ܦܬܝܚܐ ܦܛܪܝܪܟܝܐ ܕܨܘܡܐ ܪܒܐ 2025

ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܡܺܝܛܪ̈ܦܽܘܠܺܝܛܽܘ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.

ܐܠܗܐ ܡܠܰܘܶܐ ܠܰܢ ܒܙܰܒܢ̈ܐ ܕܐܘܠܨܳܢ̈ܐ

«ܐܳܦ ܬܰܡܳܢ ܐܺܝܕܳܟ ܬܶܐܚܕܰܢܝ̱ ܘܰܬܕܰܒܪܰܢܝ̱ ܝܰܡܺܝܢܳܟ. ܐܶܡܪܶܬ ܕܚܶܫܽܘܟܳܐ ܢܶܢܗܰܪ ܠܺܝ ܘܠܺܠܝܳܐ ܢܶܢܗܰܪ ܒܰܐܦܰܝ̈. ܘܚܶܫܽܘܟܳܐ ܠܳܐ ܢܶܚܫܰܟ ܡܶܢܳܟ. ! ܘܠܺܠܝܳܐ ܐܰܝܟ ܐܺܝܡܳܡܳܐ ܢܶܢܗܰܪ ܘܚܶܫܽܘܟܳܐ ܐܰܝܟ ܢܰܗܺܝܪܳܐ» »

(ܡܙܡܘܪܐ 139: 10 – 12)

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:

ܟܬܳܒܐ ܕܡܰܙܡܘܪ̈ܐ ܫܒܺܝܠܰܐ ܗ̱ܘ ܠܰܡܠܰܒܳܒܘ ܠܰܡܗܰܝܡܢ̈ܐ ܒܙܰܒܢ̈ܐ ܕܐܘܠܨܳܢܐ ܘܫܘܢܳܩܐ ܘܛܘܪܳܦܐ܆ ܘܳܐܦ ܡܰܒܘܥܰܐ ܗ̱ܘ ܕܚܰܕܘܬ݂ܐ ܘܣܰܒܪܐ ܒܙܰܒܢ̈ܐ ܕܬܶܫܒܘܚܬܐ ܘܩܘܒܠܛܝܒܘܬܐ ܠܡܳܪܝܐ ܥܰܠ ܐܰܦܰܝ̈ ܡܕܰܒܪܳܢܘܬ݂ܶܗ ܦܳܪܘܩܳܝܬܐ. ܡܰܙܡܘܪܐ ܕܡܳܐܐ ܘܰܬܠܳܬܝܢ ܘܬܶܫܥܐ ܡܰܩܪܰܚ ܥܰܠ ܫܟܺܝܚܽܘܬ݂ ܐܠܗܐ ܒܚܰܝ̈ܶܐ ܕܒܰܪܢܳܫܐ ܘܰܒܛܺܝܠܘܬܶܗ ܐܰܠܗܝܬܳܐ ܠܘܬ ܐ̱ܢܳܫܘܬܰܢ܆ ܘܳܐܦ ܬܘܒ ܒܙܰܒܢ̈ܶܐ ܕܝܰܬܝܪ ܥܰܣܩܝܢ ܕܚܰܝ̈ܶܐ܆ ܒܕܳܐܡܰܪ : «ܐܳܦ ܬܰܡܳܢ ܐܺܝܕܳܟ ܬܶܐܚܕܰܢܝ̱ ܘܰܬܕܰܒܪܰܢܝ̱ ܝܰܡܺܝܢܳܟ. ܐܶܡܪܶܬ ܕܚܶܫܽܘܟܳܐ ܢܶܢܗܰܪ ܠܺܝ ܘܠܺܠܝܳܐ ܢܶܢܗܰܪ ܒܰܐܦܰܝ̈» !(ܡܙܡܘܪܐ 139: 10 – 11). ܗܳܠܶܝܢ ܐܳܬܘ̈ܳܬܐ ܡܝܰܒ̈ܠܳܢ ܐܶܓܪ̈ܳܬܐ ܪ̈ܘܚܳܢܳܝܳܬ݂ܐ ܥܰܡܝܩ̈ܳܬܐ ܥܰܠ ܐܽܘܠܨܳܝܘܬ݂ ܣܰܒܪܐ ܘܰܫܟܺܝܚܽܘܬ݂ ܬܘܟ݂ܠܳܢܐ ܒܫܘܕ̈ܳܝܰܘܗ̱ܝ ܕܐܠܗܐ܆ ܘܰܡܫܰܪܪ̈ܳܢ ܕܠܐ ܣܳܟ ܡܰܪܦܶܐ ܡܶܢ ܒܢܰܘ̈ܗ̱ܝ܆ ܕܝܠܳܢܳܐܺܝܬ݂ ܒܥܰܣܩܘ̈ܳܬܐ ܕܳܐܪ̈ܥܳܢ ܠܗܘܢ ܒܥܳܠܡܐ ܕܝܰܘܡܳܢܐ܆ ܒܩܶܨܰܬ݂ ܩܪ̈ܳܒܶܐ ܘܰܪ̈ܕܽܘܦܝܶܐ ܘܫܘܚܠܳܦ̈ܶܐ ܦܽܘܠܺܝܛܺܝܩܳܝ̈ܶܐ ܘܬܰܟܬܘܫ̈ܶܐ ܟܢܽܘܫܝܳܝ̈ܶܐ ܘܚܰܣܝܪܘܬ݂ ܐܺܝܬܺܝܩܽܘܢ. ܐܶܠܐ܆ ܫܘܕ̈ܳܝܰܘܗ̱ܝ ܫܰܪܝܪ̈ܶܐ ܕܐܠܗܐ ܘܺܐܝܕ݂ܶܗ ܡܫܰܒܠܳܢܝܬ݂ܐ ܗܺܝ ܡܕܰܒܪܐ ܘܪܳܥܝܐ ܠܰܢ ܐܳܦܶܢ ܒܰܐܝܟܰܢܳܝܘ̈ܳܬ݂ܐ ܕܛܳܒ ܛܳܒ ܩܰܫܝ̈ܳܢ܆ ܐܰܟ݂ܡܐ ܕܰܡܫܰܪܰܪ ܗܽܘ ܡܙܰܡܪܳܢܐ: «ܐܳܦ ܬܰܡܳܢ ܐܺܝܕܳܟ ܬܶܐܚܕܰܢܝ̱ ܘܰܬܕܰܒܪܰܢܝ̱ ܝܰܡܺܝܢܳܟ. ܐܶܡܪܶܬ ܕܚܶܫܽܘܟܳܐ ܢܶܢܗܰܪ ܠܺܝ ܘܠܺܠܝܳܐ ܢܶܢܗܰܪ ܒܰܐܦܰܝ̈» (ܡܙܡܘܪܐ 139: 10 – 11). ܗܳܠܶܝܢ ܐܳܬܘ̈ܳܬܐ ܡܝܰܒ̈ܠܳܢ ܐܶܓܪ̈ܳܬܐ ܪ̈ܘܚܳܢܳܝܳܬ݂ܐ ܥܰܡܝܩ̈ܳܬܐ ܥܰܠ ܐܽܘܠܨܳܝܘܬ݂ ܣܰܒܪܐ ܘܰܫܟܺܝܚܽܘܬ݂ ܬܘܟ݂ܠܳܢܐ ܒܫܘܕ̈ܳܝܰܘܗ̱ܝ ܕܐܠܗܐ܆ ܘܰܡܫܰܪܪ̈ܳܢ ܕܠܐ ܣܳܟ ܡܰܪܦܶܐ ܡܶܢ ܒܢܰܘ̈ܗ̱ܝ܆ ܕܝܠܳܢܳܐܺܝܬ݂ ܒܥܰܣܩܘ̈ܳܬܐ ܕܳܐܪ̈ܥܳܢ ܠܗܘܢ ܒܥܳܠܡܐ ܕܝܰܘܡܳܢܐ܆ ܒܩܶܨܰܬ݂ ܩܪ̈ܳܒܶܐ ܘܰܪ̈ܕܽܘܦܝܶܐ ܘܫܘܚܠܳܦ̈ܶܐ ܦܽܘܠܺܝܛܺܝܩܳܝ̈ܶܐ ܘܬܰܟܬܘܫ̈ܶܐ ܟܢܽܘܫܝܳܝ̈ܶܐ ܘܚܰܣܝܪܘܬ݂ ܐܺܝܬܺܝܩܽܘܢ. ܐܶܠܐ܆ ܫܘܕ̈ܳܝܰܘܗ̱ܝ ܫܰܪܝܪ̈ܶܐ ܕܐܠܗܐ ܘܺܐܝܕ݂ܶܗ ܡܫܰܒܠܳܢܝܬ݂ܐ ܗܺܝ ܡܕܰܒܪܐ ܘܪܳܥܝܐ ܠܰܢ ܐܳܦܶܢ ܒܰܐܝܟܰܢܳܝܘ̈ܳܬ݂ܐ ܕܛܳܒ ܛܳܒ ܩܰܫܝ̈ܳܢ܆ ܐܰܟ݂ܡܐ ܕܰܡܫܰܪܰܪ ܗܽܘ ܡܙܰܡܪܳܢܐ: «ܐܳܦܶܢ ܐܶܗܰܠܶܟ ܒܢܰܚ̈ܠܰܝ ܛܶܠܳܠܰܝ̈ ܡܰܘܬܳܐ ܠܳܐ ܐܶܕܚܰܠ ܡܶܢ ܒܺܝܫܬܳܐ ܡܶܛܽܠ ܕܰܐܢ̱ܬ ܥܰܡܝ̱. ܫܰܒܛܳܟ ܘܚܽܘܛܪܳܟ ܗܶܢܽܘܢ ܒܰܝܐܽܘܢܝ̱» (ܡܙܡܘܪܐ 23: 4). ܘܳܐܦܠܳܐ ܣܳܟ݂ ܡܰܪܦܶܐ ܠܰܢ ܒܡܶܨܥܰܬ ܚܶܫܘܟ݂ܐ ܐܶܠܐ ܡܶܫܬܟܰܚ ܒܥܘܡܩܐ ܕܛܘܪ̈ܳܦܰܝܢ܆ ܐܰܝܟܰܢܐ ܕܰܢܫܰܟܶܢ ܠܰܢ ܙܳܟ݂ܘܬܐ ܒܝܰܡܝܢܶܗ ܚܰܝܠܬ݂ܳܢܺܝܬ݂ܐ.

1. ܐ. ܐܠܗܐ ܠܐ ܡܰܪܦܶܐ ܠܰܢ ܒܡܶܨܥܰܬ݂ ܚܶܫܘܟ݂ܐ:

ܡܦܰܫܶܩ ܠܰܢ ܡܙܰܡܪܳܢܐ ܚܰܝܠܐ ܕܕܶܢܚܗ ܕܢܘܗܪܐ ܐܠܗܳܝܐ ܥܰܠ ܩܦܝܠܘܬ݂ ܚܶܫܘܟ݂ܐ܆ ܠܺܠܝܐ ܓܶܝܪ ܠܐ ܡܨܶܐ ܕܢܶܐܣܪܺܝܘܗ̱ܝ ܐܳܦܠܐ ܚܶܫܘܟ݂ܐ ܕܢܶܙܟܶܝܘܗ̱ܝ. ܗܳܢܐ ܢܘܗܪܐ ܨܳܐܰܪ ܚܰܝܠܶܗ ܕܰܐܠܗܐ ܐܰܚܝܕ ܟܽܠ܆ ܗܰܘ ܕܰܒܪ̈ܰܚܡܰܘܗ̱ܝ ܡܰܢܗܰܪ ܐܳܦܶܢ ܥܘܡܩܐ ܕܩܰܒܪ̈ܶܐ܆ ܐܰܝܟ ܡܶܠܬ݂ܶܗ ܕܡܳܪܝ̱ ܦܰܘܠܽܘ̇ܣ ܒܶܐܓܰܪܬ݂ܶܗ ܕܰܠܘܳܬ ܐܶܦܶܣܳܝ̈ܶܐ: «ܐܶܬܬܥܝܪ ܕܰܡܟܳܐ ܘܩܘܡ ܡܶܢ ܒܶܝܬ݂ ܡܝ̈ܬܶܐ ܘܢܰܢܗܰܪ ܠܳܟ݂ ܡܫܝܚܐ» (ܐܦܣܝ̈ܐ 5: 14)܆ ܩܰܒܪ̈ܐ ܓܶܝܪ ܠܐ ܟܰܬܰܪܘ̱ ܣܟܺܝܪܺܝܢ ܒܰܐܦܰܝ̈ܗܘܢ ܕܥܢܝ̈ܕܐ܆ ܐܳܦܠܐ ܠܺܠܝܐ ܚܶܫܘܟ݂ ܩܕ݂ܳܡܰܝܗܘܢ܆ ܒܗܳܝ ܕܢܘܗܪܶܗ ܡܫܰܒܶܠ ܠܟܽܠ ܐܰܝܢܐ ܕܰܥܠܰܘܗ̱ܝ ܡܶܬܬܟ݂ܶܠ. ܒܰܕܓ݂ܽܘܢ: ܟܡܐ ܕܬܶܥܫܰܢ ܚܶܫܘܟ݂ܘܬ݂ܐ ܕܐܘܠܨܳܢ̈ܐ ܠܐ ܡܰܨܝܐ ܠܳܗ̇ ܕܰܬܩܘܡ ܠܘܩܒܰܠ ܚܰܝܠܐ ܕܢܘܗܪܐ ܐܰܠܳܗܝܐ܆ ܘܚܶܫܘܟ݂ܘܬܐ ܠܰܝܬܶܝܗ̇ ܟܽܠܳܢܳܝܬܐ ܩܕ݂ܳܡܰܘܗ̱ܝ܆ ܐܶܢ ܬܗܶܐ ܐܘܠܨܳܢ̈ܶܐ ܦܰܓ݂ܪ̈ܳܢܳܝܶܐ܆ ܐܰܘ ܦܘܠܳܓ݂ ܪܶܥܝܳܢܐ ܪܘܚܳܢܳܝܐ܆ ܐܰܘ ܪ̈ܕܘܦܝܶܐ ܩܫܰܝ̈ܳܐ. ܚܰܬܺܝܬ݂ܳܐܺܝܬ݂ ܐܰܟ݂ܡܐ ܕܒܰܙܒܰܢ ܢܚܶܬ݂ ܗ̱ܘܐ ܡܳܪܝܐ ܝܶܫܘܥ ܡܫܝܚܐ ܠܰܫܝܘܠ ܕܰܢܫܰܡܠܶܐ ܠܦܘܪܩܳܢܐ ܟܰܕ ܛܥܝܢ ܗ̱ܘܐ ܢܘܗܪܐ ܕܰܩܝܳܡܬܐ ܠܗܳܠܶܝܢ ܕܰܒܡܰܘܬܐ܆ ܐܰܝܟܰܢܐ ܕܢܶܬܶܠ ܠܗܘܢ ܚܰܝ̈ܶܐ ܚܰܕ̱̈ܬ݂ܶܐ܆ ܐܳܦ ܬܘܒ ܐܺܝܕ݂ܶܗ ܡܶܬ݂ܦܰܫܛܐ ܠܡܰܪܘܳܚܽܘ ܥܰܡܶܗ ܡܶܢ ܛܘܪܳܦܶܗ ܒܟܠܗܘܢ ܕܳܪ̈ܶܐ. ܗܳܢܰܘ ܡܶܕܡ ܕܡܰܪܓܫܝܢܰܢ ܒܶܗ ܝܰܘܡܳܢܐ܆ ܐܝܕܗ ܓܝܪ ܡܠܰܘܝܐ ܘܰܡܫܰܒܠܐ ܠܢ ܐܶܢ ܢܶܗܘܐ ܒܡܰܕܢܚܐ ܟܰܪ ܕܳܐܬ݂ܶܐ ܥܠܰܝܢ ܚܶܫܘܟ݂ܐ ܕܰܩܪ̈ܳܒܶܐ ܘܰܪ̈ܕܘܦܝܶܐ܆ ܘܡܶܬ݂ܟܬܫܝܢܰܢ ܕܰܢܟ݂ܰܬܰܪ ܒܰܐܪ̈ܥܳܬ݂ܰܢ܆ ܟܰܕ ܫܩܝܠܝܢܰܢ ܒܠܶܒܰܘ̈ܳܬ݂ܰܢ ܣܰܒܪܐ ܡܰܕܢܚܳܢܳܐ ܠܒܰܪ ܡܶܢ ܥܰܪܦܶܠܐ ܕܠܐ ܝܺܕܝܥܽܘܬ݂ܐ ܕܥܰܠ ܠܰܡܚܳܪ. ܐܰܘ ܐܶܢ ܢܶܗܘܐ ܒܡܰܥܪܒܐ܆ ܐܰܝܟܐ ܕܐܘܠܨܳܢ̈ܐ ܢܳܒܗܺܝܢ ܒܰܙܢܰܝ̈ܳܐ ܡܫܰܚܠܦ̈ܶܐ܆ ܐܰܝܟ ܫܰܦܠܘܬ݂ ܐܺܝܬ݂ܺܝܩܽܘܢ ܘܡܰܗܡܝܳܢܘܬ݂ܐ ܪܘܚܳܢܳܝܬܐ ܘܣܰܓܺܝܽܐܘܬ݂ ܡܶܬܪܰܚܩܳܢܘܬܐ ܡܶܢ ܡܰܪ̈ܕܘܳܬܐ ܘܝܘܠܦܳܢ̈ܐ ܡܫܝܚܳܝ̈ܶܐ. ܗܳܠܶܝܢ ܐܰܝܟܰܢܳܝܘ̈ܳܬ݂ܳܐ ܡܫܰܚܠܦ̈ܳܬܐ ܘܥܰܣܩܘ̈ܳܬܐ ܝܰܩܝܪ̈ܳܬܐ ܐܰܠܶܨܝ̱̈ ܠܣܰܓܺܝ̈ܶܐܐ ܕܢܶܬ݂ܪܡܘܢ ܒܰܐܒܕܳܢܐ ܘܰܦܣܳܩ ܣܰܒܪܐ܆ ܟܰܕ ܡܰܘܠܕ̈ܳܢ ܠܗܘܢ ܠܐ ܡܶܫܬܰܪܪܳܢܘܬܐ ܥܰܠ ܕܰܪܓ݂ܗܘܢ ܒܥܳܠܡܐ ܕܠܐ ܥܽܘܕ ܡܩܰܒܶܠ ܠܗܰܝܡܳܢܘܬܐ܆ ܐܳܦܠܐ ܕܶܝܢ ܡܰܘܕܶܐ ܒܢܘܗܪܶܗ ܕܡܫܝܚܐ. ܐܶܠܐ܆ ܒܡܶܨܥܰܬ ܟܽܠܶܗ ܗܳܢܐ ܚܶܫܘܟܐ܆ ܡܽܘܠܟܳܢܐ ܕܰܐܠܗܐ ܩܰܝܳܡ ܗ̱ܽܘ ܘܫܰܪܝܪ܆ ܟܰܕ݂ ܠܐ ܡܶܠܬ݂ܶܗ ܡܶܫܬܰܪܝܐ܆ ܘܳܐܦܠܐ ܐܺܝܕ݂ܶܗ ܡܰܪܦܝܐ ܠܰܢ܆ ܘܠܳܐ ܕܶܝܢ ܢܘܗܪܶܗ ܕܳܥܶܟ܆ ܐܶܠܐ ܡܗܰܕܶܐ ܠܰܒܢܰܘ̈ܗ̱ܝ ܠܚܰܝ̈ܶܐ ܕܥܰܬܝܪܝܢ ܒܣܰܒܪܐ܆ «ܕܢܶܗܘܘܢ ܠܗܘܢ ܚܰܝ̈ܐ ܘܡܶܕܡ ܕܝܰܬܝܪ ܢܶܗܘܶܐ ܠܗܘܢ» (ܝܘܚܢܢ 10: 10)܆ ܐܰܝܟ ܡܺܐܡܪܶܗ: «ܐܶܢܐ ܐ݈ܢܐ ܢܽܘܗܪܶܗ ܕܥܳܠܡܐ ܡܰܢ ܕܒܳܬ݂ܰܪܝ ܐܳܬ݂ܶܐ ܠܐ ܢܗܰܠܶܟ݂ ܒܚܶܫܘܟ݂ܐ ܐܶܠܐ ܢܶܫܟ݁ܰܚ ܠܶܗ ܢܘܗܪܐ ܕܚܰܝ̈ܶܐ (ܝܘܚܢܢ 8: 12)܆ ܘܰܒܗܳܝ ܕܗܽܘܝܽܘ ܒܳܪܘܝܶܗ ܕܢܘܗܪܐ ܡܳܕܶܝܢ ܚܶܫܘܟܐ ܡܶܬ݂ܓܠܶܐ ܒܦܘܩܕܳܢܶܗ ܘܠܺܠܝܐ ܡܶܬ݂ܚܰܠܰܦ ܠܢܘܗܪܐ ܒܕܶܢܚܳܐ ܕܢܘܗܪܶܗ ܐܰܠܳܗܳܝܐ܆ ܐܰܝܟ ܡܶܠܬ݂ܶܗ ܕܕܰܘܝܕ ܢܒܺܝܐ: «ܘܚܶܫܽܘܟܳܐ ܠܳܐ ܢܶܚܫܰܟ ܡܶܢܳܟ. ܘܠܺܠܝܳܐ ܐܰܝܟ ܐܺܝܡܳܡܳܐ ܢܶܢܗܰܪ ܘܚܶܫܽܘܟܳܐ ܐܰܝܟ ܢܰܗܺܝܪܳܐ» (ܡܙܡܘܪܐ 139: 12).

2. ܒ. ܐܠܗܐ ܫܟܺܝܚ ܗ̱ܽܘ ܒܥܘܡܩܐ ܕܛܘܪ̈ܳܦܰܝܢ:

ܒܕܳܪ̈ܶܐ ܟܽܠܗܘܢ܆ ܣܰܓܺܝ̈ܶܐܐ ܡܶܢ ܐ̱ܢܳܫ̈ܳܐ ܐܰܠܳܗܳܝ̈ܶܐ ܩܢܰܘ ܢܶܣܝܳܢܐ ܥܠ ܫܪܳܪܐ ܕܡܶܕܡ ܕܰܐܡܝܪ ܒܡܰܙܡܘܪܐ ܕ139: 10«ܐܳܦ ܬܰܡܳܢ ܐܺܝܕܳܟ ܬܶܐܚܕܰܢܝ̱». ܗܳܢܐ ܦܶܬܓ݂ܳܡܐ ܡܦܰܫܶܩ ܠܢ ܕܰܫܟܝܚܘܬܐ ܕܰܐܠܗܐ ܒܚܰܝܰܝ̈ܢ ܐܺܝܬ݂ܶܝܗ̇ ܫܪܳܪܐ ܠܳܐ ܡܶܙܕܰܥܙܥܳܢܐ܆ ܘܶܐܬ݂ܓܰܠܝܰܬ ܫܟܝܚܘܬ݂ܶܗ ܗܳܕܐ ܒܡܘܠܳܝ ܙܰܒܢ̈ܐ ܒܝܰܕ ܐ̱ܪܳܙܐ ܕܡܶܬܒܰܪܢܫܳܢܘܬܐ ܐܠܗܳܝܬܐ܆ ܒܰܕ ܠܳܐ ܣܶܦܩܰܬ݂ ܠܡܳܪܝܐ ܐܠܗܐ ܕܢܶܗܘܐ ܩܰܪܝܒ ܡܢ ܥܰܡܶܗ܆ ܐܶܠܐ ܘܳܐܦ ܗܘܳܐ ܚܰܕ ܡܶܢܗܘܢ܆ ܘܥ̣ܰܠ ܠܥܘܡܩܐ ܕܛܘܪܳܦܗܘܢ܆ ܘܰܛܥܶܢ ܟܺܐܒܰܝ̈ܗܘܢ ܥܰܠ ܟܰܬ݂ܦ̈ܳܬ݂ܶܗ܆ ܐܰܟ݂ܡܐ ܕܶܐܡܰܪ ܡܳܪܝ̱ ܦܰܘܠܽܘ̇ܣ: «ܐܶܠܐ ܢܰܦܫܶܗ ܣܰܪܶܩ. ܘܰܕܡܽܘܬ݂ܐ ܕܥܰܒܕܳܐ ܢܣܰܒ. ܘܰܗܘܳܐ ܒܰܕܡܽܘܬ݂ܐ ܕܰܒܢܰܝ̈ܢܳܫܳܐ. . ܘܒܶܐܣܟ݁ܺܡܳܐ ܐܶܫܬܟܰܚ ܐܰܝܟ݂ ܒܰܪܢܳܫܳܐ. ܘܡܰܟ݁ܶܟ݂ ܢܰܦܫܶܗ. ܘܶܐܫܬܡܰܥ ܥܕܰܡܐ ܠܡܰܘܬ݁ܐ. ܡܰܘܬ݁ܐ ܕܶܝܢ ܕܰܙܩܺܝܦܐ» (ܦܝܠܝ̈ܦܣܝܐ 2: 7 – 8) ܘܰܒܗܳܕܶܐ ܫܩܰܠ ܢܶܣܝܘܢܐ ܕܚܰܫ̈ܶܐ ܐܰܝܟ ܡܶܠܬ݂ܶܗ ܕܡܪܝ ܦܘܠܘܣ: «ܒܗܳܝ ܓܶܝܪ ܕܗܽܘ ܚܰܫ ܘܶܐܬ݂ܢܰܣܝ ܡܶܫܟܰܚ ܕܰܢܥܰܕܰܪ ܠܰܐܝܠܶܝܢ ܕܡܶܬܢܰܣܶܝܢ» (ܥܒܪ̈ܳܝܐ 2: 18). ܥܰܠ ܗܳܕܶܐ܆ ܡܠܰܘܝܳܢܘܬ݂ܶܗ ܕܡܳܪܝܐ ܐܠܗܐ ܘܰܡܫܰܒܠܳܢܘܬ݂ܶܗ ܠܢ ܒܐܘܠܨܳܢܐ ܝܳܗܒܐ ܠܰܢ ܚܰܝܠܐ ܘܗܰܝܡܳܢܘܬܐ ܠܡܶܥܒܰܪ ܒܥܰܣܩܘ̈ܳܬܐ ܘܰܠܡܶܬܢܰܣܳܝܘ ܒܛܘܪܳܦܐ܆ ܕܠܐ ܩܶܢܛܐ ܡܶܢ ܒܝܫܬܐ܆ ܡܶܛܽܠ ܕܒܰܢܛܺܝܪܽܘܬ݂ܶܗ ܙܳܟ݂ܶܝܢܰܢ ܠܽܐܘܠܨܳܢ̈ܶܐ ܥܰܣܩ̈ܐ ܘܳܐܠܨܳܝ̈ܶܐ ܕܚܰܝܰܝ̈ܢ. ܡܶܬ݂ܓܠܶܐ ܕܶܝܢ܆ ܕܢܺܝܫܐ ܕܗܳܕ݂ܶܐ ܡܶܬ݂ܒܰܪܢܫܳܢܘܬܐ ܫܒܺܝܚܬܐ܆ ܕܒܺܐܝܕܳܗ̇ ܫܩܰܠ ܡܶܠܬ݂ܳܐ ܐܠܗܐ ܝܫܘܥ ܡܫܝܚܐ ܨܰܠܡܰܢ ܚܢܰܢ ܥܰܒܕ̈ܰܘܗ̱ܝ܆ ܐܰܝܟܰܢܳܐ ܕܢܰܩܶܠ ܡܶܢ ܟܰܬܦ̈ܳܬܰܢ ܫܘܢܳܩܰܢ ܕܰܒܩܶܨܰܬ݂ ܚܛܝܬ݂ܳܐ ܘܰܓܙܳܪ ܕܝܢܐ ܕܡܰܘܬܐ܆ ܘܰܗܘܐ ܐܠܗܢ ܡܫܰܒܚܳܐ ܛܳܥܘܢܳܐ ܕܛܘܪܳܦܰܢ܆ ܠܰܘ ܒܰܠܚܘܕ ܚܰܙܳܝܶܗ܆ ܘܫܰܡܠܝ ܚܠܳܦܰܝܢ ܐܘܪܚܐ ܕܚܰܫܐ ܘܰܙܩܝܦܘܬܐ܆ ܟܰܕ ܡܣܰܒܰܪ ܠܟܠܗܘܢ ܣܢܝܩ̈ܐ ܘܰܐܠܝܨ̈ܶܐ ܘܡܰܣܠܰܝ̈ܳܐ ܕܗܽܘ ܡܩܰܒܶܠ ܠܗܘܢ܆ ܘܕܺܐܝܕܶܗ ܣܳܡܟܳܐ ܠܗܘܢ ܘܡܰܐܣܝܐ ܠܛܘܪ̈ܳܦܰܝܗܘܢ܆ ܐܰܟܡܐ ܕܶܐܡܪ: «ܪܘܚܶܗ ܕܡܳܪܝܐ ܥܠܰܝ ܘܡܶܛܽܠ ܗܕܐ ܡܰܫܚܰܢܝ̱ ܠܰܡܣܰܒܳܪܘ ܠܡܶܣ̈ܟܺܢܶܐ ܘܫܰܠܚܰܢܝ̱ ܠܡܰܐܣܳܝܽܘ ܠܰܬܒܺܝܪ̈ܰܝ ܠܶܒܐ ܘܰܠܡܰܟ݂ܪܳܙܽܘ ܠܰܫܒܰܝ̈ܳܐ ܫܘܒܩܳܢܐ ܘܠܰܥܘܺܝܪ̈ܶܐ ܚܙܳܝܳܐ ܘܠܰܡܫܰܪܳܪܽܘ ܠܰܬܒܝܪ̈ܶܐ ܒܫܘܒܩܳܢܐ» (ܠܘܩܐ 4: 19 – 18). ܡܶܬܛܰܝܒܳܢܘܬ݂ܐ ܕܶܝܢ ܕܰܐܠܗܐ ܒܥܘܡܩܐ ܕܛܘܪ̈ܳܦܰܝܗܘܢ ܠܳܐ ܦܳܫܰܬ݂ ܡܶܬܛܰܝܒܳܢܘܬܐ ܫܐܺܝܠܬܳܐ܆ ܐܰܟܡܐ ܕܡܶܢ ܩܕܳܡ ܡܶܬܒܰܪܢܫܳܢܘܬܐ ܐܰܠܳܗܝܬܐ܆ ܐܶܠܐ܆ ܡܶܬܛܰܝܒܳܢܘܬ݂ܐ ܚܰܬܺܝܬܬܐ ܐܰܝܕܐ ܕܡܶܬܬܰܪܓܫܐ ܒܟܽܠܗܘܢ ܙܰܒܢ̈ܐ ܕܛܘܪ̈ܳܦܶܐ ܕܡܶܬ݂ܢܰܣܶܝܢܰܢ ܒܗܘܢ. ܥܰܠ ܗܳܝ܆ ܚܰܝܳܒܝܢܰܢ ܕܰܢܗܰܝܡܶܢ ܕܺܐܝܕܶܗ ܕܡܳܪܝܐ ܠܐ ܣܳܟ݂ ܡܶܬܬܪܝܡܐ ܡܶܢ ܥܰܡܶܗ܆ ܐܳܦ ܟܰܕ ܕܶܝܢ ܡܶܬ݂ܚܰܘܝ̈ܳܢ ܥܰܣܩܘ̈ܳܬܐ ܡܰܘܒܕ̈ܳܢܝܳܬ݂ܐ܆ ܘܗܳܢܐ ܡܶܕܶܡ ܡܰܘܫܶܛ ܠܰܢ ܚܰܝܠܐ ܠܡܶܐܪܰܥ ܒܰܐܝܟܰܢܳܝܘܬܐ ܡܣܰܪܕܳܢܺܝܬܐ ܕܰܪܡܶܝܢܰܢ ܒܳܗ̇ ܝܰܘܡܳܢܐ܆ ܥܰܠ ܕܺܐܝܬ݂ܰܘܗ̱ܝ ܥܰܡܰܢ܆ ܘܡܶܬ݂ܟܰܬܰܫ ܚܠܳܦܰܝܢ܆ ܐܰܝܟ ܡܶܠܬ݂ܶܗ ܩܰܕܝܫܬܐ: . «ܘܢܶܬ݂ܟܰܬܫܽܘܢ ܥܰܡܳܟ݂: ܘܠܐ ܢܶܙܟܘܢܳܟ݂݂: ܡܶܛܽܠ ܕܥܰܡܳܟ݂ ܐ̱ܢܐ ܠܰܡܦܰܨܳܝܽܘܬ݂ܳܟ݂» (ܐܶܪܰܡܝܳܐ 1: 19)

3. ܓ. ܐܠܗܐ ܝܳܗܶܒ ܠܰܢ ܙܳܟ݂ܘܬ݂ܐ ܒܚܰܝܠܐ ܕܝܰܡܝܢܶܗ:

ܐܰܚܺܝܕܽܘܬ݂ܰܢ ܒܝܰܡܝܢܶܗ ܕܡܳܪܝܐ ܡܰܩܠܳܐ ܩܕܳܡܰܝܢ ܐܘܪܚܐ ܕܰܐܩܺܝܦܽܘܬ݂ܐ ܘܡܶܬ݂ܩܰܪܒܳܢܘܬ݂ܐ ܕܰܠܩܘܕܡܐ. ܗܳܟ݂ܰܢ ܡܫܰܪܰܪ ܠܰܢ ܦܶܬ݂ܓ݂ܳܡܐ ܕܡܰܙܡܘܪܐ ܕ139: 10 ܕܐܡܪ: «ܬܕܰܒܪܰܢܝ̱ ܝܰܡܺܝܢܳܟ». ܠܰܘ ܡܶܛܠ ܕܗܳܢܐ ܦܶܬܓܡܐ ܐܝܬ݂ܰܘܗ̱ܝ ܠܚܽܘܕ ܫܽܘܘܕܳܝܳܐ ܥܰܠ ܢܺܝܚܽܘܬ݂ܳܐ܆ ܐܶܠܐ ܩܪܳܝܬܐ ܠܢ ܕܐܝܬ݂ܰܝܢ ܡܗܰܝܡܢ̈ܶܐ ܠܡܶܦܠܰܚ ܘܰܠܡܶܬܰܠ܆ ܘܗܳܢܐ ܡܰܪܡܶܐ ܥܠܰܝܢ ܗܳܝ ܕܢܶܐܚܽܘܕ ܒܐܝܕ݂ܶܗ ܕܡܳܪܝܐ ܒܟܰܫܝܪܘܬ݂ܐ܆ ܘܢܶܪܗܰܛ ܠܰܡܫܰܡܠܳܝܘ ܩܪܳܝܬܰܢ ܒܰܕܡܘܬ݂ ܫܠܺܝܚܰܘ̈ܗ̱ܝ ܒܗܳܢ ܥܳܠܡܐ. ܟܰܕ ܐܺܝܬ݂ܰܝܢ ܬܟ݂ܝܠܝܢ ܥܰܠ ܚܰܝܠܶܗ ܚܠܳܦ ܬܘܟ݂ܠܳܢܐ ܕܥܰܠ ܐܽܘܪ̈ܚܳܬ݂ܳܐ ܐ̱ܢܳܫܳܝ̈ܳܬ݂ܳܐ. ܘܠܐ ܡܶܙܕܰܥܙܥܳܢ̈ܶܐ ܠܘܩܒܰܠ ܥܰܣܩܘ̈ܳܬ݂ܳܐ ܚܶܫܘܟ݂̈ܳܬ݂ܳܐ܆ ܘܠܳܐ ܪ̈ܟ݂ܺܝܢܰܝ ܨܰܘܪܐ ܠܰܦܣܳܩ ܣܰܒܪܐ܆ ܗܳܝܕܶܝܢ ܢܶܚܨܘܕ ܙܳܟܘܬܐ ܕܰܒܗܰܝܡܳܢܘܬܐ܆ ܐܰܝܟ ܡܶܠܬ݂ܶܗ ܕܡܳܪܝ ܝܘܚܰܢܢ ܫܠܝܚܐ «ܘܗܳܕܳܐ ܗ݈ܝ ܙܳܟ݂ܘܬ݂ܐ ܕܰܙܟ݂ܳܬ݂ܶܗ ܠܥܳܠܡܐ ܗܰܝܡܳܢܘܬ݂ܰܢ» (1ܝܘܚܢܢ 5: 4). ܡܶܛܽܠ ܗܳܕܐ܆ ܝܰܡܝܢܶܗ ܕܡܳܪܝܐ ܚܰܝܠܐ ܗ̱ܝ ܡܫܰܒܠܳܢܐ ܠܙܳܟ݂ܘܬ݂ܐ܆ ܘܳܐܬ݂ܳܐ ܠܟ݂ܽܠܗܘܢ ܡܗܰܝܡܢ̈ܶܐ܆ ܘܣܰܟܪܐ ܕܠܽܘܩܒܰܠ ܓܶܐܪ̈ܰܝ ܚܶܫܘܟ݂ܘܬ݂ܐ܆ ܘܰܐܝܠܶܝܢ ܕܒܳܗ̇ ܒܣܰܟܪܐ ܐܳܚܕܺܝܢ ܠܐ ܢܳܦܠܝܢ ܒܦܰܚܰܘ̈ܗ̱ܝ ܕܣܳܛܳܢܐ܆ ܒܗܳܝ ܕܰܡܡܰܢܥܳܐ ܠܗܘܢ ܠܰܠܡܺܐܢܳܐ ܕܫܰܝܢܐ. ܐܳܦ ܒܶܗ ܒܙܰܒܢܐ܆ ܐܰܚܺܝܕܽܘܬ݂ܰܢ ܕܰܒܗܳܕ݂ܶܐ ܐܺܝܕܐ ܐܠܗܳܝܬܐ ܡܠܰܒܒܳܐ ܠܰܢ ܕܢܰܣܗܶܕ ܥܰܠ ܗܰܝܡܳܢܘܬ݂ܰܢ ܬܪܝܨܬܐ ܘܰܕܢܶܓܠܶܝܗ̇ ܒܰܥܒܳܕ̈ܶܐ ܕܛܳܒ̈ܳܬ݂ܳܐ ܘܰܡܪܰܚܡܳܢܘܬ݂ܳܐ ܘܦܺܐܪ̈ܶܐ ܕܗܰܝܡܳܢܘܬܐ ܕܡܶܬ݂ܓܰܡܪܳܐ ܒܚܽܘܒܳܐ܆ ܐܰܝܟ ܡܶܠܬ݂ܶܗ ܕܡܳܪܝ ܦܘܠܘܣ: «ܒܰܡܫܺܝܚܳܐ ܓܶܝܪ ܝܶܫܽܘܥ ܠܳܐ ܓܙܽܘܪܬ݁ܳܐ ܡܶܕܶܡ ܐܺܝܬ݂ܶܝܗ̇ ܘܠܳܐ ܥܽܘܪܠܽܘܬ݂ܳܐ ܐܶܠܳܐ ܗܰܝܡܳܢܽܘܬ݂ܳܐ ܕܡܶܬ݂ܓܰܡܪܳܐ ܒܚܽܘܒܳܐ» (ܓܠܛܝ̈ܐ 5: 6). ܘܝܰܬܝܪ ܐܳܠܨܳܝ ܦܺܐܪܐ ܐܺܝܬ݂ܰܘܗ̱ܝ ܚܘܒܐ ܕܰܐܠܳܗܐ܆ ܗܰܘ ܕܡܶܬ݂ܓܠܶܐ ܒܝܰܕ ܡܫܰܥܒܕܘܬ݂ ܢܰܦܫܐ ܠܢܳܡܘܣ̈ܶܐ ܐܰܠܳܗܳܝ̈ܶܐ ܘܩܳܢܘ̈ܢܶܐ ܥܺܕ̱̈ܬܳܢܳܝܶܐ܆ ܘܚܽܘܒܐ ܕܰܠܘܳܬ݂ ܩܰܪܝܒܐ ܗܰܘ ܕܡܶܬ݂ܚܰܘܶܐ ܒܝܰܕ ܛܳܒܘܬ݂ ܗܽܘܦܳܟ݂̈ܶܐ ܥܰܡ ܟܽܠ ܐ̱ܢܳܫ ܘܡܰܘܫܛܽܘܬ݂ ܐܺܝܕܐ ܠܟܽܠ ܡܰܢ ܕܰܣܢܝܩ.

ܒܢ̈ܝܐ ܕܝܠܢ ܪ̈ܘܚܢܝܐ:

ܡܶܐܬܝܬ݂ܶܗ ܕܗܳܢܐ ܨܰܘܡܐ ܩܰܕܝܫܐ ܕܰܐܪܒܥܝܢ ܡܰܝܬܝܐ ܠܰܢ ܦܘܪܣܐ ܚܰܕ̱ܬܐ ܠܰܡܗܰܠܳܟ݂ܘ ܒܢܘܗܪܶܗ ܕܰܐܠܗܐ ܒܡܶܨܥܰܬ݂ ܚܶܫܘܟ݂ܘܬ݂ܶܗ ܕܥܳܠܡܐ ܗܳܢܐ. ܥܰܣܩܘ̈ܳܬ݂ܐ ܐܰܝܠܶܝܢ ܕܳܐܪ̈ܥܳܢ ܠܢ ܝܰܘܡܳܢܐ ܐܰܝܟ ܡܫܝܚܳܝ̈ܶܐ ܕܰܠܡܐ ܡܶܬ݂ܚܰܘ̈ܝܳܢ ܠܐ ܡܶܬ݂ܡܰܫܚܳܢ̈ܝܳܬܐ܆ ܐܶܠܐ܆ ܡܘܠܟܳܢܰܘ̈ܗ̱ܝ ܫܰܪܝܪ̈ܶܐ ܡܢܺܝܚܺܝܢ ܠܢ ܕܢܶܫܬܰܪܰܪ ܕܝܰܡܝܢܶܗ ܡܗܰܕܝܳܐ ܠܢ܆ ܘܢܘܗܪܶܗ ܡܰܢܗܰܪ ܠܠܰܝܠܰܘ̈ܳܬܐ ܕܐܘܠܨܳܢ̈ܐ ܘܥܰܣܩܘ̈ܳܬܐ ܚܶܫܘܟܳܝ̈ܳܬܐ ܐܰܝܠܝܢ ܕܰܟܪܺܝܟܺܝܢ ܠܰܢ ܥܰܠ ܕܡܶܫܬܰܟܚܳܢܘܬ݂ܶܗ ܕܒܰܝܢܳܬ݂ܰܢ ܡܚܰܝܠܳܐ ܠܢ ܒܛܘܪ̈ܳܦܰܝܢ ܘܫܘ̈ܢܳܩܰܝܢ܆ ܘܝܰܡܝܢܶܗ ܗܺܝ ܐܶܘܩܺܝܢܳܐ ܐܰܝܕܐ ܕܰܡܫܰܪܪܳܐ ܠܢ܆ ܘܰܨܠܝܒܶܗ ܡܰܚܝܳܢܐ ܗܽܘܝܽܘ ܚܰܝܠܰܢ ܘܙܳܟܘܬ݂ܰܢ. ܡܳܕܶܝܢ܆ ܐܶܬ݂ܠܰܒܰܒܘ̱ ܘܶܐܬ݂ܚܰܝܠܘ̱ ܒܗܳܝ ܕܰܟܡܐ ܕܢܶܥܫܰܢ ܚܶܫܘܟܐ ܕܰܚܕܳܪܰܝܢ܆ ܐܠܗܐ ܡܩܰܘܶܐ ܫܰܪܝܪ ܒܡܘܠܟܳܢܰܘ̈ܗ̱ܝ. ܥܰܠ ܕܺܐܝܬ݂ܰܝܢ ܥܰܡܗ ܘܠܐ ܣܳܟ݂ ܡܰܗܡܶܐ ܡܶܢܢ܆ ܘܡܶܛܠ ܕܰܥܕܰܟܝܠ ܝܰܡܝܢܶܗ ܡܫܰܒܠܐ ܠܰܢ ܘܰܐܚܺܝܕܐ ܒܰܢ܆ ܥܕܰܡܐ ܕܢܶܬܓܠܶܐ ܠܺܠܝܐ܆ ܘܢܰܢܗܰܪ ܢܘܗܪܶܗ ܥܳܠܡܺܝܢܳܝܳܐ ܠܥܳܠܰܡ.

ܡܳܪܝܐ ܢܩܰܒܶܠ ܨܰܘܡܟ݂ܘܢ ܘܰܬܝܳܒܘܬ݂ܟ݂ܘܢ ܘܰܨܠܰܘ̈ܳܬ݂ܟ݂ܘܢ ܘܙܶܕܩ̈ܳܬ݂ܟ݂ܘܢ܆ ܘܢܰܫܘܶܐ ܠܟܽܠܰܢ ܠܡܶܪܘܰܙ ܒܥܺܐܕܐ ܕܰܩܝܳܡܬܶܗ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ. ܐܒܘܢ ܕܒܫܡܝܐ ܘܫܪܟܐ.

ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ – ܣܘܪܝܐ

ܥܣܪܝܢ ܘܫܬܐ ܒܝܪܚܐ ܕܫܒܛ ܕܫܢܬ ܒ݈ܟܗ

ܕܐܝܬܝܗ̇ ܫܢ̱ܬܐ ܚܕܥܣܝܪܝܬܐ ܕܦܛܪܝܪܟܘܬܢ