ ܐܠܰܗܳܐ. ܐܶܙܕܰܡܰܢ ܠܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܐܴ ܠܡܶܫܬܽܘܬܳܐ ܐܰܝܟ ܒܰܪܢܳܫܳܐ: ܐܶܠܐܴ ܫܰܚܠܶܦ ܡܰܝ̈ܳܐ ܠܚܰܡܪܳܐ ܛܳܒܳܐ ܐܰܝܟ ܐܠܰܗܳܐ. ܨܳܡ ܐܰܪܒܥܺܝܢ ܐܺܝܡܳܡܺܝ̣̈ܢ ܘܰܐܪܒܥܺܝܢ ܠܰܝܠܰܘ̈ܳܢ ܘܡ̣ܶܢ ܐܳܟܶܠܩܰܪܨܳܐ ܐܶܬܢܰܣܺܝ ܐܰܝܟ ܒܰܪܢܳܫܳܐ: ܐܶܠܐܴ ܚܰܘܺܝ ܠܶܗ ܠܰܡܢܰܣܝܳܢܶܗ ܕܗ̣ܽܘ ܐܺܝܬܰܘܗܝ ܡܰܠܟܳܐ ܘܡܳܪܳܐ ܐܰܝܟ ܐܠܰܗܳܐ: ܫܰܐܶܠ ܠܰܡܫܰܪܝܳܐ ܕܶܐܢ ܨܳܒ̇ܶܐ ܐܰܢ̱ܬ ܕܬܶܬܚܠܶܡ ܐܰܝܟ ܒܰܪܢܳܫܳܐ: ܐܶܠܐܴ ܐܶܡ̣ܰܪ ܠܶܗ ܕܩܽܘܡ ܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ ܘܰܫܒ̣ܰܩ ܠܶܗ ܚܛܳܗܰܘ̈ܗܝ ܐܰܝܟ ܐܠܰܗܳܐ. ܫܰܐܷܠ ܠܐܱܚܘ̈ܳܬܶܗ ܕܠܳܥܳܙܳܪ ܕܰܐܝܟܳܐ ܣܳܡܬܽܘܢܳܝܗܝ ܐܰܝܟ ܒܰܪܢܳܫܳܐ: ܐܶܠܐܴ ܩ̣ܪܳܐ ܒܩܳܠܶܗ ܘܢܰܚܡܶܗ ܘܰܐܩܺܝܡܶܗ ܐܰܝܟ ܐܠܰܗܳܐ. ܫܰܐܶܠ ܠܶܗ ܥܺܝܠܐܴ ܘܰܪܟ̣ܶܒ ܥܠܰܘܗܝ ܘܥܰܠ ܠܐܘܪܫܠܶܡ ܐܰܝܟ ܒܰܪܢܳܫܳܐ: ܐܶܠܐܴ ܩܰܠܣܽܘܗܝ ܫܰܒܪ̈ܶܐ ܘܰܛܠܳܝ̈ܶܐ ܒܩ̈ܳܠܐܷ ܕܽܐܘܫܰܥ̈ܢܶܐ ܐܰܝܟ ܐܠܰܗܳܐ: ܫܩ̣ܰܠ ܡܰܝ̈ܳܐ ܒܠܰܩܢܳܐ ܘܰܐܫܺܝܓ ܪ̈ܶܓܠܐܷ ܕܬܰܠܡܺܝ̈ܕܰܘܗܝ ܐܰܝܟ ܒܰܪܢܳܫܳܐ: ܐܶܠܐܴ ܚܰܘܺܝ ܠܗܽܘܢ ܕܗ̣ܽܘ ܐܺܝܬܰܘܗܝ ܪܰܒܗܽܘܢ ܘܡܳܪܳܐ ܕܺܝܠܗܽܘܢ ܐܰܝܟ ܐܠܰܗܳܐ: ܐܰܥܠܽܘܗܝ ܘܰܐܩܺܝܡܽܘܗܝ ܩܕܳܡ ܦܺܝܠܰܛܳܘܣ ܐܺܝܓܡܽܘܢܳܐ ܘܫܰܐܠܶܗ ܕܡܰܢܽܘ ܐܺܝܬܰܝܟ ܐܰܝܟ ܒܰܪܢܳܫܳܐ: ܐܶܠܐܴ ܚܰܘܺܝ ܠܶܗ ܕܗ̣ܽܘ ܐܺܝܬܰܘܗܝ ܕܰܝ̇ܳܢܳܐ ܕܕܰܝ̈ܳܢܶܐ ܘܡܰܠܟܳܐ ܕܡܰܠܟ̈ܶܐ ܘܪܰܒܳܐ ܒܰܫܪܳܪܳܐ ܐܰܝܟ ܐܠܰܗܳܐ: ܐܰܣܩܽܘܗܝ ܡܰܬܚܽܘܗܝ ܥܰܠ ܩܰܝܣܳܐ ܕܰܨܠܺܝܒܳܐ ܘܰܩܥ̣ܳܐ ܐܠܰܗܝ ܐܠܰܗܝ ܠܡܳܢܳܐ ܫܒܰܩܬܳܢܝ ܐܰܝܟ ܒܰܪܢܳܫܳܐ: ܐܶܠܐܴ ܐܰܚܫ̣ܶܟ ܠܫܶܡܫܳܐ ܘܣܰܗܪܳܐ ܒܰܪܩܺܝܥܳܐ ܕܰܫܡܰܝܳܐ ܐܰܝܟ ܐܠܰܗܳܐ. ܣܳܡ ܢܰܦܫܶܗ ܒܺܐܝ̈ܕܰܝ ܐܰܒܽܘܗܝ ܐܰܝܟ ܒܰܪܢܳܫܳܐ ܐܶܠܐܴ ܐܰܦܩ̣ܰܥ ܫܽܘ̈ܥܶܐ ܘܰܦܬܰܚ ܩܒܪ̈ܐ ܘܢܰܚܶܡ ܡܺܝ̈ܬܶܐ ܐܰܝܟ ܐܠܰܗܳܐ. ܐܰܚܬܽܘܗܝ ܡ̣ܶܢ ܩܰܝܣܳܐ ܕܰܨܠܺܝܒܳܐ ܘܣܳܡܽܘܗܝ ܒܒܶܝܬ ܕܺܝܢܳܐ ܩܒܽܘܪܳܐ ܐܰܝܟ ܒܰܪܢܳܫܳܐ: ܐܶܠܐܴ ܢܰܚܶܡ ܗ̣ܽܘ ܠܶܗ ܒܬܶܫܒܽܘܚܬܳܐ ܡ̣ܶܢ ܓܰܘ ܩܰܒܪܳܐ ܐܰܝܟ ܐܠܰܗܳܐ. ܩܳܡ ܡ̣ܶܢ ܩܰܒܪܳܐ ܘܶܐܬܚܙܺܝ ܠܢܶܫ̈ܶܐ ܘܡܰܠܶܠ ܥܰܡ ܡܰܪܝܰܡ ܡܰܓܕܠܳܝܬܳܐ ܐܰܝܟ ܒܰܪܢܳܫܳܐ: ܐܶܠܐܴ ܥ̣ܰܠ ܠܥܶܠܺܝܬܳܐ ܨܶܝܕ ܬܰܠܡܺܝ̈ܕܰܘܗܝ ܟܰܕ ܬܰܪ̈ܥܶܐ ܐܰܚܺܝܕܺܝܢ ܐܰܝܟ ܐܠܰܗܳܐ. ܣܠ̣ܶܩ ܠܰܫܡܰܝܳܐ ܠܘܳܬ ܐܰܒܳܐ ܕܫܰܠܚܶܗ ܐܳܦ ܐܶܬܚܙܺܝ ܠܬܰܠܡܺܝ̈ܕܰܘܗܝ ܐܰܝܟ ܒܰܪܢܳܫܳܐ: ܐܶܠܐܴ ܫܰܕܰܪ ܠܗܽܘܢ ܪܽܘܚܳܐ ܦܰܪܰܩܠܺܝܛܳܐ ܘܚܰܟܶܡ ܐܶܢܽܘܢ ܐܰܝܟ ܐܠܰܗܳܐ. ܫܒܺܝܚܺܝܢ ܥܒ̇ܳܕܰܝ̈ܟ ܡܳܪܝܳܐ ܡܳܐ ܣܰܓܺܝ̈ܳܐܢ ܬܶܕܡܪ̈ܳܬܳܟ. ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܘܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܰܢ: ܕܰܬܚܰܕܶܐ ܠܰܢ ܒܥܰܕܥܺܐܕܰܝ̈ܟ ܐܠܰܗܳܝ̈ܶܐ: ܐܰܥܬܰܪ ܠܡܶܣ̈ܟܺܢܶܐ ܒܰܥܒ̇ܳܕ̈ܶܐ ܛܳܒ̈ܶܐ ܘܡܰܠܐܴ ܣܽܘܢܩܳܢܰܝ̈ܗܽܘܢ ܘܰܠܥܰܬܺܝܪ̈ܶܐ ܫܰܪܬܰܚ ܬܰܐܓܪ̈ܳܬܗܽܘܢ: ܘܰܐܫܘܳܐ ܐܶܢܽܘܢ ܠܰܡܪܰܚܳܡܽܘ ܥܰܠ ܡܶܣ̈ܟܺܢܶܐ ܟܢܰܘ̈ܳܬܗܽܘܢ: ܠܐܱܪ̈ܡܠܳܬܳܐ ܬܰܪܣܳܐ: ܘܰܠܝܰܬܡ̈ܶܐ ܪܰܒܳܐ. ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܢܺܝܚ ܐܶܢܽܘܢ ܒܽܐܘܪܫܠܶܡ ܕܰܫܡܰܝܳܐ ܥܰܡ ܟܺܐܢ̈ܶܐ ܘܙܰܕܺܝ̈ܩܶܐ ܒܒܽܘܣܳܡܳܐ ܗ̇ܰܘ ܛܽܘܒܬܳܢܳܐ: ܘܰܣܒܺܝܣ ܒܚܰܕ̈ܘܳܬܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܩܰܒܶܠ ܠܰܢ ܡܳܪܝܳܐ ܕܡܶܬܩܰܪܒܺܝܢܰܢ ܠܘܳܬ ܡܰܕܒܚܶܗ ܕܗܰܝܟܠܳܟ ܩܰܕܺܝܫܳܐ: ܐܰܝܟܰܢܳܐ ܕܟܽܠܰܢ ܢܶܬܩܰܕܰܫ ܡ̣ܶܢ ܩܰܕܺܝܫܽܘܬܶܗ ܕܪܽܘܚܳܟ ܩܰܕܺܝܫܳܐ. ܘܰܐܦܺܝܚ ܒܰܢ ܕܽܘܒܳܪ̈ܶܐ ܫܰܦܺܝܪ̈ܶܐ ܕܰܡܪܰܥܶܝܢ ܠܳܟ: ܘܰܐܥܛܰܪ ܡ̣ܶܢ ܣܶܦܘ̈ܳܬܰܢ ܚܠܳܦ ܥܶܛܪܳܐ ܕܗܶܪ̈ܽܘܡܶܐ ܪܺܝܚܳܐ ܗܰܢܺܝܳܐܐ ܕܰܥܒ̇ܳܕ̈ܶܐ ܛܳܒ̈ܶܐ ܘܢܶܬܩܰܒܰܠ ܩܕܳܡ ܬܪܽܘܢܳܣ ܕܰܐܠܳܗܽܘܬܳܟ: ܘܩܰܒܶܠ ܨܠܰܘ̈ܳܬܰܢ ܘܰܫܡܰܥ ܒܳܥܘ̈ܳܬܰܢ ܘܦܰܢܳܐ ܫ̈ܶܐܠܳܬܰܢ ܕܢܰܘܕܶܐ ܠܪ̈ܰܚܡܶܐ ܕܛܰܝܒܽܘܬܳܟ: ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܒܽܘܪܟܬܳܐ ܕܪ̈ܰܚܡܶܐ ܫܰܕܰܪ ܡܳܪܝܳܐ ܠܟܶܢܫܳܐ ܗܳܢܳܐ ܕܶܐܬܛܰܝܰܒ ܠܥܺܐܕܳܐ ܩܰܕܺܝܫܳܐ ܕܰܡܕܰܒܪܳܢܽܘܬܳܟ ܘܰܕܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܘܕܰܩܝܳܡܬܳܟ ܦܳܪܽܘܩܳܝܬܳܐ ܘܰܐܥܬܰܪ ܠܰܢ ܡܳܪܝܳܐ ܡ̣ܶܢ ܒܽܘܪ̈ܟܳܬܳܐ ܫܡܰܝܳܢ̈ܳܝܳܬܳܐ ܕܡ̣ܶܢ ܠܘܳܬܳܟ: ܒܰܨܠܽܘܬ ܐܶܡܳܟ ܘܩܰܕܺܝ̈ܫܰܝܟ ܕܰܥܒ̣ܰܕܘ ܨܶܒܝܳܢܳܟ: ܘܚܰܣܳܐ ܠܡܰܣܟܠܳܢ̈ܶܐ ܘܩܰܕܶܫ ܠܛܰܡ̈ܶܐܐ ܘܰܐܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܐܰܝܟܰܢܳܐ ܕܢܶܩܥܶܐ ܠܳܟ ܒܥܺܐܕܳܐ ܗ̇ܰܘ ܠܐܴ ܥܳܒܽܘܪܳܐ: ܫܽܘܒܚܳܐ ܕܠܐܴ ܫܶܠܝܳܐ ܡܳܪܰܢ ܘܰܐܠܳܗܰܢ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܣܓܺܝܕܳܐ ܕܠܐܴ ܡܶܫܬܰܚܠܰܦ ܘܠܐܴ ܥܳܒ̇ܰܪ ܫܽܘܠܛܳܢ ܡܳܪܽܘܬܶܗ: ܘܰܓܡ̣ܰܪ ܠܰܫܠܺܝ̈ܚܽܘܗܝ ܒܪܽܘܚܶܗ ܩܰܕܺܝܫܳܐ. ܘܰܐܥܬܰܪ ܠܥܰܒ̣ܕ̈ܰܘܗܝ ܒܺܝܕܰܥܬܳܐ ܕܺܝܠܶܗ ܬܗܺܝܪܬܳܐ. ܘܛܰܝܶܒ ܠܩܰܕܺܝ̈ܫܰܘܗܝ ܐܰܬܪܳܐ ܕܠܐܴ ܡܶܣܬܚܶܦ ܒܶܢܝܳܢܶܗ. ܘܰܐܬܩܶܢ ܠܗܽܘܢ ܟܽܘܪ̈ܣܰܘܳܬܳܐ ܕܰܢܕܽܘܢܽܘܢ ܒܰܫܪܳܪܳܐ ܠܰܬܪܶܥܣܰܪ ܫܰܒ̈ܛܶܐ ܕܰܒܢ̈ܰܝ ܐܺܝܣܪܳܐܶܝܠ: ܘܰܩ̣ܪܳܐ ܐܶܢܽܘܢ ܠܰܙܡܺܝ̣̈ܢܰܘܗܝ ܠܰܚܠܽܘܠܶܗ. ܘܒܰܣܶܡ ܐܶܢܽܘܢ ܒܰܣܡܳܟܳܐ ܕܠܐܴ ܡܶܬܩܰܦܠܐܴ ܬܰܨܒܺܝܬܶܗ: ܘܠܐܴ  ܡܰܘܦܶܐ ܒܽܘܣܳܡܶܗ ܘܠܐܴ ܓܳܡܪܳܐ ܚܰܕܽܘܬܶܗ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܟܰܕ ܒܰܫܦܺܝܥܽܘܬܳܐ ܕܪ̈ܰܚܡܰܝܟ ܘܰܒܝܰܡܳܐ ܠܐܴ ܡܶܬܡܰܫܚܳܢܳܐ ܕܥܽܘܕܪ̈ܳܢܰܝܟ ܕܰܠܘܳܬ ܓܶܢܣܰܢ ܡܶܬܒܰܩܶܝܢܰܢ ܐܳܘ ܡܶܠܬܳܐ ܐܠܰܗܳܐ. ܘܩܽܘܒܳܠܛܰܝܒܽܘܬܳܐ ܘܬܶܫܒ̈ܚܳܬܳܐ ܥܰܡ ܥܶܛܪܳܐ ܕܒܶܣ̈ܡܶܐ ܠܰܡܪܰܚܡܳܢܽܘܬܳܟ ܣܰܓܺܝܰܐܬ݀ ܥܽܘܕܪ̈ܳܢܶܐ: ܘܰܣܒܺܝܣܰܬ݀ ܒܫܽܘ̈ܟܳܢܶܐ ܡܩܰܪܒܺܝܢܰܢ: ܒܥܺܐܕܳܐ ܗܳܢܳܐ ܕܰܩܝܳܡܬܳܟ ܘܰܒܚܰܓܳܐ ܦܰܐܝܳܐ ܕܰܡܕܰܒܪܳܢܽܘܬܳܟ ܥܳܒܕܺܝܢܰܢ: ܘܰܠܚܰܫܰܝ̈ܟ ܨܶܒܝܳܢܳܝ̈ܶܐ ܘܡܰܥܒܕ̈ܰܝ ܚܰܝ̈ܶܐ: ܐܰܢ̱ܬ ܕܶܝܢ ܐܳܘ ܡܳܪܝܳܐ ܡܪܰܚܡܳܢܳܐ ܡܫܰܝܢܳܐܺܝܬ ܘܒܰܣܺܝܡܳܐܺܝܬ ܡܶܬܚܰܫܰܚ ܐܰܢ̱ܬ ܥܰܡܰܢ: ܘܰܗܦܽܘܟ ܘܫܰܕܰܪ ܠܰܢ ܒܣܽܘܓܳܐܐ ܕܰܚܢܳܢܳܟ ܥܽܘܬܪܳܐ ܕܚܶܟܡܬܳܟ ܘܰܕܡܰܘ̈ܗܒܳܬܳܟ ܐܠܰܗܳܝ̈ܳܬܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܥܺܐܕܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ: ܘܥܽܘܗܕܳܢܳܐ ܛܳܒܳܐ ܕܝ̇ܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ: ܘܕܽܘܟܪܳܢܳܐ ܛܳܒܳܐ ܕܩܰܕܺܝ̈ܫܰܝܟ ܥܳܒܕܺܝܢܰܢ ܝܰܘܡܳܢܳܐ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬܫܰܚܠܶܦ ܩܰܠܺܝܠܐܴܝܬ ܥܠܰܝܢ ܚܠܳܦ ܥܳܩ̈ܳܬܳܐ ܚܰܕ̈ܘܳܬܳܐ: ܚܠܳܦ ܟܡܺܝܪܽܘܬܳܐ ܦܨܺܝܚ̈ܘܳܬܳܐ: ܚܠܳܦ ܕܠܺܝ̣̈ܚܳܬܳܐ ܫܰܦܝ̈ܳܬܳܐ: ܚܠܳܦ ܫܓܺܝ̈ܫܳܬܳܐ ܡܫܰܝ̈ܢܳܬܳܐ: ܚܠܳܦ ܕܚܺܝ̣̈ܠܳܬܳܐ ܢܺܝ̣̈ܚܳܬܳܐ: ܚܠܳܦ ܩܰܫܝ̈ܳܬܳܐ ܕܠܺܝ̣̈ܠܳܬܳܐ: ܚܠܳܦ ܥܰܣ̈ܩܳܬܳܐ ܦܫܺܝ̈ܛܳܬܳܐ: ܚܠܳܦ ܡܰܪܺܝܪ̈ܳܬܳܐ ܚܰܠܝ̈ܳܬܳܐ: ܚܠܳܦ ܒܠܺܝ̣̈ܠܳܬܳܐ ܡܛܟ̈ܣܳܬܳܐ: ܚܠܳܦ ܡܰܦ̈ܬܠܳܬܳܐ ܬܪ̈ܺܝܨܳܬܳܐ: ܚܠܳܦ ܪ̈ܓܺܝܙܳܬܳܐ ܒܗܺܝ̣̈ܠܳܬܳܐ: ܚܠܳܦ ܡܰܪ̈ܕܘܳܬܳܐ ܡܥܰܕܪ̈ܳܢܝܳܬܳܐ: ܚܠܳܦ ܡܣܰܓܦܳܢ̈ܳܝܳܬܳܐ ܡܰܘܬܪ̈ܳܢܳܝܳܬܳܐ: ܚܠܳܦ ܒܺܝ̈ܫܳܬܳܐ ܛܳܒ̈ܳܬܳܐ. ܘܚܰܘܳܐ ܠܰܢ ܐܳܘ ܡܳܪܝܳܐ ܚܠܳܦ ܟܺܐܢܽܘܬܳܐ ܛܰܝܒܽܘܬܳܐ: ܚܠܳܦ ܬܒܰܥܬܳܐ ܡܰܘܗܒܰܬܳܐ: ܚܠܳܦ ܒܽܘܚܳܢܳܐ ܫܽܘܒܩܳܢܳܐ: ܚܠܳܦ ܣܽܘܓܦܳܢܳܐ ܥܽܘܕܪܳܢܳܐ: ܚܠܳܦ ܩܽܘܛܪܳܓܳܐ ܩܽܘܠܳܣܳܐ: ܚܠܳܦ ܟܰܪܝܽܘܬܳܐ ܫܽܘܒܚܳܐ ܘܬܰܘܕܺܝܬܳܐ ܒܰܦܨܺܝܚܽܘܬܳܐ ܘܢܶܣܓܽܘܕ ܠܳܟ ܒܰܒܗܺܝܠܽܘܬܳܐ: ܘܰܢܗܰܕܪܳܟ ܒܰܓܡܺܝܪܽܘܬܳܐ. ܘܰܢܗܰܠܠܳܟ ܒܰܟܢܺܝܟܽܘܬܳܐ. ܘܢܶܦܠܽܘܚ ܠܳܟ ܒܩܰܕܺܝܫܽܘܬܳܐ ܘܢܶܫܦܰܪ ܠܳܟ ܒܰܚܦܺܝܛܽܘܬܳܐ: ܘܰܢܥܰܕܥܶܕ ܠܳܟ ܒܕܰܟܝܽܘܬܳܐ: ܘܰܢܚܰܓܶܐ ܠܳܟ ܒܢܰܟܦܽܘܬܳܐ ܘܢܶܫܬܘܶܐ ܟܽܠܰܢ ܠܚܰܪܬܳܐ ܛܳܒܬܳܐ ܘܡܰܦܩܳܢܳܐ ܕܰܪܘܳܚܬܳܐ: ܘܠܰܫܟܺܝܒܽܘܬܳܐ ܕܰܢܝܳܚܬܳܐ: ܘܠܰܩܝܳܡܬܳܐ ܕܙܰܕܺܝܩܽܘܬܳܐ: ܘܰܠܝܳܪܬܽܘܬܳܐ ܡܒܰܪܰܟܬܳܐ. ܘܰܠܡܰܠܟܽܘܬܳܐ ܡܪܰܝܰܡܬܳܐ: ܘܰܠܡܶܫܬܽܘܬܳܐ ܡܫܰܒܰܚܬܳܐ ܘܰܠܫܳܪܽܘܬܳܐ ܫܡܰܝܳܢܺܝܬܳܐ: ܒܛܰܝܒܽܘܬܳܟ ܡܬܽܘܡܳܝܬܳܐ: ܘܕܰܐܒܽܘܟ ܡܰܠܟܳܐ ܕܪܰܒܽܘܬܳܐ: ܘܰܕܪܽܘܚܳܟ ܩܰܕܺܝܫܳܐ ܦܐܶܐ ܒܓܰܐܝܽܘܬܳܐ: ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܫܽܘܒܚܳܐ ܕܠܐܴ ܒܳܛܶܠ ܘܩܽܘܠܳܣܳܐ ܕܠܐܴ ܫ̇ܳܬܶܩ: ܘܬܰܘܕܺܝܬܳܐ ܕܠܐܴ ܡܰܘܦܝܳܐ ܘܣܶܓܕܬܳܐ ܪܟܺܝܢܬܳܐ ܢܶܫܬܘܶܐ ܟܽܠܰܢ ܥܰܦܪ̈ܳܢܶܐ ܕܰܢܩܰܪܶܒ ܠܗ̇ܰܘ ܡܰܠܟܳܐ ܪܰܒܳܐ ܕܰܫܒ̣ܰܩ ܡܰܪܟܰܒܬܳܐ ܕܰܟܪ̈ܽܘܒܶܐ ܘܚܰܝܠܰܘ̈ܳܬܳܐ ܫܡܰܝ̈ܳܢܶܐ ܒܓܰܪ ܐܶܢܽܘܢ ܒܰܐܬܪܶܗ ܪܳܡܳܐ ܘܛܰܟ̣ܶܣ ܐܶܢܽܘܢ ܠܬܶܫܒܽܘܚܬܶܗ ܓܽܘ̈ܕܺܝܢ ܓܽܘ̈ܕܺܝܢ ܘܰܢܚ̣ܶܬ ܠܐܱܪܥܳܐ ܒܨܶܒܝܳܢܶܗ ܘܰܠܒ̣ܶܫ ܦܰܓܪܳܐ ܕܰܓܒ̣̈ܰܠܝ ܐܺܝܕܰܘ̈ܗܝ ܩܰܕܺܝ̈ܫܳܬܳܐ ܥܰܠ ܕܰܫܦ̣ܰܪ ܠܶܗ. ܘܒܶܗ ܩܰܒܶܠ ܚܰܫܳܐ ܘܡܰܘܬܳܐ ܘܰܙܩܺܝܦܳܐ ܘܟܽܠ ܨܰܥܪ̈ܺܝܢ ܘܡܽܘܝ̈ܳܩܺܝܢ ܒܰܡܕܰܒܪܳܢܽܘܬܶܗ ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܡܪܰܚܡܳܢܳܐ ܘܰܡܪܰܚܦܳܢܳܐ ܚܰܢܳܢܳܐ ܘܣܰܓܺܝ ܪ̈ܰܚܡܐ ܠܳܟ ܣܳܓܕܺܝܢܰܢ ܘܡܰܘܕܶܝܢܰܢ ܘܰܡܫܰܒܚܺܝܢܰܢ: ܟܰܕ ܡܶܬܕܰܡܪܺܝܢܰܢ ܒܪܰܒܽܘܬܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ. ܗ̇ܰܘ ܕܥܰܠ ܡܰܪܟܰܒܬܳܐ ܟܪܽܘܒܳܝܬܳܐ ܘܢܽܘܪܳܢܳܝܬܳܐ ܘܫܰܠܗܶܒܺܝܬܳܢܳܝܬܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܡܶܬܓܰܝܶܐܐ ܐܰܢ̱ܬ ܘܡܶܬܝܰܩܰܪ: ܘܰܣܓܺܝܕ ܐܰܢ̱ܬ ܘܰܡܫܰܒܰܚ. ܘܰܨܒ̣ܰܝܬ ܕܶܝܢ ܒܪܶܚܡܰܬ݀ ܐ̱ܢܳܫܽܘܬܳܟ ܕܠܐܴ ܡܶܬܕܰܪܟܳܐ ܘܰܡܪܰܚܡܳܢܽܘܬܳܟ ܕܠܐܴ ܡܶܬܡܰܫܚܳܐ: ܘܚܽܘܒܳܟ ܕܰܠܘܳܬ ܓܶܢܣܰܢ ܕܰܕܠܐܴ ܣܳܟܰܐ ܗ̱̇ܘ. ܘܰܫ̣ܪܰܝܬ ܒܥܽܘܒܳܐ ܐܠܰܝܨܳܐ ܘܰܚܒ̣ܰܫܬ ܢܰܦܫܳܟ ܝܰܪ̈ܚܶܐ ܬܶܫܥܳܐ ܒܟܰܪܣܳܐ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܟܰܕ ܡܰܪܟܰܒܬܳܐ ܕܰܟܪ̈ܽܘܒܶܐ ܡܰܠܝܳܐ ܡܶܢܳܟ ܘܠܐܴ ܣܳܦܩܳܐ ܓܶܝܪ ܠܬܶܫܒܽܘܚܬܳܟ ܘܰܕܢܰܚ̣ܬ ܡ̣ܶܢ ܥܽܘܒܳܐ ܒܬܽܘܠܐܴ ܡܰܘܠܳܕܳܐ ܬܪܰܝܳܢܳܐ ܐܰܝܟ ܟܽܠ ܥܽܘ̣̈ܠܺܝܢ ܣܛܰܪ ܡ̣ܶܢ ܚܛܺܝܬܳܐ ܘܗܰܠܶܟ̣ܬ ܒܰܒܪܺܝܬܳܐ ܒܽܐܘܪܚܳܐ ܕܺܝܠܺܝ̈ܕܶܐ ܐܠܰܗܳܐܺܝܬ ܘܐ̱ܢܳܫܳܐܺܝܬ: ܐܰܢ̱ܬ ܕܰܫܡܰܝܳܐ ܘܰܫܡܰܝ̈ܫܡܰܝܳܐ ܠܐܴ ܡܣܰܝܟܺܝܢ ܠܳܟ: ܘܡ̣ܶܢ ܐܺܝ̈ܕܰܝ ܝܽܘܚܰܢܳܢ ܥܰܒܕܳܟ ܒܰܪ ܥܰܩܪܽܘܬܳܐ ܣܝ̇ܳܡ ܐܺܝܕܳܐ ܕܥܰܒܕܳܐ ܩܰܒܶܠ̣ܬ: ܐܰܢ̱ܬ ܓܶܝܪ ܕܰܥܢ̈ܳܢܶܐ ܪܟܺܝܒ ܐܰܢ̱ܬ ܘܦܳܪܰܚ ܠܥܶܠ ܡܶܢܗܽܘܢ ܒܫܽܘܒܚܳܐ ܪܰܒܳܐ ܡܶܙܕܰܝܰܚ ܐܰܢ̱ܬ. ܨܰܘܡܳܐ ܨܶܒܝܳܢܳܝܳܐ ܚܠܳܦܰܝܢ ܚܰܛܳܝ̈ܶܐ ܩܰܒ̣ܶܠܬ: ܘܒܳܬܰܪ ܐܰܪܒܥܺܝܢ ܠܣܳܛܳܢܳܐ ܒܥܶܠܕܰܐܪܳܐ ܫܰܦ̣ܶܠܬ: ܘܝܰܗ̣ܒܬ ܠܰܢ ܠܥܰܒ̣ܕܰܝ̈ܟ ܕܰܠܒܺܝܒܽܘܬܳܐ ܘܓܰܢ̱ܒܳܪܽܘܬܳܐ ܠܽܘܩܒܰܠ ܨܶܢܥ̈ܳܬܶܗ ܒܕܰܐܪܳܐ ܢܶܣܕܽܘܪ ܘܰܒܡ̈ܶܠܐܷ ܐܠܰܗܳܝ̈ܳܬܳܐ ܠܶܗ ܢܶܙܟܶܐ: ܥܰܠ̣ܬ ܠܨܶܗܝܽܘܢ ܡܰܟܺܝܟܳܐܺܝܬ: ܘܥܰܠ ܥܺܝܠܐܴ ܒܰܪ ܐܰܬܳܢܳܐ ܪܟܶܒ̣ܬ: ܘܡ̣ܶܢ ܫܰܒܪ̈ܶܐ ܨܶܗܝܽܘ̈ܢܳܝܶܐ ܒܩ̈ܳܠܰܝ ܐܽܘܫܰܥ̈ܢܶܐ ܐܶܬܩܰܠ̣ܰܣܬ ܘܬܶܫܒܽܘܚܬܳܐ ܕܡܶܬܬܚܺܝܒܳܐ ܗܘܳܬ݀ ܠܳܟ ܦ̣ܪܰܥܘ: ܘܣܳܒ̈ܶܐ ܛܳܠܽܘ̈ܡܶܐ ܘܣ̇ܳܦܪ̈ܶܐ ܘܰܦܪ̈ܺܝܫܶܐ ܒܰܚܣܳܡܳܐ ܒܠܰܥ̣ܘ: ܘܨܰܥܪܳܐ ܘܒܶܙܚܳܐ ܘܫܽܘ̈ܩܳܦܶܐ ܘܚܰܠܐܴ ܘܰܡܪܳܪ̈ܶܐ ܘܰܙܩܺܝܦܳܐ ܘܢܶܓ̈ܕܶܐ ܘܪܽܘܩܳܐ ܕܰܒܦܰܪܨܽܘܦܳܟ ܘܡܰܘܬܳܐ ܘܰܩܒܽܘܪܬܳܐ ܕܒܰܫܝܽܘܠ ܩܰܒ̣ܶܠܬ: ܘܗܳܕܶܐ ܟܽܠܳܗ̇ ܡܕܰܒܪܳܢܽܘܬܳܟ ܡܳܪܳܢܳܝܬܳܐ ܘܦܳܪܽܘܩܳܝܬܳܐ ܚܠܳܦ ܐܳܕܳܡ ܣܒ̣ܰܠܬ: ܘܰܩܝܳܡܬܳܟ ܡܝܰܬܰܪܬܳܐ ܠܰܟܝܳܢܰܢ ܐ̱ܢܳܫܳܝܳܐ ܫܰܟ̣ܶܢܬ. ܘܚܰܝ̈ܶܐ ܚܰܕ̈ܬܶܐ ܘܠܐܴ ܡܶܬܚܰܒܠܳܢܽܘܬܳܐ ܠܰܢ ܐܰܩܢ̣ܰܝܬ: ܘܰܠܦܰܪܕܰܝܣܳܐ ܡܥܰܠܝܳܐ ܐܰܬܪܳܐ ܕܺܝܠܰܢ ܩܰܕܡܳܝܳܐ ܠܰܢ ܐܰܦܢ̣ܺܝܬ ܐܳܦ ܠܰܫܡܰܝ̈ܳܐ ܥܶܠܳܝ̈ܶܐ ܠܰܢ ܥܰܠܺܝܬ: ܘܥܰܡܳܟ ܒܫܽܘܒܚܳܐ ܪܰܒܳܐ ܡ̣ܶܢ ܝܰܡܺܝܢ ܐܰܒܳܐ ܠܰܢ ܐܰܘܬܶܒ̣ܬ: ܘܰܒܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ ܠܰܫܠܺܝ̈ܚܰܝܟ ܩܰܕܺܝ̈ܫܶܐ ܓܡ̣ܰܪܬ ܘܫܰܡܠܺܝܬ ܘܥܰܠ ܗ̇ܳܝ ܚܢܰܢ ܕܶܐܫܬܘܺܝܢܰܢ ܠܰܡܥܰܕܥܳܕܽܘ ܠܥܺܐܕܳܐ ܗܳܢܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܡܰܦܨܚܰܬ݀ ܟܽܠ ܗ̇ܳܝ ܕܡ̣ܶܢ ܥܽܘܡܩܳܐ ܕܰܚܛܳܗܰܝ̈ܢ ܐܰܣܶܩ̣ܬ ܠܰܢ: ܘܰܠܪܰܘܡܳܐ ܡܥܰܠܝܳܐ ܕܰܫܡܰܝܳܐ ܥܰܠܺܝܬ ܠܰܢ: ܡܶܬܟܰܫܦܺܝܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܡܩܰܪܒܺܝܢܰܢ ܠܳܟ: ܘܫܳܐܠܺܝܢܰܢ ܫ̈ܶܐܠܳܬܳܐ ܡܶܢܳܟ ܕܬܶܬܪܰܥܶܐ ܠܰܢ ܐܠܰܗܽܘܬܳܟ ܘܰܬܚܰܣܶܐ ܠܰܢ ܛܰܝܒܽܘܬܳܟ ܘܢܶܗܘܶܐ ܠܰܢ ܠܚܽܘܣܳܝܳܐ ܕܚܰܘ̈ܒܶܐ ܘܰܕܫܳܪ̈ܥܳܬܳܐ ܘܰܥܛܳܝܳܐ ܕܰܚܛܳܗ̈ܶܐ ܘܰܕܣܰܟܠܘ̈ܳܬܳܐ. ܘܰܠܕܽܘܟܳܝܳܐ ܕܙܰܘ̈ܥܶܐ ܘܰܕܡܰܚܫ̈ܒܳܬܳܐ: ܘܠܰܢܦܺܐܫܳܐ ܘܚܽܘܠܡܳܢܳܐ ܕܦܰܓܪ̈ܶܐ ܘܢܰܦ̈ܫܳܬܳܐ: ܘܠܰܢܝܳܚܳܐ ܕܟܽܠ ܥܰܢܺܝ̈ܕܶܐ ܡܗܰܝ̈ܡܢܶܐ ܒܡܰܠܟܽܘܬܳܐ ܡܫܰܝܳܢܺܝܬܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܓܢܺܝܙܳܐ ܡܳܪܝܳܐ ܕܡܶܫܬܰܒܰܚ ܡ̣ܶܢ ܣܪ̈ܳܦܶܐ ܒܚܰܠܝܽܘܬ ܩܺܝ̣̈ܢܳܬܳܐ ܕܝܽܘܒܳܒܰܝ̈ܗܽܘܢ ܡܶܬܩܰܕܰܫ. ܘܡ̣ܶܢ ܡܰܘ̈ܬܒܶܐ ܘܡܳܪ̈ܰܘܳܬܳܐ ܒܥܰܙܺܝܙܽܘܬ ܩ̈ܳܠܐܷ ܕܬܶܫܒ̈ܚܳܬܗܽܘܢ ܡܶܬܪܰܡܪܰܡ ܩܰܕܶܫ ܠܰܥܣܺܝܪܳܝܽܘܬ ܪ̈ܶܓܫܰܝܢ ܒܩܰܕܺܝܫܽܘܬܳܐ ܗ̇ܳܝ ܕܡܶܢܳܟ: ܐܰܝܟܰܢܳܐ ܕܢܰܣܓܶܐ ܠܳܟ ܩܽܘ̈ܠܳܣܳܐ ܘܪܽܘܡܪ̈ܳܡܶܐ: ܘܰܢܩܰܪܶܒ ܠܳܟ ܣܶܓܕܬܳܐ ܡܬܽܘܡܳܝܬܳܐ ܘܗܽܘ̈ܠܳܠܐܷ ܕܟܰܝ̈ܳܐ ܘܩܽܘ̈ܝܳܙܶܐ ܪ̈ܽܘܚܳܢܳܝܶܐ ܡܳܪܰܢ ܘܰܐܠܳܗܰܢ܀

 

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܕܺܐܝܬܰܘܗܝ ܗ̣ܘܳܐ: ܘܺܐܝܬܰܘܗܝ: ܘܢܶܗܘܶܐ ܐܺܝܬܰܘܗܝ: ܕܠܐܴ ܫܽܘܪܳܝ ܘܰܕܠܐܴ ܫܽܘܠܳܡ ܡ̣ܶܢ ܥܳܠܰܡ ܡܬܽܘܡܳܐܺܝܬ: ܘܰܠܥܳܠܰܡ ܡܟܰܬܰܪ ܐܰܢ̱ܬ ܐܰܡܺܝܢܳܐܺܝܬ: ܗܰܘܢܳܐ ܝܳܠܽܘܕܳܐ: ܘܡܶܠܬܳܐ ܕܡܶܬܺܝܠܳܕ: ܘܪܽܘܚܳܐ ܢܳܦܽܘܩܳܐ ܐܰܝܟ ܕܰܐܠܶܦ̣ ܠܰܢ ܐܶܘܢܓܶܠܝܽܘܢ ܚܠܺܝܡܳܐܺܝܬ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ ܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܒܰܬܠܳܬܳܐ ܫܡܳܗ̈ܶܐ ܟܽܠܚܰܕ ܡܶܢܶܗ ܘܠܶܗ ܠܐܴ ܡܦܰܠܓܳܐܺܝܬ: ܫܳܘ̈ܝܰܝ ܠܰܚܕ̈ܳܕܶܐ ܒܝܳܬܳܐ: ܘܚܰܕ ܨܶܒܝܳܢܳܐ ܘܚܰܝܠܐܴ ܘܡܰܥܒܕܳܢܽܘܬܳܐ: ܚܰܕ ܥܳܒܽܘܕܳܐ ܘܝܳܨܽܘܦܳܐ ܘܰܡܢܰܛܪܳܢܳܐ ܟܝܳܢܳܐܺܝܬ. ܗ̇ܰܘ ܕܡ̣ܶܢ ܟܶܢ̈ܫܶܐ ܕܢܽܘܪܳܐ ܘܪܽܘܚܳܐ ܡܶܫܬܰܡܰܫ ܒܰܐܬܪܶܗ ܡܥܰܠܝܳܐ ܕܚܺܝܠܐܴܝܬ: ܘܡ̣ܶܢ ܟܽܠܗܶܝܢ ܒܶܪ̈ܝܳܬܳܐ ܕܬܰܩܶܢ ܪܶܡܙܳܐ ܕܒܳܪܽܘܝܽܘܬܶܗ ܡܶܫܬܰܒܰܚ ܡܳܪܳܢܳܐܺܝܬ. ܕܠܶܗ ܚܢܰܢ ܢܫܰܒܰܚ ܘܰܢܩܰܠܶܣ ܠܐܴ ܫܰܠܘܳܐܺܝܬ: ܒܦܽܘ̈ܡܶܐ ܘܠܶܫܳܢ̈ܶܐ. ܒܺܐܝ̈ܡܳܡܶܐ ܘܠܰܝܠܰܘ̈ܳܬܳܐ ܠܐܴ ܫܳܬܽܘܩܳܐܺܝܬ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܡܶܠܬܳܐ ܝܺܠܺܝܕܳܐ ܕܡ̣ܶܢ ܐܰܒܳܐ ܓܢܺܝܙܳܐ ܕܠܐܴ ܪܶܕܝܳܐ ܘܰܕܠܐܴ ܙܰܒܢܳܐ ܡܬܽܘܡܳܐܺܝܬ ܗ̇ܰܘ ܕܠܰܝܬ ܗܰܘܢܳܐ ܕܡܶܣܬܰܟܰܠ ܕܰܐܝܟܰܢ ܝܺܠܺܝܕ ܐܰܢ̱ܬ ܡܶܢܶܗ ܟܝܳܢܳܐܺܝܬ. ܗ̇ܰܘ ܕܺܐܝܬܰܝܟ ܒܪܰܒܽܘܬܳܐ ܘܒܰܫܒܺܝܚܽܘܬܳܐ ܥܰܡ ܪܽܘܚܳܟ ܩܰܕܺܝܫܳܐ ܠܐܴ ܡܶܬܦܰܣܩܳܢܳܐܺܝܬ: ܗ̇ܰܘ ܕܰܒ̣ܪܰܝܬ ܒܨܶܒܝܳܢܳܟ ܠܐܴܕܳܡ ܒܨܰܠܡܳܟ ܘܒܰܕܡܽܘܬܳܟ ܫܒܺܝܚܳܐܺܝܬ: ܘܣܳܡ̣ܬܳܝܗܝ ܒܦܰܪܕܰܝܣܳܐ ܕܒܽܘ̈ܣܳܡܶܐ ܕܢܺܐܚܶܐ ܚܰܝ̈ܶܐ ܛܽܘܒ̈ܬܳܢܶܐ ܠܐܴ ܥܕܺܝ̣̈ܠܐܷ: ܘܡ̣ܶܢ ܕܰܥܒ̣ܰܪ ܥܰܠ ܦܽܘܩܕܳܢܳܟ ܠܰܚܛܺܝܬܳܐ ܘܡܰܘܬܳܐ ܚܰܝܶܒܬܳܝܗܝ ܕܳܘܝܳܐܺܝܬ ܘܡ̣ܶܢ ܕܰܒܠܺܝ ܒܰܫܝܽܘܠ ܘܶܐܒ̣ܰܕ ܘܶܐܬܚܰܒܰܠ ܫܰܦܠܐܴܝܬ: ܨܒ̣ܰܝܬ ܕܡܶܢܳܗ̇ ܡ̣ܶܢ ܗܳܕܶܐ ܬܶܩܪܶܐ ܘܰܬܩܺܝܡ ܒܛܰܝܒܽܘܬܳܟ ܡܳܪܝ ܐܰܟܺܝܦܳܐܺܝܬ. ܫܽܘܒܚܳܐ ܠܳܟ ܕܰܒܫܽܘܪܳܝ ܡܕܰܒܪܳܢܽܘܬܳܟ ܕܨܶܝܕ ܓܶܢܣܰܢ ܚܰܠܳܫܳܐ ܡܪܰܚܡܳܢܳܐܺܝܬ: ܚܰܘܺܝܬ ܕܺܐܝܬܰܝܟ ܒܰܪܢܳܫܳܐ ܡܫܰܡܠܝܳܐ: ܟܰܕ ܡ̣ܶܢ ܗ̇ܳܝ ܕܺܐܝܬܰܝܟ ܐܠܰܗܳܐ ܫܰܪܺܝܪܳܐ ܠܐܴ ܫܰܢܺܝܬ ܫܰܪܺܝܪܳܐܺܝܬ ܫܽܘܒܚܳܐ ܠܳܟ ܕܡ̣ܶܢ ܗܳܠܶܝܢ ܕܡܶܢܗܽܘܢ ܐܶܨܛܰܥܰܪ ܨܰܠܡܳܟ ܝܰܩܺܝܪܳܐ ܡܰܪܳܚܳܐܺܝܬ: ܨܒ̣ܰܝܬ ܕܬܶܕܢܰܚ ܘܬܶܬܒܰܪܢܰܫ ܒܛܺܝܠܐܴܝܬ. ܫܽܘܒܚܳܐ ܠܳܟ ܕܫܰܕܰܪܬ ܠܓܰܒܪܺܐܶܝܠ ܪܺܝܫ ܡܰܠܐܱܟ̈ܶܐ ܡ̣ܶܢ ܒܶܝܬ ܣܶܕܪ̈ܶܐ ܕܓܰܘܙܰܠܬܳܐ ܩܰܠܺܝܠܐܴܝܬ: ܘܠܳܗ̇ ܠܰܕܟܺܝܬܳܐ ܡܰܪܝܰܡ ܣܰܒܪܳܗ̇ ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ ܒܰܒܪܺܝܬܳܐ ܩܰܕܺܝܫܳܐܺܝܬ. ܫܽܘܒܚܳܐ ܠܳܟ ܕܶܐܬܺܝܠܶܕܬ ܒܰܡܥܰܪܬܳܐ ܕܒܶܝܬ ܠܚܶܡ ܐ̱ܢܳܫܳܐܺܝܬ: ܘܬܶܫܒܽܘܚܬܳܐ ܠܰܫܡܳܟ ܕܰܢ̣ܓܰܕܬ ܠܰܡܓܽܘ̈ܫܶܐ ܘܪ̈ܳܥܰܘܳܬܳܐ ܘܩܰܪܶܒܘ ܠܳܟ ܩܽܘܪ̈ܒܳܢܶܐ ܘܣܶܓ̈ܕܳܬܳܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܰܣܠ̣ܶܩܬ ܒܩܽܘܪ̈ܒܳܢܶܐ ܠܗܰܝܟܠܐܴ ܐܰܝܟ ܢܳܡܽܘܣܳܐ ܐ̱ܢܳܫܳܐܺܝܬ: ܘܬܶܫܒܽܘܚܬܳܐ ܠܰܫܡܳܟ ܕܡ̣ܶܢ ܐܰܣܽܘܪ̈ܶܐ ܙܰܒܢ̈ܳܝܶܐ ܫ̣ܪܰܝܬ ܠܫܶܡܥܽܘܢ ܣܳܒܳܐ ܕܶܐܬܟܰܫܰܦ ܠܳܟ ܐܠܰܗܳܐܺܝܬ: ܫܽܘܒܚܳܐ ܠܳܟ ܕܶܐܬܰܝܬ ܠܰܥܡܳܕܳܐ ܥܰܡ ܚܰܝ̈ܳܒܶܐ ܠܘܳܬ ܝܽܘܚܰܢܳܢ ܟܳܪܽܘܙܳܟ ܐ̱ܢܳܫܳܐܺܝܬ: ܘܬܶܫܒܽܘܚܬܳܐ ܠܰܫܡܳܟ ܕܰܐܒܳܐ ܘܪܽܘܚܳܐ ܣܗ̣ܶܕܘ ܥܠܰܝܟ ܒܩܳܠܐܴ ܘܒܰܚܙܳܬܳܐ ܕܒܰܪ ܟܝܳܢܗܽܘܢ ܐܺܝܬܰܝܟ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܰܓܢ̣ܰܝܬ ܒܡܶܫܬܽܘܬܳܐ ܕܩܳܛܢܶܐ ܕܰܓܠܺܝܠܐܴ ܥܰܡ ܬܰܠܡܺܝ̈ܕܰܝܟ ܐ̱ܢܳܫܳܐܺܝܬ ܬܶܫܒܽܘܚܬܳܐ ܠܰܫܡܳܟ ܕܡ̣ܶܢ ܡܰܝ̈ܳܐ ܦܰܟܺܝ̣̈ܗܶܐ ܚܰܡܪܳܐ ܪܺܝܫܳܝܳܐ ܫܰܚܠ̣ܶܦܬ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܨܰܘܡܳܐ ܩܰܒܶܠ̣ܬ ܘܶܐܬܢܰܣܺܝܬ ܡ̣ܶܢ ܣܳܛܳܢܳܐ ܒܕܰܒܪܳܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܣܚ̣ܰܦܬ ܠܐܴܟܶܠܩܰܪܨܳܐ ܠܒܶܣܬܪܳܟ ܘܡܰܠܐܱܟ̈ܶܐ ܩܰܪܶܒܘ ܗ̣ܘܰܘ ܫܰܡܫܽܘܟ ܙܰܗܝܳܐܺܝܬ ܘܰܐܠܳܗܳܐܺܝܬ. ܫܽܘܒܚܳܐ ܠܳܟ ܕܫܶܐܠܬ ܠܬܰܠܡܺܝ̈ܕܰܝܟ ܕܰܟܡܳܐ ܠܰܚܡܺܝ̣̈ܢ ܐܺܝܬ ܠܟܽܘܢ ܘܰܦܩ̣ܰܕܬ ܕܰܢܣܺܝܡܽܘܢ ܩܕܳܡ ܟܶܢ̈ܫܶܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܣܰܒ̣ܰܥܬ ܐܠܰܦ̈ܶܐ ܣܰܓܺܝ̈ܶܐܐ ܡ̣ܶܢ ܠܰܚܡ̈ܶܐ ܙܥܽܘܪ̈ܶܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܡܳܪܝ ܕܰܕܡܶܟ̣ܬ ܒܶܐܠܦܳܐ ܘܰܫܓܰܫ̣ܘ ܪ̈ܽܘܚܶܐ ܘܓ̈ܰܠܠܐܷ ܕܝܰܡܳܐ ܘܰܐܥܺܝܪܽܘܟ ܬܰܠܡܺܝ̈ܕܰܝܟ ܐ̱ܢܳܫܳܐܺܝܬ ܘܬܶܫܒܽܘܚܬܳܐ ܠܰܫܡܳܟ ܕܰܟܐܰܝܬ ܒܪ̈ܽܘܚܶܐ ܘܰܒܝܰܡܳܐ ܘܶܐܫܬܡܰܥܘ ܠܳܟ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܶܐܣܬܰܡ̣ܰܟܬ ܥܰܠ ܦܳܬܽܘܪܳܐ ܕܰܦܪܺܝܫܳܝܳܐ ܫܶܡܥܽܘܢ ܘܶܐܟܰܠ̣ܬ ܡܶܢܶܗ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܫܒ̣ܰܩܬ ܚܰܘ̈ܒܶܝܗ̇ ܕܚܰܛܳܝܬܳܐ ܘܰܟܬܰܒ̣ܬ ܠܕܽܘܟܪܳܢܳܗ̇ ܒܰܣܒܰܪܬܳܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܺܝܬܶܒܬ ܥܰܠ ܒܺܐܪܳܐ ܕܡܰܝ̈ܳܐ: ܘܫܶܐܠ̣ܬ ܡܰܝ̈ܳܐ ܡ̣ܶܢ ܫܳܡܪܳܝܬܳܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܝܰܗ̣ܒܬ ܠܳܗ̇ ܡܰܝ̈ܳܐ  ܚܰܝ̈ܶܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܫܰܐܶܠ̣ܬ ܥܠܰ ܩܰܒܪܶܗ ܕܠܳܥܳܙܳܪ ܪܳܚܡܳܟ ܘܕܰܡܰܥ̣ܬ ܥܠܰܘܗܝ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܡ̣ܶܢ ܒܳܬܰܪ ܐܰܪܒܥܳܐ ܝܰܘ̈ܡܺܝܢ ܕܰܣܪܺܝ ܒܩܰܒܪܳܐ ܩ̣ܪܰܝܬ ܘܢܰܚܶܡܬܳܝܗܝ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܰܪܟܶܒ̣ܬ ܥܺܝܠܐܴ ܒܡܰܥܶܠܬܳܟ ܕܠܐܘܪܫܠܶܡ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܦܬܰܚ̣ܬ ܦܽܘܡܳܐ ܕܫܰܒܪ̈ܶܐ ܕܠܐܴ ܡܶܠܬܳܐ ܕܢܶܩܥܽܘܢ ܐܽܘܫܰܥ̈ܢܶܐ ܠܡܶܐܬܺܝܬܳܟ ܡܰܠܟܶܗ ܕܺܐܝܣܪܳܐܶܝܠ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܶܐܟ̣ܰܠܬ ܦܶܨܚܳܐ ܥܰܡ ܬܰܠܡܺܝ̈ܕܰܝܟ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܐܘܕܰܥ̣ܬ ܡܰܢܽܘ ܡܰܫܠܶܡ ܠܳܟ: ܘܰܐܠܶܦ̣ܬ ܐܶܢܽܘܢ ܕܰܢܫܰܡܠܽܘܢ ܐ̱ܪ̈ܳܙܶܐ ܐܠܰܗܳܐܺܝܬ: ܫܽܘܒܚܳܐ ܠܳܟ ܕܶܐܬܠܒ̣ܰܟܬ ܐܰܝܟ ܥܳܒ̇ܶܕ ܒܺܝ̈ܫܳܬܳܐ ܡ̣ܶܢ ܝܽܘ̈ܕܳܝܶܐ ܠܺܝ̣̈ܛܶܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܦܩ̣ܰܕܬ ܠܐܱܪܥܳܐ ܘܣܰܚܦܰܬ݀ ܐܶܢܽܘܢ ܥܰܠ ܐܰܦܰܝ̈ܗܽܘܢ ܐܠܰܗܳܐܺܝܬ: ܫܽܘܒܚܳܐ ܠܳܟ ܕܶܐܬܚܒܶܫ̣ܬ ܒܒܶܝܬ ܚܰܢܳܢ ܘܶܐܬܕܺܝܢܬ ܩܕܳܡ ܦܺܝܠܰܛܳܘܣ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܠܐܱܢ̱ܬܬܶܗ ܒܝܰܕ ܚܶܠܡܳܐ ܐܶܬܚܰܘܺܝܬ: ܘܫܶܠܚܰܬ݀ ܠܶܗ ܠܓܰܒܪܳܗ̇ ܕܠܐܴ ܠܳܟ ܘܰܠܗ̇ܰܘ ܙܰܕܺܝܩܳܐ ܕܰܣܥ̣ܰܪ ܬܶܕܡܪ̈ܳܬܳܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܶܐܬܬܠܺܝܬ ܥܰܠ ܩܰܝܣܳܐ ܕܰܨܠܺܝܒܳܐ ܥܰܪܛܶܠܐܴܝܬ ܘܶܐܬܩܒ̣ܰܥܬ ܒܨ̈ܶܨܶܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܐܚܫ̣ܶܟܬ ܫܶܡܫܳܐ ܒܰܪܩܺܝܥܳܐ ܘܰܐܪܥܶܠ̣ܬ ܫܶܬܶܐܣ̈ܶܐ ܕܰܐܪܥܳܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܰܛܥܶܡ̣ܬ ܡܰܘܬܳܐ ܥܰܡܶܗ ܚܰܠܐܴ ܘܰܡܪܳܪ̈ܶܐ ܘܪܽܘܩܳܐ ܒܰܐܦܰܝ̈ܟ ܩܰܒ̣ܶܠܬ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܶܐܡ̣ܰܪܬ ܠܓܰܝܳܣܳܐ ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܶܐܬܕܩ̣ܰܪܬ ܒܠܽܘܟܳܝܬܳܐ ܘܰܪܕܰܘ ܡܶܢܳܟ ܕܡܳܐ ܘܡܰܝ̈ܳܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܣܰܕܶܩ̣ܬ ܐܰܦ̈ܰܝ ܬܰܪܥܳܐ ܕܗܰܝܟܠܐܴ ܘܦܶܪܫܰܬ݀ ܡܶܢܶܗ ܪܽܘܚܳܐ ܕܩܽܘܕܫܳܐ ܒܪܶܡܙܳܟ ܐܠܰܗܳܐܺܝܬ: ܫܽܘܒܚܳܐ ܠܳܟ ܕܡܺܝܬܬ ܒܰܙܩܺܝܦܳܐ ܘܰܐܫܠܶܡ̣ܬ ܢܰܦܫܳܟ ܒܺܐܝ̈ܕܰܝ ܐܰܒܽܘܟ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܰܐܩܺܝܡܬ ܠܡܺܝ̈ܬܶܐ ܘܥܰܠ̣ܘ ܠܐܘܪܫܠܶܡ ܘܶܐܬܚܙܺܝܘ ܠܣܰܓܺܝ̈ܶܐܐ ܒܳܬܰܪ ܩܝܳܡܬܳܐ ܕܺܝܠܳܟ ܐܠܰܗܳܐܺܝܬ: ܫܽܘܒܚܳܐ ܠܳܟ ܕܶܐܬܟܰܪܰܟ̣ܬ ܒܟܶܬܳܢ̈ܶܐ ܡ̣ܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܘܶܐܬܬܣܺܝܡܬ ܒܩܰܒܪܳܐ ܠܰܬܠܳܬܳܐ ܝܰܘ̈ܡܺܝܢ: ܘܰܐܥ̣ܪܰܩܬ ܠܛܽܘܪ̈ܶܐ ܡ̣ܶܢ ܕܶܚܠܬܳܐ ܐܠܰܗܐܺܝܬ. ܫܽܘܒܚܳܐ ܠܳܟ ܕܢܶܫ̈ܶܐ ܛܰܝ̈ܶܒܝ ܒܶܣ̈ܡܶܐ ܘܗܶܪ̈ܽܘܡܶܐ ܘܶܐܬܰܝ̈ ܕܰܢܒܰܣ̈ܡܳܢ ܩܰܒܪܳܟ ܐ̱ܢܳܫܳܐܺܝܬ ܬܶܫܒܽܘܚܬܳܐ ܠܰܫܡܳܟ ܕܶܐܡܰܪܬ ܠܘܳܬܗܶܝܢ ܕܰܐܢ̱ܬܶܝܢ ܠܐܴ ܬܶܕܚ̈ܠܳܢ: ܐܶܠܐܴ ܙܶܠܶܝ̈ܢ ܣܰܒܰܪ̈ܶܝܢ ܠܰܫܠܺܝ̈ܚܶܐ ܕܩܳܡ̇ܶܬ ܠܺܝ ܡ̣ܶܢ ܩܰܒܪܳܐ ܒܦܰܐܝܽܘܬ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܚܰܘܺܝܬ ܠܬܰܠܡܺܝ̈ܕܰܝܟ ܕܽܘܟܰܬ݀ ܨ̈ܶܨܶܐ ܘܪܽܘܡܚܳܐ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܥܰܠ̣ܬ ܨܶܝܕܰܝ̈ܗܽܘܢ ܟܰܕ ܬܰܪ̈ܥܶܐ ܕܥܶܠܺܝܬܳܐ ܐܰܚܺܝܕܺܝܢ ܗ̣ܘܰܘ ܐܠܰܗܳܐܺܝܬ. ܫܽܘܒܚܳܐ ܠܳܟ ܕܰܣܠ̣ܶܩܬ ܒܫܽܘܒܚܳܐ ܠܰܫܡܰܝܳܐ ܠܥܺܝܢ ܟܶܢܫܳܐ ܕܬܰܠܡܺܝ̈ܕܰܝܟ ܐ̱ܢܳܫܳܐܺܝܬ: ܬܶܫܒܽܘܚܬܳܐ ܠܰܫܡܳܟ ܕܫ̣ܰܕܰܪܬ ܠܗܽܘܢ ܪܽܘܚܩܽܘܕܫܳܐ ܦܰܪܰܩܠܺܝܛܳܐ ܘܚܰܟ̣ܶܡ ܐܶܢܽܘܢ ܐܠܰܗܳܐܺܝܬ. ܡܶܟܺܝܠ ܕܗܳܠܶܝܢ ܟܽܠܗܶܝܢ ܐ̱ܢܳܫܳܝ̈ܳܬܳܐ ܘܰܐܠܳܗܳܝ̈ܳܬܳܐ ܣܒ̣ܰܠܬ ܘܣܰܝܒ̣ܰܪܬ ܡܶܛܽܠܳܬܰܢ ܨܶܒܝܳܢܳܐܺܝܬ ܡܫܰܒܚܺܝܢܰܢ ܠܳܟ ܘܡܰܘܕܶܝܢܰܢ ܥܰܠ ܐܰܦ̈ܰܝ ܟܽܠܳܗ̇ ܡܕܰܒܪܳܢܽܘܬܳܟ ܕܰܠܘܳܬܰܢ: ܚܰܣܳܐ ܚܰܘ̈ܒܶܝܗ̇ ܕܡܰܪܥܺܝܬܳܟ ܙܒܺܝܢܰܬ݀ ܒܰܕܡܳܟ ܡܪܰܚܡܳܢܳܐܺܝܬ: ܫܒܽܘܩ ܣܰܟܠܘ̈ܳܬܰܢ ܒܝܰܡܳܐ ܕܰܚܢܳܢܳܟ ܫܦܺܝܥܳܐ. ܐܰܥܒ̣ܰܪ ܡܶܢܰܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܩܰܫܝܳܐܺܝܬ: ܘܫܰܟܶܢ ܠܰܢ ܫܰܝܢܳܐ ܐܰܡܺܝܢܳܐ ܘܰܫܠܳܡܳܐ ܟܰܗܺܝܢܳܐ ܘܚܰܪܬܳܐ ܛܳܒܬܳܐ ܕܫܳܦ̇ܪܳܐ ܠܳܟ: ܐܰܫܘܳܐ ܠܟܽܠܰܢ ܡܫܰܝܢܳܐܺܝܬ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܦܨܺܝܚܳܐܺܝܬ: ܡ̣ܶܢ ܟܽܠ ܦܽܘܡܺܝ̈ܢ ܐܰܡܺܝܢܳܐܺܝܬ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܫܰܘܝܳܐܺܝܬ: ܗܳܫܳܐ܀

 

ܥܛܪܐ

ܗܘܺܝ ܡܳܪܝܳܐ ܗܳܫܳܐ ܚܠܳܦܰܝܢ ܡܦܺܝܣܳܢܳܐ ܒܰܥܳܝܳܐ ܠܝ̇ܳܠܽܘܕܳܟ: ܕܠܐܴ ܢܰܗܦܶܟ ܐܰܦܰܘ̈ܗܝ ܡܶܢܰܢ: ܘܠܐܴ ܢܶܡܢܶܐ ܠܰܢ ܥܰܡ ܗ̇ܳܢܽܘܢ ܕܨܰܠܒܽܘܟ ܘܰܛܠܰܡ̣ܘ ܠܰܫܪܳܪܳܟ ܘܰܠܚܰܫܰܝ̈ܟ ܦܳܪ̈ܽܘܩܳܝܶܐ ܘܰܐܘܕܳܐ ܒܰܢ ܕܰܐܘܕܺܝܢܰܢ ܒܳܟ ܘܰܒܚܰܫܰܝ̈ܟ ܡܰܐܚܝ̈ܳܢܶܐ ܘܗܰܝܡܶܢܢܰܢ ܒܰܡܕܰܒܪܳܢܽܘܬܳܟ. ܘܩܰܒܶܠ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܠܳܟ ܝܰܘܡܳܢܳܐ ܒܥܽܘܗܕܳܢܳܐ ܕܝܳܠܶܕܬܳܟ ܘܰܕܩܰܕܺܝ̈ܫܰܝܟ. ܘܢܶܗܘܶܐ ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܥܢܺܝ ܠܰܢ ܡܳܪܝܳܐ ܕܩܳܪܶܝܢܰܢ ܠܳܟ ܒܥܶܕܳܢܳܐ ܗܳܢܳܐ: ܘܚܰܝܶܠ ܡܚܺܝܠܽܘܬܰܢ ܘܰܫܒܽܘܩ ܚܰܘ̈ܒܰܝܢ ܘܰܚܛܳܗܰܝ̈ܢ ܒܥܺܐܕܳܐ ܗܳܢܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܫܰܪܰܪ ܠܰܢ ܒܣܰܒܪܳܐ ܘܚܽܘܒܳܐ ܘܗܰܝܡܳܢܽܘܬܳܐ ܠܐܴ ܡܶܙܕܰܥܙܥܳܢܺܝܬܳܐ ܕܒܳܟ: ܐܰܝܟܰܢܳܐ ܕܢܶܫܟܰܚ ܫܽܘܠܳܡܳܐ ܡܫܰܝܢܳܐ ܕܫܳܦ̇ܰܪ ܠܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝ ܒܨܶܒܝܳܢܶܗ ܠܣܽܘܪܳܩܳܐ ܐ̱ܢܳܫܳܝܳܐ: ܠܗ̇ܰܘ ܓܰܐܝܳܐ ܘܓܰܢ̱ܒܳܪܳܐ ܕܰܫܒ̣ܰܩ ܡܰܪܟܰܒܬܳܐ ܕܰܟܪ̈ܽܘܒܶܐ ܘܩܰܒܠܶ ܥܠܰܘܗܝ ܝܺܠܺܝܕܽܘܬܳܐ ܐ̱ܢܳܫܳܝܬܳܐ ܒܰܡܪܰܚܡܳܢܽܘܬܶܗ: ܘܰܣܒ̣ܰܠ ܚܰܫ̈ܶܐ ܘܡܰܘܬܳܐ ܘܰܙܩܺܝܦܳܐ ܒܛܰܝܒܽܘܬܶܗ ܕܰܢܥܰܠܶܝܢ ܠܐܱܬܪܳܐ ܩܰܕܡܳܝܳܐ ܕܒܰܥܒ̇ܳܪ ܦܽܘܩܕܳܢܳܐ ܡܶܢܶܗ ܐܶܬܛܪܶܕܢܰܢ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܠܳܟ ܬܶܫܒܽܘܚܬܳܐ ܘܠܳܟ ܬܰܘܕܺܝܬܳܐ ܘܺܐܝܩܳܪܳܐ ܘܣܶܓܕܬܳܐ: ܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܗ̇ܰܘ ܕܰܒܪܶܚܡܰܬ݀ ܐ̱ܢܳܫܽܘܬܳܟ ܡ̣ܶܢ ܡܪܰܘܡܳܐ ܕܰܐܒܽܘܟ ܠܘܳܬܰܢ ܐܶܬܬܰܚܬܺܝܬ. ܕܠܰܢ ܬܶܦܪܽܘܩ ܡ̣ܶܢ ܐܺܝ̈ܕܰܝ ܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܘܦܰܓܪܳܐ ܐ̱ܢܳܫܳܝܳܐ ܐܶܬܥܰܛܰܦ̣ܬ ܘܒܶܗ ܙܟ̣ܰܝܬ ܠܗ̇ܰܘ ܕܰܙܟ̣ܳܐ ܠܐܴܕܳܡ ܒܶܝܬ ܐܺܝܠܳܢ̈ܶܐ: ܘܩܰܒ̣ܶܠܬ ܥܠܰܝܟ ܟܽܠܳܗ̇ ܡܕܰܒܪܳܢܽܘܬܳܐ ܕܰܚܠܳܦܰܝܢ ܕܒܰܒܣܰܪ: ܐܰܝܟܰܢܳܐ ܕܠܰܢ ܬܚܰܪܰܪ ܡ̣ܶܢ ܐܺܝ̈ܕܰܝ ܡܳܪܽܘܕܳܐ: ܘܥܰܠ ܗܳܕܶܐ ܡܳܪܝܳܐ ܣܰܓܺܝ ܪ̈ܰܚܡܶܐ ܡܫܰܒܚܺܝܢܰܢ ܠܳܟ: ܘܡܰܘܕܶܝܢܰܢ ܠܣܽܘܪܳܩܳܟ ܘܣܳܓܕܺܝܢܰܢ ܠܐܱܠܳܗܽܘܬܳܟ. ܡܩܰܠܣܺܝܢܰܢ ܠܡܽܘܟܳܟܳܟ: ܘܰܡܪܰܡܪܡܺܝܢܰܢ ܠܪܰܒܽܘܬܳܟ: ܘܬܳܗܪܺܝܢܰܢ ܒܐܢܳܫܽܘܬܳܟ ܡܰܠܝܰܬ݀ ܬܶܗܪܳܐ: ܘܰܡܫܰܒܚܺܝܢܰܢ ܠܛܳܒܽܘܬܳܟ. ܬܳܡܗܺܝܢܰܢ ܒܰܡܕܰܒܪܳܢܽܘܬܟ: ܡܒܰܪܟܺܝܢܰܢ ܠܚܰܫܰܝ̈ܟ ܡܝܰܩܪܺܝܢܰܢ ܠܰܨܠܺܝܒܽܘܬܳܟ: ܡܰܘܕܶܝܢܰܢ ܒܰܩܒܽܘܪܬܳܟ: ܡܗܰܝܡܢܺܝܢܰܢ ܒܰܩܝܳܡܬܳܟ ܡܰܘܪܒܺܝܢܰܢ ܠܣܽܘܠܳܩܳܟ: ܡܗܰܕܪܺܝܢܰܢ ܠܪܽܘܡܪܳܡܳܟ: ܘܫܳܐܠܺܝܢܰܢ ܘܒܳܥܶܝܢܰܢ ܡܶܢܳܟ ܕܰܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܬܩܰܒܶܠ ܒܛܰܝܒܽܘܬܳܟ: ܐܰܝܟܰܢܳܐ ܕܒܺܝܠܺܝܕܽܘܬܳܟ ܚܰܕ̈ܬܶܐ ܡ̣ܶܢ ܕܪܺܝܫ ܬܶܒܪܶܐ ܠܰܢ: ܐܦ ܒܰܥܡܳܕܳܟ ܬܕܰܟܶܐ ܠܰܢ: ܘܰܒܝܰܕ ܣܚܳܬܳܟ ܬܚܰܠܶܠ ܠܰܢ ܘܬܶܡܪܽܘܩ ܠܰܢ: ܘܰܒܨܰܘܡܳܟ ܬܩܰܕܶܫ ܠܰܢ: ܘܰܒܢܶܣܝܳܢܳܟ ܕܡ̣ܶܢ ܒܺܝܫܳܐ ܬܶܙܟܶܐ ܠܰܢ: ܘܠܐܘܪܥܳܐ ܕܡܶܐܬܺܝܬܳܟ ܒܽܐܘ̈ܫܰܥܢܶܐ ܬܛܰܝܶܒ ܠܰܢ. ܘܒܰܫܝܳܓܬܳܐ ܕܰܚܛܳܗܰܝ̈ܢ ܚܰܕܳܐ ܠܰܢ ܘܰܒܦܶܨܚܳܐ ܕܐ̱ܪ̈ܳܙܰܝܟ ܐܰܦܨܰܚ ܠܰܢ: ܘܰܒܚܰܫܰܝ̈ܟ ܩܰܕܺܝ̈ܫܶܐ ܚܰܪܰܪ ܠܰܢ: ܘܒܰܨܠܺܝܒܳܟ ܙܰܟܳܝܳܐ ܢܰܛܰܪ ܠܰܢ. ܘܰܒܡܰܘܬܳܟ ܡܰܥܒܶܕ ܚܰܝ̈ܶܐ ܐܰܚܐ ܠܰܢ ܘܒܰܩܝܳܡܬܳܟ ܦܳܪܽܘܩܳܝܬܳܐ ܐܰܩܺܝܡ ܠܰܢ: ܘܰܒܣܽܘܠܳܩܳܟ ܕܰܠܘܳܬ ܐܰܒܽܘܟ ܐܰܣܶܩ ܠܰܢ ܘܰܒܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܚܰܟܶܡ ܠܰܢ: ܘܰܠܟܽܠ ܗܽܘܠܐܴ ܕܰܚܛܳܗܰܝ̈ܢ ܐܰܘܩܶܕ ܘܛܰܠܶܩ ܡܶܢܢ: ܘܰܒܝܽܘܡ ܡܶܐܬܺܝܬܳܟ ܕܬܰܪܬܶܝܢ ܐܶܬܕܰܟܪܰܝܢ ܘܰܒܓܰܒܳܐ ܕܝܰܡܺܝܢܳܟ ܣܕܽܘܪ ܠܰܢ: ܘܰܒܚܰܓܳܐ ܕܩܰܕܺܝ̈ܫܰܝܟ ܚܠܽܘܛ ܠܰܢ ܘܰܒܢܽܘܗܪܳܟ ܕܰܠܥܳܠܰܡ ܒܰܣܶܡ ܠܰܢ: ܘܒܰܚܙܳܬܳܐ ܕܥܰܢܺܝ̈ܕܰܝܢ ܐܰܪܘܶܙ ܠܰܢ: ܘܠܰܢܝܳܚܬܳܐ ܛܳܒܬܳܐ ܡܰܢܰܥ ܠܰܢ: ܘܥܰܡ ܟܽܠܗܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܫܠܡ

ܛܟܣܐ ܕܚܕ ܒܫܒܐ ܬܠܝܬܝܐ ܕܡܕܒܪܢܘܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܬܠܺܝܬܳܝܳܐ ܘܰܠܚܽܘܕܳܝܳܐ ܐܠܰܗܳܐ ܗ̇ܰܘ ܕܰܬܠܺܝܬܳܐܺܝܬ ܡܶܫܬܰܒܰܚ ܒܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܘܒܰܬܠܳܬܳܐ ܫܡܳܗ̈ܶܐ ܣܓܺܝ̈ܕܶܐ ܡܶܬܗܰܝܡܰܢ ܐܳܦ ܡܶܬܺܝܕܰܥ: ܘܒܰܬܠܳܬ ܥܺܕ̈ܳܬܳܐ ܕܰܫܡܰܝܳܐ ܡܶܬܒܰܪܰܟ: ܒܝܽܘ̈ܒܳܒܶܐ ܕܚܰܝܠܰܘ̈ܳܬܳܐ ܫܡܰܝ̈ܳܢܶܐ ܡܶܬܢܰܨܰܪ ܘܡܶܬܗܰܕܰܪ: ܐܰܢ̱ܬ ܡܳܪܝܳܐ ܐܠܰܗܳܐ ܩܰܕܶܫ ܠܰܢ ܒܗܰܘܢܳܐ ܘܢܰܦܫܳܐ ܘܦܰܓܪܳܐ: ܐܰܝܟܰܢܳܐ ܕܰܬܠܺܝܬܳܐܺܝܬ ܢܫܰܒܚܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ܀

 

ܦܪܘܡܝܘܢ ܕܪܡܫܐ

 

ܫܽܘܒ̈ܚܶܐ ܬܠܺܝܬܳܝ̈ܶܐ ܒܩ̈ܳܠܐܷ ܬܠܺܝܬܳܝ̈ܶܐ ܒܩܺܝܢܬܳܐ ܬܠܝܬܳܐܝܰܬ݀ ܩܽܘ̈ܕܳܫܶܐ ܢܶܫܬܘܶܐ ܕܰܢܩܰܪܶܒ ܠܐܱܒܳܐ ܩܰܕܺܝܫܳܐ ܕܰܬܠܺܝܬܳܐܺܝܬ ܐܰܟܚܕܳܐ ܡܶܬܩܰܕܰܫ ܘܠܰܒܪܳܐ ܩܰܕܺܝܫܳܐ ܕܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܡܶܫܬܰܒܰܚ: ܘܰܠܪܽܘܚܳܐ ܩܰܕܺܝܫܳܐ ܕܥܰܡ ܐܰܒܳܐ ܘܰܒܪܳܐ ܫܰܘܝܳܐܺܝܬ ܡܶܬܝܰܩܰܪ: ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ݀ ܒܽܐܘܣܺܝܰܐ ܒܺܐܝܩܳܪܳܐ ܘܒܺܐܝܬܽܘܬܳܐ: ܐܰܒܳܐ ܕܚܰܕ ܐܺܝܬܰܘܗܝ: ܘܰܒܪܳܐ ܕܚܰܕ ܐܺܝܬܰܘܗܝ: ܘܪܽܘܚܳܐ ܕܚܰܕ ܐܺܝܬܰܘܗܝ: ܬܠܺܝܬܳܝܽܘܬܳܐ ܣܓܺܝܕܬܳܐ ܚܰܕ ܐܠܰܗܳܐ ܫܰܪܺܝܪܳܐ. ܚܰܕ ܒܳܪܽܘܝܳܐ: ܚܰܕ ܓܳܒܽܘܠܐܴ ܚܰܕ ܡܳܪܝܳܐ: ܚܰܕ ܨܶܒܝܳܢܳܐ: ܚܕܳܐ ܡܰܥܒܕܳܢܽܘܬܳܐ: ܚܕܳܐ ܕܠܐܴ ܡܣܰܝܟܳܐ ܠܶܗ ܚܕܳܝܽܘܬܳܐ: ܘܰܬܠܳܬܳܐ ܕܠܐܴ ܡܬܰܚܡܳܐ ܠܗܽܘܢ ܬܠܺܝܬܳܝܽܘܬܳܐ: ܚܰܕ ܚܰܝܠܐܴ ܕܰܠܥܶܠ ܡ̣ܶܢ ܟܽܠ ܫܽܘܡܳܗ̇ ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܐܺܝܬܝܳܐ ܠܐܴ ܡܶܬܕܰܪܟܳܢܳܐ ܘܠܐܴ ܡܶܬܒܰܨܝܳܢܳܐ ܩܢܽܘܡܳܐ ܡܫܰܒܚܳܐ ܘܠܐܴ ܡܶܬܡܰܠܠܳܢܳܐ: ܟܝܳܢܳܐ ܓܢܺܝܙܳܐ ܘܠܐܴ ܡܶܬܚܰܙܝܳܢܳܐ: ܗ̇ܰܘ ܕܰܬܠܺܝܬܳܐܺܝܬ ܥܰܡ ܐܰܒܳܐ ܘܪܽܘܚܳܐ ܡܶܣܬܓܶܕ ܡܶܙܕܰܝܰܚ ܘܡܶܫܬܰܒܰܚ: ܡ̣ܶܢ ܬܠܳܬ ܥܺܕ̈ܳܬܳܐ ܕܚܰܝ̈ܠܰܘܳܬܳܐ ܢܽܘܪ̈ܳܢܶܐ ܘܰܫܡܰܝ̈ܳܢܶܐ: ܗ̇ܰܘ ܕܰܬܠܺܝܬܳܐܺܝܬ ܩܰܝܶܡ ܠܰܒܪܺܝܬܶܗ ܗܽܘܠܳܢܳܝܬܳܐ ܘܕܰܠܥܶܠ ܡ̣ܶܢ ܗܽܘܠܐܷ: ܟܰܕ ܐܰܒܽܘܗܝ ܫܰܪܺܝ: ܘܗ̣ܽܘ ܫܰܡܠܺܝ: ܘܪܽܘܚܳܐ ܩܰܕܺܝܫܳܐ ܓܰܡ̣ܰܪ. ܗ̇ܰܘ ܕܛܰܟ̣ܶܣ ܬܠܺܝܬܳܐܺܝܬ ܠܟܽܠ ܚܕܳܐ ܡ̣ܶܢ ܥܺܕ̈ܳܬܳܐ ܕܰܠܥܶܠ ܒܰܬܠܳܬܳܐ ܬܶܐܓ̈ܡܶܐ: ܘܰܬܠܺܝܬܳܐܺܝܬ ܢܶܗܘܽܘܢ ܡܫܰܒܚܺܝܢ ܠܶܗ ܐܰܝܟ ܕܰܡܟܳܢܺܝܢ. ܠܥܳܠܡܳܐ ܕܶܝܢ ܕܰܠܬܰܚܬ ܐܳܦ ܬܠܺܝܬܳܐܺܝܬ ܥܒ̣ܰܕ: ܒܗܽܘܠܐܷ ܘܳܐܕܫ̈ܶܐ ܘܓܶܢ̈ܣܶܐ: ܠܐܴܕܳܡ ܕܶܝܢ ܒܢܰܦܫܳܐ ܘܰܒܦܰܓܪܳܐ ܘܗܰܘܢܳܐ ܝܰܩܰܪ ܬܠܺܝܬܳܐܺܝܬ. ܗܳܢܳܐ ܕܶܝܢ ܥܰܠ ܢܳܡܽܘܣܳܟ ܥܒ̣ܰܪ ܘܫܳܛ ܦܽܘܩܕܳܢܳܟ ܬܠܺܝܬܳܐܺܝܬ ܕܶܝܢ ܐܶܬܡܚܺܝ: ܘܶܐܬܦܰܪܣܺܝ ܕܶܝܢ ܘܰܢܦ̣ܰܠ ܡ̣ܶܢ ܪܰܘܡܳܐ ܘܶܐܬܛܪܶܕ ܡ̣ܶܢ ܐܰܬܪܶܗ: ܘܰܒܕܺܝ̣̈ܢܶܐ ܬܠܳܬܳܐ ܚܰܝ̣ܶܒܬ ܠܐܱܝܠܶܝܢ ܕܰܢܩ̣ܶܦܘ ܠܡܳܪܽܘܕܳܐ: ܠܐܴܕܳܡ ܘܰܠܚܰܘܳܐ ܘܰܠܚܶܘܝܳܐ. ܠܐܴܕܳܡ ܕܰܠܥܰܦܪܳܐ ܬܶܗܦܽܘܟ ܘܰܐܪܥܳܐ ܕܟܽܘ̈ܒܶܐ ܬܶܦܠܽܘܚ: ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܐ ܠܚܰܘܳܐ ܕܶܝܢ ܕܰܒܟܺܐܒ̈ܶܐ ܬܺܐܠܕܺܝܢ ܒܢܰܝ̈ܳܐ: ܘܰܠܘܳܬ ܒܰܥܠܶܟܝ ܬܶܗܦܟܺܝܢ: ܘܗ̣ܽܘ ܢܶܫܬܰܠܰܛ ܥܠܰܝܟܝ. ܘܰܠܚܶܘܝܳܐ ܕܥܰܠ ܟܰܪܣܳܟ ܬܗܰܠܶܟ ܘܰܕܥܰܦܪܳܐ ܬܶܗܘܶܐ ܡܶܐܟܽܘܠܬܳܟ ܘܒܶܝܬ ܟܽܘ̈ܒܶܐ ܢܶܗܘܶܐ ܝܰܬܒܳܟ ܘܡܰܥܡܪܳܟ ܠܩܳܐܶܝܢ ܕܶܝܢ ܬܠܺܝܬܳܐܺܝܬ ܦ̣ܪܰܥܬ. ܗ̇ܳܝ ܕܠܺܝܛ ܐܰܢ̱ܬ ܡ̣ܶܢ ܐܰܪܥܳܐ: ܘܬܶܗܘܶܐ ܙܳܐܰܥ ܘܢ̇ܳܐܶܕ ܒܰܐܪܥܳܐ: ܘܩܳܐܶܝܢ ܚܰܕ ܒܫܰܒܥܳܐ ܢܶܬܦܪܰܥ. ܠܢܽܘܚ ܕܶܝܢ ܙܰܕܺܝܩܳܐ: ܕܰܬܠܺܝܬܳܐܺܝܬ ܢܶܪܟܰܒ ܠܟܶܐܘܺܝܠܐܴ ܦܰܩ̣ܶܕܬ: ܐܰܒܪܳܗܳܡ ܪܳܚܡܳܟ ܬܠܺܝܬܺܐܺܝܬ ܐܶܫܬܰܘܕܥܳܟ: ܕܥܰܡ ܐܰܒܳܐ ܘܪܽܘܚܳܐ ܚܕܳܢܳܐܺܝܬ ܫܰܡܗܳܟ: ܠܐܻܝܣܚܳܩ ܒܰܬܠܳܬܳܐ ܝܰܘ̈ܡܺܝܢ ܥܒ̣ܰܕܬ ܦܽܘܪܩܳܢܳܐ: ܠܝܰܥܩܽܘܒ ܬܽܘܒ ܬܠܺܝܬܳܐܺܝܬ ܐܶܬܓܠ̣ܰܝܬ ܒܣܶܒܠܬܳܐ: ܘܒܰܩܪܳܒܳܐ ܕܥܰܡ ܡܰܠܐܱܟܳܐ: ܘܰܒܟܺܐܦܳܐ ܗ̇ܳܝ ܕܰܡܫ̣ܰܚ ܒܒܶܝܬ ܐܺܝܠ. ܠܡܽܘܫܶܐ ܕܶܝܢ ܬܠܳܬ ܙܰܒܢܺܝ̈ܢ ܐܶܬܚ̣ܙܰܝܬ ܒܛܽܘܪ ܣܺܝܢܰܝ. ܒܣܰܢܝܳܐ ܘܒܰܥܢܳܢܳܐ ܘܰܒܥܽܘܢܕܳܢܶܗ. ܕܰܘܺܝܕ ܬܠܺܝܬܳܐܺܝܬ ܫܶܐܠ ܦܽܘܪܩܳܢܳܐ ܒܪܰܡܫܳܐ ܘܰܒܨܰܦܪܳܐ ܘܰܒܛܰܗܪܳܐ: ܘܒܰܬܠܳܬܳܐ ܓܰܒܪ̈ܶܐ ܐܶܬܓܰܡܪܰܬ݀ ܗܘܳܬ݀ ܫܶܐܠܬܶܗ: ܐܠܶܝܫܳܥ ܢܒܺܝܳܐ ܒܛܰܠܝܳܐ ܕܰܚ̣ܝܳܐ ܕܰܬܠܺܝܬܳܐܺܝܬ ܡܶܬܦܰܘܰܩ. ܝܰܘܢܳܢ ܢܒܺܝܳܐ ܕܰܬܠܳܬܳܐ ܝܰܘ̈ܡܺܝܢ ܒܰܟܪܶܣ ܢܽܘܢܳܐ ܩܰܘܺܝ. ܢܺܝܢܘܶܐ ܕܒܰܬܠܳܬܳܐ ܝܰܘ̈ܡܺܝܢ ܐ̱ܚܪ̈ܳܝܶܐ ܕܒܳܥܽܘܬܳܐ ܢܶܣܒܰܬ݀ ܫܽܘܒܩܳܢܳܐ. ܬܳܡܳܪ ܕܒܰܬܠܳܬܳܐ ܐܳܕܫܺܝ̈ܢ ܢܶܣܒܰܬ݀ ܙܳܟܽܘܬܳܐ. ܗܳܟܘܳܬ ܘܰܒܟܽܠܗܽܘܢ ܥܶܕ̈ܳܢܶܐ ܐ̱ܪܳܙܳܐ ܬܠܺܝܬܳܝܳܐ ܡܶܬܶܐܪܶܙ ܗ̣ܘܳܐ. ܣܪ̈ܳܦܶܐ ܕܰܡܩܰܕܫܺܝܢ ܬܠܺܝܬܳܐܺܝܬ ܐܠܰܗܶܗ ܕܰܐܒܪܳܗܳܡ ܐܠܰܗܶܗ ܕܺܐܝܣܚܳܩ ܐܠܰܗܶܗ ܕܝܰܥܩܽܘܒ ܡܽܘܫܶܐ ܫܡ̣ܰܥ. ܬܽܘܒ ܕܶܝܢ ܕܡܳܪܝܳܐ ܐܠܰܗܳܟ ܡܳܪܝܳܐ ܚܰܕ ܗ̣ܽܘ: ܟܰܕ ܕܶܝܢ  ܡܕܰܒܪܳܢܽܘܬܳܟ ܕܶܢܚܰܬ݀ ܟܽܠܳܗ̇ ܥܰܡ ܟܽܠܳܗ̇ ܬܠܺܝܬܳܐܺܝܬ ܐܶܫܬܰܒܚܰܬ݀. ܘܥܰܠ ܗ̇ܳܝ ܫܽܘܒܚܳܐ ܡܫܰܘܫܛܺܝܢܰܢ ܠܳܟ ܟܰܕ ܐܳܡܪܺܝܢܰܢ: ܫܽܘܒܚܳܐ ܠܳܟ ܕܰܗܘܳܝܳܟ ܬܠܺܝܬܳܐܺܝܬ ܐܶܬܓܡܰܪ: ܒܨܶܒܝܳܢܶܗ ܕܰܐܒܽܘܟ: ܘܰܒܚܽܘܒܳܟ: ܘܰܒܡܰܐܓܢܳܢܽܘܬܶܗ ܕܪܽܘܚܳܐ ܩܰܕܺܝܫܳܐ: ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܐܶܬܚܰܘܺܝ ܒܰܛܢܳܟ: ܠܡܰܪܝܰܡ ܐܶܡܳܟ: ܘܠܐܷܠܺܝܫܒܰܥ ܘܰܠܝܰܘܣܶܦ ܕܶܐܬܦܰܠܰܓ: ܫܽܘܒܚܳܐ ܠܳܟ ܕܡܰܘܠܳܕܳܟ ܬܠܺܝܬܳܐܺܝܬ ܐܶܣܬܰܒܰܪ: ܘܠܰܡܓܽܘ̈ܫܶܐ ܒܝܰܕ ܟܰܘܟܒܳܐ: ܘܰܠܚܰܝܠܰܘ̈ܳܬܳܐ ܕܰܫܡܰܝܳܐ ܕܰܬܠܺܝܬܳܐܺܝܬ ܠܳܟ ܡܫܰܒܚܺܝܢ ܗ̣ܘܰܘ. ܫܽܘܒܚܳܐ ܠܳܟ ܕܡ̣ܶܢ ܡܰܠܟ̈ܶܐ ܬܠܳܬܳܐ ܒܩܽܘܪ̈ܒܳܢܶܐ ܬܠܳܬܳܐ ܐܶܣ̣ܬܓܶܕܬ: ܘܡ̣ܶܢ ܪ̈ܳܥܰܘܳܬܳܐ ܒܕܳܫ̈ܢܶܐ ܕܰܒܝܽܘܡ ܥܡܳܕܳܟ ܬܠܺܝܬܳܐܺܝܬ ܐܶܣ̣ܬܗܶܕܬ ܡ̣ܶܢ ܐܰܒܳܐ ܒܩܳܠܐܴ: ܘܡ̣ܶܢ ܪܽܘܚܳܐ ܒܪܽܘܚܳܦܳܐ: ܘܡ̣ܶܢ ܝܽܘܚܰܢܳܢ ܒܟܳܪܽܘܙܽܘܬܳܐ. ܫܽܘܒܚܳܐ ܠܳܟ ܕܰܒܨܰܘܡܳܟ ܬܠܺܝܬܳܐܺܝܬ ܐܶܬܢܰܣܺܝܬ: ܘܰܒܦܽܘ̈ܢܳܝܶܐ ܬܠܳܬܳܐ: ܠܰܬܠܳܬܳܐ ܢܶܣܝܽܘ̈ܢܶܐ ܙܟܰܝܬ: ܘܠܰܡܢܰܣܝܳܢܳܐ ܕܶܝܢ ܐܰܒܗ̣ܶܬܬ. ܫܽܘܒܚܳܐ ܠܳܟ ܕܣܽܘܓܳܐܐ ܕܬܶܡܪ̈ܳܬܳܟ ܬܠܺܝܬܳܐܺܝܬ ܓܡ̣ܰܪܬ ܐܶܢܶܝܢ ܒܨܶܒܝܳܢܳܐ ܘܒܰܥܒܳܕܳܐ ܘܰܒܡܶܠܬܳܐ: ܫܽܘܒܚܳܐ ܠܳܟ ܕܰܠܓܰܒܪܳܐ ܓܰܪܒܳܐ ܕܰܟܺܝܬ ܒܨܶܒܝܳܢܳܟ ܘܰܒܡܶܠܬܳܟ ܘܰܒܓܶܫܬܳܟ. ܫܽܘܒܚܳܐ ܠܳܟ ܕܰܬܠܳܬܳܐ ܡܺܝ̈ܬܶܐ ܨܒ̣ܰܝܬ ܘܰܐܚܺܝܬ: ܒܰܐܬܪܳܐ ܘܰܒܙܰܒܢܳܐ ܘܒܰܡܫܽܘܚܬܳܐ. ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܡ̣ܶܢ ܬܠܳܬ ܢܶܫܺܝ̣̈ܢ ܨܒ̣ܰܝܬ ܕܬܶܬܡܫܰܚ: ܡ̣ܶܢ ܡܰܪܝܰܡ ܚܰܛܳܝܬܳܐ: ܘܡ̣ܶܢ ܡܰܪܝܰܡ ܙܰܕܺܝܩܬܳܐ ܚܳܬܶܗ ܕܠܳܥܳܙܳܪ. ܫܽܘܒܚܳܐ ܠܳܟ ܕܳܐܦ ܗ̇ܳܝ ܙܳܢܺܝܬܳܐ ܬܠܺܝܬܳܐܺܝܬ ܠܳܟ ܐܶܬܩܰܪܒܰܬ݀: ܒܗܰܝܡܳܢܽܘܬܳܐ ܘܰܒܣܰܒܪܳܐ ܘܰܒܚܽܘܒܳܐ: ܘܰܬܠܺܝܬܳܐܺܝܬ ܕܶܝܢ ܝܰܩܰܪܬܳܟ ܒܡܽܘܪܽܘܢ ܪܺܝܫܳܝܳܐ ܘܒܶܟܝܳܐ: ܘܰܒܕܶܡ̈ܥܶܐ ܕܰܦܝܳܣܳܐ. ܫܽܘܒܚܳܐ ܠܳܟ ܕܡ̣ܶܢ ܥܠܰܝ̈ܡܶܐ ܘܰܛܠܳܝ̈ܶܐ ܘܬܰܠܡܺܝ̈ܕܶܐ ܒܝܰܕ ܡܰܥܠܬܳܟ ܕܠܐܘܪܫܠܶܡ ܬܠܺܝܬܳܐܺܝܬ ܐܶܬܩܰܠܰܣ̣ܬ. ܫܽܘܒܚܳܐ ܠܳܟ ܕܠܰܬܠܳܬܳܐ ܐܶܣܟ̈ܺܡܶܐ ܕܝܰܥܢܽܘܬܳܐ ܡ̣ܶܢ ܗܰܝܟܠܳܟ ܛܪܰܕܬ ܗ̣ܘܰܝܬ: ܘܠܰܡܙܰܒ̈ܢܳܢܶܐ ܘܠܰܡܥܰܪ̈ܦܳܢܶܐ ܘܠܰܛܥܺܝ̣̈ܢܰܝ ܓܰܪ̈ܒܶܐ ܕܡܰܝ̈ܳܐ: ܫܽܘܒܚܳܐ ܠܳܟ ܕܰܒܥܶܠܺܝܬܳܐ ܬܠܳܬܳܐ ܐ̱ܪ̈ܳܙܺܝܢ ܫܰܡܠܺܝܬ: ܡܶܐܟܽܘܠܬܳܐ ܕܳܐܡܪܳܐ: ܘܰܫܝܳܓܬܳܐ ܕܪ̈ܶܓܠܐܷ: ܘܡܰܘܗܰܒܬܳܐ ܕܦܰܓܪܳܟ ܩܰܕܺܝܫܳܐ ܘܰܕܡܳܟ ܡܚܰܣܝܳܢܳܐ. ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܨܰܠܺܝܬ ܠܘܳܬ ܐܰܒܽܘܟ ܕܢܶܥܒܪܳܟ ܟܳܣܳܐ ܕܡܰܘܬܳܐ: ܒܰܠܘܺܝܬܳܐ ܕܰܬܠܳܬܳܐ ܬܰܠܡܺܝ̈ܕܰܝܟ ܗ̇ܳܢܽܘܢ ܕܰܚ̣ܙܰܘ ܫܽܘܒܚܳܟ ܬܠܺܝܬܳܐܺܝܬ ܥܰܠ ܛܽܘܪܳܐ: ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܐܶܬܕܺܝܢܬ: ܡ̣ܶܢ ܩܰܝܳܦܳܐ ܪܺܝܫ ܟܳܗ̈ܢܶܐ: ܘܡ̣ܶܢ ܦܺܝܠܰܛܳܘܣ ܐܺܝܓܡܽܘܢܳܐ ܘܡ̣ܶܢ ܗܶܪܳܘܕܶܣ ܡܰܠܟܳܐ: ܫܽܘܒܚܳܐ ܠܳܟ ܕܰܬܠܳܬܳܐ ܚܰܫܺܝ̈ܢ ܩܰܒܶܠ ܪܺܝܫܳܟ: ܩܽܘܦܳܚܳܐ ܕܰܒܩܰܢܝܳܐ: ܡܰܚܘ̈ܳܬܳܐ ܕܒܰܦܪ̈ܳܓܶܠܐܷ: ܟܠܺܝܠܐܴ ܟܽܘܒܳܢܳܝܳܐ: ܫܽܘܒܚܳܐ ܠܳܟ ܕܰܬܠܳܬܳܐ ܒܶܙܚܺܝ̣̈ܢ ܣܒ̣ܰܠ ܦܰܪܨܽܘܦܳܟ ܛܰܡܳܐܐ ܘܬܰܚܦܺܝܬܳܐ ܕܰܐܦ̈ܶܐ: ܫܽܘܒܚܳܐ ܠܳܟ ܕܰܬܠܳܬ ܡܰܚ̈ܘܳܢ ܣܰܝܒ̣ܰܪ ܓܽܘܫܡܳܟ: ܢܶܓ̈ܕܶܐ ܕܥܰܠ ܚܰܨܳܟ: ܘܰܦܟܳܪ̈ܶܐ ܕܺܐܝ̈ܕܰܝܳܐ: ܘܶܐܣܳܪܳܐ ܕܒܶܐܣܛܽܘܢܳܐ: ܫܽܘܒܚܳܐ ܠܳܟ ܕܒܰܬܠܳܬܳܐ ܨܰܥܪ̈ܺܝܢ ܐܶܬܟܰܪܙܰܬ݀ ܡܰܠܟܽܘܬܳܟ ܒܩܰܢܝܳܐ ܕܒܺܐܝܕܳܟ ܘܒܰܠܒܽܘܫܳܐ ܡܰܠܟܳܝܳܐ: ܘܰܒܣܶܓܕܬܳܐ ܕܰܩܕܳܡܰܝܟ: ܫܽܘܒܚܳܐ ܠܳܟ ܕܰܬܠܳܬܫܳܥܺܝ̈ܢ ܗ̣ܘܰܝܬ ܥܰܠ ܨܠܺܝܒܳܐ: ܘܒܰܬܠܳܬܳܐ ܗܰܕܳܡܺܝ̈ܢ ܒܠܰܥ̣ܬ ܡܰܚܘ̈ܳܬܳܐ: ܒܺܐܝ̈ܕܰܝܟ ܘܰܒܪ̈ܶܓܠܰܝܟ ܘܰܒܕܰܦܢܳܟ ܡܰܒܥܰܬ݀ ܚܽܘܣܳܝܳܐ : ܫܽܘܒܚܳܐ ܠܳܟ ܕܒܰܬܠܳܬܳܐ ܟܬܳܒܺܝ̣̈ܢ ܘܠܶܫܳܢܺܝ̣̈ܢ ܘܥܰܡ̈ܡܺܝܢ ܡܰܠܟܳܐ ܐܶܬܟ̣ܪܶܙܬ. ܫܽܘܒܚܳܐ ܠܳܟ ܕܡ̣ܶܢ ܬܠܳܬܳܐ ܣܳܗ̈ܕܺܝܢ ܐܶܫܬܰܡ̣ܰܗܬ ܡܰܠܟܳܐ ܘܰܐܠܳܗܳܐ ܘܦܳܪܽܘܩܳܐ ܡ̣ܶܢ ܓܰܝܳܣܳܐ ܝܰܡܺܝܢܳܝܳܐ: ܘܡ̣ܶܢ ܩܶܢܛܪܽܘܢܳܐ: ܘܡ̣ܶܢ ܝܰܘܣܶܦ ܪܳܡܬܳܝܳܐ: ܫܽܘܒܚܳܐ ܠܳܟ ܕܡ̣ܶܢ ܬܠܳܬܳܐ ܟܝ̈ܳܢܶܐ ܚܰܪ̈ܫܶܐ ܐܶܬܚܰܘܝܰܬ݀ ܐܠܰܗܽܘܬܳܟ: ܡ̣ܶܢ ܫܶܡܫܳܐ ܕܰܚܫܶܟ ܒܫܶܬܫܳܥܺܝ̣̈ܢ ܘܬܽܘܒ ܐܰܢܗ̣ܰܪ: ܘܡ̣ܶܢ ܐܰܦ̈ܰܝ ܬܰܪܥܳܐ ܕܗܰܝܟܠܐܴ ܗ̇ܰܘ ܕܶܐܨܛܰܪܺܝܘ: ܘܦܰܓܪ̈ܶܐ ܕܩܰܕܺܝ̈ܫܶܐ ܕܩܳܡ̣ܘ: ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܐܶܬܝܰܩܪܰܬ݀ ܐܠܰܗܽܘܬܳܟ ܒܰܩܒܽܘܪܬܳܟ: ܒܟܶܬܳܢ̈ܶܐ ܢܰܩ̈ܕܶܐ: ܘܗܶܪ̈ܽܘܡܶܐ ܕܟܰܝ̈ܳܐ: ܘܩܰܒܪܳܐ ܚܰܕܬܳܐ ܢܩܺܝܪ ܒܫܽܘܥܳܐ. ܫܽܘܒܚܳܐ ܠܳܟ ܕܰܬܠܳܬܳܐ ܝܰܘ̈ܡܺܝܢ ܩܰܘܺܝܬ ܒܰܫܝܽܘܠ ܘܩܳܡ̣ܬ ܕܠܐܴ ܚܒܳܠܐܴ. ܫܽܘܒܚܳܐ ܠܳܟ ܕܒܰܬܠܳܬܳܐ ܐܰܘ̈ܘܳܢܺܝܢ ܗܘܳܬ݀ ܢܰܦܫܳܟ ܒܺܐܝ̈ܕܰܝ ܐܰܒܽܘܟ ܒܰܫܡܰܝܳܐ: ܘܰܒܦܰܪܕܰܝܣܳܐ ܥܰܡ ܓܰܝܳܣܳܐ: ܘܥܰܡܳܟ ܒܓܰܘ ܫܝܽܘܠ ܨܶܝܕ ܐܳܕܳܡ. ܫܽܘܒܚܳܐ ܠܳܟ ܕܒܰܬܠܳܬܳܐ ܐܰܘ̈ܘܳܢܺܝܢ ܣܥ̣ܰܪܬܳܝܗܝ ܠܐܴܕܳܡ ܨܰܠܡܳܟ: ܒܟܰܪܣܳܐ ܘܰܒܡܰܥܡܽܘܕܺܝܬܳܐ ܘܰܒܓܰܘ ܩܰܒܪܳܐ ܘܶܐܫܟܰܚܬܳܝܗܝ ܘܥܰܡܳܟ ܐܰܩܺܝܡܬܳܝܗܝ. ܫܽܘܒܚܳܐ ܠܳܟ ܕܒܰܬܠܳܬ ܕܽܘܟܳܝ̈ܢ ܐܶܬܚܰܘܺܝܬ ܠܰܫܠܺܝ̈ܚܰܝܟ ܟܢܺܝܫܳܐܺܝܬ ܒܥܶܠܺܝܬܳܐ ܟܰܕ ܐܰܚܺܝܕܳܐ: ܘܒܰܓܠܺܝܠܐܴ ܥܰܠ ܛܽܘܪܳܐ ܕܙܰܝ̈ܬܶܐ ܒܝܽܘܡ ܣܽܘܠܳܩܳܟ. ܫܽܘܒܚܳܐ ܠܳܟ ܕܰܒܡܶܢܝܳܢܳܐ ܬܠܺܝܬܳܝܳܐ: ܠܰܡܨܺܝܕܬܶܗ ܕܫܶܡܥܽܘܢ ܢܽܘ̈ܢܶܐ ܐܰܣܪܰܚ̣ܬ: ܡܳܐܐ ܘܚܰܡܫܺܝܢ ܘܰܬܠܳܬܳܐ: ܟܰܕ ܬܠܳܬܳܐ ܥܰܠ̣ܘ ܠܶܗ. ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܐܰܬܩܶܢܬܳܗ̇ ܠܫܳܪܽܘܬܳܐ ܕܺܝܠܳܟ ܒܠܰܚܡܳܐ ܘܢܽܘ̈ܢܶܐ ܘܓܽܘܡܪ̈ܰܝ ܢܽܘܪܳܐ ܒܬܶܕܡܽܘܪܬܳܐ. ܫܽܘܒܚܳܐ ܠܳܟ ܕܰܒܝܰܕ ܫܽܘܐܳܠܐܴ ܬܠܺܝܬܳܝܳܐ ܕܰܠܘܳܬ ܟܺܐܦܳܐ: ܘܦܽܘܢܳܝܳܐ ܬܠܺܝܬܳܝܳܐ ܠܰܟܦܽܘܪܝܳܐ ܬܠܺܝܬܳܝܳܐ ܐܰܣܺܝܬ ܒܛܰܝܒܽܘܬܳܟ. ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܥܳܢ̈ܳܐ ܐܰܓܥ̣ܶܠܬ ܠܶܗ ܠܫܶܡܥܽܘܢ. ܐܶܡܪ̈ܶܐ ܘܥܶܪ̈ܒܶܐ ܘܰܢܩܰܘ̈ܳܬܳܐ ܦܪ̈ܺܝܩܳܬܳܐ: ܫܽܘܒܚܳܐ ܠܳܟ ܕܒܰܬܠܺܝܬܳܝܽܘܬ ܥܶܕܳܢ̈ܶܐ ܐܶܬܚܰܘ̣ܺܝܬ ܠܢܶܫ̈ܶܐ ܩܝܳܡܬܳܟ ܒܪܰܡܫܳܐ ܥܰܕ ܚܶܫܽܘܟ: ܘܰܒܫܰܦܪܳܐ ܥܰܡܺܝܩܳܐ ܘܰܒܨܰܦܪܳܐ ܟܰܕ ܕܢܰܚ̣ ܫܶܡܫܳܐ. ܫܽܘܒܚܳܐ ܠܳܟ ܕܰܒܡܰܣܰܩܬܳܟ ܕܠܰܫܡܰܝܳܐ ܬܠܺܝܬܳܐܺܝܬ ܐܶܬܝܰܩ̣ܰܪܬ ܡ̣ܶܢ ܬܠܳܬ ܥܺܕ̈ܳܬܳܐ ܕܢܽܘܪ̈ܳܢܶܐ ܘܪ̈ܽܘܚܳܢܶܐ ܘܡܰܠܐܱܟ̈ܶܐ. ܫܽܘܒܚܳܐ ܠܳܟ ܕܰܬܠܺܝܬܳܐܺܝܬ ܡܶܫܬܰܒܰܚ ܐܰܢ̱ܬ ܒܡܰܘܬܒܳܐ ܐܺܝܬܝܳܝܳܐ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܫܽܘܒܚܳܐ ܠܳܟ ܕܫ̣ܰܕܰܪܬ ܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܰܝܟ ܬܠܺܝܬܳܐܺܝܬ ܒܰܚܙܳܬܳܐ ܘܰܒܩܳܠܐܴ ܘܰܒܡܰܥܒܕܳܢܽܘܬܳܐ ܕܛܰܝܒܽܘܬܳܐ. ܫܽܘܒܚܳܐ ܠܳܟ ܕܫ̣ܰܕܰܪܬ ܠܰܫܠܺܝ̈ܚܰܝܟ ܕܢܰܟܪܙܽܘܢ ܘܢܰܐܠܦܽܘܢ ܘܢܰܥܡܕܽܘܢ ܠܥܰܡ̈ܡܶܐ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܫܽܘܒܚܳܐ ܠܳܟ ܕܗܳܠܶܝܢ ܟܽܠܗܶܝܢ ܬܡܺܝ̈ܗܳܬܳܐ ܣܒ̣ܰܠܬ ܘܣܰܝܒ̣ܰܪܬ ܚܠܳܦܰܝܢ ܒܰܒܣܰܪ ܘܠܰܢ ܦ̣ܪܰܩܬ ܡ̣ܶܢ ܚܛܺܝܬܳܐ ܘܡܰܘܬܳܐ ܘܣܳܛܳܢܳܐ ܬܠܺܝܬܳܐܺܝܬ: ܘܥܰܠ ܗ̇ܳܝ ܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܥܡܰܕܢ ܒܰܫܡܳܟ ܩܰܕܺܝܫܳܐ: ܘܕܰܐܒܽܘܟ ܘܪܽܘܚܳܟ ܩܰܕܺܝܫܳܐ ܘܶܐܟ̣ܰܠܢ ܦܰܓܪܳܟ ܘܶܐܫܬܰܝܢ ܕܡܳܟ ܡܚܰܣܝܳܢܳܐ ܬܠܺܝܬܳܐܺܝܬ: ܘܰܬܚܰܣܶܐ ܘܰܬܩܰܕܶܫ: ܘܬܰܢܗܰܪ ܠܰܢ ܬܠܺܝܬܳܐܺܝܬ: ܒܢܰܦܫܳܐ ܘܰܒܦܰܓܪܳܐ ܘܰܒܗܰܘܢܳܐ. ܟܰܕ ܠܦܰܓܪܳܐ ܠܘܳܬ ܗܳܠܶܝܢ ܕܢܰܦܫܳܐ: ܘܰܠܢܰܦܫܳܐ ܠܘܳܬ ܗܰܘܢܳܐ ܡܥܰܠܐܷ ܐܰܢ̱ܬ: ܐܳܦ ܠܰܬܠܳܬܰܝ̈ܗܽܘܢ ܠܘܳܬ ܚܙܳܬܳܐ ܕܪܰܒܽܘܬܳܟ ܢܳܬܶܦ ܐܰܢ̱ܬ: ܘܬܽܘܒ ܒܳܥܶܝܢܰܢ ܡܶܢܳܟ ܐܰܝܟܰܢܳܐ ܕܰܬܚܰܝܶܠ ܠܰܢ ܕܰܠܗܳܠܶܝܢ ܬܠܳܬܳܐ ܓܶܢ̈ܣܶܐ ܪ̈ܺܝܫܰܝ ܚܰܫ̈ܶܐ ܢܶܙܟܽܘܢ ܠܗܳܠܶܝܢ ܬܰܘܠܕ̈ܳܬܗܽܘܢ: ܬܽܘܒ ܗܰܒܠܰܢ ܡܳܪܝܳܐ ܐܳܣܝܽܘܬܳܐ ܠܢܰܦܫܳܐ ܘܰܠܦܰܓܪܳܐ ܡ̣ܶܢ ܟܪܺܝܗܽܘܬ ܪ̈ܶܓܫܶܐ ܐܰܚܠܶܡ: ܘܰܠܢܰܦܫܳܐ ܡ̣ܶܢ ܚܽܘ̈ܫܳܒܶܐ ܫܟܺܝܪ̈ܶܐ: ܘܰܠܗܰܘܢܳܐ ܡ̣ܶܢ ܦܶܗܝܳܐ ܐܰܪܥܳܢܳܝܳܐ. ܬܽܘܒ ܗܰܒܠܰܢ ܡܳܪܝܳܐ ܕܥܰܡܳܟ ܢܶܚܰܫ ܘܥܰܡܳܟ ܢܡܽܘܬ: ܘܥܰܡܳܟ ܢܶܫܬܰܒܰܚ: ܘܫܰܟܶܢ ܠܰܢ ܕܥܰܡܳܟ ܢܩܽܘܡ ܘܥܰܡܳܟ ܢܶܣܬܰܠܰܩ ܘܥܰܡܳܟ ܢܰܡܠܶܟ: ܘܬܽܘܒ ܐܰܛܶܐܒ ܠܰܢ ܒܝܰܘܡܳܐ ܕܡܶܐܬܺܝܬܳܟ ܕܬܰܪܬܶܝܢ ܕܥܰܠ ܦܳܬܽܘܪܳܟ ܢܶܣܬܡܶܟ ܘܡ̣ܶܢ ܛܳܒ̈ܳܬܳܟ ܢܶܣܒܰܥ: ܘܡ̣ܶܢ ܚܙܳܬܳܟ ܢܶܬܦܰܛܰܡ: ܘܰܐܫܘܳܐ ܠܰܢ ܕܥܰܡ ܩܰܕܺܝ̈ܫܰܝܟ ܢܪܰܡܪܡܳܟ: ܒܽܐܘܪܫܠܶܡ ܫܡܰܝܳܢܺܝܬܳܐ ܘܰܒܥܺܕܬܳܟ ܗ̇ܳܝ ܕܒܽܘܟܪ̈ܶܐ ܒܡܰܠܟܽܘܬܳܐ ܗ̇ܳܝ ܕܢܽܘܗܪܳܐ ܠܐܴ ܥܳܒܽܘܪܳܐ ܘܠܐܴ ܡܶܫܬܰܪܝܳܢܳܐ: ܘܠܐܱܒܽܘܟ ܡܪܰܚܡܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܩܰܕܺܝܫܳܐ ܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ ܗܳܫܳܐ܀

 

ܥܛܪܐ

ܫܽܘܒܚܳܐ ܠܳܟ ܬܠܺܝܬܳܝܳܐ ܕܰܐܠܳܗܽܘܬܳܐ ܝܶܫܽܘܥ ܡܫܺܝܚܳܐ ܕܡ̣ܶܢ ܢܒܺܝ̈ܶܐ ܚܰܙܳܝ̈ܶܐ ܕܡ̣ܶܢ ܥܳܠܰܡ ܬܠܺܝܬܳܐܺܝܬ ܘܰܚܕܳܢܳܐ ܐܶܬܶܐܪܶܙ ܦܽܘܪܩܳܢܳܐ ܕܰܥܒ̣ܰܕܬ ܠܰܢ ܒܰܡܕܰܒܪܳܢܽܘܬܳܟ: ܘܒܰܩܢܽܘܡܳܟ ܓܡ̣ܰܪܬ ܘܫܰܡܠܺܝܬ ܒܽܘܕܳܩܰܝ̈ܗܽܘܢ ܘܚܶܙܘܰܝ̈ܗܽܘܢ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܩܰܒܶܠ ܒܛܰܝܒܽܘܬܳܟ: ܠܦܺܝܪܡܳܐ ܕܰܬܠܺܝܬܳܐܺܝܬ ܗܳܫܳܐ ܐܶܬܬܰܥܛܰܪ ܠܳܟ ܡܶܢܰܢ: ܘܫܰܟܶܢ ܠܰܢ ܒܶܗ ܡ̣ܶܢ ܒܶܝܬ ܓܰܙܳܟ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ: ܘܫܽܘܘܙܳܒܳܐ ܕܡ̣ܶܢ ܟܽܠܗܶܝܢ ܨܶܢ̈ܥܳܬܶܗ ܕܰܒܥܶܠܕܰܐܪܳܐ: ܘܗܰܒܠܰܢ ܕܒܰܬܠܳܬ ܡܝܰܬܪ̈ܳܬܳܐ ܢܶܬܓܡܰܪ ܩܕܳܡܰܝܟ: ܒܗܰܝܡܳܢܽܘܬܳܐ ܘܰܒܣܰܒܪܳܐ ܘܰܒܚܽܘܒܳܐ: ܘܰܐܫܘܳܐ ܠܰܢ ܠܡܰܘܗܰܒܬܳܐ ܕܫܰܝܢܳܐ ܘܕܰܫܠܳܡܳܐ ܘܰܕܪ̈ܰܚܡܶܐ ܘܩܰܘܡܳܐ ܕܡ̣ܶܢ ܝܰܡܺܝܢܳܟ: ܚܢܰܢ ܘܥܰܢܺܝ̈ܕܰܝܢ ܢܶܚܕܶܐ ܥܰܡܳܟ ܒܰܓܢܽܘܢ ܢܽܘܗܪܳܐ ܬܠܺܝܬܳܐܺܝܬ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܚܘܬܡܐ

ܗܘܺܝ ܡܳܪܝܳܐ ܐܠܰܗܳܐ ܠܒܺܝܫܽܘܬܰܢ ܡܥܰܕܪܳܢܳܐ ܘܰܡܣܰܝܥܳܢܳܐ: ܘܡ̣ܶܢ ܢܶܣܝܽܘ̈ܢܶܐ ܕܰܒܥܶܠܕܰܐܪܳܐ ܦܳܪܽܘܩܳܐ ܘܰܡܢܰܛܪܳܢܳܐ: ܘܗܰܒ ܠܰܢ ܕܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܢܶܬܶܐܡܶܢ ܒܦܽܘܩ̈ܕܳܢܰܝܟ ܩܰܕܺܝ̈ܫܶܐ ܘܡܰܥܒ̈ܕܰܝ ܚܰܝ̈ܶܐ: ܘܠܐܴ ܬܶܬܶܠ ܠܐܴܟܶܠܩܰܪܨܳܐ ܥܠܰܝܢ ܫܽܘܠܛܳܢܳܐ ܕܢܶܣܛܶܐ ܠܰܢ ܠܘܳܬܶܗ: ܘܠܐܴ ܢܶܦܠܽܘܚ ܠܶܗ ܥܰܒܕܽܘܬܳܐ ܒܺܝܫܬܳܐ ܘܡܰܪܺܝܪܬܳܐ: ܐܶܠܐܴ ܫܰܟܶܢ ܠܰܢ ܕܠܳܟ ܢܰܐܚܶܒ ܡ̣ܶܢ ܟܽܠܶܗ ܠܶܒܰܢ. ܘܰܒܢܳܡܽܘ̈ܣܰܝܟ ܢܶܬܗܰܓܶܐ ܐܺܝܡܳܡܳܐ ܘܠܺܠܝܳܐ ܘܰܩܦܺܝܢ ܒܰܠܡܺܐܢܳܐ ܕܺܝܠܳܟ ܕܚܰܝ̈ܶܐ: ܘܰܐܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܒܡܰܠܟܽܘܬܳܟ ܫܡܰܝܳܢܺܝܬܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܡܶܠܬܳܐ ܐܠܰܗܳܐ ܕܰܥܒ̣ܰܕ ܒܰܐܪܥܳܐ ܡܕܰܒܪܳܢܽܘܬܳܐ ܡܶܛܽܠ ܦܽܘܪܩܳܢܰܢ: ܠܗ̇ܰܘ ܚܰܝܳܐ ܘܡܰܐܚܝܳܢܳܐ ܕܰܠܓܶܢܣܰܢ ܕܰܢܦ̣ܰܠ ܗ̣ܘܳܐ ܒܰܚܛܺܝܬܳܐ ܘܰܒܥܰܒܕܽܘܬܳܐ ܣܳܛܳܢܳܝܬܳܐ ܡܶܫܬܰܢܰܩ: ܘܰܒܝܰܕ ܫܽܘ̈ܟܳܢܰܘܗܝ ܐܠܰܗܳܝ̈ܶܐ ܘܣܰܡ̈ܡܳܢܰܘܗܝ ܡܰܐܣܝ̈ܳܢܶܐ ܥܰܨܒܶܗ ܘܰܐܩܺܝܡܶܗ: ܠܗ̇ܰܘ ܡܳܪܳܐ ܛܳܒܳܐ ܘܒܰܣܺܝܡܳܐ ܕܟܽܠܗܶܝܢ ܦܰܐܝ̈ܳܬܳܐ ܫܰܡܠܺܝ ܚܠܳܦܰܝܢ: ܚܰܫܳܐ ܘܡܰܘܬܳܐ ܘܰܙܩܺܝܦܳܐ: ܘܰܩܒܽܘܪܬܳܐ ܕܥܰܡ ܡܺܝ̈ܬܶܐ: ܒܳܬܰܪ ܬܠܳܬܳܐ ܝܰܘ̈ܡܺܝܢ ܩܳܡ ܡ̣ܶܢ ܩܰܒܪܳܐ ܘܰܦ̣ܪܰܩ ܠܰܢ: ܘܥܰܡܶܗ ܠܰܫܡܰܝܳܐ ܐܰܣܶܩ  ܠܰܢ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܟܰܕ ܒܚܶܟܡܬܳܐ ܐܠܰܗܳܝܬܳܐ ܘܡܳܪܳܢܳܝܬܳܐ ܐܳܦ ܥܰܬܺܝܪܰܬ݀ ܒܚܶܟ̈ܡܳܬܳܐ ܕܰܕܠܐܴ ܣܽܘܦ ܡܶܬܒܰܩܶܝܢܰܢ: ܐܳܘ ܒܪܳܐ ܡܶܠܬܳܐ ܕܰܐܠܳܗܳܐ. ܘܒܳܗ̇ ܒܰܡܕܰܒܪܳܢܽܘܬܳܐ ܡܰܐܚܝܳܢܺܝܬܳܐ ܕܺܝܠܳܟ ܡܰܐܨܕܶܝܢܰܢ: ܘܰܒܥܰܝ̈ܢܶܐ ܩܰܛܺܝ̣̈ܢܳܬܳܐ ܕܗܰܘ̈ܢܰܝܢ ܚܳܝܪܺܝܢܰܢ ܘܥܰܠ ܠܽܘ̈ܚܶܐ ܕܠܶܒܰܘ̈ܳܬܰܢ ܒܡܰܕ̈ܥܰܝܢ ܢܳܣܒܺܝܢܰܢ ܘܰܒܟܽܠ ܬܡܺܝ̈ܗܳܬܳܐ ܕܰܣܥ̣ܰܪܬ ܠܘܳܬ ܓܶܢܣܰܢ ܡܚܺܝܠܐܴ ܬܳܗܪܺܝܢܰܢ ܘܥܰܠ ܐܰܦ̈ܰܝ ܦܽܘܪܩܳܢܳܐ ܫܦܺܝܥ ܒܛܰܝܒܽܘܬܳܐ ܕܫܰܟܶܢ ܠܰܢ ܒܰܕܡܶܗ ܡܶܬܕܰܡܪܺܝܢܰܢ: ܟܰܕ ܡ̣ܶܢ ܗܽܘܠܐܷ ܢܽܘܟܪ̈ܳܝܰܝ ܠܰܚܕ̈ܳܕܶܐ ܠܘܳܬ ܫܰܘܝܽܘܬܳܐ ܠܐܴ ܦܠܺܝܓܬܳܐ ܒܨܶܒܝܳܢܶܗ ܐܬܝܢܢ ܘܥܠ ܐܝ̈ܕܘܗܝ ܩܰܕܺܝ̈ܫܳܬܳܐ ܐܶܬܓܒܶܠܢܰܢ ܘܶܐܙܕܰܝܰܚܢܰܢ. ܟܰܕ ܒܨܰܠܡܶܗ ܡܰܠܟܳܝܳܐ ܐܶܬܒܪܺܝܢܰܢ ܘܰܒܦܰܪܕܰܝܣܳܐ ܕܛܽܘ̈ܒܶܐ ܐܶܬܬܰܘܬܶܒܢܰܢ: ܘܝܳܪ̈ܬܶܐ ܚܰܕ̈ܬܶܐ ܗ̣ܘܰܝܢܰܢ: ܘܰܒܨܶܒܝܳܢܰܢ ܡܰܪܳܚܳܐ ܠܡܰܠܟܳܐ ܡܰܘܒܕܳܢܳܐ ܕܚܶܘܝܳܐ ܡܰܛܥܝܳܢܳܐ ܫܡܰܥ̣ܢܰܢ: ܘܡ̣ܶܢ ܦܰܪܕܰܝܣܳܐ ܥܕܶܢܳܝܳܐ ܢܦ̣ܰܠܢܰܢ: ܘܰܐܪܥܳܐ ܕܠܰܘ̈ܛܳܬܳܐ ܝܺܪܬܢܰܢ: ܘܟܽܘ̈ܒܶܐ ܘܕܰܪܕܪ̈ܶܐ ܚܠܳܦ ܒܽܘ̈ܣܳܡܶܐ ܓܶܐܘܳܬܳܢܳܝ̈ܶܐ ܩܰܕܺܝܢܰܢ: ܟܰܕ ܥܰܒܕܽܘܬܳܐ ܠܰܒܥܶܠܕܒܳܒܰܢ ܦܠܰܚ̣ܢܰܢ: ܘܰܚܠܳܦ ܒܳܪܽܘܝܳܐ ܕܥܰܒ̣ܕܰܢ ܒܕܶܡ̈ܘܳܬܳܐ ܡܫܰܚܠܦ̈ܳܬܳܐ ܠܶܗ ܚܰܠܶܦܢܰܢ: ܘܕܶܒ̈ܚܶܐ ܘܢܽܘܩ̈ܳܝܶܐ ܠܶܗ ܢܰܩܺܝܢܰܢ. ܟܰܕ ܐܰܘ̈ܘܳܢܶܐ ܡܰܠܝ̈ܰܝ ܙܰܗܡܽܘܬܳܐ ܠܶܗ ܗ̣ܘܰܝܢܰܢ: ܘܦܰܓܪ̈ܰܝܢ ܥܰܡ ܢܰܦ̈ܫܳܬܰܢ ܠܶܗ ܐܰܓܥܶܠ̣ܢܰܢ: ܥܕܰܡܳܐ ܕܝܳܪ̈ܬܶܐ ܕܬܰܫܢܺܝ̈ܩܶܐ ܥܰܡܶܗ ܗ̣ܘܰܝܢܰܢ. ܘܟܰܕ ܚ̣ܙܳܐ ܒܳܪܽܘܝܳܐ ܚܰܟܺܝܡܳܐ ܕܡ̣ܶܢ ܟܽܠܗܶܝܢ ܛܳܒ̈ܳܬܳܐ ܐܶܬܓܠ̣ܶܙܢܰܢ ܘܰܒܓܰܘ ܣܝܳܢܳܐ ܕܰܚܛܺܝܬܳܐ ܛܰܒܰܥ̣ܢܰܢ: ܘܰܒܫܽܘܚܬܳܐ ܣܰܪܝܰܬ݀ ܪܺܝܚܳܐ ܣܰܪܺܝܢܰܢ ܘܶܐܬܚܰܒܰܠܢܰܢ: ܟܰܕ ܒܪܶܚܡܰܬ݀ ܐ̱ܢܳܫܽܘܬܶܗ ܠܐܴ ܡܶܬܡܰܠܠܳܢܺܝܬܳܐ ܕܒܳܪܽܘܝܳܐ ܡ̣ܶܢ ܥܰܒܕܽܘܬܳܐ ܣܳܛܳܢܳܝܬܳܐ ܐܶܬܚܰܪܰܪܢܰܢ: ܘܡ̣ܶܢ ܥܽܘܡܩܳܐ ܕܒܺܝ̈ܫܳܬܳܐ ܐܶܬܕܰܠܠܺܝܢܰܢ ܘܠܐܴ ܡܶܬܚܰܒܠܳܢܽܘܬܳܐ ܩܢܰܝܢܰܢ: ܟܰܕ ܠܡܰܘܠܳܕܳܐ ܙܰܒܢܳܝܳܐ ܐܶܬܳܐ ܗ̇ܰܘ ܠܐܴ ܙܰܒܢܳܝܳܐ ܘܰܒܝܰܠܕܶܗ ܕܡ̣ܶܢ ܒܬܽܘܠܬܳܐ ܡܰܪܝܰܡ ܠܝܰܠܕܶܗ ܗ̇ܰܘ ܡܬܽܘܡܳܝܳܐ ܐܳܦ ܕܰܠܥܶܠ ܡ̣ܶܢ ܡܶܠܬܳܐ ܐܶܫܬܰܘܕܰܥܢܰܢ. ܟܰܕ ܩܢܽܘܡܳܐ ܐܺܝܬ ܠܒܶܣܪܳܐ ܐܶܬܚܰܝܰܕ: ܘܢܰܦܫܳܐ ܡܠܺܝܠܬܳܐ ܘܝܰܕܽܘܥܬܳܢܺܝܬܳܐ ܢܣ̣ܰܒ ܠܶܗ: ܗ̇ܰܘ ܠܐܴ ܒܶܣܪܳܢܳܐ ܕܰܒܒܶܣܪܳܐ ܐܶܬܚܙܺܝ ܥܰܠ ܐܰܪܥܳܐ ܡܶܛܽܠܳܬܰܢ: ܬܠܺܝܬܳܐܺܝܬ ܡܰܙܥܩܺܝܢܰܢ ܫܽܘܒܚܳܐ ܠܐܱܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ ܐܳܡܪܺܝܢܰܢ: ܟܰܕ ܠܰܓܙܽܘܪܬܳܐ ܡܽܘܫܳܝܬܳܐ ܫܰܡܠܺܝ ܘܰܠܦܽܘܩܕ̈ܳܢܶܐ ܥܰܡ ܢܳܡܽܘ̈ܣܶܐ ܡܰܠܺܝ: ܘܰܒܡܽܘ̈ܫܚܳܬܳܐ ܐ̱ܢܳܫܳܝ̈ܳܬܳܐ ܐܶܬܪܰܒܺܝ ܘܒܶܗ ܡ̣ܶܢ ܚܒܳܠܐܴ ܘܥܰܬܺܝܩܽܘܬܳܐ ܐܶܬܚܰܕܰܬܢܰܢ. ܘܟܰܕ ܒܰܐܪܒܥܺܝܢ ܝܰܘ̈ܡܺܝܢ ܒܩܽܘܪ̈ܒܳܢܶܐ ܐܶܬܛܥܶܢ: ܘܥܰܡ ܡܰܪܝܰܡ ܘܝܰܘܣܶܦ ܠܗܰܝܟܠܐܴ ܐܶܙܰܠ ܘܥܰܠ ܐܺܝ̈ܕܰܝ ܫܶܡܥܽܘܢ ܣܳܒܳܐ ܐܶܙܕܰܝܰܚ: ܘܒܰܫܪܳܝܳܐ ܕܝܰܗ̣ܒ ܠܶܗ ܠܐܱܠܗܽܘܬܶܗ ܪܳܡܰܬ݀ ܡ̣ܶܢ ܟܽܠ ܐܶܫܬܰܘܕܰܥܢܰܢ: ܟܰܕ ܒܰܫܪܳܝܳܐ ܕܫܶܐܠ ܫܶܡܥܽܘܢ ܫܰܘܝܽܘܬ ܨܶܒܝܳܢܳܐ ܕܰܐܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܘܺܝ ܘܥܰܡܶܗ ܘܥܰܡ ܚܰܢܰܐ ܢܒܺܝܬܳܐ ܢܺܐܡܰܪ ܒܪܺܝܟ ܗ̣ܽܘ ܐܠܰܗܰܢ ܕܒܰܚܢܳܢܶܗ ܐܶܣܬܥܰܪܢܰܢ: ܟܰܕ ܠܢܰܗܪܳܐ ܝܽܘܪܕܢܳܝܳܐ ܐܶܬܳܐ ܘܰܕܗ̣ܽܘ ܐܺܝܬܰܘܗܝ ܐܠܰܗܳܐ ܕܥܰܠ ܟܽܠ ܐܶܣܬܗܶܕ: ܘܒܰܥܡܳܕܶܗ ܡܚܰܣܝܳܢܳܐ ܐܶܬܢܰܗܰܪܢܰܢ ܘܒܰܣܚܳܬܶܗ ܩܰܕܺܝܫܬܳܐ ܐܶܬܩܰܕܰܫܢܰܢ: ܟܰܕ ܠܰܒܪܳܐ ܡܫܺܝܚܳܐ ܕܥܳܡܶܕ: ܘܠܐܱܒܳܐ ܕܩ̇ܳܥܶܐ ܕܗܳܢܰܘ ܒܶܪܝ ܚܰܒܺܝܒܝ: ܘܰܠܪܽܘܚܳܐ ܩܰܕܺܝܫܳܐ ܕܛܳܐܶܣ ܒܥܰܝ̈ܢܰܝܢ ܟܰܣ̈ܝܳܬܳܐ ܚ̇ܳܙܶܝܢܰܢ. ܘܠܰܬܠܺܝܬܳܝܽܘܬܳܐ ܣܓܺܝܕܰܬ݀ ܒܰܩܢܽܘ̈ܡܶܐ ܬܠܳܬܳܐ ܐܶܫܬܰܘܕܰܥܢܰܢ: ܘܰܕܗ̣ܽܘ ܚܰܕ ܐܺܝܬܰܘܗܝ ܐܠܰܗܳܐ ܫܰܪܺܝܪܳܐ ܘܺܝܕܰܥܢܰܢ ܘܶܐܣܬܰܟܰܠܢܰܢ ܟܰܕ ܠܪܽܘܚܳܐ ܩܰܕܺܝܫܳܐ ܢ̣ܓܰܕ ܥܰܠ ܒܶܣܪܶܗ ܡܢܰܦܫܳܐ ܘܰܡܡܰܕܥܳܐ ܒܰܪ ܟܝܳܢܰܢ: ܘܰܒܝܰܕ ܡܶܨܥܳܝܽܘܬܳܐ ܕܒܶܣܪܳܐ ܕܺܝܠܶܗ ܕܥܰܠ ܒܶܣܪܰܢ ܢܰܥܠܶܗ ܗ̇ܰܘ ܕܒܰܥܒ̇ܳܪ ܦܽܘܩܕܳܢܳܐ ܐܶܬܬܪܺܝܡ ܡܶܢܰܢ. ܟܰܕ ܠܕܰܐܪܳܐ ܕܥܰܡ ܣܳܛܳܢܳܐ ܢܚ̣ܶܬ: ܘܰܒܕܰܐܪ̈ܶܐ ܬܠܳܬܳܐ ܕܰܣܕܰܪ ܥܰܡܶܗ ܙܟܳܝܗܝ: ܘܚܰܝܶܒ ܠܗ̇ܰܘ ܕܡܶܢܶܗ ܟܽܠܰܢ ܐܶܬܕܰܟܺܝܢܰܢ ܘܚܳܒܢܰܢ. ܟܰܕ ܠܐܱܠܳܗܽܘܬܶܗ ܒܦܰܓܪܳܐ ܡܢܰܦܫܳܐ ܕܰܢܣ̣ܰܒ ܡܶܢܰܢ ܚܰܦܺܝ: ܘܠܐܴܟܶܠܩܰܪܨܳܐ ܡܰܛܥܝܳܢܳܐ ܐܰܛܥܺܝ: ܘܒܰܡܚܽܘܬܳܐ ܗ̇ܳܝ ܕܰܡܚܳܝܗܝ ܐܶܬܡܚܺܝ: ܘܰܒܝܰܕ ܩܶܛܠܐܴ ܕܩܰܛܠܶܗ ܠܪܺܝܫ ܓܶܢܣܰܢ ܩܰܛܠܶܗ ܠܰܡܢܰܣܝܳܢܰܢ: ܟܰܕ ܠܐܘܪܫܠܶܡ ܡܕܺܝܢܰܬ݀ ܨܳܠܽܘ̈ܒܶܐ ܨܒ̣ܳܐ ܠܡܶܥܰܠ ܘܥܰܠ ܥܺܝܠܐܴ ܘܥܰܠ ܢܰܚܬܰܝ̈ܗܽܘܢ ܕܬܰܠܡܺܝ̈ܕܶܐ ܝ̣ܺܬܶܒ: ܗ̇ܰܘ ܕܥܰܠ ܚܰܨܳܐ ܕܰܟܪ̈ܽܘܒܶܐ ܝ̇ܳܬܶܒ. ܘܥܰܡ ܛܠܳܝ̈ܶܐ ܘܫܰܒܪ̈ܶܐ ܘܝܰܠܽܘ̈ܕܶܐ ܡܒܰܪܟܰܐ ܗ̱̇ܘ ܡܰܠܟܳܐ ܕܺܐܝܣܪܳܐܶܝܠ ܩ̇ܳܥܶܝܢܰܢ ܟܰܕ ܒܙܰܘܚܳܐ ܪܰܒܳܐ ܕܰܒܣܰܘ̈ܟܶܐ ܕܙܰܝܬܳܐ ܐܶܬܩܰܠܰܣ ܗ̣ܘܳܐ: ܒܗܳܠܶܝܢ ܡ̇ܰܢ ܕܡ̣ܶܢ ܕܶܩ̈ܠܐܷ ܐܰܝܟ ܕܠܰܡܪܰܝܡܳܐ: ܒܗܳܠܶܝܢ ܡܰܢ ܕܡ̣ܶܢ ܙܰܝܬܳܐ ܐܰܝܟ ܕܠܰܡܪܰܚܡܳܢܳܐ: ܕܚܳܢ ܘܪܰܚܶܡ ܥܰܠ ܓܶܢܣܰܢ: ܟܰܕ ܠܘܳܬ ܚܰܫܳܐ ܦܳܪܽܘܩܳܝܳܐ ܕܰܨܠܺܝܒܳܐ ܐܶܬܳܐ: ܘܰܕܢܶܙܟܶܐ ܗ̣ܽܘ ܠܡܰܘܬܳܐ ܕܰܥܠܰܝܢ ܐܶܬܥܰܫܰܢ: ܘܰܒܚܰܫ̈ܶܐ ܕܣܰܝܒ̣ܰܪ ܚܠܳܦܰܝܢ ܡ̣ܶܢ ܝܽܘ̈ܕܳܝܶܐ ܥܒ̣ܰܕ ܦܽܘܪܩܳܢܰܢ. ܟܰܕ ܒܥܶܠܺܝܬܳܐ ܐ̱ܪܳܙܳܢܳܝܬܳܐ ܦܶܨܚܳܐ ܥܰܡ ܬܰܠܡܺܝ̈ܕܰܘܗܝ ܐܶܟ̣ܰܠ ܘܰܒܠܰܚܡܳܐ ܕܰܢܣ̣ܰܒ ܥܰܠ ܐܺܝ̈ܕܰܘܗܝ ܘܒܰܪܟܶܗ: ܦܰܓܪܶܗ ܡܚܰܣܝܳܢܳܐ ܩܰܕܺܝܫܳܐ ܡܶܫܬܰܘܕܥܺܝܢܰܢ ܘܰܕܒܶܗ ܫܽܘܒܩܳܢܳܐ ܕܰܚܛܳܗ̈ܶܐ ܢܶܣܰܒ ܡܶܣܬܰܟܠܺܝܢܰܢ: ܟܰܕ ܐܰܝܟ ܥܰܒ̣ܕܳܐ ܐܶܙܕܰܒܰܢ: ܘܰܐܝܟ ܥܳܒ̇ܶܕ ܒܺܝ̈ܫܳܬܳܐ ܥܰܠ ܪܺܝܫܶܗ ܒܠ̣ܰܥ ܘܰܒܒܶܝܬ ܩܰܝܳܦܳܐ ܐܶܬܚܒܶܫ: ܘܰܩܕܳܡ ܦܺܝܠܰܛܳܘܣ ܐܶܬܬܕܺܝܢ. ܘܥܰܠ ܨܠܺܝܒܳܐ ܒܪܺܝܫ ܓܳܓܽܘܠܬܳܐ ܐܶܬܬܠܺܝ: ܡܶܛܽܠ ܫܽܘܘܙܳܒܰܢ: ܟܰܕ ܡ̣ܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܒܟܶܬܳܢ̈ܶܐ ܪ̈ܺܝܫܳܝܶܐ ܐܶܬܥܰܦܺܝ ܘܒܰܩܒܽܘܪܬܶܗ ܡܰܐܚܝܳܢܺܝܬܳܐ ܡ̣ܶܢ ܛܽܘܒܳܥܳܐ ܗܰܘܬܳܢܳܝܳܐ ܐܶܬܕܰܠܠܺܝܢܰܢ: ܟܰܕ ܒܢܽܘܚܳܡܶܗ ܫܒܺܝܚܳܐ ܕܡ̣ܶܢ ܩܰܒܪܳܐ ܠܬܰܠܡܺܝ̈ܕܰܘܗܝ ܘܰܒ̈ܢܰܝ ܐ̱ܪܳܙܶܗ ܐܰܦܨܰܚ: ܘܡ̣ܶܢ ܡܰܦܽܘܠܬܳܐ ܕܰܚܛܺܝܬܳܐ ܕܰܪܡܶܝܢ ܗ̣ܘܰܝܢ ܒܳܗ̇ ܩܳܡ̣ܢܰܢ. ܟܰܕ ܫܽܘܠܛܳܢܳܐ ܡܳܪܳܢܳܝܳܐ ܒܥܶܠܺܝܬܳܐ ܠܰܫܠܺܝ̈ܚܰܘܗܝ ܐܰܓܥ̣ܶܠ ܘܠܰܢ ܒܺܐܝܕܰܝ̈ܗܽܘܢ ܫܰܟܶܢ ܕܟܽܠܡ̇ܰܢ ܕܰܡܗܰܝܡܶܢ ܥܳܡ̇ܶܕ ܡܶܬܦܪܶܩ ܘܚ̇ܳܝܶܐ: ܘܰܚܢܰܢ ܡܳܪܰܢ ܕܗܰܝܡܶܢܢ ܚܰܝ̈ܶܐ ܕܰܠܥܳܠܰܡ ܩܢ̣ܰܝܢܰܢ. ܟܰܕ ܒܝܽܘܡ ܣܽܘܠܳܩܶܗ ܠܰܙܡܺܝܪ̈ܳܬܳܐ ܕܕܰܘܺܝܕ ܚܰܬܶܡ: ܘܠܰܫܠܺܝ̈ܚܰܘܗܝ ܒܰܦܫܳܛ ܐܺܝ̈ܕܰܘܗܝ ܩܰܕܺܝ̈ܫܳܬܳܐ ܒܰܪܶܟ: ܘܰܠܟܽܠܰܢ ܒܢ̈ܰܝ ܓܒܺܝܠܬܶܗ ܠܐܱܬܪܶܗ ܩܰܕܡܳܝܳܐ ܦܢ̣ܰܝܢܰܢ ܘܡ̣ܶܢ ܝܰܡܺܝܢ ܐܰܒܽܘܗܝ ܝ̣ܺܬܶܒܢܰܢ. ܘܟܰܕ ܒܫܽܘܡܠܳܝ ܥܶܣܪܳܐ ܝܰܘ̈ܡܺܝܢ ܠܰܫܠܺܝ̈ܚܰܘܗܝ ܪܽܘܚܳܐ ܫܰܟܶܢ ܘܰܒܚܶܟ̈ܡܳܬܳܐ ܕܟܽܠ ܠܶܫܳܢ ܓܡ̣ܰܪ: ܘܰܕܗ̣ܽܘ ܐܺܝܬܰܘܗܝ ܡܫܰܟܢܳܢܳܐ ܕܪܽܘܚܳܐ ܩܰܕܺܝܫܳܐ ܘܫܰܘܬܳܦܳܐ ܕܰܐܒܽܘܗܝ ܟܽܠܰܢ ܝ̣ܺܠܶܦܢܰܢ. ܟܰܕ ܗܳܫܳܐ ܚܢܺܝܓܳܐܺܝܬ ܠܶܗ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܢܶܬܶܠ ܠܰܢ. ܘܙܰܒ̈ܢܶܐ ܕܫܰܝܢܳܐ ܘܕܰܫܠܳܡܳܐ ܢܫܰܟܶܢ ܠܰܢ ܘܰܠܚܰܪܬܳܐ ܛܳܒܬܳܐ ܕܫܳܦܪܳܐ ܠܪ̈ܰܚܡܰܘܗܝ ܢܰܫܘܶܐ ܠܰܢ ܘܰܠܥܰܢܺܝ̈ܕܰܝܢ ܒܰܓܢܽܘܢܶܗ ܪܽܘܚܳܢܳܝܳܐ ܢܰܣܡܶܟ: ܘܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܘܰ ܐܺܝܬܝܳܐ ܡܬܽܘܡܳܝܳܐ ܘܰܓܢܺܝܙܳܐ ܕܡ̣ܶܢ ܠܐܴ ܡܶܕܶܡ ܠܟܽܠ ܒܶܪ̈ܝܳܢ ܐܰܝܬܺܝ ܠܰܗܘ̇ܳܝܳܐ: ܗ̇ܰܘ ܒܳܪܽܘܝܳܐ ܚܰܟܺܝܡܳܐ ܘܰܡܩܺܝܡܳܢܳܐ ܕܟܽܠ: ܕܩܰܝܶܡ ܠܟܽܠ ܒܪܶܡܙܶܗ ܐܠܰܗܳܝܳܐ. ܠܗ̇ܰܘ ܡܛܰܟܣܳܢܳܐ ܕܥܽܘܡܪ̈ܶܐ ܥܶܠܳܝ̈ܶܐ ܕܛܰܟܶܣ ܠܥܺܕ̈ܳܬܳܐ ܩܰܕܺܝ̈ܫܳܬܳܐ ܕܥܶܠܳܝ̈ܶܐ ܘܰܕܬܰܚܬܳܝ̈ܶܐ ܒܚܰܝܠܶܗ ܡܳܪܳܢܳܝܳܐ ܕܢܶܗܘܽܘܢ ܐܰܡܺܝܢܳܐܺܝܬ ܡܫܰܒܚܺܝܢ ܫܡܶܗ ܩܰܕܺܝܫܳܐ ܘܰܚܕܳܢܳܝܳܐ: ܕܠܶܗ ܝ̇ܳܐܶܐ܀

 

ܣܕܪܐ

ܐܠܰܗܳܐ ܗ̇ܰܘ ܓܢܺܝܙܳܐ ܘܠܐܴ ܡܶܬܕܰܪܟܳܢܳܐ ܘܠܐܴ ܡܶܬܥܰܩܒܳܢܳܐ ܘܠܐܴ ܡܶܣܬܰܝܟܳܢܳܐ: ܗ̇ܰܘ ܪܺܝܫܺܝܬܳܐ ܕܚܰܝ̈ܶܐ ܘܰܢܫܰܡܬܳܐ ܦܳܪܽܘܩܳܝܬܳܐ ܕܥܳܠܡ̈ܶܐ: ܡܫܰܪܝܳܢܳܐ ܘܰܡܫܰܠܡܳܢܳܐ ܕܫܽܘܠܳܡܳܐ ܠܐܴ ܩ̇ܳܪܶܒ ܠܶܗ: ܘܡܶܣܬܰܓܕܳܢܳܐ ܘܠܰܘ ܣܳܓܽܘܕܳܐ: ܡܶܫܬܰܒܚܳܢܳܐ ܘܠܰܘ ܡܫܰܒܚܳܢܳܐ ܕܰܡܫܰܒܚܳܐܺܝܬ ܒܗܶܕܪܰܝ ܩܽܘܕܫܶܗ ܕܠܐܴ ܫܰܠܘܳܐܺܝܬ ܡܶܫܬܰܒܰܚ: ܘܡ̣ܶܢ ܟܽܠ ܕܶܐܬܒܪܺܝ ܒܦܳܩܽܘܕܽܘܬܶܗ ܘܰܒܫܽܘܠܛܳܢܳܐ ܕܡܳܪܽܘܬܶܗ ܘܰܒܫܽܘܠܛܳܢܳܐ ܕܡܳܪܽܘܬܶܗ ܕܠܐܴ ܣܽܘܦ ܡܶܬܝܰܩܰܪ ܘܡܶܬܗܰܕܰܪ ܘܟܰܕ ܠܐܴ ܫܶܦܪܰܬ݀ ܠܛܳܒܽܘܬ ܛܳܒܽܘܬܶܗ ܐܺܝܬܝܳܝܬܳܐ ܕܢܶܬܒܰܣܰܡ ܗ̣ܽܘ ܒܰܠܚܽܘܕܰܘܗܝ ܒܫܽܘܒܚܳܐ ܕܪܰܒܽܘܬܶܗ: ܦܩ̣ܰܕ ܘܰܐܝܟ ܦܽܘܩܕܳܢܶܗ ܡ̇ܰܢ ܡܰܐܚܝܳܢܳܐ ܐܶܬܒܪܺܝܘ ܚܰܝܠܰܘ̈ܳܬܳܐ ܠܐܴ ܫܓܺܝ̣̈ܡܶܐ: ܐܰܝܟܰܢܳܐ ܕܢܶܗܘܽܘܢ ܠܶܗ ܡܫܰܒ̈ܚܳܢܶܐ ܘܡܶܬܒܰܣ̈ܡܳܢܶܐ ܥܰܡܶܗ ܒܫܽܘܒܚܶܗ ܠܐܴ ܡܶܬܒܰܨܝܳܢܳܐ. ܟܰܕ ܒܬܶܐܓܡܳܐ ܡܫܰܡܠܝܳܐ ܘܰܥܣܺܝܪܳܝܳܐ ܓܡ̣ܰܪ ܐܶܢܽܘܢ: ܘܩܰܪ̈ܺܝܒܰܝ ܠܐܱܠܳܗܽܘܬܳܐ ܥܒ̣ܰܕ ܐܶܢܽܘܢ: ܘܛܳܥܽܘ̈ܢܶܐ ܬܚܶܝܬ ܟܽܘܪܣܝܶܗ ܫܒܺܝܚܳܐ ܣܳܡ ܐܶܢܽܘܢ ܘܡܶܬܢܰܗܪ̈ܳܢܶܐ ܕܡ̣ܶܢ ܐܺܝܬܽܘܬܶܗ ܚܘܺܝ ܐܶܢܽܘܢ. ܘܡ̣ܶܢ ܕܰܣܥ̣ܳܐ ܘܶܐܬܪܰܘܪܰܒ ܘܰܒܥ̣ܳܐ ܪܺܝܫ ܬܶܐܓܡܳܐ ܥܶܠܳܝܳܐ ܕܢܶܚܛܽܘܦ ܠܶܗ ܟܽܘܪܣܝܳܐ: ܘܰܠܫܽܘܒܚܳܐ ܕܰܐܠܳܗܽܘܬܳܐ ܕܡ̣ܶܢ ܚܰܕ ܠܚܰܕ ܡܶܫܬܰܘܫܰܛ: ܟܰܕ ܡ̣ܶܢ ܪܰܘܡܳܐ ܗ̇ܰܘ ܡܥܰܠܝܳܐ ܕܶܐܬܥܰܠܺܝ ܗ̣ܘܳܐ ܠܶܗ ܒܪܶܡܙܳܐ ܘܫܽܘܠܛܳܢܳܐ ܡܳܪܳܢܳܝܳܐ ܡܶܢܶܗ ܐܶܣܬܰܚܰܦ: ܘܰܠܢܽܘܗܪܳܐ ܗ̇ܰܘ ܕܶܐܬܺܝܗܶܒ ܠܶܗ ܡܶܢܶܗ ܐܶܫܬܩܶܠ: ܘܰܚܠܳܦ ܢܽܘܗܪܳܐ ܚܶܫܽܘܟܳܐ ܩܰܕܺܝ: ܘܰܒܚ̈ܶܙܶܐ ܕܰܐܪܥܳܐ ܐܶܫܬܕܺܝ: ܘܰܕܢܶܗܘܶܐ ܡܩܰܕܝܳܢܳܐ ܕܓܺܗܰܢܳܐ ܒܨܶܒܝܳܢܶܗ ܐܶܬܕܰܢܺܝ: ܘܟܰܕ ܚ̣ܙܳܐ ܐܠܰܗܳܐ ܡܪܰܚܡܳܢܳܐ ܕܡ̣ܶܢ ܗ̇ܳܝ ܪܽܘܚܳܢܽܘܬܳܐ ܛܪܺܝܕܳܐ ܗ̣ܘܳܐ ܘܣܳܛܳܢܳܐ ܚܠܳܦ ܡܰܠܐܱܟܳܐ ܐܶܬܚܙܺܝ: ܒܪܶܚܡܰܬ݀ ܐ̱ܢܳܫܽܘܬܶܗ ܕܡܳܪܝܳܐ ܡ̣ܶܢ ܐܰܪܥܳܐ ܥܰܦܪܳܐ ܫܩ̣ܰܠ ܘܰܓܒ̣ܰܠ ܠܐܴܕܳܡ ܨܰܠܡܳܐ ܦܰܐܝܳܐ ܕܪܰܒܽܘܬܶܗ: ܕܢܶܗܘܶܐ ܝܳܪܬܳܐ ܘܡܶܬܒܰܣܡܳܢܳܐ ܒܚܰܝ̈ܶܐ ܚܰܕ̈ܬܶܐ ܘܪ̈ܳܡܰܝ ܡ̣ܶܢ ܥܳܠܡܳܐ ܒܗ̇ܰܘ ܡܰܥܡܪܳܐ ܥܣܺܝܪܳܝܳܐ. ܟܰܕ ܒܰܪܬܶܗ ܩܳܛܽܘܠܬܳܐ ܗ̣ܽܘ ܚܰܪܡܳܢܳܐ ܒܚܶܘܝܳܐ ܥ̣ܰܠ ܘܒܶܐܕ̈ܢܰܝ ܚܰܘܳܐ ܐ̱ܪܳܙܳܐ ܠܚ̣ܰܫ: ܕܰܐܟܽܘܠܘ: ܘܟܰܕ ܐܳܟܠܺܝܢ ܐܢ̱ܬܽܘܢ ܗ̇ܳܘܶܝܬܽܘܢ ܐܠܰܗ̈ܶܐ ܒܰܕܡܽܘܬܶܗ ܕܗ̇ܰܘ ܕܰܢܨܰܒ̣ܟܽܘܢ ܒܦܰܪܕܰܝܣܳܐ ܗܳܢܳܐ. ܟܰܕ ܠܡܶܠܟܳܐ ܡܰܘܒܕܳܢܳܐ ܐܠܶܥܳܐ ܪܦܺܝܬܳܐ ܐܶܫܬܰܡܥܰܬ݀: ܘܡ̣ܶܢ ܐܺܝܠܳܢܳܐ ܕܠܐܴ ܫܰܠܺܝܛܺܝܢ ܗ̣ܘܰܘ ܠܡܶܐܟܰܠ ܦܺܐܪܳܐ: ܩܶܛܦܰܬ݀ ܘܶܐܟܠܰܬ݀ ܘܒܳܬܰܪܟܶܢ ܝܶܗܒܰܬ݀ ܠܐܴܕܳܡ ܘܰܒܡܶܐܟܽܘܠܬܶܗ ܠܫܽܘܒܚܳܐ ܕܰܠܒܺܝܫܺܝܢ ܗ̣ܘܰܘ ܫܠܰܚ̣ܘ: ܘܡ̣ܶܢ ܪܰܘܡܳܐ ܥܕܶܢܳܝܳܐ ܠܐܱܪܥܳܐ ܕܟܽܘ̈ܒܶܐ ܢܦܰܠ̣ܘ. ܟܰܕ ܚ̣ܙܳܐ ܪܰܚܡܳܢܳܐ ܕܢܽܘܓܪܳܐ ܕܰܫܢܰܝ̈ܳܐ ܨܰܠܡܶܗ ܡܰܠܟܳܝܳܐ ܒܺܐܝ̈ܕܰܝ ܒܥܶܠܕܒܳܒܶܗ ܡܰܫ̣ܠܰܡ: ܪ̈ܰܚܡܰܘܗܝ ܐܺܝܬܝ̈ܳܝܶܐ ܕܰܥܙܺܝܠܺܝܢ ܒܶܗ ܐܰܙܺܝܥܽܘܗܝ ܕܢܶܚܽܘܬ ܡ̣ܶܢ ܫܡܰܘ̈ܗܝ ܪ̈ܳܡܶܐ ܕܢܶܦܪܽܘܩ ܠܰܓܒܺܝܠܬܶܗ ܡ̣ܶܢ ܐܺܝܕܰܝ̈ܳܐ ܕܰܡܒܰܙܚ̈ܳܢܶܐ ܘܡ̣ܶܢ ܚܶܙ̈ܶܐ ܗܳܡܳܢܳܝ̈ܶܐ: ܟܰܕ ܒܨܶܒܝܳܢܶܗ ܘܕܰܐܒܽܘܗܝ ܘܰܕܪܽܘܚܶܗ ܩܰܕܺܝܫܳܐ: ܡ̣ܶܢ ܗ̇ܰܘ ܟܽܘܪܣܝܳܐ ܟܪܽܘܒܳܝܳܐ ܟܰܕ ܠܐܴ ܫܰܢܺܝ ܡܶܢܶܗ ܠܟܰܪܣܳܐ ܒܶܣܪܳܢܳܝܬܳܐ ܕܰܒܬܽܘܠܬܳܐ: ܘܝܰܪ̈ܚܶܐ ܬܶܫܥܳܐ ܐܰܝܟ ܫܰܪܟܳܐ ܕܺܝܠܺܝ̣̈ܕܶܐ ܒܳܗ̇ ܥܡ̣ܰܪ. ܟܰܕ ܒܺܝܠܺܝܕܽܘܬܶܗ ܠܰܒܬܽܘ̈ܠܐܷ ܕܝܳܠܶܕܬܶܗ ܕܠܐܴ ܚܒܳܠܐܴ ܢ̣ܛܰܪ: ܘܰܠܪ̈ܳܥܰܘܳܬܳܐ ܒܕܳܫ̈ܢܶܐ ܠܣܶܓܕܬܶܗ ܒܰܝܬܺܝ: ܬܽܘܒ ܠܡܰܠܐܱܟ̈ܶܐ ܕܢܶܗܘܽܘܢ ܡܫܰܒ̈ܚܳܢܶܐ ܕܪܰܒܽܘܬܶܗ ܦܩ̣ܰܕ ܘܰܐܝܬܺܝ. ܘܠܰܡܓܽܘ̈ܫܶܐ ܡܰܠܟ̈ܰܝ ܦܳܪܶܣ ܒܺܐܝܩܳܪܳܐ ܪܺܝܫܳܝܳܐ ܠܘܰܥܕܳܐ ܕܰܫܟܺܝܢܬܶܗ ܢ̣ܓܰܕ: ܟܰܕ ܒܝܰܘܡܳܐ ܬܡܺܝܢܳܝܳܐ ܗ̇ܰܘ ܕܒܳܬܰܪ ܡܰܘܠܳܕܶܗ ܠܢܳܡܽܘܣܳܐ ܡܽܘܫܳܝܳܐ ܚ̣ܬܰܡ ܘܰܒܝܰܘܡܳܐ ܐܰܪܒܥܺܝܢܳܝܳܐ ܒܩܽܘܪ̈ܒܳܢܶܐ ܠܗܰܝܟܠܐܴ ܣܠ̣ܶܩ ܘܰܒܙܰܘܚܳܐ ܕܺܐܝ̈ܕܰܝܳܐ ܕܫܶܡܥܽܘܢ ܣܳܒܳܐ ܘܚܰܢܰܐ ܒܢܽܘܨܪ̈ܳܬܳܐ ܪ̈ܚܺܝܡܳܬܳܐ ܐܶܬܢܰܨܰܪ. ܟܰܕ ܠܫܶܡܥܽܘܢ ܗ̇ܰܘ ܕܰܐܣܺܝܪ ܗ̣ܘܳܐ ܠܪܽܘܚܳܐ ܕܠܐܴ ܢܶܛܥܰܡ ܡܰܘܬܳܐ ܥܕܰܡܳܐ ܕܢܶܚܙܶܐ ܠܰܡܫܺܝܚܳܐ ܡ̣ܶܢ ܚܰܝ̈ܶܐ ܙܰܒܢܳܝ̈ܶܐ ܫ̣ܪܳܐ. ܘܰܒܝܰܕ ܗܳܕܶܐ ܫܰܠܺܝܛܳܐ ܕܥܰܠ ܟܽܠ: ܘܰܕܒܰܪ ܡܬܽܘܡܳܝܽܘܬܳܐ ܗ̇ܰܘ ܕܰܐܒܳܐ ܗ̣ܽܘ ܠܶܗ ܩܕܳܡ ܟܽܠ ܐ̱ܢܳܫ ܚܰܘܺܝ. ܟܰܕ ܕܶܝܢ ܒܡܽܘ̈ܫܚܳܬܳܐ ܐ̱ܢܳܫܳܝ̈ܳܬܳܐ ܐܶܬܪܰܒܺܝ ܘܰܒܩܰܘܡܬܳܐ ܦܰܓܪܳܢܳܝܬܳܐ ܐܶܫܬܰܘܫܰܛ ܘܰܠܟܽܠܶܗ ܡܽܘܠܳܝܳܐ ܕܰܢܛܽܘܪܝܳܐ ܕܢܳܡܽܘܣܳܐ ܡܽܘܫܳܝܳܐ ܥܕܰܡܳܐ ܕܩܳܡ ܒܰܡܫܽܘܚܬܳܐ ܓܰܒܪܳܢܳܝܬܳܐ ܕܒܳܗ̇ ܟܽܠܢܳܫ ܠܚܰܪܬܳܐ ܡܶܫܬܰܡܠܐܷ: ܟܕ ܠܘܳܬ ܫܶܦ̈ܥܶܐ ܝܘܽܪ̈ܕܢܳܢܳܝܶܐ ܐܶܬܳܐ: ܘܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܒܗܽܘܢ ܢܣ̣ܰܟ: ܘܡ̣ܶܢ ܝܽܘܚܰܢܳܢ ܐܶܬܬܰܘܕܺܝ ܕܰܒܪܰܐ ܗ̱̇ܘ ܚܰܝܳܐ ܕܰܐܒܽܘܗܝ ܘܡܶܢܶܗ ܥܡ̣ܰܕ: ܘܰܒܩܳܠܶܗ ܕܰܐܙܥܶܩ ܕܗܳܢܰܘ ܒܶܪܝ ܚܰܒܺܝܒܝ ܘܰܒܡܰܚܰܬܬܳܐ ܕܪܽܘܚܳܐ ܕܰܐܝܟ ܝܰܘܢܳܐ ܥܰܠ ܪܺܝܫܶܗ: ܕܰܚܕܳܢܳܝܰܐ ܗ̱̇ܘ ܕܰܐܠܳܗܽܘܬܳܐ ܐܶܣܬܗܶܕ. ܟܰܕ ܠܕܰܐܪܳܐ ܬܠܺܝܬܳܝܳܐ ܕܥܰܡ ܡܪܰܡܝܳܢܳܐ ܠܡܰܕܒܪܳܐ ܢܦ̣ܰܩ ܘܰܒܨܰܘܡܳܐ ܐܰܪܒܥܺܝܢܳܝܳܐ ܕܨܳܡ ܙܟܳܝܗܝ: ܘܰܒܣܳܥܽܘܪܽܘܬܳܐ ܕܬܶܕܡܪ̈ܳܬܳܐ ܕܰܠܘܳܬ ܟܽܠ ܕܰܡܡܰܚܰܝ ܘܰܡܢܰܘܰܠ ܚܰܘܺܝ ܣܳܥܽܘܪܽܘܬܳܐ ܚܠܺܝܡܬܳܐ ܕܒܳܗ̇ ܐܶܣܬܥܰܪ ܓܶܢܣܳܐ ܐ̱ܢܳܫܳܝܳܐ: ܟܰܕ ܕܶܝܢ ܐܰܝܟ ܗ̇ܳܝ ܕܰܐܬܩܶܢ ܠܥܶܠܳܝ̈ܶܐ ܒܬܶܫܥܳܐ ܕܛܶܟ̈ܣܶܐ ܕܡܰܠܐܱܟ̈ܶܐ: ܘܪ̈ܰܒܰܝ ܡܰܠܐܱܟ̈ܶܐ ܘܪ̈ܺܝܫܳܢܘܳܬܳܐ: ܟܪ̈ܽܘܒܶܐ: ܘܰܣܪ̈ܳܦܶܐ. ܨܒ̣ܳܐ ܕܰܢܫܰܟܶܢ ܠܰܓܒܺܝܠܬܶܗ ܘܢܰܬܩܶܢ ܒܥܺܕܬܶܗ ܐܰܝܟ ܗ̇ܳܢܽܘܢ ܛܶܟ̈ܣܶܐ: ܘܰܕܟܽܠܚܰܕ ܚܰܕ ܡ̣ܶܢ ܚܰܒܪܶܗ ܡܶܬܢܰܗܰܪ. ܟܰܕ ܕܶܝܢ ܠܗܳܠܶܝܢ ܛܶܟ̈ܣܶܐ ܬܶܫܥܳܐ ܥܺܕܬܳܢܳܝ̈ܶܐ ܕܒܰܩܢܽܘܡܶܗ ܚܰܘܺܝ ܘܰܓܡ̣ܰܪ ܘܠܰܫܠܺܝ̈ܚܰܘܗܝ ܩܰܕܺܝ̈ܫܶܐ ܐܰܓܥܶܠ ܘܰܩܕܳܡܰܝܗܽܘܢ ܣܥ̣ܰܪ: ܘܰܕܢܶܗܘܽܘܢ ܣܳܥ̇ܪܺܝܢ ܗܳܟܰܢ ܦܩܰܕ ܘܕܰܒܟܽܠ ܥܺܕ̈ܳܬܳܐ ܕܒ̇ܳܢܶܝܢ ܘܰܡܫܰܟܠܠܺܝܢ ܕܰܢܩܺܝܡܽܘܢ ܙܰܗܰܪ: ܟܰܕ ܠܛܟܣܳܐ ܗ̇ܰܘ ܕܰܡܙܰܡܪ̈ܳܢܶܐ: ܘܰܕܩܳܪ̈ܽܘܝܶܐ ܐܳܦ ܕܰܐܦܽܘܕ̈ܝܰܩܢܽܘ: ܘܣܳܥܽܘܪ̈ܶܐ ܘܕܰܡܫܰܡ̈ܫܳܢܶܐ: ܘܰܕܩܰܫܺܝ̈ܫܶܐ ܕܶܐܦܣܩܽܘ̈ܦܶܐ ܚܣܰܝ̈ܳܐ: ܘܰܕܡܺܝܛܪ̈ܽܘܦܽܘܠܺܝܛܽܘ: ܐܳܦ ܦܰܛܪܝܰܪ̈ܟܽܘ ܫܰܡܠܺܝ: ܟܰܕ ܠܗ̇ܰܘ ܕܰܡܙܰܡܪ̈ܳܢܶܐ ܠܘܳܬ ܣܳܦܪ̈ܶܐ ܡܶܬܬܰܘܒܰܠ ܗ̣ܘܳܐ ܘܰܠܗ̇ܰܘ ܕܩܳܪ̈ܽܘܝܶܐ ܒܰܝܢܳܬ ܡܦܰܫ̈ܩܳܢܶܐ ܝ̇ܳܬܶܒ ܗ̣ܘܳܐ ܘܰܠܗܽܘܢ ܡܰܬܗܰܪ ܗ̣ܘܳܐ: ܠܗ̇ܰܘ ܕܰܐܦܽܘܕ̈ܝܰܩܢܽܘ ܟܰܕ ܥܒ̣ܰܕ ܦܪ̈ܳܓܶܠܐܷ ܡ̣ܶܢ ܚܰܒܠܐܴ ܘܰܐܦ̣ܶܩ ܠܙܳܒܽܘ̈ܢܶܐ ܘܰܡܙܰܒ̈ܢܳܢܶܐ ܘܕܰܟܺܝ ܠܗܰܝܟܠܐܴ. ܟܰܕ ܠܗ̇ܰܘ ܕܣܳܥܽܘܪ̈ܐ ܟܰܕ ܗ̣ܽܘ ܡܶܬܟܪܶܟ ܒܰܡܕܺܝ̈ܢܳܬܳܐ ܘܡܰܐܣܶܐ ܠܟܽܠ ܕܟܰܪܺܝܗܺܝܢ ܘܡܰܠܶܦ ܠܐܱܝܠܶܝܢ ܕܗܶܕܝܽܘ̈ܛܺܝܢ. ܘܰܠܗ̇ܰܘ ܕܰܡܫܰܡ̈ܫܳܢܶܐ ܟܰܕ ܐܰܫܺܝܓ ܪ̈ܶܓܠܰܝܗܽܘܢ ܕܬܰܠܡܺܝ̈ܕܶܐ ܘܠܰܕܩܰܫܺܝ̈ܫܶܐ ܟܰܕ ܩ̣ܨܳܐ ܦܰܓܪܶܗ ܘܰܡ̣ܙܰܓ ܠܰܕܡܶܗ ܘܰܐܘܟܶܠ ܐܳܦ ܐܰܫܩܺܝ ܐܶܢܽܘܢ: ܟܰܕ ܒܥܶܠܺܝܬܳܐ ܐ̱ܪܳܙܳܢܳܝܬܳܐ ܒܝܰܘܡܳܐ ܗ̇ܰܘ ܕܩܳܡ ܡ̣ܶܢ ܩܰܒܪܳܐ ܟܰܕ ܟܰܟܳܪܺܝܬܳܐ ܘܢܽܘܢܳܐ ܐܶܟ̣ܰܠ ܗ̣ܘܳܐ ܠܗ̇ܰܘ ܕܰܐܦܣܩܽܘ̈ܦܶܐ ܟܰܕ ܢܦ̣ܰܚ ܒܰܐܦܰܝ̈ܗܽܘܢ: ܘܶܐܡ̣ܰܪ ܩܰܒ̣ܶܠܘ ܪܽܘܚܳܐ ܕܩܽܘܕܫܳܐ ܘܫܽܘܠܛܳܢܳܐ ܕܡܰܩܢܶܐ ܣܺܝܡܰܬ݀ ܒܢܰܝ̈ܳܐ ܘܫܽܘܒܩܳܢܳܐ ܕܰܚܛܳܗ̈ܶܐ. ܟܰܕ ܠܗ̇ܰܘ ܕܡܺܝܛܪ̈ܽܘܦܽܘܠܺܝܛܽܘ ܒܝܽܘܡ ܣܽܘܠܳܩܶܗ ܕܠܰܫܡܰܝܳܐ ܕܰܠܘܳܬ ܐܰܒܽܘܗܝ ܒܪܽܘܚܳܦܳܐ ܕܬܰܪܬܰܝܗܶܝܢ ܐܺܝ̈ܕܰܘܗܝ ܒܙܰܝܢܳܐ ܕܝܰܡܺܝܢܳܐ ܘܰܕܣܶܡܳܠܐܴ ܙܰܝܶܢ ܐܶܢܽܘܢ. ܘܰܠܗ̇ܰܘ ܕܦܰܛܪܝܰܪ̈ܟܽܘ ܟܰܕ ܥܠܰܝܗܽܘܢ ܕܬܰܠܡܺܝ̈ܕܰܘܗܝ ܕܫܰܕܰܪ ܪܽܘܚܳܐ ܦܰܪܰܩܠܺܝܛܳܐ ܘܚܰܟܶܡ ܐܶܢܽܘܢ: ܟܰܕ ܐܰܝܟ ܦܽܘܩܕܳܢܶܗ ܡܳܪܳܢܳܝܳܐ ܫܰܡܠܺܝܘ ܫܠܺܝ̈ܚܶܐ ܩܰܕܺܝ̈ܫܶܐ ܠܗܳܠܶܝܢ ܬܶܫܥܳܐ ܕܛܶܟ̈ܣܶܐ. ܘܰܒܥܺܕ̈ܳܬܳܐ ܕܫܰܟܠ̣ܶܠܘ ܛܰܟܶܣ̣ܘ ܘܩܰܝܶܡܘ ܠܕܰܡܙܰܡܪ̈ܳܢܶܐ ܟܰܕ ܫܳܡܥܺܝܢ ܡܰܠܦܳܢܽܘܬܳܐ ܕܪܰܒܗܽܘܢ ܠܰܕܩܳܪ̈ܽܘܝܶܐ ܐܰܝܟ ܗ̇ܳܝ ܕܶܐܫܟܰܚܢܳܝܗܝ ܠܰܡܫܺܝܚܳܐ ܘܰܠܗ̇ܰܘ ܕܰܐܦܽܘܕ̈ܝܰܩܢܽܘ ܟܰܕ ܠܗܰܝܟܠܐܴ ܥܳܐܠܺܝܢ ܗ̣ܘܰܘ ܘܰܠܬܺܐܪ̈ܳܬܳܐ ܕܰܦܠܺܝ̣̈ܓܶܐ ܡܕܰܟܶܝܢ ܗ̣ܘܰܘ. ܘܰܠܣܳܥܽܘܪ̈ܶܐ ܟܰܕ ܠܘܳܬ ܥܰܡ̈ܡܶܐ ܛܳܥܰܝ̈ܳܐ ܡܶܫܬܰܕܪܺܝܢ ܗ̣ܘܰܘ: ܘܰܠܗ̇ܰܘ ܕܰܡܫܰܡ̈ܫܳܢܶܐ ܟܰܕ ܠܟܶܢ̈ܫܶܐ ܥܰܠ ܥܶܣܒܳܐ ܡܰܣܡܟܺܝܢ ܗ̣ܘܰܘ: ܘܰܠܗ̇ܰܘ ܕܩܰܫܺܝ̈ܫܶܐ ܟܰܕ ܠܦܰܓܪܳܐ ܘܰܕܡܳܐ ܡܰܐܚܝܳܢܳܐ ܩ̇ܳܨܶܝܢ ܗ̣ܘܰܘ. ܘܰܠܗ̇ܰܘ ܕܶܐܦܣܩܽܘ̈ܦܶܐ ܟܰܕ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܡܰܣܪܚܺܝܢ ܗ̣ܘܰܘ: ܘܰܠܗ̇ܰܘ ܕܡܺܝܛܪ̈ܽܘܠܺܝܛܽܘ ܐܶܦܣܩܽܘ̈ܦܶܐ ܥܳܒܕܺܝܢ ܗ̣ܘܰܘ ܘܰܠܗ̇ܰܘ ܕܦܰܛܪܝܰܪ̈ܟܽܘ ܕܰܠܟܽܠ ܠܘܳܬ ܟܽܠ ܛܶܟ̈ܣܺܝܢ ܡܩܰܪܒܺܝܢ ܗ̣ܘܰܘ ܘܰܕܥܰܠ ܟܽܠ ܫܰܠܺܝܛܺܝܢ ܗ̣ܘܰܘ. ܘܰܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܩܰܒܶܠܢܰܢ ܒܺܐܝ̈ܕܰܝܳܐ ܕܺܝܠܗܽܘܢ ܠܛܶܟܣܳܐ ܗܳܢܳܐ: ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܰܢ ܕܰܬܩܰܝܶܡ ܠܥܺܕܬܳܟ ܩܰܕܺܝܫܬܳܐ: ܘܰܬܙܰܗܶܐ ܟܳܗ̈ܢܶܝܗ̇ ܘܰܡܫܰܡ̈ܫܳܢܶܐ ܕܺܝܠܳܗ̇: ܕܬܶܛܪܽܘܕ ܡܶܢܳܗ̇ ܠܟܶܫ̈ܠܐܷ ܘܣܶܕ̈ܩܶܐ ܘܰܦܠܺܝ̈ܓܘܳܬܳܐ ܘܠܐܷܪ̈ܶܣܺܝܣ ܡܚܰܒ̈ܠܳܬܳܐ: ܘܰܐܫܪܳܐ ܫܰܝܢܳܟ ܘܰܫܠܳܡܳܟ ܒܣܳܚܪ̈ܳܬܳܗ̇ ܘܗܰܒ ܠܳܗ̇ ܝܰܪ̈ܚܶܐ ܕܚܰܕ̈ܘܳܬܳܐ ܘܰܫܢܰܝ̈ܳܐ ܟܰܗܺܝ̣̈ܢܳܬܳܐ ܘܚܰܣܳܐ ܚܰܘ̈ܒܶܝܗ̇ ܘܰܚܛܳܗܶܝ̈ܗ̇ ܘܣܰܟܠܳܘ̈ܳܬܳܗ̇: ܘܰܐܢܺܝܚ ܐܶܢܽܘܢ ܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܥܢ̣ܰܕܘ ܡܶܢܳܗ̇: ܘܒܰܣܶܡ ܐܶܢܽܘܢ ܒܰܐܬܪܳܐ ܕܰܡܠܐܷ ܓܶܐܘ̈ܳܬܳܐ. ܕܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܫܰܝܢܳܐ ܫܡܰܝܳܢܳܐ ܡܫܺܝܚܳܐ ܕܫܰܝܶܢ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܒܰܕܡܳܐ ܕܰܩܢܽܘܡܶܗ܀ ܐܰܢ̱ܬ ܡܳܪܝ ܫܰܝܢ ܠܥܺܕܬܳܐ ܘܰܠܡܰܪܥܺܝܬܳܐ ܕܺܝܠܳܟ ܘܫܰܪܰܪ̈ܶܝܗ̇ ܥܰܠ ܫܽܘܥܳܐ ܠܐܴ ܡܶܙܕܰܥܙܥܳܢܳܐ ܕܗܰܝܡܳܢܽܘܬܳܐ ܠܐܴ ܡܶܬܦܰܠܓܳܢܺܝܬܳܐ܀ ܘܥܰܠ ܕܽܘܡ̈ܣܶܐ ܘܠܐܴ ܡܶܬܢܰܦ̈ܠܳܢܶܐ: ܐܰܝܟܰܢܳܐ ܕܟܰܕ ܬܶܚܕܶܐ ܘܬܶܪܘܰܙܝ ܒܥܺܐܕܳܐ ܗܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܕܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܚܕܳܢܳܝܳܐ ܘܰܬܠܺܝܬܳܝܳܐ ܕܰܚܕܳܢܳܐܺܝܬ: ܘܰܬܠܺܝܬܳܐܺܝܬ ܡ̣ܶܢ ܟܽܠ ܕܰܒ̣ܪܳܐ ܡܶܣܬܓܶܕ ܐܳܦ ܡܶܫܬܰܒܰܚ. ܠܗ̇ܰܘ ܡܶܨܥܳܝܳܐ ܕܰܐܠܳܗܽܘܬܳܐ ܕܰܒܡܶܨܥܳܝܽܘܬܶܗ ܫܰܝܶܢ ܫܡܰܝ̈ܳܢܶܐ ܥܰܡ ܐܰܪ̈ܥܳܢܳܝܶܐ: ܘܰܠܢܰܦܫܳܐ ܥܰܡ ܦܰܓܪܳܐ ܘܰܠܥܰܡܳܐ ܥܰܡ ܥܰܡ̈ܡܶܐ. ܠܗ̇ܰܘ ܬܠܺܝܬܳܝܳܐ ܕܰܬܠܺܝܬܳܐܺܝܬ ܡܶܫܬܰܒܰܚ ܒܩܽܘ̈ܕܳܫܶܐ ܗ̇ܳܢܽܘܢ ܬܠܺܝ̈ܬܳܝܶܐ ܒܰܬܠܳܬ ܥܺܕ̈ܳܬܳܐ ܩܰܕܺܝ̈ܫܳܬܳܐ: ܟܰܕ ܩܳܥܶܝܢ ܠܶܗ ܩܰܕܺܝܫ ܩܰܕܺܝܫ ܩܰܕܺܝܫ ܕܠܐܴ ܫܶܠܝܳܐ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ܀

 

ܣܕܪܐ

ܠܳܟ ܫܽܘܒܚܳܐ ܘܠܳܟ ܐܺܝܩܳܪܳܐ ܬܠܺܝܬܳܝܳܐ ܘܰܠܚܽܘܕܳܝܳܐ: ܠܳܟ ܪܽܘܡܪܳܡܳܐ ܗ̇ܰܘ ܬܠܺܝܬܳܐܺܝܬ ܡܶܬܗܰܝܡܰܢ ܘܰܚܕܳܢܳܐܺܝܬ ܡܶܬܬܰܘܕܶܐ: ܘܒܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܘܒܰܬܠܳܬܳܐ ܫܡܳܗ̈ܶܐ. ܘܒܰܬܠܳܬܳܐ ܦܰܪ̈ܨܽܘܦܶܐ ܡܶܫܬܰܡܰܗ ܘܡܶܬܟܪܶܙ ܐܳܦ ܡܶܬܺܝܕܰܥ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܚܰܕ ܨܶܒܝܳܢܳܐ ܘܰܟܝܳܢܳܐ: ܘܚܰܕ ܫܽܘܠܛܳܢܳܐ ܘܽܐܘܚܕܳܢܳܐ: ܘܰܚܕܳܐ ܐܺܝܬܽܘܬܳܐ ܡܬܽܘܡܳܝܬܳܐ ܘܠܐܴ ܒܪܺܝܬܳܐ. ܕܠܐܴ ܐܺܝܬ ܒܳܗ̇ ܩܢܽܘܡܳܐ ܕܰܛܠܐܷ ܐܰܘ ܕܩܰܫܺܝܫ ܡ̣ܶܢ ܚܰܒܪܶܗ ܟܰܕ ܡ̇ܰܢ ܐܰܒܳܐ ܡܶܬܶܐܡܰܪ: ܒܪܳܐ ܘܪܽܘܚܳܐ ܥܰܡܶܗ ܐܶܢܽܘܢ. ܘܟܰܕ ܡ̇ܰܢ ܒܪܳܐ ܘܪܽܘܚܳܐ ܡܶܬܟܰܪܙܺܝܢ: ܐܰܒܳܐ ܥܰܡܗܽܘܢ ܐܺܝܬܰܘܗܝ ܘܟܰܕ ܟܽܠܗܶܝܢ ܕܰܐܒܳܐ ܠܰܒܪܳܐ ܘܪܽܘܚܳܐ ܐܶܢܶܝܢ: ܣܛܰܪ ܡ̣ܶܢ ܝܺܠܺܝܕܽܘܬܳܐ ܘܒܳܪܽܘܬܳܢܽܘܬܳܐ ܘܡܶܬܓܰܫܡܳܢܽܘܬܳܐ: ܘܟܽܠܗܶܝܢ ܕܪܽܘܚܳܐ ܠܐܱܒܳܐ ܘܠܰܒܪܳܐ ܐܶܢܶܝܢ ܣܛܰܪ ܡ̣ܶܢ ܢܳܦܽܘܩܽܘܬܳܐ ܢܳܣܽܘܒܽܘܬܳܐ: ܐܰܒܳܐ ܡ̇ܰܢ ܢܽܘܗܪܳܐ: ܘܰܒܪܳܐ ܚܰܝܠܐܴ ܘܚܶܟܡܬܳܐ: ܘܪܽܘܚܳܐ ܚܰܝ̈ܶܐ ܘܰܢܫܰܡܬܳܐ. ܐܰܒܳܐ ܡ̇ܰܢ ܫܶܡܫܳܐ ܐܺܝܬܰܘܗܝ: ܘܰܒܪܳܐ ܨܶܡܚܳܐ ܘܙܰܠܺܝܩܳܐ ܕܡܶܢܶܗ: ܘܪܽܘܚܳܐ ܚܰܡܺܝܡܽܘܬܳܐ: ܐܰܒܳܐ ܗܰܘܢܳܐ: ܘܰܒܪܳܐ ܡܶܠܬܳܐ ܘܪܽܘܚܳܐ ܚܰܝ̈ܶܐ: ܐܰܒܳܐ ܗܰܘܢܳܐ ܕܡܰܘܠܶܕ ܡܶܠܬܐ ܕܡܶܬܝܰܠܕܳܐ ܪܽܘܚܳܐ ܕܢܳܦ̇ܶܩ ܘܢܳܣ̇ܶܒ: ܬܠܺܝܬܳܝܽܘܬܳܐ ܠܐܴ ܚܒܺܝܟܬܳܐ ܘܠܐܴ ܣܕܺܝܩܬܳܐ ܕܕܳܚ̇ܩܳܐ ܠܰܬܠܳܬ ܐܽܘܣܺܝ̈ܰܐܣ ܘܰܬܠܳܬ ܐܠܰܗܘ̈ܳܬܳܐ: ܬܠܺܝܬܳܝܳܐ ܕܰܬܠܺܝܬܳܐܺܝܬ ܟܰܕ ܡܶܬܺܝܕܰܥ: ܘܒܰܬܠܺܝܬܳܝܽܘܬܳܐ ܣܓܺܝܕܬܳܐ ܡܶܣܬܓܶܕ ܐܳܦ ܡܶܬܝܰܩܰܢ ܘܡܶܬܩܰܠܰܣ ܘܰܬܠܺܝܬܳܐܺܝܬ ܛܽܘܦ̈ܣܰܘܗܝ ܘܐ̱ܪ̈ܳܙܰܘܗܝ ܠܟܽܠܳܗ̇ ܥܳܡܰܪܬܳܐ ܐܶܬܒܰܕܰܩ ܘܰܬܠܺܝܬܳܐܺܝܬ ܒ̣ܪܳܐ. ܘܰܐܬܩܶܢ ܠܟܽܠܗܶܝܢ ܒܶܪ̈ܝܳܬܳܗ: ܘܰܬܠܺܝܬܳܐܺܝܬ ܬܠܳܬ ܥܺܕ̈ܳܬܳܐ ܩܰܕܺܝ̈ܫܳܬܳܐ ܒܰܫܡܰܝܳܐ ܣ̣ܕܰܪ ܘܰܐܩܺܝܡ: ܘܰܒܟܽܠ ܚܕܳܐ ܚܕܳܐ ܡܶܢܗܶܝܢ ܬܠܳܬܳܐ ܬܶܐܓܡ̈ܶܐ ܠܬܶܫܡܫܬܳܐ ܕܰܫܡܶܗ ܣܓܺܝܕܳܐ ܛܰܟܶܣ ܘܰܐܩܺܝܡ. ܟܰܕ ܒܥܶܠܺܝܬܳܐ ܡ̇ܰܢ ܥܺܕܬܳܐ ܣܪ̈ܳܦܶܐ ܘܰܟܪ̈ܽܘܒܶܐ ܘܡܰܘܬܒ̈ܶܐ: ܘܰܒܡܶܨܥܳܝܬܳܐ ܡܳܪ̈ܰܘܳܬܳܐ ܘܚܰܝܠܰܘ̈ܳܬܳܐ ܘܫܽܘܠܛܳܢ̈ܶܐ ܘܰܒܬܰܚܬܳܝܬܳܐ ܪ̈ܺܝܫܳܢܘܳܬܳܐ ܘܪ̈ܰܒܰܝ ܡܰܠܐܱܟ̈ܶܐ: ܘܡܰܠܐܱܟ̈ܶܐ: ܕܰܕܠܐܴ ܫܶܠܝܳܐ ܡܒܰܪܟܺܝܢ: ܘܰܡܗܰܕܪܺܝܢ ܘܰܡܫܰܒܚܺܝܢ ܠܐܻܝܬܽܘܬܶܗ ܪܳܡܰܬ݀ ܡ̣ܶܢ ܟܽܠ. ܟܰܕ ܡ̣ܶܢ ܒܳܬܰܪ ܗܳܠܶܝܢ ܠܥܰܦܪܳܐ ܡ̣ܶܢ ܐܰܪܥܳܐ ܫܩ̣ܰܠ ܘܠܐܴܕܳܡ ܓܒ̣ܰܠ ܘܰܐܬܩܶܢ: ܘܰܒܢܰܦܫܳܐ ܘܦܰܓܪܳܐ ܡ̣ܶܢ ܐܰܪܥܳܐ ܫܩ̣ܰܠ ܘܠܐܴܕܳܡ ܓܒ̣ܰܠ ܘܰܐܬܩܶܢ: ܘܰܒܢܰܦܫܳܐ ܘܦܰܓܪܳܐ ܘܗܰܘܢܳܐ ܬܠܺܝܬܳܐܺܝܬ ܨܰܒ̣ܶܬ: ܘܟܰܕ ܥܒ̣ܰܪ ܥܰܠ ܢܳܡܽܘܣܳܐ ܬܠܺܝܬܳܐܺܝܬ ܠܶܗ ܡܚ̣ܳܐ: ܘܠܰܬܠܳܬܳܐ ܒܥܶܠܕ̈ܒܳܒܶܐ ܐܳܟܶܠܩܰܪܨܳܐ ܘܡܰܘܬܳܐ ܘܰܚܛܺܝܬܳܐ ܐܶܫܬܰܥܒܰܕ. ܘܰܠܚܰܘܳܐ ܐܶܡܰܢ ܗ̇ܳܝ ܕܡܰܠܟܰܬ݀ ܠܶܗ ܬܠܺܝܬܳܐܺܝܬ ܪܕܳܐ: ܘܰܠܚܶܘܝܳܐ ܕܰܗ̣ܘܳܐ ܠܗܽܘܢ ܢܳܟܽܘܠܐܴ ܬܠܺܝܬܳܐܺܝܬ ܦ̣ܪܰܥ. ܟܰܕ ܠܩܳܐܶܝܢ ܒܳܬܰܪ ܬܠܳܬܳܐ ܝܰܘ̈ܡܺܝܢ ܕܩܶܛܠܶܗ ܕܗܳܒܶܝܠ ܓܠܐܴ ܘܶܐܡ̣ܰܪ ܕܰܐܝܟܰܘ ܗܳܒܶܝܠ ܐܰܚܽܘܟ: ܘܟܰܕ ܕܰܓܶܠ ܕܠܐܴ ܝ̇ܳܕܰܥ ܐ̱ܢܳܐ ܬܠܺܝܬܳܐܺܝܬ ܠܳܛ: ܘܰܡܣܳܡ ܒܪܺܝܫܳܐ ܬܠܺܝܬܳܐܺܝܬ ܩܰܒܶܠ. ܟܰܕ ܠܰܬܠܳܬ ܢܶܫܺܝ̈ܢ ܝܰܠܕܶܗ ܡܳܪܳܢܳܝܳܐ ܐܶܬܚܙܺܝ. ܠܡܰܪܝܰܡ ܗ̇ܳܝ ܕܰܒܛܶܢܬܶܗ ܘܺܝܠܶܕܬܶܗ ܘܠܐܷܠܺܝܫܒܰܥ ܕܰܩܥܳܬ݀ ܠܳܗ̇ ܡܒܰܪܰܟܬܳܐ ܐܰܢ̱ܬܝ ܒܢܶܫ̈ܶܐ ܘܰܡܒܰܪܟܰܐ ܗ̱̇ܘ ܡܳܪܝܳܐ ܕܣܰܥܪܰܢܝ ܘܰܠܚܰܢܰܐ ܢܒܺܝܬܳܐ ܕܰܐܘܕܝܰܬ݀ ܕܰܒܗܳܢܳܐ ܛܰܠܝܳܐ ܡܶܬܦܪܶܩ ܐܺܝܣܪܳܐܶܝܠ. ܟܰܕ ܠܰܬܠܳܬܳܐ ܓܰܒܪ̈ܺܝܢ ܝܺܠܺܝܕܽܘܬܶܗ ܐܶܬܕܰܢܚܰܬ݀ ܠܝܰܘܣܶܦ ܗ̇ܰܘ ܕܶܐܬܦܰܠܰܓ ܘܰܗ̣ܘܳܐ ܠܶܗ ܐܰܒܳܐ ܫܺܐܝܠܐܴ ܘܠܰܙܟܰܪܝܳܐ ܕܶܐܡ̣ܰܪ ܕܰܒܪܺܝܟ ܗ̣ܽܘ ܡܳܪܝܳܐ ܕܰܒܕܶܢܚܶܗ ܣܰܥܪܰܢܝ ܘܰܠܫܶܡܥܽܘܢ ܣܳܒܳܐ ܕܛܰܥ̣ܢܶܗ ܥܰܠ ܐܺܝܕܰܘ̈ܗܝ ܒܗܰܝܟܠܐܴ ܘܰܫܪܳܝܳܐ ܕܚܰܝ̈ܶܐ ܙܰܒܢܳܝ̈ܶܐ ܡܶܢܶܗ ܬܒ̣ܰܥ. ܟܰܕ ܐܰܝܟ ܦܽܘܩܕܳܢܶܗ ܒܚܰܕ ܪܦܳܦܳܐ ܙܥܽܘܪܳܐ ܒܫܰܘܝܽܘܬܳܐ ܪܗ̣ܶܛܘ ܠܘܳܬ ܚܕܳܝܽܘܬܳܐ: ܡܶܠܬܳܐ ܐܠܰܗܳܐ: ܘܢܰܦܫܳܐ ܘܦܰܓܪܳܐ: ܟܰܕ ܠܰܝܬ ܒܗܽܘܢ ܚܰܕ ܒܗܳܠܶܝܢ ܬܠܳܬܳܐ ܕܩܰܕܺܝܡ ܠܚܰܒܪܶܗ ܒܟܰܪܣܳܐ. ܟܰܕ ܒܺܝܠܺܝܕܽܘܬܶܗ ܬܠܺܝܬܳܐܺܝܬ ܐܶܬܚܰܘܺܝ ܠܦܳܠܰܚ̈ܘܳܬܳܐ ܕܡܰܠܐܱܟ̈ܶܐ ܐܠܰܗܳܐ ܘܒܰܪ ܐܠܰܗܳܐ: ܠܰܡܓܽܘ̈ܫܶܐ ܡܰܠܟܳܐ ܘܫܰܠܺܝܛܳܐ: ܘܰܠܥܶܒܪ̈ܳܝܶܐ ܥܰܒ̣ܕܳܐ ܒܰܪ ܚܺܐܪ̈ܶܐ: ܒܗ̇ܳܝ ܕܰܕܡܽܘܬܶܗ ܕܳܐܕܳܡ ܢܣ̣ܰܒ. ܟܰܕ ܒܕܳܫ̈ܢܶܐ ܬܠܺܝܬܳܝ̈ܶܐ ܡ̣ܶܢ ܪ̈ܳܥܰܘܳܬܳܐ ܡܰܘܠܳܕܶܗ ܐܶܬܝܰܩܰܪ: ܟܰܕ ܫܽܘܒܚܳܐ ܠܶܗ ܩܰܪܶܒܘ: ܘܰܠܡܰܪܝܰܡ ܚܰܠܒܳܐ ܐܰܝܬܺܝܘ: ܘܰܠܝܰܘܣܶܦ ܒܶܣܪܳܐ. ܟܰܕ ܡ̣ܶܢ ܬܠܳܬܳܐ ܟܳܪ̈ܽܘܙܶܐ ܓܽܘܫ̈ܡܳܢܳܝܶܐ ܐܶܬܟܪܶܙ: ܟܰܘܟܒܳܐ ܘܪ̈ܳܥܰܘܳܬܳܐ ܘܰܡܓܽܘ̈ܫܶܐ ܡܰܠܟܳܐ ܘܕܶܒܚܳܐ ܡܚܰܣܝܳܢܳܐ. ܟܰܕ ܒܩܽܘܪ̈ܒܳܢܶܐ ܬܠܺܝܬܳܝ̈ܶܐ ܡܰܠܟ̈ܰܝ ܦܳܪܶܣ ܠܰܡܥܰܠܝܽܘܬܶܗ ܫܽܘܕܰܥ̣ܘ ܕܰܗܒܳܐ ܠܡܰܠܟܽܘܬܶܗ ܕܰܠܒܽܘܢܬܳܐ ܠܐܻܝܩܳܪܶܗ ܘܡܽܘܪܳܐ ܠܰܩܒܽܘܪܬܶܗ ܕܰܡܫܺܝܚܳܐ. ܟܰܕ ܬܠܺܝܬܳܐܺܝܬ ܐܶܬܓܠܺܝܘ ܥܰܠ ܝܽܘܪܕܢܳܢ ܩܢܽܘ̈ܡܶܐ ܩܰܕܺܝ̈ܫܶܐ ܬܠܺܝܬܳܝ̈ܰܝ ܢܽܘܗܪ̈ܶܐ ܘܰܚܕܳܢܳܝ ܟܝܳܢܳܐ: ܒܪܳܐ ܕܥܳܡ̇ܶܕ: ܘܰܐܒܳܐ ܕܩܳܥ̇ܶܐ ܕܗܳܢܰܘ ܒܶܪܝ ܚܰܒܺܝܒܝ: ܐܳܦ ܪܽܘܚܳܐ ܩܰܕܺܝܫܳܐ ܕܰܐܝܟ ܝܰܘܢܳܐ ܫܟܶܢ ܥܰܠ ܪܺܝܫܶܗ ܟܰܕ ܬܠܺܝܬܳܐܺܝܬ ܡ̣ܶܢ ܝܽܘܚܰܢܳܢ ܡܶܬܬܰܘܕܶܐ: ܕܗܳܢܰܘ ܐܶܡܪܶܗ ܕܰܐܠܳܗܳܐ ܕܫܳܩܶܠ ܚܛܺܝܬܶܗ ܕܥܳܠܡܳܐ: ܘܕܶܐܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ ܠܟܽܘܢ: ܗ̣ܽܘ ܕܢܰܥܡܶܕܟܽܘܢ ܒܪܽܘܚܳܐ ܕܩܽܘܕܫܳܐ: ܟܰܕ ܒܩܰܘܡܬܳܐ ܬܠܺܝܬܳܝܬܳܐ ܕܰܬܠܳܬ ܥܣܺܝܪ̈ܰܝܘܳܢ ܥܡ̣ܰܕ: ܐܰܝܟܰܢܳܐ ܕܰܢܫܰܘܕܰܥ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܕܶܐܬܓܰܠܝܰܬ݀ ܥܰܠ ܝܽܘܪܕܢܳܢ: ܘܚܰܘܺܝ ܕܒܰܡܫܽܘܚܬܳܐ ܗܳܕܶܐ ܐܶܬܒܪܺܝ ܐܳܕܳܡ: ܘܥܰܠ ܗ̇ܳܝ ܒܳܗ̇ ܥܡ̣ܰܕ ܡܶܛܽܠ ܕܳܐܕܳܡ ܬܪܰܝܳܢܳܐ ܐܶܬܟܰܢܺܝ. ܟܰܕ ܒܝܰܕ ܗܳܠܶܝܢ ܬܠܺܝܬܳܝ̈ܘܳܬܳܐ ܕܰܫܢܰܝ̈ܳܐ ܠܰܚܛܺܝܬܳܐ ܙܟ̣ܳܐ: ܘܠܽܘܩܒܰܠ ܣܳܛܳܢܳܐ ܒܰܬܠܳܬܳܐ ܕܰܐܪ̈ܶܐ ܐܶܬܟܰܬܰܫ: ܘܰܠܡܰܘܬܳܐ ܒܰܬܠܳܬܳܐ ܝܰܘ̈ܡܺܝܢ ܒܰܛܶܠ: ܘܚܰܘܺܝ ܕܒܰܬܠܺܝܬܳܝܽܘܬ ܥܣܺܝܪ̈ܘܳܬܳܐ ܩܳܐܶܡ ܟܽܠ ܐ̱ܢܳܫ ܒܢܽܘܚܳܡܳܐ: ܟܰܕ ܡ̣ܶܢ ܒܳܬܰܪ ܕܰܥܡ̣ܰܕ ܠܰܬܠܳܬܳܐ ܕܰܐܪ̈ܶܐ ܕܥܰܡ ܣܳܛܳܢܳܐ ܢܚ̣ܶܬ: ܘܰܒܦܽܘܢܳܝ̈ܶܐ ܬܠܳܬܳܐ ܙܟܳܝܗܝ: ܘܠܰܬܠܳܬ ܡܢܰܘ̈ܳܢ ܕܢܰܦܫܳܐ ܕܰܐܣܺܝ ܠܪܶܓܬܳܐ ܒܨܰܘܡܳܐ ܘܰܠܚܶܡܬܳܐ ܒܰܡܪܰܚܡܳܢܽܘܬܳܐ: ܘܠܰܡܠܺܝܠܽܘܬܳܐ ܒܝܰܕ ܨܠܽܘܬܳܐ. ܟܰܕ ܬܠܺܝܬܳܐܺܝܬ ܠܟܽܠ ܐ̱ܢܳܫ ܣܥ̣ܰܪ ܘܰܐܣܺܝ ܘܰܐܚܠ̣ܶܡ: ܘܰܬܠܳܬܳܐ ܢܽܘܚܳܡܺܝ̣̈ܢ ܥܒ̣ܰܕ: ܘܥܰܠ ܛܰܠܝܽܘܬܶܗ ܘܰܥܠܰܝܡܽܘܬܶܗ ܘܥܰܠ ܣܰܝܒܽܘܬܶܗ ܕܥܳܠܡܳܐ ܒܰܕܶܩ: ܟܰܕ ܒܡܰܥܠܬܶܗ ܕܠܐܘܪܫܠܶܡ ܬܠܺܝܬܳܐܺܝܬ ܐܶܬܩܰܠܰܣ: ܡ̣ܶܢ ܬܰܠܡܺܝ̈ܕܶܐ ܘܰܥܠܰܝ̈ܡܶܐ ܘܰܛܠܳܝ̈ܶܐ: ܕܩܳܥܶܝܢ ܗ̣ܘܰܘ ܬܠܺܝܬܳܐܺܝܬ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ: ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ: ܐܽܘܫܰܥܢܳܐ ܒܰܡܪ̈ܰܘܡܶܐ: ܟܰܕ ܒܰܡܡܰܠܠܽܘܬ ܙܳܥܩ̈ܳܬܳܐ ܕܰܬܠܳܬ ܬܠܺܝܬܳܐܺܝܬ ܐܶܬܒܰܕܰܩ ܕܦܽܘܪܩܳܢܳܐ ܡ̣ܶܢ ܕܰܘܺܝܕ ܕܢܰܚ̣: ܘܕܰܒܨܶܒܝܳܢ ܐܰܒܽܘܗܝ ܐܶܬܳܐ ܠܰܙܩܺܝܦܳܐ: ܘܰܕܠܐܴ ܐܶܣܬܰܦܰܩ ܡܶܢܶܗ ܟܽܘܪܣܰܝ ܪܰܒܽܘܬܶܗ ܐܶܬܒܰܪܢܰܫ. ܟܰܕ ܬܠܺܝܬܳܐܺܝܬ ܠܘܳܬ ܬܰܠܡܺܝ̈ܕܶܐ ܥܰܠ ܚܰܫܶܗ ܡܡܰܠܶܠ ܗ̣ܘܳܐ: ܘܰܕܚܳܐܶܫ ܐ̱ܢܳܐ ܘܡܶܬܢܰܓܰܕ ܐ̱ܢܳܐ ܘܡܶܬܩܛܰܠ ܐ̱ܢܳܐ ܡ̣ܶܢ ܩܰܫܺܝ̈ܫܶܐ ܘܪ̈ܺܝܫܰܝ ܟܳܗ̈ܢܶܐ ܘܣܳܦܪ̈ܶܐ ܘܰܒܝܰܘܡܳܐ ܬܠܺܝܬܳܝܳܐ ܡܶܬܢܰܚܰܡ ܐ̱ܢܳܐ. ܟܰܕ ܒܝܰܘܡܳܐ ܬܠܺܝܬܳܝܳܐ ܕܚܰܫܳܐ ܥܰܠ ܦܶܨܚܳܐ ܫܰܘܕܰܥ ܘܰܙܒܰܢ̱ܬܳܐ ܬܠܺܝܬܳܝܬܳܐ: ܒܒܶܝܬ ܫܶܡܥܽܘܢ ܐܶܬܡܫܰܚ: ܘܡ̣ܶܢ ܬܠܳܬ ܢܶܫ̈ܶܐ ܒܗܳܢܳܐ ܐܺܝܩܳܪܳܐ ܐܶܬܝܰܩܰܪ. ܟܰܕ ܠܰܬܠܳܬܳܐ ܦܶܨܚܺܝ̣̈ܢ ܡ̣ܶܢ ܒܳܬܰܪ ܕܰܥܡ̣ܰܕ ܐܶܟ̣ܰܠ ܘܰܓܡ̣ܰܪ: ܬܰܪܬܶܝܢ ܫܢܺܝ̣̈ܢ ܘܦܶܠܓܳܗ̇ ܩܰܘܺܝ ܥܰܠ ܐܰܪܥܳܐ ܥܕܰܡܳܐ ܕܰܣܠ̣ܶܩ ܗ̣ܘܳܐ ܠܟܽܘܪܣܝܳܐ ܗ̇ܰܘ ܕܡܶܢܶܗ ܠܐܴ ܫܰܢܺܝ. ܘܰܒܥܶܠܺܝܬܳܐ ܬܠܺܝܬܳܐܺܝܬ ܣܥ̣ܰܪ: ܡܶܐܟܽܘܠܬܳܐ ܕܶܐܡܪܳܐ ܘܰܫܝܳܓܬܳܐ ܕܬܰܠܡܺܝ̈ܕܶܐ: ܘܒܳܬܪܳܗ̇ ܚܫܳܡܺܝܬܳܐ ܕܐ̱ܪ̈ܳܙܶܐ. ܟܰܕ ܒܰܫܝܳܓܬܳܐ ܬܠܺܝܬܳܐܺܝܬ ܡܫܰܡܠܐܷ ܗ̣ܘܳܐ: ܟܰܕ ܫܩ̣ܰܠ ܣܶܕܽܘܢܳܐ ܟ̇ܳܒܶܢ ܗ̣ܽܘ ܠܶܗ: ܘܪܳܡܶܐ ܡܰܝ̈ܳܐ ܘܰܡܫܺܝܓ ܘܰܡܟܰܦܰܪ ܒܣܶܕܽܘܢܳܐ ܕܰܟܒܺܝܢ: ܟܰܕ ܠܰܬܠܳܬܳܐ ܡ̣ܶܢ ܬܰܠܡܺܝ̈ܕܶܐ ܕܒ̣ܰܪ ܠܪܶܓܠܬܳܐ ܕܩܶܕܪܽܘܢ: ܗ̇ܳܢܽܘܢ ܕܰܚ̣ܙܰܘ ܢܽܘܚܳܡܳܗ̇ ܕܰܛܠܺܝܬܳܐ: ܘܫܽܘܒܚܶܗ ܕܥܰܠ ܛܽܘܪܳܐ: ܘܰܬܠܺܝܬܳܐܺܝܬ ܨܰܠܺܝ: ܘܰܬܠܺܝܬܳܐܺܝܬ ܐܶܡ̣ܰܪ ܠܗܽܘܢ ܕܨܰܠܰܘ ܕܠܐܴ ܬܶܥܠܽܘܢ ܠܢܶܣܝܽܘܢܳܐ: ܘܰܒܗ̇ܰܘ ܠܺܠܝܳܐ ܬܠܳܬܳܐ ܫܰܗܪ̈ܶܐ ܥܒܺܝܕ ܗ̣ܘܳܐ ܠܡܳܪܰܢ ܘܰܠܬܰܠܡܺܝ̈ܕܶܐ ܘܰܠܥܰܡܳܐ ܕܙܳܩܽܘ̈ܦܶܐ. ܟܰܕ ܒܒܶܝܬ ܩܰܝܳܦܳܐ ܬܠܳܬܳܐ ܒܶܙܚܺܝ̣̈ܢ ܣܒ̣ܰܠ ܘܣܰܝܒ̣ܰܪ ܪܽܘܩܳܐ ܕܦܰܪܨܽܘܦܶܗ: ܣܰܘܦܳܐ ܕܰܒܩܰܢܝܳܐ ܥܰܠ ܪܺܝܫܶܗ: ܘܫܽܘܩ̈ܳܦܶܐ ܕܥܰܠ ܐܰܦܰܘ̈ܗܝ: ܘܟܰܕ ܡ̣ܶܢ ܬܠܳܬܳܐ ܬܠܺܝܬܳܐܺܝܬ ܐܶܬܕܺܝܢ ܒܒܶܝܬ ܚܰܢܳܢ ܒܝܰܕ ܫܽܘ̈ܩܳܦܶܐ ܘܰܒܒܶܝܬ ܦܺܝܠܰܛܳܘܣ ܡܶܫܬܰܐܠ ܗ̣ܘܳܐ ܕܡܰܠܟܳܐ ܕܝܽܘ̈ܕܳܝܶܐ ܐܺܝܬܰܝܟ ܘܰܬܠܺܝܬܳܐܺܝܬ ܩܥ̣ܳܐ ܗ̣ܘܳܐ ܥܰܡܳܐ ܨܠܽܘܒܳܝܗܝ ܨܠܽܘܒܳܝܗܝ: ܘܰܬܠܳܬܳܐ ܒܶܙ̈ܚܶܐ ܕܡܰܘܬܳܐ ܣܕܰܪ ܥܰܠ ܗܰܕܳܡܰܘ̈ܗܝ ܟܠܐܱܡܺܝܣ ܕܰܙܚܽܘܪܺܝܬܳܐ: ܘܰܟܠܺܝܠܐܴ ܟܽܘܒܳܢܳܝܳܐ ܥܰܠ ܪܺܝܫܶܗ ܘܩܰܢܝܳܐ ܒܝܰܡܺܝܢܶܗ. ܟܰܕ ܬܠܺܝܬܳܐܺܝܬ ܡܒܰܙܚܺܝܢ ܒܶܗ: ܘܟܰܕ ܠܐܴ ܝܳܕܥܺܝܢ ܡܰܟܪܙܺܝܢ ܡܳܪܽܘܬܶܗ: ܟܰܕ ܒܳܪܟܺܝܢ ܩܕܳܡܰܘܗܝ: ܟܰܕ ܫܳܐܠܝܺܢ ܫܠܳܡܶܗ: ܟܰܕ ܐܳܡܪܺܝܢ ܚܕܺܝ ܡܰܠܟܳܐ ܕܝܽܘ̈ܕܳܝܶܐ: ܟܰܕ ܝܳܗܒܺܝܢ ܠܶܗ ܫܽܘ̈ܩܳܦܶܐ: ܟܰܕ ܪܳܐܩܺܝܢ ܒܦܰܪܨܽܘܦܶܗ ܟܰܕ ܒܩܰܢܝܳܐ ܡܳܚ̇ܶܝܢ ܠܶܗ ܥܰܠ ܪܺܝܫܶܗ. ܟܰܕ ܒܰܬܠܳܬܫܳܥܺܝ̈ܢ ܠܒܶܝܬ ܩܰܝܳܦܳܐ ܡܶܬܬܰܘܒܰܠ ܗ̣ܘܳܐ: ܘܰܬܠܳܬܳܐ ܓܰܒܪ̈ܺܝܢ ܕܰܛܥܺܝܢܺܝܢ ܚܶܣܕܳܐ ܥܰܡܶܗ ܐܳܙܺܠ̱ܝܢ ܗ̣ܘܰܘ ܬܪܶܝܢ ܓܰܝ̈ܳܣܶܐ ܘܫܶܡܥܽܘܢ ܩܽܘܪܺܝܢܳܝܳܐ ܕܰܛܥ̣ܶܢ ܙܩܺܝܦܶܗ: ܟܰܕ ܒܰܬܠܳܬܫܳܥܺܝ̈ܢ ܠܰܙܩܺܝܦܳܐ ܣܠ̣ܶܩ: ܘܰܬܠܳܬܳܐ ܥܶܕܳܢܺܝ̈ܢ ܗ̣ܘܳܐ ܥܰܪܛܶܠ: ܚܠܳܦ ܥܰܒ̣ܕܶܗ ܗ̇ܰܘ ܕܶܐܬܦܰܪܣܺܝ ܒܦܰܪܕܰܝܣܳܐ ܬܠܳܬܳܐ ܥܶܕܳܢܺܝ̈ܢ ܘܒܰܬܠܳܬܳܐ ܠܶܫܳܢܺܝ̈ܢ ܐܶܬܟܰܪܙܰܬ݀ ܡܰܠܟܽܘܬܶܗ: ܟܰܕ ܡ̣ܶܢ ܬܠܳܬܳܐ ܐܶܬܗܰܝܡܰܢ ܘܶܐܬܝܰܩܰܪ: ܡ̣ܶܢ ܦܺܝܠܰܛܳܘܣ ܘܝܰܘܣܶܦ ܘܢܺܝܩܳܘܕܺܝܡܳܘܣ: ܚܰܕ ܕܫܶܐܠ ܦܰܓܪܶܗ ܘܰܐ̱ܚܪܺܢܳܐ ܕܝ̇ܳܗܶܒ ܠܶܗ: ܘܰܐ̱ܚܪܺܢܳܐ ܕܰܡܚܰܢܰܛ ܠܶܗ: ܘܡ̣ܶܢ ܝܰܘܣܶܦ ܬܠܺܝܬܳܐܺܝܬ ܐܶܬܥܰܦܺܝ: ܒܣܶܕܽܘܢܳܐ ܢܰܩܕܳܐ ܘܰܒܟܶܬܳܢ̈ܶܐ. ܘܰܒܗܶܪ̈ܽܘܡܶܐ ܪ̈ܺܝܫܳܝܶܐ ܟܰܕ ܬܠܳܬ ܕܝ̣ܺܠܳܝ̈ܳܬܳܐ ܩܢܶܐ ܗ̣ܘܳܐ ܚܶܫܟܳܐ ܕܰܗ̣ܘܳܐ ܒܰܙܩܺܝܦܳܐ: ܗ̇ܳܝ ܕܰܒܦܶܠܓܶܗ ܕܝܰܘܡܳܐ ܐܰܡܠܶܟ: ܘܕܰܬܠܳܬܫܳܥܺܝ̈ܢ ܟܰܬܰܪ: ܘܰܕܥܰܠ ܟܽܠܳܗ̇ ܐܰܪܥܳܐ ܐܰܡܠ̣ܶܟ: ܘܰܕܝܰܘ̈ܢܳܝܶܐ ܘܡܶܨܪ̈ܳܝܶܐ ܘܟܰܠܕܳܝ̈ܶܐ ܐܰܟܬܶܒ̣ܘ ܘܶܐܡ̣ܰܪܘ ܕܚܰܕ ܡ̣ܶܢ ܩܢܽܘ̈ܡܶܐ ܕܰܬܠܺܝܬܳܝܽܘܬܳܐ: ܚܰܫ ܝܰܘܡܳܢܳܐ. ܟܰܕ ܬܠܳܬܳܐ ܝܰܘ̈ܡܺܝܢ ܒܩܰܒܪܳܐ ܩܰܘܺܝ ܐܰܝܟ ܝܰܘܢܳܢ ܒܟܰܪܣܶܗ ܕܩܺܝܛܳܘܣ: ܒܝܰܘܡܳܐ ܩܰܕܡܳܝܳܐ ܕܰܟܺܝ ܠܐܴܕܳܡ ܘܰܠܓܶܢܣܳܐ ܕܓܰܒܪ̈ܶܐ ܘܒܰܬܪܰܝܳܢܳܐ ܠܓܶܢܣܳܐ ܕܢܶܫ̈ܶܐ ܡ̣ܶܢ ܚܛܺܝܬܳܐ: ܘܒܰܬܠܺܝܬܳܝܳܐ ܠܣܳܛܳܢܳܐ ܕܠܐܴ ܩܰܒܶܠ ܚܽܘܠܡܳܢܳܐ ܘܩܳܡ ܘܰܫ̣ܪܳܐ ܫܽܘܠܛܳܢܶܗ: ܟܰܕ ܒܝܰܘܡܳܐ ܬܠܺܝܬܳܝܳܐ ܩܳܡ ܠܰܬܠܳܬ ܓܽܘ̈ܕܺܝܢ ܩܝܳܡܬܶܗ ܐܶܬܚܰܘܝܰܬ݀ ܠܢܳܛܽܘܪ̈ܶܐ ܘܰܠܢܶܫ̈ܶܐ ܘܰܠܬܰܠܡܺܝ̈ܕܶܐ. ܘܰܠܡܰܪܝܰܡ ܡܰܓܕܠܳܝܬܳܐ ܬܠܳܬ ܙܰܒܢܺܝ̈ܢ ܚܰܘܺܝ ܢܰܦܫܶܗ ܬܠܳܬܳܐ ܥܺܝܪ̈ܶܐ ܐܰܟܪܙܽܘܗܝ: ܘܰܬܠܳܬܳܐ ܡܰܠܐܱܟ̈ܶܐ ܐܶܡ̣ܰܪܘ ܠܢܶܫ̈ܶܐ ܕܙ̈ܶܠܶܝܢ ܣܰܒܰܪ̈ܶܝܢ ܠܬܰܠܡܺܝ̈ܕܰܘܗܝ ܕܗܳܐ ܩ̇ܳܕܶܡ ܐ̱ܢܳܐ ܠܟܽܘܢ ܠܰܓܠܺܝܠܐܴ: ܟܰܕ ܬܠܳܬ ܙܰܒܢܺܝ̈ܢ ܐܰܣܪܰܚ ܠܗܽܘܢ ܫܠܳܡܳܐ ܒܶܗ ܒܝܰܘܡܳܐ: ܟܰܕ ܚܰܘܺܝ ܐܶܢܽܘܢ ܐܺܝ̈ܕܰܘܗܝ ܘܪ̈ܶܓܠܰܘܗܝ ܘܣܶܛܪܶܗ: ܘܠܰܬܠܳܬܳܐ ܓܰܒܪ̈ܶܐ ܬܰܠܡܺܝ̈ܕܰܘܗܝ ܩܝܳܡܬܶܗ ܫܰܪܰܪ. ܠܫܶܡܥܽܘܢ ܟܰܕ ܐܶܙ̣ܰܠ ܠܩܰܒܪܳܐ ܘܠܰܬܪܶܝܢ ܐܰܚ̈ܶܐ ܒܰܩܨܳܝܬܳܐ ܕܠܰܚܡܳܐ ܟܰܕ ܐܳܙܺܠ̱ܝܢ ܠܥܶܡܰܐܘܳܣ. ܟܰܕ ܬܠܺܝܬܳܐܺܝܬ ܥܰܠ ܝܰܡ ܛܺܝܒܶܪܺܝܳܘܣ ܫܳܪܽܘܬܳܐ ܠܰܫܠܺܝ̈ܚܶܐ ܕܺܝܠܶܗ ܛܰܝܶܒ: ܘܰܬܠܺܝܬܳܐܺܝܬ ܚ̣ܙܰܘ ܐܳܦ ܗ̣ܶܢܽܘܢ ܓܽܘܡܪ̈ܶܐ ܕܰܡܫܰܠܗ̈ܒܳܢ ܕܠܐܴ ܩܰܝ̈ܣܶܐ: ܘܢܽܘܢܳܐ ܕܰܡܛܰܘܰܝ ܕܠܐܴ ܕܶܝܢ ܕܨܶܝܕ ܡ̣ܶܢ ܡܰܝ̈ܳܐ: ܘܠܰܚܡܳܐ ܕܣܺܝܡ ܕܠܐܴ ܢܰܚܬܽܘ̈ܡܶܐ. ܟܰܕ ܡ̣ܶܢ ܒܰܬܠܺܝܬܳܝܽܘܬ ܚܰܡܫܺܝܢ ܢܽܘ̈ܢܶܐ ܘܰܬܠܳܬܳܐ ܐ̱ܪܳܙ ܬܠܺܝܬܳܝܽܘܬܳܐ ܗ̇ܳܝ ܕܒܰܬܠܳܬܳܐ ܩܢܽܘ̈ܡܶܐ ܐܰܪܶܙ. ܟܰܕ ܒܫܽܘܐܳܠܐܴ ܬܠܺܝܬܳܝܳܐ ܐܰܣܺܝ ܘܰܬܠܺܝܬܳܐܺܝܬ ܐܰܓܥܶܠ ܠܶܗ ܡܰܪܥܺܝܬܶܗ ܐܶܡܪ̈ܶܐ ܘܥܶܪ̈ܒܶܐ ܘܰܢܩܰܘ̈ܳܬܳܐ: ܘܫܰܠܺܝܛܳܐ ܥܰܠ ܬܠܳܬܳܐ ܕܰܪ̈ܓܶܐ ܫܒܺܝ̈ܚܶܐ ܕܟܳܗܢܽܘܬܳܐ ܐܰܫܠܛܶܗ. ܟܰܕ ܬܠܺܝܬܳܐܺܝܬ ܒܝܽܘܡ ܣܽܘܠܳܩܶܗ ܐܶܬܝܰܩܰܪ: ܡ̣ܶܢ ܡܠܐܱܟ̈ܶܐ: ܘܡ̣ܶܢ ܬܰܠܡܺܝ̈ܕܶܐ ܘܰܥܢܳܢܳܐ ܕܩܰܒܶܠܬܶܗ: ܘܠܰܬܠܳܬ ܥܺܕ̈ܳܬܳܐ ܕܒܰܫܡܰܝܳܐ ܚܰܘܝ ܡܶܬܒܰܪܢܫܳܢܽܘܬܶܗ. ܘܰܠܪܽܘܚܳܐ ܦܰܪܰܩܠܺܝܛܳܐ ܥܰܠ ܬܰܠܡܺܝ̈ܕܶܐ ܩܰܕܺܝ̈ܫܶܐ ܫܰܕܰܪ: ܘܰܬܠܺܝܬܳܐܺܝܬ ܚܰܘܺܝ ܒܰܚܙܳܬܳܐ ܘܩܳܠܐܴ ܘܡܰܥܒܕܳܢܽܘܬܳܐ ܐܰܝܟܰܢܳܐ ܕܢܰܐܠܦܽܘܢ ܘܢܰܥܡܕܽܘܢ ܐܳܦ ܢܬܰܠܡܕܽܘܢ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܟܽܠ ܥܰܡ̈ܡܺܝܢ: ܟܰܕ ܬܠܺܝܬܳܐܺܝܬ ܗܳܫܳܐ ܠܳܟ ܬܠܺܝܬܳܝܳܗ̇ ܕܰܐܠܳܗܽܘܬܳܐ ܒܳܥܶܝܢܰܢ ܘܡܶܬܟܰܫܦܺܝܢܰܢ ܘܰܡܦܺܝܣܺܝܢܰܢ ܕܠܰܬܠܳܬܳܐ ܚܰܫ̈ܶܐ ܕܰܚܛܺܝܬܳܐ ܬܕܰܟܶܐ ܡܶܢܰܢ: ܘܒܰܬܠܳܬܳܐ ܕܰܐܪ̈ܶܐ ܬܶܙܟܶܐ ܠܰܢ: ܘܰܬܠܺܝܬܳܐܺܝܬ ܠܰܢ ܬܩܰܕܶܫ: ܒܗܰܘܢܳܐ ܘܢܰܦܫܳܐ ܘܦܰܓܪܳܐ: ܘܬܽܘܒ ܒܳܥܶܝܢܰܢ ܡܶܢܳܟ ܬܠܺܝܬܳܐܺܝܬ ܬܫܰܪܰܪ ܠܰܢ ܒܚܽܘܒܳܐ ܘܣܰܒܪܳܐ ܘܗܰܝܡܳܢܽܘܬܳܐ: ܘܰܬܠܺܝܬܳܐܺܝܬ ܨܰܒܶܬ ܠܰܢ ܒܗܰܝܡܳܢܽܘܬܳܐ ܫܰܪܺܝܪܬܳܐ ܕܡ̣ܶܢ ܢܰܦܫܳܐ: ܘܩܰܕܺܝܫܽܘܬܳܐ ܕܡ̣ܶܢ ܦܰܓܪܳܐ: ܘܰܫܪܳܪܳܐ ܕܡ̣ܶܢ ܠܶܫܳܢܳܐ. ܘܰܬܠܺܝܬܳܐܺܝܬ ܫܰܟܶܢ ܠܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܘܕܽܘܟܳܝܳܐ ܕܟܽܠܗܶܝܢ ܣܰܟܠܘ̈ܳܬܰܢ: ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܗ̇ܰܘ ܩܰܘܡܳܐ ܕܡ̣ܶܢ ܝܰܡܺܝܢܳܟ: ܘܰܠܫܽܘܒܚܳܐ ܕܪܰܒܽܘܬܳܟ: ܘܰܠܒܽܘܣܳܡܳܐ ܗ̇ܰܘ ܕܰܒܡܰܠܟܽܘܬܳܟ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܬܠܺܝܬܳܝܳܐ ܐܠܰܗܳܐ ܡܶܠܬܳܐ ܕܡ̣ܶܢ ܐܰܒܳܐ ܕܝܰܗ̣ܒ ܢܰܦܫܶܗ ܕܢܶܗܘܶܐ ܚܠܳܦ ܓܶܢܣܰܢ ܕܶܒܚܳܐ: ܘܠܰܬܠܳܬܳܐ ܣܳܢ̈ܶܐܐ ܐܰܘܒܶܕ ܒܰܩܝܳܡܬܶܗ: ܠܰܫܝܽܘܠ ܘܰܠܡܰܘܬܳܐ ܘܣܳܛܳܢܳܐ ܘܰܬܠܳܬܳܐ ܪ̈ܰܗܒܽܘܢܶܐ ܫܰܟܶܢ ܠܰܢ ܡܰܥܡܽܘܕܺܝܬܳܐ ܘܦܰܓܪܶܗ ܩܰܕܺܝܫܳܐ ܘܰܕܡܶܗ ܡܚܰܣܝܳܢܳܐ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܠܰܗܰܢ: ܩܰܒܶܠ ܡܶܢܰܢ ܠܦܺܝܪܡܳܐ ܕܰܬܠܺܝܬܳܐܺܝܬ ܡܶܢܰܢ ܡܶܬܬܰܥܛܰܪ ܒܥܺܐܕܳܐ ܗܳܢܳܐ ܕܰܡܕܰܒܪܳܢܽܘܬܳܟ: ܐܰܘܟܺܝܬ ܕܚܰܕ ܒܫܰܒܳܐ ܬܠܺܝܬܳܝܳܐ ܕܰܩܝܳܡܬܳܐ ܕܺܝܠܳܟ: ܘܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܘܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚܛܳܗ̈ܶܐ ܘܰܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ܀

 

ܚܘܬܡܐ

ܒܽܘܪܟܬܳܐ ܕܺܝܠܳܟ ܕܡܰܠܝܳܐ ܪ̈ܰܚܡܶܐ ܘܰܚܢܳܢܳܐ ܡܳܪܝܳܐ ܫܰܕܰܪ ܠܰܡܚܺܝܠܽܘܬܰܢ ܒܥܶܕܳܢܳܐ ܗܳܢܳܐ ܘܰܒܟܽܠܥܶܕ̈ܳܢܺܝܢ: ܘܰܒܝܰܕ ܡܰܠܐܱܟܳܐ ܕܰܡܠܐܷ ܪ̈ܰܚܡܶܐ: ܐܰܢ̱ܬ ܕܺܐܝܬܰܝܟ ܣܰܓܺܝ ܪ̈ܰܚܡܶܐ: ܘܠܐܴ ܡܳܪܝ ܬܶܗܘܶܐ ܠܰܢ ܕܠܐܴ ܪ̈ܰܚܡܶܐ ܡܶܛܽܠ ܕܡܰܒܽܘܥܳܐ ܕܰܚܢܳܢܳܐ ܘܰܕܪ̈ܰܚܡܶܐ ܐܺܝܬܰܝܟ: ܘܰܠܘܳܬ ܐܰܒܪܳܗܳܡ ܪܳܚܡܳܟ ܚܰܝ̈ܶܐ ܐܶܫܬܰܘܕܺܝܬ ܕܰܡܪܰܚܶܡ ܐܰܢ̱ܬ ܥܰܠ ܡܪܰܚܡܳܢܽܘܬܳܐ ܪܰܚܶܡܥܠܰܝܢ: ܒܣܽܘܓܳܐܐ ܕܰܚܢܳܢܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܫܒܺܝܚܳܐ ܘܰܡܫܰܒܚܳܐ ܕܰܫܒܺܝܚܳܐܺܝܬ ܒܺܐܝܬܽܘܬܶܗ ܐܶܫܬܰܒܰܚ: ܘܡ̣ܶܢ ܡܰܠܐܱܟ̈ܶܐ ܘܰܒܢܰܝ̈ܢܳܫܳܐ ܡܶܬܒܰܣ̈ܡܳܢܶܐ ܕܥܰܡܶܗ ܡܶܬܝܰܩܰܪ: ܠܗ̇ܰܘ ܬܰܩܺܝܦܳܐ ܘܣ̇ܳܥܰܪ ܚܰܝ̈ܠܐܷ ܕܣܰܥܪܳܗ̇ ܠܟܽܠܳܗ̇ ܥܳܡܰܪܬܳܐ ܒܣܳܥܽܘܪܽܘܬܶܗ ܡܰܠܝܰܬ݀ ܟܽܠ ܥܽܘܕܪ̈ܳܢܺܝܢ ܘܟܽܠ ܚܽܘܠܡܳܢ̈ܶܐ ܠܗ̇ܰܘ ܪܰܒܳܐ ܕܰܙܥ̣ܰܪ ܠܶܗ ܒܡܶܬܥܰܛܦܳܢܽܘܬܳܐ ܐ̱ܢܳܫܳܝܬܳܐ: ܘܰܠܪ̈ܳܡܶܐ ܘܠܰܚܬܺܝܪ̈ܶܐ ܐܰܝܠܶܝܢ ܕܡܶܫܬܰܥܠܶܝܢ ܗ̣ܘܰܘ ܥܰܠ ܓܶܢܣܰܢ ܫܰܦ̣ܶܠ ܘܕܳܫ ܬܚܶܝܬ ܪ̈ܶܓܠܰܘܗܝ: ܕܠܶܗ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܘܠܳܟ ܣܶܓܕܬܳܐ ܝܰܠܕܳܐ ܝܺܚܺܝܕܳܝܳܐ ܕܰܐܒܳܐ ܓܢܺܝܙܳܐ ܚܕܳܢܳܝܳܐ ܘܰܠܚܽܘܕܳܝܳܐ ܕܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܩܰܕܺܝ̈ܫܶܐ ܥܺܕܬܳܐ ܩܰܕܺܝܫܬܳܐ ܠܶܗ ܝ̇ܳܕܥܳܐ: ܘܒܰܬܠܺܝܬܳܝܽܘܬܳܐ ܣܓܺܝܕܬܳܐ ܚܰܕ ܐܠܰܗܳܐ ܫܰܪܺܝܪܳܐ: ܕܒܰܚܕܳܐ ܐܠܰܗܽܘܬܳܐ ܡܪܰܝܰܡܬܳܐ: ܕܒܰܚܕܳܐ ܐܽܘܣܺܝܰܐ: ܘܒܰܚܕܳܐ ܡܰܥܒܕܳܢܽܘܬܳܐ ܡܰܘܕܝܳܐ: ܘܠܰܚܒܺܝܟܽܘܬ ܪܒܺܝܥܳܝܽܘܬܳܐ ܕܰܩܢܽܘ̈ܡܶܐ ܕܳܚ̇ܩܳܐ ܠܟܽܠ ܥܳܫܽܘ̈ܩܶܐ ܘܒܳܨܽܘ̈ܝܶܐ ܘܚܶܪ̈ܝܳܝܶܐ ܙܳܢ̇ܩܳܐ. ܟܰܕ ܠܐܱܒܳܐ ܝܳܠܽܘܕܳܐ: ܘܠܰܒܪܳܐ ܝܺܠܺܝܕܳܐ ܘܰܠܪܽܘܚܳܐ ܢܳܦܽܘܩܳܐ ܡܶܫܬܰܘܕܥܳܐ ܘܠܐܱܒܳܐ ܕܰܐܒܳܐ ܐ̱ܚܪܺܢܳܐ ܠܰܝܬ ܠܶܗ: ܘܠܰܒܪܳܐ ܕܰܒܪܳܐ ܐ̱ܚܪܺܢܳܐ ܠܰܝܬ ܠܶܗ: ܘܰܠܪܽܘܚܳܐ ܕܚܰܕ ܗ̣ܽܘ ܐܺܝܬܰܘܗܝ ܕܠܐܴ ܫܽܘܓܢܳܝܳܐ ܘܰܕܠܐܴ ܒܽܘܠܒܳܠܐܴ. ܟܰܕ ܒܰܢܒܺܝ̈ܰܘܳܬܳܐ ܕܰܢܒܺܝ̈ܶܐ ܩܰܕܺܝ̈ܫܶܐ ܕܰܚܕܳܢܳܝܰܐ ܗ̱̇ܘ ܘܕܰܬܠܺܝܬܳܝܳܐ: ܘܰܕܗ̣ܽܘ ܟܰܕ ܗ̣ܽܘ ܐܠܰܗܳܐ ܫܰܪܺܝܪܳܐ ܩܳܪܝܳܐ ܘܡܶܣܬܰܟܠܐܴ. ܘܦܽܘܪܩܳܢܳܐ ܕܰܗ̣ܘܳܐ ܠܳܗ̇ ܬܠܺܝܬܳܐܺܝܬ ܐܶܬܶܐܪܶܙ ܘܶܐܬܒܰܕܰܩ ܒܺܐܝ̈ܕܰܝ ܡܒܰܕ̈ܩܳܢܶܐ ܘܚܰܙܳܝ̈ܶܐ ܕܰܓܢܺܝ̣̈ܙܶܐ: ܟܰܕ ܠܐܪܳܙܳܐ ܫܰܪܺܝܪܳܐ ܕܥܰܬܺܝܩܬܳܐ ܒܰܚܕܰܬܳܐ ܡܩܰܒܠܐܴ: ܠܰܒ̈ܢܶܝܗ̇ ܬܪ̈ܺܝܨܰܝ ܫܽܘܒܚܳܐ ܬܠܺܝܬܳܝܽܘܬܳܐ ܠܐܴ ܩܕܺܝܩܬܳܐ ܡܰܠܦܳܢܳܐ: ܘܰܠܗܽܘܢ ܬܠܳܬܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܛܳܒ̇ܥܳܐ. ܟܰܕ ܬܠܺܝܬܳܐܺܝܬ ܓܶܝܪ ܟܽܠܗܽܘܢ ܢܒܺܝ̈ܶܐ ܡܶܛܽܠ ܦܽܘܪܩܳܢܳܐ ܐ̱ܢܳܫܳܝܳܐ ܐܶܬܢܰܒܺܝܘ: ܕܠܰܬܠܳܬܳܐ ܡܳܪ̈ܽܘܕܶܐ ܕܰܒܥܶܠܕ̈ܒܳܒܶܐ ܕܶܐܫܬܰܥܒܰܕܘ ܐܳܕܳܡ ܢܶܙܟܶܐ: ܬܠܺܝܬܳܝܳܐ ܕܰܐܠܳܗܽܘܬܳܐ ܚ̣ܙܳܐ ܠܨܰܠܡܶܗ ܝܰܩܺܝܪܳܐ ܕܰܐܫܚ̣ܶܬ ܒܰܚܛܺܝܬܳܐ: ܒܝܰܕ ܚܽܘܒܶܗ ܫܦܺܝܥ ܒܛܳܒܽܘܬܶܐ ܡ̣ܶܢ ܫܡܰܝ̈ܳܐ ܥܶܠܳܝ̈ܶܐ: ܘܡ̣ܶܢ ܥܽܘܒܳܐ ܐܺܝܬܝܳܝܳܐ ܕܰܐܒܽܘܗܝ ܟܰܣܝܳܐ ܨܒ̣ܺܝ ܕܢܶܚܽܘܬ: ܟܰܕ ܠܓܰܒܪܺܐܶܝܠ ܡܰܠܐܱܟܳܐ ܫܰܕܰܪ: ܟܰܕ ܒܰܡܛܰܝܒܽܘܬ ܨܶܒܝܳܢܳܐ ܕܗܳܐ ܐܶܢܳܐ ܐܰܡܬܶܗ ܕܡܳܪܳܟ ܬܠܺܝܬܳܐܺܝܬ ܣܥ̣ܰܪ ܕܰܒܨܶܒܝܳܢܶܗ ܘܕܰܐܒܽܘܗܝ ܥܰܡ ܕܪܽܘܚܶܗ ܩܰܕܺܝܫܳܐ: ܘܡ̣ܶܢ ܐܶܕܢܳܐ ܠܟܰܪܣܳܐ ܥ̣ܰܠ: ܝܰܕ ܝܰܪ̈ܚܶܐ ܬܶܫܥܳܐ ܐܰܝܟ ܫܰܪܟܳܐ ܕܺܝܠܺܝ̣̈ܕܶܐ ܥܡ̣ܰܪ: ܘܰܒܝܰܠܕܶܗ ܬܗܺܝܪܳܐ ܒܬܽܘ̈ܠܐܷ ܕܠܐܴ ܚܒܳܠܐܴ ܢ̣ܛܰܪ: ܟܰܕ ܒܰܫܠܳܡܳܐ ܕܝܰܗ̣ܒ ܓܰܒܪܺܐܶܝܠ ܠܡܰܪܝܰܡ ܬܠܺܝܬܳܐܺܝܬ ܫܰܝܢܳܐ ܥܒ̣ܰܕ: ܒܶܝܬ ܫܡܰܝܳ̈ܢܶܐ ܠܓܰܒܳܐ ܕܰܐܪ̈ܥܳܢܳܝܶܐ: ܘܒܶܝܬ ܥܰܡܳܐ ܠܥܰܡ̈ܡܶܐ: ܘܒܶܝܬ ܢܰܦܫܳܐ ܠܦܰܓܪܳܐ. ܟܰܕ ܒܥܶܢܝܳܢܳܐ ܐܠܰܗܳܝܳܐ ܕܡܰܠܐܱܟܳܐ ܥܰܡ ܒܬܽܘܠܬܳܐ ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܰܬܠܺܝܬܳܝܽܘܬܳܐ ܦ̣ܪܰܫ: ܠܐܱܒܳܐ ܕܰܡܫܰܕܰܪ: ܘܰܒܪܳܐ ܕܡܰܓܶܢ: ܘܪܽܘܚܳܐ ܩܰܕܺܝܫܳܐ ܕܓܳܡ̇ܰܪ ܘܰܡܫܰܡܠܐܷ: ܟܰܕ ܠܰܬܠܳܬ ܡܰܚ̈ܘܳܬܶܗ ܕܳܐܕܳܡ ܐܰܣܺܝ ܒܗ̇ܳܝ ܕܦܰܓܪܳܐ ܕܺܝܠܶܗ ܐܶܬܥܰܛܰܦ: ܘܠܰܥܕܶܝܢ ܐܰܦܢܝܶܗ: ܘܠܐܱܪܥܳܐ ܕܠܺܝܛܳܐ ܒܰܪܶܟ: ܘܰܠܝܳܪܬܽܘܬܶܗ ܐܰܗܦܟܶܗ: ܘܰܚܠܳܦ ܕܽܘܥ̈ܳܬܳܐ ܘܥܰܡ̈ܠܐܷ ܦܰܓܪܶܗ ܡܰܐܚܝܳܢܳܐ ܐܰܘܟܠܶܗ: ܟܰܕ ܠܰܬܠܳܬܳܐ ܚܽܘ̈ܝܳܒܶܐ ܕܚܰܘܳܐ ܒܡܰܪܝܰܡ ܐܶܬܥܛܺܝܘ ܒܗ̇ܳܝ ܕܡܰܠܝܰܬ݀ ܛܰܝܒܽܘܬܳܐ ܐܶܬܩܰܪܝܰܬ݀ ܘܰܒܪܺܝܟܰܬ݀ ܒܢܶܫ̈ܶܐ ܐܶܬܟܰܢܝܰܬ݀: ܘܰܬܩܰܒܠܺܝܢ ܠܒܽܘܟܪܶܗ ܕܥܶܠܳܝܳܐ ܘܬܺܐܠܕܺܝܢܳܝܗܝ ܐܶܡܶܗ ܕܡܳܪܝܳܐ ܐܶܫܬܰܡܗܰܬ݀. ܟܰܕ ܠܰܬܠܳܬ ܛܶܟ̈ܣܶܐ ܒܰܓܙܽܘܪܬܳܐ ܡܽܘܫܳܝܬܳܐ ܫܰܡܠܺܝ ܘܚܰܘܺܝ: ܕܶܐܬܺܝܠܶܕ ܡ̣ܶܢ ܒܬܽܘܠܬܳܐ: ܘܶܐܬܓܙܰܪ ܒܝܰܘܡܳܐ ܬܡܺܝܢܳܝܳܐ: ܘܰܥܡ̣ܰܕ ܘܒܰܛܶܠ ܠܥܰܬܺܝܩܬܳܐ ܘܰܗ̣ܘܳܐ ܪܺܝܫܳܐ ܘܫܽܘܪܳܝܳܐ ܕܰܚܕܰܬܳܐ: ܟܰܕ ܒܡܶܬܟܰܫܦܳܢܽܘܬܳܐ ܕܫܶܡܥܽܘܢ ܣܳܒܳܐ ܠܫܰܘܝܽܘܬ ܨܶܒܝܳܢܳܐ: ܘܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܓܠܐܴ: ܘܰܕܠܰܘ ܦܽܘܠܳܓܳܐ ܒܰܝܢܳܬܗܽܘܢ ܚܰܘܺܝ: ܘܰܕܚܰܕ ܗ̣ܽܘ ܟܝܳܢܳܐ ܘܫܽܘܠܛܳܢܳܐ ܘܡܰܥܒܕܳܢܽܘܬܳܐ ܩܪܺܝܚܳܐܺܝܬ ܐܰܘܕܺܝ. ܟܰܕ ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܥܰܠ ܢܰܗܪܳܐ ܐܶܬܓܠܺܝܘ: ܐܰܒܳܐ ܕܡܰܙܥܶܩ ܕܗܳܢܰܘ ܒܶܪܝ ܚܰܒܺܝܒܝ: ܘܰܒܪܳܐ ܕܥܳܡ̇ܶܕ ܡ̣ܶܢ ܐܺܝ̈ܕܰܝ ܥܰܒ̣ܕܶܗ: ܘܪܽܘܚܳܐ ܕܛܳܐܶܣ ܠܥܶܠ ܡ̣ܶܢ ܪܺܝܫܶܗ ܐܰܝܟ ܝܰܘܢܳܐ. ܟܰܕ ܕܶܝܢ ܠܰܬܠܳܬ ܢܶܣܝܽܘ̈ܢܶܐ ܕܩ̣ܰܪܶܒ ܣܳܛܳܢܳܐ ܠܰܡܫܺܝܚܳܐ ܐܶܬܚܰܝܰܒ ܒܗܽܘܢ: ܒܪܶܚܡܰܬ݀ ܟܶܣܦܳܐ ܥܶܩܳܪܳܐ ܕܟܽܠܗܶܝܢ ܒܺܝ̈ܫܳܬܳܐ: ܘܪܶܚܡܰܬ݀ ܫܽܘܒܚܳܐ ܘܫܽܘܥܠܳܝܳܐ ܕܥܰܠ ܐܠܰܗܳܐ: ܟܰܕ ܠܰܬܠܳܬܳܐ ܐܳܕ̈ܫܶܐ ܕܝܰܥܢܽܘܬܳܐ ܡ̣ܶܢ ܗܰܝܟܠܐܴ ܐܰܦ̣ܶܩ: ܠܙܳܒܽܘ̈ܢܶܐ ܘܰܡܙܰܒ̈ܢܳܢܶܐ ܕܥܶܪ̈ܒܶܐ ܘܬܰܘܪ̈ܶܐ ܘܝܰܘ̈ܢܶܐ: ܘܰܠܦܳܬܽܘܪ̈ܶܐ ܕܰܡܥܰܪ̈ܦܳܢܶܐ ܘܠܰܛܥܺܝ̣̈ܢܰܝ ܓܰܪ̈ܒܶܐ ܣܚ̣ܰܦ: ܘܰܠܗ̇ܳܝ ܡܶܠܬܳܐ ܕܰܛܢܳܢܶܗ ܐܰܟܠܰܢܝ ܫܰܡܠܺܝ. ܟܰܕ ܒܥܺܐܕܳܐ ܬܠܺܝܬܳܝ ܫܡܳܗ̈ܶܐ ܕܰܐܪܒܰܥܣܰܪ ܫܡܳܗ̈ܶܐ ܘܰܕܐ̱ܪ̈ܳܙܶܐ ܘܰܕܦܶܨܚܳܐ ܬܠܺܝܬܳܐܺܝܬ ܣܥ̣ܰܪ: ܡܶܐܟܽܘܠܬܳܐ ܕܶܐܡܪܳܐ ܢܣܺܝܒܽܘܬܳܐ ܕܐ̱ܪ̈ܳܙܶܐ ܕܐ̱ܪܳܙܳܢܳܐܺܝܬ ܓܠܐܴ ܠܰܫܠܺܝ̈ܚܰܘܗܝ ܘܰܫܝܳܓܬܳܐ ܘܡܰܠܦܳܢܽܘܬܳܐ ܘܰܗ̣ܘܳܐ ܦܶܨܚܳܐ ܘܶܐܬܢܟܶܣ ܚܠܳܦܰܝܢ. ܟܰܕ ܬܠܺܝܬܳܐܺܝܬ ܠܘܳܬ ܫܶܡܥܽܘܢ ܘܰܠܘܳܬ ܫܠܺܝ̈ܚܶܐ ܡܰܠܶܠ ܕܰܩܕܳܡ ܕܢܶܩܪܶܐ ܬܰܪܢܳܓܠܐܴ ܬܰܪܬܶܝܢ ܙܰܒ̈ܢܺܝܢ ܬܠܳܬ ܙܰܒܢܺܝ̈ܢ ܬܶܟܦܽܘܪ ܒܺܝ. ܘܰܕܟܰܕ ܫܰܕܰܪܬܟܽܘܢ ܕܠܐܴ ܟܺܝ̈ܣܶܐ ܘܡܰܪ̈ܣܽܘܦܶܐ ܘܣܳܐܘ̈ܢܶܐ ܘܢܰܐܚܣܰܪ ܠܟܽܘܢ ܡܶܕܶܡ: ܘܗܳܫܳܐ ܗ̇ܰܘ ܕܺܐܝܬ ܠܶܗ ܟܺܝܣܳܐ ܘܡܰܪܣܽܘܦܳܐ ܢܶܫܩܽܘܠ: ܘܰܕܠܰܝܬ ܠܶܗ ܢܙܰܒܶܢ ܡܳܐܢܶܗ ܘܢܶܙܒܶܢ ܣܰܝܦܳܐ. ܟܰܕ ܒܰܬܠܺܝܬܳܐܺܝܬ ܐܶܬܳܐ ܝܽܘܕܳܐ: ܒܣܰܝ̈ܦܶܐ ܘܩܰܝ̈ܣܶܐ ܘܠܰܡܦܺܐܕ̈ܶܐ ܘܰܠܘܳܬ ܬܠܳܬ ܡܽܘܫ̈ܚܳܢ ܕܪ̈ܺܝܫܰܝ ܟܳܗ̈ܢܶܐ ܘܶܐܣܛܪ̈ܰܛܺܝܓܶܐ ܕܗܰܝܟܠܐܴ ܘܩܰܫܺܝ̈ܫܶܐ ܡܰܠܶܠ ܡܳܪܰܢ. ܟܰܕ ܐܰܝܟ ܕܥܰܠ ܓܰܝܳܣܳܐ ܢܦ̣ܰܩܬܽܘܢ: ܟܰܕ ܟܽܠܝܽܘܡ ܥܰܡܟܽܘܢ ܐܺܝܬܰܝ ܗܘܺܝܬ ܒܗܰܝܟܠܐܴ. ܟܰܕ ܬܠܳܬ ܙܰܒܢܺܝ̈ܢ ܬܠܺܝܬܳܐܺܝܬ ܨܰܠܺܝ: ܘܠܰܬܠܳܬܳܐ ܚܰܫ̈ܶܐ ܡ̣ܶܢ ܓܶܢܣܰܢ ܐܰܪܺܝܡ: ܒܩܰܕܡܳܝܳܐ ܠܰܓܙܳܪ ܕܺܝܢܳܐ ܕܡܰܘܬܳܐ: ܘܒܰܬܠܺܝܬܳܝܳܐ ܡܶܢܶܗ ܕܡܰܘܬܳܐ: ܘܛܽܘܦܣܳܐ ܚܰܘܺܝ ܠܰܒ̈ܢܰܝ ܥܺܕܬܳܐ ܕܰܬܠܺܝܬܳܐܺܝܬ ܢܨܰܠܽܘܢ ܒܠܺܠܝܳܐ. ܘܟܰܕ ܕܶܝܢ ܬܠܺܝܬܳܐܺܝܬ ܡ̣ܶܢ ܬܠܳܬܳܐ ܚܰܢܳܢ ܘܩܰܝܳܦܳܐ ܘܦܺܝܠܰܛܳܘܣ ܐܺܝܓܡܽܘܢܳܐ ܡܶܫܬܰܐܠ ܗ̣ܘܳܐ ܕܡܰܢܽܘ ܐܺܝܬܰܝܟ: ܘܦܽܘܢܳܝ̈ܶܐ ܬܠܳܬܳܐ ܦܰܢܺܝ: ܫܰܐܶܠ ܠܗ̇ܳܢܽܘܢ ܕܰܫܡ̣ܰܥܘ ܡܰܠܦܳܢܽܘܬܳܐ: ܘܕܶܐܢܳܐ ܐܺܝܬܰܝ ܒܪܳܐ ܕܰܐܠܳܗܳܐ ܚܰܝܳܐ: ܕܡܰܠܟܳܐ ܕܝܽܘ̈ܕܳܝܶܐ ܐܶܢܳܐ ܐܺܝܬܰܝ ܐܰܢ̱ܬ ܐܶܡ̣ܰܪܬ. ܟܰܕ ܬܠܺܝܬܳܐܺܝܬ ܒܒܶܝܬ ܦܺܝܠܰܛܳܘܣ ܒܠ̣ܰܥ: ܐܰܣܽܘܪܝܳܐ ܕܺܐܝ̈ܕܰܘܗܝ ܠܒܶܣܬܪܶܗ. ܘܢܶܓ̈ܕܶܐ ܕܥܰܠ ܚܰܨܶܗ: ܘܡܰܚ̈ܘܳܬܳܐ ܕܒܰܦܪ̈ܳܓܶܠܐܷ ܕܥܰܠ ܗܰܕܳܡܰܘ̈ܗܝ ܘܰܒܗܳܠܶܝܢ ܐܶܬܚܰܝܰܒ ܦܺܝܠܰܛܳܘܣ. ܟܰܕ ܒܦܽܘܢܳܝ̈ܶܐ ܬܠܳܬܳܐ ܕܰܠܘܳܬ ܝܽܘ̈ܕܳܝܶܐ ܐܶܬܚܰܪܰܪ ܦܺܝܠܰܛܳܘܣ ܒܗ̇ܳܝ ܕܶܐܡ̣ܰܪ ܕܳܐܦܠܐܴ ܚܕܳܐ ܥܶܠܬܳܐ ܕܫܳܘܝܳܐ ܠܡܰܘܬܳܐ ܒܶܗ ܡܶܫܟܰܚ ܐ̱ܢܳܐ: ܣܰܒܽܘܢ ܐܰܢ̱ܬܘܽܢ ܕܽܘܢܽܘܗܝ ܐܰܝܟ ܢܳܡܽܘܣܟܽܘܢ: ܟܰܕ ܬܠܺܝܬܳܐܺܝܬ ܠܘܳܬ ܦܪ̈ܺܝܫܶܐ ܐܶܡ̣ܰܪ: ܕܙܶܠܘ ܐܶܡ̣ܰܪܘ ܠܬܰܥܠܐܴ ܗܳܢܳܐ: ܗܳܐ ܡܰܦܶܩ ܐ̱ܢܳܐ ܕܰܝ̈ܘܶܐ: ܘܗܳܐ ܥܳܒ̇ܶܕ ܐ̱ܢܳܐ ܐܳܣܘ̈ܳܬܳܐ: ܝܰܘܡܳܢܳܐ ܘܰܡܚܳܪ ܘܰܠܗ̇ܰܘ ܬܠܺܝܬܳܝܳܐ ܡܶܫܬܰܡܠܐܷ ܐ̱ܢܳܐ: ܘܙܳܕܶܩ ܠܺܝ ܕܝܰܘܡܳܢܳܐ ܘܰܡܚܳܪ ܘܰܠܗ̇ܰܘ ܕܒܳܬܪܶܗ ܐܳܙܶܠ ܐ̱ܢܳܐ. ܟܰܕ ܣܳܗܕܽܘܬܳܐ ܠܐܴ ܫܘܺܝܬܳܐ ܐܰܣܗܶܕܘ ܝܽܘܕܳܝ̈ܶܐ ܘܶܐܡ̣ܰܪܘ ܕܰܥܬܺܝܕ ܠܡܶܫ̣ܪܶܐ ܗܰܝܟܠܐܴ ܕܰܐܠܳܗܳܐ ܥܒܺܝܕ ܒܺܐܝ̈ܕܰܝܳܐ: ܘܰܒܝܰܕ ܬܠܳܬܳܐ ܝܰܘ̈ܡܺܝܢ ܡܶܫܟܰܚ ܕܢܶܥܒܶܕ ܐ̱ܚܪܺܢܳܐ ܕܠܐܴ ܥܒܺܝܕ ܒܺܐܝ̈ܕܰܝܳܐ: ܟܰܕ ܗ̣ܘܽ ܥܰܠ ܗܰܝܟܠܐܴ ܕܦܰܓܪܶܗ ܐܰܪܶܙ. ܟܰܕ ܝܽܘ̈ܕܳܝܶܐ ܠܘܳܬ ܦܺܝܠܰܛܳܘܣ ܐܶܡ̣ܰܪܘ ܦܩܽܘܕ ܢܶܙܕܗܰܪ ܒܩܰܒܪܳܐ ܥܰܠ ܕܶܐܡ̣ܰܪ ܕܩܳܐܶܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ: ܘܰܒܝܰܕ ܢܳܛܽܘܪ̈ܶܐ ܐܰܚܬܶܡܘ ܠܟܺܐܦܳܐ ܘܝܰܨܺܝܦܳܐܺܝܬ ܡܶܙܕܰܗܪܺܝܢ ܗ̣ܘܰܘ ܒܶܗ. ܟܰܕ ܬܠܳܬܳܐ ܝܰܘ̈ܡܺܝܢ ܐܰܟܪܶܙܘ ܒܽܐܘܪܫܠܶܡ ܦܰܓܪ̈ܶܐ ܕܩܰܕܺܝ̈ܫܶܐ ܕܩܳܡ̣ܘ: ܕܡܰܢܽܘ ܗܳܢܳܐ ܣܽܘܥܪܳܢܳܐ ܕܰܥܒ̣ܰܕܬܽܘܢ: ܕܰܠܚܰܝܳܐ ܝܳܗ̇ܶܒ ܚܰܝ̈ܶܐ ܙܩܰܦ̣ܬܽܘܢ: ܘܒܳܬܰܪܟܶܢ ܗܦܰܟ̣ܘ ܠܩܰܒܪ̈ܰܝܗܽܘܢ: ܟܰܕ ܠܰܬܠܳܬܳܐ ܡܰܟܺܝ̣̈ܟܰܝ ܬܰܪܥܺܝܬܳܐ ܬܠܺܝܬܳܐܺܝܬ ܫܰܒܰܚ ܠܩܶܢܛܪܽܘܢܳܐ ܕܶܐܡ̣ܰܪ ܕܠܐܴ ܫ̇ܳܘܶܐ ܐ̱ܢܳܐ ܕܬܶܥܽܘܠ ܬܚܶܝܬ ܡܰܛܠܠܰܝ ܠܗܰܝܡܳܢܽܘܬܶܗ ܩܰܠܶܣ. ܠܝܽܘܚܰܢܳܢ ܕܶܐܡ̣ܰܪ ܕܠܐܴ ܫ̇ܳܘܶܐ ܐ̱ܢܳܐ ܕܶܐܫܪܶܐ ܥܶܪ̈ܩܶܐ ܕܰܡܣܳܐܢܰܘ̈ܗܝ: ܐܰܝܟܰܢܳܐ ܕܰܢܣܺܝܡ ܐܺܝܕܶܗ ܥܰܠ ܪܺܝܫܶܗ ܐܰܫܘܝܶܗ: ܠܫܶܡܥܽܘܢ ܐܶܡ̣ܰܪ ܕܰܦܪܽܘܩ ܠܳܟ ܡܶܢܝ ܕܓܰܒܪܳܐ ܐ̱ܢܳܐ ܚܰܛܳܝܳܐ ܫܶܬܶܐܣܬܳܐ ܠܥܺܕܬܳܐ ܣܳܡܶܗ. ܟܰܕ ܕܶܝܢ ܬܠܺܝܬܳܐܺܝܬ ܐܰܒܳܐ ܡ̣ܶܢ ܫܡܰܘ̈ܗܝ ܪ̈ܳܡܶܐ ܩܳܠܶܗ ܐܰܫܡܰܥ: ܘܰܐܣܗܶܕ ܕܰܒܪܶܗ ܟܝܳܢܳܝܳܐ ܐܺܝܬܰܘܗܝ ܟܰܕ ܐܶܡ̣ܰܪ ܥܰܠ ܢܰܗܪܳܐ ܕܗܳܢܰܘ ܒܶܪܝ ܚܰܒܺܝܒܝ: ܘܥܰܠ ܛܽܘܪ ܬܳܒܽܘܪ ܩܕܳܡ ܬܠܳܬܳܐ ܬܰܠܡܺܝ̈ܕܶܐ: ܘܰܒܥܶܕܳܢ ܙܩܺܝܦܽܘܬܳܐ ܕܫܰܒܚ̇ܶܬ ܘܬܽܘܒ ܡܫܰܒܰܚ ܐ̱ܢܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܰܬܫܰܡܠܐܷ ܠܰܢ ܒܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ ܘܰܬܩܰܕܶܫ ܠܰܢ ܒܢܰܦܫܳܐ ܘܰܒܦܰܓܪܳܐ ܘܗܰܘܢܳܐ ܘܬܶܓܡܽܘܪ ܠܰܢ ܒܟܽܠܗܶܝܢ ܐܰܝܠܶܝܢ ܕܫܳܦܪ̈ܳܢ ܠܳܟ: ܘܰܬܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܝܰܡܳܐ ܫܦܺܝܥܳܐ ܕܰܚܢܳܢܳܟ: ܘܬܶܡܪܽܘܩ ܡܶܢܰܢ ܟܽܠ ܨܘܽܥ̈ܨܳܥܶܐ ܕܰܚܛܺܝܬܳܐ: ܘܬܰܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܥܢ̣ܰܕܘ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܒܰܣܶܡ ܐܶܢܽܘܢ ܒܰܐܘ̈ܘܳܢܶܐ ܛܽܘܒܬܳܢ̈ܶܐ ܘܰܒܡܰܫܟ̈ܢܶܐ ܕܟܺܐܢ̈ܶܐ ܐܰܝܟܰܢܳܐ ܕܥܳܢܳ̈ܐ ܕܺܝܠܳܟ ܘܡܰܪܥܺܝܬܳܟ ܩܳܥܝܳܐ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܫܠܡ

 

ܛܟܣܐ ܕܚܕ ܒܫܒܐ ܪܒܝܥܝܐ ܕܡܕܒܪܢܘܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ ܘܛܰܝܒ̈ܘܳܬܳܐ ܥܰܬܺܝܪ̈ܳܬܳܐ ܘܡܰܘܗ̈ܒܳܬܳܐ ܫܦܺܝ̈ܥܳܬܳܐ ܫܰܟܶܢ ܡܳܪܝܳܐ ܐܠܰܗܳܐ ܠܥܺܕܬܳܐ ܩܰܕܺܝܫܬܳܐ ܕܺܝܠܳܟ: ܘܰܬܪܺܝܨܰܬ݀ ܫܽܘܒܚܳܐ. ܒܥܺܐܕܳܐ ܗܳܢܳܐ ܕܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ. ܘܥܰܕܰܪ ܠܰܢ ܒܟܽܠܗܶܝܢ ܐܰܝܠܶܝܢ ܕܦܳܩ̈ܚܳܢ ܘܚܳܫ̈ܚܳܢ ܠܦܽܘܪܩܳܢܰܢ ܘܣܰܝܰܥ ܠܰܢ ܢܰܛܰܪ ܠܰܢ ܒܢܳܛܽܘܪܽܘܬ ܦܽܘܩ̈ܕܳܢܰܝܟ ܡܰܥܒ̈ܕܰܝ ܚܰܝ̈ܶܐ: ܕܢܰܘܕܶܐ ܠܪ̈ܰܚܡܶܐ ܕܛܰܝܒܽܘܬܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܕܪܳܥܳܐ ܠܐܴ ܡܶܬܟܰܒܫܳܢܳܐ: ܘܚܰܝܠܐܴ ܘܬܽܘܩܦܳܐ ܠܐܴ ܡܶܬܚܰܣܢܳܢܳܐ: ܠܗ̇ܰܘ ܟܝܳܢܳܐ ܓܢܺܝܙܳܐ ܕܰܒܡܶܠܬܳܐ ܕܦܳܩܽܘܕܽܘܬܶܗ ܒ̣ܪܳܐ ܠܰܟܝܳܢܳܐ ܢܽܘܪܳܢܳܝܳܐ. ܠܗ̇ܰܘ ܕܰܒܪܶܚܡܰܬ݀ ܚܽܘܒܶܗ ܠܐܴ ܡܶܣܬܰܝܟܳܢܳܐ ܘܠܐܴ ܡܶܬܡܰܠܠܳܢܳܐ ܓܒ̣ܰܠ ܠܒܰܪܢܳܫܳܐ ܩܰܕܡܳܝܳܐ ܡ̣ܶܢ ܥܰܦܪܳܐ ܒܨܰܠܡܶܗ ܘܒܰܕܡܽܘܬܶܗ ܘܰܐܝܟ ܡܳܪܳܐ ܡܪܰܚܡܳܢܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܠܰܗܳܐ ܗ̇ܰܘ ܛܳܒܳܐ ܘܒܰܣܺܝܡܳܐ: ܗ̇ܰܘ ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ: ܗ̇ܰܘ ܕܰܒܪܶܚܡܬܶܗ ܠܐܴ ܡܶܬܡܰܠܠܳܢܺܝܬܳܐ ܠܬܶܐܓܡܳܐ ܢܽܘܪܳܢܳܝܳܐ ܡ̣ܶܢ ܠܐܴ ܡܶܕܶܡ ܒܝܰܕ ܛܰܝܒܽܘܬܳܟ ܫܦܺܝܥܰܬ݀ ܒܪ̈ܰܚܡܶܐ ܒܪܰܝܬܳܝܗܝ: ܘܟܰܕ ܡ̣ܶܢ ܒܳܬܰܪ ܗ̇ܳܝ ܕܰܒ̣ܪܰܝܬ ܠܚܰܝܠܰܘ̈ܳܬܳܐ ܫܡܰܝ̈ܳܢܶܐ ܘܛܶܟ̈ܣܶܐ: ܡܶܬܬܙܺܝܥܳܢܽܘܬܳܐ ܬܪܰܝܳܢܺܝܬܳܐ ܠܰܟܝܳܢ ܪܰܒܽܘܬܳܟ ܐܰܙܺܝܥܬܳܝܗܝ: ܘܡ̣ܶܢ ܐܰܪܒܥܳܐ ܐܶܣܛܽܘ̈ܟܣܶܐ ܣܰܩܽܘܒ̈ܠܳܝܰܝ ܠܰܚܕ̈ܳܕܶܐ ܠܐܴܕܳܡ ܒܰܪܢܳܫܳܐ ܓܒ̣ܰܠܬܳܝܗܝ: ܘܰܒܗܰܘܢܳܐ ܘܢܰܦܫܳܐ ܘܦܰܓܪܳܐ ܝܰܩܰܪܬܳܝܗܝ: ܘܰܒܨܰܠܡܳܟ ܗ̇ܰܘ ܡܰܠܝܳܐ ܨܰܒܶܬܬܳܝܗܝ. ܟܰܕ ܠܦܰܪܕܰܝܣܳܐ ܥܕܶܢܳܝܳܐ ܠܶܗ ܐܰܓܥ̣ܶܠܬܳܝܗܝ: ܐܳܦ ܫܰܠܺܝܛܳܐ ܥܰܠ ܟܽܠܗܶܝܢ ܦܰܐܝ̈ܳܬܶܗ ܣܳܡ̣ܬܳܝܗܝ: ܘܡܰܠܟܳܐ ܘܟܳܗܢܳܐ ܘܰܢܒܺܝܳܐ ܥܒ̣ܰܕܬܳܝܗܝ: ܘܠܰܟܝܳܢܳܐ ܠܐܴ ܡܠܺܝܠܐܴ ܬܚܶܝܬ ܐܺܝ̈ܕܰܘܗܝ ܫܰܥܒܶܕܬܳܝܗܝ: ܘܥܶܕܪܳܐ ܒܰܪܬ݀ ܙܰܘܓܳܐ ܢܳܡܽܘܣܳܝܳܐ ܠܶܗ ܣܳܡ̣ܬ: ܟܰܕ ܠܡܰܠܟܳܐ ܡܰܘܒܕܳܢܳܐ ܕܚܶܘܝܳܐ ܚܰܪܡܳܢܳܐ ܐܶܫܬܡܰܥ: ܘܡ̣ܶܢ ܪܰܘܡܳܐ ܡܥܰܠܝܳܐ ܕܛܽܘܒܬܳܢܽܘܬܳܐ ܥܕܶܢܳܝܬܳܐ ܛܪܰܕܬܳܝܗܝ: ܘܠܐܱܪܥܳܐ ܕܡܰܠܝܳܐ ܟܽܘ̈ܒܶܐ ܘܕܰܪܕܪ̈ܶܐ ܣܚ̣ܰܦܬܳܝܗܝ: ܘܰܒܕܽܘܥܬܳܐ ܕܰܐܦܰܘ̈ܗܝ ܢܶܐܟܽܘܠ ܠܰܚܡܳܐ ܦܰܩܶܕܬܳܝܗܝ: ܘܟܰܕ ܩܳܠ ܕܽܘܪ̈ܟܳܬܳܟ ܘܩܳܠܳܟ ܚܰܝܳܐ ܒܶܝܬ ܐܺܝܠܳܢ̈ܶܐ ܐܰܝܟ ܕܢܶܬܬܘܶܐ ܐܰܫܡܰܥ̣ܬܳܝܗܝ: ܕܳܐܕܳܡ ܐܳܕܳܡ ܕܰܐܝܟܳܐ ܐܰܢ̱ܬ ܘܰܐܝܟܰܘ ܫܽܘܒܚܳܐ ܕܰܐܠܒܶܫ̣ܬܳܟ ܫܰܐܶܠܬܳܝܗܝ. ܟܰܕ ܣܥ̣ܳܐ ܘܰܥܒ̣ܰܪ ܥܰܠ ܢܳܡܽܘܣܳܐ ܕܣܳܡ̣ܬ ܠܶܗ ܠܐܱܪܥܳܐ ܣܚܰܦ̣ܬܳܝܗܝ: ܘܡ̣ܶܢ ܗ̇ܳܝ ܓܰܐܝܽܘܬܳܐ ܠܫܶܦܠܐܴ ܘܡܽܘܟܳܟܳܐ ܪܰܒܳܐ ܐܰܚܶܬܬܳܝܗܝ. ܟܰܕ ܠܨܰܠܡܳܟ ܡܰܠܟܳܝܳܐ ܕܰܐܫܚ̣ܶܬ ܘܰܒܠܺܝ ܒܰܚܛܺܝܬܳܐ ܚ̣ܙܰܝܬܳܝܗܝ: ܘܡ̣ܶܢ ܟܽܠܳܗ̇ ܗ̇ܳܝ ܫܽܘܚܬܳܐ ܕܡܰܠܝܳܐ ܙܰܗܡܽܘܬܳܐ ܘܰܢܕܺܝܕܽܘܬܳܐ ܡܪܰܩ̣ܬܳܝܗܝ: ܘܟܰܕ ܡ̣ܶܢ ܪ̈ܰܘܡܶܐ ܪ̈ܳܡܶܐ ܕܰܐܒܽܘܟ ܠܘܳܬܰܢ ܐܶܬܬܰܚܬܺܝܬ: ܘܦܰܓܪܳܐ ܐ̱ܢܳܫܳܝܳܐ ܐܶܬܥܰܛܰܦ̣ܬ ܘܰܒܡܽܘܟܳܟܳܟ ܗ̇ܰܘ ܨܶܒܝܳܢܳܝܳܐ ܠܐܴܕܳܡ ܨܰܠܡܳܐ ܕܪܰܒܽܘܬܳܟ ܕܥܰܠ ܦܽܘܩܕܳܢܳܟ ܣܥ̣ܳܐ ܘܰܥܒ̣ܰܪ: ܡ̣ܶܢ ܐܺܝ̈ܕܰܝ ܢܳܟܽܘܠܶܗ ܘܡܰܛܥܝܳܢܶܗ ܬܽܘܒ ܦ̣ܪܰܩܬܳܝܗܝ. ܟܰܕ ܠܝܽܘܚܰܢܳܢ ܒܓܰܘ ܟܰܪܣܳܐ ܕܶܐܠܺܝܫܒܰܥ ܣܥ̣ܰܪܬܳܝܗܝ: ܘܰܒܓܰܘ ܡܰܪܒܥܳܐ ܐܶܡܗܳܝܳܐ ܩܰܕܶܫܬܳܝܗܝ: ܘܪܽܘܚܳܐ ܩܰܕܺܝܫܳܐ ܡܠ̣ܰܝܬܳܝܗܝ: ܘܰܒܕܰܘܨܳܐ ܕܢܶܦܽܘܩ ܠܐܘܪܥܳܟ ܐܰܙܺܝܥܬܳܝܗܝ ܘܠܰܦܟܳܪ̈ܶܐ ܫܶܬܩܳܢܳܝ̈ܶܐ ܕܰܐܒܽܘܗܝ ܙܟܰܪܝܳܐ ܫ̣ܪܰܝܬܳܝܗܝ: ܘܟܰܕ ܠܝܰܘܣܶܦ ܕܶܐܬܦܰܠܰܓ ܥܰܠ ܒܰܛܢܳܟ ܒܚܶܠܡܳܐ ܕܠܺܠܝܳܐ ܫܰܪܰܪܬܳܝܗܝ: ܘܰܠܟܽܠ ܚܽܘܫܳܒܳܐ ܡܙܰܝܦܳܐ ܡ̣ܶܢ ܪܶܥܝܳܢ ܢܰܦܫܶܗ ܕܚܰܩ̣ܬܳܝܗܝ: ܘܰܕܢܶܗܘܶܐ ܠܳܗ̇ ܩܳܝܽܘܡܳܐ ܘܝܳܨܽܘܦܳܐ ܕܝ̇ܳܠܶܕܬܳܟ ܒܝܰܕ ܓܰܒܪܺܐܶܝܠ ܡܰܠܐܱܟܳܐ ܗܰܝܡܶܢ̣ܬܳܝܗܝ: ܘܟܰܕ ܠܒܰܛܢܳܟ ܫܒܺܝܚܳܐ ܕܝܳܠܶܕܬܳܟ ܒܝܰܕ ܓܰܒܪܺܐܶܝܠ ܣܰܒܰܪܬܳܝܗܝ: ܘܰܠܝܽܘܡ ܡܰܘܠܳܕܳܟ ܬܗܺܝܪܳܐ ܒܚܰܝܠܰܘ̈ܳܬܳܐ ܫܡܰܝܳܢ̈ܶܐ ܠܪ̈ܳܥܰܘܳܬܳܐ ܓܠܰܝܬܳܝܗܝ ܟܰܕ ܠܥܰܡܳܐ ܥܳܓܽܘܫܳܐ ܘܰܡܓܽܘܫܳܝܳܐ ܒܝܰܕ ܟܰܘܟܒܳܐ ܒܕܳܫ̈ܢܶܐ ܪ̈ܺܝܫܳܝܶܐ ܠܣܶܓܕܬܳܟ ܐܰܝܬܺܝܬܳܝܗܝ ܘܰܒܗ̇ܰܘ ܡܳܐ ܕܰܡܥܰܝܰܕ ܗ̣ܘܳܐ ܐܰܝܟ ܕܰܒܠܶܩܛܳܐ ܠܦܳܪܰܚܬܳܐ ܨܳܕܬܳܝܗܝ: ܘܡ̣ܶܢ ܟܽܠܗܽܘܢ ܚܶܠܩ̈ܶܐ ܕܟܰܠܕܳܝܽܘܬܳܐ ܫܰܘܙܶܒܬܳܝܗܝ. ܟܰܕ ܠܗܶܪܳܘܕܶܣ ܗ̇ܰܘ ܬܰܥܠܐܴ ܫܺܝܛܳܐ ܗ̇ܰܘ ܕܰܒܥ̣ܳܐ ܒܢܶܟܠܐܴ ܢܰܛܥܝܶܗ ܐܰܒܶܗ̣ܬܬܳܝܗܝ. ܐܳܦ ܒܽܐܘܪܚܳܐ ܐ̱ܚܪܺܬܳܐ ܕܡܰܠܝܳܐ ܫܰܝܢܳܐ ܬܰܪܶܨܬܳܝܗܝ: ܘܒܰܫܠܳܡܳܐ ܠܐܱܬܪܳܐ ܕܺܝܠܶܗ ܐܰܡܛܺܝܬܳܝܗܝ. ܟܰܕ ܠܢܳܡܽܘܣܳܐ ܕܰܓܙܽܘܪܬܳܐ ܗ̇ܳܝ ܡܽܘܫܳܝܬܳܐ ܫܰܡܠܺܝܬܳܝܗܝ: ܘܕܶܒܚܳܐ ܕܰܦܩܺܝܕ ܠܗܰܝܟܠܐܴ ܐܰܣܶܩ̣ܬܳܝܗܝ: ܘܒܶܝܬ ܐܺܝ̈ܕܰܝ ܪܺܝܫ ܟܳܗ̈ܢܶܐ ܠܐܱܒܽܘܟ ܩܰܪܶܒ̣ܬܳܝܗܝ: ܟܰܕ ܠܫܶܡܥܽܘܢ ܣܳܒܳܐ ܕܰܒܚܽܘܛܳܐ ܕܚܰܝ̈ܶܐ ܐܰܣܺܝܪ ܗ̣ܘܳܐ ܡ̣ܶܢ ܚܰܝ̈ܶܐ ܙܰܒܢܳܝ̈ܶܐ ܫܪܰܝܬܳܝܗܝ ܘܠܰܫܝܽܘܠ ܒܳܠܥܰܬ݀ ܫܰܪ̈ܒܳܬܳܐ ܡܰܟܪܙܳܢܳܐ ܕܡܶܐܬܺܝܬܳܟ ܦܳܪܽܘܩܳܝܬܳܐ ܐܰܢ̱ܬ ܫܰܕܰܪܬܳܝܗܝ. ܟܰܕ ܒܫܰܢ̱ܬܳܐ ܗ̇ܳܝ ܕܰܬܪܶܥܣܰܪ ܕܺܝܠܺܝܕܽܘܬܳܟ ܗ̇ܳܝ ܦܰܓܪܳܢܳܝܬܳܐ: ܥܰܡ ܡܰܪܝܰܡ ܘܝܰܘܣܶܦ ܠܥܺܐܕܳܐ ܕܦܶܨܚܳܐ ܠܐܘܪܫܠܶܡ ܣܠ̣ܶܩܬ: ܘܰܒܡܶܨܥܰܬ݀ ܥܰܡܳܐ ܝܽܘܕܳܝܳܐ ܘܰܕܡܰܠܦܳܢܰܐ ܗ̱̇ܘ ܝ̣ܺܬܶܒܬ ܠܳܟ. ܘܰܒܚܶܟܡܬܳܟ ܡܰܠܝܰܬ݀ ܟܽܠ ܚܶܟ̈ܡܳܢ ܐܰܬܗܰܪܬܳܝܗܝ: ܕܡ̣ܶܢ ܓܠܺܝܠܐܴ ܠܘܳܬ ܝܽܘܚܰܢܳܢ ܠܝܽܘܪܕܢܳܢ ܢܰܗܪܳܐ ܐܶܬܰܝܬ: ܘܰܥܡܳܕܳܐ ܡܶܢܶܗ ܩܰܒܶܠܬܳܝܗܝ: ܘܡܶܢܶܗ ܘܡ̣ܶܢ ܐܰܒܳܐ ܘܪܽܘܚܳܐ ܕܰܒܪܳܐ ܟܝܳܢܳܝܳܐ ܐܺܝܬܰܝܟ ܐܶܣܬܗܶܕܬ: ܘܠܰܟܝܳܢܳܐ ܟܽܠܶܗ ܕܡܰܝ̈ܳܐ ܠܚܽܘܕܳܬܳܐ ܕܰܒܢܰܝ̈ܢܳܫܳܐ ܩܰܕܶܫܬܳܝܗܝ. ܟܰܕ ܡ̣ܶܢ ܝܽܘܚܰܢܳܢ ܥܡ̣ܰܕܬ ܒܝܽܘܪܕܢܳܢ ܢܰܗܪܳܐ ܘܒܳܬܰܪܟܶܢ ܠܡܰܕܒܪܳܐ ܢܦ̣ܰܩܬ ܘܰܠܨܰܘܡܳܐ ܐܰܪܒܥܺܝܢܳܝܳܐ ܕܨܳܪܘ ܠܳܟ ܢܒܺܝ̈ܶܐ ܚܰܙܳܝܰܝ̈ܟ ܥܠܰܝܟ ܩܰܒܶܠܬܳܝܗܝ. ܘܥܰܡ ܡܪܰܡܝܳܢܳܐ ܕܰܐܩܪܶܒ ܥܰܡܳܟ ܩܪܳܒܳܐ ܣܕܰܪܬ ܘܰܙܟܰܝܬܳܝܗܝ. ܟܰܕ ܠܡܶܫܬܽܘܬܳܐ ܕܩܳܛܢܶܐ ܕܰܓܠܺܝܠܐܴ ܥܰܡ ܐܶܡܳܟ ܘܬܰܠܡܺܝ̈ܕܶܐ ܕܺܝܠܳܟ ܐܶܙܰܠܬ ܘܕܰܚܣ̣ܰܪ ܠܗܽܘܢ ܚܰܡܪܳܐ ܠܰܟܝܳܢܳܐ ܕܡܰܝ̈ܳܐ ܫܚܺܝ̣̈ܡܶܐ ܕܒܰܐܓܳܢ̈ܶܐ ܠܚܰܡܪܳܐ ܪܺܝܫܳܝܳܐ ܫܰܚܠܶܦܬܳܝܗܝ. ܘܟܰܕ ܕܶܝܢ ܡܶܐܬܺܝܬܳܟ ܠܰܡܕܺܝܢ̱ܬܳܐ ܕܫܳܡܪ̈ܳܝܶܐ ܬܰܪܶܨܬ: ܘܥܰܠ ܓܶܢ̱ܒ ܡܥܺܝܢܳܐ ܕܡܰܝ̈ܳܐ ܝ̣ܺܬܶܒܬ: ܘܡܰܝ̈ܳܐ ܡ̣ܶܢ ܫܳܡܪܳܝܬܳܐ ܫ̣ܶܐܠܬ: ܘܰܠܥܰܡܳܐ ܫܳܡܪܳܝܳܐ ܠܣܶܓܕܬܳܟ ܐܰܦܢܺܝܬܳܝܗܝ. ܟܰܕ ܠܰܡܫܰܪܝܳܐ ܕܰܬܠܳܬܺܝܢ ܘܰܬܡܳܢܶܐ ܫܢܺܝ̈ܢ ܡܢܰܘܰܠ ܗ̣ܘܳܐ ܒܟܺܐܒܳܐ ܒܫܽܘܐܳܠܐܴ ܕܚܽܘܠܡܳܢܳܐ ܫܰܐܶܠܬܳܝܗܝ: ܘܰܕܠܰܝܬ ܠܶܗ ܥܶܕܪܳܐ ܡ̣ܶܢ ܐ̱ܢܳܫ ܡ̣ܶܢ ܡܫܰܪܝܽܘܬܳܐ ܗ̇ܳܝ ܕܢܰܘܶܠܬܶܗ ܚܰܝܶܨܬܳܝܗܝ ܘܶܐܡ̣ܰܪܬ ܠܶܗ ܕܢܶܫܩܽܘܠ ܥܰܪܣܶܗ ܘܕܰܢܗܰܠܶܟ ܘܢܺܐܙܰܠ ܠܒܰܝܬܶܗ ܦܰܩܶܕܬܳܝܗܝ. ܟܰܕ ܠܪܽܘܚܳܐ ܛܰܢܦܳܐ ܕܥܳܡ̇ܰܪ ܗ̣ܘܳܐ ܒܓܰܒܪܳܐ ܟܦܰܪܢܰܚܽܘܡܳܝܳܐ ܘܫܳܚ̇ܶܩ ܗ̣ܘܳܐ ܠܶܗ ܛܪܰܕܬܳܝܗܝ: ܘܕܰܐܘܕܝܳܟ ܩܰܕܺܝܫܶܗ ܕܰܐܠܳܗܳܐ ܒܠܰܡ̣ܬܳܝܗܝ: ܘܡ̣ܶܢ ܗ̇ܰܘ ܓܰܒܪܳܐ ܒܚܰܝܠܐܴ ܕܦܳܩܽܘܕܽܘܬܳܟ ܐܰܦܶܩ̣ܬܳܝܗܝ: ܘܠܰܡܢܰܣܝܳܢܳܐ ܕܡܶܫܬܰܚܰܩ ܗ̣ܘܳܐ ܚܰܪܰܪܬܳܝܗܝ. ܟܰܕ ܡ̣ܶܢ ܛܽܘܪ ܙܰܝ̈ܬܶܐ ܢܚ̣ܶܬܬ: ܘܥܰܠ ܥܺܝܠܐܴ ܒܰܪ ܐܰܬܳܢܳܐ ܪܟܶܒ̣ܬ: ܘܰܒܩ̈ܳܠܰܝ ܝܰܠܽܘ̈ܕܶܐ ܘܰܒܣܰܘ̈ܟܰܝ ܙܰܝܬܳܐ ܐܶܫܬܰܒ̣ܰܚܬ ܘܰܠܟܽܠܶܗ ܛܶܟܣܳܐ ܕܝܰܥܢܽܘܬܳܐ ܡ̣ܶܢ ܗܰܝܟܠܐܴ ܐܰܦܶܩ̣ܬܳܝܗܝ: ܟܰܕ ܠܦܶܨܚܳܐ ܗ̇ܰܘ ܪܰܡܫܳܝܳܐ ܥܰܡ ܬܰܠܡܺܝ̈ܕܶܐ ܕܺܝܠܳܟ ܐܶܟ̣ܰܠܬܳܝܗܝ: ܘܰܠܝܽܘܕܳܐ ܩܳܛܽܘܠܐܴ ܩܕܳܡ ܬܰܠܡܺܝ̈ܕܶܐ ܪ̈ܶܓܠܰܘܗܝ ܐܰܫܺܝܓܬܳܝܗܝ: ܘܒܰܢܣܺܝܒܽܘܬܳܐ ܕܦܰܓܪܳܐ ܘܰܕܡܳܐ ܫܰܘܬܶܦܬܳܝܗܝ. ܘܰܒܠܰܚܡܳܐ ܨܒܺܝܥܳܐ ܕܝܰܗ̣ܒܬ ܠܶܗ ܦܰܪܣܺܝܬܳܝܗܝ. ܟܰܕ ܠܒܶܝܬ ܚܰܢܳܢ ܘܩܰܝܳܦܳܐ ܒܢܰܦܛܺܝܪ̈ܶܐ ܐܶܬܬܰܘܒܰܠ̣ܬ: ܘܢܶܓ̈ܕܶܐ ܐܶܬܢܰܓܰܕܬ: ܘܰܠܦܺܝܠܰܛܳܘܣ ܒܝܰܕ ܚܶܠܡܳܐ ܕܰܐܢ̱ܬܬܳܐ ܕܺܝܠܶܗ ܫܶܠܚܰܬ݀ ܠܶܗ ܒܰܠܗܺܝܬܳܝܗܝ: ܘܰܒܡܰܝ̈ܳܐ ܕܰܫܐܶܠ ܘܰܐܫܺܝܓ ܐܺܝ̈ܕܰܘܗܝ ܡ̣ܶܢ ܥܰܘܠܶܗ ܚܰܣܺܝܬܳܝܗܝ: ܟܰܕ ܒܰܦܫܳܛ ܐܺܝ̈ܕܰܝܟ ܕܥܰܠ ܩܰܝܣܳܐ ܠܟܽܠܳܗ̇ ܒܪܺܝܬܳܐ ܢ̣ܓܰܕܬ ܠܣܶܓܕܬܳܟ: ܘܡ̣ܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܐܶܬܥܰܦܺܝܬ: ܘܰܠܗ̇ܰܘ ܕܰܪܡܶܐ ܗ̣ܘܳܐ ܒܗܳܡܳܢ ܕܡܺܝ̈ܬܶܐ ܢܰܚܶܡܬܳܝܗܝ. ܟܰܕ ܒܰܩܝܳܡܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܠܓܽܘܕܳܐ ܕܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܐܰܦ̣ܨܰܚܬ: ܘܰܒܗ̇ܳܝ ܕܶܐܡ̣ܰܪܬ ܠܡܰܪܝܰܡ ܕܙܶܠܝ ܐܶܡ̣ܰܪܝ ܠܟܺܐܦܳܐ ܕܗܳܐ ܩ̇ܳܕܶܡ ܐ̱ܢܳܐ ܠܟܽܘܢ ܠܰܓܠܺܝܠܐܴ ܠܽܘܒܳܒܳܐ ܐܰܩܢܺܝܬܳܝܗܝ: ܘܟܰܕ ܗܳܫܳܐ ܠܳܟ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܐܳܘ ܡܳܪܝܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ. ܕܰܠܪ̈ܺܝܫܰܝ ܟܳܗ̈ܢܶܐ ܘܟܳܗ̈ܢܶܐ ܬܙܰܗܶܐ ܒܛܰܝܒܽܘܬܳܟ ܘܠܰܡܫܰܡ̈ܫܳܢܶܐ ܬܢܰܟܶܦ: ܘܰܠܓܰܒܪ̈ܶܐ ܘܰܠܢܶܫ̈ܶܐ ܬܒܰܪܶܟ. ܘܠܰܛܠܺܝ̣̈ܡܶܐ ܘܰܥܠܺܝ̣̈ܒܶܐ ܬܫܰܘܙܶܒ: ܘܠܐܱܣܺܝܪ̈ܶܐ ܘܰܚܒܺܝ̣̈ܫܶܐ ܬܚܰܪܰܪ: ܘܰܠܟܽܠ ܩܰܘ̈ܡܳܢ ܘܡܽܘ̈ܫܚܳܢ ܒܰܡܝܰܬܪ̈ܳܬܳܐ ܠܗܽܘܢ ܬܫܰܘܫܶܛ: ܘܰܠܟܽܠܰܢ ܠܚܰܪܬܳܐ ܛܳܒܬܳܐ ܕܫܳܦܪܳܐ ܠܰܫܡܳܟ ܩܰܕܺܝܫܳܐ ܬܫܰܟܶܢ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܠܒܽܘܣܳܡܳܐ ܕܰܒܡܰܠܟܽܘܬܳܟ ܐܰܫܘܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܥܛܪܐ

ܠܐܴ ܡܳܪܝ ܬܰܣܠܐܷ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܠܳܟ ܝܰܘܡܳܢܳܐ: ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܥܺܐܕܳܐ ܕܰܡܕܰܒܪܳܢܽܘܬܳܟ: ܠܐܴ ܢܶܗܘܶܐ ܐܰܝܟ ܦܺܝܪܡܳܐ ܕܰܒܢܰܝ̈ܳܐ ܡܡܰܪܡܪ̈ܳܢܶܐ ܕܳܐܬܳܢ ܘܕܰܐܒܺܝܪܰܐܡ. ܐܶܠܐܴ ܢܶܗܘܶܐ ܩܕܳܡܰܝܟ ܘܢܶܬܩܰܒܰܠ ܐܰܝܟ ܦܺܝܪܡܳܐ ܐܰܗܪܽܘܢܳܝܳܐ ܗ̇ܰܘ ܕܰܒܣܶܡ ܠܡܳܪܽܘܬܳܟ ܘܰܠܡܰܘܬܳܢܳܐ ܟܠ̣ܰܝܬ ܒܶܗ ܡ̣ܶܢ ܥܰܡܳܐ ܐܺܝܣܰܪܠܳܝܳܐ: ܟܠܺܝ ܡܶܢܰܢ ܡܳܪܝܳܐ ܐܠܰܗܳܐ ܠܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܫܰܝܶܢ ܐܰܪܥܳܐ ܥܰܡ ܥܳܡܽܘܪ̈ܶܝܗ̇: ܘܒܰܪܶܟ ܟܠܺܝܠܐܴ ܕܫܰܢ̱ܬܳܐ ܒܛܰܝܒܽܘܬܳܟ ܡܳܪܰܢ܀

 

ܚܘܬܡܐ

ܚܰܝܠܐܴ ܠܐܴ ܡܶܬܡܰܚܠܳܢܳܐ ܕܒܶܗ ܐܶܬܚܰܝܰܠܘ ܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܥܳܠܰܡ: ܘܒܶܗ ܐܶܫܬܰܪܰܪܘ ܫܠܺܝ̈ܚܶܐ ܒܶܝܬ ܥܰܡ̈ܡܶܐ: ܘܰܢܚ̣ܶܬ ܘܥܰܡ ܣܳܗ̈ܕܶܐ ܠܐܱܓܽܘ̈ܢܰܝܗܽܘܢ: ܗ̣ܽܘ ܢܶܗܘܶܐ ܫܽܘܪܳܐ ܪܳܡܳܐ ܠܥܺܕܬܳܐ ܘܰܠܝܰܠܕ̈ܶܝܗ̇: ܘܢܽܘܛܳܪܳܐ ܘܦܽܘܨܳܝܳܐ ܕܡ̣ܶܢ ܟܽܠܗܶܝܢ ܐܶܪ̈ܶܣܺܝܣ: ܘܠܽܘܒܳܒܳܐ ܘܣܽܘܝܳܥܳܐ ܠܟܽܠܗܽܘܢ ܐܰܚܰܝ̈ܢ ܡܗܰܝ̈ܡܢܶܐ ܕܰܥܢ̣ܰܕܘ ܒܰܬܪܺܝܨܽܘܬ ܫܽܘܒܚܳܐ ܠܥܳܠܡܺܝܢ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܩܰܕܺܝܫܳܐ ܘܰܡܩܰܕܫܳܢܳܐ ܕܛܰܡ̈ܶܐܐ ܕܩܰܕܺܝܫܳܐܺܝܬ ܡ̣ܶܢ ܣܪ̈ܳܦܶܐ ܩܰܕܺܝ̈ܫܶܐ ܒܝܰܕ ܩܽܘ̈ܕܳܫܶܐ ܕܟܰܝ̈ܳܐ ܒܗܽܘܠܳܠܰܝ̈ܗܽܘܢ ܡܶܬܩܰܕܰܫ: ܠܗ̇ܰܘ ܨܶܡܚܳܐ ܢܰܗܺܝܪܳܐ ܘܡܰܢܗܪܳܢܳܐ ܕܡ̣ܶܢ ܪܺܝܫܳܐ ܕܨܶܡܚܳܐ ܐܠܰܗܳܝܳܐ ܫܰܪܺܝܪܳܐܺܝܬ ܨܡ̣ܰܚ: ܘܰܠܟܽܠܗܶܝܢ ܒܶܪ̈ܝܳܬܳܐ ܒܨܶܡ̈ܚܶܐ ܕܪܰܒܽܘܬܶܗ ܐܰܨܡܰܚ ܠܗ̇ܰܘ ܦܳܪܽܘܩܳܐ ܕܒܰܕܡܳܐ ܕܰܩܢܽܘܡܶܗ ܠܰܓܒܺܝܠܬܶܗ ܡ̣ܶܢ ܐܺܝ̈ܕܰܝ ܒܥܶܠܕ̈ܒܳܒܶܐ ܦ̣ܪܰܩ: ܘܒܰܫܠ̣ܳܚ ܒܶܣܪܶܗ ܦܰܪܣܺܝ ܠܐܱܪ̈ܟܰܐܣ ܘܰܠܫܰܠܺܝ̣̈ܛܳܢܶܐ ܕܥܳܠܡܳܐ ܚܶܫܽܘܟܳܝܳܐ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ܀

 

ܣܕܪܐ

ܫܽܘܒܚܳܐ ܠܟܰܣܝܳܐ ܕܰܠܟܰܣܝܽܘܬܶܗ ܐܰܝܟ ܕܰܫܦ̣ܰܪ ܠܶܗ ܓܠܐܴ: ܘܰܓܢܺܝܙܳܐ ܘܠܐܴ ܡܶܬܚܰܙܝܳܢܳܐ ܕܰܒܡܶܬܓܰܫܡܳܢܽܘܬܶܗ ܦܰܓܪܳܢܳܝܬܳܐ ܗ̣ܽܘ ܠܶܗ ܚܰܘܺܝ ܠܓܶܢܣܳܐ ܥܰܦܪܳܢܳܐ ܘܰܡܚܺܝܠܐܴ: ܒܳܪܽܘܝܳܐ ܕܥܳܠܡ̈ܶܐ ܘܓܳܒܽܘܠܐܴ ܕܒܶܪ̈ܝܳܬܳܐ ܕܶܐܬܳܐ ܒܰܚܢܳܢܶܗ ܠܡܶܬܥܰܛܳܦܽܘ ܕܡܽܘܬܳܐ ܥܰܒܕܳܢܳܝܬܳܐ ܕܰܠܒܶܣܪ̈ܳܢܶܐ ܡ̣ܶܢ ܚܰܫ̈ܶܐ ܕܒܶܣܪܳܐ ܢܚܰܪܰܪ: ܓܰܐܝܳܐ ܕܡܶܬܓܰܝܶܐܐ ܥܰܠ ܟܽܘܪܣܰܝ ܪܰܒܽܘܬܶܗ ܡܪܰܝܰܡ ܒܰܡܬܽܘܡܳܝܽܘܬܶܗ ܘܰܠܒ̣ܶܫ ܦܰܓܪܶܗ ܕܳܐܕܳܡ ܕܰܠܨܰܠܡܶܗ ܡܰܠܟܳܝܳܐ ܢܶܦܪܽܘܩ ܒܛܰܝܒܽܘܬܶܗ. ܥܶܠܳܝܳܐ ܕܶܐܬܗܰܦܰܟ ܥܰܡ ܬܰܚܬܳܝ̈ܶܐ ܕܰܠܬܰܚܬܳܝܽܘܬܳܐ ܕܰܩܢܽܘܡܰܝ̈ܗܽܘܢ ܢܥܰܠܐܷ ܡ̣ܶܢ ܡܶܬܢܰܚܬܳܢܽܘܬܳܐ ܥܰܦܪܳܢܳܝܬܳܐ: ܕܠܰܡܥܰܠܝܽܘܬܳܐ ܐܠܰܗܳܝܬܳܐ ܢܰܣܶܩ ܒܰܚܢܳܢܶܗ ܡܰܟܺܝܟܳܐ ܕܰܒܡܽܘܟܳܟܶܗ ܡܫܰܒܚܳܐ ܠܡܰܟܺܝ̣̈ܟܰܝ ܬܰܪܥܺܝܬܳܐ ܪܰܡܪܶܡ: ܘܰܒܢܺܝ̣̈ܚܶܐ ܫ̇ܳܪܶܐ ܘܡܶܬܬܢܺܝܚ. ܘܰܒܬܶܐܘܳܪܺܝܰܐ ܕܫܽܘܒܚܶܗ ܡܒܰܣܶܡ ܠܗܽܘܢ ܢܽܘܗܪܳܐ ܡܰܢܗܪܳܢܳܐ ܕܟܳܪܽܘܙܽܘܬܳܐ ܠܟܽܠ ܥܰܡ̈ܡܺܝܢ ܕܰܫܒܶܝܢ ܗ̣ܘܰܘ ܠܘܳܬ ܢܽܘܗܪܳܐ ܕܺܝܕܰܥܬܶܗ ܩܰܪܶܒ. ܘܰܠܗܽܘܢ ܐܰܢܗܰܪ. ܬܶܗܪܳܐ ܐܶܚܰܕ ܠܥܶܠܳܝ̈ܶܐ ܟܰܕ ܚܙܰܐܘܽܘܗܝ ܠܒܺܝܫ ܕܡܽܘܬܶܗ ܕܳܐܕܳܡ: ܘܥܰܡ ܒܢ̈ܰܝ ܛܰܡ̈ܶܐܐ ܡܶܛܽܠ ܦܽܘܪܩܳܢܗܽܘܢ ܡܶܬܗܰܦܰܟ ܗ̣ܘܳܐ. ܬܶܗܪܳܐ ܐܶܚ̣ܰܕ ܠܥܶܠܳܝ̈ܶܐ ܟܰܕ ܚܙܰܐܘܽܘܗܝ ܕܒܽܐܘܪܝܳܐ ܫܺܝܛܳܐ ܡܥܰܛܰܦ: ܗ̇ܰܘ ܕܰܥܛܺܝܦ ܓܽܘܡܪ̈ܰܝ ܢܽܘܪܳܐ: ܬܶܗܪܳܐ ܪܰܒܳܐ ܘܬܶܡܗܳܐ ܠܒ̣ܶܫܘ ܥܶܠܳܝ̈ܶܐ ܕܰܚܙܰܐܘܽܘܗܝ ܕܰܐܝܟ ܚܰܝܳܒܳܐ ܘܰܣܢܺܝܩܳܐ ܠܘܳܬ ܝܽܘܚܰܢܳܢ ܐܶܬܳܐ ܕܢܶܥܡܰܕ: ܗ̇ܰܘ ܕܰܪܩ̣ܰܥ ܐܰܪܥܳܐ ܥܰܠ ܡܰܝ̈ܳܐ ܘܰܠܠܐܴ ܡܝܰܬܰܒܬܳܐ ܝܰܬܶܒ ܘܫܰܬܶܐܣ. ܬܡ̣ܰܗܘ ܪ̈ܽܘܚܳܢܶܐ ܟܰܕ ܚܙܰܐܘܽܘܗܝ ܕܥܰܡ ܣܳܛܳܢܳܐ ܒܥܶܠܕܒܳܒܳܐ ܕܓܶܢܣܳܐ ܐ̱ܢܳܫܳܝܳܐ ܡܰܩܪܶܒ: ܘܕܽܘܫܳܐ ܩܕܳܡ ܪ̈ܶܓܠܐܷ ܕܪ̈ܰܚ̇ܡܰܘܗܝ ܘܢܳܛܪ̈ܰܝ ܦܽܘܩܕܳܢܶܗ ܥܰܒܕܶܗ: ܬܶܗܪܳܐ ܘܕܽܘܡܳܪܳܐ ܐܶܬܥܰܛܰܦ ܗ̣ܘܳܐ ܥܰܡܳܐ ܐܺܝܣܰܪܐܠܳܝܳܐ ܟܰܕ ܚ̇ܳܙܶܐ ܗ̣ܘܳܐ ܠܶܗ ܕܰܡܕܰܟܶܐ ܠܓܰܪ̈ܒܶܐ: ܘܰܡܫܰܪܰܪ ܠܰܡܫܰܪ̈ܰܝܳܐ ܘܰܡܚܰܪܰܪ ܠܕܰܝ̈ܘܳܢܶܐ: ܘܰܡܢܰܚܶܡ ܠܡܺܝ̈ܬܶܐ: ܬܶܗܪܳܐ ܘܕܽܘܡܳܪܳܐ ܐܶܚ̣ܰܕ ܠܰܬܠܳܬܳܐ ܡ̣ܶܢ ܬܰܠܡܺܝ̈ܕܶܐ ܒܛܽܘܪ ܬܳܒܽܘܪ: ܟܰܕ ܡ̣ܶܢ ܒܶܨܪܳܐ ܩܰܠܺܝܠ ܕܫܽܘܒܚܶܗ ܓܠܐܴ ܠܗܽܘܢ: ܘܰܒܩܳܠܶܗ ܕܰܐܒܳܐ ܕܰܐܙܥܶܩ ܕܗܳܢܰܘ ܒܶܪܝ ܚܰܒܺܝܒܝ ܒܰܠܗܺܝ ܐܶܢܽܘܢ. ܬܶܗܪܳܐ ܐܶܚ̣ܰܕ ܠܰܫܡܰܝ̈ܳܢܶܐ ܟܰܕ ܚܙܰܐܘܽܘܗܝ ܕܥܰܠ ܥܺܝܠܐܴ ܪܟܺܝܒ ܘܥܳܐܶܠ ܠܐܘܪܫܠܶܡ: ܘܰܒܩ̈ܳܠܐܷ ܫܦܰܝ̈ܳܐ ܕܫܰܒܪ̈ܶܐ ܘܝܰܠܽܘ̈ܕܶܐ ܡܶܬܩܰܠܰܣ ܗ̇ܰܘ ܕܰܒܩܺܝ̣̈ܢܳܬܳܐ ܚܰܠܝ̈ܳܬܳܐ ܕܩܳܠܰܝ̈ܗܽܘܢ ܡܶܬܢܰܨܰܪ. ܬܶܗܪܳܐ ܘܕܽܘܡܳܪܳܐ ܕܡܶܛܽܠ ܦܽܘܪܩܳܢܰܢ ܠܡܽܘܟܳܟܳܐ ܘܣܽܘܪܳܩܳܐ ܨܶܒܝܳܢܳܝܳܐ ܐܶܬܳܐ: ܘܰܟܠܺܝܠ ܟܽܘ̈ܒܶܐ ܩܰܒܶܠ: ܕܰܠܠܰܘܛܬܳܐ ܢܶܥܩܽܘܪ: ܘܚܰܠܐܴ ܘܰܡܪܳܪ̈ܶܐ ܐܶܫܬܺܝ ܕܰܠܡܰܪܺܝܪܽܘܬܳܐ ܕܰܚܛܳܗܰܝ̈ܢ ܢܒܰܣܶܡ: ܬܶܗܪܳܐ ܘܕܽܘܡܳܪܳܐ ܕܰܩܕܳܡ ܦܺܝܠܰܛܳܘܣ ܐܰܝܟ ܚܰܝܳܒܳܐ ܐܶܫܬܰܐܠ ܗ̣ܘܳܐ: ܘܡ̣ܶܢ ܗܶܪܳܘܕܶܣ ܐܰܝܟ ܕܰܨܒ̣ܳܐ ܐܶܬܬܫܺܝܛ ܘܡ̣ܶܢ ܩܰܝܳܦܳܐ ܘܚܰܒܪ̈ܰܘܗܝ ܐܶܬܒܰܙܰܚ: ܘܡ̣ܶܢ ܬܰܠܡܺܝܕܳܐ ܙܺܐܦܳܢܳܐ ܐܶܙܕܰܒܰܢ: ܘܒܰܝܢܳܬ ܬܪܶܝܢ ܓܰܝ̈ܳܣܶܐ ܐܶܙܕܩܶܦ. ܬܶܗܪܳܐ ܘܕܽܘܡܳܪܳܐ ܕܰܒܩܰܒܪܳܐ ܐܶܬܥܰܦܺܝ ܘܶܐܬܚܰܢܰܛ ܘܶܐܬܬܣܺܝܡ: ܘܰܠܒܶܝܬ ܡܺܝ̈ܬܶܐ ܢܚ̣ܶܬ: ܘܰܠܟܺܐܢ̈ܶܐ ܘܙܰܕܺܝ̈ܩܶܐ ܕܰܫܟܺܝܒܺܝܢ ܗ̣ܘܰܘ ܘܰܡܣܰܟܶܝܢ ܗ̣ܘܰܘ ܠܶܗ ܣܥ̣ܰܪ: ܘܠܐܴܕܳܡ ܨܰܠܡܶܗ ܡ̣ܶܢ ܚܶܙܶܝ̈ܗ̇ ܕܰܫܝܽܘܠ ܢܰܦܶܨ ܘܕܰܐܠܺܝ: ܬܶܗܪܳܐ ܘܕܽܘܡܳܪܳܐ ܥܒ̣ܰܕ ܒܰܩܝܳܡܬܶܗ ܕܡ̣ܶܢ ܓܰܘ ܩܰܒܪܳܐ ܠܪ̈ܳܚܡܰܘܗܝ ܐܰܩܺܝܡ ܥܰܡܶܗ: ܘܠܰܒ̈ܢܰܝ ܐ̱ܪܳܙܶܗ ܒܢܽܘܚܳܡܳܐ ܕܺܝܠܶܗ ܚܰܕܺܝ ܘܰܐܦܨܰܚ ܘܰܠܥܰܡܳܐ ܕܨܳܠܽܘ̈ܒܶܐ ܟܰܐܐܰܪ ܘܰܐܒܗ̣ܶܬ: ܐܳܘ ܠܬܶܗܪܳܐ ܘܰܠܕܽܘܡܳܪܳܐ ܕܰܒܝܰܘ̈ܡܳܬܳܐ ܗ̇ܳܢܽܘܢ ܕܒܳܬܰܪ ܩܝܳܡܬܶܗ ܒܰܙܒܰܢ ܙܒܰܢ ܠܬܰܠܡܺܝ̈ܕܰܘܗܝ ܡܶܬܚܰܘܶܐ ܗ̣ܘܳܐ: ܘܥܰܠ ܩܝܳܡܬܶܗ ܡܫܰܪܰܪ ܗ̣ܘܳܐ ܠܗܽܘܢ: ܘܰܒܣܽܘܠܳܩܶܗ ܕܡ̣ܶܢ ܐܰܪܥܳܐ ܠܰܫܡܰܝܳܐ ܠܪܶܥܝܳܢܗܽܘܢ ܡ̣ܶܢ ܐܰܪ̈ܥܳܢܳܝܳܬܳܐ ܡܥܰܠܐܷ ܗ̣ܘܳܐ ܘܰܒܡܰܘܬܒܶܗ ܕܡ̣ܶܢ ܝܰܡܺܝܢ ܐܰܒܽܘܗܝ ܠܪܽܘܚܳܐ ܩܰܕܺܝܫܳܐ ܥܠܰܝܗܽܘܢ ܡܫܰܕܰܪ ܗ̣ܘܳܐ. ܘܰܚܢܰܢ ܡܚܺܝ̣̈ܠܐܷ ܘܚܰܛܳܝ̈ܶܐ ܕܰܒܬܶܗܪܳܐ ܪܰܒܳܐ ܩܳܝܡܺܝܢܰܢ: ܘܕܽܘܡܳܪܳܐ ܡܶܬܡܠܶܝܢܰܢ ܘܰܐܚܺܝܕܺܝܢܰܢ: ܥܰܠ ܐܰܦ̈ܰܝ ܟܽܠܗܶܝܢ ܕܰܣܥ̣ܰܪܬ ܠܘܳܬܰܢ ܐܳܘ ܕܽܘܡܳܪܳܐ ܘܓܰܢ̱ܒܳܪܳܐ ܕܥܳܠܡ̈ܶܐ. ܘܒܳܥܶܝܢܰܢ ܡ̣ܶܢ ܝܰܡܳܐ ܫܦܺܝܥܳܐ ܕܰܡܪܰܚܡܳܢܽܘܬܳܟ ܕܰܠܕܳܘܝܽܘܬܰܢ ܬܶܣܥܽܘܪ: ܘܡ̣ܶܢ ܥܰܒܕܽܘܬܳܐ ܣܳܛܳܢܳܝܬܳܐ ܠܰܢ ܬܚܰܪܰܪ: ܘܡ̣ܶܢ ܡܫܰܪܝܽܘܬܳܐ ܗ̇ܳܝ ܕܢܰܦܫܳܐ ܘܰܕܦܰܓܪܳܐ ܠܰܢ ܬܫܰܪܰܪ: ܘܡ̣ܶܢ ܢܶܟ̈ܝܳܢܶܐ ܘܡ̣ܶܢ ܣܽܘܓܦܳܢ̈ܶܐ ܕܰܒܥܶܠܕܒܳܒܳܐ ܠܰܢ ܬܢܰܛܰܪ. ܘܠܰܢ ܘܰܠܥܰܢܺܝ̈ܕܰܝܢ ܐܰܫܘܳܐ ܕܡ̣ܶܢ ܓܰܒܳܐ ܕܺܝܠܳܟ ܗ̇ܰܘ ܝܰܡܺܝܢܳܝܳܐ ܢܩܽܘܡ: ܒܰܥܢ̈ܳܢܶܐ ܕܢܽܘܗܪܳܐ ܠܐܴ ܥܳܒܽܘܪܳܐ ܘܠܐܴ ܡܶܫܬܰܪܝܳܢܳܐ ܠܐܘܪܥܳܐ ܢܰܨܺܝܚܳܐ ܕܡܶܐܬܺܝܬܳܟ ܢܶܦܽܘܩ ܟܰܕ ܚܳܕܶܝܢܰܢ: ܘܰܠܚܽܘܣܳܝܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܢܶܫܬܘܶܐ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ: ܕܰܒܡܶܠܬܶܗ ܒ̣ܪܳܐ ܘܰܐܬܩܶܢ ܠܟܽܠܗܶܝܢ ܒܶܪ̈ܝܳܬܳܐ: ܘܠܰܡܠܺܝ̣̈ܠܐܷ ܐܰܩܺܝܡ ܥܰܠ ܬܶܫܒܽܘܚܬܳܐ ܕܥܰܡܶܗ ܩܰܕܺܝܫܳܐ: ܠܗ̇ܰܘ ܣܰܒܪܳܐ ܕܥܰܡ̈ܡܶܐ ܘܣܽܘܟܳܝܳܐ ܕܟܽܠܗܶܝܢ ܐܶܡܘ̈ܳܬܳܐ ܕܰܒܣܰܒܪܳܐ ܕܟܳܪܽܘܙܽܘܬܶܗ ܠܟܽܠ ܐ̱ܢܳܫ ܣܡ̣ܰܟ ܒܝܰܕ ܣܰܒܪܳܐ ܕܚܰܝܰܬ݀ ܡܺܝ̈ܬܶܐ: ܠܗ̇ܰܘ ܡܥܺܝܢܳܐ ܕܚܰܝ̈ܶܐ ܘܪ̈ܰܚܡܶܐ: ܘܡܰܒܽܘܥܳܐ ܕܟܽܠ ܛܳܒ̈ܳܬܳܐ ܕܰܐܫܦܰܥ ܪ̈ܰܚܡܰܘܗܝ ܥܰܠ ܓܒܺܝܠܬܶܗ ܘܰܐܓܺܝܚ ܡܶܢܶܗ ܝܰܡܳܐ ܕܡܳܡܽܘ̈ܠܰܘܗܝ ܥܰܠ ܡܰܪܥܺܝܬܶܗ ܦܪܺܝܩܰܬ݀ ܒܰܨܠܺܝܒܶܗ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܫܽܘܒܚܳܐ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܫܶܡܫܳܐ ܕܙܰܕܺܝܩܽܘܬܳܐ ܕܡ̣ܶܢ ܥܽܘܒܳܐ ܕܰܐܒܳܐ ܕܢܽܘܗܪܳܐ ܩܕܳܡ ܛܽܘܪ̈ܶܐ ܘܥܶܕ̈ܳܢܶܐ ܨܡܰܚ̣ܬ ܠܰܢ: ܘܰܒܚܰܪܬܳܐ ܕܙܰܒ̈ܢܶܐ ܘܫܽܘܠܳܡܳܐ ܕܝܰܘ̈ܡܳܬܳܐ ܡ̣ܶܢ ܥܽܘܒܳܐ ܒܬܽܘܠܳܝܳܐ ܕܰܒܬܽܘܠܬܳܐ ܡܰܪܝܰܡ ܠܥܳܠܡܳܐ ܚܶܫܽܘܟܳܐ ܕܢܰܚ̣ܬ ܘܰܒܦܰܓܪܳܐ ܐ̱ܢܳܫܳܝܳܐ ܕܶܐܬܥܰܛܰܦ̣ܬ ܠܐܴܕܳܡ ܨܰܠܡܳܐ ܕܰܐܠܳܗܽܘܬܳܟ ܡ̣ܶܢ ܐܺܝ̈ܕܰܝ ܒܥܶܠܕܒܳܒܳܐ ܦ̣ܪܰܩܬ ܘܫܰܘܙܶܒ̣ܬ: ܘܰܒܟܽܠܗܶܝܢ ܬܡܺܝ̣̈ܗܳܬܳܐ ܡܥܰܠܝ̈ܳܬܳܐ ܕܰܣܥ̣ܰܪܬ ܠܘܳܬܰܢ ܘܰܠܘܳܬ ܓܶܢܣܰܢ ܚܰܠܳܫܳܐ ܦܽܘܪܩܳܢܳܐ ܓܡܺܝܪܳܐ ܥܒ̣ܰܕܬ: ܘܰܒܟܽܠܗܽܘܢ ܗܽܘܦܳܟܰܝ̈ܟ ܡܰܠܝ̈ܰܝ ܬܶܗܪܳܐ ܕܥܰܡ ܐܰܪ̈ܥܳܢܶܐ ܠܕܽܘܟܳܝܳܐ ܕܨܰܠܡܳܟ ܝܰܩܺܝܪܳܐ ܕܡ̣ܶܢ ܟܽܠܗܶܝܢ ܨܰܥܠܰܘ̈ܳܬܳܐ ܐܶܬܚܰܫܰܚ̣ܬ: ܘܰܒܫܽܘܫܳܛܳܐ ܘܬܰܪܒܺܝܬܳܐ ܕܟܽܠܳܗ̇ ܩܰܘܡܬܳܐ ܓܰܒܪܳܢܳܝܬܳܐ ܠܦܽܘܩܕܳܢܳܐ ܗ̇ܰܘ ܡܽܘܫܳܝܳܐ ܢ̣ܛܰܪܬ: ܘܰܒܩܰܘܡܬܳܐ ܗ̇ܳܝ ܬܠܺܝܬܳܝܬܳܐ ܕܰܬܠܳܬܺܝܢ ܫܢܺܝ̣̈ܢ ܒܡܰܠܦܳܢܽܘܬܳܐ ܡܰܠܝܰܬ݀ ܚܰܝ̈ܶܐ ܫܪܰܝܬ. ܘܰܐܝܟ ܐܰܟܳܪܳܐ ܚܰܟܺܝܡܳܐ ܒܶܐܕ̈ܢܶܐ ܕܫܳܡܽܘ̈ܥܶܐ ܠܙܰܪܥܳܟ ܕܚܰܝ̈ܶܐ ܙܪܰܥ̣ܬ. ܟܰܕ ܠܝܽܘܚܰܢܳܢ ܕܰܐܟ̣ܪܶܙ ܥܠܰܝܟ ܕܗܳܢܰܘ ܐܶܡܪܶܗ ܕܰܐܠܳܗܳܐ ܗ̇ܰܘ ܕܫܳܩ̇ܶܠ ܚܛܺܝܬܶܗ ܕܥܳܠܡܳܐ ܩܰܠܶܣ̣ܬ: ܘܕܶܐܡ̣ܰܪ ܠܐܱܝܠܶܝܢ ܕܥܳܡܕܺܝܢ ܡܶܢܶܗ: ܕܗܳܢܰܘ ܗ̇ܰܘ ܕܶܐܡ̇ܶܪܬ ܕܪܰܒ ܗ̣ܽܘ ܡܶܢܝ: ܘܰܗ̣ܘܳܐ ܠܶܗ ܩܕܳܡܰܝ. ܘܒܳܬܰܪ ܐܶܬܳܐ ܠܥܺܢܰܝ̈ܗܽܘܢ ܢܰܨܰܚ̣ܬ ܘܠܰܡܣܳܡ ܐܺܝܕܳܐ ܕܥܰܠ ܪܺܝܫܳܟ ܐܰܫܘܺܝܬ. ܟܰܕ ܠܡܰܥܡܕܳܢܳܐ ܘܟܳܪܽܘܙܳܐ ܫܰܪܺܝܪܳܐ ܕܰܩܕܳܡܰܝܟ ܘܚܰܙܳܝܳܐ ܕܪܽܘܚܳܐ: ܘܫܳܡܽܘܥܳܐ ܕܒܰܪܬ݀ ܩܳܠܐܴ ܕܰܐܒܳܐ: ܘܡܰܥܡܕܳܢܳܐ ܕܪܰܒܽܘܬܳܟ ܐܰܫܘܺܝܬ. ܘܰܕܠܐܴ ܩܳܡ ܒܺܝܠܺܝ̣̈ܕܰܝ ܢܶܫ̈ܶܐ ܕܪܰܒ ܡ̣ܶܢ ܝܽܘܚܰܢܳܢ ܩܕܳܡ ܟܽܠ ܐ̱ܢܳܫ ܐܰܟ̣ܪܶܙܬ. ܟܰܕ ܠܰܡܫܰܪܝܳܐ ܕܡ̣ܶܢ ܟܺܐܒܳܐ ܡܰܪܺܝܪܳܐ ܕܢܰܘܠܶܗ ܢܽܘܓܪܳܐ ܐܰܚܠ̣ܶܡܬ: ܘܰܒܓܰܘ ܗܰܝܟܠܐܴ ܕܰܫܠܶܝܡܽܘܢ ܠܶܗ ܐܶܫܟ̣ܰܚܬ: ܘܰܕܗܳܐ ܚܠܺܝܡ ܐܰܢ̱ܬ ܠܐܴ ܬܽܘܒ ܬܶܚܛܶܐ ܕܠܐܴ ܢܶܗܘܶܐ ܠܳܟ ܡܶܕܶܡ ܕܒܺܝܫ ܡ̣ܶܢ ܩܰܕܡܳܝܳܐ ܙܰܗ̣ܰܪܬ. ܟܰܕ ܠܛܽܘܪܳܐ ܥܰܡ ܬܰܠܡܺܝ̈ܕܰܝܟ ܣܠ̣ܶܩܬ. ܘܰܠܚܰܡܫܳܐ ܐܠܰܦܺܝ̣̈ܢ ܓܰܒܪ̈ܺܝܢ ܒܡܰܠܦܳܢܽܘܬܳܟ ܐܰܬܗ̣ܰܪܬ ܐܶܢܽܘܢ: ܘܰܕܢܶܣܬܰܡܟܽܘܢ ܥܰܠ ܥܶܣܒܳܐ ܣܡܳܟܺܝ̈ܢ ܣܡܳܟܺܝ̈ܢ ܦܩ̣ܰܕܬ: ܘܰܠܚܰܡܶܫ ܓܪ̈ܺܝܨܳܢ ܕܠܰܚܡܳܐ ܘܰܬܪܶܝܢ ܢܽܘ̈ܢܺܝܢ ܕܰܩܨܳܝ̈ܶܐ ܫܩ̣ܰܠܘ ܬܰܠܡܺܝ̈ܕܶܐ: ܒܳܬܰܪ ܗ̇ܳܝ ܣܰܒܥܽܘܬܳܐ: ܘܰܠܥܰܡܳܐ ܗ̇ܰܘ ܕܰܢܩ̣ܶܦ ܠܳܟ ܒܪܰܒܽܘܬ ܬܶܕܡܪ̈ܳܬܳܟ ܡܥܰܠܝ̈ܳܬܳܐ ܘܪ̈ܳܡܰܝ ܡ̣ܶܢ ܡܶܠܬܳܐ ܐܰܬܡ̣ܰܗܬ: ܟܰܕ ܠܢܰܐܺܝܢ ܡܕܺܝܢ̱ܬܳܐ ܥܰܡ ܟܶܢܫܳܐ ܕܬܰܠܡܺܝ̈ܕܰܝܟ ܣܥ̣ܰܪܬ: ܘܰܠܛܰܠܝܳܐ ܕܺܝܚܺܝܕܳܝܳܐ ܗ̣ܘܳܐ ܠܐܷܡܶܗ ܒܢܽܘܚܳܡܶܗ ܐܰܦ̣ܨܰܚܬ: ܘܰܒܩܳܠܐܴ ܕܰܐܙܥܶܩ̣ܬ ܠܘܳܬܶܗ ܕܩܽܘܡ ܢܰܚ̣ܶܡܬ: ܘܟܰܕ ܬܪܰܨ ܘܺܝܬܶܒ ܠܐܷܡܗ ܡܓܰܙܰܝܬܳܐ ܝܰܗ̣ܒܬ. ܟܰܕ ܒܰܡܕܺܝܢ̱ܬܳܐ ܗܳܕܶܐ ܬܽܘܒ ܐܶܣܬܰܡܰܟ̣ܬ: ܘܰܐܢ̱ܬܬܳܐ ܚܰܛܳܝܬܳܐ ܕܰܒܫܳܛܺܝܦܬܳܐ ܕܒܶܣ̈ܡܶܐ ܠܘܳܬܳܟ ܐܶܬܳܬ݀ ܘܰܒܕܶܡ̈ܥܶܐ ܨܰܒܥܰܬ݀ ܪ̈ܶܓܠܰܝܟ. ܘܰܒܣܰܥܪܳܗ̇ ܫܰܘܝܰܬ݀ ܐܶܢܶܝܢ: ܘܥܰܠ ܗ̇ܳܝ ܚܰܘ̈ܒܶܝܗ̇ ܘܰܚܛܳܗܶܝ̈ܗ̇ ܫܒ̣ܰܩܬ. ܟܰܕ ܕܶܝܢ ܠܓܰܒܪܳܐ ܓܳܕܪܳܝܳܐ ܕܡܶܬܕܰܝܘܰܢ ܗ̣ܘܳܐ. ܘܰܒܒܶܝܬ ܩܒܽܘܪ̈ܶܐ ܥܳܡ̇ܰܪ ܗ̣ܘܳܐ: ܠܐܘܪܰܥ ܐܽܘܪܚܳܐ ܕܣܳܥܽܘܪܽܘܬܳܐ ܕܺܝܠܳܟ ܨܰܝܶܒ̣ܬ. ܘܰܠܠܶܓܝܽܘܢ ܕܫܺܐܕ̈ܶܐ ܠܡܶܥܡܰܪ ܒܰܚܙܺܝܪ̈ܶܐ ܐܰܦܶܣ̣ܬ: ܘܰܒܝܰܡܳܐ ܠܗܽܘܢ ܚܢ̣ܰܩܬ: ܘܰܠܕܰܝܘܳܢܳܐ ܠܘܳܬ ܗܰܘܢܶܗ ܐܰܝܬܺܝܬ ܘܢܰܟ̣ܶܦܬ. ܟܰܕ ܒܝܰܘܡܳܐ ܕܫܰܒܬܳܐ ܠܰܟܢܽܘܫܬܳܐ ܕܝܽܘ̈ܕܳܝܶܐ ܥܰܠ̣ܬ ܘܰܠܡܰܚ̈ܫܒܳܬܳܐ ܢܟܺܝ̣̈ܠܳܬܳܐ ܕܣܳܦܪ̈ܶܐ ܘܰܦܪ̈ܺܝܫܶܐ ܝ̣ܺܕܰܥܬ. ܘܰܠܓܰܒܪܳܐ ܕܝܰܒܺܝܫܳܐ ܗܘܳܬ݀ ܐܺܝܕܶܗ ܕܝܰܡܺܝܢܳܐ ܒܰܡܨܰܥܬܳܐ ܠܶܗ ܐܰܩܺܝܡܬ: ܘܕܰܦܫܽܘܛ ܐܺܝܕܳܟ ܘܬܰܩܢܰܬ݀ ܐܰܝܟ ܚܒܰܪܬܳܗ̇ ܠܶܗ ܐܶܡ̣ܰܪܬ: ܘܰܒܚܽܘܠܡܳܢܳܐ ܕܦܰܓܪܶܗ ܠܶܗ ܚܰܕܺܝܬ. ܟܰܕ ܠܝܽܘܐܳܪܳܫ ܗ̇ܰܘ ܪܝܫ ܟܢܽܘܫܬܳܐ ܕܝܽܘ̈ܕܳܝܶܐ ܕܶܐܬܟܰܫܰܦ ܠܳܟ ܡܶܛܽܠ ܒܰܪܬܶܗ ܠܰܒܶܒ̣ܬ ܘܰܩܕܳܡ ܫܶܡܥܽܘܢ ܘܝܰܥܩܽܘܒ ܘܝܽܘܚܰܢܳܢ ܠܳܗ̇ ܢܰܚ̣ܶܡܬ: ܘܠܐܱܒܽܘܗ̇ ܘܠܐܷܡܳܗ̇ ܒܢܽܘܚܳܡܳܗ̇ ܒܣܰܒܪܳܐ ܕܚܰܝ̈ܶܐ ܘܕܰܩܝܳܡܬܳܐ ܕܡܺܝ̈ܬܶܐ ܫ̣ܰܪܰܪܬ. ܟܰܕ ܠܐܱܢ̱ܬܬܳܐ ܕܰܬܪܺܝܥ ܗ̣ܘܳܐ ܕܡܳܐ ܫܢܺܝ̈ܢ ܬܪܶܥܣܰܪ: ܘܟܰܕ ܩܶܪܒܰܬ݀ ܠܡܰܪܛܽܘܛܳܟ ܪܶܕܝܳܐ ܕܰܕܡܳܐ ܕܺܝܠܳܗ̇ ܟܰܠܺܝܬ: ܘܰܒܫܽܘܐܳܠܐܴ ܕܰܠܘܳܬ ܫܶܡܥܽܘܢ ܕܡܰܢܽܘ ܩܪܶܒ ܠܺܝ ܘܰܢܣ̣ܰܒ ܡܶܢܝ ܚܰܝܠܐܴ ܥܰܠ ܪܰܒܽܘܬܳܟ ܐܰܘܕܰܥ̣ܬ. ܟܰܕ ܠܛܽܘܪܳܐ ܕܬܳܒܽܘܪ ܥܰܡ ܟܶܢܫܳܐ ܕܬܰܠܡܺܝ̈ܕܰܝܟ ܣܠ̣ܶܩܬ ܘܰܠܟܽܘܫܳܦܳܐ ܕܡܽܘܫܶܐ ܘܶܐܠܺܝܳܐ ܡܶܛܽܠ ܦܽܘܪܩܳܢܶܗ ܕܳܐܕܳܡ ܩܰܒ̣ܶܠܬ ܘܰܠܙܺܝܘܳܐ ܕܰܐܦܰܝ̈ܟ ܠܫܽܘܒܚܳܐ ܕܪܰܒܽܘܬܳܟ ܚܰܠ̣ܶܦܬ: ܟܰܕ ܠܫܳܪܽܘܬܳܐ ܕܚܰܕ ܡ̣ܶܢ ܪ̈ܺܝܫܶܐ ܕܰܟܢܽܘܫܬܳܐ ܐܶܙܕܰܡܰܢ̣ܬ: ܘܰܠܓܰܒܪܳܐ ܕܰܟܢܺܝܫ ܗ̣ܘܳܐ ܡܰܝ̈ܳܐ ܕܰܐܝܬܺܝܘ ܠܰܩܕܳܡܰܝܟ ܐܶܚ̣ܰܕܬ: ܘܰܒܫܽܘܐܳܠܐܴ ܕܰܠܘܳܬ ܣܳܦܪ̈ܶܐ ܘܰܦܪ̈ܺܝܫܶܐ: ܠܡܰܦܽܘܠܬܳܐ ܕܰܒܪܳܐ ܘܬܰܘܪܳܐ ܒܒܺܐܪܳܐ ܘܡܶܬܕܰܠܝܳܢܽܘܬܳܐ ܠܗ̇ܰܘ ܡܟܰܪܗܳܐ ܐܰܚܠ̣ܶܡܬ. ܟܰܕ ܠܛܺܝܡܰܝ ܣܰܡܝܳܐ ܕܶܐܬܟܰܫܰܦ ܠܳܟ ܘܰܒܪܶܗ ܕܕܰܘܺܝܕ ܐܰܘܕܝܳܟ ܠܘܳܬܳܟ ܩܰܪܶܒܬܳܝܗܝ ܘܛܺܝܢܳܐ ܡ̣ܶܢ ܐܰܪܥܳܐ ܫܩ̣ܰܠܬ: ܘܥܰܠ ܥܰܝ̈ܢܰܘܗܝ ܛܳܫ̣ܬ: ܘܰܐܝܟ ܒܳܪܽܘܝܳܐ ܚܰܟܺܝܡܳܐ ܕܠܐܴ ܡܢܰܟܪܰܝ ܡ̣ܶܢ ܝܳܠܽܘܕܶܗ ܢܽܘܗܪܳܐ ܒܥܰܝܢܰܘ̈ܗܝ ܢܣܰܟ̣ܬ. ܟܰܕ ܠܘܳܬ ܚܰܫܳܐ ܦܳܪܽܘܩܳܝܳܐ ܐܶܬܰܝܬ ܘܠܐܘܪܫܠܶܡ ܡܕܺܝܢܰܬ݀ ܨܳܠܽܘ̈ܒܶܐ ܥܰܠ̣ܬ: ܘܰܠܣܳܦܪ̈ܶܐ ܘܰܦܪ̈ܺܝܫܶܐ ܕܥܰܠ ܩܶܛܠܳܟ ܠܚܺܝܡܺܝܢ ܗ̣ܘܰܘ ܐܰܒ̣ܗܶܬܬ. ܘܒܰܩܝܳܡܬܳܟ ܕܡ̣ܶܢ ܩܰܒܪܳܐ ܠܛܰܒܥܰܝ̈ܗܽܘܢ ܐܳܦ ܠܰܚܬܳܡܰܝ̈ܗܽܘܢ ܦܰܪܣܺܝܬ: ܘܰܠܠܶܒܳܐ ܕܬܰܠܡܺܝ̈ܕܶܐ ܒܳܬܰܪ ܕܩܳܡ̣ܬ ܚܰܕܽܘܬܳܐ ܪܰܒܬܳܐ ܡܠ̣ܰܝܬ. ܘܰܣܒܰܪܬܳܐ ܕܚܰܝ̈ܶܐ ܚܰܕ̈ܬܶܐ ܠܰܒܪܺܝܬܳܐ ܟܽܠܳܗ̇ ܫܰܟܶܢ̣ܬ: ܘܫܰܝܢܳܐ ܘܰܫܠܳܡܳܐ ܒܟܽܠܶܗ ܥܳܠܡܳܐ ܙܪܰܥ̣ܬ ܘܠܶܒܰܘ̈ܳܬܳܐ ܕܰܡܗܰܝ̈ܡܢܶܐ ܡ̣ܶܢ ܣܰܒܪܳܐ ܫܰܪܺܝܪܳܐ ܕܡܶܐܬܺܝܬܳܟ ܬܪܰܝܳܢܺܝܬܳܐ ܡܠ̣ܰܝܬ ܘܫ̣ܰܪܰܪܬ. ܟܰܕ ܒܳܥܶܝܢܰܢ ܡܶܢܳܟ ܡܳܪܝܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ: ܕܰܬܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܬܶܠܚܶܐ ܡܶܬܥܰܒܪ̈ܳܢܘܳܬܰܢ ܘܠܐܴ ܬܰܝܬܶܐ ܠܡܶܬܥܰܗܕܳܢܽܘܬܳܐ ܠܟܽܠܗܶܝܢ ܣܰܟܠܘ̈ܳܬܰܢ. ܘܰܐܢܺܝܚ ܠܥܰܢܺܝ̈ܕܶܐ ܐܰܝܠܶܝܢ ܒܰܬܪܺܝܨܽܘܬ ܫܽܘܒܚܳܐ ܠܘܳܬܳܟ ܚ̣ܙܰܩܘ ܘܰܐܢܺܝܚ ܐܶܢܽܘܢ ܒܰܐܘ̈ܘܳܢܶܐ ܒܪ̈ܺܝܟܶܐ ܘܛܽܘ̈ܒܬܳܢܶܐ: ܘܰܒܡܰܫ̈ܟܢܶܐ ܕܟܺܐܢ̈ܶܐ ܐܰܥܡ̣ܰܪ ܐܶܢܽܘܢ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܫܰܪܰܪ ܡܳܪܝܳܐ ܐܠܰܗܳܐ ܠܥܺܕܬܳܐ ܕܺܝܠܳܟ ܩܰܕܺܝܫܬܳܐ ܥܰܠ ܕܽܘܡ̈ܣܶܐ ܠܐܴ ܡܶܙܕܰܥܙ̈ܥܳܢܶܐ ܕܗܰܝܡܳܢܽܘܬܳܐ ܬܪܺܝܨܬܳܐ ܘܠܐܴ ܡܶܣܬܰܕܩܳܢܺܝܬܳܐ ܕܰܬܠܳܬ ܣܽܘܢ̈ܢܰܕܽܘ ܩܰܕܺܝ̈ܫܳܬܳܐ ܘܗܰܒܠܰܢ ܕܒܽܐܘܪ̈ܚܳܬܳܐ ܬܪ̈ܺܝܨܳܬܳܐ ܕܰܫܠܺܝ̈ܚܰܝܟ ܩܰܕܺܝ̈ܫܶܐ ܢܶܪܕܶܐ: ܘܰܒܢܳܡܽܘ̈ܣܰܝܟ ܡܰܐܚ̈ܝܳܢܶܐ ܢܶܬܗܰܓܶܐ ܐܺܝܡܳܡܳܐ ܘܠܺܠܝܳܐ: ܘܰܠܥܺܐܕ̈ܶܐ ܘܚܰܓ̈ܶܐ ܕܰܡܕܰܒܪܳܢܽܘܬܳܟ ܢܝܰܩܰܪ: ܘܫܽܘܒܚܳܐ ܚܰܕܬܳܐ ܡ̣ܶܢ ܝܰܡܺܝܢܳܟ ܢܶܬܥܰܛܰܦ ܘܟܽܠܰܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ ܡܥܰܠܰܝܬܳܐ ܘܬܰܘܕܺܝܬܳܐ ܡܬܽܘܡܳܝܬܳܐ. ܥܰܡ ܣܶܓܕܬܳܐ ܡܩܰܠܰܣܬܳܐ: ܘܪܰܒܽܘܬ ܝܳܐܝܽܘܬܳܐ ܠܐܴ ܡܶܬܦܰܫܩܳܢܺܝܬܳܐ ܡ̣ܶܢ ܥܶܠܳܝ̈ܶܐ ܕܰܠܥܶܠ: ܘܡ̣ܶܢ ܬܰܚܬܳܝ̈ܶܐ ܕܰܠܬܰܚܬ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܚܕܳܐ ܫܰܠܡܽܘܬܳܐ ܫܒܺܝܚܬܳܐ ܘܺܐܝܬܽܘܬܳܐ ܓܢܺܝܙܬܳܐ ܕܠܐܴ ܡܶܬܦܰܚܡܳܐ: ܐܠܰܗܽܘܬܳܐ ܡܪܰܝܰܡܬܳܐ ܘܠܐܴ ܡܶܬܚܰܙܝܳܢܺܝܬܳܐ. ܐܰܒܳܐ ܕܰܒܚܽܘܒܶܗ ܐܰܘܠܶܕ ܠܰܒܪܳܐ ܕܕܳܡ̇ܶܐ ܠܶܗ. ܘܰܒܪܳܐ ܕܰܒܝܰܕܶܗ ܘܒܶܗ ܣ̣ܕܰܪ ܘܰܐܩܺܝܡ ܠܥܶܠ ܒܰܫܡܰܝܳܐ ܚܰܝܠܰܘ̈ܳܬܳܐ ܢܽܘܪ̈ܳܢܶܐ ܘܪ̈ܽܘܚܳܢܶܐ ܕܰܢܫܰܒܚܽܘܢܳܝܗܝ ܒܰܐܬܪܳܐ ܕܰܫܟܺܝܢܬܶܗ ܠܐܴ ܡܶܬܕܰܪܟܳܢܺܝܬܳܐ. ܪܽܘܚܳܐ ܩܰܕܺܝܫܳܐ ܢܳܦܽܘܩܳܐ ܘܥܳܒܽܘܕܳܐ ܕܟܽܠ ܕܒܰܫܡܰܝܳܐ ܘܒܰܐܪܥܳܐ ܕܚܰܘܺܝ ܥܒ̇ܳܕ̈ܰܘܗܝ ܬܡܺܝ̣̈ܗܶܐ ܒܳܪܽܘܝܳܐ ܕܰܢܦ̣ܰܚ ܪܽܘܚܳܐ ܒܳܐܕܳܡ: ܡܛܰܟܣܳܢܳܐ ܕܰܐܘܥܺܝ ܓܶܦ̈ܶܐ ܠܰܣܪ̈ܳܦܶܐ: ܘܰܩܒ̣ܰܥ ܐܶܒܪ̈ܶܐ ܠܰܟܪ̈ܽܘܒܶܐ: ܘܝܰܗ̣ܒ ܣܽܘܟܳܠܐܴ ܠܡܰܠܐܱܟ̈ܶܐ: ܘܰܐܘܕܰܥ ܨܶܒܝܳܢܶܗ ܠܰܢܒܺܝ̈ܶܐ ܘܚܰܘܺܝ ܕܰܐܝܟܰܢ ܛܳܝܣܳܐ ܡܰܪܟܰܒܬܳܐ ܕܰܟܪ̈ܽܘܒܶܐ. ܘܪܽܘܚܳܐ ܕܥܳܡ̇ܰܪ ܒܓܺܝ̈ܓܠܰܘܗܝ: ܣܪ̈ܳܦܶܐ ܕܶܫܬܳܐ ܫܬܳܐ ܓܶܦܺܝ̈ܢ ܠܚܰܕ ܚܰܕ ܡܶܢܗܽܘܢ: ܒܰܬܪܶܝܢ ܡܚܰܦܶܝܢ ܐܰܦܰܝ̈ܗܽܘܢ ܕܠܐܴ ܡܣܰܝܒܪܺܝܢ ܚܙܳܬܗ ܕܥܳܒܽܘܕܗܽܘܢ. ܘܒܰܬܪܶܝܢ ܕܶܝܢ ܡܟܰܣܶܝܢ ܪ̈ܶܓܠܰܝܗܽܘܢ ܕܠܐܴ ܢܺܐܩܕܽܘܢ ܡ̣ܶܢ ܓܰܘܙܰܠܬܶܗ: ܘܩܰܕܺܝܫ ܗ̣ܽܘ ܒܶܝܬ ܡܰܫܪܝܶܗ ܕܒܳܪܽܘܝܗܽܘܢ. ܘܒܰܬܪܶܝܢ ܕܶܝܢ ܦܳܪܚܺܝܢ ܘܩܳܥܶܝܢ ܗܳܢܳܐ ܠܗܳܢܳܐ ܟܰܕ ܐܳܡܪܺܝܢ: ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬܳܢܳܐ ܨܒܰܐܘܬ ܡܰܠܟܳܐ ܕܺܐܝܣܪܳܐܶܝܠ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܕܡ̣ܶܢ ܥܽܘܒܳܐ ܕܰܐܒܳܐ ܝܳܠܽܘܕܶܗ ܠܰܒܪܺܝܬܳܐ ܐܶܫܬܰܕܰܪ ܘܰܠܥܳܠܡܳܐ ܟܽܠܶܗ ܡ̣ܶܢ ܛܳܥܝܽܘܬܳܐ ܕܰܦܬܰܟܪ̈ܶܐ ܚܰܪܰܪ ܘܰܒܥܽܘܒܳܐ ܕܶܐܡܳܐ ܡܒܰܪܰܟܬܳܐ ܘܡܰܠܝܰܬ݀ ܛܰܝܒܽܘܬܳܐ ܥܡ̣ܰܪ ܘܝܰܪ̈ܚܶܐ ܬܶܫܥܳܐ ܒܡܰܥܪܒܳܐ ܒܬܽܘܠܳܝܳܐ ܐܰܝܟ ܟܽܠ ܥܽܘ̣̈ܠܺܝܢ ܕܰܝܰܪ. ܘܶܐܬܺܝܠܶܕ ܡܶܢܳܗ̇ ܦܰܓܪܳܢܳܐܺܝܬ ܘܠܰܒܬܽܘܠܽܘܬܳܐ ܕܺܝܠܳܗ̇ ܕܠܐܴ ܢܶܟܝܳܢ ܢ̣ܛܰܪ: ܕܶܐܬܢܰܒܺܝܘ ܥܰܠ ܡܶܐܬܺܝܬܶܗ ܫܰܡܠܺܝ ܘܰܓܡ̣ܰܪ: ܘܰܠܥܺܕܰܬ݀ ܥܰܡ̈ܡܶܐ ܥܰܠ ܝܽܘܪܕܢܳܢ ܢܰܗܪܳܐ ܡܟ̣ܰܪ: ܘܠܰܓܢܽܘܢܳܐ ܕܺܝܠܳܗ̇ ܠܥܶܠ ܡ̣ܶܢ ܐܰܪ̈ܟܰܐܣ ܘܫܽܘܠܛܳܢ̈ܶܐ ܘܛܶܟ̈ܣܶܐ ܥܶܠܳܝ̈ܶܐ ܩ̣ܛܰܪ: ܝܽܘܚܰܢܳܢ ܕܶܝܢ ܟܰܕ ܚܙܳܝܗܝ ܗ̣ܘܳܐ ܠܢܰܗܪܳܐ ܕܡܶܬܓܰܘܙܰܠ ܒܝܰܕ ܒܰܪ̈ܩܶܐ ܥܰܙܺܝ̣̈ܙܶܐ ܬܗ̣ܰܪ ܘܶܐܬܕܰܡܰܪ: ܘܰܬܟ̣ܰܣ ܐܺܝܕܶܗ ܘܰܐܙܥܶܩ ܘܶܐܡ̣ܰܪ: ܕܰܐܝܟܰܢܳܐ ܡܶܫܟܚܳܐ ܚܰܒܬܳܐ ܘܓܶܠܐܴ ܠܫܰܠܗܶܒܺܝܬܳܐ ܡܰܘܩܕܳܢܺܝܬܳܐ ܬܶܠܒܽܘܟܝ ܘܰܬܣܰܝܒܰܪܝ: ܐܰܒܳܐ ܡ̣ܶܢ ܠܥܶܠ ܐܰܣܗܶܕ ܕܰܥܠܰܘܗܝ ܟܰܕ ܐܳܡ̇ܰܪ: ܕܗܳܢܰܘ ܒܶܪܝ ܚܰܒܺܝܒܳܐ ܕܡ̣ܶܢ ܠܘܳܬܝ ܐܶܫܬܰܕܰܪ.. ܪܽܘܚܳܐ ܕܶܝܢ ܩܰܕܺܝܫܳܐ ܒܰܕܡܽܘܬ ܓܽܘܫܡܳܐ ܕܝܰܘܢܳܐ ܢܚ̣ܶܬ ܥܠܰܘܗܝ ܘܰܚܙܰܐܘܽܘܗܝ ܟܶܢ̈ܫܶܐ ܘܰܬܗ̣ܰܪܘ. ܘܟܰܕ ܕܶܝܢ ܬܶܕܡܪ̈ܳܬܳܐ ܦܰܐܝ̈ܳܬܳܐ ܒܚܰܝܠܐܴ ܕܺܝܠܶܗ ܐܠܰܗܳܝܳܐ ܣܥ̣ܰܪ: ܘܠܰܟܪ̈ܺܝܗܶܐ ܘܡܰܟܰܐܒ̈ܶܐ ܫܰܪܰܪ: ܘܰܚܣܰܡ̣ܘ ܒܶܗ ܣܳܦܪ̈ܶܐ ܘܰܦܪ̈ܺܝܫܶܐ ܘܶܐܡ̣ܰܪܘ: ܕܗܳܢܳܐ ܓܰܒܪܳܐ ܠܐܴ ܗ̣ܘܳܐ ܡ̣ܶܢ ܐܠܰܗܐ ܕܫܰܒܬܳܐ ܕܥܰܡܳܐ ܠܐܴ ܢ̇ܳܛܰܪ: ܘܰܠܥܰܡܳܐ ܕܝܽܘ̈ܕܳܝܶܐ ܕܠܐܴ ܗܰܝܡܶܢ ܒܶܗ ܒܟܽܠ ܦܶܢ̈ܝܳܢ ܒܰܕܰܪ: ܘܟܰܕ ܨܰܘܡܳܐ ܐܰܪܒܥܺܝܢܳܝܳܐ ܚܠܳܦܰܝܢ ܨܳܡ. ܘܡ̣ܶܢ ܡܪܰܡܝܳܢܳܐ ܠܺܝܛܳܐ ܐܶܬܢܰܣܺܝ: ܘܒܰܬܠܳܬܳܐ ܕܰܐܪ̈ܶܐ ܕܰܣ̣ܕܰܪ ܠܩܽܘܒܠܶܗ ܠܚܰܝܠܶܗ ܕܡܳܪܽܘܕܳܐ ܬܰܒܰܪ: ܟܰܕ ܙܳܟܽܘܬܳܐ ܡ̣ܶܢ ܠܰܦܪ̈ܺܝܩܰܝ ܒܰܨܠܺܝܒܳܐ ܕܺܝܠܶܗ ܙܰܟܳܝܳܐ ܥܰܠ ܨܶܢ̈ܥܳܬܶܗ ܕܡܳܪܽܘܕܳܐ ܚܰܝܶܠ ܘܥܰܕܰܪ. ܟܰܕ ܒܥܺܐܕܳܐ ܕܽܐܘܫܰܥ̈ܢܶܐ ܒܝܰܕ ܣܰܘ̈ܟܶܐ ܕܬܶܫܒܽܘܚܬܳܐ ܡ̣ܶܢ ܦܽܘܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܘܝܰܠܽܘ̈ܕܶܐ ܐܶܬܢܰܨܰܪ. ܘܗ̇ܳܝ ܕܰܒܪܺܝܟ ܗ̣ܽܘ ܕܶܐܬܳܐ ܘܰܥܬܺܝܕ ܕܢܺܐܬܶܐ ܒܰܫܡܶܗ ܕܡܳܪܝܳܐ ܐܰܟ̣ܪܶܙܘ ܘܶܐܡ̣ܰܪ: ܘܰܠܚܰܫܳܐ ܦܳܪܽܘܩܳܝܳܐ ܘܠܰܨܠܺܝܒܳܐ ܡܰܥܒܶܕ ܚܰܝ̈ܶܐ ܡ̣ܶܢ ܥܰܡܳܐ ܕܝܽܘ̈ܕܳܝܶܐ ܣܰܝܒ̣ܰܪ. ܘܰܒܡܰܚܰܬܬܶܗ ܕܰܠܓܰܘ ܩܰܒܪܳܐ ܠܢܺܝܪܶܗ ܕܡܰܘܬܳܐ ܝܰܥܢܳܐ ܬܰܒܰܪ ܘܠܐܴܕܳܡ ܨܰܠܡܳܐ ܕܪܰܒܽܘܬܶܗ ܡ̣ܶܢ ܥܰܒܕܽܘܬܶܗ ܕܡܳܪܽܘܕܳܐ ܚܰܪܰܪ ܘܒܰܩܝܳܡܬܶܗ ܕܡ̣ܶܢ ܒܶܝܬ ܡܺܝ̈ܬܶܐ ܠܰܫܠܺܝ̈ܚܶܐ ܕܺܝܠܶܗ ܥܰܠ ܢܽܘܚܳܡܶܗ ܫܰܪܰܪ: ܘܰܠܙܳܩܽܘ̈ܦܶܐ ܘܢܳܛܽܘܪ̈ܶܐ ܟܳܣܳܐ ܕܡܰܘܬܳܐ ܡܥܺܝܩܳܢܳܐ ܕܡܰܪܘܶܐ ܠܠܶܒܰܘ̈ܳܬܗܽܘܢ ܐܰܫܩܺܝ ܘܰܐܡ̣ܰܪ: ܘܰܒܡܰܣܰܩܬܶܗ ܕܠܰܫܡܰܝܳܐ ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ ܠܰܒ̈ܢܰܝ ܐ̱ܪܳܙܶܗ ܫܰܕܰܪ ܘܶܐܬܚܰܟ̣ܰܡܘ ܪ̈ܶܥܝܳܢܰܝܗܽܘܢ ܘܶܐܬܢܰܗܰܪܘ ܘܫܽܘܒܚܳܐ ܚܰܕܬܳܐ ܒܩܳܠܐܴ ܪܳܡܳܐ ܐܰܙܥ̣ܶܩܘ ܘܶܐܡ̣ܰܪܘ: ܘܠܐܱܪܒܰܥ ܦܶܢ̈ܝܳܢ ܕܰܒܪܺܝܬܳܐ ܐܰܪܬܰܚ̣ܘ ܘܢܰܗ̣ܰܪܘ ܘܡܶܠܬܳܐ ܕܚܰܝ̈ܶܐ ܘܰܫܪܳܪܳܐ ܒܓܰܘ ܠܶܒܰܘ̈ܳܬܳܐ ܕܰܡܗܰܝ̈ܡܢܶܐ ܙܪܰܥܘ ܘܰܐܟܰܪܘ: ܘܕܰܡܫܺܝܚܳܐ ܒܪܳܐ ܕܰܐܠܳܗܳܐ ܩܳܡ ܡ̣ܶܢ ܩܰܒܪܳܐ ܗܰܝܡ̣ܶܢܘ ܘܰܚܝ̣ܰܘ ܒܰܫܡܳܐ ܕܰܬܠܺܝܬܳܝܽܘܬܳܐ ܐܰܪܬܺܝܘ ܘܙܰܗܰܪܘ. ܘܗܳܫܳܐ ܠܳܟ ܡܶܬܟܰܫܦܺܝܢܰܢ ܡܫܺܝܚܳܐ ܐܠܰܗܳܐ ܕܺܝܠܰܢ. ܗ̇ܰܘ ܕܰܠܗܳܠܶܝܢ ܟܽܠܗܶܝܢ ܥܬܺܝܕ ܗ̣ܘܰܝܬ ܠܡܶܣܥܰܪ: ܘܰܠܥܺܕܬܳܟ ܩܰܕܺܝܫܬܳܐ ܣܡܽܘܟ ܘܥܰܕܰܪ: ܘܰܠܪ̈ܳܥܰܘܳܬܳܐ ܕܺܝܠܳܗ̇ ܠܰܡܕܰܒܪ̈ܳܢܶܝܗ̇ ܕܠܐܴ ܢܶܟܝܳܢ ܢܰܛܰܪ: ܘܰܠܟܳܗ̈ܢܶܝܗ̇ ܘܠܰܡܫܰܡ̈ܫܳܢܶܐ ܕܒܳܗ̇ ܬܚܶܝܬ ܟܶܢ̈ܦܶܐ ܕܰܒܛܺܝܠܽܘܬܳܟ ܣܰܬܰܪ: ܘܠܐܱܝܠܶܝܢ ܕܡ̣ܶܢ ܢܶܫ̈ܒܶܐ ܘܦܰܚ̈ܶܐ ܕܰܚܛܺܝܬܳܐ ܡܥܰܪܙܠܺܝܢ: ܡܦܺܝܣܺܝܢܰܢ ܠܳܟ ܡܳܪܝܳܐ ܐܠܰܗܳܐ ܕܬܶܠܚܶܐ ܣܰܟܠܘ̈ܳܬܗܽܘܢ ܘܠܐܴ ܬܶܬܕܟܰܪ ܚܛܳܗܰܝ̈ܗܽܘܢ ܘܚܰܘܒܰܝ̈ܗܽܘܢ ܘܒܽܘܨܳܪ̈ܰܝܗܽܘܢ ܘܠܐܴ ܡܶܬܰܐܣܝܳܢ̈ܳܝܳܬܳܐ ܕܺܝܠܗܽܘܢ ܠܚܺܝ ܘܰܐܥܒ̣ܰܪ: ܘܰܠܕܺܝܢܳܐ ܠܐܴ ܬܶܥܽܘܠ ܥܰܡ ܥܰܒ̈ܕܰܝܟ: ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܡ̣ܶܢ ܒܰܝܢܳܬܰܢ ܦ̣ܛܰܪܘ: ܘܰܚܢܰܢ ܘܗ̣ܶܢܽܘܢ ܒܽܐܘܪܫܠܶܡ ܫܡܰܝܳܢܺܝܬܳܐ ܢܶܫܬܘܶܐ ܕܰܢܕܰܝܰܪ: ܘܟܽܠܰܢ ܡܰܠܽܘܬܳܢܳܐܺܝܬ ܒܩ̈ܳܠܐܷ ܘܩܺܝ̣̈ܢܳܬܳܐ ܢܰܨܺܝ̣̈ܚܳܬܳܐ ܢܰܙܥܶܩ ܘܢܺܐܡܰܪ: ܫܽܘܒܚܳܐ ܘܬܰܘܕܺܝܬܳܐ ܡ̣ܶܢ ܦܽܘ̈ܡܶܐ ܕܟܽܠܰܢ ܒܟܽܠܥܶܕܳܢ ܠܳܟ ܢܫܰܕܰܪ: ܘܠܐܱܒܽܘܟ ܗ̇ܰܘ ܕܰܠܥܶܠ ܡ̣ܶܢ ܡܰܕܪܟܳܢܽܘܬܳܐ ܕܗܰܘ̈ܢܶܐ ܕܰܒܪ̈ܰܝܳܐ ܘܰܥܒܺܝ̣̈ܕܶܐ ܥܳܒ̇ܰܪ: ܘܰܠܪܽܘܚܳܟ ܩܰܕܺܝܫܳܐ ܗ̇ܰܘ ܕܒܳܟ ܘܒܰܐܒܽܘܟ ܥܳܡ̇ܰܪ ܘܰܡܕܰܝܰܪ. ܗܳܫܳܐ܀

 

ܥܛܪܐ

ܫܽܘܒܚܳܐ ܠܳܟ ܩܰܕܺܝܫܳܐ ܘܰܡܩܰܕܫܳܢܳܐ ܕܩܰܕܺܝ̈ܫܶܐ ܡܳܪܝܳܐ: ܕܩܰܕܶܫ̣ܬ ܠܢܰܦܫܳܟ ܥܰܠ ܐܰܦܰܝ̈ܢ ܒܰܨܠܺܝܒܽܘܬܳܟ ܕܥܰܠ ܦܽܘܪܩܳܢܰܢ: ܐܰܢ̱ܬ ܡܳܪܝܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ ܪܰܚܶܡܥܠܰܝܢ. ܘܩܰܒܶܠ ܐܶܢܶܝܢ ܠܒܶܣ̈ܡܶܐ ܗܰܢܺܝ̈ܳܐܬܳܐ ܕܶܐܬܩܰܪ̈ܰܒܝ ܠܳܟ ܒܥܶܕܳܢܳܐ ܗܳܢܳܐ: ܘܩܰܕܶܫ ܘܰܓܡܽܘܪ ܠܰܢ ܒܟܽܠܳܗ̇ ܩܰܕܺܝܫܽܘܬܳܐ ܕܰܐܝܠܶܝܢ ܕܒܳܟ ܐܶܫܬܰܡ̈ܠܝܺܝܢ ܡܕܰܒܪܳܢܳܐܺܝܬ: ܘܶܐܬܡܰܛܺܝܺܝ̣̈ܢ ܠܘܳܬܳܟ ܡܪܰܚܡܳܢܳܐܺܝܬ: ܐܰܝܟ ܕܠܰܒܢܺܝ̈ܶܐ ܪ̈ܚܺܝܡܶܐ ܘܝܳܪ̈ܬܶܐ ܫܰܪܺܝܪ̈ܶܐ ܘܰܐܚ̈ܶܐ ܚܰܒܺܝ̈ܒܶܐ: ܐܰܝܟܰܢܳܐ ܕܕܰܟܝܳܐܺܝܬ ܢܩܰܪܶܒ ܠܳܟ ܕܶܒ̈ܚܶܐ ܪ̈ܽܘܚܳܢܳܝܶܐ: ܘܩܽܘܪ̈ܒܳܢܶܐ ܡܪ̈ܰܥܝܳܢܶܐ ܐܰܝܠܶܝܢ ܕܰܡܪܰܥܶܝܢ ܠܐܱܠܳܗܽܘܬܳܟ: ܗܳܫܳܐ܀

 

ܚܘܬܡܐ

ܦܳܪܽܘܩܳܐ ܕܰܓܡ̣ܰܪ ܠܚܰܣܺܝܪ̈ܶܐ ܒܝܰܠܕܶܗ: ܘܚܰܣܺܝ ܚܰܘ̈ܒܶܐ ܕܚܰܛܳܝ̈ܶܐ ܒܰܥܡܳܕܶܗ ܘܕܰܟܺܝ ܟܽܘܬܡ̈ܳܬܳܐ ܕܰܡܟܰܬܡ̈ܶܐ: ܘܰܐܚܺܝ ܠܡܳܝܽܘ̈ܬܶܐ ܒܩܶܛܠܶܗ: ܘܰܐܩܺܝܡ ܠܰܩܒܺܝܪ̈ܶܐ ܒܰܩܝܳܡܬܶܗ ܘܥܰܠܺܝ ܠܬܰܚܬܳܝ̈ܶܐ ܒܣܽܘܠܳܩܶܗ ܘܫܰܡܠܺܝ ܠܘܳܬ ܫܠܺܝ̈ܚܶܐ ܫܽܘܘܕܳܝܶܗ: ܘܩܰܕܶܫ ܐܶܢܽܘܢ ܠܣܳܓܽܘ̈ܕܰܘܗܝ ܒܝܰܕ ܪܽܘܚܶܗ: ܩܰܕܶܫ ܡܳܪܝ ܐܳܦ ܗܳܫܳܐ ܠܟܽܠܰܢ ܘܰܐܥ̣ܬܰܪ ܠܰܢ ܘܰܐܢܗܰܪ ܠܰܢ: ܘܨܰܒܶܬ ܠܰܢ ܒܨܶܒ̈ܬܶܐ ܕܺܝܠܳܟ ܠܐܴ ܡܶܬܡ̈ܰܠܠܳܢܶܐ ܕܢܰܣܶܩ ܠܳܟ ܫܽܘܒܚܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܠܗ̇ܰܘ ܝܰܠܕܳܐ ܫܒܺܝܚܳܐ ܘܰܡܫܰܒܚܳܐ ܕܰܕܢܰܚ ܠܰܢ ܡ̣ܶܢ ܒܬܽܘܠܬܳܐ: ܘܒܰܪܶܟ ܠܰܢ ܒܺܝܠܺܝܕܽܘܬܶܗ ܬܗܺܝܪܬܳܐ: ܠܗ̇ܰܘ ܕܰܟܝܳܐ ܕܚܰܣܺܝ ܘܕܰܟܺܝ ܠܰܡܟܰܬܡ̈ܶܐ ܕܶܐܬܩܰܪܰܒܘ ܠܶܗ: ܘܕܰܟܺܝ ܠܰܢ ܒܰܥܡܳܕܶܗ ܩܰܕܺܝܫܳܐ ܠܗ̇ܰܘ ܪܳܡܳܐ ܘܰܡܥܰܠܝܳܐ ܘܠܐܴ ܡܛܰܘܫܳܐ: ܕܪܰܡܪܶܡ ܠܰܢ ܒܡܽܘܟܳܟܶܗ ܫܒܺܝܚܳܐ: ܘܰܦ̣ܪܰܩ ܠܢ ܒܰܙܩܺܝܦܶܗ ܡܰܐܚܝܳܢܳܐ: ܘܰܐܚܺܝ ܠܰܢ ܒܡܺܝܬܽܘܬܶܗ ܡܫܰܒܰܚܬܳܐ: ܘܰܐܢܗܰܪ ܠܰܢ ܒܰܩܒܽܘܪܬܶܗ ܢܰܗܺܝܪܬܳܐ. ܘܰܐܩܺܝܡ ܠܰܢ ܡ̣ܶܢ ܝܰܡܺܝܢܶܗ: ܘܰܐܘܬܶܒ ܠܰܢ ܒܡܰܠܟܽܘܬܶܗ ܫܡܰܝܳܢܺܝܬܳܐ ܥܰܡ ܐܰܒܽܘܗܝ ܘܪܽܘܚܶܗ ܩܰܕܺܝܫܳܐ ܒܗܳܢܳܐ ܥܶܕܳܢܳܐ܀

ܣܕܪܐ

ܫܽܘܒܚܳܐ ܠܳܟ ܒܳܪܽܘܝܳܐ ܕܥܳܠܡ̈ܶܐ ܘܰܡܬܰܩܢܳܢܳܐ ܕܒܶܪ̈ܝܳܬܳܐ: ܕܡ̣ܶܢ ܠܐܴ ܡܶܕܶܡ ܩܝܳܡܬܳܗ̇ ܠܬܺܒܶܝܠ ܘܰܠܚܰܝܠܰܘ̈ܳܬܳܐ ܫܡܰܝܳܢ̈ܶܐ ܕܢܶܗܘܽܘܢ ܡܫܰܒ̈ܚܳܢܶܐ ܕܺܐܝܬܽܘܬܳܟ ܪܳܡܰܬ݀ ܡܶܢܟܽܠ ܒܩܰܪܺܝܒܽܘܬܳܐ ܕܟܽܘܪܣܰܝ ܪܰܒܽܘܬܳܟ ܛܰܟܶܣ̣ܬ: ܕܰܕܠܐܴ ܫܶܠܝܳܐ ܢܶܗܘܽܘܢ ܡܫܰܒܚܺܝܢ ܘܰܡܒܰܪܟܝܢ ܠܐܱܠܳܗܽܘܬܳܟ ܡܥܰܠܰܝܬܳܐ ܒܦܽܘ̈ܡܶܐ ܕܟܰܝ̈ܳܐ: ܒܪܽܘܡܪ̈ܳܡܶܐ ܚܠܰܝ̈ܳܐ ܕܰܒܠܶܥܙܰܝ̈ܗܽܘܢ ܐܰܬܩܶܢ̣ܬ. ܬܰܩܺܝܦܳܐ ܕܰܡܬܰܚ ܠܰܫܡܰܝܳܐ ܐܰܝܟ ܝܳܪܺܝܥܬܳܐ: ܓܰܢ̱ܒܳܪܳܐ ܕܰܪܩ̣ܰܥ ܐܰܪܥܳܐ ܥܰܠ ܡܰܝ̈ܳܐ ܘܠܐܱܪܥܳܐ ܠܐܴ ܡܰܦܪܝܳܢܺܝܬܳܐ ܒܨܶܒܝܳܢܳܟ ܠܘܳܬ ܡܰܦܪܝܳܢܽܘܬܳܐ ܐܰܝܬܺܝܬ: ܘܺܐܝܠܳܢ̈ܶܐ ܘܓܶܢ̈ܣܶܐ ܕܟܽܠ ܦܺܐܪ̈ܶܐ ܒܳܗ̇ ܐܰܘܥܺܝܬ. ܟܰܕ ܚܠܳܦ ܗ̇ܳܝ ܕܶܐܬܬܠܺܝܛܰܬ݀ ܕܬܰܘܥܶܐ ܟܽܘ̈ܒܶܐ ܘܕܰܪܕܪ̈ܶܐ ܒܕܽܘܝܳܪܳܟ ܕܰܥܠܶܝܗ̇ ܠܳܗ̇ ܒܰܪܶܟ̣ܬ: ܘܺܐܝܠܳܢ̈ܶܐ ܝ̇ܳܗ̈ܒܰܝ ܦܺܐܪ̈ܶܐ ܪ̈ܽܘܚܳܢܶܐ ܒܳܗ̇ ܢܨܰܒ̣ܬ: ܘܰܐܝܟ ܦܰܪܕܰܝܣܳܐ ܪܽܘܚܳܢܳܐ ܕܰܡܦܰܬܰܟ ܒܟܽܠ ܗܰܒܳܒܺܝ̈ܢ ܠܳܗ̇ ܥܒ̣ܰܕܬ: ܟܰܕ ܚܠܳܦ ܫ̈ܶܬܠܳܬܳܐ ܘܢܶܨ̈ܒܳܬܳܐ ܐܰܪ̈ܥܳܢܳܝܳܬܳܐ ܘܦܰܪ̈ܕܰܝܣܳܢܳܝܳܬܳܐ ܢܰܦ̈ܫܳܬܳܐ ܡܠܺܝ̣̈ܠܳܬܳܐ ܢܶܨ̈ܒܳܬܳܐ ܪ̈ܚܺܝܡܳܬܳܐ ܛܥܺܝ̣̈ܢܳܬ ܦܺܐܪ̈ܶܐ ܕܬܰܘܕܺܝܬܳܐ ܒܥܺܕܬܳܐ ܩܰܕܺܝܫܬܳܐ ܫܬܰܠܬ: ܟܰܕ ܐܰܝܟ ܐܳܣܝܳܐ ܚܰܟܺܝܡܳܐ ܘܰܛܥܺܝܢ ܣܰܡ̈ܡܳܢܶܐ ܕܳܐܣܝܽܘܬܳܐ ܒܰܐܪܥܳܐ ܡܡܰܝܚܰܬ݀ ܒܟܽܠ ܡܰܚ̈ܘܳܢ ܐܶܬܗܰܦ̣ܰܟܬ: ܐܳܦ ܠܰܡܡܰܚܰܝ̈ܳܐ ܕܰܡܡܰܚܶܝܢ ܗ̣ܘܰܘ ܒܟܽܠ ܡܒܰܣܒܣܽܘܬܳܐ ܐܰܚܠ̣ܶܡܬ. ܟܰܕ ܐܰܝܟ ܡܥܺܝܢܳܐ ܕܡܰܝ̈ܳܐ ܠܰܨܗܰܝ̈ܳܐ ܕܰܨܗܶܝܢ ܗ̣ܘܰܘ ܠܡܶܡܬܰܩ ܚܰܝ̈ܶܐ ܡܰܝ̈ܳܐ ܪ̈ܽܘܚܳܢܶܐ ܠܗܽܘܢ ܐܰܫܩܺܝܬ: ܘܠܐܱܝܠܶܝܢ ܕܰܠܗܺܝܩܺܝܢ ܗ̣ܘܰܘ ܠܡܶܫܡܰܥ ܡܶܠܬܳܐ ܕܚܰܝ̈ܶܐ ܡ̈ܶܠܐܷ ܕܚܰܝ̈ܶܐ ܠܗܽܘܢ ܐܰܫܡ̣ܰܥܬ: ܟܰܕ ܚܠܳܦ ܦܽܘܪܩܳܢܳܐ ܐ̱ܢܳܫܳܝܳܐ ܠܡܽܘܟܳܟܳܐ ܨܶܒܝܳܢܳܝܳܐ ܐܶܬܰܝܬ: ܘܰܠܦ̈ܶܠܐܴܬܳܐ ܘܝܽܘ̈ܩܢܶܐ ܕܰܪܫܰܡ̣ܘ ܠܳܟ ܚܰܙܳܝܰܝ̈ܟ ܓܡ̣ܰܪܬ ܘܰܒܚܰܫ̈ܶܐ ܘܡܰܚܘ̈ܳܬܳܐ ܕܰܣܒ̣ܰܠܬ ܠܓܶܢܣܳܐ ܕܺܝܠܰܢ ܡܳܝܽܘܬܳܐ ܦܪܰܩ̣ܬ. ܟܰܕ ܠܰܦܝܳܣܶܗ ܕܰܥܒܶܕ ܡܰܠܟܳܐ ܕܶܐܬܓܰܘܰܣ ܒܳܟ ܥܰܠ ܚܽܘܠܡܳܢܳܐ ܕܰܒܪܶܗ ܫܡ̣ܰܥܬ: ܘܕܰܒܪܳܟ ܚܰܝ ܗ̣ܽܘ ܠܐܴ ܬܶܬܥܺܝܩ ܙܶܠ ܠܒܰܝܬܳܟ ܠܶܗ ܦܩ̣ܰܕܬ: ܘܟܰܕ ܐܳܙ̇ܶܠ ܐܰܪܥܽܘܗܝ ܥܰܒ̣ܕ̈ܰܘܗܝ ܘܣܰܒܪܽܘܗܝ ܥܰܠ ܚܽܘܠܡܳܢ ܒܪܶܗ ܐܰܝܟ ܕܶܐܡ̣ܰܪܬ. ܟܰܕ ܠܰܡܫܰܪܝܳܐ ܕܶܐܝܬܺܝܘ ܗ̣ܘܰܘ ܒܥܰܪܣܳܐ: ܘܡ̣ܶܢ ܐܰܓܪܳܐ ܠܰܩܕܳܡܰܝܟ ܥܰܡ ܥܰܪܣܽܘܢܺܝܬܶܗ ܫܰܒܽܘܗܝ: ܘܠܰܡܫܰܪܝܽܘܬܳܐ ܕܗܰܕܳܡܰܘ̈ܗܝ ܫ̣ܰܪܰܪܬ: ܘܰܠܫܽܘܒܩܳܢܳܐ ܕܰܚܛܳܗ̈ܶܐ ܠܶܗ ܐܰܫ̣ܘܰܝܬ: ܘܰܠܥܰܡܳܐ ܟܳܦܽܘܪܳܐ ܒܬܶܡܗܳܐ ܕܡܰܠܦܳܢܽܘܬܳܐ ܕܺܝܠܳܟ ܐܰܩܺܝܡܬ. ܟܰܕ ܠܥܶܣܪܳܐ ܓܰܪ̈ܒܶܐ ܕܫܶܐܠܘ ܠܳܟ ܚܽܘܠܡܳܢܳܐ ܚܢܳܬ: ܘܰܠܚܰܫܳܐ ܕܓܰܪܒܳܢܽܘܬܗܽܘܢ ܕܰܟܺܝܬ ܘܰܠܗ̇ܰܘ ܕܢܽܘܟܪܳܝ ܗ̣ܘܳܐ ܠܗܽܘܢ ܠܘܳܬܳܟ ܗܦ̣ܰܟ ܟܰܕ ܡܰܘܕܶܐ ܗ̣ܘܳܐ ܠܳܟ: ܘܰܩܕܳܡ ܟܽܠ ܐ̱ܢܳܫ ܠܰܫܪܳܪܳܐ ܕܗܰܝܡܳܢܽܘܬܶܗ ܩܰܠ̣ܶܣܬ. ܟܰܕ ܠܰܬܪܶܝܢ ܣܡܰܝ̈ܳܐ ܕܰܩܥ̣ܰܘ ܠܳܟ ܐܶܬܪܰܚܰܡܥܠܰܝܢ: ܢܽܘܗܪܳܐ ܫܰܟܶܢ̣ܬ ܘܰܠܕܰܝܘܳܢܳܐ ܕܰܚܪܶܫ ܘܰܥܘܺܝܪ ܐܰܣܺܝܬ: ܘܰܠܫܶܡܥܽܘܢ ܕܙܶܠ ܠܳܟ ܠܝܰܡܳܐ ܘܰܐܪܡܳܐ ܒܰܠܽܘܥܳܐ ܘܬܶܫܟܰܚ ܐܶܣܬܺܝܪܳܐ ܘܰܠܗ̇ܳܢܽܘܢ ܢܳܣ̈ܒܰܝ ܡܰܟܣܳܐ ܘܰܟܣܶܦ ܪܺܝܫܳܐ ܕܫܳܐܠܺܝܢ ܠܳܟ ܗܰܒ ܚܠܳܦܰܝ ܘܰܚܠܳܦܰܝܟ ܠܶܗ ܐܶܡ̣ܰܪܬ: ܟܰܕ ܠܓܰܒܪܳܐ ܗܰܘ ܓܰܪܒܳܢܳܐ ܕܰܛܪܺܝܕ ܗ̣ܘܳܐ ܡ̣ܶܢ ܟܢܽܘܫܬܳܐ: ܡ̣ܶܢ ܓܰܪܒܳܢܽܘܬܶܗ ܕܰܟܺܝܬ: ܘܟܺܐܒܳܐ ܡܰܪܺܝܪܳܐ ܕܳܐܠܶܨ ܗ̣ܘܳܐ ܠܶܗ ܛܪܰܕܬ: ܘܰܕܢܶܦܢܶܐ ܠܘܳܬ ܐ̱ܢܳܫܰܘ̈ܗܝ ܐܳܦ ܕܰܢܩܰܪܶܒ ܩܽܘܪܒܳܢܳܐ ܐܰܝܟ ܕܰܒܢܳܡܽܘܣܳܐ ܠܶܗ ܦܩ̣ܰܕܬ: ܟܰܕ ܠܰܚܡܳܬܶܗ ܕܦܶܛܪܽܘܣ ܕܪܰܡܝܳܐ ܗܘܳܬ݀ ܒܶܐܫܳܬܳܐ ܚܽܘܠܡܳܢܳܐ ܫܰܟܶܢ̣ܬ: ܘܠܰܬܪܶܝܢ ܕܰܝܘ̈ܳܢܶܐ ܕܥܳܡܪܺܝܢ ܗ̣ܘܰܘ ܒܒܶܝܬ ܩܒܽܘܪ̈ܶܐ ܡ̣ܶܢ ܡܢܰܣܝܽܘܬܗܽܘܢ ܚ̣ܰܪܰܪܬ: ܘܰܠܣܳܛܳܢܳܐ ܕܥܳܡ̇ܰܪ ܗ̣ܘܳܐ ܒܗܽܘܢ ܒܰܚܙܺܝܪ̈ܶܐ ܐܰܥܡ̣ܰܪܬ ܘܰܒܝܰܡܳܐ ܠܶܗ ܛܰܒܰܥ̣ܬ: ܟܰܕ ܒܰܣܦܺܝܢ̱ܬܳܐ ܒܝܰܡܳܐ ܕܡܶܟ̣ܬ: ܘܰܠܝܰܡܳܐ ܕܡܶܬܒܰܥܪܰܪ ܗ̣ܘܳܐ ܫܰܠܺܝܬ: ܘܰܠܩܳܠܐܴ ܕܰܓܥܳܬܗܽܘܢ ܨܳܬܬ ܕܬܰܠܡܺܝ̈ܕܶܐ ܘܰܠܫܶܡܥܽܘܢ ܡ̣ܶܢ ܝܰܡܐ ܕܰܐܠܺܝܬ. ܟܰܕ ܕܶܝܢ ܒܢܰܩܺܝܦܽܘܬܳܐ ܕܗ̇ܳܢܽܘܢ ܛܠܳܝ̈ܶܐ ܕܡܶܬܩܰܪܒܺܝܢ ܗ̣ܘܰܘ ܠܳܟ: ܠܛܰܠܝܳܐ ܚܰܕ ܥܰܠ ܐܺܝ̈ܕܰܝܟ ܫܩ̣ܰܠܬ: ܘܳܐܦ ܠܶܗ ܒ̣ܰܪܶܟܬ: ܘܫܰܘܬܳܦܳܐ ܘܒܰܪ ܥܶܢܝܳܢܳܐ ܕܬܰܠܡܺܝ̈ܕܰܝܟ ܓܒܰܝ̈ܳܐ ܠܶܗ ܥܒ̣ܰܕܬ: ܟܰܕ ܠܗ̇ܰܘ ܕܰܒܥ̣ܳܐ ܕܢܶܩܰܦ ܠܳܟ ܒܚܰܫܳܐ ܗ̇ܰܘ ܪܶܚܡܰܬ݀ ܟܶܣܦܳܐ ܦܰܢܺܝܬ ܕܰܠܬܰܥ̈ܠܐܷ ܢܶܩ̈ܥܶܐ ܐܺܝܬ ܠܗܽܘܢ ܘܦܳܪ̈ܚܳܬܳܐ ܕܰܫܡܰܝܳܐ ܡܰܛܠܠܐܴ: ܠܰܒܪܶܗ ܕܐ̱ܢܳܫܳܐ ܠܰܝܬ ܠܶܗ ܒܳܟ ܕܽܘܟܬܳܐ ܐܝܟܳܐ ܕܢܶܣܡܽܘܟ ܪܺܝܫܶܗ ܚܒ̣ܰܫܬ. ܟܰܕ ܠܠܳܥܳܙܳܪ ܪܳܚܡܳܟ ܡ̣ܶܢ ܒܳܬܰܪ ܕܰܣܪܺܝ ܐܺܝ̈ܕܰܘܗܝ ܘܪ̈ܶܓܠܰܘܗܝ ܘܰܡܗܰܠܶܟ ܐܰܦܶܩ̣ܬ: ܘܰܠܡܰܪܝܰܡ ܘܡܳܪܬܳܐ ܐܰܦ̣ܨܰܚܬ ܟܰܕ ܠܶܗ ܢܰܚ̣ܶܡܬ ܟܰܕ ܠܩܶܢܛܪܽܘܢܳܐ ܕܰܒܥ̣ܳܐ ܡܶܢܳܟ ܡܶܛܽܠ ܛܰܠܝܶܗ ܕܰܡܫܰܪܰܝ ܗ̣ܘܳܐ ܠܪܶܥܝܳܢܶܗ ܚܰܝܶܠ̣ܬ: ܘܕܶܐܡ̣ܰܪ ܕܠܐܴ ܫ̇ܳܘܶܐ ܐ̱ܢܳܐ ܕܬܶܥܽܘܠ ܬܚܶܝܬ ܡܰܛܠܠܰܝ̈ ܘܗܽܘܦܳܟܳܐ ܕܰܥܒ̈ܳܕܶܐ ܠܗܰܝܡܳܢܽܘܬܶܗ ܩܰܠ̣ܶܣܬ: ܘܠܰܒܪܶܗ ܚܽܘܠܡܳܢܳܐ ܐܰܩܢ̣ܰܝܬ ܟܰܕ ܒܩܳܠܐܴ ܕܝܰܠܽܘ̈ܕܶܐ ܘܰܕܫܰܒܪ̈ܶܐ ܫܦܰܝ̈ܳܐ ܠܐܘܪܫܠܶܡ ܥܰܠ̣ܬ: ܘܰܠܝܽܘܕ̈ܳܝܶܐ ܕܛܰܡܰܐܘ ܠܗܰܝܟܠܳܟ ܩܰܕܺܝܫܳܐ ܛܪܰܕܬ: ܘܠܐܱܝܠܶܝܢ ܕܰܠܚܺܝܡܺܝܢ ܗ̣ܘܰܘ ܥܰܠ ܩܶܛܠܳܟ ܒܦܽܘܢܳܝܳܟ ܕܰܠܘܳܬܗܽܘܢ ܒܗ̣ܶܬܬ. ܟܰܕ ܡ̣ܶܢ ܬܰܠܡܺܝܕܳܐ ܙܺܐܦܳܢܳܐ ܐܶܙܕܰܒܰܢ̣ܬ: ܘܡ̣ܶܢ ܣ̇ܳܦܪ̈ܶܐ ܘܩܰܫܺܝ̈ܫܶܐ ܒܩ̈ܳܠܐܷ ܡܒܰܙܚ̈ܳܢܶܐ ܐܶܬܬܫܺܝܛܬ: ܘܡ̣ܶܢ ܦܺܝܠܰܛܳܘܣ ܒܰܦܪ̈ܳܓܶܠܐܷ ܐܶܬܢ̣ܰܓܰܕܬ. ܟܰܕ ܡ̣ܶܢ ܪ̈ܳܚ̇ܡܰܝܟ ܝܰܘܣܶܦ ܘܢܺܝܩܳܘܕܺܝܡܳܘܣ ܒܩܰܒܪܳܐ ܚܰܕܬܳܐ ܐܶܬܬܣܺܝܡܬ: ܘܰܒܝܽܘܡ ܢܽܘܚܳܡܳܟ ܕܡ̣ܶܢ ܩܰܒܪܳܐ ܠܓܽܘܕܳܐ ܕܬܰܠܡܺܝ̈ܕܶܐ ܠܛܽܘܪܳܐ ܕܙܰܝ̈ܬܶܐ ܟܰܢ̣ܶܫܬ: ܘܒܰܦܫܳܛ ܐܺܝܕܰܝ̈ܟ ܩܰܕܺܝ̈ܫܳܬܳܐ ܕܰܥܠܰܝܗܽܘܢ ܠܗܽܘܢ ܒ̣ܰܪܶܟܬ: ܘܡܶܢܗܽܘܢ ܐܶܬܦܪܶܫ̣ܬ ܘܰܠܘܳܬ ܐܰܒܽܘܟ ܒܫܘܽܒܚܳܐ ܠܰܫܡܰܝ̈ܳܐ ܥܶܠܳܝ̈ܶܐ ܐܶܬܥܰܠܺܝܬ: ܟܰܕ ܠܪܽܘܚܳܐ ܩܰܕܺܝܫܳܐ ܥܰܠ ܫܠܺܝ̈ܚܶܐ ܕܺܝܠܳܟ ܒܳܬܰܪ ܥܶܣܪܳܐ ܝܰܘ̈ܡܺܝܢ ܕܫܽܘܕܳܝܳܟ ܕܰܠܘܳܬܗܽܘܢ ܫ̣ܰܕܰܪܬ: ܘܰܒܠܶܫ̈ܳܢܶܐ ܕܟܽܠ ܥܰܡ̈ܡܺܝܢ ܢܰܗܺܝܪܳܐܺܝܬ ܠܗܽܘܢ ܚܰܟ̣ܶܡܬ: ܐܰܝܟܰܢܳܐ ܕܢܺܐܙܽܠ̱ܘܢ ܢܰܟܪܙܽܘܢ ܒܰܒܪܺܝܬܳܐ: ܚܰܝ̈ܶܐ ܚܰܕ̈ܬܶܐ ܣܺܝܡܬܳܐ ܡܰܠܝܰܬ݀ ܚܰܕܘ̈ܳܬܳܐ ܕܺܝܠܳܟ ܐܶܡ̣ܰܪܬ ܘܰܓܠ̣ܰܝܬ ܟܰܕ ܥܰܠ ܡܶܐܬܺܝܬܳܟ ܬܪܰܝܳܢܺܝܬܳܐ ܠܬܰܠܡܺܝ̈ܕܰܝܟ ܐܰܪܶܙܬ: ܘܥܰܠ ܝܰܘܡܳܐ ܐ̱ܚܪܳܝܳܐ ܠܗܽܘܢ ܫܰܘܕܰܥ̣ܬ: ܘܰܕܙܰܕܺܝ̈ܩܶܐ ܢܰܢܗܪܽܘܢ ܐܰܝܟ ܫܶܡܫܳܐ ܒܡܰܠܟܽܘܬܳܟ ܘܰܒܫܽܘܒܚܳܐ ܕܪܰܒܽܘܬܳܟ ܠܗܽܘܢ ܒܰܣ̣ܶܡܬ ܟܰܕ ܗܳܟܺܝܠ ܒܳܥܶܝܢܰܢ ܡܫܺܝܚܳܐ ܡܳܪܰܢ: ܕܠܐܴ ܬܶܥܽܘܠ ܠܕܺܝܢܳܐ ܥܰܡܰܢ: ܘܠܐܴ ܡ̣ܶܢ ܩܕܳܡ ܦܰܪܨܽܘܦܳܟ ܒܪܽܘܓܙܳܐ ܢܶܬܕܚܶܩ: ܐܶܠܐܴ ܒܰܣܺܝܡܳܐܺܝܬ ܘܰܡܫܰܝܢܳܐܺܝܬ ܐܶܬܚܰܫܰܚ ܥܰܡܰܢ ܘܠܰܓܢܽܘܢܳܟ ܡܠܐܷ ܓܶܐܘ̈ܳܬܳܐ ܡܰܢܰܥ ܠܰܢ: ܘܰܒܢܽܘܗܪܳܐ ܕܺܝܠܳܟ ܗ̇ܰܘ ܕܠܐܴ ܥܳܒ̇ܰܪ ܘܰܕܠܐܴ ܥ̇ܳܪܶܒ ܦܰܛܶܡ ܠܰܢ. ܘܰܒܓܽܘ̈ܕܶܐ ܘܟܶܢ̈ܫܶܐ ܕܰܡܫܰܒ̈ܚܳܢܶܐ ܕܺܝܠܳܟ ܚܰܕܳܐ ܠܰܢ: ܘܡ̣ܶܢ ܝܰܡܺܝܢܳܟ ܒܪ̈ܰܚܡܶܐ ܐܰܩܺܝܡ ܠܰܢ: ܘܰܠܥܰܢܺܝ̈ܕܰܝܢ ܒܡܰܠܟܽܘܬܳܟ ܕܠܐܴ ܥܳܒܪܳܐ ܘܠܐܴ ܡܶܫܬܰܪܝܳܐ ܒܰܣܶܡ ܠܰܢ: ܐܳܦ ܠܰܢ ܘܰܠܥܰܢܺܝ̈ܕܰܝܢ ܒܰܚܙܳܬܳܐ ܕܺܝܠܳܟ ܡܰܪܘܙܳܢܺܝܬܳܐ ܐܰܦܨܰܚ ܠܰܢ: ܘܡ̣ܶܢ ܓܰܒܳܐ ܝܰܡܺܝܢܳܝܳܐ ܛܰܟܶܣ ܠܰܢ: ܐܰܝܟܰܢܳܐ ܕܥܰܡ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ: ܘܰܒܓܽܘܕܰܝ̈ܗܽܘܢ ܟܰܕ ܡܰܣܩܺܝܢܢ ܠܳܟ ܫܽܘܒܚܳܐ ܠܐܴ ܡܶܫܬܰܬܩܳܢܳܐ ܘܬܰܘܕܺܝܬܳܐ ܠܐܴ ܡܰܘܦܝܳܢܺܝܬܳܐ ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܫܠܡ

 

ܛܟܣܐ ܚܡܝܫܝܐ ܕܡܕܒܪܢܘܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܚܰܕܳܐ ܠܰܢ ܡܳܪܝܳܐ ܐܠܰܗܳܐ ܒܝܰܘܡܳܟ ܪܰܒܳܐ: ܘܰܐܦܨܰܚ ܠܰܢ ܒܥܰܕܥܺܐܕܳܟ ܡܰܦܨܚܳܢܳܐ ܘܠܐܴ ܡܶܫܬܰܪܝܳܢܳܐ. ܘܰܐܥܒ̣ܰܪ ܡܶܢܰܢ ܠܓܶܙ̈ܡܶܐ ܡܰܪܺܝܪ̈ܶܐ ܕܟܺܐܢܽܘܬܳܐ ܐܰܝܠܶܝܢ ܕܡܶܛܽܠ ܚܛܳܗܰܝ̈ܢ ܐܶܬܰܝܢ ܥܠܰܝܢ. ܠܐܴ ܬܶܐܠܽܘܨ ܘܬܶܫܕܶܐ ܠܰܢ ܠܒܰܪ ܡ̣ܶܢ ܐܰܝܠܶܝܢ ܕܠܐܴ ܡܨܶܝܢܰܢ ܚܰܝܠܐܴ. ܐܶܠܐܴ ܒܪ̈ܰܚܡܶܐ ܐܶܬܚܰܫܰܚ ܥܰܡܰܢ ܡܶܛܽܠ ܕܰܬܗܽܘܡܳܐ ܕܪ̈ܰܚܡܶܐ ܘܝܰܡܳܐ ܕܰܚܢܳܢܳܐ ܐܺܝܬܰܝܟ: ܘܠܳܟ ܫܽܘܒܚܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܗ̇ܰܘ ܬܗܽܘܡܳܐ ܕܪ̈ܰܚܡܶܐ ܘܰܡܥܺܝܢܳܐ ܕܛܳܒܽܘܬܳܐ: ܠܗ̇ܰܘ ܓܰܙܳܐ ܡܰܥܬܪܳܢܳܐ ܘܰܫܦܺܝܥܳܐ ܕܠܐܴ ܚ̇ܳܣܰܪ: ܘܠܐܴ ܡܬܽܘܡ ܡܶܬܚܰܙܝܳܐ ܠܘܳܬܳܟ ܣܢܺܝܩܽܘܬܳܐ. ܠܗ̇ܰܘ ܕܶܐܡ̣ܰܪ ܠܓܽܘܕܳܐ ܕܬܰܠܡܺܝ̈ܕܰܘܗܝ ܕܦܽܘܩܘ ܬܰܠܡܶܕܘ ܘܰܐܥܡܶܕܘ ܘܰܐܟܪܶܙܘ ܒܶܝܬ ܥܰܡ̈ܡܶܐ ܕܰܐܝܢܳܐ ܕܰܡܗܰܝܡܶܢ ܘܥ̇ܳܡܶܕ ܚ̇ܳܝܶܐ: ܘܰܐܝܢܳܐ ܕܠܐܴ ܡܗܰܝܡܶܢ ܡܶܬܚܰܝܰܒ: ܠܗ̇ܰܘ ܕܒܰܩܝܳܡܬܶܗ ܫܒܺܝܚܬܳܐ ܚܰܕܺܝ ܠܥܶܠܳܝ̈ܶܐ ܘܰܠܬܰܚܬܳܝ̈ܶܐ ܘܰܐܪܒܥܺܝܢ ܝܰܘ̈ܡܺܝܢ ܕܰܝܰܪ ܥܰܠ ܐܰܪܥܳܐ ܒܳܬܰܪ ܕܩܳܡ ܕܰܢܫܰܪܰܪ ܠܬܰܠܡܺܝ̈ܕܰܘܗܝ ܕܠܐܴ ܢܶܬܦܰܠܓܽܘܢ ܥܰܠ ܢܽܘܚܳܡܶܗ ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܰܢܽܘ ܡ̣ܶܢ ܒܪ̈ܰܝܳܐ ܘܰܥܒܺܝ̈ܕܶܐ ܡܶܫܟܰܚ ܕܰܢܣܰܝܶܟ ܠܟܽܠܳܗ̇ ܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܡܶܠܬܳܐ ܝܺܚܺܝܕܳܝܳܐ ܕܰܐܒܳܐ. ܐܰܘ ܡܰܢܽܘ ܡܨܶܐ ܕܢܰܕܪܳܟ ܠܚܰܝ̈ܠܐܷ ܬܡܺܝ̈ܗܶܐ ܕܰܣܥ̣ܰܪܬ ܠܘܳܬ ܓܶܢܣܰܢ ܡܚܺܝܠܐܴ: ܚܳܒ ܪܶܥܝܳܢܳܐ ܡ̣ܶܢ ܗ̇ܳܝ ܕܢܺܐܡܪܳܟ. ܕܥܺܝܪ̈ܰܝ ܪܰܘܡܳܐ ܡ̣ܶܢ ܙܺܝܘܳܐ ܡܫܰܒܚܳܐ ܕܪܰܒܽܘܬܳܟ ܟܳܘܙܺܝܢ: ܘܰܫܡ̈ܰܝ ܫܡܰܝ̈ܳܐ ܕܢܶܫܬܰܥܽܘܢ ܬܶܫܒܽܘܚܬܳܟ ܠܐܴ ܡܶܫܟܚܺܝܢ. ܘܥܺܝܪ̈ܶܐ ܘܡܰܠܐܱܟ̈ܶܐ ܘܚܰܝܠܰܘ̈ܳܬܳܐ ܠܳܟ ܒܰܐܡܺܝܢܽܘ ܡܗܰܕܪܺܝܢ: ܘܛܶܟ̈ܣܶܐ ܥܶܠܳܝ̈ܶܐ ܠܳܟ ܡܒܰܪܟܺܝܢ: ܘܰܒܢ̈ܰܝ ܥܰܦܪܳܐ ܠܳܟ ܡܫܰܒܚܺܝܢ ܟܰܕ ܣܳܓܕܺܝܢ ܒܢ̈ܰܝ ܐܳܕܰܡܬܳܐ ܒܰܡܕܰܒܪܳܢܽܘܬܳܟ ܡܰܠܝܰܬ݀ ܚܰܝ̈ܶܐ ܡܰܨܕܶܝܢ ܘܰܒܣܳܥܽܘܪܽܘܬܳܟ ܡܰܠܝܰܬ݀ ܟܽܠ ܥܽܘܕܪ̈ܳܢܶܐ ܡܶܬܕܰܡܪܺܝܢ ܐܳܦ ܬܳܡܗܺܝܢ: ܘܰܒܪܰܒܽܘܬ ܬܶܕܡܪ̈ܳܬܳܟ ܬܳܗܪܺܝܢ. ܟܰܕ ܒܝܰܠܕܳܟ ܡܳܪܳܢܳܝܳܐ ܘܕܰܠܥܶܠ ܡ̣ܶܢ ܙܰܒ̈ܢܶܐ ܥܺܝܪ̈ܰܝ ܪܰܘܡܳܐ ܕܰܡܫܰܒܚܺܝܢ ܘܚܰܝܠܰܘ̈ܳܬܳܐ ܫܡܰܝ̈ܳܢܶܐ ܕܰܡܗܰܠܠܺܝܢ ܪ̈ܳܥܰܘܳܬܳܐ ܪ̈ܳܥܝܰܝ ܥܳܢ̈ܳܐ ܘܰܡܓܽܘ̈ܫܶܐ ܘܰܒ̈ܢܰܝ ܡܰܠܟ̈ܶܐ ܕܕܳܫ̈ܢܶܐ ܠܡܰܠܟܳܐ ܡܫܺܝܚܳܐ ܡܩܰܪܒܺܝܢ: ܟܰܕ ܒܡܰܘܠܳܕܳܟ ܐ̱ܢܳܫܳܝܳܐ ܠܛܳܒ̈ܳܥܳܐ ܘܰܚܬܳܡ̈ܶܐ ܕܝܳܠܶܕܬܳܟ ܡܶܬܢܰܛܪܺܝܢ ܘܟܽܠ ܥܳܫܽܘ̈ܩܶܐ ܘܒܳܨܽܘ̈ܝܶܐ ܕܡܶܬܒܰܠܗܺܝܢ ܘܦܽܘ̈ܡܶܐ ܡܡܰܠܠܰܝ̈ ܡܦ̈ܰܬܠܳܬܳܐ ܘܰܡܥܰܩ̈ܡܳܬܳܐ ܕܡܶܣܬܰܟܪܺܝܢ: ܟܰܕ ܕܶܒ̈ܚܶܐ ܕܩܽܘܪ̈ܒܳܢܶܐ ܕܰܦܩܺܝܕܺܝܢ ܗ̣ܘܰܘ ܕܰܬܩܰܪܶܒ ܥܰܡ ܝܰܘܣܶܦ ܟܺܐܢܳܐ ܘܡܰܪܝܰܡ ܠܗܰܝܟܠܐܴ: ܣܳܠܩܺܝܢ ܘܡܶܬܢܰܣܒܺܝܢ: ܘܫܶܡܥܽܘܢ ܣܳܒܳܐ ܘܚܰܢܰܐ ܢܒܺܝܬܳܐ ܠܳܟ ܗ̣ܽܘ ܡܢܰܨܪܺܝܢ ܕܰܐܒܳܐ ܚܰܕ ܗ̣ܽܘ ܘܰܒܪܳܐ ܟܝܳܢܳܝܳܐ ܕܡܶܢܶܗ ܐܺܝܬܰܝܟ ܣܳܗܕܺܝܢ: ܟܰܕ ܒܰܥܡܳܕܳܟ ܩܰܕܺܝܫܳܐ ܡܰܝ̈ܳܐ ܝܽܘܪ̈ܕܢܳܢܳܝܶܐ ܡܶܬܩܰܕܫܺܝܢ ܘܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܰܐܠܳܗܽܘܬܳܟ ܡܶܬܟܰܪܙܺܝܢ. ܘܰܕܒܰܚܕܳܐ ܐܽܘܣܺܝܰܐ ܘܰܟܝܳܢܳܐ ܘܫܽܘܠܛܳܢܳܐ ܡܶܬܝܰܕܥܺܝܢ: ܘܰܕܚܰܕ ܐܰܢ̱ܬ ܕܠܐܴ ܦܽܘܠܳܓ: ܢܳܩܽܘ̈ܦܶܐ ܕܠܰܣܒܰܪܬܳܟ ܚܕܰܬܳܐ ܡܗܰܝܡܢܺܝܢ: ܟܰܕ ܒܰܩܪܳܒܳܐ ܕܥܰܡ ܡܢܰܣܝܳܢܳܐ ܕܰܐܪ̈ܶܐ ܬܠܺܝܬܳܝ̈ܶܐ ܒܦܽܘܢܳܝ̈ܶܐ ܬܠܺܝܬܳܝ̈ܶܐ ܡܶܣܬܰܚܦܺܝܢ: ܘܡܰܠܐܱܟ̈ܶܐ ܩܰܕܺܝ̈ܫܶܐ ܕܰܠܘܳܬܳܟ ܩܳܪܒܺܝܢ ܘܰܡܫܰܡܫܺܝܢ: ܟܰܕ ܒܣܳܥܽܘܪܽܘܬܳܟ ܒܳܝ̈ܫܶܐ ܘܡܶܣ̈ܟܺܢܶܐ ܡܶܣܬܰܒܪܺܝܢ ܘܰܫܒܰܝ̈ܳܐ ܡܶܬܦܰܪܩܺܝܢ: ܘܕܰܝܘ̈ܳܢܶܐ ܡܶܬܚܰܪܪܺܝܢ: ܘܰܡܫܰܪ̈ܰܝܳܐ ܡܶܬܚܰܪܪܺܝܢ ܟܦܺܝ̣̈ܦܶܐ ܡܶܬܦܰܫܛܺܝܢ: ܘܰܡܡܰܚܰܝ̈ܳܐ ܡܶܬܚܰܠܡܺܝܢ: ܘܡܺܝ̈ܬܶܐ ܡܶܬܢܰܚܡܺܝܢ: ܘܬܽܘܒ ܕܶܝܢ ܒܡܶܬܗܰܦܟܳܢܽܘܬܳܐ ܕܺܝܠܳܟ ܕܥܰܡ ܣܳܦܪ̈ܶܐ ܘܰܦܪ̈ܺܝܫܶܐ ܚܰܘ̈ܒܶܐ ܘܰܚܛܳܗ̈ܶܐ ܡܶܫܬܰܒܩܺܝܢ: ܣܡܰܝ̈ܳܐ ܡܶܬܦܰܬܚܺܝܢ: ܫܺܐܕ̈ܶܐ ܡܶܬܛܰܪܕܺܝܢ: ܐܠܰܦܰܝ̈ܳܐ ܕܥܰܡ̈ܡܶܐ ܕܡ̣ܶܢ ܠܰܚܡ̈ܶܐ ܒܨܺܝܪ̈ܶܐ ܣܳܒܥܺܝܢ: ܟܰܕ ܒܡܰܥܠܬܳܐ ܕܺܝܠܳܟ ܠܰܡܕܺܝܢܰܬ݀ ܩܽܘܕ̈ܫܶܐ ܐܽܘܪܫܠܶܡ ܫܰܒܪ̈ܶܐ ܘܝܰܠܽܘ̈ܕܶܐ ܒܦܽܘ̈ܡܶܐ ܠܐܴ ܡܥܰܝ̈ܕܰܝ ܒܡܰܡܠܠܐܴ ܐ̱ܢܳܫܳܝܳܐ ܠܳܟ ܡܫܰܒܚܺܝܢ ܘܰܒܣܰܘ̈ܟܶܐ ܕܙܰܝܬܳܐ ܘܰܕܕܶܩ̈ܠܐܷ ܠܳܟ ܡܩܰܠܣܺܝܢ ܘܰܠܣ̈ܳܒܶܐ ܣܰܟ̈ܠܐܷ ܕܰܒܟܺܐܦ̈ܶܐ ܐܰܪܥܽܘܟ ܡܟܰܐܐܪܺܝܢ: ܟܰܕ ܬܰܠܡܺܝ̈ܕܰܝܟ ܩܰܕܺܝ̈ܫܶܐ ܦܶܨܚܳܐ ܡܽܘܫܳܝܳܐ ܥܰܡܳܟ ܐܳܟܠܺܝܢ: ܘܪ̈ܶܓܠܐܷ ܕܺܝܠܗܽܘܢ ܡܶܬܬܫܺܝܓܺܝܢ ܡܶܢܳܟ ܘܡܰܠܦܳܢܽܘܬܳܐ ܡܰܠܝܰܬ݀ ܐ̱ܪ̈ܳܙܶܐ ܡܶܢܳܟ ܫܳܡܥܺܝܢ. ܟܰܕ ܛܺܝ̣̈ܡܰܝ ܪܰܒܽܘܬܳܟ ܠܝܽܘܕܳܐ ܙܺܐܦܳܢܳܐ ܝܽܘ̈ܕܳܝܶܐ ܣܰܟ̈ܠܐܷ ܝܳܗܒܺܝܢ: ܚܰܢܳܢ ܘܩܰܝܳܦܳܐ ܒܳܟ ܡܒܰܙܚܺܝܢ: ܘܢܶܓ̈ܕܶܐ ܘܡܰܚܘ̈ܳܬܳܐ ܠܗܰܕܳܡܰܝ̈ܟ ܡܣܰܒܠܺܝܢ: ܘܐܝܟ ܕܰܒܚܶܣܕܳܐ ܩܕܳܡܰܝܟ ܒܳܪܟܺܝܢ ܘܣܳܓܕܺܝܢ: ܘܰܟܠܺܝܠܐܴ ܟܽܘܒܳܢܳܝܳܐ ܒܪܺܝܫܳܟ ܩܳܒܥܺܝܢ: ܟܰܕ ܟܠܐܱܡܺܝܣ ܕܰܙܚܽܘܪܺܝܬܳܐ ܠܳܟ ܡܰܠܒܫܺܝܢ: ܘܰܕܫ̇ܳܘܶܐ ܠܡܰܘܬܳܐ ܐܺܝܬܰܝܟ ܩܳܥܶܝܢ ܘܳܐܡܪܺܝܢ: ܘܥܰܡ ܓܰܝ̈ܳܣܶܐ ܠܐܴ ܢܳܡܽܘ̈ܣܳܝܶܐ ܠܰܡܙܰܩܳܦܽܘ ܠܳܟ ܕܳܒܪܺܝܢ ܘܥܰܠ ܩܰܝܣܳܐ ܠܳܟ ܙܳܩܦܺܝܢ. ܟܰܕ ܒܩܳܠܳܟ ܡܰܐܚܝܳܢܳܐ ܫܽܘ̈ܥܶܐ ܦܳܩܥܺܝܢ: ܘܩܰܒܪ̈ܶܐ ܡܶܬܦܰܬܚܺܝܢ ܘܡܺܝ̈ܬܶܐ ܡܶܬܢܰܚܡܺܝܢ ܟܺܐܢ̈ܶܐ ܡܝܰܒܒܺܝܢ: ܘܡܰܘܬܳܐ ܘܣܳܛܳܢܳܐ ܢܳܝܕܺܝܢ: ܘܰܩܪܳܒܳܐ ܥܰܡ ܚܕ̈ܳܕܶܐ ܕܳܪܫܺܝܢ: ܟܰܕ ܝܰܘܣܶܦ ܘܢܺܝܩܳܘܕܺܝܡܳܘܣ ܒܗܶܪ̈ܽܘܡܶܐ ܕܟܰܝ̈ܳܐ ܠܳܟ ܡܚܰܢܛܺܝܢ: ܘܰܒܩܰܒܪܳܐ ܚܰܕܬܳܐ ܢܩܺܝܪ ܒܫܽܘܥܳܐ ܠܳܟ ܡܥܰܦܶܝܢ ܘܣܳܝܡܺܝܢ ܘܡܶܙܕܰܗܪܺܝܢ: ܟܰܕ ܒܰܩܝܳܡܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܕܡ̣ܶܢ ܩܰܒܪܳܐ ܥܺܝܪ̈ܶܐ ܢܳܚ̇ܬܺܝܢ ܘܰܡܫܰܒܚܺܝܢ: ܢܳܛܽܘܪ̈ܶܐ ܡܶܬܬܙܺܝܥܺܝܢ ܬܰܠܡܺܝ̈ܕܶܐ ܕܡ̣ܶܢ ܢܶܫ̈ܶܐ ܡܶܣܬܰܒܪܺܝܢ: ܐܰܝܟܰܢܳܐ ܕܰܠܩܰܒܪܳܐ ܪܳܗܛܺܝܢ: ܘܰܕܢܺܐܙܽܠ̱ܘܢ ܠܰܓܠܺܝܠܐܴ ܡܶܬܦܰܩܕܺܝܢ. ܟܰܕ ܒܝܰܘܡܳܐ ܕܢܽܘܚܳܡܳܟ ܒܢ̈ܰܝ ܐ̱ܪܳܙܳܟ ܕܳܝܨܺܝܢ ܡܒܰܕܪ̈ܶܐ ܕܡܶܬܟܰܢܫܺܝܢ ܥܰܪ̈ܺܝܩܶܐ ܕܨܳܝܒܺܝܢ: ܟܡܺܝܪ̈ܶܐ ܕܡܶܬܦܰܨܚܺܝܢ: ܝܽܘ̈ܕܳܝܶܐ ܕܪܺܝܫܳܐ ܡܰܪܟܢܺܝܢ: ܘܚܰܨܳܐ ܠܰܥܪܽܘܩܝܳܐ ܝܳܗܒܺܝܢ. ܟܰܕ ܒܥܶܠܺܝܬܳܐ ܐ̱ܪܳܙܳܢܳܝܬܳܐ ܫܠܺܝ̈ܚܶܐ ܩܰܕܺܝ̈ܫܶܐ ܩܰܫܺܝ̈ܫܶܐ ܡܶܬܬܰܣܪܚܺܝܢ ܘܫܽܘܠܛܳܢܳܐ ܡܳܪܳܢܳܝܳܐ ܡ̣ܶܢ ܡܳܪܗܽܘܢ ܢܳܣܒܺܝܢ: ܘܚܰܘ̈ܒܶܐ ܘܰܚܛܳܗ̈ܶܐ ܫܳܒܩܺܝܢ ܘܰܠܥ̈ܶܛܠܐܷ ܘܢܽܘܟܪ̈ܳܝܰܝ ܠܰܫܪܳܪܳܐ ܠܺܝܕܰܥܬܳܐ ܡܩܰܪܒܺܝܢ. ܟܰܕ ܒܰܚܙܳܬܳܐ ܘܓܶܫܬܳܐ ܕܫܽܘ̈ܡܳܬ ܗܰܕܳܡܰܝ̈ܟ ܘܰܒܡܶܬܚܰܘܝܳܢܽܘܬܳܟ ܕܰܠܗܽܘܢ ܡܶܫܬܰܪܪܺܝܢ ܘܰܒܣܽܘܠܳܩܳܟ ܕܠܰܫܡܰܝܳܐ ܠܛܽܘܪ ܙܰܝ̈ܬܶܐ ܡܶܬܟܰܢܫܺܝܢ: ܘܶܐܦܣܩܽܘ̈ܦܶܐ ܡܶܬܬܰܣܪܚܺܝܢ ܘܥܰܠ ܡܰܪ̈ܥܝܳܬܳܐ ܡܡܰܠܟܺܝܢ: ܟܰܕ ܬܰܠܡܺܝ̈ܕܶܐ ܥܰܠ ܦܽܘܪܫܳܢܳܟ ܕܡ̣ܶܢ ܠܘܳܬܗܽܘܢ ܡܶܬܬܥܺܝܩܺܝܢ: ܘܡܰܠܐܱܟ̈ܶܐ ܩܰܕܺܝ̈ܫܶܐ ܒܓܶܦ̈ܶܐ ܢܽܘܪ̈ܳܢܳܝܶܐ ܠܳܟ ܡܩܰܒܠܺܝܢ: ܘܰܕܡܰܢܽܘ ܗܳܢܳܐ ܕܶܐܬܳܐ ܡ̣ܶܢ ܐܰܕܽܘܡ ܡܫܰܐܠܺܝܢ: ܘܕܰܐܪܺܝܡܘ ܬܰܪ̈ܥܶܐ ܪ̈ܺܝܫܰܝܟܽܘܢ ܐܰܝܟܰܢܳܐ ܕܢܶܥܽܘܠ ܒܟܽܘܢ ܡܰܠܟܳܐ ܕܺܐܝܩܳܪ̈ܶܐ ܠܰܚܕ̈ܳܕܶܐ ܐܳܡܪܺܝܢ. ܟܰܕ ܗܰܘ̈ܢܶܐ ܕܰܒܪ̈ܰܝܳܐ ܡܶܢܳܟ ܚܳܝܒܺܝܢ: ܕܰܠܡܰܘܬܒܳܐ ܐܰܒܳܗܳܝܳܐ ܡܰܢܰܥ̣ܬ ܡܶܫܬܰܘܕܥܺܝܢ: ܘܰܒܪܽܘܚܳܐ ܦܰܪܰܩܠܺܝܛܳܐ ܕܫ̣ܰܕܰܪܬ ܫܠܺܝ̈ܚܶܐ ܡܶܬܚܰܟܡܺܝܢ. ܟܰܕ ܬܰܠܡܺܝ̈ܕܶܐ ܠܟܽܠ ܥܰܡ̈ܡܺܝܢ ܕܰܒܪܺܝܬܳܐ ܡܶܫܬܰܕܪܺܝܢ: ܘܰܠܛܳܥܰܝ̈ܳܐ ܐܽܘܪܚܳܐ ܕܚܰܝ̈ܶܐ ܡܰܠܦܺܝܢ: ܘܰܠܟܽܠ ܐ̱ܢܳܫ ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܡܬܰܠܡܕܺܝܢ ܘܡܰܥܡܕܺܝܢ: ܟܰܕ ܝܰܠܕ̈ܶܝܗ̇ ܕܥܺܕܬܳܐ ܩܰܕܺܝܫܬܳܐ ܠܳܟ ܡܫܺܝܚܳܐ ܐܠܰܗܳܐ ܡܠܐܷ ܪ̈ܰܚܡܶܐ ܘܰܚܢܳܢܳܐ ܡܦܺܝܣܺܝܢ ܘܡܶܬܟܰܫܦܺܝܢ: ܘܒܰܚܢܺܝܓܽܘܬܳܐ ܡܰܠܝܰܬ݀ ܟܽܠ ܦܽܘܪܫܳܢ ܩܳܥܶܝܢ ܘܳܐܡܪܺܝܢ: ܐܰܘܳܐ ܠܕܰܦܠܺܝܓܺܝܢ. ܒܰܝܬܳܐ ܠܕܰܡܒܰܕܪܺܝܢ ܥܰܕܰܪ ܠܐܱܝܠܶܝܢ ܕܰܡܚܺܝܠܺܝܢ ܣܡܽܘܟ ܠܕܰܬܒܺܝܪܺܝܢ ܩܪܺܝ ܘܰܐܣܩ ܠܰܕܛܰܒܺܝܥܺܝܢ: ܐܰܩܺܝܡ ܠܐܱܝܠܶܝܢ ܕܢܰܦܺܝܠܺܝܢ ܡܰܟܶܟ ܠܕܰܚܬܺܝܪܺܝܢ ܠܰܒ̣ܶܒ ܠܕܰܡܥܳܩܺܝܢ: ܟܰܗܶܢ ܠܕܰܡܟܰܗܢܺܝܢ ܐܰܪܺܝܡ ܠܐܱܝܠܶܝܢ ܕܡܰܟܺܝܟܺܝܢ: ܚܰܣܳܐ ܠܐܱܝܠܶܝܢ ܕܚܰܝܳܒܺܝܢ ܛܰܐܠܐܴ ܠܕܰܙܥܽܘܪܺܝܢ: ܝܰܬܶܒ ܠܕܰܣܕܺܝܩܺܝܢ: ܐܰܚܠܶܡ ܠܰܕܡܰܪܥܶܝܢ ܫܒܽܘܩ ܠܐܱܝܠܶܝܢ ܕܡܰܣܟܠܺܝܢ ܢܰܛܰܪ ܠܰܒܬܽܘ̈ܠܐܷ: ܘܬܰܪܶܨ ܠܕܰܟܦܺܝܦܺܝܢ: ܒܰܪܶܟ ܐܶܢܽܘܢ ܠܕܰܡܙܰܘܓܺܝܢ ܫܪܺܝ ܕܰܠܕܰܦܟܺܝܪܺܝܢ ܚܰܪܰܪ ܠܕܰܐܣܺܝܪܺܝܢ: ܕܰܟܳܐ ܠܕܰܡܟܰܬܡܺܝܢ ܚܰܝܶܠ ܠܰܕܨܳܐܐܶܝܢ ܩܰܶܕܫ ܠܰܕܛܰܡܺܝܢ: ܦܪܽܘܩ ܠܕܰܐܠܺܝܨܺܝܢ: ܢܰܦܶܫ ܠܰܕܡܰܐܟܰܐܒܺܝܢ ܪܰܘܰܚ ܠܕܰܐܒܺܝܠܺܝܢ ܦܰܢܳܐ ܠܰܕܪܰܚܺܝܩܺܝܢ ܥܢܺܝ ܠܐܱܝܠܶܝܢ ܕܰܛܠܺܝܡܺܝܢ: ܙܽܘܢ ܠܕܰܣܢܺܝܩܺܝܢ: ܘܰܐܢܺܝܚ ܠܐܱܝܠܶܝܢ ܕܰܫܟܺܝܒܺܝܢ: ܘܰܠܣܰܒܪܳܟ ܡܰܐܚܝܳܢܳܐ ܚܳܝܪܺܝܢ ܐܰܝܟܰܢܳܐ ܕܒܰܓܢܽܘܢܳܟ ܡܠܐܷ ܢܽܘܗܪܳܐ ܡܶܬܒܰܣܡܺܝܢ: ܒܚܰܝ̈ܶܐ ܚܰܕ̈ܬܶܐ ܕܠܐܴ ܥܳܒܪܺܝܢ: ܟܰܕ ܫܽܘܒܚܳܐ ܘܩܽܘܒܳܠ ܛܰܝܒܽܘܬܳܐ ܠܳܟ ܝܳܨܦܺܝܢ ܘܡܰܣܩܺܝܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܐܠܰܗܳܐ ܗ̇ܰܘ ܩܰܕܺܝܫܳܐ ܕܰܒܩܰܕܺܝ̈ܫܶܐ ܡܶܬܬܢܺܝܚ: ܗ̇ܰܘ ܕܺܐܝܬܰܝܟ ܬܶܫܒܽܘܚܬܳܐ ܕܰܢܒܺܝ̈ܶܐ ܫܽܘܒܗܳܪܳܐ ܕܰܫܠܺܝ̈ܚܶܐ ܟܠܺܝܠܐܴ ܕܣܳܗ̈ܕܶܐ ܚܰܕܽܘܬܳܐ ܕܙܰܕܺܝ̈ܩܶܐ: ܣܰܒܪܳܐ ܕܗ̇ܳܢܽܘܢ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ. ܗܰܒܠܰܢ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ. ܗܰܒܠܰܢ ܡܳܪܝ ܕܪܽܘܚܳܢܳܐܺܝܬ ܢܫܰܡܠܐܷ ܕܽܘܟܪ̈ܳܢܰܝܗܽܘܢ: ܘܰܕܢܰܐܚܶܒ ܠܐܱܝܠܶܝܢ ܕܰܐܚܒܽܘܟ ܘܢܶܬܕܰܡܶܐ ܒܰܛܢܳܢܗܽܘܢ ܘܒܰܡܝܰܬܪܽܘܬܗܽܘܢ: ܐܺܝܢ ܐܠܰܗܳܐ ܗ̇ܰܘ ܕܰܡܫܰܒܰܚ ܐܰܢ̱ܬ ܠܐܱܝܠܶܝܢ ܕܰܡܫܰܒܚܺܝܢ ܠܳܟ: ܩܰܒܶܠ ܐܶܢܽܘܢ ܕܢܶܗܘܽܘܢ ܠܳܟ ܐܺܝܙܓܰܕ̈ܶܐ ܘܰܡܦܺܝ̈ܣܳܢܶܐ ܚܠܳܦ ܥܳܢܳܟ: ܘܰܐܫܘܳܐ ܕܬܶܗܘܶܐ ܠܰܢ ܡܢܳܬܳܐ ܘܝܳܪܬܽܘܬܳܐ ܥܰܡܗܽܘܢ: ܒܡܰܠܟܽܘܬܳܐ ܕܰܫܡܰܝܳܐ ܡܶܛܽܠ ܕܰܐܠܳܗܳܐ ܡܪܰܚܡܳܢܳܐ ܐܺܝܬܰܝܟ ܗܳܫܳܐ܀

 

ܚܘܬܡܐ

ܐܠܰܗܳܐ ܗ̇ܰܘ ܪܰܒܳܐ ܘܰܡܥܰܠܝܳܐ: ܚܰܣܝܳܐ ܘܩܰܕܺܝܫܳܐ ܕܰܒܩܰܕܺܝ̈ܫܶܐ ܫ̇ܳܪܶܐ: ܓܳܡ̇ܰܪ ܨܶܒܝܳܢܶܗ: ܩܰܕܶܫ ܠܰܢ ܒܝܰܘܡܳܐ ܗܳܢܳܐ ܕܕܽܘܟܪ̈ܳܢܰܝܗܽܘܢ: ܘܗܰܒ ܠܰܢ ܕܩܕܺܝܫܳܐܺܝܬ ܢܶܬܩܰܕܰܫ ܒܩܰܕܺܝܫܽܘܬܳܐ ܕܢܰܦܫܳܐ ܘܰܕܦܰܓܪܳܐ: ܘܰܐܫܘܳܐ ܠܰܢ ܕܰܢܫܰܡܠܐܷ ܝܰܘܡܳܐ ܕܥܺܐܕܰܝ̈ܗܽܘܢ ܒܚܰܕܽܘܬܳܐ ܡܫܰܡܠܳܝܬܳܐ: ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ: ܘܰܢܝܰܩܰܪ ܠܗ̇ܳܝ ܕܝܳܠܶܕܬܳܟ ܒܕܰܟܝܽܘܬܳܐ ܘܩܰܕܺܝܫܽܘܬܳܐ: ܘܢܶܫܰܐܠ ܨܠܘ̈ܳܬܳܗ̇ ܚܰܣ̈ܝܳܬܳܐ ܘܩܰܕܺܝ̈ܫܳܬܳܐ: ܘܒܰܝܢܳܬܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܚܰܕ ܐܠܰܗܳܐ ܫܰܪܺܝܪܳܐ ܕܒܰܬܠܺܝܬܳܝܽܘܬ ܩܽܘ̈ܕܳܫܶܐ ܡ̣ܶܢ ܣܪ̈ܳܦܶܐ ܩܰܕܺܝ̈ܫܶܐ ܡܶܬܩܰܕܰܫ: ܘܗ̣ܽܘ ܟܰܕ ܗ̣ܽܘ ܒܰܚܕܳܐ ܠܚܽܘܕܳܝܽܘܬ ܡܳܪܽܘܬܳܐ ܡ̣ܶܢ ܟܪ̈ܽܘܒܶܐ ܡܶܬܒܰܪܰܟ: ܗ̇ܰܘ ܕܰܒܬܶܗܪܳܐ ܕܪܽܘܡܪ̈ܳܡܰܝܗܽܘܢ ܕܥܶܠܳܝ̈ܶܐ ܡܶܬܪܰܡܪܰܡ: ܘܰܒܩ̈ܳܠܐܷ ܕܟܰܝ̈ܳܐ ܕܦܽܘܡܰܝ̈ܗܽܘܢ ܕܬܰܚܬܳܝ̈ܶܐ ܡܶܬܩܰܠܰܣ. ܘܠܶܗ ܡܫܰܒ̈ܚܳܢ ܪ̈ܽܘܚܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ: ܘܰܐܒ̈ܳܗܳܬܳܐ: ܢܒܺܝ̈ܶܐ: ܘܰܫܠܺܝ̈ܚܶܐ: ܘܰܡܣܰܒܪ̈ܳܢܶܐ: ܘܡܰܘ̈ܕܝܳܢܶܐ: ܘܣܳܗ̈ܕܶܐ: ܘܡܰܠܦܳܢ̈ܶܐ: ܬܪ̈ܺܝܨܰܝ ܫܽܘܒܚܳܐ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܒܳܥܶܝܢܰܢ ܡܶܢܟܽܘܢ ܐܳܘ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܰܐܒܳܗ̈ܳܬܳܐ: ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܡܰܐܚܒܳܢܰܘ̈ܗܝ ܕܡܳܪܰܢ: ܪ̈ܰܒܰܝ ܚܰܝܠܰܘ̈ܳܬܶܗ ܕܰܡܫܺܝܚܳܐ ܐܰܚܺܝܕ ܟܽܠ ܡܰܓܕ̈ܠܐܷ ܕܰܫܪܳܪܳܐ ܓܰܒܪ̈ܶܐ ܕܕܶܚܠܰܬ݀ ܐܠܰܗܳܐ ܢܳܨܽܘ̈ܒܶܐ ܕܗܰܝܡܳܢܽܘܬܳܐ ܫܰܪܺܝܪܬܳܐ: ܐܰܪ̈ܕܺܝܟܠܐܷ ܕܥܺܕܰܬ݀ ܩܽܘܕܫܳܐ. ܐܳܣܘ̈ܳܬܳܐ ܕܫܽܘܚ̈ܢܶܐ ܕܰܚܛܺܝܬܳܐ: ܣܳܦܪ̈ܶܐ ܕܙܰܕܺܝܩܽܘܬܳܐ ܡܰܠܦܳܢ̈ܶܐ ܕܢܰܟܦܽܘܬܳܐ ܥܳܩܽܘܪ̈ܶܐ ܕܛܳܥܝܽܘܬܳܐ: ܡܰܐܚܒܳܢܰܘ̈ܗܝ ܕܚܽܘܒܳܐ: ܟܰܘܟ̈ܒܶܐ ܨܰܦܪ̈ܳܝܶܐ ܕܬܳܪܨܺܝܢ ܩܕܳܡܰܝܢ ܒܥܳܠܡܳܐ ܗܳܢܳܐ ܡܰܪܕܺܝܬܳܐ ܕܚܰܝ̈ܶܐ ܠܐܴ ܡܳܝܽܘ̈ܬܷܐ: ܙܰܠܺܝ̈ܩܰܘܗܝ ܕܫܶܡܫܳܐ ܕܙܰܕܺܝܩܽܘܬܳܐ ܗ̇ܳܢܽܘܢ ܕܡܰܢܗܪܺܝܢ ܥܰܝ̈ܢܶܐ ܕܰܒܢܰܝ̈ܢܳܫܳܐ: ܡܶܠܚܳܐ ܪܽܘܚܳܢܳܝܬܳܐ ܕܰܐܣܝܰܬ݀ ܬܰܡܣܽܘܬܳܗ̇ ܕܚܰܢܦܽܘܬܳܐ ܘܰܕܝܽܘܕܳܝܽܘܬܳܐ ܐܰܝܟ ܡܥܰܕܪ̈ܳܢܶܐ ܕܟܽܠܳܗ̇ ܬܺܐܒܶܝܠ ܕܰܫܩ̣ܰܠܘ ܒܦܰܓܪ̈ܰܝܗܽܘܢ ܚܰܫ̈ܶܐ ܘܟܽܘܬܡ̈ܳܬܶܗ ܕܰܡܫܺܝܚܳܐ: ܗ̣ܘܰܘ ܗܳܟܺܝܠ ܒܰܥܳܝ̈ܶܐ ܘܺܐܙܓ̈ܰܕܶܐ ܚܠܳܦܰܝܢ ܐܰܝܟܰܢܳܐ ܕܚܰܘ̈ܒܰܝܢ ܢܶܬܥܛܽܘܢ ܘܰܚܛܳܗ̈ܶܐ ܕܺܝܠܰܢ ܢܶܬܚܰܣܽܘܢ: ܘܣܰܟܠܘ̈ܳܬܰܢ ܢܶܫܬܰܒܩܽܘܢ: ܘܰܒܝܰܕ ܬܰܟܫ̈ܦܳܬܟܽܘܢ ܩܰܕܺܝ̈ܫܳܬܳܐ ܫܒܰܝ̈ܳܐ ܢܶܬܦܰܪܩܽܘܢ: ܚܒܺܝ̈ܫܶܐ ܢܶܬܚܰܪܪܽܘܢ ܐܰܣܺܝܪ̈ܶܐ ܢܶܫܬܪܽܘܢ: ܐܰܒܺܝ̣̈ܠܐܷ ܢܶܬܒܰܐܝܽܘܢ: ܡܥ̈ܳܩܶܐ ܢܶܬܠܰܒܒܽܘܢ: ܪ̈ܰܚܺܝܩܶܐ ܢܶܨܛܰܝܒܽܘܢ: ܩܰܪ̈ܺܝܒܶܐ ܢܶܬܢܰܛܪܽܘܢ: ܐܰܒܺܝ̣̈ܕܶܐ ܢܶܫܬܰܟܚܽܘܢ: ܥܰܬܺܝܪ̈ܶܐ ܘܟܰܗܺܝܢܽܘܬܳܐ ܢܶܬܒܰܪܟܽܘܢ: ܡܶܣܟܺܢ̈ܶܐ ܘܰܣܢܺܝ̣̈ܩܶܐ ܢܶܬܦܰܪܢܣܽܘܢ: ܟܪ̈ܺܝܗܶܐ ܘܰܐܠܺܝ̣̈ܨܶܐ ܢܶܬܚܰܠܡܽܘܢ ܛܳܥܰܝ̈ܳܐ ܢܶܬܦܢܽܘܢ: ܢܶܣܝܽܘ̈ܢܶܐ ܢܶܥܒܪܽܘܢ: ܫܰܒ̈ܛܶܐ ܕܪܽܘܓܙܳܐ ܢܶܬܟܠܽܘܢ: ܘܫܰܝܢܳܐ ܘܰܫܠܳܡܳܐ ܢܰܡܠܟܽܘܢ. ܘܥܺܕܬܳܐ ܘܝܰܠܕ̈ܶܝܗ̇ ܢܶܚܕܽܘܢ: ܟܳܗ̈ܢܶܐ ܒܙܰܗܝܽܘܬܳܐ ܢܫܰܡܫܽܘܢ: ܡܫܰܡ̈ܫܳܢܶܐ ܒܕܰܟܝܽܘܬܳܐ ܢܗܰܠܠܽܘܢ: ܪ̈ܳܥܰܘܳܬܳܐ ܒܪ̈ܰܚܡܶܐ ܘܰܚܢܳܢܳܐ ܢܶܬܢܰܛܪܽܘܢ: ܘܥܰܠ ܟܽܠ ܬܶܓܡܺܝ̣̈ܢ ܕܒܳܗ̇ ܪ̈ܰܚܡܶܐ ܢܶܫܬܰܦܥܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܥܰܠ ܡܰܕܒܚܳܐ ܫܡܰܝܳܢܳܐ ܢܶܬܕܰܟܪܽܘܢ: ܘܟܽܠܰܢ ܥܰܡ ܟܽܠܰܢ ܢܶܫܬܘܶܐ ܠܬܰܠܡܺܝܕܽܘܬܟܽܘܢ ܓܡܺܝܪܬܳܐ: ܘܰܠܡܰܠܦܳܢܽܘܬܟܽܘܢ ܕܪܽܘܚ: ܘܰܠܡܽܘܠܟܳܢܟܽܘܢ ܛܽܘܒܬܳܢܳܐ ܒܰܡܫܺܝܚܳܐ ܝܶܫܽܘܥ ܡܳܪܟܽܘܢ ܘܰܡܟܰܠܠܳܢܟܽܘܢ ܒܰܐܓܽܘ̈ܢܰܝܟܽܘܢ ܗ̇ܰܘ ܕܒܺܐܝ̈ܕܰܘܗܝ ܘܥܰܡܶܗ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܪܰܒܳܐ ܕܩܽܘܫܬܳܐ ܘܕܰܫܪܳܪܳܐ ܕܰܐܠܶܦ ܠܗܶܕܝܽܘ̈ܛܶܐ ܚܶܟܡܬܳܐ: ܕܠܐܴ ܦܳܐܕܳܐ: ܘܰܐܩܢܺܝ ܠܰܦܫܺܝ̈ܛܶܐ ܝܺܕܰܥܬܳܐ ܕܠܐܴ ܥܳܒ̇ܪܳܐ ܘܰܐܥܬܰܪ ܠܡܶܣ̈ܟܺܢܶܐ ܒܥܽܘܬܪܳܐ ܕܠܐܴ ܡܰܘܦܶܐ: ܘܚܰܕܺܝ ܠܥܺܕܬܳܐ ܩܰܕܺܝܫܬܳܐ ܒܕܽܘܟܪ̈ܳܢܰܝܗܽܘܢ: ܘܰܐܦܨܰܚ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ ܒܝܰܘܡܳܐ ܕܥܰܕܥܺܐܕܰܝ̈ܗܽܘܢ: ܘܗܳܐ ܥܺܕܰܬ݀ ܩܽܘܕܫܳܐ ܡܗܰܝܡܰܢܬܳܐ ܛܳܦܣܳܐ ܒܓܰܪ̈ܡܰܝܗܽܘܢ ܘܫܳܐܠܐܴ ܪ̈ܰܚܡܶܐ ܘܰܚܢܳܢܳܐ ܘܫܽܘܒܩܳܢܳܐ ܕܢܶܗܘܶܐ ܠܝܰܠܕܶܝ̈ܗ̇ ܒܺܐܝܕܰܝ̈ܗܽܘܢ: ܕܠܶܗ ܠܡܳܪܝܳܐ ܕܰܓܒ̣ܳܐ ܐܶܢܽܘܢ ܫܽܘܒܚܳܐ ܡܰܣܩܺܝܢܰܢ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܳܪܝܳܐ ܐܠܰܗܳܐ ܗ̇ܰܘ ܡܝܰܬܰܪ ܒܟܽܠ: ܗ̇ܰܘ ܕܰܐܢ̱ܬ ܒܰܠܚܽܘܕܰܝܟ ܐܺܝܬܰܝܟ ܚܰܣܝܳܐ ܕܰܚܣܰܝ̈ܳܐ: ܠܗ̇ܳܢܽܘܢ ܕܥܰܠ ܐܰܪܥܳܐ ܐܶܬܚܰܣܺܝܘ: ܒܰܐܪܥܳܐ ܘܒܰܫܡܰܝܳܐ ܚܰܣܝܳܐܺܝܬ ܡܚܰܣܶܐ ܐܰܢ̱ܬ ܘܰܡܩܰܕܶܫ ܐܰܢ̱ܬ: ܗ̇ܰܘ ܕܣܽܘܟܳܝܳܐ ܕܪ̈ܺܝܫܰܝ ܟܳܗ̈ܢܶܐ ܘܪܽܘܫܡܳܐ ܕܰܢܒܺܝ̈ܶܐ: ܫܪܳܪܳܐ ܕܰܫܠܺܝ̈ܚܶܐ ܟܳܪܽܘܙܽܘܬܳܐ ܦܐܺܝܬܳܐ ܕܰܡܣܰܒܪ̈ܳܢܶܐ ܡܚܰܡܣܢܳܢܽܘܬܳܐ ܕܥܳܢ̈ܘܳܝܶܐ ܟܺܐܢ̈ܶܐ: ܓܰܢ̱ܒܳܪܽܘܬܳܐ ܠܐܴ ܥܡܺܝܠܬܳܐ ܕܣܳܗ̈ܕܶܐ ܘܡܰܘ̈ܕܝܳܢܶܐ ܡܰܠܦܳܢܽܘܬܳܐ ܠܐܴ ܛܳܥܽܘܫܬܳܐ ܕܡܰܠܦܳܢ̈ܶܐ: ܫܰܟܶܢ ܠܰܢ ܠܥܰܒ̣ܕܰܝ̈ܟ ܕܰܒܟܽܠܙܒܰܢ ܢܫܰܡܠܐܷ ܕܽܘܟܪ̈ܳܢܰܝܗܽܘܢ ܠܐܴ ܣܰܒܥܳܐܺܝܬ: ܠܐܴ ܒܰܒ̈ܢܳܬ ܩ̈ܳܠܐܷ ܣܦܺܝ̣̈ܩܳܬܳܐ: ܐܶܠܐܴ ܒܰܥܒ̇ܳܕ̈ܶܐ ܕܙܰܕܺܝܩܽܘܬܳܐ: ܠܐܴ ܪܶܚܡܰܬ݀ ܪܓܺܝܓܳܐܺܝܬ ܐܶܠܐܴ ܠܥܶܠ ܡ̣ܶܢ ܥܳܠܡܳܐ: ܠܐܴ ܒܟܽܘܠܳܠܐܴ ܕܰܩܕܳܡ ܬܰܪ̈ܥܶܐ: ܐܶܠܐܴ ܒܦܺܐܪ̈ܶܐ ܕܬܰܘܕܺܝܬܳܐ ܗ̇ܳܝ ܡܩܰܒܰܠܬܳܐ: ܠܐܴ ܒܪ̈ܶܦܣܶܐ ܙܰܠܺܝ̣̈ܠܐܷ ܘܰܙܢܰܝ̈ܳܐ ܠܐܴ ܡܛܰܟ̈ܣܶܐ ܐܶܠܐܴ ܒܙܰܘ̈ܥܶܐ ܟܢܺܝ̣̈ܟܶܐ ܘܩܽܘܝ̈ܳܙܶܐ ܡܶܬܝܰܕ̈ܥܳܢܶܐ ܘܗܽܘ̈ܠܳܠܐܷ ܗ̇ܳܢܽܘܢ ܕܒܰܐܠܳܗܳܐ. ܠܐܴ ܒܰܡܦܰܬܟܽܘܬܳܐ ܕܰܠܒܽܘ̈ܫܶܐ ܪ̈ܰܟܺܝܟܶܐ: ܐܶܠܐܴ ܒܣܳܥܽܘܪܽܘܬܳܐ ܕܰܥܒ̇ܳܕ̈ܶܐ ܛܳܒ̈ܶܐ: ܠܐܴ ܒܦܽܘ̈ܢܳܩܶܐ ܘܰܒܪܶܓܰܬ݀ ܟܰܪܣܳܐ: ܐܶܠܐܴ ܝܰܬܺܝܪܳܐܺܝܬ ܒܚܽܘܕܳܬܳܐ ܕܢܰܦܫܳܐ ܕܰܒܗܳܠܶܝܢ ܕܒܰܐܠܳܗܳܐ ܡܶܬܦܰܛܡܳܐ: ܡ̣ܶܢ ܐܰܦܣܽܘ̈ܢܝܳܬܳܐ ܕܪܽܘܚܳܐ ܩܰܕܺܝܫܳܐ ܡܶܬܬܰܪܣܝܳܐ ܐܺܝܢ ܐܠܰܗܳܐ ܕܺܝܠܰܢ ܗ̇ܰܘ ܕܰܡܫܰܟܶܢ ܐܰܢ̱ܬ ܠܩܰܕܺܝ̈ܫܰܝܟ ܡܚܰܡܣܢܳܢܽܘܬܳܐ ܠܐܴ ܡܶܙܕܰܥܙܥܳܢܺܝܬܳܐ ܐܳܦ ܦܰܪܶܗܣܺܝܳܝܬܳܐ ܘܢܳܡܽܘܣܳܝܬܳܐ ܘܰܡܥܰܙܝܳܢܽܘܬܳܐ ܕܰܠܘܳܬ ܩܰܘܡܳܐ ܕܫܺܐܕ̈ܶܐ ܘܫܽܘܢܳܩܳܐ ܕܕܰܝ̈ܘܶܐ ܚܰܝܠܬܳܢܳܐܺܝܬ ܘܠܐܴ ܡܶܬܢܰܦܠܳܢܳܐܺܝܬ ܢܰܥܕܽܘܢ ܟܠܺܝܠܐܴܝܬ ܘܰܐܓܽܘܢܳܐ ܗܳܢܳܐ ܫܰܦܺܝܪܳܐ ܢܶܬܟܰܬܫܽܘܢ ܘܪܶܗܛܳܐ ܠܐܴ ܥܕܺܝܠܐܴ ܢܫܰܡܠܽܘܢ. ܘܰܠܗܰܝܡܳܢܽܘܬܳܐ ܕܠܐܴ ܡܽܘܡܳܐ ܢܶܛܪܽܘܢ: ܘܰܐܫܘܳܐ ܠܰܢ ܠܡܶܣ̈ܟܺܢܶܐ ܥܰܒ̣ܕܰܝ̈ܟ ܒܟܽܠܙܒܰܢ ܕܰܒܚܺܐܪܽܘܬܳܐ ܕܬܺܐܪܬܳܐ ܢܰܨܺܝܚܬܳܐ ܒܚܺܐܪ̈ܶܐ ܢܶܗܘܶܐ: ܘܰܒܗܳܕܶܐ ܢܶܙܟܶܐ ܠܟܽܠ ܨܢܺܝܥܽܘܬܳܐ ܫܺܐܕܳܢܳܝܬܳܐ ܘܰܠܦܰܢܛܰܣܺܝܰܐ ܥܳܠܡܳܢܳܝܬܳܐ: ܘܠܰܫܟܺܝܪܽܘܬ ܕܶܚܠܬܳܐ ܚܰܢܦܳܝܬܳܐ ܠܰܙܥܽܘܪܽܘܬ ܡܶܠܬܳܐ ܝܽܘܕܳܝܬܳܐ: ܠܦܽܘܩܳܩܳܐ ܐܰܪܺܝܛܺܝܩܳܝܳܐ: ܠܚܶܡܬܳܐ ܒܰܥܪܺܝܪܳܝܬܳܐ: ܠܗܰܢܺܝܐܘܽܬܳܐ ܡܪܰܦܝܳܢܺܝܬܳܐ ܠܰܣܪܺܝܩܽܘܬ ܬܶܫܒܽܘܚܬܳܐ ܕܢܳܦܚܳܐ ܠܰܚܣܳܡܳܐ: ܠܥܽܘܠܐܴ ܕܰܡܕܰܝܰܒ ܠܟܰܪܣܳܐ ܐܰܣܽܘܛܬܳܐ ܘܰܕܠܐܴ ܣܰܒܥܳܐ ܘܰܠܟܽܠܗܽܘܢ ܚܰܫ̈ܶܐ ܥܕܺܝ̣̈ܠܐܷ ܕܫܰܪܟܳܐ ܕܶܝܢ ܗܰܒ ܠܰܢ ܡܳܪܝܳܐ ܕܰܒܫܰܦܺܝܪܽܘܬ ܙܰܒܢܳܐ ܟܰܕ ܡܶܬܩܪܶܝܢܰܢ ܠܣܳܗܕܽܘܬܳܐ ܕܰܚܠܳܦ ܗܰܝܡܳܢܽܘܬܳܐ ܬܪܺܝܨܬܳܐ ܕܒܳܟ ܕܫܰܦܺܝܪܽܘܬ ܠܒܺܝܒܽܘܬܳܐ ܬܪܺܝܨܬܳܐ ܕܰܢܚܰܘܶܐ ܩܕܳܡ ܥܰܡ̈ܡܶܐ ܘܡܰܠܟ̈ܶܐ ܘܰܒܢܰܝ̈ܳܐ ܕܺܐܝܣܪܳܐܶܝܠ: ܟܰܕ ܠܐܴ ܟܳܘܙܺܝܢܰܢ ܡ̣ܶܢ ܓܙܳܡ̈ܶܐ ܐ̱ܢܳܫܳܝ̈ܳܐ ܘܒܺܝ̈ܫܳܬܳܐ ܗܳܠܶܝܢ ܕܰܬܢܳܢ ܣܥ̣ܰܪ ܚܢܰܢ: ܡܶܫܬܰܕܠܺܝܢܰܢ ܕܶܝܢ ܒܰܪ̈ܓܺܝܓܳܬܳܐ ܕܰܡܠܐܷ ܙܰܒܢܳܐ ܘܥܳܒܽܘܪ̈ܝܳܬܳܐ: ܘܰܒܕܶܡ̈ܘܳܬܳܐ ܕܝܽܘܪܳܩܳܐ ܕܥܶܣܒܳܐ ܕܒܰܥܓܰܠ ܝܳܩܕܺܝܢ ܘܰܒܩܶܢܝ̈ܳܢܶܐ ܘܡܰܪ̈ܗܳܛܶܐ ܕܗܳܪܟܳܐ ܦܳܝܫܺܝܢ ܢܶܐܚܽܘܕ ܟܽܠܰܢ ܝܰܬܺܝܪܳܐܺܝܬ ܡ̣ܶܢ ܟܽܠܳܗ̇ ܢܰܦܫܰܢ. ܒܰܡܫܰܠܡܳܢܽܘܬܳܐ ܕܚܰܒܺܝ̈ܒܰܝܟ ܘܰܡܢܺܝ̣̈ܚܳܢܶܐ ܕܡܳܪܽܘܬܳܟ. ܗ̇ܳܢܽܘܢ ܕܫܳܘ̈ܝܰܝ ܠܡܶܬܩܰܒܳܠܽܘ ܐܺܝܬܰܝܗܽܘܢ ܠܳܟ: ܐܺܝܙ̈ܓܰܕܶܐ ܡܦܺܝ̣̈ܣܳܢܶܐ ܠܳܟ ܡܩܰܪܒܺܝܢܰܢ ܚܠܳܦ ܟܽܠܗܶܝܢ ܐܰܝܠܶܝܢ ܕܰܥܠܰܝܡܳܐܺܝܬ ܚܛܰܝܢܰܢ ܠܳܟ: ܐܰܝܟܰܢܳܐ ܕܒܰܨܠܰܘ̈ܳܬܳܐ ܘܰܒܒܳܥ̈ܘܳܬܳܐ ܕܺܝܠܗܽܘܢ ܝܺܕܺܝܥܳܐܺܝܬ ܕܶܝܢ ܕܰܐܒܳܗ̈ܳܬܳܐ ܩܰܕܺܝ̈ܫܶܐ ܟܳܪ̈ܽܘܙܶܐ ܕܕܶܚܠܰܬ ܐܠܰܗܳܐ ܢܰܗܺܝܪ̈ܶܐ ܫܒܺܝ̈ܚܶܐ ܕܥܺܕܬܳܐ: ܗ̇ܳܢܽܘܢ ܕܰܚܠܳܦܶܝܗ̇ ܐܰܓܽܘ̈ܢܶܐ ܪܰܘܪ̈ܒܶܐ ܣܒ̣ܰܠܘ ܘܣܰܝܒ̣ܰܪܘ: ܩܝܳܡܬܳܐ ܕܰܡܝܰܬܪܽܘܬܳܐ ܗ̣ܘܰܘ ܘܰܕܫܰܦܺܝܪܽܘܬ ܚܰܫ̈ܶܐ ܗ̣ܶܢܽܘܢ ܠܗܽܘܢ ܫܒ̣ܰܩܘ. ܬܽܘܒ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܬܫܰܟܶܢ ܠܰܢ ܘܰܠܟܽܠܗܽܘܢ ܐܰܚܰܝ̈ܢ ܕܰܒܟܽܠ ܐܰܬܰܪ ܘܕܽܘܟ ܩ̇ܳܪܶܝܢ ܠܰܫܡܳܟ ܩܰܕܺܝܫܳܐ: ܝܺܕܺܝܥܳܐܺܝܬ ܠܗ̇ܳܢܽܘܢ ܕܫܶܐܠܘ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܘܶܐܫܬܰܘܬܰܦܘ ܒܰܣܢܺܝܩܽܘܬܰܢ ܘܒܰܣܢܺܝܩܽܘܬܳܐ ܕܡܶܣ̈ܟܺܢܶܐ ܟܢܰܘ̈ܳܬܰܢ: ܓܗܳܝܬܳܐ ܕܡ̣ܶܢ ܟܽܠ ܒܺܝ̣̈ܫܳܢ ܘܒܽܘܣܳܡܳܐ ܕܰܒܟܽܠ ܛܳܒ̈ܳܢ. ܘܟܰܕ ܡܡܰܪ̈ܝܳܢܶܐ ܕܰܡܝܰܬܪܽܘܬܳܐ ܕܩܰܕܺܝ̈ܫܰܝܟ ܥܳܒ̇ܶܕ ܐܰܢ̱ܬ ܠܰܢ: ܘܒܰܟܠܺܝ̣̈ܠܰܝܗܽܘܢ ܫܰܘܬܶܦ ܠܰܢ: ܘܰܒܛܳܒ̈ܳܬܳܐ ܗܳܠܶܝܢ ܕܰܠܥܳܠܰܡ: ܘܰܒܡܰܠܟܽܘܬܳܐ ܕܰܫܡܰܝܳܐ: ܐܰܝܟܰܢܳܐ ܕܥܰܡܗܽܘܢ ܐܰܟܚܕܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܣܶܓܕܬܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܐܺܝܬܝܳܐ ܡܬܽܘܡܳܝܳܐ ܕܶܐܬܺܝܠܶܕ ܡ̣ܶܢ ܐܶܡܳܐ ܒܬܽܘܠܬܳܐ ܡܶܛܽܠ ܦܽܘܪܩܳܢܰܢ: ܗ̇ܰܘ ܕܡܰܠܺܝ ܢܒܺܝ̈ܰܘܳܬܳܐ ܕܰܢܒܺܝ̈ܶܐ ܒܕܶܢܚܶܗ ܘܫܰܡܠܺܝ ܠܰܫܠܺܝ̈ܚܶܐ ܒܟܳܪܽܘܙܽܘܬܳܐ ܕܰܣܒܰܪܬܳܐ ܕܺܝܠܶܗ ܘܢܰܨܰܚ ܠܣܳܗ̈ܕܶܐ ܘܰܠܡܰܘ̈ܕܝܳܢܶܐ ܒܚܰܫ̈ܶܐ ܕܡܶܛܽܠܳܬܶܗ: ܘܰܐܘܪܶܒ ܠܝܰܘܡܳܐ ܕܩܰܕܺܝ̈ܫܶܐ ܒܽܐܘܠܨܳܢ̈ܶܐ ܕܰܣܒ̣ܰܠܘ ܡܶܛܽܠ ܫܡܶܗ: ܘܰܠܟܺܐܢ̈ܶܐ ܝܰܩܰܪ ܕܣܰܟܺܝܘ ܠܓܶܠܝܳܢܶܗ. ܘܠܐܱܝܠܶܝܢ ܕܰܫܟ̣ܶܒܘ ܘܫܳܟ̇ܒܺܝܢ ܥܰܠ ܣܰܒܪܶܗ ܐܶܫܬܰܘܕܺܝ ܢܽܘܚܳܡܳܐ ܘܣܰܒܪܳܐ ܛܳܒܳܐ ܘܒܽܘܣܳܡܳܐ ܕܰܒܡܰܠܟܽܘܬܶܗ: ܕܠܶܗ ܢܫܰܒܰܚ ܘܰܢܪܰܡܪܶܡ ܒܗܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܐ ܕܺܝܠܰܢ ܗ̇ܰܘ ܕܡ̣ܶܢ ܟܪ̈ܽܘܒܶܐ ܡܶܬܒܰܪܰܟ ܐܰܢ̱ܬ ܘܡ̣ܶܢ ܣܪ̈ܳܦܶܐ ܒܕܶܚܠܐܴ ܡܶܬܩܰܕܰܫ ܐܰܢ̱ܬ: ܘܡ̣ܶܢ ܟܶܢ̈ܫܶܐ ܕܡܰܠܐܱܟ̈ܶܐ ܒܙܰܘܥܬܳܐ ܘܒܰܪܬܺܝܬܳܐ ܡܶܫܬܰܒܰܚ ܐܰܢ̱ܬ ܘܺܐܝܬܰܝܟ ܐܠܰܗܳܐ ܕܥܰܠ ܟܽܠ ܘܡܰܠܟܳܐ ܕܰܠܥܳܠܡܺܝܢ ܘܫܰܠܺܝܛܳܐ ܕܰܬܪܰܝܗܽܘܢ ܥܳܠܡ̈ܶܐ: ܘܒܳܪܽܘܝܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܐܶܠܐܴ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܰܡܪܰܚܡܳܢܽܘܬܳܟ ܕܰܒܝܰܕ ܨܠܰܘ̈ܳܬܳܐ ܕܝܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ ܝ̇ܳܠܕܰܬ݀ ܐܠܰܗܳܐ ܡܰܪܝܰܡ: ܥܰܡ ܕܰܢܒܺܝ̈ܶܐ ܘܕܰܫܠܺܝ̈ܚܶܐ ܘܰܕܡܰܘ̈ܕܝܳܢܶܐ ܘܣܳܗ̈ܕܶܐ: ܘܰܕܟܽܠ ܩܰܕܺܝ̈ܫܶܐ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ: ܘܕܺܝܚܺܝ̣̈ܕܳܝܶܐ ܘܕܰܡܕܰܒܪ̈ܳܢܶܐ ܘܥܳܢ̈ܘܳܝܶܐ ܘܕܰܝܪ̈ܳܝܶܐ ܘܪ̈ܳܥܰܘܳܬܳܐ ܘܡܰܠܦܳܢ̈ܶܐ ܕܥܺܕ̈ܳܬܳܐ ܐܰܝܠܶܝܢ ܕܝܰܘܡܳܢܳܐ ܥܽܘܗܕܳܢܳܐ ܕܺܝܠܗܽܘܢ ܡܫܰܡܠܶܝܢܰܢ: ܚܽܘܪ ܒܰܢ ܡܳܪܝܳܐ ܒܪ̈ܰܚܡܶܐ ܘܰܒܚܰܘܣܳܢܳܐ: ܘܩܰܒܶܠ ܥܰܠ ܡܰܕܒܚܳܐ ܕܺܝܠܳܟ ܡܠܺܝܠܐܴ ܘܕܰܠܥܶܠ ܡ̣ܶܢ ܫܡܰܝܳܐ: ܦܺܝܪ̈ܡܶܐ ܘܰܨܠܰܘ̈ܳܬܳܐ ܕܺܝܠܰܢ ܚܰܛܳܝ̈ܶܐ ܥܰܒ̣ܕ̈ܶܐ ܕܺܝܠܳܟ: ܘܰܠܟܽܠ ܡܰܟܰܐܒ̈ܶܐ ܐܳܣܝܽܘܬܳܐ ܗܰܒ ܡܳܪܝܳܐ ܐܠܰܗܳܐ ܒܛܰܝܒܽܘܬܳܟ: ܘܠܐܱܠܺܝ̣̈ܨܶܐ ܢܦܺܐܫܳܐ: ܘܰܠܚܰܛܳܝ̈ܶܐ ܫܽܘܒܩܳܢܳܐ: ܘܠܰܫܒܰܝ̈ܳܐ ܦܽܘܪܩܳܢܳܐ. ܠܰܡܥ̈ܳܩܶܐ ܠܽܘܒܳܒܳܐ ܠܐܱܒܺܝ̣̈ܠܐܷ ܒܽܘܝܳܐܳܐ: ܠܛܳܥܰܝ̈ܳܐ ܦܽܘܢܳܝܳܐ: ܠܰܡܒܰܕܪ̈ܶܐ ܟܽܘܢܳܫܳܐ: ܠܰܪ̈ܕܺܝܦܶܐ ܦܽܘܨܳܝܳܐ: ܠܡܶܣ̈ܟܺܢܶܐ ܦܽܘܪܢܳܣܳܐ: ܠܝܰܬܡ̈ܶܐ ܡܢܰܛܪܳܢܳܐ: ܘܠܐܱܪ̈ܡܠܳܬܳܐ ܙܳܝܽܘܢܳܐ: ܠܚܳܙ̈ܩܰܝ ܒܽܐܘܪ̈ܚܳܬܳܐ ܐܰܘܘܳܢܳܐ ܕܫܰܝܢܳܐ ܘܕܰܫܠܳܡܳܐ. ܠܪ̈ܳܕܝܰܝ ܒܝܰܡܳܐ ܠܡܺܐܢܳܐ ܕܰܢܝ̇ܳܚܳܐ: ܠܰܕܡ̣ܶܢ ܪ̈ܽܘܚܶܐ ܒܺܝ̈ܫܳܬܳܐ ܡܶܬܢܰܓܕܺܝܢ ܕܽܘܟܳܝܳܐ ܠܰܡܚܺܝ̣̈ܠܐܷ ܚܽܘܝ̇ܳܠܐܴ: ܠܣܳܒ̈ܶܐ ܐܺܝܩܳܪܳܐ: ܠܰܥܠܰܝ̈ܶܡܐ ܟܚܺܝܕܽܘܬܳܐ: ܠܰܛܠܳܝ̈ܶܐ ܬܰܪܒܺܝܬܳܐ ܛܳܒܬܳܐ. ܬܽܘܒ ܕܶܝܢ ܠܬܰܠܡܺܝ̈ܕܶܐ ܝܰܨܺܝܦܽܘܬܳܐ: ܠܪ̈ܰܒܳܢܶܐ ܒܛܺܝܠܽܘܬܳܐ: ܠܣܳܥܪ̈ܰܝ ܡܶܣܟ̈ܺܢܶܐ ܚܘܺܝܚܽܘܬܳܐ. ܠܰܦܠܺܝ̣̈ܓܶܐ ܚܽܘܝܳܕܳܐ ܘܰܐܘܝܽܘܬܳܐ: ܘܠܐܱܝܠܶܝܢ ܕܰܟܕܺܝܢܺܝܢ ܒܢܺܝܪܳܐ ܕܙܽܘܘܳܓܳܐ ܟܢܺܝܟܽܘܬܳܐ: ܠܥܳܢܘܳܝ̈ܶܐ ܢܰܟܦܽܘܬܳܐ: ܠܰܒܬܽܘ̈ܠܐܷ ܕܰܟܝܽܘܬܳܐ: ܠܕܰܝܪ̈ܳܝܶܐ ܡܚܰܡܣܢܳܢܽܘܬܳܐ: ܠܺܝܚܺܝ̣̈ܕܳܝܶܐ ܡܣܰܝܒܪܳܢܽܘܬܳܐ: ܠܟܳܗ̈ܢܶܐ ܙܰܗܝܽܘܬܳܐ: ܠܰܡܫܰܡ̈ܫܳܢܶܐ ܬܰܩܢܽܘܬܳܐ: ܠܥܺܕ̈ܳܬܳܐ ܪܽܘܡܪܳܡܳܐ: ܠܕܰܝܪ̈ܳܬܳܐ ܢܽܘܛܳܪܳܐ: ܠܡܰܠܟ̈ܶܐ ܢܺܝܚܽܘܬܳܐ: ܠܦܳܠܚ̈ܶܐ ܡܶܫܬܰܡܥܳܢܽܘܬܳܐ: ܠܪ̈ܺܝܫܳܢܶܐ ܚܦܺܝܛܽܘܬܳܐ. ܠܕܰܝ̈ܳܢܶܐ ܬܪܺܝܨܽܘܬܳܐ: ܠܡܳܪ̈ܰܝܳܐ ܡܪܰܚܡܳܢܽܘܬܳܐ. ܠܥܰܒ̣ܕ̈ܶܐ ܫܽܘܥܒܳܕܳܐ ܫܰܦܺܝܪܳܐ: ܠܰܟܠܺܝܠܐܴ ܕܫܰܢ̱ܬܳܐ ܒܰܪܶܟ ܒܛܰܝܒܽܘܬܳܟ: ܘܡܶܛܪ̈ܶܐ ܡܫܰܝ̈ܢܶܐ: ܘ̈ܛܰܐܠܐܷ ܡܰܘܬܪ̈ܳܢܶܐ ܗܰܒ ܒܪ̈ܰܚܡܰܝܟ ܡܳܪܝܳܐ ܘܰܠܟܰܦ̈ܢܶܐ ܣܰܒܰܥ ܡ̣ܶܢ ܫܦܺܝܥܽܘܬ ܛܳܒ̈ܳܬܳܟ: ܘܰܠܗܳܠܶܝܢ ܕܩܽܘܪ̈ܒܳܢܶܐ ܘܪ̈ܺܝܫܳܝܳܬܳܐ ܘܡܰܥܣܳܪ̈ܶܐ ܒܥܺܕ̈ܳܬܳܐ ܕܺܝܠܳܟ ܩܰܕܺܝ̈ܫܳܬܳܐ ܥܳܒܕܺܝܢ: ܘܒܰܣܢܺܝܩܽܘܬܳܐ ܕܩܰܕܺܝ̈ܫܶܐ ܡܶܫܬܰܘܬܦܺܝܢ. ܩܰܒܶܠ ܡܳܪܝܳܐ ܩܽܘܪ̈ܒܳܢܰܝܗܽܘܢ ܘܪ̈ܺܝܫܳܝܳܬܗܽܘܢ ܘܒܽܘܪ̈ܟܳܬܳܐ ܕܺܝܠܳܟ ܥܰܬܺܝܪ̈ܶܐ ܘܠܐܴ ܡܶܬܬܟܺܝ̣̈ܠܳܢܳܝܳܬܳܐ ܐܰܫܪܳܐ ܡܳܪܝܳܐ ܒܒܳܬܰܝ̈ܗܽܘܢ: ܘܠܰܩܪܺܝܬܳܐ ܗܳܕܶܐ: ܘܰܠܟܽܠ ܥܽܘܡܪ̈ܶܐ ܘܒ̈ܳܬܶܐ ܕܰܡܗܰܝ̈ܡܢܶܐ ܣܳܥܽܘܪܽܘܬܳܐ ܕܺܝܠܳܟ ܛܳܒܬܳܐ ܘܰܫܦܺܝܥܬܳܐ ܗܰܒ: ܘܰܐܟܪܶܟ ܠܗܽܘܢ ܡܳܪܝܳܐ ܢܳܛܽܘܪܽܘܬܳܐ ܕܡܰܠܐܱܟܰܝ̈ܟ ܩܰܕܺܝ̈ܫܶܐ ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܶܬܕܰܟܪ ܡܳܪܝܳܐ: ܘܰܐܢܺܝܚ ܪ̈ܽܘܚܳܬܗܽܘܢ ܒܰܐܘ̈ܘܳܢܶܐ ܒܪ̈ܺܝܟܶܐ ܕܒܶܝܬ ܐܰܒܳܐ ܝܺܕܺܝܥܳܐܺܝܬ ܗ̇ܳܢܽܘܢ ܕܝܰܘܡܳܢܳܐ ܥܽܘܗܕܳܢܳܐ ܕܺܝܠܗܽܘܢ ܡܫܰܡܠܶܝܢܰܢ: ܚܠܽܘܛ ܐܶܢܽܘܢ ܒܓܽܘܕܰܝ̈ܗܽܘܢ: ܛܰܟܶܣ ܐܶܢܽܘܢ ܒܣܶܕܪ̈ܶܐ ܕܰܓܒܰܝ̈ܟ. ܐܰܫܪܳܐ ܐܶܢܽܘܢ ܒܰܐܘ̈ܘܳܢܶܐ ܡܰܠܝ̈ܰܝ ܪܘܳܙܳܐ ܘܚܰܕܽܘܬܳܐ: ܘܠܐܱܒܳܗ̈ܳܬܳܐ ܕܺܝܠܰܢ ܚܣܰܝ̈ܳܐ ܕܰܒܪܺܝܫ ܥܰܡܳܟ ܩܳܝܡܺܝܢ: ܗܰܒ ܚܦܺܝܛܽܘܬܳܐ ܘܰܠܒܺܝܒܽܘܬܳܐ ܗ̇ܳܝ ܕܰܥܕܰܡܳܐ ܠܰܕܡܳܐ. ܐܰܝܟܰܢܳܐ ܕܢܶܪܥܽܘܢ ܘܰܢܕܰܒܪܽܘܢ ܠܡܰܪ̈ܥܝܳܬܳܐ ܕܺܝܠܗܽܘܢ ܟܳܗ̈ܢܳܝܳܬܳܐ: ܒܟܽܠܳܗ̇ ܫܰܦܺܝܪܽܘܬ ܕܶܚܠܰܬ݀ ܐܠܰܗܳܐ ܘܰܟܢܺܝܟܽܘܬܳܐ. ܐܰܝܟܰܢܳܐ ܬܽܘܒ ܕܰܢܛܰܝܒܽܘܢ ܠܳܟ ܥܰܡܳܐ ܓܡܺܝܪܳܐ ܕܛܳܐܶܢ ܒܰܥܒ̇ܳܕ̈ܶܐ ܕܟܺܐܢܽܘܬܳܐ: ܘܰܠܥܳܠܡܳܐ ܟܽܠܶܗ ܫܰܝܢܳܐ ܘܰܫܠܳܡܳܐ ܕܡܶܢܳܟ: ܘܚܽܘܒܳܐ ܕܰܠܘܳܬܳܟ ܘܰܠܘܳܬ ܚܕ̈ܳܕܶܐ. ܘܙܰܒ̈ܢܶܐ ܡܫܰܝ̈ܢܶܐ ܥܰܡ ܕܶܚܠܬܳܐ ܕܺܝܠܳܟ ܗܰܒ: ܘܒܰܛܶܠ ܩܪ̈ܳܒܶܐ ܘܩܺܐܪ̈ܣܶܐ ܘܰܫܓܽܘ̈ܫܝܶܐ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ: ܘܰܐܘܬܶܒ ܠܟܽܠ ܐ̱ܢܳܫ ܒܰܐܬܪܶܗ ܒܚܽܘܒܳܐ ܘܰܒܗܰܝܡܳܢܽܘܬܳܐ: ܡܶܛܽܠ ܕܰܐܠܳܗܳܐ ܛܳܒܳܐ ܘܪܳܚܶܡܢܳܫܳܐ ܐܺܝܬܰܝܟ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܪܰܒܳܐ ܕܟܽܘܡܪ̈ܶܐ ܘܡܳܪܶܐ ܡܳܪ̈ܰܘܳܬܳܐ: ܗ̇ܰܘ ܕܟܰܕ ܥ̣ܰܠ ܫ̣ܪܳܐ ܒܥܺܕܬܶܗ ܩܰܕܺܝܫܬܳܐ ܥܰܠ ܥܠܳܬܳܐ ܪܽܘܚܳܢܳܝܬܳܐ. ܡܩܰܒܶܠ ܫܽܘܒܚܳܐ ܕܡ̈ܶܠܐܷ ܟܶܐܘܪܺܝܫܺܝܬܳܐ ܕܪ̈ܺܝܚܳܢܶܐ ܒܰܣܺܝ̈ܡܶܐ ܘܫܽܘܒܚܳܐ ܕܦܽܘ̈ܡܰܝܢ ܘܪܺܝܫܺܝܬܳܐ ܘܡ̈ܶܠܐܷ ܕܣܶܦܘ̈ܳܬܰܢ: ܘܢܶܫܬܰܟܰܢ ܠܰܢ ܡܶܢܳܟ ܫܰܝܢܳܐ ܠܥܰܡܳܟ: ܫܠܳܡܳܐ ܠܡܰܪܥܺܝܬܳܟ: ܘܚܽܘܣܳܝܳܐ ܠܥܳܢ̈ܳܟ: ܘܒܰܣܺܝܡܽܘܬ ܪܺܝܚܳܐ ܠܥܺܕܬܳܟ ܩܰܕܺܝܫܳܐ. ܘܕܽܘܟܪܳܢܳܐ ܛܳܒܳܐ ܠܝܳܠܶܕܬܳܟ ܘܰܠܩܰܕܺܝ̈ܫܰܝܟ ܐܳܦ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܩܰܕܺܝܫ ܒܟܽܠ ܘܰܡܩܰܕܶܫ ܟܽܠ ܒܩܰܕܺܝܫܽܘܬܳܐ ܕܡܶܢܶܗ: ܠܗ̇ܰܘ ܕܡܶܬܩܰܕܰܫ ܒܩܽܘ̈ܕܳܫܶܐ ܬܠܺܝܬܳܝ̈ܶܐ ܡ̣ܶܢ ܚܰܝܠܰܘ̈ܳܬܳܐ ܩܰܕܺܝ̈ܫܶܐ: ܘܰܡܩܰܕܶܫ ܩܰܕܺܝܫܳܐܺܝܬ ܠܐܱܝܠܶܝܢ ܕܰܚ̣ܝܰܘ ܒܕܽܘܒܳܪ̈ܶܐ ܩܰܕܺܝ̈ܫܶܐ: ܘܰܒܩܰܕܺܝܫܽܘܬܳܐ ܓܳܡ̇ܰܪ ܠܐܱܝܠܶܝܢ ܕܰܠܕܽܘܟܪܳܢܳܐ ܕܩܰܕܺܝ̈ܫܰܘܗܝ ܩܰܕܺܝܫܳܐܺܝܬ ܡܫܰܡܠܶܝܢܰܢ ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܳܪܝܳܐ ܐܠܰܗܳܐ ܕܰܐܒܳܗ̈ܳܬܳܐ ܕܺܝܠܰܢ: ܗ̇ܰܘ ܕܰܐܢ̱ܬ ܒܰܠܚܽܘܕܰܝܟ ܥܰܫܺܝܢܳܐ ܘܚܰܝܠܬܳܢܳܐ: ܗ̇ܰܘ ܕܒܰܩܪܳܝܬܳܐ ܩܰܕܺܝܫܬܳܐ ܩ̣ܪܰܝܬ ܠܟܽܠܗܽܘܢ ܩܰܕܺܝ̈ܫܰܝܟ ܘܡܶܨܥܳܝ̈ܶܐ ܘܺܐܝܙ̈ܓܰܕܶܐ ܠܰܢ ܫܰܟ̣ܶܢܬ ܐܶܢܽܘܢ: ܐܰܝܟܰܢܳܐ ܕܺܝܠܗܽܘܢ ܢܶܫܬܘܶܐ ܠܰܡܫܰܝܢܽܘܬܳܐ ܘܢܺܝܚܽܘܬܳܐ ܘܒܰܣܺܝܡܽܘܬܳܐ ܠܚܰܘܣܳܢܰܝ̈ܟ: ܗ̇ܰܘ ܕܰܒܙܰܝܢܳܐ ܠܐܴ ܡܶܙܕܰܟܝܳܢܳܐ ܕܪܽܘܚܳܐ ܩܰܕܺܝܫܳܐ: ܙܰܝܶܢ̣ܬ ܐܶܢܽܘܢ ܠܥܰܒ̣ܕܰܝ̈ܟ ܕܰܢܕܽܘܫܽܘܢ ܥܰܠ ܫܶܢ̈ܕܶܐ ܘܰܢܒܰܣܪܽܘܢ ܥܰܠ ܟܽܠ ܐܽܘܠܨܳܢܺܝ̣̈ܢ ܘܪܶܗܛܗܽܘܢ ܕܥܰܠ ܡܰܘܬܳܐ ܘܰܡܣܰܝܒܪܳܢܽܘܬܳܐ ܗ̇ܳܝ ܕܰܥܕܰܡܳܐ ܠܰܕܡܳܐ ܫܰܟܶܢ̣ܬ ܠܗܽܘܢ: ܐܶܬܕܰܟܪ ܐܳܦ ܠܰܢ ܡܳܪܝܳܐ ܡܪܰܚܡܳܢܳܐ ܒܡܶܨܛܰܒܝܳܢܽܘܬܳܐ ܕܥܰܡܳܟ: ܣܥܽܘܪ ܠܰܢ ܒܦܽܘܪܩܳܢܳܟ: ܘܫܰܟܶܢ ܠܰܢ ܕܢܶܬܥܰܗܰܕ ܠܩܰܕܺܝ̈ܫܰܝܟ ܘܰܕܢܶܫܬܰܘܬܰܦ ܠܚܰܫܰܝ̈ܟ: ܐܰܢ̱ܬ ܓܶܝܪ ܐܺܝܬܰܝܟ ܡܗܰܝܡܢܳܐ ܒܡܶܠܰܝ̈ܟ ܘܠܐܴ ܕܰܓܳܠܐܴ ܒܫܽܘ̈ܘܕܳܝܰܝܟ: ܗ̇ܰܘ ܕܫܰܟܶܢ̣ܬ ܠܰܡܢܺܝ̣̈ܚܳܢܰܝܟ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܟܽܠܗܽܘܢ ܡܪ̈ܰܥܝܳܢܰܝܟ: ܕܒܰܡܣܰܝܒܪܳܢܽܘܬܳܐ ܕܺܝܠܗܽܘܢ ܐܰܓܽܘܢܳܐ ܫܰܦܺܝܪܳܐ ܢܶܬܟܰܬܫܽܘܢ ܘܪܶܗܛܳܐ ܠܐܴ ܥܕܺܝܠܐܴ ܢܫܰܡܠܽܘܢ: ܘܗܰܝܡܳܢܽܘܬܳܐ ܕܠܐܴ ܡܽܘܡܳܐ ܢܶܛܪܽܘܢ. ܘܰܡܦܺܝܣܺܝܢܰܢ ܠܛܳܒܽܘܬܳܟ ܡܳܪܝܳܐ ܕܳܐܦ ܠܰܢ ܠܥܰܒ̣ܕܰܝ̈ܟ ܡܳܪܝܳܐ ܫܰܟܶܢ ܠܰܢ ܛܢܳܢܗܽܘܢ ܐܠܰܗܳܝܳܐ ܘܢܳܡܽܘܣܳܝܳܐ ܘܗܰܝܡܳܢܽܘܬܗܽܘܢ ܠܐܴ ܡܶܙܕܰܥܙܳܢܺܝܬܳܐ: ܘܰܚܘܺܝܚܽܘܬܗܽܘܢ ܡܫܰܪܰܪܬܳܐ. ܘܰܥܒܶܕ ܠܰܢ ܫܰܘ̈ܬܳܦܶܐ ܠܚܰܫܰܝ̈ܗܽܘܢ: ܘܰܠܘܳܬ ܣܰܒܪܳܟ ܒܝܰܕ ܡܶܨܥܳܝܽܘܬܗܽܘܢ ܪܳܗܛܺܝܢܳܢ: ܘܰܠܥܽܘܕܪ̈ܳܢܰܝܟ ܡܣܰܟܶܝܢܰܢ ܘܡܶܬܟܰܫܦܺܝܢܰܢ ܠܛܰܝܒܽܘܬܳܟ: ܕܠܐܴ ܬܶܚܽܘܪ ܒܣܰܢ̈ܝܳܬܰܢ: ܐܶܠܐܴ ܚܽܘܪ ܒܰܢ ܡܳܪܝܳܐ ܒܥܰܝܢܳܐ ܕܪ̈ܰܚܡܶܐ ܘܰܗܘܺܝ ܠܰܢ ܒܰܡܥܺܝ̣̈ܩܳܢܳܝܳܬܳܐ ܡܥܰܕܪܳܢܳܐ: ܘܒܽܐܘ̈ܠܨܳܢܶܐ ܡܪܰܘܚܳܢܳܐ. ܘܡ̣ܶܢ ܢܶܟܝ̈ܳܢܶܐ ܡܣܰܬܪܳܢܳܐ: ܘܡ̣ܶܢ ܪ̈ܕܽܘܦܝܶܐ ܒܶܝܬ ܓܰܘܣܳܐ: ܘܦܳܪܽܘܩܳܐ ܡ̣ܶܢ ܩܺܝܢܕܽܘ̈ܢܽܘܣ. ܘܰܗܘܺܝ ܠܰܢ ܡܳܪܝܳܐ ܐܳܣܝܳܐ ܕܚܰܫ̈ܶܐ: ܘܙܳܝܽܘܢܳܐ ܕܣܽܘ̈ܢܩܳܢܶܐ: ܘܦܰܨܳܐ ܠܰܢ ܡ̣ܶܢ ܟܽܠ ܢܶܣܝܽܘ̈ܢܶܐ ܘܬܰܟܬܽܘ̈ܫܶܐ: ܘܗܰܒ ܠܰܢ ܕܰܒܟܽܠ ܫܳܥ ܩܕܳܡܰܝܟ ܢܶܬܬܰܪܣܶܐ ܡ̣ܶܢ ܡܶܠܰܝ̈ ܟܬܳܒ̈ܶܐ ܩܰܕܺܝ̈ܫܶܐ. ܘܟܰܕ ܒܦܽܘܩ̈ܕܳܢܰܝܟ ܢܗܰܠܶܟ: ܘܰܒܣܳܗ̈ܕܘܳܬܳܐ ܕܺܝܠܳܟ ܢܶܬܕܰܪܰܫ: ܘܰܒܥܶܩ̈ܒܳܬܳܐ ܕܺܝܠܗܽܘܢ ܕܩܰܕܺܝ̈ܫܰܝܟ ܢܶܪܕܶܐ: ܘܢܶܬܦܰܨܶܐ ܒܶܣܬܰܪܗܽܘܢ ܡ̣ܶܢ ܟܽܠ ܒܺܝ̈ܫܳܬܳܐ: ܘܢܶܫܬܘܶܐ ܠܰܟܠܺܝܠܐܴ ܕܰܩܪܳܝܬܗܽܘܢ: ܡܶܛܽܠ ܕܰܐܢ̱ܬ ܗ̣ܽܘ ܒܶܝܬ ܓܰܘܣܳܐ ܕܰܐܝܠܶܝܢ ܕܩܳܪܶܝܢ ܠܳܟ: ܘܠܳܟ ܫܽܘܒܚܳܐ ܡܰܣܩܺܝܢܰܢ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܫܠܡ

 

ܛܟܣܐ ܕܚܕ ܒܫܒܐ ܫܬܝܬܝܐ ܕܡܕܒܪܢܘܬܐ ܦܪܘܩܝܬܐ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܘܳܐ ܠܰܢ ܡܳܪܝܳܐ ܐܠܰܗܳܐ ܒܛܰܝܒܽܘܬܳܟ: ܘܒܰܫܦܺܝܥܽܘܬ ܪ̈ܰܚܡܶܐ ܕܺܐܝܬܽܘܬܳܟ: ܕܰܒܫܰܝܢܳܐ ܢܰܓܺܝܪܳܐ ܕܥܺܕܬܳܐ ܕܺܝܠܳܟ: ܘܒܰܫܠܳܡܳܐ ܢܰܓܺܝܪܳܐ ܕܥܺܕܬܳܐ ܕܺܝܠܳܟ: ܘܒܰܫܠܳܡܳܐ ܐܰܡܺܝܢܳܐ ܕܡܰܪܥܺܝܬܳܟ: ܢܫܰܡܠܐܷ ܕܽܘܟܪܳܢܳܐ ܕܝܳܠܶܕܬܳܟ ܘܰܕܟܽܠܗܽܘܢ ܩܰܕܺܝ̈ܫܰܝܟ. ܘܗܰܒܠܰܢ ܕܰܒܫܰܗܪ̈ܶܐ ܥܺܝܪ̈ܶܐ ܘܢܰܨܺܝ̈ܚܶܐ: ܘܰܒܕܽܘܒܳܪ̈ܶܐ ܕܟܰܝ̈ܳܐ ܘܩܰܕܺܝ̈ܫܶܐ ܢܥܰܕܥܶܕ ܐܰܡܺܝܢܳܐܺܝܬ ܠܥܽܘܗܕܳܢܳܐ ܕܶܐܡܳܟ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܘܢܶܫܬܘܶܐ ܠܰܨܠܰܘ̈ܳܬܳܐ ܡܩܰܒ̈ܠܳܬܳܐ ܕܩܰܕܺܝ̈ܫܰܝܟ: ܘܰܢܝܰܒܶܒ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܰܢܝܳܚܳܐ ܕܰܐܠܳܗܽܘܬܳܟ ܘܰܠܨܶܒܝܳܢܳܐ ܒܪܺܝܟܳܐ ܕܡܳܪܽܘܬܳܟ ܘܰܠܬܰܪܥܽܘܬܳܐ ܕܰܡܪܰܚܡܳܢܽܘܬܳܟ: ܘܰܠܡܰܦܰܩ ܒܪܽܘܚܳܐ ܕܰܩܕܳܡ ܕܚܺܝܠܽܘܬܳܟ: ܘܰܠܡܶܓܠܐܴ ܐܰܦ̈ܶܐ ܕܰܩܕܳܡ ܟܺܐܢܽܘܬܳܟ: ܠܚܽܘܣܳܝܳܐ ܕܚܰܘ̈ܒܰܝܢ ܘܰܠܫܽܘܒܩܳܢܳܐ ܕܰܚܛܳܗܰܝ̈ܢ ܥܰܡ ܕܽܘܟܪܳܢܳܐ ܕܺܝܠܳܗ̇ ܕܗ̇ܳܝ ܕܫܰܘܝܰܬ݀ ܠܛܽܘ̈ܒܶܐ ܘܰܫܒܺܝܚܰܬ݀ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܘܥܰܡܳܗ̇ ܕܰܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܡܰܘ̈ܕܝܳܢܶܐ ܘܟܺܐܢ̈ܶܐ ܘܟܳܗ̈ܢܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܥܰܡ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ. ܬܽܘܒ ܕܶܝܢ ܘܰܠܚܽܘܠܡܳܢܳܐ ܕܰܟܪ̈ܺܝܗܶܐ ܘܰܠܢܽܘܛܳܪܳܐ ܕܟܽܠܗܽܘܢ ܥܽܘܡܪ̈ܶܐ ܕܳܐܘܪܬܳܘܕܽܘܟܣܽܘ: ܘܠܐܱܝܠܶܝܢ ܕܪܰܚܺܝܩܺܝܢ ܘܩܰܪܺܝܒܺܝܢ ܢܶܗܘܶܐ ܦܺܝܪܡܳܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡܰܝܟ ܡܳܪܝܳܐ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܒܟܽܘܢ ܛܳܦܣܺܝܢܰܢ ܘܡܶܬܓܰܘܣܺܝܢܰܢ ܐܳܘ ܪ̈ܰܒܰܝ ܒ̈ܳܬܶܐ: ܛܽܘ̈ܒܬܳܢܶܐ ܘܓܺܝܙܰܒܪ̈ܶܐ ܡܗܺܝܪ̈ܶܐ ܘܫܽܘܪ̈ܶܐ ܠܐܴ ܡܶܙܕܰܥܙ̈ܥܳܢܶܐ: ܐܳܘ ܡܕܰܒܪ̈ܳܢܶܐ ܘܝܳܨܽܘ̈ܦܶܐ ܘܰܐܒܳܗ̈ܳܬܳܐ ܬܪ̈ܺܝܨܶܐ ܐܳܘ ܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠܦܳܢ̈ܶܐ ܒܚܺܝܪ̈ܶܐ: ܐܳܘ ܡܰܐܪ̈ܙܳܢܶܐ ܣܦܺܝܪ̈ܶܐ ܕܰܐܘܨܪ̈ܶܐ ܕܥܽܘܕܪ̈ܳܢܶܐ ܐܳܘ ܐܳܣܰܘ̈ܳܬܳܐ ܡܗܺܝܪ̈ܶܐ ܘܡܰܚܠܡܳܢ̈ܶܐ ܕܢܰܦ̈ܫܳܬܳܐ ܟܪ̈ܺܝܗܳܬܳܐ. ܐܳܘ ܡܰܠܝ̈ܰܝ ܝܰܕ̈ܥܳܬܳܐ ܠܐܴ ܚܶܫܽܘ̈ܟܳܬܳܐ ܘܟܰܡܗ̈ܳܬܳܐ ܕܒܰܩܠܶܦܣܺܝܣ ܕܫܶܡܫܳܐ ܘܣܰܗܪܳܐ ܐܰܘܟܺܝܬ ܥܰܡܠܐܴ ܕܡܰܐܪ̈ܙܳܢܘܳܬܳܐ ܓܢܺܝ̣̈ܙܳܬܳܐ ܩܰܐܛܶܣܛܰܣܺܝܣ ܕܚܶܟ̈ܡܳܬܳܐ: ܦܽܘܪ̈ܩܳܣܶܐ ܠܐܴ ܡܶܬܚܰܠܨ̈ܳܢܶܐ ܕܕܰܟܝܽܘܬܳܐ: ܘܡܰܓܕ̈ܠܐܷ ܠܐܴ ܡܶܬܚܰܣ̈ܢܳܢܶܐ ܕܩܰܕܺܝܫܽܘܬܳܐ. ܐܳܘ ܡܶܬܟܰܬܫ̈ܳܢܶܐ ܒܚܺܝܪ̈ܶܐ ܘܰܩܪ̈ܰܒܬܳܢܶܐ ܣܒܺܝ̣̈ܣܰܝ ܙܳܟܘ̈ܳܬܳܐ: ܘܰܐܬܠܺܝ̈ܛܶܐ ܙܪ̈ܺܝܙܰܝ ܢܰܨܺܝ̣̈ܚܘܳܬܳܐ: ܐܳܘ ܚܠܺܝ̣̈ܨܶܐ ܒܰܐܠܽܘܡܦܰܐ ܘܢܰܚܫܺܝܪ̈ܬܳܢܶܐ ܒܰܐܣܛܪܰܐܛܰܣܺܝܣ ܐܳܘ ܐܰܓܽܘ̈ܢܺܝܣܛܶܐ ܚܰܝܠܬܳܢ̈ܶܐ ܘܓܰܢ̱ܒܳܪ̈ܶܐ ܕܰܐܩܪܝܒܘܢ ܘܢܶܣܠܳܝ ܡ̣ܶܢ ܙܺܝܡܝܰܐܐ: ܐܳܘ ܕܰܘܩܰܘ̈ܗܝ ܕܺܐܝܣܪܳܐܶܝܠ ܡܶܬܝܰܕܥܳܢܳܐ: ܘܢܳܛܽܘܪ̈ܶܐ ܕܟܰܪܡܳܐ ܪܽܘܚܳܢܳܐ ܘܰܡܠܺܝܠܐܴ. ܐܳܘ ܟܳܪ̈ܽܘܙܶܐ ܕܫܰܝܢܳܐ ܘܰܡܣܰܒܪ̈ܳܢܶܐ ܕܰܫܠܳܡܳܐ: ܐܳܘ ܢܰܗܺܝܪ̈ܶܐ ܘܡܰܢܗܪ̈ܳܢܶܐ ܕܥܰܝ̈ܢܶܐ ܕܬܰܪ̈ܥܝܳܬܳܐ ܚܶܫܽܘ̈ܟܳܬܳܐ: ܘܡܰܨܡܚ̈ܳܢܶܐ ܕܫܰܪܺܝܪܽܘܬܳܐ ܡܰܠܦܳܢܽܘܬܳܐ. ܐܳܘ ܙܰܠܺܝ̈ܩܶܐ ܬܗܺܝܪ̈ܶܐ ܕܢܽܘܗܪܳܐ ܕܠܐܴ ܕܳܥܶܟ: ܘܨܶܡܚ̈ܶܐ ܫܒܺܝ̈ܚܶܐ ܕܫܶܡܫܳܐ ܕܠܐܴ ܥ̇ܳܪܶܒ. ܐܳܘ ܢܽܘܗܪ̈ܶܐ ܕܡܺܝܪ̈ܶܐ ܕܥܳܠܡܳܐ ܕܠܐܴ ܦ̇ܳܛܰܪ ܘܰܡܩܰܕ̈ܫܳܢܶܐ ܘܡܰܘܕ̈ܝܳܢܶܐ ܒܥܳܠܡܳܐ ܚܰܕܬܳܐ ܕܠܐܴ ܥ̇ܳܒܰܪ: ܐܳܘ ܡܰܠܟ̈ܶܐ ܘܽܐܘܛܽܘܩܪܰܛܺܝܣ ܕܚܰܝܠܰܘ̈ܳܬܳܐ ܕܶܐܬܟܰܢܰܫܘ: ܘܫܽܘܦܪܶܗ ܕܒܶܝܬ ܪܽܘܚܳܢܳܐ ܡܦܰܠܓܺܝܢ ܒܶܙܬܳܐ ܒܡܰܘ̈ܗܒܳܬܳܐ ܕܟܺܐܢܽܘܬܳܐ ܘܰܕܙܰܕܺܝܩܽܘܬܳܐ: ܐܳܘ ܪ̈ܚܽܘܡܰܘܗܝ ܕܡܳܪܗܽܘܢ ܘܚܰܒܺܝ̣̈ܒܰܝ ܒܳܪܽܘܝܗܽܘܢ: ܐܳܘ ܚܕܽܘ̈ܓܰܝ ܥܳܒܽܘܕܗܽܘܢ: ܘܒܰܝ̈ܬܳܝܶܐ ܕܦܳܪܽܘܩܗܽܘܢ ܗ̣ܘܰܘ ܗܳܟܺܝܠ ܡܦܺܝ̣̈ܣܳܢܶܐ ܕܰܚܠܳܦܰܝܢ ܘܡܶܬܟܰܫ̈ܦܳܢܶܐ ܕܥܰܠ ܐܰܦܰܝ̈ܢ: ܠܗ̇ܰܘ ܕܙܰܕܺܝܩܽܘܬܳܐ ܪܳܚܶܡ ܡܶܛܽܠ ܕܙܰܕܺܝܩܰܐ ܗ̱ܘ ܘܰܬܪܺܝܨܽܘܬܳܐ ܚܳܙ̈ܝܳܢ ܐܰܦܰܘ̈ܗܝ ܕܰܢܫܰܟܶܢ ܠܰܢ ܒܺܐܝܕܰܝ̈ܟܽܘܢ ܚܰܣ̈ܝܳܬܳܐ ܚܽܘܠܳܠܐܴ ܕܡܶܢܟܽܠ ܨܳܐܝܽܘܬܳܐ: ܘܚܽܘܣܳܝܳܐ ܓܡܺܝܪܳܐ ܕܟܽܠܗܶܝܢ ܚܰܘ̈ܒܳܬܳܐ ܘܫܽܘܒܩܳܢܳܐ ܕܟܽܠܗܶܝܢ ܣܰܟܠܘ̈ܳܬܰܢ ܘܕܽܘܠܳܝܳܐ ܕܡ̣ܶܢ ܟܽܠ ܫܥܺܝ̣̈ܢܶܐ ܐܰܢܛܺܝܽܘ̈ܦܳܝܶܐ: ܘܥܽܘܠܳܝܳܐ ܕܡ̣ܶܢ ܦܶܚ̈ܬܶܐ ܢܕܺܝ̣̈ܕܶܐ ܘܰܫܟܺܝܪ̈ܶܐ: ܚܽܘܡ̈ܣܳܢܶܐ ܕܨܶܒܝܳܢܳܐ: ܟܽܘܒܫܳܐ ܕܝܰܨܪܳܐ ܒܺܝܫܳܐ: ܚܽܘܒܳܐ ܠܐܴ ܢܟܺܝܠܐܴ: ܘܪܶܚܡܬܳܐ ܠܐܴ ܐܰܫܺܝܕܬܳܐ: ܚܽܘܝ̇ܳܠܐܴ ܕܰܡܚܺܝ̣̈ܠܐܷ: ܥܽܘܕܪܳܢܳܐ ܕܰܣܢܺܝ̣̈ܩܶܐ ܚܽܘܒܳܒܳܐ ܕܝܰܬܡ̈ܶܐ ܝܰܨܺܝܦܽܘܬܳܐ ܕܰܐܪ̈ܡܠܳܬܳܐ: ܪܘܰܚܬܳܐ ܕܰܐܠܺܝ̣̈ܨܶܐ ܢܝܳܚܬܳܐ ܕܰܡܛܰܪ̈ܦܶܐ ܣܳܥܽܘܪܽܘܬܳܐ ܕܡܰܪ̈ܥܶܐ ܬܶܫܡܫܬܳܐ ܕܰܟܪ̈ܺܝܗܶܐ ܥܽܘܗܕܳܢܳܐ ܛܳܒܳܐ ܕܚܰܣܝܽܘܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܒܩܽܘܪ̈ܒܳܢܶܐ ܘܰܨܠܰܘ̈ܳܬܳܐ ܘܫܰܗܪ̈ܶܐ ܡܬܺܝ̣̈ܚܶܐ ܘܫܽܘܠܳܡܳܐ ܦܰܪܶܗܣܺܝܳܝܳܐ: ܘܡܰܦܩܳܢܳܐ ܠܐܴ ܡܰܒܗܢܳܐ ܘܦܺܝܠܽܘܪܽܘܦܽܘܪܺܝܰܐ ܕܰܩܕܳܡܰܘܗܝ ܕܠܐܴ ܬܰܚܡܶܨܬܳܐ ܘܟܽܘܐܳܪܳܐ ܘܰܥܢܶܝܢܳܣܳܝ̈ܶܐ ܦܨܺܝ̈ܚܶܐ ܕܥܰܡܶܗ: ܘܒܽܘܣܳܡܳܐ ܘܰܒܡܰܠܟܽܘܬܶܗ ܘܟܽܠܰܢ ܐܰܟܚܕܳܐ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

ܥܛܪܐ

ܪܺܝܚܳܐ ܚܰܠܝܳܐ ܘܥܶܛܪܳܐ ܓܰܒܝܳܐ ܕܰܩܕܳܡܰܝܟ ܐܰܡܺܝܢܳܐܺܝܬ ܦܳܐܰܚ ܡ̣ܶܢ ܓܰܪ̈ܡܰܝܗܽܘܢ ܕܰܡܢܺܝ̣̈ܚܳܢܰܝܟ ܡܳܪܝܳܐ: ܢܶܗܘܶܐ ܡܦܺܝܣܳܢܳܐ ܠܐܱܠܳܗܽܘܬܳܟ: ܚܠܳܦ ܚܰܛܳܝ̈ܶܐ ܘܡܰܣܟܠܳܢ̈ܶܐ ܚܠܳܦ ܛܳܥܰܝ̈ܳܐ ܘܰܐܒܺܝ̈ܕܶܐ: ܚܠܳܦ ܟܠܺܝܠܐܴ ܕܫܰܢ̱ܬܳܐ ܕܢܶܬܒܰܪܰܟ ܒܛܰܝܒܽܘܬܳܟ. ܘܰܚܠܳܦ ܕܽܘܟܪܳܢܳܐ ܛܳܒܳܐ ܕܝ̇ܳܠܶܕܬܳܟ ܘܰܕܩܰܕܺܝ̈ܫܰܝܟ: ܘܰܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܥܰܠ ܣܰܒܪܳܟ ܡܳܪܰܢ ܘܰܐܠܳܗܰܢ܀

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܫܒܺܝܚܳܐ ܘܰܡܫܰܒܚܳܐ ܕܗ̣ܽܘ ܐܰܘܪܶܒ ܕܽܘܟܪܳܢܳܐ ܕܝ̇ܳܠܶܕܬܶܗ ܒܬܽܘܠܬܳܐ ܩܰܕܺܝܫܬܳܐ ܒܰܫܡܰܝܳܐ ܘܒܰܐܪܥܳܐ: ܘܢܰܨܰܚ ܕܽܘܟܪܳܢܳܐ ܕܰܪ̈ܚܽܘܡܰܘܗܝ ܒܥܺܕܬܳܐ ܩܰܕܺܝܫܬܳܐ: ܘܙܰܝܰܚ ܠܰܟܠܺܝ̣̈ܠܰܝܗܽܘܢ ܕܡܰܐܚ̈ܒܳܢܰܘܗܝ ܕܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ: ܘܗܳܐ ܡܰܪܕܶܝܢ ܓܰܪ̈ܡܰܝܗܘܽܢ ܥܽܘܕܪ̈ܳܢܶܐ ܘܳܐܣܘ̈ܳܬܳܐ ܠܰܟܪ̈ܺܝܗܶܐ ܘܰܐܠܺܝ̣̈ܨܶܐ ܕܩܳܪܒܺܝܢ ܒܗܰܝܡܳܢܽܘܬܳܐ ܠܘܳܬ ܫܟܺܝ̣̈ܢܳܬܗܘܢܽ: ܘܢܳܣܒܺܝܢ ܚܽܘܠܡܳܢܳܐ ܠܟܽܘܪ̈ܗܳܢܰܝܗܽܘܢ: ܗ̣ܽܘ ܒܪ̈ܰܚܡܰܘܗܝ ܘܰܒܛܰܝܒܽܘܬܳܐ ܢܪܰܣܶܣ ܛܰܐܠܐܴ ܕܪ̈ܰܚܡܶܐ ܘܕܰܚܢܳܢܳܐ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝ̈ܡܢܶܐ: ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܳܪܝܳܐ ܕܚܰܝܠܰܘ̈ܳܬܳܐ ܘܰܐܠܳܗܳܐ ܕܪ̈ܽܘܚܳܬܳܐ ܘܰܕܟܽܠ ܒܣܰܪ: ܗ̇ܰܘ ܕܝܰܩܺܝܪ ܒܥܰܝ̈ܢܰܘܗܝ ܡܰܘܬܳܐ ܕܰܓܒܰܝ̈ܳܐ ܕܺܝܠܶܗ: ܘܕܽܘܟܪܳܢܗܽܘܢ ܠܪܺܝܚܳܐ ܚܰܠܝܳܐ ܘܒܰܣܺܝܡܳܐ ܡܩܰܒܶܠ ܐܰܢ̱ܬ: ܐܶܬܕܰܟܪ ܡܳܪܝܳܐ ܒܥܶܕܳܢܳܐ ܗܳܢܳܐ ܥܰܠ ܦܺܝܪܡܳܐ ܗܳܢܳܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡܰܝܟ ܠܟܽܠܗܽܘܢ ܩܰܕܺܝ̈ܫܰܝܟ ܐܰܝܠܶܝܢ ܕܰܠܪܶܗܛܗܽܘܢ ܫܰܡܠܺܝܘ ܘܰܓܡ̣ܰܪܘ ܒܗܰܝܡܳܢܽܘܬܳܐ ܕܰܫܪܳܪܳܐ: ܘܒܶܗ ܒܦܽܘܠܚܳܢܳܐ ܕܰܥܒ̇ܳܕ̈ܶܐ ܛܳܒ̈ܶܐ ܠܐܱܒܳܗ̈ܳܬܳܐ ܩܰܕܺܝ̈ܫܶܐ: ܠܪ̈ܺܝܫܰܝ ܐܰܒܳܗ̈ܳܬܳܐ ܠܰܢܒܺܝ̈ܶܐ ܠܰܫܠܺܝ̈ܚܶܐ ܠܟܳܪ̈ܽܘܙܶܐ: ܘܠܐܷܘܢܓܶܠܺܝ̈ܣܛܶܐ ܠܣܳܗ̈ܕܶܐ ܠܡܰܘܕ̈ܝܳܢܶܐ ܠܡܰܠܦ̈ܰܝ ܐ̱ܪ̈ܳܙܶܐ ܘܰܡܟܰܗ̈ܢܳܢܶܐ ܕܰܫܪܳܪܳܐ: ܘܰܠܟܽܠ ܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܶܐܬܓܡ̣ܰܪܘ: ܬܽܘܒ ܕܶܝܢ ܝܰܬܺܝܪܳܐܺܝܬ ܠܩܰܕܺܝܫܬܳܐ ܘܰܡܫܰܒܰܚܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܘܰܠܛܽܘܒܳܢܳܐ ܝܽܘܚܰܢܳܢ ܐܺܝܙܓܰܕܳܐ ܘܡܰܥܡܕܳܢܳܐ ܘܪܰܗܳܛܳܐ ܩܰܕܡܳܝܳܐ ܘܰܠܩܰܕܺܝܫܳܐ ܡܫܰܒܚܳܐ ܣܛܶܦܰܢܳܘܣ ܪܺܝܫܳܐ ܕܰܡܫܰܡ̈ܫܳܢܳܐ ܘܩܰܕܡܳܝܳܐ ܕܣܳܗ̈ܕܶܐ. ܘܰܠܗ̇ܳܢܽܘܢ ܐܰܝܠܶܝܢ ܕܰܐܓܽܘ̈ܢܶܐ ܢܰܨܺܝ̈ܚܶܐ ܚܠܳܦ ܫܪܳܪܳܐ ܕܗܰܝܡܳܢܽܘܬܳܐ ܐܶܬܟܰܬܰܫܘ. ܘܰܐܢܗܰܪܘ ܒܢܽܘܗܪܳܐ ܕܺܝܕܰܥܬܳܐ ܠܥܺܕ̈ܳܬܳܐ ܩܰܕܺܝ̈ܫܳܬܳܐ ܘܰܠܩܰܘ̈ܡܶܐ ܘܪ̈ܽܘܫܥܶܐ ܕܰܐܪ̈ܶܣܺܝܣ ܕܰܓ̈ܳܠܳܬܳܐ ܣܰܚ̣ܶܦܘ ܘܒܰܛܶܠܘ: ܘܥܰܡܗܽܘܢ ܐܶܬܕܰܟܪ ܡܳܪܝܳܐ ܒܛܰܝܒܽܘܬܳܟ: ܘܰܠܥܰܢܺܝ̈ܕܶܐ ܗ̇ܳܢܽܘܢ ܝܰܘܡܳܢܳܐ ܕܽܘܟܪܳܢܗܽܘܢ ܡܫܰܡܠܶܝܢܰܢ: ܐܰܢܺܝܚ ܡܳܪܝܳܐ ܢܰܦ̈ܫܳܬܗܽܘܢ ܘܪ̈ܽܘܚܳܬܗܽܘܢ ܘܦܰܓܪ̈ܰܝܗܽܘܢ: ܛܰܟܶܣ ܐܶܢܽܘܢ ܒܓܽܘܕܰܝ̈ܗܽܘܢ ܩܰܕܺܝ̈ܫܳܬܳܐ: ܘܰܐܝܠܶܝܢ ܕܰܒܡܶܠܬܳܐ ܘܒܰܥܒ̇ܳܕܳܐ ܚ̣ܛܰܘ ܐܰܝܟ ܒܢܰܝ̈ܢܳܫܳܐ ܠܒܺܝ̣̈ܫܰܝ ܒܶܣܪܳܐ ܕܡܽܘܟܳܟܳܐ ܣܰܓܺܝ ܚܰܫ̈ܶܐ ܫܒܽܘܩ ܘܰܐܥܒ̣ܰܪ ܐܰܢ̱ܬ ܓܶܝܪ ܝ̇ܳܕܰܥ ܐܰܢ̱ܬ ܡܚܺܝܠܽܘܬ ܟܝܳܢܰܢ ܘܰܕܠܺܝܠܽܘܬ ܫܳܪ̈ܥܳܬܳܐ ܕܺܝܠܰܢ: ܘܰܠܗܳܠܶܝܢ ܕܰܒܗܰܝܡܳܢܽܘܬܳܐ ܕܰܫܪܳܪܳܐ ܩܽܘܪ̈ܒܳܢܶܐ ܘܰܢܝܳܚ̈ܳܬܳܐ ܥܳܒܕܺܝܢ ܚܠܳܦܰܝܗܽܘܢ: ܘܰܒܟܽܠ ܡܰܝܬܳܝܽܘܬ ܦܺܐܪ̈ܶܐ ܕܰܥܒ̇ܳܕ̈ܶܐ ܛܳܒ̈ܶܐ ܬܽܘܒ ܡܶܬܚܰܫܚܺܝܢ ܩܰܒܶܠ ܡܳܪܝ ܩܽܘܪ̈ܒܳܢܰܝܗܽܘܢ ܘܦܽܘܪ̈ܫܳܢܰܝܗܽܘܢ ܘܒܰܪܶܟ ܥܰܡܠܰܝ̈ܗܽܘܢ ܘܰܐܣܓܳܐ ܦܺܐܪ̈ܶܐ ܕܙܰܕܺܝܩܽܘܬܗܽܘܢ: ܘܰܠܚܰܝ̈ܶܐ ܕܺܝܠܰܢ ܙܰܒܢܳܝ̈ܶܐ ܘܰܬܥܺܝ̣̈ܫܶܐ ܢܰܛܰܪ ܡ̣ܶܢ ܟܽܠ ܢܶܣܝܽܘܢܳܐ ܘܡܰܐܟܝܳܢܽܘܬܳܐ ܕܒܺܝܫܳܐ ܡܳܪܽܘܕܳܐ: ܘܕܰܒܰܪ ܠܰܢ ܠܘܳܬ ܦܽܘܪܩܳܢܳܐ ܡܫܰܡܠܝܳܐ: ܘܠܰܢܝܳܚܬܳܐ ܕܚܰܝ̈ܶܐ ܕܰܥܬܺܝܕܺܝܢ ܒܝܰܘܡܳܐ ܕܒܶܗ ܡܶܬܓܠܐܷ ܐܰܢ̱ܬ ܒܫܽܘܒܚܳܐ ܪܰܒܳܐ ܕܡܰܠܟܽܘܬܳܟ: ܘܳܐܬܶܐ ܐܰܢ̱ܬ ܕܰܬܕܽܘܢ ܠܬܺܐܒܶܝܠ ܒܙܰܕܺܝܩܽܘܬܳܐ: ܘܢܶܫܬܘܶܐ ܕܢܶܥܽܘܠ ܠܰܓܢܽܘܢܳܟ: ܘܢܶܬܒܰܣܰܡ ܒܛܳܒ̈ܳܬܳܟ ܡܬܽܘܡܳܝ̈ܳܬܳܐ ܘܕܰܠܥܳܠܰܡ ܡܟܰܬܪ̈ܳܢ ܒܢܽܘܗܪܳܐ ܗ̇ܰܘ ܕܠܐܴ ܥ̇ܳܪܶܒ ܘܰܐܟܚܕܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܝܰܠܕܳܐ ܥܶܠܳܝܳܐ ܕܥܰܕܥܺܐܕܳܐ ܕܶܐܡܳܐ ܕܺܝܠܶܕܬܶܗ ܪܰܡܪܶܡ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ: ܘܕܽܘܟܪܳܢܳܐ ܕܩܰܕܺܝ̈ܫܶܐ ܕܺܝܠܶܗ ܫܰܒܰܚ ܘܥܽܘܗܕܳܢܳܐ ܕܰܓܒܰܘ̈ܗܝ ܐܰܘܪܶܒ: ܘܰܚܠܽܘܠܐܴ ܕܢܰܨܺܝ̈ܚܰܘܗܝ ܢܰܨܰܚ. ܘܺܐܝܩܳܪܳܐ ܕܙܰܕܺܝ̈ܩܰܘܗܝ ܥܰܫܶܢ ܘܒܽܘܣܳܡܳܐ ܕܣܳܓܽܘ̈ܕܰܘܗܝ ܐܰܣܓܺܝ: ܕܠܶܗ ܬܶܫܒܽܘܚܬܳܐ ܡ̣ܶܢ ܟܽܠ ܦܽܘ̈ܡܶܐ ܘܠܶܫܳܢ̈ܶܐ ܕܰܐܘܪܶܒ ܐܶܢܽܘܢ ܒܝܽܘܒܳܠ ܥܰܕܥܺܐܕܳܐ ܕܝܳܠܶܕܬܶܗ ܘܰܕܩܰܕܺܝ̈ܫܰܘܗܝ ܘܰܕܥܰܢܺܝ̈ܕܶܐ ܡܗܰܝ̈ܡܢܶܐ ܒܗܳܢܳܐ܀

 

ܣܕܪܐ

ܐܺܝܢ ܡܳܪܝܳܐ ܐܠܰܗܳܐ ܡܪܰܚܡܳܢܳܐ ܡܶܬܟܰܫܦܺܝܢܰܢ ܠܳܟ ܘܒܳܥܶܝܢܰܢ ܡܶܢܳܟ: ܒܫܽܘܒ̈ܚܶܐ ܫܒܺܝ̈ܚܶܐ ܕܡܰܠܐܱܟ̈ܶܐ ܒܗܽܘ̈ܠܳܠܐܷ ܗܕܺܝܪ̈ܶܐ ܕܪ̈ܰܒܰܝ ܡܰܠܐܱܟ̈ܶܐ ܒܩܺܝ̣̈ܢܳܬܳܐ ܬܰܩ̈ܢܳܬܳܐ ܕܪ̈ܺܝܫܳܢܘܳܬܳܐ: ܒܫܰܘܝܽܘܬܳܐ ܫܘܺܝܬܳܐ ܕܫܽܘܠܛܳܢ̈ܶܐ ܒܺܐܝܩܳܪܳܐ ܪܰܒܳܐ ܕܡܳܪ̈ܰܘܳܬܳܐ: ܒܙܰܘܚܳܐ ܕܚܺܝܠܐܴ ܕܚܰܝܠܰܘ̈ܳܬܳܐ: ܒܰܩܒܺܝܥܽܘܬܳܐ ܡܫܰܪܰܪܬܳܐ ܕܡܰܘ̈ܬܒܶܐ ܒܒܽܘܪ̈ܟܳܬܳܐ ܪܰܘܪ̈ܒܳܬܳܐ ܕܰܟܪ̈ܽܘܒܶܐ ܒܩܽܘܕ̈ܳܫܶܐ ܫܦܰܝ̈ܳܐ ܕܰܣܪ̈ܳܦܶܐ: ܒܐܪ̈ܳܙܶܐ ܙܗܰܝ̈ܳܐ ܕܙܰܕܺܝ̈ܩܶܐ: ܒܛܽܘ̈ܦܣܶܐ ܘܦ̈ܶܠܐܴܬܳܐ ܕܟܺܐܢ̈ܶܐ ܒܚܽܘܒܳܐ ܪܰܒܳܐ ܕܰܢܒܺܝ̈ܶܐ: ܒܰܫܪܳܪܳܐ ܓܡܺܝܪܳܐ ܕܰܫܠܺܝ̈ܚܶܐ: ܒܰܐܓܽܘܢܳܐ ܢܰܨܺܝܚܳܐ ܕܣܳܗ̈ܕܶܐ: ܒܰܕܡܳܐ ܙܰܟܳܝܳܐ ܕܡܰܘ̈ܕܝܳܢܶܐ: ܒܡ̈ܶܠܐܷ ܚܰܝ̈ܳܬܳܐ ܕܡܰܠܦܳܢ̈ܶܐ ܒܩ̈ܳܠܐܷ ܩܰܕܺܝ̈ܫܶܐ ܕܟܳܪ̈ܽܘܙܶܐ: ܒܚܰܝܠܐܴ ܪܰܒܳܐ ܕܰܡܣܰܒܪ̈ܳܢܶܐ: ܒܕܰܟܝܽܘܬܳܐ ܡܨܰܠܰܠܬܳܐ ܕܰܒܬܽܘ̈ܠܐܷ: ܒܨܰܘܡܳܐ ܩܰܕܺܝܫܳܐ ܕܟܰܫܺܝܪ̈ܶܐ. ܒܰܨܠܰܘ̈ܳܬܳܐ ܚܠܺܝ̣̈ܨܳܬܳܐ ܕܢܰܨܺܝ̈ܚܶܐ: ܒܙܰܗܝܽܘܬܳܐ ܙܗܺܝܬܳܐ ܕܥܳܢ̈ܘܳܝܶܐ: ܒܰܓܡܺܝܪܽܘܬܳܐ ܡܫܰܡܠܳܝܬܳܐ: ܘܰܡܫܰܡܰܗܬܳܐ ܕܰܓܡܺܝܪ̈ܶܐ: ܒܕܶܡ̈ܥܶܐ ܚܢܺܝ̣̈ܓܳܬܳܐ ܕܬܰܝ̈ܳܒܶܐ: ܒܰܟܠܺܝ̈ܠܐܷ ܦܰܐܝ̈ܳܐ ܕܙܰܟܳܝ̈ܶܐ: ܒܙܶܕ̈ܩܳܬܳܐ ܡܩܰܒ̈ܠܳܬܳܐ ܕܰܡܪ̈ܰܚܡܳܢܶܐ ܒܟܽܠܶܗ ܣܰܒܪܳܐ ܘܬܽܘܟܠܳܢܳܐ ܘܕܽܘܒܳܪܳܐ ܕܩܰܕܺܝ̈ܫܶܐ: ܒܰܦܝܳܣܳܐ ܒܰܣܺܝܡܳܐ ܕܥܺܕܬܳܟ ܘܰܒܬܰܟܫ̈ܦܳܬܳܐ ܫܡܺܝ̣̈ܥܳܬܳܐ ܕܺܝܠܳܗ̇: ܘܰܒܒܳܥܽܘܬܳܐ ܪܰܒܬܳܐ ܕܡܰܥܡܕܳܢܳܟ: ܐܳܦ ܕܶܣܛܶܦܰܢܳܘܣ ܡܫܰܡܫܳܢܳܟ ܒܰܨܠܰܘ̈ܳܬܗܽܘܢ ܕܗܳܠܶܝܢ ܟܽܠܗܽܘܢ ܐܰܪܥܳܐ ܠܰܢ: ܘܰܒܬܰܟܫ̈ܦܳܬܗܽܘܢ ܐܶܫܬܰܝܰܢ ܠܰܢ: ܘܰܒܣܰܒܪܳܐ ܕܺܝܠܗܽܘܢ ܣܰܬܶܬ ܠܰܢ: ܘܰܒܫܽܘܦܪܳܐ ܗ̇ܰܘ ܢܰܨܺܝܚܳܐ ܕܺܝܠܗܽܘܢ ܨܰܒ̣ܶܬ ܠܰܢ: ܘܰܒܚܽܘܒܳܐ ܪܰܒܳܐ ܚܙܽܘܩ ܠܰܢ: ܘܰܒܕܽܘܒܳܪ̈ܰܝܗܽܘܢ ܐܰܥܬܰܪ ܠܰܢ: ܘܰܕܢܶܪܕܶܐ ܒܥܶܩ̈ܒܳܬܗܽܘܢ ܚܰܝܶܠ ܠܰܢ. ܘܰܕܢܶܬܕܰܡܶܐ ܒܰܚܠܺܝܨܽܘܬܳܐ ܕܺܝܠܗܽܘܢ ܣܰܝܰܥ ܠܰܢ: ܘܰܕܢܶܫܦܰܪ ܠܳܟ ܐܰܟܘܳܬܗܽܘܢ ܐܰܫܘܳܐ ܠܰܢ: ܘܰܕܢܶܬܒܰܣܰܡ ܥܰܡܗܽܘܢ ܛܰܝܶܒ ܠܰܢ: ܘܕܰܢܫܰܒܚܳܟ ܒܰܝܢܳܬܗܽܘܢ ܥܰܬܶܕ ܠܰܢ: ܘܕܰܢܗܰܕܪܳܟ ܒܓܽܘܕܰܝ̈ܗܽܘܢ ܗܰܒܠܰܢ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ ܒܳܟ ܘܰܦ̣ܛܰܪܘ ܘܫܰܢܺܝܘ ܥܰܠ ܣܰܒܪܳܟ ܒܣܶܕܪ̈ܰܝܗܽܘܢ ܕܗܳܠܶܝܢ ܚܠܽܘܛ ܠܰܢ: ܒܓܽܘܕܰܝ̈ܗܽܘܢ ܛܰܟܶܣ ܐܶܢܽܘܢ: ܘܒܰܐܘ̈ܘܳܢܰܝܗܽܘܢ ܐܰܫܪܳܐ ܐܶܢܽܘܢ ܘܒܰܠܡܺܐܢܰܝ̈ܗܽܘܢ ܐܰܢܺܝܚ ܐܶܢܽܘܢ: ܘܒܰܡܛܰܠܠܰܝ̈ܗܽܘܢ ܣܰܬܰܪ ܐܶܢܽܘܢ: ܘܒܰܚܠܽܘ̈ܠܰܝܗܽܘܢ ܚܰܕܳܐ ܐܶܢܽܘܢ: ܒܰܐܘܨܪ̈ܰܝܗܽܘܢ ܐܰܥܡܰܪ ܐܶܢܽܘܢ: ܘܰܒܝܽܘܡ ܥܺܐܕܰܝ̈ܗܽܘܢ ܐܰܦܨܰܚ ܐܶܢܽܘܢ: ܘܰܒܚܰܓܰܝ̈ܗܽܘܢ ܐܰܪܘܶܙ ܐܶܢܽܘܢ: ܘܰܒܝܽܘܬܪܳܢܗܽܘܢ ܘܰܒܝܳܪܬܽܘܬܗܽܘܢ ܒܰܣܶܡ ܐܶܢܽܘܢ: ܘܰܒܦܳܬܽܘܪܗܽܘܢ ܦܰܛܶܡ ܐܶܢܽܘܢ: ܘܰܒܢܽܘܗܪܗܽܘܢ ܐܰܢܗܰܪ ܐܶܢܽܘܢ ܘܰܒܫܽܘܒܚܳܐ ܕܥܰܡܗܽܘܢ ܘܒܰܝܢܳܬܗܽܘܢ ܚܢܰܢ ܟܝܬ ܘܥܰܢܺܝ̈ܕܰܝܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܩܰܒܶܠ ܡܳܪܝ ܡܚܺܝܠܽܘܬܳܐ ܕܬܰܟܫ̈ܦܳܬܳܐ ܕܥܰܒ̣ܕܰܝ̈ܟ ܥܰܡ ܐܰܬܠܺܝܣܽܘܬܳܐ ܕܰܪ̈ܚܽܘܡܰܝܟ ܓܒܰܝ̈ܳܐ ܘܡܶܬܝܰܕ̈ܥܳܢܶܐ ܥܒܶܕ ܠܰܢ ܡܳܪܝܳܐ ܒܓܽܘܕܰܝ̈ܗܽܘܢ ܒܝܰܘܡܳܟ ܪܰܒܳܐ: ܟܰܕ ܡܰܦܪܓܺܝܢܰܢ ܥܰܡܗܽܘܢ ܒܕܽܘܒܳܪ̈ܶܐ ܕܰܡܝܰܬܪܽܘܬܳܐ: ܘܰܒܡܶܫܚܳܐ ܕܙܰܕܺܝܩܽܘܬܳܐ ܡܰܢܗܪܺܝܢܰܢ ܘܡܰܙܠܓܺܝܢܰܢ: ܘܢܶܗܘܽܘܢ ܠܰܡܦܺܐܕ̈ܶܐ ܕܺܝܠܰܢ ܢܰܗܺܝܪ̈ܶܐ: ܘܥܰܡ ܚܰܝܠܰܘ̈ܳܬܳܐ ܪ̈ܳܡܰܝ ܡ̣ܶܢ ܪ̈ܶܓܫܶܐ ܒܫܽܘܒܚܳܐ ܕܠܐܴ ܦ̇ܳܛܰܪ ܢܩܰܠܣܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

 

ܦܪܘܡܝܘܢ ܕܨܦܪܐ

 

ܬܶܫܒܽܘܚܬܳܐ: ܠܗ̇ܰܘ ܛܳܒܳܐ ܘܛܽܘܒܬܳܢܳܐ ܕܰܒܩܰܕܺܝܫܽܘܬܳܐ ܕܩܰܕܺܝ̈ܫܰܘܗܝ ܡܶܬܩܰܕܰܫ ܘܰܒܗܽܘ̈ܠܳܠܐܷ ܘܰܒܙܽܘܡܳܪ̈ܶܐ ܘܪܽܘܡܪ̈ܳܡܶܐ ܕܙܰܕܺܝ̈ܩܰܘܗܝ ܡܶܬܗܰܕܰܪ: ܘܰܒܢܰܨܺܝܚܽܘܬܳܐ ܕܰܓܒܰܝ̈ܳܐ ܕܺܝܠܶܗ ܡܶܬܢܰܨܰܚ ܘܡܶܬܪܰܡܪܰܡ ܘܰܒܕܽܘܒܳܪ̈ܶܐ ܬܰܩ̈ܢܶܐ ܘܰܬܡܺܝ̈ܗܶܐ ܕܟܺܐܢ̈ܶܐ ܦܰܐܝܳܐܺܝܬ ܡܶܫܬܰܒܰܚ. ܠܗ̇ܰܘ ܡܥܰܠܝܳܐ ܫܰܠܺܝܛܳܐ ܕܰܒܕܽܘ̈ܥܬܶܐ ܘܥܰܡ̈ܠܐܷ ܪܰܘܪ̈ܒܶܐ ܕܥܰܒ̣ܕ̈ܰܘܗܝ ܡܶܬܩܰܠܰܣ. ܠܗ̇ܰܘ ܫܒܺܝܚܳܐ ܘܰܡܫܰܒܚܳܐ ܕܰܠܥܺܐܕܳܐ ܕܝܳܠܶܕܬܶܗ ܒܬܽܘܠܬܳܐ ܩܰܕܺܝܫܬܳܐ ܒܟܽܠ ܦܶܢ̈ܝܳܢ ܙܰܝܰܚ ܘܝܰܩܰܪ. ܘܒܰܨܠܰܘ̈ܳܬܳܐ ܘܒܳܥ̈ܘܳܬܳܐ ܘܰܒܬܰܟ̈ܫܦܳܬܳܐ ܘܰܒܬܶܫܒ̈ܚܳܬܳܐ ܕܡܰܚܒܳܢܰܘ̈ܗܝ ܡܶܬܢܰܨܰܪ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܠܰܩܕܳܡ ܬܪܽܘܢܳܘܣ ܕܪܰܒܽܘܬܶܗ ܥܽܘܗܕܳܢܳܐ ܛܳܒܳܐ ܩܕܳܡܰܘܗܝ ܡܰܝܬܶܐ. ܘܰܒܡܰܠܟܽܘܬܳܐ ܕܺܝܠܶܗ ܠܗܽܘܢ ܡܒܰܣܶܡ ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܐܠܰܗܳܐ ܡܶܠܬܳܐ ܕܡ̣ܶܢ ܐܰܒܳܐ ܗܰܘܢܳܐ ܪܰܒܳܐ ܐܶܬܺܝܠܶܕ: ܗ̇ܰܘ ܡܬܽܘܡܳܝܳܐ ܕܡ̣ܶܢ ܠܐܴ ܙܰܒܢܳܝܳܐ ܨܡ̣ܰܚ ܓܢܺܝܙܳܐ ܕܡ̣ܶܢ ܠܐܴ ܡܶܬܕܰܪܟܳܢܳܐ ܘܠܐܴ ܡܶܬܚܰܙܝܳܢܳܐ ܐܶܬܺܝܕܰܥ: ܡܫܰܒܚܳܐ ܐܰܘܟܺܝܬ ܡܶܫܬܰܒܚܳܢܳܐ ܕܡ̣ܶܢ ܚܰܝܠܰܘ̈ܳܬܳܐ ܪ̈ܽܘܚܳܢܶܐ ܡܶܫܬܰܒܰܚ ܒܫܽܘ̈ܒܚܶܐ ܣܒܺܝ̣̈ܣܶܐ ܠܐܴ ܡܶܫܬܰܠܝ̈ܳܢܶܐ: ܪܳܡܳܐ ܘܰܡܥܰܠܝܳܐ ܐܺܝܬܰܝܟ ܡܳܪܝܳܐ ܕܰܡܥܰܠܐܷ ܐܰܢ̱ܬ ܘܡܰܘܪܶܒ ܐܰܢ̱ܬ ܒܶܝܬ ܡܰܠܐܱܟ̈ܶܐ ܠܗܳܠܶܝܢ ܕܡܰܘܪܒܺܝܢ ܠܳܟ ܒܶܝܬ ܒܢܰܝ̈ܢܳܫܳܐ ܡܰܘܕܶܐ ܐܰܢ̱ܬ ܒܗܽܘܢ ܩܕܳܡ ܐܰܒܽܘܟ: ܕܒܰܫܡܰܝܳܐ ܘܰܩܕܳܡ ܡܰܠܐܱܟܰܝ̈ܟ ܩܰܕܺܝ̈ܫܶܐ ܒܰܐܝܠܶܝܢ ܕܡܰܘܕܶܝܢ ܒܳܟ ܩܕܳܡ ܐ̱ܢܳܫ̈ܳܐ. ܘܝ̇ܳܗܶܒ ܐܰܢ̱ܬ ܚܠܳܦ ܗܳܠܶܝܢ ܕܰܬܢܳܢ ܦܽܘܪ̈ܥܳܢܶܐ ܪܰܘܪ̈ܒܶܐ ܠܐܱܝܠܶܝܢ ܕܪܳܚܡܺܝܢ ܘܡܰܐܚܒܺܝܢ ܡܶܠܬܳܟ: ܘܢܳܛܪܺܝܢ ܦܽܘܩܕܳܢܰܝ̈ܟ: ܘܰܡܛܰܝܶܒ ܐܰܢ̱ܬ ܦܽܘܪܥܳܢܳܐ ܕܥܰܡܠܰܝ̈ܗܽܘܢ: ܡܶܕܶܡ ܕܥܰܝܢܳܐ ܠܐܴ ܚܙܳܬ݀: ܘܶܐܕܢܳܐ ܠܐܴ ܫܶܡܥܰܬ݀ ܘܥܰܠ ܠܶܒܳܐ ܕܒܰܪܢܳܫܳܐ ܠܐܴ ܣܠ̣ܶܩ ܡܬܽܘܡ. ܒܰܫܪܳܪܳܐ ܓܶܝܪ ܐܰܢ̱ܬ ܐܺܝܬܰܝܟ ܟܝܳܢܳܐ ܛܽܘܒܬܳܢܳܐ ܘܥܳܡ̇ܪܰ ܒܢܽܘܗܪܳܐ ܠܐܴ ܡܶܬܩܰܪܒܳܢܳܐ: ܘܡܰܢܗܰܪ ܐܰܢ̱ܬ ܠܟܽܠ ܒܰܪܢܳܫܳܐ: ܕܳܐܬܶܐ ܠܥܳܠܡܳܐ: ܘܡܰܥܬܰܪ ܐܰܢ̱ܬ ܒܛܽܘ̈ܒܶܐ ܗ̇ܳܢܽܘܢ ܫܡܰܝ̈ܳܢܶܐ ܠܐܱܝܠܶܝܢ ܕܰܠܛܽܘܒܬܳܢܽܘܬܳܐ ܕܺܝܠܳܟ ܪܚܶܡ̣ܘ: ܘܚܳܕܝܳܐܺܝܬ ܢܩ̣ܶܦܘ: ܗ̇ܰܘ ܕܰܠܡܶܣܟܺܢܝ ܒܪܽܘܚ ܛܽܘܒܳܐ ܡܠ̣ܶܟܬ ܘܦܽܘܪܥܳܢܳܐ ܘܡܰܠܟܽܘܬܳܐ ܕܰܫܡܰܝܳܐ ܐܶܫܬܰܘܕܺܝܬ: ܘܠܐܱܒܺܝ̣̈ܠܰܝ ܬܽܘܒ ܡܶܛܽܠ ܫܡܳܟ ܩܰܕܺܝܫܳܐ ܛܽܘܒܳܐ ܐܶܘܢܓܶܠܳܝܳܐ ܝܰܗ̣ܒܬ: ܘܒܽܘܝܳܐܳܐ ܘܠܽܘܒܳܒܳܐ ܠܥܳܩ̈ܳܬܗܽܘܢ ܫܰܟ̣ܶܢܬ. ܬܽܘܒ ܠܡܰܟܺܝ̣̈ܟܰܝ ܪܽܘܚܳܐ ܕܡܶܛܽܠܳܬܳܟ ܠܶܗ ܟܰܕ ܠܶܗ ܠܛܽܘܒܳܐ ܝܰܗ̣ܒܬ ܘܰܐܪܥܳܐ ܗ̇ܳܝ ܫܡܰܝܳܢܺܝܬܳܐ ܕܡܰܘܪܶܬ ܐܰܢ̱ܬ ܠܗܽܘܢ ܬܰܚܶܡ̣ܬ: ܘܰܠܟܰܦ̈ܢܰܝ ܠܟܺܐܢܽܘܬܳܐ ܘܨܰܗ̈ܝܰܝ ܠܙܰܕܺܝܩܽܘܬܳܐ ܒܶܗ ܟܰܕ ܒܶܗ ܒܛܽܘܒܳܐ ܕܟܰܠ̣ܶܠܬ: ܘܗ̣ܶܢܽܘܢ ܢܶܣܒܥܽܘܢ ܡ̣ܶܢ ܛܳܒ̈ܳܬܳܟ: ܠܰܡܪ̈ܰܚܡܳܢܶܐ ܕܶܝܢ ܘܥܰܒ̣ܕܰܝ̈ܟ ܪ̈ܰܚܡܶܐ ܘܙܶܕ̈ܩܳܬܳܐ ܕܥܰܠ ܐܰܚܰܝ̈ܗܽܘܢ ܡܶܣ̈ܟܺܢܶܐ ܡܶܢܶܗ ܟܰܕ ܡܶܢܶܗ ܕܛܽܘܒܳܐ ܐܶܘܢܓܶܠܳܝܳܐ ܠܗܽܘܢ ܐܰܥ̣ܬܰܪܬ: ܘܕܰܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ ܫ̣ܰܪܰܪܬ: ܘܠܰܕ̈ܟܰܝܳܐ ܒܠܶܒܰܘ̈ܳܬܳܐ ܒܶܗ ܒܛܽܘܒܳܐ ܡܠܺܝܟܳܐ ܠܗܽܘܢ ܒܰܣ̣ܶܡܬ: ܘܰܕܠܰܚܙܳܬܳܐ ܗ̇ܳܝ ܡܰܦܨܚܳܢܺܝܬܳܐ ܘܰܐܠܳܗܳܝܬܳܐ ܕܺܝܠܳܟ ܕܢܶܫܬܘܽܘܢ ܦܰܣ̣ܶܩܬ ܬܽܘܒ ܘܰܠܥܳܒ̇ܕ̈ܰܝ ܫܠܳܡܳܐ ܒܢ̈ܰܝ ܛܽܘܒܳܐ ܥܬܺܝܕܳܐ ܕܰܐܡܺܝܪ ܩ̣ܪܰܝܬ: ܘܕܰܒܢܰܝ̈ܳܐ ܕܰܐܠܳܗܳܐ ܢܶܬܩܪܽܘܢ ܐܰܒܽܘܗܝ ܕܰܫܠܳܡܳܐ ܚܰܘܺܝܬ: ܘܠܐܱܝܠܶܝܢ ܕܡܶܛܽܠ ܟܺܐܢܽܘܬܳܐ ܡܶܬܪܰܕܦܺܝܢ: ܘܡܶܫܬܰܚܩܺܝܢ ܝܳܪ̈ܽܘܬܶܐ ܕܺܝܠܶܗ ܕܛܽܘܒܳܐ ܗ̇ܰܘ ܫܡܰܝܳܢܳܐ ܐܺܝܬܰܝܗܽܘܢ ܫܰܘܕܰܥ̣ܬ: ܘܠܳܗ̇ ܠܡܰܠܟܽܘܬܳܐ ܕܰܫܡܰܝܳܐ ܥܰܠܺܝܬ ܘܰܐܣܶܩ̣ܬ. ܘܠܐܱܝܠܶܝܢ ܕܡܶܛܽܠ ܫܡܳܟ ܣܓܺܝܕܳܐ ܡܰܚܘ̈ܳܬܳܐ ܘܰܪ̈ܕܽܘܦܝܶܐ ܘܟܽܠ ܡܶܠܐܴ ܒܺܝܫܳܐ ܕܰܥܠܰܝܗܽܘܢ ܡܶܬܰܐܡܪܳܐ ܚܳܐܫܺܝܢ ܒܶܗ ܒܛܽܘܒܳܐ ܩܰܕܡܳܝܳܐ ܫܰܘܬܶܦ̣ܬ: ܘܰܕܢܶܚܕܽܘܢ ܐܳܦ ܢܶܪܽܘܙܽܘܢ ܗܳܝܕܶܝܢ ܦܰܩ̣ܕܶܬ ܘܕܰܐܓܪܳܐ ܕܺܝܠܗܽܘܢ ܩܕܳܡܰܝܟ ܒܰܫܡܰܝܳܐ ܣܰܓܺܝ ܫܰܘܕܰܥ̣ܬ. ܚܠܳܦ ܛܽܘܪ̈ܳܦܶܐ ܘܰܫܚ̈ܳܩܶܐ ܕܰܣܒ̣ܰܠܘ ܬܢܳܢ ܒܥܳܠܡܳܐ ܥܬܺܝܕܳܐ ܡܶܬܦܰܪܥܺܝܢ ܚܰܕ̈ܘܳܬܳܐ ܘܒܽܘ̈ܣܳܡܶܐ ܟܰܕ ܢܳܛܽܘܪ̈ܶܐ ܠܦܽܘܩ̈ܕܳܢܰܝܟ ܩܰܕܺܝ̈ܫܶܐ ܘܰܡܬܰܠܡ̈ܕܰܝ ܠܡܰܠܟܽܘܬܳܟ ܗ̇ܳܢܽܘܢ ܕܝܰܘܡܳܢܳܐ ܠܥܽܘܗܕܳܢܳܐ ܕܺܝܠܗܽܘܢ ܡܫܰܡܠܶܝܢܰܢ: ܥܰܡ ܩܽܘ̈ܠܳܣܶܐ ܕܪܽܘܚܳܐ ܘܰܙܡܺܝܪ̈ܳܬܳܐ ܘܬܶܫܒ̈ܚܳܬܳܐ ܠܥܺܐܕܳܐ ܗܳܢܳܐ ܕܺܝܠܗܽܘܢ ܡܚܰܓܶܝܢܰܢ: ܘܳܐܡܪܺܝܢܰܢ ܗ̇ܳܢܽܘܢ ܕܡܶܛܽܠ ܡܰܠܟܽܘܬܳܟ ܐܶܬܡܰܣܟܰܢܘ ܘܶܐܬܶܐܒܶܠܘ ܒܥܶܠܰܬ݀ ܕܢܶܬܒܰܐܝܽܘܢ ܒܦܽܘܪܥܳܢܽܘܬܳܐ ܕܺܝܠܳܟ: ܘܰܟܦ̣ܶܢܘ ܘܰܨܗܺܝܘ ܘܶܐܬܛܰܪܰܦܘ: ܐܰܝܟܰܢܳܐ ܕܢܶܣܒܥܽܘܢ ܒܦܽܘ̈ܛܡܶܐ ܕܡܰܠܟܽܘܬܳܟ: ܘܰܡܪ̈ܰܚܡܳܢܶܐ ܐܶܬܚܙܺܝܘ: ܡܶܛܽܠ ܕܢܶܫܟܚܽܘܢ ܪ̈ܰܚܡܶܐ ܩܕܳܡܰܝܟ ܒܕܺܝܢܳܐ ܬܪܺܝܨܳܐ ܕܟܺܐܢܽܘܬܳܟ. ܟܦ̣ܰܪܘ ܗܳܪܟܳܐ ܒܟܽܠ ܡܶܕܶܡ ܐܰܝܟܰܢܳܐ ܕܠܳܟ ܠܗܰܠ ܢܶܩܢܽܘܢ ܚܠܳܦ ܟܽܠ ܡܶܕܶܡ: ܘܶܐܙܕܩܶܦܘ ܠܥܳܠܡܳܐ ܘܠܰܪ̈ܓܺܝܓܳܬܶܗ: ܐܰܝܟܰܢܳܐ ܕܰܠܘܳܬܳܟ ܕܠܐܴ ܥܽܘܘܳܟ ܢܶܪܗܛܽܘܢ ܘܒܳܟ ܢܕܽܘܨܽܘܢ. ܢܩܶܦܘ ܘܶܐܬܰܘ ܒܳܬܪܳܟ: ܘܰܣܢ̣ܰܘ ܠܥܳܠܡܳܐ ܘܰܠܟܽܠ ܕܒܶܗ ܘܠܳܟ ܪܚܶܡ̣ܘ ܘܰܐܚܶܒ̣ܘ: ܘܰܒܣ̣ܰܪܘ ܠܟܽܠ ܘܥܰܠ ܫܽܘܦܳܪ ܕܡܶܬܚܙܶܐ ܕܠܳܟ ܫܰܦܺܝܪ ܢܶܬܚܙܽܘܢ ܘܢܶܬܝܰܕܥܽܘܢ: ܫ̣ܳܛܘ ܠܰܪ̈ܓܺܝܓܳܬܳܐ ܕܒܶܣܪܳܐ ܘܰܕܪܽܘܚܳܐ: ܘܰܠܥܳܒܽܘܪ̈ܝܳܬܳܐ ܐܶܬܢܰܟܪܺܝܘ ܘܰܕܢܶܫܬܰܘܬܦܽܘܢ ܠܠܐܴ ܡܶܫܬܰܪ̈ܝܳܢܳܝܳܬܳܐ: ܐܰܗܡܺܝܘ ܒܗܳܠܶܝܢ ܕܡܶܬܚܰܙ̈ܝܳܢ ܕܢܺܐܪܬܽܘܢ ܠܗܳܠܶܝܢ ܕܠܐܴ ܡܶܬܚܰܙ̈ܝܳܢ ܢ̣ܓܰܕܘ ܥܰܡ̈ܡܶܐ ܠܣܶܓܕܬܳܟ: ܐܰܦܢܺܝܘ ܠܛܳܥܰܝ̈ܳܐ ܠܘܳܬܳܟ: ܐܰܗܦܶܟܘ ܐܰܒܺܝ̣̈ܕܶܐ ܠܕܶܚܠܬܳܟ: ܐܰܢܗܰܪܘ ܠܚܶܫܽܘ̈ܟܶܐ ܒܺܝܕܰܥܬܳܟ: ܟܰܢܶܫܘ ܢܽܘܟܪ̈ܳܝܶܐ ܠܰܛܝܳܪܳܟ: ܐܠܰܦܘ ܠܠܐܴ ܣܦܺܝܪ̈ܶܐ ܫܪܳܪܳܟ: ܬܰܠܡܶܕܘ ܠܟܽܠ ܥܰܡ̈ܡܺܝܢ ܠܰܣܒܰܪܬܳܟ: ܘܰܐܦܢܺܝܘ ܠܚܰܛܳܝ̈ܶܐ ܠܘܳܬܳܟ: ܚܰܟܶܡܘ ܘܰܐܠܶܦܘ ܠܥܰܘ̈ܳܠܐܷ ܩܪܰܘ ܘܒܰܝܬܺܝܘ ܘܰܩܢ̣ܰܘ ܠܩܰܪ̈ܺܝܒܶܐ ܠܺܝܕܰܥܬܳܟ: ܘܰܟܢܰܫܘ ܘܰܐܝܬܺܝܘ ܘܨܰܝܶܒܘ ܠܩܰܪ̈ܺܝܒܶܐ ܘܰܠܪ̈ܰܚܺܝܩܶܐ ܨܶܝܕ ܪܶܚܡܬܳܟ: ܨܳܕܘ ܠܟܽܠܗܽܘܢ ܠܐܴ ܡܟܰܒ̈ܫܶܐ: ܘܰܠܠܐܴ ܡܫܰܥ̈ܒܕܶܐ ܘܰܚܒܰܫܘ ܐܶܢܽܘܢ ܒܰܡܨܺܝܕܬܳܐ ܕܰܣܒܰܪܬܳܟ ܙܟܰܘ ܠܪܶܓܬܳܐ: ܟܰܒܶܫܘ ܠܚܶܡܬܳܐ ܦܰܓܶܕܘ ܠܡܶܠܬܳܐ: ܡܰܟܶܟܘ ܠܪܳܡܽܘܬܳܐ ܫܰܢܶܩܘ ܠܙܰܠܺܝܠܽܘܬܳܐ. ܘܬܽܘܒ ܐܶܬܕܰܟܪ ܠܐܱܝܠܶܝܢ ܕܶܐܬܥܰܢܘܺܝܘ ܒܡܰܟܺܝܟܽܘܬܳܐ ܘܰܪܚܶܡܘ ܢܺܝܚܽܘܬܳܐ ܘܠܰܡܪܰܚܡܳܢܽܘܬܳܐ: ܐܰܚܶܒܘ ܘܪܰܝܰܚܘ ܠܪܰܓܽܘܙܬܳܢܽܘܬܳܐ ܐܶܬܪܰܥܺܝܘ ܒܡܶܣܟܺܢܽܘܬܳܐ: ܐܶܬܝܰܬܰܪܘ ܘܶܐܨܛܒܺܝܘ ܒܕܽܘܒܳܪ̈ܶܐ ܕܰܡܣܰܪܩܽܘܬܳܐ: ܕܰܫܦ̣ܰܪܘ ܠܳܟ ܒܟܽܠ ܡܝܰܬܪ̈ܳܬܳܐ ܘܪܰܥܝܽܘܟ ܒܟܽܠܗܶܝܢ ܫܰܦܺܝܪ̈ܳܬܳܐ: ܥܺܕܬܳܐ ܕܶܝܢ ܡܟܺܝܪܬܳܟ ܟܰܕ ܠܕܽܘܟܪܳܢܳܐ ܕܺܝܠܗܽܘܢ ܡܙܰܝܚܳܐ: ܘܠܳܟ ܡܦܺܝܣܳܐ ܘܡܶܬܟܰܫܦܳܐ ܕܬܶܬܶܠ ܠܳܗ̇ ܒܝܰܕ ܨܠܰܘ̈ܳܬܗܽܘܢ ܫܰܝܢܳܐ ܠܐܴ ܕܠܺܝܚܳܐ: ܘܰܫܠܳܡܳܐ ܠܐܴ ܫܓܺܝܫܳܐ: ܘܙܰܒ̈ܢܶܐ ܡܫܰܝ̈ܢܶܐ ܘܡܰܠܝ̈ܰܝ ܛܳܒ̈ܳܬܳܐ: ܘܰܐܘܝܽܘܬܳܐ ܕܠܐܴ ܦܠܺܝܓܽܘܬܳܐ. ܘܰܬܩܰܒܶܠ ܡ̣ܶܢ ܝܰܠܕ̈ܶܝܗ̇ ܒܰܨܠܽܘܬ ܐܶܡܳܐ ܕܺܝܠܶܕܬܳܟ ܒܩܰܕܺܝܫܽܘܬܳܐ ܣܶܕ̈ܩܶܐ ܘܚܶܪ̈ܝܳܢܶܐ: ܘܥܳܩ̈ܳܬܳܐ ܘܡܰܪ̈ܕܘܳܬܳܐ: ܘܬܶܠܚܶܐ ܘܬܰܥܒܰܪ ܘܬܶܫܒܽܘܩ ܟܽܠܗܶܝܢ ܣܰܟܠܘ̈ܳܬܳܐ ܘܫܳܪ̈ܥܳܬܳܐ ܕܝܰܠܕܶܝ̈ܗ̇: ܐܰܝܠܶܝܢ ܕܰܒܨܶܒܝܳܢܳܐ ܘܰܕܠܐܴ ܒܨܶܒܝܳܢܳܐ: ܘܒܺܝܕܰܥܬܳܐ ܘܰܕܠܐܴ ܒܺܝܕܰܥܬܳܐ: ܘܰܐܢܺܝܚܘ ܐܶܢܽܘܢ ܒܰܐܘ̈ܘܳܢܶܐ ܕܢܽܘܗܪܳܐ: ܘܰܒܡܰܫ̈ܟܢܶܐ ܕܰܢܝܳܚܳܐ ܠܦܰܓܪ̈ܶܐ ܘܢܰܦ̈ܫܳܬܳܐ ܘܪ̈ܽܘܚܳܬܳܐ ܕܰܫܟܺܝ̣̈ܒܰܝ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܕܬܰܣܶܩܝ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܦܺܝܪܡܳܐ ܕܚܽܘܣܳܝܳܐ ܘܪܺܝܚܳܐ ܕܬܰܪܥܽܘܬܳܐ ܘܥܶܛܪܳܐ ܒܰܣܺܝܡܳܐ ܕܗܰܢܺܝܽܐܘܬܳܐ: ܣܰܘܩܳܐ ܡܶܬܝܰܕܥܳܢܳܐ ܕܦܳܚ ܪܺܝܚܶܗ ܒܬܺܐܒܶܝܠ: ܘܰܡܚ̣ܳܐ ܪܺܝܚ ܣܘܳܬ ܥܶܛܪܗ ܒܥܳܡܰܪܬܳܐ ܘܣܳܩܶܗ ܡܰܘܬܳܐ ܡܚܰܒܶܠ ܛܽܘ̈ܗܡܶܐ ܘܰܒܟܽܠ ܫܰܪ̈ܒܳܬܳܐ: ܘܡ̣ܶܢ ܪܺܝܚ ܥܶܛܪܶܗ ܐܶܬܚܢܶܩ ܘܡܺܝܬ ܘܦܳܚ̣ ܪܺܝܚܶܗ ܪܽܘܡܬܳܢܳܝܽܘܬܶܗ ܒܓܰܘ ܫܝܽܘܠ: ܘܒܰܣܶܡ ܐܶܢܽܘܢ ܠܰܫܟܺܝ̣̈ܒܰܝ ܕܰܚܺܝܚܳܐ: ܘܰܣܓܶܕܘ ܠܶܗ ܒܗܳܡܳܢ ܚܶܫܽܘܟܬܳܐ. ܐܰܢ̱ܬ ܡܳܪܝ ܩܰܒܶܠ ܠܦܺܝܪܡܳܐ ܗܳܢܳܐ ܕܶܐܬܩܰܪܰܒ ܠܳܟ ܡ̣ܶܢ ܐܺܝܕܰܝ̈ܢ ܚܰܠܳܫ̈ܳܬܳܐ ܘܰܛܦܺܝ̣̈ܠܳܬܳܐ: ܠܪܺܝܚ ܢܝܳܚܳܐ ܕܰܐܠܳܗܽܘܬܳܟ ܒܥܺܐܕܳܐ ܗܳܢܳܐ ܕܰܡܕܰܒܪܳܢܽܘܬܳܟ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܫܶܡܫܳܐ ܫܡܰܝܳܢܳܐ ܕܡ̣ܶܢ ܡܰܕܢܚܬܳܐ ܡܪܰܝܰܡܬܳܐ ܒܬܽܘܠܬܳܐ ܡܰܪܝܰܡ: ܕܢܰܚ̣ ܠܰܢ. ܘܰܠܥܳܠܡܳܐ ܟܽܠܶܗ ܒܙܰܠܺܝ̣̈ܩܰܘܗܝ ܐܠܰܗܳܝ̈ܶܐ ܐܰܢܗܰܪ. ܠܗ̇ܳܝ ܡܶܠܚܳܐ ܡܡܰܕܟܰܬ݀ ܦܰܟܺܝ̣̈ܗܶܐ: ܕܡܰܕܰܟ ܒܣܰܡܳܐ ܕܰܚܢܳܢܶܗ ܠܣܰܪܝܽܘܬܳܐ ܫܽܘܚܢܳܢܳܝܬܳܐ ܕܰܚܛܺܝܬܳܐ: ܕܰܐܩܢܰܬ݀ ܗܘܳܬ݀ ܒܗܰܕܳܡܰܝ̈ܢ: ܠܗ̇ܰܘ ܕܫܰܟܶܢ ܠܰܢ ܒܺܐܝܕܰܝ̈ܗܽܘܢ ܕܥܰܒ̣ܕ̈ܰܘܗܝ ܘܰܡܢܺܝ̣̈ܚܳܢܶܐ ܕܰܐܠܳܗܽܘܬܶܗ ܚܰܝܠܐܴ ܘܥܽܘܕܪܳܢܳܐ ܕܳܐܣܝܽܘܬܳܐ: ܘܟܽܠ ܚܶܫܽܘܫܽܘܬܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܒܗܳܢܳܐ ܥܶܕܳܢܳܐ܀

ܣܕܪܐ

ܪܳܥܝܳܐ ܕܚܰܝܠܰܘ̈ܳܬܳܐ ܫܡܰܝܳܢ̈ܶܐ ܕܰܫܒ̣ܰܩ ܒܰܡܪ̈ܰܘܡܶܐ ܥܳܢ̈ܳܐ ܛܰܥܝ̈ܳܬܳܐ: ܘܰܠܘܳܬ ܫܟܳܚܬܶܗ ܕܥܶܪܒܳܐ ܐܰܒܺܝܕܳܐ ܒܪܶܚܡܰܬ݀ ܐ̱ܢܳܫܽܘܬܶܗ ܐܶܬܳܐ. ܘܟܰܕ ܐܶܫܟܚܶܗ ܛܰܥܢܶܗ ܥܰܠ ܟܰܬܦ̈ܳܬܶܗ ܩܰܕܺܝ̈ܫܳܬܳܐ ܘܠܰܛܝܳܪܳܐ ܕܚܰܝ̈ܶܐ ܐܰܥܠܶܗ: ܘܰܩ̣ܪܳܐ ܠܚܰܝܠܰܘ̈ܳܬܳܐ ܫܡܰܝ̈ܳܢܶܐ ܘܰܕܪܳܚܡܺܝܢ ܠܶܗ: ܘܚܰܕܽܘܬܳܐ ܪܽܘܚܳܢܳܝܬܳܐ ܥܒ̣ܰܕ ܣܳܡ ܠܶܗ: ܨܒܺܝ ܒܰܢ ܡܳܪܝܳܐ ܪܳܚܶܡܢܳܫܳܐ: ܘܩܰܒܶܠ ܡ̣ܶܢ ܐܺܝܕܰܝ̈ܳܐ ܕܺܝܠܰܢ ܒܨܺܝܪ̈ܶܐ ܘܚܰܛܳܝ̈ܶܐ ܥܰܒ̣ܕܰܝ̈ܟ: ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܠܳܟ ܒܗܳܢܳܐ ܥܶܕܳܢܳܐ: ܘܟܽܠ ܚܛܳܗ̈ܶܐ ܡܳܪܝ ܘܣܰܟܠܘ̈ܳܬܳܐ ܕܰܣܥ̣ܰܪܢܰܢ ܐܰܝܟ ܠܒܺܝ̣̈ܫܰܝ ܒܶܣܪܳܐ: ܘܶܐܬܥܒ̣ܰܪܢܰܢ ܩܕܳܡܰܝܟ ܘܰܕܠܐܴܰ ܒܺܝܕܰܥܬܳܐ: ܫܒܽܘܩ ܡܳܪܝܳܐ ܚܰܣܳܐ ܘܰܠܚܺܝ ܐܠܰܗܳܐ ܘܰܐܥܒܰܪ ܫܦ̣ܰܪܘ ܠܳܟ ܐܰܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܺܝܫܰܝ ܐܰܒܳܗ̈ܳܬܳܐ: ܢܒܺܝ̈ܶܐ ܘܰܫܠܺܝ̈ܚܶܐ ܟܳܪ̈ܽܘܙܶܐ ܘܶܐܘܢܓܶܠܺܝ̈ܣܛܶܐ ܣܳܗ̈ܕܶܐ ܘܡܰܘ̈ܕܝܳܢܶܐ: ܥܰܡ ܕܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ ܘܰܕܟܽܠ ܓܰܒܪܳܐ ܟܺܐܢܳܐ ܘܙܰܕܺܝܩܳܐ ܕܰܒܗܰܝܡܳܢܽܘܬܳܐ ܕܰܫܪܳܪܳܐ ܐܶܫܬܰܡܠܺܝ: ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܘܰܒܬܰܟܫ̈ܦܳܬܗܽܘܢ ܫܰܟܶܢ ܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ. ܘܰܠܥܺܕܬܳܐ ܕܺܝܠܳܟ ܩܰܕܺܝܫܬܳܐ ܒܡܰܘ̈ܗܒܳܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܨܰܒܶܬ ܘܗܰܕܰܪ: ܘܨܽܘܒ ܒܳܗ̇ ܒܰܫܪܪܳܐ ܕܗܰܝܡܳܢܽܘܬܳܐ ܕܡܰܠܦܳܢ̈ܶܐ ܒܚܺܝܪ̈ܶܐ ܘܡܰܐܪ̈ܙܳܢܶܐ ܬܪ̈ܺܝܨܶܐ ܕܦܳܣܩܺܝܢ ܠܡܶܠܬܳܐ ܕܰܫܪܳܪܳܐ ܬܪܺܝܨܳܐܺܝܬ: ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܘܡܰܠܝ̈ܰܝ ܡ̣ܶܢ ܣܽܘ̈ܟܳܠܐܷ ܕܬܰܪܥܺܝܬܳܐ ܕܚܰܝ̈ܶܐ ܕܰܦܐܐܶܝܢ ܠܟܳܗܢܽܘܬܳܐ ܘܕܰܡܩܰܪܒܺܝܢ ܨܶܝܕ ܐ̱ܪ̈ܳܙܶܐ ܐܠܰܗܳܝ̈ܶܐ: ܠܡܰܠܟ̈ܶܐ ܘܕܰܝ̈ܳܢܶܐ ܘܪ̈ܺܝܫܳܢܶܐ ܕܺܐܝܬ ܒܥܳܠܡܳܐ ܗܳܢܳܐ ܗܰܒ ܕܢܶܬܪܰܟܢܽܘܢ ܠܘܳܬ ܢܳܛܽܘܪܽܘܬܳܐ ܕܦܽܘܩ̈ܕܳܢܶܐ ܩܰܕܺܝ̈ܫܶܐ: ܠܣܳܒ̈ܶܐ ܣܰܡܶܟ ܘܥܰܕܰܪ: ܒܚܰܝܠܐܴ ܕܡܶܢܳܟ ܠܰܥܠܰܝ̈ܡܶܐ ܚܰܝܠܬܳܢܽܘܬܳܐ ܘܓܰܢ̱ܒܳܪܽܘܬܳܐ ܕܠܽܘܩܒܰܠ ܚܰܫ̈ܶܐ ܫܟܺܝܪ̈ܶܐ ܫܰܟܶܢ ܘܰܪܟܺܝܢܽܘܬ ܨܰܘܪܳܐ ܕܬܰܪܥܺܝܬܳܐ. ܠܰܛܠܳܝ̈ܶܐ ܬܰܐܪܰܐ ܒܺܝܕܰܥܬܳܐ ܘܰܒܕܽܘܒܳܪ̈ܶܐ ܕܰܡܝܰܬܪܽܘܬܳܐ: ܠܝܰܬܡ̈ܶܐ ܘܠܐܱܪ̈ܡܠܳܬܳܐ ܩܽܘܡ ܘܥܰܕܰܪ ܒܚܰܘ̈ܣܳܢܰܝܟ ܣܰܓܺܝ̈ܶܐܐ ܠܰܛܠܺܝ̣̈ܡܶܐ ܘܠܰܥܠܺܝ̣̈ܒܶܐ: ܘܠܐܱܝܠܶܝܢ ܕܡܶܬܕܰܒܪܺܝܢ ܒܰܩܛܺܝܪܳܐ ܕܥܰܘܠܐܴ ܫܰܘܙܶܒ ܘܦܰܨܳܐ ܒܝܰܕ ܟܺܐܢܽܘܬܳܐ ܕܕܺܝܢܰܝ̈ܟ. ܠܰܟܪ̈ܺܝܗܶܐ ܘܠܐܱܠܺܝ̣̈ܨܶܐ ܘܠܐܱܝܠܶܝܢ ܕܡܶܬܢܰܣܶܝܢ ܡ̣ܶܢ ܪ̈ܽܘܚܶܐ ܒܺܝ̈ܫܳܬܳܐ: ܚܽܘܪܳܪܳܐ ܫܰܟܶܢ ܘܰܓܗܳܝܬܳܐ ܕܡ̣ܶܢ ܟܽܘܪ̈ܗܳܢܰܝܗܽܘܢ. ܠܐܱܣܺܝܪ̈ܶܐ ܫܪܺܝ ܡܳܪܝܳܐ ܒܪ̈ܰܚܡܶܐ ܕܺܝܠܳܟ: ܠܛܳܥܰܝ̈ܳܐ ܩܪܺܝ ܘܰܐܗܦܶܟ ܠܘܳܬܳܟ: ܘܠܐܱܝܠܶܝܢ ܕܰܫ̣ܪܰܥܘ ܘܰܢܦ̣ܰܠܘ ܒܦܰܚ̈ܶܐ ܕܰܚܛܺܝܬܳܐ ܕܰܠܐܴ ܐܶܢܽܘܢ ܘܰܐܣܶܩ ܒܣܽܘܓܳܐܐ ܪܰܒܳܐ ܕܰܡܪܰܚܡܳܢܽܘܬܳܟ ܠܕܰܝܪ̈ܳܝܶܐ ܘܺܝܚܺܝܕܳܝ̈ܶܐ ܘܰܒܬܽܘ̈ܠܐܷ ܘܰܒܬܽܘ̈ܠܳܬܳܐ ܕܢܺܝܪܳܐ ܕܰܨܠܺܝܒܳܐ ܕܺܝܠܳܟ ܛܥܺܝܢܺܝܢ: ܗܰܒ ܡܚܰܡܣܢܳܢܽܘܬܳܐ ܘܰܠܒܺܝܒܽܘܬܳܐ ܗ̇ܳܝ ܕܰܥܕܰܡܳܐ ܠܰܥܕܰܡܳܐ. ܠܰܟܠܺܝܠܐܴ ܕܫܰܢ̱ܬܳܐ ܒܰܪܶܟ ܒܛܰܝܒܽܘܬܳܟ: ܘܰܫܦܺܝܥܽܘܬ ܦܺܐܪ̈ܶܐ ܫܰܪܬܰܚ ܒܒܰܣܺܝܡܽܘܬܳܟ: ܘܶܐܬܪܰܚܰܡ ܡܳܪܝܳܐ ܥܰܠ ܒܳܝ̈ܫܶܐ ܘܡܶܣ̈ܟܺܢܶܐ ܕܥܰܡܳܟ. ܘܥܰܠ ܟܽܠ ܩܰܘ̈ܡܳܢ ܘܡܽܘ̈ܫܚܳܢ ܚܽܘܣ ܘܪܰܚܶܡ: ܘܰܠܟܽܠ ܩܪܺܝ ܘܰܐܝܬܺܝ ܠܐܘܪܚܳܐ ܕܚܰܝ̈ܶܐ ܘܰܕܦܽܘܩ̈ܕܳܢܶܐ ܩܰܕܺܝ̈ܫܶܐ ܘܡܰܥܒ̈ܕܰܝ ܚܰܝ̈ܶܐ: ܘܰܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܢܺܝܚ ܐܶܢܽܘܢ ܒܰܐܘ̈ܘܳܢܶܐ ܕܺܝܠܳܟ ܫܡܰܝ̈ܳܢܶܐ: ܡܶܛܽܠ ܕܡܳܪܳܐ ܘܥܳܒܽܘܕܳܐ ܕܟܽܠܳܗ̇ ܒܪܺܝܬܳܐ ܐܺܝܬܰܝܟ: ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀

ܫܠܡ

 

ܛܟܣܐ ܕܚܕ ܒܫܒܐ ܫܒܝܥܝܐ ܕܓܘܢܝ̈ܐ

ܩܕܡܝܬ ܨܠܘܬܐ ܕܫܘܪܝܐ

 

ܐܰܫܪܳܐ ܡܳܪܝ ܒܰܐܬܪܳܐ ܛܽܘܒܬܳܢܳܐ ܘܟܳܗܢܳܝܳܐ ܠܰܡܟܰܗ̈ܢܳܢܶܐ ܕܐ̱ܪ̈ܳܙܰܝܟ ܐܠܰܗܳܝ̈ܶܐ: ܕܰܦ̣ܛܰܪܘ ܡ̣ܶܢ ܒܰܢܳܝܬܰܢ ܒܪܶܡܙܳܐ ܪܰܒܳܐ ܕܦܽܘܩ̈ܕܳܢܰܝܟ: ܕܒܺܐܝ̈ܕܰܝܟ ܐܺܝܬܰܝܗܶܝܢ ܢܰܦ̈ܫܳܬܳܐ ܕܙܰܕܺܝ̈ܩܶܐ: ܘܪ̈ܽܘܚܳܬܳܐ ܕܩܰܕܺܝ̈ܫܶܐ: ܐܰܢ̱ܬ ܗ̣ܽܘ ܕܰܡܫܰܘܙܶܒ ܡ̣ܶܢ ܡܰܘܬܳܐ ܬܶܢܝܳܢܳܐ ܘܡ̣ܶܢ ܛܪܽܘܢܽܘܬܶܗ ܕܒܺܝܫܳܐ ܒܥܶܠܕܒܳܒܳܐ: ܘܠܳܟ ܦܰܐܝܳܐ ܬܶܫܒܽܘܚܬܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܪܡܫܐ

 

ܬܶܫܒܽܘܚܬܳܐ: ܠܐܴ ܡܶܬܦܰܣܩܳܢܺܝܬܳܐ ܘܪܽܘܡܪ̈ܳܡܶܐ ܠܐܴ ܡܶܫܬܰܬܩ̈ܳܢܶܐ: ܠܗ̇ܰܘ ܠܪܺܝܫܳܐ ܕܚܰܝ̈ܶܐ ܠܐܴ ܡܳܝܽܘ̈ܬܶܐ: ܘܰܡܫܰܟܢܳܢܳܐ ܕܠܐܴ ܡܶܬܚܰܒܠܳܢܽܘܬܳܐ: ܗ̇ܰܘ ܕܰܒܫܽܘܠܛܳܢܳܐ ܘܽܐܘܚܕܳܢܳܐ ܕܪܰܒܽܘܬܶܗ ܥܰܠ ܟܽܠ ܡܰܡܠܶܟ ܘܰܠܦܽܘܩܕܳܢܳܐ ܕܡܳܪܽܘܬܶܗ ܐܠܰܗܳܝܬܳܐ ܟܽܠ ܡܶܫܬܡܰܥ: ܘܠܰܗܘܳܝܳܐ ܡܶܬܬܰܝܬܶܐ. ܗ̇ܰܘ ܕܰܒܚܰܝܠܐܴ ܬܰܩܺܝܦܳܐ ܕܓܰܢ̱ܒܳܪܽܘܬܶܗ ܠܰܫܝܽܘܠ ܘܰܠܡܰܘܬܳܐ ܡܙܺܝܥ ܘܡܰܪܥܶܠ: ܘܡܺܝ̈ܬܶܐ ܕܠܐܴ ܚܒܳܠܐܴ ܒܩܳܠܶܗ ܥܰܙܺܝܙܳܐ ܡܢܰܚܶܡ: ܘܣܰܒܪܳܐ ܕܚܰܝ̈ܶܐ ܠܐܴ ܡܳܝܽܘ̈ܬܶܐ ܠܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܡܫܰܟܶܢ: ܘܣܽܘܟܳܝܳܐ ܕܦܽܘܪܥܳܢ ܥܰܡ̈ܠܐܷ ܛܳܒ̈ܶܐ ܠܟܰܫܺܝܪ̈ܶܐ ܝܳܗ̇ܶܒ: ܕܠܶܗ ܝ̇ܳܐܶܐ ܫܽܘܒܚܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܪܺܝܫ ܐܠܰܗܽܘܬܳܐ ܕܰܐܝܠܶܝܢ ܕܡܶܬܰܐܠܗܺܝ̈ܢ ܘܡܰܐܠܗܳܢܳܐ ܘܰܡܩܰܕܫܳܢܳܐ ܕܗ̇ܳܢܽܘܢ ܕܰܓܡܺܝܪܳܐܺܝܬ ܡܟܰܗܢܺܝܢ: ܗ̇ܰܘ ܕܰܒܚܰܝ̈ܶܐ ܕܰܬܢܳܢ ܘܕܰܠܥܳܠܡܺܝܢ ܠܗ̇ܳܢܽܘܢ ܕܰܐܠܳܗܳܐܺܝܬ ܫܰܦܺܝܪ ܟܰܗܢܽܘܟ ܟܳܗܢܳܐܺܝܬ ܡܟܰܗܶܢ ܐܰܢ̱ܬ. ܐܰܟܡ̇ܰܢ ܕܡܰܒܽܘܥܳܐ ܕܚܰܝ̈ܶܐ ܐܺܝܬܰܝܟ ܘܝܳܗܽܘܒܳܐ ܕܡܰܘ̈ܗܒܳܬܳܐ ܕܛܽܘܒ̈ܬܳܢܳܝܳܬܳܐ: ܠܳܟ ܗܳܟܺܝܠ ܘܰܩܕܳܡܰܝܟ ܡܶܬܚܰܢܢܺܝܢܰܢ ܒܥܶܕܳܢܳܐ ܗܳܢܳܐ ܕܰܡܟܰܗ̈ܢܳܢܶܐ ܕܐ̱ܪ̈ܳܙܶܐ ܕܺܝܠܳܟ ܐܠܰܗܳܝ̈ܶܐ: ܗ̇ܳܢܽܘܢ ܕܒܰܬܚܽܘܡܳܐ ܕܚܰܝ̈ܶܐ ܗܳܠܶܝܢ ܡ̣ܶܢ ܬܶܫܡܶܫܬܳܐ ܕܰܬܢܳܢ ܥܒ̣ܰܪܘ ܘܫܰܢܺܝܘ ܐܰܝܟ ܕܰܦܐܶܐ ܠܗ̇ܳܢܽܘܢ ܕܝܰܩܺܝܪ ܗ̣ܽܘ ܒܥܰܝ̈ܢܰܝܟ ܡܰܘܬܳܐ ܕܺܝܠܗܽܘܢ ܬܩܰܒܶܠ ܐܶܢܽܘܢ: ܘܰܒܓܽܘ̈ܕܶܐ ܚܰܣ̈ܝܳܬܳܐ ܕܡܰܠܐܱܟ̈ܶܐ ܕܺܝܠܳܟ ܩܰܕܺܝ̈ܫܶܐ ܠܢܰܦ̈ܫܳܬܳܐ ܕܺܝܠܗܽܘܢ ܣܰܝܰܥ ܘܠܐܴ ܡܶܬܬܰܚ̈ܕܳܢܶܐ ܚܰܘܳܐ ܐܶܢܽܘܢ ܠܚܰܝܠܰܘ̈ܳܬܳܐ ܣܰܩܽܘܒܠܳܝ̈ܶܐ ܕܓܶܢܣܰܢ. ܨܒܺܝ ܗܳܟܺܝܠ ܐܳܘ ܡܳܪܝܳܐ ܘܰܐܝܟ ܕܝܰܩ̣ܰܪܬ ܐܶܢܽܘܢ ܒܚܰܝ̈ܶܐ ܕܰܬܢܳܢ: ܕܒܺܐܝܩܳܪܳܐ ܕܝܰܬܺܝܪ ܥܦܺܝܦ: ܐܳܦ ܗܳܫܳܐ ܢܶܬܚܙܽܘܢ. ܟܰܕ ܡܶܛܽܠ ܬܶܫܡܫܬܳܐ ܕܟܳܗܢܽܘܬܳܐ ܒܶܐܣܛܠܐܴ ܗ̇ܳܝ ܕܡܶܬܥܰܛܦܺܝܢ ܚܣܰܝ̈ܳܐ ܕܡ̣ܶܢ ܥܳܠܡܺܝܢ ܢܶܨܛܰܒܬܽܘܢ: ܟܰܕ ܕܶܝܢ ܐܶܡܰܬܝ ܕܳܐܬܶܐ ܐܰܢ̱ܬ ܠܦܽܘܪܥܳܢܽܘܬܳܐ ܕܥܰܡ̈ܠܐܷ ܗܰܒ ܘܫܰܟܶܢ ܠܗܽܘܢ ܘܠܰܢ ܦܽܘܪܥܳܢܽܘܬܳܐ: ܡ̣ܶܢ ܒܶܗܬܬܳܐ ܗ̇ܳܝ ܕܝܳܪܬܺܝܢ ܚܬܺܝܪ̈ܶܐ ܡܶܫܬܰܘܙܒܺܝܢ ܐܶܠܐܴ ܒܰܡ̈ܛܰܠܠܐܷ ܕܦܶܛܪܽܘܣ ܘܦܰܘܠܳܘܣ ܗ̇ܳܢܽܘܢ ܕܚܰܣܝܳܐܺܝܬ ܫܰܡܫܽܘܟ ܘܟܰܗܢܽܘܟ ܡܰܠܐܱܟܳܐܺܝܬ ܦܩܽܘܕ ܡܶܣܬܰܬܪܺܝܢ ܘܥܰܡ ܟܽܠܗܽܘܢ ܒܢܰܝ̈ܳܐ ܕܢܽܘܗܪܳܐ ܕܰܥܒ̣ܰܕܘ ܨܶܒܝܳܢܳܟ ܒܥܺܕܬܳܐ ܕܒܽܘܟܪ̈ܶܐ ܫܡܰܝ̈ܳܢܶܐ ܩܕܳܡܰܝܟ ܢܶܬܚܙܽܘܢ: ܘܟܰܕ ܡ̣ܶܢ ܬܰܫܢܺܝ̈ܩܶܐ ܕܓܺܗܰܢܳܐ ܡܶܬܚܰܪܪܺܝܢ: ܡܶܛܽܠ ܛܰܝܒܽܘܬܳܐ ܘܬܶܫܡܫܬܳܐ ܕܐ̱ܪ̈ܳܙܶܐ ܕܺܝܠܳܟ ܩܰܕܺܝ̈ܫܶܐ ܗ̇ܳܢܽܘܢ ܕܟܰܗܶܢܘ ܒܪܽܘܚܳܢܽܘܬܳܐ ܘܬܶܐܘܳܪܺܝܰܐ ܗ̇ܳܝ ܕܰܒܗܽܘܢ ܒܐܪ̈ܳܙܶܐ ܚܡܺܝ̣̈ܠܐܷ ܠܡܶܬܟܰܗܳܢܽܘ ܢܶܫܬܘܽܘܢ. ܘܟܰܕ ܥܰܡ ܢܒܺܝ̈ܶܐ ܕܳܝܨܺܝܢ ܘܰܒܚ̈ܰܓܶܐ ܪ̈ܽܘܚܳܢܳܝܶܐ ܪܳܦܣܺܝܢ: ܘܥܰܡ ܫܠܺܝ̈ܚܶܐ ܡܫܰܒܚܺܝܢ ܘܥܰܡ ܟܳܗ̈ܢܶܐ ܚܣܰܝ̈ܳܐ ܘܩܰܕܺܝ̈ܫܶܐ ܚܰܣܝܳܐܺܝܬ ܠܳܟ ܡܒܰܪܟܺܝܢ: ܘܥܰܡ ܣܳܗ̈ܕܶܐ ܘܡܰܘ̈ܕܝܳܢܶܐ ܒܰܚܙܳܬܳܐ ܐܠܰܗܳܝܬܳܐ ܡܶܬܓܰܘܶܝܢ ܘܡܶܫܬܰܪܬܚܺܝܢ ܘܥܰܡܗܽܘܢ ܕܡܰܐܪ̈ܙܳܢܶܐ ܬܪ̈ܺܝܨܰܝ ܫܽܘܒܚܳܐ ܒܡܰܠܟܽܘܬܳܐ ܠܐܴ ܡܳܝܽܘܬܳܐܺܝܬ ܕܶܝܢ ܢܶܬܒܰܣܡܽܘܢ ܒܒܳܥ̈ܘܳܬܳܐ ܘܰܨܠܰܘ̈ܳܬܳܐ ܘܡܶܬܟܰܫܦܳܢܽܘܬܳܐ ܕܰܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ ܐܠܰܗܳܐ ܡܰܪܝܰܡ ܐܶܡܳܐ ܕܺܝܠܶܕܬܳܟ ܒܰܒܬܽܘܠܽܘܬܳܗ̇: ܘܰܐܫܘܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܒܰܥܡܳܕܳܐ ܠܰܒܫܽܘܟ ܠܚܰܝ̈ܶܐ ܡܬܽܘ̈ܡܳܝܶܐ: ܘܰܠܒܽܘܣܳܡܳܐ ܕܥܰܡ ܐܰܒܪܳܗܳܡ. ܘܺܐܝܣܚܳܩ ܘܝܰܥܩܽܘܒ. ܘܟܽܠܰܢ ܢܶܫܬܘܶܐ ܠܚܰܪܬܳܐ ܛܳܒܬܳܐ ܕܰܡܠܺܝܟܳܐ ܠܳܟ: ܘܠܰܓܒܰܝ̈ܳܐ ܕܺܝܠܳܟ: ܘܬܶܫܒܽܘܚܬܳܐ ܠܐܴ ܡܶܫܬܰܠܡܳܢܺܝܬܳܐ ܠܳܟ ܡܩܰܪܒܺܝܢܰܢ ܪܺܝܫ ܟܽܘܡܪ̈ܶܐ ܕܬܰܘܕܺܝܬܰܢ ܝܶܫܽܘܥ ܡܫܺܝܚܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܥܛܪܐ

ܠܥܰܒ̣ܕܰܝ̈ܟ ܡܳܪܝܳܐ ܘܰܡܫܰܡ̈ܫܳܢܶܐ ܕܰܐܠܳܗܽܘܬܳܟ: ܘܡܰܐܪ̈ܙܳܢܶܐ ܬܪ̈ܺܝܨܰܝ ܫܽܘܒܚܳܐ ܕܟܺܐܢܽܘܬܳܟ ܟܰܕ ܕܶܝܢ ܚܠܳܦܰܝܗܽܘܢ ܕܶܝܢ ܡܩܰܪܒܺܝܢܰܢ ܠܳܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ: ܦܪܽܘܥ ܐܶܢܽܘܢ ܠܐܱܚܰܝ̈ܢ ܪ̈ܽܘܚܳܢܳܝܶܐ ܕܰܒܕܽܘܒܳܪ̈ܶܐ ܟܳܗܢܳܝ̈ܶܐ ܐܶܫܬܪܺܝܘ ܡ̣ܶܢ ܗܳܠܶܝܢ: ܐܰܝܟܰܢܳܐ ܕܣܰܟܠܘ̈ܳܬܗܽܘܢ ܢܶܬܠܰܚ̈ܝܳܢ: ܘܚܰܘ̈ܒܶܐ ܕܺܝܠܗܽܘܢ ܢܶܬܚܰܣܽܘܢ: ܘܡܶܬܥܰܒܪ̈ܳܢܘܳܬܗܽܘܢ ܢܶܫܬܰܒ̈ܩܳܢ: ܘܥܰܡ ܕܰܫܦ̣ܰܪܘ ܠܳܟ: ܘܡܰܐܪ̈ܙܳܢܶܐ ܗ̇ܳܢܽܘܢ ܕܰܥܒ̣ܰܕܘ ܨܶܒܝܳܢܳܟ: ܢܟܰܗܢܽܘܢ ܫܽܘܒܚܳܐ ܘܰܢܕܰܒܚܽܘܢ ܬܰܘܕܺܝܬܳܐ ܠܳܟ ܡܳܪܝ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

 

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܪܺܝܫ ܟܽܘܡܪ̈ܶܐ ܝܶܫܽܘܥ ܡܫܺܝܚܳܐ ܕܶܒܚܳܐ ܕܬܰܘܕܺܝܬܳܐ: ܕܰܠܟܳܗ̈ܢܶܐ ܫܰܪܺܝܪ̈ܶܐ ܘܡܰܐܪ̈ܙܳܢܶܐ ܕܰܥܒ̣ܰܕܘ ܨܶܒܝܳܢܶܗ: ܠܗ̇ܰܘ ܡܳܪܳܐ ܛܳܒܳܐ ܘܰܐܠܳܗܳܐ ܡܪܰܚܡܳܢܳܐ ܕܶܐܫܬܰܘܕܺܝ ܠܗܽܘܢ ܠܥܳܒ̇ܕ̈ܰܝ ܨܶܒܝܳܢܶܗ ܡܰܠܟܽܘܬܳܐ ܫܡܰܝܳܢܺܝܬܳܐ ܘܒܽܘܣܳܡܳܐ ܠܐܴ ܡܶܫܬܰܪܝܳܢܳܐ ܕܥܰܡܶܗ. ܘܡܶܬܓܰܘܝܳܢܽܘܬܳܐ ܒܰܚܙܳܬܳܐ ܕܫܽܘܒܚܳܐ: ܘܡܶܬܝܰܩܢܳܢܽܘܬܳܐ ܕܡܶܢ ܙܺܝܘܶܗ: ܘܡܶܬܚܰܕܝܳܢܽܘܬܳܐ ܣܰܓܺܝܽܐܘܬܳܐ ܕܦܰܪܨܽܘܦܶܗ. ܐܰܫܘܳܐ ܡܳܪܝ ܒܛܰܝܒܽܘܬܳܟ ܠܥܰܒ̣ܕܰܝ̈ܟ ܟܳܗ̈ܢܶܐ ܘܰܡܫܰܡ̈ܫܳܢܶܐ ܐܰܚܰܝ̈ܢ ܕܰܦ̣ܪܰܫܘ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ ܥܰܠ ܣܰܒܪܳܟ ܫܟ̣ܶܒܘ: ܕܠܳܟ ܝ̇ܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܕܺܝܠܰܢ ܗ̇ܰܘ ܫܶܡܫܳܐ ܪܰܒܳܐ ܘܕܶܢܚܳܐ ܕܙܰܕܺܝܩܽܘܬܳܐ: ܘܨܶܡܚܳܐ ܕܡ̣ܶܢ ܐܰܒܳܐ: ܘܡܰܢܗܪܳܢܳܐ ܕܰܐܝܠܶܝܢ ܕܰܒܚܶܫܽܘܟܳܐ ܕܛܽܘ̈ܥܝܰܝ ܝܳܬܒܺܝܢ ܗ̣ܘܰܘ: ܗ̇ܰܘ ܕܰܒܡܽܘܟܳܟܶܗ ܡܥܰܠܝܳܐ ܛܽܘܦܣܳܐ ܢܰܗܺܝܪܳܐ ܘܪܳܡܳܐ: ܚܰܘܺܝ ܘܰܐܠܶܦ ܠܰܢ: ܟܰܕ ܡܰܙܥܶܩ ܕܺܐܝܬܰܝܢ ܐܰܚ̈ܶܐ ܘܝܳܪ̈ܬܶܐ ܘܰܒܢܰܝ̈ܳܐ ܕܺܝܠܶܗ ܕܗ̇ܰܘ ܫܡܰܝܳܢܳܐ. ܟܰܕ ܐܳܡ̇ܰܪ ܒܡܶܠܰܘ̈ܗܝ ܚܰܝ̈ܳܬܳܐ ܘܩܰܕܺܝ̈ܫܳܬܳܐ: ܕܶܐܢܳܐ ܠܰܘ ܕܶܐܫܬܰܡܰܫ ܐܶܬܺܝܬ. ܐܶܠܐܴ ܕܶܐܫܰܡܶܫ ܘܰܐܚܰܘܶܐ ܡܰܟܺܝܟܽܘܬܳܐ ܠܰܓܙܳܪܳܐ ܕܥܶܪ̈ܒܶܐ ܪ̈ܽܘܚܳܢܳܝܶܐ ܗ̇ܳܢܽܘܢ ܕܒܺܐܝܕܶܗ ܕܰܐܒܳܐ ܕܺܝܠܝ ܗ̇ܰܘ ܡܫܰܒܚܳܐ ܩܳܝܡܺܝܢ: ܘܰܕܢܶܗܘܽܘܢ ܡܫܰܡ̈ܫܳܢܶܐ ܕܐ̱ܪ̈ܳܙܶܐ ܕܥܺܕܬܳܐ ܕܗ̇ܳܝ ܕܒܰܕܡܳܐ ܕܺܝܠܝ ܦܪܰܩܬܳܗ̇: ܘܨܰܒܶܬܬܳܗ̇ ܒܪ̈ܺܝܫܰܝ ܟܳܗ̈ܢܶܐ ܚܣܰܝ̈ܳܐ: ܘܟܳܗ̈ܢܶܐ ܙܗܰܝ̈ܳܐ: ܘܰܡܫܰܡ̈ܫܳܢܶܐ ܕܟܰܝ̈ܳܐ: ܘܰܕܢܶܗܘܽܘܢ ܥܺܝܪ̈ܶܐ ܘܰܚܦܺܝ̣̈ܛܶܐ ܘܢܳܛܽܘܪ̈ܶܐ ܘܰܡܕܰܟܝ̈ܳܢܶܐ ܠܥܰܡܳܐ ܩܰܕܺܝܫܳܐ ܕܰܐܒܳܐ ܕܺܝܠܝ: ܘܡ̣ܶܢ ܫܽܘܥܒܳܕܶܗ ܕܣܳܛܳܢܳܐ ܘܰܕܡܰܘܬܳܐ ܛܪܽܘܢܳܐ ܢܶܬܚܰܪܪܽܘܢ: ܘܟܰܕ ܠܬܶܫܡܫܬܳܐ ܐܠܰܗܳܝܬܳܐ ܘܩܰܕܺܝܫܬܳܐ ܓܒ̣ܰܝܬ ܘܚܰܘܺܝܬ ܐܶܢܽܘܢ: ܘܰܐܩܺܝܡܬ ܐܶܢܽܘܢ ܥܰܠ ܕܽܘܡ̈ܣܶܐ ܠܐܴ ܡܶܙܕܰܥܙ̈ܥܳܢܶܐ: ܘܛܰܟ̣ܶܣܬ ܐܶܢܽܘܢ ܬܶܫܥܳܐ ܛܶܟ̈ܣܶܐ ܐܰܪ̈ܥܳܢܳܝܶܐ ܒܰܕܡܽܘܬܳܐ ܕܗ̣ܶܢܽܘܢ ܕܰܫܡܰܝ̈ܳܢܶܐ: ܐܰܝܟܰܢܳܐ ܕܟܰܕ ܢܶܗܘܽܘܢ ܥܺܝܪܺܝܢ ܥܰܠ ܬܶܫܡܶܫܬܳܟ ܠܰܝ̈ܠܰܝ ܐܺܝܡܳܡ: ܘܰܡܫܰܡܠܶܝܢ ܦܽܘܩ̈ܕܳܢܰܝܟ ܩܰܕܺܝ̈ܫܶܐ ܘܢܳܛܪܺܝܢ ܢܳܡܽܘ̈ܣܰܝܟ ܐܠܰܗܳܝ̈ܶܐ: ܘܥܰܠ ܡܰܪ̈ܓܶܐ ܕܥܽܘܫܢܳܐ ܘܡܰܝ̈ܳܐ ܗܰܢܺܝ̈ܶܐܐ ܠܰܓܙܳܪܳܐ ܕܺܝܠܳܟ ܕܠܐܴ ܡܰܪܫܽܘ ܪܶܥܝܳܢ ܘܰܡܗܰܕܶܝܢ: ܐܰܝܟܰܢܳܐ ܕܰܒܝܽܘܡ ܡܶܐܬܺܝܬܳܟ ܕܬܰܪܬܶܝܢ: ܟܰܟܪ̈ܶܐ ܗ̇ܳܢܽܘܢ ܕܠܐܴ ܚܰܣܺܝܪ̈ܳܬܳܐ ܢܶܓܥܠܽܘܢ ܠܳܟ ܦܪܽܘܥ ܐܶܢܽܘܢ ܓܰܢܬܳܐ ܕܒܽܘ̈ܣܳܡܶܐ: ܢܝܳܚܬܳܐ ܠܐܴ ܡܶܫܬܰܪܝܳܢܺܝܬܳܐ: ܡܰܠܟܽܘܬܳܐ ܦܳܛܽܘܪܬܳܐ ܓܢܽܘܢܳܐ ܫܡܰܝܳܢܳܐ ܘܰܪܘܳܙܳܐ ܠܐܴ ܥܳܒܽܘܪܳܐ ܘܡܶܬܟܰܫܦܺܝܢܰܢ ܠܳܟ ܚܢܰܢ ܒܨܺܝܪ̈ܶܐ ܥܰܒ̣ܕ̈ܶܐ ܕܺܝܠܳܟ ܠܦܶܣܳܐ ܕܬܶܫܡܫܬܳܐ ܕܟܳܗܢܽܘܬܳܐ ܐܶܬܗܰܝܡܶܢܢܰܢ ܟܰܕ ܠܐܴ ܫ̇ܳܘܶܝܢܰܢ: ܕܬܶܫܡܰܥ ܡܶܢܰܢ ܠܩ̈ܳܠܐܷ ܡܰܠܝ̈ܰܝ ܚܶܢ̈ܓܳܬܳܐ ܕܩܳܪܶܝܢܰܢ ܠܳܟ ܚܠܳܦ ܟܽܠܳܗ̇ ܐܽܘܡܬܳܐ ܘܝܳܪܬܽܘܬܳܐ ܕܺܝܠܳܟ: ܐܰܝܟܰܢܳܐ ܕܒܰܨܠܰܘ̈ܳܬܳܐ ܕܓܽܘܕܳܐ ܕܰܢܒܺܝ̈ܶܐ ܘܰܕܣܺܝܣܰܪܬܳܐ ܕܰܫܠܺܝ̈ܚܶܐ ܘܣܺܝ̣̈ܥܳܬܳܐ ܕܣܳܗ̈ܕܶܐ ܘܡܰܘ̈ܕܝܳܢܶܐ: ܥܰܡ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ: ܫܽܘܠܳܡܳܐ ܡܫܰܝܢܳܐ ܕܫ̇ܳܦܰܪ ܠܳܟ ܫܰܟܶܢ ܠܰܢ. ܘܡܰܦܩܳܢܳܐ ܕܰܪܚܺܝܡ ܠܳܟ ܘܚܰܪܬܳܐ ܛܳܒܬܳܐ ܕܰܡܠܺܝܟܳܐ ܡܶܢܳܟ ܠܥܳܒ̇ܕ̈ܰܝ ܨܶܒܝܳܢܳܟ. ܟܰܕ ܡܫܰܟܶܢ ܐܰܢ̱ܬ ܠܚܰܛܳܝ̈ܶܐ ܚܽܘܣܳܝܳܐ ܠܬܰܝ̈ܳܒܶܐ ܫܽܘܒܩܳܢܳܐ: ܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܥܢ̣ܰܕܘ ܒܰܬܪܺܝܨܽܘܬ ܫܽܘܒܚܳܐ: ܡܶܬܕܰܟܪܳܢܽܘܬܳܐ ܛܳܒܬܳܐ ܘܰܢܝܳܚܬܳܐ ܠܐܴ ܡܶܫܬܰܪܝܳܢܺܝܬܳܐ: ܘܟܽܠܰܢ ܓܰܘܳܢܳܐܺܝܬ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

 

ܬܶܫܒܽܘܚܬܳܐ: ܠܗ̇ܰܘ ܛܳܒܳܐ ܘܰܐܚܺܝܕ ܟܽܠ ܕܰܒܩܳܠܶܗ ܡܺܝ̈ܬܶܐ ܡܶܬܢܰܚܡܺܝܢ: ܘܰܒܦܽܘܩܕܳܢܶܗ ܦܰܓܪ̈ܶܐ ܕܥܰܢܺܝ̈ܕܶܐ ܡܶܬܪܰܟܒܺܝܢ ܘܡ̣ܶܢ ܥܰܦܪܳܐ ܘܕܰܚܺܝܚܳܐ ܕܰܒܓܰܘ ܫܝܽܘܠ ܡܶܬܢܰܦܨܺܝܢ: ܘܰܒܪܶܡܙܶܗ ܐܶܣܛܰܠ ܫܽܘܒܚܳܐ ܡܶܬܥܰܛܦܺܝܢ. ܘܒܰܥ̈ܢܳܢܶܐ ܩܰܠܺܝ̣̈ܠܳܬܳܐ ܘܒܰܪܦܳܦ ܥܰܝܢܳܐ ܟܽܠܗܽܘܢ ܫܰܘܝܳܐܺܝܬ ܩܕܳܡܰܘܗܝ ܩܳܝܡܺܝܢ: ܘܥܳܒ̇ܕ̈ܰܝ ܨܶܒܝܳܢܶܗ ܒܦܳܪܚܳܐ ܩܰܠܺܝ̣̈ܠܐܷ ܠܐܘܪܥܶܗ ܡܰܫܩܠܺܝܢ: ܘܩܳܠܰܝ̈ ܫܽܘܒܚܳܐ ܕܠܐܴ ܫܶܠܝܳܐ ܠܶܗ ܡܰܣܩܺܝܢ: ܘܰܕܒܺܐܝ̈ܕܰܘܗܝ ܐܶܢܶܝܢ ܢܰܦ̈ܫܳܬܳܐ ܠܶܗ ܡܰܙܥܩܺܝܢ ܒܗܳܢܳܐ܀

 

ܣܕܪܐ

ܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ: ܕܠܐܴ ܬܶܫܕܶܐ ܠܥܰܒ̈ܕܰܝܟ ܡܟܰܗ̈ܢܳܢܶܐ ܕܺܝܠܳܟ ܘܥܳܒ̇ܕ̈ܰܝ ܨܶܒܝܳܢܳܟ ܡ̣ܶܢ ܚܰܓܳܐ ܦܰܐܝܳܐ ܕܰܓܢܽܘܢܳܟ. ܘܒܰܦܣܳܩ ܣܰܒܪܳܐ ܠܐܱܬܪܳܐ ܕܚܶܫܽܘܟܳܐ ܘܰܕܕܽܘܘܳܢܳܐ ܢܶܫܬܰܠܡܽܘܢ: ܠܐܴ ܢܶܬܦܰܪܫܽܘܢ ܡ̣ܶܢ ܩܕܳܡܰܝܟ: ܘܠܐܴ ܛܪ̈ܺܝܕܶܐ ܢܶܗܘܽܘܢ ܡ̣ܶܢ ܒܽܘܣܳܡܳܐ ܕܒܰܚܙܳܬܳܐ ܕܦܰܪܨܽܘܦܳܟ ܠܐܴ ܡܳܪܝ ܬܶܒܠܽܘܡ ܒܰܦܓܽܘܕܬܳܐ ܕܢܽܘܪܳܐ ܠܦܽܘ̈ܡܶܐ ܕܺܝܠܗܽܘܢ ܕܰܒܗܽܘܢ ܫܰܒܚܽܘܟ ܐܺܝܡܳܡ̈ܶܐ ܘܠܰܝܠܰܘ̈ܳܬܳܐ: ܠܐܴ ܢܰܙܥܩܽܘܢ ܪܰܥܽܘܡܳܐܺܝܬ ܒܝܰܕ ܩܳܠܰܝ̈ܗܽܘܢ ܚܠܰܝ̈ܳܐ ܕܙܰܝܚܽܘܟ: ܘܰܒܠܶܫܳܢܰܝ̈ܗܽܘܢ ܩܰܠܣܽܘܟ: ܘܰܒܩܺܝ̣̈ܢܳܬܗܽܘܢ ܗܰܕܪܽܘܟ: ܘܰܕܠܐܴ ܫܶܠܝܳܐ ܒܓܰܓܪ̈ܳܬܗܽܘܢ ܙܰܡܰܪܘ ܠܳܟ: ܠܐܴ ܬܶܫܡܰܥ ܠܐܷܕܢ̈ܶܐ ܕܺܝܠܗܽܘܢ ܩ̈ܳܠܐܷ ܡܰܪܺܝܪ̈ܶܐ ܕܒܶܟܝܳܐ ܕܳܐܡܪܺܝܢ ܘܡܰܫܡܥܺܝܢ ܠܗܽܘܢ ܕܙܶܠܘ ܠܟܽܘܢ ܡܶܢܝ ܠܺܝ̣̈ܛܶܐ ܠܢܽܘܪܳܐ ܠܐܴ ܝܳܕܰܥ ܐ̱ܢܳܐ ܠܟܽܘܢ ܠܗ̇ܳܢܽܘܢ ܕܰܠܩܳܠܐܴ ܕܶܐܘܢܓܶܠܝܽܘܢ ܕܺܝܠܳܟ ܨܳܬܘ: ܘܰܠܫܺܝܦܽܘܪ̈ܶܐ ܟܺܝܬ ܢܒܺܝ̈ܳܝܶܐ ܘܰܫܠܺܝ̈ܚܶܐ ܒܗܶܝܢ ܫܡ̣ܰܥܘ: ܠܐܴ ܬܰܚܫܶܟ ܠܥܰܝ̈ܢܶܐ ܕܺܝܠܗܽܘܢ ܒܒܶܟܝܳܐ ܘܰܒܚܽܘܪܳܩ ܫܶܢ̈ܶܐ ܕܰܒܗܶܝܢ ܠܳܟ ܡܶܬܝܰܕܥܳܢܳܐܺܝܬ ܚ̣ܙܰܘ: ܘܰܒܗܶܝܢ ܒܚܶܫܽܘܟܳܐ ܐܰܝܟ ܕܰܒܢܽܘܗܪܳܐ ܙܰܗܝܳܐܺܝܬ ܩܕܳܡܰܝܟ ܫܗ̣ܰܪܘ: ܘܠܐܴ ܬܶܐܣܽܘܪ ܒܰܦܟܳܪ̈ܶܐ ܡܰܪܺܝܪ̈ܶܐ ܕܓܰܘܙܰܠܬܳܐ ܠܐܻܝܕܰܝ̈ܳܐ ܕܺܝܠܗܽܘܢ ܒܢܽܘܪܳܐ ܡܶܬܚܰܪܟܳܢܺܝܬܳܐ ܕܗ̇ܳܢܽܘܢ ܕܒܳܬܪܳܗ̇ ܕܰܣܒܰܪܬܳܐ ܕܶܐܘܢܓܶܠܝܽܘܢ ܪܗ̣ܶܛܘ ܘܰܠܥܳܠܡܳܐ ܗܳܢܳܐ ܫܒ̣ܰܩܘ: ܘܠܰܨܠܺܝܒܳܟ ܛܥ̣ܶܢܘ ܘܒܶܐܣ̈ܟܳܦܳܬܳܐ ܟܳܗܢܳܝ̈ܳܬܳܐ ܗ̇ܳܢܶܝܢ ܕܡܰܕ̈ܒܚܶܐ ܕܺܝܠܳܟ ܩܰܕܺܝ̈ܫܶܐ: ܒܟܽܠܙܒܰܢ ܕܰܪܟܶܢ̣ܘ: ܐܶܠܐܴ ܐܰܕܢܰܚ ܠܗܽܘܢ ܢܽܘܗܪܳܐ ܕܦܰܪܨܽܘܦܳܟ: ܐܰܫܪܳܐ ܐܶܢܽܘܢ ܒܫܽܘܒܚܳܐ ܕܡܰܠܟܽܘܬܳܟ: ܐܰܥܶܠ ܐܶܢܽܘܢ ܠܰܓܢܽܘܢܳܟ: ܚܰܕܳܐ ܐܶܢܽܘܢ ܒܰܚܙܳܬܳܟ ܡܰܦܨܚܳܢܺܝܬܳܐ: ܘܗܰܒ ܠܗܽܘܢ ܕܦܰܪܶܗܣܺܝܳܐܺܝܬ ܘܰܕܠܐܴ ܒܶܗܬܬܳܐ ܢܶܓܥܠܽܘܢ ܠܳܟ ܠܟܰܟܪ̈ܶܐ ܕܺܝܠܗܽܘܢ ܠܐܴ ܚܰܣܺܝܪܳܐܺܝܬ: ܗܳܠܶܝܢ ܕܶܐܬܗܰܝܡ̣ܰܢܘ ܒܰܩܪ̈ܳܝܳܬܳܐ ܩܰܕܺܝ̈ܫܳܬܳܐ ܕܺܝܠܳܟ ܡ̣ܶܢ ܪܽܘܚܳܐ ܩܰܕܺܝܫܳܐ: ܘܠܰܢ ܘܰܠܗܽܘܢ ܐܰܫܘܳܐ ܡܳܪܝܳܐ ܪܳܚܶܡ ܐ̱ܢܳܫܳܐ ܠܰܡܢܳܬܳܐ ܕܪ̈ܺܝܫܰܝ ܟܳܗ̈ܢܶܐ ܚܣܰܝ̈ܳܐ ܘܟܳܗ̈ܢܶܐ ܙܗܰܝ̈ܳܐ ܒܥܺܕܬܳܐ ܗ̇ܳܝ ܐܽܘܪܫܠܶܡܳܝܬܳܐ ܘܕܰܠܥܶܠ ܡ̣ܶܢ ܥܳܠܡܳܐ: ܘܰܠܡܰܥܠܬܳܐ ܗ̇ܳܝ ܛܽܘܒܬܳܢܺܝܬܳܐ ܕܠܰܩܕܽܘܫ ܩܽܘܕܫܺܝܢ ܕܺܝܠܳܟ ܘܰܡܩܰܘ̈ܝܳܢܶܐ ܘܰܡܟܰܬܪ̈ܳܢܶܐ ܒܗܽܘܢ ܢܶܗܘܶܐ ܘܢܶܕܒܰܚ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܡܬܽܘܡܳܐܺܝܬ ܘܝܰܬܺܝܪ ܢܰܨܺܝܚܳܐܺܝܬ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܨܠܘܬܐ ܕܨܦܪܐ

 

ܒܰܐܬܪܳܐ ܗ̇ܰܘ ܕܪܰܚܺܝܩ ܡ̣ܶܢ ܟܽܠ ܟܺܐܒ̈ܶܐ ܘܥܳܩ̈ܳܬܳܐ ܘܬܶܐܢܚ̈ܳܬܳܐ: ܘܡܰܒܥܰܕ ܡ̣ܶܢ ܫܚ̈ܳܩܶܐ ܘܛܽܘܪ̈ܳܦܶܐ: ܘܪܳܣ̇ܶܡ ܛܰܐܠܐܴ ܗܰܢܺܝܳܐܐ: ܐܰܫܪܳܐ ܡܳܪܝܳܐ ܠܢܰܦ̈ܫܳܬܳܐ ܟܳܗ̈ܢܳܝܳܬܳܐ ܘܚܰܣ̈ܝܳܬܳܐ ܘܩܰܕܺܝ̈ܫܳܬܳܐ ܕܥܰܒ̣ܕ̈ܶܐ ܕܺܝܠܳܟ: ܕܶܐܬܟܰܗܰܢܘ ܠܳܟ ܕܰܟܝܳܐܺܝܬ ܘܩܰܕܺܝܫܳܐܺܝܬ: ܘܰܐܫܘܳܐ ܐܶܢܽܘܢ ܠܒܽܘܝܳܐܳܐ ܘܰܠܢܰܘܚܳܐ ܕܡ̣ܶܢ ܫܚ̈ܳܩܶܐ ܥܳܠܡܳܢܳܝ̈ܶܐ: ܘܰܠܒܽܘܣܳܡܳܐ ܕܰܒܚܰܝ̈ܶܐ ܫܡܰܝ̈ܳܢܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

ܣܕܪܐ

ܐܠܰܗܳܐ ܗ̇ܰܘ ܪܰܒܳܐ ܒܛܰܝܒܽܘܬܳܐ: ܘܠܐܴ ܡܶܣܬܰܝܟܳܢܳܐ ܒܺܐܝܬܽܘܬܳܐ ܘܛܽܘܒܬܳܢ ܒܟܽܠ: ܗ̇ܰܘ ܠܚܽܘܕܳܐܺܝܬ ܡ̇ܰܢ ܩ̇ܳܢܶܐ ܐܰܢ̱ܬ ܪ̈ܰܚܡܶܐ: ܘܡܳܪܳܢܳܐܺܝܬ ܐܳܦ ܫܰܪܺܝܪܳܐܺܝܬ ܐܺܝܬ ܠܳܟ ܛܰܝܒܽܘܬܳܐ ܘܩܽܘܫܬܳܐ: ܗ̇ܰܘ ܕܰܒܣܰܓܺܝܐܘܽܬ ܫܽܘ̈ܟܳܢܶܐ ܦܰܐܝ̈ܰܝ ܠܐܱܠܳܗܳܐ ܐܰܥ̣ܬܰܪܬ ܠܓܶܢܣܳܐ ܕܺܝܠܰܢ ܒܢܰܝ̈ܢܳܫܳܐ: ܘܝܰܩܰܪܬܳܝܗܝ ܒܪܰܒܽܘܬܳܐ ܘܰܐܘܪܶܒܬܳܝܗܝ ܒܰܡܟܰܗܢܳܢܽܘܬܳܐ ܕܟܳܗ̈ܢܶܐ ܚܣܰܝ̈ܳܐ ܘܰܡܫܰܡ̈ܫܳܢܶܐ ܕܟܰܝ̈ܳܐ: ܐܰܝܟܰܢܳܐ ܕܠܳܟ ܢܟܰܗܢܽܘܢ ܘܰܢܫܰܡܫܽܘܢ: ܘܡ̣ܶܢ ܢܽܘܗܪܳܐ ܕܺܝܠܳܟ ܢܶܬܡܠܽܘܢ. ܗܳܠܶܝܢ ܕܟܰܕ ܪ̈ܰܒܰܝ ܒ̈ܳܬܶܐ ܕܒܶܝܬܓ̈ܰܙܶܐ ܕܺܝܠܳܟ ܫܡܰܝ̈ܳܢܶܐ ܥܒ̣ܰܕܬ: ܘܰܡܟܰܗܢܳܢܽܘܬܳܐ ܘܡܰܐܪܙܳܢܽܘܬܳܐ ܕܩܽܘ̈ܕܳܫܶܐ ܕܺܝܠܳܟ ܗܰܝܡ̣ܶܢܬ ܚܰܣܝܳܐܺܝܬ ܘܪܶܚܡܰܬ݀ ܐ̱ܢܳܫܳܐܺܝܬ: ܘܡ̣ܶܢ ܬܥܺܝܫܽܘܬ ܛܽܘܪ̈ܳܦܶܐ ܘܚܰܫ̈ܶܐ ܒܝܰܕ ܡܰܘܬܳܐ ܕܳܒ̇ܰܪ ܐܰܢ̱ܬ ܠܗܽܘܢ: ܒܗ̇ܳܝ ܕܡ̣ܶܢ ܥܰܦܪܳܐ ܓܒ̣ܰܠܬܳܝܗܝ ܠܒܰܪܢܳܫܳܐ: ܘܰܠܥܰܦܪܳܐ ܡܰܗܦܶܟ ܐܰܢ̱ܬ ܠܶܗ: ܐܶܠܐܴ ܥܽܘܗܕܳܢܳܐ ܛܽܘܒܬܳܢܳܐ ܕܫ̇ܳܘܶܐ ܠܕܽܘܒܳܪ̈ܶܐ ܕܺܝܠܗܽܘܢ ܝܰܬܺܝܪ ܚܰܣܝܳܐܺܝܬ ܡܫܰܡܠܐܷ ܐܰܢ̱ܬ: ܘܰܕܚܰܐܝܺܝ̈ܢ ܠܳܟ ܓܰܠܝܳܐܺܝܬ ܐܰܘܕܰܥ̣ܬ ܒܶܐܘܢܓܶܠܳܝ̈ܶܐ ܕܺܝܠܳܟ ܣܓܺܝ̈ܕܶܐ ܟܰܕ ܐܳܡ̇ܰܪ ܐܰܢ̱ܬ  ܩܕܳܡ ܬܰܠܡܺܝ̈ܕܰܝܟ: ܕܰܐܝܟܳܐ ܕܶܐܢܳܐ ܐܺܝܬܰܝ ܬܰܡܳܢ ܢܶܗܘܶܐ ܡܫܰܡܫܳܢܳܐ ܕܺܝܠܝ: ܘܠܳܟ ܗܳܟܺܝܠ ܡܳܪܝܳܐ ܡܦܺܝܣܺܝܢܰܢ ܐܳܦ ܡܶܬܟܰܫܦܺܝܢܰܢ ܘܒܳܥܶܝܢܰܢ ܡܶܢܳܟ ܚܠܳܦ ܟܳܗ̈ܢܶܐ ܕܺܝܠܳܟ ܘܰܡܫܰܡ̈ܫܳܢܶܐ ܕܡܳܪܽܘܬܳܟ ܗܳܠܶܝܢ ܕܰܒܕܽܘܒܳܪ̈ܶܐ ܟܳܗ̈ܢܳܝܶܐ ܐܶܬܥܰܢܘܺܝܘ: ܘܡ̣ܶܢ ܥܺܕܬܳܐ ܕܗܳܪܟܳܐ ܫܰܢܺܝܘ: ܘܡ̣ܶܢ ܝܰܡܳܐ ܕܚܰܘ̈ܒܶܐ ܐܰܓܗܺܝܘ: ܘܰܠܘܳܬܳܟ ܡܰܢܰܥ̣ܘ: ܗ̇ܳܢܽܘܢ ܕܶܐܬܓܒܺܝܘ ܡܶܢܳܟ ܘܶܐܫܬܰܠܰܛܘ ܥܰܠ ܟܰܣ̈ܝܳܬܳܐ ܕܐ̱ܪ̈ܳܙܰܝܟ: ܗ̇ܳܢܽܘܢ ܕܰܒܕܳܪ̈ܳܬܳܐ ܕܺܝܠܳܟ ܩܰܕܺܝ̈ܫܳܬܳܐ ܕܰܝܰܪܘ ܘܰܒܗܶܝܢ ܐܰܝܟ ܕܰܒܓܰܘ ܩܰܝܛܽܘ̈ܢܶܐ ܕܡܰܠܟ̈ܶܐ ܥܡ̣ܰܪܘ: ܘܰܐܪܟ̣ܶܢܘ ܠܨܰܘܪ̈ܶܐ ܘܢܰܦ̈ܫܳܬܳܐ ܕܺܝܠܗܽܘܢ ܩܕܳܡܰܝܟ ܘܰܡܦܺܝ̈ܣܳܢܶܐ ܘܡܶܬܚܰܢ̈ܳܢܶܐ ܚܠܳܦ ܢܰܦ̈ܫܳܬܳܐ ܕܰܡܗܰܝ̈ܡܢܶܐ ܗ̣ܘܰܘ: ܗ̇ܳܢܽܘܢ ܕܰܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܐܰܡܺܝܢܳܐܺܝܬ ܐܶܬܗܰܓܺܝܘ ܠܰܝ̈ܠܰܝ ܐܺܝܡܳܡ ܘܰܒܪ̈ܽܘܡܪܳܡܶܐ ܚܠܰܝ̈ܳܐ: ܘܰܒܗܽܘ̈ܠܳܠܐܷ ܕܟܰܝ̈ܳܐ ܠܐܱܠܳܗܽܘܬܳܟ ܚܰܓܺܝܘ ܘܰܒܩܰܘ̈ܡܶܐ ܐܺܝܡܳܡܳܝ̈ܶܐ ܘܠܺܠܝ̈ܳܝܶܐ ܚܰܝ̈ܶܐ ܕܺܝܠܗܽܘܢ ܐܰܥܒ̣ܰܪܘ ܘܫܰܢܺܝܘ: ܗ̇ܳܢܽܘܢ ܕܒܺܐܝ̈ܕܰܝܗܽܘܢ ܫܰܟܶܢ̣ܬ: ܠܥܳܢ̈ܳܐ ܕܺܝܠܳܟ ܡܠܺܝܠܬܳܐ ܡܰܘܗܰܒܬܳܐ ܪܽܘܚܳܢܳܝܬܳܐ ܗ̇ܳܝ ܕܣܺܝܡܰܬ݀ ܒܢܰܝ̈ܳܐ ܣܚܳܬܳܐ ܕܝܰܠܕܳܐ ܕܡ̣ܶܢ ܕܪܺܝܫ ܩܨܳܝܳܐ ܕܶܐܘܟܰܪܶܣܛܺܝܰܐ ܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ: ܗ̇ܳܢܽܘܢ ܕܰܚܠܳܦܰܝܗܽܘܢ ܚܢܰܢ ܟܺܝܬ ܒܨܺܝܪ̈ܶܐ ܘܫܰܪܟܳܐ ܕܰܡܟܰܗܢ̈ܳܢܶܐ ܕܐ̱ܪ̈ܳܙܶܐ ܕܺܝܠܳܟ. ܡܦܺܝܣܺܝܢܰܢ ܠܳܟ ܕܰܬܩܰܒܶܠ ܐܶܢܽܘܢ ܦܰܐܝܽܘܬ ܟܳܗܢܳܐܺܝܬ ܘܝܰܬܺܝܪ ܡܫܰܝܢܳܐܺܝܬ: ܘܰܬܣܰܝܰܥ ܐܶܢܽܘܢ ܒܰܨܠܺܝܒܳܟ ܙܰܟܳܝܳܐ ܕܰܥܠܰܝܗܽܘܢ ܪܫܺܝܡ: ܘܦܰܓܪܳܟ ܘܰܕܡܳܟ ܕܰܒܗܰܕ̈ܳܡܶܐ ܕܺܝܠܗܽܘܢ ܛܡܺܝܪ: ܘܰܐܫܘܳܐ ܠܟܽܠܰܢ ܐܰܝܟ ܕܰܦܐܶܐ ܠܕܽܘܒܳܪ̈ܶܐ ܕܺܝܠܗܽܘܢ ܚܣܰܝ̈ܳܐ ܢܫܰܡܠܐܷ ܠܕܽܘܟܪ̈ܳܢܰܝܗܽܘܢ. ܟܰܕ ܡܚܰܘܶܐ ܐܰܢ̱ܬ ܠܰܢ ܬܰܝܳܒ̈ܶܐ ܫܰܪܺܝܪ̈ܶܐ ܩܕܳܡ ܡܰܦܰܩܬܳܢ ܕܡ̣ܶܢ ܚܰܝ̈ܶܐ ܗܳܠܶܝܢ ܙܰܒܢܳܝ̈ܶܐ: ܘܰܠܗܽܘܢ ܐܰܫܘܳܐ ܡܳܪܝܳܐ ܠܒܽܘܣܳܡܳܐ ܕܥܰܡܳܟ ܘܰܠܗܰܢܺܝܽܐܘܬܳܐ ܕܡܰܠܟܽܘܬܳܐ ܕܺܝܠܳܟ ܘܰܠܛܳܒ̈ܳܬܳܐ ܕܰܡܠܺܝ̣̈ܟܳܢ ܠܳܟ. ܘܰܠܬܶܫܒܽܘܚܬܳܐ ܕܥܳܒ̇ܕ̈ܰܝ ܨܶܒܝܳܢܳܟ: ܘܰܐܣܡܶܟ ܐܶܢܽܘܢ ܐܰܝܟܰܢܳܐ ܕܟܳܗ̈ܢܶܐ ܩܰܕܺܝ̈ܫܶܐ ܕܺܝܠܳܟ ܡܬܽܘܡܳܐܺܝܬ ܡܫܰܒܚܺܝܢ ܘܰܡܪܰܡܪܡܺܝܢ ܠܳܟ ܘܠܐܴ ܡܶܫܬܰܬܩܳܢܳܐܺܝܬ ܡܗܰܠܠܺܝܢ: ܐܰܝܟܰܢܳܐ ܕܢܰܦ̈ܫܳܬܳܐ ܕܟܺܐܢ̈ܶܐ ܡܕܰܝܪ̈ܳܢ: ܘܪ̈ܽܘܚܳܬܳܐ ܕܙܰܕܺܝ̈ܩܶܐ ܡܩܰܘ̈ܝܳܢ: ܐܰܝܟܳܐ ܕܥܳܩ̈ܳܬܳܐ ܓܠܺܝ̣̈ܙܳܢ: ܘܡܰܘܬܳܐ ܠܐܴ ܡܰܡܠܶܟ ܒܰܐܘ̈ܘܳܢܶܐ ܕܢܽܘܗܪܳܐ ܘܕܰܕܝܳܨܳܐ ܒܰܐܘܨܪ̈ܶܐ ܗܰܢܺܝ̈ܰܐܝ ܚܰܕ̈ܘܳܬܳܐ: ܘܰܒܝܰܘܡܳܐ ܗ̇ܰܘ ܕܕܳܢܚܳܐ ܘܡܶܬܓܰܠܝܳܐ ܒܶܗ ܪܰܒܽܘܬܳܟ: ܘܨܳܦ̇ܰܚ ܒܶܗ: ܘܦܽܘܪܥܳܢܳܐ ܕܟܺܐܢܽܘܬܳܐ ܠܟܽܠ ܒܣܰܪ ܘܬܳܩܢܳܐ ܒܶܗ ܒܺܐܝܡܰܐ ܕܚܺܝܠܬܳܐ ܕܺܝܠܳܟ ܡܳܪܝܳܐ. ܘܰܩܕܳܡܰܝܟ ܩܳܝܡܺܝܢ ܟܽܠܗܽܘܢ ܝܺܠܺܝ̣̈ܕܰܝ ܐܰܢ̱ܬܬܳܐ: ܘܰܐܝܟ ܫܶܡܫܳܐ ܡܰܙ̈ܠܓܳܢ ܟܰܣ̈ܝܳܬܳܐ: ܘܡܶܬܬܙܺܝܥ ܝܰܡܳܐ ܕܓܰܘܙܰܠܬܳܐ ܐܰܝܟܰܢܳܐ ܕܢܶܦܪܽܘܫ ܓܰܒܳܐ ܡ̣ܶܢ ܚܰܒܪܶܗ: ܡܳܐ ܕܰܓܡܺܝܪ̈ܶܐ ܓܡܺܝܪܳܐܺܝܬ ܚܳܕܶܝܢ: ܘܡܳܪ̈ܽܘܕܶܐ ܢܰܓܺܝܪܳܐܺܝܬ ܒܒܶܝܬ ܩܒܽܘܪ̈ܶܐ ܥܳܡܪܺܝܢ ܐܶܡܰܬܝ ܕܰܠܙܰܕܺܝ̈ܩܶܐ ܟܠܺܝ̈ܠܐܷ ܡܶܬܓܰܕܠܺܝܢ: ܘܰܠܪ̈ܰܫܺܝܥܶܐ ܘܳܝ̈ܶܐ ܡܶܬܝܰܗܒܺܝܢ: ܡܳܐ ܕܡܰܠܟܽܘܬܳܐ ܒܝܳܪ̈ܽܘܬܶܝܗ̇ ܪܳܘܙܳܐ: ܘܓܺܗܰܢܳܐ ܒܰܒ̈ܢܶܝܗ̇ ܡܶܬܦܰܬܚܳܐ ܘܡܶܬܪܰܘܚܳܐ: ܥܰܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܡܫܺܝܚܳܐ ܐܠܰܗܳܐ ܕܺܝܠܰܢ ܕܰܠܥܰܒ̣ܕ̈ܶܐ ܕܺܝܠܳܟ ܡܢܺܝ̣̈ܚܳܢܶܐ ܕܡܳܪܽܘܬܳܟ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܰܥܢ̣ܰܕܘ ܡܶܢܰܢ ܕܠܐܴ ܬܶܫܬܶܐ ܐܶܢܽܘܢ ܠܒܰܪ ܡ̣ܶܢ ܚܰܓܶܗ ܕܰܓܢܽܘܢܳܟ. ܘܠܐܴ ܬܶܛܪܽܘܕ ܐܶܢܽܘܢ ܡ̣ܶܢ ܒܽܘܣܳܡܳܐ ܕܥܰܡܳܟ: ܘܠܐܴ ܒܰܦܓܽܘ̈ܕܶܐ ܕܢܽܘܪܳܐ ܬܶܒܠܽܘܡ ܠܦܽܘ̈ܡܶܐ ܕܺܝܠܗܽܘܢ: ܐܶܠܐܴ ܐܰܕܢܰܚ ܥܠܰܝܢ ܘܰܥܠܰܝܗܽܘܢ ܢܽܘܗܪܳܐ ܦܰܐܝܳܐ ܕܦܰܪܨܽܘܦܳܟ: ܘܰܐܫܘܳܐ ܠܟܽܠܰܢ ܕܦܰܪܶܗܣܺܝܝܳܐܺܝܬ ܘܰܕܠܐܴ ܒܶܗܬܬܳܐ ܢܩܽܘܡ ܩܕܳܡ ܒܺܐܝܡܰܐ ܕܺܝܠܳܟ ܡܰܠܝܰܬ݀ ܪܬܺܝܬܳܐ: ܘܢܶܫܬܘܶܐ ܠܰܡܫܰܝܢܽܘܬܳܐ ܘܪܶܚܡܰܬ݀ ܐ̱ܢܳܫܽܘܬܳܐ ܘܰܠܡܰܥܠܬܳܐ ܗ̇ܳܝ ܛܽܘܒܬܳܢܳܝܬܳܐ ܕܠܰܩܕܽܘܫܩܽܘܕ̈ܫܺܝܢ ܕܺܝܠܳܟ ܠܐܴ ܡܶܬܚܰܙܝܳܢܳܐ: ܘܰܒܗܽܘܢ ܡܟܰܗܶܢ ܠܳܟ ܕܶܒܚ̈ܶܐ ܪ̈ܽܘܚܳܢܳܝܶܐ ܡܬܽܘܡܳܐܺܝܬ ܘܰܡܫܰܝܢܳܐܺܝܬ ܐܳܦ ܢܰܨܺܝܚܳܐܺܝܬ: ܘܗܳܪܟܳܐ ܘܰܒܚܰܝ̈ܶܐ ܕܰܥܬܺܝܕܺܝܢ ܢܫܰܡܶܫ ܠܳܟ ܡܳܪܰܢ ܝܶܫܽܘܥ ܡܫܺܝܚܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܥܛܪܐ

ܣܥܽܘܪ ܡܳܪܝܳܐ ܒܣܳܥܽܘܪܽܘܬܳܐ ܕܺܝܠܳܟ ܓܡܺܝܪܬܳܐ ܘܰܒܪ̈ܰܚܡܶܐ ܐܽܘܣ̈ܝܳܝܶܐ ܕܺܝܠܳܟ ܘܰܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡܶܢܰܢ ܐܶܬܩܰܪܰܒ ܠܳܟ: ܚܠܳܦ ܟܽܠܗܽܘܢ ܐܰܒܳܗ̈ܳܬܳܐ ܘܰܐܚ̈ܶܐ ܘܪ̈ܰܒܳܢܶܐ ܕܺܝܠܰܢ ܕܰܠܘܳܬܳܟ ܫܰܢܺܝܘ ܡܳܐ ܕܥܰܠ ܟܽܘܪܣܰܝ ܪܰܒܽܘܬܳܟ ܝ̇ܳܬܶܒ ܐܰܢ̱ܬ ܘܰܒܬܶܐܘܰܛܪܽܘܢ ܕܡܰܠܐܱܟ̈ܐ ܘܕܰܒܢܰܝ̈ܢܳܫܳܐ ܠܟܽܠ ܐ̱ܢܳܫ ܦ̇ܳܪܰܥ ܐܰܢ̱ܬ: ܥܰܡ ܐܶܡܪ̈ܶܐ ܒܢ̈ܰܝ ܝܰܡܺܝܢܳܐ ܢܶܬܛܰܟܣܽܘܢ ܘܠܰܓܢܽܘܢܳܐ ܕܢܽܘܗܪܳܐ ܥܰܡܳܟ ܢܶܥܠܽܘܢ ܘܒܶܗ ܢܶܬܓܰܐܘܽܘܢ ܘܢܶܚܕܽܘܢ: ܘܠܳܟ ܢܫܰܒܚܽܘܢ ܘܰܢܩܰܠܣܽܘܢ ܡܫܺܝܚܳܐ ܐܠܰܗܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

 

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܚܰܝܳܐ ܘܡܰܐܚܝܳܢܳܐ ܕܰܒܩܳܠܶܗ ܬܰܩܺܝܦܳܐ ܡܺܝ̈ܬܶܐ ܡܶܬܢܰܚܡܺܝܢ ܘܰܒܪܶܡܙܳܐ ܕܦܽܘܩܕܳܢܶܗ ܦܰܓܪ̈ܶܐ ܡܶܬܪܰܟܒܺܝܢ: ܠܗ̇ܰܘ ܚܰܝܳܐ ܘܰܐܚܺܝܕ ܟܽܠ ܕܡ̣ܶܢ ܥܰܦܪܳܐ ܘܰܚܒܳܠܐܴ ܕܰܫܝܽܘܠ ܡܢܰܦܶܨ ܠܟܽܠܳܗ̇ ܓܒܺܝܠܬܶܗ: ܘܰܒܪܶܡܙܶܗ ܕܠܐܴ ܡܶܬܥܨܶܐ: ܡܺܝ̈ܬܶܐ ܐܶܣܛܰܠ ܫܽܘܒܚܳܐ ܡܶܬܥܰܛܦܺܝܢ: ܘܒܰܥ̈ܢܳܢܶܐ ܕܢܽܘܗܪܳܐ ܠܐܘܪܥܶܗ ܡܰܫܩܠܺܝܢ ܘܩ̈ܳܠܰܝ ܫܽܘܒܚܳܐ ܠܶܗ ܙܳܡܪܺܝܢ: ܕܒܺܐܝ̈ܕܰܘܗܝ ܐܶܢܶܝܢ ܢܰܦ̈ܫܳܬܳܐ ܕܺܝܠܰܢ ܠܶܗ ܡܰܙܥܩܺܝܢ: ܕܠܶܗ ܝ̇ܳܐܶܐ܀

 

ܣܕܪܐ

ܡܫܺܝܚܳܐ ܐܠܰܗܳܐ ܡܶܠܬܳܐ ܡܬܽܘܡܳܝܳܐ ܗ̇ܰܘ ܫܶܡܫܳܐ ܕܙܰܕܺܝܩܽܘܬܳܐ: ܨܶܡܚܳܐ ܕܡ̣ܶܢ ܐܰܒܳܐ ܘܢܽܘܗܪܳܐ ܕܰܐܝܠܶܝܢ ܕܰܒܛܶܠܳܠܰܝ̈ ܡܰܘܬܳܐ ܝܳܬܒܺܝܢ ܗ̣ܘܰܘ: ܗ̇ܰܘ ܕܛܽܘܦܣܳܐ ܢܰܗܺܝܪܳܐ ܘܰܡܥܰܠܝܳܐ ܚܰܘܺܝ ܘܰܐܠܶܦ ܠܰܢ: ܟܰܕ ܐܳܡ̇ܰܪ ܒܡܶܠܰܘ̈ܗܝ ܚܰܝ̈ܳܬܳܐ ܕܰܒܪܶܗ ܕܐ̱ܢܳܫܳܐ ܠܰܝܬ ܠܶܗ ܐܰܝܟܳܐ ܕܢܶܣܡܽܘܟ ܪܺܝܫܶܗ: ܘܰܐܝܟܳܐ ܕܰܚܛܺܝܬܳܐ ܘܥܰܘܠܐܴ ܡܶܫܬܰܡܰܫ: ܠܐܴ ܥܳܡ̇ܰܪ ܬܰܡܳܢ ܐܠܰܗܳܐ: ܘܠܰܝܬ ܠܶܗ ܕܽܘܟܬܳܐ ܕܢܶܣܡܽܘܟ ܪܺܝܫܶܗ ܘܕܰܒܪܶܗ ܕܐ̱ܢܳܫܳܐ ܠܐܴ ܐܶܬܳܐ ܠܡܶܫܬܰܡܳܫܽܘ ܠܥܳܒ̇ܕ̈ܰܝ ܨܶܒܝܳܢܶܗ: ܘܰܕܢܶܬܶܠ ܢܰܦܫܶܗ ܚܠܳܦܰܝܗܽܘܢ ܠܡܰܘܬܳܐ: ܐܰܚܰܝ̈ܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܐ̱ܪ̈ܳܙܰܝ ܥܺܕܬܳܟ ܩܰܕܺܝܫܬܳܐ ܗ̇ܳܝ ܕܒܰܕܡܳܐ ܕܺܝܠܳܟ ܦܪܰܩܬܳܗ̇: ܗ̇ܳܢܽܘܢ ܕܰܣܒ̣ܰܠܘ ܚܠܳܦܰܟ ܫܶܢ̈ܕܶܐ ܘܩܺܝܢܕܽܘܢܺܝ̈ܣܶܐ ܕܰܕܡܳܐ: ܘܰܗ̣ܘܰܘ ܥܺܝܪ̈ܶܐ ܘܰܡܕܰܟ̈ܝܳܢܶܐ ܘܢܳܛܽܘܪ̈ܶܐ: ܕܦܽܘܩ̈ܕܳܢܶܐ ܕܺܝܠܳܟ ܥܠܰܝܗܽܘܢ ܐܶܣܬܡܶܟ ܨܶܒܝܳܢܳܟ ܘܶܐܬܬܢܺܝܚ: ܘܰܡܫܰܡܶܫ ܐܰܢ̱ܬ ܠܗܽܘܢ ܐܰܝܟ ܡܶܠܬܳܟ ܐܶܘܢܓܶܠܳܝܬܳܐ ܟܰܕ ܠܬܶܫܡܫܬܳܟ ܩܰܕܺܝܫܬܳܐ ܘܰܐܠܳܗܳܝܬܳܐ ܓܒ̣ܰܝܬ ܘܚܰܘܺܝܬ ܐܶܢܽܘܢ: ܘܰܐܩܺܝܡܬ ܐܶܢܽܘܢ ܩܕܳܡܰܝܟ ܕܕܰܟܝܳܐܺܝܬ ܘܩܰܕܺܝܫܳܐܺܝܬ ܢܫܰܡܫܽܘܢܳܟ: ܘܶܐܬܬܢܺܝܚ ܒܗܽܘܢ ܨܶܒܝܳܢ ܐܰܒܽܘܟ ܡܫܰܒܚܳܐ ܘܰܐܟܡܳܐ ܕܰܛܥܶܢ̣ܘ ܢܺܝܪܳܟ ܩܰܠܺܝܠܐܴ ܘܰܡܝܰܩܪܳܐ ܥܰܠ ܟܰܬܦ̈ܳܬܗܽܘܢ: ܘܰܐܙܥܶܩܘ ܩ̈ܳܠܐܷ ܚܠܰܝ̈ܳܐ ܟܰܕ ܡܰܘܕܶܝܢ ܠܛܰܝܒܽܘܬܳܟ ܠܐܴ ܢܰܥܙܩܽܘܢ ܡܰܠܝ̈ܰܝ ܚܶܢ̈ܓܳܬܳܐ ܘܠܐܴ ܬܶܕܟܰܪ ܠܗܽܘܢ ܡܳܪܝܳܐ ܡܰܗܡܝܳܢܽܘܬܳܐ ܗ̇ܳܝ ܕܰܒܬܶܫܡܫܬܳܐ ܕܺܝܠܗܽܘܢ ܩܕܳܡܰܝܟ: ܐܶܠܐܴ ܥܰܡ ܩܪ̈ܰܝܳܐ ܘܰܙܡܺܝ̣̈ܢܶܐ ܕܡܶܫܬܽܘܬܳܟ ܚܰܕܳܐ ܐܶܢܽܘܢ: ܘܥܰܡ ܓܒܰܝ̈ܳܐ ܕܺܝܠܳܟ ܩܕܳܡ ܬܪܽܘܢܳܘܣ ܕܰܐܠܳܗܽܘܬܳܟ ܐܰܩܺܝܡ ܐܶܢܽܘܢ: ܘܢܶܬܬܢܺܝܚ ܨܶܒܝܳܢܳܟ ܒܦܺܝܪ̈ܡܶܐ ܕܰܩܕܳܡܰܝܟ ܩܰܪܶܒܘ ܒܚܰܝܰܝ̈ܗܽܘܢ ܘܢܶܥܠܽܘܢ ܠܓܘ ܡܰܕܒܚܳܟ ܫܡܰܝܳܢܳܐ ܠܰܩܕܳܡ ܒܺܐܝܡܰܐ ܕܺܝܠܳܟ ܓܢܺܝܙܬܳܐ. ܘܰܢܫܰܒܚܽܘܢܳܟ ܒܰܓܢܽܘܢܳܟ: ܥܰܡ ܡܫܰܡ̈ܫܳܢܶܐ ܕܰܥܒ̣ܰܕܘ ܨܶܒܝܳܢܳܟ: ܚܽܘܪ ܡܳܪܝ ܒܬܶܫܡܫܬܗܽܘܢ ܕܥܰܠ ܐܺܝܕܰܝ̈ܗܽܘܢ ܩܰܕܺܝ̈ܫܳܬܳܐ ܙܰܝܚܽܘܟ: ܘܰܠܥܰܡܳܟ ܙܰܡܶܢ ܠܡܰܠܟܽܘܬܳܟ ܕܒܰܕܡܳܟ ܩܰܕܺܝܫܳܐ ܚ̣ܬܰܡܘ ܠܣܶܦܘ̈ܳܬܗܽܘܢ ܚܰܣܳܐ ܡܳܪܝ ܚܰܘܒܰܝ̈ܗܽܘܢ ܘܰܫܒܽܘܩ ܚܛܳܗܰܝ̈ܗܽܘܢ: ܘܚܰܕܳܐ ܐܶܢܽܘܢ ܒܰܚܙܳܬܳܟ ܡܰܦܨܚܳܢܺܝܬܳܐ ܘܠܐܴ ܬܶܬܥܰܗܕ ܠܗܽܘܢ ܡܚܺܝ̣̈ܠܘܳܬܳܐ ܕܡܶܢܗܽܘܢ ܐܶܫܬܰܡܰܫ̈ܝ: ܘܰܗܘܺܝ ܠܗܽܘܢ ܡܳܪܝܳܐ ܠܶܘܝܳܐ ܛܳܒܳܐ: ܘܡܰܢܰܥ ܐܶܢܽܘܢ ܠܐܱܬܪܳܐ ܕܚܰܕ̈ܘܳܬܳܐ ܘܕܰܕܝܳܨܳܐ: ܘܥܰܡ ܟܳܗ̈ܢܶܐ ܕܟܰܝ̈ܳܐ ܘܰܡܕܰܝ̈ܠܳܢܶܐ ܕܫܰܡܫܽܘܟ ܟܽܠ ܝܰܘ̈ܡܰܝ ܚܰܝܰܝ̈ܗܽܘܢ ܒܕܰܟܝܽܘܬܳܐ ܢܫܰܒܚܽܘܢܳܟ ܘܥܰܡ ܡܫܰܡ̈ܫܳܢܶܐ ܕܟܰܝ̈ܳܐ ܘܰܙܗܰܝ̈ܳܐ ܘܶܐܣܛܶܦܰܢܽܘ̈ܣܳܝܶܐ ܕܰܫܦ̣ܰܪܘ ܢܗܰܠܠܽܘܢ ܠܳܟ ܒܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܫܠܡ

 

ܛܟܣܐ ܕܚܕ ܒܫܒܐ ܬܡܝܢܝܐ ܕܓܘܢܝ̈ܐ

ܩܕܡܝܬ ܨܠܘܬܐ ܕܫܘܪܝܐ

ܠܥܰܒ̣ܕ̈ܶܐ ܕܺܝܠܳܟ ܡܳܪܝܳܐ ܕܰܕܒ̣ܰܪܬ ܐܶܢܽܘܢ ܠܘܳܬܳܟ ܡ̣ܶܢ ܥܳܠܡܳܐ ܗܳܢܳܐ: ܫܰܟܶܢ ܠܗܽܘܢ ܒܛܰܝܒܽܘܬܳܟ ܠܶܘܺܝܬܳܐ ܕܪܽܘܚܳܐ ܩܰܕܺܝܫܳܐ: ܘܡ̣ܶܢ ܣܺܝ̣̈ܥܳܬܳܐ ܕܪ̈ܽܘܚܶܐ ܘܚܰܝܠܰܘ̈ܳܬܳܐ ܚܶܫܽܘ̈ܟܳܝܶܐ ܫܰܘܙܶܒ: ܘܒܰܝܰܐܐ ܐܶܢܽܘܢ ܒܥܽܘܕܪܳܢܳܐ ܕܡܰܫܪ̈ܝܳܬܳܐ ܕܡܰܠܐܱܟ̈ܶܐ ܩܰܕܺܝ̈ܫܶܐ ܡܠܰܘ̈ܝܳܢܶܐ ܕܕܳܚܠܰܝ̈ܟ ܟܺܐܢ̈ܶܐ ܘܙܰܕܺܝ̈ܩܶܐ: ܡܶܛܽܠ ܕܰܕܚܺܝܠ ܗ̣ܽܘ ܡܳܪܝ ܝܰܘܡܶܗ ܕܥܽܘܢܕܳܢܳܐ ܘܠܰܝܬ ܠܰܢ ܐ̱ܚܪܺܢܳܐ ܠܒܰܪ ܡܶܢܳܟ ܕܢܶܬܒܰܥ ܒܺܐܝ̈ܕܰܘܗܝ ܦܽܘܪܩܳܢܰܢ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܪܡܫܐ

ܬܶܫܒܽܘܚܬܳܐ: ܠܗ̇ܰܘ ܚܰܝܠܐܴ ܛܥܺܝܢ ܒܶܪ̈ܝܳܬܳܐ ܘܣܰܘ̈ܦܶܐ ܕܬܽܘܩܦܶܗ ܪܰܒܳܐ ܘܰܡܥܰܠܝܳܐ ܡܰܪܗܶܒ ܠܰܫܡܰܝܳܐ ܘܠܐܱܪܥܳܐ: ܠܗ̇ܰܘ ܡܰܠܟܳܐ ܕܡܰܠܟ̈ܶܐ: ܐܳܦ ܫܰܠܺܝܛܳܐ ܕܰܫܠܳܡܳܐ: ܘܡܳܪܳܐ ܕܣܰܘ̈ܦܶܐ ܘܦܶܢ̈ܝܳܬܳܐ ܘܰܕܟܽܠܗܽܘܢ ܐܰܬܪ̈ܰܘܳܬܳܐ ܥܶܠܳܝ̈ܶܐ: ܗ̇ܰܘ ܕܰܕܪܶܟ ܥܰܠ ܬܽܘܩܦܳܐ ܕܰܐܪܥܳܐ: ܘܢܳܝܕܳܐ ܘܙܳܝܥܳܐ ܬܺܐܒܶܝܠ ܡ̣ܶܢ ܩܕܳܡܰܘܗܝ ܘܰܒܩܳܠܶܗ ܡܝܰܒܶܫ ܠܝܰܡܳܐ ܘܡܰܦܩܰܥ ܛܽܘܪ̈ܶܐ: ܘܡܶܨܛܰܪܶܝܢ ܩܰܒܪ̈ܶܐ ܘܫܽܘ̈ܥܶܐ: ܘܰܒܦܽܘܩܕܳܢܶܗ ܟܽܠܗܽܘܢ ܥܰܢܺܝ̈ܕܶܐ ܡܶܬܢܰܚܡܺܝܢ: ܘܗ̣ܽܘ ܐܺܝܬܰܘܗܝ ܪܺܝܫܳܐ ܕܚܰܝ̈ܶܐ ܘܰܕܡܺܝ̈ܬܶܐ: ܕܠܶܗ ܝ̇ܳܐܶܐ ܫܽܘܒܚܳܐ܀

ܣܕܪܐ

ܡܳܪܝܳܐ ܐܠܰܗܳܐ ܚܰܝܠܬܳܢ ܒܟܽܠ ܘܰܩܪܰܒܬܳܢܳܐ: ܗ̇ܰܘ ܕܚܺܝܠܐܴ ܘܡܰܡܠܶܟ ܥܰܠ ܟܽܠ. ܗ̇ܰܘ ܕܰܒܦܽܘܩܕܳܢܳܟ ܟܽܠ ܗ̣ܘܳܐ ܘܶܐܬܩܰܝܰܡ: ܘܰܒܝܰܕ ܦܽܘܩܕܳܢܳܟ ܟܽܠ ܥܳܒܰܪ ܘܡܶܫܬܪܶܐ ܘܒ̇ܳܛܶܠ: ܗ̇ܰܘ ܕܰܒܨܶܒܝܳܢܳܟ ܐܶܢܽܘܢ ܚܰܝ̈ܶܐ ܘܰܒܪܶܡܙܳܟ ܐܺܝܬܰܘܗܝ ܫܽܘܠܳܡܳܐ ܕܟܽܠܶܗ ܥܳܠܡܳܐ: ܐܰܢ̱ܬ ܗܳܟܺܝܠ ܐܠܰܗܳܐ ܐܺܝܬܰܝܟ ܢܫܰܡܬܳܐ ܕܚܰܝ̈ܶܐ ܕܟܽܠ: ܐܶܬܦܰܢ ܥܰܠ ܢܰܦ̈ܫܳܬܳܐ ܕܥܰܒ̣ܕܰܝ̈ܟ ܕܥܰܠ ܣܰܒܪܳܟ ܠܐܴ ܕܰܓܳܠܐܴ ܚ̣ܙܰܩܘ: ܘܡ̣ܶܢ ܬܰܘܬܳܒܽܘܬܳܐ ܘܚܰܝ̈ܶܐ ܡܰܠܝ̈ܰܝ ܩܶܢܛܳܐ ܐܰܓܗܺܝܘ ܘܰܠܘܳܬܳܟ ܡܰܢ̣ܰܥܘ. ܟܰܕ ܡܣܰܝܰܥ ܐܰܢ̱ܬ ܠܗܽܘܢ ܩܰܠܺܝܠܐܴܝܬ ܠܘܳܬ ܐܰܘ̈ܘܳܢܶܐ ܕܰܢܝܳܚܳܐ: ܘܰܒܝܰܘܡܳܐ ܗ̇ܰܘ ܐ̱ܚܪܳܝܳܐ ܕܒܶܗ ܡܶܐܬܺܝܬܳܟ ܕܳܢܚܳܐ ܘܪܰܒܽܘܬܳܟ ܡܶܙܕܰܝܚܳܐ: ܡܰܠܟܽܘܬܳܟ ܡܶܬܓܰܠܝܳܐ: ܘܓܰܢ̱ܒܳܪܽܘܬܳܟ ܡܶܬܝܰܕܥܳܐ: ܘܕܶܚܠܬܳܐ ܕܕܺܝܢܳܟ ܥܰܠ ܟܽܠ ܡܶܬܰܐܫܕܳܐ: ܡܳܐ ܕܡܰܠܐܱܟ̈ܶܐ ܡܰܙܥܩܺܝܢ: ܘܟܽܠܗܽܘܢ ܟܶܢ̈ܫܶܐ ܕܢܽܘܪܳܐ ܘܰܕܪܽܘܚܳܐ ܠܥܽܘܫܢܳܐ ܕܰܕܚܺܝܠܽܘܬܳܟ ܡܙܰܝܚܺܝܢ ܡܳܐ ܕܡܰܠܟ̈ܘܳܬܳܐ ܡܶܫܬܰܪ̈ܝܳܢ ܘܟܽܘܪ̈ܣܰܘܳܬܳܐ ܕܫܰܒܰܗܪ̈ܳܢܶܐ ܠܘܳܬ ܚܒܳܠܐܴ ܡܶܣܬܰܚܦܺܝܢ: ܡܳܐ ܕܰܫܢܰܝ̈ܳܐ ܡܶܬܦܰܣ̈ܩܳܢ ܘܡܶܢܝܳܢܳܐ ܕܝܰܪ̈ܚܶܐ ܡܶܬܒܰܛܰܠ: ܘܺܐܝܡ̈ܳܡܶܐ ܥܰܠ ܠܰܝܠܰܘ̈ܳܬܳܐ ܡܰܘܦܶܝܢ ܘܥܳܒܪܺܝܢ: ܘܟܽܠܳܗ̇ ܒܪܺܝܬܳܐ ܠܘܳܬ ܠܐܴ ܡܶܕܶܡ ܫܰܪܟܳܐ. ܡܳܐ ܕܰܫܡܰܝܳܐ ܙܳܝܥܳܐ: ܘܫܶܡܫܳܐ ܠܚܶܫܽܘܟܳܐ ܡܶܬܗܰܦܰܟ: ܘܣܰܗܪܳܐ ܘܟܰܘ̈ܟܒܶܐ ܠܳܒܫܺܝܢ ܥܢ̈ܳܢܶܐ ܟܡܺܝܪ̈ܳܬܳܐ: ܡܳܐ ܕܰܕܚܺܝܠܐܴܝܬ ܐܳܬܶܐ ܐܰܢ̱ܬ ܠܚܰܪܬܳܐ: ܘܢܰܗܺܝܪܳܐܺܝܬ ܡܶܬܚܙܶܐ ܐܰܢ̱ܬ: ܘܰܠܟܽܠܗܽܘܢ ܣܰܘ̈ܦܶܐ ܘܦܶܢ̈ܝܳܬܳܐ ܒܪܶܥܠܐܴ ܘܒܰܪܬܺܝܬܳܐ ܡܩܺܝܡ ܐܰܢ̱ܬ: ܡܳܐ ܕܟܺܐܢ̈ܶܐ ܕܳܝܨܺܝܢ ܘܙܰܕܺܝ̈ܩܶܐ ܚܳܕܶܝܢ: ܘܟܽܠܗܽܘܢ ܒܢ̈ܰܝ ܢܽܘܗܪܳܐ ܠܐܘܪܥܳܐ ܕܡܶܐܬܺܝܬܳܟ ܡܰܫܩܠܺܝܢ: ܐܶܡܰܬܝ ܕܒܺܝ̈ܫܶܐ ܒܳܗܬܺܝܢ: ܘܟܳܦܽܘܪ̈ܶܐ ܡܶܬܟܰܡܪܺܝܢ ܘܪ̈ܰܫܺܝܥܶܐ ܒܟܽܘܐܳܪܳܐ ܩܳܝܡܺܝܢ: ܡܳܐ ܕܟܽܘܪܣܝܳܐ ܕܺܐܝܩܳܪܳܟ ܬܳܩܶܢ ܘܩܳܠܳܟ ܒܰܣܺܝܡܳܐ ܠܟܽܠ ܡܟܰܢܶܫ ܘܟܺܐܢܽܘܬܳܐ ܡܶܬܠܰܚܡܳܐ: ܢܽܘܪܳܐ ܡܶܬܓܰܘܙܠܐܴ. ܘܚܳܪܒܳܐ ܡܶܬܠܰܛܫܳܐ ܘܚܶܫܽܘܟܳܐ ܡܶܬܥܰܪܰܡ: ܘܡܳܐ ܕܒܶܟܝܳܐ ܚܽܘܪܳܩ ܫܶܢ̈ܶܐ ܡܶܫܬܡܰܥ: ܘܰܐܒܕܳܢܳܐ ܘܫܽܘܢܳܩܳܐ ܓܳܙܡܺܝܢ: ܛܳܒ̈ܶܐ ܡܶܬܦܰܪܫܺܝܢ: ܘܚܰܛܳܝ̈ܶܐ ܡܶܬܬܕܺܝܢܺܝܢ. ܡܳܐ ܕܰܥܒ̇ܳܕ̈ܶܐ ܕܟܽܠܗܽܘܢ ܒܢܰܝ̈ܢܳܫܳܐ ܡܶܬܒܰܚܪܺܝܢ: ܘܰܒܝܰܡܳܐ ܕܢܽܘܪܳܐ ܟܽܠܗܽܘܢ ܥܳܡܕܺܝܢ ܘܰܠܒܶܝܬ ܕܺܝܢܳܐ ܕܚܺܝܠܐܴ ܡܶܨܛܰܝܒܺܝܢ: ܐܺܝܢ ܒܒܳܥܽܘ ܡܶܢܳܟ ܐܠܰܗܰܢ ܣܓܺܝܕܳܐ ܛܳܒܳܐ ܘܣܰܓܺܝ ܪ̈ܰܚܡܶܐ ܫܰܘܙܶܒ ܠܥܰܒ̣ܕܰܝ̈ܟ ܡ̣ܶܢ ܓܽܘ̈ܡܳܨܶܐ ܘܡ̣ܶܢ ܦܬܺܝ̣̈ܠܳܬܳܐ: ܘܡ̣ܶܢ ܓܙܳܡ̈ܶܐ ܘܫܽܘ̈ܢܳܩܶܐ ܕܬܰܡܳܢ ܘܚܽܘܢ ܐܶܢܽܘܢ ܒܪܶܚܡܰܬ݀ ܐ̱ܢܳܫܽܘܬܳܟ ܘܠܐܴ ܬܶܚܽܘܪ ܡܳܪܰܢ ܒܣܰܢ̈ܝܳܬܳܐ ܕܺܝܠܗܽܘܢ: ܘܠܐܴ ܬܶܕܟܰܪ ܠܗܽܘܢ ܚܛܳܗ̈ܶܐ ܕܰܣܥ̣ܰܪܘ ܒܥܳܠܡܳܐ ܕܫܳܪ̈ܥܳܬܳܐ: ܘܠܐܴ ܬܚܰܝܶܒ ܐܶܢܽܘܢ ܒܕܺܝܢܳܐ ܟܺܐܢܳܐ: ܘܠܐܴ ܬܰܫܠܶܡ ܐܶܢܽܘܢ ܠܰܦܣܳܩ ܣܰܒܪܳܐ. ܘܠܐܴ ܬܶܥܒܶܕ ܐܶܢܽܘܢ ܡܢܳܬܳܐ ܠܢܽܘܪܳܐ ܗ̇ܳܝ ܡܰܘܩܕܳܢܺܝܬܳܐ: ܘܠܐܴ ܢܶܬܓܰܠܙܽܘܢ ܡ̣ܶܢ ܛܰܝܒܽܘܬܳܟ: ܘܠܐܴ ܢܶܬܦܰܪܫܽܘܢ ܡ̣ܶܢ ܗ̇ܳܢܽܘܢ ܕܰܐܚܒܽܘܟ ܡ̣ܶܢ ܟܽܠܶܗ ܠܶܒܗܽܘܢ. ܐܶܠܐܴ ܬܶܦܪܽܘܣܝ ܟܶܢ̈ܦܶܝܗ̇ ܡܪܰܚܡܳܢܽܘܬܳܟ ܥܠܰܝܗܽܘܢ: ܘܰܬܣܰܬܰܪܝ ܛܰܝܒܽܘܬܳܟ: ܘܰܢܦܺܝܣܽܘܢܳܟ ܕܝܢ ܚܠܳܦܰܝܗܽܘܢ ܟܽܠܗܽܘܢ ܪ̈ܳܚܡܶܐ ܘܚܰܒܺܝ̈ܒܶܐ ܕܺܝܠܳܟ: ܕܣܰܟܺܝܘ ܠܡܶܐܬܺܝܬܳܟ ܒܚܰܕܘܰܬ݀ ܠܶܒܳܐ: ܘܰܫ̣ܘܰܘ ܠܡܰܠܟܽܘܬܳܟ ܟܰܕ ܚܳܕܶܝܢ ܘܪܳܘܙܺܝܢ: ܢܶܥܠܽܘܢ ܥܰܡܳܟ ܠܰܓܢܽܘܢ ܢܽܘܗܪܳܐ ܘܰܢܙܰܡܪܽܘܢ ܫܽܘܒܚܳܐ ܠܛܰܝܒܽܘܬܳܟ ܘܰܠܪ̈ܰܚܡܶܐ ܫܦܺܝ̣̈ܥܶܐ ܕܺܝܠܳܟ ܕܰܝ̇ܳܢܳܐ ܟܺܐܢܳܐ ܘܰܬܪܺܝܨܳܐ: ܗ̇ܰܘ ܕܒܰܐܦ̈ܶܐ ܠܐܴ ܢܳܣ̇ܶܒ ܘܫܽܘܚܕܳܐ ܠܐܴ ܡܩܰܒܶܠ: ܘܰܠܟܽܠ ܐ̱ܢܳܫ ܦ̇ܳܪܰܥ ܐܰܝܟ ܥܒ̇ܳܕ̈ܰܘܗܝ ܘܰܐܝܟ ܪܶܬܡܳܐ ܕܣܶܦ̈ܘܳܬܶܗ ܢܩܰܒܶܠ: ܡܳܐ ܕܰܢܒܺܝ̈ܶܐ ܚܳܕܶܝܢ ܘܕܳܝܨܺܝܢ: ܡܳܐ ܕܰܫܠܺܝ̈ܚܶܐ ܒܚܰܕܽܘܬܳܐ ܥܰܠ ܟܽܘܪ̈ܣܰܘܳܬܳܐ ܝܳܬܒܺܝܢ: ܘܰܐܒܳܗ̈ܳܬܳܐ ܟܺܐܢ̈ܶܐ ܘܙܰܕܺܝ̈ܩܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ ܢܶܫܬܘܶܐ ܕܰܐܓܪܳܐ ܕܦܽܘܪܥܳܢܗܽܘܢ ܢܳܣܒܺܝܢ. ܐܰܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܗ̇ܰܘ ܒܽܘܣܳܡܳܐ ܠܐܴ ܡܶܫܬܰܪܝܳܢܳܐ ܒܝܰܕ ܨܠܰܘ̈ܳܬܳܐ ܘܒܳܥ̈ܘܳܬܳܐ ܕܰܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܠܰܗܳܐ ܡܰܪܝܰܡ. ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܩܘܡܐ ܩܕܡܝܐ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܡܢܰܚܡܳܢܳܐ ܕܡܺܝ̈ܬܶܐ ܘܰܡܩܺܝܡܳܢܳܐ ܕܰܩܒܺܝܪ̈ܶܐ: ܘܕܰܝ̇ܳܢܳܐ ܕܚܰܝ̈ܶܐ ܘܰܕܡܺܝ̈ܬܶܐ: ܘܰܐܠܳܗܳܐ ܕܪ̈ܽܘܚܳܬܳܐ ܘܰܕܟܽܠ ܒܣܰܪ. ܠܗ̇ܰܘ ܡܳܪܳܐ ܕܗ̣ܽܘ ܡܡܺܝܬ ܘܡܰܐܚܶܐ: ܘܡܰܐܚܶܬ ܠܰܫܝܽܘܠ ܘܡܰܣܶܩ: ܠܗ̇ܰܘ ܕܝܰܗ̣ܒ ܠܒܰܪܢܳܫܳܐ ܚܰܝ̈ܶܐ ܐ̱ܢܳܫܳܝ̈ܳܐ ܘܡܳܝܽܘ̈ܬܶܐ: ܘܡܶܢܗܽܘܢ ܫ̇ܳܪܶܐ ܘܰܡܒܰܛܶܠ: ܘܰܒܝܰܕ ܡܰܘܬܳܐ ܡܰܥܒܰܪ ܠܰܢ ܠܐܱܬܪܳܐ ܕܠܰܝܬ ܠܶܗ ܫܽܘܠܳܡܳܐ ܕܠܶܗ ܝ̇ܳܐܶܐ ܫܽܘܒܚܳܐ܀

ܣܕܪܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܠܰܗܳܐ ܕܺܝܠܰܢ: ܘܡܶܬܟܰܫܦܺܝܢܰܢ ܠܳܟ ܕܰܒܝܰܘܡܳܐ ܗ̇ܰܘ ܐ̱ܚܪܳܝܳܐ ܕܢܽܘܚܳܡܳܐ ܕܒܶܗ ܫ̇ܳܪܶܐ ܐܰܢ̱ܬ ܠܐܷܣܰܝ̈ ܬܺܐܒܶܝܠ ܟܰܗܺܝ̣̈ܢܳܬܳܐ ܘܰܡܟܰܢܶܫ ܪܶܡܙܳܟ ܠܟܽܠܗܽܘܢ ܛܽܘ̈ܗܡܶܐ ܘܫܰܪ̈ܒܳܬܳܐ. ܡܳܐ ܕܡܰܠܐܱܟ̈ܶܐ ܡ̣ܶܢ ܙܺܝܘܳܟ ܪܳܥܠܺܝܢ: ܘܪ̈ܺܝܫܰܝ ܡܰܠܐܱܟ̈ܶܐ ܙܳܝܥܺܝܢ ܘܟܽܠܗܽܘܢ ܒܢܰܝ̈ܢܳܫܳܐ ܒܕܶܚܠܬܳܐ ܘܒܰܪܬܺܝܬܳܐ ܩܳܝܡܺܝܢ ܒܗ̇ܰܘ ܥܶܕܳܢܳܐ ܚܽܘܣ ܡܳܪܝܳܐ ܥܰܠ ܢܰܦ̈ܫܳܬܳܐ ܕܥܰܢܺܝ̈ܕܶܐ ܡܗܰܝ̈ܡܢܶܐ ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ: ܘܦܰܓܪܳܟ ܘܰܕܡܳܟ ܫܩ̣ܰܠܘ ܡ̣ܶܢ ܡܰܕܒܚܳܐ ܒܗܰܝܡܳܢܽܘܬܳܐ ܠܚܽܘܣܳܝܳܐ ܕܚܰܘܒܰܝ̈ܗܽܘܢ ܘܰܠܫܽܘܒܩܳܢܳܐ ܕܰܚܛܳܗܰܝ̈ܗܽܘܢ. ܠܐܴ ܡܳܪܝ ܬܶܥܽܘܠ ܠܕܺܝܢܳܐ ܥܰܡܗܽܘܢ ܡܳܐ ܕܕ̇ܳܐܶܢ ܐܰܢ̱ܬ ܠܗܽܘܢ: ܘܠܐܴ ܠܒܽܘܚܳܢܳܐ ܚܰܬܺܝܬܳܐ ܬܶܩܪܶܐ ܘܰܬܩܺܝܡ ܐܶܢܽܘܢ: ܘܟܰܕ ܘܠܐܴ ܠܥܽܘܗܕܳܢܳܐ ܘܰܠܒܽܘܚܪܳܢܳܐ ܬܰܝܬܶܐ ܠܫܳܪ̈ܥܳܬܳܐ ܘܰܠܣܰܟܠܘ̈ܳܬܳܐ ܘܦܰܘ̈ܕܶܐ ܕܺܝܠܰܢ ܘܕܺܝܠܗܽܘܢ: ܐܶܠܐܴ ܩܰܒܶܠ ܐܶܢܽܘܢ ܡܫܰܝܢܳܐܺܝܬ ܘܪܶܚܡܰܬ ܐ̱ܢܳܫܳܐܺܝܬ: ܘܝܰܬܺܝܪ ܢܺܝܚܳܐܺܝܬ: ܘܚܽܘܪ ܒܗܽܘܢ ܒܰܣܺܝܡܳܐܺܝܬ ܘܰܥܒܶܕ ܥܠܰܝܗܽܘܢ ܪ̈ܰܚܡܶܐ ܫܦܺܝ̈ܥܶܐ ܡܪܰܚܡܳܢܳܐܺܝܬ ܚܰܣܳܐ ܡܳܪܝ ܚܰܘܒܰܝ̈ܗܽܘܢ ܒܛܰܝܒܽܘܬܳܟ ܠܐܴ ܡܶܬܬܟܺܝܠܐܴ: ܘܰܫܒܽܘܩ ܠܗܽܘܢ ܒܽܘܨܳܪ̈ܰܝܗܽܘܢ ܒܝܰܡܳܐ ܪܘܺܝܚܳܐ ܕܰܡܪܰܚܡܳܢܽܘܬܳܟ ܐܰܥܶܠ ܐܶܢܽܘܢ ܠܰܓܢܽܘܢܳܟ ܒܝܰܘܡܳܐ ܕܡܶܬܓܰܠܝܳܐ ܡܶܐܬܺܝܬܳܟ ܛܰܟܶܣ ܐܶܢܽܘܢ ܡܳܪܝ ܒܰܣܡܳܟܳܟ ܥܰܡ ܚܕܽܘ̈ܓܶܐ ܘܰܙܡܺܝ̣̈ܢܶܐ ܕܰܚܠܽܘܠܳܟ: ܚܰܕܳܐ ܐܶܢܽܘܢ ܒܰܚܙܳܬܳܟ ܡܰܦܨܚܳܢܺܝܬܳܐ ܘܰܫܒܺܝܚܳܐ ܘܦܰܪܨܽܘܦܳܟ ܘܰܒܝܰܘܡܳܐ ܗ̇ܰܘ ܕܡܶܬܚܙܶܐ ܒܶܗ ܢܺܝܫܶܗ ܦܰܐܝܳܐ ܕܰܨܠܺܝܒܳܐ ܩܪܺܝ ܘܩܰܪܶܒ ܐܶܢܽܘܢ ܩܕܳܡ ܐܰܒܽܘܟ ܐܰܝܟ ܫܽܘܘܕܳܝܳܟ ܫܰܪܺܝܪܳܐ ܘܠܐܴ ܕܰܓܳܠܐܴ ܟܰܕ ܓܰܠܝ̈ܳܢ ܐܰܦܰܝ̈ܗܽܘܢ ܘܢܰܗܺܝܪܺܝܢ ܡܰܕܥܰܝ̈ܗܽܘܢ ܒܡܶܫܚܳܐ ܕܰܥܒ̇ܳܕܰܝ̈ܗܽܘܢ: ܟܰܕ ܚܶܘܳܪ̈ܺܝܢ ܢܰܚܬܰܝ̈ܗܽܘܢ: ܘܢܰܗܺܝܪܺܝܢ ܫܪ̈ܳܓܰܝܗܽܘܢ: ܟܰܕ ܡܰܨܡܚܺܝܢ ܩܢܽܘ̈ܡܰܝܗܽܘܢ ܐܰܘܕܳܐ ܒܗܽܘܢ ܩܕܳܡ ܐܰܒܽܘܟ ܕܰܐܘܕܺܝܘ ܒܳܟ ܩܕܳܡ ܒܢܰܝ̈ܢܳܫܳܐ: ܘܰܛܥܶܢ̣ܘ ܢܺܝܪܳܟ ܩܰܠܺܝܠܐܴ ܡܰܘܒܠܐܴ ܕܺܝܠܳܟ ܒܰܣܺܝܡܬܳܐ ܥܰܠ ܨܰܘܪ̈ܰܝܗܽܘܢ: ܐܰܝܟܰܢܳܐ ܕܟܰܕ ܒܛܰܝܒܽܘܬܳܟ ܡܫܰܟܶܢ ܐܰܢ̱ܬ ܠܰܢ ܘܰܠܗܽܘܢ. ܫܽܘܠܳܡܳܐ ܕܪ̈ܰܚܡܶܐ ܘܰܢܝܳܚܬܳܐ ܘܡܰܦܩܳܢܳܐ ܕܫܰܝܢܳܐ ܘܕܰܫܠܳܡܳܐ ܘܚܰܪܬܳܐ ܛܳܒܬܳܐ ܕܰܪܚܺܝܡܳܐ ܠܳܟ. ܐܰܝܟܰܢܳܐ ܕܰܢܙܰܡܪܽܘܢ ܠܳܟ ܒܩܺܝ̣̈ܢܳܬܗܽܘܢ ܘܰܢܗܰܠܠܽܘܢ ܠܳܟ ܒܓܰܓܪ̈ܳܬܗܽܘܢ: ܘܰܚܢܰܢ ܘܗ̣ܶܢܽܘܢ ܢܶܚܕܶܐ ܘܢܶܪܘܰܙ ܘܢܶܬܦܨܰܚ ܒܳܟ: ܘܰܢܩܽܘܡ ܡ̣ܶܢ ܝܰܡܺܝܢܳܟ ܥܰܡ ܐܶܡܪ̈ܶܐ ܓܒܰܝ̈ܳܐ ܕܺܝܠܳܟ ܘܰܒܢ̈ܰܝ ܝܳܪܬܽܘܬܳܟ ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܕܠܐܴ ܫܶܠܝܳܐ ܒܩ̈ܳܠܐܷ ܕܩܽܘܒܳܠܛܰܝܒܽܘܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

 

ܩܘܡܐ ܕܬܪܝܢ ܕܠܠܝܐ

ܦܪܘܡܝܘܢ

ܬܶܫܒܽܘܚܬܳܐ: ܠܗ̇ܰܘ ܕܒܺܐܝ̈ܕܰܘܗܝ ܐܶܢܽܘܢ ܚܰܝܰܝ̈ܢ: ܘܰܒܨܶܒܝܳܢܶܗ ܐܺܝܬܰܘܗܝ ܡܰܘܬܰܢ: ܘܰܒܩܳܠܶܗ ܡܩܺܝܡ ܠܰܢ ܡ̣ܶܢ ܩܰܒܪ̈ܰܝܢ: ܘܰܒܦܽܘܩܕܳܢܶܗ ܡܰܗܦܶܟ ܪ̈ܽܘܚܳܬܰܢ ܠܦܰܓܪ̈ܰܝܢ: ܘܰܒܛܰܝܒܽܘܬܶܗ ܘܰܒܪ̈ܰܚܡܰܘܗܝ ܡܰܘܪܶܬ ܠܰܢ ܦܰܪܕܰܝܣܳܐ ܗ̇ܰܘ ܕܡܶܢܶܗ ܐܶܬܛܪܶܕܘ ܐܰܒܳܗܰܝ̈ܢ: ܠܗ̇ܰܘ ܚܰܢܳܢܳܐ ܕܒܰܫܦܺܝܥܽܘܬܳܐ ܕܪܶܚܡܬܶܗ ܚܳܢܶܗ ܠܐܴܕܳܡ ܨܰܠܡܶܗ: ܘܦܰܢܝܶܗ ܠܰܥܕܶܝܢ ܝܳܪܬܽܘܬܶܗ: ܕܠܶܗ ܠܗ̇ܰܘ ܛܳܒܳܐ ܘܰܡܪܰܚܡܳܢܳܐ ܕܚܳܢܶܗ ܢܰܘܕܶܐ ܘܰܢܫܰܒܰܚ ܒܗܳܢܳܐ ܥܶܕܳܢܳܐ܀

 

ܣܕܪܐ

ܐܶܬܕܰܟܪ ܡܳܪܝܳܐ ܡܪܰܚܡܳܢܳܐ ܠܟܽܠܗܽܘܢ ܩܰܕܺܝ̈ܫܶܐ ܕܡ̣ܶܢ ܥܳܠܰܡ ܫܦ̣ܰܪܘ ܠܳܟ: ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܥܰܡ ܫܰܦܺܝܪܽܘܬ ܕܶܚܠܬܳܐ ܢܦ̣ܰܩܘ ܘܫܰܢܺܝܘ ܡ̣ܶܢ ܥܳܠܡܳܐ ܗܳܢܳܐ ܘܰܠܘܳܬܳܟ ܡܰܢܰܥܘ: ܝܺܕܺܝܥܳܐܺܝܬ ܕܶܝܢ ܗܳܠܶܝܢ ܕܝܰܘܡܳܢܳܐ ܕܽܘܟܪܳܢܳܐ ܕܺܝܠܗܽܘܢ ܡܫܰܡܠܶܝܢܰܢ: ܩܰܕܡܳܐܝܰܬ݀ ܕܶܝܢ ܠܰܢܒܺܝ̈ܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ: ܘܠܰܡܣܰܒܪ̈ܳܢܶܐ ܘܰܠܣܳܗ̈ܕܶܐ ܘܡܰܘܕ̈ܝܳܢܶܐ ܘܟܺܐܢ̈ܶܐ ܘܟܳܗ̈ܢܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ: ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܘܬܽܘܒ ܕܶܝܢ ܘܥܰܡܗܽܘܢ ܠܐܷܘܢܓܶܠܺܝ̈ܣܛܶܐ ܫܰܪܺܝܪ̈ܶܐ ܐܰܪܒܥܳܐ ܘܡܰܐܪ̈ܙܳܢܶܐ ܚܰܟܺܝ̈ܡܶܐ: ܘܠܐܱܝܠܶܝܢ ܕܰܒܕܽܘܒܳܪ̈ܶܐ ܢܰܟ̈ܦܶܐ ܘܰܡܣܰܡ̈ܥܠܐܷ ܫܰܠܶܡ̣ܘ ܚܰܝܰܝ̈ܗܽܘܢ: ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܟܰܫܺܝܪ̈ܶܐ: ܘܠܐܱܝܠܶܝܢ ܕܰܒܫܶܢ̈ܳܬܳܐ ܘܰܓܕܳܢ̈ܦܶܐ ܘܥܰܡܗܽܘܢ ܠܐܷܣܛܽܘܢܳܪ̈ܶܐ ܘܥܶܢܘ̈ܳܝܶܐ: ܘܰܠܟܽܠܗܽܘܢ ܐܰܝܠܶܝܢ ܕܰܒܦܶܥܪ̈ܶܐ ܘܰܡܥܰܪ̈ܶܐ ܘܰܒܚܶܦܪ̈ܶܐ ܕܰܐܪܥܳܐ ܨܳܡ̣ܘ. ܘܨܰܠܺܝܘ: ܐܳܦ ܐܶܬܢܰܙܰܪܘ. ܘܰܒܚܰܝ̈ܶܐ ܫܚܺܝ̣̈ܩܶܐ ܫܰܠ̣ܶܡܘ ܚܰܝܰܝ̈ܗܽܘܢ ܘܥܰܒܪܽܘܗܝ ܠܥܳܠܡܳܐ ܕܥܳܩ̈ܳܬܳܐ: ܬܽܘܒ ܕܶܝܢ ܥܰܡܗܽܘܢ ܠܩܰܕܺܝܫܬܳܐ ܝܳܠܕܰܬ ܐܠܰܗܳܐ ܡܰܪܝܰܡ. ܫܰܘܝܰܬ݀ ܗ̇ܳܝ ܠܛܽܘ̈ܒܶܐ ܘܡܰܠܝܰܬ݀ ܡ̣ܶܢ ܩܽܘ̈ܠܳܣܶܐ ܗ̇ܳܝ ܕܺܐܝܬܶܝܗ̇ ܡܶܬܟܰܫܦܳܢܺܝܬܳܐ ܚܠܳܦ ܟܽܠܰܢ: ܠܰܡܫܺܝܚܳܐ ܒܪܳܗ̇ ܘܰܐܠܳܗܳܐ ܕܟܽܠܐܴ. ܕܰܒܝܰܘܡܳܐ ܕܚܺܝܠܐܴ ܢܶܥܒܰܪ ܝܰܡܳܐ ܕܢܽܘܪܳܐ: ܘܢܶܪܕܶܐ ܠܰܠܡܺܐܢܳܐ ܕܚܰܝ̈ܶܐ ܕܠܐܴ ܩܶܢܛܳܐ ܘܰܕܠܐܴ ܒܶܗܬܬܳܐ. ܘܥܰܡܳܗ̇ ܕܶܝܢ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܐܳܕܳܡ ܘܚܰܘܳܐ ܘܰܥܕܰܡܳܐ ܠܝܰܘܡܳܢܳܐ ܒܽܐܘܪ̈ܚܳܬܳܐ ܬܪ̈ܺܝܨܳܬܳܐ ܗܰܠܶܟܘ: ܘܒܰܫܒܺܝ̣̈ܠܐܷ ܕܚܰܝ̈ܶܐ ܪܕܰܘ ܘܰܒܢܳܡܽܘ̈ܣܰܝܟ ܐܶܬܗܰܓܺܝܘ ܐܺܝܡܳܡܳܐ ܘܠܺܠܝܳܐ: ܐܰܢ̱ܬ ܕܶܝܢ ܛܳܒܳܐ ܘܒܰܣܺܝܡܳܐ ܩܰܒܶܠ ܬܰܟܫ̈ܦܳܬܰܢ ܘܰܨܠܰܘ̈ܳܬܰܢ ܕܰܚܠܳܦܰܝܗܽܘܢ ܠܳܟ ܡܩܰܪܒܺܝܢܰܢ ܚܠܳܦ ܢܰܦ̈ܫܳܬܳܐ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܡ̣ܶܢ ܚܶܫܽܘܟܳܐ ܠܢܽܘܗܪܳܐ ܐܰܦ̣ܶܩ ܐܶܢܽܘܢ ܡ̣ܶܢ ܬܚܶܝܬ ܫܽܘܥܒܳܕܶܗ ܕܡܰܘܬܳܐ ܚܰܪܰܪ ܐܶܢܽܘܢ. ܘܡ̣ܶܢ ܒܶܝܬ ܐܰܣܺܝܪ̈ܶܐ ܕܰܫܝܽܘܠ ܒܳܠܰܥܬܳܐ ܫܪܺܝ ܘܰܐܦܶܩ ܐܶܢܽܘܢ. ܘܠܐܱܬܪܳܐ ܘܰܡܥܰܠܰܝ ܡ̣ܶܢ ܚܰܫ̈ܶܐ ܡܰܢܰܥ ܐܶܢܽܘܢ: ܘܒܰܡܕܺܝܢ̱ܬܳܐ ܥܶܠܳܝܬܳܐ ܕܠܰܝܬ ܒܳܗ̇ ܩܶܢܛܳܐ ܐܰܥܡܰܪ ܐܶܢܽܘܢ: ܘܒܰܐܘܨܪ̈ܶܐ ܕܚܰܕ̈ܘܳܬܳܐ ܚܡܽܘܠ ܐܶܢܽܘܢ: ܘܥܰܠ ܡܰܪ̈ܓܶܐ ܕܥܽܘܫܢܳܐ ܪܥܺܝ ܐܶܢܽܘܢ: ܘܥܰܠ ܡܰܝ̈ܳܐ ܕܰܢܝܳܚܳܐ ܕܰܒܰܪ ܐܶܢܽܘܢ: ܘܰܒܢܽܘܗܪܳܐ ܡܫܰܒܚܳܐ ܕܦܰܪܨܽܘܦܳܟ ܒܰܣܶܡ ܐܶܢܽܘܢ: ܘܒܰܫܪܳܪܳܐ ܕܡܽܘܠܟܳܢܰܝ̈ܟ ܠܰܒܶܒ ܐܶܢܽܘܢ. ܘܰܒܚܰܘܣܳܢܳܐ ܘܰܥܛܳܝܳܐ ܕܡܶܬܥܰܒܪ̈ܳܢܘܳܬܗܽܘܢ ܚܰܕܳܐ ܐܶܢܽܘܢ. ܘܰܒܟܽܠ ܡܰܝܬܳܝܽܘܬ ܦܺܐܪ̈ܶܐ ܕܛܳܒ̈ܳܬܳܐ: ܕܰܚܠܳܦܰܝܗܽܘܢ ܡܶܬܟܰܗܢܺܝܢ ܐܰܪܓܶܫ ܐܶܢܽܘܢ: ܘܰܒܝܰܘܡܳܐ ܗ̇ܰܘ ܕܢܽܘܚܳܡܳܐ ܕܫܳܥܬܳܐ ܐ̱ܚܪܳܝܬܳܐ ܕܦܳܣܺܝ̈ܩܳܬܳܐ ܡ̣ܶܢ ܩܝܳܡܬܳܐ ܕܕܺܝܢܳܐ ܫܰܘܙܶܒ ܐܶܢܽܘܢ: ܘܠܰܩܝܳܡܬܳܐ ܕܚܰܝ̈ܶܐ ܚܰܕ̈ܬܶܐ ܐܰܫܘܳܐ ܐܶܢܽܘܢ: ܘܠܰܓܢܽܘܢܳܐ ܕܢܽܘܗܪܳܐ ܛܰܝܶܒ ܐܶܢܽܘܢ: ܘܠܰܢ ܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܨܠܘܬܐ ܕܨܦܪܐ

ܡܶܠܬܳܐ ܡܬܽܘܡܳܝܳܐ ܗ̇ܰܘ ܕܰܠܥܶܠ ܡ̣ܶܢ ܩܽܘܒܬܳܐ ܫܡܰܝܳܢܺܝܬܳܐ ܒܥܽܘܒܳܐ ܕܰܐܒܽܘܗܝ ܡܶܙܕܰܝܰܚ: ܘܡ̣ܶܢ ܒܰܪܬ ܕܰܘܺܝܕ ܒܚܰܪܰܬ݀ ܙܰܒܢ̈ܶܐ ܫܦ̣ܰܪ ܠܶܗ: ܘܒܶܣܪܳܢܳܐܺܝܬ ܕܢܰܚ ܘܶܐܬܺܝܠܶܕ ܘܰܦ̣ܪܰܩ ܠܥܳܠܡܳܐ ܟܽܠܶܗ ܡ̣ܶܢ ܛܽܘܥܝܰܝ ܘܡ̣ܶܢ ܕܶܐܫܬܰܡܠܝܰܬ݀ ܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܕܰܚܠܳܦܰܝܢ ܣܠ̣ܶܩ ܠܰܫܡܰܝܳܐ ܘܺܝܬܶܒ ܡ̣ܶܢ ܝܰܡܺܝܢܳܐ ܕܰܐܠܳܗܳܐ ܐܰܒܳܐ ܫܳܠܽܘܚܶܗ ܘܳܐܬܶܐ ܠܚܰܪܬܳܐ ܕܰܢܢܰܚܶܡ ܠܰܢ: ܘܰܢܩܺܝܡ ܠܰܢ ܡ̣ܶܢ ܩܰܒܪ̈ܰܝܢ ܡܳܪܰܢ ܘܰܐܠܳܗܰܢ܀

 

ܦܪܘܡܝܘܢ ܕܨܦܪܐ

ܬܶܫܒܽܘܚܬܳܐ: ܠܗ̇ܰܘ ܕܺܐܝܬܰܘܗܝ ܗ̣ܘܳܐ: ܘܺܐܝܬܰܘܗܝ. ܘܢܶܗܘܶܐ ܐܺܝܬܰܘܗܝ ܕܠܐܴ ܫܽܘܪܳܝ ܘܰܕܠܐܴ ܫܽܘܠܳܡ: ܗܰܘܢܳܐ ܝܳܠܽܘܕܳܐ ܕܡܶܠܬܳܐ ܡܬܽܘܡܳܝܳܐ: ܘܪܽܘܚܳܐ ܢܳܦܽܘܩܳܐ ܐܰܝܟ ܕܰܐܠܶܦ ܐܶܘܢܓܶܠܝܽܘܢ ܚܠܺܝܡܳܐ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܠܰܗܳܐ ܫܰܪܺܝܪܳܐ: ܥܳܒܽܘܕܳܐ ܘܝܳܨܽܘܦܳܐ ܘܰܡܢܰܛܪܳܢܳܐ ܗ̇ܰܘ ܕܡ̣ܶܢ ܟܶܢ̈ܫܶܐ ܕܢܽܘܪܳܐ ܘܪܽܘܚܳܐ ܡܶܫܬܰܡܰܫ ܒܰܐܬܪܶܗ ܡܥܰܠܝܳܐ: ܘܡ̣ܶܢ ܟܽܠܗܶܝܢ ܒܶܪ̈ܝܳܬܳܐ ܕܬܰܩܶܢ ܒܫܽܘܠܛܳܢ ܝܳܬܶܗ: ܕܠܶܗ ܚܢܰܢ ܢܫܰܒܰܚ ܘܰܢܩܰܠܶܣ ܠܐܴ ܡܶܬܦܰܣܩܳܢܳܐܺܝܬ ܘܰܒܦܽܘ̈ܡܶܐ ܘܠܶܫ̈ܳܢܶܐ ܐܺܝܡ̈ܳܡܶܐ ܘܠܰܝܠܰܘ̈ܳܬܳܐ ܠܐܴ ܫܳܬܽܘܩܳܐܺܝܬ: ܒܗܳܢܳܐ܀

ܣܕܪܐ

ܐܠܰܗܳܐ ܡܶܠܬܳܐ ܕܡ̣ܶܢ ܐܰܒܳܐ ܓܢܺܝܙܳܐ ܘܰܕܠܐܴ ܪܶܕܝܳܐ ܡܬܽܘܡܳܝܳܐܺܝܬ ܗ̇ܰܘ ܕܠܰܝܬ ܗܰܘܢܳܐ ܕܡܶܣܬܰܟܰܠ ܕܰܐܝܟܰܢ ܝܺܠܺܝܕ ܐܰܢ̱ܬ. ܐܰܢ̱ܬ ܕܺܐܝܬܰܝܟ ܒܪܰܒܽܘܬܳܐ ܘܰܫܒܺܝܚܽܘܬܳܐ ܥܰܡ ܪܽܘܚܳܟ ܩܰܕܺܝܫܳܐ: ܘܰܒ̣ܪܰܝܬ ܠܐܴܕܳܡ ܒܨܰܠܡܳܟ ܘܒܰܕܡܽܘܬܳܟ ܘܣܳܡ̣ܬܳܝܗܝ ܒܦܰܪܕܰܝܣܳܐ ܕܛܽܘ̈ܒܶܐ ܡܳܪܳܢܳܐܺܝܬ. ܘܟܰܕ ܥܒ̣ܰܪ ܥܰܠ ܦܽܘܩܕܳܢܳܟ ܐܶܫܬܠܶܡ ܠܰܚܛܺܝܬܳܐ ܘܶܐܬܥܰܒܕܰܕ ܠܒܺܝܫܳܐ ܘܰܠܡܰܘܬܳܐ: ܘܟܰܕ ܨܒ̣ܰܝܬ ܡ̣ܶܢ ܓܰܘ ܫܝܽܘܠ ܚܳܛܽܘܦܬܳܐ ܕܕܳܪ̈ܶܐ ܘܫܰܪ̈ܒܳܬܳܐ ܠܶܗ ܬܶܩܪܶܐ ܘܰܬܩܺܝܡ ܒܛܰܝܒܽܘܬܳܟ: ܘܰܠܪܰܘܡܳܐ ܕܡܶܢܶܗ ܢܦ̣ܰܠ ܬܥܰܠܐܷ ܠܨܰܠܡܳܐ ܕܺܝܠܳܟ ܗ̇ܰܘ ܡܰܠܟܳܝܳܐ ܕܶܐܬܚܰܒܰܠ ܕܳܘܝܳܐܺܝܬ ܟܰܕ ܒܫܽܘܪܳܝ ܡܕܰܒܪܳܢܽܘܬܳܟ ܕܨܶܝܕ ܓܶܢܣܰܢ ܚܰܘܺܝܬ ܠܰܢ ܐܰܢ̱ܬ ܒܰܪܢܳܫܳܐ ܡܫܰܡܠܝܳܐ: ܟܰܕ ܡ̣ܶܢ ܗ̇ܳܝ ܕܺܐܝܬܰܝܟ ܐܠܰܗܳܐ ܐܶܠܐܴ ܐܰܪܚ̣ܶܩܬ ܐܰܘ ܫܰܢܺܝܬ: ܟܰܕ ܫ̣ܰܕܰܪܬ ܠܓܰܒܪܺܐܶܝܠ ܪܺܝܫ ܡܰܠܐܱܟ̈ܶܐ ܕܡ̣ܶܢ ܣܶܕܪ̈ܶܐ ܕܓܰܘܙܰܠܬܳܐ ܘܰܠܡܰܪܝܰܡ ܣܰܒܰܪ ܕܡܶܢܶܟܝ ܕܳܢܰܚ̇ ܒܰܒܪܺܝܬܳܐ ܦܳܪܽܘܩܳܐ: ܘܟܰܕ ܠܡܽܘܟܳܟܳܟ ܕܒܰܡܥܰܪܬܳܐ ܕܒܶܝܬܠܚܶܡ ܙܥܽܘܪܬܳܐ ܐܶܬܺܝܠܶܕܬ: ܘܰܐܙܺܝܥܬ ܠܡܰܠܐܱܟ̈ܶܐ ܕܰܢܫܰܒܚܽܘܢ ܠܳܟ: ܘܟܰܕ ܒܽܐܘܪܝܳܐ ܕܚܰܝܘ̈ܳܬܳܐ ܐܰܢ̱ܬ ܠܳܟ ܐܰܓܶܣ̣ܬ: ܘܠܰܒܪܺܝܬܳܐ ܠܳܗ̇ ܢܰܓܕܬܳܗ̇ ܠܣܶܓܕܬܳܟ: ܘܟܰܕ ܥܰܡ ܩܽܘܪ̈ܒܳܢܶܐ ܠܗܰܝܟܠܐܴ ܐܶܬܩܰܪܰܒ̣ܬ ܥܰܠ ܐܺܝ̈ܕܰܝ ܣܳܒܳܐ ܫܶܡܥܽܘܢ ܐܶܬܛܥܶܢ̣ܬ: ܐܰܝܟܰܢܳܐ ܕܰܠܢܳܡܽܘܣܳܐ ܡܽܘܫܳܝܳܐ ܬܫܰܡܠܐܷ ܘܡ̣ܶܢ ܚܰܝ̈ܶܐ ܕܙܰܒܢܳܐ ܐܰܓܗܺܝܬܳܝܗܝ ܥܰܠ ܕܶܐܬܟܰܫܰܦ ܠܳܟ: ܘܟܰܕ ܠܘܳܬ ܝܽܘܚܰܢܳܢ ܠܝܽܘܪܕܢܳܢ ܐܶܬܰܝܬ ܘܰܐܒܳܐ ܘܪܽܘܚܳܐ ܣܗܶܕܘ ܥܠܰܝܟ ܕܒܰܪ ܟܝܳܢܗܽܘܢ ܐܺܝܬܰܝܟ: ܘܟܰܕ ܕܶܝܢ ܨܰܘܡܳܐ ܐܰܪܒܥܺܝܢܳܝܳܐ ܥܠܰܝܟ ܩܰܒ̣ܶܠܬ. ܘܡ̣ܶܢ ܡܪܰܡܝܳܢܳܐ ܐܶܬܢܰܣܺܝܬ ܘܰܣܚ̣ܰܦܬܳܝܗܝ ܠܒܶܣܬܪܳܟ: ܘܙܳܟܽܘܬܳܐ ܝܰܗ̣ܒܬ ܠܒܰܪܢܳܫܳܐ ܥܰܠ ܨܶܢܥ̈ܳܬܶܗ. ܘܟܰܕ ܠܐܘܪܫܠܶܡ ܥܰܠ ܥܺܝܠܐܴ ܫܺܝܛܳܐ ܥܳܐܶܠ ܗ̣ܘܰܝܬ: ܘܰܦܬܰܚ̣ܬ ܠܳܟ ܦܽܘܡܳܐ ܕܫܰܒܪ̈ܶܐ ܕܢܶܩܥܽܘܢ ܠܳܟ ܫܽܘܒܚܳܐ ܡܰܠܟܶܗ ܕܺܐܝܣܪܳܐܶܝܠ: ܘܟܰܕ ܚܰܫ̣ܬ ܒܒܽܘܪܢܳܫܳܟ ܚܠܳܦܰܝܢ: ܘܚܰܠܐܴ ܘܰܡܪܳܪ̈ܶܐ ܩܰܒ̣ܶܠܬ: ܬܰܥܒܰܪ ܡ̣ܶܢ ܐܰܦܰܝ̈ܢ. ܘܟܰܕ ܐܶܬܕܩ̣ܰܪܬ ܒܕܰܦܢܳܟ ܒܠܽܘܟܳܝܬܳܐ: ܘܰܪܕܰܘ ܡܶܢܳܟ ܕܡܳܐ ܘܡܰܝ̈ܳܐ: ܐܰܝܟܰܢܳܐ ܕܦܰܓܪܳܟ ܘܰܕܡܳܟ ܒܰܙܩܺܝܦܳܐ ܒܨܶܒܝܳܢܳܟ ܘܰܐܫܠ̣ܶܡܬ ܢܰܦܫܳܟ ܒܺܐܝ̈ܕܰܝ ܐܰܒܽܘܟ: ܘܰܒܗ̇ܳܝ ܫܳܥܬܳܐ ܠܡܺܝ̈ܬܶܐ ܐܰܩܺܝܡܬ: ܘܥܰܠ̣ܘ ܠܐܘܪܫܠܶܡ ܘܶܐܬܚܙܺܝܘ ܕܶܝܢ ܠܣܰܓܺܝ̈ܶܐܐ: ܘܟܰܕ ܠܒܶܝܬ ܡܺܝ̈ܬܶܐ ܢܚ̣ܶܬܬ ܘܰܒܡܶܢܝܳܢܳܐ ܕܰܩܒܺܝܪ̈ܶܐ ܐܶܬܡܢܺܝܬ: ܘܡ̣ܶܢ ܝܰܘܣܶܦ ܘܢܺܝܩܳܘܕܺܝܡܳܘܣ ܐܶܬܥܰܦܺܝܬ ܘܰܬܠܳܬܳܐ ܝܰܘ̈ܡܺܝܢ ܒܰܫܝܽܘܠ ܟ̣ܰܬܰܪܬ: ܘܢܽܘܚܳܡܳܐ ܘܚܰܝ̈ܶܐ ܠܰܫܟܺܝ̣̈ܒܶܐ ܐܰܟ̣ܪܶܙܬ: ܘܰܒܫܽܘܒܚܳܐ ܪܰܒܳܐ ܩܳܡ̣ܬ ܡ̣ܶܢ ܩܰܒܪܳܐ ܕܠܐܴ ܡܶܬܚܰܒܠܳܢܽܘܬܳܐ: ܘܰܠܬܰܠܡܺܝ̈ܕܶܐ ܕܺܝܠܳܟ ܐܰܦ̣ܨܰܚܬ:ܘܰܠܢܶܫ̈ܶܐ ܗ̇ܳܢܶܝܢ ܕܰܢܦܰܩ̣̈ܝ ܕܰܢܒܰܣ̈ܡܳܢ ܦܰܓܪܳܟ ܝܰܩܺܝܪܳܐ ܒܬܶܗܪܳܐ ܪܰܒܳܐ ܘܕܽܘܡܳܪܳܐ ܐܰܩܺܝܡܬ. ܘܟܰܕ ܒܫܽܘܒܚܳܐ ܪܰܒܳܐ ܠܰܫܡܰܝܳܐ ܣܠ̣ܶܩܬ: ܘܰܥܢܳܢܳܐ ܩܰܒܶܠܬܳܟ ܠܥܺܝܢ ܬܰܠܡܺܝ̈ܕܰܝܟ: ܘܪܽܘܚܳܐ ܩܰܕܺܝܫܳܐ ܫ̣ܰܕܰܪܬ ܠܗܽܘܢ ܘܚܰܟܶܡ̣ܬ ܐܶܢܽܘܢ: ܘܗܳܠܶܝܢ ܟܽܠܗܶܝܢ ܐ̱ܢܳܫܳܝ̈ܳܬܳܐ ܘܰܐܠܳܗܳܝ̈ܳܬܳܐ ܡܶܛܽܠܳܬܰܢ ܣܥ̣ܰܪܬ: ܘܶܐܬܥܰܗܕ ܡܳܪܝܳܐ ܒܥܶܕܳܢܳܐ ܕܡܶܬܕܰܟܪܳܢܽܘܬܳܐ ܗܳܕܶܐ ܚܠܳܦܰܝܢ ܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܰܫܟ̣ܶܒܘ ܥܰܠ ܣܰܒܪܳܟ: ܘܠܐܴ ܬܶܥܽܘܠ ܠܕܺܝܢܳܐ ܥܰܡܗܽܘܢ ܡܶܛܽܠ ܕܒܳܟ ܥܡ̣ܰܕܘ: ܘܦܰܓܪܳܟ ܘܰܕܡܳܟ ܐܶܟ̣ܰܠܘ: ܘܢܺܝܪܳܟ ܩܰܠܺܝܠܐܴ ܐܳܦ ܒܰܣܺܝܡܳܐ ܥܰܠ ܨܰܘܪ̈ܰܝܗܽܘܢ ܛܥ̣ܶܢܘ: ܘܰܒܢܳܡܽܘ̈ܣܰܝܟ ܡܳܪ̈ܳܢܳܝܶܐ ܘܡܰܐܚܝ̈ܳܢܶܐ ܠܰܝ̈ܠܰܝ ܐܺܝܡܳܡ ܐܶܬܗܰܓܺܝܘ: ܠܰܪ̈ܓܺܝܓܳܬܳܐ ܥܳܒܽܘܪ̈ܝܳܬܳܐ ܢܽܘܟܪ̈ܳܝܶܐ ܗ̣ܘܰܘ: ܩܰܒܶܠ ܡܳܪܝ ܒܳܥܽܘܬܳܐ ܕܺܝܠܰܢ ܕܰܚܠܳܦܰܝܗܽܘܢ ܠܳܟ ܡܩܰܪܒܺܝܢܰܢ: ܐܶܬܪܰܥܳܐ ܠܗܽܘܢ ܚܰܢܳܢܳܐ ܘܚܰܣܳܐ ܫܳܪ̈ܥܳܬܗܽܘܢ: ܐܳܘ ܡܪܰܚܡܳܢܳܐ ܐܰܥܒܰܪ ܘܰܠܚܺܝ ܣܰܟܠܘ̈ܳܬܗܽܘܢ ܐܳܘ ܚܰܝܽܘܣܬܳܢܳܐ. ܒܰܨܠܰܘ̈ܳܬܳܐ ܕܰܢܒܺܝܷ̈ܐ ܘܕܰܫܠܺܝ̈ܚܶܐ ܘܟܺܐܢ̈ܶܐ ܘܟܳܗ̈ܢܶܐ ܘܰܐܒܳܗ̈ܳܬܳܐ: ܘܣܳܗ̈ܕܶܐ: ܘܡܰܘ̈ܕܝܳܢܶܐ: ܘܡܰܠܦܳܢ̈ܶܐ ܒܚܺܝܪ̈ܶܐ ܘܪ̈ܺܝܫܰܝ ܥܺܕ̈ܳܬܳܐ ܘܕܰܝܪ̈ܳܬܳܐ: ܘܒܰܨܠܰܘ̈ܳܬܳܐ ܕܰܡܒܰܪܰܟܬܳܐ ܗ̇ܳܝ ܕܟܺܝܬܳܐ ܒܢ̈ܶܫܶܐ ܕܺܝܠܶܕܬܳܟ ܒܰܒܬܽܘܠܽܘܬܳܗ̇ ܒܬܽܘܠܬܳܐ ܡܰܪܝܰܡ ܡܰܠܝܰܬ݀ ܫܽܘܦܪ̈ܶܐ ܕܩܰܕܺܝܫܽܘܬܳܐ: ܘܟܽܠܰܢ ܫܰܘܝܳܐܺܝܬ ܢܶܫܬܘܶܐ ܕܢܶܦܓܰܥ ܒܳܟ ܒܰܐܦ̈ܶܐ ܓܰܠܝ̈ܳܬܳܐ ܟܰܕ ܢܰܗܺܝܪ̈ܺܝܢ ܫܪ̈ܳܓܰܝܢ: ܘܕܳܠܩܺܝܢ ܠܰܡܦܺܐܕܰܝ̈ܢ ܒܡܶܫܚܳܐ ܕܙܰܕܺܝܩܽܘܬܳܐ: ܘܠܐܴ ܢܶܫܡܰܥ ܡܶܢܳܟ ܩ̈ܳܠܐܷ ܙܥܺܝ̣̈ܦܶܐ ܘܡܰܪܺܝܪ̈ܶܐ ܕܰܡܠܶܝܢ ܘܳܝ̈ܶܐ ܘܬܶܐܢ̈ܚܳܬܳܐ ܕܙܶܠܘ ܠܟܽܘܢ ܡܶܢܝ ܠܺܝ̣̈ܛܶܐ ܠܢܽܘܪܳܐ ܠܐܴ ܝܳܕܰܥ ܐ̱ܢܳܐ ܠܟܽܘܢ: ܐܶܠܐܴ ܐܰܫܡܰܥ ܠܰܢ ܒܰܪܬ݀ ܩܳܠܳܟ ܡܚܰܕܝܳܢܺܝܬܳܐ ܕܳܐܡܪܳܐ ܠܰܢ ܘܰܠܥܰܢܺܝ̈ܕܰܝܢ ܬܰܘ ܒܪ̈ܺܝܟܰܘܗܝ ܕܳܐܒܝ ܝܺܪܰܬܘ ܡܰܠܟܽܘܬܳܐ: ܘܰܚܢܰܢ ܘܥܰܢܺܝ̈ܕܰܝܢ ܫܰܘܝܳܐܺܝܬ ܢܶܥܽܘܠ ܠܰܓܢܽܘܢܳܟ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܦܪܘܡܝܘܢ ܕܬܠܬܫܥܝ̈ܢ

 

ܬܶܫܒܽܘܚܬܳܐ: ܠܗ̇ܰܘ ܪܺܝܫܳܐ ܕܚܰܝ̈ܶܐ ܘܡܳܪܳܐ ܕܡܺܝ̈ܬܶܐ ܕܰܒܨܶܒܝܳܢܶܗ ܛܥ̣ܶܡ ܡܰܘܬܳܐ ܚܠܳܦ ܥܰܒ̣ܕܶܗ ܕܰܐܣܟܶܠ ܒܶܝܬ ܐܺܝܠܳܢ̈ܶܐ: ܠܗ̇ܰܘ ܣܰܒܪܳܐ ܫܰܪܺܝܪܳܐ ܕܠܶܗ ܣܰܟܝܘ ܟܺܐܢ̈ܶܐ ܘܙܰܕܺܝ̈ܩܶܐ: ܘܰܠܣܽܘܟܳܝܳܐ ܕܺܝܠܗܽܘܢ ܓܡ̣ܰܪ ܘܰܣܥ̣ܰܪ ܐܶܢܽܘܢ ܒܓܰܘ ܩܰܒܪ̈ܰܝܗܽܘܢ ܘܪܰܣ̣ ܛܰܐܠܐܴ ܕܪ̈ܰܚܡܶܐ ܘܕܰܚܢܳܢܳܐ ܥܰܠ ܓܰܪ̈ܡܰܝܗܽܘܢ ܠܗ̇ܰܘ ܕܺܐܝܬܰܘܗܝ ܢܽܘܚܳܡܳܐ ܕܚܰܝ̈ܶܐ: ܕܰܒܢܽܘܚܳܡܳܐ ܢܰܚܶܡ ܠܰܫܟܺܝ̣̈ܒܶܐ ܘܰܒܩܳܠܶܗ ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ ܡ̣ܶܢ ܩܰܒܪ̈ܰܝܗܽܘܢ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܕܪܐ

ܡܳܪܝܳܐ ܐܠܰܗܳܐ ܡܪܰܚܡܳܢܳܐ ܓܳܒܽܘܠܶܗ ܕܒܰܪܢܳܫܳܐ ܩܰܕܡܳܝܳܐ ܘܢܳܨܽܘܒܶܗ ܕܦܰܪܕܰܝܣܳܐ ܘܕܺܐܝܠܳܢܳܐ ܥܕܶܢܳܝܳܐ. ܗ̇ܰܘ ܕܰܒܨܰܠܡܶܗ ܡܰܠܟܳܝܳܐ ܝܰܩܰܪ ܠܰܟܝܳܢܳܐ ܛܺܝܢܳܝܳܐ: ܘܟܰܕ ܣܥ̣ܳܐ ܥܰܠ ܦܽܘܩܕܳܢܳܐ ܗ̇ܰܘ ܐܠܰܗܳܝܳܐ: ܢܦ̣ܰܠ ܡ̣ܶܢ ܪܰܘܡܳܐ ܥܶܠܳܝܳܐ ܘܩܰܕܺܝ ܥܰܡܠܐܴ ܕܽܘܥܬܳܢܳܝܳܐ ܘܶܐܬܬܰܫܠܰܡ ܒܺܐܝ̈ܕܰܝ ܒܥܶܠܕ̈ܒܳܒܶܐ ܡܰܪܺܝܪ̈ܶܐ ܣܳܢ̈ܶܐܐ ܕܓܶܢܣܳܐ ܐ̱ܢܳܫܳܝܳܐ ܘܰܒܪܶܚܡܰܬ݀ ܚܽܘܒܶܗ ܐܺܝܬܝܳܝܳܐ: ܐܶܫܬܠܰܚ ܡ̣ܶܢ ܥܽܘܒܳܐ ܐܰܒܳܗܳܝܳܐ: ܘܰܫܪܳܐ ܒܡܰܪܒܥܳܐ ܒܬܽܘܠܳܝܳܐ ܘܰܢܛܰܪ ܒܡܰܘܠܳܕܶܗ ܠܛܰܒ̈ܥܶܐ ܕܝܳܠܶܕܬܶܗ ܒܪܶܡܙܳܐ ܡܳܪܳܢܳܝܳܐ: ܐܶܬܳܐ ܠܣܽܘܪܳܩܳܐ ܨܶܒܝܳܢܳܝܳܐ. ܘܰܠܨܰܠܡܶܗ ܦ̣ܪܰܩ: ܘܫܰܘܙܶܒ ܡ̣ܶܢ ܢܺܝܪܳܐ ܚܛܺܝܬܳܢܳܝܳܐ: ܗ̣ܘܳܐ ܟܳܗܢܳܐ ܘܪܺܝܫ ܟܳܗ̈ܢܶܐ ܕܕܽܘܒܳܪܳܐ ܢܫܰܡܠܐܷ ܐܶܘܢܓܶܠܳܝܳܐ: ܘܰܠܫܶܡܥܽܘܢ ܪܺܝܫ ܬܰܠܡܺܝ̈ܕܶܐ ܐܰܥܓܶܠ ܘܥܰܒܕܶܗ ܪܺܝܫܳܐ ܘܩܰܕܡܳܝܳܐ: ܘܗܳܢܳܐ ܛܽܘܦܣܳܐ ܗܳܐ ܡܶܬܝܰܒܰܠ ܒܥܺܕ̈ܳܬܳܐ ܘܕܰܝܪ̈ܳܬܳܐ ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ: ܘܥܰܠ ܗܳܕܶܐ ܒܳܥܶܝܢܰܢ ܡ̣ܶܢ ܝܰܡܳܐ ܫܦܺܝܥܳܐ ܕܥܽܘܡܩܳܐ ܪܰܒܳܐ ܕܰܚܢܳܢܳܟ ܡܳܪܝܳܐ: ܕܰܠܟܳܗ̈ܢܶܐ ܗ̇ܳܢܽܘܢ ܕܫܰܡܫܽܘܟ ܒܥܳܠܡܳܐ ܗܳܢܳܐ ܪܺܝܩܳܢܳܝܳܐ ܘܰܒܓܰܘ ܒܶܝܬ ܩܽܘܕܫܳܐ ܐܰܪܥܳܢܳܝܳܐ ܐܰܝܟܰܢܳܐ ܕܬܰܫܘܶܐ ܐܶܢܽܘܢ ܕܰܒܡܰܕܒܚܳܐ ܗ̇ܰܘ ܠܐܴ ܥܒܺܝܕ ܒܺܐܝ̈ܕܰܝܳܐ ܢܫܰܡܫܽܘܢܳܟ ܘܰܒܩܺܝ̣̈ܢܳܬܳܐ ܚܰܠܝ̈ܳܬܳܐ ܕܺܝܠܗܽܘܢ ܙܰܝܚܽܘܟ. ܐܰܫܘܳܐ ܐܶܢܽܘܢ ܕܰܢܙܰܝܚܽܘܢ ܠܰܫܡܳܟ ܒܚܰܓܳܐ ܗ̇ܰܘ ܪܽܘܚܳܢܳܝܳܐ: ܘܠܐܱܝܠܶܝܢ ܕܰܐܘܕܝܽܘܟ ܐܠܰܗܳܐ ܫܰܪܺܝܪܳܐ ܩܕܳܡ ܥܰܡܳܐ ܚܰܢܦܳܝܳܐ: ܕܬܰܘܕܶܐ ܒܗܽܘܢ ܩܕܳܡ ܐܰܒܽܘܟ ܗ̇ܰܘ ܡܬܽܘܡܳܝܳܐ ܘܰܩܕܳܡ ܡܰܠܐܱܟܰܝ̈ܟ ܩܰܕܺܝ̈ܫܶܐ ܘܰܠܗ̇ܳܢܽܘܢ ܕܕܰܝܰܪܘ ܒܓܰܘ ܕܳܪ̈ܳܬܳܟ ܟܳܗܢ̈ܳܝܳܬܳܐ ܢܕܰܝܪܽܘܢ ܥܰܡ ܩܰܘܡܳܐ ܡܰܠܐܱܟܳܝܳܐ ܘܪܽܘܚܳܢܳܝܳܐ ܘܰܠܗ̇ܳܢܽܘܢ ܕܠܰܒܫܽܘܟ ܒܰܥܡܳܕܳܐ ܐܠܰܗܳܝܳܐ: ܐܠܰܒܫܶ ܐܶܢܽܘܢ ܐܶܣܛܠܐܴ ܪܽܘܚܳܢܳܝܬܳܐ: ܘܠܐܱܝܠܶܝܢ ܕܗܰܠܠܽܘܟ ܒܠܶܒܳܐ ܫܰܦܝܳܐ ܢܗܰܠܠܽܘܢ ܠܳܟ ܒܡܰܠܟܽܘܬܳܐ ܥܰܡ ܙܡܺܝ̣̈ܢܶܐ ܒܰܓܢܽܘܢܳܐ ܗ̇ܰܘ ܡܬܽܘܡܳܝܳܐ ܘܰܠܗ̇ܳܢܽܘܢ ܕܰܛܥ̣ܶܢܘ ܠܰܫܡܳܟ ܩܰܕܺܝܫܳܐ ܩܕܳܡ ܥܰܡ̈ܡܶܐ ܘܡܰܠܟ̈ܶܐ ܘܰܒܢܰܝ̈ܳܐ ܕܺܐܝܣܪܳܐܶܝܠ. ܕܠܐܴ ܬܶܛܥܶܐ ܠܚܰܫܳܐ ܘܽܐܘܠܨܳܢ̈ܶܐ ܕܣܰܝܒ̣ܰܪܬ ܒܪܶܚܡܰܬ݀ ܐ̱ܢܳܫܽܘܬܳܟ ܡܳܪܝܳܐ ܐܠܰܗܳܐ: ܘܠܐܱܝܠܶܝܢ ܕܰܙܩ̣ܰܦܘ ܢܰܦ̈ܫܳܬܗܽܘܢ ܠܰܪ̈ܓܺܝܓܳܬܳܐ ܥܳܠܡܳܢܳܝ̈ܳܬܳܐ ܘܠܐܱܝܠܶܝܢ ܕܡܺܝܬܘ ܒܰܐܟܣܶܢܝܳܐ ܘܰܒܛܽܘܪ̈ܳܦܶܐ ܫܰܠ̣ܶܡܘ ܚܰܝܰܝ̈ܗܽܘܢ ܡܶܛܽܠ ܫܡܳܟ ܩܰܕܺܝܫܳܐ: ܕܰܠܗ̇ܰܘ ܝܺܚܺܝܕܳܝܳܐ ܡܶܠܬܳܐ ܐܠܰܗܳܐ ܐܰܚ̈ܶܐ ܫܰܪܺܝܪ̈ܶܐ ܢܶܗܘܽܘܢ ܒܥܳܠܡܳܐ ܡܬܽܘܡܳܝܳܐ: ܘܰܡܦܺܝܣܺܝܢܰܢ ܠܳܟ ܒܪܳܐ ܡܶܠܬܳܐ ܝܺܚܺܝܕܳܝܳܐ ܕܡ̣ܶܢ ܐܰܒܳܐ: ܚܠܳܦ ܥܰܒܕܰܝ̈ܟ ܐܰܝܠܶܝܢ ܕܰܫܟ̣ܶܒܘ ܒܰܬܪܺܝܨܽܘܬ ܫܽܘܒܚܳܐ ܕܰܬܦܰܨܶܐ ܐܶܢܽܘܢ ܡ̣ܶܢ ܚܶܫܽܘܟܳܐ ܒܰܪܳܝܳܐ. ܘܡܶܢ ܩܳܠܐܴ ܡܰܪܺܝܪܳܐ ܘܰܡܠܐܷ ܘܳܝ̈ܶܐ. ܘܰܐܫܘܳܐ ܒܛܰܝܒܽܘܬܳܟ ܡܳܪܝܳܐ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܠܓܰܒܳܐ ܝܰܡܺܝܢܳܝܳܐ: ܘܰܠܕܰܘܨܳܐ ܡܰܠܐܱܟܳܝܳܐ. ܘܰܡܠܐܷ ܢܽܘܗܪܳܐ ܚܕܳܢܳܝܳܐ: ܘܟܽܠܰܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܡ ܘܫܘܒܚܐ ܠܐܠܗܐ ܕܠܐ ܫܠܡ