ܡܺܐܡܪܳܐ ܕܬܶܫܥܺܝܢ ܘܰܬܠܳܬܳܐ

ܐܶܬܶܐܡܰܪ ܕܶܝܢ ܟܰܕ ܥܬܺܝ̈ܕܳܢ ܗ̱ܘܰܝ̈ ܕܢܶܬܩܰܪ̈ܝܳܢ ܟܬܺܝ̈ܒܳܬܳܐ ܣܽܘܢܘܕܝ̈ܩܶܐ ܕܪܳܚܶܡ ܐܰ‌ܠܳܗܳܐ ܕܝܘܣܩܘܪܘܤ ܪܺܝܫ ܐܶܦܣ̈ܩܽܘܦܶܐ ܕܗܳܝ ܕܰܐ‌ܠܟܣܰܢܕܪ̈ܳܝܶܐ.

93: ܙܰܒܢܰܐ ܗܘ ܗܳܫܳܐ ܠܡܶܙܡܰܪ ܘܰܠܡܰܙܥܳܩܽܘ ܥܰܡ ܬܰܪܥܺܝܬܳܐ ܡܶܕܶܡ ܫܰܦܺܝܪܰܬ ܩܺܝܢܬܳܐ܆ ܘܰܕܝܳܕܥܳܐ ܠܡܶܙܡܰܪ ܪܽܘܚܳܢܳܐܺܝܬ ܘܰܠܡܰܪܓܳܫܽܘ ܒܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܠܰܒ̈ܢܳܬ ܩܴ̈ܠܶܐ ܗܳܠܶܝܢ ܕܰܢܒܺܝܳܐ ܕܰܘܺܝܕ܆ ܡܰܢܽܘ ܢܡܰܠܶܠ ܚܰܝ̈ܠܬܳܢܘܳܬܳܐ ܕܡܳܪܝܳܐ܆ ܡܶܫܬܰܡܥ̈ܳܢܝܳܬܳܐ ܢܶܥܒܶܕ ܠܟܽܠܗܶܝܢ ܬܶܫܒ̈ܚܳܬܳܐ ܕܺܝܠܶܗ^[1].

ܕܚܰܝܠܶܗ ܓܶܝܪ ܕܡܳܪܝܳܐ ܐܺܝܬܰܘܗ̱ܝ ܥܒܳܕܳܐ ܒܰܫܪܳܪܳܐ܆ ܕܡܶܨܪ̈ܳܝܶܐ ܠܘܳܬܰܢ ܘܰܚܢܰܢ ܠܘܳܬ ܡܶܨܪ̈ܳܝܶܐ܆ ܢܶܗܘܶܐ ܐܳܙܺܠ̱ܝܢܰܢ ܘܡܶܬܚܰܠܛܺܝܢܰܢ ܒܰܐܣܳܪܳܐ ܕܗܰܝܡܳܢܽܘܬܳܐ܆ ܠܗܰܘ ܕܰܣܕܰܩ ܢܶܣܛܽܘܪܺܝܽܘܤ ܘܣܺܝܥܬܶܗ ܛܰܡܰܐܬܳܐ ܕܗܰܘ܆ ܟܰܕ ܥܰܠ ܥܻ̈ܕܳܬܳܐ ܩܰܕܺܝ̈ܫܳܬܳܐ ܒܦܰܪ̈ܨܽܘܦܶܐ ܣܰܓܺܝ̈ܶܐܐ ܡܶܢ ܒܳܬܰܪ ܗܰܘ ܐܶܙܕܰܝܢܰܬ̣܆ ܘܠܽܘܩܒܰܠ ܬܪܶܥܣܰܪ ܩܶܦܱ̈ܠܶܐܐ ܕܗܰܘ ܚܰܟܺܝܡ ܒܰܐܠܳܗܳܝ̈ܳܬܳܐ ܩܽܘܪܺܝܠܘܤ܆ ܘܠܽܘܩܒܰܠ ܡܰܠ̈ܦܳܢܘܳܬܳܐ ܕܺܝܠܶܗ ܗܳܠܶܝܢ ܕܫܰܪܟܳܐ ܣܪܺܝܩܳܐܺܝܬ ܐܰܩܪܒܰܬ܆ ܘܰܠܚܰܕ ܡܳܪܝܳܐ ܕܺܝܠܰܢ ܘܰܐ‌ܠܳܗܳܐ ܝܶܫܽܘܥ ܡܫܺܝܚܳܐ ܠܰܬܪܶܝܢ ܦܶܠܓܰܬ̣܆ ܒܗܳܝ ܕܰܡܬܰܚܡܳܐ ܠܶܗ ܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܦܰܫܩܳܢܺܝܬܳܐ܆ ܘܰܕܗܳܠܶܝܢ ܢܳܩܦܳܐܺܝܬ܆ ܡܰܥ̈ܒܕܳܢܘܳܬܳܐ ܡܦܰܠ̈ܓܳܬܐ ܘܕܺܝܠ̈ܳܝܘܳܬܳܐ.

ܐܶܠܳܐ ܗܳܫܳܐ ܡܶܢ ܗܳܪܟܳܐ ܠܬܰܡܳܢ ܘܡܶܢ ܬܰܡܳܢ ܠܗܳܪܟܳܐ܆ ܗܳܝ ܕܙܳܕܶܩ ܕܚܰܕ ܟܝܳܢܳܐ ܢܰܘܕܶܝܘܗ̱ܝ ܠܥܰܡܰܢܽܘܐܶܝܠ ܥܳܒܪܳܐ ܘܗܳܦܟܳܐ ܡܶܬܬܰܥܒܪܳܐ. ܗܽܘ ܟܰܕ ܗܽܘ ܐܰ‌ܠܳܗܳܐ ܟܺܝܬ ܘܒܰܪܢܳܫܳܐ܆ ܤܛܰܪ ܡܶܢ ܫܽܘܚܠܳܦܳܐ ܘܦܰܢܛܰܣܺܝܰܐ. ܘܠܰܘ ܬܪܶܝܢ ܟܝܳܢ̈ܶܐ܆ ܐܶܠܳܐ ܚܰܕ ܟܝܳܢܳܐ ܟܺܝܬ ܘܰܩܢܽܘܡܳܐ܆ ܕܰܡܒܰܣܰܪ ܘܰܡܫܰܡܠܝܳܐܺܝܬ ܐܶܬܒܰܪܢܰܫ܆ ܕܺܝܠܶܗ ܕܰܐ‌ܠܳܗܳܐ ܡܶܠܬܳܐ. ܠܗܰܘ ܡܳܐ ܓܶܝܪ ܕܡܶܢ ܬܪܶܝܢ ܡܶܕܶܡ܆ ܡܶܢ ܐ̱ܢܳܫܽܘܬܳܐ ܐܳܡܰܪ ܐ̱ܢܳܐ ܘܡܶܢ ܐܰ‌ܠܳܗܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܳܢܳܝܬܳܐ ܗܳܝ ܕܺܝܠܗܶܝܢ܆ ܠܳܐ ܡܒܰܠܒܠܳܐܺܝܬ ܠܚܰܕ ܐܶܬܟܰܢܰܫ܆ ܐܰܝܟܰܢܳܐ ܐ̱ܢܳܫ ܢܶܩܪܶܐ ܬܪܶܝܢ ܟܰܕ ܠܳܐ ܫܳܪܶܐ ܠܳܗ̇ ܠܰܚܕܳܝܽܘܬܳܐ.

ܒܰܕܓܽܘܢ ܐܳܦ ܚܰܕ ܡܶܢ ܬܰܪܬܶܝܢ ܠܳܐ ܦܣܺܝܩܳܐܺܝܬ ܐܺܝܬܰܘܗ̱ܝ ܡܫܺܝܚܳܐ܆ ܘܡܶܛܽܠ ܗܳܝ ܕܠܳܐ ܡܒܰܠ̈ܒܠܳܢ ܗܳܠܶܝܢ ܕܡܶܢܗܶܝܢ ܗܳܝ ܚܕܳܝܽܘܬܳܐ܆ ܡܚܰܘܶܐ ܐܳܦ ܗܳܟܰܢܳܐ ܠܳܐ ܡܦܰܠܓܳܐܺܝܬ ܕܗܽܘ ܟܰܕ ܗܽܘ ܐܺܝܬܰܘܗ̱ܝ ܫܘܶܐ ܒܽܐܘܣܺܝܰܐ ܡܰܢ ܠܰܐܒܳܐ ܒܰܐܠܳܗܽܘܬܳܐ܆ ܫܘܶܐ ܒܽܐܘܣܺܝܰܐ ܕܶܝܢ ܠܰܢ ܒܢܰܝ̈ܢܳܫܳܐ ܬܽܘܒ܆ ܗܽܘ ܟܰܕ ܗܽܘ ܒܐ̱ܢܳܫܽܘܬܳܐ. ܟܰܕ ܓܶܝܪ ܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ܆ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ.

ܒܗܳܠܶܝܢ ܡܩܰܒܶܠ ܠܰܢ ܝܰܘܡܳܢܳܐ ܕܝܘܣܩܘܪܘܤ܆ ܗܰܘ ܕܰܠܟܽܘܪܣܝܳܐ ܐܶܘܰܢܓܶܠܳܝܳܐ ܕܰܐ‌ܠܳܗܳܝܳܐ ܡܰܪܩܽܘܤ ܝܺܪܶܬ܆ ܒܰܦܣܳܩܳܐ ܕܡܶܢ ܠܥܶܠ܆ ܓܰܒܪܳܐ ܕܰܩܕܳܡ ܕܢܶܚܘܰܪ ܣܰܥܪܳܐ ܗܰܘ ܕܥܰܠ ܪܺܝܫܶܗ ܣܳܒܳܐ ܐܺܝܬܰܘܗ̱ܝ ܒܣܰܟܽܘܠܬܳܢܽܘܬܐ܆ ܘܰܒܥܰܡ̈ܠܶܐ ܡܰܢ ܕܰܢܙܺܝܪܽܘܬܳܐ ܐܶܬܪܰܒܺܝ ܘܰܠܛܰܠܝܽܘܬܐ ܬܳܪܐܳܐ܆ ܒܬܶܫܡ̈ܫܳܬܳܐ ܕܶܝܢ ܗܳܠܶܝܢ ܟܳܗ̈ܢܳܝܳܬܳܐ ܚܝܳܐ܆ ܘܰܒܝܰܕ ܕܰܪ̈ܓܶܐ ܥܻ̈ܕܬܳܢܳܝܶܐ ܠܘܳܬ ܐܶܦܝܣܩܽܘܦܽܘܬܳܐ ܐܶܫܬܰܘܫܰܛ܆ ܘܥܰܠ ܬܪܽܘܢܘܤ ܗܰܘ ܕܛܳܒ ܣܰܓܺܝ ܡܥܰܠܰܝ ܘܺܐܝܬܰܘܗ̱ܝ ܪܺܝܫܳܐ ܕܟܽܘܪ̈ܣܰܘܳܬܳܐ ܟܳܗ̈ܢܳܝܶܐ ܗܳܢܽܘܢ ܕܒܺܐܓܘܦܛܘܤ ܣܠܶܩ܆ ܘܰܠܚܽܘܛܪܳܐ ܗܰܘ ܡܠܺܝܠܳܐ ܕܪܺܝܫܽܘܬ ܪܳܥܝܽܘܬܳܐ ܩܰܒܶܠ. ܡܶܛܽܠ ܕܶܝܢ ܕܽܘܓ̈ܡܰܐܛܰܐ ܕܺܝܠܶܗ ܬܪ̈ܺܝܨܶܐ ܘܝܽܘܠ̈ܦܳܢܰܘܗ̱ܝ ܝܰܬܺܝܪܬܳܐ ܗܝ ܠܡܺܐܡܰܪ. ܗܳܠܶܝܢ ܓܶܝܪ ܕܺܝܠ̈ܳܢܴܝܶܐ ܐܺܝܬܰܝܗܽܘܢ ܕܰܡܕܺܝܢ̱ܬܳܐ ܪܰܒܬܳܐ ܘܪܳܚܡܰܬ ܠܰܡܫܺܝܚܳܐ ܗܳܝ ܕܰܐ‌ܠܶܟܣܰܢܕܪ̈ܳܝܶܐ ܘܰܕܪ̈ܳܥܰܘܳܬܳܗ̇ ܕܗܳܝ. ܘܗܳܕܶܐ ܒܰܕܡܽܘܬ ܝܽܘܪܬܳܢܳܐ ܐܰܒܳܗܳܝܳܐ܆ ܐܳܦ ܥܰܠ ܗܳܢܽܘܢ ܕܡܶܢ ܒܳܬܰܪܟܶܢ ܢܳܚܬܳܐ܆ ܘܳܐܦܠܳܐ ܡܬܽܘܡ ܡܶܬܦܰܣܩܳܐ. ܗܳܝ ܓܶܝܪ ܕܰܢܗܰܝܡܢܽܘܢ ܚܠܺܝܡܳܐܺܝܬ܆ ܐܰܝܟ ܗܳܝ ܕܰܢܣܽܘܩܽܘܢ ܐܳܐܰܪ ܡܟܳܢܳܐ ܒܗܽܘܢ.

ܘܰܠܗܳܕܶܐ ܐܶܫܰܥܝܳܐ ܗܰܘ ܢܒܺܝܳܐ ܒܪܰܒܽܘܬ ܩܳܠܳܐ ܡܩܰܕܶܡ ܗ̱ܘܳܐ ܡܰܟܪܶܙ ܟܰܕ ܐܳܡܰܪ܆ ܒܝܰܘܡܳܐ ܗܰܘ ܢܶܗܘܶܐ ܡܰܕܒܚܳܐ ܠܡܳܪܝܳܐ ܒܰܐܬܪܳܐ ܕܡܶܨܪ̈ܳܝܶܐ܆ ܘܩܳܝܶܡܬܳܐ ܠܘܳܬ ܬܚܽܘܡܳܐ ܕܺܝܠܳܗ̇ ܠܡܳܪܝܳܐ܆ ܘܬܶܗܘܶܐ ܠܳܐܬ̣ܳܐ ܠܥܳܠܰܡ܆ ܠܡܳܪܝܳܐ ܨܒܰܐܘܽܬ ܒܰܐܬܪܳܐ ܕܡܶܨܪܶܝܢ^[2].

ܡܳܪܳܢܳܐܺܝܬ ܓܶܝܪ ܠܗܰܘ ܙܰܕܶܩ ܠܡܶܩܪܳܐ ܡܰܕܒܚܳܐ܆ ܠܗܰܘ ܕܰܥܠܰܘܗ̱ܝ ܗܰܝܡܳܢܽܘܬܳܐ ܬܪܺܝܨܬܳܐ ܠܕܶܒܚܬܳܐ ܡܟܰܗܢܳܐ. ܕܠܳܗ̇ ܟܺܝܬ ܠܗܳܕܶܐ ܗܰܝܡܳܢܽܘܬܳܐ ܕܡܶܨܪ̈ܳܝܶܐ܆ ܘܳܠܝܳܐܺܝܬ ܩܳܝܶܡܬܳܐ ܫܰܡܗܳܗ̇ ܢܒܺܝܳܐ܆ ܡܶܛܽܠ ܗܳܝ ܕܰܐܝܟ ܕܥܰܠ ܩܳܝܶܡܬܳܐ ܕܰܢܚܳܫܳܐ܆ ܓܠܺܝܦܳܐ ܘܰܪܫܺܝܡܳܐ ܥܰܠ ܠܶܒܰܘ̈ܳܬܗܽܘܢ܆ ܘܰܒܚܰܕ ܡܶܢ ܙܢܺܝ̈ܢ ܠܳܐ ܡܶܬܒܰܨܪܳܐ ܐܰܘ ܡܶܬܠܰܚܝܳܐ. ܡܶܛܽܠ ܗܳܕܶܐ ܗܳܟܺܝܠ ܡܰܕܒܚܶܗ ܕܡܳܪܝܳܐ ܐܺܝܬܰܘܗ̱ܝ ܡܰܕܒܚܳܐ ܗܰܘ ܕܡܶܨܪ̈ܳܝܶܐ܆ ܡܶܛܽܠ ܕܳܐܦ ܗܰܝܡܳܢܽܘܬܗܽܘܢ ܠܰܘ ܡܶܫܬܰܚܠܦܳܢܺܝܬܳܐ ܗܝ ܒܙܰܒܢܳܐ܆ ܐܶܠܳܐ ܐܰܝܟ ܕܥܰܠ ܩܳܝܶܡܬܳܐ ܟܬܺܝܒܳܐ.

ܡܶܛܽܠ ܡܳܢܳܐ ܕܶܝܢ ܐܰܘܣܶܦ܆ ܘܩܳܝܶܡܬܳܐ ܠܘܳܬ ܬܚܽܘܡܳܐ ܕܺܝܠܳܗ̇ ܠܡܳܪܝܳܐ. ܐܰܝܟܰܢܳܐ ܕܰܒܝܰܕ ܡܰܢ ܩܳܝܶܡܬܳܐ ܐܰܝܟ ܕܶܐܡܪܶܬ܆ ܠܰܩܒܺܝܥܽܘܬܳܐ ܘܠܳܐ ܡܶܙܕܰܥܙܥܳܢܽܘܬܳܐ ܕܗܰܝܡܳܢܽܘܬܐ ܢܚܰܘܶܐ. ܒܝܰܕ ܕܶܝܢ ܗܳܝ ܕܶܐܡܰܪ ܠܘܳܬ ܬܚܽܘܡܳܐ ܕܺܝܠܳܗ̇܆ ܠܫܰܠܡܽܘܬܐ ܢܚܰܘܶܐ܆ ܗܳܝ ܕܰܒܝܰܕ ܟܽܠܶܗ ܐܰܬܪܐ ܕܡܶܨܪ̈ܳܝܶܐ ܥܳܒܪܳܐ܆ ܐܰܝܟܰܢܳܐ ܕܰܥܕܰܡܳܐ ܠܰܬܚܽܘ̈ܡܶܐ ܕܺܝܠܳܗ̇ ܬܶܬܡܬܰܚ܆ ܘܥܰܡ ܗܳܠܶܝܢ ܐܰܟܚܕܳܐ ܬܶܫܬܰܟܠܰܠ ܘܰܐܝܟ ܗܰܘ ܕܰܒܗܽܘܢ ܡܶܣܬܰܝܟܳܐ܆ ܘܕܺܝܠܗܽܘܢ ܕܡܶܨܪ̈ܳܝܶܐ ܠܚܽܘܕܰܝܗܽܘܢ ܢܶܗܘܶܐ ܐܺܝܬܰܘܗ̱ܝ ܗܳܢܳܐ ܫܽܘܘܕܳܥܳܐ ܡܬܰܚܡܳܐ ܘܝܰܬܺܝܪ ܕܺܝܠܳܢܳܝܳܐ.

ܡܚܰܘܝܳܐ ܕܶܝܢ ܗܺܝ ܡܶܠܬܳܐ ܢܒܺܝ̣ܳܝ̣ܬܳܐ܆ ܐܳܦ ܠܰܡܟܰܬܪܳܢܽܘܬܳܐ ܘܠܳܐ ܡܶܫܬܰܠܡܳܢܽܘܬܳܐ^[3] ܕܥܽܘܠܒܳܢ ܩܶܢܝܳܢܳܐ ܕܕܰܐܝܟ ܗܳܢܳܐ. ܠܗܳܝ ܕܳܐܦ ܐܳܬ̣ܳܐ ܩܪܳܗ̇ ܟܰܕ ܐܳܡܰܪ܆ ܘܬܶܗܘܶܐ ܠܳܐܬܳܐ ܠܥܳܠܰܡ܆ ܠܡܳܪܝܳܐ ܨܒܰܐܘܽܬ ܒܰܐܬܪܳܐ ܕܡܶܨܪܶܝܢ.

ܡܩܰܕܶܡ ܕܶܝܢ ܐܳܡܰܪ܆ ܘܳܐܦ ܠܚܽܘܠܛܳܢܳܐ ܘܫܰܘܬܳܦܽܘܬܳܐ ܕܺܝܠܗܽܘܢ ܕܰܠܘܳܬܰܢ܆ ܕܗܳܝ ܕܗܳܐ ܗܳܫܳܐ ܚܳܙܶܝܢ ܚ̱ܢܰܢ ܡܰܦܩܳܢܳܗ̇. ܐܶܡܰܪ ܓܶܝܪ܆ ܒܝܰܘܡܳܐ ܗܰܘ ܬܶܗܘܶܐ ܐܽܘܪܚܳܐ ܡܶܢ ܡܶܨܪܶܝܢ ܠܘܳܬ ܐܳܬܽܘܪ̈ܳܝܶܐ܆ ܘܢܶܥܠܽܘܢ ܐܳܬܽܘܪ̈ܳܝܶܐ ܠܡܶܨܪܶܝܢ܆ ܘܡܶܨܪ̈ܳܝܶܐ ܢܺܐܙܽܠ̱ܘܢ ܠܘܳܬ ܐܳܬܽܘܪ̈ܳܝܶܐ܆ ܘܢܶܦܠܚܽܘܢ ܥܰܒܕܽܘܬܳܐ ܡܶܨܪ̈ܳܝܶܐ ܠܳܐܬܽܘܪ̈ܳܝܶܐ^[4]. ܐܳܬܽܘܪ̈ܳܝܶܐ ܕܶܝܢ ܡܶܢ ܡܢܳܬܳܐ ܩܳܪܶܐ܆ ܠܰܢ ܠܟܽܠܗܽܘܢ ܗܳܢܽܘܢ ܕܰܠܘܳܬ ܡܰܕܢܳܚ̈ܰܝ ܫܶܡܫܳܐ ܘܰܒܡܰܕܢܚܳܐ ܣܺܝܡܺܝܢܰܢ. ܐܶܠܳܐ ܘܠܳܐ ܡܶܨܪ̈ܳܝܶܐ ܠܘܳܬ ܐܳܬܽܘܪ̈ܳܝܶܐ܆ ܘܠܳܐ ܐܳܬܽܘܪ̈ܳܝܶܐ ܠܘܳܬ ܡܶܨܪ̈ܳܝܶܐ܆ ܐܳܦܶܢ ܡܶܢ ܥܰܡ̱ܡ̈ܶܐ ܕܗܳܟܰܢܳܐ ܐܺܝܬܰܝܗܽܘܢ ܣܰܓܺܝ ܕܳܚ̈ܠܰܝ ܠܫ̈ܺܐܕܶܐ ܡܟܰܢܫܳܐ ܗܺܝ ܥܺܕܬܳܐ܆ ܒܚܰܝܠܳܐ ܕܰܡܫܺܝܚܳܐ ܗܰܘ ܕܟܽܠ ܡܶܕܶܡ ܡܶܫܟܰܚ.

ܡܗܰܝܡ̈ܢܶܐ ܕܶܝܢ ܠܘܳܬ ܡܗܰܝܡ̈ܢܶܐ ܢܺܐܙܰܠ. ܘܟܰܕ ܒܰܚܕܳܐ ܡܕܺܝܢ̱ܬܳܐ ܡܶܫܬܰܒܗܪܺܝܢ ܚ̱ܢܰܢ܆ ܒܡܺܝܛܪܘܦܘܠܝܤ ܗܳܝ ܕܰܠܥܶܠ ‌ܐܽܘܪܶܫܠܶܡ ܗܳܝ ܫܡܰܝܳܢܺܝܬܳܐ܆ ܘܒܰܐܣܳܪܳܐ ܕܰܐܘܝܽܘܬܳܐ ܡܶܬܚܰܙܩܺܝܢܰܢ܆ ܢܶܦܠܽܘܚ ܠܰܚ̈ܕܳܕܶܐ ܥܰܒܕܽܘܬܳܐ܆ ܒܰܪ̱ܬ ܚܺܐܪ̈ܶܐ ܘܪܽܘܚܳܢܳܝܬܳܐ ܘܫܰܠܺܝܛܰܬ̣ ܒܨܶܒܝܳܢܳܗ̇܆ ܟܰܕ ܡܶܬܬܦܺܝܣܺܝܢ ܚ̱ܢܰܢ ܠܢܳܡܽܘܣܳܐ ܫܠܺܝܚܳܝܳܐ ܕܳܐܡܰܪ܆ ܕܟܰܕ ܡܶܫܬܰܥܒܕܺܝܢ ܚ̱ܢܰܢ ܠܰܚ̈ܕܳܕܶܐ ܒܕܶܚܠܬܳܐ ܕܰܡܫܺܝܚܳܐ^[5]. ܗܳܝ ܓܶܝܪ ܕܢܶܕܥܽܘܢ ܠܡܶܦܠܰܚ ܥܰܒܕܽܘܬܳܐ ܗܳܟܰܢܳܐ܆ ܥܰܠ ‌ܐܰܦ̈ܰܝ ܦܽܘܪܩܳܢܳܐ ܕܰܐܚ̈ܶܐ܆ ܕܰܒܢܰܝ̈ܢܳܫܳܐ ܗܳܢܽܘܢ ܕܺܐܝܬܰܝܗܽܘܢ ܫܰܪܺܝܪܳܐܺܝܬ ܪܰܘܪ̈ܒܶܐ ܐܺܝܬܶܝܗ̇܆ ܘܕܰܒܢܰܝ̈ܢܳܫܐ ܗܳܢܽܘܢ ܕܺܐܝܬܰܝܗܽܘܢ ܡܥܰܠܰܝ̈ܳܐ ܒܰܡܝܰܬܪܽܘܬܳܐ܆ ܘܕܰܠܘܳܬ ܡܕܰܡܝܳܢܽܘܬܳܐ ܕܰܡܫܺܝܚܳܐ ܪܳܕܦܺܝܢ. ܕܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܦܰܘܠܽܘܤ ܕܰܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ܆ ܟܰܕ ܒܰܪ ܚܺܐܪ̈ܶܐ ܓܶܝܪ ܐܺܝܬܰܝ ܡܶܢ ܟܽܠܢܳܫ܆ ܠܟܽܠܢܳܫ ܐܶܢܳܐ ܠܺܝ ܥܶܒܕܶܬ܆ ܐܰܝܟܰܢܳܐ ܕܰܠܣܰܓܺܝ̈ܶܐܐ ܐܺ݀ܬܰܪ^[6]. ܗܳܕܶܐ ܐܳܦ ܦܳܪܽܘܩܰܢ ܒܶܐܘܰܢܓ̈ܶܠܺܝܰܐ ܐܳܡܰܪ ܗ̱ܘܳܐ܆ ܗܰܘ ܕܶܐܢ ܢܶܨܒܶܐ ܕܢܶܗܘܶܐ ܐܺܝܬܰܘܗ̱ܝ ܒܟܽܘܢ ܩܰܕܡܳܝܳܐ܆ ܢܶܗܘܶܐ ܠܟܽܘܢ ܥܰܒܕܳܐ܆ ܐܰܝܟܰܢܳܐ ܕܳܐܦ ܒܪܶܗ ܕܐ̱ܢܳܫܳܐ ܠܳܐ ܐܶܬܳܐ ܕܢܶܫܬܰܡܰܫ܆ ܐܶܠܳܐ ܕܰܢܫܰܡܶܫ ܘܰܕܢܶܬܶܠ ܢܰܦܫܶܗ ܦܽܘܪܩܳܢܳܐ ܚܠܳܦ ܣܰܓܺܝ̈ܶܐܐ^[7]. ܗܳܟܰܢܳܐ ܐܳܦ ܐܶܫܰܥܝܳܐ ܐܶܬܢܰܒܺܝ܆ ܕܢܶܦܠܚܽܘܢ ܥܰܒܕܽܘܬܳܐ ܡܶܨܪ̈ܳܝܶܐ ܠܳܐܬܽܘܪ̈ܳܝܶܐ^[8]܆ ܟܰܕ ܒܝܰܕ ܟܽܠ ܒܰܪ̱ܬ ܩܳܠܳܐ ܡܗܰܝܡܰܢܬܳܐ ܘܰܬܪܺܝܨܰܬ ܫܽܘܒܚܳܐ ܘܢܳܡܽܘܣܳܝܬܳܐ܆ ܦܠܝܪܘܦܘܪܝܣܰܐ^[9] ܥܳܒܕܺܝܢ ܘܰܡܩܰܒܠܺܝܢ ܠܰܢ܆ ܘܗܶܢܶܝܢ ܟܰܕ ܗܶܢܶܝܢ ܡܶܬܪܰܥܶܝܢ ܘܳܐܡܪܺܝܢ܆ ܘܰܚܠܳܦܰܘܗ̱ܝ ܕܺܝܠܶܗ ܟܰܕ ܕܺܝܠܶܗ ܕܣܰܒܪܳܐ ܡܶܬܟܰܬܫܺܝܢ.

ܟܰܕ ܒܗܳܠܶܝܢ ܗܳܟܺܝܠ ܡܷ̈ܠܶܐ ܡܡܰܫ̈ܚܳܬܳܐ ܘܰܙܥܽܘܪ̈ܝܳܬܳܐ ܩܰܕܶܡܬܽܘܢ ܐܶܬܥܰܬܰܕܬܽܘܢ܆ ܟܰܕ ܠܕܽܘܓ̈ܡܰܐܛܰܐ ܠܳܐ ܙܺܐܦܳܢ̈ܶܐ ܕܡܶܢ ܩܳܝܶܡܬܳܐ ܗܳܝ ܕܡܶܨܪ̈ܳܝܶܐ܆ ܥܰܡ ܟܽܠܶܗ ܩܽܘܠܳܣܳܐ ܒܶܐܕܢ̈ܶܐ ܕܠܶܒܟܽܘܢ ܡܩܰܒܠܺܝܢ ܐܢ̱ܬܽܘܢ܆ ܫܰܒܰܚܘ ܥܰܡܰܢ ܠܰܐܒܳܐ ܘܠܰܒܪܳܐ ܗܰܘ ܕܺܐܝܬܰܘܗ̱ܝ ܡܫܺܝܚܳܐ ܗܰܘ ܕܡܶܛܽܠܳܬܰܢ ܐܶܬܒܰܣܰܪ܆ ܘܰܠܪܽܘܚܳܐ ܩܰܕܺܝܫܳܐ܆ ܡܶܛܽܠ ܟܺܝܬ ܕܰܬܠܺܝܬܳܝܽܘܬܳܐ ܐܺܝܬܶܝܗ̇ ܬܠܺܝܬܳܝܽܘܬܳܐ܆ ܐܳܦܶܢ ܗܰܘ ܚܰܕ ܕܡܶܢ ܬܠܺܝܬܳܝܽܘܬܳܐ ܡܶܠܬܳܐ ܗܰܘ ܕܡܶܢ ܐܰܒܳܐ܆ ܠܒܶܣܪܳܐ ܗܰܘ ܕܡܶܢܰܢ ܐܶܬܒܰܣܰܪ ܤܛܰܪ ܡܶܢ ܚܛܺܝܬܳܐ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ. ܩܰܘܺܝ ܓܶܝܪ ܐܳܦ ܗܳܟܰܢܳܐ ܚܰܕ ܒܪܳܐ܆ ܟܰܕ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܡܶܫܬܰܒܰܚ܆ ܐܰܝܟܰܢܳܐ ܕܰܩܕܳܡ ܥܳܠ̈ܡܶܐ. ܐܳܦ ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܬܶܫܥܺܝܢ ܘܰܬܠܳܬܳܐ.

ܡܙܡܘܪ̈ܐ. 106: 2 [1]

ܐܫܥܝܐ. 19: 19 ـ 20[2]

ܐܘܟܝܬ ܕܠܐ ܫܘܠܳܡ[3]

ܐܫܥܝܐ. 19: 23 [4]

ܐܦܣ̈ܝܐ. 5: 21 [5]

ܐ. ܩܘܪ̈ܝܢܬܝܐ. 9: 19 [6]

ܡܬܝ. 20: 27 ـ 28 [7]

ܐܫܥܝܐ. 19: 23 [8]

ܡܰܦܰܩ ܒܪܽܘܚܳܐ[9]