ܒܫܽܘܪܳܝܳܐ ܕܡܺܐܡܪܳܐ ܩܽܘܠܳܣܳܐ ܕܫܳܡܽܘ̈ܥܶܐ. ܘܥܽܘܩܳܒܳܐ ܘܒܽܘܚܳܢܳܐ. ܘܰܫܪܳܝܐ ܥܰܠ ܗܳܠܶܝܢ ܐ̱ܚܪ̈ܳܝܬܳܐ ܕܦܽܘܫܳܟ̈ܶܐ܆ ܗܳܢܽܘܢ ܕܡܶܛܠ ܡܡܰܠܠܽܘܬ ܫܰܪ̈ܒܳܬܳܐ ܘܡܶܛܽܠ ܝܺܠܺܝܕܽܘܬܳܐ ܕܒܰܒܣܰܪ ܕܡܳܪܰܢ ܘܰܐܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ.
96: ܝܶܕܥܶܬ ܠܡܰܫܡܰܥܬܳܐ ܕܺܝܠܟܽܘܢ ܕܣܰܓܺܝ ܫܰܦܺܝܪܳܐܺܝܬ ܡܕܰܪܫܳܐ ܠܘܳܬ ܫܶܡܥܳܐ ܕܕܽܘܓܡ̈ܰܐܛܳܐ ܐܰܠܳܗܳܝ̈ܶܐ܆ ܘܰܠܘܳܬ ܬܶܐܽܘܪܺܝܰܐ ܕܣܰܓܺܝ ܛܳܒ ܡܶܢ ܟܽܠ ܡܰܘܬܪܳܢܝܳܐ ܗܳܝ ܕܒܰܟ̈ܬܳܒܶܐ ܢܦܺܝ̈ܚܰܝ ܡܶܢ ܐܰܠܳܗܳܐ ܡܶܬܬܰܝܬܝܳܐ܆ ܗܳܝ ܕܒܺܐܝ̈ܕܶܝܗ̇ ܢܰܦ̈ܫܳܬܳܐ ܡܠܺܝ̈ܠܳܬܳܐ ܡܶܬܬܰܪ̈ܣܝܳܢ܆ ܟܰܕ ܠܥܽܘܬܪܳܐ ܕܚܶܟܡܬܶܗ ܕܰܐܠܳܗܳܐ ܡܥܰܩ̈ܒܳܢ ܘܝܳܠ̈ܦܳܢ܆ ܘܰܠܘܳܬ ܪܶܓܬܳܐ ܕܚܰܝ̈ܶܐ ܕܰܥܬܺܝܕܺܝܢ ܦܳܪ̈ܚܳܢ܆ ܗܳܝ ܕܒܳܗ̇ ܐܺܝܬܰܘܗ̱ܝ ܒܽܘܣܳܡܳܐ ܥܰܬܺܝܪܳܐ ܘܰܡܫܰܪܬܚܳܐ ܕܺܝܕܰܥܬܳܐ܆ ܘܕܰܐܝܟ ܗܳܕܶܐ ܟܽܠܳܗ̇ ܐܺܝܬܶܝܗ̇܆ ܐܰܝܟܰܢܳܐ ܕܳܐܦ ܠܚܰܝܠܳܐ ܗܰܘ ܪܰܝܽܘܓܬܳܢܳܐ ܕܗܳܢܽܘܢ ܕܡܶܫܬܰܘܬܦܺܝܢ ܬܡ̣ܰܠܶܐ ܘܰܬܣܰܒܰܥ܆ ܘܬܶܫܬܰܦܰܥ ܒܣܰܓܺܝܽܐܘܬܳܐ ܘܬܶܬܶܐܫܶܕ ܒܰܕܡܽܘܬ ܡܰܝ̈ܳܐ ܣܰܓܺܝ̈ܶܐܐ܆ ܗܳܢܽܘܢ ܕܡܶܢ ܐܺܝܕܐ ܗܳܝ ܕܡܶܬܚܰܪܝܳܐ ܕܬܶܠܒܽܘܟ ܐܶܢܽܘܢ ܡܶܬܰܐܫܕܺܝܢ. ܗܳܝ ܕܰܠܘܳܬܳܗ̇ ܟܰܕ ܚܳܐܰܪ ܗ̱ܘܳܐ ܐܳܦ ܕܰܘܺܝܕ ܐܳܡܰܪ ܗ̱ܘܳܐ܆ ܠܰܐܠܳܗܳܐ ܗܰܘ ܝܳܗܽܘܒܳܐ ܕܡܰܘܗܰܒܬܳܐ ܫܦܺܝܥܬܳܐ ܕܕܰܐܝܟ ܗܳܕܶܐ܆ ܐܶ݀ܣܒܰܥ ܟܰܕ ܬܶܬܚܙܶܐ ܠܺܝ ܬܶܫܒܽܘܚܬܳܟ[1].
ܡܶܛܠ ܗܳܕܶܐ ܐܳܦ ܐܶܢܳܐ ܩܢܽܘܡܝ܆ ܠܘܳܬ ܬܶܫܡܶܫܬܳܐ ܕܡܰܠܦܳܢܽܘܬܳܐ ܝܰܬܺܝܪ ܡܛܰܝܒܳܐܺܝܬ ܡܛܰܝܒܳܐܺܝܬ ܡܶܬܬܥܺܝܪ ܐ̱ܢܳܐ. ܘܰܩܕܳܡ ܕܶܐ݀ܬܬܒܰܥ ܚܘܺܝܚܳܐ ܐܺܝܬܰܝ܆ ܘܰܠܘܳܬ ܗܳܝ ܕܰܐܪܡܶܐ ܟܶܣܦܳܐ ܡܶܬܗܰܘܢܳܢܳܐ ܨܶܒܝܳܢܳܐܺܝܬ ܐܳܬܶܐ ܐ̱ܢܐ. ܝܽܘܠܦܳܢܳܐ ܓܶܝܪ ܛܳܒܳܐ ܟܰܕ ܢܳܦܶܠ ܒܡܰܫܡܰܥܬܳܐ ܕܝܳܕܥܳܐ ܠܡܶܫܡܰܥ ܫܰܦܺܝܪ܆ ܕܝܰܬܺܝܪ ܢܰܨܺܝܚ ܘܰܕܝܰܬܺܝܪ ܚܰܕܳܝ ܡܶܬܚܰܘܶܐ. ܘܰܠܝܽܘܩܢܳܗ̇ ܕܗܳܕܶܐ ܟܬܳܒܳܐ ܟܳܗܢܳܝܳܐ ܕܡ̈ܰܬܠܶܐ ܚܰܘܺܝ ܟܰܕ ܗܳܟܰܢܳܐ ܐܶܡܰܪ. ܒܰܩܕܳܫܳܐ ܕܕܰܗܒܳܐ܆ ܣܐܪܕܝܘܢ ܝܰܩܺܝܪ ܕܡܰܝ̈ܳܐ ܐܰܣܺܝܪ. ܡܶܠܬܳܐ ܕܚܶܟܡܬܳܐ ܒܶܐܕܢܳܐ ܕܫܰܦܺܝܪ ܫܳܡܥܳܐ[2]. ܐܰܝܟ ܙܢܳܐ ܓܶܝܪ ܕܟܺܐܦܳܐ ܡܶܕܶܡ ܡܝܰܩܰܪܬܳܐ ܟܰܕ ܐܶܬܚܰܕܪܰܬ ܒܕܰܗܒܳܐ܆ ܨܶܒܬܳܐ ܝܶܗܒܰܬ ܘܗܶܦܟܰܬ ܢܶܣܒܰܬ܆ ܘܰܠܗܳܝ ܕܰܡܚܰܕܝܳܐ ܥܶܐܦܰܬ܆ ܟܰܕ ܚܕܳܐ ܗܕܺܝܪܽܘܬ ܫܽܘܦܪܳܐ ܡܶܢ ܬܪ̈ܰܝܗܽܘܢ ܐܰܨܡܚܰܬ܆ ܗܳܟܰܢܳܐ ܡܶܠܬܳܐ ܚܰܟܺܝܡܬܳܐܟܰܕܥܰܡܡܰܫ̈ܡܥܳܬܳܐ ܣܰܟܽܘܠ̈ܬܳܢܝܳܬܳܐ ܬܶܬܠܰܚܰܡ܆ ܡܫܰܡܠܝܳܐ ܫܽܘܦܪܳܐ ܡܥܰܠܝܳܐ ܘܰܕܠܰܝܬ ܠܥܶܠ ܡܶܢܶܗ ܘܫܰܦܺܝܪܽܘܬ ܦܰܐܝܽܘܬܳܐ ܐܰܠܳܗܳܝܬܳܐ.
ܟܰܕ ܕܶܝܢ ܐܢ̱ܬܽܘܢ ܗܳܢܳܐ ܟܽܠܶܗ ܡܶܢ ܫܶܡܥܳܐ ܚܰܪܺܝܦܳܐ ܘܰܕܝܰܬܺܝܪ ܐܺܝܬܰܘܗ̱ܝ ܝܳܕܽܘܥܳܐ ܡܶܫܟܚܺܝܢ ܐܢ̱ܬܽܘܢ ܠܡܰܘܬܴܪܽܘ܆ ܐܰܝܟܰܢܳܐ ܕܠܰܘ ܒܰܠܚܽܘܕ ܛܰܝܒܽܘܬܳܐ ܬܙܰܡܢܽܘܢ ܠܗܰܘ ܕܳܐܡܰܪ܆ ܐܶܠܳܐ ܐܳܦ ܠܗܳܝ ܕܚܰܣܺܝܪܳܐ ܠܡ̈ܶܠܶܐ ܕܺܝܠܝ ܡܚܺܝ̈ܠܳܬܳܐ ܬܡܰܠܽܘܢ܆ ܘܰܬܩܰܕܡܽܘܢ ܬܶܐܪܥܽܘܢܳܗ̇ ܠܬܰܪܥܺܝܬܳܐ܆ ܟܰܕ ܟܡܳܐ ܙܰܒ̈ܢܺܝܢ ܠܳܐ ܡܶܫܟ̈ܚܳܢ ܗ̱ܘܰܝ̈ ܕܰܥܕܰܡܳܐ ܠܫܽܘܠܳܡܳܐ ܢܦܩ̈ܢܗ̇ ܠܗܳܝ ܕܩܰܕܺܝܡܳܐ ܣܺܝܡܳܐ܆ ܟܰܕ ܬܟܺܝܠ ܐ̱ܢܳܐ ܡܶܟܺܝܠ ܣܳܥܶܐ ܐ̱ܢܳܐ ܐܳܦ ܥܰܠ ܐܰܝܠܶܝܢ ܕܰܐܝܟܰܢ ܕܗܽܘ ܐܺܝܬܰܝܗܶܝܢ ܝܰܬܺܝܪ ܥܰܣ̈ܩܳܬܳܐ ܠܦܽܘܫܳܩܳܐ. ܕܗܳܠܶܝܢ ܕܰܚܕܳܐ ܡܶܢܗܶܝܢ. ܐܳܦ ܗܳܝ ܕܰܡܡܰܠܠܽܘܬ ܫܰܪ̈ܒܳܬܳܐ ܕܒܰܒܣܰܪ ܕܰܐܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܡܶܣܬܰܒܪܳܐ ܗ̱ܘܳܬ ܕܺܐܝܬܶܝܗ̇܆ ܘܗ̱ܝ ܕܫܳܠܡܺܝܢ ܠܰܚ̈ܕܳܕܶܐ ܢܚܰܘܶܐ ܐܶܢܽܘܢ ܠܶܐܘܰܢܓ̈ܶܠܺܝܣܛܶܐ܆ ܟܰܕ ܠܦܰܪ̈ܨܽܘܦܶܐ ܡܫܰܚ̈ܠܦܶܐ ܘܠܰܘ ܠܗܽܘܢ ܟܰܕ ܠܗܽܘܢ ܐܶܬܥܗܰܕܘ܆ ܗܳܢܽܘܢ ܕܡܶܢܗܽܘܢ ܐܺܝܬܰܘܗ̱ܝ ܗܽܘ ܬܽܘܢܳܝܶܗ ܕܓܶܢܣܳܐ. ܗܳܝ ܟܺܝܬ ܕܳܐܦ ܐܶܬܓܰܠܝܰܬ ܢܰܗܺܝܪܳܐܺܝܬ܆ ܕܰܒܙܰܠܺܝ̈ܩܶܐ ܕܰܫܪܳܪܳܐ ܡܰܨܡܚܳܐ܆ ܘܠܰܘ ܕܒܰܡܦܺܝܣܳܢܽܘܬܳܐ ܕܗܽܘܦܳܟ ܚܽܘ̈ܫܳܒܶܐ ܛܺܝܫܳܐ.
ܟܰܕ ܗܳܟܺܝܠ ܣܰܓܺܝ̈ܳܐܬܳܐ ܡܶܢ ܟܰܕܽܘ ܩܰܕܶܡ ܐܶܬܒܰܚ̈ܢܶܝܢ܆ ܘܗܳܠܶܝܢ ܕܡܶܣܬܰܒܪ̈ܳܢ ܗ̱ܘܰܝ̈ ܕܥܳܒ̈ܕܳܢ ܦܽܘܫܳܟ̈ܶܐ ܐܶܫܬܪ̈ܶܝ̣ܶܝ̣ܢ܆ ܐܳܠܨܳܝܬܳܐ ܐܺܝܬܶܝܗ̇ ܣܰܓܺܝ܆ ܕܳܐܦ ܗܳܠܶܝܢ ܕܚܰܣܺܝܪ̈ܳܢ ܢܰܘܣܶܦ ܥܰܠ ܫܰܪܒܳܐ. ܫܰܦܺܝܪܳܐ ܗܝ ܓܶܝܪ ܗܳܝ ܕܰܡܫܰܡܠܝܳܐ ܒܟܽܠ ܡܶܕܶܡ. ܡܳܕܶܝܢ ܙܳܕܶܩ ܠܰܡܫܰܪܳܝܽܘ ܒܡܶܠܬܳܐ ܡܶܢ ܗܳܪܟܳܐ.
ܟܰܕ ܡܰܬܰܝ ܠܟܽܠܳܗ̇ ܡܡܰܠܠܽܘܬ ܫܰܪ̈ܒܳܬܳܐ ܣܰܝܟܳܗ̇ ܒܦܳܣܺܝ̈ܩܳܬܳܐ ܘܟܰܢܫܳܗ̇ ܠܩܶܦܱ̈ܠܶܐܐ܆ ܘܦܰܠܓܳܗ̇ ܠܰܬܠܳܬ ܡܢܰܘ̈ܳܬܳܐ ܘܶܐܡܰܪ܆ ܟܽܠܗܶܝܢ ܗܳܟܺܝܠ ܫܰܪ̈ܒܳܬܳܐ ܡܶܢ ܐܰܒܪܳܗܳܡ ܥܕܰܡܳܐ ܠܕܰܘܺܝܕ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ܆ ܘܡܶܢ ܕܰܘܺܝܕ ܥܕܰܡܳܐ ܠܓܳܠܽܘܬܳܐ ܕܒܳܒܶܠ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ. ܘܡܶܢ ܓܳܠܽܘܬܐ ܕܒܳܒܶܠ ܥܕܰܡܳܐ ܠܰܡܫܺܝܚܳܐ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ[3]܆ ܘܠܺܝܠܺܝܕܽܘܬܳܐ ܕܟܽܠ ܚܰܕ ܫܰܪܒܬܳܐ ܫܰܡܗܳܗ̇ ܘܰܡܢܳܗ̇܆ ܡܶܬܒܰܥܝܳܐ ܕܡܶܛܽܠ ܡܳܢܳܐ ܒܰܦܣܳܩܳܐ ܗܰܘ ܬܪܰܝܳܢܳܐ܆ ܗܰܘ ܕܡܶܢ ܕܰܘܺܝܕ ܥܕܰܡܳܐ ܠܓܳܠܽܘܬܐ ܕܒܳܒܶܠ ܡܳܬܰܚ܆ ܠܡܶܢܝܳܢܳܐ ܡܰܢ ܕܗܳܢܽܘܢ ܕܰܡܫܰܡܗܺܝܢ ܡܶܫܟܚܺܝܢܰܢ ܠܶܗ ܕܠܳܐ ܡܕܰܓܶܠ܆ ܥܶܣܪܳܐ ܓܶܝܪ ܐܺܝܬܰܝܗܽܘܢ ܥܰܡ ܐܰܪܒܥܳܐ܆ ܬܠܳܬܳܐ ܕܶܝܢ ܦܰܪ̈ܨܽܘܦܶܐ ܫܰܬܺܝܩܺܝܢ܆ ܟܰܕ ܒܬܰܫܥܺܝܬܳܐ ܘܒܰܟܬܳܒܳܐ ܗܰܘ ܕܡܰܠ̈ܟܘܳܬܳܐ ܡܶܬܬܰܢܶܝܢ. ܗܳܠܶܝܢ ܕܶܝܢ ܐܺܝܬܰܝܗܽܘܢ܆ ܐܘܚܘܙܝܐ ܘܝܘܐܫ ܘܐܡܨܝܐ. ܠܗܳܠܶܝܢ ܟܺܝܬ ܕܳܐܦ ܟܰܕ ܥܒܰܪ ܐܶܢܽܘܢ ܐܶܘܰܢܓܶܠܺܝܣܛܳܐ ܐܶܡܰܪ܆ ܝܽܘܪܳܡ ܕܝܢ ܝܺܠܶܕ ܠܥܽܘܙܝܐ[4]. ܟܰܕ ܙܳܕܶܩ ܗ̱ܘܳܐ ܠܡܺܐܡܰܪ ܠܐܘܚܘܙܝܐ ܘܠܝܘܐܫ ܘܠܐܡܨܝܐ܆ ܘܗܳܟܰܢܳܐ ܒܳܬܰܪܟܶܢ ܠܥܽܘܙܝܐ. ܡܳܢܐ ܗܝ ܗܳܟܺܝܠ ܥܶܠܬܳܐ ܕܗܳܝ ܕܶܐܬܒܰܨܰܪܘ̱ ܗܳܠܶܝܢ ܦܰܪ̈ܨܽܘܦܶܐ.
ܟܰܕ ܩܰܠܺܝܠ ܡܶܢ ܠܥܶܠ ܡܫܰܪܶܐ ܐ̱ܢܳܐ܆ ܡܶܢܗܽܘܢ ܕܰܟ̈ܬܳܒܶܐ ܢܦܺܝ̈ܚܰܝ ܡܶܢ ܪܽܘܚܳܐ ܐܶ݀ܚܰܘܶܐ ܐܰܝܟ ܕܰܡܨܶܐ ܐ̱ܢܳܐ. ܫܠܝܡܘܢ ܟܰܕ ܒܪܳܐ ܐܺܝܬܰܘܗ̱ܝ ܗ̱ܘܳܐ ܕܕܰܘܺܝܕ ܐܰܠܳܗܳܝܳܐ܆ ܟܰܕ ܥܕܰܟܺܝܠ ܛܰܠܝܳܐ ܐܺܝܬܰܘܗ̱ܝ ܗ̱ܘܳܐ ܩܰܒܶܠ ܗ̱ܘܳܐ ܡܰܠܟܽܘܬܐ ܐܰܒܳܗܳܝܬܳܐ܆ ܫܶܐܠ ܚܶܟܡܬܳܐ ܡܶܢ ܐܰܠܳܗܳܐ. ܘܩܰܪܺܝܒ ܗ̱ܘܳܐ ܡܛܰܝܒܳܐ ܗܰܘ ܕܰܕܢܫ̣ܬܰܐܠ ܫܰܦܺܝܪ ܪܳܐܶܓ܆ ܘܝܰܗ̱ܒ ܠܶܗ ܓܶܠܝܳܢܳܐ ܗܳܢܳܐ ܐܰܠܳܗܳܝܳܐ ܟܰܕ ܗܳܟܰܢܳܐ ܐܳܡܰܪ. ܚܠܳܦ ܕܰܗܘܳܬ ܗܳܕܶܐ ܒܠܶܒܳܟ܆ ܘܠܳܐ ܫܶܐܠܬ ܥܽܘܬܪܳܐ ܕܩܶܢ̈ܝܳܢܶܐ ܘܠܳܐ ܫܽܘܒܚܳܐ܆ ܘܳܐܦܠܳܐ ܢܰܦܫܳܐ ܕܗܳܢܽܘܢ ܕܣܳܢܶܝܢ ܠܳܟ܆ ܘܠܳܐ ܫܶܐܠܬ ܝܰܘ̈ܡܳܬܳܐ ܣܰܓܺܝ̈ܶܐܐ܆ ܘܫܶܐܠܬ ܠܳܟ ܚܶܟܡܬܳܐ ܘܣܰܟܽܘܠܬܳܢܽܘܬܳܐ܆ ܐܰܝܟܰܢܳܐ ܕܰܬܕܽܘܢ ܠܥܰܡܳܐ ܕܺܝܠܝ ܗܰܘ ܕܰܐܡܠܶܟܬ ܥܠܰܘܗ̱ܝ܆ ܚܶܟܡܬܳܐ ܘܣܰܟܽܘܠܬܳܢܽܘܬܐ ܝܳܗܶܒ ܐ̱ܢܳܐ ܠܳܟ. ܘܥܽܘܬܪܳܐ ܘܩܶܢܝܳܢܳܐ ܘܫܽܘܒܚܳܐ ܐܶ݀ܬܶܠ ܠܳܟ. ܟܰܕ ܡܰܠܶܦ ܠܰܢ܆ ܕܰܐܝܠܶܝܢ ܡܰܢ ܙܳܕܶܩ ܕܢܶܫ̣ܰܐܠ܆ ܐܰܝܠܶܝܢ ܕܶܝܢ ܐܰܝܟ ܕܒܡܢܬܐ ܕܬܰܘܣܶܦܬܳܐ ܢܶܣܰܒ. ܟܰܕ ܓܶܝܪ ܫܶܐܠ ܫܰܦܺܝܪ ܚܶܟܡܬܳܐ܆ ܥܰܡ ܗܳܝ ܕܝܰܗ̱ܒ ܠܶܗ ܗܳܕܶܐ܆ ܐܳܦ ܗܳܠܶܝܢ ܐ̱ܚܪ̈ܳܢܝܳܬܳܐ ܟܽܠܗܶܝܢ ܐܰܘܣܶܦ ܠܶܗ. ܡܶܛܽܠ ܟܺܝܬ ܕܳܐܦ ܗܽܘ ܐܺܝܬܰܘܗ̱ܝ܆ ܘܳܐܦ ܗܰܘ ܕܒܶܐܘܰܢܓ̈ܶܠܺܝܰܐ ܐܶܡܰܪ܆ ܒܥܰܘ ܠܽܘܩܕܰܡ ܡܰܠܟܽܘܬܶܗ ܕܰܐܠܳܗܳܐ ܘܙܰܕܝܩܽܘܬܶܗ܆ ܘܗܳܠܶܝܢ ܟܽܠܗܶܝܢ ܢܶܬܬܰܘܣ̈ܦܳܢ ܠܟܽܘܢ[5].
ܐܶܠܳܐ ܗܰܘ ܕܰܒܡܰܘ̈ܡܳܬܳܐ ܕܕܰܐܝܟ ܗܳܠܶܝܢ ܐܶܬܝܰܩܰܪ܆ ܛܥܳܐ ܠܗܰܘ ܕܝܰܩܪܶܗ. ܘܗܳܢܳܐ ܟܽܠܶܗ ܗܘ̣ܳܐ ܠܳܐ ܡܠܺܝܠܳܐ ܘܰܐܪܚܶܩ ܡܶܢ ܦܽܘܩ̈ܕܳܢܰܘܗ̱ܝ ܕܗܳܢܳܐ܆ ܘܰܒܪܶܚܡܰܬ ܪ̈ܓܺܝܓܳܬܳܐ ܪܘ̣ܳܐ ܒܗܰܘܢܶܗ܆ ܘܰܕܦܽܘܢܳܩܳܐ ܗܘ̣ܳܐ ܟܽܠܶܗ܆ ܘܰܕܨܰܚܢܽܘܬܳܐ ܗܳܝ ܕܡܶܢ ܗܳܪܟܳܐ ܫܳܘܚܳܐ܆ ܐܰܝܟܰܢܳܐ ܕܳܐܦ ܠܘܳܬ ܕܶܚܠܰܬ ܫ̈ܺܐܕܶܐ ܢܶܫܬܰܪܓܰܠ܆ ܘܡܶܛܽܠܳܬܶܗ ܢܺܐܡܰܪ ܟܬܳܒܳܐ ܐܰܠܳܗܳܝܳܐ܆ ܘܰܐܤ̈ܛܺܝ ܢܶܫ̈ܶܐ ܗܳܠܶܝܢ ܢܽܘܟܪ̈ܳܝܳܬܳܐ ܠܠܶܒܶܗ ܒܳܬܰܪ ܐܰܠܳܗܰܝܗܶܝܢ[6]. ܘܰܬܒܰܥܬܳܐ ܕܗܳܠܶܝܢ ܡܶܚܕܳܐ ܬܪܺܝܨܳܐܺܝܬ ܢܳܩܦܳܐ ܗ̱ܘܳܬ. ܘܦܳܣܶܩ ܗ̱ܘܳܐ ܡܶܟܺܝܠ ܡܳܪܝܳܐ ܗܰܘ ܕܬܰܒ̈ܥܳܬܳܐ[7]܆ ܟܰܕ ܡܡܰܙܶܓ ܒܶܗ ܒܰܓܙܳܡܳܐ ܪܶܚܡܰܬ ܐ̱ܢܳܫܽܘܬܐ ܗܳܟܰܢܳܐ. ܡܶܨܪܳܐ ܐܶܨܪܶܝܗ̇ ܠܡܰܠܟܽܘܬܐ ܡܶܢ ܐܺܝܕܳܟ܆ ܘܶܐ݀ܬܠܺܝܗ̇ ܠܥܰܒܕܳܟ. ܒܪܰܡ ܒܝܰܘ̈ܡܳܬܳܐ ܕܺܝܠܳܟ ܠܳܐ ܐܶ݀ܥܒܶܕ ܗܳܠܶܝܢ܆ ܡܶܛܽܠ ܕܰܘܺܝܕ ܐܰܒܽܘܟ. ܡܶܢ ܐܺܝܕܶܗ ܕܰܒܪܳܟ ܐܶ݀ܣܒܺܝܗ̇. ܒܪܰܡ ܠܟܽܠܳܗ̇ ܡܰܠܟܽܘܬܳܐ ܠܳܐ ܐܶ݀ܣܰܒ. ܫܰܒܛܳܐ ܚܰܕ ܐܶ݀ܬܶܠ ܠܰܒܪܳܟ. ܡܶܛܽܠ ܕܰܘܺܝܕ ܥܰܒܕܝ܆ ܘܡܶܛܽܠ ܐܽܘܪܶܫܠܶܡ ܡܕܺܝܢ̱ܬܳܐ ܗܳܝ ܕܰܓܒܺܝܬ̣[8].
ܘܳܐܠܨܳܐܺܝܬ ܗܳܠܶܝܢ ܕܰܓܙܳܪ ܕܺܝܢܳܐ ܠܰܥܒܳܕܳܐ ܢܳܦ̈ܩܳܢ. ܘܐ̱ܢܳܫ ܥܰܒܕܶܗ ܕܺܐܝܬܰܘܗ̱ܝ ܗ̱ܘܳܐ ܣܰܓܺܝ ܙܢܰܝ̈ܳܐ ܒܰܨܢܺܝܥܽܘܬܳܐ ܘܒܰܫܟܳܚ̈ܳܬܳܐ܆ ܘܰܕܣܳܦܶܩ ܗ̱ܘܳܐ ܠܡܶܬܚܰܫܳܚܽܘ ܒܣܽܘܥܪ̈ܳܢܶܐ ܕܰܫܡܶܗ ܝܽܘܪܰܒܥܰܡ܆ ܛܪܽܘܢܳܐܺܝܬ ܩܳܐܶܡ ܥܠܰܘܗ̱ܝ܆ ܘܡܶܢ ܡܰܠܟܽܘܬܳܐ ܣܽܘܓܳܐܗ̇ ܡܪܺܝܡ܆ ܟܰܕ ܥܶܣܪܳܐ ܫܰܒ̈ܛܶܐ ܢܬܰܫ܆ ܘܰܬܪܶܝܢ ܒܰܠܚܽܘܕ ܫܒܰܩ ܠܰܒܪܶܗ ܕܡܳܪܶܗ܆ ܗܰܘ ܕܺܝܗܽܘܕܳܐ ܐܳܡܰܪ ܐ̱ܢܳܐ ܘܗܰܘ ܕܒܶܢܝܳܡܶܝܢ܆ ܗܳܠܶܝܢ ܕܳܐܦ ܫܰܒܛܳܐ ܚܰܕ ܩܪܳܐ ܐܶܢܽܘܢ ܟܬܳܒܳܐ ܟܳܗܢܳܝܳܐ܆ ܡܶܛܽܠ ܗܳܝ ܕܢܰܩܺܝܦܺܝܢ ܗ̱ܘܰܘ ܬܚܽܘܡ̈ܶܐ ܕܝܳܪܬܽܘܬܗܽܘܢ܆ ܗܳܠܶܝܢ ܕܰܒܗܽܘܢ ܚܒܺܝܫܳܐ ܗ̱ܘܳܬ ܐܳܦ ܗܺܝ ܡܕܺܝܢ̱ܬܳܐ ܕܰܐܠܳܗܳܐ ܐܽܘܪܶܫܠܶܡ܆ ܐܰܝܟܰܢܳܐ ܕܚܰܕ ܢܶܣܬܰܒܪܽܘܢ ܗܘܰܘ ܕܺܐܝܬܰܝܗܽܘܢ ܬܪ̈ܰܝܗܽܘܢ ܫܰܒ̈ܛܶܐ. ܘܟܰܕ ܒܗܳܢܳܐ ܙܢܳܐ ܐܶܬܦܰܠܓܰܬ ܡܰܠܟܽܘܬܳܐ܆ ܓܰܒܪܳܐ ܡܰܢ ܗܰܘ ܥܰܒܕܳܐ ܘܥܳܪܽܘܩܳܐ܆ ܡܕܰܒܰܪ ܗ̱ܘܳܐ ܠܗܳܠܶܝܢ ܥܶܣܪܳܐ ܫܰܒ̈ܛܺܝܢ܆ ܗܳܢܽܘܢ ܕܳܐܦ ܐܝܣܪܳܐܶܝܠ ܡܶܫܬܰܡܗܺܝܢ ܗ̱ܘܰܘ. ܫܳܡܪܺܝܢ ܕܶܝܢ ܐܺܝܬܶܝܗ̇ ܗ̱ܘܳܬ ܠܶܗ ܒܶܝܬ ܡܰܠܟܽܘܬܳܐ. ܥܰܠ ܗܳܠܶܝܢ ܕܶܝܢ ܬܪܶܝܢ ܫܰܒ̈ܛܶܐ ܐ̱ܚܪ̈ܳܢܶܐ܆ ܕܟܽܘܢܳܝܳܐ ܕܺܝܗܽܘܕܳܐ ܡܶܬܟܬܶܒ ܗ̱ܘܳܐ ܥܠܰܝܗܽܘܢ܆ ܟܰܕ ܡܶܢ ܫܰܒܛܳܐ ܗܰܘ ܕܝܰܬܺܝܪ ܐܺܝܬܰܘܗ̱ܝ ܗ̱ܘܳܐ ܪܰܒܳܐ ܘܣܰܓܺܝ ܒܢܰܝ̈ܢܳܫܳܐ ܠܒܰܟ ܗܽܘ ܫܡܳܐ܆ ܐܰܡܠܶܟ ܥܠܰܝܗܽܘܢ ܪܚܰܒܥܰܡ ܒܪܶܗ ܕܰܫܠܝܡܘܢ܆ ܘܗܳܢܽܘܢ ܕܡܶܢܶܗ ܢܳܚܬܺܝܢ ܒܝܽܘܒܳܠܳܐ܆ ܟܰܕ ܐܽܘܪܶܫܠܶܡ ܐܺܝܬܶܝܗ̇ ܗ̱ܘܳܬ ܠܗܽܘܢ ܒܶܝܬ ܡܰܥܡܪܳܐ ܡܰܠܟܳܝܳܐ܆ ܘܬܰܡܶܢ ܡܫܰܡܠܶܝܢ ܗ̱ܘܰܘ ܠܰܥ̈ܝܳܕܶܐ ܐܰܒܳܗ̈ܳܝܶܐ܆ ܘܝܰܨܺܝܦܺܝܢ ܗ̱ܘܰܘ ܕܦܽܘܠܚܳܢ ܟܳܗܢܽܘܬܳܐ ܠܶܘܳܝܳܐ ܗܰܘ ܕܰܒܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ ܘܕܰܡܟܰܗܢܳܢܽܘܬ ܩܽܘܕܫ̈ܶܐ ܗܳܝ ܕܫܰܪܟܳܐ܆ ܐܳܦܶܢ ܠܰܘ ܡܫܰܡܠܝܳܐܺܝܬ ܣܰܓܺܝ̈ܶܐܐ ܡܶܢܗܽܘܢ ܪܳܕܦܺܝܢ ܗ̱ܘܰܘ ܒܳܬܰܪ ܗܳܝ ܕܚܰܬܻܝܬ̣ܽܘܬܳܐ ܘܕܰܟܝܳܐ ܕܣܳܝܽܘܡܽܘܬ ܢܳܡܽܘܣܳܐ ܐܰܠܳܗܳܝܬܳܐ܆ ܐܶܠܳܐ ܐܺܝܬ ܗ̱ܘܳܐ ܠܗܽܘܢ ܣܰܪܺܝܟܽܘܬ ܬܰܪܥܺܝܬܳܐ ܡܶܕܶܡ ܫܺܐܕܳܢܳܝܬܳܐ܆ ܘܰܠܘܳܬ ܛܽܘܪ̈ܶܐ ܘܕܽܘܟ̈ܝܳܬܳܐ ܪ̈ܳܡܳܬܳܐ ܡܬܰܘܪܺܝܢ ܗ̱ܘܰܘ܆ ܟܰܕ ܡܰܥܛܪܺܝܢ ܗ̱ܘܰܘ ܬܰܡܳܢ ܐܰܝܟ ܗܳܝ ܕܰܠܗܽܘܢ ܡܶܣܬܰܒܪܳܐ ܗ̱ܘܳܬ.
ܝܽܘܪܰܒܥܰܡ ܕܶܝܢ ܗܰܘ ܥܰܒܕܳܐ ܘܫܰܦܠܳܐ ܘܰܡܪܰܒܰܝ ܒܥܰܒܕܽܘܬܳܐ܆ ܗܰܘ ܡܕܰܒܪܳܢܳܐ ܕܺܐܝܣܪܳܐܶܝܠ܆ ܕܗܳܠܶܝܢ ܟܺܝܬ ܐܳܡܰܪ ܐ̱ܢܳܐ ܥܶܣܪܳܐ ܫܰܒ̈ܛܺܝܢ܆ ܟܰܕ ܪܰܒܺܝ ܠܰܙܢܳܐ ܥܰܒܕܳܢܳܝܳܐ ܒܪܺܝܫܳܢܽܘܬܳܐ܆ ܘܰܠܘܳܬ ܨܰܥܪܳܐ ܕܝܰܬܺܝܪ ܪܰܒ ܘܰܕܝܰܬܺܝܪ ܓܠܶܐ ܘܺܝܕܺܝܥ ܐܶܬܬܪܺܝܡ܆ ܐܳܦ ܠܽܘܩܒܰܠ ܐܰܠܳܗܳܐ ܩܳܐܶܡ ܣܰܩܽܘܒܠܳܐܺܝܬ ܘܡܳܪܽܘܕܳܐܺܝܬ܆ ܗܰܘ ܕܳܐܦ ܠܶܗ ܐܰܣܠܺܝ ܕܢܶܪܕܶܐ܆ ܒܝܰܕ ܢܒܺܝܳܐ ܕܶܝܢ ܐ̱ܢܳܫ ܕܰܠܗܳܕܶܐ ܐܶܫܬܰܕܰܪ ܩܰܕܶܡ ܐܰܙܥܶܩ ܠܶܗ ܗܳܠܶܝܢ. ܘܢܶܗܘܶܐ ܕܶܐܢܗܽܘ ܕܬܶܛܰܪ ܟܽܠܗܶܝܢ ܗܳܠܶܝܢ ܕܰܡܦܰܩܶܕ ܐ̱ܢܳܐ ܠܳܟ܆ ܘܰܬܗܰܠܶܟ ܒܽܐܘܪ̈ܚܳܬܝ܆ ܐܳܦ ܐܶ݀ܗܘܶܐ ܥܰܡܳܟ܆ ܘܶܐ݀ܒܢܶܐ ܠܳܟ ܒܰܝܬܳܐ ܡܗܰܝܡܢܳܐ܆ ܐܰܝܟܰܢܳܐ ܕܰܒܢܺܝܬ̣ ܠܕܰܘܺܝܕ[9].
ܡܳܢܳܐ ܗܝ ܠܶܗ ܗܳܟܺܝܠ ܡܰܚܫܰܒܬܳܐ ܢܳܨܝܰܬ̣ ܥܰܡ ܐܰܠܳܗܳܐ ܕܡܳܪܽܘܕܽܘܬܳܐ ܘܰܕܩܰܘܡܳܐ ܕܰܠܩܽܘܒܠܶܗ܆ ܥܰܒܕܳܢܳܝܬܳܐ ܐܰܝܟ ܕܒܰܫܪܳܪܳܐ ܘܒܺܝܫܬܳܐ ܘܒܺܝܫܰܬ̣ ܙܢܳܐ. ܟܰܕ ܓܶܝܪ ܢܳܡܽܘܣܳܐ ܦܳܩܶܕ ܗ̱ܘܳܐ ܕܟܽܠܶܗ ܥܰܡܰܐ ܠܽܐܘܪܫܠܶܡ ܢܶܣܰܩ܆ ܘܬܰܡܳܢ ܢܰܣܶܩ ܕܶܒ̈ܚܶܐ ܒܒܰܝܬܶܗ ܕܡܳܪܝܳܐ܆ ܟܰܕ ܕܚܶܠ ܗܰܘ ܒܺܝܫܳܐ܆ ܕܕܰܠܡܳܐ ܟܰܕ ܡܶܬܪܰܚܩܺܝܢ ܡܶܢܶܗ ܡܶܫܬܰܡ̈ܥܳܢܰܘܗܝ܆ ܠܡܰܠܟܽܘܬܳܐ ܗܳܝ ܢܳܡܽܘܣܳܝܬܳܐ ܢܶܫܬܰܘܕܥܽܘܢ܆ ܗܳܝ ܕܰܐܚܺܝܕܳܐ ܒܽܐܘܪܫܠܶܡ܆ ܦܽܘܠܚܳܢ ܕܶܚ̈ܠܳܬܳܐ ܗܽܘ ܡܶܢ ܢܰܦܫܶܗ ܒܳܕܶܐ ܘܡܶܫܟܰܚ. ܘܚܳܫܶܠ ܬܰܪܬܶܝܢ ܐܳܪ̈ܽܘܢܝܳܬܐ ܕܕܰܗܒܳܐ܆ ܘܳܐܡܰܪ ܠܗܳܢܽܘܢ ܚܰܣܺܝܪ̈ܰܝ ܗܰܘܢܳܐ܆ ܙܳܕܶܩ ܠܺܝ ܓܶܝܪ ܕܰܠܗܶܝܢ ܠܰܒ̈ܢܳܬܩ̈ܳܠܶܐ ܗܳܠܶܝܢ ܕܰܟܬܳܒܳܐ ܐܰܠܳܗܳܝܳܐ ܒܳܗ̇ ܒܡܶܠܬܳܐ ܐܶ݀ܣܺܝܡ. ܬܶܣܦܰܩ[10] ܠܟܽܘܢ ܠܡܶܣܰܩ ܠܽܐܘܪܫܠܶܡ. ܗܳܐ ܐܰܠܳܗܰܝ̈ܟ ܐܺܝܣܪܳܐܶܝܠ܆ ܗܳܢܽܘܢ ܕܰܐܣܩܽܘܟ ܡܶܢ ܐܰܪܥܳܐ ܕܡܶܨܪܶܝܢ[11]. ܘܗܳܟܰܢܳܐ ܡܶܬܢܰܫܝܳܢܽܘܬܳܐ ܡܫܰܡܠܰܝܬܳܐ ܘܰܓܡܺܝܪܬܳܐ ܕܡܶܢ ܗܰܘ ܕܒܰܫܪܳܪܳܐ ܐܰܠܳܗܳܐ܆ ܐܰܥܒܶܕ ܒܗܽܘܢܒܕܳܘܰܝ̈ܳܐ܆ ܘܟܽܠܗܽܘܢ ܡܶܟܺܝܠ ܗܳܢܽܘܢ ܕܡܶܢ ܒܳܬܪܶܗ ܩܰܒܠܽܘܗ̇ ܠܡܰܠܟܽܘܬܳܐ ܗܳܝ ܡܣܰܝܰܒܬܳܐ ܘܕܰܣܢܺܝܐܳܐ ܠܰܐܠܳܗܳܐ܆ ܢܳܩܦܺܝܢ ܗ̱ܘܰܘ ܠܛܳܥܝܽܘܬܳܐ. ܘܰܕܪܽܘܫܥܳܐ ܡܰܠܽܘܢ ܐܺܝܬܰܝܗܽܘܢ ܗܘܰܘ ܡܩܰܒ̈ܠܳܢܶܐ ܘܝܳܪ̈ܬܶܐ ܐܘ ܕܪܺܝܫܳܢܽܘܬܳܐ.
ܟܰܕ ܗܳܟܺܝܠ ܗܳܠܶܝܢ ܬܰܪܬܶܝܢ ܡܰܠ̈ܟܘܳܬܳܐ܆ ܗܳܝ ܟܺܝܬ ܕܺܝܗܽܘܕܳܐ ܡܶܬܩܰܪܝܳܐ ܗ̱ܘܳܬ܆ ܗܳܝ ܕܡܶܬܕܰܒܪܳܐ ܗ̱ܘܳܬ ܐܰܝܟ ܦܽܘܩ̈ܕܳܢܶܐ ܗܳܢܽܘܢ ܢܳܡܽܘܣܳܝ̈ܶܐ ܒܽܐܘܪܫܠܶܡ܆ ܘܰܒܗܳܕܶܐ ܡܢܺܝܚܳܐ ܗ̱ܘܳܬ ܠܰܐܠܳܗܳܐ ܗܰܘ ܫܰܪܺܝܪܳܐ ܘܒܰܠܚܽܘܕܰܘܗ̱ܝ܆ ܘܗ̱ܝ ܟܺܝܬ ܕܺܐܝܣܪܳܐܶܝܠ܆ ܗܳܝ ܕܰܐܚܺܝܕܳܐ ܗ̱ܘܳܬ ܒܫܳܡܪܺܝܢ ܛܪܽܘܢܳܐܺܝܬ܆ ܘܰܠܥܶܓ̈ܠܶܐ ܕܕܰܗܒܳܐ ܠܳܐ ܐܰܠܳܗܳܐܺܝܬ ܣܳܓܕܳܐ ܗ̱ܘܳܬ܆ ܗܳܟܰܢܳܐ ܡܦܰܠ̈ܓܳܢ ܗ̱ܘܰܝ̈ ܘܳܐܦܠܳܐ ܒܡܶܕܶܡ ܡܶܬܚܰܠ̈ܛܳܢ ܗ̱ܘܰܝ̈܆ ܝܽܘܪܳܡ ܒܪܶܗ ܕܝܽܘܫܳܦܛ ܡܰܠܟܳܐ ܕܺܝܗܽܘܕܳܐ܆ ܠܒܰܪܬܶܗ ܕܳܐܚܳܒ ܡܰܠܟܳܐ ܕܺܐܝܣܪܳܐܶܝܠ ܗܰܘ ܕܰܠܟܽܠܗܽܘܢ ܗܳܢܽܘܢ ܕܰܗܘ̣ܰܘ ܩܕܳܡܰܘ̈ܗ̱ܝ ܥܳܒܰܪ ܗ̱ܘܳܐ ܒܪܽܘܫܥܳܐ܆ ܕܥܶܬܠܝܐ ܫܡܳܗ̇ ܗ̱ܘܳܐ ܢܳܣܶܒ ܠܶܗ ܠܙܽܘܘܳܓܳܐ܆ ܘܡܶܬܚܰܠܰܛ ܚܽܘܠܛܳܢܳܐ ܗܰܘ ܕܡܰܪܓܶܙ ܠܰܐܠܳܗܳܐ܆ ܗܰܘ ܕܡܶܢܶܗ ܝܺܠܶܕ ܠܐܘܚܘܙܝܐ܆ ܗܰܘ ܕܥܽܘܗܕܳܢܶܗ ܒܰܡܡܰܠܠܽܘܬ ܫܰܪ̈ܒܳܬܳܐ ܠܳܐ ܥܒܰܕ ܡܰܬܰܝ܆ ܘܟܰܕ ܫܬܶܩ ܡܶܢ ܒܳܬܪܶܗ ܐܳܦ ܠܝܽܘܐܳܫ ܘܳܐܦ ܠܐܡܨܝܐ܆ ܘܒܳܗ̇ ܒܰܕܡܽܘܬܳܐ ܠܰܬܠܳܬܰܝܗܽܘܢ. ܠܰܘ ܡܶܛܽܠ ܗܳܕܶܐ ܪܚܺܝܡܳܐ ܗ̱ܘܳܬ ܠܰܐܠܳܗܳܐ ܗܰܘ ܕܶܐܬܒܰܣܰܪ܆ ܗܳܝ ܕܠܳܐ ܢܶܣܬܒܰܪ ܕܡܶܢ ܕܰܐܝܟ ܗܳܢܳܐ ܓܶܢܣܳܐ ܢܳܚܶܬ ܒܝܽܘܒܳܠܳܐ܆ ܐܰܝܟܰܢܳܐ ܓܶܝܪ ܠܗܰܘ ܕܩܰܕܶܡ ܓܒܳܐ ܠܶܗ܆ ܕܰܠܟܽܠ ܛܽܘܠܫܳܐ ܕܰܟܝܳܢܳܐ ܐ̱ܢܳܫܳܝܳܐ ܢܶܡܪܽܘܩ܆ ܒܝܰܕ ܐ̱ܚܝܳܢܽܘܬ ܓܶܢܣܳܐ ܕܺܝܠܶܗ ܕܰܠܘܳܬܰܢ܆ ܘܰܒܝܰܕ ܡܶܬܒܰܣܪܳܢܽܘܬܳܐ ܕܺܝܠܶܗ ܗܳܝ ܕܝܰܬܺܝܪ ܡܶܢ ܟܽܠ ܕܰܟܝܳܐ܆ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ.
ܐܶܠܳܐ ܡܶܛܽܠ ܟܺܝܬ ܕܰܠܗܳܢܽܘܢ ܕܡܶܢ ܥܶܒܪ̈ܳܝܶܐ ܗܰܝܡܶܢܘ ܡܰܫ̣ܠܶܡ ܗ̱ܘܳܐ ܡܰܬܰܝ ܐܶܘܰܢܓܶܠܺܝܽܘܢ ܡܶܢ ܫܽܘܪܳܝܳܐ܆ ܕܣܳܢܶܝܢ ܗ̱ܘܰܘ ܡܰܢ ܠܡܰܠܟܽܘܬܳܐ ܕܺܐܝܣܪܳܐܶܝܠ ܗܳܝ ܕܶܐܫܬܰܠܛܰܬ ܒܫܳܡܪܺܝܢ܆ ܣܰܪܺܝܟܺܝܢ ܗ̱ܘܰܘ ܕܶܝܢ ܒܢܳܡܽܘܣܳܐ ܕܡܽܘܫܶܐ܆ ܘܣܰܓܺܝ ܝܰܬܺܝܪ ܥܰܒܝܳܐܺܝܬ ܘܰܐܝܟ ܟܬܳܒܳܐ ܡܶܣܬܰܟܠܺܝܢ ܗ̱ܘܰܘ ܠܗܽܘܢ ܠܦܽܘܩ̈ܕܳܢܶܐ܆ ܗܳܢܽܘܢ ܕܚܰܕ ܡܶܢܗܽܘܢ ܐܺܝܬܰܘܗ̱ܝ ܗ̱ܘܳܐ ܕܰܡܦܰܩܶܕ܆ ܗܳܝ ܕܠܳܐ ܢܶܗܘܽܘܢ ܠܳܟ ܐܰܠܳܗ̈ܶܐ ܐ̱ܚܪ̈ܳܢܶܐ ܤܛܰܪ ܡܶܢܝ܆ ܠܳܐ ܬܶܥܒܶܕ ܠܳܟ ܦܬܰܟܪܳܐ ܘܳܐܦܠܳܐ ܕܡܽܘܬܳܐ ܕܟܽܠܗܶܝܢ ܗܳܠܶܝܢ ܕܺܐܝܬ ܒܰܫܡܰܝܳܐ ܠܥܶܠ܆ ܘܰܕܟܽܠܗܶܝܢ ܗܳܠܺܝܢ ܕܺܐܝܬ ܒܰܐܪܥܳܐ ܠܬܰܚܬ܆ ܘܰܕܟܽܠܗܶܝܢ ܗܳܠܶܝܢ ܕܺܐܝܬ ܒܡܰܝ̈ܳܐ ܠܬܰܚܬ ܡܶܢ ܐܰܪܥܳܐ܆ ܠܳܐ ܬܶܣܓܽܘܕ ܠܗܽܘܢ ܐܳܦܠܳܐ ܬܶܦܠܽܘܚ ܠܗܽܘܢ܆ ܐܶܢܳܐ ܓܶܝܪ ܐܺܝܬܰܝ ܡܳܪܝܳܐ ܐܰܠܳܗܳܐ ܕܺܝܠܳܟ܆ ܐܰܠܳܗܳܐ ܛܰܢܳܢܳܐ ܕܦܳܪܰܥ ܚ̈ܛܳܗܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ܆ ܥܰܠ ܕܳܪܳܐ ܬܠܺܝܬܳܝܳܐ ܘܰܪܒܺܝܥܳܝܳܐ[12]܆ ܛܒܺܝܒܬܳܐ ܕܶܝܢ ܐܺܝܬܶܝܗ̇ ܗ̱ܘܳܬ ܕܶܚܠܰܬ ܦܬܰܟܪ̈ܶܐ ܗܳܝ ܕܝܽܘܪܰܒܥܡ܆ ܗܰܘ ܕܰܠܥܶܓ̈ܠܶܐ ܗܳܢܽܘܢ ܕܕܰܗܒܳܐ ܓܒܰܠ ܘܰܐܛܥܺܝ ܠܗܳܠܶܝܢ ܥܶܣܪܳܐ ܫܰܒ̈ܛܶܐ܆ ܠܗܰܘ ܕܥܰܒܪܶܗ ܐܳܚܳܒ ܒܪܽܘܫܥܳܐ܆ ܐܰܝܟܰܢܳܐ ܕܢܺܐܡܰܪ ܡܶܛܽܠܳܬܶܗ ܟܬܳܒܳܐ ܗܰܘ ܟܳܗܢܳܝܳܐ܆ ܘܰܥܒܰܕ ܐܳܚܳܒ ܗܳܝ ܕܒܺܝܫܳܐ ܩܕܳܡ ܡܳܪܝܳܐ܆ ܘܰܐܒܶܐܫ ܝܰܬܺܝܪ ܡܶܢ ܟܽܠܗܽܘܢ ܗܳܢܽܘܢ ܕܰܗܘ̣ܰܘ ܡܶܢ ܩܕܳܡܰܘܗܝ܆ ܘܠܳܐ ܣܳܦܩܳܐ ܗ̱ܘܳܬ ܠܶܗ ܗܳܝ ܕܰܢܗܰܠܶܟ ܒܰܚ̈ܛܳܗܰܘܗ̱ܝ ܕܝܽܘܪܰܒܥܡ[13]܆ ܟܰܕ ܨܳܒܶܐ ܗ̱ܘܳܐ ܐܶܘܰܢܓܶܠܺܝܣܛܳܐ ܕܰܢܚܰܘܶܐ ܒܝܰܕ ܗܳܠܶܝܢ ܕܳܐܡܰܪ ܗ̱ܘܳܐ܆ ܕܚܰܕ ܘܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܐܰܠܳܗܳܐ ܕܢܳܡܽܘܣܳܐ ܘܕܶܐܘܰܢܓܶܠܺܝܽܘܢ. ܠܗܳܢܽܘܢ ܕܡܶܢ ܙܽܘܘܳܓܳܐ ܕܗܳܟܰܢܳܐ ܐܺܝܬܰܘܗ̱ܝ ܕܳܚܶܠ ܠܫ̈ܺܐܕܶܐ ܐܶܬܺܝܠܶܕܘ ܥܕܰܡܳܐ ܠܕܳܪܳܐ ܬܠܺܝܬܳܝܳܐ ܫܬܶܩ܆ ܐܰܝܟܰܢܳܐ ܕܝܰܬܺܝܪܳܐܺܝܬ ܢܶܓܰܕ ܐܶܢܽܘܢ ܠܘܳܬ ܗܰܝܡܳܢܽܘܬܳܐ܆ ܠܗܳܢܽܘܢ ܕܡܶܢ ܥܶܒܪ̈ܳܝܶܐ ܕܗܰܝܡܶܢܘ. ܟܰܕ ܡܚܰܘܶܐ ܕܰܐܠܳܗܳܐ ܗܰܘ ܕܕܺܝܰܐܬܺܝܩܺܐ ܥܰܬܺܝܩܬܳܐ܆ ܐܰܠܳܗܐ ܗܰܘ ܛܰܢܳܢܳܐ܆ ܗܽܘ ܟܰܕ ܗܽܘ ܐܺܝܬܰܘܗ̱ܝ܆ ܐܰܝܟ ܕܶܐܡܪܶܬ ܐܳܦ ܐܰܠܳܗܳܐ ܕܶܐܘܰܢܓܶܠܺܝܽܘܢ. ܕܡܶܛܽܠ ܓܶܝܪ ܗܳܝ ܕܰܢܩܰܪܶܒ ܐܶܢܽܘܢ ܠܘܳܬ ܗܰܝܡܳܢܽܘܬܐ ܠܗܳܢܽܘܢ ܕܡܶܢ ܥܶܒܪ̈ܳܝܶܐ ܥܰܒܕܳܗ̇ ܠܗܳܕܶܐ ܡܰܘܕܥܳܐ܆ ܐܳܦ ܗܳܝ ܕܰܠܕܰܘܺܝܕ ܩܰܕܶܡ ܛܰܟܣܶܗ ܩܕܳܡ ܐܰܒܪܳܗܳܡ ܘܶܐܡܰܪ܆ ܟܬܳܒܳܐ ܕܰܗܘܳܝܶܗ ܕܝܶܫܽܘܥ ܡܫܺܝܚܳܐ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ[14]܆ ܡܶܛܽܠܳܬܳܗ̇ ܟܰܕ ܡܶܛܽܠܳܬܳܗ̇ ܕܗܳܕܶܐ ܥܶܠܬܳܐ܆ ܡܶܛܽܠ ܗܳܝ ܕܰܠܘܳܬ ܥܶܒܪ̈ܳܝܶܐ ܬܶܫܒܽܘܚܬܳܐ ܡܶܕܶܡ ܪܰܒܬܳܐ ܐܰܚܺܝܕܳܐ ܗ̱ܘܳܬ ܡܶܛܽܠ ܕܰܘܺܝܕ܆ ܐܰܝܟܰܢܳܐ ܕܗܳܐ ܡܶܢ ܟܰܕܽܘ ܒܗܳܠܶܝܢ ܕܡܶܢܰܢ ܐܶܬܶܐܡܰܪ̈ܝ̱ ܐܶܬܚܰܘܝܰܬ. ܡܶܛܽܠܳܬܳܗ̇ ܕܗܳܕܶܐ ܐܳܦ ܠܫܳܒܽܘ̈ܥܶܐ ܥܦܺܝ̈ܦܶܐܦܰܠܓܳܗ̇ ܠܰܡܡܰܠܠܽܘܬ ܫܰܪ̈ܒܳܬܳܐ܆ ܠܗܳܠܶܝܢ ܬܠܳܬ ܐܰܪܒܥܣܪ̈ܝܘܬܐ ܕܫܰܪ̈ܒܳܬܳܐ ܐܳܡܰܪ ܐ̱ܢܳܐ܆ ܡܶܛܽܠ ܟܺܝܬ ܕܰܪܚܺܝܡܳܐ ܐܺܝܬܰܘܗ̱ܝ ܫܳܒܽܘܥܐ ܠܥܶܒܪ̈ܳܝܶܐ܆ ܟܰܕ ܡܶܢ ܗܳܠܶܝܢ ܕܰܥܝܳܕܳܐ ܢܳܓܶܕ ܗ̱ܘܳܐ܆ ܠܗܽܘܢ ܠܘܳܬ ܗܰܝܡܳܢܽܘܬܳܐ.
ܐܶܢ ܓܶܝܪ ܚܫܰܚܬܳܢܳܐܺܝܬ ܘܰܡܕܰܒܪܳܢܳܐܺܝܬ܆ ܡܶܛܽܠ ܗܳܢܽܘܢ ܕܡܶܢ ܝܽܗ̱ܘ̈ܕܳܝܶܐ ܗܰܝܡܶܢܘ܆ ܥܰܒܪܶܗ ܒܫܶܬܩܳܐ ܠܐܘܚܘܙܝܐ ܘܠܝܘܐܫ ܘܠܐܡܨܝܐ܆ ܐܶܠܳܐ ܒܰܫܪܳܪܳܐ ܡܶܛܽܠ ܬܒܰܥܬܳܐ ܕܰܚ̈ܛܳܗܶܐ ܐܰܒܳܗܳܝ̈ܶܐ܆ ܙܳܕܶܩ ܗ̱ܘܳܐ ܠܽܘܩܕܰܡ ܕܗܽܘ ܝܽܘܪܳܡ ܢܶܫܬܰܬܰܩ܆ ܗܰܘ ܕܰܫܩܰܠ ܠܒܰܪܬܶܗ ܕܳܐܚܳܒ ܗܰܘ ܕܝܰܬܺܝܪ ܡܶܢ ܟܽܠ ܐܺܝܬܰܘܗ̱ܝ ܗ̱ܘܳܐ ܕܳܚܶܠ ܠܫ̈ܺܐܕܶܐ ܘܪܰܫܺܝܥܳܐ.
ܗܳܝ ܓܶܝܪ ܕܰܐܡܺܝܪܳܐ܆ ܐܶܢܳܐ ܐܰܠܳܗܳܐ ܛܰܢܳܢܳܐ ܕܦܳܪܰܥ ܚ̈ܛܳܗܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ[15]܆ ܙܳܕܶܩ ܕܬܶܣܬܰܟܰܠ܆ ܠܰܘ ܐܰܝܟ ܡܰܢ ܕܰܒܢܰܝ̈ܳܐ ܚܠܳܦ ܚ̈ܛܳܗܶܐ ܐܰܒܳܗܳܝ̈ܶܐ ܬܰܒܥ̈ܳܬܳܐ ܦܳܪܥܺܝܢ܆ ܐܶܠܳܐ ܡܶܢ ܗܳܠܶܝܢ ܕܡܶܢܗܽܘܢ ܡܶܬܚܰܛܝ̈ܳܢ܆ ܐܶܡܰܬܝ ܕܰܢܕܰܡܽܘܢ ܚܛܺܝܬܗܽܘܢ ܠܗܳܝ ܕܰܐܒܳܗܰܝ̈ܗܽܘܢ܆ ܘܢܶܪܕܦܽܘܢ ܘܰܢܕܰܡܽܘܢ ܒܪܰܫܺܝܥܽܘܬܳܐ ܕܝܳܠܽܘܕܰܝ̈ܗܽܘܢ܆ ܘܢܶܗܘܽܘܢ ܐܰܝܟ ܕܒܰܫܪܳܪܳܐ ܒܢܰܝ̈ܳܐ ܕܗܳܢܽܘܢ܆ ܡܶܛܽܠ ܡܕܰܡܝܳܢܽܘܬܳܐ ܕܒܺܝܫܽܘܬܳܐ. ܗܳܟܰܢܳܐ ܓܶܝܪ ܐܺܝܬ ܠܰܢ ܥܝܳܕܳܐ ܠܡܺܐܡܰܪ ܥܰܠ ܗܳܢܽܘܢ ܕܰܡܕܰܡܶܝܢ ܒܒܺܝܫܽܘܬܳܐ ܐܰܒܳܗܳܝܬܳܐ. ܕܫܰܪܺܝܪܳܐܺܝܬ ܦܠܳܢ ܒܪܳܐ ܐܺܝܬܰܘܗ̱ܝ ܕܰܐܒܽܘܗ̱ܝ. ܡܶܛܽܠ ܗܳܕܶܐ ܘܳܐܦ ܗܽܘ ܡܳܪܝܳܐ܆ ܠܰܘ ܦܫܺܝܛܳܐܺܝܬ ܐܶܡܰܪ܆ ܕܦܳܪܰܥ ܚ̈ܛܳܗܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ܆ ܥܰܠ ܕܳܪܳܐ ܬܠܺܝܬܳܝܳܐ ܘܰܪܒܺܝܥܳܝܳܐ ܐܶܠܳܐ ܐܰܘܣܶܦ ܠܗܳܢܽܘܢ ܕܣܳܢܶܝܢ ܠܺܝ3. ܗܳܢܰܘ ܕܶܝܢ܆ ܐܶܡܰܬܝ ܕܰܠܣܶܢܐܬܳܐ ܕܰܐܒܳܗܰܝ̈ܗܽܘܢ܆ ܗܳܝ ܕܰܠܘܳܬ ܐܰܠܳܗܳܐ ܢܶܩܦܽܘܢ.
ܐܺܝܬ ܓܶܝܪ ܐܶܡܰܬܝ܆ ܕܥܰܠ ܐ̱ܢܳܫܺܝ̈ܢ ܡܰܢ ܡܬܰܗܶܐ ܠܳܗ̇ܠܰܬܒܰܥܬܳܐܘܠܳܐܡܰܝܬܶܐܠܶܗܠܰܡܣܳܡ ܒܪܺܝܫܳܐ܆ ܟܰܕ ܡܶܬܕܟܰܪ[16] ܠܰܬܝܳܒܽܘܬܳܐ ܕܺܝܠܗܽܘܢ܆ ܐܰܝܟܰܢܳܐ ܟܺܝܬ ܕܰܐܘ ܡܝܰܬܪ̈ܶܐ ܢܶܗܘܽܘܢ ܟܰܕ ܡܶܫܬܰܚܠܦܺܝܢ܆ ܐܰܘ ܐܶܢ ܠܳܐ ܗܳܕܶܐ܆ ܡܶܢ ܒܳܬܰܪ ܚܰܝ̈ܶܐ ܕܗܳܪܟܳܐ܆ ܠܬܰܫܢܺܝ̈ܩܶܐ ܗܳܢܽܘܢ ܕܰܥܬܺܝܕܺܝܢ ܢܶܬܢܰܛܪܽܘܢ. ܥܰܠ ܐ̱ܢܳܫܺܝ̈ܢ ܕܶܝܢ ܗܳܠܶܝܢ ܕܡܶܢ ܗܳܢܽܘܢ ܟܒܰܪ܆ ܐܰܘ ܡܶܢ ܗܳܠܶܝܢ ܕܡܶܢ ܒܳܬܰܪܟܶܢ ܟܡܳܐ ܙܰܒ̈ܢܺܝܢ܆ ܕܒܶܗ ܟܰܕ ܒܶܗ ܒܪܽܘܫܥܳܐ ܐܰܚܺܝܕܺܝܢ܆ ܡܰܝܬܶܐ ܪܽܘܓܙܳܐ ܟܺܐܢܳܐ. ܟܰܕ ܠܰܒܛܺܝܠܽܘܬܶܗ ܡܚܰܘܶܐ܆ ܘܟܰܕ ܠܰܐ̱ܚܪ̈ܳܢܶܐ ܪܳܕܶܐ ܡܶܢ ܬܰܚܘܺܝܬܳܐ܆ ܠܗܰܘ ܟܺܝܬ ܕܡܰܝܬܶܐ ܗ̱ܘܳܐ ܠܶܗ܆ ܐܳܦ ܥܰܠ ܐܰܒܳܗ̈ܶܐ ܕܺܝܠܗܽܘܢ܆ ܐܶܠܽܘ ܟܺܝܬ ܐܳܦ ܠܗܳܢܽܘܢ ܗܳܪܟܳܐ ܕܳܢ ܗ̱ܘܳܐ ܕܰܢܫܰܢܶܩ ܐܶܢܽܘܢ܆ ܘܠܰܘ ܠܰܡܣܳܡ ܒܪ̈ܺܝܫܶܐ ܗܳܢܽܘܢ ܕܰܥܬܺܝܕܺܝܢ ܢܶܛܰܪ ܐܶܢܽܘܢ܆ ܕܳܐܦܠܳܐ ܒܬܽܘܗܳܝܶܗ ܕܰܡܣܳܡ ܒܪܺܝܫܳܐ ܐܶܬܬܘܺܝܘ ܥܰܠ ܗܳܝ ܕܰܐܪܫܰܥܘ. ܗܳܟܰܢܳܐ ܡܶܣܬܰܒܪܳܐ[17] ܕܦܳܪܥܺܝܢ ܒܢܰܝ̈ܳܐ ܚܰܘ̈ܒܳܬܳܐ ܕܰܐܒܳܗ̈ܶܐ. ܘܗܳܕܶܐ ܟܰܕ ܚܠܳܦ ܚ̈ܛܳܗܶܐ ܒܰܝ̈ܬܳܝܶܐ ܕܺܝܠܗܽܘܢ ܗܳܠܶܝܢ ܕܰܒܗܽܘܢ ܕܰܡܺܝܘ ܒܗܳܢܽܘܢ ܕܺܝܠܶܕܘ ܐܶܢܽܘܢ܆ ܣܳܒܠܺܝܢ ܠܗܽܘܢ ܠܰܡܣܳܡ ܒܪ̈ܺܝܫܶܐ.
ܘܶܐܢܕܶܝܢ ܠܳܐ܆ ܕܰܚܠܳܦ ܗܳܠܶܝܢ ܕܚܰܛܝ̈ܳܢ ܠܰܐܒܳܗ̈ܶܐ܆ ܠܳܐ ܣܳܟ ܡܶܬܢܰܓܕܺܝܢ ܒܢܰܝ̈ܳܐ܆ ܩܰܪܺܝܒܳܐ ܗܳܝ ܕܡܶܢܶܗ ܕܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ ܢܶܫܡܰܥ ܕܡܰܙܥܶܩ܆ ܠܳܐ ܢܡܽܘܬܽܘܢ ܐܰܒܳܗ̈ܶܐ ܚܠܳܦ ܒܢܰܝ̈ܳܐ܆ ܘܰܒܢܰܝ̈ܳܐ ܠܳܐ ܢܡܽܘܬܽܘܢ ܚܠܳܦ ܐܰܒܳܗ̈ܶܐ܆ ܟܽܠܢܳܫ ܒܰܚܛܺܝܬܳܐ ܕܺܝܠܶܗ ܢܡܽܘܬ[18]. ܐܰܝܟܰܢܳܐ ܗܳܟܺܝܠ ܗܰܘ ܕܗܳܠܶܝܢ ܐܶܡܰܪ܆ ܥܬܺܝܕ ܗ̱ܘܳܐ ܠܡܰܝܬܳܝܽܘ ܥܰܠ ܒܢܰܝ̈ܳܐ ܙܰܟܳܝ̈ܶܐ ܡܣܳܡ ܒܪܺܝܫܳܐ ܕܰܚܛܺܝܬܳܐ ܐܰܒܳܗܳܝܬܳܐ܆ ܐܰܝܟ ܡܶܠܬܗܽܘܢ ܕܗܳܢܽܘܢ ܕܝܰܬܺܝܪ ܥܰܒܝܳܐܺܝܬ ܘܣܰܓܺܝ ܠܒܰܪ ܡܶܢ ܡܶܠܬܳܐ ܡܶܣܬܟܠܺܝܢ ܠܳܗ̇܆ ܠܗܳܝ ܕܶܐܢܳܐ ܐܰܠܳܗܳܐ ܛܰܢܳܢܳܐ܆ ܕܦܳܪܰܥ ܚ̈ܛܳܗܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ. ܗܳܢܽܘܢ ܕܰܠܘܳܬܗܽܘܢ ܐܳܦ ܒܝܰܕ ܚܙܩܝܐܝܠ ܡܳܬܰܚ ܡܶܠܬܳܐ ܟܰܕ ܐܳܡܰܪ܆ ܒܰܪܢܳܫܳܐ܆ ܡܳܢܰܐ ܗܘ ܠܟܽܘܢ ܡܰܬܠܳܐ ܗܳܢܳܐ ܥܰܠ ܐܰܪܥܳܐ ܕܺܐܝܣܪܳܐܶܝܠ܆ ܕܳܐܡܪܺܝܢ܆ ܐܰܒܳܗ̈ܶܐ ܐܶܟܰܠܘ ܒܶܣܪ̈ܶܐ܆ ܘܫܶܢ̈ܶܐ ܕܰܒ̈ܢܰܝܳܐ ܩܗ̈ܰܝ. ܚܰܝ ܐ̱ܢܳܐ ܐܳܡܰܪ ܐܰܕܽܘܢܺܝ ܡܳܪܝܳܐ܆ ܐܶܢ ܢܶܗܘܶܐ ܬܽܘܒ ܡܰܬܠܳܐ ܗܳܢܳܐ ܕܡܶܬܶܐܡܰܪ ܒܺܐܝܣܪܳܐܶܝܠ. ܡܶܛܽܠ ܕܟܽܠܗܶܝܢ ܢܰܦܫ̈ܳܬܳܐ ܕܺܝܠܺܝ ܐܺܝܬܰܝܗܶܝܢ. ܐܰܝܟ ܙܢܳܐ ܕܢܰܦܫܳܐ ܕܰܐܒܳܐ܆ ܗܳܟܰܢܳܐ ܐܳܦ ܢܰܦܫܳܐ ܕܰܒܪܳܐ. ܟܽܠܗܶܝܢ ܢܰܦ̈ܫܳܬܳܐ ܕܺܝܠܝ ܐܺܝܬܰܝܗܶܝܢ. ܢܰܦܫܐ ܗܳܝ ܕܚܰܛܳܝܳܐ ܗܺܝ ܬܡܽܘܬ[19]. ܘܬܽܘܒ. ܘܶܐܡܰܪܬܽܘܢ܆ ܡܳܢܰܐ ܗܘ ܕܠܳܐ ܢܶܣܰܒ ܒܪܳܐ ܥܰܘܠܳܐ ܕܰܐܒܽܘܗ̱ܝ. ܡܶܛܽܠ ܕܰܒܪܳܐ ܕܺܝܢܳܐ ܘܙܰܕܝܩܽܘܬܐ ܘܪ̈ܰܚܡܶܐ ܥܒܰܕ[20].
ܡܶܛܽܠ ܗܳܢܽܘܢ ܕܗܳܟܰܢܳܐ ܐܺܝܬܰܝܗܽܘܢ ܥܒܰܝ̈ܳܐ܆ ܘܰܒܩܰܕܺܝܡܽܘܬ ܡܰܣܒܪܳܢܽܘܬܐ ܗܳܝ ܕܰܐܚܺܝܕܳܐ ܠܘܳܬ ܝܽܗ̱ܘ̈ܕܳܝܶܐ ܗܳܟܰܢܳܐ ܣܺܝܡܺܝܢ ܒܗܰܘܢܗܽܘܢ܆ ܠܗܳܢܽܘܢ ܬܠܳܬܳܐ ܐܰܒܳܗ̈ܶܐ ܟܰܣܺܝ ܡܰܬܰܝ ܒܫܶܬܩܳܐ܆ ܕܶܐܫܬܰܘܬܰܦܘ ܒܙܰܪܥܳܐ ܘܶܐܬܚܰܠܰܛܘ ܒܡܰܠܟܽܘܬܳܐ܆ ܕܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܣܰܓܺܝ ܕܳܚ̈ܠܰܝ ܠܫ̈ܺܐܕܶܐ ܝܰܬܺܝܪ ܡܶܢ ܟܽܠܢܳܫ܆ ܝܽܘܪܰܒܥܡ ܟܺܝܬ ܘܳܐܚܳܒ.
ܐܳܠܐ ܟܒܰܪ ܢܺܐܡܰܪ ܐ̱ܢܳܫ܆ ܕܰܐܝܟܰܢܳܐ ܟܰܕ ܟܬܳܒܳܐ ܢܳܡܽܘܣܳܝܳܐ ܐܳܡܰܪ܆ ܥܰܠ ܕܳܪܳܐ ܬܠܺܝܬܳܝܳܐ ܘܰܪܒܺܝܥܳܝܳܐ[21]܆ ܬܠܳܬܳܐ ܡܰܠܽܘܢ ܘܠܰܘ ܐܰܪܒܥܳܐ ܫܬܶܩ ܡܰܬܰܝ܆ ܟܰܕ ܡܶܢܳܗ̇ ܕܗܳܝ ܐ̱ܚܝܳܢܽܘܬܳܐ ܛܰܡܰܐܬܳܐ ܢܳܚܬܺܝܢ ܗ̱ܘܰܘ ܒܝܽܘܒܳܠܳܐ܆ ܐܰܝܟܰܢܳܐ ܕܝܰܬܺܝܪ ܡܦܺܝܣܳܢܺܝܬܳܐ ܢܬܰܩܢܺܝܗ̇ ܠܡܶܠܬܳܐ ܠܗܳܢܽܘܢ ܕܡܶܢ ܥܶܒܪ̈ܳܝܶܐ. ܡܶܢ ܒܳܬܰܪ ܓܶܝܪ ܗܳܠܶܝܢ ܬܠܳܬܐ ܕܶܐܫܬܰܬܰܩܘ܆ ܐܘܚܘܙܝܐ ܘܝܘܐܫ ܘܐܡܨܝܐ܆ ܥܽܘܙܺܝܐ ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܐܪܒܥܳܐ܆ ܕܡܶܢ ܗܳܢܽܘܢ ܘܳܐܦܠܳܐ ܒܡܶܕܶܡ ܐܺܝܬܰܘܗ̱ܝ ܗ̱ܘܳܐ ܕܰܡܝܰܬܰܪ܆ ܐܶܠܳܐ ܕܳܐܦ ܠܟܳܗܢܽܘܬܳܐ ܐܶܬܪܰܓܪܰܓ ܗ̱ܘܳܐ܆ ܘܕܰܢܣܺܝܡ ܒܶܣ̈ܡܶܐ ܢܰܣܺܝ ܗ̱ܘܳܐ ܠܒܰܪ ܡܶܢ ܢܳܡܽܘܣܳܐ܆ ܘܰܒܠܰܥ ܗ̱ܘܳܐ ܒܓܰܪܒܳܐ ܥܰܠ ܒܶܝܬ ܥܰܝܢܰܘ̈ܗ̱ܝ܆ ܕܬܳܟܶܤ ܗ̱ܘܳܐ ܠܣܰܦܺܝܦܽܘܬܶܗ܆ ܘܟܳܠܶܐ ܗ̱ܘܳܐ ܠܶܗ ܟܽܠ ܟܽܠܶܗ ܡܶܢ ܗܰܝܟܠܳܐ.
ܐܶܠܳܐ ܐܳܦ ܕܗܳܕܶܐ ܬܽܘܒ ܝܺܕܺܝܥܳܐ ܐܺܝܬܰܘܗ̱ܝ ܚܽܘܫܳܒܳܐ܆ ܘܰܕܠܶܗ ܟܰܕ ܠܶܗ ܠܣܽܘܟܳܠܳܐ ܢܳܩܶܦ. ܠܗܳܢܽܘܢ ܕܠܰܘ ܠܳܐ ܝܰܠܺܝ̈ܦܶܐ ܐܺܝܬܰܝܗܽܘܢ ܕܰܟܬܳܒ̈ܶܐ ܢܦܺܝ̈ܚܰܝ ܡܶܢ ܐܰܠܳܗܳܐ. ܐܡܨܝܐ ܓܶܝܪ ܗܰܘ ܕܰܬܠܺܝܬܳܝܳܐ ܐܰܡܠܶܟ ܕܗܳܢܽܘܢ ܕܶܐܫܬܰܬܰܩܘ܆ ܠܥܰܒ̈ܕܶܐ ܗܳܢܽܘܢ ܕܰܩܛܰܠܘ ܠܝܘܐܫ ܐܰܒܽܘܗ̱ܝ܆ ܠܡܰܘܬܳܐ ܐܰܫܠܶܡ ܐܶܢܽܘܢ. ܥܰܠ ܒܢܰܝ̈ܗܽܘܢ ܕܶܝܢ ܕܗܳܢܽܘܢ ܕܩܰܛܠܽܘܗܝ܆ ܐܶܬܪܰܚܰܡ. ܫܰܦܺܝܪܳܐ ܕܶܝܢ ܕܳܐܦ ܠܗܶܝܢ ܠܰܒ̈ܢܳܬ ܩ̈ܳܠܶܐ ܟܳܗ̈ܢܳܝܳܬܳܐ ܢܣܺܝܡ ܗܳܪܟܳܐ܆ ܕܣܺܝ̈ܡܳܢ ܡܰܢ ܒܗܳܝ ܕܰܐܪܒܰܥ ܕܡܰܠ̈ܟܘܳܬܳܐ܆ ܐܺܝܬ ܠܗܶܝܢ ܕܶܝܢ ܗܳܟܰܢܳܐ. ܘܰܗܘ̣ܳܐ ܕܟܰܕ ܐܶܬܥܰܫܢܰܬ ܡܰܠܟܽܘܬܳܐ ܒܺܐܝܕܶܗ ܕܐܡܨܝܐ܆ ܩܛܰܠ ܠܥܰܒܕܰܘ̈ܗ̱ܝ ܗܳܢܽܘܢ ܕܰܩܛܰܠܘ ܠܰܐܒܽܘܗ̱ܝ. ܠܰܒ̈ܢܰܝܗܽܘܢ ܕܶܝܢ ܠܳܐ ܐܰܡܺܝܬ. ܐܰܝܟܰܢܳܐ ܕܰܟܬܺܝܒ ܒܰܟܬܳܒܳܐ ܕܢܳܡܽܘܣܳܐ ܕܡܽܘܫܶܐ܆ ܕܰܦܩܰܕ ܡܳܪܝܳܐ ܟܰܕ ܐܳܡܰܪ܆ ܠܳܐ ܢܡܽܘܬܽܘܢ ܐܰܒܳܗ̈ܶܐ ܚܠܳܦ ܒܢܰܝ̈ܳܐ܆ ܘܳܐܦܠܳܐ ܒܢܰܝ̈ܳܐ ܢܡܽܘܬܽܘܢ ܚܠܳܦ ܐܰܒܳܗ̈ܶܐ܆ ܐܶܠܳܐ ܟܽܠܢܳܫ ܒܰܚܛܺܝܬܳܐ ܕܺܝܠܶܗ ܢܡܽܘܬ[22].
ܡܶܛܽܠ ܗܳܟܺܝܠ ܕܰܠܣܳܝܽܘܡܽܘܬ ܢܳܡܽܘܣܳܐ ܡܰܠܺܝ܆ ܗܳܝ ܕܺܐܝܬ ܠܳܗ̇ ܪܶܚܡܰܬ ܐ̱ܢܳܫܽܘܬܳܐ ܡܶܛܽܠ ܒܢܰܝ̈ܳܐ܆ ܕܰܒܪܶܗ ܥܒܰܕ ܥܽܘܗܕܳܢܳܐ ܐܰܝܟ ܘܳܠܺܝܬܐ ܗܽܘ ܐܶܘܰܢܓܶܠܺܝܣܛܳܐ܆ ܟܰܕ ܗܳܝ ܕܕܳܡܝܳܐ ܦܪܰܥ ܠܗܳܢܽܘܢ ܕܕܳܡܶܝܢ܆ ܐܰܝܟܰܢܳܐ ܕܰܠܩܰܕܺܝܡܽܘܬ ܡܰܣܒܪܳܢܽܘܬܳܐ ܗܳܝ ܝܺܗܽܘܕܳܝܬܳܐ ܬܽܘܒ ܢܬܽܘܦ ܥܠܰܘܗ̱ܝ܆ ܕܡܰܣܒܪܳܐ ܕܡܶܢ ܟܽܠܦܪܘܤ ܡܰܘܬܪܳܐ ܠܰܒ̈ܢܰܝܳܐ ܙܰܕܺܝܩܽܘܬܳܐ ܕܰܐܒܳܗ̈ܶܐ܆ ܕܠܰܘ ܐ̱ܚܪܳܢܝܳܐܺܝܬ ܐܰܝܟ ܕܒܰܫܪܳܪܳܐ ܡܰܘܬܪܳܐ܆ ܐܶܢܗܽܘ ܕܠܰܘ ܗܺܝ ܟܰܕ ܗܺܝ ܙܰܕܺܝܩܽܘܬܳܐ ܢܶܬܗܰܓܽܘܢ ܐܰܝܟ ܐܰܒܳܗܰܝ̈ܗܽܘܢ܆ ܘܠܰܘ ܗܳܝ ܕܰܠܩܽܘܒܠܳܐ ܢܗܰܠܟܽܘܢ.
ܢܶܒܥܶܐ ܕܶܝܢ ܐ̱ܢܳܫ ܐܳܦ ܗܳܝ. ܐܰܝܟܰܢܳܐ ܟܰܕ ܢܒܺܝܽܘܬܳܐ ܗܳܝ ܕܰܒܝܰܕ ܐܶܪܰܡܝܳܐ ܐܳܡܪܳܐ ܡܶܛܽܠ ܝܐܟܘܢܝܐ܆ ܗܳܟܰܢܳܐ ܐܳܡܰܪ ܡܳܪܝܳܐ܆ ܟܬܽܘܒܳܝܗ̱ܝ ܠܓܰܒܪܳܐ ܗܳܢܳܐ ܒܰܪܢܳܫܳܐ ܡܰܟܪܙܳܐ܆ ܡܶܛܽܠ ܕܠܳܐ ܢܶܪܒܶܐ ܡܶܢ ܙܰܪܥܶܗ ܓܰܒܪܳܐ ܕܝܳܬܶܒ ܥܰܠ ܟܽܘܪܣܝܶܗ ܕܕܰܘܺܝܕ ܪܺܝܫܳܢܳܐ ܬܽܘܒ ܒܺܝܗܽܘܕܳܐ[23]܆ ܡܶܢܶܗ ܐܳܡܰܪ ܡܰܬܰܝ[24] ܕܢܳܚܶܬ ܡܫܺܝܚܳܐ ܒܝܽܘܒܳܠܳܐ܆ ܕܡܶܛܽܠܳܬܳܗ̇ ܓܰܒܪܐܝܠ ܟܰܕ ܠܘܳܬ ܝܳܠܕܰܬ ܐܰܠܳܗܳܐ ܒܬܽܘܠܬܳܐ܆ ܠܡ̈ܶܠܶܐ ܗܳܠܶܝܢ ܕܣܽܘܒܳܪܳܐ ܢܳܦܶܩ ܗ̱ܘܳܐ ܐܳܡܰܪ ܗ̱ܘܳܐ܆ ܘܢܶܬܶܠ ܠܶܗ ܡܳܪܝܳܐ ܟܽܘܪܣܝܳܐ ܕܕܰܘܺܝܕ ܐܰܒܽܘܗ̱ܝ[25].
ܗܳܕܶܐ ܓܶܝܪ ܕܣܰܩܽܘܒܠܳܝܬܳܐ ܐܺܝܬܶܝܗ̇ ܠܰܢܒܺܝܽܘܬܳܐ ܡܶܣܬܰܒܪܳܐ. ܬܶܬܚܙܶܐ ܕܶܝܢ ܕܠܳܐ ܐܺܝܬܶܝܗ̇ ܣܰܩܽܘܒܠܳܝܬܳܐ܆ ܐܶܢܗܽܘ ܕܢܶܬܥܰܗܕ ܠܶܗ ܠܰܡܫܺܝܚܳܐ ܕܰܠܘܳܬ ܦܝܠܛܘܤ ܗܺܓܡܽܘܢܳܐ ܐܳܡܰܪ ܗ̱ܘܳܐ܆ ܡܰܠܟܽܘܬܳܐ ܕܺܝܠܝ ܠܳܐ ܐܺܝܬܶܝܗ̇ ܡܶܢ ܗܳܢܳܐ ܥܳܠܡܳܐ[26]. ܡܶܛܽܠ ܡܰܠܟܽܘܬܳܐ ܗܳܟܺܝܠ ܐ̱ܢܳܫܳܝܬܳܐ ܘܰܕܥܳܠܡܳܐ ܗܳܢܳܐ ܘܰܕܥܰܠ ܥܰܦܪܳܐ ܡܶܬܓܰܪܓܪܳܐ܆ ܗܘ̣ܳܬ ܩܰܕܺܝܡܽܘܬ ܡܶܠܬܳܐ ܗܳܝ ܕܶܐܪܰܡܝܳܐ܆ ܘܠܰܘ ܡܶܛܽܠ ܗܳܝ ܐܰܠܳܗܳܝܬܳܐ ܘܰܫܡܰܝܳܢܺܝܬܳܐ܆ ܘܰܕܠܰܡܫܺܝܚܳܐ ܒܰܠܚܽܘܕ ܦܰܐܝܳܐ܆ ܐܰܝܟ ܕܠܰܐܠܳܗܳܐ ܕܒܰܟܝܳܢܳܐ.
ܐܳܦ ܒܗܶܝܢ ܕܶܝܢ ܒܡ̈ܶܠܶܐ ܗܳܠܶܝܢ ܕܰܢܒܺܝܳܐ܆ ܠܗܳܢܽܘܢ ܕܚܰܬܺܝܬܳܐܺܝܬ ܡܶܬܒܰܩܶܝܢ܆ ܫܪܳܝܳܐ ܕܣܰܓܺܝ ܢܰܗܺܝܪܳܐܺܝܬ ܓܠܶܐ ܕܗܳܝ ܕܡܶܬܒܰܥܝܳܐ ܐܺܝܬ ܒܗܶܝܢ. ܡܳܢܳܐ ܓܶܝܪ ܡܶܛܽܠ ܝܐܟܘܢܝܐ ܐܳܡܪ̈ܳܢ. ܠܳܐ ܢܶܪܒܶܐ ܡܶܢ ܙܰܪܥܶܗ ܓܰܒܪܳܐ ܕܝܳܬܶܒ ܥܰܠ ܟܽܘܪܣܝܶܗ ܕܕܰܘܺܝܕ܆ ܪܺܝܫܳܢܳܐ ܬܽܘܒ ܒܺܝܗܽܘܕܳܐ[27]. ܐܰܝܟܰܢܳܐ ܕܡܳܕܶܝܢ܆ ܡܶܛܽܠ ܡܰܠܟܽܘܬܳܐ ܗܳܝ ܕܒܺܝܗܽܘܕܳܐ ܐܰܚܺܝܕܳܐ ܗ̱ܘܳܬ ܐܺܝܬܰܝܗܶܝܢ ܗܳܠܶܝܢ ܕܰܢܒܺܝܽܘܬܳܐ܆ ܗܳܝ ܟܺܝܬ ܕܳܐܦ ܒܰܛܺܝܠܳܐ܆ ܟܰܕ ܡܶܢ ܒܳܬܰܪ ܝܐܟܘܢܝܐ ܡܰܢ ܠܳܐ ܐܰܡܠܟܰܬ܆ ܐܰܫܦܰܬ̣ ܕܶܝܢ ܠܫܶܒܝܳܐ ܘܫܽܘܥܒܳܕܳܐ ܗܰܘ ܕܒܳܒ̈ܠܳܝܶܐ. ܡܫܺܝܚܳܐ ܕܶܝܢ܆ ܠܰܘ ܥܰܠ ܝܽܗ̱ܘ̈ܕܳܝܶܐ ܐܰܡܠܶܟ܆ ܐܶܠܳܐ ܥܰܠ ܥܶܒܪ̈ܶܝܗ̇ ܕܰܐܪܥܳܐ. ܟܰܕ ܐܺܝܬܰܘܗ̱ܝ ܡܰܢ ܡܶܢ ܩܕܳܡ ܥܳܠ̈ܡܶܐ ܐܽܘܣܝܳܐܺܝܬ ܡܰܠܟܳܐ ܕܟܽܠ ܒܗܳܝ ܕܰܐܠܳܗܳܐ܆ ܫܳܡܰܥ ܕܶܝܢ ܡܶܢ ܐܰܒܳܐ ܡܕܰܒܪܳܢܳܐܺܝܬ ܐܶܡܰܬܝ ܕܰܗܘ̣ܳܐ ܒܰܪܢܳܫܳܐ܆ ܘܰܠܘܳܬ ܡܰܟܺܝܟܽܘܬܳܐ ܨܶܒܝܳܢܳܐܺܝܬ ܐܶܬܢܰܚܰܬ܆ ܫܶܐܠ ܡܶܢܝ ܘܶܐ݀ܬܶܠ ܠܳܟ ܥܰܡ̱ܡ̈ܶܐ ܠܝܳܪܬܽܘܬܳܟ܆ ܘܽܐܘܚ̈ܕܳܢܰܝܟ ܥܶܒܪ̈ܶܝܗ̇ ܕܰܐܪܥܳܐ[28]܆ ܘܳܐܡܰܪ ܒܶܐܘܰܢܓ̈ܶܠܺܝܰܐ ܡܶܛܽܠܳܬܳܗ̇ ܕܰܡܕܰܒܪܳܢܽܘܬܳܐ ܬܽܘܒ ܗܽܘ܆ ܐܶܬܺܝܗܶܒ ܠܺܝ ܟܽܠܶܗ ܫܽܘܠܛܳܢܳܐ ܒܰܫܡܰܝܳܐ ܘܳܐܦ ܥܰܠ ܐܰܪܥܳܐ[29]. ܕܡܶܢ ܗܳܪܟܳܐ ܘܳܐܦܠܳܐ ܥܰܠ ܟܽܘܪܣܝܳܐ ܦܰܓܪܳܢܳܝܳܐ ܕܕܰܘܺܝܕ ܝܺܬܶܒ. ܐܶܠܳܐ ܟܰܕ ܡܶܢ ܙܰܪܥܶܗ ܒܰܒܣܰܪ ܐܶܬܺܝܠܶܕ܆ ܡܶܬܗܰܘܢܳܢܳܐܺܝܬ ܘܦܰܐܝܽܘܬ ܐܰܠܳܗܳܐܺܝܬ ܡܡܰܠܶܐ ܗ̱ܘܳܐ ܠܫܽܘܘܕܳܝܳܐ ܗܰܘ ܕܰܠܘܳܬܶܗ܆ ܟܰܕ ܡܰܠܟܳܐ ܕܰܠܥܳܠܰܡ ܐܺܝܬܰܘܗ̱ܝ. ܥܰܠ ܗܳܝ ܕܳܐܦ ܓܰܒܪܐܝܠ ܟܰܕ ܡܣܰܒܰܪ ܗ̱ܘܳܐ ܐܳܡܰܪ ܗ̱ܘܳܐ܆ ܘܰܕܡܰܠܟܽܘܬܶܗ ܠܳܐ ܢܶܗܘܶܐ ܫܽܘܠܳܡܳܐ[30].
ܟܰܕ ܕܶܝܢ ܡܰܬܰܝ ܟܬܰܒ܆ ܕܡܶܢ ܓܳܠܽܘܬܳܐ ܕܒܳܒܶܠ ܥܕܰܡܳܐ ܠܰܡܫܺܝܚܳܐ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ[31]܆ ܡܶܫܬܰܘܙܰܒ ܡܰܠܝܐ ܗܽܘ ܡܶܢܝܳܢܳܐ܆ ܟܰܕ ܗܺܝ ܓܳܠܽܘܬܳܐ ܐܰܘܟܺܝܬ ܫܶܒܝܳܐ ܗܰܘ ܕܰܒܒܳܒܶܠ ܕܶܐܬܡܬܰܚ ܥܕܰܡܳܐ ܠܫܰܢ̱ܬܳܐ ܕܫܰܒܥܺܝܢ܆ ܡܶܬܚܫܶܒ ܚܠܳܦ ܚܕܳܐ ܫܰܪܒܬܳܐ܆ ܘܳܐܦ ܗܺܝ ܝܺܠܺܝܕܽܘܬܳܐ ܕܰܡܫܺܝܚܳܐ ܬܽܘܒ ܫܰܪܒܬܳܐ ܐ̱ܚܪܺܬܳܐ ܡܶܣܬܰܟܠܳܐ܆ ܡܶܛܽܠ ܟܺܝܬ ܕܠܺܝܠܺܝܕܘ̈ܳܬܳܐ ܗܽܘ ܐܶܘܢܓܠܝܣܛܐ܆ ܫܰܪܒܬܳܐ ܐܳܦ ܫܰܡܰܗ ܐܳܦ ܡܢ̣ܳܐ.
ܐܳܦ ܗܳܝ ܕܶܝܢ ܐ̱ܚܪܺܬܳܐ ܢܳܩܦܳܐܺܝܬ ܐܶܬܒܰܥܝܰܬ܆ ܕܰܐܝܟܰܢܳܐ ܡܶܛܽܠ ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܘܡܶܛܽܠ ܝܰܘܣܶܦ ܟܬܺܝܒ܆ ܘܠܳܐ ܚܰܟ̣ܡܳܗ̇[32] ܥܕܰܡܳܐ ܕܝܶܠܕܰܬ ܠܰܒܪܳܗ̇ ܗܰܘ ܒܽܘܟܪܳܐ[33]. ܗܳܝ ܓܶܝܪ ܕܠܳܐ ܝܳܕܰܥ ܗ̱ܘܳܐ܆ ܡܶܛܽܠ ܚܽܘܠܛܳܢܳܐ ܕܙܽܘܘܳܓܳܐ ܐܰܡܺܝܪܳܐ܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܐܰܠܳܗܳܝܳܐ܆ ܐܳܕܳܡ ܕܶܝܢ ܝܺܕܰܥ ܠܚܰܘܳܐ ܐܰܢ̱ܬܬܶܗ܆ ܘܟܰܕ ܒܶܛܢܰܬ ܝܶܠܕܰܬ ܠܩܳܐܝܢ[34]. ܠܡܶܓܚܰܟ ܓܶܝܪ ܙܳܕܶܩ ܥܰܠ ܗܳܢܽܘܢ ܕܳܐܡܪܺܝܢ܆ ܕܠܳܐ ܚܰܟ̣ܡܳܗ̇[35]܆ ܒܗܳܝ ܕܠܳܐ ܝܺܕܰܥ ܠܐ̱ܪܳܙܳܐ ܪܰܒܳܐ ܗܰܘ ܕܡܶܫܬܰܡܠܶܐ ܗ̱ܘܳܐ ܒܳܗ̇܆ ܗܳܢܰܘ ܕܶܝܢ ܕܠܳܐ ܐܺܝܬ ܗ̱ܘܳܐ ܠܶܗ ܡܰܣܒܪܳܢܽܘܬܳܐ ܕܫܳܘܝܳܐ ܡܶܛܽܠܳܬܳܗ̇ ܘܰܕܪܳܗܛܳܐ ܥܰܡ ܫܪܳܪܳܐ܆ ܥܕܰܡܳܐ ܕܝܶܠܕܰܬ ܠܰܒܪܳܗ̇ ܗܰܘ ܒܽܘܟܪܳܐ3. ܗܳܕܶܐ ܓܶܝܪ ܫܰܪܺܝܪܳܐ ܘܠܳܐ ܟܽܠ ܟܽܠܶܗ. ܐܶܬܬܦܺܝܤ ܗ̱ܘܳܐ ܠܶܗ ܓܶܝܪ܆ ܠܡܰܠܰܐܟܳܐ ܗܰܘ ܕܳܐܡܰܪ ܗ̱ܘܳܐ ܠܶܗ܆ ܕܗܰܘ ܕܒܳܗ̇ ܐܶܬܺܝܠܶܕ ܡܶܢ ܪܽܘܚܳܐ ܩܰܕܺܝܫܳܐ ܐܺܝܬܰܘܗ̱ܝ[36]. ܘܶܐܢܕܶܝܢ ܠܳܐ܆ ܟܰܕ ܕܰܚܺܝܠ ܗ̱ܘܳܐ ܘܣܺܝܡ ܗ̱ܘܳܐ ܡܶܬܦܰܫܟܳܢܳܐܺܝܬ܆ ܠܳܐ ܕܳܒܰܪ ܗ̱ܘܳܐ ܠܳܗ̇ ܠܒܰܝܬܶܗ. ܐܶܢܕܶܝܢ ܠܘܳܬ ܡܰܕܪܟܳܢܽܘܬܳܐ ܡܫܰܡܠܰܝܬܳܐ ܕܐ̱ܪܳܙܳܐ ܗܰܘ ܠܳܐ ܡܶܬܡܰܠܠܳܢܳܐ܆ ܬܶܣܬܰܟܰܠ ܗܳܝ ܕܠܳܐ ܝܳܕܰܥ ܗ̱ܘܳܐ ܠܳܗ̇܆ ܗܳܕܶܐ ܘܳܐܦܠܳܐ ܡܶܢ ܒܳܬܰܪ ܕܝܶܠܕܰܬ ܝܰܕܥܳܗ̇܆ ܘܡܶܢ ܝܰܬܺܝܪܽܘ ܡܳܕܶܝܢ ܐܰܡܺܝܪܳܐ܆ ܗܳܝ ܕܰܥܕܰܡܳܐ ܕܝܶܠܕܰܬ ܠܰܒܪܳܗ̇ ܗܰܘ ܒܽܘܟܪܳܐ. ܐܳܦ ܓܶܝܪ ܘܟܰܕ ܐܶܬܺܝܠܶܕ܆ ܘܠܶܗ ܠܝܰܘܣܶܦ ܘܳܐܦ ܠܟܽܠܗܽܘܢ ܒܢܰܝ̈ܢܳܫܳܐ ܒܳܗ̇ ܒܰܕܡܽܘܬܳܐ ܛܳܥܶܐ ܗ̱ܘܳܐ ܥܽܘܡܩܳܗ̇ ܕܰܡܕܰܒܪܳܢܽܘܬܳܐ܆ ܘܕܰܠܘܳܬ ܐܰܝܢܳܐ ܫܽܘܠܳܡܳܐ ܚܳܐܰܪ ܗ̱ܘܳܐ ܝܰܠܕܳܐ ܗܰܘ. ܐܶܢ ܓܶܝܪ ܠܰܘ ܒܰܡܢܳܬܳܐ ܣܰܓܺܝܐܬܳܐ܆ ܣܰܓܺܝ ܝܰܬܺܝܪ ܐ̱ܢܳܫܳܐܺܝܬ ܣܺܝܡ ܗ̱ܘܳܐ ܒܬܰܪܥܺܝܬܶܗ ܝܰܘܣܶܦ܆ ܐܰܝܟܰܢܳܐ ܥܳܪܶܩ ܗ̱ܘܳܐ ܠܡܶܨܪܶܝܢ. ܐܰܝܟܰܢܳܐ ܟܰܕ ܒܚ̈ܶܙܘܶܐ ܕܒܺܐܝܕܳܐ ܒܺܐܝܕܳܐ ܕܡܰܠܰܐܟܳܐ ܡܶܬܚܰܝܰܠ ܗ̱ܘܳܐ ܒܢܰܦܫܶܗ ܘܡܶܫܬܰܪܰܪ܆ ܡܫܰܡܶܫ ܗ̱ܘܳܐ ܠܰܡܕܰܒܪܳܢܽܘܬܳܐ܆ ܘܟܰܕ ܦܢܳܐ ܡܶܢ ܡܶܨܪܶܝܢ ܬܽܘܒ܆ ܐܺܝܬܰܘܗ̱ܝ ܗ̱ܘܳܐ ܒܪܶܥܠܳܐ ܘܩܶܢܛܳܐ ܟܰܕ ܝܺܠܶܦ ܕܰܐܪܟܠܐܘܤ ܡܰܡܠܶܟ ܚܠܳܦ ܗܶܪܽܘܕܺܝܤ ܐܰܒܽܘܗ̱ܝ.
ܗܳܝ ܗܳܟܺܝܠ ܕܠܳܐ ܚܰܟܡܳܗ̇ ܐܰܡܺܝܪܳܐ܆ ܡܶܛܽܠ ܫܰܘܬܳܦܽܘܬܳܐ ܘܚܽܘܠܛܳܢܳܐ. ܗܳܝ ܕܶܝܢ ܕܰܥܕܰܡܳܐ ܕܝܶܠܕܰܬ ܠܰܒܪܳܗ̇ ܗܰܘ ܒܽܘܟܪܳܐ[37]܆ ܠܰܘ ܠܘܳܬ ܦܽܘܪܳܫܳܐ ܕܗܳܕܶܐ ܬܶܣܬܰܟܰܠ܆ ܐܰܝܟ ܡܰܢ ܕܰܩܕܳܡ ܕܬܺܐܠܰܕ ܡܰܢ ܠܳܐ ܚܰܟܡܳܗ̇܆ ܡܶܢ ܒܳܬܰܪ ܕܶܝܢ ܝܰܠܕܳܐ ܚܳܟܶܡ ܗ̱ܘܳܐ ܠܳܗ̇.
ܥܝܳܕܰܐ ܗܘ ܓܶܝܪ ܠܰܟܬܳܒܳܐ ܐܰܠܳܗܳܝܳܐ܆ ܕܰܒܫܽܘܘܕܳܥܳܐ ܕܰܐܝܟ ܗܳܢܳܐ ܢܶܬܚܰܫܰܚ. ܠܰܘ ܒܬܽܘܚܳܡܳܐ ܡܶܕܡ ܙܰܒܢܳܢܳܝܳܐ ܒܰܠܚܽܘܕ܆ ܐܰܝܟܰܢܳܐ ܕܰܠܗܳܝ ܡܰܢ ܕܰܩܕܳܡ ܗܳܢܳܐ ܢܶܚܒܽܘܫ܆ ܠܗܳܝ ܕܶܝܢ ܕܡܶܢ ܒܳܬܰܪܟܶܢ ܡܚܰܪܰܪܬܳܐ ܢܶܫܒܽܘܩ ܡܶܢ ܙܗܺܝܪܽܘܬܳܐ ܘܰܢܛܺܝܪܽܘܬܳܐ܆ ܐܶܠܳܐ ܐܳܦ ܥܰܠ ܐܰܝܠܶܝܢ ܕܺܐܝܬܰܝܗܶܝܢ ܕܠܳܐ ܫܽܘܠܳܡ ܘܠܳܐ ܡܬܰܚ̈ܡܳܬܳܐ܆ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܠܗܳܕܶܐ ܥܳܒܶܕ. ܘܶܐܫܰܥܝܳܐ ܡܰܢ ܗܰܘ ܢܒܺܝܳܐ܆ ܡܰܥܶܠ ܠܶܗ ܠܰܐܠܳܗܳܐ ܕܟܽܠ ܕܳܐܡܰܪ܆ ܠܰܒ̈ܢܰܝܳܐ ܕܺܐܝܣܪܳܐܶܝܠ܆ ܐܶܢܳܐ ܐܺܝܬܰܝ ܘܰܥܕܰܡܳܐ ܕܬܶܣܐܒܽܘܢ ܐܶܢܳܐ ܐܺܝܬܰܝ[38]. ܟܰܕ ܓܠܺܝܬܳܐ ܐܺܝܬܶܝܗ̇܆ ܕܳܐܦ ܡܶܢ ܒܳܬܰܪ ܕܣܳܐܒܺܝܢ ܗܳܢܽܘܢ ܕܰܠܘܳܬܗܽܘܢ ܗܝ ܡܶܠܬܳܐ܆ ܥܬܺܝܕ ܗ̱ܘܳܐ ܕܢܶܗܘܶܐ ܐܺܝܬܰܘܗ̱ܝ܆ ܗܰܘ ܕܰܒܟܽܠܙܒܰܢ ܐܺܝܬܰܘܗ̱ܝ. ܟܬܺܝܒ ܕܶܝܢ ܐܳܦ ܡܶܛܽܠ ܢܽܘܚ܆ ܕܫܰܕܰܪ ܡܶܢ ܩܺܐܒܽܘܬܳܐ ܠܥܽܘܪܒܳܐ܆ ܕܢܶܚܙܶܐ ܐܶܢ ܢܳܚܘ ܡܰܝ̈ܳܐ. ܘܟܰܕ ܢܦܰܩ ܠܳܐ ܗܦܰܟ ܥܕܰܡܳܐ ܕܺܝܒܶܫܘ ܡܰܝ̈ܳܐ ܡܶܢ ܐܰܪܥܳܐ. ܘܟܰܕ ܛܳܒ ܐܳܦܠܳܐ ܡܶܢ ܒܳܬܰܪ ܕܺܝܒܶܫܘ ܡܰܝ̈ܳܐ ܗܦܰܟ[39].
ܗܳܟܰܢܳܐ ܗܳܟܺܝܠ ܐܳܦ ܥܰܠ ܗܳܕܶܐ ܕܩܰܕܺܝܡܳܐ ܣܺܝܡܳܐ܆ ܗܳܝ ܕܰܥܕܰܡܳܐ ܕܝܶܠܕܰܬ ܠܰܒܪܳܗ̇ ܐܶܡܰܪ ܐܶܘܰܢܓܶܠܺܝܣܛܳܐ܆ ܠܰܘ ܐܰܝܟ ܡܰܢ ܕܰܡܦܰܠܶܓ ܘܣܳܐܶܡ ܣܰܩܽܘܒܠܳܐܺܝܬ ܠܽܘܩܒܰܠ ܙܰܒܢܳܐ ܗܰܘ ܕܰܥܒܰܪ ܠܙܰܒܢܳܐ ܗܰܘ ܕܰܥܬܺܝܕ܆ ܐܶܠܳܐ ܟܰܕ ܥܰܠ ܙܰܒܢܳܐ ܕܠܳܐ ܣܽܘܦ ܣܳܐܶܡ ܠܳܗ̇. ܠܙܰܒܢܳܐ ܡܰܢ ܓܶܝܪ ܗܰܘ ܕܰܩܕܳܡ ܝܰܠܕܳܐ ܫܰܪܪܶܗ ܒܰܙܗܺܝܪܽܘܬܳܐ܆ ܟܰܕ ܐܶܡܰܪ ܕܠܳܐ ܝܳܕܰܥ ܗ̱ܘܳܐ ܠܳܗ̇܆ ܡܶܛܽܠ ܟܺܝܬ ܕܗܳܢܳܐ ܐܺܝܬܰܘܗ̱ܝ ܗ̱ܘܳܐ ܙܰܒܢܳܐ ܗܰܘ ܕܺܐܝܬ ܗ̱ܘܳܐ ܠܶܗ ܡܰܟܠܳܢܽܘܬܳܐ܆ ܕܚܽܘܠܛܳܢܳܐ ܘܕܺܐܝܬ ܗ̱ܘܳܐ ܒܶܗ ܦܽܘܫܳܟܳܐ. ܟܕ ܗܳܢܳܐ ܕܶܝܢ ܐܶܬܬܰܘܕܺܝ ܒܳܗ̇ ܒܡܶܠܬܳܐ܆ ܕܕܰܟܝܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܫܰܘܬܳܦܽܘܬܳܐ܆ ܠܳܟ ܕܺܝܠܳܟ ܫܳܒܶܩ. ܐܳܦ ܟܰܕ ܫܬܶܩ܆ ܕܢܳܩܦܳܐܺܝܬ ܒܗܳܝ ܕܰܥܬܺܝܕܳܐ ܬܶܬܒܰܩܶܐ܆ ܕܡܶܢ ܒܳܬܰܪ ܒܰܛܢܳܐ ܗܰܘ ܐܰܠܳܗܳܝܳܐ ܘܰܡܫܰܒܚܳܐ܆ ܠܳܐ ܡܶܫܬܰܥܒܕܳܢܺܝܬܳܐ ܐܺܝܬܶܝܗ̇ ܗ̱ܘܳܬ ܡܶܟܺܝܠ ܠܰܪܡܳܝܳܐ ܕܙܰܪܥܳܐ ܐ̱ܢܳܫܳܝܳܐ܆ ܗܳܝ ܕܗܳܟܰܢܳܐ ܦܰܐܝܽܘܬ ܐܰܠܳܗܳܐܺܝܬ ܒܶܛܢܰܬ̣.
ܠܗܳܕܶܐ ܕܳܡܝܳܐ ܐܳܦ ܗܳܝ ܐ̱ܚܪܺܬܳܐ܆ ܗܳܝ ܕܰܐܡܺܝܪܳܐ ܡܶܢ ܦܳܪܽܘܩܢ ܠܬܰܠ̈ܡܺܝܕܶܐ܆ ܗܳܝ ܕܗܳܐ ܐܶܢܳܐ ܥܰܡܟܽܘܢ ܐܺܝܬܰܝ ܟܽܠܗܽܘܢ ܝܰܘ̈ܡܳܬܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ[40]. ܕܠܳܐ ܚܶܪܝܳܢܳܐ ܗܝ ܓܶܝܪ܆ ܕܗܰܘ ܕܺܐܝܬܰܘܗ̱ܝ ܥܰܡܗܽܘܢ ܥܕܰܡܳܐ ܠܫܘܠܳܡܶܗ ܕܥܳܠܡܳܐ܆ ܣܰܓܺܝ ܝܰܬܺܝܪܳܐܺܝܬ ܐܳܦ ܡܶܢ ܒܳܬܰܪ ܫܽܘܠܳܡܳܐ ܥܬܺܝܕ ܗ̱ܘܳܐ ܠܡܶܗ̱ܘܳܐ ܥܰܡܗܽܘܢ.
ܠܡܶܬܒܰܩܳܝܽܘ ܓܶܝܪ ܙܳܕܶܩ܆ ܒܚܰܬܺܝܬ̣ܽܘܬܶܗ ܕܰܟܬܳܒܳܐ ܢܦܺܝܚ ܡܶܢ ܐܰܠܳܗܳܐ. ܠܳܐ ܓܶܝܪ ܐܶܡܰܪ ܠܰܒܪܳܐ ܗܰܘ ܒܽܘܟܪܳܐ ܕܺܝܠܳܗ̇܆ ܐܰܝܟ ܡܰܢ ܕܳܐܦ ܕܰܐ̱ܚܪ̈ܳܢܶܐ ܒܢܰܝ̈ܳܐ ܡܶܢ ܒܳܬܰܪ ܗܳܕܶܐ ܗܘ̣ܳܬ ܐܶܡܳܐ. ܐܶܠܳܐ ܐܶܡܰܪ ܠܰܒܪܳܐ ܕܺܝܠܳܗ̇܆ ܘܗܳܟܰܢܳܐ ܠܳܐ ܡܬܰܚܡܳܐܺܝܬ ܐܰܝܬܺܝ ܒܳܬܰܪܟܶܢ܆ ܗܰܘ ܒܽܘܟܪܳܐ. ܗܘ̣ܳܐ ܓܶܝܪ ܐܰܝܟ ܕܒܰܫܪܳܪܳܐ܆ ܕܟܽܠܳܗ̇ ܥܺܕܬܳܐ ܒܽܘܟܪܳܐ. ܐܰܝܟ ܙܢܳܐ ܕܳܐܕܳܡ ܗܰܘ ܩܰܕܡܳܝܳܐ ܡܶܢ ܐܰܪܥܳܐ܆ ܗܳܟܰܢܳܐ ܐܳܦ ܗܽܘ ܟܰܕ ܕܠܳܐ ܚܛܺܝܬܳܐ ܡܶܢ ܒܬܽܘܠܬܳܐ ܐܶܬܓܒܶܠ܆ ܘܪܺܝܫܺܝܬܳܐ ܬܪܰܝܳܢܺܝܬܳܐ ܕܓܶܢܣܳܐ ܕܺܝܠܰܢ ܐܶܬܚܙܺܝ. ܡܶܛܽܠܗܳܕܶܐ ܩܳܕܶܡ ܗ̱ܘܳܐ ܡܰܙܥܶܩ ܒܝܰܕ ܢܒܺܝܳܐ ܗܰܘ ܕܰܡܙܰܡܰܪ ܘܳܐܡܰܪ ܗ̱ܘܳܐ܆ ܐܰ݀ܘܕܰܥ ܫܡܳܐ ܕܺܝܠܳܟ ܠܰܐܚ̈ܰܝ. ܒܰܡܨܰܥܬܳܐ ܕܥܺܕܬܳܐ ܐܶ݀ܫܰܒܚܳܟ[41]. ܘܳܐܦ ܦܰܘܠܽܘܤ ܡܶܛܽܠܳܬܶܗ ܠܪ̈ܽܘܡܳܝܶܐ ܟܳܬܶܒ ܗ̱ܘܳܐ܆ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ[42]. ܗܘ̣ܳܐ ܕܶܝܢ ܐܳܦ ܡܶܢ ܡܺܝ̈ܬܶܐ ܒܽܘܟܪܳܐ܆ ܟܕ ܩܰܕܡܳܝܳܐ ܫܰܪܺܝ ܒܰܩܝܳܡܬܳܐ ܕܺܝܠܰܢ܆ ܐܰܝܟܰܢܳܐ ܕܟܰܕ ܠܩܽܘܠܳܣܳܝ̈ܶܐ ܟܳܬܶܒ ܗ̱ܘܳܐ ܗܽܘ ܟܰܕ ܗܽܘ ܫܠܺܝܚܳܐ. ܐܶܡܰܪ܆ ܗܰܘ ܕܺܐܝܬܰܘܗ̱ܝ ܪܺܝܫܳܐ܆ ܒܽܘܟܪܳܐ ܕܡܶܢ ܡܺܝ̈ܬܶܐ܆ ܐܰܝܟܰܢܳܐ ܕܗܽܘ ܢܶܗܘܶܐ ܕܩܰܕܡܳܝ ܒܟܽܠ[43]. ܠܳܐ ܗ̱ܘܳܐ ܕܶܝܢ ܗܘ̣ܳܐ ܒܰܠܚܽܘܕ܆ ܐܶܠܳܐ ܐܺܝܬܰܘܗ̱ܝ ܗ̱ܘܳܐ ܐܳܦ ܒܰܟܝܳܢܳܐ ܒܽܘܟܪܳܐ ܩܕܳܡ ܥܳܠ̈ܡܶܐ܆ ܘܰܡܬܽܘܡܳܐܺܝܬ ܡܶܢ ܐܰܠܳܗܳܐ ܘܰܐܒܳܐ ܝܺܠܺܝܕ ܗ̱ܘܳܐ܆ ܐܰܝܟܰܢܳܐ ܕܒܳܗ̇ ܒܶܐܓܰܪܬܳܐ ܐܺܝܬ ܠܡܶܫܟܳܚܽܘ ܕܰܟܬܺܝܒ ܗܳܟܰܢܳܐ܆ ܗܰܘ ܕܺܐܝܬܰܘܗ̱ܝ ܨܰܠܡܳܐ ܕܰܐܠܳܗܳܐ ܠܳܐ ܡܶܬܚܰܙܝܳܢܳܐ܆ ܒܽܘܟܪܳܐ ܕܟܽܠܳܗ̇ ܒܪܺܝܬܳܐ[44]. ܡܶܛܽܠ ܗܳܠܶܝܢ ܟܽܠܗܶܝܢ ܗܽܘ ܐܶܘܰܢܓܶܠܺܝܣܛܳܐ܆ ܡܶܢ ܒܳܬܰܪ ܕܶܐܡܰܪ ܒܪܳܗ̇܆ ܠܳܐ ܡܬܰܚܡܳܐܺܝܬ ܐܰܝܬܺܝ ܒܳܬܰܪܟܶܢ ܗܰܘ ܒܽܘܟܪܳܐ.
ܫܳܬܶܩ ܐ̱ܢܳܐ ܓܶܝܪ ܠܡܺܐܡܰܪ܆ ܕܠܰܘ ܡܶܢ ܟܽܠ ܦܪܽܘܤ ܗܰܘ ܕܺܐܝܬܰܘܗ̱ܝ ܒܽܘܟܪܳܐ ܠܶܐܡܶܗ܆ ܕܐ̱ܢܳܫܺܝ̈ܢ ܐܺܝܬܰܘܗ̱ܝ ܒܽܘܟܪܳܐ. ܡܰܨܝܳܐ ܗܝ ܓܶܝܪ ܐܳܦ ܕܒܽܘܟܪܳܐ ܢܶܗܘܶܐ ܐܺܝܬܰܘܗ̱ܝ ܐ̱ܢܳܫ ܐܳܦ ܝܺܚܺܝܕܳܝܳܐ. ܗܳܠܶܝܢ ܕܶܝܢ ܕܒܶܝܬ ܝܰܥܩܽܘܒ܆ ܒܢܰܝ̈ܳܐ ܡܰܢ ܐܺܝܬܰܝܗܽܘܢ ܗ̱ܘܰܘ ܕܝܰܘܣܶܦ ܡܶܢ ܙܽܘܘܳܓ̈ܶܐ ܕܩܰܕܺܝܡܺܝܢ ܗ̱ܘܰܘ. ܐܰܚ̈ܶܐ ܕܶܝܢ ܕܝܶܫܽܘܥ ܡܶܛܽܠ ܡܕܰܒܪܳܢܽܘܬܳܐ ܢܳܩܦܳܐܺܝܬ ܡܶܬܐܰܡܪܺܝܢ ܗ̱ܘܰܘ܆ ܡܶܛܽܠ ܗܳܝ ܕܳܐܦ ܗܽܘ ܝܰܘܣܶܦ܆ ܕܰܐܒܽܘܗ̱ܝ ܐܺܝܬܰܘܗ̱ܝ ܗ̱ܘܳܐ ܡܶܣܬܒܰܪ ܗ̱ܘܳܐ. ܒܰܕܓܽܘܢ ܐܳܦ ܗܽܘ ܠܽܘܩܳܐ ܒܰܦܪ̈ܟܣܝܤ ܗܳܟܰܢܳܐ ܐܳܡܰܪ. ܗܳܠܶܝܢ ܟܽܠܗܽܘܢ ܐܺܝܬܰܝܗܽܘܢ ܗ̱ܘܰܘ ܕܰܐܡܺܝܢܺܝܢ ܗ̱ܘܰܘ ܐܰܟܚܕܳܐ ܒܰܨܠܽܘܬܳܐ ܥܰܡ ܢܶܫ̈ܶܐ܆ ܘܥܰܡ ܡܰܪܝܰܡ ܐܶܡܶܗ ܕܝܶܫܽܘܥ܆ ܘܥܰܡ ܐܰܚܰܘ̈ܗܝ[45]. ܘܟܰܕ ܛܳܒ ܐܶܠܽܘ ܡܶܢܳܗ̇ ܐܺܝܬܰܝܗܽܘܢ ܗ̱ܘܰܘ܆ ܙܳܕܶܩ ܗ̱ܘܳܐ ܠܶܗ ܠܡܺܐܡܰܪ܆ ܥܰܡ ܡܰܪܝܰܡ ܐܶܡܶܗ ܕܝܶܫܽܘܥ ܘܥܰܡ ܒܢܶܝ̈ܗ̇. ܐܶܠܳܐ ܘܠܳܐ ܒܕܽܘܟ ܣܳܟ ܡܶܬܚܙܶܝܢ ܐܶܘܰܢܓ̈ܶܠܺܝܣܛܶܐ ܕܶܐܡܰܪܘ ܐܶܢܽܘܢ ܒܢܶܝ̈ܗ̇. ܟܰܕ ܡܶܢ ܫܪܳܪܳܐ ܒܳܗܬܺܝܢ ܗ̱ܘܰܘ܆ ܘܟܰܕ ܐܰܝܠܶܝܢ ܕܠܳܚ̈ܡܳܢ ܠܰܡܕܰܒܪܳܢܽܘܬܳܐ ܡܡܰܠܠܺܝܢ ܗ̱ܘܰܘ.
ܠܗܳܠܶܝܢ ܬܠܳܬܳܐ ܡܺܐܡܪ̈ܶܐ ܕܰܡܡܰܠܠܽܘܬ ܫܰܪ̈ܒܳܬܳܐ ܕܒܰܒܣܰܪ ܕܰܡܫܺܝܚܳܐ ܐܰܠܳܗܰܢ ܘܦܳܪܽܘܩܰܢ ܦܪܰܫܢܰܢ ܘܩܰܪܶܒܢܰܢ܆ ܠܺܐܝܩܳܪܐ ܕܺܝܠܶܗ ܟܺܝܬ ܘܕܰܐܒܽܘܗ̱ܝ ܘܰܕܪܽܘܚܳܐ ܩܰܕܺܝܫܳܐ܆ ܒܗܳܠܶܝܢ ܓܶܝܪ ܐܺܝܬܶܝܗ̇ ܗܺܝ ܬܠܺܝܬܳܝܽܘܬܐ ܩܰܕܺܝܫܬܳܐ. ܠܗܳܝ ܕܟܰܕ ܐܶܬܒܰܣܰܪ ܠܳܐ ܡܶܫܬܰܚܠܦܳܢܳܐܺܝܬ܆ ܘܠܳܐ ܦܰܠܶܓ ܘܠܳܐ ܐܰܣܓܺܝ. ܚܰܕ ܓܶܝܪ ܐܺܝܬܰܘܗ̱ܝ ܐܳܦ ܟܰܕ ܐܶܬܒܰܪܢܰܫ ܘܠܰܘ ܬܪܶܝܢ܆ ܐܳܦܶܢ ܡܶܢ ܬܰܪܬܶܝܢ ܐܺܝܬܰܘܗ̱ܝ܆ ܡܶܢ ܐܰܠܳܗܽܘܬܳܐ ܘܡܶܢ ܐ̱ܢܳܫܽܘܬܳܐ. ܒܚܰܝܠܳܐ ܗܳܟܺܝܠ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܗܳܝ ܕܠܳܐ ܪܺܝܫܳܐ ܘܰܡܬܽܘܡܳܝܬܳܐ܆ ܬܠܳܬ ܙܰܒ̈ܢܺܝܢ ܐܰܝܟ ܕܰܒܕܰܐܪܳܐ ܥܰܡ ܠܒܽܘܟ̈ܝܶܐ ܕܒܰܥ̈ܠܰܝ ܕܰܐܪܳܐ ܐܶܬܥܰܪܙܰܠܢܰܢ܆ ܘܰܬܠܳܬ ܙܰܒ̈ܢܺܝܢ ܕܰܛܥܺܝܢ ܟܠܺܝܠܳܐ ܚܰܘܺܝܢܳܝܗ̱ܝ ܠܰܫܪܳܪܳܐ. ܬܶܗܘܶܐ ܕܶܝܢ ܕܳܐܦ ܐܢ̱ܬܽܘܢ ܬܶܬܓܰܒܪܽܘܢ ܠܽܘܩܒܰܠ ܚܰܫ̈ܶܐ܆ ܘܬܶܬܟܰܠܠܽܘܢ ܠܽܘܩܒܰܠ ܒܺܝܫܽܘܬܳܐ ܒܝܰܕ ܡܝܰܬܪ̈ܳܬܳܐ܆ ܠܬܶܫܒܽܘܚܬܳܐ ܕܰܐܠܗܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ܆ ܠܥܳܠܡܺܝܢ ܐܰܡܺܝܢ.
ܫܠܶܡ ܡܺܐܡܪܳܐ ܕܬܶܫܥܺܝܢ ܘܫܬܐ.
ܒܽܐܘܪܳܝܬܐ ܟܳܬܶܒ. ܣܰܓܺܝ ܗ̱ܘ̣[10]
[24]ܒܐܘܢܓܠܝܘܢ ܕܠܘܩܐ. 1: 32 ܟܳܬܶܒ ܗܳܢܐ ܦܬܓܡܐ ܘܠܰܘ ܒܡܰܬܰܝ.