ܡܥܕܥܕܢܐ

ܥܠ ܟܬܳܒܐ ܕܰܡܥܰܕܥܕܳܢܐ

ܐܺܝܬ ܠܣܘܪ̈ܝܳܝܐ ܟܬܳܒܐ ܕܕܺܝܠܳܢܳܝ ܕܙܽܘܝܳܚܐ ܕܥܰܕܥܺܐܕ̈ܐ ܪ̈ܰܘܪܒܐ ܕܡܶܫܬܰܡܰܗ ܡܥܰܕܥܕܳܢܐ: ܕܺܐܝܬ ܒܗ ܛܶܟܣ̈ܐ ܕܒܶܝܬ ܝܰܠܕܐ ܘܒܽܘܪܳܟ ܡܰܝ̈ܐ ܒܥܺܐܕܐ ܕܕܶܢܚܳܐ. ܘܛܶܟܣܐ ܕܫܽܘܒܩܳܢܐ ܕܗܳܘܶܐ ܒܝܘܽܡ ܬܪܶܝܢ ܒܫܰܒܐ ܕܨܰܘܡܐ ܪܰܒܐ. ܘܛܶܟܣܐ ܕܙܽܘܝܳܚ ܨܠܺܝܒܐ ܒܦܶܠܓܗ ܕܨܰܘܡܐ ܪܰܒܐ ܘܰܕܒܘܪܳܟ ܣܰܘܟ̈ܐ ܒܥܺܐܕܐ ܕܐܽܘܫܰܥܢ̈ܐ ܘܛܶܟܣܐ ܕܘܰܥܕܗ ܕܰܠܡܺܐܢܐ ܐܘܰ ܕܢܰܗܝܪ̈ܐ ܒܠܶܠܝܐ ܕܰܬܪܶܝܢ ܕܚܰܫܐ. ܘܛܶܟܣܐ ܕܰܫܝܳܓܬܐ ܕܪ̈ܶܓܠܐ ܒܝܽܘܡ ܚܰܡܫܐ ܕܐܪ̈ܳܙܐ. ܘܥܽܘܦܳܝܐ ܕܰܨܠܝܒܐ ܝܽܘܡ ܥܪܘܽܒܬܐ ܪܰܒܬܐ. ܘܛܶܟܣܐ ܕܫܘܽܒܩܳܢܐ ܒܝܘܽܡ ܫܰܒܬܐ ܕܰܣܒܰܪܬܐ. ܘܛܶܟܣܐ ܕܰܫܠܳܡܐ ܒܨܰܦܪܐ ܕܥܺܐܕܐ ܕܰܩܝܳܡܬܐ. ܘܛܶܟܣܐ ܕܣܶܓܕܬܐ ܒܥܺܐܕܐ ܕܦܶܢܛܺܝܩܘܽܣܛܝ ܘܙܽܘܝܳܚܐ ܕܥܐܺܕܐ ܕܰܨܠܝܒܐ. ܘܡܶܫܟܰܚ ܐܰܢܬ ܒܛܶܟܣܐ ܡܰܕܢܚܳܝܐ ܙܡܺܝܪ̈ܳܬܐ ܕܰܡܬܬܰܢܝ̈ܢ ܒܙܽܘܝܳܚܐ ܕܥܺܐܕܐ ܕܡܰܥܠܰܬܐ ܕܰܠܗܰܝܟܠܐ ܘܫܶܡܥܘܢ ܣܳܒܐ ܒܰܙܒܰܢ ܕܳܪܳܐ ܕܐܰܡܝܪ ܒܒܶܝܬܓܰܙܐ ܥܝܺܢܘܰܪܕܝܐ ܫܢܰܬ 1468 ܙܽܘܝܳܚܐ ܕܥܺܐܕܐ ܕܡܰܥܰܠܬܐ ܐܰܘܟܝܬ ܙܽܘܝܳܚܐ ܕܰܨܠܝܒܐ ܐܰܝܟ ܥܝܳܕܐ ܕܥܺܕܬܐ ܕܐܰܪܒܥܝܢ ܣܳܗ̈ܕܐ ܕܡܶܪܕܝܢ. ܘܗܳܟܘܳܬ ܒܰܡܥܰܕܥܕܳܢܐ ܕܕܰܝܪܐ ܕܡܳܪܝ ܐܰܘܓܺܝܢ ܕܰܕܟܝܺܪ ܡܶܢ ܠܥܶܠ ܐܶܫܬܟܰܚ ܒܗ ܙܽܘܝܳܚܗ ܒܥܰܕܥܺܐܕܝ̈ܗ̇ ܕܰܒܬܘܽܠܬܐ ܘܰܒܥܰܕܥܺܐܕ̈ܐ ܕܩܰܕܝܫ̈ܐ.

ܘܰܩܪܰܝܢ ܒܒܶܝܬܓܰܙܐ ܕܐܽܘܪܶܫܠܡ ܡܶܢܝܳܢ 62 ܕܰܟܬܺܝܒ ܫܢܰܬ 1599 ܡ̄  ܕܛܶܟܣܐ ܕܒܽܘܪܳܟ ܡܰܝ̈ܐ ܣܝܳܡܐ ܗܰܘ ܕܣܶܘܺܝܪܶܐ ܦܰܛܪܝܰܪܟܐ ܕܐܰܢܛܝܟ. ܒܪܰܡ ܝܰܥܩܘܒ ܕܐܽܘܪܗܳܝ ܦܰܚܡܗ ܘܬܰܪܨܗ. ܘܐܶܬܕܟܰܪ ܝܰܥܩܘܒ ܕܐܽܘܪܗܳܝ ܕܗܰܘ ܕܣܳܡ ܨܠܘܬܐ ܩܰܕܡܳܝܬܐ ܕܒܽܘܪܳܟ ܡܰܝ̈ܳܐ ܒܥܺܐܕܐ ܕܕܶܢܚܐ ܕܫܘܪܳܝܗ̇ (ܪܰܒܐ ܐܰܢܬ ܐܠܗܐ ܘܰܬܡܺܝܗܺܝܢ ܥܒܳܕܰ̈ܝܟ) ܗܽܘܝܽܘ ܦܪܘܩܠܘܣ ܐܶܦܝܣܩܘܦܐ ܕܰܚܕܐ ܡܶܢ ܡܰܪ̈ܥܝܳܬܐ ܕܓܳܙܰܪܬܐ ܕܩܘܽܦܪܘܣ ܘܟܰܕ ܚܙܳܗ̇ ܡܳܪܝ ܐܰܦܝܦܰܐܢܝܘܣ ܡܶܛܪܘܦܘܠܝܛܐ ܕܩܘܦܪܘܣ ܫܢܰܬ 404 ܫܶܦܪܰܬ ܠܗ ܘܐܰܘܣܶܦ ܥܠܶܝܗ̇. ܘܗܳܕܐ ܨܠܘܬܐ ܫܟܺܝܚܐ ܒܛܶܟܣܐ ܕܪ̈ܽܘܡܳܝܐ ܘܡܳܪܝ ܦܪܘܩܠܘܣ ܗܳܢܐ ܚܝܳܐ ܒܡܶܨܥܳܝ̈ܬܗ̇ ܕܡܰܐܬܐ ܪܒܝܺܥܳܝܬܐ ܘܠܰܘ ܕܡܰܐܬܐ ܫܒܺܝܥܳܝܬܐ ܐܰܝܟ ܕܰܣܒܰܪ ܠܶܩܝܰܐܢ ܒܰܟܬܳܒܗ ܕܡܰܕܢܚܐ ܡܫܺܝܚܳܝܐ ܘܐܶܫܬܟܰܚ ܒܰܟܬܳܒܐ ܚܰܕ ܥܰܬܝܩܐ ܕܰܟܬܝܺܒ ܥܰܠ ܓܶܠܕܐ ܒܠܘܢܕܳܢ (ܡܶܢܝܳܢ 14494) ܕܣܳܝܘܡܐ ܕܰܨܠܘܬܐ ܕܒܘܪܳܟ ܡܰܝ̈ܳܐ ܒܥܺܐܕܐ ܕܕܶܢܚܐ ܗܽܘܝܽܘ ܦܪܽܘܩܠܘܣ ܕܩܽܘܣܛܰܢܛܝܺܢܘܦܘܠܝܣ (444) ܒܪܰܡ ܡܶܕܶܡ ܕܚܰܘܝܢܰܢ ܡܶܢ ܐܘܽܪܗܳܝܐ ܝܰܬܝܪ ܚܰܬܝܺܬ.

ܘܐܶܬܕܟܰܪ ܒܰܪ ܥܶܒܪܳܝܐ ܒܢܽܘܗܳܪܐ ܚܰܕ ܕܟܰܬܒܗ ܒܰܟܬܳܒܐ ܕܰܡܥܕܥܕܳܢܐ ܒܒܰܪܛܶܠܐ ܒܰܬܠܳܬܝܢ ܒܟܳܢܘܢ ܐܚܪܳܝ ܫܢܰܬ 1282 ܡ̄ ܕܰܫܡܥ ܡܫܰܡܫܳܢܐ ܒܛܶܟܣܐ ܡܰܕܢܚܳܝܐ ܐܶܡܰܪ ܒܥܶܕܳܢ ܒܘܪܳܟ ܡܰܝ̈ܳܐ ܨܠܘܬܐ ܕܰܦܪܝܫܐ ܠܡܰܓܢܳܢܘܬܐ ܕܪܽܘܚܐ ܩܰܕܝܫܐ. ܘܓܶܥܨܰܬ ܠܗ. ܘܣܰܝܒܰܪ ܐܶܢܘܢ ܡܬܚܐ ܕܰܬܡܳܢܥܶܣܪ̈ܐ ܫܢܝ̈ܢ ܥܕܰܡܐ ܕܐܶܬܛܦܺܝܣܘ ܩܠܺܝܪܽܘܣ ܘܗܰܠܶܟܘ ܐܰܝܟ ܥܝܳܕܐ ܕܛܶܟܣܐ ܡܰܥܪܒܳܝܐ.

ܘܺܝܕܰܥܢܰܢ ܡܶܢ ܢܘܽܣܟܐ ܚܰܕ ܥܰܬܝܩܐ ܕܰܟܬܝܒ ܠܰܡܫܰܡܫܳܢܐ ܕܰܘܝܕ ܒܰܪ ܝܰܘܣܦ ܡܶܨܪܳܝܐ ܫܢܰܬ 1403 ܡ̄ : ܕܝܘܚܰܢܢ ܣܰܥܺܝܕ ܒܰܪ ܨܰܒܽܘܢܺܝ ܡܶܛܪܘܦܘܠܝܛܐ ܕܡܺܝܠܝܛܺܝܢܝܺ ܣܳܡ ܛܶܟܣܐ ܠܒܽܘܪܳܟ ܣܰܘܟ̈ܐ ܕܰܒܥܺܐܕܐ ܕܐܽܘܫܰܥܢ̈ܐ ܘܗܽܘ ܦܰܚܶܡ ܘܬܰܪܶܨ ܛܶܟܣܐ ܕܣܶܓܕܬܐ ܕܰܒܥܺܐܕܐ ܕܦܶܢܛܝܩܘܣܛܝ.

ܘܡܶܢ ܗܳܠܝܢ ܕܳܐܠܨܳܝܐ ܝܺܕܰܥܬܗܶܝܢ: ܫܰܠܡܘ̈ܬܐ ܘܰܥܝ̈ܕܐ ܕܰܒܫܘܽܡܠܳܝ ܛܶܟܣ̈ܐ ܘܰܨܠܰܘ̈ܬܳܐ. ܡܫܰܚܠܦܝܢ ܗܘܰܘ ܒܰܐܬܪ̈ܘܳܬܐ ܕܣܽܘܪ̈ܝܳܝܐ. ܘܰܡܫܰܡܗܝܢ ܠܰܥܝܳܕܐ ܐܰܘ ܠܐܽܘܪܚܐ ܕܰܥܠܝܗ̇ ܪܳܕܶܝܢ ܫܰܠܡܘܬܐ ܘܛܽܘܟܳܣܐ. ܘܐܰܝܠܝܢ ܕܝܰܬܝܪ ܝܰܩܝܪ̈ܳܢ ܒܗܘܽܢ. ܫܰܠܡܘܬܐ ܕܐܽܘܪܗܳܝ. ܘܰܕܕܰܝܪܳܐ ܕܩܶܢܰܫܪ̈ܝܢ. ܘܡܺܝܠܝܛܝܢܝ ܘܕܰܝܪܐ ܕܡܳܪܝ ܒܰܪܨܰܘܡܐ. ܘܡܰܕܢܚܐ ܐܰܘܟܝܬ ܬܰܓܪܝܬ ܘܕܰܐܬܪ̈ܰܘܳܬܐ ܕܡܰܘܨܰܠ ܘܡܰܪܕܝܢ ܘܕܰܝܪܐ ܕܡܳܪܝ ܚܰܢܰܢܝܐ. ܘܐܳܡܝܕ ܘܥܘܽܡܪܐ ܕܩܰܪܛܡܝܢ ܘܛܘܽܪ̈ܥܰܒܕܝܢ ܘܒܶܝܬܢܰܗܪ̈ܝܢ ܘܓܳܙܰܪܬܐ ܥܶܠܳܝܬܐ ܕܥܰܠ ܢܗܰܪ ܚܰܒܘܪ. ܘܒܰܙܒܰܢ ܡܶܬܕܟܰܪ ܕܰܝܪܐ ܕܡܳܪܝ ܐܰܒܚܰܝ. ܘܕܰܝܪܐ ܕܢܳܛܦܐ ܐܰܘܟܝܬ ܕܡܳܪܬܐ  ܕܢܰܩܝܦ ܠܕܰܝܪܐ ܕܡܳܪܝ ܚܰܢܰܢܝܐ (ܙܥܦܪܐܢ)

ܘܐܶܡܪ ܒܰܪܥܶܒܪܳܝܐ ܡܶܛܠ ܛܶܟܣܐ ܡܰܕܢܚܳܝܐ ܒܢܘܽܗܳܪܗ ܕܰܕܟܝܺܪ ܡܶܢ ܠܥܶܠ ܕܟܰܕ ܩܰܒܶܠ ܪܺܝܫܳܢܘܬ ܟܘܽܪܣܝܐ ܕܬܰܓܪܝܬ ܐܶܫܟܰܚ ܫܘܽܚܠܳܦ̈ܐ ܣܰܓܝ̈ܐܐ ܒܶܝܬ ܬܰܪܬܶܝܢ ܫܰܠܡܘ̈ܬܐ ܕܡܰܕܢܚܐ ܟܺܝܬ ܘܰܕܡܰܥܪܒܐ. ܒܪܰܡ ܚܙܳܐ ܫܘܦܪܐ ܒܛܽܘܟܳܣ ܛܶܟܣܐ ܡܰܕܢܚܳܝܐ. ܗܰܘ ܕܐܶܫܬܰܚܠܰܦܘ ܙܢܰܘ̈ܗܝ ܘܰܣܓܺܝܘ ܦܶܠܓ̈ܘܗܝ ܘܐܰܘܕܺܝ ܒܰܡܝܰܬܪܘܬܐ ܕܣܳܝܘܡܰܘ̈ܗܝ. ܘܠܐܳ ܙܰܛܶܡ ܐܶܠܐܳ ܐܶܢ ܨܠܘܬܐ ܗܳܝ ܕܰܐܪܶܙܢܰܢ ܥܠܶܝܗ̇ ܡܶܢ ܟܰܕܽܘ.

ܘܗܳܐ ܡܚܰܘܶܐ ܐܢܳܐ ܠܳܟ ܡܶܕܶܡ ܕܰܟܬܝܒ ܒܒܶܝܬܓܰܙܐ ܕܡܶܛܪܘܦܘܠܝܛܐ ܫܶܡܥܘܢ ܥܺܝܢܘܰܪܕܝܐ ܥܰܠ ܨܒܽܘܬܐ ܕܛܶܟܣ̈ܐ ܕܥܺܐܕ̈ܐ ܡܚܰܓܝܳܢ̈ܐ ܘܰܥܝ̈ܕܐ ܡܫܰܚܠܦ̈ܐ ܕܰܥܠܰܝܗܘܽܢ ܪܳܕܶܝܢ ܗܘܰܘ: ܐܰܝܟܰܢܐ ܕܬܺܐܠܰܦ ܡܶܛܠ ܕܳܐܠܨܐ ܝܺܕܰܥܬܗ ܒܬܰܪܥܐ ܗܳܢܐ.

ܛܶܟܣܐ ܕܙܽܘܝܳܚ ܥܺܐܕܐ ܕܒܶܝܬ ܝܰܠܕܳܐ ܠܦܽܘܬ ܥܝܳܕܐ ܕܥܺܕܬܐ ܕܐܰܪܒܥܝܢ ܣܳܗ̈ܕܐ ܒܡܰܪܕܝܢ. ܥܺܐܕܐ ܕܕܶܢܚܐ ܐܰܝܟ ܬܘܪܳܨܐ ܕܝܰܥܩܘܒ ܕܐܽܘܪܗܳܝ: ܕܐܺܝܬ ܒܪܝܫܗ ܢܽܘܗܳܪܳܐ ܕܡܳܪܝ ܓܶܝܘܰܪܓܝ ܕܥܰܡܡ̈ܐ. ܘܒܳܬܪܗ ܢܽܘܗܳܪܗ ܕܒܰܪ ܥܶܒܪܳܝܐ ܕܰܕܟܺܝܪ ܠܰܢ. ܘܐܺܝܬܰܘܗܝ ܠܦܘܽܬ ܥܝܳܕܐ ܕܕܰܝܪܐ ܕܡܳܪܝ ܒܰܪܨܰܘܡܐ. ܘܕܰܝܪܐ ܕܡܪܝ ܚܰܢܰܢܝܐ. ܘܕܰܝܪܐ ܕܐܰܟܣܢܳܝ̈ܐ ܐܰܘܟܝܬ ܕܰܝܪܐ ܕܢܶܛܦܐ ܕܰܟܬܝܒ ܥܰܠ ܢܘܣܟܳܐ ܕܣܳܒܐ ܪܰܒܰܢ ܨܰܠܝܒܐ ܟܺܝܪܘܢ ܫܢܰܬ 1430 ܕܰܢܣܝܒ ܡܶܢ ܢܘܣܟܐ ܕܦܰܛܪܝܰܪܟܐ ܡܺܝܟܳܐܝܠ ܪܰܒܐ. ܟܶܢ ܙܘܽܝܳܚܐ ܕܥܺܐܕܐ ܕܡܰܥܰܠܬܐ ܠܦܘܬ ܥܝ̈ܳܕܐ ܕܡܶܪܕܝܢ. ܘܛܶܟܣܐ ܕܫܘܒܩܳܢܐ ܕܨܰܘܡܐ ܕܐܰܪܒܥܝܢ. ܘܛܶܟܣܐ ܬܪܰܝܳܢܐ ܠܦܘܽܬ ܥܝܳܕܐ ܕܡܶܪ̈ܕܺܝܢܳܝܐ. ܘܒܘܪܳܟ ܣܰܘܟ̈ܐ ܕܰܟܬܝܒ ܥܰܠ ܢܘܣܟܐ ܕܪܰܒܰܢ ܨܰܠܝܒܰܐ: ܘܰܢܣܝܒ ܡܶܢ ܢܘܽܣܟܐ ܕܰܟܬܝܒ ܒܐܺܝܕܐ ܕܡܳܪܝ ܡܝܟܐܝܠ. ܛܶܟܣܐ ܕܢܰܗܝܪ̈ܐ ܙܢܳܐ ܐܚܪܢܐ ܡܶܢܗ ܥܰܠ ܥܝܳܕܐ ܕܐܽܘܪ̈ܗܳܝܐ. ܘܐܶܬܕܟܰܪ ܕܰܡܩܰܪܒ ܩܘܪܳܒܐ ܐܠܗܝܐ ܢܳܓܗ ܒܶܝܬ ܝܰܠܕܐ. ܘܰܒܪܰܡܫܐ ܕܚܰܡܫܐ ܒܫܰܒܐ ܕܦܶܨܚܐ. ܛܶܟܣܐ ܕܰܥܪܘܒܬܐ ܕܰܙܩܝܦܘܬܐ ܠܦܘܽܬ ܥܝܳܕܐ ܕܐܰܪܒܥܝܢ ܒܡܰܪܕܝܺܢ. ܛܶܟܣܐ ܬܪܰܝܳܢܐ ܠܦܘܽܬ ܥܝܳܕܳܐ ܕܕܰܝܪܐ ܕܡܳܪܝ ܓܰܒܪܐܝܠ ܕܰܒܛܘܪܥܒܕܺܝܢ. ܛܶܟܣܐ ܕܚܰܕ ܒܫܰܒܐ ܕܰܩܝܳܡܬܐ ܠܦܘܽܬ ܥܝܳܕܐ ܕܕܰܝܪܐ ܕܡܳܪܝ ܒܰܪܨܰܘܡܐ ܘܕܰܝܪܐ ܕܡܳܪܝ ܚܰܢܰܢܝܐ. ܛܶܟܣܐ ܐܚܪܢܐ ܕܙܘܝܳܚܐ ܕܥܺܐܕܐ ܕܰܩܝܳܡܬܐ ܠܦܘܬ ܥܝܳܕܐ ܘܫܰܦܝܪܐ ܘܬܰܩܢܐ ܕܪܳܕܐ ܒܕܝܰܪܐ ܕܡܳܪܝ ܓܰܒܪܐܝܠ. ܘܰܒܥܺܐܕܐ ܕܩܘܠܳܣܐ ܐܰܪܶܙ ܥܠ ܥܝܳܕܐ ܛܶܟܣܳܢܳܝܐ ܕܰܒܢ̈ܝ ܡܰܕܢܚܐ ܟܕ ܛܳܥܶܢ ܡܫܰܡܫܳܢܐ ܠܦܝܺܢܟܐ ܘܟܳܗܢܐ ܠܟܳܣܐ ܒܰܙܒܰܢ ܙܽܘܝܳܚܐ ܕܐܪ̈ܳܙܐ. ܘܰܥܕܰܡܐ ܠܝܰܘܡܳܢ ܪܳܕܐ ܥܝܳܕܐ ܗܳܢܐ ܒܐܰܬܪ̈ܘܳܬܐ ܘܟܠܗ̇ ܥܪܰܐܩ.

ܡܒܥܐ: ܐܝܓܢܐܛܝܘܣ ܐܦܪܝܡ ܩܕܡܝܐ܆ ܒܪ̈ܘܠܐ ܒܕܝܪ̈ܐ ܕܥܠ ܡܪܕܘܬ ܝܘܠܦܢ̈ܐ ܣܘܪ̈ܝܝܐ ܗܕܝܪ̈ܐ܆ ܡܦܫܩ ܠܡܪܝ ܦܝܠܠܘܟܣܝܢܘܣ ܝܘܚܢܢ ܕܘܠܒܐܢܝ܆ ܩܡܫܠܝ 1967܆ ܕܦܐ 119-123.