ܦܬܝܚܐ ܦܛܪܝܪܟܝܐ ܕܨܘܡܐ ܪܒܐ 2026

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:
ܡܶܠܬܳܐ ܕܰܐܠܳܗܳܐ ܡܰܢ ܒܰܐܡܺܝܢ ܠܥܺܕܬܳܐ ܣܳܡܟܳܐ ܘܰܠܗܰܝܡܳܢܽܘܬܳܗ̇ ܬܪܺܝܨܬܳܐ ܘܰܨܠܰܘ̈ܳܬܳܗ̇ ܬܟܺܝ̈ܒܳܬܳܐ ܘܣܳܗܕܽܘܬܳܗ̇ ܚܰܝܬܳܐ ܡܫܰܪܪܳܐ܆ ܘܠܰܡܗܰܝܡ̈ܢܶܐ ܕܰܒܟܽܠܗܽܘܢ ܕܳܪ̈ܶܐ ܐܰܝܟ ܟܰܘܟܒܳܐ ܕܡܰܕܢܚܳܐ ܡܫܰܒܠܳܐ ܘܰܡܗܰܕܝܳܐ. ܘܰܐܝܟ ܡܥܺܝܢܳܐ ܗ̱ܝ ܓܶܝܪ ܚܰܝܳܐ ܕܡܶܢܶܗ ܥܺܕܬܳܐ ܥܽܘܕܪܳܢܳܐ ܠܫܽܘܘܫܳܛܳܗ̇ ܢܳܣܒܳܐ. ܘܢܘܗܪܐ ܗ̱ܝ ܕܠܫܒܝ̈ܠܐ ܡܗܕܝܐ܆ ܘܐܰܟܡܳܐ ܕܣܳܗܶܕ ܗܰܘ ܡܙܰܡܪܳܢܳܐ ܐܰܠܳܗܳܝܳܐ ܕܰܘܺܝܕ܆ ܫܪܳܓܳܐ ܗ̱ܝ ܠܰܡ ܡܶܠܬܳܟ݂ ܠܪ̈ܶܓܠܰܝ ܘܢܽܘܗܪܳܐ ܠܰܫܒܺܝ̈ܠܰܝ (ܡܙܡܘܪ̈ܐ105:119 ).
105).
ܟܰܕ ܕܶܝܢ ܥܳܠܡܳܐ ܐܶܫܬܰܘܫܰܛ ܘܙܰܒܢ̈ܶܐ ܩܰܠܺܝܠܳܐܺܝܬ݂ ܐܶܫܬܰܚܠܰܦܘ܆ ܒܰܪܢܳܫܳܐ ܬܚܶܝܬ ܢܺܝܪܳܐ ܕܝܰܥܢܽܘܬ ܝܽܘ̈ܠܦܳܢܶܐ ܣܰܓܺܝ̈ܶܐܐ ܗܘܳܐ ܟܒܺܝܫ܆ ܘܕܰܠܡܳܐ ܚܰܝܠܳܐ ܕܦܽܘܪܫܳܢܳܐ ܕܺܝܠܶܗ ܕܒܶܝܬ ܫܪܳܪܳܐ ܠܫܽܘܩܪܳܐ ܐܶܬܡܚܶܠ. ܡܶܟܺܝܠ܆ ܨܰܗܝܳܐ ܗ̱ܝ ܢܰܦܫܳܐ ܠܡܶܠܬܳܐ ܫܰܪܺܝܪܬܳܐ ܕܰܡܦܰܝܓܳܐ ܠܪܽܘܚܳܐ ܘܥܳܐܠܳܐ ܥܕܰܡܳܐ ܠܥܽܘ̈ܡܩܶܐ ܕܠܶܒܳܐ ܘܝܳܗܒܳܐ ܚܰܝ̈ܶܐ ܘܣܽܘܟܳܠܳܐ.
ܒܗܳܢܳܐ ܙܰܒܢܳܐ܆ ܗܳܐ ܣܰܓܺܝ̈ܶܐܐ ܡܶܢ ܒܢ̈ܰܝ ܥܺܕܬܳܐ ܡܫܰܐܠܺܝܢ ܕܡܳܢܳܐ ܗ̱ܝ ܐܳܠܨܳܝܽܘܬ݂ܳܐ ܘܰܐܢܰܢܩܳܝܽܘܬܳܐ ܘܰܣܢܺܝܩܽܘܬܳܐ ܕܰܟܬܳܒ̈ܶܐ ܐܰܠܳܗܳܝ̈ܶܐ ܘܰܐܝܟܰܢ ܡܰܘܬܪܺܝܢ ܠܰܢ ܒܚܰܝ̈ܰܝܢ؟ ܘܳܐܡܪܺܝܢܰܢ ܕܥܺܕܬܳܐ ܠܰܡ ܢܶܛܪܰܬ݂݀ ܠܣܺܝܡܬܳܐ ܕܰܟܬܳܒܳܐ ܩܰܕܝܫܳܐ ܕܶܐܬܓܰܠܰܬ݂݀ ܠܳܗ̇ ܡܶܢ ܫܠܺܝ̈ܚܶܐ ܘܶܐܬܝܰܒܠܰܬ݀ ܒܳܗ̇ ܒܟܽܠܗܽܘܢ ܕܳܪ̈ܶܐ ܥܕܰܡܳܐ ܠܝܰܘܡܳܢܳܐ ܘܡܶܢܶܗ ܝܶܠܦܰܬ݂݀ ܘܠܶܗ ܐܰܠܦܰܬ݂݀
ܐܰܝܟܰܢܳܐ ܕܢܶܗܘܶܐ ܥܶܢܝܳܢܳܐ ܒܶܝܬ ܐܰܠܳܗܳܐ ܠܰܡܗܰܝܡ̈ܢܶܐ܆ ܡܰܠܽܘܢ ܒܙܰܒܢܳܐ ܕܨܰܘܡܳܐ ܩܰܕܺܝܫܳܐ܆ ܕܦܽܘܪܣܰܐ ܗ̱ܘ ܠܰܬܘܳܬ݂ ܢܰܦܫܳܐ ܘܰܠܡܶܩܪܳܐ ܘܰܠܡܺܐܠܰܦ ܒܣܶܦܪ̈ܶܐ ܕܩܽܘܫܬܳܐ ܘܰܕܢܶܗܘܶܐ ܒܰܪܢܳܫܳܐ ܕܺܝܠܰܢ ܓܰܘܳܝܳܐ ܚܰܕܬܳܐ ܒܰܪܕܪܺܝܫ.

ܟܬܳܒܳܐ ܩܰܕܺܝܫܳܐ ܒܚܰܝ̈ܶܐ ܥܺܕ̈ܬܳܢܳܝܶܐ
ܟܬܳܒܳܐ ܩܰܕܺܝܫܳܐ ܚܰܝ̈ܶܐ ܗ̱ܘ ܕܥܺܕܬܰܢ ܣܽܘܪܝܳܝܬܳܐ ܬܪܺܝܨܰܬ ܫܽܘܒܚܳܐ܆ ܘܗܽܘܝܽܘ ܫܶܬܶܐܣܬܳܐ ܕܟܽܠܗܽܘܢ ܛܶܟ̈ܣܶܝܗ̇ ܘܬܶܫܡ̈ܫܳܬܳܗ̇ ܘܳܐܦ ܝܽܘ̈ܠܦܳܢܶܝܗ̇ ܘܗܰܝܡܳܢܽܘܬܳܗ̇ ܚܰܝܬܳܐ. ܘܣܳܟ݂ܳܐ ܠܡܺܐܡܰܪ ܕܰܟܬܳܒ̈ܶܐ ܐܰܠܳܗܳܝ̈ܶܐ ܒܠܶܒ ܗܺܝܽܘܬܳܗ̇ ܪܽܘܚܳܢܳܝܬܳܐ ܕܥܺܕܬܳܐ ܘܰܫܠܺܝܚܽܘܬܳܗ̇ ܣܳܗܕܳܝܬܳܐ ܕܰܒܥܳܠܡܳܐ.
ܢܛܺܝܪܺܝܢ ܓܶܝܪ ܐܶܢܽܘܢ ܡ̈ܶܠܶܐ ܐܰܠܳܗܳܝ̈ܳܬܳܐ ܒܛܶܟܣ̈ܶܐ ܥܺܕ̈ܬܳܢܳܝܶܐ ܘܒܰܙܡܺܝܪ̈ܳܬܳܐ ܘܩ̈ܳܠܶܐ ܘܰܨܠܰܘ̈ܳܬܳܐ ܕܰܙܢܺܝ̈ܢ ܙܢܺܝ̈ܢ܆ ܒܰܕܥܺܕܬܳܐ ܣܽܘܪܝܳܝܬܳܐ ܩܳܪܝܳܐ ܠܰܟܬܳܒ̈ܶܐ ܩܰܕܺܝ̈ܫܶܐ ܒܥܰܝܢܳܐ ܦܫܺܝܛܬܳܐ ܕܗܰܝܡܳܢܽܘܬܳܐ ܘܡܶܫܟܚܳܐ ܒܗܽܘܢ ܓܡܺܝܪܽܘܬܳܐ ܕܟܽܠܗܶܝܢ ܗܳܠܶܝܢ ܕܥܰܠ ܡܫܺܝܚܳܐ ܡܰܐܪ̈ܙܳܢ ܘܠܶܗ ܓܳܠ̈ܝܳܢ ܘܗܽܘܝܽܘ ܡܰܟܪ̈ܙܳܢ ܕܰܐܠܳܗ ܒܰܪܐ̱ܢܳܫ܆ ܕܰܒܓܰܘܳܗ̇ ܗ̱ܽܘ ܘܒܳܗ̇ ܥܕܰܟܺܝܠ ܦܳܠܰܚ ܘܥܰܡܳܗ̇ ܘܒܳܗ̇ ܡܡܰܠܶܠ ܠܟܽܠܗܽܘܢ ܒܢ̈ܶܝܗ̇ ܘܳܐܦ ܠܰܒܢܰܝ̈ܢܳܫܳܐ ܓܰܘܳܢܳܐܺܝܬ݂ ܒܟܽܠܗܽܘܢ ܕܳܪ̈ܶܐ.

ܟܳܬܒ̈ܶܐ ܐܰܠܳܗܳܝ̈ܶܐ: ܚܰܝܠܳܐ ܡܫܰܚܠܦܳܢܳܐ
ܐܳܦܶܢ ܓܶܝܪ ܐܰܝܟ ܕܩܰܕܶܡܢ ܐܶܡܰܪܢ ܕܰܟܬܳܒܳܐ ܩܰܕܺܝܫܳܐ ܫܶܬܶܐܣܬܰܐ ܗ̱ܘ ܠܚܰܝ̈ܶܝܗ̇ ܕܥܺܕܬܳܐ܆
ܒܰܙܒܰܢ ܙܒܰܢ ܫܳܡܥܺܝܢܰܢ ܕܰܡܗܰܝܡ̈ܢܶܐ ܟܒܰܪ ܥܰܣܩܽܘܬܳܐ ܡܶܕܶܡ ܡܶܫܟܚܺܝܢ ܒܡܰܪܓܳܫܽܘ ܒܚܰܝܠܳܗ̇ ܕܡܶܠܬܳܐ ܘܡܰܥܒܕܳܢܽܘܬܳܗ̇ ܒܚܰܝ̈ܰܝܗܽܘܢ ܩܢܽܘ̈ܡܳܝܶܐ. ܘܢܶܣܝܽܘܢܰܐ ܗ̱ܘ ܗܳܢܳܐ ܪܽܘܚܳܢܳܝܳܐ ܪܰܒܳܐ ܟܰܕ ܐ̱ܢܳܫ ܣܰܓܺܝ ܩܳܪܶܐ ܘܦܺܐܪ̈ܶܐ ܠܳܐ ܡܰܘܥܶܐ ܘܝܳܗܶܒ܆ ܐܰܝܟ ܕܰܡܚܰܘܶܐ ܡܳܪܰܢ ܝܶܫܽܘܥ ܡܫܺܝܚܳܐ ܒܡܰܬܠܳܐ ܕܙܳܪܽܘܥܳܐ ܕܒܶܐܘܰܢܓܶܠܺܝܽܘܢ ܕܡܰܬܰܝ ( 23-18 , 9-3:13)܆ ܟܰܪ ܕܙܰܪܥܳܐ ܫܦܺܝܥܳܐܺܝܬ ܡܶܙܕܪܰܥ ܒܪܰܡ ܕܶܝܢ ܐܰܪܥܳܐ ܠܰܘ ܒܰܐܡܺܝܢܽܘ ܛܳܒܳܐ ܗ̱ܝ ܠܡܰܘܥܳܝܽܘ ܘܰܠܡܶܬܰܠ ܦܺܐܪ̈ܶܐ.
ܘܕܰܟܒܰܪ ܚܕܳܐ ܡܶܢ ܥܶܠ̈ܠܳܢ ܐܺܝܬܶܝܗ̇ ܕܢܶܗܘܶܐ ܐ̱ܢܳܫ ܫܳܡܰܥ ܠܡܶܠܬܳܐ ܫܚܺܝܡܳܐܺܝܬ ܘܰܠܦܽܘܬ ܛܶܟܣܳܐ ܕܰܥܝܳܕܳܐ ܘܠܳܐ ܝܳܗܶܒ ܐܰܬܪܳܐ ܠܳܗ̇ ܠܡܰܥܒܳܕܽܘ ܒܠܶܒܶܗ ܘܰܠܡܰܢܗܳܪܽܘ ܡܰܕܥܶܗ܆ ܘܗܳܟܰܢ ܡܶܬܚܰܘܝܳܐ ܡܶܠܬܳܐ ܥܰܝܺܝܦܰܬ݂ ܚܰܝܠܳܐ܆ ܟܰܕ ܫܪܳܪܳܐ ܐܺܝܬܰܘܗ̱ܝ ܕܐ̱ܢܳܫ̈ܳܐ ܚܳܣܪܺܝܢ ܠܦܽܘܪܣܳܐ ܕܰܒܝܰܕ ܛܰܝܒܽܘܬܳܐ ܠܗܽܘܢ ܝܺܗܺܝܒ ܠܡܺܐܪܰܒ ܒܚܰܝ̈ܰܝܗܽܘܢ ܪ̈ܽܘܚܳܢܳܝܶܐ ܘܰܠܡܶܗܘܳܐ ܓܡܺܝܪ̈ܶܐ ܒܰܡܫܽܘܚܬܳܐ ܕܩܰܘܡܬܳܐ ܕܫܽܘܡܠܳܝܶܗ ܕܰܡܫܺܝܚܳܐ.
ܗܳܕܶܐ ܓܶܝܪ ܠܰܣܢܺܝܩܽܘܬܳܐ ܕܥܺܝܪܽܘܬܳܐ ܪܽܘܚܳܢܳܝܬܳܐ ܒܩܶܪܝܳܢ ܘܡܶܫܡܰܥ ܡܶܠܬܳܐ ܡܚܰܘܝܳܐ܆ ܕܢܶܗܘܶܐ ܐܰܬܪܳܐ ܠܡܶܠܬܳܐ ܕܬܶܫܬܟܰܚ ܡܰܦܪܝܳܢܺܝܬܳܐ ܒܚܰܝ̈ܶܐ ܕܰܡܗܰܝܡ̈ܢܶܐ. ܒܗܳܝ ܕܟܰܕ ܐ̱ܢܳܫ ܠܡܶܠܬܳܐ ܐܰܟܺܝܦܳܐܺܝܬ ܫܳܡܰܥ ܘܠܳܗ̇ ܡܰܟܺܝܟܳܐܺܝܬ ܡܩܰܒܶܠ܆ ܥܽܘܡܩܳܐ ܗܳܘܶܐ ܒܚܰܝ̈ܰܘܗ̱ܝ ܠܥܶܩܳܪܳܐ ܕܝܳܥܶܐ ܘܠܳܐ ܝܳܒܶܫ܆ ܘܗܳܘܝܳܐ ܡܶܠܬܳܐ ܡܰܥܒܕܳܢܺܝܬܳܐ ܒܒܰܪܢܳܫܶܗ ܓܰܘܳܝܳܐ ܘܳܐܦ ܡܬܰܪܨܳܢܺܝܬܳܐ ܠܨܶܒܝܳܢܶܗ܆ ܘܗܳܘܶܐ ܩܶܪܝܳܢ ܟܬܳܒ̈ܶܐ ܕܽܘܪܳܫܳܐ ܪܽܘܚܳܢܳܝܳܐ ܕܰܡܕܰܟܶܐ ܘܰܡܚܰܕܶܬ ܠܠܶܒܳܐ܆ ܘܰܡܫܰܒܶܠ ܠܶܗ ܠܗܰܘ ܩܳܠܳܐ ܕܡܰܢܗܰܪ ܘܰܡܒܰܕܶܩ ܠܰܫܪܳܪܳܐ ܘܝܳܗܶܒ ܚܰܝ̈ܶܐ܆ ܗܰܘ ܕܳܐܡܰܪ ܕܶܐܢܳܐ ܐ̱ܢܳܐ ܠܰܡ ܐܽܘܪܚܳܐ ܘܰܫܪܳܪܳܐ ܘܚܰܝ̈ܶܐ (ܝܘܚܢܢ5:14)܆ ܘܗܳܟܰܢ ܛܳܥܶܢ ܘܝܳܗܶܒ ܦܺܐܪ̈ܶܐ ܘܗܳܘܶܝܢ ܕܽܘܒܳܪ̈ܰܘܗ̱ܝ ܐܰܝܟ ܕܝܳܐܶܐ ܒܗܳܠܶܝܢ ܕܠܰܫܪܳܪܳܐ ܡܰܣܗܕܺܝܢ ܘܡܶܣܬܰܗܕܺܝܢ.

ܟܬܳܒܳܐ ܩܰܕܺܝܫܳܐ ܘܚܰܝ̈ܶܐ ܡܰܦܪ̈ܝܳܢܶܐ
ܡ̈ܶܠܶܐ ܐܰܠܳܗܳܝ̈ܳܬܳܐ܆ ܐܳܡܪܺܝܢܰܢ܆ ܡܰܬܩܳܠܳܐ ܐܶܢܶܝܢ ܠܗܰܝܡܳܢܽܘܬܳܐ ܕܡܶܬܓܰܡܪܳܐ ܒܚܽܘܒܳܐ. ܘܡܶܬܬܰܩ̈ܠܳܢ ܠܦܽܘܬ ܚܰܝܠܳܐ ܕܺܝܠܗܶܝܢ ܘܚܽܘܕܳܬܳܐ ܘܫܽܘܚܠܳܦܳܐ ܓܰܘܳܝܳܐ ܕܡܰܥܒܕ̈ܳܢ ܒܒܰܪܢܳܫܳܐ ܒܗܳܝ ܕܓܳܠ̈ܝܳܢ ܟܰܣܝ̈ܳܬܳܐ ܕܰܒܠܶܒܳܐ ܘܰܡܬܰܪ̈ܨܳܢ ܠܪܶܗܛܳܐ ܠܦܽܘܬ ܨܶܒܝܳܢܶܗ ܕܰܐܠܳܗܳܐ ܦܳܪܽܘܩܳܐ܆ ܐܰܝܟ ܕܡܰܟܪܶܙ ܫܠܺܝܚܳܐ ܦܰܘܠܳܘܣ ܕܳܐܡܰܪ ܕܚܰܝܳܐ ܗ̱ܝ ܓܶܝܪ ܡܶܠܬܶܗ ܕܰܐܠܳܗܳܐ ܘܟܽܠ ܣܳܥܪܳܐ ܘܚܰܪܺܝܦܳܐ ܛܳܒ ܡܶܢ ܣܰܦܣܺܪܳܐ ܕܰܬܪܶܝܢ ܦܽܘ̈ܡܶܝܗ̇ ܘܥܳܐܠܳܐ ܥܕܰܡܳܐ ܠܦܽܘܪܫܳܢܳܐ ܕܢܰܦܫܳܐ ܘܰܕܪܽܘܚܳܐ ܘܰܕܫܳܪ̈ܝܳܬܳܐ ܘܰܕܡܽܘܚܳܐ ܘܰܕܓܰܪ̈ܡܶܐ ܘܕܳܝܢܳܐ ܡܰܚܫ̈ܒܳܬܳܐ ܘܬܰܪ̈ܥܝܳܬܳܐ ܕܠܶܒܳܐ (ܥܒܪ̈ܝܐ 12:4). 12).
ܡܶܟܺܝܠ܆ ܟܰܕ ܥܳܐܠܺܝܢܰܢ ܒܥܶܕܳܢܳܐ ܗܳܢܳܐ ܕܨܰܘܡܳܐ ܩܰܕܺܝܫܳܐ ܐܰܪܒܥܺܝܢܳܝܳܐ ܡܩܰܒܠܳܐ܆ ܡܶܠܬܳܐ ܕܒܰܟܬܳܒ̈ܶܐ ܐܰܠܳܗܳܝ̈ܶܐ ܬܽܘܪܣܳܝܳܐ ܫܒܽܘܩܘ̱ ܕܬܶܗܘܶܐ ܠܰܢ ܕܰܡܬܰܪܣܝܳܐ ܘܰܡܪܰܒܝܳܐ ܠܰܢ ܪܽܘܚܳܢܳܐܺܝܬ݂܆ ܒܗܳܝ ܕܠܳܐ ܗ̱ܘܳܐ ܒܠܰܚܡܳܐ ܒܰܠܚܽܘܕ ܚܳܝܶܐ ܒܰܪܢܳܫܳܐ܆ ܐܶܡܰܪ ܡܳܪܰܢ܆ ܐܶܠܳܐ ܒܟ݂ܽܠ ܡܶܠܳܐ ܕܢܳܦܩܳܐ ܡܶܢ ܦܽܘܡܶܗ ܕܰܐܠܳܗܳܐ (ܡܬܝ4:4. ܠܘܩܐ 4:4). 4).
ܥܰܠܗܳܕܶܐ܆ ܡܙܰܡܢܺܝܢܰܢ ܠܟܽܘܢ܆ ܐܳܘ ܒܢܰܝ̈ܳܐ ܪ̈ܽܘܚܳܢܳܝܶܐ ܕܬܶܗܘܽܘܢ ܡܶܬܕܰܡܶܝܢ ܒܰܐܒܳܗ̈ܳܬܳܐ ܩܰܕܺܝ̈ܫܶܐ ܕܥܺܕܬܳܐ܆ ܐܰܝܠܶܝܢ ܕܰܩܪܰܘ ܠܡܶܠܬܳܐ ܐܰܠܳܗܳܝܬܳܐ ܘܡܶܢܗ̇ ܚܰܝ̈ܶܐ ܕܩܰܕܺܝܫܽܘܬܳܐ ܩܢܰܘ܆ ܘܰܕܬܶܗܘܽܘܢ ܩܳܪܶܝܢ ܒܰܟܬܳܒܳܐ ܩܰܕܺܝܫܳܐ܆ ܩܢܽܘܡܳܐܺܝܬ ܟܺܝܬ ܘܓܰܘܳܢܳܐܺܝܬ ܒܰܟܢܽܘ̈ܫܳܬܳܐ ܕܺܝܠܟܽܘܢ ܒܪܽܘܚܳܐ ܕܰܨܠܽܘܬܳܐ ܘܰܒܥܰܝܢܳܐ ܪܽܘܚܳܢܳܝܬܳܐ ܘܰܡܠܺܝܠܬܳܐ ܘܰܦܫܺܝܛܬܳܐ ܘܡܶܬܒܰܩܝܳܢܺܝܬܳܐ܆ ܐܰܝܟܰܢܳܐ ܕܢܶܗܘܶܐ ܩܶܪܝܳܢܳܐ ܡܶܬܚܰܘܶܐ ܓܰܠܝܳܐܺܝܬ ܒܕܽܘܒܳܪ̈ܶܐ ܕܚܰܝ̈ܰܝܟܽܘܢ܆ ܘܬܶܗܘܶܐ ܡܶܠܬܳܐ ܢܽܘܗܪܳܐ ܠܰܫܒܺܝ̈ܠܰܝܟܽܘܢ ܘܚܰܝܠܳܐ ܡܰܘܥܝܳܢܳܐ ܕܦܺܐܪ̈ܶܐ ܪ̈ܽܘܚܳܢܳܝܶܐ ܒܰܥܒܳܕ̈ܰܝܟܽܘܢ.

ܟܬܳܒܳܐ ܩܰܕܺܝܫܳܐ ܒܰܟܬܺܝܒ̈ܳܬܳܐ ܕܡܳܪܝ ܓܪܝܓܘܪܝܘܣ ܒܪ ܥܒܪܝܐ
ܟܰܕ ܗܳܠܶܝܢ ܐܳܡܪܺܝܢܰܢ ܥܰܠ ܡܶܠܰܬ ܐܰܠܳܗܳܐ܆ ܝܽܘܬܪܳܢܳܐ ܟܺܝܬ ܚܳܙܶܝܢܰܢ ܕܰܢܒܰܚܶܢ ܒܰܟܬܺܝܒ̈ܳܬܳܐ ܕܡܳܪܝ ܓܪܝܓܘܪܝܘܣ ܒܪ ܥܒܪܝܐ܆ ܕܺܝܠܳܢܳܐܺܝܬ ܒܗܳܕ ܫܰܢ̱ܬܳܐ ܕܒܳܗ̇ ܕܽܘܟܪܳܢܳܐ ܕܰܬܡܳܢܶܐܡܳܐܐ ܫܢ̈ܺܝܢ ܕܺܝܠܺܝܕܽܘܬܶܗ ܡܩܺܝܡܺܝܢܰܢ (1226 ـ 2026). ܘܒܰܪ ܥܶܒܪܳܝܳܐ ܛܽܘܦܣܳܐ ܐܺܝܬܰܘܗ̱ܝ ܕܰܐܒܳܗ̈ܳܬܳܐ ܕܕܳܪ̈ܶܐ ܡܫܰܚ̈ܠܦܶܐ ܒܥܺܕܬܰܢ ܣܽܘܪܝܳܝܬܳܐ܆ ܗܳܠܶܝܢ ܕܝܰܒܶܠ ܠܰܢ ܡܰܠܦܳܢܽܘܬܳܐ ܬܪܺܝܨܬܳܐ ܕܰܡܩܰܝܡܳܐ ܥܰܠ ܫܽܘܥܳܐ ܕܰܟܬܳܒܳܐ ܩܰܕܺܝܫܳܐ. ܘܗܳܟܰܢ ܗܘܳܐ ܒܰܪ ܥܶܒܪܳܝܳܐ ܐܰܝܟ ܡܰܠܦܳܢܳܐ ܡܗܺܝܪܳܐ ܕܡܰܠܶܦ ܘܰܡܦܰܫܶܩ ܘܛܳܥܶܢ ܦܺܐܪ̈ܶܐ ܕܣܳܗܕܽܘܬܳܐ ܠܚܰܝܠܳܗ̇ ܕܡܶܠܬܳܐ ܕܰܐܠܳܗܳܐ ܒܒܶܢܝܳܢ ܚܰܝ̈ܰܝܗܽܘܢ ܕܰܡܗܰܝܡ̈ܢܶܐ ܘܰܡܨܰܠܠܽܘܬ݂ ܡܰܕ̈ܥܶܐ ܕܠܶܒܰܘ̈ܳܬܗܽܘܢ܆ ܡܶܕܶܡ ܕܡܶܬܚܰܘܶܐ ܒܚܰܝ̈ܰܘܗ̱ܝ ܕܺܝܠܶܗ܆ ܕܡܶܠܬܳܐ ܠܰܘ ܠܕܽܘܪܳܫܳܐ ܦܺܝܠܘܣܘܦܳܝܳܐ ܚܳܫܚܳܐ܆ ܐܶܠܳܐ ܠܡܶܗܘܳܐ ܫܒܺܝܠ ܚܰܝ̈ܶܐ ܒܩܰܛܺܝ̈ܢܳܬܳܐ ܕܰܐܓܽܘܢܳܐ ܪܽܘܚܳܢܳܝܳܐ ܘܬܶܫܡܶܫܬܳܐ ܪܳܥܝܳܝܬܳܐ ܘܘܳܠܺܝܬܳܐ ܥܺܕܬܳܢܳܝܬܳܐ ܐܰܝܟ ܡܰܦܪܝܳܢܳܐ ܕܡܰܕܢܚܳܐ. ܘܗܳܟܰܢ܆ ܐܰܘܺܝ ܒܰܪ ܥܶܒܪܳܝܳܐ ܒܶܝܬ ܝܺܕܰܥܬܳܐ ܘܚܶܟܡܬܳܐ ܪܰܒܬܳܐ ܠܚܰܝ̈ܶܐ ܕܰܡܣܰܪܩܽܘܬܳܐ ܘܥܳܢܘܳܝܽܘܬܳܐ ܘܣܽܘܡܥܳܠܳܐ܆ ܘܶܐܬܓܰܠܝܰܬ݂݀ ܒܚܰܝ̈ܰܘܗ̱ܝ ܡܶܠܬܳܐ ܐܰܠܳܗܳܝܬܳܐ ܠܰܘ ܒܰܠܚܽܘܕ ܒܩܶܪܝܳܢܳܐ ܐܶܠܐ ܘܕܺܝܠܳܢܳܐܺܝܬ ܒܰܥܒܳܕܳܐ.
ܐܰܠܶܦ ܓܶܝܪ ܕܰܟܬܳܒܳܐ ܩܰܕܺܝܫܳܐ ܡܥܺܝܢܰܐ ܗ̱ܘ ܕܚܶܟܡܬܳܐ ܪܽܘܚܳܢܳܝܬܳܐ ܘܦܽܘܪܣܳܐ ܐܰܡܺܝܢܳܐ ܠܥܶܢܝܳܢܳܐ ܕܥܰܡ ܐܰܠܳܗܳܐ܆ ܘܰܕܩܶܪܝܳܢ ܣܶܦܪ̈ܶܐ ܐܰܠܳܗܳܝ̈ܶܐ ܐܰܝܟ ܕܽܘܪܳܫܰܐ ܗ̱ܘ ܪܽܘܚܳܢܳܝܳܐ ܕܰܡܚܰܝܶܕ ܒܶܝܬ ܝܺܕܰܥܬܳܐ ܠܗܰܝܡܳܢܽܘܬܳܐ܆ ܘܣܽܘܟܳܠܳܐ ܠܰܨܠܽܘܬܳܐ܆ ܘܬܶܐܘܳܪܺܝܰܐ ܠܰܥܒܳܕܳܐ܆ ܘܰܐܝܟ ܚܰܝܠܰܐ ܗ̱ܘ ܠܡܰܩܪܳܒܽܘ ܥܰܡ ܒܺܝܫܳܐ ܘܙܰܝܢܳܐ ܠܡܶܙܟ݁ܳܐ ܠܣܳܛܳܢܳܐ ܘܚܰܝ̈ܠܰܘܳܬܶܗ.
ܒܰܟܬܳܒܶܗ ܓܶܝܪ ܕܶܐܬܝܩܘܢ܆ ܟܳܬܶܒ ܕ ܠܰܡ ܟܽܠ ܐܶܡܰܬܝ̱ ܕܢܶܩܪܶܐ ܐ̱ܢܳܫ ܒܰܟܬܳܒ̈ܶܐ ܐܰܠܳܗܳܝ̈ܶܐ܆ ܕܶܚܠܬܳܐ ܗ̱ܝ ܠܫܺܐܕ̈ܶܐ ܕܢܶܬܩܰܪܒܽܘܢ ܠܶܗ (ܡܐܡܪܐ ܐ܆ ܩܦܠܐܘܢ ܒ܆ ܦܣܘܩܐ ܘ).
ܡܶܬܚܰܘܶܐ ܓܶܝܪ ܝܽܘܠܦܳܢܳܐ ܗܳܢܳܐ ܪܽܘܚܳܢܳܝܳܐ ܒܰܟܬܳܒ ܐܰܘܨܰܪ ܐ̱ܪ̈ܳܙܶܐ܆ ܕܒܶܗ ܩܰܪܶܒ ܒܰܪ ܥܶܒܪܳܝܳܐ ܠܰܟܬܳܒܳܐ ܩܰܕܺܝܫܳܐ ܐܰܝܟ ܐܰܘܨܪܳܐ ܚܰܝܳܐ ܕܐ̱ܪ̈ܳܙܶܐ ܕܰܐܠܳܗܳܐ܆ ܐܰܝܢܳܐ ܕܙܳܕܶܩ ܕܢܶܬܩܪܶܐ ܒܗܰܝܡܳܢܽܘܬܳܐ܆ ܘܢܶܣܬܰܟܰܠ ܒܰܡܫܰܒܠܳܢܽܘܬ݂ ܪܽܘܚܳܐ ܕܩܽܘܕܫܳܐ܆ ܘܢܶܬܩܰܒܰܠ ܐܰܝܟ ܡܥܺܝܢܳܐ ܕܝܰܕ̈ܥܳܬܳܐ ܕܡܰܢܗܰܪ ܠܰܫܒܺܝ̈ܠܶܐ ܕܚܰܝ̈ܶܐ.

ܒܢܰܝ̈ܳܐ ܕܺܝܠܰܢ ܪ̈ܽܘܚܳܢܝܶܐ ܪ̈ܚܺܝܡܶܐ܆

ܟܬܳܒܳܐ ܩܰܕܺܝܫܳܐ ܠܰܡ ܡܶܠܬܳܐ ܕܚܰܝ̈ܶܐ ܐܺܝܬܰܘܗ̱ܝ ܠܟܽܠܗܽܘܢ ܕܳܪ̈ܶܐ ܘܫܰܪ̈ܒܳܬܳܐ܆ ܕܟܰܕ ܡܶܫܬܡܰܥ ܡܙܺܝܥ ܠܐ̱ܢܳܫ܆ ܘܟܰܕ ܠܦܽܘܬ݂ ܦܽܘܩ̈ܕܳܢܰܘܗ̱ܝ ܚܳܝܶܐ ܡܶܬܚܰܕܰܬ݂܆ ܘܟܰܕ ܛܳܥܶܢ ܦܺܐܪ̈ܶܐ ܗܳܘܶܐ ܡܰܣܗܶܕ ܒܚܰܝ̈ܰܘܗ̱ܝ. ܒܥܳܠܡܳܐ ܓܶܝܪ ܗܳܢܳܐ ܕܰܡܠܶܐ ܩ̈ܳܠܶܐ ܣܰܩܽܘ̈ܒܠܳܝܶܐ ܘܽܐܘܪ̈ܚܳܬܳܐ ܡܰܛܥܝܳܢ̈ܝܳܬܳܐ ܡܫܰܚܠ̈ܦܳܬܳܐ܆ ܙܡܺܝܢܽܘܬܳܐ ܐܺܝܬ݂ ܠܰܢ ܕܢܶܗܘܶܐ ܫܳܡܥܺܝܢ ܘܡܶܫܬܰܡܥܺܝܢ܆ ܘܦܳܢܶܝܢ ܘܡܶܬܚܰܕܬܺܝܢ. ܟܰܪ ܕܣܰܒܪܳܐ ܒܠܶܒܰܘ̈ܳܬܳܐ ܒܳܨܰܪ܆ ܒܰܠܚܽܘܕܶܝܗ̇ ܡܶܠܰܬ݂ ܐܰܠܳܗܳܐ ܣܳܦܩܳܐ ܠܡܶܬܰܠ ܚܰܝ̈ܶܐ ܘܣܰܒܪܳܐ ܘܦܳܬܚܳܐ ܬܰܪܥܳܐ ܕܣܳܟ ܠܳܐ ܡܶܣܬܟܰܪ.
ܒܰܕܓܽܘܢ܆ ܟܰܕ ܡܶܠܬܳܐ ܕܰܐܠܳܗܳܐ ܒܰܐܡܺܝܢܽܘ ܐܰܙܕܰܝܚܰܬ݂݀ ܒܥܺܕ̈ܳܬܳܐ ܗܳܐ ܡܶܢ ܫܽܘܪܳܝ ܡܫܺܝܚܳܝܽܘܬܳܐ܆ ܘܳܐܦ ܝܰܘܡܳܢܳܐ ܡܙܰܡ̈ܢܶܐ ܚܢܰܢ ܕܰܢܙܰܝܚܺܝܗ̇ ܘܰܢܩܰܒܠܺܝܗ̇ ܐܰܝܟ ܠܶܘܺܝܬܐ ܠܚܰܝ̈ܰܝܢ. ܢܶܣܰܒ ܡܶܟܺܝܠ ܠܥܶܕܳܢܳܐ ܕܨܰܘܡܳܐ ܗܳܢܳܐ ܐܰܝܟ ܦܽܘܪܣܳܐ ܚܰܕܬܳܐ ܠܡܶܬܗܰܓܳܝܽܘ ܒܰܟܬܳܒ̈ܶܐ ܐܰܠܳܗܳܝ̈ܶܐ ܐܰܝܟܰܢܳܐ ܕܬܶܥܽܘܠܝ̱ ܡܶܠܬܳܐ ܥܕܰܡܳܐ ܠܦܽܘܪܫܳܢܳܐ ܕܢܰܦܫܰܢ ܘܰܬܚܰܕܶܬ ܠܶܒܰܘ̈ܳܬܰܢ ܘܢܶܬܶܠ ܦܺܐܪ̈ܶܐ܆ ܕܰܡܳܐܐ ܘܕܶܫܬܺܝܢ ܘܕܰܬܠܳܬܺܝܢ (ܡܬܝ23:13 ). 23).
ܡܳܪܝܳܐ ܢܩܰܒܶܠ ܨܰܘܡܟܽܘܢ ܘܰܬܝܳܒܽܘܬܟܽܘܢ ܘܰܨܠܰܘ̈ܬܟܽܘܢ ܘܙܶܕ̈ܩܳܬܟܽܘܢ܆ ܘܢܶܬܶܠ ܠܰܢ ܕܢܶܚܕܶܐ ܐܰܟܚܕܳܐ ܒܥܺܐܕܳܐ ܪܰܒܳܐ ܕܰܩܝܳܡܬܶܗ ܦܳܪܽܘܩܳܝܬܳܐ܆ ܒܝܰܕ ܨܠܽܘܬ݂ ܗܳܝ ܒܬܽܘܠܰܬ ܒܟܽܠܙܒܰܢ ܝܳܠܕܰܬ ܐܰܠܳܗܳܐ ܡܰܪܝܰܡ܆ ܘܡܳܪܝ ܦܶܛܪܘܣ ܪܺܝܫܳܐ ܕܰܫܠܺܝ̈ܚܶܐ܆ ܘܟܽܠܗܽܘܢ ܣܳܗ̈ܕܶܐ ܘܩܰܕܺܝ̈ܫܶܐ. ܘܐܒܘܢ ܕܒܫܡܝܐ ܘܫܪܟܐ. ܘܐܒܘܢ ܕܒܫܡܝܐ ܘܫܪܟܐ.