ܡܪܝ ܝܥܩܘܒ ܐܘܪܗܝܐܒܫܡ ܐܝܬܝܐ ܡܬܘܡܝܐ ܐܠܨܝ ܐܝܬܘܬܐ ܕܟܠ ܐܚܝܕ ܐܝܓܢܐܛܝܘܤ ܦܛܪܝܪܟܐ ܕܟܘܪܣܝܐ ܫܠܝܚܝܐ ܕܐܢܛܝܘܟܝܐ ܘܕܟܠܗ̇ ܡܕܢܚܐ ܘܪܝܫܐ ܓܘܢܝܐ ܕܥܕܬܐ ܣܘܪܝܝܬܐ ܐܪܬܕܘܟܣܝܬܐ ܕܒܟܠܗ̇ ܬܒܝܠ ܕܗܘ ܙܟܝ ܩܕܡܝܐ ܕܒܝܬ ܥܝܘܐܨ ܡ̄
ܥܘܗܕܢܐ ܕܐܠܦܐ ܘܬܠܬܡܐܐ ܫܢܝ̈ܢ
ܕܫܘܢܝ ܩܕܝܫܐ ܡܪܝ ܝܥܩܘܒ ܐܘܪܗܝܐ (+ܬܫܚ) ܕܠܐܘܢ̈ܐ ܫܡܝܢ̈ܐ
ܐܡܪ ܡܪܝ ܦܘܠܘܣ ܫܠܝܚܐ: «ܗܘܝܬܘܢ ܥܳܗܕܝܢ ܠܰܡܕܒܪ̈ܢܰܝܟܘܢ ܐܰܝܠܝܢ ܕܡܠܶܠܘ ܥܰܡܟܘܢ ܡܶܠܬܐ ܕܐܠܗܐ ܐܶܬܒܩܰܘ ܒܫܘܠܡܐ ܕܕܘܒܳܪ̈ܰܝܗܘܢ ܘܡܪܰܘ ܒܗܝܡܳܢܘܬܗܘܢ» (ܥܒܪ̄ ܝܓ:ܙ)
ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܳܬܐ ܡܫܰܟܢܺܝܢܢ ܠܐܚ̈ܝܢ ܡܥܰܠܰܝ̈ܐ܆ ܛܘܒܬܢܘܬܗ ܕܡܪܝ ܒܰܣܶܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܳܦܘܠܺܝܛܐ ܪ̈ܳܡܰܝ ܐܝܩܪܐ܆ ܘܰܒܢ̈ܰܝܳܐ ܕܺܝܠܰܢ ܪ̈ܽܘܚܳܢܳܝܶܐ ܟܽܘܪ̈ܳܝܶܐ ܘܕܰܝܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܳܬܐ ܘܰܡܫܰܡܫܳܢ̈ܐ ܘܰܡܫܰܡ̈ܫܳܢܝܳܬܐ܆ ܘܫܰܪܟܐ ܕܥܰܡܐ ܕܝܠܢ ܣܽܘܪܝܳܝܐ ܐܳܪܬܕܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܬܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܘܠܬܐ ܡܪܝܡ ܘܰܕܡܳܪܝ ܦܛܪܘܣ ܪܺܝܫܐ ܕܰܫܠܺܝܚ̈ܐ ܘܫܰܪܟܐ ܕܣܳܗܕ̈ܶܐ ܘܩܰܕ̈ܝܫܶܐ ܐܰܡܺܝܢ܀
ܚܒܝ̈ܒܝ܉ ܟܕ ܥܠ ܗܠܝܢ ܕܝܠܟܘܢ ܝܩܝܪ̈ܬܐ ܡܥܩܒܝܢ܉ ܡܢܗ ܕܡܪܝܐ ܫܐܠܝܢܢ: ܕܒܚܘܠܡܢܐ ܓܡܝܪܐ ܘܟܘܫܪܐ ܕܪܘܚ ܘܕܦܓܪ܉ ܬܗܘܘܢ.
ܒܥܘܗܕܢܐ ܓܝܪ ܕܥܒܳܪ ܐܠܦܐ ܘܬܠܬܡܐܐ ܫܢܝ̈ܢ ܥܠ ܫܘܢܝ ܩܕܝܫܐ ܡܪܝ ܝܥܩܘܒ ܕܐܘܪܗܝ ܕܠܐܘܢ̈ܐ ܫܡܝܢ̈ܐ܉ ܚܕܝܐܝܬ ܕܝܢ ܡܟܪܙܝܢܢ ܒܥܕܬܢ ܣܘܪܝܝܬܐ ܐܪܬܕܘܟܣܝܬܐ ܕܒܟܠܗ̇ ܬܒܝܠ ܕܠܡ ܫܢܬܐ ܗܕܐ ܕ(ܒܚ̄)܉ ܫܢܬ ܬܗܐ ܕܡܪܝ ܝܥܩܘܒ ܐܘܪܗܝܐ ܡܣܪܚܝܢܢ ܓܝܪ ܠܦܪܝܣܢ ܗܢܐ ܫܠܝܚܝܐ ܟܕ ܡܬܒܩܝܢܢ ܒܚܝ̈ܘܗܝ ܕܡܪܐ ܥܘܗܕܢܐ܉ ܘܠܫܪܒܐ ܫܒܝܚܐ ܕܚܝ̈ܘܗܝ ܒܩܦܝܣܘ ܟܬܒܝܢ܉ ܟܕ ܐܡܪܝܢܢ:
ܐܬܝܠܕ ܠܗ ܡܪܝ ܝܥܩܘܒ ܒܥܺܝܢܕܰܒܰܐ ܩܪܝܬܐ ܕܒܐܘܚܕܢ ܐܢܛܝܘܟܝܐ ܣܝܡܐ ܫܢܬ ܣ̇ܠܓ ܡ̄ (633)܉ ܘܐܬܕܪܫ ܒܕܝܪܐ ܕܩܢܫܪܝܢ ܗܰܘ ܕܫܬܐܣܗ ܡܪܝ ܝܘܚܢܢ ܒܪ ܐܦܬܘܢܝܐ (+ܢܠܘ) ܫܢܬ ܢܠ ܡ̄ ܥܠ ܣܦܪܐ ܕܦܪܬ ܢܗܪܐ ܕܠܘܩܒܠ ܓܪܒܠܘܣ ܣܝܡ܉ ܕܒܝܬ ܓܘܣܐ ܗܘܐ ܕܝܘܠܦܢܐ ܘܒܝܬ ܨܘܒܐ ܕܝܕ̈ܘܥܬܢܐ ܣܘܪ̈ܝܝܐ ܥܕܡܐ ܠܕܪܐ ܬܠܬܥܣܝܪܝܐ.ܠܒܫܗ ܡܪܝ ܝܥܩܘܒ ܠܐܣܟܝܡܐ ܩܕܝܫܐ ܕܕܝܪܝܘܬܐ ܘܐܬܕܪܫ ܥܠ ܐܝܕ̈ܝ ܦܝܠܣܘܦܐ ܪܒܐ ܡܪܝ ܣܘܝܪܐ ܣܒܘܟܬ ܒܡܪܕܘܬܐ ܕܠܫܢܐ ܝܘܢܝܐ ܘܐܬܥܡܩ ܠܗ ܒܦܝܠܣܘܦܘܬܐ ܘܬܐܘܠܘܓܝܐ܉ ܟܢ ܐܫܩܠ ܠܗ ܠܐܠܟܣܢܕܪܝܐ ܠܫܘܡܠܝ ܝܕܥܬܗ ܕܒܦܝܠܣܘܦܘܬܐ ܘܠܫܢܐ܉ ܘܗܦܟ ܠܣܘܪܝܐ ܘܐܬܥܢܘܝ ܒܐܘܪܗܝ܉ܘܐܬܬܣܪܚ ܟܗܢܐ ܘܒܫܢܬ ܣܥܕ 674 ܡ̄ ܐܣܪܚܗ ܚܒܪܗ ܡܪ ܐܬܢܣܝܘܣ ܬܪܝܢܐ ܒܠܕܝܐ ܦܛܪܝܪܟܐ ܕܐܢܛܝܘܟܝܐ܉ ܡܝܛܪܦܘܠܝܛܐ ܠܐܘܪܗܝ ܡܕܝܢܬܐ ܕܠܗ̇ ܐܬܒܝܬܝ ܘܩܘܝ ܒܗ̇ ܐܪܒܥ ܫܢܝ̈ܢ܉ ܘܡܛܠ ܛܢܢܗ ܪܒܐ ܕܢܛܘܪܘܬ ܩܢܘܢ̈ܐ ܥܕ̈ܬܢܝܐ܉ ܘܨܒܝܢܗ ܠܙܝܙܐ ܠܡܦܢܝܘ ܛܘܟܣܐ ܠܕܝܪ̈ܬܐ ܕܡܪܥܝܬܗ܉ ܩܡܘ ܠܩܘܒܠܗ ܕܝܪ̈ܝܐ ܐܢܫܝ̈ܢ ܘܩܠܝܪܘܣ ܗܢܘܢ ܕܦܪܫ ܐܢܘܢ ܡܢ ܕܪ̈ܓܝܗܘܢ.
ܘܡܬܐܡܪܐ ܥܠܘܗܝ ܕܠܡ ܟܢܫ ܠܟܬܒ̈ܐ ܕܩܢܘܢ̈ܐ ܥܕ̈ܬܢܝܐ ܩܕܡ ܬܪܥܐ ܕܕܝܪܐ ܗܳܝ ܕܝܬܝܒ ܗܘܐ ܒܗ̇ ܝܘܠܝܢܐ ܦܛܪܝܪܟܐ ܥܡ ܐܦܣܩ̈ܘܦܐ ܐܢܫܝ̈ܢ (ܗܢܘܢ ܕܨܒܝܢ ܗܘܘ ܕܢܫܦ ܟܬܦܐ ܘܦܫܝܩܘܬܐ ܢܚܘܐ ܒܢܛܘܪܘܬ ܩܢܘܢ̈ܐ ܘܢܪܕܐ ܠܦܘܬ ܡܬܒܥܝܢܝ̈ܬܗ ܕܙܒܢܐ)܉ ܘܐܘܩܕ ܐܢܘܢ ܟܕ ܐܡܪ: ܗܐ ܡܘܩܕ ܐܢܐ ܠܩܢܘܢ̈ܐ ܗܢܘܢ ܕܒܪ̈ܓܠܝܟܘܢ ܕܝܫܝܢ ܐܢܬܘܢ ܐܢܘܢ܉ ܘܠܐ ܡܙܕܩܝܢ ܐܢܬܘܢ ܕܢܬܢܛܪܘܢ܉ ܘܡܢ ܝܬܝܪ̈ܬܐ ܚܫܝܒܝܢ ܠܟܘܢ ܘܠܐ ܡܘܬܪ̈ܢܐ ܘܗܟܢܐ ܐܫܬܐܠ ܡܢ ܡܕܒܪܢܘܬܐ ܕܡܪܥܝܬܐ ܘܐܙܠ ܥܡܪ ܠܗ ܒܕܝܪܐ ܕܡܪܝ ܝܥܩܘܒ ܕܒܟܝܫܘܡ ܕܩܪܝܒܐ ܠܫܡܝܫܛ܉
ܘܡܢ ܬܡܢ ܐܫܩܠ ܠܕܝܪܐ ܕܐܘܣܝܒܘܢܐ ܕܒܐܘܚܕܢ ܐܢܛܝܘܟܝܐ܉ ܘܩܘܝ ܒܗ̇ ܚܕܥܣܪ̈ܐ ܫܢܝ̈ܢ ܟܕ ܡܩܪܐ ܠܕܝܪ̈ܝܐ ܕܝܠܗ ܠܫܢܐ ܝܘܢܝܐ܉ ܟܢ ܐܙܠ ܠܕܝܪܐ ܕܬܠܥܕܐ ܕܒܓܪܒܝ ܡܥܪܒ ܚܠܒ ܡܕܝܢܬܐ ܣܝܡܐ ܘܩܘܝ ܬܡܢ ܐܝܟ ܬܫܥ ܫܢܝ̈ܢ ܘܒܗܰܘ ܙܒܢܐ܉ ܫܢܝ ܠܗ ܚܒܝܒ ܡܝܛܪܦܘܠܝܛܐ ܕܐܬܬܩܝܡ ܗܘܐ ܒܕܘܟܬܗ ܕܡܪܝ ܝܥܩܘܒ ܥܠ ܡܪܥܝܬܐ ܕܐܘܪܗܝ܉ ܘܒܥܘ ܡܢܗ ܐܘܪ̈ܗܝܐ ܕܢܗܦܘܟ ܠܡܪܥܝܬܗ܉ ܘܗܦܟ.ܘܒܬܪ ܐܪܒܥܐ ܝܪ̈ܚܐ ܐܙܠ ܠܕܝܪܐ ܕܬܠܥܕܐ ܕܢܣܒ ܟܬܒ̈ܘܗܝ܉ ܘܬܡܢ ܐܕܪܟܗ ܡܘܬܐ ܒܚܡܫܬܐ ܕܚܙܝܪܢ ܝܪܚܐ ܕܫܢܬ ܬܫܚ 708 ܡ̄܉ ܘܐܬܬܣܝܡܬ݀ ܫܟܝܢܬܗ ܒܕܝܪܐ ܕܥܗܝܕ.
ܐܝܢ܉ ܩܕܝܫܐ ܡܪܝ ܝܥܩܘܒ ܐܘܪܗܝܐ: ܬܐܘܠܘܓܝܐ ܗܘܐ ܘܟܬܘܒܐ ܘܡܬܪܓܡܢܐ ܕܬܪ̈ܝܗܘܢ ܠܫܢ̈ܐ ܣܘܪܝܝܐ ܟܝܬ ܘܝܘܢܝܐ܉ ܘܡܦܫܩܢܐ ܕܟܬܒܐ ܩܕܝܫܐ܉ ܘܗܟܘܬ ܐܬܟܢܝ ܡܦܫܩܢܐ ܕܟܬܒ̈ܐ ܫܒܩ ܓܝܪ ܝܬܝܪ ܡܢ ܬܠܬܝܢ ܟܬܒ̈ܐ ܗܢܘܢ ܕܡܢܗܘܢ ܣܡ ܐܘ ܬܪܓܡ ܐܘ ܐܨܚ ܡܬܝܕܥܢܐܝܬ ܕܝܢ ܕܦܫܩ ܠܟܠ ܐܬܘܬܐ ܕܒܟܬܒܐ ܩܕܝܫܐ܉ ܘܟܬܒ̈ܐ ܕܣܦܪ ܢܡܘܣܐ ܥܕܬܢܝܐ ܘܡܟܬܒܢܘܬܐ ܘܦܝܠܣܦܘܬܐ ܘܕܘܓܡ̈ܛܐ ܬܘܕ̈ܝܬܢܝܬܐ ܘܛܟܣ̈ܐ ܥܕ̈ܬܢܝܐ ܘܫܪܟܐ ܘܗܘܝܘ ܕܠܙܢܝ̈ ܙܘܥ̈ܐ ܣܘܪ̈ܝܝܐ ܐܒܥ܉ ܘܐܦ ܩܕܡܝܐ ܕܓܪܡܛܝܩܝ ܣܡ ܕܠܫܢܐ ܣܘܪܝܝܐ܉ ܘܣܝܘܡܗ ܕܬܘܪܨ ܡܡܠܠܐ ܚܫܝܒ ܠܘܬ ܣܘܪ̈ܝܝܐ ܘܐܘܪܚܐ ܢܣܒ ܚܕܰܬܐ ܠܬܘܪܓܡܐ܉ ܗܢܘܢ ܓܝܪ ܕܩܰܕܡܽܘܗܝ ܐܘܪܚܐ ܢܣܝܒܐ ܗܘܬ ܠܗܘܢ ܕܬܘܪܓܡܐ ܐܬܘܬܢܝܐ܉ ܗܘ ܕܝܢ ܡܬܪܓܡ ܗܘܐ ܡܢ ܠܫܢܐ ܠܐܚܪܢܐ ܠܦܘܬ ܣܘܟܠܐ ܘܠܘ ܐܬܘܬܐ.
ܚܢܢ ܕܝܢ ܟܕ ܠܥܘܗܕܢܐ ܕܥܒܳܪ ܐܠܦܐ ܘܬܠܬܡܐܐ ܫܢܝ̈ܢ ܕܫܘܢܝܗ ܕܠܐܘܢ̈ܐ ܫܡܝܢ̈ܐ ܡܥܕܥܕܝܢܢ܉ ܡܫܡܠܝܢ̈ܐ ܗܘܝܢܢ ܒܗܕܐ ܠܡܠܬܗ ܕܦܘܠܘܣ ܫܠܝܚܐ ܕܐܡܪ: «ܗܘܝܬܽܘܢ ܥܳܗܕܺܝܢ ܠܡܕܒܪ̈ܢܰܝܟܘܢ ܐܝܠܝܢ ܕܡܠܠܘ ܥܡܟܘܢ ܡܠܬܐ ܕܐܠܗܐ ܐܬܒܩܘ ܒܫܘܠܡܐ ܕܕܘܒܪ̈ܝܗܘܢ ܘܡܪܘ ܒܗܝܡܢܘܬܗܘܢ» (ܥܒܪ̄ ܝܓ:ܙ) ܦܩܕܝܢܢ ܗܟܝܠ ܕܒܟܠ ܡܪܥܝܬܐ ܕܡܢ ܡܪ̈ܥܝܬܐ ܕܝܠܢ ܣܘܪ̈ܝܝܬܐ ܕܒܟܠܗ̇ ܬܒܝܠ܉ ܕܥܕܥܐܕ̈ܐ ܢܥܒܕܘܢ ܕܥܘܗܕܢܐ ܗܢܐ ܫܒܝܚܐ ܘܝܩܝܪܐ܉ ܘܢܠܘܬܘܢ ܠܨܘܡܐ ܐܪܒܥܝܢܝܐ ܩܕܝܫܐ: ܨܠܘ̈ܬܐ ܘܦܘܠܓ ܙܕ̈ܩܬܐ܉ ܘܫܪܒܗ ܕܗܢܐ ܩܕܝܫܐ ܪܒܐ ܢܗܘܐ ܣܝܡ ܒܟܪ̈ܘܙܘܬܐ܉ ܕܢܬܡܰܪܘܢ ܒܚܝ̈ܘܗܝ܉ ܡܠܘܢ ܕܝܢ ܕܢܛܪܘܢ ܠܗܝܡܢܘܬܐ ܬܪܝܨܬܐ ܕܥܕܬܐ ܬܪܝܨܬ ܫܘܒܚܐ ܐܪܬܕܘܟܣܝܬܐ܉ ܘܠܩܢܘܢ̈ܐ ܕܫܠܝܚ̈ܐ ܘܕܐܒܗ̈ܬܐ܉ ܘܠܩܢܘܢ̈ܐ ܕܣܘܢܗܕ̈ܘ ܬܒܝܠܝ̈ܬܐ ܘܐܬܪ̈ܢܝܬܐ܉ ܒܗ̇ ܒܕܡܘܬܐ ܕܡܠܦ ܗܘܐ ܡܪܝ ܝܥܩܘܒ ܠܩܠܝܪܘܣ ܘܥܡܐ܉ ܕܠܩܢܘܢ̈ܐ ܢܛܪܘܢ ܗܢܘܢ ܕܐܬܬܣܝܡܘ ܕܡܗܝܡܢ̈ܐ ܠܗܘܢ ܢܫܡܠܘܢ ܡܛܠ ܒܶܢܝܳܢ ܢܦܫ̈ܬܐ܉ ܘܠܡܗܦܟ ܠܘܬ ܐܠܗܐ ܒܬܝܒܘܬܐ ܫܪܝܪܬܐ ܘܕܟܝܘܬ ܠܒܐ ܘܚܝ̈ܐ ܛܒ̈ܐ.ܚܒܝ̈ܒܝ܉ ܢܥܒܕܝܘܗܝ ܡܪܝܐ ܐܠܗܐ ܠܥܘܗܕܢܐ ܗܢܐ ܫܒܝܚܐ ܕܥܠܬܐ ܕܛܝܒܘܬܐ ܢܘܗܐ ܘܕܒܘܪܟܬܐ ܠܟܠܟܘܢ܉ ܒܒܥܘܬܐ ܕܝܠܕܬ ܐܠܗܐ ܒܬܘܠܬܐ ܡܪܝܡ ܘܕܩܕܝܫܐ ܡܝܩܪܐ ܡܪܝ ܝܥܩܘܒ ܐܘܪܗܝܐ ܘܫܪܟܐ ܕܣܗܕ̈ܐ ܘܩܕ̈ܝܫܐ.
ܘܒܥܠܬ ܨܘܡܐ ܐܪܒܥܝܢܝܐ ܩܕܝܫܐ܉ ܫܐܠܝܢܢ ܠܡܪܝܐ ܕܠܨܘܡܟܘܢ ܘܨܠܘ̈ܬܟܘܢ ܘܙܕ̈ܩܬܟܘܢ ܢܩܒܠ܉ ܘܠܟܘܢ ܢܫܘܐ ܕܬܥܕܥܕܘܢ ܠܥܐܕܐ ܫܒܝܚܐ ܕܩܝܡܬܐ ܒܚܕܘܬܐ ܘܦܨܝܚܘܬܐ ܘܚܘܠܡܢܐ ܓܡܝܪܐ܉ ܘܩܘܘ ܒܟܠ ܫܢܐ ܒܛܒܘ܉ ܘܐܒܘܢ ܕܒܫܡܝܐ ܘܫܪܟܐ.
ܟܬܺܝܒ ܒܩܶܠܳܝܬܰܢ ܦܰܛܪܝܰܪܟܳܝܬܳܐ ܕܰܒܕܰܪܡܣܽܘ̇ܩ ـ ܣܽܘܪܺܝܰܐ
ܒܬܡܢܝܐ ܕܫܒܛ ܝܪܚܐ ܕܫܢܬ ܬܪܝܢ ܐܠܦܝ̈ܢ ܘܬܡܢܐ
ܕܐܝܬܝܗ̇ ܫܢ̱ܬܐ ܕܥܣܪܝܢ ܘܬܡܢܐ ܕܦܛܪܝܪܟܘܬܢ