اليوبيل المئوي الخامس عشر للجوء مار سويريوس الكبير، بطريرك أنطاكية إلى مصر. المنشور البطريركي بمناسبة عيد مار سويريوس الكبير تاج السريان
ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܛܽܘܒܬܳܢܽܘܬܶܗ ܕܡܳܪܝ ܒܣܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܦܽܘܠܺܝܛܽܘ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܰܡܫܰܡ̈ܫܳܢܝܳܬܐ ܡܝܰܬܪ̈ܳܬܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.
« ܐܳܦܶܢ ܥܳܪܶܩ ܐ̱ܢܳܐ ܡܶܛܽܠ ܡܫܺܝܚܳܐ܆ ܐܶܠܳܐ ܡܶܠܬܶܗ ܠܳܐ ܥܶܪܩܰܬ. ܩܰܪܺܝܒܳܐ ܗ̱ܝ ܓܶܝܪ ܠܟܽܠ ܐܰܝܟܳܐ ܕܨܳܒܶܐ ܢܳܡܽܘܣܳܐ ܕܪܽܘܚܳܐ ܕܢܰܘܒܠܺܝܗ̇»(ܡܪܝ ܣܘܝܪܝܘܣ܆ ܐܓܪܬܐ 53)
ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:
ܡܶܢ ܐܰܟܣܽܘܪܺܝܰܐ ܕܺܝܠܶܗ ܒܡܶܨܪܶܝܢ܆ ܪܳܫܶܡ ܩܰܕܺܝܫܐ ܡܳܪܝ ܣܶܘܺܝܪܝܳܘܣ ܪܰܒܐ܆ ܦܰܛܪܝܰܪܟܐ ܕܰܐܢܛܝܽܘܟ܆ ܠܗܳܠܶܝܢ ܡ̈ܶܠܶܐ ܕܰܛܥܺܝ̈ܢܳܢ ܣܰܒܪܐ ܪܰܒܐ ܘܒܽܘܝܳܐܐ ܠܰܡܗܰܝܡ̈ܢܶܐ܆ ܟܰܕ ܥܰܠ ܗܰܠܟ̈ܳܬܐ ܕܡܳܪܝ ܦܰܘܠܳܘܣ ܫܠܺܝܚܳܐ ܪܳܕܶܐ܆ ܗܰܘ ܕܰܠܬܰܠܡܺܝܕܶܗ ܛܺܝܡܳܬܶܐܘܣ ܟܳܬܶܒ ܘܳܐܡܰܪ: «ܐܶܬܕܰܟܪ ܠܝܶܫܽܘܥ ܡܫܺܝܚܐ܉ ܕܩܳܡ ܡܶܢ ܒܶܝܬ ܡܺܝ̈ܬܶܐ܇ ܗܰܘ ܕܺܐܝܬܰܘܗ̱ܝ ܡܶܢ ܙܰܪܥܐ ܕܕܰܘܺܝܕ ܐܰܝܟ݂ ܐܶܘܰܢܓܶܠܺܝܳܘܢ ܕܺܝܠܝ̱܇ ܕܒܶܗ ܣܳܒܶܠ ܐ̱ܢܳܐ ܒܺܝ̈ܫܳܬܐ ܥܕܰܡܐ ܠܰܐܣܽܘܪ̈ܶܐ ܐܰܝܟ݂ ܥܳܒܶܕ ܒܺܝ̈ܫܳܬܐ. ܐܶܠܐ ܡܶܠܬܶܗ ܕܰܐܠܳܗܐ ܠܐ ܐܰܣܺܝܪܐ» (ܒ ܛܝܡܬܐܘܣ ܒ܆ ܚ ـ ܛ).
ܝܰܘܡܳܢܐ ܕܶܝܢ܆ ܠܫܰܢ̱ܬܐ ܗܳܕܶܐ ܕ2018 ܝܽܘܒܳܠܐ ܕܰܐܠܦܐ ܘܚܰܡܶܫܡܐܐ ܫܢ̈ܺܝܢ ܕܡܰܫܩܠܳܢܽܘܬܶܗ ܕܡܳܪܝ ܣܶܘܶܝܪܝܳܘܣ ܦܰܛܪܝܰܪܟܐ ܠܡܶܨܪܶܝܢ܆ ܡܬܰܚܡܺܝܢܰܢ. ܘܰܒܦܽܘܪܣܐ ܗܳܢܐ ܠܟܽܘܢ ܡܙܰܡܢܺܝܢܰܢ ܠܡܶܬܒܰܩܳܝܽܘ ܒܬܰܫܥܺܝܬ ܚܰܝ̈ܰܘܗ̱ܝ ܕܩܰܕܺܝܫܐ ܗܳܢܐ ܢܰܨܺܝܚܐ܆ ܘܠܰܡܡܰܪܳܝܽܘ ܒܶܗ܆ ܘܰܠܡܶܫܬܰܪܳܪܽܘ ܒܗܰܝܡܳܢܽܘܬܐ ܬܪܺܝܨܰܬ ܫܽܘܒܚܐ.
ܐܶܬܺܝܠܶܕ ܓܶܝܪ ܡܳܪܝ ܣܶܘܺܝܪܶܐ ܒܣܽܘܙܽܘܦܳܘܠܺܝܣ ܕܦܺܝܣܺܝܕܝܰܐ ܒܰܫܢܰܬ 459܆ ܘܰܩܪܐ ܠܬܘܪܨ ܡܡܠܠܐ ܘܠܰܪܗܺܝܛܪܽܘܬܐ ܒܰܐܠܟܣܰܢܕܰܪܺܝܰܐ ܝܰܘܢܳܐܺܝܬ ܘܠܰܐܬܺܝܢܳܐܺܝܬ܆ ܘܰܠܬܰܪܬܶܝܢ ܝܰܕ̈ܥܳܬܐ ܕܩܳܢܽܘ̈ܢܶܐ ܘܰܕܦܺܝܠܳܣܽܘܦܽܘܬܐ ܒܡܰܕܪܰܫܬܐ ܕܩܳܢܽܘ̈ܢܶܐ ܕܰܒܒܶܝܪܽܘܬ. ܘܰܥܡܰܕ ܒܥܺܕܬܐ ܕܰܛܪܺܝܦܳܘܠܺܝܣ ܫܢܰܬ 488. ܟܶܢ ܪܰܚܡܳܗ̇ ܠܥܳܢܘܳܝܽܘܬܐ ܘܰܗܘܐ ܕܰܝܪܳܝܐ ܒܕܰܝܪܐ ܕܡܳܪܝ ܪܽܘܡܰܐܢܳܘܣ ܕܒܰܐܬܪܐ ܕܡܰܝܽܘܡܰܐ ܕܒܰܦܠܶܫܬ. ܘܡܶܢ ܒܳܬܰܪ ܡܐ ܕܶܐܬܬܰܣܪܰܚ ܠܩܰܫܺܝܫܽܘܬܐ܆ ܒܢܳܐ ܕܰܝܪܐ ܘܩܰܘܺܝ ܥܶܣܪܝܢ ܘܰܐܪܒܰܥ ܫܢ̈ܺܝܢ ܟܰܕ ܦܳܠܰܚ ܠܰܐܠܳܗܐ܆ ܘܡܶܬܥܰܢܘܶܐ ܒܰܡܝܰܬܪ̈ܳܬܐ ܕܰܢܙܺܝܪܽܘܬܐ܆ ܘܰܐܡܺܝܢ ܡܶܫܬܟܰܚ ܗ̱ܘܐ ܒܩܶܪܝܳܢܐ ܕܰܟܬܳܒܐ ܩܰܕܺܝܫܐ ܘܰܒܗܶܪܓܐ ܕܰܣܝܳܡ̈ܶܐ ܕܬܶܐܘܳܠܳܘܓܺܝܰܐ. ܘܶܐܬܥܢܺܝ ܒܰܣܝܳܡܐ ܕܰܟܬܳܒ̈ܶܐ ܐܰܝܟܰܢܐ ܕܰܠܗܰܝܡܳܢܽܘܬܐ ܬܪܺܝܨܰܬ ܫܽܘܒܚܐ ܢܫܰܪܰܪ. ܘܗܳܟܺܝܠ ܛܶܒܶܗ ܐܶܬܦܪܶܣ ܒܟܽܠ ܕܘܽܟ. ܘܒܰܫܢܰܬ 508 ܐܰܫܩܶܠ ܥܰܡ ܡܰܐܬܶܝܢ ܕܰܝܪ̈ܳܝܶܐ ܡܶܢ ܦܠܶܫܬ ܠܩܽܘܣܛܰܢܛܺܝܢܳܘܦܳܘܠܺܝܣ ܡܶܛܽܠ ܫܽܘܪܳܪ ܗܰܝܡܳܢܽܘܬܐ܆ ܘܩܰܘܺܝ ܒܳܗ̇ ܐܰܝܟ ܬܠܳܬ ܫܢ̈ܺܝܢ ܥܕܰܡܐ ܠܰܫܢܰܬ 511.
ܘܒܳܬܰܪ ܫܰܢ̱ܬܐ ܘܝܰܪܚܐ ܡܶܕܶܡ܆ ܐܶܬܦܪܶܫ ܦܺܝܠܺܝܦܝܰܐܢܳܘܣ ܕܰܬܪܶܝܢ܆ ܦܰܛܪܝܰܪܟܐ ܕܰܐܢܛܺܝܽܘܟܺܝܰܐ܆ ܘܶܐܬܓܒܺܝ ܡܳܪܝ ܣܶܘܶܝܪܝܳܘܣ ܠܕܰܪܓܐ ܕܦܰܛܪܝܰܪܟܽܘܬܐ ܘܶܐܬܗܰܝܡܰܢ ܠܟܽܘܪܣܝܐ ܫܠܺܝܚܳܝܐ. ܘܒܶܫܬܐ ܕܬܶܫܪܺܝܢ ܐ̱ܚܪܳܝ ܫܢܰܬ 512܆ ܐܶܬܬܰܣܪܰܚ ܦܰܛܪܝܰܪܟܐ ܒܰܐܢܛܺܝܽܘܟܺܝܰܐ. ܗܳܝܕܶܝܢ ܦܬܰܚ ܠܣܺܝܡܬܐ ܕܝܰܕ̈ܥܳܬܶܗ ܘܰܐܩܶܦ ܐܳܡܰܪ ܬܽܘܪ̈ܓܳܡܶܐ ܙܡܺܝ̈ܡܶܐ ܡܶܛܽܠ ܫܽܘܪܳܪ ܗܰܝܡܳܢܽܘܬܐ ܘܬܽܘܪܳܨ ܙܢܰܝ̈ܳܐ܆ ܟܰܕ ܡܶܢ ܐܽܘܪܚܐ ܕܥܳܢܘܳܝܽܘܬܶܗ ܘܰܢܙܺܝܪܽܘܬܶܗ ܠܐ ܣܛܳܐ. ܘܒܰܫܢܰܬ 518 ܐܰܡܠܶܟ ܝܽܘܣܛܺܝܢܝܰܢܳܘܣ ܩܰܕܡܳܝܐ ܟܰܠܩܺܝܕܽܘܢܳܝ ܬܰܘܕܺܝܬܐ ܒܕܽܘܟܰܬ ܐܰܢܰܣܛܰܐܣ܆ ܘܰܫܕܳܐ ܠܰܐܟܣܽܘܪܺܝܰܐ ܠܣܰܓܺܝ̈ܶܐܐ ܡܶܢ ܐܶܦܺܝܣܩܽܘ̈ܦܰܝܢ ܐܳܪ̈ܬܳܕܽܘܟܣܽܘ. ܢܦܰܩ ܡܶܟܺܝܠ ܡܳܪܝ ܣܶܘܶܝܪܝܳܘܣ ܒܕܶܐܬܶܐܠܶܨ ܘܶܐܙܰܠ ܠܣܰܠܽܘܩܝܰܐ ܒܥܶܣܪܺܝܢ ܘܚܰܡܫܳܐ ܕܺܐܝܠܽܘܠ ܝܰܪܚܐ܆ ܟܶܢ ܐܰܫܩܶܠ ܠܡܶܨܪܶܝܢ ܒܥܶܣܪܺܝܢ ܘܬܶܫܥܳܐ ܒܶܗ ܒܝܰܪܚܐ.
ܘܰܒܪܰܚܺܝܩܽܘܬܶܗ ܕܪܳܥܝܳܗ̇ ܚܰܟܺܝܡܐ܆ ܪ̈ܕܽܘܦܝܶܐ ܩܫܰܝ̈ܳܐ ܣܶܒܠܰܬ ܕܶܝܢ ܐܰܢܛܺܝܽܘܟܺܝܰܐ܆ ܟܰܕ ܟܰܠܩܺܝܕܽܘ̈ܢܳܝܶܐ ܠܦܽܘܪܣܐ ܗܳܢܐ ܢܣܰܒ ܕܦܰܛܪܝܰܪ̈ܟܽܘ ܠܳܐ ܢܳܡܽܘ̈ܣܳܝܶܐ ܢܩܺܝܡܽܘܢ. ܗܳܟܘܳܬ ܓܶܝܪ ܫܰܪܝܰܬ ܠܳܗ̇ ܫܺܫܰܠܬܳܐ ܕܦܰܛܪܝܰܪ̈ܟܽܘ ܟܰܠܩܺܝ̈ܕܳܢܳܝܶܐ.
ܩܰܕܺܝܫܰܢ ܓܶܝܪ ܩܰܘܺܝ ܐܰܝܟ ܥܶܣܪܺܝܢ ܫܢ̈ܺܝܢ܆ ܟܰܕ ܡܕܰܒܰܪ ܠܥܺܕܬܐ ܒܝܰܕ ܐܶܓܪ̈ܳܬܶܗ ܕܰܒܗܶܝܢ ܡܒܰܝܰܐܐ ܠܝܰܠ̈ܕܶܝܗ̇ ܕܥܺܕܬܐ ܪ̈ܕܺܝܦܶܐ܆ ܘܰܡܫܰܪܰܪ ܐܶܢܽܘܢ ܒܗܰܝܡܳܢܽܘܬܐ ܕܰܫܪܳܪܐ. ܘܒܰܫܢܰܬ 535܆ ܐܰܫܩܶܠ ܠܩܽܘܣܛܰܢܛܺܝܢܳܘܦܳܘܠܺܝܣ ܟܰܕ ܩܰܒܶܠ ܩܪܳܝܬܶܗ ܕܡܰܠܟܐ ܝܽܘܣܛܺܝܢܝܰܢܶܐ ܠܰܟܢܽܘܫܝܐ ܕܡܶܛܽܠ ܚܕܳܝܽܘܬܐ܆ ܘܰܐܥܒܰܪ ܬܰܡܳܢ ܫܰܢ̱ܬܐ ܘܦܶܠܓܐ. ܟܰܕ ܝܽܘܬܪܳܢܐ ܡܶܢ ܗܳܢܐ ܟܢܽܘܫܝܐ ܠܐ ܐܶܫܟܰܚ܆ ܘܰܕܢܰܘܒܶܕ ܥܶܕܳܢܶܗ ܠܐ ܒܥܐ܆ ܗܦܰܟ ܠܡܶܨܪܶܝܢ ܒܰܡܥܰܕܪܳܢܽܘܬ ܡܰܠܟܬܐ ܣܽܘܪܝܳܝܬܐ ܬܶܐܳܘܕܳܘܪܰܐ. ܬܰܡܳܢ ܕܶܝܢ ܫܰܢܺܝ ܠܚܰܝ̈ܶܐ ܥܳܠܡܺܝ̈ܢܳܝܶܐ ܬܡܳܢܝܐ ܫܒܳܛ ܝܰܪܚܐ ܫܢܰܬ 538.
ܒܢܰܝ̈ܳܐ ܪ̈ܚܺܝܡܶܐ ܒܰܡܫܺܝܚܐ܆ ܟܰܕ ܠܗܰܝܡܳܢܽܘܬܶܗ ܫܰܪܺܝܪܬܐ ܕܦܰܛܪܝܰܪܟܐ ܡܳܪܝ̱ ܣܶܘܶܝܪܝܳܘܣ ܬܳܓܐ ܕܣܽܘܪ̈ܝܳܝܶܐ ܡܰܥ̱ܗܕܺܝܢܰܢ܆ ܘܳܐܦ ܠܚܶܟܡܬܶܗ ܒܰܡܕܰܒܪܳܢܽܘܬ ܥܺܕܬܐ ܕܰܐܢܛܺܝܽܘܟܺܝܰܐ ܡܶܬܕܰܟܪܺܝܢܰܢ܆ ܠܐ ܛܰܥܝܐ ܠܰܢ ܗܳܝ ܕܰܒܝܰܕ ܡܣܰܝܒܪܳܢܽܘܬܶܗ ܐܶܬܢܛܰܪ ܟܽܘܪܣܝܐ ܫܠܺܝܚܳܝܐ ܕܰܐܢܛܺܝܽܘܟܺܝܰܐ ܥܕܰܡܐ ܠܝܰܘܡܳܢܐ. ܟܰܕ ܡܶܬܒܰܩܶܝܢܰܢ ܒܡܶܬܓܰܘܣܳܢܽܘܬܐ ܕܦܰܛܪܝܰܪܟܐ ܕܰܒܡܶܨܪܶܝܢ ܟܰܪ ܕܳܐܦ ܡܶܠܬܐ ܐܰܠܳܗܐ ܡܒܰܣܪܐ ܥܰܡ ܒܬܽܘܠܬܐ ܡܰܪܝܰܡ ܘܝܰܘܣܶܦ ܠܡܶܦܠܰܛ ܡܶܢ ܗܶܪܳܘܕܺܝܣ ܐܶܬܓܰܘܰܣܘ܆ ܗܐ ܚܳܙܶܝܢܰܢ ܕܠܰܡ ܓܶܕ̈ܫܶܐ ܕܗܳܘܶܝܢ ܒܰܐܬܪ̈ܰܘܳܬܰܢ ܡܰܕ̈ܢܚܳܝܶܐ ܘܳܐܦ ܓܳܠܽܘܬܐ ܕܥܰܡܰܢ ܪܕܺܝܦܳܐ ܕܡܶܬܓܰܘܰܣ ܒܰܐܬܪ̈ܰܘܳܬܐ ܡܫܰܚ̈ܠܦܶܐ ܕܢܶܥܪܽܘܩ ܡܶܢ ܛܽܘܪܳܦܐ ܘܰܕܢܰܥܕܶܐ ܡܶܢ ܛܳܠܽܘܡܽܘܬ ܗܰܝܡܳܢܽܘܬܐ܆ ܘܥܰܡܶܗ ܕܩܰܕܺܝܫܰܢ ܣܰܒܪܐ ܡܶܬܥܰܛܦܺܝܢܰܢ ܘܳܐܡܪܺܝܢܰܢ ܐܰܝܟ ܕܩܰܕܶܡ ܐܶܡܰܪ܆ ܕܒܺܐܝ̈ܕܶܝܗ̇ ܠܰܡ ܕܺܝܠܳܗ̇ ܕܗܳܝ ܕܡܶܬܪܰܕܦܺܝܢ ܐܢ̱ܬܽܘܢ܆ ܒܪܰܒܽܘܬ ܩܳܠܐ ܡܰܟܪܙܺܝܢ ܐܢ̱ܬܽܘܢ. ܘܰܒܝܰܕ ܗܳܝ ܕܫܰܬܺܝܩܺܝܢ ܐܢ̱ܬܽܘܢ ܡܡܰܠܳܠܽܘ ܡܡܰܠܠܺܝܢ ܐܢ̱ܬܽܘܢ.
ܠܰܡܥܰܕܥܳܕܽܘ ܗܳܟܺܝܠ ܠܝܽܘܒܳܠܐ ܗܳܢܳܐ ܐܰܝܟ ܕܝܳܐܶܐ܆ ܚܽܘܓܬܐ ܕܗܽܘ̈ܓܳܝܶܐ ܣܽܘܪ̈ܝܳܝܶܐ ܕܰܒܦܰܛܪܝܰܪܟܽܘܬܰܢ ܡܛܰܝܒܐ ܠܠܽܘܡܳܕܐ ܕܺܝܠܳܢܝܐ ܕܥܰܠ ܡܳܪܝ ܣܶܘܶܝܪܝܳܘܣ ܪܰܒܐ ܕܰܥܬܺܝܕ ܕܢܶܬܬܩܺܝܡ ܒܒܶܝܬ ܡܩܳܡܐ ܦܰܛܪܝܰܪܟܳܝܐ ܒܰܨܗܺܝܬܐ ܕܠܶܒܢܳܢ ܝܰܘ̈ܡܰܝ 26 ܘ27 ܕܺܐܝܳܪ ܝܰܪܚܐ 2018܆ ܟܰܕ ܬܽܘܒ ܠܽܘܡܳܕܐ ܐ̱ܚܪܺܢܐ ܒܦܶܪܥܐ ܕܗܽܘ̈ܓܳܝܶܐ ܣܽܘܪ̈ܝܳܝܶܐ ܒܒܶܝܬ ܨܰܘܒܐ ܕܣܰܐܠܙܒܽܘܪܓ ܒܐܘܣܬܪܝܰܐ ܡܶܬܬܩܺܝܡ. ܘܠܽܘܡܳܕܐ ܐ̱ܚܪܺܢܐ ܡܛܰܝܒܐ ܠܶܗ ܐܶܦܛܪܽܘܦܽܘܬܐ ܦܰܛܪܝܰܪܟܳܝܬܐ ܕܰܐܠܡܰܢܝܰܐ ܒܝܰܪܚܐ ܕܬܶܫܪܺܝܢ ܩܕܺܝܡ ܥܰܡ ܒܶܝܬ ܨܰܘܒܐ ܕܗܰܝܕܶܠܒܶܝܪܓ ܥܠܰܘܗ̱ܝ ܥܰܠ ܩܰܕܺܝܫܐ ܡܪܝ ܣܶܘܶܝܪܝܳܘܣ. ܬܽܘܒ ܕܶܝܢ ܠܥܺܕܬܐ ܕܡܳܪܝ ܣܶܘܶܝܪܝܳܘܣ ܒܶܗ ܒܒܶܝܬ ܡܩܳܡܐ ܦܰܛܪܝܰܪܟܳܝܐ ܚܰܕܬܐ ܕܒܰܨܗܺܝܬܐ ܠܰܡܩܰܕܳܫܽܘ ܥܬܺܝܕܺܝܢܰܢ܆ ܘܳܐܦ ܟܬܳܒ̈ܶܐ ܕܰܥܠܰܘܗ̱ܝ ܕܡܳܪܝ ܣܶܘܺܝܪܶܐ ܠܡܶܦܪܰܣ ܨܶܒܝܳܢܐ ܐܺܝܬ ܠܰܢ.
ܡܶܢ ܐܰܠܳܗܳܐ ܫܳܐܠܺܝܢܰܢ ܕܢܶܗܘܶܐ ܥܽܘܗܕܳܢܐ ܗܳܢܐ ܠܒܽܘܪܟܬܐ ܕܟܽܠܰܢ ܒܰܨܠܰܘ̈ܳܬܳܗ̇ ܕܝܳܠܕܰܬ ܐܰܠܳܗܐ ܡܰܪܝܰܡ ܘܰܕܦܰܛܪܝܰܪܟܐ ܡܳܪܝ ܣܶܘܶܝܪܝܳܘܣ ܬܳܓܐ ܕܣܽܘܪ̈ܝܳܝܶܐ܆ ܘܰܕܟܽܠܗܽܘܢ ܙܰܕܺܝ̈ܩܶܐ ܘܣܳܗ̈ܕܶܐ ܘܩܰܕܺܝ̈ܫܶܐ. ܘܛܰܝܒܽܘ ܕܡܳܪܝܳܐ ܥܰܡܟܽܘܢ ܐܰܡܺܝܢ ܘܰܐܡܺܝܢ. ܘܐܒܘܢ ܕܒܫܡܝܐ ܘܫܪܟܐ.
ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ – ܣܘܪܝܐ
ܝܘܡܐ ܩܕܡܝܐ ܕܝܪܚܐ ܕܫܒܛ ܕܫܢܬ ܒܝܚ
ܥܐܕܐ ܕܡܪܝ ܣܘܝܪܝܘܣ ܦܛܪܝܪܟܐ ܕܐܢܛܝܘܟܝܐ
ܕܐܝܬܝܗ̇ ܫܢ̱ܬܐ ܪܒܝܥܝܬܐ ܕܦܛܪܝܪܟܘܬܢ