2007- ܢܝܚܘܬܐ ܘܡܟܝܟܘܬܐ

ܒܽܘܪܟܬܳܐ ܫܠܺܝܚܳܝܬܳܐ ܘܨܠ̈ܘܳܬܳܐ ܡܳܪ̈ܳܢܳܝܬܳܐ ܡܫܟܢܺܝܢܢ ܠܐܚܝ̈ܢ ܡܥܠܝ̈ܳܐ ܛܽܘܒܬܳܢܽܘܬܶܗ ܕܡܳܪܝ ܒܣܶܝܠܝܘܣ ܬܐܘܡܐ ܩܕܡܳܝܳܐ ܡܦܪܝܳܢܳܐ ܕܗܶܢܕܽܘ ܡܺܝܛܪ̈ܽܦܽܘܠܺܝܛܶܐ ܪ̈ܳܡܝ ܐܺܝܩܳܪ̈ܶܐ ܘܒܢܰܝ̈ܳܐ ܕܺܝܠܢ ܪ̈ܽܘܚܳܢܳܝܶܐ ܟܽܘܪ̈ܳܝܶܐ ܘܟܳܗ̈ܢܶܐ ܘܕܝܪ̈ܳܝܶܐ ܘܕܝܪ̈ܳܝܳܬܳܐ ܘܡܫܡ̈ܫܳܢܶܐ ܘܡܫܡ̈ܫܳܢܝܳܬܳܐ ܘܫܪܟܳܐ ܕܥܡܳܐ ܕܺܝܠܢ ܣܽܘܪܝܳܝܳܐ ܐܳܪܬܳܕܽܘܟܣܳܝܳܐ ܕܒܟܽܠܳܗ̇ ܬܒܶܝܠ ܡܝܩܪ̈ܶܐ. ܢܛܺܝܪ̈ܶܐ ܢܶܗܘܽܘܢ ܒܒܛܺܝܠܽܘܬܳܐ ܡܳܪܳܢܳܝܬܳܐ ܒܨܠ̈ܘܳܬܳܐ ܕܒܬܽܘܠܬܳܐ ܡܪܝܡ ܘܕܡܳܪܝ ܦܶܛܪܽܘܣ ܪܺܝܫܳܐ ܕܫܠܺܝ̈ܚܶܐ ܘܫܪܟܳܐ ܕܣܳܗܕ̈ܐ ܘܩܕ̈ܺܝܫܶܐ܉ ܐܡܺܝܢ܀

ܢܝܚܘܬܐ ܘܡܟܝܟܘܬܐ

ܐܶܡܪ ܝܶܫܽܘܥ ܡܳܪܢ: ”ܬ݁ܘ ܠܘܳܬ݂ܝ ܟ݁ܽܠܟ݂ܽܘܢ ܠܰܐܝ̈ܳܐ ܘܫܩܺܝ̈ܠܝ ܡܘ̈ܒ݁ܠܶܐ ܘܶܐܢܳܐ ܐܢܺܝܚܟ݂ܽܘܢ܂ ܫܩܽܘܠܘ ܢܺܝܪܝ ܥܠܝܟ݁ܽܘܢ ܘܺܝܠܦ݂ܘ ܡܶܢܝ ܕ݁ܢܺܝܚ ܐ̱ܢܳܐ ܘܡܰܟ݁ܺܝܟ݂ ܐ̱ܢܳܐ ܒ݁ܠܶܒ݁ܝ ܘܡܶܫܟ݁ܚܺܝܢ ܐܢ̱ܬ݁ܽܘܢ ܢܝܳܚܳܐ ܠܢܦ݂ܫ̈ܳܬ݂ܟ݂ܽܘܢ܂ ܢܺܝܪܝ ܓ݁ܶܝܪ ܒ݁ܣܺܝܡ ܗ̱ܘ ܘܡܘܒ݁ܰܠܝ ܩܠܺܝܠܳܐ ܗ̱ܝ (ܡܬܝ ܝܐ ܟܚ ـ ܠ)

ܐܳܘ ܟܢܫܐ ܕܡܗܝܡ̈ܢܶܐ:
ܡܟܺܝܟܽܘܬܳܐ ܡܰܢ ܘܢܺܝܚܽܘܬܳܐ (ܬܰܡܝܡܘܬܐ) ܬܪܬܶܝܢ ܐܶܢܶܝܢ ܡܝܰܬܪ̈ܳܬܳܐ ܫܡܝܳܢ̈ܝܳܬܳܐ ܘܡܥܠ̈ܝܳܬܳܐ܉ ܕܠܚܕܕ̈ܐ ܡܓܰܡܪ̈ܳܢ. ܒܡܟܺܝܟܽܘܬܐ ܓܝܪ ܕܺܝܠܰܢ܉ ܠܐܠܳܗܳܐ ܡܫܒܚܝܢܢ܈ ܘܒܛܒܘܬܗ ܕܠܐ ܙܥܽܘܪܐ ܕܠܰܢ܉ ܡܘܕܝܢܢ. ܕܗܽܘܝܽܘ ܒܳܪܽܘܝܢ ܘܕܰܒܛܺܝܠ ܠܶܗ ܥܠܝܢ. ܘܐܝܬ ܠܰܢ ܕܢܰܐܡܶܢ ܘܬܘܕ̈ܝܬܐ ܠܗ ܠܐܠܳܗܳܐ ܡܪܝܡܳܐ ܢܩܪܒ܉ ܟܕ ܒܡܚܺܝܠܽܘܬܢ ܡܘܕܶܝܢܢ ܘܣܢܺܝܩܽܘܬܢ ܕܰܠܪ̈ܚܡܘܗܝ܆ ܘܚܬܝܬܐܝܬ ܬܟܺܝܠܺܝܢܢ ܕܠܡ ܟܽܠ ܕܐܝܬ ܠܢ: ܡܘܗ̈ܒܳܬܳܐ ܟܝܬ ܫܡܝܳܢ̈ܝܳܬܳܐ ܘܐܪ̈ܥܳܢܝܳܬܳܐ܆ ܘܛܝܒ̈ܘܳܬܳܐ ܕܒܗܝܢ ܡܬܒܣܡܝܢܢ ܒܚܝ̈ܐ܆ ܡܘܗ̈ܒܳܬܳܐ ܐܶܢܶܝܢ ܕܡܓܳܢ ܠܢ ܝܗܝܒ̈ܢ ܡܢܗ ܕܩܕܝܫܐ. ܡܶܛܽܠܗܳܕܶܐ ܠܝܬ ܠܢ ܗܳܝ ܕܢܫܬܰܩܰܠ ܘܢܬܚܬܪ. ܐܠܐ ܕܢܘܕܐ ܒܛܒܘܬܗ ܕܐܠܳܗܳܐ܆ ܘܢܪܚܩ ܠܢ ܡܶܢ ܪܳܡܽܘܬܳܐ ܗܳܝ ܕܡܒܥܕ̈ܶܐ ܥܳܒܕܳܐ ܠܢ ܡܶܢܶܗ ܕܐܠܳܗܳܐ܆ ܘܠܐܕ̈ܢܝܢ ܐܕܫܐ ܕܠܐ ܢܫܡܥ ܠܢ ܠܡܠܬܗ ܚܝܬܐ܆ ܘܠܘܳܬ ܣܶܓܕܬ ܝܳܬܐ ܘܟܦܽܘܪܝܳܐ ܠܢ ܢܳܓܕܳܐ. ܘܙܕܩ ܠܢ ܕܡܟܺܝܟܽܘܬܳܐ ܠܗܘܢܢ ܕܬܡܠܐ ܢܥܒܕ ܘܠܠܒܢ ܒܢܽܘܗܪܶܗ ܕܡܫܺܝܚܳܐ܆ ܘܬܰܚܒ ܒܗܘܢ ܠܓܡܽܘܪܬܳܐ ܡܫܠܗܒܬܳܐ ܕܗܰܝܡܳܢܽܘܬܳܐ܉ ܘܬܽܘܟܠܳܢܳܐ ܕܥܠܘܗܝ ܕܐܠܳܗܳܐ܆ ܘܗܝܡܢܘܬܐ ܒܫܪܺܝܪ̈ܘܳܬܳܐ ܕܬܘܕܝܬܐ ܕܰܓܠܐ ܐܢܝܢ ܠܢ ܐܠܗܐ ܒܟܬܳܒܶܗ ܩܕܺܝܫܳܐ ܕܐܝܬܘܗܝ ܡܶܠܬܳܐ ܚܝܬܳܐ ܕܐܠܳܗܳܐ ܘܒܗܳܕܶܐ ܡܫܒܚܝܢ ܗܘܝܢܢ ܠܫܡܶܗ ܩܕܺܝܫܳܐ ܥܡ ܡܳܪܶܐ ܡܙܡܽܘܪ̈ܶܐ ܕܳܐܡܪ: ”ܠܳܐ ܠܢ ܡܳܪܝܐ ܠܳܐ ܠܢ܉ ܐܶܠܳܐ ܠܫܡܳܟ ܗܒ ܐܺܝܩܳܪܳܐ“ (ܡܙ̄ܡ ܩܝܕ: ܐ)

ܡܝܬܪܽܘܬܳܐ ܡܕܶܝܢ ܕܡܟܺܝܟܽܘܬܳܐ: ܕܽܘܡܣܳܐ ܐܝܬܝܗ̇ ܘܣܟܐ ܕܟܽܠܗܶܝܢ ܡܝܬܪ̈ܳܬܳܐ ܕܡܫܺܝܚܳܝܽܘܬܳܐ. ܢܺܝܚܽܘܬܳܐ ܕܝܢ ܦܺܐܪܳܗ̇ ܡܰܗܝܳܐ ܐܝܬܝܗ̇ ܘܒܰܪܬ ܠܶܘܝܬܗ̇ ܒܐܓܽܘܢܳܐ ܪܽܘܚܳܢܳܝܳܐ ܕܒܐܡܺܝܢܽܘ ܢܰܩܺܝܦܳܐ ܠܳܗ̇. ܘܡܳܐ ܕܡܶܣܬ̊ܬ̊ܬ̥ܳܐ ܠܳܗ̇ ܡܝܬܪܽܘܬܳܐ ܕܡܟܺܝܟܽܘܬܳܐ ܒܠܶܒܶܗ ܘܒܗܘܢܶܗ ܕܒܪܢܳܫܳܐ ܘܬܶܗܘܶܐ (ܩܰܢܳܝܘܬܐ) ܡܰܘܗܰܒܬܳܐ ܓܒܝܠܬܐ ܟܶܐܡܰܬ ܕܽܘܒܳܪܳܐ ܐܰܡܺܝܢܳܐ ܘܣܬܺܝܬܳܐ ܒܢܦܫܶܗ܉ ܡܬܚܙܝܐ ܗܳܝܕܶܝܢ ܠܟܽܠ ܐܢܳܫ ܒܝܰܕ ܕܽܘܒܳܪ̈ܰܘܗܝ܉ ܒܕ ܩܳܢܶܐ ܗܳܘܶܐ ܒܪܢܳܫܳܐ ܗܰܘ ܠܪܝܫ ܢܺܝܚܽܘܬܳܐ (ܬܡܝܡܘܬܐ)܉ ܘܡܬܝܗܒܐ ܠܶܗ ܠܒܺܝܒܽܘܬܳܐ ܪܽܘܚܳܢܳܝܳܬܳܐ ܕܣܳܦܩܳܐ ܠܡܩܪܒܘ ܥܡܗ ܕܳܐܟܶܠܩܪܨܳܐ ܠܺܝܛܳܐ ܘܢܙܟܐ ܠܢܶܣ̈ܝܽܘܢܘܗܝ ܥܣ̈ܩܶܐ܉ ܘܰܡܫܰܟܶܢ ܠܶܗ ܐܠܳܗܳܐ ܚܝܠܐ ܕܣܳܦܶܩ ܕܢܐܚܘܕ ܢܦܫܗ܉ ܘܢܬܒܪ ܚܺܐܦܳܐ ܕܪܽܘܓܙܳܐ܉ ܘܢܟܒܘܫ ܠܬܪܥܝܬܗ ܣܢܝܐܬܐ ܘܩܽܘܦܳܚ ܥܽܘܙܐ ܕܪ̈ܓܝܓܬܗ܉ ܟܰܕ ܡܰܒܥܰܕ ܡܶܢ ܐܟܬܳܐ ܘܶܐܠܡܳܐ ܣܰܢܝܐ܉ ܘܡܶܬܡܰܪܶܐ ܒܦܽܘܩ̈ܕܳܢܶܐ ܕܡܳܪܢ ܕܳܐܡܪ: ”ܕ݁ܠܳܐ ܬ݂ܩܽܘܡܽܘܢ ܠܽܘܩܒ݂ܠ ܒ݁ܺܝܫܳܐ ܐܶܠܳܐ ܡܰܢ ܕ݁ܡܳܚܶܐ ܠܳܟ݂ ܥܠ ܦ݁ܟ݁ܳܟ݂ ܕ݁ܝܡܺܝܢܳܐ ܐܦ݂ܢܳܐ ܠܶܗ ܐܳܦ݂ ܐ̱ܚܪܺܢܳܐ܂ ܘܡܰܢ ܕ݁ܨܳܒ݂ܶܐ ܕ݂ܢܕ݂ܽܘܢ ܥܡܳܟ݂ ܘܢܶܫܩܽܘܠ ܟ݁ܽܘܬ݁ܺܝܢܳܟ݂ ܫܒ݂ܽܘܩ ܠܶܗ ܐܳܦ݂ ܡܪܛܽܘܛܳܟ݂“ (ܡܬܝ ܗ: ܠܛ ـ ܡ) ”ܐܶܢܳܐ ܕ݂ܶܝܢ ܐܳܡܪ ܐ̱ܢܳܐ ܠܟ݂ܽܘܢ ܐܚܶܒ݂ܘ ܠܒ݂ܥܶܠܕ݁̈ܒ݂ܳܒ݂ܝܟ݁ܽܘܢ ܘܒ݂ܪܶܟ݂ܘ ܠܡܰܢ ܕ݁ܠܳܐܶܛ ܠܟ݂ܽܘܢ ܘܰܥܒ݂ܶܕ݂ܘ ܕ݁ܫܰܦ݁ܺܝܪ ܠܡܰܢ ܕ݁ܣܳܢܶܐ ܠܟ݂ܽܘܢ ܘܨܰܠܰܘ ܥܠ ܐܝܠܶܝܢ ܕ݁ܕ݂ܳܒ݂ܪܺܝܢ ܠܟ݂ܽܘܢ ܒ݁ܰܩܛܺܝܪܳܐ ܘܪܳܕ݂ܦ݁ܺܝܢ ܠܟ݂ܽܘܢ (ܡܬܝ ܗ: ܡܕ) ܘܒܗܳܕܶܐ ܠܚܘܕ ܗܳܘܝܳܐ ܠܢ ܢܺܝܚܽܘܬܳܐ (ܬܡܝܡܘܬܐ) ܟܝܳܢܳܐ܆ ܘܡܶܬܗܰܦܟܝܢ ܗܘܝܢܢ ܥܰܡ ܒܢܝ̈ܢܳܫܳܐ ܒܒܣܺܝܡܳܘܬܐ ܘܪܶܚܡܬܐ܉ ܘܡܬܕܡܝܢ ܒܡܫܺܝܚܳܐ ܝܶܫܽܘܥ ܡܳܪܢ ܕܦܰܩܕܰܢ ܠܡܺܐܠܰܦ ܡܶܢܶܗ ܡܛܠ ܕܢܺܝܚܽ ܗ̱ܘ ܘܡܟܺܝܟ ܠܒܐ. ܘܗܶܢܶܝܢ ܗܳܠܶܝܢ ܬܪܬܶܝܢ ܡܝܬܪ̈ܳܬܳܐ ܢܰܗܝܪ̈ܢ ܗܘ̈ܝ ܒܟܽܠܗܽܘܢ ܕܽܘܒܳܪ̈ܘܗܝ ـ ܕܠܶܗ ܫܽܘܒܚܳܐ ـ ܒܰܙܒܰܢ ܡܕܒܪܳܢܽܘܬܶܗ ܐܠܳܗܳܝܬܳܐ ܕܒܰܒܣܰܪ܉ ܒܗܳܝ ܕܰܐܚܶܒ ܠܛ̈ܠܳܝܶܐ ܘܗܶܢܽܘܢ ܒܣܶܡܘ ܒܦܶܓܥܶܗ ܘܰܐܚܒܽܘܗܝ܉ ܘܶܐܬܗ̱ܦܶܟܘ ܪ̈ܚܡܘܗܝ ܥܠ ܢܶܫ̈ܐ܉ ܘܚܳܣ ܥܰܠ ܡܰܣܟ̈ܠܳܢܶܐ ܘܫܰܦܝ ܠܗܽܘܢ ܐܽܘܪܚܳܐ ܠܡܗܦܟ ܠܘܳܬܶ ܐܠܳܗܳܐ ܒܬܝܳܒܽܘܬܳܐ ܕܫܪܺܝܪܳܐ. ܐܟܡܐ ܕܳܐܦ ܠܣܳܢ̈ܰܐܘܗܝ ܘܠܣܳܩܽܘܪ̈ܘܗܝ ܫܒܰܩ܉ ܘܗܳܟܰܢܳܐ ܐܰܠܦܰܢ ܠܗܳܠܶܝܢ ܬܪܬܶܝܢ ܡܝܬܪ̈ܳܬܳܐ ܒܬܰܦܢܟܳܐ ܘܰܒ̈ܡܶܠܶܐ ܘܛܽܘܦ̈ܣܶܐ. ܐܢ ܕܝܢ ܡܡܰܪ̈ܝܳܢܶܐ ܒܶܗ ܐܫܬܟܚܢܢ܉ ܘܒܥܶܩ̈ܒܘܗܝ ܕܪܟܢܢ܉ ܗܳܝܕܶܝܢ ܫܠܳܡܳܐ ܡܫܟܚܝܢܢ ܥܡ ܐܠܳܗܳܐ ܟܕ ܠܨܶܒܝܳܢܶܗ ܡܳܪܳܢܳܝܳܐ ܠܢ ܢܫܠܡ ܓܡܝܪܐܝܬ ܐܢ ܒܛܳܒܬܳܐ ܐܘ ܒܺܝܫܬܳܐ܉ ܘܗܟܘܬ ܬܽܘܒ ܫܠܳܡܳܐ ܥܡ ܢܦ̈ܫܳܬܢ ܡܶܫܟܚܝܢܢ ܘܢܩܰܒܶܠ ܢܺܝܚܽܘܬ ܬܺܐܪܬܳܐ ܒܚܘܒܰܢ ܕܠܐܠܳܗܳܐ ܗܘ ܕܐܚܒܢ܉ ܘܡܶܫܬܡܥܳܢܽܘܬܢ ܕܠܦܽܘܩ̈ܕܳܢܘܗܝ ܘܡܪܚܩܘܬܢ ܡܢ ܟܠܝ̈ܢܘܗܝ܉ ܘܫܘܡܠܝ ܕ̈ܝܢܐ ܥܺܕ̈ܬܳܢܳܝܶܐ܆ ܘܕܢܶܗܘܶܐ ܒܫܠܳܡܳܐ ܥܰܡ ܩܪܺܝܒܳܐ ܘܢܶܪܚܡܺܝܘܗܝ ܘܢܕܰܠܩܶܒ ܠܒܝܫ̈ܬܗ ܒܫܽܘܒܩܳܢܳܐ܉ ܘܰܢܨܠܐ ܡܛܠܬܗ܉ ܐܝܟ ܦܽܘܩܕܳܢܶܗ ܕܦܘܠܽܘܣ ܫܠܺܝܚܳܐ ܠܬܠܡܺܝܕܶܗ ܛܺܝܡܳܬܶܐܘܣ ”ܕ݁ܢܶܗܘܶܐ ܪܳܕ݂ܶܐ ܠܰܐܝܠܶܝܢ ܕ݁ܡܶܬ݂ܚܪܶܝܢ ܠܩܽܘܒ݂ܠܶܗ ܒ݁ܡܰܟ݁ܺܝܟ݂ܽܘܬ݂ܳܐ ܕ݁ܰܠܡܳܐ ܢܶܬ݁ܶܠ ܠܗܽܘܢ ܐܰܠܳܗܳܐ ܬ݁ܝܳܒ݁ܽܘܬ݂ܳܐ ܘܢܶܕ݁ܥܽܘܢ ܫܪܳܪܳܐ“ (ܒ ܛܝܡ̄ ܒ: ܟܕ ܘ ܟܗ).

ܒܝܰܕ ܢܺܝܚܽܘܬܶܗ ܘܡܰܟܺܝܟܽܘܬܶܗ ܗܳܟܺܝܠ܆ ܬܪܨ ܝܶܫܽܘܥ ܡܫܺܝܚܳܐ ܡܳܪܰܢ ܠܥܳܠܡܳܐ ܣܘܟܠܐ ܕܡܝܰܬܪ̈ܳܬܳܐ ܫܡܰܝܳܢ̈ܝܳܬܳܐ ܘܝܰܩܺܝܪ̈ܘܳܬܳܐ ܥܶܠܳܝ̈ܳܬܳܐ ܕܫܦܝܪܘܬ ܕܘܒܪ̈ܐ܆ ܘܶܐܢܗܘ ܕܐܶܬܚܰܫܒܰܬ ܢܺܝܚܽܘܬܳܐ (ܬܡܝܡܘܬܐ)܉ ܡܚܝܠܘܬܐ܉ ܩܕܳܡ ܝܰܠܕܶܗ ܕܝܶܫܽܘܥ ܡܫܺܝܚܳܐ ܡܳܪܰܢ ܕܒܰܒܣܰܪ܆ ܒܪܰܡ ܒܰܡܫܺܝܚܳܝܽܘܬܳܐ ܚܝܠܐ ܐܺܝܬܶܝܗ̇ ܪܽܘܚܳܢܳܝܳܐ ܕܪܳܡ. ܘܶܐܢܗܘ ܕܶܐܣܬܰܒܪܰܬ ܠܳܗ̇ ܡܟܝܟܘܬܐ ܒܕܰܥܒܰܪ ܡܳܟܘܬܐ܉ ܠܐ ܒܪܰܡ ܒܰܡܫܺܝܚܳܝܽܘܬܳܐ ܪܽܘܡܪܳܡܳܐ ܐܺܝܬܶܝܗ̇ ܘܡܬܥܠܝܢܘܬܐ ܕܡܢ ܣܢܝ̈ܬܐ܉ ܘܙܳܟܽܘܬܳܐ ܗ̄ܝ ܩܪܺܝܚܬܳܐ ܥܰܠ ܣܳܛܳܢܳܐ ܠܺܝܛܳܐ ܘܢܳܩܽܘܦܰܘܗ̈ܝ ܢܦܝ̈ܚܰܝ ܪܡܘܬܐ܉ ܘܚܽܘܝܳܒܳܐ ܠܪܡܘܬܗܘܢ ܗܳܝ ܕܰܐܚܬܰܬ ܐܶܢܽܘܢ ܠܥܘܡܩܐ ܕܠܐ ܡܬܛܦܝܣܢܘܬܐ ܘܰܗܘܰܘ ܠܗܘܢ ܒܥܠܕ̈ܒܒܐ ܕܰܐܠܳܗܳܐ ܘܰܕܒܢܝ̈ܢܳܫܐ. ܐܰܟܡܳܐ ܕܐܦ ܠܒܰܪܢܳܫܳܐ ܐܦܠܬ ܪܳܡܽܘܬܳܐ ܘܶܐܬܦܠܦܠ ܠܶܗ ܒܰܚܛܺܝܬܳܐ ܕܡܳܪܽܘܕܽܘܬܳܐ ܥܠܰܘܗܝ ܕܒܳܪܽܘܝܳܐ ܘܶܐܫܬܘܺܝ ܠܰܓܙܳܪܕܺܝܢܳܐ ܕܡܰܘܬܳܐ. ܥܰܠܗܳܕܶܐ ܘܰܐܝܟܰܢܳܐ ܕܝܶܫܽܘܥ ܡܫܺܝܚܳܐ ܡܳܪܰܢ ܢܶܦܪ̱ܩܺܝܘܗܝ ܠܒܰܪܢܳܫܳܐ ܡܶܢ ܥܶܨܝܳܢܳܐ ܘܬܶܢܝܳܢܽܘܬ ܢܰܥܛܶܦ ܠܶܗ ܚܰܝ̈ܐ܆ ܐܚܠܡܶܗ ܒܡܰܟܺܝܟܽܘܬܳܐ ܘܦܰܪܓܠܶܗ ܕܢܶܨܛܰܒܰܬ ܒܰܡܝܰܬܪܽܘܬ ܡܽܘܟܳܟܳܐ ܟܰܕ ܐܳܡܰܪ ܠܬܰܠܡܺܝ̈ܕܰܘܗܝ: ”ܗܳܐ ܐܶܢܳܐ ܡܫܰܕ݁ܰܪ ܐ݈ܢܳܐ ܠܟ݂ܽܘܢ ܐܰܝܟ݂ ܐܶܡܪ̈ܶܐ ܒ݂ܰܝܢܰܝ ܕ݁̈ܺܐܒ݂ܶܐ ܗܘܰܘ ܗܳܟ݂ܺܝܠ ܚܰܟ݁ܺܝ̈ܡܶܐ ܐܰܝܟ݂ ܚܘܰܘ̈ܳܬ݂ܳܐ ܘܬ݂ܰܡܺܝ̈ܡܶܐ ܐܰܝܟ݂ ܝܰܘܢ̈ܶܐ“ (ܡܬܝ ܝ: ܝܘ)

ܐܺܝܢ܆ ܬܰܠܡܺܝ̈ܕܰܘܗܝ ܕܺܝܠܶܗ ܕܡܳܪܰܢ ܐܰܕܪܶܟܘ ܠܪܰܒܽܘܬܳܐ ܕܡܰܠܦܳܢܗܽܘܢ ܐܰܠܳܗܳܝܳܐ ܘܶܐܫܬܰܘܕܰܥܘ ܠܝܘܩܪܐ ܕܢܰܦܫ̈ܬܗܽܘܢ ܡܚܝ̈ܠܳܬܳܐ ܘܶܐܫܬܰܪܰܪܘ ܠܗܽܘܢ ܡܶܢ ܐܰܡܺܝܢܽܘܬ ܣܢܺܝܩܽܘܬܳܗܘܢ ܕܰܠܡܪܝܐ܉ ܘܠܳܐ ܬܗܝܪܐ ܗܳܕܶܐ܉ ܒܰܕ ܢܰܗܰܪ ܠܗܘܢ ܡܳܪܰܢ ܠܫܪܝܪܘܬܐ ܗܕܐ ܟܰܕ ܐܳܡܰܪ: ”ܩܰܘܰܘ ܒ݁ܺܝ ܘܶܐܢܳܐ ܒ݂ܟ݂ܽܘܢ ܐܰܝܟ݁ܰܢܳܐ ܕ݂ܰܫܒ݂ܺܫܬ݁ܳܐ ܠܳܐ ܡܶܫܟ݁ܚܳܐ ܕ݂ܬ݂ܶܬ݁ܶܠ ܦ݁ܺܐܪ̈ܶܐ ܡܶܢ ܢܰܦ݂ܫܳܗ̇ ܐܶܠܳܐ ܡܩܰܘܝܳܐ ܒ݂ܰܓ݂ܦ݂ܶܬ݁ܳܐ ܗܳܟ݂ܰܢܳܐ ܐܳܦ݂ ܠܳܐ ܐܰܢ̱ܬ݁ܽܘܢ ܐܶܠܳܐ ܬ݂ܩܰܘܽܘܢ ܒ݁ܺܝ܂ ܐܶܢܳܐ ܐ̱ܢܳܐ ܓ݂ܦ݂ܶܬ݁ܳܐ ܘܰܐܢ̱ܬ݁ܽܘܢ ܫܒ݂ܺܫ̈ܬ݁ܶܐ ܡܰܢ ܕ݁ܰܡܩܰܘܶܐ ܒ݂ܺܝ ܘܶܐܢܳܐ ܒ݂ܶܗ ܗܳܢܳܐ ܡܰܝܬ݁ܶܐ ܦ݂ܺܐܪ̈ܶܐ ܣܰܓ݁ܺܝ̈ܶܐܐ ܡܶܛܽܠ ܕ݁ܰܕ݂ܠܳܐ ܐܶܢܳܐ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܥܒ݁ܰܕ݂ ܡܶܕ݁ܶܡ“ (ܝܘܚܢܢ ܝܗ: ܕـ ܗ)

ܚܰܒܺܝܒܰܝ̈܆

ܒܶܗ ܒܗܳܢܳܐ ܙܰܒܢܳܐ ܡܙܰܠܗ̱ܙܳܐ܆ ܥܺܕܬܰܢ ܩܰܕܺܝܫܬܳܐ ܒܙܒܢܐ ܥܐܠܐ ܕܛܳܒ ܩܰܫܝܳܐ ܒܡܰܟܬܰܒܙܰܒܢܳܗ̇ ܚܰܕܬܳܐ ܘܺܐܝܬܰܘܗܝ ܫܘܚܠܦܐ ܪܒܐ ܘܩܰܢܺܝܛܳܐ. ܘܓܳܠܽܘܬܳܐ ܫܺܝܥܳܢܳܝܬܳܐ ܡܶܨܛܰܢܥܳܐ ܠܡܦܰܠܗܳܕܘ ܒܢܶܝ̈ܗ̇ ܒܦܰܗܝ̈ܬܐ ܕܰܫܒܺܝ̈ܠܝ ܥܳܠܡܳܐ܆ ܘܡܰܪܚܩܳܐ ܠܗܽܘܢ ܡܶܢ ܫܶܪܫܗܽܘܢ ܡܰܟܬܰܒܙܰܒܢܳܝܳܐ ܘܡܰܒܽܘܥ̈ܐ ܕܝܰܩܺܝܪ̈ܘܳܬܳܐ ܪ̈ܽܘܚܳܢܳܝܳܬܳܐ ܕܺܝܪܶܬܘ ܐܶܢܶܝܢ ܡܶܢ ܐܰܒܳܗ̈ܬܗܽܘܢ ܡܒܪ̈ܟܐ. ܐܰܟܡܳܐ ܕܐܦ ܣܳܢ̈ܝܰܝ ܫܪܳܪܳܐ ܨܳܠܶܝܢ ܢܶܫܒܝ̈ܗܘܢ ܠܰܡܨܳܕ ܐܢܘܢ܉ ܘܰܢܨܰܒܘ ܠܗܽܘܢ ܡܨܺܝ̈ܕܳܬܳܐ ܕܢܶܟܠܳܐ ܒܰܐܬܪܳܐ ܕܝܠܗܘܢ ܘܰܒܓܳܠܽܘܬܳܐ. ܐܝܬ ܓܝܪ ܬܡܢ ܡܪ̈ܝ ܐܪ̈ܣܝܣ ܫܟܝܪ̈ܬܐ ܕܥܬܝܩ̈ܢ܉ ܘܐܝܬ ܬܘܒ ܣܺܝ̈ܥܳܬܳܐ ܚܕ̈ܬܬܐ ܗܳܢܶܝܢ ܕܡܫܺܝܚܳܝܽܘܬܳܐ ܫܡܐ ܠܗܝܢ ܢܣܒ̈ܢ ܟܕ ܡܫܺܝܚܳܝܽܘܬܳܐ ܢܘܟܪܝܐ ܡܶܢܗܶܝܢ. ܘܶܐܬܰܘ ܢܩܘܦܝ̈ܗܝܢ ܕܺܐܒ̈ܐ ܚܳܛܽܘܦ̈ܐ ܒܰܠܒܽܘܫ̈ܐ ܕܶܐܡܪ̈ܶܐ ܕܒܳܥܶܝܢ ܒܽܘܣܒܳܣ ܓܙܳܪܶܗ ܕܰܡܫܺܝܚܳܐ. ܘܐܝܬ ܪܳܡܽܘܬܳܐ ܐܶܡܳܐ ܕܟܠܗܝܢ ܒܝܫ̈ܬܐ ܗܳܝ ܕܕܳܠܰܬ ܒܗܰܘ̈ܢܶܐ ܕܡܶܢܗܽܘܢ ܕܰܒܢܰܝ̈ܢܳܫܳܐ ܘܐܝܬܝܘ ܡܰܪ̈ܢܝܳܬܳܐ ܣܪ̈ܺܝܩܳܬܳܐ ܕܢܫܬܠܛܘܢ ܒܳܥܶܝܢ ܥܰܠ ܥܺܕܬܳܐ ܘܢܦܠܗܕܘܢ ܛܽܘܟܳܣܶܝ̈ܗ̇ ܡܕܰܒܪ̈ܳܢܳܝܳܐ ܗܢܘܢ ܕܡܢ ܐܰܠܳܗܳܐ ܐܢܘܢ ܘܠܘ ܡܢ ܐܢܳܫ̈ܳܐ. ܒܗܳܝ ܕܥܺܕܬܳܐ ܫܽܘܬܳܐܣܳܐ ܐܺܝܬܶܝܗ̇ ܪܽܘܚܳܢܳܝܳܐ ܘܓܘܫܡܗ ܐܪܳܙܳܢܳܝܳܐ ܕܰܡܫܺܝܚܳܐ܉ ܘܗܽܘ ܐܝܬܰܘܗܝ ܪܺܝܫܳܗ̇܉ ܘܐܩܺܝܡ ܒܗ̇ ܫܠܺܝ̈ܚܰܘܗܝ ܩܰܕܺܝ̈ܫܶܐ ܕܢܫܡܫܘܢ ܠܒܢܶܝ̈ܗ̇܉ ܘܝܰܗ̱ܒ ܠܗܽܘܢ ܫܽܘܠܛܳܢܳܐ ܕܗܕܐ ܢܥܒܕܘܢ܉ ܕܗܶܢܽܘܢ ܐܶܢܽܘܢ ܡ̈ܫܰܐܠܶܐ ܕܡܕܰܒܪܳܢܽܘܬܳܗ̇ ܘܕܽܘܒܳܪ ܣܽܘܥܪ̈ܳܢܶܝܗ̇ ܘܰܒܛܺܝܠܽܘܬܳܐ ܕܠܰܐܦܰܝ̈ ܗܰܕܳܡܶܝ̈ܗ̇ ܟܰܕ ܗܶܢܽܘܢ ܐܶܢܽܘܢ ܡܡܰܬ̈ܠܳܢܶܝ̈ܗ̇ ܢܳܡܽܘܣܳܝ̈ܐ ܘܢܳܛܽܘܪ̈ܶܐ ܕܝܽܘܠܦܳܢܳܗ̇ ܬܰܘܕܺܝܬܳܢܳܝܳܐ ܘܕܰܫܡܳܗ̇ ܘܝܳܪܬܽܘܬܳܗ̇ ܘܠܶܫܳܢܳܗ̇ ܘܡܰܫܠ̱ܡܳܢ̈ܘܳܬܳܗ̇ ܘܰܡܕܺܝܢܳܝܘܬܳܗ̇ ܘܝܰܕ̈ܥܝܗ̇ ܘܫܽܘܡܳܗܶܝ̈ܗ̇܉ ܐܰܝܠܶܝܢ ܕܗܺܝ ܫܡܰܝܳܐ ܐܰܫܦܥܰܬ ܐܶܢܽܘܢ ܥܠܝܗ̇ ܕܥܺܕܬܳܐ ܘܗܽܘ ܡܰܟܬܰܒܙܰܒܢܳܐ ܠܗܽܘܢ ܫܰܪܰܪ ܒܪܶܕܝܳܐ ܕܙܰܒ̈ܢܶܐ ܘܕܳܪ̈ܶܐ܉ ܘܰܡܫܺܝܚܳܐ ܒܓܰܘܳܗ̇ ܐܝܬܘܗܝ ܘܠܳܐ ܡܬܬܙܝܥܐ܉ ܘܐܫܬܘܕܝ ܠܳܗ̇ ܟܰܕ ܐܳܡܰܪ: ”ܘܬ݂ܰܪ̈ܥܶܐ ܕ݁ܰܫܝܽܘܠ ܠܳܐ ܢܶܚܣܢܽܘܢܳܗ̇“ (ܡܬܝ ܝܘ: ܝܚ) (ܘܡܶܬܕܚܶܩ ܡܰܢ ܕܢܰܒܪܶܩ ܣܰܝܦܳܐ ܠܩܽܘܒܠܳܗ̇) ܒܰܕ ܫܽܘܠܛܳܢܳܗ̇ ܫܡܰܝܳܢܳܝܰܐ ܗ̱ܘ܉

ܘܣܺܝܡܽ ܗ̱ܘ ܥܠܰܝܢ ܕܰܒܪܽܘܚܳܐ ܕܢܺܝܚܽܘܬܳܐ ܘܡܰܟܺܝܟܽܘܬܳܐ ܕܢܶܬܠ ܡܶܠ̈ܟܶܐ ܘܰܡܫܰܒܠܳܢ̈ܘܳܬܳܐ ܠܗܳܢܘܢ ܛܳܥܰܝ̈ܐ ܘܶܐܢܗܽܘ ܕܢܶܥܛܦܽܘܢ ܘܢܫܬܡܥܘܢ ܠܥܺܕܬܳܐ ܗܳܝܕܶܝܢ ܬܶܚܕܶܐ ܫܡܰܝܳܐ ܒܚܰܕ ܚܰܛܳܝܳܐ ܡܳܐ ܕܬܳܐܶܒ ܘܰܢܩܰܒܶܠ ܠܶܗ ܒܥܺܕܬܳܐ܉ ܘܶܐܢ ܗܽܘ ܕܢܰܓܪܽܘܢ ܒܡܰܨܽܘܬܳܐ ܠܽܘܩܒܰܠ ܥܺܕܬܳܐ ܘܣܝܳܡ ܦܶܬܢܳܐ ܒܣܶܕܪ̈ܶܝܗ̇ ܠܡܒܕܪܘ ܒܢܶܝ̈ܗ̇ ܘܢܰܐܕܫܘܢ ܐܶܕ̈ܢܝܗܘܢ ܡܶܢ ܕܠܡܫܡܥ ܠܩܳܠ ܥܰܠ̈ܠܳܢܶܐ ܫܰܪܺܝܪ̈ܶܐ܉ ܗܳܝܕܶܝܢ ܐܝܬ ܠܢ ܕܒܫܽܘܠܛܳܢܰܢ ܪܽܘܚܳܢܳܝܳܐ ܢܬܚܫܚ ܠܡܰܦܳܩܽܘ ܪܽܘܚܳܐ ܚܠܦ ܝܽܘܠܦܳܢܳܐ ܬܪܺܝܨܳܐ ܘܡܰܫܠ̱ܡܳܢܽܘܬܳܐ ܢܰܨܺܝܚܬܳܐ܉ ܘܟܘܘܢ ܐܝܠܝܢ ܕܡܪܕܝܢ ܥܰܠ ܩܳܢܽܘܢ̈ܐ ܥܺܕ̈ܬܳܢܳܝܶܐ ܕܡܫܡܠܝܢ̈ܐ ܢܗܘܐ ܠܗܰܘ ܡܳܐ ܕܦܰܩܕܰܢ ܦܰܘܠܽܘܣ ܫܠܺܝܚܳܐ ܒܰܐܝܟܰܢܳܝܽܘܬܳܐ ܕܰܐܝܟ ܗܳܕܶܐ ܕܐܡܪ: ”ܘܫܽܘܩܠܽܘܗ݈ܝ ܠܒ݂ܺܝܫܳܐ ܡܶܢ ܒ݁ܰܝܢܳܬ݂ܟ݂ܽܘܢ“ (ܐ ܩܘܖ̈ ܗ: ܝܓ)

ܚܰܒܺܝܒܰܝ̈܆

ܡܶܐܬܝܶܗ ܕܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ ܡܶܬܚܫܶܒ ܦܽܘܪܣܳܐ ܕܰܗܒܳܢܳܝܳܐ ܕܺܝܗܺܝܒ ܠܰܢ ܠܡܶܬܟܰܬܳܫܽܘ ܪܽܘܚܳܢܳܐܝܬ ܘܰܠܡܶܬܡܰܪܳܝܽܘ ܒܡܳܪܰܢ ܝܶܫܽܘܥ ܒܡܰܟܺܝܟܽܘܬܶܗ ܘܢܺܝܚܽܘܬܶܗ ܘܰܢܫܰܡܶܫ ܡܝܰܬܪ̈ܳܬܳܐ ܕܪ̈ܡܢ ܘܢܰܠܘܶܬ ܠܗܰܝܡܳܢܽܘܬܰܢ ܥܒܳܕ̈ܶܐ ܛܳܒ̈ܐ܉ ܡܫܰܡܗܳܐܝܬ ܕܶܝܢ ܥܒܳܕ̈ܶܐ ܕܰܡܪܰܚܡܳܢܽܘܬܳܐ ܕܰܐܝܟ ܦܽܘܠܳܓ ܙܶܕ̈ܩܳܬܳܐ ܘܰܡܥܰܕܪܳܢܽܘܬ ܡܶܣ̈ܟܺܢܶܐ ܘܰܡܕܰܒܪܳܢܽܘܬ ܝܰܬ̈ܡܶܐ ܘܰܐܪ̈ܡܠܳܬܳܐ ܥܰܡ ܪܶܚܡܬܰܢ ܕܰܠܘܳܬ ܥܺܕܬܰܢ ܣܽܘܪܝܳܝܬܳܐ ܐܳܪܬܳܕܽܘܟܣܳܝܬܳܐ ܩܰܕܺܝܫܬܳܐ ܘܩܳܢܽܘܢܶܝ̈ܗ̇ ܡܕܰܒܪ̈ܳܢܳܝܶܐ ܘܠܶܫܳܢܳܗ̇ ܣܽܘܪܝܳܝܳܐ ܘܛܶܟܣܳܗ̇ ܥܺܕܬܳܢܳܝܳܐ ܘܡܰܠܦܳܢܽܘܬ ܐܰܒܳܗ̈ܬܳܗ̇ ܩܰܕ̈ܺܝܫܶܐ.

ܢܩܒܶܠ ܡܳܪܝܳܐ ܐܠܳܗܳܐ ܠܨܘܡܟܽܘܢ ܘܨܠ̈ܘܳܬܟܽܘܢ܆ ܘܢܰܫܘܶܝܟܽܘܢ ܕܬܶܗܘܽܘܢ ܡܥܕܥܕܺܝܢ ܩܝܳܡܬܶܗ ܕܡܢ ܒܝܬ ܡܝ̈ܬܐ ܒܚܕܘܳܐ ܘܰܪܘܳܙܐ܉ ܘܛܝܒܽܘ ܕܡܳܪܝܳܐ ܥܡܟܽܘܢ ܘܐܒܽܘܢ ܕܒܫܡܝܳܐ ܘܫܪܟܳܐ܀

ܟܬܺܝܒ ܒܩܶܠܳܝܬܰܢ ܦܰܛܪܝܰܪܟܳܝܬܳܐ ܕܰܒܕܰܪܡܣܽܘ̇ܩ ـ ܣܽܘܪܺܝܰܐ

ܒܥܶܣܪܺܝܢ ܕܟܳܢܽܘܢ ܐܚܪܳܝ ܝܪܚܳܐ ܕܫܢܬ ܬܪܶܝܢ ܐܠܦܺܝ̈ܢ ܘܰܫܒܰܥ

ܕܺܐܝܬܶܝܗ̇ ܫܢ̱ܬܳܐ ܕܥܶܣܪܺܝܢ ܘܰܫܒܰܥ ܕܦܛܪܝܪܟܽܘܬܢ