2015- قرارات مجمعية

ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܛܽܘܒܬܳܢܽܘܬܶܗ ܕܡܳܪܝ ܒܣܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܦܽܘܠܺܝܛܽܘ ܘܶܐܦܺܝ̈ܣܩܽܘܦܶܐ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܰܡܫܰܡ̈ܫܳܢܝܳܬܐ ܡܝܰܬܪ̈ܳܬܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ܆ ܕܰܒܛܰܝܒܽܘ ܕܰܐܠܳܗܐ ܢܛܺܝܪܺܝܢ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܺܝܠܟܽܘܢ܆ ܐܳܡܪܺܝܢܰܢ:

ܒܛܰܝܒܽܘ ܕܰܬܠܺܝܬܳܝܽܘܬܐ ܩܰܕܺܝܫܬܐ܆ ܐܶܬܟܰܢܫܰܬ݀ ܣܽܘܢܢܕܽܘܣ ܩܰܕܺܝܫܬܐ ܕܥܺܕܬܰܢ ܣܽܘܪܝܳܝܬܐ ܐܳܪܬܳܕܽܘܟܣܳܝܬܐ ܕܰܐܢܛܝܽܘܟ ܒܪܺܝܫܳܢܽܘܬܰܢ ܒܶܝܬ ܛ ܠـ ܝܕ ܒܝܰܪܚܐ ܕܚܙܺܝܪܳܢ ܒܝܗ ܒܕܰܝܪܐ ܕܡܪܝ ܐܦܪܝܡ ܣܘܪܝܝܐ ܒܡܥܪܬ ܨܝܕܢܝܐ – ܕܪܡܣܘܩ܆ ܟܰܕ ܐܶܬܛܰܝܰܒܘ ܣܽܘܓܳܐܐ ܕܗܰܕ̈ܳܡܰܝ ܣܽܘܢܢܕܽܘܣ ܘܳܐܦ ܡܺܝܛܪ̈ܦܽܘܠܺܝܛܽܘ ܕܡܰܠܰܢܟܰܪܰܐ ܕܢܳܩܦܺܝܢ ܬܪܺܝܨܳܐܺܝܬ ܠܟܽܘܪܣܝܐ ܫܠܺܝܚܳܝܐ ܕܰܐܢܛܝܽܘܟ. ܝܰܩܺܝܪ ܗ̱ܽܘ ܒܠܶܒܰܢ ܪܰܚܺܝܩܽܘܬܐ ܥܨܝܝܬܐ ܕܰܡܥܰܠܝܽܘܬܶܗ ܕܰܐܚܽܘܢ ܙܰܗܝܐ ܡܪܝ ܓܪܝܓܘܪܝܘܣ ܝܘܚܢܢ ܐܒܪܗܡ܆ ܡܺܝܛܪܦܽܘܠܺܝܛܐ ܕܚܠܒ ܘܢܶܩܦܳܝ̈ܳܬܳܗ̇܆ ܒܪܰܡ ܕܶܝܢ ܗܰܝܡܳܢܽܘܬܰܢ ܪܰܒܬܐ ܗ̱ܝ ܕܰܡܥܰܠܝܽܘܬܶܗ ܥܰܡܰܢ ܗ̱ܽܘ ܒܪܽܘܚ܆ ܘܰܡܨܰܠܶܐ ܡܶܛܽܠ ܥܺܕܬܶܗ ܘܡܶܛܽܠ ܒܢ̈ܰܝ ܡܰܪܥܺܝܬܶܗ ܕܰܒܚܳܠܳܒ ܡܕܺܝܢ̱ܬܐ ܪܚܺܝܡܬܐ ܥܕܰܟܺܝܠ ܩܳܝܡܺܝܢ.

ܒܡܶܬܛܰܝܒܳܢܽܘܬܐ ܕܥܳܠܡܳܢܳܝ̈ܶܐ ܕܰܩܪܰܝܢܰܢ ܡܶܢ ܡܰܪ̈ܥܝܳܬܐ ܣܽܘܪ̈ܝܳܝܳܬܐ ܕܰܒܟܽܠܳܗ̇ ܬܺܒܶܝܠ܆ ܫܰܪܺܝܢܰܢ ܒܰܟܢܽܘܫܝܐ ܕܣܽܘܢܢܕܽܘܣ ܩܰܕܺܝܫܬܐ ܒܰܨܠܽܘܬܐ ܕܒܳܗ̇ ܩܪܰܝܢܰܢ ܠܪܽܘܚܐ ܩܰܕܺܝܫܐ ܕܰܢܫܰܒܶܠ ܠܰܐܒܳܗ̈ܳܬܐ ܕܣܽܘܢܢܕܽܘܣ ܠܗܰܘ ܡܐ ܕܫܳܪܶܟ ܠܗܶܢܝܳܢ ܥܺܕܬܐ ܩܰܕܺܝܫܬܐ ܘܦܽܘܪܩܳܢ ܒܢ̈ܶܝܗ̇. ܬܽܘܒ ܕܶܝܢ ܨܰܠܺܝܢܰܢ ܡܶܛܽܠ ܢܝܳܚܬܐ ܕܢܰܦܫܐ ܕܩܰܕܡܳܝܰܢ ܬܠܺܝܬܳܝ ܛܽܘ̈ܒܶܐ ܦܰܛܪܝܰܪܟܐ ܡܪܝ ܐܝܓܢܛܝܘܣ ܙܟܝ ܩܕܡܝܐ܆ ܘܡܶܛܽܠ ܬܪܶܝܢ ܚܣܰܝ̈ܳܐ ܕܚܳܠܳܒ ܚܛܺܝ̈ܦܶܐ ܡܪܝ ܓܪܝܓܘܪܝܘܣ ܝܘܚܢܢ ܐܒܪܗܡ ܘܦܘܠܘܣ ܝܐܙܔܝ ܥܰܡ ܟܳܗ̈ܢܶܐ. ܘܶܐܬܒܰܩܺܝܢܰܢ ܟܽܠܰܢ ܥܰܡ ܟܽܠܰܢ ܒܰܨܚܳܚܐ ܥܣܺܝܪܳܝܐ ܕܶܐܘܰܢܓܶܠܝܽܘܢ ܕܡܪܝ ܡܬܝ ܫܠܺܝܚܐ.

ܩܰܕܡܳܝܰܬ ܡܰܢ ܚܰܘܺܝܢܰܢ ܩܰܛܺܝܢܳܐܺܝܬ ܦܽܘܠܚܳܢܐ ܕܫܰܡܠܺܝܢܰܢ ܒܥܽܘܕܪܳܢ ܐܰܠܳܗܐ ܒܫܰܢ̱ܬܐ ܩܰܕܡܳܝܬܐ ܕܦܰܛܪܝܰܪܟܽܘܬܰܢ܆ ܣܳܥܽܘܪ̈ܘܳܬܐ ܪ̈ܽܘܫܡܳܢܳܝܳܬܐ ܟܺܝܬ ܘܰܟܢܽܘ̈ܫܝܶܐ ܥܰܡ ܪ̈ܺܝܫܳܢܶܐ ܘܦܽܘܠܺܝܛܺܝܩܳܪ̈ܶܐ܆ ܘܣܳܥܽܘܪ̈ܘܳܬܐ ܕܰܟܡܐ ܡܶܢ ܡܰܪ̈ܥܝܳܬܐ ܣܽܘܪ̈ܝܳܝܳܬܐ ܕܰܒܟܽܠܳܗ̇ ܬܺܒܶܝܠ܆ ܡܰܠܽܘܢ ܕܶܝܢ ܠܗܶܢܕܽܘ ܟܰܪ ܕܫܰܝܢܐ ܘܰܫܠܳܡܐ ܒܶܝܬ ܒܢ̈ܰܝ ܥܺܕܬܐ ܟܽܠܗܽܘܢ ܐܶܬܓܠܺܝ. ܚܰܘܺܝܢܰܢ ܬܽܘܒ ܠܰܐܒܳܗ̈ܳܬܐ ܕܣܽܘܢܢܕܽܘܣ ܟܢܽܘ̈ܫܝܶܐ ܕܰܥܒܰܕܢܰܢ ܥܰܡ ܦܰܛܪܝܰܪ̈ܟܶܐ ܡܰܕܢܚܳܝ̈ܶܐ ܒܣܽܘܪܝܰܐ ܘܠܶܒܢܳܢ ܘܡܶܨܪܶܝܢ ܘܰܐܪܡܺܝܢܝܰܐ܆ ܕܺܝܠܳܢܳܐܺܝܬ ܟܢܽܘܫܝܐ ܕܪ̈ܺܝܫܳܢܶܐ ܕܥܺܕ̈ܳܬܐ ܡܰܕܢ̈ܚܳܝܳܬܐ ܕܰܒܡܰܕܢܚܐ ܡܶܨܥܳܝܐ. ܘܬܽܘܒ ܕܶܝܢ ܝܰܗ̱ܒܢܰܢ ܬܰܫܪ̈ܳܒܶܐ ܥܰܠ ܟܢܽܘ̈ܫܝܶܐ ܕܥܰܡ ܓܰܒ̈ܶܐ ܘܚܽܘܕܪ̈ܶܐ ܦܽܘܠܺܝܛܺܝܩܳܝ̈ܶܐ ܣܽܘܪ̈ܝܳܝܶܐ ܟܰܕ ܩܪܰܝܢܰܢ ܠܗܽܘܢ ܠܡܶܦܠܰܚ ܐܰܟܚܕܐ ܠܝܽܘܬܪܳܢ ܥܺܕܬܐ ܘܽܐܘܡܬܐ. ܘܳܐܦ ܡܰܠܶܠܢ ܥܰܠ ܬܰܪ̈ܡܝܳܬܐ ܘܒܶܢ̈ܝܳܢܶܐ ܚܰܕ̈ܬܶܐ ܕܝܳܨܦܳܐ ܒܩܽܘܝܳܡܗܽܘܢ ܦܰܛܪܝܰܪܟܽܘܬܐ. ܬܽܘܒ ܕܶܝܢ ܩܰܪܶܒܘ ܚܣܰܝ̈ܳܐ ܘܕܰܝܪ̈ܳܝܶܐ ܬܰܫܪ̈ܳܒܰܝܗܽܘܢ ܥܰܠ ܦܽܘܠܚܳܢܐ ܕܚܽܘ̈ܓܝܳܬܐ ܦܰܛܪܝܰܪ̈ܟܳܝܳܬܐ ܡܫܰܚ̈ܠܦܳܬܐ.

ܒܣܽܘܢܢܕܽܘܣ ܩܰܕܺܝܫܬܐ܆ ܗܪܰܓܘ ܐܰܒܳܗ̈ܳܬܐ ܠܰܣܝ̈ܳܡܶܐ ܗܳܠܶܝܢ:

ܐ- ܚܛܽܘܦܝܐ ܕܰܚܣܰܝ̈ܳܐ ܦܘܠܘܣ ܝܐܙܔܝ ܘܝܘܚܢܢ ܐܒܪܗܡ:

ܩܪܐ ܡܥܰܠܝܽܘܬܶܗ ܕܡܪܝ ܩܠܝܡܝܣ ܕܢܝܐܝܠ ܓܘܪܝܐ܆ ܡܝܛܪܦܘܠܝܛܐ ܕܒܝܪܘܬ܆ ܒܫܶܡ ܣܺܝܥܬܐ ܦܰܛܪܝܰܪܟܳܝܬܐ ܕܡܶܛܽܠ ܨܒܽܘܬܐ ܕܰܚܛܽܘܦܝܐ ܕܚܰܣܝܐ ܡܪܝ ܝܘܚܢܢ ܐܒܪܗܡ܆ ܠܬܰܫܪܳܒܐ ܕܡܰܘܕܰܥ ܕܚܰܣܝܐ ܝܘܚܢܢ ܐܒܪܗܡ ܥܕܰܟܺܝܠ ܒܚܰܝ̈ܶܐ ܗ̱ܘ܆ ܚܢܰܢ ܕܶܝܢ ܡܣܰܟܶܝܢܰܢ ܠܰܗܦܽܘܟܝܶܗ ܒܰܥܓܰܠ. ܩܳܪܶܝܢܰܢ ܕܶܝܢ ܠܟܽܠܟܽܘܢ ܕܰܬܩܰܪܒܽܘܢ ܨܠܽܘܬܐ ܬܟܺܝܒܬܐ ܡܶܛܽܠ ܡܥܰܠܝܽܘܬܶܗ ܟܰܕ ܡܫܰܪܪܺܝܢܰܢ ܡܶܬܛܰܝܒܳܢܽܘܬܰܢ ܠܰܡܩܰܪܳܒܽܘ ܟܽܠ ܙܢܐ ܕܰܡܥܰܕܪܳܢܽܘܬܰܢ ܡܳܡܽܘܢܳܝܬܐ ܘܰܣܛܰܪ ܠܳܗ̇ ܠܣܺܝܥܬܐ ܠܡܐ ܕܫܳܪܶܟ ܠܡܰܨܠܚܳܢܽܘܬܐ ܘܟܽܘܫܳܪܐ ܕܦܽܘܠܚܳܢܳܗ̇.

ܒ- ܢܳܛܽܘܪܽܘܬ ܐ̱ܪ̈ܙܶܐ ܓܰܘܳܢܳܝܬܐ ܕܣܽܘܢܢܕܽܘܣ ܩܰܕܺܝܫܬܐ:

ܦܣܰܩܢܰܢ ܕܬܶܬܥܒܶܕ ܣܺܝܥܬܐ ܡܳܠܽܘܟܳܝܬܐ ܠܰܣܝܳܡ ܫܶܬܐܶܣܬܐ ܕܦܽܘܠܚܳܢܐ ܕ«ܢܳܛܽܘܪܽܘܬ ܐ̱ܪ̈ܳܙܶܐ ܓܰܘܳܢܳܝܬܐ ܕܣܽܘܢܢܕܽܘܣ ܩܰܕܺܝܫܬܐ». ܘܗܺܝ ܗܳܕܶܐ ܣܺܝܥܬܐ ܡܫܰܡܫܐ ܟܽܠܗܽܘܢ ܦܽܘ̈ܠܚܳܢܶܐ ܕܢܳܛܽܘܪܽܘܬ ܐ̱ܪ̈ܳܙܶܐ ܓܰܘܳܢܳܝܬܐ ܥܕܰܡܐ ܠܰܟܢܽܘܫܝܐ ܕܣܽܘܢܢܕܽܘܣ ܩܰܕܺܝܫܬܐ.

ܓ- ܐܶܦܺܝܣܩܽܘ̈ܦܶܐ:

ܐܶܬܐܰܘܺܝܘ ܐܰܒܳܗ̈ܳܬܐ ܟܽܠܗܽܘܢ ܕܢܰܗܦܶܟ ܛܽܘܟܳܣܐ ܕܶܐܦܺܝܣܩܽܘܦܽܘܬܐ ܠܥܺܕܬܐ܆ ܥܰܡ ܡܰܣܪܚܳܢܽܘܬܐ ܕܶܐܦܺܝܣܩܽܘ̈ܦܶܐ ܡܶܛܽܠ ܬܶܫܡܶܫܬܐ ܕܩܶܠܳܝܬܐ ܦܰܛܪܝܰܪܟܳܝܬܐ ܘܰܕܢܶܩܢܽܘܢ ܢܶܣܝܳܢܐ ܒܫܶܕܬܐ ܕܺܝܠܗܽܘܢ܆ ܥܰܕ ܢܶܬܓܒܶܐ ܡܶܢܗܽܘܢ ܠܡܰܪ̈ܥܝܳܬܐ. ܗܳܝܕܶܝܢ ܢܶܬܥܰܠܶܐ ܠܕܰܪܓܐ ܕܡܺܝܛܪܦܽܘܠܺܝܛܐ ܘܢܶܬܺܝܗܶܒ ܠܶܗ ܩܳܠܐ ܒܣܽܘܢܢܕܽܘܣ ܩܰܕܺܝܫܬܐ.

ܥܰܠܗܳܕܶܐ܆ ܐܶܬܓܒܺܝܘ ܒܢܰܝ̈ܢ ܪ̈ܽܘܚܳܢܳܝܶܐ ܪ̈ܚܺܝܡܶܐ ܪܰܒܰܢ ܡܘܪܝܣ ܥܡܣܝܚ ܐܶܦܺܝܣܩܽܘܦܐ ܡܕܰܒܪܳܢܐ ܕܩܶܠܳܝܬܐ ܕܶܐܣܳܪ̈ܶܐ ܓܰܘܳܢܳܝ̈ܶܐ܆ ܘܪܰܒܰܢ ܓܘܪܓܝ ܓܘܪܝܐ ܐܶܦܺܝܣܩܽܘܦܐ ܡܕܰܒܪܳܢܐ ܕܰܩܠܺܝܪܺܝܩܳܝܬܐ ܬܶܐܘܳܠܳܓܳܝܬܐ ܕܡܪܝ ܐܰܦܪܝܡ܆ ܟܰܕ ܒܓܽܘܒܳܝܐ ܐ̱ܪܳܙܳܢܳܝܐ ܣܽܘܓܳܐܐ ܕܩ̈ܳܠܶܐ ܕܰܐܒܳܗ̈ܳܬܐ ܢܣܰܒܘ.

ܕ- ܡܰܪܥܺܝܬܐ ܕܚܳܠܳܒ ܘܢܶܩܦܳܝ̈ܳܬܳܗ̇:

ܫܡܰܥܘ ܐܰܒܳܗ̈ܳܬܐ ܠܬܰܫܪܳܒܐ ܪܘܺܝܚܐ ܕܪܰܒܰܢ ܦܛܪܘܣ ܩܣܝܣ܆ ܬܟܺܝܠܐ ܦܰܛܪܝܰܪܟܳܝܐ ܒܚܳܠܳܒ܆ ܥܰܠ ܐܰܝܟܰܢܳܝܽܘܬܐ ܕܡܰܪܥܺܝܬܐ ܕܚܳܠܳܒ ܥܰܡ ܥܰܣܩܽܘܬܐ ܕܺܐܝܬ ܠܰܒܢ̈ܰܝ ܡܰܪܥܺܝܬܐ.

ܒܳܬܰܪ ܗܪܽܘܓܝܐ ܩܰܛܺܝܢܐ܆ ܦܣܰܩܘ ܐܰܒܳܗ̈ܳܬܐ ܟܽܠܗܽܘܢ ܕܢܶܗܦܟܽܘܢ ܟܳܗ̈ܢܰܝ ܚܳܠܳܒ ܕܩܰܕܶܡܘ ܢܦܰܩܘ ܡܶܢܳܗ̇ ܠܬܶܫܡܶܫܬܗܽܘܢ ܒܡܰܪܥܺܝܬܐ ܕܚܳܠܳܒ ܩܕܳܡ ܝܘ ܐܒ ܒܝܗ܆ ܘܶܐܠܐ ܢܶܬܟܠܽܘܢ ܡܶܢ ܬܶܫܡܶܫܬܐ܆ ܟܰܕ ܗܺܝ ܡܰܪܥܺܝܬܐ ܚܰܝ̈ܶܐ ܡܝܰܩܪ̈ܶܐ ܠܟܳܗ̈ܢܶܝܗ̇ ܘܳܠܶܐ ܕܰܬܦܰܪܢܶܣ.

ܡܶܛܽܠ ܓܶܝܪ ܓܰܙ̈ܶܐ ܘܚܳܫ̈ܚܳܬܐ ܝܰܩܺܝܪ̈ܳܬ ܕܡܰܝ̈ܳܐ ܕܒܳܗ̇ ܒܡܰܪܥܺܝܬܐ܆ ܐܶܬܐܰܘܺܝܘ ܐܰܒܳܗ̈ܳܬܐ ܕܣܽܘܢܢܕܽܘܣ ܩܰܕܺܝܫܬܐ ܕܰܢܫܰܕܪܽܘܢ ܣܺܝܥܬܐ ܕܒܳܗ̇ ܒܰܒܨܺܝܪܽܘ ܚܰܕ ܚܰܣܝܐ܆ ܥܰܡ ܬܪܶܝܢ ܐܰܘ ܬܠܳܬܐ ܟܳܗ̈ܢܶܐ܆ ܘܥܳܠܡܳܝ̈ܶܐ ܡܶܢ ܬܪܰܝܗܽܘܢ ܡܰܘ̈ܬܒܶܐ ܕܚܳܠܳܒ. ܘܳܠܺܝܬܐ ܕܗܳܕܶܐ ܣܺܝܥܬܐ ܐܺܝܬܶܝܗ̇ ܕܰܬܝܰܒܶܠ ܠܝܰܩܺܝܪ̈ܳܬܐ ܕܒܶܝܬ ܚܰܣܝܽܘܬܐ ܘܬܰܪܬܶܝܢ ܥܺܕ̈ܳܬܐ ܙܰܒܢܳܢܳܐܺܝܬ ܠܕܽܘܟܬܐ ܡܫܰܝܰܢܬܐ ܕܓܳܒܝܐ ܣܺܝܥܬܐ ܒܰܐܘܝܽܘܬܐ ܥܰܡ ܦܰܛܪܝܰܪܟܽܘܬܐ.

ܗ- ܡܰܪ̈ܥܝܳܬܐ ܣܽܘܪ̈ܝܳܝܳܬܐ:

ܗܪܰܓܘ ܐܰܒܳܗ̈ܳܬܐ ܠܰܐܝܟܰܢܳܝܽܘܬܐ ܕܰܟܡܐ ܡܶܢ ܡܰܪ̈ܥܝܳܬܐ ܣܽܘܪ̈ܝܳܝܳܬܐ ܦܪܺܝܫܳܐܺܝܬ܆ ܘܺܐܝܬܰܝܗܶܝܢ: ܡܰܪܥܺܝܬܐ ܕܓܳܙܰܪܬܐ ܘܰܦܪܳܬ܆ ܘܶܐܦܛܪܽܘܦܽܘܬܐ ܦܰܛܪܝܰܪܟܳܝܬܐ ܕܽܐܘܪܶܫܠܶܡ ܘܰܕܝܽܘܪܕܢܳܢ܆ ܘܶܐܦܛܪܽܘܦܽܘܬܐ ܦܰܛܪܝܰܪܟܳܝܬܐ ܕܒܠܔܝܟܐ ܘܦܪܢܣܐ ܘܠܘܟܣܢܒܘܪܓ܆ ܟܰܕ ܦܣܰܩܘ ܠܦܽܘܬ ܡܐ ܕܙܳܕܶܩ ܒܨܶܒ̈ܘܳܬܐ ܕܗܳܠܶܝܢ ܡܰܪ̈ܥܝܳܬܐ.

ܩܰܒܶܠܘ ܐܰܒܳܗ̈ܳܬܐ ܕܣܽܘܢܢܕܽܘܣ ܩܰܕܺܝܫܬܐ ܕܚܰܣܝܐ ܡܪܝ ܢܝܩܘܠܐܘܣ ܡܬܝ ܥܒܕܐܠܚܕ ܢܶܗܘܶܐ ܐܶܦܛܪܽܘܦܐ ܦܰܛܪܝܰܪܟܳܝܐ ܒܶܐܣܒܢܝܐ܆ ܟܰܕ ܐܶܣܒܝܢܐ ܠܐ ܬܶܗܘܶܐ ܡܪܥܝܬܐ ܥܰܕ ܢܶܬܬܩܺܝܡ ܒܳܗ̇ ܫܽܘܬܳܐܣܐ ܕܡܰܪܥܺܝܬܐ ܐܰܟܙܢܐ ܕܫܽܘܬܳܐܣ ܥܺܕ̈ܳܬܐ ܘܡܶܬܬܰܣܪܚܳܢܽܘܬ ܟܳܗ̈ܢܶܐ.

ܡܶܛܽܠ ܒܥܳܬܶܗ ܕܡܪܝ ܝܘܠܝܘܣ ܥܒܕܐܠܚܕ ܫܐܒܘ ܕܢܶܬܦܰܪܫܽܘܢ ܐܰܬܪ̈ܰܘܳܬܐ ܣܟܢܕܝܢܦܘ̈ܝܐ ܡܶܢ ܡܰܪܥܺܝܬܐ ܕܰܣܘܺܝܕ܆ ܠܐ ܐܶܬܚܰܘܺܝܘ ܐܶܣܛܽܘ̈ܟܣܶܐ ܐܳܠܨܳܝ̈ܶܐ ܕܩܽܘܝܳܡ ܡܰܪܥܺܝܬܐ ܚܕܰܬܐ ܒܰܐܬܪ̈ܰܘܳܬܐ ܣܟܢܕܝܢܦܘ̈ܝܐ (ܦܢܠܢܕܐ܆ ܢܪܘܓ܆ ܘܕܢܡܐܪܟ). ܪܰܒܰܢ ܐܦܪܝܡ ܠܚܕܐ ܓܶܝܪ ܡܰܩܶܦ ܬܶܫܡܶܫܬܶܗ ܬܚܶܝܬ ܚܝܳܪܬܐ ܕܚܰܣܝܐ ܕܣܘܝܕ ܘܣܟܢܕܝܢܦܝܐ ܥܕܰܡܐ ܕܢܶܬܬܩܺܝ̈ܡܳܢ ܥܺܕ̈ܳܬܐ܆ ܘܢܶܬܬܰܣܪܚܽܘܢ ܟܳܗ̈ܢܶܐ ܠܗܳܠܶܝܢ ܐܰܬܪ̈ܰܘܳܬܐ ܐܰܝܟ ܕܬܶܗܘܶܐ ܠܳܗ̇ ܫܽܘܬܐܳܣܐ ܠܡܰܪܥܺܝܬܐ܆ ܩܕܳܡ ܕܢܶܬܦܣܶܩ ܦܽܘܣܩܳܢܐ ܚܰܕܬܐ ܒܗܳܕܶܐ ܨܒܽܘܬܐ.

ܘ- ܣܺܝ̈ܥܳܬܐ ܣܽܘܢܗܶܕܺܝ̈ܩܳܝܳܬܐ:

ܒܳܬܰܪ ܡܳܐ ܕܰܐܩܪܰܚܢܰܢ ܣܢܺܝܩܽܘܬܐ ܕܺܐܝܬ ܥܰܠ ܕܰܢܚܽܘܪ ܘܰܢܒܰܚܶܢ ܩܳܢܽܘ̈ܢܶܐ ܘܰܬܚܽܘ̈ܡܶܐ ܘܛܶܟ̈ܣܶܐ ܕܥܺܕܬܐ܆ ܦܣܰܩܘ ܐܰܒܳܗ̈ܳܬܐ ܗܰܕܳܡ̈ܶܐ ܕܣܽܘܢܢܕܽܘܣ ܩܰܕܺܝܫܬܐ ܕܢܶܫܬܰܟ̈ܚܳܢ ܣܺܝ̈ܥܳܬܐ ܐܶܦܺܝܣܩܽܘ̈ܦܳܝܳܬܐ ܗܳܠܶܝܢ: 1- ܣܺܝܥܬܐ ܕܰܐܣܺܝܪܽܘܬܐ ܥܰܡ ܥܺܕ̈ܳܬܐ ܣܽܘܪ̈ܝܳܝܳܬܐ܆ 2- ܣܺܝܥܬܐ ܕܰܬܚܽܘܡܐ ܕܥܺܕܬܐ ܣܽܘܪܝܳܝܬܐ ܬܪܺܝܨܰܬ ܫܽܘܒܚܐ܆ 3- ܣܺܝܥܬܐ ܕܩܳܢܽܘܢܐ ܕܰܩܢܽܘ̈ܡܶܐ ܝܳܬܳܢܳܝ̈ܶܐ܆ 4- ܣܺܝܥܬܐ ܕܛܶܟ̈ܣܶܐ ܥܺܕ̈ܬܳܢܳܝܶܐ܆ 5- ܣܺܝܥܬܐ ܕܰܩܠܺܝܪ̈ܺܝܩܳܝܳܬܐ ܣܽܘܪ̈ܝܳܝܳܬܐ. ܡܶܬܩܰܪ̈ܝܳܢ ܓܶܝܪ ܗܳܠܶܝܢ ܣܺܝ̈ܥܳܬܐ ܠܰܟܢܽܘܫܝܐ ܒܕܰܥܬܺܝܕ ܐܰܝܟ ܕܰܢܛܰܝܶܒ̈ܝ ܬܰܚܪܰܙܬܗܶܝܢ ܘܕܰܢܫܰܪ̈ܶܝܢ ܒܦܽܘܠܚܳܢܗܶܝܢ.

ܙܙ- ܡܰܘܬܒܐ ܦܰܛܪܝܰܪܟܳܝܐ ܓܰܘܳܢܳܝܐ:

ܗܪܰܓܘ ܐܰܒܳܗ̈ܳܬܐ ܕܣܽܘܢܢܕܽܘܣ ܩܰܕܺܝܫܬܐ ܘܥܳܠܡܳܝ̈ܶܐ ܡܡܰܬܠܳܢ̈ܶܐ ܕܰܟܡܐ ܡܶܢ ܡܰܘ̈ܬܒܶܐ ܕܡܰܪ̈ܥܝܳܬܐ ܣܽܘܪ̈ܝܳܝܳܬܐ܆ ܬܰܫܪܳܒܐ ܕܬܰܪܡܺܝܬܐ ܕܛܰܝܒܰܬ݀ ܠܳܗ̇ ܦܰܛܪܝܰܪܟܽܘܬܐ ܡܶܛܽܠ ܩܳܢܽܘܢܐ ܓܰܘܳܝܐ ܠܡܰܘܬܒܐ ܦܰܛܪܝܰܪܟܳܝܐ ܓܰܘܳܢܳܝܐ.

ܒܳܬܰܪ ܗܪܽܘܓܝܐ܆ ܦܣܰܩܘ ܐܰܒܳܗ̈ܳܬܐ ܕܰܢܩܰܒܠܽܘܢ ܗܳܫܳܐܺܝܬ ܠܗܳܕܶܐ ܬܰܪܡܺܝܬܐ ܕܩܳܢܽܘܢܐ ܓܰܘܳܝܐ ܕܡܰܘܬܒܐ ܦܰܛܪܝܰܪܟܳܝܐ ܓܰܘܳܢܳܝܐ܆ ܘܰܢܣܰܟܽܘܢ ܕܢܶܫܬܰܕܰܪ ܗܳܢܐ ܩܳܢܽܘܢܐ ܠܡܰܪ̈ܥܝܳܬܐ܆ ܘܢܶܬܗܪܶܓ ܒܝܰܕ ܚܣܰܝ̈ܳܐ ܘܟܳܗ̈ܢܶܐ ܘܡܰܘ̈ܬܒܶܐ ܘܢܶܫܬܰܕܪܽܘܢ ܪ̈ܶܥܝܳܢܶܐ ܠܢܳܛܽܘܪܽܘܬ ܐ̱ܪ̈ܳܙܶܐ ܓܰܘܳܢܳܝܬܐ ܕܣܽܘܢܢܕܽܘܣ ܩܰܕܺܝܫܬܐ ܩܕܳܡ ܕܢܶܫܬܰܡܠܶܐ ܡܶܬܚܐ ܕܰܫܬܐ ܝܰܪ̈ܚܺܝܢ.

ܚ- ܕܰܝܪ̈ܳܝܶܐ:

ܗܪܰܓܘ ܐܰܒܳܗ̈ܳܬܐ ܠܰܐܝܟܰܢܳܝܽܘܬܐ ܕܕܰܝܪ̈ܳܝܶܐ܆ ܕܺܝܠܳܢܳܐܺܝܬ ܗܳܠܶܝܢ ܕܰܡܫܰܡܫܺܝܢ ܒܡܰܪ̈ܥܝܳܬܐ܆ ܘܰܦܣܰܩܢܰܢ ܕܬܶܗܘܶܐ ܣܺܝܥܬܐ ܐܶܦܺܝܣܩܽܘܦܳܝܬܐ ܘܬܶܬܟܰܢܰܫ ܥܰܡ ܕܰܝܪ̈ܳܝܶܐ܆ ܚܕܳܢܐܺܝܬ ܘܰܟܢܺܝܫܳܐܺܝܬ. ܟܶܢ ܟܳܬܒܐ ܗܳܕܶܐ ܣܺܝܥܬܐ ܬܰܫܪ̈ܳܒܶܝܗ̇ ܘܰܡܫܰܕܪܐ ܠܗܽܘܢ ܠܦܰܛܪܝܰܪܟܽܘܬܐ ܟܰܪ ܕܡܶܬܗܰܪܓܺܝܢ ܘܦܽܘ̈ܣܩܳܢܶܐ ܕܚܳܫܚܺܝܢ ܡܶܬܝܰܗܒܺܝܢ.

ܛ- ܝܰܘܡܐ ܕܥܽܘܗܕܳܢܐ ܕܰܩܛܳܠܥܰܡܐ ܣܽܘܪܝܳܝܐ ܣܰܝܦܐ:

ܒܳܬܰܪ ܡܶܬܒܰܩܝܳܢܽܘܬܐ ܒܣܺܝܩܽܘ̈ܡܶܐ ܕܶܐܬܺܝܗܶܒܘ ܠܦܰܛܪܝܰܪܟܽܘܬܐ ܡܶܢ ܡܰܪ̈ܥܝܳܬܐ ܘܫܽܘ̈ܬܳܐܣܶܐ ܘܰܡܒܰܚ̈ܢܳܢܶܐ ܐܰܟܰܕܺܝ̈ܡܳܝܶܐ܆ ܐܶܬܐܰܘܺܝܘ ܐܰܒܳܗ̈ܳܬܐ ܕܰܢܬܰܚܶܡܘ ܥܽܘܗܕܳܢܐ ܕܥܺܐܕܐ ܕܣܳܗ̈ܕܶܐ ܣܽܘܪ̈ܝܳܝܶܐ ܕܣܰܝܦܐ ܒܝܽܘܡ ܝܗ ܚܙܝܪܢ ܫܰܢ̱ܬܳܢܳܐܺܝܬ.

ܝ- ܨܶܒ̈ܘܳܬܐ ܓܰܘܳܢܳܝ̈ܳܬܐ:

ܨܶܒ̈ܘܳܬܐ ܡܫܰܚ̈ܠܦܳܬܐ ܬܽܘܒ ܐܶܬܗܪ̈ܶܓܝ܆ ܥܒܽܘܪܝܐ ܕܰܬܚܽܘܡܐ ܡܶܢ ܟܳܗ̈ܢܶܐ (ܐܰܝܟ ܝܺܗܺܝܒܽܘܬ ܠܰܚܡܐ ܕܒܽܘܪܟܬܐ ܒܰܢܣܺܝܒܽܘܬܐ ܒܕܽܘܟܰܬ ܦܰܓܪܐ ܩܰܕܺܝܫܐ)܆ ܘܠܐ ܝܺܕܰܥܬܐ ܕܐ̱ܢܳܫܺܝܢ ܡܶܢ ܟܳܗ̈ܢܶܐ ܠܛܶܟ̈ܣܳܝܳܬܐ (ܡܰܥܡܽܘܕܺܝܬܐ܆ ܩܽܘܪܳܒܐ ܐܰܠܳܗܳܝܐ܆ ܨܠܰܘ̈ܳܬܐ)܆ ܐܰܘ ܚܫܰܚܬܐ ܕܰܨܠܺܝܒܐ ܕܰܩܕܳܠܐ ܡܶܛܽܠ ܒܽܘܪܟܬܐ ܕܰܟܪ̈ܺܝܗܶܐ܆ ܘܰܨܠܺܝܒܐ ܕܺܐܝܕܐ ܒܰܟܠܺܝ̈ܠܶܐ. ܘܰܐܒܳܗ̈ܳܬܐ ܟܽܠܗܽܘܢ ܠܐ ܩܰܒܶܠܘ ܠܗܳܠܶܝܢ ܗܦܽܘ̈ܟܝܶܐ ܕܥܳܒܪܺܝܢ ܠܰܬܚܽܘܡܐ ܕܥܺܕܬܐ. ܡܶܟܺܝܠ܆ ܦܳܩܕܺܝܢܰܢ ܐܰܒܳܗܳܐܺܝܬ ܠܟܳܗ̈ܢܶܐ ܠܡܶܪܕܳܐ ܠܦܽܘܬ ܛܶܟ̈ܣܶܐ ܕܥܺܕܬܐ܆ ܟܽܠ ܒܕܰܪܓܶܗ.

ܚܬܰܡܢܰܢ ܟܢܽܘܫܝܐ ܕܣܽܘܢܢܕܽܘܣ ܩܰܕܺܝܫܬܐ ܒܰܨܠܽܘܬܐ ܕܩܽܘܒܳܠܛܰܝܒܽܘܬܐ ܕܩܰܪܶܒܢܰܢ ܠܰܐܠܗܐ ܕܟܰܢܶܫ ܠܰܐܒܳܗ̈ܳܬܐ ܒܰܐܬܪܐ ܕܣܘܪܝܐ ܒܗܳܠܶܝܢ ܝܰܘ̈ܡܶܐ ܥܰܣ̈ܩܶܐ ܘܢܰܛܰܪ ܐܶܢܽܘܢ ܕܠܳܐ ܢܶܟܝܳܢ. ܬܽܘܒ ܕܶܝܢ ܨܰܠܺܝܢܰܢ ܡܶܛܽܠ ܗܦܽܘܟܝܐ ܕܰܡܥܰܠܝܽܘܬܗܽܘܢ ܒܫܰܝܢܐ ܘܚܽܘܠܡܳܢܐ ܟܰܕ ܛܥܺܝܢܺܝܢ ܨܠܰܘ̈ܳܬܰܢ ܘܒܽܘܪ̈ܟܳܬܰܢ ܫܠܺܝ̈ܚܳܝܳܬܐ ܠܰܡܗܰܝ̈ܡܢܶܐ ܕܰܒܟܽܠܳܗ̇ ܬܺܒܶܝܠ.

ܘܡܰܘܕܥܺܝܢܰܢ ܠܟܽܘܢ܆ ܚܰܒܺܝ̈ܒܰܝܢ܆ ܕܰܣܥܰܪܢܰܢ ܠܪܺܝܫܳܢܐ ܕܣܘܪܝܐ ܐܳܣܝܐ ܒܫܐܪ ܐܣܕ܆ ܗܰܘ ܕܩܰܒܶܠ ܠܰܢ ܚܰܡܺܝܡܳܐܺܝܬ ܘܫܰܪܰܪ ܡܶܫܬܰܒܗܪܳܢܽܘܬܶܗ ܒܥܺܕܬܰܢ ܣܽܘܪܝܳܝܬܐ ܕܺܐܝܬܶܝܗ̇ ܥܺܕܬܐ ܕܣܘܪܝܐ.

ܘܰܒܦܶܠܥܐ ܕܕܽܘܟܪܳܢ ܡܐܐ ܫܢ̈ܺܝܢ ܕܥܰܠ ܣܰܝܦܐ܆ ܩܰܕܶܫܢܰܢ ܒܛܰܝܒܽܘ ܕܡܳܪܝܐ ܠܡܰܕܒܚܐ ܕܥܰܠ ܫܶܡ ܣܳܗ̈ܕܶܐ ܣܽܘܪ̈ܝܳܝܶܐ ܕܣܰܝܦܐ ܒܢܶܐ܆ ܒܕܳܪܬܐ ܕܕܰܝܪܐ ܕܡܪܝ ܐܦܪܝܡ ܣܘܪܝܝܐ ܒܡܥܪܬ ܨܝܕܢܝܐ܆ ܥܰܡ ܝܽܘܩܢܐ ܚܕܰܬܐ ܕܰܡܨܰܝܪܐ ܠܣܳܗܕܽܘܬܗܽܘܢ ܥܰܠ ܐܰܦ̈ܰܝ ܗܰܝܡܳܢܽܘܬܐ. ܘܳܐܦ ܬܰܪܬܶܝܢ ܩܳܝ̈ܶܡܳܬܐ ܐܰܩܺܝܡܢܰܢ ܠܥܽܘܗܕܳܢܐ ܕܰܩܛܳܠܥܰܡܐ ܣܽܘܪܝܳܝܐ ܣܰܝܦܐ܆ ܚܕܳܐ ܡܰܢ ܒܕܰܝܪܐ ܕܡܪܝ ܐܦܪܝܡ ܣܘܪܝܝܐ ܒܡܥܪܬ ܨܝܕܢܝܐ ܘܰܐ̱ܚܪܺܬܐ ܒܓܰܢܬܐ ܕܣܳܗ̈ܕܶܐ ܣܽܘܪ̈ܝܳܝܶܐ ܕܣܰܝܦܐ ܒܕܰܪܡܣܽܘܩ ܥܰܬܺܝܩܬܐ.

ܗܳܠܶܝܢ ܕܠܰܢ ܙܳܕܩܳܐܺܝܬ ܐܶܬܚܰܙܝܰܬ݀ ܕܢܶܣܪܽܘܛ ܠܟܽܘܢ ܚܰܒܺܝ̈ܒܰܝܢ܆ ܘܠܶܒܰܢ ܣܰܒܪܐ ܡܠܶܐ ܕܡܰܩܦܺܝܬܽܘܢ ܨܠܰܘ̈ܳܬܟܽܘܢ ܡܶܛܽܠ ܥܺܕܬܐ ܘܰܡܫܰܡ̈ܫܳܢܶܝܗ̇ ܕܰܢܥܰܕܰܪ ܠܰܢ ܡܳܪܝܐ ܕܰܢܫܰܡܶܫ ܠܟܽܘܢ ܐܰܟܡܳܐ ܕܝܳܐܶܐ ܒܢܰܨܺܝܚܽܘܬ ܫܽܘܒܚܐ ܕܥܺܕܬܰܢ ܩܰܕܺܝܫܬܐ܆ ܐܶܡܐ ܕܣܳܗ̈ܕܶܐ. ܗܳܠܶܝܢ ܗܳܪܟܐ ܢܩܰܒ̈ܠܳܢ ܢܰܘܚܐ܆ ܘܛܰܝܒܽܘ ܕܡܳܪܝܐ ܥܰܡܟܽܘܢ܆ ܘܐܒܘܢ ܕܒܫܡܝܐ ܘܫܪܟܐ

ܟܬܺܝܒ ܒܩܶܠܳܝܬܰܢ ܦܰܛܪܝܰܪܟܳܝܬܳܐ ܕܰܒܕܰܪܡܣܽܘ̇ܩ ـ ܣܽܘܪܺܝܰܐ

ܒܥܣܪܝܢ ܘܚܡܫܐ ܕܝܪܚܐ ܕܚܙܝܪܢ ܕܫܢܬ ܒܝܗ

ܕܐܝܬܝܗ̇ ܫܢ̱ܬܐ ܬܪܝܢܝܬܐ ܕܦܛܪܝܪܟܘܬܢ