ܡܺܐܡܪܳܐ ܕܬܶܫܥܺܝܢ ܘܰܐܪܒܥܳܐ

ܠܘܳܬ ܐ̱ܢܳܫܺܝ̈ܢ ܗܳܢܽܘܢ ܕܶܐܬܦܰܫܰܟܘ ܟܰܕ ܐܶܬܩܪܺܝ ܪܺܝܫܳܐ ܕܶܐܘܰܢܓܶܠܺܝܽܘܢ ܗܰܘ ܕܡܰܬܰܝ܆ ܡܶܛܽܠ ܡܡܰܠܠܽܘܬ ܫܰܪ̈ܒܳܬܳܐ ܘܰܗܘܳܝܳܐ ܕܒܰܒܣܰܪ܆ ܕܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ.

94: ܒܚܰܕ ܒܫܰܒܳܐ ܗܳܢܳܐ ܕܰܥܒܰܪ܆ ܟܰܕ ܪܺܝܫܳܐ ܕܶܐܘܰܢܓܶܠܺܝܽܘܢ ܕܡܰܬܰܝ ܐܶܬܩܪܺܝ ܠܟܽܘܢ܆ ܠܰܘ ܒܙܰܒܢܶܗ ܡܰܢ܆ ܝܳܕܥܺܝܢ ܐܢ̱ܬܽܘܢ ܗ̱ܘ ܓܶܝܪ ܕܪܰܚܺܝܩ ܗ̱ܘ ܥܺܐܕܳܐ ܗܰܘ ܕܕܶܢܚܳܐ ܐܰ‌ܠܳܗܳܝܳܐ ܘܕܺܝܠܺܝܕܽܘܬܶܗ ܕܒܰܒܣܰܪ ܕܦܳܪܽܘܩܰܢ܆ ܐܶܬܩܪܺܝ ܕܶܝܢ ܒܪܰܡ܆ ܡܶܛܽܠ ܕܳܐܦ ܟܽܠܗܶܝܢ ܠܙܰܒܢܳܐ ܕܙܳܕܶܩ ܢܛܺܝܪ̈ܳܢ ܘܣܺܝ̈ܡܳܢ܆ ܘܳܐܦ ܩܶܪ̈ܝܳܢܶܐ ܕܠܳܚܡܺܝܢ ܐܳܦ ܠܥܻ̈ܐܕܶܐ ܘܳܐܦ ܠܫܰܪ̈ܒܶܐ ܐ̱ܚܪ̈ܳܢܶܐ܆ ܡܶܢ ܐܰܒܳܗ̈ܳܬܳܐ ܘܡܶܢ ܗܳܢܽܘܢ ܕܰܪܥܰܘ ܐܶܢܶܝܢ ܠܥܻ̈ܕܳܬܳܐ ܡܠܰܚܡܺܝܢ ܘܰܡܬܰܩܢܺܝܢ܆ ܐ̱ܢܳܫܺܝ̈ܢ ܡܰܢ ܡܶܢ ܗܳܢܽܘܢ ܕܰܫܡܰܥܘ ܟܰܕ ܐܶܬܰܘ ܠܘܳܬܝ ܡܶܢ ܒܳܬܰܪ ܗܳܠܶܝܢ ܐܳܡܪܺܝܢ ܗ̱ܘܰܘ܆ ܡܳܢܳܐ ܝܽܘܬܪܳܢܳܐ ܕܗܳܝ ܕܢܶ݀ܫܡܰܥ܆ ܕܰܦܠܳܢ ܐܰܘܠܶܕ ܠܰܦܠܳܢ܆ ܘܰܦܠܳܢ ܠܰܦܠܳܢ܆ ܘܰܒܣܽܘܓܳܐܐ ܕܗܳܠܶܝܢ ܟܽܠܗܽܘܢ ܫܡܳܗ̈ܶܐ ܢܰ݀ܠܐܶܐ ܡܰܫܡܰܥܬܰܢ܆ ܘܰܠܨܶܒ̈ܥܳܬܰܢ ܢܙܺܝܥ ܒܡܶܢܝܳܢܳܐ ܕܦܰܪ̈ܨܽܘܦܶܐ܆ ܠܳܐ ܡܶܕܶܡ ܕܶܝܢ ܝܽܘܬܪܳܢܳܐ ܪܽܘܚܳܢܳܝܳܐ ܒܢܰܦܫܰܢ ܢ݀ܩܰܒܶܠ. ܐ̱ܢܳܫܺܝ̈ܢ ܕܶܝܢ ܘܛܳܒܳܐܺܝܬ ܘܝܰܬܺܝܪ ܩܰܛܺܝܢܳܐܺܝܬ ܨܳܬ̣ܘ ܘܒܰܚܶܢܘ܆ ܘܶܐܬܦܰܫܰܟܘ ܒܡܶܕܶܡ ܡܶܕܶܡ. ܟܰܕ ܝܰܠܺܝܦܳܐܺܝܬ ܐܺܝܬ ܠܗܽܘܢ܆ ܠܫܽܘܴ̈ܐܠܶܐ ܕܶܝܢ ܕܡܶܛܽܠ ܗܳܠܶܝܢ ܐܰܝܟ ܕܰܠܚܰܝ̈ܠܬܳܢܶܐ ܡܬܰܚܘ ܐܶܢܽܘܢ ܠܘܳܬܝ ܠܗܳܢܽܘܢ ܕܡܶܛܽܠ ܟܺܝܬ ܕܦܰܢܺܝܬ̣ ܠܗܽܘܢ ܦܶܬܓܳܡܳܐ܆ ܐܰܝܟ ܡܫܽܘܚܬܳܐ ܕܚܰܝܠܳܐ ܗܰܘ ܕܺܐܝܬ ܠܰܒܨܺܝܪܽܘܬܝ܆ ܕܙܳܕܩܳܐ ܐܰܣܒܪܶܬ ܕܗܳܠܶܝܢ ܕܕܺܝܠܳܢܳܐܺܝܬ ܐ݀ܶܬܡܰܠܰܠ܆ ܒܕܺܝܡܽܘܣܺܝܰܐ ܐܰܘܟܺܝܬ ܒܓܰܘܳܐ ܐܶ݀ܣܺܝܡ ܐܶܢܶܝܢ ܩܕܳܡ ܟܽܠܟܽܘܢ܆ ܐܰܝܟ ܕܰܠܫܶܡܥܳܐ܆ ܥܰܡ ܦܽܘܠܚܳܢܳܐ ܡܶܕܶܡ ܘܒܽܘܚܳܢܳܐ ܕܝܰܬܺܝܪ ܚܰܬܺܝܬ̣.

ܙܳܕܶܩ ܗܳܟܺܝܠ ܠܡܶܕܰܥ ܢܰܗܺܝܪܳܐܺܝܬ܆ ܕܠܶܐܘܰܢܓ̈ܶܠܺܝܣܛܶܐ ܡܰܠܽܘܢ ܕܶܝܢ ܠܪܽܘܚܳܐ ܗܰܘ ܕܰܒܗܽܘܢ ܡܡܰܠܶܠ ܗ̱ܘܳܐ܆ ܝܰܨܺܝܦܽܘܬܳܐ ܘܰܥܒܳܕܳܐ ܐܺܝܬܰܘܗ̱ܝ ܗ̱ܘܳܐ܆ ܗܳܝ ܕܰܒܝܰܕ ܗܳܠܶܝܢ ܕܡܶܬܟܰܬܒ̈ܳܢ ܗ̱ܘܰܝ̈ ܢܶܬܗܰܝܡܰܢ ܡܫܺܝܚܳܐ ܘܠܳܐ ܐ̱ܢܳܫ ܢܶܬܦܰܠܰܓ ܥܠܰܘܗ̱ܝ܆ ܠܳܐ ܕܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܒܰܟܝܳܢܳܐ܆ ܘܳܐܦܠܳܐ ܕܒܰܡܕܰܒܪܳܢܽܘܬܳܐ ܗܽܘ ܟܰܕ ܗܽܘ ܒܰܪܢܳܫܳܐ ܫܰܪܺܝܪܳܐܺܝܬ܆ ܤܛܰܪ ܡܶܢ ܟܽܠ ܫܽܘܚܠܳܦܳܐ ܘܫܽܘܓܢܳܝܳܐ ܘܰܣܒܺܝܪܽܘܬܳܐ. ܡܶܛܽܠܗܳܕܶܐ ܗܰܘ ܡܰܢ ܐܳܡܰܪ ܗ̱ܘܳܐ܆ ܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ. ܘܗܽܘ ܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‌ܠܳܗܳܐ. ܘܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܡܶܠܬܳܐ^[1]. ܘܗܽܘ ܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[2]. ܗܰܘ ܕܶܝܢ ܙܳܕܩܳܐܺܝܬ ܟܳܬܶܒ ܗ̱ܘܳܐ܆ ܟܬܳܒܳܐ ܕܰܗܘܳܝܶܗ ܕܝܶܫܽܘܥ ܡܫܺܝܚܳܐ܆ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ^[3]. ܐܰܝܟܰܢܳܐ ܕܠܶܗ ܟܰܕ ܠܶܗ ܐܳܦ ܕܠܳܐ ܡܢ̣ܶܐ ܒܫܰܪ̈ܒܳܬܳܐ ܐܺܝܬܰܘܗ̱ܝ ܢܺܐܠܰܦ܆ ܟܬܺܝܒ ܓܶܝܪ ܕܕܳܪܶܗ ܡܰܢܽܘ ܢܶܫܬܰܥܶܐ^[4]܆ ܡܰܠܽܘܢ ܕܶܝܢ ܕܰܩܕܳܡ ܥܳܠ̈ܡܶܐ ܐܺܝܬܰܘܗ̱ܝ ܘܰܫܘܶܐ ܒܰܡܬܽܘܡܳܝܽܘܬܳܐ ܠܶܗ ܠܰܐܒܳܐ܆ ܘܳܐܦ ܕܡܶܬܡܢܶܐ ܒܫܰܪ̈ܒܳܬܳܐ ܐܺܝܬܰܘܗ̱ܝ ܒܰܒܣܰܪ܆ ܡܶܛܽܠ ܟܺܝܬ ܕܟܰܕ ܩܰܘܺܝ ܐܰ‌ܠܳܗܳܐ ܗܽܘ ܟܰܕ ܗܽܘ ܠܳܐ ܡܶܫܬܰܚܠܦܳܢܳܐܺܝܬ ܒܚܰܪܬܳܐ ܕܙܰܒ̈ܢܶܐ ܗܘ̣ܳܐ ܒܰܪܢܳܫܳܐ.

ܡܶܛܽܠܗܳܕܶܐ ܐܳܦ ܥܽܘܗܕܳܢܳܐ ܕܰܐܒܳܗ̈ܶܐ ܩܰܕܡܳܝ̈ܶܐ܆ ܘܬܰܫܥܺܝܬܳܐ ܘܰܢܛܽܘܪܽܘܬܳܐ ܕܙܰܒ̈ܢܶܐ ܘܰܕܗܳܠܶܝܢ ܐ̱ܚܪ̈ܳܢܝܳܬܳܐ܆ ܗܳܢܶܝܢ ܟܺܝܬ ܕܕܺܝܠ̈ܳܢܴܝܳܬܳܐ ܕܰܒܢܰܝ̈ܢܳܫܐ ܐܺܝܬܰܝܗܶܝܢ܆ ܐܰܝܟܰܢܳܐ ܕܰܒܝܰܕ ܟܽܠܗܶܝܢ ܫܰܪܺܝܪܳܐܺܝܬ ܢܚܰܘܶܝܘܗ̱ܝ܆ ܕܒܰܗܘܳܝܳܐ ܘܰܟܝܳܢܳܐ ܕܺܝܠܰܢ ܐܶܫܬܰܘܬܰܦ. ܐܶܢ ܓܶܝܪ ܘܟܰܕ ܗܳܠܶܝܢ ܟܬܺܝ̈ܒܳܢ܆ ܒܰܣܒܺܝܪܽܘܬܳܐ ܘܰܒܦܰܢܛܰܣܺܝܰܐ ܐܰܡܪܽܘܗ̱ܝ ܐ̱ܢܳܫܺܝ̈ܢ ܕܶܐܬܚܙܺܝ ܝܰܬܺܝܪܳܐܺܝܬ܆ ܐܰܘ ܕܰܗܘ̣ܳܐ ܒܰܫܪܳܪܳܐ ܒܰܪܢܳܫܳܐ܆ ܡܳܢܳܐ ܠܳܐ ܥܳܒܕܺܝܢ ܗ̱ܘܰܘ܆ ܐܶ‌ܠܽܘ ܘܠܳܐ ܡܶܕܶܡ ܕܰܐܝܟ ܗܳܟܰܢܳܐ ܟܬܺܝܒ ܗ̱ܘܳܐ.

ܡܶܛܽܠܗܳܕܶܐ ܓܶܝܪ ܥܶܠܬܳܐ ܒܗܳܝ ܡܡܰܠܠܽܘܬ ܫܰܪ̈ܒܳܬܳܐ܆ ܐܳܦ ܚܽܘܠ̈ܛܳܢܶܐ ܕܠܳܐ ܙܳܕܩܺܝܢ ܘܕܰܠܒܰܪ ܡܶܢ ܢܳܡܽܘܣܳܐ ܥܰܠ ܚܰܕܚ̈ܕܳܢܶܐ ܦܰܪ̈ܨܽܘܦܶܐ ܐܶܬܥܰܗܕ ܗܽܘ ܐܶܘܰܢܓܶܠܺܝܣܛܳܐ. ܟܰܕ ܝܰܨܺܝܦܳܐܺܝܬ ܘܨܶܒܝܳܢܳܐܺܝܬ ܟܬܰܒ܆ ܝܺܗܽܘܕܳܐ ܕܶܝܢ ܝܺܠܶܕ ܠܦܰܪܨ ܘܰܠܙܪܚ ܡܶܢ ܬܳܡܳܪ^[5]. ܘܕܰܘܺܝܕ ܕܶܝܢ ܡܰܠܟܳܐ ܝܺܠܶܕ ܠܫܠܝܡܘܢ ܡܶܢ ܗܳܝ ܕܽܐܘܪܺܝܳܐ^[6]. ܠܗܳܠܶܝܢ ܕܙܳܢܝܳܐܺܝܬ ܘܓܰܝܳܪܳܐܺܝܬ ܐܶܬܢܰܩܰܦܘ ܠܗܶܝܢ. ܐܰܝܟܰܢܳܐ ܕܰܓܠܺܝܬܳܐ ܢܶܥܒܕܺܝܗ̇܆ ܕܠܰܟܝܳܢܳܐ ܕܺܝܠܰܢ ܗܰܘ ܕܰܫܪܰܥ ܘܰܢܦܰܠ ܘܡܰܪܡܰܪ܆ ܘܶܐܫܬܰܪܓܰܠ ܠܰܪ̈ܓܺܝܓܳܬܳܐ ܕܠܳܐ ܙܳܕܩ̈ܳܢ܆ ܐܶܬܳܐ ܡܫܺܝܚܳܐ ܠܡܰܐܣܳܝܽܘ. ܘܟܰܕ ܥܳܪܶܩ ܗܳܢܳܐ ܢܶܩܡܛܺܝܘܗ̱ܝ܆ ܘܟܰܕ ܢܶܫܘܰܪ ܘܢܶܬܰܙ ܢܶܪܗܰܛ ܐܰܝܟ ܕܰܠܪܽܘܚܩܳܐ ܢܶܠܒܟܺܝܘܗ̱ܝ ܘܢܶܬܟܣܺܝܘܗ̱ܝ܆ ܘܢܰܗܦܟܺܝܘܗ̱ܝ ܘܢܶܟܠܶܝܘܗ̱ܝ ܡܶܢ ܡܰܪܕܺܝܬܳܐ ܕܠܰܐܦ̈ܰܝ ܠܬܰܚܬ. ܗܳܕܶܐ ܓܶܝܪ ܡܚܰܘܝܳܐ ܗܳܝ ܕܰܐܡܺܝܪܳܐ ܠܰܫܠܺܝܚܳܐ ܡܶܛܽܠܳܬܶܗ܆ ܕܠܰܘ ܓܶܝܪ ܠܡܰܠܰܐܟ̈ܶܐ ܠܳܒܶܟ܆ ܐܶܠܳܐ ܠܙܰܪܥܶܗ ܕܰܐܒܪܳܗܳܡ ܠܳܒܶܟ^[7]܆ ܕܡܶܢ ܗܳܪܟܳܐ ܙܳܕܶܩ ܠܶܗ ܕܰܒܟܽܠܗܶܝܢ ܢܶܬܕܰܡܶܐ ܠܰܐܚܰܘ̈ܗܝ^[8].

ܕܗܳܢܳܐ ܗܳܟܺܝܠ ܟܝܳܢܳܐ ܩܰܒܶܠ ܥܠܰܘܗ̱ܝ ܡܫܺܝܚܳܐ ܐ̱ܚܝܳܢܽܘܬܳܐ. ܕܗܰܘ ܕܙܰܢܺܝ܆ ܐܰܝܟܰܢܳܐ ܕܰܢܕܰܟܶܐ. ܕܗܰܘ ܕܶܐܬܟܪܰܗ܆ ܐܰܝܟܰܢܳܐ ܕܢܰܐܣܶܐ. ܕܗܰܘ ܕܰܢܦܰܠ܆ ܐܰܝܟܰܢܳܐ ܕܰܢܩܺܝܡ. ܘܡܶܬܢܰܚܬܳܢܳܐܺܝܬ ܡܰܢ ܘܪܶܚܡܰܬ ܐ̱ܢܳܫܳܐܺܝܬ܆ ܒܪܰܡ ܐܳܦ ܗܳܟܰܢܳܐ ܦܰܐܝܽܘܬ ܐܰ‌ܠܳܗܳܐܝܬ. ܐܶܬܚܰܝܰܕ ܓܶܝܪ ܠܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ ܕܠܳܐ ܚܛܳܗ܆ ܟܰܕ ܒܬܽܘܠܽܘܬܳܐ ܡܡܰܨܥܳܐ ܗ̱ܘܳܬ܆ ܘܰܢܣܺܝܒܽܘܬܳܐ ܕܰܒܟܰܪܣܳܐ ܘܒܰܛܢܳܐ ܕܡܶܢ ܪܽܘܚܳܐ ܩܰܕܺܝܫܳܐ܆ ܘܝܰܠܕܳܐ ܕܰܠܙܽܘܘܳܓܳܐ ܘܫܰܘܬܳܦܽܘܬܳܐ ܠܳܐ ܝܺܕܰܥ܆ ܘܰܠܛܰܒܥܳܐ ܕܕܰܟܝܽܘܬܳܐ ܒܬܽܘܠܳܝܬܳܐ ܠܳܐ ܡܶܬܡܰܠܠܳܢܳܐܺܝܬ ܐܰܫܶܦ.

ܘܗܽܘ ܡܰܢ ܐܶܘܰܢܓܶܠܺܝܣܛܳܐ܆ ܡܒܰܙܰܚ ܘܰܡܦܰܪܣܶܐ ܠܚܰܫ̈ܶܐ ܕܓܶܢܣܳܐ ܕܺܝܠܰܢ. ܠܚܶܣ̈ܕܶܐ܆ ܠܟܽܘܪ̈ܗܳܢܶܐ܆ ܗܳܠܶܝܢ ܕܰܠܘܳܬܗܽܘܢ ܢܚܶܬ ܡܶܛܽܠ ܚܰܝܽܘܣܬܳܢܽܘܬܳܐ ܡܶܠܬܳܐ ܗܰܘ ܕܰܐ‌ܠܳܗܳܐ܆ ܐܰܝܟܰܢܳܐ ܕܰܢܫܰܒܰܚ ܝܰܬܺܝܪܳܐܺܝܬ ܠܪܶܚܡܰܬ ܐ̱ܢܳܫܽܘܬܶܗ ܐܰܟܚܕܳܐ ܘܠܰܡܥܰܠܝܽܘܬܶܗ. ܘܠܳܐ ܣܳܟ ܓܶܝܪ ܡܰܝܬܝܳܐ ܚܽܘܣܪܳܢܳܐ ܠܳܐܣܝܳܐ܆ ܗܳܝ ܕܢܶܬܢܰܚܰܬ̣ ܥܰܡ ܗܳܢܽܘܢ ܕܰܟܪܺܝܗܶܝܢ. ܘܟܰܕ ܙܳܕܶܩ ܗ̱ܘܳܐ ܠܶܗ ܕܢܺܐܡܰܪ܆ ܕܕܰܘܺܝܕ ܝܺܠܶܕ ܠܰܫܠܝܡܘܢ ܡܶܢ ܒܰܪܬܫܒܰܥ܆ ܗܳܢܳܐ ܓܶܝܪ ܫܡܳܐ ܐܺܝܬ ܗ̱ܘܳܐ ܠܳܗ̇ ܠܰܐܢ̱ܬܬܳܐ܆ ܐܰܝܟ ܕܰܠܡܺܐܡܰܪ ܟܰܕ ܡܒܰܙܰܚ ܠܶܗ ܠܓܰܘܪܳܐ܆ ܡܶܢ ܗܳܝ ܕܽܐܘܪܺܝܳܐ ܓܰܠܝܳܐܺܝܬ ܐܰܙܥܶܩ^[9]. ܟܰܕ ܡܚܰܘܶܐ ܕܰܡܫܺܝܚܳܐ ܗܰܘ ܕܡܶܢ ܓܶܢܣܳܐ ܕܰܐܝܟ ܗܳܢܳܐ ܢܳܚܶܬ ܒܝܽܘܒܳܠܳܐ܆ ܠܰܡܚܺܝ̈ܠܘܴܬܰܢ ܫܩܰܠ܆ ܘܰܠܟܽܘܪ̈ܗܳܢܰܝܢ ܛܥܶܢ^[10]܆ ܐܰܝܟܰܢܳܐ ܕܰܒܕܽܘܟ ܐܶܡܰܪ ܐ̱ܢܳܫ ܡܶܢ ܢܒܺܝ̈ܶܐ.

ܗܳܢܽܘܢ ܕܶܝܢ ܕܰܣܒܺܝܪܽܘܬܳܐ ܡܰܢܺܝܢܳܝܬܳܐ ܕܠܳܐ ܐܰ‌ܠܳܗ ܕܶܐܘܛܶܘܟ̥ܶܐ ܡܶܬܪܰܥܶܝܢ܆ ܘܚܰܣܺܝܪܽܘܬ ܗܰܘܢܳܐ ܕܰܐܰܦܽܘܠܺܝܢܰܪܺܝܽܘܤ܆ ܡܶܬܚܰܡܨܺܝܢ ܒܡܶܬܒܰܣܪܳܢܽܘܬܳܐ ܘܰܒܡܶܬܒܰܪܢܫܳܢܽܘܬܳܐ ܡܫܰܡܠܰܝܬܳܐ܆ ܟܰܕ ܒܦܽܘܪܩܳܢܳܐ ܕܺܝܠܰܢ ܫܰܪܺܝܪܳܐ ܐܰܝܟ ܕܕܳܡܝܳܐ ܒܳܗܬܺܝܢ܆ ܘܣܳܒܪܺܝܢ ܕܰܚܛܺܝܬܳܐ ܛܳܝܫܳܐ ܒܦܳܪܽܘܩܰܢ܆ ܘܗܳܕܶܐ ܟܰܕ ܤܛܰܪ ܡܶܢ ܚܛܺܝܬܳܐ ܠܗܳܢܳܐ ܣܽܘܪܳܩܳܐ ܢܚܶܬ܆ ܘܰܢܣܰܒ ܕܡܽܘܬܳܐ ܕܥܰܒܕܳܐ^[11]܆ ܘܡܶܛܽܠܗܳܝ ܕܰܢܕܰܥܶܟ ܠܚܰܝܠܬܳܢܽܘܬܳܐ ܕܰܚܛܺܝܬܳܐ ܐܶܬܒܰܪܢܰܫ. ܡܶܢ ܟܠ ܦܪܽܘܤ ܓܶܝܪ ܐܰܝܟܳܐ ܕܰܐ‌ܠܳܗܳܐ܆ ܪܰܚܺܝܩܐ ܗܝ ܡܶܢ ܡܨܰܥܬܳܐ ܚܛܺܝܬܳܐ. ܟܰܕ ܕܶܝܢ ܗܳܕܶܐ ܪܰܚܺܝܩܳܐ܆ ܡܳܢܰܘ ܗܰܘ ܕܠܰܡܣܰܝܳܒܽܘ ܬܽܘܒ ܘܠܰܡܨܰܝܳܐܽܘ ܡܟܳܢ. ܨܳܐܬܳܐ ܓܶܝܪ ܘܠܳܐ ܡܶܕܶܡ ܐ̱ܚܪܺܢܳܐ ܐܺܝܬ܆ ܐܶܠܳܐ ܐܶܢ ܟܽܘܬܡܳܐ ܗܰܘ ܕܰܚܛܺܝܬܳܐ.

ܡܶܛܽܠ ܗܳܕܶܐ ܗܳܢܽܘܢ ܕܗܶܢܽܘܢ ܩܢܽܘܡܗܽܘܢ ܗܘ̣ܰܘ ܚܰܙܳܝ̈ܶܐ ܘܰܡܫܰܡ̈ܫܳܢܶܐ ܕܺܝܠܳܗ̇ ܕܡܶܠܬܳܐ^[12]܆ ܥܰܡ ܦܰܪܶܗ̱ܣܺܝܰܐ ܐܰܟܪܶܙܘ ܠܰܡܡܰܠܠܽܘܬ ܫܰܪ̈ܒܳܬܳܐ ܕܒܰܒܣܰܪ ܕܝܶܫܽܘܥ܆ ܟܰܕ ܠܳܐ ܡܶܕܶܡ ܡܶܢ ܗܳܠܶܝܢ ܕܡܶܣܬܰܒܪ̈ܳܢ ܕܺܐܝܬܰܝܗܶܝܢ ܡܶܬܚܰܣ̈ܕܳܢܝܳܬܳܐ ܚܰܦܺܝܘ. ܘܰܐܟܚܕܳܐ ܟܰܕ ܪܳܕܶܝܢ ܘܡܰܠܦܺܝܢ ܠܰܢ܆ ܕܠܳܐ ܥܰܠ ܫܺܝܛܽܘܬܐ ܕܰܐܒܳܗ̈ܶܐ ܕܺܝܠܰܢ ܩܰܕܡܳܝ̈ܶܐ܆ ܠܬܰܚܬ ܢܰܪܟܶܢ ܚܝܳܪܰܢ ܘܢܶܬܚܰܡܰܨ܆ ܘܳܐܦܠܳܐ ܬܽܘܒ ܡܶܛܽܠ ܫܒܺܝܚܽܘܬܳܐ܆ ܗܳܝ ܕܰܠܩܽܘܒܠܳܐ ܢܶܬܬܪܺܝܡ ܘܢܺܐܡܰܪ܆ ܕܩܰܫܺܝܫܳܐ ܕܺܝܠܝ ܣܳܗܕܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܒܳܐ ܕܶܝܢ ܕܺܝܠܝ܆ ܕܩܰܕܡܳܝ̈ܳܬܳܐ ܡܰܝܬܶܐ ܗ̱ܘܳܐ ܒܗܳܠܶܝܢ ܟܳܗ̈ܢܳܝܳܬܳܐ ܘܒܶܐܦܝܣ̈ܩܽܘܦܶܐ܆ ܐܶܡܝ ܕܶܝܢ ܕܰܒܚܰܝ̈ܶܐ ܕܰܢܙܺܝܪܽܘܬܳܐ ܡܶܬܗܰܦܟܳܐ ܗ̱ܘܳܬ܆ ܘܟܽܘܠܳܢܳܐܺܝܬ ܟܪܺܝܣܛܝܳܢܺܝܬܳܐ ܐܺܝܬܶܝܗ̇ ܗ̱ܘܳܬ. ܠܘܳܬ ܓܶܝܪ ܗܰܘ ܕܕܰܐܝܟ ܗܳܢܳܐ ܢܺܐܡܰܪ ܐ̱ܢܳܫ ܘܛܳܒ ܟܺܐܢܳܐܺܝܬ܆ ܚܰܘܳܐ ܠܺܝ ܐܰܢ̱ܬ ܠܳܟ ܐܳܘ ܡܝܰܬܪܳܐ܆ ܕܰܒܥܶܩ̈ܒܳܬܳܐ ܕܰܐܒܳܗܰܝ̈ܟ ܩܰܕܡܳܝ̈ܶܐ ܪܳܕܶܐ ܐܰܢ̱ܬ܆ ܘܶܐ݀ܝܰܩܪܳܟ ܣܰܓܺܝ܆ ܕܠܰܡܝܰܬܪܽܘܬܳܐ ܕܰܐܒܳܗܰܝ̈ܟ ܘܰܠܫܰܦܺܝܪܽܘܬ ܕܶܚܠܬܳܐ ܕܓܶܢܣܳܟ ܠܳܐ ܕܰܓܶܠܬ. ܐܶܢ ܕܶܝܢ ܠܘܳܬ ܐܽܘܪܚܳܐ ܗܳܝ ܕܰܠܩܽܘܒܠܳܐ ܡܶܬܬܰܝܬܶܐ ܐܰܢ̱ܬ܆ ܡܶܬܕܰܡܰܪ ܐ̱ܢܳܐ ܒܳܟ ܥܰܠ ܚܰܣܺܝܪܽܘܬ ܗܰܘܢܳܐ ܘܥܰܠ ܡܨܰܕܪܽܘܬܳܐ ܣܰܓܺܝܐܬܳܐ܆ ܕܛܳܥܶܐ ܐܰܢ̱ܬ ܕܠܽܘܩܒܰܠ ܢܰܦܫܳܟ ܡܰܝܬܶܐ ܐܰܢ̱ܬ ܠܰܡܨܰܥܬܳܐ ܠܫܰܦܺܝܪܽܘܬ ܕܶܚܠܬܳܐ ܕܗܳܢܽܘܢ ܕܝܰܠܕܽܘܟ܆ ܠܰܘ ܐܰܝܟܰܢܳܐ ܕܬܶܬܩܰܠܰܤ܆ ܐܶܠܳܐ ܐܰܝܟܰܢܳܐ ܕܬܶܬܟܣܶܤ ܕܳܐܦܠܳܐ ܒܬܰܚܘܺܝܬܳܐ ܛܳܒܬܳܐ ܗܳܝ ܒܰܝܬܳܝܬܳܐ ܛܰܢ̣ܬ.

ܡܶܛܽܠܗܳܕܶܐ ܐܳܦ ܠܝܽܗ̱ܘ̈ܕܳܝܶܐ ܗܳܢܽܘܢ ܕܰܡܪܺܝܡܺܝܢ ܗ̱ܘܰܘ ܓܒܺܝܢܳܐ܆ ܘܥܰܡ ܡܫܰܩܠܽܘܬܳܐ ܣܰܓܺܝܐܬܳܐ ܫܰܒܗܪܳܢܳܐܺܝܬ ܐܳܡܪܺܝܢ ܗ̱ܘܰܘ ܕܙܰܪܥܶܗ ܕܰܐܒܪܳܗܳܡ ܐܺܝܬܰܝܢ^[13] ܡܦܰܢܶܐ ܗ̱ܘܳܐ ܡܫܺܝܚܳܐ܆ ܐܶ‌ܠܽܘ ܒܢܰܝ̈ܳܐ ܕܰܐܒܪܳܗܳܡ ܐܺܝܬܰܝܟܽܘܢ ܗ̱ܘܰܝܬܽܘܢ܆ ܥ̈ܒܳܕܶܐ ܕܰܐܒܪܳܗܳܡ ܥܳܒܕܺܝܢ ܗ̱ܘܰܝܬܽܘܢ^[14]. ܐܳܦ ܩܕܳܡܰܘ̈ܗ̱ܝ ܕܶܝܢ ܝܽܘܚܰܢܳܢ ܗܰܘ ܡܰܥܡܕܳܢܳܐ܆ ܟܰܕ ܠܡܰܣܒܪܳܢܽܘܬܳܐ ܗܳܕܶܐ ܦܳܣܶܩ ܐܳܡܰܪ ܗ̱ܘܳܐ܆ ܘܠܳܐ ܬܰܣܒܪܽܘܢ ܠܡܺܐܡܰܪ ܒܢܰܦܫܟܽܘܢ ܕܰܐܒܳܐ ܐܺܝܬ ܠܰܢ ܐܰܒܪܳܗܳܡ^[15]. ܐܶܠܳܐ ܐܰܝܟ ܙܢܳܐ ܕܠܝܽܗ̱ܘ̈ܕܳܝܶܐ ܘܠܳܐ ܡܶܕܶܡ ܐܰܘܬ̣ܪܰܬ̣ ܐܶܢܽܘܢ ܡܝܰܬܪܽܘܬܳܐ ܗܳܝ ܕܰܐܒܳܗܰܝ̈ܗܽܘܢ ܩܰܕܡܳܝ̈ܶܐ܆ ܟܰܕ ܠܳܐ ܩܰܒܶܠܘ ܠܶܐܘܰܢܓܶܠܺܝܽܘܢ܆ ܗܳܟܰܢܳܐ ܠܗܳܢܽܘܢ ܕܡܶܢ ܥܰܡ̱ܡ̈ܶܐ ܗܰܝܡܶܢܘ܆ ܘܠܳܐ ܡܶܕܶܡ ܣܶܓܦܰܬ ܐܶܢܽܘܢ ܕܶܚܠܰܬ ܫ̈ܺܐܕܶܐ ܗܳܝ ܐܰܒܳܗܳܝܬܳܐ܆ ܟܰܕ ܠܘܳܬ ܡܫܺܝܚܳܐ ܪܗܶܛܘ. ܡܰܠܽܘܢ ܕܶܝܢ ܐܳܦ ܣܰܓܺܝ ܫܰܦܺܝܪ ܒܚܺܝܪ̈ܶܐ ܚܰܘܝܰܬ̣ ܐܶܢܽܘܢ܆ ܘܰܒܢܰܝ̈ܳܐ ܠܰܐܒܪܗܳܡ ܥܶܒ̣ܕܰܬ̣ ܐܶܢܽܘܢ܆ ܐܰܝܟܰܢܳܐ ܕܳܐܦ ܦܰܘܠܽܘܤ ܟܰܕ ܠܘܳܬ ܝܽܗ̱ܘ̈ܕܳܝܶܐ ܡܳܬܰܚ ܠܳܗ̇ ܠܡܶܠܬܳܐ ܢܺܐܡܰܪ܆ ܝܳܕܥܺܝܢ ܐܢ̱ܬܽܘܢ ܗܳܟܺܝܠ܆ ܕܗܳܢܽܘܢ ܕܡܶܢ ܗܰܝܡܳܢܽܘܬܐ܆ ܗܳܠܶܝܢ ܐܺܝܬܰܝܗܽܘܢ ܒܢܰܝ̈ܳܐ ܕܰܐܒܪܳܗܳܡ^[16]. ܙܳܕܶܩ ܠܰܢ ܗܳܟܺܝܠ ܕܥܰܠ ܛܳܒ̈ܳܬܳܐ ܕܺܝܠܰܢ ܢܶܬܬܟܶܠ܆ ܘܠܳܐ ܟܕ ܥܰܪ̈ܛܶܠܳܝܶܐ ܐܺܝܬܰܝܢ ܡܶܢ ܟܽܠ ܛܳܒܬܳܐ܆ ܡܝܰܬܪ̈ܳܬܳܐ ܕܰܐ̱ܚܪ̈ܳܢܶܐ ܢܶܬܥܰܛܰܦ ܫܰܘ̈ܝ̣ܰܝ̣ ܒܓܶܢܣܳܐ ܓܶܝܪ ܕܓܰܒܪ̈ܶܐ ܫܰܦܺܝܪ̈ܰܝ ܕܶܚܠܬܳܐ܆ ܕܳܡܝܽܘܬܳܐ ܗܝ ܕܰܙܢܳܐ ܥܳܒܕܳܐ܆ ܘܠܰܘ ܫܰܘܬܳܦܽܘܬܳܐ ܗܳܝ ܕܰܕܡܳܐ.

ܐܶܠܳܐ ܡܶܛܽܠ ܡܳܢܳܐ ܐܳܡܪܺܝܢ ܐܶܡܰܪ܆ ܕܝܶܫܽܘܥ ܡܫܺܝܚܳܐ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ^[17]܆ ܟܰܕ ܙܳܕܶܩ ܗ̱ܘܳܐ ܕܢܶܩܕܽܘܡ ܢܶܬܛܰܟܰܤ ܐܰܒܪܳܗܳܡ܆ ܐܰܝܟ ܐܰܝܢܳܐ ܕܝܰܬܺܝܪ ܩܰܫܺܝܫ ܒܙܰܒܢܳܐ. ܡܳܢܳܐ ܗܝ ܗܳܟܺܝܠ ܥܶܠܬܳܐ. ܬܶܫܒܽܘܚܬܳܐ ܣܰܓܺܝܐܬܳܐ ܐܰܚܺܝܕܳܐ ܗ̱ܘܳܬ ܠܘܳܬ ܝܽܗ̱ܘ̈ܕܳܝܶܐ ܕܰܢܒܺܝܳܐ ܕܰܘܺܝܕ܆ ܐܰܝܟ ܕܰܐܝܢܳܐ ܕܩܰܕܡܳܝܳܐ ܐܰܝܟ ܕܰܠܡܺܐܡܰܪ ܐܰܡܠܶܟ ܒܽܐܘܪܫܠܶܡ ܘܺܐܝܬܰܘܗ̱ܝ ܓܰܒܪܳܐ ܪܳܚܶܡ ܐܰ‌ܠܳܗܳܐ܆ ܘܕܰܢܣܰܒ ܡܽܘܠܟܳܢܳܐ ܕܡܶܢ ܙܰܪܥܳܐ ܕܺܝܠܶܗ ܢܩܽܘܡ ܡܫܺܝܚܳܐ܆ ܡܶܛܽܠ ܗܳܝ ܕܳܐܦ ܒܡܰܙܡܽܘܪ̈ܶܐ ܡܶܙܕܰܡܪܳܐ ܗ̱ܘܳܬ܆ ܗܳܝ ܕܡܶܛܽܠ ܕܰܘܺܝܕ ܥܰܒܕܳܟ ܠܳܐ ܬܰܗܦܶܟ ܦܰܪܨܽܘܦܳܐ ܕܰܡܫܺܝܚܳܐ ܕܺܝܠܳܟ܆ ܘܺܝܡ̣ܳܐ ܡܳܪܝܳܐ ܠܕܰܘܺܝܕ ܫܪܳܪܳܐ ܘܠܳܐ ܢܶܛܠܡܺܝܘܗ̱ܝ^[18]܆ ܕܡܶܢ ܦܺܐܪ̈ܶܐ ܕܟܰܪܣܳܐ ܕܺܝܠܳܟ ܐܶ݀ܣܺܝܡ ܥܰܠ ܟܽܘܪܣܝܳܟ^[19].

ܘܰܐ̱ܚܪ̈ܳܢܝܳܬܳܐ ܣܰܓܺܝ̈ܳܐܬܳܐ ܕܰܐܝܟ ܗܳܠܶܝܢ ܕܡܶܢ ܢܒܺܝ̈ܶܐ ܐ̱ܚܪ̈ܳܢܶܐ ܐܰܡܺܝܪ̈ܳܢ ܗ̱ܘܰܝ̈܆ ܐܰܝܟ ܕܳܐܦ ܡܶܢ ܒܳܬܰܪ ܡܰܘܬܶܗ ܕܺܝܠܶܗ ܕܕܰܘܺܝܕ܆ ܒܰܫܡܶܗ ܕܺܝܠܶܗ ܠܗܰܘ ܕܳܐܬܶܐ ܢܩܰܕܡܽܘܢ ܢܫܰܘܕܥܽܘܢ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ܆ ܐܰܝܟ ܐܰܝ̇ܕܳܐ ܕܺܐܝܬܶܝܗ̇ ܗܳܝ ܕܚܰܙܩܝܐܝܠ. ܘܰܐ݀ܩܺܝܡ ܥܠܰܝܗܽܘܢ^[20] ܪܳܥܝܳܐ ܚܰܕ ܗܰܘ ܕܢܶܪܥܶܐ ܐܶܢܽܘܢ܆ ܠܕܰܘܺܝܕ ܥܰܒܕܳܐ ܕܺܝܠܝ. ܗܽܘ ܢܶܪܥܶܐ ܐܶܢܽܘܢ ܘܗܽܘ ܢܢܺܝܚ ܐܶܢܽܘܢ. ܘܢܶܗܘܶܐ ܪܳܥܝܳܐ ܕܺܝܠܗܽܘܢ܆ ܘܶܐܢܳܐ ܡܳܪܝܳܐ ܐܶ݀ܗܘܶܐ ܠܗܽܘܢ ܠܰܐܠܳܗܳܐ. ܘܥܰܒܕܳܐ ܕܺܝܠܝ ܕܰܘܺܝܕ܆ ܪܺܝܫܳܢܳܐ ܒܰܡܨܰܥܬܳܐ ܕܺܝܠܗܽܘܢ^[21]. ܕܰܐܝܟ ܗܳܕܶܐ ܐܺܝܬܶܝܗ̇܆ ܐܳܦ ܗܳܝ ܕܡܶܢ ܐܶܪܰܡܝܳܐ ܒܰܢܒܺܝܽܘܬܳܐ ܐܶܬܐܰܡܪܰܬ܆ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ܆ ܘܰܐ݀ܩܺܝܡ ܠܕܰܘܺܝܕ ܕܶܢܚܳܐ ܙܰܕܝܩܳܐ܆ ܘܢܰܡܠܶܟ ܡܰܠܟܳܐ ܙܰܕܺܝܩܳܐ܆ ܢܶܣܬܰܟܰܠ ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ ܥܰܠ ‌ܐܰܪܥܳܐ^[22].

ܘܣܰܓܺܝ̈ܳܐܬܳܐ ܐܺܝܬ ܗ̱ܘܳܐ ܠܡܶܚܫܰܒ ܗܳܢܶܝܢ ܕܕܳܡ̈ܝܳܢ ܠܗܳܠܶܝܢ ܘܰܕܝܰܬܺܝܪ ܢܰܗܺܝܪ̈ܳܢ܆ ܡܶܛܽܠ ܗܳܝ ܕܰܠܘܳܬ ܝܽܗ̱ܘ̈ܕܳܝܶܐ ܩܒܺܝܥܳܐܺܝܬ ܠܒܺܝܟܳܐ ܗ̱ܘܳܬ܆ ܕܡܶܢ ܙܰܪܥܶܗ ܕܕܰܘܺܝܕ ܢܺܐܬܶܐ ܡܫܺܝܚܳܐ. ܒܰܕܓܽܘܢ ܐܳܦ ܝܽܘܚܰܢܳܢ ܐܶܘܰܢܓܶܠܺܝܣܛܳܐ ܟܬܰܒ܆ ܕܡܶܢ ܝܽܗ̱ܘ̈ܕܳܝܶܐ ܟܰܕ ܠܳܐ ܡܗܰܝܡܢܺܝܢ ܗ̱ܘܰܘ܆ ܘܰܠܘܳܬ ܢܽܘܗܪܳܐ ܕܰܫܪܳܪܳܐ ܡܣܰܡܶܝܢ ܗ̱ܘܰܘ܆ ܗܳܠܶܝܢ ܡܶܬܐܰܡܪ̈ܳܢ ܗ̱ܘܰܝ̈ ܘܡܶܬܥܰܪ̈ܦܳܢ. ܕܰܠܡܳܐ ܡܶܢ ܓܠܺܝܠܳܐ ܐܳܬܶܐ ܡܫܺܝܚܳܐ܆ ܠܳܐ ܗ̱ܘܳܐ ܟܬܳܒܳܐ ܐܶܡܰܪ܆ ܕܡܶܢ ܙܰܪܥܶܗ ܕܕܰܘܺܝܕ ܘܡܶܢ ܒܶܝܬܠܚܶܡ ܩܪܺܝܬܳܐ ܐܰܝܟܳܐ ܕܺܐܝܬܰܘܗ̱ܝ ܗ̱ܘܳܐ ܕܰܘܺܝܕ܆ ܐܳܬܶܐ ܡܫܺܝܚܳܐ^[23]܆ ܡܠܺܝܟ ܗ̱ܘܳܐ ܡܰܢ ܓܶܝܪ ܐܳܦ ܠܰܐܒܪܳܗܳܡ ܡܽܘܠܟܳܢܳܐ ܩܕܳܡ ܕܰܘܺܝܕ ܗܽܘ ܟܰܕ ܗܽܘ. ܐܳܦ ܓܶܝܪ ܐܶܬܐܰܡܪܰܬ ܠܘܳܬܶܗ܆ ܕܰܒܙܰܪܥܳܟ ܢܶܬܒܰܪܟܽܘܢ ܟܽܠܗܽܘܢ ܥܰܡܡ̈ܶܐ^[24]. ܒܪܰܡ ܠܰܘ ܗܳܟܰܢܳܐ ܓܰܠܝܳܐܺܝܬ܆ ܐܳܦܠܳܐ ܒܝܰܕ ܣܰܓܺܝ̈ܳܐܬܳܐ.

ܡܶܢ ܗܳܠܶܝܢ ܗܳܟܺܝܠ ܕܝܰܬܺܝܪ ܣܰܓܺܝ̈ܳܐܢ ܗ̱ܘܰܝ̈ ܘܰܕܝܰܬܺܝܪ ܛܰܠ̈ܝܳܢ܆ ܗܺܝ ܩܰܕܺܝܡܽܘܬ ܡܶܬܬܰܚܕܳܢܽܘܬܳܐ ܠܒܺܝܟܳܐ ܗ̱ܘܳܬ܆ ܗܳܝ ܕܰܠܘܳܬܳܗ̇ ܟܰܕ ܐܶܬܠܚܰܡ ܐܶܘܰܢܓܶܠܺܝܣܛܳܐ ܒܬܰܪܥܺܝܬܶܗ ܡܶܢ ܕܰܘܺܝܕ ܫܰܪܺܝ܆ ܟܰܕ ܡܶܢ ܗܳܠܶܝܢ ܕܡܶܬܬܰܘ̈ܕܝܳܢ ܘܡܶܢ ܟܽܠܢܳܫ ܡܶܙܕܰܡܪ̈ܳܢ܆ ܨܳܒܶܐ ܗ̱ܘܳܐ ܕܰܢܨܽܘܕܺܝܘܗ̱ܝ ܠܫܳܡܽܘܥܳܐ ܠܘܳܬ ܫܰܠܡܽܘܬܳܐ ܕܠܳܐ ܚܶܪܝܳܢ܆ ܘܗܳܟܰܢܳܐ ܠܘܳܬ ܐܰܒܪܳܗܳܡ ܢܥܰܠܶܐ ܢܰܣܩܝܘܗ̱ܝ܆ ܘܡܶܢ ܗܳܝ ܕܓܰܠܝܳܐ܆ ܐܳܦ ܠܗܳܝ ܕܥܰܬܺܝܩܳܐ ܘܫܰܠܝܳܐܺܝܬ ܐܰܝܟܰܢ ܕܗܽܘ ܡܚܰܦܝܳܐ ܗ̱ܘܳܬ ܢܫܰܪܪ. ܐܳܦ ܓܶܝܪ ܠܗܽܘܢ ܩܰܕܡܳܝ̈ܶܐ ܠܥܶܒܪ̈ܳܝܶܐ ܐܰܝܟ ܕܳܐܡܪܺܝܢ ܒܠܶܫܳܢܳܐ ܕܗܳܢܽܘܢ ܐܰܫܠܶܡ ܡܰܬܰܝ ܠܶܐܘܰܢܓܶܠܺܝܽܘܢ ܕܺܝܠܶܗ܆ ܫܒܽܘܩ ܟܺܝܬ ܕܳܐܦ ܡܶܛܽܠܳܬܶܗ ܕܰܫܪܳܪܳܐ ܐܺܝܬ ܗ̱ܘܳܐ ܠܗܽܘܢ ܢܺܝܫܳܐ܆ ܠܰܘ ܒܰܠܚܽܘܕ ܠܗܳܢܽܘܢ ܕܰܐܟܬܒܽܘܗ̱ܝ ܠܶܐܘܰܢܓܶܠܺܝܽܘܢ܆ ܐܶܠܳܐ ܐܳܦ ܠܗܳܢܽܘܢ ܕܣܰܒܰܪܘ ܘܰܐܟܪܶܙܘ܆ ܕܰܠܘܳܬ ܟܬܳܒ̈ܶܐ ܐܰ‌ܠܳܗܳܝ̈ܶܐ ܢܥܰܠܽܘܢ ܢܰܣܩܽܘܢ ܐܶܢܽܘܢ ܠܗܳܢܽܘܢ ܕܫܳܡܥܺܝܢ܆ ܘܡܶܢ ܗܳܠܶܝܢ ܕܩܰܕܶܡ ܐܶܬܟܬܶܒ̈ܝ̱ ܘܶܐܬܶܐܡܰܪ̈ܝ̱ ܒܰܢܒܺܝܽܘܬܳܐ ܡܶܛܽܠ ܡܫܺܝܚܳܐ܆ ܢܫܰܪܪܽܘܢܳܗ̇ ܠܡܶܠܬܳܐ.

ܡܶܛܽܠ ܗܳܕܶܐ ܓܶܝܪ ܗܽܘ ܡܰܬܰܝ܆ ܘܟܰܕ ܠܫܰܪ̈ܒܳܬܳܐ ܒܟܽܠ ‌ܐܳܕܫܳܐ ܡܶܢܶܗ ܘܠܶܗ ܡܢ̣ܳܐ܆ ܘܰܠܟܽܠܚܰܕ ܓܰܒܪܳܐ ܡܶܢܶܗ ܘܠܶܗ܆ ܬܽܘܒ܆ ܟܰܕ ܓܶܢܣܳܢܳܐܺܝܬ ܘܰܟܢܺܝܫܳܐܺܝܬ ܐܰܝܟ ܕܰܒܩܶܦܱܠܶܐܘܳܢ ܡܣܰܝܶܟ ܟܳܬܶܒ ܗ̱ܘܳܐ܆ ܡܶܢ ܐܰܒܪܳܗܳܡ ܥܕܰܡܳܐ ܠܕܰܘܺܝܕ܆ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ. ܘܡܶܢ ܕܰܘܺܝܕ ܥܕܰܡܳܐ ܠܓܳܠܽܘܬܐ ܕܒܳܒܶܠ ܫܰܪ̈ܒܳܬܐ ܐܰܪܒܰܥܶܣܪ̈ܶܐ. ܘܡܶܢ ܓܳܠܽܘܬܐ ܕܒܳܒܶܠ ܥܕܰܡܳܐ ܠܰܡܫܺܝܚܳܐ ܫܰܪ̈ܒܳܬܳܐ ܐܰܪܒܰܥܶܣܪ̈ܶܐ.^[25] ܐܰܝܟܰܢܳܐ ܕܟܰܕ ܠܫܰܪ̈ܒܳܬܳܐ ܠܫܳܒܽܘܥ̈ܶܐ ܥܦܺܝ̈ܦܶܐ ܡܦܰܠܶܓ܆ ܫܳܒܽܘܥܳܐ ܓܶܝܪ ܥܦܺܝܦܳܐ ܐܺܝܬܰܘܗ̱ܝ ܡܶܢܝܳܢܳܐ ܗܰܘ ܕܝܕ܆ ܢܶܥܗܰܕ ܐܶܢܽܘܢ ܠܡܶܠܰܘܗ̱ܝ ܕܰܢܒܺܝܳܐ ܕܳܢܝܐܝܠ ܕܰܠܫܳܒܽܘܥ̈ܶܐ ܕܰܫܢܰܝ̈ܳܐ ܡܦܰܠܶܓ ܠܗܽܘܢ ܠܙܰܒܢ̈ܶܐ܆ ܐܳܦ ܥܰܣܩܽܘܬ ܡܶܬܕܰܪܟܳܢܳܐܺܝܬ ܘܰܐܝܟܰܢܳܐ ܕܝܳܕܰܥ ܠܚܽܘܕܰܘܗ̱ܝ ܗܰܘ ܕܰܓܠܳܐ ܘܗܰܘ ܕܶܐܫܬܘܺܝ ܠܚܶܙܘܳܐ܆ ܘܰܡܩܰܕܶܡ ܐܳܡܰܪ ܠܡܶܐܬܺܝܬܳܐ ܕܰܡܫܺܝܚܳܐ ܘܰܠܟܽܠܗܶܝܢ ܗܳܠܶܝܢ ܕܰܥܬܺܝ̈ܕܳܢ܆ ܘܰܢܚܰܘܶܐ ܒܝܰܕ ܐ̱ܚܝܳܢܽܘܬܗܶܝܢ ܘܕܳܡܝܽܘܬܗܶܝܢ ܕܡܷ̈ܠܶܐ܆ ܕܠܰܘ ܡܫܺܝܚܳܐ ܐ̱ܚܪܺܢܳܐ ܐܺܝܬܰܘܗ̱ܝ ܗܰܘ ܕܗܽܘ ܡܣܰܒܰܪ ܠܗܳܢܽܘܢ ܕܫܳܡܥܺܝܢ ܐܶܠܳܐ ܐܶܢ ܗܰܘ܆ ܗܰܘ ܕܗܶܢܽܘܢ ܢܒܺܝ̈ܶܐ ܡܩܰܕܡܺܝܢ ܗ̱ܘܰܘ ܐܳܡܪܺܝܢ.

ܐܶܠܳܐ ܐܰܝܟܰܢܳܐ ܐܳܡܪܺܝܢ ܟܰܕ ܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܐܶܬܺܝܠܶܕ ܦܳܪܽܘܩܰܢ ܡܫܺܝܚܳܐ܆ ܠܝܰܘܣܶܦ ܡܳܢܶܝܢ ܒܫܰܪ̈ܒܳܬܳܐ ܗܳܢܽܘܢ ܐܶܘܢ̈ܓܠܝܣܛܐ܆ ܟܰܕ ܛܳܥܶܝܢ ܠܶܗ ܡܰܠܽܘܢ ܠܝܰܠܕܳܐ ܗܰܘ ܬܡܺܝܗܳܐ ܘܰܠܝܳܠܶܕܬܳܐ ܗܳܝ ܠܳܐ ܡܙܰܘܰܓܬܳܐ܆ ܘܰܕܡܶܢ ܚܽܘܠܛܳܢܳܐ ܕܙܽܘܘܳܓܳܐ ܐܶܬܺܝܠܶܕ ܡܚܰܘܶܝܢ ܠܶܗ ܠܝܶܫܽܘܥ ܐܳܦ ܟܰܕ ܠܳܐ ܨܳܒܶܝܢ. ܗܳܠܶܝܢ ܓܶܝܪ ܐܺܝܬ ܠܡܶܫܡܰܥ ܐܶܢܽܘܢ ܠܚܰܢ̈ܦܶܐ ܕܳܐܡܪܺܝܢ܆ ܟܰܕ ܡܓܰܚܟܺܝܢ ܘܰܡܡܰܝܩܺܝܢ ܒܶܗ ܒܐ̱ܪܳܙܳܐ ܪܰܒܳܐ. ܐܶܢܳܐ ܕܶܝܢ܆ ܐܳܦ ܠܐ̱ܢܳܫ ܡܶܢ ܗܳܢܽܘܢ ܕܦܰܢܛܣܺܝܰܐ ܡܶܬܪܰܥܶܝܢ܆ ܘܰܪܘܶܐ ܗ̱ܘܳܐ ܘܡܰܨܕܰܪ^[26] ܡܶܢ ܗܳܠܶܝܢ ܕܽܐܘܛܘܟܶܐ܆ ܘܛܳܗܶܐ^[27] ܗ̱ܘܳܐ ܘܦܳܗܶܐ ܒܛܳܥܝܽܘܬܳܐ ܫܶܡܥܶܬ ܕܳܐܡܰܪ ܗ̱ܘܳܐ܆ ܕܡܶܛܽܠ ܗܳܕܶܐ ܠܳܐ ܡܶܬܡܰܢܝܳܐ ܒܫܰܪ̈ܒܳܬܳܐ ܗܺܝ ܒܬܽܘܠܬܳܐ ܐܶܠܳܐ ܝܰܘܣܶܦ܆ ܐܰܝܟܰܢܳܐ ܕܬܶܬܚܰܘܶܐ ܡܶܢ ܗܳܕܶܐ܆ ܕܠܳܐ ܡܶܕܶܡ ܠܳܚܶܡ ܐܰܘ ܙܳܕܶܩ܆ ܓܶܢܣܳܐ ܗܳܢܳܐ ܠܦܳܪܽܘܩܰܢ ܡܫܺܝܚܳܐ. ܘܰܕܡܶܬܐܰܡܪܳܐ ܡܰܢ ܕܡܶܢ ܐܰܒܪܳܗܳܡ ܘܕܰܘܺܝܕ ܢܳܚܶܬ ܒܝܽܘܒܳܠܳܐ܆ ܠܳܐ ܕܶܝܢ ܐܺܝܬܶܝܗ̇܆ ܘܕܰܣܪܺܝܩܳܐܺܝܬ ܦܫܺܝܛܳܐܺܝܬ ܠܡܺܐܡܰܪ. ܘܒܰܣܒܺܝܪܽܘܬܳܐ ܒܓܰܠܘ^[28] ܘܰܨܒܰܪܘ^[29] ܗܳܢܽܘܢ ܕܰܟܬܰܒܘ.

ܣܒܺܝܪܽܘܬܳܐ ܓܶܝܪ ܐܰܝܟ ܕܕܳܡܝܳܐ ܐܺܝܬܰܘܗ̱ܝ ܠܘܳܬܗܽܘܢ܆ ܐܳܦ ܗܽܘ ܫܪܳܪܳܐ ܕܰܟܬܳܒ̈ܶܐ ܟܳܗ̈ܢܳܝܶܐ ܫܳܬܶܩ ܐ̱ܢܳܐ ܠܓܽܘܕܳܦ̈ܶܐ ܕܰܒܢܰܝ̈ܳܐ ܕܢܶܣܛܽܘܪܺܝܽܘܤ܆ ܕܣܰܩܽܘܒܠܳܐܺܝܬ ܡܰܢ ܠܘܳܬ ܗܳܠܶܝܢ ܐܺܝܬ ܠܗܽܘܢ܆ ܘܰܡܡܰܪܝܳܢܽܘܬܳܐ ܣܰܩܽܘܒܠܳܝܬܳܐ ܡܡܰܪܶܝܢ܆ ܠܘܳܬ ܕܶܝܢ ܬܪܺܝܥܽܘܬ ܦܽܘܡܳܐ ܡܣܰܝܰܒܬܳܐ ܕܚܰܢ̈ܦܶܐ ܢܳܦܩܺܝܢ܆ ܡܶܛܽܠ ܟܺܝܬ ܕܳܐܦ ܗܳܠܶܝܢ ܐܶܢܳܐ ܩܢܽܘܡܝ ܗܘܺܝܬ ܫܳܡܽܘܥܳܐ܆ ܟܰܕ ܙܰܒܢ̈ܳܬܳܐ ܣܰܓܺܝ̈ܳܐܬܳܐ ܐܶܬܥܰܪܙܠܶܬ ܥܰܡܗܽܘܢ܆ ܟܰܕ ܦܰܩܺܝܪܺܝܢ ܠܳܐ ܡܶܬܠܰܒܟܳܢܳܐܺܝܬ. ܗܳܢܽܘܢ ܕܨܳܒܶܝܢ܆ ܕܳܐܦ ܡܶܢ ܫܰܘܬܳܦܽܘܬܳܐ ܕܓܰܒܪܳܐ ܘܕܰܐܢ̱ܬܬܳܐ ܢܶܣܬܒܰܪ ܕܶܐܬܺܝܠܶܕ ܡܫܺܝܚܳܐ܆ ܐܰܝܟܰܢܳܐ ܕܰܠܘܳܬ ܐ̱ܢܳܫܽܘܬܳܐ ܫܚܺܝܡܬܳܐ ܒܰܠܚܽܘܕ ܢܰܝܬܽܘܢܳܝܗ̱ܝ ܆ ܘܒܰܪܢܳܫܳܐ ܠܒܺܝܫ ܠܰܐܠܳܗܳܐ ܢܚܰܘܘܢܳܝܗ̱ܝ ܆ ܘܠܰܘ ܐܰ‌ܠܳܗܳܐ ܕܒܰܟܝܳܢܳܐ܆ ܕܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܘܰܡܕܰܒܪܳܢܳܐܺܝܬ ܐܰܟܚܕܳܐ ܘܫܰܪܺܝܪܳܐܺܝܬ ܗܘ̣ܳܐ ܒܰܪܢܳܫܳܐ. ܐܶܠܳܐ ܟܰܕ ܠܗܳܢܽܘܢ ܗܘ̣ܰܘ ܚܠܺܝܡܺܝܢ ܐܳܡܪܺܝܢܰܢ܆ ܘܠܰܡܡܰܠܠܽܘܬ ܣܪ̈ܺܝܩܳܬܳܐ ܕܺܝܠܗܽܘܢ ܗܳܠܶܝܢ ܠܳܐ ܣܰܟܽܘܠ̈ܬܳܢܝܳܬܳܐ ܪܳܩܺܝܢܰܢ܆ ܫܳܛܝܳܐ ܓܶܝܪ ܫܳܛܝ̈ܳܬܳܐ ܢܡܰܠܶܠ܆ ܘܠܶܒܶܗ ܣܪ̈ܺܝܩܳܬܳܐ ܢܶܬܚܰܫܰܒ^[30] ܐܳܡܪܳܐ ܡܶܠܬܳܐ ܢܒܺܝ̣ܳܝ̣ܬܳܐ܆ ܗܳܠܶܝܢ ܕܡܶܢ ܫܪܳܪܳܐ ܢܺܐܡܰܪ.

ܥܝܳܕܳܐ ܐܺܝܬ ܠܰܟܬܳܒܳܐ ܐܰ‌ܠܳܗܳܝܳܐ܆ ܕܠܰܘ ܡܶܢ ܢܶܫ̈ܶܐ ܐܶܠܳܐ ܡܶܢ ܓܰܒܪ̈ܶܐ ܢܶܥܒܶܕ ܐܶܢܶܝܢ ܠܰܡܡܰܠܠܽܘܬ ܫܰܪ̈ܒܳܬܳܐ܆ ܘܡܶܢ ܐܰܒܳܗ̈ܶܐ ܠܘܳܬ ܒܢܰܝ̈ܳܐ ܕܶܟܪ̈ܶܐ ܢܰܚܶܬ ܠܗܳܠܶܝܢ ܒܝܽܘܒܳܠܳܐ. ܘܠܰܘ ܡܶܢ ܢܶܩ̈ܒܳܬܳܐ ܘܶܐܡ̈ܗܳܬܳܐ ܠܚܽܘܫܒܳܢܳܐ ܕܓܶܢܣ̈ܶܐ ܢܶܙܩܽܘܪ܆ ܘܳܐܦܠܳܐ ܠܘܳܬ ܢܶܩ̈ܒܳܬܳܐ ܢܫܰܕܰܪ܆ ܐܰܝܟ ܕܢܶܣܬܰܒܪ̈ܳܢ ܕܰܒܛܶܟܣܳܐ ܩܰܕܡܳܝܳܐ ܡܶܬܡܰܢ̈ܝܳܢ ܒܫܰܪ̈ܒܳܬܳܐ ܢܶܫ̈ܶܐ. ܐܰܝܟ ܕܰܒܛܶܟܣܳܐ ܓܶܝܪ ܐ̱ܚܪܳܝܳܐ ܘܢܰܩܺܝܦܳܐܺܝܬ ܘܡܶܬܬܰܠܘܬܳܢܳܐܺܝܬ ܐܺܝܬ ܐܶܡܰܬܝ܆ ܕܳܐܦ ܗܶܢܶܝܢ ܥܰܡ ܓܰܒܪ̈ܶܐ ܐܰܟܚܕܳܐ ܡܶܬܡܰܢ̈ܝܳܢ ܒܫܰܪ̈ܒܳܬܳܐ܆ ܐܰܝܟ ܡܳܐ ܟܺܝܬ ܕܳܐܦ ܟܰܕ ܡܽܘܫܶܐ ܘܰܐܗܪܽܘܢ ܡܬܶܡܢܶܝܢ ܗ̱ܘܰܘ ܒܫܰܪ̈ܒܳܬܳܐ܆ ܐܶܬܡܰܢܝܰܬ ܐܰܟܚܕܳܐ ܥܰܡܗܽܘܢ ܐܳܦ ܡܰܪܝܰܡ ܚܳܬܳܐ ܕܗܳܠܶܝܢ. ܐܰܝܟܰܢܳܐ ܗܳܟܺܝܠ ܕܠܰܥܝܳܕܳܐ ܗܰܘ ܟܬܳܒܳܝܳܐ ܢܳܩܶܦ ܗܽܘ ܐܶܘܰܢܓܶܠܺܝܣܛܳܐ܆ ܠܘܳܬ ܝܰܘܣܶܦ ܘܠܰܘ ܠܘܳܬ ܒܬܽܘܠܬܳܐ ܐܰܚܬܶܗ ܠܬܽܘܢܳܝܳܐ ܕܝܽܘܒܳܠܳܐ ܕܓܶܢܣܳܐ.

ܘܰܐܝܟܰܢܳܐ ܬܺܐܡܰܪ ܬܶܫܬܟܰܚ ܡܶܟܺܝܠ ܗܺܝ ܡܡܰܠܠܽܘܬ ܫܰܪ̈ܒܳܬܳܐ܆ ܕܠܳܚܡܳܐ ܠܰܡܫܺܝܚܳܐ ܗܰܘ ܕܠܰܘ ܡܶܢ ܝܰܘܣܶܦ ܗܘ̣ܳܐ. ܐܰܘ ܓܶܝܪ ܬܶܬܶܠ ܢܳܩܦܳܐܺܝܬ ܕܰܒܪܳܐ ܕܝܰܘܣܶܦ ܐܺܝܬܰܘܗ̱ܝ܆ ܐܰܘ ܐܶܢ ܠܰܘ ܗܳܕܶܐ܆ ܢܽܘܟܪܳܝܳܐ ܡܶܢ ܟܽܠܦܪܽܘܤ ܢܶܗܘܶܐ ܐܺܝܬܰܘܗ̱ܝ ܕܰܡܡܰܠܠܽܘܬ ܫܰܪ̈ܒܳܬܳܐ ܗܳܕܶܐ. ܐܶܠܳܐ ܓܰܠܝܳܐ ܐܺܝܬܰܘܗ̱ܝ ܗܽܘ ܚܽܘܫܳܒܳܐ܆ ܠܗܳܢܽܘܢ ܕܺܐܝܬܰܝܗܽܘܢ ܦܠܺܝ̈ܚܶܐ ܘܰܡܢܰܦ̈ܩܶܐ ܕܰܟܬܳܒ̈ܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ.

ܦܽܘܩܕܳܢܳܐ ܓܶܝܪ ܢܳܡܽܘܣܳܝܳܐ ܐܺܝܬ ܗ̱ܘܳܐ܆ ܕܰܒܝܰܕ ܡܽܘܫܶܐ ܐܶܬܺܝܗܶܒ܆ ܘܣܺܝܡ ܗ̱ܘܳܐ ܒܰܟܬܳܒܳܐ ܗܰܘ ܕܡܶܢ̈ܝܳܢܶܐ܆ ܗܰܘ ܕܦܳܩܶܕ ܗ̱ܘܳܐ ܕܠܳܐ ܢܶܗܘܶܐ ܫܰܠܺܝܛ ܠܐ̱ܢܳܫ ܟܰܕ ܡܶܢ ܫܰܒܛܳܐ ܐ̱ܚܪܺܢܳܐ ܐܺܝܬܰܘܗ̱ܝ܆ ܕܢܶܡܟܽܘܪ ܐܰܢ̱ܬܬܳܐ ܠܙܽܘܘܳܓܳܐ ܡܶܢ ܫܰܒܛܳܐ ܐ̱ܚܪܺܢܳܐ܆ ܐܶܠܳܐ ܡܶܢ ܟܽܠܦܪܽܘܤ ܡܶܢܶܗ ܟܰܕ ܡܶܢܶܗ܆ ܐܰܝܟܰܢܳܐ ܕܳܐܦ ܗܺܝ ܝܳܪܬܽܘܬܳܐ ܕܰܐܪܥܳܐ ܗܳܝ ܕܰܡܛܳܬ ܠܟܽܠ ܚܰܕ ܫܰܒܛܳܐ܆ ܠܳܐ ܬܶܥܒܰܪ ܠܘܳܬ ܫܰܒܛܳܐ ܐ̱ܚܪܺܢܳܐ ܒܥܶܠܬܳܐ ܕܙܽܘܘܳܓ̈ܶܐ^[31]. ܐܺܝܬ ܠܗܶܝܢ ܕܶܝܢ ܠܡ̈ܶܠܶܐ ܕܺܝܠܶܗ ܕܦܽܘܩܕܳܢܳܐ ܐܰ‌ܠܳܗܳܝܳܐ ܗܳܟܰܢܳܐ. ܟܽܠܢܳܫ ܒܝܳܪܬܽܘܬܳܐ ܕܫܰܒܛܳܐ ܕܰܐܒܽܘܗ̱ܝ ܢܶܬܢܰܩܦܽܘܢ ܒܢܰܝ̈ܳܐ ܕܺܐܝܣܪܳܐܶܝܠ. ܘܟܽܠ ܒܰܪܬܳܐ ܕܺܐܝܬ ܠܳܗ̇ ܐ̱ܚܝܳܢܽܘܬܳܐ ܒܝܳܪܬܽܘܬܳܐ ܡܶܢ ܫܰܒ̈ܛܶܐ ܕܰܒ̈ܢܰܝܳܐ ܕܺܐܝܣܪܳܐܶܝܠ܆ ܠܚܰܕ ܡܶܢ ܗܳܠܶܝܢ ܕܡܶܢ ܫܰܪ̈ܒܳܬܳܐ ܕܰܐܒܽܘܗ̱ܝܢ ܢܶܗܘ̈ܝܳܢ ܢܶܫ̈ܶܐ. ܐܰܝܟܰܢܳܐ ܕܢܶܗܘܽܘܢ ܩܰܪܺܝܒܺܝܢ ܒܰܐܚܝܳܢܽܘܬܳܐ ܒܢܰܝ̈ܳܐ ܕܺܐܝܣܪܳܐܶܝܠ܆ ܟܽܠܢܳܫ ܒܝܳܪܬܽܘܬܳܐ ܕܺܝܠܶܗ ܗܳܝ ܐܰܒܳܗܳܝܬܳܐ܆ ܘܠܳܐ ܢܶܬܗܦܰܟ ܝܽܘܪܬܳܢܳܐ ܡܶܢ ܫܰܒܛܳܐ ܠܘܳܬ ܫܰܒܛܳܐ ܐ̱ܚܪܺܢܳܐ. ܐܶܠܳܐ ܟܽܠܢܳܫ ܒܝܳܪܬܽܘܬܶܗ ܢܶܬܢܰܩܰܦ ܒܫܰܒܛܳܐ ܕܺܝܠܶܗ܆ ܫܰܒ̈ܛܶܐ ܕܰܒ̈ܢܰܝܳܐ ܕܺܐܝܣܪܳܐܶܝܠ.

ܡܶܛܽܠ ܗܳܢܳܐ ܢܳܡܽܘܣܳܐ ܐܳܦ ܝܰܘܣܶܦ ܟܰܕ ܢܳܛܽܘܪܳܐ ܕܦܽܘܩ̈ܕܳܢܶܐ ܕܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܠܗܳܕܶܐ ܓܶܝܪ ܫܰܘܕܥܳܗ̇ ܐܳܦ ܗܽܘ ܐܶܘܢܓܠܝܣܛܐ ܟܰܕ ܐܶܡܰܪ ܕܓܰܒܪܳܐ ܗ̱ܘܳܐ ܟܺܐܢܳܐ^[32]܆ ܘܡܶܢ ܫܰܒܛܳܐ ܕܺܝܗܽܘܕܳܐ܆ ܘܡܶܢ ܒܰܝܬܳܐ ܘܫܰܪܒܬܳܐ ܕܕܰܘܺܝܕ ܐܰܝܟ ܕܰܟܬܺܝܒ ܢܳܚܶܬ ܗ̱ܘܳܐ ܒܝܽܘܒܳܠܳܐ܆ ܡܶܢܶܗ ܟܰܕ ܡܶܢܶܗ ܕܫܰܒܛܳܐ ܘܫܰܘܝܽܘܬ ܓܶܢܣܳܐ ܡܰܟܪܳܗ̇ ܠܰܒܬܽܘܠܬܳܐ. ܐܰܝܟܰܢܳܐ ܟܺܝܬ ܕܰܡܡܰܠܠܽܘܬ ܫܰܪ̈ܒܳܬܳܐ ܗܳܝ ܕܺܝܠܶܗ܆ ܡܡܰܠܠܽܘܬ ܫܰܪ̈ܒܳܬܳܐ ܕܡܰܪܝܰܡ ܬܶܗܘܶܐ ܐܺܝܬܶܝܗ̇܆ ܗܳܝ ܕܡܶܢܳܗ̇ ܕܠܳܐ ܙܰܪܥܳܐ ܐܶܬܺܝܠܶܕ ܡܫܺܝܚܳܐ. ܘܗܳܟܰܢܳܐ ܐܳܦ ܥܝܳܕܳܐ ܕܰܟܬܳܒܳܐ ܢܶܗܘܶܐ ܢܛܺܝܪ܆ ܕܠܳܐ ܡܳܢܶܐ ܒܰܟܬܳܒܳܐ ܠܢܶܫ̈ܶܐ܆ ܘܡܶܢ ܗܳܕܶܐ ܘܠܳܐ ܒܡܶܕܶܡ ܢܣܬܰܓܰܦ ܫܪܳܪܳܐ. ܕܗܺܝ ܕܶܝܢ ܒܬܽܘܠܬܳܐ܆ ܕܺܝܠܳܗ̇ ܟܰܕ ܕܺܝܠܳܗ̇ ܕܫܰܪܒܬܳܐ ܘܫܰܘܝܽܘܬ ܓܶܢܣܳܐ ܠܝܰܘܣܶܦ ܐܺܝܬܶܝܗ̇ ܗ̱ܘܳܬ܆ ܝܰܬܺܝܪܳܐܺܝܬ ܡܰܢ܆ ܡܶܢܗܶܝܢ ܕܗܳܠܶܝܢ ܕܶܐܬܶܐܡܰܪ̈ܝ̱ ܐܶܬܚܰܘܝܰܬ ܓܰܠܝܳܐܺܝܬ. ܘܳܐܦ ܒܳܗ̇ ܒܡܶܠܬܳܐ ܕܶܝܢ ܐܳܡܰܪ ܠܳܗ̇ ܠܗܳܕܶܐ܆ ܟܬܳܒܳܐ ܗܰܘ ܟܳܗܢܳܝܳܐ. ܟܬܰܒ ܓܶܝܪ ܠܽܘܩܳܐ܆ ܕܶܐܫܬܰܕܰܪ ܓܰܒܪܐܝܠ ܡܶܢ ܠܘܳܬ ܐܰ‌ܠܳܗܳܐ܆ ܠܘܳܬ ܒܬܽܘܠܬܳܐ ܕܰܡܟܺܝܪܳܐ ܠܓܰܒܪܳܐ ܗܰܘ ܕܰܫܡܶܗ ܝܰܘܣܶܦ܆ ܡܶܢ ܒܰܝܬܶܗ ܕܕܰܘܺܝܕ^[33]. ܡܶܛܽܠ ܗܳܕܶܐ ܐܳܦ ܡܰܠܰܐܟܳܐ ܗܰܘ ܕܰܡܣܰܒܰܪ ܗ̱ܘܳܐ ܐܳܡܰܪ ܗ̱ܘܳܐ܆ ܘܬܺܐܠܕܺܝܢ ܒܪܳܐ ܘܬܶܩܪܶܝܢ ܫܡܶܗ ܝܶܫܽܘܥ. ܗܳܢܳܐ ܢܶܗܘܶܐ ܪܰܒܳܐ ܘܰܒܪܶܗ ܕܰܡܪܰܝܡܳܐ ܢܶܬܩܪܶܐ. ܘܢܶܬܶܠ ܠܶܗ ܡܳܪܝܳܐ ܐܰ‌ܠܳܗܳܐ ܟܽܘܪܣܝܶܗ ܕܕܰܘܺܝܕ ܐܰܒܽܘܗ̱ܝ^[34]. ܘܬܽܘܒ. ܣܠܶܩ ܕܶܝܢ ܐܳܦ ܝܰܘܣܶܦ ܡܶܢ ܓܠܺܝܠܳܐ ܡܶܢ ܢܳܨܪܰܬ ܡܕܺܝܢ̱ܬܳܐ ܠܺܝܗܽܘܕ ܠܰܡܕܺܝܢ̱ܬܶܗ ܕܕܰܘܺܝܕ܆ ܗܳܝ ܕܡܶܬܩܰܪܝܳܐ ܒܶܝܬ ܠܚܶܡ܆ ܡܶܛܽܠ ܕܺܐܝܬܰܘܗ̱ܝ ܗ̱ܘܳܐ ܡܶܢ ܒܰܝܬܳܐ ܘܡܶܢ ܫܰܪܒܬܳܐ ܕܕܰܘܺܝܕ܆ ܕܢܶܬܟܬܶܒ ܥܰܡ ܡܰܪܝܰܡ ܐܰܢ̱ܬܬܳܐ ܗܳܝ ܕܰܡܟܺܝܪܳܐ ܗ̱ܘܳܬ ܠܶܗ܆ ܕܺܐܝܬܶܝܗ̇ ܗ̱ܘܳܬ ܒܰܛܢܬܳܐ^[35]. ܘܠܳܐ ܐܶܡܰܪ ܕܰܣܠܶܩ ܥܰܡ ܡܰܪܝܰܡ܆ ܐܰܝܟܰܢܳܐ ܕܠܳܐ ܬܶܣܬܒܰܪ܆ ܕܡܶܛܽܠ ܫܰܘܝܽܘܬ ܡܰܥܡܪܳܐ ܣܶܠܩܰܬ ܥܰܡܶܗ. ܐܶܠܳܐ ܐܶܡܰܪ܆ ܕܢܶܬܟܬܶܒ ܥܰܡ ܡܰܪܝܰܡ. ܠܰܘ ܕܶܝܢ ܕܰܚܕܳܐ ܘܗ̱ܝ ܟܰܕ ܗܺܝ ܡܰܟܬܒܳܢܽܘܬܳܐ ܐܺܝܬܰܘܗ̱ܝ ܗ̱ܘܳܐ܆ ܐܶ‌ܠܽܘ ܠܳܐ ܐܳܦ ܕܺܝܠܳܗ̇ ܟܰܕ ܕܺܝܠܳܗ̇ ܘܫܰܘܝܽܘܬ ܓܶܢܣܐ ܐܺܝܬܰܘܗ̱ܝ ܗ̱ܘܳܐ܆ ܘܰܕܒܰܝܬܳܐ ܘܕܰܡܕܺܝܢ̱ܬܳܐ. ܫܰܪܒܬܳܐ ܕܶܝܢ ܐܺܝܬ ܥܝܳܕܳܐ ܠܰܟܬܳܒܳܐ ܠܡܶܩܪܳܐ܆ ܠܫܰܘܝܽܘܬ ܓܶܢܣܳܐ. ܐܳܦ ܓܶܝܪ ܟܽܠ ܚܰܕ ܫܰܒܛܳܐ ܬܽܘܒ܆ ܠܫܰܪ̈ܒܳܬܳܐ ܘܰܠܫܰܘܝܽܘܬ ܓܶܢܣ̈ܶܐ ܡܶܬܦܰܠܰܓ ܗ̱ܘܳܐ܆ ܐܰܝܟ ܕܺܝܕܺܝܥܳܐ ܡܶܢ ܟܬܳܒܳܐ ܗܰܘ ܕܡܶܢܝܳܢ̈ܶܐ. ܟܬܺܝܒ ܓܶܝܪ ܗܳܟܰܢܳܐ. ܘܰܗܘ̣ܰܘ ܒܢܰܝ̈ܳܐ ܕܪܽܘܒܝܠ ܒܽܘܟܪܶܗ ܕܺܐܝܣܪܳܐܶܝܠ܆ ܫܰܘܝܽܘܬ ܓܶܢ̈ܣܶܐ ܕܺܝܠܗܽܘܢ܆ ܒܫܰܪ̈ܒܳܬܳܐ ܕܺܝܠܗܽܘܢ܆ ܒܒ̈ܳܬܶܐ ܕܒܶܝܬ ܐܰܒܳܗܰܝ̈ܗܽܘܢ܆ ܒܡܶܢܝܳܢܳܐ ܕܰܫܡܳܗ̈ܶܐ ܕܺܝܠܗܽܘܢ܆ ܒܫܰܒ̈ܛܶܐ ܕܺܝܠܗܽܘܢ^[36]. ܘܳܐܦ ܝܶܫܽܘܥ ܒܰܪ ܢܽܘܢ ܟܬܰܒ ܗܳܟܰܢܳܐ. ܘܬܶܬܟܰܢܫܽܘܢ ܟܽܠܟܽܘܢ ܠܨܰܦܪܳܐ܆ ܐܰܝܟ ܫܰܒ̈ܛܶܐ ܕܺܝܠܟܽܘܢ. ܘܢܶܗܘܶܐ ܫܰܒܛܳܐ ܗܰܘ ܕܶܐܢ ܢܶܬܚܰܘܶܐ ܡܶܢ ܡܳܪܝܳܐ܆ ܢܩܰܪܒܽܘܢܳܝܗ̱ܝ ܒܫܰܪ̈ܒܳܬܳܐ. ܘܰܠܫܰܪܒܬܳܐ ܗܳܝ ܕܶܐܢ ܢܚܰܘܶܐ ܡܳܪܝܳܐ܆ ܢܩܰܪܒܽܘܢܳܗ̇ ܒܒ̈ܳܬܶܐ. ܘܰܠܒܰܝܬܳܐ ܗܰܘ ܕܶܐܢ ܢܚܰܘܶܐ ܡܳܪܝܳܐ܆ ܢܩܰܪܒܽܘܢܳܝܗ̱ܝ ܒܓܰܒܪ̈ܶܐ^[37].

ܐܶܠܳܐ ܢܺܐܡܰܪ ܐ̱ܢܳܫ ܕܗܺܝ ܗܳܕܶܐ ܫܳܓܫܳܐ ܠܺܝ܆ ܗܳܝ ܕܫܳܡܰܥ ܐ̱ܢܳܐ ܓܰܒܪܳܗ̇ ܕܡܰܪܝܰܡ^[38]܆ ܘܬܽܘܒ܆ ܠܡܰܪܝܰܡ ܐܰܢ̱ܬܬܳܟ^[39]. ܗܳܠܶܝܢ ܓܶܝܪ ܫܡܳܗ̈ܶܐ܆ ܕܙܽܘܘܳܓܳܐ ܘܰܕܫܰܘܬܳܦܽܘܬܳܐ ܐܺܝܬܰܝܗܽܘܢ ܡܫܰܘܕܥܳܢ̈ܶܐ. ܐܶܠܳܐ ܐܳܦ ܗܳܪܟܳܐ܆ ܠܰܟܬܳܒܳܐ ܐܰ‌ܠܳܗܳܝܳܐ ܢܩ݀ܪܩ^[40] ܠܡܰܦܰܩ ܒܪܽܘܚܳܐ܆ ܕܰܡܥܳܕ ܕܓܰܒܪܳܐ ܢܟܰܢܶܐ ܠܰܡܟܺܝܪܳܐ܆ ܘܠܰܡܟܺܝܪܬܳܐ ܒܳܗ̇ ܒܰܕܡܽܘܬܳܐ ܐܰܢ̱ܬܬܳܐ. ܟܬܺܝܒ ܓܶܝܪ ܒܬܶܢܝܳܢ ܢܳܡܽܘܣܳܐ ܗܳܠܶܝܢ. ܐܶܢ ܕܶܝܢ ܬܶܗܘܶܐ ܛܠܺܝܬܳܐ ܒܬܽܘܠܬܳܐ ܕܰܡܟܺܝܪܳܐ ܠܓܰܒܪܳܐ܆ ܘܟܰܕ ܢܶܫܟܚܺܝܗ̇ ܓܰܒܪܳܐ ܒܰܡܕܺܝܢ̱ܬܳܐ ܢܶܕܡܰܟ ܥܰܡܳܗ̇܆ ܐܰܦܶܩ ܠܰܬܪ̈ܰܝܗܽܘܢ ܠܘܳܬ ܬܰܪܥܳܐ ܕܰܡܕܺܝܢ̱ܬܳܐ ܗܳܝ܆ ܘܢܶܬܪܰܓܡܽܘܢ ܬܪ̈ܰܝܗܽܘܢ ܒܟܺܐܦ̈ܶܐ ܘܰܢܡܽܘܬܽܘܢ. ܗܳܝ ܥܠܰܝܡܬܳܐ ܡܶܛܽܠ ܕܠܳܐ ܩܥܳܬ ܒܰܡܕܺܝܢ̱ܬܳܐ. ܘܗܰܘ ܓܰܒܪܳܐ ܡܶܛܽܠ ܕܡܰܟܶܟ ܠܰܐܢ̱ܬܰܬ ܩܰܪܺܝܒܶܗ^[41]. ܚܙܺܝ ܐܰܝܟܰܢܳܐ ܠܰܛܠܺܝܬܳܐ ܗܳܝ ܒܬܽܘܠܬܳܐ܆ ܠܰܘ ܕܰܡܟܺܝܪܳܐ ܠܰܡܟܺܝܪܳܐ ܐܶܡܰܪ. ܐܶܠܳܐ ܠܓܰܒܪܳܐ. ܘܰܠܗܰܘ ܕܚܰܒܠܳܗ̇ ܠܗܳܕܶܐ ܦܩܰܕ ܕܢܶܬܪܓܶܡ܆ ܡܶܛܽܠ ܕܡܰܟܶܟ ܐܳܡܰܪ ܠܰܐܢ̱ܬܰܬ ܩܰܪܺܝܒܶܗ. ܘܟܰܕ ܛܳܒ܆ ܠܳܐ ܐܰܬ̣ܺܚܳܐ^[42] ܗ̱ܘܳܬ ܐܰܟܚܕܳܐ ܥܰܡܶܗ ܠܘܳܬ ܙܽܘܘܳܓܳܐ. ܡܟܺܝܪܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ. ܐܶܠܳܐ ܥܝܳܕܰܐ ܗ̄ܘ ܕܠܰܡܟܺܝܪܬܳܐ ܢܶܩܪܶܐ ܐܰܢ̱ܬܬܳܐ܆ ܘܠܰܡܟܺܝܪܐ ܓܰܒܪܳܐ.

ܒܪܰܡ ܠܰܘ ܠܒܰܪ ܡܶܢ ܪܽܘܚܳܐ ܩܰܕܺܝܫܳܐ܆ ܗܽܘ ܐܶܘܰܢܓܶܠܺܝܣܛܳܐ ܗܳܪܟܳܐ ܐܳܦ ܠܝܰܘܣܶܦ ܫܰܡܰܗ ܓܰܒܪܳܐ ܘܳܐܦ ܠܡܰܪܝܰܡ ܐܰܢ̱ܬܬܳܐ ܕܗܳܢܳܐ܆ ܘܟܰܕ ܫܡܳܗ̈ܶܐ ܕܰܡܥܰܝܕܺܝܢ ܠܰܟܬܳܒܳܐ ܐܳܡܰܪ܆ ܘܟܰܕ ܠܗܽܘܢ ܠܣܽܘܥܪ̈ܳܢܶܐ ܚܳܢܝܳܐܺܝܬ ܡܡܰܠܶܠ. ܡܶܬܦܰܪܢܣܳܐ ܗ̱ܘܳܬ ܓܶܝܪ ܐܳܦ ܗܳܕܶܐ܆ ܡܶܢ ܗܰܘ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܐܶܬܒܰܪܢܰܫ܆ ܗܳܝ ܕܬܶܬܚܰܦܶܐ ܬܡܺܝܗܽܘܬܶܗ ܕܝܰܠܕܳܐ. ܒܰܕܓܽܘܢ ܘܳܐܦܠܳܐ ܡܶܚܕܳܐ ܡܶܢܶܗ ܕܫܽܘܪܳܝܳܐ ܕܰܡܟܺܝܪܽܘܬܳܐ܆ ܗܘ̣ܳܐ ܗ̱ܘܳܐ ܗܽܘ ܒܰܛܢܳܐ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ܆ ܘܶܐܢܕܶܝܢ ܠܳܐ ܡܶܢ ܟܽܠ ܦܪܽܘܤ ܓܰܠܝܳܐ ܘܺܝܕܺܝܥܳܐ ܗܳܘܶܐ ܗ̱ܘܳܐ ܗܽܘ ܣܽܘܥܪܳܢܳܐ܆ ܐܶܠܳܐ ܒܶܗ ܒܙܰܒܢܳܐ ܡܶܟܺܝܠ ܗܰܘ ܕܰܓܢܽܘܢܳܐ. ܡܶܛܽܠ ܗܳܕܶܐ ܓܶܝܪ ܐܶܡܰܪ܆ ܕܰܩܕܳܡ ܕܢܶܫܬܰܘܬܦܽܘܢ ܐܶܫܬܰܟܚܰܬ ܕܒܰܛܢܳܐ ܡܶܢ ܪܽܘܚܳܐ ܩܰܕܺܝܫܳܐ^[43]. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܰܒܨܺܝܪ ܩܰܠܺܝܠ ‌ܐܳܦ ܡܶܫܬܰܘܬܦܺܝܢ ܗ̱ܘܰܘ܆ ܐܶ‌ܠܽܘ ܠܳܐ ܕܬܶܕܡܽܘܪܬܳܐ ܩܰܕܡܰܬ ܠܚܽܘܠܛܳܢܳܐ. ܘܗܳܟܰܢܳܐ ܝܰܘܣܶܦ ܠܰܘ ܚܰܬܢܳܐ܆ ܐܶܠܳܐ ܡܫܰܡܫܳܢܳܐ ܕܰܡܕܰܒܪܳܢܽܘܬܳܐ ܘܰܕܐ̱ܪ̈ܳܙܶܐ ܠܳܐ ܡܶܬܡܰܠ̈ܠܳܢܶܐ ܗܳܘܶܐ ܗ̱ܘܳܐ. ܘܫܳܡܰܥ ܗ̱ܘܳܐ ܠܳܐ ܬܶܕܚܰܠ ܠܡܶܕܒܰܪ ܠܡܰܪܝܰܡ ܐܰܢ̱ܬܬܳܐ ܕܺܝܠܳܟ. ܗܰܘ ܓܶܝܪ ܕܒܳܗ̇ ܐܶܬܺܝܠܶܕ܆ ܡܶܢ ܪܽܘܚܳܐ ܩܰܕܺܝܫܳܐ ܐܺܝܬܰܘܗ̱ܝ^[44]. ܐܰܝܟܰܢܳܐ ܕܟܰܕ ܙܰܒܢܳܐ ܣܰܓܺܝܳܐܐ ܕܒܰܛܢܳܐ ܠܘܳܬܶܗ ܥܒܰܪ܆ ܕܡܶܢ ܫܰܘܬܳܦܽܘܬܳܐ ܐܺܝܬܰܘܗ̱ܝ ܗ̱ܘܳܐ ܗܰܘ ܕܡܶܬܺܝܠܶܕ ܢܶܣܬܒܰܪ܆ ܘܠܰܘ ܡܶܢ ܪܽܘܚܳܐ ܩܰܕܺܝܫܳܐ. ܡܶܛܽܠܗܳܕܶܐ ܐܳܦ ܗܺܝ ܐܰܢ̱ܬܬܳܐ ܕܺܝܠܶܗ ܐܶܫܬܰܡܗܰܬ܆ ܘܳܐܦ ܗܽܘ ܓܰܒܪܳܐ ܕܺܝܠܳܗ̇. ܘܶܐܢ ܕܶܝܢ ܠܳܐ܆ ܕܠܳܐ ܟܺܝܬ ܗܘ̣ܳܐ ܥܰܡܳܗ̇ ܠܘܳܬ ܫܰܘܬܳܦܽܘܬܳܐ ܕܙܽܘܘܳܓܳܐ܆ ܐܰܝܟܰܢܳܐ ܓܶܝܪ ܥܰܠ ܗܳܕܶܐ ܡܶܢ ܒܳܬܰܪ ܒܰܛܢܳܐ ܐܰ‌ܠܳܗܳܝܳܐ ܡܰܡܪܰܚ ܗ̱ܘܳܐ܆ ܠܳܐ ܐܳܡܰܪ ܐ̱ܢܳܐ ܕܟܕ ܙܰܕܺܝܩܳܐ ܐܺܝܬܰܘܗ̱ܝ ܗ̱ܘܳܐ܆ ܐܶܠܳܐ ܘܳܐܦܶܢ ܐܺܝܬܰܘܗ̱ܝ ܗ̱ܘܳܐ ܐ̱ܢܳܫ ܕܣܰܓܺܝ ܐܺܝܬܰܘܗ̱ܝ ܪܰܫܺܝܥܳܐ ܘܰܕܠܳܐ ܢܳܡܽܘܤ܆ ܟܰܕ ܒܰܪܬܺܝܬܳܐ ܘܰܒܙܰܘܥܬܳܐ ܣܰܓܺܝܐܬܳܐ ܡܶܙܕܪܶܒ ܗ̱ܘܳܐ ܘܡܶܬܒܰܠܗܶܐ܆ ܠܘܳܬ ܗܳܝ ܕܢܶܬܚܰܫܰܒ ܒܰܠܚܽܘܕ܆ ܫܒܽܘܩ ܟܺܝܬ ܐܳܦ ܕܢܶܣܥܽܘܪ܆ ܣܰܗܶܕ ܠܽܘܩܳܐ ܕܰܟܬܰܒ ܓܰܠܝܳܐܺܝܬ܆ ܥܰܡ ܡܰܪܝܰܡ ܗܳܝ ܕܰܡܟܺܝܪܳܐ ܠܶܗ ܕܺܐܝܬܶܝܗ̇ ܒܰܛܢܬܳܐ. ܘܰܐܝܟܰܢܳܐ ܗܳܝ ܕܺܐܝܬܶܝܗ̇ ܒܰܛܢܬܳܐ ܡܟܺܝܪܳܐ ܗ̱ܘܳܬ. ܡܶܛܽܠ ܗܳܝ ܕܠܰܘ ܡܶܢܶܗ ܐܺܝܬܰܘܗ̱ܝ ܗ̱ܘܳܐ ܗܽܘ ܒܰܛܢܳܐ. ܐܶܠܳܐ ܡܶܢ ܪܽܘܚܳܐ ܩܰܕܺܝܫܳܐ. ܟܬܰܒ ܕܶܝܢ ܬܽܘܒ ܗܽܘ ܟܰܕ ܗܽܘ ܐܶܘܢܓܠܝܣܛܐ܆ ܘܺܐܝܬܰܘܗ̱ܝ ܗ̱ܘܳܐ ܗܽܘ ܝܶܫܽܘܥ܆ ܐܰܝܟ ܐܰܝܢܳܐ ܕܰܒܫܰܢ̱ܬܳܐ ܕܰܬܠܳܬܺܝܢ ܡܫܰܪܶܐ ܗ̱ܘܳܐ. ܘܺܐܝܬܰܘܗ̱ܝ ܗ̱ܘܳܐ ܐܰܝܟ ܕܡܶܣܬܒܰܪ ܗ̱ܘܳܐ܆ ܒܪܳܐ ܕܝܰܘܣܶܦ^[45].

ܐܶܠܳܐ ܒܪܰܡ܆ ܐܺܝܬ ܗ̱ܘܳܐ ܣܽܘܢܩܳܢܳܐ ܥܰܠ ܗܳܝ ܕܗܺܝ ܗܳܕܶܐ ܬܶܣܬܒܰܪ ܗ̱ܘܳܬ. ܐܶ‌ܠܽܘ ܓܶܝܪ ܡܶܢ ܫܽܘܪܳܝܳܐ ܝܽܗ̱ܘ̈ܕܳܝܶܐ ܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܩܳܛܽܘ̈ܠܶܐ܆ ܠܽܘܩܒܰܠ ܟܽܠ ܕܡܳܐ ܫܰܦܺܝܪ ܕܶܚܠܬܳܐ܆ ܝܺܕܰܥܘ ܗ̱ܘܰܘ ܠܰܒܬܽܘܠܽܘܬܳܐ ܘܰܠܒܰܛܢܳܐ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ܆ ܡܶܢ ܟܽܠ ܦܪܘܤ ܩܳܛܠܺܝܢ ܗ̱ܘܰܘ ܠܳܗ̇ ܠܰܒܬܽܘܠܬܳܐ܆ ܘܒܺܝ̈ܫܳܬܳܐ ܣܰܓܺܝ̈ܳܐܬܳܐ ܣܳܥܪܺܝܢ ܗ̱ܘܰܘ. ܘܰܕܗܳܠܶܝܢ ܩܰܪܺܝܒܳܐ ܗܝ ܬܰܚܘܺܝܬܳܐ܆ ܡܶܛܽܠ ܕܰܒܝܰܕ ܬܶܕܡܪ̈ܳܬܳܐ ܐܰܝܟ ܢܳܨ̈ܝ̣ܰܝ̣ ܥܰܡ ܐܰ‌ܠܳܗܳܐ܆ ܝܰܬܺܝܪܳܐܺܝܬ ܡܶܬܓܰܪܓܺܝܢ ܗ̱ܘܰܘ ܘܡܶܬܗܰܪܗܪܺܝܢ ܠܘܳܬ ܡܣܰܝܒܽܘܬ ܩܶܛܠܳܐ. ܠܠܳܥܳܙܳܪ ܓܶܝܪ ܡܶܛܽܠ ܟܺܝܬ ܕܡܶܢ ܡܺܝ̈ܬܶܐ ܡܶܢ ܝܶܫܽܘܥ ܬܡܺܝܗܳܐܺܝܬ ܚܙܰܐܘܗ̱ܝ ܕܩܳܡ܆ ܕܢܶܩܛܠܽܘܢܳܝܗ̱ܝ ܡܶܬܚܰܫܒܺܝܢ ܗ̱ܘܰܘ. ܘܰܠܗܳܕܶܐ ܐܳܡܰܪ ܠܳܗ̇ ܝܽܘܚܰܢܳܢ ܗܰܘ ܬܶܐܽܘܠܽܘܓܽܘܤ܆ ܗܳܟܰܢܳܐ. ܐܶܬܚܰܫܰܒܘ ܕܶܝܢ ܗܶܢܽܘܢ ܪ̈ܺܝܫܰܝ ܟܳܗ̈ܢܶܐ܆ ܕܳܐܦ ܠܶܗ ܠܠܳܥܳܙܳܪ ܢܶܩܛܠܽܘܢ܆ ܡܶܛܽܠ ܕܣܰܓܺܝ̈ܶܐܐ ܡܶܢ ܝܽܗ̱ܘ̈ܕܳܝܶܐ ܡܶܛܽܠܳܬܶܗ ܐܳܙܺܠ̱ܝܢ ܗ̱ܘܰܘ܆ ܘܰܡܗܰܝܡܢܺܝܢ ܗ̱ܘܰܘ ܒܶܗ ܒܝܶܫܽܘܥ^[46].

ܘܳܐܦ ܠܳܗ̇ ܕܶܝܢ ܠܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܶܫܟܚܺܝܢܰܢ܆ ܕܥܰܡ ܡܕܰܒܪܳܢܽܘܬܳܐ ܣܺܝܡܳܐ ܗ̱ܘܳܬ ܒܬܰܪܥܺܝܬܳܗ̇ ܘܡܶܬܗܰܦܟܳܐ ܗ̱ܘܳܬ܆ ܘܗܳܕܶܐ ܟܰܕ ܝܰܬܺܝܪ ܡܶܢ ܟܽܠܗܽܘܢ ܒܢܰܝ̈ܢܳܫܳܐ ܝܳܕܥܳܐ ܗ̱ܘܳܬ ܠܶܗ ܐܰܝܟ ܕܡܰܨܝܳܐ ܠܐ̱ܪܳܙܳܐ ܪܰܒܳܐ ܗܰܘ ܕܶܐܫܬܰܡܠܺܝ ܒܗ̇܆ ܘܳܐܡܪܳܐ ܗ̱ܘܳܬ ܠܘܳܬ ܝܶܫܽܘܥ ܟܰܕ ܥܕܰܟܺܝܠ ܛܰܠܝܳܐ ܗ̱ܘܳܐ ܒܰܒܣܰܪ܆ ܒܶܪܝ ܠܡܳܢܳܐ ܥܒܰܕܬ ܠܰܢ ܗܳܟܰܢܳܐ. ܗܳܐ ܐܰܒܽܘܟ ܐܳܦ ܐܶܢܳܐ܆ ܟܰܕ ܡܶܬܛܰܪܦܺܝܢ ܗ̱ܘܰܝܢ ܒܳܥܶܝܢ ܗ̱ܘܰܝܢ ܠܳܟ^[47].

ܠܳܐ ܗܳܟܺܝܠ ܬܶܬܕܰܡܰܪ ܟܰܕ ܫܳܡܰܥ ܐܰܢ̱ܬ ܝܰܘܣܶܦ ܓܰܒܪܳܗ̇ ܕܰܒܬܽܘܠܬܳܐ܆ ܟܰܕ ܝܺܠ̣ܶܦܬ ܠܥܽܘܡܩܳܗ̇ ܕܰܡܕܰܒܪܳܢܽܘܬܳܐ. ܢܺܝܫܳܐ ܓܶܝܪ ܐܺܝܬ ܗ̱ܘܳܐ ܕܠܰܘ ܡܶܢ ܝܽܗ̱ܘ̈ܕܳܝܶܐ ܒܰܠܚܽܘܕ ܬܶܬܛܰܫܶܐ ܗܺܝ ܒܬܽܘܠܽܘܬܳܐ ܘܰܬܡܺܝܗܽܘܬܶܗ ܕܝܰܠܕܳܐ܆ ܐܶܠܳܐ ܐܳܦ ܡܶܢ ܐܳܟܶܠ ܩܰܪܨܳܐ ܐܰܒܽܘܗܽܘܢ ܕܗܳܠܶܝܢ܆ ܗܰܘ ܕܚܳܣܶܡ ܡܰܢ ܒܦܽܘܪܩܳܢܐ ܕܺܝܠܰܢ܆ ܛܥܳܝܗ̱ܝ ܕܶܝܢ ܡܰܦܩܳܢܳܐ ܕܗܳܠܶܝܢ܆ ܘܰܕܙܰܪ̈ܥܶܐ ܦܳܪ̈ܽܘܩܳܝܶܐ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܕܟܽܠܶܗ ܥܳܠܡܳܐ. ܠܗܳܕܶܐ ܐܳܦ ܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ ܟܰܕ ܠܶܐܦܶܣܳܝ̈ܶܐ ܫܳܠܰܚ ܗ̱ܘܳܐ ܟܳܬܶܒ ܗ̱ܘܳܐ ܗܳܟܰܢܳܐ. ܘܶܐܬܛܰܫܝܰܬ ܡܶܢ ܐܰܪܟܽܘܢܶܗ ܕܥܳܠܡܳܐ ܗܳܢܳܐ ܒܬܽܘܠܽܘܬܳܗ̇ ܕܡܰܪܝܡ܆ ܐܳܦ ܝܰܠܕܳܗ̇. ܒܳܗ̇ ܒܰܕܡܽܘܬܳܐ ܐܳܦ ܡܰܘܬܶܗ ܕܡܳܪܝܳܐ. ܬܠܳܬܳܐ ܐ̱ܪ̈ܳܙܶܐ ܕܰܩܥܳܬܳܐ܆ ܗܳܠܺܝܢ ܟܺܝܬ ܕܰܒܫܶܬܩܶܗ ܕܰܐ‌ܠܳܗܳܐ ܐܶܣܬܥܰܪܘ.

ܐܶܬܒܰܩܺܝܬܽܘܢ ܟܰܕ ܗܳܠܶܝܢ ܫܳܡܥܺܝܢ ܗ̱ܘܰܝܬܽܘܢ܆ ܕܰܐܝܟܰܢܳܐ ܥܰܡ ܠܒܽܘܟ̈ܝܶܐ ܕܗܳܢܽܘܢ ܕܰܠܩܽܘܒܠܳܐ ܗܳܢܽܘܢ ܕܡܶܣܬܰܒܪܺܝܢ ܗ̱ܘܰܘ ܠܳܐ ܡܶܬܥܰܪ̈ܩܳܢܶܐ ܐܶܬܥܰܪܙܠܶܬ܆ ܠܡܳܐ ܡܶܕܶܡ ܕܰܐܝܟ ܗܳܟܰܢܳܐ܆ ܠܘܳܬ ܚܳܠܳܐ ܗܰܘ ܕܰܐ‌ܠܽܘܡܦ̊ܺܝܰܐܤ ܐܺܝܬ ܠܡܶܚܙܳܐ܆ ܕܰܠܡܳܐ ܠܡܶܬܚܰܠܳܛܽܘ ܥܰܡ ܗܳܢܽܘܢ ܕܢܳܚܬܺܝܢ ܕܰܐܪܳܐ ܕܶܚܠܶܬ܆ ܠܡܳܐ ܟܰܕ ܚܕܳܐ ܙܒܰܢ ܠܺܐܝ̈ܕܰܝܳܐ ܠܽܘܩܒܰܠ ‌ܐܺܝ̈ܕܰܝܳܐ ܚܶܪܙܶܬ܆ ܒܳܥܽܘܛܬܳܐ ܡܰܬܚܶܬ ܠܽܘܩܒܰܠ ܡܶܬܟܰܬܫܳܢܳܐ ܕܰܠܩܽܘܒܠܳܐ܆ ܠܒܰܪ ܡܶܢ ܢܳܡܽܘܣܳܐ ܕܰܐܬܠܺܝܛܽܘܬܳܐ܆ ܕܰܠܡܳܐ ܟܰܕ ܢܳܚܶܬ ܗ̱ܘܺܝܬ ܕܰܐܪܳܐ܆ ܠܒܰܪ ܡܶܢ ܠ̈ܛܳܝܶܐ ܗܳܢܽܘܢ ܕܣܺܝܡܺܝܢ ܗ̱ܘܰܘ ܐܰܝܟ ܚܽܘܓܬܳܐ ܢܰܣܺܝܬ ܠܡܶܐܬܳܐ܆ ܕܰܠܡܳܐ. ܚܽܘܟܳܡܳܐ ܡܶܕܶܡ ܕܡܶܢ ܠܒܰܪ ܕܕܰܐܪ̈ܳܪܶܐ ܩܛܺܝܪ̈ܳܢܳܝܶܐ ܘܰܡܦܺܝ̈ܣܳܢܝܐ ܓܫܰܦ ܒܺܝ܆ ܘܠܰܠܒܽܘܟ̈ܝܶܐ ܕܕܰܐܪ̈ܶܐ ܕܣܰܩܽܘܒܠܳܝܽܘܬ ܣܝܳܡ̈ܶܐ ܫܪܳܐ ܘܒܰܛܶܠ܆ ܕܰܠܡܳܐ ܡܶܢ ܗܳܪܟܳܐ ܫܓܽܘܫܝܳܐ ܡܶܕܶܡ ܩܳܡ܆ ܐܰܘ ܚܳܠܳܐ ܘܰܕܠܽܘܚܝܳܐ܆ ܠܰܘ ܟܽܠܗܶܝܢ ܢܺܝܚܳܐܺܝܬ ܘܰܡܫܰܝܢܳܐܺܝܬ ܩܰܒܠܶܬ܆ ܘܠܰܫܪ̈ܳܝܶܐ ܐܰܝܬܺܝܬ̣ ܥܠܰܝܗܶܝܢ ܢܳܡܽܘܣܳܐܺܝܬ܆ ܘܡܶܢܗܽܘܢ ܕܰܟܬܳܒ̈ܶܐ ܗܳܠܶܝܢ ܕܪܽܘܚܳܐ.

ܕܰܐܪܳܐ ܓܶܝܪ ܫܰܪܺܝܪܳܐܺܝܬ ܐܺܝܬܰܝܗܽܘܢ܆ ܐܳܦ ܕܽܘܪ̈ܳܫܶܐ ܗܳܠܶܝܢ ܕܕܰܐܝܟ ܗܳܟܰܢ܆ ܕܰܠܥܽܘܪ̈ܙܳܠܶܐ ܡܰܢ ܘܰܠܣܰܩܽܘܒܠܳܝܽܘܬ ܣܝܳܡ̈ܶܐ ܡܶܢ ܚܰܢ̈ܦܶܐ ܘܡܶܢ ܝܽܗ̱ܘ̈ܕܳܝܶܐ ܘܡܶܢ ܗܶܪ̈ܛܝܩܘ ܐܺܝܬ ܠܶܗ܆ ܟܰܕ ܐܳܟܶܠ ܩܰܪܨܳܐ ܘܫ̈ܺܐܕܶܐ ܡܰܥܒܕܺܝܢ ܒܗܽܘܢ ܒܗܳܠܶܝܢ ܡܰܪܺܝܪܽܘܬܳܐ ܘܰܡܦܺܝܣܳܢܽܘܬܳܐ ܕܗܽܘܦܳܟ ܚܽܘܫܳܒ̈ܶܐ. ܠܰܫܪܳܝܳܐ ܕܶܝܢ ܠܰܘ ܡܶܢ ܐܽܘܡܳܢܽܘܬܳܐ ܡܶܕܶܡ܆ ܐܶܠܳܐ ܡܶܢ ܡܰܥܒܕܳܢܽܘܬܳܐ ܗܳܝ ܕܡܶܢ ܠܥܶܠ ܘܡܰܘܗܰܒܬܳܐ܆ ܘܡܶܢ ܥܽܘܬܪܳܐ ܗܰܘ ܕܰܫܪܳܪܳܐ ܦܫܺܝܛܳܐ܆ ܕܡܶܛܽܠ ܡܫܰܪܬܚܽܘܬܳܐ ܕܡܶܬܚܰܘ̈ܝܳܢܘܳܬܳܐ܆ ܥܰܠ ܡܨܰܢܥܽܘܬܳܐ ܘܰܡܦܰܬܟܽܘܬܳܐ ܠܳܐ ܣܢܺܝܩ.

ܢܺܐܡܰܪ ܐܳܦ ܥܰܠ ܗܳܕܶܐ ܦܰܘܠܽܘܤ܆ ܕܠܳܐ ܐܺܝܬܰܘܗ̱ܝ ܠܰܢ ܕܰܐܪܳܐ ܠܘܳܬ ܕܡܳܐ ܘܒܶܣܪܳܐ ܐܶܠܳܐ ܠܘܳܬ ܪ̈ܺܝܫܳܢܘܳܬܳܐ. ܠܘܳܬ ܫܽܘܠ̈ܛܳܢܶܐ. ܠܘܳܬ ܐܰܚܺܝ̈ܕܰܝ ܥܳܠܡܳܐ ܕܚܶܫܘܟܳܐ ܕܥܳܠܡܳܐ ܗܳܢܳܐ. ܠܘܳܬ ܪ̈ܽܘܚܶܐ ܕܒܺܝܫܽܘܬܳܐ^[48]. ܠܗܳܢܳܐ ܐܰܓܽܘܢܳܐ ܚܳܙܶܐ ܡܫܺܝܚܳܐ. ܡܰܠܰܐܟ̈ܶܐ. ܪ̈ܺܝܫܰܝ ܡܰܠܰܐܟ̈ܶܐ. ܟܽܠܗܽܘܢ ܚܰܝ̈ܠܰܘܳܬܳܐ ܕܰܫܡܰܝܳܐ܆ ܘܪ̈ܽܘܚܳܬܳܐ ܕܙܰܕܝ̈ܩܶܐ ܘܰܕܚܰܣܝܳܐܺܝܬ ܐܶܬܕܰܒܰܪܘ. ܟܽܠܗܽܘܢ ܡܶܢ ܠܥܶܠ ܘܠܰܐܦܰܝ̈ ܠܥܶܠ ܚܳܝܪܺܝܢ. ܠܘܳܬ ܐܰܪܥܳܐ ܕܶܝܢ ܘܳܐܦܠܳܐ ܚܰܕ. ܘܳܐܦ ܗܽܘ ܣܳܝܽܘܡܶܗ ܕܰܐܓܽܘܢܳܐ܆ ܘܳܐܦ ܗܳܢܽܘܢ ܕܚܳܙܶܝܢ ܠܶܗ ܠܰܐܓܽܘܢܳܐ܆ ܘܳܐܦ ܗܰܘ ܕܡܶܬܟܰܬܰܫ ܠܶܗ ܠܗܳܢܳܐ.

ܒܗܳܢܳܐ ܡܰܢ ܓܶܝܪ ܕܰܐܪܳܐ ܡܶܬܪܰܓܫܳܢܳܐ ܕܗܳܢܽܘܢ ܕܰܒܦܰܓܪܳܐ ܡܶܬܕܰܪܫܺܝܢ܆ ܘܳܐܦ ܗܽܘ ܡܶܫܚܳܐ ܗܰܘ ܕܚܳܙܶܝܢܰܢ ܕܡܶܬܡܰܫܚܺܝܢ ܗܳܢܽܘܢ ܕܡܶܬܟܰܬܫܺܝܢ܆ ܡܶܢ ܙܰܝܬܳܐ ܘܡܶܢ ܐܰܪܥܳܐ ܐܺܝܬ ܠܶܗ ܥܶܠ̈ܠܳܬܳܐ. ܡܶܛܽܠ ܗܳܕܶܐ ܐܳܦ ܥܰܦܪܳܐ ܫܳܝܦܺܝܢ ܒܰܚ̈ܕܳܕܶܐ ܗܳܢܽܘܢ ܕܢܳܚܬܺܝܢ ܕܰܐܪܳܐ܆ ܐܰܝܟܰܢܳܐ ܕܠܳܐ ܢܶܫܪܥܽܘܢ ܠܒܽܘܟ̈ܝܶܐ ܕܺܐܝ̈ܕܰܝܗܽܘܢ. ܥܰܠ ܗܰܘ ܕܶܝܢ ܡܶܬܗܰܘܢܳܢܳܐ ܘܕܺܝܠܰܢ܆ ܪܽܘܚܳܢܳܝܬܳܐ ܘܰܫܡܰܝܳܢܺܝܬܳܐ ܐܺܝܬܶܝܗ̇ ܡܫܺܝܚܽܘܬܳܐ܆ ܗܳܝ ܕܣܳܝܽܘܡܽܘܬ ܒܢܰܝ̈ܳܐ ܐܳܡܰܪ ܐ̱ܢܳܐ܆ ܗܳܝ ܕܒܺܐܝ̈ܕܶܝܗ̇ ܟܽܠ ܡܳܐ ܕܺܐܝܬܰܘܗ̱ܝ ܐܰܪܥܳܢܳܝܳܐ ܙܳܢܩܺܝܢܰܢ ܡܶܢܰܢ܆ ܘܠܳܐ ܫܳܒܩܺܝܢܰܢ ܠܶܗ ܠܳܐܟܶܠܩܰܪܨܳܐ ܕܰܠܗܳܢܳܐ ܢܫܽܘܦ ܒܰܢ܆ ܟܰܕ ܝܳܕܥܺܝܢܰܢ ܠܗܶܝܢ ܠܡܰܚ̈ܫܒܳܬܶܗ܆ ܘܢܳܛܪܺܝܢ ܚ̱ܢܰܢ ܠܳܗ̇ ܠܰܡܫܺܝܚܽܘܬܳܐ ܢܰܗܺܝܪܬܳܐ ܘܰܕܡܰܙܗܪܳܐ ܘܡܰܒܪܩܳܐ܆ ܟܰܕ ܠܒܳܒ̈ܳܬܳܐ ܕܺܝܠܶܗ ܘܰܕܫ̈ܺܐܕܶܐ ܡܣܰܡܝܳܐ. ܐܶܢܕܶܝܢ ܡܶܕܶܡ ܡܶܢ ܐܰܪܥܳܐ ܣܳܟ ܢܩܰܒܶܠ܆ ܟܰܕ ܬܟܺܝܠ ܣܳܥܶܐ ܘܣܳܒܶܟ ܥܠܰܝܢ. ܘܙܳܟܶܐ ܡܶܢ ܟܽܠܦܪܽܘܤ܆ ܘܪܳܡܶܐ ܠܰܢ ܡܰܦܽܘܠܬܳܐ ܗܳܝ ܕܝܰܬܺܝܪ ܡܶܢ ܟܽܠ ܕܰܘܝܳܐ.

ܕܡܶܢ ܗܳܪܟܳܐ ܐܳܦ ܝܽܘܚܰܢܳܢ ܟܳܬܶܒ ܗ̱ܘܳܐ܆ ܡܫܺܝܚܽܘܬܳܐ ܗܳܝ ܕܰܢܣܰܒܬܽܘܢ ܡܶܢܶܗ ܬܩܰܘܶܐ ܒܟܽܘܢ܆ ܘܠܳܐ ܣܢܺܝܩܺܝܢ ܐܢ̱ܬܽܘܢ ܕܐ̱ܢܳܫ ܢܰܠܶܦܟܽܘܢ. ܐܶܠܳܐ ܐܰܝܟ ܕܗܺܝ ܡܫܺܝܚܽܘܬܳܐ ܕܺܝܠܶܗ ܡܰܠܦܳܐ ܠܟܽܘܢ ܡܶܛܽܠ ܟܽܠܗܶܝܢ^[49].

ܬܰܘ ܗܳܟܺܝܠ ܠܘܳܬ ܠܘܳܬ ܚܶܦܪܳܐ^[50] ܕܺܝܠܝ. ܘܥܰܠ ܗܰܘ ܕܡܶܣܬܰܟܶܐ ܥܰܡ ܦܰܩܪܽܘܬܳܐ܆ ܗܰܘ ܕܕܰܐܦܢܳܐ ܒܰܣܪܘ. ܗܘܰܘ ܠܺܝ ܪ̈ܳܚܡܰܝ ܚܶܙܘܳܢ̈ܶܐ ܕܕܰܐܪ̈ܶܐ ܪ̈ܽܘܚܳܢܶܐ܆ ܘܶܐ݀ܛܰܝܶܒ ܠܟܽܘܢ ܐܳܦ ܥܽܘܪ̈ܙܳܠܶܐ ܐ̱ܚܪ̈ܳܢܶܐ ܥܰܣ̈ܩܰܝ ܠܡܶܫܬܪܳܝܽܘ ܕܒܰܥ̈ܠܰܝ ܕܰܐܪܳܐ. ܘܝܰܬܺܝܪ ܫܦܺܝܥܳܐܺܝܬ ܘܰܒܪܰܒܽܘܬ ܢܰܦܫܳܐ ܐ݀ܶܥܰܬܕܶܝܗ̇ ܠܬܶܐܰܛܪܘܢ܆ ܐܰܝܟ ܐܰܝܢܳܐ ܕܡܶܛܽܠ ܟܠܺܝܠܳܐ ܘܡܶܛܽܠ ܡܶܬܟܰܪܙܳܢܽܘܬܳܐ ܡܶܬܟܰܬܰܫ ܐ̱ܢܳܐ܆ ܘܶܐ݀ܚܰܘܶܐ ܕܒܰܐܝܢܳܐ ܙܢܳܐ ܙܳܕܶܩ ܐܳܦ ܠܟܽܘܢ ܕܬܶܬܟܰܬܫܽܘܢ. ܐܰܝܟܰܢܳܐ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܫܰܝܢܶܗ ܕܰܡܫܺܝܚܳܐ ܢܡܰܨܰܥ ܘܰܢܕܰܒܰܪ ܘܢܰܦܶܩ ܦܣܳܩܳܐ ܕܡܶܛܽܠ ܟܠܺܝܠܳܐ ܕܙܳܟܽܘܬܳܐ ܒܠܶܒܰܘ̈ܳܬܳܐ ܕܺܝܠܰܢ܆ ܗܰܘ ܕܳܐܦ ܐܶܬܩܪܺܝܢܰܢ ܠܶܗ^[51]܆ ܘܢܶܫܬܘܶܐ ܠܡܰܠܟܽܘܬܳܐ ܕܰܫܡܰܝܳܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ ܥܰܡ ܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܬܫܥܝܢ ܘܐܪܒܥܐ.

ܝܘܚܢܢ. 1: 1 [1]

ܝܘܚܢܢ. 1: 14 [2]

ܡܬܝ. 1: 1 [3]

ܐܫܥܝܐ. 53: 8[4]

ܡܬܝ. 1: 3 [5]

ܡܬܝ. 1: 6 [6]

ܩܳܡܶܛ [7]

ܥܒܪ̈ܝܐ. 2: 16 ـ 17 [8]

ܡܬܝ. 1: 6 [9]

ܐܫܥܝܐ. 53: 4[10]

ܦܝܠܝܦܣ̈ܝܐ. 2: 7 [11]

ܠܘܩܐ. 1: 2 [12]

ܝܘܚܢܢ. 8: 22: (33) [13]

ܝܘܚܢܢ. 8: 28: (39) [14]

ܡܬܝ. 3: 9 [15]

ܓܠܛܝ̈ܐ. 3: 7 [16]

ܡܬܝ. 1: 1[17]

ܢܫܺܝܛܝܘܗܝ[18]

ܡܙܡܘܪ̈ܐ. 131: 10 ـ 11 [19]

ܒܡܙܡܘܪ̈ܐ ܟܬܝܒ. ܥܠܰܝܗܝܢ.[20]

ܚܙܩܝܐܝܠ. 34: 23 ـ 24 [21]

ܐܪܡܝܐ. 23: 5 [22]

ܝܘܚܢܢ. 7: 41 ـ 42 [23]

ܣܶܦܪܐ ܕܒܪܝܬܐ. 22: 18 ܐܦ 26: 4[24]

ܡܬܝ. 1: 17 [25]

ܕܰܪܘܶܐ ܘܕܺܝܫ ܘܰܥܠܺܝܒ ܠܚܰܝܠܳܐ ܕܚܰܡܪܳܐ.[26]

 ܦܗܳܐ. ܛܥܳܐ. ܦܰܕ.[27]

ܣܺܝܡܬܳܐ ܕܬܐܘܡܐ ܐܘܕܘ. ܣܪܰܒ. ܦܰܩܶܩ. ܒܕܐ. ܘܫܪܟܐ.[28]

 ܒܕ̣ܐ. ܒܓܰܠ. ܫܢ̣ܳܐ. ܗܘܳܐ ܫܳܢܝܳܐ.[29]

ܐܫܥܝܐ. 32: 6[30]

ܣܶܦܪܐ ܕܡܶܢܝܢܐ. 36: 7 ـ 9 [31]

ܡܬܝ. 1: 19 [32]

ܠܘܩܐ. 1: 26 ـ 27 [33]

ܠܘܩܐ. 1: 31 ـ 32 [34]

ܠܘܩܐ. 2: 4 ـ 5 [35]

ܣܶܦܪܐ ܕܡܢܝܢܐ. 1: 20 [36]

ܝܫܘܥ ܒܪܢܘܢ. 7: 14 [37]

ܡܬܝ. 1: 16 [38]

ܡܬܝ. 1: 20 [39]

ܢܰܩܪܰܚ؟ [40]

ܬܢܝܢ ܢܡܘܣܐ. 22: 23 ـ 24 [41]

ܐܰܬܺܝ̣ܝ̣ܳܐ؟[42]

ܡܬܝ. 1: 18 [43]

ܡܬܝ. 1: 20[44]

ܠܘܩܐ. 3: 23 [45]

ܝܘܚܢܢ. 12: 11 ـ 12 [46]

ܠܘܩܐ. 2: 48[47]

ܐܦܣ̈ܝܐ. 6: 12 [48]

ܐ. ܝܘܚܢܢ. 2: 27 [49]

[50]ܚܶܦܪܳܐ ܩܳܪܶܐ ܠܕܽܘܟܬܳܐ ܗܳܝ ܕܡܶܬܪܰܫܡܳܐ ܘܡܶܬܬܚܺܝܓܳܐ ܠܗܽܘܢ ܠܕܰܪܳܪ̈ܶܐ ܕܒܳܗ̇ ܢܶܬܥܰܪܙܠܽܘܢ ܥܰܡ ܚ̈ܕܳܕܶܐ ܒܕܰܐܪܳܐ.

ܩܘܠܣ̈ܝܐ. 3: 15 [51]