ܡܺܐܡܪܳܐ ܕܬܶܫܥܺܝܢ ܘܬܶܫܥܳܐ

ܥܰܠ ܝܰܘܡܳܐ ܕܫܰܢ̱ܬܳܐ܆ ܗܰܘ ܕܒܶܗ ܒܛܰܝܒܽܘܬܳܐ ܕܰܐ‌ܠܳܗܳܐ ܟܕ ܠܟܺܝܪܽܘܛܽܘܢܺܝܰܐ ܐܶܫܬܘܺܝ܆ ܐܶܬܬܰܝܬܺܝ ܠܶܐܦܣܩܽܘܦܽܘܬܳܐ.

99: ܟܒܰܪ ܡܰܣܒܪܺܝܢ ܥܠܰܝ ܐ̱ܢܳܫܺܝ̈ܢ ܝܰܘܡܳܢܳܐ܆ ܡܶܢ ܗܳܢܽܘܢ ܕܰܠܘܳܬ ܒܶܣܪܳܐ ܦܥܺܝܪ ܚܶܟܗܽܘܢ܆ ܘܰܠܘܳܬ ܦܰܢܛܰܣܺܝܰܐ ܕܗܳܠܶܝܢ ܕܡܶܢ ܠܒܰܪ ܬܰܘܺܝܪܺܝܢ܆ ܕܡܶܬܶܐܫܶܕ ܐ̱ܢܳܐ ܡܶܢ ܗܰܢܺܝܽܐܘܬܳܐ ܘܚܳܕܶܐ ܐ̱ܢܳܐ܆ ܡܶܛܽܠ ܕܰܠܝܰܘܡܳܐ ܗܳܢܳܐ ܡܰܢܥܶܬ܆ ܕܰܡܫܰܡܠܶܐ ܠܺܝ ܫܰܢ̱ܬܳܐ ܪܒܺܝܥܳܝܬܳܐ ܕܪܺܝܫܽܘܬ ܟܳܗܢܽܘܬܳܐ. ܐܶܢܳܐ ܕܶܝܢ ܡܰܘܕܶܐ ܐ̱ܢܳܐ ܡܰܢ ܕܝܳܕܰܥ^[1] ܐ̱ܢܳܐ ܛܰܝܒܽܘܬܳܐ ܠܰܐܠܳܗܳܐ܆ ܗܰܘ ܕܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܠܰܘ ܒܰܠܚܽܘܕ ܠܗܳܕܶܐ ܩܪܳܢܝ܆ ܘܡܶܢ ܐܰܪܥܳܐ ܐܰܩܺܝܡ ܠܡܶܣܟܺܢܳܐ܆ ܘܡܶܢ ܩܺܩܰܠܬܳܐ ܪܰܡܪܶܡ ܠܒܳܝܫܳܐ^[2] ܐܰܝܟܰܢܳܐ ܕܰܡܙܰܡܰܪ ܕܰܘܺܝܕ܆ ܐܶܠܳܐ ܐܳܦ ܫܰܟܶܢ ܡܫܰܪܬܚܳܐܺܝܬ ܙܰܒܢܳܐ ܠܥܽܘܬܴܕܳܐ ܕܰܬܝܳܒܽܘܬܳܐ܆ ܕܠܳܐ ܐܺ݀ܒܰܕ ܐܰܟܚܕܳܐ ܥܰܡ ܚ̈ܛܳܗܰܝ܆ ܘܶܐ݀ܦܶܠ ܡܶܢ ܚܰܝ̈ܶܐ ܛܽܘܒ̈ܬܳܢܶܐ. ܪܳܐܶܬ̣ ܐ̱ܢܳܐ ܕܶܝܢ ܒܪܰܡ ܘܪܳܥܶܠ ‌ܐ̱ܢܳܐ ܡܶܢ ܝܰܘܡܳܐ ܗܳܢܳܐ ܕܩܳܐܶܡ܆ ܟܰܕ ܚܳܙܶܐ ܐ̱ܢܳܐ ܠܶܗ ܕܰܒܟܽܠ ܚܕܳܐ ܫܰܢ̱ܬܳܐ ܒܚܽܘܕܪܳܐ ܕܙܰܒܢܳܐ ܡܶܬܟܪܶܟ܆ ܒܰܕܡܽܘܬ ܗܳܢܽܘܢ ܕܰܠܟܶܣܦܳܐ ܕܶܐܬܝܙܶܦ ܚܳܒܘ܆ ܘܟܰܕ ܗܳܕܶܐ ܪܶܒܺܝܬܳܐ ܠܩܰܪܢܳܐ ܐܶܫܬܰܘܝܰܬ ܘܗܳܟܰܢܳܐ ܥܶܦܰܬ̣ ܚܰܘܒܬܳܐ܆ ܡܶܢ ܝܰܘܡܳܐ ܗܰܘ ܕܰܬܒܰܥܬܳܐ ܟܰܕ ܩܳܐܶܡ ܪܰܬܺܝܬܺܝܢ܆ ܘܡܰܙܥܶܩ ܐ̱ܢܳܐ ܠܰܒ̈ܢܳܬ ܩ̈ܳܠܶܐ ܕܶܐܪܰܡܝܳܐ ܗܳܠܶܝܢ ܕܡܰܠ̣̈ܝܳܢ ܐܽܘܠ̈ܝܳܬܳܐ܆ ܒܙܰܘܥܳܐ ܡܛܰܫܝܳܐ ܕܠܶܒܳܐ. ܘܳܐܡܰܪ ܐ̱ܢܳܐ ܥܒܰܪ ܩܰܝܛܳܐ ܘܰܥܒܰܪ ܚܨܳܕܳܐ܆ ܘܰܚܢܰܢ ܠܳܐ ܐܶܬܦܪܰܩܢܰܢ. ܐܶܬܬܰܒܪܶܬ. ܐܶܬܚܰܫܟܶܬ. ܒܦܽܘܫܳܟܳܐ ܐ̱ܢܳܐ. ܚܰܣܢܽܘܢܝ ܚܶܒ̈ܠܶܐ ܐܰܝܟ ܕܰܠܗܳܝ ܕܝܳܠܕܳܐ^[3].

ܐܰܝܟܳܐ ܓܶܝܪ ܕܰܐ‌ܠܳܗܳܐ ܡܰܢ ܐܰܝܟ ܕܶܐܡܪܶܬ܆ ܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܐܰܩܺܝܡܰܢܝ ܡܶܢ ܐܰܪܥܳܐ ܟܰܕ ܡܶܣܟܺܢܳܐ ܐܺܝܬܰܝ ܗ̱ܘܺܝܬ̣܆ ܐܶܢܳܐ ܕܶܝܢ ܠܳܐ ܩܳܡܶܬ̣ ܐܰܟܚܕܳܐ ܒܣܳܥܽܘܪ̈ܘܳܬܳܐ ܕܰܡܝܰܬܪܽܘܬܳܐ ܥܰܡ ܗܰܘ ܕܰܐܩܺܝܡܰܢܝ܆ ܟܰܕ ܡܶܣܟܺܝܢ ܐ̱ܢܳܐ ܕܶܝܢ ܥܕܰܟܺܝܠ ܡܶܢ ܥ̈ܒܳܕܶܐ ܛܳܒ̈ܶܐ܆ ܠܘܳܬ ܐܰܪܥܳܐ ܩܒܺܝܥ ܐ̱ܢܳܐ ܘܰܠܬܰܚܬ ܝܳܬܶܒ ܐ̱ܢܳܐ܆ ܟܰܕ ܠܳܐ ܐܰܡܺܝܬ̣ܶܬ̣ ܠܗܰܕܳܡ̈ܶܐ ܗܳܠܶܝܢ ܕܥܰܠ ‌ܐܰܪܥܳܐ ܐܰܝܟ ܡܰܪܬܝܳܢܽܘܬܶܗ ܕܦܘܠܘܣ^[4] ܘܡܶܬܥܰܠܝܳܢܺܝܬܳܐ ܘܩܰܠܺܝܠܬܳܐ ܥܒܰܕܬܳܗ̇ ܠܢܰܦܫܝ܆ ܐܶܠܳܐ ܐܶܬܪܰܡܪܡܶܬ ܡܰܢ ܒܰܡܫܺܝܚܽܘܬܳܐ ܕܪܺܝܫܽܘܬ ܟܳܗܢܽܘܬܳܐ܆ ܒܙܶܒܠܳܐ ܕܶܝܢ ܕܚܰܫ̈ܶܐ ܕܒܶܣܪܳܐ ܟܰܬܪܶܬ܆ ܘܡܶܢ ܗܳܪܟܳܐ ܒܣܰܘܩܳܐ ܗܰܘ ܡܶܬܗܰܘܢܳܢܳܐ ܩܰܗܳܝ ܐ̱ܢܳܐ ܘܒܰܛܺܝܠ ‌ܐ̱ܢܳܐ܆ ܐܰܝܟܰܢܳܐ ܕܠܳܐ ܐܶ݀ܫܟܰܚ ܐܶ݀ܩܰܒܶܠ ܠܪܺܝܚܳܐ ܗܰܢܺܝܳܐܐ ܕܗܳܠܶܝܢ ܫܡܰܝ̈ܳܢܳܝܳܬܳܐ܆ ܡܳܢܳܐ ܐ̱ܚܪܺܢܳܐ ܐܺܝܬ ܠܺܝ ܐܶܠܳܐ ܕܶܐ݀ܒܟܶܐ ܘܶܐ݀ܬܟܰܦܰܦ ܐܰܟܚܕܳܐ ܘܶܐ݀ܬܚܰܦܶܐ܆ ܘܶܐܬܒܰܩܶܐ ܕܠܰܐܝܢܳܐ ܫܽܘܠܳܡܳܐ ܢܶܫܪ̈ܟܳܢ ܠܺܝ ܗܳܠܶܝܢ ܕܺܐܝܩܳܪܳܐ܆ ܐܶܢܗܽܘ ܕܰܡܫܰܡܠܝܳܐܺܝܬ ܢܰܗܡܶܐ. ܕܶܐܦܝܣܩܽܘܦܽܘܬܳܐ ܓܶܝܪ ܡܶܬܚܰܘܝܳܢܽܘܬܳܐ ܕܰܥ̈ܒܳܕܶܐ ܪ̈ܽܘܚܳܢܳܝܶܐ ܐܺܝܬܶܝܗ̇܆ ܘܠܰܘ ܐܰܟܣܺܝܽܘܡܳܐ ܡܫܰܩܠܳܐ ܘܪܳܡܳܐ܆ ܐܰܝܟܰܢܳܐ ܕܣܰܓܺܝ̈ܶܐܐ ܣܳܒܪܺܝܢ܆ ܡܶܢ ܟܬܳܒ̈ܶܐ ܟܳܗ̈ܢܳܝܶܐ ܝܳܠܦܺܝܢ ܚ̱ܢܰܢ. ܐܶܢ ܐ̱ܢܳܫ ܐܳܡܰܪ ܠܶܐܦܝܣܩܽܘܦܽܘܬܳܐ ܪܳܐܶܓ܆ ܠܰܥ̈ܒܳܕܶܐ ܛܳܒ̈ܶܐ ܪܳܐܶܓ^[5]. ܡܰܘܕܥܳܐ ܕܶܝܢ ܡܶܠܬܳܐ܆ ܕܙܳܕܶܩ ܕܢܶܬܪܰܓܪܰܓ ܠܳܗ̇ ܠܗܳܕܶܐ܆ ܠܰܘ ܗܰܘ ܕܠܳܐ ܥܕܰܟܺܝܠ ‌ܐܶܫܬܘܺܝ ܠܶܗ ܠܺܐܝܩܳܪܳܐ܆ ܐܶܠܳܐ ܗܰܘ ܕܗܳܐ ܡܶܢ ܟܰܕܽܘ ܐܶܫܬܘܺܝ ܠܶܗ ܘܒܶܐܦܝܣ̈ܩܽܘܦܶܐ ܡܶܬܡܢܶܐ܆ ܙܳܕܶܩ ܠܶܗ ܐܰܝܟ ܗܰܘ ܕܠܶܐܦܝܣܩܽܘܦܽܘܬܳܐ ܣܳܥܽܘܪܳܝܬܳܐ ܘܡܰܥܒܕܳܢܺܝܬܳܐ܆ ܢܶܬܪܰܓܪܰܓ ܟܺܝܬ ܘܢܶܬܝܰܐܰܒ. ܐܳܦ ܓܶܝܪ ܗܰܘ ܕܠܳܐ ܢܰܣܒܳܗ̇ ܥܕܰܟܺܝܠ܆ ܐܶܢܗܽܘ ܡܰܢ ܕܰܒܣܳܥܽܘܪ̈ܘܳܬܳܐ ܛܳܒ̈ܳܬܳܐ ܥܰܬܺܝܪ܆ ܡܕܰܟܰܝ ܗ̱ܘ̣ ܒܢܰܦܫܶܗ܆ ܘܢܰܗܺܝܪܳܐ ܐܺܝܬܰܘܗ̱ܝ ܒܚܽܘܫܳܒܰܘ̈ܗ̱ܝ. ܠܳܐ ܪܘܶܐ ܒܫܳܢܝܽܘܬܳܐ ܕܪܶܓܬܳܐ^[6]. ܐܶܠܳܐ ܐܳܦ ܟܰܕ ܐܳܬܶܐ ܗܽܘ ܐܺܝܩܳܪܳܐ܆ ܥܳܪܶܩ. ܡܶܛܽܠ ܕܳܐܦܠܳܐ ܠܢܰܦܫܶܗ ܢܳܣܶܒ ܠܶܗ ܐ̱ܢܳܫ ܠܗܳܢܳܐ܆ ܐܶܠܳܐ ܟܰܕ ܡܶܢ ܐܰ‌ܠܳܗܳܐ ܡܶܬܩܪܶܐ^[7]܆ ܐܰܝܟܰܢܳܐ ܕܳܐܡܰܪ ܚܰܟܺܝܡܳܐ ܦܰܘܠܽܘܤ. ܘܰܠܘܳܬ ܗܰܘ ܕܩܳܪܶܐ ܐܳܡܰܪ ܒܰܕܡܽܘܬ ܡܽܘܫܶܐ܆ ܐܰܣܪܰܚ ܐ̱ܚܪܺܢܳܐ ܕܡܶܫܟܰܚ ܗܰܘ ܐܰܝܢܳܐ ܕܰܡܫܰܕܰܪ ܐܰܢ̱ܬ^[8]. ܐܶܢ ܕܶܝܢ ܟܰܕ ܣܦܺܝܩܳܐ ܐܺܝܬܰܘܗ̱ܝ ܡܶܢ ܫܽܘܘ̈ܕܳܥܶܐ ܫܰܦܺܝܪ̈ܶܐ ܕܰܡܝܰܬܪܽܘܬܳܐ ܘܡܶܢ ܥܰܡ̈ܠܶܐ܆ ܠܶܐܦܶܝܣܩܽܘܦܽܘܬܳܐ ܪܳܐܶܓ܆ ܝܺܕܺܝܥܳܐ ܐܺܝܬܰܘܗ̱ܝ ܗܳܢܳܐ܆ ܕܓܰܠܕܳܐ ܕܶܐܦܝܣܩܽܘܦܳܐ ܨܳܒܶܐ ܕܢܶܠܒܰܫ ܒܰܕܡܽܘܬ ܓܰܠܕܳܐ ܡܶܕܶܡ ܕܰܐܪܝܳܐ܆ ܘܠܰܘ ܠܰܥ̈ܒܳܕܶܐ ܛܳܒ̈ܶܐ ܪܳܐܶܓ. ܐܶ‌ܠܽܘ ܓܶܝܪ ܠܗܳܠܶܝܢ ܪܳܐܶܓ ܗ̱ܘܳܐ܆ ܩܳܕܶܡ ܗ̱ܘܳܐ ܣܳܥܰܪ ܡܢܳܬܳܐ. ܟܰܕ ܕܶܝܢ ܩܳܕܶܡ ܗ̱ܘܳܐ ܣܳܥܰܪ܆ ܘܬܽܘܒ ܒܗܽܘܢ ܒܰܥ̈ܒܳܕܶܐ ܐܰܚܺܝܕ ܗ̱ܘܳܐ ܡܶܬܕܰܟܶܐ ܗ̱ܘܳܐ. ܟܰܕ ܕܶܝܢ ܡܶܬܕܰܟܶܐ ܗ̱ܘܳܐ܆ ܠܺܐܝܩܳܪܳܐ ܫܚܺܝܡܳܐ ܘܰܕܠܳܐ ܣܳܥܽܘܪܽܘܬܳܐ ܠܳܐ ܪܳܐܶܓ ܗ̱ܘܳܐ.

ܠܒܰܝܬܳܐ ܓܶܝܪ ܕܡܶܬܒܢܶܐ ܘܰܠܪܰܘܡܳܐ ܡܶܬܥܰܠܶܐ܆ ܘܰܠܫܽܘܠܳܡܳܐ ܡܡܰܢܰܥ ܠܶܗ ܡܶܟܺܝܠ܆ ܘܰܥܬܺܝܕ ܕܰܒܩܳܪ̈ܝܳܬܳܐ ܘܰܒܕܰܦ̈ܶܐ ܢܶܬܚܰܦܶܐ܆ ܐܳܡܰܪ ܐ̱ܢܐ ܐܶܢܳܐ ܕܕܳܡܝܳܐ ܐܶܦܝܣܩܽܘܦܽܘܬܳܐ. ܐܰܝܟ ܙܢܳܐ ܗܳܟܺܝܠ ܕܗܰܘ ܕܰܠܒܰܝܬܳܐ ܒܳܢܶܐ܆ ܘܠܰܐܦܰܝ̈ ܠܥܶܠ ܡܶܬܩܰܪܰܒ ܘܰܒܩܰܠܺܝܠ ܩܰܠܺܝܠ ܣܳܠܶܩ܆ ܠܳܐ ܥܳܩܰܪ ܘܫܳܪܶܛ ܠܗܶܝܢ ܠܫܶܬܶܐܣܰܘ̈ܗ̱ܝ܆ ܐܶܠܳܐ ܐܳܦ ܠܗܶܝܢ ܐܳܦ ܠܒܶܢܝܳܢܳܐ ܗܰܘ ܕܒܺܐܝܕܳܐ ܒܺܐܝܕܳܐ ܠܝܰܨܺܝܦܽܘܬܳܐ ܣܰܓܺܝܐܬܳܐ ܡܰܫܘܶܐ܆ ܘܣܰܓܺܝ ܚܠܺܝܡܳܐ ܘܰܡܫܰܪܪܳܐ ܡܩܺܝܡ ܠܶܗ܆ ܐܰܝܟܰܢܳܐ ܕܰܠܝܽܘܩܪܳܐ ܗܰܘ ܕܰܥܬܺܝܕ ܕܢܶܬܬܣܺܝܡ ܥܠܰܘܗ̱ܝ ܢܶܣܦܰܩ ܠܡܶܛܥܰܢ܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܠܗܰܘ ܕܠܶܐܦܝܣܩܽܘܦܽܘܬܳܐ ܐܳܬܶܐ܆ ܙܳܕܶܩ ܠܶܗ ܕܢܶܙܕܗܰܪ ܒܕܰܪ̈ܓܶܐ ܗܳܢܽܘܢ ܩܰܕܡܳܝ̈ܶܐ ܐܰܝܟ ܕܰܒܫ̈ܶܬܶܐܣܶܐ ܘܰܒܒܶܢܝܳܢܳܐ܆ ܒܗܽܘܢ ܒܰܥ̈ܒܳܕܶܐ ܘܠܰܘ ܒܡܶܠܬܳܐ ܒܰܠܚܽܘܕ܆ ܐܰܝܟܰܢܳܐ ܕܥܰܡ ܗܳܢܽܘܢ ܡܰܢ ܕܰܡܙܰܡܪܺܝܢ ܢܙܰܡܰܪ܆ ܥܰܡ ܗܳܢܽܘܢ ܕܶܝܢ ܕܫܳܗܪܺܝܢ ܢܶܫܗܰܪ܆ ܥܰܡ ܗܳܢܽܘܢ ܕܩܳܪܶܝܢ ܢܶܩܪܶܐ܆ ܥܰܡ ܗܳܢܽܘܢ ܕܰܡܫܰܡܫܺܝܢ ܢܫܰܡܶܫ܆ ܥܰܡ ܗܳܢܽܘܢ ܕܰܡܨܰܠܶܝܢ ܢܨܰܠܶܐ܆ ܥܰܡ ܗܳܢܽܘܢ ܕܡܰܣܩܺܝܢ ܕܶܒܚܬܳܐ ܡܠܺܝܠܬܳܐ ܢܰܣܶܩ. ܥܰܡ ܗܳܢܽܘܢ ܕܡܶܬܥܰܢܘܶܝܢ ܟܽܠ ‌ܐܳܕܫܳܐ ܕܥܳܢܘܳܝܽܘܬܳܐ ܐܰܟܚܕܳܐ ܢܶܬܥܰܢܘܶܐ܆ ܥܰܡ ܗܳܢܽܘܢ ܕܪܳܗܛܺܝܢ ܪܶܗܛܳܐ ܛܳܒܳܐ ܐܰܟܚܕܐ ܢܶܪܗܰܛ܆ ܘܗܳܟܰܢܳܐ ܢܫܰܪܰܪ ܐܶܢܽܘܢ ܕܠܰܘ ܠܳܐ ܝܺܕܺܝܥܳܐܺܝܬ ܪܳܗܛܺܝܢ܆ ܥܰܡ ܗܳܢܽܘܢ ܕܡܶܬܟܰܬܫܺܝܢ ܒܰܐܓܽܘ̈ܢܶܐ ܐܰܟܚܕܳܐ ܢܶܬܟܰܬܰܫ^[9]܆ ܘܡܶܢ ܟܽܠ ܕܽܘܟ ܐܳܦ ܠܫܶܬܶܐܣ̈ܶܐ ܟܺܝܬ ܐܳܦ ܠܒܶܢܝܳܢܳܐ ܢܫܰܪܰܪ ܘܰܢܚܰܣܶܢ ܒܟܽܠ ܫܳܥܳܐ܆ ܐܰܝܟܰܢܳܐ ܕܰܠܝܽܘܩܪܳܐ ܕܶܐܦܺܝܣܩܽܘܦܽܘܬܳܐ ܕܣܺܝܡ ܥܠܰܝܗܽܘܢ ܢܶܫܟܚܽܘܢ ܠܰܡܣܰܝܒܳܪܽܘ܆ ܕܕܰܠܡܳܐ ܐܰܝܟ ܕܥܰܠ ܒܰܝܬܶܗ ܕܗܰܘ ܕܒܶܐܘܰܢ̈ܓܶܠܺܝܰܐ ܡܫܰܡܰܗ ܣܰܟܠܳܐ܆ ܗܰܘ ܕܥܰܠ ܚܳܠܳܐ ܒܢܳܝܗ̱ܝ ܢܶܚܽܘܬ ܥܠܰܘܗ̱ܝ ܡܶܛܪܳܐ܆ ܘܢܺܐܬܽܘܢ ܢܰܗܪ̈ܰܘܳܬܳܐ ܘܢܶܫ̈ܒܳܢ ܪ̈ܽܘܚܶܐ܆ ܡܰܘ̈ܕܥܳܢ ܕܶܝܢ ܗܳܠܶܝܢ ܠܰܩܪ̈ܳܒܶܐ ܐܽܘܠ̈ܨܳܢܳܝܶܐ ܕܢܶܣܝܽܘ̈ܢܶܐ܆ ܘܢܶܛܪܽܘܢ ܒܒܰܝܬܳܐ ܗܰܘ ܘܢܶܦܶܠ܆ ܘܬܶܗܘܶܐ ܡܰܦܽܘܠܬܶܗ ܪܰܒܬܳܐ ܣܰܓܺܝ^[10].

ܒܝܰܕ ܟܽܠܗܽܘܢ ܗܳܟܺܝܠ ܕܰܪ̈ܓܶܐ܆ ܙܳܕܶܩ ܠܶܗ ܠܶܐܦܝܣܩܽܘܦܳܐ ܕܢܶܣܡܽܘܟ ܠܒܰܝܬܳܐ ܕܺܝܠܶܗ܆ ܐܰܝܟܰܢܳܐ ܕܢܶܫܟܰܚ ܠܡܶܛܥܰܢ ܠܰܡܝܰܬܪ̈ܳܬܳܐ ܕܪܺܝܫܽܘܬ ܟܳܗܢܽܘܬܳܐ܆ ܐܰܝܟ ܕܰܠܐܰܪ̈ܙܶܐ ܘܫܰܪ̈ܘܰܝܢܶܐ ܫܰܦܺܝܪ̈ܰܝ ܩܰܘܡ̈ܳܬܳܐ ܟܺܝܬ ܘܕܰܠܪܰܘܡܳܐ ܡܶܬܬܪܺܝܡܺܝܢ ܘܒܰܣܺܝ̈ܡܰܝ ܪܺܝܚܳܐ܆ ܟܰܕ ܒܰܕܡܽܘܬ ܩܳܪ̈ܝܳܬܳܐ ܡܶܬܬܣܺܝܡܺܝܢ ܥܠܰܘܗ̱ܝ. ܡܶܛܽܠ ܩܳܪ̈ܝܳܬܳܐ ܕܕܰܐܝܟ ܗܳܠܶܝܢ܆ ܒܬܶܫܒ̈ܚܳܬ ܬܶܫܒ̈ܚܳܬܳܐ ܚܰܬܢܳܐ ܗܰܘ ܕܺܐܝܬܰܘܗ̱ܝ ܡܫܺܝܚܳܐ܆ ܠܘܳܬ ܟܰܠܬܳܐ ܕܺܝܠܶܗ ܥܺܕܬܳܐ ܐܳܡܰܪ܆ ܩܳܪ̈ܝܳܬܳܐ ܕܒܰܝܬܳܐ ܕܺܝܠܰܢ ܐܰܪ̈ܙܶܐ. ܕܰܦ̈ܶܐ ܕܬܰܛܠܺܝܠܳܐ ܕܺܝܠܰܢ ܫܰܪ̈ܘܰܝܢܶܐ^[11].

ܡܶܣܬܰܟܠܺܝܢ ܐܢ̱ܬܽܘܢ ܕܰܐܝܟܰܢܳܐ ܒܰܝܬܳܐ ܕܺܝܠܰܢ ܩܪܳܝܗ̱ܝ ܚܰܬܢܳܐ܆ ܠܒܰܝܬܳܐ ܗܰܘ ܕܰܬܚܶܝܬ ܩܳܪ̈ܝܳܬܳܐ ܗܳܠܶܝܢ ܕܶܐܬܶܐܡܰܪ̈ܝ̱ ܣܺܝܡ܆ ܡܳܕܶܝܢ ܥܰܩܶܒܬܽܘܢ ܐܰܟܚܕܳܐ ܡܶܢ ܟܽܠܦܪܘܤ܆ ܐܳܦ ܠܪܰܒܽܘܬܶܗ ܕܰܐܝܟ ܐܰܝܕܳܐ ܗܝ܆ ܘܕܰܐܝܢܳܐ ܙܳܕܶܩ ܕܢܶܗܘܶܐ ܐܺܝܬܰܘܗ̱ܝ ܒܰܝܬܳܐ܆ ܗܰܘ ܕܡܰܝܬܶܐ ܕܢܶܥܡܰܪ ܒܶܗ ܡܫܺܝܚܳܐ. ܐܰܪܰܐ ܠܰܘ ܕܰܒܝܰܕ ܟܽܠܗܶܝܢ ܡܶܬܒܢܶܐ ܘܡܶܫܬܰܪܰܪ ܒܟܽܠ ܥܶܕܳܢ܆ ܠܰܘ ܗܳܠܶܝܢ ܦܰܘܠܽܘܤ܆ ܟܰܕ ܪܳܫܶܡ ܗ̱ܘܳܐ ܘܰܡܦܰܩܶܕ ܕܕܰܐܝܟ ܐܰܝܢܳܐ ܙܳܕܶܩ ܕܢܶܗܘܶܐ ܐܺܝܬܰܘܗ̱ܝ ܐܶܦܝܣܩܘܦܐ܆ ܠܘܳܬ ܛܺܝܛܽܘܤ ܫܳܠܰܚ ܗ̱ܘܳܐ܆ ܟܰܕ ܡܶܛܽܠ ܟܽܠܗܶܝܢ ܗܽܘ ܠܶܗ ܝܳܗܶܒ ܗ̱ܘܳܐ ܛܽܘܦܣܳܐ ܕܰܥ̈ܒܳܕܶܐ ܛܳܒ̈ܶܐ^[12]܆ ܠܰܘ ܗܶܢܶܝܢ ܟܰܕ ܗܶܢܶܝܢ ܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ ܟܰܕ ܐܳܡܰܪ܆ ܕܰܠܟܽܠܢܳܫ ܗܘܺܝܬ̣ ܟܽܠܗܶܝܢ ܐܰܝܟܰܢܳܐ ܕܡܶܢ ܟܽܠ ܦܪܽܘܤ ܠ̱ܐܢܳܫܺܝ̈ܢ ܐܶ݀ܦܪܽܘܩ^[13]܆ ܘܠܳܐ ܐ̱ܢܳܫ ܟܰܕ ܗܳܠܶܝܢ ܫܳܡܰܥ ܢܶܣܒܰܪ ܥܠܰܝ܆ ܕܡܶܕܶܡ ܪܰܒܳܐ ܘܩܰܫܝܳܐ ܐܳܡܰܪ ܐ̱ܢܳܐ܆ ܘܕܰܠܥܶܠ ܡܶܢ ܚܰܝܠܳܐ. ܩܰܪܺܝܒܳܐ ܗܝ ܓܶܝܪ ܕܳܐܦ ܡܶܢܶܗ ܕܰܟܝܳܢܳܐ ܕܣܽܘܥܪ̈ܳܢܶܐ ܢܺܐܠܰܦ܆ ܕܡܶܫܬܰܪܪ̈ܳܢ ܗܳܠܶܝܢ ܕܡܶܢ ܫܠܺܝܚܳܐ ܐܶܬܶܐܡܰܪ̈ܝ̱. ܕܙܳܕܶܩ ܠܶܗ ܠܗܰܘ ܕܗܳܘܶܐ ܪܺܝܫܳܢܳܐ܆ ܕܛܶܟܣܳܐ ܕܗܳܢܽܘܢ ܕܰܬܚܶܝܬ ܪܺܝܫܳܐ ܢܡܰܠܶܐ܆ ܐܰܝܟܰܢܳܐ ܕܢܶܗܘܶܐ ܛܽܘܦܣܳܐ ܠܗܳܢܽܘܢ܆ ܕܗܳܝ ܕܢܶܕܥܽܘܢ ܢܶܗܘܽܘܢ ܬܚܶܝܬ ܪܺܝܫܳܐ.

ܐܳܦ ܓܶܝܪ ܐܶܢ ܫܳܦܪܳܐ ܠܟܽܘܢ܆ ܟܰܕ ܡܰܪܦܝܢܰܢ ܠܶܗ ܠܶܐܦܝܣܩܽܘܦܳܐ ܩܰܠܺܝܠ܆ ܠܘܳܬ ܪܺܝܫ ܚܰܝܠܳܐ ܢܺܐܙܰܠ ܒܡܶܠܬܰܢ. ܐܰܪܰܐ ܟܰܕ ܒܡܶܠܬܳܐ ܒܰܠܚܽܘܕ ܘܰܒܦܽܘܩܕܳܢܳܐ ܦܳܩܶܕ ܠܡܶܙܕܰܝܳܢܽܘ܆ ܢܶܗܘܶܐ ܗܳܢܳܐ ܡܦܺܝܣܳܢܳܐ ܠܦܳܠ̈ܚܶܐ܆ ܐܰܘ ܝܰܬܺܝܪܳܐܺܝܬ ܟܰܕ ܐܰܟܚܕܳܐ ܥܰܡܗܽܘܢ ܡܶܙܕܰܝܰܢ ܘܗܳܠܶܝܢ ܕܦܳܠܚܳܐ ܥܳܒܶܕ܆ ܘܟܰܕ ܓܶܐܪ̈ܶܐ ܡܫܰܕܰܪ܆ ܘܒܰܙܒܰܢ ܡܰܢ ܪܳܗܶܛ܆ ܒܰܙܒܰܢ ܕܶܝܢ ܐܰܟܚܕܳܐ ܥܰܡܗܽܘܢ ܪܳܗܶܛ܆ ܘܥܳܐܶܠ ‌ܐܰܟܚܕܳܐ ܠܰܩܪܳܒܳܐ ܠܽܘܩܒܰܠ ܒܥܶܠ̈ܕܒܳܒܶܐ܆ ܘܰܦܫܺܝܛܳܐܺܝܬ ܠܡܺܐܡܰܪ܆ ܟܰܕ ܒܣܶܕܪܳܐ ܗܳܘܶܐ ܠܗܽܘܢ ܫܰܘܬܳܦܳܐ܆ ܘܡܶܫܬܰܘܬܰܦ ܐܳܦ ܒܩܺܝ̈ܢܕܽܘܢܽܘ ܒܰܡܢܳܬܳܐ ܣܰܓܺܝܐܬܳܐ. ܐܶܢ ܓܶܝܪ ܠܰܘ ܗܳܠܶܝܢ ܢܶܥܒܶܕ܆ ܐܶܠܳܐ ܥܰܡ ܬܰܪܥܺܝܬܳܐ ܡܫܰܩܰܠܬܳܐ ܘܪܺܝܫܳܢܳܝܬܳܐ ܢܶܦܩܽܘܕ܆ ܟܰܕ ܠܠܶܫܳܢܳܐ ܡܰܢ ܡܙܺܝܥ܆ ܘܰܐܛܺܝܩܳܐܺܝܬ ܟܒܰܪ ܡܡܰܠܶܠ ܘܰܡܪܰܘܪܶܒ ܡܶܠܰܘܗ̱ܝ܆ ܬܚܶܝܬ ܕܶܝܢ ܟܠܰܐܡܺܝܤ ܕܺܝܠܶܗ ܡܛܰܫܶܐ ܐܝܕܰܘ̈ܗ̱ܝ܆ ܢܶܓܚܟܽܘܢ ܥܠܰܘܗ̱ܝ ܐܰܪ̈ܺܝܟܳܬܳܐ ܥܰܠ ܦܽܘܩܕܳܢܶܗ ܗܳܢܽܘܢ ܕܰܬܚܶܝܬ ܐܺܝܕܶܗ܆ ܘܰܒܦܽܘܪܩܳܢܶܗ ܗܰܘ ܕܰܕܠܳܐ ܩܺܝܢܕܽܘܢܽܘܤ ܘܡܶܬܚܰܣܕܳܢܳܐ ܢܶܛܐܢܽܘܢ. ܘܢܶܪܚܩܽܘܢ ܘܥܳܪ̈ܽܘܩܶܐ ܢܶܗܘܽܘܢ. ܐܶܢܕܶܝܢ ܐܳܦ ܕܓܳܙܶܡ ܢܶܚܙܽܘܢܳܝܗ̱ܝ ܆ ܘܰܕܡܶܕܶܡ ܡܰܘܣܶܦ ܡܶܢ ܟܽܠܗܶܝܢ ܗܳܠܶܝܢ ܕܰܕܫܽܘܠܛܳܢܳܐ ܐܺܝܬܰܝܗܶܝܢ܆ ܥܠܰܘܗ̱ܝ ܟܒܰܪ ܚܠܳܦ ܒܰܪܒܪ̈ܳܝܶܐ ܢܶܫܡܛܽܘܢ ܣܰܝܦܳܐ܆ ܟܰܕ ܠܳܐ ܡܶܬܪܡܶܝܢ ܠܡܶܫܬܰܥܒܳܕܽܘ ܠܰܢܦܺܝܚܽܘܬܳܐ ܒܰܛܺܝܠܬܳܐ ܘܠܳܐ ܩܪܰܒܬܳܢܺܝܬܳܐ܆ ܘܰܠܡܰܪܳܚܽܘܬܳܐ ܠܳܐ ܡܙܰܝܰܢܬܳܐ.

ܡܳܢܳܐ ܕܶܝܢ. ܢܶܐܘܩܠܝܪܘܤ ܐܰܘܟܺܝܬ ܡܳܪܳܗ̇ ܕܶܐ‌ܠܦܳܐ܆ ܡܶܣܬܰܝܒܪܳܢܳܐ ܢܶܗܘܶܐ ܠܗܽܘܢ ܠܢܰܘ̈ܛܶܐ ܐܰܘܟܺܝܬ ܠܶܐܠܦܳܪ̈ܶܐ܆ ܐܰܘ ܠܶܗ ܠܡܰܠܳܚܳܐ ܗܰܘ ܕܰܡܕܰܒܰܪ ܠܳܗ̇ ܠܶܐܠܦܳܐ܆ ܟܰܕ ܝܳܬܶܒ ܥܰܠ ܦܪܽܘܪܳܐ ܐܰܘܟܺܝܬ ܚܰܪܬܳܗ̇ ܕܶܐ‌ܠܦܳܐ܆ ܘܰܒܩܳܠܐ ܪܰܒܳܐ ܡܫܰܪܶܐ ܒܦܽܘܩ̈ܕܳܢܰܘܗܝ܆ ܘܠܳܐ ܓܳܫܶܦ ܐܰܟܚܕܳܐ ܥܰܡܗܽܘܢ ܒܚܰܒ̈ܠܶܐ ܐܰܘ ܒܣܳܘܟܳܢܳܐ ܘܡܰܣܶܩ ܥܰܡܗܽܘܢ ܠܩܰܝܣܳܐ ܗܰܘ ܕܰܐܪܡܶܢܽܘܢ܆ ܘܰܠܟܽܠ ܕܽܘܟ ܡܶܬܟܪܶܟ ܒܳܗ̇ ܒܶܐܠܦܳܐ܆ ܘܥܰܠ ܟܽܠܗܶܝܢ ܗܳܠܶܝܢ ܕܙܳܕܶܩ ܠܗܽܘܢ ܕܢܶܥܒܕܽܘܢ ܠܗܳܢܽܘܢ ܕܰܬܚܶܝܬ ܐܝܕܰܘ̈ܗ̱ܝ. ܠܟܽܠܢܳܫ ܗܳܟܺܝܠ ܝܺܕܺܝܥܳܐ ܕܶܐܢ ܠܰܘ ܒܝܰܕ ܗܳܠܶܝܢ ܝܰܨܺܝ̈ܦܘܳܬܳܐ ܢܺܐܬܶܐ ܥܰܡ ܚܰܬܺܝܬܽܘܬܳܐ܆ ܒܝܰܡܳܐ ܬܶܬܛܰܒܰܥ ܠܳܗ̇ ܐܶ‌ܠܦܶܗ܆ ܘܟܰܕ ܥܰܠ ܕܰܦ̈ܶܐ ܢܶܫܒܩܽܘܢܳܝܗ̱ܝ ܗܳܢܽܘܢ ܐܶ‌ܠܦܳܪ̈ܶܐ܆ ܟܰܕ ܡܶܬܦܰܫܰܟ ܘܠܰܝܬ ܠܶܗ ܦܽܘܪܣܳܐ ܕܦܽܘܪܩܳܢܳܐ܆ ܠܓܰܠ̈ܠܶܐ ܢܰܦܣܽܘܢ ܦܽܘܪܩܳܢܳܐ ܕܢܰܦܫܗܽܘܢ. ܘܰܚܕܳܐ ܡܶܢ ܬܰܪܬܶܝܢ. ܐܰܘ ܐܳܒܶܕ ܗܽܘ ܥܰܡ ܐܶ‌ܠܦܶܗ܆ ܟܰܕ ܠܳܐ ܡܣܰܝܒܰܪ ܠܚܽܘܣܪܳܢܳܐ ܘܟܰܕ ܣܰܪܺܝܟ ܒܝܽܘܬܪܳܢܳܐ ܕܬܶܐܓܽܘܪܬܳܐ܆ ܐܰܘ ܠܚܰܪܬܳܐ ܐܳܦ ܗܽܘ܆ ܚܰܕ ܢܶܗܘܶܐ ܡܶܢ ܗܳܢܽܘܢ ܕܣܳܚܶܝܢ ܥܰܠ ܡܰܝ̈ܳܐ܆ ܘܕܳܝܢܺܝܢ ܚܰܒܺܝܒܬܳܐ ܠܗܳܝ ܕܢܺܚܽܘܢ ܚܰܝ̈ܶܐ ܕܠܳܐ ܣܰܒܪܳܐ܆ ܘܰܕܣܳܒܠܺܝܢ ܥܳܩ̈ܳܬܳܐ ܥܰܒܺܝ̈ܛܳܬܳܐ ܥܰܠ ܡܰܠܺܝܚܽܘܬܳܐ.

ܟܰܕ ܠܗܳܠܶܝܢ ܫܡܰܥܬܽܘܢ܆ ܠܳܐ ܝܺܕܰܥܬܽܘܢ ܢܰܗܺܝܪܳܐܺܝܬ ܕܘܠܳܐ ܠܶܗ ܠܰܡܕܰܒܪܳܢܳܐ܆ ܕܢܶܥܒܶܕ ܘܢܶܣܥܽܘܪ ܗܳܠܶܝܢ ܕܗܳܢܽܘܢ ܕܰܬܚܽܘܬܰܘܗ̱ܝ ܡܶܬܛܰܟܣܺܝܢ܆ ܘܠܳܐ ܢܨܰܥܰܪ ܐܰܘ ܢܫܺܝܛ ܠܕܰܪ̈ܓܶܐ ܗܳܢܽܘܢ ܕܰܡܫܰܥ̈ܒܕܰܘ̈ܗ̱ܝ܆ ܘܡܶܢ ܥܒܳܕܗܽܘܢ ܕܗܳܠܶܝܢ ܐܰܝܟ ܕܡܶܢ ܐܰܟܣܶܢܝܳܐ ܡܶܕܶܡ ܡܶܕܶܡ ܘܢܽܘܟܪܳܝܳܐ ܢܶܬܪܰܚܰܩ. ܕܰܐܝܟ ܐܰܝܠܶܝܢ ܗܳܟܺܝܠ ‌ܐܺܝܬܰܝܗܶܝܢ ܗܳܠܶܝܢ ܕܺܝܠܰܢ܆ ܟܰܕ ܥܰܡ ܗܳܠܶܝܢ ܐܰܟܚܕܳܐ ܡܶܬܦܰܚ̈ܡܳܢ ܘܡܶܬܥܰܩ̈ܒܳܢ. ܕܺܝܠܰܢ ܕܶܝܢ ܐܶܡܰܬܝ ܕܳܐܡܰܪ ܐ̱ܢܳܐ܆ ܗܳܠܶܝܢ ܕܟܽܠܢܳܫ ܐܳܡܰܪ ܐ̱ܢܳܐ܆ ܐܰܘ ܗܳܠܶܝܢ ܕܣܰܓܺܝ̈ܶܐܐ܆ ܕܗܳܢܽܘܢ ܕܩܰܕܡܳܝܳܐ ܕܺܝܠܗܽܘܢ ܐܺܝܬܰܝ ܐܶܢܳܐ.

ܠܰܘ ܗܰܘ ܡܰܢ܆ ܟܰܕ ܡܶܢ ܓܽܘܕܳܐ ܕܗܳܢܽܘܢ ܕܰܡܙܰܡܪܺܝܢ ܒܩܳܪ̈ܽܘܝܶܐ ܐܶܬܟܬܶܒ܆ ܟܰܕ ܐܰܝܟ ܕܡܶܢ ܢܶܫܒܳܐ ܡܶܢ ܬܶܫܒ̈ܚܳܬܳܐ ܘܡܶܢ ܩܰܘܡܳܐ ܗܰܘ ܠܶܠܝ̣ܳܝ̣ܳܐ ܥܳܪܶܩ܆ ܚܺܐܪܽܘܬܳܐ ܡܰܣܒܰܪ ܕܶܐܫܟܰܚ܆ ܘܥܰܠ ܥܰܪܣܶܗ ܟܽܠܶܗ ܠܶܠܝܳܐ܆ ܘܗܰܘ ܐܰܪܺܝܟܳܐ ܗܳܢܳܐ ܕܗܳܫܳܐ ܩܳܐܶܡ ܐܳܡܰܪ ܐ̱ܢܳܐ܆ ܟܰܕ ܢܰܚܪܶܐ ܓܰܓܰܪܬܶܗ ܪܡܶܐ. ܗܰܘ ܕܶܝܢ ܟܰܕ ܡܶܢ ܩܳܪ̈ܽܘܝܶܐ ܐܰܘ ܡܶܢ ܡܙܰܡܪ̈ܳܢܶܐ ܠܘܬ ܡܫܰܡ̈ܫܳܢܶܐ ܥܒܰܪ܆ ܡܶܠܬܳܐ ܡܶܕܶܡ ܕܙܽܘܡܳܪܳܐ ܐܰܘ ܕܩܳܪܽܘܝܽܘܬܳܐ ܥܳܒܶܕ܆ ܠܰܘ ܒܗܳܕܶܐ ܗܳܠܶܝܢ ܕܰܡܫܰܡܫܳܢܽܘܬܳܐ ܡܶܬܝܰܨ̈ܦܳܢ ܠܶܗ ܡܨܰܕܝܳܢܳܐܺܝܬ܆ ܒܗܳܝ ܕܟܽܘܬܺܝܢܳܐ ܡܰܢ ܫܒܺܝܚܬܳܐ ܢܶܗܘܶܐ ܠܒܺܝܫ܆ ܒܟܶܬܳܢܳܐ ܕܶܝܢ ܢܰܩܕܳܐ ܘܚܰܙܝܳܐ ܗܰܘ ܕܥܰܠ ܟܰܬܦܶܗ ܢܶܨܛܰܒܰܬ ܟܺܝܬ ܘܢܰܦܪܰܓ܆ ܘܛܰܥܝܳܐ ܠܶܗ ܕܗܳܢܳܐ ܫܽܘܘܕܳܥܳܐ ܕܓܶܦ̈ܶܐ ܐܺܝܬܰܘܗ̱ܝ܆ ܗܳܠܶܝܢ ܕܰܒܗܽܘܢ ܩܰܠܺܝܠܽܘܬܳܐ ܘܚܰܪܺܝܦܽܘܬܳܐ ܘܰܕܠܺܝܠܽܘܬ ܡܶܬܬܙܺܝܥܳܢܽܘܬܳܐ܆ ܕܚܰܝ̈ܠܰܘܳܬܳܐ ܗܳܢܽܘܢ ܡܫܰܡ̈ܫܳܢܶܐ ܘܠܳܐ ܦܰܓܪ̈ܳܢܶܐ ܡܶܬܪܰܫܡܳܐ. ܡܶܢ ܗܽܘܦܕܝܰܩ̈ܢܶܐ ܕܶܝܢ܆ ܣܰܓܺܝ̈ܶܐܐ ܝܳܕܰܥ ܐ̱ܢܳܐ ܐܳܦ ܕܡܶܬܚܰܡܨܺܝܢ ܒܶܗ ܒܕܰܪܓܳܐ. ܘܶܐ‌ܠܽܘܠܳܐ ܕܡܶܛܽܠ ܬܰܪ̈ܣܝܳܬܳܐ ܕܡܶܢ ܕܝܰܐܪ̈ܝܐ^[14]܆ ܐܰܝܟ ܕܡܶܢ ܒܶܗܬܬ̣ܳܐ ܥܳܪܩܺܝܢ ܗ̱ܘܰܘ ܡܶܢ ܗܳܝ ܕܢܰܕܠܩܽܘܢ ܫܪ̈ܳܓܶܐ ܕܒܰܝܬܳܐ ܩܰܕܺܝܫܳܐ. ܘܠܳܐ ܡܶܬܚܰܫܒܺܝܢ܆ ܕܶܐܢܗܽܘ ܕܗܳܢܽܘܢ ܕܰܠܡܰܠ̈ܟܶܐ ܕܥܰܠ ‌ܐܰܪܥܳܐ ܡܫܰܡܫܺܝܢ ܘܰܠܠܰܡܦܺܝ̈ܕܶܐ ܒܺܐܝ̈ܕܰܝܗܽܘܢ ܛܳܥܢܺܝܢ܆ ܐܰܘ ܬܶܫܡܶܫܬܳܐ ܡܶܕܶܡ ܡܶܢ ܗܳܠܶܝܢ ܠܳܐ ܚ̈ܰܙܝܳܬܳܐ ܘܰܫܚܺܝ̈ܡܳܬܳܐ ܘܰܟܡܳܐ ܙܰܒ̈ܢܺܝܢ ܕܰܠܘܳܬ ܢܝܳܚܳܐ ܕܟܰܪܣܳܐ ܚܝܳܪܳܐ ܡܡܰܠܶܝܢ܆ ܛܽܘܒ̈ܬܳܢܶܐ ܡܶܬܬܕܺܝܢܺܝܢ܆ ܘܢܰܨܺܝ̈ܚܶܐ ܐܺܝܬܰܝܗܽܘܢ ܠܗܳܢܽܘܢ ܕܡܶܢ ܠܒܰܪ ܘܣܰܓܺܝ ܫܒܺܝ̈ܚܶܐ܆ ܕܒܺܐܝܩܳܪܳܐ ܗܰܘ ܕܡܶܢ ܒܶܝܬ ܡܰܠ̈ܟܶܐ ܡܶܫܬܰܘܬܦܺܝܢ܆ ܣܰܓܺܝ ܝܰܬܺܝܪܳܐܺܝܬ ܗܳܢܽܘܢ܆ ܕܰܠܥܳܒܽܘܕܐ ܕܟܽܠ ܘܡܰܠܟܳܐ ܕܡܰܠ̈ܟܶܐ ܡܫܰܡܫܺܝܢ܆ ܘܳܐܦܠܳܐ ܐܺܝܬ ܠܡܺܐܡܰܪ܆ ܕܒܰܟܡܳܐ ܡܶܨܥܳܝܽܘܬܳܐ ܘܪܰܚܺܝܩܽܘܬܳܐ ܒܺܐܝܩܳܪܳܐ ܪܰܒܳܐ ܡܶܬܒܰܣܡܺܝܢ܆ ܘܰܒܫܽܘܒܚܳܐ ܕܝܰܬܺܝܪ ܪܰܒ ܥܬܺܝܕܺܝܢ ܕܢܶܬܒܰܣܡܽܘܢ܆ ܟܰܕ ܚܠܳܦ ܬܶܫܡܶܫܬܳܐ ܗܳܕܶܐ ܘܩܰܘܡܳܐ ܕܗܳܪܟܳܐ ܕܰܒܥܺܕܬܳܐ܆ ܥܬܺܝܕܺܝܢ ܕܢܶܣܒܽܘܢ ܩܰܘܡܳܐ ܐ̱ܚܪܺܢܳܐ ܕܰܩܕܳܡ ܕܰܝܳܢܳܐ ܕܟܽܠܳܗ̇ ܒܪܺܝܬܳܐ܆ ܒܗܰܝܟܠܐ ܗܰܘ ܡܶܬܗܰܘܢܳܢܳܐ܆ ܗܰܘ ܩܰܕܺܝܫܳܐ܆ ܗܰܘ ܬܡܺܝܗܳܐ ܒܙܰܕܺܝܩܽܘܬܳܐ܆ ܗܰܘ ܕܡܶܛܽܠܳܬܶܗ ܡܙܰܡܰܪ ܕܰܘܺܝܕ ܟܰܕ ܐܳܡܰܪ܆ ܛܽܘܒܰܝܗܽܘܢ ܠܗܳܢܽܘܢ ܕܥܳܡܪܺܝܢ ܒܒܰܝܬܳܟ܆ ܠܥܳܠܰܡ ܥܳܠܡܺܝܢ ܢܫܰܒܚܽܘܢܳܟ܆ ܘܛܽܘܒܰܘ̈ܗ̱ܝ ܠܗܰܘ ܕܰܓܒܰܝܬܳܝܗ̱ܝ ܘܰܕܒܰܪܬܳܝܗ̱ܝ ܆ ܢܶܫܪܶܐ ܒܕܳܪ̈ܳܬܳܟ^[15].

ܕܗܳܝ ܕܶܝܢ ܕܢܰܕܠܶܩ ܫܪ̈ܳܓܶܐ ܕܗܰܝܟܠܳܐ ܐܰ‌ܠܳܗܳܝܳܐ܆ ܕܰܙܥܽܘܪ̈ܶܐ ܠܳܐ ܣܳܟ ܐܺܝܬܶܝܗ̇܆ ܐܳܦܠܳܐ ܬܽܘܒ ܕܡܰܣ̈ܠܰܝܳܐ܆ ܡܶܢ ܟܬܳܒ̈ܶܐ ܟܳܗ̈ܢܳܝܶܐ ܐܶ݀ܚܰܘܶܐ ܓܰܠܝܳܐܺܝܬ. ܗܽܘ ܓܶܝܪ ܗܰܘ ܪܺܝܫ ܟܳܗ̈ܢܶܐ ܕܶܐܬܡܫܰܚ ܩܰܕܡܳܝܳܐ܆ ܗܰܘ ܐܰܚܽܘܗ̱ܝ ܕܡܽܘܫܶܐ܆ ܐܰܗܪܽܘܢ ܗܰܘ܆ ܗܰܘ ܕܠܶܐܤܛܠܳܐ ܟܳܗܢܳܝܬܳܐ ܡܥܰܛܰܦ ܗ̱ܘܳܐ܆ ܗܳܝ ܕܰܒܕܰܗܒܳܐ ܘܰܒܟܺܐܦ̈ܶܐ ܝܰܩܺܝܪ̈ܳܬܳܐ ܡܰܨܡܚܳܐ ܗ̱ܘܳܬ܆ ܠܗܳܕܶܐ ܬܶܫܡܶܫܬܳܐ ܒܺܐܝܕܰܘ̈ܗ̱ܝ ܕܺܝܠܶܗ ܡܶܬܦܩܰܕ ܗ̱ܘܳܐ ܠܡܶܥܒܰܕ. ܟܬܺܝܒ ܓܶܝܪ ܒܡܶܢ̈ܝܳܢܶܐ ܗܳܟܰܢܳܐ. ܘܡܰܠܶܠ ܡܳܪܝܳܐ ܠܘܳܬ ܡܽܘܫܶܐ ܟܰܕ ܐܳܡܰܪ܆ ܡܰܠܶܠ ܠܰܐܗܪܽܘܢ ܘܬܺܐܡܰܪ ܠܘܳܬܶܗ܆ ܐܶܡܰܬܝ ܕܣܳܐܶܡ ܐܰܢ̱ܬ ܫܪ̈ܳܓܶܐ ܡܶܢ ܓܰܒܳܐ܆ ܠܽܘܩܒܰܠ ܦܰܪܨܽܘܦܳܗ̇ ܕܰܡܢܳܪܬܳܐ ܢܰܢܗܪܽܘܢ ܫܰܒܥܳܬܰܝ̈ܗܽܘܢ ܫܪ̈ܳܓܶܐ. ܘܰܥܒܰܕ ܗܳܟܰܢܳܐ ܐܰܗܪܽܘܢ. ܡܶܢ ܚܰܕ ܓܰܒܳܐ ܠܽܘܩܒܰܠ ܦܰܪܨܽܘܦܳܗ̇ ܕܰܡܢܳܪܬܳܐ ܐܰܕܠܶܩ ܐܶܢܽܘܢ ܠܰܫܪ̈ܳܓܶܐ ܕܺܝܠܳܗ̇܆ ܐܰܝܟܰܢܳܐ ܕܰܦܩܰܕ ܡܳܪܝܳܐ ܠܡܽܘܫܶܐ^[16].

ܠܰܢ ܕܶܝܢ ܠܩܰܫܺܝ̈ܫܶܐ ܘܠܶܐܦܣ̈ܩܽܘܦܶܐ܆ ܣܳܦܶܩ ܗܽܘ ܫܡܳܐ ܕܩܰܫܺܝܫܳܐ ܘܕܶܐܦܣܩܽܘܦܳܐ ܘܗ̱ܝ ܕܢܶܬܶܒ. ܠܩܰܘܡܳܐ ܕܶܝܢ ܕܬܶܫܡܶܫܬܳܐ܆ ܟܽܠ ܟܽܠܶܗ ܛܥܰܝܢܳܝܗ̱ܝ . ܗܳܢܳܐ ܕܶܝܢ ܢܺܝܫܳܐ܆ ܗܳܢܰܘ ܕܶܝܢ ܗܳܝ ܕܡܶܢ ܫܡܳܗ̈ܶܐ ܕܠܳܐ ܣܳܥܽܘܪܽܘܬܳܐ ܢܶܬܺܝܕܰܥ܆ ܐܳܦ ܥܰܠ ܗܳܢܽܘܢ ܕܰܒܥܰܡܳܐ ܐܺܝܬܰܝܗܽܘܢ ܥܒܰܪ. ܘܶܐܢ ܐ̱ܢܳܫ ܒܕܽܘܟ ܠܥܺܕܬܳܐ ܢܶܥܽܘܠ ܣܒܺܝܣܳܐܺܝܬ܆ ܣܟܽܘܠܰܐܤܛܺܝܤ ܐܰܘܟܺܝܬ ܡܶܬܐܰܡܢܳܢܳܐ ܡܶܫܬܰܡܰܗ܆ ܘܥܰܠ ܩܳܪܺܝܬܳܐ ܡܶܬܢܦܰܚ ܘܡܶܫܬܰܩܰܠ܆ ܟܰܕ ܘܠܳܐ ܒܠܶܠܝܳܐ ܡܶܬܚܙܶܐ ܠܰܢ܆ ܘܠܳܐ ܠܒ̈ܳܬܶܐ ܕܰܨ̈ܠܰܘܳܬܳܐ ܕܣܳܗ̈ܕܶܐ ܡܬܽܘܡ ܐܶܙܰܠ ‌ܐܰܟܚܕܳܐ ܥܰܡܰܢ. ܘܰܚܕܳܐ ܙܒܰܢ ܒܰܠܚܽܘܕ ܫܰܡܠܺܝ ܥܰܡܰܢ ܨ̈ܠܰܘܳܬܳܐ ܗܳܠܶܝܢ ܪ̈ܰܡܫܳܝܳܬܳܐ.

ܐܶܠܳܐ ܬܺܐܡܰܪ ܡܶܢ ܟܽܠ ܦܪܽܘܤ܆ ܕܕܺܝܠܳܢܳܐܺܝܬ ܡܙܰܡܰܪ ܐܰܢ̱ܬ. ܡܳܕܶܝܢ ܡܶܢ ܡܕܺܝܢ̱ܬܳܐ ܦܽܘܩ܆ ܘܰܡܫܰܡܠܝܳܐܺܝܬ ܘܢܳܡܽܘܣܳܐܺܝܬ ܥܰܙܳܐ܆ ܘܶܐܬܥܰܢܘܳܐ ܠܫܽܘܢܳܝܳܐ ܗܰܘ ܦܺܝܠܘܣܘܦܳܝܳܐ. ܠܡܳܢܳܐ ܡܚܰܠܶܛ ܐܰܢ̱ܬ ܠܰܬܪ̈ܰܝܗܽܘܢ ܕܽܘܒܳܪ̈ܶܐ ܕܚܰܝ̈ܶܐ ܐܰܟܚܕܳܐ ܠܗܰܘ ܕܕܰܝܪܳܝܽܘܬܳܐ ܘܰܠܗܰܘ ܡܕܺܝܢܳܝܳܐ܆ ܕܠܳܐ ܚܠܺܝܛܳܐܺܝܬ ܒܗܽܘܢ ܒܣܽܘܥܪ̈ܳܢܶܐ ܐܺܝܬ ܠܗܽܘܢ. ܟܡܳܐ ܓܶܝܪ ܕܒܰܡܕܺܝܢ̱ܬܳܐ ܐܺܝܬܰܝܟ܆ ܕܰܠܘܳܬ ܥܺܕܬܳܐ ܬܺܐܬܶܐ ܚܰܝܳܒ ܐܰܢ̱ܬ܆ ܕܠܳܐ ܬܶܟܦܽܘܪ ܒܪܽܘܟܳܒܳܐ ܘܰܡܠܰܚܡܽܘܬܳܐ ܕܗܰܕܳܡ̈ܶܐ. ܠܰܡܡܰܠܳܝܽܘ ܦܰܓܪܳܐ ܕܰܡܫܺܝܚܳܐ ܒܟܽܠ ܙܰܒܢܳܐ܆ ܗܰܘ ܕܺܐܝܬܰܘܗ̱ܝ ܟܢܽܘܫܝܳܐ ܕܰܡܗܰܝܡ̈ܢܶܐ^[17]. ܕܠܳܐ ܬܶܣܕܽܘܩ ܠܰܐܣܳܪܳܐ ܗܰܘ ܕܒܶܗ ܐܺܝܬܶܝܗ̇ ܚܕܳܝܽܘܬܳܐ ܕܪܽܘܚܳܐ ܩܰܕܺܝܫܳܐ܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ. ܐܰܘ ܠܳܐ ܫܳܡܰܥ ܐܰܢ̱ܬ ܠܶܗ ܕܳܐܡܰܪ܆ ܚܰܕ ܦܰܓܪܳܐ ܚܕܳܐ ܪܽܘܚܳܐ܆ ܐܰܝܟܰܢܳܐ ܕܳܐܦ ܐܶܬܩܪܺܝܬܽܘܢ܆ ܒܚܰܕ ܣܰܒܪܳܐ ܕܰܩܪܳܝܬܟܽܘܢ^[18]. ܠܡܳܢܳܐ ܠܳܐ ܐܳܦ ܠܰܢ ܟܰܕ ܡܶܬܚܙܶܐ ܐܰܢ̱ܬ ܡܰܘܬܰܪ ܐܰܢ̱ܬ ܡܶܢ ܬܰܚܘܺܝܬܳܟ. ܐܰܪܰܐ ܠܳܐ ܣܳܒܰܪ ܐܰܢ̱ܬ ܥܠܰܝ܆ ܕܝܰܬܺܝܪ ܡܶܢܳܟ ܚܳܕܶܐ ܗ̱ܘܺܝܬ̣ ܒܬܶܫܡܶܫܬܳܐ ܘܰܨܠܽܘܬܳܐ ܗܳܝ ܕܺܝܠܳܢܳܝܬܳܐ ܘܰܦܪܺܝܫܬܳܐ ܕܰܒܫܶܠܝܳܐ܆ ܐܶܠܳܐ ܠܳܐ ܡܒܰܠܒܶܠ ‌ܐ̱ܢܳܐ ܠܛܶܟܣܳܐ. ܐܶܠܳܐ ܝܳܕܰܥ ܐ̱ܢܳܐ ܠܡܶܦܪܰܫ ܕܽܘܟ̈ܝܳܬܳܐ ܘܙܰܒ̈ܢܶܐ܆ ܘܠܳܐ ܛܰܥܝܳܐ ܠܺܝ ܕܡܳܢܳܐ ܡܰܢ ܨܳܒܝܳܐ ܦܺܝܠܽܘܣܽܘܦܺܝܰܐ ܘܰܡܫܰܘܚܕܽܘܬܳܐ܆ ܡܳܢܳܐ ܕܶܝܢ ܡܶܫܬܰܘܕܶܐ ܕܽܘܒܳܪܳܐ ܕܰܟܪ̈ܺܝܣܛܝܳܢܶܐ ܗܰܘ ܕܰܒܥܳܠܡܳܐ܆ ܘܚܰܓܳܐ ܘܰܟܢܽܘܫܝܳܐ ܕܰܒܥܺܕܬܳܐ ܗܰܘ ܕܟܽܠ ܩܰܘܡܬܳܐ. ܫܳܬܶܩ ܐ̱ܢܳܐ ܠܗܳܢܽܘܢ ܕܰܠܚܰܝ̈ܶܐ ܕܕܰܝܪܳܝܽܘܬܳܐ ܓܒ̣ܰܘ ܠܗܽܘܢ ܓܰܒܪ̈ܶܐ ܟܺܝܬ ܘܢܶܫ̈ܶܐ܆ ܘܳܐܡܪܺܝܢ ܘܒܶܐܓܪ̈ܳܬܳܐ ܘܰܒܦܶܢܩ̈ܝܳܬܳܐ ܟܳܬܒܺܝܢ܆ ܦܠܳܢ ܗܰܘ ܠܒܺܝܫ ܣܰܩܳܐ܆ ܦܠܳܢܝܰܬ̣ ܗܳܝ ܛܥܺܝܢܰܬ ܦܰܪܙܠܳܐ܆ ܦܠܳܢ ܗܰܘ ܕܰܚܒܺܝܫ܆ ܘܛܰܥܳܝ̣ܺܝ̣ܢ ܠܗܰܘ ܣܳܐܶܡ ܢܳܡܽܘܣܳܐ ܕܳܐܡܰܪ܆ ܠܳܐ ܬܶܕܰܥ ܣܶܡܳܠܳܟ ܡܳܢܳܐ ܥܳܒܕܳܐ ܝܰܡܺܝܢܳܟ^[19].

ܟܽܠܳܗ̇ ܗܳܕܶܐ ܡܶܠܬܳܐ ܘܰܒܛܺܝܠܽܘܬܳܐ ܐܺܝܬ ܠܰܢ ܥܰܠ ܫܡܳܗ̈ܶܐ܆ ܘܠܰܘ ܥܰܠ ܣܽܘܥܪ̈ܳܢܶܐ. ܘܰܠܟܽܠܢܳܫ ܐܰܝܟ ܕܰܠܡܺܐܡܰܪ܆ ܗܳܝ ܕܢܶܣܬܒܰܪ ܕܺܐܝܬܰܘܗ̱ܝ܆ ܘܠܰܘ ܗܺܝ ܗܳܝ ܕܢܶܗܘܶܐ ܐܺܝܬܰܘܗ̱ܝ ܡܶܬܝܰܨܦܳܐ. ܥܶܠܬܳܐ ܕܶܝܢ ܕܗܳܠܶܝܢ ܟܽܠܗܶܝܢ܆ ܠܘܳܬ ܪܺܝܫܳܐ ܡܶܬܥܰܠܝܳܐ܆ ܠܘܳܬ ܐܶܦܣܩܽܘܦܳܐ ܗܰܘ ܕܡܶܢܶܗ ܐܳܦ ܗܳܠܶܝܢ ܗܰܕܳܡ̈ܶܐ ܕܫܰܪܟܳܐ ܐܶܬܚܰܒܰܠܘ. ܐܶ‌ܠܽܘ ܓܶܝܪ ܠܺܝ ܒܛܺܝܠ ܗ̱ܘܐ ܠܺܝ ܥܰܠ ܣܽܘܥܪ̈ܳܢܶܐ܆ ܠܰܘ ܥܰܠ ܫܡܳܗ̈ܶܐ ܒܰܠܚܽܘܕ ܡܶܬܒܛܶܠ ܗ̱ܘܳܐ ܠܗܽܘܢ ܠܗܳܢܽܘܢ ܐ̱ܚܪ̈ܳܢܶܐ. ܗܳܫܳܐ ܕܶܝܢ ܐܶܢ ܐ̱ܢܳܫ ܐܶܦܣܩܽܘܦܳܐ ܢܶܩܪܶܝܢܝ܆ ܠܰܘ ܕܶܝܢ ܐܪܟܝܐܦܝܣܩܘܦܘܤ ܐܘ ܦܐܛܪܝܐܪܟܝܤ܆ ܐܶܠܳܐ ܢܪܺܝܡ ܡܶܢܝ ܗܳܠܶܝܢ ܬܰܪܬܶܝܢ ܣܘܠܐܒ̈ܤ܆ ܐܰܝܟ ܐܰܝܢܳܐ ܕܪܺܝܫ ܗܰܕܳܡ̈ܶܐ ܕܦܰܓܪܶܗ ܗܳܠܶܝܢ ܪ̈ܺܝܫܳܝܶܐ ܘܳܐ‌ܠ̈ܨܳܝܶܐ ܡܦܰܣܩܺܝܢ ܟܳܐܶܒ ܠܝ. ܐܶ‌ܠܽܘ ܕܶܝܢ ܝܳܕܰܥ ܗ̱ܘܺܝܬ̣ ܐܶܢܳܐ܆ ܕܶܐܢ ܐ̱ܢܳܫ ܠܶܐܦܝܣܩܽܘܦܽܘܬܳܐ ܪܳܐܶܓ ܠܰܥ̈ܒܳܕܶܐ ܫܰܦܺܝܪ̈ܶܐ ܪܳܐܶܓ܆ ܘܰܕܬܰܘܣܶܦܬܳܐ ܕܺܐܝܩܳܪܳܐ ܬܰܘܣܶܦܬܳܐ ܕܥܰܡ̈ܠܶܐ ܐܺܝܬܶܝܗ̇܆ ܘܠܰܘ ܟܦܽܘܪܝܳܐ ܕܕܰܪ̈ܓܶܐ ܕܬܶܫܡܶܫܬܳܐ ܗܳܢܽܘܢ ܕܩܰܕܺܝܡܺܝܢ܆ ܝܳܕܰܥ ܗ̱ܘܳܐ ܐܳܦ ܡܫܰܡܫܳܢܳܐ ܡܶܢ ܟܽܠܦܪܽܘܤ܆ ܕܶܐܢ ܐ̱ܢܳܫ ܠܰܡܫܰܡܫܳܢܽܘܬܳܐ ܪܳܐܶܓ܆ ܠܰܥܒܳܕܳܐ ܫܰܦܺܝܪܳܐ ܪܳܐܶܓ. ܒܗܳܕܶܐ ܕܶܝܢ ܒܳܗ̇ ܒܰܕܡܽܘܬܳܐ ܐܳܦ ܩܰܫܺܝܫܳܐ. ܘܰܕܗܳܠܶܝܢ ܕܺܐܝܩܳܪܳܐ ܗܰܘ ܕܡܶܢ ܒܳܬܰܪܟܶܢ ܐܶܬܬܰܘܣܰܦ܆ ܘܡܶܬܥܰܠܝܳܢܽܘܬܳܐ ܛܶܟܣܳܐ ܟܳܗܢܳܝܳܐ܆ ܠܳܐ ܡܫܰܠܚ̈ܳܢ ܠܶܗ ܠܗܰܘ ܕܡܶܬܝܰܩܰܪ܆ ܘܳܐܦܠܳܐ ܥܳܒ̈ܕܳܢ ܠܶܗ ܥܰܪܛܶܠܳܝܳܐ ܘܰܣܦܺܝܩܳܐ܆ ܡܶܢ ܕܰܪ̈ܓܶܐ ܗܳܢܽܘܢ ܕܩܰܕܺܝܡܺܝܢ.

ܙܳܕܶܩ ܓܶܝܪ ܕܰܕܬܶܬܶܐܡܰܪ ܐܳܦ ܥܰܠ ܗܳܕܶܐ ܗܳܝ ܕܦܰܘܠܽܘܤ܆ ܗܳܝ ܕܥܰܠ ܗܰܘ ܕܠܳܐ ܨܳܒܶܝܢ ܚ̱ܢܰܢ ܠܡܶܫܠܰܚ܆ ܐܶܠܳܐ ܕܢܶܠܒܰܫ ܠܥܶܠ ܡܶܢܶܗ^[20]. ܐܳܦ ܓܶܝܪ ܠܰܘ ܡܶܛܽܠ ܕܰܠܒܶܫܢܰܢ ܠܥܶܠ ܡܶܢ ܕܰܪܓܳܐ ܗܰܘ ܕܩܰܕܺܝܡ ܠܟܳܗܢܽܘܬܳܐ ܕܩܰܫܺܝܫܽܘܬܳܐ܆ ܗܳܐ ܐܰܒܺܝܕ ܡܫܰܡܫܳܢܳܐ. ܘܳܐܦܠܳܐ ܡܶܛܽܠ ܬܶܫܡܶܫܬܳܐ ܕܰܡܫܰܡܫܳܢܽܘܬܳܐ ܗܳܝ ܕܶܐܬܬܰܘܣܦܰܬ̣܆ ܐܶܙܰܠ ܠܶܗ ܗܰܘ ܕܰܡܙܰܡܰܪ܆ ܘܰܕܥܶܟ ܗܰܘ ܕܩܳܪܶܐ. ܟܽܠܗܶܝܢ ܕܶܝܢ ܐܺܝܬܰܘܗ̱ܝ ܗܰܘ ܚܰܕ ܐܰܟܚܕܳܐ ܟܰܕ ܐܺܝܬܰܘܗ̱ܝ ܚܰܝܳܒܳܐ ܕܰܥܒܳܕܳܐ ܕܟܽܠܗܶܝܢ. ܗܳܝ ܟܺܝܬ ܕܶܐ‌ܠܽܘ ܐܺܝܬܶܝܗ̇ ܗ̱ܘܳܬ ܠܰܢ ܒܗܰܘܢܰܢ܆ ܗܳܝ ܕܬܰܒ̈ܥܳܬܳܐ ܐܳܡܰܪ ܐ̱ܢܳܐ܆ ܘܰܕܡܰܦܰܩ ܒܪܽܘܚܳܐ ܕܚܺܝܠܳܐ ܗܰܘ ܕܰܩܕܳܡ ܒܺܐܡܰܐ ܕܰܡܫܺܝܚܳܐ܆ ܡܶܢ ܟܽܠܦܪܽܘܤ ܟܰܕ ܡܶܬܬܰܘܣܰܦ ܗ̱ܘܳܐ ܐܺܝܩܳܪܳܐ܆ ܠܰܘ ܒܰܫܡܳܗ̈ܶܐ ܡܶܬܢܰܦܚܺܝܢ ܗ̱ܘܰܝܢ. ܐܶܠܳܐ ܟܰܕ ܠܘܳܬ ܝܽܘܩܪܳܐ ܚܳܝܪܺܝܢ ܗ̱ܘܰܝܢ܆ ܒܰܐܪܥܳܐ ܚܳܠܕܺܝܢ ܗ̱ܘܰܝܢ ܘܪܳܥܠܺܝܢ ܗ̱ܘܰܝܢ. ܘܡܶܬܪܢܶܝܢ ܗ̱ܘܰܝܢ܆ ܕܡܳܢܳܐ ܟܰܝ ܢܶܦܓܰܥ ܒܰܢ ܡܶܢ ܗܳܪܟܳܐ ܒܝܰܘܡܳܐ ܗܰܘ ܕܕܺܝܢܳܐ.

ܡܳܢܳܐ ܗܳܟܺܝܠ ‌ܐܶܢܳܐ ܐܶ݀ܥܒܶܕ. ܐܰܝܟܰܢܳܐ ܕܶܝܢ ܠܳܐ ܐܶ݀ܬܬܰܢܰܚ ܘܶܐ݀ܒܟܶܐ ܡܰܪܺܝܪܳܐܺܝܬ܆ ܕܰܥܕܰܟܺܝܠ ܒܗܳܠܶܝܢ ܕܰܩܕܳܡ ܒܶܝܬ ܬܰܪ̈ܥܶܐ ܕܶܐܦܝܣܩܽܘܦܽܘܬܳܐ ܠܳܐ ܓܶܫܦܶܬ̣܆ ܐܳܦܠܳܐ ܥܰܠ ‌ܐܶܣܟܽܘܦܬܳܐ ܣܶܡܟܶܬ ܪܶܓܠܳܐ. ܕܺܝܠܳܗ̇ ܓܶܝܪ ܕܒܰܪ̱ܬ ܩܳܠܳܐ ܗܳܝ ܩܰܕܡܳܝܬܳܐ ܐܰܝܟ ܐ̱ܢܳܫ ܢܺܐܡܰܪ ܗܳܝ ܕܰܡܡܰܠܠܺܝܢܰܢ ܠܘܳܬ ܥܰܡܳܐ܆ ܟܰܕ ܗܳܝ ܕܫܰܝܢܳܐ ܠܟܽܠܟܽܘܢ ܡܰܙܥܩܺܝܢ ܚ̱ܢܰܢ܆ ܟܡܳܐ ܡܶܕܶܡ ܐܺܝܬܰܘܗ̱ܝ ܚܰܝܠܳܗ̇. ܟܡܳܐ ܕܶܝܢ ܦܰܐܝܺܫ ܐ̱ܢܳܐ ܡܶܢܳܗ̇. ܡܰܠܽܘܢ ܕܶܝܢ. ܐܳܦܠܳܐ ܒܚܶܠܡܳܐ ܐܶܬܗܰܓܰܓܬܳܗ̇. ܗܳܠܶܝܢ ܡܰܢ ܓܶܝܪ ܕܟܽܠ ܚܰܕ܆ ܡܫܰܝ̈ܢܶܐ ܡܶܕܶܡ ܐ̱ܢܳܫ̈ܺܝܢ ܙܳܕܶܩ ܠܗܽܘܢ ܕܢܶܗܘܽܘܢ ܐܺܝܬܰܝܗܽܘܢ܆ ܟܰܕ ܡܫܰܝܢܽܘܬܳܐ ܘܢܺܝܚܽܘܬܳܐ ܠܘܳܬ ܩܰܪ̈ܺܝܒܰܝܗܽܘܢ ܡܚܰܘܶܝܢ. ܐܰܝܟ ܗܳܝ ܕܶܐܬܐܰܡܪܰܬ ܡܶܢ ܒܢܰܝ̈ܳܐ ܕܝܰܥܩܘܒ ܠܘܳܬ ܐܰܚܽܘܗܽܘܢ ܝܰܘܣܶܦ܆ ܡܫܰܝ̈ܢܶܐ ܐܺܝܬܰܝܢ܆ ܘܠܳܐ ܐܺܝܬܰܝܗܽܘܢ ܥܰܒ̈ܕܶܐ ܕܺܝܠܳܟ ܓܳܫܽܘ̈ܫܶܐ^[21]܆ ܘܰܐܝܟ ܗܳܝ ܕܡܶܙܕܰܡܪܳܐ ܡܶܢ ܢܒܺܝܳܐ ܕܰܘܺܝܕ܆ ܥܰܡ ܗܳܢܽܘܢ ܕܣܳܢܶܝܢ ܫܰܝܢܳܐ ܐܺܝܬܰܝ ܗ̱ܘܺܝܬ ܡܫܰܝܢܳܐ^[22]. ܘܰܐܝܟ ܗܳܝ ܬܽܘܒ ܕܡܶܢ ܦܰܘܠܽܘܤ ܡܶܬܐܰܡܪܳܐ ܒܡܶܠܟܳܐ ܐܰܘ ܟܺܝܬ ܒܡܰܪܬܝܳܢܽܘܬܳܐ܆ ܒܳܬܰܪ ܫܰܝܢܳܐ ܪܗܰܛܘ ܥܰܡ ܟܽܠܢܳܫ܆ ܘܫܰܝܢܶܗ ܕܰܡܫܺܝܚܳܐ ܢܕܰܝܰܪ ܒܠܶܒܰܘ̈ܳܬܟܽܘܢ^[23].

ܗܰܘ ܕܶܝܢ ܕܰܠܥܺܕܬܳܐ ܕܰܐ‌ܠܳܗܳܐ ܡܰܟܪܶܙ ܫܰܝܢܳܐ܆ ܠܰܘ ܡܫܰܝܢܳܐ ܒܰܠܚܽܘܕ ܐܺܝܬܰܘܗ̱ܝ ܚܰܝܳܒܳܐ ܕܢܶܗܘܶܐ ܐܺܝܬܰܘܗ̱ܝ܆ ܐܶܠܳܐ ܥܳܒܶܕ ܫܰܝܢܳܐ. ܐܰܝܟܰܢܳܐ ܕܢܶܫܟܰܚ ܕܰܒܠܶܒܰܘ̈ܳܬܳܐ ܕܗܳܢܽܘܢ ܕܫܳܡܥܺܝܢ ܠܶܗ܆ ܢܶܥܒܶܕ ܫܰܝܢܳܐ ܘܰܒܗܺܝܠܽܘܬܳܐ ܘܫܰܦܺܝܪܽܘܬ ܩܰܘܡܳܐ ܕܰܙܢܳܐ. ܛܽܘܦܣܳܐ ܓܶܝܪ ܐܰܚܺܝܕ ܕܰܡܫܺܝܚܳܐ܆ ܕܪܺܝܫ ܟܳܗ̈ܢܶܐ ܗܰܘ ܪܰܒܳܐ^[24]܆ ܐܰܝܟ ܡܶܠܬܳܐ ܕܰܡܕܰܒܪܳܢܽܘܬܳܐ܆ ܕܗܰܘ ܡܶܨܥܳܝܳܐ ܕܰܐ‌ܠܳܗܳܐ ܘܕܰܒܢܰܝ̈ܢܳܫܳܐ^[25]܆ ܕܗܰܘ ܕܫܰܝܶܢ ܒܝܰܕ ܕܡܳܐ ܕܰܨܠܺܝܒܶܗ ܐܰܝܟܰܢܳܐ ܕܳܐܡܰܪ ܫܠܺܝܚܳܐ܆ ܐܶܢ ܟܺܝܬ ܠܗܳܠܶܝܢ ܕܥܰܠ ‌ܐܰܪܥܳܐ܆ ܐܶܢ ܟܺܝܬ ܠܗܳܠܶܝܢ ܕܒܰܫܡܰܝܳܐ^[26]. ܘܰܠܗܳܠܶܝܢ ܡܰܢ ܕܥܰܠ ‌ܐܰܪܥܳܐ܆ ܒܝܰܕ ܗܳܠܶܝܢ ܕܠܺܐܝܣܪܳܐܶܝܠ ܠܗܳܢܽܘܢ ܥܰܡܡ̈ܶܐ ܕܫܰܪܟܳܐ ܐܰ‌ܠܘܶܬ܆ ܘܰܚܕܳܐ ܥܺܕܬܳܐ ܡܶܢ ܬܪ̈ܰܝܗܽܘܢ ܥܒܰܕ܆ ܟܰܕ ܫܰܘܝܳܐܺܝܬ ܘܰܒܫܰܘܝܽܘܬ ܐܺܝܩܳܪܳܐ ܩܪܳܐ ܠܗܳܢܽܘܢ ܕܡܶܢ ܬܪ̈ܰܝܗܽܘܢ. ܠܗܳܠܶܝܢ ܕܶܝܢ ܕܒܰܫܡܰܝܳܐ܆ ܒܝܰܕ ܗܳܢܶܝܢ ܕܠܰܐܒܳܐ ܫܡܰܝܳܢܳܐ ܠܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܕܺܐܝܬܰܘܗ̱ܝ ܡܩܰܪܒܳܢܳܐ ܘܰܕܟܺܐܢܳܐܺܝܬ ܐܺܝܬܰܘܗ̱ܝ ܗ̱ܘܳܐ ܣܢܺܝܐܳܐ ܪܰܥܺܝ. ܘܰܠܡܰܠܰܐܟ̈ܶܐ ܢܓܰܕ ܡܶܢ ܫܡܰܝܳܐ ܕܰܡܫܰܒܚܺܝܢ܆ ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[27]. ܡܶܛܽܠ ܗܳܕܶܐ ܟܰܕ ܡܰܘܕܰܥ ܕܗܳܢܽܘܢ ܕܺܐܝܬܰܝܗܽܘܢ ܥܳܒ̈ܕܰܝ ܫܰܝܢܳܐ ܛܶܟܣܳܐ ܕܺܝܠܶܗ ܐܰܚܺܝܕܺܝܢ܆ ܐܳܡܰܪ ܗ̱ܘܳܐ܆ ܛܽܘܒܰܝܗܽܘܢ ܠܥܳܒ̈ܕܰܝ ܫܰܝܢܳܐ ܕܰܒܢܰܝ̈ܳܐ ܕܰܐ‌ܠܳܗܳܐ ܢܶܬܩܪܽܘܢ^[28]. ܐܰܝܟ ܗܰܘ ܕܶܐܡܰܪ ܕܠܺܝ ܢܶܬܕܰܡܽܘܢ.

ܐܰܝܟܰܢܳܐ ܗܳܟܺܝܠ ܥܳܒܶܕ ܫܰܝܢܳܐ ܐܺܝܬܰܝ ܐܶܢܳܐ. ܐܰܝܟܰܢܳܐ ܒܰܐܚܪ̈ܳܢܶܐ ܐܶ݀ܥܒܶܕ ܫܰܝܢܳܐ܆ ܟܰܕ ܠܗܳܢܳܐ ܠܺܝ ܠܢܰܦܫܝ ܠܳܐ ܙܰܡܢܶܬ܆ ܐܳܦܠܐ ܩܢܺܝܬܶܗ ܠܒܰܪܢܳܫܳܐ ܗܰܘ ܕܡܶܢ ܠܒܰܪ ܕܰܡܫܰܝܰܢ ܠܘܳܬ ܗܰܘ ܕܡܶܢ ܠܓܰܘ܆ ܟܰܕ ܒܶܣܪܳܐ ܡܰܢ ܪܳܐܶܓ ܠܽܘܩܒܰܠ ܪܽܘܚܳܐ܆ ܪܽܘܚܳܐ ܕܶܝܢ ܣܺܝܡܳܐ ܡܰܢ ܣܰܩܽܘܒܠܳܐܺܝܬ ܠܽܘܩܒܰܠ ܒܶܣܪܳܐ^[29]܆ ܠܳܐ ܕܶܝܢ ܚܳܣܢܳܐ ܠܶܗ܆ ܐܰܝܟܰܢܳܐ ܟܺܝܬ ܕܒܰܐܫܺܝܕܽܘܬܳܐ ܕܗܰܢܺܝ̈ܐܘܳܬܳܐ ܢܶܬܓܪܰܦ܆ ܘܰܠܘܳܬ ܚܶܡܬܳܐ ܢܶܦܽܘܩ܆ ܘܰܬܚܶܝܬ ܚܰܫ̈ܶܐ ܐܰܚܰܝ̈ܗܽܘܢ ܕܗܳܠܶܝܢ ܢܶܨܛܠܶܐ. ܐܰܝܟܳܐ ܐܺܝܬܰܘܗ̱ܝ ܦܰܛܪܝܪܟܳܐ ܒܗܳܠܶܝܢ. ܐܰܝܟܳܐ ܕܶܝܢ ܪܺܝܫ ܐܶܦܝܣܩܽܘ̈ܦܶܐ. ܒܙܰܒܢܳܗ̇ ܬܶܬܚܰܘܶܐ ܪܺܝܫܳܢܽܘܬܳܐ. ܬܶܫܬܰܠܰܛ ܪܺܝܫܳܢܽܘܬܳܐ ܥܰܠ ܚܰܫ̈ܶܐ ܫܟܺܝܪ̈ܶܐ܆ ܘܠܰܘ ܗܺܝ ܡܶܢ ܗܳܠܶܝܢ ܬܶܬܕܒܰܪ ܥܰܒܕܳܢܳܐܺܝܬ܆ ܐܰܝܟ ܥܰܒܕܳܐ ܗܽܘ ܠܶܗ ܢܶܣܥܽܘܪ܆ ܗܰܘ ܕܠܰܐ̱ܚܪ̈ܳܢܶܐ ܣܳܥܰܪ.

ܚܳܙܶܝܢ ܐܢ̱ܬܽܘܢ ܕܰܟܡܳܐ ܪܰܚܺܝܩܺܝܢܰܢ ܡܶܢ ܟܽܘܢܳܝܳܐ ܕܥܳܒܶܕ ܫܰܝܢܳܐ܆ ܗܰܘ ܐܰܝܢܳܐ ܕܦܰܬܝܳܐ ܡܶܕܶܡ ܐܺܝܬܰܘܗ̱ܝ ܣܰܓܺܝ܆ ܘܕܰܡܠܶܐ ܡܶܢ ܣܽܘܟܴ̈ܠܶܐ ܣܓܺܝ̈ܶܐܐ ܐܰ‌ܠܳܗܳܝ̈ܶܐ܆ ܘܥܰܠ ܕܽܘ̈ܥܬܶܐ ܣܰܓܺܝ̈ܳܐܬܳܐ ܘܰܐܓܽܘ̈ܢܶܐ ܪܰܘܪ̈ܒܶܐ ܣܢܺܝܩ ܠܘܳܬ ܗܳܝ ܕܢܶܬܬܱܪܰܨ܆ ܘܩܰܛܺܝܢܳܐ ܡܶܕܶܡ ܠܡܶܣܬܰܟܠܳܢܽܘܬܳܐ. ܥܳܒܶܕ ܫܰܝܢܳܐ ܓܶܝܪ ܠܰܘ ܒܡܶܠܬܳܐ ܒܰܠܚܽܘܕ܆ ܐܶܠܳܐ ܐܳܦ ܒܕܽܘܒܳܪܳܐ ܐܳܦ ܒܚܰܘܪܳܐ ܐܳܦ ܒܶܐܣܟܺܡܳܐ܆ ܐܳܦ ܒܗܳܝ ܕܢܶܦܪܽܘܫ ܕܰܐܝܢܰܐ ܗ̱ܘ ܫܰܝܢܳܐ ܗܰܘ ܫܰܪܺܝܪܳܐ ܘܰܐܝܢܳܐ ܠܳܐ܆ ܝܳܨܶܦ ܕܢܶܗܘܶܐ ܐܺܝܬܰܘܗ̱ܝ ܠܰܐ̱ܚܪ̈ܳܢܶܐ ܝܳܗܽܘܒܳܐ ܕܫܰܝܢܳܐ܆ ܠܰܘ ܓܶܝܪ ܗܳܝ ܕܰܠܘܳܬ ܟܽܠܢܳܫ ܢܶܗܘܶܐ ܣܺܝܡ ܐ̱ܢܳܫ ܡܫܰܝܢܳܐܺܝܬ܆ ܗܳܕܶܐ ܐܺܝܬܶܝܗ̇ ܕܥܳܒܶܕ ܫܰܝܢܳܐ. ܡܶܢ ܐܰܝܟܳܐ ܘܠܳܐ ܟܽܠ ܟܽܠܶܗ. ܗܳܝ ܓܶܝܪ ܕܠܽܘܩܒܰܠ ܗܰܘ ܕܙܰܢܺܝ ܐܶܢ ܬܶܓܕܰܫ܆ ܠܳܐ ܢܶܬܬܙܺܝܥ ܘܰܢܩܽܘܡ ܥܺܝܪܳܐܺܝܬ ܘܠܳܐ ܡܫܰܝܢܳܐܺܝܬ܆ ܢܥܰܡܶܨ ܕܶܝܢ ܥܰܝ̈ܢܰܝܢ ܘܢܰܗܡܶܐ܆ ܘܰܢܪܰܚܶܡ^[30] ܗܶܢܽܘܢ ܪ̈ܰܚܡܶܐ ܗܳܢܽܘܢ ܡܰܘܒ̈ܕܳܢܰܘܗ̱ܝ ܕܚܰܫܳܐ܆ ܠܰܘ ܕܥܳܒܶܕ ܫܰܝܢܳܐ ܐܺܝܬܶܝܗ̇. ܒܕܰܠܩܽܘܒܠܳܐ ܕܶܝܢ܆ ܕܗܰܘ ܕܰܡܪܰܒܶܐ ܘܡܰܣܓܶܐ ܠܶܗ ܠܰܩܪܳܒܶܗ ܕܚܰܫܳܐ܆ ܘܡܰܫܠܶܡ ܠܶܗ ܠܕܳܘܝܳܐ ܠܰܚܒܳܠܳܐ ܡܫܰܡܠܝܳܐ ܘܠܰܐܒܕܳܢܳܐ. ܗܳܝ ܕܶܝܢ ܕܢܰܟܶܤ ܘܢܶܨܪܰܦ ܒܣܰܡܡ̈ܳܢܶܐ ܪ̈ܳܕܽܘܝܶܐ ܠܗܰܘ ܕܰܢܦܰܠ܆ ܘܰܠܡܶܫܬܰܘܕܥܳܢܽܘܬܳܐ ܢܰܝܬܶܝܘܗ̱ܝ܆ ܘܰܒܗܳܢܳܐ ܙܢܳܐ ܢܶܬܪܰܚܰܡ܆ ܘܰܢܕܰܥܶܟ ܠܫܽܘܠܗܳܒܳܗ̇ ܕܪܶܓܬܳܐ܆ ܘܰܢܦܰܨܶܐ ܘܢܶܦܪܩܺܝܘܗ̱ܝ ܡܶܢ ܫܳܢܝܽܘܬܳܐ܆ ܘܰܢܣܺܝܡ ܒܗܺܝܠܽܘܬܳܐ ܒܢܰܦܫܶܗ܆ ܗܳܕܶܐ ܥܒܳܕܳܐ ܗ̱ܝ ܐܝܟ ܕܒܰܫܪܳܪܳܐ ܕܥܳܒܶܕ ܫܰܝܢܳܐ.

ܟܰܕ ܠܘܳܬ ܗܳܕܶܐ ܬܰܪܥܺܝܬܳܐ ܚܳܐܰܪ ܗ̱ܘܳܐ ܕܰܘܺܝܕ ܡܙܰܡܰܪ ܗ̱ܘܳܐ܆ ܢܶܪܕܶܝܢܝ ܙܰܕܺܝܩܳܐ ܒܪ̈ܰܚܡܶܐ ܘܢܰܟܣܰܢܝ. ܡܶܫܚܳܐ ܕܶܝܢ ܕܚܰܛܳܝ̈ܶܐ ܠܳܐ ܢܰܕܗܶܢ ܠܪܺܝܫܐ ܕܺܝܠܝ^[31]. ܗܳܕܶܐ ܓܶܝܪ ܐܺܝܬܶܝܗ̇ ܪ̈ܰܚܡܶܐ ܘܫܰܝܢܳܐ܆ ܗܳܝ ܕܠܽܘܩܒܰܠ ܚܰܫ̈ܶܐ ܣܰܩܽܘܒܠܳܐܺܝܬ ܬܺܐܬܶܐ ܘܬܶܦܣܽܘܩ ܐܶܢܽܘܢ. ܘܰܠܫܰܒܗܪܳܢܳܐ ܡܰܢ ܘܰܡܫܰܩܠܳܐ܆ ܒܦܽܘܪ̈ܳܣܶܐ ܡܡܰܟ̈ܟܳܢܶܐ ܬܩܰܦܰܚ. ܘܰܒܬܰܪ̈ܥܶܐ ܘܒܰܫܟ̈ܳܚܳܬܳܐ ܡܰܠ̈ܦܳܢܝܳܬܳܐ ܘܚܰܟܺܝ̈ܡܳܬܳܐ ܢܺܝܚܳܐܺܝܬ ܘܠܰܘ ܡܶܢ ܫܶܠܝ܆ ܬܰܪܟܶܢ ܠܰܓܒܺܝܢܶܗ ܪܳܡܳܐ. ܠܥܳܠܽܘܒܳܐ ܕܶܝܢ܆ ܕܠܰܘ ܡܶܚܕܳܐ ܒܰܚܕܳܐ ܙܒܰܢ ܡܰܢ ܬܶܪܕܶܐ ܘܬܰܠܦܺܝܘܗ̱ܝ ܡܣܰܪܩܽܘܬܳܐ. ܠܽܘܩܕܰܡ ܕܶܝܢ܆ ܡܶܛܽܠ ܦܽܘܪ̈ܳܣܶܐ ܘܝܽܘܬܪ̈ܳܢܶܐ ܟܺܐܢ̈ܶܐ ܬܡܰܠܶܠ ܠܶܗ. ܘܡܶܢ ܒܳܬܰܪܟܶܢ ܬܬܽܘܦ ܘܬܶܡܬܽܘܩ ܡܶܢܶܗ ܠܗܽܘܠܶܐ ܗܳܝ ܕܚܰܫܶܗ܆ ܘܬܰܪܬܽܘܗ̱ܝ ܡܫܰܘܬܦܽܘܬܳܐ ܗܳܝ ܕܒܰܣܢܺܝ̈ܩܶܐ܆ ܘܰܬܨܰܠܶܦ ܬܚܰܘܶܐ ܠܶܗ ܝܽܘܬܪܳܢܳܐ ܗܰܘ ܪܽܘܚܳܢܳܝܳܐ܆ ܡܰܠܟܽܘܬܳܐ ܗܳܝ ܕܰܫܡܰܝܳܐ. ܗܳܝ ܕܶܝܢ ܕܫܽܘܠܛܳܢܳܐ ܬܶܬܶܠ ܠܗܽܘܢ ܠܚܰܫ̈ܶܐ܆ ܘܥܰܠ ܟܽܠܗܽܘܢ ܬܶܫܬܽܘܩ܆ ܐܰܝܟܰܢܳܐ ܕܗܽܘ ܒܶܗ ܢܚܰܦܶܐ ܐܶܢܽܘܢ ܐ̱ܢܳܫ܆ ܕܫܰܝܢܳܐ ܣܰܩܽܘܒܠܳܝܳܐ ܐܺܝܬܶܝܗ̇܆ ܗܰܘ ܕܠܳܐ ܝܳܕܰܥ^[32] ܠܰܐܠܳܗܳܐ. ܕܗܰܘ ܕܺܐܝܬܰܘܗ̱ܝ ܐܶܡܳܐ ܕܰܩܪܳܒܳܐ ܘܰܕܡܰܨܽܘܬܳܐ. ܗܰܘ ܕܰܕܠܳܐ ܦܽܘܪܣܐ ܗ̱ܝ ܗܳܝ ܕܠܳܐ ܢܶܬܦܰܠܰܓ܆ ܘܗܽܘ ܒܶܗ ܢܶܬܬܩܶܠ ܒܰܙܢܳܐ ܡܶܕܶܡ. ܐܳܦ ܓܶܝܪ ܐܳܦ ܠܳܐ ܩܒܺܝܥܳܐ ܐܺܝܬܰܘܗ̱ܝ܆ ܗܰܘ ܡܳܐ ܕܠܳܐ ܐܺܝܬ ܠܶܗ ܥܶܠ̈ܠܳܬܳܐ ܡܶܢ ܐܰ‌ܠܳܗܳܐ. ܟܰܕ ܠܽܘܩܒܰܠ ܗܳܢܳܐ ܫܰܝܢܳܐ ܡܶܙܕܰܝܰܢ ܗ̱ܘܐ ܕܰܘܺܝܕ ܐܳܡܰܪ ܗ̱ܘܳܐ܆ ܕܛܶܢܶܬ̣ ܒܠܳܐ ܢܳܡܽܘܣܳܝ̈ܶܐ܆ ܟܰܕ ܫܰܝܢܳܐ ܕܚܰܛܳܝ̈ܶܐ ܚܳܙܶܐ ܗ̱ܘܺܝܬ^[33]. ܠܗܳܕܐ ܐܳܦ ܡܶܠܰܘܗ̱ܝ ܕܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܡܰܝܬܶܝܢ ܕܶܐܡܰܪ܆ ܫܰܝܢܳܐ ܫܳܒܶܩ ܐ̱ܢܳܐ ܠܟܽܘܢ܆ ܫܰܝܢܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ܆ ܠܰܘ ܐܰܝܟܰܢܳܐ ܕܥܳܠܡܳܐ ܝܳܗܶܒ܆ ܐܶܢܳܐ ܝܳܗܶܒ ܐ̱ܢܳܐ ܠܟܽܘܢ^[34].

ܙܳܕܶܩ ܠܶܗ ܕܶܝܢ ܠܥܳܒܶܕ ܫܰܝܢܳܐ܆ ܐܳܦ ܕܶܐܣܟܺܡܳܐ ܢܶܗܘܶܐ ܐܺܝܬ ܠܶܗ ܕܠܳܚܶܡ ܠܰܥ̈ܒܳܕܶܐ. ܣܳܦܶܩ ܗ̱ܘ̣ ܓܶܝܪ ܗܽܘ ܡܰܣܰܒ ܒܰܐܦ̈ܶܐ ܐܰܘܟܺܝܬ ܡܨܰܕܝܳܢܽܘܬܳܐ܆ ܕܶܐܣܟܺܡܳܐ ܕܰܓܳܠܳܐ ܕܰܩܪܳܒܳܐ ܬܨܽܘܒ ܒܢܰܦ̈ܫܳܬܳܐ ܕܗܳܢܽܘܢ ܕܚܳܙܶܝܢ܆ ܘܬܶܡܚܶܐ ܒܟܶܫܠܳܐ܆ ܘܠܰܚܒܳܪܐ ܬܰܘܒܶܠ. ܐܶܡܰܬܝ ܓܶܝܪ ܐܳܘ ܗܳܢܳܐ܆ ܕܰܒܡܳܐܢ̈ܶܐ ܡܰܢ ܐܽܘܟܳܡ̈ܶܐ ܡܚܰܘܶܐ ܐܰܢ̱ܬ ܐܶܣܟܺܡܳܐ ܕܰܓܳܠܳܐ ܕܫܰܦܺܝܪܽܘܬ ܕܶܚܠܬܳܐ܆ ܘܰܠܣܰܥܪܳܐ ܕܕܰܩܢܳܟ ܡܥܰܒܶܛ ܐܰܢ̱ܬ܆ ܠܰܓܒܺܝ̈ܢܰܝܟ ܕܶܝܢ ܡܰܪܟܶܢ ܐܰܢ̱ܬ ܘܒܰܐܪܥܳܐ ܚܳܐܰܪ ܐܰܢ̱ܬ܆ ܟܰܕ ܡܶܣܬܰܟܰܡ ܐܰܢ̱ܬ ܟܡܺܝܪܽܘܬܳܐ ܗܳܝ ܕܠܳܐ ܐܺܝܬܶܝܗ̇܆ ܠܢܽܘܟܪ̈ܳܝܳܬܳܐ ܕܶܝܢ ܪܳܐܶܓ ܐܰܢ̱ܬ܆ ܟܰܕ ܐܺܝܬܰܝܟ ܚܰܪܺܝܦܳܐ ܠܘܳܬ ܚܛܽܘܦܝܳܐ ܕܗܳܠܶܝܢ ܝܰܬܺܝܪ ܡܶܢ ܕܺܐܒ̈ܶܐ ܕܰܐܪܰܒܺܝܰܐ^[35] ܗܳܝ ܕܳܐܡܪܳܐ ܡܶܠܬܳܐ ܢܒܺܝ̣ܳܝ̣ܬܳܐ܆ ܐܺܝܬ ܠܳܟ ܕܶܝܢ ܝܰܥܢܳܐܺܝܬ ܠܘܳܬ ܟܽܘܢܳܫܳܐ ܕܟܶܣܦܳܐ܆ ܐܰܝܢܳܐ ܫܰܝܢܳܐ ܬܶܬܶܠ ܠܗܳܢܽܘܢ ܕܺܐܝܬܰܝܟ ܠܗܽܘܢ ܪܺܝܫܳܐ. ܐܰܝܢܳܐ ܕܶܝܢ ܩܪܳܒܐ ܠܳܐ ܪܳܡܶܐ ܐܰܢ̱ܬ ܒܗܽܘܢ.

ܕܺܝܠܳܝܬܳܐ ܕܶܝܢ ܕܥܳܒܶܕ ܫܰܝܢܳܐ ܐܺܝܬܶܝܗ̇܆ ܕܠܰܘ ܒܰܠܚܽܘܕ ܗܳܢܶܝܢ ܕܰܠܘܳܬ ܡܰܠܦܳܢܽܘܬܳܐ ܕܡܰܪܬܝܳܢܽܘܬܳܐ ܕܡܶܛܽܠ ܕܽܘܒܳܪܳܐ ܚܳܝܪ̈ܳܢ܆ ܫܰܠܡܳܐܺܝܬ ܘܠܳܚܡܳܐܺܝܬ ܢܶܬܦܰܪܰܤ ܘܢܰܠܶܦ܆ ܐܶܠܳܐ ܐܳܦ ܗܳܝ ܕܰܠܗܳܠܶܝܢ ܕܡܶܣܬܰܒܪ̈ܳܢ ܕܢܳܒ̈ܥܳܢ ܟܽܠܫܳܥ ܣܰܩܽܘܒ̈ܠܳܝܳܬܳܐ ܒܰܟ̈ܬܳܒܶܐ ܟܳܗ̈ܢܳܝܶܐ܆ ܣܰܟܽܘܠܬܳܢܳܐܺܝܬ ܘܰܡܠܰܚܡܳܐܺܝܬ ܢܶܫܪܶܐ܆ ܘܢܰܠܘܶܬ ܗܳܠܶܝܢ ܕܕܺܝܰܬܺܝܩܺܐ ܥܰܬܺܝܩܬܳܐ ܠܘܳܬ ܗܳܠܶܝܢ ܚ̈ܰܕܳܬ̣ܳܬ̣ܳܐ܆ ܒܰܕܡܽܘܬ ܡܶܢ̈ܶܐ ܡܫܰܚ̈ܠܦܳܬܳܐ ܕܚܰܕ ܩܺܝܬܳܪܳܐ܆ ܕܰܚܕܳܐ ܩܺܝܢܬܳܐ ܫܰܦܺܝܪܰܬ ܪ̈ܶܟܢܶܐ ܡܫܰܡ̈ܠܝܳܢ܆ ܘܰܡܚܰܘ̈ܝܳܢ ܕܚܰܕ ܐܺܝܬܰܘܗ̱ܝ ܐܰ‌ܠܳܗܳܐ ܗܰܘ ܕܬܰܪ̈ܬܰܝܗܶܝܢ ܕܺܝܰܐܬܺܝܩ̈ܰܐܤ܆ ܘܣܳܟܪ̈ܳܢ ܠܦܽܘܡܳܐ ܕܠܳܐ ܐܰ‌ܠܳܗ ܕܡܰܪܩܝܘܢ܆ ܘܰܕܡܰܐܢܺܝ ܗܰܘ ܕܳܘܝܳܐ ܐܰܒܽܘܗܽܘܢ ܕܡܰܢܺܝ̈ܢܳܝܶܐ. ܐܶܠܳܐ ܟܺܝܬ ܐܳܦ ܗܳܝ ܕܰܠܗܶܪ̈ܣܝܤ ܗܳܠܶܝܢ ܣܰܩܽܘܒ̈ܠܳܝܳܬܳܐ ܘܒܰܥ̈ܠܳܬ ܕܰܐܪ̈ܶܐ ܕܠܽܘܩܒܰܠ ܚ̈ܕܳܕܶܐ܆ ܕܡܶܢ ܟܽܠ ܚܰܕ ܡܶܢ ܓܰܒ̈ܶܐ ܡܶܣ̈ܬܰܕܩܳܢ ܘܡܶܢ ܚ̈ܕܳܕܶܐ ܢܳܘܪ̈ܳܢ ܒܬܰܪ̈ܥܝܳܬܳܐ ܫܩܺܝ̈ܦܳܬܳܐ܆ ܕܰܐܝܟ ܐܰܝܟܰܢ܆ ܠܗܳܝ ܕܣܰܐܒܠܝܘܤ ܘܰܠܗܳܝ ܕܰܐܪܺܝܽܘܤ܆ ܘܰܠܗܳܝ ܕܽܐܘܛܘܟܐ ܘܰܠܗܳܝ ܕܢܶܣܛܽܘܪܺܝܽܘܤ܆ ܒܡ̈ܶܠܶܐ ܕܰܫܪܳܪܳܐ ܐܰܝܟ ܕܒܺܐܝ̈ܕܰܝܳܐ ܢܬܽܘܦ ܘܢܶܓܰܕ ܐܶܢܶܝܢ ܡܶܟܳܐ ܘܡܶܟܳܐ܆ ܘܰܠܘܳܬ ܐܽܘܪܚܳܐ ܡܶܨܥܳܝܬܳܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܢܰܝܬܶܐ ܐܶܢܶܝܢ܆ ܗܳܝ ܕܡܶܢܳܗ̇ ܗܳܠܶܝܢ ܟܰܕ ܡܣܰܡܶܝܢ ܗ̱ܘܰܘ ܫܪܰܥܘ ܘܰܢܦܰܠܘ܆ ܥܒܳܕܳܐ ܗ̱ܝ ܕܥܳܒܶܕ ܫܰܝܢܳܐ܆ ܘܰܕܗܰܘ ܕܝܳܕܰܥ ܕܢܰܠܘܶܬ ܚܰܟܺܝܡܳܐܺܝܬ ܠܗܳܢܶܝܢ ܕܰܣܕܺܝ̈ܩܳܢ. ܢܶܒܗܰܬ ܡܰܢ ܓܶܝܪ ܣܐܒܠܝܘܤ ܡܶܢ ܚܕܳܐ ܐܽܘܣܺܝܰܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܘܰܣܪܺܝܩܳܐܺܝܬ ܢܶܬܥܰܠܰܠ ܘܢܰܪܫܶܐ ܦܣܳܩܳܐ ܕܰܐ‌ܠܳܗܽܘܬܳܐ ܗܰܘ ܕܠܳܐ ܐܺܝܬܰܘܗ̱ܝ. ܢܶܬܚܰܡܰܨ ܕܶܝܢ ܐܪܺܝܽܘܤ ܡܶܢ ܦܽܘܪܳܫܳܐ ܫܰܦܺܝܪܳܐ ܕܰܬܠܳܬܳܐ ܩܢܽܘܡ̈ܶܐ܆ ܘܡܶܛܽܠ ܗܳܝ ܕܰܚܕܳܐ ܘܗ̱ܝ ܟܰܕ ܗܺܝ ܕܽܐܘܣܺܝܰܐ܆ ܠܳܐ ܢܰܪܫܶܐ ܒܽܘܠܒܳܠܳܐ. ܐܽܘܛܘܟܐ ܕܶܝܢ܆ ܢܶܫܕܶܝܗ̇ ܠܦܰܢܛܰܣܺܝܰܐ܆ ܟܰܕ ܚܳܙܶܐ ܕܡܶܬܬܰܘܕܶܐ ܚܰܕ ܟܝܳܢܳܐ ܕܰܐ‌ܠܳܗܳܐ ܡܶܠܬܳܐ ܕܰܡܒܰܣܰܪ ܒܶܣܪܳܐ ܫܘܶܐ ܒܽܐܘܣܺܝܰܐ ܠܰܢ܆ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ܆ ܘܠܳܐ ܡܶܬܦܰܠܰܓ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܕܡܶܢ ܒܳܬܰܪ ܚܕܳܝܽܘܬܳܐ. ܢܶܬܩܰܪܰܒ ܕܶܝܢ ܘܢܶܬܚܰܝܕ ܠܥܺܕܬܳܐ܆ ܐܳܦ ܗܰܘ ܕܰܒܚܽܘܟܳܡ̈ܶܐ ܢܕܺܝ̈ܕܶܐ ܕܢܶܣܛܽܘܪܺܝܽܘܤ ܡܰܕܚܶܠܘܫ݀ܢܝ. ܟܰܕ ܚܳܙܶܐ ܠܰܐܠܳܗܳܐ ܕܚܰܫ ܒܗܰܘ ܡܳܐ ܕܰܡܟܳܢ ܗ̱ܘܐ ܕܢܶܚܰܫ܆ ܝܺܕܺܝܥܳܐ ܕܶܝܢ ܕܰܒܒܶܣܪܳܐ܆ ܘܩܰܘܺܝ ܗܽܘ ܟܰܕ ܗܽܘ ܠܳܐ ܚܳܫܽܘܫܳܐ. ܗܳܠܶܝܢ ܫܽܘܘ̈ܕܳܥܶܐ ܕܥܳܒ̈ܕܰܝ ܫܰܝܢܳܐ ܐܺܝܬܰܝܗܽܘܢ. ܗܳܝ ܓܶܝܪ ܕܢܰܚܪܶܡ ܒܰܠܚܽܘܕ ܠܳܐ ܡܠܺܝܠܳܐܺܝܬ ܡܶܢ ܠܳܐ ܝܰܠܺܝܦܽܘܬܳܐ ܘܩܽܘܪܝ̣ܳܝ̣ܽܘܬܐ܆ ܘܳܐܪܬܘܕܘܟܣܳܝܐ ܢܶܩܥܶܐ ܘܰܢܛܰܒܶܒ ܒܪܽܘܪܳܒ ܡ̈ܶܠܶܐ܆ ܘܰܛܪܽܘܢܳܐܺܝܬ ܐܰܝܟ ܕܡܶܢ ܚܶܣܢܳܐ ܕܰܡܕܺܝܢ̱ܬܳܐ ܢܡܰܠܶܠ܆ ܘܒܦܽܘܪܩܳܢܳܐ ܕܗܳܢܽܘܢ ܐ̱ܚܪ̈ܳܢܶܐ ܢܶܒܣܶܐ܆ ܘܠܳܐ ܢܰܘܫܶܛ ܐܺܝܕܳܐ ܠܗܳܢܽܘܢ ܕܛܳܥܶܝܢ܆ ܠܰܘ ܕܥܳܒ̈ܕܰܝ ܫܰܝܢܳܐ ܐܺܝܬܶܝܗ̇.

ܟܰܕ ܡܶܢ ܗܳܠܶܝܢ ܕܶܝܢ ܟܽܠܗܶܝܢ ܛܳܒ̈ܳܬܳܐ ܕܶܐܬܡ̈ܢܺܝ̣ܶܝ̣ܢ܆ ܗܳܢܶܝܢ ܕܙܳܕܶܩ ܕܢܶܗܘ̈ܝܳܢ ܫܟܺܝ̈ܚܳܢ ܠܗܳܢܽܘܢ ܕܰܠܘܳܬ ܒܶܝܬ ܬܰܪ̈ܥܶܐ ܕܶܐܦܝܣܩܽܘܦܽܘܬܳܐ ܩܳܝܡܺܝܢ܆ ܐܺܝܬܰܝ ܐܶܢܳܐ ܥܰܪܛܶܠܳܝܳܐ܆ ܡܶܬܟܰܫܰܦ ܐ̱ܢܳܐ ܠܟܽܠܟܽܘܢ܆ ܘܰܡܦܺܝܤ ܐ̱ܢܳܐ ܕܬܰܘܙܦܽܘܢܳܢܝ ܕܶܡ̈ܥܶܐ. ܨ̈ܠܰܘܳܬܳܐ. ܐܰܝܟܰܢܳܐ ܕܠܳܐ ܡܶܠܬܳܐ ܕܚܽܘܣܪܳܢܳܐ ܕܟܽܠܢܳܫ ܐܶ݀ܬܬܒܰܥ ܕܰܐܪܡܶܐ ܐܰܘܟܺܝܬ ܕܶܐ݀ܥܒܶܕ܆ ܘܰܐܝܟܰܢܳܐ ܕܶܐܡܰܬܝ ܕܗܽܘ ܘܰܡܫܰܘܚܪܳܐܺܝܬ܆ ܐܶܚܽܘܪ ܠܘܳܬ ܬܝܳܒܽܘܬܳܐ ܘܰܠܘܳܬ ܫܽܘܚܠܳܦܳܐ ܡܝܰܬܪܳܐ. ܡܶܛܽܠ ܗܳܕܶܐ ܓܶܝܪ ܠܘܳܬ ܟܽܠܟܽܘܢ ܒܗܳܠܶܝܢ ܕܶܐܬܶܐܡܰܪ̈ܝ̱ ܡܫܰܚܠܦܳܐܺܝܬ ܐܶܬܚܰܫܚܶܬ܆ ܡܶܛܽܠ ܟܺܝܬ ܕܰܥܠܰܝ ܣܺܝܡ ܩܺܝܢܕܽܘܢܽܘܤ ܕܗܳܠܶܝܢ܆ ܕܟܽܠܟܽܘܢ. ܟܰܕ ܓܶܝܪ ܗܳܕܶܐ ܥܳܒܕܺܝܢ ܐܢ̱ܬܽܘܢ܆ ܐܰܓܪܳܐ ܗܰܘ ܕܡܶܢ ܠܥܶܠ ܬܶܣܒܽܘܢ܆ ܘܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܪܽܘܚܳܐ ܩܰܕܺܝܫܳܐ ܘܛܳܒܳܐ ܘܡܰܥܒܶܕ ܚܰܝ̈ܶܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܡ ܡܐܡܪܐ ܕܬܫܥܝܢ ܘܬܫܥܐ.

ܕܚܰܝܳܒ[1]

ܡܙܡܘܪ̈ܐ. 113: 8  ܐܦ ܐ. ܫܡܘܐܝܠ. 2: 8[2]

ܐܪܡܝܐ. 8: 20 ـ 21 [3]

ܩܘܠܣ̈ܝܐ. 3: 5 [4]

ܐ. ܛܝܡܬܐܘܣ. 3: 1 [5]

ܐ. ܛܝܡܬܐܘܣ. 6: 18 [6]

ܥܒܪ̈ܝܐ. 5: 4 [7]

ܡܦܩܢܐ. 4: 13[8]

ܐ. ܩܘܪ̈ܝܢܬܝܐ. 9: 26 [9]

ܡܬܝ. 7: 26 ـ 27 [10]

ܬܫܒ̈ܚܬ ܬܫܒ̈ܚܳܬܐ. 1: 16 [11]

ܛܛܘܣ. 2: 7 [12]

ܐ. ܩܘܪ̈ܝܢܬܝܐ. 9: 22[13]

[14]ܕܝܐܪ̈ܝܐ ܐܺܝܬܰܝܗܶܝܢ܆ ܡܰܘܗ̈ܒܳܬܳܐ ܗܳܠܶܝܢ ܕܫܳܩܠܺܝܢ ܩܠܺܝܪ̈ܺܝܩܽܘ. ܡܶܢ ܩܽܘܢܽܘܢ ܕܥܺܕܬܳܐ.

ܡܙܡܘܪ̈ܐ. 65: 5 ـ 6 [15]

ܣܶܦܪܐ ܕܡܢܝܢܐ. 8: 1 ـ 3 [16]

ܐܦܣ̈ܝܐ. 4: 16[17]

ܐܦܣ̈ܝܐ. 4: 4 [18]

ܡܬܝ. 6: 3 [19]

ܐ. ܩܘܪ̈ܝܢܬܝܐ. 5: 4[20]

ܣܶܦܪܐ ܕܒܪܝܬܐ. 42: 11 [21]

ܡܙܡܘܪ̈ܐ. 119: 6 [22]

ܥܒܪ̈ܝܐ. 12: 14  ܐܦ ܩܘܠܣ̈ܝܐ. 3: 15 [23]

ܥܒܪ̈ܝܐ. 4: 14 [24]

ܐ. ܛܝܡܬܐܘܣ. 2: 5 [25]

ܩܘܠܣ̈ܝܐ. 1: 20 [26]

ܠܘܩܐ. 2: 14 [27]

ܡܬܝ. 5: 9 [28]

ܓܠܛܝ̈ܐ. 5: 17[29]

[30]ܦܶܬܓܳܡܳܐ ܗܰܘ ܕܳܐܡܰܪ: ܘܢܶܪܚܡܽܘܢ ܗܶܢܽܘܢ ܪ̈ܚܡܐ ܗܢܘܢ ܡܰܘܒ̈ܕܳܢܰܘܗܝ ܕܚܰܫܳܐ. ܠܗܰܘ ܠܐ ܟܳܦܽܘܪܳܐ ܕܺܐܝܬ ܩܕܳܡ ܗܘ ܢܶܬܬܙܺܝܥ܆ ܢܳܩܶܦ ܒܚܰܝܠܳܐ ܕܣܽܘܟܳܠܳܐ. ܘܰܐܝܟܰܢܳܐ ܕܬܶܕܰܥ ܠܗܳܝ ܕܡܶܬܐܰܡܪܳܐ܆ ܗܳܐ ܣܳܐܶܡ ܐ̱ܢܳܐ ܠܶܗ ܠܳܟ ܐܰܝܟ ܚܰܝܠܳܐ ܕܣܘܟܳܠܐ܀ ܗܳܝ ܓܶܝܪ ܕܠܽܘܩܒܰܠ ܗܰܘ ܕܙܰܢܺܝ ܠܐ ܢܶܬܬܙܺܝܥ ܘܰܢܩܽܘܡ: ܘܢܪܚܡ ܗܶܢܽܘܢ ܪ̈ܚܡܐ ܗܳܢܽܘܢ ܡܰܘܒ̈ܕܳܢܰܘܗܝ ܕܚܰܫܳܐ܆ ܠܰܘ ܕܥܳܒܶܕ ܫܰܝܢܳܐ ܐܺܝܬܶܝܗ̇.

ܡܙܡܘܪ̈ܐ. 140: 5 [31]

ܕܛܳܥܶܐ[32]

ܡܙܡܘܪ̈ܐ. 73: 3 [33]

ܝܘܚܢܢ. 14: 27 [34]

ܚܒܩܘܩ. 1: 8[35]