ܡܺܐܡܪܳܐ ܕܬܶܫܥܺܝܢ ܘܚܰܕ

ܥܰܠ ܪܰܒܳܐ ܐܰܬܐܢܣܝܘܤ ܡܰܘܕܝܳܢܳܐ ܐܶܦܝܣܩܘܦܐ ܕܰܡܕܺܝܢ̱ܬܳܐ ܪܰܒܬܳܐ ܕܰܐ‌ܠܶܟܣܰܢܕܪ̈ܳܝܶܐ. ܘܰܠܘܳܬ ܪ̈ܳܚܡܰܝ ܚ̈ܶܙܘܳܢܶܐ ܕܰܐܓܽܘ̈ܢܶܐ ܗܳܢܽܘܢ ܕܰܐ‌ܠܽܘܡܦ̊ܝܰܐ.

91: ܒܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ ܦܳܩܶܕ ܗ̱ܘܳܐ ܐܰ‌ܠܳܗܳܐ ܕܟܽܠ܆ ܕܟܰܕ ܡܫܰܠܶܡ ܪܺܝܫ ܟܳܗ̈ܢܶܐ ܠܚܰܝ̈ܶܐ ܗܳܢܽܘܢ ܕܗܳܪܟܳܐ܆ ܘܰܡܫܰܢܶܐ ܠܘܳܬ ܝܽܘܪܬܳܢܳܐ ܗܰܘ ܡܝܰܬܪܳܐ ܘܚܰܝ̈ܶܐ ܗܳܢܽܘܢ ܕܡܶܣܬܰܒܪܺܝܢ܆ ܗܰܘ ܕܡܶܢ ܒܳܬܰܪ ܗܰܘ ܠܪܺܝܫܽܘܬ ܟܳܗܢܽܘܬܳܐ ܡܶܬܩܪܶܐ܆ ܡܶܚܕܳܐ ܘܒܰܪ ܫܳܥܬܶܗ ܟܰܕ ܡܶܫܬܰܠܰܚ ܗܰܘ ܕܰܥܢܰܕ܆ ܢܶܠܒܫܺܝܗ̇ ܠܳܗ̇ ܠܶܐܤܛܠܶܗ. ܡܶܛܽܠ ܗܳܕܶܐ ܐܳܦ ܐܳܡܰܪ ܗ̱ܘܳܐ ܠܘܳܬܶܗ ܕܡܽܘܫܶܐ܆ ܣܰܒ ܠܰܐܗܪܽܘܢ ܘܠܶܐܠܺܝܥܳܙܳܪ ܒܪܶܗ܆ ܘܰܐܣܶܩܳܝܗ̱ܝ ܠܗܽܘܪ ܛܽܘܪܳܐ ܠܥܺܝܢ ܟܽܠܳܗ̇ ܟܢܽܘܫܬܳܐ ܕܺܐܝܣܪܳܐܶܝܠ. ܘܰܐܫܠܰܚܳܝܗ̱ܝ ܠܰܐܗܪܽܘܢ ܐܶܤܛܠܶܗ܆ ܘܰܐ‌ܠܒܶܫܳܝܗ̱ܝ ܠܶܐܠܺܝܥܳܙܳܪ ܒܪܶܗ. ܘܰܐܗܪܽܘܢ ܟܰܕ ܡܶܬܬܰܘܣܰܦ܆ ܢܡܽܘܬ ܬܰܡܳܢ^[1].

ܗܳܕܶܐ ܕܶܝܢ܆ ܘܠܳܐ ܡܶܛܽܠ ܡܶܕܶܡ ܐ̱ܚܪܺܢܳܐ ܦܳܩܶܕ ܗ̱ܘܳܐ ܕܬܶܗܘܶܐ܆ ܐܶܠܳܐ ܐܰܝܟܰܢܳܐ ܕܢܰܠܶܦ ܒܺܐܝܕܰܘ̈ܗ̱ܝ ܕܣܽܘܥܪܳܢܳܐ܆ ܕܙܳܕܶܩ ܠܗܰܘ ܕܢܳܩܶܦ ܘܰܬܪܰܝܳܢܳܐ ܐܳܬܶܐ ܠܘܳܬ ܫܽܘܠܛܳܢܳܐ܆ ܕܰܒܕܽܘܒܳܪܳܐ ܘܰܒܡܶܠܬܳܐ ܐܰܝܟ ܗܰܘ ܕܰܠܟܽܠܶܗ ܗܰܘ ܕܰܩܕܳܡܰܘ̈ܗ̱ܝ ܠܳܒܶܫ ܘܚܳܕܶܐ ܙܳܩܰܪ ܠܳܗ̇ ܠܰܡܝܰܬܪܽܘܬܳܐ܆ ܐܰܝܟܰܢܳܐ ܕܳܐܦ ܟܳܗܢܽܘܬܳܐ ܚܕܳܐ ܬܶܣܬܒܰܪ ܕܺܐܝܬܶܝܗ̇܆ ܘܠܰܘ ܣܰܓܺܝ̈ܶܐܐ ܐܶܠܳܐ ܚܰܕ ܢܶܣܬܒܰܪ ܗܰܘ ܕܰܡܟܰܗܶܢ܆ ܒܗܳܝ ܕܠܳܐ ܡܶܬ̣ܦܰܬܰܟ̣ ܒܒܺܝܫܽܘܬܳܐ. ܕܗܳܢܳܐ ܩܽܘܠܳܣܳܐ ܫܰܪܺܝܪܳܐ ܐܺܝܬܰܘܗ̱ܝ ܗ̱ܘܳܐ ܕܗܰܘ ܕܩܰܕܶܡ ܡܺܝܬ̣܆ ܗܳܝ ܕܢܶܗܘܶܐ ܚܰܝ ܒܰܥ̈ܒܕܰܘ̈ܗ̱ܝ ܕܗܰܘ ܕܚܰܝ ܗ̱ܘܳܐ ܘܩܰܝܳܡ܆ ܘܰܐܝܟ ܕܰܒܝܰܕ ܨܰܠܡܳܐ ܡܶܕܶܡ ܢܰܦܫܳܢܳܐ ܘܰܡܠܺܝܠܳܐ ܢܶܬܚܙܶܐ ܘܢܶܬܚܰܘܶܐ.

ܡܳܢܳܐ ܗܳܟܺܝܠ ‌ܐܶ݀ܥܒܶܕ ܐܶܢܳܐ܆ ܕܕܽܘܟܪܳܢܶܗ ܡܰܢ ܕܰܐܬܰܐܢܣܝܘܤ ܗܰܘ ܪܰܒܳܐ ܡܫܰܡܠܶܐ ܐ̱ܢܳܐ܆ ܡܶܢ ܐܶܤܛܠܳܐ ܕܶܝܢ ܕܪܺܝܫܽܘܬ ܟܳܗܢܳܝܬܳܐ ܕܗܰܘ ܗܳܝ ܕܒܰܡܝܰܬܪ̈ܳܬܳܐ ܡܶܣܬܰܟܠܳܐ ܥܰܪܛܶܠܳܝܳܐ ܐܺܝܬܰܝ. ܐܰܘ ܙܳܕܶܩ ܕܰܐܝܟ ܗܳܢܽܘܢ ܡܶܣ̈ܟܺܢܶܐ ܐܰܝܠܶܝܢ ܕܰܒܚܰܓ̈ܶܐ ܘܰܒܥܻ̈ܐܕܶܐ ܫܳܐܠܺܝܢ ܠܒܽܘܫ̈ܶܐ܆ ܘܰܒܢܽܘܟܪ̈ܳܝܳܬܳܐ ܐܰܝܟ ܕܰܒܒܰܝ̈ܬܳܝܳܬܳܐ ܡܶܬܗܰܕܪܺܝܢ܆ ܠܩܽܘ̈ܠܳܣܶܐ ܕܢܶܨܚܳܢܰܘܗ̱ܝ ܪ̈ܽܘܚܳܢܶܐ ܕܗܰܘ ܪܺܝܫ ܟܳܗ̈ܢܶܐ ܐܶ݀ܬܥܰܛܰܦ܆ ܘܰܒܗܳܠܶܝܢ ܐܶ݀ܨܛܰܒܰܬ ܒܡܶܠܬܳܐ܆ ܘܰܚܠܳܦ ܣܳܥܽܘܪ̈ܘܳܬܳܐ ܠܗܽܘܢ ܐܶ݀ܚܰܘܶܐ. ܐܳܦ ܓܶܝܪ ܬܶܗܘܶܐ ܠܰܢ ܗܺܝ ܗܳܕܶܐ ܠܝܽܘܬܪܳܢܳܐ. ܗܳܝ ܕܳܐܦ ܐܶܢ ܠܳܐ ܡܶܢ ܡܶܕܶܡ ܐ̱ܚܪܺܝܢ܆ ܐܶܠܳܐ ܛܐܘܣ^[2] ܡܶܢ ܡ̈ܶܠܶܐ ܕܺܝܠܰܢ ܕܢܰܦܫܰܢ ܢܶܒܗܰܬ. ܗܰܘ ܓܶܝܪ ܕܰܡܩܰܠܶܤ ܠܰܡܝܰܬܪܽܘܬܳܐ܆ ܡܫܰܘܚܪܳܐܺܝܬ ܒܰܙܒܰܢ ܐܳܦ ܠܗܳܝ ܕܢܶܣܥܪܺܝܗ̇ ܠܗܳܕܶܐ ܐܳܬܶܐ.

ܒܪܰܡ ܠܺܝ ܪܰܒܬܳܐ ܗܝ܆ ܗܳܝ ܕܰܠܡܰܫܡܰܥܬܳܐ ܕܺܝܠܟܽܘܢ ܐܶ݀ܒܰܣܶܡ܆ ܟܰܕ ܐܰܓܳܢܳܐ ܡܶܕܶܡ ܙܥܽܘܪܬܳܐ ܐܰܩܺܝܡܶܬ܆ ܘܰܐܝܟ ܕܡܶܢ ܝܰܡܳܐ ܪܰܒܳܐ ܘܠܳܐ ܡܶܬܬܟܺܝܠܳܢܳܐ܆ ܡܶܢ ܬܽܘܪ̈ܳܨܶܐ ܕܰܐܬܰܐܢܰܣܝܘܤ ܠܗܳܕܶܐ ܚܰܪܦܶܬ܆ ܥܰܡ ܚܶܟܡܬܳܐ ܗܳܝ ܕܝܳܕܥܳܐ ܕܫܰܦܺܝܪ ܬܶܡܙܓܺܝܘܗ̱ܝ ܠܫܶܩܝܳܐ ܕܰܐܝܟ ܗܳܢܳܐ܆ ܐܰ݀ܙܥܶܩ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ܆ ܐܶܫܬܰܘ ܚܰܡܪܳܐ ܗܰܘ ܕܡܶܙܓܶܬ ܠܟܽܘܢ܆ ܐܰܪܦܰܘ ܚܰܣܺܝܪܽܘܬ ܪܶܥܝܳܢܳܐ ܘܰܚ̣ܝܰܘ܆ ܘܰܒܥܰܘ ܚܶܟܡܬܳܐ ܐܰܝܟܰܢܳܐ ܕܬܺܚܽܘܢ^[3]܆ ܘܬܰܪܶܨܘ ܣܽܘܟܳܠܳܐ ܒܺܝܕܰܥܬܳܐ. ܕܚܶܟܡܬܳܐ ܓܶܝܪ ܐܰܝܟ ܕܒܰܫܪܳܪܳܐ ܘܰܕܣܽܘܟܳܠܳܐ܆ ܘܕܽܐܘܪܚܳܐ ܗܳܝ ܕܰܥܬܺܝܕܳܐ܆ ܘܰܕܚܰܝ̈ܶܐ ܗܳܢܽܘܢ ܐܰ‌ܠܳܗܳܝ̈ܶܐ ܘܰܕܠܳܐ ܫܽܘܠܳܡ܆ ܣܳܐܶܡ ܐ̱ܢܳܐ ܩܕܳܡܰܝܟܽܘܢ ܝܽܘܠܦܳܢܳܐ. ܠܰܘ ܐܰܝܟ ܕܰܠܩܽܘܠܳܣܳܐ܆ ܐܰܝ̇ܕܳܐ ܓܶܝܪ ܐܳܦ ܡܶܠܬܳܐ ܐܺܝܬ ܕܡܳܛܝܳܐ ܠܗܳܝ ܕܰܐܝܟ ܕܫܳܘܝܳܐ ܬܺܐܡܰܪ܆ ܐܶܠܳܐ ܐܰܝܟ ܕܰܠܬܽܘܢܳܝܳܐ ܫܚܺܝܡܳܐ ܒܰܠܚܽܘܕ.

ܐܰܬܰܐܢܣܝܘܤ܆ ܗܳܢܳܐ ܓܶܝܪ ܗܳܢܳܐ܆ ܗܰܘ ܪܺܝܫ ܟܳܗ̈ܢܶܐ ܪܰܒܳܐ܆ ܗܰܘ ܪܳܥܝܳܐ܆ ܗܰܘ ܡܰܠܦܳܢܳܐ܆ ܗܰܘ ܐܰܓܽܘܢܺܝܣܛܳܐ ܐܰܘܟܺܝܬ ܡܶܬܟܰܬܫܳܢܳܐ ܕܰܫܪܳܪܳܐ܆ ܗܰܘ ܕܰܠܗܳܠܶܝܢ ܟܽܠܗܶܝܢ ܟܢܺܝܫܳܐܺܝܬ ܐܺܝܬ ܠܶܗ ܐܰܝܟ ܕܠܰܚܕܳܐ܆ ܘܰܠܟܽܠ ܚܕܳܐ ܡܶܢܗܶܝܢ ܗܳܟܰܢܳܐ ܪܺܝܫܳܐܺܝܬ ܚܰܘܝܳܗ̇܆ ܐܰܝܟ ܕܢܶܣܬܒܰܪ ܕܒܳܗ̇ ܒܰܠܚܽܘܕܶܝܗ̇ ܥܰܬܺܝܪ܆ ܘܰܒܗܳܕܶܐ ܡܶܢ ܗܳܠܶܝܢ ܐ̱ܚܪ̈ܳܢܶܐ ܡܝܰܬܰܪ܆ ܡܶܢܗܽܘܢ ܕܥܰܙܪܽܘܪ̈ܶܐ ܠܘܳܬ ܪܺܝܫܽܘܬ ܟܳܗܢܽܘܬܳܐ ܐܰܝܟ ܕܰܒܐ̱ܪܳܙܳܐ ܡܶܬܬܰܝܬܶܐ ܗ̱ܘܳܐ܆ ܟܰܕ ܐܰܝܟ ܬܽܘܪܣܳܝܳܐ ܓܰܘܳܢܳܝܳܐ܆ ܗܳܝ ܕܰܒܗܳܠܶܝܢ ܟܳܗ̈ܢܳܝܳܬܳܐ ܢܶܩܕܽܘܡ ܢܶܫܬܰܡܠܶܐ ܡܶܬܬܰܪܣܶܐ ܗ̱ܘܳܐ.

ܕܡܶܢ ܗܳܪܟܳܐ ܐܳܦ ܡܶܠܬܳܐ ܡܶܕܶܡ ܥܰܬܺܝܩܬܳܐ ܢܶܚܬܰܬ̣ ܠܘܳܬܰܢ ܕܕܰܐܝܟ ܗܳܕܶܐ. ܕܟܰܕ ܐܺܝܬܰܘܗ̱ܝ ܫܰܒܪܳܐ ܒܩܰܘܡܬܳܐ܆ ܛܠܳܝ̈ܶܐ ܗܳܢܽܘܢ ܒ̈ܢܰܝ ܩܰܘܡܬܶܗ^[4]܆ ܟܰܕ ܩܕܳܡ ܬܰܪ̈ܥܶܐ ܕܒܰܝܬܳܐ ܒܫܽܘܩܳܐ ܡܶܫܬܰܥܶܝܢ ܗ̱ܘܰܘ܆ ܐܶܦܝܣܩܘܦܐ ܘܪܺܝܫ ܟܳܗ̈ܢܶܐ ܐܰܣܪܚܽܘܗ̱ܝ. ܪܳܚܡܳܐ ܓܶܝܪ ܫܰܒܪܽܘܬܳܗ̇ ܕܛܰܠܝܽܘܬܳܐ܆ ܕܳܐܦ ܡܰܠܟܳܐ ܡܶܢܫܶܠܝ ܬܩܺܝܡ ܐܰܝܟ ܕܰܒܣܽܘܓܳܐܐ܆ ܘܕܳܐܦ ܒܣܽܘܥܪ̈ܳܢܶܐ ܪܰܘܪ̈ܒܶܐ ܬܕܰܡܶܐ܆ ܠܦܽܘܬ ܗܰܘ ܡܳܐ ܕܳܐܬܶܐ ܠܙܰܘܥ̈ܶܐ ܕܬܰܪܥܺܝܬܳܐ. ܘܟܰܕ ܟܺܝܬ ܒܰܦܣܳܩܳܐ ܒܳܒܽܘܣܳܝܳܐ܆ ܡܰܠܽܘܢ ܕܶܝܢ ܒܕܺܝܢܳܐ ܕܰܒܛܺܝܠܽܘܬܳܐ ܐܰ‌ܠܳܗܳܝܬܳܐ܆ ܕܡܶܢ ܪܽܘܚܩܳܐ ܩܳܕܡܳܐ ܡܙܺܝܥܳܐ ܠܪܰܘܪ̈ܒܳܬܳܐ ܒܝܰܕ ܙܰܪ̈ܥܶܐ ܕܝܰܬܺܝܪ ܙܥܽܘܪܺܝܢ܆ ܐܰܬܰܐܢܣܝܘܤ ܠܩܰܕܺܝܡܽܘܬ ܡܰܘܬܒܳܐ ܩܰܒܶܠ܆ ܠܗܳܢܽܘܢ ܡܰܢ ܡܶܢ ܛܠܳܝ̈ܶܐ ܩܰܫܺܝ̈ܫܶܐ ܡܩܺܝܡ ܗ̱ܘܳܐ܆ ܠܗܳܢܽܘܢ ܕܶܝܢ ܡܫܰܡ̈ܫܳܢܶܐ܆ ܘܰܒܛܶܟܣܳܐ ܗܰܘ ܕܫܰܪܟܳܐ ܕܥܺܕܬܳܐ ܡܕܰܡܶܐ ܗ̱ܘܳܐ ܐܰܝܟ ܕܡܶܫܟܚܳܐ ܗ̱ܘܳܬ.

ܝܰܘܡܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܗܰܘ ܕܩܳܐܶܡ ܗ̱ܘܳܐ܆ ܕܽܘܟܪܳܢܶܗ ܕܦܶܛܪܘܤ ܗܰܘ ܪܺܝܫ ܟܳܗ̈ܢܶܐ ܘܣܳܗܕܳܐ܆ ܗܰܘ ܕܒܶܗ ܗܳܠܶܝܢ ܟܳܗܢܳܐܺܝܬ ܐܰܝܟ ܕܒܶܐܫܬܥܶܢܝܳܐ ܗܳܘ̈ܝܳܢ ܗ̱ܘܰܝ̈ ܘܒܳܒܽܘܣܳܐܺܝܬ ܡܶܫܬܰܡ̈ܠܝܳܢ ܗ̱ܘܰܝ̈܆ ܐܰܘ ܗܳܝ ܟܺܝܬ ܕܝܰܬܺܝܪ ܫܰܪܺܝܪܳܐ ܐܺ݀ܡܰܪ܆ ܕܓܰܒܪܳܐܺܝܬ ܘܰܐ‌ܠܳܗܳܐܺܝܬ ܩܳܕܡ̈ܳܢ ܗ̱ܘܰܝ̈ ܡܶܬܪ̈ܰܫܡܳܢ. ܟܰܕ ܕܶܝܢ ܢܦܰܩ ܠܫܽܘܩܳܐ ܐܰ‌ܠܶܟܣܢܕܪܘܤ ܗܰܘ ܕܗܳܝܕܶܝܢ ܠܰܬܪܽܘܢܘܤ ܕܥܺܕܬܳܐ ܩܰܕܺܝܫܬܳܐ ܕܰܐ‌ܠܶܟܣܰܢܕܪܺܝܰܐ ܐܰܚܺܝܕ ܗ̱ܘܳܐ܆ ܘܥܰܠ ‌ܐܶܫܬܥܶܢܝܳܐ ܗܳܝ ܕܰܛܠܳܝ̈ܶܐ ܥܒܰܪ܆ ܟܰܕ ܒܰܪ̱ܬ ܩܳܠܳܐ ܡܶܕܶܡ ܟܳܗܢܳܝܬܳܐ ܢܶܦܠܰܬ ܥܠܰܘܗ̱ܝ ܕܗܳܝ ܕܺܐܝܬ ܗ̱ܘܳܐ ܠܶܗ ܝܰܨܺܝܦܽܘܬܳܐ܆ ܠܳܐ ܓܶܝܪ ܡܶܫܬܰܥ̈ܝܳܢ ܗ̱ܘܰܝ̈ ܗܳܠܶܝܢ ܒܳܒܽܘ̈ܣܝܳܬܳܐ^[5] ܕܰܐܬܰܐܢܰܣܝܘܤ܆ ܟܰܕ ܡܶܢ ܐܰ‌ܠܳܗܳܐ ܐܶܬܬܙܺܝܥ ܩܳܡ ܘܰܡܫܰܐܶܠ ܗ̱ܘܳܐ܆ ܕܡܳܢܳܐ ܐܺܝܬܶܝܗ̇ ܗܳܝ ܕܡܶܣܬܰܥܪܳܐ. ܘܟܰܕ ܝܺܠܶܦ ܘܥܰܠ ܗܳܠܶܝܢ ܕܡܶܣܬܰܥܪ̈ܳܢ ܗ̱ܘܰܝ̈ ܝܰܬܺܝܪ ܐܰ‌ܠܳܗܳܐܺܝܬ ܐܰܩܺܝܡ ܬܰܪܥܺܝܬܶܗ܆ ܡܶܬܚܰܫܰܒ ܗ̱ܘܳܐ ܕܐ̱ܪܳܙܳܐ ܐܺܝܬܶܝܗ̇ ܗܳܝ ܐܶܫܬܥܶܢܝܳܐ. ܘܠܰܐܬܰܐܢܣܝܘܤ ܥܰܡ ܛܠܳܝ̈ܶܐ ܗܳܢܽܘܢ ܕܟܺܝܪܘܛܘܢܝܬܝܢܐ ܗܘ̣ܰܘ ܡܶܢܶܗ ܡܒܰܝܬܶܐ ܗ̱ܘܳܐ ܐܰܝܟ ܒܢܰܝ̈ܳܐ܆ ܘܰܠܓܰܘ ܒܥܺܕܬܳܐ ܐܰܚܺܝܕ ܗ̱ܘܳܐ ܠܗܽܘܢ ܘܰܡܪܰܒܶܐ ܗ̱ܘܳܐ ܠܗܽܘܢ ܬܰܪܒܺܝܬܳܐ ܗܳܝ ܪܺܝܫܳܝܬܳܐ ܘܛܰܪܩܬܳܐ ܘܰܕܝܰܬܺܝܪ ܡܳܪܳܢܳܝܳܐ ܕܒܰܪܢܳܫܳܐ܆ ܟܰܕ ܒܡ̈ܶܠܶܐ ܐܰ‌‌ܠܳܗܳܝ̈ܳܬܳܐ ܒܠܶܠܝܳܐ ܘܒܺܐܝܡܳܡܳܐ ܐܰܥܒܶܕ ܕܢܶܬܗܰܓܽܘܢ. ܘܰܒܝܰܕ ܝܻܨܺܝ̈ܦܘܳܬܳܐ ܗܳܠܶܝܢ ܐ̱ܚܪ̈ܳܢܝܳܬܳܐ ܢܶܬܕܰܪܫܽܘܢ ܦܺܝܠܘܣܽܘܦܳܐܺܝܬ ܘܐ̱ܪܳܙܳܢܳܐܺܝܬ܆ ܟܰܕ ܢܳܛܰܪ ܗ̱ܘܳܐ ܠܟܽܠܚܰܕ ܡܶܢܗܽܘܢ ܘܩܳܕܶܡ ܡܛܰܝܶܒ ܠܶܗ ܠܕܰܪܓܳܐ ܗܰܘ ܒܰܝܬܳܝܳܐ܆ ܘܰܠܩܰܘܡܳܐ ܘܛܶܟܣܳܐ ܟܳܗܢܳܝܳܐ ܗܰܘ ܕܬܶܫܡܶܫܬܳܐ.

ܝܰܬܺܝܪ ܕܶܝܢ ܡܶܢ ܗܳܠܶܝܢ ܕܫܪܟܳܐ ܝܺܕܺܝܥܳܐܺܝܬ ܘܦܰܐܝܽܘܬ ܟܳܗܢܳܐܺܝܬ܆ ܘܰܐܝܟ ܕܰܒܒܶܝܬ ܩܽܘܕܫܳܐ ܩܰܕܺܝܫܳܐܺܝܬ܆ ܢܶܬܥܰܢܘܶܐ ܘܢܶܬܕܰܒܰܪ ܡܰܥܒܶܕ ܗ̱ܘܳܐ܆ ܠܰܐܬܰܐܢܣܝܘܤ܆ ܟܰܕ ܒܡܰܪ̈ܕܘܳܬܳܐ ܥ̈ܺܕܬܳܢܳܝܳܬܳܐ ܪܳܒܶܐ ܗ̱ܘܳܐ܆ ܘܠܳܐ ܣܳܟ ܐܳܙܶܠ ܗ̱ܘܳܐ ܠܕܽܘܟ܆ ܐܰܝܟܰܢܳܐ ܕܳܐܦ ܡܶܛܽܠ ܝܶܫܽܘܥ ܒܰܪܢܽܘܢ ܡܶܫܬܰܥܶܐ ܟܬܳܒܳܐ ܟܳܗܢܳܝܳܐ ܟܰܕ ܐܳܡܰܪ܆ ܝܶܫܽܘܥ ܕܶܝܢ ܗܰܘ ܒܰܪܢܽܘܢ ܡܢܺܝܚܳܢܳܐ ܛܰܠܝܳܐ܆ ܠܳܐ ܢܳܦܶܩ ܗ̱ܘܳܐ ܡܶܢ ܡܰܫܟܢܳܐ^[6]. ܐܶܠܳܐ ܘܳܐܦܠܳܐ ܕܡܰܪܕܽܘܬܳܐ ܗܳܝ ܕܡܶܢ ܠܒܰܪ ܐܺܝܬܰܘܗ̱ܝ ܗ̱ܘܳܐ ܠܳܐ ܡܫܰܘܬܦܳܐ܆ ܟܰܕ ܡܶܫܬܰܘܫܛܳܐ ܗ̱ܘܳܬ ܩܰܘܡܬܶܗ. ܐܶܠܳܐ ܗܳܟܰܢܳܐ ܐܶܬܚܰܫܰܚ ܥܰܡܳܗ̇܆ ܐܰܝܟܰܢܳܐ ܕܳܐܦ ܠܰܓܚܺܝܟܽܘܬܳܐ ܘܠܰܡܚܺܝܠܽܘܬܳܐ ܕܕܽܘܓܡ̈ܰܐܛܐ ܚܰܢ̈ܦܳܝܶܐ ܢܶܕܰܥ ܡܶܢܳܗ̇ ܣܳܦܩܳܐܺܝܬ܆ ܘܠܰܘ ܡܶܣܬܰܟܠܳܢܽܘܬܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܗܳܝ ܕܚܳܫܚܳܐ ܢܟܰܢܶܫ܆ ܘܰܐܝܟ ܐܰܡܬܳܐ ܕܰܡܫܰܡܫܳܐ ܬܶܗܘܶܐ ܐܺܝܬܶܝܗ̇ ܠܶܗ. ܦܳܩܚܳܐ ܓܶܝܪ ܘܰܡܥܰܕܪܳܐ ܐܳܦ ܗܳܝ ܕܢܶܕܰܥ ܫܰܦܺܝܪ ܠܦܰܚܺܝܚܽܘܬܳܐ ܕܡܰܣܒܪ̈ܳܢܘܳܬܳܐ ܗܳܠܶܝܢ ܕܰܠܩܽܘܒܠܳܐ܆ ܠܘܬ ܫܽܘܪܳܪܶܗ ܕܰܫܪܳܪܳܐ.

ܟܰܕ ܗܳܟܺܝܠ ܗܳܟܰܢܳܐ ܩܰܕܶܡ ܐܶܬܪܕܺܝ ܒܡܰܪܕܽܘܬܳܐ ܗܳܝ ܛܰܠܝ̣ܳܝ̣ܬܳܐ ܘܩܰܕܶܡ ܐܶܫܬܰܡܠܺܝ ܗܰܘ ܚܰܝܠܬܳܢܳܐ܆ ܘܰܒܝܰܕ ܟܽܠ ܛܶܟܣܳܐ ܥܺܕܬܳܢܳܝܳܐ ܒܫܰܦܺܝܪܽܘܬ ܛܶܟܣܳܐ ܐܶܬܳܐ܆ ܘܰܒܕܰܪ̈ܓܶܐ ܟܳܗ̈ܢܳܝܶܐ ܠܰܘ ܠܳܐ ܟܳܗܢܳܐܺܝܬ ܐܶܠܳܐ ܝܰܬܺܝܪ ܟܳܗܢܳܐܺܝܬ ܘܝܰܬܺܝܪ ܕܰܟܝܳܐܺܝܬ ܪܕܳܐ܆ ܠܘܳܬ ܪܺܝܫܳܢܽܘܬܳܐ ܗܳܝ ܕܰܡܫܰܡ̈ܫܳܢܶܐ ܐܶܬܳܐ܆ ܘܩܰܕܡܳܝ ܩܰܘܡܳܐ ܐܺܝܬܰܘܗ̱ܝ ܗ̱ܘܳܐ ܕܗܰܘ ܛܶܟܣܳܐ܆ ܟܰܕ ܗܳܝ ܕܩܰܕܡܳܝ̈ܳܬܳܐ ܡܰܝܬܶܐ ܗ̱ܘܳܐ ܒܰܡܝܰܬܪܽܘܬܳܐ܆ ܟܰܕ ܗܽܘ ܡܟܰܢܶܟ ܗ̱ܘܳܐ ܠܳܗ̇ ܠܩܰܕܡܳܝܽܘܬܶܗ ܕܩܰܘܡܳܐ܆ ܘܠܰܘ ܗܽܘ ܡܶܢܶܗ ܡܶܬܟܰܢܰܟ̣ ܗ̱ܘܳܐ.

ܘܗܳܝܕܶܝܢ ܟܰܕ ܦܰܩܪܽܘܬܶܗ ܕܰܐܪܺܝܽܘܤ ܐܶܬܥܰܫܢܰܬ ܥܰܠ ܫܰܦܺܝܪܽܘܬ ܕܶܚܠܬܳܐ܆ ܘܰܠܡܶܠܬܳܐ ܐܰ‌ܠܳܗܳܐ ܡܶܢ ܐܽܘܣܺܝܰܐ ܕܰܐ‌ܠܳܗܳܐ ܘܰܐܒܳܐ ܦܳܣܩܳܐ ܗ̱ܘܳܬ܆ ܘܰܒ̣ܪܺܝܬܳܐ ܐܳܡܪܳܐ ܗ̱ܘܳܬ ܠܶܗ ܠܥܳܒܽܘܕܳܐ ܕܟܽܠܳܗ̇ ܒܪܺܝܬܳܐ܆ ܠܗܰܘ ܕܒܺܐܝܕܰܘ̈ܗ̱ܝ ܗܘ̣ܳܐ ܟܽܠ ܡܶܕܶܡ܆ ܘܰܠܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܗܰܘ ܕܺܐܝܬܰܘܗ̱ܝ ܘܰܡܬܽܘܡܳܐܺܝܬ ܐܶܬܺܝܠܶܕ ܘܠܳܐ ܦܣܺܝܩܳܐܺܝܬ ܕܢܰܚ܆ ܕܠܳܐ ܐܺܝܬܰܘܗ̱ܝ ܗ̱ܘܳܐ ܒܰܙܒܰܢ ܡܫܰܒܚܳܐ ܗ̱ܘܳܬ܆ ܩܽܘܤܛܢܛܝܢܘܤ ܡܰܠܟܳܐ ܗܰܘ ܫܰܦܺܝܪ ܕܶܚܠܬܳܐ܆ ܗܰܘ ܕܥܰܡ ܐܰܪ̈ܓܘܳܢܶܐ ܘܫܰܒܛܳܐ ܕܡܰܠܟܽܘܬܳܐ ܐܳܦ ܠܡܰܠܟܳܝܽܘܬܳܐ ܕܕܶܚܠܬܳܐ ܕܰܟܪ̈ܺܝܣܛܝܳܢܶܐ ܐܰܚܶܒ܆ ܕܒܰܬܠܺܝܬܳܝܽܘܬܳܐ ܠܚܽܘܕܳܝܽܘܬܳܐ ܡܰܟܪܙܳܐ ܘܰܚܕܳܐ ܪܺܝܫܳܢܽܘܬܳܐ ܕܟܽܠ܆ ܡܶܛܽܘܠ ܟܺܝܬ ܕܚܰܕ ܐܰ‌ܠܳܗܳܐ ܡܶܣܬܰܟܰܠ ܒܰܬܠܳܬܳܐ ܩܢܽܘ̈ܡܶܐ܆ ܟܰܢܶܫ ܒܢܺܝܩܺܝܰܐ ܡܕܺܝܢ̱ܬܳܐ ܗܳܝ ܕܒܰܝܬܽܘܢܺܝܰܐ܆ ܗܳܝ ܕܡܶܢ ܩܕܺܝܡ ܡܰܢ ܠܳܐ ܝܺܕܺܝܥܬܳܐ ܐܺܝܬܶܝܗ̇ ܗ̱ܘܳܬ ܠܣܰܓܺܝ̈ܶܐܐ܆ ܡܶܛܽܠ ܗܳܕܶܐ ܕܶܝܢ ܛܒܺܝܒܬܳܐ܆ ܠܰܟܢܽܘܫܝܳܐ ܗܰܘ ܕܰܬܠܳܬܡܳܐܐ ܘܰܬܡܳܢܬܰܥܣܰܪ ܐܰܒܳܗ̈ܳܬܳܐ ܩܰܕܺܝ̈ܫܶܐ ܘܶܐܦܝܣܩܽܘ̈ܦܐ܆ ܕܗܳܢܽܘܢ ܕܰܐ‌ܠܶܟܣܰܢܕܪܘܤ ܐܶܦܝܣܩܽܘܦܐ ܕܗܳܝ ܐܰ‌ܠܶܟܣܰܢܕܪܺܝܰܐ ܡܛܰܟܶܤ ܗ̱ܘܳܐ ܒܪܺܝܫܗܽܘܢ܆ ܟܰܕ ܐܺܝܬ ܗ̱ܘܳܐ ܠܶܗ ܕܩܳܐܶܡ ܡܶܢ ܝܰܡܺܝܢܶܗ܆ ܐܳܦ ܠܰܡܣܰܝܥܳܢܳܐ ܚܰܝܠܬܳܢܳܐ ܐܰܬܰܐܢܣܝܘܤ. ܗܰܘ ܕܡܶܛܽܠ ܛܶܟܣܶܗ ܟܰܕ ܒܰܡܫܰܡ̈ܫܳܢܶܐ ܩܳܐܶܡ ܗ̱ܘܳܐ܆ ܡܶܛܽܠ ܟܺܝܬ ܕܥܰܬܺܝܪ ܗ̱ܘܳܐ ܡܶܠܬܳܐ ܕܚܶܟܡܬܳܐ ܘܡܶܠܬܳܐ ܕܺܝܕܰܥܬܳܐ^[7] ܐܰܝܟ ܕܶܐܡܰܪ ܫܠܺܝܚܳܐ܆ ܒܩܰܕܺܝܡܽܘܬ ܡܰܘܬܒܳܐ ܕܡܰܠ̈ܟܶܐ܆ ܡܶܢ ܩܕܳܡ ܗܳܢܽܘܢ ܕܰܒܡܰܘܬܒܳܐ ܩܰܕܺܝܡܺܝܢ ܗ̱ܘܰܘ ܡܝܰܩܪܺܝܢ ܩܰܕܺܝܡ ܗ̱ܘܳܐ ܡܝܰܩܰܪ ܗ̱ܘܳܐ. ܐܳܦ ܓܶܝܪ ܠܳܐ ܐܺܝܬ ܗ̱ܘܳܐ ܡܶܠܬܳܐ ܘܠܳܐ ܫܟܳܚܬܳܐ ܣܰܟܽܘܠܬܳܢܝܬܐ ܠܗܳܢܽܘܢ ܕܰܚܠܳܦ ܫܽܘܒܚܳܐ ܬܪܺܝܨܳܐ ܡܶܬܟܰܬܫܺܝܢ ܗ̱ܘܰܘ܆ ܕܗܳܝ ܕܠܰܘ ܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܐܰܬܰܐܢܣܝܘܤ܆ ܟܰܕ ܒܳܠܶܡ ܗ̱ܘܳܐ ܦܫܺܝܩܳܐܺܝܬ ܠܠܶܫܳܢ̈ܶܐ ܣܢܺܐܓܪ̈ܶܐ ܕܫܳܢܝܽܘܬܶܗ ܕܰܐܪܺܝܽܘܤ܆ ܘܡܰܟܶܤ ܗ̱ܘܳܐ ܠܗܽܘܦܳܟ ܚܽܘܫܳܒ̈ܶܐ ܕܺܝܠܗܽܘܢ܆ ܘܠܰܟܡ̈ܺܐܢܶܐ ܡܶܬܚܰܟ̈ܡܳܢܶܐ ܨܳܐܶܕ ܗ̱ܘܳܐ܆ ܘܰܠܗܳܠܶܝܢ ܕܰܡܛܰܫܶܝܢ ܗ̱ܘܰܘ ܡܦܰܪܣܶܐ ܗ̱ܘܳܐ܆ ܐܺܝܬ ܗ̱ܘܰܘ ܓܶܝܪ ܐܺܝܬ ܗ̱ܘܰܘ ܬܰܡܳܢ ܐ̱ܢܳܫܺܝ̈ܢ܆ ܗܳܢܽܘܢ ܡܰܢ ܕܰܒܫܽܘܒܚܳܐ ܗܰܘ ܣܰܩܽܘܒܠܳܝܳܐ ܤܰܪܺܝܟ̣ܺܝܢ ܗ̱ܘܰܘ܆ ܗܳܢܽܘܢ ܕܶܝܢ ܕܠܰܬܪ̈ܰܝܗܽܘܢ ܓܰܒ̈ܶܐ ܡܶܨܛܠܶܝܢ ܗ̱ܘܰܘ܆ ܘܠܽܘܩܒܰܠ ܫܪܳܪܳܐ ܡܶܬܚܰܟܡܺܝܢ ܗ̱ܘܰܘ܆ ܘܰܕܚܰܡܪܳܐ ܒܡܰܝ̈ܳܐ ܠܡܶܚܠܰܛ ܝܰܨܺܝܦܺܝܢ ܗ̱ܘܰܘ܆ ܘܰܕܩܰܦܺܝܠܽܘܣܳܐ ܢܶܥܒܕܽܘܢ ܠܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ. ܐܶܠܳܐ ܠܳܐ ܚܠܺܝܛܬܳܐ ܘܰܕܟܺܝܬܐ ܠܗܳܕܶܐ ܢܛܰܪ ܐܰܬܰܐܢܣܝܘܤ܆ ܟܰܕ ܣܟܰܪ ܠܟܽܠ ܡܰܥܠܳܢܳܐ܆ ܠܦܽܘܪ̈ܳܣܶܐ ܘܠܰܫ̈ܟܳܚܳܬܳܐ ܡܦ̈ܰܬܟܳܬܳܐ ܕܒܺܝ̈ܫܶܐ܆ ܗܳܠܶܝܢ ܕܗܽܘ ܐܶܫܬܰܥܺܝ ܐܶܢܶܝܢ ܝܰܬܺܝܪ ܦܰܬܝܳܐܺܝܬ܆ ܒܗܳܠܶܝܢ ܕܰܟܬܰܒ ܠܘܳܬ ܐܰܦܪ̈ܺܝܩܳܝܶܐ ܚܰܕܚ̈ܕܳܢܶܐ. ܘܡܶܟܺܝܠ ܒܫܰܠܡܽܘܬܳܐ ܗܺܝ ܣܘܢܗܕܘܤ ܩܰܕܝܫܬܳܐ܆ ܕܰܫܘܶܐ ܒܽܐܘܣܺܝܰܐ ܐܺܝܬܰܘܗ̱ܝ ܠܰܐܒܳܐ ܗܽܘ ܒܪܳܐ ܬܰܚܡܰܬ ܟܺܝܬ ܘܦܶܣܩܰܬ܆ ܗܰܘ ܕܰܒܚܰܪܬܳܐ ܕܙܰܒܢ̈ܶܐ ܐܶܬܒܰܣܰܪ ܡܶܛܽܠ ܦܽܘܪܩܳܢܳܐ ܕܺܝܠܰܢ܆ ܘܡܰܠܺܝ ܟܽܠܳܗ̇ ܡܕܰܒܪܳܢܽܘܬܳܐ. ܘܰܠܪܽܘܚܳܐ ܩܰܕܺܝܫܳܐ ܥܰܡ ܐܰܒܳܐ ܘܥܰܡ ܒܪܳܐ ܐܰܟܚܕܳܐ ܡܢ̣ܳܬ̣܆ ܘܠܰܡܗܰܝܡܳܢܽܘ ܒܶܗ ܒܫܰܘܝܽܘܬ ܐܺܝܩܳܪܳܐ ܐܰ‌ܠ̣ܦܰܬ. ܘܰܠܟܽܠܳܗ̇ ܡܶܬܥܰܡܪܳܢܺܝܬܳܐ ܬܚܽܘܡܳܐ ܗܳܢܳܐ ܦܳܪܽܘܩܳܝܳܐ܆ ܘܬܰܘܕܺܝܬܳܐ ܗܳܕܶܐ ܠܳܐ ܚܰܣܺܝܪܬܳܐ ܐܰ‌ܠܦܰܬ ܘܣܳܡܰܬ ܢܳܡܽܘܣܳܐ܆ ܗܳܝ ܕܒܳܗ̇ ܥܳܡܕܺܝܢ ܚ̱ܢܰܢ܆ ܟܰܕ ܒܰܙܥܽܘܪܽܘܬ ܡܶܠܬܳܐ ܚܶܒܫܰܬ ܘܣܰܝܟܰܬ܆ ܠܣܽܘ̈ܟܳܠܶܐ ܟܺܝܬ ܘܰܠܡ̈ܶܠܶܐ ܗܳܠܶܝܢ ܕܰܙܪܺܝܥܳܐܺܝܬ ܘܰܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܣܺܝ̈ܡܳܢ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ.

ܡܶܢ ܒܳܬܰܪ ܗܳܢܳܐ ܬܰܟܬܽܘܫܳܐ ܟܰܕ ܠܰܡܕܺܝܢ̱ܬܶܗ ܦܢܳܐ ܐܰܬܰܐܢܣܝܘܤ܆ ܠܣܳܒܳܐ ܡܰܢ ܐܰ‌ܠܶܟܣܰܢܕܪܘܤ܆ ܟܰܕ ܠܰܩܪܳܒܳܐ ܗܰܘ ܕܠܽܘܩܒܰܠ ‌ܐܪܺܝܽܘܤ ܙܟ̣ܳܐ܆ ܒܝܰܕ ܚܰܝܠܳܐ ܕܰܐ‌ܠܳܗܳܐ ܘܰܒܝܰܕ ܡܣܰܝܥܳܢܽܘܬܶܗ ܕܺܝܠܶܗ܆ ܟܰܕ ܡܶܢ ܦܰܓܪܳܐ ܐܶܫܬܪܺܝ܆ ܠܘܳܬ ܡܕܺܝܢ̱ܬܳܐ ܗܳܝ ܕܰܠܥܶܠ ‌ܐܽܘܪܶܫܠܶܡ ܗܳܝ ܫܡܰܝܳܢܺܝܬܳܐ ܠܰܘܺܝ ܘܫܰܕܪܶܗ. ܗܽܘ ܕܶܝܢ ܠܰܬܪܽܘܢܘܤ ܗܰܘ ܕܡܰܪܩܽܘܤ ܡܩܰܒܶܠ ܘܝܳܪܶܬ. ܡܰܠܽܘܢ ܕܶܝܢ ܠܰܐܓܽܘ̈ܢܶܐ ܘܩܺܝ̈ܢܕܽܘܢܽܘ ܕܰܚܠܳܦ ܗܰܝܡܳܢܽܘܬܳܐ܆ ܗܳܠܶܝܢ ܕܙܳܕܶܩ ܗ̱ܘܳܐ ܠܶܗ ܕܩܺܝܢܕܽܘܢܽܘܣܳܐ ܢܶܥܒܶܕ ܘܢܶܬܟܰܬܰܫ܆ ܡܶܛܽܠ ܗܳܝ ܕܟܰܠ̈ܒܶܐ ܗܳܢܽܘܢ ܕܰܐܪܺܝܽܘܤ܆ ܗܳܢܽܘܢ ܡܰܢ ܟܰܕ ܓܰܠܝܳܐܺܝܬ܆ ܗܳܢܽܘܢ ܕܶܝܢ ܐܳܦ ܟܰܕ ܟܰܣܝܳܐܺܝܬ ܡܢܰܟܬܺܝܢ ܗ̱ܘܰܘ܆ ܥܠܰܘܗ̱ܝ ܒܰܠܚܽܘܕܰܘܗ̱ܝ ܠܫܶܢܰܝ̈ܗܽܘܢ ܠܳܛܫܺܝܢ ܗ̱ܘܰܘ ܐܰܝܟ ܕܥܰܠ ‌ܐܰܝܢܳܐ ܕܰܠܟܽܠ ܬܰܪܶܨ. ܘܡܶܛܽܠ ܡܰܢ ܗܰܝܡܳܢܽܘܬܳܐ ܠܘܬ ܫܰܦܺܝܪ ܕܶܚܠܬܳܐ ܡܰܠܟܳܐ ܩܘܤܛܢܛܝܢܘܤ ܢܺܐܟܠܽܘܢ ܩܰܪ̈ܨܰܘܗ̱ܝ ܐܺܝܬ ܗ̱ܘܳܐ ܠܗܽܘܢ ܘܠܳܐ ܡܶܕܶܡ܆ ܐܶܬܟܣܶܣ̈ܝ̱ ܗ̱ܘܰܝ̈ ܠܗܶܝܢ ܓܶܝܪ ܟܽܠܗܶܝܢ܆ ܒܰܥܫܽܘܩ̈ܝܶܐ ܕܶܝܢ ܐ̱ܚܪ̈ܳܢܶܐ ܕܠܳܐ ܦܝܳܤ ܡܶܬܚܰܫܚܺܝܢ ܗ̱ܘܰܘ. ܚܰܕ ܕܶܝܢ ܡܶܢ ܗܳܠܶܝܢ ܐܺܝܬܰܘܗ̱ܝ ܗ̱ܘܳܐ܆ ܗܳܝ ܕܰܐܬܰܐܢܣܝܘܤ ܠܰܡ ܣܥܳܐ܆ ܕܰܠܛܽܘܦܳܐ ܕܶܐ‌ܠ̈ܦܶܐ ܗܳܠܶܝܢ ܕܡܰܘܒ̈ܠܳܢ ܗ̱ܘܰܝ̈ ܚ̈ܶܛܶܐ ܠܰܡܕܺܝܢ̱ܬܳܐ ܡܰܠܟܳܝܬܳܐ ܢܶܦܣܽܘܩ. ܘܡܳܢܳܐ ܙܳܕܶܩ ܣܰܓܺܝ̈ܳܐܬܳܐ ܠܡܺܐܡܰܪ.

ܡܶܬܬܦܺܝܤ ܡܰܠܟܳܐ ܠܗܳܠܶܝܢ܆ ܘܰܟܬܳܒܳܐ ܕܰܐܟܣܽܘܪܝܳܐ ܒܰܪ ܫܳܥܬܶܗ ܠܽܘܩܒܰܠ ܗܰܘ ܕܶܐܬܥܫܰܩ ܡܶܬܟܬܶܒ ܗ̱ܘܳܐ. ܐܳܦ ܓܶܝܪ ܘܪܺܝܫ ܡܓܺܝܪ̈ܣܶܐ ܗܰܘ ܕܦܶܪܥܽܘܢ ܟܰܕ ܠܝܰܘܣܶܦ ܙܰܒܶܢ܆ ܟܰܕ ܓܰܒܪܳܐ ܛܳܒܐ ܐܺܝܬܰܘܗ̱ܝ ܗ̱ܘܳܐ܆ ܝܳܕܰܥ ܗ̱ܘܳܐ ܡܰܢ ܕܡܳܪܝܳܐ ܐܰ‌ܠܳܗܳܐ ܐܺܝܬ ܗ̱ܘܳܐ ܥܰܡ ܝܰܘܣܶܦ܆ ܩܰܒܶܠ ܕܶܝܢ ܒܪܰܡ ܠܰܥܫܽܘܩܝܳܐ ܕܰܐܢ̱ܬܬܶܗ܆ ܕܰܐܝܟ ܕܰܠܓܰܝܳܪܳܐ ܩܰܛܪܰܓܬ̣ܶܗ ܠܰܥܠܰܝܡܳܐ ܗܰܘ ܡܚܰܡܣܢܳܢܳܐ ܘܢܰܟܦܳܐ. ܝܳܗܶܒ ܓܶܝܪ ܐܰܬܪܳܐ܆ ܘܳܐܦ ܠܗܳܢܽܘܢ ܕܰܠܩܽܘܒܠܳܐ ܐܺܝܬ ܐܶܡܰܬܝ ܘܰܐܝܟܳܐ܆ ܗܰܘ ܣܳܐܶܡ ܐܰܓܽܘ̈ܢܶܐ ܕܰܡܝܰܬܪܽܘܬܳܐ܆ ܐܰܝܟܰܢܳܐ ܕܰܒܝܰܕ ܙܰܒ̈ܢܶܐ ܣܺܝ̈ܡܰܝ ܣܰܩܽܘܒܠܳܐܺܝܬ ܕܟܰܗܺܝܢܽܘܬܳܐ ܟܺܝܬ ܘܰܕܥܰܣܩܽܘܬܳܐ܆ ܝܰܬܺܝܪ ܒܚܺܝܪܬܳܐ ܬܶܗܘܶܐ ܡܶܬܟܰܪܙܳܢܽܘܬܗܽܘܢ ܘܡܶܬܢܰܨܚܳܢܽܘܬܗܽܘܢ ܕܰܐܬܠܺܝ̈ܛܶܐ ܕܰܒܬܰܪ̈ܬܰܝܗܶܝܢ ܒܳܬܰܪ ܗܳܝ ܕܫܳܘܝܳܐ ܪܳܗܛܺܝܢ܆ ܟܰܕ ܠܳܐ ܟܺܝܬ ܡܶܬܢܰܦܚܺܝܢ ܘܡܶܬܬܪܺܝܡܺܝܢ܆ ܐܳܦܠܳܐ ܬܳܚܒܺܝܢ^[8] ܐܰܘ ܡܶܬܩܰܣܦܺܝܢ ܣܪܺܝܩܳܐܺܝܬ. ܡܶܢ ܐܰܝܟܳܐ ܓܶܝܪ ܐ̱ܚܪܺܢܳܐ ܐܶܠܳܐ ܐܶܢ ܡܶܢ ܗܳܪܟܳܐ܆ ܠܡܰܨܠܳܚܽܘ ܒܟܽܠ ܚܕܳܐ ܡܶܢܗܶܝܢ ܦܰܘܠܽܘܤ ܡܫܰܪܰܪ ܗ̱ܘܳܐ ܟܰܕ ܟܳܬܶܒ܆ ܒܝܰܕ ܙܰܝ̈ܢܶܐ ܕܙܰܕܝܩܽܘܬܳܐ ܝܰܡܺܝ̈ܢܳܝܶܐ ܘܣܶܡܳܠܳܝ̈ܶܐ܆ ܒܝܰܕ ܫܽܘܒܚܳܐ ܘܨܰܥܪܳܐ܆ ܒܝܰܕ ܨܽܘܚܳܝܳܐ ܘܩܽܘܠܳܣܳܐ܆ ܐܰܝܟ ܛܳܥܰܝ̈ܳܐ ܘܫܰܪܺܝܪ̈ܶܐ܆ ܐܰܝܟ ܐܰܝܠܶܝܢ ܕܠܳܐ ܝܺܕܺܝܥܺܝܢ ܘܰܛܫܶܝܢ ܘܡܶܬܝܰܕܥܺܝܢ܆ ܐܰܝܟ ܐܰܝܠܶܝܢ ܕܡܺܝܬܺܝܢ ܘܗܳܐ ܚܰܝ̣ܺܝ̣ܢ ܚ̱ܢܰܢ܆ ܐܰܝܟ ܐܰܝܠܶܝܢ ܕܡܶܬܪܕܶܝܢ ܘܠܳܐ ܡܳܝܬܺܝܢ܆ ܐܰܝܟ ܐܰܝܠܶܝܢ ܕܡܶܬܬܥܺܝܩܺܝܢ ܒܟܽܠܙܒܰܢ ܕܶܝܢ ܚܳܕܶܝܢ܆ ܐܰܝܟ ܡܶܣ̈ܟܺܢܶܐ ܕܰܠܣܰܓܺܝ̈ܶܐܐ ܕܶܝܢ ܡܰܥܬܪܺܝܢ܆ ܐܰܝܟ ܐܰܝܠܶܝܢ ܕܠܳܐ ܡܶܕܶܡ ܐܺܝܬ ܠܗܽܘܢ܆ ܘܰܠܟܽܠ ܡܶܕܶܡ ܐܰܚܺܝܕܺܝܢ^[9].

ܟܰܕ ܥܰܠ ܗܳܠܶܝܢ ܙܰܝ̈ܢܶܐ ܕܙܰܕܝܩܽܘܬܐ܆ ܗܳܠܶܝܢ ܕܡܶܢ ܟܽܠܕܽܘܟ ܕܠܳܐ ܡܰܦܽܘܠܬܳܐ ܘܠܳܐ ܡܶܬܚܰܣܢܳܢܳܐ ܢܳܛܪܺܝܢ ܠܶܗ ܠܙܰܕܝܩܳܐ܆ ܬܟܺܝܠ ܗ̱ܘܐ ܐܳܦ ܐܰܬܰܐܢܣܝܘܤ܆ ܗܰܘ ܠܳܐ ܡܶܬܦܰܚܡܳܢܳܐ ܒܡܝܰܬܪܽܘܬܳܐ܆ ܠܰܐܟܣܽܘܪܝܳܐ ܚܳܕܝܳܐܺܝܬ ܡܩܰܒܶܠ ܗ̱ܘܳܐ. ܘܰܠܘܳܬ ܡܕܺܝܢ̱ܬܳܐ ܚܕܳܐ ܡܶܢ ܗܳܠܶܝܢ ܕܓܰܐܠܝܰܐ ܐܶܬܬܰܘܒܰܠ܆ ܘܚܰܝ̈ܶܐ ܦܺܝܠܽܘܣ̈ܘܦܳܝܶܐ ܡܶܬܥܰܢܘܶܐ ܗ̱ܘܳܐ܆ ܟܰܕ ܥܰܡ ܐܰ‌ܠܳܗܳܐ ܒܰܠܚܽܘܕܰܘܗ̱ܝ ܗܳܘܶܐ ܗ̱ܘܳܐ܆ ܗܰܘ ܕܳܐܦܠܳܐ ܕܢܶܬܛܰܫܶܐ ܫܰܒܩܶܗ܆ ܒܰܕܡܽܘܬ ܡܕܺܝܢ̱ܬܳܐ ܚܙܺܝܬܳܐ ܘܢܰܨܺܝܚܬܳܐ ܕܥܰܠ ܛܽܘܪܳܐ ܕܰܡܝܰܬܪ̈ܳܬܳܐ ܣܺܝܡܳܐ܆ ܘܰܫܪܳܓܳܐ ܕܰܬܚܶܝܬ ܡܽܘܕܝܳܐ ܢܶܬܛܰܫܶܐ ܠܳܐ ܡܶܫܟܰܚ܆ ܗܰܘ ܕܰܠܡܶܬܪܰܡܪܳܡܽܘ ܙܳܕܶܩ܆ ܘܰܠܟܽܠܶܗ ܒܰܝܬܳܐ ܗܰܘ ܕܺܐܝܬܰܘܗ̱ܝ ܥܺܕܬܳܐ ܢܰܢܗܰܪ ܒܢܽܘܗܪܳܐ ܥܰܬܺܝܪܳܐ^[10]. ܡܙܺܝܥ ܓܶܝܪ ܠܗܰܘ ܕܰܦܢܺܝܬܳܐ ܗܳܝ ܡܰܥܪܒܳܝܬܳܐ ܕܡܰܠܟܽܘܬܳܐ ܕܪ̈ܽܘܡܳܝܶܐ ܡܕܰܒܰܪ ܗ̱ܘܳܐ܆ ܩܽܘܤܛܰܢܛܝܢܘܤ ܕܶܝܢ ܗܰܘ ܛܰܠܝܳܐ ܐܺܝܬܰܘܗ̱ܝ ܗ̱ܘܳܐ ܗܳܢܳܐ܆ ܒܪܳܐ ܫܰܦܺܝܪ ܕܶܚܠܬܳܐ ܕܩܘܤܛܢܛܝܢܘܤ ܗܰܘ ܕܫܽܘܠܳܡܳܐ ܫܰܦܺܝܪ ܕܶܚܠܬܳܐ܆ ܫܘܶܐ ܒܰܫܡܳܐ ܕܰܐܒܽܘܗ̱ܝ ܘܰܫܘܶܐ ܒܰܙܢܳܐ܆

ܘܡܰܦܢܶܐ ܠܶܗ ܠܰܐܬܠܺܝܛܳܐ ܡܶܢ ܐܰܟܣܽܘܪܝܳܐ.

ܗܳܢܳܐ ܥܰܡ ܐܰ‌ܠܳܗܳܐ ܗܰܘ ܕܰܐܙܺܝܥܶܗ܆ ܠܰܡܕܺܝܢ̱ܬܳܐ ܗܳܝ ܕܰܐ‌ܠܶܟܣܰܢܕܪ̈ܳܝܶܐ ܐܰܦܢܺܝ ܠܰܐܬܰܐܢܣܝܘܤ܆ ܟܰܕ ܠܰܐܚܽܘܗ̱ܝ ܡܰܢ ܩܽܘܤܛܢܛܝܢܘܤ ܕܰܒܢܶܫ̈ܒܶܐ ܕܪܽܘܫܥܳܐ ܐܰܪܝܰܢܳܝܳܐ ܐܶܬܦܟܰܪ ܐܳܦܶܢ ܠܰܘ ܡܫܰܡܠܝܳܐܺܝܬ ܩܪܳܒܳܐ ܓܙܰܡ܆ ܐܶܢܗܽܘ ܕܰܠܗܳܢܳܐ ܠܳܐ ܢܫܰܕܰܪ ܠܰܡܕܺܝܢ̱ܬܶܗ ܕܰܐ‌ܠܶܟܣܰܢܕܪܘܤ܆ ܠܰܐܠܟܣܰܢܕܪ̈ܳܝܶܐ ܕܶܝܢ ܟܬܰܒ ܠܰܘ ܐܶܓܰܪܬܳܐ܆ ܐܶܠܳܐ ܡܺܐܡܪܳܐ ܡܚܰܓܝܳܢܳܐ ܘܰܡܩܰܠܣܳܢܳܐ ܥܰܠ ‌ܐܰܬܰܐܢܰܣܝܘܤ܆ ܘܟܰܕ ܠܟܽܠܗܶܝܢ ܡܰܢ ܗܳܠܶܝܢ ܐ̱ܚܪ̈ܳܢܝܳܬܳܐ ܒܺܐܝܕܳܐ ܒܺܐܝܕܳܐ ܬܢܳܐ܆ ܐܰܝܟ ܕܰܒܩܶܦܰܠܶܐܘܢ ܕܶܝܢ ܐܶܡܰܪ܆ ܕܪ̈ܺܝܫܰܝ ܟܳܗ̈ܢܶܐ ܒܰܠܚܽܘܕܰܝܗܽܘܢ ܐܺܝܬܶܝܗ̇ ܠܰܡܚܰܘܳܝܽܘ܆ ܕܡܳܢܳܐ ܗܝ ܗܳܝ ܕܰܒܛܽܘܪܳܦܳܐ ܢܶܒܣܡܽܘܢ܆ ܘܰܠܥܰܡ̈ܠܶܐ ܡܰܢ ܢܣܰܝܒܪܽܘܢ܆ ܒܣܰܒܪܳܐ ܕܶܝܢ ܢܶܚܕܽܘܢ܆ ܘܰܠܬܶܫܒܽܘܚܬܳܐ ܗܳܝ ܕܰܥܬܺܝܕܳܐ ܢܶܬܗܰܓܓܽܘܢ ܒܬܰܪܥܺܝܬܗܽܘܢ܆ ܗܳܝ ܕܰܡܚܰܦܝܳܐ ܠܟܽܠܗܶܝܢ ܗܳܠܶܝܢ ܙܰܒ̈ܢܳܝܳܬܳܐ܆ ܘܰܠܗܳܠܶܝܢ ܥܡܺܝ̈ܠܳܬܳܐ ܕܥܳܠܡܳܐ ܗܳܢܳܐ ܕܩܰܪܺܝܒ. ܗܺܝ ܕܶܝܢ ܟܰܕ ܗܺܝ ܗܳܕܶܐ ܥܒܰܕ ܬܽܘܒ܆ ܐܳܦ ܩܽܘܤܛܢܛܝܢܘܤ ܗܰܘ ܫܰܦܺܝܪ ܕܶܚܠܬܳܐ܆ ܟܰܕ ܠܶܗ ܠܩܰܕܺܝܫܳܐ ܕܥܰܡܗܽܘܢ ܕܰܐܓܽܘ̈ܢܶܐ ܕܕܳܡܶܝܢ ܣܠܶܩ ܠܪܰܘܡܳܐ ܫܟܶܢ ܠܰܡܕܺܝܢ̱ܬܶܗ܆ ܥܰܡ ܟܠܺܝܠܳܐ ܕܙܳܟܽܘܬܳܐ.

ܫܳܬܶܩ ܐ̱ܢܳܐ ܠܥܽܘ̈ܬܳܕܶܐ ܢܟܺܝ̈ܠܶܐ ܕܣܽܘܢܶܢ̈ܕܘ ܗܳܠܶܝܢ ܐܰܪ̈ܝܰܢܳܝܳܬܳܐ܆ ܗܳܠܶܝܢ ܕܰܩܕܳܡܰܝܗܶܝܢ ܥܳܐܶܠ ܗ̱ܘܳܐ ܠܡܶܬܬܕܳܢܽܘ܆ ܗܰܘ ܡܕܰܡܝܳܢܶܗ ܕܰܡܫܺܝܚܳܐ. ܠܰܦܫܺܝܩܽܘܬ ܡܶܙܕܰܒܢܳܢܽܘܬܳܐ ܕܰܩܛܺܝܓܪ̈ܳܢܶܐ. ܠܣܳܗ̈ܕܶܐ ܡܶܙܕܰܒ̈ܢܳܢܶܐ. ܠܟܽܠܗܶܝܢ ܒܰܚܕܳܐ ܒܰܪ̱ܬ ܩܳܠܳܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܘܒܰܙܥܽܘܪܽܘܬ ܡܶܠܬܳܐ ܣܰܟܽܘܠܬܳܢܺܝܬܳܐ ܫܳܪܶܐ ܗ̱ܘܳܐ܆ ܕܺܐܝܬ ܗ̱ܘܳܐ ܠܶܗ ܚܰܝܠܳܐ ܡܶܢ ܫܪܳܪܳܐ. ܗܰܘ ܓܶܝܪ ܡܡܰܠܶܠ ܗ̱ܘܳܐ ܒܺܐܝܕܰܘ̈ܗ̱ܝ܆ ܗܰܘ ܕܶܐܡܰܪ܆ ܕܠܳܐ ܬܶܪܢܽܘܢ ܕܰܐܝܟܰܢܳܐ ܐܰܘ ܡܳܢܳܐ ܬܡܰܠܠܽܘܢ܆ ܢܶܬܺܝܗܶܒ ܠܟܽܘܢ ܓܶܝܪ ܒܗܳܝ ܫܳܥܬܳܐ ܡܳܢܳܐ ܬܡܰܠܠܽܘܢ^[11].

ܗܳܢܳܐ ܟܽܠܶܗ ܕܶܝܢ ܒܪܰܡ܆ ܐܰܦܩܪܰܬ ܐܶܢܽܘܢ ܫܳܢܝܽܘܬܳܐ ܕܪܽܘܫܥܳܐ ܠܒܺܝ̈ܫܶܐ܆ ܐܰܝܟܰܢܳܐ ܕܳܐܦ ܒܳܬܰܪ ܩܽܘܛܪܳܓܳܐ ܕܩܶܛܠܳܐ ܢܶܪܕܦܽܘܢ܆ ܕܢܰܝܬܽܘܢ ܥܰܠ ܗܰܘ ܕܒܶܗ ܒܰܕܡܽܘܬܳܐ ܐܺܝܬܰܘܗ̱ܝ ܗ̱ܘܳܐ ܪܳܚܶܡ ܐܰ‌ܠܳܗܳܐ ܘܪܳܚܶܡ ܐ̱ܢܳܫܳܐ܆ ܘܰܪܕܶܐ ܗ̱ܘܳܐ ܘܝܰܠܺܝܦ ܠܡܶܪܚܰܡ ܠܡܳܪܝܳܐ ܐܰ‌ܠܳܗܳܐ ܘܰܠܩܰܪܺܝܒܳܐ ܐܰܝܟ ܕܰܠܢܰܦܫܶܗ^[12]. ܡܶܬܩܰܛܪܰܓ ܗ̱ܘܳܐ ܓܶܝܪ܆ ܐܰܝܟ ܐܰܝܢܳܐ ܕܰܠܐ̱ܢܳܫ ܐܰܪܣܐܢܝܘܤ ܩܛܰܠ܆ ܘܠܺܐܝܕܶܗ ܕܡܺܝܬܳܐ ܦܣܰܩ܆ ܐܰܝܟ ܕܰܠܘܳܬ ܬܘܩܢܐ ܕܦܽܘܪ̈ܳܣܶܐ ܡܶܕܶܡ ܒܺܝ̈ܫܶܐ܆ ܘܕܽܐܘܡܳܢܽܘܬܳܐ ܕܚܰܪܳܫܽܘܬܳܐ. ܕܠܳܗ̇ ܠܗܳܝ ܐܺܝܕܳܐ ܠܘܳܬܗܽܘܢ ܐܰܚܺܝܕܺܝܢ ܗ̱ܘܰܘ ܠܳܗ̇ ܩܛܺܝܓܪ̈ܳܢܶܐ ܟܰܕ ܐܳܡܪܺܝܢ: ܕܰܐܬܰܐܢܣܝܘܤ ܡܰܢ ܡܛܰܫܶܐ ܗ̱ܘܳܐ ܠܗܳܕܶܐ܆ ܚܢܰܢ ܕܶܝܢ ܐܰܪܺܝܡܢܳܗ̇ ܡܶܢܶܗ ܠܘܳܬ ܡܰܟܣܳܢܽܘܬܳܐ. ܘܗܰܘ ܡܰܢ ܒܗܳܠܶܝܢ ܡܶܬܬܕܺܝܢ ܗ̱ܘܳܐ. ܡܳܪܝܳܐ ܕܶܝܢ ܗܰܘ ܕܬܶܕܡܪ̈ܳܬܳܐ ܘܰܕܚܰܝ̈ܠܶܐ܆ ܗܰܘ ܕܰܐܥܺܝܪ ܠܪܽܘܚܳܐ ܕܕܳܢܝܐܝܠ^[13]܆ ܘܰܠܕܺܝܢܳܐ ܗܰܘ ܕܰܠܒܰܪ ܡܶܢ ܢܳܡܽܘܣܳܐ ܕܩܰܫܺܝ̈ܫܶܐ ܗܳܢܽܘܢ ܨܰܚ̈ܢܶܐ ܕܡܶܛܽܠ ܫܽܘܫܰܢ ܢܰܟܦܬܳܐ ܐܰܟܶܤ܆ ܐܰܝܟ ܗܰܘ ܕܡܶܢ ܐܳܐܰܪ ܦܪܰܚ ܢܚܶܬ܆ ܐܰܩܺܝܡܶܗ ܠܰܐܪܣܐܢܝܘܤ ܡܶܢ ܨܒܽܘܬ ܢܰܦܫܶܗ ܥܰܠ ܗܳܢܽܘܢ ܕܕܺܝܢܺܝܢ܆ ܟܰܕ ܒܕܰܗܒܳܐ ܡܙܰܒܶܢ ܗ̱ܘܳܐ ܠܶܗ ܥܪܽܘܩܝܳܐ ܒܰܝܬܳܝܳܐ ܕܺܝܠܶܗ ܠܰܩܛܺܝܓܪ̈ܳܢܶܐ܆ ܘܗ̱ܝ ܕܠܳܐ ܒܕܽܘܟ ܣܳܟ ܢܶܬܚܙܶܐ ܒܦܳܣܺܝ̈ܩܳܬܳܐ ܥܕܰܡܳܐ ܕܡܶܫܬܰܡ̈ܠܝܳܢ ܗ̱ܘܰܝ̈ ܗܳܠܶܝܢ ܕܰܥܫܽܘܩܝܳܐ܆ ܐܰܝܟ ܡܶܕܶܡ ܡܶܢ ܩܶܢܝܳܢ̈ܶܐ ܡܶܙܕܰܒ̈ܢܳܢܶܐ ܒܣܽܘܓܳܐܐ ܕܛܺܝ̈ܡܶܐ ܩܨܺܝܨܳܐ ܗ̱ܘܳܬ ܠܶܗ. ܘܟܰܕ ܩܰܪܺܝܒ ܗ̱ܘܳܐ ܩܕܳܡܰܝܗܽܘܢ܆ ܘܰܠܬܰܪ̈ܬܰܝܗܶܝܢ ܐܝܕܰܘ̈ܗ̱ܝ ܕܡܶܬܛܰܫ̈ܝܳܢ ܗ̱ܘܰܝ̈ ܬܚܶܝܬ ܢܰܚܬܶܗ ܐܰܦܶܩ܆ ܘܰܠܗܳܢܽܘܢ ܕܰܟܢܺܝܫܺܝܢ ܗ̱ܘܰܘ ܚܰܘܺܝ ܐܶܢܶܝܢ܆ ܗܳܢܽܘܢ ܡܺܝ̈ܬܶܐ ܒܠܳܐ ܗܰܝܡܳܢܽܘܬܳܐ܆ ܗܳܢܽܘܢ ܡܺܝ̈ܬܶܐ ܒܰܥܫܽܘܩܝܳܐ܆ ܗܳܢܽܘܢ ܓܰܢܳܒ̈ܶܐ ܕܡܺܝ̈ܬܶܐ܆ ܘܰܕܡܶܛܽܠ ܚܣܳܡܳܐ ܕܺܝܢܳܐ ܕܩܶܛܠܳܐ ܡܥܰܠܶܝܢ ܗ̱ܘܰܘ܆ ܐܰܝܟܰܢܳܐ ܕܕܺܐܝܕܳܐ ܗܳܝ ܕܡܶܬܕܰܓܠܳܐ ܗ̱ܘܳܬ ܫܪܳܪܳܐ ܢܶܬܦܰܪܣܽܘܢ ܠܗܽܘܢ܆ ܩܳܝܡܺܝܢ ܗ̱ܘܰܘ ܕܠܳܐ ܡܶܠܬܳܐ܆ ܟܰܕ ܩܒܺܝܥܺܝܢ ܗ̱ܘܰܘ ܐܰܝܟ ܟܺܐܦ̈ܶܐ. ܘܰܠܚܰܪܬܳܐ ܥܳܪ̈ܽܘܩܶܐ ܗܘ̣ܰܘ.

ܡܳܢܳܐ ܐܺ݀ܡܰܪ ܡܶܟܺܝܠ܆ ܠ‍ܐܶܐ ܐ̱ܢܳܐ ܓܶܝܪ ܟܰܕ ܠܘܳܬ ܝܰܡܳܐ ܕܣܳܥܽܘܪ̈ܘܳܬܳܐ ܚܳܐܰܪ ܐ̱ܢܳܐ. ܐܶ݀ܡܢܶܐ ܠܗܳܠܶܝܢ ܐܰܟܣܘܪ̈ܝܰܐܤ ܐ̱ܚܪ̈ܳܢܝܳܬܳܐ܆ ܠܰܥܪ̈ܽܘܩܝܶܐ܆ ܠܡܰܘܒ̈ܠܳܢܘܳܬܳܐ܆ ܠܡܰܣ̈ܩܳܬܶܗ ܗܳܠܶܝܢ ܕܰܠܪܰܘܡܳܐ܆ ܠܰܘ ܠܗܳܝ ܩܰܕܡܳܝܬܳܐ ܒܰܠܚܽܘܕ ܐܶܠܳܐ ܐܳܦ ܠܗܳܝ ܚܕܰܬܳܐ܆ ܠܡܰܪ̈ܕܝܳܬܳܐ ܣܰܓܺܝ̈ܳܐܬܳܐ ܕܒܽܐܘܪܚܳܐ ܘܠܰܚ̈ܙܽܘܩܝܶܐ܆ ܠܩܺܝ̈ܢܕܽܘܢܘ ܕܰܒܝܰܡܳܐ܆ ܠܟܰܘ̈ܫܶܐ ܘܡܰܥܡܪ̈ܶܐ ܕܰܒܚܽܘܪܒܳܐ܆ ܠܡܰܠ̈ܟܶܐ ܐܺ݀ܡܰܪ ܗܳܢܽܘܢ ܕܩܶܛܠܳܐ ܥܠܰܘܗ̱ܝ ܓܳܙܡܺܝܢ ܗ̱ܘܰܘ܆ ܠܩܽܘܤܛܢܛܝܢܘܤ ܘܠܘܠܝܤ ܘܰܠܝܘܠܝܢܘܤ܆ ܠܗܳܢܽܘܢ ܡܰܢ ܕܗܳܠܶܝܢ ܕܰܐܪܺܝܽܘܤ ܟܪܺܝܗܶܝܢ ܗ̱ܘܰܘ܆ ܠܗܰܘ ܕܶܝܢ ܕܗܳܠܶܝܢ ܕܚܰܢ̈ܦܶܐ܆ ܘܰܠܟܽܠܗܽܘܢ ܕܰܠܚܰܝܰܘ̈ܗ̱ܝ ܕܰܐܬܰܐܢܣܝܘܤ ܫܪܳܝܳܐ ܕܕܶܚܠܬܳܐ ܕܺܝܠܗܽܘܢ ܚܳܫܒܺܝܢ ܗ̱ܘܰܘ܆ ܘܕܳܐܦܠܳܐ ܠܚܰܕ ܡܶܢܗܽܘܢ ܗܘ̣ܳܐ ܡܶܬܟܰܒܫܳܢܳܐ܆ ܐܶܠܳܐ ܐܺܝܬܰܘܗ̱ܝ ܗ̱ܘܳܐ ܐܰܬܰܐܢܣܝܘܤ ܐܰܘܟܺܝܬ ܠܳܐ ܡܳܝܽܘܬܳܐ ܫܰܪܺܝܪܳܐܺܝܬ܆ ܕܠܳܐ ܡܳܝܽܘܬܳܐܺܝܬ ܒܦܰܓܪܐ ܡܳܝܽܘܬܳܐ ܡܰܩܪܶܒ ܗ̱ܘܳܐ܆ ܘܒܺܐܝ̈ܕܰܝܗܽܘܢ ܕܰܥܒ̈ܳܕܶܐ ܫܠܺܝܚܳܐܺܝܬ ܠܥܶܠܬܶܗ ܕܰܩܪܳܒܳܐ ܡܰܙܥܶܩ ܗ̱ܘܳܐ܆ ܕܙܳܕܶܩ ܠܗܳܢܳܐ ܦܰܓܪܳܐ ܡܶܬܚܰܒܠܳܢܳܐ ܕܢܶܠܒܰܫ ܠܠܳܐ ܡܶܬܚܰܒܠܳܢܽܘܬܳܐ܆ ܘܰܠܗܳܢܳܐ ܡܳܝܽܘܬܳܐ ܕܢܶܠܒܰܫ ܠܠܳܐ ܡܳܝܽܘܬܽܘܬܳܐ^[14]܆ ܗܳܝ ܕܡܶܛܽܠܳܬܳܗ̇ ܟܽܠܗܶܝܢ ܡܶܣܬܰܝܒܪ̈ܳܢܝܳܬܳܐ ܐܺܝܬܰܝܗܶܝܢ.

ܘܐܝܘܒ ܡܰܢ ܗܰܘ ܛܽܘܦܣܳܐ ܕܰܡܥܰܙܝܳܢܽܘܬܳܐ ܟܰܕ ܡܶܬܢܟܶܬ ܗ̱ܘܳܐ ܘܡܶܬܕܒܶܨ ܒܟ̈ܺܐܒܶܐ ܐܰܝܟ ܒܰܪܢܳܫܳܐ ܐܳܡܰܪ ܗ̱ܘܳܐ܆ ܫܒܽܘܩܰܝܢܝ ܕܶܐܬܬܢܺܝܚ ܩܰܠܺܝܠ^[15]. ܐܰܬܰܐܢܣܝܘܤ ܕܶܝܢ܆ ܒܰܐܪܒܥܺܝܢ ܘܫܶܬ ܫܢܰܝ̈ܳܐ ܕܶܐܦܣܩܽܘܦܽܘܬܶܗ܆ ܟܰܕ ܠܣܘܟ̈ܢܶܐ ܒܰܬܠܺܝܬܳܝܽܘܬ ܓܰܠ̈ܠܶܐ ܕܡܰܚ̈ܫܽܘܠܳܐ ܬܰܪܶܨ ܗ̱ܘܳܐ܆ ܠܶܐܠܦܳܐ ܕܗܰܝܡܳܢܽܘܬܐ ܬܪܺܝܨܬܳܐ ܠܳܐ ܛܰܒܰܥ. ܐܶܠܳܐ ܟܰܕ ܙܰܒܢܳܐ ܕܫܶܬ ܫܢܰܝ̈ܳܐ܆ ܘܐܦ ܠܳܐ ܡܰܠܽܘܬܳܐܺܝܬ ܝܺܬܶܒ ܒܰܬܪܽܘܢܘܤ܆ ܠܗܰܘ ܕܰܐܪܒܥܺܝܢ ܫܢܰܝ̈ܳܐ ܒܰܪܕܽܘܦܝܳܐ ܥܰܒܕܶܗ܆ ܘܠܳܐ ܐܶܡܰܪ ܕܰܫܒܽܘܩܰܝܢܝ ܕܩܰܠܺܝܠ ‌ܐܶ݀ܬܬܢܺܝܚ. ܟܰܕ ܡܫܰܪܰܪ ܗ̱ܘܳܐ ܥܰܠ ܢܰܦܫܶܗ܆ ܠܡܶܠܬܳܐ ܟܳܗܢܳܝܬܳܐ ܗܳܝ ܕܳܐܡܪܳܐ܆ ܕܙܰܕܝܩܳܐ ܠܥܳܠܰܡ ܠܳܐ ܢܶܫܰܦ^[16]. ܘܟܰܕ ܒܚܰܕ ܪܶܗܛܳܐ ܘܕܽܘܥܬܳܐ ܚܺܝܨܬܳܐ ܪܗܶܛ܆ ܗܳܝ ܕܶܝܢ ܡܰܠܽܘܢ ܡܰܣܒܰܪ ܗ̱ܘܳܐ ܕܥܰܠ ܡܰܘܬܒܳܐ ܗܰܘ ܟܳܗܢܳܝܳܐ ܝܳܬܶܒ ܗ̱ܘܳܐ ܪܽܘܚܳܢܳܐܺܝܬ܆ ܐܶܡܰܬܝ ܕܡܶܢܶܗ ܡܶܛܽܠ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ ܡܶܬܕܚܶܩ ܗ̱ܘܳܐ.

ܡܳܢܳܐ ܢܺܐܡܰܪ ܐ̱ܢܳܫ܆ ܡܶܛܽܠ ܚܰܝܠܶܗ ܘܰܬܪܺܝܨܽܘܬܶܗ ܕܰܒܡܰܠܦܳܢܽܘܬܳܐ܆ ܗܳܝ ܕܒܺܐܝ̈ܕܶܝܗ̇ ܠܟܽܠ ܥܺܕܬܳܐ ܘܰܠܟܽܠ ܥܰܡܳܐ ܪܳܕܶܐ ܗ̱ܘܳܐ ܘܡܰܠܶܦ܆ ܒܗܳܠܶܝܢ ܕܳܐܦ ܠܗܳܕܶܐ ܥܺܕܬܳܐ ܫܠܺܝܚܳܝܬܳܐ ܐܰܡܺܝܢܳܐܺܝܬ ܡܰܫܩܶܐ ܗ̱ܘܳܐ܆ ܟܰܕ ܒܶܐܓܪ̈ܳܬܶܗ ܢܦܺܝ̈ܚܳܬ ܡܶܢ ܐܰ‌ܠܳܗܳܐ ܡܰܪܬܶܐ ܗ̱ܘܳܐ܆ ܟܰܕ ܠܰܐܘܝܽܘܬܳܐ ܡܰܝܬܶܐ ܗ̱ܘܳܐ܆ ܟܰܕ ܡܰܩܶܦ ܗ̱ܘܳܐ ܠܗܳܠܶܝܢ ܕܪ̈ܰܚܺܝܩܳܢ܆ ܟܰܕ ܠܕܺܐܒ̈ܶܐ ܛܳܪܶܕ ܗ̱ܘܳܐ܆ ܘܰܒܩܶܠܥܳܐ ܪܽܘܚܳܢܳܝܬܳܐ ܠܟܺܐܦ̈ܶܐ ܕܕܽܘܓܡ̈ܰܐܛܰܐ ܥܠܰܝܗܽܘܢ ܡܫܰܕܰܪ ܗ̱ܘܳܐ ܘܡܳܚܶܐ ܗ̱ܘܳܐ ܠܗܽܘܢ܆ ܠܠܐܘܢܛܝܘܤ ܘܠܐܘܙܘܐܝܘܤ ܗܳܢܽܘܢ ܓܰܢ̱ܒܳܪ̈ܶܐ ܐܰܪ̈ܝܰܐܢܽܘ ܘܡܶܬܟܰܬܫܰܝ̈ ܥܰܡ ܐܰ‌ܠܳܗܳܐ ܒܰܕܡܽܘܬ ܓܽܘܠܝܰܕ܆ ܠܗܳܢܽܘܢ ܕܳܐܦ ܐܰܪܡܺܝ ܘܰܣܚܰܦ ܘܰܡܣܰܝ̈ܒܶܐ ܚܰܘܺܝ ܐܶܢܽܘܢ܆ ܠܗܰܘ ܡܰܢ ܕܡܶܛܽܠ ܫܪܺܝܚܽܘܬܳܐ ܘܦܰܚܙܽܘܬܳܐ ܕܚܰܝܰܘ̈ܗ̱ܝ܆ ܡܶܢ ܗܰܕܳܡ̈ܶܐ ܗܳܢܽܘܢ ܡܰܥ̈ܒܕܰܝ ܝܰܠܕܳܐ ܣܥܳܐ ܠܡܶܦܣܰܩ ܘܰܠܡܶܓܠܰܙ ܗܽܘ ܠܶܗ܆ ܐܰܝܟܰܢܳܐ ܕܥܰܡ ܗܳܠܶܝܢ ܕܪܳܚܶܡ ܗ̱ܘܳܐ ܕܠܳܐ ܕܶܚܠܬܳܐ ܢܶܗܘܶܐ ܗ̱ܘܳܐ܆ ܠܗܰܘ ܕܶܝܢ܆ ܕܡܶܛܽܠ ܪܶܚܡܰܬ ܪܺܝܫܳܢܽܘܬܳܐ ܟܽܘܪܣܝܳܐ ܡܶܢ ܟܽܘܪܣܝܳܐ ܡܚܰܠܰܦ ܗ̱ܘܳܐ܆ ܘܰܠܟܰܪܣܶܗ ܝܰܥܢܬܳܐ ܪܳܥܶܐ ܗ̱ܘܳܐ܆ ܘܰܠܪܽܘܫܥܳܐ ܡܪܰܒܶܐ ܗ̱ܘܳܐ.

ܡܶܛܽܠ ܗܳܕܶܐ܆ ܐܳܦ ܠܚܰܓܳܐ ܗܳܢܳܐ ܒܕܽܘܟܪܳܢܶܗ ܐܰܝܟ ܚܰܘܒܬܳܐ ܠܡܰܠܦܳܢܳܐ ܘܰܐܓܽܘܢܺܝܣܛܳܐ ܣܳܡܢܰܢ܆ ܟܰܕ ܠܰܢ ܠܢܰܦܫܰܢ ܬܽܘܒ ܡܶܢ ܗܳܪܟܳܐ ܠܝܽܘܬܪܳܢܳܐ ܡܟܰܢܫܺܝܢܰܢ ܘܡܶܬܬܰܓܪܺܝܢܰܢ. ܟܰܕ ܓܶܝܪ ܙܰܕܝܩܳܐ ܡܶܬܩܰܠܰܤ܆ ܕܚܳܕܶܝܢ ܥܰܡܡ̈ܶܐ ܐܳܡܪܳܐ ܒܕܽܘܟ ܡܶܠܬܳܐ ܟܳܗܢܳܝܬܳܐ^[17].

ܟܽܠܳܗ̇ ܗܳܕܶܐ ܓܶܝܪ ܐܺܝܬܶܝܗ̇ ܗ̱ܘܳܬ ܬܪܺܝܨܽܘܬܳܐ ܕܕܽܘܓܡ̈ܰܐܛܰܐ ܕܺܝܠܶܗ ܚܰܬܺܝ̈ܬܶܐ܆ ܐܰܝܟܰܢܳܐ ܕܠܰܟܦܳܬܳܐ ܘܢܶܙܠܳܐ ܕܡܰܣܰܐܬܳܐ ܬܶܬܕܰܡܶܐ. ܘܰܕܟܽܠ ܚܶܪܝܳܢܳܐ ܘܦܽܘܫܳܟܳܐ܆ ܒ̈ܢܳܬܩ̈ܳܠܶܐ ܕܗܰܘ ܢܶܗܘ̈ܝܳܢ ܐܺܝܬܰܝܗܶܝܢ ܬܚܽܘܡܳܐ ܘܢܳܡܽܘ̈ܣܶܐ. ܟܰܕ ܓܶܝܪ ܠܽܘܩܒܰܠ ܡܰܣܒܪܳܢܽܘܬܳܐ ܛܰܡܰܐܬܳܐ ܕܰܐܪܺܝܽܘܤ ܡܶܬܟܰܬܰܫ ܗ̱ܘܳܐ܆ ܐܰܝܟ ܙܢܳܐ ܕܗܳܢܽܘܢ ܕܫܰܦܺܝܪ ܐܽܘܡܳܢܳܐܺܝܬ ܝܳܕܥܺܝܢ ܠܡܶܠܒܰܟ ܕܰܪܳܐ܆ ܘܳܐܦܠܳܐ ܠܰܚܕܳܐ ܡܶܢ ܗܳܠܶܝܢ ܗܶܪ̈ܣܝܤ ܐ̱ܚܪ̈ܳܢܝܳܬܳܐ ܝܰܗ̱ܒ ܡܰܥܠܳܢܳܐ ܐܰܘ ܠܒܽܘܟܝܳܐ܆ ܒܰܕܡܽܘܬ ܗܳܢܽܘܢ ܠܳܐ ܒܚܺܝܪ̈ܶܐ ܒܗܰܝܡܳܢܽܘܬܳܐ ܕܝܘܕܘܪܘܤ ܘܬܶܐܽܘܕܽܘܪܽܘܤ܆ ܕܒܰܚܕܳܐ ܡܰܢ ܥܰܝܢܗܽܘܢ ܚܳܙܶܝܢ ܗ̱ܘܰܘ܆ ܒܗܳܝ ܕܶܝܢ ܐ̱ܚܪܺܬܳܐ ܡܣܰܡܶܝܢ ܗ̱ܘܰܘ܆ ܘܰܠܡܶܠܬܳܐ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ ܦܣܰܩܘ ܠܰܬܪܶܝܢ܆ ܘܳܐܚܕܺܝܢ ܗ̱ܘܰܘ ܥܶܠ̈ܠܳܬܐ ܕܰܠܘܳܬ ܐܪܺܝܽܘܤ ܐܰܘ ܠܘܳܬ ܬܰܪܥܺܝܬܳܐ ܡܶܕܶܡ ܐ̱ܚܪܺܬܳܐ ܡܶܢ ܗܶܪ̈ܣܝܤ ܡܶܬܟܰܬܫܺܝܢ ܗ̱ܘܰܘ. ܐܶܠܳܐ ܠܰܘ ܕܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܗܰܘ ܪܰܒܳܐ. ܐܶܠܳܐ ܟܰܕ ܒܝܰܕ ܟܽܠܗܶܝܢ ܫܘܺܝܬܳܐ ܘܰܓܪܺܝܕܬܳܐ ܝܳܗܶܒ ܗ̱ܘܳܐ ܘܡܰܫܠܶܡ ܗ̱ܘܳܐ ܠܳܗ̇ ܠܡܶܠܬܳܐ܆ ܠܰܘ ܕܰܬܪܶܝܢ ܟܝܳܢ̈ܶܐ ܢܰܘܕܶܐ ܠܗܰܘ ܚܰܕ ܡܫܺܝܚܳܐ ܡܶܢ ܒܳܬܰܪ ܚܕܳܝܽܘܬܳܐ܆ ܐܶܠܳܐ ܕܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ ܙܳܕܶܩ ܠܡܺܐܡܰܪ ܣܳܡ ܢܳܡܽܘܣܳܐ܆ ܘܰܐܟܚܕܳܐ ܢܛܰܪ ܘܶܐܙܕܗܰܪ܆ ܘܳܐܦ ܡܶܢ ܫܽܘܚܠܳܦܳܐ ܘܒܽܘܠܒܳܠܳܐ܆ ܘܳܐܦ ܡܶܢ ܦܽܘܠܳܓܳܐ ܕܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ.

ܕܗܰܘ ܕܟܰܕ ܠܳܐ ܡܣܰܝܒܪܝܢ ܗ̱ܘܰܘ ܠܡܰܟܣܳܢܽܘܬܶܗ܆ ܢܶܣܛܽܘܪܺܝܽܘܤ ܘܗܳܢܽܘܢ ܕܫܰܪܟܳܐ ܒܢܰܝ̈ܳܐ ܕܕܝܘܕܘܪܘܤ ܘܰܕܬܶܐܽܘܕܽܘܪܽܘܤ܆ ܠܶܐܓܰܪܬܶܗ ܗܳܝ ܕܰܠܘܳܬ ܐܰܦܝܩܛܝܛܘܤ ܙܰܝܶܦܘ ܘܫܰܚܠܶܦܘ. ܗܳܝ ܕܦܶܚܡܳܗ̇ ܐܰܝܟ ܕܺܐܝܬ ܗ̱ܘܳܐ ܒܳܗ̇ ܒܰܫܪܳܪܳܐ܆ ܬܰܠܡܺܝܕܶܗ ܫܰܪܺܝܪܳܐ ܕܰܐܬܰܐܢܣܝܘܤ܆ ܩܽܘܪܝܠܘܤ ܗܰܘ ܚܰܟܺܝܡܳܐ܆ ܫܰܕܰܪ ܠܥܻ̈ܕܳܬܳܐ ܩܰܕܺܝ̈ܫܳܬܳܐ ܗܳܠܶܝܢ ܕܰܒܡܰܕܢܚܳܐ܆ ܟܰܕ ܣܳܟܰܪ ܗ̱ܘܳܐ ܠܦܽܘܡܗܽܘܢ ܕܗܳܢܽܘܢ ܕܝܽܘܕܝܣܐ ܥܳܒܕܺܝܢ ܗ̱ܘܰܘ܆ ܗܰܘ ܕܰܡܛܰܝܰܒ ܗ̱ܘܳܐ ܠܘܳܬ ܕܰܓܳܠܽܘܬܳܐ ܘܰܓܒܽܘ̈ܠܝܶܐ. ܗܳܟܰܢܳܐ ܐܰܬܰܐܢܣܝܘܤ ܐܳܦ ܟܰܕ ܡܶܢ ܗܳܪܟܳܐ ܫܰܢܺܝ܆ ܒܝܰܕ ܡܺܐܡܪ̈ܶܐ ܕܺܝܠܶܗ ܥܕܰܟܺܝܠ܆ ܐܳܦ ܗܳܫܳܐ ܡܶܬܟܰܬܰܫ.

ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܢܳܐ ܐܰܬܠܺܝܛܳܐ ܒܚܺܝܪܳܐ ܐܰܩܺܝܡܶܬ ܠܟܽܘܢ ܝܰܘܡܳܢܳܐ܆ ܡܶܢ ܐܓܘܦܛܘܤ ܘܡܶܢ ܡܕܺܝܢ̱ܬܳܐ ܪܰܒܬܳܐ ܘܪܳܚܡܰܬ ܠܰܡܫܺܝܚܳܐ ܗܳܝ ܕܰܐ‌ܠܟܣܢܕܪܘܤ܆ ܕܰܐܓܽܘ̈ܢܶܐ ܕܫܰܦܺܝܪܽܘܬ ܕܶܚܠܬܳܐ ܡܰܠܶܦ ܘܡܰܥܒܶܕ܆ ܘܠܰܘ ܦܢܛܐܬܠܘܢ ܒܰܠܚܽܘܕ ܐܰܘܟܺܝܬ ܚܡܺܝܫܳܝܽܘܬ ܬܰܟ̈ܬܽܘܫܶܐ܆ ܐܶܠܳܐ ܕܶܐܢ ܡܶܫܟܚܳܢܺܝܬܳܐ ܐܺܝܬܶܝܗ̇ ܠܡܺܐܡܰܪ܆ ܪ̈ܶܒܽܘ ܙܳܟ̈ܘܳܬܳܐ ܠܙܳܟ̈ܘܳܬܳܐ ܡܰܠܘܶܬ܆ ܕܥܰܡܳܐ ܡܶܕܶܡ ܕܰܐܝܟ ܗܳܢܳܐ ܡܶܫܟܚܳܐ ܠܡܶܚܙܳܐ ܒܰܐܠܽܘܡ̈ܦ̊ܝܰܐܕܰܤ܆ ܗܳܝ ܓܶܝܪ ܕܦܰܓܪܳܢܳܐܺܝܬ ܐܰܟܚܕܳܐ ܢܶܬܥܰܪܙܰܠ܆ ܘܰܐܟܚܕܳܐ ܢܰܬܒܥܰܩ ܘܢܶܦܶܠ܆ ܘܢܶܡܚܶܐ ܘܢܶܗܦܽܘܟ ܢܶܬܡܚܶܐ܆ ܕܕܶܟܪ̈ܶܐ ܘܰܕܬܰܝ̈ܫܶܐ ܐܺܝܬܶܝܗ̇ ܕܺܝܠܳܝܬܳܐ܆ ܕܰܡܕܰܩܪܺܝܢ ܘܡܳܚܶܝܢ ܠܰܚ̈ܕܳܕܶܐ ܒܩܰܪ̈ܢܳܬܗܽܘܢ܆ ܘܕܰܚܡܳܪ̈ܶܐ ܕܚܳܟܶܝܢ ܘܦܳܢܶܝܢ ܚܳܟܶܝܢ ܠܰܚ̈ܕܳܕܶܐ܆ ܘܚܰܝܘܰܬ ܫܶܢܳܝܬܳܐ ܗܝ ܘܰܕܠܳܐ ܡܶܠܬܳܐ ܟܽܠ ܟܽܠܶܗ.

ܠܰܡ̈ܠܺܝܠܶܐ ܕܶܝܢ ܘܰܠܓܰܒܪ̈ܶܐ ܟܪ̈ܺܝܣܛܝܳܢܶܐ܆ ܐܰܓܽܘ̈ܢܶܐ ܕܰܦܐܶܝܢ ܐܺܝܬܰܝܗܽܘܢ܆ ܗܳܢܽܘܢ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ. ܗܳܢܽܘܢ ܕܠܽܘܩܒܰܠ ܚܰܫ̈ܶܐ ܕܨܰܥܪܳܐ܆ ܘܠܽܘܩܒܰܠ ܫ̈ܺܐܕܶܐ ܗܳܢܽܘܢ ܕܰܡܫܰܠܗܒܺܝܢ ܠܗܳܠܶܝܢ܆ ܕܗܳܢܽܘܢ ܕܺܐܝܬܰܘܗ̱ܝ ܗ̱ܘܳܐ ܐܰܬܠܺܝܛܳܐ ܕܺܝܠܗܽܘܢ ܘܰܡܢܰܦܶܩ ܛܠܳܝ̈ܶܐ ܘܡܰܠܦܳܢܳܐ ܐܰܬܰܐܢܣܝܘܤ. ܐܰܪܡܳܐ ܠܺܝ ܠܚܰܫܳܐ ܕܙܳܢܝܽܘܬܳܐ ܒܚܽܘܫܳܒܳܐ ܢܰܟܦܳܐ. ܥܰܪܩܶܠ ܠܳܐܣܽܘܛܽܘܬܳܐ ܒܣܳܦܩܽܘܬܳܐ. ܪܗܶܛ ܥܒܰܪ ܡܶܢ ܥܳܠܽܘܒܽܘܬܳܐ ܒܟܺܐܢܽܘܬܳܐ. ܥܰܠ^[18] ܟܽܠ ܚܰܫܳܐ ܐܶܬܟܰܠܰܠ. ܠܡ̈ܶܠܶܐ ܟܳܗ̈ܢܳܝܳܬܳܐ ܫܡܰܥ ܕܡܰܙܥ̈ܩܳܢ܆ ܕܠܳܐ ܠܰܢ ܕܰܐܪܳܐ ܠܘܳܬ ܕܡܳܐ ܘܒܶܣܪܳܐ^[19]. ܠܡܳܢܳܐ ܠܘܳܬ ܕܰܐܪܳܐ ܕܦܰܓܪ̈ܶܐ ܦܥܺܝܪ ܠܳܟ ܚܶܟܳܟ܆ ܠܡܳܢܳܐ ܪܳܗܶܛ ܐܰܢ̱ܬ ܠܘܳܬ ܕܰܐܦܢܰܐ ܘܡܰܦܪܰܚ ܐܰܢ̱ܬ ܠܶܗ ܠܗܰܘܢܳܟ܆ ܘܡܶܛܽܠ ܙܳܟܽܘܬܳܐ ܕܰܐ̱ܚܪ̈ܳܢܶܐ ܡܶܬܟܰܬܰܫ ܐܰܢ̱ܬ ܘܦܰܩܺܝܪ^[20] ܐܰܢ̱ܬ܆ ܘܡܶܢ ܡܰܦ̈ܠܳܬܳܐ ܕܢܰܦܫܳܟ ܡܰܗܡܶܐ ܐܰܢ̱ܬ܆ ܟܰܕ ܝܗ̱ܝ ܒ ܐܰܢ̱ܬ ܘܡܰܫܠܶܡ ܐܰܢ̱ܬ ܠܰܒܣܳܡܳܐ ܘܰܠܪܰܘܳܝܽܘܬܳܐ܆ ܘܠܰܚܣܳܡܳܐ ܘܰܠܥܶܢ̈ܝܳܢܶܐ ܘܡܰܡ̈ܠܠܶܐ ܚܶܪ̈ܝ̣ܳܝ̣ܶܐ܆ ܘܠܰܩ̈ܥܳܬܳܐ ܘܰܠܝܰܠ̈ܠܳܬܳܐ ܠܳܐ ܡܛܰܟ̈ܣܳܬܳܐ ܘܰܕܡܰܙ̈ܡܳܢ ܠܶܗ ܠܳܐܐܰܪ܆ ܘܰܠܡܰܨ̈ܘܳܬܳܐ ܬܽܘܒ܆ ܘܰܟܒܰܪ ܐܳܦ ܠܡܰܚ̈ܘܳܬܳܐ ܗܳܠܶܝܢ ܕܡܶܢ ܗܳܪܟܳܐ.

ܠܳܐ ܐܺܝܬܶܝܗ̇ ܙܥܽܘܪܬܳܐ ܐܰܚܰܝ̈܆ ܗܳܝ ܕܥܰܠ ‌ܐܶܫܬܥܶܢܝܳܐ ܐܰܘ ܥܰܠ ܡܶܕܡ ܐ̱ܚܪܺܝܢ ܡܶܢ ܗܳܠܶܝܢ ܕܡܰܗ̈ܢܝܳܢ ܢܶܒܣܶܐ ܡܶܛܽܠ ܢܳܡܽܘܣܳܐ ܕܰܐ‌ܠܳܗܳܐ܆ ܡܶܛܽܠ ܕܳܐܦܠܳܐ ܡܶܕܶܡ ܐܺܝܬ ܠܘܳܬܶܗ ܕܠܳܐ ܐܰܓܪܳܐ ܘܰܕܠܳܐ ܦܽܘܪܥܳܢܳܐ. ܗܳܠܶܝܢ ܡܙܰܡ̈ܢܳܢ ܡܰܠܟܽܘܬܳܐ ܕܰܫܡܰܝܳܐ. ܗܳܠܶܝܢ ܒܺܐܝ̈ܕܰܝ ܐܰܝܟ ܕܰܒܩܰܕܺܝܡܽܘܬ ܙܽܘܗܳܪܳܐ܆ ܡܰܠܶܦ ܝܰܘܡܳܢܳܐ ܐܰܬܐܢܣܝܘܤ. ܠܗܰܘ ܕܳܐܦ ܕܢܶܣܥܽܘܪ ܠܰܢ ܢܰܦܺܝܣܺܝܘܗ̱ܝ܆ ܘܰܕܒܳܥ̈ܘܳܬܳܐ ܕܰܚܠܳܦܰܝܢ ܢܩܰܪܶܒ܆ ܥܰܡ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ܆ ܐܰܝܟܰܢܳܐ ܕܢܶܬܢܛܰܪ ܡܚܰܪܪ̈ܶܐ܆ ܡܶܢ ܟܽܠ ܦܰܚ̈ܶܐ ܕܳܐܟܶܠܩܰܪܨܳܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܐ ܕܬܶܫܥܝܢ ܘܚܕ.

ܡܢܝܢܐ. 20: 25 ـ 26[1]

[2]ܛܐܘܣ. ܝܘܢܝܬܐ ܗܝ. ܗ̄. ܕ̄. ܒܨܺܝܪ ܩܰܠܺܝܠ. ܣܝܡܬܐ ܕܬܐܘܡܐ ܐܘܕܘ ܦܐܬܐ 388.

ܡ̈ܬܠܐ. 9: 5 ـ 6 [3]

ܩܰܘܡܽܘܬܶܗ[4]

ܫܰܒܪ̈ܝܬܳܐ[5]

ܡܦܩܢܐ. 33: 11 [6]

ܐܦܣ̈ܝܐ. 1: 8[7]

ܡܫܰܦܠܝܢ ܘܡܡܐܢܝܢ[8]

ܒ. ܩܘܪ̈ܝܢܬܝܐ. 6: 7 ـ 10 [9]

ܡܬܝ. 5: 14 ـ 15[10]

ܡܬܝ. 10: 19 [11]

ܡܬܝ. 22: 37 ـ 39 [12]

ܕܢܝܐܝܠ. 13: 45 [13]

ܐ. ܩܘܪ̈ܝܢܬܝܐ. 15: 53 [14]

ܐܝܘܒ. 10: 20 [15]

ܡ̈ܬܠܐ. 10: 30  ܢܙܘܥ[16]

ܡ̈ܬܠܐ. 29: 2[17]

ܠܽܘܩܒܰܠ[18]

ܐܦܣ̈ܝܐ. 6: 12 [19]

ܡܶܢ ܦܰܩܪܽܘܬܳܐ ܫܳܢܝܽܘܬܳܐ[20]