ܡܺܐܡܪܳܐ ܕܬܶܫܥܺܝܢ ܘܚܰܡܫܳܐ

ܥܰܠ ܦܠܺܝܓܽܘܬܳܐ ܘܠܳܐ ܫܰܠܡܽܘܬܳܐ ܗܳܝ ܕܡܶܣܬܰܒܪܳܐ ܕܡܰܬܰܝ ܘܰܕܠܽܘܩܳܐ܆ ܕܡܶܛܽܠ ܡܡܰܠܠܽܘܬ ܫܰܪ̈ܒܳܬܳܐ ܕܒܰܒܣܰܪ ܕܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܘܰܒܫܽܘܠܳܡܳܐ ܠܘܳܬ ܗܳܢܽܘܢ ܕܚܰܢܦܳܐܺܝܬ ܣܠܶܩܘ ܠܘܳܬ ܕܳܐܦܢܶܐ.

95: ܥܗܺܝܕ ܐ̱ܢܳܐ ܕܡܶܢ ܩܕܺܝܡ ܟܰܕ ܠܡܺܐܡܪܳܐ ܗܰܘ ܕܡܶܛܽܠ ܡܡܰܠܠܽܘܬ ܫܰܪ̈ܒܳܬܳܐ ܕܒܰܒܣܰܪ ܕܰܐ‌ܠܳܗܳܐ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܐܶܡܪܶܬ܆ ܘܚܰܘܺܝܬ̣ ܕܡܶܛܽܠ ܡܳܢܳܐ ܘܰܐܝܟܰܢܳܐ ܗܽܘ ܟܰܕ ܗܽܘ ܐܳܦ ܡܶܢ ܓܶܢܣܳܐ ܕܰܒܢܰܝ̈ܢܳܫܳܐ ܢܳܚܶܬ ܒܝܽܘܒܳܠܳܐ܆ ܘܳܐܦ ܡܥܰܠܰܝ ܘܥܳܒܰܪ ܠܟܽܠ ܓܶܢܣܳܐ ܘܰܠܒܰܪ ܡܶܢ ܙܰܒܢܳܐ ܡܶܬܬܰܝܬܶܐ܆ ܘܰܠܣܽܘܟܳܠܳܐ ܕܡܶܛܽܠ ܟܽܠܗܽܘܢ ܥܳܠ̈ܡܶܐ ܠܬܰܚܬ ܡܶܢܶܗ ܣܳܐܶܡ܆ ܟܰܕ ܫܘܶܐ ܒܰܡܬܽܘܡܳܝܽܘܬܳܐ ܐܺܝܬܰܘܗ̱ܝ ܠܰܐܒܳܐ ܘܰܐ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܘܰܕܡܶܛܽܠ ܡܳܢܳܐ ܐܺܝܬ ܠܡܶܫܡܰܥ ܠܶܐܘܰܢ̈ܓܶܠܺܝܣܛܶܐ ܕܳܐܡܪܺܝܢ܆ ܕܰܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‌ܠܳܗܳܐ܆ ܘܰܟܬܳܒܳܐ ܕܰܗܘܳܝܶܗ ܕܝܶܫܽܘܥ ܡܫܺܝܚܳܐ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ^[1]܆ ܘܰܕܡܶܛܽܠ ‌ܐܰܝ̇ܕܳܐ ܥܶܠܬܳܐ ܒܪܶܗ ܕܕܰܘܺܝܕ ܐܶܬܶܐܡܰܪ ܩܰܕܡܳܐܺܝܬ܆ ܘܗܳܟܰܢܳܐ ܒܳܬܰܪܟܶܢ ܒܪܶܗ ܕܰܐܒܪܳܗܳܡ܆ ܕܺܐܝܬܰܘܗ̱ܝ ܗ̱ܘܳܐ ܕܝܰܬܺܝܪ ܥܰܬܺܝܩ ܒܙܰܒܢܳܐ ܘܡܶܛܽܠܗܳܕܶܐ ܙܳܕܶܩ ܗ̱ܘܳܐ ܕܢܶܩܕܽܘܡ ܢܶܫܬܰܡܰܗ܆ ܘܰܕܡܳܢܐ ܗܝ ܡܶܠܬܳܐ ܕܗܳܝ ܕܝܰܘܣܶܦ ܐܶܬܡܢܺܝ ܒܫܰܪ̈ܒܳܬܳܐ܆ ܟܰܕ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܰܪܝܰܡ ܕܠܳܐ ܙܰܪܥܳܐ ܘܡܶܢ ܪܽܘܚܳܐ ܩܰܕܺܝܫܳܐ ܐܳܦ ܒܶܛܢܰܬ ܐܳܦ ܝܶܠܕܰܬ ܠܰܡܫܺܝܚܳܐ܆ ܗܳܝ ܕܠܳܗ̇ ܚܠܳܦ ܗܰܘ ܙܳܕܶܩ ܗ̱ܘܳܐ ܠܶܗ ܕܢܶܡܢܶܐ ܒܫܰܪ̈ܒܳܬܳܐ ܐܰܝܟ ܘܳܠܺܝܬܳܐ܆ ܘܕܰܐܝܟܰܢܳܐ ܟܰܕ ܫܰܘܬܳܦܽܘܬܳܐ ܕܙܽܘܘܳܓܳܐ ܠܳܐ ܗ̣ܘܳܬ܆ ܗܰܘ ܡܰܢ ܓܰܒܪܳܗ̇ ܕܗܳܝ ܡܶܬܟܰܢܶܐ ܗܳܝ ܕܶܝܢ ܐܰܢ̱ܬܬܶܗ܆ ܘܟܰܕ ܗܳܠܶܝܢ ܟܽܠܗܶܝܢ ܘܰܐܝܠܶܝܢ ܕܰܠܗܳܠܶܝܢ ܕܳܡ̈ܝܳܢ܆ ܗܳܠܶܝܢ ܕܳܐܦ ܠܝܽܗ̱ܘ̈ܕܳܝܶܐ ܐܳܦ ܠܚܰܢ̈ܦܶܐ ܘܳܐܦ ܠܗܶܪ̈ܛܝܩܘ ܐܶܣܬܒܰܪ ܕܚܰܝ̈ܠܬܳܢܝܳܬܳܐ ܐܺܝܬܰܝܗܶܝܢ ܘܠܳܐ ܡܶܬܥܰܪ̈ܩܳܢܝܳܬܳܐ܆ ܥܰܡ ܝܰܨܺܝܦܽܘܬܐ ܢܰܗܺܝܪܳܐܺܝܬ ܘܠܳܐ ܩܛܺܝܪܳܐܺܝܬ ܡܶܬܥܰܩ̈ܒܳܢ ܗ̱ܘܰܝ̈ ܡܶܢܝ܆ ܚܳܙܶܐ ܗ̱ܘܺܝܬ ܠܟܽܘܢ܆ ܕܥܰܠ ܦܪ̈ܘܛܐܣܝܤ ܡܰܢ ܦܽܘ̈ܫܳܟܶܐ ܗܳܠܶܝܢ܆ ܥܰܠ ܪܺܝܫ ܛܶܦܪ̈ܰܝܟܽܘܢ ܩܳܝܡܺܝܢ ܗ̱ܘܰܝܬܽܘܢ܆ ܘܰܐܝܟ ܗܰܘ ܕܠܰܐܓܽܘܢܳܐ ܡܶܕܶܡ ܕܕܰܐܪ̈ܶܐ ܚܳܙܶܝܢ ܗ̱ܘܰܝܬܽܘܢ܆ ܥܰܠ ܫܪ̈ܳܝܶܐ ܕܶܝܢ ܕܕܳܝܨܺܝܢ ܗ̱ܘܰܝܬܽܘܢ ܘܰܡܩܰܠܣܺܝܢ ܐܢ̱ܬܽܘܢ ܘܚܳܕܶܝܢ ܐܢ̱ܬܽܘܢ܆ ܐܰܝܟ ܗܰܘ ܕܐ̱ܢܳܫ ܡܶܬܟܰܬܫܳܢܳܐ ܣܰܩܽܘܒܠܳܝܳܐ ܐܶܙܕܟܺܝ ܘܰܢܦܰܠ.

ܡܶܛܽܠ ܗܳܕܶܐ ܐܳܦ ܕܶܐ݀ܫܬܰܘܕܶܐ ܠܟܽܘܢ ܐܶܬܺܝܬ̣܆ ܕܶܐܢܗܽܘ ܕܰܠܘܳܬ ܕܳܐܦܢܶܐ ܠܳܐ ܬܶܣܩܽܘܢ܆ ܐܳܦ ܕܕܰܐܪ̈ܶܐ ܐ̱ܚܪ̈ܳܢܶܐ ܘܣܰܩܽܘܒܠܳܝܽܘܬ ܣܝܳܡ̈ܶܐ ܕܡܶܣܬܰܒܪ̈ܳܢ ܥܰܣܩ̈ܳܬܳܐ܆ ܠܳܐ ܕܶܝܢ ܐܺܝܬܰܝܗܶܝܢ܆ ܐܰܝܟܰܢܳܐ ܓܶܝܪ ܐܳܦ ܢܶܗܘܶܐ ܡܶܕܶܡ ܥܰܣܩܳܐ ܐܰܝܟܳܐ ܕܰܐ‌ܠܳܗܳܐ ܘܰܫܪܳܪܳܐ܆ ܐܶ݀ܥܰܬܶܕ ܘܶܐ݀ܛܰܝܶܒ ܠܟܽܘܢ ܚܶܙܘܳܢܳܐ܆ ܕܩܰܪܺܝܒ ܠܶܗ ܟܰܕ ܠܶܗ ܠܫܰܪܒܳܐ. ܘܐ̱ܢܳܫܺܝ̈ܢ ܡܰܢ ܟܰܕ ܠܘܳܬ ܫܽܘܘܕܳܝܳܐ ܕܺܝܠܝ ܚܳܪܘ܆ ܘܰܠܘܳܬ ܒܶܝܬ ܕܰܐܪܳܐ ܗܳܢܳܐ ܪܽܘܚܳܢܳܐ܆ ܐܳܦ ܫܠܶܡܘ ܐܳܦ ܢܛܰܪܘ ܠܰܩܝܳܡ̈ܶܐ܆ ܘܠܳܐ ܣܠܶܩܘ ܠܘܳܬ ܦܽܘܪܓܳܝܳܐ ܗܰܘ ܡܰܚܣܪܳܢܳܐ. ܣܰܓܺܝ̈ܶܐܐ ܕܶܝܢ ܟܰܕ ܡܶܢ ܪܶܓܬܳܐ ܫܟܺܝܪܬܳܐ ܐܶܙܕܟܺܝܘ܆ ܐܰܝܟ ܥܳܪ̈ܽܘܩܶܐ ܕܡܶܢ ܡܝܰܬܪܽܘܬܳܐ ܐܶܬܗܦܰܟܘ܆ ܘܝܰܗܒܘ ܚܰܨܗܽܘܢ ܫܳܢܝܳܐ ܐܰܝܟܰܢܳܐ ܕܰܙܟܰܪܝܳܐ ܢܒܺܝܳܐ ܐܳܡܰܪ^[2].

ܐܶܠܳܐ ܠܰܘ ܡܶܛܽܠ ܗܳܠܶܝܢ ܐܶܢܳܐ ܐ݀ܶܟܠܶܐ ܘܶܐ݀ܚܽܘܕ ܦܽܘܡܝ܆ ܘܶܐ݀ܦܪܽܘܥ ܛܳܠܽܘܡܽܘܬܳܐ ܒܫܶܬܩܳܐ܆ ܘܶܐܕܰܓܶܠ ܠܫܽܘܘܕܳܝܳܐ. ܐܶܠܳܐ ܡܶܛܽܠ ܗܳܢܽܘܢ ܕܟܰܬܰܪܘ ܒܗܳܠܶܝܢ ܕܰܫܠܶܡܘ ܠܗܶܝܢ܆ ܐܳܦܶܢ ܣܰܓܺܝ ܙܥܽܘܪ̈ܶܐ ܢܶܗܘܽܘܢ ܐܺܝܬܰܝܗܽܘܢ܆ ܐܳܦܶܢ ܚܰܕ ܐܰܘ ܬܪܶܝܢ ܒܡܶܢܝܳܢܳܐ ܒܕܽܘܟ܆ ܚܘܺܝܚܳܐܺܝܬ ܐܶ݀ܦܪܥܺܝܗ̇ ܠܚܰܘܒܬܳܐ. ܘܳܐܦܶܢ ܘܠܳܐ ܐ̱ܢܳܫ ܕܶܝܢ ܐܺܝܬ ܗ̱ܘܳܐ ܗܰܘ ܕܶܐܬܬܦܺܝܤ ܘܰܠܒܰܪ ܡܶܢ ܣܽܘܓܦܳܢܳܐ ܗܘ̣ܳܐ܆ ܘܳܐܦ ܗܳܟܰܢܳܐ ܕܗܳܝ ܕܺܐ݀ܡܰܪ ܐܺܝܬܰܝ ܗ̱ܘܺܝܬ ܚܰܝܳܒܳܐ. ܡܶܛܽܠܗܳܕܶܐ ܓܶܝܪ ܣܳܒܰܪ ܐ̱ܢܳܐ ܕܳܐܦ ܗܽܘ ܡܳܪܰܢ ܒܶܐܘܰܢܓ̈ܶܠܺܝܰܐ ܐܳܡܰܪ ܗ̱ܘܳܐ܆ ܕܗܰܘ ܕܺܐܝܬ ܠܶܗ ܐܶܕܢ̈ܶܐ ܠܡܶܫܡܰܥ ܢܶܫܡܰܥ^[3]. ܟܰܕ ܡܚܰܘܶܐ ܗ̱ܘܳܐ܆ ܕܰܠܡܶܠܬܳܐ ܕܡܰܠܦܳܢܽܘܬܳܐ ܒܰܕܡܽܘܬ ܙܰܪܥܳܐ ܙܳܕܶܩ ܠܡܶܫܕܳܐ ܠܳܐ ܝܺܕܺܝܥܳܐܺܝܬ܆ ܐܳܦ ܥܰܠ ܟܽܠܗܽܘܢ ܗܳܢܽܘܢ ܕܫܳܡܥܺܝܢ ܒܳܗ̇ ܒܰܕܡܽܘܬܳܐ܆ ܕܗܰܘ ܕܶܝܢ ܕܶܐܕܢ̈ܶܐ ܕܡܰܪܓܫܳܢܽܘܬܳܐ ܩܢܶܐ ܡܰܢܽܘ ܐܺܝܬܰܘܗ̱ܝ܆ ܠܳܐ ܢܶܒܥܶܐ ܡܥܰܩܒܳܢܳܐܺܝܬ. ܬܶܫܟܚܺܝܘܗ̱ܝ ܓܶܝܪ ܠܗܳܢܳܐ ܗܺܝ ܡܶܠܬܳܐ܆ ܟܰܕ ܠܳܐ ܡܶܬܚܰܙܝܳܢܳܐܺܝܬ ܒܥܽܘܡ̈ܩܶܐ ܕܠܶܒܶܗ ܬܶܬܩܰܒܰܠ.

ܠܰܡܫܰܪܳܝܽܘ ܕܶܝܢ ܡܶܢ ܟܰܕܽܘ ܙܳܕܶܩ ܒܗܶܝܢ ܒܡܰܣܪ̈ܚܳܢܘܳܬܳܐ ܐܰܘ ܟܺܝܬ ܬܰܒ̈ܥܳܬܳܐ.

ܐܰܝܟܰܢܳܐ ܐܳܡܪܺܝܢ܆ ܡܰܬܰܝ ܡܰܢ ܟܰܕ ܡܳܢܶܐ ܫܰܪ̈ܒܳܬܳܐ܆ ܡܶܢ ܐܰܒܳܗ̈ܶܐ ܩܰܕܡܳܝ̈ܶܐ ܠܘܳܬ ܒܢܰܝ̈ܳܐ ܡܰܚܶܬ ܠܳܗ̇ ܠܡܶܠܬܳܐ܆ ܟܰܕ ܫܰܪܺܝ ܡܶܢ ܐܰܒܪܳܗܳܡ ܘܰܢܚܶܬ ܠܘܳܬ ܝܰܘܣܶܦ ܡܟܺܝܪܳܗ̇ ܕܝܳܠܕܰܬ ܐܰ‌ܠܳܗܳܐ ܡܰܪܝܰܡ܆ ܠܽܘܩܳܐ ܕܶܝܢ ܟܰܕ ܠܰܡܥܺܝܢܳܐ ܕܢܰܗܪ̈ܰܘܳܬܳܐ ܗܳܝ ܟܺܝܬ ܕܡܶܬܐܰܡܪܳܐ ܡܗܰܠܶܟ܆ ܘܡܰܗܦܶܟ ܠܶܗ ܠܪܶܕܝܳܐ ܣܰܩܽܘܒܠܐܺܝܬ܆ ܟܰܕ ܡܶܢ ܝܰܘܣܶܦ ܥܒܰܕ ܫܽܘܪܳܝܳܐ܆ ܘܰܠܒܶܣܬܪܳܐ ܡܳܢܶܐ ܠܗܽܘܢ ܠܰܐܒܳܗ̈ܳܬܳܐ܆ ܘܳܐܡܰܪ ܡܶܛܽܠ ܦܳܪܽܘܩܳܐ ܕܺܝܠܰܢ ܝܶܫܽܘܥ܆ ܕܺܐܝܬܰܘܗ̱ܝ ܗ̱ܘܳܐ ܐܰܝܟ ܕܡܶܣܬܒܰܪ ܗ̱ܘܳܐ ܒܪܳܐ ܕܝܰܘܣܶܦ ܒܰܪ ܥܶܠܺܝ^[4]܆ ܘܗܳܟܰܢܳܐ ܣܳܠܶܩ ܣܶܒܠܬܳܐ ܕܰܠܥܶܠ ܡܰܝܬܝܳܐ܆ ܥܕܰܡܳܐ ܕܳܐܦ ܠܘܳܬܶܗ ܕܳܐܕܳܡ ܢܶܬܡܰܛܶܐ.

ܗܳܝ ܟܺܝܬ ܕܰܠܘܳܬܳܗ̇ ܐܳܦ ܐܳܡܪܺܝܢܰܢ܆ ܕܠܳܐ ܡܶܕܶܡ ܢܽܘܟܪܳܝܳܐ ܡܶܫܟܚܺܝܢ ܚ̱ܢܰܢ ܠܗܽܘܢ ܠܶܐܘܰܢܓ̈ܶܠܺܝܣܛܶܐ ܕܰܥܒܰܕܘ܆ ܘܳܐܦܠܳܐ ܬܽܘܒ ܕܠܳܐ ܝܺܕܺܝܥ ܠܰܟܬܳܒܳܐ ܐܰ‌‌ܠܳܗܳܝܳܐ. ܡܥܰܝܕܬܳܐ ܗܝ ܓܶܝܪ ܠܶܗ܆ ܘܳܐܦ ܗܳܝ ܕܡܶܢ ܠܥܶܠ ܢܰܚܶܬ ܠܚܽܘܫܒܳܢ ܡܶܢܝܳܢܳܐ ܕܓܶܢ̈ܣܶܐ܆ ܘܳܐܦ ܗܳܝ ܕܡܶܢ ܠܬܰܚܬ ܢܰܣܶܩ. ܘܗܳܕܶܐ ܓܰܠܝܳܐܺܝܬ ܘܙܰܒ̈ܢܳܬܳܐ ܣܰܓܺܝ̈ܳܐܬܳܐ܆ ܒܰܟܬܳܒܳܐ ܗܰܘ ܕܚܰܣܺܝܪ̈ܳܬܳܐ ܟܬܺܝܒܳܐ. ܡܰܚܶܬ ܡܰܢ ܓܶܝܪ܆ ܐܰܝܟ ܐܰܝܟܳܐ ܕܳܐܡܰܪ܆ ܘܗܳܠܶܝܢ ܒܢܰܝ̈ܳܐ ܕܰܐܗܪܽܘܢ܆ ܐܶ‌ܠܺܝܥܳܙܳܪ ܒܪܶܗ܆ ܦܺܝܢܚܤ ܒܪܶܗ܆ ܐܰܒܺܝܫܽܘܕ ܒܪܶܗ܆ ܒܽܘܩܟܺܝ ܒܪܶܗ܆ ܥܽܘܙܺܝܳܐ ܒܪܶܗ. ܡܰܣܶܩ ܕܶܝܢ ܒܗܳܝ ܬܽܘܒ ܘܳܐܡܰܪ܆ ܗܡܢ ܗܰܘ ܡܙܰܡܪܳܢܳܐ ܒܰܪ ܝܘܐܝܠ܆ ܒܰܪ ܫܡܽܘܐܝܠ܆ ܒܰܪ ܗܶܠܰܩܢܳܐ܆ ܒܪ ܝܐܪܐܡܝܐܝܠ܆ ܒܪܐ‌ܠܝܐܒ܆ ܒܰܪܢܐܚܫ܆ ܒܰܪ ܣܽܘܦܝ. ܘܟܰܕ ܒܪܶܚܡܰܬ ܥܰܡܠܳܐ ܦܳܓܰܥ ܐ̱ܢܳܫ܆ ܓܶܢ̈ܣܶܐ ܣܰܓܺܝ̈ܶܐܐ ܕܰܐܝܟ ܗܳܠܶܝܢ ܢܶܫܟܰܚ ܕܰܡܫܰܚܠܦܳܐܺܝܬ ܙܩܺܝܪܺܝܢ ܒܡܶܠܬܳܐ܆ ܘܒܰܙܒܰܢ ܡܰܢ ܒܗܳܢܳܐ ܙܢܳܐ܆ ܒܰܙܒܰܢ ܕܶܝܢ ܬܽܘܒ ܒܗܰܘ.

ܐܰܝܟܰܢܳܐ ܗܳܟܺܝܠ ‌ܐܳܡܪܺܝܢ ܚܳܙܶܝܢܰܢ ܠܶܗ ܠܠܽܘܩܳܐ܆ ܕܰܕܦܰܪ̈ܨܽܘܦܶܐ ܐ̱ܚܪ̈ܳܢܶܐ ܠܒܰܪ ܡܶܢ ܗܳܠܶܝܢ ܕܰܐܡܺܝܪܺܝܢ ܠܡܰܬܰܝ܆ ܥܳܒܶܕ ܥܽܘܗܕܳܢܳܐ ܒܰܡܡܰܠܠܽܘܬ ܫܰܪ̈ܒܳܬܳܐ܆ ܘܠܰܘ ܕܰܐ̱ܚܪ̈ܳܢܶܐ ܒܰܠܚܽܘܕ܆ ܐܶܠܳܐ ܐܳܦ ܕܣܰܓܺܝ ܣܰܓܺܝܐܝܺܢ܆ ܡܶܢ ܗܳܠܶܝܢ ܒܡܶܢܝܳܢܳܐ. ܠܝܰܘܣܶܦ ܓܶܝܪ ܡܟܺܝܪܳܗ̇ ܕܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܡܰܬܰܝ ܡܰܢ ܕܐ̱ܢܳܫ ܝܰܥܩܽܘܒ ܐܳܡܰܪ ܕܺܐܝܬܰܘܗ̱ܝ ܒܪܳܐ. ܠܽܘܩܳܐ ܕܶܝܢ ܕܥܶܠܺܝ.

ܐܶܠܳܐ ܐܳܦ ܒܗܳܕܶܐ ܬܽܘܒ ܠܠܳܐ ܡܰܐܪ̈ܙܶܐ ܘܠܳܐ ܝܰܠܺܝܦ̈ܶܐ ܘܰܕܡܶܛܽܠ ܗܳܕܶܐ ܡܶܫܬܰܓܫܺܝܢ܆ ܗܽܘ ܫܪܳܪܳܐ ܕܰܟܬܳܒ̈ܶܐ ܟܳܗ̈ܢܳܝܶܐ ܢܩܰܪܶܒ ܐܶܢܽܘܢ ܠܘܳܬ ܗܰܝܡܳܢܽܘܬܳܐ. ܠܰܘ ܓܶܝܪ ܕܰܚܕܳܐ ܡܡܰܠܠܽܘܬ ܫܰܪ̈ܒܳܬܳܐ ܢܶܙܩܪܽܘܢ ܐܺܝܬ ܗ̱ܘܳܐ ܠܗܽܘܢ ܢܺܝܫܳܐ ܠܐܘܰܢܓ̈ܶܠܺܝܣܛܶܐ ܐܰ‌ܠܳܗܳܝ̈ܶܐ܆ ܘܗܳܕܶܐ ܟܰܕ ܚܰܕ ܐܺܝܬܰܘܗ̱ܝ ܗ̱ܘܳܐ ܗܰܘ ܕܡܶܬܡܢܶܐ ܗ̱ܘܳܐ ܒܫܰܪ̈ܒܳܬܳܐ܆ ܗܳܕܶܐ ܓܶܝܪ ܐܺܝܬܶܝܗ̇ ܗܳܝ ܕܰܬܡܺܝܗܳܐ܆ ܐܶܠܳܐ ܡܰܬܰܝ ܡܰܢ ܠܗܳܝ ܟܝܳܢܳܝܬܳܐ ܡܶܫܬܰܥܶܐ܆ ܠܽܘܩܳܐ ܕܶܝܢ ܠܗܳܝ ܢܳܡܽܘܣܳܝܬܳܐ. ܡܳܢܳܐ ܗܝ ܕܶܝܢ ܗܳܕܶܐ. ܟܰܕ ܐܰ‌ܠܳܗܳܐ ܝܳܗܶܒ ܐܢܳܐ ܐܺ݀ܡܰܪ ܓܰܠܝܳܐܺܝܬ.

ܒܢܳܡܽܘܣܳܐ ܕܡܽܘܫܶܐ ܦܩܺܝܕ ܗ̱ܘܳܐ܆ ܕܠܰܐܢܬܬܶܗ ܕܗܰܘ ܕܡܳܐܶܬ ܗ̱ܘܳܐ ܕܠܳܐ ܒܢܰܝ̈ܳܐ܆ ܠܰܘ ܐ̱ܚܪܺܢܳܐ ܢܶܣܒܺܝܗ̇ ܠܘܳܬ ܫܰܘܬܳܦܽܘܬܳܐ܆ ܐܶܠܳܐ ܐܶܢ ܐܰܚܽܘܗ̱ܝ ܕܓܰܒܪܳܗ̇. ܘܰܕܗܰܘ ܕܡܶܢ ܗܳܪܟܳܐ ܡܶܬܺܝܠܶܕ ܗ̱ܘܳܐ܆ ܕܰܒܪܳܐ ܕܗܰܘ ܕܡܺܝܬ ܐܺܝܬܰܘܗ̱ܝ ܢܶܫܬܰܡܰܗ ܗ̱ܘܳܐ. ܫܰܦܺܝܪܳܐ ܕܶܝܢ܆ ܕܳܐܦ ܠܗܶܝܢ ܠܰܒ̈ܢܳܬ ܩܴ̈ܠܶܐ ܗܳܠܶܝܢ ܐܰ‌ܠܳܗܳܝ̈ܳܬܳܐ ܢܶܫܡܰܥ. ܕܣܺܝ̈ܡܳܢ ܡܰܢ ܒܬܶܢܝܳܢ ܢܳܡܽܘܣܳܐ܆ ܐܳܡܪ̈ܳܢ ܕܶܝܢ ܗܳܟܰܢܳܐ. ܐܶܢܕܶܝܢ ܢܶܗܘܽܘܢ ܥܳܡܪܺܝܢ ܬܪܶܝܢ ܐܰܚ̈ܶܐ ܐܰܟܚܕܳܐ܆ ܘܰܢܡܽܘܬ ܚܰܕ ܡܶܢܗܽܘܢ܆ ܙܰܪܥܳܐ ܕܶܝܢ ܠܳܐ ܢܶܗܘܶܐ ܐܺܝܬ ܠܶܗ܆ ܠܳܐ ܬܶܗܘܶܐ ܐܰܢ̱ܬܬܶܗ ܕܗܰܘ ܕܡܺܝܬ ܠܒܰܪ܆ ܠܓܰܒܪܳܐ ܕܠܳܐ ܩܰܪܺܝܒ. ܐܰܚܽܘܗ̱ܝ ܕܓܰܒܪܳܐ ܢܶܥܽܘܠ ܠܘܳܬܳܗ̇܆ ܘܢܶܣܒܺܝܗ̇ ܠܶܗ ܐܰܢ̱ܬܬܳܐ܆ ܘܢܶܥܡܰܪ ܥܰܡܳܗ̇. ܘܢܶܗܘܶܐ ܒܪܳܐ ܗܰܘ ܕܶܐܢ ܬܺܐܠܰܕ܆ ܢܩܽܘܡ ܡܶܢ ܫܡܶܗ ܕܗܰܘ ܕܡܺܝܬ܆ ܘܠܳܐ ܢܶܬܥܛܶܐ ܫܡܶܗ ܡܶܢ ܐܺܝܣܪܳܐܶܝܠ^[5]. ܐܶܢ ܕܶܝܢ ܐܳܦ ܗܰܘ ܕܡܺܝܬ ܕܠܳܐ ܒܢܰܝ̈ܳܐ ܐܰܚܳܐ ܠܰܝܬ ܗ̱ܘܳܐ ܠܶܗ܆ ܐ̱ܢܳܫ ܐ̱ܚܪܺܢܳܐ ܡܶܢ ܗܳܢܽܘܢ ܕܩܰܪܺܝܒܺܝܢ ܗ̱ܘܰܘ ܠܶܗ ܒܓܶܢܣܳܐ ܫܳܩܶܠ ܗ̱ܘܳܐ ܠܳܗ̇ ܠܰܐܢܬܬܶܗ܆ ܠܘܳܬ ܗܳܝ ܕܰܢܩܺܝܡ ܠܶܗ ܙܰܪܥܳܐ. ܠܗܰܘ ܓܶܝܪ ܕܡܺܝܬ ܐܰܝܟܰܢܳܐ ܕܗܳܫܳܐ ܫܡܰܥܬܽܘܢ܆ ܡܶܬܚܫܶܒ ܗ̱ܘܳܐ ܗܰܘ ܒܪܳܐ ܐܰܝܟ ܢܳܡܽܘܣܳܐ܆ ܘܳܐܕܫܶܗ ܕܗܳܢܳܐ ܙܽܘܘܳܓܳܐ ܩܰܪܺܝܒܽܘܬ ܓܶܢܣܳܐ ܡܶܬܟܰܢܶܐ ܗ̱ܘܳܐ. ܘܶܐܢܗܽܘ ܕܶܝܢ ܕܒܰܪ ܓܶܢܣܳܐ ܗܰܘ ܕܩܰܪܺܝܒ ܗ̱ܘܳܐ܆ ܠܳܐ ܨܳܒܶܐ ܗ̱ܘܳܐ ܕܢܶܣܒܺܝܗ̇ ܠܰܐܢܬܬܶܗ ܕܗܰܘ ܕܡܺܝܬ ܐܰܝܟ ܘܳܠܺܝܬܳܐ܆ ܗܰܘ ܕܡܶܢ ܒܳܬܪܶܗ ܩܰܪܺܝܒ ܗ̱ܘܳܐ ܒܓܶܢܣܳܐ܆ ܡܶܢ ܟܽܠ ܦܪܽܘܤ ܡܩܰܒܶܠ ܗ̱ܘܳܐ ܠܶܗ ܠܙܽܘܘܳܓܳܐ. ܝܰܨܺܝܦܽܘܬܳܐ ܓܶܝܪ ܐܺܝܬ ܗ̱ܘܳܐ ܠܶܗ ܠܢܳܡܽܘܣܳܐ܆ ܗܳܝ ܕܰܢܩܺܝܡ ܠܶܗ ܙܰܪܥܳܐ ܠܗܰܘ ܕܠܳܐ ܥܒܰܕ ܒܢܰܝ̈ܳܐ ܘܡܺܝܬ.

ܗܳܠܶܝܢ ܓܰܠܝܳܐܺܝܬ ܒܪܳܥܽܘܬ ܟܬܺܝ̈ܒܳܢ܆ ܐܺܝܬܰܘܗ̱ܝ ܕܶܝܢ ܐܳܦ ܗܳܢܳܐ ܟܬܳܒܳܐ ܡܶܢ ܟܬܳܒ̈ܶܐ ܐܰ‌ܠܳܗܳܝ̈ܶܐ. ܒܳܥܳܙ ܓܶܝܪ ܐ̱ܢܳܫ ܕܨܳܒܶܐ ܗ̱ܘܳܐ ܕܰܠܪܳܥܽܘܬ ܢܶܣܰܒ ܠܘܳܬ ܙܽܘܘܳܓܳܐ܆ ܕܰܗܘ̣ܳܬ ܐܰܢܬܬܳܐ ܕܐ̱ܢܳܫ ܡܰܠܽܘܢ ܐ̱ܚܝܳܢܶܗ ܕܡܺܝܬ ܕܠܳܐ ܒܢܰܝ̈ܳܐ܆ ܐܳܡܰܪ ܠܗܰܘ ܕܰܩܕܳܡܰܘ̈ܗ̱ܝ ܩܰܪܺܝܒ ܗ̱ܘܳܐ ܒܓܶܢܣܳܐ ܠܗܰܘ ܕܡܺܝܬ܆ ܐܶܢ ܗܳܘܶܐ ܐܰܢ̱ܬ ܩܰܪܺܝܒ ܓܶܢܣܳܐ܆ ܗܘܺܝ ܩܰܪܺܝܒ ܓܶܢܣܳܐ^[6]. ܐܶܢ ܕܶܝܢ ܠܳܐ ܗܳܘܶܐ ܐܰܢ̱ܬ ܩܰܪܺܝܒ ܓܶܢܣܳܐ܆ ܐܶܡܰܪ ܠܺܝ ܘܶܐܕܰܥ. ܠܰܝܬ ܠܒܰܪ ܡܶܢܳܟ ܕܢܶܬܩܰܪܰܒ. ܘܶܐܢܳܐ ܐܺܝܬܰܝ ܒܳܬܪܳܟ. ܘܟܰܕ ܗܽܘ ܠܳܐ ܨܒܳܐ ܘܶܐܡܰܪ ܠܶܗ܆ ܕܩܰܪܶܒ ܘܒܰܝܬܝܳܗ̇ ܐܰܢ̱ܬ ܠܳܟ ܠܩܰܪܺܝܒܽܘܬ ܓܶܢܣܳܐ ܗܳܝ ܕܺܝܠܝ܆ ܡܶܛܽܠ ܕܠܳܐ ܡܶܫܟܰܚ ܐ̱ܢܳܐ ܐܶܢܳܐ ܕܶܐ݀ܬܩܰܪܰܒ^[7]܆ ܬܽܘܒ ܐܶܡܰܪ ܗܽܘ ܒܘܥܘܙ܆ ܡܳܕܶܝܢ ܠܪܳܥܽܘܬ ܡܽܘܐܒܳܝܬܳܐ ܐܰܢܬܬܗ ܕܡܰܠܽܘܢ܆ ܗܳܐ ܩܳܢܶܐ ܐ̱ܢܳܐ ܠܳܗ̇ ܠܺܝ ܐܰܢ̱ܬܬܳܐ܆ ܠܰܡܩܳܡܽܘ ܫܡܶܗ ܕܗܰܘ ܕܡܺܝܬ ܡܶܢ ܐܰܚܰܘ̈ܗ̱ܝ ܘܡܶܢ ܫܰܒܛܶܗ^[8].

ܟܰܕ ܗܳܠܶܝܢ ܗܳܟܺܝܠ ܗܳܟܰܢܳܐ ܐܶܬܺܝܕܰܥ ܘܶܐܬܦܪܰܫ܆ ܠܟܽܠܢܳܫ ܐܺܝܬܶܝܗ̇ ܝܺܕܺܝܥܬܳܐ܆ ܕܥܳܒܽܘܕܽܘܬ ܒܢܰܝ̈ܳܐ ܗܳܝ ܕܡܶܢ ܙܽܘܘܳܓ̈ܶܐ ܗܳܠܶܝܢ ܕܰܐܝܟ ܗܳܟܰܢ܆ ܐܰܝܟ ܗܰܘ ܕܰܩܝܳܡܬܶܗ ܕܗܰܘ ܕܡܺܝܬ ܐܺܝܬܶܝܗ̇. ܐܳܡܰܪ ܓܶܝܪ ܓܰܠܝܳܐܺܝܬ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܠܰܡܩܳܡܽܘ ܫܡܶܗ ܕܗܰܘ ܕܡܺܝܬ܆ ܥܰܠ ܝܳܪܬܽܘܬܳܐ ܕܺܝܠܶܗ³. ܘܡܶܢ ܐܳ‌ܠ̈ܨܳܬܳܐ ܥܰܠ ܗܰܘ ܕܶܐܬܺܝܠܶܕ܆ ܡܶܬܟܬܶܒ ܡܰܢ ܒܰܟܝܳܢܳܐ ܐܰܒܳܐ܆ ܓܰܒܪܳܗ̇ ܗܰܘ ܕܰܬܪܶܝܢ ܕܰܐܢ̱ܬܬܳܐ܆ ܗܰܘ ܕܳܐܦ ܡܶܢ ܫܰܘܬܳܦܽܘܬܶܗ ܐܶܬܺܝܠܶܕ. ܐܰܝܟ ܕܰܒܢܳܡܽܘܣܳܐ ܕܶܝܢ܆ ܕܗܰܘ ܕܡܺܝܬ ܡܶܬܗܰܝܡܰܢ ܕܺܐܝܬܰܘܗ̱ܝ ܒܪܳܐ.

ܒܗܳܢܳܐ ܙܢܳܐ ܐܳܦ ܥܰܠ ܝܰܘܣܶܦ ܗܰܘ ܕܡܰܟܪܳܗ̇ ܠܰܒܬܽܘܠܬܳܐ ܩܰܕܺܝܫܬܳܐ܆ ܕܰܬܪܶܝܢ ܐܰܒܳܗ̈ܶܐ ܢܶܬܟܰܬܒܽܘܢ ܥܠܰܘܗ̱ܝ ܐܺܝܬܶܝܗ̇ ܫܰܪܺܝܪܬܳܐ. ܟܰܕ ܓܶܝܪ ܢܣܰܒ ܐܰܢܬܬܳܐ ܥܶܠܺܝ ܘܡܺܝܬ ܕܠܳܐ ܒܢܰܝ̈ܳܐ܆ ܝܰܥܩܘܒ ܕܰܒܓܶܢܣܳܐ ܩܰܪܺܝܒ ܗ̱ܘܳܐ ܠܶܗ܆ ܢܰܣܒܳܗ̇ ܠܰܐܢܬܬܶܗ ܠܘܳܬ ܫܰܘܬܳܦܽܘܬܳܐ܆ ܐܰܝܟܰܢܳܐ ܕܰܢܩܺܝܡ ܠܶܗ ܙܰܪܥܳܐ ܠܗܰܘ ܕܡܺܝܬ܆ ܐܰܝܟ ܡܳܐ ܕܦܳܩܶܕ ܗ̱ܘܳܐ ܢܳܡܽܘܣܳܐ. ܐܳܦ ܟܺܝܬ ܟܰܕ ܡܶܢܶܗ ܐܶܬܺܝܠܶܕ ܝܰܘܣܶܦ܆ ܕܥܶܠܺܝ ܡܰܢ ܒܪܳܐ ܢܳܡܽܘܣܳܝܳܐ ܐܺܝܬܰܘܗ̱ܝ ܗ̱ܘܳܐ܆ ܕܝܰܥܩܘܒ ܕܶܝܢ ܟܝܳܢܳܝܳܐ. ܘܡܶܛܽܠܗܳܕܶܐ܆ ܡܰܬܰܝ ܡܰܢ ܐܰܡܪܶܗ ܠܝܰܘܣܶܦ܆ ܕܰܒܪܶܗ ܕܝܥܩܘܒ ܐܺܝܬܰܘܗ̱ܝ. ܠܽܘܩܳܐ ܕܶܝܢ ܕܥܶܠܺܝ.

ܐܳܦ ܓܶܝܪ ܗܰܘ ܡܰܢ ܠܰܟܝܳܢܳܐ ܐܰܟܬܶܒ܆ ܗܰܘ ܕܶܝܢ ܠܢܳܡܽܘܣܳܐ ܘܰܠܫܰܘܝܽܘܬ ܓܶܢܣܳܐ ܗܳܝ ܕܡܶܢ ܬܪ̈ܰܝܗܽܘܢ ܓܰܒ̈ܶܐ܆ ܠܦܰܪ̈ܨܽܘܦܶܐ ܡܫܰܚ̈ܠܦܶܐ ܡܶܣܬܰܕܩܳܐ. ܘܡܰܬܰܝ ܡܰܢ܆ ܕܰܐܒܳܗ̈ܶܐ ܟܝܳܢܳܝ̈ܶܐ ܕܝܰܘܣܶܦ ܥܒܰܕ ܥܽܘܗܕܳܢܳܐ. ܠܽܘܩܳܐ ܕܶܝܢ ܕܢܳܡܽܘܣܳܝ̈ܶܐ. ܟܰܕ ܠܥܶܠܺܝ ܗܰܘ ܕܰܐܝܟ ܢܳܡܽܘܣܳܐ ܐܰܒܳܐ ܐܺܝܬܰܘܗ̱ܝ ܗ̱ܘܳܐ ܕܝܰܘܣܶܦ ܐܶܬܥܗܰܕ܆ ܘܰܒܣܶܕܪܳܐ ܡܺܟܺܝܠ ܠܰܐܦܰܝ̈ ܠܥܶܠ ܪܕܳܐ܆ ܥܕܰܡܳܐ ܠܢܳܬܳܢ ܗܰܘ ܕܺܐܝܬܰܘܗ̱ܝ ܗ̱ܘܳܐ ܐܳܦ ܗܽܘ ܒܪܶܗ ܕܕܰܘܺܝܕ. ܐܰܝܟܰܢܳܐ ܕܰܢܚܰܘܶܐ ܐܳܦ ܠܰܐܚܝܳܢܽܘܬܳܐ ܗܳܝ ܢܳܡܽܘܣܳܝܬܳܐ܆ ܕܡܰܣܩܳܐ ܠܰܡܫܺܝܚܳܐ ܠܘܳܬ ܕܰܘܺܝܕ. ܡܰܬܰܝ ܓܶܝܪ ܟܰܕ ܠܰܐܚܝܳܢܽܘܬܳܐ ܗܳܝ ܟܝܳܢܳܝܬܳܐ ܚܳܫܶܒ ܗ̱ܘܳܐ܆ ܒܝܰܕ ܗܳܢܽܘܢ ܕܡܶܢ ܫܠܝܡܘܢ ܢܳܚܬܺܝܢ ܒܝܽܘܒܳܠܳܐ܆ ܚܰܘܝܶܗ ܒܪܶܗ ܕܕܰܘܺܝܕ ܒܰܒܣܰܪ ܠܰܡܫܺܝܚܳܐ.

ܕܰܒ̈ܢܰܝܳܐ ܕܶܝܢ ܕܕܰܘܺܝܕ ܐܺܝܬܰܝܗܽܘܢ ܗ̱ܘܰܘ ܐܳܦ ܫܠܝܡܘܢ ܐܳܦ ܢܳܬܳܢ܆ ܠܰܘ ܒ̈ܢܰܝ ܚܰܕ ܐܰܒܳܐ ܒܰܠܚܽܘܕ܆ ܐܶܠܳܐ ܟܺܝܬ ܐܳܦ ܒ̈ܢܰܝ ܚܕܳܐ ܐܶܡܳܐ. ܬܽܘܒ ܡܶܢ ܟܬܳܒܳܐ ܗܰܘ ܩܰܕܡܳܝܳܐ ܕܚܰܣܺܝܪ̈ܳܬܳܐ ܡܶܬܚܰܘܝܳܐ. ܐܳܡܰܪ ܓܶܝܪ ܗܽܘ ܟܬܳܒܳܐ ܟܳܗܢܳܝܳܐ ܗܳܟܰܢܳܐ. ܘܰܐܡܠܶܟ ܕܰܘܺܝܕ ܒܚܶܒܪܽܘܢ ܫܒܰܥ ܫ̈ܢܺܝܢ ܘܶܫܬܳܐ ܝܰܪ̈ܚܺܝܢ. ܘܰܬܠܳܬܺܝܢ ܘܰܬܠܳܬ ܫ̈ܢܺܝܢ ܐܰܡܠܶܟ ܒܽܐܘܪܫܠܶܡ. ܘܗܳܠܶܝܢ ܐܶܬܺܝܠܶܕܘ ܠܶܗ ܒܽܐܘܪܫܠܶܡ. ܫܰܐܡܥܐ ܘܫܽܘܒܐܒ ܘܢܐܬܢ ܘܫܠܝܡܘܢ. ܐܰܪ̈ܒܥܳܬܰܝܗܽܘܢ ܡܶܢ ܒܰܪܬܫܒܥ ܒܰܪ̱ܬ ܐܰܝܠܳܐ. ܗܳܕܶܐ ܕܶܝܢ ܐܺܝܬܶܝܗ̇ ܗ̱ܘܳܬ ܐܰܢܬܬܶܗ ܕܽܐܘܪܺܝܳܐ܆ ܗܳܝ ܕܰܒܓܰܘܪܳܐ ܐܶܫܬܰܘܬܰܦ ܠܳܗ̇ ܕܰܘܺܝܕ. ܠܗܳܕܶܐ ܕܶܝܢ ܠܰܘ ܫܚܺܝܡܳܐܺܝܬ ܘܰܐܝܟܰܢ ܕܗܽܘ ܫܰܘܕܰܥܬܳܗ̇܆ ܐܶܠܳܐ ܡܶܛܽܠ ܗܳܢܽܘܢ ܕܰܐܣܒܰܪܘ ܕܡܶܢ ܙܽܘܘܳܓܳܐ ܐ̱ܚܪܺܢܳܐ ܕܰܟܝܳܐ ܐܶܬܺܝܠܶܕ ܠܶܗ ܢܳܐܬܢ ܠܕܰܘܺܝܕ܆ ܘܠܽܘܩܳܐ ܠܰܡ ܝܰܨܺܝܦܽܘܬܐ ܥܒܰܕ܆ ܕܠܳܐ ܢܶܬܕܟܰܪ ܠܐ̱ܢܳܫ ܡܶܢ ܗܳܢܽܘܢ ܕܡܶܢ ܙܽܘܘܳܓ̈ܶܐ ܕܰܠܒܰܪ ܡܶܢ ܢܳܡܽܘܣܳܐ ܐܶܬܺܝܠܶܕܘ. ܗܳܝ ܟܺܝܬ ܕܠܳܐ ܐܺܝܬܶܝܗ̇ ܫܰܪܝܪܬܳܐ. ܐܶܬܥܗܰܕ ܓܶܝܪ ܐܳܦ ܠܦܪܨ ܕܡܶܢ ܚܽܘܠܛܳܢܳܐ ܠܳܐ ܢܳܡܽܘܣܳܝܳܐ ܕܺܝܗܽܘܕܳܐ ܕܰܠܘܳܬ ܟܰܠܬܶܗ ܐܶܬܺܝܠܶܕ. ܡܶܢ ܗܳܠܶܝܢܕܝܰܬܺܝܪܳܐܺܝܬ ܡܶܬܚܰܘܝܳܐܢܰܗܺܝܪܳܐܺܝܬ܆ ܕܠܰܡܬܰܪܳܨܽܘ ܠܟܽܘܪ̈ܗܳܢܶܐ ܕܰܟܝܳܢܳܐ ܕܺܝܠܰܢ ܐܶܬܳܐ ܡܫܺܝܚܳܐ.

ܐܶܠܳܐ ܟܰܕ ܝܰܨܺܝܦܽܘܬܐ ܗܳܝ ܟܺܝܬ ܕܶܐܡܪܶܬ ܥܒܰܕ ܠܽܘܩܳܐ܆ ܕܠܰܐܚܝܳܢܽܘܬܳܐ ܗܳܝ ܕܰܐܝܟ ܢܳܡܽܘܣܳܐ ܢܣܺܝܡ܆ ܒܝܰܕ ܦܰܪ̈ܨܽܘܦܶܐ ܐ̱ܚܪ̈ܳܢܶܐ ܥܕܰܡܳܐ ܠܕܰܘܺܝܕ ܟܰܕ ܡܶܢ ܠܬܰܚܬ ܫܰܪܺܝ܆ ܡܳܢܶܐ ܠܶܗ ܠܚܽܘܫܒܳܢܶܗ ܕܓܶܢܣܳܐ. ܕܰܐ̱ܚܪ̈ܳܢܶܐ ܡܰܢ ܐܺܝܬܰܝܗܽܘܢ ܗ̱ܘܰܘ ܐܰܝܟ ܕܒܰܫܪܳܪܳܐ܆ ܒܫܰܘܝܽܘܬ ܫܡܳܐ ܕܶܝܢ ܡܶܫܬܰܡܗܺܝܢ ܗ̱ܘܰܘ ܚܰܕܚ̈ܕܳܢܶܐ ܡܶܢܗܽܘܢ܆ ܠܗܳܢܽܘܢ ܕܰܡܢ̣ܳܐ ܡܰܬܰܝ. ܐܳܦ ܓܶܝܪ ܒܶܗ ܟܰܕ ܒܶܗ ܒܥܰܡܳܐ܆ ܐܳܦ ܝܺܗܽܘܕܳܐ ܠܰܘ ܚܰܕ ܐܶܠܳܐ ܣܰܓܺܝ̈ܶܐܐ܆ ܐܳܦ ܠܶܘܺܝ ܐܳܦ ܫܶܡܥܽܘܢ ܐܶܢ ܬܶܓܕܰܫ ܡܶܬܟܰܢܶܝܢ ܗ̱ܘܰܘ܆ ܐܰܝܟ ܙܢܳܐ ܕܗܳܫܳܐ ܦܘ̈ܠܘ ܘܝܘ̈ܚܢܐ ܘܦܛܪ̈ܘ. ܙܰܒ̈ܢܺܝܢ ܕܶܝܢ ܣܰܓܺܝ̈ܳܐܢ܆ ܐܳܦ ܠܶܗ ܟܰܕ ܠܶܗ ܠܦܰܪܨܽܘܦܳܐ ܐܶܬܬܰܝܬܺܝ ܠܽܘܩܳܐ ܐܰܟܚܕܳܐ ܥܰܡ ܡܰܬܰܝ܆ ܘܗܳܕܶܐ ܟܰܕ ܬܽܘܢܳܝܳܐ ܕܓܶܢܣܳܐ ܐ̱ܚܪܺܢܳܐ ܡܰܟܬܶܒ ܗ̱ܘܳܐ܆ ܕܗܰܘ ܢܳܡܽܘܣܳܝܳܐ ܐܳܡܰܪ ܐ̱ܢܳܐ.

ܡܥܳܕܺܝܢ ܐܶܢܽܘܢ ܓܶܝܪ ܓܶܢ̈ܣܶܐ ܒܰܕܡܽܘܬ ܪ̈ܶܕܝܶܐ ܗܳܢܽܘܢ ܕܰܡܫܰܚܠܦܳܐܺܝܬ ܡܶܣܬܰܕܩܺܝܢ ܘܬܽܘܒ ܐܰܟܚܕܳܐ ܪܳܕܶܝܢ܆ ܘܬܽܘܒ ܡܶܢ ܚ̈ܕܳܕܶܐ ܡܶܬܦܰܠܓܺܝܢ܆ ܕܰܒܝܰܕ ܐ̱ܢܳܫܺܝ̈ܢ ܦܰܪ̈ܨܽܘܦܶܐ ܒܡܶܨܥܰܬ ܢܶܬܚܰܠܛܽܘܢ܆ ܐܳܦ ܡܶܢ ܒܳܬܰܪ ܕܰܠܪܽܘܚܩܳܐ ܟܒܰܪ ܐܶܬܐܫܶܕܘ ܘܶܐܬܦܣܶܩܘ. ܗܳܐ ܓܶܝܪ ܠܫܠܐܬܐܝܠ ܬܪ̈ܰܝܗܽܘܢ ܐܶܘܰܢܓ̈ܶܠܺܝܣܛܶܐ ܐܶܬܥܰܗܕܽܘܗ̱ܝ. ܐܶܠܳܐ ܡܰܬܰܝ ܡܰܢ ܒܪܶܗ ܕܝܐܟܘܢܝܐ ܫܰܡܗܶܗ ܠܗܳܢܳܐ ܟܝܳܢܳܐܺܝܬ. ܠܽܘܩܳܐ ܕܶܝܢ ܟܺܝܬ ܢܳܡܽܘܣܳܐܺܝܬ܆ ܒܪܶܗ ܕܢܺܝܪܺܝ ܩܪܳܝܗ̱ܝ ܆ ܟܰܕ ܢܶܦܠܰܬ ܒܰܡܨܰܥܬܳܐ ܚܰܣܺܝܪܽܘܬ ܒܢܰܝ̈ܳܐ ܕܗܰܘ ܕܡܺܝܬ ܘܫܰܘܬܳܦܽܘܬܳܐ ܬܪܰܝܳܢܺܝܬܳܐ܆ ܐܰܝܟ ܙܢܳܐ ܗܰܘ ܕܶܐܬܶܐܡܰܪ ܡܶܢܰܢ ܡܶܢ ܠܥܶܠ. ܐܶܠܳܐ ܟܺܝܬ ܐܳܦ ܠܙܘܪܘܡܒܐܒܠ܆ ܬܪ̈ܰܝܗܽܘܢ ܡܶܬܥܰܗܕܺܝܢ ܠܶܗ. ܕܡܶܢܶܗ ܡܰܬܰܝ ܡܰܢ܆ ܠܰܐܒܝܽܘܕ ܐܳܡܰܪ ܕܺܐܝܬܰܘܗ̱ܝ. ܠܽܘܩܳܐ ܕܶܝܢ ܟܺܝܬ܆ ܠܪܺܝܣܐ. ܐܶܠܳܐ ܐܰܝܟ ܙܢܳܐ ܕܡܶܢ ܕܰܘܺܝܕ ܐܺܝܬܰܝܗܽܘܢ ܗ̱ܘܰܘ ܬܪ̈ܰܝܗܽܘܢ܆ ܫܠܝܡܘܢ ܘܢܳܐܬܳܢ ܒܢܰܝ̈ܳܐ ܬܪܶܝܢ܆ ܘܒܺܐܝ̈ܕܰܝܗܽܘܢ ܐܶܣܬܕܶܩ ܓܶܢܣܳܐ܆ ܘܰܠܘܳܬ ܝܰܘܣܶܦ ܗܰܘ ܡܟܺܝܪܳܗ̇ ܕܝܳܠܕܰܬ ܐܰ‌ܠܳܗܳܐ ܒܰܡܕܰܒܪܳܢܽܘܬܳܐ܆ ܒܝܰܕ ܐ̱ܚܝܳܢܽܘܬܳܐ ܗܳܝ ܟܝܳܢܳܝܬܳܐ ܘܗ̱ܝ ܢܳܡܽܘܣܳܝܬܳܐ ܠܳܗ̇ ܟܰܕ ܠܳܗ̇ ܐܰܟܚܕܳܐ ܐܶܬܳܐ܆ ܘܒܰܙܢܳܐ ܡܶܕܶܡ ܐܰܟܚܕܳܐ ܪܕܳܐ ܘܶܐܬܚܰܠܰܛ܆ ܒܳܗ̇ ܒܰܕܡܽܘܬܳܐ ܐܳܦ ܡܶܢ ܐܰܒܝܽܘܕ ܘܪܺܝܣܳܐ ܒܢܰܘܗ̱ܝ ܕܙܘܪܘܡܒܐܒܠ ܟܰܕ ܐܶܬܦܠܓ ܓܶܢܣܳܐ܆ ܠܘܳܬ ܝܰܘܣܶܦ ܒܶܗ ܒܰܙܢܳܐ ܫܰܘܝܳܐ ܪܗܶܛ ܐܰܟܚܕܳܐ.

ܠܳܐ ܕܶܝܢ ܬܡܺܝܗܳܐ܆ ܐܶܢ ܐܰܝܟ ܡܰܬܰܝ ܡܰܢ܆ ܡܶܢ ܐܰܒܪܳܗܳܡ ܥܕܰܡܳܐ ܠܝܰܘܣܶܦ ܐܰܪܒܥܺܝܢ ܘܰܬܪܶܝܢ ܦܰܪ̈ܨܽܘܦܶܐ ܐܶܬܡܢܺܝܘ܆ ܐܰܝܟ ܠܽܘܩܳܐ ܕܝܢ ܝܰܬܺܝܪ ܚܰܣܺܝܪ ܚܰܡܫܺܝܢ ܘܚܰܡܫܳܐ. ܟܰܕ ܓܶܝܪ ܓܶܢ̈ܣܶܐ ܡܫܰܚ̈ܠܦܶܐ ܐܺܝܬܰܝܗܽܘܢ ܗ̱ܘܰܘ܆ ܠܰܘ ܠܒܰܪ ܡܶܢ ܗܳܝ ܕܘܳܠܝܳܐ ܐܺܝܬܶܝܗ̇܆ ܕܗܰܘ ܡܰܢ ܢܶܣܓܶܐ ܒܝܰܠ̈ܕܶܐ܆ ܗܰܘ ܕܶܝܢ ܢܶܒܨܰܪ ܒܝܰܠ̈ܕܶܐ ܡܫܰܘܚܪ̈ܶܐ. ܒܩܽܘܪܒܳܐ ܗܳܟܺܝܠ ‌ܐܺܝܬ ܠܡܶܚܙܳܐ܆ ܒ̈ܳܬܶܐ ܕܰܐܚ̈ܶܐ ܬܪܶܝܢ ܐܶܢ ܬܶܓܕܰܫ. ܕܚܰܕ ܡܰܢ ܩܰܫܺܝܫ ܒܙܰܒܢܳܐ ܘܕܰܩܕܳܡ ܙܰܒܢܳܐ ܣܰܓܺܝܳܐܐ ܫܩܰܠ ‌ܐܰܢܬܬܳܐ܆ ܚܰܕ ܕܶܝܢ ܕܝܰܬܺܝܪ ܛܠܶܐ ܒܩܰܘܡܬܳܐ܆ ܘܕܰܠܚܰܪܬܳܐ ܐܶܬܥܢܺܝ ܥܰܡ ܙܽܘܘܳܓܳܐ. ܠܒܰܝܬܶܗ ܡܰܢ ܕܗܰܘ ܕܰܛܠܶܐ܆ ܕܠܰܬܠܳܬܳܐ ܕܳܪ̈ܶܐ ܪܒ̣ܳܐ ܘܰܫܘܰܚ ܡܶܢ ܟܰܕܽܘ ܘܰܒܝܰܠ̈ܕܶܐ ܣܰܓܺܝ̈ܶܐܐ ܥܰܒܺܝܛ܆ ܘܰܠܟܽܘܢܳܝܳܐ ܕܦܐܦܘܤ ܐܰܘܟܺܝܬ ܕܩܰܫܺܝܫܳܐ ܣܒܺܝܣܳܐܺܝܬ ܡܟܰܪܶܟ܆ ܠܒܰܝܬܶܗ ܕܶܝܢ ܕܗܰܘ ܕܩܰܫܺܝܫ܆ ܕܰܡܫܰܘܚܪܳܐܺܝܬ ܒܰܙܒܰܢ ܘܰܠܘܳܬܗܽܘܢ ܕܬܰܪ̈ܥܶܐ ܕܣܰܝܒܽܘܬܳܐ܆ ܠܗܰܘ ܕܺܐܝܬܰܘܗ̱ܝ ܒܰܛܺܝܠܳܐ ܡܶܢ ܥܳܒܽܘܕܽܘܬ ܒܢܰܝ̈ܳܐ܆ ܠܡܰܚܣܶܢ ܡܫܰܡܰܗ ܐܰܒܳܐ. ܡܳܢܳܐ ܗܳܟܺܝܠ ܬܡܺܝܗܳܐ܆ ܐܶܢ ܒܰܟܪܽܘܟܝܳܐ ܕܚܰܡܶܫܡܳܐܐ ܫ̈ܢܰܝܳܐ ܐܰܝܟ ܕܰܠܡܺܐܡܰܪ ܘܰܒܚܽܘܕܪܳܐ ܕܟܽܠܗܽܘܢ ܗܳܠܶܝܢ ܕܳܪ̈ܶܐ ܕܡܶܢ ܕܰܘܺܝܕ ܥܕܰܡܳܐ ܠܝܰܘܣܶܦ܆ ܚܰܕ ܡܶܢܗܽܘܢ ܕܓܶܢܣ̈ܶܐ܆ ܗܰܘ ܟܺܝܬ ܕܰܡܢܳܐ ܠܽܘܩܳܐ ܐܰܝܟ ܢܳܡܽܘܣܳܐ܆ ܣܓܳܐ ܘܰܪܒ̣ܳܐ ܒܩܰܠܺܝܠܽܘܬܳܐ ܕܝܰܠ̈ܕܶܐ ܠܰܥܣܰܪ ܫܰܪ̈ܒܳܬܳܐ ܐܰܘ ܠܝܰܬܺܝܪܳܐ܆ ܗܰܘ ܕܶܝܢ ܒܝܰܠ̈ܕܶܐ ܡܫܰܘܚܪ̈ܰܝ ܒܙܰܒܢܳܐ܆ ܝܰܬܺܝܪ ܒܛܺܝܠܳܐܺܝܬ ܪܕܳܐ.

ܘܡܶܢ ܐܰܝܟܳܐ ܝܺܕܺܝܥܳܐ ܢܺܐܡܰܪ ܐ̱ܢܳܫ܆ ܕܠܽܘܩܳܐ ܕܰܡܡܰܠܠܽܘܬ ܫܰܪ̈ܒܳܬܳܐ ܢܳܡܽܘܣܳܝܬܳܐ ܥܒܰܕ ܥܽܘܗܕܳܢܳܐ܆ ܘܠܰܘ ܐܰܝܟ ܡܰܬܰܝ ܡܰܠܽܘܢ ܐܳܦ ܗܽܘ ܥܒܰܕ ܕܗܳܝ ܟܝܳܢܳܝܬܳܐ ܟܽܠܳܗ̇. ܡܶܢܗܽܘܢ ܕܣܽܘܥܪ̈ܳܢܶܐ ܡܛܰܝܒܳܐܺܝܬ ܐܶܫܰܪܪܺܝܗ̇ ܠܗܳܕܶܐ. ܐܳܦ ܓܶܝܪ ܡܫܺܝܚܳܐ ܒܝܰܕ ܡܶܐܬܺܝܬܶܗ ܕܒܰܒܣܰܪ܆ ܘܳܐܦ ܠܡܰܦܽܘܠܬܶܗ ܕܰܟܝܳܢܳܐ ܕܺܝܠܰܢ ܐܶܬܳܐ ܕܰܢܩܺܝܡ ܘܢܰܐܣܶܐ܆ ܘܳܐܦ ܕܰܠܠܳܐ ܡܶܫܟܚܳܢܽܘܬܶܗ ܘܰܡܚܺܝܠܽܘܬܶܗ ܕܰܠܘܳܬ ܥܽܘܕܪܳܢܳܐ ܡܫܰܡܠܝܳܐ܆ ܘܛܶܠܳܢܳܝܽܘܬܶܗ ܕܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ ܢܫܰܪܰܪ ܘܢܰܚܠܶܡ܆ ܘܗܳܟܰܢܳܐ ܢܚܰܦܽܘܗ̱ܝ. ܗܳܕܶܐ ܓܶܝܪ ܐܳܦ ܥܒܰܕ܆ ܟܰܕ ܣܳܡ ܥܠܰܝܗܽܘܢ ܕܛܽܘܦ̈ܣܶܐ ܠܶܗ ܠܰܫܪܳܪܳܐ.

ܡܰܬܰܝ ܗܳܟܺܝܠ ܟܰܕ ܫܰܪܺܝ ܒܶܐܘܰܢܓܶܠܺܝܽܘܢ܆ ܘܰܟܬܰܒ ܟܬܳܒܳܐ ܕܰܗܘܳܝܶܗ ܕܝܶܫܽܘܥ ܡܫܺܝܚܳܐ܆ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ^[9]܆ ܡܶܚܕܳܐ ܒܥܶܩܒܳܗ̇ ܕܗܳܕܶܐ܆ ܦܰܪܣܳܗ̇ ܠܰܡܡܰܠܠܽܘܬ ܫܰܪ̈ܒܳܬܳܐ ܟܰܕ ܐܶܡܰܪ܆ ܐܰܒܪܳܗܳܡ ܝܺܠܶܕ ܠܺܐܝܣܚܳܩ. ܘܺܐܝܣܚܳܩ ܝܺܠܶܕ ܠܝܥܩܘܒ^[10]. ܘܟܰܕ ܠܗܳܢܽܘܢ ܕܡܶܢ ܚܽܘܠܛܳܢܳܐ ܕܰܠܒܰܪ ܡܶܢ ܢܳܡܽܘܣܳܐ ܐܶܬܺܝܠܶܕܘ ܐܶܬܥܗܰܕ܆ ܘܰܠܫܽܘܠܳܡܳܐ ܐܰܝܬܝܶܗ ܠܚܽܘܫܒܳܢ ܡܶܢܝܳܢܳܐ ܗܰܘ ܕܫܰܪ̈ܒܳܬܳܐ܆ ܡܶܚܕܳܐ ܐܰܝܬܺܝ ܒܳܬܪܶܗ܆ ܝܰܠܕܶܗ ܕܶܝܢ ܕܝܶܫܽܘܥ ܡܫܺܝܚܳܐ ܗܳܟܰܢܳܐ ܐܺܝܬܰܘܗ̱ܝ ܗ̱ܘܳܐ. ܟܰܕ ܓܶܝܪ ܐܶܬܡܰܟܪܰܬ ܡܰܪܝܰܡ ܐܶܡܶܗ ܠܝܰܘܣܶܦ܆ ܩܕܳܡ ܕܢܶܫܬܰܘܬܦܽܘܢ܆ ܐܶܫܬܰܟܚܰܬ ܕܒܰܛܢܳܐ ܡܶܢ ܪܽܘܚܳܐ ܩܰܕܺܝܫܳܐ^[11]. ܟܰܕ ܨܳܒܶܐ ܗ̱ܘܳܐ ܕܰܢܚܰܘܶܐ܆ ܕܠܽܘܩܒܰܠ ܡܰܘܠܳܕܳܐ ܕܺܝܠܰܢ ܕܳܝܽܘܒܳܐ܆ ܗܰܘ ܕܡܶܢ ܥܽܘܪܙܳܠܳܐ ܘܚܽܘܠܛܳܢܳܐ ܗܳܘܶܐ܆ ܘܠܰܚܒܳܠܳܐ ܘܰܠܡܰܘܬܳܐ ܡܫܰܕܰܪ܆ ܠܡܰܘܠܳܕܳܐ ܗܰܘ ܕܡܶܢ ܒܬܽܘܠܬܳܐ ܣܳܡ܆ ܕܰܠܠܳܐ ܡܳܝܽܘܬܽܘܬܳܐ ܡܰܘܒܶܠ܆ ܘܠܶܗ ܠܰܟܝܳܢܳܐ ܕܶܐܬܟܪܰܗ ܘܡܶܢ ܗܳܪܟܳܐ ܚܰܫ ܗܳܝ ܕܢܶܬܚܰܒܰܠ ܡܰܐܣܶܐ܆ ܘܡܰܣܶܩ ܠܘܳܬ ܗܳܝ ܕܡܶܢ ܫܽܘܪܳܝܳܐ ܘܩܰܕܡܳܝܬܳܐ. ܡܶܢ ܒܳܬܰܪ ܓܶܝܪ ܕܰܥܒܰܪ ܥܰܠ ܦܽܘܩܕܳܢܳܐ܆ ܘܰܫܡܰܥ ܗܳܝ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܶܗܦܽܘܟ ܬܺܐܙܰܠ^[12]܆ ܘܰܢܦܰܠ ܡܶܢ ܦܰܪܕܰܝܣܳܐ܆ ܗܳܝܕܶܝܢ ܚܟ̣ܰܡ ܐܳܕܳܡ ܠܚܰܘܳܐ ܐܰܢܬܬܳܐ ܕܺܝܠܶܗ. ܘܟܰܕ ܒܶܛܢܰܬ ܝܶܠܕܰܬ ܠܩܳܐܝܢ^[13].

ܠܽܘܩܳܐ ܕܶܝܢ ܠܰܘ ܗܳܟܰܢܳܐ. ܐܶܠܳܐ ܟܰܕ ܦܪܘܡܝܘܢ ܐܰܘܟܺܝܬ ܫܽܘܪܳܝܳܐ ܕܶܐܘܰܢܓܶܠܺܝܽܘܢ܆ ܥܒܰܕ ܠܬܰܫܥܺܝܬܳܐ ܕܺܝܠܺܝܕܽܘܬܶܗ ܕܝܽܘܚܰܢܳܢ ܡܰܥܡܕܳܢܳܐ ܘܪܰܗܳܛܳܐ ܩܰܕܡܳܝܳܐ܆ ܘܬܰܢܺܝ ܠܰܣܒܰܪܬܶܗ ܕܪܺܝܫ ܡܰܠܰܐܟ̈ܶܐ ܓܰܒܪܐܝܠ ܕܰܠܘܳܬ ܒܬܽܘܠܬܳܐ ܩܰܕܺܝܫܬܳܐ܆ ܘܰܠܒܰܛܢܳܐ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ܆ ܘܰܠܝܰܠܕܳܐ ܗܰܘ ܐܰ‌ܠܳܗܳܝܳܐ ܘܰܬܡܺܝܗܳܐ܆ ܘܰܐ̱ܚܪ̈ܳܢܝܳܬܳܐ ܣܰܓܺܝ̈ܳܐܬܳܐ ܡܫܰܚܠܦܳܐܺܝܬ ܟܬܰܒ܆ ܘܶܐܡܰܪ ܕܟܰܕ ܒܰܪ ܬܠܳܬܺܝܢ ܫ̈ܢܺܝܢ ܐܺܝܬܰܘܗ̱ܝ ܗ̱ܘܳܐ ܒܩܰܘܡܬܳܐ ܦܰܓܪܳܢܳܝܬܳܐ ܗܽܘ ܝܶܫܽܘܥ ܐܶܬܳܐ ܠܘܳܬ ܝܽܘܪܕܢܳܢ ܘܰܥܡܰܕ܆ ܡܰܠܽܘܢ ܕܶܝܢ ܘܰܨܒܰܥ ܐܶܢܽܘܢ ܠܡܰܝ̈ܳܐ ܒܡܰܚܰܬܬܶܗ ܘܝܰܗ̱ܒ ܠܗܽܘܢ ܩܰܕܺܝܫܽܘܬܳܐ܆ ܘܠܰܢ ܕܶܝܠܰܢ ܥܒܰܕ ܐܶܢܽܘܢ ܣܚܳܬܳܐ ܡܫܰܡܠܰܝܬܳܐ܆ ܩܰܕܺܝ̈ܫܶܐ܆ ܕܽܘܟܳܝܳܐ ܕܟܽܠܳܗ̇ ܚܛܺܝܬܳܐ ܘܕܰܡܠܶܝܢ ܟܽܠܗܶܝܢ ܡܰܘܗ̈ܒܳܬܳܐ ܕܪܽܘܚܳܐ܆ ܗܳܝܕܶܝܢ ܡܫܰܪܶܐ ܠܡܺܐܡܰܪ ܡܡܰܠܠܽܘܬ ܫܰܪ̈ܒܳܬܳܐ܆ ܟܰܕ ܠܦܰܪ̈ܨܽܘܦܶܐ ܗܳܢܽܘܢ ܕܰܐ̱ܚܝܳܢܽܘܬ ܓܶܢܣܳܐ ܗܳܝ ܕܰܒܢܳܡܽܘܣܳܐ ܡܶܬܝܰܕܥܳܐ ܡܳܢܶܐ. ܘܡܶܣܬܒܰܪ ܐܰܝܟܰܢ ܕܗܽܘ ܕܡܶܕܶܡ ܕܠܳܐ ܒܙܰܒܢܶܗ ܕܠܳܐ ܠܳܚܶܡ ܥܳܒܶܕ܆ ܐܰܝܟ ܗܰܘ ܕܡܶܢ ܫܶܢܬܳܐ ܐܶܬܬܥܺܝܪ܆ ܘܡܶܢ ܒܳܬܰܪ ܬܠܳܬܺܝܢ ܫ̈ܢܺܝܢ܆ ܓܶܢܣܳܐ ܡܶܫܬܰܥܶܐ ܘܰܡܬܰܢܶܐ ܠܰܢ. ܢܶܬܚܙܶܐ ܕܶܝܢ ܗܽܘ ܬܽܘܢܳܝܳܐ܆ ܐܳܦ ܕܣܰܓܺܝ ܒܙܰܒܢܶܗ ܐܺܝܬܰܘܗ̱ܝ܆ ܐܶܢܗܽܘ ܕܢܶܬܥܗܰܕ ܕܡܳܢܳܐ ܐܺܝܬܰܘܗ̱ܝ ܢܺܝܫܳܐ ܕܰܐ̱ܚܝܳܢܽܘܬ ܓܶܢܣܳܐ ܗܳܝ ܢܳܡܽܘܣܳܝܬܳܐ. ܡܳܢܰܘ. ܗܳܝ ܕܰܠܗܰܘ ܕܡܺܝܬ ܕܠܳܐ ܒܢܰܝ̈ܳܐ܆ ܡܶܢ ܙܽܘܘܳܓܳܐ ܬܪܰܝܳܢܳܐ ܢܶܗܘܶܐ ܠܶܗ ܒܪܳܐ܆ ܘܢܶܬܒܰܝܬܶܐ ܠܶܗ ܘܢܶܬܟܬܶܒ ܕܺܝܠܶܗ ܘܳܐܦ ܡܶܢ ܒܳܬܰܪ ܡܰܘܬܶܗ܆ ܘܰܢܩܽܘܡ ܫܡܶܗ. ܕܗܳܕܶܐ ܓܶܝܪ ܦܳܩ̈ܕܳܢ ܗ̱ܘܰܝ̈ ܡ̈ܶܠܶܐ ܗܳܠܶܝܢ ܟܳܗ̈ܢܳܝܳܬܳܐ܆ ܗܳܫܳܐ ܫܡܰܥܢܰܢ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܛܽܘܦܣܳܐ ܐܺܝܬ ܗ̱ܘܳܐ ܒܗܶܝܢ ܒܗܳܠܶܝܢ ܘܝܽܘܩܢܳܐ ܡܶܕܶܡ܆ ܐܳܦ ܕܣܳܝܽܘܡܽܘܬ ܒܢܰܝ̈ܳܐ ܐܳܦ ܕܰܩܝܳܡܬܳܐ.

ܡܶܛܽܠ ܗܳܟܺܝܠ ܕܡܰܥܡܽܘܕܺܝܬܳܐ ܣܳܝܽܘܡܽܘܬ ܒܢܰܝ̈ܳܐ ܫܰܪܺܝܪܬܳܐ ܘܰܫܡܰܝܳܢܺܝܬܳܐ ܝܳܗܒܳܐ܆ ܟܰܕ ܒܢܰܝ̈ܳܐ ܕܰܐ‌ܠܳܗܳܐ ܡܚܰܘܝܳܐ ܠܰܢ܆ ܘܰܒܡܰܘܬܶܗ ܕܝܶܫܽܘܥ ܡܶܫܬܰܡܠܝܳܐ ܘܰܒܣܰܒܪܳܐ ܕܰܩܝܳܡܬܳܐ܆ ܡܶܛܽܠܗܳܕܶܐ ܐܰ‌ܠܳܗܳܝܳܐ ܠܽܘܩܳܐ܆ ܡܶܢ ܒܳܬܰܪ ܕܰܥܡܰܕ ܝܶܫܽܘܥ ܐܶܬܥܗܰܕ ܠܰܡܡܰܠܠܽܘܬ ܫܰܪ̈ܒܳܬܳܐ ܗܳܝ ܢܳܡܽܘܣܳܝܬܳܐ܆ ܕܛܶܠܳܢܺܝܬܳܐ ܐܺܝܬ ܠܳܗ̇ ܕܣܳܝܽܘܡܽܘܬ ܒܢܰܝ̈ܳܐ ܘܕܰܩܝܳܡܬܳܐ܆ ܡܶܛܽܠ ܕܰܢܚܰܘܶܐ ܕܶܐܫܬܰܪܰܪ ܗܽܘ ܛܽܘܦܣܳܐ ܒܰܫܪܳܪܳܐ܆ ܘܶܐܬܚܰܠܡܰܬ ܟܪܺܝܗܽܘܬܶܗ ܕܢܳܡܽܘܣܳܐ ܒܝܰܕ ܛܰܝܒܽܘܬܳܐ. ܡܶܛܽܠܗܳܕܶܐ ܓܶܝܪ ܐܳܦ ܡܶܢ ܠܬܰܚܬ ܠܰܐܦܰܝ̈ ܠܥܶܠ ܡܰܣܶܩ ܠܳܗ̇ ܠܰܡܡܰܠܠܽܘܬ ܫܰܪ̈ܒܳܬܳܐ܆ ܘܰܡܩܺܝܡ ܠܳܗ̇ ܥܕܰܡܳܐ ܠܰܐܠܳܗܳܐ. ܟܰܕ ܡܰܘܕܰܥ ܕܛܰܝܒܽܘܬܳܐ ܗܝ ܕܰܒܝܰܕ ܡܰܥܡܽܘܕܺܝܬܳܐ܆ ܠܘܳܬ ܐ̱ܚܝܳܢܽܘܬ ܓܶܢܣܳܐ ܐܰ‌ܠܳܗܳܝܬܳܐ ܡܥܰܠܝܳܐ ܘܡܰܣܩܳܐ ܠܰܢ܆ ܟܰܕ ܒܢܰܝ̈ܳܐ ܕܰܐ‌ܠܳܗܳܐ ܥܳܒܕܳܐ ܠܰܢ܆ ܐܰܝܟ ܙܢܳܐ ܕܫܰܘܬܳܦܽܘܬܳܐ ܕܙܽܘܘܳܓܳܐ ܗܳܝ ܕܡܶܢ ܒܳܬܰܪ ܥܒܳܪ ܦܽܘܩܕܳܢܳܐ ܕܳܐܕܳܡ ܘܝܺܠܺܝܕܽܘܬܳܐ ܗܳܝ ܕܡܶܢܳܗ̇܆ ܠܬܰܚܬ ܐܰܚܬܰܬ̣ ܠܰܢ. ܕܗܳܝ ܟܰܕ ܠܨܰܠܡܳܐ ܕܺܝܠܳܗ̇ ܡܡܰܠܶܐ ܡܰܬܰܝ܆ ܠܰܡܡܰܠܠܽܘܬ ܫܰܪ̈ܒܳܬܳܐ ܗܳܝ ܟܝܳܢܳܝܬܳܐ܆ ܒܰܕܡܽܘܬ ܓܺܝܓܠܳܐ ܥܰܪܓܶܠ ‌ܐܰܚܶܬ ܠܰܐܦܰܝ̈ ܠܬܰܚܬ.

ܕܡܰܥܡܽܘܕܺܝܬܳܐ ܕܶܝܢ ܚܰܝܠܳܐ ܕܣܳܝܽܘܡܽܘܬ ܒܢܰܝ̈ܳܐ ܐܺܝܬ ܠܳܗ̇܆ ܣܳܗܶܕ ܦܰܘܠܽܘܤ ܕܡܰܙܥܶܩ ܕܰܢܣܰܒܬܽܘܢ ܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ^[14]܆ ܘܳܐܦ ܗܽܘ ܡܳܪܰܢ ܕܳܐܡܰܪ܆ ܕܶܐܢ ܠܳܐ ܢܶܬܺܝܠܶܕ ܐ̱ܢܳܫ ܡܶܢ ܡܰܝ̈ܳܐ ܘܪܽܘܚܳܐ܆ ܠܳܐ ܡܶܫܟܰܚ ܕܢܶܥܽܘܠ ܠܡܰܠܟܽܘܬܐ ܕܰܐ‌ܠܳܗܳܐ^[15].

ܕܳܐܦ ܪܰܗܒܽܘܢܳܐ ܕܶܝܢ ܐܺܝܬܶܝܗ̇ ܕܰܩܝܳܡܬܳܐ. ܬܽܘܒ ܗܽܘ ܟܰܕ ܗܽܘ ܦܰܘܠܽܘܤ ܡܚܰܘܶܐ܆ ܟܰܕ ܠܘܳܬ ܪ̈ܽܘܡܳܝܶܐ ܟܳܬܶܒ ܗ̱ܘܳܐ ܒܗܳܠܶܝܢ ܡ̈ܶܠܶܐ. ܐܰܘ ܠܳܐ ܝܳܕܥܺܝܢ ܐܢ̱ܬܽܘܢ܆ ܕܟܽܠܢ ܐܰܝܠܶܝܢ ܕܰܥܡܰܕܢܰܢ ܒܰܡܫܺܝܚܳܐ ܝܶܫܽܘܥ܆ ܒܡܰܘܬܶܗ ܗܘ ܥܡܰܕܢܰܢ. ܐܶܬܩܒܰܪܢܰܢ ܗܳܟܺܝܠ ܥܰܡܶܗ ܐܰܟܚܕܳܐ ܒܝܰܕ ܡܰܥܡܽܘܕܺܝܬܳܐ ܠܡܰܘܬܳܐ. ܐܰܝܟܰܢܳܐ ܕܰܐܝܟ ܙܢܳܐ ܕܩܳܡ ܡܫܺܝܚܳܐ ܡܶܢ ܡܺܝ̈ܬܶܐ ܒܝܰܕ ܬܶܫܒܽܘܚܬܳܐ ܕܰܐܒܳܐ܆ ܗܳܟܰܢܳܐ ܐܳܦ ܚܢܰܢ ܒܚܰܕܬ̣ܽܘܬ̣ܳܐ ܕܚܰܝ̈ܶܐ ܢܗܰܠܶܟ^[16]. ܐܶܢ ܓܶܝܪ ܫܰܘ̈ܝ̣ܰܝ̣ ܒܡܰܘܥܺܝܬܳܐ ܗܘ̣ܰܝܢܰܢ ܠܶܗ ܒܕܽܘܡܝܳܐ ܕܡܰܘܬܶܗ܆ ܐܶܠܳܐ ܐܳܦ ܕܰܩܝܳܡܬܶܗ ܢܶܗܘܶܐ. ܡܶܛܽܠ ܗܳܕܶܐ ܓܶܝܪ܆ ܐܳܦ ܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ ܐܶܬܟܰܢܺܝܘ ܗܶܢܽܘܢ ܡܰܝ̈ܳܐ ܗܳܢܽܘܢ ܕܪܽܘܚܳܐ ܐܰ‌ܠܳܗܳܝܳܐ^[17]. ܐܰܝܟܰܢܳܐ ܟܺܝܬ ܕܡܳܕܶܝܢ ܡܰܥܡܽܘܕܺܝܬܳܐ ܕܰܡܫܰܟܢܳܐ ܣܳܝܽܘܡܽܘܬ ܒܢܰܝ̈ܳܐ܆ ܡܰܫܟܢܳܐ ܫܰܪܺܝܪܳܐ ܘܠܳܐ ܕܰܓܳܠܳܐ ܕܰܩܝܳܡܬܳܐ ܐܺܝܬܶܝܗ̇. ܐܶ‌ܠܽܘ ܓܶܝܪ ܠܳܐ ܐܺܝܬ ܗ̱ܘܳܐ ܩܝܳܡܬܳܐ܆ ܠܳܐ ܐܺܝܬ ܗ̱ܘܳܐ ܐܳܦܠܳܐ ܡܰܥܡܽܘܕܺܝܬܳܐ܆ ܗܳܝ ܕܥܰܠ ܣܰܒܪܳܐ ܕܰܩܝܳܡܬܳܐ ܡܶܬܝܰܗܒܳܐ. ܕܡܶܢ ܗܳܪܟܳܐ ܛܽܘܦܣܳܐ ܗܰܘ ܕܰܐ̱ܚܝܳܢܽܘܬ ܓܶܢܣܳܐ ܗܳܝ ܢܳܡܽܘܣܳܝܬܳܐ܆ ܠܗܰܘ ܕܰܥܢܰܕ ܘܺܐܝܬܰܘܗ̱ܝ ܗ̱ܘܳܐ ܡܺܝܬܳܐ܆ ܒܝܰܕ ܣܳܝܽܘܡܽܘܬ ܒܢܰܝ̈ܳܐ ܡܫܰܟܶܢ ܗ̱ܘܳܐ ܠܶܗ ܩܝܳܡܬܳܐ ܗܳܝ ܕܰܐܝܟ ܕܰܒܝܽܘܩܢܳܐ ܘܰܒܛܶܠܳܢܺܝܬܳܐ ܡܶܣܬܰܒܪܳܐ ܗ̱ܘܳܬ. ܗܳܝ ܕܰܠܘܳܬܳܗ̇ ܟܰܕ ܚܳܐܰܪ ܗ̱ܘܳܐ ܗܰܘ ܡܰܠܦܳܢܳܐ ܕܥܰܡ̱ܡ̈ܶܐ ܟܳܬܶܒ ܗ̱ܘܳܐ ܠܗܽܘܢ ܠܩܽܘܪ̈ܝܢܬܳܝܶܐ܆ ܕܶܐܢ ܣܳܟ ܡܺܝ̈ܬܶܐ ܠܳܐ ܩܳܝܡܺܝܢ܆ ܠܡܳܢܳܐ ܐܳܦ ܥܳܡܕܺܝܢ ܚܠܳܦܰܝܗܽܘܢ^[18]. ܟܽܠ ܚܰܕ ܡܶܢܰܢ ܓܶܝܪ ܟܰܕ ܠܰܩܝܳܡܬܳܐ ܥܳܡܶܕ܆ ܒܝܰܕ ܗܳܝ ܕܰܐܟܚܕܳܐ ܡܶܬܩܒܰܪ ܒܕܽܘܡܝܳܐ ܕܡܰܘܬܶܗ ܕܰܡܫܺܝܚܳܐ܆ ܚܠܳܦ ܣܰܒܪܳܐ ܕܡܺܝ̈ܬܶܐ ܥܳܡܶܕ.

ܠܗܳܕܶܐ ܗܦܳܟܬܳܐ ܐܰܘܟܺܝܬ ܣܰܩܽܘܒܠܳܝܽܘܬ ܣܳܝܡܳܐ܆ ܕܰܦܠܺܝܓܽܘܬܳܐ ܐܰܘܟܺܝܬ ܠܳܐ ܫܰܠܡܽܘܬܳܐ ܗܳܝ ܕܡܶܣܬܰܒܪܳܐ ܕܰܡܡܰܠܠܽܘܬ ܫܰܪ̈ܒܳܬܳܐ ܢܶܛܪܶܬ ܠܟܽܘܢ ܝܰܘܡܳܢܳܐ܆ ܚܕܳܐ ܘܒܰܠܚܽܘܕܶܝܗ̇ ܐܰܝܟ ܐܰܝ̇ܕܳܐ ܕܡܶܣܬܰܒܪܳܐ ܗ̱ܘܳܬ ܝܰܬܺܝܪܳܐ ܝܰܬܺܝܪ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܕܝܰܬܺܝܪ ܐܺܝܬܶܝܗ̇ ܫܳܘܝܰܬ ܠܡܶܬܗܰܝܡܳܢܽܘ܆ ܘܰܕܥܰܠ ܫܪܳܝܳܐ ܫܰܘܝܳܐ ܘܰܕܦܳܚܶܡ ܠܳܗ̇ ܣܢܺܝܩܳܐ ܘܥܰܠ ܢܽܘܗܳܪܳܐ ܣܰܓܺܝܳܐܐ. ܠܗܳܝ ܕܥܰܡ ܡ̈ܶܠܶܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ ܐܪܥܬܗ̇܆ ܒܰܕܡܽܘܬ ܝܽܘܠ̈ܦܳܢܶܐ ܐܰܘܟܺܝܬ ܕܽܘܪ̈ܳܫܶܐ ܡܢܰܦ̈ܩܳܢܶܐ܆ ܗܳܠܶܝܢ ܕܗܳܢܽܘܢ ܡܢܰܦ̈ܩܰܝ ܛܠܳܝ̈ܶܐ ܡܰܙܥܩܺܝܢ ܘܡܰܠܦܺܝܢ ܠܗܳܢܽܘܢ ܕܢܳܚܬܺܝܢ ܕܰܐܪܳܐ. ܐܺܝܬ ܗ̱ܘ ܓܶܝܪ ܗܳܢܳܐ ܥܝܳܕܳܐ܆ ܐܳܦ ܒܕܰܐܪ̈ܶܐ ܦܰܓܪ̈ܳܢܳܝܶܐ܆ ܕܠܰܐܬܠܺܝ̈ܛܶܐ ܗܳܢܽܘܢ ܕܝܰܬܺܝܪ ܪܰܘܪ̈ܒܺܝܢ ܛܳܒ ܡܶܢ ܗܳܢܽܘܢ ܐ̱ܚܪ̈ܳܢܶܐ܆ ܘܺܐܝܬܰܝܗܽܘܢ ܫܳܘ̈ܝ̣ܰܝ̣ ܠܡܶܬܗܰܝܡܳܢܽܘ ܘܫܰܘ̈ܝ̣ܰܝ̣ ܒܕܰܐܪ̈ܶܐ ܠܰܚ̈ܕܳܕܶܐ܆ ܢܶܛܪܽܘܢ ܐܶܢܽܘܢ ܡܛܰܝܒܳܐܺܝܬ ܡܶܛܽܠܳܬܶܗ ܕܣܽܘܥܪܳܢܳܐ܆ ܠܘܳܬ ܗܳܝ ܕܢܶܬܟܰܬܫܽܘܢ ܥܰܠ ‌ܐܰܦܰܝ̈ ܗܳܝ ܕܢܶܬܟܰܠܠܽܘܢ.

ܠܡܳܢܳܐ ܗܳܟܺܝܠ ‌ܐܢ̱ܬܽܘܢ ܠܳܐ ܙܰܕܶܩܬܽܘܢ ܠܶܗ ܟܠܺܝܠܐ ܠܰܫܪܳܪܳܐ܆ ܟܰܕ ܗܳܟܰܢܳܐ ܕܢܺܝܚܳܐܺܝܬ ܙܟܳܐ܆ ܘܡܶܢ ܟܽܠ ܠܒܽܘܟܝܳܐ ܦܠܰܛ. ܐܰܘ ܠܗܳܢܳܐ ܡܶܢ ܩܕܳܡܰܝܟܽܘܢ ܐܰ‌ܠܳܗܶܗ ܟܰܠܠܶܗ܆ ܐܰܝܟܰܢܳܐ ܕܳܐܦ ܟܬܳܒܳܐ ܟܳܗܢܳܝܳܐ ܕܥܶܙܪܳܐ ܐܳܡܰܪ ܗܳܟܰܢܳܐ. ܘܰܫܪܳܪܳܐ ܪܰܒ ܘܝܰܬܺܝܪ ܚܰܝܠܬܳܢ ܛܳܒ ܡܶܢ ܟܽܠ. ܟܽܠܳܗ̇ ܐܰܪܥܳܐ ܠܰܫܪܳܪܳܐ ܩܳܪܝܳܐ. ܘܰܫܡܰܝܳܐ ܠܶܗ ܡܒܰܪܶܟ. ܘܟܽܠܗܽܘܢ ܥܒ̈ܳܕܶܐ ܙܳܝܥܺܝܢ ܘܪܳܥܠܺܝܢ. ܘܠܳܐ ܐܺܝܬ ܡܶܢ ܒܳܬܪܶܗ ܘܠܳܐ ܡܶܕܶܡ.

ܐܶܠܳܐ ܗܳܢܽܘܢ ܕܰܠܘܳܬ ܕܳܐܦܢܰܐ ܚܰܢܦܳܐܺܝܬ ܣܠܶܩܘ܆ ܠܰܫܪܳܪܳܐ ܗܰܘ ܕܗܳܟܰܢܳܐ ܕܚܺܝܠ܆ ܗܰܘ ܕܡܶܢܶܗ ܟܽܠ ܙܳܐܰܥ ܘܪܳܥܶܠ܆ ܐܰܝܟ ܠܳܐ ܡܶܕܶܡ ܚܰܫܒܽܘܗ̱ܝ. ܐܶܠܳܐ ܒܥܶܕܳܢܳܐ ܚܶܫܽܘܟܳܐ ܕܠܰܝ̈ܠܰܘܳܬܳܐ܆ ܠܰܡ̈ܦܺܝܕܶܐ ܕܡܶܢ ܩܺܝܪܽܘܬܳܐ ܡܰܕܠܩܺܝܢ ܗ̱ܘܰܘ ܒܶܗ ܒܰܣܛܰܐܕܝܘܢ ܘܣܳܝܡܺܝܢ ܗ̱ܘܰܘ ܒܶܣ̈ܡܶܐ܆ ܟܰܕ ܠܰܐܒܕܳܢܳܐ ܒܰܝܬܳܝܳܐ ܕܺܝܠܗܽܘܢ ܓܳܢܒܺܝܢ ܗ̱ܘܰܘ. ܘܰܠܗܳܕܶܐ ܫܰܦܺܝܪ ܕܰܥܘ܆ ܐ̱ܢܳܫܺܝ̈ܢ ܡܶܢ ܐܰܟܣ̈ܢܳܝܶܐ ܐܰܘܕܥܽܘܢܝ܆ ܟܰܕ ܡܶܬܬܰܢܚܺܝܢ ܘܰܡܕܰܡܥܺܝܢ. ܐܰܪܰܐ ܠܳܐ ܚܳܙܶܝܢ ܐܢ̱ܬܽܘܢ ܠܢܶܫ̈ܒܶܐ ܕܳܐܟܶܠܩܰܪܨܳܐ ܘܰܠܦܰܚܰܘ̈ܗ̱ܝ ܡܛܰܫ̈ܰܝܳܐ܆ ܗܳܠܶܝܢ ܕܥܶܠܬܳܐ ܡܰܢ ܐܺܝܬ ܠܗܽܘܢ ܐܰܝܟ ܕܰܒܩܰܕܺܝܡܽܘܬ ܐܶܣܟܺܡܳܐ ܦܨܺܝܚܽܘܬܳܐ ܘܦܽܘܪܓܳܝܳܐ܆ ܠܘܳܬ ܕܶܚܠܰܬ ܫ̈ܺܐܕܶܐ ܕܶܝܢ ܡܰܘܒܠܺܝܢ܆ ܘܰܠܘܳܬ ܫܽܘܡܠܳܝ ܥܻ̈ܐܕܶܐ ܡܶܕܡ ܥܰܢ̈ܳܬܳܐ ܘܡܰܚܣܪ̈ܳܢܶܐ܆ ܘܠܳܐ ܒܳܗܬܺܝܢ ܚ̱ܢܰܢ ܕܟܰܕ ܟܪ̈ܺܝܣܛܝܳܢܶܐ ܡܶܬܩܪܶܝܢܰܢ܆ ܘܡܶܢ ܠܥܶܠ ܝܺܠܺܝܕܺܝܢ ܚ̱ܢܰܢ ܒܕܽܘܟܳܝܳܐ ܕܡܶܢ ܡܰܝ̈ܳܐ ܘܪܽܘܚܳܐ܆ ܘܰܒܢܰܝ̈ܳܐ ܕܰܐ‌ܠܳܗܳܐ ܡܶܫܬܰܡܗܺܝܢܰܢ܆ ܐܳܦ ܠܘܳܬ ܚܰܓ̈ܶܐ ܤܳܛܳܢܳܝ̈ܶܐ ܪܳܗܛܺܝܢܰܢ܆ ܗܳܢܽܘܢ ܕܰܟܦܰܪܢܰܢ ܒܗܽܘܢ ܩܕܳܡ ܥܡܳܕܳܐ ܐܰ‌ܠܳܗܳܝܳܐ܆ ܐܶܡܰܬܝ ܓܶܝܪ ܕܰܬܚܰܠܶܦ ܡܰܢ ܠܒܽܘܫܳܐ܆ ܒܳܬܰܪܟܶܢ ܕܶܝܢ ܠܘܳܬ ܚܙܳܬܳܐ ܬܶܣܰܩ܆ ܟܰܕ ܟܽܘܬܺܝܢܽܘܢܺܝܬܳܐ ܙܥܽܘܪܬܳܐ ܕܟܶܬܳܢܳܐ ܠܒܺܝܫ ܐܰܢ̱ܬ܆ ܕܰܠܟܰܬܦ̈ܳܬܳܐ ܡܚܰܦܝܳܐ ܘܠܰܘ ܠܺܐܝ̈ܕܰܝܳܐ܆ ܘܰܠܫܰܒܛܳܐ ܕܢܰܐܪܬܝܟܤ ܠܥܶܠ ܡܙܺܝܥ ܐܰܢ̱ܬ܆ ܘܟܽܠܶܗ ܡܶܫܟܳܟ ܐܰܝܟ ܕܰܠܡܺܐܡܰܪ ܓܪܺܝܥ ܠܳܟ ܒܰܡܕܰܟܝܳܐ܆ ܠܳܐ ܗܳܐ ܓܰܠܝܳܐܺܝܬ ܥܒܰܕܬ ܙܽܘܝܳܚܳܐ܆ ܘܶܐܫܬܰܡܠܺܝܬ ܠܳܟ ܠܙܘܤ ܗܰܘ ܐܰ‌ܠܽܘܡܦ̊ܝܐ.

ܡܢܐ ܕܶܝܢ. ܥܕܰܡܳܐ ܠܶܐܣܟܺܡܳܐ ܒܰܠܚܽܘܕ ܩܳܐܶܡ ܚܽܘܣܪܳܢܳܐ܆ ܠܦܰܓܪܳܐ ܕܶܝܢ ܠܳܐ ܡܚܰܒܶܠ܆ ܘܰܠܘܳܬ ܐܰܒܕܳܢܳܐ ܕܢܰܦܫܳܐ ܐܳܬܶܐ܆ ܙܘܤ ܓܶܝܪ ܗܰܘ ܐ‌ܘܠܘܡܦܝܘܤ ܗܰܘ ܚܰܝܠܬܳܢܳܐ܆ ܠܢܶܫ̈ܶܐ ܡܰܢ ܛܳܪܶܕ ܡܶܢ ܚܙܳܬܳܐ܆ ܥܰܠ ܛܠܳܝ̈ܶܐ ܕܶܝܢ ܕܶܟܪ̈ܶܐ ܫܳܢܶܐ܆ ܘܡܶܢ ܬܰܡܳܢ ܛܰܠܝܽܘܢܳܐ ܦܪܽܘܓܳܝܳܐ ܓܐܢܘܡܝܕܝܤ ܡܳܙܶܓ ܠܶܗ. ܘܣܰܓܺܝ̈ܶܐܐ ܟܰܕ ܒܰܐܠܳܗܳܐ ܕܺܝܠܗܽܘܢ ܨܰܚܢܳܐ ܛܳܢܶܝܢ܆ ܕܶܟܪ̈ܶܐ ܒܕܶܟܪ̈ܶܐ ܒܶܗܬܬ̣ܳܐ ܦܳܠܚܺܝܢ. ܙܳܕܶܩ ܓܶܝܪ ܕܰܫܠܺܝܚܳܐܺܝܬ ܘܰܡܚܰܦܝܳܐܺܝܬ ܟܡܳܐ ܕܡܶܫܟܚܳܐ ܢܺܐܡܪܝܗ̇ ܠܰܫܟܺܝܪܽܘܬܳܐ. ܢܶܬܒܰܝܢܽܘܢ ܐܰܒܳܗ̈ܶܐ ܕܠܰܐܝܢܳܐ ܚܰܒܪܳܐ ܡܰܪܫܠܺܝܢ ܡܫܰܡܪܺܝܢ ܠܰܒ̈ܢܰܝܗܽܘܢ܆ ܕܒܰܚܒܳܠܳܐ ܘܠܰܘ ܒܦܽܘܪܓܳܝܳܐ ܢܶܫܬܰܘܬܦܽܘܢ܆ ܟܰܕ ܠܘܳܬ ܚܙܳܬܳܐ ܡܫܰܕܪܺܝܢ ܠܗܽܘܢ.

ܡܶܬܕܰܡܰܪ ܐ̱ܢܳܐ ܕܶܝܢ ܐܰܝܟܰܢܳܐ ܗܰܘ ܡܝܰܬܪܳܐ ܙܘܤ܆ ܠܳܐ ܡܦܺܝܤ ܠܶܗ ܠܰܐܦܘܠܘܢ ܗܰܘ ܕܡܶܢ ܩܽܘܪܒܳܐ ܕܠܳܐ ܢܶܪܚܡܺܝܗ̇ ܠܕܳܐܦܢܰܐ܆ ܐܰܝܟܰܢܳܐ ܕܠܳܐ ܢܟܰܢܶܟ ܠܰܚܙܳܬܳܐ^[19]. ܐܶܠܳܐ ܠܰܘ ܡܶܬܬܦܺܝܣܳܢܰܐ ܗ̄ܘ ܠܘܳܬ ܡܰܠܟܳܐ܆ ܕܰܗܒܐ ܗܰܘ ܕܕܐܢܐܝ. ܩܘܩܢܘܤ ܗܰܘ ܕܠܝܕܐ. ܗܰܘ ܕܰܠܘܳܬ ܚ̈ܙܳܬܶܐ ܣܰܓܺܝ̈ܳܐܬܳܐ ܐܶܣܬܰܟܰܡ ܘܶܐܫܬܰܚܠܰܦ܆ ܘܟܶܢܫܳܐ ܕܢܶܫ̈ܶܐ ܣܰܓܺܝ̈ܳܐܬܳܐ ܚܰܒܶܠ. ܘܠܳܐ ܐܺܝܬ ܠܗܽܘܢ ܠܚܰܟܺܝ̈ܡܶܐ ܘܰܡܗܺܝܪ̈ܶܐ ܠܡܺܐܡܰܪ܆ ܕܡ̈ܰܬܠܐ ܐܶܢܽܘܢ ܗܳܠܶܝܢ ܘܰܓܒܽܘ̈ܠܝܶܐ܆ ܐܳܦ ܓܶܝܪ ܐܺܝܬ ܐܶܡܰܬܝ ܕܟܰܕ ܡܶܬܚܰܡܨܺܝܢ ܒܗܳܠܶܝܢ ܓܚܺܝ̈ܟܳܬܳܐ܆ ܠܘܳܬ ܡ̈ܶܠܶܐ ܕܕܰܐܝܟ ܗܳܟܰܢ ܡܶܬܓܰܘܣܺܝܢ. ܫܽܘܘ̈ܕܳܥܶܐ ܓܶܝܪ ܕܫܽܘܡ̈ܠܳܝܶܐ ܗܳܠܶܝܢ ܕܰܡܫܰܡܠܶܝܢ܆ ܡܶܢܗܽܘܢ ܕܡ̈ܰܬܠܶܐ ܗܳܠܶܝܢ ܘܫܽܘ̈ܥܝܳܬܳܐ ܐܺܝܬ ܠܗܽܘܢ ܥܶܠ̈ܠܳܬܐ܆ ܐܰܝܟ ܕܳܐܦ ܒܦܶܬܓܳܡ̈ܶܐ ܘܒܰܙܡܺܝܪ̈ܳܬܳܐ ܕܦܽܘܐܝ̈ܛܶܐ ܢܶܬܚܰܫܚܽܘܢ܆ ܗܳܢܽܘܢ ܕܰܠܘܳܬܗܽܘܢ ܗܳܠܶܝܢ ܕܗܳܟܰܢܳܐ ܫܟܺܝܪ̈ܳܢ܆ ܐܳܦ ܒܩܺܝܢܬܳܐ ܡܰܬܩ̈ܢܳܢ܆ ܐܳܦ ܒܡܽܘܫ̈ܚܳܬܳܐ ܥܒܺܝ̈ܕܳܢ. ܟܰܕ ܙܳܕܶܩ ܗ̱ܘܳܐ ܕܰܒܐ̱ܪ̈ܳܙܶܐ ܐܶܢܗܽܘ ܟܺܝܬ ܕܫܰܪܺܝܪ̈ܶܐ ܐܺܝܬܰܝܗܽܘܢ ܗ̱ܘܰܘ ܘܠܰܘ ܡܣܰܝ̈ܒܶܐ܆ ܟܽܠ ܡܶܕܶܡ ܕܺܐܝܬܰܘܗ̱ܝ ܗ̱ܘܳܐ ܡܰܬܠܳܢܳܝܳܐ ܘܰܕܠܫܟܺܝܪܽܘܬܳܐ ܡܰܝܬܶܐ܆ ܢܶܫܬܕܶܐ ܠܒܰܪ.

ܟܰܕ ܣܰܓܺܝ̈ܳܐܬܳܐ ܕܶܝܢ ܐܺܝܬ ܗ̱ܘܳܐ ܠܺܝ ܕܺܐ݀ܡܰܪ ܐܳܦ ܐ̱ܚܪ̈ܳܢܝܳܬܳܐ܆ ܕܰܠܚܰܣܺܝܪܽܘܬ ܗܰܘܢܳܐ ܕܺܝܠܗܽܘܢ ܡܒܰܙ̈ܚܳܢ ܗ̱ܘܰܝ̈܆ ܕܗܳܢܽܘܢ ܕܰܠܚܰܫ̈ܶܐ ܒܰܝ̈ܬܳܝܶܐ ܕܺܝܠܗܽܘܢ ܡܝܰܩܪܺܝܢ܆ ܘܰܚܦܺܝܛܺܝܢ ܕܨܰܚܢܽܘܬܳܐ ܕܺܝܠܗܽܘܢ ܢܶܗܘܽܘܢ ܐܺܝܬ ܠܗܽܘܢ ܐܰ‌ܠܳܗ̈ܶܐ ܣܢܺܐܓܪ̈ܶܐ܆ ܟܳܠܶܐ ܐ̱ܢܳܐ ܠܶܗ ܠܡܺܐܡܪܳܐ܆ ܕܰܠܘܳܬ ܠܳܐ ܡܡܰܫܚܽܘܬܳܐ ܢܳܦܶܩ܆ ܘܰܡܫܰܒܰܚ ܐ̱ܢܳܐ ܠܰܡܫܺܝܚܳܐ܆ ܗܰܘ ܕܡܶܢ ܛܳܥܝܽܘܬܳܐ ܕܰܐܝܟ ܗܳܕܶܐ ܐܰܓܗܺܝ ܠܰܢ܆ ܘܡܶܢ ܥܰܒܕܽܘܬܳܐ ܕܫ̈ܺܐܕܶܐ ܚܪܪ ܠܢ. ܕܠܶܗ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܳܐ ܕܬܫܥܝܢ ܘܚܰܡܫܳܐ.

ܝܘܚܢܢ. 1: 1  ܐܦ ܡܬܝ. 1: 1 [1]

ܙܟܪܝܐ. 7: 11[2]

ܡܬܝ. 11: 15 [3]

ܠܘܩܐ. 3: 23[4]

ܬܢܝܢ ܢܡܘܣܐ. 25: 5 ـ 6 [5]

ܪܳܥܘܬ. 4: 4 [6]

ܪܳܥܘܬ. 4: 6 [7]

ܪܳܥܘܬ. 4: 10[8]

ܡܬܝ. 1: 1 [9]

ܡܬܝ. 1: 2 [10]

ܡܬܝ. 1: 18[11]

ܣܶܦܪܐ ܕܒܪܝܬܐ. 3: 19 [12]

ܣܶܦܪܐ ܕܒܪܝܬܐ. 4: 1 [13]

ܪ̈ܗܘܡܝܐ. 8: 15 [14]

ܝܘܚܢܢ. 3: 5[15]

ܪ̈ܗܘܡܝܐ. 6: 3 ـ 5 [16]

ܛܛܘܣ. 3: 5 [17]

ܐ. ܩܘܪ̈ܝܢܬܝܐ. 15: 29[18]

ܠܚܶܙܘܢܐ ܗܰܘ ܕܚܳܙܶܝܢ ܒܬܐܛܪܘܢ ܐܳܡܰܪ.[19]