ܦܬܝܚܐ ܦܛܪܝܪܟܝܐ ܡܛܠ ܓܘܒܝܐ ܕܡܦܪܝܢܐ ܚܕܬܐ

ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܡܺܝܛܪ̈ܦܽܘܠܺܝܛܽܘ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܰܕܡܳܪܝ ܬܘܡܐ ܫܠܺܝܚܳܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:

ܒܳܬܰܪ ܫܽܘܢܝܳܐ ܕܰܬܠܺܝ̈ܬܝ ܛܽܘ̈ܒܶܐ ܛܽܘܒܬܢܽܘܬܶܗ ܕܡܪܝ ܒܰܣܺܝܠܝܽܘܤ ܬܐܘܡܐ ܩܕܡܝܐ ܒܣܺܝܩܽܘܡ 31/10/2024܆ ܐܶܣܬܦܶܩ ܟܽܘܪܣܝܳܐ ܕܡܰܦܪܝܢܽܘܬܐ ܒܗܢܕܘ. ܘܒܗ̇ ܒܣܥܽܘܪܘܬܰܢ ܠܗܶܢܕܘ ܠܰܡܩܰܪܒܘ ܩܽܘܪܒܐ ܐܠܗܝܐ ܘܕܽܘܟܪܢܳܐ ܐܪܒܥܺܝܢܝܳܐ ܕܰܬܠܝ̈ܬܝ ܛܽܘ̈ܒܐ ܡܪܝ ܒܣܺܝܠܝܽܘܣ ܬܐܘܡܐ ܩܕܡܝܐ܆ ܡܰܦܪܝܢܳܐ ܕܗܶܢܕܘ܆ ܐܶܬܪܝܫܢܢܰܢ ܠܣܘܢܢܕܘܣ ܕܽܘܟܬܳܢܝܬܳܐ ܩܕܝܫܬܐ ܒܣܝܩܘܡ 8/12/2024܆ ܕܒܗ̇ ܕܪܰܫܢܰܢ ܥܡ ܡܥܰܠܝܽܘܬܗܘܢ ܕܡܝܛܪ̈ܦܘܠܝܛܘ ܠܨܶܒܘ̈ܬܐ ܕܥܺܕܬܐ ܕܗܶܢܕܘ܆ ܘܰܣܢܺܝܩܘܬܗ̇ ܠܡܰܦܪܝܢܳܐ ܕܰܢܕܰܒܪܝܗ̇. ܘܡܢ ܒܬܪ ܕܰܫܡܥܢܰܢ ܠܪ̈ܢܝܶܐ ܕܰܡܥܰܠܝܽܘܬܗܘܢ ܕܐܒܗ̈ܬܐ ܡܝܛܪ̈ܦܘܠܝܛܘ ܗܰܕܡ̈ܶܐ ܕܣܽܘܢܶܢܕܽܘܣ ܕܽܘܟܬܳܢܝܬܳܐ܆ ܘܕܽܘܪܫ ܡܠܘ̈ܐܐ ܩܳܢܘ̈ܢܝܶܐ ܠܓܽܘܒܝܳܐ ܕܡܰܦܪܝܢܳܐ ܚܰܕܬܳܐ܆ ܘܒܗ ܒܳܗܢܳܐ ܟܽܘܢܫܝܳܐ ܕܣܽܘܢܶܢܕܽܘܤ ܩܰܕܺܝܫܬܳܐ ܓܒܰܘ ܟܽܠܗܘܢ ܐܒܗ̈ܬܐ ܡܥܰܠܝ̈ܳܐ ܠܰܡܥܰܠܝܽܘܬܗ ܕܡܪܝ

ܓܪܝܓܘܪܝܘܤ ܓܘܙܝܦ܆ ܡܝܛܪܦܘܠܝܛܐ ܘܰܟܺܝܠܳܐ ܕܥܕܬܢ ܒܗܢܕܘ܆ ܘܡܝܛܪܦܘܠܝܛܐ ܕܡܪܥܝܬܐ ܕܟܘܔܝܢ܆ ܕܢܗܘܐ ܡܦܪܝܢܐ ܠܥܕܬܢ ܒܗܢܕܘ.
ܐܶܬܝܒܠ̈ܝ ܠܢ ܬܽܘܒ ܐܶܓܪ̈ܬܳܐ ܕܩ̈ܳܠܶܐ ܕܣܺܝܥܬܳܐ ܡܕܰܒܪܢܺܝܬܐ (Managing Committee) ܘܗܝ ܦܰܠܽܘܚܬܳܐ (Working Committee) ܕܥܺܕܬܐ ܕܒܗܶܢܕܘ܆ ܘܰܒܝܕ ܗܠܝܢ ܐܓܪ̈ܬܐ܆ ܟܽܠܗܘܢ ܫܳܐܠܺܝܢ ܡܢܰܢ ܒܚܰܕ ܩܳܠܳܐ ܕܢܰܣܪܰܚ ܠܰܡܥܠܝܽܘܬܶܗ ܕܐܚܽܘܢ ܡܪܝ ܓܪܝܓܘܪܝܘܣ ܔܘܙܝܦ܆ ܡܦܪܝܢܐ ܕܗܢܕܘ.

ܠܦܽܘܬ ܡܠܘܐܐ 22 (ܐ) ܕܰܬܚܽܘܡ ܥܺܕܬܰܢ ܣܽܘܪܝܝܬܐ ܬܪܺܝܨܰܬ ܫܽܘܒܚܳܐ܆ ܟܬܰܒܢܰܢ ܠܰܡܥܰܠܝܽܘܬܗܘܢ ܚܣܰܝ̈ܳܐ ܡܥܰܠܝ̈ܳܐ ܕܗܰܕ݁̈ܡܶܐ ܕܣܽܘܢܶܢܕܽܘܣ ܩܰܕܺܝܫܬܳܐ ܕܐܢܛܺܝܘܟ܆ ܕܰܬܩܰܕܶܐ ܓܰܒܝܽܘܬܐ ܗܕܐ ܠܫܽܘܪܪܗܘܢ. ܒܳܬܰܪ ܡܐ ܕܶܐܫܬܰܪܪܰܬ ܓܰܒܝܽܘܬܐ ܡܶܢ ܟܽܠܗܘܢ ܐܒܗ̈ܬܐ: ܬܰܚܶܡܢܰܢ ܝܘܡ ܬܠܬܐ ܒܫܒܐ 25 ܐܕܪ 2025 ܕܐܝܬܘܗܝ ܥܺܐܕܳܐ ܕܣܽܘܒܳܪܳܐ܆ ܕܰܢܫܰܡܠܶܐ ܡܰܣܪܚܢܽܘܬܐ ܕܰܡܥܰܠܝܽܘܬܗ ܕܐܚܘܢ ܡܪܝ ܓܪܝܓܘܪܝܘܣ ܔܘܙܝܦ܆ ܡܰܦܪܝܢܳܐ ܕܗܶܢܕܘ܆ ܒܫܶܡ ܛܽܘܒܬܢܽܘܬܶܗ ܕܡܪܝ ܒܰܣܺܝܠܝܽܘܤ ܓܘܙܝܦ܆ ܒܥܺܕܬܐ ܕܝܳܠܕܰܬ ܐܰܠܗܳܐ ܒܥܰܛܫܐܢܗ – ܠܒܢܢ.

ܡܥܰܠܝܽܘܬܶܗ ܕܝܢ ܕܡܪܝ ܓܪܝܓܘܪܝܘܣ ܔܘܙܝܦ܆ ܐܶܬܝܠܕ ܒܡܕܝܢܬ ܟܘܔܝܢ ܒܫܢܬ 1960܆ ܘܶܐܬܬܰܣܪܚ ܡܝܛܪܦܘܠܝܛܐ ܠܡܰܪܥܺܝܬܐ ܕܟܘܔܝܢ ܒܝܰܕ ܬܠܝ̈ܬܝ ܛܘ̈ܒܐ ܡܪܝ ܐܝܓܢܛܝܘܣ ܙܟܝ ܩܕܡܝܐ ܒܫܢܬ 1994܆ ܘܶܐܬܓܒܺܝ ܒܝܕ ܟܢܘܫܬܐ ܓܘܢܝܬܐ (The Association) ܒܗܶܢܕܘ ܕܢܶܗܘܐ ܡܝܛܪܦܘܠܝܛܐ ܘܟܝܠܐ Metropolitan Trustee ܠܰܡܕܰܒܳܪܽܘ ܠܥܺܕܬܐ ܕܒܗܶܢܕܘ ܒܫܢܬ 2019܆ ܘܟܢ ܐܶܬܓܒܺܝ ܒܝܕ ܣܽܘܢܶܢܕܽܘܣ ܕܽܘܟܬܳܢܝܬܳܐ܆ ܘܣܺܝܥܬܳܐ ܡܕܰܒܪܢܺܝܬܳܐ ܡܝܛܪܦܘܠܝܛܐ ܠܡܠܢܟܪܐ ܫܢܬ 2024܆ ܘܫܰܪܪܢܢ ܟܽܘܢܝܳܐ ܗܢܐ ܒܣܥܽܘܪܘܬܰܢ ܠܗܶܢܕܘ ܒܝܪܚ ܫܒܛ 2024.

ܒܢܰܝ̈ܳܐ ܕܺܝܠܰܢ ܪ̈ܽܘܚܳܢܝܶܐ ܪ̈ܚܺܝܡܐ܆ ܡܘܕܥܝܢܢ ܠܟܘܢ܆ ܕܰܥܬܺܝܕܐ ܠܡ ܕܬܶܬܟܰܢܰܫ ܒܝܘܡ ܐܪܒܥܐ ܒܫܒܐ 26 ܐܕܪ 2025 ܣܽܘܢܶܢܕܽܘܤ ܓܰܘܢܳܝܬܳܐ ܠܟܽܠܗܘܢ ܚܣܰܝ̈ܳܐ ܡܥܰܠܝ̈ܳܐ ܕܬܰܪܬܝܢ ܣܽܘܢܶܢܕ̈ܘ ܩܰܕܝ̈ܫܳܬܳܐ ܕܥܺܕܬܰܢ܆ ܕܐܢܛܺܝܘܟ ܠܡܐܡܪ ܘܗܳܝ ܕܽܘܟܬܳܢܝܬܳܐ ܕܗܢܕܘ܆ ܕܢܶܕܪܽܘܫ ܨܶܒܘ̈ܬܐ ܕܰܣܢܺܝ̈ܩܳܢ ܠܥܺܕܬܢ ܣܘܪܝܝܬܐ ܬܪܝܨܬ ܫܘܒܚܐ ܒܗܠܝܢ ܝܘܡ̈ܬܐ.
ܡܟܝܠ: ܫܳܐܠܺܝܢܰܢ ܡܶܢܟܽܘܢ ܕܰܨܠܘܬܳܐ ܬܟܺܝܒܬܳܐ ܠܡܳܪܝܳܐ ܐܰܠܗܳܐ ܬܩܰܪܒܽܘܢ ܕܢܶܬܶܠ ܠܡܰܦܪܝܳܢܳܐ ܚܰܕܬܳܐ ܚܰܝܠܳܐ ܘܟܽܘܫܳܪܳܐ ܒܬܶܫܡܫܬܶܗ ܚܕܰܬܳܐ ܘܰܢܫܰܟܶܢ ܠܟܽܠܢ ܚܶܟܡܬܳܐ ܕܢܶܥܒܶܕ ܗܰܘ ܡܐ ܕܘܳܠܶܐ ܠܒܢܝܳܢܳܐ ܕܥܺܕܬܰܢ܆ ܘܕܰܢܕܰܒܪܝܗ̇ ܒܐܽܘܪܚܳܐ ܕܫܽܘܒܚܳܐ ܘܪܘܡܪܡܐ ܐܡܺܝܢܳܐܝܬ܆ ܒܰܨܠܰܘ̈ܳܬܳܗ̇ ܕܰܒܬܽܘܠܬܐ ܩܰܕܺܝܫܬܐ ܝܳܠܕܰܬ ܐܰܠܳܗܐ ܡܰܪܝܰܡ܆ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ܆ ܘܰܕ݂ܡܳܪܝ ܬܐܘܡܐ ܫܠܺܝܚܳܐ܆ ܥܰܡ ܫܰܪܟܐ ܕܣܳܗ̈ܕܶܐ ܘܕܩܰܕܺܝ̈ܫܶܐ܆ ܐܡܝܢ. ܘܐܒܘܢ ܕܒܫܡܝܐ ܘܫܪܟܐ

ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ – ܣܘܪܝܐ

ܥܣܪܝܢ ܘܫܒܥ ܒܝܪܚܐ ܕܟܢܘܢ ܐ̱ܚܪܝ ܕܫܢܬ ܒ݈ܟܗ

ܕܐܝܬܝܗ̇ ܫܢ̱ܬܐ ܚܕܥܣܝܪܝܬܐ ܕܦܛܪܝܪܟܘܬܢ