ܡܺܐܡܪܳܐ ܕܬܶܫܥܺܝܢ ܘܰܬܡܳܢܝܳܐ

ܥܰܠ ܢܒܺܝܽܘܬܐ ܗܳܝ ܕܶܐܬܬܰܝܬܝܰܬ ܡܶܢ ܡܰܬܰܝ ܕܶܐܫܰܥܝܳܐ ܢܒܺܝܳܐ܆ ܗܳܐ ܥܰܒܕܝ ܗܰܘ ܕܶܐܨܛܰܒܝܰܬ ܒܶܗ ܢܰܦܫܝ^[1]܆ ܘܗܳܠܶܝܢ ܕܫܰܪܟܳܐ ܕܡܶܢ ܒܳܬܰܪܟܶܢ܆ ܘܥܰܠ ܗܳܝ ܕܶܐܬܐܰܡܪܰܬ ܡܶܢ ܦܳܪܽܘܩܰܢ܆ ܕܟܽܠ ܚܛܺܝܬܳܐ ܘܓܽܘܕܳܦܳܐ ܢܶܫܬܰܒܩܽܘܢ ܠܰܒܢܰܝ̈ܢܳܫܳܐ܆ ܓܽܘܕܳܦܳܐ ܕܶܝܢ ܗܰܘ ܕܥܰܠ ܪܽܘܚܳܐ ܩܰܕܺܝܫܳܐ ܠܳܐ ܢܶܫܬܒܶܩ܆ ܘܗܰܘ ܕܶܐܢ ܢܺܐܡܰܪ ܡܶܠܬܳܐ ܥܰܠ ܒܪܶܗ ܕܐ̱ܢܳܫܳܐ ܢܶܫܬܒܶܩ ܠܶܗ܆ ܗܰܘ ܕܶܝܢ ܕܢܺܐܡܰܪ ܥܰܠ ܪܽܘܚܳܐ ܩܰܕܺܝܫܳܐ ܠܳܐ ܢܶܫܬܒܶܩ ܠܶܗ܆ ܘܠܳܐ ܒܗܳܢܳܐ ܥܳܠܡܳܐ ܘܠܳܐ ܒܗܰܘ ܕܰܥܬܺܝܕ^[2].

98: ܡܶܛܽܠ ܟܺܝܬ ܕܝܰܠܶܦܬܟܽܘܢ ܕܠܰܘ ܡܫܳܟ̣ܳܐܺܝܬ܆ ܐܶܠܳܐ ܐܳܦ ܣܰܓܺܝ ܝܰܨܺܝܦܳܐܺܝܬ ܫܳܡܥܺܝܢ ܐܢ̱ܬܽܘܢ ܠܰܟܬܳܒܳܐ ܐܰ‌ܠܳܗܳܝܳܐ܆ ܘܝܰܬܺܝܪܳܐܺܝܬ ܠܗܰܘ ܕܶܐܘܰܢܓ̈ܶܠܺܝܰܐ ܩܰܕܺܝ̈ܫܶܐ܆ ܘܠܰܘ ܒܰܠܚܽܘܕ ܒܶܐܕܢ̈ܶܐ ܗܳܢܶܝܢ ܕܦܰܓܪܳܐ ܐܶܠܳܐ ܐܳܦ ܒܗܳܠܶܝܢ ܕܠܶܒܳܐ܆ ܐܰܝܟܰܢܳܐ ܕܠܰܘ ܠܡܶܬܰܐܡܪܳܢܽܘܬܳܐ ܕܡܶܢ ܠܒܰܪ ܕܺܝܠܗܶܝܢ ܕܡ̈ܶܠܶܐ ܠܳܐ ܡܒܰܚܢܳܢܳܐܺܝܬ ܬܩܰܒܠܽܘܢ܆ ܐܶܠܳܐ ܕܰܬܥܰܩܒܽܘܢ ܐܳܦ ܠܗܰܘܢܳܐ ܗܰܘ ܕܣܺܝܡ ܒܗܶܝܢ܆ ܝܳܕܥܳܐ ܓܶܝܪ ܝܳܕܥܳܐ ܡܰܠܦܳܢܽܘܬܳܐ ܕܪܽܘܚܳܐ ܠܗܳܢܽܘܢ ܕܗܳܟܰܢܳܐ ܫܳܡܥܺܝܢ܆ ܘܒܳܥܝܳܐ ܠܶܐܕܢ̈ܶܐ ܕܕܰܐܝܟ ܗܳܠܶܝܢ ܘܰܡܩܰܠܣܳܐ ܟܰܕ ܐܳܡܪܳܐ܆ ܠܶܒܳܐ ܕܚܰܟܺܝ̈ܡܶܐ ܩܳܢܶܐ ܡܰܪܓܫܳܢܽܘܬܳܐ܆ ܐܶܕܢ̈ܶܐ ܕܶܝܢ ܕܚܰܟܺܝ̈ܡܶܐ ܒܳܥܶܝܢ ܣܽܘ̈ܟܳܠܶܐ^[3]܆ ܒܳܥܶܐ ܐ̱ܢܳܐ ܗܳܫܐ ܕܠܰܡܨܰܥܬܳܐ ܐܰ݀ܝܬܶܐ܆ ܗܳܠܶܝܢ ܕܡܶܢ ܩܕܺܝܡ ܐܶܬܦܰܫܰܟ ܠ̱ܐܢܳܫܺܝ̈ܢ ܡܶܢ ܩܶܪܝܳܢܳܐ܆ ܘܰܒܫܽܘܐܴܠܳܐ ܐܶܬܡ̈ܬܰܚܶܝܢ ܠܘܳܬܝ܆ ܘܰܕܝܰܬܺܝܪ ܚܰܪ̈ܺܝܦܶܐ ܡܩܺܝ̈ܡܳܢ ܠܟܽܘܢ܆ ܠܘܳܬ ܫܶܡܥܳܐ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ. ܫܰܦܺܝܪܳܐ ܓܶܝܪ ܕܓܰܘܳܢܳܝܳܐ ܢܶܗܘܶܐ ܐܺܝܬܰܘܗ̱ܝ ܐܳܦ ܝܽܘܬܪܳܢܳܐ ܗܰܘ ܕܡܶܢ ܗܳܪܟܳܐ܆ ܠܗܳܢܽܘܢ ܕܡܶܢ ܚܰܕ ܠܰܚܡܳܐ ܘܡܶܢ ܚܰܕ ܟܳܣܳܐ ܡܶܫܬܰܘܬܦܺܝܢ܆ ܡܶܛܽܠ ܟܺܝܬ ܕܳܐܦ ܚܰܕ ܦܰܓܪܳܐ ܐܺܝܬܰܝܢ ܟܽܠܰܢ܆ ܗܳܢܽܘܢ ܕܺܐܝܬܰܝܢ ܕܰܡܫܺܝܚܳܐ^[4].

ܕܡܳܢܳܐ ܗܳܟܺܝܠ ‌ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܕܶܐܬܦܰܫ̈ܟܶܝܢ ܙܳܕܶܩ ܠܡܺܐܡܰܪ.

ܡܰܬܰܝ ܐܶܡܰܪ ܒܗܳܠܶܝܢ ܕܗܳܝܕܶܝܢ ܐܶܬܩܪ̈ܝ̣ܶܝ̣ܢ܆ ܘܰܢܩܶܦܘ ܒܳܬܪܶܗ ܟܶܢ̈ܫܶܐ ܣܰܓܺܝ̈ܶܐܐ܆ ܘܰܐܣܺܝ ܐܶܢܽܘܢ ܠܟܽܠܗܽܘܢ ܘܰܟܐܳܐ ܒܗܽܘܢ ܕܠܳܐ ܓܰܠܝܳܐ ܢܶܥܒܕܽܘܢܳܝܗ̱ܝ ܆ ܐܰܝܟܰܢܳܐ ܕܬܶܬܡܰܠܶܐ ܗܳܝ ܕܶܐܬܐܰܡܪܰܬ ܒܝܕ ܐܶܫܰܥܝܳܐ ܢܒܺܝܳܐ ܕܳܐܡܰܪ܆ ܗܳܐ ܥܰܒܕܝ ܗܰܘ ܕܰܨܒܺܝܬ ܒܶܗ܆ ܚܰܒܺܝܒܳܐ ܕܺܝܠܝ ܗܰܘ ܕܶܐܨܛܰܒܝܰܬ ܒܶܗ ܢܰܦܫܝ܆ ܐܶ݀ܣܺܝܡ ܪܽܘܚܳܐ ܕܺܝܠܝ ܥܠܰܘܗ̱ܝ܆ ܘܕܺܝܢܳܐ ܠܥܰܡܡ̈ܶܐ ܢܰܘܕܰܥ܆ ܠܳܐ ܢܶܬܚܪܶܐ ܘܠܳܐ ܢܶܩܥܶܐ܆ ܘܳܐܦܠܳܐ ܢܶܫܡܰܥ ܐ̱ܢܳܫ ܩܳܠܶܗ ܒܫܽܘ̈ܩܶܐ܆ ܩܰܢܝܳܐ ܪܥܺܝܥܳܐ ܠܳܐ ܢܶܬܒܽܘܪ܆ ܘܟܶܬܳܢܳܐ ܕܡܶܫܬܰܩܰܠ ܒܕܶܠܩܶܗ ܠܳܐ ܢܰܕܥܶܟ܆ ܥܕܰܡܳܐ ܕܢܰܦܶܩ ܕܺܝܢܳܐ ܠܙܳܟܽܘܬܳܐ܆ ܘܒܰܫܡܶܗ ܥܰܡܡ̈ܶܐ ܢܣܰܒܪܽܘܢ^[5].

ܘܰܕܗܳܝ ܡܰܢ ܕܗܳܐ ܥܰܒܕܝ ܗܰܘ ܕܰܨܒܺܝܬ̣ ܒܶܗ܆ ܗܳܢܰܘ ܕܶܝܢ ܕܰܓܒܺܝܬ̣ܶܗ܆ ܘܰܐܝܟ ܕܡܶܢ ܦܰܪܨܽܘܦܳܐ ܕܰܐ‌ܠܳܗܳܐ ܘܰܐܒܳܐ ܠܘܳܬ ܒܪܳܐ ܐܰܡܺܝܪܳܐ܆ ܘܗ̱ܝ ܕܰܒܗܰܘ ܕܶܐܨܛܰܒܝܰܬ ܒܶܗ ܢܰܦܫܝ܆ ܘܗ̱ܝ ܕܶܐ݀ܣܺܝܡ ܪܽܘܚܳܐ ܕܺܝܠܝ ܥܠܰܘܗ̱ܝ^[6]܆ ܡ̈ܶܠܶܐ ܐܺܝܬܰܝܗܶܝܢ ܕܠܰܡܕܰܒܪܳܢܽܘܬܳܐ ܦܰܐܝ̈ܳܢ ܘܰܠܡܽܘܫ̈ܚܳܬܳܐ ܡܰܟܺܝ̈ܟܳܬܳܐ ܕܡܶܬܒܰܪܢܫܳܢܽܘܬܳܐ܆ ܗܳܠܶܝܢ ܟܺܝܬ ܕܨܶܒܝܳܢܳܐܺܝܬ ܝܺܚܺܝܕܳܝܳܐ ܡܶܠܬܳܐ ܩܰܒܶܠ ‌ܐܶܢܶܝܢ ܥܠܰܘܗ̱ܝ܆ ܟܰܕ ܕܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܗܘ̣ܳܐ ܪܺܝܫܺܝܬܳܐ ܕܟܺܝܬܳܐ ܘܰܕܠܳܐ ܐܺܝܬ ܒܳܗ̇ ܥܶܩܒܬܳܐ ܕܰܚܛܺܝܬܳܐ܆ ܘܟܰܕ ܡܶܛܽܠܳܬܰܢ ܗܳܢܽܘܢ ܕܶܐܣܬܠܺܝܢܰܢ ܘܠܳܐ ܐܶܫܬܟܰܚܢܰܢ ܐܺܝܬܰܝܢ ܕܫܰܦܺܝܪܺܝܢ ܐܶܬܓܒܺܝ܆ ܘܟܰܕ ܡܶܛܽܠ ܗܳܢܽܘܢ ܕܶܐܤܛܰܢܺܝܘ ܗܘ̣ܳܬ ܥܠܰܘܗ̱ܝ ܡܶܨܛܰܒܝܳܢܽܘܬܳܐ ܘܶܐܬܪܚܶܡ܆ ܘܟܰܕ ܡܶܛܽܠ ܗܳܠܶܝܢ ܕܺܐܝܬܰܝܗܽܘܢ ܗ̱ܘܰܘ ܣܦܺܝ̈ܩܶܐ ܡܶܢ ܪܽܘܚܳܐ ܢܣܰܒ ܪܽܘܚܳܐ ܐ̱ܢܳܫܳܐܺܝܬ܆ ܗܰܘ ܟܺܝܬ ܕܺܐܝܬܰܘܗ̱ܝ ܗ̱ܘܳܐ ܠܶܗ ܐܽܘܣܝܳܐܺܝܬ ܐܰܝܟ ܐܰ‌ܠܳܗܳܐ܆ ܓܰܠܝܳܐ ܗܝ. ܗܽܘ ܓܶܝܪ ܬܽܘܒ ܒܶܐܫܰܥܝܳܐ ܢܒܺܝܳܐ ܐܰܘܕܥܳܗ̇ ܠܗܳܕܶܐ ܓܰܠܝܳܐܺܝܬ ܟܰܕ ܐܳܡܰܪ܆ ܪܽܘܚܶܗ ܕܡܳܪܝܳܐ ܥܠܰܝ܆ ܡܶܛܽܠ ܗܳܝ ܕܡܰܫܚܰܢܝ ܡܳܪܝܳܐ^[7]. ܐܰܪܰܐ ܠܰܘ ܠܟܽܠ ‌ܐ̱ܢܳܫ ܓܰܠܝܳܐ ܘܺܝܕܺܝܥܳܐ ܗܳܝ ܕܡܶܬܐܰܡܪܳܐ܆ ܠܰܘ ܒܰܕܡܽܘܬ ܒܰܪܩܳܐ ܕܢܽܘܗܪܳܐ ܡܰܢܗܰܪ^[8] ܗܰܘܢܗܶܝܢ ܕܡ̈ܶܠܶܐ܆ ܪܽܘܚܳܐ ܐܳܡܰܪ ܗܰܘ ܕܒܺܝ ܐܺܝܬܰܘܗ̱ܝ ܐܰ‌ܠܳܗܳܐܝܬ܆ ܗܘ̣ܳܐ ܡܕܰܒܪܳܢܳܐܺܝܬ ܥܠܰܝ܆ ܡܶܛܽܠ ܗܳܝ ܕܢܶܚܬܶܬ ܠܗܳܝ ܕܶܐ݀ܫܬܰܡܰܗ ܡܫܺܝܚܳܐ܆ ܐܰܝܟ ܐܰܝܢܳܐ ܕܰܚܠܳܦ ܟܽܠܢܳܫ ܡܶܬܡܫܰܚ ܐ̱ܢܳܐ.

ܗܳܝ ܕܶܝܢ ܐܺܝܬܶܝܗ̇ ܕܫܳܘܝܳܐ ܠܰܒܥܳܬܳܐ܆ ܕܰܐܝܟܰܢܳܐ ܐܶܡܰܪ ܐܰ‌ܠܳܗܳܐ ܒܝܰܕ ܢܒܺܝܳܐ ܡܶܛܽܠܳܬܶܗ܆ ܗܳܝ ܕܠܳܐ ܢܶܩܥܶܐ^[9]܆ ܟܰܕ ܝܽܘܚܰܢܳܢ ܓܰܠܝܳܐܺܝܬ ܐܳܡܰܪ܆ ܕܰܒܝܰܘܡܳܐ ܐ̱ܚܪܳܝܳܐ ܕܥܺܐܕܳܐ ܪܰܒܳܐ܆ ܩܳܐܶܡ ܗ̱ܘܳܐ ܝܶܫܽܘܥ ܘܩܳܥܶܐ ܟܰܕ ܐܳܡܰܪ܆ ܐܶܢ ܐ̱ܢܳܫ ܨܗܶܐ ܢܺܐܬܶܐ ܠܘܳܬܝ ܘܢܶܫܬܶܐ^[10]. ܐܰܝܟܰܢܳܐ ܕܶܝܢ ܐܶܡܰܪ ܕܠܳܐ ܐܶܫܬܡܰܥ ܒܫܽܘ̈ܩܶܐ ܩܳܠܶܗ^2: ܟܰܕ ܓܰܠܝܳܐܺܝܬ ܗܽܘ ܦܳܪܽܘܩܰܢ ܠܘܳܬ ܗܳܢܽܘܢ ܕܰܒܙܰܒܢܳܐ ܗܰܘ ܕܚܰܫܳܐ ܐܰܚܕܽܘܗ̱ܝ ܐܳܡܰܪ܆ ܡܰܠܽܘܢ ܕܶܝܢ ܠܘܳܬ ܟܶܢ̈ܫܶܐ^[11]܆ ܙܳܕܶܩ ܓܶܝܪ ܕܠܳܐ ܒܡܶܕܶܡ ܢܶܦܽܘܩ ܡܶܢ ܒ̈ܢܳܬ ܩ̈ܳܠܶܐ ܗܳܠܶܝܢ ܢܦܺܝ̈ܚܳܬ ܡܶܢ ܐܰ‌ܠܳܗܳܐ. ܟܽܠ ܝܽܘܡ ܠܘܳܬܟܽܘܢ ܝܳܬܶܒ ܗ̱ܘܺܝܬ ܟܰܕ ܡܰܠܶܦ ܐ̱ܢܳܐ ܒܗܰܝܟܠܳܐ ܘܠܳܐ ܠܒܰܟܬܽܘܢܳܢܝ܆ ܘܰܠܬܰܠ̈ܡܺܝܕܶܐ ܕܶܝܢ ܫܳܡܰܥ ܗ̱ܘܳܐ ܕܳܐܡܪܺܝܢ܆ ܪܰܒܰܢ ܟܶܢ̈ܫܶܐ ܚܳܒܨܺܝܢ ܠܳܟ ܘܙܳܪܒܺܝܢ܆ ܘܳܐܡܰܪ ܐܰܢ̱ܬ ܡܰܢܽܘ ܗܰܘ ܕܰܓܫܰܦ ܒܺܝ^[12]܆ ܘܰܒܟܽܠܗܶܝܢ ܕܶܝܢ ܡܕܺܝܢ̱ܬܳܐ ܘܩܽܘܪ̈ܝܳܐ ܡܶܬܟܪܶܟ ܗ̱ܘܳܐ܆ ܒܰܓܠܺܝܠܳܐ ܟܺܝܬ ܘܒܺܝܗܽܘܕ ܟܰܕ ܡܰܠܶܦ ܒܰܟܢܽܘܫ̈ܳܬܳܐ ܘܡܰܟܪܶܙ ܣܒܰܪܬܳܐ ܕܡܰܠܟܽܘܬܳܐ܆ ܐܰܝܟܰܢܳܐ ܕܳܐܦ ܛܶܒܶܗ ܢܶܥܒܰܪ ܒܟܽܠܳܗ̇ ܣܽܘܪܺܝܰܐ ܐܰܝܟ ܕܰܟܬܺܝܒ^[13]. ܐܰܝܟܰܢܳܐ ܗܳܟܺܝܠ ‌ܐܰܝܟ ܡܶܠܬܳܐ ܢܒܺܝ̣ܳܝ̣ܬܳܐ܆ ܘܳܐܦܠܳܐ ܒܫܽܘܩ̈ܶܐ ܫܡܰܥ ܐ̱ܢܳܫ ܩܳܠܶܗ. ܐܰܝܟܰܢܳܐ ܕܶܝܢ ܩܰܢܝܳܐ ܪܥܺܝܥܳܐ ܠܳܐ ܬܒܰܪ^[14]܆ ܗܰܘ ܕܳܐܦ ܒܡܶܠܬܳܐ ܒܰܠܚܽܘܕ ܚܰܘܝܳܗ̇ ܝܰܒܺܝܫܬܳܐ ܠܬܺܬܳܐ. ܐܰܝܟܰܢܳܐ ܫܳܠ̈ܡܳܢ ܗܳܠܶܝܢ ܠܰܢܒܺܝܽܘܬܳܐ.

ܐܶܬܒܰܩܳܐ ܐܶܢ ܨܳܒܶܐ ܐܰܢ̱ܬ ܒܗܰܘܢܳܐ܆ ܘܬܶܚܙܶܐ ܫܰܠܡܽܘܬܳܐ ܪܺܝܫܳܝܬܳܐ ܕܡ̈ܶܠܶܐ ܕܪܽܘܚܳܐ. ܗܳܝ ܓܶܝܪ ܕܠܳܐ ܢܶܩܥܶܐ܆ ܠܳܐ ܬܶܣܬܒܰܪ ܕܡܶܛܽܠ ܩܥܳܬܳܐ ܗܳܝ ܢܳܡܽܘܣܳܝܬܳܐ ܘܡܰܠܦܳܢܺܝܬܳܐ܆ ܐܺܝܬ ܕܶܝܢ ܐܰܝܟܳܐ ܕܳܐܦ ܦܰܐܺܝܬ ܠܰܐܠܳܗܳܐ ܐܰܡܺܝܪܳܐ܆ ܗܳܝ ܟܺܝܬ ܕܡܶܬܚܙܶܐ ܕܰܩܥܳܐ ܐܰܘܟܺܝܬ ܐܰܙܥܶܩ ܝܶܫܽܘܥ ܙܰܒ̈ܢܺܝܢ ܣܰܓܺܝ̈ܳܐܢ. ܐܶܠܳܐ ܡܶܛܽܠ ܩܥܳܬܳܐ ܗܳܝ ܕܡܶܬܩܰܛܪܓܳܐ܆ ܗܳܝ ܕܺܐܝܬܶܝܗ̇ ܝܰܠܕܳܐ ܕܡܰܪܺܝܪܽܘܬܳܐ ܘܰܕܚܶܪܝܳܢܳܐ܆ ܘܢܽܘܟܪܳܝܬܳܐ ܕܟܽܠܳܗ̇ ܢܺܝܚܽܘܬܳܐ. ܡܶܛܽܠܗܳܕܶܐ ܓܶܝܪ ܗܽܘ ܐܶܘܰܢܓܶܠܺܝܣܛܳܐ ܟܰܕ ܡܢܰܗܰܪ ܠܳܗ̇ ܠܬܰܪܥܺܝܬܳܐ ܢܒܺܝ̣ܳܝ̣ܬܳܐ܆ ܩܰܕܶܡ ܣܳܡ ܗܳܝ ܕܠܳܐ ܢܶܬܚܪܶܐ܆ ܘܗܳܟܰܢܳܐ ܐܰܝܬܺܝ ܒܳܬܪܳܗ̇ ܗܳܝ ܕܠܳܐ ܢܶܩܥܶܐ^[15]܆ ܟܰܕ ܡܚܰܘܶܐ ܕܰܩܥܳܬܳܐ ܗܳܝ ܕܡܶܢ ܚܶܪܝܳܢܳܐ ܐܳܬܝܳܐ ܠܳܐ ܩܥܳܐ ܦܳܪܽܘܩܰܢ܆ ܘܟܰܕ ܛܳܒ ܗܺܝ ܡܶܠܬܳܐ ܠܘܳܬ ܐܶܫܰܥܝܳܐ܆ ܡܚܰܠܦܳܐܺܝܬ ܘܠܳܐ ܢܰܗܺܝܪܳܐܺܝܬ ܡܰܫܠܡܳܐ ܗ̱ܘܳܬ. ܩܰܕܡܳܐܺܝܬ ܓܶܝܪ ܐܺܝܬ ܒܳܗ̇܆ ܗܳܝ ܕܠܳܐ ܢܶܩܥܶܐ. ܘܰܚܠܳܦ ܗܳܝ ܕܠܳܐ ܢܶܬܚܪܶܐ܆ ܘܳܐܦܠܳܐ ܢܢܽܘܚ ܣܺܝܡܳܐ^[16]. ܗܳܢܰܘ ܕܶܝܢ ܕܠܳܐ ܢܶܫܠܶܐ ܘܠܳܐ ܢܶܩܥܶܐ. ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܗܳܢܽܘܢ ܕܡܶܢ ܚܶܪܝܳܢܳܐ ܩܳܥܶܝܢ ܘܡܶܢ ܗܶܪܬܳܐ. ܕܠܳܐ ܫܳܠܶܝܢ ܐܰܘ ܡܰܫܦܶܝܢ܆ ܘܳܐܦܠܳܐ ܦܳܣܩܺܝܢ ܡܶܢ ܩܥܳܬܳܐ. ܐܶܠܳܐ ܕܠܳܐ ܛܶܟܣܳܐ ܘܰܕܠܳܐ ܫܰܠܘܳܐ ܘܰܣܪܺܝܩܳܐܺܝܬ ܘܒܳܐܐܰܪ ܡܰܨܪܚܺܝܢ. ܡܶܛܽܠ ܩܥܳܬܳܐ ܕܰܐܝܟ ܗܳܕܶܐ ܟܰܕ ܟܳܬܶܒ ܗ̱ܘܳܐ ܫܠܺܝܚܳܐ ܠܶܐܦܶܣܳܝ̈ܶܐ ܐܳܡܰܪ ܗ̱ܘܳܐ܆ ܟܽܠܳܗ̇ ܡܰܪܺܝܪܽܘܬܳܐ ܘܚܶܡܬܳܐ ܘܪܽܘܓܙܳܐ܆ ܘܰܩܥܳܬܳܐ ܘܓܽܘܕܳܦܳܐ ܢܶܫܬܰܩܠܽܘܢ ܡܶܢܟܽܘܢ܆ ܥܰܡ ܟܽܠܳܗ̇ ܒܺܝܫܽܘܬܳܐ^[17]. ܠܗܳܕܶܐ ܩܥܳܬܳܐ ܦܳܠܚܺܝܢ ܗ̱ܘܰܘ ܐܳܦ ܣܕܽܘܡܳܝ̈ܶܐ. ܘܳܐܡܰܪ ܗ̱ܘܳܐ ܐܰ‌ܠܳܗܳܐ ܕܟܽܠ ܡܶܛܽܠܳܬܗܽܘܢ܆ ܩܥܳܬܳܐ ܕܰܣܕܽܘܡ ܘܰܕܥܰܡܽܘܪܰܐ ܥ̣ܶܠܰܬ ܣܶܓܝܰܬ̣ ܠܘܳܬܝ܆ ܘܰܚ̈ܛܳܗܰܝܗܽܘܢ ܪܰܘܪ̈ܒܶܐ ܣܰܓܺܝ^[18]. ܡܩܰܛܪܶܓ ܗ̱ܘܳܐ ܕܶܝܢ ܐܳܦ ܠܺܐܝܣܪܳܐܶܝܠ ܒܝܰܕ ܐܶܫܰܥܝܳܐ ܢܒܺܝܳܐ ܟܰܕ ܐܳܡܰܪ܆ ܣܰܟܺܝܬ ܕܢܶܥܒܶܕ ܕܺܝܢܳܐ. ܥܒܰܕ ܕܶܝܢ ܠܳܐ ܢܳܡܽܘܣܳܝܽܘܬܳܐ. ܘܠܰܘ ܙܰܕܺܝܩܽܘܬܳܐ ܐܶܠܳܐ ܩܥܳܬܳܐ^[19]. ܐܰܝܟܰܢܳܐ ܗܳܟܺܝܠ ܥܬܺܝܕ ܗ̱ܘܳܐ ܕܰܩܥܳܬܳܐ ܗܳܝ ܕܠܳܐ ܡܶܬܩܰܠܣܳܐ܆ ܐܶܠܳܐ ܕܡܶܢ ܚܶܪܝܳܢܳܐ ܘܡܰܪܺܝܪܽܘܬܳܐ ܢܳܦܩܳܐ ܢܶܩܥܶܐ܆ ܗܰܘ ܕܳܐܡܰܪ ܗ̱ܘܳܐ ܠܬܰܠܡܺܝܕܰܘ̈ܗ̱ܝ܆ ܝܺܠܰܦܘ ܡܶܢܝ ܕܢܺܝܚܳܐ ܐܺܝܬܰܝ ܘܡܰܟܺܝܟܳܐ ܒܠܶܒܳܐ^[20]܆ ܘܰܠܘܳܬ ܝܽܗ̱ܘ̈ܕܳܝܶܐ ܕܨܳܒܶܝܢ ܗ̱ܘܰܘ ܠܡܶܩܛܰܠ ܘܡܶܬܒܰܥܪܺܪܝܢ ܗ̱ܘܰܘ ܐܰܝܟ ܚܰܝ̈ܘܳܬ ܫܶܢܳܐ ܥܰܡ ܢܺܝܚܽܘܬܳܐ ܐܳܡܰܪ ܗ̱ܘܳܐ܆ ܠܡܳܢܳܐ ܒܳܥܶܝܢ ܐܢ̱ܬܽܘܢ ܠܡܶܩܛܠܰܢܝ^[21]܆ ܘܬܽܘܒ܆ ܗܳܫܳܐ ܕܶܝܢ ܒܳܥܶܝܢ ܐܢ̱ܬܽܘܢ ܕܬܶܩܛܠܽܘܢܳܢܝ܆ ܠܒܰܪܢܳܫܳܐ ܗܰܘ ܕܰܫܪܳܪܳܐ ܡܰܠܠܶܬ̣ ܠܟܽܘܢ܆ ܗܰܘ ܕܫܶܡܥܶܬ ܡܶܢ ܐܰ‌ܠܳܗܳܐ܆ ܘܰܠܘܳܬ ܥܰܒܕܳܐ ܗܰܘ ܕܪܺܝܫ ܟܳܗ̈ܢܶܐ ܕܰܡܨܰܥܪܳܢܳܐܺܝܬ ܡܚ̣ܳܝܗ̱ܝ ܥܰܠ ܦܰܟܶܗ ܡܫܰܝܢܳܐܺܝܬ ܡܦܰܢܶܐ ܗ̱ܘܳܐ ܦܶܬܓܳܡܳܐ܆ ܐܶܢ ܡܰܢ ܒܺܝܫܳܐܺܝܬ ܡܰܠܠܶܬ ܐܰܣܗܶܕ ܡܶܛܽܠ ܒܺܝܫܬܳܐ܆ ܐܶܢ ܕܶܝܢ ܛܳܒܳܐܺܝܬ ܠܡܳܢܳܐ ܡܳܚܶܐ ܐܰܢ̱ܬ ܠܺܝ^[22].

ܐܰܝܟ ܙܢܳܐ ܗܳܟܺܝܠ ܕܰܩܥܳܬܳܐ ܗܳܝ ܕܡܶܬܩܰܛܪܓܳܐ ܠܳܐ ܩܥܳܐ܆ ܗܳܟܰܢܳܐ ܐܳܦܠܳܐ ܒܦܳܠ̈ܰܛܘܳܬܳܐ ܘܰܒܫܽܘܩ̈ܶܐ ܐܰ‌ܠܶܦ܆ ܟܰܕ ܫܽܘܒܚܳܐ ܣܪܺܝܩܳܐ ܡܨܰܝܶܕ. ܐܶܠܳܐ ܒܗܰܝܟܠܳܐ ܘܒܰܟܢܽܘܫ̈ܳܬܳܐ܆ ܐܰܝܟܳܐ ܕܰܕܡܰܠܦܳܢܽܘܬܳܐ ܐܺܝܬܶܝܗ̇ ܕܽܘܟܬܳܐ. ܣܽܘܓܳܐܐ ܕܶܝܢ ܕܡܰܠܦܳܢܽܘܬܳܐ ܒܚܽܘܪ̈ܒܶܐ ܡܶܬܚܙܶܐ ܕܥܳܒܶܕ ܗ̱ܘܳܐ܆ ܘܥܰܠ ܛܽܘܪܳܐ ܘܥܰܠ ܣܦܳܪܳܐ ܕܝܰܡܳܐ܆ ܘܠܳܐ ܒܕܽܘܟ ܕܶܝܢ ܕܰܒܫܽܘܩܳܐ. ܕܰܫܡܳܐ ܕܶܝܢ ܗܰܘ ܕܦܠܐܛܝܐ ܐܰܘ ܟܺܝܬ ܕܫܽܘܩܳܐ܆ ܫܽܘܘܕܳܥܳܐ ܕܫܽܘܒܚܳܐ ܣܪܺܝܩܳܐ ܐܺܝܬ ܠܳܗ̇܆ ܣܳܗܶܕ ܗܽܘ ܦܳܪܽܘܩܰܢ ܟܰܕ ܡܶܛܽܠ ܦܪ̈ܺܝܫܶܐ ܡܨܰܕܝܳܢ̈ܶܐ ܐܳܡܰܪ ܗ̱ܘܳܐ܆ ܕܪܳܚܡܺܝܢ ܕܟܰܕ ܒܰܟܢܽܘܫ̈ܝܶܐ ܘܰܒܓܘ̈ܢܘܬܐ ܕܫܽܘ̈ܩܶܐ ܩܳܝܡܺܝܢ ܕܰܢܨܰܠܽܘܢ܆ ܐܰܝܟܰܢܳܐ ܕܢܶܬܚܙܽܘܢ ܠܰܒܢܰܝ̈ܢܳܫܳܐ^[23]. ܢܰܩܺܝܦ ܗ̱ܘ̣ ܓܶܝܪ ܠܦܠܐܛܝܐ ܐܰܘܟܺܝܬ ܫܽܘܩܳܐ ܫܡܳܐ ܗܰܘ ܕܰܟܢܽܘܫܝܳܐ. ܡܰܝܬܶܐ ܥܶܕܠܳܝܳܐ܆ ܟܰܕ ܡܚܰܘܶܐ ܠܡܶܬܚܰܘܝܳܢܽܘܬܳܐ^[24] ܘܰܠܫܽܘܩܳܝܽܘܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܳܝ ܡܰܢ ܕܠܳܐ ܢܶܬܚܪܶܐ ܘܠܳܐ ܢܶܩܥܶܐ ܡܫܰܘܕܥܳܐ܆ ܠܢܺܝܚܽܘܬܳܐ ܘܠܰܡܫܰܝܢܽܘܬܳܐ. ܗܳܝ ܕܶܝܢ ܕܠܳܐ ܢܶܫܡܰܥ ܐ̱ܢܳܫ ܩܳܠܶܗ ܒܫܽܘܩ̈ܶܐ܆ ܠܗܳܝ ܕܠܳܐ ܐܺܝܬ ܗ̱ܘܳܐ ܠܶܗ ܪܶܚܡܰܬ ܐܺܝܩܳܪܳܐ ܘܡܶܬܚܙܰܘܙܝܳܢܽܘܬܳܐ ܘܪܽܘܪܳܒܳܐ܆ ܘܰܠܚܺܐܪܽܘܬܳܐ ܕܡܶܢ ܫܽܘܒܚܳܐ ܣܪܺܝܩܳܐ. ܐܶܢ ܕܶܝܢ ܒܕܽܘܟ ܐܳܦ ܠܘܳܬ ܦܪ̈ܺܝܫܶܐ ܟܳܐܬܳܐܢܳܐܺܝܬ ܐܰܘܟܺܝܬ ܡܰܟܣܳܢܳܐܺܝܬ ܐܶܬܬܰܝܬܺܝ ܠܽܘܩܒܰܠܗܽܘܢ܆ ܗܳܕܶܐ ܠܰܘ ܟܦܽܘܪܝܳܐ ܗܝ ܕܢܺܝܚܽܘܬܳܐ. ܙܳܕܶܩ ܓܶܝܪ ܕܠܽܘܩܒܰܠ ܒܺܝܫܽܘܬܳܐ ܐܺܝܬ ܐܶܡܰܬܝ ܘܰܐܝܟܳܐ܆ ܐܳܦ ܕܢܶܬܬܥܺܝܪ ܘܰܢܩܽܘܡ ܩܰܫܝܳܐܺܝܬ܆ ܘܰܕܠܳܐ ܢܣܰܝܒܰܪ ܐܶܢܶܝܢ ܡܫܰܝܢܳܐܺܝܬ ܡܰܠܽܘܢ ܕܶܝܢ ܠܳܐ ܡܰܪܓܫܳܢܳܐܺܝܬ ܒܕܽܘܟ܆ ܠܗܳܠܶܝܢ ܕܰܣܢܺܝܩܺܝܢ ܥܰܠ ܟܳܐܬܳܐ ܪܳܕܘܝܬܳܐ.

ܐܺܝܬ ܠܳܗ̇ ܕܶܝܢ܆ ܐܳܦ ܣܽܘܟܳܠܳܐ ܐ̱ܚܪܺܢܳܐ ܡܥܰܠܝܳܐ܆ ܠܗܳܝ ܕܠܳܐ ܢܶܫܬܡܰܥ ܩܳܠܶܗ ܒܫܽܘܩ̈ܶܐ^[25]܆ ܡܶܛܽܠ ܕܰܒܡ̈ܰܬܠܶܐ ܘܫܰܠܝܳܐܺܝܬ ܐܰܝܟ ܕܗܽܘ ܘܰܡܚܰܦܝܳܐܺܝܬ܆ ܒܰܕܡܽܘܬ ܡܶܕܶܡ ܡܝܰܩܪܳܐ ܠܡܶܠܬܳܐ ܕܡܰܠܦܳܢܽܘܬܳܐ ܡܰܦܶܩ ܗ̱ܘܳܐ܆ ܐܰܝܟܰܢܳܐ ܕܠܳܐ ܢܶܬܝܰܗܒܽܘܢ ܩܽܘܕܫ̈ܶܐ ܠܟܰܠ̈ܒܶܐ܆ ܐܳܦܠܳܐ ܢܶܫ̈ܬܰܕܳܝܢ ܡܰܪ̈ܓܳܢܝܳܬܳܐ ܩܕܳܡ ܚܙܺܝܪ̈ܶܐ^[26]܆ ܗܳܠܶܝܢ ܓܶܝܪ ܐܺܝܬܰܝܗܽܘܢ ܗܳܢܽܘܢ ܕܰܒܫܽܘܩ̈ܶܐ ܡܶܬܗܰܦܟܺܝܢ. ܒܰܕܓܽܘܢ ܐܳܦ ܠܬܰܠܡܺܝܕܰܘ̈ܗ̱ܝ ܕܰܡܫܰܐܠܺܝܢ ܗ̱ܘܰܘ ܠܶܗ܆ ܕܰܠܡܳܢܳܐ ܒܦܷ̈ܠܳܐܬܳܐ ܡܡܰܠܶܠ ‌ܐܰܢ̱ܬ ܠܗܳܢܽܘܢ ܕܡܶܢ ܟܶܢܫܳܐ܆ ܐܳܡܰܪ ܗ̱ܘܳܐ ܕܰܠܟܽܘܢ ܝܗ̱ܝ ܒ ܠܡܶܕܰܥ ܐ̱ܪ̈ܳܙܶܐ ܕܡܰܠܟܽܘܬܳܐ ܕܰܫܡܰܝܳܐ. ܠܗܳܢܽܘܢ ܕܶܝܢ ܠܳܐ ܝܗ̱ܝ ܒ^[27].

ܠܩܰܢܝܳܐ ܕܶܝܢ ܡܪܰܥܪܥܳܐ ܠܳܐ ܬܒܰܪ܆ ܠܰܡܚܺܝܠܽܘܬܗܽܘܢ ܕܝܽܗ̱ܘ̈ܕܳܝܶܐ. ܘܰܠܟܶܬܳܢܳܐ ܕܡܶܫܬܰܩܰܠ ܒܕܶܠܩܶܗ ܐܰܘܟܺܝܬ ܕܡܶܬܬܰܢܰܢ ܠܳܐ ܕܰܥܶܟ ܠܚܶܡܬܗܽܘܢ ܕܗܳܢܽܘܢ^[28]܆ ܕܶܐܬܓܰܘܙܠܰܬ ܡܰܢ ܥܠܰܘܗ̱ܝ܆ ܐܰܫܦܠܰܬ ܕܶܝܢ ܘܶܐܬܡܰܚܠܰܬ ܘܳܐܦ ܗܺܝ ܡܶܢ ܢܰܦܫܳܗ̇ ܐܶܬܚܰܒܠܰܬ ܥܰܡ ܓܽܘܘܙܳܠܳܗ̇^[29]. ܕܰܐܝܟ ܗܳܟܰܢܳܐ ܓܶܝܪ ܐܺܝܬܰܘܗ̱ܝ ܟܶܬܳܢܳܐ܆ ܕܥܰܡܳܗ̇ ܕܗܳܝ ܕܡܶܬܓܰܘܙܰܠ ܛܳܠܶܩ. ܘܬܽܘܪܣܳܝܳܐ ܕܬܶܢܳܢܳܐ ܝܰܬܺܝܪܳܐܺܝܬ ܐܺܝܬܰܘܗ̱ܝ܆ ܘܠܰܘ ܕܢܽܘܪܳܐ. ܠܕܰܐܝܟ ܗܳܕܶܐ ܗܳܟܺܝܠ ܚܶܡܬܳܐ܆ ܗܳܝ ܕܥܰܠ ܗܰܘ ܕܰܡܕܰܥܶܟ ܠܳܗ̇ ܠܳܐ ܣܢܺܝܩܳܐ܆ ܠܳܐ ܕܰܥܶܟ ܦܳܪܽܘܩܰܢ. ܐܰܝܟܰܢܳܐ ܕܟܰܕ ܠܽܘܩܒܰܠ ܫܪܳܪܳܐ ܡܶܬܟܰܬܫܳܐ܆ ܟܺܐܢܳܐ ܬܚܰܘܶܝܘܗ̱ܝ ܠܗܰܘ ܕܡܶܫܟܰܚ ܗ̱ܘܳܐ ܕܰܢܕܰܥܶܟ ܘܣܰܝܒܰܪ. ܘܰܠܗܳܢܽܘܢ ܕܡܶܬܚܰܡܬܺܝܢ ܗ̱ܘܰܘ ܥܰܘܳܠܳܐܺܝܬ ܘܠܳܐ ܐܶܬܬܰܪܰܨܘ܆ ܡܚܰܝ̈ܒܶܐ ܬܶܥܒܶܕ ܐܶܢܽܘܢ ܠܕܺܝܢܳܐ. ܗܳܕܶܐ ܓܶܝܪ ܐܺܝܬܶܝܗ̇ ܗܳܝ ܕܰܠܟܶܬܳܢܳܐ ܕܡܶܬܬܰܢܰܢ ܠܳܐ ܢܕܰܥܶܟ܆ ܐܶܠܳܐ ܠܰܫܪܳܪܳܐ ܢܰܦܶܩ ܕܺܝܢܳܐ. ܗܳܝ ܟܺܝܬ ܕܟܰܕ ܒܰܢܒܺܝܽܘܬܳܐ ܣܺܝܡܳܐ ܗ̱ܘܳܬ܆ ܫܰܒܩܳܗ̇ ܗܽܘ ܐܶܘܰܢܓܶܠܺܝܣܛܳܐ.

ܕܗܺܝ ܗܳܕܶܐ ܢܒܺܝܽܘܬܳܐ ܕܡܶܛܽܠ ܟܶܬܳܢܳܐ ܕܡܶܬܬܰܢܰܢ ܘܠܳܐ ܐܶܬܕܰܥܰܟ܆ ܘܰܠܚܶܡܬܳܐ ܝܺܗܽܘܕܳܝܬܳܐ ܡܫܰܘܕܰܥ܆ ܐܳܦ ܗܳܝ ܐ̱ܚܪܺܬܳܐ ܐܳܡܪܳܐ܆ ܟܰܕ ܡܚܰܘܝܳܐ ܠܢܰܓܺܝܪܽܘܬ ܪܽܘܚܶܗ ܕܗܰܘ ܕܣܰܝܒܰܪ. ܢܶܕܠܰܩ ܘܠܳܐ ܢܶܬܢܟܶܐ܆ ܥܕܰܡܳܐ ܕܰܢܣܺܝܡ ܥܰܠ ‌ܐܰܪܥܳܐ ܕܺܝܢܳܐ^[30]܆ ܘܒܰܫܡܶܗ ܥܰܡܡ̈ܶܐ ܢܣܰܒܪܽܘܢ. ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܕܺܝܠܳܝܬܳܐ ܗܝ ܕܟܶܬܳܢܳܐ܆ ܗܳܝ ܕܡܶܢ ܫܶܠܝ ܢܶܬܓܰܘܙܰܠ. ܘܰܐܝܟ ܕܰܒܙܰܒܢܳܐ ܙܥܽܘܪܳܐ ܢܶܢܗܰܪ ܐܰܟܚܕܐ ܘܢܶܬܛܰܠܰܩ. ܠܚܶܡܬܳܐ ܕܶܝܢ ܕܝܽܗ̱ܘ̈ܕܳܝܶܐ܆ ܐܳܦܠܳܐ ܕܰܥܟܳܗ̇ ܡܫܺܝܚܳܐ܆ ܐܶܠܳܐ ܐܳܦ ܟܰܕ ܕܶܠܩܰܬ ܘܶܐܬܓܰܘܙܠܰܬ ܘܶܐܬܢܰܒܪܫܰܬ ܥܠܰܘܗ̱ܝ ܙܰܒ̈ܢܺܝܢ ܣܰܓܺܝ̈ܳܐܢ܆ ܕܬܰܘܦܶܐ ܘܬܶܬܚܰܒܰܠ ܠܳܐ ܫܰܒܩܳܗ̇܆ ܥܕܰܡܳܐ ܕܟܰܕ ܐܶܬܩܒܰܥ ܨܠܺܝܒܳܐ ܗܰܘ ܕܰܣܒܰܠ ܨܶܒܝܳܢܳܐܺܝܬ ܒܰܒܣܰܪ ܘܢܶܩܦܰܬ ܩܝܳܡܬܳܐ܆ ܐܰܝܬܝܳܗ̇ ܗܳܢܰܘ ܕܶܝܢ ܐܰܦܩܳܗ̇ ܠܙܳܟܽܘܬܳܐ ܘܕܰܢܫܰܠܶܡ ܥܰܒܕܶܗ ܠܕܺܝܢܶܗ܆ ܗܰܘ ܕܰܠܘܳܬ ܝܽܗ̱ܘ̈ܕܳܝܶܐ ܐܶܬܬܕܺܝܢ ܟܰܕ ܦܺܝܠܛܘܤ ܕܳܐܶܢ ܗ̱ܘܳܐ܆ ܘܗܰܘ ܕܕܳܢ̣ܶܗ ܠܳܐܟܶܠܩܰܪܨܳܐ܆ ܟܰܕ ܠܘܳܬ ܚܰܫܳܐ ܡܶܛܽܠ ܦܽܘܪܩܳܢܳܐ ܕܺܝܠܰܢ ܐܳܬܶܐ ܗ̱ܘܳܐ ܘܳܐܡܰܪ܆ ܕܰܐܪܟܽܘܢܶܗ ܕܥܳܠܡܳܐ ܗܳܢܳܐ ܕܺܝܢ ܗ̱ܘ̣^[31]܆ ܘܬܽܘܒ܆ ܗܳܫܳܐ ܕܺܝܢܶܗ ܗ̱ܘ̣ ܕܥܳܠܡܳܐ ܗܳܢܳܐ܆ ܗܳܫܳܐ ܐܰܪܟܽܘܢܶܗ ܕܥܳܠܡܳܐ ܗܳܢܳܐ ܢܶܦܽܘܩ ܠܒܰܪ܆ ܘܶܐܢܳܐ ܐܶܢ ܐܶܬܬܪܺܝܡ ܡܶܢ ܐܰܪܥܳܐ܆ ܠܟܽܠܢܳܫ ܐܶܓܶܕ ܠܘܳܬܝ^[32]. ܣܰܒܰܪܘ ܓܶܝܪ ܥܰܡ̱ܡ̈ܶܐ ܒܰܫܡܶܗ܆ ܡܶܢ ܒܳܬܰܪ ܕܰܐܦܶܩ ܕܺܝܢܶܗ ܠܙܳܟܽܘܬܳܐ.

ܚܳܙܶܐ ܐܰܢ̱ܬ ܐܰܝܟܰܢܳܐ ܐܺܝܬܰܝܗܶܝܢ ܕܫܳܠ̈ܡܳܢ ܠܶܐܘܰܢܓ̈ܶܠܺܝܰܐ܆ ܗܳܠܶܝܢ ܕܰܢܒܺܝܽܘܬܳܐ܆ ܠܰܘ ܕܶܝܢ ܠܒܰܪ ܡܶܢ ܢܺܝܫܳܐ ܐܺܝܬܶܝܗ̇܆ ܐܶܢ ܐ̱ܢܳܫ ܢܠܰܚܶܡ ܠܗܶܝܢ ܠܗܳܠܶܝܢ܆ ܐܳܦ ܗܳܝ ܕܡܶܢ ܕܰܘܺܝܕ ܡܶܙܕܰܡܪܳܐ܆ ܗܳܝ ܕܰܐܝܟܰܢܳܐ ܕܬܶܙܕܰܕܰܩ ܒܡ̈ܶܠܶܐ ܕܺܝܠܳܟ ܘܬܶܙܟܶܐ ܟܰܕ ܡܶܬܬܕܺܝܢ ܐܰܢ̱ܬ^[33]. ܠܗܳܝ ܓܶܝܪ ܕܰܐܡܺܝܪܳܐ ܠܶܐܫܰܥܝܳܐ ܥܕܰܡܳܐ ܕܰܢܣܺܝܡ ܕܺܝܢܳܐ ܥܰܠ ‌ܐܰܪܥܳܐ^[34]܆ ܡܰܬܝ ܟܰܕ ܠܘܳܬ ܚܰܝܠܳܐ ܕܣܽܘܟܳܠܳܐ ܡܫܰܚܠܶܦ ܠܳܗ̇ ܐܶܡܰܪ܆ ܥܕܰܡܳܐ ܕܢܰܦܶܩ ܕܺܝܢܳܐ ܠܙܳܟܽܘܬܳܐ^[35]. ܙܳܟܽܘܬܳܐ ܕܶܝܢ ܐܺܝܬ ܠܶܗ ܥܝܳܕܳܐ ܠܰܟܬܳܒܳܐ ܐܰ‌ܠܳܗܳܝܳܐ܆ ܠܡܶܩܪܳܐ ܠܙܳܟܽܘܬܳܐ܆ ܐܰܝܟ ܗܳܝ ܕܰܐܝܟܰܐ ܗ̱ܘ ܥܽܘܩܣܳܟ ܡܰܘܬܐ܆ ܐܰܝܟܳܐ ܗܝ ܙܳܟܽܘܬܶܟܝ ܫܝܽܘܠ^[36]܆ ܘܛܰܝܒܽܘ ܕܶܝܢ ܠܰܐܠܳܗܳܐ ܗܰܘ ܕܝܰܗ̱ܒ ܠܰܢ ܙܳܟܽܘܬܳܐ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ^[37].

ܡܶܫܟܰܚ ܕܶܝܢ ܐ̱ܢܳܫ܆ ܕܳܐܦ ܣܽܘܟܳܠܳܐ ܦܫܺܝܩܳܐ ܢܶܣܒܺܝܗ̇܆ ܠܗܳܝ ܕܩܰܢܝܳܐ ܪܥܺܝܥܳܐ ܠܳܐ ܢܶܬܒܽܘܪ܆ ܘܰܠܗܳܝ ܕܶܐܢ ܢܶܫܡܰܥ ܐ̱ܢܳܫ ܒܫܽܘܩ̈ܶܐ ܩܳܠܶܗ^[38]. ܒܙܰܒܢܳܐ ܓܶܝܪ ܗܰܘ ܕܚܰܫܳܐ ܦܳܪܽܘܩܳܝܳܐ܆ ܩܰܢܝܳܐ ܩܰܒܶܠ ܢܺܝܚܳܐܺܝܬ ܦܳܪܽܘܩܰܢ܆ ܡܶܢ ܗܳܢܽܘܢ ܕܰܡܒܰܙܚܺܝܢ ܗ̱ܘܰܘ ܒܶܗ܆ ܘܠܰܘ ܐܰܝܟ ܡܰܢ ܕܡܶܬܥܰܣܰܩ ܗ̱ܘܳܐ ܥܰܠ ܒܶܗܬܬ̣ܳܐ܆ ܟܰܕ ܥܰܠ ܗܳܢܳܐ ܐܶܣܬܡܰܟ ܬܰܒܪܶܗ. ܘܳܐܦ ܦܺܝܠܛܘܤ ܕܶܝܢ ܐܰܝܟ ܡܶܠܬܶܗ ܕܝܽܘܚܰܢܳܢ܆ ܐܰܝܬܝܶܗ ܠܒܰܪ ܠܝܶܫܽܘܥ܆ ܘܺܝܬܶܒ ܥܰܠ ܒܺܐܡܰܐ܆ ܒܕܽܘܟܬܳܐ ܕܡܶܬܐܰܡܪܳܐ ܡܫܰܘܝܰܬ ܒܟܺܐܦ̈ܶܐ܆ ܥܶܒܪܳܐܺܝܬ ܕܶܝܢ ܓܐܒܐܬܐ^[39]. ܗܳܕܶܐ ܕܽܘܟܬܳܐ ܡܫܰܘܝܰܬ ܒܟܺܐܦ̈ܶܐ܆ ܦܠܐܛܝܐ ܐܰܘܟܺܝܬ ܫܽܘܩܳܐ ܦܰܬܝܳܐ ܡܶܢ ܟܽܠܦܪܽܘܤ ܐܺܝܬܶܝܗ̇܆ ܘܬܰܡܳܢ ܐܰܝܟ ܢܒܺܝܽܘܬܳܐ܆ ܐܰܝܟ ܥܶܪܒܳܐ ܠܘܳܬ ܢܶܟܣܬܳܐ ܐܶܬܬܰܝܬܺܝ܆ ܘܰܐܝܟ ܐܶܡܪܳܐ ܩܕܳܡ ܗܰܘ ܕܓܳܐܶܙ ܠܶܗ ܐܺܝܬܰܘܗ̱ܝ ܗ̱ܘܳܐ ܕܠܳܐ ܩܳܠܳܐ^[40]܆ ܘܳܐ‌ܠܨܳܐܺܝܬ ܠܳܐ ܫܡܰܥ ܐ̱ܢܳܫ ܒܫܽܘܩ̈ܶܐ ܩܳܠܶܗ. ܪܥܺܝܥܳܐ ܕܶܝܢ ܠܩܰܢܝܳܐ ܐܺܝܬ ܥܝܳܕܳܐ ܠܰܟܬܳܒܳܐ ܐܰ‌ܠܳܗܳܝܳܐ ܠܰܡܟܰܢܳܝܽܘ܆ ܡܶܛܽܠ ܗܳܝ ܕܰܦܫܺܝܩܳܐܺܝܬ ܐܺܝܬ ܠܶܗ ܕܢܶܬܪܨܶܨ ܘܢܶܬܪܥܰܥ ܘܩܰܪܺܝܒ ܠܰܬܒܳܪܳܐ. ܡܶܛܽܠܗܳܕܶܐ ܢܳܣܶܒ ܠܶܗ ܠܗܳܢܳܐ ܐܰܝܟ ܕܶܐܡܰܪܢܰܢ܆ ܐܳܦ ܠܬܰܚܘܺܝܬܳܐ ܕܰܡܚܺܝܠܽܘܬܳܐ. ܟܰܕ ܐܳܡܰܪ܆ ܥܰܠ ܚܽܘܛܪܳܐ ܕܩܰܢܝܳܐ ܗܳܢܳܐ ܕܰܪܥܺܝܥ܆ ܥܰܠ ‌ܐܓܘܦܛܘܣ^[41].

ܠܗܳܕܶܐ ܕܶܝܢ ܢܒܺܝܽܘܬܳܐ ܕܗܳܫܳܐ ܐܶܬܥܰܩܒܰܬ ܡܶܢܰܢ܆ ܐܰܝܬܺܝ ܠܰܡܨܰܥܬܳܐ ܡܰܬܝ܆ ܡܶܛܽܠ ܕܰܐܡܺܝܪ ܗ̱ܘܳܐ ܠܶܗ ܡܶܢ ܩܕܳܡܶܝܗ̇܆ ܕܰܐܣܺܝ ܝܶܫܽܘܥ ܠܒܰܪܢܳܫܳܐ ܕܺܐܝܬ ܗ̱ܘܳܐ ܠܶܗ ܐܺܝܕܳܐ ܝܰܒܺܝܫܬܳܐ^[42]܆ ܘܰܐܝܬܺܝ ܒܳܬܰܪܟܶܢ܆ ܕܰܦܪ̈ܺܝܫܶܐ ܟܰܕ ܢܦܰܩܘ ܡܶܠܟܳܐ ܢܣܰܒܘ ܗ̱ܘܰܘ ܥܠܰܘܗ̱ܝ ܐܰܝܟܰܢܳܐ ܕܢܰܘܒܕܽܘܢܳܝܗ̱ܝ ܆ ܗܽܘ ܕܶܝܢ ܝܶܫܽܘܥ ܟܰܕ ܝܺܕܰܥ ܫܰܢܺܝ ܠܶܗ ܡܶܢ ܬܰܡܳܢ܆ ܘܰܢܩܶܦܘ ܒܳܬܪܶܗ ܟܶܢ̈ܫܶܐ ܣܰܓܺܝ̈ܶܐܐ ܘܰܐܣܺܝ ܐܶܢܽܘܢ ܠܟܽܠܗܽܘܢ܆ ܘܰܟܐܳܐ ܒܗܽܘܢ܆ ܐܰܝܟܰܢܳܐ ܕܠܳܐ ܢܶܥܒܕܽܘܢܳܝܗ̱ܝ ܓܶܠܝܳܐ^[43].

ܡܶܛܽܠ ܗܳܟܺܝܠ ܕܟܰܕ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܒܰܟܝܳܢܳܐ ܡܳܪܰܢ ܝܶܫܽܘܥ ܘܚܰܝܠܳܐ ܕܰܐܒܳܐ ܡܬܽܘܡܳܝܳܐ܆ ܡܶܬܩܦܶܤ ܗ̱ܘܳܐ ܠܘܳܬ ܙܥܽܘܪܽܘܬܳܐ܆ ܟܰܕ ܡܰܪܚܶܩ ܗ̱ܘܳܐ ܘܡܰܫܶܦ ܫܰܠܝܳܐܺܝܬ ܠܡܰܟ̈ܝܳܢܘܳܬܳܐ ܦܪ̈ܺܝܫܳܝܳܬܳܐ܆ ܐܺܝܬܰܘܗ̱ܝ ܗ̱ܘܳܐ ܓܶܝܪ ܗܽܘ ܟܰܕ ܗܽܘ ܐܳܦ ܒܰܪܢܳܫܳܐ ܫܰܪܺܝܪܳܐܺܝܬ܆ ܘܰܕܠܳܐ ܩܳܠܳܐ ܡܡܰܠܶܐ ܗ̱ܘܳܐ ܠܰܡܕܰܒܪܳܢܽܘܬܳܐ܆ ܟܰܕ ܡܶܫܟܰܚ ܗ̱ܘܳܐ ܐܰ‌ܠܳܗܳܐܺܝܬ ܕܰܟܢܺܝܫܳܐܺܝܬ ܢܶܩܛܽܘܠ ܠܟܽܠܗܽܘܢ ܗܳܢܽܘܢ ܕܩܳܝܡܺܝܢ ܗ̱ܘܰܘ ܠܩܽܘܒܠܶܗ܆ ܟܰܕ ܠܰܝܬ ܗ̱ܘܳܐ ܠܶܗ ܠܶܐܘܰܢܓܶܠܺܝܣܛܳܐ ܬܰܚܘܺܝܬܳܐ ܐ̱ܚܪܺܬܳܐ ܕܗܳܕܶܐ ܟܽܠܳܗ̇ ܪܰܒܽܘܬܳܐ ܕܡܰܫܦܳܢܽܘܬܳܐ ܘܢܺܝܚܽܘܬܳܐ܆ ܐܰܝܬܺܝ ܠܰܢܒܺܝܽܘܬܳܐ ܗܳܝ ܕܰܒܩܰܢܝܳܐ ܕܰܪܥܺܝܥ ܘܠܳܐ ܡܶܬܬܒܰܪ ܘܰܒܟܶܬܳܢܳܐ ܕܡܶܫܬܰܩܰܠ ܒܕܶܠܩܶܗ ܘܠܳܐ ܡܶܬܕܰܥܰܟ ܐܶܬܚܰܫܚܰܬ܆ ܐܰܝܟܰܢܳܐ ܕܰܠܢܰܓܺܝܪܽܘܬ ܪܽܘܚܶܗ ܢܚܰܘܶܐ܆ ܕܚܰܟܺܝܡܳܐܺܝܬ ܘܰܡܕܰܒܪܳܢܳܐܺܝܬ ܒܪܶܓܠܳܐ ܩܰܠܺܝܠܬܳܐ܆ ܠܰܐܝܠܶܝܢ ܕܗܳܟܰܢܳܐ ܐܺܝܬܰܝܗܶܝܢ ܗ̱ܘܰܘ ܩܰܫ̈ܝܳܬܳܐ ܥܳܒܰܪ ܗ̱ܘܳܐ܆ ܟܰܕ ܠܳܐ ܡܚܰܘܶܐ ܗ̱ܘܳܐ ܠܪܰܒܘܳܬܳܐ ܕܰܐ‌ܠܳܗܽܘܬܳܐ ܕܺܝܠܶܗ ܒܰܝܬܳܝܬܳܐ܆ ܒܰܕܡܽܘܬ ܐ̱ܢܳܫ ܕܕܰܚܺܝܠ ܕܢܶܓܫܽܘܦ ܒܟܶܬܳܢܳܐ ܕܡܶܬܬܰܢܰܢ ܘܒܰܪ ܫܳܥܬܶܗ ܡܶܬܕܰܥܰܟ܆ ܐܰܘ ܕܢܶܣܬܡܶܟ ܥܰܠ ܩܰܢܝܳܐ ܪܥܺܝܥܳܐ܆ ܐܰܘ ܕܡܶܠܬܳܐ ܒܝܰܕ ܦܽܘܡܶܗ ܢܰܝܬܶܐ܆ ܐܰܝܟܰܢܳܐ ܕܰܠܐ̱ܢܳܫ ܡܶܢ ܗܳܢܽܘܢ ܕܡܶܢ ܠܒܰܪ ܐܶܫܬܡܰܥ. ܡܶܣܬܰܒܪ̈ܳܢ ܓܶܝܪ ܗܳܠܶܝܢ ܟܽܠܗܶܝܢ܆ ܕܰܐܝܟ ܕܰܒܬܰܚܘܺܝܬܳܐ ܐܶܬܶܐܡܰܪ̈ܶܝܢ. ܟܰܕ ܠܢܺܝܚܽܘܬܳܐ ܘܰܡܫܰܝܢܽܘܬܳܐ ܡܚܰܘ̈ܝܳܢ ܕܗܰܘ ܕܰܡܕܰܒܰܪ ܗ̱ܘܳܐ.

ܐܳܦ ܗܳܝ ܕܶܝܢ ܕܶܐܬܒܰܥܝܰܬ ܒܗܳܠܶܝܢ ܕܡܶܢ ܩܕܺܝܡ ܐܶܬܩܪ̈ܰܝ̣ܶܝ̣ܢ ܢܳܩܦܳܐܺܝܬ܆ ܙܳܕܶܩ ܕܬܶܬܥܰܩܰܒ ܥܰܡ ܗܳܠܶܝܢ ܕܰܐܡܺܝܪ̈ܳܢ܆ ܘܰܕܬܶܫܬܘܶܐ ܠܰܫܪܳܝܳܐ ܕܠܳܚܶܡ܆ ܗܳܝ ܕܰܐܡܺܝܪܳܐ ܡܶܢ ܦܳܪܽܘܩܰܢ܆ ܕܟܽܠ ܚܛܺܝܬܳܐ ܘܓܽܘܕܳܦܳܐ ܢܶܫܬܒܶܩ ܠܰܒܢܰܝ̈ܢܳܫܳܐ܆ ܓܽܘܕܳܦܳܐ ܕܶܝܢ ܕܪܽܘܚܳܐ ܠܳܐ ܢܶܫܬܒܶܩ ܠܗܽܘܢ^[44]. ܐܰܪܰܐ ܓܶܝܪ ܐܶܢ ܐ̱ܢܳܫ ܥܰܠ ‌ܐܰܒܳܐ ܢܓܰܕܶܦ ܐܰܘ ܥܰܠ ܒܪܳܐ܆ ܟܰܕ ܐܳܡܰܪ ܕܽܐܘܛܘ̈ܡܛܶܐ ܐܰܘܟܺܝܬ ܕܡܶܢ ܨܒܽܘܬ ܢܰܦܫܗܶܝܢ ܐܺܝܬܰܝܗܶܝܢ ܗܳܠܶܝܢ ܕܺܐܝܬܰܝܗܶܝܢ ܘܠܰܘ ܒ̣ܰܪ̈ܝܳܬܳܐ܆ ܘܰܕܡܶܢ ܒܛܺܝܠܽܘܬܳܐ ܗܳܝ ܕܰܠܟܽܠ ܡܦܰܪܢܣܳܐ ܠܳܐ ܡܶܬܕܰܒܪ̈ܳܢ܆ ܐܰܘ ܗܰܘ ܕܕܺܐܝܬܰܘܗ̱ܝ ܡܰܢ ܐܰ‌ܠܳܗܳܐ ܡܰܘܕܶܐ܆ ܠܝܳܬܳܐ ܕܶܝܢ ܐܰܘܟܺܝܬ ܠܰܩܢܽܘܡܳܐ ܕܰܒܪܳܐ ܡܪܺܝܡ܆ ܘܕܳܐܦܠܳܐ ܐܺܝܬܰܘܗ̱ܝ ܟܽܠ ܟܽܠܶܗ ܡܩܰܒܶܠ ܕܢܺܐܡܰܪ܆ ܡܶܣܬܰܝܒܪ̈ܳܢܝܳܬܳܐ ܢܶܣܬܒܰܪ ܗܰܘ ܕܕܰܐܝܟ ܗܳܢܳܐ ܕܰܡܓܰܕܶܦ ܘܰܕܫܳܘ̈ܝܳܢ ܠܫܽܘܒܩܳܢܳܐ܆ ܘܟܰܕ ܛܳܒ ܫܰܘܝܰܬ ܒܺܐܝܩܳܪܳܐ ܐܺܝܬܶܝܗ̇ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܘܕܰܚܕܳܐ ܐܽܘܣܺܝܰܐ ܘܡܰܠܟܽܘܬܳܐ ܘܫܽܘܒܚܳܐ܆ ܐܶܠܳܐ ܠܗܳܝ ܕܰܐܡܺܝܪܳܐ ܠܳܐ ܡܬܰܚܡܳܐܺܝܬ ܘܓܶܢܣܳܢܳܐܺܝܬ܆ ܒܬܽܘܚܳܡܳܐ ܕܺܝܠܳܢܳܝܳܐ ܦܰܓܕܳܗ̇ ܦܳܪܽܘܩܰܢ܆ ܒܝܰܕ ܗܳܠܶܝܢ ܕܒܳܬܰܪܟܶܢ ܐܰܝܬܺܝ. ܟܰܕ ܓܶܝܪ ܐܶܡܰܪ ܦܫܺܝܛܳܐܺܝܬ ܘܫܰܪܝܳܐܺܝܬ܆ ܕܟܽܠ ܚܛܺܝܬܳܐ ܘܓܽܘܕܳܦܳܐ ܢܶܫܬܒܶܩ ܠܰܒܢܰܝ̈ܢܳܫܳܐ܆ ܓܽܘܕܳܦܳܐ ܕܶܝܢ ܕܪܽܘܚܳܐ ܠܳܐ ܢܶܫܬܒܶܩ ܠܰܒܢܰܝ̈ܢܳܫܳܐ܆ ܐܰܝܬܺܝ ܒܳܬܰܪܟܶܢ܆ ܘܗܰܘ ܕܶܐܢ ܢܺܐܡܰܪ ܡܶܠܬܳܐ ܥܰܠ ܒܪܶܗ ܕܐ̱ܢܳܫܳܐ܆ ܢܶܫܬܒܶܩ ܠܶܗ. ܗܰܘ ܕܶܝܢ ܕܢܺܐܡܰܪ ܥܰܠ ܪܽܘܚܳܐ ܩܰܕܺܝܫܳܐ ܠܳܐ ܢܶܫܬܒܶܩ ܠܶܗ. ܘܠܳܐ ܒܗܳܢܳܐ ܥܳܠܡܳܐ܆ ܘܳܐܦܠܳܐ ܒܗܰܘ ܕܰܥܬܺܝܕ^[45]. ܐܰܝܟܰܢܳܐ ܡܳܕܶܝܢ ܕܗܳܝ ܕܡܶܬܟܰܢܫܳܐ ܗܳܕܶܐ ܐܺܝܬܶܝܗ̇܆ ܟܰܕ ܢܰܩܺܝܦܳܐܺܝܬ ܟܽܠܶܗ ܦܶܬܓܳܡܳܐ ܘܠܰܘ ܡܶܢ ܡܢܳܬܳܐ ܡܶܬܩܪܶܐ ܒܰܦܣܳܩܳܐ܆ ܕܟܽܠ ܚܛܳܗܳܐ ܘܓܽܘܕܳܦܳܐ ܕܥܰܠ ܒܪܶܗ ܕܐ̱ܢܳܫܳܐ ܡܶܬܓܰܕܰܦ ܘܡܶܬܚܛܶܐ܆ ܢܶܫܬܒܶܩ ܠܰܒܢܰܝ̈ܢܳܫܳܐ. ܗܰܘ ܕܶܝܢ ܕܥܰܠ ܪܽܘܚܳܐ ܠܳܐ ܢܶܫܬܒܶܩ.

ܟܰܕ ܓܶܝܪ ܐܳܬ̣ܳܐ ܐܰ‌ܠܳܗܳܝܬܳܐ ܘܰܬܡܺܝܗܬܳܐ ܡܶܢ ܡܫܺܝܚܳܐ ܗܘ̣ܳܬ ܒܝܰܕ ܪܽܘܚܳܐ ܩܰܕܺܝܫܳܐ ܗܰܘ ܕܽܐܘܣܝܳܐܺܝܬ ܐܺܝܬܰܘܗ̱ܝ ܗ̱ܘܳܐ ܒܶܗ܆ ܘܰܕܗܰܘ ܕܗܽܘ ܐܺܝܬܰܘܗ̱ܝ ܝܳܗܽܘܒܳܐ ܕܡܰܘܗ̈ܒܳܬܶܗ ܠܰܐ̱ܚܪ̈ܳܢܶܐ܆ ܟܰܕ ܙܳܕܶܩ ܗ̱ܘܳܐ ܠܰܡܩܰܠܳܣܽܘ܆ ܗܳܠܶܝܢ ܕܓܽܘܕܳܦܳܐ ܢܳܩ̈ܦܳܢ ܗ̱ܘܰܝ̈. ܠܒܰܪܢܳܫܳܐ ܓܶܝܪ ܕܰܐܟܚܕܳܐ ܣܰܡܝܳܐ ܘܕܽܘܓܳܐ ܘܕܰܝܘܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܕܥܰܡ ܬܠܳܬܳܐ ܚܰܫ̈ܶܐ ܡܶܬܟܰܬܰܫ ܗ̱ܘܳܐ܆ ܘܥܰܡ ܗܳܠܶܝܢ ܬܪܶܝܢ ܪ̈ܶܓܫܶܐ ܪ̈ܺܝܫܳܝܶܐ ܚܰܣܺܝܪ ܗ̱ܘܳܐ ܐܳܦ ܡܶܢ ܡܰܥܒܕܳܢܽܘܬܳܐ ܕܗܰܘܢܳܐ܆ ܕܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܗܳܢܽܘܢ ܕܰܒܫܳܢܝܽܘܬܳܐ ܗܳܝ ܕܡܶܢ ܕܰܝܘܳܐ ܐܰܚܺܝܕܺܝܢ܆ ܦܰܐܝܽܘܬ ܐܰ‌ܠܳܗܳܐܺܝܬ ܐܰܟܚܕܳܐ ܘܪܶܚܡܰܬ ܐ̱ܢܳܫܳܐܺܝܬ ܐܰܣܝܶܗ. ܐܰܝܟܰܢܳܐ ܟܺܝܬ ܕܗܰܘ ܕܽܘܓܳܐ ܘܣܰܡܝܳܐ ܐܳܦ ܢܡܰܠܶܠ ܐܳܦ ܢܶܚܙܶܐ. ܘܓܶܢܣܳܐ ܗܰܘ ܕܝܽܗ̱ܘ̈ܕܳܝܶܐ ܢܳܨܶܐ ܥܡ ܐܰ‌ܠܳܗܳܐ ܘܕܰܡܛܰܝܶܒ ܠܘܳܬ ܓܽܘܕܳܦܳܐ ܐܳܡܰܪ ܗ̱ܘܳܐ܆ ܕܒܰܒܥܶܠܙܒܽܘܒ ܪܺܝܫܳܢܳܐ ܕܕܰܝ̈ܘܶܐ ܡܰܦܶܩ ܕܰܝ̈ܘܶܐ^[46]. ܠܡܶܛܰܪ ܕܶܝܢ ܙܳܕܶܩ ܘܰܠܡܶܬܒܰܩܳܝܽܘ܆ ܕܗܳܪܟܳܐ ܕܽܘܓܳܐ ܩܪܳܐ ܟܬܳܒܳܐ ܟܳܗܢܳܝܳܐ܆ ܠܗܰܘ ܕܕܰܢܡܰܠܶܠ ܠܳܐ ܡܶܫܟܰܚ ܗ̱ܘܳܐ. ܟܰܕ ܠܘܳܬ ܗܳܢܳܐ ܗܳܟܺܝܠ ܓܽܘܕܳܦܳܐ ܡܰܟܣܳܢܳܐܺܝܬ ܡܳܬܰܚ ܗ̱ܘܳܐ ܡܶܠܬܶܗ ܦܳܪܽܘܩܰܢ܆ ܘܰܒܝܰܕ ܣܰܓܺܝ̈ܳܐܬܳܐ ܚܰܘܺܝ ܘܰܒܗܶܝܢ ܒܡ̈ܶܠܶܐ ܐܶܡܰܪ܆ ܕܤܳܛܳܢܳܐ ܠܣܳܛܳܢܳܐ ܠܳܐ ܡܰܦܶܩ܆ ܘܰܕܗܽܘ ܒܪܽܘܚܳܐ ܕܰܐ‌ܠܳܗܳܐ ܡܰܦܶܩ ܕܰܝ̈ܘܶܐ܆ ܗܳܝܕܶܝܢ ܒܡ̈ܶܠܶܐ ܗܳܠܶܝܢ ܕܩܰܕܺܝ̈ܡܳܢ ܐܰܡܺܝܪ̈ܳܢ ܐܶܬܚܰܫܰܚ ܟܰܕ ܐܳܡܰܪ܆ ܕܟܽܠ ܓܽܘܕܳܦܳܐ ܕܥܰܠ ܒܪܶܗ ܕܐ̱ܢܳܫܳܐ ܢܶܫܬܒܶܩ܆ ܗܰܘ ܕܶܝܢ ܕܥܰܠ ܪܽܘܚܳܐ ܩܰܕܺܝܫܳܐ ܠܳܐ ܢܶܫܬܒܶܩ^[47].

ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܟܰܕ ܠܘܳܬ ܫܺܝܛܽܘܬܳܐ ܘܡܰܟܺܝܟܽܘܬܳܐ ܕܡܶܛܽܠܳܬܰܢ ܕܡܶܬܒܰܪܢܫܳܢܽܘܬܳܐ ܕܡܶܠܬܳܐ ܐܰ‌ܠܳܗܳܐ ܘܦܳܪܽܘܩܰܢ ܡܣܰܡܶܝܢ ܗ̱ܘܰܘ ܝܽܗ̱ܘ̈ܕܳܝܶܐ܆ ܘܟܰܕ ܐܰܝܟ ܕܰܒܚܶܫܽܘܟܳܐ ܡܗܰܠܟܺܝܢ ܗ̱ܘܰܘ ܡܶܬܬܰܩܠܺܝܢ ܗ̱ܘܰܘ܆ ܘܺܐܝܬܶܝܗ̇ ܗ̱ܘܳܬ ܠܗܽܘܢ ܟܺܐܦܳܐ ܗܳܝ ܪܺܝܫ ܓܽܘܢܝܳܐ ܘܰܓܒܺܝܬܳܐ ܘܰܡܝܰܩܰܪܬܳܐ^[48]܆ ܐܰܝܟܰܢܳܐ ܕܰܢܒܺܝܽܘܬܳܐ ܩܰܕܡܰܬ ܐܰܟܪܙܰܬ܆ ܫܽܘܥܳܐ ܕܟܶܫܠܳܐ ܘܟܺܐܦܳܐ ܕܬܽܘܩܰܠܬܳܐ^[49]܆ ܘܠܳܐ ܡܶܬܚܰܫܒܺܝܢ ܗ̱ܘܰܘ ܣܳܟ ܠܝܳܬܶܗ ܗܳܝ ܕܰܩܕܳܡ ܥܳܠ̈ܡܶܐ܆ ܘܠܺܝܠܺܝܕܽܘܬܶܗ ܕܠܳܐ ܓܫܽܘܡ ܕܡܶܢ ܐܰܒܳܐ܆ ܘܰܠܫܰܘܝܽܘܬܳܐ ܘܠܳܐ ܡܫܰܚܠܦܽܘܬܳܐ ܕܰܒܟܽܠ ܡܽܘܢ ܕܗܽܘ ܕܰܠܘܳܬ ܗܰܘ ܕܝܰܠܕܶܗ܆ ܐܶܠܳܐ ܟܰܕ ܬܰܪܥܺܝܬܳܐ ܕܥܰܠ ‌ܐܰܪܥܳܐ ܡܶܬܓܰܪܪܐ ܐܺܝܬ ܗ̱ܘܳܐ ܠܗܽܘܢ ܐܳܡܪܺܝܢ ܗ̱ܘܰܘ܆ ܠܳܐ ܗ̱ܘܳܐ ܗܳܢܳܐ ܐܺܝܬܰܘܗ̱ܝ ܗܰܘ ܒܪܶܗ ܕܢܰܓܳܪܳܐ܆ ܠܳܐ ܗ̱ܘܳܐ ܐܶܡܶܗ ܡܶܬܐܰܡܪܳܐ ܡܰܪܝܰܡ^[50]܆ ܘܬܽܘܒ܆ ܫܳܡܪܳܝܳܐ ܐܺܝܬܰܝܟ܆ ܘܕܰܝܘܳܐ ܐܺܝܬ ܠܳܟ^[51]. ܘܬܽܘܒ. ܡܶܛܽܠ ܥܒ̈ܳܕܶܐ ܛܳܒ̈ܶܐ ܠܳܐ ܪܳܓܡܺܝܢܰܢ ܠܳܟ. ܐܶܠܳܐ ܡܶܛܽܠ ܓܽܘܕܳܦܳܐ܆ ܘܡܶܛܽܠ ܕܟܰܕ ܐܰܢ̱ܬ ܒܰܪܢܳܫܳܐ ܐܺܝܬܰܝܟ܆ ܥܳܒܶܕ ܐܰܢ̱ܬ ܢܰܦܫܳܟ ܐܰ‌ܠܳܗܳܐ^[52].

ܗܳܠܶܝܢ ܗܳܟܺܝܠ܆ ܟܽܠܗܶܝܢ ܐܰܝܠܶܝܢ ܕܟܰܕ ܐܰܝܟ ܕܥܰܠ ܒܪܶܗ ܕܐ̱ܢܳܫܳܐ ܡܓܰܕܦܺܝܢ ܐܳܡܪܺܝܢ ܗ̱ܘܰܘ܆ ܟܰܕ ܒܰܡܕܰܒܪܳܢܽܘܬܳܐ ܕܒܰܒܣܰܪ ܐܰܝܟܰܢܳܐ ܕܶܐܡܪܶܬ ܡܶܬܬܰܩܠܺܝܢ ܗ̱ܘܰܘ܆ ܐܳܡܰܪ ܦܳܪܽܘܩܰܢ ܕܢܶܫ̈ܬܰܒܩܳܢ ܠܗܽܘܢ܆ ܟܰܕ ܐܺܝܬ ܠܗܽܘܢ ܠܘܳܬ ܡܰܦܰܩ ܒܪܽܘܚܳܐ ܕܠܳܐ ܝܺܕܰܥܬܶܗ ܕܐ̱ܪܳܙܳܐ ܡܬܰܚܬܳܝܽܘܬܶܗ ܘܡܰܟܺܝܟܽܘܬܶܗ ܗܳܝ ܕܰܐܝܟ ܒܰܪܢܳܫܳܐ. ܡܶܛܽܠܗܳܕܶܐ ܓܶܝܪ܆ ܕܢܶܫܬܒܶܩ ܠܰܒܢܰܝ̈ܢܳܫܳܐ ܐܶܡܰܪ ܘܠܰܘ ܠܟܽܘܢ^[53]. ܟܰܕ ܐܰܝܟ ܕܰܠܡܺܐܡܰܪ ܐܳܡܰܪ ܗ̱ܘܳܐ܆ ܕܰܐܝܟ ܕܠܰܒ̈ܢܰܝܢܳܫܳܐ ܕܠܳܐ ܝܳܕܥܺܝܢ ܠܥܽܘܡܩܳܗ̇ ܕܰܡܕܰܒܪܳܢܽܘܬܳܐ܆ ܝܳܗܶܒ ܐ̱ܢܳܐ ܫܽܘܒܩܳܢܳܐ.

ܗܳܠܶܝܢ ܕܶܝܢ ܕܠܽܘܩܒܰܠ ‌ܐܳܬܘ̈ܳܬܳܐ ܐܰ‌ܠܳܗܳܝ̈ܳܬܳܐ ܘܠܽܘܩܒܰܠ ܚܰܝ̈ܠܶܐ ܬܡܺܝ̈ܗܶܐ܆ ܗܳܠܶܝܢ ܕܰܡܫܰܡܠܶܐ ܗ̱ܘܳܐ ܘܡܰܥܒܶܕ ܒܪܽܘܚܳܐ ܗܰܘ ܕܒܶܗ ܐܺܝܬܰܘܗ̱ܝ ܗ̱ܘܳܐ ܘܰܫܘܶܐ ܒܽܐܘܣܺܝܰܐ܆ ܟܰܕ ܡܓܰܕܦܺܝܢ ܡܨܰܚܶܝܢ ܗ̱ܘܰܘ܆ ܟܰܕ ܐܰܝܟ ܕܶܐܡܪܶܬ ܐܳܡܪܺܝܢ ܗ̱ܘܰܘ ܠܶܗ ܕܒܰܒܥܶܠܙܒܽܘܒ ܡܰܦܶܩ ܕܰܝ̈ܘܶܐ^[54]܆ ܗܳܠܶܝܢ ܐܰܝܟ ܡܰܢ ܕܰܠܘܳܬ ܓܽܘܕܳܦܳܐ ܗܰܘ ܕܥܰܠ ܪܽܘܚܳܐ ܩܰܕܺܝܫܳܐ ܚܳܝܪ̈ܳܢ܆ ܘܡܶܢܗܽܘܢ ܕܰܥ̈ܒܳܕܶܐ ܐܺܝܬ ܗ̱ܘܳܐ ܠܗܶܝܢ ܗܳܝ ܕܦܰܐܝܳܐ ܠܰܐܠܳܗܳܐ܆ ܘܳܐܦܠܳܐ ܚܰܕ ܐܰܬܪܳܐ ܕܡܰܦܰܩܒܪܽܘܚܳܐ ܫܳܒ̈ܩܳܢ ܠܗܽܘܢ܆ ܐܳܡܰܪ ܡܫܺܝܚܳܐ ܕܠܳܐ ܢܶܫ̈ܬܰܒܩܳܢ ܠܗܽܘܢ܆ ܕܳܐܦܠܳܐ ܚܕܳܐ ܬܰܚܦܺܝܬܳܐ ܐܺܝܬ ܗ̱ܘܳܐ ܠܗܽܘܢ ܗܳܪܟܳܐ ܕܠܳܐ ܝܺܕܰܥܬܳܐ. ܒܰܕܓܽܘܢ ܐܳܦ ܥܰܠ ܗܳܕܶܐ ܗܳܝ ܕܠܳܐ ܢܶܫܬܒܶܩ ܠܰܒ̈ܢܰܝܢܳܫܳܐ² ܩܪܺܝܚܳܐܺܝܬ ܐܶܡܰܪ܆ ܟܰܕ ܡܳܬܰܚ ܥܠܰܝܗܽܘܢ ܗܳܠܶܝܢ ܕܰܩܛܝܓܪܳܢܽܘܬܳܐ. ܙܳܕܶܩ ܗ̱ܘܳܐ ܠܗܽܘܢ ܓܶܝܪ ܐܰܝܟ ܕܠܰܒ̈ܢܰܝܢܳܫܳܐ ܡܠܻ̈ܝܠܶܐ܆ ܕܠܳܐ ܥܰܠ ‌ܐܰܝܠܶܝܢ ܕܗܳܟܰܢܳܐ ܢܰܗܺܝܪ̈ܳܢ ܘܺܝܕܺܝ̈ܥܳܢ܆ ܘܰܩܕܳܡ ܥܰܝ̈ܢܶܐ ܣܺܝ̈ܡܳܢ ܘܡܶܬܚܰܙܝ̈ܳܢ܆ ܘܗ̱ܝ ܕܦܰܐܝܳܐ ܠܰܐܠܳܗܳܐ ܡܰܙܥ̈ܩܳܢ܆ ܠܳܐ ܡܰܪܓܫܳܢܳܐܺܝܬ ܢܶܗܘܶܐ ܐܺܝܬ ܠܗܽܘܢ ܘܰܢܓܰܕܦܽܘܢ. ܥܰܠ ܬܰܪ̈ܬܰܝܗܶܝܢ ܓܶܝܪ ܟܰܕ ܫܡܳܐ ܕܰܒ̈ܢܰܝ ܐ̱ܢܳܫܳܐ ܣܺܝܡ܆ ܒܰܙܒܰܢ ܡܰܢ ܫܽܘܒܩܳܢܳܐ܆ ܒܰܙܒܰܢ ܕܶܝܢ ܩܛܺܝܓܪܳܢܽܘܬܳܐ ܐܰܥܶܠ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܘ ܡܶܛܽܠ ܨܰܥܪܳܐ ܐܺܝܬܰܘܗ̱ܝ ܪܽܘܓܙܳܐ܆ ܒܕܽܘܟܬܳܐ ܓܶܝܪ ܐ̱ܚܪܺܬܳܐ ܐܳܦ ܕܰܝܘܳܢܳܐ ܐܳܦ ܫܳܡܪܳܝܳܐ ܩܪܰܐܘܽܗܝ܆ ܐܶܠܳܐ ܡܶܛܽܠ ܓܽܘܕܳܦܗܽܘܢ ܕܥܰܠ ܬܶܕܡܪ̈ܳܬܳܐ ܐܰ‌ܠܳܗܳܝ̈ܳܬܳܐ ܘܠܳܐ ܝܺܕܰܥܬܗܽܘܢ.

ܠܗܳܢܳܐ ܕܶܝܢ ܓܽܘܕܳܦܳܐ ܕܥܰܠ ܒܪܶܗ ܕܐ̱ܢܳܫܳܐ ܕܡܶܫܬܒܶܩ܆ ܘܡܶܢ ܓܽܘܕܳܦܳܐ ܗܰܘ ܕܥܰܠ ܪܽܘܚܳܐ ܩܰܕܺܝܫܳܐ ܡܶܬܬܕܺܝܢ ܕܰܒܨܺܝܪ܆ ܥܕܰܡܳܐ ܠܙܰܒܢܳܐ ܕܰܨܠܺܝܒܳܐ ܙܳܕܶܩ ܠܰܢ ܕܢܶܣܬܰܟܠܺܝܘܗ̱ܝ. ܡܶܛܽܠ ܟܺܝܬ ܕܰܥܕܰܡܳܐ ܠܗܰܘ ܙܰܒܢܳܐ܆ ܡܚܰܦܶܐ ܗ̱ܘܳܐ ܡܫܺܝܚܳܐ ܒܝܰܕ ܡ̈ܶܠܶܐ ܡܕܰܒܪ̈ܳܢܝܳܬܳܐ ܘܣܽܘܥܪ̈ܳܢܶܐ܆ ܠܰܡܥܰܠܝܽܘܬܳܐ ܕܰܐ‌ܠܳܗܽܘܬܳܐ ܕܺܝܠܶܗ. ܡܶܢ ܒܳܬܰܪ ܓܶܝܪ ܨܠܺܝܒܳܐ ܘܰܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ܆ ܟܰܕ ܠܳܐ ܬܽܘܒ ܒܰܒܣܰܪ ܡܶܬܺܝܕܰܥ܆ ܗܳܢܰܘ ܕܶܝܢ ܟܰܕ ܠܳܐ ܬܽܘܒ ܒܝܰܕ ܣܽܘܥܪ̈ܳܢܶܐ ܐܰܘ ܡ̈ܶܠܶܐ ܡܰܟܺܝ̈ܟܳܬܳܐ ܘܐ̱ܢܳܫܳܝ̈ܳܬܳܐ ܐܳܬܶܐ܆ ܟܰܕ ܡܕܰܒܪܳܢܽܘܬܳܐ ܚܕܳܐ ܙܒܰܢ ܫܶܩܠܰܬ ܠܳܗ̇ ܫܽܘܠܳܡܳܐ ܐܰܝܟܰܢܳܐ ܕܳܐܡܰܪ ܫܠܺܝܚܳܐ܆ ܐܶܢ ܕܶܝܢ ܐܳܦ ܝܺܕܰܥܢ ܒܰܒܣܰܪ ܠܰܡܫܺܝܚܳܐ ܐܶܠܳܐ ܗܳܫܳܐ ܠܳܐ ܬܽܘܒ ܝܳܕܥܺܝܢܰܢ^[55]܆ ܐܳܦܠܳܐ ܚܕܳܐ ܥܶܠܬܳܐ ܕܫܽܘܒܩܳܢܳܐ ܠܗܳܢܽܘܢ ܕܰܥܠܰܘܗ̱ܝ ܡܓܰܕܦܺܝܢ ܢܶܬܶܠ. ܗܳܝܕܶܝܢ ܓܶܝܪ ܗܳܝܕܶܝܢ ܡܶܟܺܝܠ܆ ܠܳܐ ܗ̱ܘܳܐ ܐܰܝܟ ܕܒܰܒܪܶܗ ܕܐ̱ܢܳܫܳܐ ܡܓܰܕܶܦ ܐ̱ܢܳܫ܆ ܗܰܘ ܕܡܰܠ̣ܺܝ ܘܰܢܦܰܩ ܠܡܽܘܫ̈ܚܳܬܳܐ ܕܣܽܘܪܳܩܳܐ܆ ܘܰܠܪܰܘܡܳܐ ܣܠܶܩ ܐܳܦ ܟܰܕ ܡܒܰܣܰܪ܆ ܘܡܶܢ ܝܰܡܺܝܢܳܐ ܝܳܬܶܒ ܥܰܡ ܐܰܒܳܐ܆ ܐܳܦܶܢ ܠܳܐ ܦܰܓܪܳܢܳܐܺܝܬ ܠܟܽܠ ܡܳܠܶܐ ܗ̱ܘܳܐ ܟܺܝܬ ܘܡܳܠܶܐ܆ ܘܺܐܝܬܰܘܗ̱ܝ ܗ̱ܘܳܐ ܐܳܦ ܐܺܝܬܰܘܗ̱ܝ ܟܽܠܶܗ ܠܳܐ ܡܶܬܕܰܪܟܳܢܳܐܺܝܬ ܠܥܶܠ ܡܶܢ ܟܽܠ. ܡܶܛܽܠܗܳܕܶܐ ܓܶܝܪ ܐܶܡܰܪ܆ ܗܰܘ ܕܶܐܢ ܢܺܐܡܰܪ ܡܶܠܬܳܐ ܥܰܠ ܒܪܶܗ ܕܐ̱ܢܳܫܳܐ^[56]. ܗܰܘ ܗܳܟܺܝܠ ܕܡܶܢ ܒܳܬܰܪ ܫܽܘܠܳܡܳܐ ܕܰܡܕܰܒܪܳܢܽܘܬܳܐ ܡܓܰܕܶܦ ܥܠܰܘܗ̱ܝ܆ ܐܰܟܙܢܳܐ ܕܗܰܘ ܕܥܰܠ ܪܽܘܚܳܐ ܩܰܕܺܝܫܳܐ ܦܩ̣ܰܪ ܘܨܰܥܰܪ܆ ܘܰܠܗܰܠ ܡܶܢ ܫܽܘܒܩܳܢܳܐ ܚܛܳܐ܆ ܫܽܘܒܩܳܢܳܐ ܐܳܦܠܳܐ ܚܰܕ ܢܶܗܘܶܐ ܕܰܚܛܳܗܳܐ.

ܗܳܠܶܝܢ ܕܶܝܢ ܐܳܡܪܺܝܢܰܢ܆ ܐܶܢܗܽܘ ܕܐ̱ܢܳܫ ܒܶܗ ܒܓܽܘܕܳܦܳܐ ܥܕܰܡܳܐ ܠܫܽܘܠܳܡܳܐ ܕܚܰܝ̈ܶܐ ܕܺܝܠܶܗ ܩܰܘܺܝ܆ ܘܗܳܟܰܢܳܐ ܫܰܢܺܝ ܡܶܢ ܚܰܝ̈ܶܐ. ܐܶܢ ܓܶܝܪ ܡܰܢܰܥ ܕܰܢܬܽܘܒ܆ ܟܰܕ ܝܰܘ̈ܡܳܬܳܐ ܕܚܰܝ̈ܶܐ ܗܳܠܶܝܢ ܡܶܫܬܰܪܬܚܺܝܢ ܗ̱ܘܰܘ ܠܶܗ܆ ܓܰܠܝܳܐ ܗܝ ܘܝܺܕܺܝܥܳܐ ܕܗܺܝ ܬܝܳܒܽܘܬܳܐ ܠܟܽܠ ܚܛܳܗܳܐ ܙܳܟܝܳܐ܆ ܟܰܕ ܝܺܕܺܝܥܳܐ ܕܫܽܘܒܩܳܢܳܐ ܝܳܗܒܳܐ ܠܗܳܢܽܘܢ ܕܫܰܪܺܝܪܳܐܺܝܬ ܐܰܝܟ ܕܫܳܘܶܐ ܬܳܝܒܺܝܢ. ܙܳܕܶܩ ܗܳܟܺܝܠ ܕܰܐܝܟ ܕܰܒܬܰܚܘܺܝܬܳܐ ܕܣܽܘܥܪܳܢܳܐ܆ ܐܰܝܟܰܢܳܐ ܕܝܰܬܺܝܪ ܓܠܺܝܬܳܐ ܬܶܗܘܶܐ ܗܳܝ ܕܶܐܬܐܰܡܪܰܬ܆ ܕܰܢܣܺܝܡ ܕܰܒܗܰܘ ܙܰܒܢܳܐ ܓܰܕܶܦܘ ܬܪܶܝܢ ܐ̱ܢܳܫܺܝ̈ܢ܆ ܘܚܰܕ ܡܶܢ ܐܶܬܬܩܶܠ ܒܒܶܣܪܳܐ ܘܶܐܡܰܪ ܐܶܢ ܬܶܓܕܰܫ ܠܝܶܫܽܘܥ܆ ܕܰܐܢ̱ܬ ܟܰܕ ܒܰܪܢܳܫܳܐ ܐܺܝܬܰܝܟ܆ ܥܳܒܶܕ ܐܰܢ̱ܬ ܢܰܦܫܳܟ ܐܰ‌ܠܳܗܳܐ^[57]. ܗܰܘ ܕܶܝܢ ܐ̱ܚܪܺܢܳܐ ܟܰܕ ܠܘܳܬ ܐܳܬܘ̈ܳܬܳܐ ܐܰ‌ܠܳܗܳܝ̈ܳܬܳܐ ܗܳܠܶܝܢ ܕܰܒܪܽܘܚܳܐ ܩܰܕܺܝܫܳܐ ܡܶܫܬܰܡ̈ܠܝܳܢ ܗ̱ܘܰܝ̈ ܡܓܰܕܦܳܢܳܐܺܝܬ ܐܶܬܬܙܺܝܥ܆ ܐܶܡܰܪ ܕܒܰܒܥܶܠܙܒܽܘܒ ܪܺܝܫܳܢܳܐ ܕܕܰܝ̈ܘܶܐ ܡܰܦܶܩ ܕܰܝ̈ܘܶܐ^[58]. ܘܰܬܪ̈ܰܝܗܽܘܢ ܒܰܚ̈ܛܳܗܶܐ ܩܫܰܝ̈ܳܐ܆ ܐܶܬܬܰܘܒܰܠܘ ܐܽܘܪܚܳܐ ܗܳܝ ܕܰܠܘܳܬ ܡܰܘܬܳܐ. ܗܳܪܟܳܐ܆ ܗܰܘ ܡܰܢ ܐܰܝܟ ܐܰܝܢܳܐ ܕܥܰܠ ܒܪܶܗ ܕܐ̱ܢܳܫܳܐ ܓܰܕܶܦ܆ ܢܶܫܬܒܶܩ ܠܶܗ. ܗܰܘ ܕܶܝܢ ܐܰܝܟ ܐܰܝܢܳܐ ܕܰܒܪܽܘܚܳܐ ܩܰܕܺܝܫܳܐ ܐܰܣܟܶܠ ܘܰܚܛܳܐ܆ ܢܶܬܚܰܝܰܒ. ܟܰܕ ܠܳܐ ܒܥܳܠܡܳܐ ܗܳܢܳܐ ܐܶܢ ܬܶܓܕܰܫ܆ ܘܳܐܦܠܳܐ ܒܗܰܘ ܕܰܥܬܺܝܕ ܐܳ‌ܠܨܳܐܺܝܬ ܐܶܫܬܘܺܝ ܠܫܽܘܒܩܳܢܳܐ.

ܐ̱ܢܳܫܺܝ̈ܢ ܕܶܝܢ ܐܳܡܪܺܝܢ܆ ܕܳܐܦ ܢܒܺܝܳܐܺܝܬ ܐܰܡܪܳܗ̇ ܡܳܪܰܢ ܠܗܳܕܶܐ܆ ܕܓܽܘܕܳܦܳܐ ܗܰܘ ܕܥܰܠ ܪܽܘܚܳܐ ܩܰܕܺܝܫܳܐ ܠܳܐ ܢܶܫܬܒܶܩ^[59]. ܩܰܕܶܡ ܗ̱ܘܳܐ ܓܶܝܪ ܐܳܡܪܺܝܢ ܝܳܕܰܥ܆ ܕܰܥܬܺܝܕܺܝܢ ܐ̱ܢܳܫܺܝ̈ܢ ܡܶܢ ܐܶܪ̈ܛܝܩܘ ܕܠܳܐ ܐܰ‌ܠܳܗ܆ ܕܰܢܬܰܚܬܽܘܢܳܝܗ̱ܝ ܠܪܽܘܚܳܐ ܩܰܕܺܝܫܳܐ ܡܶܢ ܬܶܫܒܽܘܚܬܳܐ ܟܺܝܬ ܘܰܐ‌ܠܳܗܽܘܬܳܐ ܫܰܘܝܰܬ ܒܺܐܝܩܳܪܳܐ ܕܰܠܘܳܬ ܐܰܒܳܐ ܘܰܒܪܳܐ܆ ܕܗܳܢܽܘܢ ܕܰܗܘ̣ܳܐ ܪܺܝܫ ܬܶܓܡܗܽܘܢ ܪܰܫܺܝܥܳܐ ܡܐܩܕܘܢܝܘܤ܆ ܡܶܛܽܠ ܗܳܝ ܕܶܐܡܰܪ ܗܽܘ ܦܳܪܽܘܩܰܢ ܒܶܐܘܰܢ̈ܓܶܠܺܝܰܐ ܡܶܛܽܠ ܦܰܪܩܠܺܝܛܳܐ܆ ܕܠܳܐ ܢܡܰܠܶܠ ܡܶܢ ܢܰܦܫܶܗ܆ ܐܶܠܳܐ ܟܽܠܗܶܝܢ ܐܰܝܠܶܝܢ ܕܶܐܢ ܢܶܫܡܰܥ ܢܡܰܠܶܠ܆ ܘܗܰܘ ܢܫܰܒܚܰܢܝ܆ ܘܰܕܡܶܢ ܕܺܝܠܝ ܢܶܣܰܒ^[60]܆ ܘܡܶܛܽܠܗܳܕܶܐ ܐܳܡܪܺܝܢ ܨܶܒܝܳܢܳܐܺܝܬ ܒܗܳܕܶܐ ܡܶܠܬܳܐ ܩܫܺܝܬܳܐ ܐܶܬܚܰܫܰܚ܆ ܘܗܽܘ ܠܶܗ ܝܰܨܺܝܦܳܐܺܝܬ ܐܰܙܥܰܪ܆ ܘܶܐܡܰܪ ܕܓܽܘܕܳܦܳܐ ܗܰܘ ܕܥܰܠ ܪܽܘܚܳܐ ܩܰܕܺܝܫܳܐ ܪܰܒܳܐ ܐܺܝܬܰܘܗ̱ܝ ܡܶܢ ܗܰܘ ܕܰܥܠܰܘܗ̱ܝ܆ ܟܰܕ ܩܰܕܶܡ ܡܪܺܝܡ ܠܰܬܪܺܝܥܽܘܬ ܦܽܘܡܳܐ ܠܳܐ ܡܦܰܓܰܕܬܳܐ ܕܶܐܪ̈ܛܝܩܘ ܕܠܽܘܩܒܰܠ ܪܽܘܚܳܐ܆ ܐܰܝܟ ܕܥܰܠ ܒܨܺܝܪܳܐ ܘܰܕܠܳܐ ܫܘܶܐ ܒܽܐܘܣܺܝܰܐ ܠܰܐܒܳܐ ܘܠܰܒܪܳܐ.

ܐܺܝܬ ܕܶܝܢ ܕܳܐܦ ܦܽܘܫܳܩܳܐ ܬܠܺܝܬܳܝܳܐ ܐܰܝܟ ܕܰܒܡܶܬܥܰܠܝܳܢܽܘܬܳܐ ܢܶܬܶܠ ܠܳܗ̇ ܠܕܽܘܟܬܳܐ ܗܳܕܶܐ. ܡܶܬܒܰܪܢܫܳܢܽܘܬܶܗ ܓܶܝܪ ܕܦܳܪܽܘܩܰܢ܆ ܛܶܟܣܳܐ ܕܝܽܘܠ̈ܦܳܢܶܐ ܡܰܥ̈ܠܳܢܳܝܶܐ ܐܰܘܟܺܝܬ ܫܰܪ̈ܘܳܝܶܐ ܐܰܚܺܝܕܳܐ. ܝܽܘܠ̈ܦܳܢܶܐ ܕܶܝܢ ܡܰܥ̈ܠܳܢܳܝܶܐ ܐܺܝܬܰܝܗܽܘܢ܆ ܗܳܠܶܝܢ ܕܰܠܗܳܢܽܘܢ ܕܗܳܫܳܐ ܡܫܰܪܶܝܢ ܒܕܶܚܠܰܬ ܐܰ‌ܠܳܗܳܐ܆ ܘܡܶܬܗܰܕܶܝܢ ܐܰܝܟ ܕܰܒܝܰܕ ܤܛܽܘܟ̈ܝܶܐ ܐܰܘܟܺܝܬ ܐܳܬܘ̈ܳܬܳܐ ܩܰܕܡܳܝ̈ܳܬܳܐ܆ ܒܩܰܠܺܝܠ ܩܰܠܺܝܠ ܠܘܳܬ ܝܺܕܰܥܬܳܐ ܕܡܶܛܽܠ ‌ܐܰ‌ܠܳܗܳܐ ܡܶܢ ܡܰܠ̈ܦܳܢܶܐ ܡܰܪܬܝܳܢܳܐܺܝܬ ܡܶܫ̈ܬܰܠܡܳܢ. ܐܳܦ ܓܶܝܪ ܝܺܕܰܥܬܳܐ ܕܡܶܛܽܠ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܠܳܐ ܡܶܬܩܰܪܒܳܢܺܝܬܳܐ ܐܺܝܬܶܝܗ̇ ܗ̱ܘܳܬ ܠܰܒܢܰܝ̈ܢܳܫܳܐ܆ ܘܠܳܐ ܡܶܬܓܰܫܫܳܢܺܝܬܳܐ. ܐܶܠܳܐ ܗܰܘ ܚܰܕ ܡܶܢ ܬܠܺܝܬܳܝܽܘܬܳܐ ܡܶܠܬܶܗ ܕܰܐ‌ܠܳܗܳܐ܆ ܟܰܕ ܐܶܬܒܰܣܰܪ ܠܳܐ ܡܶܫܬܰܚܠܦܳܢܳܐܺܝܬ ܘܶܐܬܒܰܪܢܰܫ܆ ܘܡܰܟܶܟ ܗܽܘ ܠܶܗ ܨܶܒܝܳܢܳܐܺܝܬ܆ ܠܺܝܕܰܥܬܳܐ ܗܳܝ ܕܡܶܛܽܠܳܬܶܗ ܘܡܶܛܽܠ ‌ܐܰܒܳܐ ܘܡܶܛܽܠ ܪܽܘܚܳܐ ܩܰܕܺܝܫܳܐ ܩܰܪܶܒ ܠܰܢ܆ ܟܰܕ ܐܰܝܟ ܕܥܰܡ ܛܠܳܝ̈ܶܐ ܠܰܓܠܶܓ ܥܰܡܰܢ ܒܝܰܕ ܡܶܬܕܰܡܝܳܢܽܘܬܶܗ ܕܰܠܘܳܬܰܢ. ܘܰܒܝܰܕ ܗܳܝ ܕܶܐܫܬܰܘܬܰܦ ܠܰܢ ܒܳܗ̇ ܟܰܕ ܒܳܗ̇ ܒܽܐܘܣܺܝܰܐ ܤܛܰܪ ܡܶܢ ܚܛܺܝܬܳܐ܆ ܘܰܗܘ̣ܳܐ ܒܰܫܪܳܪܳܐ ܒܰܪܢܳܫܳܐ. ܡܶܛܽܠܗܳܕܶܐ ܓܶܝܪ ܬܰܪܥܳܐ ܘܽܐܘܪܚܳܐ ܗܽܘ ܠܶܗ ܡܫܰܡܰܗ ܗ̱ܘܳܐ^[61]܆ ܟܰܕ ܡܚܰܘܶܐ ܗ̱ܘܳܐ ܕܗܽܘ ܗܘ̣ܳܐ ܠܰܢ ܡܰܥܰܠܬܳܐ ܘܫܽܘܪܳܝܳܐ ܕܣܽܘܟܳܠܳܐ ܕܡܶܛܽܠ ܬܠܺܝܬܳܝܽܘܬܳܐ܆ ܘܕܺܝܕܰܥܬܳܐ ܕܰܐ‌ܠܳܗܳܐ ܗܳܝ ܕܰܒܟܽܠ ܡܶܕܶܡ.

ܐܶܢܗܽܘ ܗܳܟܺܝܠ ܕܐ̱ܢܳܫ ܟܰܕ ܗܳܫܳܐ ܛܥܶܡ ܡܶܢ ܝܽܘܠ̈ܦܳܢܶܐ ܕܕܶܚܠܰܬ ܐܰ‌ܠܳܗܳܐ܆ ܘܟܰܕ ܥܕܰܟܺܝܠ ܩܕܳܡ ܒܶܝܬ ܬܰܪ̈ܥܶܐ ܕܗܳܟܰܢܳܐ ܐܳܡܰܪ ܕܺܝܕܰܥܬܐ ܐܺܝܬܰܘܗ̱ܝ܆ ܚܛܳܐ ܘܰܫܪܰܥ ܡܶܢ ܗܳܝ ܕܘܳܠܝܳܐ܆ ܐܰܝܟ ܐܰܝܢܳܐ ܕܰܒܡܶܬܒܰܪܢܫܳܢܽܘܬܳܐ ܚܛܳܐ܆ ܘܒܰܒܪܶܗ ܕܐ̱ܢܳܫܳܐ ܓܰܕܶܦ܆ ܢܶܫܬܒܶܩ ܠܶܗ ܘܫܽܘܒܩܳܢܳܐ ܢܶܗܘܶܐ ܠܶܗ. ܐܶܢ ܕܶܝܢ ܐ̱ܢܳܫ ܟܰܕ ܙܰܒܢܳܐ ܣܰܓܺܝܳܐܐ ܐܶܬܶܐܡܶܢ ܘܶܐܬܕܰܪܰܫ ܒܡܰܪ̈ܕܘܳܬܳܐ ܕܚܶܟܡܬܳܐ ܐܰ‌ܠܳܗܳܝܬܳܐ܆ ܘܰܒܝܰܕ ܫܽܘܘܫܳܛܳܐ ܕܰܡܝܰܬܪ̈ܳܬܳܐ ܘܰܒܝܰܕ ܬܶܐܽܘܪܺܝܰܐ܆ ܠܫܽܘܟܳܢ̈ܶܐ ܪ̈ܽܘܚܳܢܳܝܶܐ ܐܶܫܬܘܺܝ܆ ܗܳܢܽܘܢ ܕܰܡܢܶܝܢ ܠܰܫܠܺܝܚܳܐ ܦܘܠܘܣ^[62]܆ ܕܰܐܝܟ ܐܰܝܟܰܢ܆ ܠܡܶܠܬܳܐ ܕܺܝܕܰܥܬܳܐ ܘܕܰܢܒܺܝܽܘܬܳܐ܆ ܘܕܳܐܣܺܝ̈ܘܳܬܳܐ ܘܰܕܡܰܥܒܕܳܢܽܘܬܳܐ ܕܚܰܝ̈ܠܶܐ܆ ܢܶܣܟܰܠ ܡܶܢ ܫܪܳܪܳܐ ܘܢܶܫܪܰܥ܆ ܫܽܘܒܩܳܢܳܐ ܠܗܰܘ ܕܕܰܐܝܟ ܗܳܟܰܢܰܐ ܗ̱ܘ܆ ܐܳܦܠܳܐ ܚܰܕ ܢܶܗܘܶܐ ܠܶܗ ܡܶܟܺܝܠ܆ ܐܰܝܟ ܡܰܢ ܕܥܰܠ ܪܽܘܚܳܐ ܩܰܕܺܝܫܳܐ ܓܰܕܶܦ.

ܗܳܠܶܝܢ ܕܶܝܢ ܐܰܝܟܰܢܳܐ ܕܩܰܕܡܶܬ ܐܶܡܪܶܬ܆ ܕܶܐܢܗܽܘ ܕܰܩܕܳܡ ܬܝܳܒܽܘܬܳܐ ܕܫܳܘܝܳܐ ܠܡܶܠܬܳܐ܆ ܗܰܘ ܕܰܚܛܳܐ ܢܶܬܚܛܶܦ. ܠܓܰܘ ܓܶܝܪ ܡܶܢ ܗܳܕܶܐ ܚܒܺܝ̈ܫܳܢ ܟܽܠܗܶܝܢ܆ ܘܠܳܐ ܐܺܝܬ ܡܶܕܶܡ ܣܳܟ ܕܥܳܪܶܩ ܡܶܢ ܗܳܢܳܐ ܣܰܡܳܐ. ܒܪܰܡ ܥܰܠ ܚ̈ܛܳܗܶܐ ܗܳܢܽܘܢ ܪܰܘܪ̈ܒܶܐ܆ ܥܰܣܩܬܳܐ ܐܺܝܬܶܝܗ̇ ܗܺܝ ܐܳܣܝܽܘܬܳܐ ܘܟܺܐܒܳܢܳܝܬܳܐ ܘܣܰܓܺܝ ܡܰܪܺܝܪܬܳܐ܆ ܘܰܕܥܰܠ ܕܶܡ̈ܥܶܐ ܣܰܓܺܝ̈ܳܐܬܳܐ ܣܢܺܝܩܳܐ ܘܰܬܥܳܫ̈ܶܐ ܘܥܰܡ̈ܠܶܐ.

ܠܳܐ ܐ̱ܢܳܫ ܕܶܝܢ ܒܗܳܝ ܕܶܐܡܰܪ ܡܳܪܰܢ ܕܠܳܐ ܢܶܫܬܰܒܩܽܘܢ ܘܠܳܐ ܒܗܳܢܳܐ ܥܰܠܡܳܐ ܘܠܳܐ ܒܗܰܘ ܕܰܥܬܺܝܕ^[63] ܢܶܫܓܶܐ ܘܢܶܬܬܰܛܥܶܐ܆ ܘܟܰܕ ܡܦܰܪܶܫ ܕܰܠܩܽܘܒܠܳܐܺܝܬ ܢܶܬܚܰܫܰܒ܆ ܕܚܰܕܚ̈ܕܳܢܶܐ ܡܶܢܗܽܘܢ ܕܰܚ̈ܛܳܗܶܐ ܐܺܝܬܰܝܗܽܘܢ܆ ܐܰܝܠܶܝܢ ܕܰܒܗܳܢܳܐ ܥܳܠܡܳܐ ܡܰܢ ܠܳܐ ܡܶܫܬܰܒܩܺܝܢ܆ ܡܶܫܬܰܒܩܺܝܢ ܕܶܝܢ ܒܗܰܘ ܕܰܥܬܺܝܕ. ܗܳܝ ܓܶܝܪ ܕܳܐܦܠܳܐ ܒܗܰܘ ܕܰܥܬܺܝܕ܆ ܝܺܕܺܝܥܳܐ ܓܰܠܝܳܐܺܝܬ ܕܠܰܘ ܕܦܽܘܪܳܫܳܐ ܣܰܩܽܘܒܠܳܝܳܐ ܐܺܝܬܶܝܗ̇܆ ܐܶܠܳܐ ܕܰܡܬܺܝܚܽܘܬܳܐ^[64] ܕܢܽܘܓܪܳܐ. ܟܰܕ ܓܶܝܪ ܨܳܒܶܐ ܗ̱ܘܳܐ ܕܰܢܕܰܚܶܠ܆ ܗܳܝ ܕܺܐܝܬܶܝܗ̇ ܡܶܬܬܰܘܕܝܳܢܺܝܬܳܐ ܐܰܘܣܶܦ. ܗܳܠܶܝܢ ܓܶܝܪ ܕܰܒܗܳܢܳܐ ܥܳܠܡܳܐ ܠܳܐ ܡܶܫܬܰܒ̈ܩܳܢ܆ ܝܺܕܺܝܥܳܐ ܗܝ ܕܳܐܦܠܳܐ ܒܗܰܘ ܕܰܥܬܺܝܕ. ܙܰܒܢܺܝ̈ܢ ܓܶܝܪ ܣܰܓܺܝ̈ܳܐܢ ܡܶܫܟܚܺܝܢܰܢ ܠܶܗ ܠܰܐܠܳܗܳܐ܆ ܕܰܠܗܳܠܶܝܢ ܕܰܕܠܳܐ ܚܶܪܝܳܢܳܐ ܐܺܝܬܰܝܗܶܝܢ܆ ܕܒܳܐܕܫܳܐ ܕܰܓܙܳܡܳܐ ܡܳܬܰܚ ܠܗܶܝܢ ܡܶܛܽܠ ܕܶܚܠܬܳܐ. ܐܰܝܟ ܐܰܝܟܳܐ ܕܳܐܡܰܪ ܒܝܰܕ ܡܽܘܫܶܐ܆ ܘܠܳܐ ܐܺܝܬ ܗܰܘ ܕܢܶܦܠܰܛ ܡܶܢ ܐܺܝ̈ܕܰܝ^[65]. ܡܰܢܽܘ ܓܶܝܪ ܢܶܫܟܰܚ ܕܟܰܕ ܗܽܘ ܠܳܐ ܨܳܒܶܐ܆ ܡܶܢ ܐܺܝ̈ܕܰܝܳܐ ܕܺܝܠܶܗ ܢܥܰܕܶܐ ܩܛܺܝܪܳܐܺܝܬ܆ ܠܗܰܘ ܕܰܚܕܳܐ ܙܒܰܢ ܢܶܦܶܠ ܠܶܗ ܒܺܐܝܕܰܘ̈ܗ̱ܝ. ܗܳܟܰܢܳܐ ܗܳܟܺܝܠ ‌ܐܳܦ ܗܳܪܟܳܐ܆ ܕܠܳܐ ܢܶܫܬܒܶܩ ܠܶܗ ܐܳܡܰܪ ܒܥܳܠܡܳܐ ܗܳܢܳܐ. ܐܰܢ̱ܬ ܕܶܝܢ ܐܳܡܰܪ܆ ܠܳܐ ܬܩܽܘܡ ܠܺܝ ܠܗܳܕܶܐ. ܐܶܬܚܰܫܰܒ ܕܶܝܢ ܢܳܩܦܳܐܺܝܬ܆ ܐܳܦ ܠܥܳܠܡܳܐ ܗܰܘ ܕܰܥܬܺܝܕ܆ ܘܶܐܬܒܰܩܳܐ ܠܰܐܝܟܳܐ ܡܫܰܕܰܪ ܠܳܟ ܚܛܳܗܳܐ܆ ܗܰܘ ܕܰܒܥܳܠܡܳܐ ܗܳܢܳܐ ܕܩܰܪܺܝܒ ܠܳܐ ܡܶܫܬܒܶܩ. ܝܺܕܺܝܥܳܐ ܟܺܝܬ ܕܰܠܘܳܬ ܥܳܠܡܳܐ ܗܰܘ ܕܡܶܣܬܰܟܶܐ܆ ܘܰܠܘܳܬ ܬܰܫܢܺܝܩܳܐ ܗܰܘ ܕܠܳܐ ܫܽܘܠܳܡ܆ ܐܰܝܟܳܐ ܕܰܐܝܟ ܡܶܠܬܶܗ ܕܰܢܒܺܝܳܐ ܗܰܘ ܕܰܡܙܰܡܰܪ܆ ܒܡܰܘܬܳܐ ܠܳܐ ܐܺܝܬ ܗܰܘ ܕܡܶܬܥܰܗܕ ܠܶܗ܆ ܘܳܐܦܠܳܐ ܬܽܘܒ ܗܰܘ ܕܡܰܘܕܶܐ ܠܶܗ ܒܰܫܝܽܘܠ^[66]܆ ܘܰܒܕܽܘܝܳܪܳܐ ܗܰܘ ܕܬܰܡܳܢ ܘܰܒܕܺܝܢܳܐ. ܡܶܛܽܠ ܓܶܝܪ ܕܰܐܝܟ ܕܰܒܣܽܘܓܳܐܐ ܟܽܠܰܢ ܠܘܳܬ ܗܳܠܶܝܢ ܡܥܺܝܩܳܢ̈ܝܳܬܳܐ ܘܡܰܠ̈ܝܳܬ ܥܰܡܠܳܐ܆ ܗܳܠܶܝܢ ܕܰܒܥܳܠܡܳܐ ܗܳܢܳܐ ܚܳܝܪܺܝܢܰܢ܆ ܟܰܕ ܕܥܳܠܡܳܐ ܗܰܘ ܕܰܥܬܺܝܕ ܐܳܦܠܳܐ ܚܕܳܐ ܡܶܠܬܳܐ ܥܳܒܕܺܝܢܰܢ܆ ܡܶܛܽܠܗܳܕܶܐ ܡܳܪܰܢ ܟܰܕ ܐܶܡܰܪ ܕܓܽܘܕܳܦܳܐ ܗܰܘ ܕܰܒܪܽܘܚܳܐ ܩܰܕܺܝܫܳܐ ܠܳܐ ܡܶܫܬܒܶܩ ܒܥܳܠܡܳܐ ܗܳܢܳܐ܆ ܐܰܘܣܶܦ ܗܳܝ ܕܡܶܬܬܰܘܕܝܳܐ ܐܰܝܟܰܢܳܐ ܕܰܢܕܰܚܶܠ܆ ܕܳܐܦܠܳܐ ܒܥܳܠܡܳܐ ܗܰܘ ܕܰܥܬܺܝܕ^[67]. ܗܳܝ ܟܺܝܬ ܕܺܐܝܬܶܝܗ̇ ܗ̱ܘܳܬ ܝܺܕܺܝܥܬܳܐ܆ ܕܳܐܦܶܢ ܠܳܐ ܬܶܬܶܐܡܰܪ ܗ̱ܘܳܬ.

ܢܶܕܚܰܠ ܗܳܟܺܝܠ ‌ܐܳܦ ܚܢܰܢ܆ ܕܕܰܠܡܳܐ ܟܰܕ ܒܝܰܕ ܡܰܗܡܝܳܢܽܘܬܳܐ ܣܰܓܺܝܐܬܳܐ ܒܳܣܶܝܢ ܚ̱ܢܰܢ ܒܗܳܠܶܝܢ ܚ̈ܛܳܗܶܐ ܙܥܽܘܪ̈ܶܐ܆ ܢܶܛܥܶܐ ܕܗܳܠܶܝܢ ܕܪܰܘܪ̈ܒܳܢ ܚܳܛܶܝܢ ܚ̱ܢܰܢ܆ ܘܰܐܝܟܰܢܳܐ ܕܳܐܡܰܪ ܦܰܘܠܽܘܤ܆ ܟܰܕ ܡܥܺܝܩܺܝܢܰܢ ܠܪܽܘܚܳܐ ܩܰܕܺܝܫܐ ܕܰܐ‌ܠܳܗܳܐ܆ ܗܰܘ ܕܒܶܗ ܐܶܬܚܬܶܡܢܰܢ ܠܝܰܘܡܳܐ ܕܦܽܘܪܩܳܢܳܐ^[68]. ܐܶܠܳܐ ܒܟܽܠ ܚܕܳܐ ܫܳܥܬܳܐ ܐܰܝܟ ܕܰܠܡܺܐܡܰܪ ܢܶܣܥܽܘܪ ܚܢܰܢ ܠܰܢ܆ ܟܰܕ ܡܶܬܒܰܩܶܝܢܰܢ ܝܰܨܺܝܦܳܐܺܝܬ ܕܶܐܢ ܒܝܰܕ ܥ̈ܒܳܕܶܐ ܐܺܝܬܰܘܗ̱ܝ ܒܰܢ ܡܫܺܝܚܳܐ. ܕܚܺܝܠܬܳܐ ܗܝ ܓܶܝܪ ܐܰܝܟܰܢܳܐ ܕܫܳܡܥܺܝܢܰܢ ܠܰܟܬܒܳܐ ܐܰ‌ܠܳܗܳܝܳܐ ܕܳܐܡܰܪ܆ ܗܳܝ ܕܢܶܦܶܠ ܒܺܐܝ̈ܕܰܝܳܐ ܕܰܐ‌ܠܳܗܳܐ ܚܰܝܳܐ^[69]܆ ܘܢܶܫܬܰܕܰܪ ܠܥܳܠܡܳܐ ܕܰܥܬܺܝܕ܆ ܘܰܠܢܽܘܪܳܐ ܕܠܳܐ ܕܳܥܟܳܐ. ܡܶܢ ܗܳܝ ܕܬܶܗܘܶܐ ܕܟܽܠܰܢ ܢܶܬܦܰܨܶܐ܆ ܘܢܶܫܬܘܶܐ ܠܡܰܠܟܽܘܬܳܐ ܕܰܫܡܰܝܳܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܡ ܡܐܡܪܐ ܕܬܫܥܝܢ ܘܬܡܢܝܐ.

ܡܬܝ. 12: 18 [1]

ܡܬܝ. 12: 31 ـ 32 [2]

ܡ̈ܬܠܐ. 18: 15 [3]

ܐ. ܩܘܪ̈ܝܢܬܝܐ. 10: 16 ـ 17 [4]

ܐ. ܩܘܪ̈ܝܢܬܝܐ. 12: 17 ـ 21 [5]

ܡܬܝ. 12: 18 [6]

ܐܫܥܝܐ. 61: 1 [7]

ܡܫܘܪ ܠܥܠ [8]

ܡܬܝ. 12: 19 [9]

ܝܘܚܢܢ. 7: 37 [10]

ܡܬܝ. 26: 55 [11]

ܠܘܩܐ. 8: 45 [12]

ܡܬܝ. 4: 23 ـ 24  ܐܦ 9: 35 [13]

ܡܬܝ. 12: 20 [14]

ܐܫܥܝܐ. 42: 2 [15]

ܢܶܫܒܘܩ[16]

ܐܦܣ̈ܝܐ. 4: 31 [17]

ܣܶܦܪܐ ܕܒܪܝܬܐ. 18: 20 [18]

ܐܫܥܝܐ. 5: 7 [19]

ܡܬܝ. 11: 29 [20]

ܝܘܚܢܢ. 7: 20   ܐܦ 8: 29 (40)[21]

ܝܘܚܢܢ. 18: 23 [22]

ܡܬܝ. 6: 5 [23]

ܠܡܶܬܚܙܰܘܙܝܳܢܽܘܬܳܐ[24]

ܐܫܥܝܐ. 42: 2 [25]

ܡܬܝ. 7: 6 [26]

ܡܬܝ. 13: 10 ـ 11 [27]

ܡܬܝ. 12: 20 [28]

ܕܠܩܳܗ̇[29]

ܐܫܥܝܐ. 42: 3 [30]

ܝܘܚܢܢ. 16: 11 [31]

ܝܘܚܢܢ. 12: 31 ـ 32[32]

ܡܙܡܘܪ̈ܐ. 51: 4 [33]

ܐܫܥܝܐ. 42: 4[34]

ܡܬܝ. 12: 20 [35]

[36] ܗܳܠܶܝܢ ܬܰܪܬܶܝܢ ܬܰܚ̈ܘܝܳܬܳܐ: ܗܳܝ ܕܰܐܝܟܳܐ ܗܝ ܙܳܟܽܘܬܶܟܝ ܫܝܽܘܠ ܕܰܒܗܽܘܫܳܥ ܢܒܺܝܳܐ: 13: 14  ܘܗܳܝ ܕܰܫܠܺܝܚܳܐ ܣܺܝܡܳܐ ܒܳܬܪܳܗ̇܆ ܣܦܺܝܩܬܳܐ ܐܶܢܶܝܢ ܐܰܝܟ ܕܰܠܘܳܬ ܠܶܫܳܢܳܐ ܕܣܽܘܪ̈ܝ̣ܳܝ̣ܶܐ. ܒܝܰܘܢܳܝܳܐ ܓܶܝܪ܆ ܒܰܬܪܶܝܢ ܙܢܰܝ̈ܳܐ ܡܶܬܶܐܡܰܪ ܫܡܳܐ ܕܙܳܟܽܘܬܳܐ. ܒܗܰܘ ܓܶܢܣܳܐ ܕܠܐ ܕܶܟܪܳܢܳܐܝܬ ܘܠܐ ܢܶܩܒܬܳܢܳܐܝܬ܆ ܘܢܶܩܒܬܳܢܳܐܝܬ ܬܽܘܒ. ܢܺܝܩܘܣ܆ ܘܢܺܝܩܺܝ. ܘܡܶܛܽܠ ܕܡܶܠܬܳܐ ܗܳܝ ܕܶܐܘܢܓܠܝܣܛܐ: ܢܝܩܘܣ ܐܺܝܬ ܗܘܳܐ ܒܳܗ̇܆ ܨܒܳܐ ܕܰܢܚܰܘܶܐ ܡܰܠܦܳܢܳܐ܆ ܕܰܥܝܳܕܰܐ ܗܘ ܠܰܟܬܳܒܳܐ ܕܢܺܐܡܰܪ ܢܝܩܘܣ ܚܠܳܦ ܢܝܩܝ. ܡܶܛܽܠܗܳܕܶܐ܆ ܗܳܠܶܝܢ ܬܰܪܬܶܝܢ ܬܰܚ̈ܘܝܳܬܳܐ ܐܰܝܬܺܝ܆ ܕܺܐܝܬ ܒܗܶܝܢ ܢܝܩܘܣ ܚܠܳܦ ܢܝܩܝ. ܕܬܰܪ̈ܬܰܝܗܶܝܢ ܣܽܘܪܝܳܐܝܬ ܐܺܝܬܰܝܗܶܝܢ ܙܳܟܽܘܬܳܐ܆ ܘܰܐܝܟ ܕܶܐܡܪܶܬ ܒܣܽܘܪܝ̣ܳܝ̣ܳܐ ܣܪ̈ܺܝܩܳܬܳܐ ܐܺܝܬܰܝܗܶܝܢ

ܐ. ܩܘܪ̈ܝܢܬܝܐ. 15: 55  ܐܦ 57 [37]

ܡܬܝ. 12: 19 ـ 20 [38]

[39]ܝܘܚܢܢ. 19: 13 ܘܒܶܐܘܢܓܠܝܘܢ ܚܠܳܦ ܓܰܒܰܐܬܰܐ. ܓܦܺܝܦܬܳܐ ܟܬܺܝܒ.

ܐܫܥܝܐ. 53: 7 [40]

ܐܫܥܝܐ. 36: 6 [41]

ܡܬܝ. 12: 10 [42]

ܡܬܝ. 12: 14 ـ 16[43]

ܡܬܝ. 12: 31 [44]

ܡܬܝ. 12: 32 [45]

ܡܬܝ. 12: 24 [46]

ܡܬܝ. 12: 31 [47]

ܐܫܥܝܐ. 28: 16 [48]

ܐܫܥܝܐ. 8: 14 [49]

ܡܬܝ. 13: 55 [50]

ܝܘܚܢܢ. 8: 37 (48)[51]

ܝܘܚܢܢ. 10: 33 [52]

ܡܬܝ. 12: 31 [53]

ܡܬܝ. 12: 24 [54]

ܒ. ܩܘܪ̈ܝܢܬܝܐ. 5: 16 [55]

 ܡܬܝ. 12: 32 [56]

ܝܘܚܢܢ. 10: 33 [57]

ܡܬܝ. 12: 24 [58]

ܡܬܝ. 12: 31 [59]

ܝܘܚܢܢ. 16: 13 ـ 14 [60]

ܝܘܚܢܢ. 10: 9  ܐܦ ܝܘܚܢܢ. 14: 6 [61]

ܐ. ܩܘܪ̈ܝܢܬܝܐ. 12: 8 ـ 10 [62]

ܡܬܝ. 12: 32 [63]

ܕܬܰܘܣ̈ܦܳܬܳܐ ܕܩܰܫܝܽܘܬܳܐ[64]

ܬܢܝܢ ܢܡܘܣܐ. 32: 39 [65]

ܡܙܡܘܪ̈ܐ. 6: 6 [66]

ܡܬܝ. 12: 31 ـ 32 [67]

ܐܦܣ̈ܝܐ. 5: 30 [68]

ܥܒܪ̈ܝܐ. 10: 31 [69]