ܣܳܦܪܳܐ ܕܶܐܫܰܥܝܳܐ ܢܒܺܝܳܐ

ܩܶܦܰܠܶܐܘܳܢ: ܩܰܕܡܳܝܐ، ܩܶܦܰܠܶܐܘܳܢ: ܬܪܰܝܳܢܳܐ، ܩܶܦܰܠܶܐܘܳܢ: ܬܠܺܝܬܳܝܳܐ. ܩܶܦܰܠܶܐܘܳܢ: ܪܒܺܝܥܳܝܳܐ. ܩܶܦܰܠܶܐܘܳܢ: ܚܡܺܝܫܳܝܳܐ. ܩܶܦܰܠܶܐܘܳܢ: ܫܬܺܝܬܳܝܳܐ. ܩܶܦܰܠܶܐܘܳܢ: ܫܒܺܝܥܳܝܳܐ. ܩܶܦܰܠܶܐܘܳܢ: ܬܡܺܝܢܳܝܳܐ. ܩܶܦܰܠܶܐܘܳܢ: ܬܫܺܝܥܳܝܳܐ. ܩܶܦܰܠܶܐܘܳܢ: ܥܣܺܝܪܳܝܳܐ.

ܩܶܦܰܠܶܐܘܳܢ: ܝܐ. ܩܶܦܰܠܶܐܘܳܢ: ܝܒ. ܩܶܦܰܠܶܐܘܳܢ: ܝܓ. ܩܶܦܰܠܶܐܘܳܢ: ܝܕ. ܩܶܦܰܠܶܐܘܳܢ: ܝܗ. ܩܶܦܰܠܶܐܘܳܢ: ܝܘ. ܩܶܦܰܠܶܐܘܳܢ: ܝܙ. ܩܶܦܰܠܶܐܘܳܢ: ܝܚ. ܩܶܦܰܠܶܐܘܳܢ: ܝܛ. ܩܶܦܰܠܶܐܘܳܢ: ܟܟ.

ܩܶܦܰܠܶܐܘܳܢ: ܟܐ. ܩܶܦܰܠܶܐܘܳܢ: ܟܒ. ܩܶܦܰܠܶܐܘܳܢ: ܟܓ. ܩܶܦܰܠܶܐܘܳܢ: ܟܕ. ܩܶܦܰܠܶܐܘܳܢ: ܟܗ. ܩܶܦܰܠܶܐܘܳܢ: ܟܘ. ܩܶܦܰܠܶܐܘܳܢ: ܟܙ. ܩܶܦܰܠܶܐܘܳܢ: ܟܚ. ܩܶܦܰܠܶܐܘܳܢ: ܟܛ. ܩܶܦܰܠܶܐܘܳܢ: ܠ

ܩܶܦܰܠܶܐܘܳܢ: ܠܐ ܩܶܦܰܠܶܐܘܳܢ: ܠܒ ܩܶܦܰܠܶܐܘܳܢ: ܠܓ ܩܶܦܰܠܶܐܘܳܢ: ܠܕ ܩܶܦܰܠܶܐܘܳܢ: ܠܗ ܩܶܦܰܠܶܐܘܳܢ: ܠܘ ܩܶܦܰܠܶܐܘܳܢ: ܠܙ ܩܶܦܰܠܶܐܘܳܢ: ܠܚ ܩܶܦܰܠܶܐܘܳܢ: ܠܛ ܩܶܦܰܠܶܐܘܳܢ: ܡ

ܩܶܦܰܠܶܐܘܳܢ: ܡܐ ܩܶܦܰܠܶܐܘܳܢ: ܡܒ ܩܶܦܰܠܶܐܘܳܢ: ܡܓ ܩܶܦܰܠܶܐܘܳܢ: ܡܕ ܩܶܦܰܠܶܐܘܳܢ: ܡܗ ܩܶܦܰܠܶܐܘܳܢ: ܡܘ ܩܶܦܰܠܶܐܘܳܢ: ܡܙ ܩܶܦܰܠܶܐܘܳܢ: ܡܚ ܩܶܦܰܠܶܐܘܳܢ: ܡܛ ܩܶܦܰܠܶܐܘܳܢ: ܢܢ

ܩܶܦܰܠܶܐܘܳܢ: ܢܐ ܩܶܦܰܠܶܐܘܳܢ: ܢܒ ܩܶܦܰܠܶܐܘܳܢ: ܢܓ ܩܶܦܰܠܶܐܘܳܢ: ܢܕ ܩܶܦܰܠܶܐܘܳܢ: ܢܗ ܩܶܦܰܠܶܐܘܳܢ: ܢܘ ܩܶܦܰܠܶܐܘܳܢ: ܢܙ ܩܶܦܰܠܶܐܘܳܢ: ܢܚ ܩܶܦܰܠܶܐܘܳܢ: ܢܛ ܩܶܦܰܠܶܐܘܳܢ: ܣ

ܩܶܦܰܠܶܐܘܳܢ: ܣܐ ܩܶܦܰܠܶܐܘܳܢ: ܣܒ ܩܶܦܰܠܶܐܘܳܢ: ܣܓ ܩܶܦܰܠܶܐܘܳܢ: ܣܕ ܩܶܦܰܠܶܐܘܳܢ: ܣܗ ܩܶܦܰܠܶܐܘܳܢ: ܣܘ

 

 

ܩܶܦܰܠܶܐܘܳܢ: ܩܰܕܡܳܝܳܐ

¹ ܚܶܙܘܳܐ ܕܶܐܫܰܥܝܳܐ ܒܰܪ ܐܰܡܽܘܨ: ܕܰܚ̣ܙܳܐ ܥܰܠ ܝܺܗܽܘܕ݂ܳܐ ܘܥܰܠ ܐܽܘܪܺܫܠܶܡ: ܒܝܰܘ̈ܡܰܝ ܥܽܘܙܺܝܳܐ: ܘܝܽܘܬ݂ܳܡ: ܘܳܐܚܳܙ: ܘܚܶܙܰܩܝܳܐ: ܡܰܠ̈ܟ݁ܶܐ ܕܺܝܗܽܘܕ݂ܳܐ. ² ܫܡܰܥܘ ܫܡܰܝܳܐ: ܘܨܽܘܬ݂ܝ ܐܰܪܥܳܐ: ܡܶܛܽܠ ܕܡܳܪܝܳܐ ܡܰܠܶܠ: ܒܢܰܝ̈ܳܐ ܪܰܒܺܝ݀ܬ݂ ܘܪܰܡܪܡܶܬ݂: ܘܗܶܢܽܘܢ ܐܰܥܠܺܝܘ ܒܺܝ. ³ ܝܺܕܰܥ ܬܰܘܪܳܐ ܩܰܢܝܶܗ: ܘܰܚܡܳܪܳܐ ܐܽܘܪܝܳܐ ܕܡܳܪܶܗ. ܘܺܝܣܪܳܐܶܝܠ ܠܳܐ ܝܺܕܰܥ: ܘܥܰܡܝ ܠܳܐ ܐܶܣܬܰܟܰܠ. ⁴ ܘܳܝ ܠܥܰܡܳܐ ܚܰܛܳܝܳܐ: ܥܰܡܳܐ ܥܰܫܺܝܢ ܥܰܘܳܠܳܐ: ܙܰܪܥܳܐ ܡܰܒܐܫܳܢܳܐ. ܒܢܰܝ̈ܳܐ ܡܚܰܒ݁̈ܠܶܐ: ܫܒܰܩܬ݁ܽܘܢ ܠܡܳܪܝܳܐ: ܘܰܐܪܓ݁ܶܙܬ݁ܽܘܢ ܠܩܰܕ݁ܺܝܫܳܐ ܕܺܝܣܪܳܐܶܝܠ: ܘܰܗܦܰܟ݂ܬܽܘܢ ܠܒܶܣܬܰܪܟ݂ܽܘܢ. ⁵ ܠܡܳܢܳܐ ܬܽܘܒ ܬܶܒܠܥܽܘܢ: ܘܬ݂ܰܘܣܦܽܘܢ ܠܡܶܬ݂ܪܕ݂ܳܝܽܘ ܟܽܠ ܪܺܝܫ ܠܟܺܐܒܳܐ: ܘܟܽܠ ܠܶܒܳܐ ܠܟܰܪܝܽܘܬ݂ܳܐ. ⁶ ܡ̣ܶܢ ܦܰܣܬ݂ܳܐ ܕܪܶܓܠܳܐ ܘܰܥܕܰܡܳܐ ܠܡܽܘܚܳܐ: ܠܰܝܬ݁ ܒܶܗ ܕܽܘܟܬ݂ܳܐ ܕܫܰܪܺܝܪܳܐ. ܨܽܘ̈ܠܦܳܬ݂ܳܐ: ܘܫܽܘ̈ܡܳܬ݂ܳܐ: ܘܡܰܚ̈ܘܳܬ݂ܳܐ: ܕܰܥܒܰܝ̈ܳܐ. ܠܳܐ ܠܡܶܨܡܰܕ݂: ܘܠܳܐ ܠܡܶܥܨܰܒ: ܘܳܐܦ ܠܳܐ ܠܰܡܪܰܟܳܟܽܘ ܒܡܶܫܚܳܐ. ⁷ ܐܰܪܥܟ݂ܽܘܢ ܚܰܪܒܳܐ: ܘܩܽܘܖ̈ܝܰܟܽܘܢ ܝܳܩ̈ܕܳܢ ܒܢܽܘܪܳܐ. ܐܰܪܥܟ݂ܽܘܢ ܠܽܘܩܒܰܠܟ݂ܽܘܢ ܐܳܟ݂ܠܺܝܢ ܠܳܗ̇ ܢܽܘܟ݂ܖ̈ܳܝܶܐ. ܘܨܳܕ݂ܝܳܐ ܐܰܝܟ݂ ܗܦܺܝܟܬ݂ܳܐ ܕܢܽܘܟ݂ܖ̈ܳܝܶܐ. ⁸ ܘܶܐܫܬܰܚܪܰܬ݂ ܒܰܪܬ݂ ܨܶܗܝܽܘܢ: ܐܰܝܟ݂ ܡܛܰܠܬ݂ܳܐ ܒܟܰܪܡܳܐ: ܘܰܐܝܟ݂ ܥܰܪܙܶܠܳܐ ܒܡܰܩܛܝܳܐ: ܘܰܐܝܟ݂ ܡܕ݂ܺܝܢ̱ܬ݂ܳܐ ܚܒܺܝܫܬܳܐ. ⁹ ܘܶܐܠܽܘܠܳܐ ܡܳܪܝܳܐ ܨܒܰܐܬ݂ ܐܰܘܬܰܪ ܠܰܢ ܣܪܺܝܕ݂ܳܐ: ܐܰܝܟ݂ ܣܕ݂ܽܘܡ ܗܳܘܶܝܢ ܗ̱ܘܰܝܢ: ܘܰܠܥܳܡܽܘܪܳܐ ܡܶܬ݁ܕܰܡܶܝܢ ܗ̱ܘܰܝܢ. ¹⁰ ܫܡܰܥܘ ܦܶܬ݂ܓ݂ܳܡܶܗ ܕܡܳܪܝܳܐ: ܫܰܠܺܝ̈ܛܶܐ ܕܰܣܕ݂ܽܘܡ. ܘܨܽܘܬ݂ܘ ܢܳܡܽܘܣܶܗ ܕܰܐܠܳܗܰܢ ܥܰܡܳܐ ܕܥܳܡܽܘܪܳܐ. ¹¹ ܠܡܳܢܳܐ ܗܳܘܶܝܢ ܠܺܝ ܣܽܘܓ݂ܳܐܐ ܕܕܶܒܚܰܝ̈ܟܽܘܢ: ܐܳܡܰܪ ܡܳܪܝܳܐ. ܣܶܒܥܶ݀ܬ݂ ܥܠ̈ܰܘܳܬ݂ܳܐ ܕܕܶܟ݂ܖ̈ܶܐ: ܘܬܰܪܒܳܐ ܕܰܡܦܰܛܡ̈ܶܐ. ܘܰܕܡܳܐ ܕܬܰܘܖ̈ܶܐ: ܘܕܶܐܡܖ̈ܶܐ: ܘܕܰܓ̈ܕ݂ܰܝܳܐ: ܠܳܐ ܨܒܺܝ݀ܬ݂. ¹² ܟܰܕ݂ ܬܺܐܬ݂ܽܘܢ ܠܡܶܚܙܳܐ ܐܰܦܰܝ̈: ܡܰܢܽܘ ܒܥ̣ܳܐ ܗܳܠܶܝܢ ܡ̣ܶܢ ܐܺܝܕܰܝ̈ܟ݁ܽܘܢ ܠܰܡܕ݂ܳܫ ܕܳܖ̈ܰܝ. ¹³ ܠܳܐ ܬܰܘܣܦܽܘܢ ܠܡܰܝܬܳܝܽܘ ܠܺܝ ܩܽܘܪܒܳܢܳܐ ܣܖ̈ܺܝܩܶܐ: ܣܘܳܬ݂ܳܐ ܕܡܰܣܠܝܳܐ ܗ̱ܝ̣ ܠܺܝ: ܒܪܺܝܫ ܝܰܖ̈ܚܶܐ ܘܰܒܫܰܒ݁ܬ݂ܳܐ: ܟܳܢܫܺܝܢ ܐܢ̱ܬ݁ܽܘܢ ܟܢܽܘܫܝܳܐ. ܠܳܐ ܐܳܟܠ ܐ̱ܢܳܐ ܕܥܶܬܳܐ ܘܕܰܚܒܽܘܫܝܳܐ. ¹⁴ ܪܺܝܫ ܝܰܖ̈ܚܰܝܟ݁ܽܘܢ ܘܥܰܕ݂ܥܺܕܰܝ̈ܟ݁ܽܘܢ: ܣܢܳܬ݂ ܢܰܦܫܝ. ܗ̱ܘܰܘ ܥܠܰܝ ܠܺܝܩܰܪܬ݂ܳܐ. ܠܺܐܝܬ݂ ܠܡܶܫܩܰܠ. ¹⁵ ܟܰܕ݂ ܬܶܦܪܣܽܘܢ ܐܺܝܕܰܝ̈ܟܘܢ: ܐܰܗܡܶܐ ܥܰܝܢܰܝ̈ ܡܶܢܟ݂ܽܘܢ. ܘܳܐܦܶܢ ܬܰܣܓܽܘܢ ܨܠܽܘܬ݂ܳܐ: ܠܳܐ ܫܳܡܰܥ ܐ̱ܢܳܐ. ܐܺܝܕܰܝ̈ܟܽܘܢ ܡܰܠ̈ܝܳܢ ܕܡܳܐ. ¹⁶ : ܣܚܰܘ ܘܶܐܬ݁ܕܰܟܰܘ. ܘܰܐܥܒܰܪܘ ܒܺܝ̈ܫܳܬ݂ܳܐ ܕܰܥܒܕܰܝ̈ܟ݁ܽܘܢ ܡ̣ܶܢ ܩܕ݂ܳܡ ܥܰܝ̈ܢܰܝ. ¹⁷ ܫܠܰܘ ܡ̣ܶܢ ܒܺܝ̈ܫܳܬ݂ܳܐ: ܘܺܝܠܰܦܘ ܠܡܰܛܐܳܒܽܘ ܥܰܩܶܒܘ ܕܺܝܢܳܐ: ܘܰܐܛܐܶܒܘ ܠܰܛܠܺܝ̈ܡܶܐ. ܕܽܘܢܘ ܝܰܬ݂ܡ̈ܶܐ: ܘܕ݂ܽܘܢܘ ܐܰܖ̈ܡܠܳܬ݂ܳܐ. ¹⁸ ܘܬܰܘ ܢܡܰܠܶܠ ܥܰܡ ܚ̈ܕ݂ܳܕܶܐ: ܐܳܡܰܪ ܡܳܪܝܳܐ. ܘܶܐܢ ܢܶܗܘܽܘܢ ܚܛܳܗܰܝ̈ܟ݁ܽܘܢ ܐܰܝܟ݂ ܙܚܽܘܪܺܝܬ݂ܳܐ: ܐܰܝܟ݂ ܬܰܠܓܳܐ ܢܶܬ݂ܚܰܘܪܽܘܢ. ܘܶܐܢ ܢܶܣܡܩܽܘܢ ܐܰܝܟ݂ ܬܰܘܠܰܥܬ݂ܳܐ: ܐܰܝܟ݂ ܥܰܡܪܳܐ ܢܶܗܘܽܘܢ. ¹⁹ ܘܶܐܢ ܬܶܬ݁ܛܦܺܝܣܽܘܢ ܘܶܬܫܡܥܽܘܢܳܢܝ: ܛܽܘܒܳܗ̇ ܕܰܐܪܥܳܐ ܬܶܐܟ݂ܠܽܘܢ. ²⁰ ܘܶܐܢ ܠܳܐ ܬܶܬ݁ܛܦܺܝܣܽܘܢ ܘܬܶܬܚܪܽܘܢ: ܒܚܰܪܒܳܐ ܬܶܬܐܰܟ݂ܠܽܘܢ. ܦܽܘܡܶܗ ܕܡܳܪܝܳܐ ܡܰܠܶܠ. ²¹ ܐܰܝܟܰܢܳܐ ܗܘܳܬ݂ ܙܳܢܺܝܬ݂ܳܐ ܡܕ݂ܺܝܢ̱ܬܳܐ ܡܗܰܝܡܰܢܬܳܐ: ܕܡܰܠܝܳܐ ܗ̱ܘܳܬ݂ ܕܺܝܢܳܐ. ܘܙܰܕ݁ܺܝܩܽܘܬ݂ܳܐ ܒܳܬܰܬ݂ ܒܳܗ̇: ܘܗܳܫܳܐ ܩܳܛܽܘ̈ܠܶܐ. ²² ܟܶܣܦܶܟ݂ܝ ܐܶܣܬ݁ܠܺܝ. ܚܳܢ̈ܘܳܬܶܟܝ ܚܳܠܳܛܺܝܢ ܡܰܝ̈ܳܐ. ²³ ܪܰܘܖ̈ܒܳܢܰܝܟ݁ܝ ܡܳܪܽܘܕ݂ܺܝܢ. ܘܫܰܘ̈ܬܳܦܶܐ ܐܶܢܽܘܢ ܕܓܰܢܳܒ̈ܶܐ. ܟܽܠܗܽܘܢ ܪܳܚܡܺܝܢ ܫܽܘܚܕ݂ܳܐ. ܘܡܶܣܬܰܪܗܒܺܝܢ ܠܡܶܦܪܰܥ ܚܽܘ̈ܒܠܶܐ. ܠܝܬ݂ܰܡ̈ܶܐ ܠܳܐ ܕܳܝܢܺܝܢ: ܘܕ݂ܺܝܢܳܐ ܕܰܐܖ̈ܡܠܳܬ݂ܳܐ ܠܳܐ ܥܳܐܶܠ ܠܘܳܬ݂ܗܽܘܢ. ²⁴ ܡܶܛܽܠ ܗܳܢܳܐ ܗܳܟ݂ܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬ݂ܳܐ ܚܰܝܠܬ݂ܳܢܳܐ: ܥܰܫܺܝܢܳܐ ܕܺܝܣܪܳܐܶܝܠ: ܘܳܝ ܡܶܬ݂ܦܪܰܥ ܐ̱ܢܳܐ ܡ̣ܶܢ ܣܳܢ̈ܰܐܝ: ܘܡܶܬ݂ܢܰܩܰܡ ܐ̱ܢܳܐ ܡ̣ܶܢ ܒܥܶܠܕ݁ܒܳܒܰܝ̈. ²⁵ ܘܰܐܦܢܶܐ ܐܺܝܕ݂ܝ ܥܠܝܟ݁ܝ ܘܶܐܨܪܽܘܦ ܡܳܖ̈ܽܘܕܰܝܟ݁ܝ ܠܕܰܟ݂ܝܽܘ ܘܰܐܥܒܰܪ ܥܰܘ̈ܠܰܝܟܝ ܟܽܠܗܽܘܢ. ²⁶ ܘܰܐܩܺܝܡ ܕܰܝܳܢܰܝ̈ܟܝ ܐܰܝܟ݂ ܕܡ̣ܶܢ ܩܕ݂ܺܝܡ: ܘܡܳܠܽܘܟܰܝ̈ܟܝ ܐܰܝܟ݂ ܕܡ̣ܶܢ ܠܩܽܘܕ݂ܡܺܝܢ. ܘܒܳܬܰܪܟܶܢ ܬܶܬܩܪܶܝܢ ܡܕ݂ܺܝܢ̱ܬܳܐ ܕܙܰܕܺܝܩܽܘܬܳܐ: ܘܰܡܕ݂ܺܝܢ̱ܬܳܐ ܕܗܰܝܡܳܢܽܘܬܳܐ. ²⁷ ܨܶܗܝܽܘܢ ܒܕ݂ܺܝܢܳܐ ܬܶܬܦܪܶܩ: ܘܰܫܒܺܝܬܳܗ̇ ܒܙܰܕܺܝܩܽܘܬܳܐ. ²⁸ ܘܰܬܒܳܪܳܐ ܕܥܰܘ̈ܳܠܶܐ ܘܰܕ݂ܚܰܛܳܝ̈ܶܐ ܐܰܟ݂ܚܕ݂ܳܐ. ܘܰܐܝܠܶܝܢ ܕܰܫܒܰܩܘ ܠܡܳܪܝܳܐ ܢܣܽܘܦܽܘܢ. ²⁹ ܡܶܛܽܠ ܕܢܶܒܗܬܽܘܢ ܡ̣ܶܢ ܦܬܰܟ݂ܖ̈ܶܐ ܕܪܰܓ݂ܘ ܘܢܰܚܦܪܽܘܢ ܡ̣ܶܢ ܓܶܢ̈ܝܳܬܳܐ ܕܰܓ݂ܒܰܘ. ³⁰ ܡܶܛܽܠ ܕܢܶܗܘܽܘܢ ܐܰܝܟ݂ ܒܶܛܡܬܳܐ ܕܰܢܬܰܪܘ ܛܰܖ̈ܦܶܝܗ̇. ܘܰܐܝܟ݂ ܓܰܢܬܳܐ ܕܡܰܝ̈ܳܐ ܠܰܝܬ ܠܳܗ̇. ³¹ ܘܢܶܗܘܶܐ ܥܽܘܫܢܗܽܘܢ ܠܰܣܪܳܩܬ݂ܳܐ: ܘܰܥܒܳܕܰܝ̈ܗܽܘܢ ܠܒܰܠܨܽܘܨ̈ܝܳܬ݂ܳܐ ܘܢܺܐܩܕܽܘܢ ܬܖ̈ܰܝܗܽܘܢ ܐܰܟ݂ܚܕ݂ܳܐ. ܘܠܰܝܬ ܕܰܡܕܰܥܶܟ݂.

ܩܶܦܰܠܶܐܘܳܢ: ܬܪܰܝܳܢܳܐ

¹ ܦܶܬ݂ܓ݂ܳܡܳܐ ܕܰܚܙܳܐ ܐܶܫܰܥܝܳܐ ܒܰܪ ܐܰܡܽܘܨ: ܥܰܠ ܝܺܗܽܘܕ݂ܳܐ: ܘܥܰܠ ܐܽܘܪܺܫܠܶܡ.² ܢܶܗܘܶܐ ܒܝܰܘ̈ܡܳܬܳܐ ܐ̱ܚܖ̈ܳܝܶܐ: ܛܽܘܪ ܒܰܝܬܶܗ ܕܡܳܪܝܳܐ. ܡܰܬ݂ܩܰܢ ܒܪܺܝܫ ܛܽܘܖ̈ܶܐ: ܘܪܳܡ ܡ̣ܶܢ ܖ̈ܳܡܳܬܳܐ. ܘܰܢܣܰܟܽܘܢ ܠܶܗ ܟܽܠܗܽܘܢ ܥܰܡ̈ܡܶܐ. ³ ܘܢܺܐܙܽܠ̱ܘܢ ܥܰܡ̈ܡܶܐ ܣܰܓ݁ܺܝ̈ܐܶܐ: ܘܢܺܐܡܪܽܘܢ: ܬܰܘ ܢܶܣܰܩ ܠܛܽܘܪܶܗ ܕܡܳܪܝܳܐ: ܘܰܠܒܶܝܬ ܐܰܠܳܗܶܗ ܕܝܰܥܩܽܘܒ. ܘܢܰܠܦܰܢ ܡ̣ܶܢ ܐܽܘܖ̈ܚܳܬܶܗ. ܘܰܢܗܰܠܶܟ݂ ܒܰܫܒܺܝܠܰܘ̈ܗܝ. ܡܶܛܽܠ ܕܡ̣ܶܢ ܨܶܗܝܽܘܢ ܢܳܦܶܩ ܢܳܡܽܘܣܳܐ: ܘܦܶܬܓ݂ܳܡܶܗ ܕܡܳܪܝܳܐ ܡ̣ܶܢ ܐܽܘܪܺܫܠܶܡ. ⁴ ܘܰܢܕ݂ܽܘܢ ܒܶܝܬ ܥܰܡ̈ܡܶܐ. ܘܢܰܟ݁ܶܣ ܠܥܰܡ̈ܡܶܐ ܣܰܓ݁ܺܝ̈ܐܶܐ ܕܰܒܪܽܘܚܩܳܐ. ܘܢܶܪܥܽܘܢ ܣܰܦ݂ܣܺܖ̈ܰܝܗܽܘܢ ܠܣܶܟܰܝ̈ ܦܰܕ݂ܳܢ̈ܶܐ: ܘܖ̈ܽܘܡܚܰܝܗܽܘܢ ܠܡܰܓ݁̈ܠܶܐ. ܘܠܳܐ ܢܶܫܩܽܘܠ ܥܰܡܳܐ ܥܰܠ ܥܰܡܳܐ ܣܰܝܦܳܐ. ܘܬ݂ܽܘܒ ܠܳܐ ܢܺܐܠܦܽܘܢ ܩܪܳܒܳܐ. ⁵ ܕܒܶܝܬ ܝܰܥܩܽܘܒ: ܬܰܘ ܢܺܐܙܰܠ ܒܢܽܘܗܪܶܗ ܕܡܳܪܝܳܐ. ⁶ ܡܶܛܽܠ ܕܰܫܒܰܩܬܳܝܗܝ ܠܥܰܡܳܟ݂ ܕܒܶܝܬ ܝܰܥܩܽܘܒ. ܡܶܛܽܠ ܕܶܐܬ݂ܡܠܺܝܘ ܐܰܝܟ݂ ܕܡ̣ܶܢ ܩܕ݂ܺܝܡ. ܘܰܡܢܰܚܫܺܝܢ ܐܰܝܟ݂ ܦܠܶܫܬܳܝ̈ܶܐ. ܘܣܽܘܓ݂ܳܐܐ ܕܰܒܢܰܝ̈ܳܐ ܢܾܽܘܟ݂ܖ̈ܳܝܶܐ ܪܰܒܺܝܘ. ⁷ ܘܶܐܬ݂ܡܰܠܝܰܬ݁ ܐܰܪܥܗܽܘܢ ܣܺܐܡܳܐ ܘܕܰܗܒܳܐ ܘܠܰܝܬ݁ ܣܳܟ݂ܳܐ ܠܓܰܙܰܝ̈ܗܽܘܢ ܘܶܐܬ݂ܡܰܠܝܰܬ ܐܰܪ̱ܥܗܽܘܢ ܖ̈ܰܟ݂ܫܳܐ: ܘܠܰܝܬ݁ ܣܳܟ݂ܳܐ ܠܡܰܖ̈ܟܒܳܬ݂ܗܽܘܢ. ⁸ ܘܶܐܬ݂ܡܰܠܝܬ݂ ܐܰܪܥܗܽܘܢ ܦܬܰܟ݂ܖ̈ܶܐ. ܠܰܥܒܳܕ݂ ܐܺܝܕܰܝ̈ܗܽܘܢ ܣܳܓ݁ܕ݁ܺܝܢ: ܠܕܰܥ̣ܒܰܕ݂ ܨܶܒ̈ܥܳܬ݂ܗܽܘܢ. ⁹ ܘܶܐܬ݂ܡܰܟܰܟ݂ ܐ̱ܢܳܫܳܐ: ܘܶܐܫܬܰܦܰܠ ܓܰܒܪܳܐ ܘܠܳܐ ܬܶܫܒܽܘܩ ܠܗܽܘܢ. ¹⁰ ܥܽܘܠܘ ܒܛܰܖ̈ܳܢܶܐ: ܘܶܐܬ݁ܛܰܡ̱ܪܘ ܒܥܰܦܪܳܐ: ܡ̣ܶܢ ܩܕ݂ܳܡ ܕܶܚܠܬܶܗ ܕܡܳܪܝܳܐ: ܘܡ̣ܶܢ ܗܶܕ݂ܪܳܐ ܕܥܽܘܫܢܶܗ. ¹¹ ܥܰܝ̈ܢܶܐ ܖ̈ܳܡܳܬ݂ܳܐ ܕܐ̱ܢܳܫܳܐ ܢܡܰܟܶܟ݂. ܘܢܶܬ݂ܡܰܟܰܟ݂ ܪܰܘܡܳܐ ܕܓܰܒܪܳܐ. ܘܢܶܥܫܰܢ ܡܳܪܝܳܐ ܒܰܠܚܽܘܕ݂ܰܘܗܝ ܒܝܰܘܡܳܐ ܗܰܘ.¹² ܡܶܛܽܠ ܕܝܰܘܡܶܗ ܕܡܳܪܝܳܐ: ܥܰܠ ܟܽܠ ܕܡܶܬ݂ܓܰܐܶܐ ܘܡܶܬ݁ܬ݁ܪܺܝܡ: ܘܥܰܠ ܟܽܠ ܕܡܶܫܬܰܩܰܠ ܕܢܶܬ݂ܡܰܟܰܟ݂. ¹³ ܘܥܰܠ ܟܽܠܗܽܘܢ ܐܰܖ̈ܙܶܐ ܕܠܶܒܢܳܢ ܕܪܳܡܺܝܢ ܘܰܡܫܰܩܠܺܝܢ: ܘܥܰܠ ܟܽܠܗܽܘܢ ܒܰܠܽܘ̈ܛܶܐ ܕܒܰܝܫܳܢ. ¹⁴ ܘܥܰܠ ܟܽܠܗܽܘܢ ܛܽܘܖ̈ܶܐ ܕܪܳܡܺܝܢ: ܘܥܰܠ ܟܽܠ ܖ̈ܳܡܳܬܳܐ ܕܖ̈ܳܡܳܢ. ¹⁵ ܘܥܰܠ ܟܽܠ ܡܰܓ̈ܕ݁ܠܶܐ ܕܪܳܡܺܝܢ: ܘܥܰܠ ܟܽܠ ܫܽܘܖ̈ܶܐ ܕܥܰܫܺܝܢܺܝܢ. ¹⁶ ܘܥܰܠ ܟܽܠܗܶܝܢ ܐܶܠܦ̈ܶܐ ܕܬܰܪܫܺܝܫ: ܘܥܰܠ ܟܽܠܗܽܘܢ ܕܰܘ̈ܩܶܐ ܕܪܶܓ݁ܬܳܐ. ¹⁷ ܘܢܶܬ݂ܡܰܟܰܟ݂ ܪܰܘܡܳܐ ܕܐ̱ܢܳܫܳܐ: ܘܢܶܫܬܰܦܰܠ ܪܰܘܡܳܐ ܕܓܰܒܪܳܐ ܘܢܶܥܫܰܢ ܡܳܪܝܳܐ ܒܰܠܚܽܘܕ݂ܰܘܗ̱ܝ ܒܝܰܘܡܳܐ ܗܰܘ. ¹⁸ ܘܰܦܬܰܟ݂ܖ̈ܶܐ ܓܡܺܝܪܳܐܺܝܬ݂ ܢܶܥܒ݁ܪܽܘܢ. ¹⁹ ܘܢܶܥܠܽܘܢ ܒܰܡܥܰܖ̈ܶܐ ܕܟܺܐܦܳܐ: ܘܰܒܚܽܘܠܳܢ̈ܶܐ ܕܥܰܦܪܳܐ ܡ̣ܶܢ ܩܕ݂ܳܡ ܕܶܚܠܬܶܗ ܕܡܳܪܝܳܐ: ܘܡ̣ܶܢ ܗܶܕ݂ܪܳܐ ܕܥܽܘܫܢܶܗ: ܡܳܐ ܕܩܳܐܶܡ ܠܰܡܟܰܒܳܫܽܘ ܠܰܐܪܥܳܐ. ²⁰ ܒܶܗ ܒܝܰܘܡܳܐ ܗܰܘ: ܢܶܫܕ݁ܽܘܢ ܐ̱ܢܳܫܳܐ ܦܬܰܟ݂ܖ̈ܶܐ ܕܕܰܗܒܐ ܘܰܕ݂ܣܺܐܡܳܐ: ܕܰܥ̣ܒܰܕ݂ܘ ܠܗܽܘܢ ܠܡܶܣܓܰܕ݂ ܠܰܣܪܺܝܩܽܘܬ݂ܳܐ: ܘܠܰܦܖ̈ܰܚܕ݁ܽܘܕܶܐ. ²¹ ܠܡܶܥܰܠ ܒܰܡܥܰܖ̈ܶܐ ܕܛܰܪܳܢܳܐ: ܘܒܰܫܩܺܝ̈ܦܶܐ ܕܟܺܐܦܳܐ ܡ̣ܶܢ ܩܕ݂ܳܡ ܕܶܚܠܬܶܗ ܕܡܳܪܝܳܐ: ܘܡ̣ܶܢ ܗܶܕ݂ܪܳܐ ܕܥܽܘܫܢܶܗ: ܡܳܐ ܕܩܳܐܶܡ ܠܰܡܟܰܒܳܫܽܘ ܠܰܐܪܥܳܐ. ²² ܫܠܰܘ ܠܟ݂ܽܘܢ ܡ̣ܶܢ ܐ̱ܢܳܫܳܐ ܕܰܢܫܰܡܬܳܐ ܒܰܢܚܺܝܖ̈ܰܘܗܝ: ܡܶܛܽܠ ܕܰܐܝܟ݂ ܡܳܢܳܐ ܚܫܺܝܒ.

ܩܶܦܰܠܶܐܘܳܢ: ܬܠܺܝܬܳܝܳܐ.

¹ ܡܶܛܽܠ ܕܗܳܐ ܡܳܪܶܐ ܡܳܖ̈ܰܘܳܬ݂ܳܐ: ܡܰܥܒܰܪ ܡܶܢ ܐܽܘܪܺܫܠܶܡ: ܘܡ̣ܶܢ ܝܺܗܽܘܕ݂ܳܐ: ܣܳܡܽܘܟ݂ܳܐ ܘܣܳܡܽܘܟ݂ܬܳܐ: ܟܽܠ ܕܣܳܡܶܟ݂ ܒܠܰܚܡܳܐ: ܘܟ݂ܽܠ ܕܣܳܡܶܟ݂ ܒܡܰܝ̈ܳܐ. ² ܘܓܰܢ̱ܒܳܪܳܐ ܘܓܰܒܪܳܐ ܩܪܰܒܬ݂ܳܢܳܐ: ܘܕܰܝܳܢܳܐ ܘܰܢܒܺܝܳܐ ܘܩܳܨܽܘܳܡܳܐ ܘܩܰܫܺܝܫܳܐ. ³ ܘܪܺܝܫ ܚܰܡܫܺܝܢ: ܘܰܗܕ݂ܺܝܪ ܐܰܦ̈ܶܐ: ܘܡܳܠܽܘܟ݂ܳܐ ܘܚܰܟܺܝܡ ܢܰܓܳܖ̈ܶܐ: ܘܰܕ݂ܡܶܬ݂ܒܰܝܰܢ ܒܡܶܠܟܳܐ. ⁴ ܘܰܐܩܺܝܡ ܥܠܰܝ̈ܡܶܐ ܪܰܘܖ̈ܒܳܢܰܝܗܽܘܢ: ܘܰܡܒܰܙܚܳܢ̈ܶܐ ܢܶܫܬܰܠܛܽܘܢ ܒܗܽܘܢ. ⁵ ܘܢܶܦܶܠ ܥܰܡܳܐ ܓܒܰܪ ܒܰܓܒܰܪ: ܓܰܒܪܳܐ ܒܚܰܒܪܶܗ. ܘܢܶܬ݂ܓܰܪܽܘܢ ܥܠܰܝ̈ܡܶܐ ܥܰܠ ܣܳܒ̈ܶܐ: ܘܰܡܨܰܥܖ̈ܶܐ ܥܰܠ ܡܝܰܩܖ̈ܶܐ. ⁶ ܡܶܛܽܠ ܕܢܶܐܚܽܘܕ݂ ܓܰܒܪܳܐ ܓܒܰܪ ܠܰܐܚܽܘܗܝ ܡ̣ܶܢ ܒܶܝܬ݂ ܐܰܒܽܘܗܝ: ܘܢܺܐܡܰܪ ܠܶܗ: ܢܰܚ̈ܬ݁ܶܐ ܐܺܝܬ݂ ܠܳܟ݂. ܗܘܺܝ ܠܰܢ ܫܰܠܺܝܛܳܐ. ܘܬ݂ܽܘܩܠܬ݂ܳܐ ܗܳܕܶܐ ܬܚܶܝܬ݂ ܐܺܝܕ݂ܳܟ݂. ⁷ ܘܢܶܥܢܶܐ ܒܝܰܘܡܳܐ ܗܰܘ: ܘܢܺܐܡܰܪ: ܠܳܐ ܗܳܘܶܐ ܐ̱ܢܳܐ ܪܺܝܫܳܐ. ܕܰܒܒܰܝܬ݁ܝ ܠܰܝܬ݁ ܠܰܚܡܳܐ: ܘܳܐܦܠܳܐ ܬܰܟ݂ܣܺܝܬ݂ܳܐ. ܠܳܐ ܬܶܥܒܕ݂ܽܘܢܳܢܝ ܫܰܠܺܝ̈ܛܳܐ ܥܰܠ ܥܰܡܳܐ. ⁸ ܡܶܛܽܠ ܕܶܐܬ݁ܬܰܩܠܰܬ݂ ܐܽܘܪܺܫܠܶܡ: ܘܺܝܗܽܘܕ݂ܳܐ ܢܦܰܠ. ܡܶܛܽܠ ܕܠܶܫܳܢܗܽܘܢ ܘܰܥܒܳܕ݂ ܐܺܝܕܰܝ̈ܗܽܘܢ ܡܰܪܡܰܪܘ ܩܕ݂ܳܡ ܡܳܪܝܳܐ: ܘܠܰܥܢܳܢܳܐ ܕܺܐܝܩܳܪܶܗ. ⁹ ܡܰܣܰܒ ܒܰܐܦܰܝ̈ܗܽܘܢ ܣܳܗܶܕ݂ ܒܗܽܘܢ. ܘܰܚܛܳܗܰܝ̈ܗܽܘܢ ܐܰܝܟ݂ ܣܕ݂ܽܘܡ ܚܰܘܺܝܘ: ܘܠܳܐ ܐܶܬ݁ܬ݁ܟܶܣܘ ܘܳܝ ܠܢܰܦܫܗܽܘܢ: ܕܰܐܪܡܺܝܘ ܠܗܽܘܢ ܚܽܘ̈ܒܠܶܐ ܒܺܝ̈ܫܶܐ. ¹⁰ ܐܶܡܰܪܘ ܠܙܰܕܺܝܩܳܐ ܛܳܒ: ܡܶܛܽܠ ܗܳܢܳܐ ܦܺܐܖ̈ܰܝ ܥܒܳܕܰܝ̈ܗܽܘܢ ܢܶܐܟ݂ܠܽܘܢ. ¹¹ ܘܳܝ ܠܪܰܫܺܝܥܳܐ ܒܺܝܫܳܐ: ܡܶܛܽܠ ܕܰܥܒܳܕ݂ ܐܺܝܕ݂ܰܘ̈ܗܝ ܡܶܬܦܪܰܥ. ¹² ܫܰܠܺܝ̈ܛܰܘܗܝ ܕܥܰܡܝ ܡܒܰܥܪܺܝܢ ܠܶܗ. ܘܢܶܫ̈ܶܐ ܐܶܫܬܰܠܰܛ ܒܶܗ ܥܰܡܝ ܡܰܛܐܒܳܢܰܝ̈ܟ ܐܰܛܥܝܽܘܟ݂. ܐܘܪܚܳܐ ܕܰܫܒܺܝ̈ܠܰܝܟ ܕܰܠܰܚܘ. ¹³ ܩܳܐܶܡ ܠܰܡܕ݂ܳܢ ܡܳܪܝܳܐ: ܘܩܳܐܶܡ ܠܰܡܕ݂ܳܢ ܠܥܰܡܶܗ. ¹⁴ ܡܳܪܝܳܐ ܒܕ݂ܺܝܢܳܐ ܢܶܥܽܘܠ: ܘܥܰܡ ܣܳܒ̈ܶܐ ܕܥܰܡܶܗ: ܘܥܰܡ ܪܰܘܖ̈ܒܳܢܰܘܗܝ. ܐܰܢ̱ܬ݁ܽܘܢ ܐܰܘܩܶܕܬ݁ܽܘܢ ܟܰܪܡܳܐ. ܘܰܚܛܽܘܦܝܳܐ ܕܡܶܣ̈ܟܺܢܶܐ ܒܒܳܬܰܝ̈ܟܽܘܢ. ¹⁵ ܠܡܳܢܳܐ ܢܟܰܝܬ݁ܽܘܢ ܠܥܰܡܝ: ܘܰܐܦ̈ܶܐ ܕܡܶܣܟܺܢ̈ܶܐ ܐܰܒܗܶܬ݁ܬ݁ܽܘܢ: ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ. ¹⁶ ܥܰܠ ܕܶܐܬ݁ܬ݁ܪܺܝܡ ܒ̈ܢܳܬ݂ ܨܶܗܝܽܘܢ: ܘܗܰܠܶܟ݂ ܒܨܰܘܪܳܐ ܪܳܡܳܐ. ܘܰܒܪܶܡܙܳܐ ܕܥܰܝ̈ܢܶܐ ܡܗܰܠ̈ܟ݂ܳܢ ܗ̱ܘܰܝ̈. ܘܰܡܛܰܖ̈ܦܳܢ ܒܖ̈ܶܓܠܰܝܗܶܝܢ: ܘܡܰܖ̈ܓܙܳܢ ܠܡܳܪܝܳܐ. ¹⁷ ܢܡܰܟܶܟ݂ ܡܳܪܝܳܐ ܖ̈ܺܝܫܳܝܳܬ݂ܳܐ ܕܰܒ̈ܢܳܬ݂ ܨܶܗܝܽܘܢ. ܘܡܳܪܝܳܐ ܐܶܣܟܺܝܡܰܝ̈ܗܶܝܢ ܢܦܰܪܣܶܐ. ¹⁸ ܒܝܰܘܡܳܐ ܗܰܘ: ܢܰܥܒܰܪ ܡܳܪܝܳܐ ܫܽܘܒܚܳܐ ܕܢܰܚܬܰܝ̈ܗܶܝܢ. ܘܰܕ݂ܨܶܒܬ݁ܗܶܝܢ: ܘܕܰܓܕ݂ܽܘܠܰܝ̈ܗܶܝܢ. ¹⁹ ܘܶܐܣܦܺܝܖ̈ܶܐ ܕܣܰܥܖ̈ܰܝܗܶܝܢ: ܘܒܶܠܽܘܖ̈ܰܝܗܶܝܢ: ܘܨܶܕ݂ܥܰܝ̈ܗܶܝܢ. ²⁰ ܘܨܶܒܬܳܐ ܕܰܐܦܰܝ̈ܗܶܝܢ: ܘܰܩܕ݂ܳܫܰܝ̈ܗܶܝܢ: ܘܥܶܩܰܝ̈ܗܶܝܢ. ²¹ ܘܰܐܩ̈ܠܳܢܝܗܶܝܢ: ܘܩܽܘܠܒܰܝ̈ܗܶܝܢ: ܘܫܺܐܖ̈ܰܝܗܶܝܢ. ²² ܘܟ݂ܽܘܬ݁ܺܝܢ̈ܝܳܬ݂ܗܶܝܢ: ܘܰܡܫܰܠܡܳܢ̈ܝܳܬ݂ܗܶܝܢ: ܘܒܽܘܨܗܶܝܢ: ܘܰܐܖ̈ܓܘܳܢܰܝܗܶܝܢ. ²³ ܘܢܰܚܬܰܝ̈ܗܶܝܢ: ܘܬܶܟ݂̈ܠܝܳܬ݂ܗܶܝܢ: ܘܰܙܚܽܘܖ̈ܝܳܬ݂ܗܶܝܢ: ܘܨܶܡܕܳܐ ܟܽܠܶܗ ܕܨܶܒܬ݁ܗܶܝܢ. ²⁴ ܘܢܶܗܘܶܐ ܚܶܠܳܐ ܚܠܳܦ ܪܺܝܚܗܶܝܢ ܒܰܣܺܝܡܳܐ. ܘܰܚܠܳܦ ܐܰܣܳܪ ܚܰܨܰܝ̈ܗܶܝܢ ܡܺܝܙܖ̈ܳܢܶܐ ܢܺܐܣܖ̈ܳܢ. ܘܰܚܠܳܦ ܒܶܠܽܘܖ̈ܶܐ: ܩܽܘ̈ܕ݂ܚܳܬ݂ܳܐ. ܘܰܚܠܳܦ ܬܶܟ݂ܠ̈ܝܳܬ݂ܗܶܝܢ: ܣܰܩ̈ܶܐ ܢܶܬ݂ܟܰܣ̈ܝܳܢ. ܡܶܛܽܠ ܕܢܶܬ݂ܚܰܒܰܠ ܫܽܘܦܪܗܶܝܢ. ²⁵ ܘܥܰܫܺܝܢܰܝ̈ܟܝ ܒܚܰܪܒܳܐ ܢܶܦܠܽܘܢ: ܘܓܰܢ̱ܒܳܖ̈ܰܝܟܝ ܒܰܩܪܳܒܳܐ. ²⁶ ܘܢܺܐܠܽܘܢ: ܘܢܶܬ݁ܒܽܘܢ ܒܶܐܒܠܳܐ ܬܰܖ̈ܥܶܝܗ̇. ܘܙܳܟ݂ܽܘܬ݂ܳܗ̇ ܒܰܐܪܥܳܐ ܬܶܦܶܠ.

ܩܶܦܰܠܶܐܘܳܢ: ܪܒܺܝܥܳܝܳܐ.

¹ ܘܢܶܐܚ̈ܕܳܢ ܫܒܰܥ ܢܶܫܺܝ̈ܢ ܠܓܰܒܪܳܐ ܚܰܕ݂ ܒܝܰܘܡܳܐ ܗܰܘ. ܘܢܺܐܡܖ̈ܳܢ ܠܶܗ: ܠܰܚܡܰܢ ܢܶܐܟ݂ܽܘܠ: ܘܢܰܚ̈ܬܰܝܢ ܢܶܬ݂ܟܰܣܶܐ. ܒܰܠܚܽܘܕ݂ ܫܡܳܟ݂ ܢܶܬ݂ܩܪܶܐ ܥܠܰܝܢ: ܘܰܐܥܒܰܪ ܚܶܣܕܰܢ. ² ܒܶܗ ܒܝܰܘܡܳܐ ܗܰܘ: ܢܶܗܘܶܐ ܕܶܢܚܶܗ ܕܡܳܪܝܳܐ ܠܫܽܘܒܚܳܐ: ܘܠܺܐܝܩܳܪܳܐ. ܘܦܺܐܖ̈ܶܐ ܕܰܐܪܥܳܐ ܠܓܰܐܝܽܘܬ݂ܳܐ: ܘܰܠܫܽܘܒܚܳܐ: ܠܡܶܕܶܡ ܕܶܐܫܬ݁ܚܰܪ ܡ̣ܶܢ ܐܺܝܣܪܳܝܶܠ. ³ ܘܢܶܗܘܶܐ ܡܰܢ ܕܡܶܫܬܰܚܰܪ ܒܨܶܗܝܽܘܢ: ܘܡܰܢ ܕܡܶܫܬܰܚܰܪ ܒܽܐܘܪܺܫܠܶܡ: ܩܰܕ݁ܺܝܫܳܐ ܢܶܬ݂ܩܪܶܐ: ܟܽܠ ܕܰܟ݂ܬܺܝܒ ܒܽܐܘܪܺܫܠܶܡ ܠܚܰܝ̈ܶܐ. ⁴ ܘܰܢܫܺܝܓ ܡܳܪܝܳܐ ܨܳܐܬ݂ܳܐ ܕܰܒ̈ܢܳܬ݂ ܨܶܗܝܽܘܢ. ܘܰܕ݂ܡܳܐ ܢܰܪܚܶܩ ܡ̣ܶܢ ܓܰܘܳܗ̇ ܕܽܐܘܪܺܫܠܶܡ: ܒܪܽܘܚܳܐ ܕܕܺܝܢܳܐ: ܘܰܒܪܽܘܚܳܐ ܝܰܩܺܝܕܬܳܐ. ⁵ ܘܢܶܒܪܶܐ ܡܳܪܝܳܐ ܥܰܠ ܟܽܠܶܗ ܡܰܬܩܢܳܐ: ܠܛܽܘܪܳܐ ܕܨܶܗܝܽܘܢ ܥܰܠ ܚܕ݂ܳܖ̈ܶܝܗ̇: ܥܢܳܢܳܐ ܒܺܐܝܡܳܡܳܐ: ܘܬܶܢܳܢܳܐ ܘܙܰܗܪܳܐ ܕܫܰܠܗܶܒܺܝܬ݂ܳܐ ܕܢܽܘܪܳܐ ܒܠܺܠܝܳܐ. ܡܶܛܽܠ ܕܥܰܠ ܟܽܠ ܐܽܝܩܳܪ ܬܰܛܶܠܝ. ⁶ ܘܣܶܬܳܪܳܐ ܢܶܗܘܶܐ ܠܛܶܠܳܠܳܐ ܕܝܰܘܡܳܐ ܡ̣ܶܢ ܫܰܘܒܳܐ: ܠܰܡܟܰܣܳܝܽܘ ܘܠܰܡܣܰܬܳܪܽܘ ܡ̣ܶܢ ܙܰܪܺܝܦܬܳܐ ܘܡ̣ܶܢ ܡܶܛܪܳܐ.

ܩܶܦܰܠܶܐܘܳܢ: ܚܡܺܝܫܳܝܳܐ.

¹ ܐܶܫܰܒܰܚ ܠܚܰܒܺܝܒܝ: ܬܶܫܒܽܘܚܬܳܐ ܕܚܰܒܺܝܒܝ ܠܟܰܪܡܶܗ. ܟܰܪܡܳܐ ܗ̱ܘܳܐ ܠܚܰܒܺܝܒܝ: ܒܩܰܪܢܳܐ ܕܰܐܬ݂ܪܳܐ ܫܰܡܺܝܢܳܐ. ² ܘܦܰܠܚܶܗ: ܘܰܐܚܕ̇ܪܶܗ ܣܝܳܓ݂ܳܐ. ܘܰܢܨܰܒ ܒܶܗ ܫܰܒܽܘ̈ܩܶܐ: ܘܰܒܢܳܐ ܡܰܓܕܠܳܐ ܒܓܰܘܶܗ. ܘܳܐܦ ܡܰܥܨܰܪܬܳܐ ܥܒܰܕ݂ ܒܶܗ. ܘܣܰܟܺܝ ܕܢܶܥܒܶܕ݂ ܥܶܢ̈ܒܶܐ. ܘܰܥܒܰܕ݂ ܚܰܖ̈ܽܘܒܶܐ. ³ ܗܳܫܳܐ ܓܰܒܖ̈ܶܐ ܕܺܝܗܽܘܕ݂ܳܐ: ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܕܽܘܢܘ ܒܰܝ̈ܢܰܝ ܠܟܰܪܡܝ. ⁴ ܡܳܢܳܐ ܬܽܘܒ ܘܳܠܶܐ ܗ̱ܘܳܐ ܠܡܶܥܒܰܕ݂ ܠܟܰܪܡܝ: ܘܠܳܐ ܥܶܒܕܶܬ݂ ܠܶܗ. ܕܣܰܟܺܝܬ݁ ܕܢܶܥܒܶܕ݂ ܥܶܢ̈ܒܶܐ: ܘܰܥ̣ܒܰܕ݂ ܚܰܖ̈ܽܘܒܶܐ. ⁵ ܗܳܫܳܐ ܐܶܚܰܘܶܝܟ݂ܽܘܢ ܡܶܕܶܡ ܕܥܳܒܶܕ݂ ܐ̱ܢܳܐ ܠܶܗ ܠܟܰܪܡܝ: ܥܳܩܰܪ ܐ̱ܢܳܐ ܡܰܓܕܠܶܗ: ܘܢܶܗܘܶܐ ܠܒܶܙܬ݂ܳܐ. ܘܬܳܪܰܥ ܐ̱ܢܳܐ ܣܝܳܓܶܗ: ܘܢܶܗܘܶܐ ܠܰܕ݂ܝܳܫܳܐ. ⁶ ܘܶܐܥܒܕ݂ܺܝܘܗܝ ܕܢܶܚܪܰܒ ܘܠܳܐ ܢܶܟܣܰܚ. ܘܠܳܐ ܢܶܬ݂ܦܠܰܚ ܘܢܺܐܥܽܘܢ ܒܶܗ ܟܽܘܒܶܐ ܘܝܰܥܪܳܐ. ܘܶܐܦܩܽܘܕ݂ ܠܰܥܢܳܢ̈ܶܐ ܕܠܳܐ ܢܰܚ̈ܬ݂ܳܢ ܥܠܰܘܗ̱ܝ ܡܶܛܪܳܐ.  ⁷ ܡܶܛܽܠ ܕܟܰܪܡܶܗ ܕܡܳܪܝܳܐ ܚܰܝܠܬ݂ܳܢܳܐ: ܒܰܝܬܳܐ ܗ̱ܘ̣ ܕܒܶܝܬ݂ ܝܺܣܪܳܝܶܠ: ܘܓܰܒܖ̈ܶܐ ܕܡ̣ܶܢ ܝܺܗܽܘܕ݂ܳܐ: ܢܶܨܒܬ݂ܳܐ ܚܕܰܬܳܐ ܘܚܰܒܺܝܒܬܳܐ ܣܰܟܺܝܬ݁ ܠܕ݂ܺܝܢܳܐ: ܘܰܗܘܳܐ ܚܛܽܘܦܝܳܐ. ܘܰܠܙܰܕܺܝܩܽܘܬ݂ܳܐ: ܘܗܳܐ ܝܺܠܰܠܬܳܐ. ⁸ ܘܳܝ ܠܕܰܡܩܰܪܒܺܝܢ ܒܰܝܬܳܐ ܠܒܰܝܬܳܐ: ܘܚܰܩܠܐ ܒܚܰܩܠܳܐ ܚܳܠܛܺܝܢ. ܕܬܶܐܚܕܽܘܢ ܐܰܬ݂ܪܳܐ: ܘܬܶܬ݁ܒܽܘܢ ܒܰܠܚܽܘܕܰܝܟܽܘܢ ܒܓܰܘܳܗ̇ ܕܰܐܪܥܳܐ. ⁹ ܒܶܐܕ݂ܢܰܝ̈ ܡܳܪܝܳܐ ܚܰܝܠܬ݂ܳܢܳܐ ܐܶܫܬ݁ܡܰܥ. ܒ̈ܳܬܶܐ ܣܰܓ݁ܺܝ̈ܐܶܐ ܠܚܽܘܪܒܳܐ ܢܶܗܘܽܘܢ: ܡ̣ܶܢ ܒܠܰܝ ܕܝܳܬܶܒ. ¹⁰ ܡܶܛܽܠ ܕܰܥܣܰܪ ܐܶܫܟܳܖ̈ܶܐ ܕܟܰܪܡܳܐ ܢܶܥ̈ܒܕܳܢ ܚܕ݂ܳܐ ܚܳܒܺܝܬ݂ܳܐ: ܘܙܰܪܥܳܐ ܕܟ݂ܽܘܪ ܢܶܥܒܶܕ݂ ܣܐܳܐ. ¹¹ ܘܳܝ ܠܕܰܡܩܰܕܡܺܝܢ ܒܨܰܦܪܳܐ: ܘܪܳܗܛܺܝܢ ܠܫܰܟ݂ܪܳܐ. ܘܡܰܘܚܪܺܝܢ ܒܪܰܡܫܳܐ: ܘܚܰܡܪܳܐ ܡܰܘܩܶܕ݂ ܠܗܽܘܢ. ¹² ܒܟܶܢܳܖ̈ܶܐ: ܘܰܒܩܺܝܬ݂ܳܖ̈ܶܐ: ܘܒܰܦ̈ܠܰܓܶܐ: ܘܒܰܖ̈ܒܺܝܥܶܐ: ܚܰܡܪܳܐ ܫܳܬܶܝܢ. ܘܒܰܥܒܳܕ݂ܰܘ̈ܗܝ ܕܰܐ‌ܠܳܗܳܐ ܠܳܐ ܡܶܣܬܰܟܠܺܝܢ. ܘܒܰܥܒܳܕ݂ ܐܺܝܕ݂ܰܘ̈ܗܝ ܠܳܐ ܚܳܝܪܺܝܢ. ¹³ ܡܶܛܽܠ ܗܳܢܳܐ ܐܶܫܬ݁ܒܺܝ ܥܰܡܝ ܡ̣ܶܢ ܒܠܰܝ ܝܺܕܰܥܬ݂ܳܐ. ܡܺܝܬܰܝ̈ܗܽܘܢ ܡ̣ܶܢ ܟܰܦܢܳܐ. ܘܰܥ̣ܫܶܢܘ ܡ̣ܶܢ ܨܶܗܝܳܐ. ¹⁴ ܡܶܛܽܠ ܗܳܢܳܐ ܐܰܦܬ݁ܝܰܬ ܫܝܽܘܠ ܢܰܦܫܳܗ̇. ܘܦܶܥܪܰܬ ܦܽܘܡܳܗ̇ ܕܠܳܐ ܣܳܟ݂: ܘܢܶܚܬ݂ܽܘܢ ܠܳܗ̇ ܡܫܰܒܚ̈ܶܐ ܘܰܡܝܰܩܖ̈ܶܐ ܘܥܰܫܺܝܢ̈ܶܐ. ¹⁵ ܘܢܶܬ݂ܡܰܟܰܟ݂ ܐ̱ܢܳܫܳܐ: ܘܢܶܫܬܰܦܰܠ ܓܰܒܪܳܐ ܘܥܰܝ̈ܢܶܐ ܖ̈ܳܡܳܬ݂ܳܐ ܢܶܬ݂ܡܰܟ̈ܟ݂ܳܢ. ¹⁶ ܘܢܶܬ݁ܬ݁ܪܺܝܡ ܡܳܪܝܳܐ ܚܰܝܠܬ݂ܳܢܳܐ ܒܕ݂ܺܝܢܳܐ ܘܰܐ‌ܠܳܗܳܐ ܩܰܕ݁ܺܝܫܳܐ ܢܶܬ݂ܩܰܕܰܫ ܒܙܰܕܺܝܩܽܘܬ݂ܳܐ. ¹⁷ ܘܢܶܪܥܽܘܢ ܐܶܡܖ̈ܶܐ ܒܙܶܕ݂ܩܗܽܘܢ. ܘܚܰܖ̈ܒܳܬ݂ܳܐ ܕܶܐܬ݂ܒܢܺܝ: ܥܳܡܽܘܖ̈ܶܐ ܢܶܐܟ݂ܠܽܘܢ ܐܶܢܶܝܢ. ¹⁸ ܘܳܝ ܠܰܕ݂ܡܰܘܪܟ݂ܺܝܢ ܚܛܳܗܰܝ̈ܗܽܘܢ ܐܰܝܟ݂ ܚܰܒܠܳܐ ܐܰܪܺܝܟ݂ܳܐ. ܘܰܐܝܟ݂ ܥܪܰܩܬ݂ܳܐ ܕܥܶܓܠܬܳܐ ܚܛܺܝܬ݂ܗܽܘܢ. ¹⁹ ܘܳܐܡܪܺܝܢ: ܒܰܥܓܰܠ ܢܣܰܪܗܶܒ ܡܳܪܝܳܐ ܥܒܳܕ݂ܰܘ̈ܗܝ ܕܢܶܚܙܶܐ ܐܶܢܽܘܢ. ܘܬܶܩܪܽܘܒ ܘܬܺܐܬܶܐ ܬܰܪܥܺܝܬܶܗ ܕܩܰܕ݁ܺܝܫܳܐ ܕܺܝܣܪܳܐܶܝܠ ܘܢܶܕܥܺܝܗ̇. ²⁰ ܘܳܝ ܠܰܕ݂ܩܳܪܶܝܢ ܠܒܺܝܫܳܐ ܛܳܒܳܐ: ܘܰܠܛܳܒܳܐ ܒܺܝܫܳܐ. ܘܣܳܝܡܺܝܢ ܢܰܗܺܝܪܳܐ ܠܚܶܫܽܘܟ݂ܳܐ: ܘܚܶܫܽܘܟ݂ܳܐ ܠܢܰܗܺܝܪܳܐ. ܘܣܳܝܡܺܝܢ ܡܰܪܺܝܪܳܐ ܚܰܠܝܳܐ: ܘܚܰܠܝܳܐ ܡܰܪܺܝܪܳܐ. ²¹ ܘܳܝ ܠܰܕ݂ܚܰܟܺܝܡܺܝܢ ܒܥܰܝܢܰܝ̈ ܢܰܦܫܗܽܘܢ: ܘܠܽܘܩܒܰܠ ܐܰܦܰܝ̈ܗܽܘܢ ܣܰܟܽܘܠܬ݂ܳܢܺܝܢ. ²² ܘܳܝ ܠܰܕ݂ܓܰܢ̱ܒܳܪܺܝܢ ܠܡܶܫܬܳܐ ܚܰܡܪܳܐ: ܘܰܠܓܰܒܖ̈ܶܐ ܚܰܝܠܬܳܢ̈ܶܐ ܕܡܳܙܓܺܝܢ ܫܰܟ݂ܪܳܐ. ²³ ܘܰܡܙܰܟܶܝܢ ܠܚܰܝܳܒܳܐ ܡܶܛܽܠ ܫܽܘܚܕܶܗ ܘܙܳܟ݂ܽܘܬܶܗ ܕܙܰܟܳܝܳܐ ܡܰܥܒܪܺܝܢ ܡܶܢܗܽܘܢ. ²⁴ ܡܶܛܽܠ ܗܳܢܳܐ ܐܰܝܟ݂ ܕܡܶܬܐܰܟ݂ܠܳܐ ܚܰܒܬ݂ܳܐ. ܒܠܶܫܳܢܳܐ ܕܢܽܘܪܳܐ ܕܳܐܚܕܳܐ: ܡ̣ܶܢ ܫܰܠܗܶܒܺܝܬ݂ܳܐ ܕܡܶܫܬܰܒܩܳܐ ܢܶܬ݂ܳܐܟ݂ܠܽܘܢ. ܘܥܶܩܳܪܗܽܘܢ ܐܰܝܟ݂ ܚܶܠܳܐ ܢܶܗܘܶܐ. ܘܦܶܪܥܗܽܘܢ ܐܰܝܟ݂ ܥܽܘܪܳܐ ܢܶܣܰܩ. ܥܰܠ ܕܰܐܣܠܺܝܘ ܢܳܡܽܘܣܶܗ ܕܡܳܪܝܳܐ ܚܰܝܠܬ݂ܳܢܳܐ: ܘܰܠܡܺܐܡܪܶܗ ܕܩܰܕ݁ܺܝܫܳܐ ܕܺܝܣܪܳܐܶܝܠ ܐܰܪܓܶܙܘ. ²⁵ ܡܶܛܽܠ ܗܳܢܳܐ ܐܶܬ݂ܚܰܡܰܬ݂ ܪܽܘܓܙܶܗ ܕܡܳܪܝܳܐ ܥܰܠ ܥܰܡܶܗ. ܘܰܐܪܺܝܡ ܐܺܝܕܶܗ ܥܠܰܝܗܽܘܢ: ܘܰܡܚܳܐ ܐܶܢܽܘܢ. ܘܙܳܥܘ ܛܽܘܖ̈ܶܐ ܘܰܗܘܰܝ̈ ܫܠܰܕܰܝ̈ܗܽܘܢ ܐܰܝܟ݂ ܣܝܳܢܳܐ ܒܓܰܘ ܫܽܘ̈ܩܶܐ ܘܰܒܳܗܳܠܶܝܢ ܟܽܠܗܶܝܢ ܠܳܐ ܗܦܰܟ݂ ܪܽܘܓܙܶܗ: ܘܬܽܘܒ ܐܺܝܕܶܗ ܪܳܡܳܐ. ²⁶ ܘܰܢܪܺܝܡ ܐܳܬܳܐ ܠܥܰܡ̈ܡܶܐ ܡ̣ܶܢ ܪܽܘܚܩܳܐ: ܘܢܰܫܪܶܩ ܠܗܽܘܢ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ. ܘܒܰܥܓܰܠ ܘܩܰܠܺܝܠܳܐܺܝܬ݂ ܢܺܐܬ݂ܽܘܢ. ²⁷ ܠܳܐ ܢܶܬ݁ܛܰܪܦܽܘܢ: ܘܠܳܐ ܢܶܬ݁ܬܰܩܠܽܘܢ. ܘܠܳܐ ܢܢܽܘܡܽܘܢ ܘܠܳܐ ܢܶܕ݂ܡܟ݂ܽܘܢ. ܘܠܳܐ ܢܶܫܪܽܘܢ ܐܳܣܰܪ ܚܰܨܰܝ̈ܗܽܘܢ: ܘܠܳܐ ܢܶܬ݂ܦܰܣ̈ܩܳܢ ܥܰܖ̈ܩܶܐ ܕܰܡܣܳܢܰܝ̈ܗܽܘܢ. ²⁸ ܓܶܐܖ̈ܰܝܗܽܘܢ ܫܢܺܝܢܺܝܢ: ܘܩܶܫ̈ܬܳܬ݂ܗܽܘܢ ܡܰܠ̈ܝܳܢ. ܘܦܰܖ̈ܣܳܬ݂ܳܐ ܕܖ̈ܰܟ݂ܫܗܽܘܢ ܐܰܝܟ݂ ܛܰܖ̈ܳܢܶܐ ܢܶܬ݂ܚܰܫ̈ܒܳܢ: ܘܓܝܓ̣ܠܰܝ̈ܗܽܘܢ ܐܰܝܟ݂ ܥܰܠܥܳܠܳܐ. ²⁹ ܘܢܶܗܡܰܬ݂ܗܽܘܢ ܐܰܝܟ݂ ܐܰܪܝܳܐ ܕܢܳܗܶܡ: ܘܰܐܝܟ݂ ܓܽܘܪܝܳܐ ܕܰܐܪܝܳܐ ܕܢܳܗܶܡ ܘܳܐܚܶܕ݂ ܬܒܳܪܳܐ. ܘܡܰܥܕܶܐ ܘܠܰܝܬ݁ ܕܰܡܦܰܨܶܐ. ³⁰ ܘܢܶܢܗܰܡ ܥܠܰܝܗܽܘܢ ܒܝܰܘܡܳܐ ܗܰܘ: ܐܰܝܟ݂ ܢܶܗܡܬܶܗ ܕܝܰܡܳܐ. ܘܰܢܚܽܘܪܽܘܢ ܒܰܐܪܥܳܐ: ܘܢܶܗܘܶܐ ܚܶܫܽܘܟ݂ܳܐ ܐܘܠܨܳܢܳܐ. ܘܢܽܘܗܪܳܐ ܢܶܚܫܰܟ݂ ܒܥܰܡܛܳܢܗܽܘܢ.

ܩܶܦܰܠܶܐܘܳܢ: ܫܬܺܝܬܳܝܳܐ.

¹ ܒܫܰܢ̱ܬܳܐ ܕܡܺܝܬ݂ ܥܽܘܙܺܝܳܐ ܡܰܠܟܳܐ: ܚܙܺܝܬ݂ ܠܡܳܪܝܳܐ ܝܳܬ݁ܶܒ ܥܰܠ ܟܽܘܪܣܝܳܐ ܪܳܡܳܐ. ܘܫܶܩܠܳܐ ܕܰܫܦܽܘܠܰܘ̈ܗܝ ܡܠܶܐ ܗܰܝܟܠܶܗ. ² ܘܰܣܖ̈ܳܦܺܝܢ ܩܳܝܡܺܝܢ ܠܥܶܠ ܡܶܢܶܗ: ܫܬܳܐ ܫܬܳܐ ܓܶܦܺܝ̈ܢ ܠܚܰܕ݂ ܡܶܢܗܽܘܢ. ܒܰܬ݂ܪܶܝܢ ܡܟܰܣܶܝܢ ܦܰܪܨܽܘܦܶܗ: ܘܒܰܬ݂ܪܶܝܢ ܡܟܰܣܶܝܢ ܖ̈ܶܓܠܰܘܗܝ: ܘܒܰܬ݂ܪܶܝܢ ܦܳܪܚܺܝܢ. ³ ܘܩܳܪܶܝܢ ܗܳܢܳܐ ܠܗܳܢܳܐ: ܘܳܐܡܪܺܝܢ: ܩܰܕܺܝܫ: ܩܰܕܺܝܫ: ܩܰܕܺܝܫ: ܡܳܪܝܳܐ ܚܰܝܠܬ݂ܳܢܳܐ: ܕܡܰܠܝܳܐ ܟܽܠܳܗ̇ ܐܰܪܥܳܐ ܬܶܫ̈ܒܚܳܬܶܗ. ⁴ ܘܙܳܥ ܐܶܣܟ̈ܦܳܬ݂ܳܐ ܕܬܰܖ̈ܥܶܐ ܡ̣ܶܢ ܩܳܠܳܐ ܕܩܳܪܶܐ: ܘܒܰܝܬܳܐ ܐܶܬ݂ܡܠܺܝ ܬܶܢܳܢܳܐ. ⁵ ܘܶܐܡ̇ܪܶܬ݂ ܘܳܝ ܠܺܝ ܕܬ݂ܰܘܺܝܪ ܐ̱ܢܳܐ: ܡܶܛܽܠ ܕܓܰܒܪܳܐ ܐ̱ܢܳܐ ܛܡܰܐ ܣܶܦ̈ܘܳܬ݂ܳܐ: ܘܒܰܝܢܳܬ݂ ܥܰܡܳܐ ܕܛܰܡ̈ܳܐܰܢ ܣܶܦ̈ܘܳܬܶܗ ܥܳܡܰܪ ܐ̱ܢܳܐ. ܘܰܠܡܰܠܟܳܐ ܡܳܪܝܳܐ ܚܰܝܠܬ݂ܳܢܳܐ ܚܙܰܝ̈ ܥܰܝ̈ܢܰܝ. ⁶ ܘܰܦܪܰܚ ܠܘܳܬ݂ܝ ܚܰܕ݂ ܡ̣ܶܢ ܣܖ̈ܳܦܺܝܢ: ܘܒܺܐܝܕܶܗ ܓܡܽܘܪܬܳܐ ܫܩܰܠ ܡ̣ܶܢ ܡܰܕ݂ܒܚܳܐ: ܒܟܰܠܒܬ݂ܳܐ. ⁷ ܘܩܰܪܶܒ ܠܦܽܘܡܝ: ܘܶܐܡܰܪ ܠܺܝ: ܗܳܐ ܩܶܪܒܰܬ ܗܳܕܶܐ ܠܣܶܦ̈ܘܳܬ݂ܳܟ݂: ܕܢܶܥܒܰܪ ܥܰܘܠܳܟ݂: ܘܰܚܛܳܗܰܝ̈ܟ ܢܶܫܬܰܒܩܽܘܢ. ⁸ ܘܫܶܡܥܶܬ݂ ܩܳܠܶܗ ܕܡܳܪܝܳܐ ܕܳܐܡܰܪ: ܠܡܰܢ ܐܶܫܰܕܰܪ: ܘܡܰܢ ܢܺܐܙܰܠ. ܘܶܐܡ̇ܪܶܬ݂ ܗܳܐ ܐܶܢܳܐ ܫܰܕܰܪܰܝܢܝ. ⁹ ܘܶܐܡܰܪ ܠܺܝ: ܙܶܠ ܐܶܡܰܪ ܠܥܰܡܳܐ ܗܳܢܳܐ: ܫܡܰܥܘ ܡܶܫܡܰܥ: ܘܠܳܐ ܬܶܣܬܰ̇ܟܠܽܘܢ ܘܰܚܙܰܘ ܡܶܚܙܳܐ: ܘܠܳܐ ܬܶܕܥܽܘܢ. ¹⁰ ܐܶܬ݂ܥܰܒܺܝ ܠܶܗ ܓܶܝܪ ܠܶܒܶܗ ܕܥܰܡܳܐ ܗܳܢܳܐ: ܘܶܐܕ݂ܢܰܘ̈ܗܝ ܐܰܘܩܰܪ: ܘܥܰܝܢܰܘ̈ܗܝ ܫܳܥ. ܕܠܳܐ ܢܶܚܙܶܐ ܒܥܰܝܢܰܘ̈ܗܝ: ܘܢܶܫܡܰܥ ܒܶܐܕ݂ܢܰܘ̈ܗܝ: ܘܢܶܣܬܰܟܰܠ ܒܠܶܒܶܗ: ܘܰܢܬܽܘܒ ܘܢܶܫܬܒܶܩ ܠܶܗ. ¹¹ ܘܶܐܡܪܶܬ݂ ܥܕܰܡܳܐ ܠܐܶܡܰܬ݂ܝ ܡܳܪܝܳܐ: ܘܶܐܡܰܪ ܥܕܰܡܳܐ ܕܢܶܚܖ̈ܒܳܢ ܩܽܘܖ̈ܝܳܐ ܡ̣ܶܢ ܒܠܰܝ ܕܝܳܬ݁ܶܒ: ܘܒ̈ܳܬ݁ܶܐ ܡ̣ܶܢ ܒܠܰܝ ܐ̱ܢܳܫܳܐ: ܘܰܐܪܥܳܐ ܬܶܚܪܰܒ ܘܬܶܨܕܶܐ. ¹² ܘܢܶܕ݂ܚܽܘܩ ܡܳܪܝܳܐ ܠܐ̱ܢܳܫܳܐ: ܘܬܶܣܓܶܐ ܫܒܺܝܩܽܘܬ݂ܳܐ ܒܓܰܘܳܗ̇ ܕܰܐܪܥܳܐ. ¹³ ܘܰܕ݂ܦܳܝܫܺܝܢ ܒܳܗ̇ ܚܰܕ݂ ܡ̣ܶܢ ܥܶܣܪܳܐ: ܘܰܬ݁ܬܽܘܒ: ܘܬܶܗܘܶܐ ܠܝܰܩܕܳܢܳܐ: ܐܰܝܟ݂ ܒܶܛܡ̱ܬ݂ܳܐ ܘܰܐܝܟ݂ ܒܰܠܽܘܛܳܐ ܕܰܢܦܰܠ ܡ̣ܶܢ ܩܥܳܪܬ݁ܶܗ. ܘܙܰܪܥܳܐ ܗ̱ܘ̣ ܩܰܕ݁ܺܝܫܳܐ ܢܶܨܒܬܶܗ.

ܩܶܦܰܠܶܐܘܳܢ: ܫܒܺܝܥܳܝܳܐ.

¹ ܘܰܗܘܳܐ ܒܝܰܘ̈ܡܳܬܶܗ ܕܳܐܚܳܙ: ܒܰܪ ܝܽܘܬ݂ܳܡ: ܒܰܪ ܥܽܘܙܺܝܳܐ ܡܰܠܟܳܐ ܕܺܝܗܽܘܕ݂ܳܐ: ܣܠܶܩ ܪܳܨܳܢ ܡܰܠܟܳܐ ܕܳܐܪܳܡ: ܘܰܦܩܰܚ ܒܰܪ ܪܽܘܡܰܠܝܳܐ ܡܰܠܟܳܐ ܕܺܝܣܪܳܐܶܝܠ ܠܽܐܘܪܺܫܠܶܡ: ܠܡܶܬ݂ܟܰܬܳܫܽܘ ܥܰܡܳܗ̇: ܘܠܳܐ ܐܶܫܟܰܚܘ ܕܢܶܬ݂ܟܰܬ݁ܫܽܘܢ ܥܠܶܝܗ̇. ² ܘܶܐܬ݂ܶܐܡܰܪ ܠܰܕ݂ܒܶܝܬ݂ ܕܰܘܺܝܕ݂: ܕܶܐܫܬ݁ܘܺܝ ܐܳܪܳܡ ܥܰܡ ܐܰܦܪܶܝܡ. ܘܙܳܥ̣ ܠܶܒܶܗ ܘܠܶܒܳܐ ܕܥܰܡܶܗ: ܐܰܝܟ݂ ܕܙܳܝܥܺܝܢ ܐܺܝ̈ܠܳܢܶܐ ܕܥܳܒܳܐ ܡ̣ܶܢ ܩܕ݂ܳܡ ܪܽܘܚܳܐ. ³ ܘܶܐܡܰܪ ܡܳܪܝܳܐ ܠܶܐܫܰܥܝܳܐ: ܦܽܘܩ ܠܽܐܘܪܥܶܗ ܕܳܐܚܳܙ: ܐܰܢ̱ܬ݁ ܘܫܰܪܢܳܫܽܘܒ ܒܪܳܟ݂: ܥܰܠ ܓܶܢ̱ܒ ܝܰܡܬ݂ܳܐ ܥܶܠܳܝܬܳܐ ܕܒܽܐܘܪܚܳܐ ܕܚܰܩܠܶܗ ܕܩܰܨܪܳܐ. ⁴ ܘܶܐܡܰܪ ܠܶܗ: ܐܶܙܕܰܗܪ ܘܰܫܠܺܝ: ܘܠܳܐ ܬܶܕ݂ܚܰܠ. ܘܠܶܒܳܟ݂ ܠܳܐ ܢܶܬ݂ܘܰܪ ܡ̣ܶܢ ܗܳܠܶܝܢ ܬܪܶܝܢ ܕܽܘܢ̈ܒܳܬ݂ܳܐ: ܐܽܘ̈ܕܶܐ ܡܚܰܖ̈ܟܶܐ: ܡ̣ܶܢ ܚܶܡܬ݂ܳܐ ܕܪܽܘܓܙܶܗ ܕܪܳܨܳܢ ܘܰܕ݂ܒܰܪ ܪܽܘܡܰܠܝܳܐ. ⁵ ܚܠܳܦ ܕܶܐܬ݂ܡܰܠܰܟܘ ܥܠܰܝܟ ܒܺܝܫܬܳܐ: ܐܳܪܳܡ: ܘܰܐܦܪܶܝܡ: ܘܒܰܪ ܪܽܘܡܰܠܝܳܐ. ⁶ ܘܶܐܡܰܪܘ ܢܶܣܰܩ ܠܺܝܗܽܘܕ݂ܳܐ ܘܢܶܥܩܪܺܝܗ̇: ܘܢܶܬ݂ܪܥܺܝܗ̇ ܘܢܰܡܠܶܟ݂ ܒܳܗ̇ ܡܰܠܟܳܐ ܠܒܰܪ ܛܒܳܐܶܝܠ. ⁷ ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ: ܠܳܐ ܬܩܽܘܡ ܘܠܳܐ ܬܶܗܘܶܐ. ⁸ ܡܶܛܽܠ ܕܪܳܫܳܐ ܕܳܐܪܳܡ ܕܰܪܡܣܽܘܩ: ܘܪܺܝܫܳܐ ܕܕܰܪܡܣܽܘܩ ܪܳܨܳܢ: ܘܒܳܬܰܪ ܫܬ݁ܺܝܢ ܘܚܰܡܶܫ ܫܢܺܝ̈ܢ: ܢܶܬܰܪ ܐܰܦܪܶܝܡ ܡ̣ܶܢ ܥܰܡܳܐ. ⁹ ܘܪܺܝܫܳܐ ܕܰܐܦܪܶܝܡ ܫܳܡܪܺܝܢ: ܘܪܺܝܫܳܐ ܕܫܳܡܪܺܝܢ ܒܰܪ ܪܽܘܡܰܠܝܳܐ. ܘܶܐܢ ܠܳܐ ܬܗܰܝܡܢܽܘܢ: ܐܳܦ ܠܳܐ ܬܶܣܬܰܟܠܽܘܢ. ¹⁰ ܘܰܐܘܣܶܦ ܬܽܘܒ ܡܳܪܝܳܐ ܠܡܺܐܡܰܪ ܠܐܳܚܳܙ. ¹¹ ܫܐܰܠ ܠܳܟ݂ ܐܳܬܳܐ ܡ̣ܶܢ ܡܳܪܝܳܐ ܐܰܠܳܗܳܟ݂: ܥܰܡܶܩ: ܫܐܰܠ: ܐܰܘ ܐܰܪܺܝܡ ܠܥܶܠ. ¹² ܘܶܐܡܰܪ ܐܳܚܳܙ ܠܳܐ ܐܶܫܐܰܠ: ܘܠܳܐ ܐܶܢܰܣܶܐ ܠܡܳܪܝܳܐ ܐܰܠܳܗܝ. ¹³ ܘܶܐܡܰܪ ܫܡܰܥܘ ܒܰܝܬ݁ܶܗ ܕܕܰܘܺܝܕ݂: ܙܥܽܘܪܝܳܐ ܗ̱ܝ ܠܟ݂ܽܘܢ ܕܡܰܠܐܶܝܢ ܐ̱ܢܬ݁ܽܘܢ ܠܓܰܒܪܳܐ: ܐܶܠܳܐ ܕܬܰܠܐܽܘܢ ܐܳܦ ܠܰܐܠܳܗܝ. ¹⁴ ܡܶܛܽܠ ܗܳܢܳܐ ܢܶܬ݁ܶܠ ܠܟ݂ܽܘܢ ܡܳܪܝܳܐ ܐܰ‌ܠܳܗܳܐ ܐܳܬܳܐ: ܗܳܐ ܒܬ݂ܽܘܠܬܳܐ ܒܳܛܢܳܐ ܘܝܳܠܕܳܐ ܒܪܳܐ: ܘܢܶܬ݂ܩܪܶܐ: ܫܡܶܗ ܥܰܡܰܢܽܘܐܶܝܠ. ¹⁵ ܚܶܐܘܬ݂ܳܐ ܘܕܶܒܫܳܐ ܢܶܐܟ݂ܽܘܠ: ܕܢܶܕܰܥ ܠܡܰܣܠܳܝܽܘ ܒܺܝܫܬܳܐ: ܘܰܠܡܶܓܒܳܐ ܛܳܒܬ݂ܳܐ. ¹⁶ ܡܶܛܽܠ ܕܥܰܕ݂ܠܳܐ ܢܶܕܰܥ ܛܰܠܝܳܐ ܠܡܰܣܠܳܝܽܘ ܒܺܝܫܬܳܐ: ܘܰܠܡܶܓܒܳܐ ܛܳܒܬ݂ܳܐ: ܬܶܫܬ݁ܒܶܩ ܐܰܪܥܳܐ ܕܰܡܥܳܩ ܐܰܢ̱ܬ݁ ܒܳܗ̇ ܡ̣ܶܢ ܩܕ݂ܳܡ ܬܪܶܝܢ ܡܰܠܟܶܝ̈ܗ̇. ¹⁷ ܡܳܪܝܳܐ ܢܰܝܬ݁ܶܐ ܥܠܰܝܟ: ܘܥܰܠ ܥܰܡܳܟ݂: ܘܥܰܠ ܒܶܝܬ݂ ܐܰܒܽܘܟ݂: ܝܰܘ̈ܡܳܬܳܐ ܕܠܳܐ ܐܶܬ݂ܰܘ ܡ̣ܶܢ ܝܰܘܡܳܐ ܕܰܐܥܒܰܪ ܠܰܐܦܪܶܝܡ ܡ̣ܶܢ ܝܺܗܽܘܕ݂ܳܐ ܡܰܠܟܳܐ ܕܳܐܬ݂ܽܘܪ. ¹⁸ ܘܢܶܗܘܶܐ ܒܝܰܘܡܳܐ ܗܰܘ: ܢܰܫܪܶܩ ܡܳܪܝܳܐ ܠܕܰܒܳܒ̈ܶܐ: ܕܒܰܫܦܽܘܠܰܝ̈ ܢܰܗܖ̈ܰܘܳܬ݂ܳܐ ܕܡܶܨܪܶܝܢ: ܘܰܠܕܶܒܽܘܖ̈ܝܳܬ݂ܳܐ ܕܒܰܐܪܥܳܐ ܕܳܐܬ݂ܽܘܪ. ¹⁹ ܘܢܺܐܬ݂ܽܘܢ ܘܢܶܬ݁ܬ݁ܢܺܝܚܽܘܢ ܟܽܠܗܽܘܢ ܒܢܰܚܠܳܐ ܕܝܳܬ݂ܽܘܬ݂: ܘܰܒܦܰܥܖ̈ܶܐ ܕܟܺܐܦܳܐ: ܘܰܒܟܽܠܗܽܘܢ ܚܠܺܝ̈ܠܶܐ. ²⁰ ܒܝܰܘܡܳܐ ܗܰܘ: ܢܶܓܪܽܘܥ ܡܳܪܝܳܐ ܒܰܡܕܰܟܝܳܐ ܪܳܘܝܳܐ: ܒܥܶܒܖ̈ܰܘܗܝ ܕܢܰܗܪܳܐ ܠܡܰܠܟܳܐ ܕܳܐܬ݂ܽܘܪ: ܡ̣ܶܢ ܪܺܝܫܶܗ ܘܰܠܣܰܥܪܳܐ ܕܖ̈ܶܓ̣ܠܰܘܗܝ. ܐܳܦ ܕܰܩܢܶܗ ܢܶܫܩܽܘܠ. ²¹ ܘܢܶܗܘܶܐ ܒܝܰܘܡܳܐ ܗܰܘ: ܢܰܚܶܐ ܓܰܒܪܳܐ ܥܶܓܠܬܳܐ ܕܬ݂ܰܘܖ̈ܶܐ: ܘܬܰܪܬܶܝܢ ܥܳܢ̈ܳܐ. ²² ܘܢܶܗܘܶܐ ܡ̣ܶܢ ܣܽܘܓ݂ܳܐܐ ܕܥܳܒ̈ܕܳܢ ܚܰܠܒܳܐ: ܢܶܐܟ݂ܽܘܠ ܚܺܐܘܬ݂ܳܐ: ܡܶܛܽܠ ܕܕܶܒܫܳܐ ܘܚܶܐܘܬ݂ܳܐ ܢܶܐܟ݂ܽܘܠ ܡܰܢ ܕܡܶܫܬܰܚܰܪ ܒܓܰܘܳܗ̇ ܕܰܐܪܥܳܐ. ²³ ܘܢܶܗܘܶܐ ܒܝܰܘܡܳܐ ܗܰܘ ܟܽܠ ܐܰܬܰܪ ܕܺܐܝܬ݂ ܒܶܗ ܐܳܠܶܦ ܓܽܘܦܢܺܝ̈ܢ ܒܐܳܠܶܦ ܕܰܟ݂ܣܶܦ: ܠܝܰܥܪܳܐ ܘܰܠܟܽܘ̈ܒܶܐ ܢܶܗܘܶܐ. ²⁴ ܘܰܒܓܶܐܖ̈ܶܐ ܘܰܒܩܶܫ̈ܬܳܬ݂ܳܐ ܢܶܥܠܽܘܢ ܠܬܰܡܳܢ. ܡܶܛܽܠ ܕܝܰܥܪܳܐ ܘܟ݂ܽܘ̈ܒܶܐ ܬܶܬ݂ܡܠܶܐ ܟܽܠܳܗ̇ ܐܰܪܥܳܐ. ²⁵ ܘܟܽܠܗܽܘܢ ܛܽܘܖ̈ܶܐ ܕܕ݂ܰܒܪܳܐ ܗ̱ܘܳܬ݂ ܒܗܽܘܢ ܦܰܕܳܢܳܐ. ܢܶܬ݁ܕܰܒܪܽܘܢ: ܘܠܳܐ ܬܶܥܽܘܠ ܠܬܰܡܳܢ ܕܶܚܠܬ݂ܳܐ ܕܝܰܥܪܳܐ ܘܰܕ݂ܟ݂ܽܘ̈ܒܶܐ. ܘܢܶܗܘܶܐ ܒܶܝܬ݂ ܪܶܥܝܳܐ ܠܬ݂ܰܘܖ̈ܶܐ: ܘܒܶܝܬ݂ ܕܝܳܫܳܐ ܠܥܳܢ̈ܳܐ.

ܩܶܦܰܠܶܐܘܳܢ: ܬܡܺܝܢܳܝܳܐ.

¹ ܘܶܐܡܰܪ ܠܺܝ ܡܳܪܝܳܐ ܣܰܒ ܠܳܟ݂ ܓܶܠܝܽܘܢܳܐ ܪܰܒܳܐ: ܘܰܟ݂ܬܽܘܒ ܥܠܰܘܗ̱ܝ ܒܰܟ݂ܬܳܒܳܐ ܕܐ̱ܢܳܫܳܐ: ܠܰܡܣܰܪܗܳܒܽܘ ܫܶܒܝܳܐ: ܘܰܠܡܶܬ݂ܟܰܒ ܒܶܙܬ݂ܳܐ. ² ܘܣܰܗܶܕ݂ ܠܺܝ ܣܳܗ̈ܕܶܐ ܕܰܡܗܰܝܡܢܺܝܢ: ܠܽܐܘܪܺܝܳܐ ܟܳܗܢܳܐ: ܘܠܰܙܟܰܪܝܳܐ ܒܰܪ ܒܪܰܟ݂ܝܳܐ. ³ ܘܩܶܪܒܶܬ݂ ܠܰܢܒܺܝܬ݂ܳܐ: ܘܒܶܛܢܰܬ ܘܝܶܠܕܰܬ ܒܪܳܐ. ܘܶܐܡܰܪ ܠܺܝ ܡܳܪܝܳܐ: ܩܪܺܝ ܫܡܶܗ ܡܣܰܪܗܶܒ ܫܳܒܶܐ: ܘܬ݂ܽܘܟܒ ܒܳܐܶܙ. ⁴ ܡܶܛܽܠ ܕܥܰܕ݂ܠܳܐ ܢܶܕܰܥ ܛܰܠܝܳܐ ܠܡܶܩܪܳܐ ܐܰܒܳܐ ܘܶܐܡܳܐ: ܢܶܫܩܽܘܠ ܩܶܢܝܳܢܳܐ ܕܕܰܪܡܣܽܘܩ: ܘܒܶܙܬ݂ܳܐ ܕܫܳܡܪܺܝܢ: ܩܕ݂ܳܡ ܡܰܠܟܳܐ ܕܳܐܬ݂ܽܘܪ. ⁵ ܘܰܐܘܣܶܦ ܬܽܘܒ ܡܳܪܝܳܐ ܠܡܺܐܡܰܪ ܠܺܝ. ⁶ ܥܰܠ ܕܰܐܣܠܺܝܘ ܥܰܡܳܐ ܗܳܢܳܐ ܡܰܝ̈ܳܐ ܕܫܺܝܠܽܘܚܳܐ ܕܪܳܕܶܝܢ ܒܫܶܠܝܳܐ: ܘܰܚܕ݂ܺܝܘ ܒܪܳܨܳܢ ܘܰܒܒܰܪ ܪܽܘܡܰܠܝܳܐ. ⁷ ܡܶܛܽܠ ܗܳܢܳܐ ܢܰܣܶܩ ܥܠܰܝܗܽܘܢ ܡܳܪܝܳܐ: ܡܰܝ̈ܳܐ ܕܢܰܗܪܳܐ ܣܰܓ݁ܺܝ̈ܐܶܐ ܘܥܰܫܺܝ̈ܢܶܐ: ܠܡܰܠܟܳܐ ܕܳܐܬ݂ܽܘܪ: ܘܰܠܟ݂ܠܶܗ ܐܺܝܩܳܪܶܗ. ܘܢܶܣܰܩ ܥܰܠ ܟܽܠܗܽܘܢ ܦܨܺܝܕܰܝ̈ܗܽܘܢ: ܘܰܢܗܰܠܶܟ݂ ܥܰܠ ܟܽܠܗܽܘܢ ܫܽܘܖ̈ܰܝܗܽܘܢ. ⁸ ܘܢܶܥܒܰܪ ܒܺܝܗܽܘܕ݂ܳܐ: ܘܢܶܓܪܽܘܦ ܘܢܶܥܒܰܪ: ܘܰܥܕܰܡܳܐ ܠܨܰܘܪܳܐ ܢܶܡܛܶܐ. ܘܢܶܗܘܶܐ ܪܰܘܡܳܐ ܕܟܶܢܦܰܘ̈ܗܝ: ܡܠܶܐ ܦܬ݂ܳܝܳܗ̇ ܕܰܐܪܥܳܟ݂ ܥܰܡܰܢܘܐܶܝܠ. ⁹ ܙܽܘܥܘ ܥܰܡ̈ܡܶܐ: ܘܶܐܬ݁ܬܰܒܪܘ. ܘܨܽܘܬ݂ܘ ܟܽܠܗܽܘܢ ܖ̈ܰܚܺܝܩܶܝܗ̇ ܕܰܐܪܥܳܐ. ܐܶܬ݂ܥܰܫܰܢܘ ܘܶܐܬ݁ܬܰܒܪܘ. ¹⁰ ܐܶܬ݂ܪܰܥܰܘ ܬܰܪܥܺܝܬ݂ܳܐ: ܘܬܶܬ݂ܒܰܛܰܠ ܡܰܠܠܶܘ ܡܶܠܬ݂ܳܐ: ܘܠܳܐ ܬܶܬ݂ܩܰܝܰܡ ܡܶܛܽܠ ܥܰܡܰܢܘܐܶܝܠ. ¹¹ ܗܳܟ݂ܰܢܳܐ ܐܶܡܰܪ ܠܺܝ ܡܳܪܝܳܐ: ܐܰܝܟ݂ ܡܶܐܚܰܕ݂ ܐܺܝܕ݂ܳܐ: ܘܢܰܣܛܶܝܢܝ: ܠܳܐ ܐܶܗܰܠܶܟ݂ ܒܽܐܘܪܚܶܗ ܕܥܰܡܳܐ ܗܳܢܳܐ. ¹² ܘܶܐܡܰܪ: ܠܳܐ ܬܶܐܡܪܽܘܢ ܡܶܪܕܳܐ: ܐܰܝܟ݂ ܕܶܐܡܰܪ ܥܰܡܳܐ ܗܳܢܳܐ ܡܶܪܕܳܐ: ܘܰܒܕܰܚܠܰܬ݂ܗܽܘܢ ܠܳܐ ܬܶܕ݂ܚܠܽܘܢ: ܘܠܳܐ ܬܽܙܘܥܽܘܢ. ¹³ ܠܡܳܪܝܳܐ ܚܰܝܠܬ݂ܳܢܳܐ ܩܰܕܶܫܘ: ܘܗܽܘܝܽܘ ܕܶܚܠܰܬ݂ܟܽܘܢ: ܘܗܽܘܝܽܘ ܡܣܰܝܥܳܢܟ݂ܽܘܢ. ¹⁴ ܘܢܶܗܘܶܐ ܠܡܰܩܕܫܳܐ: ܘܰܠܟܺܐܦܳܐ ܕܰܡܚܽܘܬ݂ܳܐ: ܘܰܠܛܰܪܳܢܳܐ ܕܬ݂ܽܘܩܠܬ݂ܳܐ: ܠܰܬ݂ܖ̈ܰܝܗܽܘܢ ܒ̈ܳܬ݁ܶܐ ܕܺܝܣܪܳܐܶܝܠ: ܠܦܰܚ̈ܶܐ ܘܠܰܡܨܺܝ̈ܕ݂ܳܬ݂ܳܐ ܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ¹⁵ ܘܢܶܬ݁ܬܰܩܠܽܘܢ ܒܗܽܘܢ ܣܰܓ݁ܺܝ̈ܐܶܐ: ܘܢܶܦܠܽܘܢ: ܘܢܶܬ݁ܬܰܒܪܽܘܢ: ܘܢܶܬ݁ܬ݁ܨܺܝܕ݂ܽܘܢ: ܘܢܶܬ݁ܬܰܚܕܽܘܢ. ¹⁶ ܨܽܘܪܘ ܣܳܗܕܽܘܬ݂ܳܐ: ܘܰܚܬ݂ܽܘܡܘ ܢܳܡܽܘܣܳܐ. ¹⁷ ܒܝܽܘܠܦܳܢܝ ܐܶܟܰܬܰܪ ܠܡܳܪܝܳܐ ܕܰܐܦܢܺܝ ܐܰܦܰܘ̈ܗܝ ܡ̣ܶܢ ܕܒܶܝܬ݂ ܝܰܥܩܽܘܒ: ܘܶܐܣܰܟܶܐ ܠܶܗ. ¹⁸ ܗܳܐ ܐܶܢܳܐ ܘܰܒܢܰܝ̈ܳܐ ܕܝܰܗ̱ܒ ܠܺܝ ܡܳܪܝܳܐ: ܠܳܐܬܳܐ ܘܰܠܬܶܕ݂ܡܽܘܪܬܳܐ ܒܺܐܝܣܪܳܝܶܠ: ܡ̣ܶܢ ܩܕ݂ܳܡ ܡܳܪܝܳܐ ܚܰܝܠܬ݂ܳܢܳܐ ܕܰܫܪܳܐ ܒܛܽܘܪܳܐ ܕܨܶܗܝܽܘܢ. ¹⁹ ܟܰܕ݂ ܢܺܐܡܪܽܘܢ ܠܟ݂ܽܘܢ: ܕܰܫܐܰܠܘ ܡ̣ܶܢ ܙܰܟܽܘܖ̈ܶܐ ܘܡ̣ܶܢ ܝܰܕܽܘܥ̈ܶܐ: ܕܢܳܨܪܺܝܢ: ܘܢܳܗ̇ܡܺܝܢ: ܠܳܐ ܗܘܰܘ ܥܰܡܶܗ ܕܰܐ‌ܠܳܗܳܐ ܐܰܝܠܶܝܢ ܕܫܳܐܠܺܝܢ ܠܡܺܝ̈ܬܶܐ ܥܰܠ ܚܰܝ̈ܶܐ. ²⁰ ܠܢܳܡܽܘܣܳܐ ܘܰܠܣܳܗܕܽܘܬ݂ܳܐ: ܕܠܳܐ ܢܺܐܡܪܽܘܢ ܐܰܝܟ݂ ܡܶܠܬ݂ܳܐ ܗܳܕܶܐ: ܕܠܰܝܬ݁ ܠܡܶܬܰܠ ܥܠܶܝܗ̇ ܫܽܘܚܕܳܐ. ²¹ ܘܢܶܥܒܰܪ ܒܳܗ̇: ܘܰܢܩܰܫܶܝܗ̇: ܘܢܶܟ݂ܦܰܢ. ܘܡܳܐ ܕܰܟ݂ܦܶܢ ܢܶܪܓܰܙ: ܘܰܢܨܰܚܶܐ ܠܡܰܠܟܶܗ ܘܠܰܐܠܳܗܶܗ. ²² ܘܢܶܬ݂ܦܢܶܐ ܠܥܶܠ: ܘܒܰܐܪܥܳܐ ܢܚܽܘܪ: ܐܘܠܨܳܢܳܐ ܘܚܶܫܽܘܟ݂ܳܐ: ܘܥܳܩܬ݂ܳܐ ܘܥܰܡܛܳܢܳܐ ܢܶܕ݂ܚܩܺܝܘܗܝ ܡܶܛܽܠ ܕܠܳܐ ܢܛܰܪܶܦ ܠܰܐܝܢܳܐ ܕܰܡܥܳܩ: ܐܰܝܟ݂ ܕܰܒܙܰܒܢܳܐ ܩܰܕ݂ܡܳܝܳܐ.

ܩܶܦܰܠܶܐܘܳܢ: ܬܫܺܝܥܳܝܳܐ.

¹ ܣܰܪܗܒܰܬ ܐܰܪܥܳܐ ܕܰܙܒܳܘܠܽܘܢ: ܘܰܐܪܥܳܐ ܕܢܰܦܬܳܠܺܝ. ܐܘܚܕܳܢܳܐ ܥܫܶܢ: ܐܽܘܪܚܳܐ ܕܝܰܡܳܐ: ܥܶܒܖ̈ܰܘܗܝ ܕܝܽܘܪܕ̇ܢܳܢ ܢܰܗܪܳܐ: ܓܠܺܝܠܳܐ ܕܥܰܡ̈ܡܶܐ. ² ܥܰܡܳܐ ܕܰܡܗܰܠܟ݂ܺܝܢ ܒܚܶܫܽܘܟ݂ܳܐ: ܚܙܰܘ ܢܽܘܗܪܳܐ ܪܰܒܳܐ. ܘܰܕ݂ܝܳܬ݂ܒܺܝܢ ܒܰܐܪܥܳܐ ܕܛܶܠܳܠܰܝ̈ ܡܰܘܬܳܐ: ܢܽܘܗܪܳܐ ܕܢܰܚ ܥܠܰܝܗܽܘܢ. ³ ܐܰܣܓܺܝܬ݁ ܥܰܡܳܐ: ܘܠܶܗ ܐܰܘܪܶܒܬ݁ ܚܰܕ݂ܽܘܬ݂ܳܐ. ܚܕ݂ܺܝܘ ܩܕ݂ܳܡܰܝܟ ܐܰܝܟ݂ ܗܳܢܽܘܢ ܕܚܳܕܶܝܢ ܒܰܚܨܳܕ݂ܳܐ: ܘܰܐܝܟ݂ ܗܳܢܽܘܢ ܕܕܳܝܨܺܝܢ ܡܳܐ ܕܰܡܦܰܠܓܺܝܢ ܒܶܙܬ݂ܳܐ. ⁴ ܡܶܛܽܠ ܕܢܺܝܪܳܐ ܕܫܽܘܥܒܳܕ݂ܗܽܘܢ: ܘܚܽܘܛܪܳܐ ܕܟܰܬ݂ܦܗܽܘܢ: ܘܫܰܒܛܳܐ ܕܰܡܫܰܥܒܶܕ݂ ܗ̱ܘܳܐ ܠܗܽܘܢ: ܬܒܰܪܬ݁ ܐܰܝܟ݂ ܝܰܘܡܳܐ ܕܡܶܕ݂ܝܰܢ. ⁵ ܡܶܛܽܠ ܕܟ݂ܽܠ ܩܳܠ ܐܶܫܬ݁ܡܰܥ ܒܙܳܘܥܬ݂ܳܐ. ܘܢܰܚܬܳܐ ܡܦܰܠܦܰܠ ܒܰܕ݂ܡܳܐ. ܘܰܗܘܳܐ ܠܝܰܩܕܳܢܳܐ ܘܰܠܡܶܐܟ݂ܽܘܠܬܳܐ ܕܢܽܘܪܳܐ. ⁶ ܡܶܛܽܠ ܕܝܰܠܕܳܐ ܐܶܬ݂ܺܝܠܶܕ݂ ܠܰܢ: ܘܰܒܪܳܐ ܐܶܬ݂ܺܝܗܶܒ ܠܰܢ. ܘܰܗܘܳܐ ܫܽܘܠܛܳܢܶܗ ܥܰܠ ܟܰܬ݂ܦܶܗ. ܘܶܐܬ݂ܩܪܺܝ ܫܡܶܗ ܕܽܘܡܳܪܳܐ ܘܡܳܠܽܘܟ݂ܳܐ: ܐܰ‌ܠܳܗܳܐ ܓܰܢ̱ܒܳܪܳܐ ܕܥܳܠ̈ܡܶܐ: ܫܰܠܺܝܛܳܐ ܕܰܫܠܳܡܳܐ. ⁷ ܠܡܰܣܓܳܝܽܘ ܫܽܘܠܛܳܢܶܗ. ܘܠܰܫܠܳܡܶܗ ܠܰܝܬ݁ ܣܳܟ݂ܶܐ: ܥܰܠ ܟܽܘܪܣܝܶܗ ܕܕܰܘܺܝܕ݂: ܘܥܰܠ ܡܰܠܟܽܘܬܶܗ. ܕܢܰܬ݂ܩܢܺܝܗ̇ ܘܰܢܣܰܡܟ݂ܺܝܗ̇ ܒܕܺܝܢܳܐ ܘܰܒܙܰܕܺܝܩܽܘܬ݂ܳܐ: ܡܶܟܺܝܠ ܘܰܥܕܰܡܳܐ ܠܥܳܠܰܡ. ܛܢܳܢܶܗ ܕܡܳܪܝܳܐ ܚܰܝܠܬ݂ܳܢܳܐ ܥܳܒܶܕ݂ ܗܳܕܶܐ. ⁸ ܦܶܬ݂ܓ݂ܳܡܳܐ ܫܰܕܰܪ ܡܳܪܝܳܐ ܒܝܰܥܩܽܘܒ: ܘܰܢ̣ܦܰܠ ܒܺܝܣܪܳܐܶܝܠ. ⁹ ܘܢܶܕܥܽܘܢ ܥܰܡ̈ܡܶܐ ܟܽܠܗܽܘܢ: ܐܰܦܪܶܝܡ ܘܥܳܡܽܘܖ̈ܶܝܗ̇ ܕܫܳܡܪܺܝܢ: ܒܓܰܐܝܽܘܬ݂ܳܐ ܘܰܒܪܰܒܽܘܬ݂ ܠܶܒܳܐ: ܘܳܐܡܪܺܝܢ. ¹⁰ ܠܶܒ̈ܢܶܐ ܢܰܪܡܶܐ: ܘܢܶܓܙܽܘܪ ܓܙܺܝܖ̈ܳܬ݂ܳܐ. ܘܢܶܦܣܽܘܩ ܫܰܩ̈ܡܶܐ: ܘܰܐܖ̈ܙܶܐ ܢܶܚܠܽܘܦ. ¹¹ ܘܢܰܥܫܶܢ ܡܳܪܝܳܐ ܠܳܐܠܽܘܨܰܘ̈ܗܝ ܕܪܳܨܳܢ ܥܠܰܘܗ̱ܝ. ܘܠܰܒܥܶܠܕܒܳܒܰܘ̈ܗܝ ܢܓܰܪܶܓ. ¹² ܠܰܐܕ݂ܽܘܡ ܡ̣ܶܢ ܡܰܕܢܚܳܐ: ܘܠܰܦܠܶܫܬܳܝ̈ܶܐ ܡ̣ܶܢ ܡܰܥܪܒܳܐ. ܘܢܶܐܟ݂ܽܠܘܳܢܶܗ ܠܺܝܣܪܳܐܶܝܠ ܒܟ݂ܽܠܶܗ ܦܽܘܡܗܽܘܢ ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ݂ ܪܽܘܓܙܶܗ. ܘܬܽܘܒ ܐܺܝܕܶܗ ܪܳܡܳܐ. ¹³ ܘܥܰܡܳܐ ܠܳܐ ܐܶܬ݂ܦܢܺܝܘ: ܥܕܰܡܳܐ ܕܰܒܠܰܥܘ. ܘܰܠܡܳܪܝܳܐ ܚܰܝܠܬ݂ܳܢܳܐ ܠܳܐ ܒܥܳܘ. ¹⁴ ܘܰܐܘܒܶܕ݂ ܡܳܪܝܳܐ ܡ̣ܶܢ ܝܺܣܪܳܐܶܝܠ: ܪܺܝܫܳܐ ܘܕ݂ܽܘܢܒܬ݂ܳܐ: ܘܕ݂ܽܘܢܒܬ݂ܳܐ ܘܪܺܝܫܳܐ: ܒܝܰܘܡܳܐ ܚܰܕ݂. ¹⁵ ܣܳܒܳܐ ܘܰܗܕ݂ܺܝܪ ܐܰܦ̈ܶܐ ܗܽܘܝܽܘ ܪܺܝܫܳܐ. ܘܰܢܒܺܝܳܐ ܕܡܰܠܶܦ ܫܽܘܩܪܳܐ ܗܽܘܝܽܘ ܕܽܘܢܒܬ݂ܳܐ. ¹⁶ ܘܢܶܗܘܽܘܢ ܡܰܛܐܒܳܢܰܘ̈ܗܝ ܕܥܰܡܳܐ ܗܳܢܳܐ: ܡܰܛܥܶܝܢ ܘܰܡܛܰܒܥܺܝܢ ܠܶܗ. ¹⁷ ܡܶܛܽܠ ܗܳܢܳܐ ܠܳܐ ܢܚܰܕܶܐ ܡܳܪܝܳܐ ܥܰܠ ܥܠܰܝܡܰܝ̈ܗܽܘܢ. ܘܥܰܠ ܝܰܬ݂ܡܰܝ̈ܗܽܘܢ ܘܥܰܠ ܐܰܖ̈ܡܠܳܬ݂ܗܽܘܢ ܠܳܐ ܢܪܰܚܶܦ. ܡܶܛܽܠ ܕܟܽܠܗܽܘܢ ܚܰܠܦܺܝܢ ܘܒܺܝܫܺܝܢ. ܘܟܽܠ ܦܽܘܡ ܡܡܰܠܶܠ ܫܳܛܝܽܘܬ݂ܳܐ. ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ݂ ܪܽܘܓܙܶܗ. ܘܬܽܘܒ ܐܺܝܕܶܗ ܪܳܡܳܐ. ¹⁸ ܡܶܛܽܠ ܕܣܶܦܰܬ ܚܛܺܝܬ݂ܳܐ ܐܰܝܟ݂ ܢܽܘܪܳܐ: ܘܬܶܐܟ݂ܽܘܠ ܝܰܥܪܳܐ ܘܟ݂ܽܘ̈ܒܶܐ. ܘܬܶܣܰܦ ܒܣܰܘ̈ܟܶܐ ܕܥܳܒܳܐ. ܘܢܶܬ݂ܥܰܪܩܠܽܘܢ ܓܒܰܝ̈ܳܐ ܒܬܶܢܳܢܳܐ. ¹⁹ ܒܰܟ݂ܐܳܬܶܗ ܕܡܳܪܝܳܐ ܚܰܝܠܬ݂ܳܢܳܐ ܙܳܥܰܬ ܐܰܪܥܳܐ. ܘܰܗܘܳܐ ܥܰܡܳܐ ܐܰܝܟ݂ ܗܰܘ ܕܶܐܟܰܠܬܶܗ ܢܽܘܪܳܐ. ܘܰܓܒܰܪ ܥܰܠ ܐܰܚܽܘܗܝ ܠܳܐ ܢܚܽܘܣ. ²⁰ ܘܢܶܓܙܽܘܪ ܥܰܠ ܝܰܡܺܝܢܶܗ ܘܢܶܟ݂ܦܰܢ. ܘܢܶܐܟ݂ܽܘܠ ܥܰܠ ܣܶܡܳܠܶܗ. ܘܠܳܐ ܢܶܣܒܥܽܘܢ ܓܒܰܪ ܒܶܣܪܳܐ ܕܰܕ݂ܪܳܥܶܗ ܢܶܐܟ݂ܽܘܠ. ²¹ ܡܢܰܫܶܐ ܠܰܐܦܪܶܝܡ: ܘܰܐܦܪܶܝܡ ܠܰܡܢܰܫܶܐ: ܘܰܐܟ݂ܚܕ݂ܳܐ ܥܰܠ ܝܺܗܽܘܕ݂ܳܐ. ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ݂ ܪܽܘܓ̣ܙܶܗ. ܘܬܽܘܒ ܐܺܝܕܶܗ ܪܳܡܳܐ.

ܩܶܦܰܠܶܐܘܳܢ: ܥܣܺܝܪܳܝܳܐ.

¹ ܘܳܝ ܠܰܕ݂ܒܳܕ݂ܩܺܝܢ ܒܕ݂ܳܩ̈ܶܐ ܕܥܶܬܳܐ: ܘܟܳܬ݂ܒܺܝܢ ܥܰܘܠܳܐ. ² ܠܡܶܨܠܳܐ ܕܺܝܢܳܐ ܕܡܶܣܟܺܢ̈ܶܐ: ܘܰܠܡܶܒܰܙ ܕܺܝܢܳܐ ܕܒܳܝ̈ܫܶܐ ܕܥܰܡܝ. ܕܢܶܫܒܽܘܢ ܠܰܐܖ̈ܡܠܳܬ݂ܳܐ: ܘܢܶܒܙܽܘܢ ܠܝܰܬ݂ܡ̈ܶܐ. ³ ܡܳܢܳܐ ܬܶܥܒܕ݂ܽܘܢ ܠܝܰܘܡܳܐ ܕܦܽܘܪܥܳܢܳܐ: ܘܠܰܕ݂ܠܽܘܚܝܳܐ ܕܡ̣ܶܢ ܪܽܘܚܩܳܐ ܐܳܬ݁ܶܐ. ܠܘܳܬ݂ ܡܰܢ ܬܶܥ̱ܪܩܽܘܢ ܕܬܶܬ݂ܥܰܕܪܽܘܢ ܘܰܠܘܳܬ݂ ܡܰܢ ܬܶܫܒܩܽܘܢ ܐܺܝܩܳܪܟ݂ܽܘܢ. ⁴ ܕܠܳܐ ܬܶܒܪܟ݂ܽܘܢ ܬܚܶܝܬ݂ ܐܰܣܺܝܖ̈ܶܐ: ܬܚܶܝܬ݂ ܩܛܺܝ̈ܠܶܐ ܬܶܦܠܽܘܢ ܘܰܒܗܳܠܶܝܢ ܟܽܠܗܶܝܢ ܠܳܐ ܗܦܰܟ݂ ܪܽܘܓܙܶܗ. ܘܬܽܘܒ ܐܺܝܕܶܗ ܪܳܡܳܐ. ⁵ ܘܳܝ ܠܐܳܬ݂ܽܘܪܳܝܳܐ: ܫܰܒܛܳܐ ܗ̱ܘ̣ ܕܪܽܘܓܙܝ: ܘܚܽܘܛܪܳܐ ܗ̱ܘ̣ ܒܺܐܝܕ݂ܗܽܘܢ ܕܰܡܚܽܘܬ݂ܝ: ܥܰܠ ܥܰܡܳܐ ܚܰܠܦܳܐ ܐܶܫܰܕܪܺܝܘܗܝ. ⁶ ܘܥܰܠ ܥܰܡܳܐ ܐܰܟܬܳܢܳܐ ܐܶܦܰܩܕ݂ܺܝܘܗܝ ܕܢܶܫܒܶܐ ܫܶܒܝܳܐ: ܘܢܶܒܽܘܙ ܒܶܙܬ݂ܳܐ: ܘܢܶܥܒܕ݂ܺܝܘܗܝ ܕܝܳܫܳܐ ܐܰܝܟ݂ ܣܝܳܢܳܐ ܕܫܽܘܩ̈ܶܐ. ⁷ ܘܗܽܘ ܠܳܐ ܗ̱ܘܳܐ ܗܳܟ݂ܰܢܳܐ ܕܰܡܺܝ. ܘܰܒܠܶܒܶܗ ܠܳܐ ܗ̱ܘܳܐ ܗܳܟ݂ܰܢܳܐ ܐܶܬ݂ܚܰܫܰܒ. ܐܶܠܳܐ ܕܢܰܘܒܶܕ݂ ܒܠܶܒܶܗ: ܘܰܢܣܺܝܦ ܥܰܡ̈ܡܶܐ ܣܰܓ݁ܺܝ̈ܐܶܐ. ⁸ ܡܶܛܽܠ ܕܶܐܡܰܪ: ܕܗܳܐ ܪܰܘܖ̈ܒܳܢܶܐ ܐܰܟ݂ܚܕ݂ܳܐ. ܡܰܠ̈ܟܶܐ ܐܶܢܽܘܢ. ⁹ ܗܳܐ ܐܰܝܟ݂ ܟܰܪܟܡܽܘܫ ܒܰܠܝܽܘ: ܘܰܐܝܟ݂ ܪܳܦܳܕ݂ ܚܡܳܬ݂: ܘܰܐܝܟ݂ ܕܰܪܡܣܽܘܩ ܫܳܡܪܺܝܢ. ¹⁰ ܘܰܐܝܟ݂ ܕܶܐܫܟܚܰܬ ܐܺܝܕ݂ܝ ܠܡܰܠ̈ܟܘܳܬ݂ܳܐ ܕܰܦܬܰܟ݂ܖ̈ܶܐ ܘܕܰܓ̣ܠܺܝ̈ܦܶܐ: ܡ̣ܶܢ ܐܽܘܪܺܫܠܶܡ ܘܡ̣ܶܢ ܫܳܡܪܺܝܢ. ¹¹ ܘܰܐܝܟ݂ ܕܥܶܒܕܶܬ݂ ܠܫܳܡܪܺܝܢ ܘܠܰܦܬܰܟ݂ܖ̈ܶܝܗ̇: ܗܳܟ݂ܰܢܳܐ ܐܶܥܒܶܕ݂ ܠܽܐܘܪܺܫܠܶܡ ܘܠܰܦܬܰܟ݂ܖ̈ܶܝܗ̇. ¹² ܘܢܶܗܘܶܐ ܡܳܐ ܕܫܰܡܠܺܝ ܡܳܪܝܳܐ ܟܽܠܗܽܘܢ ܥܒܳܕܰܘ̈ܗܝ ܒܛܽܘܪܳܐ ܕܨܶܗܝܽܘܢ: ܘܒܽܐܘܪܺܫܠܶܡ: ܐܶܦܩܽܘܕ݂ ܥܰܠ ܦܶܐܖ̈ܰܘܗܝ ܕܠܶܒܳܐ ܪܰܒܳܐ ܕܡܰܠܟܳܐ ܕܳܐܬ݂ܽܘܪ: ܘܥܰܠ ܬܶܫܒܽܘܚܬܳܐ ܕܪܳܘܡܳܐ ܕܥܰܝܢܰܘ̈ܗܝ. ¹³ ܡܶܛܽܠ ܕܶܐܡܰܪ ܕܰܒܚܰܝܠܳܐ ܕܺܐܝܕ݂ܝ ܥܶܒܕܶܬ݂: ܘܰܒܚܶܟ݂ܡܰܬ݂ܝ ܡܶܛܽܠ ܕܣܰܟܽܘܠܬ݂ܳܢ ܐ̱ܢܳܐ. ܐܰܥܒܪܶܬ݂ ܬܚܽܘܡܰܝ̈ܗܽܘܢ ܕܥܰܡ̈ܡܶܐ. ܘܢܶܟ݂ܣܰܝ̈ܗܽܘܢ ܒܶܙܶܬ݂. ܘܟܰܒܫܶܬ݂ ܡܕ݂ܺܝ̈ܢܳܬ݂ܳܐ ܕܝܰܬ݂ܒ̈ܳܢ. ¹⁴ ܘܶܐܫܟܚܰܬ݂ ܐܶܝܕ݂ܝ ܐܰܝܟ݂ ܩܶܢܳܐ ܠܚܰܝܠܳܐ ܕܥܰܡ̈ܡܶܐ: ܘܰܐܝܟ݂ ܕܟ݂ܳܢܫܺܝܢ ܒ̈ܢܳܬ݂ܳܐ ܕܰܫܒܺܝ̈ܩܳܢ: ܟܢܰܫܬܳܗ̇ ܠܟܽܠܳܗ̇ ܐܰܪܥܳܐ. ܘܠܳܐ ܗܘܳܐ ܕܰܡܪܺܝܡ ܓܶܦܳܐ: ܘܦܳܬܰܚ ܦܽܘܡܶܗ ܘܢܳܨܰܪ. ¹⁵ ܕܰܠܡܳܐ ܡܶܫܬܰܒܰܚ ܢܳܪܓܳܐ ܥܰܠ ܡܰܢ ܕܦܳܣܶܩ ܒܶܗ. ܐܰܘ ܡܶܬ݁ܬ݁ܪܺܝܡ ܡܰܣܳܪܳܐ ܥܰܠ ܡܰܢ ܕܢܳܣܰܪ ܒܶܗ. ܐܰܘ ܡܶܫܬܰܩܰܠ ܫܰܒܛܳܐ ܥܰܠ ܡܰܢ ܕܰܡܪܺܝܡ ܠܶܗ. ¹⁶ ܡܶܛܽܠ ܗܳܢܳܐ ܢܫܰܕܰܪ ܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ: ܐܰܒܕܳܢܳܐ ܥܰܠ ܫܰܡܺܝܢܳܘ̈ܗܝ ܚܠܳܦ ܐܺܝܩܳܪܶܗ ܢܺܐܩܰܕ݂ ܝܰܩܕܳܢܶܗ ܐܰܝܟ݂ ܝܰܩܕܳܢܳܐ ܕܢܽܘܪܳܐ. ¹⁷ ܘܢܶܗܘܶܐ ܢܽܘܗܪܶܗ ܕܺܝܣܪܳܐܶܝܠ ܠܢܽܘܪܳܐ: ܘܩܰܕܺܝܫܰܘ̈ܗܝ ܠܫܰܠܗܶܒܺܝܬ݂ܳܐ. ܘܬ݂ܰܘܩܶܕ݂ ܘܬܶܐܟ݂ܽܘܠ ܝܰܥܪܶܗ ܘܟ݂ܽܘܒܰܘ̈ܗܝ ܒܝܰܘܡܳܐ ܚܰܕ݂. ¹⁸ ܘܫܽܘܒܚܳܐ ܕܥܳܒܶܗ ܘܰܕ݂ܟܰܪܡܠܶܗ: ܡ̣ܶܢ ܢܰܦܫܳܐ ܘܰܥܕܰܡܳܐ ܠܒܶܣܪܳܐ ܢܓܰܡܰܪ. ܘܢܶܗܘܶܐ ܐܰܝܟ݂ ܕܠܳܐ ܗܘܳܐ. ¹⁹ ܘܫܰܪܟܳܐ ܕܩܰܝ̈ܣܶܐ ܕܥܳܒܶܗ: ܠܡܶܢܝܳܢܳܐ ܢܶܗܘܽܘܢ. ܘܛܰܠܝܳܐ ܢܶܟ݂ܬ݁ܽܘܒ ܐܶܢܽܘܢ. ²⁰ ܘܢܶܗܘܶܐ ܒܝܰܘܡܳܐ ܗܰܘ: ܠܳܐ ܢܰܘܣܶܦ ܬܽܘܒ ܫܰܪܟܶܗ ܕܺܝܣܪܳܐܶܝܠ: ܘܰܐܝܠܶܝܢ ܕܡܶܬ݂ܦܰܨܶܝܢ ܡ̣ܶܢ ܕܒܶܝܬ݂ ܝܰܥܩܽܘܒ ܠܡܶܬ݁ܬ݁ܟܳܠܽܘ ܥܰܠ ܡܰܢ ܕܰܢܟ݂ܶܐ ܐܶܢܽܘܢ. ܐܶܠܳܐ ܢܶܬ݁ܬܰܟ݂ܠܽܘܢ ܒܩܽܘܫܬܳܐ ܥܰܠ ܡܳܪܝܳܐ ܩܰܕ݁ܺܝܫܳܐ ܕܺܝܣܪܳܐܶܝܠ. ²¹ ܘܫܰܪܟܳܐ ܢܶܬ݂ܦܢܽܘܢ: ܫܰܪܟܶܗ ܕܝܰܥܩܽܘܒ ܠܘܳܬ݂ ܐܶܝܠ ܓܰܢ̱ܒܳܪܳܐ. ²² ܘܶܐܢ ܢܶܗܘܶܐ ܥܰܡܳܟ݂ ܝܺܣܪܳܐܶܝܠ: ܐܰܝܟ݂ ܚܳܠܳܐ ܕܰܒܝܰܡܳܐ: ܫܰܪܟܳܐ ܢܶܬ݂ܦܢܽܘܢ ܡܶܢܗܽܘܢ ܟܪܰܡ ܘܰܦܣܰܩ̣: ܘܰܓܪܰܦ ܒܙܰܕܺܝܩܽܘܬܳܐ. ²³ ܡܶܛܽܠ ܕܰܓܡܽܘܪܝܳܐ ܘܦܳܣܺܝ̈ܩܳܬ݂ܳܐ ܥܳܒܶܕ݂ ܡܳܪܝܳܐ ܚܰܝܠܬ݂ܳܢܳܐ ܒܟ݂ܽܠܳܗ̇ ܐܰܪܥܳܐ. ²⁴ ܗܳܟ݂ܰܢܳܐ ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ: ܠܳܐ ܬܶܕ݂ܚܰܠ ܕܥܳܡܰܪ ܒܨܶܗܝܽܘܢ: ܡ̣ܶܢ ܐܳܬ݂ܽܘܪܳܝܳܐ ܕܡܳܚܶܐ ܠܳܟ݂ ܒܫܰܒܛܶܗ: ܘܚܽܘܛܪܶܗ ܡܪܺܝܡ ܥܠܰܝܟ ܒܽܐܘܪܚܳܐ ܕܡܶܨܪܶܝܢ. ²⁵ ܡܶܛܽܠ ܕܥܰܕ݂ ܩܰܠܺܝܠ ܙܥܽܘܪ: ܘܢܶܫܬܰܡܠܶܐ ܪܽܘܓܙܝ ܘܚܶܡܬ݂ܝ ܥܰܠ ܚܒܳܠܗܽܘܢ. ²⁶ ܘܰܢܥܺܝܪ ܥܠܰܘܗ̱ܝ ܡܳܪܝܳܐ ܚܰܝܠܬ݂ܳܢܳܐ ܫܰܘܛܳܐ: ܐܰܝܟ݂ ܡܚܽܘܬ݂ܳܐ ܕܡܶܕ݂ܝܰܢ ܕܰܒܛܽܘܪܳܐ ܕܚܽܘܪܺܝܒ: ܘܚܽܘܛܪܶܗ ܥܰܠ ܝܰܡܳܐ: ܘܰܫܩܳܠܶܗ ܒܽܐܘܪܚܳܐ ܕܡܶܨܪܶܝܢ. ²⁷ ܘܢܶܗܘܶܐ ܒܝܰܘܡܳܐ ܗܰܘ: ܢܶܥܒܰܪ ܫܽܘܥܒܳܕܶܗ ܡ̣ܶܢ ܟܰܬ݂ܦܳܟ݂: ܘܢܺܝܪܶܗ ܡ̣ܶܢ ܨܰܘܪܳܟ݂ ܘܢܶܬ݂ܚܰܒܰܠ ܢܺܝܪܳܐ ܡ̣ܶܢ ܩܕ݂ܳܡ ܡܽܘܫܚܳܐ. ²⁸ ܐܶܬ݂ܳܐ ܠܰܥܢܳܬ݂: ܘܰܥܒܰܪ ܒܡܰܓܳܕܽܘ. ܘܰܒܡܰܟ݂ܡܰܣ ܣܳܡ ܡܳܐܢܰܘ̈ܗܝ. ²⁹ ܥܒܰܪ ܠܡܰܥܒܪܳܐ ܕܰܓܒܰܥ ܠܒܶܝܬ݂ ܒܝܳܬܰܢ: ܕܶܚܠܰܬ ܪܳܡܬ݂ܳܐ: ܘܓܶܒܥܰܬ݂ ܫܳܐܳܘܠ ܥܶܪܩܰܬ. ³⁰ ܨܗܰܠܝ ܒܩܳܠܶܟ݂ܝ ܒܰܪܬ݂ ܓܶܠܝܰܡ. ܨܽܘܬ݂ܝ ܠܺܝܫ ܘܰܥܢܳܝ ܥܢܳܬ݂ܽܘܬ݂. ³¹ ܐܶܬ݂ܪܰܚܩܰܬ ܡܰܪܡܢܳܐ. ܘܝܳܬ݂ܒܰܝ ܓܽܘ̈ܒܺܝܢ ܥܫܶܢܘ. ³² ܥܕܰܟܝܠ ܝܰܘܡܳܐ ܒܢܳܒ ܩܳܐܶܡ. ܐܰܢܺܝܦ ܐܺܝܕܶܗ ܥܰܠ ܛܽܘܪܳܐ ܕܒܰܪܬ݂ ܨܶܗܝܽܘܢ: ܘܥܰܠ ܖ̈ܳܡܳܬ݂ܳܐ ܕܽܐܘܪܺܫܠܶܡ. ³³ ܗܳܐ ܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ: ܡܣܰܚܶܦ ܠܰܡܫܰܒ̈ܚܶܐ ܒܥܽܘܫܢܳܐ. ܘܰܕ݂ܪܳܡܺܝܢ ܒܩܰܘ̈ܡܳܬ݂ܳܐ ܢܶܬ݂ܡܰܟܟ݂ܽܘܢ: ܘܰܕ݂ܪܳܡܺܝܢ ܢܶܫܬܰܦܠܽܘܢ. ³⁴ ܘܰܢܦܰܫܰܚ ܣܰܘ̈ܟܶܐ ܕܥܳܒܳܐ ܒܦܰܪܙܠܳܐ. ܘܠܶܒܢܳܢ ܒܫܽܘܒܚܶܗ ܢܶܦܶܠ.

ܩܶܦܰܠܶܐܘܳܢ: ܝܐ.

¹ ܘܢܶܦܽܘܩ ܚܽܘܛܪܳܐ ܡ̣ܶܢ ܓܽܘܙܥܶܗ ܕܺܐܝܫܰܝ. ܘܢܰܦܪܰܥ ܢܽܘܪܒܳܐ ܡ̣ܶܢ ܥܶܩܳܪܶܗ. ² ܘܬܶܬ݁ܢܺܝܚ ܘܬܶܫܪܶܐ ܥܠܰܘܗ̱ܝ ܪܽܘܚܳܐ ܕܰܐ‌ܠܳܗܳܐ: ܪܽܘܚܳܐ ܕܚܶܟ݂ܡܬ݂ܳܐ ܘܰܕ݂ܣܽܘܟܳܠܳܐ: ܪܽܘܚܳܐ ܕܬܰܪܥܺܝܬ݂ܳܐ ܘܰܕ݂ܓܰܢ̱ܒܰܪܽܘܬ݂ܳܐ: ܪܽܘܚܳܐ ܕܺܝܕܰܥܬ݂ܳܐ ܘܰܕܕܶܚܠܬܶܗ ܕܡܳܪܝܳܐ. ³ ܘܢܶܕ݂ܢܰܚ ܒܕܶܚܠܬܶܗ ܕܡܳܪܝܳܐ. ܘܠܳܐ ܐܰܝܟ݂ ܕܚܳܙ̈ܝܳܢ ܥܰܝܢܳܘ̈ܗܝ ܢܕ݂ܽܘܢ: ܘܠܳܐ ܐܰܝܟ݂ ܕܫܳܡ̈ܥܳܢ ܐܶܕ݂ܢܳܘ̈ܗܝ ܢܰܟܣ. ⁴ ܢܕ݂ܽܘܢ ܒܩܽܘܫܬܳܐ ܠܡܶܣܟܺܢ̈ܶܐ: ܘܢܰܟܶܣ ܒܰܬ݂ܪܺܝܨܽܘܬ݂ܳܐ ܠܒܺܝ̈ܫܶܝܗ̇ ܕܰܐܪܥܳܐ. ܢܶܡܚܶܐ ܠܰܐܪܥܳܐ ܒܫܰܒܛܳܐ ܕܦܽܘܡܶܗ. ܘܰܒܪܽܘܚܳܐ ܕܣܶܦ̈ܘܳܬܶܗ ܢܡܺܝܬ݂ ܠܖ̈ܰܫܺܝܥܶܐ. ⁵ ܬܶܗܘܶܐ ܙܰܕܺܝܩܽܘܬܳܐ ܐܳܣܰܪ ܚܰܨܰܘ̈ܗܝ: ܘܗܰܝܡܳܢܽܘܬ݂ܳܐ ܚܙܳܩܳܐ ܕܕܰܦ̈ܢܳܬܶܗ. ⁶ ܢܶܥܡܰܪ ܕܺܐܒܳܐ ܥܰܡ ܐܶܡܪܳܐ. ܘܢܶܡܪܶܐ ܥܰܡ ܓܰܕ݂ܝܳܐ ܢܶܪܒܰܥ. ܘܥܶܓܠܳܐ ܘܓܽܘܪܝܳܐ ܕܰܐܪܝܳܐ ܘܬ݂ܰܘܪܳܐ: ܐܰܟ݂ܚܕ݂ܳܐ ܢܶܪܥܽܘܢ. ܘܛܰܠܝܳܐ ܙܥܽܘܪܳܐ ܢܕܰܒܰܪ ܐܶܢܽܘܢ. ⁷ ܬܽܘܪܬܳܐ ܘܕܶܒܳܐ ܐܰܟ݂ܚܕ݂ܳܐ ܢܶܖ̈ܥܝܳܢ ܘܰܒܢܰܝ̈ܗܶܝܢ ܐܰܟ݂ܚܕ݂ܳܐ ܢܶܪܒܥܽܘܢ ܐܰܪܝܳܐ ܐܰܝܟ݂ ܬܰܘܪܳܐ ܢܶܐܟ݂ܽܘܠ ܬܶܒܢܳܐ. ⁸ ܘܢܶܫܬ݁ܥܶܐ ܝܰܠܽܘܕ݂ܳܐ ܒܚܰܪܡܳܢܳܐ. ܘܰܒܚܽܘܪܳܐ ܕܶܐܣܦܶܣ ܢܰܘܫܶܛ ܐܺܝܕܶܗ ܚܣܺܝܠܳܐ. ⁹ ܘܠܳܐ ܢܰܒܐܫܽܘܢ: ܘܠܳܐ ܢܚܰܒܠܽܘܢ ܒܟ݂ܽܠܶܗ ܛܽܘܪܳܐ ܕܩܽܘܕ݂ܫܝ. ܡܶܛܽܠ ܕܬܶܬ݂ܡܠܶܐ ܐܰܪܥܳܐ ܝܺܕܰܥܬܶܗ ܕܡܳܪܝܳܐ: ܐܰܝܟ݂ ܡܰܝ̈ܳܐ ܕܰܡܟܰܣܶܝܢ ܠܝܰܡܳܐ. ¹⁰ ܘܢܶܗܘܶܐ ܒܝܰܘܡܳܐ ܗܰܘ: ܥܶܩܳܪܶܗ ܕܺܐܝܫܰܝ ܕܩܳܐܶܡ: ܐܳܬܳܐ ܠܥܰܡ̈ܡܶܐ ܘܰܥܠܰܘܗ̱ܝ ܥܰܡ̈ܡܶܐ ܢܥܰܩܒܽܘܢ ܘܬܶܗܘܶܐ ܢܝܳܚܬ݁ܶܗ ܐܺܝܩܳܪܳܐ. ¹¹ ܘܢܶܗܘܶܐ ܒܝܰܘܡܳܐ ܗܰܘ: ܢܰܘܣܶܦ ܡܳܪܝܳܐ ܬܶܢܝܳܐ ܕܺܐܝܕܶܗ: ܕܢܶܩܢܶܐ ܫܰܪܟܳܐ ܕܥܰܡܶܗ ܕܶܐܫܬ݁ܚܰܪܘ: ܡ̣ܶܢ ܐܳܬ݂ܽܘܪ: ܘܡ̣ܶܢ ܡܶܨܪܶܝܢ: ܘܡ̣ܶܢ ܦܰܬ݂ܪܽܘܣ: ܘܡ̣ܶܢ ܟܽܘܫ: ܘܡ̣ܶܢ ܥܺܝܠܳܡ: ܘܡ̣ܶܢ ܣܳܥܺܝܪ: ܘܡ̣ܶܢ ܚܡܳܬ݂: ܘܡܶܢ ܓܳܙܖ̈ܳܬ݂ܳܐ ܕܝܰܡܳܐ. ¹² ܘܢܶܫܩܽܘܠ ܐܳܬܳܐ ܠܥܰܡ̈ܡܶܐ: ܘܰܢܟܰܢܶܫ ܠܛܳܥܰܝ̈ܳܐ ܕܺܝܣܪܳܐܶܝܠ: ܘܠܰܡܒܰܕܖ̈ܶܐ ܕܺܝܗܽܘܕ݂ܳܐ ܢܟܰܢܶܫ ܡ̣ܶܢ ܐܰܪܒܥܰܬ݂ ܟܶܢܦܶܝܗ̇ ܕܰܐܪܥܳܐ. ¹³ ܘܢܶܥܒܰܪ ܛܢܳܢܳܐ ܡ̣ܶܢ ܐܰܦܪܶܝܡ: ܘܐܳܠܽܘܨܰܘ̈ܗܝ ܕܺܝܗܽܘܕ݂ܳܐ ܢܺܐܒܕܽܘܢ. ܐܰܦܪܶܝܡ ܠܳܐ ܢܶܛܰܢ ܒܺܝܗܽܘܕܳܐ: ܘܺܝܗܽܘܕ݂ܳܐ ܠܳܐ ܢܶܐܠܽܘܨ ܠܰܐܦܪܶܝܡ. ¹⁴ ܘܢܶܦܠܚܽܘܢ ܒܟܰܬ݂ܦܳܐ ܕܰܦܠܶܫܬܳܝ̈ܶܐ ܥܰܠ ܝܰܡܳܐ. ܘܰܐܟ݂ܚܕ݂ܳܐ ܢܶܒܙܽܘܢ ܠܰܒܢܰܝ̈ ܡܰܕ݂ܢܚܳܐ ܒܰܐܕ݂ܽܘܡ ܘܰܒܡܽܘܐܳܒ ܢܰܘܫܛܽܘܢ ܐܺܝܕܰܝ̈ܗܽܘܢ ܘܰܒܢܰܝ̈ ܥܰܡܽܘܢ ܢܶܫܬܰܡܠܽܘܢ ܠܗܽܘܢ. ¹⁵ ܘܢܰܚܪܶܒ ܡܳܪܝܳܐ ܠܶܫܳܢ ܝܰܡܳܐ ܕܰܒܡܶܨܪܶܝܢ: ܘܰܢܪܺܝܡ ܐܺܝܕܶܗ ܥܰܠ ܢܰܗܪܳܐ ܒܽܐܘܚܕܳܢܳܐ ܕܪܽܘܚܶܗ: ܘܢܶܡܚܶܝܘܗܝ ܠܫܰܒܥܳܐ ܢܰܚ̈ܠܺܝܢ: ܕܢܶܬ݂ܥܒܰܪ ܒܰܡܣܳܢ̈ܶܐ. ¹⁶ ܘܢܶܗܘܶܐ ܫܒܺܝܠܳܐ ܠܫܰܪܟܳܐ ܕܥܰܡܶܗ: ܕܶܐܫܬ݁ܚܰܪܘ ܡ̣ܶܢ ܐܳܬ݂ܽܘܪ: ܐܰܝܟ݂ ܕܰܗܘܳܬ݂ ܠܺܝܣܪܳܐܶܝܠ: ܒܝܰܘܡܳܐ ܕܰܣܠܶܩ̣ܘ ܡ̣ܶܢ ܐܰܪܥܳܐ ܕܡܶܨܪܶܝܢ.

 

 

ܩܶܦܰܠܶܐܘܳܢ: ܝܒ.

¹ ܘܬܺܐܡܰܪ ܒܝܰܘܡܳܐ ܗܰܘ: ܐܰܘܕܶܐ ܠܳܟ݂ ܡܳܪܝܳܐ ܕܰܪܓܶܙܬ݁ ܥܠܰܝ: ܘܰܐܗܦܶܟ݂ܬ݁ ܪܽܘܓܙܳܟ݂ ܘܒܰܝܰܐܬܳܢܝ. ² ܗܳܐ ܥܰܠ ܐܰ‌ܠܳܗܳܐ ܦܳܪܽܘܩܝ ܬܟ݂ܺܝܠ ܐ̱ܢܳܐ: ܘܠܳܐ ܐܶܙܽܘܥ. ܡܶܛܽܠ ܕܬ݂ܽܘܩܦܝ ܘܫܽܘܒܚܝ ܡܳܪܝܳܐ ܗ̱ܘ̣: ܘܢܶܗܘܶܐ ܠܺܝ ܠܦܽܘܪܩܳܢܳܐ. ³ ܘܬܶܡܠܽܘܢ ܡܰܝ̈ܳܐ ܒܚܰܕ݂ܽܘܬ݂ܳܐ ܡ̣ܶܢ ܡܰܒܽܘܥܳܐ ܕܦܽܘܪܩܳܢܳܐ. ⁴ ܘܬܺܐܡܪܽܘܢ ܒܝܰܘܡܳܐ ܗܰܘ: ܐܰܘܕܰܘ ܠܡܳܪܝܳܐ ܘܰܩܪܰܘ ܫܡܶܗ: ܘܚܰܘܰܘ ܒܥܰܡ̈ܡܶܐ ܨܶܢ̈ܥܳܬܶܗ. ܐܶܬ݁ܕܰܟ݂ܪܘ ܕܥܰܫܺܝܢ ܗ̱ܘ̣ ܫܡܶܗ. ⁵ ܙܡܰܪܘ ܠܡܳܪܝܳܐ ܡܶܛܽܠ ܕܓܰܐܝܽܘܬ݂ܳܐ ܥܒܰܕ݂. ܝܺܕ݂ܺܝܥܳܐ ܗ̱ܝ ܗܳܕܶܐ ܒܟܽܠܳܗ̇ ܐܰܪܥܳܐ. ⁶ ܕܽܘܨܝ ܘܫܰܒܰܚܝ ܥܳܡܽܘܪܬܳܐ ܕܨܶܗܝܽܘܢ. ܡܶܛܽܠ ܕܪܰܒ ܗ̱ܘ̣ ܕܰܒܓܰܘܶܟ݂ܝ: ܩܰܕ݁ܺܝܫܳܐ ܕܺܝܣܪܳܐܶܝܠ.

ܩܶܦܰܠܶܐܘܳܢ: ܝܓ.

¹ ܡܰܫܩܠܳܐ ܕܒܳܒܶܠ ܕܰܚܙܳܐ ܐܶܫܰܥܝܳܐ ܒܰܪ ܐܰܡܽܘܨ. ² ܥܰܠ ܛܽܘܖ̈ܶܐ ܫܦܰܝ̈ܳܐ ܫܩܽܘܠܘ ܐܳܬܳܐ. ܐܰܪܺܝܡܘ ܠܗܽܘܢ ܩܳܠܳܐ. ܐܰܢܺܝܦܘ ܒܺܐܝܕܶܗ ܢܶܥܠܽܘܢ ܒܬܰܖ̈ܥܰܝ ܫܰܠܺܝܛܳ̈ܢ̈ܶܐ. ³ ܐܶܢܳܐ ܦܶܩܕܶܬ݂ ܠܡܰܩܕܰܫܝ. ܘܰܩܪܺܝܬ݂ ܠܓܰܢ̱ܒܳܖ̈ܶܐ ܒܪܽܘܓܙܝ. ܘܡܶܬ݂ܥܰܫܢܺܝܢ ܒܓܰܐܝܽܘܬ݂ܝ. ⁴ ܩܳܠܳܐ ܕܰܪܓܽܘܫܝܳܐ ܒܛܽܘܪܳܐ: ܕܽܘܡܝܳܐ ܕܥܰܡ̈ܡܶܐ ܣܰܓܺܝ̈ܐܶܐ ܩܳܠܳܐ ܕܰܪܓܽܘܫܝܳܐ ܕܡܰܠܟ̈ܘܳܬ݂ܳܐ ܕܥܰܡ̈ܡܶܐ ܕܡܶܬ݂ܟܰܢܫܺܝܢ. ܡܳܪܝܳܐ ܚܰܝܠܬ݂ܳܢܳܐ ܣܳܥܰܪ ܚܰܝ̈ܠܶܐ. ⁵ ܩܖ̈ܰܒܬܳܢܶܐ ܐܳܬ݁ܶܝܢ ܡ̣ܶܢ ܪܽܘܚܩܳܐ: ܘܡ̣ܶܢ ܣܰܘ̈ܦܰܝ ܫܡܰܝܳܐ ܡܳܪܝܳܐ: ܘܡܳܐܢ̈ܶܐ ܕܪܽܘܓܙܶܗ: ܠܰܡܚܰܒܳܠܽܘ ܠܟܽܠܳܗ̇ ܐܰܪܥܳܐ. ⁶ ܐܰܝܠܠܶܘ ܡܶܛܽܠ ܕܩܰܪܺܝܒ ܗ̱ܘ̣ ܝܳܘܡܶܗ ܕܡܳܪܝܳܐ: ܘܰܐܝܟ݂ ܒܶܙܬ݂ܳܐ ܡ̣ܶܢ ܫܶܠܝܳܐ ܢܺܐܬܶܐ. ⁷ ܡܶܛܽܠ ܗܳܢܳܐ ܟܽܠܗܶܝܢ ܐܺܝ̈ܕܰܝܳܐ ܢܶܬ݂ܖ̈ܰܦܝܳܢ. ܘܟܽܠܶܗ ܠܶܒܳܐ ܕܐ̱ܢܳܫܳܐ ܢܶܬ݂ܡܣܶܐ ܘܢܶܬ݁ܕܰܠܚܽܘܢ. ⁸ ܘܨܰܘܖ̈ܳܢܶܐ ܘܚܶܒܠܶܐ ܐܰܝܟ݂ ܕܝܳܠܶܕܬܳܐ ܢܶܐܚܕܽܘܢ ܐܶܢܽܘܢ. ܘܢܶܬ݂ܡܗܽܘܢ ܓܒܰܪ ܒܚܰܒܪܶܗ. ܘܰܐܦ̈ܶܐ ܕܫܰܠܗܶܒܺܝܬ݂ܳܐ ܐܰܦܰܝ̈ܗܽܘܢ. ⁹ ܗܳܐ ܝܳܘܡܶܗ ܕܡܳܪܝܳܐ ܐܳܬ݁ܳܐ: ܕܳܐܣܝܽܘ ܠܰܝܬ݁ ܠܶܗ ܐܰܟܬܰܢ ܘܚܰܡܺܝܡ ܪܽܘܓܙܶܗ ܕܢܶܥܒܕ݂ܺܝܗ̇ ܠܰܐܪܥܳܐ ܠܚܽܘܪܒܳܐ: ܘܰܚܛܳܝ̈ܶܝܗ̇ ܢܰܘܒܶܕ݂ ܡܶܢܳܗ̇. ¹⁰ ܡܶܛܽܠ ܕܟ݂ܰܘ̈ܟܒܶܐ ܕܰܫܡܰܝܳܐ ܘܚܰܝ̈ܠܳܘܳܬ݂ܗܽܘܢ ܠܳܐ ܢܰܢܗܪܽܘܢ ܢܶܚܫܰܟ݂ ܫܶܡܫܳܐ ܒܡܰܦܩܶܗ. ܘܢܽܘܗܪܶܗ ܕܣܰܗܪܳܐ ܠܳܐ ܢܰܢܗܰܪ. ¹¹ ܐܶܦܩܽܘܕ݂ ܒܺܝܫܬܳܐ ܥܰܠ ܬܺܒܶܝܠ: ܘܥܰܠ ܖ̈ܰܫܺܝܥܶܐ ܥܰܘܠܗܽܘܢ. ܐܶܒܰܛܶܠ ܪܳܡܽܘܬ݂ܳܐ ܕܫܰܒܗܖ̈ܳܢܶܐ. ܘܓܰܐܝܽܘܬ݂ܳܐ ܕܥܰܫܺܝ̈ܢܶܐ ܐܶܡܰܟܶܟ݂. ¹² ܐܰܘܩܰܪ ܓܰܒܪܳܐ ܡ̣ܶܢ ܕܰܗܒܳܐ: ܘܐ̱ܢܳܫܳܐ ܡ̣ܶܢ ܕܰܗܒܳܐ ܕܰܐܘܦܺܝܪ. ¹³ ܡܶܛܽܠ ܗܳܢܳܐ ܠܰܫܡܰܝܳܐ ܐܰܪܓܶܙ. ܘܰܬ݂ܙܽܘܥ ܐܰܪܥܳܐ ܡ̣ܶܢ ܕܽܘܟܬܳܗ̇: ܒܰܟ݂ܐܳܬܶܗ ܕܡܳܪܝܳܐ ܚܰܝܠܬ݂ܳܢܳܐ: ܒܝܰܘܡܳܐ ܕܚܶܡܬ݂ܳܐ ܕܪܽܘܓܙܶܗ. ¹⁴ ܢܶܗܘܽܘܢ ܐܰܝܟ݂ ܛܒܰܝ̈ܳܐ ܕܥܳܪܩܺܝܢ: ܘܰܐܝܟ݂ ܥܳܢ̈ܳܐ ܕܠܰܝܬ݁ ܠܳܗ̇ ܡܟܰܢܫܳܢܳܐ ܐ̱ܢܳܫ ܠܥܰܡܶܗ ܢܶܬ݂ܦܢܽܘܢ: ܘܰܓܒܰܪ ܠܰܐܪܥܶܗ ܢܶܥܪܩܽܘܢ. ¹⁵ ܟܠ ܕܢܶܫܬܰܟܰܚ: ܢܶܬ݁ܕܩܰܪ. ܘܟ݂ܽܠ ܕܢܶܬ݁ܬܰܘܣܰܦ: ܢܶܦܶܠ ܒܚܰܪܒܳܐ. ¹⁶ ܘܝܰܠܽܘܕܰܝ̈ܗܽܘܢ ܢܶܫܬܰܩܦܽܘܢ ܠܥܰܢܰܝ̈ܗܽܘܢ ܘܢܶܬ݂ܒܰܙܙܽܘܢ ܒܳܬܰܝ̈ܗܽܘܢ. ܘܢܶܫܰܝ̈ܗܽܘܢ ܢܶܨܛܰܥܖ̈ܳܢ. ¹⁷ ܗܳܐ ܡܥܺܝܪ ܐ̱ܢܳܐ ܥܠܰܝܟܽܘܢ ܠܡܳܕ݂ܳܝ̈ܶܐ: ܕܟܶܣܦܳܐ ܠܳܐ ܚܫܺܝܒ ܠܗܽܘܢ: ܘܰܒܕܰܗܒܳܐ ܠܳܐ ܡܶܨܛܒܶܝܢ. ¹⁸ ܩܶܫ̈ܬܳܬ݂ܳܐ ܕܰܥܠܰܝ̈ܡܶܐ ܢܶܬ݂ܬܰܒܖ̈ܳܢ. ܘܥܰܠ ܦܺܐܖ̈ܶܐ ܕܟܰܪܣܳܐ ܠܳܐ ܢܪܰܚܡܽܘܢ. ܘܥܰܠ ܒܢܰܝ̈ܟܽܘܢ ܠܳܐ ܢܚܽܘ̈ܣܳܢ ܥܰܝܢܰܝ̈ܗܽܘܢ. ¹⁹ ܘܬܶܗܘܶܐ ܒܳܒܶܠ ܚܰܝܠܳܐ ܕܡܰܠ̈ܟܽܘܬ݂ܳܐ: ܘܫܽܘܒܚܳܐ ܕܓܰܐܝܽܘܬ݂ܳܐ ܕܟܰܠܕܳܝ̈ܶܐ: ܐܰܝܟ݂ ܕܰܗܦܰܟ݂ ܐܰ‌ܠܳܗܳܐ ܠܰܣܕ݂ܽܘܡ ܘܰܠܥܳܡܽܘܪܳܐ. ²⁰ ܠܳܐ ܬܶܬܰܒ ܠܥܳܠܰܡ: ܘܠܳܐ ܬܶܫܪܶܐ ܠܕ݂ܳܪܕܳܖ̈ܺܝܢ ܘܠܳܐ ܢܶܫܪܽܘܢ ܬܰܡܳܢ ܥܰܖ̈ܰܒܳܝܶܐ: ܘܖ̈ܳܥܰܘܳܬ݂ܳܐ ܠܳܐ ܢܶܪܥܽܘܢ ܬܰܡܳܢ. ²¹ ܐܶܠܳܐ ܢܶܖ̈ܒܥܳܢ ܬܰܡܳܢ ܚܰܝ̈ܘܳܬ݂ܳܐ. ܘܢܶܬ݂ܡܠܽܘܢ ܒܳܬܰܝ̈ܗܽܘܢ ܒ̈ܢܳܬ݂ ܩ̈ܳܠܶܐ. ܘܢܶܫܖ̈ܝܳܢ ܬܰܡܳܢ ܒ̈ܢܳܬ݂ ܢܰܥܳܡ̈ܶܐ: ܘܫܺܐܕ̈ܶܐ ܢܶܪܩܕ݂ܽܘܢ ܬܰܡܳܢ. ²² ܘܢܶܥܢ̈ܝܳܢ ܣܺܝܖ̈ܶܢܳܣ ܒܣܳܚܖ̈ܳܬ݂ܗܽܘܢ: ܘܝܳܪܽܘܖ̈ܶܐ ܒܗܰܝ̈ܟܠܶܐ ܕܦܽܘܢܳܩܰܝ̈ܗܽܘܢ ܩܰܪܺܝܒ ܗ̱ܘ̣ ܙܰܒܢܳܗ̇ ܠܡܶܐܬ݂ܳܐ: ܘܝܳܘ̈ܡܳܬ݂ܳܗ̇ ܬܽܘܒ ܠܳܐ ܢܶܬ݂ܡܰܬ݂ܚܽܘܢ.

ܩܶܦܰܠܶܐܘܳܢ: ܝܕ.

¹ ܡܶܛܽܠ ܕܰܡܪܰܚܶܡ ܡܳܪܝܳܐ ܥܰܠ ܝܰܥܩܽܘܒ: ܘܡܶܨܛܒܶܐ ܬܽܘܒ ܒܺܝܣܪܳܐܶܝܠ ܘܢܶܫܒܽܘܩ ܐܶܢܽܘܢ ܒܰܐܪܥܗܽܘܢ. ܘܢܶܬ݂ܠܰܘܢ ܥܠܰܝܗܽܘܢ ܥܳܡܽܘܖ̈ܶܐ. ܘܢܶܬ݁ܬܰܘܣܦܽܘܢ ܥܰܠ ܕܒܶܝܬ݂ ܝܰܥܩܽܘܒ. ² ܘܢܶܕ݂ܒܪܽܘܢ ܐܶܢܽܘܢ ܥܰܡ̈ܡܶܐ. ܘܢܰܝܬ݁ܽܘܢ ܐܶܢܽܘܢ ܠܰܐܪܥܗܽܘܢ ܘܢܺܐܪܬ݁ܽܘܢ ܐܶܢܽܘܢ ܕܒܶܝܬ݂ ܝܺܣܪܳܐܶܝܠ: ܒܰܐܪܥܶܗ ܕܡܳܪܝܳܐ: ܠܥܰܒ̈ܕܶܐ ܘܠܰܐܡ̈ܗܳܬ݂ܳܐ. ܘܢܶܗܘܽܘܢ ܫܳܒܶܝܢ ܠܫܳܒܰܝ̈ܗܽܘܢ: ܘܢܶܫܬܰܠܛܽܘܢ ܒܰܡܫܰܥܒܕ݂ܳܢܰܝ̈ܗܽܘܢ. ³ ܘܢܶܗܘܶܐ ܒܝܰܘܡܳܐ ܕܰܢܢܺܝܚܳܟ݂ ܡܳܪܝܳܐ ܡ̣ܶܢ ܟܰܪܝܽܘܬ݂ܳܟ݂: ܘܡ̣ܶܢ ܪܽܘܓܙܳܟ݂: ܘܡ̣ܶܢ ܫܽܘܥܒܳܕ݂ܳܐ ܩܰܫܝܳܐ ܕܶܐܫܬܰܥܒܰܕܬ݁. ⁴ ܬܶܫܩܽܘܠ ܡܰܬ݂ܠܳܐ ܗܳܢܳܐ ܥܰܠ ܡܰܠܟܳܐ ܕܒܳܒܶܠ: ܘܬܺܐܡܰܪ. ܐܰܝܟܰܢܳܐ ܒܛܶܠ̣ ܫܰܠܺܝܛܳܐ: ܘܰܒܛܶܠ ܡܚܰܦܛܳܢܳܐ. ⁵ ܬܒܰܪ ܡܳܪܝܳܐ ܚܽܘܛܪܳܐ ܕܪܰܫܺܝܥܳܐ: ܘܫܰܒܛܳܐ ܕܫܰܠܺܝܛܳܐ. ⁶ ܕܡܳܚܶܐ ܗ̱ܘܳܐ ܥܰܡ̈ܡܶܐ ܒܰܐܟܬ݂ܳܐ: ܡܚܽܘܬ݂ܳܐ ܕܠܳܐ ܡܶܪܕܽܘ. ܘܪܳܕܶܐ ܗ̱ܘܳܐ ܒܪܽܘܓܙܳܐ ܥܰܡ̈ܡܶܐ. ܘܪܳܕܶܦ ܠܗܽܘܢ ܕܠܳܐ ܚܳܘܣܳܢ. ⁷ ܐܶܬ݁ܬ݁ܢܺܝܚܰܬ ܘܫܶܠܝܰܬ ܟܽܠܳܗ̇ ܐܰܪܥܳܐ: ܘܕ݂ܳܨܰܬ݂ ܒܬܶܫܒܽܘܚܬܳܐ. ⁸ ܐܳܦ ܒܪܽܘܬ݂ܳܐ ܘܰܐܖ̈ܙܶܐ ܕܠܶܒܢܳܢ ܚܕ݂ܺܝܘ ܠܳܟ݂. ܡ̣ܶܢ ܙܰܒܢܳܐ ܕܰܫܟ݂ܶܒܬ݁: ܠܳܐ ܣܠܶܩܘ ܥܠܰܝܢ ܠܡܶܦܣܰܩ. ⁹ ܫܝܽܘܠ ܡ̣ܶܢ ܠܬܰܚܬ݁ ܐܶܬ݂ܡܰܪܡܪܰܬ ܠܽܘܩܒܰܠ ܡܰܥܠܳܟ݂. ܐܰܥܺܝܪܰܬ ܥܠܰܝܟ ܓܰܢ̱ܒܳܖ̈ܶܐ: ܘܟܽܠܗܽܘܢ ܫܰܠܺܝܛܳܢ̈ܶܐ ܕܰܐܪܥܳܐ ܕܰܐܩܺܝܡܬ݁ ܡ̣ܶܢ ܟܽܘܖ̈ܣܰܘܳܬ݂ܗܽܘܢ. ¹⁰ ܟܽܠܗܽܘܢ ܡܰܠ̈ܟܶܐ ܕܥܰܡ̈ܡܶܐ ܢܶܥܢܽܘܢ ܘܢܺܐܡܪܽܘܢ ܠܳܟ݂: ܐܳܦ ܐܰܢ̱ܬ݁ ܐܶܬ݂ܟܪܰܗܬ݁ ܐܰܟ݂ܘܳܬܰܢ: ܘܰܠܘܳܬܰܢ ܐܶܫܬܰܠܶܡܬ݁. ¹¹ ܘܺܐܝܩܳܪܳܟ݂ ܢ̣ܚܶܬ݂ ܠܰܫܝܽܘܠ: ܘܡ̣ܺܝܬ݂ ܟܶܢܳܪܳܟ݂ ܬܚܽܘܬܰܝܟ ܬܶܬ݂ܡܟܰܟ݂ ܪܳܡܬ݂ܳܐ: ܘܰܬ݂ܟܰܣܶܝܟ݂ ܬܰܘܠܥܳܐ. ¹² ܐܰܝܟܰܢܳܐ ܢܦܰܠ̣ܬ݁ ܡ̣ܶܢ ܫܡܰܝܳܐ. ܐܰܝܠܶܠ ܒܨܰܦܪܳܐ ܢܦܰܠܬ݁ ܒܰܐܪܥܳܐ ܡܨܰܥܪܳܢܳܐ ܕܥܰܡ̈ܡܶܐ. ¹³ ܐܰܢ̱ܬ݁ ܐܶܡܰܪܬ݁ ܒܠܳܒܳܟ݂. ܕܶܐܣܰܩ ܠܰܫܡܰܝܳܐ: ܘܰܠܥܶܠ ܡ̣ܶܢ ܟܰܘܟܒܰܘ̈ܗܝ ܕܺܐܝܠ ܐܰܪܺܝܡ ܟܽܘܪܣܰܝ: ܘܶܐܬ݁ܶܒ ܒܛܽܘܖ̈ܶܐ ܖ̈ܳܡܶܐ ܕܒܰܫܦܽܘ̈ܠܰܝ ܓܰܪܒܝܳܐ. ¹⁴ ܘܶܐܣܰܩ ܥܰܠ ܪܰܘܡܳܐ ܕܰܥܢܳܢ̈ܶܐ: ܘܶܐܬ݁ܕܰܡܶܐ ܠܥܶܠܝܳܐ. ¹⁵ ܡܶܟܺܝܠ ܠܰܫܝܽܘܠ ܬܶܚܽܘܬ݂: ܘܠܐܶܫܬ݁ܶܗ ܕܓܽܘܒܳܐ. ¹⁶ ܟܽܠ ܚܳܙ̈ܝܰܝܟ ܥܠܰܝܟ ܢܕ݂ܺܝܩܽܘܢ ܘܒܳܟ݂ ܢܶܣܬܰܟܠܽܘܢ: ܘܢܺܐܡܪܽܘܢ: ܗܳܢܰܘ ܓܰܒܪܳܐ ܕܡܰܪܡܰܪ ܗ̱ܘܳܐ ܐܰܪܥܳܐ: ܘܰܐܙܺܝܥ ܡܰܠ̈ܟܘܳܬ݂ܳܐ. ¹⁷ ܘܰܐܚܪܶܒ ܬܺܒܶܝܠ ܐܰܝܟ݂ ܡܕ݂ܰܒܪܳܐ. ܘܩܽܘܖ̈ܝܳܐ ܣܰܚܶܦ: ܘܰܐܣܺܝܖ̈ܰܘܗܝ ܠܳܐ ܫ̣ܪܳܐ. ¹⁸ ܟܽܠܗܽܘܢ ܡܰܠ̈ܟܶܐ ܕܥܰܡ̈ܡܶܐ: ܫܟܶܒܘ ܒܺܐܝܩܳܪܳܐ: ܐ̱ܢܳܫ ܒܒܰܝܬ݁ܶܗ. ¹⁹ ܘܰܐܢ̱ܬ݁ ܐܶܫܬܕ݂ܺܝܬ݁ ܡ̣ܶܢ ܩܰܒܪܳܟ݂: ܐܰܝܟ݂ ܢܽܘܪܒܳܐ ܡܰܣܠܝܳܐ: ܠܒܽܘܫܳܐ ܕܰܩܛܺܝ̈ܠܶܐ ܕܰܩܛܺܝܠܺܝܢ ܒܣܰܝܦܳܐ: ܕܢܳܚܬܺܝܢ ܒܟܺܐܦ̈ܶܐ ܕܓܽܘܒܳܐ ܐܰܝܟ݂ ܫܠܰܕܳܐ ܕܺܝ̈ܫܳܬ݂ܳܐ. ²⁰ ܘܠܳܐ ܬܶܚܕܶܐ ܥܰܡܗܽܘܢ ܒܩܰܒܪܳܐ: ܡܶܛܽܠ ܕܰܐܪܥܳܟ݂ ܚܰܒܶܠܬ݁: ܘܥܰܡܳܟ݂ ܩܛܰܠܬ݁. ܠܳܐ ܢܩܽܘܡ ܠܥܳܠܰܡ ܙܰܪܥܳܐ ܒܺܝܫܳܐ. ²¹ ܛܰܝܶܒ ܠܰܒܢܰܘ̈ܗܝ ܩܶܛܠܳܐ ܒܥܰܘܠܳܐ ܕܰܐܒܽܘܗܽܘܢ. ܕܠܳܐ ܢܩܽܘܡܽܘܢ ܘܢܺܐܪܬ݁ܽܘܢ ܐܰܪܥܳܐ: ܘܢܶܡܠܽܘܢ ܐܰܦܰܝ̈ ܬܺܒܶܝܠ ܩܪܳܒܳܐ. ²² ܐܶܩܽܘܡ ܥܠܰܝܗܽܘܢ: ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ. ܘܰܐܘܒܶܕ݂ ܫܡܳܗ̇ ܕܒܳܒܶܠ: ܘܙܰܪܥܳܗ̇ ܘܛܽܘܗܡܳܗ̇ ܘܫܰܪܒܬ݂ܳܗ̇: ܐܳܡܰܪ ܡܳܪܝܳܐ. ²³ ܘܶܐܥܒܕ݂ܺܝܗ̇ ܝܳܪܬ݁ܽܘܬ݂ܳܐ ܠܩܽܘ̈ܦܕܶܐ: ܘܰܐܓܡ̈ܶܐ ܕܡܰܝ̈ܳܐ ܘܶܐܟ݂ܢܫܺܝܗ̇ ܒܡܰܟܢܰܫܬܳܐ ܕܰܐܒܕܳܢܳܐ: ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ. ²⁴ ܝܺܡܳܐ ܡܳܪܝܳܐ ܚܰܝܠܬ݂ܳܢܳܐ ܘܶܐܡܰܪ: ܕܰܐܝܟ݂ ܕܶܐܬ݂ܚܰܫܒܶܬ݂: ܗܳܟ݂ܰܢܳܐ ܢܶܗܘܶܐ. ܘܰܐܝܟ݂ ܕܶܐܬ݂ܪܰܥܺܝܬ݁: ܢܶܬ݂ܩܰܝܰܡ. ²⁵ ܕܶܐܬ݂ܒܰܪ ܠܐܳܬ݂ܽܘܪܳܝܳܐ ܒܰܐܪܥܝ: ܘܥܰܠ ܛܽܘܖ̈ܰܝ ܐܶܕܽܘܫܺܝܘܗܝ. ܘܢܶܥܒܰܪ ܢܺܝܪܶܗ ܡܶܢܗܽܘܢ: ܘܫܽܘܥܒܳܕܶܗ ܡ̣ܶܢ ܟܰܬ݂ܦܗܽܘܢ ܢܶܥܒܰܪ. ²⁶ ܗܳܕܳܐ ܗ̱ܝ ܬܰܪܥܺܝܬ݂ܳܐ ܕܶܐܬ݂ܪܰܥܺܝܬ݂ ܥܰܠ ܐܰܪܥܳܐ ܟܽܠܳܗ̇. ܘܗܳܕܳܐ ܗ̱ܝ ܐܺܝܕ݂ܳܐ ܕܶܐܬ݁ܬ݁ܪܺܝܡܰܬ ܥܰܠ ܟܽܠܗܽܘܢ ܥܰܡ̈ܡܶܐ. ²⁷ ܡܳܪܝܳܐ ܚܰܝܠܬ݂ܳܢܳܐ ܐܶܬܪܰܥܺܝ: ܡܰܢܽܘ ܢܒܰܛܶܠ ܘܠܺܐܝܕܶܗ ܪܳܡܬ݂ܳܐ ܡܰܢܽܘ ܢܰܗܦܶܟ݂. ²⁸ ܡܰܫܩܠܳܐ ܕܰܦܠܶܫܬ݁: ܒܫܰܢ̱ܬܳܐ ܕܡܺܝܬ݂ ܐܳܚܳܙ ܡܰܠܟܳܐ ܗܘܳܐ ܡܰܫܩܠܳܐ ܗܳܢܳܐ. ²⁹ ܠܳܐ ܬܶܚܕܶܝܢ ܟܽܠܶܟ݂ܝ ܦܠܶܫܬ݁: ܡܶܛܽܠ ܕܶܐܬ݁ܬ݁ܒܰܪ ܫܰܒܛܳܐ ܕܰܡܫܰܥܒܕ݂ܳܢܰܟܝ. ܡܶܛܽܠ ܕܡ̣ܶܢ ܥܶܩܳܪܶܗ ܕܚܶܘܝܳܐ ܢܳܦܶܩ ܓܳܪܣܳܐ: ܘܦܺܐܖ̈ܰܘܗܝ ܚܰܪܡܳܢܳܐ ܕܦܳܪܰܚ. ³⁰ ܘܢܶܪܥܽܘܢ ܒܽܘܟ݂ܖ̈ܰܝ ܡܶܣܟܺܢ̈ܶܐ. ܘܒܝܳܫ̈ܶܐ ܒܫܶܠܝܳܐ ܢܶܪܒܥܽܘܢ ܘܰܐܡܺܝܬ݂ ܥܶܩܳܪܶܟ݂ܝ ܒܟܰܦܢܳܐ. ܘܰܕ݂ܡܶܫܬ݁ܚܰܪ ܡܶܢܶܟ݂ܝ ܢܶܬ݂ܩܛܶܠ. ³¹ ܐܰܝܠܠܶܝ ܩܪܺܝܬ݂ܳܐ: ܒܰܓܶܢܝ ܩܪܺܝܬ݂ܳܐ ܐܶܬ݁ܕܰܠܚܰܬ ܦܠܶܫܬ݁ ܟܽܠܳܗ̇. ܡܶܛܽܠ ܕܡ̣ܶܢ ܓܰܪܒܝܳܐ ܐܳܬ݁ܶܐ ܬܶܢܳܢܳܐ: ܘܠܰܝܬ݁ ܕܺܝܚܺܝܕ݂ܳܝ ܒܥܰܕ݂ܥܺܕ݂ܰܘ̈ܗܝ. ³² ܘܡܳܢܳܐ ܢܶܥܢܶܐ ܠܡܰܠܰܐܟ݂ܳܐ ܕܥܰܡ̈ܡܶܐ: ܕܡܳܪܝܳܐ ܡܰܬ݂ܩܶܢ ܫܶܬ݂ܶܐܣ̈ܶܝܗ̇ ܕܨܶܗܝܽܘܢ ܘܒܳܗ̇ ܢܶܣܬܰܬ݁ܪܽܘܢ ܒܳܝܫ̈ܶܐ ܕܥܰܡܶܗ.

ܩܶܦܰܠܶܐܘܳܢ: ܝܗ.

¹ ܡܰܫܩܠܳܐ ܕܡܽܘܐܳܒ ܒܠܺܠܝܳܐ ܐܶܬ݂ܒܰܙܙܰܬ ܩܪܺܝܬ݂ܳܐ ܕܡܽܘܐܳܒ ܘܰܬ݂ܡܰܗܽܘ ܒܠܺܠܝܳܐ ܐܶܬ݂ܒܙܶܙܘ ܫܽܘܖ̈ܶܝܗ̇ ܕܡܽܘܐܳܒ: ܘܰܬ݂ܘܰܪܘ. ² ܣܠܶܩܘ ܠܒܰܝܬܳܐ ܕܪܺܝܒܽܘܢ: ܥܰܠ ܥܳܠܰܘ̈ܳܬ݂ܳܐ ܠܡܶܒܟܳܐ: ܥܰܠ ܢܳܒܽܘ ܘܥܰܠ ܡܶܐܕ݂ܒܳܐ. ܡܽܘܐܳܒ ܡܰܝܠܶܠ: ܘܰܒܟ݂ܽܠ ܖ̈ܺܝܫܳܘܗܝ ܩܽܘ̈ܕܚܳܬ݂ܳܐ: ܘܟ݂ܽܠ ܕܩܰܢ ܓܙܺܝܙ. ³ ܒܫܽܘܩܰܘ̈ܗܝ ܐܶܬ݂ܟܢܶܫܘ ܣܰܩ̈ܶܐ. ܘܥܰܠ ܐܶܓܳܖ̈ܶܐ ܘܰܒܫܽܘ̈ܩܶܐ: ܟܽܠ ܐ̱ܢܳܫ ܡܰܝܠܶܠ: ܘܢܳܚܶܬ݂ ܒܰܒܟܳܬ݂ܳܐ. ⁴ ܬܰܝܠܶܠ ܚܶܫܒܽܘܢ ܘܰܐܠܥܳܠܳܐ: ܘܰܥܕܰܡܳܐ ܠܝܳܨܽܘܬ݂ ܢܶܫܬ݁ܡܰܥ ܩܳܠܗܶܝܢ ܡܶܛܽܠ ܗܳܢܳܐ ܡܰܚܣܢܰܘ̈ܗܝ ܕܡܽܘܐܳܒ ܢܶܩܥܽܘܢ: ܘܢܰܦ݂ܫܶܗ ܬܶܩܥܶܐ ܠܶܗ. ⁵ ܘܠܶܒܝ ܥܰܠ ܡܽܘܐܳܒ: ܢܶܝܠܶܠ ܒܪܽܘܚܶܗ ܥܕܰܡܳܐ ܠܨܳܥܳܪ ܥܶܓܠܬܳܐ ܬܽܘܠܬܳܐ. ܡܶܛܽܠ ܕܰܒܡܰܣܰܩܬܳܐ ܕܠܽܘܚܝܰܬ݂ ܟܰܕ݂ ܒܳܟܶܝܢ: ܢܶܣܩܽܘܢ ܒܳܗ̇. ܘܒܽܐܘܪܚܳܐ ܕܚܽܘܪܢܺܝܡ ܓܥܳܬ݂ܳܐ ܕܰܬ݂ܒܳܪܳܐ ܢܶܥܒܕ݂ܽܘܢ. ⁶ ܡܶܛܽܠ ܕܡܰܝ̈ܳܐ ܕܢܰܡܪܺܝܡ ܢܓܽܘܙܽܘܢ. ܡܶܛܽܠ ܕܺܝܒܶܫ ܥܡܺܝܪܳܐ: ܘܰܚܡܳܐ ܬܰܕ݂ܐܳܐ: ܘܝܽܘܪܳܩܳܐ ܠܳܐ ܗܘܳܐ. ⁷ ܡܶܛܽܠ ܗܳܢܳܐ ܡܶܕܶܡ ܕܶܐܫܬ݁ܚܰܪ ܥܒܰܪ. ܘܣܽܘܥܪܳܢܗܽܘܢ ܥܰܠ ܢܰܚܠܳܐ ܕܥܰܖ̈ܒܺܝܢ ܢܶܫܩܠܘܢ. ⁸ ܡܶܛܽܠ ܕܚܶܕ݂ܪܰܬ ܝܺܠܰܠܬܳܐ ܠܰܬ݂ܚܽܘܡܳܐ ܕܡܽܘܐܳܒ: ܘܰܥܕܰܡܳܐ ܠܓܶܠܥܳܡ ܝܺܠܰܠܬ݁ܶܗ: ܘܰܠܒܺܪܳܐ ܕܳܐܠܺܝܡ ܝܺܠܰܠܬ݁ܶܗ. ⁹ ܡܶܛܽܠ ܕܡܰܝ̈ܳܐ ܕܪܺܝܒܽܘܢ ܐܶܬ݂ܡܠܺܝܘ ܕܡܳܐ: ܡܶܛܽܠ ܕܶܐܣܺܝܡ ܥܰܠ ܪܺܝܒܽܘܢ ܬܰܘܣܰܦܬܳܐ. ܘܶܐܪܢܶܐ ܥܰܠ ܐܰܝܠܶܝܢ ܕܡܶܬ݂ܦܰܨܶܝܢ ܡ̣ܶܢ ܡܽܘܐܳܒ.

ܩܶܦܰܠܶܐܘܳܢ: ܝܘ.

¹ ܘܥܰܠ ܫܰܪܟܳܐ ܕܰܐܪܥܳܐ: ܐܶܫܰܕܰܪ ܠܒܰܪ ܫܰܠܺܝܛܳܐ ܕܰܐܪܥܳܐ: ܡ̣ܶܢ ܟܺܐܦܳܐ ܕܡܰܕ݂ܒܪܳܐ ܠܛܽܘܪܳܐ ܕܒܰܪܬ݂ ܨܶܗܝܽܘܢ. ² ܘܢܶܗܘܶܐ ܐܰܝܟ݂ ܦܳܪܰܚܬ݂ܳܐ ܕܰܡܫܰܢܝܳܐ ܩܶܢܳܗ̇. ܘܰܒܢܳܬ݂ ܡܽܘܐܳܒ: ܫܒܺܝ̈ܩܳܬ݂ܳܐ ܢܶܗܘ̈ܝܳܢ ܒܡܰܥܒܰܪܬܳܐ ܕܰܐܪܢܽܘܢ. ³ ܐܰܝܬܳܝ ܬܰܪܥܺܝܬ݂ܳܐ: ܘܰܥܒܶܕ݂ܝ ܬܰܘܓܳܢܳܐ. ܣܺܝܡܝ ܐܰܝܟ݂ ܠܺܠܝܳܐ ܛܶܠܳܠܶܟ݂ܝ ܡܶܨܥܰܬ݂ ܛܰܗܪܳܐ. ܛܰܫܳܝ ܠܰܕܛܳܥܶܝܢ ܘܰܠܕܰܡܒܰܕܪܺܝܢ ܠܳܐ ܬܶܓܠܶܝܢ. ⁴ ܢܶܥܡܪܽܘܢ ܒܶܟ݂ܝ ܡܒܰܕܖ̈ܶܐ ܕܡܽܘܐܳܒ ܗܘܺܝ ܠܗܽܘܢ ܣܶܬܳܪܳܐ ܡ̣ܶܢ ܩܕ݂ܳܡ ܒܳܙܽܘܙܳܐ. ܡܶܛܽܠ ܕܰܓܡܰܪ ܕܰܚܺܝܚܳܐ: ܘܣܳܦ ܒܳܙܽܘܙܳܐ: ܘܰܓܡܰܪ ܕܳܝܽܘܫܳܐ ܡ̣ܶܢ ܐܰܪܥܳܐ. ⁵ ܘܢܶܬ݂ܩܰܢ ܟܽܘܪܣܝܳܐ ܒܛܰܝܒܽܘܬ݂ܳܐ. ܘܢܶܬ݁ܶܒ ܥܠܰܘܗ̱ܝ ܒܩܽܘܫܬܳܐ ܒܡܰܫܟܢܶܗ ܕܕܰܘܺܝܕ݂: ܕܰܝܳܢܳܐ ܘܰܡܥܰܩܶܒ ܕܺܝܢܳܐ: ܘܰܡܣܰܪܗܶܒ ܙܰܕܺܝܩܽܘܬܳܐ. ⁶ ܫܡܰܥܢ ܓܰܐܝܽܘܬܶܗ ܕܡܽܘܐܳܒ: ܕܛܳܒ ܐܶܬ݂ܓܰܐܺܝ ܓܰܐܝܽܘܬܶܗ ܘܪܳܡܽܘܬܶܗ ܘܶܐܠܡܶܗ. ܠܳܐ ܗ̱ܘܳܐ ܗܳܟ݂ܰܢܳܐ ܒܰܕܶܩܘ ܥܠܰܘܗ̱ܝ ܩܳܨܽܘܡܰܘ̈ܗܝ. ⁷ ܡܶܛܽܠ ܗܳܢܳܐ ܢܰܝܠܶܠ ܡܽܘܐܳܒ ܘܥܰܠ ܡܽܘܐܳܒ ܟܽܠܶܗ ܢܰܝܠܶܠ: ܥܰܠ ܐܶܫ̈ܝܳܬ݂ܳܐ ܕܫܽܘܖ̈ܶܐ ܕܡܶܬ݂ܗܰܓ̈ܡܳܢ. ܬܢܰܗܡܽܘܢ ܐܰܝܟ݂ ܟܖ̈ܺܝܗܶܐ. ⁸ ܡܶܛܽܠ ܕܚܰܩ̈ܠܳܬ݂ܳܐ ܕܚܶܫܒܽܘܢ ܚܪܶܒ ܓܦܶܬܳܐ ܕܣܰܒܡܳܐ: ܓܰܢ̱ܒܳܖ̈ܶܐ ܕܥܰܡ̈ܡܶܐ ܓܰܡܘ ܫܰܒܽܘ̈ܩܶܝܗ̇: ܘܰܥܕܰܡܳܐ ܠܝܰܥܙܺܝܪ ܡܛܰܘ ܘܰܛܥܳܘ ܒܡܰܕ݂ܒܪܳܐ ܥܢܳܩܶܝ̈ܗ̇ ܢܓܰܕ݂ܘ ܘܰܥܒܰܪܘ ܝܰܡܳܐ. ⁹ ܡܶܛܽܠ ܗܳܢܳܐ ܐܶܒܰܟܶܝܟܝ ܒܰܒܟܳܬ݂ܳܐ ܕܝܰܥܙܺܝܪ ܓܦܶܬܳܐ ܕܣܰܒܡܳܐ. ܐܰܪܘܶܝܟܝ ܡ̣ܶܢ ܕܶܡܥܬܶܟܝ ܚܶܫܒܽܘܢ: ܘܰܐܠܥܳܠܳܐ: ܡܶܛܽܠ ܕܥܰܠ ܚܨܰܕܶܟ݂ܝ ܘܥܰܠ ܩܛܳܦܶܟ݂ܝ ܕܳܝܽܘܫܳܐ ܢܦܰܠ. ¹⁰ ܘܬܶܥܒܰܪ ܚܰܕ݂ܽܘܬ݂ܳܐ ܘܰܕ݂ܝܳܨܳܐ ܡ̣ܶܢ ܟܰܪܡܠܳܐ. ܘܰܒܟܪܡܠܳܐ ܠܳܐ ܢܶܚܕܽܘܢ. ܘܠܳܐ ܢܶܥܨܪܽܘܢ ܚܰܡܪܳܐ ܒܡܰܥܨܰܪܬܳܐ. ܘܠܳܐ ܢܕ݂ܽܘܫ ܕܳܝܽܘܫܳܐ: ܡܶܛܽܠ ܕܰܠܕܳܝܽܘܫܳܐ ܐܶܒܰܛܶܠ. ¹¹ ܡܶܛܽܠ ܗܳܢܳܐ ܟܰܪܣܝ ܥܰܠ ܡܽܘܐܳܒ: ܐܰܝܟ݂ ܟܶܢܳܪܳܐ ܬܡܰܠܶܠ. ܘܓܳܘܝ ܥܰܠ ܫܽܘܪܳܐ ܕܡܶܬ݂ܗܓܶܡ. ¹² ܘܡܳܐ ܕܰܚܙܳܐ ܕܰܠܐܺܝ ܡܽܘܐܳܒ ܥܰܠ ܥܳܠܰܘ̈ܳܬ݂ܳܐ: ܢܺܐܬܶܐ ܠܡܰܩܕܫܳܐ ܠܰܡܨܰܠܳܝܽܘ: ܘܠܳܐ ܢܶܫܟܰܚ. ¹³ ܗܳܢܳܐ ܦܶܬ݂ܓ݂ܳܡܳܐ ܡܰܠܶܠ̣ ܡܳܪܝܳܐ ܥܳܠ ܡܽܘܐܳܒ ܡ̣ܶܢ ܗܳܝܕܶܝܢ. ¹⁴ ܘܗܳܫܳܐ ܡܰܠܶܠ̣ ܡܳܪܝܳܐ ܘܶܐܡܰܪ: ܒܰܬ݂ܠܳܬ݂ ܫܢܺܝ̈ܢ ܐܰܝܟ݂ ܫܢܰܝ̈ܳܐ ܕܰܐܓܺܝܪܳܐ: ܢܶܨܛܰܥܰܪ ܐܺܝܩܳܪܶܗ ܕܡܽܘܐܳܒ: ܥܰܠ ܣܽܘܓ݂ܳܐܐ ܕܥܰܡܶܗ. ܘܢܶܫܬܰܚܰܪ ܩܰܠܺܝܠ ܙܥܽܘܪ: ܘܠܳܐ ܣܰܓܺܝ.

ܩܶܦܰܠܶܐܘܳܢ: ܝܙ.

¹ ܡܰܫܩܠܳܐ ܕܕܰܪܡܣܽܘܩ ܗܳܐ ܕܰܪܡܣܽܘܩ ܡܰܥܒܪܳܐ ܡ̣ܶܢ ܩܪܺܝܬ݂ܳܐ ܘܬܶܗܘܶܐ ܠܚܽܘܪܒܳܐ ܘܰܠܡܰܦܽܘܠܬܳܐ. ² ܘܢܶܗܘ̈ܝܳܢ ܫܒܺܝ̈ܩܳܬ݂ܳܐ ܩܽܘܖ̈ܝܳܐ ܕܥܰܕ݂ܳܘܥܺܝܪ ܘܢܶܗܘ̈ܝܳܢ ܠܰܓܙܳܖ̈ܶܐ ܕܢܶܪܒܥܽܘܢ ܒܗܶܝܢ. ܘܠܳܐ ܢܶܗܘܶܐ ܠܗܽܘܢ ܡܰܗܪܳܢܳܐ. ³ ܘܢܶܬ݂ܒܰܛܰܠ ܥܽܘܫܢܳܐ ܡ̣ܶܢ ܐܰܦܪܶܝܡ: ܘܡܰܠܟܽܘܬ݂ܳܐ ܡ̣ܶܢ ܕܰܪܡܣܽܘܩ ܘܫܰܪܟܳܐ ܕܰܐܦܪܶܝܡ ܐܰܝܟ݂ ܐܺܝܩܳܪܳܐ ܕܰܒܢܰܝ̈ ܝܺܣܪܳܐܶܝܠ ܢܶܗܘܽܘܢ: ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ. ⁴ ܢܶܗܘܶܐ ܒܝܰܘܡܳܐ ܗܰܘ: ܢܶܬ݂ܡܰܣܟܰܢ ܐܺܝܩܳܪܶܗ ܕܝܰܥܩܽܘܒ ܘܫܽܘܡܢܳܐ ܕܒܶܣܪܶܗ ܢܶܬ݂ܪܙܶܐ. ⁵ ܘܢܶܗܘܶܐ ܐܰܝܟ݂ ܗܰܘ ܕܟ݂ܳܢܶܫ ܚܨܳܕܳܐ ܕܩܳܝܶܡܬ݂ܳܐ: ܘܰܕ݂ܪܳܥܶܗ ܫܶܒ̈ܠܶܐ ܚܳܨܶܕ݂. ܘܢܶܗܘܶܐ ܐܰܝܟ݂ ܗܰܘ ܕܰܡܠܰܩܶܛ ܫܶܒ̈ܠܶܐ ܒܥܽܘܡܩܳܐ ܕܰܪܦܳܐܺܝܡ. ⁶ ܘܢܶܫܬ݁ܚܰܪ ܒܶܗ ܒܳܘܥܳܪܳܐ ܐܰܝܟ݂ ܙܰܝܬܳܐ ܕܰܚܒܺܝܛ: ܘܰܬ݂ܪܶܝܢ ܬܠܳܬ݂ܳܐ ܙܰܝ̈ܬ݁ܺܝܢ ܒܪܺܝܫ ܟܰܢܳܐ ܒܣܰܘܟܰܘ̈ܗܝ: ܘܰܐܪܒܥܳܐ ܘܚܰܡܫܳܐ: ܐܳܡܰܪ ܡܳܪܝܳܐ ܐܰ‌ܠܳܗܳܐ ܕܺܝܣܪܳܐܶܝܠ. ⁷ ܒܶܗ ܒܝܰܘܡܳܐ ܗܰܘ: ܢܶܬ݁ܬ݁ܟܶܠ ܐ̱ܢܳܫ ܥܰܠ ܥܳܒܽܘܕܶܗ. ܘܥܰܝܢܰܘ̈ܗܝ ܢܚܽܘܖ̈ܳܢ ܠܩܰܕ݁ܺܝܫܳܐ ܕܺܝܣܪܳܐܶܝܠ. ⁸ ܘܠܳܐ ܢܶܬ݁ܬ݁ܟܶܠ ܥܰܠ ܡܰܕ݂ܒܚ̈ܶܐ ܕܰܥܒܰܕ݂ܝ̈ ܐܺܝܕ݂ܰܘ̈ܗܝ ܕܰܥܒܳܕܝ̈ ܨܶܒ̈ܥܳܬܶܗ. ܘܠܳܐ ܢܚܽܘܪ ܒܰܦܬܰܟ݂ܖ̈ܶܐ ܘܰܒܕܶܚ̈ܠܳܬ݂ܳܐ. ⁹ ܒܝܰܘܡܳܐ ܗܰܘ: ܢܶܗܘ̈ܝܳܢ ܩܽܘܖ̈ܝܳܐ ܕܥܽܘܫܢܶܗ ܐܰܝܟ݂ ܓܽܘܒܳܐ ܕܰܚܪܶܫ: ܘܕܰܐܡܺܝܪ ܕܶܐܫܬ݁ܒܶܩ ܡ̣ܶܢ ܩܕ݂ܳܡ ܒܢܰܝ̈ ܝܺܣܪܳܐܶܝܠ ܘܰܗܘܺܝܬ݁ܝ ܠܰܚܒܠܳܐ. ¹⁰ ܕܰܛܥܰܝܬ݁ܝ ܠܰܐܠܳܗܳܐ ܦܳܪܽܘܩܶܟ݂ܝ ܘܰܠܬܰܩܺܝܦܳܐ ܡܥܰܫܢܳܢܶܟ݂ܝ ܠܳܐ ܐܶܬ݁ܕܰܟ݂ܪܬ݁ܝ ܡܶܛܽܠ ܗܳܢܳܐ ܬܶܨܒܺܝܢ ܢܶܨܒܬ݂ܳܐ ܝܳܐܺܝܬ݂ܳܐ. ܒܫܰܒܽܘ̈ܩܶܐ ܢܽܘܟ݂ܖ̈ܳܝܶܐ ܬܶܙܪܥܺܝܢܳܗ̇. ¹¹ ܒܝܰܘܡܳܐ ܕܬܶܨܒܺܝܢܳܗ̇: ܢܶܦܽܘܩ ܣܡܳܕ݂ܪܳܐ. ܘܰܒܨܰܦܪܳܐ ܙܰܪܥܶܟ݂ܝ ܬܰܦܪܥܺܝܢ: ܐܰܝܟ݂ ܢܺܝܪܳܐ ܕܰܩܛܳܦܳܐ ܒܝܰܘܡܳܐ ܟܰܪܝܳܐ: ܘܰܐܝܟ݂ ܟܺܐܒܳܐ ܕܐ̱ܢܳܫܳܐ. ¹² ܘܳܝ ܠܚܰܝܠܳܐ ܕܥܰܡ̈ܡܶܐ ܣܰܓ݁ܺܝ̈ܐܶܐ: ܕܳܐܙܶܠ ܩܳܠܗܽܘܢ ܐܰܝܟ݂ ܩܳܠܳܐ ܕܝܰܡ̈ܡܶܐ: ܘܰܪܓܽܘܫܝܳܐ ܕܶܐܡ̈ܘܳܬ݂ܳܐ. ¹³ ܐܰܝܟ݂ ܩܳܠܳܐ ܕܡܰܝ̈ܳܐ ܣܰܓ݁ܺܝ̈ܐܶܐ: ܢܶܓ̣ܥܽܘܪ ܒܶܗ: ܘܢܶܥܪܽܘܩ ܠܪܽܘܚܩܳܐ. ܘܢܶܪܗܰܛ ܐܰܝܟ݂ ܕܰܚܺܝܚܳܐ ܕܛܽܘܖ̈ܶܐ ܩܕ݂ܳܡ ܪܽܘܚܳܐ: ܘܰܐܝܟ݂ ܓܶܠܳܐ ܩܕ݂ܳܡ ܥܰܠܥܳܠܳܐ. ¹⁴ ܒܙܰܒܢܳܐ ܕܪܰܡܫܳܐ ܘܗܳܐ ܚܽܘܛܳܦܳܐ ܥܰܕ݂ܠܳܐ ܗܳܘܶܐ ܨܰܦܪܳܐ: ܘܠܳܐ ܢܶܫܬܰܚܰܪ. ܗܳܕܳܐ ܗ̱ܝ ܦܳܠܓܽܘܬ݂ܳܐ ܕܕ݂ܳܝܽܘܫܰܢ: ܘܰܡܢܳܬ݂ܳܐ ܕܒܳܙܽܘܙܰܢ.

ܩܶܦܰܠܶܐܘܳܢ: ܝܚ.

¹ ܘܳܝ ܠܰܐܪܥܳܐ ܕܛܶܠܳܠܳܐ ܕܟܶܢ̈ܦܶܐ: ܕܒܰܥܒܳܪ ܢܰܗܖ̈ܰܘܳܬ݂ܳܐ ܕܟ݂ܽܘܫ. ² ܕܰܡܫܰܕܰܪ ܗܡܰܝܖ̈ܶܐ ܒܝܰܡܳܐ: ܘܰܒܡܳܐܢ̈ܶܐ ܕܦܳܦܺܝܪܳܘܢ ܥܰܠ ܐܰܦܰܝ̈ ܡܰܝ̈ܳܐ. ܐܶܙܰܠܘ ܐܺܝ̈ܙܓܰܕܶܐ ܩܰܠܺܝ̈ܠܶܐ: ܠܘܳܬ݂ ܥܰܡܳܐ ܕܰܡܠܺܝܓ ܘܰܥܩܺܝܪ: ܠܘܳܬ݂ ܥܰܡܳܐ ܕܚܰܝܠܳܐ ܡܶܢܶܗ ܘܰܠܗܰܠ: ܥܰܡܳܐ ܕܰܡܫܰܕܰܪ ܘܕ݂ܺܝܫ. ܕܒܰܙܘ ܢܰܗܖ̈ܰܘܳܬ݂ܳܐ ܐܰܪܥܶܗ. ³ ܟܽܠܗܽܘܢ ܥܳܡܽܘܖ̈ܶܝܗ̇ ܕܬܺܒܶܝܠ ܕܰܫܪܶܝܢ ܒܰܐܪܥܳܐ. ܡܳܐ ܕܰܫܩܰܠܘ ܐܳܬܳܐ ܛܽܘܖ̈ܶܐ: ܬܶܚܙܽܘܢ. ܘܡܳܐ ܕܰܩܪܳܐ ܫܺܝܦܽܘܪܳܐ: ܬܶܫܡܥܽܘܢ. ⁴ ܡܶܛܽܠ ܕܗܳܟ݂ܰܢܳܐ ܐܶܡܰܪ ܠܺܝ ܡܳܪܝܳܐ: ܐܰܫܠܳܐ ܘܚܽܘܪ ܒܛܽܘܝܳܒܝ: ܐܰܝܟ݂ ܚܽܘܡܳܐ ܨܰܚܺܝܚܳܐ ܕܥܰܠ ܢܰܗܪܳܐ: ܘܰܐܝܟ݂ ܥܢܳܢܳܐ ܕܛܰܠܳܐ ܒܝܰܘܡܳܐ ܕܰܚܨܳܕ݂ܳܐ. ⁵ ܡܶܛܽܠ ܕܡ̣ܶܢ ܩܕ݂ܳܡ ܚܨܳܕ݂ܳܐ ܓܡܰܪ ܦܶܪܥܳܐ: ܘܗܰܒܳܒܐ ܚܣܰܠ. ܘܢܶܗܘܶܐ ܥܽܘܦܝܳܐ. ܘܢܶܦܣܽܘܩ ܙܰܠܺܝܠܳܐ ܒܡܰܓܠܳܐ. ܘܫܰܒܽܘܩܳܐ ܢܶܥܒܰܪ ܘܢܶܦܶܨ. ⁶ ܘܢܶܫܬܰܒܩܽܘܢ ܐܰܟ݂ܚܕ݂ܳܐ ܠܛܰܝܪܳܐ ܕܛܽܘܖ̈ܶܐ: ܘܰܠܚܰܝܽܘܬ݂ܳܐ ܕܰܐܪܥܳܐ. ܘܬܶܟ݂ܢܰܫ ܥܠܰܘܗ̱ܝ ܛܰܝܪܳܐ. ܘܟ݂ܽܠܳܗ̇ ܚܰܝܽܘܬ݂ܳܐ ܕܰܐܪܥܳܐ ܥܠܰܘܗ̱ܝ ܬܶܪܓܰܙ. ⁷ ܒܶܗ ܒܝܰܘܡܳܐ ܗܰܘ: ܢܰܘܒܶܠ ܩܽܘܪܒܳܢܳܐ ܠܡܳܪܝܳܐ ܚܰܝܠܬ݂ܳܢܳܐ: ܥܰܡܳܐ ܡܠܺܝܓܳܐ ܘܰܥܩܺܝܪܳܐ: ܥܰܡܳܐ ܕܚܰܝܠܳܐ ܡܶܢܶܗ ܘܰܠܗܰܠ: ܥܰܡܳܐ ܕܰܡܫܰܟܰܪ ܘܕ݂ܺܝܫ. ܕܒܰܙܘ ܢܰܗܖ̈ܰܘܳܬ݂ܳܐ ܐܰܪܥܶܗ: ܠܰܐܬ݂ܪܳܐ ܕܰܫܡܶܗ ܕܡܳܪܝܳܐ ܚܰܝܠܬ݂ܳܢܳܐ: ܠܛܽܘܪܳܐ ܕܨܶܗܝܽܘܢ.

 ܩܶܦܰܠܶܐܘܳܢ: ܝܛ.

¹ ܡܰܫܩܠܳܐ ܕܡܶܨܪܶܝܢ. ܗܳܐ ܡܳܪܝܳܐ ܪܟ݂ܺܝܒ ܥܰܠ ܥܢܳܢ̈ܶܐ ܩܰܠܺܝܠܬ݂ܳܐ: ܘܥܳܐܶܠ ܠܡܶܨܪܶܝܢ. ܘܰܢܙܽܘܥܽܘܢ ܦܬܰܟ݂ܖ̈ܶܐ ܕܡܶܨܪܶܝܢ ܡ̣ܶܢ ܩܕ݂ܳܡܰܘܗܝ. ܘܠܶܒܶܗ ܕܡܶܨܪܳܝܳܐ ܢܶܬ݂ܡܣܶܐ ܒܓܰܘܶܗ. ² ܘܰܐܓܰܪܳܐ ܡܶܨܪܳܝܳܐ ܒܡܶܨܪܳܝܳܐ. ܘܢܶܬ݂ܟܰܬܰܫ ܓܰܒܪܳܐ ܥܰܡ ܐܰܚܽܘܗܝ: ܘܓܰܒܪܳܐ ܥܰܡ ܚܰܒܪܶܗ: ܡܕ݂ܺܝܢ̱ܬܳܐ ܥܰܡ ܡܕ݂ܺܝܢ̱ܬܳܐ: ܘܡܰܠܟܽܘܬ݂ܳܐ ܥܰܡ ܡܰܠܟܽܘܬ݂ܳܐ. ³ ܘܬܶܬ݂ܦܣܶܩ ܪܽܘܚܶܗ ܕܡܶܨܪܳܝܳܐ ܒܓܰܘܶܗ: ܘܬܰܪܥܺܝܬܶܗ ܐܶܛܰܒܰܥ. ܘܢܶܫ̱ܐܠܽܘܢ ܡ̣ܶܢ ܦܬܰܟ݂ܖ̈ܶܐ ܘܡ̣ܶܢ ܡܓܽܘ̈ܫܶܐ: ܘܡ̣ܶܢ ܙܰܟܽܘܖ̈ܶܐ ܘܡ̣ܶܢ ܝܰܕܽܘ̈ܥܶܐ. ⁴ ܘܰܐܫܠܶܡ ܠܡܶܨܖ̈ܳܝܶܐ ܒܺܐܝܕ݂ܳܐ ܕܡܳܖ̈ܰܝܳܐ ܩܫܰܝ̈ܳܐ. ܘܡܰܠܟܳܐ ܥܰܫܺܝܢܳܐ ܢܶܫܬܰܠܰܛ ܒܗܽܘܢ: ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ. ⁵ ܘܰܢܓܽܘܙܽܘܢ ܡܰܝ̈ܳܐ ܡ̣ܶܢ ܝܰܡܳܐ. ܘܢܰܗܪܳܐ ܢܶܚܪܰܒ ܘܢܺܐܒܰܫ. ⁶ ܘܰܢܓܽܘܙܽܘܢ ܢܰܗܖ̈ܰܘܳܬ݂ܳܐ: ܘܢܶܬ݂ܡܰܣܟܢܽܘܢ. ܘܢܶܚܪܒܽܘܢ ܢܰܗܖ̈ܰܘܳܬ݂ܳܐ ܥܰܫܺܝ̈ܢܶܐ. ܩܰܢܝܳܐ ܘܰܐܪܒܳܢܳܐ ܘܦܳܦܳܪܽܘܢ ܢܺܐܒܫܽܘܢ. ⁷ ܘܠܽܘܥܳܐ ܕܥܰܠ ܢܰܗܪܳܐ: ܘܥܰܠ ܦܽܘܡܶܗ ܕܢܰܗܪܳܐ: ܘܟ݂ܽܠ ܕܡܶܙܕܪܰܥ ܥܰܠ ܓܰܒܶܗ ܕܢܰܗܪܳܐ ܢܺܐܒܰܫ. ܘܢܶܫܬ݁ܩܶܦ ܘܠܳܐ ܢܶܫܬ݁ܟܰܚ. ⁸ ܘܢܶܐܠܽܘܢ ܨܰܝܳܕ̈ܶܐ. ܘܢܶܬ݁ܒܽܘܢ ܒܶܐܒܠܳܐ ܕܪܳܡܶܝܢ ܨܶܢܳܖ̈ܝܳܬ݂ܳܐ ܒܢܰܗܪܳܐ. ܘܰܕ݂ܦܰܪܣܺܝܢ ܡܨܺܝ̈ܕ݂ܳܬ݂ܳܐ ܥܰܠ ܐܰܦܰܝ̈ ܡܰܝ̈ܳܐ ܐܶܬ݂ܟܪܰܗܘ. ⁹ ܘܢܶܒܗܬ݂ܽܘܢ ܥܳܒܕܰܝ ܟܶܬܳܢܳܐ: ܕܣܳܪܩܺܝܢ ܘܙܳܩܪܺܝܢ ܠܚܰܕ݂ܽܘܬ݂ܳܐ. ¹⁰ ܘܢܶܬ݂ܡܰܟܟ݂ܽܘܢ ܟܽܠ ܕܥܳܒܕܺܝܢ ܫܰܟ݂ܪܳܐ: ܠܡܰܫܬ݁ܝܳܐ ܕܢܰܦܫܳܐ. ¹¹ ܫܛܳܘ ܪܰܘܖ̈ܒܢܶܐ ܕܨܳܥܳܢ: ܘܚܰܟܺܝܡܶܐ ܕܡܳܠܟܺܝܢ ܠܦܶܪܥܽܘܢ ܡܰܠܟܳܐ ܡܶܠ̈ܟܶܐ ܫܳܛܰܝ̈ܳܐ. ܐܰܝܟܰܢܳܐ ܬܶܐܡܪܽܘܢ ܠܦܶܪܥܽܘܢ ܕܚܰܟܺܝܡܶܐ ܚܢܰܢ: ܘܰܒܢܰܝ̈ ܡܰܠ̈ܟܶܐ ܩܰܕ݂ܡܳܝ̈ܶܐ. ¹² ܐܰܝܟܳܐ ܐܶܢܽܘܢ ܚܰܟܺܝܡܰܝ̈ܟ: ܢܚܰܘܢܳܟ݂: ܘܢܶܕܥܽܘܢ ܡܳܢܳܐ ܐܶܬ݂ܪܰܥܺܝ ܡܳܪܝܳܐ ܚܰܝܠܬ݂ܳܢܳܐ ܥܰܠ ܡܶܨܪܶܝܢ. ¹³ ܫܛܳܘ ܪܰܘܖ̈ܒܢܶܐ ܕܨܳܥܳܢ. ܐܶܬ݁ܬ݁ܪܺܝܡܘ ܪܰܘܖ̈ܒܢܶܐ ܕܡܰܦܰܣ: ܘܰܐܛܥܺܝܘ ܠܡܶܨܪܶܝܢ ܒܙܳܘ̈ܝܳܬ݂ܳܐ ܕܫܰܖ̈ܒܳܬ݂ܳܗ̇. ¹⁴ ܡܳܪܝܳܐ ܡܙܰܓ ܒܓܰܘܳܗ̇ ܪܽܘܚܳܐ ܛܳܥܺܝܬ݂ܳܐ: ܘܰܐܛܥܶܝܗ ܠܡܶܨܪܳܝܳܐ ܒܟܽܠܗܽܘܢ ܥܒܳܕ݂ܰܘ̈ܗܝ: ܐܰܝܟ݂ ܕܛܳܥܶܐ ܪܳܘܝܳܐ ܒܰܬ݂ܝܳܒܬ݁ܶܗ. ¹⁵ ܘܠܳܐ ܢܶܗܘܶܐ ܠܡܶܨܪܳܝܳܐ ܓܰܒܪܳܐ ܕܢܶܥܒܶܕ݂ ܪܺܝܫܳܐ ܘܕ݂ܽܘܢܒܬ݂ܳܐ: ܘܕ݂ܽܘܢܒܬ݂ܳܐ ܘܪܺܝܫܳܐ. ¹⁶ ܒܝܰܘܡܳܐ ܗܰܘ: ܢܶܗܘܶܐ ܡܶܨܪܳܝܳܐ ܐܰܝܟ݂ ܢܶܫ̈ܶܐ. ܘܢܶܕ݂ܚܰܠ ܘܰܢܙܽܘܥ ܡ̣ܶܢ ܩܕ݂ܳܡ ܪܰܘܡܳܐ ܕܺܐܝܕܶܗ ܕܡܳܪܝܳܐ ܚܰܝܠܬ݂ܳܢܳܐ ܕܰܡܪܺܝܡ ܥܠܰܘܗ̱ܝ. ¹⁷ ܘܬܶܗܘܶܐ ܐܰܪܥܳܐ ܕܺܝܗܽܘܕ݂ܳܐ ܠܡܶܨܪܳܝܳܐ ܠܣܽܘܪܳܕܳܐ. ܘܟܽܠ ܕܢܰܕ݂ܟܪܺܝܗ̇ ܠܶܗ: ܢܶܬ݂ܪܗܶܒ: ܡ̣ܶܢ ܩܕ݂ܳܡ ܬܰܪܥܺܝܬܶܗ ܕܡܳܪܝܳܐ ܚܰܝܠܬ݂ܳܢܳܐ ܕܶܐܬ݂ܪܰܥܺܝ ܥܠܰܘܗ̱ܝ. ¹⁸ ܒܝܰܘܡܳܐ ܗܰܘ: ܢܶܗܘ̈ܝܳܢ ܚܰܡܶܫ ܩܽܘܖ̈ܝܳܐ ܒܰܐܪܥܳܐ ܕܡܶܨܪܶܝܢ: ܕܰܡܡܰܠ̈ܠܳܢ ܒܠܶܫܳܢܳܐ ܟܢܰܥܢܳܝܳܐ. ܘܝܳܡ̈ܝܳܢ ܒܡܳܪܝܳܐ ܚܰܝܠܬ݂ܳܢܳܐ. ܘܰܚܕ݂ܳܐ ܡܶܢܗܶܝܢ ܗܰܪܶܣ ܬܶܬ݂ܩܪܶܐ. ¹⁹ ܒܝܰܘܡܳܐ ܗܰܘ: ܢܶܗܘܶܐ ܡܰܕܒܚܳܐ ܠܡܳܪܝܳܐ ܚܰܝܠܬ݂ܳܢܳܐ ܒܓܰܘܳܗ̇ ܕܰܐܪܥܳܐ ܕܡܶܨܪܶܝܢ: ܘܩܳܝܳܡܬ݂ܳܐ ܠܡܳܪܝܳܐ ܥܰܠ ܓܶܢ̱ܒ ܬܚܽܘܡܶܝܗ̇. ²⁰ ܘܬܶܗܘܶܐ ܠܳܐܬܳܐ ܘܰܠܣܳܗܕܽܘܬ݂ܳܐ ܠܡܳܪܝܳܐ ܚܰܝܠܬ݂ܳܢܳܐ ܒܰܐܪܥܳܐ ܕܡܶܨܪܶܝܢ: ܡܶܛܽܠ ܕܢܶܓܥܽܘܢ ܩܕ݂ܳܡ ܡܳܪܝܳܐ ܡ̣ܶܢ ܩܕ݂ܳܡ ܐܳܠܽܘܨܳܐ. ܘܰܢܫܰܕܰܪ ܠܗܽܘܢ ܦܳܪܽܘܩܳܐ: ܘܕܰܝܳܢܳܐ: ܘܰܢܦܰܨܶܐ ܐܶܢܽܘܢ. ²¹ ܘܢܶܬ݂ܺܝܕܰܥ ܡܳܪܝܳܐ ܠܡܶܨܖ̈ܳܝܶܐ: ܘܢܶܕܥܽܘܢܶܗ ܡܶܨܖ̈ܳܝܶܐ ܠܡܳܪܝܳܐ ܒܝܰܘܡܳܐ ܗܰܘ. ܘܰܢܩܰܪܒܽܘܢ ܕܶܒܚ̈ܶܐ ܘܰܣܡܺܝܕ݂ܳܐ. ܘܢܶܕܪܽܘܢ ܢܶܕ݂ܖ̈ܶܐ ܠܡܳܪܝܳܐ: ܘܰܢܫܰܠܡܽܘܢ. ²² ܘܢܶܡܚܶܐ ܡܳܪܝܳܐ ܠܡܶܨܖ̈ܳܝܶܐ ܡܚܽܘܬ݂ܳܐ: ܘܢܰܐܣܶܐ ܐܶܢܽܘܢ. ܘܢܶܬ݂ܦܢܽܘܢ ܠܘܳܬ݂ ܡܳܪܝܳܐ: ܘܢܶܥܢܶܐ ܐܶܢܽܘܢ: ܘܢܰܐܣܶܐ ܐܶܢܽܘܢ. ²³ ܒܝܰܘܡܳܐ ܗܰܘ: ܢܶܗܘܶܐ ܫܒܺܝܥܳܐ ܡ̣ܶܢ ܡܶܨܪܶܝܢ ܐܳܬ݂ܽܘܪ: ܘܡ̣ܶܢ ܐܳܬ݂ܽܘܪ ܠܡܶܨܪܶܝܢ. ܘܢܶܥܽܘܠ ܐܳܬ݂ܽܘܪܳܝܳܐ ܠܡܶܨܪܶܝܢ: ܘܡܶܨܪܳܝܳܐ ܠܐܳܬ݂ܽܘܪ. ܘܢܶܦܠܚܽܘܢ ܡܶܨܖ̈ܳܝܶܐ ܠܐܳܬ݂ܽܘܪܳܝܳܐ. ²⁴ ܒܝܰܘܡܳܐ ܗܰܘ ܢܶܗܘܶܐ ܝܺܣܪܳܐܶܝܠ ܚܰܕ݂ ܡ̣ܶܢ ܬܠܳܬ݂ܳܐ: ܠܡܶܨܖ̈ܳܝܶܐ ܘܠܳܐܬ݂ܽܘܖ̈ܳܝܶܐ ܒܽܘܪܟܬ݂ܳܐ ܒܓܰܘ ܐܰܪܥܳܐ. ²⁵ ܕܠܶܗ ܒܰܪܶܟ݂ ܡܳܪܝܳܐ ܚܰܝܠܬ݂ܳܢܳܐ: ܘܶܐܡܰܪ ܒܪܺܝܟ݂ ܥܰܡܝ ܕܰܒܡܶܨܪܶܝܢ: ܘܰܥܒܳܕ݂ ܐܺܝ̈ܕܰܝ ܕܒܳܐܬ݂ܽܘܪ. ܘܝܽܘܪܬܳܢܝ ܝܺܣܪܳܐܶܝܠ.

ܩܶܦܰܠܶܐܘܳܢ: ܟܟ.

¹ܒܫܰܢ̱ܬܳܐ ܕܶܐܬ݂ܳܐ ܬܳܐܪܬܳܢ ܠܰܐܫܕܽܘܕ݂: ܟܰܕ݂ ܫܰܕܪܶܗ ܣܰܪܓܽܘܢ ܡܰܠܟܳܐ ܕܳܐܬ݂ܽܘܪ: ܘܶܐܬ݂ܟܰܬܰܫ ܥܰܡ ܐܰܫܕܽܘܕ݂ ܘܟܰܒܫܳܗ̇. ² ܒܶܗ ܒܙܰܒܢܳܐ ܗܰܘ: ܡܰܠܶܠ̣ ܡܳܪܝܳܐ ܒܝܰܕ݂ ܐܶܫܰܥܝܳܐ ܢܒܺܝܳܐ ܒܰܪ ܐܰܡܽܘܨ: ܘܶܐܡܰܪ ܠܶܗ: ܙܶܠ ܫܪܺܝ ܣܰܩܳܐ ܡ̣ܶܢ ܚܰܨܰܝ̈ܟ: ܘܰܡܣܳܢܰܝ̈ܟ ܡ̣ܶܢ ܖ̈ܶܓܠܰܝܟ. ܘܰܥܒܰܕ݂ ܗܳܟ݂ܰܢܳܐ: ܘܗܰܠܶܟ݂ ܥܰܪܛܶܠ ܘܚܶܦܝ݂ܳܝ݂. ³ ܘܶܐܡܰܪ ܡܳܪܝܳܐ: ܐܰܝܟܰܢܳܐ ܕܗܰܠܶܟ݂ ܥܰܒܕܝ ܐܶܫܰܥܝܳܐ ܥܰܪܛܶܠ ܘܚܶܦܝ݂ܳܝ݂: ܗܳܟ݂ܰܢܳܐ ܢܶܗܘ̈ܝܳܢ ܐܳܬ݂ܘ̈ܳܬ݂ܳܐ ܘܬܶܕ݂ܡܖ̈ܳܬ݂ܳܐ ܬܠܳܬ݂ ܫܢܺܝ̈ܢ ܥܰܠ ܡܶܨܪܶܝܢ ܘܥܰܠ ܟܽܘܫ. ⁴ ܗܳܟ݂ܰܢܳܐ ܢܶܕ݂ܒܰܪ ܡܰܠܟܳܐ ܕܳܐܬ݂ܽܘܪ ܫܒܺܝܬ݂ܳܐ ܕܡܶܨܪܶܝܢ: ܘܰܫܒܺܝܬ݂ܳܐ ܕܟ݂ܽܘܫ: ܥܠܰܝ̈ܡܶܐ ܘܣܳܒ̈ܶܐ ܥܰܪܛܶܠ ܘܚܶܦܝ݂ܳܝ݂ ܘܢܶܬ݂ܓܠܶܐ ܦܽܘܪܣܳܝܳܗ̇ ܕܡܶܨܪܶܝܢ. ⁵ ܘܢܶܬ݁ܬܰܒܪܽܘܢ ܘܢܶܒܗܬ݂ܽܘܢ: ܡ̣ܶܢ ܟܽܘܫ ܬܽܘܟ݂ܠܳܢܗܽܘܢ: ܘܡ̣ܶܢ ܡܶܨܪܶܝܢ ܬܶܫܒܽܘܚܬ݁ܗܽܘܢ. ⁶ ܘܢܺܐܡܰܪ ܥܳܡܽܘܪܳܐ ܕܓܳܙܰܪܬܳܐ ܗܳܕܶܐ ܒܝܰܘܡܳܐ ܗܰܘ: ܗܳܪܟܳܐ ܗ̱ܘ̣ ܬܽܘܟ݂ܠܳܢܰܢ: ܕܰܥܪܰܩܢ ܠܡܶܬ݂ܥܰܕܳܪܽܘ ܘܰܠܡܶܬ݂ܦܰܨܳܝܽܘ ܡ̣ܶܢ ܡܰܠܟܳܐ ܕܳܐܬ݂ܽܘܪ. ܘܰܚܢܰܢ ܐܰܝܟܰܢܳܐ ܢܶܬ݂ܦܰܨܶܐ.

ܩܶܦܰܠܶܐܘܳܢ: ܟܐ.

¹ ܡܰܫܩܠܳܐ ܕܡܰܕ݂ܒܪܳܐ ܕܝܰܡܳܐ. ܐܰܝܟ݂ ܥܰܠܥܳܠܳܐ ܡ̣ܶܢ ܬܰܝܡܢܳܐ ܬܶܪܗܰܛ ܡ̣ܶܢ ܡܰܕ݂ܒܪܳܐ: ܘܬܺܐܬܶܐ ܡ̣ܶܢ ܐܰܪܥܳܐ ܪܰܚܺܝܩܬܳܐ. ² ܚܶܙܘܳܐ ܩܰܫܝܳܐ ܐܶܬ݂ܚܙܺܝ ܠܰܢ. ܛܳܠܽܘܡܳܐ ܛܳܠܶܡ: ܘܒܳܙܽܘܙܳܐ ܒܳܐܶܙ ܣܰܩܝ ܥܺܝܠܳܡ ܘܛܽܘܖ̈ܰܝ ܡܳܕܰܝ: ܘܟܽܠܗܶܝܢ ܬܶܢ̈ܚܳܬ݂ܳܗ̇ ܒܰܛܠܶܬ݂. ³ ܡܶܛܽܠ ܗܳܢܳܐ ܐܶܬ݂ܡܠܺܝ ܚܰܨܝ ܙܳܘܥܬ݂ܳܐ ܘܰܐܚܕܽܘܢܝ ܨܰܘܖ̈ܳܢܶܐ ܐܰܝܟ݂ ܨܰܘܖ̈ܳܢܶܐ ܕܝܳܠܶܕܬܳܐ. ܙܳܥܶܬ݂ ܕܠܳܐ ܐܶܫܡܰܥ. ܘܶܐܬ݁ܕܰܠܚܶܬ݂ ܕܠܳܐ ܐܶܚܙܶܐ. ⁴ ܛܥܳܐ ܠܶܒܝ: ܘܨܰܘܖ̈ܳܢܶܐ ܐܰܙܺܝܥܽܘܢܝ ܘܫܽܘܦܖ̈ܶܐ ܕܨܶܒܝܳܢܝ ܣܳܡܘ ܠܺܝ ܠܣܽܘܪܳܕ݂ܳܐ. ⁵ ܛܰܝܶܒܘ ܦܳܬ݂ܽܘܖ̈ܶܐ: ܕܽܘܩܘ ܕܰܘ̈ܩܶܐ. ܐܰܟ݂ܽܘܠܘ ܘܶܐܫܬܰܘ. ܩܽܘܡܘ ܪܰܘܖ̈ܒܳܢܶܐ: ܡܫܽܘܚܘ ܣܰܟܖ̈ܶܐ. ⁶ ܡܶܛܽܠ ܕܗܳܟ݂ܰܢܳܐ ܐܶܡܰܪ ܠܺܝ ܡܳܪܝܳܐ: ܙܶܠ ܐܰܩܺܝܡ ܕܰܘܩܳܐ: ܕܡܶܕܶܡ ܕܚܳܙܶܐ: ܢܚܰܘܶܐ. ⁷ ܘܰܚܙܳܐ ܪܟ݂ܽܘܒܳܐ ܕܰܬ݂ܪܶܝܢ ܦܰܖ̈ܳܫܺܝܢ: ܕܰܪܟ݂ܺܝܒ ܚܡܳܪܳܐ: ܘܕܰܪܟ݂ܺܝܒ ܓܰܡܠܳܐ: ܘܨܳܬ݂ ܫܶܡܥܳܐ ܣܰܓܺܝܐܳܐ. ⁸ ܘܰܩܪܳܐ ܕܰܘܩܳܐ ܒܶܐܕ݂ܢܰܝ̈: ܘܶܐܡܰܪ: ܐܶܢܳܐ ܡܳܪܝܳܐ ܩܳܐܶܡ ܐ̱ܢܳܐ ܐܰܡܺܝܢܳܐܺܝܬ݂ ܒܺܐܝܡܳܡܳܐ: ܘܥܰܠ ܡܰܛܰܪܬ݁ܝ ܩܳܐܶܡ ܐ̱ܢܳܐ ܟܽܠܗܽܘܢ ܠܰܝ̈ܠܰܘ̈ܳܬ݂ܳܐ. ⁹ ܘܗܐ ܐܶܬ݂ܳܐ ܓܰܒܪܳܐ ܡ̣ܶܢ ܖ̈ܳܟ݂ܒܶܐ ܕܦܰܖ̈ܳܫܶܐ: ܘܰܥ̣ܢܳܐ ܘܶܐܡܰܪ: ܢܶܦܠܰܬ: ܢܶܦܠܰܬ: ܒܳܒܶܠ. ܘܟܽܠܗܽܘܢ ܐܰܠܳܗ̈ܶܝܗ̇ ܓܠܺܝ̈ܦܶܐ ܐܶܬ݁ܬܰܒܰܪܘ ܒܰܐܪܥܳܐ: ܡ̣ܶܢ ܚܨܳܕ݂ ܘܡ̣ܶܢ ܒܠܰܝ ܐܶܕܰܪ. ¹⁰ ܡܶܕܶܡ ܕܫܶܡܥܶܬ݂ ܡ̣ܶܢ ܡܳܪܝܳܐ ܐܰ‌ܠܳܗܳܐ ܕܺܝܣܪܳܐܶܝܠ: ܚܳܘܺܝܬ݁ܟ݂ܽܘܢ. ¹¹ ܡܰܫܩܠܳܐ ܕܕ݂ܽܘܡܳܐ. ܠܺܝ ܩܪܳܐ ܡ̣ܶܢ ܣܳܥܺܝܪ ܢܳܛܽܘܪܳܐ ܕܰܒܠܺܠܝܳܐ. ¹² ܐܶܡܰܪ ܢܳܛܽܘܪܳܐ: ܐܶܬ݂ܳܐ ܨܰܦܪܳܐ ܐܳܦ ܠܺܠܝܳܐ. ܐܶܢ ܒܳܥܶܝܢ ܐܰܢ̱ܬ݁ܽܘܢ ܒܥܰܘ: ܬܽܘܒ ܐܳܬ݁ܶܝܢ ܐܰܢ̱ܬ݁ܽܘܢ. ¹³ ܡܰܫܩܠܳܐ ܕܥܰܪܰܒܳܝܳܐ ܒܪܰܡܫܳܐ ܒܥܳܒܳܐ ܬܒܽܘܬܽܘܢ: ܒܰܫܒܺܝܠܳܐ ܕܕ݂ܽܘܪܢܺܝܡ. ¹⁴ ܠܽܐܘܪܰܥ ܨܗܰܝ̈ܳܐ ܐܰܝܬܰܘ ܡܰܝ̈ܳܐ: ܥܳܡܽܘܖ̈ܶܐ ܕܰܐܪܥܳܐ ܕܬܰܝܡܢܳܐ. ܒܠܰܚܡܟ݂ܽܘܢ ܐܰܪܽܘܥܘ ܠܰܡܒܰܕܖ̈ܶܐ. ¹⁵ ܡܶܛܽܠ ܕܡ̣ܶܢ ܩܕ݂ܳܡ ܣܰܦܣܺܪܳܐ ܐܶܬ݂ܒܰܕܰܪܘ: ܘܡ̣ܶܢ ܩܕ݂ܳܡ ܚܰܪܒܳܐ ܕܰܠܛܺܝܫܳܐ: ܘܡ̣ܶܢ ܩܕ݂ܳܡ ܩܶܫܬܳܐ ܕܡܰܠܝܳܐ: ܘܡ̣ܶܢ ܩܕ݂ܳܡ ܥܽܘܫܢܳܐ ܕܰܩܪܳܒܳܐ. ¹⁶ ܡܶܛܽܠ ܕܗܳܟ݂ܰܢܳܐ ܐܶܡܰܪ ܠܺܝ ܡܳܪܝܳܐ: ܒܡܶܫܠܰܡ ܫܰܢ̱ܬܳܐ ܐܰܝܟ݂ ܫܢܰܝ̈ܳܐ ܕܰܐܓܺܝܪܳܐ: ܢܣܽܘܦ ܟܽܠܶܗ ܐܺܝܩܳܪܳܐ ܕܩܶܕ݂ܳܪ. ¹⁷ ܘܫܰܪܟܳܐ ܕܡܶܢܝܳܢܳܐ ܕܩܰܫ̈ܳܬܳܐ: ܓܰܒܖ̈ܶܐ ܕܰܒܢܰܝ̈ ܩܶܕܳܪ ܢܶܙܥܪܽܘܢ: ܡܶܛܽܠ ܕܡܳܪܝܳܐ ܐܰ‌ܠܳܗܳܐ ܕܺܝܣܪܳܐܶܝܠ ܡܰܠܶܠ.

ܩܶܦܰܠܶܐܘܳܢ: ܟܒ.

¹ ܡܰܫܩܠܳܐ ܕܢܰܚܠܳܐ ܕܚܰܙܝܽܘܢ. ܡܳܢܳܐ ܐܺܝܬ݂ ܠܶܟ݂ܝ ܗܳܪܟܳܐ: ܕܰܣܠܶܩܬ݁ܝ ܒܳܠܶܟ݂ܝ ܠܐܶܓܳܪܳܐ. ² ܕܠܽܘܚܝܳܐ ܐܶܬܡܠܺܝܬ݁ܝ ܩܪܺܝܬ݂ܳܐ ܩܳܠܳܐ ܐܶܬܡܠܺܝܬ݁ܝ ܩܪܺܝܬ݂ܳܐ ܥܰܫܺܝܢܬܳܐ ܩܛܺܝܠܰܝ̈ܟܝ ܠܳܐ ܗܘܰܘ ܩܛܺܝ̈ܠܶܐ ܕܣܰܝܦܳܐ: ܐܳܦܠܳܐ ܡܺܝ̈ܬܶܐ ܕܰܩܪܳܒܳܐ. ³ ܟܽܠܗܽܘܢ ܫܰܠܺܝܛܳܢܰܝ̈ܟܝ ܢܳܕܘ ܐܰܟ݂ܚܕ݂ܳܐ ܡ̣ܶܢ ܩܶܫܬܳܐ ܐܶܬ݂ܳܐܣܰܪܘ. ܕܶܐܫܬܚܰܪܘ ܒܶܟ݂ܝ: ܐܰܟ݂ܚܕܳܐ ܐܶܬ݂ܳܐܣܰܪܘ: ܘܰܠܪܽܘܚܩܳܐ ܥܪܰܩܘ. ⁴ ܡܶܛܽܠ ܗܳܢܳܐ ܐܶܡ̇ܪܶܬ݂: ܫܽܘܒܩܽܘܢܝ ܐܶܬ݂ܡܰܪܡܰܪ ܒܰܒܟ݂ܳܬ݂ܳܐ ܘܠܳܐ ܬܶܐܠܨܽܘܢ ܠܰܡܒܰܝܳܐܽܘܬܰܢܝ ܥܰܠ ܬܒܳܪܳܗ̇ ܕܒܰܪܬ݂ ܥܰܡܝ. ⁵ ܡܶܛܽܠ ܕܝܰܘܡܳܐ ܕܰܕ݂ܠܽܘܚܝܳܐ ܘܕܰܕ݂ܝܳܫܳܐ ܘܕܰܒܟ݂ܳܬ݂ܳܐ: ܠܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ ܒܢܰܚܠܳܐ ܕܚܶܙܝܽܘܢ. ܒܨܳܐ ܫܽܘܖ̈ܶܐ: ܘܰܓܥܳܐ ܥܰܠ ܛܽܘܖ̈ܶܐ. ⁶ ܘܥܺܝܠܳܡ ܫܩܰܠ ܩܛܺܪܩܳܐ: ܒܖ̈ܳܟ݂ܒܶܐ ܕܐ̱ܢܳܫܳܐ ܦܰܖ̈ܳܫܶܐ. ܘܫܽܘܪܳܐ ܓܠܳܐ ܣܰܟܖ̈ܶܐ. ⁷ ܘܢܶܗܘܽܘܢ ܓܒܰܝ̈ܳܐ ܕܥܽܘܡܩܰܝ̈ܟܝ ܡܠܶܝܢ ܡܰܖ̈ܟܒܳܬ݂ܳܐ. ܘܦܰܖ̈ܳܫܶܐ ܢܶܣܬܰܕ݂ܪܽܘܢ ܥܰܠ ܬܰܖ̈ܥܶܐ. ⁸ ܘܺܝܗܽܘܕܳܐ ܢܶܓܠܶܐ ܣܶܕ݂ܖ̈ܶܐ. ܘܬܶܚܙܶܐ ܒܝܰܘܡܳܐ ܗܰܘ ܙܰܝܢܳܐ ܕܒܶܝܬ݂ ܥܳܒܳܐ. ⁹ ܘܬ݂ܽܘܖ̈ܥܳܬ݂ܳܐ ܕܰܩܪܺܝܬܶܗ ܕܕܰܘܺܝܕ݂ ܚܙܰܝܬ݁ܽܘܢ ܕܰܣܓܺܝ̈ ܘܰܟ݂ܢܰܫܬ݁ܽܘܢ ܡܰܝ̈ܳܐ ܕܝܰܡܬ݂ܳܐ ܬܰܚܬܳܝܬܳܐ. ¹⁰ ܘܰܡܠܰܝܬ݁ܽܘܢ ܒ̈ܳܬ݁ܶܐ ܕܽܐܘܪܺܫܠܶܡ. ܘܰܥܩܰܪܬ݁ܽܘܢ ܒ̈ܳܬ݁ܶܐ: ܕܬܰܥܫܢܽܘܢ ܫܽܘܪܳܐ. ¹¹ ܘܩܳܒܝܳܬ݂ܳܐ ܥ̣ܒܰܕܬ݁ܽܘܢ ܒܶܝܬ݂ ܫܽܘܪܳܐ ܠܡܰܝ̈ܳܐ ܕܝܰܡܬ݂ܳܐ ܥܰܬ݁ܺܝܩܬܳܐ. ܘܠܳܐ ܚܳܪܬ݁ܽܘܢ ܠܥܳܒܽܘܕ݂ܳܗ̇ ܘܰܠܓܳܒܽܘܠܳܗ̇ ܡ̣ܶܢ ܪܽܘܚܩܳܐ ܠܳܐ ܚܙܰܝܬ݁ܽܘܢ. ¹² ܘܰܩܪܳܐ ܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ ܒܝܰܘܡܳܐ ܗܰܘ: ܠܰܒܟ݂ܳܬ݂ܳܐ ܘܰܠܡܰܖ̈ܩܕ݂ܳܬ݂ܳܐ ܘܰܠܩܽܘ̈ܕ݂ܝܳܬ݂ܳܐ: ܘܠܰܟ݂ܒܳܢܳܐ ܕܣܰܩ̈ܶܐ. ¹³ ܘܗܳܐ ܒܽܘܣܳܡܳܐ ܘܚܰܕ݂ܽܘܬ݂ܳܐ: ܢܶܟܣܬ݂ܳܐ ܕܬܰܘܖ̈ܶܐ: ܘܢܶܟܣܬ݂ܳܐ ܕܥܳܢ̈ܳܐ: ܘܡܶܐܟ݂ܽܘܠܬܳܐ ܕܒܶܣܪܳܐ: ܘܡܰܫܬܝܳܐ ܕܚܰܡܪܳܐ. ܢܶܐܟ݂ܽܘܠ ܘܢܶܫܬ݁ܶܐ: ܡܶܛܽܠ ܕܰܡܚܳܪ ܢܡܽܘܬ݂. ¹⁴ ܓܰܠܝܳܐ ܗ̱ܝ ܒܶܐܕ݂ܢܰܝ̈ ܡܳܪܝܳܐ ܚܰܝܠܬ݂ܳܢܳܐ: ܘܶܐܡܰܪ: ܠܳܐ ܬܶܣܒܽܘܢ ܠܟ݂ܽܘܢ ܚܛܺܝܬ݂ܳܐ ܗܳܕܶܐ ܥܕܰܡܳܐ ܕܰܬ݂ܡܽܘܬ݂ܽܘܢ: ܐܳܡܰܪ ܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ. ¹⁵ ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ: ܙܶܠ ܠܘܳܬ݂ ܣܰܘܟܳܢ ܗܳܢܳܐ: ܠܘܳܬ݂ ܫܰܒܢܳܐ ܪܰܒܒܰܝܬܳܐ: ܘܶܐܡܰܪ ܠܶܗ. ¹⁶ ܡܳܢܳܐ ܥܳܒܕ݂ ܐܰܢ̱ܬ݁ ܗܳܪܟܳܐ: ܘܡܳܢܳܐ ܐܺܝܬ݂ ܠܳܟ݂ ܗܳܪܟܳܐ. ܕܰܢܩܰܪܬ݁ ܠܳܟ݂ ܗܳܪܟܳܐ ܩܰܒܪܳܐ. ܢܳܩܰܪ ܒܪܰܘܡܳܐ ܩܰܒܪܶܗ: ܘܪܳܫܶܡ ܒܟܺܐܦܳܐ ܡܰܫܪܝܶܗ. ¹⁷ ܗܳܐ ܡܳܪܝܳܐ ܡܶܫܕܶܐ ܫܳܕܶܐ ܠܳܟ݂ ܓܰܒܪܳܐ: ܘܡܶܛܥܳܐ ܛܳܥܶܐ ܠܳܟ݂. ¹⁸ ܢܶܐܠܨܳܟ݂ ܒܽܐܘܠܨܳܢܳܐ ܐܰܝܟ݂ ܐܽܘܠܨܳܢܳܐ ܕܶܐܣܦܺܝܪܳܐ: ܒܰܐܪܥܳܐ: ܪܘܰܚܬ݂ܳܐ ܕܺܐܝ̈ܕܰܝܳܐ ܬܰܡܳܢ ܬܡܽܘܬ݂: ܘܬܰܡܳܢ ܡܰܪܟܰܒܬ݂ܳܐ ܕܺܐܝܩܳܪܳܟ݂: ܨܰܥܪܳܐ ܕܒܶܝܬ݂ ܡܳܪܳܟ݂. ¹⁹ ܘܶܐܗܰܓܡܳܟ݂ ܡ̣ܶܢ ܐܺܝܩܳܪܳܟ݂: ܘܶܐܣܰܚܦܳܟ݂ ܡ̣ܶܢ ܩܝܳܡܳܟ݂. ²⁰ ܘܢܶܗܘܶܐ ܒܝܰܘܡܳܐ ܗܰܘ: ܐܳܡܰܪ ܡܳܪܝܳܐ: ܐܶܩܪܶܐ ܠܥܰܒܕܝ ܐܶܠܝܰܩܺܝܡ ܒܰܪ ܚܶܠܰܩܝܳܐ. ²¹ ܘܰܐܠܒܶܫܺܝܘܗܝ ܟܽܘܬ݁ܺܝܢܳܟ݂. ܘܰܒܗܶܡܝܳܢܳܟ݂ ܐܶܚܰܙܩܺܝܘܗܝ. ܘܫܽܘܠܛܳܢܳܟ݂ ܐܶܬ݁ܶܠ ܒܺܐܝܕ݂ܰܘ̈ܗܝ ܘܢܶܗܘܶܐ ܐܰܒܳܐ ܠܥܳܡܽܘܖ̈ܶܐ ܕܽܐܘܪܺܫܠܶܡ: ܘܰܠܓܰܒܖ̈ܶܐ ܕܒܶܝܬ݂ ܝܺܗܽܘܕ݂ܳܐ. ²² ܘܰܢܣܺܝܡ ܩܠܺܝܕܳܐ ܕܒܶܝܬ݂ ܕܰܘܺܝܕ݂ ܥܰܠ ܟܰܬ݂ܦܶܗ. ܘܢܶܦܬܰܚ: ܘܠܰܝܬ݁ ܕܢܶܐܚܽܘܕ݂. ܘܢܶܐܚܽܘܕ݂ ܘܠܰܝܬ݁ ܕܢܶܦܬܰܚ. ²³ ܘܶܐܩܫܶܝܘܗܝ ܣܶܟܬ݂ܳܐ ܒܰܐܬ݂ܪܳܐ ܡܗܰܝܡܢܳܐ. ܘܢܶܗܘܶܐ ܟܽܘܪܣܝܳܐ ܕܺܐܝܩܳܪܳܐ ܠܒܶܝܬ݂ ܐܰܒܽܘܗܝ. ²⁴ ܘܢܶܬ݁ܠܽܘܢ ܥܠܰܘܗ̱ܝ ܟܠܶܗ ܐܺܝܩܳܪܳܐ ܕܒܶܝܬ݂ ܐܰܒܽܘܗܝ: ܡܝܰܩܪܳܐ ܘܰܡܫܰܒܚܳܐ: ܘܟ݂ܽܠ ܡܳܐܢܳܐ ܙܥܽܘܪܳܐ: ܡ̣ܶܢ ܡܳܐܢܳܐ ܕܰܙܡܳܪܳܐ: ܘܰܥܕܰܡܳܐ ܠܡܳܐܢܳܐ ܕܟܶܢܳܪܳܐ.  ²⁵ ܒܝܰܘܡܳܐ ܗܰܘ: ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ: ܬܶܬ݂ܥܩܰܪ ܣܶܟܬ݂ܳܐ ܕܰܢܩܺܝܫܳܐ ܒܰܐܬ݂ܪܳܐ ܡܗܰܝܡܢܳܐ. ܘܬܶܣܬ݁ܚܶܦ ܘܬܶܦܶܠ. ܘܢܺܐܒܰܕ݂ ܫܩܳܠܳܐ ܕܣܺܝܡ ܥܠܶܝܗ̇: ܡܶܛܽܠ ܕܡܳܪܝܳܐ ܡܰܠܶܠ.

ܩܶܦܰܠܶܐܘܳܢ: ܟܓ.

¹ ܡܰܫܩܠܳܐ ܕܨܽܘܪ: ܐܰܝ̈ܠܠܺܝܢ. ܐܶܠܦ̈ܶܐ ܕܬܰܪܫܺܝܫ ܡܶܛܽܠ ܕܶܐܬ݂ܒܙܶܙ ܡ̣ܶܢ ܒܰܝܬܳܐ: ܡܰܝܬ݁ܝܳܢܳܐ. ܘܡ̣ܶܢ ܐܰܪܥܳܐ ܕܟ݂ܳܬ݂ܺܝܡ ܐܶܬ݂ܓܠܺܝ ܠܰܢ. ² ܫܬ݂ܽܘܩܘ ܥܳܡܽܘܖ̈ܶܐ ܕܓܳܙܰܪܬܳܐ: ܬܰܓܳܪܳܐ ܕܨܰܝܕܳܢ ܕܥܳܒܰܪ ܒܝܰܡܳܐ. ³ ܡܠܽܘܐܳܟ݂ ܒܡܰܝ̈ܳܐ ܣܰܓ݁ܺܝ̈ܐܶܐ: ܙܰܪܥܳܐ ܕܬܰܓܳܪܳܐ ܚܨܳܕ݂ܳܐ ܕܢܰܗܪܳܐ. ܥܠܰܠܬܶܗ ܗܘܳܬ݂ ܬܶܐܓܽܘܪܬܳܐ ܠܥܰܡ̈ܡܶܐ. ⁴ ܒܗܰܬ݂ܝ ܨܰܝܕܳܢ: ܡܶܛܽܠ ܕܶܐܡܰܪ ܝܰܡܳܐ ܘܥܽܘܫܢܶܗ ܕܝܰܡܳܐ: ܠܳܐ ܚܰܒܠܶܬ݂: ܘܠܳܐ ܝܶܠܕܶܬ݂. ܘܠܳܐ ܪܰܒܺܝܬ݂ ܓܰܕܽܘ̈ܕܶܐ: ܘܳܐܦܠܳܐ ܪܰܡܪܡܶܬ݂ ܒܬ݂ܽܘ̈ܠܳܬ݂ܳܐ. ⁵ ܡܳܐ ܕܶܐܫܬ݁ܡܰܥ ܠܡܶܨܪܶܝܢ: ܚܶܒ̈ܠܶܐ ܢܶܐܚܕܽܘܢ ܐܶܢܽܘܢ: ܐܰܝܟ݂ ܫܶܡܥܳܐ ܕܨܽܘܪ. ⁶ ܥܒܰܪܘ ܠܬܰܪܫܺܝܫ: ܐܰܝܠܶܠܘ ܥܳܡܽܘܖ̈ܶܐ ܕܓܳܙܰܪܬܳܐ. ⁷ ܗܳܕܳܐ ܗ̱ܝ ܠܟ݂ܽܘܢ ܥܰܫܺܝܢܬܳܐ ܕܡ̣ܶܢ ܝܰܘ̈ܡܳܬܳܐ ܩܰܕ݂ܡܳܝ̈ܶܐ ܩܕ݂ܳܡܶܝܗ̇ ܢܺܐܙ̈ܳܠ̄ܢ ܖ̈ܶܓܠܶܝܗ̇ ܕܬܶܥܡܰܪ ܒܪܽܘܚܩܳܐ. ⁸ ܡܰܢܽܘ ܐܶܬ݂ܡܰܠܰܟ݂ ܗܳܟ݂ܰܢܳܐ ܥܰܠ ܨܽܘܪ ܡܟܰܠܰܠܬܳܐ. ܕܬܰܓܳܖ̈ܶܝܗ̇ ܪܰܘܖ̈ܒܳܢܶܐ: ܘܰܟ݂ܢܰܥܢܳܝ̈ܶܝܗ̇ ܝܰܩܺܝܖ̈ܶܝܗ̇ ܕܰܐܪܥܳܐ. ⁹ ܡܳܪܝܳܐ ܚܰܝܠܬ݂ܳܢܳܐ ܐܶܬ݂ܪܰܥܺܝ: ܠܰܡܒܰܛܳܠܽܘ ܐܺܝܩܳܪܳܐ ܕܟ݂ܽܠ ܚܺܝܠ: ܘܠܰܡܨܰܥܳܪܽܘ ܠܟܽܠܗܽܘܢ ܝܰܩܺܝܖ̈ܶܝܗ̇ ܕܰܐܪܥܳܐ. ¹⁰ ܥܒܰܪܝ ܠܰܐܪܥܶܟ݂ܝ ܐܰܝܟ݂ ܢܰܗܪܳܐ ܒܰܪܬ݂ ܬܰܪܫܺܝܫ ܠܰܝܬ݁ ܬܽܘܒ ܕܕܳܚܶܩ ܠܶܟ݂ܝ. ¹¹ ܐܺܝܕܶܗ ܐܰܪܺܝܡ ܥܰܠ ܝܰܡܳܐ: ܘܰܐܪܓܶܙ ܡܰܠܟ̈ܘܳܬ݂ܳܐ. ܡܳܪܝܳܐ ܦܩܰܕ݂ ܥܰܠ ܟܢܰܥܢ ܕܢܳܘܒܶܕ݂ ܥܰܫܺܝ̈ܢܶܝܗ̇. ¹² ܘܶܐܡܰܪ: ܠܳܐ ܬܽܘܣܦܺܝܢ ܬܽܘܒ ܠܡܶܬ݂ܥܰܫܳܢܽܘ: ܛܠܺܝܡܬܳܐ ܒܬ݂ܽܘܠܬܳܐ ܒܰܪܬ݂ ܨܰܝܕܳܢ. ܩܽܘܡܝ ܥܒܰܪܝ ܠܟ݂ܳܬ݂ܺܝܡ ܐܳܦ ܬܰܡܳܢ ܠܳܐ ܢܢܺܝܚ ܠܶܟ݂ܝ. ¹³ ܗܳܐ ܐܰܪܥܳܐ ܕܟܰܠ̈ܕܳܝܶܐ: ܗܳܢܳܐ ܗ̱ܘ̣ ܥܰܡܳܐ ܕܠܳܐ ܗ̱ܘܳܐ ܐܳܬ݂ܽܘܪܳܝܳܐ ܥܰܒܕܶܗ ܠܪܽܘܚܳܐ. ܘܰܐܩܺܝܡܘ ܒܳܨܽܘܝ̈ܶܐ. ܒܨ̣ܰܘ ܣܳܚܖ̈ܳܬܶܗ̇: ܘܥܰܒܕܽܘܗ̇ ܠܡܰܦܽܘܠܬܳܐ. ¹⁴ ܐܰܝ̈ܠܠܺܝܢ ܐܰܠ̈ܦܶܐ ܕܬܰܪܫܺܝܫ: ܡܶܛܽܠ ܕܶܐܬ݂ܒܙܶܙ ܥܽܘܫܢܟܶܝܢ. ¹⁵ ܢܶܗܘܶܐ ܕܶܝܢ ܒܝܰܘܡܳܐ ܗܰܘ: ܬܶܬ݁ܛܥܶܐ ܨܽܘܪ ܫܰܒܥܺܝܢ ܫܢܺܝ̈ܢ: ܐܰܝܟ݂ ܝܰܘܡܰܝ̈ ܡܰܠܟܳܐ ܚܰܕ݂. ܘܡ̣ܶܢ ܒܳܬܰܪ ܫܰܒܥܺܝܢ ܫܢܺܝ̈ܢ: ܢܶܙܡܪܽܘܢ ܠܨܽܘܪ ܙܡܺܝܪܬܳܐ ܕܙܳܢܺܝܬ݂ܳܐ. ¹⁶ ܣܰܒܝ ܟܶܢܳܪܳܐ: ܘܶܐܬ݂ܟܪܰܟܝ ܩܪܺܝܬ݂ܳܐ: ܙܳܢܺܝܬ݂ܳܐ ܕܶܐܬ݁ܛܰܥܝܰܬ. ܩܽܘܫܝ ܫܰܦܺܝܪ: ܐܰܣܓܳܝ ܙܡܳܪܳܐ: ܕܬܶܬ݁ܕܰܟ݂ܪܺܝܢ. ¹⁷ ܘܢܶܗܘܶܐ ܡ̣ܶܢ ܒܳܬܰܪ ܫܰܒܥܺܝܢ ܫܢܺܝ̈ܢ: ܢܶܦܩܽܘܕ݂ ܡܳܪܝܳܐ ܠܨܽܘܪ: ܘܢܰܗܦܟ݂ܺܝܗ̇ ܠܰܐܓܺܝܖ̈ܳܬ݂ܳܗ̇. ܘܰܬ݂ܙܰܢܶܐ ܒܟܽܠܗܶܝܢ ܡܰܠ̈ܟܘܳܬ݂ܳܐ ܕܥܰܠ ܐܰܦܰܝ̈ ܐܰܪܥܳܐ. ¹⁸ ܘܬܶܗܘܶܐ ܬܶܐܓܽܘܪܬܳܗ̇ ܘܰܐܓܖ̈ܳܬ݂ܳܗ̇ ܩܽܘܕ݂ܫܳܐ ܠܡܳܪܝܳܐ. ܠܳܐ ܢܶܬ݁ܬ݁ܣܺܝ̈ܡܳܢ ܒܶܝܬ݂ ܓܰܙܳܐ: ܘܠܳܐ ܢܶܬ݂ܢܰܛܖ̈ܳܢ. ܐܶܠܳܐ ܠܰܕ݂ܥܳܡܪܺܝܢ ܩܕ݂ܳܡ ܡܳܪܝܳܐ ܬܶܗܘܶܐ ܬܶܐܓܽܘܪܬܳܗ̇: ܠܡܶܐܟܰܠ: ܘܰܠܡܶܣܒܰܥ: ܘܠܰܡܟܰܣܳܝܽܘ ܥܰܬ݁ܺܝܩܶܝ̈ܗ̇.

ܩܶܦܰܠܶܐܘܳܢ: ܟܕ.

¹ ܗܳܐ ܡܳܪܝܳܐ ܡܚܰܒܶܠ ܐܰܪܥܳܐ: ܘܰܡܬܰܪܰܥ ܠܳܗ̇. ܘܣܳܚܶܦ ܐܰܦܶܝ̈ܗ̇: ܘܰܡܒܰܕܰܪ ܥܳܡܽܘܖ̈ܶܝܗ̇. ² ܘܢܶܗܘܶܐ ܥܰܡܳܐ ܐܰܝܟ݂ ܟܳܗܢܳܐ: ܘܥܰܒܕܳܐ ܐܰܝܟ݂ ܡܳܪܶܗ: ܘܰܐܡܬ݂ܳܐ ܐܰܝܟ݂ ܡܳܪܬܳܗ̇: ܩܰܢܳܝܳܐ ܐܰܝܟ݂ ܡܙܰܒܢܳܢܳܐ: ܘܝܳܙܽܘܦܳܐ ܐܰܝܟ݂ ܡܰܘܙܦܳܢܳܐ: ܐܰܝܟ݂ ܡܳܪܶܐ ܚܳܘܒܬܶܗ ܕܚܰܝܳܒ ܠܶܗ. ³ ܡܶܬ݂ܚܰܒܳܠܽܘ ܬܶܬ݂ܚܰܒܰܠ ܐܰܪܥܳܐ: ܘܡܶܬ݂ܒܙܳܙܽܘ ܬܶܬ݂ܒܙܶܙ. ܡܶܛܽܠ ܕܡܳܪܝܳܐ ܡܰܠܶܠ̣ ܦܶܬ݂ܓ݂ܳܡܳܐ ܗܳܢܳܐ. ⁴ ܐܰܠܰܬ ܘܝܶܬ݂ܒܰܬ ܒܶܐܒܠܳܐ ܐܰܪܥܳܐ. ܐܰܠܰܬ ܘܝܶܬ݂ܒܰܬ: ܘܶܐܬ݂ܰܐܒܠܰܬ ܬܺܒܶܝܠ. ܐܶܠܳܐ ܪܰܘܡܳܗ̇ ܕܰܐܪܥܳܐ. ⁵ ܘܰܐܪܥܳܐ ܐܶܬ݁ܕܰܡܝܰܬ ܠܥܳܡܽܘܖ̈ܶܝܗ̇. ܡܶܛܽܠ ܕܰܥܒܰܪܘ ܢܳܡܽܘܣܳܐ: ܘܚܰܠܶܦܘ ܦܽܘܩܕܳܢܳܐ: ܘܒܰܛܶܠܘ ܩܝܳܡܳܐ ܕܥܳܠܰܡ. ⁶ ܡܶܛܽܠ ܗܳܠܶܝܢ ܬܶܬ݁ܶܒ ܒܶܐܒܠܳܐ ܐܰܪܥܳܐ. ܘܢܶܬ݂ܚܰܝܒܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܡܶܛܽܠ ܗܳܢܳܐ ܢܶܬ݂ܚܰܪܒܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ: ܘܢܶܫܬܰܚܪܽܘܢ ܐ̱ܢܳܫܳܐ ܩܰܠܺܝܠ. ⁷ ܝܺܬܶܒ ܒܶܐܒܠܳܐ ܥܳܒܽܘܪܳܐ. ܘܰܐܠܰܝ̈ ܓܽܘܦ̈ܢܶܐ ܘܶܐܬ݁ܬܰܢܰܚܘ ܟܠ ܚܳܕ݂ܝ݂ܰܝ݂̈ ܠܶܒܳܐ. ⁸ ܒܶܛܠܰܬ ܚܰܕ݂ܽܘܬ݂ܳܐ ܘܰܦ̈ܠܰܓܶܐ. ܘܰܫܠܺܝ ܩܳܠܳܐ ܕܰܕ݂ܝܳܨܳܐ. ܒܶܛܠܰܬ ܚܰܕ݂ܽܘܬ݂ܳܐ ܘܟܶܢܳܖ̈ܶܐ. ⁹ ܒܰܙܡܳܪܳܐ ܠܳܐ ܢܶܫܬ݁ܽܘܢ ܚܰܡܪܳܐ. ܢܶܡܰܪ ܫܰܟ݂ܪܳܐ ܠܫܳܬ݂ܝܰܘ̈ܗܝ. ¹⁰ ܐܶܬ݂ܒܰܙܙܰܬ ܩܪܺܝܬ݂ܳܐ: ܘܶܐܬ݁ܬ݁ܚܶܕ݂ܘ ܟܠ ܒܶܝܬ݂ ܡܰܕܳܢ̈ܶܐ. ¹¹ ܝܺܠܰܠܬܳܐ ܥܰܠ ܚܰܡܪܳܐ ܒܫܽܘܩܳܐ. ܒܶܛܠܰܬ ܟܠܳܗ̇ ܚܰܕ݂ܽܘܬ݂ܳܐ. ܘܰܥܒܰܪ ܕܝܳܨܳܗ̇ ܕܰܐܪܥܳܐ. ¹² ܘܶܐܫܬ݁ܚܰܪ ܒܰܩܪܺܝܬ݂ܳܐ ܚܒܳܠܳܐ ܘܕ݂ܽܘܘܳܢܳܐ ܢܦܰܣܶܩ ܬܰܖ̈ܥܶܝܗ̇. ¹³ ܗܳܟ݂ܰܢܳܐ ܢܶܗܘܶܐ ܒܓܰܘܳܗ̇ ܕܰܐܪܥܳܐ ܒܰܝܢܳܬ݂ ܥܰܡ̈ܡܶܐ: ܐܰܝܟ݂ ܚܒܳܛܳܐ ܕܙܰܝܬܳܐ: ܘܰܐܝܟ݂ ܒܽܘܥܳܪܳܐ ܡܳܐ ܕܰܓܡܰܪ ܩܛܳܦܳܐ. ¹⁴ ܗܶܢܽܘܢ ܢܪܺܝܡܽܘܢ ܩܳܠܗܽܘܢ ܘܰܢܫܰܒܚܽܘܢ ܒܓܰܐܝܽܘܬܶܗ ܕܡܳܪܝܳܐ. ܘܢܶܨܗܠܽܘܢ ܡ̣ܶܢ ܝܰܡܳܐ. ¹⁵ ܡܶܛܽܠ ܗܳܢܳܐ ܒܬܶܫܒܽܘܚܬܳܐ ܫܰܒܰܚܘ ܠܡܳܪܝܳܐ: ܘܰܒܓܰܙܖ̈ܳܬ݂ܳܐ ܕܝܰܡܳܐ ܫܡܶܗ ܕܡܳܪܝܳܐ ܐܰ‌ܠܳܗܳܐ ܕܺܝܣܪܳܐܶܝܠ. ¹⁶ ܡ̣ܶܢ ܟܶܢ̈ܦܶܝܗ̇ ܕܰܐܪܥܳܐ ܙܡܺܝܖ̈ܳܬ݂ܳܐ ܫ̣ܡܰܥܢ: ܚܰܝܠܳܐ ܕܙܰܕܺܝܩܳܐ ܕܳܐܡܰܪ: ܐ̱ܪܳܙ ܠܺܝ: ܐ̱ܪܳܙ ܠܺܝ: ܐܽܘܝ ܠܺܝ: ܥܳܘܳܠܳܐ ܐܰܥܠܺܝܘ: ܥܳܘܳܠܳܐ ܥܰܘܠܳܐ ܐܰܥܠܺܝܘ. ¹⁷ ܕܶܚܠܬܳܐ ܘܓܽܘܡܳܨܳܐ: ܘܦܰܚܳܐ ܥܠܰܝܟ: ܥܰܡܽܘܪܳܐ ܕܰܐܪܥܳܐ. ¹⁸ ܘܡܰܢ ܕܢܶܥܪܽܘܩ ܡ̣ܶܢ ܩܳܠܳܐ ܕܕܶܚܠܬ݂ܳܐ: ܢܶܦܶܠ ܒܓܽܘܡܳܨܳܐ. ܘܡܰܢ ܕܢܶܣܰܩ ܡ̣ܶܢ ܓܰܘ ܓܽܘܡܳܨܳܐ: ܢܶܬ݁ܬ݁ܚܶܕ݂ ܒܦܰܚܳܐ. ܡܶܛܽܠ ܕܡܰܣܘ̈ܟܶܐ ܡ̣ܶܢ ܡܪܰܘܡܳܐ ܐܶܬ݂ܦܬܰܚܘ: ܘܙܳܥ ܫܶܬܶܐܣܶܝ̈ܗ̇ ܕܰܐܪܥܳܐ. ¹⁹ ܡܙܳܥ ܬܙܽܘܥ ܐܰܪܥܳܐ: ܘܰܡܕ݂ܳܠ ܬܕ݂ܽܘܠ ܐܰܪܥܳܐ: ܘܰܡܡܳܛ ܬܡܽܘܛ ܐܰܪܥܳܐ. ₂₀ ܘܰܡܙܳܥ ܬܙܽܘܥ ܐܰܪܥܳܐ ܐܰܝܟ݂ ܪܰܘܝܳܐ ܘܰܬ݂ܢܽܘܕ݂ ܐܰܝܟ݂ ܥܰܪܙܳܠܳܐ. ܘܢܶܥܫܰܢ ܥܠܶܝܗ̇ ܥܳܘܠܳܗ̇: ܘܬܶܦܶܠ ܘܠܳܐ ܬܰܘܣܶܦ ܠܰܡܩܳܡ. ²¹ ܒܶܗ ܒܝܰܘܡܳܐ ܗܰܘ: ܢܶܦܩܽܘܕ݂ ܡܳܪܝܳܐ ܥܰܠ ܚܰܝ̈ܠܶܐ ܕܪܰܘܡܳܐ ܒܪܰܘܡܳܐ: ܘܥܰܠ ܡܰܠ̈ܟܶܐ ܕܰܐܪܥܳܐ ܒܰܐܪܥܳܐ. ²² ܘܢܶܟ݂ܢܫܽܘܢ ܟܢܽܘܫܝܳܐ ܥܰܠ ܐܰܣܺܝܪ ܓܽܘܒܳܐ. ܘܢܶܬ݂ܚܰܫܒܽܘܢ ܥܰܠ ܚܒܺܝܫܳܐ. ܘܰܠܣܽܘܓ݂ܳܐܐ ܕܝܰܘ̈ܡܳܬܳܐ ܢܶܬ݂ܦܰܪܩܽܘܢ. ²³ ܘܢܶܚܦܽܘܪ ܣܰܗܪܳܐ: ܘܢܶܒܗܰܬ݂ ܫܶܡܫܳܐ. ܡܶܛܽܠ ܕܰܐܡܠܶܟ݂ ܡܳܪܝܳܐ ܚܰܝܠܬ݂ܳܢܳܐ: ܒܛܽܘܪܳܐ ܕܨܶܗܝܽܘܢ: ܘܒܽܐܘܪܺܫܠܶܡ ܘܰܩܕ݂ܳܡ ܩܰܕܺܝܫܰܘ̈ܗܝ ܢܶܫܬܰܒܰܚ.

ܩܶܦܰܠܶܐܘܳܢ: ܟܗ.

¹ ܡܳܪܝܳܐ ܐܰܠܳܗܝ ܐܰܢ̱ܬ݁: ܐܶܪܰܡܪܡܳܟ݂: ܘܰܐܘܕܶܐ ܠܰܫܡܳܟ݂. ܕܰܥܒܰܕܬ݁ ܕܽܘܡܳܪܳܐ ܘܬܰܪܥܺܝܬ݂ܳܐ ܡܗܰܝܡܰܢܬܳܐ. ܡ̣ܶܢ ܪܽܘܚܩܳܐ ܐܰܡܶܝܢ. ² ܡܶܛܽܠ ܕܰܥܒܰܕܬ݁ ܩܪܺܝܬ݂ܳܐ ܠܝܰܓܪܳܐ: ܘܰܩܪܺܝܬ݂ܳܐ ܥܰܫܺܝܢܬܳܐ ܠܡܰܦܽܘܠܬܳܐ ܢܳܘܣܳܐ ܕܢܽܘܟ݂ܖ̈ܳܝܶܐ ܠܥܳܠܰܡ ܡ̣ܶܢ ܩܪܺܝܬ݂ܳܐ ܠܳܐ ܢܶܬ݂ܒܢܶܐ. ³ ܡܶܛܽܠ ܗܳܢܳܐ ܢܫܰܒܚܽܘܢܳܟ݂ ܥܰܡ̈ܡܶܐ ܣܰܓܺܝ̈ܐܶܐ. ܘܰܩܪܺܝܬ݂ܳܐ ܕܥܰܡ̈ܡܶܐ ܥܰܫܺܝ̈ܢܶܐ ܢܶܕ݂ܚܠܽܘܢ ܠܳܟ݂. ⁴ ܡܶܛܽܠ ܕܰܗܘܰܝܬ݁ ܡܣܰܝܥܳܢܳܐ ܠܡܶܣܟܺܢܳܐ: ܘܥܳܕ݂ܽܘܪܳܐ ܠܒܳܝܫܳܐ ܒܽܐܘܠܨܳܢܶܗ: ܣܶܬܳܪܳܐ ܡ̣ܶܢ ܙܳܪܺܝܦܬܳܐ: ܘܛܶܠܳܠܳܐ ܡ̣ܶܢ ܫܰܘܒܳܐ. ⁵ ܡܶܛܽܠ ܕܪܽܘܚܳܐ ܕܥܰܫܺܝܢܳܐ ܐܰܝܟ݂ ܙܳܪܺܝܦܬܳܐ ܒܶܐܣܬ݂ܳܐ: ܘܰܐܝܟ݂ ܛܶܠܳܠܳܐ ܒܫܰܘܒܳܐ. ܪܳܡܽܘܬ݂ܳܐ ܕܢܽܘܟ݂ܖ̈ܳܝܶܐ ܬܶܬ݂ܡܰܟܰܟ݂: ܘܫܰܘܒܳܐ ܒܛܶܠܳܠܳܐ ܕܰܥܢܳܢ̈ܶܐ. ܫܰܒܽܘܩܳܐ ܕܥܰܫܺܝܢ̈ܶܐ ܢܶܬ݂ܡܰܟܰܟ݂. ⁶ ܘܢܶܥܒܶܕ݂ ܡܳܪܝܳܐ ܚܰܝܠܬ݂ܳܢܳܐ ܒܟܽܠܗܽܘܢ ܥܰܡ̈ܡܶܐ ܒܛܽܘܪܳܐ ܗܳܢܳܐ: ܡܰܫܬ݁ܝܳܐ ܫܰܡܺܝܢܳܐ: ܘܡܰܫܬ݁ܝܳܐ ܢܛܺܝܪܳܐ ܘܫܰܡܺܝܢܳܐ: ܕܡܰܚܝܳܢܰܢ ܫܡܰܝܳܐ ܘܥܰܫܺܝܢܳܐ. ⁷ ܘܢܶܬ݂ܒܠܰܥ ܒܛܽܘܪܳܐ ܗܳܢܳܐ: ܐܰܦܰܝ̈ ܫܰܠܺܝܛܳܐ ܕܫܰܠܺܝܛ ܗ̱ܘܳܐ ܥܰܠ ܟܽܠܗܽܘܢ ܥܰܡ̈ܡܶܐ. ܘܢܶܟ݂ܣܬ݂ܳܐ ܕܶܐܬ݂ܢܰܟ݂ܣܰܬ ܥܰܠ ܐܰܦܰܝ̈ ܟܽܠܗܽܘܢ ܥܰܡ̈ܡܶܐ. ⁸ ܘܢܶܬ݂ܒܰܠܥ ܡܰܘܬܳܐ ܠܙܳܟܽܘ ܠܥܳܠܡܺܝܢ. ܘܢܰܥܒܰܪ ܡܳܪܝܳܐ ܐܰ‌ܠܳܗܳܐ ܚܰܝܠܬ݂ܳܢܳܐ ܕܶܡܥܬ݂ܳܐ ܡ̣ܶܢ ܟܽܠ ܐܰܦܺܝ̈ܢ. ܘܚܶܣܕܳܐ ܕܥܰܡܶܗ ܢܰܥܒܰܪ ܡ̣ܶܢ ܟܽܠܳܗ̇ ܐܰܪܥܳܐ: ܡܶܛܽܠ ܕܡܳܪܝܳܐ ܡܰܠܶܠ. ⁹ ܘܬܺܐܡܰܪ ܒܝܰܘܡܳܐ ܗܰܘ: ܗܳܢܰܘ ܡܳܪܝܳܐ ܐܰܠܳܗܰܢ: ܕܣܰܟܺܝܢ ܠܶܗ ܘܢܶܦܪܩܰܢ ܗܳܢܰܘ ܡܳܪܝܳܐ ܐܰܠܳܗܰܢ ܕܣܰܟܺܝܢ ܠܶܗ: ܢܕ݂ܽܘܨ ܢܶܚܕܶܐ ܒܦܽܘܪܩܳܢܶܗ. ¹⁰ ܡܶܛܽܠ ܕܬܶܬ݁ܢܺܝܚ ܐܺܝܕܶܗ ܕܡܳܪܝܳܐ ܒܛܽܘܪܳܐ ܗܳܢܳܐ: ܘܢܶܬ݁ܬ݁ܕܺܝܫ ܡܽܘܐܳܒ ܬܚܽܘܬ݂ܰܘܗܝ: ܐܰܝܟ݂ ܕܡܶܬ݁ܬ݁ܕܺܝܫ ܬܶܒܢܳܐ ܒܓܰܪܓܳܪܳܐ. ¹¹ ܘܰܢܦܰܪܶܣ ܐܺܝܕ݂ܰܘ̈ܗܝ ܒܓܰܘܶܗ: ܐܰܝܟ݂ ܕܰܡܦܰܪܶܣ ܣܰܚܳܝܳܐ ܠܡܶܣܚܳܐ ܘܢܶܡܰܟ ܥܽܘܫܢܶܗ ܥܰܡ ܫܽܘܘܳܛܳܐ ܕܺܐܝܕ݂ܰܘ̈ܗܝ. ¹² ܘܒܶܝܬ݂ ܡܶܪܕܳܐ ܕܥܽܘܫܢܳܐ ܕܫܽܘܖ̈ܰܝܟܝ ܢܡܰܟܶܟ݂: ܘܰܢܫܰܦܶܠ: ܘܰܢܡܰܛܶܐ ܠܰܐܪܥܳܐ ܥܕܰܡܳܐ ܠܥܰܦܪܳܐ.

ܩܶܦܰܠܶܐܘܳܢ: ܟܘ.

¹ ܒܶܗ ܒܝܰܘܡܳܐ ܗܰܘ: ܬܶܙܕܰܡܰܪ ܙܡܺܝܪܬܳܐ ܗܳܕܶܐ ܒܰܐܪܥܳܐ ܕܰܝܗܽܘܕ݂: ܩܪܺܝܬ݂ܳܐ ܕܰܥܫܶܢ ܦܽܘܪܩܳܢܳܗ̇: ܣܳܡܘ ܫܽܘܪܳܐ ܘܒܰܪ ܫܽܘܪܳܐ. ² ܦܬܰܚܘ ܬܰܖ̈ܥܶܐ: ܢܶܥܽܘܠ ܥܰܡܳܐ ܙܰܕܺܝܩܳܐ: ܕܢܳܛܰܪ ܗܰܝܡܳܢܽܘܬ݂ܳܐ: ܕܢܳܛܰܪ ܒܰܫܪܳܪܳܐ. ³ ܬܶܛܰܪ ܠܰܢ ܫܠܳܡܳܐ: ܡܶܛܽܠ ܕܒܳܟ݂ ܣܰܒܰܪܢ ܡܳܪܝܳܐ: ܠܥܳܠܰܡ ܥܰܠܡܺܝܢ. ⁴ ܡܶܛܽܠ ܕܡܳܪܝܳܐ ܐܰ‌ܠܳܗܳܐ ܬܰܩܺܝܦܳܐ ܠܥܳܠܡܺܝܢ. ⁵ ܡܶܛܽܠ ܕܢܰܡܶܟ ܠܰܕ݂ܥܳܡܪܺܝܢ ܒܪܰܘܡܳܐ. ܘܰܩܪܺܝܬ݂ܳܐ ܥܰܫܺܝܢܬܳܐ ܢܡܰܟܟ݂ܺܝܗ̇ ܥܕܰܡܳܐ ܠܰܐܪܥܳܐ. ܘܰܢܡܰܛܶܝܗ ܥܕܰܡܳܐ ܠܥܰܦܪܳܐ. ⁶ ܬܕ݂ܽܘܫܶܝܗ̇ ܪܶܓܠܳܐ ܕܒܺܝ̈ܫܶܐ: ܘܗܶܠܰܟ݂ܬ݂ܳܐ ܕܡܶܣܟܺܢ̈ܶܐ. ⁷ ܫܒܺܝܠܳܐ ܬܪܺܝܨ ܠܡܶܣܟܺܢ̈ܶܐ. ܘܰܬ݂ܪܺܝܨܳܐ ܘܫܰܦܝܳܐ ܐܽܘܪܚܳܐ ܕܙܰܕܺܝ̈ܩܶܐ. ⁸ ܘܳܐܦ ܠܽܐܘܪܚܳܐ ܕܕ݂ܺܝܢܰܝ̈ܟ ܡܳܪܝܳܐ ܣܰܟܺܝܢ ܠܰܫܡܳܟ݂ ܘܰܠܕ݂ܽܘܟ݂ܪܳܢܳܟ݂ ܪܶܓܰܬ ܢܰܦܫܳܟ݂. ⁹ ܢܰܦܫܝ ܐܶܬ݂ܰܐܘܒܰܬ ܠܳܟ݂ ܒܠܺܠܝܳܐ: ܐܳܦ ܪܽܘܚܝ ܒܓܰܘܝ ܡܩܰܕܡܳܐ ܠܘܳܬ݂ܳܟ݂. ܡܶܛܽܠ ܕܰܐܝܟ݂ ܕܺܝܢܰܝ̈ܟ ܥܰܠ ܐܰܪܥܳܐ ܙܰܕܺܝܩܽܘܬܳܐ ܝܺܠܶܦܘ ܥܳܡܽܘܖ̈ܶܝܗ̇ ܕܬܺܒܶܝܠ. ¹⁰ ܐܶܬ݂ܪܰܚܰܩ ܥܳܘܳܠܳܐ ܕܠܳܐ ܢܺܐܠܰܦ ܙܰܕܺܝܩܽܘܬܳܐ. ܡܰܟܣܺܢܽܘܬ݂ܳܐ ܒܰܐܪܥܳܐ ܡܟܰܘܢܳܐ. ܘܠܳܐ ܢܶܚܙܽܘܢ ܒܓܰܐܝܽܘܬܶܗ ܕܡܳܪܝܳܐ. ¹¹ ܡܳܪܝܳܐ ܒܪܳܡܽܘܬ݂ܳܐ ܕܺܐܝܕܰܝ̈ܟ ܠܳܐ ܢܶܚܙܽܘܢ. ܢܶܚܙܽܘܢ ܘܢܶܒܗܬ݂ܽܘܢ ܛܢܳܢܶܗ ܕܥܰܡܳܐ. ܘܰܐܝܟ݂ ܬܰܢܽܘܪܳܐ ܬܶܐܟ݂ܽܘܠ ܐܶܢܽܘܢ ܠܰܒܥܶܠܕܒܳܒܰܝ̈ܟ. ¹² ܡܳܪܝܳܐ ܬܶܛܰܪ ܠܰܢ ܫܠܳܡܳܐ: ܡܶܛܽܠ ܕܰܐܝܟ݂ ܟܽܠܗܽܘܢ ܥܒܳܕܰܝ̈ܢ ܥܰܬ݁ܕܶܬ݀݁ ܠܰܢ. ¹³ ܡܳܪܝܳܐ ܐܰܠܳܗܰܢ: ܗܘܰܘ ܥܠܰܝܢ ܡܳܪܝܳܐ ܠܒܰܪ ܡܶܢܳܟ݂. ܒܰܠܚܽܘܕ݂ ܫܡܳܟ݂ ܕܺܝܠܳܟ݂ ܢܶܬ݂ܕܟܰܪ. ¹⁴ ܡܺܝ̈ܬܶܐ ܠܳܐ ܡܰܚܶܝܢ: ܘܓܰܢ̱ܒܳܖ̈ܶܐ ܠܳܐ ܡܩܺܝܡܺܝܢ ܡܶܛܽܠ ܗܳܢܳܐ ܦܩܰܕܬ݁ ܘܕܰܢܶܒܬ݁ ܐܶܢܽܘܢ. ܘܰܐܘܒܶܕܬ݁ ܟܽܠܶܗ ܕܽܘܟ݂ܪܳܢܗܽܘܢ. ¹⁵ ܐܰܘܣܶܦܬ݁ ܡܳܪܝܳܐ ܥܰܠ ܥܰܡܳܐ: ܐܰܘܣܶܦܬ݁ ܥܰܠ ܥܰܡܳܐ. ܐܶܬܪܰܚܰܩܬ݁ ܘܰܕ݂ܚܰܩܬ݁ ܟܽܠܗܽܘܢ ܣܰܘ̈ܦܶܝܗ̇ ܕܰܐܪܥܳܐ. ¹⁶ ܡܳܪܝܳܐ ܒܽܐܘܠܨܳܢܳܐ ܦܰܩܕܽܘܟ݂: ܘܒܰܚܒܽܘܫܝܳܐ ܠܰܚܶܫܘ ܡܰܪܕܽܘܬ݂ܳܟ݂. ¹⁷ ܐܰܝܟ݂ ܒܰܛܢܬ݂ܳܐ ܕܩܰܪܺܝܒܳܐ ܠܡܶܐܠܰܕ݂: ܘܰܡܚܰܒܠܳܐ ܘܡܰܝܠܠܳܐ ܒܚܶܒܠܶܝ̈ܗ̇: ܗܳܟ݂ܰܢܳܐ ܗܘܰܝܢ ܡ̣ܶܢ ܩܕ݂ܳܡܰܝܟ ܡܳܪܝܳܐ. ¹⁸ ܒܛܶܢܢ ܘܚܰܒܠܢ ܐܰܝܟ݂ ܗܳܢܶܝܢ ܕܝܳܠ̈ܕܳܢ ܖ̈ܽܘܚܶܐ. ܦܪܽܘܩܰܝܢ ܕܠܳܐ ܢܺܐܒܰܕ݂ ܒܰܐܪܥܳܐ: ܘܠܳܐ ܢܶܦܠܽܘܢ ܥܳܡܽܘܖ̈ܶܝܗ̇ ܕܬܺܒܶܝܠ. ¹⁹ ܢܺܚܽܘܢ ܡܺܝܬܰܝ̈ܟ: ܘܰܫܠܰܕܰܝ̈ܗܽܘܢ ܢܩܽܘ̈ܡܳܢ. ܘܢܶܬ݁ܬ݁ܥܺܝܪܽܘܢ ܘܰܢܫܰܒܚܽܘܢ ܫܳܟ݂ܒܰܝ̈ ܥܰܦܪܳܐ. ܡܶܛܽܠ ܕܛܰܠܳܟ݂ ܛܰܠܳܐ ܗ̱ܘ̣ ܕܢܽܘܗܪܳܐ: ܘܰܐܪܥܳܐ ܕܓܰܢ̱ܒܳܖ̈ܶܐ ܬܣܰܚܶܦ. ²⁰ ܙܶܠ ܥܰܡܝ: ܥܽܘܠ ܠܬ݂ܰܘܳܢܰܝ̈ܟ. ܘܰܐܚܽܘܕ݂ ܬܰܖ̈ܥܰܝܟ ܒܰܐܦܰܝ̈ܟ ܘܶܐܬ݁ܛܰܫܳܐ ܩܰܠܺܝܠ ܙܥܽܘܪ: ܥܰܕ݂ ܥܳܒܰܪ ܪܽܘܓܙܝ. ²¹ ܡܶܛܽܠ ܕܗܳܐ ܡܳܪܝܳܐ ܢܳܦܶܩ ܡ̣ܶܢ ܐܰܬ݂ܪܶܗ: ܘܦܳܩܶܕ݂ ܥܰܘܠܶܗ ܕܥܳܡܽܘܪܳܐ ܕܰܐܪܥܳܐ ܥܠܰܘܗ̱ܝ. ܘܬܶܓܠܶܐ ܐܰܪܥܳܐ ܕܡܳܗ̇: ܘܠܳܐ ܬܟܰܣܶܐ ܬܽܘܒ ܥܰܠ ܩܛܺܝ̈ܠܶܝܗ̇.

ܩܶܦܰܠܶܐܘܳܢ: ܟܙ.

¹ ܒܝܰܘܡܳܐ ܗܰܘ: ܢܶܦܩܽܘܕ݂ ܡܳܪܝܳܐ ܒܚܰܪܒܶܗ ܩܫܺܝܬ݂ܳܐ ܘܪܰܒܬ݂ܳܐ ܘܥܰܫܺܝܢܬܳܐ: ܥܰܠ ܠܶܘܝܳܬ݂ܰܢ ܚܶܘܝܳܐ ܚܰܪܡܳܢܳܐ: ܘܥܰܠ ܠܶܘܝܳܬ݂ܰܢ ܚܶܘܝܳܐ ܥܩܰܠܩܠܳܐ. ܘܢܶܩܛܽܘܠ ܠܬܰܢܺܝܢܳܐ ܕܰܒܝܰܡܳܐ. ² ܒܝܰܘܡܳܐ ܗܰܘ: ܟܰܪܡܳܐ ܕܚܰܡܪܳܐ ܥܢܰܘ ܠܶܗ. ³ ܐܶܢܳܐ ܡܳܪܝܳܐ ܢܳܛܰܪ ܐ̱ܢܳܐ ܠܶܗ: ܐܰܡܺܝܢܳܐܺܝܬ݂ ܐܰܫܩܶܝܘܗܝ: ܘܶܐܦܩܽܘܕ݂ ܥܠܰܘܗ̱ܝ ܒܠܺܠܝܳܐ ܘܒܺܐܝܡܳܡܳܐ ܐܶܛܪܺܝܘܗܝ. ⁴ ܫܽܘܪܳܐ ܠܰܝܬ݁ ܠܶܟ݂ܝ: ܡܰܢ ܕܶܝܢ ܝܰܗ̱ܒ ܒܶܟ݂ܝ ܝܰܥܪܳܐ ܘܟ݂ܽܘܒܳܐ. ܒܩܽܘܪܒܳܐ ܐܶܦܽܘܚ ܒܶܗ: ܘܰܐܘܩܕ݂ܺܝܘܗܝ ܐܰܟ݂ܚܕ݂ܳܐ. ⁵ ܐܰܘ ܢܶܐܚܽܘܕ݂ ܒܥܽܘܫܢܝ: ܘܶܐܥܒܶܕ݂ ܠܶܗ ܫܠܳܡܳܐ. ܫܠܳܡܳܐ ܐܶܥܒܶܕ݂ ܠܶܗ. ⁶ ܐܰܝܠܶܝܢ ܕܡ̣ܶܢ ܥܶܩܳܪܶܗ ܕܝܰܥܩܽܘܒ. ܢܶܓܦܶܐ ܘܢܰܦܪܰܥ ܝܺܣܪܳܐܶܝܠ ܘܢܶܡܠܽܘܢ ܐܰܦܰܝ̈ ܬܺܒܶܝܠ ܦܺܐܖ̈ܶܐ. ⁷ ܐܰܝܟ݂ ܡܚܽܘܬ݂ܳܐ ܕܰܡܚܳܝܗܝ: ܡܚܳܝܗܝ. ܘܰܐܝܟ݂ ܩܶܛܠܳܐ ܕܩܰܛܠܶܗ: ܩܰܛܠܶܗ. ⁸ ܒܣܰܐܬ݂ܳܐ ܕܰܐܟܺܝܠ: ܬܕܽܘܢܺܝܘܗܝ: ܒܕܰܪܢܳܐ ܒܪܽܘܚܶܗ ܫܩܺܝܬ݂ܳܐ ܒܝܰܘܡܳܐ ܚܰܡܺܝܡܳܐ. ⁹ ܡܶܛܽܠ ܗܳܢܳܐ: ܒܗܳܕܶܐ ܢܶܫܬ݁ܒܶܩ ܥܰܘܠܶܗ ܕܝܰܥܩܽܘܒ ܘܰܒܗܳܠܶܝܢ ܟܽܠܗܽܘܢ ܦܺܐܖ̈ܶܐ ܬܶܥܒܰܪ ܚܛܺܝܬܶܗ: ܡܳܐ ܕܣܳܐܶܡ ܟܽܠܗܶܝܢ ܟܺܐܦ̈ܶܐ ܕܡܰܕܒܚܳܐ: ܐܰܝܟ݂ ܟܺܐܦ̈ܶܐ ܕܟܶܠܫܳܐ ܕܡܶܬ݂ܦܰܟ̈ܟܳܢ: ܗܳܟ݂ܰܢܳܐ ܠܳܐ ܢܶܬ݂ܩܰܝܡܽܘܢ ܦܬܰܟ݂ܖ̈ܶܐ ܘܕܶܚ̈ܠܳܬ݂ܳܐ. ¹⁰ ܡܶܛܽܠ ܕܰܩܪܺܝܬ݂ܳܐ ܥܰܫܺܝܢܬܳܐ: ܒܰܠܚܽܘܕܶܝܗ̇ ܚܳܪܒܳܐ ܘܡܶܫܬܰܒܩܳܐ: ܘܚܳܪܒܳܐ ܐܰܝܟ݂ ܡܕ݂ܰܒܪܳܐ. ܬܰܡܳܢ ܢܶܪܥܶܐ ܥܶܓܠܳܐ: ܘܬܰܡܳܢ ܢܶܪܥܶܐ ܘܰܢܓܰܡܰܪ ܬܶܕ݂ܐܶܝ̈ܗ̇. ¹¹ ܒܝܰܒܫܳܐ ܕܰܚܨܳܕ݂ܳܐ: ܢܶܬ݁ܬܰܒܖ̈ܳܢ ܢܶܫ̈ܶܐ ܕܳܐܬ݂ܝܳܢ ܡܰܢܗܖ̈ܳܢ ܠܳܗ̇: ܡܶܛܽܠ ܕܠܳܐ ܗ̱ܘܳܐ ܥܰܡܳܐ ܣܰܟܽܘܠܬ݂ܢܳܐ. ܡܶܛܽܠ ܗܳܢܳܐ ܠܳܐ ܢܪܰܚܶܡ ܥܠܰܘܗ̱ܝ ܥܳܒܽܘܕܶܗ ܘܓܳܒܽܘܠܶܗ ܠܳܐ ܢܪܰܚܶܦ ܥܠܰܘܗ̱ܝ. ¹² ܘܢܶܗܘܶܐ ܒܝܰܘܡܳܐ ܗܰܘ: ܢܶܚܒܽܘܛ ܡܳܪܝܳܐ ܡ̣ܶܢ ܫܶܒܠܬ݂ܳܐ ܕܢܰܗܪܳܐ: ܥܕܰܡܳܐ ܠܢܰܚܠܳܐ ܕܡܶܨܪܶܝܢ. ܘܰܐܢ̱ܬ݁ܽܘܢ ܬܶܬ݂ܠܰܩܛܽܘܢ ܚܰܕ݂ ܠܘܳܬ݂ ܚܰܕ݂: ܒܢܰܝ̈ ܝܺܣܪܳܐܶܝܠ. ¹³ ܘܢܶܗܘܶܐ ܒܝܰܘܡܳܐ ܗܰܘ: ܢܶܬ݂ܩܪܶܐ ܫܺܝܦܽܘܪܳܐ ܪܰܒܳܐ: ܘܢܺܐܬ݂ܽܘܢ ܕܶܐܒܰܕ݂ܘ ܒܰܐܪܥܳܐ ܕܡܶܨܪܶܝܢ: ܘܕܶܐܬ݂ܒܰܕܰܪܘ ܒܰܐܪܥܳܐ ܕܳܐܬ݂ܽܘܪ. ܘܢܶܣܓܕ݂ܽܘܢ ܒܰܐܪܥܶܗ ܕܡܳܪܝܳܐ ܠܡܳܪܝܳܐ: ܒܛܽܘܪܶܗ ܩܰܕܺܝܫܳܐ ܒܽܐܘܪܺܫܠܶܡ.

ܩܶܦܰܠܶܐܘܳܢ: ܟܚ.

¹ ܘܳܝ ܠܰܟ݂ܠܺܝܠܳܐ ܓܰܐܝܳܐ ܕܪܳܘܝܳܐ ܐܰܦܪܶܝܡ: ܘܠܰܓܕ݂ܳܠܳܐ ܡܨܰܥܪܳܐ ܚܰܝܠܳܐ ܕܫܽܘܒܚܶܗ ܕܰܒܪܺܝܫ ܢܰܚܠܳܐ ܕܫܰܡܺܝ̈ܢܶܐ: ܕܬ݂ܰܘܺܝܪܺܝܢ ܒܚܰܡܪܳܐ. ² ܗܳܐ ܚܰܝܠܳܐ ܘܥܽܘܫܢܳܐ ܕܡܳܪܝܳܐ: ܐܰܝܟ݂ ܙܳܪܺܝܦܬܳܐ ܕܒܰܪܕ݂ܳܐ: ܘܰܐܝܟ݂ ܥܰܠܥܳܠܳܐ ܕܰܬ݂ܒܳܪܳܐ: ܘܰܐܝܟ݂ ܙܳܪܺܝܦܬܳܐ ܕܡܰܝ̈ܳܐ ܣܰܓܺܝ̈ܐܶܐ ܕܓܳܪܦܺܝܢ. ³ ܐܰܢܺܝܚ ܠܰܐܪܥܳܐ ܒܺܐܝܕ݂ܳܟ݂. ܘܰܒܪܶܓܠܳܐ ܢܶܬ݁ܬ݁ܕܺܝܫ ܟܠܺܝܠܳܐ ܓܰܐܝܳܐ ܕܪܳܘܝܳܐ ܐܰܦܪܶܝܡ. 4 ܢܶܗܘܶܐ ܓܕ݂ܳܠܳܐ ܡܨܰܥܪܳܐ: ܚܰܝܠܳܐ ܕܫܽܘܒܚܶܗ ܕܰܒܪܺܝܫ ܢܰܚܠܳܐ ܕܫܰܡܺܝ̈ܢܶܐ: ܐܰܝܟ݂ ܒܰܟܰܪܬܳܐ ܕܰܩܕ݂ܳܡ ܩܰܝܛܳܐ: ܕܡܳܐ ܕܰܚܙܳܘ ܡܰܢ ܕܚܳܙܶܐ ܠܳܗ̇: ܥܰܕ݂ ܗܺܝ ܒܺܐܝܕܶܗ: ܒܳܠܰܥ ܠܳܗ̇. ⁵ ܒܝܰܘܡܳܐ ܗܰܘ: ܢܶܗܘܶܐ ܡܳܪܝܳܐ ܚܰܝܠܬ݂ܳܢܳܐ ܠܰܟ݂ܠܺܝܠܳܐ ܕܚܰܝܠܳܐ: ܘܠܰܓܕ݂ܳܠܳܐ ܡܫܰܒܚܳܐ ܠܫܰܪܟܳܐ ܕܥܰܡܶܗ. ⁶ ܠܪܽܘܚܳܐ ܕܕܺܝܢܳܐ: ܠܡܰܢ ܕܝܳܬܶܒ ܥܰܠ ܕܺܝܢܳܐ ܘܓܰܢ̱ܒܳܪܽܘܬ݂ܳܐ: ܕܡܰܗܦܟܺܝܢ ܩܪܳܒܳܐ ܡ̣ܶܢ ܬܰܪܥܳܐ. ⁷ ܐܳܦ ܗܳܠܶܝܢ ܒܚܰܡܪܳܐ ܛܥܰܘ: ܘܰܒܫܰܟ݂ܪܳܐ ܛܥܰܘ. ܟܳܗ̈ܢܶܐ ܘܰܢܒܺܝ̈ܶܐ ܛܥܰܘ ܒܫܰܟ݂ܪܳܐ. ܐܶܬ݂ܒܠܰܥܘ ܡ̣ܶܢ ܚܰܡܪܳܐ. ܙܳܥܘ ܡ̣ܶܢ ܫܰܟ݂ܪܳܐ. ܛܥܰܘ ܒܪܰܘܳܝܽܘܬ݂ܳܐ ܐܶܟܰܠܘ ܐܳܣܽܘܛܳܐܺܝܬ݂. 8 ܡܶܛܽܠ ܕܟܽܠܗܽܘܢ ܦܳܬ݂ܽܘܖ̈ܶܐ ܐܶܬ݂ܡܠܺܝܘ ܬܝܽܘܒܳܐ ܘܬܶܒܬܳܐ ܡ̣ܶܢ ܒܠܰܝ ܐܰܬ݂ܪܳܐ. ⁹ ܠܡܰܢ ܢܰܠܶܦ ܝܺܕܰܥܬ݂ܳܐ ܘܰܠܡܰܢ ܢܣܰܟܶܠ ܫܶܡܥܳܐ: ܠܕܰܚܣܺܝܠܺܝܢ ܡ̣ܶܢ ܚܰܠܒܳܐ: ܘܰܢܓܺܝܕ݂ܺܝܢ ܡ̣ܶܢ ܬܕܰܝ̈ܳܐ. ¹⁰ ܡܶܛܽܠ ܬܶܒܬܳܐ ܥܰܠ ܬܶܒܬܳܐ: ܘܬܶܒܬܳܐ ܥܰܠ ܬܶܒܬܳܐ. ܘܰܬ݂ܝܽܘܒܳܐ ܥܰܠ ܬܝܽܘܒܳܐ: ܘܰܬ݂ܝܽܘܒܳܐ ܥܰܠ ܬܝܽܘܒܳܐ. ܩܰܠܺܝܠ ܠܬܰܡܳܢ: ܘܩܰܠܺܝܠ ܠܬܰܡܳܢ. ¹¹ ܡܶܛܽܠ ܕܰܒܡܰܡܠܠܳܐ ܥܰܛܠܳܐ ܘܰܒܠܶܫܳܢܳܐ ܐ̱ܚܪܺܢܳܐ ܐܶܡܰܠܶܠ ܥܰܡܶܗ ܥܰܡ ܥܰܡܳܐ ܗܳܢܳܐ. ¹² ܕܶܐܡܪܶܬ݂ ܠܗܽܘܢ: ܗܳܕܳܐ ܗ̱ܝ ܢܝܳܚܬ݁ܝ: ܐܰܢܺܝܚܘ ܠܰܡܛܰܖ̈ܦܳܐ ܘܗܳܢܰܘ ܫܶܠܝܳܐ ܘܠܳܐ ܨܒܰܘ ܠܡܶܫܡܰܥ. ¹³ ܘܰܗܘܳܬ݂ ܠܗܽܘܢ ܡܶܠܬ݂ܶܗ ܕܡܳܪܝܳܐ: ܬܶܒܬܳܐ ܥܰܠ ܬܶܒܬܳܐ: ܘܬܶܒܬܳܐ ܥܰܠ ܬܶܒܬܳܐ: ܘܰܬ݂ܝܽܘܒܐ ܥܰܠ ܬܝܽܘܒܳܐ: ܘܰܬ݂ܝܽܘܒܳܐ ܥܰܠ ܬܝܽܘܒܳܐ: ܩܰܠܺܝܠ ܠܬܰܡܳܢ: ܘܩܰܠܺܝܠ ܠܬܰܡܳܢ ܕܢܶܗܦܟܽܘܢ ܘܢܶܣܬܰܚܦܽܘܢ ܠܒܶܣܬܰܪܗܽܘܢ: ܘܢܶܬ݁ܬܰܒܪܽܘܢ ܘܢܶܬ݁ܬ݁ܨܺܝܕ݂ܽܘܢ ܘܢܶܬ݁ܬܰܚܕܽܘܢ. ¹⁴ ܡܶܛܽܠ ܗܳܢܳܐ ܫܡܰܥܘ ܦܶܬܓܳܡܶܗ ܕܡܳܪܝܳܐ ܓܰܒܖ̈ܶܐ ܡܡܰܝܩܳܢ̈ܶܐ: ܫܰܠܺܝܛܰܘ̈ܗܝ ܕܥܰܡܳܐ ܗܳܢܳܐ ܕܒܽܐܘܪܺܫܠܶܡ. ¹⁵ ܡܶܛܽܠ ܕܶܐܡܰܪܬ݁ܽܘܢ ܕܰܐܩܺܝܡܢ ܩܝܳܡܳܐ ܥܰܡ ܡܰܘܬܳܐ: ܘܥܰܡ ܫܝܽܘܠ ܥܒܰܕ݂ܢ ܚܶܙܘܳܐ. ܫܰܘܛܳܐ ܕܰܓܪܽܘܦܝܳܐ ܟܰܕ݂ ܢܶܥܒܰܪ: ܠܳܐ ܢܺܐܬܶܐ ܥܠܰܝܢ. ܡܶܛܽܠ ܕܣܳܡܢ ܒܕܰܓܳܠܽܘܬ݂ܳܐ ܬܽܘܟ݂ܠܳܢܰܢ: ܘܰܒܫܽܘܩܪܳܐ ܐܶܣܬܰܬܰܪܢ. ¹⁶ ܡܶܛܽܠ ܗܳܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ: ܗܳܐ ܐܶܢܳܐ ܡܰܬ݂ܩܶܢ ܐ̱ܢܳܐ ܒܨܶܗܝܽܘܢ ܟܺܐܦܳܐ: ܟܺܐܦܳܐ ܒܚܺܝܪܬܳܐ ܒܙܳܘܺܝܬ݂ܳܐ ܝܰܩܺܝܪܬܳܐ: ܪܺܝܫ ܐܶܣܬ݂ܳܐ ܕܫܶܬܶܐܣܬܳܐ. ܕܰܡܗܰܝܡܶܢ ܠܳܐ ܢܶܕ݂ܚܰܠ. ¹⁷ ܘܶܐܣܺܝܡ ܕܺܝܢܳܐ ܠܰܡܫܽܘܚܬ݂ܳܐ: ܘܙܰܕܺܝܩܽܘܬܳܐ ܠܡܰܬ݂ܩܳܠܳܐ. ܘܢܶܚܒܽܘܛ ܒܰܪܕ݂ܳܐ ܠܣܰܒܪܳܐ ܕܰܓܳܠܳܐ: ܘܰܠܣܶܬܳܪܳܐ ܡܰܝ̈ܳܐ ܢܶܓܪܦܽܘܢ. ¹⁸ ܘܢܶܬ݂ܟܰܦܰܪ ܩܝܳܡܟ݂ܽܘܢ ܕܥܰܡ ܡܰܘܬܳܐ. ܘܚܶܙܘܟ݂ܽܘܢ ܕܥܰܡ ܫܝܽܘܠ ܠܳܐ ܢܩܽܘܡ. ܫܰܘܛܳܐ ܓܳܪܽܘܦܳܐ ܟܰܕ݂ ܢܶܥܒܰܪ: ܬܶܗܘܢ ܠܶܗ ܠܰܕܝܳܫܳܐ. ¹⁹ ܘܰܒܙܰܒܢܳܐ ܕܥܳܒܰܪ ܢܶܕ݂ܒܰܪܟ݂ܽܘܢ. ܡܶܛܽܠ ܕܰܒܨܰܦܪܳܐ ܒܨܰܦܪܳܐ ܢܶܥܒܰܪ ܒܺܐܝܡܳܡܳܐ ܘܰܒܠܺܠܝܳܐ ܗܳܘܝܳܐ ܙܳܘܥܬ݂ܳܐ. ܒܰܠܚܽܘܕ݂ ܐܶܣܬܰܟܰܠ ܫܳܡܽܘܥܳܐ. ²⁰ ܡܶܛܽܠ ܕܟܰܪܺܝ ܡܳܐܢܳܐ ܠܡܶܣܬܪܶܗ. ܘܡܶܫܬ݁ܺܝܬ݂ܳܐ ܩܶܛܢܰܬ: ܘܠܳܐ ܡܡܰܠܝܳܐ. ²¹ ܡܶܛܽܠ ܕܰܒܛܽܘܪܳܐ ܒܬ݂ܽܘܪܰܥܬ݂ܳܐ ܢܩܽܘܡ ܡܳܪܝܳܐ: ܐܰܝܟ݂ ܥܽܘܡܩܳܐ ܕܓܶܒܥܽܘܢ ܢܶܪܓܰܙ ܠܡܶܥܒܰܕ݂ ܥܒܳܕ݂ܰܘ̈ܗܝ: ܢܽܘܟ݂ܖ̈ܳܝ݂ܺܝ݂ܢ ܥܒܳܕ݂ܰܘ̈ܗܝ. ܘܰܠܡܶܥܒܰܕ݂ ܥܒܺܝ̈ܕ݂ܳܬܶܗ: ܢܽܘܟ݂ܖ̈ܳܝܳܢ ܥܒܺܝ̈ܕܳܬܶܗ. ²² ܘܗܳܫܳܐ ܠܳܐ ܬܡܰܝܩܽܘܢ: ܕܠܳܐ ܢܶܥܫ̈ܢܳܢ ܡܰܖ̈ܕܘܳܬ݂ܟ݂ܽܘܢ ܡܶܛܽܠ ܕܰܓܡܽܘܪܝܳܐ ܘܦܳܣܺܝ̈ܩܳܬ݂ܳܐ ܫܶܡܥܶܬ݂ ܡ̣ܶܢ ܡܳܪܝܳܐ ܚܰܝܠܬ݂ܳܢܳܐ: ܥܰܠ ܟܠܳܗ̇ ܐܰܪܥܳܐ^{. 23} ܨܽܘܬ݂ܘ ܘܰܫܡܰܥܘ ܩܳܠܝ: ܨܽܘܬܘ ܘܰܫܡܰܥܘ ܡܶܐܡܰܪܝ. 24 ܕܰܠܡܳܐ ܝܰܘܡܳܐ ܟܽܠܶܗ ܕܳܒܰܪ ܐܰܟܳܪܳܐ ܠܡܶܙܪܰܥ: ܘܙܳܩܶܦ ܘܫܳܦܶܢ ܐܰܪܥܶܗ.²⁵ ܠܳܐ ܗ̱ܘܳܐ ܡܳܐ ܕܰܐܫܘܺܝ ܐܰܦܶܝ̈ܗ̇: ܒܰܕܰܪ ܫܰܒܽܘܒܢܳܐ: ܘܟܰܡܽܘܢܳܐ ܙܳܪܰܥ. ܘܪܳܡܶܐ ܚܶܛ̈ܶܐ ܘܰܣܥܳܖ̈ܶܐ ܘܟ݂ܽܘ̈ܢܳܬܳܐ ܒܰܬ݂ܚܽܘܡܶܝ̈ܗ̇. ²⁶ ܢܶܪܕܶܝܘܗܝ ܒܕܺܝܢܳܐ ܕܰܐ‌ܠܳܗܳܐ ܘܰܢܫܰܒܚܺܝܘܗܝ. ²⁷ ܡܶܛܽܠ ܕܠܳܐ ܗ̱ܘܳܐ ܒܰܕܪܳܫܳܐ ܡܶܬ݁ܕܰܪܰܟ݂ ܫܰܒܽܘܒܢܳܐ. ܘܳܐܦܠܳܐ ܡܶܬ݂ܟܪܶܟ݂ ܓܰܪܓܪܳܐ ܥܰܠ ܟܰܡܽܘܢܳܐ. ܡܶܛܽܠ ܕܰܒܚܽܘܛܪܳܐ ܡܶܬ݂ܚܰܒܰܛ ܫܰܒܽܘܒܢܳܐ: ܘܟܰܡܽܘܢܳܐ ܒܙܶܩܬܳܐ. ²⁸ ܥܒܽܘܪܳܐ ܡܶܬ݁ܕܰܪܰܟ݂ ܡܶܛܽܠܬܰܢ. ܡܶܛܽܠ ܕܠܳܐ ܗ̱ܘܳܐ ܠܙܳܟ݂ܽܘ ܡܰܕ݂ܪܳܟܽܘ ܐܰܕܪܶܟ݂ܢܳܝܗܝ ܘܰܒܣܽܘܓ݂ܳܐܐ ܕܓܺܝ̈ܓܠܶܐ ܕܓܰܪܓܖ̈ܽܘܗܝ: ܘܰܒܦܰܖ̈ܣܰܘܗܝ ܢܕܰܩܽܘܢܶܗ. ²⁹ ܘܳܐܦ ܗܳܕܶܐ ܩܕ݂ܳܡ ܡܳܪܝܳܐ ܚܰܝܠܬ݂ܳܢܳܐ ܢܶܦܩܰܬ ܕܽܘܡܳܪܳܐ ܕܬܰܪܥܺܝܬ݂ܳܐ ܐܰܘܪܶܒ ܬܰܪܒܺܝܬ݂ܳܐ.

ܩܶܦܰܠܶܐܘܳܢ: ܟܛ.

¹ ܘܳܝ ܐܰܪܺܝܠ ܐܰܪܺܝܠ ܩܪܺܝܬ݂ܳܐ ܕܰܫܪܳܐ ܕܰܘܺܝܕ݂. ܐܰܘܣܶܦܘ ܫܰܢ̱ܬܳܐ ܥܰܠ ܫܰܢ̱ܬܳܐ: ܥܰܕ݂ܥ̈ܺܐܕܶܐ ܢܶܬ݂ܥܰܒܕܽܘܢ. ² ܘܰܐܥܺܝܩ ܠܰܐܪܺܝܠ: ܘܬܶܗܘܶܐ ܢܽܘܗܳܡܳܐ ܐܘܠܺܝܬ݂ܳܐ: ܘܬܶܗܘܶܐ ܐܰܝܟ݂ ܐܰܪܺܝܠ. ³ ܘܶܐܫܪܶܐ ܐܰܝܟ݂ ܐܶܣܦܺܪܳܐ ܥܠܰܝܟܝ ܘܰܐܠܨܶܟ݂ܝ ܒܡܰܩܰܒܬܳܐ ܘܰܐܩܺܝܡ ܥܠܰܝܟܝ ܡܰܛܰܪܬܳܐ. ⁴ ܘܬܶܬ݂ܡܰܟܟܺܝܢ ܘܡ̣ܶܢ ܥܰܦܪܳܐ ܬܡܰܠܠܺܝܢ. ܘܡ̣ܶܢ ܥܰܦܪܳܐ ܢܢܰܨܖ̈ܳܢ ܡܶܠܰܝ̈ܟܝ ܘܢܶܫܬ݁ܡܰܥ ܩܳܠܶܟ݂ܝ ܡ̣ܶܢ ܐܰܪܥܳܐ ܐܰܝܟ݂ ܙܰܟܽܘܪܳܐ. ܘܡ̣ܶܢ ܥܰܦܪܳܐ ܢܢܰܨܖ̈ܳܢ ܡܶܠܰܝ̈ܟܝ. ⁵ ܘܢܶܗܘܶܐ ܐܰܝܟ݂ ܚܶܠܳܐ ܕܰܩܺܝܩܳܐ ܣܽܘܓ݂ܳܐܐ ܕܕܳܝܽܘܫܰܝ̈ܟܝ ܘܰܐܝܟ݂ ܥܽܘܪܳܐ ܕܥܳܒܰܪ ܣܽܘܓ݂ܳܐܐ ܕܥܰܫܺܝܢܰܝ̈ܟܝ. ܘܢܶܗܘܶܐ ܡ̣ܶܢ ܫܶܠܝܳܐ ܒܰܥܓܰܠ. ⁶ ܡ̣ܶܢ ܩܕ݂ܳܡ ܡܳܪܝܳܐ ܚܰܝܠܬ݂ܳܢܳܐ: ܬܶܬ݂ܦܩܶܕ݂ ܒܙܰܘ̈ܥܶܐ: ܘܰܒܖ̈ܰܥܡܶܐ ܘܰܒܩܳܠܳܐ ܪܰܒܳܐ: ܘܰܒܩܽܘܕ݂ܚܳܬ݂ܳܐ: ܘܰܒܥܰܠܥܳܠܳܐ: ܘܰܒܫܰܠܗܶܒܺܝܬ݂ܳܐ ܕܢܽܘܪܳܐ ܕܡܰܘܩܕ݂ܳܐ. ⁷ ܘܢܶܗܘܶܐ ܐܰܝܟ݂ ܚܶܠܡܳܐ ܒܚܶܙܘܳܐ ܕܠܺܠܝܳܐ: ܣܽܘܓ݂ܳܐܐ ܕܟܽܠܗܽܘܢ ܥܰܡ̈ܡܶܐ ܕܡܶܬ݂ܚܰܝܠܺܝܢ ܥܰܠ ܨܶܗܝܽܘܢ: ܘܟ݂ܽܠ ܚܰܝ̈ܠܶܐ ܘܟܶܢ̈ܫܶܐ ܕܰܡܥܺܝܩܺܝܢ ܠܳܗ̇. ⁸ ܘܢܶܗܘܶܐ ܐܰܝܟ݂ ܟܰܦܢܳܐ ܕܚܳܙܶܐ ܒܚܶܠܡܶܗ ܕܳܐܟܶܠ ܘܡܳܐ ܕܶܐܬ݁ܬ݁ܥܺܝܪ: ܡܛܰܪܰܦ: ܘܰܣܪܺܝܩܳܐ ܢܰܦܫܶܗ. ܘܰܐܝܟ݂ ܨܶܗܝܳܐ ܕܚܳܙܶܐ ܒܚܶܠܡܶܗ ܕܫܳܬܶܐ. ܘܡܳܐ ܕܶܐܬ݁ܬ݁ܥܺܝܪ: ܡܛܰܪܰܦ ܘܰܣܪܺܝܩܳܐ ܢܰܦܫܶܗ. ܗܳܟ݂ܰܢܳܐ ܢܶܗܘܶܐ ܣܽܘܓ݂ܳܐܐ ܕܟܽܠܗܽܘܢ ܥܰܡ̈ܡܶܐ ܕܡܶܬ݂ܚܰܝܠܺܝܢ ܥܰܠ ܛܽܘܪܳܐ ܕܨܶܗܝܽܘܢ. ⁹ ܬܡܰܗܘ ܘܶܐܬ݁ܕܰܡܰܪܘ: ܘܶܐܬ݁ܛܰܪܰܦܘ ܘܰܬ݂ܘܰܪܘ: ܕܰܪܘܶܝܢ ܠܳܐ ܡ̣ܶܢ ܚܰܡܪܳܐ: ܘܰܕܛܳܥܶܝܢ ܠܳܐ ܡ̣ܶܢ ܫܰܟܪܳܐ. ¹⁰ ܡܶܛܽܠ ܕܰܢܣܰܟ݂ ܥܠܰܝܗܽܘܢ ܡܳܪܝܳܐ ܪܽܘܚܳܐ ܛܰܒܺܝܥܬܳܐ ܘܥܶܫܢܰܬ ܥܰܠ ܥܰܝܢܰܝ̈ܗܽܘܢ ܘܥܰܠ ܢܒܺܝ̈ܶܐ: ܘܥܰܠ ܖ̈ܺܝܫܰܝܗܽܘܢ ܕܚܳܙܶܝܢ ܟܰܣ̈ܝܳܬ݂ܳܐ. ¹¹ ܘܢܶܗܘܶܐ ܒܗܽܘܢ ܚܶܙܘܳܐ ܕܟܽܠܗܽܘܢ ܐܰܝܟ݂ ܡ̈ܶܠܶܐ ܕܰܟ݂ܬ݂ܒܳܐ ܕܰܚܬ݂ܺܝܡ ܕܡܳܐ ܕܝܰܗܒܽܘܗܝ ܠܡܰܢ ܕܝܳܕܰܥ ܣܶܦܪܳܐ: ܢܺܐܡܪܽܘܢ ܠܶܗ ܩܪܺܝ ܗܳܢܳܐ: ܘܢܺܐܡܰܪ ܠܳܐ ܡܶܫܟܰܚ ܐ̱ܢܳܐ: ܡܶܛܽܠ ܕܰܚܬ݂ܺܝܡ ܗ̱ܘ̣.¹² ܘܢܶܬ݁ܠܽܘܢܶܗ ܠܰܟ݂ܬ݂ܒܳܐ ܠܡܰܢ ܕܠܳܐ ܝܳܕܰܥ ܣܶܦܪܳܐ. ܘܢܺܐܡܪܽܘܢ ܠܶܗ ܩܪܺܝ ܗܳܢܳܐ. ܘܢܺܐܡܰܪ ܠܳܐ ܝܳܕܰܥ ܐ̱ܢܳܐ ܣܶܦܪܳܐ. ¹³ ܘܶܐܡܰܪ ܡܳܪܝܳܐ: ܥܰܠ ܕܰܩܪܶܒ ܥܰܡܳܐ ܗܳܢܳܐ ܒܦܽܘܡܶܗ: ܘܰܒܣܶܦ̈ܘܳܬܶܗ ܝܰܩܪܰܢܝ: ܘܠܶܒܶܗ ܪܰܚܺܝܩ ܡܶܢܝ: ܘܰܗܘܳܬ݂ ܕܶܚܠܰܬ݂ܗܽܘܢ ܡܶܢܝ ܒܦܽܘܩܕܳܢܳܐ ܘܰܒܝܽܘܠܦܳܢܳܐ ܕܐ̱ܢܳܫܳܐ. ¹⁴ ܡܶܛܽܠ ܗܳܢܳܐ: ܗܳܐ ܡܰܘܣܶܦ ܐ̱ܢܳܐ ܠܡܶܦܪܫܶܗ ܠܥܰܡܳܐ ܗܳܢܳܐ: ܒܬܶܕ݂ܡܽܘܪܬܳܐ ܘܰܒܕ݂ܽܘܡܳܪܳܐ. ܘܬܺܐܒܰܕ݂ ܚܶܟ݂ܡܬ݂ܳܐ ܕܚܰܟܺܝܡܰܘ̈ܗܝ. ܘܣܽܘܟܳܠܳܐ ܕ݂ܣܰܟܽܘܠܬ݂ܳܢܰܘ̈ܗܝ ܢܶܬ݂ܓܠܶܙ. ¹⁵ ܘܳܝ ܠܰܕ݂ܡܶܬ݂ܥܰܩܡܺܝܢ ܡ̣ܶܢ ܡܳܪܝܳܐ: ܠܰܡܛܰܫܳܝܘ ܬܰܪܥܺܝܬ݂ܳܐ. ܘܗܳܘܶܝܢ ܒܚܶܫܽܘܟ݂ܳܐ ܥܒܳܕܰܝ̈ܗܽܘܢ ܘܳܐܡܪܺܝܢ ܡܰܢܘ ܚܳܙܶܐ ܠܰܢ: ܐܰܘ ܡܰܢܽܘ ܝܳܕܰܥ ܡܳܢܳܐ ܡܶܬ݂ܗܰܦܟ݂ܺܝܢܰܢ. ¹⁶ ܐܰܝܟ݂ ܛܺܝܢܳܐ ܕܦܰܚܳܪܳܐ ܚܫܺܝܒܺܝܢ ܐ̱ܢܬ݁ܽܘܢ. ܕܰܠܡܳܐ ܐܳܡܰܪ ܥܒܳܕ݂ܳܐ ܠܥܳܒܽܘܕܶܗ ܠܳܐ ܥܒܰܕܬܳܢܝ. ܘܰܓܒܺܝܠܬܳܐ ܐܳܡ̇ܪܳܐ ܠܓܳܒܽܘܠܳܗ̇: ܕܚܰܟܺܝܡܳܐܺܝܬ݂ ܠܳܐ ܓܒܰܠܬܳܢܝ. ¹⁷ ܗܳܐ ܥܰܕ݂ ܩܰܠܺܝܠ ܙܥܽܘܪ: ܘܢܶܗܦܽܘܟ݂ ܠܶܒܢܳܢ ܠܟܰܪܡܠܳܐ: ܘܟܰܪܡܠܳܐ ܠܥܳܒܳܐ ܢܶܬ݂ܚܫܶܒ. ¹⁸ ܘܢܶܫܡܥܽܘܢ ܒܝܰܘܡܳܐ ܗܰܘ ܚܰܖ̈ܫܶܐ ܡ̈ܶܠܶܐ ܕܰܟ݂ܬ݂ܒܳܐ. ܘܡ̣ܶܢ ܚܶܫܽܘܟ݂ܳܐ ܘܥܰܡܛܳܢܳܐ: ܥܰܝ̈ܢܶܐ ܕܰܥܘܺܝܖ̈ܶܐ ܢܶܚ̈ܙܝܳܢ. ¹⁹ ܘܢܰܘܣܦܽܘܢ ܡܰܟܺܝ̈ܟܶܐ ܒܡܳܪܝܳܐ ܒܚܰܕ݂ܽܘܬ݂ܳܐ. ܘܐ̱ܢܳܫܳܐ ܒܳܝ̈ܫܶܐ ܒܩܰܕ݁ܺܝܫܳܐ ܕܺܝܣܪܳܐܶܝܠ ܢܕ݂ܽܘܨܽܘܢ. ²⁰ ܡܶܛܽܠ ܕܰܥܒܰܪ ܕܳܝܽܘܫܳܐ: ܘܰܓܡܰܪ ܡܡܰܝܩܳܢܳܐ. ܘܶܐܒܰܕ݂ܘ ܟܽܠ ܕܰܡܓܰܪܓܺܝܢ ܥܰܘܠܳܐ. ²¹ ܘܡܰܚܛܶܝܢ ܠܐ̱ܢܳܫܳܐ ܒܡܶܠܬ݂ܳܐ. ܘܠܰܕ݂ܡܰܟܶܣ ܣܳܝܡܺܝܢ ܠܶܗ ܬܽܘܩܠܬ݂ܳܐ: ܘܨܳܠܶܝܢ ܒܚܶܫܽܘܟ݂ܳܐ ܠܙܰܕܺܝܩܳܐ. ²² ܡܶܛܽܠ ܗܳܢܳܐ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܥܰܠ ܒܰܝܬ݁ܶܗ ܕܝܰܥܩܽܘܒ: ܕܰܦܪܰܩ ܠܰܐܒܪܳܗܳܡ: ܠܳܐ ܡܶܟܺܝܠ ܢܶܒܗܰܬ݂ ܝܰܥܩܽܘܒ: ܘܠܳܐ ܡܶܟܺܝܠ ܢܰܚܦܖ̈ܳܢ ܐܰܦܰܘ̈ܗܝ. ²³ ܡܳܐ ܕܰܚܙܳܘ ܒܢܰܘ̈ܗܝ ܥܒܳܕ݂ ܐܺܝܕܰܝ̈: ܒܓܰܘܶܗ ܢܩܰܕܫܽܘܢ ܫܶܡܝ. ܘܰܢܩܰܕܫܽܘܢ ܠܩܰܕ݁ܺܝܫܳܐ ܕܝܰܥܩܽܘܒ. ܘܠܰܐܠܳܗܳܐ ܕܺܝܣܪܳܐܶܝܠ ܢܥܰܫܢܽܘܢ. ²⁴ ܘܢܶܕܥܽܘܢ ܣܰܟ݂̈ܠܶܐ ܐܰܝܠܶܝܢ ܕܛܳܥܝܳܐ ܗ̱ܘܳܬ݂ ܪܽܘܚܗܽܘܢ. ܘܫܳܛܰܝ̈ܳܐ ܢܺܐܠܦܽܘܢ ܠܡܶܫܬܡܳܥܽܘ.

 

ܩܶܦܰܠܶܐܘܳܢ: ܠ

¹ ܘܳܝ ܠܰܒܢܰܝܳܐ ܡܳܖ̈ܽܘܕܶܐ: ܐܳܡܰܪ ܡܳܪܝܳܐ: ܕܰܥܒܰܕ݂ܘ ܬܰܪܥܺܝܬ݂ܳܐ ܘܠܳܐ ܡܶܢܝ. ܘܢܰܩܺܝܘ ܢܽܘܩܳܝ̈ܶܐ: ܕܠܳܐ ܡ̣ܶܢ ܪܽܘܚܝ. ܕܢܰܘܣܦܽܘܢ ܚܛܳܗ̈ܶܐ ܥܰܠ ܚܛܳܗ̈ܶܐ. ² ܕܶܐܙܰܠܘ ܠܡܶܚܰܬ݂ ܠܡܶܨܪܶܝܢ: ܘܡ̣ܶܢ ܦܽܘܡܝ ܠܳܐ ܫܐܶܠܘ ܕܢܶܬ݂ܥܰܫܢܽܘܢ ܒܥܽܘܫܢܶܗ ܕܦܶܪܥܽܘܢ. ܘܢܶܣܬܰܬ݁ܪܽܘܢ ܒܛܶܠܳܠܳܗ̇ ܕܡܶܨܪܶܝܢ. ³ ܢܶܗܘܶܐ ܠܟ݂ܽܘܢ ܥܽܘܫܢܶܗ ܕܦܶܪܥܽܘܢ ܠܒܶܗܬܬ݂ܳܐ: ܘܣܶܬܳܪܳܐ ܕܛܶܠܳܠܳܗ̇ ܕܡܶܨܪܶܝܢ ܠܬܰܚܦܺܝܬ݂ܳܐ. ⁴ ܡܶܛܽܠ ܕܗܽܘ ܒܨܳܥܳܢ: ܘܪܰܘܖ̈ܒܳܢܰܘܗܝ ܘܡܰܠܰܐܟ݂ܰܘ̈ܗܝ ܚܰܠܦ̈ܶܐ ܢܶܠܐܽܘܢ. ⁵ ܠܘܳܬ݂ ܥܰܡܳܐ ܕܠܳܐ ܡܰܘܬܰܪ ܠܗܽܘܢ: ܠܳܐ ܠܥܽܘܕ݂ܪܳܢܳܐ ܘܠܳܐ ܠܗܶܢܝܳܢܳܐ: ܐܶܠܳܐ ܠܒܶܗܬܬ݂ܳܐ ܘܰܠܚܶܣܕܳܐ.  ⁶ ܡܰܫܩܠܳܐ ܕܰܒܥܺܝܪܳܐ ܕܬܰܝܡܢܳܐ ܒܰܐܪܥܳܐ ܐܰܠܺܝܨܬܳܐ ܘܰܡܥܳܩܬܳܐ. ܐܰܪܝܳܐ ܘܓܽܘܪܝܳܐ ܕܰܐܪܝܳܐ: ܘܡܶܢܗܽܘܢ ܐܶܣܦܶܣ ܘܚܰܪܡܳܢܳܐ ܕܦܳܪܰܚ. ܢܶܫܩܠܽܘܢ ܥܰܠ ܚܰܨܳܐ ܕܥܺܝ̈ܠܶܐ ܥܽܘܬ݂ܪܗܽܘܢ: ܘܥܰܠ ܓܰܒܳܐ ܕܓܰܡ̈ܠܶܐ ܓܰܙܰܝ̈ܗܽܘܢ: ܠܘܳܬ݂ ܥܰܡܳܐ ܕܠܳܐ ܡܰܗܢܶܐ ܠܗܽܘܢ. ⁷ ܘܡܶܨܖ̈ܳܝܶܐ ܒܰܣܪܺܝܩܽܘܬ݂ܳܐ ܘܰܒܕܰܓܳܠܽܘܬ݂ܳܐ ܡܥܰܕܪܺܝܢ ܡܶܛܽܠ ܗܳܢܳܐ ܩܪܺܝܬ݂ ܠܗܽܘܢ: ܕܰܣܪܺܝܩ ܗ̱ܘ̣ ܬܽܘܟ݂ܠܳܢܗܽܘܢ ܗܳܢܳܐ. ⁸ ܡܶܟܺܝܠ ܬܳܐ ܟܬ݂ܽܘܒ ܥܰܠ ܠܽܘ̈ܚܶܐ ܗܳܠܶܝܢ: ܘܥܰܠ ܟܬ݂ܳܒܳܐ ܕܰܩܝܳܡܗܽܘܢ: ܕܢܶܗܘܶܐ ܠܝܰܘܡܳܐ ܐ̱ܚܪܳܝܳܐ ܠܣܳܗܕܽܘܬ݂ܳܐ ܠܥܳܠܰܡ ܥܳܠܡܺܝܢ. ⁹ ܡܶܛܽܠ ܕܥܰܡܳܐ ܗ̱ܘ̣ ܡܡܰܪܡܪܳܢܳܐ: ܒܢܰܝ̈ܳܐ ܐܶܢܽܘܢ ܕܰܓ̈ܳܠܶܐ: ܒܢܰܝ̈ܳܐ ܕܠܳܐ ܨܒܰܘ ܠܡܶܫܡܰܥ ܢܳܡܽܘܣܶܗ ܕܡܳܪܝܳܐ. ¹⁰ ܕܶܐܡܰܪܘ ܠܚܰܙܳܝ̈ܶܐ ܕܠܳܐ ܬܶܚܙܽܘܢ: ܘܠܰܢܒܺܝ̈ܶܐ ܕܠܳܐ ܬܶܬ݂ܢܰܒܽܘܢ ܠܰܢ ܡܰܟܣܳܢܽܘܬ݂ܳܐ ܡܰܠܶܠܘ ܠܰܢ ܦܳܠܓܽܘܬ݂ܳܐ: ܘܰܚܙܳܘ ܠܰܢ ܟܰܕܳܒܽܘܬ݂ܳܐ. ¹¹ ܘܰܐܣܛܰܐܽܘܢ ܡ̣ܶܢ ܐܽܘܪܚܳܐ. ܘܰܐܗܦܟܽܘܢ ܡ̣ܶܢ ܫܒܺܝ̈ܠܶܐ. ܘܒܰܛܶܠܘ ܡܶܢܰܢ ܠܩܰܕ݁ܺܝܫܳܐ ܕܺܝܣܪܳܐܶܝܠ. ¹² ܡܶܛܽܠ ܗܳܢܳܐ: ܗܳܟ݂ܰܢܳܐ ܐܳܡܰܪ ܡܳܪܝܳܐ ܩܰܕ݁ܺܝܫܳܐ ܕܺܝܣܪܳܐܶܝܠ: ܥܰܠ ܕܰܐܣܠܺܝܬ݁ܽܘܢ ܡܶܠܬ݂ܳܐ ܗܳܕܶܐ: ܘܶܐܬ݁ܬ݁ܟܶܠܬ݁ܽܘܢ ܒܰܛܠܽܘܡܝܳܐ: ܘܰܪܛܰܢܬ݁ܽܘܢ ܘܶܐܬ݁ܬ݁ܟܶܠܬ݁ܽܘܢ ܥܠܰܘܗ̱ܝ. ¹³ ܡܶܛܽܠ ܗܳܢܳܐ ܬܶܗܘܶܐ ܠܟ݂ܽܘܢ ܚܛܺܝܬ݂ܳܐ ܗܳܕܶܐ ܐܰܝܟ݂ ܬܽܘܪܥܬ݂ܳܐ ܕܢܶܦܠܰܬ: ܘܰܐܝܟ݂ ܫܽܘܪܳܐ ܪܳܡܳܐ ܕܡ̣ܶܢ ܫܶܠܝܳܐ ܗܘܳܐ ܬܒܳܪܶܗ. ¹⁴ ܘܰܬ݂ܒܪܶܗ ܐܰܝܟ݂ ܬܒܳܪܳܐ ܕܡܳܐܢܳܐ ܕܦܰܚܳܪܳܐ ܕܰܬ݂ܒܺܝܪ ܕܠܳܐ ܚܰܘܣܳܢ. ܕܠܳܐ ܡܶܫܬܰܟܰܚ ܒܬܶܒܖ̈ܰܘܗܝ ܚܶܨܦܳܐ ܠܡܶܣܰܒ ܒܶܗ ܢܽܘܪܳܐ ܡ̣ܶܢ ܝܰܩܕܳܢܳܐ: ܘܳܐܦܠܳܐ ܠܡܶܓ̣ܪܰܦ ܒܶܗ ܡܰܝ̈ܳܐ ܡ̣ܶܢ ܓܽܘܒܳܐ. ¹⁵ ܡܶܛܽܠ ܗܳܢܳܐ ܗܳܟ݂ܰܢܳܐ ܐܳܡܰܪ ܡܳܪܝܳܐ ܩܰܕ݁ܺܝܫܳܐ ܕܺܝܣܪܳܐܶܝܠ: ܡܳܐ ܕܬ݂ܳܒܬ݁ܽܘܢ ܘܶܐܬ݁ܬܰܢܰܚܬ݁ܽܘܢ: ܬܶܬ݂ܦܰܪܩܽܘܢ. ܘܰܒܫܶܠܝܳܐ ܘܰܒܣܰܒܪܳܐ ܬܶܗܘܶܐ ܓܰܢ̱ܒܳܪܽܘܬ݂ܟ݂ܽܘܢ ܘܠܳܐ ܐܶܬܛܦܺܝܣܬ݁ܽܘܢ. ¹⁶ ܘܶܐܡܰܪܬ݁ܽܘܢ ܠܳܐ ܗܳܟ݂ܰܢܳܐ: ܥܰܠ ܖ̈ܰܟܫܳܐ ܢܶܪܟܰܒ. ܘܥܰܠ ܩܰܠܺܝܠܳܐ ܢܶܥܪܽܘܩ. ܡܶܛܽܠ ܗܳܢܳܐ ܬܶܥܪܩܽܘܢ: ܘܢܶܗܘܽܘܢ ܩܰܠܺܝܠܺܝܢ ܖ̈ܳܕܽܘܦܰܝܟܽܘܢ. ¹⁷ ܐܰܠܶܦ ܡ̣ܶܢ ܟܐܳܬ݂ܳܐ ܕܚܰܕ݂: ܘܡ̣ܶܢ ܟܐܳܬ݂ܳܐ ܕܚܰܡܫܳܐ ܬܶܥܪܩܽܘܢ: ܥܕܰܡܳܐ ܕܬܶܫܬܰܚܪܽܘܢ ܐܰܝܟ݂ ܥܪܳܪܳܐ ܥܰܠ ܪܺܝܫ ܛܽܘܪܳܐ: ܘܰܐܝܟ݂ ܐܳܬܳܐ ܥܰܠ ܪܳܡܬ݂ܳܐ. ¹⁸ ܡܶܛܽܠ ܕܰܢܫܰܪܶܐ ܡܳܪܝܳܐ ܠܰܡܪܰܚܳܡܘ ܥܠܰܝܟܽܘܢ. ܘܢܶܬ݁ܬ݁ܪܺܝܡ ܠܰܡܪܰܚܳܦܘ ܥܠܰܝܟܽܘܢ ܡܶܛܽܠ ܕܰܐ‌ܠܳܗܳܐ ܗ̱ܘ̣ ܕܰܝܳܢܳܐ ܡܳܪܝܳܐ. ܘܛܽܘܒܰܝܗܽܘܢ ܠܟܽܠ ܕܰܡܣܰܟܶܝܢ ܠܶܗ. ¹⁹ ܡܶܛܽܠ ܕܥܰܡܳܐ ܒܨܶܗܝܽܘܢ ܝܳܬܶܒ: ܘܒܽܐܘܪܺܫܠܶܡ ܡܶܒܟܶܐ ܠܳܐ ܬܶܒܟܽܘܢ ܡܪܰܚܳܡܽܘ ܢܪܰܚܶܡ ܥܰܠ ܩܳܠܳܐ ܕܰܓ̣ܥܳܬ݂ܟ݂ܽܘܢ: ܘܡܳܐ ܕܰܫܡܰܥ ܢܶܥܢܶܝܟ݂ܽܘܢ. ²⁰ ܘܢܶܬ݁ܶܠ ܠܟ݂ܽܘܢ ܡܳܪܝܳܐ ܠܰܚܡܳܐ ܒܽܐܘܠܨܳܢܳܐ: ܘܡܰܝ̈ܳܐ ܒܽܐܘܠܨܳܢܳܐ. ܘܠܳܐ ܢܟܰܢܶܫ ܬܽܘܒ ܠܡܰܛܥܝܳܢܰܝ̈ܟܽܘܢ ܘܢܶܚܙ̈ܝܳܢ ܥܰܝܢܰܝ̈ܟܽܘܢ ܒܡܰܛܥܝܳܢܰܝ̈ܟܽܘܢ. ²¹ ܘܶܐܕ݂ܢܰܝ̈ܟܽܘܢ ܢܶܫܡ̈ܥܳܢ ܡܶܠܬ݂ܳܐ ܡ̣ܶܢ ܒܶܣܬܰܪܟ݂ܽܘܢ. ܕܳܐܡܪܳܐ: ܗܳܕܳܐ ܗ̱ܝ ܐܽܘܪܚܳܐ: ܙܶܠܘ ܒܳܗ̇. ܘܠܳܐ ܬܶܣܛܽܘܢ ܠܝܰܡܺܝܢܳܐ ܘܰܠܣܶܡܳܠܳܐ. ²² ܘܰܬ݁ܛܰܘܫܽܘܢ ܣܺܐܡܳܐ ܕܰܩܪܺܝܡ ܠܰܦܬܰܟ݂ܖ̈ܰܝܟܽܘܢ: ܘܦܶܕܬܳܐ ܕܢܶܣܟܬ݂ܳܐ ܕܕܰܗܒܗܽܘܢ. ܘܬܶܕ݂ܪܽܘܢ ܐܶܢܽܘܢ ܐܰܝܟ݂ ܡܰܝ̈ܳܐ ܕܟܶܦܣܳܢܺܝܬ݂ܳܐ. ܘܰܐܝܟ݂ ܢܦܳܬ݂ܳܐ ܬܰܦܩܽܘܢ ܐܶܢܽܘܢ. ²³ ܘܢܶܬ݂ܺܝܗܶܒ ܡܶܛܪܳܐ ܠܙܰܪܥܟ݂ܽܘܢ: ܕܬܶܙܪܥܽܘܢ ܒܰܐܪܥܳܐ: ܘܰܥܒܽܘܪܳܐ ܕܙܰܪܥܳܐ ܕܰܐܪܥܳܐ. ܢܶܗܘܶܐ ܕܰܗܺܝܢ ܘܫܰܡܺܝܢ: ܪܶܥܝܳܐ ܕܰܒܥܺܝܪܟ݂ܽܘܢ ܒܝܰܘܡܳܐ ܗܰܘ ܒܰܐܬ݂ܪܳܐ ܫܰܡܺܝܢܳܐ. ²⁴ ܘܒܰܩܖ̈ܶܐ ܘܰܐܖ̈ܘܳܢܶܐ ܕܦܳܠܚܺܝܢ ܒܰܐܪܥܳܐ: ܒܠܺܝܠܳܐ ܚܰܡܺܝܡܳܐ ܢܶܐܟ݂ܠܽܘܢ: ܕܰܡܣܰܠܰܩ ܒܪܰܦܫܳܐ ܘܰܒܡܰܕ݂ܪܝܳܐ. ²⁵ ܘܢܶܗܘܶܐ ܥܰܠ ܟܠ ܛܽܘܪ ܕܪܳܡ: ܘܥܰܠ ܟܽܠ ܪܳܡܬ݂ܳܐ ܕܪܳܡܳܐ: ܢܶܪܕܽܘܢ ܬܰܦ̈ܶܐ ܕܡܰܝ̈ܳܐ ܒܝܰܘܡܳܐ ܕܩܶܛܠܳܐ ܪܰܒܳܐ: ܘܰܒܣܽܘܚܳܦܳܐ ܕܡܰܓ̈ܕܠܶܐ. ²⁶ ܘܢܶܗܘܶܐ ܢܽܘܗܪܶܗ ܕܣܰܗܪܳܐ ܐܰܝܟ݂ ܢܽܘܗܪܶܗ ܕܫܶܡܫܳܐ. ܘܢܽܘܗܪܶܗ ܕܫܶܡܫܳܐ ܢܶܗܘܶܐ ܚܰܕ݂ ܒܫܰܒܥܳܐ: ܐܰܝܟ݂ ܢܽܘܗܪܳܐ ܕܫܰܒܥܳܐ ܝܳܘ̈ܡܺܝܢ: ܒܝܰܘܡܳܐ ܕܢܶܥܨܽܘܒ ܡܳܪܝܳܐ ܬܒܪܳܐ ܕܥܰܡܶܗ: ܘܟܺܐܒܳܐ ܕܰܡܚܽܘܬܶܗ ܢܰܐܣܶܐ. ²⁷ ܗܳܐ ܫܡܶܗ ܕܡܳܪܝܳܐ ܐܳܬ݁ܶܐ ܡ̣ܶܢ ܪܽܘܚܩܳܐ ܝܳܩܶܕ݂ ܪܽܘܓܙܶܗ: ܘܰܫܒܺܝܚ ܡܰܫܩܠܶܗ. ܘܣܶܦ̈ܘܳܬܶܗ ܡܰܠ̈ܝܳܢ ܪܓܙܳܐ ܘܠܶܫܳܢܶܗ ܐܰܝܟ݂ ܢܽܘܪܳܐ ܕܝܳܩܕܳܐ. ²⁸ ܘܪܽܘܚܶܗ ܐܰܝܟ݂ ܢܰܚܠܳܐ ܕܓܳܪܶܦ. ܥܕܰܡܳܐ ܠܨܰܘܪܳܐ ܢܶܦܣܽܘܩ: ܠܡܶܕ݂ܠܰܚ ܥܰܡ̈ܡܶܐ ܡܶܛܽܠ ܛܳܠܝܽܘܬ݂ܗܽܘܢ ܣܪܺܝܩܬܳܐ: ܘܠܰܦܓܽܘܕܬܳܐ ܡܰܛܥܝܳܢܺܝܬ݂ܳܐ ܕܥܰܠ ܦܰܟܰܝ̈ܗܽܘܢ ܕܥܰܡ̈ܡܶܐ. ²⁹ ܬܶܫܒܽܘܚܬܳܐ ܢܶܗܘܶܐ ܠܟ݂ܽܘܢ ܟܠܺܝܠܳܐ ܕܶܐܬ݂ܩܰܕܰܫ ܒܚܰܓܳܐ. ܘܚܰܕ݂ܽܘܬܶܗ ܕܠܶܒܳܐ ܐܰܝܟ݂ ܗܰܘ ܕܰܡܗܰܠܶܟ݂ ܒܚܰܕ݂ܽܘܬ݂ܳܐ: ܠܡܶܐܬ݂ܳܐ ܠܛܽܘܪܶܗ ܕܡܳܪܝܳܐ: ܠܘܳܬ݂ ܬܰܩܺܝܦܳܐ ܕܝܰܥܩܽܘܒ. ³⁰ ܘܢܰܫܡܰܥ ܡܳܪܝܳܐ ܫܽܘܒܚܳܐ ܕܩܳܠܶܗ. ܘܰܡܚܽܘܬ݂ܳܐ ܕܰܕ݂ܪܥܶܗ ܢܚܳܘܶܐ ܒܚܶܡܬ݂ܳܐ ܕܪܽܘܓܙܳܐ: ܘܰܒܫܰܠܗܶܒܺܝܬ݂ܳܐ ܕܢܽܘܪܳܐ ܕܳܐܟ݂ܠܳܐ: ܒܙܳܪܺܝܦܬܳܐ ܕܚܳܒܛܳܐ ܘܟܺܐܦ̈ܶܐ ܕܒܰܪܕ݂ܳܐ. ³¹ ܡܶܛܽܠ ܕܡ̣ܶܢ ܩܕ݂ܳܡ ܪܰܒܽܘܬܶܗ ܕܡܳܪܝܳܐ ܢܶܬ݁ܬ݁ܒܰܪ ܐܳܬ݂ܽܘܪܳܝܳܐ: ܘܰܒܫܰܒܛܳܐ ܢܶܒܠܰܥ. ³² ܘܢܶܗܘܶܐ ܒܟܽܠܗܽܘܢ ܥܒܳܕ݂ܘ̈ܗܝ: ܚܽܘܛܪܳܐ ܕܫܽܘܥܒܳܕ݂ܳܐ ܕܰܢܢܺܝܚ ܡܳܪܝܳܐ ܥܠܰܘܗ̱ܝ: ܒܰܦܠܰܓ̈ܶܐ: ܘܰܒܟܶܢܳܖ̈ܶܐ ܘܒܰܩܪܳܒܳܐ ܥܰܫܺܝܢܳܐ ܢܶܬ݂ܟܰܬܰܫ ܒܶܗ. ³³ ܡܶܛܽܠ ܕܰܡܛܰܝܶܒ ܡ̣ܶܢ ܩܕ݂ܳܡ ܝܰܘ̈ܡܳܬܳܐ ܡܶܐܟ݂ܽܘܠܬܶܗ ܐܳܦ ܗܺܝ ܐܶܬ݁ܛܰܝܒܰܬ ܕܬܰܡܠܶܟ݂: ܘܥܰܡܩܰܬ݂ ܘܪܰܘܚܰܬ ܒܶܝܬ݂ ܡܰܥܡܪܳܗ̇ ܣܰܓܺܝܐܺܝܢ ܩܰܝ̈ܣܶܐ ܘܢܽܘܪܳܐ. ܘܰܢܫܰܡܬܶܗ ܕܡܳܪܝܳܐ ܐܰܝܟ݂ ܢܰܚܠܳܐ ܕܟܶܒܪܺܝܬ݂ܳܐ ܕܝܳܩܕܳܐ ܒܶܗ.

ܩܶܦܰܠܶܐܘܳܢ: ܠܐ

¹ ܘܳܝ ܠܰܕ݂ܢܳܚܬ݁ܺܝܢ ܠܡܶܨܪܶܝܢ ܠܡܶܬ݂ܥܰܕܳܪܽܘ: ܘܥܰܠ ܖ̈ܰܟ݂ܫܳܐ ܡܶܬ݁ܬܰܟ݂ܠܺܝܢ: ܘܡܶܬ݁ܬܰܟ݂ܠܺܝܢ ܥܰܠ ܡܰܖ̈ܟܒܳܬ݂ܳܐ ܣܰܓ̈ܝܳܐܬ݂ܳܐ: ܘܥܰܠ ܦܰܖ̈ܳܫܶܐ ܕܛܳܒ ܥܰܫܺܝܢܺܝܢ. ܘܠܳܐ ܐܶܬ݁ܬ݁ܟܶܠܘ ܥܰܠ ܩܰܕ݁ܺܝܫܳܐ ܕܺܝܣܪܳܐܶܝܠ: ܘܰܠܡܳܪܝܳܐ ܠܳܐ ܒܥܰܘ.² : ܘܰܒܚܶܟ݂ܡܬܶܗ ܐܰܝܬ݁ܺܝ ܒܺܝܫܬܳܐ: ܘܡܶܠܰܘ̈ܗܝ ܠܳܐ ܐܰܥܒܰܪ. ܘܩܳܡ ܥܰܠ ܒܰܝܬܳܐ ܕܒܺܝܫ̈ܶܐ: ܘܥܰܠ ܥܽܘܕ݂ܪܳܢܳܐ ܕܥܳܒܕܰܝ̈ ܥܰܘܠܳܐ. ³ ܘܡܶܨܖ̈ܳܝܶܐ ܐ̱ܢܳܫ̈ܳܐ ܐܶܢܽܘܢ: ܘܠܳܐ ܗܘܰܘ ܐܰܠܳܗ̈ܶܐ ܘܖ̈ܶܟ݂ܫܗܽܘܢ ܕܒܶܣܪܳܐ ܐܶܢܽܘܢ: ܘܠܳܐ ܗܘܰܘ ܕܪܽܘܚܳܐ. ܘܡܳܪܝܳܐ ܢܰܪܟܶܢ ܐܺܝܕܶܗ: ܘܢܶܣܬ݁ܚܶܦ ܡܥܰܕܪܳܢܳܐ. ܘܢܶܦܶܠ ܐܳܦ ܗܰܘ ܕܡܶܬ݂ܥܰܘܰܪ ܘܟܽܠܗܽܘܢ ܐܰܟ݂ܚܕ݂ܳܐ ܢܣܽܘܦܽܘܢ. ⁴ ܡܶܛܽܠ ܕܗܳܟ݂ܰܢܳܐ ܐܶܡܰܪ ܠܺܝ ܡܳܪܝܳܐ: ܐܰܝܟ݂ ܕܢܳܗܶܡ ܐܰܪܝܳܐ ܘܓܽܘܪܝܳܐ ܕܰܐܪܝܳܐ ܥܰܠ ܡܶܕܶܡ ܕܰܬܒܰܪ: ܘܩܳܥܶܝܢ ܒܶܗ ܣܽܘܓ݂ܳܐܐ ܕܖ̈ܳܥܳܘܳܬ݂ܳܐ ܘܡ̣ܶܢ ܩܳܠܗܽܘܢ ܠܳܐ ܕܳܚܶܠ: ܘܡ̣ܶܢ ܣܽܘܓܐܗܽܘܢ ܠܳܐ ܡܶܬ݁ܬ݁ܙܺܝܥ. ܗܳܟ݂ܰܢܳܐ ܢܶܚܽܘܬ݂ ܡܳܪܝܳܐ ܚܰܝܠܬ݂ܳܢܳܐ ܠܡܶܬ݂ܚܰܝܳܠܽܘ ܥܰܠ ܛܽܘܪܳܐ ܕܨܶܗܝܽܘܢ: ܘܥܰܠ ܖ̈ܳܡܳܬ݂ܳܗ̇. ⁵ ܐܰܝܟ݂ ܨܶܦܖ̈ܶܐ ܕܦܳܖ̈ܚܳܢ: ܗܳܟ݂ܰܢܳܐ ܢܰܓܶܢ ܡܳܪܝܳܐ ܚܰܝܠܬ݂ܳܢܳܐ ܥܰܠ ܐܽܘܪܺܫܠܶܡ: ܢܰܓܶܢ ܘܰܢܦܰܨܶܐ: ܘܰܢܣܰܝܰܥ ܘܰܢܥܰܕܰܪ. ⁶ ܬܽܘܒܘ ܒܢܰܝ̈ ܝܺܣܪܳܐܶܝܠ: ܕܰܐܥܫܶܢܬ݁ܽܘܢ ܡܰܪܕܽܘܬ݂ܳܐ. ⁷ ܡܶܛܽܠ ܕܰܒܝܰܘܡܳܐ ܗܰܘ: ܢܰܣܠܽܘܢ ܐ̱ܢܳܫ̈ܳܐ ܦܬܰܟ݂ܖ̈ܶܐ ܕܕܰܗܒܳܐ ܘܰܕ݂ܣܺܐܡܳܐ: ܕܰܥܒܰܕ݂ ܠܟ݂ܽܘܢ ܐܺܝܕܰܝ̈ܟܽܘܢ ܚܛܺܝܬ݂ܳܐ. ⁸ ܘܢܶܦܶܠ ܐܳܬ݂ܽܘܪܳܝܳܐ ܒܚܰܪܒܳܐ: ܚܰܪܒܳܐ ܠܳܐ ܕܓܰܒܖ̈ܶܐ: ܘܚܰܪܒܳܐ ܠܳܐ ܕܓܰܢ̱ܒܳܖ̈ܶܐ ܬܶܐܟ݂ܠܺܝܘܗܝ ܘܢܶܥܪܽܘܩ ܠܶܗ ܡ̣ܶܢ ܩܕ݂ܳܡ ܚܰܪܒܳܐ: ܘܰܥܠܰܝܡܰܘ̈ܗܝ ܠܳܐܬܳܐ ܢܶܗܘܽܘܢ. ⁹ ܘܒܰܫܩܺܝܦܳܐ ܕܡܰܥܡܪܶܗ ܢܶܥܡܰܪ. ܘܢܶܬ݁ܬܰܒܪܽܘܢ ܡ̣ܶܢ ܐܳܬܳܐ ܪܰܘܖ̈ܒܳܢܰܘܗܝ. ܐܳܡܰܪ ܡܳܪܝܳܐ ܕܢܽܘܗܪܶܗ ܒܨܶܗܝܽܘܢ: ܘܬܰܢܽܘܪܶܗ ܒܽܐܘܪܺܫܠܶܡ.

ܩܶܦܰܠܶܐܘܳܢ: ܠܒ

¹ ܗܳܐ ܒܙܰܕ݁ܺܝܩܽܘܬ݂ܳܐ ܡܰܠܟܳܐ. ܘܪܰܘܖ̈ܒܳܢܶܐ ܒܕ݂ܺܝܢܳܐ ܢܶܫܬܰܠܛܽܘܢ. ² ܘܢܶܗܘܶܐ ܓܰܒܪܳܐ ܐܰܝܟ݂ ܓܶܢܝܳܐ ܠܪܽܘܚܳܐ. ܘܰܐܝܟ݂ ܣܶܬܳܪܳܐ ܠܙܳܪܺܝܦܬܳܐ: ܘܰܐܝܟ݂ ܬܰܦܳܐ ܕܡܰܝ̈ܳܐ ܒܨܶܗܝܳܐ: ܘܰܐܝܟ݂ ܛܶܠܳܠܳܐ ܕܟܺܐܦܳܐ ܥܰܫܺܝܢܬܳܐ ܒܰܐܪܥܳܐ ܡܛܰܪܦܬܳܐ. ³ ܘܠܳܐ ܢܶܬ݁ܬ݁ܫܺܝ̈ܥܳܢ ܥܰܝܢܰܝ̈ܗܽܘܢ ܕܰܐܝܠܶܝܢ ܕܚܳܙܶܝܢ. ܘܶܐܕ݂ܢܰܝ̈ܗܽܘܢ ܕܰܐܝܠܶܝܢ ܕܫܳܡܥܺܝܢ: ܢܨܽܘ̈ܬ݂ܳܢ. ⁴ ܘܠܶܒܳܐ ܕܰܣܟܰܠ ܢܶܣܬܰܟܰܠ ܝܺܕܰܥܬ݂ܳܐ: ܘܠܶܫܳܢܳܐ ܕܠܰܥܓܳܐ ܢܶܣܬܰܪܗܰܒ ܠܰܡܡܰܠܳܠܘ ܫܠܳܡܳܐ. ⁵ ܘܠܳܐ ܢܶܩܪܽܘܢ ܬܽܘܒ ܠܫܳܛܝܳܐ ܫܰܠܺܝܛܳܐ. ܐܳܦܠܳܐ ܠܰܣܪܺܝܩܳܐ ܢܶܩܪܽܘܢ ܦܳܪܽܘܩܳܐ. ⁶ ܡܶܛܽܠ ܕܫܳܛܝܳܐ ܫܳܛܝܽܘܬ݂ܳܐ ܡܡܰܠܶܠ ܘܠܶܒܶܗ ܚܳܫܶܠ ܥܰܘܠܳܐ. ܕܢܶܥܒܶܕ݂ ܚܰܠܦܽܘܬ݂ܳܐ: ܘܰܢܡܰܠܶܠ ܥܰܠ ܛܳܥܝܽܘܬ݂ܳܐ: ܘܰܢܣܰܪܶܩ ܢܰܦܫܳܐ ܕܟܰܦܢܳܐ: ܘܡܰܫܬ݁ܝܳܐ ܕܨܶܗܝܳܐ ܢܓܰܝܶܙ. ⁷ ܒܺܝܫܺܝܢ ܐܶܢܽܘܢ ܡܳܐܢܰܘ̈ܗܝ ܕܰܣܪܺܝܩܳܐ. ܘܗܽܘ ܬܰܪܥܺܝܬ݂ܳܐ ܡܶܬ݂ܚܰܫܰܒ: ܠܰܡܚܰܒܳܠܘ ܡܶܣܟܺܢ̈ܶܐ ܒܡܶܐܡܪܳܐ ܕܫܽܘܩܪܳܐ: ܘܡܶܠܬ݂ܶܗ ܕܒܺܝܫܳܐ ܒܕܺܝܢܳܐ. ⁸ ܘܪܰܒܳܐ ܪܰܒܽܘܬ݂ܳܐ ܡܶܬ݂ܪܰܥܶܐ ܘܗܽܘ ܥܰܠ ܪܰܒܽܘܬ݂ܳܐ ܢܩܽܘܡ. ⁹ ܢܶܫ̈ܶܐ ܥܰܬ݁ܺܝܖ̈ܳܬ݂ܳܐ: ܩܽܘ̈ܡܶܝܢ ܫܡܰܥܶܝ̈ܢ ܩܳܠܝ. ܒܢ̈ܳܬ݂ܳܐ ܕܰܡܣܰܒܖ̈ܳܢ: ܨܽܘ̈ܬܶܝܢ ܡܶܠܰܝ̈. ¹⁰ ܝܰܘ̈ܡܳܬܳܐ ܕܫܰܢ̱ܬܳܐ ܢܶܖ̈ܓܙܳܢ ܐܰܝܠܶܝܢ ܕܰܡܣܰܒܖ̈ܳܢ. ܡܶܛܽܠ ܕܰܓܡܰܪ ܩܛܳܦܳܐ: ܘܶܐܬ݂ܚܡܶܠ: ܘܠܳܐ ܐܶܬ݂ܳܐ. ¹¹ ܙܽܘܥܶܝ̈ܢ ܥܰܬ݁ܺܝܖ̈ܳܬ݂ܳܐ: ܘܰܪܓܰܙܶܝܢ ܐܰܝܠܶܝܢ ܕܰܡܣܰܒܖ̈ܳܢ ܫܠܰܚܶܝ̈ܢ ܥܰܪܛܶܠ: ܡܚܳܝ݂ܶܝ݂̈ܢ ܣܰܩ̈ܶܐ ܒܚܰܨܰܝܟܶܝ̈ܢ. ¹² ܘܥܰܠ ܬܕܰܝ̈ܟܶܝܢ ܐܰܖ̈ܩܶܕܶܝܢ: ܥܰܠ ܬܰܕ݂ܐܳܐ ܕܚܰܩܠܳܐ: ܘܥܰܠ ܓܦܶܬܳܐ ܕܦܺܐܖ̈ܶܝܗ̇. ¹³ ܘܥܰܠ ܐܰܪܥܶܗ ܕܥܰܡܝ ܟܽܘ̈ܒܶܐ ܘܝܰܥܪܳܐ ܢܺܐܥܽܘܢ: ܘܰܒܟܽܠܗܽܘܢ ܒ̈ܳܬ݁ܶܐ ܕܚܰܕ݂ܽܘܬ݂ܳܐ: ܘܒܰܩܪܺܝܬ݂ܳܐ ܥܰܫܺܝܢܬܳܐ. ¹⁴ ܡܶܛܽܠ ܕܢܳܘܣܳܐ ܐܶܬ݁ܛܥܺܝ. ܘܚܰܝܠܳܐ ܕܰܩܪܺܝܬ݂ܳܐ ܐܶܫܬ݁ܒܶܩ. ܘܫܽܘܦܪܗܽܘܢ ܕܒ̈ܳܬ݁ܶܐ ܗܘܳܐ ܠܰܡܥܰܖ̈ܶܐ ܥܕܰܡܳܐ ܠܥܳܠܰܡ. ܟܽܘ̈ܒܶܐ ܘܚܰܕ݂ܽܘܬ݂ܳܐ ܠܰܥܖ̈ܳܕܶܐ: ܘܒܶܝܬ݂ ܪܶܥܝܳܐ ܠܰܓܙܳܖ̈ܶܐ ܕܥܳܢ̈ܳܐ. ¹⁵ ܥܕܰܡܳܐ ܕܬܶܬ݁ܥܺܝܪ ܥܠܰܝܢ ܪܽܘܚܳܐ ܡ̣ܶܢ ܡܪܰܘܡܳܐ: ܘܢܶܗܘܶܐ ܡܰܘܒܪܳܐ ܐܰܝܟ݂ ܟܰܪܡܠܳܐ: ܘܟܰܪܡܠܳܐ ܐܰܝܟ݂ ܥܳܒܳܐ ܢܶܬ݂ܚܫܶܒ. ¹⁶ ܘܢܶܫܪܶܐ ܕܺܝܢܳܐ ܒܡܰܕ݂ܒܪܳܐ: ܘܙܰܕܺܝܩܽܘܬܳܐ ܒܟܰܪܡܠܳܐ ܬܶܬ݂ܺܝܗܶܒ. ¹⁷ ܘܢܶܗܘܶܐ ܥܒܳܕ݂ܳܗ̇ ܕܙܰܕܺܝܩܽܘܬܳܐ ܫܠܳܡܳܐ: ܘܦܽܘܠܚܳܢܳܗ̇ ܕܙܰܕܺܝܩܽܘܬܳܐ ܫܶܠܝܳܐ: ܘܣܰܒܪܳܐ ܠܥܳܠܰܡ ܥܳܠܡܺܝܢ. ¹⁸ ܘܢܶܬܶܒ ܥܰܡܝ ܒܕܰܝܪܳܐ ܕܰܫܠܳܡܳܐ: ܘܰܒܡܰܫܟܢܳܐ ܕܣܰܒܪܳܐ: ܘܒܶܝܬ݂ ܡܰܫܪܝܳܐ ܕܣܰܒܪܳܐ. ¹⁹ ܘܒܰܪܕ݂ܳܐ ܢܶܚܽܘܬ݂ ܥܰܠ ܥܳܒܳܐ: ܘܰܐܝܟ݂ ܦܩܰܥܬ݂ܳܐ ܬܶܬ݂ܡܰܟܰܟ݂ ܡܕ݂ܺܝܢ̱ܬܳܐ. ²⁰ ܛܽܘܒܰܝܟܽܘܢ ܕܙܳܪܥܺܝܢ ܥܰܠ ܟܽܠ ܡܺܝ̈ܢ: ܟܰܪ ܕܕܰܪܶܟ݂ ܬܰܘܪܳܐ ܘܰܚܡܳܪܳܐ.

ܩܶܦܰܠܶܐܘܳܢ: ܠܓ

¹ ܘܳܝ ܠܰܕ݂ܒܳܐܶܙ ܐܰܢ̱ܬ݁ܽܘܢ ܠܳܐ ܬܶܒܙܽܘܢ. ܘܕܰܓܳܠܳܐ ܠܳܐ ܢܕܰܓܶܠ ܒܟ݂ܽܘܢ. ܡܳܐ ܕܰܨܒܰܝܬ݁ܽܘܢ ܠܡܶܒܰܙ: ܬܶܬ݂ܒܰܙܽܘܢ. ܘܡܳܐ ܕܰܨܒܰܝܬ݁ܽܘܢ ܠܰܡܕܰܓܠܽܘ: ܢܶܬ݁ܕܰܠܰܓ ܒܟ݂ܽܘܢ. ² ܡܳܪܝܳܐ: ܪܰܚܶܡ ܥܠܰܝܢ: ܡܶܛܽܠ ܕܰܥܠܰܝܟܽܘ ܣܰܒܪܰܢ. ܗܘܺܝ ܥܳܕ݂ܽܘܪܰܢ ܒܨܰܦܪܳܐ: ܘܦܳܪܽܘܩܰܢ ܒܙܰܒܢܳܐ ܕܽܐܘܠܨܳܢܳܐ. ³ ܡ̣ܶܢ ܩܳܠ ܕܶܚܠܬܳܟ݂ ܢܳܕ݂ܘ ܥܰܡ̈ܡܶܐ ܘܡ̣ܶܢ ܪܳܡܽܘܬ݂ܳܟ݂ ܐܶܬ݂ܒܰܕܰܪܘ ܥܰܡ̈ܡܶܐ. ⁴ ܡܶܟܺܝܠ ܬܶܬ݂ܟܢܶܫ ܒܶܙܬܟ݂ܽܘܢ ܐܰܝܟ݂ ܟܢܽܘܫܝܳܐ ܕܙܳܚܠܳܐ: ܘܰܐܝܟ݂ ܟܢܽܘܫܝܳܐ ܕܩܰܡܨܳܐ ܕܰܟ݂ܢܺܝܫ. ⁵ ܐܶܬ݁ܬ݁ܪܺܝܡ ܡܳܪܝܳܐ ܕܥܳܡܰܪ ܒܰܡܖ̈ܰܘܡܶܐ. ܘܰܡܠܳܗ̇ ܠܨܶܗܝܽܘܢ ܕܺܝܢܳܐ ܘܙܰܕܺܝܩܽܘܬܳܐ. ⁶ ܘܢܶܗܘܶܐ ܙܰܒܢܳܟ݂ ܗܰܝܡܳܢܽܘܬ݂ܳܐ: ܘܦܽܘܪܩܳܢܳܟ݂ ܒܣܶܬܳܪܳܐ. ܚܶܟ݂ܡܬ݂ܳܐ ܘܺܝܕܰܥܬ݂ܳܐ: ܕܶܚܠܬ݂ܳܐ ܕܡܳܪܝܳܐ ܗܺܝ ܗ̱ܝ ܓܰܙܶܗ. ⁷ ܐܶܢ ܢܶܬ݂ܚܙܶܐ ܠܗܽܘܢ: ܢܰܝܠܠܽܘܢ ܩܰܫܝܳܐܺܝܬ݂. ܘܡܰܠܰܐܟ̈ܶܐ ܕܰܫܠܳܡܳܐ ܢܶܒܟܽܘܢ ܡܰܪܺܝܪܳܐܺܝܬ݂. ⁸ ܨܕ݂ܰܘ ܫܒܺܝ̈ܠܶܐ: ܘܰܒܛܶܠܘ ܥܳܒܖ̈ܰܝ ܐܽܘܪܚܳܐ. ܘܰܒܛܶܠ ܩܝܳܡܳܐ. ܘܩܽܘܖ̈ܝܳܐ ܐܶܣܬ݁ܠܺܝ ܘܐ̱ܢܳܫܳܐ ܠܳܐ ܐܶܬ݂ܚܫܶܒܘ.⁹ : ܐܰܠܰܬ ܘܝܶܬ݂ܒܰܬ ܒܶܐܒܠܳܐ ܐܰܪܥܳܐ. ܘܰܐܚܦܰܪ ܠܶܒܢܳܢ ܘܰܒܗܶܬ݂. ܘܰܗܘܳܐ ܫܰܪܘܳܢܳܐ ܐܰܝܟ݂ ܦܩܰܥܬ݂ܳܐ. ܚܶܪܒܰܬ ܒܰܝܫܳܢ ܘܟܰܪܡܠܳܐ. ¹⁰ ܡܶܟܺܝܠ ܐܶܩܽܘܡ ܐܳܡܰܪ ܡܳܪܝܳܐ: ܡܶܟܺܝܠ ܐܶܬ݁ܬ݁ܪܺܝܡ: ܘܡܶܟܺܝܠ ܐܶܫܬܰܩܰܠ. ¹¹ ܘܬܶܒܛܢܽܘܢ ܟܽܘ̈ܒܶܐ: ܘܬܺܐܠܕܽܘܢ ܩܶܫܬ݂ܳܐ ܒܪܽܘܚܟ݂ܽܘܢ. ܢܽܘܪܳܐ ܬܶܐܟ݂ܽܘܠܟ݂ܽܘܢ.¹² ܘܢܶܗܘܽܘܢ ܥܰܡ̈ܡܶܐ ܡܰܘܩܕ݂ܺܝܢ ܐܰܝܟ݂ ܟܶܠܫܳܐ. ܘܰܐܝܟ݂ ܟܽܘ̈ܒܶܐ ܕܰܟ݂ܢܺܝܫܺܝܢ ܒܢܽܘܪܳܐ ܢܺܐܩܕܽܘܢ.¹³ ܫܡܰܥܘ ܖ̈ܰܚܺܝܩܶܐ ܡܶܕܶܡ ܕܥܶܒܕܶܬ݂ ܘܕܰܥܘ ܩܰܖ̈ܺܝܒܶܐ ܓܰܢ̱ܒܳܪܽܘܬ݂ܝ. ¹⁴ ܐܶܬ݂ܪܗܶܒܘ ܚܰܛܳܝ̈ܶܐ ܒܨܶܗܝܽܘܢ. ܘܰܪܬܺܝܬ݂ܳܐ ܢܦܰܠ ܒܚܰܢ̈ܦܶܐ. ܡܰܢܘ ܢܶܥܡܰܪ ܠܰܢ ܥܰܡ ܢܽܘܪܳܐ ܐܳܟܶܠܬ݂ܳܐ. ܘܡܰܢܽܘ ܢܶܥܡܰܪ ܠܰܢ ܥܰܡ ܡܰܘܩܕܰܬ݂ ܥܳܠ̈ܡܶܐ. ¹⁵ ܕܰܡܗܰܠܶܟ݂ ܒܙܰܕܺܝܩܽܘܬܳܐ: ܘܰܡܡܰܠܶܠ ܬܪܺܝܨܽܘܬ݂ܳܐ: ܘܣܳܢܶܐ ܢܶܟ݂ܠܳܐ ܘܰܛܠܽܘܡܝܳܐ: ܘܢܳܦܶܨ ܐܺܝܕܶܗ ܡ̣ܶܢ ܕܰܠܡܶܣܰܒ ܫܽܘܚܕܳܐ: ܘܰܡܣܰܟܰܪ ܐܶܕ݂ܢܰܘ̈ܗܝ ܕܠܳܐ ܢܶܫܡܰܥ: ܘܰܡܥܰܡܶܨ ܥܰܝܢܰܘ̈ܗܝ ܕܠܳܐ ܢܶܚܙܶܐ ܒܺܝܫܬܳܐ. ¹⁶ ܗܳܢܳܐ ܒܰܡܪܰܘܡܳܐ ܢܶܥܡܰܪ. ܘܰܒܥܽܘܫܢܳܐ ܕܰܫܩܺܝܦܳܐ ܡܰܫܪܝܶܗ. ܠܰܚܡܶܗ ܝܺܗܺܝܒ: ܘܡܰܘ̈ܗܝ ܡܗܰܝܡܢܺܝܢ. ¹⁷ ܠܡܰܠܟܳܐ ܒܫܽܘܦܪܶܗ ܢܶܚ̈ܙܝܳܢ ܥܰܝܢܰܝ̈ܟ: ܒܰܐܖ̈ܥܳܬ݂ܳܐ ܖ̈ܰܚܺܝܩܳܬ݂ܳܐ. ܘܠܶܒܳܟ݂ ܢܶܬ݂ܝܰܠܰܦ ܕܶܚܠܬ݂ܳܐ. ¹⁸ ܐܰܝܟܳܐ ܗ̱ܘ̣ ܣܳܦܪܳܐ ܐܰܝܟܳܐ ܗ̱ܘ̣ ܬܳܩܽܘܠܳܐ ܐܰܝܟܰܘ ܕܡܳܢܳܐ ܡܰܓ̈ܕܠܶܐ ܠܥܰܡܳܐ ܥܰܫܺܝܢܳܐ. ¹⁹ ܠܳܐ ܢܚܽܘܪ ܠܥܰܡܳܐ ܕܰܥܛܶܠ ܫܶܡܥܶܗ: ܘܰܠܥܶܓ ܠܶܫܳܢܶܗ: ܘܠܳܐ ܡܶܣܬܰܟܰܠ. ²⁰ ܚܙܺܝ ܠܨܶܗܝܽܘܢ ܩܪܺܝܬ݂ܳܐ ܕܥܰܕ݂ܥܺܕܰܝ̈ܢ. ܘܥܰܝܢܰܝ̈ܟ ܢܚܽܘܖ̈ܳܢ ܒܽܐܘܪܺܫܠܶܡ ܕܰܝܪܳܐ ܥܰܬ݁ܺܝܪܬܳܐ. ܡܰܫܟܢܳܐ ܕܠܳܐ ܙܳܐܰܥ: ܘܠܳܐ ܡܶܬ݂ܥܰܩܖ̈ܳܢ ܣܶܟܰܘ̈ܗܝ ܠܥܳܠܡܺܝܢ: ܘܟܽܠܗܽܘܢ ܛܽܘܢܒܰܘ̈ܗܝ ܠܳܐ ܡܶܬ݂ܦܰܣܩܺܝܢ. ²¹ ܡܶܛܽܠ ܕܡܳܪܝܳܐ ܫܡܳܐ ܗ̱ܘ̣ ܠܰܢ ܡܫܰܒܚܳܐ ܘܗܽܘ ܢܶܗܘܶܐ ܠܰܢ ܐܰܬ݂ܪܳܐ ܢܰܗܺܝܪܳܐ: ܘܢܰܗܺܝܪܽܘܬ݂ܳܐ ܘܰܪܘܰܚܬ݂ܳܐ ܕܺܐܝ̈ܕܰܝܳܐ. ܕܠܳܐ ܬܰܡܠܶܟ݂ ܡܳܪܽܘܬ݂ܳܐ ܕܫܰܠܺܝܛܳܐ ܘܥܰܫܺܝܢܳܐ ܕܢܶܫܬ݁ܟܰܚ: ܠܳܐ ܢܶܥܒܰܪ ܒܳܗ̇. ²² ܡܶܛܽܠ ܕܡܳܪܝܳܐ ܗ̱ܘ̣ ܕܰܝܳܢܳܐ ܘܡܳܪܝܳܐ ܗ̱ܘ̣ ܡܒܰܕܩܳܢܳܐ. ܘܡܳܪܝܳܐ ܗ̱ܘ̣ ܡܰܠܟܰܢ: ܘܗܽܘܝܽܘ ܦܳܪܽܘܩܰܢ. ²³ ܐܶܫܬ݁ܪܺܝܘ ܚܰܒܠܰܝ̈ܟܝ ܕܠܳܐ ܐܶܫܬܰܪܰܪܘ ܘܶܐܬ݂ܪܟܶܢܘ ܥܰܡܽܘܕܰܝ̈ܟܝ ܕܠܳܐ ܦܫܰܛܘ ܐܳܬܳܐ: ܥܕܰܡܳܐ ܕܦܰܠܶܓܘ ܒܶܙܬ݂ܳܐ: ܘܣܽܘܓ݂ܳܐܐ ܕܰܚܓܺܝܖ̈ܶܐ ܫܒܰܘ ܫܒܺܝܬ݂ܳܐ. ²⁴ ܘܠܳܐ ܢܺܐܡܰܪ ܥܳܡܽܘܪܳܐ ܕܰܟ݂ܪܺܝܗ ܐ̱ܢܳܐ ܥܰܡܳܐ ܕܝܳܬܶܒ ܒܳܗ̇: ܩܰܒܶܠ ܚܛܳܗܳܐ.

ܩܶܦܰܠܶܐܘܳܢ: ܠܕ

¹ ܐܰܬ݂ܪܳܐ ܕܕܺܝܢܳܐ. ܩܪܽܘܒܘ ܥܰܡ̈ܡܶܐ ܠܡܶܫܡܰܥ: ܘܨܽܘܬܶܝܢ ܐܶܡ̈ܘܳܬ݂ܳܐ. ܬܶܫܡܰܥ ܐܰܪܥܳܐ ܒܰܡܠܳܐܳܗ̇: ܘܟܽܠܗܽܘܢ ܥܳܡܽܘܖ̈ܶܝܗ̇. ² ܡܶܛܽܠ ܕܪܽܘܓܙܶܗ ܕܡܳܪܝܳܐ ܥܰܠ ܟܽܠܗܽܘܢ ܥܰܡ̈ܡܶܐ. ܘܚܶܡܬܶܗ ܥܰܠ ܟܽܠܶܗ ܚܰܝܠܗܽܘܢ ܕܢܶܚܪܽܘܒ ܐܶܢܽܘܢ: ܘܢܰܫܠܶܡ ܐܶܢܽܘܢ ܠܩܶܛܠܳܐ. ³ ܘܢܶܫܬ݁ܕ݂ܽܘܢ ܩܛܺܝܠܰܝ̈ܗܽܘܢ. ܘܢܶܡܚܶܐ ܪܺܝܚܳܐ ܕܰܫܠܰܕܰܝ̈ܗܽܘܢ. ܘܢܶܬ݂ܡܣܽܘܢ ܛܽܘܖ̈ܶܐ ܡ̣ܶܢ ܕܶܡܗܽܘܢ. ⁴ ܘܢܶܬ݂ܡܣܽܘܢ ܟܠ ܚܰܝ̈ܠܰܘܳܬ݂ܳܐ ܕܰܫܡܰܝܳܐ. ܘܢܶܬ݂ܟܰܪܟܽܘܢ ܫܡܰܝܳܐ ܐܰܝܟ݂ ܡܓܰܠܬ݂ܳܐ. ܘܟ݂ܽܠܶܗ ܚܰܝܠܗܽܘܢ ܢܶܬܰܪ: ܐܰܝܟ݂ ܛܰܪܦܳܐ ܕܢܳܬܰܪ ܡ̣ܶܢ ܓܦܶܬܳܐ: ܘܰܐܝܟ݂ ܦܰܩܽܘܥܳܐ ܡ̣ܶܢ ܬܺܬܳܐ. ⁵ ܡܶܛܽܠ ܕܬܶܬ݂ܪܘܶܐ ܚܰܪܒܝ ܒܰܫܡܰܝܳܐ. ܗܳܐ ܥܰܠ ܐܰܕ݂ܽܘܡܳܝ̈ܶܐ ܬܶܚܽܘܬ݂: ܥܰܠ ܥܰܡܳܐ ܕܶܐܬ݂ܚܰܝܰܒ ܒܕܺܝܢܳܐ. ⁶ ܚܰܪܒܶܗ ܕܡܳܪܝܳܐ ܡܰܠܝܳܐ ܕܡܳܐ. ܐܶܬ݁ܕܰܗܢܰܬ ܡ̣ܶܢ ܕܡܳܐ ܘܡ̣ܶܢ ܬܰܪܒܳܐ ܕܰܡܦܰܛ̈ܡܶܐ: ܘܕܰܓ̣ܕܰܝ̈ܳܐ: ܘܬܰܪܒܳܐ ܕܟ݂ܽܘܠ̈ܝܳܬ݂ܳܐ ܕܕܶܟ݂ܖ̈ܶܐ. ܡܶܛܽܠ ܕܕܶܒܚܬ݂ܳܐ ܠܡܳܪܝܳܐ ܒܒܽܘܨܳܪ: ܘܩܶܛܠܳܐ ܪܰܒܳܐ ܒܰܐܪܥܳܐ ܕܰܐܕ݂ܽܘܡ. ⁷ ܘܢܶܦܠܽܘܢ ܖ̈ܰܝܡܶܐ ܥܰܡܗܽܘܢ: ܘܬܰܘܖ̈ܶܐ ܥܰܡ ܐܰܖ̈ܘܳܢܶܐ. ܘܬܶܬܪܘܶܐ ܐܰܪܥܳܐ ܡ̣ܶܢ ܕܶܡܗܽܘܢ. ܘܥܰܦܪܳܐ ܡ̣ܶܢ ܬܰܪܒܗܽܘܢ ܢܶܕ݂ܗܰܢ.⁸ ܡܶܛܽܠ ܕܝܰܘܡܳܐ ܕܰܬ݂ܒܰܥܬ݂ܳܐ ܠܡܳܪܝܳܐ: ܘܫܰܢ̱ܬܳܐ ܕܦܽܘܪܥܳܢܳܐ ܠܕܰܝܳܢܳܐ ܕܨܶܗܝܽܘܢ.⁹ ܘܢܶܬ݂ܗܰܦܟܽܘܢ ܢܰܚ̈ܠܶܝܗ̇ ܠܙܶܦܬܳܐ: ܘܥܰܦܪܳܗ̇ ܠܟܶܒܪܺܝܬ݂ܳܐ ܘܬܶܗܘܶܐ ܐܰܪܥܳܗ̇ ܙܶܦܬܳܐ ܕܝܳܩܕܳܐ.¹⁰ ܘܠܳܐ ܬܶܕ݂ܥܰܟ݂ ܠܺܠܝܳܐ ܘܺܐܝܡܳܡܳܐ ܘܰܠܥܳܠܰܡ ܢܶܣܰܩ ܬܶܢܳܢܳܗ̇ ܘܬܶܚܪܰܒ ܠܕ݂ܳܪܕܳܖ̈ܺܝܢ. ܘܰܠܥܳܠܰܡ ܥܰܠܡܺܝܢ ܐ̱ܢܳܫ ܠܳܐ ܢܶܥܒܰܪ ܒܳܗ̇. ¹¹ ܕܢܺܐܪܬ݁ܽܘܢܳܗ̇ ܩܳܩ̈ܶܐ ܘܩܽܘ̈ܦܕܶܐ. ܘܩܰܦܽܘ̈ܦܶܐ ܘܢܰܥ̈ܒܶܐ ܢܶܫܪܽܘܢ ܒܳܗ̇. ¹² ܘܢܶܬ݂ܡܬܰܚ ܥܠܶܝܗ̇ ܚܽܘܛܳܐ ܕܚܰܪܒܳܐ ܘܠܳܐ ܬܶܗܘܶܐ ܬܰܡܳܢ ܚܰܕ݂ܽܘܬ݂ܳܐ. ܐܳܦܠܳܐ ܢܶܩܪܽܘܢ ܬܰܡܳܢ ܡܰܠܟܽܘܬ݂ܳܐ. ܘܟܽܠܗܽܘܢ ܪܰܘܖ̈ܒܳܢܶܝܗ̇ ܢܶܗܘܽܘܢ ܠܰܐܒܕܳܢܳܐ. ¹³ ܘܢܺܐܥܽܘܢ ܟܽܘ̈ܒܶܐ ܒܣܳܚܖ̈ܳܬܳܗ̇: ܘܩܽܘܖ̈ܛܒܶܐ ܘܕܰܕܖ̈ܶܐ ܒܥܽܘܫܢܳܗ̇. ܘܬܶܗܘܶܐ ܕܰܝܪܳܐ ܕܝܳܪܽܘܖ̈ܶܐ: ܘܒܶܝܬ݂ ܪܶܥܝܳܐ ܠܰܒ̈ܢܳܬ݂ ܢܰܥ̈ܡܶܐ. ¹⁴ ܘܢܶܐܪܥܽܘܢ ܒܳܗ̇ ܖ̈ܽܘܚܶܐ ܒܦܶܓܥ̈ܶܐ. ܘܫܺܐܕ݂ܳܐ ܠܚܰܒܪܶܗ ܢܶܩܪܶܐ. ܬܰܡܳܢ ܐܶܬ݁ܬ݁ܢܺܝܚܰܬ݂ ܐܶܠܺܝܬ݂ܳܐ. ܘܶܐܫܟܚܰܬ ܠܳܗ̇ ܢܝܳܚܳܐ. ¹⁵ ܘܬܰܡܳܢ ܐܰܩܢܰܬ ܩܽܘܦܕܳܐ: ܘܶܐܬ݂ܢܰܦܨܰܬ ܘܚܶܠܕܰܬ݂ ܘܒܶܙܥܰܬ݂ ܒܛܶܠܳܠܳܗ̇. ܘܬܰܡܳܢ ܐܶܬ݂ܟܰܢܰܫ ܕܰܝ̈ܬ݂ܶܐ ܚܕ݂ܳܐ ܠܘܳܬ݂ ܚܕ݂ܳܐ. ¹⁶ ܒܥܰܘ ܒܰܟ݂ܬ݂ܳܒܶܗ ܕܡܳܪܝܳܐ ܘܰܩܪܰܘ. ܕܰܚܕ݂ܳܐ ܡܶܢܗܶܝܢ ܠܳܐ ܛܥܳܬ. ܘܰܚܕ݂ܳܐ ܠܰܚܕ݂ܳܐ ܠܳܐ ܒܥܰܝ̈. ܐܶܠܳܐ ܗܽܘ ܦܩܰܕ݂ ܒܦܽܘܡܶܗ. ܘܪܽܘܚܶܗ ܟܰܢܫܰܬ ܐܶܢܶܝܢ. ¹⁷ ܘܗܽܘ ܐܰܪܡܺܝ ܠܗܶܝܢ ܦܶܨ̈ܶܐ. ܘܺܐܝܕܶܗ ܦܰܠܓܰܬ ܠܗܶܝܢ ܡܽܘܫ̈ܚܳܬ݂ܳܐ: ܕܰܥܕܰܡܳܐ ܠܥܳܠܰܡ ܢܺܐܖ̈ܬܳܢܳܗ̇: ܘܰܠܕ݂ܳܪܕܳܖ̈ܺܝܢ ܢܶܫܖ̈ܝܳܢ ܒܳܗ̇.

ܩܶܦܰܠܶܐܘܳܢ: ܠܗ

¹ ܢܶܚܕܶܐ ܡܰܕ݂ܒܪܳܐ ܨܶܗܝܳܐ. ܘܰܬ݁ܕ݂ܽܘܨ ܦܩܰܥܬ݂ܳܐ: ܘܬܰܦܪܰܥ ܐܰܝܟ݂ ܚܰܡܨܰܠܳܝܬܳܐ. ² ܘܰܬ݁ܕ݂ܽܘܨ ܐܰܝܟ݂ ܕܰܝܨܳܐ. ܘܰܒܫܽܘܒܚܳܐ ܐܺܝܩܳܪܳܐ ܕܠܶܒܢܳܢ ܢܶܬ݂ܺܝܗܶܒ ܠܳܗ̇. ܘܗܶܕܪܶܗ ܕܟܰܪܡܠܳܐ ܘܰܕ݂ܫܰܪܘܳܢܳܐ. ܗܶܢܽܘܢ ܢܶܚܙܽܘܢ ܐܺܝܩܳܪܶܗ ܕܡܳܪܝܳܐ: ܘܗܶܕ݂ܪܽܗ ܕܰܐܠܳܗܰܢ. ³ ܙܽܘܗܳܪܳܐ ܘܠܽܘܒܳܒܳܐ ܕܰܡܚܺܝ̈ܠܶܐ ܕܳܐܬܶܐ ܦܳܪܽܘܩܳܐ ܘܦܳܪܶܩ ܠܗܽܘܢ. ܐܶܬ݂ܚܰܝܰܠܶܝ̈ܢ ܐܺܝ̈ܕܰܝܳܐ ܕܡܰܖ̈ܦܝܳܢ. ܘܒܽܘܖ̈ܟܳܐ ܕܖ̈ܳܥܠܳܢ ܐܶܫܬܰܪܰܖ̈ܶܝܢ. ⁴ ܐܶܡܰܪܘ ܠܰܙܥܽܘܖ̈ܰܝ ܠܶܒܳܐ: ܐܶܬ݂ܚܰܝܰܠܘ ܘܠܳܐ ܬܶܕ݂ܚܠܽܘܢ ܗܳܐ ܐܰܠܳܗܟ݂ܽܘܢ ܬܳܒܽܘܥܳܐ ܐܳܬ݁ܶܐ. ܐܰ‌ܠܳܗܳܐ ܦܳܪܽܘܩܳܐ ܐܳܬ݁ܶܐ: ܘܦܳܪܶܩ ܠܟ݂ܽܘܢ. ⁵ ܗܳܝܕܶܝܢ ܢܶܬ݂ܦܰܬ݁ܚ̈ܳܢ ܥܰܝܢܰܝ̈ܗܽܘܢ ܕܰܥܘܺܝܖ̈ܶܐ. ܘܶܐܕ݂ܢܰܝ̈ܗܽܘܢ ܕܚܰܖ̈ܫܶܐ ܢܶܬ݂ܦܰܬ݁ܚ̈ܳܢ. ⁶ ܗܳܝܕܶܝܢ ܢܩܰܝܶܙ ܚܓܺܝܖ̈ܶܐ ܐܰܝܟ݂ ܐܰܝܠܳܐ. ܘܢܶܬ݂ܦܫܶܛ ܠܶܫܳܢܶܗ ܕܦܺܐܩܳܐ. ܡܶܛܽܠ ܕܶܐܬ݁ܬ݁ܪܰܥܘ ܡܰܝ̈ܳܐ ܒܡܰܕ݂ܒܪܳܐ: ܘܢܰܚ̈ܠܶܐ ܒܰܦܩܰܥܬ݂ܳܐ. ⁷ ܢܶܗܘܽܘܢ ܐܰܓ̈ܡܶܐ ܒܰܐܬ݂ܪܳܐ ܚܽܘܪܒܳܐ: ܘܡܰܒܽܘܥܳܐ ܕܡܰܝ̈ܳܐ ܒܶܝܬ݂ ܨܰܗ̈ܘܳܢܶܐ. ܢܺܐܥܶܐ ܥܡܺܝܪܳܐ ܘܩܰܢܝܳܐ ܘܰܐܪܒܢܳܐ ܒܕܰܝܪܳܐ ܕܝܳܪܽܘܖ̈ܶܐ. ⁸ ܘܢܶܗܘܶܐ ܬܰܡܳܢ ܫܒܺܝܠܳܐ: ܐܘܪܚܳܐ ܩܰܕܺܝܫܬܳܐ ܢܶܬ݂ܩܪܶܐ: ܘܠܳܐ ܬܶܥܒܰܪ ܒܶܗ ܛܰܢܦܽܘܬ݂ܳܐ. ܘܠܳܐ ܬܶܗܘܶܐ ܒܶܗ ܐܽܘܪܚܳܐ. ܘܣܰܟ݂̈ܠܐ ܠܳܐ ܢܶܛܥܽܘܢ ܬܰܡܳܢ. ⁹ ܘܠܳܐ ܢܶܗܘܶܐ ܬܰܡܳܢ ܐܰܪܝܳܐ. ܘܚܰܝ̈ܘܳܬ݂ܳܐ ܒܺܝ̈ܫܳܬܳܐ ܠܳܐ ܢܶܣ̈ܩܳܢ: ܘܠܳܐ ܢܶܫܬܰܟ݂̈ܚܳܢ ܬܰܡܳܢ. ¹⁰ ܘܢܺܐܙܽܠܘܢ ܦܖ̈ܺܝܩܶܐ: ܦܖ̈ܺܝܩܰܘܗܝ ܕܡܳܪܝܳܐ. ܘܢܶܬ݂ܦܢܽܘܢ ܘܢܶܥܠܽܘܢ ܠܨܶܗܝܽܘܢ ܒܫܽܘܒܚܳܐ. ܘܰܠܥܳܠܡܺܝܢ ܬܶܗܘܶܐ ܚܰܕ݂ܽܘܬ݂ܳܐ ܥܰܠ ܖ̈ܺܝܫܰܝܗܽܘܢ. ܒܽܘܣܳܡܳܐ ܘܚܰܕ݂ܽܘܬ݂ܳܐ ܢܰܕ݂ܪܟ݂ܽܘܢ. ܘܢܶܥܪܩܽܘܢ ܕܽܘ̈ܘܳܢܶܐ ܘܬܶܢ̈ܚܳܬ݂ܳܐ.

ܩܶܦܰܠܶܐܘܳܢ: ܠܘ

¹ ܘܰܗܘܳܬ݂ ܒܰܫܢܰܬ݂ ܐܰܪܒܰܥܶܣܖ̈ܶܐ ܕܚܶܙܰܩܝܳܐ ܡܰܠܟܳܐ ܕܺܝܗܽܘܕܳܐ: ܣܠܶܩ ܣܰܢܚܶܪܺܝܒ ܡܰܠܟܳܐ ܕܳܐܬ݂ܽܘܪ: ܥܰܠ ܟܽܠܗܶܝܢ ܡܕ݂ܺܝ̈ܢܳܬ݂ܳܐ ܥܰܫܺܝ̈ܢܳܬ݂ܳܐ ܕܺܝܗܽܘܕ݂ܳܐ. ܘܶܐܚܰܕ݂ ܐܶܢܶܝܢ. ² ܘܫܰܕܰܪ ܡܰܠܟܳܐ ܕܳܐܬ݂ܽܘܪ ܡ̣ܶܢ ܠܟ݂ܺܝܫ ܠܪܰܒ ܫܳܩ̈ܶܐ: ܠܘܳܬ݂ ܚܶܙܰܩܝܳܐ ܡܰܠܟܳܐ ܠܽܐܘܪܺܫܠܶܡ: ܒܚܰܝܠܳܐ ܣܰܓܺܝܐܳܐ. ܘܩܳܡ̣ ܒܡܰܣܰܩܬ݂ܳܐ ܕܝܰܡܬ݂ܳܐ ܥܶܠܳܝܬܳܐ ܕܒܽܐܘܪܚܳܐ ܕܚܰܩܠܶܗ ܕܩܰܨܪܳܐ. ³ ܘܰܢܦܰܩ ܠܘܳܬܶܗ ܐܶܠܝܳܩܺܝܡ ܒܰܪ ܚܶܠܰܩܝܳܐ ܪܰܒܒܰܝܬܳܐ: ܘܫܰܒܢܳܐ ܣܳܦܪܳܐ: ܘܝܽܘܐܳܚ ܒܰܪ ܐܳܣܳܦ ܡܓܰܗܕ݂ܳܢܳܐ. ⁴ ܘܶܐܡܰܪ ܠܗܽܘܢ ܪܰܒ ܫܳܩ̈ܶܐ: ܐܶܡܰܪܘ ܠܚܶܙܰܩܝܳܐ: ܗܳܟ݂ܰܢܳܐ ܐܳܡܰܪ ܡܰܠܟܳܐ ܪܰܒܳܐ ܡܰܠܟܳܐ ܕܳܐܬ݂ܽܘܪ: ܡܳܢܳܐ ܗ̱ܘ̣ ܬܽܘܟܠܳܢܳܐ ܗܳܢܳܐ ܕܶܐܬ݁ܬ݁ܟܶܠܬ݁. ⁵ ܘܶܐܡܰܪܬ݁ ܕܺܐܝܬ݂ ܒܳܟ݂ ܡܰܡܠܠܳܐ ܕܣܶܦ̈ܘܳܬ݂ܳܐ: ܘܬܰܪܥܺܝܬ݂ܳܐ ܘܓܰܢ̱ܒܳܪܽܘܬ݂ܳܐ ܠܰܩܪܳܒܳܐ. ܗܳܫܳܐ ܥܰܠ ܡܰܢܽܘ ܐܶܬ݁ܬ݁ܟܶܠܬ݁: ܕܰܡ̣ܪܰܕܬ݁ ܥܠܰܝ. ⁶ ܗܳܐ ܐܶܬ݁ܬ݁ܟܶܠܬ݁ ܥܰܠ ܣܳܡ̇ܟܳܐ ܕܩܰܢܝܳܐ ܪܥܺܝܥܳܐ: ܥܰܠ ܡܶܨܪܳܝܳܐ. ܕܡܳܐ ܕܶܐܣܬ݁ܡܶܟ݂ ܓܰܒܪܳܐ ܥܠܰܘܗ̱ܝ: ܥܳܐܶܠ ܒܺܐܝܕܶܗ ܘܒܰܙܰܥ ܠܳܗ̇. ܗܳܟ݂ܰܢܳܐ ܗ̱ܘ̣ ܦܶܪܥܽܘܢ ܡܰܠܟܳܐ ܕܡܶܨܪܶܝܢ ܠܟ݂ܽܠ ܕܡܶܬ݁ܬܰܟ݂ܠܺܝܢ ܥܠܰܘܗ̱ܝ. ⁷ ܘܶܐܢ ܬܺܐܡܰܪ ܠܺܝ ܕܥܰܠ ܡܳܪܝܳܐ ܐܰܠܳܗܰܢ ܐܶܬ݁ܬ݁ܟܶܠܢ: ܡܳܢܳܐ ܐܰܘܬܰܪ ܚܶܙܰܩܝܳܐ ܕܰܐܥܒܰܪ ܥܳܠܰܘ̈ܳܬ݂ܳܐ ܘܡܰܕ݂ܒܚ̈ܶܐ ܘܶܐܡܰܪ ܠܺܝܗܽܘܕ݂ܳܐ ܘܠܽܐܘܪܺܫܠܶܡ: ܕܰܩܕ݂ܳܡ ܡܰܕܒܚܳܐ ܚܰܕ݂ ܬܶܣܓܕ݂ܽܘܢ. ⁸ ܘܗܳܫܳܐ ܐܶܬ݂ܚܰܠܰܛ ܥܰܡ ܡܳܪܝ ܡܰܠܟܳܐ ܐܳܬ݂ܽܘܪܳܝܳܐ. ܘܶܐܬ݁ܶܠ ܠܳܟ݂ ܬܪܶܝܢ ܐܰܠܦܺܝ̈ܢ ܖ̈ܰܟ݂ܫܳܐ: ܐܶܢ ܐܺܝܬ݂ ܠܳܟ݂ ܦܰܖ̈ܳܫܶܐ ܕܬܰܪܟܶܒ ܥܠܰܝܗܽܘܢ. ⁹ ܘܰܐܝܟܰܢܳܐ ܡܰܗܦܶܟ݂ ܐܰܢ̱ܬ݁ ܐܰܦ̈ܶܐ ܕܚܰܕ݂ ܡ̣ܶܢ ܥܰܒܕܰܘ̈ܗܝ ܙܥܽܘܖ̈ܶܐ ܕܡܳܪܝ. ܘܶܐܬ݁ܬ݁ܟܶܠܬ݁ ܠܳܟ݂ ܥܰܠ ܡܶܨܪܳܝܳܐ: ܕܢܶܬ݁ܶܠ ܠܳܟ݂ ܡܰܖ̈ܟܒܳܬ݂ܳܐ ܘܦܰܖ̈ܳܫܶܐ. ¹⁰ ܗܳܫܳܐ ܓܶܝܪ ܒܶܠܥܳܕ݂ ܡ̣ܶܢ ܡܳܪܝܳܐ ܣܶܠܩܶܬ݂ ܠܰܐܪܥܳܐ ܗܳܕܶܐ ܠܡܰܚܪܳܒܽܘܬ݂ܳܗ̇. ܡܳܪܝܳܐ ܗ̱ܘ̣ ܐܶܡܰܪ ܠܺܝ ܕܶܐܣܰܩ ܥܰܠ ܐܰܪܥܳܐ ܗܳܕܶܐ ܘܶܐܚ̱ܪܒܺܝܗ̇. ¹¹ ܘܶܐܡܰܪ ܐܶܠܺܝܰܩܺܝܡ ܘܫܰܒܢܳܐ ܘܝܽܘܐܳܚ ܠܪܰܒ ܫܳܩ̈ܶܐ: ܡܰܠܶܠ ܥܰܡ ܥܰܒܕܰܝ̈ܟ ܐܳܪܳܡܳܐܺܝܬ݂ ܡܶܛܽܠ ܕܫܳܡܥܺܝܢ ܚܢܰܢ. ܘܠܳܐ ܬܡܰܠܶܠ ܥܰܡܰܢ ܝܺܗ̱ܘܕܳܐܺܝܬ݂ ܩܕ݂ܳܡ ܥܰܡܳܐ ܕܩܳܝܡܺܝܢ ܥܰܠ ܫܽܘܪܳܐ. ¹² ܘܶܐܡܰܪ ܠܗܽܘܢ ܪܰܒ ܫܳܩ̈ܶܐ: ܠܳܐ ܗ̱ܘܳܐ ܠܘܳܬ݂ܟ݂ܽܘܢ ܘܰܠܘܳܬ݂ ܡܳܪܟ݂ܽܘܢ: ܫܰܕܪܰܢܝ ܡܳܪܝ ܠܡܶܐܡܰܪ ܡ̈ܶܠܶܐ ܗܳܠܶܝܢ: ܐܶܠܳܐ ܠܓܰܒܖ̈ܶܐ ܕܝܳܬ݂ܒܺܝܢ. ܥܰܠ ܫܽܘܪܳܐ: ܕܠܳܐ ܢܶܐܟ݂ܠܽܘܢ ܬܶܒܬ݁ܗܽܘܢ: ܘܢܶܫܬ݁ܽܘܢ ܬܺܝܢܰܝ̈ܗܽܘܢ ܥܰܡܟ݂ܽܘܢ. ¹³ ܘܩܳܡ ܪܰܒ ܫܳܩ̈ܶܐ. ܘܰܩܪܳܐ ܒܩܳܠܳܐ ܪܳܡܳܐ ܝܺܗ̱ܘܕ݂ܳܐܺܝܬ݂: ܘܶܐܡܰܪ ܫܡܰܥܘ ܡܶܠܰܘ̈ܗܝ ܕܡܰܠܟܳܐ ܪܰܒܳܐ ܡܰܠܟܳܐ ܕܳܐܬ݂ܽܘܪ. ¹⁴ ܗܳܟ݂ܰܢܳܐ ܐܳܡܰܪ ܡܰܠܟܳܐ ܕܳܐܬ݂ܽܘܪ: ܠܳܐ ܢܰܛܥܶܝܟ݂ܽܘܢ ܚܶܙܰܩܝܳܐ: ܡܶܛܽܠ ܕܠܳܐ ܡܶܫܟܰܚ ܠܰܡܦܰܨܳܝܽܘܬ݂ܟ݂ܽܘܢ. ¹⁵ ܘܠܳܐ ܢܰܬ݂ܟ݂ܶܠܟ݂ܽܘܢ ܚܶܙܰܩܝܳܐ ܥܰܠ ܡܳܪܝܳܐ. ܘܢܺܐܡܰܪ ܕܰܡܦܰܨܳܝܽܘ ܡܦܰܨܶܐ ܠܰܢ ܡܳܪܝܳܐ: ܘܠܳܐ ܡܶܫܬܰܠܡܳܐ ܩܪܺܝܬ݂ܳܐ ܗܳܕܶܐ ܒܺܐܝܕ݂ܰܘ̈ܗܝ ܕܡܰܠܟܳܐ ܕܳܐܬ݂ܽܘܪ. ¹⁶ ܠܳܐ ܬܶܫܡܥܽܘܢ ܠܚܶܙܰܩܝܳܐ. ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܰܠܟܳܐ ܕܳܐܬ݂ܽܘܪ: ܥܒܶܕ݂ܘ ܥܰܡܝ ܒܽܘܪܟܬ݂ܳܐ: ܘܦܽܘܩܘ ܠܘܳܬ݂ܝ ܘܰܐܟ݂ܽܘܠܘ ܐ̱ܢܳܫ ܓܽܘܦܢܰܘ̈ܗܝ: ܘܐ̱ܢܳܫ ܬܺܐܢܰܘ̈ܗܝ ܘܶܐܫܬܰܘ ܐ̱ܢܳܫ ܡܰܝ̈ܳܐ ܕܓܽܘܒܶܗ. ¹⁷ ܥܰܕ݂ ܐܺܬܶܐ ܘܶܐܕ݂ܒܰܪܟ݂ܽܘܢ ܠܰܐܪܥܳܐ ܕܰܐܝܟ݂ ܐܰܪܥܟ݂ܽܘܢ: ܐܰܪܥܳܐ ܕܰܥܒܽܘܪܳܐ ܘܰܕ݂ܡܶܫܚܳܐ: ܐܰܪܥܳܐ ܕܙܰܝ̈ܬ݁ܶܐ ܘܰܕ݂ܟܰܖ̈ܡܶܐ. ¹⁸ ܠܳܐ ܢܰܛܥܶܝܟ݂ܽܘܢ ܚܶܙܰܩܝܳܐ ܘܢܺܐܡܰܪ ܕܡܳܪܝܳܐ ܡܦܰܨܶܐ ܠܰܢ. ܕܰܠܡܳܐ ܦܰܨܺܝܘ ܐܰܠܳܗܰܝ̈ܗܽܘܢ ܕܥܰܡ̈ܡܶܐ: ܐ̱ܢܳܫ ܐܰܪܥܶܗ ܡ̣ܶܢ ܐܺܝܕ݂ܰܘ̈ܗܝ ܕܡܰܠܟܳܐ ܕܳܐܬ݂ܽܘܪ. ¹⁹ ܐܰܝܟܳܐ ܐܶܢܽܘܢ ܐܰܠܳܗ̈ܶܐ ܕܰܚܡܳܬ݂ ܘܕܰܪܦܳܕ݂ ܘܰܐܝܟܳܐ ܐܶܢܽܘܢ ܐܰܠܳܗ̈ܶܐ ܕܰܣܦܰܪܘܶܝܡ ܕܰܠܡܳܐ ܦܰܨܺܝܘ ܠܫܳܡܪܺܝܢ ܡ̣ܶܢ ܐܺܝܕܰܝ̈. ²⁰ ܡܰܢ ܡ̣ܶܢ ܟܽܠܗܽܘܢ ܐܰܠܳܗ̈ܶܐ ܕܰܐܖ̈ܥܳܬ݂ܳܐ ܗܳܠܶܝܢ ܦܰܨܺܝ ܐܰܪܥܶܗ ܡ̣ܶܢ ܐܺܝܕܰܝ̈: ܕܰܡܦܰܨܶܐ ܡܳܪܝܳܐ ܠܽܐܘܪܺܫܠܶܡ ܡ̣ܶܢ ܐܺܝ̈ܕܰܝ. ²¹ ܘܰܫܬܶܒܩ ܠܗܽܘܢ: ܘܐ̱ܢܳܫ ܠܳܐ ܝܰܗܒ ܠܶܗ ܦܶܬ݂ܓܶܡ. ܡܶܛܽܠ ܕܰܦܩܰܕ݂ ܡܰܠܟܳܐ ܘܶܐܡܰܪ: ܠܳܐ ܬܶܬ݁ܠܽܘܢ ܒܶܗ ܦܶܬ݂ܓ݂ܳܡܳܐ. ²² ܘܶܐܬ݂ܳܐ ܐܶܠܝܳܩܺܝܡ ܒܰܪ ܚܶܠܰܩܝܳܐ ܪܰܒܒܰܝܬܳܐ: ܘܫܰܒܢܳܐ ܣܳܦܪܳܐ: ܘܝܽܘܐܳܚ ܒܰܪ ܐܳܣܳܦ ܡܥܰܗܕ݂ܳܢܳܐ: ܠܘܳܬ݂ ܚܶܙܰܩܝܳܐ ܟܰܕ݂ ܡܨܶܪܶܝܢ ܢܰܚܬܰܝ̈ܗܽܘܢ ܘܚܰܘܺܝܘܗܝ ܡܶܠܰܘ̈ܗܝ ܕܪܰܒ ܫܳܩ̈ܶܐ.

 

 

ܩܶܦܰܠܶܐܘܳܢ: ܠܙ

¹ ܘܰܗܘܳܐ ܕܟܰܕ݂ ܫܡܰܥ ܚܶܙܰܩܝܳܐ ܡܰܠܟܳܐ: ܨܰܪܺܝ ܢܰܚܬܰܘ̈ܗܝ: ܘܶܐܬ݂ܟܰܣܺܝ ܣܰܩܳܐ. ܘܥܰܠ ܠܒܰܝܬ݁ܶܗ ܕܡܳܪܝܳܐ. ² ܘܫܰܕܰܪ ܠܶܐܠܺܝܳܩܺܝܡ ܪܰܒܒܰܝܬܳܐ: ܘܰܠܫܰܒܢܳܐ ܣܳܦܪܳܐ: ܘܰܠܣܳܒ̈ܶܐ ܕܟ݂ܳܗ̈ܢܶܐ ܟܰܕ݂ ܡܟܰܣܶܝܢ ܣܰܩ̈ܶܐ: ܠܘܳܬ݂ ܐܶܫܰܥܝܳܐ ܢܒܺܝܳܐ ܒܰܪ ܐܰܡܽܘܨ. ³ ܘܶܐܡܰܪܘ ܠܶܗ: ܗܳܟ݂ܰܢܳܐ ܐܳܡܰܪ ܚܶܙܰܩܝܳܐ: ܝܰܘܡܳܐ ܗ̱ܘ̣ ܕܽܐܘܠܨܳܢܳܐ: ܘܰܕ݂ܡܰܟܣܳܢܽܘܬ݂ܳܐ: ܘܰܕ݂ܪܽܘܓܙܳܐ: ܝܳܘܡܳܢܳܐ. ܡܶܛܽܠ ܕܡܰܛܺܝܘ ܚܶܒ̈ܠܶܐ ܕܰܒܢܰܝ̈ܳܐ. ܘܠܰܝܬ݁ ܚܰܝܠܳܐ ܒܝܳܠܶܕܬܳܐ. ⁴ ܟܒܰܪ ܢܶܫܡܰܥ ܡܳܪܝܳܐ ܐܰܠܳܗܳܟ݂ ܡܶܠܰܘ̈ܗܝ ܕܪܰܒ ܫܳܩ̈ܶܐ. ܘܫܰܕܪܶܗ ܡܳܪܶܗ ܡܰܠܟܳܐ ܐܳܬ݂ܽܘܪܳܝܳܐ: ܕܰܢܚܰܣܶܕ݂ ܠܰܐܠܳܗܳܐ ܚܰܝܳܐ. ܘܢܰܟܣܺܝܘܗܝ ܒܡ̈ܶܠܶܐ ܕܰܫܡܰܥ ܡܳܪܝܳܐ ܐܰܠܳܗܳܟ݂. ܘܬܶܒܥܶܐ ܘܰܬܨܰܠܶܐ ܥܰܠ ܫܰܪܟܳܐ ܕܶܐܫܬ݁ܚܰܪܘ. ⁵ ܘܶܐܬ݂ܰܘ ܥܰܒܕܰܘ̈ܗܝ ܕܚܶܙܰܩܝܳܐ ܡܰܠܟܳܐ ܠܘܳܬ݂ ܐܶܫܰܥܝܳܐ. ⁶ ܘܶܐܡܰܪ ܠܗܽܘܢ ܐܶܫܰܥܝܳܐ: ܗܳܟ݂ܰܢܳܐ ܐܶܡܰܪܘ ܠܡܳܪܟ݂ܽܘܢ: ܗܳܟ݂ܰܢܳܐ ܐܳܡܰܪ ܡܳܪܝܳܐ: ܠܳܐ ܬܶܕ݂ܚܰܠ ܡ̣ܶܢ ܡ̈ܶܠܶܐ ܕܰܫܡܰܥܬ݁: ܕܓܰܕܶܦܘ ܩܕ݂ܳܡܰܝ ܐܺܝܙܓܰܕܰܘ̈ܗܝ ܕܡܰܠܟܳܐ ܕܳܐܬ݂ܽܘܪ. ⁷ ܗܳܐ ܝܳܗܶܒ ܐ̱ܢܳܐ ܥܠܰܘܗ̱ܝ ܪܽܘܚܳܐ ܘܢܶܫܡܰܥ ܛܶܒܳܐ: ܘܢܶܗܦܽܘܟ݂ ܠܰܐܪܥܶܗ. ܘܰܐܪܡܶܝܘܗܝ ܒܚܰܪܒܳܐ ܒܰܐܪܥܶܗ. ⁸ ܘܰܗܦܰܟ݂ ܪܰܒ ܫܳܩ̈ܶܐ. ܘܶܐܫܟܰܚ ܠܡܰܠܟܳܐ ܕܳܐܬ݂ܽܘܪ ܟܰܕ݂ ܡܶܬ݂ܟܰܬܰܫ ܥܰܠ ܠܶܒܢܳܐ: ܟܰܕ݂ ܫܡܰܥ ܕܰܫܩܰܠ ܡ̣ܶܢ ܠܟܺܝܫ. ⁹ ܘܰܫܡܰܥ ܥܰܠ ܬܰܪܗܰܦ ܡܰܠܟܳܐ ܕܟ݂ܽܘܫ: ܕܰܢܦܰܩ ܠܡܶܬ݂ܟܰܬܳܫܽܘ ܥܰܡܶܗ. ܘܰܫܡܰܥ ܘܫܰܕܰܪ ܐܺܝܙ̈ܓܰܕܶܐ ܠܘܳܬ݂ ܚܶܙܰܩܝܳܐ. ¹⁰ ܗܳܟ݂ܰܢܳܐ ܐܶܡܰܪܘ ܠܚܶܙܰܩܝܳܐ ܡܰܠܟܳܐ ܕܺܝܗܽܘܕܳܐ ܠܡܶܐܡܰܪ: ܠܳܐ ܢܰܛܥܝܶܟ݂ ܐܰܠܳܗܳܟ݂: ܕܰܬ݂ܟ݂ܺܝܠ ܐܰܢ̱ܬ݁ ܥܠܰܘܗ̱ܝ. ܘܳܐܡܰܪ ܐܰܢ̱ܬ݁ ܕܠܳܐ ܡܶܫܬܰܠܡܳܐ ܐܽܘܪܺܫܠܶܡ ܒܺܐܝܕ݂ܰܘ̈ܗܝ ܕܡܰܠܟܳܐ ܕܳܐܬ݂ܽܘܪ. ¹¹ ܗܳܐ ܐܰܢ̱ܬ݁ ܫܡܰܥܬ݁ ܠܟ݂ܽܠ ܕܰܥܒܰܕ݂ܘ ܡܰܠ̈ܟܶܐ ܕܳܐܬ݂ܽܘܪ ܠܟܽܠܗܶܝܢ ܐܰܖ̈ܥܳܬ݂ܳܐ ܠܡܰܚܪܳܒܽܘ ܐܶܢܶܝܢ. ܘܰܐܢ̱ܬ݁ ܡܶܬ݂ܦܰܨܶܐ ܐܰܢ̱ܬ݁. ¹² ܕܰܠܡܳܐ ܦܰܨܺܝܘ ܐܰܠܳܗܰܝ̈ܗܽܘܢ ܕܥܰܡ̈ܡܶܐ ܕܰܚܪܰܒܘ ܐܰܒܳܗܰܝ̈: ܠܓܳܘܙܳܢ ܘܰܠܚܳܪܳܢ ܘܰܠܪܳܨܳܦ: ܘܠܰܒܢܰܝ̈ ܥܰܕܳܢ ܘܕܰܒܕ݂ܳܠܳܣܰܪ. ¹³ ܐܰܝܟܰܘ ܡܰܠܟܳܐ ܕܰܚܡܳܬ݂: ܘܡܰܠܟܳܐ ܕܰܪܦܳܕ݂: ܘܡܰܠܟܳܐ ܕܰܩܪܺܝܬ݂ܳܐ ܣܦܰܪܘܺܝܡ: ܘܰܕ݂ܢܳܥ: ܘܰܕ݂ܥܳܩܳܐ. ¹⁴ ܘܩܰܒܠ ܚܶܙܰܩܝܳܐ ܐܶܓܖ̈ܳܬ݂ܳܐ ܡ̣ܶܢ ܐܺܝܕ݂ܳܐ ܕܺܐܝܙ̈ܓܰܕܶܐ ܘܰܩܪܳܐ ܐܶܢܶܝܢ ܘܰܣܠܶܩ ܠܒܰܝܬ݁ܶܗ ܕܡܳܪܝܳܐ. ܘܰܦܪܰܣ ܐܶܢܶܝܢ. ܚܶܙܰܩܝܳܐ ܩܕ݂ܳܡ ܡܳܪܝܳܐ. ¹⁵ ܨܰܠܺܝ ܚܶܙܰܩܝܳܐ ܩܕ݂ܳܡ ܡܳܪܝܳܐ: ܘܶܐܡܰܪ. ¹⁶ ܡܳܪܝܳܐ ܚܰܝܠܬ݂ܳܢܳܐ ܐܰ‌ܠܳܗܳܐ ܕܺܝܣܪܳܐܶܝܠ ܝܳܬܶܒ ܥܰܠ ܟܖ̈ܽܘܒܶܐ. ܐܰܢ̱ܬ݁ ܗ̱ܘ̣ ܐܰ‌ܠܳܗܳܐ ܒܰܠܚܽܘܕܰܝܟ ܥܰܠ ܟܽܠܗܶܝܢ ܡܰܠܟ̈ܘܳܬ݂ܳܐ ܕܰܐܪܥܳܐ. ܐܰܢ̱ܬ݁ ܥܒܰܕܬ݁ ܫܡܰܝܳܐ ܘܰܐܪܥܳܐ. ¹⁷ ܨܠܺܝ ܡܳܪܝܳܐ ܐܶܕ݂ܢܳܟ݂ ܘܰܫܡܰܥ ܦܬܰܚ ܡܳܪܝܳܐ ܥܰܝܢܰܝ̈ܟ ܘܰܚܙܺܝ ܘܰܫܡܰܥ ܡܶܠܰܘ̈ܗܝ ܕܣܰܢܚܶܪܺܝܒ: ܕܰܫܠܰܚ ܠܰܡܚܰܣܳܕ݂ܽܘ ܠܰܐܠܳܗܳܐ ܚܰܝܳܐ. ¹⁸ ܫܰܪܺܝܪܳܐܺܝܬ݂ ܡܳܪܝܳܐ: ܚܪܰܒܘ ܡܰܠ̈ܟܶܐ ܕܳܐܬ݂ܽܘܪ ܠܟܽܠܗܶܝܢ ܐܰܖ̈ܥܳܬ݂ܳܐ. ¹⁹ ܘܰܐܪܥܗܽܘܢ ܘܰܐܠܳܗܰܝ̈ܗܽܘܢ ܐܰܘܩܶܕ݂ܘ ܒܢܽܘܪܳܐ ܡܶܛܽܠ ܕܠܳܐ ܗܘܰܘ ܐܰܠܗ̈ܶܐ. ܐܶܠܳܐ ܥܒܳܕ݂ ܐܺܝ̈ܕܰܝܳܐ ܕܐ̱ܢܳܫ̈ܳܐ: ܕܩܰܝܣܳܐ: ܘܰܕ݂ܟܶܣܦܳܐ: ܘܰܕ݂ܟܺܐܦܳܐ. ܘܰܐܘܒܶܕ݂ܘ ܐܶܢܽܘܢ. ²⁰ ܘܗܳܫܳܐ ܡܳܪܝܳܐ ܐܰܠܳܗܰܢ: ܦܪܽܘܩܰܝܢ ܡ̣ܶܢ ܐܺܝܕ݂ܰܘ̈ܗܝ: ܕܢܶܕܥ̈ܳܢ ܟܽܠܗܶܝܢ ܡܰܠܟ̈ܘܳܬ݂ܳܐ ܕܰܐܪܥܳܐ: ܕܰܐܢ̱ܬ݁ܽܘ ܐܰ‌ܠܳܗܳܐ ܒܰܠܚܽܘܕܰܝܟ. ²¹ ܘܶܐܫܬ݁ܠܰܚ ܐܶܫܰܥܝܳܐ ܒܰܪ ܐܰܡܽܘܨ ܠܘܳܬ݂ ܚܶܙܰܩܝܳܐ: ܘܶܐܡܰܪ ܠܶܗ: ܗܳܟ݂ܰܢܳܐ ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ ܐܰ‌ܠܳܗܳܐ ܕܺܝܣܪܳܐܶܝܠ: ܟܽܠ ܕܨܰܠܺܝܬ݁ ܩܕ݂ܳܡܝ ܥܰܠ ܣܰܢܚܶܪܺܝܒ ܡܰܠܟܳܐ ܕܳܐܬ݂ܽܘܪ: ܫܶܡܥܶܬ݂. ²² ܗܳܢܳܐ ܦܶܬ݂ܓ݂ܳܡܳܐ ܕܶܐܡܰܪ ܥܠܰܘܗ̱ܝ ܡܳܪܝܳܐ. ܫܳܝܛܳܐ ܠܳܟ݂: ܘܰܡܡܰܝܩܳܐ ܒܳܟ݂ ܒܬ݂ܽܘܠܬܳܐ ܒܰܪܬ݂ ܨܶܗܝܽܘܢ ܘܰܡܢܺܝܕ݂ܳܐ ܪܺܝܫܳܗ̇ ܒܳܬ݂ܪܳܟ݂ ܒܰܪܬ݂ ܐܽܘܪܺܫܠܶܡ. ²³ ܠܡܰܢ ܚܰܣܶܕܬ݁ ܘܓܰܕܶܦܬ݁. ܘܥܰܠ ܡܰܢ ܐܰܪܺܝܡܬ݁ ܩܳܠܳܟ݂ ܐܰܪܺܝܡܬ݁ ܥܰܝܢܰܝ̈ܟ ܠܰܡܪܰܘܡܳܐ ܥܰܠ ܩܰܕ݁ܺܝܫܳܐ ܕܺܝܣܪܳܐܶܝܠ. ²⁴ ܘܒܺܐܝܕ݂ܳܐ ܕܺܐܝܙܓܰܕܰܝ̈ܟ ܚܰܣܶܕܬ݁ ܠܡܳܪܝܳܐ: ܘܶܐܡܰܪܬ݁: ܕܰܒܣܽܘܓ݂ܳܐܐ ܕܡܰܖ̈ܟܒܳܬ݂ܝ: ܐܶܢܳܐ ܐܶܣܰܩ ܠܪܰܘܡܳܐ ܕܛܽܘܖ̈ܶܐ: ܘܠܰܫܦܽܘܠܰܘ̈ܗܝ ܕܠܶܒܢܳܢ. ܘܶܐܦܣܽܘܩ ܩܰܘ̈ܡܳܬ݂ܳܐ ܕܰܐܖ̈ܙܰܘܗܝ: ܘܰܓ̣ܒܰܝ̈ܳܐ ܕܫܰܖ̈ܘܰܝܢܰܘܗܝ ܘܶܐܥܽܘܠ ܠܪܰܘܡܳܐ ܕܣܳܟܶܗ ܕܥܳܒܳܐ ܕܟܰܪܡܠܳܐ. ²⁵ ܐܶܢܳܐ ܐܶܚܦܽܘܪ ܘܶܐܫܬ݁ܶܐ ܡܰܝ̈ܳܐ: ܘܰܐܘܒܶܫ ܒܦܰܖ̈ܣܳܬ݂ܳܐ ܕܖ̈ܰܟ݂ܫܰܝ: ܟܽܠܗܽܘܢ ܢܰܗܖ̈ܰܘܳܬ݂ܳܐ ܥܰܫܺܝܢ̈ܶܐ. ²⁶ ܠܳܐ ܫܡܰܥܬ݁ ܕܡ̣ܶܢ ܪܽܘܚܩܳܐ ܠܳܗ̇ ܥܶܒܕܶܬ݂ ܘܡ̣ܶܢ ܝܰܘ̈ܡܳܬܳܐ ܩܰܕ݂ܡܳܝ̈ܶܐ ܠܳܗ̇ ܥܰܬ݁ܕܶܬ݂. ܘܗܳܫܳܐ ܐܰܝܬ݁ܺܝܬܳܗ̇ ܕܬܶܗܘܶܐ ܠܚܽܘܪܒܳܐ: ܘܰܠܨܰܕ݂ܝܳܐ: ܐܰܝܟ݂ ܡܕܺܝ̈ܢܳܬ݂ܳܐ ܥܰܫܺܝ̈ܢܳܬ݂ܳܐ. ²⁷ ܕܥܳܡܽܘܖ̈ܰܝܗܶܝܢ ܐܰܪܦܺܝܘ ܒܗܶܝܢ ܐܺܝ̈ܕܰܝܳܐ. ܘܶܐܬ݁ܬ݁ܰܒܰܪܘ ܘܰܒܗܶܬ݂ܘ ܘܰܗܘܰܘ ܐܰܝܟ݂ ܥܶܣܒܳܐ ܕܚܰܩܠܳܐ: ܘܰܐܝܟ݂ ܝܽܘܪܳܩܳܐ ܕܬܰܕ݂ܐܳܐ: ܘܰܐܝܟ݂ ܫܶܒܠܳܐ ܕܶܐܓܳܪܳܐ: ܘܰܐܝܟ݂ ܒܽܘܚܫܺܝܢܳܐ ܩܕ݂ܳܡ ܩܳܝܳܡܬ݂ܳܐ. ²⁸ ܡܰܘܬ݁ܒܳܟ݂ ܘܡܰܥܠܳܟ݂ ܘܡܰܦܩܳܟ݂ ܝܳܕܰܥ ܐ̱ܢܳܐ: ܘܕܰܐܡܪܰܚܬ݁ ܩܕ݂ܳܡܝ. ²⁹ ܥܰܠ ܕܰܐܡܪܰܚܬ݁ ܩܕ݂ܳܡܝ: ܘܓܽܘܕܳܦܳܟ݂ ܣܠܶܩ ܒܶܐܕ݂ܢܰܝ̈: ܐܰܪܡܶܐ ܩܠܳܕ݂ܳܐ ܒܰܢܚܺܝܪܳܟ݂: ܘܰܒܥܳܡܳܐ ܒܣܶܦ̈ܘܳܬ݂ܳܟ݂ ܘܰܐܗܦܟ݂ܳܟ݂ ܒܽܐܘܪܚܳܐ ܕܶܐܬܰܝ̣ܬ݁ ܒܳܗ̇. ³⁰ ܘܗܳܕܶܐ ܠܳܟ݂ ܐܳܬܳܐ: ܐܳܟܶܠ ܐܰܢ̱ܬ݁ ܫܰܢ̱ܬܳܐ ܗܳܕܶܐ ܟܳܬ݂ܳܐ. ܘܫܰܢ̱ܬܳܐ ܕܬܰܪܬ݁ܶܝܢ ܟܳܬ݂ ܟܳܬ݂ܳܐ. ܘܫܰܢ̱ܬܳܐ ܬܠܺܝܬܳܝܬܳܐ ܙܳܪܥܺܝܢ ܐܢ̱ܬ݁ܽܘܢ ܘܚܳܨܕܺܝܢ ܐܢ̱ܬ݁ܽܘܢ: ܘܢܳܨܒܺܝܢ ܐܢ̱ܬ݁ܽܘܢ ܟܰܖ̈ܡܶܐ: ܘܐܳܟ݂ܠܺܝܢ ܐܢ̱ܬ݁ܽܘܢ ܦܺܐܖ̈ܰܝܗܽܘܢ. ³¹ ܘܢܶܬ݂ܗܰܦܟܽܘܢ ܫܰܪܟܳܐ ܕܒܶܝܬ݂ ܝܺܗܽܘܕ݂ܳܐ ܕܶܐܫܬܰܚܰܪܘ: ܐܰܝܟ݂ ܥܶܩܳܪܳܐ ܕܰܪܡܶܐ ܠܬܰܚܬ݁: ܘܥܳܒܶܕ݂ ܦܺܐܖ̈ܶܐ ܠܥܶܠ. ³² ܡܶܛܽܠ ܕܡ̣ܶܢ ܐܽܘܪܺܫܠܶܡ ܢܳܦܶܩ ܫܰܪܟܳܢܳܐ. ܘܢܶܫܬܰܘܙܰܒ ܡ̣ܶܢ ܛܽܘܪܳܐ ܕܨܶܗܝܽܘܢ. ܛܢܳܢܶܗ ܕܡܳܪܝܳܐ ܚܰܝܠܬ݂ܳܢܳܐ ܥܳܒܶܕ݂ ܗܳܕܶܐ. ³³ ܡܶܛܽܠ ܗܳܢܳܐ ܗܳܟ݂ܰܢܳܐ ܐܳܡܰܪ ܡܳܪܝܳܐ ܥܰܠ ܡܰܠܟܳܐ ܕܳܐܬ݂ܽܘܪ: ܠܳܐ ܢܶܥܽܘܠ ܠܰܩܪܺܝܬ݂ܳܐ ܗܳܕܶܐ. ܘܠܳܐ ܢܶܫܕܶܐ ܬܰܡܳܢ ܓܶܐܪܶܐ. ܘܠܳܐ ܢܶܐܪܥܶܝܗ̇ ܒܣܰܟܖ̈ܶܐ. ܘܠܳܐ ܢܰܟ݂ܡܶܢ ܥܠܶܝܗ̇ ܟܡܶܐܢ̈ܶܐ. ³⁴ ܐܶܠܳܐ ܒܽܐܘܪܚܳܐ ܕܶܐܬ݂ܳܐ ܒܳܗ̇: ܢܶܗܦܽܘܟ݂ ܘܠܰܩܪܺܝܬ݂ܳܐ ܗܳܕܶܐ ܠܳܐ ܢܶܥܽܘܠ: ܐܳܡܰܪ ܡܳܪܝܳܐ. ³⁵ ܘܰܐܓܶܢ ܥܰܠ ܩܪܺܝܬ݂ܳܐ ܗܳܕܶܐ ܘܶܐܦܪܩܺܝܗ̇: ܡܶܛܽܠܳܬ݂ܝ ܘܡܶܛܽܠ ܕܰܘܺܝܕ݂ ܥܰܒܕܝ. ³⁶ ܘܰܢܦܰܩ ܡܰܠܰܐܟܶܗ ܕܡܳܪܝܳܐ. ܘܰܩܛܰܠ ܒܡܰܫܪܺܝܬܶܗ ܕܳܐܬ݂ܽܘܪܳܝܳܐ. ܡܳܐܐ ܘܰܬ݂ܡܳܢܺܝܢ ܘܚܰܡܫܳܐ ܐܰܠܦܺܝ̈ܢ. ܘܩܰܕܶܡܘ ܒܨܰܦܪܳܐ: ܘܗܳܐ ܟܽܠܗܽܘܢ ܫ̈ܠܰܕܶܐ ܡܺܝ̈ܬ݂ܳܬ݂ܳܐ. ³⁷ ܘܰܫܩܰܠ ܣܰܢܚܶܪܺܝܒ: ܘܰܗܦܰܟ݂ ܐܶܙܰܠ ܝܺܬܶܒ ܒܢܺܝܢܘܶܐ. ³⁸ ܘܟܰܕ݂ ܣܳܓܶܕ݂ ܗ̱ܘܳܐ ܒܶܝܬ݂ ܢܳܣܪܳܟ݂ ܐܰܠܳܗܶܗ: ܐܰܕ݂ܪܰܡܠܶܟ݂ ܘܫܳܪܳܐܨܰܐܪ ܒܢܰܘ̈ܗܝ ܩܰܛܠܽܘܗܝ ܒܚܰܪܒܳܐ. ܘܗܶܢܽܘܢ ܥܪܰܩܘ ܠܰܐܪܥܳܐ ܕܩܰܖ̈ܕܘܳܝܶܐ. ܘܰܐܡܠܶܟ݂ ܣܰܪܚܰܕܽܘܡ ܒܪܶܗ ܒܳܬ݂ܪܶܗ.

ܩܶܦܰܠܶܐܘܳܢ: ܠܚ

¹ ܒܗܽܘܢ ܒܝܰܘ̈ܡܳܬܳܐ ܗܳܢܽܘܢ: ܐܶܬ݂ܟܪܰܗ ܚܶܙܰܩܝܳܐ ܠܰܡܡܳܬ݂. ܘܶܐܬ݂ܳܐ ܠܘܳܬܶܗ ܐܶܫܰܥܝܳܐ ܢܒܝܳܐ ܒܰܪ ܐܰܡܽܘܨ: ܘܶܐܡܰܪ ܠܶܗ: ܗܳܟ݂ܰܢܳܐ ܐܳܡܰܪ ܡܳܪܝܳܐ. ܦܰܩܶܕ݂ ܥܰܠ ܒܰܝܬܳܟ݂: ܡܶܛܽܠ ܕܡܳܐܶܬ݂ ܐܰܢ̱ܬ݁: ܘܠܳܐ ܚܳܝܶܐ ܐܰܢ̱ܬ݁. ² ܘܰܐܦܢܺܝ ܚܶܙܰܩܝܳܐ ܐܰܦܰܘ̈ܗܝ ܠܐܶܣܬ݂ܳܐ. ܘܨܰܠܺܝ ܩܕ݂ܳܡ ܡܳܪܝܳܐ ܘܶܐܡܰܪ. ³ ܐܽܘܢ ܡܳܪܝܳܐ: ܐܶܬ݁ܕܰܟ݂ܪ ܕܗܰܠܟܶܬ݂ ܩܕ݂ܳܡܰܝܟ ܒܩܽܘܫܬܳܐ: ܘܰܒܠܶܒܳܐ ܫܰܠܡܳܐ: ܘܰܕ݂ܫܰܦܺܝܪ ܩܕ݂ܳܡܰܝܟ ܥܶܒܕܶܬ݂ ܘܰܒܟ݂ܳܐ ܚܶܙܰܩܝܳܐ ܒܟ݂ܳܬ݂ܳܐ ܪܰܒܬ݂ܳܐ. ⁴ ܘܰܗܘܳܐ ܦܶܬ݂ܓܳܡܶܗ ܕܡܳܪܝܳܐ ܥܰܠ ܐܶܫܰܥܝܳܐ ܢܒܺܝܳܐ: ܠܡܶܐܡܰܪ. ⁵ ܙܶܠ ܐܶܡܰܪ ܠܚܶܙܰܩܝܳܐ ܡܰܠܟܳܐ ܕܺܝܗܽܘܕ݂ܳܐ: ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰܠܳܗܶܗ ܕܕܰܘܺܝܕ݂ ܐܰܒܽܘܟ݂: ܫܶܡܥܶܬ݂ ܨܠܽܘܬ݂ܳܟ݂: ܘܰܚܙܺܝܬ݂ ܕܶܡܥܰܝ̈ܟ ܗܳܐ ܡܰܘܣܶܦ ܐ̱ܢܳܐ ܥܰܠ ܝܰܘ̈ܡܳܬ݂ܳܟ݂ ܚܰܡܫܰܥܶܣܖ̈ܶܐ ܫܢܺܝ̈ܢ. ⁶ ܘܡ̣ܶܢ ܐܺܝܕ݂ܰܘ̈ܗܝ ܕܡܰܠܟܳܐ ܕܳܐܬ݂ܽܘܪ ܐܶܦܰܨܶܝܟ݂: ܘܠܰܡܕ݂ܺܝܢ̱ܬܳܐ ܗܳܕܶܐ. ܘܰܐܓܶܢ ܥܰܠ ܡܕ݂ܺܝܢ̱ܬܳܐ ܗܳܕܶܐ: ܘܶܐܦܪܩܺܝܗ̇. ⁷ ܘܗܳܕܶܐ ܠܳܟ݂ ܐܳܬܳܐ ܡ̣ܶܢ ܩܕ݂ܳܡ ܡܳܪܝܳܐ ܕܥܳܒܶܕ݂ ܡܳܪܝܳܐ ܦܶܬ݂ܓ݂ܳܡܳܐ ܗܳܢܳܐ ܕܶܐܡܰܪ. ⁸ ܗܳܐ ܡܰܗܦܶܟ݂ ܐ̱ܢܳܐ ܛܶܠܳܠܳܐ ܕܕܰܖ̈ܓܶܐ ܕܢܳܚܶܬ݂ ܒܕܰܖ̈ܓܶܐ ܕܳܐܚܳܙ ܐܰܒܽܘܟ݂: ܫܶܡܫܳܐ ܠܒܶܣܬ݁ܪܶܗ ܥܶܣܪܳܐ ܕܰܖ̈ܓܺܝܢ ܘܰܗܦܰܟ݂ ܫܶܡܫܳܐ ܠܒܶܣܬ݁ܪܶܗ ܥܶܣܪܳܐ ܕܰܖ̈ܓܺܝܢ: ܒܕܰܖ̈ܓܶܐ ܕܰܢܚܶܬ݂. ⁹ ܟܬ݂ܳܒܶܗ ܕܚܶܙܰܩܝܳܐ ܡܰܠܟܳܐ ܕܺܝܗܽܘܕ݂ܳܐ: ܟܰܕ݂ ܐܶܬ݂ܟܪܰܗ: ܘܰܚܝܳܐ ܡ̣ܶܢ ܟܽܘܪܗܳܢܶܗ. ¹⁰ ܐܶܢܳܐ ܐܶܡܪܶܬ݂ ܕܰܒܦܶܠܓܽܘܬ݂ ܝܰܘ̈ܡܰܝ ܐܶܙܰܠ: ܒܬܰܪܥܳܐ ܕܰܫܝܽܘܠ ܫܶܒܩܶܬ݂ ܫܰܪܟܳܐ ܕܰܫܢܰܝ̈. ¹¹ ܐܶܡܪܶܬ݂ ܕܠܳܐ ܐܶܚܙܶܐ ܠܡܳܪܝܳܐ ܒܰܐܪܥܳܐ ܕܚܰܝ̈ܶܐ ܘܬܽܘܒ ܠܳܐ ܐܶܚܙܶܐ ܐ̱ܢܳܫܳܐ ܥܰܡ ܥܳܡܖ̈ܰܝ ܚܶܦܪܳܐ. ¹² ܕܳܪܝ ܫܩܰܠ ܘܰܥܒܰܪ ܡܶܢܝ: ܐܰܝܟ݂ ܡܰܫܟܢܳܐ ܕܖ̈ܳܥܰܘܳܬ݂ܳܐ. ܐܶܬ݂ܩܦܶܕ݂ܘ ܐܰܝܟ݂ ܣܺܝܪܳܣ ܚܰܝ݂ܰܝ݂̈. ܘܰܐܝܟ݂ ܢܰܘܠܳܐ ܕܩܰܪܺܝܒ ܠܡܶܬ݂ܓܕ݂ܕ݂ܽܘ. ܡ̣ܶܢ ܐܺܝܡܳܡܳܐ ܘܰܥܕܰܡܳܐ ܠܠܺܠܝܳܐ ܐܰܫܠܶܡܬܳܢܝ. ¹⁴ ܐܰܝܟ݂ ܣܢܽܘܢܺܝܬ݂ܳܐ ܕܰܡܢܰܨܪܳܐ ܢܰܨܪܰܬ݂ ܘܰܐܝܟ݂ ܝܳܘܢܳܐ ܢܰܗܡܶܬ݂ ܐܰܪܺܝܡܶܬ݂ ܥܰܝܢܰܝ̈ ܠܰܡܪܰܘܡܳܐ. ܡܳܪܝܳܐ ܦܰܨܳܢܝ: ܘܒܰܣܶܡܰܝܢܝ. ¹⁵ ܘܡܳܢܳܐ ܐܶܡܰܠܶܠ: ܐܶܡܰܪ ܠܺܝ ܘܗܽܘ ܥܒܰܪ ܘܰܐܢܶܕ݂ ܟܽܠܳܗ̇ ܫܶܢܰܬ݂ܝ: ܥܰܠ ܡܪܳܖ̈ܶܐ ܕܢܰܦܫܝ. ܡܳܪܝܳܐ ܥܠܰܝܗܽܘܢ ܢܶܚܽܘܢ. ¹⁶ ܡܶܛܽܠ ܗܳܠܶܝܢ ܚܰܝ̈ܶܐ ܕܪܽܘܚܝ ܐܰܚܠܶܡܰܝܢܝ ܘܰܐܚܳܢܝ. ¹⁷ ܗܳܐ ܠܰܫܠܳܡܳܐ ܡܰܪܘ ܠܺܝ ܡܪܳܖ̈ܶܐ. ܘܰܐܢ̱ܬ݁ ܨܒܰܝܬ݁ ܒܢܰܦܫܝ ܕܠܳܐ ܬܶܒܠܶܐ ܒܰܚܒܠܳܐ ܡܶܛܽܠ ܕܰܫܕܰܝܬ݁ ܒܶܣܬܰܪ ܓܽܘܫܡܳܟ݂ ܟܽܠܗܽܘܢ ܚܛܳܗܰܝ̈. ¹⁸ ܡܶܛܽܠ ܕܠܳܐ ܫܝܽܘܠ ܬܶܪܕܶܐ ܠܳܟ݂. ܘܳܐܦܠܳܐ ܡܰܘܬܳܐ ܢܫܰܒܚܳܟ݂ ܘܠܳܐ ܢܣܰܒܪܽܘܢ ܠܩܽܘܫܬܳܟ݂ ܐܰܝܠܶܝܢ ܕܢܳܚܬ݁ܺܝܢ ܠܓܽܘܒܳܐ. ¹⁹ ܐܶܠܳܐ ܢܰܘܕܽܘܢ ܠܳܟ݂ ܚܰܝ̈ܶܐ ܕܰܐܟ݂ܘܳܬ݂ܝ ܝܳܘܡܳܢܳܐ ܘܰܐܒܳܐ ܠܰܒܢܰܝ̈ܳܐ ܢܚܳܘܶܐ ܗܰܝܡܳܢܽܘܬ݂ܳܟ݂. ²⁰ ܡܳܪܝܳܐ ܢܶܦܪܩܰܢ: ܘܬܶܫ̈ܒܚܳܬܶܗ ܢܫܰܒܰܚ: ܟܽܠܗܽܘܢ ܝܰܘ̈ܡܳܬܳܐ ܕܚܰܝ݂ܰܝ݂̈ܢ: ܒܒܰܝܬ݁: ܕܡܳܪܝܳܐ. ²¹ ܘܶܐܡܰܪ ܚܶܙܰܩܝܳܐ: ܡܳܢܳܐ ܗ̱ܝ ܐܳܬܳܐ ܕܣܳܠܶܩ ܐ̱ܢܳܐ ܠܒܰܝܬ݁ܶܗ ܕܡܳܪܝܳܐ. ²² ܘܶܐܡܰܪ ܐܶܫܰܥܝܳܐ: ܢܶܣܒܽܘܢ ܕܒܰܠܬ݂ܳܐ ܕܬܺܐܢ̈ܶܐ. ܘܰܢܣܺܝܡܽܘܢ ܥܰܠ ܫܽܘܚܢܳܐ: ܘܡܶܬ݂ܚܠܶܡ.

ܩܶܦܰܠܶܐܘܳܢ: ܠܛ

¹ ܒܙܰܒܢܳܐ ܗܰܘ: ܫܰܕܰܪ ܡܪܽܘܕܳܟ݂ ܒܶܠܕܳܢ ܒܰܪ ܒܶܠܕܳܢ ܡܰܠܟܳܐ ܕܒܳܒܶܠ: ܐܶܓܖ̈ܳܬ݂ܳܐ ܘܩܽܘܖ̈ܒܳܢܶܐ ܠܚܶܙܰܩܝܳܐ: ܡܶܛܽܠ ܕܰܫܡܰܥ ܕܶܐܬ݂ܟܪܰܗ: ܘܰܚܣܰܢ: ܘܶܐܬ݂ܚܠܶܡ. ² ܘܰܚܕ݂ܺܝ ܒܗܽܘܢ ܚܶܙܰܩܝܳܐ ܘܚܳܘܺܝ ܐܶܢܽܘܢ ܒܶܝܬ݂ ܓܰܙܶܗ: ܟܶܣܦܳܐ: ܘܕܰܗܒܳܐ: ܘܒܶܣ̈ܡܶܐ: ܘܡܶܫܚܳܐ ܛܳܒܳܐ: ܘܟܽܠܗܽܘܢ ܒܶܝܬ݂ ܡܳܐܢܰܘ̈ܗܝ: ܘܟ݂ܽܠ ܕܶܐܫܬ݁ܟܰܚ ܒܓܰܙܩܘ̈ܗܝ ܘܠܳܐ ܫܒܰܩ ܡܶܕܶܡ ܚܶܙܰܩܝܳܐ ܕܠܳܐ ܚܳܘܺܝ ܐܶܢܽܘܢ: ܒܒܰܝܬ݁ܶܗ ܘܰܒܟ݂ܽܠܶܗ ܒܶܝܬ݂ ܫܽܘܠܛܳܢܶܗ. ³ ܘܶܐܬ݂ܳܐ ܐܶܫܰܥܝܳܐ ܢܒܺܝܳܐ ܠܘܳܬ݂ ܚܶܙܰܩܝܳܐ ܡܰܠܟܳܐ: ܘܶܐܡܰܪ ܠܶܗ: ܡܳܢܳܐ ܐܶܡܰܪܘ ܠܳܟ݂ ܗܳܠܶܝܢ ܓܰܒܖ̈ܶܐ. ܘܡ̣ܶܢ ܐܰܝܡܶܟܳܐ ܐܶܬ݂ܰܘ ܠܘܳܬ݂ܳܟ݂ ܘܶܐܡܰܪ ܚܶܙܰܩܝܳܐ: ܡ̣ܶܢ ܐܰܪܥܳܐ ܪܰܚܺܝܩܬܳܐ ܕܒܳܒܶܠ ܐܶܬ݂ܰܘ ܠܘܳܬ݂ܝ. ⁴ ܘܶܐܡܰܪ ܡܳܢܳܐ ܚܙܰܘ ܒܒܰܝܬܳܟ݂ ܘܶܐܡܰܪ ܚܶܙܰܩܝܳܐ ܟܽܠ ܕܺܐܝܬ݂ ܒܒܰܝܬ݁ܝ ܚܙܰܘ: ܘܠܳܐ ܫܶܒܩܶܬ݂ ܡܶܕܶܡ ܒܒܰܝܬ݁ܝ ܕܠܳܐ ܚܳܘܺܝܬ݂ ܐܶܢܽܘܢ. ⁵ ܘܶܐܡܰܪ ܐܶܫܰܥܝܳܐ ܠܚܶܙܰܩܝܳܐ: ܫܡܰܥ ܦܶܬ݂ܓܳܡܶܗ ܕܡܳܪܝܳܐ ܚܰܝܠܬ݂ܳܢܳܐ. ⁶ ܗܳܐ ܝܰܘ̈ܡܳܬܳܐ ܐܳܬ݁ܶܝܢ: ܘܢܶܫܬ݁ܩܶܠ ܟܽܠ ܕܺܐܝܬ݂ ܒܒܰܝܬܳܟ݂ ܘܓܰܙܳܐ ܕܰܐܒܳܗܰܝ̈ܟ ܕܰܥܕܰܡܳܐ ܠܝܳܘܡܳܢܳܐ ܠܒܳܒܶܠ ܢܺܐܙܰܠ. ܘܡܶܕܶܡ ܠܳܐ ܢܶܫܬ݁ܚܰܪ ܠܳܟ݂: ܐܳܡܰܪ ܡܳܪܝܳܐ. ⁷ ܘܡ̣ܶܢ ܒܢܰܝ̈ܟ ܕܢܳܦܩܺܝܢ ܡܶܢܳܟ݂: ܕܡܰܘܠܶܕ݂ ܐܰܢ̱ܬ݁: ܢܶܬ݁ܕܰܒܪܽܘܢ: ܘܢܶܗܘܽܘܢ ܡܗܰܝܡܢ̈ܶܐ ܒܗܰܝܟܠܶܗ ܕܡܰܠܟܳܐ ܕܒܳܒܶܠ. ⁸ ܘܶܐܡܰܪ ܚܶܙܰܩܝܳܐ ܠܶܐܫܰܥܝܳܐ: ܫܰܦܺܝܪ ܦܶܬ݂ܓܶܡܶܗ ܕܡܳܪܝܳܐ ܕܶܐܡܰܪܬ݁: ܢܶܗܘܶܐ ܫܠܳܡܳܐ ܘܩܽܘܫܬܳܐ ܒܝܰܘ̈ܡܰܝ.

ܩܶܦܰܠܶܐܘܳܢ: ܡ

¹ ܒܰܝܰܐܗܝ ܒܰܝܰܐܗܝ ܠܥܰܡܝ: ܐܳܡܰܪ ܐܰܠܳܗܟ݂ܽܘܢ. ² ܡܠܰܘ ܒܠܶܒܳܗ̇ ܕܽܐܘܪܺܫܠܶܡ: ܘܰܩܪܰܘ ܠܳܗ̇. ܡܶܛܽܠ ܕܶܐܬ݂ܡܰܠܝܰܬ ܚܰܝܠܳܐ: ܘܰܨܒܳܬ ܒܰܚܛܺܝܬ݂ܳܐ. ܘܩܰܒܠܰܬ݂ ܡ̣ܶܢ ܐܺܝܕܶܗ ܕܡܳܪܝܳܐ ܐܰܥܦܳܐ ܕܟܽܠܗܽܘܢ ܚܛܳܗܶܝ̈ܗ̇. ³ ܩܳܠܳܐ ܕܩܳܪܶܐ ܒܡܰܕ݂ܒܪܳܐ: ܦܰܢܰܘ ܐܽܘܪܚܳܐ ܠܡܳܪܝܳܐ: ܘܰܬ݂ܪܽܘܨܘ ܒܰܦܩܰܥܬ݂ܳܐ ܫܒܺܝ̈ܠܶܐ ܠܰܐܠܳܗܰܢ. ⁴ ܟܽܠܗܽܘܢ ܢܰܚ̈ܠܶܐ ܢܶܬ݂ܡܰܠܽܘܢ ܘܟܽܠܗܽܘܢ ܛܽܘܖ̈ܶܐ ܘܖ̈ܳܡܳܬ݂ܳܐ ܢܶܬ݂ܡܰܟܟ݂ܽܘܢ. ܘܢܶܗܘܶܐ ܥܰܪܡܳܐ ܠܫܰܦܝܳܐ: ܘܰܐܬ݂ܪܳܐ ܥܰܣܩܳܐ ܠܰܦܩܰܥܬ݂ܳܐ. ⁵ ܘܢܶܬ݂ܓܠܶܐ ܐܺܝܩܳܪܶܗ ܕܡܳܪܝܳܐ. ܘܢܶܚܙܽܘܢܶܗ ܐܰܟܚܕ݂ܳܐ ܟܽܠ ܒܣܰܪ. ܡܶܛܽܠ ܕܦܽܘܡܶܗ ܕܡܳܪܝܳܐ ܡܰܠܶܠ. ⁶ ܩܳܠܳܐ ܕܳܐܡܰܪ ܩܪܺܝ ܘܶܐܡܰܪ ܡܳܢܳܐ ܐܶܩܪܶܐ. ܟܽܠ ܒܣܰܪ ܥܡܺܝܪܳܐ: ܘܟܽܠܳܗ̇ ܝܳܐܝܽܘܬܶܗ ܐܰܝܟ݂ ܥܽܘܦܝܳܐ ܕܚܰܩܠܳܐ. ⁷ ܝܺܒܶܫ ܥܡܺܝܪܳܐ: ܘܰܚܡܳܐ ܥܽܘܦܝܳܐ ܡܶܛܽܠ ܕܪܽܘܚܗ ܕܡܳܪܝܳܐ ܢܶܫܒܰܬ ܒܶܗ. ܗܳܟ݂ܰܢܳܐ ܗ̱ܘ̣ ܥܡܺܝܪܶܗ ܕܥܰܡܳܐ ܗܳܢܳܐ. ⁸ ܝܳܒܶܫ ܥܡܺܝܪܳܐ: ܘܚܳܡܶܐ ܥܽܘܦܝܳܐ ܘܡܶܠܬ݂ܶܗ ܕܰܐܠܳܗܰܢ ܩܰܝܳܡܳܐ ܠܥܳܠܡܺܝܢ. ⁹ ܥܰܠ ܛܽܘܖ̈ܶܐ ܖ̈ܳܡܶܐ ܣܰܩܝ ܠܶܟ݂ܝ ܨܶܗܝܽܘܢ ܡܣܰܒܰܪܬܳܐ ܐܰܪܺܝܡܝ ܩܳܠܶܟ݂ܝ ܒܚܰܝܠܳܐ: ܐܽܘܪܺܫܠܶܡ ܡܣܰܒܰܪܬܳܐ ܐܰܪܺܝܡܝ: ܘܠܳܐ ܬܶܕܚܠܺܝܢ ܐܶܡܰܪܝ ܠܩܽܘܖ̈ܝܳܐ ܕܺܝܗܽܘܕ݂ܳܐ: ܗܳܐ ܐܰܠܳܗܟܶܝܢ. ¹⁰ ܗܳܐ ܡܳܪܝܳܐ ܐܰ‌ܠܳܗܳܐ ܐܳܬ݁ܶܐ ܒܥܽܘܫܢܳܐ: ܘܰܕ݂ܪܳܥܶܗ ܒܚܰܝܠܳܐ. ܗܳܐ ܐܰܓܪܶܗ ܥܰܡܶܗ: ܘܰܥܒܳܕܶܗ ܩܕ݂ܳܡܰܘܗܝ. ¹¹ ܐܰܝܟ݂ ܪܳܥܝܳܐ ܕܪܳܥܶܐ ܠܰܓܙܳܪܶܗ: ܘܒܰܕ݂ܪܳܥܶܗ ܡܟܰܢܶܫ ܐܶܡܖ̈ܶܐ. ܘܰܒܚܰܢܶܗ ܫܳܩܶܠ ܠܗܽܘܢ. ܘܠܰܕ݂ܡܰܝ̈ܢܩܳܢ ܡܬܰܪܣܶܐ. ¹² ܡܰܢܘ ܐܰܟܺܝܠ ܡܰܝ̈ܳܐ ܒܫܽܘܥܠܶܗ: ܘܰܫܡܰܝܳܐ ܡܫܰܚ ܒܙܰܪܬ݁ܶܗ. ܘܰܐܟܺܝܠ ܒܰܙܘܳܪܶܗ ܥܰܦܪܳܗ̇ ܕܰܐܪܥܳܐ. ܘܰܬ݂ܩܰܠ ܛܽܘܖ̈ܶܐ ܒܡܰܬ݂ܩܳܠܳܐ: ܘܖ̈ܳܡܳܬ݂ܳܐ ܒܡܰܣܰܐܬ݂ܳܐ. ¹³ ܡܰܢܽܘ ܬܰܩܶܢ ܪܽܘܚܶܗ ܕܡܳܪܝܳܐ ܐܰܘ ܡܰܢܽܘ ܗܘܳܐ ܠܶܗ ܡܳܠܶܟ݂ ܡܶܠܟܳܐ. ¹⁴ ܒܡܰܢܽܘ ܐܶܬ݂ܡܰܠܰܟ݂: ܘܰܐܠܦܶܗ ܘܣܰܟܠܶܗ ܐܽܘܪܚܳܐ ܕܕܺܝܢܳܐ ܘܰܐܠܦܶܗ ܝܺܕܰܥܬ݂ܳܐ. ܐܘܪܚܳܐ ܕܣܽܘܟܳܠܳܐ ܚܰܘܝܶܗ. ¹⁵ ܗܳܐ ܥܰܡ̈ܡܶܐ ܐܰܝܟ݂ ܢܽܘܛܦܬܳܐ ܡ̣ܶܢ ܩܰܕ݂ܣܳܐ: ܘܰܐܝܟ݂ ܢܶܙܠܳܐ ܕܡܰܣܰܐܬ݂ܳܐ. ܘܓܳܙܖ̈ܳܬ݂ܳܐ ܐܰܝܟ݂ ܕܰܚܺܝܚܳܐ ܢܶܫ̈ܕ݂ܝܳܢ. ¹⁶ ܘܠܶܒܢܳܢ ܠܳܐ ܚܫܺܝܒ ܠܶܗ ܠܝܰܩܕܳܢܳܐ. ܘܚܰܝܘܬܶܗ ܠܳܐ ܚܫܺܝܒܳܐ ܠܶܗ ܠܳܥܠܳܬ݂ܳܐ. ¹⁷ ܘܟܽܠܗܽܘܢ ܥܰܡ̈ܡܶܐ ܐܰܝܟ݂ ܠܳܐ ܡܶܕܶܡ ܚܫܺܝܒܺܝܢ ܠܶܗ. ܠܰܐܒܕܳܢܳܐ ܘܰܠܚܰܪܒܳܐ ܚܫܺܝܒܺܝܢ ܠܶܗ. ¹⁸ ܠܡܰܢ ܕܰܡܺܝܬ݁ܽܘܢܳܝܗܝ ܠܰܐܠܳܗܳܐ. ܘܠܰܐܝܕܳܐ ܕܡܽܘܬ݂ ܕܰܡܺܝܬ݁ܽܘܢܳܝܗܝ. ¹⁹ ܨܰܠܡܳܐ ܗ̱ܘ̣ ܕܰܥܒܰܕ݂ ܢܰܓܳܪܳܐ ܘܩܰܝܢܳܝܳܐ ܒܕܰܗܒܳܐ ܩܰܪܡܶܗ. ܘܣܺܐܡܳܐ ܨܪܺܝܦܳܐ ܩܒܰܥ ܒܶܗ. ²⁰ ܦܪܰܫ ܗܽܘ ܩܰܝܣܳܐ ܕܠܳܐ ܡܰܒܠܰܛ ܘܰܓܒܳܐ ܢܰܓܳܪܳܐ. ܘܰܒܚܶܡܬܶܗ ܓܰܠܦܶܗ ܘܡܰܬ݂ܩܶܢ ܨܰܠܡܳܐ ܕܠܳܐ ܙܳܐܰܥ. ²¹ ܠܳܐ ܫܡܰܥܬ݁ܽܘܢ: ܘܠܳܐ ܝܺܕܰܥ̣ܬ݁ܽܘܢ ܘܠܳܐ ܐܶܬ݂ܶܐܡܰܪ ܠܟ݂ܽܘܢ ܡ̣ܶܢ ܪܺܫܺܝܬ݂ܳܐ. ܘܠܳܐ ܐܶܣܬܰܟܰܠܬ݁ܽܘܢ: ܫܶܬܶܐܣܶܝ̈ܗ̇ ܕܰܐܪܥܳܐ. ²² ܘܰܠܡܰܢ ܕܝܳܬܶܒ ܥܰܠ ܚܽܘܓܬ݂ܳܗ̇ ܕܰܐܪܥܳܐ: ܘܥܳܡܽܘܖ̈ܶܝܗ̇ ܐܰܝܟ݂ ܩܰܡܨܳܐ ܕܰܡܬܰܚ ܫܡܰܝܳܐ ܐܰܝܟ݂ ܟܶܦܬ݂ܳܐ. ܘܰܡܬܰܚ ܐܶܢܽܘܢ ܐܰܝܟ݂ ܡܰܫܟܢܳܐ ܠܝܰܬ݂ܒܳܐ. ²³ ܕܰܥ̣ܒܰܕ݂ ܫܰܠܺܝܛܳܢ̈ܶܐ ܠܳܐ ܡܶܕܶܡ: ܘܕܰܝܳܢ̈ܶܐ ܕܰܐܪܥܳܐ ܐܰܝܟ݂ ܕܠܰܝܬ݁ ܐܶܢܽܘܢ. ²⁴ ܠܳܐ ܢܶܨܒܽܘܢ: ܘܠܳܐ ܢܶܙܪܥܽܘܢ. ܘܠܳܐ ܢܰܪܡܽܘܢ ܥܶܩܳܪܳܐ ܒܰܐܪܥܳܐ. ܢܶܦܽܘܚ ܒܗܽܘܢ ܘܢܺܐܒܫܽܘܢ. ܘܥܰܠܥܳܠܳܐ ܬܶܫܩܽܘܠ ܐܶܢܽܘܢ ܐܰܝܟ݂ ܕܰܠܚܰܒܬ݂ܳܐ. ²⁵ ܠܡܰܢ ܕܰܡܺܝܬ݁ܽܘܢܳܢܝ ܕܦܳܚܶܡ ܐ̱ܢܳܐ ܠܶܗ: ܐܳܡܰܪ ܩܰܕ݁ܺܝܫܳܐ. ²⁶ ܐܰܪܺܝܡܘ ܥܰܝܢܰܝ̈ܟܽܘܢ ܠܰܡܪܰܘܡܳܐ. ܘܰܚܙܳܘ ܡܰܢܽܘ ܒܪܳܐ ܗܳܠܶܝܢ. ܕܡܰܦܶܩ ܒܡܶܢܝܳܢܳܐ ܚܰܝ̈ܠܰܘܳܬ݂ܗܽܘܢ: ܘܰܠܟܽܠܗܽܘܢ ܩܪܳܐ ܫܡܳܗ̈ܶܐ ܒܣܽܘܓ݂ܳܐܐ ܕܺܐܝܩܳܪܶܗ: ܘܰܒܥܽܘܫܢܳܐ ܕܚܰܝܠܶܗ ܐ̱ܢܳܫ ܠܳܐ ܛܳܥܶܐ. ²⁷ ܠܡܳܢܳܐ ܡܡܰܠܶܠ ܐܰܢ̱ܬ݁ ܝܰܥܩܽܘܒ: ܘܳܐܡܰܪ ܐܰܢ̱ܬ݁ ܝܺܣܪܳܐܶܝܠ. ܕܰܡܛܰܫ̈ܝܳܢ ܐܽܘܖ̈ܚܳܬ݂ܝ ܡ̣ܶܢ ܡܳܪܝܳܐ: ܘܡܰܥܒܰܪ ܕܺܝܢܝ ܡ̣ܶܢ ܐܰܠܳܗܝ. ²⁸ ܠܳܐ ܝܺܕܰܥܬ݁: ܘܠܳܐ ܫܶܡܰܥܬ݁: ܕܰܐ‌ܠܳܗܳܐ ܠܥܳܠܰܡ ܡܳܪܝܳܐ ܗ̱ܘ̣ ܕܰܒܪܳܐ ܣܰܘ̈ܦܶܝܗ̇ ܕܰܐܪܥܳܐ. ܠܳܐ ܡܶܬ݁ܛܰܪܰܦ: ܘܠܳܐ ܠܳܐܶܐ: ܘܠܰܝܬ݁ ܒܽܘܕܳܩܳܐ ܠܣܽܘܟܳܠܶܗ. ²⁹ ܝܳܗܶܒ ܚܰܝܠܳܐ ܠܰܡܛܰܖ̈ܦܶܐ ܘܰܠܡܰܟ݂ܐܒܰܝ̈ ܟܺܐܒܳܐ ܡܰܣܓܶܐ ܥܽܘܫܢܳܐ. ³⁰ ܢܶܬ݁ܛܰܪܦܽܘܢ ܥܠܰܝ̈ܡܶܐ ܘܢܶܠܐܽܘܢ ܘܓܰܕܽܘ̈ܕܶܐ ܡܶܬ݁ܬܰܩܳܠܽܘ ܢܶܬܰܩܠܽܘܢ. ³¹ ܘܰܐܝܠܶܝܢ ܕܰܡܣܰܒܪܺܝܢ ܒܡܳܪܝܳܐ: ܢܚܰܠܦܽܘܢ ܚܰܝܠܗܽܘܢ. ܘܢܰܘܥܽܘܢ ܓܶܦ̈ܶܐ ܐܰܝܟ݂ ܕܝܳܘܢܳܐ. ܘܢܶܪܗܛܽܘܢ: ܘܠܳܐ ܢܶܠܐܽܘܢ ܘܰܢܗܰܠܟ݂ܽܘܢ: ܘܠܳܐ ܢܶܬ݁ܛܰܪܦܽܘܢ.

ܩܶܦܰܠܶܐܘܳܢ: ܡܐ

¹ ܫܬ݂ܽܘܩܺܝ̈ܢ ܓܳܙܖ̈ܳܬ݂ܳܐ. ܘܶܐܡ̈ܘܳܬ݂ܳܐ ܢܚܰܠ̈ܦܳܢ ܚܰܝܠܳܐ. ܢܶܩܖ̈ܒܳܢ: ܘܗܳܝܕܶܝܢ ܢܡܰܠ̈ܠܳܢ ܘܰܐܟ݂ܚܕ݂ܳܐ ܠܕܺܝܢܳܐ ܢܶܩܖ̈ܒܳܢ. ² ܡܰܢܽܘ ܐܰܥܺܝܪ ܙܰܕܺܝܩܽܘܬܳܐ ܡ̣ܶܢ ܡܰܕ݂ܢܚܳܐ: ܘܰܩܪܳܗ̇ ܠܪܶܓܠܶܗ. ܢܶܫܬܰܠܡܽܘܢ ܩܕ݂ܳܡܰܘܗܝ ܥܰܡ̈ܡܶܐ ܘܡܰܠ̈ܟܶܐ ܢܶܬܘܪܽܘܢ ܢܶܬܶܠ ܐܰܝܟ݂ ܥܰܦܪܳܐ ܚܰܪܒܶܗ: ܘܰܐܝܟ݂ ܕܢܳܬ݂ܪܳܐ ܩܶܫܬ݁ܶܗ. ³ ܢܶܪܕܽܘܦ ܐܶܢܽܘܢ: ܘܢܶܥܒܶܕ݂ ܫܠܳܡܳܐ. ܐܘܪܚܳܐ ܒܖ̈ܶܓܠܰܘܗܝ ܠܳܐ ܢܰܥܶܠ. ⁴ ܡܰܢܽܘ ܥܰܬ݁ܶܕ݂ ܘܰܥܒܰܕ݂ ܡܰܢ ܕܰܩܪܳܐ ܠܕ݂ܳܖ̈ܶܐ ܡ̣ܶܢ ܪܺܫܺܝܬ݂ܳܐ. ܐܶܢܳܐ ܐ̱ܢܳܐ ܡܳܪܝܳܐ ܩܰܕ݂ܡܳܝܳܐ ܘܰܐ̱ܚܪܳܝܳܐ: ܐܶܢܳܐ ܐ̱ܢܳܐ. ⁵ ܚܙܰܝܳܢ̈ܝ ܓܳܙܖ̈ܳܬ݂ܳܐ. ܘܰܕ݂ܚܶܠܘ ܣܰܘ̈ܦܶܝܗ̇ ܕܰܐܪܥܳܐ. ܕܚܶܠܘ ܘܰܩܪܶܒܘ ܘܶܐܬ݂ܰܘ. ⁶ ܘܰܓܒܰܪ ܠܚܰܒܪܶܗ ܡܥܰܕܪܺܝܢ ܘܠܰܐܚܰܘ̈ܗܝ ܐܳܡܰܪ ܐܶܬ݂ܚܰܝܰܠ. ⁷ ܘܠܰܒܶܒ ܢܰܓܳܪܳܐ ܠܩܰܝܢܳܝܳܐ ܕܳܐܪܶܫ ܒܩܽܘܪܢܳܣܳܐ: ܘܦܳܠܰܚ. ܘܳܐܡܰܪ ܥܰܠ ܕܶܒܩܳܐ ܕܫܰܦܺܝܪ ܗ̱ܘ̣. ܘܩܳܒܥܺܝܢ ܠܶܗ ܒܨܶܨ̈ܶܐ: ܕܠܳܐ ܢܶܬ݁ܬ݁ܙܺܝܥ. ⁸ ܗܳܫܳܐ ܝܺܣܪܳܐܶܝܠ ܥܰܒܕܝ: ܝܰܥܩܽܘܒ ܕܰܓܒܶܝܬ݂ܳܟ݂: ܙܰܪܥܶܗ ܕܰܐܒܪܳܗܳܡ ܪܳܚܡܝ ܕܚܰܝܶܠܬܳܟ݂. ⁹ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ: ܘܡ̣ܶܢ ܕܰܘܩܶܝ̈ܗ̇ ܩܪܺܝܬ݂ܳܟ݂ ܘܶܐܡܪܶܬ݂ ܠܳܟ݂ ܥܰܒܕܝ ܠܳܟ݂ ܥܰܒܕܝ ܐܰܢ̱ܬ݁ ܓܒܶܝܬ݂ܳܟ݂ ܘܠܳܐ ܐܰܣܠܺܝܬܳܟ݂. ¹⁰ ܠܳܐ ܬܶܕ݂ܚܰܠ ܡܶܛܽܠ ܕܥܰܡܳܟ݂ ܐ̱ܢܳܐ. ܘܠܳܐ ܬܶܬ݂ܪܗܶܒ ܡܶܛܽܠ ܕܶܐܢܳܐ ܐ̱ܢܳܐ ܐܰܠܳܗܳܟ݂. ܚܰܝܶܠܬܳܟ݂: ܐܳܦ ܥܰܕܰܪܬܳܟ݂ ܐܳܦ ܣܰܡܶܟ݂ܬܳܟ݂ ܒܝܰܡܺܝܢܝ ܙܰܕܺܝܩܬܳܐ. ¹¹ ܢܶܒܗܬ݂ܽܘܢ ܘܢܰܚܦܪܽܘܢ ܐܰܝܠܶܝܢ ܕܣܳܩܪܺܝܢ ܠܳܟ݂: ܢܶܗܘܽܘܢ ܐܰܝܟ݂ ܠܳܐ ܡܶܕܶܡ. ܘܢܺܐܒܕܽܘܢ ܓܰܒܖ̈ܶܐ ܕܢܳܨܶܝܢ ܥܰܡܳܟ݂. ¹² ܬܶܒܥܶܐ ܐܶܢܽܘܢ: ܘܠܳܐ ܬܶܫܟܰܚ ܐܶܢܽܘܢ ܠܓܰܒܖ̈ܶܐ ܕܢܳܨܶܝܢ ܥܰܡܳܟ݂. ܢܶܗܘܽܘܢ ܐܰܝܟ݂ ܕܠܳܐ ܐܺܝܬܰܝܗܽܘܢ: ܓܰܒܖ̈ܶܐ ܕܡܶܬ݂ܟܰܬ݁ܫܺܝܢ ܥܰܡܳܟ݂. ¹³ ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܳܟ݂: ܡܚܰܝܠܳܢܳܐ ܕܝܰܡܺܝܢܳܟ݂: ܐܶܡܪܶܬ݂ ܠܳܟ݂ ܠܳܐ ܬܶܕ݂ܚܰܠ. ܐܶܢܳܐ ܐ̱ܢܐ ܥܳܕ݂ܽܘܪܳܟ݂. ¹⁴ ܠܳܐ ܬܶܕ݂ܚܠܺܝܢ ܬܰܘܠܥܶܗ ܕܝܰܥܩܽܘܒ: ܘܰܡܢܺܝܢܶܗ ܕܺܝܣܪܳܐܶܝܠ ܐܶܢܳܐ ܐ̱ܢܳܐ ܥܳܕ݂ܽܘܪܶܟ݂ܝ: ܐܳܡܰܪ ܡܳܪܝܳܐ. ܘܦܳܪܽܘܩܶܟ݂ܝ ܩܰܕ݁ܺܝܫܳܐ ܕܺܝܣܪܳܐܶܝܠ. ¹⁵ ܗܳܐ ܥܒܰܕܬܳܟ݂ ܐܰܝܟ݂ ܓܰܪܓܰܪܳܟ݂ ܚܰܕ݂ܬ݂ܳܐ: ܕܫܳܚܶܩ ܘܡܰܕܶܩ ܬܕ݂ܽܘܫ ܛܽܘܖ̈ܶܐ: ܘܬܰܕܶܩ ܘܖ̈ܳܡܳܬ݂ܳܐ ܬܶܥܒܶܕ݂ ܐܰܝܟ݂ ܥܽܘܪܳܐ. ¹⁶ ܬܶܕ݂ܕܶܐ ܐܶܢܽܘܢ. ܘܪܽܘܚܳܐ ܬܶܫܩܽܘܠ ܐܶܢܽܘܢ ܘܥܰܠܥܳܠܳܐ ܬܒܰܕܰܪ ܐܶܢܽܘܢ. ܘܰܐܢ̱ܬ݁ ܬܕ݂ܽܘܨ ܒܡܳܪܝܳܐ. ܘܰܒܩܰܕ݁ܺܝܫܳܐ ܕܺܝܣܪܳܐܶܝܠ ܬܶܫܬܰܒܰܚ. ¹⁷ ܡܶܣܟܺܢ̈ܶܐ ܘܒܳܝ̈ܫܶܐ ܒܳܥܶܝܢ ܡܰܝ̈ܳܐ ܘܠܰܝܬ݁ ܘܠܶܫܳܢܗܽܘܢ ܒܨܶܗܝܳܐ ܝܺܒܶܫ ܐܶܢܳܐ ܡܳܪܝܳܐ ܐܶܥܢܶܐ ܐܶܢܽܘܢ ܐܰܠܳܗܶܗ ܕܺܝܣܪܳܐܶܝܠ: ܘܠܳܐ ܐܶܫܒܽܘܩ ܐܶܢܽܘܢ. ¹⁸ ܐܶܦܬܰܚ ܢܰܗܖ̈ܰܘܳܬ݂ܳܐ ܒܛܽܘܖ̈ܶܐ: ܘܰܒܓܰܘ ܦܰܩ̈ܥܳܬ݂ܳܐ ܡܰܒܽܘ̈ܥܶܐ: ܐܶܥܒܶܕ݂ ܡܰܕ݂ܒܪܳܐ ܠܰܐܓ̈ܡܶܐ ܕܡܰܝ̈ܳܐ: ܘܰܐܪܥܳܐ ܨܗܺܝܬ݂ܳܐ ܠܡܰܒܽܘ̈ܥܶܐ ܕܡܰܝ̈ܳܐ. ¹⁹ ܐܶܬ݁ܶܠ ܒܡܰܕ݂ܒܪܳܐ ܐܰܖ̈ܙܶܐ ܘܶܐܫܟܳܖ̈ܥܶܐ: ܘܳܐܣܳܐ ܘܩܰܝܣܳܐ ܕܡܶܫܚܳܐ. ܐܶܣܺܝܡ ܒܰܦܩܰܥܬ݂ܳܐ ܫܰܖ̈ܘܰܝܢܶܐ ܗܕ݂ܺܝܖ̈ܶܐ ܐܰܟ݂ܚܕ݂ܳܐ. ²⁰ ܕܢܶܚܙܽܘܢ ܘܢܶܕܥܽܘܢ ܘܢܶܬ݂ܒܰܝܢܽܘܢ. ܘܢܶܣܬܰܟܠܽܘܢ ܐܰܟ݂ܚܕ݂ܳܐ: ܕܺܐܝܕܶܗ ܕܡܳܪܝܳܐ ܥܶܒܕܰܬ ܗܳܕܶܐ: ܘܩܰܕ݁ܺܝܫܳܐ ܕܺܝܣܪܳܐܶܝܠ ܒܪܳܗ̇. ²¹ ܩܰܪܶܒܘ ܕܺܝܢܰܝ̈ܟܽܘܢ: ܐܳܡܰܪ ܡܳܪܝܳܐ. ܩܰܪܶܒܘ ܬܰܖ̈ܥܝܳܬ݂ܟ݂ܽܘܢ ܐܳܡܰܪ ܡܰܠܟܶܗ ܕܝܰܥܩܽܘܒ. ²² ܢܶܩܪܒܽܘܢ: ܘܰܢܚܳܘܢ ܐܰܝܠܶܝܢ ܕܰܥܬ݂ܺܝ̈ܕ݂ܳܢ ܩܰܕ݂ܡܳܝ̈ܳܬ݂ܳܐ ܡܳܢܳܐ ܐܶܢܶܝܢ: ܚܳܘܰܐܢܝ. ܘܰܢܣܺܝܡ ܒܠܶܒܰܢ: ܘܢܶܕܰܥ ܐ̱ܚܖ̈ܳܝܳܬ݁ܗܶܝܢ. ܐܰܘ ܕܳܐܬ݂ܝ̈ܳܢ ܐܰܫܡܥܽܘܢ. ²³ ܚܳܘܰܐܢܝ ܐܳܬܘ̈ܳܬܳܐ ܕܰܥܬ݂ܺܝ̈ܕ݂ܳܢ ܘܢܶܕܰܥ ܕܰܐܠܳܗ̈ܶܐ ܐܰܢ̱ܬ݁ܽܘܢ ܐܳܦ ܡܰܛܐܒܺܝܢ ܐ̱ܢܬ݁ܽܘܢ ܐܳܦ ܡܰܒܐܫܺܝܢ ܐ̱ܢܬ݁ܽܘܢ ܘܢܶܫܬܰܥܶܐ: ܘܢܶܚܙܶܐ ܐܰܟ݂ܚܕ݂ܳܐ. ²⁴ ܗܳܐ ܐܰܢ̱ܬ݁ܽܘܢ ܠܳܐ ܡܶܕܶܡ ܐܰܢ̱ܬ݁ܽܘܢ. ܘܰܥܒܳܕܰܝ̈ܟܽܘܢ ܡ̣ܶܢ ܚܰܪܒܳܐ. ܘܛܰܢܦܽܘܬ݂ܳܐ ܗ̱ܝ ܓܒܺܝܬ݂ܟܽܘܢ. ²⁵ ܐܰܥܺܝܪܶܬ݂ ܡ̣ܶܢ ܓܰܪܒܝܳܐ: ܕܢܺܐܬܶܐ ܡ̣ܶܢ ܡܰܕ݂ܢܳܚܰܝ̈ ܫܶܡܫܳܐ: ܘܢܶܩܪܶܐ ܒܫܶܡܝ. ܘܢܺܐܬ݂ܽܘܢ ܫܰܠܺܝ̈ܛܳܢܶܐ ܘܢܶܬ݁ܬ݁ܕܺܝܫܽܘܢ: ܐܰܝܟ݂ ܛܺܝܢܳܐ ܕܕܳܐܶܫ ܦܰܚܳܪܳܐ. ²⁶ ܡܰܢܽܘ ܕܰܢܚܳܘܶܐ ܡ̣ܶܢ ܪܺܝܫܺܝܬ݂ܳܐ: ܘܢܶܕܰܥ ܘܢܺܐܡܰܪ ܕܙܰܕܺܝܩ. ܠܰܝܬ݁ ܕܰܡܚܳܘܶܐ ܐܳܦܠܳܐ ܕܡܰܫܡܰܥ: ܐܳܦܠܳܐ ܕܫܳܡܰܥ ܡܶܠܰܝ̈ܟܽܘܢ. ²⁷ ܖ̈ܺܝܫܳܝܳܬ݂ܳܐ ܕܨܶܗܝܽܘܢ ܗܳܠܶܝܢ ܐܶܢܶܝܢ. ܘܠܽܐܘܪܺܫܠܶܡ ܡܣܰܒܪܳܢܳܐ ܐܶܬ݁ܶܠ. ²⁸ ܚܳܪܶܬ݂ ܘܠܰܝܬ݁ ܐ̱ܢܳܫ ܕܡܶܬ݂ܪܰܥܶܐ ܥܰܠ ܗܳܠܶܝܢ: ܕܶܐܫܰܐܶܠ ܐܶܢܽܘܢ: ܘܢܶܬ݁ܠܽܘܢ ܠܺܝ ܦܶܬ݂ܓ݂ܳܡܳܐ. ²⁹ ܗܳܐ ܟܽܠܗܽܘܢ ܠܳܐ ܡܶܕܶܡ ܐܶܢܽܘܢ: ܘܰܥܒܳܕܰܝ̈ܗܽܘܢ ܣܪܺܝܩܺܝܢ ܘܪܽܘܚܳܐ ܪܰܝܩܳܢܺܝܬ݂ܳܐ ܥܒܳܕܰܝ̈ܗܽܘܢ.

ܩܶܦܰܠܶܐܘܳܢ: ܡܒ

¹ ܗܳܐ ܠܥܰܒܕܝ ܣܰܡܟܶܬ. ܘܰܒܓܰܒܺܝ ܨܒܳܬ ܢܰܦܫܝ. ܘܝܶܗܒܶܬ݂ ܪܽܘܚܝ ܥܠܰܘܗ̱ܝ: ܕܢܰܦܶܩ ܕܺܝܢܳܐ ܠܥܰܡ̈ܡܶܐ. ² ܠܳܐ ܢܶܩܥܶܐ: ܘܠܳܐ ܢܪܺܝܒ ܘܠܳܐ ܢܰܫܡܰܥ ܩܳܠܶܗ ܒܫܽܘܩܳܐ. ³ ܩܰܢܝܳܐ ܪܥܺܝܥܳܐ ܠܳܐ ܢܶܬ݂ܒܰܪ. ܘܰܫܪܳܓܳܐ ܕܰܡܛܰܦܛܶܦ ܠܳܐ ܢܰܕ݂ܥܶܟ݂. ܒܩܽܘܫܬܳܐ ܢܰܦܶܩ ܕܺܝܢܳܐ. ⁴ ܠܳܐ ܢܶܕ݂ܥܰܟ݂ ܘܠܳܐ ܢܛܰܦܛܶܦ: ܥܕܰܡܳܐ ܕܰܢܣܺܝܡ ܕܺܝܢܳܐ ܒܰܐܪܥܳܐ. ܘܰܠܢܳܡܽܘܣܶܗ ܓܳܙܖ̈ܳܬ݂ܳܐ ܢܣܰܟ̈ܝܳܢ. ⁵ ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ: ܕܰܒܪܳܐ ܫܡܰܝܳܐ ܘܰܡܬܰܚ ܐܶܢܽܘܢ. ܘܰܪܩܰܥ ܐܰܪܥܳܐ ܘܟ݂ܽܠ ܕܒܳܗ̇. ܘܝܰܗܒ ܢܫܰܡܬ݂ܳܐ ܠܥܰܡܳܐ ܕܰܥܠܶܝܗ̇: ܘܪܽܘܚܳܐ ܠܕܰܡܗܰܠܟ݂ܺܝܢ ܒܳܗ̇. ⁶ ܐܶܢܳܐ ܡܳܪܝܳܐ ܩܪܺܝܬܳܟ݂ ܒܙܰܕܺܝܩܽܘܬ݂ܳܐ: ܘܶܐܚܕܶܬ݂ ܒܺܐܝܕ݂ܳܟ݂ ܘܚܰܝܶܠܬܳܟ݂. ܘܝܰܗܒܬܳܟ݂ ܩܝܳܡܳܐ ܠܥܰܡܳܐ: ܘܢܽܘܗܪܳܐ ܠܥܰܡ̈ܡܶܐ. ⁷ ܕܰܬ݂ܦܰܬܰܚ ܥܰܝ̈ܢܶܐ ܕܰܥܘܺܝܖ̈ܶܐ: ܘܬܰܦܶܩ ܠܰܐܣܺܝܖ̈ܶܐ ܡ̣ܶܢ ܒܶܝܬ݂ ܚܒܽܘܫܝܳܐ: ܘܡ̣ܶܢ ܒܶܝܬ݂ ܐܰܣܺܝܖ̈ܶܐ ܠܰܕ݂ܝܳܬ݂ܒܺܝܢ ܒܚܶܫܽܘܟ݂ܳܐ. ⁸ ܐܶܢܳܐ ܐ̱ܢܳܐ ܡܳܪܝܳܐ: ܘܗܳܢܰܘ ܫܶܡܝ. ܘܺܐܝܩܳܪܝ ܠܰܐܚܪܺܝܢ ܠܳܐ ܐܶܬܶܠ: ܘܳܐܦܠܳܐ ܬܶܫܒܽܘܚܬ݁ܝ ܠܰܓܠܺܝ̈ܦܶܐ. ⁹ ܚܰܕ݂̈ܳܬܳܬ݂ܳܐ ܐܶܢܳܐ ܡܚܳܘܶܐ. ܘܩܰܕ݂ܡܳܝ̈ܳܬ݂ܳܐ ܗܳܐ ܐܶܬܰܝ̈. ܘܥܰܕ݂ܠܳܐ ܢܶܨܡ̈ܚܳܢ: ܐܰܫܡܥܶܬ݂ ܐܶܢܶܝܢ ܠܟ݂ܽܘܢ. ܬܶܫܒܽܘܚܬܳܐ ܕܶܐܫܰܥܝܳܐ. ¹⁰ ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܬܶܫܒܽܘܚܬܶܗ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ. ܢܳܚܬܰܝ̈ ܝܰܡܳܐ ܒܰܡܠܳܐܶܗ: ܘܓܳܙܖ̈ܳܬ݂ܳܐ ܕ݂ܥܳܡܪܺܝܢ ܒܗܶܝܢ. ¹¹ ܢܶܚܕܶܐ ܡܰܕ݂ܒܪܳܐ ܘܩܽܘܖ̈ܶܝܗ̇: ܘܡܰܖ̈ܓܶܐ ܬܶܗܘܶܐ ܩܶܕ݂ܳܪ. ܢܫܰܒܚܽܘܢ ܝܳܬ݂ܒܰܝ̈ ܫܩܺܝ̈ܦܶܐ: ܘܡ̣ܶܢ ܪܺܝܫܳܐ ܕܛܽܘܖ̈ܶܐ ܢܶܩܥܽܘܢ. ¹² ܘܢܶܬ݁ܠܽܘܢ ܬܶܫܒܽܘܚܬܳܐ ܠܡܳܪܝܳܐ: ܘܬܶܫ̈ܒܚܳܬܶܗ ܢܚܰܘܢ ܒܓܳܙܖ̈ܳܬ݂ܳܐ. ¹³ ܡܳܪܝܳܐ ܐܰܝܟ݂ ܓܰܢ̱ܒܳܪܳܐ ܢܶܦܽܘܩ. ܘܰܐܝܟ݂ ܓܰܒܪܳܐ ܩܪܰܒܬ݂ܳܢܳܐ ܢܓܰܪܶܓ ܛܢܳܢܳܐ. ܢܶܩܥܶܐ ܘܢܶܬ݂ܓܰܢ̱ܒܰܪ: ܘܢܶܩܛܽܘܠ ܠܰܒܥܶܠܕܒܳܒܰܘ̈ܗܝ. ¹⁴ ܫܶܬ݂ܩܶܬ݂: ܡ̣ܶܢ ܥܳܠܰܡ ܐܶܫܬ݁ܽܘܩ ܣܰܝܒܪܶܬ݂ ܐܰܝܟ݂ ܝܳܠܶܕܬܳܐ. ܐܰܬ݂ܡܰܗ ܘܰܐܬ݂ܘܰܪ ܐܰܟ݂ܚܕ݂ܳܐ. ¹⁵ ܐܰܚܪܶܒ ܛܽܘܖ̈ܶܐ ܘܖ̈ܳܡܳܬ݂ܳܐ: ܘܟ݂ܽܠܶܗ ܥܽܘܫܢܗܽܘܢ ܐܰܘܒܶܫ. ܐܶܥܒܶܕ݂ ܢܰܗܖ̈ܰܘܳܬ݂ܳܐ ܠܓܳܙܖ̈ܳܬ݂ܳܐ: ܘܰܐܓܡ̈ܶܐ ܐܰܘܒܶܫ. ¹⁶ ܐܶܕ݂ܒܰܪ ܥܘܺܝܖ̈ܶܐ ܒܽܐܘܪܚܳܐ ܕܠܳܐ ܝܳܕ݂ܥܺܝܢ. ܘܒܰܫܒܺܝ̈ܠܶܐ ܕܠܳܐ ܝܳܕ݂ܥܺܝܢ ܗ̱ܘܰܘ: ܐܶܗܰܠܶܟ݂ ܐܶܢܽܘܢ. ܐܶܥܒܶܕ݂ ܚܶܫܽܘܟ݂ܳܐ ܩܕ݂ܳܡܰܝܗܽܘܢ ܢܽܘܗܪܳܐ. ܘܥܰܪܡܳܐ ܐܶܫܰܦܶܐ. ܗܳܠܶܝܢ ܦܶܬ݂ܓܳܡ̈ܶܐ ܥܶܒܕܶܬ݂ ܠܗܽܘܢ. ܘܠܳܐ ܫܶܒܩܶܬ݂ ܐܶܢܽܘܢ. ¹⁷ ܢܶܗܦܟ݂ܽܘܢ ܠܒܶܣܬܰܪܗܽܘܢ: ܘܢܶܒܗܬ݂ܽܘܢ ܒܒܶܗܬܬ݂ܳܐ: ܐܰܝܠܶܝܢ ܕܰܬ݂ܟ݂ܺܝܠܺܝܢ ܥܰܠ ܓܠܺܝ̈ܦܶܐ: ܘܐܳܡܪܺܝܢ ܠܰܢܣܺܝ̈ܟܶܐ: ܕܰܐܢ̱ܬ݁ܽܘܢ ܐܶܢܽܘܢ ܐܰܠܳܗܰܝ̈ܢ. ¹⁸ ܚܰܖ̈ܫܶܐ ܫܡܰܥܘ. ܘܰܥܘܺܝܖ̈ܶܐ ܐܶܣܬܰܟܰܠܘ: ܘܰܚܙܳܘ. ¹⁹ ܡܰܢܘ ܥܘܺܝܪܳܐ ܐܶܠܳܐ ܥܰܒܕܝ: ܘܚܰܪܫܳܐ ܐܰܝܟ݂ ܡܰܠܰܐܟ݂ܝ ܕܶܐܫܰܕܰܪ ܡܰܢܽܘ ܥܘܺܝܪܳܐ ܐܰܝܟ݂ ܫܰܠܺܝܛܳܐ: ܘܰܥܘܺܝܪܳܐ ܐܰܝܟ݂ ܥܰܒܕܶܗ ܕܡܳܪܝܳܐ. ²⁰ ܚܳܪܶܬ݂ ܣܰܓܺܝ ܘܠܳܐ ܢܳܛܪܺܝܢ ܐ̱ܢܬ݁ܽܘܢ ܘܦܶܬ݂ܚܶܬ݂ ܐܶܕܢ̈ܶܐ: ܘܠܳܐ ܫܳܡܥܺܝܢ ܐ̱ܢܬ݁ܽܘܢ. ²¹ ܡܳܪܝܳܐ ܨܒܳܐ ܡܶܛܽܠ ܙܰܕܺܝܩܽܘܬܶܗ: ܕܢܰܘܪܶܒ ܢܳܡܽܘܣܳܐ ܘܰܢܫܰܒܚܺܝܘܗܝ. ²² ܘܗܽܘ ܥܰܡܳܐ ܒܙܺܝܙܳܐ ܘܕ݂ܺܝܫܳܐ ܦܰܚ̈ܶܐ ܐܶܢܽܘܢ ܟܽܠܗܽܘܢ ܓܰܕ݂ܽܘ̈ܕܶܐ ܘܰܒ̈ܒܳܬ݁ܶܐ ܐܰܣܺܝܖ̈ܶܐ ܛܰܫܺܝܘ. ܗܘܰܘ ܠܒܶܙܬ݂ܳܐ: ܘܠܰܝܬ݁ ܕܰܡܦܰܨܶܐ ܘܠܰܕ݂ܝܳܫܳܐ: ܘܠܰܝܬ݁ ܕܡܰܦܢܶܐ. ²³ ܡܰܢܘ ܐܺܝܬ݂ ܒܟ݂ܽܘܢ ܕܢܰܫܡܰܥ ܗܳܕܶܐ. ܘܰܢܨܽܘܬ݂ ܘܢܶܫܡܰܥ ܠܰܐܚܪܺܬ݂ܳܐ. ²⁴ ܡܰܢܽܘ ܝܰܗܒ ܠܝܰܥܩܽܘܒ ܠܰܕ݂ܝܳܫܳܐ: ܘܠܺܝܣܪܳܐܶܝܠ ܠܰܒܙܳܙܳܐ. ܠܳܐ ܗ̱ܘܳܐ ܡܳܪܝܳܐ ܥܰܠ ܕܰܚܛܰܝܢ ܠܶܗ: ܘܠܳܐ ܨܒܰܝܢ ܠܰܡܗܰܠܳܟ݂ܘ ܒܽܐܘܖ̈ܚܳܬܶܗ: ܘܠܳܐ ܫܡܰܥܢ ܢܳܡܽܘܣܶܗ. ²⁵ ܐܶܫܰܕ݂ ܥܠܰܝܗܽܘܢ ܚܶܡܬ݂ܳܐ ܕܪܽܘܓܙܶܗ. ܘܥܽܘܫܢܳܐ ܕܰܩܪܳܒܳܐ ܐܰܘܩܶܕ݂ ܐܶܢܽܘܢ ܡ̣ܶܢ ܚܕ݂ܳܖ̈ܰܝܗܽܘܢ ܘܠܳܐ ܝܺܕܰܥܘ ܘܚܶܒܰܬ ܒܗܽܘܢ ܢܽܘܪܳܐ: ܘܠܳܐ ܐܰܝܬܺܝܘ ܥܰܠ ܒܳܠܗܽܘܢ.

ܩܶܦܰܠܶܐܘܳܢ: ܡܓ

¹ ܗܳܫܳܐ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܰܒܪܳܟ݂ ܝܰܥܩܽܘܒ ܘܓܰܒܠܳܟ݂ ܝܺܣܪܳܐܶܝܠ ܠܳܐ ܬܶܕ݂ܚܰܠ ܕܰܦܪܰܩܬ݂ܳܟ݂: ܘܰܩܪܺܝܬ݂ܳܟ݂ ܒܰܫܡܳܟ݂: ܕܕ݂ܺܝܠܝ ܐܰܢ̱ܬ݁. ² ܐܶܢ ܬܶܥܒܰܪ ܒܝܰܡܳܐ: ܥܰܡܳܟ݂ ܐ̱ܢܳܐ ܘܢܰܗܖ̈ܰܘܳܬ݂ܳܐ ܠܳܐ ܢܶܓܪܦܽܘܢܳܟ݂. ܐܶܢ ܬܗܰܠܶܟ݂ ܥܰܠ ܢܽܘܪܳܐ ܠܳܐ ܬܶܬ݂ܟܰܘܶܐ: ܘܫܰܠܗܶܒܺܝܬ݂ܳܐ ܠܳܐ ܬܰܘܩܕܳܟ݂. ³ ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܳܟ݂: ܩܰܕ݁ܺܝܫܳܐ ܕܺܝܣܪܳܐܶܝܠ ܦܳܪܽܘܩܳܟ݂ ܝܶܗܒܶܬ݂ ܠܡܶܨܪܶܝܢ ܚܠܳܦܰܝܟ: ܘܰܠܟ݂ܽܘܫ ܘܠܰܫܒܳܐ ܥܰܠ ܐܰܦܰܝ̈ܟ. ⁴ ܡ̣ܶܢ ܕܝܰܩܺܝܪ ܐܰܢ̱ܬ݁ ܒܥܰܝ̈ܢܰܝ ܐܶܫܬܰܒܰܚܬ݁: ܘܶܐܢܳܐ ܪܚܶܡܬ݂ܳܟ݂ ܝܶܗܒܶܬ݂ ܐ̱ܢܳܫܳܐ ܚܠܳܦܰܝܟ: ܘܶܐܡ̈ܘܳܬ݂ܳܐ ܚܠܳܦ ܢܰܦܫܳܟ݂. ⁵ ܠܳܐ ܬܶܕ݂ܚܰܠ ܡܶܛܽܠ ܕܥܰܡܳܟ݂ ܐ̱ܢܳܐ ܡ̣ܶܢ ܡܰܕ݂ܢܚܳܐ ܐܰܝܬ݁ܐ ܙܰܪܥܳܟ݂. ܘܡ̣ܶܢ ܡܰܥܪܒܳܐ ܐܶܟܰܢܫܳܟ݂. ⁶ ܐܶܡܰܪ ܠܓܰܪܒܝܳܐ ܕܗܰܒܝ. ܘܰܠܬܰܝܡܢܳܐ ܕܠܳܐ ܬܶܟ݂ܠܺܝܢ ܐܰܝܬ݁ܶܐ ܒܢܰܝ̈ ܡ̣ܶܢ ܪܽܘܚܩܳܐ: ܘܰܒ̈ܢܳܬ݂ܝ ܡ̣ܶܢ ܣܰܘ̈ܦܶܝܗ̇ ܕܰܐܪܥܳܐ. ⁷ ܟܠ ܕܩܳܪܶܐ ܒܫܶܡܝ: ܠܺܐܝܩܳܪܝ ܒܪܺܝܬܶܗ ܘܰܓܒܰܠܬ݁ܶܗ ܘܰܥܒܰܕܬ݁ܶܗ. ⁸ ܐܰܦܶܩ ܥܰܡܳܐ ܥܘܺܝܪܳܐ: ܕܥܰܝ̈ܢܶܐ ܐܺܝܬ݂ ܠܗܽܘܢ: ܘܶܐܕܢ̈ܶܐ ܐܺܝܬ݂ ܠܗܽܘܢ ܘܚܰܪܫܺܝܢ. ⁹ ܟܽܠܗܽܘܢ ܥܰܡ̈ܡܶܐ ܢܶܬ݂ܟܰܢܫܽܘܢ ܐܰܟ݂ܚܕ݂ܳܐ. ܘܢܶܬ݂ܟܰܢ̈ܫܳܢ ܐܶܡ̈ܘܳܬ݂ܳܐ ܡܰܢܽܘ ܐܺܝܬ݂ ܒܟ݂ܽܘܢ ܕܰܢܚܳܘܶܐ ܗܳܕܶܐ: ܘܩܰܕ݂ܡܳܝ̈ܳܬ݂ܳܐ ܢܰܫܡܰܥ ܢܰܝܬ݁ܽܘܢ ܣܳܗܕܰܝ̈ܗܽܘܢ ܘܢܶܙܕܰܕܩܽܘܢ: ܘܢܶܫܡܥܽܘܢ ܘܢܺܐܡܪܽܘܢ. ¹⁰ ܒܩܽܘܫܬܳܐ ܐܰܢ̱ܬ݁ܽܘܢ ܣܳܗ̈ܕܰܝ: ܐܳܡܰܪ ܡܳܪܝܳܐ: ܘܥܰܒ̈ܕܰܝ ܕܰܓܒܶܝܬ݂ ܘܬܶܕܥܽܘܢ ܘܰܬ݂ܗܰܝܡܢܽܘܢ ܒܺܝ ܘܬܶܣܬܰܟܠܽܘܢ ܕܶܐܢܳܐ ܗ̱ܘ̣. ܘܰܩܕ݂ܳܡܝ ܠܳܐ ܐܶܬ݂ܒܪܺܝ ܐܰܠܳܗ ܘܒܳܬܰܪܝ ܠܳܐ ܢܶܗܘܶܐ. ¹¹ ܐܶܢܳܐ ܐ̱ܢܳܐ ܡܳܪܝܳܐ: ܘܠܰܝܬ݁ ܬܽܘܒ ܠܒܰܪ ܡܶܢܝ. ¹² ܐܶܢܳܐ ܚܳܘܺܝܬ݂ ܘܦܶܪܩܶܬ݂ ܘܰܐܫܡܥܶܬ݂: ܘܠܰܝܬ݁ ܒܟ݂ܽܘܢ ܢܽܘܟ݂ܪܳܝܳܐ: ܘܰܐܢ̱ܬ݁ܽܘܢ ܣܳܗ̈ܕܰܝ: ܐܳܡܰܪ ܡܳܪܝܳܐ. ܘܶܐܢܳܐ ܐܰ‌ܠܳܗܳܐ. ¹³ ܘܳܐܦ ܡ̣ܶܢ ܝܰܘܡܳܐ ܩܰܕ݂ܡܳܝܳܐ ܐܶܢܳܐ ܐ̱ܢܳܐ: ܘܠܰܝܬ݁ ܕܡܶܬ݂ܦܰܨܶܐ ܡ̣ܶܢ ܐܺܝܕܰܝ̈. ܘܡܶܕܶܡ ܕܥܳܒܶܕ݂ ܐ̱ܢܳܐ: ܡܰܢܽܘ ܡܰܗܦܶܟ݂. ¹⁴ ܗܳܟ݂ܰܢܳܐ ܐܳܡܰܪ ܡܳܪܝܳܐ ܦܳܪܽܘܩܟ݂ܽܘܢ ܩܰܕ݁ܺܝܫܳܐ ܕܺܝܣܪܳܐܶܝܠ. ܡܶܛܽܠܳܬ݂ܟ݂ܽܘܢ ܫܰܕܪܶܬ݂ ܠܒܳܒܶܠ. ܘܰܐܝܬ݁ܺܝܬ݂ ܠܟܽܠܗܽܘܢ ܥܳܖ̈ܽܘܩܶܐ: ܘܰܠܟܰܠܕܳܝ̈ܶܐ ܕܒܰܣܦܺܝ̈ܢܶܐ ܡܶܫܬܰܒܚܺܝܢ. ¹⁵ ܐܶܢܳܐ ܐ̱ܢܳܐ ܡܳܪܝܳܐ ܩܰܕܺܝܫܟ݂ܽܘܢ: ܕܰܒܪܺܝܬ݁ ܠܺܝܣܪܳܐܶܝܠ ܡܰܠܟܟ݂ܽܘܢ. ¹⁶ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܝܰܗܒ ܐܽܘܪܚܳܐ ܒܝܰܡܳܐ: ܘܰܫܒܺܝܠܳܐ ܒܡܰܝ̈ܳܐ ܣܰܓܺܝ̈ܐܶܐ. ¹⁷ ܕܡܰܦܶܩ ܡܰܖ̈ܟܒܬ݂ܳܐ ܖ̈ܰܟ݂ܫܳܐ ܘܚܰܝܠܳܐ ܥܰܫܺܝܢܳܐ. ܘܰܐܟ݂ܚܕ݂ܳܐ ܢܶܫܟܒܽܘܢ ܘܠܳܐ ܢܩܽܘܡܽܘܢ. ܘܢܶܕ݂ܥܟ݂ܽܘܢ ܐܰܝܟ݂ ܫܪܳܓܳܐ ܕܰܡܛܰܦܛܶܦ. ¹⁸ ܠܳܐ ܬܶܬ݁ܕܰܟ݂ܪܽܘܢ ܩܰܕ݂ܡܳܝ̈ܳܬ݂ܳܐ: ܘܰܕܡ̣ܶܢ ܪܺܝܫܺܝܬ݂ܳܐ ܠܳܐ ܬ݂ܶܣܬܰܟܠܽܘܢ. ¹⁹ ܗܳܐ ܥܳܒܶܕ݂ ܐ̱ܢܳܐ ܚܕܰܬܳܐ ܘܗܳܫܳܐ ܬܺܐܥܶܐ ܘܬܶܕܥܽܘܢܳܗ̇. ܘܶܐܥܒܶܕ݂ ܐܽܘܪܚܳܐ ܒܡܰܕ݂ܒܪܳܐ: ܘܢܰܗܖ̈ܰܘܳܬ݂ܳܐ ܒܰܐܫܺܝܡܽܘܢ. ²⁰ ܬܫܰܒܚܰܢܝ ܚܰܝܽܘܬ݂ܳܐ ܕܕܰܒܪܳܐ: ܝܳܪܽܘܖ̈ܶܐ ܘܰܒ̈ܢܳܬ݂ ܢܰܥ̈ܡܶܐ: ܡܶܛܽܠ ܕܝܶܗܒܶܬ݂ ܡܰܝ̈ܳܐ ܒܡܰܕ݂ܒܪܳܐ: ܘܢܰܗܖ̈ܰܘܳܬ݂ܳܐ ܒܰܐܫܺܝܡܽܘܢ: ܕܢܶܫܬ݁ܶܐ ܥܰܡܝ ܓܰܒܝܳܐ. ²¹ ܥܰܡܳܐ ܗܳܢܳܐ ܕܰܓܒܶܝܬ݂ ܠܺܝ: ܢܶܫܬ݁ܽܘܢ. ²² ܠܳܐ ܗ̱ܘܳܐ ܠܺܝ ܩܪܰܝܬ݁ ܝܰܥܩܽܘܒ: ܕܰܩܪܺܝܬ݂ܳܟ݂ ܝܺܣܪܳܐܶܝܠ. ²³ ܠܳܐ ܐܰܝܬ݁ܺܝܬ݁ ܠܺܝ ܐܶܡܖ̈ܶܐ ܕܝܰܩܕܰܝ̈ܟ. ܘܰܒܕܶܒܚܰܝ̈ܟ ܠܳܐ ܝܰܩܰܪܬܳܢܝ ܠܳܐ ܫܰܥܒܶܕܬܳܟ݂ ܒܩܽܘܪܒܳܢܳܐ: ܘܠܳܐ ܐܰܠܐܺܝܬܳܟ݂ ܒܰܠܒܽܘܢ̱ܬܳܐ. ²⁴ ܠܳܐ ܙܒܰܢܬ݁ ܠܺܝ ܒܟܶܣܦܳܐ ܩܰܢܝܳܐ ܕܒܶܣܡܳܐ. ܘܰܒܬܰܪܒܳܐ ܕܕܶܒܚܰܝ̈ܟ ܠܳܐ ܐܰܪܘܺܝܬܳܢܝ ܐܶܠܳܐ ܫܰܥܒܰܕܬܳܢܝ ܒܰܚܛܳܗܰܝ̈ܟ: ܘܰܒܥܰܘܠܳܟ݂ ܐܰܠܐܺܝܬܳܢܝ. ²⁵ ܐܶܢܳܐ ܐ̱ܢܳܐ ܕܥܳܛܶܐ ܐ̱ܢܳܐ ܥܰܘܠܳܟ݂ ܡܶܛܽܠܳܬܝ. ܘܰܚܛܳܗܰܝ̈ܟ ܠܳܐ ܐܶܬ݁ܕܟܰܪ. ²⁶ ܐܶܬ݁ܕܰܟ݂ܪܰܝܢܝ: ܢܶܬ݁ܬ݁ܕܺܝܢ ܐܰܟ݂ܚܕ݂ܳܐ. ܐܶܡ̇ܪܶܬ݂ ܕܬܶܙܕܰܕܰܩ. ²⁷ ܐܰܒܽܘܟ݂ ܩܰܕ݂ܡܳܝܳܐ ܚܛܳܐ ܫܰܠܺܝܛܳܢܰܝ̈ܟ ܐܰܥܠܺܝܘ ܒܺܝ. ²⁸ ܛܰܘܶܫܘ ܪܰܘܖ̈ܒܢܰܝܟ ܩܽܘܕ݂ܫܳܐ. ܝܶܗܒܶܬ݂ ܠܝܰܥܩܽܘܒ ܠܚܰܪܡܳܐ: ܘܠܺܝܣܪܳܐܶܝܠ ܠܚܶܣܕܳܐ.

ܩܶܦܰܠܶܐܘܳܢ: ܡܕ

¹ ܡܶܟܺܝܠ ܫܡܰܥܰܝܢܝ ܝܰܥܩܽܘܒ ܥܰܒܕܝ: ܘܺܝܣܪܳܐܶܝܠ ܕܰܓܒܶܝܬ݂ ² ܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܥܰܒܕܳܟ݂ ܘܓܰܒܠܳܟ݂ ܒܡܰܪܒܥܳܐ ܘܥܰܕ݂ܪܳܟ݂ ܠܳܐ ܬܶܕ݂ܚܶܠ ܥܰܒܕܝ ܝܰܥܩܽܘܒ: ܘܺܝܣܪܳܐܶܝܠ ܕܰܩܪܺܝܬ݂. ³ ܡܶܛܽܠ ܕܶܐܬ݁ܶܠ ܡܰܝ̈ܳܐ ܒܰܐܬ݂ܪܳܐ ܨܶܗܝܳܐ: ܘܖ̈ܳܕܰܝܳܐ ܒܝܰܒܫܳܐ ܐܶܫܽܘܕ݂ ܪܽܘܚܝ ܥܰܠ ܙܰܪܥܳܟ݂: ܘܒܽܘܖ̈ܟܳܬ݂ܝ ܥܰܠ ܒܢܰܝ̈ܟ. ⁴ ܘܢܺܐܥܽܘܢ ܡ̣ܶܢ ܒܰܝܢܳܬ݂ ܥܡܺܝܪܳܐ: ܐܰܝܟ݂ ܥܰܖ̈ܒܶܐ ܕܥܰܠ ܬܰܦ̈ܶܐ ܕܡܰܝ̈ܳܐ. ⁵ ܗܳܢܳܐ ܢܺܐܡܰܪ ܕܡܳܪܝܳܐ ܐ̱ܢܳܐ: ܘܗܳܢܳܐ ܢܶܩܪܶܐ ܒܰܫܡܶܗ ܕܝܰܥܩܽܘܒ ܘܗܳܢܳܐ ܢܰܟ݂ܬ݁ܶܒ ܐܺܝܕܶܗ ܠܡܳܪܝܳܐ. ܘܰܒܫܶܡ ܝܺܣܪܳܐܶܝܠ ܢܶܬ݂ܟܰܢܶܐ. ⁶ ܗܳܟ݂ܰܢܳܐ ܐܳܡܰܪ ܡܳܪܝܳܐ ܡܰܠܟܶܗ ܕܺܝܣܪܳܐܶܝܠ ܘܦܳܪܽܘܩܶܗ: ܡܳܪܝܳܐ ܚܰܝܠܬ݂ܳܢܳܐ ܫܡܶܗ. ܐܶܢܳܐ ܐ̱ܢܳܐ ܩܰܕ݂ܡܳܝܳܐ: ܘܶܐܢܳܐ ܐ̱ܢܳܐ ܐ̱ܚܪܳܝܳܐ. ܘܠܰܝܬ݁ ܐܰܠܳܗ ܠܒܰܪ ܡܶܢܝ. ⁷ ܘܡܰܢܽܘ ܐܰܟ݂ܘܳܬ݂ܝ ܢܶܩܪܶܐ: ܘܢܶܬ݁ܛܰܝܰܒ ܘܰܢܚܳܘܶܐ: ܡ̣ܶܢ ܕܣܳܡܶܬ݂ ܥܰܡܳܐ ܠܥܳܠܰܡ: ܘܶܐܬܘ̈ܳܬܳܐ ܕܳܐܬ݂ܝܳܢ ܢܚܰܘܢ. ⁸ ܠܳܐ ܬܶܕ݂ܚܠܽܘܢ ܘܠܳܐ ܬܶܬ݂ܪܰܗܒܽܘܢ: ܠܳܐ ܐܰܫܡܰܥܬܟ݂ܽܘܢ ܡ̣ܶܢ ܩܕ݂ܺܝܡ ܘܚܰܘܺܝܬ݁ܟ݂ܽܘܢ ܘܰܐܢ̱ܬ݁ܽܘܢ ܣܳܗ̈ܕܰܝ. ܕܠܰܝܬ݁ ܐܰܠܳܗ ܠܒܰܪ ܡܶܢܝ: ܘܠܰܝܬ݁ ܕܬܰܩܺܝܦ ܕܠܳܐ ܝܳܕܰܥ ܐ̱ܢܳܐ. ⁹ ܣܪܺܝܩܺܝܢ ܐܶܢܽܘܢ ܟܽܠܗܽܘܢ ܐܽܘܡܳܢ̈ܶܐ ܕܥܳܒܕܺܝܢ ܨܰܠ̈ܡܶܐ. ܘܠܰܝܬ݁ ܝܽܘܬ݂ܪܳܢ ܒܰܥܒܳܕܰܝ̈ܗܽܘܢ ܕܪܰܓܘ ܠܡܶܥܒܰܕ݂ ܘܣܳܗܕܺܝܢ ܐܽܘܡܳܢ̈ܶܐ ܕܰܥܒܰܕ݂ܘ ܐܶܢܽܘܢ: ܕܠܳܐ ܚܳܙܶܝܢ: ܘܠܳܐ ܫܳܡܥܺܝܢ: ܘܠܳܐ ܝܳܕ݂ܥܺܝܢ. ¹⁰ ܡܶܛܽܠ ܗܳܢܳܐ ܢܶܒܗܬ݂ܽܘܢ ܐܰܝܠܶܝܢ ܕܥܳܒܕܺܝܢ ܐܰܠܳܗ̈ܶܐ: ܘܓܳܠܦܺܝܢ ܢܣܺܝ̈ܟܶܐ ܕܝܽܘܬ݂ܪܳܢ ܠܰܝܬ݁ ܒܗܽܘܢ. ¹¹ ܗܳܐ ܟܽܠܗܽܘܢ ܐܽܘܡܳܢܰܝ̈ܗܽܘܢ: ܚܰܪܫܺܝܢ ܐܶܢܽܘܢ ܡ̣ܶܢ ܒܢܰܝ̈ܢܳܫܳܐ. ܢܶܬ݂ܟܰܢܫܽܘܢ ܟܽܠܗܽܘܢ ܘܰܢܩܽܘܡܽܘܢ ܘܢܶܒܗܬ݂ܽܘܢ ܘܢܰܚܦܪܽܘܢ ܐܰܟ݂ܚܕ݂ܳܐ. ¹² ܕܰܠܛܰܫ ܦܰܪܙܠܳܐ ܢܰܓܳܪܳܐ: ܘܰܒܥܶܫܦܳܐ ܫܰܦܝܶܗ. ܘܰܒܡܰܩܳܪܳܐ ܓܰܠܦܶܗ ܘܥܰܒܕܶܗ ܒܚܰܝܠܳܐ ܕܰܕܪܳܥܶܗ. ܐܳܦ ܟܦܶܢ ܐܳܦ ܨܗܺܝ. ܘܠܳܐ ܐܶܫܬ݁ܺܝ ܡܰܝ̈ܳܐ ܘܶܐܬ݁ܛܰܪܰܦ. ¹³ ܓܒܳܐ ܢܰܓܳܪܳܐ ܩܰܝܣܳܐ: ܘܡܰܫܚܶܗ ܘܰܒܬ݁ܳܬܳܐ ܕܰܒܩܶܗ. ܘܓܰܠܦܶܗ ܘܥܰܒܕܶܗ ܒܰܕ݂ܡܽܘܬ݂ܳܐ ܕܓܰܒܪܳܐ: ܐܰܝܟ݂ ܝܳܐܝܽܘܬ݂ܳܐ ܕܒܰܪܢܳܫܳܐ. ¹⁴ ܘܰܐܩܺܝܡܶܗ ܒܒܰܝܬܳܐ ܠܩܰܝܣܳܐ ܕܰܦܣܺܝܩ ܡ̣ܶܢ ܥܳܒܐ: ܕܰܒܡܶܛܪܳܐ ܐܶܬ݂ܪܰܒܺܝ. ܕܢܶܗܘܶܐ ܠܐ̱ܢܳܫܳܐ ܠܝܰܩܕܳܢܳܐ. ¹⁵ ܘܰܢܣܰܒܘ ܡܶܢܶܗ: ܘܰܐܚܶܡ̣ܘ: ܘܰܐܦܰܘ ܠܰܚܡܳܐ. ܘܳܐܦ ܥܒܰܕ݂ܘ ܐܰ‌ܠܳܗܳܐ: ܘܣܳܓܕܺܝܢ ܠܶܗ. ܥܒܰܕ݂ܘ ܓܠܺܝܦܳܐ ܘܰܣܓܶܕ݂ܘ ܠܶܗ. ¹⁶ ܦܶܠܓܶܗ ܐܰܘܩܶܕ݂ܘ ܒܢܽܘܪܳܐ. ܘܛܰܘܺܝܘ ܒܶܣܪܳܐ ܥܰܠ ܓܽܘܡܖ̈ܰܘܗܝ. ܘܶܐܟܰܠܘ ܘܰܣܒܰܥܘ ܘܳܐܦ ܫܚܶܢܘ ܘܶܐܡܰܪܘ ܐܰܚܳܢ: ܫܶܚܢܶܬ݂: ܘܰܚܙܺܝܬ݂ ܢܽܘܪܳܐ. ¹⁷ ܘܫܰܪܟܳܐ ܥܒܰܕ݂ܘ ܐܰ‌ܠܳܗܳܐ ܓܠܺܝܦܳܐ: ܘܰܣܓܶܕ݂ܘ ܠܶܗ: ܘܨܰܠܺܝܘ ܠܶܗ: ܘܶܐܡܰܪܘ ܦܰܨܳܢ: ܡܶܛܽܠ ܕܰܐܢ̱ܬ݁ ܗܽܘ ܐܰܠܳܗܰܢ. ¹⁸ ܘܠܳܐ ܝܺܕܰܥܘ ܘܠܳܐ ܐܶܣܬܰܟܰܠܘ: ܕܫܺܝܥ ܗ̱ܘ̣ ܚܶܙܘܳܐ ܕܥܰܝܢܰܝ̈ܗܽܘܢ. ܘܣܽܘܟܳܠܳܐ ܕܠܶܒܗܽܘܢ. ¹⁹ ܘܠܳܐ ܐܰܝܬ݁ܺܝܘ ܥܰܠ ܒܳܠܗܽܘܢ: ܘܠܳܐ ܝܺܕܰܥܘ ܘܠܳܐ ܐܶܬ݂ܪܰܥܺܝܘ ܘܶܐܡܰܪܘ: ܕܦܶܠܓܶܗ ܐܰܘܩܶܕ݂ܘ ܒܢܽܘܪܳܐ. ܘܥܰܠ ܓܽܘܡܖ̈ܰܘܗܝ ܐܰܦܰܘ ܠܰܚܡܳܐ. ܘܛܰܘܺܝܘ ܒܶܣܪܳܐ ܘܶܐܟܰܠܘ ܘܫܰܪܟܳܐ ܥܒܰܕ݂ܘ ܠܗܽܘܢ ܦܬܰܟ݂ܪܳܐ ܕܩܰܝܣܳܐ: ܘܰܣܓܶܕ݂ܘ ܠܶܗ. ²⁰ ܪܳܥܶܐ ܗ̱ܘ̣ ܒܩܶܛܡܳܐ ܠܶܒܗܽܘܢ. ܘܡܶܛܥܳܐ ܗ̱ܘ̣ ܛܳܥܶܝܢ: ܘܠܳܐ ܡܦܰܨܶܝܢ ܢܰܦܫܗܽܘܢ. ܘܠܳܐ ܐܳܡܪܺܝܢ ܕܕܰܓܳܠܽܘܬ݂ܳܐ ܥܶܒܕܰܬ ܝܰܡܺܝܢܰܢ. ²¹ ܐܶܬ݁ܕܰܟ݂ܪ ܗܳܠܶܝܢ ܝܰܥܩܽܘܒ: ܘܺܝܣܪܳܐܶܝܠ ܕܥܰܒܕܝ ܐܰܢ̱ܬ݁. ܓܒܰܠܬܳܟ݂ ܠܺܝ ܥܰܒܕ݂ܳܐ: ܡܶܟܺܝܠ ܝܺܣܪܳܐܶܝܠ ܠܳܐ ܬܶܛܥܶܝܢܝ. ²² ܐܰܥܒܪܶܬ݂ ܥܳܘܠܳܟ݂ ܐܰܝܟ݂ ܥܰܪܦܶܠܳܐ: ܘܰܚܛܳܗܰܝ̈ܟ ܐܰܝܟ݂ ܥܢܳܢܳܐ. ܐܶܬ݂ܦܰܢܝ ܠܘܳܬ݂ܝ ܕܰܦܪܰܩܬܳܟ݂. ²³ ܫܰܒܰܚܘ ܫܡܰܝܳܐ ܡܶܛܽܠ ܕܰܥܒܰܕ݂ ܡܳܪܝܳܐ: ܝܰܒܒܶܝ̈ܢ ܫܶܬܶܐܣܶܝ̈ܗ̇ ܕܰܐܪܥܳܐ. ܐܶܬ݂ܦܰܨܚܘ ܛܽܘܖ̈ܶܐ ܒܬܶܫܒܽܘܚܬܳܐ: ܘܥܳܒܳܐ ܘܟ݂ܽܠ ܐܺܝ̈ܠܳܢܶܐ ܕܒܶܗ. ܕܰܦܪܰܩ̣ ܡܳܪܝܳܐ ܠܝܰܥܩܽܘܒ: ܘܒܺܝܣܪܳܐܶܝܠ ܐܶܫܬܰܒܰܚ. ²⁴ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܦܰܪܩܳܟ݂ ܘܓܰܒܠܳܟ݂ ܒܡܰܪܒܥܳܐ ܘܥܰܕܪܳܟ݂. ܐܶܢܳܐ ܐ̱ܢܳܐ ܡܳܪܝܳܐ ܕܥܶܒܕܶܬ݂ ܟܽܠ. ܡܶܬܚܶܬ݂ ܫܡܰܝܳܐ ܒܰܠܚܽܘܕܰܝ. ܘܪܶܩܥܶܬ݂ ܐܰܪܥܳܐ ܡܶܢܝ ܘܠܺܝ. ²⁵ ܡܒܰܛܶܠ ܐܳܬܘ̈ܳܬܳܐ ܕܙܰܟܽܘܖ̈ܶܐ ܘܩܶܨܡܰܝ̈ܗܽܘܢ ܡܰܫܛܶܐ ܐ̱ܢܳܐ. ܡܰܗܦܶܟ݂ ܚܰܟܺܝܡܶܐ ܠܒܶܣܬܰܪܗܽܘܢ ܘܺܝܕܰܥܬ݂ܗܽܘܢ ܡܣܰܟܶܠ ܐ̱ܢܳܐ. ²⁶ ܘܰܡܩܺܝܡ ܡܶܠܬ݂ܳܐ ܕܥܰܒܕܶܗ: ܘܬܰܪܥܺܝܬ݂ܳܐ ܕܡܰܠܰܐܟܰܘ̈ܗܝ ܡܫܰܠܶܡ. ܕܶܐܡܰܪ ܠܽܐܘܪܺܫܠܶܡ: ܕܬܶܬ݂ܝܰܬܰܒ. ܘܰܠܩܽܘܖ̈ܝܳܐ ܕܺܝܗܽܘܕܳܐ: ܕܢܶܬ݂ܒܰܢ̈ܝܳܢ. ܘܰܠܚܰܖ̈ܒܬ݂ܳܗ̇ ܐܰܩܺܝܡ. ²⁷ ܕܶܐܡܰܪ ܠܥܽܘܡܩܳܐ ܚܪܰܒ. ܘܢܰܗܖ̈ܰܘܳܬ݂ܳܟ݂ ܐܰܘܒܶܫ. ²⁸ ܕܶܐܡܰܪ ܠܟ݂ܽܘܪܶܫ ܪܳܥܺܝ݂ܝ݂: ܕܟ݂ܽܠܶܗ ܨܶܒܝܳܢܝ ܢܫܰܠܶܡ: ܠܡܶܐܡܰܪ ܠܽܐܘܪܺܫܠܶܡ ܕܬܶܬ݂ܒܢܶܐ ܘܗܰܝܟܠܳܐ ܢܶܫܬܰܟ݂ܠܰܠ.

ܩܶܦܰܠܶܐܘܳܢ: ܡܗ

¹ ܗܳܟ݂ܰܢܳܐ ܐܳܡܰܪ ܡܳܪܝܳܐ ܠܰܡܫܺܝܚܶܗ: ܠܟ݂ܽܘܪܶܫ ܕܶܐܚܕܶܬ݂ ܒܝܰܡܺܝܢܶܗ. ܢܶܫܬܰܥܒܕ݂ܽܘܢ ܩܕ݂ܳܡܰܘܗܝ ܥܰܡ̈ܡܶܐ. ܘܚܰܨܳܐ ܕܡܰܠ̈ܟܶܐ ܐܶܫܰܪܶܐ ܠܡܶܦܬܰܚ ܩܕ݂ܳܡܰܘܗܝ ܬܰܖ̈ܥܶܐ: ܘܬܰܖ̈ܥܶܐ ܠܳܐ ܢܶܬ݁ܬܰܚܕܽܘܢ. ² ܐܶܢܳܐ ܩܕ݂ܳܡܰܝܟ ܐܶܙܰܠ. ܘܥܰܪܡܳܐ ܐܶܫܰܦܶܐ. ܬܰܖ̈ܥܶܐ ܕܰܢܚܳܫܳܐ ܐܶܬܰܒܰܪ. ܘܡܽܘܟ݂̈ܠܶܐ ܕܦܰܪܙܠܳܐ ܐܶܓܰܕܶܡ. ³ ܘܶܐܬ݁ܶܠ ܠܳܟ݂ ܣܺܝ̈ܡܳܬ݂ܳܐ ܕܰܒܚܶܫܽܘܟ݂ܳܐ: ܘܰܛܡܺܝܖ̈ܳܬ݂ܳܐ ܡܣܰܬ݁ܖ̈ܳܬ݂ܳܐ. ܕܬܶܕܰܥ ܕܶܐܢܳܐ ܐ̱ܢܳܐ ܡܳܪܝܳܐ ܕܰܩܪܺܝܬ݂ܳܟ݂ ܒܰܫܡܳܟ݂: ܐܰܠܳܗܶܗ ܕܺܝܣܪܳܐܶܝܠ. ⁴ ܡܶܛܽܠ ܥܰܒܕܰܝ ܝܰܥܩܽܘܒ: ܘܺܝܣܪܳܐܶܝܠ ܓܰܒܝ: ܩܪܺܝܬ݂ܳܟ݂ ܒܰܫܡܳܟ ܘܟܰܢܺܝܬ݂ܳܟ݂: ܘܠܳܐ ܝܺܕܰܥܬܳܢܝ. ⁵ ܐܶܢܳܐ ܐ̱ܢܳܐ ܡܳܪܝܳܐ: ܘܠܰܝܬ݁ ܬܽܘܒ ܠܒܰܪ ܡܶܢܝ: ܘܠܰܝܬ݁ ܐܰܠܳܗ. ܐܰܥܫܶܢܬܳܟ݂: ܘܠܳܐ ܝܺܕܰܥܬܳܢܝ. ⁶ ܕܢܶܕܥܽܘܢ ܡ̣ܶܢ ܡܰܕ݂ܢܳܚܰܝ̈ ܫܶܡܫܳܐ. ܘܡ̣ܶܢ ܡܰܥܖ̈ܳܒܰܘܗܝ: ܕܠܰܝܬ݁ ܠܒܰܪ ܡܶܢܝ. ܐܶܢܳܐ ܐ̱ܢܳܐ ܡܳܪܝܳܐ ܘܠܰܝܬ݁ ܬܽܘܒ. ⁷ ܕܰܓܒܰܠ ܢܽܘܗܪܳܐ: ܘܰܒܪܳܐ ܚܶܫܽܘܟ݂ܳܐ. ܥܒܰܕ݂ ܫܠܳܡܳܐ: ܘܰܒܪܳܐ ܒܺܝܫܬܳܐ ܐܶܢܳܐ ܐ̱ܢܳܐ ܡܳܪܝܳܐ ܕܥܶܒܕܶܬ݂ ܗܳܠܶܝܢ ܟܽܠܗܶܝܢ. ⁸ ܐܶܬ݂ܒܰܣܰܡܘ ܫܡܰܝܳܐ ܡ̣ܶܢ ܠܥܶܠ ܘܰܥܢܳܢ̈ܶܐ ܢܶܖ̈ܣܳܢ ܙܰܕܺܝܩܽܘܬܳܐ. ܬܶܬ݂ܦܬܰܚ ܐܰܪܥܳܐ: ܘܢܶܣܓܶܐ ܦܽܘܪܩܳܢܳܐ. ܘܙܰܕܺܝܩܽܘܬܳܐ ܬܶܫܘܰܚ ܐܰܟ݂ܚܕ݂ܳܐ. ܐܶܢܳܐ ܐ̱ܢܳܐ ܡܳܪܝܳܐ ܕܰܒܪܺܝܬ݂ ܗܳܠܶܝܢ. ⁹ ܘܳܝ ܠܰܕ݂ܕ݂ܳܐܶܢ ܥܰܡ ܓܳܒܽܘܠܶܗ: ܚܶܨܦܳܐ ܡ̣ܶܢ ܚܶܨܦܶܝ̈ܗ̇ ܕܰܐܪܥܳܐ ܕܰܠܡܳܐ ܐܳܡܰܪ ܛܺܝܢܳܐ ܠܦܰܚܳܪܳܐ ܡܳܢܳܐ ܥܳܒܶܕ݂ ܐܰܢ̱ܬ݁. ܘܠܳܐ ܗܘܺܝܬ݂ ܥܒܳܕ݂ܳܐ ܕܺܐܝܕܰܝ̈ܟ. ¹⁰ ܘܳܝ ܠܰܕ݂ܐܳܡܰܪ ܠܰܐܒܳܐ: ܡܳܢܳܐ ܡܰܘܠܶܕ݂ ܐܰܢ̱ܬ݁ ܘܠܰܐܢ̱ܬ݁ܬ݂ܳܐ: ܕܡܳܢܳܐ ܒܳܛܢܰܬ݁ܝ. ¹¹ ܗܳܟ݂ܰܢܳܐ ܐܳܡܰܪ ܡܳܪܝܳܐ ܩܰܕ݁ܺܝܫܳܐ ܕܺܝܣܪܳܐܶܝܠ ܘܓܳܒܽܘܠܶܗ. ܡܳܪܝܳܐ ܚܰܝܠܬ݂ܳܢܳܐ ܫܡܶܗ. ܫܰܐܠܽܘܢܝ ܐܳܬܘ̈ܳܬܳܐ ܥܰܠ ܒܢܰܝ̈. ܘܥܰܠ ܥܒܳܕ݂ ܐܺܝܕܰܝ̈ ܦܽܘܩܕܽܘܢܝ. ¹² ܐܶܢܳܐ ܥܶܒܕܶܬ݂ ܐܰܪܥܳܐ: ܘܒܰܪܢܳܫܳܐ ܥܠܶܝܗ̇ ܐܶܢܳܐ ܒܺܐܝܕܰܝ̈ ܡܶܬ݂ܚܶܬ݂ ܫܡܰܝܳܐ. ܘܦܶܩܕܶܬ݂ ܠܟ݂ܽܠܶܗ ܚܰܝܠܗܽܘܢ. ¹³ ܐܶܢܳܐ ܐܰܥܺܝܪܬ݁ܶܗ ܒܙܰܕܺܝܩܽܘܬܳܐ ܘܟܽܠܗܶܝܢ ܐܽܘܖ̈ܚܳܬܶܗ ܐܶܫܰܦܶܐ. ܗܽܘ ܢܶܒܢܶܐ ܩܪܺܝܬ݂ܝ ܘܰܫܒܺܝܬܝ ܢܫܰܕܰܪ ܠܳܐ ܒܰܕ݂ܡܰܝ̈ܳܐ: ܘܠܳܐ ܒܫܽܘܚܕܳܐ ܐܳܡܰܪ ܡܳܪܝܳܐ ܚܰܝܠܬ݂ܳܢܳܐ.¹⁴ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܠܐܶܘܬ݂ܳܗ̇ ܕܡܶܨܪܶܝܢ: ܬܰܓܳܖ̈ܶܐ ܕܟ݂ܽܘܫ ܘܕܰܫܒܳܐ. ܓܰܒܖ̈ܶܐ ܕܰܡܫܽܘܚܬ݂ܳܐ ܥܠܰܝܟܝ ܢܶܥܒܪܽܘܢ. ܘܕ݂ܺܝܠܶܟ݂ܝ ܢܶܗܘܽܘܢ: ܘܒܬ݂ܰܪܶܟ݂ܝ ܢܺܐܙܽܠ̄ܘܢ. ܘܰܒܫܺܫ̈ܠܳܬ݂ܳܐ ܢܶܥܒܪܽܘܢ. ܘܠܶܟ݂ܝ ܢܶܣܓܕ݂ܽܘܢ. ܘܒܶܟ݂ܝ ܢܨܰܠܽܘܢ ܕܒܶܟ݂ܝ ܗ̱ܘ̣ ܐܰ‌ܠܳܗܳܐ: ܘܠܰܝܬ݁ ܬܽܘܒ ܐܰܠܳܗ ܐ̱ܚܪܺܝܢ. ¹⁵ ܫܰܪܪܝܪܳܐܺܝܬ݂ ܐܰܢ̱ܬ݁ ܗ̱ܘ̣ ܡܣܰܬ݁ܪܳܐ: ܐܰܠܳܗܶܗ ܕܺܝܣܪܳܐܶܝܠ ܘܦܳܪܽܘܩܶܗ. ¹⁶ ܒܗܶܬ݂ܘ ܘܰܐܚܦܰܪܘ ܟܽܠܗܽܘܢ ܐܰܟ݂ܚܕ݂ܳܐ. ܕܰܡܗܰܠܟ݂ܺܝܢ ܒܚܶܦܪܳܐ: ܘܓܳܠܦܺܝܢ ܦܬܰܟ݂ܖ̈ܶܐ. ¹⁷ ܦܽܘܪܩܳܢܶܗ ܕܺܝܣܪܳܐܶܝܠ ܒܡܳܪܝܳܐ ܗ̱ܘ̣ ܦܳܪܽܘܩܳܐ ܕܥܳܠ̈ܡܶܐ ܠܳܐ ܬܶܒܗܬ݂ܽܘܢ: ܘܠܳܐ ܬܰܚܦܪܽܘܢ ܠܥܳܠܰܡ ܥܳܠܡܺܝܢ. ¹⁸ ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܳܪܝܳܐ ܕܰܒܪܳܐ ܫܡܰܝܳܐ: ܘܗܽܘܝܽܘ ܐܰ‌ܠܳܗܳܐ ܕܰܓܒܰܠ ܐܰܪܥܳܐ: ܘܥܰܒܕܳܗ̇ ܘܗܽܘܝܽܘ ܬܰܩܢܳܗ̇. ܠܳܐ ܗ̱ܘܳܐ ܣܪܺܝܩܳܐܺܝܬ݂ ܒܪܳܗ̇ ܐܶܠܳܐ ܕܬܶܬ݁ܶܒ ܒܳܗ̇ ܒܪܺܝܬܶܗ. ܐܶܢܳܐ ܐ̱ܢܳܐ ܡܳܪܝܳܐ ܘܠܰܝܬ݁ ܬܽܘܒ. ¹⁹ ܠܳܐ ܗ̱ܘܳܐ ܒܛܽܘܫܝܳܐ ܡܰܠܠܶܬ݂ ܒܰܐܬ݂ܪܳܐ ܕܰܐܪܥܳܐ ܚܶܫܽܘܟ݂ܬܳܐ: ܘܠܳܐ ܐܶܡܪܶܬ݂ ܠܙܰܪܥܳܐ ܕܝܰܥܩܽܘܒ ܕܰܣܪܺܝܩܳܐܺܝܬ݂ ܒܥܳܐܽܘܢܝ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܡܰܠܶܠ ܐ̱ܢܳܐ ܙܰܕܺܝܩܽܘܬܳܐ: ܘܰܡܚܳܘܶܐ ܐ̱ܢܳܐ ܬܪܺܝܨܽܘܬ݂ܳܐ. ²⁰ ܐܶܬ݂ܟܰܢܰܫܘ: ܘܬ݂ܰܘ: ܘܶܐܬ݂ܩܰܪܰܒܘ ܐܰܟ݂ܚܕ݂ܳܐ: ܐܰܝܠܶܝܢ ܕܡܶܬ݂ܦܰܨܶܝܢ ܡ̣ܶܢ ܥܰܡ̈ܡܶܐ. ܘܠܳܐ ܝܺܕ݂ܰܥܘ ܕܰܫܩܰܠܘ ܩܰܝܣܳܐ ܓܠܺܝܦܳܐ ܘܨܰܠܺܝܘ ܠܰܐܠܳܗܳܐ ܕܠܳܐ ܦܳܪܶܩ. ²¹ ܚܰܘܰܘ ܘܰܩܪܽܘܒܘ: ܘܶܐܬ݂ܡܰܠܰܟܘ ܐܰܟ݂ܚܕ݂ܳܐ. ܡܰܢܽܘ ܐܰܫܡܰܥ ܗܳܕܶܐ ܡ̣ܶܢ ܩܕ݂ܺܝܡ. ܘܡ̣ܶܢ ܪܺܝܫܺܝܬ݂ܳܐ ܐܶܢܳܐ ܐ̱ܢܳܐ ܡܳܪܝܳܐ. ܘܠܰܝܬ݁ ܬܽܘܒ ܐܰܠܳܗ ܠܒܰܪ ܡܶܢܝ. ܐܰ‌ܠܳܗܳܐ ܙܰܕܺܝܩܳܐ ܘܦܳܪܽܘܩܳܐ: ܘܠܰܝܬ݁ ܠܒܰܪ ܡܶܢܝ. ²² ܐܶܬ݂ܩܰܪܰܒܘ ܠܘܳܬ݂ܝ ܟܽܠܟ݂ܽܘܢ ܥܶܒܖ̈ܶܝܗ̇ ܕܰܐܪܥܳܐ: ܕܬܶܬ݂ܦܰܪܩܽܘܢ ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ: ܘܠܰܝܬ݁ ܬܽܘܒ. ²³ ܒܺܝ ܝܺܡܺܝܬ݂: ܘܢܶܦܩܰܬ ܡ̣ܶܢ ܦܽܘܡܝ ܡܶܠܬ݂ܳܐ ܕܙܰܕܺܝܩܽܘܬܳܐ: ܘܠܳܐ ܬܶܗܦܽܘܟ݂ ܕܠܺܝ ܬܶܟܽܘܦ ܟܽܠ ܒܪܽܘܟ ܘܒܺܝ ܢܺܐܡܶܐ ܟܽܠ ܠܶܫܳܢ. ²⁴ ܘܢܺܐܡܪܽܘܢ ܒܡܳܪܝܳܐ ܗ̱ܝ ܙܰܕܺܝܩܽܘܬܳܐ. ܘܥܰܫܺܝ̈ܢܶܐ ܠܘܳܬܶܗ ܢܺܐܙܽܠ̱ܘܢ. ܘܢܶܒܗܬ݂ܽܘܢ ܟܽܠ ܕܣܳܩܪܺܝܢ ܠܳܟ݂. ²⁵ ܒܺܝ ܢܶܫܬܰܒܰܚ ܘܢܶܙܕܰܕܰܩ ܟܽܠܶܗ ܙܰܪܥܶܗ ܕܺܝܣܪܳܐܶܝܠ.

ܩܶܦܰܠܶܐܘܳܢ: ܡܘ

¹ ܢܦܰܠ ܒܺܝܠ: ܘܶܐܣܬ݁ܚܶܦ ܢܳܒܽܘ ܘܰܗܘܰܘ ܦܬܰܟ݂ܖ̈ܰܝܗܽܘܢ ܓܠܺܝ̈ܦܶܐ ܛܰܥܢ̈ܶܐ ܥܕ݂ܺܝ̈ܕܶܐ: ܠܚܰܝܽܘܬ݂ܳܐ ܘܠܰܒܥܺܝܪܳܐ ܟܦܰܢܬܳܐ. ² ܐܶܣܬ݁ܚܶܦܘ ܘܰܢܦܰܠܘ ܐܰܟܚܕ݂ܳܐ. ܘܠܳܐ ܐܶܫܟܰܚܘ ܠܰܡܫܰܘܙܳܒܽܘ ܛܳܥܽܘܢܝ̈ܗܽܘܢ ܘܶܐܙܰܠ ܒܫܶܒܝܳܐ ܢܰܦ̈ܫܳܬ݂ܗܽܘܢ. ³ ܫܽܘܡܥܽܘܢܝ ܕܒܶܝܬ݂ ܝܰܥܩܽܘܒ: ܘܟ݂ܽܠܶܗ ܫܰܪܟܶܗ ܕܺܝܣܪܳܐܶܝܠ ܕܡܶܫܬܰܩܠܺܝܢ ܒܟܰܪܣܳܐ: ܘܡܶܫܬܰܩܠܺܝܢ ܒܡܰܪܒܥܳܐ. ⁴ ܥܕܰܡܳܐ ܠܣܰܝܒܽܘܬ݂ܳܐ ܐܶܢܳܐ ܗ̱ܘ̣ ܘܰܥܕܰܡܳܐ ܠܩܰܫܺܝܫܽܘܬ݂ܳܐ ܐܶܢܳܐ ܐܶܣܒܽܘܠ ܐܶܢܳܐ ܥܶܒܕܶܬ݂: ܘܶܐܢܳܐ ܐܶܫܩܽܘܠ ܘܶܐܢܳܐ ܐܶܣܒܽܘܠ ܘܶܐܦܰܨܶܐ. ⁵ ܠܡܰܢ ܕܰܡܺܝܬ݁ܽܘܢܳܢܝ ܘܦܰܚܶܡܬ݁ܽܘܢܳܢܝ. ⁶ ܠܰܕ݂ܛܳܥܶܝܢ ܘܡܰܦܩܺܝܢ ܕܰܗܒܳܐ ܡ̣ܶܢ ܟܺܝܣܰܝ̈ܗܽܘܢ ܘܣܺܐܡܳܐ ܒܡܰܣܰܐܬ݂ܳܐ ܬܳܩܠܺܝܢ. ܘܐܳܓܪܺܝܢ ܩܰܢܝܳܢܳܐ. ܘܥܳܒܕܺܝܢ ܐܰ‌ܠܳܗܳܐ ܘܣܳܓܕܺܝܢ ܠܶܗ: ܘܳܐܦ ܡܨܰܠܶܝܢ ܠܶܗ. ⁷ ܘܫܳܩܠܺܝܢ ܠܶܗ ܥܰܠ ܟܰܬ݂ܦ̈ܳܬ݂ܗܽܘܢ: ܘܰܡܗܰܠܟ݂ܺܝܢ ܠܶܗ. ܘܣܳܝܡܺܝܢ ܠܶܗ ܥܰܠ ܕܽܘܟܬܶܗ. ܘܠܳܐ ܡܶܫܟܰܚ ܠܰܡܩܳܡ ܡ̣ܶܢ ܕܽܘܟܬܶܗ ܘܳܐܦ ܡܨܰܠܶܝܢ ܠܶܗ: ܘܠܳܐ ܥܳܢܶܐ ܠܗܽܘܢ. ܘܠܳܐ ܦܳܪܶܩ ܠܗܽܘܢ ܡ̣ܶܢ ܐܽܘܠܨܳܢܰܝ̈ܗܽܘܢ. ⁸ ܐܶܬ݁ܕܰܟ݂ܪܘ ܗܳܠܶܝܢ ܘܶܐܬ݂ܒܰܝܰܢܘ ܘܰܐܝܬܰܘ ܥܰܘ̈ܳܠܶܐ ܥܰܠ ܠܶܒܟ݂ܽܘܢ. ⁹ ܐܶܬܰܕܰܟ݂ܪܘ ܩܰܕ݂ܡܳܝ̈ܳܬ݂ܳܐ ܕܡ̣ܶܢ ܥܳܠܰܡ. ܕܶܐܢܳܐ ܐ̱ܢܳܐ ܐܰ‌ܠܳܗܳܐ: ܘܠܰܝܬ݁ ܬܽܘܒ ܐܰܠܳܗ: ܘܠܰܝܬ݁ ܐܰܟ݂ܘܳܬ݂ܝ. ¹⁰ ܘܰܡܚܳܘܶܐ ܐ̱ܢܳܐ ܡ̣ܶܢ ܪܺܝܫܺܝܬ݂ܳܐ ܐ̱ܚܖ̈ܳܝܳܬܳܐ: ܘܡ̣ܶܢ ܩܕܺܝܡ ܐܰܝܠܶܝܢ ܕܠܳܐ ܐܶܬ݂ܥܒܶܕ݂ ܐܳܡܰܪ ܐ̱ܢܳܐ. ܬܰܪܥܺܝܬܝ ܡܩܺܝܡ ܐ̱ܢܳܐ. ܘܟ݂ܽܠܶܗ ܨܶܒܝܳܢܝ ܥܳܒܶܕ݂ ܐ̱ܢܳܐ. ¹¹ ܩܳܪܶܐ ܐ̱ܢܳܐ ܡ̣ܶܢ ܡܰܕ݂ܢܚܳܐ ܛܰܝܪܳܐ: ܘܡ̣ܶܢ ܐܰܪܥܳܐ ܪܰܚܺܝܩܬܳܐ ܓܰܒܪܳܐ ܕܬܰܪܥܺܝܬ݂ܝ. ܐܶܢܳܐ ܡܡܰܠܶܠ ܐ̱ܢܳܐ: ܐܳܦ ܡܰܝܬܶܐ ܐ̱ܢܳܐ. ܓܶܒܠܶܬ݂: ܐܳܦ ܥܳܒܶܕ݂ ܐ̱ܢܳܐ. ¹² ܫܽܘܡܥܽܘܢܝ ܥܰܫܺܝ̈ܢܰܝ ܠܶܒܳܐ: ܖ̈ܰܚܺܝܩܰܝ ܡ̣ܶܢ ܙܰܕܺܝܩܽܘܬܳܐ. ¹³ ܩܶܪܒܰܬ ܙܰܕܺܝܩܽܘܬ݂ܝ ܠܡܶܐܬ݂ܳܐ: ܘܦܽܘܪܩܳܢܝ ܠܳܐ ܢܳܘܚܰܪ ܘܶܐܬܶ݁ܠ ܒܨܶܗܝܽܘܢ ܦܽܘܪܩܳܢܳܐ: ܘܠܺܝܣܪܳܐܶܝܠ ܬܶܫܒܽܘܚܬ݁ܝ.

ܩܶܦܰܠܶܐܘܳܢ: ܡܙ

¹ܐ: ܚܽܘܬ݂ܝ ܘܬܶܒܝ ܥܰܠ ܥܰܦܪܳܐ ܒܬ݂ܽܘܠܬܳܐ ܒܰܪܬ݂ ܒܳܒܶܠ. ܬܶܒܝ ܥܰܠ ܐܰܪܥܳܐ ܒܰܪܬ݂ ܟܰܠܕ݂ܳܝ̈ܶܐ. ܠܰܝܬ݁ ܟܽܘܪܣܝܳܐ. ܡܶܛܽܠ ܕܠܳܐ ܢܰܘܣܦܽܘܢ ܬܽܘܒ ܠܡܶܩܪܶܝܟ݂ܝ ܡܥܰܕܰܢܬܳܐ ܘܰܡܦܰܢܰܩܬܳܐ. ² ܣܰܒܝ ܪܰܚܝܳܐ: ܛܚܰܢܝ ܩܰܡܚܳܐ ܓܠܳܝ ܬܰܚܦܺܝܬܶܟ݂ܝ ܓܽܘܙܝ ܚܶܘܳܖ̈ܳܬܶܟ݂ܝ ܓܠܳܝ ܫܳܩܰܝ̈ܟܝ ܥܒܰܪܝ ܢܰܗܖ̈ܰܘܳܬ݂ܳܐ. ³ ܢܶܬ݂ܓܠܶܐ ܦܽܘܪܣܳܝܶܟ݂ܝ: ܘܢܶܬ݂ܚܙܶܐ ܚܶܣܕܰܟ݂ܝ ܐܶܣܰܒ ܡܶܢܶܟ݂ܝ ܬܒܰܥܬ݂ܳܐ. ܘܠܳܐ ܐܰܦܓܰܥ ܒܶܟ݂ܝ ܐ̱ܢܳܫ. ⁴ ܦܳܪܽܘܩܰܢ ܡܳܪܝܳܐ ܚܰܝܠܬ݂ܳܢܳܐ ܫܡܶܗ: ܩܰܕ݁ܺܝܫܳܐ ܕܺܝܣܪܳܐܶܝܠ. ⁵ ܬܶܒܝ ܒܰܬ݂ܘܳܪܳܐ. ܥܽܘܠܝ ܒܚܶܫܽܘܟ݂ܳܐ ܒܰܪܬ݂ ܟܰܠܕ݂ܳܝ̈ܶܐ. ܡܶܛܽܠ ܕܠܳܐ ܢܰܘܣܦܽܘܢ ܬܽܘܒ ܠܡܶܩܪܶܝܟ݂ܝ ܓܰܢ̱ܒܳܪܰܬ݂ ܡܰܠ̈ܟܘܳܬ݂ܳܐ. ⁶ ܪܶܓܙܶܬ݂ ܥܰܠ ܥܰܡܝ: ܕܛܰܘܶܫܘ ܝܳܪܬ݁ܽܘܬ݂ܝ ܘܰܐܫܠܡܶܬ݂ ܐܶܢܽܘܢ ܒܺܐܝܕܰܝ̈ܟܝ ܘܠܳܐ ܥܒܰܕܬܝ ܥܠܰܝܗܽܘܢ ܖ̈ܰܚܡܶܐ. ܘܥܰܠ ܣܳܒ̈ܶܐ ܐܰܥܫܶܢܬ݁ܝ ܢܺܝܪܶܟ݂ܝ ܛܳܒ. ⁷ ܘܶܐܡܰܪܬ݁ܝ ܕܰܠܥܳܠܰܡ ܐܶܗܘܶܐ ܓܰܢ̱ܒܳܪܬܳܐ. ܘܠܳܐ ܣܳܡܬ݁ܝ ܒܠܶܒܶܟ݂ܝ ܗܳܠܶܝܢ. ܘܠܳܐ ܐܶܬ݁ܕܟܰܪܬ݁ܝ ܚܰܪܬ݂ܳܐ. ⁸ ܗܳܫܳܐ ܫܡܰܥܝ ܗܳܠܶܝܢ ܡܥܰܕܢܬܳܐ: ܕܝܳܬ݂ܒܳܐ ܒܫܶܠܝܳܐ: ܘܳܐܡܪܳܐ ܒܠܶܒܳܗ̇: ܐܶܢܳܐ ܐ̱ܢܳܐ ܘܠܰܝܬ݁ ܬܽܘܒ. ܠܳܐ ܐܶܬܶܒ ܐܰܪܡܰܠܬܳܐ: ܘܠܳܐ ܐܶܕܰܥ ܬܟ݂ܳܠܳܐ. ⁹ ܢܺܐܬ݂ܝ̈ܳܢ ܥܠܰܝܟܝ ܗܳܠܶܝܢ ܬܰܖ̈ܬܰܝܗܶܝܢ ܡܰܚ̈ܘܳܬ݂ܳܐ ܒܝܰܘܡܳܐ ܚܰܕ݂. ܬܟܳܠܳܐ ܘܰܐܪܡܠܽܘܬ݂ܳܐ ܡ̣ܶܢ ܫܶܠܝܳܐ ܢܺܐܬ݂ܝ̈ܳܢ ܥܠܰܝܟܝ: ܒܣܽܘܓܳܐܐ ܕܚܰܖ̈ܳܫܰܝܟܝ: ܘܰܒܣܽܘܓ݂ܳܐܐ ܕܰܡܓܽܘܫܰܝ̈ܟܝ. ¹⁰ ܕܶܐܬ݁ܬ݁ܟܶܠܬ݁ܝ ܥܰܠ ܒܺܝܫܽܘܬܶܟ݂ܝ ܘܶܐܡܰܪܬ݁ܝ ܕܠܰܝܬ݁ ܕܚܳܙ̇ܶܐ ܠܺܝ. ܚܶܟ݂ܡܬܶܟ݂ܝ ܘܺܝܕܰܥܬܶܟ݂ܝ. ܗܺܝ ܐܰܛܥܝܰܬܶܟ݂ܝ ܘܶܐܡܰܪܬ݁ܝ ܒܠܶܒܶܟ݂ܝ ܕܶܐܢܳܐ ܐ̱ܢܳܐ ܘܠܰܝܬ݁ ܬܽܘܒ. ¹¹ ܬܺܐܬ݂ܶܐ ܥܠܰܝܟܝ ܒܺܝܫܬܳܐ ܒܫܰܦܪܳܐ: ܘܠܳܐ ܬܶܕܥܺܝܢ ܘܬܶܦܶܠ ܥܠܰܝܟܝ ܬܳܘܶܗܬ݂ܳܐ: ܘܠܳܐ ܬܶܫܟܚܺܝܢ ܠܡܰܥܒܳܪܽܘܬ݂ܳܗ̇ ܘܢܺܐܬܶܐ ܥܠܰܝܟܝ ܡ̣ܶܢ ܫܶܠܝܳܐ ܕܠܽܘܚܝܳܐ ܘܠܳܐ ܬܶܕܥܺܝܢ. ¹² ܩܽܘܡܝ ܢܺܐ ܒܰܡܓܽܘܫܰܝ̈ܟܝ: ܘܰܒܚܰܖ̈ܳܫܰܝܟܝ ܣܰܓܝ̈ܐܶܐ ܕܰܠܐܰܝܬ݁ܝ ܒܗܽܘܢ ܡ̣ܶܢ ܛܰܠܝܽܘܬܶܟ݂ܝ. ܛܳܟ݂ ܬܶܫܟܚܺܝܢ ܬܰܘܬ݁ܪܺܝܢ: ܛܳܟ݂ ܬܶܬ݂ܥܰܫܢܺܝܢ. ¹³ ܠܐܰܝܬ݁ܝ ܒܣܽܘܓ݂ܳܐܐ ܕܡܰܚܫ̈ܒܳܬܶܟ݂ܝ. ܢܩܽܘܡܽܘܢ ܢܶܦܪܩܽܘܢܶܟ݂ܝ ܟܰܠܕܳܝ̈ܶܐ ܕܚܳܝܪܺܝܢ ܒܰܫܡܰܝܳܐ ܘܰܒܟ݂ܰܘܟ̈ܒܶܐ: ܘܡܰܘܕܥܺܝܢ ܠܶܟ݂ܝ ܒܝܰܪܚܳܐ ܡܶܕܶܡ ܕܳܐܬܶܐ ܥܠܰܝܟܝ. ¹⁴ ܗܳܐ ܗܘܰܘ ܐܰܝܟ݂ ܓ̈ܶܠܶܐ ܕܰܐܘܩܕܰܬ ܐܶܢܽܘܢ ܢܽܘܪܳܐ. ܘܠܳܐ ܢܦܰܨܽܘܢ ܢܰܦܫܗܽܘܢ ܡ̣ܶܢ ܐܺܝܕܳܐ ܕܫܰܠܗܶܒܺܝܬ݂ܳܐ. ܠܰܝܬ݁ ܓܽܘܡܖ̈ܶܐ ܠܢܽܘܪܗܽܘܢ: ܐܳܦܠܳܐ ܙܰܗܪܳܐ ܠܡܶܬܰܒ ܠܩܽܘܒܠܶܗ. ¹⁵ ܗܳܟ݂ܰܢܳܐ ܗܘܰܘ ܠܶܟ݂ܝ ܬܰܓܳܖ̈ܰܝܟܝ ܕܰܠܐܰܝܬ݁ܝ ܒܗܽܘܢ ܡ̣ܶܢ ܛܰܠܝܽܘܬܶܟ݂ܝ ܘܐ̱ܢܳܫ ܠܣܶܛܪܶܗ ܛܥܰܘ: ܘܠܰܝܬ݁ ܕܦܳܪܶܩ ܠܶܟ݂ܝ.

ܩܶܦܰܠܶܐܘܳܢ: ܡܚ

¹ ܫܡܰܥܘ ܗܳܠܶܝܢ ܕܒܶܝܬ݂ ܝܰܥܩܽܘܒ: ܕܡܶܬ݂ܩܪܶܝܢ ܒܰܫܡܶܗ ܕܺܝܣܪܳܐܶܝܠ: ܘܡ̣ܶܢ ܡܰܝ̈ܳܐ ܕܺܝܗܽܘܕܳܐ ܢܦܰܩܘ: ܕܝܳܡܶܝܢ ܒܰܫܡܶܗ ܕܡܳܪܝܳܐ: ܘܒܰܐܠܳܗܳܐ ܕܺܝܣܪܳܐܶܝܠ ܡܰܕ݂ܟܪܺܝܢ: ܠܳܐ ܒܩܽܘܫܬܳܐ ܘܠܳܐ ܒܙܰܕܺܝܩܽܘܬܳܐ. ² ܡܶܛܽܠ ܕܡ̣ܶܢ ܩܪܺܝܬ݂ܳܐ ܕܩܽܘܕ݂ܫܳܐ ܐܶܬ݂ܩܪܺܝܘ: ܘܥܰܠ ܐܰ‌ܠܳܗܳܐ ܕܺܝܣܪܳܐܶܝܠ ܐܶܣܬ݁ܡܶܟ݂ܘ: ܡܳܪܝܳܐ ܚܰܝܠܬ݂ܳܢܳܐ ܫܡܶܗ. ³ ܩܰܕ݂ܡܳܝ̈ܳܬ݂ܳܐ ܕܡ̣ܶܢ ܪܺܝܫܺܝܬ݂ܳܐ ܚܰܘܺܝܬ݂. ܘܡ̣ܶܢ ܦܽܘܡܝ ܢܦܰܩ: ܘܰܐܫܡܥܶܬ݂ ܐܶܢܶܝܢ ܠܟ݂ܽܘܢ. ܘܡ̣ܶܢ ܫܶܠܝܳܐ ܥܳܒܶܕ݂ ܐ̱ܢܳܐ ܘܐܳܬ݂ܝ̈ܳܢ. ⁴ ܝܳܕܰܥ ܕܰܩܫܶܐ ܐܰܢ̱ܬ݁ ܘܰܩܕܳܠܳܟ݂ ܓܝܳܕܳܐ ܗ̱ܘ̣ ܕܦܰܪܙܠܳܐ. ܘܒܶܝܬ݂ ܥܰܝܢܰܝ̈ܟ ܢܚܳܫܳܐ. ⁵ ܘܚܳܘܺܝܬ݂ܳܟ݂ ܡ̣ܶܢ ܩܕܺܝܡ. ܘܥܰܕ݂ܠܳܐ ܬܺܐܬܶܐ ܐܰܫܡܰܥܬܳܟ݂ ܕܠܳܐ ܬܺܐܡܰܪ ܦܬ݂ܰܟ݂ܖ̈ܰܝ ܥܒܰܕ݂ܘ: ܘܰܓܠܺܝܦܰܝ̈ ܘܰܢܣܺܝܟܰܝ̈ ܦܰܪܩܽܘܢܝ. ⁶ ܫܶܡܥܶܬ݂ ܘܰܚܙܺܝܬ݂ ܟܽܠܗܶܝܢ ܘܰܐܢ̱ܬ݁ܽܘܢ ܠܳܐ ܬܚܰܘܢ. ܐܰܫܡܰܥܬܳܟ݂ ܚܰܕ݂̈ܬܳܬ݂ܳܐ ܕܡ̣ܶܢ ܗܳܫܳܐ ܢܛܺܝܖ̈ܳܢ: ܘܠܳܐ ܝܺܕܰܥܬ݁. ⁷ ܘܡܶܟܺܝܠ ܡܶܬ݂ܒܰܖ̈ܝܳܢ ܘܠܳܐ ܡ̣ܶܢ ܩܕܺܝܡ. ܘܡ̣ܶܢ ܩܕ݂ܳܡ ܝܰܘܡܳܐ ܠܳܐ ܫܡܰܥܬ݁ ܐܶܢܶܝܢ: ܕܠܳܐ ܬܺܐܡܰܪ ܕܝܳܕܰܥ ܐ̱ܢܳܐ ܠܗܶܝܢ. ⁸ ܠܳܐ ܫܡܰܥܬ݁ ܐܳܦܠܳܐ ܝܳܕܰܥ ܐܰܢ̱ܬ݁ ܠܗܶܝܢ. ܘܡ̣ܶܢ ܩܕܺܝܡ ܠܳܐ ܐܶܬ݂ܦܬܰܚ ܐܶܕ݂ܢܰܝ̈ܟ ܝܳܕܰܥ ܐ̱ܢܳܐ ܕܰܡܕܰܓܳܠܽܘ ܡܕܰܓܶܠ ܐܰܢ̱ܬ݁. ܘܥܰܘܳܠܳܐ ܡ̣ܶܢ ܟܰܪܣܳܐ ܐܶܬ݂ܩܪܺܝܬ݁. ⁹ ܡܶܛܽܠ ܫܶܡܝ ܐܰܘܪܶܟ݂ ܪܽܘܓܙܝ ܘܬܶܫܒܽܘܚܬ݁ܝ ܐܶܛܰܪ ܠܳܟ݂: ܘܠܳܐ ܐܰܘܒܕ݂ܳܟ݂. ¹⁰ ܗܳܐ ܨܪܰܦܬܳܟ݂ ܘܠܳܐ ܒܟܶܣܦܳܐ. ܘܰܒܚܰܪܬܳܟ݂ ܒܟ݂ܽܘܪܳܐ ܕܡܶܣܟܺܢܽܘܬ݂ܳܐ. ¹¹ ܡܶܛܽܠܳܬ݂ܝ ܐܶܥܒܶܕ݂ ܕܠܳܐ ܐܶܬ݁ܛܰܘܰܫ ܘܺܐܝܩܳܪܝ ܠܰܐܚܪܺܝܢ ܠܳܐ ܐܶܬ݁ܶܠ. ¹² ܫܡܰܥܰܝܢܝ ܝܰܥܩܽܘܒ ܘܺܝܣܪܳܐܶܝܠ ܕܰܩܪܺܝܬ݂. ܐܶܢܳܐ ܐ̱ܢܳܐ ܩܰܕ݂ܡܳܝܳܐ: ܘܶܐܢܳܐ ܐ̱ܢܳܐ ܐ̱ܚܪܳܝܳܐ. ¹³ ܘܺܐܝܕ݂ܝ ܐܰܬ݂ܩܢܰܬ ܫܶܬܶܐܣܶܝ̈ܗ̇ ܕܰܐܪܥܳܐ. ܘܝܰܡܺܝܢܝ ܛܶܦܚܰܬ ܫܡܰܝܳܐ. ܩܳܪܶܐ ܐ̱ܢܳܐ ܠܗܽܘܢ: ܘܩܳܝܡܺܝܢ ܐܰܟܚܕ݂ܳܐ. ¹⁴ ܐܶܬ݂ܟܰܢܰܫܘ ܟܽܠܟ݂ܽܘܢ ܘܰܫܡܰܥܘ ܡܰܢܽܘ ܐܺܝܬ݂ ܒܟ݂ܽܘܢ ܕܰܡܚܳܘܶܐ ܗܳܠܶܝܢ. ܡܳܪܝܳܐ ܪܳܚܶܡ ܕܢܶܥܒܶܕ݂ ܨܶܒܝܳܢܶܗ ܒܒܳܒܶܠ: ܘܰܒܙܰܪܥܳܐ ܕܟܰܠܕ݂ܳܝ̈ܶܐ. ¹⁵ ܐܶܢܳܐ ܡܰܠܠܶܬ݂ ܘܳܐܦ ܩܪܺܝܬ݂ ܘܰܐܝܬ݁ܺܝܬܳܗ̇ ܘܰܐܨܠܚܶܬ݂ ܐܽܘܪܚܶܗ. ¹⁶ ܩܪܽܘܒܘ ܠܘܳܬ݂ܝ ܘܰܫܡܰܥܘ ܗܳܕܶܐ. ܕܡ̣ܶܢ ܪܺܝܫܺܝܬ݂ܳܐ ܒܛܽܘܫܝܳܐ ܠܳܐ ܡܰܠܠܶܬ݂ ܘܡ̣ܶܢ ܙܰܒܢܳܐ ܕܰܗܘܳܬ݂ ܬܰܡܳܢ ܐ̱ܢܳܐ. ܘܗܳܫܳܐ ܡܳܪܝܳܐ ܐܰ‌ܠܳܗܳܐ ܫܰܕܪܰܢܝ ܘܪܽܘܚܶܗ. ¹⁷ ܗܳܟ݂ܰܢܳܐ ܐܳܡܰܪ ܡܳܪܝܳܐ ܦܳܪܽܘܩܳܟ݂ ܩܰܕ݁ܺܝܫܳܐ ܕܺܝܣܪܳܐܶܝܠ ܐܶܢܳܐ ܡܳܪܝܳܐ ܐܰܠܳܗܳܟ݂ ܡܰܠܶܦ ܐ̱ܢܳܐ ܠܳܟ݂ ܕܠܳܐ ܬܰܥܠܶܐ ܘܰܡܚܳܘܶܐ ܐ̱ܢܳܐ ܠܳܟ݂ ܐܽܘܪܚܳܐ ܕܬܺܐܙܰܠ ܒܳܗ̇. ¹⁸ ܠܘܰܝ ܕܶܝܢ ܨܳܐܶܬ݂ ܐܰܢ̱ܬ݁ ܦܽܘܩܕܳܢܰܝ̈. ܘܗܳܘܶܐ ܫܠܳܡܳܟ݂ ܐܰܝܟ݂ ܢܰܗܪܳܐ: ܘܙܰܕܺܝܩܽܘܬ݂ܳܟ݂ ܐܰܝܟ݂ ܓ̈ܰܠܠܶܐ ܕܝܰܡܳܐ. ¹⁹ ܘܗܳܘܶܐ ܙܰܪܥܳܟ݂ ܐܰܝܟ݂ ܚܳܠܳܐ: ܘܝܰܠܕܳܐ ܕܰܡܥܰܝ̈ܟ ܐܰܝܟ݂ ܚܨܳܨܰܘ̈ܗܝ ܘܠܳܐ ܢܣܽܘܦ ܘܠܳܐ ܢܺܐܒܰܕ݂ ܫܡܶܗ ܡ̣ܶܢ ܩܕ݂ܳܡܝ. ²⁰ ܦܽܘܩܘ ܡ̣ܶܢ ܒܳܒܶܠ: ܥܪܽܘܩܘ ܡ̣ܶܢ ܟܰܠܕܳܝ̈ܶܐ ܒܩܳܠܳܐ ܕܬܶܫܒܽܘܚܬܳܐ ܚܰܘܰܘ ܗܳܕܶܐ. ܘܰܐܫܡܥܽܘܗ̇ ܘܰܐܦܩܽܘܗ̇ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ܘܶܐܡܰܪܘ: ܦܪܰܩ ܡܪܝܳܐ ܠܝܰܥܩܽܘܒ ܥܰܒܕܶܗ. ²¹ ܒܚܰܖ̈ܒܳܬ݂ܳܐ ܗܰܠܶܟ݂ ܐܶܢܽܘܢ. ܘܡܰܝ̈ܳܐ ܡ̣ܶܢ ܛܰܪܳܢܳܐ ܐܰܪܕܺܝ ܠܗܽܘܢ ܒܰܙܰܥ ܟܺܐܦܳܐ ܘܰܪܕܰܘ ܡܰܝ̈ܳܐ. ²² ܠܰܝܬ݁ ܫܠܳܡܳܐ ܠܖ̈ܰܫܺܝܥܶܐ: ܐܳܡܰܪ ܡܳܪܝܳܐ.

ܩܶܦܰܠܶܐܘܳܢ: ܡܛ

¹ ܫܡܰܥܰܝ̈ܢ ܓܳܙܖ̈ܳܬ݂ܳܐ: ܘܨܽܘܬܶܝ̈ܢ ܐܶܡ̈ܘܳܬ݂ܳܐ. ܡ̣ܶܢ ܪܽܘܚܩܳܐ ܡܳܪܝܳܐ ܩܪܳܢܝ. ܘܡ̣ܶܢ ܡܰܪܒܥܳܐ ܘܡ̣ܶܢ ܟܰܪܣܳܗ̇ ܕܶܐܡܝ ܕܟܰܪ ܫܶܡܝ. ² ܥܒܰܕ݂ ܦܽܘܡܝ ܐܰܝܟ݂ ܣܰܝܦܳܐ ܚܰܪܺܝܦܳܐ ܘܰܒܛܶܠܳܠܳܐ ܕܺܐܝܕܶܗ ܛܰܫܝܰܢܝ ܥܰܒܕܰܢܝ ܐܰܝܟ݂ ܓܶܐܪܳܐ ܓܰܒܝܳܐ: ܘܒܰܩܛܺܪܩܶܗ ܣܰܬ݁ܪܰܢܝ. ³ ܘܶܐܡܰܪ ܠܺܝ܆ ܥܰܒܕܝ ܐܰܢ̱ܬ݁: ܝܺܣܪܳܐܶܝܠ ܕܒܳܟ݂ ܡܶܫܬܰܒܰܚ ܐ̱ܢܳܐ. ⁴ ܘܠܳܐ ܐܶܡܪܶܬ݂ ܠܙܰܪܥܶܗ ܕܝܰܥܩܽܘܒ ܕܰܣܪܺܝܩܳܐܺܝܬ݂ ܠܺܐܝܬ݁ ܘܝܶܗܒܶܬ݂ ܚܠܰܝ ܠܰܣܪܺܝܩܽܘܬ݂ܳܐ. ܫܰܪܺܝܪܳܐܺܝܬ݂ ܕܺܝܢܝ ܩܕ݂ܳܡ ܡܳܪܝܳܐ: ܘܰܥܒܳܕ݂ܝ ܩܕ݂ܳܡ ܐܰܠܳܗܝ. ⁵ ܗܳܫܳܐ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܓܰܒܠܰܢܝ ܒܡܰܪܒܥܳܐ ܕܶܐܗܘܶܐ ܠܶܗ ܥܰܒܕܳܐ: ܘܰܐܦܢܶܐ ܠܝܰܥܩܽܘܒ ܠܘܳܬܶܗ: ܘܠܺܝܣܪܳܐܶܝܠ ܐܶܟܰܢܶܫ ܐܶܫܬܰܒܚܶܬ݂ ܩܕ݂ܳܡ ܡܳܪܝܳܐ. ܘܰܐܠܳܗܝ ܗܘܳܐ ܥܽܘܫܢܝ. ⁶ ܘܶܐܡܰܪ ܙܥܽܘܪܳܐ ܗ̱ܝ ܕܬܶܗܘܶܐ ܠܺܝ ܥܰܒܕܳܐ: ܘܰܬ݂ܩܺܝܡ ܫܰܒܛܳܐ ܕܝܰܥܩܽܘܒ: ܘܬܰܦܢܶܐ ܢܽܘܪܒܶܗ ܕܺܝܣܪܳܐܶܝܠ. ܝܰܗܒܬܳܟ݂ ܢܽܘܗܪܳܐ ܠܥܰܡ̈ܡܶܐ: ܕܬܶܗܘܶܐ ܦܽܘܪܩܳܢܝ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ⁷ ܗܳܟ݂ܰܢܳܐ ܐܳܡܰܪ ܡܳܪܝܳܐ ܩܰܕ݁ܺܝܫܳܐ ܕܺܝܣܪܳܐܶܝܠ: ܘܦܳܪܽܘܩܶܗ: ܠܰܕ݂ܡܶܣܬܰܠܝܳܐ ܢܰܦܫܶܗ: ܠܰܕ݂ܡܰܣܠܰܝ ܡ̣ܶܢ ܥܰܡܳܐ ܘܡ̣ܶܢ ܥܰܒ̈ܕܶܐ ܕܫܰܠܺܝܛܳܢ̈ܶܐ: ܡܰܠ̈ܟܶܐ ܢܶܚܙܽܘܢ ܘܰܢܩܽܘܡܽܘܢ: ܘܫܰܠܺܝܛܳܢ̈ܶܐ ܢܶܣܓܕ݂ܽܘܢ ܠܶܗ. ܡܶܛܽܠ ܡܳܪܝܳܐ ܕܰܡܗܰܝܡܰܢ: ܩܰܕ݁ܺܝܫܳܐ ܕܺܝܣܪܳܐܶܝܠ ܕܰܓܒܳܟ݂. ⁸ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܒܙܰܒܢܳܐ ܕܨܶܒܝܳܢܳܐ ܥܢܺܝܬ݂ܳܟ݂ ܘܰܒܝܰܘܡܳܐ ܕܦܽܘܪܩܳܢܳܐ ܥܰܕܰܪܬܳܟ݂. ܘܰܓܒܰܠܬܳܟ݂: ܘܝܰܗܒܬܳܟ݂ ܩܝܳܡܳܐ ܠܥܰܡܳܐ: ܘܢܽܘܗܪܳܐ ܠܥܰܡ̈ܡܶܐ. ܕܰܬ݂ܩܺܝܡ ܐܰܪܥܳܐ: ܘܬܺܐܪܰܬ݂ ܝܳܪܬ݁ܽܘܬ݂ܳܐ ܕܚܰܖ̈ܒܳܬ݂ܳܐ. ⁹ ܘܬܺܐܡܰܪ ܠܰܐܣܺܝܖ̈ܶܐ ܕܦܽܘܩܘ: ܘܠܰܚܒܺܝ̈ܫܶܐ ܕܶܐܬ݂ܓܠܰܘ. ܥܰܠ ܐܽܘܖ̈ܚܳܬ݂ܳܐ ܢܶܪܥܽܘܢ: ܘܰܒܟܽܠܗܽܘܢ ܫܒܺܝ̈ܠܶܐ ܡܰܖ̈ܥܝܳܬ݂ܗܽܘܢ. ¹⁰ ܠܳܐ ܢܶܟ݂ܦܢܽܘܢ: ܘܠܳܐ ܢܶܨܗܽܘܢ. ܘܠܳܐ ܢܰܟܶܐ ܐܶܢܽܘܢ ܫܰܘܒܳܐ ܘܫܶܡܫܳܐ. ܡܶܛܽܠ ܕܰܡܪܰܚܡܳܢܗܽܘܢ ܢܕܰܒܰܪ ܐܶܢܽܘܢ. ܘܰܠܡܰܒܽܘܥ̈ܶܐ ܕܡܰܝ̈ܳܐ ܢܰܝܬ݁ܶܐ ܐܶܢܽܘܢ. ¹¹ ܐܶܥܒܶܕ݂ ܟܽܠܗܽܘܢ ܛܽܘܖ̈ܶܐ ܐܽܘܖ̈ܚܳܬ݂ܳܐ: ܘܰܫܒܺܝ̈ܠܶܐ ܢܶܬ݁ܬ݁ܪܺܝܡܽܘܢ. ¹² ܗܳܠܶܝܢ ܢܺܐܬ݂ܽܘܢ ܡ̣ܶܢ ܪܽܘܚܩܳܐ: ܘܗܳܠܶܝܢ ܡ̣ܶܢ ܓܰܪܒܝܳܐ ܘܗܳܠܶܝܢ ܡ̣ܶܢ ܝܰܡܳܐ: ܘܗܳܠܶܝܢ ܡ̣ܶܢ ܝܰܡܳܐ ܕܣܰܢܝܰܡ. ¹³ ܫܰܒܰܚܘ ܫܡܰܝܳܐ: ܘܕ݂ܽܘܨܝ ܐܰܪܥܳܐ. ܐܶܬ݂ܦܰܨܚܘ ܛܽܘܖ̈ܶܐ ܒܬܶܫܒܽܘܚܬܳܐ. ܡܶܛܽܠ ܕܒܰܝܰܐ ܡܳܪܝܳܐ ܠܥܰܡܶܗ: ܘܪܰܚܶܡ ܥܰܠ ܒܳܝܫܰܘ̈ܗܝ. ¹⁴ ܘܶܐܡܪܰܬ ܨܶܗܝܽܘܢ ܕܫܰܒܩܰܢܝ ܡܳܪܝܳܐ: ܘܡܳܪܝܳܐ ܛܥܳܢܝ. ¹⁵ ܐܶܢ ܛܳܥܝܳܐ ܐܰܢ̱ܬ݁ܬ݂ܳܐ ܥܽܘܠܳܗ̇: ܘܠܳܐ ܡܪܰܚܡܳܐ ܥܰܠ ܒܰܪ ܡܥܶܝ̈ܗ̇: ܐܳܦܶܢ ܗܳܠܶܝܢ ܢܶܛܥ̈ܝܳܢ: ܐܶܢܳܐ ܠܳܐ ܐܶܛܥܶܝܟ݂ܝ. ¹⁶ ܗܳܐ ܥܰܠ ܦܰܣ̈ܶܐ ܕܺܐܝܕܰܝ̈ ܪܫܰܡ̇ܬ݁ܶܟ݂ܝ ܘܫܽܘܖ̈ܰܝܟܝ ܠܽܘܩܒܰܠܝ ܐܶܢܽܘܢ ܐܰܡܺܝܢܳܐܺܝܬ݂. ¹⁷ ܒܰܥܓܰܠ ܒܢܰܝ̈ܟܝ ܡܣܰܚܦܳܢܰܝ̈ܟܝ ܘܡܰܚܖ̈ܒܳܢܰܝܟܝ ܡܶܢܶܟ݂ܝ ܢܶܦܩܽܘܢ. ¹⁸ ܐܰܪܺܝܡܝ ܥܰܝܢܰܝ̈ܟܝ ܠܰܚܕ݂ܳܖ̈ܰܝܟܝ. ܘܰܚܙܳܝ ܕܟܽܠܗܽܘܢ ܡܶܬ݂ܟܰܢܫܺܝܢ ܘܳܐܬ݁ܶܝܢ ܠܶܟ݂ܝ: ܚܰܝ ܐ̱ܢܳܐ ܐܳܡܰܪ ܡܳܪܝܳܐ: ܕܟܽܠܗܽܘܢ ܐܰܝܟ݂ ܨܶܒܬܳܐ ܬܶܠܒܫܺܝܢ: ܘܬܶܬ݂ܟܰܠܠܺܝܢ ܐܰܝܟ݂ ܟܰܠܬ݂ܳܐ. ¹⁹ ܡܶܛܽܠ ܕܚܰܖ̈ܒܳܬܶܟ݂ܝ: ܘܨܳܕ݂̈ܝܳܬܶܟ݂ܝ: ܘܰܐܪܥܳܐ ܕܰܣܚܺܝܦܽܘܬܶܟ݂ܝ ܡܶܟܺܝܠ ܬܶܬ݂ܶܐܠܶܨ ܡ̣ܶܢ ܝܰܬ݂ܒܳܐ: ܘܢܶܥܪܩܽܘܢ ܒܳܠܽܘܥܰܝ̈ܟܝ. ²⁰ ܘܬܽܘܒ ܢܺܐܡܪܽܘܢ ܒܶܐܕ݂ܢܰܝ̈ܟܝ ܒܢܰܝ̈ ܡܓܰܙܝܽܘܬܶܟ݂ܝ: ܐܰܠܺܝܨ ܗ̱ܘ̣ ܠܰܢ ܐܰܬ݂ܪܳܐ ܐܶܬ݂ܩܰܪܰܒ ܠܰܢ: ܢܶܬ݁ܶܒ. ²¹ ܘܬܺܐܡܪܺܝܢ ܒܠܶܒܶܟ݂ܝ ܡܰܢܽܘ ܝܺܠܶܕ݂ ܠܺܝ ܗܳܠܶܝܢ. ܕܗܳܐ ܐܶܢܳܐ ܡܓܰܙܰܝܬܳܐ ܐ̱ܢܳܐ ܘܰܡܫܰܘܚܰܕܬܳܐ: ܓܳܠܺܝܬ݂ܳܐ ܘܰܡܕ݂ܰܘܰܕܬܳܐ. ܗܳܠܶܝܢ ܡܰܢ ܪܰܒܺܝ ܐܶܢ ܐܶܢܳܐ ܗܳܐ ܐܶܫܬܰܚܪܶܬ݂ ܒܰܠܚܽܘܕ݂ܰܝ: ܗܳܠܶܝܢ ܐܰܝܟܳܐ ܗܘܰܘ. ²² ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ: ܗܳܐ ܡܪܺܝܡ ܐ̱ܢܳܐ ܐܺܝܕ݂ܝ ܥܰܠ ܥܰܡ̈ܡܶܐ. ܘܰܠܥܰܡ̈ܡܶܐ ܐܰܪܺܝܡ ܐܳܬܳܐ. ܘܢܰܝܬ݁ܽܘܢ ܠܰܒܢܰܝ̈ܟܝ ܥܰܠ ܐܺܝܕܰܝ̈ܗܽܘܢ. ܘܠܰܒ̈ܢܳܬܶܟ݂ܝ ܥܰܠ ܟܰܬ݂ܦ̈ܳܬ݂ܗܽܘܢ ܢܶܫܩܠܽܘܢ. ²³ ܘܢܶܗܘܽܘܢ ܡܰܠ̈ܟܶܐ ܡܖ̈ܰܒܝܳܢܰܝܟܝ: ܘܪܰܘܖ̈ܒܳܢܺܝܬ݂ܗܽܘܢ ܡܰܝܢܩܳܢ̈ܝܳܬܶܟܝ ܘܥܰܠ ܐܰܦܰܝ̈ܗܽܘܢ ܥܰܠ ܐܰܪܥܳܐ ܢܶܣܛܕ݂ܽܘܢ ܠܶܟ݂ܝ. ܘܥܰܦܪܳܐ ܕܖ̈ܶܓܠܰܝܟܝ ܢܶܠܚܟ݂ܽܘܢ ܘܬܶܕܰܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ: ܕܠܳܐ ܒܳܗܳܬܺܝܢ ܐܰܝܠܶܝܢ ܕܰܡܣܰܟܶܝܢ ܠܺܝ. ²⁴ ܠܡܳܐ ܡܶܬ݁ܕܰܒܪܳܐ ܕܒܰܪܬ݁ܶܗ ܕܓܰܢ̱ܒܳܪܳܐ. ܐܰܘ ܫܒܺܝܬܶܗ ܕܥܰܫܺܝܢܳܐ ܡܶܬ݂ܦܰܨܝܳܐ. ²⁵ ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܰܕ݂ܒܰܪܬ݁ܶܗ ܕܓܰܢ̱ܒܳܪܳܐ ܬܶܬ݁ܕ̇ܒܰܪ ܘܰܫܒܺܝܬܶܗ ܕܥܰܫܺܝܢܳܐ ܬܶܬ݂ܦܰܨܶܐ. ܘܕ݂ܺܝܢܰܝ̈ܟܝ ܐܶܢܳܐ ܐܶܕܽܘܢ. ܘܠܰܒܢܰܝ̈ܟܝ ܐܶܢܳܐ ܐܶܦܪܽܘܩ. ²⁶ ܘܰܐܘܟܶܠ ܠܳܐܠܽܘܨܰܝ̈ܟܝ ܒܶܣܪܗܽܘܢ. ܘܰܐܝܟ݂ ܡܶܐܪܺܝܬ݂ܳܐ ܢܶܪܘܢ ܡ̣ܶܢ ܕܶܡܗܽܘܢ. ܘܢܶܕܥܽܘܢ ܟܽܠ ܒܣܰܪ ܕܶܐܢܳܐ ܐ̱ܢܳܐ ܡܳܪܝܳܐ ܦܳܪܽܘܩܶܟ݂ܝ: ܘܰܡܣܰܝܥܳܢܶܟ݂ܝ ܬܰܩܺܝܦܶܗ ܕܝܰܥܩܽܘܒ.

ܩܶܦܰܠܶܐܘܳܢ: ܢܢ

¹ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܐܰܝܢܰܘ ܟܬ݂ܳܒܳܐ ܕܫܽܘܒܩܳܢܳܐ ܕܫܶܒܩܶܬ݂ ܠܐܶܡܟ݂ܽܘܢ. ܐܳܘ ܡܰܢܽܘ ܡܳܪܶܐ ܚܳܘܒܰܬ݂ܝ ܕܙܰܒܢܬ݁ܟ݂ܽܘܢ ܠܶܗ. ܗܳܐ ܒܰܚܛܳܗܰܝ̈ܟܽܘܢ ܐܶܙܕܰܒܰܢܬܽܘܢ. ܘܰܒܥܳܘܠܟ݂ܽܘܢ ܐܶܫܬܰܒܩܰܬ ܐܶܡܟ݂ܽܘܢ. ² ܠܡܳܢܳܐ ܐܶܬܺܝܬ݂: ܘܠܰܝܬ݁ ܐ̱ܢܳܫ ܘܰܩܪܺܝܬ݂ ܘܠܰܝܬ݁ ܕܥܳܢܶܐ ܚܨܳܕ݂ܳܐ ܚܶܨܕܰܬ ܐܺܝܕ݂ܝ ܘܦܶܕܰܬ ܐܰܘ ܠܰܝܬ݁ ܒܺܝ ܚܰܝܠܳܐ ܠܰܡܦܰܨܳܝܽܘ ܗܳܐ ܒܰܟ݂ܐܳܬ݂ܝ ܡܰܚܪܶܒ ܐ̱ܢܳܐ ܝܰܡܳܐ. ܘܥܳܒܶܕ݂ ܐ̱ܢܳܐ ܢܰܗܖ̈ܰܘܳܬ݂ܳܐ ܐܰܝܟ݂ ܡܰܕ݂ܒܪܳܐ: ܘܣܳܪܶܝܢ ܢܽܘܢܰܝ̈ܗܽܘܢ ܡ̣ܶܢ ܒܠܰܝ ܡܰܝ̈ܳܐ: ܘܡܳܝܬ݁ܺܝܢ. ³ ܘܡܰܠܒܶܫ ܐ̱ܢܳܐ ܠܰܫܡܰܝܳܐ ܚܶܫܽܘܟ݂ܳܐ. ܘܣܰܩܳܐ ܥܳܒܕ݂ ܐ̱ܢܳܐ ܬܰܟ݂ܣܺܝܬܗܽܘܢ. ⁴ ܡܳܪܝܳܐ ܐܰ‌ܠܳܗܳܐ ܝܰܗܒ ܠܺܝ ܠܶܫܳܢܳܐ ܕܝܽܘܠܦܳܢܳܐ. ܕܰܐܘܕܰܥ ܘܶܐܚܳܘܶܐ ܠܰܡܛܰܖ̈ܦܶܐ ܡܶܠܬ݂ܳܐ. ܐܰܥܺܝܪ ܒܨܰܦܪܳܐ. ܒܨܰܦܪܳܐ ܢܶܥܒܶܕ݂ ܠܺܝ ܐܶܕܢ̈ܶܐ ܠܡܶܫܡܰܥ ܝܽܘܠܦܳܢܳܐ. ⁵ ܡܳܪܝܳܐ ܐܰ‌ܠܳܗܳܐ ܦܬܰܚ ܠܺܝ ܐܶܕܢ̈ܶܐ. ܘܶܐܢܳܐ ܠܳܐ ܗܶܦܟܶܬ݂ ܠܒܶܣܬܰܪܝ: ܐܳܦܠܳܐ ܩܳܡܶܬ݂ ܒܚܶܪܝܳܢܳܐ. ⁶ ܓܽܘܫܡܝ ܝܶܗܒܶܬ݂ ܠܡܰܚ̈ܘܳܬ݂ܳܐ: ܘܦܰܟܰܝ̈ ܠܫܽܘ̈ܩܳܦܶܐ. ܘܰܐܦܰܝ̈ ܠܳܐ ܐܰܦܢܺܝܬ݂ ܡ̣ܶܢ ܒܶܗܬܬ݂ܳܐ ܘܡ̣ܶܢ ܪܽܘܩܳܐ. ⁷ ܘܡܳܪܝܳܐ ܐܰ‌ܠܳܗܳܐ ܥܰܕܰܪܰܢܝ. ܡܶܛܽܠ ܗܳܢܳܐ ܠܳܐ ܒܶܗܬܶܬ݂: ܡܶܛܽܠ ܗܳܢܳܐ ܥܶܒܕܶܬ݂ ܐܰܦܰܝ̈ ܐܰܝܟ݂ ܟܺܐܦܳܐ: ܘܝܶܕ݂ܥܶܬ݂ ܕܠܳܐ ܒܳܗܳܬ݂ ܐ̱ܢܳܐ. ⁸ ܕܩܰܪܺܝܒ ܗ̱ܘ̣ ܡܙܰܕܩܳܢܝ. ܡܰܢܽܘ ܕܕܳܐܶܢ ܥܰܡܝ: ܢܩܽܘܡ ܐܰܟܚܕ݂ܳܐ. ܐܰܘ ܡܰܢܽܘ ܒܥܶܠ ܕܺܝܢܝ: ܢܶܬ݂ܩܰܪܰܒ ܠܘܳܬ݂ܝ. ⁹ ܗܳܐ ܡܳܪܝܳܐ ܐܰ‌ܠܳܗܳܐ ܡܥܰܕܰܪ ܠܺܝ: ܡܰܢܽܘ ܡܚܰܝܶܒ ܠܺܝ. ܗܳܐ ܟܽܠܗܽܘܢ ܐܰܝܟ݂ ܠܒܽܘܫܳܐ ܒܳܠܶܝܢ: ܘܣܳܣܳܐ ܢܶܐܟ݂ܽܘܠ ܐܶܢܽܘܢ. ¹⁰ ܡܰܢܽܘ ܒܟ݂ܽܘܢ ܕܕ݂ܳܚܶܠ ܡ̣ܶܢ ܡܳܪܝܳܐ: ܢܶܫܡܰܥ ܒܩܳܠܳܐ ܕܥܰܒܕܶܗ ܕܰܡܗܰܠܶܟ݂ ܒܚܶܫܽܘܟ݂ܳܐ: ܘܠܰܝܬ݁ ܠܶܗ ܢܽܘܗܪܳܐ. ܢܣܰܒܰܪ ܒܰܫܡܶܗ ܕܡܳܪܝܳܐ: ܘܢܶܬ݂ܦܪܶܩ ܒܰܐܠܳܗܶܗ. ¹¹ ܗܳܐ ܟܽܠܟ݂ܽܘܢ ܫܳܒܩܰܝ̈ ܢܽܘܪܳܐ ܐܰܢ̱ܬ݁ܽܘܢ: ܘܰܡܓܰܘ̈ܙܠܰܝ ܫܰܠܗܶܒܺܝܬ݂ܳܐ. ܙܶܠܘ ܒܙܰܗܪܳܐ ܕܢܽܘܪܟ݂ܽܘܢ: ܘܰܒܫܰܠܗܶܒܺܝܬ݂ܳܐ ܕܓܰܘܙܰܠܬ݁ܟ݂ܽܘܢ. ܡ̣ܶܢ ܐܺܝܕܰܝ̈ ܗܶܘܰܬ݂ܟ݂ܽܘܢ ܗܳܕܶܐ: ܕܰܒܟܰܪܝܽܘܬ݂ܳܐ ܬܶܕ݂ܡܟ݂ܽܘܢ.

 

 

ܩܶܦܰܠܶܐܘܳܢ: ܢܐ

¹ ܫܽܘܡܥܽܘܢܝ ܕܪܳܗܛܺܝܢ ܒܙܰܕܺܝܩܽܘܬܳܐ: ܘܒܳܥܶܝܢ ܠܡܳܪܝܳܐ. ܚܽܘܪܘ ܠܛܽܘܪܳܐ ܕܶܐܬܓܙܰܪܬ݁ܽܘܢ ܡܶܢܶܗ: ܘܰܠܓܽܘܒܳܐ ܕܶܐܬ݂ܢܰܩܰܪܬ݁ܽܘܢ ܡܶܢܶܗ. ² ܚܽܘܪܘ ܠܰܐܒܪܳܗܳܡ ܐܰܒܘܟ݂ܽܘܢ: ܘܰܠܣܰܪܳܐ ܕܰܒܛܶܢܬ݂ܟ݂ܽܘܢ ܕܚܰܕ݂ ܗ̱ܘܳܐ: ܘܰܩܪܺܝܬܶܗ: ܘܒܰܪܶܟ݂ܬܶܗ: ܘܰܐܣܺܓܝܬ݁ܶܗ. ³ ܡܶܛܽܠ ܕܰܒܢܳܐ ܡܳܪܝܳܐ ܠܨܶܗܝܽܘܢ: ܘܰܡܒܰܢܶܐ ܠܟܽܠܗܶܝܢ ܚܰܖ̈ܒܳܬ݂ܳܗ̇. ܘܥܳܒܶܕ݂ ܡܰܕ݂ܒܪܳܗ̇ ܐܰܝܟ݂ ܥܕܶܢ: ܘܰܦܩܰܥܬ݂ܳܗ̇ ܐܰܝܟ݂ ܦܰܪܕܰܝܣܶܗ ܕܡܳܪܝܳܐ. ܕܝܳܨܳܐ ܘܚܰܕ݂ܽܘܬ݂ܳܐ ܢܶܫܬ݁ܡܰܥ ܒܓܰܘܳܗ̇: ܬܰܘܕܺܝܬ݂ܳܐ ܘܩܳܠܳܐ ܕܰܙܡܳܪܳܐ. ⁴ ܫܽܘܡܥܽܘܢܝ ܥܰܡ̈ܡܶܐ: ܘܨܽܘܬܰܝܢܳܢ̈ܝ ܐܶܡ̈ܘܳܬ݂ܳܐ. ܡܶܛܽܠ ܕܢܳܡܽܘܣܳܐ ܡ̣ܶܢ ܩܕ݂ܳܡܝ ܢܳܦܶܩ ܘܕ݂ܺܝܢܝ ܢܽܘܗܪܳܐ ܗ̱ܘ̣ ܠܥܰܡ̈ܡܶܐ. ⁵ ܩܶܪܒܰܬ ܙܰܕܺܝܩܽܘܬ݂ܝ: ܘܰܢܦܰܩ ܦܽܘܪܩܳܢܝ. ܘܒܰܕ݂ܪܳܥܝ ܥܰܡ̈ܡܶܐ ܢܶܬ݁ܬ݁ܕܺܝܢܽܘܢ. ܠܺܝ ܢܣܰܟ̈ܝܳܢ ܓܳܙܖ̈ܳܬ݂ܳܐ. ܘܠܰܕ݂ܪܳܥܝ ܢܣܰܒܖ̈ܳܢ. ⁶ ܐܰܪܺܝܡܘ ܥܰܝܢܰܝ̈ܟܽܘܢ ܠܰܫܡܰܝܳܐ: ܘܚܽܘܪܘ ܐܳܦ ܠܬܰܚܬ݁ ܒܰܐܪܥܳܐ. ܡܶܛܽܠ ܕܰܫܡܰܝܳܐ ܐܰܝܟ݂ ܬܶܢܳܢܳܐ ܢܶܥܒܪܽܘܢ: ܘܰܐܪܥܳܐ ܐܰܝܟ݂ ܠܒܽܘܫܳܐ ܬܶܒܠܶܐ. ܘܥܳܡܽܘܖ̈ܶܝܗ̇ ܐܰܟ݂ܘܳܬ݂ܳܗ̇ ܢܶܗܘܽܘܢ. ܘܦܽܘܪܩܳܢܝ ܠܥܳܠܰܡ ܢܶܗܘܶܐ: ܘܙܰܕܺܝܩܽܘܬ݂ܝ ܠܳܐ ܬܶܥܒܰܪ. ⁷ ܫܽܘܡܥܽܘܢܝ ܝܳܕ݂ܥܰܝ̈ ܙܰܕܺܝܩܽܘܬܳܐ: ܥܰܡܳܐ ܕܢܳܡܽܘܣܝ ܒܠܶܒܗܽܘܢ. ܠܳܐ ܬܶܕ݂ܚܠܽܘܢ ܡ̣ܶܢ ܚܶܣܕܳܐ ܕܐ̱ܢܳܫܳܐ. ܘܡ̣ܶܢ ܓܽܘܕܳܦܗܽܘܢ ܠܳܐ ܬܽܙܘܥܽܘܢ. ⁸ ܡܶܛܽܠ ܕܰܐܝܟ݂ ܕܰܠܥܰܡܪܳܐ ܘܰܐܝܟ݂ ܕܠܰܠܒܘܫܳܐ ܢܶܐܟ݂ܽܘܠ ܐܶܢܽܘܢ ܣܳܣܳܐ. ܘܙܰܕܺܝܩܽܘܬ݂ܝ ܠܥܳܠܰܡ ܬܶܗܘܶܐ. ܘܦܽܘܪܩܳܢܝ ܠܕ݂ܳܪܕܳܖ̈ܺܝܢ. ⁹ ܐܶܬ݁ܬ݁ܥܺܝܪܝ: ܐܶܬ݁ܬ݁ܥܺܝܪܝ: ܘܰܠܒܰܫܝ ܥܽܘܫܢܳܐ ܕܰܕ݂ܪܳܥܶܗ ܕܡܳܪܝܳܐ. ܐܶܬ݁ܬ݁ܥܺܝܪܝ ܐܰܝܟ݂ ܕܰܒܝܰܘ̈ܡܳܬܳܐ ܩܰܕ݂ܡܳܝ̈ܶܐ: ܘܰܐܝܟ݂ ܕܳܖ̈ܶܐ ܕܡ̣ܶܢ ܥܳܠܡܺܝܢ. ܐܰܢ̱ܬ݁ܝ ܐܰܢ̱ܬ݁ܝ ܕܰܦܣܰܩܬ݁ܝ ܦܣܳܩܳܐ ܪܰܒܳܐ: ܘܰܩܛܰܠܬ݁ܝ ܠܬܰܢܺܝܢܳܐ. ¹⁰ ܐܰܢ̱ܬ݁ܝ ܗ̄ܝ ܕܰܐܚܪܶܒܬ݁ܝ ܝܰܡܳܐ: ܘܡܰܝ̈ܳܐ ܕܰܬ݂ܗܽܘܡܳܐ ܪܰܒܳܐ. ܘܰܒܥܽܘܡܩܳܐ ܕܡܰܝ̈ܳܐ ܥܒܰܕܬ݁ܝ ܐܽܘܪܚܳܐ. ܕܢܶܥܒܪܽܘܢ ܦܖ̈ܺܝܩܶܐ ܦܖ̈ܺܝܩܰܘܗܝ ܕܡܳܪܝܳܐ. ¹¹ ܘܢܶܗܦܟ݂ܽܘܢ ܘܢܶܥܠܽܘܢ ܠܨܶܗܝܽܘܢ ܒܫܽܘܒܚܳܐ. ܘܰܠܥܳܠܡܺܝܢ ܬܶܗܘܶܐ ܚܰܕ݂ܽܘܬ݂ܳܐ ܥܰܠ ܖ̈ܺܝܫܰܝܗܽܘܢ. ܒܽܘܣܳܡܳܐ ܘܚܰܕ݂ܽܘܬ݂ܳܐ ܢܰܕ݂ܪܟ݂ܽܘܢ. ܘܢܶܥܪܩܽܘܢ ܕܽܘܘܳܢܳܐ ܘܬܶܢ̈ܚܳܬ݂ܳܐ. ¹² ܐܶܢܳܐ ܐ̱ܢܳܐ ܡܒܰܝܳܐܢܟ݂ܽܘܢ ܐܳܡܰܪ ܡܳܪܝܳܐ. ܡܰܢ ܐܰܢ̱ܬ݁ܝ ܕܰܕ݂ܚܶܠܬ݁ܝ ܡ̣ܶܢ ܐ̱ܢܳܫܳܐ ܕܡܳܐܶܬ݂: ܘܡ̣ܶܢ ܒܰܪܢܳܫܳܐ ܕܰܐܝܟ݂ ܥܳܡܺܝܪܳܐ ܝܳܒܶܫ. ¹³ ܘܰܛܥܰܝܬ݁ܝ ܠܡܳܪܝܳܐ ܕܥܰܒܕܰܟ݂ܝ. ܕܰܡܬܰܚ ܫܡܰܝܳܐ: ܘܰܐܬ݂ܩܶܢ ܫܶܬܶܐܣܶܝ̈ܗ̇ ܕܰܐܪܥܳܐ. ܘܰܕ݂ܚܶܠܬ݁ܝ ܐܰܡܺܝܢܳܐܺܝܬ݂ ܟܽܠܝܽܘܡ ܡ̣ܶܢ ܩܕ݂ܳܐ ܚܶܡܬܶܗ ܕܳܐܠܽܘܨܳܐ: ܕܰܡܛܰܝܰܒ ܗ̱ܘܳܐ ܠܰܡܚܰܒܳܠܽܘ ܐܰܝܟܳܐ ܗ̱ܝ ܚܶܡܬܶܗ ܕܳܐܠܽܘܨܳܐ. ¹⁴ ܕܰܡܣܰܪܗܶܒ ܗ̱ܘܳܐ ܥܰܫܺܝܢ̈ܶܐ ܠܰܡܚܰܒܳܠܽܘ ܠܳܐ ܢܡܽܘܬ݂ܽܘܢ ܠܰܚܒܳܠܳܐ. ܘܠܳܐ ܢܶܚܣܰܪ ܠܰܚܡܶܗ. ¹⁵ ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܶܟ݂ܝ ܕܟܳܐܶܐ ܒܝܰܡܳܐ ܘܫܳܠܶܝܢ ܓܰܠܠܰܘ̈ܗܝ ܡܳܪܝܳܐ ܚܰܝܠܬ݂ܳܢܳܐ ܫܡܶܗ. ¹⁶ ܕܣܳܡܶܬ݂ ܡܶܠܰܝ̈ ܒܦܽܘܡܶܟ݂ܝ. ܘܰܒܛܶܠܳܠܳܐ ܕܺܐܝܕ݂ܝ ܟܰܣܺܝܬ݁ܶܟ݂ܝ ܒܗܳܝ ܕܡܶܬ݂ܚܶܬ݂ ܫܡܰܝܳܐ: ܘܰܐܬ݂ܩܢܶܬ݂ ܫܶܬܶܐܣܶܝ̈ܗ̇ ܕܰܐܪܥܳܐ: ܘܶܐܡܪܶܬ݂ ܠܨܶܗܝܽܘܢ ܕܥܰܡܝ ܐܰܢ̱ܬ݁ܝ. ¹⁷ ܐܶܬ݁ܬ݁ܥܺܝܪܝ: ܐܶܬ݁ܬ݁ܥܺܝܪܝ: ܘܩܽܘܡܝ ܐܽܘܪܺܫܠܶܡ ܕܶܐܫܬܺܝܬܝ ܡ̣ܶܢ ܐܺܝܕܶܗ ܕܡܳܪܝܳܐ ܟܳܣܳܐ ܕܪܽܘܓܙܶܗ ܘܶܐܫܬ݁ܺܝܬ݁ܝ ܘܰܐܡܨܺܝܬ݁ܝ ܟܳܣܳܐ ܕܪܶܥܠܳܐ. ¹⁸ ܘܠܰܝܬ݁ ܕܰܡܒܰܝܰܐ ܠܳܗ̇ ܡ̣ܶܢ ܟܽܠܗܽܘܢ ܒܢܰܝ̈ܳܐ ܕܝܶܠܕܰܬ. ܘܠܰܝܬ݁ ܕܳܐܚܶܕ݂ ܒܺܐܝܕ݂ܳܗ̇ ܘܰܡܩܺܝܡ ܠܳܗ̇: ܡ̣ܶܢ ܟܽܠܗܽܘܢ ܒܢܰܝ̈ܳܐ ܕܪܰܒܝܰܬ. ¹⁹ ܬܰܪܬ݁ܶܝܢ ܐܶܢܶܝܢ ܡܰܛ̈ܝܶܟ݂ܝ ܠܡܰܢ ܬܶܟ݂ܪܶܐ ܥܠܰܟܝ ܒܶܙܬ݂ܳܐ ܘܰܬ݂ܒܳܪܳܐ: ܘܟܰܦܢܳܐ ܘܚܰܪܒܳܐ ܡܰܢ ܢܒܰܝܐܶܟ݂ܝ. ²⁰ ܒܢܰܝ̈ܟܝ ܬܰܘܺܝܪܺܝܢ: ܘܕ݂ܳܡܟܺܝܢ ܒܪܺܝܫ ܟܽܠܗܽܘܢ ܫܽܘ̈ܩܶܐ: ܐܰܝܟ݂ ܣܶܠܩܳܐ ܕܰܟ݂ܡܺܝܕ݂. ܘܰܡܠܶܝܢ ܪܽܘܓܙܶܗ ܕܡܳܪܝܳܐ: ܘܰܟ݂ܐܳܬܶܗ ܕܰܐܠܳܗܶܟ݂ܝ. ²¹ ܡܶܛܽܠ ܗܳܢܳܐ ܫܡܰܥܝ ܗܳܠܶܝܢ ܡܡܰܟܰܟ݂ܬܳܐ: ܕܪܰܘܝܳܐ ܠܳܐ ܡ̣ܶܢ ܚܰܡܪܳܐ. ²² ܗܳܟ݂ܰܢܳܐ ܐܳܡܰܪ ܡܳܪܶܟ݂ܝ ܡܳܪܝܳܐ: ܘܰܐܠܳܗܶܟ݂ܝ ܢܕ݂ܽܘܢ ܠܥܰܡܶܗ. ܗܳܐ ܢܶܣܒܶܬ݂ ܡ̣ܶܢ ܐܺܝܕܰܝ̈ܟܝ ܟܳܣܳܐ ܕܰܪܥܳܠܳܐ. ܘܟܳܣܳܐ ܕܪܽܘܓܙܝ ܠܳܐ ܬܰܘܣܦܺܝܢ ܬܽܘܒ ܠܡܶܫܬ݁ܝܶܗ. ²³ ܘܶܐܣܺܝܡܺܝܘܗܝ ܒܝܰܕ݂ ܡܡܰܟܟ݂ܳܢܰܝ̈ܟܝ ܕܶܐܡܰܪܘ ܠܢܰܦܫܶܟ݂ܝ ܐܶܬ݂ܡܰܟܰܟ݂ܝ: ܘܢܶܥܒܰܪ. ܘܰܥܒܰܕܬ݁ܝ ܠܥܰܡܶܟ݂ܝ ܐܰܝܟ݂ ܐܰܪܥܳܐ: ܘܰܐܝܟ݂ ܫܽܘܩܳܐ ܠܰܕ݂ܥܳܒܪܺܝܢ.

ܩܶܦܰܠܶܐܘܳܢ: ܢܒ

¹ ܐܶܬ݁ܬ݁ܥܺܝܪܝ: ܐܶܬ݁ܬ݁ܥܺܝܪܝ: ܨܶܗܝܽܘܢ ܘܰܠܒܰܫܝ ܠܒܽܘܫܳܐ ܕܬܶܫܒܽܘܚܬܳܐ: ܐܽܘܪܺܫܠܶܡ ܩܪܺܝܬ݂ܳܐ ܩܰܕܺܝܫܬܳܐ. ܡܶܛܽܠ ܕܠܳܐ ܢܰܘܣܶܦ ܬܽܘܒ ܠܡܶܥܰܠ ܠܶܟ݂ܝ ܥܽܘܪܠܳܐ ܘܛܰܡܳܐܐ. ² ܐܶܬ݂ܢܰܦܨܝ ܡ̣ܶܢ ܥܰܦܪܳܐ ܘܩܽܘܡܝ ܬܶܒܝ ܐܽܘܪܺܫܠܶܡ ܫܪܳܝ ܢܺܝܪܳܐ ܡ̣ܶܢ ܨܰܘܪܶܟ݂ܝ ܫܒܺܝܬ݂ܳܐ: ܒܰܪܬ݂ ܨܶܗܝܽܘܢ. ³ ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܳܪܝܳܐ: ܡܰܓܳܢ ܐܶܙܕܰܒܰܢܬ݁ܽܘܢ: ܘܠܳܐ ܒܟܶܣܦܳܐ ܬܶܬ݂ܦܰܪܩܽܘܢ. ⁴ ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ: ܠܡܶܨܪܶܝܢ ܢܚܶܬ ܥܰܡܝ ܒܩܰܕ݂ܡܳܝܬܳܐ ܠܡܶܥܡܰܪ ܬܰܡܳܢ. ܘܳܐܬ݂ܽܘܪܳܝܳܐ ܒܰܩܛܺܝܪܳܐ ܕܰܒܪܶܗ. ⁵ ܘܗܳܫܳܐ ܡܳܐ ܠܺܝ ܗܳܪܟܳܐ ܐܳܡܰܪ ܡܳܪܝܳܐ: ܕܶܐܬ݁ܕܒܰܪ ܥܰܡܝ ܡܰܓܳܢ. ܫܰܠܺܝܛܳܢܰܝ̈ܗܽܘܢ ܡܰܝܠܠܺܝܢ: ܐܳܡܰܪ ܡܳܪܝܳܐ. ܘܰܐܡܺܝܢܳܐܺܝܬ݂ ܟܽܠܝܽܘܡ ܥܰܠ ܫܶܡܝ ܡܓܰܕܦܺܝܢ. ⁶ ܡܶܛܽܠ ܗܳܢܳܐ ܢܶܕܰܥ ܥܰܡܝ ܫܶܡܝ ܒܝܰܘܡܳܐ ܗܰܘ. ܡܶܛܽܠ ܕܶܐܢܳܐ ܗ̱ܘ̣ ܡܡܰܠܶܠ: ܘܺܐܝܬ݁ܰܝ. ⁷ ܡܳܐ ܝܳܐܝ̈ܳܢ ܥܰܠ ܛܽܘܖ̈ܶܐ ܖ̈ܶܓܠܰܘܗܝ ܕܰܡܣܰܒܰܪ ܫܠܳܡܳܐ: ܘܕܰܡܣܰܒܰܪ ܛܳܒ̈ܳܬ݂ܳܐ: ܘܰܕ݂ܡܰܫܡܰܥ ܦܽܘܪܩܳܢܳܐ. ܕܳܐܡܰܪ ܠܨܶܗܝܽܘܢ: ܐܰܡܠܶܟ݂ ܐܰܠܳܗܶܟ݂ܝ. ⁸ ܩܳܠܳܐ ܕܕ݂ܰܘܩܰܝ̈ܟܝ ܐܰܪܺܝܡܘ ܩܳܠܳܐ. ܘܰܐܟ݂ܚܕ݂ܳܐ ܡܫܰܒܚܺܝܢ ܡܶܛܽܠ ܕܥܺܝܢ ܒܥܺܝܢ ܢܶܚܙܽܘܢ ܟܰܕ݂ ܡܰܦܢܶܐ ܡܳܪܝܳܐ ܠܨܶܗܝܽܘܢ. ⁹ ܕܽܘܨܺܝ̈ܢ ܘܫܰܒܰܚ̈ܶܝܢ ܐܰܟ݂ܚܕ݂ܳܐ ܚܰܖ̈ܒܳܬ݂ܳܐ ܕܽܐܘܪܺܫܠܶܡ ܡܶܛܽܠ ܕܒܰܝܰܐ ܡܳܪܝܳܐ ܠܥܰܡܶܗ: ܘܰܦܪܰܩ ܠܽܐܘܪܺܫܠܶܡ. ¹⁰ ܓܠܳܐ ܡܳܪܝܳܐ ܕܪܳܥܶܗ ܩܰܕ݁ܺܝܫܳܐ ܠܥܺܝܢ ܟܽܠܗܽܘܢ ܥܰܡ̈ܡܶܐ. ܘܢܶܚܙܽܘܢ ܟܽܠܗܽܘܢ ܥܶܒܖ̈ܶܝܗ̇ ܕܰܐܪܥܳܐ ܦܽܘܪܩܳܢܶܗ ܕܰܐܠܳܗܰܢ. ¹¹ ܥܒܰܪܘ: ܥܒܰܪܘ ܦܽܘܩܘ ܡ̣ܶܢ ܬܰܡܳܢ: ܘܰܠܛܰܡ̈ܶܐܐ ܠܳܐ ܬܶܬ݂ܩܰܪܒܽܘܢ. ܦܽܘܩܘ ܡ̣ܶܢ ܓܰܘܳܗ̇: ܘܶܐܬ݂ܓܰܒܳܘ: ܫܩܺܝ̈ܠܰܝ ܡܳܐܢܰܘ̈ܗܝ ܕܡܳܪܝܳܐ. ¹² ܡܶܛܽܠ ܕܠܳܐ ܒܣܽܘܪܗܳܒܳܐ ܬܶܦܩܽܘܢ. ܘܒܰܥܪܽܘܩܝܳܐ ܠܳܐ ܬܺܐܙܽܠ̱ܘܢ ܡܶܛܽܠ ܕܡܳܪܝܳܐ ܐܳܙܶܠ ܩܕ݂ܳܡܰܝܟܽܘܢ: ܘܰܡܟܰܢܫܳܢܟ݂ܽܘܢ ܐܰܠܳܗܶܗ ܕܺܝܣܪܳܐܶܝܠ. ¹³ ܗܳܐ ܡܶܣܬܰܟܰܠ ܥܰܒܕܝ. ܘܡܶܬ݁ܬ݁ܪܺܝܡ: ܘܡܶܫܬܰܩܰܠ: ܘܡܶܬ݂ܥܰܠܶܐ ܛܳܒ. ¹⁴ ܐܰܝܟ݂ ܕܢܶܬ݂ܡܗܽܘܢ ܥܠܰܘܗ̱ܝ ܣܰܓܺܝ̈ܐܶܐ ܗܳܟ݂ܰܢܳܐ ܡܚܰܒܰܠ ܚܶܙܘܶܗ ܡ̣ܶܢ ܕܓܰܒܪܳܐ: ܘܩܽܘܒܳܠܠܶܗ ܡ̣ܶܢ ܕܰܒܢܰܝ̈ܢܳܫܳܐ. ¹⁵ ܗܳܢܳܐ ܡܕܰܟܶܐ ܥܰܡ̈ܡܶܐ ܣܰܓܺܝ̈ܐܶܐ: ܘܰܥܠܰܘܗܝ ܢܶܐܚܕܽܘܢ ܡܰܠ̈ܟܶܐ ܦܽܘܡܗܽܘܢ ܡܶܛܽܠ ܕܰܕ݂ܠܳܐ ܐܶܬ݂ܶܐܡܰܪ ܠܗܽܘܢ ܚܙܰܘ: ܘܰܕ݂ܠܳܐ ܫܡܰܥܘ ܐܶܣܬܰܟܰܠܘ.

ܩܶܦܰܠܶܐܘܳܢ: ܢܓ

¹ ܡܰܢ ܗܰܝܡܶܢ ܠܫܶܡܥܰܢ. ܘܰܕ݂ܪܳܥܶܗ ܕܡܳܪܝܳܐ ܠܡܰܢ ܐܶܬ݂ܓܠܺܝ. ² ܣܠܶܩ ܐܰܝܟ݂ ܝܰܠܽܘܕ݂ܳܐ ܩܕ݂ܳܡܰܘܗܝ: ܘܰܐܝܟ݂ ܥܶܩܳܪܳܐ ܡ̣ܶܢ ܐܰܪܥܳܐ ܨܗܺܝܬ݂ܳܐ ܠܰܝܬ݁ ܗ̱ܘܳܐ ܠܶܗ ܚܶܙܘܳܐ: ܘܠܳܐ ܙܺܝܘܳܐ ܘܰܚܙܰܝܢܳܝܗܝ ܕܠܰܝܬ݁ ܗ̱ܘܳܐ ܠܶܗ ܚܶܙܘܳܐ ܘܕܰܓܶܠܢܳܝܗܝ. ³ ܫܺܝܛܳܐ ܘܡܰܟܺܝܟܳܐ ܕܐ̱ܢܳܫܳܐ: ܓܰܒܪܳܐ ܗ̱ܘ̣ ܕܟܺܐܒ̈ܶܐ: ܘܝܳܕܰܥ ܚܰܫ̈ܶܐ. ܐܰܦܢܺܝܢ ܐܰܦܶܝ̈ܢ ܡܶܢܶܗ. ܘܫܳܛܢܳܝܗܝ ܘܠܳܐ ܚܫܰܒܢܳܝܗܝ. ⁴ ܫܰܪܺܝܪܳܐܺܝܬ݂ ܚܰܫܰܝ̈ܢ ܗܽܘ ܣܰܝܒܰܪ ܘܟܺܐܒܰܝ̈ܢ ܗܽܘ ܣܒܰܠ. ܘܰܚܢܰܢ ܚܫܰܒܢܳܝܗܝ ܟܬ݂ܺܝܫܳܐ: ܘܰܡܡܰܚܝܳܐ ܕܰܐ‌ܠܳܗܳܐ: ܘܰܡܡܰܟܟ݂ܳܐ. ⁵ ܗܽܘ ܡܶܬܩܛܶܠ ܡܶܛܽܠ ܚܛܳܗܰܝ̈ܢ. ܘܡܶܬ݂ܡܰܟܰܟ݂ ܡܶܛܽܠ ܥܳܘܠܰܢ ܡܰܪܽܕܘܬ݂ܳܐ ܕܰܫܠܳܡܰܢ ܥܠܰܘܗ̱ܝ. ܘܰܒܫܽܘܡܬܶܗ ܢܶܬ݂ܰܐܣܶܐ. ⁶ ܟܽܠܰܢ ܐܰܝܟ݂ ܥܳܢ̈ܳܐ ܛܥܰܝܢ. ܘܐ̱ܢܳܫ ܠܣܶܛܪܶܗ ܦܢܰܝܢ ܘܡܳܪܝܳܐ ܐܰܦܓܰܥ ܒܶܗ ܚܛܳܗ̈ܶܐ ܕܟ݂ܽܠܰܢ. ⁷ ܩܪܶܒ ܘܶܐܬ݂ܡܰܟܰܟ݂: ܘܠܳܐ ܦܬܰܚ ܦܽܘܡܶܗ. ܐܰܝܟ݂ ܐܶܡܪܶܐ ܠܢܶܟ݂ܣܬ݂ܳܐ ܐܶܬ݁ܕܰܒܰܪ. ܘܰܐܝܟ݂ ܢܶܩܝܳܐ ܩܕ݂ܳܡ ܓܳܙܽܘܙܳܐ ܫܰܬ݂ܺܝܩ ܗ̱ܘܳܐ: ܘܠܳܐ ܦܬܰܚ ܦܽܘܡܶܗ. ⁸ ܘܡ̣ܶܢ ܚܒܽܘܫܝܳܐ ܘܡ̣ܶܢ ܕܺܝܢܳܐ ܐܶܬ݁ܕ̇ܒܰܪ ܘܕ݂ܳܪܶܗ ܡܰܢܘ ܢܶܫܬܰܥܶܐ. ܡܶܛܽܠ ܕܶܐܬ݂ܓܰܙܰܪ ܡ̣ܶܢ ܐܰܪܥܳܐ ܕܚܰܝ̈ܶܐ: ܘܡ̣ܶܢ ܥܳܘ̈ܳܠܶܐ ܕܥܰܡܝ ܩܪܶܒܘ ܠܶܗ. ⁹ ܝܰܗܒ ܪܰܫܺܝܥܳܐ ܩܰܒܪܶܗ: ܘܥܰܬ݁ܺܝܪܳܐ ܒܡܰܘܬ݁ܶܗ ܥܰܠ ܕܠܳܐ ܥܒܰܕ݂ ܥܰܘܠܳܐ: ܘܠܰܝܬ݁ ܢܶܟ݂ܠܳܐ ܒܦܽܘܡܶܗ. ¹⁰ ܘܡܳܪܝܳܐ ܨܒܳܐ ܕܰܢܡܰܟܟ݂ܺܝܘܗܝ ܘܢܰܚܫܺܝܘܗܝ ܐܶܬ݁ܬ݁ܣܺܝܡ ܚܛܳܗܳܐ ܒܢܰܦܫܶܗ. ܕܢܶܚܙܶܐ ܙܰܪܥܳܐ: ܘܢܰܓܰܪ ܝܰܘ̈ܡܳܬܳܐ. ܘܨܶܒܝܳܢܶܗ ܕܡܳܪܝܳܐ ܒܺܐܝܕܶܗ ܢܰܨܠܰܚ. ¹¹ ܘܡ̣ܶܢ ܥܰܡܠܳܐ ܕܢܰܦܫܶܗ ܢܶܚܙܶܐ: ܘܰܢܣܰܒܰܥ ܒܺܝܕܰܥܬ݂ܳܐ: ܘܰܢܙܰܟܐ ܠܙܰܕܺܝ̈ܩܶܐ. ܥܰܒܕܳܐ ܗ̱ܘ̣ ܕܣܰܓܺܝ̈ܐܶܐ. ܘܰܚܛܳܗܰܝ̈ܗܽܘܢ ܗܽܘ ܢܶܣܒܽܘܠ. ¹² ܡܶܛܽܠ ܗܳܢܳܐ ܐܶܦܰܠܓܺܝܘܗܝ ܒܣܰܓܺܝ̈ܐܶܐ. ܘܰܠܥܰܫܺܝ̈ܢܶܐ ܢܦܰܠܶܓ ܒܶܙܬ݂ܳܐ. ܚܠܳܦ ܕܰܫܕ݂ܳܐ ܢܰܦ݂ܫܶܗ ܠܡܰܘܬܳܐ: ܘܥܰܡ ܥܳܘ̈ܳܠܶܐ ܐܶܬ݂ܡܢܺܝ ܘܗܽܘ ܚܛܳܗ̈ܶܐ ܕܣܰܓܺܝ̈ܐܶܐ ܫܩܰܠ: ܘܰܒܥܳܘ̈ܳܠܶܐ ܦܓܰܥ.

ܩܶܦܰܠܶܐܘܳܢ: ܢܕ

¹ ܫܰܒܰܚܝ ܥܩܰܪܬ݂ܳܐ ܕܠܳܐ ܝܶܠܕܰܬ ܘܶܐܬ݂ܦܰܨܚܝ ܒܬܶܫܒܽܘܚܬܳܐ: ܘܕ݂ܽܘܨܝ ܠܳܐ ܚܰܒܠܰܬ. ܡܶܛܽܠ ܕܰܣܓܺܝܘ ܒܢܶܝ̈ܗ̇ ܕܨܳܕ݂ܺܝܬ݂ܳܐ: ܝܰܬ݁ܺܝܪ ܡ̣ܶܢ ܒܢܶܝ̈ܗ̇ ܕܰܒܥܺܝܠܬܳܐ: ܐܳܡܰܪ ܡܳܪܝܳܐ. ² ܐܰܦܬܳܝ ܐܰܬ݂ܪܳܐ ܕܡܰܫܟܢܰܝ̈ܟܝ. ܘܝܳܖ̈ܺܝܥܳܬ݂ܳܐ ܕܡܰܫܟܢܰܝ̈ܟܝ ܡܬ݂ܽܘܚܝ: ܘܠܳܐ ܬܚܽܘܣܺܝܢ. ܐܰܘܪܶܟ݂ܝ ܛܽܘܢܒܰܝ̈ܟܝ ܘܣܶܟܰܝ̈ܟܝ ܫܰܪܰܪܝ. ³ ܡܶܛܽܠ ܕܰܠܝܰܡܺܝܢܳܐ ܘܰܠܣܶܡܳܠܳܐ ܬܶܣܓܺܝܢ. ܘܙܰܪܥܶܟ݂ܝ ܢܺܐܪܰܬ݂ ܥܰܡ̈ܡܶܐ. ܘܩܽܘܖ̈ܝܳܐ ܕܨܳܕ݂̈ܝܳܢ ܢܰܘܬ݁ܒܽܘܢ. ⁴ ܠܳܐ ܬܶܕ݂ܚܠܺܝܢ ܡܶܛܽܠ ܕܠܳܐ ܒܳܗܬܰܬ݁ܝ. ܘܠܳܐ ܬܶܬܟ݂ܰܣܶܝܢ: ܡܶܛܽܠ ܕܠܳܐ ܡܰܚܦܪܰܬ݁ܝ. ܡܶܛܽܠ ܕܒܶܗܬ݁ܬ݂ܳܐ ܕܛܰܠܝܽܘܬܶܟ݂ܝ ܬܶܛܥܶܝܢ: ܘܚܶܣܕܳܐ ܕܰܐܪܡܠܽܘܬܶܟ݂ܝ ܬܽܘܒ ܠܳܐ ܬܶܬ݁ܕܰܟ݂ܪܺܝܢ. ⁵ ܡܶܛܽܠ ܕܡܳܪܶܟ݂ܝ ܥܳܒܶܕ݂ ܠܶܟ݂ܝ ܗܳܟ݂ܰܢܳܐ: ܡܳܪܝܳܐ ܚܰܝܠܬ݂ܳܢܳܐ ܫܡܶܗ. ܘܦܳܪܽܘܩܶܟ݂ܝ ܩܰܕ݁ܺܝܫܳܐ ܕܺܝܣܪܳܐܶܝܠ. ܐܰ‌ܠܳܗܳܐ ܕܟ݂ܽܠܳܗ̇ ܐܰܪܥܳܐ ܢܶܬ݂ܩܪܶܐ. ⁶ ܡܶܛܽܠ ܕܰܐܝܟ݂ ܕܠܰܐ̱ܢܬ݁ܬ݂ܳܐ ܫܒܺܝܩܬܳܐ ܘܥܰܝ݂ܝ݂ܩܰܬ݂ ܪܽܘܚܳܐ ܩܪܳܟ݂ܝ ܡܳܪܝܳܐ ܘܰܐܝܟ݂ ܐܰܢ̱ܬ݁ܬ݂ ܛܰܠܝܽܘܬ݂ܳܐ ܕܡܶܫܬܰܒܩܳܐ: ܐܳܡܰܪ ܐܰܠܳܗܶܟ݂ܝ. ⁷ ܒܪܽܘܓܙܳܐ ܙܥܽܘܪܳܐ ܫܒܰܩܬ݁ܶܟ݂ܝ: ܘܰܒܖ̈ܰܚܡܰܝ ܣܰܓܺܝ̈ܐܶܐ ܐܶܟܰܢܫܶܟܝ. ⁸ ܒܪܽܘܓܙܳܐ ܪܰܒܳܐ ܐܰܦܢܺܝܬ݂ ܐܰܦܰܝ̈ ܡܶܢܶܟ݂ܝ. ܘܰܒܖ̈ܰܚܡܰܝ ܕܰܠܥܳܠܰܡ ܪܰܚܡܶܬ݂ ܥܠܰܝܟܝ: ܐܳܡܰܪ ܡܳܪܝܳܐ ܦܳܪܽܘܩܶܟ݂ܝ. ⁹ ܗܳܕܶܐ ܐܰܝܟ݂ ܝܰܘ̈ܡܳܬܳܐ ܗ̱ܝ ܠܺܝ ܕܢܽܘܚ: ܕܺܝܡܺܝܬ݂ ܕܠܳܐ ܢܶܥܒܪܽܘܢ ܬܽܘܒ ܡܰܝ̈ܳܐ ܕܢܽܘܚ ܥܰܠ ܐܰܪܥܳܐ. ܗܳܟ݂ܰܢܳܐ ܝܺܡܺܝܬ݂ ܕܠܳܐ ܐܶܪܓܰܙ ܥܠܰܝܟܝ: ܘܠܳܐ ܐܶܟ݂ܐܶܐ ܒܟܶܝ. ¹⁰ ܡܶܛܽܠ ܕܛܽܘܖ̈ܶܐ ܢܶܬ݂ܡܰܟܟܽܘܢ: ܘܖ̈ܳܡܳܬ݂ܳܐ ܢܶܬ݂ܖ̈ܰܟܢܳܢ. ܘܛܰܝܒܽܘܬ݂ܝ ܡܶܢܶܟܝ ܠܳܐ ܬܶܥܒܰܪ. ܘܰܩܝܳܡܳܐ ܕܰܫܠܳܡܶܟܝ ܠܳܐ ܢܶܥܒܰܪ: ܐܳܡܰܪ ܡܳܪܝܳܐ ܡܪܰܚܡܳܢܳܐ. ¹¹ ܡܡܰܟܰܟ݂ܬܳܐ ܘܰܡܥܰܠܥܰܠܬܳܐ ܕܠܳܐ ܐܶܬ݂ܒܰܝܐܰܬ. ܗܳܐ ܐܶܢܳܐ ܥܳܒܶܕ݂ ܐ̱ܢܳܐ: ܟܺܐܦܰܝ̈ܟܝ ܒܶܖ̈ܽܘܠܶܐ. ܘܰܐܬ݂ܩܶܢ ܫܶܬܶܐܣܰܝ̈ܟܝ ܒܟܺܐܦ̈ܶܐ ܕܣܰܦܺܝܠܳܐ. ¹² ܘܶܐܒܢܶܐ ܐܶܣܰܝ̈ܟܝ ܒܟܺܐܦ̈ܶܐ ܕܺܐܝܳܣܦܳܘܢ: ܘܬܰܖ̈ܥܰܝܟܝ ܒܟܺܐܦ̈ܶܐ ܕܰܩܪܽܘܣܛܶܠܳܘܣ: ܘܰܬ݂ܚܽܘܡܰܝ̈ܟܝ ܒܟܺܐܦ̈ܶܐ ܓܰܒܝܳܬ݂ܳܐ. ¹³ ܘܟܽܠܗܽܘܢ ܒܢܰܝ̈ܟܝ ܢܶܠܦܽܘܢܳܢܝ. ܘܢܶܣܓܶܐ ܫܠܳܡܳܐ ܕܰܒܢܰܝ̈ܟܝ. ¹⁴ ܘܰܒܙܰܕܺܝܩܽܘܬܳܐ ܬܶܬ݂ܩܢܶܝܢ. ܐܶܬ݂ܪܰܚܰܩܝ ܡ̣ܶܢ ܥܫܽܘܩܝܳܐ: ܡܶܛܽܠ ܕܠܳܐ ܬܶܕ݂ܚܠܺܝܢ. ܘܡ̣ܶܢ ܬܒܳܪܳܐ: ܡܶܛܽܠ ܕܠܳܐ ܩܳܪܶܒ ܠܶܟ݂ܝ. ¹⁵ ܘܟ݂ܽܠ ܕܡܶܬ݂ܦܢܶܝܢ ܡ̣ܶܢ ܐܺܝܕܰܝ̈: ܢܶܥܠܽܘܢ ܠܶܟ݂ܝ. ܘܬܶܗܘܶܝܢ ܒܶܝܬ݂ ܓܰܘܣܳܐ ܠܥܳܡܽܘܖ̈ܰܝܟܝ. ¹⁶ ܗܳܐ ܐܶܢܳܐ ܒܪܺܝܬ݂ ܐܽܘܡܳܢܳܐ ܕܢܳܦܰܚ ܒܢܽܘܪܳܐ ܡܰܦܽܘܚܳܐ: ܘܓܳܡܰܪ ܡܳܐܢܳܐ ܠܰܥܒܕܶܗ. ܘܶܐܢܳܐ ܒܪܺܝܬ݂ ܡܚܰܒܠܳܢܳܐ ܠܰܡܚܰܒܳܠܘ. ¹⁸ ܟܠ ܡܳܐܢ ܕܡܶܬ݁ܬܰܩܰܢ ܥܠܰܝܟܝ: ܠܳܐ ܢܶܣܰܩ ܠܪܺܝܫ. ܘܟ݂ܽܠ ܠܶܫܳܢ ܕܰܢܩܽܘܡ ܥܰܡܶܟ݂ܝ ܒܕܺܝܢܳܐ: ܬܚܰܝܒܺܝܢܶܗ ܗܳܕܳܐ ܗ̱ܝ ܝܳܪܬ݁ܽܘܬ݂ܳܐ ܕܥܰܒܕܰܘ̈ܗܝ ܕܡܳܪܝܳܐ. ܘܙܰܕܺܝܩܽܘܬ݂ܗܽܘܢ ܡ̣ܶܢ ܩܕܰܡܰܝ: ܐܳܡܰܪ ܡܳܪܝܳܐ.

 

ܩܶܦܰܠܶܐܘܳܢ: ܢܗ

¹ ܐܳܘܝ ܟܽܠ ܕܰܨܗܶܝܢ: ܙܶܠܘ ܠܡܰܝ̈ܳܐ: ܕܠܰܝܬ݁ ܠܶܗ ܟܶܣܦܳܐ. ܙܶܠܘ ܡܽܘܪܘ: ܘܰܐܟ݂ܽܘܠܘ ܕܠܳܐ ܟܶܣܦܳܐ: ܘܰܕ݂ܠܳܐ ܕܡܺܝ̈ܢ: ܚܰܡܪܳܐ ܘܚܰܠܒܳܐ. ² ܠܡܳܐ ܬܳܩܠܺܝܢ ܐ̱ܢܬ݁ܽܘܢ ܟܶܣܦܳܐ ܕܠܳܐ ܠܠܰܚܡܳܐ: ܘܠܶܐܘܰܬ݂ܟܽܘܢ ܕܠܳܐ ܠܡܶܣܒܰܥ ܫܽܘܡܥܽܘܢܝ ܡܶܫܡܰܥ: ܘܬܶܐܟ݂ܠܽܘܢ ܛܳܒ̈ܳܬ݂ܳܐ. ܘܬܶܬ݂ܦܰܢܰܩ ܢܰܦܫܟܽܘܢ ܒܕ݂ܽܘܗܳܢܳܐ. ³ ܨܠܰܘ ܐܶܕ݂ܢܰܝ̈ܟܽܘܢ: ܘܬ݂ܰܘ ܠܘܳܬ݂ܝ ܫܽܘܡܥܽܘܢܝ ܘܬܶܚܶܐ ܢܰܦܫܟܽܘܢ. ܘܰܐܩܽܝܡ ܠܟ݂ܽܘܢ ܩܝܳܡܳܐ ܕܥܳܠܰܡ: ܛܰܝܒܽܘܬܶܗ ܕܕܰܘܺܝܕ݂ ܡܗܰܝܡܰܢܬܳܐ. ⁴ ܗܳܐ ܣܳܗܕܳܐ ܠܥܰܡ̈ܡܶܐ ܝܰܗܒܬܳܟ݂: ܫܰܠܺܝܛܳܐ ܘܰܡܕܰܒܪܳܢܳܐ ܠܐܶܡ̈ܘܳܬ݂ܳܐ. ⁵ ܕܬܶܩܪܶܐ ܥܰܡ̈ܡܶܐ ܕܠܳܐ ܝܺܕܰܥܬ݁. ܘܥܰܡ̈ܡܶܐ ܕܠܳܐ ܝܳܕ݂ܥܺܝܢ ܠܳܟ݂ ܠܘܳܬܳܟ݂ ܢܶܪܗܛܽܘܢ. ܡܶܛܽܠ ܡܳܪܝܳܐ ܐܰܠܳܗܳܟ݂: ܘܩܰܕ݁ܺܝܫܳܐ ܕܺܝܣܪܳܐܶܝܠ ܕܫܰܒܚܳܟ݂. ⁶ ܒܥܰܘ ܠܡܳܪܝܳܐ. ܘܡܳܐ ܕܶܐܫܟܰܚܬ݁ܽܘܢܳܝܗܝ: ܩܪܰܐܗܝ. ⁷ ܘܡܳܐ ܕܰܩܪܶܒ: ܢܶܫܒܽܘܩ ܚܰܛܳܝܳܐ ܐܽܘܪܚܶܗ: ܘܓܰܒܪܳܐ ܥܳܘܳܠܳܐ ܬܰܪܥܺܝܬܶܗ. ܘܢܶܬ݂ܦܢܶܐ ܠܘܳܬ݂ܝ: ܘܶܐܪܰܚܶܡ ܥܠܰܘܗ̱ܝ: ܘܰܠܘܳܬ݂ ܐܰܠܳܗܰܢ ܕܡܰܣܓܶܐ ܠܡܶܫܒܰܩ. ⁸ ܡܶܛܽܠ ܕܬܰܖ̈ܥܝܳܬ݂ܝ ܠܳܐ ܗ̱ܘܰܝ̈ ܐܰܝܟ݂ ܬܰܖ̈ܥܝܳܬ݂ܟ݂ܽܘܢ. ܐܘܖ̈ܚܳܬ݂ܝ ܠܳܐ ܗ̱ܘܰܝ̈ ܐܰܝܟ݂ ܐܽܘܖ̈ܚܳܬ݂ܟ݂ܽܘܢ: ܐܳܡܰܪ ܡܳܪܝܳܐ. ⁹ ܡܶܛܽܠ ܕܰܐܝܟ݂ ܕܪܳܡܺܝܢ ܫܡܰܝܳܐ ܡ̣ܶܢ ܐܰܪܥܳܐ: ܗܳܟ݂ܰܢܳܐ ܖ̈ܳܡܳܢ ܐܽܘܖ̈ܚܳܬ݂ܝ ܡ̣ܶܢ ܐܽܘܖ̈ܚܳܬ݂ܟ݂ܽܘܢ. ܘܬܰܖ̈ܥܝܳܬ݂ܝ ܡ̣ܶܢ ܬܰܖ̈ܥܝܳܬ݂ܟ݂ܽܘܢ. ¹⁰ ܡܶܛܽܠ ܕܰܐܝܟܰܢܳܐ ܕܳܢܚܶܬ݂ ܡܶܛܪܳܐ ܘܬܰܠܓܳܐ ܡ̣ܶܢ ܫܡܰܝܳܐ: ܘܰܠܬܰܡܳܢ ܠܳܐ ܗܳܦܶܟ݂: ܐܶܠܳܐ ܡܰܪܘܶܐ ܠܰܐܪܥܳܐ: ܘܡܰܘܠܶܕ݂ ܠܳܗ̇: ܘܡܰܘܥܶܐ ܠܳܗ̇: ܘܝܳܗܶܒ ܙܰܪܥܳܐ ܠܙܳܪܽܘܥܳܐ: ܘܠܰܚܡܳܐ ܠܡܶܐܟ݂ܽܘܠܬܳܐ. ¹¹ ܗܳܟ݂ܰܢܳܐ ܢܶܗܘܶܐ ܦܶܬ݂ܓܳܡܝ ܕܰܢܦܰܩ ܡ̣ܶܢ ܦܽܘܡܝ: ܘܠܳܐ ܢܶܗܦܽܘܟ݂ ܠܘܳܬ݂ܝ ܣܪܺܝܩܳܐܺܝܬ݂: ܐܶܠܳܐ ܐܶܢ ܥܒܰܕ݂ ܡܶܕܶܡ ܕܨܳܒܐ ܐ̱ܢܳܐ: ܘܫܰܠܶܡ ܕܫܰܕܰܪܬܶܗ. ¹² ܡܶܛܽܠ ܕܰܒܚܰܕ݂ܽܘܬ݂ܳܐ ܬܶܦܩܽܘܢ: ܘܒܰܫܠܳܡܳܐ ܬܺܐܙܽܠ̱ܘܢ ܘܛܽܘܖ̈ܶܐ ܘܖ̈ܳܡܳܬ݂ܳܐ ܢܶܬ݂ܦܰܨܚܽܘܢ ܩܕ݂ܳܡܝܟܽܘܢ. ܘܬܶܫܒܽܘܚܬܳܐ ܕܟܽܠܗܽܘܢ ܐܺܝ̈ܠܳܢܶܐ ܕܚܰܩܠܳܐ ܢܶܩܫܽܘܢ ܟܰܦܳܐ. ¹³ ܚܠܳܦ ܚܳܓܬ݂ܳܐ ܬܺܐܥܶܐ ܒܪܽܘܬ݂ܳܐ ܘܰܚܠܳܦ ܨܳܬ݂ܪܳܐ ܢܺܐܥܶܐ ܐܳܣܳܐ. ܘܢܶܗܘܶܐ ܠܡܳܪܝܳܐ ܠܰܫܡܳܐ: ܘܠܳܐܬܳܐ ܕܰܠܥܳܠܰܡ ܕܠܳܐ ܓܳܡܪܳܐ.

ܩܶܦܰܠܶܐܘܳܢ: ܢܘ

¹ ܗܳܟ݂ܰܢܳܐ ܐܳܡܰܪ ܡܳܪܝܳܐ. ܛܰܪܘ ܕܺܝܢܳܐ ܘܰܥܒܶܕ݂ܘ ܙܰܕܺܝܩܽܘܬܳܐ. ܡܶܛܽܠ ܕܩܰܪܺܝܒܽ ܗ̱ܘ ܦܽܘܪܩܳܢܝ ܠܡܶܐܬ݂ܳܐ: ܘܙܰܕܺܝܩܽܘܬ݂ܝ ܠܡܶܬ݂ܓܠܳܝܽܘ. ² ܛܽܘܒܰܘܗܝ ܠܓܰܒܪܳܐ ܕܢܶܥܒܶܕ݂ ܗܳܕܶܐ: ܘܒܰܪܢܳܫܳܐ ܕܢܶܬ݂ܚܰܝܰܠ ܒܳܗ̇. ܘܢܶܛܰܪ ܐܳܦ ܫܰܒܬ݂ܳܐ ܕܠܳܐ ܢܰܚܠܺܝܗ̇ ܘܢܶܛܰܪ ܐܺܝܕܰܘ̈ܗܝ ܕܠܳܐ ܢܶܥܒܶܕ݂ ܕܒܺܝܫ. ³ ܘܠܳܐ ܢܺܐܡܰܪ ܒܰܪ ܢܽܘܟ݂ܖ̈ܳܝܶܐ ܕܡܶܬ݂ܠܳܘܶܐ ܠܡܳܪܝܳܐ: ܕܡܶܦܪܰܫ ܦܳܪܶܫ ܠܺܝ ܡܳܪܝܳܐ ܡ̣ܶܢ ܥܰܡܶܗ. ܘܠܳܐ ܢܺܐܡܰܪ ܡܗܰܝܡܢܳܐ: ܕܩܰܝܣܳܐ ܐ̱ܢܳܐ ܝܰܒܺܝܫܳܐ. ⁴ ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܳܪܝܳܐ: ܠܰܡܗܰܝܡ̈ܢܶܐ ܕܢܳܛܪܺܝܢ ܫܰܒܰܝ̈: ܘܓܳܒܶܝܢ ܡܶܕܶܡ ܕܨܳܒܶܐ ܐ̱ܢܳܐ: ܘܡܶܬ݂ܚܰܝܠܺܝܢ ܒܰܩܝܳܡܝ. ⁵ ܐܶܬ݁ܶܠ ܠܗܽܘܢ ܒܒܰܝܬ݁ܝ ܘܰܒܫܽܘܖ̈ܳܝ ܐܰܬ݂ܪܳܐ. ܘܰܫܡܳܐ ܕܛܳܒ ܡ̣ܶܢ ܒܢܰܝ̈ܳܐ ܘܡ̣ܶܢ ܒ̈ܢܳܬ݂ܳܐ: ܫܡܳܐ ܕܰܠܥܳܠܰܡ ܐܶܬ݁ܶܠ ܠܗܽܘܢ ܕܠܳܐ ܓܳܡܰܪ. ⁶ ܘܠܰܒܢܰܝ̈ ܢܽܘܟ݂ܖ̈ܳܝܶܐ ܕܡܶܬ݂ܠܰܘܶܝܢ ܠܡܳܪܝܳܐ ܠܰܡܫܰܡܳܫܽܘܬ݂ܶܗ: ܘܰܠܡܶܪܚܰܡ ܫܡܶܗ ܕܡܳܪܝܳܐ: ܘܰܕ݂ܢܶܗܘܽܘܢ ܠܶܗ ܥܰܒ̈ܕܶܐ. ܟܽܠ ܕܢܳܛܰܪ ܫܰܒܬ݂ܳܐ ܕܠܳܐ ܢܰܚܠܺܝܗ̇: ܘܡܶܬ݂ܚܰܠܺܝܢ ܒܰܩܝܳܡܝ. ⁷ ܐܰܝܬ݁ܶܐ ܐܶܢܽܘܢ ܠܛܽܘܪܝ ܩܰܕܺܝܫܳܐ ܘܶܐܚܰܕ݂ܶܐ ܐܶܢܽܘܢ ܒܒܰܝܬܳܐ ܕܰܨܠܽܘܬ݂ܝ ܥܳܠܰܘ̈ܳܬ݂ܗܽܘܢ ܘܕܶܒܚܰܝ̈ܗܽܘܢ ܠܨܶܒܝܳܢܳܐ ܠܡܰܕ݂ܒܰܚܝ. ܡܶܛܽܠ ܕܒܰܝܬ݁ܝ: ܒܶܝܬ݂ ܨܠܽܘܬ݂ܳܐ ܢܶܬ݂ܩܪܶܐ: ܠܟܽܠܗܽܘܢ ܥܰܡ̈ܡܶܐ. ⁸ ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ: ܕܰܡܟܰܢܶܫ ܠܰܡܒܰܕܖ̈ܶܐ ܕܺܝܣܪܳܐܶܝܠ: ܬܽܘܒ ܐܶܟܰܢܶܫ ܥܠܰܘܗ̱ܝ ܠܰܡܟܰܢ̈ܫܶܐ. ⁹ ܟܽܠ ܚܰܝܽܘܬ݂ܳܐ ܕܕܰܒܪܳܐ: ܬܳܝ ܐܰܟ݂ܽܘܠܝ ܠܟ݂ܽܠܳܗ̇ ܚܰܝܽܘܬ݂ܳܐ ܕܥܳܒܳܐ. ¹⁰ ܚܳܙܶܝܢ ܟܽܠܗܽܘܢ ܥܘܺܝܖ̈ܶܐ ܘܠܳܐ ܝܳܕ݂ܥܺܝܢ. ܟܽܠܗܽܘܢ ܟܰܠ̈ܒܶܐ ܐܶܢܽܘܢ ܦܺܐܩ̈ܶܐ: ܘܠܳܐ ܡܶܫܟܺܚܝܢ ܠܡܶܒܰܚ. ܚܳܙܶܝܢ ܘܕ݂ܳܡܟܺܝܢ: ܘܪܳܚܡܺܝܢ ܠܰܡܢܳܡ. ¹¹ ܘܟܰܠ̈ܒܶܐ ܐܶܢܽܘܢ ܕܝܰܥܢܳܐ ܢܰܦܫܗܽܘܢ: ܘܠܳܐ ܝܳܕ݂ܥܺܝܢ ܠܡܶܣܒܰܥ. ܢܶܗܘܽܘܢ ܒܺܝܫܺܝܢ ܘܠܳܐ ܝܳܕ݂ܥܺܝܢ ܣܽܘܟܳܠܳܐ ܟܽܠܗܽܘܢ ܠܽܐܘܪܚܗܽܘܢ ܦܢܰܘ: ܘܐ̱ܢܳܫ ܠܣܶܛܪܶܗ ܘܰܠܓܰܒܶܗ. ¹² ܬܰܘ ܢܶܣܰܒ ܚܰܡܪܳܐ: ܘܢܶܣܰܒ ܫܰܟ݂ܪܳܐ ܘܢܶܗܘܶܐ ܐܰܝܟ݂ ܕܝܳܘܡܳܢܳܐ: ܘܢܰܘܬܰܪ ܠܰܢ ܣܽܘܓ݂ܳܐܐ ܕܛܳܒ.

ܩܶܦܰܠܶܐܘܳܢ: ܢܙ

¹ܐ: ܗܳܐ ܙܰܕܺܝܩܳܐ ܐܶܒܰܕ݂. ܘܠܰܝܬ݁ ܐ̱ܢܳܫ ܕܡܰܝܬ݁ܶܐ ܥܰܠ ܒܳܠܶܗ. ܘܓܰܒܖ̈ܶܐ ܚܣܰܝ̈ܳܐ ܡܶܬ݂ܟܰܢܫܺܝܢ ܕܠܳܐ ܣܽܘܟܳܠܳܐ: ܡܶܛܽܠ ܕܡ̣ܶܢ ܩܕ݂ܳܡ ܒܺܝܫܬܳܐ ܡܶܬ݂ܟܰܢܰܫ ܙܰܕܺܝܩܳܐ. ² ܘܢܺܐܬ݂ܳܐ ܫܠܳܡܳܐ: ܘܢܶܬ݁ܬ݁ܢܺܝܚܽܘܢ ܥܰܠ ܡܰܫܟܰܒܗܽܘܢ: ܘܢܺܐܙܽܠ̱ܘܢ ܠܽܘܩܒܰܠܗܽܘܢ. ³ ܘܰܐܢ̱ܬ݁ܽܘܢ ܩܪܽܘܒܘ ܠܟܳܐ: ܒܢܰܝ̈ ܡܡܰܟܰܟ݂ܬܳܐ: ܙܰܪܥܳܐ ܓܰܝܳܪܳܐ ܘܙܰܢܳܝܳܐ. ⁴ ܥܰܠ ܡܰܢ ܐܶܬ݂ܠܰܥܰܒܬ݁ܘܢ ܘܥܰܠ ܡܰܢ ܦܬܰܚܬ݁ܽܘܢ ܦܽܘܡܟܽܘܢ: ܘܰܐܘܪܶܟ݂ܬ݁ܽܘܢ ܠܶܫܳܢܟܽܘܢ. ܕܗܳܐ ܐܰܢ̱ܬ݁ܽܘܢ ܝܰܠܕܳܐ ܕܥܰܘܠܳܐ: ܘܙܰܪܥܳܐ ܕܰܓܳܠܳܐ. ⁵ ܕܡܶܬ݂ܒܰܝܰܐܺܝܢ ܒܰܦܬܰܟ݂ܖ̈ܶܐ ܬܚܶܝܬ݂ ܟܽܠ ܐܺܝܠܳܢ ܕܥܳܒܳܐ. ܘܰܢܟܰܣܬ݁ܽܘܢ ܛܠܳܝ̈ܶܐ ܒܢܰܚ̈ܠܶܐ ܬܚܶܝܬ݂ ܫܩܺܝ̈ܦܶܐ ܕܟܺܐܦܳܐ. ⁶ ܡܢܳܬ݂ܟܶܝ ܘܝܳܪܬ݁ܽܘܬܶܟ݂ܝ ܥܰܡ ܡܢܳܬ݂ܳܐ ܗ̱ܝ ܕܢܰܚ̈ܠܶܐ. ܐܳܦ ܥܠܰܝܗܽܘܢ ܢܰܩܺܝܬ݁ܝ ܢܽܘܩܳܝ̈ܶܐ: ܘܰܐܣܶܩܬ݁ܝ ܩܽܘܪܒܳܢܳܐ. ܥܰܠ ܗܳܠܶܝܢ ܐܶܬ݂ܒܰܝܰܐ. ⁷ ܥܰܠ ܛܽܘܖ̈ܶܐ ܖ̈ܳܡܶܐ ܘܰܡܫܰܩ̈ܠܶܐ ܥܒܰܕܬ݁ܝ ܡܰܫܟܒܶܟ݂ܝ. ܐܳܦ ܠܬܰܡܳܢ ܣܠܶܩܬ݁ ܠܡܶܕ݂ܒܰܚ ܕܶܒܚ̈ܶܐ. ⁸ ܘܒܶܣܬܰܪ ܬܰܖ̈ܥܶܐ ܥܰܠ ܦܖ̈ܽܘܣܬ݁ܕܶܐ ܪܫܰܡܬܝ ܕܽܘܟ݂ܪܳܢܶܟ݂ܝ ܡܶܛܽܠ ܕܡ̣ܶܢ ܠܘܳܬ݂ܝ ܓܰܠܺܝܬ݁ܝ ܘܰܣܠܶܩܬ݁ܝ ܘܰܐܪܘܰܚܬ݁ܝ ܡܰܫܟܒܶܟ݂ܝ. ܘܰܗܘܰܝܬ݁ܝ ܠܶܟ݂ܝ ܡܶܢܗܽܘܢ. ܘܰܪܚܶܡܬ݁ܝ ܡܰܫܟܰܒܗܽܘܢ: ܘܰܐܬ݂ܪܳܐ ܚܙܰܝܬ݁ܝ. ⁹ ܘܶܐܫܬܰܒܰܚܬ݁ܝ ܠܡܰܠ̈ܟܶܐ ܒܡܶܫܚܳܐ. ܘܰܐܣܓܺܝܬ݁ܝ ܒܶܣܡܰܝ̈ܟܝ ܘܫܰܕܰܪܬ݁ܝ ܐܺܝܙܓܰܕܰܝ̈ܟܝ ܠܪܽܘܚܩܳܐ. ܘܶܐܬ݂ܡܰܟܰܟ݂ܬ݁ܝ ܥܕܰܡܳܐ ܠܰܫܝܽܘܠ. ¹⁰ ܒܣܽܘܓܐܰܬ݂ ܐܽܘܖ̈ܚܳܬܶܟ݂ܝ ܠܐܰܝܬ݁ܝ ܘܠܳܐ ܐܶܡܰܪܬ݁ܝ ܕܶܐܫܠܶܐ. ܒܚܰܘܒܬ݂ܳܐ ܕܺܐܝܕܰܝ̈ܟܝ ܐܰܫܚܺܝܬ݁ܝ ܡܶܛܽܠ ܗܳܢܳܐ ܠܳܐ ܐܶܬ݂ܟܰܫܰܦܬ݁ܝ. ¹¹ ܡ̣ܶܢ ܡܰܢ ܐܶܬ݂ܪܗܶܒܬ݁ܝ ܘܰܕ݂ܚܶܠܬ݁ܝ. ܕܟܰܕܶܒܬ݁ܝ ܒܺܝ. ܘܠܳܐ ܐܶܬ݁ܕܟܰܪܬ݁ܺܝܢܝ: ܘܠܳܐ ܚܫܰܒܬ݁ܺܝܢܝ ܒܠܶܒܶܟ݂ܝ ܗܳܐ ܐܶܢܳܐ ܗ̱ܘ ܚܰܣܝܳܐ ܕܡ̣ܶܢ ܥܳܠܰܡ. ܘܡܶܢܝ ܠܳܐ ܕܚܶܠܬ݁ܝ. ¹² ܐܶܢܳܐ ܐܶܚܳܘܶܐ ܙܰܕܺܝܩܽܘܬ݂ܝ ܘܰܥܒܳܕܰܝ̈ܟܝ ܠܳܐ ܢܰܘܬ݁ܪܽܘܢܶܟ݂ܝ. ¹³ ܒܰܓܥܳܬܶܟ݂ܝ ܢܦܰܨܽܘܢܶܟ݂ܝ ܐܰܝܠܶܝܢ ܕܡܶܬ݂ܟܰܢܫܺܝܢ ܠܶܟܝ. ܠܟܽܠܗܽܘܢ ܬܶܫܩܽܘܠ ܐܶܢܽܘܢ ܪܽܘܚܳܐ. ܘܬܶܣܰܒ ܐܶܢܽܘܢ ܥܰܠܥܳܠܳܐ ܘܰܐܝܠܶܝܢ ܕܰܡܣܰܒܪܺܝܢ ܒܺܝ: ܢܺܐܪܬ݁ܽܘܢ ܐܰܪܥܳܐ: ܘܢܺܐܪܬ݁ܽܘܢ ܛܽܘܪܝ ܩܰܕ݁ܺܝܫܳܐ. ¹⁴ ܘܢܺܐܡܪܽܘܢ ܫܰܦܰܘ ܫܰܦܰܘ: ܦܰܢܰܘ ܐܽܘܪܚܳܐ ܘܰܐܪܺܝܡܘ ܬܽܘܩ̈ܠܳܬ݂ܳܐ ܡ̣ܶܢ ܐܽܘܪܚܶܗ ܕܥܰܡܝ. ¹⁵ ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܪܰܝܡܳܐ ܘܰܡܫܰܩܠܳܐ: ܕܰܫܪܶܐ ܠܥܳܠܡܺܝܢ: ܘܩܰܕܺܝܫ ܫܡܶܗ: ܡܪܰܝܡܳܐ: ܘܩܰܕܺܝܫ ܡܰܫܪܝܶܗ: ܠܡܰܟܺܝܟ̈ܶܐ ܘܰܠܥܰܝ݂ܝ݂ܰܩܰܝ ܪܽܘܚܳܐ: ܠܡܰܚܳܝܽܘ ܪܽܘܚܳܐ ܕܡܰܟܺܝ̈ܟܶܐ: ܘܰܠܡܰܚܳܝܘ ܠܶܒܳܐ ܕܡܰܟܰܐܒ̈ܶܐ. ¹⁶ ܡܶܛܽܠ ܕܠܳܐ ܠܥܳܠܰܡ ܐܳܠܶܡ ܐ̱ܢܳܐ. ܘܠܳܐ ܠܥܳܠܰܡ ܪܳܓܶܙ ܐ̱ܢܳܐ. ܡܶܛܽܠ ܕܪܽܘܚܳܐ ܡ̣ܶܢ ܩܕ݂ܳܡܝ ܢܳܦܩܳܐ ܘܰܢܫܰܡܬ݂ܳܐ ܐܶܢܳܐ ܥܶܒܕܶܬ݂. ¹⁷ ܒܥܰܘܠܳܐ ܕܢܶܟ݂ܠܳܗ̇ ܪܶܓܙܶܬ݂ ܘܰܡܚܺܝܬܳܗ̇. ܘܶܐܬ݂ܦܰܢܝܰܬ݂ ܘܪܶܓܙܰܬ݂: ܘܶܐܙܰܠ̱ܬ ܚܢܰܓܬ݂ܳܗ̇ ܒܽܐܘܪܚܳܐ ܕܠܶܒܳܗ̇. ¹⁸ ܐܽܘܖ̈ܚܳܬ݂ܳܗ̇ ܚܙܺܝܬ݂: ܘܰܐܣܺܝܬܳܗ̇ ܘܒܰܝܰܐܬܳܗ̇ ܘܦܶܪܥܶܬ݂ ܒܽܘܝܳܐܐ ܠܳܗ̇ ܘܠܰܐܒܺܝ̈ܠܶܝܗ̇. ¹⁹ ܒܪܶܐ ܡܰܡܠܠܳܐ ܕܣܶܦ̈ܘܳܬ݂ܳܐ ܫܠܳܡܳܐ: ܫܠܳܡܳܐ: ܠܖ̈ܰܚܺܝܩܶܐ ܘܰܠܩܰܖ̈ܺܝܒܶܐ: ܐܳܡܰܪ ܡܳܪܝܳܐ ܘܰܐܣܶܐ ܐܶܢܽܘܢ. ²⁰ ܘܖ̈ܰܫܺܝܥܶܐ ܐܰܝܟ݂ ܝܰܡܳܐ ܡܶܬ݁ܕܰܠܚܺܝܢ. ܡܶܛܽܠ ܕܫܶܠܝܳܐ ܠܳܐ ܡܶܫܟܚܺܝܢ ܘܗܳܦܟܺܝܢ ܡܰܘ̈ܗܝ ܖ̈ܰܚܫܳܐ ܘܰܣܝܳܢܳܐ. ܠܰܝܬ݁ ܫܠܳܡܳܐ ܠܖ̈ܰܫܺܝܥܶܐ: ܐܳܡܰܪ ܐܰܠܳܗܝ.

ܩܶܦܰܠܶܐܘܳܢ: ܢܚ

¹ ܩܪܺܝ ܒܓܰܓܰܪܬܳܟ݂ ܘܠܳܐ ܬܚܽܘܣ ܘܰܐܪܺܝܡ ܩܳܠܳܟ݂ ܐܰܝܟ݂ ܫܺܝܦܽܘܪܳܐ ܘܚܰܘܳܐ ܠܥܰܡܝ ܥܰܘܠܗܽܘܢ: ܘܠܰܕ݂ܒܶܝܬ݂ ܝܰܥܩܽܘܒ ܚܛܳܗܰܝ̈ܗܽܘܢ. ² ܘܠܺܝ ܒܳܥܶܝܢ ܒܟ݂ܽܠܝܽܘܡ ܘܨܳܒܶܝܢ ܠܡܶܕܰܥ ܐܽܘܖ̈ܚܳܬ݂ܝ: ܐܰܝܟ݂ ܥܰܡܳܐ ܕܰܥܒܰܕ݂ ܙܰܕܺܝܩܽܘܬܳܐ: ܘܠܳܐ ܫܒܰܩ ܕܺܝܢܳܐ ܕܰܐܠܳܗܶܗ. ܫܳܐܠܺܝܢ ܠܺܝ ܕܺܝܢܳܐ ܘܙܰܕܺܝܩܽܘܬ݂ܳܐ: ܨܳܒܶܝܢ ܠܡܶܬ݂ܩܰܪܳܒܽܘ ܠܰܐܠܳܗܳܐ. ³ ܠܡܳܢܳܐ ܨܳܡܢ: ܘܠܳܐ ܚܙܰܝܬ݁ ܘܡܰܟܶܟܢ ܢܰܦܫܰܢ: ܘܠܳܐ ܝܺܕܰܥܬ݁ ܗܳܐ ܒܝܰܘܡܳܐ ܕܨܰܘܡܟܽܘܢ ܥܳܒܕܺܝܬ݁ܽܘܢ ܨܶܒܝܳܢܰܝ̈ܟܽܘܢ: ܘܰܡܩܰܪܒܺܝܢ ܐ̱ܢܬ݁ܽܘܢ ܦܬܰܟ݂ܖ̈ܰܝܟܽܘܢ ܟܽܠܗܽܘܢ. ⁴ ܗܳܐ ܠܚܶܪܝܳܢܳܐ ܘܰܠܡܰܨܽܘܬ݂ܳܐ ܨܳܝܡܺܝܬ݁ܽܘܢ: ܘܰܠܡܶܡܚܳܐ ܒܰܩܛܺܝܪܳܐ ܕܥܰܘܠܳܐ. ܠܳܐ ܬܨܽܘܡܽܘܢ ܐܰܝܟ݂: ܕܝܳܘܡܳܢܳܐ: ܘܬܰܫܡܥܽܘܢ ܩܳܠܟ݂ܽܘܢ ܒܰܡܪܰܘܡܳܐ. ⁵ ܗܳܢܰܘ ܨܰܘܡܰܐ ܕܰܓܒܶܝܬ݂: ܕܢܰܡܶܟ ܐ̱ܢܳܫ ܢܰܦܫܶܗ. ܘܢܶܟܽܘܦ ܨܰܘܪܶܗ ܐܰܝܟ݂ ܟܪܽܘܠܳܐ ܘܣܰܩܳܐ ܘܩܶܛܡܳܐ ܡܳܐܶܟ ܠܶܗ. ܠܗܳܢܳܐ ܬܶܩܪܽܘܢ ܨܰܘܡܳܐ: ܘܝܰܘܡܳܐ ܕܨܶܒܝܳܢܶܗ ܕܡܳܪܝܳܐ. ⁶ ܗܳܢܰܘ ܨܰܘܡܳܐ ܕܰܓܒܶܝܬ݂: ܕܬܶܫܪܶܐ ܩܶܛܖ̈ܶܐ ܕܥܰܘܠܳܐ: ܘܰܬ݂ܦܰܣܶܩ ܡܶܐܣܰܖ̈ܝܳܬ݂ܳܐ ܕܢܶܟ݂ܠܳܐ. ܘܬܶܫܪܶܐ ܟܒܺܝ̈ܫܶܐ ܠܚܺܐܪܽܘܬ݂ܳܐ ܘܟܽܠܗܶܝܢ ܡܶܐܣܰܖ̈ܝܳܬ݂ܳܐ ܬܶܦܣܩܽܘܢ. ⁷ ܘܬܶܩܨܶܐ ܠܰܚܡܳܟ݂ ܠܟܰܦܢܳܐ. ܘܠܰܐܟ݂ܣܢܳܝܳܐ ܬܰܥܶܠ ܠܒܰܝܬܳܟ݂ ܟܰܕ݂ ܬܶܚܙܶܐ ܥܰܪܛܶܠܳܝܳܐ: ܘܰܬ݂ܟܰܣܶܝܘܗܝ ܘܠܳܐ ܬܰܗܡܶܐ ܡ̣ܶܢ ܒܰܪ ܒܶܣܪܳܟ݂. ⁸ ܗܳܝܕܶܝܢ ܢܶܬ݂ܦܬܰܚ ܢܽܘܗܪܳܟ݂ ܐܰܝܟ݂ ܨܰܦܪܳܐ. ܘܙܰܕܺܝܩܽܘܬ݂ܳܟ݂ ܒܰܥܓܰܠ ܬܶܕ݂ܢܰܚ. ܘܬܺܐܙܰܠ ܩܕ݂ܳܡܰܝܟ ܙܰܕܺܝܩܽܘܬ݂ܳܟ݂. ܘܺܐܝܩܳܪܶܗ ܕܡܳܪܝܳܐ ܢܟܰܢܫܳܟ݂. ⁹ ܗܳܝܕܶܝܢ ܬܶܩܪܶܐ: ܘܢܶܥܢܶܝܟ݂ ܡܳܪܝܳܐ. ܘܬܶܓܥܶܐ: ܘܢܺܐܡܰܪ ܗܳܐ ܐܶܢܳܐ ܐܶܢ ܬܰܥܒܰܪ ܡ̣ܶܢ ܓܰܘܳܟ݂ ܢܶܟ݂ܠܳܐ: ܘܬܶܫܪܶܐ ܠܰܟ݂ܒܺܝ̈ܫܶܐ ܘܡ̣ܶܢ ܡܰܡܠܠܳܐ ܕܰܓܳܠܳܐ ܬܰܪܚܶܩ. ¹⁰ ܘܬܶܬ݁ܶܠ ܠܰܚܡܳܟ݂ ܠܟܰܦܢܳܐ. ܘܰܬ݂ܣܰܒܰܥ ܢܰܦܫܳܟ݂ ܕܟܰܦܢܳܐ: ܢܶܕ݂ܢܰܚ ܢܽܘܗܪܳܟ݂ ܒܚܶܫܽܘܟ݂ܳܐ: ܘܚܶܫܽܘܟ݂ܳܐ ܐܰܝܟ݂ ܛܰܗܪܳܐ. ¹¹ ܘܰܢܕܰܒܪܳܟ݂ ܡܳܪܝܳܐ ܐܰܡܺܝܢܳܐܺܝܬ݂ ܘܰܢܣܰܒܰܥ ܢܰܦܫܳܟ݂ ܒܕ݂ܽܘܗܳܢܳܐ. ܘܢܰܫܰܪ ܓܰܖ̈ܡܰܝܟ ܘܬܶܗܘܶܐ ܐܰܝܟ݂ ܦܰܪܕܰܝܣܳܐ ܕܰܪܘܶܐ: ܘܰܐܝܟ݂ ܡܰܒܽܘܥܳܐ ܕܡܰܝ̈ܳܐ ܕܠܳܐ ܓܳܝܙܺܝܢ ܡܰܘ̈ܗܝ. ¹² ܘܢܶܒܢܽܘܢ ܡܶܢܳܟ݂ ܚܰܖ̈ܒܳܬ݂ܳܐ ܕܡ̣ܶܢ ܥܳܠܰܡ. ܘܫܶܬܶܐܣ̈ܶܐ ܕܕܳܪܕܳܖ̈ܺܝܢ ܬܩܺܝܡ ܘܢܶܩܪܽܘܢܳܟ݂ ܣܳܐܶܓ ܬܽܘܖ̈ܥܳܬ݂ܳܐ: ܘܡܰܗܦܶܟ݂ ܫܒܺܝ̈ܠܶܐ ܠܝܰܬ݂ܒܳܐ. ¹³ ܐܶܢ ܬܰܗܦܶܟ݂ ܪܶܓܠܳܟ݂ ܡ̣ܶܢ ܫܰܒܬ݂ܳܐ: ܕܠܳܐ ܬܶܥܒܶܕ݂ ܨܶܒܝܳܢܳܟ݂ ܒܝܰܘܡܳܐ ܕܩܽܘܕ݂ܫܝ. ܘܬܶܩܪܶܐ ܠܫܰܒܬ݂ܳܐ ܡܦܰܢܰܩܬ݂ܳܐ: ܘܩܽܘܕܫܶܗ ܕܡܳܪܝܳܐ ܡܝܰܩܪܳܐ. ܘܰܬ݂ܝܰܩܪܶܝܗ̇ ܕܠܳܐ ܬܶܥܒܶܕ݂ ܒܳܗ̇ ܐܽܘܪܚܳܟ݂: ܘܠܳܐ ܬܶܥܒܶܕ݂ ܒܳܗ̇ ܨܶܒܝܳܢܳܟ݂: ܘܠܳܐ ܬܡܰܠܶܠ ܡܶܠܬ݂ܳܐ. ¹⁴ ܗܳܝܕܶܝܢ ܬܶܬ݁ܟܶܠ ܥܰܠ ܡܳܪܝܳܐ. ܕܰܐܪܟܒܳܟ݂ ܥܰܠ ܥܽܘܫܢܳܗ̇ ܕܰܐܪܥܳܐ. ܘܰܐܘܟܠܳܟ݂ ܝܳܪܬ݁ܽܘܬܶܗ ܕܝܰܥܩܽܘܒ ܐܰܒܽܘܟ݂ ܡܶܛܽܠ ܕܦܽܘܡܶܗ ܕܡܳܪܝܳܐ ܡܰܠܶܠ.

ܩܶܦܰܠܶܐܘܳܢ: ܢܛ

¹ ܗܳܐ ܠܳܐ ܙܥܽܘܪܝܳܐ ܐܺܝܕ݂ܶܗ ܕܡܳܪܝܳܐ ܠܡܶܦܪܰܩ ܘܠܳܐ ܝܰܩܺܝܪܳܐ ܐܶܕ݂ܢܶܗ ܠܡܶܫܡܰܥ. ² ܐܶܠܳܐ ܚܰܘ̈ܒܰܝܟܽܘܢ ܗ̱ܘ̣ ܦܪܰܫܘ ܒܰܝܢܳܝܟܽܘܢ ܠܰܐܠܳܗܟ݂ܽܘܢ ܘܰܚܛܳܗܰܝ̈ܟܽܘܢ ܐܰܗܦܶܟܘ ܐܰܦܰܘ̈ܗܝ ܡܶܢܟ݂ܽܘܢ ܕܠܳܐ ܢܶܫܡܰܥ. ³ ܡܶܛܽܠ ܕܺܐܝܕܰܝ̈ܟܽܘܢ ܡܛܰܢ̈ܦܳܢ ܒܰܕ݂ܡܳܐ: ܘܨܶܒ̈ܥܳܬ݂ܟ݂ܽܘܢ ܒܥܰܘܠܳܐ ܘܣܶܦ̈ܘܳܬ݂ܟ݂ܽܘܢ ܡܡܰܠ̈ܠܳܢ ܫܽܘܩܪܳܐ. ܘܠܶܫܳܢܟ݂ܽܘܢ ܪܳܢܶܐ ܒܥܰܘܠܳܐ. ⁴ ܘܠܰܝܬ݁ ܕܩܳܪܶܐ ܒܙܰܕܺܝܩܽܘܬܳܐ ܘܠܰܝܬ݁ ܕܕ݂ܳܐܶܢ ܒܗܰܝܡܢܽܘܬ݂ܳܐ ܐܶܬ݁ܬ݁ܟܶܠܘ ܥܰܠ ܣܪܺܝܩܽܘܬ݂ܳܐ: ܘܡܰܠܶܠܘ ܪܺܝܩܳܢܽܘܬ݂ܳܐ ܒܛܶܢܘ ܥܶܬܳܐ: ܘܺܝܠܶܕ݂ ܟܺܐܒ̈ܶܐ. ⁵ ܒ̈ܢܳܬ݂ܳܐ ܕܚܰܪܡܳܢܳܐ ܐܰܦܰܥܘ ܘܢܰܘܠܳܐ ܕܰܓܘܳܓܰܝ ܙܩܰܪܘ. ܕܳܐܟܶܠ ܡ̣ܶܢ ܒ̈ܢܳܬ݂ܗܽܘܢ: ܢܡܽܘܬ݂ ܘܰܕܬܰܒܪܳܗ̇: ܡܶܫܟܰܚ ܫܰܥܛܳܐ. ⁶ ܢܰܘܠܗܽܘܢ ܠܳܐ ܢܶܗܘܶܐ ܠܰܠܒܽܘܫܳܐ. ܘܠܳܐ ܢܶܬ݂ܟܰܣܽܘܢ ܒܰܥܒܳܕܰܝ̈ܗܽܘܢ ܥܒܳܕܰܝ̈ܗܽܘܢ ܥܒܳܕ̈ܶܐ ܐܶܢܽܘܢ ܕܥܶܬܳܐ. ܘܰܥܒܳܕ̈ܶܐ ܕܥܰܘܠܳܐ ܒܺܐܝܕܰܝ̈ܗܽܘܢ. ⁷ ܖ̈ܶܓܠܰܝܗܽܘܢ ܖ̈ܳܗܛܳܢ ܠܒܺܝܫܬܳܐ. ܘܡܶܣܬܰܪܗܒܺܝܢ ܠܡܶܐܫܰܕ݂ ܕܡܳܐ ܙܰܟܳܝܳܐ. ܬܰܖ̈ܥܝܳܬ݂ܗܽܘܢ ܬܰܖ̈ܥܝܳܬ݂ܳܐ ܐܶܢܶܝܢ ܕܥܶܬܳܐ. ܘܒܶܙܬ݂ܳܐ ܘܰܬ݂ܒܳܪܳܐ ܒܰܫܒܺܝ̈ܠܰܝܗܽܘܢ. ⁸ ܐܽܘܪܚܳܐ ܕܰܫܠܳܡܳܐ ܠܳܐ ܝܺܕܰܥܘ ܘܠܰܝܬ݁ ܕܺܝܢܳܐ ܒܗܰܠ̈ܟ݂ܳܬ݂ܗܽܘܢ ܫܒܺܝ̈ܠܰܝܗܽܘܢ ܡܥܰܩܡܺܝܢ. ܘܟ݂ܽܠ ܕܰܡܗܰܠܶܟ݂ ܒܗܽܘܢ: ܠܳܐ ܝܳܕܰܥ ܫܠܳܡܳܐ. ⁹ ܡܶܛܽܠ ܗܳܢܳܐ ܐܶܬ݂ܪܰܚܰܩ ܡܶܢܰܢ ܕܺܝܢܳܐ. ܘܙܰܕܺܝܩܽܘܬܳܐ ܠܳܐ ܬܶܕ݂ܪܟܰܢ ܣܰܟܺܝܢ ܠܢܽܘܗܪܳܐ: ܘܰܗܘܳܐ ܚܶܫܽܘܟ݂ܳܐ ܘܰܠܙܰܗܪܳܐ ܘܰܒܥܰܡܛܳܢܳܐ ܗܰܠܶܟܢ. ¹⁰ ܡܳܫܢ ܐܶܣܬ݂ܳܐ ܐܰܝܟ݂ ܥܘܺܝܖ̈ܶܐ. ܘܡܳܫܢ ܐܰܝܟ݂ ܗܳܢܽܘܢ ܕܠܰܝܬ݁ ܠܗܽܘܢ ܥܰܝ̈ܢܶܐ ܐܶܬ݁ܬܰܩܰܠܢ ܒܛܰܗܪܳܐ ܐܰܝܟ݂ ܕܰܒܪܰܡܫܳܐ. ܘܶܐܬ݁ܬܰܢܰܚܢ ܐܰܝܟ݂ ܗܳܢܽܘܢ ܕܩܰܪܺܝܒܺܝܢ ܠܳܡܡܳܬ݂. ¹¹ ܢܰܗܶܡܢ ܟܠܰܢ ܐܰܝܟ݂ ܕܶܒܳܐ ܘܰܐܝܟ݂ ܝܳܘ̈ܢܶܐ ܢܰܗܶܡܢ ܣܰܟܺܝܢ ܠܕܺܝܢܳܐ: ܘܠܰܝܬ݁ ܘܰܠܦܽܘܪܩܳܢܳܐ: ܘܶܐܬ݂ܪܰܚܰܩ ܡܶܢܰܢ. ¹² ܡܶܛܽܠ ܕܰܣܓܺܝ ܥܰܘܠܰܢ ܩܕ݂ܳܡܰܝܟ: ܘܰܚܛܳܗܰܝ̈ܢ ܣܰܗܕܽܘܢ ܡܶܛܽܠ ܕܥܰܘܠܰܢ ܥܰܡܰܢ ܗ̱ܘ. ܘܰܚܛܳܗܰܝ̈ܢ ܝܺܕ݂ܺܝܥܺܝܢ ܐܶܢܽܘܢ. ¹³ ܐܰܥܠܺܝܢ ܘܕܰܓܶܠܢ ܒܡܳܪܝܳܐ ܘܰܗܦܰܟ݂ܢ ܡ̣ܶܢ ܒܳܬ݂ܪܶܗ ܕܰܐܠܳܗܰܢ. ܡܰܠܶܠܢ ܛܠܽܘܡܝܳܐ ܘܰܡܪܰܕ݂ܢ. ܒܛܶܢܢ: ܘܰܪܢܰܝܢ ܡ̣ܶܢ ܠܶܒܰܢ ܡ̈ܶܠܶܐ ܕܫܽܘܩܪܳܐ. ¹⁴ ܐܰܗܦܶܟ݂ܢ ܕܺܝܢܳܐ ܠܒܶܣܬܪܶܗ: ܘܙܰܕܺܝܩܽܘܬܳܐ ܐܰܩܺܝܡܢ ܒܪܽܘܚܩܳܐ ܡܶܛܽܠ ܕܶܐܬ݁ܬ݁ܩܶܠ ܩܽܘܫܬܳܐ ܒܰܪܘܰܚܬ݂ܳܐ. ܘܡܰܟܣܳܢܽܘܬ݂ܳܐ ܠܳܐ ܡܶܫܟܚܳܐ ܠܡܶܐܬ݂ܳܐ. ¹⁵ ܘܰܗܘܳܐ ܩܽܘܫܬܳܐ ܒܟܶܣܝܳܐ. ܘܰܥܒܰܪ ܣܽܘܟܳܠܳܐ ܡ̣ܶܢ ܪܶܥܝܳܢܰܢ. ܘܰܚܙܳܐ ܡܳܪܝܳܐ ܕܠܰܝܬ݁ ܕܺܝܢܳܐ: ܘܶܐܬ݂ܒܐܶܫ ܒܥܰܝܢܰܘ̈ܗܝ. ¹⁶ ܘܰܚܙܳܐ ܕܠܰܝܬ݁ ܐ̱ܢܳܫ. ܘܶܐܬ݁ܕܰܡܰܪ ܕܠܰܝܬ݁ ܕܰܡܥܰܕܰܪ. ܘܦܰܪܩܶܗ ܕܪܳܥܶܗ ܘܙܰܕܺܝܩܽܘܬܶܗ ܗܺܝ ܣܡܰܟ݂ܬܶܗ. ¹⁷ ܠܒܶܫ ܙܰܕܺܝܩܽܘܬܳܐ ܐܰܝܟ݂ ܫܶܪܝܳܢܳܐ: ܘܣܰܢܘܰܪܬ݂ܳܐ ܕܦܽܘܪܩܳܢܳܐ ܒܪܺܫܶܗ. ܘܰܠܒܶܫ ܠܒܽܘܫܳܐ ܕܦܽܘܪܥܳܢܳܐ. ¹⁸ ܕܢܶܬ݁ܬܰܒܰܥ ܡ̣ܶܢ ܣܳܢܰܐܘ̈ܗܝ: ܘܢܶܦܪܽܘܥ ܠܰܒܥܶܠܕܒܳܒܰܘ̈ܗܝ ܘܰܠܓܳܙܖ̈ܳܬ݂ܳܐ ܢܶܦܪܽܘܥ ܦܽܘܪܥܳܢܳܐ. ¹⁹ ܢܶܕ݂ܚܠܽܘܢ ܡ̣ܶܢ ܡܰܥܪܒܳܐ ܠܰܫܡܶܗ ܕܡܳܪܝܳܐ. ܘܡ̣ܶܢ ܡܰܕ݂ܢܳܚܰܝ̈ ܫܶܡܫܳܐ ܠܺܐܝܩܳܪܶܗ. ܡܶܛܽܠ ܕܢܺܐܬܶܐ ܐܳܠܽܘܨܳܐ ܢܰܗܪܳܐ ܘܪܽܘܚܶܗ ܕܡܳܪܝܳܐ ܬܡܰܟܟ݂ܺܝܘܗܝ. ²⁰ ܘܢܺܐܬܶܐ ܠܨܶܗܝܽܘܢ ܦܳܪܽܘܩܳܐ: ܘܰܐܝܠܶܝܢ ܕܡܰܦܢܶܝܢ ܥܰܘܠܳܐ ܡ̣ܶܢ ܝܰܥܩܽܘܒ: ܐܳܡܰܪ ܡܳܪܝܳܐ. ²¹ ܘܶܐܢܳܐ ܗܳܢܰܘ ܩܝܳܡܝ ܕܥܰܡܟ݂ܽܘܢ: ܐܳܡܰܪ ܡܳܪܝܳܐ: ܪܽܘܚܝ ܕܰܥܠܰܝܟ ܘܡܶܠܰܝ̈ ܕܣܳܡܶܬ݂ ܒܦܽܘܡܳܟ݂: ܠܳܐ ܢܶܥܢ̈ܕ݂ܳܢ ܡ̣ܶܢ ܦܽܘܡܳܟ݂ ܘܡ̣ܶܢ ܦܽܘܡܶܗ ܕܙܰܪܥܳܟ݂: ܘܡ̣ܶܢ ܦܽܘܡܳܐ ܕܙܰܪܥܳܐ ܕܙܰܪܥܳܟ݂: ܐܳܡܰܪ ܡܳܪܝܳܐ: ܡ̣ܶܢ ܗܳܫܳܐ ܘܰܥܕܰܡܳܐ ܠܥܳܠܰܡ.

ܩܶܦܰܠܶܐܘܳܢ: ܣ

¹ ܩܽܘܡܝ ܐܰܢܗܰܪܝ ܡܶܛܽܠ ܕܰܡܛܳܐ ܢܽܘܗܪܶܟ݂ܝ. ܘܺܐܝܩܳܪܶܗ ܕܡܳܪܝܳܐ ܥܠܰܝܟܝ ܢܶܕ݂ܢܰܚ. ² ܡܶܛܽܠ ܕܗܳܐ ܚܶܫܽܘܟ݂ܳܐ ܡܟܰܣܶܐ ܠܰܐܪܥܳܐ: ܘܥܰܪܦܶܠܳܐ ܠܐܶܡܘ̈ܳܬ݂ܳܐ. ܘܰܥܠܰܝܟܝ ܢܶܕ݂ܢܰܚ ܡܳܪܝܳܐ. ܘܺܐܝܩܳܪܶܗ ܥܠܰܝܟܝ ܢܶܬ݂ܚܙܶܐ. ³ ܘܢܺܐܬ݂ܽܘܢ ܥܰܡ̈ܡܶܐ ܠܢܽܘܗܪܶܟ݂ܝ: ܘܡܰܠ̈ܟܶܐ ܠܢܽܘܗܪܳܐ ܕܕܶܢܚܶܟ݂ܝ. ⁴ ܐܰܪܺܝܡܝ ܥܰܝܢܰܝ̈ܟܝ ܠܰܚܕ݂ܳܖ̈ܰܝܟܝ ܘܰܚܙܳܝ ܕܟܽܠܗܽܘܢ ܡܶܬ݂ܟܰܢܫܺܝܢ ܘܳܐܬ݁ܶܝܢ ܠܶܟ݂ܝ. ܒܢܰܝ̈ܟܝ ܡ̣ܶܢ ܪܽܘܚܩܳܐ ܢܺܐܬ݂ܽܘܢ ܘܰܒܢܳܬܶܟ݂ܝ ܥܰܠ ܦܶܖ̈ܝܰܘܳܬ݂ܳܐ ܢܶܬ݂ܖ̈ܰܒܝܳܢ. ⁵ ܗܳܝܕܶܝܢ ܬܶܚܙܶܝܢ: ܘܬܶܢܗܪܺܝܢ ܘܬܶܚܕܺܝܢ: ܘܰܢܪܘܰܚ ܠܶܒܶܟ݂ܝ. ܡܶܛܽܠ ܕܗܳܦܶܟ݂ ܠܶܟ݂ܝ ܥܽܘܬ݂ܪܶܗ ܕܝܰܡܳܐ. ܘܚܰܝ̈ܠܶܐ ܕܥܰܡ̈ܡܶܐ ܢܺܐܬ݂ܽܘܢ ܠܶܟ݂ܝ. ⁶ ܐܰܒܰܠܬܳܐ ܕܓܰܡ̈ܠܶܐ ܬܟܰܣܶܝܟ݂ܝ ܒܽܘܟ݂ܖ̈ܶܐ ܕܡܶܕ݂ܝܰܢ ܘܕܰܐܥܦܳܐ: ܟܽܠܗܽܘܢ ܡ̣ܶܢ ܫܰܒܰܐ ܢܺܐܬ݂ܽܘܢ. ܕܰܗܒܳܐ ܘܰܠܒܽܘܢܬܳܐ ܢܶܫܩܠܽܘܢ ܘܬܶܫ̈ܒܚܳܬܶܗ ܕܡܳܪܝܳܐ ܢܣܰܒܪܽܘܢ. ⁷ ܟܽܠܳܗ̇ ܥܳܢ̈ܳܐ ܕܩܶܕ݂ܳܪ ܢܟܰܢܫܽܘܢ ܠܶܟ݂ܝ ܘܕܶܟ݂ܖ̈ܶܐ ܕܢܰܒܐܽܘܬ݂ ܢܫܰܡܫܽܘܢܶܟ݂ܝ. ܘܢܶܣܩܽܘܢ ܠܨܶܒܝܳܢܳܐ ܥܰܠ ܡܰܕ݂ܒܰܚܝ ܘܒܰܝܬܳܐ ܕܬܶܫܒܽܘܚܬ݁ܝ ܐܶܫܰܒܰܚ. ⁸ ܡܰܢ ܐܶܢܽܘܢ ܗܳܠܶܝܢ ܕܰܐܝܟ݂ ܥܢܳܢ̈ܶܐ ܦܳܪܚܺܝܢ: ܘܰܐܝܟ݂ ܝܰܘ̈ܢ̈ܶܐ ܠܟ݂ܰܘܰܝ̈ܗܶܝܢ. ⁹ ܡܶܛܽܠ ܕܠܺܝ ܢܣܰܟ̈ܝܳܢ ܓܳܙܖ̈ܳܬ݂ܳܐ: ܘܶܐܠܦ̈ܶܐ ܕܬܰܪܫܺܝܫ ܐܰܝܟ݂ ܕܰܒܩܰܕ݂ܡܳܝܬܳܐ. ܠܡܰܝܬܳܝܽܘ ܒܢܰܝ̈ܟܝ ܡ̣ܶܢ ܪܽܘܚܩܳܐ: ܘܣܶܐܡܗܽܘܢ ܘܕܰܗܒܗܽܘܢ ܥܰܡܗܽܘܢ: ܠܰܫܡܶܗ ܕܡܳܪܝܳܐ ܐܰܠܳܗܶܟ݂ܝ: ܘܩܰܕ݁ܺܝܫܳܐ ܕܺܝܣܪܳܐܶܝܠ ܕܫܰܒܚܶܟ݂ܝ. ¹⁰ ܘܢܶܒܢܽܘܢ ܒܢܰܝ̈ ܢܽܘܟ݂ܖ̈ܳܝܶܐ ܫܽܘܖ̈ܰܝܟܝ. ܘܡܰܠܟܰܝ̈ܗܽܘܢ ܢܫܰܡܫܽܘܢܶܟ݂ܝ ܡܶܛܽܠ ܕܰܒܪܽܘܓܙܝ ܡܚܺܝܬ݂ܶܟ݂ܝ. ܘܰܒܨܶܒܝܳܢܝ ܪܰܚܡܶܬ݂ ܥܠܰܝܟܝ. ¹¹ ܢܶܬ݂ܦܰܬ݂ܚܽܘܢ ܬܰܖ̈ܥܰܝܟܝ ܐܰܡܺܝܢܳܐܺܝܬ݂: ܒܺܐܝܡܳܡܳܐ ܘܰܒܠܺܠܝܳܐ: ܘܠܳܐ ܢܶܬ݁ܬܰܚܕܽܘܢ. ܘܢܶܥܠܽܘܢ ܠܶܟ݂ܝ ܚܰܝ̈ܠܶܐ ܕܥܰܡ̈ܡܶܐ: ܘܡܰܠܟܰܝ̈ܗܽܘܢ ܟܰܕ݂ ܕܒܺܝܪܺܝܢ. ¹² ܡܶܛܽܠ ܕܥܰܡܳܐ ܘܡܰܠܟܽܘܬ݂ܳܐ ܕܠܳܐ ܢܶܦܠܚܽܘܢܶܟ݂ܝ: ܢܺܐܒܕܽܘܢ ܘܥܰܡ̈ܡܶܐ ܒܚܰܪܒܳܐ ܢܶܬ݂ܚܰܪܒܽܘܢ. ¹³ ܐܺܝܩܳܪܳܐ ܕܠܶܒܢܳܢ ܢܺܐܬܶܐ ܠܶܟ݂ܝ: ܒܪܽܘܬ݂ܳܐ ܗܕ݂ܺܝܪܬܳܐ ܘܫܰܖ̈ܘܰܝܢܶܐ ܐܰܟܚܕ݂ܳܐ: ܠܰܡܫܰܒܳܚܽܘ ܐܰܬ݂ܪܳܐ ܕܡܰܩܕܰܫܝ: ܘܠܰܐܬ݂ܪܳܐ ܕܖ̈ܶܓܠܰܝ ܐܺܝܩܳܪܝ. ¹⁴ ܘܢܺܐܬ݂ܽܘܢ ܠܶܟ݂ܝ ܟܰܕ݂ ܡܡܰܟܟܺܝܢ ܒܢܰܝ̈ ܡܡܰܟܟܳܢܰܝ̈ܟܝ ܘܢܶܣܓܽܕ݂ܽܘܢ ܠܦܰܣ̈ܶܐ ܕܖ̈ܶܓܠܰܝܟܝ ܟܽܠܗܽܘܢ ܡܰܖ̈ܓܙܳܢܰܝܟܝ ܘܢܶܩܪܽܘܢܶܟ݂ܝ ܨܶܗܝܽܘܢ ܩܪܺܝܬܶܗ ܕܡܳܪܝܳܐ ܩܰܕ݁ܺܝܫܳܐ ܕܺܝܣܪܳܐܶܝܠ. ¹⁵ ܚܠܳܦ ܕܰܗܘܰܝܬ݁ܝ ܫܒܺܝܩܬ݂ܳܐ ܘܰܣܢܺܝܐܬ݂ܳܐ ܡ̣ܶܢ ܒܠܰܝ ܕܥܳܒܰܪ: ܐܶܥܒܕܶܟ݂ܝ ܐܺܝܩܳܪܳܐ ܠܥܳܠܰܡ: ܘܚܰܕ݂ܽܘܬ݂ܳܐ ܠܕ݂ܳܪܕܳܖ̈ܺܝܢ. ¹⁶ ܘܬܶܐܢܩܺܝܢ ܚܰܠܒܳܐ ܕܥܰܡ̈ܡܶܐ ܘܒܶܙܬ݂ܳܐ ܕܡܰܠ̈ܟܶܐ ܬܺܐܢܩܺܝܢ. ܘܬܶܕܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ ܦܳܪܽܘܩܶܟ݂ܝ: ܘܰܡܦܰܨܝܳܢܶܟ݂ܝ ܬܰܩܺܝܦܶܗ ܕܝܰܥܩܽܘܒ. ¹⁷ ܚܠܳܦ ܢܚܳܫܳܐ ܐܰܝܬ݁ܶܐ ܕܰܗܒܳܐ. ܘܰܚܠܳܦ ܦܰܪܙܠܳܐ ܐܰܝܬ݁ܶܐ ܣܺܐܡܳܐ. ܘܰܚܠܳܦ ܩܰܝ݁ܣܶܐ ܢܚܳܫܳܐ. ܘܰܚܠܳܦ ܟܺܐܦ̈ܶܐ ܦܰܪܙܠܳܐ. ܘܶܐܥܒܶܕ݂ ܫܠܳܡܳܐ ܦܳܩܽܘܕܰܟ݂ܝ: ܘܫܰܠܺܝܛܶܟ݂ܝ ܙܰܕܺܝܩܽܘܬܳܐ. ܘܠܳܐ ܢܶܫܬ݁ܡܰܥ ܬܽܘܒ ܥܰܘܠܳܐ ܒܰܐܪܥܶܟ݂ܝ. ¹⁸ ܘܒܶܙܬ݂ܳܐ ܘܰܬ݂ܒܪܳܐ ܒܰܬ݂ܚܽܘܡܰܝ̈ܟܝ ܘܢܶܩܪܽܘܢ ܫܽܘܖ̈ܰܝܟܝ ܦܽܘܪܩܳܢܳܐ: ܘܬܰܖ̈ܥܰܝܟܝ ܬܶܫܒܽܘܚܬܳܐ. ¹⁹ ܘܠܳܐ ܢܶܗܘܶܐ ܠܶܟܝ ܬܽܘܒ ܫܶܡܫܳܐ ܠܢܽܘܗܪܳܐ ܕܺܐܝܡܳܡܳܐ. ܘܢܽܘܗܪܶܗ ܕܣܰܗܪܳܐ ܠܳܐ ܢܶܢܗܰܪ ܠܶܟ݂ܝ. ܡܶܛܽܠ ܕܢܶܗܘܶܐ ܠܶܟ݂ܝ ܡܳܪܝܳܐ ܢܽܘܗܪܳܐ ܠܥܳܠܰܡ. ²⁰ ܘܢܶܫܠܡܽܘܢ ܝܰܘ̈ܡܳܬܳܐ ܕܶܐܒܠܶܟ݂ܝ. ²¹ ܘܟ݂ܽܠܶܗ ܥܰܡܶܟ݂ܝ ܙܰܕܺܝܩܳܐ ܠܥܳܠܰܡ ܢܺܐܪܬ݁ܽܘܢ ܐܰܪܥܳܐ. ܢܽܘܪܒܳܐ ܕܢܶܨܒܶܬ݂: ܥܒܳܕ݂ ܐܺܝ̈ܕܰܝ ܢܶܫܬܰܒܰܚ. ²² ܙܥܽܘܪܳܐ ܢܶܗܘܶܐ ܒܰܐܠܦ̈ܶܐ: ܘܰܒܨܺܝܪܳܐ ܒܥܰܡܳܐ ܥܰܫܺܝܢܳܐ ܐܶܢܳܐ ܡܳܪܝܳܐ ܠܙܰܒܢܶܗ ܐܶܛܪܺܝܘܗܝ.

ܩܶܦܰܠܶܐܘܳܢ: ܣܐ

¹ ܪܽܘܚܶܗ ܕܡܳܪܝܳܐ ܐܰ‌ܠܳܗܳܐ ܥܠܰܝ. ܚܠܳܦ ܕܡܰܫܚܰܢܝ ܡܳܪܝܳܐ ܘܫܰܕܰܪܰܢܝ ܕܶܐܣܰܒܰܪ ܠܡܰܟܺܝ̈ܟܶܐ: ܘܶܐܥܨܽܘܒ ܠܰܬ݂ܒܺܝܖ̈ܰܝ ܠܶܒܳܐ: ܘܶܐܩܪܶܐ ܚܺܐܪܽܘܬ݂ܳܐ ܠܰܫ̈ܒܰܝܳܐ: ܘܰܫܪܳܝܳܐ ܠܰܐܣܺܝܖ̈ܶܐ. ² ܘܶܐܩܪܶܐ ܫܰܢ̱ܬܳܐ ܕܨܶܒܝܳܢܳܐ ܠܡܳܪܝܳܐ: ܘܝܰܘܡܳܐ ܕܦܽܘܪܩܳܢܳܐ ܠܰܐܠܳܗܰܢ: ܠܰܡܒܰܝܳܐܘ ܠܟܽܠܗܽܘܢ ܐܰܒܺܝ̈ܠܶܐ. ³ ܠܡܶܬܰܠ ܠܰܐܒܺܝ̈ܠܶܐ ܕܨܶܗܝܽܘܢ ܫܽܘܒܚܳܐ: ܚܠܳܦ ܩܶܛܡܳܐ ܡܶܫܚܳܐ ܒܰܣܺܝܡܳܐ: ܘܰܚܠܳܦ ܐܶܒܠܳܐ ܥܛܳܦܳܐ ܕܬܶܫܒܽܘܚܬܳܐ. ܘܰܚܠܳܦ ܪܽܘܚܳܐ ܡܰܟ݂ܐܰܒܬܳܐ: ܢܶܬ݂ܩܪܽܘܢ ܕܶܟ݂ܖ̈ܶܐ ܕܙܰܕܺܝܩܽܘܬܳܐ: ܢܶܨܒܬܶܗ ܕܡܳܪܝܳܐ ܡܫܰܒܰܚܬܳܐ. ⁴ ܘܢܶܒܢܽܘܢ ܚܰܖ̈ܒܳܬ݂ܳܐ ܕܡ̣ܶܢ ܥܳܠܰܡ: ܘܨܰܕ݂̈ܝܳܬ݂ܳܐ ܕܡ̣ܶܢ ܪܺܝܫܺܝܬ݂ܳܐ ܢܩܺܝܡܽܘܢ ܘܰܢܚܰܕܬ݂ܽܘܢ ܩܽܘܖ̈ܝܳܐ ܚܰܖ̈ܒܳܬ݂ܳܐ: ܘܨܰܕ݂̈ܝܳܬ݂ܳܐ ܕܕ݂ܳܪܕܳܖ̈ܺܝܢ. ⁵ ܘܰܢܩܽܘܡܽܘܢ ܢܽܘܟ݂ܖ̈ܳܝܶܐ: ܘܢܶܪܥܽܘܢ ܥܳܢ̈ܗܽܘܢ. ܘܰܒܢܰܝ̈ ܢܽܘܟ݂ܖ̈ܳܝܶܐ ܢܶܗܘܽܘܢ ܠܗܽܘܢ ܐܰܟܳܖ̈ܶܐ ܘܟ݂ܰܖ̈ܡܶܐ. ⁶ ܘܰܐܢ̱ܬ݁ܽܘܢ ܟܽܘܡܖ̈ܰܘܗܝ ܕܡܳܪܝܳܐ ܬܶܬ݂ܩܪܽܘܢ. ܘܰܡܫܰܡܫܳܢܰܘ̈ܗܝ ܕܰܐܠܳܗܰܢ ܢܶܬ݂ܶܐܡܰܪ ܠܟ݂ܽܘܢ. ܢܶܟ݂ܣܰܝ̈ܗܽܘܢ ܕܥܰܡ̈ܡܶܐ ܬܶܐܟ݂ܠܽܘܢ ܘܒܺܐܝܩܳܪܗܽܘܢ ܬܶܫܬܰܒܚܽܘܢ. ⁷ ܚܠܳܦ ܒܶܗܬ݁ܬ݂ܟ݂ܽܘܢ: ܘܰܚܠܳܦ ܚܶܦܪܟ݂ܽܘܢ: ܝܽܘܪܬܳܢܳܐ ܬܶܢܝܳܢܳܐ ܬܺܐܪܬ݁ܽܘܢ ܒܰܐܪܥܗܽܘܢ. ܘܬܶܫܬܰܒܚܽܘܢ ܒܦܳܠܓܽܘܬ݂ܗܽܘܢ. ܚܰܕ݂ܽܘܬ݂ܳܐ ܠܥܳܠܰܡ ܬܶܗܘܶܐ ܠܟ݂ܽܘܢ. ⁸ ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܕܪܳܚܶܡ ܐ̱ܢܳܐ ܕܺܝܢܳܐ. ܘܣܳܢܶܐ ܐ̱ܢܳܐ ܚܛܽܘܦܝܳܐ ܘܥܰܘܠܳܐ ܘܶܐܬ݁ܶܠ ܥܰܡܠܟ݂ܽܘܢ ܒܩܽܘܫܬܳܐ. ܘܰܩܝܳܡܳܐ ܕܥܳܠܰܡ ܐܰܩܺܝܡ ܠܟ݂ܽܘܢ. ⁹ ܘܢܶܬ݂ܺܝܕܰܥ ܙܰܪܥܟ݂ܽܘܢ ܒܥܰܡ̈ܡܶܐ: ܘܙܰܪܥܳܐ ܕܙܰܪܥܟ݂ܽܘܢ ܒܶܐܡ̈ܘܳܬ݂ܳܐ. ܟܽܠ ܚܳܙ̈ܝ݂ܳܝ݂ܟܽܘܢ ܢܶܫܬܰܘܕܥܽܘܢܳܟ݂ܽܘܢ: ܕܙܰܪܥܳܐ ܐܰܢ̱ܬ݁ܽܘܢ ܕܒܰܪܶܟ݂ ܡܳܪܝܳܐ. ¹⁰ ܡܶܬ݂ܒܰܣܳܡܽܘ ܐܶܬ݂ܒܰܣܰܡ ܒܡܳܪܝܳܐ. ܘܰܬ݁ܕ݂ܽܘܨ ܢܰܦܫܝ ܒܰܐܠܳܗܝ. ܡܶܛܽܠ ܕܰܐܠܒܶܫܰܢܝ ܠܒܽܘܫܳܐ ܕܦܽܘܪܩܳܢܳܐ: ܘܰܐܥܛܦܰܢܝ ܦܪܺܝܣܳܐ ܕܙܰܕܺܝܩܽܘܬܳܐ: ܐܰܝܟ݂ ܚܰܬ݂ܢܳܐ ܫܒܺܝܚܳܐ ܘܰܐܝܟ݂ ܟܰܠܬ݂ܳܐ ܡܨܰܒܰܬ݁ܬܳܐ. ¹¹ ܘܰܐܝܟ݂ ܐܰܪܥܳܐ ܕܡܰܦܩܳܐ ܥܽܘܦܝܳܐ: ܘܰܐܝܟ݂ ܓܰܢܬ݂ܳܐ ܕܡܰܘܥܝܳܐ ܙܰܪܥܳܐ: ܗܳܟ݂ܰܢܳܐ ܢܰܘܥܶܐ ܡܳܪܝܳܐ ܐܰ‌ܠܳܗܳܐ ܙܰܕܺܝܩܽܘܬܳܐ: ܘܬܶܫܒܽܘܚܬܳܐ ܩܕ݂ܳܡ ܟܽܠܗܽܘܢ ܥܰܡ̈ܡܶܐ.

ܩܶܦܰܠܶܐܘܳܢ: ܣܒ

¹ ܡܶܛܽܠ ܨܶܗܝܽܘܢ ܠܳܐ ܐܶܫܬ݁ܽܘܩ ܘܡܶܛܽܠ ܐܽܘܪܺܫܠܶܡ ܠܳܐ ܐܶܫܠܶܐ ܥܕܰܡܳܐ ܕܬܶܦܽܘܩ ܙܰܕܺܝܩܽܘܬܳܗ̇ ܐܰܝܟ݂ ܢܽܘܗܪܳܐ: ܘܦܽܘܪܩܳܢܳܗ̇ ܐܰܝܟ݂ ܠܰܡܦܺܝܕ݂ܳܐ ܢܶܕ݂ܠܰܩ. ² ܘܢܶܚܙܽܘܢ ܥܰܡ̈ܡܶܐ ܙܰܕܺܝܩܽܘܬܶܟ݂ܝ: ܘܟܽܠܗܽܘܢ ܡܰܠ̈ܟܶܐ ܐܺܝܩܳܪܶܟ݂ܝ. ܘܢܶܬ݂ܩܪܶܐ ܠܶܟܝ ܫܡܳܐ ܚܰܕ݂ܬ݂ܳܐ: ܕܦܽܘܡܶܗ ܕܡܳܪܝܳܐ ܢܣܺܝܡܺܝܘܗܝ. ³ ܘܬܶܗܘܶܝܢ ܟܠܺܝܠܳܐ ܕܬܶܫܒܽܘܚܬܳܐ ܒܺܐܝܕ݂ܶܗ ܕܡܳܪܝܳܐ: ܘܬ݂ܳܓܳܐ ܕܡܰܠܟܽܘܬ݂ܳܐ ܒܺܐܝܕ݂ܶܗ ܕܰܐܠܳܗܶܟ݂ܝ. ⁴ ܘܬܽܘܒ ܠܳܐ ܬܶܬ݂ܩܪܶܝܢ ܫܒܺܝܬܳܐ. ܘܰܐܪܥܶܟ݂ܝ ܬܽܘܒ ܠܳܐ ܬܶܬ݂ܩܪܶܐ ܨܳܕ݂ܺܝܬ݂ܳܐ. ܐܶܠܳܐ ܬܶܬ݂ܩܪܶܝܢ ܨܶܒܝܳܢܝ: ܘܰܐܪܥܶܟ݂ܝ ܒܥܺܝܠܬܳܐ. ܡܶܛܽܠ ܕܰܨܒܳܐ ܒܶܟܝ ܡܳܪܝܳܐ. ܘܰܐܪܥܶܟ݂ܝ ܬܶܬ݂ܒܰܥܰܠ. ⁵ ܡܶܛܽܠ ܕܰܐܝܟ݂ ܕܰܒܥܶܠ ܓܰܕܽܘܕ݂ܳܐ ܠܰܒܬ݂ܽܘܠܬܳܐ: ܗܳܟ݂ܰܢܳܐ ܢܶܒܥܠܽܘܢܶܟ݂ܝ ܒܢܰܝ̈ܟܝ. ܘܰܐܝܟ݂ ܕܚܳܕܶܐ ܚܰܬ݂ܢܳܐ ܒܟܰܠܬ݂ܳܐ: ܢܶܚܕܶܐ ܒܶܟ݂ܝ ܐܰܠܳܗܶܟ݂ܝ. ⁶ ܥܰܠ ܫܽܘܖ̈ܰܝܟܝ ܐܽܘܪܺܫܠܶܡ ܐܰܩܺܝܡܶܬ݂ ܢܳܛܽܘܖ̈ܶܐ ܟܽܠܝܽܘܡ: ܒܺܐܝܡܳܡܳܐ ܘܰܒܠܺܠܝܳܐ ܐܰܡܺܝܢܳܐܺܝܬ݂. ܕܠܳܐ ܢܶܫܬ݁ܩܽܘܢ: ܘܠܳܐ ܢܶܫܠܽܘܢ ܡܰܕ݂ܟܖ̈ܳܢܶܝܗ̇ ܩܕ݂ܳܡ ܡܳܪܝܳܐ. ⁷ ܘܠܳܐ ܬܶܬ݁ܠܺܝܢ ܠܗܽܘܢ ܫܶܠܝܳܐ ܥܕܰܡܳܐ ܕܢܰܬ݂ܩܢܶܟ݂ܝ: ܘܰܥܕܰܡܳܐ ܕܢܰܥܒܕܶܟ݂ܝ ܐܽܘܪܺܫܠܶܡ ܬܶܫܒܽܘܚܬܳܐ ܒܰܐܪܥܳܐ. ⁸ ܝܺܡܳܐ ܡܳܪܝܳܐ ܒܝܰܡܺܝܢܶܗ ܘܒܰܕ݂ܪܳܥܶܗ ܥܰܫܺܝܢܳܐ: ܕܠܳܐ ܐܶܬ݁ܶܠ ܬܽܘܒ ܥܒܽܘܪܶܟ݂ܝ ܡܶܐܟ݂ܽܘܠܬܳܐ ܠܰܒܥܶܠܕܒܳܒܰܝ̈ܟܝ ܘܠܳܐ ܢܶܫܬ݁ܽܘܢ ܒܢܰܝ̈ ܢܽܘܟ݂ܖ̈ܳܝܶܐ ܚܰܡܪܶܟ݂ܝ ܕܰܠܐܰܝܬ݁ܝ ܒܶܗ. ⁹ ܐܶܠܳܐ ܡܟܰܢܫܳܢܰܘ̈ܗܝ ܢܶܐܟ݂ܠܽܘܢܶܗ. ܘܰܢܫܰܒܚܽܘܢ ܠܡܳܪܝܳܐ. ܘܰܡܟܰܢܫܳܢܰܘ̈ܗܝ ܢܶܫܬ݁ܽܘܢܶܗ ܒܕ݂ܳܖ̈ܰܝ ܩܰܕܺܝ̈ܫܳܬ݂ܳܐ. ¹⁰ ܥܒܰܪܘ ܥܒܰܪܘ ܒܬܰܪܥܳܐ ܦܰܢܰܘ ܐܽܘܪܚܳܐ ܠܥܰܡܳܐ. ܕܪܽܘܫܘ ܫܒܺܝܠܳܐ. ܘܩܽܘܠܘ ܟܺܐܦܰܘ̈ܗܝ ܐܰܪܺܝܡܘ ܐܳܬܳܐ ܠܥܰܡ̈ܡܶܐ. ¹¹ ܗܳܐ ܡܳܪܝܳܐ ܐܰܫܡܰܥ ܠܣܰܘ̈ܦܶܝܗ̇ ܕܰܐܪܥܳܐ. ܐܶܡܰܪܘ ܠܒܰܪܬ݂ ܨܶܗܝܽܘܢ ܕܗܳܐ ܐܳܬ݁ܶܐ ܦܳܪܽܘܩܶܟ݂ܝ. ܗܳܐ ܐܰܓܪܶܗ ܥܰܡܶܗ: ܘܰܥܒܳܕܶܗ ܩܕ݂ܳܡܰܘܗܝ. ¹² ܘܢܶܩܪܽܘܢ ܐܶܢܽܘܢ ܥܰܡܳܐ ܩܰܕ݁ܺܝܫܳܐ: ܦܖ̈ܺܝܩܰܘܗܝ ܕܡܳܪܝܳܐ. ܘܰܐܢ̱ܬ݁ܝ ܬܶܬ݂ܩܪܶܝܢ ܬܒܺܝܥܬܳܐ: ܩܪܺܝܬ݂ܳܐ ܕܠܳܐ ܐܶܫܬܰܒܩܰܬ.

ܩܶܦܰܠܶܐܘܳܢ: ܣܓ

¹ ܡܰܢܘ ܗܳܢܳܐ ܕܳܐܬܶ݁ܐ ܡ̣ܶܢ ܐܰܕܽܘܡ. ܘܣܽܘܡܳܩܺܝܢ ܢܰܚܬܰܘ̈ܗܝ ܡ̣ܶܢ ܒܽܘܨܳܪ ܘܰܗܕ݂ܺܝܪ ܒܰܠܒܽܘܫܰܘ̈ܗܝ ܘܥܰܫܺܝܢ ܒܣܽܘܓ݂ܳܐܐ ܕܚܰܝܠܶܗ. ܐܶܢܳܐ ܡܡܰܠܶܠ ܒܙܰܕܺܝܩܽܘܬܳܐ: ܘܡܰܣܓܶܐ ܠܡܶܦܪܰܩ. ² ܠܡܳܢܳܐ ܣܽܘܡܳܩܺܝܢ ܢܰܚ̈ܬܰܝܟ ܘܰܠܒܽܘܫܰܝ̈ܟ: ܐܰܝܟ݂ ܗܰܘ ܕܰܥܨܰܪ ܒܡܰܥܨܰܪܬܳܐ. ³ ܡܰܥܨܰܪܬܳܐ ܕܳܫܶܬ݂ ܒܰܠܚܽܘܕܰܝ ܘܐ̱ܢܳܫ ܡ̣ܶܢ ܥܰܡ̈ܡܶܐ ܠܰܝܬ݁ ܗ̱ܘܳܐ ܥܰܡܝ. ܥܶܨܪܶܬ݂ ܐܶܢܽܘܢ ܒܪܽܘܓܙܝ ܘܕ݂ܳܫܶܬ ܐܶܢܽܘܢ ܒܚܶܡܬ݂ܝ. ܘܰܢܕ݂ܳܐ ܕܶܡܗܽܘܢ ܥܰܠ ܠܒܽܘܫܰܝ ܘܟܽܠܗܽܘܢ ܢܰܚ̈ܬܰܝ ܦܰܠܦܠܶܬ݂. ⁴ ܡܶܛܽܠ ܕܝܰܘܡܳܐ ܕܰܬ݂ܒܰܥܬ݂ܳܐ ܒܠܶܒܝ. ܘܫܰܢ̱ܬܳܐ ܕܦܽܘܪܩܳܢܝ ܡܛܳܬ. ⁵ ܚܳܪܶܬ݂ ܘܠܰܝܬ݁ ܕܰܡܥܰܕܰܪ ܘܶܐܬ݁ܕܰܡܪܶܬ݂ ܘܠܰܝܬ݁ ܕܣܳܡܶܟ݂ ܘܦܰܪܩܰܢܝ ܕܪܳܥܝ ܘܚܶܡܬ݂ܳܐ ܗܺܝ ܣܡܰܟ݂ܬܰܢܝ. ⁶ ܕܳܫܶܬ݂ ܥܰܡ̈ܡܶܐ ܒܪܽܘܓܙܝ ܘܕ݂ܰܘܺܝܬ݂ ܐܶܢܽܘܢ ܒܚܶܡܬ݂ܝ ܘܰܐܚܬ݁ܶܬ݂ ܠܰܐܪܥܳܐ ܥܽܘܫܢܗܽܘܢ. ⁷ ܛܰܝܒܽܘܬܶܗ ܕܡܳܪܝܳܐ ܐܶܬ݁ܕ̇ܟܰܪ. ܘܶܬܫܒܽܘܚܬ݁ܶܗ ܕܡܳܪܝܳܐ ܥܰܠ ܕܟ݂ܽܠ ܕܦܰܪܥܰܝܢܝ ܡܳܪܝܳܐ. ܘܰܐܣܓܺܝ ܛܰܝܒܽܘܬܶܗ ܥܰܠ ܕܒܶܝܬ݂ ܝܺܣܪܳܐܶܝܠ ܕܦܰܪܥܰܢܝ ܐܰܝܟ݂ ܖ̈ܰܚܡܰܘܗܝ: ܘܰܐܝܟ݂ ܣܽܘܓ݂ܳܐܐ ܕܛܰܝܒܽܘܬܶܗ. ⁸ ܘܶܐܡܰܪ ܕܥܰܡܝ ܐܶܢܽܘܢ ܒ̈ܢܰܝܳܐ ܕܠܳܐ ܡܕܰܓܠܺܝܢ ܘܰܗܘܳܐ ܠܗܽܘܢ ܦܳܪܽܘܩܳܐ. ⁹ ܒܟ݂ܽܠ ܐܽܘܠܨܳܢܰܝ̈ܗܽܘܢ ܠܳܐ ܐܰܠܶܨ ܐܶܢܽܘܢ. ܘܡܰܠܰܐܟ݂ܳܐ ܕܰܐܦܰܘ̈ܗܝ ܦܪܰܩ ܐܶܢܽܘܢ. ܒܰܡܪܰܚܡܳܢܽܘܬܶܗ ܘܰܒܪܽܘܚܳܦܶܗ ܦܪܰܩ ܐܶܢܽܘܢ. ܘܰܐܪܺܝܡ ܐܶܢܽܘܢ ܘܫܰܩܶܠ ܐܶܢܽܘܢ: ܟܽܠܗܽܘܢ ܝܳܘ̈ܡܳܬܶܗ ܕܥܳܠܡܳܐ. ¹⁰ ܘܗܶܢܽܘܢ ܡܰܪܡܰܪܘ: ܘܰܐܟ݂ܶܐܒܘ ܠܪܽܘܚܳܐ ܕܩܽܘܕ݂ܫܶܗ. ܘܰܗܦܰܟ݂ ܗܘܳܐ ܠܗܽܘܢ ܒܥܶܠܕܒܳܒܳܐ. ܘܗܽܘ ܐܶܬ݂ܟܰܬܰܫ ܥܰܡܗܽܘܢ. ¹¹ ܘܶܐܬ݁ܕ̇ܟܰܪ ܝܰܘ̈ܡܳܬܳܐ ܕܥܳܠܰܡ ܕܡܽܘܫܶܐ ܥܰܒܕܶܗ: ܐܰܝܟ݂ ܕܰܐܣܶܩ ܡ̣ܶܢ ܝܰܡܳܐ ܠܪܳܥܝܳܐ ܕܥܳܢ̈ܶܗ: ܘܰܐܝܟ݂ ܕܣܳܡ ܒܓܰܘܶܗ ܪܽܘܚܳܐ ܕܩܽܘܕ݂ܫܶܗ. ¹² ܡܕܰܒܰܪ ܠܝܰܡܺܝܢܶܗ ܕܡܽܘܫܶܐ ܕܪܳܥܳܐ ܕܬܶܫܒܽܘܚܬ݁ܶܗ. ܬܪܰܥ ܝܰܡܳܐ ܡ̣ܶܢ ܩܕ݂ܳܡܰܝܗܽܘܢ. ܘܰܥܒܰܕ݂ ܠܗܽܘܢ ܫܡܳܐ ܠܥܳܠܰܡ. ¹³ ܕܰܒܰܪ ܐܶܢܽܘܢ ܒܰܬ݂ܗܽܘܡܳܐ ܐܰܝܟ݂ ܣܽܘܣܝܳܐ ܒܡܰܕ݂ܒܪܳܐ. ܘܠܳܐ ܐܶܬ݁ܬ݁ܩܶܠܘ. ¹⁴ ܐܰܝܟ݂ ܒܥܺܝܪܳܐ ܕܢܳܚܬܳܐ ܒܰܦܩܰܥܬ݂ܳܐ: ܪܽܘܚܶܗ ܕܡܳܪܝܳܐ ܕܰܒܪܰܬ ܐܶܢܽܘܢ. ܗܳܟ݂ܰܢܳܐ ܕܰܒܰܪܬ݁ ܐܶܢܽܘܢ ܠܥܰܡܳܟ݂: ܘܰܥܒܰܕܬ݁ ܠܳܟ݂ ܫܡܳܐ ܡܫܰܒܚܳܐ. ¹⁵ ܚܽܘܪ ܡ̣ܶܢ ܫܡܰܝܳܐ. ܘܰܚܙܺܝ ܡ̣ܶܢ ܡܶܕ݂ܝܳܪܳܟ݂ ܩܰܕ݁ܺܝܫܳܐ ܘܰܡܫܰܒܚܳܐ ܐܰܝܟܰܘ ܛܢܳܢܳܟ݂ ܘܓܰܢ̱ܒܳܪܽܘܬ݂ܳܟ݂: ܘܗܽܘܦܳܟܳܐ ܕܰܡܥܰܝ̈ܟ ܘܰܕ݂ܖ̈ܰܚܡܰܝܟ ܕܶܐܬ݂ܗܦܶܟ݂ܘ ܥܠܰܝܢ. ¹⁶ ܡܶܛܽܠ ܕܰܐܢ̱ܬ݁ ܗ̱ܘ ܐܰܒܘܢ. ܐܰܒܪܳܗܳܡ ܠܳܐ ܝܺܕܰܥܢ ܘܺܝܣܪܳܐܶܝܠ ܠܳܐ ܐܶܫܬܰܘܕܥܢ ܘܰܐܢ̱ܬ݁ ܗ̱ܘ ܡܳܪܝܳܐ ܐܰܒܽܘܢ ܦܳܪܽܘܩܰܢ ܘܡ̣ܶܢ ܥܳܠܰܡ ܫܡܳܟ݂. ¹⁷ ܠܡܳܢܳܐ ܐܰܛܥܺܝܬܳܢ ܡܳܪܝܳܐ ܡ̣ܶܢ ܐܽܘܪܚܳܟ݂. ܘܩܰܫܺܝܬ݁ ܠܶܒܰܢ ܡ̣ܶܢ ܕܶܚܠܬ݂ܳܟ݂. ܐܶܬ݂ܦܰܢܝ ܡܶܛܽܠ ܥܰܒܕܰܝ̈ܟ ܫܰܒܛܳܐ ܕܝܳܪܬ݁ܽܘܬ݂ܳܟ݂. ¹⁸ ܩܰܠܺܝܠ ܢܺܐܪܰܬ݂ ܥܰܡܳܐ ܕܩܽܘܕ݂ܫܳܟ݂. ܐܳܠܽܘܨܰܝ̈ܢ ܕܳܫܘ ܡܰܩܕܫܳܟ݂. ¹⁹ ܗܘܰܝܢ ܡ̣ܶܢ ܥܳܠܰܡ: ܥܰܕ݂ܠܳܐ ܐܶܫܬܰܠܰܛܬ݁ ܥܠܰܝܗܽܘܢ. ܘܠܳܐ ܐܶܬ݂ܩܪܺܝ ܫܡܳܟ݂ ܥܠܰܝܗܽܘܢ.

ܩܶܦܰܠܶܐܘܳܢ: ܣܕ

¹ ܠܳܐ ܦܬܰܚܬ݁ ܫܡܰܝܳܐ ܘܰܢܚܶܬ݁ܬ݁ ܘܡܢ ܩܕ݂ܳܡܰܝܟ ܕܳܠܘ ܛܽܘܖ̈ܶܐ. ܘܶܐܬ݂ܦܰܫܰܪܘ ܐܰܝܟ݂ ܕܡܶܬ݂ܦܰܫܪܳܐ ܫܥܽܘܬ݂ܳܐ ܡ̣ܶܢ ܩܕ݂ܳܡ ܢܽܘܪܳܐ. ² ܘܬܰܘܩܶܕ݂ ܢܽܘܪܳܐ ܠܰܒܥܶܠܕܒܳܒܰܝ̈ܟ. ܘܢܶܬ݂ܺܝܕܰܥ ܫܡܳܟ݂ ܠܰܒܥܶܠܕܒܳܒܰܝ̈ܟ. ܘܢܶܬ݁ܕܰܠܚܽܘܢ ܥܰܡ̈ܡܶܐ ܡ̣ܶܢ ܩܕ݂ܳܡܰܝܟ. ³ ܟܰܕ݂ ܥܒܰܕܬ݁ ܕܚܺܝ̈ܠܳܬ݂ܳܐ ܕܠܳܐ ܣܰܟܺܝܢ ܠܳܟ݂: ܢܚܶܬ݁ܬ݁: ܘܡ̣ܶܢ ܩܕ݂ܳܡܰܝܟ ܕܳܠܘ ܛܽܘܖ̈ܶܐ. ⁴ ܡ̣ܶܢ ܥܳܠܰܡ ܠܳܐ ܨܳܬ݂ܘ ܘܠܳܐ ܫܡܰܥܘ ܘܥܺܝܢ ܠܳܐ ܚܙܳܬ ܐܰܠܳܗ ܠܒܰܪ ܡܶܢܳܟ݂. ܕܥܳܒܶܕ݂ ܐܰܢ̱ܬ݁ ܠܰܐܝܠܶܝܢ ܕܰܡܣܰܟܝܢ ܠܳܟ݂. ⁵ ܘܦܳܓܰܥ ܐܰܢ̱ܬ݁ ܒܒܽܘܣܳܡܳܐ ܒܰܐܝܠܶܝܢ ܕܥܳܒܕܺܝܢ ܙܰܕܺܝܩܽܘܬܳܐ ܒܽܐܘܖ̈ܚܳܬ݂ܳܟ݂ ܢܶܬ݁ܕܰܟ݂ܪܽܘܢܳܟ݂. ܗܳܐ ܐܰܢ̱ܬ݁ ܪܓܶܙܬ݁ ܘܰܚܛܰܝܢ ܒܗܶܝܢ. ܒܥܳܠܰܡ ܢܶܬ݂ܦܪܶܩ. ⁶ ܕܰܗܘܰܝܢ ܐܰܝܟ݂ ܛܰܡܰܐܐ ܟܽܠܰܢ. ܘܰܐܝܟ݂ ܐܽܘܪܩܰܥܬ݂ܳܐ ܕܟܶܦܣܳܢܺܝܬ݂ܳܐ ܟܽܠܳܗ̇ ܙܰܕܺܝܩܽܘܬܰܢ. ܢܬܰܪܢ ܐܰܝܟ݂ ܛܰܖ̈ܦܶܐ ܟܽܠܰܢ. ܘܰܐܝܟ݂ ܥܰܠܥܳܠܳܐ ܫܰܩܠܽܘܢ ܚܛܳܗܰܝ̈ܢ. ⁷ ܘܠܰܝܬ݁ ܕܩܳܪܶܐ ܒܰܫܡܳܟ݂: ܘܰܕ݂ܥܳܗܶܕ݂ ܠܰܡܚܰܡܣܳܢܽܘ ܒܳܟ݂. ܡܶܛܽܠ ܕܰܐܗܦܶܟ݂ܬ݁ ܐܰܦܰܝ̈ܟ ܡܶܢܰܢ: ܘܰܐܫܠܶܡ̣ܬܳܢ ܒܝܰܕ݂ ܚܛܳܗܰܝ̈ܢ. ⁸ ܗܳܫܳܐ ܡܳܪܝܳܐ ܐܰܒܽܘܢ ܐܰܢ̱ܬ݁ ܚܢܰܢ ܛܺܝܢܳܐ: ܘܰܐܢ̱ܬ݁ ܓܳܒܽܘܠܰܢ ܘܰܥܒܳܕ݂ ܐܺܝܕܰܝ̈ܟ ܚܢܰܢ ܟܽܠܰܢ. ⁹ ܠܳܐ ܬܶܪܓܰܙ ܡܳܪܝܳܐ ܛܳܒ ܠܥܳܠܰܡ. ܘܠܳܐ ܬܶܬ݁ܕܟܰܪ ܠܥܳܠܰܡ ܚܛܳܗܰܝ̈ܢ ܚܙܺܝ ܕܥܰܡܳܟ݂ ܚܢܰܢ ܟܽܠܰܢ. ¹⁰ ܩܽܘܖ̈ܝܳܐ ܕܩܽܘܕ݂ܫܳܟ݂ ܗܘܰܝ̈ ܡܰܕ݂ܒܪܳܐ. ܘܨܶܗܝܽܘܢ ܗܘܳܬ݂ ܡܰܕ݂ܒܪܳܐ: ܐܘܪܺܫܠܶܡ ܚܰܪܒܬ݂ܳܐ. ¹¹ ܒܶܝܬ݂ ܩܽܘܕ݂ܫܰܢ ܘܬܶܫܒܽܘܚܬܰܢ: ܕܫܰܒܚܽܘܟ݂ ܐܰܒܗܰܝ̈ܢ: ܗܘܳܐ ܠܝܰܩܕܳܢܳܐ ܕܢܽܘܪܳܐ. ܘܟ݂ܽܠܳܗ̇ ܪܶܓܬܰܢ ܗܘܳܬ݂ ܠܚܽܘܪܒܳܐ. ¹² ܥܰܠ ܗܳܠܶܝܢ ܚܰܡܣܶܢܬ݁ ܡܳܪܝܳܐ. ܘܰܫܬܶܩܬ݁ ܘܡܰܟܰܟ݂ܬܳܢ ܛܳܒ.

ܩܶܦܰܠܶܐܘܳܢ: ܣܗ

¹ ܐܶܬ݂ܒܥܺܝܬ݂ ܠܰܐܝܠܶܝܢ ܕܠܳܐ ܫܰܐܠܽܘܢܝ ܘܶܐܫܬܰܟ݂ܚܶܬ݂ ܠܰܐܝܠܶܝܢ ܕܠܳܐ ܒܥܳܐܽܘܢܝ. ܐܶܡ̇ܪܶܬ݂ ܗܳܐ ܐܶܢܳܐ: ܠܥܰܡܳܐ ܕܠܳܐ ܩܪܳܐ ܫܶܡܝ. ² ܦܶܫܛܶܬ݂ ܐܺܝ̈ܕܰܝ ܝܰܘܡܳܐ ܟܽܠܶܗ: ܥܰܠ ܥܰܡܳܐ ܕܠܳܐ ܡܶܬ݁ܛܦܺܝܣ: ܕܰܡܗܰܠܟ݂ܺܝܢ ܒܳܬܰܪ ܬܰܖ̈ܥܝܳܬ݂ܗܽܘܢ: ܒܽܐܘܪܚܳܐ ܕܠܳܐ ܫܰܦܺܝܪܳܐ. ³ ܥܰܡܳܐ ܕܡܰܪܓܙܺܝܢ ܠܺܝ ܐܰܡܺܝܢܳܐܺܝܬ݂: ܕܕܳܒܚܺܝܢ ܒܓܰ̈ܢܶܐ: ܘܣܳܝܡܺܝܢ ܒܶܣ̈ܡܶܐ ܥܰܠ ܐܰܒܳܢ̈ܶܐ. ⁴ ܘܝܳܬ݂ܒܺܝܢ ܒܩܰܒܖ̈ܶܐ: ܘܒܳܝܬ݁ܺܝܢ ܒܰܡܥܰܖ̈ܶܐ. ܘܐܳܟ݂ܠܺܝܢ ܒܶܣܪܳܐ ܕܰܚܙܺܝܪܳܐ. ܘܰܡܛܰܘܫܺܝܢ ܒܰܫ̈ܠܰܕܶܐ ܡܳܐܢܰܝ̈ܗܽܘܢ. ⁵ ܘܳܐܡܪܺܝܢ ܦܪܽܘܩ ܠܗܰܠ: ܠܳܐ ܬܶܬ݂ܩܰܪܰܒ ܠܺܝ ܡܶܛܽܠ ܕܰܡܩܰܕܰܫ ܐ̱ܢܳܐ ܗܳܠܶܝܢ ܗܘܰܝ̈ ܬܶܢܳܢܳܐ ܒܪܽܘܓܙܝ: ܘܢܽܘܪܳܐ ܕܝܳܩܕܳܐ ܒܟ݂ܽܠܝܽܘܡ. ⁶ ܗܳܐ ܟܬ݂ܺܝܒܐ ܩܕ݂ܳܡܝ. ܠܳܐ ܐܶܫܬ݁ܽܘܩ: ܥܕܰܡܳܐ ܕܶܐܦܪܽܘܩ ܐܶܢܽܘܢ ܐܰܥܦܳܐ ܒܥܽܘܒܗܽܘܢ. ⁷ ܚܛܳܗܰܝ̈ܗܽܘܢ ܘܰܚܛܳܗ̈ܶܐ ܕܰܐܒܗܰܝ̈ܗܽܘܢ: ܚܰܫ ܩܒܽܘܠ ܐܶܢܽܘܢ: ܐܳܡܰܪ ܡܳܪܝܳܐ. ܕܣܳܡܘ ܒܶܣ̈ܡܶܐ ܥܰܠ ܛܽܘܖ̈ܶܐ. ܘܥܰܠ ܖ̈ܳܡܳܬ݂ܳܐ ܚܰܣܕ݂ܽܘܢܝ ܐܶܡܫܽܘܚ ܥܒܳܕܰܝ̈ܗܽܘܢ ܠܽܘܩܕܰܡ ܒܥܽܘܒܗܽܘܢ. ⁸ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܐܰܝܟ݂ ܕܡܶܫܬܰܟ݂ܚܳܐ ܛܽܘܛܺܝܬ݂ܳܐ ܒܰܣܓܽܘܠܳܐ: ܘܳܐܡܰܪ ܐ̱ܢܳܫ ܠܚܰܒܪܶܗ: ܠܳܐ ܬܚܰܒܠܺܝܘܗܝ: ܡܶܛܽܠ ܕܒܽܘܪܟܬ݂ܳܐ ܐܺܝܬ݂ ܒܶܗ. ܗܳܟ݂ܰܢܳܐ ܐܶܥܒܶܕ݂ ܡܶܛܽܠ ܥܰܒܕܰܝ̈: ܘܠܳܐ ܐܶܚܰܒܰܠ ܠܟܽܠܗܽܘܢ. ⁹ ܘܰܐܦܶܩ ܙܰܪܥܳܐ ܡ̣ܶܢ ܝܰܥܩܽܘܒ: ܘܡ̣ܶܢ ܝܺܗܽܘܕ݂ܳܐ ܝܳܪܬܳܐ ܕܛܽܘܪܝ ܘܢܺܐܪܬ݁ܽܘܢܶܗ ܓܒܰܝ̈. ܘܥܰܒܕܰܝ̈ ܢܶܥܡܪܽܘܢ ܬܰܡܳܢ. ¹⁰ ܘܢܶܗܘܶܐ ܫܰܪܘܳܢܳܐ ܕܰܝܪܳܐ ܠܥܳܢ̈ܳܐ. ܘܥܽܘܡܩܳܐ ܕܥܳܟ݂ܳܪ ܠܡܰܪܒܳܥܳܐ ܕܒܰܩܖ̈ܶܐ ܠܥܰܡܝ ܕܰܒܥܰܐܽܘܢܝ. ¹¹ ܘܰܐܢ̱ܬ݁ܽܘܢ ܕܰܫܒܰܩܬ݁ܽܘܢ ܠܡܳܪܝܳܐ: ܘܰܛ̣ܥܰܝܬ݁ܽܘܢ ܠܛܽܘܪܶܗ ܩܰܕ݁ܺܝܫܳܐ. ܘܰܡ̣ܠܰܝܬ݁ܽܘܢ ܦܳܬ݂ܽܘܖ̈ܶܐ ܠܓܰܕ̈ܶܐ: ܘܰܡ̣ܙܰܓܬ݁ܽܘܢ ܠܗܽܘܢ ܐܰܓܳܢ̈ܶܐ. ¹² ܐܶܡܚܶܟ݂ܽܘܢ ܒܚܰܪܒܳܐ. ܘܟ݂ܽܠܟ݂ܽܘܢ ܒܩܶܛܠܳܐ ܐܶܬ݂ܒܰܪܟ݂ܽܘܢ. ܥܰܠ ܕܰܩܪܺܝܬ݂ܟ݂ܽܘܢ ܘܠܳܐ ܥ̣ܢܰܝܬ݁ܽܘܢ. ܘܡܰܠܠܶܬ݂ ܘܠܳܐ ܫܡܰܥܬ݁ܽܘܢ. ܘܰܥܒܰܕܬ݁ܽܘܢ ܕܒܺܝܫ ܩܕ݂ܳܡܝ ܘܰܓܒܰܝܬ݁ܽܘܢ ܡܶܕܶܡ ܕܠܳܐ ܨܳܒܶܐ ܐ̱ܢܳܐ. ¹³ ܡܶܛܽܠ ܗܳܢܳܐ ܗܳܟ݂ܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ. ܗܳܐ ܥܰܒܕܰܝ̈ ܢܶܐܟ݂ܠܽܘܢ: ܘܰܐܢ̱ܬ݁ܽܘܢ ܬܶܟ݂ܦܢܽܘܢ ܗܳܐ ܥܰܒܕܰܝ̈ ܢܶܫܬ݁ܽܘܢ: ܘܰܐܢ̱ܬ݁ܽܘܢ ܬܶܨܗܽܘܢ ܗܳܐ ܥܰܒܕܰܝ̈ ܢܶܚܕܽܘܢ: ܘܰܐܢ̱ܬ݁ܽܘܢ ܬܶܒܟܘܢ. ¹⁴ ܗܳܐ ܥܰܒܕܰܝ̈ ܢܫܰܒܚܽܘܢ ܡ̣ܶܢ ܛܳܒ̈ܳܬ݂ܳܐ ܕܠܶܒܗܽܘܢ: ܘܰܐܢ̱ܬ݁ܽܘܢ ܬܒܰܓܢܽܘܢ ܡ̣ܶܢ ܟܺܐܒܶܗ ܕܠܶܒܟ݂ܽܘܢ: ܘܡ̣ܶܢ ܬܒܳܪܳܗ̇ ܕܪܽܘܚܟ݂ܽܘܢ. ¹⁵ ܘܬܶܫܒܩܽܘܢ ܫܶܡܟ݂ܽܘܢ ܡܰܘܡܳܬܳܐ ܠܰܓܒܰܝ̈ ܘܰܢܡܺܝܬ݂ܳܟ݂ ܡܳܪܝܳܐ ܐܰ‌ܠܳܗܳܐ ܘܰܠܥܰܒܕܰܘ̈ܗܝ ܢܶܩܪܶܐ ܫܡܳܐ ܐ̱ܚܪܺܢܳܐ. ¹⁶ ܕܡܶܬ݂ܒܰܪܰܟ݂ ܒܰܐܪܥܳܐ: ܡܶܬ݂ܒܰܪܰܟ݂ ܒܰܐܠܳܗܳܐ ܐܰܡܶܝܢ. ܘܰܕ݂ܝܳܡܶܐ ܒܰܐܪܥܳܐ: ܝܳܡܶܐ ܒܰܐܠܳܗܳܐ ܐܰܡܶܝܢ. ܡܶܛܽܠ ܕܢܶܬ݁ܛܰܥ̈ܝܳܢ ܥܳܩ̈ܳܬ݂ܳܐ ܩܰܕ݂ܡܳܝ̈ܳܬ݂ܳܐ: ܘܢܶܬ݂ܟܰܣ̈ܝܳܢ ܡ̣ܶܢ ܩܕ݂ܳܡܝ. ¹⁷ ܡܶܛܽܠ ܕܗܳܐ ܐܶܢܳܐ ܒܳܪܶܐ ܐ̱ܢܳܐ ܫܡܰܝ̈ܳܐ ܚܰܕ݂ܳܬܳܐ ܘܰܐܪܥܳܐ ܚܕܰܬܳܐ. ܘܠܳܐ ܢܶܬ݁ܕܰܟ݂ܪܽܘܢ ܩܰܕ݂ܡܳܝ̈ܳܬ݂ܳܐ. ܘܠܳܐ ܢܶܣ̈ܩܳܢ ܥܰܠ ܠܶܒܳܐ. ¹⁸ ܐܶܠܳܐ ܢܶܚܕܽܘܢ ܘܰܢܕ݂ܘܨܽܘܢ ܠܥܳܠܰܡ ܥܳܠܡܺܝܢ ܕܒܳܪܶܐ ܐ̱ܢܳܐ. ܡܶܛܽܠ ܕܗܳܐ ܒܳܪܶܐ ܐ̱ܢܳܐ ܠܽܐܘܪܺܫܠܶܡ ܕܝܳܨܳܐ: ܘܒܳܗ̇ ܐܶܚܕܶܐ. ¹⁹ ܘܶܐܚܕܶܐ ܒܽܐܘܪܺܫܠܶܡ: ܘܶܐܕܽܘܨ ܒܥܰܡܝ. ܘܬܽܘܒ ܠܳܐ ܢܶܫܬ݁ܡܰܥ ܒܳܗ̇ ܩܳܠܳܐ ܕܰܒܟܳܬ݂ܳܐ: ܘܩܳܠܳܐ ܕܺܝܠܰܠܬܳܐ. ²⁰ ܘܬܽܘܒ ܠܳܐ ܢܶܗܘܶܐ ܬܰܡܳܢ ܛܠܶܐ ܝܰܘ̈ܡܳܬܳܐ: ܘܣܳܒܳܐ ܕܠܳܐ ܢܡܰܠܶܐ ܝܳܘ̈ܡܳܬܶܗ. ܡܶܛܽܠ ܕܛܰܠܝܳܐ ܒܰܪ ܡܳܐܐ ܫܢܺܝ̈ܢ ܢܡܽܘܬ݂. ܘܰܐܝܢܳܐ ܕܚܳܛܶܐ ܒܰܪ ܡܳܐܐ ܫܢܺܝ̈ܢ: ܢܶܬ݁ܬ݁ܠܺܝܛ. ²¹ ܘܢܶܒܢܽܘܢ ܒ̈ܳܬܶܐ: ܘܢܶܬ݁ܒܽܘܢ ܘܢܶܨܒܽܘܢ ܟܰܖ̈ܡܶܐ ܘܢܶܐܟ݂ܠܽܘܢ ܦܺܐܖ̈ܰܝܗܽܘܢ. ²² ܠܳܐ ܢܶܒܢܽܘܢ: ܘܰܐ̱ܚܖ̈ܳܢܶܐ ܢܶܬ݁ܒܽܘܢ ܘܠܳܐ ܢܶܨܒܽܘܢ: ܘܰܐ̱ܚܖ̈ܳܢܶܐ ܢܶܐܟ݂ܠܽܘܢ. ܡܶܛܽܠ ܕܝܳܘ̈ܡܳܬܶܗ ܕܥܰܡܝ ܐܰܝܟ݂ ܝܰܘ̈ܡܳܬܳܐ ܐܶܢܽܘܢ ܕܺܐܝ̈ܠܳܢܶܐ. ܘܰܥܒܳܕ݂ ܐܺܝܕܰܝ̈ܗܽܘܢ ܢܶܐܟ݂ܠܽܘܢ ܓܒܰܝ̈. ²³ ܠܳܐ ܢܶܠܐܽܘܢ ܠܰܣܪܺܝܩܽܘܬ݂ܳܐ: ܘܠܳܐ ܢܳܘܠܕ݂ܽܘܢ ܠܠܰܘܛܬ݂ܳܐ: ܡܶܛܽܠ ܕܙܰܪܥܳܐ ܐܶܢܽܘܢ ܒܪܺܝܟܶܗ ܕܡܳܪܝܳܐ: ܗܶܢܽܘܢ ܘܰܒܢܰܝ̈ܗܽܘܢ ܥܰܡܗܽܘܢ. ²⁴ ܘܥܰܕ݂ܠܳܐ ܢܶܩܪܽܘܢ: ܐܶܥܢܶܐ ܐܶܢܽܘܢ ܘܥܰܕ݂ܠܳܐ ܢܡܰܠܠܽܘܢ: ܐܶܫܡܰܥ ܐܶܢܽܘܢ. ²⁵ ܕܺܐܒܳܐ ܘܶܐܡܪܳܐ ܐܰܟܚܕ݂ܳܐ ܢܶܪܥܽܘܢ. ܘܰܐܪܝܳܐ ܐܰܝܟ݂ ܬܰܘܪܳܐ ܢܶܐܟ݂ܽܘܠ ܬܶܒܢܳܐ. ܘܚܶܘܝܳܐ ܥܰܦܪܳܐ ܠܰܚܡܶܗ: ܘܠܳܐ ܢܰܒܐܫܽܘܢ ܘܠܳܐ ܢܚܰܒܠܽܘܢ ܒܟ݂ܽܠܶܗ ܛܽܘܪܳܐ ܕܩܽܘܕ݂ܫܝ ܐܳܡܰܪ ܡܳܪܝܳܐ.

ܩܶܦܰܠܶܐܘܳܢ: ܣܘ

¹ ܗܳܟ݂ܰܢܳܐ ܐܳܡܰܪ ܡܳܪܝܳܐ: ܫܡܰܝܳܐ ܟܽܘܪܣܰܝ: ܘܰܐܪܥܳܐ ܟܽܘܒܫܳܐ ܕܖ̈ܶܓܠܰܝ: ܐܰܝܢܳܘ ܒܰܝܬܳܐ ܕܒܳܢܶܝܢ ܐ̱ܢܬ݁ܽܘܢ ܠܺܝ: ܐܰܘ ܐܰܝܢܰܘ ܐܰܬ݂ܪܐ ܕܰܢܝܳܚܬ݁ܝ. ² ܗܳܠܶܝܢ ܟܽܠܗܶܝܢ ܐܺܝܕ݂ܝ ܥܶܒܕܰܬ: ܘܕ݂ܺܝܠܝ ܐܶܢܶܝܢ ܗܳܠܶܝܢ ܟܽܠܗܶܝܢ ܐܳܡܰܪ ܡܳܪܝܳܐ. ܘܰܒܡܰܢ ܐܶܚܽܘܪ ܘܶܐܥܡܰܪ: ܐܶܠܳܐ ܒܢܺܝܚܳܐ ܘܰܒܡܰܟܺܝܟ݂ ܪܽܘܚܳܐ ܕܙܳܐܰܥ ܡ̣ܶܢ ܡܶܠܰܬ݂ܝ. ³ ܕܢܳܟܶܣ ܬܰܘܪܳܐ ܐܰܝܟ݂ ܗܰܘ ܕܩܳܛܶܠ ܓܰܒܪܳܐ: ܕܕ݂ܳܒܰܚ ܐܶܡܪܳܐ ܐܰܝܟ݂ ܗܰܘ ܕܩܳܛܶܠ ܟܰܠܒܳܐ: ܕܰܡܩܰܪܶܒ ܣܡܺܝܕ݂ܳܐ ܐܰܝܟ݂ ܕܡܳܐ ܕܰܚܙܺܝܪܳܐ: ܕܰܡܩܰܪܶܒ ܠܒܽܘܢܬܳܐ ܐܰܝܟ݂ ܗܰܘ ܕܰܡܒܰܪܶܟ݂ ܠܰܦܬܰܟ݂ܖ̈ܶܐ: ܐܳܦ ܗܶܢܽܘܢ ܐܶܬ݂ܪܰܥܺܝܘ ܒܽܐܘܖ̈ܚܳܬ݂ܗܽܘܢ: ܘܰܨܒܳܬ ܢܰܦܫܗܽܘܢ ܒܰܦܬܰܟ݂ܖ̈ܰܝܗܽܘܢ. ⁴ ܐܳܦ ܐܶܢܳܐ ܐܶܨܒܶܐ ܒܒܽܘܙܳܚܗܽܘܢ: ܘܶܐܦܪܽܘܥ ܐܶܢܽܘܢ ܥܒܳܕܰܝ̈ܗܽܘܢ: ܥܰܠ ܕܰܩܪܺܝܬ݂ ܘܠܰܝܬ݁ ܕܥܳܢܶܐ: ܘܡܰܠܠܶܬ݂ ܘܠܳܐ ܫܡܰܥܘ: ܘܰܥܒܰܕ݂ܘ ܕܒܺܝܫ ܩܕ݂ܳܡܝ: ܘܰܓܒܰܘ ܡܶܕܶܡ ܕܠܳܐ ܨܒܺܝܬ݂. ⁵ ܫܡܰܥܘ ܦܶܬ݂ܓܳܡܶܗ ܕܡܳܪܝܳܐ ܐܰܝܠܶܝܢ ܕܙܳܝܥܺܝܢ ܡ̣ܶܢ ܡܶܠܬ݂ܶܗ. ܐܶܡܰܪܘ ܠܰܐܚܰܝ̈ܟܽܘܢ ܣܳܢܐܰܝ̈ܟܽܘܢ ܡܰܣܠܝܳܢܰܝ̈ܟܘܢ ܡܶܛܽܠ ܫܶܡܝ. ܢܶܫܬܰܒܰܚ ܡܳܪܝܳܐ ܘܢܶܚܕܶܐ ܒܚܰܕ݂ܽܘܬ݂ܟܽܘܢ: ܘܗܶܢܽܘܢ ܢܶܒܗܬ݂ܽܘܢ. ⁶ ܩܳܠܳܐ ܕܰܕ݂ܠܽܘܚܝܳܐ ܡ̣ܶܢ ܩܪܺܝܬ݂ܳܐ: ܘܩܳܠܳܐ ܡ̣ܶܢ ܗܰܝܟܠܳܐ: ܩܳܠܶܗ ܕܡܳܪܝܳܐ ܕܦܳܪܰܥ ܦܽܘܪܥܳܢܳܐ ܠܰܒܥܶܠܕܒܳܒܰܘ̈ܗܝ. ⁷ ܥܰܕ݂ܠܳܐ ܬܚܰܒܶܠ ܕܝܳܠܕܳܐ: ܘܥܰܕ݂ܠܳܐ ܢܶܡܛܽܘܢ ܚܶܒܠܶܝܗ̇ ܘܬܶܦܠܰܛ ܕܶܟ݂ܪܳܐ. ⁸ ܡܰܢ ܫܡܰܥ ܐܰܝܟ݂ ܗܳܕܶܐ: ܘܡܰܢ ܚܙܳܐ ܐܰܝܟ݂ ܗܳܠܶܝܢ: ܕܰܡܚܰܒܠܳܐ ܐܰܪܥܳܐ ܒܝܰܘܡܳܐ ܚܰܕ݂: ܘܡܶܬ݂ܺܝܠܶܕ݂ ܥܰܡܳܐ ܒܫܳܥܬ݂ܳܐ ܚܕ݂ܳܐ: ܡܶܛܽܠ ܕܚܰܒܠܰܬ ܘܝܶܠܕܰܬ݂ ܨܶܗܝܽܘܢ ܠܰܒܢܶܝ̈ܗ̇. ⁹ ܐܶܢܳܐ ܝܶܗܒܬ݂ ܣܽܘܟܳܝܳܐ ܗܳܢܳܐ: ܘܠܳܐ ܡܰܘܠܶܕ݂ ܐ̱ܢܳܐ ܐܳܡܰܪ ܡܳܪܝܳܐ ܕܰܠܡܳܐ ܠܳܐ ܗ̱ܘܳܐ ܐܶܢܳܐ ܡܰܘܠܶܕ݂ ܐ̱ܢܳܐ ܘܟ݂ܳܠܶܐ ܐ̱ܢܳܐ ܐܳܡܰܪ ܐܰܠܳܗܶܟ݂ܝ. ¹⁰ ܚܕ݂ܰܘ ܒܽܐܘܪܺܫܠܶܡ ܘܕ݂ܽܘܨܘ ܒܳܗ̇ ܟܠ ܖ̈ܳܚܡܶܝܗ̇. ܐܶܬ݂ܒܰܣܰܡܘ ܥܰܡܳܗ̇ ܒܒܽܘܣܳܡܳܐ ܟܠ ܕܰܗܘܰܘ ܒܶܐܒܠܳܐ ܥܠܶܝܗ̇. ¹¹ ܘܬܺܐܢܩܽܘܢ ܘܬܶܣܒܠܽܘܢ ܡ̣ܶܢ ܬܕ݂ܳܐ ܕܒܽܘܝܳܐܳܗ̇: ܘܬܺܐܢܩܽܘܢ ܘܬܶܬ݂ܦܰܢܩܽܘܢ ܡ̣ܶܢ ܥܽܘܫܢܳܐ ܕܺܐܝܩܳܪܳܗ̇. ¹² ܡܶܛܽܠ ܕܗܳܟ݂ܰܢܳܐ ܐܳܡܰܪ ܡܳܪܝܳܐ: ܕܗܳܐ ܪܳܡܶܐ ܐ̱ܢܳܐ ܥܠܶܝܗ̇ ܫܠܳܡܳܐ ܐܰܝܟ݂ ܢܰܗܪܳܐ: ܘܰܐܝܟ݂ ܢܰܚܠܳܐ ܕܓܳܪܶܦ. ܘܺܐܝܩܳܪܳܐ ܕܥܰܡ̈ܡܶܐ ܬܺܐܢܩܽܘܢ: ܘܥܰܠ ܦܶܖ̈ܝܳܘܳܬ݂ܳܐ ܬܶܫܬܰܩܠܽܘܢ: ܘܥܰܠ ܒܽܘܖ̈ܟܶܐ ܬܶܬ݂ܪܰܒܽܘܢ. ¹³ ܐܰܝܟ݂ ܓܰܒܪܳܐ ܕܰܡܒܰܝܐܰܐ ܠܶܗ ܐܶܡܶܗ: ܗܳܟ݂ܰܢܳܐ ܐܶܢܳܐ ܐܶܒܰܝܰܐܟ݂ܽܘܢ: ܘܒܽܐܘܪܺܫܠܶܡ ܬܶܬ݂ܒܰܝܐܽܘܢ. ¹⁴ ܘܬܶܚܙܽܘܢ ܘܢܶܚܕܶܐ ܠܶܒܟܽܘܢ: ܘܓܰܖ̈ܡܰܝܟܽܘܢ ܐܰܝܟ݂ ܬܰܕ݂ܐܳܐ ܢܶܪܘܙܽܘܢ. ܘܬܶܬ݂ܺܝܕܰܥ ܐܺܝܕܶܗ ܕܡܳܪܝܳܐ ܥܰܠ ܥܰܒܕܰܘ̈ܗܝ: ܘܬ݂ܰܘܒܶܕ݂ ܠܰܒܥܶܠܕܒܳܒܰܘ̈ܗܝ. ¹⁵ ܡܶܛܽܠ ܕܗܳܐ ܡܳܪܝܳܐ ܒܢܽܘܪܳܐ ܐܳܬ݁ܶܐ: ܘܰܐܝܟ݂ ܥܰܠܥܳܠܳܐ ܡܰܪܟܰܒܬܶܗ. ܕܢܶܗܦܽܘܟ݂ ܒܚܶܡܬ݂ܳܐ ܕܪܽܘܓܙܶܗ. ܘܰܟ݂ܐܳܬܶܗ ܫܰܠܗܶܒܺܝܬ݂ܳܐ ܕܢܽܘܪܳܐ. ¹⁶ ܡܶܛܽܠ ܕܰܒܢܽܘܪܳܐ ܕܳܐܶܢ ܡܳܪܝܳܐ: ܘܒܳܚܰܪ ܒܳܗ̇ ܠܟ݂ܽܠ ܒܣܰܪ: ܘܢܶܣܓܽܘܢ ܩܛܺܝܠܰܘ̈ܗܝ ܕܡܳܪܝܳܐ. ¹⁷ ܕܡܶܬ݂ܩܰܕܫܺܝܢ ܘܡܶܬ݁ܕܰܟܶܝܢ ܒܓܰܢ̈ܶܐ: ܚܰܕ݂ ܒܳܬܰܪ ܚܰܕ݂ ܒܰܡܨܰܥܬ݂ܳܐ: ܘܐܳܟ݂ܠܺܝܢ ܒܶܣܪܳܐ ܕܰܚܙܺܝܪܳܐ: ܘܫܶܪܨܳܐ ܘܥܽܘܩܒܖ̈ܶܐ. ܐܰܟܚܕ݂ܳܐ ܢܣܽܘܦܽܘܢ ܐܳܡܰܪ ܡܳܪܝܳܐ. ¹⁸ ܘܶܐܢܳܐ ܝܳܕܰܥ ܐ̱ܢܳܐ ܥܒܳܕܰܝ̈ܗܽܘܢ ܘܬܰܖ̈ܥܝܳܬ݂ܗܽܘܢ: ܡܳܐ ܕܶܐܬ݁ܺܝܬ݂ ܠܰܡܟܰܢܳܫܽܘ ܠܟܽܠܗܽܘܢ ܥܰܡ̈ܡܶܐ ܘܰܠܶܠܫܳܢ̈ܶܐ: ܘܢܺܐܬ݂ܽܘܢ ܘܢܶܚܙܽܘܢ ܐܺܝܩܳܪܝ. ¹⁹ ܘܶܐܣܺܝܡ ܒܗܽܘܢ ܐܳܬܳܐ: ܘܶܐܫܰܕܰܪ ܡܶܢܗܽܘܢ ܡܫܰܘܙ̈ܒܶܐ ܠܥܰܡ̈ܡܶܐ: ܠܬܰܪܫܺܝܫ: ܘܰܠܦܳܘܠ: ܘܰܠܠܳܘܕ݂: ܕܢܳܓܕܺܝܢ ܒܩܶܫܬܳܐ: ܘܰܠܬ݂ܽܘܒܶܝܠ: ܘܰܠܝܳܘܳܢ: ܘܰܠܓܳܙܖ̈ܳܬ݂ܳܐ ܖ̈ܰܚܺܝܩܳܬ݂ܳܐ: ܕܠܳܐ ܫܡܰܥܘ ܫܶܡܝ ܘܠܳܐ ܚܙܰܘ ܐܺܝܩܳܪܝ: ܘܰܢܚܰܘܢ ܐܺܝܩܳܪܝ ܒܥܰܡ̈ܡܶܐ. ²⁰ ܘܢܰܝܬ݁ܽܘܢ ܠܟܽܠܗܽܘܢ ܐܰܚܰܝ̈ܟܘܢ ܡ̣ܶܢ ܟܽܠܗܽܘܢ ܥܰܡ̈ܡܶܐ ܩܽܘܪܒܳܢܳܐ ܠܡܳܪܝܳܐ: ܒܖ̈ܰܟܫܳܐ: ܘܰܒܡܰܖ̈ܟܒܳܬ݂ܳܐ: ܘܰܒܩܳܖ̈ܽܘܟܶܐ: ܠܛܽܘܪܳܐ ܕܩܽܘܕ݂ܫܝ: ܠܽܐܘܪܺܫܠܶܡ ܐܳܡܰܪ ܡܳܪܝܳܐ: ܐܰܝܟ݂ ܕܡܰܝܬ݁ܶܝܢ ܒܢܰܝ̈ ܝܺܣܪܳܐܶܝܠ ܣܡܺܝܕܳܐ ܒܡܳܐܢ̈ܶܐ ܕܟܰܝ̈ܳܐ ܠܒܰܝܬ݁ܶܗ ܕܡܳܪܝܳܐ. ²¹ ܐܳܦ ܡܶܢܗܽܘܢ ܐܶܣܰܒ ܠܟܳܗ̈ܢܶܐ: ܘܰܠܠܶܘܳܝ̈ܶܐ: ܐܳܡܰܪ ܡܳܪܝܳܐ. ²² ܐܰܝܟ݂ ܫܡܰܝ̈ܳܐ ܚܰܕ݂̈ܳܬܳܐ ܘܰܐܪܥܳܐ ܚܕܰܬܳܐ ܕܥܳܒܶܕ݂ ܐ̱ܢܳܐ: ܕܩܳܝܡܺܝܢ ܩܕ݂ܳܡܝ ܐܳܡܰܪ ܡܳܪܝܳܐ: ܗܳܟ݂ܰܢܳܐ ܢܶܬ݂ܩܰܝܰܡ ܙܰܪܥܟ݂ܽܘܢ ܘܫܶܡܟ݂ܽܘܢ. ²³ ܘܢܶܗܘܶܐ ܡ̣ܶܢ ܙܒܰܢ ܝܺܪܰܚ ܒܺܝܪܰܚ: ܘܡ̣ܶܢ ܙܒܰܢ ܫܰܒܳܐ ܠܫܰܒܳܐ: ܢܺܐܬ݂ܽܘܢ ܟܠ ܒܣܰܪ ܠܡܶܣܓܰܕ݂ ܩܕ݂ܳܡܝ ܐܳܡܰܪ ܡܳܪܝܳܐ. ²⁴ ܘܢܶܦܩܽܘܢ ܘܢܶܚܙܽܘܢ ܫܠܰܕܰܝ̈ܗܽܘܢ ܕܓܰܒܖ̈ܶܐ ܕܰܐܥܠܺܝܘ ܒܺܝ: ܕܠܳܐ ܡܳܝܬܳܐ ܬܰܘܠܰܥܗܽܘܢ: ܘܢܽܘܪܗܽܘܢ ܠܳܐ ܕܳܥܟܳܐ: ܘܢܶܗܘܽܘܢ ܕܽܘܡܳܪܳܐ ܠܟ݂ܽܠ ܒܣܰܪ.

 

ܠܥܠ