ܡܺܐܡܪܳܐ ܕܬܶܫܥܺܝܢ ܘܰܬܪܶܝܢ

ܥܰܠ ܫܳܥܬܳܐ ܕܰܬܫܰܥ ܕܰܥܪܽܘܒܬܳܐ ܗܳܝ ܕܡܶܢ ܒܳܬܰܪ ܦܰܢܛܺܝܩܽܘܤܛܺܝ.

92: ܟܒܰܪ ܐ̱ܢܳܫܺܝ̈ܢ ܡܶܢ ܗܳܢܽܘܢ ܕܰܠܘܳܬ ܟܰܪܣܗܽܘܢ ܦܢܶܝܢ܆ ܘܰܒܚܰܫܳܐ ܝܰܥܢܳܐ ܕܪܶܚܡܰܬ ܟܰܪܣܳܐ ܠܘܳܬ ܫܡܰܝܳܐ ܕܢܶܬܠܽܘܢ ܥܰܝ̈ܢܶܐ ܕܬܰܪܥܺܝܬܗܽܘܢ ܠܳܐ ܡܶܫܟܚܺܝܢ܆ ܡܠܰܚܫܺܝܢ ܘܰܡܠܰܬܡܺܝܢ ܥܠܰܝ. ܘܟܰܕ ܫܰܠܝܳܐܺܝܬ ܡܶܢ ܚܶܡܬܳܐ ܡܶܬܥܰܝܛܺܝܢ܆ ܘܚܰܪܺܝܦܳܐܺܝܬ ܚܳܝܪܺܝܢ ܒܺܝ܆ ܘܰܐܝܟ ܕܰܒܣܰܩܽܘܒܠܳܝܽܘܬ ܡܶܠܬܳܐ ܘܚܶܪܝܳܐܺܝܬ ܐܰܟܚܕܳܐ ܡܶܬܬܙܺܝܥܺܝܢ ܐܳܡܪܺܝܢ܆ ܡܶܢ ܐܰܝܟܳܐ ܐܳܦ ܠܨܰܘܡܳܐ ܕܝܰܘܡܳܢܳܐ ܐܶܫܟܰܚܬ ܠܰܢ܆ ܗܰܘ ܕܡܶܢ ܩܕܺܝܡ ܟܰܕ ܠܰܐܦܰܝ̈ ܫܳܥܬܳܐ ܕܫܶܬ ܐܰܘ ܕܰܫܒܰܥ ܡܶܫܬܰܠܰܡ ܗ̱ܘܳܐ܆ ܐܰܢ̱ܬ ܢܳܓܶܕ ܐܰܢ̱ܬ ܠܶܗ ܠܦܳܢܝܳܐ ܡܫܰܘܚܪܳܐ ܘܪܰܡܫܳܝܳܐ܆ ܘܰܠܘܳܬ ܫܶܡܫܳܐ ܕܥܳܪܶܒ. ܐܰܪܰܐ ܐܺܝܬ ܠܳܟ ܕܬܶܩܪܶܐ ܠܰܢ ܢܳܡܽܘܣܳܐ ܡܶܢ ܟܬܳܒܳܐ ܐܰ‌ܠܳܗܳܝܳܐ܆ ܗܰܘ ܕܗܳܕܶܐ ܦܳܩܶܕ܆ ܐܰܘ ܒܢܳܡܽܘܣܳܝܽܘܬ ܢܰܦܫܳܟ ܣܳܥܰܪ ܐܰܢ̱ܬ ܗܳܝ ܕܳܐܬܝܳܐ ܥܰܠ ܒܳܠܳܟ܆ ܘܣܳܐܶܡ ܐܰܢ̱ܬ ܥܠܰܝܢ ܐܰܝܟܰܢܳܐ ܕܒܶܐܘܰܢܓ̈ܶܠܺܝܰܐ ܐܳܡܰܪ ܦܳܪܽܘܩܰܢ܆ ܡܰܘܒ̈ܠܶܐ ܝܰܩܺܝܪ̈ܳܬܳܐ ܘܥܰܣ̈ܩܳܬ ܠܛܰܥܢܳܐ^[1]܆ ܒܰܕܡܽܘܬ ܦܪ̈ܺܝܫܶܐ ܗܳܢܽܘܢ.

ܐܶܢܳܐ ܕܶܝܢ ܐܶ‌ܠܽܘ ܡܰܢ ܟܰܕ ܟܽܠܗܽܘܢ ܟܳܦܢܺܝܢ ܗ̱ܘܰܘ ܘܨܳܝܡܺܝܢ ܗܳܠܶܝܢ ܐܳܡܪܺܝܢ ܗ̱ܘܰܘ܆ ܡܣܰܝܒܰܪ ܗ̱ܘܺܝܬ ܥܰܡ ܗܰܢܺܝܽܐܘܬܳܐ ܠܚܶܡܬܗܽܘܢ ܟܰܕ ܐܰܝܟ ܦܰܘܠܽܘܤ ܐܳܡܰܪ ܗܘܺܝܬ܆ ܘܡܰܢܽܘ ܐܺܝܬܰܘܗ̱ܝ ܗܰܘ ܕܰܡܚܰܕܶܐ ܠܺܝ܆ ܐܶܠܳܐ ܗܰܘ ܕܡܶܬܬܥܺܝܩ ܡܶܢܝ^[2]. ܢܳܟܬܳܐ ܠܺܝ ܕܶܝܢ܆ ܗܳܝ ܕܣܽܘܓܐܗܽܘܢ ܕܰܡܩܰܛܪ̈ܓܳܢܶܐ ܕܺܝܠܝ܆ ܟܰܕ ܡܰܥܪܶܝܢ ܠܗܽܘܢ ܘܣܰܒܺܝܥܺܝܢ܆ ܘܟܰܕ ܒܫܽܘܩܳܐ ܙܰܒ̈ܢܺܝܢ ܣܰܓܺܝ̈ܳܐܢ ܝܰܬܺܝܒܺܝܢ ܐܰܘ ܒܰܟܢܽܘܫ̈ܝܶܐ ܐ̱ܚܪ̈ܳܢܶܐ܆ ܗܳܠܶܝܢ ܕܰܐܝܟ ܗܳܠܶܝܢ ܡܩܰܛܪܓܺܝܢ. ܗܳܢܽܘܢ ܕܰܠܘܳܬܗܽܘܢ ܐܰܝܟܰܢܳܐ ܕܠܳܐ ܠܚܺܝܨܽܘܬܳܐ ܕܗܳܢܽܘܢ ܕܨܳܝܡܺܝܢ ܢܪܰܦܽܘܢ ܟܰܕ ܣܪܺܝܩܳܐܺܝܬ ܡܦܰܟܢܺܝܢ܆ ܐܳܦ ܣܰܓܺܝ ܚܘܺܝܚܳܐܺܝܬ ܐܶ݀ܦܽܘܩ ܪܽܘܚܳܐ܆ ܘܶܐ݀ܚܰܘܶܐ ܕܡܳܢܳܐ ܗܝ ܥܶܠܬܶܗ ܕܨܰܘܡܳܐ ܗܳܢܳܐ. ܘܰܕܠܰܘ ܕܚܰܕ ܝܰܘܡܳܐ ܒܰܠܚܽܘܕ ܐܺܝܬܰܘܗ̱ܝ܆ ܐܶܠܳܐ ܐܳܦ ܕܝܰܘ̈ܡܳܬܳܐ ܣܰܓܺܝ̈ܶܐܐ.

ܟܰܕ ܓܶܝܪ ܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܥܰܡ ܡܳܟ̈ܣܶܐ ܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܣܰܓܺܝܐܬܳܐ ܐܰܟܚܕܳܐ ܐܶܣܬܡܶܟ ܒܒܰܝܬܶܗ ܕܡܰܬܰܝ ܘܳܐܟܶܠ ܗ̱ܘܳܐ ܥܰܡܗܽܘܢ܆ ܟܳܬܶܒ ܓܶܝܪ ܠܽܘܩܳܐ ܕܰܥܒܰܕ ܠܶܗ ܠܶܘܺܝ ܩܽܘܒܳܠܳܐ ܪܰܒܳܐ ܒܒܰܝܬܶܗ܆ ܘܺܐܝܬ ܗ̱ܘܳܐ ܟܶܢܫܳܐ ܣܰܓܺܝܳܐܐ ܕܡܳܟ̈ܣܶܐ ܘܕܰܐ̱ܚܪ̈ܳܢܶܐ ܗܳܢܽܘܢ ܕܺܐܝܬ ܗ̱ܘܰܘ ܕܰܣܡܺܝܟܺܝܢ ܥܰܡܗܽܘܢ^[3]܆ ܡܶܛܽܠ ܟܺܝܬ ܕܗܽܘ ܟܰܕ ܗܽܘ ܐܳܦ ܠܶܘܺܝ ܐܳܦ ܡܰܬܰܝ ܡܶܬܐܶܡܰܪ ܗ̱ܘܳܐ܆ ܟܶܢܫܳܐ ܗܰܘ ܚܰܣܳܡܳܐ ܘܫܰܒܗܪܳܢܳܐ ܕܰܦܪ̈ܺܝܫܶܐ܆ ܡܶܬܥܕܠ ܗ̱ܘܳܐ ܒܝܰܨܽܘܦܬܳܢܽܘܬܶܗ ܡܥܰܕܪܳܢܺܝܬܳܐ ܕܳܐܣܝܳܐ ܐܰܝܟ ܕܰܒܡܰܟܺܝܟܬܳܐ ܘܫܺܝܛܬܳܐ܆ ܘܰܠܘܳܬ ܬܰܠ̈ܡܺܝܕܶܐ ܣܳܥܶܐ ܗ̱ܘܳܐ ܠܰܡܨܰܚܳܝܽܘ ܘܳܐܡܰܪ ܗ̱ܘܳܐ܆ ܗܳܕܶܐ ܓܶܝܪ ܥܒܳܕܳܐ ܗܝ ܕܰܚܣܳܡܳܐ ܗܳܝ ܕܰܢܦܰܪܶܫ ܠܗܳܢܽܘܢ ܕܰܐܘܶܝܢ܆ ܕܡܶܛܽܠ ܡܳܢܳܐ ܥܰܡ ܡܳܟ̈ܣܶܐ ܘܚܰܛܳܝ̈ܶܐ ܐܳܟܶܠ ܪܰܒܟܽܘܢ^[4]. ܕܺܝܠܳܝܬܳܐ ܗܝ ܓܶܝܪ ܕܰܡܫܰܩܠܽܘܬܳܐ܆ ܠܰܡܓܰܚܳܟܽܘ ܘܠܰܡܡܰܝܳܩܽܘ ܒܡܶܬܢܰܚܬܳܢܽܘܬܳܐ܆ ܘܰܒܗܳܝ ܕܡܰܟܺܝܟܳܐ ܘܰܡܡܰܫܚܳܐ. ܠܗܳܢܽܘܢ ܕܳܐܦ ܒܠܰܡ ܐܶܢܽܘܢ ܟܰܕ ܐܶܡܰܪ܆ ܕܠܳܐ ܣܢܺܝܩܺܝܢ ܗܳܢܽܘܢ ܕܰܚܠܺܝܡܺܝܢ ܥܰܠ ‌ܐܳܣܝܳܐ܆ ܐܶܠܳܐ ܗܳܢܽܘܢ ܕܒܺܝܫܳܐܺܝܬ ܐܺܝܬ ܠܗܽܘܢ. ܙܶܠܘ ܝܺܠܰܦܘ ܡܳܢܐ ܐܺܝܬܶܝܗ̇܆ ܪ̈ܰܚܡܶܐ ܒܳܥܶܐ ܐ̱ܢܳܐ ܘܠܰܘ ܕܶܒܚܬܳܐ. ܠܳܐ ܓܶܝܪ ܐܶܬܺܝܬ ܕܶܐ݀ܩܪܶܐ ܠܙܰܕܺܝ̈ܩܶܐ ܐܶܠܳܐ ܠܚܰܛܳܝ̈ܶܐ^[5]. ܘܰܒܝܰܕ ܗܳܠܶܝܢ ܡ̈ܶܠܶܐ܆ ܡܶܢܗܶܝܢ ܕܗܳܠܶܝܢ ܕܥܳܕܠܺܝܢ ܗ̱ܘܰܘ܆ ܒܥܶܕܠܳܝ̈ܶܐ ܣܰܓܺܝ̈ܶܐܐ ܚܰܘܺܝ ܐܶܢܽܘܢ ܚܰܝܳܒ̈ܶܐ.

ܘܠܽܘܩܕܰܡ ܡܰܢ܆ ܐܰܝܟ ܕܠܰܐܝܠܶܝܢ ܕܡܰܣܒܪܳܢܽܘܬܳܐ ܕܡܰܠ̈ܦܳܢܶܐ ܐܺܝܬ ܠܗܽܘܢ܆ ܘܛܰܥܝܳܐ ܠܗܽܘܢ ܕܢܽܘܟܪܳܝܬܳܐ ܐܺܝܬܶܝܗ̇ ܕܡܰܠܦܳܢܽܘܬܳܐ ܗܳܝ ܕܠܳܐ ܬܶܬܢܰܚܰܬ̣ ܥܰܡ ܬܰܠ̈ܡܺܝܕܶܐ܆ ܐܰܝܟܰܢܳܐ ܕܳܐܦ ܕܳܐܣܝܽܘܬܳܐ ܠܳܐ ܐܺܝܬܶܝܗ̇ ܕܺܝܠܳܝܬܳܐ܆ ܗܳܝ ܕܠܳܐ ܬܶܬܪܟܶܢ ܠܘܳܬ ܚܰܫ̈ܶܐ ܕܗܳܢܽܘܢ ܕܰܟܪܺܝܗܶܝܢ.

ܕܬܰܪܬܶܝܢ ܕܶܝܢ܆ ܐܰܝܟ ܕܠܰܐܝܠܶܝܢ ܕܡܶܬܪܰܘܪܒܺܝܢ ܕܝܳܕܥܺܝܢ ܟܬܳܒ̈ܶܐ܆ ܘܰܟܪܺܝܗܶܝܢ ܠܳܐ ܝܰܠܺܝܦܽܘܬܳܐ ܐ̱ܚܪܳܝܬܳܐ. ܗܳܕܶܐ ܓܶܝܪ ܡܰܘܕܥܳܐ ܗܳܝ ܕܙܶܠܘ ܝܺܠܰܦܘ ܡܳܢܳܐ ܐܺܝܬܶܝܗ̇܆ ܪ̈ܰܚܡܶܐ ܒܳܥܶܐ ܐ̱ܢܳܐ ܘܠܰܘ ܕܶܒܚܬܳܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܰܐܢ̱ܬܘܢ ܗܳܢܽܘܢ ܕܰܒܩܽܘܪܒܳܐ ܡܰܣܒܪܺܝܢ ܐܢ̱ܬܽܘܢ ܕܺܐܝܬܰܝܟܽܘܢ ܕܡܰܕܪܟܳܢܽܘܬܳܐ ܕܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܟܰܕ ܠܪܽܘܚܩܳܐ ܪܰܚܺܝܩܺܝܢ ܐܢ̱ܬܽܘܢ ܡܶܢܗܽܘܢ܆ ܙܶܠܘ ܠܘܳܬܗܽܘܢ ܘܺܝܠܰܦܘ ܕܡܳܢܳܐ ܐܺܝܬܶܝܗ̇܆ ܪ̈ܰܚܡܶܐ ܒܳܥܶܐ ܐ̱ܢܳܐ ܘܠܰܘ ܕܶܒܚܬܳܐ. ܠܡܳܢܳܐ ܠܟܽܠ ܡܶܕܡ ܒܕܶܒ̈ܚܶܐ ܢܳܡܽܘܣܳܝ̈ܶܐ ܣܳܝܡܺܝܢ ܐܢ̱ܬܽܘܢ܆ ܠܪ̈ܰܚܡܶܐ ܕܶܝܢ ܕܥܰܠ ܫܰܘ̈ܝ̣ܰܝ̣ ܒܓܶܢܣܳܐ ܪܳܩܶܝܢ ܐܢ̱ܬܽܘܢ܆ ܗܳܢܽܘܢ ܕܝܰܬܺܝܪܳܐܺܝܬ ܡܢܺܝܚܺܝܢ ܠܰܐܠܳܗܳܐ. ܟܰܕ ܡܰܘܕܰܥ ܗ̱ܘܳܐ ܐܰܟܚܕܳܐ ܘܪܳܡܶܙ ܥܰܠ ܢܰܦܫܶܗ܆ ܕܗܽܘ ܐܺܝܬܰܘܗ̱ܝ ܗ̱ܘܳܐ ܗܰܘ ܕܡܶܛܽܠ ܪ̈ܰܚܡܶܐ ܕܰܥܠܰܝܢ ܨܶܒܝܳܢܳܐܺܝܬ ܥܬܺܝܕ ܕܢܶܬܕܒܰܚ܆ ܘܢܰܦܶܩ ܠܰܡܚܺܝܠܽܘܬܳܐ ܕܕܶܒܚ̈ܶܐ ܗܳܢܽܘܢ ܕܰܒܢܳܡܽܘܣܳܐ. ܗܳܢܽܘܢ ܕܡܶܛܽܠܳܬܗܽܘܢ ܐܳܦ ܕܰܘܺܝܕ ܩܰܕܶܡ ܗ̱ܘܳܐ ܡܰܙܥܶܩ܆ ܟܰܕ ܒܥܰܝ̈ܢܶܐ ܢܒܺܝ̣ܳܝ̣̈ܳܬܳܐ ܚܳܙܶܐ ܗ̱ܘܳܐ ܠܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ܆ ܚܰܘܳܐ ܠܰܢ ܡܳܪܝܳܐ ܪ̈ܰܚܡܶܐ ܕܺܝܠܳܟ܆ ܘܦܽܘܪܩܳܢܳܐ ܕܺܝܠܳܟ ܬܶܬܶܠ ܠܰܢ^[6].

ܕܰܬܠܳܬ ܕܶܝܢ ܓܳܫܶܦ ܒܗܽܘܢ ܒܰܡܫ̈ܰܩܠܶܐ܆ ܕܥܰܡ ܗܳܝ ܚܰܣܺܝܪܽܘܬ ܪܶܥܝܳܢܳܐ ܐ̱ܚܪܺܬܳܐ܆ ܐܳܦ ܡܙܰܕܩܺܝܢ ܗ̱ܘܰܘ ܗܶܢܽܘܢ ܠܗܽܘܢ܆ ܘܰܠܟܽܠܗܽܘܢ ܗܳܢܽܘܢ ܕܫܪܟܳܐ ܚܰܛܳܝ̈ܶܐ ܐܳܡܪܺܝܢ ܗ̱ܘܰܘ ܠܗܽܘܢ. ܘܡܶܛܽܠܗܳܕܶܐ ܠܳܐ ܣܶܦܩܰܬ ܠܗܽܘܢ ܠܡܺܐܡܰܪ ܕܡܶܛܽܠ ܡܳܢܳܐ ܥܰܡ ܡܳܟ̈ܣܶܐ ܐܳܟܶܠ ܪܰܒܟܽܘܢ܆ ܐܶܠܳܐ ܐܰܘܣܶܦܘ ܘܚܰܛܳܝ̈ܶܐ^[7]. ܗܳܟܰܢܳܐ ܓܶܝܪ ܐܳܦ ܦܪܺܝܫܳܐ ܗܰܘ ܕܥܰܡ ܗܰܘ ܡܳܟܣܳܐ ܠܘܳܬ ܗܰܝܟܠܳܐ ܣܠܶܩ܆ ܟܰܕ ܡܨܰܠܶܐ ܐܳܡܰܪ ܗ̱ܘܳܐ܆ ܐܰ‌ܠܳܗܳܐ ܡܰܘܕܶܐ ܐ̱ܢܳܐ ܠܳܟ܆ ܕܠܳܐ ܐܺܝܬܰܝ ܐܰܝܟ ܗܳܢܽܘܢ ܕܫܰܪܟܳܐ ܕܰܒܢܰܝ̈ܢܳܫܳܐ܆ ܚܳܛܽܘ̈ܦܶܐ܆ ܥܳܠܽܘܒ̈ܶܐ܆ ܓܰܝܳܪ̈ܶܐ܆ ܐܰܘ ܐܳܦ ܐܰܝܟ ܗܳܢܳܐ ܡܳܟܣܳܐ. ܨܳܐܶܡ ܐ̱ܢܳܐ ܬܰܪܬܶܝܢ ܙܰܒ̈ܢܺܝܢ ܒܫܰܒܬܳܐ. ܡܥܰܣܰܪ ܐ̱ܢܳܐ ܟܽܠܗܶܝܢ ܗܳܠܶܝܢ ܕܰܩܢܶܐ ܐ̱ܢܳܐ^[8]. ܕܰܠܘܳܬܳܗ̇ ܕܗܳܕܶܐ ܬܰܪܥܺܝܬܳܐ ܟܰܕ ܡܳܬܰܚ ܠܡܶܠܬܳܐ ܦܳܪܽܘܩܰܢ ܐܳܡܰܪ܆ ܕܠܳܐ ܐܶܬܺܝܬ ܕܶܐ݀ܩܪܶܐ ܠܙܰܕܺܝ̈ܩܶܐ ܐܶܠܳܐ ܠܚܰܛܳܝ̈ܶܐ ܠܰܬܝܳܒܽܘܬܳܐ^[9]. ܗܳܢܰܘ ܕܶܝܢ ܠܟܽܘܢ ܠܳܐ ܐܶܬܺܝܬ ܠܡܶܩܪܳܐ܆ ܗܳܢܽܘܢ ܕܒܰܦܣ̈ܳܩܶܐ ܒܰܝ̈ܬܳܝܶܐ ܕܺܝܠܟܽܘܢ ܙܰܕܺܝ̈ܩܶܐ ܡܚܰܘܶܝܢ ܐܢ̱ܬܽܘܢ ܐܢ̱ܬܽܘܢ ܠܟܽܘܢ܆ ܠܳܐ ܓܶܝܪ ܨܳܒܶܝܢ ܐܢ̱ܬܽܘܢ܆ ܐܶܠܳܐ ܠܗܳܢܽܘܢ ܕܡܰܘܕܶܝܢ ܕܚܰܛܳܝ̈ܶܐ ܐܺܝܬܰܝܗܽܘܢ܆ ܘܰܠܘܳܬ ܩܪܳܝܬܳܐ ܕܺܝܠܝ ܪܳܗܛܺܝܢ ܐܶܬܺܝܬ ܠܡܶܦܪܰܩ. ܗܺܝ ܓܶܝܪ ܩܪܳܝܬܳܐ܆ ܠܰܘ ܐܳ‌ܠܽܘܨܬܳܐ ܡܶܕܶܡ ܐܺܝܬܶܝܗ̇ ܘܰܩܛܺܝܪܳܝܬܳܐ܆ ܐܶܠܳܐ ܕܰܡܣܰܟܝܳܐ ܠܗܳܝ ܕܰܒܨܶܒܝܳܢܳܐ. ܐܰܝܟܰܢܳܐ ܟܺܝܬ ܕܰܐܝܟ ܕܡܶܢ ܨܶܝܕܰܝ܆ ܐܳܦ ܐܢ̱ܬܽܘܢ ܩܪܶܝܢ ܐܢ̱ܬܽܘܢ. ܒܰܠܚܽܘܕ ܐܶܢ ܠܩܰܕܺܝܡܽܘܬ ܡܰܣܒܪܳܢܽܘܬܳܐ ܕܙܰܕܺܝܩܽܘܬܳܐ ܗܳܝ ܕܡܶܣܬܰܒܪܳܐ ܬܶܕܚܩܽܘܢ ܡܶܢܟܽܘܢ. ܟܽܠܗܽܘܢ ܓܶܝܪ ܚܛܰܘ ܐܰܝܟܰܢܳܐ ܕܳܐܦ ܦܰܘܠܽܘܤ ܐܳܡܰܪ܆ ܘܚܰܣܺܝܪܺܝܢ ܡܶܢ ܬܶܫܒܽܘܚܬܳܐ ܕܰܐ‌ܠܳܗܳܐ܆ ܟܰܕ ܡܶܙܕܰܕܩܺܝܢ ܡܰܓܳܢ ܒܛܰܝܒܽܘܬܳܐ ܕܺܝܠܶܗ܆ ܒܝܰܕ ܦܽܘܪܩܳܢܳܐ ܗܰܘ ܕܒܰܡܫܺܝܚܳܐ ܝܶܫܽܘܥ^[10]. ܡܶܛܽܠ ܙܰܕܺܝ̈ܩܶܐ ܗܳܢܽܘܢ ܕܰܐܝܟ ܗܳܟܰܢ܆ ܘܳܐܦ ܗܰܘ ܕܰܒܚܰܙܩܺܝܐܝܠ ܢܒܺܝܳܐ ܡܡܰܠܶܠ ܗ̱ܘܳܐ ܐܶܡܰܪ܆ ܕܟܰܕ ܐܺ݀ܡܰܪ ܠܙܰܕܺܝܩܳܐ ܕܡܶܐܚܳܐ ܬܺܚܶܐ܆ ܘܗܽܘ ܐܶܬܬܟܶܠ ܥܰܠ ܙܰܕܺܝܩܽܘܬܶܗ܆ ܘܰܥܒܰܕ ܥܰܘܠܳܐ܆ ܟܽܠܗܶܝܢ ܙܰܕܺܝܩ̈ܘܳܬܶܗ ܠܳܐ ܢܶܬܥܰܗ̈ܕܳܢ. ܒܥܰܘܳܠܽܘܬܳܐ ܕܺܝܠܶܗ ܗܳܝ ܕܰܥܒܰܕ܆ ܒܳܗ̇ ܢܡܽܘܬ^[11]. ܫܽܘܪܳܐ ܓܶܝܪ ܐܺܝܬܶܝܗ̇ ܕܣܳܟܰܪ ܠܟܽܠܗܶܝܢ ܐܽܘܪ̈ܚܳܬܳܐ ܗܳܠܶܝܢ ܕܡܰܝ̈ܬܝܳܢ ܠܘܳܬ ܦܽܘܪܩܳܢܳܐ ܘܟܳܠܶܐ ܡܶܢ ܐܰ‌ܠܳܗܳܐ܆ ܡܰܣܒܪܳܢܽܘܬܐ ܕܙܰܕܺܝܩܽܘܬܳܐ܆ ܟܰܕ ܩܳܕܡܳܐ ܐܳܚܕܳܐ ܠܳܗ̇ ܠܬܰܪܥܺܝܬܳܐ. ܗܳܝ ܕܳܐܦ ܠܰܦܪ̈ܺܝܫܶܐ܆ ܠܓܽܘܡܳܨܳܐ ܕܰܐܒܕܳܢܳܐ ܥܶܒܕܰܬ ܐܶܢܽܘܢ ܕܢܶܫܬܰܪܓܠܽܘܢ ܡܫܰܡܠܝܳܐܺܝܬ܆ ܟܰܕ ܠܳܐ ܫܶܒܩܰܬ ܐܶܢܽܘܢ ܕܢܶܬܩܰܪܒܽܘܢ ܠܘܳܬ ܡܫܺܝܚܳܐ ܗܰܘ ܢܽܘܗܪܳܐ ܕܰܫܪܳܪܳܐ.

ܕܒܳܬܰܪܗܽܘܢ ܬܰܠܡܺܝܕܰܘ̈ܗ̱ܝ ܕܝܽܘܚܰܢܳܢ ܟܰܕ ܩܪܶܒܘ܆ ܡܫܰܐܠܺܝܢ ܗ̱ܘܰܘ ܠܶܗ ܠܗܰܘ ܕܥܰܡ ܡܳܟ̈ܣܶܐ ܐܳܣܝܳܐܺܝܬ ܣܡܺܝܟ ܗ̱ܘܳܐ܆ ܕܡܶܛܽܠ ܡܳܢܳܐ ܚܢܰܢ ܘܰܦܪ̈ܺܝܫܶܐ ܨܳܝܡܺܝܢ ܚ̱ܢܰܢ ܣܰܓܺܝ̈ܳܐܬܳܐ܆ ܬܰܠ̈ܡܺܝܕܰܝܟ ܕܶܝܢ ܕܺܝܠܳܟ ܠܳܐ ܨܳܝܡܺܝܢ^[12]. ܚܳܙܶܐ ܐܰܢ̱ܬ ܐܰܝܟܰܢܐ ܗܽܘ ܚܣܳܡܳܐ. ܠܗܳܝ ܕܕܳܡܝܳܐ ܠܘܳܬ ܗܳܝ ܕܕܳܡܝܳܐ ܡܓܰܪܶܓ ܘܰܡܠܰܒܶܛ܆ ܘܰܠܥܽܘܩܣܶܗ ܡܰܪܺܝܪܳܐ ܕܰܛܢܳܢܳܐ ܡܶܢ ܗܳܪܟܳܐ ܠܳܛܶܫ܆ ܠܰܦܪ̈ܺܝܫܶܐ ܡܰܢ ܓܶܝܪ ܕܡܶܬܟܰܢܶܝܢ ܗ̱ܘܰܘ ܐܰܝܟ ܡܰܠ̈ܦܳܢܶܐ܆ ܠܽܘܩܒܰܠ^[13] ܡܰܠܦܳܢܳܐ ܐܰܩܺܝܡ ܐܶܢܽܘܢ. ܡܶܛܽܠܗܳܕܶܐ ܐܳܦ ܐܳܡܪܺܝܢ ܗ̱ܘܰܘ܆ ܕܡܶܛܽܠ ܡܳܢܳܐ ܥܰܡ ܡܳܟ̈ܣܶܐ ܘܚܰܛܳܝ̈ܶܐ ܐܳܟܶܠ ܪܰܒܟܽܘܢ^[14]. ܠܬܰܠܡܺܝܕܰܘ̈ܗ̱ܝ ܕܶܝܢ ܕܝܽܘܚܰܢܳܢ ܠܽܘܩܒܰܠ ܬܰܠܡܺܝܕܰܘ̈ܗ̱ܝ ܕܰܡܫܺܝܚܳܐ. ܒܰܕܓܽܘܢ ܐܳܦ ܐܳܡܪܺܝܢ ܗ̱ܘܰܘ܆ ܕܡܶܛܽܠ ܡܳܢܳܐ ܬܰܠ̈ܡܺܝܕܰܝܟ ܠܳܐ ܨܳܝܡܺܝܢ.

ܐܶܠܳܐ ܗܰܘ ܕܫܰܪܺܝܪܳܐܺܝܬ ܚܶܟܡܬܳܐ܆ ܘܳܐܦ ܠܘܳܬܶܗ ܕܫܽܘܐܴܠܳܐ ܠܰܘ ܩܰܫܝܳܐܺܝܬ ܡܦܰܢܶܐ ܦܶܬܓܳܡܳܐ܆ ܘܳܐܦ ܟܰܣܝܳܐܺܝܬ ܡܰܟܶܤ ܠܗܽܘܢ. ܕܰܠܝܽܘܠ̈ܦܳܢܰܘܗ̱ܝ ܕܝܽܘܚܰܢܳܢ ܛܰܥܳܝ̣ܺܝ̣ܢ܆ ܐܳܦ ܕܰܣܪܺܝܩܳܐܺܝܬ ܫܡܳܐ ܕܬܰܠ̈ܡܺܝܕܶܐ ܡܪܰܘܪܒܺܝܢ ܥܰܠ ܢܰܦܫܗܽܘܢ. ܡܳܢܳܐ ܓܶܝܪ ܟܺܝܬ ܐܳܦ ܐܳܡܰܪ. ܕܰܠܡܳܐ ܡܶܫܟܚܺܝܢ ܒܢܰܘܗ̱ܝ ܕܰܓܢܽܘܢܳܐ ܕܢܶܬܰܐܒܠܽܘܢ܆ ܟܡܳܐ ܕܥܰܡܗܽܘܢ ܐܺܝܬܰܘܗ̱ܝ ܚܰܬܢܳܐ܆ ܢܺܐܬܽܘܢ ܕܶܝܢ ܝܰܘ̈ܡܳܬܳܐ ܐܶܡܰܬܝ ܕܢܶܬܬܪܺܝܡ ܡܶܢܗܽܘܢ ܚܰܬܢܳܐ܆ ܘܗܳܝܕܶܝܢ ܢܨܽܘܡܽܘܢ^[15]. ܡܶܢ ܒܰܪ̱ܬ ܩܳܠܳܐ ܕܝܽܘܚܰܢܳܢ ܗܰܘ ܡܰܠܦܳܢܳܐ ܕܺܝܠܟܽܘܢ܆ ܗܰܘ ܕܡܶܛܽܠܳܬܶܗ ܪܰܒܬܳܐ ܡܶܬܪܰܥܶܝܢ ܐܢ̱ܬܽܘܢ܆ ܡܦܰܢܶܐ ܐ̱ܢܳܐ ܠܟܽܘܢ ܦܶܬܓܳܡܳܐ. ܠܗܳܕܶܐ ܐܶܬܥܰܗܕܘ ܘܢܶܗܘܶܐ ܠܟܽܘܢ ܫܪܳܝܳܐ ܕܰܒܥܳܬܟܽܘܢ. ܗܰܘ ܕܟܰܕ ܡܶܛܽܠܳܬܝ ܡܣܰܗܶܕ ܗ̱ܘܳܐ ܐܳܡܰܪ ܗ̱ܘܳܐ܆ ܗܰܘ ܕܺܐܝܬ ܠܶܗ ܟܰܠܬܳܐ ܚܰܬܢܳܐ ܐܺܝܬܰܘܗ̱ܝ^[16]. ܐܶܢ ܗܳܟܺܝܠ ܚܰܬܢܳܐ ܐܺܝܬܰܝ܆ ܘܠܳܐ ܡܕܰܓܠܺܝܢ ܐܢ̱ܬܽܘܢ ܠܶܗ ܠܡܰܠܦܳܢܳܐ ܕܺܝܠܟܽܘܢ ܩܰܕܺܝܡܳܐ ܝܺܕܺܝܥܳܐ ܕܙܳܕܶܩ ܠܗܽܘܢ ܠܬܰܠ̈ܡܺܝܕܶܐ ܕܺܝܠܝ ܟܰܕ ܒܢܰܝ̈ܳܐ ܕܰܓܢܽܘܢܳܐ ܐܺܝܬܰܝܗܽܘܢ܆ ܡܫܰܡܫܺܝܢ ܠܺܝ ܓܶܝܪ ܟܰܕ ܠܰܡܕܰܒܪܳܢܽܘܬܳܐ ܗܳܝ ܕܡܶܫܬܽܘܬܳܐ ܡܡܰܠܶܐ ܐ̱ܢܳܐ܆ ܕܰܦܨܺܝܚ̈ܶܐ ܘܚ̈ܰܕܳܝܶܐ ܢܶܗܘܽܘܢ ܐܺܝܬܰܝܗܽܘܢ܆ ܘܠܳܐ ܢܶܬܐܰܒܠܽܘܢ ܘܰܒܨܰܘܡܳܐ ܢܶܬܩܰܦܣܽܘܢ. ܡܶܕܶܡ ܕܶܝܢ ܕܩܽܘܛܳܦܳܐ ܐܺܝܬܰܘܗ̱ܝ ܨܰܘܡܳܐ܆ ܘܰܐ̱ܚܪܳܢܝܳܐܺܝܬ ܥܡܺܝܠܳܐ ܠܗܳܢܽܘܢ ܕܠܰܘ ܡܫܰܡܠܝܳܐܺܝܬ ܣܺܝܡܺܝܢ܆ ܠܳܐ ܡܫܰܡ̈ܠܰܝܳܐ ܕܶܝܢ ܕܫܳܥܬܳܐ ܐܺܝܬܰܝܗܽܘܢ ܬܰܠ̈ܡܺܝܕܰܝ.

ܡܶܣܬܰܒܪܳܐ ܕܶܝܢ ܐܰܝܟܰܢ ܕܗܽܘ܆ ܕܳܐܦ ܬܰܪܥܺܝܬܳܐ ܕܝܰܬܺܝܪ ܪܰܒܳܐ ܪܳܫܡܳܐ ܗܺܝ ܡܶܠܬܳܐ ܠܳܐ ܓܶܝܪ ܐܶܡܰܪ ܕܠܳܐ ܡܶܫܟܚܺܝܢ ܒܢܰܘܗ̱ܝ ܕܰܓܢܽܘܢܳܐ ܠܰܡܨܳܡ܆ ܐܶܠܳܐ ܕܠܳܐ ܡܶܫܟܚܺܝܢ ܠܡܶܬܐܰܒܳܠܽܘ. ܟܰܕ ܐܰܝܟ ܕܰܠܡܺܐܡܰܪ ܐܳܡܰܪ ܗ̱ܘܳܐ܆ ܕܰܐܢ̱ܬܘܢ ܐܳܘ ܬܰܠ̈ܡܺܝܕܶܐ ܕܝܽܘܚܰܢܳܢ܆ ܨܰܘܡܳܐ ܦܰܓܪܳܢܳܝܳܐ ܨܳܝܡܺܝܢ ܐܢ̱ܬܽܘܢ܆ ܘܰܐܚܽܘܗ̱ܝ ܕܗܰܘ ܦܪܺܝܫܳܝܳܐ܆ ܘܥܰܠ ܗܳܝ ܐܳܦ ܗܳܕܶܐ ܐܶܡܰܪܬܽܘܢ܆ ܕܡܶܛܽܠ ܡܳܢܳܐ ܚܢܰܢ ܘܰܦܪ̈ܺܝܫܶܐ ܨܳܝܡܺܝܢܰܢ ܣܰܓܺܝ̈ܳܐܬܳܐ^[17]܆ ܘܰܠܗܳܢܽܘܢ ܐܢ̱ܬܽܘܢ ܠܟܽܘܢ ܐܰܙܘܶܓܬܽܘܢ܆ ܘܟܰܕ ܒܣܽܘܓܳܐܐ ܕܨܰܘ̈ܡܶܐ ܡܶܬܪܰܘܪܒܺܝܢ ܐܢ̱ܬܽܘܢ܆ ܘܳܐܡܪܺܝܢ ܐܢ̱ܬܽܘܢ ܕܨܳܝܡܺܝܢ ܚ̱ܢܰܢ ܣܰܓܺܝ̈ܳܐܬܳܐ܆ ܘܰܒܝܰܕ ܦܽܘ̈ܡܶܐ ܠܗܳܕܶܐ ܡܦܰܬܶܝܢ ܐܢ̱ܬܽܘܢ܆ ܚܰܘܺܝܬܽܘܢ ܓܰܠܝܳܐܺܝܬ܆ ܕܥܰܒ̈ܕܶܐ ܕܫܽܘܒܚܳܐ ܣܪܺܝܩܳܐ ܐܺܝܬܰܝܟܽܘܢ. ܠܘܳܬ ܕܶܝܢ ܨܰܘܡܳܐ ܡܫܰܡܠܝܳܐ ܐܶܢܳܐ ܡܕܰܪܶܫ ܐ̱ܢܳܐ܆ ܒܝܰܕ ܦܨܺܝܚܽܘܬܳܐ ܗܳܝ ܕܰܒܙܰܒܢܳܐ ܕܡܶܫܬܽܘܬܳܐ. ܗܰܘ ܨܰܘܡܳܐ܆ ܗܰܘ ܕܦܳܠܰܚ ܘܰܡܟܰܐܰܪ ܠܶܐܒܠܳܐ ܗܰܘ ܛܽܘܒܬܳܢܳܐ܆ ܗܰܘ ܕܡܶܛܽܠܳܬܶܗ ܟܰܕ ܡܰܠܶܦ ܐ̱ܢܳܐ ܐܶܡܪܶܬ܆ ܕܛܽܘܒܰܝܗܽܘܢ ܠܗܳܢܽܘܢ ܕܡܶܬܐܰܒܠܺܝܢ ܕܗܶܢܽܘܢ ܢܶܬܒܰܝܐܘܢ^[18]. ܐܶܒܠܳܐ ܕܶܝܢ ܗܰܘ ܕܒܽܘܝܳܐܳܐ ܥܳܒܶܕ܆ ܠܳܐ ܐܴܠܶܐ ܠܰܣܦܺܝܩܽܘܬܳܐ ܕܟܰܪܣܳܐ. ܐܶܠܳܐ ܡܦܰܓܶܕ ܠܟܽܠ ܪܶܓܫܳܐ ܕܪܳܥܶܐ ܒܰܪ̈ܓܺܝܓܳܬܳܐ܆ ܘܰܠܟܽܠ ܗܰܕܳܡܳܐ ܒܢܳܡܽܘܣܳܐ ܕܰܐ‌ܠܳܗܳܐ ܡܬܰܪܶܐ^[19]. ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܗܳܢܽܘܢ ܕܡܶܬܐܰܒܠܺܝܢ܆ ܕܰܠܘܳܬܶܗ ܒܰܠܚܽܘܕ ܕܚܰܫܳܐ ܗܰܘ ܕܣܺܝܡ ܡܰܗܦܟܺܝܢ ܠܶܗ ܠܗܰܘܢܳܐ܆ ܘܰܠܘܳܬ ܡܶܕܶܡ ܡܶܢ ܗܳܠܶܝܢ ܕܰܡ̈ܟܳܢܳܢ ܕܢܰܗ̈ܢܝܳܢ ܡܶܬܐܰܫܕܺܝܢ ܘܠܳܐ ܣܳܟ. ܐܶܒܠܳܐ ܗܳܟܺܝܠ ܥܰܠ ܗܳܝ ܕܩܰܕܺܝܡܳܐ ܣܺܝܡܳܐ ܐܺܝܬܰܘܗ̱ܝ ܡܳܪܳܢܳܐܺܝܬ܆ ܓܠܺܝܙܽܘܬܳܐ ܨܶܒܝܳܢܳܝܬܳܐ ܕܰܚܠܳܦ ܗܰܢܺܝ̈ܐܘܳܬܳܐ ܥܳܠ̈ܡܳܢܳܝܳܬܳܐ ܗܳܦܟܳܐ ܡܰܥܠܳܐ ܒܽܘܝܳܐܳܐ ܐܰ‌ܠܳܗܳܝܳܐ܆ ܘܬܶܐܽܘܪܺܝܰܐ ܡܳܠܝܳܐ ܠܶܗ ܠܗܰܘܢܳܐ ܘܩܳܕܡܳܐ ܡܰܐܪܙܳܐ ܘܡܰܠܦܳܐ ܠܳܗ̇ ܠܛܽܘܒܬܳܢܽܘܬܳܐ ܕܡܶܣܬܰܟܝܳܐ ܗܳܝ ܕܚܰܝ̈ܶܐ ܕܰܥܬܺܝܕܺܝܢ. ܠܗܳܢܳܐ ܗܳܟܺܝܠ ܨܰܘܡܳܐ܆ ܠܳܐ ܡܶܫܟܚܺܝܢ ܒܢܰܘܗ̱ܝ ܕܰܓܢܽܘܢܳܐ ܠܡܶܬܐܰܒܳܠܽܘ܆ ܟܡܳܐ ܕܥܰܡܗܽܘܢ ܐܺܝܬܰܘܗ̱ܝ ܚܰܬܢܳܐ܆ ܕܰܠܠܳܐ ܡܫܰܡܠܝܽܘܬܳܐ ܕܺܝܠܗܽܘܢ ܡܬܰܪܶܨ.

ܕܡܳܢܳܐ ܗܝ ܕܶܝܢ ܡܶܫܬܽܘܬܳܐ ܘܟܰܠܬܳܐ ܘܚܰܬܢܳܐ ܢ݀ܺܐܠܰܦ܆ ܘܠܰܘ ܦܫܺܝܛܳܐܺܝܬ ܢܶܪܗܰܛ ܘܢܶܥܒܰܪ.

ܡܶܠܬܳܐ^[20] ܗܰܘ ܕܰܐ‌ܠܳܗܳܐ܆ ܠܰܟܝܳܢܳܐ ܗܰܘ ܕܺܝܠܰܢ ܕܬ̣ܰܙ ܘܰܢܘܰܪ܆ ܘܰܠܢܰܩܺܝܦܽܘܬܳܐ ܟܺܝܬ ܘܒܰܝܬܳܝܽܘܬܳܐ ܗܳܝ ܕܰܠܘܳܬܶܗ ܐܰܫܺܝܛ ܘܨܰܥܰܪ܆ ܘܰܠܢܰܦܫܳܐ ܗܳܝ ܡܠܺܝܠܬܳܐ ܘܕܰܒܨܰܠܡܳܐ ܕܰܐ‌ܠܳܗܳܐ ܗ̣ܘܳܬ܆ ܬܚܶܝܬ ܪ̈ܓܺܝܓܳܬܳܐ ܕܠܳܐ ܡܶܠܬܳܐ ܟܕܰܢ ܘܫܰܥܒܶܕ܆ ܒܥܳܝܗ̱ܝ ܘܰܪܕܰܦ ܒܳܬܪܶܗ܆ ܘܰܒܝܰܕ ܗܳܠܶܝܢ ܕܰܠܩܽܘܒܠܳܐ ܚܰܝܕܶܗ ܠܶܗ. ܟܰܕ ܓܶܝܪ ܗܰܘ ܠܢܰܩܺܝܦܽܘܬܳܐ ܗܳܝ ܕܡܶܢ ܨܰܠܡܳܐ ܐܰ‌ܠܳܗܳܝܳܐ ܕܗܰܘܢܳܐ ܣܕܰܩ܆ ܗܽܘ ܒܝܰܕ ܐ̱ܚܝܳܢܽܘܬܳܐ ܗܳܝ ܕܒܰܒܣܰܪ ܡܩܰܪܶܒ ܠܶܗ ܠܘܳܬܶܗ܆ ܟܰܕ ܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ܆ ܘܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ. ܡܶܢ ܙܰܪܥܶܗ ܓܶܝܪ ܕܰܐܒܪܳܗܳܡ ܢܣܰܒ^[21]܆ ܘܡܶܢ ܥܶܩܳܪܶܗ ܕܺܐܝܫܰܝ ܝܺܥܳܐ܆ ܘܡܶܢ ܚܰܨܶܗ ܕܕܰܘܺܝܕ. ܗܳܢܽܘܢ ܕܡܶܢܗܽܘܢ ܗܝ ܗܺܝ ܩܰܕܺܝܫܬܳܐ ܒܬܽܘܠܬܳܐ܆ ܗܳܝ ܕܰܕܠܳܐ ܙܰܪܥܳܐ ܠܗܳܢܳܐ ܒܶܛܢܰܬ. ܘܶܐܫܬܰܘܬܰܦ ܒܳܗ̇ ܒܰܕܡܽܘܬܳܐ ܠܰܢ܆ ܒܰܕܡܳܐ ܘܰܒܒܶܣܪܳܐ ܕܢܰܦܫܳܐ^[22] ܐܺܝܬ ܠܶܗ ܗܳܝ ܡܠܺܝܠܬܳܐ.

ܘܠܳܐ ܣܶܦܩܰܬ ܠܶܗ ܗܳܕܶܐ ܒܰܠܚܽܘܕ܆ ܐܶܠܳܐ ܟܺܝܬ ܐܳܦ ܠܘܳܬ ܚܠܽܘܠܳܐ ܐ̱ܪܳܙܳܢܳܝܳܐ ܢܰܣܒܶܗ ܟܰܕ ܗܰܝܡܶܢ ܒܶܗ. ܟܰܕ ܒܝܰܕ ܡܰܥܡܽܘܕܺܝܬܳܐ ܡܰܟܪܳܗ̇ ܗܳܝ ܕܫܰܪܺܝ ܒܳܗ̇ ܥܠ ܝܽܘܪܕܢܳܢ܆ ܟܰܕ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܐܺܝܬܰܘܗ̱ܝ ܘܰܚܠܳܦܰܝܢ ܥܳܡܶܕ܆ ܘܟܰܕ ܬܰܡܳܢ ܠܽܘܩܕܰܡ ܩܒܰܥ ܠܰܓܢܽܘܢܳܐ ܡܶܬܗܰܘܢܳܢܳܐ܆ ܗܰܘ ܕܒܺܐܝܕܰܘ̈ܗ̱ܝ ܡܶܬܢܰܩܦܺܝܢܰܢ ܠܶܗ܆ ܘܟܰܠܬܳܐ ܘܥܺܕܬܳܐ ܕܺܝܠܶܗ ܡܶܟܺܝܠ ܡܶܫܬܰܡܗܺܝܢܰܢ. ܘܣܳܗܶܕ ܦܰܘܠܽܘܤ ܟܰܕ ܠܶܐܦܶܣܳܝ̈ܶܐ ܟܳܬܶܒ ܗܳܟܰܢܳܐ. ܓܰܒܪ̈ܶܐ ܐܰܚܶܒܘ ܢܶܫܰܝ̈ܟܽܘܢ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܐܰܚܶܒ ܠܥܺܕܬܶܗ܆ ܘܗܽܘ ܠܶܗ ܐܰܫܠܶܡ ܚܠܳܦܶܝܗ̇܆ ܡܶܛܽܠ ܕܰܢܩܰܕܫܺܝܗ̇ ܟܰܕ ܡܕܰܟܶܐ ܠܳܗ̇ ܒܰܣܚܳܬܳܐ ܕܡܰܝ̈ܳܐ ܒܡܶܠܬܳܐ܆ ܐܰܝܟܰܢܳܐ ܕܗܽܘ ܠܶܗ ܢܩܺܝܡܳܗ̇ ܡܫܰܒܰܚܬܳܐ ܠܥܺܕܬܳܐ܆ ܟܰܕ ܠܰܝܬ ܒܳܗ̇ ܟܽܘܬܡܳܐ ܐܰܘ ܩܶܡܛܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ. ܐܶܠܳܐ ܕܬܶܗܘܶܐ ܐܺܝܬܶܝܗ̇ ܩܰܕܺܝܫܬܳܐ܆ ܘܰܕܠܳܐ ܡܽܘܡ. ܗܳܟܰܢܳܐ ܚܰܝܳܒܺܝܢ ܓܰܒܪ̈ܶܐ ܕܢܰܚܒܽܘܢ ܠܢܶܫܰܝ̈ܗܽܘܢ܆ ܐܰܝܟ ܕܰܠܦܰܓܪ̈ܶܐ ܕܺܝܠܗܽܘܢ. ܗܰܘ ܓܶܝܪ ܕܡܰܚܶܒ ܠܰܐܢ̱ܬܬܶܗ܆ ܗܽܘ ܠܶܗ ܡܰܚܶܒ. ܘܠܳܐ ܐ̱ܢܳܫ ܓܶܝܪ ܡܬܽܘܡ ܠܒܶܣܪܳܐ ܕܺܝܠܶܗ ܣܢܳܐ. ܐܶܠܳܐ ܡܬܰܪܣܶܐ ܠܶܗ ܘܰܡܫܰܚܶܢ ܠܶܗ ܘܰܡܚܰܒܶܒ ܠܶܗ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܠܥܺܕܬܳܐ. ܡܶܛܽܠ ܕܗܰܕܳܡ̈ܶܐ ܐܺܝܬܰܝܢ ܕܦܰܓܪܶܗ܆ ܘܡܶܢ ܒܶܣܪܶܗ ܘܡܶܢ ܓܰܪ̈ܡܰܘܗܝ^[23].

ܗܳܝ ܡܰܢ ܓܶܝܪ ܕܰܐ̱ܚܝܳܢܽܘܬܰܢ ܕܰܠܘܳܬ ܡܫܺܝܚܳܐ܆ ܡܶܢ ܡܶܬܒܰܣܪܳܢܽܘܬܶܗ ܗ̣ܘܳܬ ܠܰܢ. ܐܺܝܬܰܝܢ ܓܶܝܪ ܗܰܕܳܡ̈ܶܐ ܕܦܰܓܪܳܐ ܕܺܝܠܶܗ܆ ܡܶܢ ܒܶܣܪܳܐ ܕܺܝܠܶܗ ܘܡܶܢ ܓܰܪ̈ܡܶܐ ܕܺܝܠܶܗ^[24]. ܗܳܝ ܕܶܝܢ ܕܫܰܘܬܳܦܽܘܬܳܐ ܐ̱ܪܳܙܳܢܳܝܬܳܐ ܐܰܟܚܕܳܐ ܘܰܕܢܰܩܺܝܦܽܘܬܳܐ܆ ܒܝܰܕ ܡܰܥܡܽܘܕܺܝܬܳܐ ܩܰܕܺܝܫܬܳܐ. ܟܰܕ ܓܶܝܪ ܕܰܟܝܳܗ̇ ܒܰܣܚܳܬܳܐ ܕܡܰܝ̈ܳܐ܆ ܐܰܩܺܝܡܳܗ̇ ܠܶܗ ܗܽܘ ܠܢܰܦܫܶܗ ܡܫܰܒܰܚܬܳܐ ܠܥܺܕܬܳܐ܆ ܟܰܕ ܒܰܕܡܽܘܬ ܟܰܠܬܳܐ ܡܰܙܠܓܳܐ ܡܶܢ ܦܰܐܝܽܘܬܳܐ ܪܽܘܚܳܢܳܝܬܳܐ܆ ܘܟܰܕ ܟܽܠ ܨܳܐܬܳܐ ܘܛܽܘܠܫܳܐ܆ ܘܰܦܫܺܝܛܳܐܺܝܬ ܠܡܺܐܡܰܪ܆ ܠܟܽܠ ܡܽܘܡܳܐ ܕܒܺܝܫܽܘܬܳܐ ܥܰܬܺܝܩܬܳܐ ܫܕܳܬ̣ ܡܶܢܳܗ̇ ܒܝܰܕ ܛܰܝܒܽܘܬܳܐ.

ܡܳܢܳܐ ܠܘܳܬ ܗܳܠܶܝܢ ܐܳܡܪܺܝܢ ܠܰܢ܆ ܗܳܢܽܘܢ ܕܡܶܬܬܰܥܫܺܝܢ ܒܝܰܕ ܣܒܺܝܪܽܘܬܳܐ ܕܠܳܐ ܐܰ‌ܠܳܗ ܕܶܐܘܛܶܘܟ̥ܶܐ. ܐܰܪܰܐ ܠܳܐ ܡܶܬܚܰܦܶܝܢ ܘܡܶܬܚܰܡܨܺܝܢ܆ ܟܰܕ ܠܘܳܬ ܒ̈ܢܳܬ ܩܴ̈ܠܶܐ ܕܰܟܬܳܒ̈ܶܐ ܟܳܗ̈ܢܳܝܶܐ ܕܗܳܟܰܢܳܐ ܢܰܗܺܝܪ̈ܳܢ ܡܶܬܟܰܬܫܺܝܢ܆ ܕܡܰܠ̈ܦܳܢ ܓܰܠܝܳܐܺܝܬ܆ ܕܥܰܡܰܢܽܘܐܶܝܠ ܗܰܘ ܕܰܫܘܶܐ ܒܽܐܘܣܺܝܰܐ ܐܺܝܬܰܘܗ̱ܝ ܠܰܐܒܳܐ ܒܰܐܠܳܗܽܘܬܳܐ܆ ܗܘ̣ܳܐ ܐܳܦ ܠܰܢ ܗܽܘ ܟܰܕ ܗܽܘ ܫܘܶܐ ܒܓܶܢܣܳܐ ܟܺܝܬ ܘܰܫܘܶܐ ܒܽܐܘܣܺܝܰܐ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܐܶܬܚܰܝܰܕ ܠܒܶܣܪܳܐ ܩܢܽܘܡܳܐܺܝܬ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܚܰܕ ܓܶܝܪ ܐܺܝܬܰܘܗ̱ܝ ܗ̱ܘܳܐ ܡܶܢ ܬܰܪܬܶܝܢ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܘܠܰܘ ܬܪܶܝܢ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܦܰܫܩܳܢܺܝܬܳܐ܆ ܐܰܟܡܳܐ ܕܳܐܦ ܒܰܪ ܐ̱ܢܳܫܳܐ ܗܰܘ ܕܺܝܠܰܢ܆ ܚܰܕ ܡܶܢ ܬܰܪܬܶܝܢ ܡܶܣܬܰܟܰܠ܆ ܡܶܢ ܢܰܦܫܳܐ ܟܺܝܬ ܘܦܰܓܪܳܐ. ܐܶܢ ܕܶܝܢ ܦܰܢܛܰܣܺܝܰܐ ܐܺܝܬܶܝܗ̇ ܗܳܝ ܕܶܐܬܚܙܺܝ ܡܫܺܝܚܳܐ ܒܰܒܣܰܪ܆ ܐܳܦܠܳܐ ܡܶܢ ܙܰܪܥܶܗ ܕܰܐܒܪܳܗܳܡ ܢܣܰܒ^[25]܆ ܘܳܐܦܠܳܐ ܡܶܢ ܥܶܩܳܪܶܗ ܕܺܐܝܫܰܝ ܝܺܥܳܐ܆ ܘܡܶܢ ܚܰܨܶܗ ܕܕܰܘܺܝܕ. ܠܳܐ ܗܘ̣ܳܐ ܡܶܢ ܐܰܢ̱ܬܬܳܐ. ܠܳܐ ܗܘ̣ܳܐ ܬܚܶܝܬ ܢܳܡܽܘܣܳܐ^[26]. ܠܳܐ ܐܺܝܬܰܝܢ ܡܶܢ ܗܰܕܳܡ̈ܶܐ ܕܦܰܓܪܶܗ ܘܡܶܢ ܒܶܣܪܶܗ ܘܡܶܢ ܓܰܪ̈ܡܰܘܗܝ^[27]. ܣܪܺܝܩܳܐܺܝܬ ܡܚ̈ܝܛܳܢ ܗܳܠܶܝܢ܆ ܐܳܦ ܠܰܫ̈ܠܺܝܚܶܐ ܐܳܦ ܠܰܢܒܺܝ̈ܶܐ ܐܳܦ ܠܶܐܘܢܓ̈ܠܝܣܛܐ. ܡܶܢ ܟܽܠܗܶܝܢ ܛܳܒ̈ܳܬܳܐ ܐܺܝܬܰܝܢ ܣܦܺܝ̈ܩܶܐ ܚܢܰܢ܆ ܐܶܢ ܕܒܶܣܪܳܐ ܢܽܘܟܪܳܝܳܐ ܐܺܝܬܰܝܗܶܝܢ ܗܳܠܶܝܢ ܘܠܰܘ ܕܗܰܘ ܕܺܝܠܰܢ܆ ܘܶܐܢ ܠܰܘ ܒܶܗ ܡܶܠܬܳܐ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ ܙܟܳܐ܆ ܠܗܰܘ ܕܺܐܝܬ ܠܶܗ ܐܽܘܚܕܳܢܳܐ ܕܡܰܘܬܳܐ.

ܐܶܠܳܐ ܫܰܦܺܝܪ ܝܳܕܰܥ ܐ̱ܢܳܐ ܕܟܰܕ ܗܳܠܶܝܢ ܫܳܡܥܺܝܢ܆ ܡܶܫܬܰܚܩܺܝܢ ܗܳܢܽܘܢ ܕܳܐܦ ܩܕܳܡ ܩܰܠܺܝܠ ܚܠܰܛܘ ܗܶܢܽܘܢ ܠܗܽܘܢ ܒܟܶܢܫܳܐ ܕܥܺܕܬܳܐ. ܘܟܰܕ ܠ̱ܐܢܳܫܺܝ̈ܢ ܠܘܳܬ ܗܳܕܶܐ ܚܰܦܶܛܘ܆ ܐܰܝܟܰܢܳܐ ܟܺܝܬ ܕܫܶܡܥܶܬ܆ ܒܨܰܥܪ̈ܶܐ ܕܰܥܠܰܝܢ ܚܕܰܘ ܘܶܐܬܒܰܣܰܡܘ. ܐܶܢܳܐ ܕܶܝܢ ܠܳܐ ܐܶ݀ܒܣܶܐ ܡܶܛܽܠ ܗܳܕܶܐ ܒܦܽܘܪܩܳܢܳܐ ܕܺܝܠܗܽܘܢ. ܡܶܛܽܠ ܕܳܐܦ ܐܳܣܝܳܐ ܟܰܕ ܗܳܢܽܘܢ ܕܰܟܪܺܝܗܶܝܢ ܙܘܪܐ ܡܳܚܶܝܢ ܐܰܘ ܒܽܘܥܰܛܬܳܐ ܡܳܬܚܺܝܢ܆ ܡܫܰܡܠܝܳܐ ܥܳܒܶܕ ܠܶܗ ܗܽܘ ܠܰܟܘܳܝܳܐ ܐܰܘ ܠܰܓܙܳܪܳܐ ܒܗܰܕܳܡ̈ܶܐ ܗܳܢܽܘܢ ܕܶܐܬܚܰܒܰܠܘ.

ܨܳܒܶܐ ܐܰܢ̱ܬ ܓܶܝܪ ܐܳܘ ܗܳܢܳܐ܆ ܠܡܺܐܠܰܦ ܝܰܬܺܝܪ ܢܰܗܺܝܪܳܐܺܝܬ܆ ܕܳܐܦ ܫܘܶܐ ܒܓܶܢܣܳܐ ܕܺܝܠܰܢ ܐܺܝܬܰܘܗ̱ܝ ܒܰܒܣܰܪ ܡܫܺܝܚܳܐ ܘܳܐܦ ܚܰܬܢܳܐ܆ ܡܳܕܶܝܢ ܠܟܰܠܬܳܐ ܗܳܝ ܕܰܒܬܶܫܒ̈ܚܳܬ ܬܶܫܒ̈ܚܳܬܳܐ ܫܡܰܥ܆ ܕܩܳܕܡܳܐ ܡܛܰܦܣܳܐ ܠܳܗ̇ ܠܥܺܕܬܳܐ ܘܰܠܘܳܬܶܗ ܐܳܡܪܳܐ܆ ܗܳܐ ܐܺܝܬܰܝܟ ܫܰܦܺܝܪܳܐ ܒܰܪ ܚܳܬܝ ܐܳܦ ܟܺܝܬ ܗܕܺܝܪܳܐ^[28]܆ ܗܕܺܝܪܳܐ ܓܶܝܪ ܐܺܝܬܰܘܗ̱ܝ ܒܫܽܘܦܪܳܐ ܝܰܬܺܝܪ ܡܶܢ ܒܢܰܝ̈ܳܐ ܕܐ̱ܢܳܫܳܐ ܐܰܝܟ ܕܰܡܙܰܡܰܪ ܕܰܘܺܝܕ^[29]. ܐܶܠܳܐ ܟܺܝܬ ܐܳܦ ܗܽܘ ܡܦܰܢܶܐ ܦܶܬܓܳܡܳܐ ܠܘܳܬܳܗ̇܆ ܟܰܕ ܟܰܠܬܳܐ ܩܳܪܶܐ ܠܳܗ̇ ܐܰܟܚܕܳܐ ܘܚܳܬܳܐ܆ ܘܟܰܕ ܡܩܰܒܶܠ ܠܗܰܒܳܒܳܐ ܘܰܠܒܰܣܺܝܡܽܘܬ ܪܺܝܚܳܐ܆ ܘܰܠܚܰܠܝܽܘܬܳܐ ܘܠܰܡܬܰܪܣܝܳܢܽܘܬܳܐ ܕܦܽܘܠܚܳܢܳܐ ܕܺܝܠܳܗ̇ ܗܳܟܰܢܳܐ. ܥܶܠܶܬ̣ ܠܓܰܢܬܳܐ ܕܺܝܠܝ ܚܳܬܝ ܟܰܠܬܳܐ. ܩܶܛܦܶܬ ܡܽܘܪܳܐ ܕܺܝܠܝ ܥܰܡ ܒܶܣ̈ܡܳܢܶܐ ܕܺܝܠܝ. ܐܶܟܠܶܬ ܠܰܚܡܳܐ ܕܺܝܠܝ ܥܰܡ ܕܶܒܫܳܐ ܕܺܝܠܝ. ܐܶܫܬܺܝܬ̣ ܚܰܡܪܳܐ ܕܺܝܠܝ ܥܰܡ ܚܰܠܒܳܐ ܕܺܝܠܝ^[30].

ܚܙܰܝܬ ܡܬܽܘܡ ܠܳܗ̇ ܟܰܕ ܠܳܗ̇ ܐܰܟܚܕܳܐ ܟܰܠܬܳܐ ܟܺܝܬ ܘܚܳܬܳܐ܆ ܐܶܠܳܐ ܗܳܝ ܡܰܢ ܐܺܝܬܶܝܗ̇ ܐܰܝܟ ܕܶܐܡܪܶܬ܆ ܕܰܐ̱ܚܝܳܢܽܘܬܳܐ ܕܒܰܒܣܰܪ. ܗܳܝ ܕܶܝܢ ܕܛܰܝܒܽܘܬܳܐ ܕܡܰܥܡܽܘܕܺܝܬܳܐ. ܡܶܛܽܠ ܗܳܟܺܝܠ ܕܗܳܢܳܐ ܐܺܝܬܰܘܗ̱ܝ ܗ̱ܘܳܐ ܚܠܽܘܠܳܐ܆ ܗܰܘ ܕܰܒܝܰܕ ܡܰܥܡܽܘܕܺܝܬܳܐ ܐܶܫܬܠܶܡ ܡܶܢ ܡܫܺܝܚܳܐ ܐ̱ܪܳܙܳܢܳܐܺܝܬ܆ ܣܽܘܢܩܳܢܳܐ ܕܶܝܢ ܐܳ‌ܠܨܳܐܺܝܬ ܩܳܪܶܐ ܗ̱ܘܳܐ ܠܶܗ ܠܚܰܬܢܳܐ܆ ܕܡܶܢ ܒܳܬܰܪ ܚܠܽܘܠܳܐ ܢܟܽܘܫ ܘܢܶܬܐܡܶܢ ܠܘܳܬ ܟܰܠܬܳܐ܆ ܘܢܰܪܕܶܝܗ̇ ܘܢܰܠܦܶܝܗ̇ ܒܝܰܕ ܗܳܝ ܕܡܶܬܗܰܦܰܟ ܥܰܡܳܗ̇܆ ܕܒܰܐܝܠܶܝܢ ܥܝ̈ܳܕܶܐ^[31] ܘܗܽܘ̈ܦܳܟܶܐ ܬܶܬܚܰܫܰܚ܆ ܥܰܡ ܬܰܠ̈ܡܺܝܕܶܐ ܕܰܒܛܶܟܣܳܐ ܕܥܺܕܬܳܐ ܘܰܕܟܰܠܬܳܐ ܐܺܝܬܰܝܗܽܘܢ ܗ̱ܘܰܘ܆ ܐܰܝܟ ܒܰܪ ܐ̱ܢܳܫܐ ܥܰܡ ܒܢܰܝ̈ܢܳܫܳܐ ܚܝܳܐ ܘܶܐܬܗܰܦܰܟ܆ ܘܗܳܕܶܐ ܟܰܕ ܐܺܝܬܰܘܗ̱ܝ ܗ̱ܘܳܐ ܐܰܟܚܕܳܐ ܐܳܦ ܐܰ‌ܠܳܗܳܐ܆ ܟܰܕ ܟܽܠܳܗ̇ ܐܽܘܪܚܳܐ ܕܚܰܝ̈ܶܐ ܡܝܰܬܪ̈ܶܐ ܡܚܰܘܶܐ ܗ̱ܘܳܐ ܠܗܽܘܢ܆ ܗܳܝ ܕܒܺܐܝ̈ܕܶܝܗ̇ ܥܬܺܝܕܺܝܢ ܗ̱ܘܰܘ܆ ܕܰܠܗܳܢܽܘܢ ܕܰܒܟܽܠܙܒܰܢ ܡܶܬܟܰܠܬܺܝܢ^[32] ܒܝܰܕ ܡܰܥܡܽܘܕܺܝܬܳܐ ܐܰ‌ܠܳܗܳܝܬܳܐ܆ ܠܘܳܬ ܙܢܶܗ ܕܚܰܬܢܳܐ ܢܶܓܒܠܽܘܢ ܘܰܢܕܰܡܽܘܢ.

ܡܶܛܽܠܗܳܕܶܐ ܟܽܠܶܗ ܙܰܒܢܳܐ ܗܰܘ ܕܡܶܬܒܰܪܢܫܳܢܽܘܬܳܐ܆ ܡܰܫܠܡܳܢܽܘܬܳܐ ܘܗܽܘܓܳܝܳܐ ܘܬܽܘܪܳܨܳܐ ܐܺܝܬܰܘܗ̱ܝ ܗ̱ܘܳܐ܆ ܕܰܚܠܽܘܠܳܐ ܗܰܘ ܐ̱ܪܳܙܳܢܳܝܳܐ ܐܰܘܟܺܝܬ ܕܡܶܫܬܽܘܬܳܐ ܘܫܰܘܬܳܦܽܘܬܳܐ ܘܙܽܘܘܳܓܳܐ. ܘܰܡܫܰܡ̈ܫܳܢܶܐ ܐܰܘܟܺܝܬ ܚܕܽܘܓ̈ܶܐ ܘܰܒ̈ܢܰܝܳܐ ܕܰܓܢܽܘܢܳܐ ܐܺܝܬܰܝܗܽܘܢ ܗ̱ܘܰܘ ܬܰܠ̈ܡܺܝܕܶܐ܆ ܐܰܝܟ ܕܳܐܦ ܥܰܒ̈ܕܶܐ ܐܰܘܟܺܝܬ ܦܳܥ̈ܠܶܐ ܕܰܚܨܳܕܳܐ. ܥܝܳܕܳܐ ܓܶܝܪ ܐܺܝܬ ܠܰܟܬܳܒܳܐ ܐܰ‌ܠܳܗܳܝܳܐ܆ ܕܰܠܗܳܢܽܘܢ ܕܰܠܘܳܬ ܡܶܕܶܡ ܡܫܰܡܫܺܝܢ܆ ܐܰܘ ܕܡܶܕܶܡ ܡܚܰܩܠܺܝܢ ܐܰܘܟܺܝܬ ܥܳܒܕܺܝܢ܆ ܒܢܰܝ̈ܳܐ ܕܺܝܠܶܗ ܕܣܽܘܥܪܳܢܳܐ ܢܫܰܡܰܗ ܐܶܢܽܘܢ. ܐܰܝܟ ܒܢܰܝ̈ܳܐ ܕܫܰܝܢܳܐ܆ ܘܗ̱ܝ ܕܰܠܩܽܘܒܠܳܐ ܒܢܰܝ̈ܳܐ ܕܠܳܐ ܡܶܬܛܦܺܝܣܳܢܽܘܬܳܐ^[33]܆ ܘܰܒܢܰܝ̈ܳܐ ܕܚܰܝܠܳܐ܆ ܠܚܰܝ̈ܠܰܘܳܬܳܐ ܘܠܰܦ̈ܠܰܓܶܐ ܕܰܡܙܰܝ̈ܢܶܐ. ܗܳܕܐ ܗܝ ܗܳܟܺܝܠ ܕܳܐܡܰܪ ܡܫܺܝܚܳܐ܆ ܕܰܠܡܳܐ ܡܶܫܟܚܺܝܢ ܒܢܰܘܗ̱ܝ ܕܰܓܢܽܘܢܳܐ ܠܡܶܬܰܐܒܳܠܽܘ ܟܡܳܐ ܕܥܰܡܗܽܘܢ ܐܺܝܬܰܘܗ̱ܝ ܚܰܬܢܳܐ܆ ܢܺܐܬܽܘܢ ܕܶܝܢ ܝܰܘ̈ܡܳܬܳܐ ܐܶܡܰܬܝ ܕܢܶܬܬܪܺܝܡ ܡܶܢܗܽܘܢ ܚܰܬܢܳܐ܆ ܘܗܳܝܕܶܝܢ ܢܨܽܘܡܽܘܢ^[34].

ܐܶܡܰܬܝ ܕܶܝܢ ܐܶܬܥܰܠܺܝ ܡܶܢܗܽܘܢ ܚܰܬܢܳܐ ܘܶܐܬܬܪܺܝܡ. ܝܺܕܺܝܥܳܐ ܗܝ ܕܶܐܡܰܬܝ ܕܰܣܠܶܩ ܠܰܫܡܰܝܳܐ܆ ܘܰܢܚܶܬ ܦܰܪܩܠܝܛܐ ܗܰܘ ܡܰܠܦܳܢܳܐ ܕܨܰܘܡܳܐ ܡܫܰܡܠܝܳܐ܆ ܘܕܰܠܘܳܬ ܟܽܠܗܶܝܢ ܗܳܠܶܝܢ ܕܰܡܫܰܡ̈ܠܝܳܢ ܡܗܰܕܶܐ ܠܰܢ ܘܰܡܕܰܒܰܪ. ܗܰܘ ܓܶܝܪ ܢܕܰܒܰܪܟܽܘܢ܆ ܒܟܽܠܶܗ ܫܪܳܪܳܐ^[35]܆ ܐܳܡܰܪ ܗ̱ܘܳܐ ܡܫܺܝܚܳܐ ܠܬܰܠܡܺܝܕܰܘ̈ܗ̱ܝ. ܠܗܳܕܶܐ ܡܶܬܬܪܺܝܡܳܢܽܘܬܳܐ ܕܚܰܬܢܳܐ܆ ܐܳܦ ܢܒܺܝܳܐ ܕܰܘܺܝܕ ܙܳܡܰܪ ܟܰܕ ܐܳܡܰܪ܆ ܡܳܪܝܳܐ ܡܳܪܰܢ ܡܳܐ ܬܡܺܝܗ ܫܡܳܐ ܕܺܝܠܳܟ ܒܟܽܠܳܗ̇ ܐܪܥܳܐ^[36]܆ ܡܶܛܽܠ ܕܶܐܬܬܪܺܝܡܰܬ ܪܰܒܽܘܬ ܦܰܐܝܽܘܬܳܐ ܕܺܝܠܳܟ ܠܥܶܠ ܡܶܢ ܫܡܰܝܳܐ.

ܥܽܘܗܕܳܢܳܐ ܗܳܟܺܝܠ ‌ܐܺܝܬܰܘܗ̱ܝ ܝܰܘܡܳܢܳܐ܆ ܕܨܰܘ̈ܡܶܐ ܗܳܢܽܘܢ ܕܡܶܢ ܒܳܬܰܪ ܡܶܬܬܪܺܝܡܳܢܽܘܬܶܗ ܘܡܶܬܥܰܠܝܳܢܽܘܬܶܗ ܕܰܡܫܺܝܚܳܐ܆ ܕܝܰܘ̈ܡܳܬܳܐ ܗܳܢܽܘܢ ܕܰܒܡܶܢܝܳܢܳܐ ܠܳܐ ܡܶܬܬܰܚܡܺܝܢ. ܠܳܐ ܡܬܰܚܡܳܐܺܝܬ ܓܶܝܪ ܐܶܡܰܪ ܦܳܪܽܘܩܰܢ܆ ܢܺܐܬܽܘܢ ܝܰܘ̈ܡܳܬܳܐ܆ ܐܶܡܰܬܝ ܕܢܶܬܬܪܺܝܡ ܚܰܬܢܳܐ ܡܶܢܗܽܘܢ ܗܳܝܕܶܝܢ ܢܨܽܘܡܽܘܢ⁶. ܚܢܰܢ ܕܶܝܢ ܒܪܰܡ ܠܦܽܘܬ ܡܰܐܺܝܢܽܘܬܳܐ ܕܺܝܠܰܢ܆ ܒܥܽܘܗܕܳܢܳܐ ܕܚܰܕ ܝܰܘܡܐ ܒܰܠܚܽܘܕ ܡܫܰܡܠܶܝܢ ܚ̱ܢܰܢ ܠܗ ܠܢܳܡܽܘܣܳܐ ܡܨܰܕܝܳܢܳܐܺܝܬ܆ ܘܰܠܘܳܬ ܫܳܥܰܘܗ̱ܝ ܕܗܳܢܳܐ ܡܶܬܥܰܣܩܺܝܢ ܚ̱ܢܰܢ܆ ܘܰܠܘܳܬ ܐܳܐܰܪ ܚܳܝܪܺܝܢ ܚ̱ܢܰܢ. ܘܰܠܘܳܬ ܥܪܳܒܶܗ ܕܫܶܡܫܳܐ ܡܶܬܚܰܠܡܠܡܺܝܢܰܢ܆ ܘܰܠܘܳܬ ܗܰܘ ܦܥܺܝܪ ܚܶܟܰܢ. ܐܶܠܳܐ ܠܰܘ ܗܳܢܽܘܢ ܕܫܰܪܺܝܪܳܐܺܝܬ ܐܺܝܬܰܝܗܽܘܢ ܟܪ̈ܺܝܣܛܝܳܢܶܐ.

ܐܳܦ ܓܶܝܪ ܝܳܕܰܥ ܐ̱ܢܳܐ ܠܣܰܓܺܝ̈ܶܐܐ܆ ܕܥܰܡ ܚܰܬܺܝܬ̣ܽܘܬܳܐ ܢܳܛܪܺܝܢ ܠܗܶܝܢ ܠܗܳܠܶܝܢ ܐܳܦ ܒܰܡܕܺܝܢ̱ܬܳܐ. ܘܝܰܬܺܝܪܳܐܺܝܬ ܢܶܫ̈ܶܐ ܢܰܟ̈ܦܳܬܳܐ. ܠܡܶܢܗܶܝܢ ܡܰܢ ܐܳܦ ܕܰܠܟܽܠܗܽܘܢ ܝܰܘ̈ܡܳܬܳܐ ܨܳܝ̈ܡܳܢ. ܠܣܰܓܺܝ̈ܳܐܬܳܐ ܕܶܝܢ܆ ܕܠܰܐܪܒܥܳܐ ܒܫܰܒܳܐ ܘܠܰܥܪܽܘܒܬܳܐ. ܗܳܠܶܝܢ ܕܳܐܦ ܓܳܚܟܺܝܢ ܥܠܰܝܗܶܝܢ܆ ܗܳܢܽܘܢ ܕܡܶܢ ܓܰܒܪ̈ܶܐ. ܕܺܐܝܬܰܝܗܽܘܢ ܝܰܬܺܝܪ ܡܰܗ̈ܡܝܳܢܶܐ܆ ܘܰܠܘܳܬ ܫܳܪܽܘܬܐ ܡܚܰܦܛܺܝܢ ܘܩܳܪܶܝܢ ܠܗܶܝܢ. ܘܡܰܘܬܪܺܝܢ ܘܠܳܐ ܡܶܕܶܡ܆ ܐܶܠܳܐ ܡܶܙܕܟܶܝܢ ܡܶܢ ܗܳܢܶܝܢ ܕܢܶܩ̈ܒܳܬܳܐ ܡܰܢ ܐܺܝܬܰܝܗܶܝܢ܆ ܢܰܦ̈ܫܳܬܳܐ ܚܰܝ̈ܠܬܳܢܝܳܬܳܐ ܒܪܰܡ܆ ܗܳܢܽܘܢ ܕܛܶܟܣܳܐ ܕܪܺܝܫܳܐ ܐܰܚܺܝܕܺܝܢ܆ ܘܥܳܐܦܶܝܢ ܠܶܗ ܠܗܶܝܢ ܠܰܐܓܪܳܐ܆ ܐܰܝܟܰܢܳܐ ܕܢܶܬܟܰܠ̈ܠܳܢ܆ ܘܟܰܕ ܨܳܡܶܝ̈ܢ ܐܰܟܚܕܳܐ ܘܟܰܕ ܙܟܰܝ̈ ܒܚܰܝܠܶܗ ܕܰܡܫܺܝܚܳܐ ܗܰܘ ܕܶܐܡܰܪ܆ ܕܚܰܝܠܳܐ ܕܺܝܠܝ ܒܰܡܚܺܝܠܽܘܬܳܐ ܡܶܬܓܡܰܪ^[37]܆ ܘܰܠܗܶܕܶܐ ܡܰܥܒܶܕ ܒܗܽܘܢ ܒܣܽܘܥܪ̈ܳܢܶܐ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܡܺܝܢ‌܀

ܫܠܡ ܡܺܐܡܪܐ ܕܬܫܥܝܢ ܘܰܬܪܝܢ.

ܡܬܝ. 23: 4 [1]

ܒ. ܩܘܪ̈ܝܢܬܝܐ. 2: 2 [2]

ܠܘܩܐ. 5: 29 [3]

ܡܬܝ. 9: 11 [4]

ܡܬܝ. 9: 12 ـ 13 [5]

ܡܙܡܘܪ̈ܐ. 85: 7 [6]

ܡܬܝ. 9: 11 [7]

ܠܘܩܐ. 18: 11 ـ 12 [8]

ܠܘܩܐ. 5: 32 [9]

ܪ̈ܗܘܡܝܐ. 3: 23 ـ 24 [10]

ܚܙܩܝܐܝܠ. 33: 13 [11]

ܡܬܝ. 9: 14 [12]

ܥܰܠ [13]

ܡܬܝ. 9: 11[14]

ܡܬܝ. 9: 15 [15]

ܝܘܚܢܢ. 3: 29 [16]

ܡܬܝ. 9: 14 [17]

ܡܬܝ. 5: 4 [18]

ܡܟܰܘܶܢ[19]

[20]ܒܠܶܫܳܢܳܐ ܝܰܘܢܳܝܳܐ ܫܡܳܐ ܕܰܟܝܳܢܳܐ ܢܶܩܒܬܳܢܳܐܝܬ ܡܶܬܶܐܡܰܪ ܡܶܛܽܠ ܗܳܕܶܐ ܡܰܠܦܳܢܳܐ ܡܰܢ ܐܰܡܪܶܗ ܒܡܶܠܬܳܐ ܗܳܝ ܕܰܥܠܰܘܗܝ ܢܶܩܒܬܳܢܳܐܝܬ ܒܰܕܡܽܘܬ ܟܰܠܬܳܐ ܘܠܰܘ ܕܶܟܪܳܢܳܐܝܬ. ܐܶܢܳܐ ܕܶܝܢ ܐܰܝܟ ܠܶܫܳܢܳܐ ܣܘܪܝ̣ܳܝ̣ܳܐ ܕܶܟܪܳܢܳܐܝܬ ܐܶܬܐܠܨܶܬ ܕܶܐ݀ܣܺܝܡܝܘܗܝ

ܥܒܪ̈ܝܐ. 2: 16 [21]

ܥܒܪ̈ܝܐ. 2: 14 [22]

ܐܦܣ̈ܝܐ. 5: 25 ـ 30 [23]

ܐܦܣ̈ܝܐ. 5: 30[24]

ܥܒܪ̈ܝܐ. 2: 16 [25]

ܓܠܛܝ̈ܐ. 4: 4 [26]

ܐܦܣ̈ܝܐ. 5: 30 [27]

ܬܫܒ̈ܚܳܬ ܬܫܒ̈ܚܬܐ. 1: 15 [28]

ܡܙܡܘܪ̈ܐ. 45: 4 [29]

ܬܫܒ̈ܚܬ ܬܫܒ̈ܚܳܬܐ. 5: 1 ـ 2 [30]

ܙܢܰܝ̈ܳܐ[31]

ܐܰܝܟ ܕܡܶܢ ܟܰܠܬܳܐ[32]

ܐܦܣ̈ܝܐ. 2: 2 [33]

ܡܬܝ. 9: 15 [34]

ܝܘܚܢܢ. 16: 13 [35]

ܡܙܡܘܪ̈ܐ. 8: 2 [36]

ܒ. ܩܘܪ̈ܝܢܬܝܐ. 12: 9[37]