ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܛܽܘܒܬܳܢܽܘܬܶܗ ܕܡܳܪܝ ܒܣܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܦܽܘܠܺܝܛܽܘ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܰܡܫܰܡ̈ܫܳܢܝܳܬܐ ܡܝܰܬܪ̈ܳܬܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.

«ܡܶܛܽܠܳܬܳܟ ܐܶܬܩܰܛܰܠܢ ܟܽܠ ܝܽܘܡ. ܘܶܐܬܚܫܶܒܢ ܐܰܝܟ ܐܶܡܖ̈ܶܐ ܠܢܶܟܣܬܳܐ » (ܡܙܡܘܪܐ 44: 22)

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:

ܠܰܡܩܰܠܳܣܽܘ ܣܳܗ̈ܕܶܐ ܝܳܐܶܐ ܠܰܢ܆ ܒܰܕܡܰܘܬܳܐ ܠܐ ܟܠܐ ܐܶܢܽܘܢ ܡܶܢ ܕܰܢܗܰܝܡܢܽܘܢ ܒܡܳܪܰܢ ܝܶܫܽܘܥ ܡܫܺܝܚܐ܆ ܘܳܐܦܠܐ ܒܛܺܝ̈ܡܶܐ ܢܙܰܒܢܽܘܢ ܬܰܘܕܺܝܬܗܽܘܢ ܘܠܐ ܠܳܗ̇ ܢܶܫܒܩܽܘܢ ܘܢܶܬܢܰܟܪܽܘܢ܆ ܐܶܠܐ ܚܰܝ̈ܰܝܗܽܘܢ ܦܪܰܥܘ ܚܠܳܦ ܗܰܝܡܳܢܽܘܬܗܽܘܢ ܫܰܪܺܝܪܬܐ. ܚܢܰܢ ܕܶܝܢ܆ ܒܢܰܝ̈ܳܐ ܕܺܝܠܗܽܘܢ ܚܢܰܢ ܕܗܳܠܶܝܢ ܕܥܒܰܪܘ ܩ̈ܶܛܠܶܐ ܕܥܰܡܐ ܘܳܐܦ ܒܢܰܚ̈ܠܰܝ ܛܶܠܳܠܰܝ̈ ܡܰܘܬܳܐ ܥܒܰܪܘ (ܡܙܡܘܪܐ 23: 4)܆ ܘܣܳܟ ܠܐ ܢܟܰܠܘ ܓܽܘܥܠܳܢܐ ܕܰܠܗܽܘܢ ܐܶܬܺܝܗܶܒ ܗ̱ܘܐ܆ ܕܗܽܘܝܽܘ ܡܰܪܓܳܢܺܝܬܐ ܕܗܰܝܡܳܢܽܘܬܐ ܫܠܺܝܚܳܝܬܐ ܒܡܳܪܰܢ ܝܶܫܽܘܥ ܡܫܺܝܚܐ܆ ܕܰܠܗܽܘܢ ܐܶܬܝܰܒܠܰܬ݀ ܒܝܰܕ ܐܰܒܳܗ̈ܳܬܐ ܢܰܚܫܺܝܪ̈ܬܳܢܶܐ ܕܥܺܕܬܐ. ܗܶܢܽܘܢ ܐܶܢܽܘܢ ܣܳܗ̈ܕܶܐ ܕܰܩܛܳܠܥܰܡܳܐ ܣܽܘܪܝܳܝܳܐ ܣܰܝܦܳܐ ܕܡܶܢܝܳܢܗܽܘܢ ܥܒܰܪ ܠܚܰܡܶܫܡܳܐܐ ܐܰܠܦܺܝ̈ܢ.

ܒܗܽܘܢ ܡܶܫܬܰܒܗܪܺܝܢܰܢ ܐܰܝܟ ܫܽܘܒܗܳܪܰܢ ܒܰܙܩܺܝܦܳܐ ܕܡܶܛܽܠܳܬܶܗ ܚܰܝ̈ܰܝܗܽܘܢ ܩܰܪܶܒܘ. ܘܥܰܠܗܳܕܶܐ ܥܳܡܠܺܝܢܰܢ ܕܕܽܘܟܪܳܢܗܽܘܢ ܚܰܝܳܐ ܢܩܰܘܶܐ ܒܬܰܪ̈ܥܝܳܬܐ ܕܟܽܠܗܽܘܢ ܒܢ̈ܰܝ ܥܺܕܬܐ܆ ܒܡܰܕܢܚܳܐ ܟܺܝܬ ܘܰܒܡܰܥܪܒܐ. ܗܳܟܰܢܐ ܕܶܝܢ܆ ܡܶܢ ܬܰܫܥ̈ܝܳܬܗܽܘܢ ܘܢܶܨ̈ܚܳܢܰܝܗܽܘܢ ܣܰܒܪܐ ܩܳܢܶܝܢܰܢ ܠܝܰܘ̈ܡܰܝܢ ܗܳܠܶܝܢ ܕܰܠܰܝܰܘ̈ܡܰܝܗܽܘܢ ܣܰܓܺܝ ܕܳܡܶܝܢ.

ܡܶܟܺܝܠ܆ ܠܟܽܘܢ ܟܳܬܒܺܝܢܰܢ܆ ܟܰܕ ܠܥܽܘܗܕܳܢܐ ܬܠܺܝܬܳܝܐ ܕܒܳܬܰܪ ܡܳܐܐ ܕܰܩܛܳܠܥܰܡܳܐ ܗܳܢܳܐ ܣܰܝܦܳܐ ܕܰܢܩܺܝܡ ܥܬܺܝܕܺܝܢܰܢ܆ ܕܢܰܕܟܰܪ ܠܟܽܘܢ ܕܒܰܟܢܽܘܫܝܐ ܥܝܳܕܳܝܐ ܕܣܽܘܢܶܗܕܽܘܣ ܕܺܝܠܰܢ ܩܰܕܺܝܫܬܐ ܕܰܐܢܛܝܽܘܟ ܕܰܫܢܰܬ 2015܆ ܬܰܚܶܡܢܰܢ ܥܺܐܕܐ ܕܣܳܗ̈ܕܶܐ ܣܽܘܪ̈ܝܳܝܶܐ ܕܣܰܝܦܐ ܒܶܗ ܒ15 ܚܙܺܝܪܳܢ ܕܟܽܠ ܫܰܢ̱ܬܐ.

ܒܕܽܘܟܪܳܢܐ ܗܳܢܳܐ ܕܶܝܢ܆ ܠܩܽܘܪܳܒܐ ܐܰܠܳܗܳܝܐ ܒܒܶܝܬ ܡܩܳܡܐ ܕܺܝܠܰܢ ܦܰܛܪܺܝܰܪܟܳܝܐ ܒܕܰܪܡܣܽܘܩ ܥܬܺܝܕܺܝܢܰܢ ܕܰܢܩܰܪܶܒ܆ ܘܬܽܘܒ ܠܟܽܠܗܶܝܢ ܡܰܪ̈ܥܝܳܬܰܢ ܡܠܰܒܒܺܝܢܰܢ ܕܳܐܦ ܗܶܢܶܝܢ ܩܽܘܪܳܒܳܐ ܐܰܠܳܗܳܝܳܐ ܘܬܰܚܪ̈ܙܳܬܐ ܕܠܳܚ̈ܡܳܢ ܠܗܳܢܐ ܦܽܘܪܣܐ ܢܶܗܘ̈ܝܳܢ ܡܩܺܝ̈ܡܳܢ܆ ܘܠܰܣܢܺܐܓܪܽܘܬܐ ܕܺܝܠܗܽܘܢ ܕܣܳܗ̈ܕܶܐ ܢܶܗܘ̈ܝܳܢ ܫܳܐܠ̈ܳܢ. ܘܳܐܦ ܠܟܽܠܟܽܘܢ ܡܚܰܦܛܺܝܢܰܢ ܕܒܰܨܠܰܘ̈ܳܬܐ ܡܶܛܽܠ ܫܰܝܢܳܐ ܘܰܫܠܳܡܐ ܒܶܗ ܒܡܰܕܢܚܳܐ ܡܶܨܥܳܝܐ ܘܰܒܟܽܠܶܗ ܥܳܠܡܐ ܬܶܗܘܽܘܢ ܩܳܝܡܺܝܢ܆ ܐܰܝܟܰܢܐ ܕܢܶܬܟܠܽܘܢ ܩܪ̈ܳܒܶܐ ܘܬܰܟܬܽܘ̈ܫܶܐ ܘܩ̈ܶܛܠܶܐ ܕܠܰܒܪܺܝܪ̈ܶܐ ܕܠܐ ܡܽܘܡ ܡܰܘܒܕܺܝܢ.

ܬܽܘܒ ܕܶܝܢ܆ ܣܰܒܪܐ ܐܺܝܬ ܠܰܢ ܕܬܶܗܘܽܘܢ ܡܶܬܟܰܫܦܺܝܢ ܡܶܛܽܠ ܚܽܘܠܡܳܢܗܽܘܢ ܘܰܗܦܽܘܟܝܗܽܘܢ ܕܡܺܝܛܪ̈ܦܽܘܠܺܝܛܽܘ ܚܛܺܝ̈ܦܶܐ ܕܚܳܠܳܒ ܡܥܰܠܝܽܘܬܗܽܘܢ ܕܦܘܠܘܣ ܝܐܙܔܝ ܘܡܳܪܝ ܓܪܝܓܘܪܝܘܣ ܝܘܚܢܢ ܐܒܪܗܡ.

ܡܶܢ ܡܳܪܝܐ ܫܳܐܠܺܝܢܰܢ ܕܰܒܚܽܘܠܡܳܢܐ ܬܩܰܘܽܘܢ. ܘܗܳܠܶܝܢ ܗܳܪܟܐ ܢܩܰܒ̈ܠܳܢ ܢܰܘܚܐ. ܘܐܒܘܢ ܕܒܫܡܝܐ ܘܫܪܟܐ

ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ – ܣܘܪܝܐ

ܝܘܡܐ ܫܒܝܥܝܐ ܕܝܪܚܐ ܕܚܙܝܪܢ ܕܫܢܬ ܒܝܚ

ܕܐܝܬܝܗ̇ ܫܢ̱ܬܐ ܚܡܝܫܝܬܐ ܕܦܛܪܝܪܟܘܬܢ