1981– اسم الكنيسة

ܒܘܪܟܬܐ ܫܠܝܚܝܬܐ ܘܫܠܡ̈ܐ ܐܒܗ̈ܝܐ ܠܐܚܝ̈ܢ ܡܥܠܝܐ ܛܘܒܬܢܘܬܗ ܕܡܪܒ ܒܣܠܠܝܘܤ ܦܘܠܘܤ ܬܪܝܢܐ ܡܦܪܝܢܐ ܕܡܕܢܚܐ ܘܡܝܛܪ̈ܦܘܠܝܛܘ ܘܒܢܝ̈ܐ ܕܝܠܢ ܪ̈ܘܚܢܝܐ ܐܦܛܪ̈ܘܦܐ ܕܡܪ̈ܥܝܬܐ ܘܟܘܪ̈ܝܐ ܘܕܝܪ̈ܝܐ ܘܩܫܝܫ̈ܐ  ܘܡܫܡܫܢ̈ܐ ܡܝܩܪ̈ܐ ܘܟܠܗܘܢ ܒܢ̈ܝ ܥܡܐ ܕܝܠܢ ܣܘܪܝܝܐ ܐܪܬܕܘܟܣܝܐ ܕܢܛܝܪܝܢ ܒܨܠ̈ܘܬܐ ܕܝܠܕܬ ܐܠܗܐ ܡܪܝܡ ܘܕܟܠܗܘܢ ܣܗܕ̈ܐ ܘܩܕ̈ܝܫܐ ܐܡܝܢ܀

 

ܒܬܪ ܥܘܩܒܐ ܕܥܠ ܚܘܠܡܢܟܘܢ ܘܗ̇ܠܝܢ ܕܝܠܟܘܢ ܐܡܪܝܢܢ: ܕܚܰܕܘܬܐ ܐܝܬ ܠܰܢ ܪܒܬܐ ܕܢܘܕܥ ܠܟܘܢ ܕܠܡ ܩܪܝܢܢ ܠܟܢܘܫܝܐ ܕܣܘܢܗܕܘܤ ܕܝܠܢ ܩܕܝܫܬܐ ܠܐܚܝ̈ܢ ܡܝܛܪ̈ܦܘܠܝܛܘ ܕܐܬܛܝܒܘ ܡܢ ܓ ܕܬܫܪܝ ܐܚܪܝ ܘܥܕܡܐ ܠܚܡܫܥܣܪ ܡܢܗ ܕܝܪܚܐ ܕܫܢܬ ܐܨܦܐ ܡ̄ ܒܒܝܬ ܦܛܪܝܪܟܘܬܢ ܕܒܕܪܡܣܘܩ ܕܣܘܪܝܐ. ܘܩܕܡ ܥܝܢܝ̈ܢ ܠܝܘܬܪܢܐ ܕܥܕܬܐ ܒܪܝܫ ܟܠ ܣܡܢܢ܆ ܒܣܒܪܐ ܕܓܝܓܠܐ ܕܝܠܗ̇ ܠܩܘܕܡܐ ܬܪܕܐ ܒܐܝܕܐ ܕܒܚܬܐ ܕܚܝ܆ ܟܕ ܥܠ ܢܘܠܐ ܕܩܕ̈ܡܝܐ ܕܝܠܢ ܢܨܝܚ̈ܐ ܙܩܪܝܢܢ ܘܥܠ ܐܦ̈ܝ ܢܝܫܐ ܗ̇ܢܐ ܡܥܠܝܐ ܠܣܕܪܐ ܕܣܘܥܪ̈ܢܐ ܕܛܒ ܐܠܨܝܝ̈ܢ ܠܫܘܘܫܛܐ ܕܥܕܬܐ ܛܟܣܢܢ. ܐܝܟܢܐ ܕܦܐܪ̈ܐ ܕܰܥܒܕ̈ܐ ܗ̇ܠܝܢ ܒܫܘܝܘܬܐ ܐܟܚܕܳܐ ܢܗܘܘܢ ܠܣܘܟܝ̈ܐ ܕܝܠܢ ܪ̈ܡܐ ܘܐܦ ܕܣܘܢܗܕܘܤ ܩܕܝܫܬܐ ܐܗܘܐ ܐܘܪܚܐ ܕܛܒ ܝܨܝܦܬܐ ܒܡܟܬܒܢܘܬܢ ܕܝܘܡܢܐ. ܡܟܝܠ ܫܩܝܠܘܬ ܛܥܢܐ ܪܒܬܐ ܣܡܬ ܥܠ ܗܕ̈ܡܝܗ̇.

ܚܢܢ ܕܝܢ ܐܝܟ ܕܠܫܘܡܠܝ ܘܠܝܬܢ ܕܪܥܝܘܬܐ ܫܪܝܪܬܐ ܡܛܠ ܦܘܪܩܢ ܢܦܫ̈ܬܐ ܘܢܛܘܪܘܬ ܗܝܡܢܘܬܢ ܬܪܝܨܬ ܫܘܒܚܐ ܘܡܫܠܡܢܘܬܢ ܪܳܡܰܬ ܢܨܚܢܐ ܘܢܘܚܡ ܠܫܢܢ ܩܕܝܫܐ ܘܡܰܚܝܢܘܬ ܝܨܪܬܘܬܰܢ ܐܢܛܝܘܟܝܬܐ ܣܘܪܝܝܬܐ ܠܐ ܡܳܝܘܬܬܐ. ܡܛܠ ܗ̇ܠܝܢ ܟܠܗܝܢ ܥܡܝܩܐܝܬ ܘܛܒ ܘܠܝܐܝܬ ܗܪܓܢܢ ܒܪܘܚܐ ܐܒܗܝܬܐ ܐܕ̈ܫܐ ܘܡܠ̈ܘܐܐ ܪ̈ܝܫܝܐ ܘܐܠܨܝ̈ܐ ܕܥܕܬܐ ܕܚܒܫܝܢ ܠܗܠܝܢ ܕܦܛܪܝܪܟܘܬܐ ܐܡܪܝܢܢ. ܡܢ ܟܝܬ ܛܘܟܣܗ̇ ܓܘܝܐ ܘܫܘܬܐܣܝ̈ܗ̇ ܘܡܘܠܟܢܝ̈ܗ̇ ܘܟܠܗܝܢ ܕܢܳܩܦ̈ܢ ܠܐܝܩܪܗ̇ ܘܪܒܘܬܗ̇܆ ܘܐܦ ܛܟܣܢܢ ܗ̇ܠܝܢ ܕܝܐܝ̈ܢ ܘܦܐܝ̈ܢ ܠܒܝܬ ܣܦܪܢ ܟܗܢܝܐ ܕܡܪܝ ܐܦܪܝܡ ܕܒܥܛܫܐܢܗ ܕܠܒܢܢ ܘܐܠܨܝܘܬܐ ܕܩܪܝܐ ܠܪܘܡܪܡܗ ܘܠܕܘܪܓܗ ܪܘܚܢܐܝܬ ܟܝܬ ܘܝܘܠܦܢܐܝܬ܆ ܘܬܚܡܢܢ ܠܗ ܣܝܥܬܐ ܐܦܣܩܘܦܝܬܐ ܒܪܝܫܳܢܘܬܢ ܕܬܪܥܝܘܗܝ ܘܬܕܒܪܝܘܗܝ.

ܥܕܬܐ ܕܝܠܢ ܕܶܝܢ ܕܒܗܢܕܘ ܗܪܓܢܢ ܠܐܣܝܪܘܬܗ̇ ܕܒܟܘܪܣܝܐ ܫܠܝܚܝܐ ܐܢܛܘܟܝܐ ܘܡܕܒܪܢܘܬܗ̇ ܓܘܢܝܬܐ ܒܡܬܛܝܒܢܘܬ ܛܘܒܬܢܘܬܗ ܕܡܦܪܝܢܐ ܕܡܕܢܚܐ ܡܪܝ ܒܣܝܠܠܝܘܤ ܦܘܠܘܤ ܬܪܝܢܐ ܘܡܝܛܪ̈ܦܘܠܝܛܘ ܕܝܠܢ ܕܒܗܢܕܘ ܒܟܢܘܫܝܐ ܓܘܢܝܐ ܕܒܒܝܬ ܦܛܪܝܪܟܘܬܢ ܒܕܪܡܣܘܩ ܡܢ ܫܒܥܣܪ ܕܬܫܪܝ ܐ̱ܚܪܝ ܘܗܐ ܠܥܣܪܝܢ ܘܫܒܥܐ ܕܒܗ ܫܢܬ ܐܨܦܐ ܡ̄.

ܘܬܘܒ ܗܪܓܢܢ ܠܐܣܝܪܘܬܐ ܕܝܠܢ ܕܒܐܚ̈ܘܬܢ ܥܕ̈ܬܐ ܐܪ̈ܬܕܘܟܣܝܬܐ ܘܫܪܟܐ ܕܥܕ̈ܬܐ ܐܚܪ̈ܢܝܬܐ ܘܕܘܪܐ ܕܥܕܬܢ ܒܚܦܝܛܘܬܐ ܬܒܠܝܬܐ ܘܙܘܥܐ ܓܘܢܝܐ ܕܥܕ̈ܬܐ.

ܐܦ ܝܨܦܢܢ ܕܨܒܘܬܐ ܐܠܨܝܬܐ ܕܥܐܕܐ ܕܦܨܚܐ ܐܠܗܝܐ ܘܩܝܡܬܐ ܦܪܘܩܝܬܐ ܘܦܣܩܢܢ ܕܢܬܢܛܪ ܣܝܩܘܡܐ ܕܦܨܚܐ ܐܟܡܐ ܕܐܝܬܘܗܝ܆ ܒܪܡ ܕܝܢ ܠܐ ܐܝܬ ܟܠܝܢܐ ܠܘܬ ܣܘܢܗܕܘܤ ܩܕܝܫܬܐ ܕܬܘܪ̈ܨܐ ܡܕܡ ܢܬܬܣܝܡܘܢ ܥܠܘܗܝ ܟܕ ܫܪܟܐ ܕܥܕ̈ܬܐ ܕܡܕܢܚܐ ܡܨܥܝܬܐ ܡܬܪ̈ܥܝܢ ܕܚܕ ܡܢ ܚܕ ܒܫܒ̈ܐ ܕܢܝܣܢ ܡܥܪܒܝܐ ܢܬܬܚܡ ܠܝܘܡܐ ܗ̇ܢܐ ܩܕܝܫܐ.

ܢܡܘܣܐ ܓܝܪ ܓܘܢܝܐ ܘܛܟܣܐ ܕܩܢܘܢ̈ܐ ܩܢܘܡܝ̈ܐ ܕܥܕܬܐ܆ ܝܨܝܦܘܬܐ ܡܫܡܠܝܬܐ ܐܬܦܪܫܬ ܠܗܘܢ ܟܕ ܛܒ ܥܠ ܗ̇ܠܝܢ ܕܥܗܢ̈ܢ ܠܕܪܐ ܢܗܝܪܐܝܬ ܐܬܒܛܠ ܠܢ.

ܘܠܕܘܒܪ̈ܐ ܕܡܪ̈ܥܝܬܐ ܓܘܢܐܝܬ ܝܨܝܦܘܬܐ ܪܒܬܐ ܝܗܒܢܢ ܡܐܘܢ ܕܝܢ ܠܕܪ̈ܓܐ ܕܟܗܢ̈ܐ ܘܡܫܡܫܢ̈ܐ ܕܥܕܬܐ ܘܡܩܡܐ ܕܡܗܝܡܢ̈ܐ ܦܪܝܫܐܝܬ ܚܘܝܢܢ܆ ܘܠܚܕ ܒܫܒܐ ܕܟܗܢ̈ܐ ܕܒܬܪ ܨܘܡܐ ܩܕܝܫܐ ܕܢܝܢܘܐ ܠܩܪܳܝܬܐ ܟܗܢܝܬܐ ܕܢܗܘܐ ܫܰܢ̱ܬܢܐܝܬ ܬܰܚܡܢܢ ܘܗܟܘܬ ܠܚܕ ܒܫܒܐ ܩܕܡܝܐ ܕܒܬܪ ܝܘܡ ܡܬܬܩܝܡܢܘܬܢ ܒܥܐܕܐ ܕܨܠܝܒܐ ܦܪܘܩܝܐ ܝܘܡܐ ܦܛܪܝܪܟܝܐ ܫܡܗܢܝܗܝ.

ܘܥܠ ܛܘܝܒ ܕܪܐ ܚܕܬܐ ܕܡܠܐ ܗܝܡܢܘܬܐ ܘܪܚܢܝܘܬܐ ܘܪܚܡܬ ܐ̱ܢܫܘܬܐ ܘܡܬܐ ܐܟܝܦܐܝܬ ܐܚܨܦܢܢ܆ ܕܢܐܠܦܘܢ ܠܝܘܠܦܢ̈ܐ ܬܘܕ̈ܝܬܢܝܐ ܒܒ̈ܬܝ ܬܪܒܝܬܐ ܬܘܕܝܬܢܝܬܐ ܘܒ̈ܬܝ ܣܦܪ̈ܐ ܚܕ ܒܫܒܝ̈ܐ ܕܒܥܕܬܐ ܐܣܝܪܝܢ ܪܘܫܡܐܝܬ ܒܪܝܫܳܢܘܬ ܟܠ ܡܪܥܝܬܐ ܫܪܪܢܢ.

ܘܠܛܟܣ̈ܐ ܕܥܕܬܐ ܘܐܠܨܝܘܬ ܚܬܡܗܘܢ ܘܦܪܳܣܗܘܢ ܥܡܝܩܐܝܬ ܒܰܚܢܢ ܘܣܝܥܬܐ ܠܥܡܠܐ ܗ̇ܢܐ ܬܚܡܢ. ܒܦܘܪܣܐ ܕܝܢ ܗ̇ܢܐ ܠܒܢܝ̈ܐ ܕܝܠܢ ܚܒܝܒ̈ܐ ܟܗܢ̈ܐ ܡܝܩܪ̈ܐ ܕܢܬܒܛܠ ܠܗܘܢ ܘܳܠܝܐܝܬ ܥܠ ܫܘܡܠܝ ܛܟܣ̈ܐ ܗ̇ܠܝܢ ܦܩܕܝܢܢ ܘܕܢܬܐܡܢܘܢ ܒܨܘܡܐ ܘܒܨܠܘܬܐ ܒܥܕ̈ܢܝܗܘܢ ܠܦܘܬ ܡܫܠܡܢ̈ܘܬܐ ܘܥܝܳܕ̈ܐ ܕܥܕܬܐ ܕܝܠܢ ܩܕܝܫܬܐ ܡܓܪܓܝܢܢ܆ ܘܕܢܣܥܪܘܢ ܠܒ̈ܬܝ ܡܗܝܡܢ̈ܐ ܕܠܐ ܩܘܛܥ ܡܠܒܒܝܢܢ܆ ܘܕܪܘܚܐ ܡܫܝܚܝܬܐ ܒܟܠ ܐܝܩܪܬܐ ܘܒܝܬܐ ܬܬܥܡܩ ܡܫܪܪܝܢܢ܆ ܘܐܦ ܠܒܢܝ̈ܐ ܕܝܠܢ ܡܫܡܫܢ̈ܐ ܪ̈ܚܝܡܐ ܕܢܐܠܦܘܢ ܠܛܟܣ̈ܐ ܫܦܝܪܐܝܬ ܡܚܦܛܝܢܢ ܘܕܢܫܡܠܘܢ ܐܢܘܢ ܒܗܝܡܢܘܬܐ ܘܒܡܫܬܡܥܢܘܬܐ ܘܒܡܟܝܟܘܬܐ ܡܫܪܝܢܢ܆ ܘܕܢܐܨܦܘܢ ܕܬܫܡܫܬܗܘܢ ܒܒܝܬܗ ܕܐܠܗܐ ܠܦܘܬ ܕܪܓܐ ܕܝܠܗܘܢ ܪܘܚܢܝܐ ܡܘܕܥܝܢܢ.

ܒܒܛܝܠܘܬܐ ܕܝܢ ܕܝܠܢܝܬܐ ܠܫܡܐ ܪܝܫܝܐ ܘܪܘܫܡܝܐ ܕܥܕܬܢ ܣܘܪܝܝܬܐ ܦܪܫܢܢ܆ ܘܕܡܢ ܫܘܪܝ ܡܫܝܚܝܘܬܐ ܘܡܢ ܙܒܢܐ ܕܫܰܬܐܤ ܡܪܝ ܦܛܪܘܤ ܫܠܝܚܐ ܒܐܢܛܝܘܟܝܐ ܕܣܘܪܝܐ ܘܥܕܡܐ ܠܝܘܡܐ ܕܝܘܡܢܐ ܥܕܬܢ ܡܬܝܕܥܐ ܒܫܡ (ܥܕܬܐ ܣܘܪܝܝܬܐ) ܘܠܫܢܢ ܡܬܝܕܥ ܒܫܡ (ܠܫܢܐ ܣܘܪܝܝܐ) ܘܥܡܐ ܕܝܠܢ ܒܫܡ (ܥܡܐ ܣܘܪܝܝܐ) ܘܒܫܡܐ ܗ̇ܢܐ ܪܝܫܝܐ ܕܡܢ ܡܟܬܒܢܘܬܢ ܘܗܝܡܢܘܬܢ ܫܠܝܚܝܬܐ ܘܡܕܝܢܝܘܬܢ ܢܨܝܚܬܐ ܢܒܥ܆ ܠܘܬ ܟܠ ܐܝܟ ܥܕܬܐ ܘܠܫܢܐ ܘܥܡܐ ܣܘܪܝܝܐ ܝܕܝܥܝܢܢ ܒܟܠܗܘܢ ܛܘܪ̈ܐ ܘܙܒܢ̈ܐ. ܘܒܟܠܗܘܢ ܐܣܛܪ̈ܝܐ ܕܬܘܕܝܬܐ ܘܕܝܘܠܦܢܐ ܘܕܫܪܝܪܘܬ ܫܪܫܐ ܘܡܒܘܥܐ ܡܩܒܠܝܢܢ ܘܡܝܩܪܝܢܢ܆ ܡܟܝܠ ܐܦܠܐ ܫܡܐ ܣܛܪ ܡܢ ܫܡܐ ܣܘܪܝܝܐ ܠܐ ܪܥܝܢܢ ܘܐܦܠܐ ܡܩܒܠܝܢܢ.

ܗ̇ܘ ܓܝܪ ܕܢܒܗ ܡܢ ܙܒܢ ܠܙܒܢ ܠܒܪ ܡܢ ܫܡܐ ܣܘܪܝܝܐ ܢܘܟܪܝܐ ܗܘ ܘܥܘܕܝܝ ܘܐܦ ܙܘܝܦܐ ܗܘ ܕܫܪܪܐ ܐܢ ܒܡܟܬܒܙܒܢ̈ܐ ܐܘ ܒܗܝܡܢܘܬܐ. ܒܫܘܠܛܢܐ ܕܝܢ ܝܠܢ ܫܠܝܚܐ ܡܘܕܥܝܢܢ ܕܠܡ ܟܠܢܐܝܬ ܢܕܚܐ ܘܢܣܠܐ ܠܗ̇ܠܝܢ ܫܘܡܗ̈ܐ ܚܕ̈ܬܐ ܕܢܒܗܘ ܒܙܒܢ̈ܐ ܐܚܪ̈ܝܐ ܕܐܬܕܒܩܘ ܠܥܕܬܢ ܘܥܡܐ ܕܝܠܢ ܐܝܟ ܫܡܐ ܐܬܘܪܝܐ ܐܘ ܐܪܡܝܐ ܘܫܪܟܐ ܕܫܡܗ̈ܐ ܕܥܒܪ ܙܒܢܗܘܢ ܗܐ ܡܢ ܬܪܝܬ ܐܠܦܝ̈ܢ ܕܫܢܝ̈ܐ܆ ܘܕܣܥܝܢ ܒܥܠܬܗܘܢ ܐ̱ܢܫܝ̈ܢ ܕܠܥܕܬܐ ܢܚܣܟܘܢ ܘܠܒܢܝ̈ܗ̇ ܫܪܝܪ̈ܐ ܡܢܗ̇ ܢܒܥܕܘܢ܆ ܟܕ ܛܒ ܠܣܬܘܪܝܐ ܕܫܘܒܚܗ̇ ܘܚܘܦܳܝ ܢܰܗܝܪܘܬܗ̇ ܘܥܩܘܪܝܐ ܕܝܪܬܘܬܗ̇ ܪܘܚܢܝܬܐ ܟܝܬ ܘܐ̱ܢܫܝܬܐ ܒܥܝܢ ܘܝܨܦܝܢ. ܡܫܝܚܐ ܓܝܪ ܫܘܒܚܐ ܠܫܡܗ ܒܓܘܗ̇ ܐܝܬܘܗܝ ܕܥܕܬܐ ܘܠܐ ܡܙܕܥܙܥܐ ܘܪ̈ܥܘܬܗ̇ ܥܝܪܝܢ ܐܢܘܢ ܘܥܠ ܫܘܪ̈ܝܗ̇ ܫܗܪܝܢ ܘܡܘܟ̈ܠܐ ܕܫܝܘܠ ܠܐ ܢܚܣܢܘܢܗ̇.

ܡܛܠܗܕܐ ܠܒܢܝ̈ܐ ܕܝܠܢ ܕܒܟܠ ܕܘܟ ܡܙܗܪܝܢܢ ܡܠܘܢ ܕܝܢ ܠܟܗ̈ܢܐ ܘܡܫܡܫܢ̈ܐ ܒܟܠܗܘܢ ܕܪ̈ܓܝܗܘܢ ܘܐܩܡܝ̈ܗܘܢ ܕܠܐ ܢܩܒܠܘܢ ܠܪ̈ܥܝܢܐ ܗ̇ܠܝܢ ܕܠܘܩܒܠ ܥܕܬܐ ܐܢܘܢ ܩܕܝܫܬܐ ܘܗܝܡܢܘܬܗ̇ ܘܐܦ ܕܒܝܫܘܬܐ ܡܥܠܝܢ ܥܠ ܡܟܬܒܢܘܬܗ̇ ܢܨܝܚܬܐ.

ܡܘܕܥܝܢܢ ܠܟܘܢ ܐܦ ܕܐܦܣܢܢ ܠܚܒܝܒ̈ܐ ܕܝܠܢ ܪ̈ܝܫܢܐ ܕܡܪ̈ܥܝܬܐ ܕܢܦܣܩܘܢ ܡܪ̈ܕܘܬܐ ܥܕ̈ܬܢܝܬܐ ܘܓܙܪܕܝܢܐ ܕܘ̇ܠܐ ܡܛܠ ܗ̇ܠܝܢ ܕܣܛܘ ܡܢ ܐܘܪܚܐ ܕܫܪܪܐ. ܡܠܘܢ ܕܝܢ ܒܡܕܡ ܡܪ̈ܥܝܬܐ ܕܪ̈ܥܝܢܶܐ ܗ̇ܠܝܢ ܣܓܝܘ ܘܐܬܦܪܣܘ ܘܕܠܚܘ ܠܫܦܝܘܬܐ ܕܡܗܝܡܢ̈ܐ ܘܩܢܛܐ ܐܥܝܪܘ ܥܠ ܥܕܬܐ ܕܐܠܗܐ.

ܒܢܝ̈ܐ ܕܝܠܢ ܪ̈ܘܚܢܝܐ ܚܒܝܒ̈ܐ:

ܒܚܘܒܐ ܐܒܗܝܐ ܘܒܙܗܝܪܘܬܐ ܕܥܠ ܗ̇ܠܝܢ ܕܚܘܝܳܕ ܥܕܬܢ ܘܒܛܢܢܐ ܕܥܠ ܒܢܝ̈ܢ ܪ̈ܘܚܢܝܐ ܡܚܦܛܝܢܢ ܠܟܘܢ ܟܗܢ̈ܐ ܘܡܫܡܫܢ̈ܐ ܘܡܗܝܡܢ̈ܐ ܕܬܕܥܘܢ ܠܫܩܝܠܘܬ ܛܥܢܐ ܕܣܝܡܐ ܥܠܝܟܘܢ ܪܘܚܢܐܝܬ ܟܝܬ ܘܟܢܘܫܝܐܝܬ ܕܬܝܩܪܘܢ ܠܢܘܩܝ̈ܐ ܫܪܝܪ̈ܐ ܘܕܒܚ̈ܬܐ ܝܩܝܪ̈ܬ ܕܡܝ̈ܐ ܕܣܥܪܘ ܐܒܗܝܟ̈ܘܢ ܒܰܣܝܡ̈ܝ ܥܘܗܕܢܐ ܘܣܳܒܝܟ̈ܘܢ ܫܪܝܪ̈ܐ ܡܛܐ ܢܛܘܪܘܬ ܡܪܓܢܝܬܐ ܕܗܝܡܢܘܬܐ ܕܠܐ ܕܠܝܚܐ ܘܓܘܥܠܢܐ ܝܰܩܝܪܳܐ ܦܫܬ ܠܢ ܡܢ ܡܝܬܪ̈ܐ ܐܒ̈ܗܬܢ.

ܘܡܣܟܝܢܢ ܐܦ ܕܬܛܪܘܢ ܠܡܫܠܡܢ̈ܘܬܢ ܘܡܩܕ̈ܫܬܢ ܕܛܒ ܡܫܬܒܗܪܐ ܒܗܝܢ ܥܕܬܢ ܬܪܝܨܬ ܫܘܒܚܐ ܘܐܦ ܕܬܦܪܫܘܢ ܠܩ̈ܠܐ ܕܪ̈ܥܘܬܐ ܫܪܝܪ̈ܐ ܡܚܦܛܝܢܢ ܠܟܘܢ ܘܕܬܰܪܚܩܘܢ ܡܢ ܕܐܒ̈ܐ ܚܛܘܦ̈ܐ ܕܒܥܝܢ ܕܢܒܣܒܣܘܢ ܠܟܘܢ ܐܢ̱ܬܘܢ ܐܘ ܓܙܳܪܳܐ ܡܒܪܟܐ ܕܡܫܝܚܐ ܡܪܢ ܡܙܗܪܝܢܢ ܠܟܘܢ.

ܘܐܝܠܝܢ ܕܦܫܝܛܝܢ ܘܒܣܝܡܝܢ ܘܕܐܫܬܕܠܘ ܘܐܪܚܩܘ ܢ ܛܝܪܐ ܕܥܕܬܐ ܡܠܟܝܢܢ ܘܡܫܒܠܝܢܢ ܠܗܘܢ ܕܠܟܢܦܝ̈ܗ̇ ܕܥܕܬܐ ܢܗܦܟܘܢ ܘܥܡ ܐܚܝ̈ܗܘܢ ܒܚܘܒܐ ܫܪܝܪܐ ܢܚܘܢ ܘܒܬܘܟܠܢܐ ܕܥܠ ܐܠܗܐ ܘܒܣܒܪܐ ܡܫܡܠܝܐ ܗܕ̈ܡܐ ܕܐܝܩܪܬܐ ܚܕܐ ܣܘܪܝܝܬܐ ܢܗܘܘܢ ܒܛܝܒܘ.

ܘܛܝܒܘܬܗ ܕܡܪܝܐ ܥܡܟܘܢ܆ ܘܐܒܘܢ ܕܒܫܡܝܐ ܘܫܪܟܐ.

 

 

ܟܬܝܒ ܒܩܠܝܬܢ ܦܛܪܝܪܟܝܬܐ ܕܒܕܪܡܣܘܩ ܕܣܘܪܝܐ

ܒܝܘܡ ܟܛ ܕܬܫܪܝܢ ܐܚܪܝ ܫܢܬ ܐܠܦ ܘܬܫܥܡܐܐ ܘܬܡܢܝܢ ܘܚܕܐ

ܕܐܝܬܝܗ̇ ܫܢܬܐ ܬܪܝܢܝܬܐ ܕܦܛܪܝܪܟܘܬܢ