ܡܺܐܡܪܳܐ ܕܬܶܫܥܺܝܢ

ܕܡܰܪܬܝܳܢܽܘܬܳܐ ܕܶܐܬܐܰܡܪܰܬ ܐܰܝܟ ܥܝܳܕܳܐ܆ ܥܰܠ ‌ܐܰܝܠܶܝܢ ܕܰܥܬܺܝܕܺܝܢ ܗܘܰܘ ܕܢܶܥܡܕܽܘܢ ܒܝܰܘܡܳܐ ܕܦܶܣܟܳܐ ܗܰܘ ܣܰܓܺܝ ܡܝܰܩܪܳܐ ܘܕܰܩܝܳܡܬܳܐ ܟܰܕ ܣܰܓܺܝ̈ܶܐܐ ܛܳܒ ܣܰܓܺܝ ܟܢܺܝܫܺܝܢ ܗܘܰܘ. ܐܺܝܬܶܝܗ̇ ܕܶܝܢ ܕܰܐܪܒܰܥ.

90: ܟܰܕ ܠܰܟܢܽܘܫܝܳܐ ܗܳܢܳܐ ܪܽܘܚܳܢܳܐ ܚܳܙܶܐ ܐ̱ܢܳܐ܆ ܗܰܝܡܢܶܬ ܕܠܰܘ ܒܰܠܚܽܘܕ ܒܢܰܝ̈ܢܳܫܳܐ ܚܳܙܶܐ ܐ̱ܢܳܐ܆ ܐܶܠܳܐ ܐܳܦ ܟܶܢܫܳܐ ܕܛܶܟܣܳܐ ܫܡܰܝܳܢ̈ܶܐ܆ ܕܠܳܐ ܡܶܬܚܰܙܝܳܢܳܐܺܝܬ ܚܠܺܝܛ ܘܒܰܝܢܳܬܟܽܘܢ ܥܰܠܺܝܠ ܩܳܐܶܡ܆ ܘܡܶܢ ܠܒܰܪ ܚܕܺܝܪ ܠܟܽܘܢ ܘܠܰܚܕܳܐ ܡܰܪܥܺܝܬܳܐ ܡܫܰܡܠܶܝܢ܆ ܘܠܰܟܢܽܘܫܝܳܐ ܕܥܺܕܬܳܐ ܡܡܰܠܠܺܝܢ܆ ܡܰܠܰܐܟ̈ܶܐ܆ ܪ̈ܺܝܫܰܝ ܡܰܠܰܐܟ̈ܶܐ܆ ܫܽܘܠ̈ܛܳܢܶܐ܆ ܡܳܪ̈ܰܘܳܬܳܐ^[1]܆ ܘܟܽܠ ܗܰܘ ܡܳܐ ܕܰܡܢ̣ܳܐ ܦܰܘܠܽܘܤ܆ ܪܽܘܚܳܐ ܐܰܘ ܫܡܳܐ ܡܶܬܗܰܘܢܳܢܳܐ ܘܠܳܐ ܗܽܘܠܳܢܳܝܳܐ܆ ܐܰܘ ܕܗܳܫܳܐ ܐܶܫܬܰܡܰܗ ܐܰܘ ܕܰܥܬܺܝܕ ܕܢܶܬܺܝܕܰܥ ܒܥܳܠܡܳܐ ܗܰܘ ܕܰܥܬܺܝܕ. ܘܛܳܒ ܟܺܐܢܳܐܺܝܬ.

ܐܶܢ ܓܶܝܪ ܐܰܝܟ ܗܳܝ ܕܰܟܬܺܝܒܳܐ܆ ܪ̈ܽܘܚܶܐ ܡܫܰܡ̈ܫܳܢܝܳܬܳܐ ܐܺܝܬܰܝܗܽܘܢ ܕܰܠܬܶܫܡܶܫܬܳܐ ܡܶܫܬܰܕܪܺܝܢ܆ ܡܶܛܽܠ ܗܳܢܽܘܢ ܕܰܥܬܺܝܕܺܝܢ ܠܡܺܐܪܰܬ ܦܽܘܪܩܳܢܳܐ^[2]܆ ܦܽܘܪܩܳܢܳܐ ܕܶܝܢ ܗܳܫܳܐ ܗܰܘ ܕܝܰܬܺܝܪ ܡܶܢ ܟܽܠܗܽܘܢ ܪܺܝܫܳܝ ܘܝܰܬܺܝܪ ܡܶܢ ܟܽܠܗܽܘܢ ܡܫܰܡܠܰܝ܆ ܘܳܐܦ ܩܰܪܺܝܒ ܘܩܳܐܶܡ ܘܥܰܠ ܬܰܪܥܳܐ ܐܺܝܬܰܘܗ̱ܝ܆ ܕܗܳܢܽܘܢ ܐܳܡܰܪ ܐ̱ܢܳܐ ܕܰܥܬܺܝܕܺܝܢ ܠܡܶܫܬܘܳܝܽܘ ܠܰܥܡܳܕܳܐ ܐܰ‌ܠܳܗܳܝܳܐ܆ ܗܰܘ ܟܺܝܬ ܕܳܐܦ ܠܡܺܐܡܪܳܐ ܗܳܢܳܐ ܕܩܰܪܺܝܒ ܝܳܗܶܒ ܡܠܽܘܐܳܐ ܘܥܶܠܬܳܐ܆ ܘܰܠܟܽܘܢ ܡܗܰܝܡ̈ܢܶܐ ܐܺܝܬ ܠܳܗ̇ ܕܰܐܟܚܕܳܐ ܡܶܬܩܰܪܒܺܝܢ ܐܢ̱ܬܽܘܢ ܠܘܳܬ ܐ̱ܪ̈ܳܙܶܐ ܥܰܡ ܗܳܢܽܘܢ ܕܡܶܬܐܰܪܙܺܝܢ܆ ܘܝܰܬܺܝܪ ܦܰܬܝܳܐܺܝܬ ܘܣܰܓܺܝ ܓܰܒܪܐܺܝܬ܆ ܒܥܰܝ̈ܢܶܐ ܕܬܰܪܥܺܝܬܳܐ ܡܶܬܩܰܪܒܺܝܢ ܐܢ̱ܬܽܘܢ ܠܗܳܠܶܝܢ ܕܡܶܬܡܰܠ̈ܠܳܢ܆ ܐܰܝܟܰܢܳܐ ܢܦܽܘܫܽܘܢ ܘܢܶܪܚܩܽܘܢ. ܐܰܝܟܰܢܳܐ ܕܶܝܢ ܠܳܐ ܢܶܬܐܰܡܢܽܘܢ^[3] ܘܥܰܡ ܚܰܕܽܘܬܳܐ ܢܺܐܬܽܘܢ ܗܳܢܽܘܢ ܡܫܰܡ̈ܫܳܢܶܐ ܕܦܽܘܪܩܳܢܳܐ܆ ܘܠܰܘ ܒܚܰܕ ܐܰܘ ܒܰܬܪܶܝܢ܆ ܐܶܠܳܐ ܒܬܶܓ̈ܡܶܐ ܟܽܠܗܽܘܢ ܐܰܝܟ ܕܐ̱ܢܳܫ ܢܺܐܡܰܪ ܘܟܶܢ̈ܫܶܐ.

ܗܳܕܶܐ ܓܶܝܪ ܐܺܝܬܶܝܗ̇ ܠܗܽܘܢ ܚܰܕܽܘܬܳܐ ܘܗܰܢܺܝܽܐܘܬܳܐ ܡܶܕܶܡ ܕܠܳܐ ܫܽܘܠܳܡܳܐ܆ ܗܳܝ ܕܠܰܘ ܒܗܽܘܢ ܒܰܠܚܽܘܕ ܬܩܽܘܡ ܝܺܕܰܥܬܳܐ ܕܰܐ‌ܠܳܗܳܐ܆ ܘܫܰܘܬܳܦܽܘܬܳܐ ܘܪܶܕܝܳܐ ܕܢܽܘܗܪܳܐ ܗܰܘ ܥܶܠܳܝܳܐ ܘܕܰܠܗܰܠ ܡܶܢ ܟܽܠ܆ ܐܶܠܳܐ ܕܥܰܠ ܣܰܓܺܝ̈ܶܐܐ ܬܶܪܕܶܐ܆ ܘܥܰܠ ܟܽܠ ܢܰܦܫܳܐ ܡܠܺܝܠܬܳܐ ܬܶܬܦܰܠܰܓ ܘܬܶܬܦܪܶܤ܆ ܘܥܰܠ ܟܽܠ ܟܝܳܢܳܐ ܕܰܡܟܳܢ ܠܡܶܫܬܰܘܬܳܦܽܘ ܒܫܰܦܺܝܪܽܘܬ ܣܳܥܽܘܪܽܘܬܳܐ ܕܰܐܝܟ ܗܳܕܶܐ. ܒܰܕܓܽܘܢ ܘܳܐܦ ܥܰܠ ܝܺܠܺܝܕܽܘܬܳܐ ܕܒܰܒܣܰܪ ܕܥܰܡܰܢܽܘܐܶܝܠ܆ ܟܰܕ ܒܪܶܚܡܰܬ ܐ̱ܢܳܫܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܘܝܰܨܺܝܦܽܘܬܳܐ ܕܡܶܛܽܠܳܬܰܢ ܬܡܰܗܘ̱܆ ܟܰܕ ܐܰܝܟ ܗܰܘ ܕܓܽܘ̈ܕܶܐ ܐܰܩܺܝܡܘ ܕܦܰܐܝ̈ܳܢ ܠܪ̈ܽܘܚܶܐ ܡܶܬܗܰܘܢܳܢ̈ܝܳܬܳܐ ܘܠܳܐ ܗܽܘ̈ܠܳܢܳܝܳܬܳܐ܆ ܘܒܶܪ̈ܝܳܬܳܐ ܕܰܐ‌ܠܳܗܐ ܛܳܒܳܐ܆ ܘܰܠܡܰܠܰܐܟ̈ܶܐ ܘܰܡܫܰܡ̈ܫܳܢܶܐ܆ ܦܽܘܪܩܳܢܳܐ ܕܺܝܠܰܢ ܙܳܡܪܺܝܢ ܗ̱ܘܰܘ ܘܰܡܫܰܒܚܺܝܢ ܗ̱ܘܰܘ ܟܰܕ ܐܳܡܪܺܝܢ: ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[4]. ܡܶܛܽܠ ܗܳܕܶܐ ܘܳܐܦ ܗܽܘ ܦܳܪܽܘܩܰܢ ܒܶܐܘܰܢܓ̈ܶܠܺܝܰܐ ܐܳܡܰܪ܆ ܐܳܡܰܪ ܐ̱ܢܳܐ ܠܟܽܘܢ܆ ܕܚܰܕܽܘܬܳܐ ܗܳܘܝܳܐ ܩܕܳܡ ܡܰܠܰܐܟ̈ܶܐ ܕܰܐ‌ܠܳܗܳܐ܆ ܥܰܠ ܚܰܕ ܚܰܛܳܝܳܐ ܕܬܳܐܶܒ^[5].

ܟܰܕ ܕܶܝܢ ܡܥܺܝܢܳܐ ܡܶܬܦܰܬܚܳܐ ܒܟܽܠܳܗ̇ ܗܳܝ ܕܰܬܚܶܝܬ ܫܶܡܫܳܐ܆ ܕܡܰܒܥܳܐ ܡܰܥܡܽܘܕܺܝܬܳܐ ܕܰܬܝܳܒܽܘܬܳܐ܆ ܘܫܽܘܒܩܳܢܳܐ ܕܰܚ̈ܛܳܗܶܐ ܒܛܰܝܒܽܘܬܳܐ ܕܠܳܐ ܚܣܳܡ ܘܰܡܫܰܪܬܰܚܬܳܐ ܘܥܰܬܺܝܪܬܳܐ ܘܰܫܦܺܝܥܬܳܐ܆ ܘܚܰܒ̣ܠܳܐ ܘܒܰܛܢܳܐ ܪܽܘܚܳܢܳܐ ܐ̱ܪܳܙܳܢܳܐܺܝܬ ܡܶܬܦܪܶܬ̣ ܘܡܶܣܬܕܶܩ܆ ܘܰܐܟܚܕܳܐ ܘܡܶܢ ܫܶܠܝ ܟܢܺܝܫܳܐܺܝܬ܆ ܟܶܢܫܳܐ ܘܥܰܡܳܐ ܩܰܕܺܝܫܳܐ ܘܥܺܕܬܳܐ ܝܳܠܕܳܐ܆ ܘܒܳܛܢܳܐ ܠܗܽܘܢ ܡܰܢ ܟܰܕ ܐܺܝܬܰܝܗܽܘܢ ܚ̈ܘܰܘܳܬܳܐ ܘܝܰܠ̈ܕܶܐ ܕܳܐܟܰܕܢ̈ܶܐ܆ ܕܢܳܫܡܺܝܢ ܡܶܪܬܳܐ ܕܒܺܝܫܽܘܬܳܐ ܘܰܕܡܰܪܺܝܪܽܘܬܳܐ܆ ܒܶܗ ܕܶܝܢ ܒܒܰܛܢܳܐ ܡܫܰܚܠܦܳܐ ܠܗܽܘܢ ܘܰܒܢܰܝ̈ܳܐ ܕܢܽܘܗܪܳܐ ܥܳܒܕܳܐ ܠܗܽܘܢ܆ ܡܶܢ ܟܽܠܦܪܽܘܤ ܡܰܠܰܐܟ̈ܶܐ ܩܳܝܡܺܝܢ ܠܘܳܬ ܗܳܢܽܘܢ ܕܡܰܠܦܺܝܢ. ܠܘܳܬ ܗܳܢܽܘܢ ܕܫܳܡܥܺܝܢ. ܠܘܳܬ ܗܳܢܽܘܢ ܕܰܡܫܰܡܠܶܝܢ. ܠܘܳܬ ܗܳܢܽܘܢ ܕܡܶܫܬܰܡܠܶܝܢ܆ ܐܰܝܟܰܢܳܐ ܕܰܫܡܰܝܳܐ ܐ̱ܚܪܺܬܳܐ ܬܶܗܘܶܐ ܐܺܝܬܶܝܗ̇ ܐܰܪܥܳܐ. ܠܳܐ ܗܳܟܺܝܠ ‌ܐ̱ܚܪܳܢܝܳܐܺܝܬ ܢܶܗܘܶܐ ܣܺܝܡ ܐ̱ܢܳܫ ܒܬܰܪܥܺܝܬܶܗ܆ ܐܶܠܳܐ ܐܰܝܟ ܗܰܘ ܕܒܶܗ ܒܰܫܡܰܝܳܐ ܒܗܳܢܳܐ ܥܶܕܳܢܳܐ ܩܳܐܶܡ܆ ܘܥܰܡ ܡܰܠܰܐܟ̈ܶܐ ܡܶܬܟܰܢܰܫ܆ ܘܥܰܡ ܚܰܝ̈ܠܰܘܳܬܳܐ ܕܰܠܥܶܠ ‌ܐܰܟܚܕܳܐ ܡܚܰܓܶܐ.

ܡܶܛܽܠ ܕܶܝܢ ܕܗܺܝ ܡܶܠܬܳܐ ܕܡܰܪܬܝܳܢܽܘܬܳܐ܆ ܐܰܝܟ ܗܰܘ ܕܛܶܟܣܳܐ ܐܰܚܺܝܕܳܐ ܕܩܰܕܺܝܡܽܘܬ ܣܽܘܗܳܕܶܐ ܡܶܕܶܡ܆ ܘܰܕܦܽܘܩܕܳܢܳܐ ܕܩܳܕܶܡ ܡܙܰܗܰܪ܆ ܩܳܕܡܳܐ ܓܶܝܪ ܐܳܡܪܳܐ ܘܰܡܣܰܗܕܳܐ ܠܗܳܢܽܘܢ ܕܠܰܣܚܳܬܳܐ ܐܰ‌ܠܳܗܳܝܬܳܐ ܡܶܬܩܰܪܒܺܝܢ ܕܠܳܐ ܬܽܘܒ ܢܶܗܦܟܽܘܢ ܠܒܶܣܬܰܪܗܽܘܢ܆ ܩܰܪܺܝܒܺܝܢ ܗܳܪܟܳܐ ܡܰܠܰܐܟ̈ܶܐ ܟܰܕ ܣܳܗܕܺܝܢ ܠܗܳܠܶܝܢ ܕܰܡܡܰܠܠܺܝܢ ܚ̱ܢܰܢ܆ ܟܰܕ ܠܰܒ̈ܢܳܬ ܩ̈ܳܠܶܐ ܕܰܩܝܳܡ̈ܶܐ ܗܳܢܶܝܢ ܕܰܠܘܳܬ ܡܫܺܝܚܳܐ ܗܳܢܽܘܢ ܡܰܘܕܶܝܢ ܡܰܟܬܒܺܝܢ. ܘܰܦܫܺܝܩܳܐ ܗܳܕܶܐ ܠܡܶܚܙܳܐ܆ ܡܶܢ ܗܳܠܶܝܢ ܕܦܰܘܠܽܘܤ ܥܰܠ ܗܳܝ ܕܕܳܡܝܳܐ ܥܒܰܕ܆ ܟܰܕ ܠܛܺܝܡܳܬܶܐܘܤ ܟܬܰܒ ܗܳܟܰܢܳܐ. ܡܣܰܗܶܕ ܐ̱ܢܳܐ ܠܳܟ ܩܕܳܡ ܐܰ‌ܠܳܗܳܐ ܘܰܡܫܺܝܚܳܐ ܝܶܫܽܘܥ܆ ܘܰܩܕܳܡ ܡܰܠܰܐܟ̈ܶܐ ܓܒܰܝ̈ܳܐ܆ ܐܰܝܟܰܢܳܐ ܕܗܳܠܶܝܢ ܬܶܛܰܪ ܤܛܰܪ ܡܶܢ ܥܶܕܠܳܝܳܐ܆ ܟܰܕ ܠܳܐ ܡܶܕܶܡ ܥܳܒܶܕ ܐܰܢ̱ܬ ܒܡܰܣܰܒ ܒܰܐܦ̈ܶܐ^[6]. ܐܶܠܳܐ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܟܰܕ ܪܳܕܝܳܐ ܡܶܠܬܳܐ܆ ܠܰܘ ܒܰܠܚܽܘܕ ܠܡܰܠܰܐܟ̈ܶܐ܆ ܐܶܠܳܐ ܐܳܦ ܠܶܗ ܠܰܐܠܳܗܳܐ ܘܰܐܒܳܐ ܘܳܐܦ ܠܰܒܪܳܐ܆ ܝܺܕܺܝܥܳܐ ܕܶܝܢ ܕܳܐܦ ܠܪܽܘܚܳܐ ܩܰܕܺܝܫܳܐ ܚܰܘܝܰܬ ܒܰܢ܆ ܕܗܳܟܰܢܳܐ ܠܟܽܠ ܕܽܘܟ ܩܰܪܺܝܒ ܘܰܠܟܽܠ ܡܳܠܶܐ܆ ܒܗܳܕܶܐ ܓܶܝܪ ܡܶܠܬܳܐ ܘܳܐܦ ܒܟܽܠ ‌ܐܺܝܬܰܘܗ̱ܝ܆ ܐܶܠܳܐ ܘܳܐܦ ܒܶܗ ܒܚܽܘܒܳܐ ܘܰܒܫܰܦܺܝܪܽܘܬ ܨܶܒܝܳܢܳܐ ܘܰܒܡܰܥܒܕܳܢܽܘܬܳܐ ܘܰܒܒܰܝܬܳܝܽܘܬܳܐ. ܘܰܕܗܳܕܶܐ ܐܺܝܬܶܝܗ̇ ܬܰܚܘܺܝܬܳܐ ܓܠܺܝܬܳܐ ܒܰܪ̱ܬ ܩܳܠܶܗ ܕܰܡܫܺܝܚܳܐ ܦܳܪܽܘܩܰܢ ܕܳܐܡܪܳܐ܆ ܕܰܐܝܟܳܐ ܕܺܐܝܬ ܬܪܶܝܢ ܐܰܘ ܬܠܳܬܳܐ ܕܰܟܢܺܝܫܺܝܢ ܒܫܶܡܝ܆ ܬܰܡܳܢ ܐܺܝܬܰܝ ܒܰܝܢܳܬܗܽܘܢ^[7]. ܗܽܘ ܐܳܦ ܠܗܳܠܶܝܢ ܕܰܠܬܰܚܬ ܠܗܳܠܶܝܢ ܕܰܠܥܶܠ ‌ܐܰ‌ܠܘܶܬ܆ ܟܰܕ ܫܰܝܶܢ ܒܰܕܡܳܐ ܕܰܨܠܺܝܒܶܗ܆ ܐܶܢ ܟܺܝܬ ܠܗܳܠܶܝܢ ܕܥܰܠ ‌ܐܰܪܥܳܐ܆ ܘܶܐܢ ܠܗܳܠܶܝܢ ܕܒܰܫܡܰܝܳܐ^[8]܆ ܐܰܝܟܰܢܳܐ ܕܰܫܠܺܝܚܳܐ ܟܰܕ ܠܩܽܘܠܳܣܳܝ̈ܶܐ ܟܳܬܶܒ ܗ̱ܘܳܐ ܐܳܡܰܪ.

ܡܰܢܽܘ ܗܳܟܺܝܠ ܕܠܳܐ ܢܶܪܥܰܠ ‌ܐܳܦܶܢ ܢܰܦܫܳܐ ܕܟܺܐܦܳܐ ܢܶܗܘܶܐ ܐܺܝܬ ܠܶܗ܆ ܟܰܕ ܒܰܫܡܰܝܳܐ ܡܰܢ ܡܣܰܒܰܪ ܕܩܳܐܶܡ. ܡܶܬܚܕܰܪ ܕܶܝܢ ܒܰܐܠ̈ܦܶܐ ܘܰܒܪ̈ܶܒܘܳܬܳܐ ܕܡܰܠܰܐܟ̈ܶܐ܆ ܘܠܶܗ ܠܢܽܘܗܪܳܐ ܕܰܬܠܺܝܬܳܝܽܘܬܳܐ ܩܰܕܝܫܬܳܐ ܕܩܰܪܺܝܒ ܠܬܰܡܳܢ ܩܳܪܶܒ ܘܡܶܢܶܗ ܡܶܬܢܗܰܪ. ܐ̱ܪܳܙܳܐ ܓܶܝܪ ܪܰܒܳܐ ܗܰܘ ܕܰܬܠܺܝܬܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܗܰܘ ܕܡܶܢ ܩܕܺܝܡ ܠܚܰܝ̈ܠܰܘܴܬܳܐ ܡܶܬܗܰܘ̈ܢܳܢܶܐ ܘܰܕܠܳܐ ܓܫܽܘܡ܆ ܗܳܠܶܝܢ ܕܰܡܥܰܠܶܝܢ ܡܶܢ ܪ̈ܽܘܚܶܐ ܗܳܠܶܝܢ ܕܫܰܪܟܳܐ܆ ܟܪ̈ܽܘܒܶܐ ܐܳܡܰܪ ܐ̱ܢܳܐ ܘܰܣܪ̈ܳܦܶܐ܆ ܒܰܗܽܘܪܳܐܺܝܬ ܡܰܢ ܡܶܬܚܰܘܶܐ ܗ̱ܘܳܐ܆ ܡܶܬܟܰܣܶܐ ܗ̱ܘܳܐ ܕܶܝܢ܆ ܗܳܫܳܐ ܒܣܶܦ̈ܘܳܬܳܐ ܕܡܶܢ ܛܺܝܢܳܐ ܡܶܬܬܰܘܕܶܐ ܡܶܢܰܢ ܘܡܶܬܺܝܕܰܥ ܐܰܝܟ ܡܳܐ ܕܡܶܬܕܰܪܟܳܐ ܠܰܒܢܰܝ̈ܢܳܫܳܐ܆ ܘܥܰܡ ܦܰܪܶܗ̱ܣܺܝܰܐ ܡܶܬܟܪܶܙ. ܕܰܡܗܰܝܡܢܺܝܢܰܢ ܓܶܝܪ ܡܰܘܕܶܝܢ ܚ̱ܢܰܢ ܒܰܐܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ܆ ܕܗܳܠܶܝܢ ܟܺܝܬ ܕܡܶܬܚܰܙ̈ܝܳܢ ܟܽܠܗܶܝܢ ܘܰܕܗܳܠܶܝܢ ܕܠܳܐ ܡܶܬܚܰܙ̈ܝܳܢ܆ ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܒܪܳܐ ܕܺܝܠܶܗ ܝܺܚܺܝܕܳܝܳܐ܆ ܗܰܘ ܕܰܩܕܳܡ ܟܽܠ ܥܳܠܡܳܐ ܘܰܡܬܽܘܡܳܐܺܝܬ ܡܶܢܶܗ ܐܶܬܺܝܠܶܕ ܗܳܢܰܘ ܕܶܝܢ ܡܶܢ ܐܽܘܣܺܝܰܐ ܕܺܝܠܶܗ ܘܕܰܫܘܶܐ ܒܽܐܘܣܺܝܰܐ ܠܰܐܒܳܐ܆ ܘܰܒܪܽܘܚܳܐ ܩܰܕܺܝܫܳܐ ܗܰܘ ܕܡܶܢ ܐܰܒܳܐ ܕܠܳܐ ܫܽܘܪܳܝܳܐ ܘܰܕܠܳܐ ܙܰܒܢܳܐ ܘܰܡܬܽܘܡܳܐܺܝܬ ܢܳܦܶܩ܆ ܗܰܘ ܫܘܶܐ ܒܽܐܘܣܺܝܰܐ ܠܰܐܒܳܐ ܘܠܰܒܪܳܐ.

ܛܳܒܳܐܺܝܬ ܐܰܪܰܐ ܗܽܘ ܦܰܘܠܽܘܤ ܐܳܡܰܪ ܗ̱ܘܳܐ܆ ܕܶܐܬܝܰܕܥܰܬ ܗܳܫܳܐ ܠܪ̈ܺܝܫܳܢܘܳܬܳܐ ܘܰܠܫܽܘܠ̈ܛܳܢܶܐ܆ ܒܗܳܠܶܝܢ ܫܡܰܝ̈ܳܢܝܳܬܳܐ ܒܝܰܕ ܥܺܕܬܳܐ ܚܶܟܡܬܳܐ ܕܰܐ‌ܠܳܗܳܐ ܗܳܝ ܣܰܓܺܝܰܐܬ ܙܢܰܝ̈ܳܐ^[9]. ܟܪ̈ܽܘܒܶܐ ܓܶܝܪ ܗܳܢܽܘܢ ܕܣܽܘܓܳܐܐ ܕܺܝܕܰܥܬܳܐ ܗܘ̣ܳܐ ܠܗܽܘܢ ܫܡܳܐ܆ ܗܳܕܶܐ ܓܶܝܪ ܡܚܰܘܶܐ ܠܶܫܳܢܳܐ ܗܰܘ ܕܥܶܒܪ̈ܳܝܶܐ܆ ܟܰܕ ܒܦܰܪ̈ܨܽܘܦܶܐ ܣܰܓܺܝ̈ܶܐܐ ܡܶܬܪܰܫܡܺܝܢ܆ ܘܰܒܝܰܕ ܗܳܠܶܝܢ ܡܰܘܕܥܺܝܢ ܠܥܰܬܺܝܪܽܘܬܳܗ̇ ܕܬܶܐܽܘܪܺܝܰܐ܆ ܘܰܒܥܰܝ̈ܢܶܐ ܣܰܓܺܝ̈ܳܐܬܳܐ ܟܽܠܗܽܘܢ ܟܽܘܠܳܢܳܐܺܝܬ ܘܠܰܘ ܡܶܢ ܦܶܠܓܳܐ܆ ܡܗܰܒܒܺܝܢ ܘܡܰܢܗܪܺܝܢ ܒܰܕܡܽܘܬ ܟܰܘ̈ܟܒܶܐ ܕܛܳܒ ܣܰܓܺܝ ܡܰܢܗܪܺܝܢ܆ ܘܰܒܗܳܕܶܐ ܗܳܝ ܕܥܺܝܪܺܝܢ ܘܡܰܢܗܪܺܝܢ ܡܚܰܘܶܝܢ܆ ܘܰܒܣܽܘܓܳܐܐ ܕܓܶܦ̈ܶܐ ܡܶܬܬܪܺܝܡܺܝܢ ܘܦܳܪܚܺܝܢ܆ ܘܡܶܢ ܗܳܪܟܳܐ ܚܰܪܺܝܦܽܘܬܳܐ ܘܩܰܠܺܝܠܽܘܬܳܐ ܘܡܶܬܥܰܠܝܳܢܽܘܬܳܐ ܘܰܕܠܺܝܠܽܘܬ ܡܶܬܬܙܺܝܥܳܢܽܘܬܳܐ ܡܰܘܕܥܺܝܢ܆ ܒܝܰܕ ܓܶܝܪ ܗܳܠܶܝܢ ܚ̈ܙܳܬܶܐ ܦܰܓܪ̈ܳܢܳܝܳܬܳܐ ܘܩܪ̈ܝܬܳܐ܆ ܐܰܝܟ ܕܰܒܝܰܕ ܪ̈ܶܡܙܶܐ ܘܦ̈ܶܠܳܐܬܳܐ ܠܡܶܣܬܰܟܠܳܢܽܘܬܳܐ ܕܗܳܠܶܝܢ ܕܠܳܐ ܓܫܽܘܡ ܩܳܛܦܺܝܢܰܢ܆ ܘܰܕܗܳܟܰܢܳܐ ܐܺܝܬ ܠܗܽܘܢ ܒܰܟܝܳܢܳܐ ܟܺܝܬ ܘܰܒܛܶܟܣܳܐ܆ ܝܺܕܰܥܬܳܐ ܐܰܘ ܟܺܝܬ ܦܰܢܛܰܣܺܝܰܐ ܕܰܕܡܽܘܬܳܐ ܕܫܽܘܒܚܶܗ ܕܡܳܪܝܳܐ ܢܳܓܕܺܝܢ ܗ̱ܘܰܘ ܗܶܢܽܘܢ ܠܗܽܘܢ ܠܘܳܬܗܽܘܢ܆ ܘܒܳܗ̇ ܒܰܠܚܽܘܕ ܒܡܶܫܬܰܘܬܦܳܢܽܘܬܳܐ ܠܡܰܚܣܶܢ ܡܶܬܒܰܣܡܺܝܢ ܗ̱ܘܰܘ܆ ܘܠܰܘ ܒܶܗ ܒܫܽܘܒܚܳܐ܆ ܐܶܠܳܐ ܒܕܽܘܡܝܳܐ ܕܫܽܘܒܚܶܗ ܕܡܳܪܝܳܐ܆ ܫܒܽܘܩ ܟܺܝܬ ܕܒܽܐܘܣܺܝܰܐ ܕܰܐ‌ܠܳܗܳܐ܆ ܡܶܢ ܐܰܝܟܳܐ܆ ܘܠܳܐ ܟܽܠ ܟܽܠܶܗ ܘܠܳܐ ܣܳܟ܆ ܡܰܠܽܘܢ ܕܶܝܢ ܒܣܰܓܺܝܽܐܘܬܳܐ ܡܰܒܥܕܺܝܢ ܘܪܰܚܺܝܩܺܝܢ. ܘܩܰܪܺܝܒܳܐ ܠܡܶܫܡܰܥ܆ ܐܳܦ ܠܳܗ̇ ܠܒܰܪ̱ܬ ܩܠܶܗ ܕܗܰܘ ܕܰܠܗܳܠܶܝܢ ܚܙܳܐ ܕܗܳܟܰܢܳܐ ܐܺܝܬ ܠܗܽܘܢ܆ ܚܰܙܩܝܐܝܠ ܕܶܝܢ ܗܰܘ ܢܒܺܝܳܐ ܐܺܝܬܰܘܗ̱ܝ ܗ̱ܘܳܐ ܗܳܢܳܐ. ܗܳܕܶܐ ܐܳܡܰܪ ܐܺܝܬܶܝܗ̇ ܚܙܳܬܳܐ ܕܰܕܡܽܘܬܳܐ ܕܫܽܘܒܚܶܗ ܕܡܳܪܝܳܐ^[10].

ܐܳܦ ܣܪ̈ܳܦܶܐ ܕܶܝܢ ܗܽܘ ܗܳܟܘܳܬ܆ ܗܳܢܽܘܢ ܟܺܝܬ ܕܟܰܕ ܠܠܶܫܳܢܳܐ ܐܰ‌ܠܕܳܝܳܐ ܡܶܬܦܰܫܩܺܝܢ ܘܥܳܒܪܺܝܢ܆ ܪ̈ܽܘܚܶܐ ܕܰܠܥܶܠ ܩܳܝ̈ܡܳܢ ܘܡܶܫܬܰܡܗܺܝܢ܆ ܐܰܝܟ ܡܳܐ ܟܺܝܬ ܕܳܐܦ ܐܺܝܬܰܝܗܽܘܢ܆ ܡܶܛܽܠ ܗܳܝ ܕܰܐܝܟ ܗܰܘ ܕܰܠܥܶܠ ܩܳܝܡܺܝܢ ܘܝܰܬܺܝܪ ܡܥܰܠܶܝܢ ܡܶܢ ܗܳܠܶܝܢ ܚܰܝ̈ܠܰܘܳܬܳܐ ܐ̱ܚܪ̈ܳܢܶܐ܆ ܘܰܠܘܳܬ ܪܰܘܡܳܐ ܕܬܶܐܽܘܪܺܝܰܐ ܐܰ‌ܠܳܗܳܝܬܳܐ ܟܡܳܐ ܕܡܶܫܟܚܳܐ܆ ܐܳܦ ܩܳܝܡܺܝܢ ܐܳܦ ܡܶܬܡܰܬܚܺܝܢ܆ ܒܗܳܝ ܕܪܳܓܶܝܢ ܘܪܳܚܡܺܝܢ ܠܡܶܬܰܦ ܡܶܕܡ ܝܰܬܺܝܪܳܐ܆ ܡܶܢ ܫܽܘܦܪܳܐ ܟܺܝܬ ܘܢܽܘܗܪܳܐ ܗܰܘ ܠܳܐ ܡܶܬܪܰܢܝܳܢܳܐ ܘܠܳܐ ܡܶܣܬܰܒܥܳܢܳܐ܆ ܟܰܕ ܒܓܶܦ̈ܶܐ ܣܰܓܺܝ̈ܶܐܐ ܐܳܦ ܗܶܢܽܘܢ ܪܨܺܝܦܺܝܢ ܡܶܛܽܠ ܥܶܠܬܳܐ ܗܳܝ ܕܩܰܕܡܶܬ ܐܶܡܪܶܬ܆ ܐܶܫܰܥܝܳܐ ܗܰܘ ܢܒܺܝܳܐ ܐܺܝܬܰܘܗ̱ܝ ܕܰܚܙܳܐ܆ ܘܰܒܗܳܠܶܝܢ ܡܰܢ ܡܶܬܬܪܺܝܡܺܝܢ ܘܦܳܪܚܺܝܢ^[11]܆ ܘܰܒܪܶܓܬܳܐ ܠܘܳܬ ܗܰܘ ܕܰܪܚܺܝܡ ܡܶܣܬܰܪܗܒܺܝܢ ܘܰܐܝܟ ܕܰܠܡܺܐܡܰܪ ܠܗܰܠ ܡܶܢ ܗܰܘ ܠܳܐ ܡܶܬܩܰܕܡܳܢܳܐ ܡܰܚܨܦܺܝܢ ܕܢܶܫܽܘܪܽܘܢ܆ ܒܗܳܠܶܝܢ ܕܶܝܢ ܡܦܰܓܕܺܝܢ ܠܪܶܓܬܳܐ ܕܚܺܐܦܳܐ ܗܰܘ ܕܰܐܝܟ ܕܰܠܩܳܕܡܳܐ ܪܳܗܶܛ ܘܰܡܚܰܦܶܝܢ ܠܦܰܪ̈ܨܽܘܦܰܝܗܽܘܢ܆ ܕܕܰܠܡܳܐ ܟܰܕ ܒܟܽܠܳܗ̇ ܚܙܳܬܳܐ ܡܶܬܩܰܪܒܺܝܢ ܠܗܰܘ ܡܳܐ ܕܣܰܓܺܝ ܡܥܰܠܰܝ ܘܠܳܐ ܢܶܫܟܚܽܘܢ ܠܰܡܣܰܝܒܳܪܽܘ܆ ܐܳܦ ܠܰܡܡܰܫܚܽܘܬܳܐ ܕܡܰܢܗܪܳܢܽܘܬܳܐ ܗܳܝ ܕܢܳܚܬܳܐ ܗ̱ܘܳܬ ܠܗܽܘܢ ܢܰܘܒܕܽܘܢ܆ ܡܶܢ ܗܳܝ ܕܟܽܠܶܗ ܗܳܢܳܐ ܡܶܕܶܡ ܐܺܝܬܰܘܗ̱ܝ ܠܗܽܘܢ ܡܶܬܚܰܙܝܳܢܳܐ܆ ܟܡܳܐ ܕܡܰܨܝ̈ܳܢ ܐܰܦ̈ܶܐ ܠܡܶܚܙܳܐ ܟܰܕ ܡܚܰܦܶܝܢ ܒܓܶܦ̈ܶܐ܆ ܗܳܕܶܐ ܕܶܝܢ ܢܽܘܩܰܙܬܳܐ ܡܶܕܶܡ ܕܢܽܘܗܪܳܐ ܙܥܽܘܪܬܳܐ ܘܰܕܝܰܬܺܝܪ ܥܰܡܽܘܛܳܐ ܡܨܰܠܦܳܐ ܡܚܰܘܝܳܐ܆ ܗܰܘ ܡܳܐ ܓܶܝܪ ܕܥܳܒܰܪ ܠܚܰܝܠܳܐ ܚܰܙܳܝܳܐ܆ ܟܰܕ ܝܰܬܺܝܪ ܟܰܪܝܳܐܺܝܬ ܢܶܬܚܙܶܐ܆ ܫܰܦܺܝܪܳܐ ܕܶܝܢ ܠܡܺܐܡܰܪ ܕܢܶܬܒܥܶܐ ܠܡܶܬܚܙܳܝܽܘ܆ ܐܰܕܥܶܟ ܡܰܠܽܘܢ ܠܰܚܙܳܬܐ ܐܰܘ ܐܰܢܗܰܪ܆ ܡܶܛܽܠ ܕܳܐܦ ܒܰܪܩܳܐ ܐܳܦ ܗܳܕܶܐ ܟܰܕ ܫܳܘܰܪ ܐܳܦ ܪܳܗܶܛ܆ ܩܕܳܡ ܕܢܶܣܬܒܰܪ ܕܡܶܬܚܙܶܐ܆ ܕܬܶܬܥܰܡܰܨ ܥܰܝܢܳܐ ܡܥܰܬܶܕ ܟܰܕ ܒܕܶܚܠܬܳܐ ܩܳܦܶܤ ܠܗ ܠܰܚܙܳܝܳܐ^[12].

ܡܶܛܽܠ ܗܳܕܶܐ ܐܳܦ ܚܰܝ̈ܠܰܘܳܬܳܐ ܗܳܠܶܝܢ ܕܡܶܛܽܠܳܬܗܽܘܢ ܐܺܝܬܶܝܗ̇ ܡܶܠܬܳܐ܆ ܠܰܘ ܕܰܡܟܰܣܶܝܢ ܦܫܺܝܛܳܐܺܝܬ ܦܰܪ̈ܨܽܘܦܰܝܗܽܘܢ ܟܬܺܝܒܳܐ܆ ܐܶܠܳܐ ܕܣܰܓܺܝ ܡܣܰܓܶܝܢ ܡܟܰܣܶܝܢ܆ ܘܰܒܗܳܠܶܝܢ ܓܶܦ̈ܶܐ ܕܫܰܪܟܳܐ ܠܪ̈ܶܓܠܶܐ܆ ܗܳܝ ܟܺܝܬ ܕܕܶܚܠܬܳܐ ܘܣܽܘܪܳܕܳܐ ܡܰܘܕܥܳܐ܆ ܐܳܬܳܐ ܗܝ ܓܶܝܪ ܕܕܶܚܠܬܳܐ ܗܳܕܶܐ܆ ܗܳܝ ܕܗܽܘ ܒܶܗ ܐ̱ܢܳܫ ܢܶܗܘܶܐ ܚܳܐܰܪ ܘܰܠܓܰܘ ܢܶܬܩܦܶܤ.

ܟܰܕ ܒܗܳܢܳܐ ܟܺܝܬ ܙܢܳܐ ܣܪ̈ܳܦܶܐ ܣܕܺܝܪܺܝܢ ܗ̱ܘܰܘ ܠܟܽܘܪܣܝܳܐ ܗܰܘ ܡܰܠܟܳܝܳܐ ܘܰܡܥܰܠܝܳܐ܆ ܡܳܢܳܐ ܐܳܡܰܪ ܐܶܫܰܥܝܳܐ ܕܰܫܡܰܥ ܕܩܳܥܶܝܢ ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܨܒܰܐܘܽܬ^[13]. ܗܳܕܶܐ ܗܳܝ ܬܶܐܘܠܘܓܝܰܐ ܡܫܰܡܠܰܝܬܳܐ܆ ܐܰܘ ܟܺܝܬ ܡܡܰܠܠܽܘܬ ܐܰ‌ܠܳܗܽܘܬܳܐ ܕܰܬܠܺܝܬܳܝܽܘܬܳܐ܆ ܕܗܳܝܕܶܝܢ ܡܰܢ ܡܶܢ ܚܰܝ̈ܠܰܘܳܬܳܐ ܗܳܢܽܘܢ ܥܶܠܳܝ̈ܶܐ ܘܰܕܠܳܐ ܓܫܽܘܡ܆ ܐܰܝܟ ܕܰܒܪܶܡܙܳܐ ܡܶܬܐܰܡܪܳܐ ܗ̱ܘܳܬ ܘܡܶܙܕܰܡܪܳܐ܆ ܐܶܬܓܰܠܝܰܬ ܕܶܝܢ ܗܳܫܳܐ ܘܶܐܣܬܰܟܠܰܬ ܠܗܳܢܽܘܢ ܕܥܳܡܕܺܝܢ ܘܠܰܡܗܰܝܡܳܢܽܘ ܡܰܘܕܶܝܢ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ. ܟܰܕ ܓܶܝܪ ܒܒܰܪܬܩܳܠܳܐ ܬܠܺܝܬܳܝܬܳܐ ܘܫܰܘܝܰܬ ܒܺܐܝܩܳܪܳܐ܆ ܠܰܬܠܳܬܐ ܩܢܽܘ̈ܡܶܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܐ ܦܶܪܫܰܬ܆ ܘܰܠܠܳܐ ܒܠܺܝܠܽܘܬܐ ܕܺܝܠܗܽܘܢ ܒܗܳܕܶܐ ܢܰܗܪܰܬ܆ ܒܗܳܝ ܕܶܐܡܪܰܬ ܩܰܕܺܝܫ ܩܰܕܺܝܫ ܩܰܕܺܝܫ܆ ܗܳܟܰܢܳܐ ܠܰܬܠܳܬܰܝ̈ܗܽܘܢ ܠܰܚܕܳܐ ܡܳܪܽܘܬܳܐ ܘܰܐ‌ܠܳܗܽܘܬܳܐ ܟܰܢܫܰܬ܆ ܒܗܳܝ ܕܰܐܝܬܝܰܬ̣ ܒܳܬܰܪܟܶܢ ܡܳܪܝܳܐ ܨܒܰܐܘܽܬ܆ ܚܕܳܐ ܓܶܝܪ ܐܺܝܬܶܝܗ̇ ܡܳܪܽܘܬܳܐ ܘܰܐ‌ܠܳܗܽܘܬܳܐ ܕܰܬܠܳܬܰܝ̈ܗܽܘܢ ܩܢܽܘܡ̈ܶܐ. ܗܰܘ ܕܶܝܢ ܨܒܰܐܘܽܬ܆ ܕܦܳܠܰܚ̈ܘܳܬܳܐ ܡܰܘܕܰܥ܆ ܗܳܢܰܘ ܕܶܝܢ ܕܛܶܟ̈ܣܶܐ ܟܺܝܬ ܘܰܕܚܰܝ̈ܠܰܘܳܬܳܐ ܗܳܢܽܘܢ ܫܡܰܝܳܢ̈ܶܐ܆ ܡܶܛܽܠ ܕܳܐܦ ܡܳܪܝܳܐ ܐܺܝܬܰܘܗ̱ܝ ܐܳܦ ܐܰ‌ܠܳܗܳܐ܆ ܠܰܘ ܒܰܠܚܽܘܕ ܕܰܒܪܺܝܬܳܐ ܡܶܬܚܰܙܝܳܢܺܝܬܳܐ܆ ܐܶܠܳܐ ܐܳܦ ܕܗܳܝ ܠܳܐ ܡܶܬܚܰܙܝܳܢܺܝܬܳܐ܆ ܗܰܘ ܕܒܰܠܚܽܘܕܳܝܽܘܬܳܐ ܘܒܰܬܠܺܝܬܳܝܽܘܬܳܐ ܡܶܣܬܰܟܰܠ܆ ܐܰܝܟ ܡܣܰܬܬ̣ܳܢܳܐ ܘܒܳܪܽܘܝܳܐ ܘܥܳܒܽܘܕܳܐ. ܗܳܟܰܢܳܐ ܓܶܝܪ ܒܕܽܘܟ ܐܳܦ ܢܒܺܝܳܐ ܗܰܘ ܕܰܡܙܰܡܰܪ ܐܳܡܰܪ܆ ܗܰܘ ܕܥܳܒܶܕ ܠܡܰܠܰܐܟ̈ܶܐ ܕܺܝܠܶܗ ܪ̈ܽܘܚܶܐ ܘܠܰܡܫܰܡ̈ܫܳܢܶܐ ܕܺܝܠܶܗ ܢܽܘܪܳܐ ܕܡܶܬܓܰܘܙܠܳܐ^[14].

ܥܠܰܝ ܕܶܝܢ ܟܰܕ ܡܶܬܒܰܩܶܐ ܐ̱ܢܳܐ ܒܟܽܘܠܳܗ̇ ܡܡܰܠܠܽܘܬ ܫܽܘܒܚܳܐ ܕܰܣܪ̈ܳܦܶܐ܆ ܕܽܘܡܳܪܳܐ ܕܪܶܚܡܰܬ ܐ̱ܢܳܫܽܘܬܶܗ ܕܰܐ‌ܠܳܗܳܐ ܡܶܬܡܬܰܚ ܘܡܶܬܦܪܶܤ. ܐܳܦ ܓܶܝܪ ܠܡ̈ܶܠܶܐ ܗܳܠܶܝܢ ܕܩܰܕܶܡ̈ܝ̱ ܐܶܬܐܡܰܪ̈ܝ̱ ܠܗܳܝ ܕܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܨܒܰܐܘܽܬ܆ ܐܰ‌ܠܘܶܬ ܗܳܝ ܕܡܰܠܝܳܐ ܟܽܠܳ̇ܐ ܐܰܪܥܳܐ ܡܶܢ ܬܶܫܒܽܘܚܬܶܗ¹. ܘܟܰܕ ܛܳܒ ܟܺܝܬ ܕܰܫܡܰܝܳܐ ܝܰܬܺܝܪܳܐܺܝܬ ܙܳܕܶܩ ܗ̱ܘܳܐ ܠܡܺܐܡܰܪ ܕܡܰܠܝܳܐ ܡܶܢ ܬܶܫܒܽܘܚܬܶܗ܆ ܐܶܠܳܐ ܠܳܐ ܐܶܡܰܪ. ܡܶܛܽܠ ܟܺܝܬ ܕܰܠܗܳܝ ܕܠܳܐ ܓܰܠܝܳܐܺܝܬ ܘܒܰܗܽܘܪܳܐܺܝܬ ܗܳܝܕܶܝܢ ܐܰܝܟܰܢܳܐ ܕܶܐܡܰܪܢܰܢ ܠܰܫܡܰܝܳܢ̈ܶܐ ܡܶܬܚܰܘܝܳܐ ܗ̱ܘܳܬ܆ ܒܝܰܘ̈ܡܳܬܳܐ ܐ̱ܚܪ̈ܳܝܶܐ ܟܰܕ ܢܚܶܬ ܝܺܚܺܝܕܳܝܳܐ ܒܪܳܐ ܘܡܶܠܬܳܐ܆ ܘܰܒܗܳܝ ܕܶܐܬܒܰܣܰܪ ܘܶܐܬܒܰܪܢܰܫ ܘܥܰܡܰܢ ܒܢܰܝ̈ܢܳܫܳܐ ܐܶܬܗܰܦܰܟ ܝܺܕܺܝܥܬܳܐ ܥܰܒܕܳܗ̇. ܘܡܶܢ ܡܡܰܠܠܽܘܬ ܫܽܘܒܚܳܐ ܕܒܰܬܠܺܝܬܳܝܽܘܬܳܐ ܠܟܽܘܠܳܗ̇ ܐܰܪܥܳܐ ܡܠܳܐ܆ ܟܰܕ ܠܰܫܡܳܐ ܗܰܘ ܕܰܡܛܰܫܰܝ ܗ̱ܘܳܐ ܘܰܟܣܶܐ ܐܰܟܪܶܙ܆ ܘܟܰܕ ܠܗܰܘ ܡܰܢ ܕܡܶܢܶܗ ܐܺܝܬܰܘܗ̱ܝ ܗ̱ܘܳܐ ܗܽܘ ܩܕܳܡ ܥܳܠ̈ܡܶܐ ܟܰܕ ܝܺܠܺܝܕ܆ ܐܰܒܳܐ ܐܰܘܕܰܥ ܕܺܐܝܬܰܘܗ̱ܝ ܘܡܶܬܶܐܡܰܪ܆ ܗܰܘ ܠܶܗ ܕܶܝܢ ܒܪܳܐ܆ ܘܪܽܘܚܳܐ ܕܰܫܪܳܪܳܐ ܩܰܕܺܝܫܳܐ܆ ܠܗܰܘ ܕܡܶܢ ܐܰܒܳܐ ܢܳܦܶܩ. ܗܳܟܰܢܳܐ ܟܺܝܬ ܐܳܦ ܘܠܰܫ̈ܠܺܝܚܶܐ ܐܳܡܰܪ ܗ̱ܘܳܐ܆ ܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̱ܡ̈ܶܐ܆ ܟܰܕ ܡܰܥܡܕܺܝܢ ܐܢ̱ܬܽܘܢ ܠܗܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ^[15]. ܡܶܛܽܠ ܗܳܕܶܐ ܐܳܦ ܠܘܳܬ ܐܰܒܳܐ ܟܰܕ ܠܘܳܬ ܨܠܺܝܒܳܐ ܥܬܺܝܕ ܗ̱ܘܳܐ ܕܢܺܐܬܶܐ܆ ܐܳܡܰܪ ܗ̱ܘܳܐ܆ ܓܠܺܝܬ̣ ܫܡܳܟ ܠܰܒ̈ܢܰܝ ܐ̱ܢܳܫܳܐ^[16]. ܘܬܽܘܒ ܐܰܒܳܐ ܟܺܐܢܳܐ܆ ܘܥܳܠܡܳܐ ܠܳܐ ܝܰܕܥܳܟ. ܐܶܢܳܐ ܕܶܝܢ ܝܺܕܰܥܬ̊ܳܟ. ܘܳܐܦ ܗܳܠܶܝܢ ܝܺܕܰܥܘ ܕܰܐܢ̱ܬ ܫܰܕܰܪܬܳܢܝ. ܘܰܐܘܕܥܶܬ ܠܗܽܘܢ ܫܡܳܐ ܕܺܝܠܳܟ ܐܳܦ ܐܰ݀ܘܕܰܥ^[17].

ܘܟܰܕ ܛܳܒ ܟܺܝܬ ܠܰܘ ܠܳܐ ܝܺܕܺܝܥܳܐ ܐܺܝܬܰܘܗ̱ܝ ܗ̱ܘܳܐ ܐܰܝܟ ܕܰܠܡܺܐܡܰܪ ܠܟܽܠܗܽܘܢ ܒܢܰܝ̈ܢܳܫܳܐ ܫܡܶܗ ܕܰܐ‌ܠܳܗܳܐ܆ ܐܳܦ ܩܕܳܡ ܡܶܐܬܺܝܬܶܗ ܕܒܰܒܣܰܪ܆ ܐܶܠܳܐ ܕܰܐܒܳܐ ܐܺܝܬܰܘܗ̱ܝ ܗ̱ܘܳܐ ܡܛܰܫܝܳܐ ܗ̱ܘܳܬ ܘܟܰܣܝܳܐ ܗ̱ܘܳܬ. ܬܺܐܡܰܪ ܕܶܝܢ ܟܒܰܪ ܕܳܐܦ ܚܰܢ̈ܦܶܐ ܐܰܒܳܐ ܡܰܘܕܶܝܢ ܗ̱ܘܰܘ ܠܶܗ ܟܰܕ ܐܳܡܪܺܝܢ: ܐܰܒܳܐ ܕܰܒܢܰܝ̈ܢܳܫܳܐ ܟܺܝܬ ܕܰܐ‌ܠܳܗ̈ܶܐ ܟܺܝܬ. ܐܶܠܳܐ ܟܰܕ ܒܪܳܐ ܗܰܘ ܫܰܪܺܝܪܳܐ ܘܰܫܘܶܐ ܒܽܐܘܣܺܝܰܐ ܘܰܕܒܰܟܝܳܢܳܐ ܡܛܰܫܰܝ ܗ̱ܘܳܐ ܘܠܳܐ ܝܺܕܺܝܥ܆ ܡܶܢ ܟܽܠ ܦܪܘܤ ܕܰܓܳܠܳܐܺܝܬ ܡܶܬܬܰܘܕܶܐ ܗ̱ܘܳܐ ܐܰܒܳܐ. ܝܺܕܰܥܬܳܐ ܓܶܝܪ ܕܰܒܪܳܐ܆ ܡܶܬܓܰܠܝܳܢܽܘܬܳܐ ܫܰܪܺܝܪܬܳܐ ܘܠܳܐ ܕܰܓܳܠܬܳܐ ܘܰܕܠܰܝܬ ܥܠܶܝܗ̇ ܚܶܪܝܳܢܳܐ ܐܺܝܬܶܝܗ̇ ܕܰܐܒܳܐ. ܗܰܘ ܓܶܝܪ ܕܰܚܙܳܢܝ ܠܰܐܒܳܐ ܚܙܳܐ ܐܶܡܰܪ^[18]. ܡܶܛܽܠ ܗܳܕܶܐ ܐܶܡܰܪ܆ ܐܰܒܳܐ ܟܺܐܢܳܐ ܘܥܳܠܡܳܐ ܠܳܐ ܝܰܕܥܳܟ. ܐܶܢܳܐ ܕܶܝܢ ܝܺܕܰܥܬܳ̊ܟ.^[19] ܗܳܢܰܘ ܕܶܝܢ ܠܰܘ ܐܰܝܟ ܕܣܳܒܰܪ ܗ̱ܘܳܐ ܥܳܠܡܳܐ ܕܝܳܕܰܥ ܠܳܟ. ܐܶܠܳܐ ܐܰܝܟ ܕܶܐܢܳܐ ܒܰܠܚܽܘܕܰܝ ܝܳܕܰܥ ܐ̱ܢܳܐ܆ ܐܰܘܕܥܶܬ̣ ܫܡܳܟ܆ ܒܝܰܕ ܐܰܝܠܶܝܢ ܕܶܐܬܝܰܕܥܶܬ ܕܰܐܢ̱ܬ ܫܰܕܰܪܬܳܢܝ. ܐܺܝܬܰܝ ܓܶܝܪ ܡܶܢ ܒܳܬܰܪܟܶܢ܆ ܐܳܦ ܗܳܠܶܝܢ ܝܺܕܰܥܘ. ܕܰܐܢ̱ܬ ܫܰܕܰܪܬܳܢܝ². ܐܰܝܟܰܢܳܐ ܟܺܝܬ ܕܡܳܕܶܝܢ ܗܳܝ ܕܶܐܬܺܝܕܰܥ ܒܪܳܐ܆ ܝܺܕܰܥܬܳܐ ܗܘ̣ܳܬ ܕܗܳܝ ܕܳܐܦ ܐܰܒܳܐ ܫܰܪܺܝܪܳܐ ܐܺܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ.

ܠܳܐ ܕܶܝܢ ܐ̱ܢܳܫ ܠܗܳܝ ܕܶܐܡܰܪ ܒܪܳܐ ܠܘܳܬ ܐܰܒܳܐ܆ ܐܶܢܳܐ ܕܶܝܢ ܠܳܟ ܝܶܕܥܶܬ̣܆ ܟܰܕ ܐ̱ܢܳܫܳܐܺܝܬ ܢܳܣܶܒ ܠܳܗ̇ ܢܶܣܒܰܪ ܕܺܝܕܰܥܬܳܐ ܕܰܐܒܳܐ ܗܘ̣ܳܬ ܠܶܗ܆ ܗܳܝ ܕܡܶܢ ܠܳܐ ܝܺܕܰܥܬܳܐ ܗܘ̣ܳܬ ܠܶܗ ܘܰܕܚܰܕܬܳܐܺܝܬ ܐܶܬܩܰܢܝܰܬ. ܐܶܠܳܐ ܦܰܐܺܝܬ ܠܰܐܠܳܗܳܐ ܘܕܰܟܝܳܢܳܐܺܝܬ ܘܰܡܬܽܘܡܳܐܺܝܬ ܐܺܝܬܶܝܗ̇ ܒܶܗ܆ ܐܰܝܟ ܗܳܝ ܕܰܐܡܺܝܪܳܐ ܠܡܰܬܰܝ ܡܶܛܽܠ ‌ܐܰܒܳܐ ܠܳܐ ܐ̱ܢܳܫ ܝܳܕܰܥ ܠܰܒܪܳܐ ܐܶܠܳܐ ܐܶܢ ܐܰܒܳܐ܆ ܘܳܐܦܠܳܐ ܠܰܐܒܳܐ ܐ̱ܢܳܫ ܡܶܫܬܰܘܕܰܥ ܐܶܠܳܐ ܐܶܢ ܒܪܳܐ܆ ܘܗܰܘ ܕܶܐܢ ܢܶܨܒܶܐ ܒܪܳܐ ܕܢܶܓܠܶܐ ܠܶܗ^[20].

ܗܳܕܶܐ ܗܳܝ ܐܺܝܬܶܝܗ̇ ܗ̱ܘܳܬ܆ ܗܳܝ ܟܺܝܬ ܕܰܣܪ̈ܳܦܶܐ ܡܰܙܥܩܺܝܢ ܗ̱ܘܰܘ܆ ܡܰܠܝܳܐ ܟܽܘܠܳܗ̇ ܐܰܪܥܳܐ ܡܶܢ ܬܶܫܒܽܘܚܬܶܗ^[21]. ܐܳܦ ܓܶܝܪ ܟܰܕ ܥܰܠ ‌ܐܰܪܥܳܐ܆ ܐܶܬܦܰܬ̣ܝܰܬ̣ ܗܺܝ ܬܶܫܒܽܘܚܬܳܐ ܒܝܰܕ ܝܺܚܺܝܕܳܝܳܐ܆ ܘܳܐܦ ܠܘܳܬܶܗ ܕܺܝܠܶܗ ܕܰܫܡܰܝܳܐ ܐܶܬܬܪܺܝܡܰܬ̣. ܐܰܝܟܰܢܳܐ ܕܪܶܚܡܰܬ ܐ̱ܢܳܫܽܘܬܳܐ ܗܳܝ ܕܰܠܘܳܬ ܥܺܕܬܳܐ܆ ܥܶܠܬܳܐ ܬܶܗܘܶܐ ܠܪ̈ܽܘܚܳܬܳܐ ܕܰܠܥܶܠ܆ ܕܺܝܕܰܥܬܳܐ ܟܺܝܬ ܕܝܰܬܺܝܪ ܓܰܠܝܳܐ ܘܰܕܡܰܕܪܟܳܢܽܘܬܳܐ. ܕܡܶܢ ܗܳܪܟܳܐ ܐܶܘܢܓܠܝܣܛܐ ܝܽܘܚܰܢܳܢ ܐܳܡܰܪ ܗ̱ܘܳܐ ܕܺܝܚܺܝܕܳܝܳܐ ܒܪܳܐ ܗܰܘ ܕܺܐܝܬܰܘܗ̱ܝ ܒܥܽܘܒܳܐ ܕܰܐܒܳܐ ܗܽܘ ܦܰܫܶܩ^[22]. ܐܳܦ ܓܶܝܪ ܐܺܝܬܶܝܗ̇ ܗ̱ܘܳܬ ܘܠܳܐ ܕܐ̱ܢܳܫ ܡܶܢ ܒܢܰܝ̈ܢܳܫܳܐ܆ ܕܺܝܠܶܗ ܕܶܝܢ ܒܰܠܚܽܘܕܰܘܗ̱ܝ ܟܰܕ ܢܚܶܬ ܥܰܠ ‌ܐܰܪܥܳܐ܆ ܕܰܢܚܰܘܶܐ ܘܢܶܓܠܶܝܘܗ̱ܝ ܠܰܫܡܳܐ ܣܓܺܝܕܳܐ ܗܰܘ ܕܰܬܠܺܝܬܳܝܽܘܬܳܐ. ܘܰܠܗܳܢܳܐ ܠܳܐ ܥܕܰܟܺܝܠ ‌ܐܳܦ ܟܡܳܐ ܕܺܐܝܬܰܘܗ̱ܝ܆ ܐܶܠܳܐ ܟܡܳܐ ܕܠܰܢ ܡܶܬܕܰܪܟܳܐ. ܡܶܛܽܠ ܗܳܕܶܐ ܐܳܦ ܥܰܠ ܕܶܒܚܬܳܐ ܗܳܝ ܪܽܘܚܳܢܳܝܬܳܐ ܘܰܡܠܺܝܠܬܳܐ܆ ܟܰܕ ܗܳܝ ܕܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܨܒܰܐܘܽܬ ܩܳܥܶܝܢ ܚ̱ܢܰܢ^[23]܆ ܘܰܠܡܳܪܽܘܬܳܐ ܗܳܝ ܕܒܰܬܠܳܬܳܐ ܩܢܽܘܡ̈ܶܐ ܚܕܳܐ ܡܰܘܕܶܝܢܰܢ܆ ܘܰܠܬܶܫܒܽܘܚܬܳܐ ܗܳܝ ܕܰܣܪ̈ܳܦܶܐ ܡܡܰܠܶܝܢ ܚ̱ܢܰܢ܆ ܘܨܳܒܶܝܢܰܢ ܠܰܡܚܰܘܳܝܽܘ ܓܰܠܝܳܐܺܝܬ܆ ܕܠܳܐ ܐ̱ܢܳܫ ܐܰ‌ܠܶܦ ܠܰܢ ܠܺܝܕܰܥܬܳܐ ܕܬܰܘܕܺܝܬܳܐ ܕܰܫܡܳܐ ܗܳܢܳܐ܆ ܐܶܠܳܐ ܐܶܢ ܝܺܚܺܝܕܳܝܳܐ ܒܪܳܐ ܒܰܠܚܽܘܕܰܘܗ̱ܝ ܗܰܘ ܕܺܐܝܬܰܘܗ̱ܝ ܒܥܽܘܒܳܐ ܕܰܐܒܳܐ܆ ܗܰܘ ܚܰܕ ܡܶܢ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܗܰܘ ܕܳܐܦ ܐܶܬܒܰܣܰܪ ܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ܆ ܘܰܗܘ̣ܳܐ ܒܰܪܢܳܫܳܐ܆ ܒܩ̈ܳܠܶܐ ܕܩܽܘܕܫܳܐ ܛܰܝܒܽܘܬܳܐ ܡܰܝܬܶܝܢ ܚ̱ܢܰܢ ܒܳܬܰܪܟܶܢ ܡܰܠܽܘܬܳܐܺܝܬ܆ ܡܒܰܪܟܳܐ ܐܺܝܬܰܘܗ̱ܝ ܗܰܘ ܕܶܐܬܳܐ ܘܳܐܬܶܐ ܒܰܫܡܶܗ ܕܡܳܪܝܳܐ. ܟܰܕ ܡܰܘܕܥܺܝܢ ܚ̱ܢܰܢ܆ ܕܶܐ‌ܠܽܘ ܠܳܐ ܗܽܘ ܐܶܬܳܐ܆ ܗܰܘ ܕܳܐܦ ܬܽܘܒ ܥܬܺܝܕ ܠܡܶܐܬܳܐ ܒܰܫܡܶܗ ܕܰܐܒܳܐ܆ ܠܳܐ ܡܶܫܬܘܶܝܢ ܗ̱ܘܰܝܢ ܚܢܰܢ ܕܰܠܗܳܕܶܐ ܙܡܺܝܪܬܳܐ ܕܰܡܡܰܠܠܽܘܬ ܫܽܘܒܚܳܐ ܒܝܰܕ ܦܽܘܡܳܐ ܢܰܦܶܩ܆ ܗܳܝ ܕܰܠܡܰܚܣܶܢ ܘܥܰܡ ܕܶܚܠܬܳܐ ܘܠܳܐ ܡܶܬܡܰܠܠܳܢܳܐܺܝܬ܆ ܡܶܢ ܚܰܝ̈ܠܰܘܳܬܳܐ ܫܡܰܝܳܢ̈ܶܐ ܡܶܙܕܰܡܪܳܐ ܗ̱ܘܳܬ ܘܡܶܬܐܰܡܪܳܐ.

ܘܓܰܘܳܢܳܐܺܝܬ ܠܳܚܡܳܐ ܗ̱ܘܳܬ ܘܣܳܠܩܳܐ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܘܕܺܝܠܳܢܳܐܺܝܬ ܬܽܘܒ ܠܟܽܠ ܚܰܕ ܡܶܢ ܩܢܽܘܡ̈ܶܐ܆ ܘܟܰܕ ܬܠܺܝܬܳܐܺܝܬ ܡܶܬܩܰܕܫܳܐ ܘܟܰܕ ܠܚܽܘܕܳܐܺܝܬ. ܐܳܦ ܓܶܝܪ ܐܶܢ ܐ̱ܢܳܫ ܟܰܕ ܠܘܳܬ ܐܰܒܳܐ ܘܰܠܘܳܬ ܦܰܪܨܽܘܦܶܗ ܠܚܽܘܕܰܘܗ̱ܝ ܐܰܝܟ ܕܐ̱ܢܳܫ ܢܺܐܡܰܪ ܚܳܐܰܪ܆ ܒܰܬܠܳܬܳܐ ܩܽܘܕܫ̈ܶܐ ܠܗܳܢܳܐ ܢܫܰܒܰܚ܆ ܐܰܘ ܬܠܺܝܬܳܝ ܩܽܘܕܫ̈ܶܐ ܢܫܰܡܗܺܝܘܗ̱ܝ܆ ܐܰܘ ܠܰܒܪܳܐ ܕܺܝܠܳܢܳܐܺܝܬ܆ ܐܰܘ ܠܪܽܘܚܳܐ ܩܰܕܺܝܫܳܐ ܡܶܢܶܗ ܘܠܶܗ܆ ܠܳܐ ܢܶܦܰܕ ܕܶܝܢ ܗܳܝ ܕܘܳܠܝܳܐ. ܕܺܝܠܳܢܳܝܳܐ ܓܶܝܪ ܐܺܝܬܰܘܗ̱ܝ ܕܟܽܠܚܰܕ ܡܶܢ ܩܢܽܘܡ̈ܶܐ܆ ܘܳܐܦ ܩܽܘܕܫܳܐ ܗܰܘ ܕܰܠܗܳܠܶܝܢ ܐ̱ܚܪ̈ܳܢܶܐ ܠܳܚܶܡ. ܗܳܠܶܝܢ ܓܶܝܪ ܕܰܡܫܰܘܬܦܺܝܢ ܒܽܐܘܣܺܝܰܐ ܠܰܚ̈ܕܳܕܶܐ܆ ܘܰܚܕܳܐ ܐܺܝܬܰܝܗܽܘܢ ܐܰ‌ܠܳܗܽܘܬܳܐ ܟܺܝܬ ܘܡܳܪܽܘܬܳܐ܆ ܘܳܐܦ ܒܩܽܘܕܫܳܐ ܘܰܒܫܽܘܒܚܳܐ ܡܫܰܘܬܦܺܝܢ ܡܶܢܟܽܠܦܪܽܘܤ܆ ܘܳܐܦ ܒܰܡܡܰܠܠܽܘܬ ܫܽܘܒܚܳܐ ܕܩܽܘܠܳܣܳܐ ܗܳܝ ܕܣܳܠܩܳܐ ܠܗܽܘܢ. ܘܳܐܦ ܬܽܘܒ ܟܰܕ ܟܢܺܝܫܳܐܺܝܬ ܘܰܐܝܟ ܚܕܳܐ ܢܳܣܶܒ ܐ̱ܢܳܫ ܒܗܰܘܢܳܐ ܐܰܝܟ ܕܡܶܫܟܚܳܐ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܠܘܳܬܳܗ̇ ܢܶܡܬܽܘܚ ܘܡܶܠܬܳܐ ܘܬܰܪܥܺܝܬܳܐ܆ ܘܰܠܬܶܫܒܽܘܚܬܳܐ ܗܳܕܶܐ ܬܠܺܝܬܳܝܰܬ ܩܽܘܕܫ̈ܶܐ ܐܰܝܟ ܚܕܳܐ ܢܳܣܶܒ܆ ܟܰܕ ܠܟܽܠ ܚܰܕ ܡܶܢ ܩܢܽܘܡ̈ܶܐ ܠܚܽܘܕܳܐܺܝܬ ܡܰܠܚܶܡ ܠܳܗ̇܆ ܘܰܠܗܰܘ ܗܰܘ ܩܰܕܺܝܫ ܘܰܠܗܰܘ ܐ̱ܚܪܺܢܳܐ ܗܰܘ ܩܰܕܺܝܫ ܐ̱ܚܪܺܢܳܐ ܘܰܠܗܰܘ ܐ̱ܚܪܺܢܳܐ ܗܰܘ ܩܰܕܺܝܫ ܐ̱ܚܪܺܢܳܐ^[24]܆ ܡܶܢ ܗܳܝ ܕܰܬܪܺܝܨܳܐܺܝܬ ܐܺܝܬ ܠܳܗ̇܆ ܠܳܐ ܢܶܦܶܠ. ܠܳܗ̇ ܓܶܝܪ ܟܰܕ ܠܳܗ̇ ܠܰܡܡܰܠܠܽܘܬ ܫܽܘܒܚܳܐ܆ ܐܳܦ ܓܰܘܳܢܳܝܬܳܐ ܥܳܒܕܳܐ ܠܳܗ̇ ܗܳܝ ܕܰܚܕܳܐ ܘܗ̱ܝ ܟܰܕ ܗܺܝ ܕܽܐܘܣܺܝܰܐ܆ ܘܰܡܦܰܪܫܳܐ ܠܳܗ̇܆ ܠܳܐ ܒܠܺܝܠܽܘܬܗܽܘܢ ܘܕܺܝܠܳܢܳܝܽܘܬܗܽܘܢ ܕܰܩܢܽܘܡ̈ܶܐ.

ܟܰܕ ܗܳܕܶܐ ܝܺܕܰܥܬܳܐ ܥܬܺܝܕܳܐ ܗ̱ܘܳܬ ܕܬܶܚܽܘܬ ܠܘܳܬܰܢ܆ ܣܪ̈ܳܦܶܐ ܐܳܡܪܺܝܢ ܗ̱ܘܰܘ܆ ܕܡܰܠܝܳܐ ܟܽܠܳܗ̇ ܐܰܪܥܳܐ ܡܶܢ ܬܶܫܒܽܘܚܬܶܗ. ܟܰܕ ܓܶܝܪ ܩܰܒܠܰܬ ܠܡܶܐܬܺܝܬܳܐ ܫܰܪܺܝܪܬܳܐ ܘܰܕܒܰܒܣܰܪ ܕܰܐ‌ܠܳܗܳܐ܆ ܐܰܝܟܰܢܳܐ ܠܳܐ ܥܬܺܝܕܳܐ ܗ̱ܘܳܬ ܕܬܶܬܡ̣ܰܠܶܐ ܬܶܫܒܽܘܚܬܳܐ܆ ܘܬܶܬܦܰܚܰܡ ܒܪܰܒܽܘܬ ܢܰܦܫܳܐ ܠܽܘܩܒܰܠ ܫܡܰܝܳܐ܆ ܘܰܬܚܰܠܶܦ ܛܶܟܣܳܐ܆ ܘܰܕܬܰܣܶܩ ܡܡܰܠܠܽܘܬ ܫܽܘܒܚܳܐ ܘܺܝܕܰܥܬܳܐ ܕܝܰܬܺܝܪ ܡܫܰܡܠܝܳܐ܆ ܗܳܝ ܕܙܳܕܶܩ ܗ̱ܘܳܐ ܕܡܶܢ ܠܥܶܠ ܬܚܽܘܬ.

ܟܽܠܶܗ ܗܳܢܳܐ ܐܺܝܬܰܘܗ̱ܝ ܥܽܘܬܪܳܐ ܗܰܘ ܕܶܐܫܰܕ ܥܠܰܝܢ ܗܰܘ ܕܣܰܪܶܩ ܗܽܘ ܠܶܗ^[25]܆ ܠܰܘ ܒܗܳܝ ܕܰܐܪܚܶܩ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܡܰܠܝܳܐ܆ ܐܶܠܳܐ ܒܗܳܝ ܕܨܶܒܝܳܢܐܺܝܬ ܐܶܬܡܰܣܟܰܢ ܘܒܰܙܥܽܘܪܽܘܬܳܐ ܕܺܝܠܰܢ ܐܶܫܬܰܘܬܰܦ܆ ܐܰܝܟܰܢܳܐ ܕܢܶܗܘܶܐ ܚܢܰܢ ܡ̈ܠܰܝܳܐ ܚܠܳܦ ܣܦܺܝ̈ܩܶܐ܆ ܘܰܚܠܳܦ ܡܶܣ̈ܟܺܢܶܐ ܥܰܬܺܝܪ̈ܶܐ.

ܟܰܕ ܠܗܳܢܳܐ ܥܽܘܬܪܳܐ ܘܛܰܝܒܽܘܬܳܐ ܡܠܺܝܬܳܐ ܘܰܫܦܺܝܥܬܳܐ܆ ܐܶܫܰܥܝܳܐ ܢܒܺܝܳܐ ܩܰܕܶܡ ܗ̱ܘܳܐ ܡܰܟܪܶܙ ܐܳܡܰܪ ܗ̱ܘܳܐ܆ ܕܶܐܬܡܰܠܝܰܬ ܟܽܠܳܗ̇ ܐܰܪܥܳܐ ܗܳܝ ܕܢܶܕܥܽܘܢ ܠܡܳܪܝܳܐ܆ ܐܰܝܟ ܡܰܝ̈ܳܐ ܣܰܓܺܝ̈ܶܐܐ ܕܰܡܟܰܣܶܝܢ ܠܝܰܡ̱̈ܡܶܐ^[26]. ܡܶܢ ܗܳܕܶܐ ܬܶܫܒܽܘܚܬܳܐ ܕܺܐܝܬܶܝܗ̇ ܣܰܓܺܝ ܝܰܬܺܝܪ ܡܠܺܝܬܳܐ ܘܰܡܡܰܠܠܽܘܬ ܫܽܘܒܚܳܐ ܡܫܰܡܠܰܝܬܳܐ܆ ܠܗܳܝ ܕܙܳܡܪܺܝܢ ܗ̱ܘܰܘ ܡܰܢ ܐ̱ܪܳܙܳܢܳܐܺܝܬ ܐܳܦ ܙܳܡܪܺܝܢ܆ ܣܪ̈ܳܦܶܐ ܥܰܡ ܚܰܝ̈ܠܰܘܳܬܳܐ ܗܳܢܽܘܢ ܕܩܰܪܺܝܒܺܝܢ^[27] ܠܗܽܘܢ܆ ܓܠܳܗ̇ ܕܶܝܢ ܠܗܳܢܽܘܢ ܕܥܰܠ ‌ܐܰܪܥܳܐ ܗܽܘ ܝܺܚܺܝܕܳܝܳܐ܆ ܗܳܝ ܕܒܺܐܝ̈ܕܶܝܗ̇ ܕܳܡܝܳܐܺܝܬ ܘܠܳܐ ܒܠܺܝܠܳܐܺܝܬ ܘܠܳܐ ܦܣܺܝܩܳܐܺܝܬ ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ ܒܽܐܘܣܺܝܰܐ܆ ܡܶܬܬܰܘܕܝܳܐ ܟܺܝܬ ܘܡܶܫܬܰܒܚܳܐ܆ ܠܳܐ ܢܶܪܚܰܩ. ܐܶܠܳܐ ܚܠܺܝܡܳܐܺܝܬ ܘܰܒܟܽܠܶܗ ܚܰܝܠܐ ܢܶܐܚܕܶܝܗ̇܆ ܟܰܕ ܠܳܐ ܡܶܕܶܡ ܡܶܢ ܬܠܺܝܬܳܝܽܘܬܳܐ ܩܰܕܺܝܫܬܳܐ ܠܬܰܚܬ ܣܳܝܡܺܝܢܰܢ. ܐܶܠܳܐ ܟܰܕ ܒܫܰܘܝܽܘܬ ܐܺܝܩܳܪܳܐ ܐܰܝܟ ܫܰܘܝܰܬ ܒܽܐܘܣܺܝܰܐ܆ ܥܰܡ ܚܰܝ̈ܠܰܘܳܬܳܐ ܗܳܢܽܘܢ ܕܰܠܥܶܠ ܡܩܰܠܣܺܝܢ ܚ̱ܢܰܢ ܠܳܗ̇ ܟܺܝܬ ܘܰܡܫܰܒܚܺܝܢܰܢ܆ ܘܠܰܘ ܟܰܕ ܫܳܛܶܝܢ ܚ̱ܢܰܢ ܥܰܡ ܫܳܛܽܘܪ̈ܘܳܬܳܐ ܕܰܐܪܺܝܽܘܤ܆ ܗܳܠܶܝܢ ܕܡܶܬܟܰܬܫ̈ܳܢ ܘܡܰܩܪ̈ܒܳܢ ܐܳܦ ܠܩܽܘܒܠܳܗ̇ ܕܰܡܡܰܠܠܽܘܬ ܫܽܘܒܚܳܐ ܕܰܣܪ̈ܳܦܶܐ܆ ܘܰܡܡ̈ܠܠܴܢ ܥܰܘܠܳܐ ܒܰܡܪ̈ܰܘܡܶܐ ܐܰܝܟ ܗܳܝ ܕܰܐܡܺܝܪܳܐ ܠܰܢܒܺܝܳܐ ܕܰܘܺܝܕ^[28].

ܟܰܕ ܓܶܝܪ ܡܰܚܬܺܝܢ ܠܶܗ ܐܰܝܟ ܕܡܶܢ ܨܶܐܕܰܝܗܽܘܢ ܠܺܝܚܺܝܕܳܝܳܐ ܡܶܠܬܳܐ܆ ܗܰܘ ܕܰܐܟܚܕܳܐ ܡܰܡܠܶܟ ܥܰܡ ܐܰܒܳܐ ܘܰܐܟܚܕܳܐ ܝܳܬܶܒ܆ ܡܶܢ ܬܪܽܘܢܘܤ ܡܰܠܟܳܝܳܐ܆ ܥܰܡ ܒܶܪ̈ܝܳܬܳܐ ܐܰܟܚܕܳܐ ܡܳܢܶܝܢ ܠܶܗ܆ ܘܥܰܡ ܪ̈ܽܘܚܶܐ ܡܫܰܡ̈ܫܳܢܝܳܬܳܐ ܗܳܠܶܝܢ ܕܒܰܫܡܰܝܳܐ܆ ܐܰܝܟ ܐܰܝܢܳܐ ܕܡܶܢ ܗܳܠܶܝܢ ܕܠܳܐ ܐܺܝܬܰܝܗܶܝܢ ܗܳܘܶܐ܆ ܘܠܰܘ ܡܬܽܘܡܳܐܺܝܬ ܐܺܝܬܰܘܗ̱ܝ ܐܰܟܚܕܳܐ ܥܰܡ ܐܰܒܳܐ. ܘܳܐܡܪܺܝܢ ܕܦܰܘܠܽܘܤ ܠܰܒܪܳܐ ܒܽܘܟܪܳܐ ܕܟܽܘܠܳܗ̇ ܒܪܺܝܬܳܐ ܩܪܳܝܗ̱ܝ ^[29]. ܐܰܢܰܢܩܺܐ ܗܳܟܺܝܠ ‌ܐܳܡܪܺܝܢ܆ ܐܰܝܟ ܐܰܚܳܐ ܕܒܶܪ̈ܝܳܬܳܐ܆ ܕܰܕܟܽܠܳܗ̇ ܒܪܺܝܬܳܐ ܢܶܫܬܰܡܰܗ ܒܽܘܟܪܳܐ. ܕܗܳܠܶܝܢ ܢܺܐܡܪܽܘܢ܆ ܠܰܘ ܕܰܐ̱ܚܪ̈ܳܢܶܐ ܐܺܝܬܶܝܗ̇܆ ܐܶܠܳܐ ܕܗܳܢܽܘܢ ܕܫܰܢܺܝ̣ܺܝ̣ܢ ܘܩܳܝܡܺܝܢ ܣܰܩܽܘܒܠܳܐܺܝܬ ܠܽܘܩܒܰܠ ܟܝܳܢܳܐ ܘܛܶܟܣܳܐ ܕܣܽܘܥܪ̈ܳܢܶܐ. ܐܳܦ ܓܶܝܪ ܙܳܕܶܩ ܗ̱ܘܳܐ ܠܗܽܘܢ܆ ܕܳܐܦ ܡܶܢܳܗ̇ ܕܰܐܝܢܳܝܽܘܬܗܶܝܢ ܕܠܶܟܣܺܝ̈ܤ ܘܡܰܦܩܳܢܗܶܝܢ^[30] ܕܡ̈ܶܠܶܐ܆ ܢܶܬܗܰܕܽܘܢ ܠܘܳܬ ܣܽܘ̈ܟܳܠܶܐ ܕܰܦܐܶܝܢ ܠܣܽܘܥܪ̈ܳܢܶܐ ܗܳܠܶܝܢ ܕܣܺܝܡܺܝܢ ܩܕܳܡܰܝܢ܆ ܘܰܢܕܽܘܢܽܘܢ ܠܫܽܘܚ̈ܠܳܦܶܐ ܕܺܝܠܗܽܘܢ ܘܢܶܕܥܽܘܢ ܓܰܠܝܳܐܺܝܬ܆ ܕܰܫܡܳܐ ܡܰܢ ܕܒܽܘܟܪܐ܆ ܠܺܝܠܺܝܕܽܘܬܳܐ ܡܫܰܘܕܰܥ܆ ܘܰܠܗܺܝܟܰܕܗܺܝܽܘܬܳܐ ܕܽܐܘܣܺܝܰܐ ܘܕܰܟܝܳܢܳܐ. ܡܺܐܠܰܕ ܓܶܝܪ ܝܳܠܶܕ ܠܶܗ ܐ̱ܢܳܫ ܠܰܒܪܳܐ ܗܰܘ ܕܡܶܢܶܗ܆ ܘܠܰܘ ܡܶܥܒܰܕ ܥܳܒܶܕ ܠܶܗ. ܫܡܳܐ ܕܶܝܢ ܗܰܘ ܕܰܒܪܺܝܬܳܐ܆ ܠܰܥܒܺܝܕܽܘܬܳܐ ܡܫܰܘܕܰܥ. ܥܒܳܕܳܐ ܓܶܝܪ ܐܺܝܬܶܝܗ̇ ܒܪܺܝܬܳܐ ܟܽܠܳܗ̇܆ ܐܳܦ ܗܳܝ ܕܠܳܐ ܡܶܬܚܰܙܝܳܐ ܘܳܐܦ ܗܳܝ ܡܶܬܚܰܙܝܳܢܺܝܬܳܐ. ܐܰܝܟܰܢܳܐ ܗܳܟܺܝܠ ‌ܐܺܝܬܶܝܗ̇܆ ܕܗܽܘ ܟܰܕ ܗܽܘ ܐܳܦ ܐܰܝܟ ܒܪܳܐ ܒܽܘܟܪܳܐ ܢܶܗܘܶܐ ܐܺܝܬܰܘܗ̱ܝ܆ ܘܳܐܦ ܐܰܝܟ ܥܒܳܕܳܐ ܢܶܬܛܰܟܰܤ ܐܰܟܚܕܳܐ ܘܢܶܬܡܢܶܐ ܥܰܡ ܒܶܪ̈ܝܳܬܳܐ. ܐܶ‌ܠܽܘ ܓܶܝܪ ܗܳܕܶܐ ܨܳܒܶܐ ܗ̱ܘܳܐ ܦܰܘܠܽܘܤ܆ ܕܰܢܚܰܘܶܝܘܗ̱ܝ ܕܩܰܕܡܳܝ ܗܘ ܡܶܢ ܒܪܺܝܬܳܐ܆ ܥܬܺܝܕ ܗ̱ܘܳܐ ܠܡܺܐܡܰܪ ܒܽܘܟܪܳܐ ܕܗܳܝ ܒܪܺܝܬܳܐ ܐ̱ܚܪܺܬܳܐ܆ ܐܰܘ ܕܗܳܝ ܒܪܺܝܬܳܐ ܕܫܰܪܟܳܐ. ܗܳܝ ܕܶܝܢ ܕܟܽܘܠܳܗ̇ ܒܪܺܝܬܳܐ ܡܚܰܘܝܳܐ ܠܳܗ̇܆ ܕܡܶܕܡ ܗܘ ܕܰܦܪܺܝܫ ܘܰܡܒܰܪܰܝ ܘܰܠܒܰܪ ܡܶܢ ܟܽܠܳܗ̇ ܒܪܺܝܬܳܐ ܐܺܝܬܰܘܗ̱ܝ܆ ܐܰܝܟ ܐܰܝܢܳܐ ܕܰܩܕܳܡ ܟܽܘܠ ܥܳܠ̈ܡܶܐ ܝܺܠܺܝܕ ܘܠܰܘ ܡܶܥܒܰܕ ܥܒܺܝܕ. ܚܰܕ ܓܶܝܪ ܡܶܕܶܡ ܡܰܢ ܟܽܘܠܳܗ̇ ܒܪܺܝܬܳܐ ܐܺܝܬܰܝܗܽܘܢ ܐܳܦ ܗܶܢܽܘܢ ܥܳܠ̈ܡܶܐ܆ ܠܗܳܢܽܘܢ ܕܒܺܐܝܕܰܘ̈ܗ̱ܝ ܥܰܡ ܗܳܠܶܝܢ ܐ̱ܚܪ̈ܳܢܝܳܬܳܐ ܥܒܰܕ ܐܶܢܽܘܢ ܐܰܒܳܐ. ܐܺܝܬܰܘܗ̱ܝ ܓܶܝܪ ܨܶܡܚܳܐ ܕܬܶܫܒܽܘܚܬܳܐ܆ ܘܨܰܠܡܳܐ ܕܰܩܢܽܘܡܶܗ ܕܰܐܒܳܐ^[31]܆ ܕܠܳܐ ܡܰܪܚܩܳܢܳܐܺܝܬ ܘܰܡܬܽܘܡܳܐܺܝܬ ܨܡܰܚ ܡܶܢ ܐܽܘܣܺܝܰܐ ܕܺܝܠܶܗ. ܐܶ‌ܠܽܘ ܕܶܝܢ ܒܰܪܝܳܐ ܐܺܝܬܰܘܗ̱ܝ ܗ̱ܘܳܐ ܐܰܘ ܥܒܺܝܕܳܐ܆ ܩܕܳܡ ܗܳܠܶܝܢ ܒܶܪ̈ܝܳܬܳܐ ܐ̱ܚܪ̈ܳܢܝܳܬܳܐ ܡܶܢ ܟܽܠܳܗ̇ ܐܰܢܰܢܩܺܐ܆ ܒܰܡܢܳܬܳܐ ܡܶܕܶܡ ܘܰܐܝܟ ܒܛܰܘܪܳܐ ܙܰܒܢܳܝܳܐ ܕܥܳܠ̈ܡܶܐ ܘܰܐܝܟ ܕܐ̱ܢܳܫ ܢܶܣܒܰܪ ܪ̈ܦܳܦܶܐ ܙܥܽܘܪ̈ܐ ܕܙܰܒܢܳܐ܆ ܥܒܺܝܕ ܗ̱ܘܳܐ ܘܰܒܪܶܐ. ܡܳܕܶܝܢ ܕܺܝܠܳܗ̇ ܕܗܳܝ ܡܢܳܬܳܐ܆ ܠܳܐ ܢܶܗܘܶܐ ܐܺܝܬܰܘܗ̱ܝ ܥܳܒܽܘܕܳܐ ܗܽܘ ܒܪܳܐ܆ ܗܰܘ ܝܺܚܺܝܕܳܝܳܐ (؟) ܕܰܕܥܳܒܽܘܕܰܐ ܗܘ ܕܥܳܠ̈ܡܶܐ^[32]܆ ܡܟܬܒ.

ܐ̱ܚܪܳܢܝܳܐܺܝܬ ܕܶܝܢ ܟܺܝܬ ܐܶܢ ܐܰܝܟ ܐܰܚܳܐ ܕܒܶܪ̈ܝܳܬܳܐ ܡܰܣܒܪܺܝܢ ܥܠܰܘܗ̱ܝ ܕܶܐܬܶܐܡܰܪ ܒܽܘܟܪܳܐ ܕܟܽܠܳܗ̇ ܒܪܺܝܬܳܐ܆ ܘܠܰܘ ܐܰܝܟ ܐܰܝܢܳܐ ܕܰܩܕܳܡ ܟܽܠ ܥܳܠ̈ܡܶܐ ܝܺܠܺܝܕ. ܐܰܝܟܰܢܳܐ ܗܰܘ ܕܰܐܚ̈ܶܐ ܣܰܓܺܝ̈ܶܐܐ ܐܺܝܬ ܠܶܗ܆ ܘܥܰܡ ܗܳܠܶܝܢ ܒܶܪ̈ܝܳܬܳܐ ܐ̱ܚܪ̈ܳܢܝܳܬܳܐ ܐܰܝܟ ܚܕܳܐ ܡܛܰܟܰܤ܆ ܫܰܪܺܝܪܳܐܺܝܬ ܢܶܬܩܪܶܐ ܝܺܚܺܝܕܳܝܐ. ܗܽܘ ܓܶܝܪ ܟܰܕ ܗܽܘ ܐܳܦ ܝܺܚܺܝܕܳܝܳܐ ܐܰܡܺܝܪ ܘܳܐܦ ܒܽܘܟܪܳܐ܆ ܐܰܝܟܰܢܳܐ ܕܰܒܝܰܕ ܫܡܳܐ ܗܰܘ ܕܺܝܚܺܝܕܳܝܳܐ܆ ܢܶܕܚܽܘܩ ܠܬܰܪܥܺܝܬܳܐ ܫܟܺܝܪܬܳܐ ܗܳܝ ܕܡܶܢ ܫܡܳܐ ܕܒܽܘܟܪܳܐ܆ ܘܰܕܠܰܐܠܳܗܳܐ ܠܳܐ ܦܰܐܝܳܐ. ܟܰܕ ܗܳܝ ܒܰܠܚܽܘܕ ܕܰܩܕܳܡ ܟܽܠ ܥܳܠ̈ܡܶܐ ܝܺܠܺܝܕ ܡܶܣܬܰܟܠܺܝܢ ܚ̱ܢܰܢ܆ ܠܳܐ ܕܶܝܢ ܬܽܘܒ ܡܶܢ ܗܳܪܟܳܐ܆ ܐܰܝܟ ܗܰܘ ܕܰܐܚ̈ܘܳܬܳܐ ܕܺܝܠܶܗ ܐܺܝܬܰܝܗܶܝܢ ܗܳܠܶܝܢ ܒܶܪ̈ܝܳܬܳܐ ܐ̱ܚܪ̈ܳܢܝܳܬܳܐ܆ ܩܳܕܡܺܝܢܰܢ ܡܛܰܟܣܺܝܢܰܢ ܠܶܗ ܘܩܳܕܡܺܝܢܰܢ ܡܝܰܩܪܺܝܢܰܢ ܠܶܗ܆ ܩܰܕܺܝܡܽܘܬ ܐܺܝܩܳܪܳܐ ܗܳܝ ܕܠܳܐ ܐܰ‌ܠܳܗ. ܗܳܝ ܓܶܝܪ ܕܒܽܘܟܪܳܐ ܕܟܽܠܳܗ̇ ܒܪܺܝܬܳܐ܆ ܕܰܡܕܰܚܩܳܢܽܘܬܳܐ ܘܦܽܘܪܳܫܳܐ ܘܡܰܪܚܩܳܢܽܘܬܳܐ ܐܺܝܬܶܝܗ̇܆ ܘܠܰܘ ܕܫܰܘܬܳܦܽܘܬܳܐ ܘܰܕܕܳܡܝܽܘܬܳܐ܆ ܐܰܝܟܰܢܳܐ ܟܺܝܬ ܕܰܩܕܳܡ ܗܳܠܶܝܢ ܕܕܳܡ̈ܝܳܢ ܠܶܗ ܢܶܩܕܽܘܡ ܢܶܬܛܰܟܰܤ. ܗܳܝ ܟܺܝܬ ܕܡܶܛܽܘܠܳܬܳܗ̇ ܕܡܶܬܒܰܪܢܫܳܢܽܘܬܳܐ ܟܰܕ ܐܶܫܬܰܘܬܰܦ ܠܰܢ ܒܳܗ̇ ܟܰܕ ܒܳܗ̇ ܒܽܐܘܣܺܝܰܐ܆ ܘܰܒܟܽܠܗܶܝܢ ܩܰܒܶܠ ܥܠܰܘܗ̱ܝ ܕܳܡܝܽܘܬܳܐ ܗܳܝ ܕܰܠܘܳܬܰܢ ܤܛܰܪ ܡܶܢ ܚܛܺܝܬܳܐ܆ ܘܳܠܝܳܐܺܝܬ ܐܰܡܺܝܪܳܐ ܕܰܗܘ̣ܳܐ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ^[33]܆ ܐܰܝܟ ܐܳܕܳܡ ܬܪܰܝܳܢܳܐ ܕܓܶܢܣܳܐ ܕܺܝܠܰܢ܆ ܘܒܽܘܟܪܳܐ ܕܡܶܢ ܡܺܝ̈ܬܶܐ^[34]܆ ܐܰܝܟ ܪ̈ܺܝܫܝܳܬܳܐ ܕܰܓܒܺܝܠܽܘܬܳܐ ܕܺܝܠܰܢ ܕܡܶܢ ܕܪܺܝܫ ܘܕܰܩܝܳܡܬܳܐ ܕܰܠܠܳܐ ܡܶܬܚܰܒܠܳܢܽܘܬܳܐ. ܐܺܝܢ ܐܳܡܰܪ.

ܐܶܠܳܐ ܗܽܘ ܒܶܐܘܰܢ̈ܓܶܠܺܝܰܐ ܓܰܠܝܳܐܺܝܬ ܐܶܡܰܪ܆ ܕܰܐܒܳܐ ܕܺܝܠܝ ܪܰܒ ܗ̱ܘ̣ ܡܶܢܝ^[35]. ܐܶܠܳܐ ܙܳܕܶܩ ܗ̱ܘܳܐ܆ ܕܡܶܢܗܽܘܢ ܟܰܕ ܡܶܢܗܽܘܢ ܕܶܐܘܰܢ̈ܓܶܠܺܝܰܐ܆ ܠܰܘ ܡܫܳܟ̣ܳܐܺܝܬ ܬܶܫܡܥܺܝܘܗ̱ܝ ܕܳܐܡܰܪ܆ ܕܰܐܒܳܐ ܗܰܘ ܕܝܰܗ̱ܒ ܠܺܝ ܕܝܰܬܺܝܪ ܪܰܒ ܡܶܢ ܟܽܠ ‌ܐܺܝܬܰܘܗ̱ܝ܆ ܘܠܳܐ ܐ̱ܢܳܫ ܡܶܫܟܰܚ ܠܡܶܚܛܰܦ ܡܶܢ ܐܺܝܕܶܗ ܕܳܐܒܝ܆ ܐܶܢܳܐ ܘܳܐܒܝ ܚܰܕ ܐܺܝܬܰܝܢ^[36]. ܡܶܛܽܠ ܓܶܝܪ ܕܟܰܕ ܒܰܪܢܳܫܳܐ ܗܘ̣ܳܐ ܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ܆ ܚܰܕ ܡܶܢ ܟܽܠܗܶܝܢ ܗܘ̣ܳܐ܆ ܘܰܒܟܽܠܗܶܝܢ ܐܶܬܚܫܶܒ܆ ܝܺܕܺܝܥܳܐ ܕܶܝܢ ܕܰܒܗܳܠܶܝܢ ܕܡܶܢ ܒܳܬܰܪ ܐܰ‌ܠܳܗܳܐ ܡܶܬܪܢܶܝܢ܆ ܟܰܕ ܠܳܐ ܫܕܳܐ ܡܶܢܶܗ ܠܰܡܥܰܠܝܽܘܬܳܐ ܐܰ‌ܠܳܗܳܝܬܳܐ܆ ܒܗܳܕܶܐ ܕܪܰܒ ܡܶܢܶܗ ܐܳܡܰܪ ܠܶܗ ܠܰܐܒܳܐ܆ ܒܗܳܝ ܕܳܐܦ ܡܶܢ ܟܽܠܗܶܝܢ܆ ܕܝܰܬܺܝܪ ܪܰܒ ܐܺܝܬܰܘܗ̱ܝ܆ ܕܡܶܢ ܗܳܪܟܳܐ ܐܳܦ ܕܶܐܬܺܝ̈ܗܶܒܝܢ ܠܶܗ ܡܶܢ ܐܰܒܳܐ ܐܳܡܰܪ܆ ܗܳܠܶܝܢ ܟܺܝܬ ܕܺܐܝܬ ܗ̱ܘܰܝ̈ ܠܶܗ܆ ܘܗܳܠܶܝܢ ܕܡܳܪܳܐ ܕܺܝܠܗܶܝܢ ܐܺܝܬܰܘܗ̱ܝ ܗ̱ܘܳܐ ܐܰܝܟ ܐܰ‌ܠܳܗܳܐ. ܒܗܳܝ ܕܶܝܢ ܕܗܺܝ ܟܰܕ ܗܺܝ ܕܽܐܘܣܺܝܰܐ܆ ܐܶܢܳܐ ܐܳܡܰܪ ܐܳܦ ܐܰܒܳܐ ܚܰܕ ܐܺܝܬܰܝܢ. ܗܳܟܰܢܳܐ ܗܳܝ ܡܰܢ ܕܪܰܒ܆ ܕܰܡܕܰܒܪܳܢܽܘܬܳܐ ܗܳܝ ܕܰܒܡܶܬܒܰܪܢܫܳܢܽܘܬܳܐ ܐܺܝܬܶܝܗ̇. ܗܳܝ ܕܶܝܢ ܕܚܰܕ܆ ܕܫܰܘܝܽܘܬ ܐܺܝܩܳܪܳܐ ܕܒܰܐܠܳܗܽܘܬܳܐ. ܡܶܛܽܠ ܗܳܕܶܐ ܐܳܦ ܟܰܕ ܡܶܬܥܰܣܰܩ ܗ̱ܘܐ ܠܘܳܬ ܗܳܝ ܕܶܐܬܐܰܡܪܰܬ܆ ܥܰܡܳܐ ܚܰܣܳܡܳܐ ܘܢܳܨܶܐ ܥܰܡ ܐܰ‌ܠܳܗܳܐ ܗܰܘ ܕܝܽܗ̱ܘ̈ܕܳܝܶܐ܆ ܕܢܶܪܓܡܺܝܘܗ̱ܝ ܒܟܺܐܦ̈ܶܐ ܡܶܣܬܰܪܗܰܒ ܗ̱ܘܳܐ. ܟܰܕ ܐܳܡܰܪ ܗ̱ܘܳܐ܆ ܕܟܰܕ ܐܰܢ̱ܬ ܒܰܪܢܳܫܳܐ ܐܺܝܬܰܝܟ܆ ܐܰ‌ܠܳܗܳܐ ܥܳܒܶܕ ܐܰܢ̱ܬ ܢܰܦܫܳܟ^[37]. ܒܳܗ̇ ܓܶܝܪ ܟܰܕ ܒܳܗ̇ ܒܡܶܠܬܳܐ ܗܳܝ ܕܣܽܘܪܳܩܳܐ ܨܶܒܝܳܢܳܝܳܐ܆ ܘܕܶܐܫܬܰܕܰܪ ܡܶܢ ܐܰܒܳܐ ܐܳܡܰܪ^[38]܆ ܐܳܦ ܕܰܢܣܰܒ ܦܽܘܩܕܳܢܳܐ^[39]܆ ܐܳܦ ܕܠܳܐ ܡܶܫܟܰܚ ܕܢܶܥܒܶܕ ܡܶܕܶܡ ܡܶܢ ܨܒܽܘܬ ܢܰܦܫܶܗ^[40]. ܐܶܠܳܐ ܝܳܕܥܺܝܢ ܚ̱ܢܰܢ ܕܟܰܕ ܒܰܕܡܽܘܬܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܘܰܢܚܶܬ ܠܗܳܝ ܕܰܕܡܽܘܬܳܐ ܕܥܰܒܕܳܐ ܢܣܰܒ܆ ܡ̈ܶܠܶܐ ܕܦܰܐܝ̈ܳܢ ܠܥܰܒܕܽܘܬܳܐ ܘܰܠܡܶܫܬܰܡܥܳܢܽܘܬܳܐ ܐܳܡܰܪ܆ ܕܠܳܐ ܡܒܰܨܪ̈ܳܢ ܐܰܘ ܡܙܰܥܪ̈ܳܢ ܒܡܶܕܶܡ ܠܰܡܥܰܠܝܽܘܬܳܐ ܘܪܰܘܡܳܐ ܕܰܐ‌ܠܳܗܽܘܬܶܗ. ܐܰܝܟܰܢܳܐ ܓܶܝܪ ܡܶܬܢܰܚܬܳܢܽܘܬܳܐ ܘܡܰܟܺܝܟܽܘܬܳܐ ܕܡ̈ܶܠܶܐ ܡܕܰܒܪ̈ܳܢܝܬܳܐ ܒܽܘܨܳܪܳܐ ܬܶܥܒܶܕ ܗ̱ܘܳܬ ܕܽܐܘܣܺܝܰܐ ܐܰ‌ܠܳܗܳܝܬܳܐ ܐܰܘ ܕܫܽܘܠܛܳܢܳܐ.

ܗܳܝ ܓܶܝܪ ܕܳܐܒܝ ܪܰܒ ܗ̱ܘ̣ ܡܶܢܝ^[41]܆ ܐܶܢ ܥܰܠ ‌ܐܰ‌ܠܳܗܽܘܬܳܐ ܡܦܰܚܡܳܢܳܐܺܝܬ ܢܶܣܒܽܘܢܳܗ̇ ܗܳܢܽܘܢ ܠܳܐ ܪ̈ܕܰܝܳܐ܆ ܐܰܝܟܰܢܳܐ ܗܰܘ ܕܰܒܪܺܝܬܳܐ ܐܺܝܬܰܘܗ̱ܝ܆ ܥܬܺܝܕ ܗ̱ܘܳܐ ܕܰܢܦܰܚܶܡ ܗܽܘ ܠܶܗ ܠܗܰܘ ܠܳܐ ܒܰܪܝܳܐ. ܗܳܠܶܝܢ ܓܶܝܪ ܕܕܳܡ̈ܝܳܢ܆ ܘܠܰܘ ܗܳܠܶܝܢ ܕܰܕܟܽܠ ܟܽܠܶܗ ܠܪܽܘܚܩܳܐ ܦܰܪ̈ܺܝܩܳܢ ܒܰܟܝܳܢܳܐ܆ ܡܶܬܦܰܚ̈ܡܳܢ ܠܘܳܬ ܚ̈ܕܳܕܶܐ. ܒܳܬܰܪܟܶܢ ܕܶܝܢ܆ ܐܶܢ ܡܫܺܝܚܳܐ ܚܰܝܠܰܐ ܗ̱ܘ ܕܰܐ‌ܠܳܗܳܐ ܘܚܶܟܡܬܳܐ ܕܰܐ‌ܠܳܗܳܐ^[42]܆ ܐܰܝܟܰܢܳܐ ܠܰܘ ܕܠܳܐ ܡܶܠܬܳܐ ܗܝ܆ ܕܝܰܬܺܝܪ ܡܶܢ ܚܶܟܡܬܳܐ ܕܺܝܠܶܗ ܘܚܰܝܠܶܗ ܢܺܐܡܪܺܝܘܗ̱ܝ ܠܰܐܒܳܐ ܕܝܰܬܺܝܪ ܚܰܝܠܬܳܢ ܐܰܘ ܕܝܰܬܺܝܪ ܚܰܟܺܝܡ. ܘܠܳܐ ܒܡܶܕܡ ܓܶܝܪ ܐܺܝܬܰܘܗ̱ܝ ܒܪܳܐ ܕܰܒܨܺܝܪ ܡܶܢ ܐܰܒܳܐ܆ ܟܰܕ ܕܺܝܠܳܗ̇ ܟܰܕ ܕܺܝܠܳܗ̇ ܕܬܶܫܒܽܘܚܬܳܐ ܐܺܝܬܰܘܗ̱ܝ ܠܗܰܘ܆ ܘܡܰܠܟܽܘܬܳܐ ܘܰܡܬܽܘܡܳܝܽܘܬܳܐ ܘܚܰܝܠܳܐ. ܕܨܰܠܡܳܐ ܓܶܝܪ ܐܺܝܬܰܘܗ̱ܝ ܕܰܐ‌ܠܳܗܳܐ ܠܳܐ ܡܶܬܚܰܙܝܳܢܳܐ^[43]܆ ܐܳܡܰܪ ܠܶܗ ܦܰܘܠܽܘܤ ܘܨܶܡܚܳܐ ܕܬܶܫܒܽܘܚܬܶܗ܆ ܘܨܰܠܡܳܐ ܕܰܩܢܽܘܡܶܗ^[44]. ܒܨܰܠܡܳܐ ܕܶܝܢ ܟܽܘܠܗܶܝܢ ܗܳܠܶܝܢ ܕܬܰܦܢܟܳܐ ܐܺܝܬ. ܐܰܝܟܰܢܳܐ ܕܡܳܪܳܢܳܐܺܝܬ ܢܶܗܘܶܐ ܐܺܝܬܰܘܗ̱ܝ ܨܰܠܡܳܐ. ܨܰܠܡܳܐ ܕܶܝܢ ܠܰܘ ܐܽܘܡܳܢܳܝܳܐ ܡܶܕܶܡ ܘܠܳܐ ܡܢܰܦܫܳܐ ܕܒܽܐܘܡܳܢܽܘܬܳܐ ܡܰܬܩܰܢ ܐܰܝܟ ܗܳܠܶܝܢ ܨܰܠ̈ܡܶܐ ܕܰܠܘܳܬܰܢ܆ ܘܳܐܦ ܠܳܐ ܐܰܝܟܰܢܳܐ ܕܰܚܢܰܢ ܒܨܰܠܡܳܐ ܘܒܰܕܡܽܘܬܳܐ ܕܰܐ‌ܠܳܗܳܐ ܡܶܬܐܰܡܪܺܝܢܰܢ ܕܰܗܘܰܝܢ^[45]܆ ܟܰܕ ܡܶܫܬܰܘܬܦܺܝܢ ܚ̱ܢܰܢ ܒܛܰܝܒܽܘܬܳܐ ܗܳܝ ܕܡܶܢܶܗ܆ ܐܶܠܳܐ ܝܽܘܩܢܳܐ ܕܰܕܡܽܘܬܳܐ ܘܪܽܘܫܡܳܐ ܕܺܝܠܶܗ ܕܰܩܢܽܘܡܶܗ ܕܰܐܒܳܐ܆ ܗܰܘ ܕܳܐܦ ܐܺܝܬܰܘܗ̱ܝ ܨܰܠܡܳܐ. ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܚܰܝ̈ܶܐ ܩܢܽܘܡܳܝ̈ܶܐ ܕܡܶܢ ܚܰܝ̈ܶܐ. ܢܽܘܗܪܳܐ ܕܡܶܢ ܢܽܘܗܪܳܐ. ܚܰܝܠܳܐ ܕܠܳܐ ܣܳܟܳܐ܆ ܡܶܢ ܚܰܝܠܳܐ ܠܳܐ ܡܶܣܬܰܝܟܳܢܳܐ ܘܠܳܐ ܡܶܬܬܰܚܡܳܢܳܐ. ܐܰܝܟܳܐ ܗܳܟܺܝܠ ܢܣܺܝܡܶܝܗ̇ ܗܳܪܟܳܐ ܠܗܳܝ ܕܪܰܒ܆ ܟܰܕ ܒܟܽܠ ܕܽܘܟ ܩܳܕܡܳܐ ܦܳܓܥܳܐ ܒܰܢ ܫܰܘܝܽܘܬܳܐ ܗܳܝ ܕܒܟܽܠ ܡܶܕܶܡ܆ ܐܶܠܳܐ ܐܶܢ ܟܺܝܬ ܟܰܕ ܒܗܳܝ ܡܶܬܕܒܰܪ ܐ̱ܢܳܫ ܒܰܩܛܺܝܪܳܐ ܘܡܶܬܶܐܠܶܨ ܢܺܐܡܰܪ܆ ܕܰܒܗܳܝ ܕܡܶܢ ܐܰܒܳܐ ܐܺܝܬܰܘܗ̱ܝ ܒܪܳܐ܆ ܐܳܦܶܢ ܠܳܐ ܙܰܒܢܳܐܺܝܬ ܘܰܡܬܽܘܡܳܐܺܝܬ ܡܶܢܶܗ ܨܡܰܚ܆ ܐܰܝܟ ܨܶܡܚܳܐ ܕܬܶܫܒܽܘܚܬܳܐ ܐܰܒܳܗܳܝܬܳܐ܆ ܕܰܫܘܶܐ ܒܰܡܬܽܘܡܳܝܽܘܬܳܐ ܐܺܝܬܰܘܗ̱ܝ ܠܗܰܘ ܕܡܰܨܡܰܚ ܠܶܗ. ܗܳܕܶܐ ܕܶܝܢ ܠܰܘ ܒܨܺܝܪܽܘܬܳܐ ܡܶܕܶܡ ܡܰܝܬܝܳܐ ܠܶܗ ܠܰܒܪܳܐ. ܐܰܝܟ ܙܢܳܐ ܓܶܝܪ ܕܪܰܒܬܳܐ ܗܝ ܠܰܒܪܳܐ܆ ܗܳܝ ܕܡܶܢ ܐܰܒܳܐ ܡܬܽܘܡܳܝܳܐ ܘܰܕܠܳܐ ܫܽܘܪܳܝ ܢܶܬܺܝܠܶܕ܆ ܗܳܟܰܢܳܐ ܐܳܦ ܠܰܐܒܳܐ ܪܰܒܬܳܐ ܗܝ ܘܕܺܐܝܩܳܪܳܐ ܕܰܦܐܶܐ ܠܰܐܠܳܗܐ ܐܺܝܬ ܠܶܗ܆ ܗܳܝ ܕܫܳܘܶܐ ܒܰܡܬܽܘܡܳܝܽܘܬܳܐ ܘܠܰܘ ܡܶܬܩܰܢܝܳܢܳܐ ܘܥܰܠܺܝܠܳܐ ܢܶܗܘܶܐ ܐܺܝܬ ܠܶܗ ܒܪܳܐ. ܐܶܢ ܓܶܝܪ ܡܶܛܽܠ ܗܳܕܶܐ ܢܶܬܪܢܶܐ ܒܪܳܐ ܒܨܺܝܪ ܡܶܢ ܐܰܒܳܐ܆ ܡܶܛܽܠ ܕܠܳܐ ܐܺܝܬܰܘܗ̱ܝ ܐܰܒܳܐ܆ ܚܰܣܺܝܪܳܐ ܡܳܕܶܝܢ ܐܰܪܰܐ ܐܺܝܬܰܘܗ̱ܝ ܐܳܦ ܗܽܘ ܐܰܒܳܐ܆ ܡܶܛܽܠ ܕܠܳܐ ܐܺܝܬܰܘܗ̱ܝ ܒܪܳܐ. ܐܶܠܳܐ ܗܳܠܶܝܢ܆ ܕܗܳܢܽܘܢ ܕܡܶܫܬܰܥܶܝܢ ܐܺܝܬܰܝܗܶܝܢ ܘܠܰܘ ܕܗܳܢܽܘܢ ܕܰܡܡܰܠܠܺܝܢ ܐܰ‌ܠܳܗܳܐܝܬ. ܐܰܒܳܐ ܓܶܝܪ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܟܽܘ̈ܢܳܝܶܐ ܡܝܰܩ̈ܢܳܢܶܐ ܘܰܡܫܰܘ̈ܕܥܰܝ ܢܰܗܺܝܪܳܐܺܝܬ ܐܺܝܬܰܝܗܽܘܢ܆ ܕܠܳܐ ܒܠܺܝܠܽܘܬܗܽܘܢ ܕܰܩܢܽܘ̈ܡܶܐ. ܠܰܘ ܓܶܝܪ ܠܰܬܠܺܝܬܳܝܽܘܬܳܐ ܦܳܣܩܺܝܢ܆ ܒܰܡ̈ܥܰܠܺܝܘܳܬܳܐ ܘܒܰܒܨܺܝܪ̈ܘܳܬܳܐ. ܟܽܘܠܗܶܝܢ ܓܶܝܪ ܐܰܝܠܶܝܢ ܕܰܫܟܺܝ̈ܚܳܢ ܒܰܐܒܳܐ ܘܒܰܒܪܳܐ܆ ܗܳܠܶܝܢ ܐܳܦ ܒܪܽܘܚܳܐ ܡܶܬܚܰܙ̈ܝܳܢ. ܠܘܳܬ ܓܶܝܪ ܐܰܒܳܐ ܕܰܘܺܝܕ ܗܰܘ ܢܒܺܝܳܐ ܟܰܕ ܩܰܕܶܡ ܗ̱ܘܳܐ ܡܰܟܪܶܙ ܐܳܡܰܪ ܗ̱ܘܳܐ. ܕܰܒܢܽܘܗܪܳܟ ܢܶܚܙܶܐ ܢܽܘܗܪܳܐ^[46]. ܗܳܢܰܘ ܕܶܝܢ ܒܰܒܪܳܐ ܠܪܽܘܚܳܐ ܩܰܕܺܝܫܳܐ. ܗܽܘ ܓܶܝܪ܆ ܟܰܕ ܒܝܰܕ ܒܶܣܪܳܐ ܕܢܰܚ ܓܠܳܝܗ̱ܝ ܠܰܢ܆ ܘܡܶܢܶܗ ܝܰܬܺܝܪ ܢܰܨܺܝܚܳܐܺܝܬ ܐܶܬܓܠܺܝ. ܗܳܕܶܐ ܓܶܝܪ ܐܳܦ ܓܪܺܝܓܽܘܪܺܝܽܘܤ ܗܰܘ ܪܰܒܳܐ܆ ܗܰܘ ܒܥܶܠ ܫܡܳܐ ܕܳܐܬܘ̈ܳܬܳܐ ܘܬܶܕܡܪ̈ܳܬܳܐ ܬܡܺܝ̈ܗܳܬܳܐ ܐܶܡܰܪ. ܡܰܠܽܘܢ ܕܶܝܢ܆ ܗܰܘ ܕܰܠܗܰܝܡܳܢܽܘܬܳܐ ܓܠܳܐ ܠܶܗ. ܚܰܕ ܪܽܘܚܳܐ ܩܰܕܺܝܫܳܐ ܕܡܶܢ ܐܰܒܳܐ ܐܺܝܬ ܠܶܗ ܝܳܬܳܐ܆ ܘܰܒܝܰܕ ܒܪܳܐ ܐܶܬܚܰܘܺܝ܆ ܝܺܕܺܝܥܳܐ ܕܶܝܢ ܕܠܰܒܢܰܝ̈ܢܳܫܳܐ܆ ܡܫܰܡܠܝܳܐ ܕܡܫܠܝܐ܆ ܐܰܝܟ ܡܳܐ ܕܳܐܦ ܒܪܳܐ ܨܰܠܡܳܐ ܐܺܝܬܰܘܗ̱ܝ ܕܰܐܒܳܐ܆ ܟܰܕ ܐܳܡܰܪ܆ ܕܗܰܘ ܕܚܳܙܶܐ ܠܺܝ ܚܳܙܶܐ ܠܗܰܘ ܕܫܰܕܪܰܢܝ܆ ܐܶܢܳܐ ܢܽܘܗܪܳܐ ܠܥܳܠܡܳܐ ܐܶܬܺܝܬ̣. ܡܚܰܘ̈ܝܳܢܶܐ ܓܶܝܪ ܕܰܚ̈ܕܳܕܶܐ ܐܺܝܬܰܝܗܽܘܢ ܗܶܢܘܢ ܩܢܽܘܡ̈ܶܐ. ܡܶܛܽܠ ܗܳܝ ܕܚܰܕ ܘܫܰܘܝܰܬ̣ ܒܺܐܝܩܳܪܳܐ ܕܰܐ‌ܠܳܗܽܘܬܳܐ ܕܒܰܬܠܳܬܰܝܗܽܘܢ.

ܢܺܐܡܰܪ ܕܶܝܢ ܟܒܰܪ ܗܰܘ ܕܫܳܡܰܥ ܐܰܘ ܒܪܶܚܡܰܬ ܝܽܘܠܦܳܢܳܐ ܡܶܢ ܠܳܐ ܝܺܕܰܥܬܳܐ܆ ܐܰܘ ܚܶܪܝܳܐܺܝܬ ܡܶܢ ܨܢܺܝܥܽܘܬܳܐ܆ ܕܶܐܢ ܐܳܦ ܪܽܘܚܳܐ ܩܰܕܺܝܫܳܐ܆ ܝܳܬܳܐ ܡܬܽܘܡܳܝܬܳܐ ܡܶܢ ܐܰܒܳܐ ܐܺܝܬ ܠܶܗ܆ ܠܡܳܢܳܐ ܠܰܘ ܒܪܳܐ ܐܳܦ ܗܽܘ ܡܶܣܬܰܟܰܠ ‌ܐܳܦ ܡܶܬܶܐܡܰܪ. ܡܶܛܽܠ ܕܠܳܐ ܟܬܺܝܒܳܐ ܕܶܐܬܺܝܠܶܕ. ܐܶܠܳܐ ܐܰܡܺܝܪܳܐ ܐܰ‌ܠܳܗܳܐܺܝܬ ܕܢܳܦܶܩ. ܗܳܠܶܝܢ ܓܶܝܪ ܒܰܬܚܽܘܡ̈ܶܐ ܡܣܰܝ̈ܟܶܐ܆ ܐܳܡܰܪ ܐ̱ܢܳܐ ܐܶܢܳܐ܆ ܕܕܳܡ̈ܝܳܢ ܕܣܽܘܥܪ̈ܳܢܶܐ ܐܺܝܬܰܝܗܶܝܢ ܡܫܰܘܕܥܳܢ̈ܝܳܬܳܐ܆ ܘܠܰܘ ܡ̈ܶܠܶܐ ܐ̱ܚܪܳܢܝܳܐܺܝܬ ܣܦܺܝ̈ܩܳܬܳܐ ܐܺܝܬܰܝܗܶܝܢ ܘܰܫܡܳܗ̈ܶܐ. ܐܰܝܟ ܙܢܳܐ ܓܶܝܪ ܕܠܰܒܪܳܐ ܠܳܐ ܡܬܽܘܡ ܐܳܡܰܪ ܐ̱ܢܳܐ ܠܶܗ ܪܽܘܚܳܐ ܩܰܕܺܝܫܳܐ܆ ܡܶܛܽܠ ܕܠܳܐ ܢܳܦܶܩ ܐܶܠܳܐ ܝܺܠܺܝܕ܆ ܒܶܗ ܟܰܕ ܒܶܗ ܒܰܙܢܳܐ܆ ܪܽܘܫܥܳܐ ܗܝ ܠܡܺܐܡܪܶܗ ܠܪܽܘܚܳܐ ܩܰܕܺܝܫܳܐ ܒܪܳܐ܆ ܗܰܘ ܕܠܰܘ ܒܝܰܕ ܝܺܠܺܝܕܽܘܬܳܐ ܢܦܰܩ.

ܚܰܣܺܝܪܳܐ ܗ̱ܘܳܬ ܓܶܝܪ ܐܶ‌ܠܽܘ ܗܳܕܶܐ ܐܺܝܬܶܝܗ̇ ܗܘܳܬ܆ ܕܳܐܦ ܠܟܽܘܢܳܝܳܐ ܗܰܘ ܕܺܝܚܺܝܕܳܝܳܐ ܢܕܰܓܶܠ ܒܪܳܐ. ܟܰܕ ܓܶܝܪ ܬܪܶܝܢ ܒܢܰܝ̈ܳܐ ܐܺܝܬܰܝܗܽܘܢ ܐܰܝܟܰܢܳܐ ܗܰܘ ܚܰܕ ܡܶܢ ܗܳܠܶܝܢ ܢܶܗܘܶܐ ܐܺܝܬܰܘܗ̱ܝ ܝܺܚܺܝܕܳܝܳܐ. ܐܶܠܳܐ ܙܳܕܶܩ ܠܡܶܛܰܪ ܩܒܺܝܥܬܳܐ ܠܰܒܪܳܐ ܠܺܝܠܺܝܕܽܘܬܳܐ܆ ܘܰܠܪܽܘܚܳܐ ܢܳܦܽܘܩܽܘܬܳܐ܆ ܐܰܝܟܰܢܳܐ ܕܳܐܦ ܠܰܐܒܳܐ ܗܳܝ ܕܠܰܘ ܝܺܠܺܝܕܳܐܺܝܬ ܘܠܰܘ ܡܶܢ ܡܶܕܶܡ ܢܶܗܘܶܐ ܐܺܝܬܰܘܗ̱ܝ. ܟܰܕ ܓܶܝܪ ܕܺܝ̈ܠܳܝܳܬܳܐ ܕܟܽܠ ܚܰܕ ܡܶܢ ܩܢܽܘ̈ܡܶܐ ܠܳܐ ܡܶܬܬܙܺܝ̈ܥܳܢܝܳܬܳܐ ܡܩܰܘ̈ܝܳܢ܆ ܘܽܐܘܣܺܝܰܐ ܐܰܘ ܟܺܝܬ ܐܰ‌ܠܳܗܽܘܬܳܐ ܚܕܳܐ ܡܶܬܗܰܝܡܢܳܐ ܕܺܐܝܬܶܝܗ̇ ܒܰܬܠܳܬܰܝܗܽܘܢ܆ ܠܳܐ ܒܠܺܝܠܬܳܐ ܐܰܟܚܕܳܐ ܘܠܳܐ ܡܦܰܠܰܓܬܳܐ܆ ܐܰܝܟܰܢܳܐ ܟܺܝܬ ܕܳܐܦ ܐܺܝܬܶܝܗ̇ ܬܠܺܝܬܳܝܽܘܬܳܐ ܩܰܕܺܝܫܬܳܐ ܬܶܬܬܰܘܕܶܐ ܡܶܢܰܢ܆ ܟܰܕ ܠܳܐ ܡܥܰܩܒܺܝܢ ܚ̱ܢܰܢ ܕܡܳܢܳܐ ܗܝ ܝܺܠܺܝܕܽܘܬܐ ܐܰ‌ܠܳܗܳܝܬܳܐ ܘܢܳܦܽܘܩܽܘܬܳܐ܆ ܘܡܳܢܰܐ ܗܘ ܫܽܘܚܠܳܦܳܐ ܕܗܳܠܶܝܢ. ܬܶܕܰܥ ܕܶܝܢ ܗܺܝ ܠܳܗ̇ ܕܰܐܝܟܰܢܳܐ ܐܺܝܬܶܝܗ̇܆ ܗܳܝ ܬܠܺܝܬܳܝܽܘܬܳܐ ܩܰܕܺܝܫܬܳܐ.

ܪܰܒܳܐ ܗܝ ܕܶܝܢ ܠܰܢ ܗܳܝ ܕܠܳܐ ܙܺܐܦܳܢܳܐܺܝܬ ܢܰܘܕܶܐ ܗܳܠܶܝܢ ܕܗܰܘ ܝܺܚܺܝܕܳܝܳܐ ܒܪܳܐ܆ ܗܰܘ ܕܺܐܝܬܰܘܗ̱ܝ ܒܥܽܘܒܶܗ ܕܰܐܒܳܐ^[47]܆ ܐܶܫܬܰܥܺܝ ܘܦܰܫܶܩ ܠܰܢ ܘܠܰܘ ܚܶܪܝܳܐܺܝܬ ܢܶܣܥܶܐ ܕܰܢܕܺܝܩ ܒܗܳܠܶܝܢ ܕܰܠܓܰܘ ܡܶܢ ܗܳܠܶܝܢ ܐ̱ܪ̈ܳܙܳܢܳܝܬܳܐ ܘܟܰܣ̈ܝܳܬܳܐ. ܣܳܦܩܳܐ ܓܶܝܪ ܠܢܰܟܦܳܐ ܚܠܳܦ ܟܽܘܠ ܡܚܰܘܝܳܢܽܘܬܳܐ ܗܳܝ ܕܗܽܘ ܐܶܡܰܪ. ܡܶܢ ܐܰܝܟܳܐ ܓܶܝܪ ܐܰܢ̱ܬ ܗܳܠܶܝܢ ܐܳܡܰܪ ܐܰܢ̱ܬ܆ ܠܰܘ ܡܶܢ ܗܰܘ. ܡܳܕܶܝܢ ܬܚܽܘܡܳܐ ܢܶܗܘܶܐ ܠܳܟ܆ ܕܗܳܝ ܕܠܳܐ ܬܺܐܡܰܪ ܗܳܠܶܝܢ ܙܳܕܶܩ܆ ܐܳܦܠܐ ܬܶܒܥܶܐ܆ ܗܳܝ ܕܠܳܐ ܐܶܡܰܪ ܗܰܘ ܫܬܰܩ ܐܶܢܶܝܢ ܓܶܝܪ ܠܗܳܠܶܝܢ ܕܝܳܕܰܥ ܗ̱ܘܳܐ ܓܰܠܝܳܐܺܝܬ ܕܥܳܒܪ̈ܳܢ ܠܥܰܒܝܽܘܬܳܟ.

ܘܳܐܦ ܡܶܢ ܗܳܝ ܕܶܝܢ ܕܰܥܬܺܝܕܳܐ ܕܬܶܬܶܐܡܰܪ ܠܰܢ ܡܶܢ ܗܳܢܽܘܢ ܕܠܽܘܩܒܰܠ ܪܽܘܚܳܐ ܩܰܕܺܝܫܳܐ ܡܶܬܟܰܬܫܺܝܢ܆ ܕܡܰܪܺܝܪܳܐܺܝܬ ܡܰܢ ܘܥܰܢܳܬܳܐܺܝܬ܆ ܠܳܐ ܝܰܠܺܝܦܳܐܺܝܬ ܕܶܝܢ ܘܰܒܚܰܣܺܝܪܽܘܬ ܗܰܘܢܳܐ ܐܶܫܬܰܟܚܰܬ܆ ܙܳܕܶܩ ܕܢܶܛܰܪ ܘܢܶܙܕܗܰܪ. ܐܳܡܪܺܝܢ ܓܶܝܪ ܕܰܟܬܺܝܒ ܡܶܛܽܠ ܒܪܳܐ܆ ܕܟܽܘܠܗܶܝܢ ܒܺܐܝܕܰܘ̈ܗ̱ܝ ܗ̣ܘ̈ܰܝ܆ ܘܰܤܛܰܪ ܡܶܢܶܗ ܗܘ̣ܳܬ ܐܳܦ ܠܳܐ ܚܕܳܐ^[48]. ܒܟܽܠܗܶܝܢ ܕܶܝܢ ܡܶܬܚܒܶܫ ܒܕܽܘܟ ܐܳܦ ܪܽܘܚܳܐ ܩܰܕܺܝܫܳܐ. ܡܳܕܶܝܢ ܒܝܰܕ ܒܪܳܐ ܒܪܶܐ܆ ܟܰܕ ܥܰܡ ܗܳܠܶܝܢ ܐ̱ܚܪ̈ܳܢܝܳܬܳܐ ܗܘ̣ܳܐ. ܗܳܕܶܐ ܕܶܝܢ ܗܽܘܦܳܟ ܚܽܘܫܳܒ̈ܶܐ ܡܰܛܥܝܳܢܳܐ ܘܣܽܘܦܝܣܛܝܩܺܝܰܐ ܐܺܝܬܶܝܗ̇܆ ܕܝܰܬܺܝܪ ܡܚܺܝܠ ܡܶܢ ܐܙܩܽܘܪܳܐ ܕܓܳܘܓܰܝ. ܕܽܐܘܣܺܝܰܐ ܓܶܝܪ ܗܳܝ ܐܰ‌ܠܳܗܳܝܬܳܐ܆ ܠܳܐ ܚܫܺܝܒܳܐ ܐܰܟܚܕܳܐ ܘܣܺܝܡܳܐ ܥܰܡ ܟܽܠܗܶܝܢ܆ ܐܳܦܠܳܐ ܚܒܺܝܫܳܐ ܥܰܡܗܶܝܢ܆ ܒܗܳܝ ܕܰܠܗܰܠ ܡܶܢ ܟܽܠ ‌ܐܺܝܬܶܝܗ̇܆ ܡܰܢܽܘ ܕܺܐܝܬ ܠܶܗ ܚܠܺܝܡܳܐܺܝܬ ܒܚܽܘܫܳܒܰܘ̈ܗ̱ܝ܆ ܕܠܰܘ ܐܰܟܚܕܳܐ ܡܰܘܕܶܐ. ܠܪܽܘܚܳܐ ܗܳܟܺܝܠ ܗܰܘ ܕܰܫܪܳܪܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ܆ ܐܰܝܟܰܢܳܐ ܒܪܳܐ ܥܬܺܝܕ ܗ̱ܘܳܐ ܠܡܶܒܪܳܐ܆ ܐܰܝܟ ܡܶܕܶܡ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܕܡܶܢ ܗܘܰܝ̈ܳܐ. ܐܰܝܟ ܙܢܳܐ ܓܶܝܪ ܕܕܺܝܠܺܝܕܽܘܬܳܐ ܕܺܝܠܳܢܝܬܳܐ ܗܳܝ ܕܺܝܠܶܗ܆ ܗܰܘ^[49] ܕܡܶܢ ܐܰܒܳܐ ܡܬܽܘܡܳܐܺܝܬ ܐܶܬܺܝܠܶܕ܆ ܠܳܐ ܣܳܟ ܡܶܬܪܢܶܐ ܕܺܐܝܬܰܘܗ̱ܝ ܥܳܒܽܘܕܳܐ܆ ܒܳܗ̇ ܟܰܕ ܒܳܗ̇ ܒܡܶܠܬܳܐ ܡܶܢ ܟܽܠܦܪܘܤ ܘܳܐܦ ܠܳܐ ܕܢܳܦܽܘܩܽܘܬܶܗ ܕܪܽܘܚܳܐ. ܐܶܢ ܓܶܝܪ ܡܶܢ ܐܰܒܳܐ ܢܳܦܶܩ ܒܽܐܘܣܺܝܰܐ܆ ܐܰܝܟܰܢܳܐ ܒܪܶܐ ܒܝܰܕ ܒܪܳܐ. ܐܰܝܟܰܢܳܐ ܕܶܝܢ ܐܰܟܚܕܳܐ ܡܢܶܐ ܘܰܡܛܰܟܰܤ ܥܰܡ ܐܰܒܳܐ ܘܥܰܡ ܒܪܳܐ܆ ܐܳܦ ܗܰܘ ܕܰܒܪܶܐ. ܙܶܠܘ ܓܶܝܪ ܐܳܡܰܪ ܬܰܠܡܶܕܘ ܠܟܽܠܗܽܘܢ ܥܰܡ̱ܡ̈ܶܐ܆ ܟܰܕ ܡܰܥܡܕܺܝܢ ܐܢ̱ܬܽܘܢ ܠܗܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ^[50]. ܘܳܐܦ ܗܰܘ ܕܶܝܢ ܐܶܘܢܓܠܝܣܛܐ܆ ܛܳܒ ܙܗܺܝܪܳܐܺܝܬ ܐܶܬܚܰܫܰܚ ܒܳܗ̇ ܒܗܳܝ ܕܳܐܬܝܳܐ ܒܳܬܰܪܟܶܢ܆ ܟܰܕ ܐܳܡܰܪ܆ ܘܰܤܛܰܪ ܡܶܢܶܗ ܗܘ̣ܳܬ ܐܳܦ ܠܳܐ ܚܕܳܐ܆ ܗܳܝ ܕܰܗܘܳܬ^[51]܆ ܐܰܝܟܰܢܳܐ ܟܺܝܬ ܕܡܳܕܶܝܢ ܠܟܽܘܠܗܽܘܢ ܗܘܰܝ̈ܳܐ ܚܳܒܫܳܐ ܡܶܠܬܳܐ ܘܒܽܐܘܣܺܝܰܐ ܗܳܝ ܠܳܐ ܥܒܺܝܕܬܳܐ ܘܠܳܐ ܒܪܺܝܬܳܐ ܘܰܐ‌ܠܳܗܳܝܬܳܐ ܠܳܐ ܓܳܫܦܳܐ.

ܒܪܰܡ ܐܺܝܬ ܐܶܡܰܬܝ ܕܟܰܕ ܒܓܽܘ̈ܕܳܦܶܐ ܓܠܰܝ̈ܳܐ ܡܶܬܚܰܡܨܺܝܢ ܐܰܪ̈ܝܰܐܢܽܘ ܘܰܐܝܠܶܝܢ ܕܡܶܢ ܗܳܠܶܝܢ ܣܕܰܩܘ܆ ܘܰܠܘܳܬ ܪܽܘܚܳܐ ܩܰܕܺܝܫܳܐ ܒܰܠܚܽܘܕܰܘܗ̱ܝ ܢܳܨܶܝܢ ܘܰܕܡܶܢ ܗܳܢܽܘܢ ܕܰܚܕܳܐ ܥܰܝܢܗܽܘܢ ܘܠܳܐ ܡܶܕܶܡ ܡܫܰܚܠܦܺܝܢ ܐܳܡܪܺܝܢ. ܠܳܐ ܒܶܪ̈ܝܳܬܳܐ ܐܳܡܪܺܝܢܰܢ ܠܗܽܘܢ ܠܰܒܪܳܐ ܐܰܘ ܠܪܽܘܚܳܐ ܩܰܕܺܝܫܳܐ ܘܠܳܐ ܬܽܘܒ ܫܰܘ̈ܝ̣ܰܝ̣ ܒܽܐܘܣܺܝܰܐ ܠܰܐܒܳܐ. ܩܕܳܡ ܓܶܝܪ ܟܽܠܗܶܝܢ ܒܶܪ̈ܝܳܬܳܐ ܡܰܘܕܶܝܢ ܚ̱ܢܰܢ ܕܺܐܝܬܰܝܗܽܘܢ. ܡܳܢܳܐ ܗܳܟܺܝܠ ‌ܐܺܝܬ ܕܺܐܝܬܰܘܗ̱ܝ ܡܶܨܥܳܝܳܐ܆ ܕܽܐܘܣܺܝܰܐ ܗܳܝ ܠܳܐ ܒ̣ܪܺܝܬܳܐ ܘܰܕܗܳܝ ܒ̣ܪܺܝܬܳܐ܆ ܐܳܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܣܪܺܝܩܳܐ ܘܚܰܣܺܝܪ ܢܰܦܫܶܗ܆ ܦܰܫܶܩ ܠܺܝ܆ ܐܰܝܟܰܢܳܐ ܕܬܰܡܳܢ ܐܶܣܝܡܘܗ̱ܝ ܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܐܶܢ ܕܶܝܢ ܘܠܳܐ ܡܶܕܶܡ܆ ܠܳܐ ܓܶܝܪ ܐܺܝܬ ܠܳܟ ܠܡܺܐܡܰܪ܆ ܟܽܠܗܶܝܢ ܓܶܝܪ ܗܳܠܶܝܢ ܕܡܶܢ ܒܳܬܰܪ ܐܽܘܣܺܝܰܐ ܐܰ‌ܠܳܗܳܝܬܳܐ܆ ܥܒܺܝ̈ܕܳܬܳܐ ܐܺܝܬܰܝܗܶܝܢ ܘܒ̣ܰܪ̈ܝܳܬܳܐ܆ ܐܳܦܶܢ ܩܕܳܡ ܗܳܠܶܝܢ ܐ̱ܚܪ̈ܳܢܝܳܬܳܐ ܐܺܝܬ ܠܗܶܝܢ ܗܳܝ ܕܰܗ̣ܘ̈ܰܝ ܐܺܝܬܰܝܗܶܝܢ. ܠܪܽܘܚܩܳܐ ܓܶܝܪ ܘܰܓܡܺܝܪܳܐܺܝܬ ܘܡܶܢ ܫܶܪ̈ܫܶܐ ܬܶܬܥܩܰܪ ܘܬܶܬܕܚܶܩ ܗܽܘܠܶܐ ܗܳܝ ܠܳܐ ܥܒܺܝܕܬܳܐ ܕܡܰܢܺܝ̈ܢܳܝܶܐ܆ ܘܚܶܫܽܘܟܳܐ ܗܰܘ ܕܡܶܢ ܬܰܡܳܢ ܝܺܥܳܐ. ܠܰܘ ܠܳܐ ܝܺܕܺܝܥܬܳܐ ܗܳܝ ܕܰܠܘܳܬ ܐܽܘܣܺܝܰܐ ܕܰܐ‌ܠܳܗܳܐ ܘܰܐܒܳܐ ܡܰܣܶܩ ܐܰܢ̱ܬ ܠܗܽܘܢ ܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܐܶܢ ܟܺܝܬ ܕܒ̣ܰܪ̈ܝܬܳܐ ܬܺܐܡܰܪ ܐܶܢܽܘܢ܆ ܡܶܬܚܰܡܰܨ ܐܰܢ̱ܬ. ܐܶܢ ܕܶܝܢ ܩܕܳܡ ܗܳܠܶܝܢ ܐ̱ܚܪ̈ܳܢܝܳܬܳܐ ܐܳܡܰܪ ܐܰܢ̱ܬ ܠܗܽܘܢ ܕܺܐܝܬܰܝܗܽܘܢ ܘܕܰܐܚܪܳܝܺܝܢ ܡܶܢ ܐܰܒܳܐ܆ ܒܩܰܫܺܝܫܽܘܬܳܐ ܕܛܰܘܪܳܐ ܙܰܒܢܳܝܳܐ ܒܰܠܚܽܘܕܰܘܗ̱ܝ ܝܰܩܰܪܬ ܐܶܢܽܘܢ܆ ܡܶܢ ܒܪܺܝܬܐ^[52] ܕܶܝܢ ܠܳܐ ܐܰܓܗܺܝܬ̊ ܐܶܢܽܘܢ. ܘܠܳܐ ܝܳܕܰܥ ܐܰܢ̱ܬ ܕܠܽܘܩܒܰܠ ܟܬܳܒ̈ܶܐ ܟܳܗ̈ܢܳܝܶܐ ܡܰܩܪܶܒ ܐܰܢ̱ܬ܆ ܕܳܐܡܪܺܝܢ ܕܠܳܐ ܢܶܗܘܶܐ ܒܳܟ ܐܰ‌ܠܳܗܳܐ ܚܰܕܬ̣ܳܐ^[53]܆ ܐܳܦܠܳܐ ܬܶܣܓܽܘܕ ܠܰܐܠܳܗܳܐ ܢܽܘܟܪܳܝܳܐ. ܟܽܠ ܓܶܝܪ ܗܰܘ ܡܳܐ ܕܠܳܐ ܐܺܝܬܰܘܗ̱ܝ ܡܬܽܘܡܳܝܳܐ܆ ܐܳܦܶܢ ܪܺܝܫܳܝܰܐ ܗ̱ܘ ܘܥܰܬܺܝܩܳܐ܆ ܚܰܕܬ̣ܳܐ ܐܺܝܬܰܘܗ̱ܝ ܟܡܳܐ ܟܡܳܐ. ܐܰܝܟ ܕܰܠܘܳܬ ܡܶܠܬܳܐ ܕܡܶܛܽܠ ‌ܐܰ‌ܠܳܗ̈ܶܐ. ܚܰܕܬܳܐ ܕܶܝܢ ܢܽܘܟܪܳܝܰܐ ܗ̱ܘ ܕܽܐܘܣܺܝܰܐ ܐܰ‌ܠܳܗܳܝܬܳܐ ܘܠܳܐ ܡܶܣܬܰܓܕܳܢܳܐ.

ܐܶܠܳܐ ܠܘܳܬ ܣܪ̈ܳܦܶܐ ܦܳܢܶܐ ܐ̱ܢܳܐ ܣܳܠܶܩ ܐ̱ܢܳܐ܆ ܘܰܠܘܳܬ ܬܶܐܽܘܪܺܝܰܐ ܕܰܢܒܺܝܳܐ. ܐܺܝܬ ܒܳܗ̇ ܓܶܝܪ ܥܰܡ ܡܡܰܠܠܽܘܬ ܐܰ‌ܠܳܗܽܘܬܳܐ܆ ܘܳܐܦ ܕܽܘܡܳܪܳܐ ܠܳܐ ܡܶܣܬܰܟܠܳܢܳܐ ܘܰܥܣܶܩ ܠܡܶܬܕܰܪܟܳܢܽܘܬܳܐ ܕܰܡܕܰܒܪܳܢܽܘܬܐ ܗܳܝ ܕܡܶܛܽܠܳܬܰܢ. ܡܰܕܒܚܳܐ ܓܶܝܪ ܐܳܡܰܪ ܕܰܚܙܳܐ܆ ܘܰܓܡܘܪܬܳܐ ܕܣܺܝܡܳܐ ܠܥܶܠ ܡܶܢܶܗ܆ ܘܰܠܚܰܕ ܡܶܢ ܣܪ̈ܳܦܶܐ ܗܳܢܽܘܢ ܕܗܳܫܳܐ ܒܓܶܦ̈ܶܐ ܡܚܰܦܶܝܢ ܠܦܰܪ̈ܨܽܘܦܰܝܗܽܘܢ. ܘܠܳܐ ܡܣܰܝܒܪܺܝܢ ܕܰܠܢܰܨܺܝܚܽܘܬܳܐ ܕܬܶܫܒܽܘܚܬܳܐ ܐܰ‌ܠܳܗܳܝܬܳܐ ܢܶܚܙܽܘܢ܆ ܘܰܠܒ̣ܰܟ ܓܡܽܘܪܬܳܐ ܒܟܰܠܒܬܳܐ ܘܰܓܫܰܦ ܒܦܽܘܡܶܗ ܘܶܐܡܰܪ܆ ܗܳܐ ܓܶܫܦܰܬ ܗܳܕܶܐ ܒܣܶܦ̈ܘܳܬܳܟ܆ ܘܰܬܪܺܝܡ ܠܠܳܐ ܢܳܡܽܘܣܳܝ̈ܘܳܬܳܐ ܕܺܝܠܳܟ ܘܠܰܚ̈ܛܳܗܶܐ ܕܺܝܠܳܟ ܬܕܰܟܶܐ^[54]. ܕܰܓܡܽܘܪܬܳܐ ܕܶܝܢ ܛܽܘܦܣܳܐ ܐܰܚܺܝܕܳܐ ܕܥܰܡܰܢܽܘܐܶܝܠ ܠܟܽܠ ‌ܐ̱ܢܳܫ ܓܰܠܝܳܐ. ܗܰܘ ܕܟܰܕ ܥܰܠ ܬܪܽܘܢܘܤ ܪܳܡܳܐ ܘܰܡܥܰܠܝܳܐ ܗܰܘ ܕܡܶܢ ܣܪ̈ܳܦܶܐ ܡܶܬܚܕܰܪ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܐܰܟܚܕܳܐ ܝܳܬܶܒ܆ ܐܰܝܟ ܡܳܐ ܕܰܡܡܰܠܠܽܘܬ ܫܽܘܒܚܳܐ ܗܳܝ ܬܠܺܝܬܳܝܰܬ ܩܽܘ̈ܕܫܶܐ ܐܰܘܕܥܰܬ̣܆ ܟܰܕ ܐܳܦܠܳܐ ܒܰܚܙܳܬܳܐ ܐܺܝܬܰܘܗ̱ܝ ܡܶܬܢܰܣܒܳܢܳܐ ܐܳܦ ܠܚܰܝ̈ܠܰܘܳܬܳܐ ܕܰܠܥܶܠ܆ ܨܶܒܝܳܢܳܐܺܝܬ ܢܚܶܬ ܠܘܳܬܰܢ܆ ܘܠܳܐ ܡܶܫܬܰܓܢܝܳܢܳܐܺܝܬ ܗܘ̣ܳܐ ܒܰܪܢܳܫܳܐ. ܗܳܕܶܐ ܓܶܝܪ ܐܺܝܬܶܝܗ̇ ܗܺܝ ܡܰܚܬܬܳܐ. ܡܶܛܽܠ ܕܳܐܦ ܠܳܐ ܡܶܢ ܕܽܘܟܬܳܐ ܠܕܽܘܟܬܳܐ ܫܰܢܺܝ܆ ܗܳܝ ܟܺܝܬ ܕܠܳܐ ܐܺܝܬ ܠܳܗ̇ ܦܽܘܪܣܳܐ܆ ܐܶܠܳܐ ܟܰܕ ܟܽܠܶܗ ܐܺܝܬܰܘܗ̱ܝ ܒܟܽܠ܆ ܘܠܥܶܠ ܡܶܢ ܟܽܠ ܠܳܐ ܡܶܣܬܰܝܟܳܢܳܐܺܝܬ܆ ܟܽܠܶܗ ܗܘ̣ܳܐ ܐܳܦ ܒܦܰܓܪܳܐ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܠܰܘ ܐܰܝܟ ܕܒܰܡܫܰܘܬܦܽܘܬܳܐ ܡܶܕܶܡ ܘܰܒܡܰܥܒܕܳܢܽܘܬܳܐ ܒܰܠܚܽܘܕܶܝܗ̇܆ ܒܶܗ ܕܶܝܢ ܒܰܩܢܽܘܡܳܐ ܘܒܰܚܕܳܝܽܘܬܳܐ ܗܳܝ ܟܝܳܢܳܝܬܳܐ ܬܡܺܝܗܽܘܬܳܗ̇ ܓܶܝܪ ܕܬܶܕܡܽܘܪܬܳܐ ܗܳܕܶܐ ܐܶܝܬܶܝܗ̇܆ ܕܰܒܡܶܠܬܳܐ ܡܰܢ ܠܳܐ ܡܶܫܟܚܳܐ ܕܬܶܬܕܪܶܟ܆ ܐܰܝܟܰܢܳܐ ܕܳܐܦ ܬܩܰܘܶܐ ܬܡܺܝܗܬܳܐ܆ ܒܗܰܝܡܳܢܽܘܬܳܐ ܕܶܝܢ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܡܶܬܚܰܬܡܳܐ܆ ܕܒܰܙܒܰܢ ܡܰܢ ܐܳܡܰܪ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[55]܆ ܒܰܙܒܰܢ ܕܶܝܢ ܬܽܘܒ܆ ܡܶܛܽܠ ܗܳܟܺܝܠ ܕܰܛܠܳܝ̈ܶܐ ܐܶܫܬܰܘܬܰܦܘ ܠܰܕܡܳܐ ܘܰܠܒܶܣܪܳܐ܆ ܘܳܐܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ.^[56] ܐܰܟܙܢܳܐ ܗܳܟܺܝܠ ܕܥܰܠ ܒܳܒܽܘܣܳܐ ܥܽܘܠܳܐ܆ ܘܥܰܠ ܒܰܪܢܳܫܳܐ ܗܰܘ ܕܺܝܠܰܢ܆ ܠܳܐ ܡܶܫܟܚܺܝܢܰܢ ܠܡܺܐܡܰܪ. ܕܒܰܐܝܢܳܐ ܙܢܳܐ ܐܶܫܬܰܘܬܦܰܬ ܢܰܦܫܳܐ ܠܒܶܣܪܳܐ ܘܠܰܕܡܳܐ܆ ܘܰܐܝܟܰܢܳܐ ܡܚܰܝܕܳܐ ܠܗܳܠܶܝܢ ܚܕܳܝܽܘܬܳܐ ܪܺܝܫܳܝܬܳܐ܆ ܘܚܰܕ ܟܝܳܢܳܐ ܘܰܩܢܽܘܡܳܐ ܡܶܢ ܢܰܦܫܳܐ ܘܦܰܓܪܳܐ ܠܳܐ ܒܠܺܝܠܳܐܺܝܬ ܟܽܠܳܗ̇ ܚܰܝܽܘܬܐ ܐܺܝܬܶܝܗ̇܆ ܗܳܟܰܢܳܐ ܐܳܦ ܠܚܰܝܠܶܗ ܕܰܐܒܳܐ ܡܪܰܝܡܳܐ܆ ܠܡܶܠܬܶܗ ܕܰܐ‌ܠܳܗܳܐ ܟܰܕ ܐܰܓܶܢ ܥܰܠ ܒܬܽܘܠܬܳܐ܆ ܘܡܶܢ ܪܽܘܚܳܐ ܩܰܕܺܝܫܳܐ ܘܡܶܢܳܗ̇ ܐܶܬܚܰܝܰܕ ܩܢܽܘܡܳܐܺܝܬ ܠܒܶܣܪܳܐ ܕܢܰܦܫܳܐ ܐܺܝܬ ܠܶܗ ܗܳܝ ܡܠܺܝܠܬܳܐ܆ ܐܰܝܟܰܢܳܐ ܕܳܐܦ ܠܒܰܛܢܳܐ ܢܶܬܪܡܶܐ܆ ܘܢܶܬܺܝܠܶܕ ܒܰܒܣܰܪ ܦܰܐܝܽܘܬ ܐܰ‌ܠܳܗܳܐܺܝܬ ܐܰܝܟ ܚܕܳܐ ܘܰܟܝܳܢܳܐܺܝܬ܆ ܟܰܕ ܩܰܘܺܝ ܠܳܐ ܡܶܣܬܰܕܩܳܢܳܐ ܐܰܣܳܪܳܐ ܕܰܒܬܽܘܠܽܘܬܳܐ܆ ܚܰܕ ܡܶܢ ܬܰܪܬܶܝܢ ܐܳܡܪܺܝܢ ܚ̱ܢܰܢ ܕܺܐܝܬܰܘܗ̱ܝ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܚܰܕ ܦܰܪܨܽܘܦܳܐ܆ ܚܰܕ ܩܢܽܘܡܳܐ܆ ܚܰܕ ܟܝܳܢܳܐ ܕܰܡܒܰܣܰܪ ܘܰܡܫܰܡܠܝܳܐܺܝܬ ܐܶܬܒܰܪܢܰܫ ܕܺܝܠܶܗ ܕܰܐ‌ܠܗܳܐ ܡܶܠܬܳܐ. ܗܺܝ ܡܰܢ ܓܶܝܪ ܡܰܪܝܰܡ ܟܰܕ ܒܰܟܝܳܢܳܐ ܒܰܪ̱ܬ ܐ̱ܢܳܫܳܐ ܐܺܝܬܶܝܗ̇ ܗ̱ܘܳܬ ܡܶܢ ܓܒܺܝܠܬܳܐ ܐ̱ܢܳܫܳܝܬܳܐ܆ ܟܝܳܢܳܐܺܝܬ ܠܡܰܘܗܰܒܬܳܐ ܝܰܗܒܳܐ ܗ̱ܘܳܬ. ܡܰܠܽܘܢ ܕܶܝܢ ܐܳܦ ܠܗܳܕܶܐ ܠܥܶܠ ܡܶܢ ܟܝܳܢܳܐ. ܪܰܚܺܝܩܳܐ ܗ̱ܘܳܬ ܓܶܝܪ ܡܶܢ ܙܰܪܥܳܐ ܐ̱ܢܳܫܳܝܳܐ ܘܡܶܢ ܪܶܓܬܳܐ܆ ܟܰܕ ܗܽܘ ܪܽܘܚܳܐ ܩܰܕܺܝܫܳܐ ܥܳܒܽܘܕܳܐܺܝܬ ܡܰܥܒܶܕ ܗ̱ܘܳܐ ܘܓܳܒܶܠ. ܡܶܠܬܶܗ ܕܶܝܢ ܕܰܐ‌ܠܳܗܳܐ ܗܰܘ ܕܰܩܕܳܡ ܥܳܠ̈ܡܶܐ ܡܶܢܗܽܘܢ ܕܫܽܘܪ̈ܳܝܶܐ ܩܰܕܡܳܝ̈ܶܐ ܘܰܪܦܳܦܳܐ ܗܰܘ ܠܳܐ ܡܶܬܦܰܣܩܳܢܳܐ ܕܙܰܒܢܳܐ ܕܰܩܒܳܥܳܐ ܐܰܘ ܟܺܝܬ ܩܽܘܝܳܡܳܐ ܗܰܘ ܕܰܒܡܰܪܒܥܳܐ܆ ܠܳܐ ܡܶܬܡܰܠܠܳܢܳܐܺܝܬ ܡܶܬܚܰܝܰܕ ܗ̱ܘܳܐ ܠܒܶܣܪܳܐ ܗܰܘ ܕܰܡܢܰܦܰܫ ܗ̱ܘܳܐ ܡܠܺܝܠܳܐܺܝܬ܆ ܒܰܙܢܳܐ ܗܰܘ ܕܰܡܟ̣ܳܢܳܐ ܢܰܦܫܳܐ ܡܠܺܝܠܬܳܐ ܠܡܶܬܚܰܝܳܕܽܘ ܠܦܰܓܪܳܐ܆ ܡܰܠܽܘܢ ܕܶܝܢ ܘܰܠܥܶܠ ܡܶܢ ܗܳܕܶܐ ܝܰܬܺܝܪ ܫܰܪܺܝܪܳܐܺܝܬ ܘܰܐ‌ܠܳܗܳܐܝܬ. ܫܰܘܝܰܬ ܒܪܶܗܛܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܗܺܝ ܚܕܳܝܽܘܬܳܐ܆ ܠܩܽܘܝܳܡܳܐ ܐܰܘ ܟܺܝܬ ܣܽܘܬܳܬ̣ܳܐ ܗܰܘ ܕܒܰܒܣܰܪ܆ ܘܗܳܕܶܐ ܐܺܝܬܶܝܗ̇ ܚܕܳܝܽܘܬܳܐ ܗܳܝ ܕܒܰܩܢܽܘܡܳܐ^[57] ܐܰܝܟܰܢܳܐ ܕܗܽܘ ܡܶܠܬܳܐ ܕܰܐ‌ܠܳܗܳܐ ܢܶܬܪܢܶܐ܆ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ܆ ܗܰܘ ܕܳܐܦ ܐܶܬܒܛܶܢ ܘܶܐܬܺܝܠܶܕ܆ ܘܝܳܠܕܰܬ ܐܰ‌ܠܳܗܳܐ ܬܡܺܝܗܳܐܺܝܬ ܚܰܘܺܝ ܠܗܳܝ ܕܺܝܠܶܕܬ̣ܶܗ܆ ܐܰܝܟ ܐܰܝܢܳܐ ܕܰܚܕܳܐ ܙܒܰܢ ܚܰܝܶܕ ܠܶܗ ܦܰܓܪܳܐ ܕܰܡܟܳܢ ܠܡܶܬܒܛܳܢܽܘ ܘܰܠܡܶܬܺܝܠܳܕܽܘ. ܠܰܘ ܓܶܝܪ ܒܗܳܝ ܕܡܶܠܬܳܐ ܐܺܝܬܰܘܗ̱ܝ܆ ܩܢܳܐ ܫܽܘܪܳܝܳܐ ܡܶܢ ܡܰܪܝܰܡ܆ ܐܰܝܟܰܢܳܐ ܓܶܝܪ ܗܰܘ ܕܰܒܟܽܠܙܒܰܢ ܐܺܝܬܰܘܗ̱ܝ܆ ܘܠܳܐ ܫܰܚܠܶܦ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܐܶܠܳܐ ܒܗܳܝ ܕܰܗܘ̣ܳܐ ܒܰܪܢܳܫܳܐ.

ܐܶܢܕܶܝܢ ܠܳܐ ܡܶܬܦܰܠܓܳܢܳܐܺܝܬ ܚܰܕ ܡܶܢ ܒܬܽܘܠܬܳܐ ܐܶܬܚܙܺܝ ܥܰܡܰܢܽܘܐܶܝܠ܆ ܐܰܝܟܰܢܳܐ ܡܶܢ ܒܳܬܰܪ ܚܕܳܝܽܘܬܳܐ ܕܰܐܝܟ ܗܳܕܶܐ܆ ܟܰܕ ܬܪܶܝܢ ܟܝܳܢܺܝ̈ܢ ܐܳܡܪܺܝܢܰܢ ܢܦܰܣܩܺܝܘܗ̱ܝ. ܗܳܕܶܐ ܓܶܝܪ ܦܣܳܩܳܐ ܥܰܒܝܳܐ ܐܺܝܬܶܝܗ̇ ܘܰܫܪܳܝܳܐ ܕܰܚܕܳܝܽܘܬܳܐ. ܐܶܢܕܶܝܢ ܐܰܝܟ ܢܶܣܛܽܘܪܺܝܽܘܤ ܩܳܕܶܡ ܐܰܢ̱ܬ ܓܳܒܶܠ ‌ܐܰܢ̱ܬ ܥܽܘܠܳܐ ܒܰܒܬܽܘܠܬܳܐ܆ ܘܗܳܟܰܢܳܐ ܡܰܥܶܠ ‌ܐܰܢ̱ܬ ܡܰܥܡܰܪ ܐܰܢ̱ܬ ܒܶܗ ܠܰܐܠܳܗܳܐ ܐܰܝܟ ܕܒܰܢܒܺܝ̈ܶܐ܆ ܒܢܰܩܺܝܦܽܘܬܳܐ ܚܽܘܒܳܢܳܝܬܳܐ ܘܪܶܚܡܬܳܐ ܕܨܶܒܝܳܢܳܐ܆ ܘܳܠܝܳܐܺܝܬ ܡܶܢ ܒܳܬܰܪ ܚܕܳܝܽܘܬܳܐ ܕܰܐܝܟ ܗܳܕܶܐ ܕܰܓܳܠܬܳܐ ܘܰܛܥܝܬܳܐ ܬܪܶܝܢ ܡܰܘܕܶܐ ܐܰܢ̱ܬ ܠܗܽܘܢ ܠܰܟ̈ܝܳܢܶܐ. ܠܰܘ ܓܶܝܪ ܐܰܝܟ ܦܰܘܠܽܘܤ ܐܳܡܰܪ ܐܰܢ̱ܬ܆ ܕܒܳܗ̇ ܒܰܕܡܽܘܬܳܐ ܠܰܢ ܐܶܫܬܰܘܬܰܦ ܡܶܠܬܳܐ ܒܰܕܡܳܐ ܘܰܒܒܶܣܪܳܐ^[58]. ܥܰܡ ܒܢ̈ܳܬ ܩܴ̈ܠܶܐ ܕܡܰܠ̈ܦܳܢܶܐ ܕܥܺܕܬܳܐ ܢܳܨܶܐ ܐ̱ܢܳܐ ܓܰܠܝܳܐܺܝܬ܆ ܕܡܰܦ̈ܩܳܢ ܠܢܰܩܺܝܦܽܘܬܳܐ ܕܺܝܠܳܟ ܡܦܰܠܰܓܬܳܐ. ܐܰܘ ܠܳܐ ܫܳܡܰܥ ܐܰܢ̱ܬ ܠܰܓܪܺܝܓܽܘܪܺܝܽܘܤ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ܆ ܕܰܠܘܳܬ ܩܠܺܝܕܽܘܢܝܘܤ ܟܳܬܶܒ܆ ܐܶܢ ܐ̱ܢܳܫ ܐܳܡܰܪ ܕܶܐܬܓܒܶܠ ܒܰܪܢܳܫܳܐ܆ ܒܳܬܰܪܟܶܢ ܚܠ̣ܰܕ ܥ̣ܰܠ ܥܡܰܪ ‌ܐܰ‌ܠܳܗܳܐ ܡܚܰܝܒܳܐ ܢܶܗܘܶܐ܆ ܠܰܘ ܓܶܝܪ ܝܺܠܺܝܕܽܘܬܳܐ ܕܰܐ‌ܠܳܗܳܐ ܐܺܝܬܶܝܗ̇ ܗܳܕܶܐ܆ ܐܶܠܳܐ ܥܪܽܘܩܝܳܐ ܕܡܶܢ ܝܺܠܺܝܕܽܘܬܳܐ. ܗܳܠܶܝܢ ܕܶܝܢ ܬܢܺܝܬ̣ ܐܳ‌ܠܨܳܐܺܝܬ܆ ܐܰܝܟܰܢܳܐ ܕܰܠܢܰܦ̈ܫܳܬܳܐ ܕܗܳܢܽܘܢ ܕܡܶܬܬܰܪܬܶܝܢ܆ ܐܰܘ ܕܗܳܢܽܘܢ ܕܰܐ̱ܚܪܳܢܝܳܐܺܝܬ ܚ̈ܰܕܬ̣ܶܐ ܘܠܳܐ ܩܒܺܝ̈ܥܶܐ ܐܺܝܬܰܝܗܽܘܢ ܒܗܰܝܡܳܢܽܘܬܳܐ܆ ܠܳܐ ܡܶܬܟܰܒ̈ܫܳܢܝܳܬܳܐ ܘܰܙܗܺܝܪ̈ܳܬܳܐ ܢܶܫܟܚܽܘܢ ܐܶܢܶܝܢ܆ ܗܳܢܽܘܢ ܡܚܰܪ̈ܟܫܰܝ ܠܦܳܬܽܘܪܳܐ ܕܛܰܢܦܽܘܬܶܗ ܕܢܶܣܛܽܘܪܺܝܽܘܤ܆ ܗܳܢܽܘܢ ܕܳܐܦ ܟܰܕ ܥܳܪ̈ܽܘܩܶܐ ܐܺܝܬܰܝܗܽܘܢ ܡܶܢ ܫܶܡܥܳܐ ܕܕܽܘܓܡ̈ܰܛܰܐ ܬܪ̈ܺܝܨܶܐ܆ ܡܶܫܬܰܟܚܺܝܢ ܗܳܫܳܐ ܕܰܚܠܺܝܕܺܝܢ ܒܕܽܘܟ ܘܰܡܛܰܫܶܝܢ ܒܡܰܪ̈ܥܝܳܬܳܐ܆ ܘܦܳܩܚܳܐ ܗ̱ܘܳܬ ܕܟܰܕ ܚܕܳܐ ܙܒܰܢ ܢܶܬܚܙܽܘܢ ܐܳܦܶܢ ܟܰܣܝܳܐܺܝܬ܆ ܒܶܗ ܒܣܶܕܪܳܐ ܕܰܩܪܳܒܳܐ ܢܶܡܚܶܐ ܐܶܢܽܘܢ ܒܓܶܐܪ̈ܶܐ ܩܳܛܽܘ̈ܠܶܐ. ܟܰܕ ܓܶܝܪ ܠܳܐ ܣܳܦܶܩ ܠܗܽܘܢ ܐܰܒܕܳܢܳܐ ܕܢܰܦܫܗܽܘܢ܆ ܟܰܕ ܛܳܒ ܚܰܟܺܝ̈ܡܶܐ ܣܳܒܪܺܝܢ ܕܺܐܝܬܰܝܗܽܘܢ. ܠܘܳܬ ܡܰܢ ܗܳܢܽܘܢ ܕܰܦܫܺܝܩܺܝܢ ܠܗܽܘܢ ܘܡܶܫܟܚܺܝܢ ܕܢܶܨܛܰܕܽܘܢ ܒܗܽܘܢ ܘܰܕܠܺܝܠܺܝܢ ܠܡܶܬܓܰܫܡܳܢܽܘܬܳܐ܆ ܦܳܬܚܺܝܢ ܠܦܽܘܡܗܽܘܢ ܡܓܰܕܦܳܢܳܐ. ܠܘܳܬ ܕܶܝܢ ܗܳܢܽܘܢ ܕܣܳܦܩܺܝܢ ܠܡܰܟܳܣܽܘ ܐܶܢܽܘܢ ܘܠܰܡܚܰܘܳܝܽܘ ܗܳܝ ܕܫܰܪܺܝܪܳܐ ܣܳܟܪܺܝܢ ܠܣܶܦ̈ܘܳܬܳܐ ܐܳܦ ܠܡܰܫܡܰܥܬܳܐ ܥܰܡ ܗܳܠܶܝܢ. ܘܡܶܚܕܳܐ ܕܰܡܢܰܣܶܐ ܐ̱ܢܳܫ ܕܢܰܘܫܶܛ ܠܗܽܘܢ ܡܰܟܺܝܟܳܐܺܝܬ ܡܶܠܬܳܐ ܡܰܘܬܪܳܢܺܝܬܳܐ܆ ܒܗܳܝ ܕܠܳܐ ܝܳܕܥܺܝܢ ܐܳܚܕܺܝܢ ܥܶܠܬܳܐ ܘܰܕܠܳܐ ܡܢܰܣܝܳܐܺܝܬ ܐܺܝܬ ܠܗܽܘܢ. ܘܟܰܕ ܪܟܺܝܢܳܐܺܝܬ ܡܶܫܬܰܐܠܺܝܢ^[59] ܢܳܫܩܺܝܢ ܠܺܐܝ̈ܕܰܝܳܐ. ܓܳܫܦܺܝܢ ܒܒܽܘܪ̈ܟܶܐ. ܘܡܶܬܟܰܫܦܺܝܢ ܘܰܡܦܺܝܣܺܝܢ ܘܰܡܣܰܓܕܺܝܢ. ܘܡܳܢܳܐ ܓܶܝܪ ܠܳܐ ܡܡܰܠܠܺܝܢ ܡܰܟܺܝܟܳܐ܆ ܡܳܢܳܐ ܕܶܝܢ ܠܳܐ ܥܳܒܕܺܝܢ ܕܰܦܐܶܐ ܠܥܰܒ̈ܕܶܐ. ܟܰܕ ܕܢܶܫܬܘܽܘܢ ܠܫܽܘܒܩܳܢܳܐ ܡܦܺܝܣܺܝܢ܆ ܘܰܠܗܳܝ ܕܢܶܥܪܩܽܘܢ ܡܶܢ ܗܳܝ ܕܫܰܦܺܝܪ ܢܶܬܬܨܺܝܕܽܘܢ ܘܢܶܬܟܰܣܣܽܘܢ ܗܶܢܽܘܢ ܙܺܝܥ̈ܶܐ ܝܽܘܬܪܳܢܳܐ ܣܳܒܪܺܝܢ. ܘܳܐܡܪܺܝܢ ܡܶܛܽܠ ܗܰܝܡܳܢܽܘܬܳܐ ܐܶܦܽܘܩ ܪܽܘܚܳܐ ܠܰܐܠܳܗܳܐ. ܟܰܕ ܠܩܰܕܺܝܡܽܘܬ ܡܶܬܬܰܚܕܳܢܽܘܬܳܐ ܠܳܐ ܡܒܰܚܰܢܬܳܐ ܗܰܝܡܳܢܽܘܬܳܐ ܡܣܒܪܺܝܢ. ܘܰܐܝܢܳܐ ܡܰܦܰܩ ܒܪܽܘܚܳܐ ܢܶܗܘܶܐ ܠܳܟ ܐܶܡܰܪ ܠܺܝ܆ ܟܕ ܠܕܺܝܢܳܪܳܐ ܡܰܢ ܡܶܚܕܳܐ ܕܢܳܣܶܒ ܐܰܢ̱ܬ ܠܶܗ ܡܶܢ ܗܰܘ ܕܚܰܝܳܒ ܠܳܟ܆ ܠܰܘ ܒܕܺܝܢܳܐ ܕܺܝܠܳܟ ܒܰܠܚܽܘܕ ܒܳܩܶܐ ܐܰܢ̱ܬ ܠܶܗ܆ ܐܶܠܳܐ ܐܳܦ ܒܡܰܣܰܐܬܳܐ ܚܰܬܺܝܬ̣ܬܳܐ ܕܕܺܝܡܽܘܣܝܽܘܢ ܬܳܩܶܠ ‌ܐܰܢ̱ܬ܆ ܘܶܐܢ ܗܽܘ ܕܢܳܚܫܳܝܳܐ ܡܶܕܶܡ ܢܶܬܚܙܶܐ ܘܰܐ̱ܚܪܳܢܝܳܐܺܝܬ ܙܺܐܦܳܢܳܐ܆ ܟܰܕ ܐܳܙܶܠ ‌ܐܰܢ̱ܬ ܠܘܳܬ ܗܳܢܽܘܢ ܕܡܶܫܟܚܺܝܢ ܠܰܡܦܰܪܳܫܽܘ ܡܶܢ ܗܰܘ ܒܚܺܝܪܳܐ ܠܗܰܘ ܡܰܣܠܝܳܐ܆ ܕܗܰܝܡܳܢܽܘܬܐ ܕܶܝܢ ܠܳܐ ܒܚܺܝܪܬܳܐ ܐܳܦ ܠܳܐ ܚܕܳܐ ܡܶܠܬܳܐ ܥܳܒܶܕ ܐܰܢ̱ܬ܆ ܐܶܠܳܐ ܠܳܐ ܡܒܰܚܢܳܐܺܝܬ ܠܗܳܕܶܐ܆ ܐܰܚܺܝܕ ܐܰܢ̱ܬ ܠܘܳܬܳܟ܆ ܘܰܟܒܰܪ ܡܶܢ ܢܶܫܽܘܢ̈ܝܳܬܳܐ ܡܶܕܶܡ ܐܰܘ ܓܰܒܪ̈ܽܘܢܶܐ ܒܺܝ̈ܫܶܐ ܕܒܶܗ ܟܰܕ ܒܶܗ ܒܓܰܪܒܳܐ ܕܰܠܘܳܬܳܟ ܚܳܟܶܝܢ ܡܶܬܺܝܗܶܒ ܠܳܟ ܛܽܘܒܳܐ. ܘܳܐܦ ܠܳܐ ܠܶܐܫܰܥܝܳܐ ܢܒܺܝܐ ܫܳܡܰܥ ܐܰܢ̱ܬ ܕܳܐܡܰܪ܆ ܥܰܡܳܐ ܕܺܝܠܝ ܗܳܢܽܘܢ ܕܝܳܗܒܺܝܢ ܠܟܽܘܢ ܛܽܘܒܳܐ ܡܰܛܥܶܝܢ ܠܟܽܘܢ^[60]. ܘܠܶܐܪܰܡܝܳܐ ܬܽܘܒ܆ ܟܶܣܦܳܐ ܡܰܣܠܝܳܐ ܩܪܰܘ ܐܶܢܽܘܢ܆ ܡܶܛܽܠ ܕܰܐܣܠܺܝ ܐܶܢܽܘܢ ܡܳܪܝܳܐ^[61]܆ ܘܳܐܦ ܠܦܰܘܠܽܘܤ ܕܶܝܢ ܒܳܗ̇ ܒܰܕܡܽܘܬܳܐ܆ ܒ̈ܢܰܝ ܐ̱ܢܳܫܳܐ ܕܰܡܚܰܒܠܺܝܢ ܒܗܰܘܢܳܐ܆ ܠܳܐ ܒܚܺܝܪ̈ܶܐ ܒܗܰܝܡܳܢܽܘܬܳܐ^[62].

ܡܶܛܽܠ ܗܳܟܺܝܠ ܕܗܳܝ ܕܢܶܒܩܶܐ ܫܰܦܺܝܪܬܳܐ ܐܺܝܬܶܝܗ̇. ܣܰܓܺܝ ܓܶܝܪ ܡܶܬܒܩܶܝܢ ܚ̱ܢܰܢ ܠܳܟ ܘܝܳܨܦܺܝܢܰܢ܆ ܬܳܐ^[63] ܪܢܐ ܥܰܡ ܗܳܢܽܘܢ ܕܡܶܬܬܰܪܬܶܝܢ ܒܫܰܦܺܝܪܽܘܬ ܬܰܪܥܺܝܬܳܐ. ܐܶܢ ܨܳܒܶܐ ܐܰܢ̱ܬ܆ ܚܽܘܪ ܒܰܓܡܽܘܪܬܳܐ ܗܳܝ ܕܰܡܫܰܒܝܳܢܳܐ ܕܳܐܦ ܐܰܝܟ ܕܰܒܛܽܘܦܣܳܐ ܬܚܰܘܶܐ ܠܳܟ ܫܪܳܪܳܐ. ܐܰܝܟܰܢܳܐ ܓܶܝܪ ܕܢܽܘܪܳܐ ܟܰܕ ܐܳܚܕܳܐ ܒܩܰܝܣܳܐ܆ ܡܶܫܬܰܠܛܳܐ ܒܶܗ ܡܰܢ ܘܟܳܪܟܳܐ ܠܶܗ ܘܰܒܥܽܘܡܩܳܐ ܚܳܠܕܳܐ ܘܰܠܟܽܠܶܗ ܢܽܘܪܳܐ ܥܳܒܕܳܐ ܠܶܗ܆ ܡܫܰܚܠܦܳܐ ܠܶܗ ܕܶܝܢ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܩܰܝܣܳܐ ܘܠܳܐ ܬܽܘܒ ܣܳܟ܆ ܐܳܦ ܐܶܢ ܚܙܳܬܳܐ ܘܚܰܝܠܳܐ ܕܢܽܘܪܳܐ ܐܺܝܬ ܠܶܗ܆ ܟܽܠܶܗ ܓܶܝܪ ܗܰܘ ܡܳܐ ܕܺܐܝܬܰܘܗ̱ܝ ܒܗܳܝ܆ ܟܽܠܳܗ̇ ܥܳܒܕܳܐ ܒܶܗ܆ ܡܰܘܩܶܕ ܓܶܝܪ ܐܳܦ ܡܰܢܗܰܪ܆ ܘܡܶܢ ܢܽܘܪܳܐ ܘܡܶܢ ܩܰܝܣܳܐ ܕܰܬܪܶܝܢ ܐܺܝܬܰܝܗܽܘܢ ܚܕܳܐ ܓܡܽܘܪܬܳܐ ܐܺܝܬܰܘܗ̱ܝ ܗܰܘ ܡܳܐ ܕܡܶܬܚܙܶܐ܆ ܕܰܠܗܳܠܶܝܢ ܕܡܶܢܗܶܝܢ ܡܟܰܢܫܳܐ ܠܳܐ ܬܽܘܒ ܡܶܬܦܰܣܩܳܐ܆ ܘܳܐܦ ܠܳܐ ܡܶܫܟܚܳܐ ܕܬܶܬܦܰܠܰܓ ܠܰܬܪܶܝܢ ܟܡܳܐ ܕܰܓܡܽܘܪܬܳܐ ܡܩܰܘܝܳܐ ܘܠܳܐ ܡܶܬܛܰܠܩܳܐ ܘܡܰܘܦܝܳܐ ܒܢܽܘܪܳܐ܆ ܒܶܗ ܟܰܕ ܒܶܗ ܒܰܙܢܳܐ ܐܰܝܟ ܕܡܶܫܟܚܳܐ ܘܰܐܝܟ ܕܰܒܬܶܐܘܳܪ̈ܺܝܐܰܤ ܩܰܛܺܝ̈ܢܳܬܳܐ܆ ܐܶܣܬܰܟܠ ܠܺܝ ܠܡܶܠܬܳܐ ܕܰܐ‌ܠܳܗܳܐ܆ ܠܢܽܘܗܪܳܐ ܗܰܘ ܡܶܬܗܰܘܢܳܢܳܐ܆ ܕܶܐܬܚܰܝܰܕ ܠܒܶܣܪܳܐ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܕܚܰܕ ܩܢܽܘܡܳܐ ܡܶܢ ܬܰܪ̈ܬܰܝܗܶܝܢ ܐܺܝܬܰܘܗ̱ܝ܆ ܟܕ ܘܠܳܐ ܡܶܠܬܐ ܐܶܬܚܰܠܰܦ ܠܦܰܓܪܳܐ܆ ܘܳܐܦܠܳܐ ܦܰܓܪܳܐ ܫܰܢܺܝ ܠܰܟܝܳܢܳܐ ܐܰ‌ܠܳܗܳܝܳܐ܆ ܠܳܐ ܡܶܫܟܚܳܢܺܝܬܳܐ ܗܝ ܓܶܝܪ܆ ܘܳܐܦܠܳܐ ܬܽܘܒ ܗܰܘ ܚܰܕ ܡܫܺܝܚܳܐ ܡܶܫܬܪܶܐ ܡܶܢ ܕܪܺܝܫ ܠܗܳܠܶܝܢ ܕܡܶܢܗܶܝܢ ܚܕܳܝܽܘܬܳܐ ܟܰܕ ܟܺܝܬ ܐܺܝܬ ܠܶܗ ܠܒܶܣܪܳܐ ܬܶܫܒܽܘܚܬܳܐ ܟܺܝܬ ܘܡܰܥܒܕܳܢܽܘܬܳܐ ܦܰܐܺܝܬ ܠܰܐܠܳܗܳܐ܆ ܒܝܰܕ ܫܘܺܝܚܽܘܬܳܐ ܕܰܐܟܚܕܳܐ ܕܡܶܠܬܳܐ ܗܰܘ ܕܶܐܬܚܰܝܰܕ ܠܶܗ܆ ܐܰܝܟ ܒܰܝܬܳܝܬܳܐ ܡܶܢ ܟܰܕܽܘ ܘܠܳܐ ܡܶܬܦܰܣܩܳܢܺܝܬܳܐ܆ ܘܣܰܓܺܝ ܝܰܬܺܝܪܳܐ܆ ܐܰܘ ܩܰܝܣܳܐ ܟܰܕ ܗܳܠܶܝܢ ܕܢܽܘܪܳܐ ܡܰܥܒܶܕ. ܐܰܝܟܰܢܳܐ ܟܺܝܬ ܕܰܡܫܺܝܚܳܐ ܡܶܠܬܳܐ ܗܰܘ ܕܶܐܬܒܰܣܰܪ܆ ܐܳܦ ܡܺܝ̈ܬܶܐ ܢܩܺܝܡ܆ ܐܳܦ ܠܗܳܢܽܘܢ ܕܰܪܡܶܝܢ ܢܰܚܶܐ܆ ܐܳܦ ܥܰܠ ܝܰܡܳܐ ܢܗܰܠܶܟ܆ ܘܳܐܦ ܟܰܕ ܐܰܚܺܝܕܺܝܢ ܬܰܪ̈ܥܶܐ܆ ܠܓܰܘ ܡܶܢ ܒܰܝܬܳܐ ܢܶܗܘܶܐ ܘܢܶܬܚܙܶܐ ܠܬܰܠ̈ܡܺܝܕܶܐ. ܠܗܳܢܳܐ ܒܟܰܠܒܬܳܐ ܕܺܝܕܰܥܬܳܐ ܐܰܝܟܰܢܳܐ ܕܗܰܘ ܚܰܕ ܡܶܢ ܣܪ̈ܳܦܶܐ ܡܶܫܟܚܺܝܢܰܢ ܠܡܶܠܒܰܟ. ܐܳܦ ܓܶܝܪ ܐܶܬܓܫܶܫ ܒܝܰܕ ܗܳܠܶܝܢ ܕܶܐܬܒܰܪܢܰܫ. ܐܶܠܳܐ ܗܳܟܰܢܳܐ ܐܰܝܟ ܓܡܽܘܪܬܳܐ܆ ܟܰܕ ܠܗܳܢܽܘܢ ܕܠܰܘ ܥܰܡ ܟܰܠܒܬܳܐ ܡܶܬܩܰܪܒܺܝܢ ܠܳܐ ܡܶܬܠܰܒܟܳܢܳܐ ܐܺܝܬܰܘܗ̱ܝ܆ ܓܳܫܶܦ ܕܶܝܢ ܒܣܶܦ̈ܘܳܬܳܐ ܪܶܚܡܰܬ ܐ̱ܢܳܫܳܐܺܝܬ܆ ܕܗܳܢܽܘܢ ܕܰܒܠܶܒܳܐ ܡܗܰܝܡܢܺܝܢ ܠܙܰܕܺܝܩܽܘܬܳܐ܆ ܒܦܽܘܡܳܐ ܕܶܝܢ ܡܰܘܕܶܝܢ ܠܦܽܘܪܩܳܢܳܐ^[64]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ.

ܐܰܝܟܳܐ ܐܺܝܬܰܝܗܽܘܢ ܟܰܕ ܠܗܳܠܶܝܢ ܫܳܡܥܺܝܢ܆ ܗܳܢܽܘܢ ܕܰܐܚܺܝܕܺܝܢ ܒܦܰܢܛܐܣܺܝܐ ܕܽܐܘܛܘܟܐ܆ ܡܰܠܽܘܢ ܕܶܝܢ ܕܰܠܘܳܬ ܣܝܳܢܳܐ ܣܰܪܝܳܐ ܗܰܘ ܕܡܰܢܺܝ̈ܢܳܝܶܐ ܫܪܰܥܘ. ܐܰܪܰܐ ܟܰܕ ܡܶܢ ܢܰܨܺܝܚܽܘܬܳܐ ܕܰܓܡܽܘܪܬܳܐ ܒܳܗܬܺܝܢ܆ ܢ݀ܬܠܘܢ ܠܶܗ ܠܰܡܫܺܝܚܳܐ ܒܶܣܪܳܐ ܗܰܘ ܫܰܪܺܝܪܳܐ ܘܕܺܝܠܰܢ܆ ܗܰܘ ܕܰܕܠܳܐ ܫܳܘܶܐ ܡܶܬܬܕܺܝܢ ܡܶܢܗܽܘܢ ܡܶܛܽܠ ܨܳܐܬܳܐ ܐܰܝܟ ܕܳܐܡܪܺܝܢ܆ ܠܰܚܕܳܝܽܘܬܳܐ ܕܰܠܘܳܬ ܡܶܠܬܳܐ. ܒܰܐܝܢܳܐ ܛܽܘܠܫܳܐ ܓܶܝܪ ܡܶܫܬܰܘܬܰܦ ܐܰ‌ܠܳܗܳܐ ܟܰܕ ܠܰܡܥܰܕܳܪܽܘ ܨܳܒܶܐ. ܐܰܝ̇ܕܳܐ ܕܶܝܢ ܨܳܐܬܳܐ܆ ܐܰܝܟܳܐ ܕܠܳܐ ܐܺܝܬ ܚܛܺܝܬܳܐ. ܒܕܰܠܩܽܘܒܠܳܐ ܕܶܝܢ ܕܰܟܝܽܘܬܳܐ ܕܰܒܬܽܘܠܽܘܬܐ ܘܡܰܓܢܳܢܽܘܬܳܐ ܕܪܽܘܚܳܐ. ܐܺܝܢ ܐܳܡܰܪ.

ܐܶܠܳܐ ܐܰܡܺܝܪܳܐ ܕܒܶܣܪܳܐ ܘܰܕܡܳܐ ܡܰܠܟܽܘܬܐ ܕܰܐ‌ܠܳܗܳܐ ܠܳܐ ܢܺܐܪܬܽܘܢ܆ ܘܳܐܦܠܳܐ ܚܒܳܠܳܐ ܝܳܪܶܬ ܠܠܳܐ ܡܶܬܚܰܒܠܳܢܽܘܬܳܐ^[65]܆ ܘܕܳܚܶܠ ‌ܐ̱ܢܳܐ ܐܺ݀ܡܰܪ܆ ܕܡܶܠܬܳܐ ܗܰܘ ܕܰܐ‌ܠܳܗܳܐ ܐܶܬܚܰܝܰܕ ܠܰܚܒܳܠܳܐ. ܦܽܘܝ ܡܶܢ ܠܳܐ ܝܰܠܺܝܦܽܘܬܳܐ ܘܡܶܢ ܥܰܒܝܽܘܬܳܐ ܩܽܘܪܝ̣ܳܝ̣ܬܳܐ. ܛܳܥܝܳܐ ܠܗܽܘܢ ܕܰܟܬܳܒܐ ܐܰ‌ܠܳܗܳܝܳܐ܆ ܒܰܙܒܰܢ ܡܰܢ ܒܶܣܪܳܐ ܘܰܕܡܳܐ ܠܽܐܘܣܺܝܰܐ ܕܦܰܓܪܳܐ ܩܳܪܶܐ܆ ܘܠܰܘ ܠܟܽܠܶܗ ܒܰܪܢܳܫܳܐ ܡܶܢ ܡܢܳܬܳܐ܆ ܐܰܝܟ ܐܰܝܟܳܐ ܕܳܐܡܰܪ܆ ܕܛܽܘܒܰܝܟ ܫܶܡܥܽܘܢ ܒܪܶܗ ܕܝܰܘܢܳܐ ܕܒܶܣܪܳܐ ܘܰܕܡܳܐ ܠܳܐ ܓܠܳܐ ܠܳܟ܆ ܐܶܠܳܐ ܐܳܒܝ ܗܰܘ ܕܒܰܫܡܰܝܳܐ^[66]܆ ܘܦܰܘܠܽܘܤ ܒܶܐܓܰܪܬܐ ܗܳܝ ܕܰܠܘܳܬ ܓܰܠܰܛܳܝ̈ܶܐ܆ ܠܳܐ ܐܰܘܕܥܶܬ ܠܒܶܣܪܳܐ ܘܰܕܡܳܐ܆ ܘܳܐܦܠܳܐ ܐܶܙܶܠ̱ܬ̣ ܠܽܐܘܪܫܠܶܡ ܠܘܳܬ ܫܠܺܝ̈ܚܶܐ ܗܳܢܽܘܢ ܕܡܶܢ ܩܕܳܡܰܝ^[67]܆ ܗܳܢܰܘ ܕܶܝܢ ܣܦܰܩ ܠܺܝ ܓܶܠܝܳܢܳܐ ܗܰܘ ܕܡܶܢ ܐܰ‌ܠܳܗܳܐ܆ ܘܡܶܢ ܒܢܰܝ̈ܢܳܫܳܐ ܐܳܦܠܐ ܠܚܰܕ ܫܰܘܬܦܶܬ ܒܡܶܠܟܳܐ ܕܡܶܛܽܠ ܗܳܕܶܐ܆ ܘܳܐܦ ܡܙܰܡܪܳܢܳܐ܆ ܫܡܰܥ ܐܰ‌ܠܳܗܳܐ ܨܠܽܘܬܝ ܠܘܳܬܳܟ ܟܽܠ ܒܶܣܪܳܐ ܢܺܐܬܶܐ^[68]܆ ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ܆ ܢܒܰܪܶܟ ܟܽܠ ܒܶܣܪܳܐ ܠܰܫܡܳܐ ܩܰܕܺܝܫܳܐ ܕܺܝܠܶܗ^[69]܆ ܒܰܙܒܰܢ ܕܶܝܢ܆ ܠܬܰܪܥܺܝܬܳܐ ܗܳܝ ܕܰܠܘܳܬ ܗܰܢܺܝܽܐܘܬܳܐ ܕܒܶܣܪܳܐ ܚܳܝܪܳܐ܆ ܒܶܣܪܳܐ ܘܰܕܡܳܐ ܐܰܘ ܒܶܣܪܳܐ ܒܰܠܚܽܘܕ ܝܳܕܰܥ ܠܡܶܩܪܳܐ܆ ܐܰܝܟ ܐܰܝܟܳܐ ܕܟܰܕ ܠܪ̈ܽܘܡܳܝܶܐ ܟܳܬܶܒ ܫܠܺܝܚܳܐ ܐܳܡܰܪ܆ ܗܳܢܽܘܢ ܕܶܝܢ ܕܰܒܒܶܣܪܳܐ ܐܺܝܬܰܝܗܽܘܢ ܠܡܶܫܦܰܪ ܠܰܐܠܳܗܳܐ ܠܳܐ ܡܶܫܟܚܺܝܢ܆ ܐܢ̱ܬܽܘܢ ܕܶܝܢ ܠܳܐ ܐܺܝܬܰܝܟܽܘܢ ܒܒܶܣܪܳܐ ܐܶܠܳܐ ܒܪܽܘܚܳܐ^[70]. ܐܰܪܰܐ ܓܶܝܪ܆ ܟܰܕ ܠܳܐ ܦܰܓܪ̈ܳܢܶܐ ܐܺܝܬܰܝܗܽܘܢ ܟܳܬܶܒ ܠܗܽܘܢ ܗܳܠܶܝܢ܆ ܐܰܘ ܟܰܕ ܕܟܰܝ̈ܳܐ ܡܰܠܽܘܢ ܐܺܝܬܰܝܗܽܘܢ ܘܰܡܚܰܪܪ̈ܶܐ ܡܶܢ ܬܰܪܥܺܝܬܳܐ ܕܒܶܣܪܳܐ. ܘܰܠܗܳܕܶܐ ܡܚܰܘܶܐ ܓܰܠܝܳܐܺܝܬ܆ ܘܗܽܘ ܗܰܘ ܕܗܳܠܶܝܢ ܐܶܡܰܪ. ܡܶܢ ܠܥܶܠ ܓܶܝܪ ܐܶܡܰܪ܆ ܬܰܪܥܺܝܬܳܐ ܕܒܶܣܪܳܐ ܡܰܘܬܳܐ. ܬܰܪܥܺܝܬܳܐ ܕܶܝܢ ܕܪܽܘܚܳܐ܆ ܚܰܝ̈ܶܐ ܘܰܫܠܳܡܳܐ. ܡܶܛܽܠ ܕܬܰܪܥܺܝܬܳܐ ܕܒܶܣܪܳܐ܆ ܒܥܶܠܕܒܳܒܽܘܬܳܐ ܗܝ ܠܘܳܬ ܐܰ‌ܠܳܗܳܐ. ܠܢܳܡܽܘܣܳܐ ܓܶܝܪ ܕܰܐ‌ܠܳܗܳܐ ܠܳܐ ܡܶܫܬܰܥܒܕܳܐ^[71]. ܐܳܦܠܳܐ ܓܶܝܪ ܡܶܫܟܚܳܐ. ܡܶܛܽܠ ܬܰܪܥܺܝܬܳܐ ܗܳܝ ܕܕܰܐܝܟ ܗܳܕܶܐ ܐܶܡܰܪ܆ ܕܒܶܣܪܳܐ ܘܰܕܡܳܐ ܡܰܠܟܽܘܬܐ ܕܰܐ‌ܠܳܗܳܐ ܠܡܺܐܪܰܬ ܠܳܐ ܡܶܫܟܚܺܝܢ. ܐܳܦܠܳܐ ܚܒܳܠܳܐ ܝܳܪܶܬ ܠܠܳܐ ܡܶܬܚܰܒܠܳܢܽܘܬܳܐ^[72].

ܐܳܦ ܓܶܝܪ ܐܶܢ ܐܰܝܟ ܛܳܥܝܽܘܬܳܐ ܕܺܝܠܟܽܘܢ ܐܳܘ ܡܝܰܬܪ̈ܶܐ܆ ܠܽܐܘܣܺܝܰܐ ܗܳܝ ܕܒܶܣܪܳܐ ܘܳܐܦ ܠܶܗ ܠܦܰܓܪܳܐ ܢܺܐܡܰܪ܆ ܕܠܳܐ ܡܶܫܟܚܺܝܢ ܠܡܺܐܪܰܬ ܡܰܠܟܽܘܬܳܐ ܕܰܐ‌ܠܳܗܳܐ܆ ܘܳܐܦܠܳܐ ܚܒܳܠܳܐ ܠܡܺܐܪܰܬ ܠܳܐ ܡܶܬܚܰܒܠܳܢܽܘܬܳܐ܆ ܐܶܒܰܕ ܠܶܗ ܠܰܢ ܣܰܒܪܳܐ ܕܰܩܝܳܡܬܳܐ ܕܦܰܓܪ̈ܶܐ ܕܺܝܠܰܢ. ܢܶܫܬܟܚ ܕܶܝܢ ܐܳܦ ܥܳܒܽܘܕܳܐ ܕܰܚܒܳܠܐ ܗܽܘ ܐܰ‌ܠܳܗܳܐ܆ ܗܰܘ ܕܡܶܢ ܫܽܘܪܳܝܳܐ ܓܰܒ̣ܠܶܗ ܠܒܰܪܢܳܫܳܐ. ܚܳܙܶܝܢ ܐܢ̱ܬܽܘܢ ܕܳܐܦ ܠܽܘܩܒܰܠ ܢܰܦܫܟܽܘܢ ܠܣܰܝܦܳܐ ܕܳܚܶܝܢ ܐܢ̱ܬܽܘܢ܆ ܘܰܠܘܳܬ ܡܰܣܒܪ̈ܳܢܘܳܬܳܐ ܡܓܰܕܦܳܢ̈ܝܳܬܳܐ ܢܳܦܩܺܝܢ ܐܢ̱ܬܽܘܢ܆ ܟܰܕ ܒܦܰܢܛܰܣܝܰܐ ܫܺܐܕܳܢܳܝܬܳܐ ܐܰܝܟ ܗܰܘ ܕܒܳܬܰܪ ܛܶܠܳܢ̈ܝܳܬܟܽܘܢ ܪܳܗܛܺܝܢ ܐܢ̱ܬܽܘܢ܆ ܘܒܰܕܡܽܘܬ ܗܳܢܽܘܢ ܕܰܪܘܶܝܢ ܡܫܰܘܪܺܝܢ ܐܢ̱ܬܽܘܢ܆ ܐܺܝܩܺܝ܆ ܘܠܰܫܪܳܪܳܐ ܥܳܒܪܺܝܢ ܐܢ̱ܬܽܘܢ܆ ܚܽܘܪܘ ܠܘܳܬ ܓܡܽܘܪܬܳܐ ܥܰܡ ܗܳܠܶܝܢ ܕܗܳܫܳܐ ܛܥܶܡܘ ܠܡܶܠܬܳܐ ܕܚܰܝ̈ܶܐ. ܕܰܥܘ ܕܒܰܐܝ̇ܕܳܐ ܬܶܫܒܽܘܚܬܳܐ ܫܰܘܬܶܦ ܠܰܢ. ܒܒܶܣܪܳܐ ܕܺܝܠܰܢ ܗܰܘ ܡܩܰܒܠܳܢܳܐ ܕܗܳܝ ܕܢܶܚܰܫ܆ ܫܪܳܝܗ̱ܝ ܠܽܐܘܚܕܳܢܶܗ ܕܡܰܘܬܳܐ ܗܰܘ ܠܳܐ ܚܳܫܽܘܫܳܐ܆ ܟܰܕ ܠܰܢ ܡܶܬܬܰܓܰܪ ܗ̱ܘܳܐ ܙܳܟܽܘܬܳܐ. ܠܰܢ ܓܶܝܪ ܐܳܦ ܐܰܩܺܝܡ ܐܰܟܚܕܳܐ ܥܰܡܶܗ܆ ܐܳܦ ܐܰܣܶܩ ܐܰܟܚܕܳܐ ܠܰܫܡܰܝܳܐ܆ ܘܰܠܘܳܬܶܗ ܕܺܝܠܶܗ ܕܰܬܪܽܘܢܘܤ ܗܰܘ ܡܰܠܟܳܝܳܐ ܘܕܰܠܗܰܠ ܡܶܢ ܟܽܠ. ܝܺܬܶܒ ܓܶܝܪ ܡܶܢ ܝܰܡܺܝܢܳܐ ܕܰܐܒܳܐ܆ ܟܰܕ ܗܽܘ ܥܬܺܝܕ ܠܡܶܐܬܳܐ ܠܕܺܝܢܳܐ܆ ܒܶܗ ܟܰܕ ܒܶܗ ܒܦܰܓܪܳܐ ܒܗܰܘ ܕܳܐܦ ܗܳܫܳܐ ܠܳܐ ܡܶܣܬܰܝܟܳܢܳܐܺܝܬ ܐܺܝܬܰܘܗ̱ܝ܆ ܗܰܘ ܕܒܶܗ ܐܳܦ ܡܶܢ ܗܳܢܽܘܢ ܕܰܕܓܰܫܽܘܗ̱ܝ ܐܰܝܟ ܡܶܠܬܳܐ ܢܒܺܝ̣ܳܝ̣ܬܳܐ ܢܶܬܚܙܶܐ܆ ܒܪܰܡ ܥܰܡ ܫܽܘܒܚܳܐ ܗܰܘ ܕܰܦܐܶܐ ܠܰܐܠܳܗܳܐ.

ܟܰܕ ܗܳܟܺܝܠ ܠܘܳܬ ܚܰܝ̈ܶܐ ܕܰܐܝܟ ܗܳܠܶܝܢ ܐܶܬܩܪܺܝܬܽܘܢ ܐܢ̱ܬܽܘܢ ܗܳܢܽܘܢ ܕܡܶܬܐܰܪܙܺܝܢ ܐܢ̱ܬܽܘܢ܆ ܘܰܥܬܺܝܕܺܝܢ ܐܢ̱ܬܽܘܢ ܕܰܠܢܽܘܗܪܳܐ ܫܰܪܺܝܪܳܐ ܬܶܫܬܘܽܘܢ܆ ܘܡܶܢ ܥܰܒܕܽܘܬܳܐ ܡܰܪܺܝܪܬܳܐ ܕܤܳܛܳܢܳܐ ܬܶܬܚܰܪܪܽܘܢ܆ ܐܶܬܬܥܺܝܪܘ ܘܩܽܘܡܘ. ܡܫܺܝܚܳܐ ܦܳܩܶܕ ܠܟܽܘܢ ܗܳܕܶܐ ܘܠܰܘ ܐܶܢܳܐ. ܐܳܦ ܓܶܝܪ ܐܶ‌ܠܽܘ ܠܳܐ ܕܰܒܝܰܕ ܨܠܺܝܒܳܐ ܘܡܰܚܰܬܬ̣ܳܐ ܕܠܰܫܝܽܘܠ ܘܰܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ܆ ܐܰܩܗܝܶܗ ܠܥܽܘܩܣܶܗ ܕܡܰܘܬܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܗ̱ܘܳܐ ܩܘܢܛܪܐ ܕܝܰܬܺܝܪ ܩܪܰܒܬܳܢܳܝ ܕܳܐܟܶܠ ܩܰܪܨܳܐ܆ ܘܚܶܣܢܳܐ ܡܶܕܶܡ ܘܒܶܝܬ ܢܛܽܘܪܬܳܐܕܰܚܒܽܘܫܝܳܐܕܰܡܕܺܝܢ̱ܬܳܐܡܪܺܝܕܬܳܐܕܰܥܠܰܝܢ܆ ܡܰܢܽܘ ܡܨܶܐ ܗ̱ܘܳܐ ܠܡܶܚܛܰܦܟܽܘܢ ܡܶܢ ܛܪܽܘܢܽܘܬܳܐ ܩܫܺܝܬܳܐ܆ ܕܗܳܐ ܡܳܐܢ̈ܶܐ ܘܩܶܢܝܳܢܳܐ ܕܒܺܝܫܳܐ ܗܘܰܝܬܽܘܢ ܡܶܢ ܟܰܕܽܘ. ܗܳܕܶܐ ܓܶܝܪ ܘܳܐܦ ܗܽܘ ܦܳܪܽܘܩܰܢ ܒܶܐܘܰܢܓ̈ܶܠܺܝܰܐ ܐܳܡܰܪ ܗ̱ܘܳܐ܆ ܕܰܐܝܟܰܢܳܐ ܡܶܫܟܰܚ ܐ̱ܢܳܫ ܠܡܶܥܰܠ ܠܒܰܝܬܶܗ ܕܚܰܣܺܝܢܳܐ ܘܰܠܡܳܐܢܰܘܗ̱ܝ ܢܶܚܛܽܘܦ܆ ܐܶܠܳܐ ܐܶܢ ܠܽܘܩܕܰܡ ܢܶܐܣܪܺܝܘܗ̱ܝ ܠܶܗ ܠܚܰܝܠܬܳܢܳܐ܆ ܘܗܳܝܕܶܝܢ ܒܰܝܬܶܗ ܢܶܒܽܘܙ^[73]. ܡܳܢܳܐ ܗܳܟܺܝܠ ܡܶܬܬܰܗܶܝܢ ܐܢ̱ܬܽܘܢ. ܠܡܳܢܳܐ ܠܰܘ ܩܰܠܺܝܠܳܐܺܝܬ ܚܳܝܪܺܝܢ ܐܢ̱ܬܽܘܢ ܠܘܳܬ ܫܶܡܫܳܐ ܕܥܳܪܶܒ܆ ܘܰܒܣܳܥܽܘܪ̈ܘܳܬܳܐ ܕܚܶܫܽܘܟܳܐ ܟܳܦܪܺܝܢ ܐܢ̱ܬܽܘܢ ܘܫܳܠܚܺܝܢ ܐܢ̱ܬܽܘܢ ܠܢܰܚܬܳܐ ܐܽܘܟܳܡܳܐ ܕܒܺܝܫܽܘܬܳܐ܆ ܘܠܰܦܟܳܪ̈ܶܐ ܗܳܢܽܘܢ ܛܪ̈ܽܘܢܳܝܶܐ ܫܳܕܶܝܢ ܐܢ̱ܬܽܘܢ ܡܶܢܟܽܘܢ. ܕܗܳܕܶܐ ܓܶܝܪ ܐܺܝܬܶܝܗ̇ ܫܽܘܘܕܳܥܳܐ܆ ܗܳܝ ܕܟܰܕ ܦܢܶܝܢ ܐܢ̱ܬܽܘܢ ܠܘܳܬ ܦܢܺܝܬܳܐ ܗܳܝ ܡܰܥܪܒܳܝܬܳܐ܆ ܒܰܒ̈ܢܳܬ ܩ̈ܳܠܶܐ ܕܚܺܐܪܽܘܬܳܐ ܬܶܬܚܰܫܚܽܘܢ. ܠܰܘ ܓܶܝܪ ܐܰܝܟܰܢܳܐ ܕܰܬܚܰܘܽܘܢܳܝܗ̱ܝ ܠܫܺܐܕܳܐ ܗܰܘ ܒܺܝܫܳܐ ܘܩܰܫܝܳܐ܆ ܕܫܰܠܺܝܛ ܗ̱ܘ̣ ܥܰܠ ܡܢܳܬܳܐ ܡܶܕܶܡ ܡܶܢ ܒܪܺܝܬܳܐ. ܕܺܝܠܝ ܓܶܝܪ ܐܺܝܬܶܝܗ̇ ܡܶܬܥܰܡܪܳܢܺܝܬܳܐ^[74]܆ ܐܳܦ ܡܽܘܠܳܝܳܐ ܕܺܝܠܳܗ̇܆ ܐܳܡܰܪ ܗܰܘ ܕܺܐܝܬܰܘܗ̱ܝ ܡܳܪܳܐ ܘܒܳܪܽܘܝܳܐ ܕܗܳܕܶܐ܆ ܒܝܰܕ ܢܒܺܝܳܐ ܗܰܘ ܕܰܡܙܰܡܰܪ. ܗܰܘ ܕܳܐܦ ܟܰܕ ܡܫܰܒܰܚ ܠܳܗ̇ ܩܳܥܶܐ ܗ̱ܘܳܐ܆ ܕܡܶܢ ܡܰܕܢܳܚܰܘ̈ܗ̱ܝ ܕܫܶܡܫܳܐ ܥܕܰܡܳܐ ܠܡܰܥܪ̈ܳܒܰܘܗܝ܆ ܡܫܰܒܰܚ ܗ̱ܘ̣ ܫܡܶܗ ܕܡܳܪܝܳܐ^[75]. ܗܰܘ ܕܰܠܘܳܬܶܗ ܟܰܕ ܡܶܬܦܢܶܝܢ ܐܢ̱ܬܽܘܢ܆ ܘܰܠܘܳܬ ܡܰܕܢܳܚ̈ܰܝ ܫܶܡܫܳܐ ܚܳܝܪܺܝܢ ܐܢ̱ܬܽܘܢ܆ ܡ̈ܶܠܶܐ ܕܰܩܝܳܡ̈ܶܐ ܡܰܠܶܠܘ. ܓܰܠܝܳܐܺܝܬ ܐܶܡܰܪܘ܆ ܕܠܳܐ ܬܽܘܒ ܡܰܣܩܺܝܢ ܐܢ̱ܬܽܘܢ ܡܰܕܰܐܬܳܐ ܠܒܺܝܫܳܐ. ܩܶܢܝܳܢܳܐ ܕܡܰܠܟܳܐ ܫܡܰܝܳܢܳܐ ܗܘܰܝܬܽܘܢ. ܣܳܥܽܘܪ̈ܘܳܬܳܐ ܢܳܡܽܘܣ̈ܳܝܳܬܳܐ ܘܰܕܠܰܫܡܰܝܳܐ ܦܰܐܝ̈ܳܢ ܣܥܽܘܪܘ. ܠܘܳܬ ܡܫܺܝܚܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ ܚܳܪܬܽܘܢ܆ ܒܢܽܘܗܪܳܐ ܕܰܥ̈ܒܳܕܶܐ ܕܙܰܕܺܝܩܽܘܬܳܐ ܐܶܬܢܰܨܰܚܘ. ܠܘܳܬ ܐܰܬܪܳܐ ܩܕܡܝܐ ܐܶܬܛܰܝܰܒܘ^[76]܆ ܠܘܳܬ ܦܰܪܕܰܝܣܳܐ ܐܳܡܰܪ ܐ̱ܢܳܐ ܗܰܘ ܕܰܢܨܺܝܒ ܒܡܰܕܢܚܳܐ. ܗܳܕܶܐ ܓܶܝܪ ܡܚܰܘܶܐ ܐܶܣܟܺܡܳܐ ܕܩܰܘܡܳܐ ܗܰܘ ܕܗܳܫܳܐ ܐܰܩܺܝܡܢܳܟܽܘܢ܆ ܐܰܝܟ ܕܺܐܝܬܰܘܗ̱ܝ ܢܳܡܽܘܣܳܐ. ܬܺܐܙܽܠ̱ܘܢ ܡܶܟܺܝܠ ‌ܐܳܦ ܠܘܳܬ ܡܥܺܝܢܳܐ ܗܳܝ ܕܝܽܘܪܕܢܳܢ܆ ܗܳܝ ܕܡܰܠ̣ܝܳܐ ܪܽܘܚܳܐ ܩܰܕܺܝܫܳܐ ܘܕܽܘܟܳܝܳܐ ܘܢܽܘܪܳܐ ܐܰ‌ܠܳܗܳܝܬܳܐ܆ ܗܳܝ ܕܒܳܗ̇ ܬܶܬܩܰܒܪܽܘܢ ܐܰܟܚܕܳܐ ܥܰܡ ܡܫܺܝܚܳܐ܆ ܟܰܕ ܒܡܰܝ̈ܳܐ ܩܳܒܪܺܝܢ ܐܢ̱ܬܽܘܢ ܠܒܰܪܢܳܫܳܐ ܗܰܘ ܥܰܬܺܝܩܳܐ. ܡܶܛܽܠܗܳܕܶܐ ܓܶܝܪ ܐܳܦ ܒܰܓܡܳܥܬܳܐ ܗܳܝ ܬܠܺܝܬܳܝܬܳܐ܆ ܠܰܩܒܽܘܪܬܳܐ ܬܠܺܝܬܳܝܰܬ ܝܰܘ̈ܡܶܐ ܡܰܘܕܥܺܝܢ ܚ̱ܢܰܢ܆ ܘܠܰܩܝܳܡܬܳܐ ܕܡܶܢ ܗܳܪܟܳܐ. ܕܡܳܢܳܐ ܗܳܟܺܝܠ ‌ܐܺܝܬܰܝܗܽܘܢ ܚܰܝܳܒ̈ܶܐ ܗܳܢܽܘܢ ܕܰܒܗܳܕܶܐ ܛܰܝܒܽܘܬܳܐ ܐܶܫܬܰܘܬܰܦܘ܆ ܢܶܫܡܰܥ ܠܦܰܘܠܽܘܤ ܕܡܰܠܶܦ ܗܳܟܰܢܳܐ. ܐܶܬܩܒܰܪܢܰܢ ܗܳܟܺܝܠ ܥܰܡܶܗ ܐܰܟܚܕܳܐ ܒܝܰܕ ܡܰܥܡܽܘܕܺܝܬܳܐ ܠܡܰܘܬܳܐ܆ ܐܰܝܟܰܢܳܐ ܕܰܐܟܙܢܳܐ ܕܩܳܡ ܡܫܺܝܚܳܐ ܡܶܢ ܡܺܝ̈ܬܶܐ ܒܝܰܕ ܬܶܫܒܽܘܚܬܳܐ ܕܰܐܒܳܐ. ܗܳܟܰܢܳܐ ܐܳܦ ܚܢܰܢ ܒܚܰܕܬ̣ܽܘܬ̣ܳܐ ܕܚܰܝ̈ܶܐ ܢܗܰܠܶܟ. ܐܶܢ ܓܶܝܪ ܫܰܘܝ̣̈ܰܝ̣ ܒܡܰܘܥܺܝܬܳܐ ܗܘܰܝܢܰܢ ܠܰܕܡܽܘܬܳܐ ܕܡܰܘܬܶܗ܆ ܐܶܠܳܐ ܐܳܦ ܕܰܩܝܳܡܬܶܗ ܢܶܗܘܶܐ. ܟܰܕ ܗܳܕܶܐ ܝܳܕܥܺܝܢ ܐܢ̱ܬܽܘܢ ܕܒܰܪܢܳܫܰܢ ܗܰܘ ܥܰܬܺܝܩܳܐ ܐܶܙܕܩܶܦ ܥܰܡܶܗ܆ ܐܰܝܟܰܢܳܐ ܕܢܶܬܒܰܛܰܠ ܦܰܓܪܳܐ ܕܰܚܛܺܝܬܳܐ܆ ܕܠܳܐ ܬܽܘܒ ܢܶܦܠܰܚ ܚܢܰܢ ܥܰܒܕܽܘܬܳܐ ܠܰܚܛܺܝܬܳܐ^[77].

ܡܳܢܳܐ ܗܳܟܺܝܠ ܢܺܐܡܰܪ ܠܟܽܘܢ ܚܢܰܢ܆ ܠܗܳܢܽܘܢ ܕܰܥܬܺܝܕܺܝܢ ܐܢ̱ܬܽܘܢ ܕܡܶܚܕܳܐ ܒܳܬܰܪ ܩܰܠܺܝܠ ܕܰܒܢܰܝ̈ܳܐ ܕܢܽܘܗܪܳܐ ܬܶܬܚܰܘܽܘܢ. ܡܰܪܬܝܳܢܽܘܬܳܐ ܐܳܡܰܪ ܐ̱ܢܳܐ ܕܰܒܦܳܣܺܝ̈ܩܳܬܳܐ ܡܰܢ ܘܫܰܪܺܝܪܬܳܐ܆ ܕܝܰܩܺܝܪܬܳܐ ܕܶܝܢ ܒܪܰܡ ܡܶܣܬܰܒܪܳܐ ܠܣܰܓܺܝ̈ܶܐܐ ܒܰܢ ܠܳܐ ܬܶܬܕܰܡܽܘܢ. ܦܰܓܪܳܐ ܓܶܝܪ ܠܰܘ ܕܶܐܬܒܰܛܰܠ ܠܰܚܛܺܝܬܳܐ܆ ܕܝܰܬܺܝܪ ܕܶܝܢ ܡܥܒܕ ܡܰܠܽܘܢ ܛܥܺܝܢܺܝܢ ܚ̱ܢܰܢ ܘܡܰܟܪܟܺܝܢ ܚ̱ܢܰܢ. ܠܘܳܬ ܡܰܥܪܒܳܐ ܟܽܠܶܗ ܒܰܝܬܰܢ ܒܳܢܶܝܢ ܚ̱ܢܰܢ. ܕܡܰܕܢܚܳܐ ܕܶܝܢ ܙܥܽܘܪ̈ܝܳܬܳܐ ܝܳܨܦܺܝܢ ܚ̱ܢܰܢ. ܡܰܠܽܘܢ ܕܶܝܢ ܘܳܐܦܠܳܐ ܕܺܐܝܬܶܝܗ̇ ܡܶܕܶܡ ܡܰܫܘܶܝܢܰܢ ܕܢܶܚܫܒܺܝܗ̇. ܠܡܶܙܕܰܝ̈ܚܳܢܘܳܬܳܐ ܕܶܝܢ ܤܳܛܳܢܳܝ̈ܳܬܳܐ܆ ܠܦܽܘܚܪ̈ܶܐ ܕܪܰܘܳܝܽܘܬܳܐ ܘܰܠܡܰܫ̈ܬܝܶܐ ܘܠܰܙܡܺܝܪ̈ܳܬܳܐ ܫܟܺܝܪ̈ܳܬܳܐ ܐܰܝܟ ܕܰܠܥܻ̈ܐܕܶܐ ܪܳܗܛܺܝܢܰܢ܆ ܐܰܝܟܰܢܳܐ ܕܳܐܦ ܢܶܫ̈ܶܐ ܠܘܳܬ ܚܶܙܘܳܢ̈ܶܐ ܢܶܫ̈ܢܝܳܢ. ܡܶܛܽܠ ܗܳܕܶܐ ܓܽܘܚܟܳܐ ܣܺܝܡܺܝܢ ܚ̱ܢܰܢ ܩܕܳܡ ܚܰܢ̈ܦܶܐ܆ ܟܰܕ ܡܕܰܓܠܺܝܢܰܢ ܠܶܗ ܠܟܽܘܢܳܝܳܐ ܕܰܟܪ̈ܺܝܣܛܝܳܢܶܐ. ܟܰܕ ܓܶܝܪ ܗܳܟܰܢܳܐ ܣܰܪܺܝܟܺܝܢ ܚ̱ܢܰܢ ܒܗܳܠܶܝܢ ܕܩܰܪ̈ܺܝܒܳܢ܆ ܣܪ̈ܺܝܩܶܐ ܘܰܐܝܟ ܠܳܐ ܡܶܕܶܡ ܥܳܒܕܺܝܢ ܚ̱ܢܰܢ ܠܗܰܘ. ܕܢܶܣܬܰܒܪܽܘܢ ܠܣܶܒܪ̈ܶܐ ܕܰܩܝܳܡܬܳܐ. ܫܽܘܥܺܝܬܳܐ ܕܒܶܕ̣ܝܳܐ ܡܶܟܺܝܠ ‌ܐܺܝܬܰܘܗ̱ܝ ܦܰܪܕܰܝܣܳܐ. ܫܳܛܽܘܪܽܘܬܳܐ ܦܬܺܝܬܳܐ ܡܰܠܟܽܘܬܳܐ ܕܰܫܡܰܝܳܐ.

ܡܳܢܳܐ ܗܳܟܺܝܠ ܢܺܐܡܰܪ ܐ̱ܢܳܫ. ܒܰܦܣܳܩ ܣܰܒܪܳܐ ܐܺܝܬܰܝܗܶܝܢ ܗܳܠܶܝܢ ܕܺܝܠܰܢ ܟܰܕ ܢܶܚܛܶܐ ܡܶܢ ܒܳܬܰܪ ܡܰܥܡܽܘܕܺܝܬܳܐ܆ ܗܳܟܰܢܳܐ ܐܰܝܟ ܕܳܐܡܰܪ ܐܰܢ̱ܬ ܐܺܝܬܰܝܗܶܝܢ ܠܳܐ ܡܶܬܐܰܣ̈ܝܳܢܝܳܬܳܐ܆ ܘܟܽܠܶܗ ܣܽܘܟܳܝܳܐ ܕܦܽܘܪܩܳܢܳܐ ܦܳܣܶܩ ܐܰܢ̱ܬ ܠܰܢ܆ ܠܳܐ ܬܶܗܘܶܐ. ܠܳܐ ܡܬܽܘܡ ܗܳܟܰܢܳܐ ܐ݀ܶܫܢܶܐ܆ ܐܰܝܟ ܕܗܳܕܶܐ ܐܺܡܰܪ. ܐܺܝܬ ܗܘ̣ ܓܶܝܪ ܕܽܘܟܳܝܳܐ ܗܰܘ ܕܰܒܝܰܕ ܬܝܳܒܽܘܬܳܐ. ܐܶܠܳܐ ܥܡܺܝܠܳܐ ܘܕܰܡܠܶܐ ܕܶܡ̈ܥܶܐ ܣܰܓܺܝ̈ܳܐܬܳܐ ܘܕܽܘ̈ܥܬܶܐ ܘܛܽܘܪܳܦܳܐ ܦܰܓܪܳܢܳܝܳܐ. ܘܡܶܬܚܰܘܝܳܢܽܘܬܳܐ ܕܟܽܠ ܥܒܳܕܳܐ ܕܰܟܝܳܐ ܕܚܳܐܰܪ ܠܘܳܬ ܙܰܕܺܝܩܽܘܬܳܐ. ܡܶܛܽܠ ܗܳܕܶܐ ܣܰܓܺܝ̈ܶܐܐ ܠܘܳܬ ܡܰܕܒܪ̈ܶܐ ܪܗܶܛܘ܆ ܘܰܠܕܽܘܒܳܪܳܐ ܦܺܝܠܘܣܘܦܳܝܳܐ ܘܕܰܝܪܳܝܳܐ ܐܰܚܶܒܘ܆ ܟܰܕ ܝܰܨܺܝܦܺܝܢ ܠܰܡܚܰܘܳܝܽܘ ܕܟܺܝܬܳܐ ܠܟܽܘܬܺܝܢܳܐ ܗܳܝ ܕܶܐܬܟܰܬܡܰܬ. ܒܪܰܡ ܐܺܝܬ ܗ̱ܘ̣ ܣܰܒܪܳܐ ܕܦܽܘܪܩܳܢܳܐ ܐܳܦ ܒܰܡܕܺܝܢ̱ܬܳܐ ܐܶܢ ܨܳܒܶܝܢ ܚ̱ܢܰܢ܆ ܒܝܰܕ ܙܽܘܘܳܓܳܐ ܢܰܟܦܳܐ ܕܰܠܚܽܘܠ̈ܛܳܢܶܐ ܒܥܺܝܪ̈ܳܝܶܐ ܘܠܰܪ̈ܓܺܝܓܳܬܳܐ ܦܳܣܶܩ܆ ܐܰܘܟܺܝܬ ܟܳܠܶܐ ܒܝܰܕ ܝܰܨܺܝܦܽܘܬܳܐ ܗܳܝ ܕܥܰܠ ܗܳܢܽܘܢ ܕܡܶܣܟܺܢܺܝܢ ܘܰܣܢܺܝܩܺܝܢ܆ ܘܰܒܝܰܕ ܥ̈ܒܳܕܶܐ ܕܰܡܝܰܬܪܽܘܬܳܐ ܗܳܢܽܘܢ ܕܰܠܗܳܠܶܝܢ ܕܳܡܶܝܢ.

ܕܺܐܝܬ ܓܶܝܪ ܐܳܦ ܡܶܢ ܒܳܬܰܪ ܥܡܳܕܳܐ ܣܰܡܳܐ ܗܰܘ ܕܰܬܝܳܒܽܘܬܳܐ ܘܕܽܘܟܳܝܳܐ܆ ܐܳܦ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ ܡܰܘܕܰܥ܆ ܘܟܰܕ ܩܳܕܶܡ ܪܳܫܶܡ ܒܝܰܕ ܛܽܘܦ̈ܣܶܐ ܡܶܬܪ̈ܰܓܫܳܢܶܐ܆ ܐܰܝܟ ܕܰܒܛܶܠܳܢܳܝܽܘܬ ܪܽܘܫܡܳܐ ܡܶܕܶܡ ܠܰܫܪܳܪܳܐ. ܠܗܰܘ ܡܰܢ ܓܶܝܪ ܕܡܰܓܪܰܒ ܗ̱ܘܳܐ ܒܦܰܓܪܶܗ^[78]܆ ܘܒܰܙܢܳܐ ܡܶܕܶܡ ܠܰܚܛܺܝܬܳܐ ܒܝܰܕ ܥܝܳܕܳܐ ܒܺܝܫܳܐ܆ ܠܰܟܝܳܢܳܐ ܐܰܩܺܝܡܳܗ̇ ܠܶܗ܆ ܘܰܗܘ̣ܳܐ ܚܠܺܝܡܳܐ܆ ܠܰܘ ܐ̱ܚܪܳܢܝܳܐܺܝܬ ܒܰܕܟܰܝ̈ܳܐ ܡܳܢܶܐ ܘܚܳܠܶܛ ܠܶܗ܆ ܐܶܢܗܽܘ ܕܰܒܡܰܝ̈ܳܐ ܠܳܐ ܢܶܣܚܶܐ ܘܰܒܡܶܫܚܳܐ ܠܳܐ ܢܶܬܡܫܰܚ܆ ܘܢܶܬܕܰܟܶܐ ܒܰܕܡܳܐ ܕܕܶܒܚܬܳܐ. ܗܳܕܶܐ ܕܶܝܢ ܓܰܠܝܳܐܺܝܬ ܡܰܙܥܩܳܐ܆ ܠܚܰܝܠܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ. ܘܳܐܦ ܠܓܰܪܒܳܐ ܕܶܝܢ ܕܢܰܚܬܳܐ ܝܳܕܰܥ ܠܰܡܕܰܟܳܝܽܘ. ܗܳܝ ܟܺܝܬ ܕܶܐܢ ܥܕܰܡܳܐ ܠܛܽܘܦܣܳܐ ܬܩܽܘܡ. ܐܳܦ ܓܚܺܝܟܬܳܐ ܡܶܬܚܰܙܝܳܐ܆ ܘܳܐܦ ܡܥܰܩܒܳܢܽܘܬܳܐ ܝܰܬܺܝܪܬܳܐ ܐ̱ܚܪܳܢܝܳܐܺܝܬ. ܐܶܢ ܕܶܝܢ ܠܘܳܬ ܫܪܳܪܳܐ ܢܚܽܘܪ ܐ̱ܢܳܫ܆ ܘܰܠܘܳܬ ܫܽܘܦܪܳܐ ܕܣܽܘ̈ܟܳܠܶܐ ܗܰܘ ܕܣܺܝܡ ܒܰܟܬܳܒܳܐ܆ ܢܶܬܕܰܡܰܪ ܒܶܗ ܒܰܣܝܳܡ ܢܳܡܽܘܣܳܐ܆ ܘܰܢܫܰܒܰܚ ܠܗܰܘ ܕܣܳܡܶܗ ܠܢܳܡܽܘܣܳܐ. ܡܶܛܽܠ ܓܶܝܪ ܕܰܚܢܰܢ ܗܳܢܽܘܢ ܕܒܰܡܫܺܝܚܳܐ ܥܳܡܕܺܝܢ ܚ̱ܢܰܢ܆ ܠܰܡܫܺܝܚܳܐ ܐܰܝܟ ܢܰܚܬܳܐ ܠܳܒܫܺܝܢܰܢ^[79]܆ ܝܳܗܶܒ ܠܰܢ ܐܶܢܗܽܘ ܕܠܶܐܤܛܠܳܐ ܗܳܕܶܐ ܫܰܦܺܝܪܬܳܐ ܒܛܽܘܠܫܳܐ ܢܟܰܬܶܡ܆ ܥܰܡ̈ܠܶܐ ܕܰܬܝܳܒܽܘܬܳܐ ܠܕܽܘܟܳܝܳܐ܆ ܐܰܘ ܟܰܕ ܩܰܠܺܝ̈ܠܳܬܳܐ ܢܶܫܬܟܰܚ ܕܰܚܛܶܐ ܠܢ܆ ܐܰܝܟ ܕܢܰܚܬܳܐ ܕܟܶܬܳܢܳܐ ܥܕܰܟܺܝܠ ܢܶܣܬܰܒܪ̈ܳܢ܆ ܐܰܘ ܟܰܕ ܝܰܩܺܝܪ̈ܳܬܳܐ ܘܰܕܥܰܒܝܽܘܬܳܐ ܣܰܓܺܝܐܬܳܐ ܘܒܶܣܪܳܢܳܝܬܳܐ ܘܡܺܝܬ̣ܬܳܐ ܐܺܝܬ ܠܗܶܝܢ܆ ܐܰܝܟ ܕܢܶܬܕܰܡ̈ܝܳܢ ܠܡܳܐܢ̈ܶܐ ܗܳܢܽܘܢ ܕܡܶܢ ܥܰܡܪܳܐ ܡܰܬܩܢܺܝܢ܆ ܗܳܠܶܝܢ ܕܰܐܝܟ ܕܰܒܣܽܘܓܳܐܐ ܦܺܐܪܳܐ ܕܫܶܠ̈ܚܶܐ ܡܺܝ̈ܬܶܐ ܐܺܝܬܰܝܗܽܘܢ. ܦܳܩܶܕ ܕܶܝܢ ܕܶܐܢܗܽܘ ܕܓܰܪܒܳܐ ܕܢܰܚܬܳܐ ܟܰܕ ܢܶܬܬܫܺܝܓ ܠܳܐ ܢܶܪܚܰܩ܆ ܗܳܢܳܐ ܒܢܽܘܪܳܐ ܢܺܐܩܰܕ^[80]. ܟܰܕ ܡܰܘܕܥܳܐ ܡܶܠܬܳܐ܆ ܕܰܠܗܰܘ ܕܡܶܢ ܒܳܬܰܪ ܥܡܳܕܳܐ ܠܳܐ ܐܶܬܕܰܟܺܝ ܒܟܽܠܶܗ ܚܰܝܠܶܗ܆ ܘܰܠܟܽܘ̈ܬܡܳܬܳܐ ܕܰܚ̈ܛܳܗܶܐ ܐܰܫܺܝܓ܆ ܫܰܠܗܶܒܺܝܬܳܐ ܕܠܳܐ ܕܳܥܟܳܐ ܡܩܰܒܠܳܐ ܠܶܗ.

ܘܳܐܦ ܠܒܰܝܬܳܐ ܕܶܝܢ ܕܡܰܓܪܰܒ ܡܕܰܟܶܐ ܢܳܡܽܘܣܳܐ܆ ܟܰܕ ܡܚܰܘܶܐ ܠܪܰܒܽܘܬܳܗ̇ ܕܰܬܝܳܒܽܘܬܳܐ ܕܰܟܡܳܐ ܗܝ. ܐܳܦ ܓܶܝܪ ܐܶܢ ܐ̱ܢܳܫ ܠܫܽܘܘܫܳܛܳܐ ܢܺܐܬܶܐ܆ ܕܕܽܘܒܳܪܳܐ ܟܢܺܝܟܳܐ ܘܕܰܡܝܰܬܪ̈ܳܬܳܐ܆ ܐܰܝܟܰܢܳܐ ܕܠܰܥܡܽܘܪܝܳܐ ܕܰܐ‌ܠܳܗܳܐ ܢܶܫܬܘܶܐ܆ ܗܰܘ ܕܡܶܛܽܠܳܬܶܗ ܐܳܦ ܡܫܺܝܚܳܐ ܐܶܡܰܪ܆ ܕܶܐܢ ܐ̱ܢܳܫ ܡܰܚܶܒ ܠܺܝ ܡܶܠܰܬܝ ܢܳܛܰܪ܆ ܘܰܐܒܳܐ ܕܺܝܠܝ ܢܶܪܚܡܺܝܘܗ̱ܝ܆ ܘܰܠܘܳܬܶܗ ܢܺܐܬܶܐ ܘܰܐܘܳܢܳܐ ܠܘܳܬܶܗ ܢܶ݀ܥܒܶܕ^[81]܆ ܘܡܶܢ ܒܳܬܰܪ ܗܳܠܶܝܢ܆ ܒܝܰܕ ܚܰܝ̈ܶܐ ܡܶܕܶܡ ܕܠܳܐ ܢܛܽܘܪܬܳܐ ܘܫܰܪ̈ܝܶܐ܆ ܐܰܘ ܡܶܢ ܡܫܰܩܠܽܘܬܳܐ ܘܪܳܡܽܘܬܳܐ ܠܘܳܬ ܒܺܝܫܽܘܬܳܐ ܬܽܘܒ ܢܶܪܗܰܛ܆ ܡܶܫܟܰܚ ܒܝܰܕ ܬܝܳܒܽܘܬܳܐ܆ ܕܰܠܓܰܪܒܳܐ ܕܰܐܝܟ ܗܳܢܳܐ ܢܶܓܪܽܘܕ ܡܶܢܶܗ܆ ܟܰܕ ܐܺܝܬ ܠܶܗ ܠܘܳܬ ܡܥܰܕܪܳܢܽܘܬܳܐ܆ ܐܳܦ ܠܰܕܡܳܐ ܗܰܘ ܕܶܐܡܪܶܗ ܕܶܐܰ‌ܠܳܗܳܐ܆ ܗܰܘ ܕܰܡܪܺܝܡ ܠܰܚܛܺܝܬܶܗ ܕܥܳܠܡܳܐ^[82]. ܡܶܛܽܠܗܳܕܶܐ ܓܶܝܪ ܟܰܕ ܡܶܬܕܰܟܶܐ ܗ̱ܘܳܐ ܒܰܝܬܳܐ ܗܰܘ ܕܡܰܓܪܰܒ܆ ܘܳܐܦ ܕܶܒܚܬܳܐ ܗܳܝ ܢܳܡܽܘܣܳܝܬܳܐ ܘܕܰܐܝܟ ܕܰܒܛܽܘܦܣܳܐ ܡܶܫܬܰܡܠܝܳܐ ܗ̱ܘܳܬ ܡܶܬܩܰܪܒܳܐ ܗ̱ܘܳܬ^[83].

ܠܗܳܠܶܝܢ ܕܶܝܢ ܡ̈ܶܠܶܐ܆ ܐܳ‌ܠܨܳܝܬܳܐ ܐܰܣܒܪܶܬ ܕܺܐܝܬܶܝܗ̇܆ ܕܶܐ݀ܓܪܽܘܕ ܘܰܐ݀ܚܕܰܪ ܐܶܢܶܝܢ ܠܟܽܘܢ. ܐܰܝܟܰܢܳܐ ܕܳܐܦ ܠܓܽܘܡܳܨܳܐ ܗܰܘ ܕܰܦܣܳܩ ܣܰܒܪܳܐ ܕܶܐ݀ܣܟܽܘܪ ܠܰܡܗܰܝܡ̈ܢܶܐ܆ ܟܰܕ ܣܶܒܪ̈ܶܐ ܒܰܣܺܝ̈ܡܶܐ ܡܳܬܰܚ ܐ̱ܢܳܐ܆ ܘܳܐܦ ܠܗܳܢܽܘܢ ܕܰܥܬܺܝܕܺܝܢ ܠܡܶܫܬܘܳܝܽܘ ܠܡܰܘܗܰܒܬܳܐ ܕܰܣܚܳܬܳܐ ܐܰ‌ܠܳܗܳܝܬܳܐ ܐܶ݀ܥܒܶܕ ܝܰܬܺܝܪ ܙܗܺܝܪ̈ܶܐ ܘܰܕܥܺܝܪܺܝܢ ܠܘܳܬ ܢܛܽܘܪܬܳܐ ܗܳܝ ܕܢܰܦܫܗܽܘܢ܆ ܘܠܳܐ ܒܗܰܢܺܝܽܐܘܬܳܐ ܙܥܽܘܪܬܳܐ ܢܙܰܒܽܢܘܳܢܝܗ̱ܝ ^[84] ܠܰܚܛܺܝܬܳܐ ܠܩܶܢܝܳܢܳܐ ܗܰܘ ܪܰܒܳܐ ܕܛܰܝܒܽܘܬܳܐ܆ ܘܰܚܠܳܦ ܢܰܚܬܳܐ ܗܰܘ ܕܠܳܐ ܡܶܬܚܰܒܠܳܢܽܘܬܳܐ܆ ܢܚܰܠܦܽܘܢ ܢܶܣܒܽܘܢ ܚܒܳܠܳܐ. ܟܽܠܰܢ ܕܶܝܢ ܢܶܬܦܪܶܩ ܘܰܚܠܺܝ̈ܡܶܐ ܢܶܬܢܛܰܪ ܒܢܰܦ̈ܫܳܬܳܐ ܘܰܒܦܰܓܪ̈ܶܐ܆ ܠܗܰܘ ܕܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢܶܬܦܰܪܩܽܘܢ܆ ܘܰܠܡܶܫܬܰܘܕܥܳܢܽܘܬܳܐ ܕܰܫܪܳܪܳܐ ܢܺܐܬܽܘܢ^[85]. ܠܶܗ ܓܶܝܪ ܘܠܰܘ ܠܰܢ ܡܰܠܽܘܢ ܡܶܬܦܰܪܩܺܝܢܰܢ܆ ܡܶܛܽܠ ܡܪܰܚܡܳܢܽܘܬܶܗ ܣܰܓܺܝܐܬܳܐ ܘܪܶܚܡܰܬ ܐ̱ܢܳܫܽܘܬܶܗ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ. ܐܰܡܺܝܢ.

ܫܠܶܡ ܟܬܳܒܳܐ ܕܰܬܪܶܝܢ ܕܡܺܐܡܪ̈ܶܐ ܐܦܝܬܪ̈ܘܢܝܘ ܐܰܘ ܟܺܝܬ ܕܥܰܠ ܟܽܘܪܣܝܳܐ܆ ܩܰܕܺܝܫܳܐ ܣܶܐܘܝܪܝܘܤ ܪܺܝܫ ܐܶܦܝܣ̈ܩܘܦܐ ܘܦܛܪܝܪܟܐ ܕܐܢܛܝܘܟܝܰܐ܀

ܐܦܣ̈ܝܐ. 1: 21 [1]

ܥܒܪ̈ܝܐ. 1: 14[2]

ܢܶܗܘܽܘܢ ܨܳܝܒܺܝܢ[3]

ܠܘܩܐ. 2: 14 [4]

ܠܘܩܐ. 15: 10 [5]

ܐ. ܛܝܡܬܐܘܣ. 5: 21 [6]

ܡܬܝ. 18: 20 [7]

ܩܘܠܣ̈ܝܐ. 1: 20 [8]

ܐܦܣ̈ܝܐ. 3: 10.[9]

ܚܙܩܝܐܝܠ. 2: 1[10]

ܐܫܥܝܐ. 6: 2 [11]

ܠܚܘܪܐ[12]

ܐܫܥܝܐ. 6: 3 [13]

ܡܙܡܘܪ̈ܐ. 104: 4 [14]

ܡܬܝ. 28: 19 [15]

ܝܘܚܢܢ. 17: 6 [16]

ܝܘܚܢܢ. 17: 25 ـ 26 [17]

ܝܘܚܢܢ. 14: 9 [18]

ܝܘܚܢܢ. 17: 25 [19]

ܡܬܝ. 11: 27  ܐܦ ܠܘܩܐ. 10: 22 [20]

ܐܫܥܝܐ. 6: 3 [21]

ܝܘܚܢܢ. 1: 18[22]

ܐܫܥܝܐ. 6: 3 [23]

ܐܫܥܝܐ. 6: 3 [24]

ܦܝܠܝܦܣ̈ܝܐ. 2: 7[25]

ܐܫܥܝܐ. 11: 9 [26]

ܕܕܡܝܢ[27]

ܡܙܡܘܪ̈ܐ. 73: 8 [28]

ܩܘܠܣ̈ܝܐ. 1: 15 [29]

ܘܡܰܦܩܗܶܝܢ[30]

ܥܒܪ̈ܝܐ. 1: 2 ـ 3 [31]

ܥܒܪ̈ܝܐ. 1: 2 [32]

ܪ̈ܗܘܡܝܐ. 8: 29 [33]

ܩܘܠܣ̈ܝܐ. 1: 18 [34]

ܝܘܚܢܢ. 14: 28 [35]

ܝܘܚܢܢ. 10: 29 ـ 30 [36]

ܝܘܚܢܢ. 10: 33 [37]

ܝܘܚܢܢ. 5: 37 [38]

ܝܘܚܢܢ. 10: 18  ܦܘܪܩܢܐ[39]

ܝܘܚܢܢ. 5: 19 ـ 30 [40]

ܝܘܚܢܢ. 14: 28 [41]

ܐ. ܩܘܪ̈ܝܢܬܝܐ. 1: 24 [42]

ܩܘܠܣ̈ܝܐ. 1: 15 [43]

ܥܒܪ̈ܝܐ. 1: 3 [44]

ܣܶܦܪܐ ܕܒܪܝܬܐ. 1: 26 [45]

ܡܙܡܘܪ̈ܐ. 36: 9[46]

ܝܘܚܢܢ. 1: 18 [47]

ܝܘܚܢܢ. 1: 3 [48]

ܗܳܝ[49]

ܡܬܝ. 28: 19 [50]

ܝܘܚܢܢ. 1: 3 [51]

[52]ܙܳܕܶܩ ܠܶܗ ܕܢܶܕܰܥ ܠܗܰܘ ܕܦܳܓܰܥ ܒܰܫܡܳܐ ܗܳܢܳܐ ܕܰܟܬܺܝܒ ܗܳܪܟܳܐ܆ ܕܠܰܘ  ܐܰܝܟ ܗܽܘ ܕܳܐܡܪܺܝܢܰܢ ـ ܒܪܝܘܬܐ: ܒܪܺܝܬܳܐ ܐܺܝܬܰܘܗ̱ܝ

ܡܙܡܘܪ̈ܐ. 81: 10 [53]

ܐܫܥܝܐ. 6: 6 ـ 7[54]

ܝܘܚܢܢ. 1: 14 [55]

ܥܒܪ̈ܝܐ. 2: 14 [56]

ܩܢܽܘܡܳܐ. ܩܢܽܘܡܳܝܬܳܐ[57]

ܥܒܪ̈ܝܐ. 2: 14 [58]

ܥܳܪܩܺܝܢ[59]

ܐܫܥܝܐ. 3: 12[60]

ܐܪܡܝܐ. 6: 30 [61]

ܒ. ܛܝܡܬܐܘܣ. 3: 8[62]

ܐܢܬܪܐaܬܐ[63]

ܪ̈ܗܘܡܝܐ. 10: 10 [64]

ܐ. ܩܘܪ̈ܝܢܬܝܐ. 15: 50 [65]

ܡܬܝ. 16: 17[66]

ܓܠܛܝ̈ܐ. 1: 16 ـ 17 [67]

ܡܙܡܘܪ̈ܐ. 54: 2 [68]

ܡܙܡܘܪ̈ܐ. 144: 21 [69]

ܪ̈ܗܘܡܝܐ. 8: 8 ـ 9 [70]

ܪ̈ܗܘܡܝܐ. 8: 6 ـ 7 [71]

ܐ. ܩܘܪ̈ܝܢܬܝܐ. 15: 50[72]

ܡܬܝ. 12: 29 [73]

ܡܙܡܘܪ̈ܐ. 50: 12 [74]

ܡܙܡܘܪ̈ܐ. 113: 4 [75]

ܡܶܬܛܰܝܒܺܝܢ ܐܢܬܽܘܢ܆[76]

ܪ̈ܗܘܡܝܐ. 6: 4 ـ 6 [77]

ܟܗ̈ܢܐ. 14: 32 [78]

ܓܠܛܝ̈ܐ. 3: 27 [79]

ܟܗ̈ܢܐ. 13: 57 [80]

 ܝܘܚܢܢ. 14: 23[81]

ܝܘܚܢܢ. 1: 29 [82]

ܟܗ̈ܢܐ. 14: 49 [83]

ܢܙܰܒܢܺܝܘܗܝ[84]

ܐ. ܛܝܡܬܐܘܣ. 2: 4 [85]