“ܡܶܛܽܠ ܕܥܶܫܢܰܬ݀ ܥܠܰܝܢ ܛܰܝܒܽܘܬܶܗ܆ ܫܰܪܺܝܪܳܐܺܝܬ ܡܳܪܝܰܐ ܗ̱ܘ ܠܥܳܠܰܡ (ܡܙܡܘܪܐ 116: 2)

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:

ܗܐ ܨܰܘܡܐ ܐܰܪܒܥܺܝܢܳܝܐ ܩܰܕܺܝܫܐ ܡܶܢ ܕܪܺܝܫ ܦܳܓܰܥ ܒܰܢ܆ ܗܰܘ ܕܒܶܗ ܡܶܬܡܰܪܶܝܢܰܢ ܒܝܶܫܽܘܥ ܡܫܺܝܚܐ ܡܳܪܰܢ܆ ܘܰܠܡܰܕܒܪܐ ܓܰܘܳܝܐ ܕܶܝܢ ܡܶܬܕܰܒܪܺܝܢܰܢ܆ ܕܢܶܗܘܶܐ ܠܘܳܬ ܢܰܦܫܰܢ ܘܢܶܬܒܰܩܶܐ ܒܚܰܝ̈ܰܝܢ ܐܰܝܟܐ ܨܳܝܒܺܝܢ܆ ܘܢܰܨܶܕ ܗܰܘ̈ܢܰܝܢ ܠܡܶܬܗܰܓܳܝܽܘ ܒܗܰܝܡܳܢܽܘܬܶܗ܆ ܐܰܘܟܺܝܬ ܒܫܰܪܺܝܪܽܘܬܶܗ܆ ܕܰܐܠܳܗܳܐ ܕܨܶܝܕܰܝܢ܆ ܘܰܡܕܰܒܪܳܢܽܘܬܶܗ ܦܳܪܽܘܩܳܝܬܳܐ ܕܰܚܠܳܦܰܝܢ܆ ܘܢܶܥܒܰܪ ܠܦܰܓܪ̈ܳܢܳܝܳܬܐ ܟܰܕ ܠܡܰܠܟܽܘܬܐ ܕܰܐܠܳܗܳܐ ܘܙܰܕܺܝܩܽܘܬܶܗ ܩܰܕܡܳܝܰܬ ܢܶܒܥܶܐ (ܡܬܝ ܘ܆ ܠܓ، ܠܘܩܐ ܝܒ܆ ܠܐ)܆ ܘܰܠܡܰܡܠܠܶܗ ܕܺܝܠܶܗ ܡܰܚܝܳܢܐ ܢܶܬܕܟܰܪ܆ ܕܠܐ ܗ̱ܘܳܐ ܠܰܡ ܒܠܰܚܡܳܐ ܒܰܠܚܽܘܕ ܚܳܝܶܐ ܒܰܪܢܳܫܳܐ܆ ܐܶܠܐ ܒܟܽܠ ܡܶܠܳܐ ܕܢܳܦܩܐ ܡܶܢ ܦܽܘܡܶܗ ܕܰܐܠܳܗܐ (ܡܬܝ ܕ܆ ܕ).
ܟܡܐ ܪܰܒ ܗ̱ܽܘ ܨܰܘܡܐ܆ ܕܙܰܝܢܰܐ ܗ̱ܘ ܠܰܡ ܠܽܘܩܒܰܠ ܒܺܝܫܐ܆ ܘܣܰܟܪܐ ܡܩܰܒܠܰܬ݀ ܓܶܐܪ̈ܶܐ ܕܰܒܥܶܠܕܒܳܒܐ (ܐܦܪܗܛ ܦܪܣܝܐ܆ ܬܚܘܝܬܐ ܕܨܘܡܐ). ܒܶܗ ܡܶܬܛܰܝܒܺܝܢܰܢ ܠܡܶܪܰܥ ܒܡܳܪܝܐ ܕܰܬܠܶܐ ܥܰܠ ܩܰܝܣܐ ܒܓܳܓܽܘܠܬܐ܆ ܘܰܠܡܶܣܓܰܕ ܩܕܳܡ ܨܠܺܝܒܶܗ ܩܰܕܺܝܫܐ܆ ܘܰܠܡܶܬܒܰܩܳܝܽܘ ܒܚܰܫ̈ܰܘܗ̱ܝ ܦܳܪ̈ܽܘܩܳܝܶܐ܆ ܐܰܝܟܰܢܐ ܕܥܰܡܶܗ ܢܡܽܘܬ ܘܳܐܦ ܥܰܡܶܗ ܢܺܚܶܐ (ܒ ܛܝܡܬܐܘܣ ܒ܆ ܝܐ)܆ ܘܥܰܡ ܕܰܘܺܝܕ ܡܙܰܡܪܳܢܐ ܐܰܠܳܗܳܝܐ ܢܰܙܥܶܩ ܘܢܺܐܡܰܪ ܕܡܳܪܝܐ ܒܰܫܡܰܝܐ ܪ̈ܰܚܡܰܝܟ: ܘܗܰܝܡܳܢܽܘܬܳܟ ܥܕܰܡܐ ܠܰܫܡ̈ܰܝ ܫܡܰܝܐ. ܙܰܕܺܝܩܽܘܬܳܟ ܐܰܝܟ ܛܽܘܪ̈ܶܐ ܐܰܠܳܗܐ: ܘܕܺܝ̈ܢܰܝܟ ܐܰܝܟ ܬܗܽܘܡܐ ܪܰܒܐ (ܡܙܡܘܪܐ ܠܘ܆ ܗ ـ ܘ).

ܒܢܰܝ̈ܳܐ ܪ̈ܚܺܝܡܶܐ ܒܰܐܠܳܗܐ܆ ܒܗܳܢܐ ܨܰܘܡܐ ܩܰܕܺܝܫܐ܆ ܒܗܰܝܡܳܢܽܘܬܶܗ ܕܰܐܠܳܗܐ ܕܨܶܝܕܰܝܢ ܡܶܬܒܰܩܶܝܢܰܢ܆ ܗܰܘ ܕܢܳܛܰܪ ܩܽܘܫܬܐ ܠܥܳܠܰܡ (ܡܰܙܡܽܘܪܐ ܩܡܗ܆ ܘ)܆ ܘܗܰܝܡܳܢܽܘܬܶܗ ܒܰܫܡܰܝܐ ܢܰܬܩܶܢ ܠܕܳܪܕܳܪ̈ܺܝܢ܆ ܘܠܐ ܢܕܰܓܠܺܝܗ̇ ܠܥܳܠܰܡ (ܡܙܡܘܪ̈ܐ ܦܛ܆ ܒ ܘܠܓ، ܩܝܚ܆ ܨ). ܘܶܐܢ ܠܰܡ ܠܳܐ ܢܗܰܝܡܶܢ ܒܶܗ܉ ܗܽܘ ܒܗܰܝܡܳܢܽܘܬܶܗ ܡܩܰܘܶܐ. ܕܢܶܟܦܽܘܪ ܓܶܝܪ ܒܢܰܦܫܶܗ ܠܳܐ ܡܶܫܟܰܚ (ܒ ܛܝܡܬܐܘܣ ܒ܆ ܝܓ).

ܡܶܬܚܰܘܝܐ ܕܶܝܢ ܗܰܝܡܳܢܽܘܬܶܗ ܕܰܐܠܳܗܐ ܡܗܰܝܡܢܐ ܒܗܳܝ ܕܢܳܛܰܪ ܩܝܳܡܐ ܘܛܰܝܒܽܘܬܐ ܠܪ̈ܳܚܡܰܘܗ̱ܝ܆ ܘܰܠܢܳܛܪ̈ܰܝ ܦܽܘ̈ܩܕܳܢܰܘܗ̱ܝ܆ ܠܳܐܠܶܦ ܕܳܪ̈ܺܝܢ (ܬܢܝܢ ܢܡܘܣܐ ܙܙ܆ ܛ، ܡܙܡܘܪܐ ܩܝܐ܆ ܗ)܆ ܘܰܕܫܰܪܺܝܪ ܗ̱ܽܘ ܒܫܽܘܘ̈ܕܳܝܶܐ ܕܺܝܠܶܗ ܟܰܕ ܡܶܢܗܶܝܢ ܠܰܓܡܳܪ ܠܐ ܗܳܦܶܟ (ܡܙܡܘܪܐ ܩܠܐ܆ ܝܐ). ܡܶܬܓܰܠܝܳܢܽܘܬܐ ܕܶܝܢ ܪܰܒܬܐ ܕܗܰܝܡܳܢܽܘܬܐ ܗܳܕܶܐ ܠܘܳܬ ܨܠܺܝܒܐ ܡܶܫܬܰܟܚܐ܆ ܟܰܪ ܕܶܐܬܓܡܰܪ ܦܽܘܪܩܳܢܐ ܘܶܐܫܬܒܶܩܘ ܚܰܘ̈ܒܰܝܢ܆ ܒܕܰܐܠܳܗܐ ܠܰܡ ܡܗܰܝܡܰܢ ܗ̱ܽܘ ܘܙܰܕܺܝܩ ܕܢܶܫܒܽܘܩ ܠܰܢ ܚܛܳܗ̈ܰܝܢ܆ ܘܰܢܕܰܟܶܝܢ ܡܶܢ ܟܽܠܶܗ ܥܰܘܠܰܢ (ܐ ܝܘܚܢܢ ܐ܆ ܛ). ܟܰܕ ܕܶܝܢ ܒܶܗ ܒܡܰܟܬܰܒܙܰܒܢܰܢ ܥܰܬܺܝܪܐ ܚܳܝܪܺܝܢܰܢ܆ ܗܰܘ ܕܰܡܠܶܐ ܒܡܰܟܫܪ̈ܳܢܘܳܬܐ ܘܠܐ ܡܰܟܫܪ̈ܳܢܘܳܬܐ܆ ܘܰܒܛܳܒ̈ܳܬܐ ܘܒܺܝ̈ܫܳܬܐ܆ ܘܰܒܗܰܝܡܳܢܽܘܬܐ ܘܠܐ ܗܰܝܡܳܢܽܘܬܐ܆ ܗܶܪ̈ܓܶܐ ܠܢܰܦܫ̈ܳܬܰܢ ܢܳܣܒܺܝܢܰܢ ܕܰܢܗܰܠܶܟ ܒܚܰܝ̈ܰܝܢ ܥܰܠ ܐܪܥܐ ܗܳܕܶܐ܆ ܘܢܶܕܚܰܠ ܠܡܳܪܝܐ ܘܢܶܦܠܚܺܝܘܗ̱ܝ ܒܩܽܘܫܬܐ ܒܟܽܠܶܗ ܠܶܒܰܢ ܘܰܒܟܽܠܳܗ̇ ܢܰܦܫܰܢ (ܐ ܫܡܘܐܝܠ ܝܒ܆ ܟܕ). ܡܶܛܽܠܗܳܢܐ܆ ܩܳܪܶܐ ܠܰܢ ܡܳܪܝ ܦܰܘܠܳܘܣ ܫܠܺܝܚܳܐ ܕܰܡܗܰܝܡܢܺܝܢ ܘܥܺܝܪܺܝܢ ܘܰܡܗܰܘܢܺܝܢ ܢܶܗܘܶܐ (ܐ ܬܣܠܘܢܝ̈ܩܝܐ ܗ܆ ܘ). ܗܳܢܰܘ ܓܶܝܪ ܫܰܗܪܐ ܪܽܘܚܳܢܳܝܐ܆ ܗܰܘ ܕܣܰܓܺܝ ܡܚܰܦܶܛ ܠܰܢ ܡܳܪܰܢ ܕܢܶܪܕܶܐ ܒܶܗ܆ ܟܰܕ ܝܳܗܶܒ ܠܰܢ ܡ̈ܰܬܠܶܐ ܡܫܰܚ̈ܠܦܶܐ܆ ܕܗܰܘ ܥܰܒܕܐ ܡܗܰܝܡܢܐ ܠܡܺܐܡܰܪ܆ ܘܕܰܥܣܰܪ ܒܬܽܘ̈ܠܳܢ܆ ܘܰܕܟܰܟܪ̈ܶܐ. ܘܰܒܫܽܘܠܳܡܗܽܘܢ ܕܡ̈ܰܬܠܶܐ ܕܶܝܢ܆ ܨܳܐܰܪ ܡܳܪܰܢ ܠܕܺܝܢܐ ܓܰܘܳܢܳܝܐ܆ ܕܒܶܗ ܙܰܕܺܝ̈ܩܶܐ ܡܗܰܝ̈ܡܢܶܐ ܢܺܐܙܠܽܘܢ ܠܚܰܝ̈ܶܐ ܕܰܠܥܳܠܰܡ܆ ܘܒܺܝ̈ܫܶܐ ܠܬܰܫܢܺܝܩܐ ܕܰܠܥܳܠܰܡ (ܡܬܝ ܟܕ ܘ ܟܗ).

ܡܶܟܺܝܠ܆ ܒܢ̈ܰܝܐ ܕܺܝܠܰܢ ܪ̈ܽܘܚܳܢܳܝܶܐ ܪ̈ܚܺܝܡܐ܆ ܘܳܠܶܐ ܠܰܢ ܕܰܒܦܽܘ̈ܩܕܳܢܰܘܗ̱ܝ ܕܰܐܠܳܗܐ ܢܗܰܠܶܟ ܘܝܰܬܺܝܪܳܐܺܝܬ ܢܰܘܣܶܦ܆ ܐܰܝܟܰܢܐ ܕܠܶܗ ܠܰܐܠܳܗܐ ܢܶܫܦܰܪ܆ ܘܰܠܕܰܪܓܐ ܕܩܰܕܺܝܫܽܘܬܐ ܢܶܡܛܶܐ (ܐ ܬܣܠܘܢܝ̈ܩܝܐ ܕ܆ ܐ ـ ܓ). ܠܐ ܬܶܡܰܢ ܠܰܢ ܣܳܟ܆ ܐܶܠܐ ܢܶܬܟܰܫܰܪ ܕܰܢܡܰܠܶܠ ܦܶܬܓܳܡ̈ܰܘܗ̱ܝ ܕܰܐܠܳܗܐ ܒܩܽܘܫܬܳܐ (ܐܪܡܝܐ ܟܓ܆ ܟܚ)܆ ܟܰܕ ܠܳܐ ܢܶܗܘܶܐ ܠܰܡ ܡܗܰܠܟܺܝܢ ܒܚܳܪܥܽܘܬܐ. ܘܠܳܐ ܢܳܟܠܺܝܢ ܡܶܠܬܶܗ ܕܰܐܠܳܗܐ܆ ܐܶܠܳܐ ܒܓܰܠܝܽܘܬܳܐ ܕܰܫܪܳܪܳܐ ܢܚܰܘܶܐ ܢܰܦܫܰܢ (ܐ ܩܘܪ̈ܝܢܬܝܐ ܕ܆ ܒ).

ܝܰܘܡܳܢܐ܆ ܠܘܳܬ ܥܺܕܬܰܢ ܕܡܰܕܢܚܐ ܕܰܒܚܰܫ̈ܶܐ ܘܥܳܩ̈ܳܬܐ ܪܰܡܝܐ ܚܳܝܪܺܝܢܰܢ܆ ܗܳܝ ܡܫܰܡܫܳܢܺܝܬܐ ܪܺܝܫܳܝܬܐ ܕܟܳܪܽܘܙܽܘܬܐ܆ ܘܣܳܗܶܕܬܐ ܕܰܡܗܰܝܡܰܢܐ ܗ̱ܝ ܠܡܰܘܒܳܠܽܘ ܠܶܐܘܰܢܓܶܠܺܝܳܘܢ ܠܟܽܠܳܗ̇ ܥܳܡܰܪܬܐ܆ ܘܒܳܗ̇ ܓܶܝܪ ܡܶܬܗܰܦܰܟ ܛܽܘܦܣܐ ܕܶܐܣܛܶܦܰܢܳܘܣ܆ ܪܺܝܫܐ ܕܰܡܫܰܡ̈ܫܳܢܶܐ ܘܩܰܕܡܳܝܐ ܕܣܳܗ̈ܕܶܐ܆ ܕܰܪܕܐ ܒܥܶܩ̈ܒܳܬܐ ܕܡܳܪܝܐ ܘܰܫܒܰܩ ܠܪ̈ܳܓܽܘܡܰܘܗ̱ܝ܆ ܘܩܰܘܺܝ ܡܗܰܝܡܢܐ ܥܕܰܡܐ ܠܡܰܘܬܐ ܘܰܢܣܰܒ ܠܶܗ ܕܶܝܢ ܟܠܺܝܠܐ ܕܚܰܝ̈ܶܐ (ܦܪܟܣܝܣ ܙܙ، ܓܠܝܢܐ ܒ܆ ܝ).

ܠܟܽܘܢ ܩܳܪܶܝܢܰܢ܆ ܐܳܘ ܪ̈ܚܺܝܡܶܐ ܕܰܒܗܳܢܐ ܡܰܕܢܚܐ ܚܳܝܶܝܬܽܘܢ܆ ܕܰܬܣܰܝܒܪܽܘܢ ܥܕܰܡܳܐ ܠܚܰܪܬܐ (ܡܬܝ ܟܕ܆ ܝܒ). ܣܰܓܺܝ ܓܶܝܪ ܥܰܡܟܽܘܢ ܘܰܠܚܰܫ̈ܰܝܟܽܘܢ ܚܳܝܫܺܝܢܰܢ. ܡܳܪܝܐ ܢܶܬܶܠ ܠܰܢ ܕܥܰܡܟܽܘܢ ܘܰܠܚܰܕܘܰܬܟܽܘܢ ܢܶܚܕܶܐ (ܪ̈ܗܘܡܝܐ ܝܒ܆ ܝܗ). ܠܶܗ ܡܶܬܟܰܫܦܺܝܢܰܢ ܕܢܰܟܪܶܐ ܠܝܰܘ̈ܡܳܬܐ ܗܳܠܶܝܢ (ܡܬܝ ܟܕ܆ ܟܒ) ܘܰܕܢܶܠܚܶܐ ܟܽܠ ܕܶܡ̈ܥܶܐ ܡܶܢ ܥܰܝ̈ܢܰܝܟܽܘܢ (ܓܠܝܢܐ ܟܐ܆ ܕ)܆ ܘܰܕܢܰܫܪܶܐ ܫܰܝܢܶܗ ܘܰܫܠܳܡܶܗ ܒܰܐܬܪ̈ܰܘܳܬܰܢ ܡܰܕ̈ܢܚܳܝܶܐ܆ ܡܰܠܽܘܢ ܕܶܝܢ ܒܥܝܪܐܩ ܘܣܘܪܝܐ܆ ܐܰܪܥܐ ܕܣܳܒ̈ܰܝܢ ܘܰܐܒܳܗ̈ܰܝܢ. ܡܨܰܠܶܝܢܰܢ ܬܽܘܒ ܡܛܽܠ ܗܦܽܘܟܝܐ ܕܰܡܥܰܠܝܽܘܬܗܽܘܢ ܕܰܐܚܰܝ̈ܢ ܪ̈ܚܺܝܡܶܐ ܡܺܝܛܪ̈ܦܽܘܠܺܝܛܽܘ ܚܛܺܝ̈ܦܶܐ ܕܚܳܠܳܒ ܦܘܠܘܣ ܝܐܙܔܝ ܘܡܪܝ ܓܪܝܓܘܪܝܘܣ ܝܘܚܢܢ ܐܒܪܗܡ܆ ܕܰܦܪܰܥܘ ܚܺܐܪܽܘܬܗܽܘܢ ܛܺܝܡܐ ܕܗܰܝܡܳܢܽܘܬܗܽܘܢ ܒܬܶܫܡܶܫܬܐ ܘܫܰܗܪܐ ܚܠܳܦ ܢܺܝܚܽܘܬ ܒܢܰܝ̈ܳܐ ܕܺܝܠܗܽܘܢ ܪ̈ܽܘܚܳܢܳܝܶܐ.

ܘܳܐܦ ܠܘܳܬ ܥܺܕܬܰܢ ܕܰܒܓܳܠܽܘܬܐ ܡܰܩܬܺܝܢܰܢ ܚܰܘܪܐ܆ ܗܳܝ ܕܝܳܪܒܐ ܘܡܶܬܝܰܬܪܐ ܩܰܠܺܝܠܳܐܺܝܬ ܒܰܕ ܒܳܗ̇ ܗ̱ܽܘ ܡܶܬܓܰܘܣܺܝܢ ܒܢ̈ܰܝܢ ܪ̈ܕܺܝܦܶܐ. ܗܺܝ ܬܽܘܒ ܡܶܬܪܰܕܦܐ ܐܳܦܶܢ ܒܰܙܢܐ ܡܫܰܚܠܦܐ. ܒܳܗ̇ ܕܶܝܢ ܚܳܙܶܝܢܰܢ ܛܽܘܦܣܐ ܕܝܰܘܣܶܦ ܟܺܐܢܐ܆ ܗܰܘ ܕܟܰܕ ܒܰܐܪܥܐ ܕܡܶܨܪܶܝܢ ܗ̱ܘܐ܆ ܩܰܘܺܝ ܫܰܪܺܝܪܐ ܒܗܰܝܡܳܢܽܘܬܐ ܕܠܰܐܠܳܗܐ܆ ܘܠܐ ܩܰܒܶܠ ܕܢܶܣܛܶܐ ܡܶܢ ܐܽܘܪܚܐ ܕܰܫܪܳܪܐ܆ ܐܶܠܐ ܒܰܩܪܺܝܚܽܘܬܐ ܐܰܘܕܰܥ ܐܰܝܟܰܢܐ ܠܰܡ ܐܶܥܒܶܕ ܒܺܝܫܬܐ ܗܳܕܶܐ ܪܰܒܬܐ: ܘܶܐܚܛܶܐ ܠܰܐܠܳܗܐ (ܒܪܝܬܐ ܠܛ܆ ܛ)܆ ܘܥܰܠܗܳܕܶܐ ܐܰܦܪܝܶܗ ܐܰܠܳܗܐ ܒܰܐܪܥܐ ܕܫܽܘܥܒܳܕܶܗ (ܒܪܝܬܐ ܡܐ܆ ܢܒ). ܘܳܐܦ ܒܳܗ̇ ܒܥܺܕܬܐ ܕܰܒܓܳܠܽܘܬܐ܆ ܕܡܽܘܬܐ ܕܕܳܢܺܝܶܐܝܠ ܢܒܺܝܐ ܡܶܬܚܰܘܝܐ ܠܰܢ܆ ܗܰܘ ܕܰܡܗܰܝܡܢܐ ܠܰܐܠܳܗܶܗ ܩܰܘܺܝ ܒܰܐܪܥܐ ܕܓܳܠܽܘܬܐ. ܢܛܰܪ ܕܶܝܢ ܠܨܰܘܡܐ (ܕܢܝܐܝܠ ܐ܆ ܚ)܆ ܘܰܗܘܐ ܡܝܰܬܰܪ ܡܶܢ ܟܽܠܗܽܘܢ ܫܰܠܺܝ̈ܛܳܢܶܐ ܕܡܰܠܟܽܘܬܐ ܒܰܕܛܳܒ ܗ̱ܘܐ ܘܰܡܗܰܝܡܶܢ ܒܰܐܠܳܗܐ܆ ܘܠܐ ܩܰܒܶܠ ܕܰܢܚܰܠܶܦ ܣܶܓܕܰܬ ܡܳܪܝܐ ܒܣܶܓܕܰܬ ܕܪܝܘܫ ܡܰܠܟܐ. ܘܰܚܠܳܦ ܗܰܝܡܳܢܽܘܬܶܗ ܫܰܘܙܒܶܗ ܐܰܠܳܗܐ ܡܶܢ ܐܰܪ̈ܝܰܘܳܬܐ ܕܰܒܓܽܘܒܐ ܘܰܐܘܪܒܶܗ ܒܡܰܠܟܽܘܬܐ ܕܕܪܝܘܫ (ܕܢܝܐܝܠ ܘ). ܡܶܟܺܝܠ܆ ܡܚܰܦܛܺܝܢܰܢ ܠܟܽܘܢ܆ ܒܢܰܝ̈ܳܐ ܕܥܺܕܬܰܢ ܕܰܒܓܳܠܽܘܬܐ܆ ܕܬܶܫܦܪܽܘܢ ܠܰܐܠܳܗܐ ܒܚܰܝܰܝ̈ܟܽܘܢ܆ ܟܰܕ ܠܽܘܩܒܰܠ ܚܛܺܝܬܐ ܬܶܗܘܽܘܢ ܡܶܬܟܰܬܫܺܝܢ܆ ܘܰܠܡܳܐܢܟܽܘܢ ܒܩܰܕܺܝܫܽܘܬܐ ܘܒܺܐܝܩܳܪܐ ܬܶܗܽܘܘܢ ܩܳܢܶܝܢ (ܐ ܬܣܠܘܢܝ̈ܩܝܐ ܕ܆ ܐ ـ ܕ). ܘܠܐ ܢܫܰܥܒܶܕܟܽܘܢ ܠܐ ܡܳܡܽܘܢܐ ܘܠܐ ܫܽܘܠܛܳܢܐ ܘܠܐ ܡܠܽܘܐܳܐ ܘܳܐܦܠܐ ܥܝܳܕܐ ܢܽܘܟܪܳܝܐ܆ ܐܶܠܐ ܒܬܰܘܕܺܝܬܐ ܕܥܺܕܬܐ ܘܡܰܫܠܡܳܢܽܘܬܳܗ̇ ܬܶܗܘܽܘܢ ܠܳܒܟܺܝܢ܆ ܟܰܕ ܚܽܘܒܐ ܒܠܶܒܰܘ̈ܳܬܟܽܘܢ ܚܰܡܺܝܡܳܐܺܝܬ ܢܩܰܘܶܐ (ܡܬܝ ܟܕ܆ ܝܒ)܆ ܘܬܶܗܘܽܘܢ ܡܗܰܠܟܺܝܢ ܒܶܐܣܟܺܡܳܐ ܠܘܳܬ ܒܰܪ̈ܳܝܶܐ (ܐ ܬܣܠܘܢܝ̈ܩܝܐ ܕ܆ ܝܒ)܆ ܘܰܬܩܰܘܽܘܢ ܢܽܘܗܪܐ ܕܡܰܢܗܰܪ ܠܥܳܠܡܐ ܗܰܘ ܕܰܐܚܶܒ ܠܚܶܫܽܘܟܐ ܝܰܬܺܝܪ ܡܶܢ ܕܰܠܢܽܘܗܪܐ܆ ܘܡܶܠܚܐ ܠܰܐܪܥܐ ܕܦܶܟܗܰܬ݀ ܡܶܠܚܳܗ̇ (ܡܬܝ ܗ܆ ܝܓ ـ ܝܘ، ܝܘܚܢܢ ܓ܆ ܝܛ).

ܟܡܐ ܪܰܒܐ ܗ̱ܝ ܗܰܝܡܳܢܽܘܬܳܗ̇ ܕܥܺܕܬܰܢ ܕܰܒܗܶܢܕܽܘ. ܢܶܬܕܟܰܪ ܕܶܝܢ ܠܡܰܦܪܝܳܢܐ ܩܰܕܺܝܫܐ ܡܳܪܝ ܒܰܣܶܝܠܺܝܳܘܣ ܫܰܟܪܰܐܠܠܰܗ܆ ܗܰܘ ܕܰܣܥܰܪ ܠܗܶܢܕܽܘ ܒܕܳܪܐ ܬܡܳܢܰܥܣܺܝܪܳܝܐ܆ ܘܰܐܣܪܽܘܗ̱ܝ ܪ̈ܳܕܽܘܦܶܐ ܕܥܺܕܬܐ ܬܰܡܳܢ܆ ܟܰܕ ܠܗܰܝܡܳܢܽܘܬܶܗ ܣܳܟ ܠܳܐ ܙܟܰܘ. ܘܡܶܢ ܒܳܬܰܪ ܚܽܘܪܳܪܶܗ܆ ܫܰܪܺܝ ܩܰܕܺܝܫܐ ܕܰܢܫܰܪܰܪ ܬܰܡܳܢ ܒܢ̈ܰܝ ܥܺܕܬܰܢ ܒܬܰܘܕܺܝܬܐ ܬܪܺܝܨܰܬ ܫܽܘܒܚܐ: ܘܰܐܣܪܰܚ ܠܗܽܘܢ ܩܰܫܺܝ̈ܫܶܐ ܘܰܒܢܐ ܠܗܽܘܢ ܥܺܕ̈ܳܬܐ܆ ܘܩܰܝܶܡ ܠܰܐܣܺܝܪܽܘܬܐ ܒܶܝܬ ܠܗܽܘܢ ܘܰܠܟܽܘܪܣܝܐ ܫܠܺܝܚܳܝܐ ܕܰܐܢܛܺܝܽܘܟ.

ܪ̈ܚܺܝܡܶܐ ܕܺܝܠܰܢ ܕܰܒܗܶܢܕܽܘ܆ ܗܐ ܝܰܘܡܳܢܐ ܡܶܬܪܰܕܦܺܝܢ ܐܢ̱ܬܘܢ ܡܶܛܽܠ ܗܰܝܡܳܢܽܘܬܟܽܘܢ ܠܟܽܘܪܣܝܐ ܦܶܛܪܽܘܣܳܝܐ ܕܰܐܢܛܺܝܽܘܟ. ܚܢܰܢ ܕܶܝܢ ܠܟܽܘܢ ܡܠܰܒܒܺܝܢܰܢ ܕܢܶܗܘܶܐ ܠܟܽܘܢ ܬܽܘܟܠܳܢܐ «ܕܽܐܘܠܨܳܢܳܐ ܠܰܡ ܡܣܰܝܒܪܳܢܽܘܬܐ ܓܳܡܰܪ ܒܰܢ. ܘܰܡܣܰܝܒܪܳܢܽܘܬܐ ܒܽܘܩܳܝܐ. ܘܒܽܘܩܳܝܐ ܣܰܒܪܐ. ܣܰܒܪܐ ܕܶܝܢ ܠܐ ܡܰܒܗܶܬ» (ܪ̈ܗܘܡܝܐ ܗ܆ ܕ ـ ܗ). ܡܶܢ ܡܳܪܝܐ ܢܶܒܥܶܐ ܕܚܰܝܠܐ ܢܶܬܶܠ ܠܰܢ ܕܰܒܗܰܝܡܳܢܽܘܬܐ ܢܺܐܬܶܐ ܒܩܶܛܪ̈ܶܐ ܕܰܒܥܺܕܬܐ ܕܗܶܢܕܽܘ ܠܫܽܘܠܳܡܐ ܕܫܳܦܰܪ ܠܰܫܡܶܗ ܩܰܕܺܝܫܐ܆ ܐܰܝܟܰܢܐ ܕܒܰܪܕܪܺܝܫ ܢܶܫܪܶܐ ܒܳܗ̇ ܫܠܳܡܐ.

ܠܐ ܛܰܥܝܐ ܠܰܢ ܥܺܕܬܐ ܙܥܽܘܪܬܐ ܕܗܺܝ ܗ̱ܺܝ ܫܟܺܝܚܐ ܒܟܽܠ ܝܺܩܰܪܬܐ. ܠܳܗ̇ ܗ̱ܽܘ ܓܶܝܪ ܒܚܽܘܒܐ ܪܰܒܐ ܚܳܝܪܺܝܢܰܢ܆ ܟܰܕ ܒܝܳܠܕܰܬ ܐܰܠܳܗܐ ܡܰܪܝܰܡ ܘܰܒܝܰܘܣܶܦ ܡܪܰܒܝܳܢܶܗ ܕܡܳܪܰܢ ܡܶܬܒܰܩܶܝܢܰܢ܆ ܗܳܢܽܘܢ ܕܰܐܓܥܶܠ ܠܗܽܘܢ ܐܰܠܳܗܐ ܒܪܶܗ ܝܺܚܺܝܕܳܝܐ. ܗܶܢܽܘܢ ܕܶܝܢ ܢܰܛܪܽܘܗ̇ ܠܗܰܝܡܳܢܽܘܬܐ ܗܳܕܶܐ ܡܶܢ ܟܽܠ ܢܶܟܝܳܢ̈ܺܝܢ (ܚܙܝ ܡܬܝ ܒ܆ ܝܓ ـ ܟܓ)܆ ܘܺܝܨܶܦ ܕܬܰܪܒܺܝܬܶܗ ܕܛܰܠܝܐ ܠܦܽܘܬ ܢܳܡܽܘܣܶܗ ܕܡܳܪܝܐ (ܠܘܩܐ ܒ܆ ܟܐ ـ ܢܐ). ܠܰܡܙܰܘ̈ܓܶܐ ܡܶܟܺܝܠ܆ ܡܙܰܡܢܺܝܢܰܢ ܕܢܶܗܘܽܘܢ ܢܳܛܪܺܝܢ ܠܫܽܘܘܕܳܝܗܽܘܢ ܙܰܘܓܳܝܐ ܡܩܰܕܫܳܐ ܒܗܰܝܡܳܢܽܘܬܐ܆ ܟܰܕ ܢܶܗܽܘܘܢ ܡܶܫܬܰܥܒܕܺܝܢ ܚܰܕ ܠܚܰܕ ܒܚܽܘܒܶܗ ܕܰܡܫܺܝܚܐ (ܐܦܣܝ̈ܐ ܗ܆ ܟܐ)܆ ܐܰܝܟܰܢܐ ܕܝܽܘܩܢܐ ܕܰܡܫܺܝܚܐ ܘܰܕܥܺܕܬܐ ܒܥܳܠܡܐ ܗܳܢܐ ܢܒܰܕܩܽܘܢ. ܬܽܘܒ ܕܶܝܢ ܠܰܐܒܳܗ̈ܶܐ ܘܶܐܡ̈ܗܳܬܐ ܡܓܰܪܓܺܝܢܰܢ ܕܢܶܗܘܽܘܢ ܡܪܰܒܶܝܢ ܠܰܒ̈ܢܰܝܗܽܘܢ ܥܰܠ ܫܶܬܶܐܣ̈ܶܐ ܕܗܰܝܡܳܢܽܘܬܐ ܡܶܢ ܪܰܟܺܝܟܽܘܬ ܛܰܪ̈ܦܰܝܗܽܘܢ܆ ܘܰܠܗܽܘܢ ܢܶܛܪܽܘܢ ܡܶܢ ܟܽܠ ܝܽܘܠܦܳܢܐ ܢܽܘܟܪܳܝܐ ܘܰܥܝܳܕܐ ܡܣܰܓܦܳܢܐ ܘܡܽܘܙܳܓܐ ܡܚܰܒܠܳܢܐ܆ ܘܰܒܗܰܝܡܳܢܽܘܬܐ ܘܨܰܘܡܐ ܘܰܨܠܽܘܬܐ ܘܚܽܘܒܐ ܫܰܪܺܝܪܐ ܢܩܰܝܡܽܘܢ܆ ܕܢܶܗܘܽܘܢ ܩܰܕܺܝ̈ܫܶܐ ܒܟܽܠܗܽܘܢ ܗܽܘ̈ܦܳܟܰܝܗܽܘܢ ܐܰܝܟ ܕܩܰܕܺܝܫ ܗܰܘ ܡܰܢ ܕܰܩܪܐ ܐܶܢܽܘܢ (ܐ ܦܛܪܘܣ ܐ܆ ܝܗ). ܠܰܒܢܰܝ̈ܳܐ ܕܶܝܢ ܘܰܒ̈ܢܳܬܳܐ ܡܦܰܩܕܺܝܢܰܢ ܕܠܳܐ ܢܶܪܚܡܽܘܢ ܠܥܳܠܡܐ܆ ܘܠܐ ܠܡܶܕܶܡ ܕܺܐܝܬ ܒܶܗ܆ ܐܶܠܐ ܢܶܗܘܽܘܢ ܥܳܒܕܺܝܢ ܨܶܒܝܳܢܶܗ ܕܰܐܠܳܗܳܐ ܐܰܝܟܰܢܐ ܕܰܢܩܰܘܽܘܢ ܠܥܳܠܰܡ (ܐ ܝܘܚܢܢ ܒ܆ ܝܗ ܘ ܝܙ). ܘܗܳܟܰܢܐ ܐܰܟܚܕܐ ܩܳܥܝܐ ܝܺܩܰܪܬܐ ܕܶܐܢܳܐ ܕܶܝܢ ܘܰܒܢ̈ܰܝ ܒܰܝܬܝ̱: ܠܡܳܪܝܰܐ ܗ̱ܘ ܐܰܠܳܗܐ ܦܳܠܚܺܝܢ ܚ̱ܢܰܢ (ܝܫܘܥ ܟܕ܆ ܝܗ).
ܪ̈ܚܺܝܡܶܐ ܕܺܝܠܰܢ܆ ܟܳܗ̈ܢܶܐ ܒܕܰܪ̈ܓܰܝܟܽܘܢ ܡܫܰܚ̈ܠܦܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ܆ ܢܶܗܘܶܐ ܠܰܢ ܩܰܕܺܝܫܐ ܦܰܛܪܝܰܪܟܐ ܡܳܪܝ ܣܘܝܪܝܘܣ ܪܰܒܐ܆ ܗܰܘ ܕܝܽܘܒܳܠܐ ܕܰܐܠܦܐ ܘܚܰܡܶܫܡܐܐ ܫܢ̈ܺܝܢ ܕܡܰܫܩܠܳܢܽܘܬܶܗ ܠܡܶܨܪܶܝܢ ܗܳܕܶܐ ܫܰܢ̱ܬܐ ܡܥܰܕܥܕܺܝܢܰܢ܆ ܚܰܘܪܐ ܒܗܰܝܡܳܢܽܘܬܐ. ܗܽܘ ܕܶܝܢ ܩܰܕܺܝܫܐ ܩܰܘܺܝ ܫܰܪܺܝܪ ܒܗܰܝܡܳܢܽܘܬܐ ܬܪܺܝܨܰܬ ܫܽܘܒܚܐ܆ ܘܫܳܗܰܪ ܥܰܠ ܥܺܕܬܐ ܕܰܐܢܛܺܝܽܘܟܺܝܰܐ ܘܰܡܕܰܒܰܪ ܠܳܗ̇ ܠܰܐܦ̈ܰܝ ܥܶܣܺܪܝܢ ܫܢ̈ܺܝܢ ܡܶܢ ܐܰܟܣܽܘܪܺܝܰܐ ܕܺܝܠܶܗ ܒܡܶܨܪܶܝܢ.

ܡܶܟܺܝܠ܆ ܡܚܰܦܛܺܝܢܰܢ ܠܟܽܘܢ ܕܬܶܛܪܽܘܢ ܠܓܽܘܥܠܳܢܐ (ܒ ܛܝܡܬܐܘܣ ܐ܆ ܝܕ) ܒܫܽܘܚܠܳܦ ܙܢ̈ܰܘܗ̱ܝ. ܟܳܗ̈ܢܶܐ ܡܰܢ܆ ܡܫܰܡ̈ܫܳܢܶܐ ܕܰܡܫܺܝܚܐ ܘܪ̈ܰܒܰܝ ܒ̈ܳܬܶܐ ܕܐ̱ܪ̈ܳܙܰܘܗ̱ܝ ܕܰܐܠܳܗܐ (ܐ ܩܘܪ̈ܝܢܬܝܐ ܕ܆ ܐ ـ ܒ)܆ ܗܘܰܘ ܫܳܗܪܺܝܢ ܥܰܠ ܡܰܪܥܺܝܬܐ܆ ܢܳܛܪܺܝܢ ܠܦܽܘ̈ܩܕܳܢܶܐ ܘܝܽܘ̈ܠܦܳܢܶܐ ܥܺܕ̈ܬܳܢܳܝܶܐ. ܕܰܝܪ̈ܳܝܶܐ ܓܶܝܪ ܘܕܰܝܪ̈ܳܝܳܬܐ܆ ܗܘܰܘ ܫܰܪܺܝܪ̈ܶܐ ܠܢܶܕܪ̈ܰܝܟܽܘܢ ܕܕܰܝܪܳܝܽܘܬܐ܆ ܡܶܬܟܰܫܪܺܝܢ ܒܡܰܪܕܺܝܬܟܽܘܢ ܒܗܳܠܶܝܢ ܚܰܝ̈ܶܐ ܠܡܶܡܛܐ ܠܩܰܕܺܝܫܽܘܬܐ ܘܠܰܓܡܺܝܪܽܘܬܐ. ܡܫܰܡ̈ܫܳܢܶܐ ܬܽܘܒ܆ ܗܘܰܘ ܐܳܚܕܺܝܢ ܐ̱ܪܳܙܐ ܕܗܰܝܡܳܢܽܘܬܐ ܒܬܺܐܪܬܐ ܕܟܺܝܬܐ (ܐ ܛܝܡܬܐܘܣ ܓ܆ ܛ).

ܒܢ̈ܰܝܐ ܕܺܝܠܰܢ ܪ̈ܽܘܚܳܢܳܝܶܐ ܪ̈ܚܺܝܡܐ܆ ܟܰܕ ܒܨܰܘܡܐ ܐܰܪܒܥܺܝܢܳܝܐ ܩܰܕܺܝܫܐ ܡܫܰܪܶܝܢܰܢ܆ ܠܟܽܘܢ ܡܠܰܒܒܺܝܢܰܢ ܕܰܬܫܰܪܪܽܘܢ ܗܰܝܡܳܢܽܘܬܟܽܘܢ ܒܰܨܠܽܘܬܐ ܘܨܰܘܡܐ ܘܡܶܬܒܰܩܝܳܢܽܘܬܐ ܒܩܶܪ̈ܝܳܢܶܐ ܡܩܰܕ̈ܫܶܐ ܕܺܝ̈ܠܳܢܳܝܶܐ ܕܛܰܟܣܰܬ݀ ܐܶܢܽܘܢ ܥܺܕܬܐ ܠܗܳܢܐ ܙܰܒܢܐ ܡܩܰܕܫܐ. ܘܳܐܦ ܡܚܰܦܛܺܝܢܰܢ ܠܟܽܘܢ ܕܬܶܗܘܽܘܢ ܡܗܰܝܡ̈ܢܶܐ ܒܰܡܩܰܪܒܽܘܬ ܙܶܕ̈ܩܳܬܐ܆ ܟܰܕ ܡܶܬܕܰܟܪܺܝܢ ܐܢ̱ܬܽܘܢ ܠܗܳܝ ܐܰܪܡܰܠܬܐ ܕܟܽܠ ܡܶܕܶܡ ܕܺܐܝܬ ܗ̱ܘܳܐ ܠܳܗ̇ ܐܰܪܡܝܰܬܶܗ ܒܒܶܝܬ ܓܰܙܐ ܕܗܰܝܟܠܐ (ܡܪܩܘܣ ܝܒ܆ ܡܐ ـ ܡܕ، ܠܘܩܐ ܟܐ܆ ܐ ـ ܕ). ܬܽܘܒ ܕܶܝܢ ܡܓܰܪܓܺܝܢܰܢ ܠܟܽܘܢ ܕܬܶܗܘܽܘܢ ܫܦܺܝ̈ܥܰܝ ܡܪܰܚܡܳܢܽܘܬܐ ܘܕܰܬܚܰܘܽܘܢ ܚܽܘܒܐ ܠܟܽܠܗܽܘܢ ܒܢܰܝ̈ܢܳܫܐ܆ ܐܰܝܟܰܢܐ ܕܬܶܗܘܽܘܢ ܒܰܕܡܽܘܬ ܡܰܠܦܳܢܐ ܛܳܒܐ ܕܠܐ ܐܶܬܐ ܕܢܶܫܬܰܡܰܫ ܐܶܠܐ ܕܰܢܫܰܡܶܫ (ܡܬܝ ܟ܆ ܟܚ، ܡܪܩܘܣ ܝ܆ ܡܗ). ܡܳܪܝ ܝܰܥܩܽܘܒ ܕܰܣܪܽܘܓ ܕܶܝܢ܆ ܥܰܠ ܬܶܫܡܶܫܬܶܗ ܕܡܳܪܰܢ ܠܐ̱ܢܳܫܽܘܬܐ ܒܚܰܕ ܡܶܢ ܡܺܐܡܪ̈ܰܘܗ̱ܝ ܣܩܺܝܠܳܐܺܝܬ ܟܳܬܶܒ: