ܡܺܐܡܪܳܐ ܕܬܶܫܥܺܝܢ ܘܫܰܒܥܳܐ

ܥܰܠ ܩܰܕܡܳܝܬܳܐ ܕܣܳܗ̈ܕܳܬܳܐ ܬܰܩܠܰܐ.

97: ܟܰܕ ܫܳܡܰܥ ܐ̱ܢܳܐ ܠܕܰܘܺܝܕ ܕܰܒܪܽܘܚܳܐ ܢܒܺܝ̣ܳܝ̣ܳܐ ܠܥܺܕܬܳܐ ܩܳܕܶܡ ܡܛܰܦܶܤ ܘܪܳܫܶܡ܆ ܘܰܠܘܳܬ ܪܺܝܫܳܐ ܕܺܝܠܳܗ̇ ܗܰܘ ܕܺܐܝܬܰܘܗ̱ܝ ܡܫܺܝܚܳܐ ܡܳܬܰܚ ܠܳܗ̇ ܠܡܶܠܬܳܐ ܘܳܐܡܰܪ܆ ܩܳܡܰܬ̣ ܡܰܠܟܬܳܐ ܡܶܢ ܝܰܡܺܝܢܳܟ܆ ܟܕ ܒܰܠܒܽܘܫܳܐ ܕܕܰܗܒܳܐ ܡܥܰܛܦܳܐ ܘܰܡܦܰܬܟܳܐ^[1]܆ ܡܶܚܕܳܐ ܒܰܪ ܫܳܥܬܶܗ ܠܘܳܬ ܣܳܗܕܬܳܐ ܚܰܝܠܬܳܢܺܝܬܳܐ ܬܰܩܠܰܐ ܡܶܬܬܰܘܒܰܠ ‌ܐ̱ܢܳܐ ܒܗܰܘܢܝ܆ ܘܩܳܝܶܡܬܳܐ ܡܢܰܦܰܫܬܐ ܚܳܙܶܐ ܐ̱ܢܳܐ ܠܳܗ̇܆ ܕܰܒܗܽܘܢ ܒܰܥ̈ܒܳܕܶܐ ܝܳܗܒܳܐ ܠܡܶܩܪܳܐ ܗܺܝ ܒܳܗ̇ ܠܡ̈ܶܠܶܐ ܗܳܠܶܝܢ ܕܰܢܒܺܝܽܘܬܳܐ ܐܰܝܟ ܕܡܶܢ ܟܬܺܝ̈ܒܳܬܳܐ܆ ܡܶܛܽܠ ܕܳܐܦ ܕܟܽܠܳܗ̇ ܥܺܕܬܳܐ ܐܺܝܬ ܗ̱ܘܳܐ ܠܳܗ̇ ܡܝܰܬܪ̈ܳܬܳܐ ܟܰܕ ܐܰܟܚܕܳܐ ܢܶܣܒܰܬ^[2] ܐܶܢܶܝܢ.

ܥܺܕܬܳܐ ܕܶܝܢ ܐܺܝܬܶܝܗ̇܆ ܚܰܓܳܐ ܐܰܘܟܺܝܬ ܟܢܽܘܫܝܳܐ ܕܗܳܢܽܘܢ ܕܗܰܝܡܶܢܘ ܒܰܡܫܺܝܚܳܐ܆ ܕܡܶܢ ܟܽܠ ܚܰܕ ܡܶܢܗܽܘܢ ܐܰܝܟ ܕܡܶܢ ܗܰܕܳܡ̈ܶܐ ܡܪܰܟܰܒ܆ ܘܚܰܕ ܦܰܓܪܳܐ ܡܫܰܡܠܶܐ܆ ܫܰܦܺܝܪܳܐ ܘܰܗܕܺܝܪܳܐ ܘܰܕܣܰܓܺܝ ܛܳܒ ܪܰܒ܆ ܕܰܒܡܰܥܡܽܘܕܺܝܬܳܐ ܐܰ‌ܠܳܗܳܝܬܳܐ ܘܰܒܦܽܘܩ̈ܕܳܢܶܐ ܐܶܘܰܢܓ̈ܶܠܳܝܶܐ܆ ܠܪܺܝܫܳܢܽܘܬܳܐ ܕܫܰܦܺܝܪܽܘܬ ܦܰܐܝܽܘܬܳܐ ܥܡܺܝܠ ܘܡܰܬܩܰܢ. ܐܰܝܟܰܢܳܐ ܟܺܝܬ ܕܳܐܦ ܦܰܘܠܽܘܤ܆ ܟܰܕ ܥܰܡ ܢܒܺܝܳܐ ܕܰܘܺܝܕ ܟܳܬܶܒ ܐܳܡܰܪ ܡܶܛܽܠܳܬܳܗ̇܆ ܕܰܡܫܺܝܚܳܐ ܐܰܚܶܒ ܠܥܺܕܬܶܗ܆ ܘܗܽܘ ܠܶܗ ܐܰܫܠܶܡ ܚܠܳܦܶܝܗ̇܆ ܐܰܝܟܰܢܳܐ ܕܰܢܩܰܕܫܺܝܗ̇܆ ܟܰܕ ܡܕܰܟܶܐ ܠܳܗ̇ ܒܰܣܚܳܬܳܐ ܕܡܰܝ̈ܳܐ ܒܡܶܠܬܳܐ܆ ܐܰܝܟܰܢܳܐ ܕܰܢܩܺܝܡܺܝܗ̇ ܗܽܘ ܠܶܗ ܠܥܺܕܬܳܐ ܡܫܰܒܰܚܬܳܐ܆ ܟܰܕ ܠܳܐ ܐܺܝܬ ܒܳܗ̇ ܟܽܘܬܡܳܐ ܐܰܘ ܩܰܡܛܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ܆ ܐܶܠܳܐ ܬܶܗܘܶܐ ܐܺܝܬܶܝܗ̇܆ ܩܰܕܺܝܫܬܳܐ ܘܰܕܠܳܐ ܡܽܘܡܳܐ^[3].

ܚܙܰܝܬ ܫܰܠܡܽܘܬܳܐ ܕܡ̈ܶܠܶܐ ܘܕܰܫܡܳܗ̈ܶܐ܆ ܩܳܡܰܬ ܡܰܠܟܬܳܐ ܡܶܢ ܝܰܡܺܝܢܳܟ ܐܰܙܥܶܩ ܕܰܘܺܝܕ^[4]. ܐܰܝܟܰܢܳܐ ܕܗܽܘ ܠܶܗ ܡܫܰܒܰܚܬܳܐ ܢܩܺܝܡܺܝܗ̇ ܠܥܺܕܬܳܐ ܐܰܙܥܶܩ ܠܩܽܘܒܠܶܗ ܦܰܘܠܽܘܤ. ܕܗܳܝ ܕܶܝܢ ܕܝܰܬܺܝܪ ܒܰܝܬܳܝܳܐ ܐ݀ܺܡܰܪ܆ ܐܰܝܟ ܚܕܳܐ ܥܰܡܶܗ ܐܰ݀ܙܥܶܩ܆ ܗܳܝ ܕܶܝܢ ܕܩܳܡܰܬ ܠܘܳܬܳܟ܆ ܠܰܡܛܰܝܒܽܘܬܳܐ ܘܰܚܘܺܝܚܽܘܬܳܐ ܕܥܺܕܬܳܐ ܕܰܠܘܳܬ ܗܰܝܡܳܢܽܘܬܳܐ ܡܚܰܘܝܳܐ. ܩܰܪܺܝܒܳܐ ܗ̱ܘܳܬ ܓܶܝܪ ܡܛܰܝܒܳܐܺܝܬ ܠܘܳܬ ܩܪܳܝܬܳܐ ܡܶܢ ܨܒܽܘܬ ܢܰܦܫܳܗ̇. ܡܳܢܳܐ ܓܶܝܪ ܐܺܝܬ ܕܝܰܬܺܝܪ ܡܛܰܝܰܒ܆ ܡܶܢ ܗܳܝ ܕܰܡܫܺܝܚܳܐ ܡܰܢ ܢܺܐܡܰܪ ܠܗܳܢܽܘܢ ܕܒܶܝܬ ܦܛܪܘܤ ܬܰܘ ܒܳܬܰܪܝ ܘܶܐ݀ܥܒܶܕܟܽܘܢ ܨܰܝ̈ܳܕܶܐ ܕܰܒܢܰܝ̈ܢܳܫܳܐ^[5]܆ ܗܳܢܽܘܢ ܕܶܝܢ ܢܶܫܒܩܽܘܢ ܥܰܡܗܽܘܢ ܕܢܽܘ̈ܢܶܐ ܐܳܦ ܠܰܡܨܺܝܕܬܳܐ ܘܢܶܩܦܽܘܢ ܠܶܗ܆ ܘܒܶܗ ܟܰܕ ܒܶܗ ܒܰܙܢܳܐ ܥܰܡܳܗ̇ ܕܰܩܪܳܝܬܳܐ ܗܳܢܽܘܢ ܒܢܰܘܗ̱ܝ ܕܙܰܒܕܰܝ ܠܶܐܠܦܳܐ ܘܠܰܐܒܽܘܗܽܘܢ ܢܶܫܒܩܽܘܢ. ܫܳܒܶܩ ܐܰܘܟܺܝܬ ܫܳܬܶܩ ܐ̱ܢܳܐ ܓܶܝܪ ܠܡܺܐܡܰܪ܆ ܕܡܰܬܰܝ ܟܰܕ ܥܰܠ ܛܐܠܘܢܝܘܢ ܕܺܝܠܶܗ ܐܰܘܟܺܝܬ ܚܳܢܽܘܬܳܐ ܕܡܳܟܣܳܐ ܝܳܬܶܒ ܗ̱ܘܳܐ܆ ܘܦܽܘܪ̈ܳܣܶܐ ܘܝܽܘܬܪ̈ܳܢܶܐ ܡܶܕܶܡ ܩܛܺܝܪ̈ܳܝܶܐ ܐܰܘ ܫܶܩ̈ܠܶܐ^[6] ܡܨܰܝܶܕ ܗ̱ܘܳܐ܆ ܟܰܕ ܫܡܰܥ ܕܬܳܐ ܒܳܬܰܪܝ^[7]܆ ܐܳܦ ܕܡܳܟܣܳܐ ܐܺܝܬܰܘܗ̱ܝ ܗ̱ܘܳܐ ܒܦܳܣܺܝ̈ܩܳܬܳܐ ܠܡܺܐܡܰܪ ܛܥܳܐ.

ܕܪܰܘܪ̈ܒܳܢ ܕܶܝܢ ܡܶܢ ܗܳܠܶܝܢ ܢܶܚܙܶܐ ܐ̱ܢܳܫ܆ ܐܳܦ ܥܰܠ ܡܰܠܦܳܢܽܘܬܳܐ ܕܰܫܠܺܝ̈ܚܶܐ܆ ܕܒܰܫܡܶܗ ܕܝܶܫܽܘܥ ܡܫܺܝܚܳܐ ܗܰܘ ܢܳܨܪܳܝܳܐ ܗܘ̣̈ܰܝ. ܡܡܰܠܶܠ ܗ̱ܘܳܐ ܦܶܛܪܘܤ ܒܺܝܗܽܘܕ ܡܶܢ ܒܳܬܰܪ ܩܝܳܡܬܳܐ ܕܰܡܫܺܝܚܳܐ ܕܡܶܢ ܡܺܝ̈ܬܶܐ ܠܗܳܢܽܘܢ ܕܨܰܠܒܽܘܗ̱ܝ܆ ܟܰܕ ܥܕܰܟܺܝܠ ܚܰܕܬܳܐ ܐܺܝܬܰܘܗ̱ܝ ܗ̱ܘܳܐ ܚܰܫܳܐ܆ ܘܡܶܢ ܬܳܠܬܳܐ ܐܰ‌ܠ̈ܦܰܝܳܐ܆ ܘܬܽܘܒ ܡܶܢ ܚܰܡܫܳܐ ܐܰ‌ܠ̈ܦܰܝܳܐ܆ ܡܗܰܝܡܢܺܝܢ ܗ̱ܘܰܘ ܐܰܟܚܕܳܐ ܗܳܢܽܘܢ ܕܫܳܡܥܺܝܢ ܗ̱ܘܰܘ. ܡܬܰܪܓܶܡ ܗ̱ܘܳܐ ܠܥܰܡܳܐ ܦܰܘܠܽܘܤ ܒܰܐܬܝܢ̈ܤ܆ ܘܠܐܪ̈ܐܘܦܐܓܝܛܐ ܢܳܬܶܦ ܗ̱ܘܳܐ ܠܘܳܬܶܗ܆ ܗܳܢܽܘܢ ܕܰܝܳܢ̈ܶܐ ܚܰܪ̈ܺܝܦܶܐ ܘܥܰܣ̈ܩܰܝ ܠܫܽܘܚܠܳܦܳܐ܆ ܘܰܕܠܳܐ ܐܺܝܬ ܗ̱ܘܳܐ ܡܶܕܶܡ ܕܰܩܫܶܐ ܗ̱ܘܳܐ ܘܚܰܝܠܬܳܢ ܡܶܢܗܽܘܢ ܒܕܺܝ̈ܢܶܐ܆ ܗܰܘ ܕܳܐܦ ܠܰܡܕܺܝܢ̱ܬܳܐ ܘܰܠܥܰܡ̱ܡ̈ܶܐ ܟܰܕ ܒܰܕܡܽܘܬ ܦܳܪܰܚܬܳܐ ܡܶܕܶܡ ܛܳܐܶܤ ܗ̱ܘܳܐ܆ ܟܢܺܝܫܳܐܺܝܬ ܒܡܶܠܬܳܐ ܕܗܰܝܡܳܢܽܘܬܳܐ ܓܰܦ.

ܟܰܕ ܡܶܢ ܗܳܠܶܝܢ ܥܺܕܬܳܐ ܐܶܬܟܰܢܫܰܬ܆ ܩܳܡܰܬ ܠܘܳܬ ܡܰܠܟܳܐ܆ ܨܰܝܕܳܐ ܗܰܘ ܕܣܰܓܺܝ ܝܰܬܺܝܪ ܡܛܰܝܰܒ. ܡܰܠܽܘܢ ܕܶܝܢ ܠܰܘ ܕܰܡܛܰܝܰܒ ܒܰܠܚܽܘܕ܆ ܐܶܠܳܐ ܐܳܦ ܕܰܡܫܰܡܠܰܝ ܘܰܓܡܺܝܪ ܡܚܰܘܝܳܐ ܠܶܟܣܺܝܤ ܐܰܘܟܺܝܬ ܡܶܠܬܳܐ ܗܳܝ ܕܩܳܡܰܬ^[8]. ܕܰܥܝܳܕܐ ܗܝ ܓܶܝܪ ܠܰܢ ܠܡܺܐܡܰܪ܆ ܩܳܡ ܥܒܳܕܳܐ. ܩܳܡ ܣܽܘܟܳܠܳܐ. ܗܳܢܰܘ ܕܶܝܢ ܐܶܬܦܪܰܥ܆ ܘܰܠܫܽܘܠܳܡܳܐ ܕܠܳܚܶܡ ܐܶܬܳܐ. ܠܗܳܝ ܟܺܝܬ ܕܝܰܬܺܝܪܳܐܺܝܬ܆ ܐܳܦ ܗܺܝ ܡܶܬܬܰܝܬܝܳܢܽܘܬܳܐ ܗܳܝ ܕܒܳܬܰܪܟܶܢ ܡܫܰܪܪܳܐ. ܩܳܡܰܬ̣ ܐܳܡܰܪ ܡܰܠܟܬܳܐ ܡܶܢ ܝܰܡܺܝܢܳܟ^[9]. ܡܶܛܽܠ ܕܳܐܦ ܡܰܠܟܬܳܐ ܐܺܝܬܶܝܗ̇ ܗ̱ܘܳܬ ܗܳܝ ܕܰܬܩܽܘܡ ܠܘܳܬ ܡܰܠܟܳܐ ܩܰܪܺܝܒܳܐܺܝܬ܆ ܗܳܝ ܕܰܠܘܳܬ ܟܽܠ ܡܶܕܶܡ ܐܺܝܬ ܠܳܗ̇ ܠܳܐ ܚܰܣܺܝܪܳܐܺܝܬ. ܟܰܕ ܓܶܝܪ ܦܳܫܰܬ ܡܶܢ ܗܳܝ ܕܡܶܢ ܐܰ‌ܠܳܗ̈ܶܐ ܕܰܓ̈ܳܠܶܐ ܘܡܶܢ ܚܰܫ̈ܶܐ ܕܨܰܥܪܳܐ ܬܶܬܡܰܠܰܟ܆ ܘܚܰܠܦܰܬ ܫܶܩܠܰܬ ܚܰܝ̈ܶܐ ܚ̈ܰܕܬܶܐ ܘܰܕܟܰܝ̈ܳܐ ܚܠܳܦ ܕܽܘܒܳܪܳܐ ܥܰܬܺܝܩܳܐ ܘܨܳܐܳܐ܆ ܩܳܡܰܬ̣ ܡܫܰܡܠܰܝܬܳܐ ܟܰܕ ܐܶܫܬܰܘܬܦܰܬ̣ ܠܡܰܠܟܳܐ܆ ܐܳܦ ܒܺܐܝܩܳܪܳܐ ܐܳܦ ܒܰܫܡܳܐ܆ ܘܥܶܠܰܬ ܥܰܡܶܗ ܠܩܰܝܛܽܘܢܳܐ ܒܰܕܡܽܘܬ ܟܰܠܬܳܐ܆ ܘܰܒܝܰܕ ܬܶܫܒ̈ܚܳܬ ܬܶܫܒ̈ܚܳܬܳܐ ܐܳܡܪܳܐ܆ ܐܰܥܠܰܢܝ ܡܰܠܟܳܐ ܠܬܰܘܳܢܶܗ^[10]܆ ܘܡܶܢ ܡܰܠܟܳܐ ܐܰܘܟܺܝܬ ܚܰܬܢܳܐ ܡܶܬܝܰܕܥܳܐ ܘܗܳܦܟܳܐ ܫܳܡܥܳܐ܆ ܚܕܳܐ ܐܺܝܬܶܝܗ̇ ܝܰܘܢܳܐ ܕܺܝܠܝ܆ ܚܕܳܐ ܐܺܝܬܶܝܗ̇ ܡܫܰܡܠܰܝܬܳܐ ܕܺܝܠܝ. ܝܰܘܢܳܐ ܡܰܢ܆ ܐܰܝܟ ܐܰܝ̇ܕܳܐ ܕܟܽܠܳܗ̇ ܪܽܘܚܳܢܳܝܬܳܐ. ܫܽܘܘܕܳܥܳܐܺܝܬ ܓܶܝܪ ܒܰܚܙܳܬܳܐ ܕܝܰܘܢܳܐ ܡܶܫܬܰܘܕܰܥ ܪܽܘܚܳܐ. ܡܫܰܡܠܰܝܬܳܐ ܕܶܝܢ܆ ܡܶܛܽܠ ܕܒܰܠܒܽܘܫܳܐ ܕܕܰܗܒܳܐ ܐܺܝܬܶܝܗ̇ ܕܰܡܥܰܛܦܳܐ ܘܰܡܦܰܬܟܳܐ^[11]܆ ܗܳܝ ܕܶܐܡܰܪ ܕܰܘܺܝܕ. ܒܚܽܘܕܪܳܐ ܡܰܢ ܓܶܝܪ ܣܰܓܺܝ ܫܽܘܚ̈ܠܳܦܶܐ ܕܰܡܝܰܬܪ̈ܳܬܳܐ܆ ܕܙܰܕܝܩܽܘܬܳܐ܆ ܕܓܰܢ̱ܒܳܪܽܘܬܳܐ܆ ܕܢܰܟܦܽܘܬܳܐ܆ ܕܚܶܟܡܬܳܐ܆ ܘܰܕܗܳܠܶܝܢ ܕܰܬܚܶܝܬ ܗܳܠܶܝܢ ܡܶܬܦܰܠ̈ܓܳܢ܆ ܡܦܰܬܟܐ ܗܺܝ ܐܶܤܛܠܳܐ܆ ܬܽܘܒ ܕܶܝܢ܆ ܠܘܳܬ ܫܽܘܦܪܳܐ ܠܚܽܘܕܳܝ ܚܶܙܘܳܐ^[12] ܘܠܳܐ ܡܚܰܠܛܳܐ ܘܡܶܫܬܰܡܠܝܳܐ. ܐܳܦ ܓܶܝܪ ܐܺܝܬܶܝܗ̇ ܟܽܠܳܗ̇ ܕܰܗܒܳܢܳܝܬܳܐ ܟܰܕ ܠܘܳܬ ܒܰܝܬܳܝܽܘܬܳܐ ܕܰܐ‌ܠܳܗܳܐ ܡܫܰܠܡܳܐ܆ ܘܰܠܗܳܕܶܐ ܡܙܰܡܢܳܐ ܠܗܳܢܽܘܢ ܕܶܐܬܥܰܢܘܺܝܘ ܒܰܡܝܰܬܪ̈ܳܬܳܐ. ܦܫܺܝܛܳܐ ܕܶܝܢ ܡܶܕܶܡ ܘܰܠܚܽܘܕܳܝ ܐܳܕܫܐ ܐܺܝܬܶܝܗ̇ ܐܰ‌ܠܳܗܽܘܬܳܐ܆ ܘܳܐܦ ܢܽܘܗܪܳܐ ܗܰܘ ܕܗܳܘܶܐ ܡܶܢܳܗ̇ ܒܗܳܢܽܘܢ ܕܡܶܫܬܰܘܬܦܺܝܢ. ܠܰܘ ܕܠܳܐ ܥܰܡܠܳܐ ܕܶܝܢ ܘܠܰܘ ܐܰܝܟ ܕܳܐܬܝܳܐ ܘܰܐܝܟܰܢ ܕܗܽܘ ܐܶܬܥܰܠܝܰܬ ܥܺܕܬܳܐ ܠܘܳܬ ܬܶܫܒܽܘܚܬܳܐ ܕܰܐܝܟ ܗܳܕܶܐ܆ ܐܶܠܳܐ ܩܰܕܡܳܐܺܝܬ ܟܰܕ ܐܰܝܟ ܒܰܪܬܳܐ ܠܰܐܒܳܐ ܘܡܰܠܦܳܢܳܐ ܠܰܡܫܺܝܚܳܐ ܐܰܪܟܢܰܬ ܡܰܫܡܰܥܬܳܗ̇܆ ܘܗܳܟܰܢܳܐ ܐܰܝܟ ܕܰܠܡܰܠܟܳܐ ܐܶܬܢܰܩܦܰܬ܆ ܘܡܶܢ ܫܽܘܪܳܝܳܐ ܫܡܰܥܬܶܗ ܕܳܐܡܰܪ܆ ܫܡܰܥܝ ܒܪܰܬܝ ܘܰܚܙܳܝ ܘܰܨܠܳܝ ܐܶܕܢܶܟܝ܆ ܘܰܛܥܳܝ ܥܰܡܶܟܝ ܘܒܶܝܬ ܐܰܒܽܘܟܝ܆ ܘܢܶܬܪܰܓܪܰܓ ܡܰܠܟܳܐ ܠܫܽܘܦܪܶܟܝ^[13].

ܟܒܰܪ ܕܶܝܢ ܐ̱ܢܳܫ ܢܺܐܡܰܪ ܠܺܝ ܟܰܕ ܗܳܠܶܝܢ ܫܳܡܰܥ܆ ܛܥܰܝܬ ܠܳܟ ܐܳܘ ܗܳܢܳܐ܆ ܕܰܕܥܺܕܬܳܐ ܘܠܰܘ ܕܬܰܩܠܰܐ ܟܳܬܶܒ ܐܰܢ̱ܬ ܠܰܢ ܩܽܘܠܳܣܳܐ. ܐܶܠܳܐ ܢܶܫܡܰܥ ܘܳܠܝܳܐܺܝܬ ܐܰܟܚܕܳܐ ܘܫܰܪܺܝܪܳܐܺܝܬ܆ ܟܰܬܰܪ ܐܳܘ ܛܳܒܳܐ ܕܰܠܫܽܘܦܪܳܐ ܕܝܽܘܩܢܳܐ ܬܰܦܢܟܳܝܐ ܬܺܐܠܰܦ܆ ܕܰܐܝܟ ܕܥܰܠ ܕܰܦܳܐ ܪܳܫܡܳܐ ܠܶܗ ܠܳܟ ܡܶܠܬܳܐ ܠܗܳܢܳܐ܆ ܘܗܳܝܕܶܝܢ ܬܶܕܰܥ ܓܰܠܝܳܐܺܝܬ܆ ܕܣܳܗܕܬܳܐ ܗܳܝ ܕܨܳܪܬܶܗ ܠܨܰܠܡܳܐ܆ ܠܟܽܠܳܗ̇ ܫܰܦܺܝܪܽܘܬ ܦܰܐܝܽܘܬܳܐ ܒܚܰܬܺܝܬܽܘܬܳܐ ܕܰܡܝܰܬ. ܒܪܰܡ ܡܶܛܽܠ ܕܟܰܕ ܫܳܡܽܘܥܳܐ ܚܰܡܺܝܡܳܐ ܐܺܝܬܰܝܟ܆ ܫܽܘܠܛܳܢܳܐ ܠܳܐ ܝܳܗܶܒ ܐܰܢ̱ܬ ܠܳܗ̇ ܠܡܶܠܬܳܐ܆ ܠܘܳܬ ܕܶܝܢ ܗܳܝ ܕܩܰܕܺܝܡܳܐ ܪܳܕܶܦ ܐܰܢ̱ܬ ܠܰܢ܆ ܟܰܕ ܐܰܝܟ ܕܰܠܡܺܐܡܰܪ ܐܳܦ ܒܰܡܚܽܘܬܳܐ^[14] ܡܳܚܶܐ ܐܰܢ̱ܬ܆ ܘܰܠܚܺܐܦܳܐ ܬܳܟܶܤ ܐܰܢ̱ܬ ܘܦܳܣܶܩ ܐܰܢ̱ܬ ܠܶܗ ܠܪܶܗܛܳܐ܆ ܐܶܬܒܰܩܳܐ ܥܰܠ ܬܰܩܠܰܐ ܒܗܳܠܶܝܢ ܕܰܐܡܺܝܪ̈ܳܢ ܠܺܝ܆ ܘܰܦܫܺܝܛܳܐܺܝܬ ܬܶܚܙܶܐ܆ ܕܰܒܝܰܕ ܦܰܪܨܽܘܦܳܐ ܕܥܺܕܬܳܐ܆ ܘܰܒܝܰܕ ܗܳܠܶܝܢ ܕܰܥܠܶܝܗ̇ ܐܰܡܺܝܪ̈ܳܢ܆ ܩܰܕܺܝܡܳܐ ܛܒܺܝܥܳܐ ܘܰܡܛܰܦܣܳܐ ܗܺܝ ܣܳܗܕܬܳܐ. ܡܳܢܳܐ ܓܶܝܪ.

ܐܺܝܬܰܘܗ̱ܝ ܗ̱ܘܳܐ ܦܰܘܠܽܘܤ܆ ܕܒܺܐܝܩܽܘܢܝܘܢ ܡܰܠܶܦ ܗ̱ܘܳܐ܆ ܒܰܡܕܺܝܢ̱ܬܳܐ ܗܳܝ ܕܺܐܝܬ ܠܳܗ̇ ܪܺܝܫܳܢܽܘܬܳܐ ܕܳܐܦܰܪܟܺܝܰܐ ܕܠܽܘ̈ܩܐܘܢܝܐ. ܡܰܠܽܘܢ ܕܶܝܢ ܡܫܺܝܚܳܐ ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܡܡܰܠܶܠ ܗ̱ܘܳܐ ܒܶܗ. ܘܬܰܩܠܰܐ ܕܰܒܓܶܢܣܳܐ ܘܰܒܥܽܘܬܪܳܐ ܩܰܕܡܳܝ̈ܳܬܳܐ ܕܰܡܕܺܝܢ̱ܬܳܐ ܡܰܝܬܝܳܐ ܗ̱ܘܳܬ܆ ܘܰܒܫܽܘܦܪܳܐ ܕܦܰܓܪܳܐ ܠܰܫܒܺܝܚܽܘܬܳܐ ܕܡܶܢ ܗܳܠܶܝܢ ܡܚܰܦܝܳܐ ܗ̱ܘܳܬ܆ ܘܰܠܩܶܢܝܳܢܳܐ ܗܰܘ ܕܗܳܟܰܢܳܐ ܦܫܺܝܩ ܠܨܰܝܕܳܐ ܐܺܝܬܰܘܗ̱ܝ܆ ܕܫܳܥܬܳܐ ܠܳܐ ܡܶܬܚܰܠܨܳܢܳܐ ܐܺܝܬ ܗ̱ܘܳܐ ܠܳܗ̇܆ ܝܳܬܒܳܐ ܗ̱ܘܳܬ ܡܛܰܫܝܳܐܺܝܬ ܥܰܠ ܟܰܘܬܳܐ ܕܣܺܝܡܳܐ ܗ̱ܘܳܬ ܠܥܶܠ ܡܶܢ ܒܰܝܬܳܐ ܡܶܕܶܡ. ܟܰܕ ܒܡܰܫܡܰܥܬܳܐ ܡܰܠܽܘܢ܆ ܐܰܘ ܒܰܚܙܳܬܳܐ ܚܳܙܝܳܐ ܗ̱ܘܳܬ ܠܶܗ ܠܡܰܠܦܳܢܳܐ. ܘܒܰܪ ܫܳܥܬܶܗ܆ ܠܝܽܘܩܢܳܗ̇ ܕܥܺܕܬܳܐ ܡܡܰܠܝܳܐ ܗ̱ܘܳܬ܆ ܗܰܘ ܕܩܰܕܶܡ ܐܶܬܶܐܡܰܪ ܒܝܰܕ ܢܒܺܝܳܐ ܕܰܘܺܝܕ. ܫܶܡܥܰܬ ܡܶܬܬܦܺܝܣܳܢܳܐܺܝܬ ܐܰܝܟ ܒܰܪܬܳܐ. ܨܠܳܬ̣ ܐܶܕܢܳܐ. ܛܥܳܬ̣ ܠܥܰܡܳܗ̇ ܘܰܠܒܰܝܬܳܐ ܕܰܐܒܽܘܗ̇. ܪܚܺܝܡܬܳܐ ܗܘ̣ܳܬ ܠܡܰܠܟܳܐ܆ ܘܡܶܢ ܝܰܡܺܝܢܶܗ ܩܳܡܰܬ ܠܘܳܬܶܗ܆ ܟܰܕ ܒܰܠ̈ܒܽܘܫܶܐ ܕܰܡܝܰܬܪ̈ܳܬܳܐ ܡܥܰܛܦܳܐ ܘܰܡܦܰܬܟܳܐ. ܟܕ ܓܶܝܪ ܡܶܢ ܡ̈ܶܠܶܐ ܕܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ ܘܰܕܡܰܠܟܽܘܬܳܐ ܕܰܫܡܰܝܳܐ܆ ܒܪܺܝܫ ܣܶܦ̈ܘܳܬܳܗ̇ ܒܰܠܚܽܘܕ ܗܳܝ ܟܺܝܬ ܕܡܶܬܐܰܡܪܳܐ ܛܶܥܡܰܬ܆ ܠܗܳܝ ܕܝܰܬܺܝܪܳܐܺܝܬ ܛܳܒ ܟܽܠܗܽܘܢ ܒܢܰܝ̈ܢܳܫܳܐ܆ ܢܰܦ̈ܫܳܬܳܐ ܗܳܢܶܝܢ ܢܰܟ̈ܦܳܬܳܐ ܘܕܰܟ̈ܝܳܬܳܐ ܥܳܐܠ̈ܳܢ ܐܰܟܚܕܳܐ ܥܰܡ ܚܰܬܢܳܐ܆ ܟܰܕ ܠܠܰܡ̈ܦܺܝܕܶܐ ܕܕܰܟܝܽܘܬܐ ܒܡܶܫܚܳܐ ܗܕܺܝܪܳܐܺܝܬ ܡܰܢܗܪ̈ܳܢ܆ ܐܳܦ ܠܰܒܬܽܘܠܽܘܬܳܐ ܐܰܚܒܰܬ܆ ܘܰܚܠܳܦ ܟܽܠ ܡܶܕܶܡ ܚܰܠܦܰܬ ܢܣܰܒܬܳܗ̇.

ܘܡܶܢ ܗܳܪܟܳܐ ܐܶܡܳܗ̇ ܫܰܢܝ̣ܳܝ̣ܳܐ ܗ̱ܘܳܬ܆ ܟܰܕ ܠܘܳܬ ܡܰܫܟܢܳܐ ܕܥܳܠܡܳܐ ܗܳܢܳܐ ܬܰܘܺܝܪܳܐ ܗ̱ܘܳܬ܆ ܘܰܠܘܳܬ ܒܶܣܪܳܐ ܒܗܰܘܢܳܗ̇ ܐܰܣܺܝܪܳܐ ܗ̱ܘܳܬ ܘܰܩܒܺܝܥܳܐ܆ ܘܠܰܓܢܽܘܢܳܐ ܕܒܰܪܬܳܗ̇ ܡܶܬܗܰܓܓܳܐ ܗ̱ܘܳܬ ܘܰܠܬܰܘܳܢܳܐ^[15] ܕܙܽܘܘܳܓܳܐ܆ ܘܰܠܪ̈ܶܩܕܶܐ ܘܦܰܩܪ̈ܘܳܬܳܐ ܕܥܶܢ̈ܝܶܐ ܚܰܢ̈ܦܳܝܶܐ ܘܠܰܙܡܺܝܪ̈ܳܬܳܐ܆ ܘܰܠܙܽܘܝܳܚܳܐ ܕܰܟ̈ܠܺܝܠܶܐ܆ ܘܰܠܪܰܦܝܽܘܬܳܐ ܘܗܰܢܺܝܽܐܘܬܳܐ ܕܰܒܗܳܠܶܝܢ܆ ܘܰܠܥܰܪܣܳܐ ܕܙܽܘܘܳܓܳܐ ܘܰܠܥܳܒܽܘܕܽܘܬ ܒܢܰܝ̈ܳܐ܆ ܘܰܠܝܽܘܒܳܠܳܐ ܕܓܶܢܣܳܐ܆ ܘܰܠܠܽܘܒܳܒܳܐ ܕܣܰܝܒܽܘܬܳܐ ܒܰܝܬܳܝܬܳܐ. ܥܝܳܕܰܐ ܗ̄ܘ ܓܶܝܪ ܠܢܶܫ̈ܶܐ ܗܳܠܶܝܢ ܪ̈ܳܚܡܳܬ ܐܽܘܠ̈ܝܳܬܳܐ܆ ܕܰܠܗܳܠܶܝܢ ܕܶܐܣ̈ܬܰܟܺܝ̣ܝ̣ܶܢ ܐܰܝܟ ܗܰܘ ܕܗܳܐ ܡܶܢ ܟܰܕܽܘ ܐܶܬܩ̈ܢܝ̣ܝ̣ܢ ܢܶܒܟ̈ܝܳܢ܆ ܘܰܒܗܳܕܶܐ܆ ܣܺܝܪܳܐ ܕܝܰܬܺܝܪ ܐܰܪܺܝܟܳܐ ܕܥܳܩܴ̈ܬܳܐ ܘܒܽܘܟܳܝ̈ܶܐ ܕܒܽܐܘܠ̈ܝܳܬܳܐ ܢܶܓ̈ܕܠܳܢ.

ܘܟܰܕ ܐܰܫܦܠܰܬ ܠܰܡܫܰܚܠܦܽܘܬܳܗ̇ ܠܰܥܠܰܝܡܬܳܐ ܡܶܢ ܚܘܺܝܚܽܘܬܳܗ̇ ܫܰܦܺܝܪܰܬ ܕܶܚܠܬܳܐ ܘܕܳܚܠܰܬ ܠܰܐܠܳܗܳܐ܆ ܠܰܡܟܺܝܪܳܗ̇ ܕܗܳܕܶܐ ܩܳܪܝܳܐ ܗ̱ܘܳܬ ܠܣܽܘܝܳܥܳܐ܆ ܬܰܐܡܘܪܝܤ ܐܺܝܬ ܗ̱ܘܳܐ ܫܡܳܐ ܠܗܳܢܳܐ. ܘܟܰܕ ܒܪܶܗܛܳܐ ܐܶܬܳܐ܆ ܘܡܶܫܬܰܠܗܰܒ ܗ̱ܘܳܐ ܒܢܽܘܪܳܐ ܕܪܶܓܬܳܐ܆ ܡܫܰܓܫܳܢܳܐܺܝܬ ܐܰܟܚܕܳܐ ܘܪܶܚܡܬܳܢܳܐܺܝܬ܆ ܫܰܪܺܝ ܠܰܡܢܰܨܳܪܽܘ ܠܗܳܝ ܕܡܶܬܪܰܚܡܳܐ ܗ̱ܘܳܬ ܡܶܢܶܗ. ܘܟܰܕ ܗܺܝ ܫܰܬܺܝܩܳܐ ܗ̱ܘܳܬ ܘܓܰܒܪܳܐܺܝܬ ܚܳܝܪܳܐ ܗ̱ܘܳܬ܆ ܡܰܟܣܳܐ ܗ̱ܘܳܬ ܠܰܡܚܺܝܠܽܘܬܳܐ ܘܪܶܚܡܰܬ ܗܰܢܺܝܽܐܘܬܳܐ ܕܺܝܠܗܶܝܢ ܕܡ̈ܶܠܶܐ܆ ܟܰܕ ܒܳܐܐܰܪ ܝܳܗܒܳܐ ܗ̱ܘܳܬ ܕܢܺܐܙ̈ܳܠ̱ܢ ܗܳܠܶܝܢ܆ ܘܰܠܗܰܘ ܕܰܡܡܰܠܶܠ ܗ̱ܘܳܐ ܥܰܡܳܗ̇ ܕܳܐܦܠܳܐ ܩܰܪܺܝܒ ܗ̱ܘܳܐ ܠܬܰܡܳܢ ܣܳܒܪܳܐ ܗ̱ܘܳܬ. ܟܰܕ ܟܺܝܬ ܒܡ̈ܶܠܶܐ ܕܦܰܘܠܽܘܤ ܣܰܪܺܝܟܳܐ ܗ̱ܘܳܬ ܘܰܩܒܺܝܥܳܐ܆ ܘܰܒܝܰܕ ܗܳܠܶܝܢ ܒܳܢܝܳܐ ܗ̱ܘܳܬ ܠܒܰܪܢܳܫܳܐ ܗܰܘ ܕܰܠܓܰܘ܆ ܘܡܶܬܗܰܓܓܳܐ ܗ̱ܘܳܬ ܠܗܳܠܶܝܢ ܕܰܥ̈ܬܺܝܕܳܢ܆ ܘܕܳܐܦܠܳܐ ܐܺܝܬܶܝܗ̇ ܗ̱ܘܳܬ ܒܦܰܓܪܳܐ ܡܶܟܺܝܠ ܣܳܒܪܳܐ ܗ̱ܘܳܬ. ܬܐܘܡܘܪܝܤ ܕܶܝܢ ܗܰܘ ܒܺܝܫ ܪܶܚܡܬܳܐ ܘܠܳܐ ܡܦܺܝܣܳܢܳܐ܆ ܠܪܶܚܡܬܳܐ ܐܳ‌ܠܨܳܐܺܝܬ ܫܰܚܠܦܳܗ̇ ܠܣܶܢܐܬܳܐ. ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ܆ ܗܳܢܽܘܢ ܕܦܳܕܶܝܢ ܡܶܢ ܐܰܝܠܶܝܢ ܕܰܪ̈ܚܺܝܡܳܢ ܠܗܽܘܢ.

ܘܟܰܕ ܥܰܠ ܦܰܘܠܽܘܤ ܡܰܢ ܐܶܬܳܐ ܥܰܡ ܐܺܝܕܳܐ ܣܰܓܺܝܐܬܳܐ ܘܥܰܡ ܡܳܐܢ̈ܶܐ ܩܪ̈ܳܒܳܝܶܐ܆ ܠܘܳܬ ܐܰܢܬܽܘܦܐܛܘܤ ܢܓܰܕ ܐܰܝܬܝܶܗ ܟܰܕ ܓܳܪܶܝܢ ܠܶܗ. ܘܟܰܕ ܐܶܬܩܰܪܰܒ ܠܒܺܐܡܰܐ ܕܪܺܝܫܳܢܳܐ܆ ܘܡܰܠܶܠ ܡܶܛܽܠ ܢܰܟܦܽܘܬܳܐ ܘܡܶܛܽܠ ܗܰܝܡܳܢܽܘܬܳܐ܆ ܐܰܝܟ ܐܰܝܠܶܝܢ ܕܺܐܝܬܶܝܗ̇ ܗ̱ܘܳܬ ܕܰܢܡܰܠܶܠ ܦܰܘܠܽܘܤ܆ ܕܰܠܒܶܝܬ ܐܰܣܺܝܪ̈ܶܐ ܢܶܬܬܰܘܒܰܠ ܥܰܬܶܕ. ܠܬܰܩܠܰܐ ܕܶܝܢ ܕܰܒܠܶܠܝܳܐ ܐܶܬ̣ܳܬ̣ ܗ̱ܘܳܬ ܩܳܡܰܬ ܥܰܠ ܡܰܠܦܳܢܳܐ ܘܰܐܣܺܝܪܳܐ܆ ܐܳܦ ܓܶܝܪ ܫܡܰܥܬܶܗ ܕܳܐܡܰܪ ܕܡܶܠܬܳܐ ܕܰܐ‌ܠܳܗܳܐ ܠܳܐ ܐܰܣܺܝܪܳܐ^[16]܆ ܘܡܶܢ ܫܶܦ̈ܥܶܐ ܕܡܰܠܦܳܢܽܘܬܳܐ ܡܫܰܪܬܚܳܐܺܝܬ ܕܳܠܝܳܐ ܗ̱ܘܳܬ܆ ܘܥܰܠ ‌ܐܰܣܽܘܪ̈ܰܘܗ̱ܝ ܐܰܫܺܝܕܳܐ ܗ̱ܘܳܬ܆ ܘܰܡܢܰܫܩܳܐ ܗ̱ܘܳܬ ܠܰܦܟܳܪ̈ܰܘܗ̱ܝ ܘܟܶܒ̈ܠܰܘܗ̱ܝ ܐܰܝܟ ܐܰܝܠܶܝܢ ܕܩܽܘܕܫܳܐ ܡܫܰܡܪܺܝܢ ܗ̱ܘܰܘ܆ ܚܰܛܦܳܗ̇ ܠܘܳܬ ܕܰܝܳܢܳܐ܆ ܘܠܰܘ ܒܰܠܚܽܘܕܶܝܗ̇܆ ܐܶܠܳܐ ܟܰܕ ܡܙܰܘܓܳܐ ܐܰܟܚܕܳܐ ܠܰܐܣܺܝܪܳܐ ܘܰܡܣܰܒܪܳܢܳܐ܆ ܗܰܘ ܕܟܰܕ ܠܦܰܘܠܽܘܤ ܡܰܢ ܢܰܓܶܕ ܛܰܪܕܶܗ. ܠܬܰܩܠܰܐ ܕܶܝܢ ܕܝܶܠܦܰܬ̣ ܡܶܢ ܐܰܣܽܘܪ̈ܰܘܗ̱ܝ ܕܡܰܠܦܳܢܳܗ̇܆ ܠܗܳܝ ܕܬܶܕܰܥ ܬܶܚܰܫ ܡܶܛܽܠ ܡܫܺܝܚܳܐ܆ ܠܓܰܘܙܰܠܬܳܐ ܕܢܽܘܪܳܐ ܡܰܫܠܶܡ ܠܳܗ̇. ܠܗܳܢܳܐ ܓܶܝܪ ܓܙܰܪ ܕܺܝܢܳܐ܆ ܠܰܘ ܗܰܘ ܕܕܳܐܶܢ ܗ̱ܘܳܐ܆ ܐܶܠܳܐ ܡܶܢ ܩܕܳܡܰܘ̈ܗ̱ܝ ܐܳܦ ܐܶܡܳܗ̇ ܦܶܣܩܰܬ ܥܠܶܝܗ̇܆ ܘܳܐܦ ܟܽܠܶܗ ܟܶܢܫܳܐ ܕܰܡܕܺܝܢ̱ܬܳܐ܆ ܕܓܰܒܪ̈ܶܐ ܟܺܝܬ ܘܰܕܢܶܫ̈ܶܐ܆ ܐܰܝܟ ܕܥܰܠ ‌ܐܰܝ̇ܕܳܐ ܕܫܳܪܝܳܐ ܙܽܘܘܳܓܳܐ܆ ܘܗܳܦܟܳܐ ܠܢܳܡܽܘܣ̈ܶܐ ܕܰܟܝܳܢܳܐ.

ܗܺܝ ܕܶܝܢ ܟܰܕ ܠܰܐܠܳܗܳܐ ܗܰܘ ܕܡܶܢ ܒܬܽܘܠܬܳܐ ܐܶܬܒܰܣܰܪ ܘܠܳܐ ܡܶܫܬܰܓܢܝܳܢܳܐܺܝܬ ܐܶܬܒܰܪܢܰܫ ܫܶܩܠܰܬ ܒܗܰܘܢܳܗ̇܆ ܠܗܳܢܳܐ ܓܶܝܪ ܦܶܪܫܰܬ ܗ̱ܘܳܬ ܘܝܰܗܒܬܳܗ̇ ܚܶܪܡܳܐ ܠܰܒܬܽܘܠܽܘܬܳܗ̇܆ ܘܚܳܬܡܳܐ ܕܺܝܠܶܗ ܠܽܘܩܒܰܠ ܓܰܘܙܰܠܬܳܐ ܪܶܫܡܰܬ܆ ܠܥܶܠ ܡܶܢ ܩܰܝ̈ܣܶܐ ܕܶܪܟܰܬ܆ ܘܠܽܘܩܒܰܠ ܫܰܠܗܶܒܺܝܬܳܐ ܗܳܝ ܐܰܡܪܚܰܬ ܣܶܠܩܰܬ. ܘܡܶܚܕܳܐ ܦܶܩܥܳܐ^[17] ܡܰܢ ܡܶܕܶܡ ܘܟܽܘܟܺܝܬܳܐ ܡܶܬܟܰܪܟܳܐ ܗ̱ܘܳܬ ܒܰܐܪܥܳܐ ܘܰܡܙܺܝܥܳܐ ܠܳܗ̇܆ ܥܢܳܢܳܐ ܕܶܝܢ ܟܰܕ ܡܶܢ ܠܥܶܠ ‌ܐܶܣܬܰܕܩܰܬ܆ ܘܡܶܛܪܳܐ ܩܰܫܝܳܐ ܘܰܬܟܺܝܒܳܐ ܕܰܚܠܺܝܛ ܒܒܰܪܕܳܐ ܫܰܡܪܰܬ܆ ܠܢܽܘܪܳܐ ܡܰܢ ܕܰܥܟܰܬ. ܡܶܢ ܗܳܢܽܘܢ ܕܶܝܢ ܕܩܳܝܡܺܝܢ ܗ̱ܘܰܘ ܚܕܳܪ̈ܶܝܗ̇܆ ܠܗܳܢܽܘܢ ܡܰܢ ܡܺܝ̈ܬܶܐ܆ ܠܗܳܢܽܘܢ ܕܶܝܢ ܥܳܪ̈ܽܘܩܶܐ ܚܰܘܝܰܬ ܐܶܢܽܘܢ. ܠܬܰܩܠܰܐ ܕܶܝܢ܆ ܠܠܳܐ ܡܗܰܝܡ̈ܢܶܐ ܡܰܢ ܕܠܳܐ ܣܰܒܪܳܐ܆ ܠܰܡܗܰܝܡ̈ܢܶܐ ܕܶܝܢ܆ ܠܰܘ ܕܠܳܐ ܣܰܒܪܳܐ ܫܰܘܙܒܰܬ. ܡܳܢܳܐ ܓܶܝܪ ܟܰܕ ܨܳܒܶܐ ܠܳܐ ܥܳܒܶܕ ܐܰ‌ܠܳܗܳܐ ܗܰܘ ܕܬܶܕܡܪ̈ܳܬܳܐ.

ܚܳܙܶܝܢ ܐܢ̱ܬܽܘܢ ܐܰܝܟܢܳܐ ܗܺܝ ܣܳܗܕܬܳܐ܆ ܥܕܰܡܳܐ ܠܫܽܘܠܳܡܳܐ ܠܝܽܘܩܢܳܐ ܐܶܡܗܳܝܳܐ܆ ܠܗܰܘ ܕܥܺܕܬܳܐ ܐܳܡܰܪ ܐ̱ܢܳܐ܆ ܠܘܳܬ ܡܥܰܠܝܽܘܬܳܐ ܪܺܝܫܳܝܬܳܐ ܕܰܡܝܰܬ܆ ܥܰܠ ܗܳܢܳܐ ܓܶܝܪ ܫܽܘܥܳܐ ܐܳܡܰܪ ܦܳܪܽܘܩܰܢ ܐܶ݀ܒܢܶܝܗ̇ ܠܥܺܕܬܝ܆ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇^[18]. ܡܶܛܽܠ ܗܳܕܶܐ ܗܺܝ ܫܰܠܗܶܒܺܝܬܳܐ ܠܗܳܝ ܚܰܝܠܬܳܢܺܝܬܳܐ ܠܳܐ ܙܟܳܬ̣.

ܢܺܐܡܰܪ ܠܰܢ ܐ̱ܢܳܫ ܟܰܕ ܥܳܒܰܪ ܠܰܡܨܰܥܬܳܐ܆ ܡܳܢܳܐ ܒܰܨܪܰܬ ܒܰܪܬܳܐ ܡܶܢ ܨܰܠܡܳܐ ܗܰܘ ܐܶܡܗܳܝܳܐ. ܕܰܠܡܳܐ ܠܳܐ ܩܳܡܰܬ ܠܘܳܬ ܡܰܠܟܳܐ܆ ܕܰܠܡܳܐ ܠܰܘ ܡܛܰܝܒܳܐܺܝܬ܆ ܕܰܠܡܳܐ ܠܰܘ ܡܫܰܡܠܝܳܐܺܝܬ܆ ܕܰܠܡܳܐ ܠܰܘ ܟܰܕ ܐܰܝܟ ܡܰܠܟܬܳܐ ܡܥܰܛܦܳܐ ܘܰܡܦܰܬܟܳܐ܆ ܘܟܽܠ ܠܒܽܘܫܳܐ ܘܨܶܒܬܳܐ ܕܰܡܝܰܬܪ̈ܳܬܳܐ ܡܟܰܣܝܳܐ܆ ܘܗܳܟܰܢܳܐ ܟܰܕ ܒܢܽܘܪܳܐ ܥܶܒܪܰܬ܆ ܘܚܰܘܝܰܬ ܠܟܽܠܗܶܝܢ ܗܳܠܶܝܢ ܕܺܝܠܳܗ̇ ܕܰܗܒܳܢܳܝ̈ܳܬܳܐ ܐܰܝܟ ܕܒܰܫܪܳܪܳܐ܆ ܘܕܰܒܫܰܠܗܶܒܺܝܬܳܐ ܐܶܬܒܚܰܪ̈ܶܝܢ ܘܠܳܐ ܙܺܐܦܳܢ̈ܝܳܬܳܐ.

ܠܗܳܕܶܐ ܡܕܰܡܝܳܢܽܘܬܳܐ ܕܰܒ̈ܢܳܬܳܐ ܕܰܠܘܳܬ ܐܶܡܳܐ܆ ܣܰܓܺܝ̈ܳܐܬܳܐ ܓܶܝܪ ܡܶܢ ܒܳܬܰܪܟܶܢ ܛܰܢ̈ܶܝܢ ܒܰܒܬܽܘܠܽܘܬܳܐ ܘܰܒܣܳܗܕܽܘܬܳܐ ܕܬܰܩܠܰܐ܆ ܐܳܦܶܢ ܕܦܰܝ̣ܺܝ̣̈ܫܳܢ ܐܺܝܬܰܝܗܶܝܢ ܡܶܢ ܡܕܰܡܝܳܢܽܘܬܳܐ ܕܰܒܟܽܠ ܡܶܕܶܡ܆ ܕܰܘܺܝܕ ܗܰܘ ܐܰ‌ܠܳܗܳܝܳܐ ܡܩܰܕܶܡ ܗ̱ܘܳܐ ܙܳܡܰܪ ܠܳܗ̇ ܟܰܕ ܐܳܡܰܪ܆ ܢܶܬܬܰܘܒ̈ܠܳܢ ܠܡܰܠܟܳܐ ܒܬܽܘ̈ܠܳܬܳܐ ܒܳܬܪܳܗ̇. ܩܰܪ̈ܺܝܒܳܬܳܐ^[19] ܕܺܝܠܳܗ̇ ܢܶܬܬܰܘܒ̈ܠܳܢ ܠܳܟ. ܢܶܬܬܰܘܒ̈ܠܳܢ ܒܚܰܕܽܘܬܳܐ ܘܒܰܪܘܳܙܳܐ. ܢܶܬܬܰܝ̈ܬܝܳܢ ܠܗܰܝܟܠܶܗ ܕܡܰܠܟܳܐ^[20]. ܗܳܝ ܡܰܢ ܓܶܝܪ ܕܒܳܬܪܳܗ̇܆ ܡܰܘܕܥܳܐ ܠܰܡܕܰܡܝܳܢܽܘܬܳܐ܆ ܘܰܕܒܳܬܰܪ ܐܶܡܳܐ ܐܶܙܰܠ̈ܶܝܢ. ܗܳܟܰܢܳܐ ܓܶܝܪ ܐܳܦ ܠܘܳܬ ܐܰ‌ܠܳܗܳܐ ܕܟܽܠ ܗܽܘ ܢܒܺܝܳܐ ܡܰܙܥܶܩ ܗ̱ܘܳܐ܆ ܢܶܩܦܰܬ ܢܰܦܫܝ ܒܳܬܪܰܟ^[21]. ܗܳܝ ܕܶܝܢ ܕܩܰܪ̈ܺܝܒܳܬܳܐ ܕܺܝܠܳܗ̇ ܡܚܰܘܝܳܐ܆ ܕܰܒܩܽܘܪܒܳܐ ܕܰܡܕܰܡܝܳܢܽܘܬܳܐ ܗܘܰܝ̈. ܠܰܘ ܓܶܝܪ ܐ̱ܚܪܳܢܝܳܐܺܝܬ ܠܗܰܝܟܠܳܐ ܕܡܰܠܟܳܐ ܐܶܬܬܰܘܒ̈ܰܠܶܝܢ܆ ܗܰܘ ܕܡܶܛܽܠܳܬܶܗ ܬܽܘܒ ܗܽܘ ܗܰܘ ܕܰܡܙܰܡܰܪ ܢܒܺܝܳܐܺܝܬ ܥܰܡ ܩܺܝܢܬܳܐ ܙܳܡܰܪ܆ ܩܰܕܺܝܫ ܗ̱ܘ̣ ܗܰܝܟܠܳܐ ܕܺܝܠܳܟ ܬܡܺܝܗܳܐ ܒܙܰܕܺܝܩܽܘܬܳܐ^[22].

ܟܰܕ ܠܘܳܬ ܗܳܢܳܐ ܐܺܝܩܳܪܳܐ ܐܶܬܥܰܠܝܰܬ܆ ܘܡܶܢ ܫܰܠܗܶܒܺܝܬܳܐ ܐܶܣܬܰܗܕܰܬ܆ ܘܠܰܡܫܺܝܚܳܐ ܣܶܗܕܰܬ ܬܰܩܠܰܐ܆ ܬܽܘܒ ܒܬܰܠ̈ܡܺܝܕܶܐ ܐܺܝܬܶܝܗ̇ ܗ̱ܘܳܬ. ܘܰܠܡܰܠܦܳܢܽܘܬܳܐ ܕܦܰܘܠܽܘܤ ܫܳܡܥܳܐ ܗ̱ܘܳܬ܆ ܟܰܕ ܗܳܝ ܨܳܒܝܳܐ ܗ̱ܘܳܬ ܕܬܶܬܪܕܶܐ ܘܬܺܐܠܰܦ܆ ܕܰܚܠܳܦ ܥܰܡܰܢܽܘܐܶܝܠ ܙܰܒ̈ܢܺܝܢ ܣܰܓܺܝ̈ܳܐܢ ܙܳܕܶܩ ܠܡܶܚܰܫ. ܐܳܦ ܓܶܝܪ ܟܰܕ ܣܰܦܪܰܬ ܣܰܥܪܳܗ̇܆ ܡܶܛܽܠ ܣܽܘܓܦܳܢܳܐ ܗܰܘ ܕܡܶܢ ܫܽܘܦܪܳܐ܆ ܠܪܶܥܝܳܢܳܗ̇ ܓܰܒܪܳܢܳܝܳܐ܆ ܥܳܒܕܳܐ ܠܶܗ ܠܶܐܣܟܺܡܳܗ̇ ܕܠܳܚܶܡ. ܘܢܰܩܺܝܦܳܐ ܗ̱ܘܳܬ ܠܟܳܪܽܘܙܳܐ ܕܰܫܪܳܪܳܐ܆ ܟܰܕ ܐܰܟܚܕܳܐ ܥܰܡܶܗ ܡܰܟܪܙܳܐ ܗ̱ܘܳܬ. ܘܳܐܦ ܟܰܕ ܡܶܬܬܰܠܡܕܳܐ ܗ̱ܘܳܬ ܓܶܝܪ܆ ܥܽܘܬܳܕܳܐ ܡܰܠܦܳܢܳܝܳܐ ܐܺܝܬ ܗ̱ܘܳܐ ܠܳܗ̇.

ܘܠܳܐ ܐ̱ܢܳܫ ܢܺܐܡܰܪ܆ ܘܰܐܝܟܰܢܳܐ ܦܰܘܠܽܘܤ ܠܩܽܘܪ̈ܺܝܢܬܳܝܶܐ ܟܳܬܶܒ ܗ̱ܘܳܐ܆ ܠܡܰܠܳܦܽܘ ܕܶܝܢ ܠܰܐܢܬܬܳܐ ܠܳܐ ܡܰܦܶܤ ܐ̱ܢܳܐ^[23]܆ ܘܗܳܢܽܘܢ ܕܰܪܥܰܘ ܠܥܻ̈ܕܳܬܳܐ ܩܰܕܺܝ̈ܫܳܬܳܐ ܒܩܳܢܽܘܢܳܐ ܦܩܰܕܘ܆ ܕܠܳܐ ܢܶܗܘܶܐ ܫܰܠܺܝܛ ܠܰܐܢܬܬܳܐ ܠܡܶܣܬܰܦܳܪܽܘ܆ ܐܳܦܠܳܐ ܐܶܤܛܠܳܐ ܓܰܒܪܳܢܳܝܬܳܐ ܠܡܶܬܟܰܣܳܝܽܘ. ܗܳܠܶܝܢ ܓܶܝܪ ܕܠܺܝ̈ܠܳܬܳܐܘܕܰܒܚܺܝܪܳܐܺܝܬܐܶܣܬܥܰܪ̈ܝ̱ܡܶܢܐ̱ܢܳܫܺܝ̈ܢ܆ ܥܕܰܡܳܐ ܠܗܳܢܽܘܢ ܩܳܝܡ̈ܳܢ܆ ܟܰܕ ܠܳܐ ܗܳܘ̈ܝܳܢ ܢܳܡܽܘܣܳܐ ܠܰܐ̱ܚܪ̈ܳܢܶܐ. ܣܳܝܽܘܡܽܘܬ ܢܳܡܽܘܣ̈ܶܐ ܕܶܝܢ܆ ܠܦܽܘܬ ܐܽܘܚܕܳܢܳܐ ܕܗܳܝ ܕܣܰܓܺܝ̈ܶܐܐ ܡܶܬܬܣܺܝ̈ܡܳܢ܆ ܘܠܰܘ ܠܦܽܘܬ ܚܰܕ ܒܕܽܘܟ ܐܰܘ ܬܪܶܝܢ܆ ܠܟܽܠܢܳܫ ܓܰܘܳܢܳܐܺܝܬ ܡܬܰܚ̈ܡܳܢ ܘܰܡܛܰܟ̈ܣܳܢ. ܬܰܩܠܰܐ ܡܰܢ ܓܶܝܪ܆ ܩܕܳܡ ܐܶܣܟܺܡܳܐ ܚܰܝܠܳܐ ܕܰܥܒܳܕܳܐ ܐܺܝܬ ܗ̱ܘܳܐ ܠܳܗ̇. ܠܗܳܠܶܝܢ ܕܶܝܢ ܕܫܰܪܟܳܐ ܐܶܣܟܺܡܳܐ ܕܡܰܪܡܰܠ ܗ̱ܘܳܐ ܡܶܢ ܣܳܥܽܘܪܽܘܬܳܐ܆ ܕܰܥܬܺܝܕ ܕܢܶܬܒܰܙܰܚ ܒܰܫܟܺܝܪܽܘܬܳܐ ܐܺܝܬܰܘܗ̱ܝ ܗ̱ܘܳܐ. ܡܶܢ ܒܳܬܰܪ ܕܶܝܢ ܣܝܳܡ ܢܳܡܽܘܣܳܐ ܘܟܶܠܝܳܢܳܐ܆ ܐܳܦܠܳܐ ܠܗܳܠܶܝܢ ܕܡܶܫܟ̈ܚܳܢ ܠܡܶܛܰܢ ܒܬܰܩܠܰܐ܆ ܗܳܕܶܐ ܠܡܶܥܒܰܕ ܡܰܦܣܳܐ. ܠܰܬܚܽܘ̈ܡܶܐ ܓܶܝܪ ܘܛܽܘܟܳܣ̈ܶܐ ܓܰܘܳܢܳܝ̈ܶܐ ܙܳܕܶܩ ܗ̱ܘܳܐ ܠܡܶܫܬܰܥܒܳܕܽܘ. ܡܶܛܽܠ ܕܳܐܦ ܦܽܘܩܕܳܢܳܐ ܢܳܡܽܘܣܳܝܳܐ ܦܳܩܶܕ܆ ܕܠܳܐ ܢܫܰܢܶܐ ܬܚܽܘ̈ܡܶܐ ܕܡܶܢ ܥܳܠܰܡ ܗܳܠܶܝܢ ܕܣܳܡܘ ܐܰܒܳܗܰܝ̈ܢ^[24]. ܡܫܰܢܶܐ ܗ̱ܘ̣ ܕܶܝܢ ܐ̱ܢܳܫ܆ ܐܳܦܶܢ ܡܶܢ ܝܰܡܺܝܢܳܐ ܠܒܰܪ ܡܶܢ ܢܳܡܽܘܣܳܐ ܡܗܰܠܶܟ.

ܒܪܰܡ ܐܰܢܬܬܳܐ ܗܳܝ ܙܪܺܝܙܬܳܐ ܘܕܰܠܬܰܟܬܽܘ̈ܫܶܐ ܗܳܢܽܘܢ ܫܰܦܺܝܪ̈ܰܝ ܕܶܚܠܬܳܐ ܐܰܝܟ ܕܠܳܐܐܰܪ ܣܳܝܩܳܐ ܗ̱ܘܳܬ܆ ܒܶܐܣܟܺܡܳܐ ܡܰܢ ܕܶܟܪܳܢܳܝܳܐ ܘܚܽܘܫܳܒܳܐ ܠܘܳܬ ܗܳܕܶܐ ܡܕܺܝܢ̱ܬܳܐ ܕܰܐܢܛܝܘܟܘܤ ܐܶܬ̣ܳܬ̣܆ ܟܰܕ ܕܶܝܢ ܬܰܩܠܰܐ ܐܺܝܬܶܝܗ̇ ܗ̱ܘܳܬ܆ ܠܡܶܬܛܰܫܳܝܽܘ ܠܳܐ ܡܶܫܟܚܳܐ ܗ̱ܘܳܬ. ܬܽܘܒ ܓܶܝܪ ܥܠܶܝܗ̇ ܗܳܢܽܘܢ ܨܰܝ̈ܳܕܶܐ ܕܫܽܘܦܪܳܐ. ܬܽܘܒ ܗܳܢܽܘܢ ܪ̈ܳܕܽܘܦܶܐ ܕܫܰܦܺܝܪܽܘܬ ܕܶܚܠܬܳܐ. ܗܳܢܽܘܢ ܡܰܢ ܟܰܕ ܠܘܳܬ ܨܰܚܢܽܘܬܳܐ܆ ܗܳܢܽܘܢ ܕܶܝܢ ܟܰܕ ܠܘܳܬ ܕܶܚܠܰܬ ܫܻ̈ܐܕܶܐ ܠܽܘܩܒܰܠ ܚ̈ܕܳܕܶܐ ܢܳܓܕܺܝܢ ܗ̱ܘܰܘ ܠܳܗ̇. ܐܶܠܳܐ ܐܺܝܬܶܝܗ̇ ܗ̱ܘܳܬ ܠܗܽܘܢ ܗܺܝ ܒܬܽܘܠܬܳܐ ܘܣܳܗܕܬܳܐ܆ ܠܳܐ ܡܶܬܟܰܒܫܳܢܺܝܬܳܐ ܡܶܢ ܬܰܪ̈ܬܰܝܗܶܝܢ.

ܐܰ‌ܠܶܟܣܰܢܕܪܘܤ ܓܶܝܪ ܐ̱ܢܳܫ ܟܰܕ ܐܳܦ ܗܽܘ ܐܶܬܟܪܰܗ ܗ̱ܘܳܐ ܒܪܶܚܡܬܳܐ ܗܳܝ ܠܳܐ ܣܳܥܽܘܪܬܳܐ ܕܬܰܐܡܘܪܝܤ܆ ܥܰܠ ܫܽܘܦܪܳܗ̇ ܕܩܰܕܺܝܫܬܳܐ ܫܢ̣ܳܐ. ܘܟܰܕ ܫܪܰܥ ܘܦܰܕ ܡܶܢ ܢܺܝܫܶܗ܆ ܟܰܕ ܕܰܝܳܢܳܐ ܦܩܰܕ ܗ̱ܘܳܐ ܕܬܶܬܣܺܝܡ ܬܰܩܠܰܐ ܡܶܐܟܽܘܠܬܳܐ ܠܚܰܝ̈ܘܳܬ ܫܶܢܳܐ܆ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܒܗܰܘ ܙܰܒܢܳܐ ܝܳܗܽܘܒܳܐ ܘܡܶܬܦܰܪܣܳܢܳܐ ܕܚܶܙܘܳܢ̈ܶܐ ܕܕܰܐܝܟ ܗܳܠܶܝܢ܆ ܗܰܘ ܒܰܥܪܺܝܪܳܝܳܐ ܐܰܟܚܕܳܐ ܕܰܬܪܶܝܢ ܚܰܫܺܝ̈ܢ ܕܺܐܝܬܰܝܗܽܘܢ ܣܰܓܺܝ ܣܰܩܽܘܒ̈ܠܳܝܶܐ܆ ܕܪܰܦܝܽܘܬܳܐ ܟܺܝܬ ܘܰܕܚܰܪܡܽܘܬܳܐ܆ ܘܰܠܘܳܬ ܬܪ̈ܰܝܗܽܘܢ ܡܰܢ ܡܶܬܦܰܠܰܓ ܗ̱ܘܳܐ܆ ܠܘܳܬ ܕܶܝܢ ܗܰܘ ܕܚܰܪܡܽܘܬܳܐ ܐܶܨܛܠܺܝ܆ ܡܶܛܽܠ ܟܺܝܬ ܕܰܦܣܰܩ ܗ̱ܘܳܐ ܠܶܗ ܣܰܒܪܳܐ ܡܶܢ ܗܰܘ ܡܳܐ ܕܡܶܬܪܚܶܡ ܗ̱ܘܳܐ܆ ܟܽܠ ‌ܐܳܕܫܳܐ ܕܚܰܝ̈ܘܳܬܫܶܢܳܐ ܕܟܽܠ ܓܢܶܤ ܠܰܩܶܛ܆ ܘܡܶܢ ܟܽܠ ܕܽܘܟ ܟܰܢܶܫ. ܐܶܠܳܐ ܐܶܬܚܰܙܝܰܬ ܬܽܘܒ ܗܳܝ ܕܰܡܛܰܝܒܳܐ ܗ̱ܘܳܬ ܕܟܽܠܗܶܝܢ ܬܶܚܰܫ܆ ܠܳܐ ܡܶܬܟܰܒܫܳܢܺܝܬܳܐ ܠܟܽܠܗܶܝܢ܆ ܟܰܕ ܒܰܨܠܽܘܬܳܐ ܒܰܠܚܽܘܕܶܝܗ̇ ܘܒܰܦܫܳܛܳܐ ܕܺܐܝ̈ܕܰܝܳܐ ܐܰܩܗܝܰܬ ܠܫܶܢ̈ܶܐ ܠܳܐ ܡܫܰܝ̈ܢܳܬܳܐ. ܘܟܰܕ ܐܰܝܟ ܕܒܰܝܢܳܬ ܥܶܪ̈ܒܶܐ ܪܰܡܝܳܐ ܗ̱ܘܳܬ ܒܰܡܨܰܥܬܳܐ ܕܗܳܠܶܝܢ ܠܳܐ ܡܶܬܟܰܒ̈ܫܳܢܝܳܬܳܐ ܘܠܳܐ ܡܫܰܝ̈ܢܳܬܳܐ܆ ܘܳܐܦ ܕܠܳܐ ܕܶܚܠܬܳܐ.

ܢܶܫܡܥܽܘܢ ܚܰܢ̈ܦܶܐ ܗܳܠܶܝܢ܆ ܗܳܢܽܘܢ ܕܰܠܘܳܬ ܩܺܝܬܳܪܳܐ ܗܰܘ ܫܽܘܥܺܝܬܳܢܳܝܳܐ ܘܰܕܒܶܕ̣ܝܳܐ ܕܽܐܘܪܦܘܤ ܦܥܺܝܪ ܚܶܟܗܽܘܢ܆ ܘܕܰܡܪܰܝܰܚ ܠܚܰܝ̈ܘܳܬ ܫܶܢܳܐ ܒܰܢܩܳܫܰܘ̈ܗ̱ܝ ܐܰܝܟ ܕܗܶܢܽܘܢ ܐܳܡܪܺܝܢ. ܢܶܬܒܰܩܽܘܢ ܝܽܗ̱ܘ̈ܕܳܝܶܐ܆ ܐܰܝܟܰܢܳܐ ܐܰܢ̱ܬܬܳܐ ܚܕܳܐ ܒܰܕܡܽܘܬ ܗܳܠܶܝܢ ܬܠܳܬܳܐ ܛܠܳܝ̈ܶܐ ܠܓܰܘܙܰܠܬܳܐ ܕܰܥܟܰܬ܆ ܘܰܒܫܰܠܗܶܒܺܝܬܳܐ ܥܶܒܪܰܬ ܟܰܕ ܠܳܐ ܝܶܩܕܰܬ܆ ܘܒܰܕܡܽܘܬ ܕܳܢܝܐܝܠ ܠܰܘ ܠܰܐܪ̈ܝܰܘܳܬܳܐ ܒܰܠܚܽܘܕ܆ ܐܶܠܳܐ ܐܳܦ ܠܟܽܠܗ ܓܶܢܣܳܐ ܕܚܰܝ̈ܘܳܬܫܶܢܳܐ ܟܢܺܝܫܳܐܺܝܬ܆ ܠܳܐ ܡܶܬܬܰܩܪܒܳܢܺܝܬܳܐ ܐܶܬܚܰܙܝܰܬ ܘܰܕܚܺܝܠܬܳܐ܆ ܘܢܰܘܕܽܘܢ ܡܶܢ ܬܶܕܡܪ̈ܳܬܳܐ ܐܰܚ̈ܘܳܬܳܐ܆ ܕܚܰܕ ܐܺܝܬܰܘܗ̱ܝ ܐܰ‌ܠܳܗܳܐ ܕܢܳܡܽܘܣܳܐ ܘܕܶܐܘܰܢܓ̈ܶܠܺܝܰܐ. ܡܰܠܽܘܢ ܕܶܝܢ܆ ܠܳܐ ܒܣܶܒܪ̈ܶܐ ܪ̈ܰܚܺܝܩܶܐ ܘܰܣܪ̈ܺܝܩܶܐ ܢܶܬܬܰܛܥܽܘܢ܆ ܐܶܠܳܐ ܡܶܢ ܗܳܠܶܝܢ ܕܰܡܝܰܬܪܺܝܢ ܢܶܫܬܰܘܕܥܽܘܢ ܕܰܐܬ̣ܝ ܗܘ ܡܫܺܝܚܳܐ܆ ܘܠܳܐ ܠܗܰܘ ܕܰܡܫܺܝܚ܆ ܠܗܰܘ ܕܳܐܦܠܳܐ ܡܬܽܘܡ ܥܬܺܝܕ ܕܢܺܐܬܶܐ ܢܣܰܟܽܘܢ.

ܐܶܫܰܥܝܳܐ ܡܰܢ ܓܶܝܪ ܗܰܘ ܢܒܺܝܳܐ ܟܰܕ ܟܳܐܶܒ ܗ̱ܘܳܐ ܠܶܗ ܡܰܙܥܶܩ ܗ̱ܘܳܐ܆ ܢܶܫ̈ܶܐ ܥܰܬܺܝܪ̈ܳܬܳܐ ܩܽܘ̈ܡܶܝܢ ܘܰܫܡܰܥܶܝ̈ܢ ܠܩܳܠܝ. ܒ̈ܢܳܬܳܐ ܒܣܰܒܪܳܐ ܫܡܰܥܶܝ̈ܢ ܠܡܶܠ̈ܰܝ^[25]. ܘܰܚܕܳܐ ܡܶܢܗܶܝܢ ܟܽܠ ܟܽܠܶܗ ܠܳܐ ܫܶܡܥܰܬ ܐܰܝܟ ܗܰܘ ܕܙܳܕܶܩ ܗ̱ܘܳܐ ܠܡܶܫܡܰܥ. ܬܰܩܠܰܐ ܕܶܝܢ ܟܰܕ ܒܟܽܠܗܶܝܢ ܨܶܒ̈ܘܳܬܳܐ ܗܳܠܶܝܢ ܕܡܶܣܬܰܒܪ̈ܳܢ ܥܰܠ ‌ܐܰܪܥܳܐ ܛܽܘܒ̈ܬܳܢܝܳܬܳܐ ܥܰܬܺܝܪܳܐ ܗ̱ܘܳܬ܆ ܒܓܶܢܣܳܐ ܘܰܒܫܽܘܦܪܳܐ ܘܰܒܥܽܘܬܪܳܐ܆ ܥܶܒܪܰܬ ܐܶܢܶܝܢ ܠܡܶܠܰܘܗ̱ܝ ܕܰܢܒܺܝܳܐ. ܫܶܡܥܰܬ ܓܶܝܪ ܘܳܐܦ ܟܰܕ ܠܳܐ ܐܶܬܩܰܪܝܰܬ܆ ܠܡܶܠܰܘܗ̱ܝ ܕܦܰܘܠܽܘܤ. ܘܫܶܡܥܰܬ ܒܣܰܒܪܳܐ. ܘܰܚܠܳܦ ܗܰܘ ܚܰܕ ܣܰܒܪܳܐ ܟܽܠܗܶܝܢ ܫܰܡܪܰܬ܆ ܟܰܕ ܐܶܬܕܰܡܝܰܬ ܒܬܰܓܳܪܳܐ ܗܰܘ ܕܒܶܐܘܰܢܓܶܠܺܝܽܘܢ܆ ܗܰܘ ܕܶܐܫܟܰܚ ܡܰܪܓܳܢܺܝܬܳܐ ܚܕܳܐ ܘܣܰܓܺܝܐܰܬ̣ ܕܡܰܝ̈ܳܐ ܐܰܝܟ ܕܳܐܡܰܪ ܦܳܪܽܘܩܰܢ܆ ܘܰܚܠܳܦ ܟܽܠܗܶܝܢ ܗܳܠܶܝܢ ܕܺܐܝܬ ܗ̱ܘܳܐ ܠܶܗ ܠܗܳܝ ܩܢ̣ܳܐ^[26].

ܐܰܟܙܢܳܐ ܓܶܝܪ ܕܳܐܕܳܡ ܕܰܒܨܰܠܡܳܐ ܕܰܐ‌ܠܳܗܳܐ ܐܶܬܒܪܺܝ܆ ܩܕܳܡ ܕܢܶܥܒܰܪ ܥܰܠ ܦܽܘܩܕܳܢܳܐ ܒܰܕܡܽܘܬ ܡܰܠܟܳܐ ܡܶܢ ܚܰܝ̈ܘܳܬܫܶܢܳܐ ܡܶܬܚܕܰܪ ܗ̱ܘܳܐ܆ ܘܰܫܡܳܗ̈ܶܐ ܠܟܽܠܗܶܝܢ ܣܳܐܶܡ ܗ̱ܘܳܐ܆ ܒܰܕܡܽܘܬ ܡܳܪܳܐ ܕܰܚܕܳܐ ܪܰܡܟܳܐ܆ ܗܳܟܰܢܳܐ ܐܳܦ ܬܰܩܠܰܐ ܟܰܕ ܠܒܰܪܢܳܫܳܐ ܥܰܬܺܝܩܳܐ ܫܶܠܚܰܬ ܘܰܠܗܰܘܢܳܐ ܕܰܟܝܰܬ܆ ܗܳܢܰܘ ܓܶܝܪ ܨܰܠܡܳܐ ܐܰ‌ܠܳܗܳܝܳܐ܆ ܘܗ̱ܝ ܕܶܐܢ ܐ̱ܢܳܫ ܐܺܝܬܰܘܗ̱ܝ ܒܰܡܫܺܝܚܳܐ ܒܪܺܝܬܰܐ ܗ̄ܘ ܚܕܰܬܳܐ^[27] ܡܶܢ ܦܰܘܠܽܘܤ ܝܶܠܦܰܬ ܘܰܓܡܰܪܬܳܗ̇܆ ܡܶܬܚܰܕܪܳܐ ܗ̱ܘܳܬ ܒܓܽܘܕܳܐ ܕܚܰܝ̈ܘܳܬܫܶܢܳܐ܆ ܘܺܐܝܬܰܝܗܶܝܢ ܗ̱ܘܰܝ̈ ܠܳܗ̇ ܡܫܰܝ̈ܢܳܬܳܐ ܗܳܠܶܝܢ ܒܰܥܪܺܝܪ̈ܳܝܳܬܳܐ.

ܘܟܰܕ ܕܠܳܐ ܣܽܘܓܦܳܢܳܐ ܠܗܳܠܶܝܢ ܥܶܒܪܰܬ܆ ܘܰܒܣܳܗ̈ܕܘܳܬܳܐ ܣܰܓܺܝ̈ܳܐܬܳܐ ܐܰܟܚܕܳܐ ܐܶܬܟܰܬܫܰܬ܆ ܘܰܒܕܰܐܝܟ ܗܳܠܶܝܢ ܟܽܠܗܽܘܢ ܟܠܺܝ̈ܠܶܐ ܐܶܨܛܰܒܬ̣ܰܬ̣܆ ܠܘܳܬ ܣܶܠܽܘܩܺܝܰܐ ܗܳܝ ܕܺܐܝܣܘܪܝܐ ܫܰܢܝܰܬ. ܘܟܰܕ ܬܰܡܳܢ ܥܰܡ ܫܶܠܝܳܐ ܠܪܶܗܛܳܗ̇ ܫܰܠܡܰܬ܆ ܘܰܠܗܰܝܡܳܢܽܘܬܳܗ̇ ܢܶܛܪܰܬ^[28]܆ ܠܦܰܓܪܳܗ̇ ܡܰܢ ܠܰܐܪܥܳܐ ܐܰܓܥܠܰܬ܆ ܗܰܘ ܕܗܳܫܳܐ ܒܗܰܝܟܠܳܐ ܩܰܕܺܝܫܳܐ ܘܰܫܒܺܝܚܳܐ ܡܶܬܚܰܦܶܐ܆ ܘܗܳܠܶܝܢ ܕܺܐܝܬܰܝܗܶܝܢ ܕܺܝܠܴ̈ܢܳܝܳܬܳܐ ܕܬܰܩܠܰܐ ܡܰܥܒܶܕ܆ ܗܳܢܰܘ ܕܶܝܢ ܐܳܣ̈ܺܝܘܳܬܳܐ ܘܬܶܕܡܪ̈ܳܬܳܐ܆ ܒܢܰܦܫܳܗ̇ ܕܶܝܢ܆ ܠܘܳܬ ܓܽܘ̈ܕܶܐ ܕܡܰܠܰܐܟ̈ܶܐ ܚܶܙܩܰܬ ܘܰܠܘܳܬ ܕܽܘܝܳܪ̈ܶܐ ܫܡܰܝܳܢ̈ܶܐ.

ܘܡܶܢ ܬܰܡܳܢ ܒܰܡܕܺܝܢ̱ܬܶܗ ܡܰܢ ܕܣܠܘܩܘܤ ܚܳܕܝܳܐܺܝܬ ܘܰܡܫܰܝܢܳܐܺܝܬ ܚܳܝܪܳܐ ܘܣܳܥܪܳܐ ܡܶܛܽܠ ܦܰܓܪܳܗ̇. ܠܗܳܕܶܐ ܕܶܝܢ ܕܺܝܠܰܢ܆ ܡܶܛܽܠ ܬܰܟ̈ܬܽܘܫܶܐ ܕܺܝܠܳܗ̇܆ ܡܶܛܽܠ ܟܺܝܬ ܕܰܒܗܳܕܶܐ ܡܰܠܝܰܬ ܠܗܳܠܶܝܢ. ܠܗܳܝ ܕܳܐܦ ܝܰܬܺܝܪܳܐܺܝܬ ܡܶܬܬܦܺܝܤ ܐ̱ܢܳܐ ܕܰܡܣܰܝܥܳܐ ܘܝܳܨܦܳܐ. ܥܕܰܟܺܝܠ ܓܶܝܪ ܐܳܦ ܗܳܫܳܐ܆ ܪܶܚܡܬܳܐ ܐܺܝܬ ܠܳܗ̇ ܠܘܳܬ ܐܰܓܽܘ̈ܢܶܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ܆ ܕܡܶܢܗܽܘܢ ܟܠܺܝ̈ܠܶܐ ܘܟܳܪܽܘܙܽܘܬܐ ܕܢܶܨܚܳܢ̈ܶܐ. ܡܳܕܶܝܢ ܐܳܦ ܡܶܛܽܠ ܕܽܘܟܬܳܐ ܗܳܕܶܐ܆ ܗܳܝ ܕܒܳܗ̇ ܠܗܳܠܶܝܢ ܐܶܬܟܰܬܫܰܬ. ܐܳܦ ܓܶܝܪ ܐܳܦ ܠܡܶܬܟܰܬܫܳܢ̈ܶܐ ܗܳܢܽܘܢ ܕܡܶܬܢܰܨܚܺܝܢ܆ ܘܳܐܦ ܡܶܢ ܒܳܬܰܪ ܙܳܟܽܘܬܳܐ܆ ܪܚܺܝܡܬܳܐ ܗܝ ܠܗܽܘܢ ܕܽܘܟܬܳܐ ܗܳܝ ܕܒܳܗ̇ ܐܣܬܕܰܪܘ.

ܡܶܛܽܠܳܬܳܗ̇ ܕܗܳܕܶܐ܆ ܐܳܦ ܠܒܰܝܬܳܐ ܗܳܢܳܐ ܕܒܶܝܬ ܨܠܽܘܬܳܐ܆ ܥܰܠ ܫܡܳܐ ܕܰܤܛܦܐܢܘܤ ܟܺܝܬ ܘܕܺܝܠܳܗ̇ ܦܪܰܫܢܰܢ ܘܩܰܪܶܒܢܰܢ ܘܟܰܗܶܢܢܰܢ ܠܦܳܪܽܘܩܰܢ ܡܫܺܝܚܳܐ. ܐܳܦ ܓܶܝܪ ܗܰܘ ܡܰܢ ܒܓܰܒܪ̈ܶܐ ܩܰܕܡܳܝܰܐ ܗ̱ܘ ܕܣܳܗ̈ܕܶܐ܆ ܗܳܝ ܕܶܝܢ ܒܢܶܫ̈ܶܐ ܪܺܝܫܳܐ ܗܝ ܕܣܳܗ̈ܕܳܬܳܐ܆ ܟܰܕ ܠܟܽܘܢܳܝܳܗ̇ ܐܰܫܪܰܬ܆ ܘܫܽܘܒܚܳܐ ܗܘ̣ܳܬ ܕܰܐ‌ܠܳܗܳܐ. ܬܰܩܠܰܐ ܓܶܝܪ ܫܽܘܒܚܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܡܶܛܽܠ ܟܺܝܬ ܕܰܒܢܰܝ̈ܳܐ ܕܦܽܘܐܝ̈ܛܶܐ ܩܠܐܘܤ ܡܫܰܡܗܺܝܢ ܠܶܗ ܠܫܽܘܒܚܳܐ܆ ܐܰܝܟܰܢܳܐ ܕܳܐܦ ܒܗܳܕܶܐ ܠܦܽܘܩܕܳܢܳܐ ܕܡܰܠܦܳܢܳܗ̇ ܦܰܘܠܽܘܤ ܬܡܰܠܶܐ ܕܳܐܡܰܪ܆ ܫܰܒܰܚܘ ܗܳܟܺܝܠ ܠܰܐܠܳܗܳܐ ܒܦܰܓܪܟܽܘܢ ܘܰܒܪܽܘܚܟܽܘܢ^[29]. ܟܰܕ ܬܪܰܝܳܢܳܐܺܝܬ ܫܰܒܰܚܬ̣ܶܗ܆ ܒܰܒܬܽܘܠܽܘܬܳܐ ܟܺܝܬ ܘܰܒܣܳܗܕܽܘܬܳܐ.

ܙܳܕܶܩ ܗܳܟܺܝܠ ‌ܐܳܦ ܠܟܶܝܢ ܐܳܘ ܒܬܽܘ̈ܠܳܬܳܐ܆ ܕܟܰܕ ܕܰܐܝܟ ܗܳܢܳܐ ܨܰܠܡܳܐ^[30] ܕܰܡܝܰܬܪܽܘܬܳܐ ܐܺܝܬ ܠܟܶܝܢ ܡܶܢ ܒܳܬܰܪ ܝܳܠܕܰܬ ܐܰ‌ܠܳܗܳܐ܆ ܠܩܰܕܡܳܝܬܳܐ ܕܣܳܗ̈ܕܳܬܳܐ. ܕܰܠܘܳܬܳܗ̇ ܬܚܽܘܪ̈ܳܢ܆ ܘܡܶܢ ܬܰܡܳܢ ܬܶܕܡ̈ܝܳܢ ܒܫܽܘܦܪܳܐ ܡܶܬܗܰܘܢܳܢܳܐ܆ ܘܕܰܒܓܰܘ̈ܢܶܐ ܕܰܡܝܰܬܪ̈ܳܬܳܐ ܬܨܽܘܪ̈ܳܢ ܠܢܰܦ̈ܫܳܬܳܐ ܕܺܝܠܟܶܝܢ. ܐܶܠܳܐ ܐܳܦ ܐܰܢ̱ܬܶܝܢ ܗܳܢܶܝܢ ܕܰܬܚܶܝܬ ܢܺܝܪܳܐ ܕܙܽܘܘܳܓܳܐ ܐܺܝܬܰܝܟܶܝܢ܆ ܡܶܫܟܚܳܐ ܗܝ ܕܡܶܢܶܗ ܟܰܕ ܡܶܢܶܗ ܕܨܰܠܡܳܐ ܬܶܩܛܦ̈ܳܢ ܚܰܝ̈ܶܐ ܟܢܺܝ̈ܟܶܐ ܘܢܰܟ̈ܦܶܐ. ܐܰܝܟܰܢܳܐ ܕܟܰܕ ܒܝܰܕ ܟܽܠܟܶܝܢ ܡܶܫܬܰܒܰܚ ܫܡܳܐ ܕܰܡܫܺܝܚܳܐ܆ ܢܙܰܡܶܢ ܠܟܶܝܢ ܬܶܫܒܽܘܚܬܳܐ ܘܛܰܝܒܽܘܬܳܐ ܕܡܶܢ ܠܥܶܠ ܗܰܘ ܓܶܝܪ ܕܳܐܡܰܪ ܕܰܠܗܳܢܽܘܢ ܕܰܡܫܰܒܚܺܝܢ ܠܺܝ ܐܶ݀ܫܰܒܰܚ^[31]܆ ܠܳܐ ܡܕܰܓܶܠ. ܠܗܰܘ ܕܳܐܦ ܦܰܐܝܳܐ ܟܽܠ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܡܙܡܘܪ̈ܐ. 45: 9 [1]

ܒܶܛܢܰܬ[2]

ܐܦܣ̈ܝܐ. 5: 25 ـ 27 [3]

ܡܙܡܘܪ̈ܐ. 45: 9 [4]

ܡܬܝ. 4: 19 [5]

[6] ܡܰܣܒܳܐ ܕܡܶܕܶܡ. ܣܒܳܠܶܗ. ܡܪܺܝܡܳܢܽܘܬܶܗ. ܫܽܘܢܳܝܳܐ. ܬܽܘܒ ܗܰܘ ܡܳܐ ܕܡܶܬܢܣܶܒ. ܡܰܕܰܐܬܳܐ. ܟܣܶܦ ܪܺܝܫܳܐ.

ܡܬܝ. 9: 9[7]

[8]ܠܶܟܣܺܝܣ ܗܳܕܶܐ ܕܺܐܝܬ ܒܝܰܘܢܳܝܳܐ: ܕܰܟܬܺܝܒܳܐ ܒܠܶܫܳܢܳܐ ܣܽܘܪܝ̣ܳܝ̣ܳܐ ܩܳܡܰܬ̣܆ ܘܳܐܦ ܒܕܰܘܺܝܕ ܘܳܐܦ ܒܗܳܢܳܐ ܡܺܐܡܪܳܐ܆ ܠܐ ܗܘܳܐ ܡܶܠܬܳܐ ܗܝ ܕܳܐܡܪܺܝܢܰܢ ܩܳܡܰܬ ܡܶܢ ܐܰܪܥܳܐ ܐܰܘ ܡܶܢ ܡܰܦܽܘܠܬܳܐ܆ ܐܰܘ ܗܳܝ ܐ̱ܚܪܺܬܳܐ ܕܩܳܡܰܬ ܡܶܢ ܗܠܟܐ ܐܰܘ ܡܶܢ ܪܗܛܐ ܠܐ ܡܶܬܬܙܺܝܥܳܢܺܝܬܳܐ ܒܕܽܘܟܬܳܐ܆ ܐܺܝܬܶܝܗ̇ ܗܳܪܟܳܐ. ܐܶܠܐ ܡܫܰܚܠܦܳܐ ܗܳܕܶܐ܆ ܘܗܳܢܳܐ ܚܰܝܠܳܐ ܐܺܝܬ ܠܳܗ̇ ܩܳܡܰܬ ܠܘܳܬ ܡܶܕܶܡ. ܩܶܪܒܰܬ ܘܶܐܬܛܰܝܒܰܬ. ܗܳܐ ܩܰܪ̈ܺܝܒܶܐ. ܗܳܐ ܡܛܰܝܒܳܐ ܗܳܐ ܒܩܽܘܪܳܒܳܐ ܐܺܝܬܶܝܗ̇. ܗܳܐ ܠܘܳܬܶܗ ܕܡܶܕܶܡ ܐܺܝܬܶܝܗ̇. ܗܳܠܶܝܢ ܟܽܠܗܶܝܢ ܣܳܡܰܬ ܡܶܛܽܠܳܬܶܗ܆ ܘܠܐ ܥܕܰܟܺܝܠ ‌ܐܶܫܟܚܶܬ ܐܶ݀ܚܰܘܶܐ ܚܰܝܠܳܗ̇܆ ܡܶܬܐܰܡܪܳܐ ܕܶܝܢ ܡܶܠܬܳܐ ܗܳܕܶܐ܆ ܐܳܦ ܚܠܳܦܝ ܐܶܬܚܰܘܝܰܬ ܐܶܬܝܰܕܥܰܬ. ܐܶܬܢܰܗܪܰܬ.

ܡܙܡܘܪ̈ܐ. 45: 9 [9]

ܬܫܒ̈ܚܳܬ ܬܫܒ̈ܚܳܬܳܐ. 1: 3 [10]

ܡܙܡܘܪ̈ܐ. 45: 9 [11]

ܐܳܕܫܳܐ[12]

ܡܙܡܘܪ̈ܐ. 45: 10 [13]

ܒܫܘܛܐ[14]

ܠܩܰܝܛܽܘܢܳܐ[15]

ܒ. ܛܝܡܬܐܘܣ. 2: 9 [16]

ܢܳܩܫܳܐ[17]

ܡܬܝ. 16: 18 [18]

ܚܰܒܪ̈ܳܬܳܐ[19]

ܡܙܡܘܪ̈ܐ. 45: 15 ـ 16 [20]

[21]ܡܙܡܘܪ̈ܐ. 63: 8  (ܒܟܬܒܐ ܕܡܙܡܘܪ̈ܐ ܟܳܬܶܒ. ܢܶܦܩܰܬ ܢܰܦܫܝ ܒܳܬܪܳܟ)

ܡܙܡܘܪ̈ܐ. 65: 4 ـ 5 [22]

ܐ. ܩܘܪ̈ܝܢܬܝܐ. 14: 34 [23]

ܬܢܝܢ ܢܡܘܣܐ. 19: 14 [24]

ܐܫܥܝܐ. 32: 9 [25]

ܡܬܝ. 13: 46 [26]

ܒ. ܩܘܪ̈ܝܢܬܝܐ. 5: 17 [27]

ܒ. ܛܝܡܬܐܘܣ. 4: 7[28]

ܐ. ܩܘܪ̈ܝܢܬܝܐ. 6: 20 [29]

ܚܘܪܐ[30]

ܐ. ܫܡܘܐܝܠ. 2: 30 [31]