»ܐܰܝܟ݁ܰܢܳܐ ܕ݂ܝܳܐܶܐ ܠܰܣܒ݂ܰܪܬ݂ܶܗ ܕ݁ܰܡܫܺܝܚܳܐ: ܗܘܰܝܬ݁ܽܘܢ ܡܶܬ݁ܕ݁ܰܒ݁ܪܺܝܢ܆ ܕ݁ܶܐܢ ܐܺܬ݂ܶ݀ܐ ܐܶܚܙܶܝܟ݂ܽܘܢ܆ ܘܶܐܢ ܦ݁ܰܪܺܝܩ ܐ̱ܢܳܐ ܐܶܫܡܰܥ ܥܠܰܝܟ݁ܽܘܢ܆ ܕ݁ܩܳܝܡܺܝܢ ܐܢ̱ܬ݁ܽܘܢ ܒ݁ܰܚܕ݂ܳܐ ܪܽܘܚ ܘܒ݂ܰܚܕ݂ܳܐ ܢܦ݂ܶܫ. ܘܡܶܬ݂ܢܰܨܚܺܝܬ݁ܽܘܢ ܐܰܟ݂ܚܰܕ݂. ܒ݁ܗܰܝܡܳܢܽܘܬ݂ܳܐ ܕ݂ܶܐܘܰܢܓ݁ܶܠܺܝܽܘܢ» (ܦܝ̄ܠ ܐ:ܟܙ).
ܒܽܘܪܟܬ̥ܳܐ ܫܠܺܝܚܳܝܬܳ̊ܐ ܘܰܨܠܰܘ̈ܳܬ̥ܳܐ ܡܳܪ̈ܳܢܳܝܳܬ̥ܳܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܛܽܘܒܬ̥ܳܢܽܘܬ̥ܶܗ ܕܡܳܪܝ ܒܰܣܶܝܠܺܝܽܘ̇ܣ ܬܽܐܘܡܰܐܣ ܩܰܕܡܳܝܳܐ ܡܰܦܪܝܳܢܳܐ ܕܗܶܢܕܽܘ̇܆ ܘܰܡܥܰܠܝܽܘܬܳܐ ܕܡܺܝܛܪ̈ܦܽܘ̇ܠܺܝܛܶܐ ܪ̈ܳܡܰܝ ܐܺܝܩܳܪܳܐ܆ ܘܰܒܢܰܝ̈ܳܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬ̥ܳܐ: ܟܽܘܪ̈ܳܝܶܐ ܘܕܰܝܪ̈ܳܝܶܐ ܘܩܰܫܺܝܫ̈ܶܐ ܘܕܰܝܪ̈ܳܝܳܬ̥ܳܐ ܘܰܡܫܰܡܫܳܢ̈ܶܐ ܙܗܰܝ̈ܳܐ ܘܰܡܫܰܡܫܳܢܝ̈ܳܬ̥ܳܐ ܡܝܰܬ̊ܪ̈ܳܬ̥ܳܐ܆ ܘܫܰܪܟ̊ܳܐ ܕ̥ܥܰܡܳܐ ܕ̥ܺܝܠܰܢ ܣܽܘܪܝܳܝܳܐ ܐܳܪܬ̥ܕܽܘ̇ܟ̊ܣܳܝܳܐ ܡܝܰܩܪܳܐ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬ̥ܳܐ ܡܳܪܳܢܳܝܬܳ̊ܐ܆ ܒܰܨܠܰܘ̈ܳܬ̥ܳܐ ܕܰܒܬ̥ܽܘܠܬ̊ܳܐ ܡܰܪܝܰܡ ܝܳܠܕܰܬ ܐܰܠܳܗܳܐ܆ ܘܰܕܡܳܪܝ ܦܶܛܪܽܘ̇ܣ ܪܺܝܫܳܐ ܕܰܫܠܺܝܚ̈ܶܐ܆ ܘܫܰܪܟܳ̊ܐ ܕ̥ܣܳܗܕ̈ܶܐ ܘܩܰܕ̈ܺܝܫܶܐ܆ ܐܰܡܺܝܢ.
ܟܰܕ ܥܰܠ ܗܳܠܶܝܢ ܕܺܝܠܟ̥ܽܘܢ ܝܰܩܺܝܪ̈ܳܬ̥ܳܐ ܡܥܰܩܒܺܝܢܰܢ܆ ܠܒܽܘܪܟ̊ܬ̥ܳܐ ܫܠܺܝܚܳܝܬ̊ܳܐ ܘܰܨܠܰܘ̈ܳܬ̥ܳܐ ܡܳܪ̈ܳܢܳܝܳܬ̥ܳܐ ܕܺܝܠܰܢ ܠܟ̥ܽܘܢ ܡܫܰܟ̊ܢܺܝܢ܆ ܘܳܐܡܪܺܝܢܰܢ:
ܡܫܰܪܶܐ ܦܰܘܠܽܘ̇ܣ ܫܠܺܝܚܳܐ ܒܶܐܓܰܪܬ̥ܶܗ ܕܰܠܘܳܬ̥ ܦܺܝܠܺܝܦܣܳܝ̈ܶܐ ܟ̥ܰܕ ܬ̊ܰܘܕܺܝ ܠܰܐܠܳܗܳܐ ܡܩܰܪܶܒ܆ ܘܰܡܨܰܠܶܐ ܡܶܛܽܠܳܬ̥ܗܽܘܢ ܕܦܺܝܠܺܝܦܣܳܝ̈ܶܐ ܕܶܐܫܬܰܘܬܰܦܘ ܥܰܡܶܗ ܒܛܰܝܒܽܘ ܕܶܐܘܰܢܓܶܠܺܝܽܘ̇ܢ ܩܰܕܺܝܫܳܐ܆ ܗܳܢܰܘ ܕܶܝܢ ܛܰܝܒܽܘܬ̥ܳܐ ܕܰܣܒܰܪܬ̥ܳܐ ܕ̥ܦܽܘܪܩܳܢܳܐ܆ ܕܺܐܝܬ̥ܶܝܗ̇ ܕܶܐܘܰܢܓܶܠܺܝܽܘ̇ܢ ܩܰܕܺܝܫܳܐ.
ܘܰܩܕܳܡ ܕܰܢܣܰܝܶܟ̥ ܠܶܐܘܰܢܓܶܠܺܝܽܘ̇ܢ ܕܺܝܠܶܗ ܩܰܕܺܝܫܳܐ܆ ܟܬ̥ܰܒ ܝܽܘ̇ܚܰܢܳܢ ܫܠܺܝܚܳܐ ܥܰܠ ܗܳܢܳܐ ܫܰܪܒܳܐ ܟܰܕ ܡܒܰܕܶܩ ܥܰܠ ܢܺܝܫܳܐ ܪܳܡܳܐ ܕܡܶܛܽܠܳܬ̥ܶܗ ܟܰܬܒܶܗ ܘܶܐܡܰܪ: ܕ«ܐܳܦ݂ ܗܳܠܶܝܢ ܕ݁ܶܝܢ ܕ̊ܰܟ̥ܬ̥ܺܝ̈ܒ̥ܳܢ ܕ̊ܰܬ̥ܗܰܝܡܢܽܘܢ܆ ܕ̊ܝܶܫܽܘ̇ܥ ܗ̱ܘ ܡܫܺܝܚܳܐ ܒ̥ܪܶܗ ܕ̊ܰܐܠܳܗܳܐ܇ ܘܡܳܐ ܕ̥ܗܰܝܡܶܢܬ̊ܽܘܢ܆ ܢܶܗܘܽܘܢ ܠܟ̥ܽܘܢ ܒ̊ܰܫܡܶܗ ܚܰܝ̈ܶܐ ܕ̥ܰܠܥܳܠܰܡ» (ܝܽܘ̇ܚܰܢܳܢ ܟ: ܠܐ). ܚܰܝ̈ܶܐ ܓ̥ܶܝܪ ܗܳܠܶܝܢ ܕܰܒܝܰܕ ܐܶܘܰܢܓܶܠܺܝܽܘ̇ܢ ܩܳܢܶܐ ܠܗܽܘܢ ܐܰܝܢܳܐ ܕܰܒܝܶܫܽܘ̇ܥ ܡܫܺܝܚܳܐ ܡܗܰܝܡܶܢ܆ ܚܰܝ̈ܶܐ ܐܶܢܘܽܢ ܕܒܰܡܫܺܝܚܳܐ ܘܥܰܡܶܗ ܕܥܰܠ ܐܰܪܥܳܐ ܘܒܰܫܡܰܝܳܐ܆ ܕܶܥ̱ܗܰܕ ܐܶܢܘܽܢ ܡܳܪܰܢ ܟܰܕ ܐܳܡܰܪ: ܕܰ«ܒ̊ܨܰܘ ܟ̊ܬ̥ܳܒ̥ܐ ܕ̥ܰܒ̥ܗܽܘܢ ܡܰܣܒ̊ܪܺܝܢ ܐܢ̱ܬ̊ܽܘܢ ܕ̊ܚܰܝ̈ܶܐ ܕ̥ܰܠܥܳܠܰܡ ܐܺܝܬ̥ ܠܟ̥ܽܘܢ ܘܗܶܢܽܘܢ ܣܳܗܕ̊ܺܝܢ ܥܠܰܝ» (ܝܽܘ̇ܚܰܢܳܢ ܗ: ܠܛ). ܘܠܰܝܬ̊ܰܘܗܝ ܒܨܳܝܳܐ ܕܰܟܬ̥ܳܒ̈ܶܐ ܐܶܠܳܐ ܐܶܢ ܕܢܶܬ̥ܩܪܽܘܢ ܒܨܶܦܬܳܐ ܡܶܬ̥ܒܰܩܝܳܢܳܐܺܝܬ̥. ܘܰܐܝܢܳܐ ܕܗܳܟ̥ܰܢܳܐ ܥܳܒܶܕ܆ ܡܶܬ̥ܓ̊ܠܶܐ ܠܶܗ ܡܫܺܝܚܳܐ ܦܳܪܽܘܩܳܐ܆ ܕܰܥܠܰܘܗܝ ܡܰܐ̱ܪ̈ܙܳܢ ܟܽܠܗܶܝܢ ܢܒܺܝ̈ܰܘܳܬ̥ܳܐ ܫܰܪܺܝܪ̈ܳܬ̥ܳܐ ܕܰܒܣܶܦܪ̈ܶܐ ܕܥܰܬ̊ܺܝܩܬܳܐ ܟ̥ܬ̥ܺܝܒ̈ܳܢ ܒܓܶܠܝܳܢܳܐ ܕܡܶܢ ܐܰܠܳܗܳܐ. ܟܬܰܒܘ ܐܶܢܶܝܢ ܓܶܝܪ ܓܰܒܪ̈ܶܐ ܕܡܶܢ ܐܰܠܳܗܳܐ ܐܶܫܬܠܰܚܘ܆ ܘܰܒܚܰܝ̈ܶܐ ܛܳܒ̈ܶܐ ܐܬܕܰܒܰܪܘ܆ ܘܺܝܕܺܝܥܺܝܢ ܒܫܰܪܺܝܪܽܘܬ̥ܳܐ ܘܰܬܪܺܝܨܽܘܬ̥ܳܐ܆ ܘܶܐܬ̥ܝܰܗܒܰܬ̥݀ ܠܗܽܘܢ ܠܥܰܡܳܐ ܕܕܺܝܰܬܺܩܺܐ ܥܰܬܺ̊ܝܩܬܳܐ ܕܠܰܢܒܺܝ̈ܰܘܳܬ̥ܳܐ ܗܳܢܶܝܢ ܢܶܛܪܽܘܢ܆ ܕܺܐܝܬ̥ܰܝܗܶܝܢ ܡ̈ܶܠܶܐ ܕܰܐܠܳܗܳܐ (ܪ̈ܽܗ̱ܘܡܳܝܶܐ ܓ:ܒ) ܡܶܢܗܽܘܢ ܡܰܢ ܠܗܶܝܢ ܣܓ̥ܶܕܘ ܒܣܰܟ̥ܠܽܘ ܛܳܥܝܳܐܺܝܬ̥܆ ܘܠܳܐ ܩܪܰܘ ܐܶܢܶܝܢ ܡܶܬܒܰܩܝܳܢܳܐܺܝܬ̥܆ ܘܳܐܦܠܳܐ ܕܪܰܫܘ ܐܶܢܶܝܢ ܒܗܰܝܡܳܢܽܘܬ̥ܳܐ ܘܕ̥ܶܚܠܰܬ ܐܰܠܳܗܳܐ܆ ܕܢܶܕܥܽܘܢ ܠܙܰܒܢܳܐ ܕܡܳܪܝܳܐ ܣܥܰܪ ܐܶܢܽܘܢ. ܥܰܠܗܳܕܶܐ ܐܰܟܶܣ ܐܶܢܘܽܢ ܡܳܪܰܢ ܟܰܕ ܐܳܡܰܪ: ܕ«ܐܶܠܽܘ ܓ̥ܶܝܪ ܒ̊ܡܽܘܫܶܐ ܗܰܝܡܶܢܬ̊ܽܘܢ܆ ܐܳܦ̥ ܒ̊ܺܝ ܡܗܰܝܡܢܺܝܢ ܗ̱ܘܰܝܬ̊ܽܘܢ. ܡܽܘܫܶܐ ܓ̥ܶܝܪ ܥܠܰܝ ܟ̊ܬ̥ܰܒ̥܂ ܘܶܐܢ ܠܰܟ̥ܬ̥ܳܒ̥̈ܰܘܗ̱ܝ ܕ̊ܗܰܘ ܠܳܐ ܡܗܰܝܡܢܺܝܢ ܐܢ̱ܬ̊ܽܘܢ܆ ܐܰܝܟ̊ܰܢܳܐ ܠܡܶܠܰܝ̈ ܕ̊ܺܝܠܝ ܬ̊ܗܰܝܡܢܽܘܢ» (ܝܽܘ̇ܚܰܢܳܢ ܗ: ܡܘ ـ ܡܙ).
ܚܰܒܺܝ̈ܒܰܝܢ: ܐܶܘܰܢܓܶܠܺܝܽܘ̇ܢ ܡܰܢ ܣܳܗܕܽܘܬ̥ܳܐ ܐܺܝܬ̥ܰܘܗ̱ܝ ܫܰܪܺܝܪܬ̊ܳܐ ܐܰܠܳܗܳܝܬ̊ܳܐ܆ ܘܓ̥ܺܝܫܪܳܐ ܪܽܘܚܳܢܳܝܳܐ ܚܠܺܝܡܳܐ܆ ܕܠܰܢ ܡܝܰܒܶܠ ܠܡܶܕܰܥ ܐܽܘܪܚܳܐ ܕ̥ܚܰܝ̈ܶܐ ܕ̥ܰܠܥܳܠܰܡ. ܐܶܬ̥ܳܐ ܠܶܗ ܓ̊ܶܝܪ ܡܫܺܝܚܳܐ ܠܥܳܠܡܳܐ ܕܺܝܠܰܢ ܕܢܶܗܘܽܘܢ ܠܰܢ ܚܰܝ̈ܶܐ. (ܝܽܘ̇ܚܰܢܳܢ ܝ: ܝ) ܘܗܽܘܝܽܘ: ܐܽܘܪܚܳܐ܆ ܘܰܫܪܳܪܳܐ܆ ܘܚܰܝ̈ܶܐ. ܗܽܘ ܕ̥ܶܝܢ ܩܪܳܐ ܠܰܢ ܕ̊ܢܶܗܘܽܘܢ ܠܰܢ ܒܶܗ ܚܰܝ̈ܶܐ܆ ܝܽܗ̱ܘܕ̈ܳܝܶܐ ܕ̥ܶܝܢ ܠܳܐ ܩܰܒܠܽܘܗ̱ܝ ܥܰܠܗܳܕܶܐ ܐܶܡܰܪ ܠܗܽܘܢ: «ܘܠܳܐ ܨܳܒ̥ܶܝܢ ܐܢ̱ܬ̊ܽܘܢ ܕ̊ܬ̥ܺܐܬ̥ܽܘܢ ܠܘܳܬ̥ܝ ܕ̊ܚܰܝ̈ܶܐ ܕ̥ܰܠܥܳܠܰܡ ܢܶܗܘܽܘܢ ܠܟ̥ܽܘܢ» (ܝܽܘ̇ܚܰܢܳܢ ܗ: ܡ).
ܘܶܐܘܰܢܓܶܠܺܝܽܘ̇ܢ ܩܰܕܺܝܫܳܐ܆ ܟܬ̥ܳܒܳܐ ܐܺܝܬ̥ܰܘܗܝ ܫܰܪܺܝܪܳܐ܆ ܕܰܠܡܶܕܶܡ ܕܡܳܪܰܢ ܝܶܫܽܘ̇ܥ ܐܶܡܰܪ ܘܰܣܥܰܪ ܒܰܡܕܰܒܪܳܢܽܘܬ̥ܶܗ ܐܰܠܳܗܳܝܬ̊ܳܐ ܕ̥ܒ̥ܰܒ̥ܣܰܪ܆ ܟܬܰܒ. ܠܳܐ ܦܰܩܶܕ ܠܰܢ ܦܽܘܩܕ̈ܳܢܶܐ ܕܰܠܗܽܘܢ ܢܶܥܒܶܕ܆ ܐܳܦܠܳܐ ܦܽܘܩܳܕ̈ܶܐ ܕܰܠܗܽܘܢ ܢܫܰܡܠܶܐ܆ ܐܰܟ̥ܡܳܐ ܕܳܐܦܠܳܐ ܟܳܠܶܐ ܠܰܢ ܡܶܢ ܡܶܕܶܡ ܕܡܶܢܗܽܘܢ ܢܶܬ̥ܟ̊ܠܶܐ܆ ܡܰܠܽܘܢ ܕܶܝܢ ܡܩܰܪܶܒ ܠܰܢ ܦܪܺܝܫܳܐܺܝܬ̥ ܠܰܡܫܺܝܚܳܐ ܝܶܫܽܘ̇ܥ ܡܳܪܰܢ ܐܰܝܟ̥ ܕܽܘܡܝܳܐ ܚܰܝܳܐ ܕܰܒܚܰܝ̈ܰܘܗܝ ܢܶܬ̊ܕ̊ܰܡܶܐ܆ ܘܒܶܗ ܢܶܬܡܰܪܶܐ ܘܠܰܙܩܺܝܦܶܗ ܢܶܛܥܰܢ ܘܒܳܬܪܶܗ ܢܶܪܕܶܐ܆ ܕܰܒܝܰܕܶܗ ܚܰܝ̈ܶܐ ܕ̥ܰܠܥܳܠܰܡ ܢܶܗܘܽܘܢ ܠܰܢ. ܘܗܳܢܰܘ ܢܺܝܫܶܗ ܕܦܰܘܠܽܘ̇ܣ ܫܠܺܝܚܳܐ ܟ̥ܰܕ ܐܳܡܰܪ: «ܘܥܰܡ ܡܫܺܝܚܳܐ ܙܩܺܝܦ̥ ܐ̱ܢܳܐ. ܘܡܶܟ̊ܺܝܠ ܠܳܐ ܗ̱ܘܳܐ ܐܶܢܳܐ ܚܰܝ ܐ̱ܢܳܐ܆ ܐܶܠܳܐ ܚܰܝ ܒ̊ܺܝ ܡܫܺܝܚܳܐ. ܘܗܳܢܳܐ ܕ̥ܗܳܫܳܐ ܚܰܝ ܐ̱ܢܳܐ ܒ̥ܰܒ̥ܣܰܪ܆ ܒ̊ܗܰܝܡܳܢܽܘܬ̥ܰܐ ܗ̱ܘ ܕ̊ܰܒܪܶܗ ܕ̊ܰܐܠܳܗܳܐ ܚܰܝ ܐ̱ܢܳܐ. ܗܰܘ ܕ̊ܰܐܚܒ̥ܰܢ ܘܝܰܗ̱ܒ̥ ܢܰܦ̥ܫܶܗ ܚܠܳܦ̥ܰܝܢ» (ܓܰܠܰܛܳܝ̈ܶܐ ܒ: ܟ).
ܡܶܣܬܰܟ̊ܠܺܝܢܰܢ ܓ̊ܶܝܪ ܡܶܢ ܗܳܕܶܐ܆ ܕܠܰܡ ܡܫܺܝܚܳܝܳܐ ܫܰܪܺܝܪܳܐ ܠܰܝܬ̊ܰܘܗ̱ܝ ܐܰܝܢܳܐ ܕܰܡܫܺܝܚܳܝܳܐ ܐܺܝܬ̥ܰܘܗܝ ܒܡܰܘܠܳܕܶܗ܆ ܐܰܘ ܒܰܠܚܽܘܕ ܕܗܰܝܡܶܢ ܒܰܡܫܺܝܚܳܐ܆ ܐܰܘ ܕܒܰܫܡܶܗ ܐܶܬ̥ܥܡܶܕ܆ ܐܶܠܳܐ ܗܰܘ ܗ̱ܘ ܕܒܳܬ̥ܰܪ ܕܗܽܘ ܠܶܗ ܙܳܩܶܦ ܥܰܡܶܗ ܕܰܡܫܺܝܚܳܐ ܘܠܰܕܡܽܘܬ̥ܳܐ ܐܰܠܳܗܳܝܬ̊ܳܐ ܡܶܫܬܰܚܠܰܦ܆ ܒܰܡܫܺܝܚܳܐ ܚܳܝܶܐ܆ ܘܫܰܘܬܳ̊ܦܳܐ ܗܳܘܶܐ ܠܰܟ̥ܝܳܢܳܐ ܫܡܰܝܳܢܳܐ܆ ܚܳܝܶܐ ܒܶܗ ܗܳܝܕܶܝܟ̥ ܡܫܺܝܚܳܐ܆ ܘܠܶܗ ܡܫܺܝܚܳܐ ܙܥܽܘܪܳܐ ܥܳܒܶܕ. ܕܶܐܬ̥ܩܪܺܝܘ ܕܶܝܢ ܐ̱ܢܳܫ̈ܰܝ ܐܰܢܛܺܝܽܘ̇ܟ̥ܺܝܰܐ܆ ܬܰܠܡܺܝܕ̈ܰܘܗ̱ܝ ܕܡܳܪܰܢ܆ ܒܰܫܡܳܐ ܕܰܡܫܺܝܚܳܝ̈ܶܐ (ܦܪ̄ܟ ܝܐ: ܟܘ)܆ ܥܶܠܰܬ ܒܽܘܙܳܚܳܐ ܘܡܽܘܝܳܩܳܐ ܗ̱ܘܳܐ܆ ܐܺܝܬ̥ܰܝܗܽܘܢ ܗ̱ܘܰܘ ܓ̊ܶܝܪ ܐܰܝܠܶܝܢ ܕܰܢܩܶܦܘ ܠܰܡܫܺܝܚܳܐ ܡܫܰܚܠܦܺܝܢ ܡܶܢ ܕܚܰܢܦ̈ܶܐ ܘܝܽܗ̱ܘܕ̈ܳܝܶܐ. ܒܰܕ ܟ̊ܢܺܝܟ̥̈ܶܐ ܘܡܰܟ̊ܺܝ̈ܟ̥ܶܐ ܗ̱ܘܰܘ ܘܪ̈ܳܚܡܰܝ ܒܥܶܠܕ̈ܒܳܒܰܝܗܽܘܢ܆ ܘܫܰܪܺܝܪ̈ܶܐ ܒܗܽܘܦܳܟ̥ܰܝ̈ܗܽܘܢ ܕܥܰܡ ܒܢܰܝ̈ܢܳܫܳܐ܆ ܘܶܐܬ̥ܗܰܕܰܪܘ ܒܰܙܢܰܝ̈ܳܐ ܕܒܰܪܢܳܫܳܐ ܗܰܘ ܕܡܶܢ ܦܰܘܠܽܘ̇ܣ ܫܠܺܝܚܳܐ ܐܶܬ̥ܩܪܺܝ «ܒܰܪܢܳܫܳܐ ܕܰܐܠܳܗܳܐ» ܗܰܘ ܕ̊ܢܶܗܘܶܐ ܙܳܕܶܩ «ܓ̊ܡܺܝܪ ܘܰܠܟ̥ܽܠ ܥܒ̥ܳܕ݂ ܛܳܒ̥ ܡܫܰܠܡܳܢ» (ܒ ܛܝܡ̄ ܓ: ܝܙ). ܐ̱ܢܳܫ̈ܳܐ ܓ̥ܶܝܪ ܚܰܢ̈ܦܶܐ ܕܰܐܢܛܺܝܽܘܟ̥ܺܝܰܐ܆ ܚܳܙܶܝܢ ܗ̱ܘܰܘ ܠܫܽܘܡܳܗ̈ܶܐ ܗܳܠܶܝܢ ܐܰܝܟ̥ ܐܳܬ̥ܳܐ ܕܰܡܚܺܝܠܽܘܬ̥ܳܐ ܠܒܰܪܢܳܫܳܐ܆ ܫܽܘܡܳܗ̈ܶܐ ܐܰܝܠܶܝܢ ܕܰܡܫܺܝܚܳܝܳܐ ܒܝܳܬܶܗ ܒܗܽܘܢ ܐܶܫܬܰܡܰܗ܆ ܥܰܠܗܳܕܶܐ ܐܳܦ ܠܢܳܩܽܘܦ̈ܰܘܗ̱ܝ ܗܶܢܽܘܢ ܕܒܶܗ ܐܶܬ̥ܡܰܪܺܝܘ܆ «ܡܫܺܝܚܳܝ̈ܶܐ» ܐܶܬ̥ܩܪܺܝܘ. ܡܶܛܽܠ ܕ̊ܰܠܟ̥ܽܠ ܚܰܕ ܡܶܢܗܽܘܢ: ܡܫܺܝܚܳܐ ܙܥܽܘܪܳܐ܆ ܚܙܰܘ. ܘܰܗܘܳܐ ܠܶܗ ܫܡܳܐ ܕܰ«ܡܫܺܝܚܳܝܳܐ» ܫܡܳܐ ܕܚܽܘܬܪܳܐ ܘܢܶܨܚܳܢܳܐ ܒܕܺܝܰܬܺܩܺܐ ܚܕ̥ܰܬ̊ܳܐ. ܡܗܰܝܡܢ̈ܶܐ ܗܳܟ̥ܺܝܠ ܐܰܝܠܶܝܢ ܠܦܽܘܬ̥ ܐܶܘܰܢܓܶܠܺܝܽܘ̇ܢ ܕܰܡܫܺܝܚܳܐ ܡܶܬ̊ܕ̊ܰܒܪܺܝܢ܆ ܗܶܢܽܘܢ ܐܶܢܘܢ ܐܰܝܠܶܝܢ ܕܩܰܒܠܽܘܗ̱ܝ ܠܰܡܫܺܝܚܳܐ ܘܒܶܗ ܐܶܬ̥ܡܰܪܺܝܘ܆ «ܐܰܝܠܶܝܢ ܕ̊ܶܝܢ ܕ̊ܝܰܗ̱ܒ̥ ܠܗܽܘܢ ܫܽܘܠܛܳܢܳܐ ܕ̥ܰܒ̥ܢܰܝ̈ܳܐ ܕ̥ܰܐܠܳܗܳܐ ܢܶܗܘܽܘܢ ܠܰܐܝܠܶܝܢ ܕ̊ܰܡܗܰܝܡܢܺܝܢ ܒ̊ܰܫܡܶܗ܂ ܐܰܝܠܶܝܢ ܕ̊ܠܰܘ ܡܶܢ ܕ̊ܡܳܐ ܘܠܳܐ ܡܶܢ ܨܶܒ̥ܝܳܢܳܐ ܕ̥ܒ̥ܶܣܪܳܐ ܘܠܳܐ ܡܶܢ ܨܶܒ̥ܝܳܢܳܐ ܕ̥ܓ̥ܰܒܪܳܐ ܐܶܠܳܐ ܡܶܢ ܐܰܠܳܗܳܐ ܐܶܬ̥ܺܝܠܶܕ̥ܘ» (ܝܽܘ̇ܚܰܢܳܢ ܐ: ܝܒ ـ ܝܓ). ܗܳܢܽܘܢ ܕܟ̥ܳܦܪܺܝܢ ܒܢܰܦܫ̈ܳܬ̥ܗܽܘܢ ܘܠܰܡܫܺܝܚܳܐ ܚܳܐܶܝܢ܆ ܡܶܛܽܠ ܚܰܝ̈ܶܐ ܕܰܡܫܺܝܚܳܐ ܫܽܘܪܳܝܳܐ ܗ̱ܘܰܘ ܠܚܰܝ̈ܶܐ ܕܗܶܢܘܽܢ ܒܶܗ ܗܰܝܡܶܢܘ܆ ܕ̊ܺܐܝܬ̥ܰܘܗ̱ܝ ܪܺܝܫܳܐ ܕ̥ܺܝܠܗܽܘܢ ܘܗܶܢܽܘܢ ܗܰܕ̈ܳܡܶܐ ܕܦܰܓ̥ܪܶܗ ܘܰܐܝܟ̥ ܡܶܠܰܬ ܦܰܘܠܽܘ̇ܣ ܫܠܺܝܚܳܐ «ܡܶܛܽܠ ܕ̊ܗܰܕ̊̈ܳܡܶܐ ܚܢܰܢ ܕ̊ܦ̥ܰܓ̥ܪܶܗ ܘܡܶܢ ܒ̊ܶܣܪܶܗ ܚܢܰܢ ܘܡܶܢ ܓ̊ܰܪ̈ܡܰܘܗ̱ܝ» (ܐܦܣܝ̈ܐ ܗ: ܠ) «ܕ̊ܺܝܠܰܢ ܕ̊ܶܝܢ ܦ̊ܽܘܠܚܳܢܰܢ ܒ̊ܰܫܡܰܝܰܐ ܗ̱ܘ ܘܡܶܢ ܬ̊ܰܡܳܢ ܡܣܰܟ̊ܶܝܢܰܢ ܠܡܰܚܝܳܢܳܐ ܠܡܳܪܰܢ ܝܶܫܽܘ̇ܥ ܡܫܺܝܚܳܐ» (ܦܝ̄ܠ ܓ: ܟ). ܚܢܰܢ ܕܶܝܢ ܒܢܰܝ̈ܳܐ ܚܢܰܢ ܕܰܫܡܰܝܳܐ.
ܙܳܕܶܩ ܠܰܢ ܕܢܶܕܰܥ ܠܘܳܠܺܝܬ̥ܰܢ ܕܰܒܚܰܝ̈ܶܐ ܕܺܝܠܰܢ ܕܥܰܠ ܐܰܪܥܳܐ܆ ܕܰܫܠܺܝܚ̈ܶܐ ܚܢܰܢ ܕܰܡܫܺܝܚܳܐ܆ ܘܰܟ̥ܬ̥ܳܒܶܗ ܕܰܩܪܶܐ ܡܶܢ ܒܢܰܝ̈ܢܳܫܳܐ܆ ܘܪܺܝܚܶܗ ܒܰܣܺܝܡܳܐ. ܥܰܠܗܳܕܶܐ ܙܳܕܶܩ ܠܰܢ ܕܰܒܚܰܝ̈ܶܐ ܕܺܝܠܰܢ ܕ̈ܳܘܰܝܳܐ ܕܥܰܠ ܐܰܪܥܳܐ ܐܰܝܠܶܝܢ ܕܰܠܩܶܨܰܢ ܥܳܠܡܺܝܢܳܝܳܐ ܡܬܰܚܡܺܝܢ܆ ܕܢܶܬ̊ܕ̊ܰܒܰܪ ܒܗܽܘܢ ܐܰܝܟ̥ ܕܝܳܐܶܐ ܠܰܣܒܰܪܬ̥ܶܗ ܕܰܡܫܺܝܚܳܐ ܟ̥ܰܕ ܠܩܳܢܽܘܢܳܐ ܕܡܰܠܟ̊ܽܘܬ̥ܶܗ ܕܰܐܠܳܗܳܐ ܢܶܗܪܽܘܓ ܗܰܘ ܕܠܶܗ ܠܰܢ ܡܚܰܘܶܐ ܡܳܪܝܳܐ ܒܶܐܘܰܢܓܶܠܺܝܽܘ̇ܢ ܕܺܝܠܶܗ ܩܰܕܺܝܫܳܐ܆ ܘܕܰܢܚܰܘܶܐ ܚܰܝ̈ܰܘܗܝ ܕܡܳܪܰܢ ܒܚܰܝ̈ܶܐ ܕ̥ܺܝܠܰܢ. ܐܶܢܗܽܘ ܓܶܝܪ ܕܢܶܪܢܶܐ ܐܰܘ ܕܰܢܡܰܠܶܠ ܐܰܘ ܕܢܶܥܒܶܕ ܡܶܕܶܡ ܐܰܝܢܳܐ ܕܗܽܘ܆ ܐܺܝܬ̥ ܠܰܢ ܕܰܠܢܰܦܫ̈ܳܬ̥ܰܢ ܢܫܰܐܶܠ: ܕܠܰܡ ܐܶܢܗܽܘ ܕܰܡܫܺܝܚܳܐ ܒܕܽܘܟ̊ܬܰܢ ܗ̱ܘܳܐ܆ ܥܳܒܶܕ ܗ̱ܘܳܐ ܟ̥ܰܝ ܗܳܟ̥ܰܢ؟ ܘܢܶܥܒܶܕ ܠܰܢ ܗܰܘ ܕܰܡܫܺܝܚܳܐ ܨܳܒܶܐ ܠܡܶܥܒܰܕ܆ ܘܰܒܡܶܠܬ̥ܳܐ ܐ̱ܚܪܺܬ̥ܳܐ܆ ܢܺܐܡܰܪ ܠܶܗ: ܕܢܶܗܘܶܐ ܨܶܒܝܳܢܳܟ̥ ܘܠܳܐ ܨܶܒܝܳܢܰܢ.
ܐܺܝܢ܆ ܟ̊ܰܕ ܠܶܐܘܰܢܓܶܠܺܝܽܘ̇ܢ ܩܰܕܺܝܫܳܐ ܒܪܽܘܚܳܐ ܢܶܗܪܽܘܓ ܕܰܨܠܽܘܬ̥ܳܐ܆ ܘܫܰܦܺܝܪܽܘܬ̥ ܕܶܚܠܬ̥ܳܐ܆ ܘܕܶܚܠܰܬ ܐܰܠܳܗܳܐ܆ ܡܶܬ̥ܓ̊ܠܶܐ ܠܰܢ ܗܳܝܕܶܝܢ ܨܶܒܝܳܢܳܐ ܕܰܐܠܳܗܳܐ ܘܡܶܬܓܰܠܝ̈ܳܢ ܐܳܦ ܢܰܦܫ̈ܳܬ̥ܰܢ ܩܕܳܡܰܝܢ܆ ܘܡܫܰܡܠܝܳܢ̈ܶܐ ܢܶܬ̥ܚܙܶܐ ܒܰܥܒܳܕ̈ܶܐ ܘܡ̈ܶܠܶܐ ܘܬ̥ܰܪ̈ܥܝܳܬ̥ܳܐ ܕܺܝܠܰܢ ܒܳܗ̇ ܒܰܕܡܽܘܬ̥ܶܗ ܕܰܡܫܺܝܚܳܐ܆ ܢܺܚܶܐ ܗܳܝܕܶܝܢ ܒܶܗ ܘܗܽܘ ܕܶܝܢ ܒܰܢ ܢܺܚܶܐ. ܘܗܳܟ̥ܰܢ ܥܳܒܪܺܝܢ ܗܳܘܶܝܢܰܢ ܡܶܢ ܗܰܝܡܳܢܽܘܬ̥ܳܐ ܬܰܪܥܺܝܬܳܢܳܝܬ̊ܳܐ܆ ܠܗܰܝܡܳܢܽܘܬ̥ܳܐ ܣܽܘܥܪܳܢܳܝܬ̊ܳܐ. ܡܶܛܽܠ ܗܰܝܡܳܢܽܘܬ̥ܳܐ ܕܠܳܐ ܥܒܳܕ̈ܶܐ ܡܺܝܬ̥ܳܐ ܗ̱ܝ. ܡܫܺܝܚܳܐ ܠܰܡ ܫܳܡܪܳܝܳܐ ܛܳܒܳܐ܆ ܒܥܳܐ ܡܶܢܰܢ ܕܢܶܕܰܥ ܕ«ܬ̊ܶܫܡܶܫܬ̊ܳܐ ܓ̥ܶܝܪ ܕ̊ܟ̥ܺܝܬ̥ܳܐ ܘܩܰܕ̊ܺܝܫܬ̊ܳܐ ܩܕ̥ܳܡ ܐܰܠܳܗܳܐ ܐܰܒ̥ܳܐ ܗܳܕ̥ܳܐ ܗ̱ܝ: ܠܡܶܣܥܰܪ ܝܰܬ̊ܡ̈ܶܐ ܘܰܐܪ̈ܡܠܳܬ̥ܳܐ ܒ̥ܽܐܘܠܨܳܢܰܝ̈ܗܽܘܢ ܘܰܠܡܶܛܰܪ ܐ̱ܢܳܫ ܢܰܦ̥ܫܶܗ ܡܶܢ ܥܳܠܡܳܐ ܕ̥ܠܳܐ ܛܽܘܠܫܳܐ» (ܝܰܥܩܽܘ̇ܒ ܐ: ܟܙ).
ܗܳܟ̥ܰܢܳܐ ܓ̥ܶܝܪ ܗ̱ܘܰܘ ܡܫܺܝܚܳܝ̈ܶܐ ܫܰܪܺܝܪ̈ܶܐ ܕܰܒܫܽܘܪܳܝ ܡܫܺܝܚܳܝܽܘܬ̥ܳܐ܆ ܣܳܗܕ̈ܶܐ ܫܰܪܺܝܪ̈ܶܐ ܒܚܰܝ̈ܰܝܗܽܘܢ ܝܰܘܡܳܢܳܝ̈ܶܐ. ܘܰܒܗܳܕܶܐ ܐܰܝܟܰܢܽܘ ܢܓ̥ܰܕܘ ܠܰܒܢܰܝ̈ܢܳܫܳܐ ܠܘܳܬ ܡܳܪܝܳܐ ܘܗܰܝܡܶܢܘ ܒܶܗ ܘܰܩܢܰܘ ܚܰܝ̈ܶܐ.
ܐܺܝܢ܆ ܠܰܘ ܦܫܺܝܩܺܝܢ ܐܶܢܽܘܢ ܚܰܝ̈ܶܐ ܗܳܠܶܝܢ ܕܒܰܡܫܺܝܚܳܐ܆ ܐܶܠܳܐ ܠܫܽܘܪܳܪܳܐ ܣܢܺܝܩܺܝܢ ܘܠܰܐܓ̥ܽܘܢܳܐ ܘܰܡܣܰܝܒܪܳܢܽܘܬ̥ܳܐ ܘܰܕܢܶܣܒܽܘܠ ܐ̱ܢܳܫ ܥܰܠ ܛܽܘܪ̈ܳܦܶܐ ܐܰܝܟ̥ ܦܳܠܚܳܐ ܛܳܒܳܐ ܕܰܡܫܺܝܚܳܐ. ܘܰܒܟ̥ܽܠܗܶܝܢ ܗܳܠܶܝܢ܆ ܐܶܘܰܢܓܶܠܺܝܽܘܢ: ܒܽܘܝܳܐܳܐ ܐܺܝܬ̥ܰܘܗܝ ܒܰܙܒܰܢ ܥܳܩܬ̥ܳܐ܆ ܘܣܰܒܪܳܐ ܒܙܰܒܢܳܐ ܕܰܦܣܳܩ ܣܰܒܪܳܐ. ܘܡܶܢ ܠܳܐ ܦܪܽܘܣ ܐܺܝܬ̥ ܠܗܽܘܢ ܠܰܡܗܰܝܡܢ̈ܶܐ ܕܒܰܫܪܳܪܳܐ ܢܩܽܘܡܽܘܢ ܐܰܝܟ̥ ܦܽܘܩܳܕܶܗ ܕܦܰܘܠܽܘ̇ܣ ܫܠܺܝܚܳܐ ܕܠܰܢ ܟ̊ܰܕ ܐܳܡܰܪ: «ܐܶܫܡܰܥ ܥܠܰܝܟ̊ܽܘܢ ܕ̊ܩܳܝܡܺܝܢ ܐܢ̱ܬ̊ܽܘܢ ܒ̊ܰܚܕ݂ܳܐ ܪܽܘܚ ܘܒ̥ܰܚܕ̥ܳܐ ܢܦ̥ܶܫ» (ܦܝ̄ܠ ܐ: ܟܙ).
ܡܗܰܝܡܢ̈ܶܐ ܗܳܟ̥ܺܝܠ ܗܳܢܽܘܢ ܕܰܐܟ̥ܡܳܐ ܕܝܳܐܶܐ ܠܶܐܘܰܢܓܶܠܺܝܽܘ̇ܢ ܡܶܬ̊ܕ̊ܰܒܪܺܝܢ܆ ܠܳܐ ܡܶܬ̥ܒܰܣܬܪܺܝܢ ܘܠܳܐ ܚܳܝܒܺܝܢ ܐܳܦܠܳܐ ܡܶܙܕܟ̥ܶܝܢ܆ ܐܶܠܳܐ ܒܟ̥ܽܠܙܒܰܢ ܩܳܝܡܺܝܢ ܟܰܕ ܡܫܰܪܪܺܝܢ. ܐܳܦ ܠܚܰܫ̈ܶܐ ܡܰܘܗܰܒܬ̥ܳܐ ܚܫܺܝܒܺܝܢ ܠܗܽܘܢ ܡܶܢ ܐܰܠܳܗܳܐ܆ ܐܰܝܟ̥ ܕܰܐܡܺܝܪܳܐ ܠܡܳܪܝ ܦܰܘܠܽܘ̇ܣ ܫܠܺܝܚܳܐ: ܕ«ܘܗܳܕ݂ܶܐ ܡܶܢ ܐܰܠܳܗܰܐ ܗ̱ܘ ܐܶܬ̥ܝܰܗܒ̊ܰܬ̥݀ ܠܟ̥ܽܘܢ܆ ܕ̊ܠܳܐ ܒ̥ܰܠܚܽܘܕ̥ ܡܗܰܝܡܳܢܽܘ ܬ̥ܗܰܝܡܢܽܘܢ ܒ̊ܶܗ ܒ̊ܰܡܫܺܝܚܳܐ܆ ܐܶܠܳܐ ܐܳܦ̥ ܕ̊ܥܰܠ ܐܰܦ̊ܰܘ̈ܗ̱ܝ ܬ̊ܶܚܫܽܘܢ» (ܦܝ̄ܠ ܐ: ܟܛ). ܚܰܝ̈ܶܐ ܕܒܰܡܫܺܝܚܳܐ ܬ̥ܽܘܒ ܡܶܬܒܰܥܝܳܐ ܠܗܽܘܢ ܕܢܶܗܘܽܘܢ ܒـܰ«ܚܕ̥ܳܐ ܪܽܘܚ». ܒܰܪܢܳܫܳܐ ܡܰܢ ܡܶܬܚܰܝܰܕ ܒܪܽܘܚ ܥܰܡ ܡܫܺܝܚܳܐ ܘܥܰܡ ܦܰܓܪܶܗ ܐ̱ܪܳܙܳܢܳܝܳܐ ܕܰܡܫܺܝܚܳܐ܆ ܕܺܐܝܬ̥ܰܘܗܝ ܥܺܕܬܳ̊ܐ܆ ܘܗܳܘܝܳܐ ܠܶܗ ܫܰܘܬܳ̊ܦܽܘܬ̥ܳܐ ܒܰܣܒܰܪܬ̥ܶܗ ܕܰܡܫܺܝܚܳܐ܆ ܗܳܢܰܘ ܡܶܕܶܡ ܕܡܶܛܽܠܳܬ̥ܶܗ ܒܫܽܘܪܳܝ ܐܶܓܰܪܬ̥ܶܗ ܦܰܘܠܽܘ̇ܣ ܫܠܺܝܚܳܐ ܐܰܘܕܺܝ ܠܡܳܪܝܳܐ܆ ܘܰܟܬܰܒ ܡܶܛܽܠ ܚܕܳܝܽܘܬ̥ܳܐ ܕܰܒܚܰܕ ܟܢܽܘܫܝܳܐ܆ ܘܰܚܕܳܝܽܘܬ̥ܳܐ ܕܪܽܘܚܳܐ ܕܒܰܚܕܳܐ ܝܺܩܰܪܬ̊ܳܐ ܘܚܰܕ ܒܰܝܬܳ̊ܐ.
ܚܰܒܺܝ̈ܒܰܝܢ܆ ܝܰܨܺܝܦܺܝܢܰܢ ܕܰܒܗܳܢܳܐ ܙܰܒܢܳܐ ܩܰܠܺܝܠܳܐ܆ ܕܰܢܫܰܪܰܪ ܥܰܠ ܚܕܳܝܽܘܬܳܐ ܕܺܝܩܰܪܬ̊ܳܐ. ܒܕܳܪܰܢ ܓܶܝܪ ܗܳܢܳܐ ܐܶܫܬܪ̈ܺܝ̣ܝ ܡܶܢܗܶܝܢ ܕܝܰܩܪ̈ܳܬ̥ܳܐ ܡܫܺܝܚܳܝ̈ܳܬ̥ܳܐ ܕܰܐܪ̈ܚܶܩܝ ܠܗܶܝܢ ܡܶܢ ܡܫܺܝܚܳܐ. ܡܳܐ ܦܰܐܝܳܐ ܗ̱ܝ ܕܢܶܗܘܶܐ ܡܫܺܝܚܳܐ ܡܳܪܳܐ ܕܺܝܩܰܪܬ̊ܳܐ ܘܪܺܝܫܳܗ̇!. ܘܰܟ̥ܡܳܐ ܫܰܦܺܝܪ ܕ̊ܢܶܬ̊ܕ̊ܰܒܪܽܘܢ ܗܰܕ̈ܳܡܰܝ ܝܺܩܰܪܬ̊ܳܐ ܐܰܟ̥ܡܳܐ ܕܝܳܐܶܐ ܠܰܣܒܰܪܬ̥ܶܗ ܕܰܡܫܺܝܚܳܐ܆ ܘܰܕ̥ܢܶܬ̥ܢܰܗܪܽܘܢ ܒܢܽܘܗܪܶܗ ܕ̊ܰܡܫܺܝܚܳܐ܆ ܒܝܰܕ ܗܽܘܓܳܝܳܐ ܕܰܒܡܶܠܬ̥ܶܗ ܚܰܝܬ̥ܳܐ ܕܰܐܠܳܗܳܐ ܘܠܳܗ̇ ܥܳܒܽܘܕ̈ܶܐ ܢܶܬ̥ܚܙܽܘܢ. ܠܳܐ ܒܪܰܡ ܐܶܢܗܽܘ ܕܡܰܪܚܩܺܝܢ ܗܳܘܶܝܢ ܗܰܕ̈ܳܡܰܝ ܝܺܩܰܪܬ̊ܳܐ ܠܶܐܘܰܢܓܶܠܺܝܽܘ̇ܢ ܕܰܡܫܺܝܚܳܐ ܡܶܢ ܒܰܝܬ̊ܗܽܘܢ܆ ܡܰܪܚܩܺܝܢ ܗܳܘܶܝܢ ܠܢܽܘܗܪܳܐ ܡܰܢܗܪܳܢܳܐ ܕܰܠܡܳܪܝܳܐ ܠܗܽܘܢ ܡܚܰܘܶܐ܆ ܐܶܠܳܐ ܐܳܦ ܠܰܡܫܺܝܚܳܐ ܡܰܪܚܩܺܝܢ ܗܳܘܶܝܢ܆ ܘܰܠܒܺܝܫܳܐ ܒܥܶܠܕܒܳܒܶܗ ܡܩܰܒܠܳܢ̈ܶܐ ܡܶܫܬ̊ܰܟܚܺܝܢ. ܘܗܳܟ̥ܰܢܳܐ ܒܺܝܫܬ̊ܳܐ ܡܰܡܠܟ̥ܳܐ ܘܚܶܫܟܳ̊ܐ ܩܳܐܶܡ ܥܠ ܗܳܝ ܝܺܩܰܪܬ̊ܳܐ܆ ܘܡܶܬܥܰܫܢܳܐ ܦܠܺܝܓ̥ܽܘܬ̥ܳܐ ܘܚܶܪܝܳܝܽܘܬ̥ܳܐ ܒܰܝܢܰܝ ܗܰܕ̈ܳܡܶܝܗ̇܆ ܡܶܬ̥ܦܰܠܓ̥ܺܝܢ ܗܳܝܕܶܝܟ̥ ܥܰܠ ܢܰܦܫ̈ܳܬ̥ܗܽܘܢ܆ ܘܒܰܝܬܳ̊ܐ ܐܰܝܢܳܐ ܕܥܰܠ ܝܳܬ̥ܶܗ ܡܶܬ̥ܦܰܠܰܓ̥܆ ܚܳܪܶܒ.
ܚܰܒܺܝ̈ܒܰܝܢ܆ ܒܰܡܩܰܕܡܽܘܬ̥ ܨܰܘܡܳܐ ܐܰܪܒܥܺܝܢܳܝܳܐ܆ ܡܓ̥ܰܪܓ̥ܺܝܢܰܢ ܠܟ̥ܽܘܢ ܕ̊ܰܠܨܰܘܡܳܐ ܩܰܕܺܝܫܳܐ ܬ̥ܫܰܡܠܽܘܢ ܐܰܟ̥ܡܳܐ ܕ̥ܰܡܬܰܚܰܡ ܡܶܢ ܩܳܢܽܘܢ̈ܶܐ ܥܺܕ̈ܬ̊ܳܢܳܝܶܐ܆ ܘܰܐܝܟ̥ ܥܝܳܕܳܐ ܕܰܦܠܺܝܚ܆ ܘܬ̥ܰܠܘܶܬ̥ܽܘܢ ܠܨܰܘܡܳܐ: ܨܠܽܘܬ̥ܳܐ ܘܙܶܕܩܬ̥ܳܐ܆ ܬܝܳܒܽܘܬ̥ܳܐ ܘܰܗܦܽܘܟ̥ܝܳܐ ܕܰܠܘܳܬ ܐܰܠܳܗܳܐ܆ ܕ̊ܬ̥ܶܗܘܽܘܢ ܡܶܬ̊ܕ̊ܰܒ̊ܪܺܝܢ ܐܰܟ̥ܡܳܐ ܕܝܳܐܶܐ ܠܰܣܒܰܪܬ̥ܶܗ ܕܰܡܫܺܝܚܳܐ ܟ̥ܰܕ ܡܫܰܪܪܺܝܢ ܒܗܰܝܡܳܢܽܘܬ̥ܳܐ ܬܪܺܝܨܰܬ̥ ܫܽܘܒ̥ܚܳܐ ܘܠܳܐ ܡܶܙܕ̈ܰܥܙܥܳܢܶܐ.
ܐܰܟ̥ܡܳܐ ܕܩܳܪܶܝܢܰܢ ܠܟ̥ܽܘܢ ܠܡܶܗܪܰܓ ܒܶܐܘܰܢܓܶܠܺܝܽܘ̇ܢ ܩܰܕܺܝܫܳܐ ܕ̥ܺܐܝܬ̥ܰܘܗܝ ܡܰܒܽܘܥܳܐ ܕܛܳܒ̈ܳܬܳܐ ܘܰܡܥܺܝܢܳܐ ܕܒ̥ܽܘܪ̈ܟܳ̊ܬ̥ܳܐ ܪ̈ܽܘܚܳܢܳܝܳܬܳܐ ܘܙܰܒܢܳܢܳܝ̈ܳܬ̥ܳܐ. ܝܺܩܰܪܬ̊ܳܐ ܡܰܢ ܐܰܝܕܳܐ ܕܡܶܬ̥ܟܰܢܫܺܝܢ ܗܰܕ̈ܳܡܶܝܗ̇ ܚܕܳܪܰܝ ܐܶܘܰܢܓܶܠܺܝܽܘ̇ܢ ܩܰܕܺܝܫܳܐ܆ ܘܰܒܪܽܘܚܳܐ ܕܰܨܠܽܘܬ̥ܳܐ ܠܶܗ ܗܳܪܓ̊ܺܝܢ܆ ܘܰܒܚܰܝ̈ܰܝܗܽܘܢ ܝܰܘܡܳܢܳܝ̈ܶܐ ܒܶܗ ܡܶܬ̊ܕ̊ܰܒܪܺܝܢ܆ ܡܶܬ̥ܡܠܶܝܢ ܠܶܒ̈ܰܘܳܬ̥ܗܽܘܢ ܕܗܰܕ̈ܳܡܶܝܗ̇ ܗܳܝܕܶܝܢ ܚܰܕܽܘܬ̥ܳܐ ܪܳܘܚܳܢܳܝܬ̊ܳܐ܆ ܘܝܳܕܥܺܝܢ ܗܳܘܶܝܢ ܙܶܕ̈ܩܰܝܗܽܘܢ ܕܠܰܐܦܰܝ̈ ܐܰܠܳܗܳܐ ܘܠܰܐܦܰܝ̈ ܢܰܦܫ̈ܳܬ̥ܗܽܘܢ ܘܠܰܚܕܳܕ̈ܶܐ܆ ܘܡܰܡܠܶܟ̥ ܚܽܘ̣ܒ̊ܳܐ ܒܰܝܢܳܬ̥ܗܽܘܢ܆ ܘܰܡܝܰܩܰܪ ܗܳܘܶܐ ܙܥܽܘܪܳܐ ܠܪܰܒܳܐ܆ ܘܝܳܨܶܦ ܐܳܦ ܪܰܒܳܐ ܕܰܙܥܽܘܪܳܐ܆ ܘܫܳܪܶܐ ܫܰܝܢܳܐ ܥܰܡ ܐܰܘܝܽܘܬ̥ܳܐ܆ ܘܰܡܟܰܬܪ̈ܳܢ ܫܶܬ̥ܐܶܣ̈ܶܝܗ̇ ܟܰܕ ܥܰܫܝ̈ܢܳܢ ܘܰܡܫܰܪܪ̈ܳܢ ܐܰܝܟ̥ ܒܶܢܝܳܢܳܐ ܕܰܨܡܺܝܕ ܕܳܐܣܰܪ ܗܽܘ ܠܶܗ ܒܰܚܕܳܕ̈ܶܐ܆ ܘܡܶܛܽܠ ܕܥܰܠ ܫܽܘܥܳܐ ܕܗܰܝܡܳܢܽܘܬ̥ܳܐ ܣܺܝܡܳܐ ܫܶܬ̥ܐܶܣܬ̥ܳܗ̇܆ ܡܽܘܟ̥̈ܠܶܐ ܕܰܫܝܽܘ̇ܠ ܠܳܐ ܢܶܚܣܢܽܘܢܳܗ̇.
ܟ̊ܬܳܒܳܐ ܩܰܕܺܝܫܳܐ ܡܶܟ̊ܺܝܠ ܫܶܬ̥ܐܶܣܬ̥ܰܐ ܗ̱ܘ ܕ̊ܬ̥ܰܪܒܺܝܬ̥ܳܐ ܚܠܺܝܡܬ̊ܳܐ ܘܛܳܒܬ̥ܳܐ ܕܺܝܩܰܪܬ̊ܳܐ܆ ܘܰܐܝܟ̥ ܡܶܠܰܬ ܦܰܘܠܽܘ̇ܣ ܫܠܺܝܚܳܐ ܕܰܠܘܳܬ̥ ܬܰܠܡܺܝܕܶܗ ܛܺܝܡܳܬ̥ܶܐܽܘ̇ܣ «ܘܰܕ̥ܡܶܢ ܛܰܠܝܽܘܬ̥ܳܟ̥ ܣܶܦ̥ܪ̈ܶܐ ܩܰܕ̊̈ܺܝܫܶܐ ܝܰܠܺܝܦ̥ ܐܰܢ̱ܬ̊܆ ܕ̊ܡܶܫܟ̊ܚܺܝܢ ܕ̊ܰܢܚܰܟ̥ܡܽܘܢܳܟ̥ ܠܚܰܝ̈ܶܐ ܒ̥ܗܰܝܡܳܢܽܘܬ̥ܳܐ ܕ̥ܝܶܫܽܘ̇ܥ ܡܫܺܝܚܳܐ܂ ܟ̊ܽܠ ܟ̊ܬ̥ܳܒ̥ ܕ̊ܰܒ̥ܪܽܘܚܳܐ ܐܶܬ̥ܟ̊ܬ̥ܶܒ̥܆ ܡܰܘܬ̊ܪܳܢܰܐ ܗ̱ܘ ܠܝܽܘܠܦ̊ܳܢܳܐ ܘܰܠܟ̥ܽܘܘܳܢܳܐ ܘܰܠܬ̥ܽܘܪܳܨܳܐ ܘܰܠܡܰܪܕ̊ܽܘܬ̥ܳܐ ܕ̥ܰܒ̥ܟ̥ܺܐܢܽܘܬ̥ܳܐ܂ ܕ̊ܢܶܗܘܶܐ ܓ̥ܡܺܝܪ ܒ̊ܰܪܢܳܫܳܐ ܕ̥ܰܐܠܳܗܳܐ ܘܰܠܟ̥ܽܠ ܥܒ̥ܳܕ̥ ܛܳܒ̥ ܡܫܰܠܡܳܢ» (ܒ ܛܝܡ̄ ܓ: ܝܗ ـ ܝܙ). ܒܰܪܢܳܫܳܐ ܓ̥ܶܝܪ ܕܰܐܠܳܗܳܐ ܗܳܢܳܐ܆ «ܒ̊ܢܳܡܽܘܣܶܗ ܕܡܳܪܝܳܐ ܨܶܒܝܳܢܶܗ: ܘܰܒܢܳܡܽܘܣܶܗ ܢܶܬܗܰܓܶܐ ܐܺܝܡܳܡܳܐ ܘܠܺܠܝܳܐ܆ ܘܢܶܗܘܶܐ ܐܰܝܟ ܐܺܝܠܳܢܳܐ ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ܆ ܕܦܺܐܪ̈ܰܘܗ̱ܝ ܝܳܗܶܒ ܒܙܰܒܢܶܗ ܘܛܰܪ̈ܦܰܘܗ̱ܝ ܠܳܐ ܢܳܬ̥ܪܺܝܢ܆ ܘܟܽܠ ܕܥܳܒܶܕ ܡܫܰܠܶܡ» (ܡܙܡ̄ ܐ ـ ܒ).
ܢܩܰܒܶܠ ܡܳܪܝܳܐ ܨܰܘܡܟ̥ܽܘܢ ܘܰܨܠܰܘ̈ܳܬ̥ܟ̥ܽܘܢ ܘܙܶܕ̈ܩܳܬ̥ܟ̥ܽܘܢ ܥܰܡ ܬܝܳܒܽܘܬ̥ܟ̥ܽܘܢ܆ ܘܰܢܚܰܣܶܐ ܠܥܰܢܺܝܕ̈ܰܝܟ̊ܽܘܢ ܡܗܰܝܡܢ̈ܶܐ܆ ܘܢܰܫܪܶܐ ܡܳܪܝܳܐ ܠܫܰܝܢܶܗ ܘܰܫܠܳܡܶܗ ܒܟ̥ܽܠܶܗ ܥܳܠܡܳܐ. ܘܰܢܒܰܪܶܟ̥ ܠܒ̥̈ܳܬ̊ܰܝܟ̊ܽܘܢ ܟܰܗܺܝܢ̈ܶܐ܆ ܘܢܰܫܘܶܝܟ̥ܽܘܢ ܕ̊ܬ̥ܶܬܕܰܒܪܽܘܢ ܐܰܟܡܳܐ ܕܝܳܐܶܐ ܠܶܐܘܰܢܓܶܠܺܝܽܘ̇ܢ ܩܰܕܺܝܫܳܐ܆ ܘܢܰܚܕܶܝܟ̥ܽܘܢ ܒܥܺܐܕܳܐ ܩܰܪܝܳܐ ܕܰܩܝܳܡܬܶ̊ܗ܆
ܘܛܰܝܒܽܘ̣ ܕܡܳܪܝܳܐ ܥܰܡܟ̥ܽܘܢ ܒܰܐܡܺܝܢܽܘ̣܆ ܘܰܐܒܽܘܢ ܕܒܰܫܡܰܝܳܐ ܘܫܰܪܟ̊ܳܐ.
ܟܬܺܝܒ ܒܩܶܠܳܝܬܰܢ ܦܰܛܪܝܰܪܟܳܝܬܳܐ ܕܰܒܕܰܪܡܣܽܘ̇ܩ ـ ܣܽܘܪܺܝܰܐ
ܒܰܬܪܶܝܢ ܕܰܫܒܳܛ ܝܰܪܚܳܐ ܕܰܫܢܰܬ ܒܝܐ ܡ̄
ܕܺܐܝܬܶܝܗ̇ ܫܰܢ̱ܬܳܐ ܕܰܬܠܳܬܺܝܢ ܘܰܚܕܳܐ ܕܦܰܛܪܝܰܪܟܽܘܬܰܢ