Skip to content Skip to footer

2009 – ܐܪܙܐ ܩܕܝܫܐ ܕܟܗܢܘܬܐ

ܒܫܡ ܐܝܬܝܐ ܡܬܘܡܝܐ ܐܠܨܝ ܐܝܬܘܬܐ ܕܟܠ ܐܚܝܕ ܐܝܓܢܐܛܝܘܤ ܦܛܪܝܪܟܐ ܕܟܘܪܣܝܐ ܫܠܝܚܝܐ ܕܐܢܛܝܘܟܝܐ ܘܕܟܠܗ̇ ܡܕܢܚܐ ܘܪܝܫܐ ܓܘܢܝܐ ܕܥܕܬܐ ܣܘܪܝܝܬܐ ܐܪܬܕܘܟܣܝܬܐ ܕܒܟܠܗ̇ ܬܒܝܠ ܕܗܘ ܙܟܝ ܩܕܡܝܐ ܕܒܝܬ ܥܝܘܐܨ ܡ̄

ܐܡܪ ܦܘܠܘܣ ܫܠܝܚܐ ܕ«ܠܐ ܗܘܐ ܠܢܦܫܗ ܐ̱ܢܳܫ ܢܳܣܶܒ ܐܝܩܪܐ܆ ܐܠܐ ܐܰܝܢܐ ܕܡܬܩܪܐ ܡܢ ܐܠܗܐ ܐܝܟܢܐ ܕܐܗܪܘܢ» (ܥܒ̄ܪ̈ ܗ: ܕ)

ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܳܬܐ ܡܫܰܟܢܺܝܢܢ ܠܐܚ̈ܝܢ ܡܥܰܠܰܝ̈ܐ܆ ܛܘܒܬܢܘܬܗ ܕܡܪܝ ܒܰܣܶܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܳܦܘܠܺܝܛܐ ܪ̈ܳܡܰܝ ܐܝܩܪܐ܆ ܘܰܒܢ̈ܰܝܳܐ ܕܺܝܠܰܢ ܪ̈ܽܘܚܳܢܳܝܶܐ ܟܽܘܪ̈ܳܝܶܐ ܘܕܰܝܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܳܬܐ ܘܰܡܫܰܡܫܳܢ̈ܐ ܘܰܡܫܰܡ̈ܫܳܢܝܳܬܐ܆ ܘܫܰܪܟܐ ܕܥܰܡܐ ܕܝܠܢ ܣܽܘܪܝܳܝܐ ܐܳܪܬܕܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܬܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܘܠܬܐ ܡܪܝܡ ܘܰܕܡܳܪܝ ܦܛܪܘܣ ܪܺܝܫܐ ܕܰܫܠܺܝܚ̈ܐ ܘܫܰܪܟܐ ܕܣܳܗܕ̈ܶܐ ܘܩܰܕ̈ܝܫܶܐ ܐܰܡܺܝܢ܀

ܚܰܒܝ̈ܒܝܢ܆ ܒܳܬܰܪ ܥܽܘܩܳܒܐ ܕܥܰܠ ܗܳܠܶܝܢ ܝܰܩܺܝܪ̈ܶܐ ܕܺܝܠܟܘܢ܆ ܒܽܘܪܟܬܐ ܫܠܺܝܚܳܝܬܐ ܘܰܨܠܘܬܐ ܐܰܒܳܗܳܝܬܐ ܠܟܘܢ ܡܫܰܟܢܺܝܢܢ܆ ܘܳܐܡܪܝܢ:

ܐ̱ܪܙܐ ܩܕܝܫܐ ܕܟܗܢܘܬܐ܆ ܡܰܘܗܰܒܬܐ ܐܺܝܬܰܘܗ̱ܝ ܐܰܠܳܗܳܝܬܐ܆ ܕܒܳܗ̇ ܡܰܫܦܰܥ ܐܠܗܐ ܛܰܝܒ̈ܘܳܬܗ ܥܠ ܒܢܰܝ̈ܢܳܫܳܐ ܗܳܢܽܘܢ ܕܠܗܘܢ ܓܳܒܶܐ ܡܶܢ ܡܗܰܝܡܢ̈ܐ܆ ܘܩܳܪܐ ܠܗܘܢ܆ ܘܡܶܫܬܰܡܥܺܝܢ ܠܰܩܪܳܝܬܶܗ ܘܦܳܪܫܝܢ ܗܶܢܘܢ ܠܗܘܢ ܠܬܫܡܫܬܗ܆ ܘܰܡܩܰܒܠܝܢ ܣܝܳܡܺܝܕܐ ܢܳܡܽܘܣܳܝܐ ܩܳܢܽܘܢܐܝܬ ܒܚܰܝܠܐ ܘܣܽܘܥܪܳܢܐ ܕܪܘܚܐ ܩܰܕܺܝܫܐ. ܘܗܟܢܐ ܫܘܠܛܢܐ ܩܳܢܶܝܢ ܡܶܢ ܐܠܗܐ ܕܠܗܘܢ ܦܪܰܫ ܡܢ ܐ̱ܚܪ̈ܳܢܶܐ ܒܥܕܬܗ. (ܡܬܝ ܝ: ܐ ـ ܝܗ܆ ܠܘܩܐ ܝ: ܐ-ܝܒ) ܘܠܦܘܬ ܫܘܠܛܢܐ ܕܕܪܓܐ ܕܠܗ ܡܩܰܒܠܝܢ܆ ܡܫܰܟܢܺܝܢ ܐ̱ܪ̈ܙܐ ܕܝܠܗ̇ ܠܗܳܢܘܢ ܕܠܗܘܢ ܫܳܘܶܝܢ ܡܛܟܣܐܝܬ܆ ܡܶܢ ܟܺܝܬ ܡܥܡܘܕܝܬܐ ܘܩܘܕܫܐ ܘܰܫܪܳܝ ܬܝ̈ܒܐ܆ ܘܡܪܚܩܢܘܬ ܒܝ̈ܫܐ ܘܠܐ ܢܡܘ̈ܣܝܐ ܘܠܗܪ̈ܛܝܩܐ ܘܠܐ ܬܝ̈ܒܐ܆ ܘܡܩܝܡܢܘܬ ܨܠܘ̈ܬܐ ܓܰܘ̈ܳܢܳܝܳܬܐ ܘܰܡܫܰܒܠܳܢܽܘܬ ܡܗܝ̈ܡܢܐ ܘܪܳܥܝܽܘܬܗܘܢ (ܝܘܚܢܢ ܟ: ܟܐ ـ ܟܓ܆ ܦܪ̄ܟ ܟ܆ ܬܘܒ ܐ ܦܛܪ̄ ܗ).

ܟܕ ܕܝܢ ܡܫܰܠܶܡ ܗ̱ܘܐ ܡܪܢ ܝܶܫܘܥ ܡܕܒܪܢܘܬܗ ܕܒܰܒܣܰܪ܆ ܓܒܳܐ ܠܗ ܬܪܥܣܪ ܫܠܝܚ̈ܐ ܘܫܒܥܝܢ ܬܠܡܝ̈ܕܐ܆ ܘܰܥܒܰܕ ܐܢܘܢ ܪ̈ܒܝ ܒ̈ܬܐ ܕܐ̱ܪ̈ܙܘܗܝ (ܐ ܩܘ̄ܪ ܕ: ܐ)܆ ܘܰܐܓܥܶܠ ܝܰܗܒ ܠܗܘܢ ܕܰܢܫܰܡܠܽܘܢ ܠܬܫܡܫܬܐ ܬܰܘܕܝܬܳܢܳܝܬܐ ܘܐ̱ܪ̈ܙܐ ܕܥܕܬܐ
(ܠܘ ܘ: ܝܓ). ܘܥܠ ܗܢܐ ܫܪܒܐ ܩܪܝܢܢ ܒܐܘܢܓܠܝܘܢ ܩܕܝܫܐ ܕ«ܟܕ ܢܶܓܗܰܬ܆ ܩܪܳܐ ܠܬܰܠܡܺܝ̈ܕܰܘܗ̱ܝ ܘܰܓܒܳܐ ܡܢܗܘܢ ܬܪܥܣܪ. ܗܳܢܘܢ ܕܫܠܺܝ̈ܚܶܐ ܫܰܡܺܝ ܐܢܘܢ» (ܠܘ̄ ܘ: ܝܓ). «ܘܰܩܪܶܒ ܝܫܘܥ ܡܰܠܶܠ ܥܡܗܘܢ ܘܶܐܡܪ ܠܗܘܢ: ܐܶܬܺܝܗܶܒ ܠܝ ܟܠ ܫܘܠܛܢ ܒܫܡܝܐ ܘܒܐܪܥܐ. ܘܐܝܟܢܐ ܕܫܰܕܪܰܢܝ ܐܳܒܝ܆ ܡܫܰܕܰܪ ܐ̱ܢܐ ܠܟܘܢ. ܙܠܘ ܗܟܝܠ ܬܠܡܕܘ ܟܠܗܘܢ ܥܡ̈ܡܐ ܘܐܥܡܕܘ ܐܢܘܢ ܒܫܡ ܐܒܐ ܘܒܪܐ ܘܪܘܚܐ ܕܩܘܕܫܐ» (ܡܬܝ ܟܚ: ܝܚ ـ ܝܛ) «ܐܶܡܰܪ ܠܗܘܢ ܕܶܝܢ ܬܘܒ ܝܶܫܽܘܥ: ܫܠܡܐ ܥܡܟܘܢ. ܐܝܟܢܐ ܕܫܰܕܪܰܢܝ ܐܳܒܝ ܐܳܦ ܐܶܢܐ ܡܫܰܕܰܪ ܐ̱ܢܐ ܠܟܘܢ. ܘܟܕ ܐܶܡܰܪ ܗܠܝܢ܆ ܢܦܰܚ ܒܗܘܢ ܘܐܡܪ ܠܗܘܢ: ܩܒܠܘ ܪܘܚܐ ܕܩܘܕܫܐ. ܐܶܢ ܬܶܫܒܩܽܘܢ ܚܛܗ̈ܐ ܠܐ̱ܢܳܫ܆ ܢܶܫܬܰܒܩܽܘܢ ܠܶܗ. ܘܶܐܢ ܬܶܐܚܕܘܢ ܕܐ̱ܢܳܫ܆ ܐܰܚܺܝܕܺܝܢ» (ܝܘ̄ ܟ: ܟܐ ـ ܟܓ). ܘܰܠܦܽܘܬ ܡܰܠܦܳܢܘܬܐ ܕܡܢܗܘܢ ܕܐܒܗ̈ܬܐ ܕܝܠܢ܆ ܕܠܡ: ܡܪܢ ܐܣܪܚ ܠܰܫܠܺܝ̈ܚܰܘܗܝ ܐܦܣܩܘ̈ܦܐ ܟܕ «ܐܦܩ ܐܢܘܢ ܥܕܡܐ ܠܒܝܬ ܥܢܝܐ܆ ܘܰܐܪܺܝܡ ܐܺܝܕ̈ܰܘܗ̱ܝ ܘܒܰܪܶܟ ܐܶܢܘܢ. ܘܰܗܘܳܐ ܟܰܕ ܡܒܰܪܶܟ ܠܗܘܢ܆ ܐܶܬܦܪܶܫ ܡܢܗܘܢ ܘܰܣܠܶܩ ܠܫܡܝܐ» (ܠܘܩܐ ܟܕ: ܢ ـ ܢܐ). ܘܰܒܝܰܕ ܣܝܳܡܺܝܕܐ ܡܩܰܕܶܐ ܐܦܣܩܘܦܐ ܫܘܠܛܢܐ ܕܡܠܦܢܘܬܐ ܘܙܽܘܕܳܩܐ ܘܩܘܕܳܫܐ ܘܪܳܥܝܘܬܐ ܘܕܺܝܢܐ. ܫܰܬܐܣܶܗ ܓܝܪ ܡܪܢ ܝܫܘܥ ܠܐ̱ܪܙܐ ܗܢܐ ܕܟܗܢܘܬܐ ܡܶܚܕܐ ܕܰܐܘܕܰܥ ܥܠ ܫܽܘܬܳܐܣ ܥܺܕܬܐ܆ ܟܰܕ ܐܰܘܕܝ ܦܛܪܘܣ ܫܠܝܚܐ ܕܺܐܝܬܰܘܗܝ ܒܪܗ ܕܐܠܗܐ ܚܰܝܐ. ܐܶܡܪ ܓܝܪ ܠܫܶܡܥܘܢ: «ܛܘܒܝܟ ܫܡܥܘܢ ܒܪܗ ܕܝܘܢܐ: ܕܒܣܪܐ ܘܕܡܐ ܠܐ ܓܠܐ ܠܟ܆ ܐܠܐ ܐܳܒܝ ܕܒܰܫܡܰܝܐ. ܐܳܦ ܐܶܢܐ ܐܳܡܰܪ ܐܢܐ ܠܟ: ܕܰܐܢ̱ܬ ܗ̱ܘ ܟܺܐܦܐ ܘܥܠ ܗܳܕܐ ܟܺܐܦܐ ܐܶܒܢܶܝܗ̇ ܠܥܕܬܝ ܘܬܰܪ̈ܥܐ ܕܫܝܘܠ ܠܐ ܢܚܣܢܘܢܗ̇܆ ܠܟ ܐܶܬܠ ܩܠܝܕ̈ܐ ܕܡܠܟܘܬܐ ܕܰܫܡܰܝܐ܆ ܘܟܠ ܡܕܡ ܕܬܶܐܣܽܘܪ ܒܐܪܥܐ ܢܗܘܐ ܐܰܣܺܝܪ ܒܰܫܡܰܝܐ܆ ܘܡܕܡ ܕܬܶܫܪܶܐ ܒܰܐܪܥܐ ܢܶܗܘܶܐ ܫܪܶܐ ܒܰܫܡܰܝܐ» (ܡܬܝ ܝܘ: ܝܙ ـ ܝܛ). ܘܚܰܘܺܝܘ ܫܠܺܝ̈ܚܶܐ ܠܐ̱ܪܙܐ ܗܢܐ ܘܰܐܣܪܰܚܘ ܩܰܫܺܝ̈ܫܐ ܒܟܽܠ ܡܕܺܝܢܐ (ܦܪ̄ܟ ܝܓ: ܒ ـ ܓ). ܘܰܐܡܺܝܪ ܒܣܶܦܪܐ ܕܦܪܟܣܝܣ ܕܠܡ «ܟܰܕ ܗܶܢܘܢ ܨܳܝܡܺܝܢ ܗ̱ܘܰܘ ܘܡܶܬܟܰܫܦܺܝܢ ܠܐܠܗܐ܆ ܐܳܡܪܐ ܠܗܘܢ ܪܘܚܐ ܕܩܘܕܫܐ: ܦܪܽܘܫܘ ܠܝ ܠܫܳܐܘܠ ܘܰܠܒܰܪܢܰܒܐ܆ ܠܰܥܒܳܕܐ ܐܰܝܢܐ ܕܶܐܢܐ ܩܪܺܝܬ ܐܶܢܘܢ. ܘܒܳܬܰܪ ܕܨܳܡܘ ܘܨܰܠܺܝܘ܆ ܣܳܡܘ ܥܠܝܗܘܢ ܐܝܕܐ ܘܫܰܕܰܪܘ ܐܶܢܘܢ» (ܦܪ̄ܟ ܝܓ: ܒ ـ ܓ). ܘܩܳܪܶܝܢܢ ܬܘܒ ܕܰܐܝܟܰܢܐ ܐܳܦ ܗܢܘܢ ܩܰܫܺܝ̈ܫܐ ܓܒܰܘ ܠܡܽܘܠܳܝ ܣܢܺܝܩܽܘܬܐ ܕܬܶܫܡܶܫܬܐ ܕܥܕܬܐ. ܟܬܺܝܒ ܓܶܝܪ ܒܣܶܦܪܐ ܕܰܦܪܰܟܣܺܝܣ ܥܰܠ ܦܘܠܘܣ ܘܒܰܪܢܰܒܐ: «ܘܰܗܦܰܟܘ ܘܶܐܬܰܘ ܠܗܘܢ ܠܠܽܘܣܛܪܰܐ ܡܕܺܝܢ̱ܬܐ ܘܠܺܐܝܩܳܢܺܘܳܢ ܘܠܰܐܢܛܺܝܘܟܺܝܰܐ܆ ܟܕ ܡܫܰܪܪܺܝܢ ܗ̱ܘܰܘ ܢܰܦ̈ܫܳܬܗܘܢ ܕܬܰܠܡܺܝܕ̈ܐ܆ ܘܒܳܥܶܝܢ ܗ̱ܘܰܘ ܡܢܗܘܢ ܕܰܢܩܰܘܽܘܢ ܒܗܰܝܡܢܘܬܐ܆ ܘܳܐܡܪܺܝܢ ܗ̱ܘܘ ܠܗܘܢ ܕܒܐܘܠܨܢܐ ܣܰܓܝܐܐ ܘܳܠܶܐ ܠܡܶܥܰܠ ܠܡܰܠܟܘܬܗ ܕܐܠܗܐ ܘܰܐܩܺܝܡ ܠܗܘܢ ܒܟܠ ܥܕܬܐ ܩܰܫܺܝ̈ܫܐ܆ ܟܰܕ ܨܳܝܡܺܝܢ ܗ̱ܘܰܘ ܥܡܗܘܢ ܘܰܡܨܰܠܶܝܢ܆ ܘܡܰܓܥܠܺܝܢ ܗ̱ܘܰܘ ܠܗܽܘܢ ܠܡܳܪܰܢ ܗܰܘ ܕܗܰܝܡܶܢܘ ܒܗ» (ܦܪ̄ܟ ܝܕ: ܟܐ ـ ܟܓ). ܦܘܠܘܣ ܫܠܺܝܚܐ ܕܝܢ ܡܳܠܶܟ ܠܛܺܝܡܬܐܘܣ ܬܠܡܝܕܗ ܕܟܗܢܐ ܢܣܪܚ܆ ܟܰܕ ܐܡܪ: «ܠܐ ܬܶܒܣܶܐ ܒܡܘܗܒܬܐ ܕܺܐܝܬ ܒܟ܆ ܗܳܝ ܕܶܐܬܝܰܗܒܰܬ ܠܟ ܒܰܢܒܺܝܘܬܐ ܘܒܰܣܝܳܡ ܐܺܝܕܐ ܕܩܰܫܺܝܫܘܬܐ» (ܐ ܛܝ̄ܡ ܕ: ܝܕ). ܘܰܟܬܒ ܦܘܠܘܣ ܠܛܺܛܘܣ ܬܠܡܝܕܗ ܕܐܝܟܢܐ ܠܡ ܙܳܕܶܩ ܕܢܗܘܐ ܩܰܫܺܝܫܐ܆ ܟܕ ܐܳܡܰܪ: «ܐܰܢ̱ܬ ܕܶܝܢ ܡܰܠܶܠ ܡܕܡ ܕܝܳܐܶܐ ܠܝܽܘܠܦܳܢܐ ܚܠܺܝܡܐ. ܘܰܐܠܶܦ ܕܢܗܘܘܢ ܩܰܫܺܝ̈ܫܐ ܥܺܝܪܺܝܢ ܒܪ̈ܶܥܝܳܢܰܝܗܘܢ. ܘܢܗܘܘܢ ܢܰܟܦܺܝܢ. ܘܢܶܗܘܽܘܢ ܕܟܶܝܢ. ܘܢܶܗܘܽܘܢ ܚܠܺܝܡܺܝܢ ܒܗܰܝܡܳܢܽܘܬܐ ܘܰܒܚܽܘܒܐ ܘܒܰܡܣܰܝܒܪܳܢܘܬܐ» (ܛܛܘܣ ܒ: ܐ ـ ܒ). ܘܒܐܓܪܬܗ ܕܰܠܘܳܬ ܥܒܪ̈ܝܐ܆ ܟܬܰܒ ܥܰܠ ܡܰܘܗܰܒܬܐ ܕܩܰܫܝܫܘܬܐ ܘܐܡܪ: «ܘܠܐ ܗܘܐ ܠܢܦܫܗ ܐ̱ܢܳܫ ܢܳܣܶܒ ܐܝܩܪܐ܆ ܐܠܐ ܐܰܝܢܐ ܕܡܶܬܩܪܶܐ ܡܶܢ ܐܠܗܐ ܐܝܟܢܐ ܕܐܗܪܘܢ» (ܥܒ̄ܪ̈ ܗ: ܕ). ܘܐܡܪ ܠܗܘܢ: «ܣܳܡ ܓܝܪ ܐܠܗܐ ܒܥܕܬܗ܆ ܠܘܩܕܡ ܫܠܺܝ̈ܚܐ. ܒܳܬܪܗܘܢ ܢܒܝ̈ܐ. ܒܳܬܰܪܗܘܢ ܡܰܠܦܢ̈ܐ܆ ܒܳܬܰܪܗܘܢ ܥܳܒܕ̈ܝ ܚܰܝ̈ܠܐ܆ ܒܳܬܰܪܗܘܢ ܡܰܘܗܰܒܬܐ ܕܳܐܣܝܘܬܐ. ܘܡܥܕܪ̈ܢܐ ܘܡܕܒܪ̈ܢܐ ܘܰܙܢܰܝ̈ܳܐ ܕܠܶܫܢ̈ܐ» (ܐ ܩܘ̄ܪ ܝܒ: ܟܚ). ܐܦܣܩܘܦ̈ܐ ܓܝܪ ܕܝܰܘܡܢ܆ ܬܰܚܠܘ̈ܦܐ ܐܢܘܢ ܕܰܫܠܺܝ̈ܚܐ ܗܳܢܘܢ ܕܰܢܣܰܒܘ ܠܐܦܣܩܘܦܘܬܐ ܒܰܣܝܳܡ ܐܺܝܕܐ ܗܰܘ ܕܰܥܠܰܝܗܽܘܢ ܐܶܬܬܣܝܡ (ܦܪ̄ܟ ܝܕ: ܟܓ). ܘܰܓܒܰܘ ܠܗܘܢ ܩܰܫܺܝ̈ܫܐ ܒܟܠ ܥܺܕܬܐ. ܘܰܥܕܰܟܝܠ ܗܕܐ ܐܰܡܺܝܢܐ ܒܥܕܬܐ.

ܘܥܠ ܗܢܐ ܫܪܒܐ ܐܶܡܪ ܦܘܠܘܣ ܫܠܝܚܐ: «ܘܐܝܠܝܢ ܕܰܫܡܰܥܬ ܡܶܢܝ ܒܝܕ ܣܳܗ̈ܕܐ ܣܰܓܺܝ̈ܐܐ܆ ܗܳܢܶܝܢ ܐܰܓܥܶܠ ܠܐ̱ܢܳܫ̈ܳܐ ܡܗܰܝܡܢ̈ܐ܆ ܐܰܝܠܝܢ ܕܡܳܛܝܐ ܒܺܐܝܕ̈ܝܗܘܢ ܐܳܦ ܠܐ̱ܚܪ̈ܢܐ ܠܡܰܠܳܦܽܘ» (ܒ ܛܝ̄ܡ ܒ: ܒ).

ܐܝܬ ܒܗ̇ ܓܝܪ ܒܥܺܕܬܐ ܕܝܠܢ܆ ܬܠܬܐ ܬܶܓܡ̈ܐ ܟܳܗ̈ܢܳܝܶܐ ܗܳܢܘܢ ܕܺܝܕܺܝܥܝܢ ܠܰܟܬܒܐ ܩܰܕܝܫܐ܆ ܘܐܝܬܝܗܘܢ:

ܐ ـ ܐܦܣܩܘܦܘܬܐ: ܗܳܢܰܘ ܕܝܢ ܕܰܘܩܽܘܬܐ ܘܪܳܥܝܘܬܐ ܪܘܚܳܢܳܝܬܐ ܕܓܰܘܳܢܳܝܐ ܘܰܡܥܰܠܝܐ܆ ܘܰܦܪܺܝܫܐ ܠܪ̈ܝܫܢܐ ܕܐܝܬ ܒܰܝܢܳܬܗܘܢ ܕܰܡܥܰܠܰܝ ܘܰܡܬܰܚܬܰܝ ܒܫܘܠܛܳܢܗ ܘܰܐܣܺܝܪܘܬܗ ܡܕܰܒܪܳܢܳܝܬܐ. ܘܰܬܠܳܬܐ ܐܢܘܢ ܕܰܪ̈ܓܶܐ ܕܝܠܗ̇: ܦܛܪܝܪܟܘܬܐ܆ ܘܡܝܛܪܦܘܠܝܛܘܬܐ ܘܐܦܣܩܘܦܘܬܐ.

ܒ ـ ܩܫܝܫܘܬܐ (ܦܪ̄ܟ ܝܕ: ܟܓ. ܛܛܘܣ ܐ: ܗ): ܘܐܝܬܝܗ̇ ܕܝܪܝܐ ܟܗܢܐ (ܪܒܢ)܆ ܘܟܘܪܝܐ. ܟܘܪܝܐ ܡܰܢ ܡܶܬܬܰܣܪܰܚ ܗ̱ܘܐ ܡܶܢ ܩܕܺܝܡ ܕܢܶܗܘܶܐ ܡܥܰܕܪܢܐ ܠܐܦܣܩܘܦܐ ܕܩܽܘܪ̈ܝܳܐ. ܝܘܡܢ ܕܝܢ ܟܗܢܐ ܕܩܰܕܡܳܝ ܗ̱ܘ ܒܝܬ ܟܗܢ̈ܐ ܒܥܺܕܬܐ ܚܕܐ ܐܰܘ ܒܰܚܕܐ ܡܰܪܥܝܬܐ. ܟܢ ܕܪܓܐ ܕܩܰܫܝܫܘܬܐ: ܡܪܐ ܕܝܢ ܕܕܪܓܐ ܗܢܐ܆ ܓܰܘܳܢܳܐܺܝܬ܆ ܡܫܰܡܶܫ ܠܐ̱ܪ̈ܙܐ ܩܕ̈ܝܫܐ ܘܬܫܡܫ̈ܬܐ ܪ̈ܘܚܢܝܬܐ ܟܠܗܝܢ ܠܒܰܪ ܡܶܢ ܗܳܢܶܝܢ ܕܰܦܪ̈ܺܝܫܳܢ ܠܐܦܣܩܘܦܐ ܐܰܝܟ ܗܳܝ ܕܡܰܣܪܚܳܢܽܘܬ ܟܳܗܢ̈ܐ ܘܡܫܡܫܢ̈ܐ ܘܫܽܘܟܳܢ ܫܶܕ̈ܬܶܐ ܥܺܕ̈ܬܳܢܳܝܳܬܐ ܒܓܘ ܡܰܪܥܝܬܐ. ܗܰܘ ܡܐ ܕܙܳܕܶܩ ܠܰܢ ܠܡܶܕܰܥ܆ ܩܰܕܡܳܝܰܬ: ܕܠܰܡ ܗܳܠܶܝܢ ܬܶܓܡ̈ܐ ܬܠܳܬܐ ܫܟܺܝܚܺܝܢ ܗ̱ܘܰܘ ܐܳܦ ܒܟܳܗܢܽܘܬܐ ܕܥܰܬܺܝܩܬܐ܆ ܐܠܐ ܐܶܬܓܡܰܪܘ ܘܶܐܫܬܰܡܠܺܝܘ ܒܰܚܕܰܬܐ. ܗܳܢܰܘ ܕܶܝܢ ܐܝܬ ܟܽܘܡܪ̈ܐ ܘܟܳܗ̈ܢܐ ܘܠܶܘܳܝ̈ܶܐ. ܕܬܰܪܬܶܝܢ ܕܶܝܢ: ܕܠܡ ܗܠܝܢ ܬܓܡ̈ܐ ܬܠܬܐ܆ ܠܬܶܓܡ̈ܐ ܥܶܠܳܝ̈ܶܐ ܕܳܡܶܝܢ܆ ܗܳܢܘܢ ܕܳܐܦ ܡܶܢ ܬܠܬܐ ܬܶܓܡ̈ܐ ܡܶܬܩܰܝܡܺܝܢ ܠܦܘܬ ܩܕܝܫܐ ܡܪܝ ܩܠܝܡܝܣ ܕܐܠܟܣܢܕܪܝܐ ܕܶܐܡܪ ܕܠܡ: ܬܓ̈ܡܐ ܕܶܐܦܣܩܽܘܦ̈ܐ ܘܰܕܟܳܗܢ̈ܐ ܘܕܰܡܫܰܡܫܳܢ̈ܐ܆ ܠܗ ܠܫܘܒܚܐ ܡܠܐܟܝܐ ܕܳܡܶܝܢ. ܕܬܠܬܐ ܬܘܒ: ܕܠܰܡ ܟܽܠ ܬܶܓܡܐ ܡܶܢ ܗܠܝܢ ܬܠܬܐ܆ ܬܠܬܐ ܕܰܪ̈ܓܶܐ ܐ̱ܚܪ̈ܳܢܶܐ ܚܳܡܶܠ܆ ܕܢܶܗܘܽܘܢ ܒܛܽܘܦܣܐ ܕܬܶܓܡ̈ܐ ܫܡܰܝܢ̈ܐ.

ܓ ـ ܡܫܡܫܢܘܬܐ ܗ̄ ܬܫܡܫܬܗ ܕܐܠܗܐ (ܦܪ̄ܟ ܘ: ܘ܆ ܬܘܒ ܐ ܛܝ̄ܡ ܓ: ܚ ـ ܝ)܆ ܘܐܝܬ ܒܗ̇: ܡܫܡܫܢܐ ܐܘܢܓܠܝܐ܆ ܘܐܦܘܕܝܩܢܐ܆ ܘܩܳܪܽܘܝܐ ܘܡܙܡܪܢܐ. ܘܐܝܬ ܒܗ̇ ܬܘܒ ܐܪܟܕܝܩܘܢ ܕܐܝܬܘܗܝ ܪܺܝܫܐ ܕܟܽܠܗܘܢ ܡܫܰܡܫܳܢ̈ܐ ܕܚܕܐ ܡܪܥܝܬܐ.

ܡܫܡܫܢܐ ܓܝܪ ܕܐ̱ܪܙܐ ܕܟܳܗܢܽܘܬܐ܆ ܐܦܣܩܘܦܐ ܐܝܬܘܗܝ ܕܠܗ ܒܰܠܚܽܘܕ ܙܶܕܩܐ ܐܺܝܬ ܕܰܢܣܺܝܡ ܐܺܝܕܐ ܥܠ ܪܺܝܫܐ ܕܡܶܬܬܰܣܪܚܳܢܐ (ܦܪ̄ܟ ܘ: ܘ. ܬܘܒ ܝܓ: ܒ ـ ܓ). ܡܢܳܬܐ ܕܝܢ ܡܶܬܚܰܙܝܳܢܝܬܐ ܕܐ̱ܪܙܐ ܕܟܳܗܢܘܬܐ܆ ܣܝܳܡܺܝܕܐ ܐܺܝܬܶܝܗ̇ ܕܶܐܦܣܩܘܦܐ ܕܥܰܠ ܪܺܝܫܗ ܕܗܰܘ ܕܰܓܒܶܐ ܠܟܳܗܢܽܘܬܐ܆ ܘܰܨܠܽܘܬܐ ܕܰܦܪܺܝܫܐ ܠܗܳܢܐ ܐ̱ܪܙܐ. ܟܕ ܒܳܥܶܐ ܐܦܣܩܘܦܐ ܡܛܠ ܡܶܬܬܣܪܚܢܐ ܗܳܝ ܕܬܰܓܶܢ ܥܠܰܘܗܝ ܛܝܒܘܬܐ ܕܪܘܚܐ ܩܕܝܫܐ. ܒܪܰܡ ܡܢܳܬܐ ܕܝܢ ܠܐ ܡܶܬܚܰܙܝܳܢܺܝܬܐ܆ ܛܝܒܘܬܐ ܐܝܬܝܗ̇ ܕܠܗ̇ ܡܬܬܣܪܚܢܐ ܡܩܰܒܶܠ ܡܶܢ ܐܠܗܐ܆ ܘܫܘܠܛܢܐ ܕܰܫܪܳܝܐ ܘܰܐܣܺܝܪܽܘܬ ܚܛܗ̈ܐ܆ ܘܡܠܦܢܘܬܐ܆ ܘܡܪܕܘܬܐ܆ ܘܙܽܘܕܳܩܐ ܘܩܽܘܕܳܫܐ.

ܦܐܪ̈ܐ ܓܝܪ ܕܐ̱ܪܙܐ ܕܟܳܗܢܽܘܬܐ܆ ܢܳܛܽܘܪܽܘܬܐ ܐܢܘܢ ܕܕܰܪ̈ܓܶܐ ܟܳܗ̈ܢܳܝܶܐ ܒܥܕܬܐ܆ ܘܰܐܚܺܝܕܘܬܐ ܕܛܽܘܟܳܣܐ ܘܫܘܡܠܳܝ ܬܶܫܡ̈ܫܬܐ܆ ܘܐܝܩܳܪ ܪ̈ܳܥܰܘܳܬܐ ܘܰܒܢ̈ܝ ܡܪܥܝܬܐ܆ ܘܫܽܘܟܳܢ ܛܝܒܘ̈ܬܐ ܘܒܘܪ̈ܟܬܐ ܒܝܕ ܪ̈ܳܥܰܘܳܬܐ ܠܰܒܢ̈ܝ ܡܪܥܝܬܐ܆ ܘܡܫܡܫܢܘܬܐ ܕܫܰܒܥܐ ܐ̱ܪ̈ܙܐ ܕܥܕܬܐ ܡܢ ܟܠ ܬܓܡܐ ܠܦܘܬ ܙܕܩܐ ܕܕܪܓܐ ܕܝܠܗ ܟܗܢܝܐ. ܘܡܠܦܢܘܬ ܡܗܝܡܢ̈ܐ ܫܪܝܪ̈ܬܐ ܕܗܝܡܢܘܬܐ ܡܫܺܝܚܳܝܬܐ܆ ܘܡܶܨܛܰܒܬܳܢܽܘܬܐ ܕܒܰܡܝܰܬܪ̈ܬܐ ܪ̈ܳܡܳܬܐ ܘܰܫܡܰܝܳܢ̈ܝܳܬܐ ܕܰܕܡܽܘܬܐ ܛܳܒܬܐ ܢܩܺܝܡܘܢ ܡܢ ܢܰܦ̈ܫܳܬܗܘܢ ܠܰܡܗܰܝܡܢ̈ܐ ܒܝܕ ܟܳܪܽܘܙܘܬܐ ܕܒܐܘܢܓܠܝܘܢ ܩܰܕܺܝܫܐ܆ ܒܡܠܬܐ ܘܒܰܥܒܳܕܐ܆ ܕܰܒܗܽܘܢ ܢܶܫܬܰܒܰܚ ܫܡܗ ܕܐܒܐ ܫܡܰܝܳܢܐ. ܘܐܝܩܳܪ ܡܗܝܰܡܢ̈ܐ ܠܡܳܪ̈ܰܝ ܬܓܡ̈ܐ ܟܗܢ̈ܝܐ܆ ܘܚܘܒܐ ܕܰܩܠܝܪܘܣ ܕܠܰܡܗܰܝܡܢ̈ܐ܆ ܘܪܶܗܛܐ ܕܝܠܗܘܢ ܕܡܶܛܽܠ ܦܽܘܪܩܳܢܐ ܕܢܰܦ̈ܫܳܬܗܘܢ ܡܛܠ «ܟܠ ܪܰܒ ܟܽܘܡܪ̈ܐ ܓܝܪ ܕܡܶܢ ܒܢܰܝ̈ܢܳܫܐ ܗܳܘܶܐ: ܚܠܳܦ ܒܢܰܝ̈ܢܳܫܐ ܩܳܐܶܡ ܥܰܠ ܐܰܝܠܶܝܢ ܕܕܰܐܠܳܗܐ ܐܶܢܶܝܢ܆ ܕܰܢܩܰܪܶܒ ܩܘܪ̈ܒܳܢܐ ܘܕܶܒ̈ܚܐ ܚܠܦ ܚܛܗ̈ܐ܆ ܐܝܢܐ ܕܡܶܫܟܰܚ ܕܢܰܡܶܟ ܢܰܦܫܶܗ܆ ܘܢܶܚܰܫ ܥܡ ܐܝܠܝܢ ܕܠܐ ܝܳܕܥܺܝܢ ܘܛܳܥܶܝܢ܆ ܡܛܠ ܐܦ ܗܽܘ ܟܪܝܗܘܬܐ ܠܒܺܝܫ܆ ܘܡܶܛܽܠܬܗ̇ ܚܰܝܳܒ ܗ̱ܘ. ܕܰܐܝܟܢܐ ܕܰܚܠܳܦ ܥܰܡܐ܆ ܗܳܟܰܢܐ ܐܦ ܚܠܦ ܢܰܦܫܗ ܢܩܰܪܶܒ ܥܠ ܚܛܳܗ̈ܰܘܗ̱ܝ» (ܥܒ̄ܪ̈ ܗ: ܐ ـ ܓ). ܐܝܬ ܠܗܘܢ ܓܝܪ ܠܟܗ̈ܢܐ ܘܐܦܣܩܘ̈ܦܐ܆ ܕܠܦܘܪܩܢܐ ܕܢܰܦ̈ܫܬܐ ܕܰܡܗܰܝܡܢ̈ܐ ܢܺܐܨܦܽܘܢ: «ܐܶܙܕܰܗܪ ܗܳܟܝܠ ܒܢܰܦܫܟܘܢ ܘܰܒܟܽܠܗ̇ ܡܰܪܥܺܝܬܐ܇ ܗܳܝ ܕܰܐܩܺܝܡܟܘܢ ܒܳܗ̇ ܪܘܚܐ ܕܩܘܕܫܐ ܐܦܣܩܘ̈ܦܐ ܕܬܶܪܥܘܢ ܠܥܕܬܗ ܕܐܠܗܐ ܗܳܝ ܕܰܩܢܳܗ̇ ܒܰܕܡܶܗ» (ܦܪ̄ܟ ܟ: ܟܚ) ܘܗܳܟܘܳܬ ܐܳܦ ܙܳܕܶܩ ܠܗܘܢ ܠܰܡܫܺܝ̈ܚܳܝܶܐ ܡܗܰܝܡܢ̈ܐ܆ ܕܰܠܟܳܗܢ̈ܐ ܘܪ̈ܳܥܰܘܳܬܐ ܕܺܝܠܗܘܢ ܐܝܩܪܐ ܢܶܦܠܓܽܘܢ܆ ܕܰܡܫܰܡܫܢ̈ܐ ܐܢܘܢ ܕܰܡܫܝܚܐ ܘܪ̈ܰܒܰܝ ܒ̈ܬܐ ܕܐ̱ܪ̈ܳܙܰܘܗܝ ܕܐܠܗܐ

ܘܰܒܦܽܘܪܣܐ ܗܢܐ ܕܨܰܘܡܐ ܩܰܕܝܫܐ ܕܰܐܪܒܥܺܝܢ܆ ܡܶܢܶܗ ܕܡܳܪܝܐ ܫܳܐܠܺܝܢܰܢ ܕܰܢܩܰܒܶܠ ܨܘܡܟܘܢ ܘܰܨܠܰܘ̈ܳܬܟܽܘܢ ܘܙܶܕ̈ܩܳܬܟܽܘܢ܆ ܘܕܢܰܫܘܶܝܟܘܢ ܕܰܒܚܽܘܠܡܳܢܐ ܫܰܠܡܐ ܬܶܗܘܽܘܢ ܡܥܰܕܥܕܺܝܢ ܚܘܺܝܚܳܐܺܝܬ ܘܚܳܕܝܐܝܬ ܠܥܺܐܕܐ ܕܰܩܝܳܡܬܐ ܦܳܪܽܘܩܳܝܬܐ܆ ܒܰܨܠܰܘ̈ܳܬܗ̇ ܕܒܬܘܠܬܐ ܩܕܝܫܬܐ ܡܪܝܡ ܝܠܕܬ ܐܠܗܐ܆ ܘܕܡܪܝ ܦܛܪܘܣ ܪܝܫܐ ܕܫܠܝ̈ܚܐ ܘܫܪܟܐ ܕܣܗܕ̈ܐ ܘܕܩܕ̈ܝܫܐ. ܘܐܒܘܢ ܕܒܫܡܝܐ ܘܫܪܟܐ.

ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ ܕܣܘܪܝܐ

ܒܫܒܥܬܐ ܕܫܒܛ ܕܫܢܬ ܬܪܝܢ ܐܠܦܝ̈ܢ ܘܬܫܥ

ܕܐܝܬܝܗ̇ ܫܰܢ̱ܬܐ ܕܥܣܪܝܢ ܘܬܫܥ ܕܦܛܪܝܪܟܘܬܢ

جميع الحقوق محفوظة لموقع دائرة الدراسات السريانية ©