ܡܺܐܡܪܳܐ ܕܬܶܫܥܳܐ

ܥܰܠ ܒܰܐܣܶܝܠܺܝܽܘܤ ܘܰܓܪܺܝܓܳܪܺܝܽܘܤ ܐܶܦܶܝܣܩܽܘ̈ܦܶܐ ܕܶܐܬܶܐܡܰܪ ܒܗܰܝܟܠܳܐ ܕܩܰܕܺܝܫܳܐ ܐܺܝܓܢܰܐܛܺܝܽܘܤ.

1: ܐܰܝܟ ܙܢܳܐ ܕܰܢܒܺܝܳܐ ܕܰܘܺܝܕ. 222ܛܽܘܒܬܳܢܳܝܬܳܐ ܦܣܰܩ ܕܺܐܝܬܶܝܗ̇ ܗܳܝ ܕܰܒܢܳܡܽܘܣܳܐ ܕܡܳܪܝܳܐ ܢܶܬܗܰܓܶܐ ܐܺܝܡܳܡܳܐ ܘܠܺܠܝܳܐ^[1]܆ ܗܳܟܰܢܳܐ ܠܺܝ ܕܝܰܬܺܝܪ ܛܽܘܒܬܳܢܳܝܬܳܐ ܐܺܝܬܶܝܗ̇ ܡܶܬܚܰܙܝܳܐ܆ ܗܳܝ ܕܥܽܘܗ̈ܕܳܢܶܐ ܕܗܳܢܽܘܢ ܕܫܰܦܺܝܪ ܚܝܰܘ ܒܥܳܠܡܳܐ ܗܳܢܳܐ܆ ܒܟܽܠ ܚܕܳܐ ܫܳܥܬܳܐ ܐܰܝܟ ܕܰܠܡܺܐܡܰܪ ܢܰܝܬܶܐ ܒܬܰܪܥܺܝܬܳܐ܆ ܘܢܶܨܚܳܢ̈ܶܐ ܕܗܳܢܽܘܢ ܕܰܚܠܳܦ ܫܰܦܺܝܪܽܘܬ݂ ܕܶܚܠܬܳܐ ܐܶܬܟܰܬܰܫܘ. ܡܰܠܽܘܢ ܕܶܝܢ ܐܳܦ ܗܳܕܶܐ ܠܗܳܢܽܘܢ ܕܚܰܬܺܝܬ̣ܳܐܺܝܬ ܡܶܬܚܰܫܒܺܝܢ܆ ܕܢܶܬܗܰܓܶܐ ܒܢܳܡܽܘܣܳܐ ܕܡܳܪܝܳܐ ܐܺܝܬܶܝܗ̇⁴. ܗܰܘ ܓܶܝܪ ܕܰܒܚܰܝ̈ܶܐ ܕܗܳܢܽܘܢ ܕܢܳܡܽܘܣܳܐܺܝܬ ܐܶܬܕܰܒܰܪܘ ܡܶܬܕܰܡܰܪ܆ ܟܰܣܝܳܐܺܝܬ ܡܰܢ܆ ܝܰܬܺܝܪ ܡܳܪܳܢܳܐܺܝܬ ܕܶܝܢ܆ ܘܳܐܦ ܒܢܳܡܽܘܣܳܐ ܘܳܐܦ ܒܶܗ ܒܣܳܐܶܡ ܢܳܡܽܘܣܳܐ ܐܶܬܕܰܡܰܪ.

2: ܠܡܰܢܽܘ ܗܳܟܺܝܠ ܢܶܫܟܰܚ܆ ܕܝܰܬܺܝܪ ܡܶܢ ܒܰܣܶܝܠܺܝܽܘܤ ܗܰܘ ܪܰܒܳܐ ܘܰܓܪܺܝܓܽܘܪܺܝܽܘܤ ܗܰܘ ܡܡܰܠܶܠ ܐܰ‎ܠܳܗܳܝ̈ܳܬܳܐ܆ ܕܢܳܡܽܘܣܳܐܺܝܬ ܚܝܰܘ܆ ܘܰܠܢܳܡܽܘܣܳܐ ܘܰܠܣܳܐܶܡ ܢܳܡܽܘܣܳܐ ܡܙܰܡܢܺܝܢ ܫܽܘܒܚܳܐ ܡܶܢ ܥܽܘܗܕܳܢܗܽܘܢ܆ ܘܠܰܢ ܗܳܢܽܘܢ ܕܡܶܬܥܰܗܕܺܝܢ ܠܗܽܘܢ ܝܽܘܬܪܳܢܳܐ. ܗܳܠܶܝܢ ܓܶܝܪ ܗܳܠܶܝܢ ܐܰܝܟ ܕܒܰܫܪܳܪܳܐ ܐܺܝܬܰܝܗܽܘܢ ܗ̱ܘܰܘ ܪ̈ܳܥܰܘܳܬܳܐ ܡܠ̈ܺܝܠܶܐ ܕܡܰܪܥܺܝܬܳܐ ܡܠܺܝܠܬܳܐ܆ ܘܪ̈ܰܒܰܝ ܒ̈ܳܬܶܐ ܕܐ̱ܪ̈ܳܙܶܐ ܕܪܽܘܚܳܐ܆ ܘܰܡܫܰܡ̈ܫܳܢܶܐ ܫܰܪܺܝܪ̈ܶܐ ܕܰܐ‎ܠܳܗܳܐ^[2] ܘܡܶܠܬܳܐ ܘܰܕܡܶܛܽܠܳܬܰܢ ܪܺܝܫ ܟܳܗ̈ܢܶܐ ܡܫܺܝܚܳܐ܆ ܗܰܘ ܕܰܐܪܟܶܢ ܫܡܰܝܳܐ^[3] ܘܰܥܕܰܡܳܐ ܠܗܳܕܶܐ ܢܚܶܬ݂܆ ܕܢܶܣܰܒ ܠܳܐ ܡܶܫܬܰܚܠܦܳܢܳܐܺܝܬ ܕܡܽܘܬܳܐ ܕܥܰܒܕܳܐ^[4]܆ ܘܰܕܢܶܗܘܶܐ ܒܰܪ ܐ̱ܢܳܫܳܐ܆ ܘܠܳܐ ܢܫܰܚܠܶܦ ܠܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܬܽܘܒ ܥܒܰܪ ܠܰܫܡܰܝܳܐ ܡܶܢ ܒܳܬܰܪ ܣܽܘܪܳܩܳܐ ܗܰܘ ܨܶܒܝܳܢܳܝܳܐ ܝܰܬܺܝܪ ܡܪܰܡܪܡܳܐܺܝܬ.

3: ܡܶܛܽܠܗܳܕܶܐ ܓܶܝܪ ܐܳܦ ܚܰܝܠܰܘ̈ܳܬܳܐ ܡܰܠܰܐܟܳܝ̈ܶܐ܆ ܟܰܕ ܡܶܢ ܒܳܬܰܪ ܫܽܘܠܳܡܳܐ ܕܰܡܕܰܒܪܳܢܽܘܬܳܐ ܦܳܢܶܐ ܗ̱ܘܳܐ ܣܳܠܶܩ ܠܰܐܦܰܝ̈ ܠܥܶܠ ܦܰܓܪܳܢܳܐܺܝܬ^[5]܆ ܟܰܕ ܡܝܰܩܪܺܝܢ ܟܺܝܬ ܘܰܡܠܰܘܶܝܢ܆ ܠܰܘ ܒܰܠܚܽܘܕ ܐܳܡܪܺܝܢ ܗ̱ܘܰܘ ܠܪ̈ܽܘܚܳܬܳܐ ܡܶܬܗܰܘܢܳܢ̈ܝܳܬܳܐ ܘܰܒ̈ܢܳܬ ܬܶܫܡܶܫܬܳܐ ܕܺܝܠܗܽܘܢ܆ ܐܰܪܺܝܡܘ ܬܰܪ̈ܥܶܐ ܪ̈ܺܝܫܳܢܶܐ ܕܺܝܠܟܽܘܢ܆ ܐܶܠܳܐ ܡܰܘܣܦܺܝܢ ܗ̱ܘܰܘ܆ ܐܳܦ ܗܳܝ ܕܶܐܬܬܪܺܝܡܘ ܬܰܪ̈ܥܶܐ ܕܡܶܢ ܥܳܠܰܡ^[6]. ܗܳܝ ܕܶܝܢ ܕܶܐܬܬܪܺܝܡܘ܆ ܠܬܶܫܒܽܘܚܬܳܐ ܕܝܰܬܺܝܪ ܪܳܡܳܐ ܡܚܰܘܝܳܐ. ܠܰܘ ܓܶܝܪ ܗܽܘ ܝܰܬܺܝܪ ܡܶܢ ܢܰܦܫܶܗ ܗܘ̣ܳܐ ܕܝܰܬܺܝܪ ܪܳܡ. ܟܰܕ ܡܳܢܳܐ ܓܶܝܪ ܢܰܘܣܶܦ ܐ̱ܢܳܫ ܠܗܰܘ ܕܡܶܢ ܫܽܘܪܳܝܳܐ ܘܒܽܐܘܣܺܝܰܐ ܐܺܝܬܰܘܗ̱ܝ ܡܫܰܡܠܝܳܐ܆ ܢܶܦܣܽܘܩ ܕܺܐܝܬܰܘܗ̱ܝ ܝܰܬܺܝܪ ܡܫܰܡܠܝܳܐ܆ ܐܶܠܳܐ ܐܶܢ ܙܳܕܶܩ ܕܗܳܝ ܕܫܰܪܺܝܪܳܐ ܢܺܐܡܰܪ܆ ܒܬܰܪ̈ܥܝܳܬܳܐ ܕܺܝܠܰܢ܆ ܘܰܒܟܽܠܳܗ̇ ܒܪܺܝܬܳܐ ܡܠܺܝܠܬܳܐ܆ ܗܘ̣ܳܐ ܕܝܰܬܺܝܪ ܪܳܡ܆ ܟܰܕ ܒܰܢ ܟܺܝܬ ܘܰܒܚܰܝ̈ܠܰܘܳܬܳܐ ܕܠܰܐܓܫܽܘܡ ܣܳܡ ܠܺܝܕܰܥܬܳܐ ܗܳܝ ܕܡܶܛܽܠܳܬܶܗ܆ ܝܰܬܺܝܪ ܪܳܡܬܳܐ ܘܝܰܬܺܝܪ ܡܫܰܡܠܰܝܬܳܐ.

4: ܗܳܝ ܓܶܝܪ ܕܶܐܬܬܪܺܝܡܘ ܬܰܪ̈ܥܶܐ ܕܡܶܢ ܥܳܠܰܡ^2: ܡܶܛܽܠ ܬܰܪ̈ܥܶܐ ܫܡܰܝܳܢ̈ܶܐ܆ ܐܰܝܟ ܣܽܘܟܳܠܳܐ ܡܰܢ ܒܰܪܝܳܐ^[7] ܘܕܰܩܕܳܡ ܐܺܝܕܰܝ̈ܳܐ ܐܰܡܺܝܪܳܐ܆ ܠܘܳܬ݂ ܬܰܪܥܺܝܬܳܐ ܕܶܝܢ ܡܝܰܬܰܪܬܳܐ ܒܪܰܡ ܡܥܰܠ̣ܝܳܐ ܠܗܰܘ ܕܫܳܡܰܥ. ܕܟܽܠܶܗ ܓܶܝܪ ܟܝܳܢܳܐ ܡܠܺܝܠܳܐ ܦܳܬܚܳܐ ܠܬܰܪ̈ܥܶܐ ܡܶܬܗܰܘ̈ܢܳܢܶܐ ܘܰܡܪܺܝܡܳܐ ܘܰܐܝܟ ܗܰܘ ܕܰܡܪܰܡܪܡܳܐ܆ ܠܘܳܬ݂ ܗܳܝ ܕܰܢܩܰܒܠܽܘܢ ܠܗܰܘ ܪܳܡܳܐ܆ ܘܰܕܢܶܬܪܰܥܽܘܢ ܡܶܛܽܠܳܬܶܗ܆ ܕܝܰܬܺܝܪ ܦܰܐܝ̈ܳܢ ܠܰܐܠܳܗܳܐ ܟܺܝܬ ܘܰܕܝܰܬܺܝܪ ܪ̈ܳܡܳܢ.

5: ܐܶܠܳܐ ܠܳܐ ܝܳܕܰܥ ܐ̱ܢܳܐ ܡܳܢܳܐ ܚܶܫܶܬ݂. ܟܰܕ ܓܶܝܪ ܠܘܳܬ݂ ܡ̈ܶܠܶܐ ܡܩܰܠܣܳܢܝ̈ܳܬܳܐ ܕܡܰܠ̈ܦܳܢܶܐ ܕܥܺܕܬܳܐ ܦܢܶܐ ܗ̱ܘܺܝܬ݂܆ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܠܘܳܬ ܡܡܰܠܠܽܘܬ݂ ܐܰ‎ܠܳܗܽܘܬܳܐ ܥܶܒܪܶܬ݂ ܢܶܦܠܶܬ݂܆ ܘܰܠܘܳܬ݂ ܐ̱ܪܳܙܳܐ ܪܰܒܳܐ ܕܰܡܕܰܒܪܳܢܽܘܬܳܐ. ܒܪܰܡ ܐܳܦܶܢ ܠܳܐ ܨܶܒܝܳܢܳܐܺܝܬ ܠܗܳܕܶܐ ܐܶܬܬܰܝܬܺܝܬ݂܆ ܡܦܳܤ ܐ̱ܢܳܐ܆ ܕܠܰܘ ܡܶܢ ܨܒܽܘܬ݂ ܢܰܦܫܝ܆ ܐܶܠܳܐ ܡܶܢ ܡܶܬܬܙܺܝܥܳܢܽܘܬܳܐ ܐܰ‎ܠܳܗܳܝܬܳܐ ܕܡܰܘܕܥܳܐ ܓܰܠܝܳܐܺܝܬ܆ ܕܳܐܦ ܗܺܝ ܗܳܝ ܕܢܶܬܶܥܰܗܕ ܒܰܠܚܽܘܕ ܠܒܰܣܶܝܠܺܝܽܘܤ ܘܠܰܓܪܺܝܓܽܘܪܺܝܽܘܤ܆ ܡܡܰܠܶܠ ܐܰ‎ܠܳܗܳܝ̈ܳܬܳܐ ܡܫܰܡܠܝܳܐ ܠܶܗ ܠܗܰܘ ܕܡܶܬܥܰܗܰܕ ܠܗܽܘܢ܆ ܐܰܟܙܢܳܐ ܕܳܐܦ ܠܗܳܢܽܘܢ ܕܰܠܢܽܘܪܳܐ ܡܶܬܩܰܪܒܺܝܢ܆ ܟܽܠܳܗ̇ ܐܰܢܰܢܩܺܐ ܕܢܶܫܬܰܘܬܦܽܘܢ ܒܫܰܚܺܝܢܽܘܬܳܐ ܟܺܝܬ ܘܢܰܗܺܝܪܽܘܬܳܐ ܕܡܶܢܳܗ̇. ܒܪܰܡ ܕܶܝܢ ܗܳܝ ܨܳܒܝܳܐ ܗ̱ܘܳܬ ܡܶܠܬܳܐ ܠܡܺܐܡܰܪ܆ ܕܟܰܕ ܒܡܰܟܺܝܟܽܘܬܳܐ ܕܰܐ‎ܠܳܗܳܐ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܐܶܬܕܰܡܺܝܘ ܗܳܠܶܝܢ܆ ܠܘܳܬ݂ ܪܰܘܡܳܐ ܕܰܡܝܰܬܪܽܘܬܳܐ ܐܶܬܰܘ.

6: ܟܰܕ ܓܶܝܪ ܐܺܝܬ ܗ̱ܘܳܐ ܠܗܽܘܢ ܢܰܨܺܝܚܽܘܬܳܐ ܗܳܝ ܕܡܶܢ ܓܶܢܣܳܐ܆ ܘܰܒܥܽܘܬܪܳܐ ܥܰܒܺܝܛܺܝܢ ܗ̱ܘܰܘ܆ ܘܟܽܠܳܗ̇ ܚܶܟܡܬܳܐ ܕܚܰܟܺܝ̈ܡܶܐ ܗܳܢܽܘܢ ܕܡܶܢ ܠܒܰܪ ܐܶܬܥܰܢܘܺܝܘ܆ ܡܽܘܫ̈ܚܳܬܳܐ ܕܰܓܪܰܡܰܛܺܝܩܺܝ ܘܫܰܦܺܝܪܽܘܬ݂ ܡܠܰܚܡܽܘܬܳܐ ܟܺܝܬ ܘܫܰܦܺܝܪܽܘܬ݂ ܛܽܘܗܡܳܐ ܕܡܶܠܬܳܐ܆ ܘܪܽܘܪܳܒ ܡ̈ܶܠܶܐ܆ ܘܰܡܦܺܝܣܳܢܽܘܬܳܐ ܕܪܺܝܛܽܘܪܺܝܩܺܝ^[8]܆ ܘܪܺܝܫܳܝܽܘܬܳܐ^[9] ܘܣܰܓܺܝܽܐܘܬ ܡܢܰܣܝܳܢܽܘܬܳܐ ܕܡܰܟܬܒܽܘܬ݂ ܬܰܫܥ̈ܝܳܬܳܐ܆ ܘܗܽܘܦܳܟ ܚܽܘܫܳܒ̈ܶܐ ܘܥܽܘܪ̈ܙܳܠܶܐ ܕܦܺܝܠܳܣܽܘܦܺܝܰܐ܆ ܘܰܬܚܽܘ̈ܡܶܐ ܕܓܶܐܘܡܰܛܪܺܝܰܐ ܘܩܰܛܺܝܢܽܘܬܳܐ ܕܪܽܘܟܳܒܳܐ ܕܡܶܢ̈ܝܳܢܶܐ܆ ܘܰܣܝܳܡܳܐ ܘܡܶܬܬܙܺܝܥܳܢܽܘܬܳܐ ܕܟܰܘ̈ܟܒܶܐ܆ ܘܟܽܠܗܶܝܢ ܐܰܝܠܶܝܢ ܕܰܠܘܳܬ ܡܡܰܠܠܽܘܬ݂ ܐܰ‎ܠܳܗܽܘܬܳܐ ܣܡܺܝܬܳܐ ܡܰܝ̈ܬܝܳܢ܆ ܘܰܠܘܳܬ ܝܺܕܰܥܬܳܐ ܕܗܳܠܶܝܢ ܕܺܐܝܬܰܝܗܶܝܢ܆ ܗܳܝ ܕܕܰܓܳܠܳܐܺܝܬ ܡܶܫ̈ܬܰܘܕܝܳܢ܆ ܘܰܠܟܽܠܗܶܝܢ ܗܳܠܶܝܢ ܠܳܐ ܡܶܕܶܡ ܚܫܰܒܘ^[10]܆ ܨܰܝ̈ܳܕܶܐ ܕܰܡܨܺܝܕܬܳܐ ܕܝܽܘܚܰܢܳܢ ܘܰܕܦܶܛܪܽܘܤ ܗܘ̣ܰܘ܆ ܕܗܳܢܽܘܢ ܨܰܝܳܕ̈ܶܐ ܘܠܳܐ ܣܦܺܝܪ̈ܶܐ. ܘܰܠܦܰܘܠܽܘܤ ܥܳܒܶܕ ܡܰܫ̈ܟܢܶܐ^[11]܆ ܡܰܠܦܳܢܳܐ ܘܰܡܗܰܕܝܳܢܳܐ ܕܡ̈ܶܠܶܐ ܐܰ‎ܠܳܗܳܝ̈ܬܳܐ ܩܢܰܐܽܘܗ̱ܝ.

7: ܘܟܰܕ ܝܺܕܰܥܘ ܕܡܶܬܬܰܘܕܝܳܢܳܐܺܝܬ ܪܰܒܳܐ ‌ܐܺܝܬܰܘܗ̱ܝ ܐ̱ܪܳܙܳܐ ܕܫܰܦܺܝܪܽܘܬ݂ ܕܶܚܠܬܳܐ^[12]܆ ܘܰܫܡܰܥܘ ܠܡܽܘܫܶܐ ܕܳܐܡܰܪ: ܫܡܰܥ ܐܺܝܣܪܳܐܶܝܠ܆ ܡܳܪܝܳܐ ܐܰ‎ܠܳܗܳܟ ܡܳܪܝܳܐ ܚܰܕ ‌ܐܺܝܬܰܘܗ̱ܝ^[13]܆ ܘܺܝܕܰܥܘ ܒܝܰܕ ܗܳܕܶܐ ܘܰܒܝܰܕ ܗܳܠܶܝܢ ܕܰܐܝܟ ܗܳܟܰܢ܆ ܠܰܚܕܳܐ ܡܳܪܽܘܬܳܐ ܘܰܐ‌ܠܳܗܽܘܬܳܐ ܕܒܰܬܠܳܬܳܐ ܩܢܽܘܡ̈ܶܐ܆ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ ܪܰܩܘ ܒܣܰܓܺܝܽܐܘܬ݂ ܐܰ‎ܠܳܗܽܘܬܳܐ ܗܳܝ ܕܚܰܢ̈ܦܶܐ. ܘܡܶܚܕܳܐ ܟܰܕ ܠܗܳܝ ܕܰܒܫܽܘܪܳܝܳܐ ܥܒܰܕ ܐܰ‎ܠܳܗܳܐ ܠܰܫܡܰܝܳܐ ܘܠܰܐܪܥܳܐ ܩܪܰܘ^[14]܆ ܓܚܶܟܘ ܥܰܠ ܬܶܫ̈ܒܚܳܬܳܐ^[15] ܗܳܠܶܝܢ ܕܦܺܝܠܳܣܽܘ̈ܦܶܐ܆ ܕܗܰܘ ܡܰܢ ܐܳܡܰܪ ܕܢܽܘܪܳܐ ܐܺܝܬܶܝܗ̇ ܪܺܝܫܺܝܬܳܐ ܕܗܳܢܳܐ ܥܳܠܡܳܐ܆ ܐ̱ܚܪܺܢܳܐ ܕܶܝܢ ܡܰܝ̈ܳܐ܆ ܐ̱ܚܪܺܢܳܐ ܕܶܝܢ ܡܶܕܶܡ ܐ̱ܚܪܺܢܳܐ ܡܶܢ ܤܛܽܘܟܺܝ̈ܰܐ (ܐܶܤܛܽܘܟܣ̈ܶܐ).

8: ܐܰܤܛܪܽܘܢܽܘܡܺܝܰܐ ܕܶܝܢ ܐܰܘܟܺܝܬ ܡܡܰܠܠܽܘܬ݂ ܟܰܘܟ̈ܒܶܐ ܫܰܪܺܝܪܬܳܐ ܘܰܡܫܰܪܰܪܬܳܐ ܠܗܳܕܶܐ ܐܰܣܒܰܪܘ܆ ܠܗܳܝ ܕܡܶܢ ܫܽܘܦܪܳܐ ܕܗܳܠܶܝܢ ܕܡܶܬܚܰܙ̈ܝܳܢ܆ ܠܘܳܬ݂ ܥܳܒܽܘܕܳܐ ܕܺܝܠܗܶܝܢ ܦܳܢܝܳܐ ܡܰܣܩܳܐ܆ ܗܳܝ ܕܡܶܢܳܗ̇ ܐܰ‎ܠܳܗܳܝܳܐ ܕܰܘܺܝܕ ܟܰܕ ܠܰܐܠܳܗܳܐ ܕܟܽܠ ‌ܐܶܣܬܰܟܰܠ ‌ܐܶܡܰܪ: ܗܰܘ ܕܡܳܢܶܐ ܠܣܽܘܓܳܐܐ ܕܟܰܘܟ̈ܒܶܐ܆ ܘܰܠܟܽܠܗܽܘܢ ܩܳܪܶܐ ܫܡܳܗ̈ܶܐ^[16]. ܪܰܒ ܗܘ̣ ܡܳܪܰܢ ܘܪܰܒ ܚܰܝܠܶܗ^[17]܆ ܘܰܕܣܽܘܟܳܠܳܐ ܕܺܝܠܶܗ ܠܳܐ ܐܺܝܬ ܡܶܢܝܳܢܳܐ܆ ܘܠܳܐ ܗ̱ܘܳܐ ܐܰܝܟ ܐܰܤܛܪ̈ܽܘܠܳܘܓܽܘ ܗܳܢܽܘܢ ܣܪ̈ܺܝܩܶܐ܆ ܕܡܶܢ ܡܶܬܬܙܺܝܥܳܢܽܘܬܳܐ ܗܳܝ ܛܳܥܺܝܬܳܐ ܕܟܰܘܟ̈ܒܶܐ܆ ܢܥܰܪܙܠܽܘܢ ܚܶܠܩܳܐ ܡܶܕܶܡ ܘܦܶܣܳܐ ܩܛܺܝܪܳܝܳܐ܆ ܘܥܰܠ ܗܳܢܳܐ ܢܣܺܝܡܽܘܢ ܡܰܘ̈ܠܳܕܶܐ ܘܗܳܠܶܝܢ ܕܓܳܕ̈ܫܳܢ܆ ܘܢܶܓܠܙܽܘܢ ܠܰܢ ܡܶܢ ܒܛܺܝܠܽܘܬܳܐ ܘܰܡܕܰܒܪܳܢܽܘܬܳܐ ܕܰܐ‎ܠܳܗܳܐ.

9: ܟܰܕ ܗܳܠܶܝܢ ܘܕܰܐܝܟ ܗܳܠܶܝܢ ܦܺܝܠܳܣܽܘܦܺܝܣܳܐ ܥܒܰܕܘ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ܆ ܐܳܦ ܓܶܝܪ ܘܟܰܕ ܫܡܳܗ̈ܶܐ ܕܺܝܠܗܽܘܢ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܐܳܡܰܪ ܐ̱ܢܳܐ܆ ܡܶܬܒܰܣܰܡ ܐ̱ܢܳܐ܆ ܟܰܕ ܒܗܶܝܢ ܒܰܐܬܺܝܢܶܤ ܥܕܰܟܺܝܠ ܠܘܳܬ݂ ܡܰܠ̈ܦܳܢܶܐ ܐܺܝܬܰܝܗܽܘܢ ܗ̱ܘܰܘ܆ ܐܰܝܟܳܐ ܕܕܶܚܠܬܳܐ ܕܫ̈ܺܐܕܶܐ ܥܰܙܺܝܙܳܐ^[18] ܗ̱ܘܳܬ ܘܝܽܘܠ̈ܦܳܢܶܐ ܕܛܳܥܝܽܘܬܳܐ ܡܗܰܒܒܺܝܢ ܗ̱ܘܰܘ܆ ܕܳܫܘ ܠܕܶܚܠܬܳܐ ܕܫ̈ܺܐܕܶܐ܆ ܘܣܰܚܶܦܘ ܠܰܡܫܰܩܠܽܘܬܳܐ ܕܚܰܢ̈ܦܶܐ܆ ܡܶܢܳܗ̇ ܕܺܝܠܳܗ̇ ܕܣܰܩܽܘܒܠܳܝܽܘܬ݂ ܡܶܠܬܳܐ ܟܺܝܬ ܘܰܡܚܺܝܠܽܘܬܳܐ^[19] ܕܝܽܘܠ̈ܦܳܢܶܐ ܚܰܢܦܳܝ̈ܶܐ.

10: ܘܟܰܕ ܡܶܢ ܐܰܓܳܢܳܐ ܕܚܶܟܡܬܳܐ ܫܰܪܺܝܪܬܳܐ ܛܥܶܡܘ܆ ܘܝܰܬܺܝܪܳܐܺܝܬ ܐܶܬܚܰܬܰܚܘ ܠܘܳܬ ܨܶܗܝܳܐ܆ ܘܡܶܢ ܫܶܩܝܳܐ܆ ܝܰܬܺܝܪ ܥܰܬܺܝܪܳܐܺܝܬ ܐܶܬܡܠܺܝܘ܆ ܘܰܪܘܺܝܘ ܪܳܘܽܘܬܳܐ ܡܩܰܠܰܣܬܳܐ ܘܰܕܡܰܠܝܳܐ ܥܺܝܪܽܘܬܳܐ܆ ܘܰܠܒܶܣܪܳܐ ܒܥܰܡ̈ܠܶܐ ܕܰܡܚܰܡܣܢܳܢܽܘܬܳܐ ܟܰܒܶܫܘ܆ ܘܒܰܦܓܽܘܕܬܳܐ ܕܢܰܟܦܽܘܬܳܐ ܬܟܰܣܘ ܠܚܺܐܦ̈ܶܐ ܕܰܪ̈ܓܺܝܓܳܬܳܐ ܕܛܰܠܝܽܘܬܳܐ ܗܳܠܶܝܢ ܡܫܰܠܗܒܳܢ̈ܶܐ ܘܥܰܣ̈ܩܰܝ ܠܡܶܬܠܒܳܟܽܘ܆ ܘܶܐܬܥܰܢܘܺܝܘ ܠܟܽܠܳܗ̇ ܡܝܰܬܪܽܘܬܳܐ ܗܳܝ ܣܳܥܽܘܪܳܝܬܳܐ܆ ܠܘܳܬ݂ ܪܰܘܡܳܐ ܗܰܘ ܕܬܶܐܽܘܪܺܝܰܐ ܣܠܶܩܘ.

11: ܘܟܰܕ ܫܩܰܠܘ ܠܡܶܠܬܳܐ ܕܚܶܟܡܬܳܐ܆ ܡܶܠܬܳܐ ܕܺܝܕܰܥܬܳܐ܆ ܗܳܠܶܝܢ ܟܺܝܬ ܕܺܐܝܬܰܝܗܶܝܢ ܫܽܘܟܳܢ̈ܶܐ ܪܰܘܪ̈ܒܶܐ ܕܪܽܘܚܳܐ^[20]܆ ܢܰܗܪ̈ܰܘܳܬܳܐ ܕܡܰܝ̈ܳܐ ܡܰܫ̈ܬܰܬܝܳܢܶܐ ܘܚܰܝ̈ܶܐ܆ ܐܰܝܟ ܫܽܘܘܕܳܝܶܗ ܕܦܳܪܽܘܩܰܢ ܡܶܢ ܟܰܪܣܗܽܘܢ ܡܰܫܦܥܺܝܢ ܗ̱ܘܰܘ. ܘܗܰܘ ܕܠܳܐ ܫܳܒܶܩ ܠܰܡܕܺܝܢ̈ܳܬܳܐ ܕܥܰܠ ܛܽܘܪܳܐ ܕܰܡܝܰܬܪܽܘܬܳܐ ܣܺܝ̈ܡܳܢ ܠܡܶܬܛܰܫܳܝܽܘ܆ ܐܳܦܠܳܐ ܕܢܶܬܬܣܺܝܡ ܫܪܳܓܳܐ ܬܚܶܝܬ݂ ܡܽܘܕ݂ܝܳܐ^[21]܆ ܟܰܕ ܢܰܣܒܶܗ ܠܪܰܒܳܐ ܒܰܣܶܝܠܺܝܽܘܤ ܡܶܢ ܡܰܕܒܪܳܐ ܘܡܶܢ ܕܽܘܒܳܪܳܐ ܕܰܝܪܳܝܳܐ܆ ܥܰܠ ܬܪܽܘܢܽܘܤ ܕܥܺܕܬܳܐ ܗܳܝ ܕܩܶܣܰܪ̈ܳܝܶܐ ܐܰܣܩܶܗ܆ ܗܳܝ ܕܺܐܝܬܶܝܗ̇ ܡܺܝܛܪܳܦܳܘܠܺܝܤ ܕܩܰܦܰ̊ܕܽܘܩܺܝܰܐ.

12: ܘܡܶܢ ܬܰܡܳܢ ܗܽܘ ܠܟܽܠܳܗ̇ ܡܶܬܥܰܡܪܳܢܺܝܬܳܐ܆ ܒܡܰܠܦܳܢ̈ܘܳܬܳܐ ܐܰܛܺܝܦ܆ ܟܰܕ ܐܰܝܟ ܕܡܶܢ ܚܕܳܐ ܡܥܺܝܢܳܐ ܠܟܳܐ ܘܰܠܗܰܠ ܪ̈ܳܕܰܝܳܐ ܐܰܡܺܝ̈ܢܰܝ ܢܶܒ̈ܥܶܐ ܡܫܰܕܰܪ ܗ̱ܘܳܐ. ܘܟܰܕ ܠܗܳܢܽܘܢ ܡܰܢ ܕܰܒܥܺܕܬܳܐ ܡܡܰܠܶܠ ܗ̱ܘܳܐ ܒܬܽܘܪ̈ܓܳܡܶܐ܆ ܠܗܳܢܽܘܢ ܕܶܝܢ ܕܰܒܪܽܘܚܩܳܐ ܐܺܝܬܰܝܗܽܘܢ ܗ̱ܘܰܘ܆ ܫܳܠܰܚ ܗ̱ܘܳܐ ܐܶܓܪ̈ܳܬܳܐ܆ ܡܰܪܬܝܳܢܽܘܬܳܐ ܠܳܚܶܡ ܠܡ̈ܶܠܶܐ ܕܰܒܪܺܝܬܳܐ܆ ܘܰܠܚܶܟܡܬܳܐ ܗܳܝ ܕܣܺܝܡܳܐ ܒܰܥܒܳܕ̈ܶܐ ܕܗܰܘ ܕܰܥܒܰܕ ܐܰ‌ܠܶܦ. ܡܡܰܠܠܽܘܬ݂ ܐܰ‎ܠܳܗܽܘܬܳܐ ܪܕܳܐ. ܠܡܶܫ̈ܟܚܳܢܶܐ ܕܗܶܪ̈ܶܣܺܝܤ ܕܠܳܐ ܐܰ‌ܠܳܗ ܒܠܰܡ. ܒܰܙܒܰܢ ܡܰܢ ܟܰܕ ܒܰܟܢܽܘܫܝܳܐ ܡܰܩܪܶܒ ܗ̱ܘܳܐ܆ ܘܰܒܡ̈ܶܠܶܐ ܕܡܶܢ ܠܶܫܳܢܳܐ ܣܳܚܶܦ ܗ̱ܘܳܐ ܠܗܽܘܢ. ܒܰܙܒܰܢ ܕܶܝܢ܆ ܟܰܕ ܠܡ̈ܶܠܶܐ ܨܢܺܝ̈ܥܳܬܳܐ ܘܥܰܣ̈ܩܳܬ݂ ܠܰܫܟܳܚܬܳܐ ܕܗܳܢܽܘܢ܆ ܒܰܟܫܳܛ̈ܶܐ ܕܡܶܢ ܕܝܽܘܬܳܐ ܘܩܰܢܝܳܐ ܪܰܒܳܐ ܗ̱ܘܳܐ. ܘܫܳܪܶܐ ܗ̱ܘܳܐ ܠܥܽܘܪ̈ܙܳܠܶܐ ܕܺܝܠܗܽܘܢ ܗܳܠܶܝܢ ܕܺܐܝܬܰܝܗܽܘܢ ܗ̱ܘܰܘ ܠܳܐ ܡܶܬܥܰܪ̈ܩܳܢܶܐ܆ ܐܰܟܡܳܐ ܟܺܝܬ ܕܗܶܢܽܘܢ ܡܰܣܒܪܺܝܢ ܗ̱ܘܰܘ ܗܳܟܰܢܳܐ ܦܫܺܝܩܳܐܺܝܬ. ܐܰܟܙܢܳܐ ܕܫܶܡܫܽܘܢ ܗܰܘ ܢܙܺܝܪܳܐ ܠܚܰܒ̈ܠܶܐ ܕܰܦܠܶܫ̈ܬܳܝܶܐ^[22].

13: ܓܪܺܝܓܽܘܪܺܝܽܘܤ ܕܶܝܢ܆ ܗܰܘ ܕܫܰܪܺܝܪܳܐܺܝܬ ܡܡܰܠܶܠ ܐܰ‎ܠܳܗܳܝ̈ܳܬܳܐ܆ ܠܩܳܝܽܘܡܽܘܬܳܐ ܕܢܰܐܙܺܝܰܢܙܽܘ ܡܕܺܝܢ̱ܬܳܐ ܗܳܝ ܕܝܰܬܺܝܪ ܙܥܽܘܪܝܳܐ ܡܶܢ ܗܳܠܶܝܢ ܕܩܰܦܰ̊ܕܽܘܩܺܝܰܐ ܩܰܒܶܠ܆ ܘܳܐܦܠܳܐ ܕܰܠܗܳܕܶܐ ܫܳܘܶܐ ܡܰܣܒܰܪ ܗ̱ܘܳܐ ܗܽܘ ܠܶܗ. ܐܶܠܳܐ ܥܕܰܟܺܝܠ ܡܶܢ ܝܽܘܩܪܳܐ ܕܪܺܝܫܽܘܬ݂ ܟܳܗܢܽܘܬܳܐ ܥܳܪܶܩ ܗ̱ܘܳܐ. ܠܰܘ ܟܰܕ ܒܪܰܒܽܘܬܳܐ ܕܰܡܕܺܝܢ̱ܬܳܐ ܗܳܕܶܐ ܡܳܫܰܚ ܗ̱ܘܳܐ܆ ܐܶܠܳܐ ܟܰܕ ܝܳܕܰܥ ܗ̱ܘܳܐ ܕܚܰܕ ‌ܐܺܝܬܰܘܗ̱ܝ ܫܽܘܠܛܳܢܳܐ ܘܰܫܘܶܐ ܒܺܐܝܩܳܪܳܐ ܠܟܽܠܗܽܘܢ ܗܳܢܽܘܢ ܕܰܡܟܰܗܢܺܝܢ܆ ܗܳܝ ܕܢܶܬܚܰܫܒܽܘܢ ܗܳܝ ܕܝܰܬܺܝܪܳܐ ܘܗܳܝ ܕܰܒܨܺܝܪܳܐ܆ ܠܗܳܢܽܘܢ ܠܳܐ ܝܰܠܺܝ̈ܦܶܐ ܘܰܕܣܰܓܺܝ ܒܶܣܪܳܢܺܝܢ ܫܕܳܗ̇.

14: ܘܟܰܕ ܦܰܩܪܽܘܬܳܐ ܡܰܢ ܕܰܐܪܺܝܽܘܤ ܐܰܚܺܝܕܳܐ ܗ̱ܘܳܬ݂܆ ܘܠܺܝܚܺܝܕܳܝܳܐ ܕܰܐ‎ܠܳܗܳܐ ܡܶܠܬܳܐ܆ ܗܰܘ ܕܶܐܬܺܝܠܶܕ ܡܰܢ܆ ܕܠܳܐ ܫܽܘܪܳܝ ܕܶܝܢ ܘܰܕܠܳܐ ܙܰܒܢܳܐ ܘܠܳܐ ܓܽܘܫܡܳܢܳܐܺܝܬ ܐܰܝܟ ܡܶܠܬܳܐ ܕܡܶܢ ܐܰܒܳܐ. ܥܰܡ ܒܶܪ̈ܝܳܬܳܐ ܡܰܢܝܳܐ ܗ̱ܘܳܬ݂܆ ܘܰܐ‌ܠܳܗܳܐ ܚܰܕܬܳܐ ܡܰܥܠܳܐ ܗ̱ܘܳܬ ܠܥܳܒܽܘܕܳܐ ܕܥܳܠ̈ܡܶܐ ܘܰܕܙܰܒܢ̈ܶܐ܆ ܡܰܩܕܽܘܢܺܝܽܘܤ ܕܶܝܢ ܐܰܚܘ̈ܳܬܳܐ ܠܗܳܠܶܝܢ ܕܰܐܪܺܝܽܘܤ ܫܢܳܐ ܗ̱ܘܳܐ܆ ܘܠܶܗ ܟܰܕ ܠܶܗ ܠܓܽܘܕܳܦܳܐ ܐܰܥܒܰܪ ܣܳܡ ܥܰܠ ܪܽܘܚܳܐ ܩܰܕܺܝܫܳܐ܆ ܠܩܽܘܤܛܰܢܛܺܝܢܽܘܦܽܘܠܺܝܤ ܡܶܢ ܐܰ‎ܠܳܗܳܐ ܡܶܫܬܰܕܰܪ܆ ܒܗܳܕܶܐ ܓܶܝܪ ܥܰܒܺܝܛ ܗ̱ܘܳܐ ܣܰܓܺܝ ܚܽܘܒܳܠܳܐ ܕܗܳܠܶܝܢ ܐܶܪ̈ܶܣܺܝܤ ܒܺܝ̈ܫܳܬ݂ ܒܕܳܘܝܽܘܬܳܐ.

15: ܘܗܰܘ ܕܕܰܒ̣ܪܶܗ ܠܕܰܘܺܝܕ ܡܶܢ ܓܙܳܪܳܐ ܕܥܶܪ̈ܒܶܐ܆ ܠܡܶܪܥܳܐ ܠܝܰܥܩܽܘܒ ܥܰܒܕܶܗ ܘܠܺܐܝܣܪܳܐܶܝܠ ܝܳܪܬܽܘܬܶܗ^[23]܆ ܗܽܘ ܕܒܰܪ ܐܳܦ ܠܰܓܪܺܝܓܽܘܪܺܝܽܘܤ܆ ܘܡܶܢ ܡܰܪܥܺܝܬܳܐ ܙܥܽܘܪܬܳܐ ܕܢܰܐܙܺܝܰܢܙܽܘ܆ ܠܘܳܬ ܡܕܺܝܢ̱ܬܳܐ ܡܰܠܟܳܝܬܳܐ ܐܰܥܒܰܪ ܐܰܩܺܝܡܶܗ. ܘܬܰܡܳܢ ܟܰܕ ܐܶܬܬܰܠܒܰܫ ܒܟܽܘܠܳܝܽܘܬ݂ ܙܰܝܢܳܐ ܕܪܽܘܚܳܐ^[24]܆ ܘܰܠܓܰܘ ܡܶܢ ܥܢܳܢܳܐ ܒܰܕܡܽܘܬ݂ ܡܽܘܫܶܐ ܥ̣ܰܠ܆ ܘܰܒܢܽܘܪܳܐ ܕܰܡܡܰܠܠܽܘܬ݂ ܐܰ‎ܠܳܗܽܘܬܳܐ ܠܠܶܫܳܢܶܗ ܤܛܰܡ.^[25] ܒܪܰܥܡܳܐ ܕܰܡܥܰܠܝܽܘܬ݂ ܡܶܠܬܳܐ ܕܕܽܘܓ̈ܡܰܛܰܐ ܐܰ‎ܠܳܗܳܝ̈ܶܐ܆ ܠܟܽܠܳܗ̇ ܡܰܫܡܰܥܬܳܐ ܘܬܰܪܥܺܝܬܳܐ ܐܶܪܛܺܝܩܳܝܬܳܐ ܙܰܥܙܰܥ. ܘܟܰܕ ܒܡ̈ܶܠܶܐ ܙܥܽܘܪ̈ܝܳܬܳܐ ܕܰܟܬܳܒܳܐ ܐܰ‎ܠܳܗܳܝܳܐ ܠܗܰܘܢܳܐ ܕܫܳܡܽܘ̈ܥܶܐ ܐܰܩܺܝܡ܆ ܘܰܠܥܽܘܬܪܳܐ ܕܣܽܘ̈ܟܳܠܶܐ ܦܰܐܝ̣̈ܰܝ̣ ܠܰܐܠܳܗܳܐ ܗܰܘ ܕܣܺܝܡ ܗ̱ܘܳܐ ܒܗܶܝܢ ܓܠܳܐ܆ ܣܟܰܪ ܐܰܟܚܕܳܐ ܠܪܶܕܝܳܐ ܕܠܶܫܳܢܳܐ ܗܰܘ ܣܰܓܺܝ ܡ̈ܶܠܶܐ ܘܣܰܩܽܘܒܠܳܝܳܐ. ܣܰܓܺܝ̈ܶܐܐ ܓܶܝܪ ܐܺܝܬܰܝܗܽܘܢ ܗ̱ܘܰܘ ܣܽܘܦܺܝܣ̈ܛܶܐ ܕܒܺܝܫܽܘܬܳܐ ܒܙܰܒܢܳܐ ܗܰܘ܆ ܘܕܳܐܡܪܺܝܢ ܗ̱ܘܰܘ ܠܽܘܩܒܰܠ ܫܪܳܪܳܐ ܘܰܕܟܳܬܒܺܝܢ ܗ̱ܘܰܘ. ܐܶܠܳܐ ܐܰܟܙܢܳܐ ܕܰܐܪܝܳܐ ܕܰܒܟܶܢܫܳܐ ܕܬܰܥ̈ܠܶܐ ܘܕܰܐܪ̈ܢܒܶܐ ܢܳܦܶܠ܆ ܠܟܽܠܗܽܘܢ ܥܳܪ̈ܽܘܩܶܐ ܚܰܘܺܝ.

16: ܡܰܢܽܘ ܓܶܝܪ ܕܟܰܕ ܫܳܡܰܥ ܠܶܗ ܠܺܝܚܺܝܕܳܝܳܐ ܒܪܳܐ ܕܰܐ‎ܠܳܗܳܐ ܕܠܰܫܠܺܝ̈ܚܶܐ ܐܳܡܰܪ: ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̱ܡ̈ܶܐ܆ ܟܰܕ ܡܰܥܡܕܺܝܢ ܐܢ̱ܬܽܘܢ ܠܗܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ^[26]܆ ܡܰܡܪܰܚ ܠܰܡܦܰܠܳܓܽܘ ܠܰܚܕܳܐ ܐܽܘܣܺܝܰܐ ܘܰܐ‌ܠܳܗܽܘܬܳܐ ܕܰܬܠܳܬܳܐ ܩܢܽܘ̈ܡܶܐ. ܐܶܢ ܓܶܝܪ ܠܰܘ ܚܕܳܐ ܗ̱ܝ ܐܰ‎ܠܳܗܽܘܬܳܐ ܕܰܬܠܳܬܰܝ̈ܗܽܘܢ܆ ܘܳܐܦܠܳܐ ܚܕܳܐ ܗܰܝܡܳܢܽܘܬܳܐ ܐܺܝܬܶܝܗ̇ ܡܶܟܺܝܠ܆ ܘܳܐܦܠܳܐ ܡܰܥܡܽܘܕܺܝܬܳܐ ܚܕܳܐ^[27]. ܘܶܐܢ ܐܰܒܳܐ ܠܳܐ ܒܰܪܝܳܐ ܘܠܳܐ ܥܒܺܝܕܳܐ ‌ܐܺܝܬܰܘܗ̱ܝ܆ ܒܪܳܐ ܕܶܝܢ ܒܪܺܝܬܳܐ܆ ܘܰܥܒܳܕܳܐ ܪܽܘܚܳܐ ܩܰܕܺܝܫܳܐ܆ ܥܰܒ̈ܕܶܐ ܡܳܕܶܝܢ ܡܶܢܟܽܠܦܪܽܘܤ ܢܶܗܘܽܘܢ ܐܺܝܬܰܝܗܽܘܢ ܘܰܡܫܰܥܒ̈ܕܶܐ ܕܰܐܒܳܐ܆ ܐܰܝܟ ܕܒܳܪܽܘܝܳܐ ܘܥܳܒܽܘܕܳܐ. ܘܰܐܝܟܰܢܳܐ ܥܰܡ ܗܰܘ ܕܠܳܐ ܥܰܒܕܰܐ ܗ̱ܘ ܘܰܕܒܰܟܝܳܢܳܐ ‌ܐܺܝܬܰܘܗ̱ܝ ܒܰܪ ܚܺܐܪ̈ܶܐ܆ ܠܥܰܒ̈ܕܶܐ ܡܢܳܐ ܥܰܡܶܗ ܐܰܟܚܕܳܐ܆ ܗܳܢܰܘ ܕܶܝܢ ܠܶܗ ܘܰܠܪܽܘܚܳܐ ܩܰܕܺܝܫܳܐ܆ ܘܰܒܫܰܘܝܽܘܬ݂ ܐܺܝܩܳܪܳܐ ܒܶܗ ܟܺܝܬ ܘܰܒܗܳܢܽܘܢ ܦܩܰܕ ܠܰܡܗܰܝܡܳܢܽܘ.

17: ܒܡ̈ܶܠܶܐ ܕܰܐܝܟ ܗܳܠܶܝܢ ܗܰܘ ܣܰܓܺܝܳܐܐ ܒܬܶܐܘܳܠܘܓܺܝܰܐ ܓܪܺܝܓܽܘܪܺܝܽܘܤ܆ ܠܰܘ ܒܰܠܚܽܘܕ ܠܶܐܪ̈ܶܐܣܺܝܤ ܕܰܐܪܺܝܽܘܤ ܘܰܕܡܰܩܕܽܘܢܺܝܽܘܤ ܚܰܝܶܒ܆ ܐܶܠܳܐܘܰܠܟܽܠ ‌ܐܶܪ̈ܶܐܣܺܝܤ܆ ܟܰܕ ܒܰܕܡܽܘܬ݂ ܐ̱ܢܳܫ ܦܳܠܚܳܐ ܛܰܪܩܳܐ܆ ܕܡܶܚܕܳܐ ܕܝܳܥܶܝܢ ܟܽܘܒ̈ܶܐ ܡܰܓܠܳܐ ܡܰܝܬܶܐ ܥܠܰܝܗܽܘܢ. ܘܗܳܟܰܢܳܐ ܠܰܛܫܳܗ̇ ܚܰܪܺܝܦܳܐܺܝܬ܆ ܐܰܝܟ ܕܳܐܦ ܠܰܢ ܘܰܠܗܳܢܽܘܢ ܕܒܳܬܰܪܟܶܢ ܗܳܘܶܝܢ܆ ܬܶܣܦܰܩ ܠܰܦܣܳܩܳܐ ܕܗܳܢܽܘܢ ܕܡܶܢܕܪܺܝܫ ܝܳܥܶܝܢ ܒܟܽܠܙܒܰܢ. ܐܶܠܳܐ ܗܳܢܳܐ ܗܰܘ ܕܕܰܐܝܟ ܗܳܢܳܐ ‌ܐܺܝܬܰܘܗ̱ܝ ܩܰܕܡܳܝܳܐ ܕܰܩܪ̈ܰܒܬܳܢܶܐ ܘܡܶܬܟܰܬܫܳܢܳܐ ܩܰܕܡܳܝܳܐ ܕܡܰܪܥܺܝܬܳܐ ܕܰܡܫܺܝܚܳܐ܆ ܟܰܕ ܙܰܒܢܳܐ ܕܰܥܣܰܪ ܫܢܰܝ̈ܳܐ ܕܥܶܬ݂ ܒܰܡܕܺܝܢܰܬ݂ ܡܰܠܟܽܘܬܳܐ ܒܥܰܡ̈ܠܶܐ ܘܬܰܟܬܽܘ̈ܫܶܐ ܟܳܗܢܳܝ̈ܶܐ܆ ܘܡܶܢ ܫܽܘܪܳܝܳܐ ܒܒܰܝܬܳܐ ܙܥܽܘܪܳܐ܆ ܠܳܐܪ̈ܬܳܕܳܟܣܽܘ ܗܳܢܽܘܢ ܕܣܰܓܺܝ ܦܫܺܝ̈ܩܰܝ ܠܡܶܢܝܳܢ̈ܶܐ ܐܺܝܬܰܝܗܽܘܢ ܗ̱ܘܰܘ ܡܡܰܠܶܠ ܗ̱ܘܳܐ܆ ܘܰܠܟܶܢܫܳܐ ܗܰܘ ܣܰܓܺܝܳܐܐ ܕܶܐܪ̈ܶܛܺܝܩܽܘ ܠܠܳܐ ܡܶܕܶܡ ܐܰܩܺܝܡܶܗ܆ ܘܰܠܘܳܬ݂ ܗܰܝܡܳܢܽܘܬܳܐ ܬܪܺܝܨܬܳܐ ܒܰܕܡܽܘܬ݂ ܪܶܕܝܳܐ ܡܶܕܶܡ ܐܰܥܒܰܪ ܐܰܝܬܝܳܗ̇܆ ܡܶܢ ܒܳܬܰܪ ܪ̈ܕܽܘܦܝܶܐ܆ ܡܶܢ ܒܳܬܰܪ ܡܣܰܝܒܪܳܢܽܘܬܳܐ ܕܒܺܝܫܬܳܐ ܗܳܝ ܣܰܓܺܝܰܐܬ݂ ܙܢܰܝ̈ܳܐ܆ ܡܶܢ ܒܳܬܰܪ ܕܶܐܬܪܓܶܡ ܙܰܒܢܺܝ̈ܢ ܣܰܓܺܝ̈ܳܐܢ ܒܟܺܐܦ̈ܶܐ܆ ܟܰܕ ܠܶܫܳܢܳܐ ܡܰܩܪܒܳܢܳܐ ܐܶܬܡܚܶܠ ܗ̱ܘܳܐ܆ ܘܡܶܟܺܝܠ‌ ܐܰܝܕܳܐ ܡܙܰܝܶܢ ܗ̱ܘܳܐ܆ ܡܶܢ ܒܳܬܰܪ ܕܥܰܠ ܟܽܘܪܣܝܳܐ ܐܶܬܬܣܺܝܡ܆ ܟܰܕ ܟܽܠܗܽܘܢ ܡܗܰܝܡ̈ܢܶܐ ܟܳܗ̈ܢܶܐ ܟܺܝܬ ܘܗܳܢܽܘܢ ܕܰܒܥܰܡܳܐ ܐܺܝܬܰܝܗܽܘܢ ܗ̱ܘܰܘ ܚܰܛܦܽܘܗ̱ܝ ܘܒܰܩܛܺܝܪܳܐ ܐܰܣܩܽܘܗ̱ܝ܆ ܘܗܳܢܳܐ ܐܺܝܩܳܪܳܐ ܫܠܶܡܘ ܘܰܦܣܰܩܘ ܘܝܰܗܒܘ ܠܶܗ ܦܽܘܪܥܳܢܳܐ ܕܥܰܡܠܰܘܗ̱ܝ܆ ܙܢܰܩ ܗ̱ܘܳܐ ܡܶܢܶܗ ܠܗܳܢܳܐ ܐܺܝܩܳܪܳܐ܆ ܘܰܠܘܳܬ݂ ܢܰܐܙܺܝܰܢܙܽܘ ܚܳܐܰܪ ܗ̱ܘܳܐ. ܘܟܰܕ ܠܘܳܬ݂ ܣܽܘܢܶܗܕܳܘܤ ܕܰܐܒܳܗ̈ܳܬܳܐ ܩܰܕܺܝ̈ܫܶܐ ܡܳܐܐ ܘܚܰܡܫܺܝܢ ܕܰܒܩܽܘܤܛܰܢܛܺܝܢ ܘܦܽܘܠܺܝܤ ܗܳܝܕܶܝܢ ܟܢܺܝܫܺܝܢ ܗ̱ܘܰܘ܆ ܡܺܐܡܪܳܐ ܥܒܰܕ ܐܳܡܰܪ ܗ̱ܘܳܐ: ܦܰܢܰܘ ܠܺܝ ܠܩܽܘܪܝܳܝܽܘܬܳܐ ܘܰܠܚܽܘܪܒܳܐ ܘܠܰܐܠܳܗܳܐ. ܟܰܕ ܒܡܶܣܟܺܢܽܘܬܳܐ ܨܶܒܝܳܢܳܝܬܳܐ ܕܡܳܪܶܗ ܡܕܰܡܶܐ ܗ̱ܘܳܐ܆ ܗܰܘ ܕܟܰܕ ܥܳܒܽܘܕܳܐ ܕܰܫܡܰܝܳܐ ‌ܐܺܝܬܰܘܗ̱ܝ܆ ܘܡܰܠܟܳܐ ܘܰܐ‌ܠܳܗܳܐ ܕܟܽܠܗܶܝܢ ܗܳܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ܆ ܩܰܒܶܠ ܥܠܰܘܗ̱ܝ ܡܶܛܽܠܳܬܰܢ܆ ܕܢܶܬܟܰܬܒ̈ܳܢ ܠܶܗ ܒܶܝܬ ܐܰܒܳܗ̈ܶܐ ܒܶܝܬ ܠܚܶܡ ܘܢܳܨܪܰܬ݂.

18: ܐܰܪܰܐ ܗܳܟܺܝܠ ܫܳܘܶܝܢ ܚܢܰܢ ܠܰܣܐܽܘܢܗܽܘܢ ܕܗܳܢܽܘܢ؟ ܡܰܠܽܘܢ ܕܶܝܢ ܠܰܐܪܥܳܐ ܗܳܝ ܕܗܳܢܽܘܢ ܕܳܝܫܺܝܢ ܗ̱ܘܰܘ܆ ܚܢܰܢ ܕܡܶܛܽܠ ܩܰܕܺܝܡܽܘܬ݂ ܡܰܘܬܒܳܐ ܡܶܫܬܰܝܚܢܺܝܢܰܢ ܘܡܶܛܽܠ ܩܰܕܺܝܡܽܘܬ݂ ܐܺܝܩܳܪ̈ܶܐ܆ ܘܟܽܘܪܣܝܳܐ ܫܠܺܝܚܳܝܳܐ ܒܓܰܓܰܪܬܰܢ ܡܒܰܓܒܓܺܝܢܰܢ ܒܩܳܠܳܐ ܪܳܡܳܐ܆ ܘܠܰܓܒܺܝܢܳܐ ܠܥܶܠ ܬܳܠܶܝܢ ܚ̱ܢܰܢ܆ ܒܨܺܝܪ ܩܰܠܺܝܠ ܘܦܰܟܰܝ̈ܢ ܢܳܦܚܺܝܢܰܢ ܘܦܰܬܝܳܐܺܝܬ ܪܳܩܺܝܢܰܢ܆ ܘܥܰܠ ܪܺܝܫ ܛܶܦܪ̈ܰܝܢ ܡܗܰܠܟܺܝܢܰܢ. ܟܒܰܪ ܕܶܝܢ ܐܳܦ ܕܥܰܠ ‌ܐܰܪܥܳܐ ܢܕܽܘܫ ܡܶܬܥܰܣܩܺܝܢܰܢ܆ ܘܥܰܠ ܚܡܳܪ̈ܶܐ ܪܰܘܪ̈ܒܶܐ ܕܺܐܝܬ ܠܗܽܘܢ ܓܰܘܢܳܐ ܕܣܰܥܪܳܐ ܕܫܰܦܺܝܪ ܘܗܶܠܟܳܐ ܐܰܝܟ ܕܥܰܠ ܡܰܪ̈ܟܒܳܬܳܐ ܡܶܙܕܰܝܚܺܝܢܰܢ܆ ܟܰܕ ܡܶܬܝܰܩܪܺܝܢܰܢ ܟܺܝܬ ܒܡܶܐܙܰܠܬܳܐ ܕܣܰܓܺܝ̈ܶܐܐ ܕܰܩܕܳܡܰܝܢ ܘܒܳܬܪܰܢ ܘܡܶܬܠܰܘܶܝܢܰܢ. ܫܳܒܶܩ ܐ̱ܢܳܐ ܠܫܰܓܽܘܫ̈ܬܳܢܘܳܬܳܐ ܗܳܠܶܝܢ ܕܰܒܗܶܝܢ ܟܽܠܝܽܘܡ ܡܶܬܦܰܪܓܺܝܢܰܢ. ܫܡܳܐ ܓܶܝܪ ܗܰܘ ܪܰܒܳܐ ܕܢܰܟܦܽܘܬܳܐ ܐܶܬܒܣܺܝ ܠܶܗ. ܟܽܘܢܳܝܳܐ ܕܶܝܢ ܗܰܘ ܕܕܶܚܠܰܬ݂ ܐܰ‎ܠܳܗܳܐ ܫܺܝܛ. ܘܡܶܟܺܝܠ. ܕܨܰܥܪܳܐ‌ ܐܺܝܬܰܘܗ̱ܝ ܡܶܣܬܒܰܪ. ܚܠܺܝܕܳܐ ܕܶܝܢ ܥܰܠܺܝܠܳܐ ܠܰܡܨܥܬܳܐ ܛܽܘܒܬܳܢܽܘܬܳܐ. ܗܳܝ ܟܺܝܬ ܕܳܐܦ ܗܺܝ ܒܳܬܰܪ ܩܰܠܺܝܠ ܬܶܬܕܺܝܫ. ܘܰܐܝܟ ܡܰܠ̈ܟܶܐ ܕܰܐܪܥܳܐ܆ ܠܘܳܬ݂ ܩܪ̈ܳܝܳܬܳܐ ܕܰܐ‎ܠܳܗܽܘܬܳܐ ܢܶܣܰܩ.

19: ܐܶܢܳܐ ܡܰܢ ܗܳܟܺܝܠ܆ ܒܣܰܓܺܝ̈ܳܐܬܳܐ ܡܰܣܒܰܪ ܐ̱ܢܳܐ܆ ܘܰܕܠܳܐ ܚܳܫܚܳܐܺܝܬ ܘܰܕܠܳܐ ܠܳܚܡܳܐܺܝܬ ܐܺܝܬ ܠܺܝ܆ ܠܘܳܬ݂ ܪܺܝܫܳܢܽܘܬܳܐ ܗܳܕܶܐ܆ ܘܠܳܐ ܡܶܫܟܰܚ ܐ̱ܢܳܐ ܕܰܐܝܟ ܡܰܣܒܪܳܢܽܘܬܳܐ ܕܰܐܚܺܝܕܳܐ܆ ܐܶ݀ܬܬܪܺܝܡ ܐܰܟܚܕܳܐ ܥܰܡ ܢܦܺܝܚܽܘܬܳܐ ܕܟܽܘܪܣܝܳܐ. ܐܶܠܳܐ ܐܶܢܳܐ ܕܶܝܢ ܒܪܰܡ ܠܢܰܦܫܝ ܘܰܡܕܰܡܰܥ ܐ̱ܢܳܐ܆ ܕܳܐܦܠܳܐ ܥܶܩܒܬܳܐ ܐܺܝܬ ܠܺܝ ܕܰܡܝܰܬܪܽܘܬܳܐ ܫܠܺܝܚܳܝܬܳܐ܆ ܐܶܠܳܐ ܡܡܰܚܰܝ ܐ̱ܢܳܐ ܒܚܰܫ̈ܶܐ. ܘܠܳܐ ܪܳܥܶܠ ‌ܐ̱ܢܳܐ ܠܡܶܓܫܰܦ ܒܰܠܚܽܘܕ ܒܡܰܘܬܒܳܐ ܗܳܢܳܐ ܟܳܗܢܳܝܳܐ܆ ܒܕܰܠܩܽܘܒܠܳܐ ܕܶܝܢ܆ ܕܠܳܐ ܟܳܐܶܒ ܠܺܝ ܟܰܕ ܝܳܬܶܒ ܐ̱ܢܳܐ.

20: ܗܰܘ ܓܶܝܪ ܕܨܳܒܶܐ ܠܡܶܬܟܰܢܳܟܽܘ ܒܺܐܝܩܳܪ̈ܶܐ ܟܺܝܬ ܫܠܺܝܚܳܝ̈ܶܐ ܘܰܒܫܽܘܠ̈ܛܳܢܶܐ܆ ܫܠܺܝܚܳܐܺܝܬ ܢܶܬܕܒܰܪ. ܘܢܶܛܰܢ ܒܩܺܝ̈ܢܕܽܘܢܽܘ ܕܰܚܠܳܦ ܫܰܦܺܝܪܽܘܬ݂ ܕܶܚܠܬܳܐ. ܘܶܐܢܕܶܝܢ ܠܳܐ܆ ܢܶܬܓܚܶܟ ܕܰܡܥܰܛܰܦ ܓܰܠܕܳܐ ܕܰܐܪܝܳܐ܆ ܘܺܐܝܬܰܘܗ̱ܝ ܩܰܒܪܳܐ ܕܰܡܠܶܐ ܓܰܪ̈ܡܶܐ ܕܡܺܝ̈ܬܶܐ܆ ܘܡܰܚܘܰܪ ܒܰܠܚܽܘܕ ܒܓܰܘܢܳܐ ܕܡܶܢ ܟܰܠܫܳܐ^[28].

21: ܐܰܝܟܰܢܳܐ ܠܳܗ̇ ܟܰܕ ܠܳܗ̇ ܢܺܐܬܶܐ܆ ܐܶܢܳܐ ܟܺܝܬ ܘܰܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ܆ ܗܰܘ ܕܥܰܠ ܡܰܘܬܒܶܗ ܕܶܐ݀ܬܶܒ ܡܰܡܪܰܚ ܐ̱ܢܳܐ. ܐܰܪܰܐ܆ ܠܰܘ ܠܳܐ ܠܳܚ̈ܡܶܐ ܐܺܝܬܰܝܗܽܘܢ ܡܰܝ̈ܳܐ ܠܢܽܘܪܳܐ܆ ܗܳܟܰܢܳܐ ܐܰܫܺܝܕܽܘܬܳܐ ܕܚܰܝ̈ܶܐ ܕܺܝܠܝ. ܕܠܳܐ ܠܳܚܡܳܐ ܐܺܝܬܶܝܗ̇܆ ܠܘܳܬ݂ ܚܰܝ̈ܶܐ ܢܽܘܪ̈ܳܢܶܐ ܘܰܫܡܰܝܳܢ̈ܶܐ ܕܗܰܘ. ܠܰܡܝܰܬܪܽܘܬܶܗ ܓܶܝܪ ܕܺܐܝܦܽܘܠܺܝܛܳܤ ܐܶܦܶܝܣܩܽܘܦܳܐ ܘܣܳܗܕܳܐ܆ ܐܰܝܟ ܠܳܐ ܡܶܬܩܰܪܒܳܢܺܝܬܳܐ ܫܳܬܶܩ ܐ̱ܢܳܐ܆ ܗܰܘ ܕܫܰܕܪܰܬ ܠܰܢ. ܡܕܺܝܢ̱ܬܳܐ ܕܪ̈ܽܘܡܳܝܶܐ܆ ܟܰܕ ܦܳܪܥܳܐ ܠܰܡܕܺܝܢ̱ܬܳܐ ܗܳܕܶܐ ܪܳܚܡܰܬ ܠܰܡܫܺܝܚܳܐ܆ ܡܶܛܽܠ ܥܽܘܕܪܳܢܳܐ ܗܰܘ ܕܺܐܺܝܓܢܰܐܛܺܝܽܘܤ ܟܰܕ ܐܶܙܰܠ ܠܬܰܡܳܢ ܥܰܕܪܳܗ̇܆ ܟܰܕ ܒܳܗ̇ ܐܶܬܟܰܬܰܫ ܐܰܓܽܘܢܳܐ ܕܣܳܗܕܽܘܬܳܐ܆ ܘܚܰܝܶܠ ܘܫܰܪܰܪ ܠܰܟܪ̈ܺܝܣܛܝܳܢܶܐ ܕܬܰܡܳܢ. ܐܰܝܟܰܢܳܐ ܗܳܟܺܝܠ ܠܰܘ ܕܶܐ݀ܬܶܐܒܶܠ ܥܰܠ ܢܰܦܫܝ ܙܳܕܶܩ ܠܺܝ܆ ܕܠܶܗ ܟܰܕ ܠܶܗ ܠܺܐܝܩܳܪܳܐ ܐܶܫܬܰܘܬܦܶܬ.

22: ܢܶ݀ܥܪܽܘܩ ܗܳܟܺܝܠ ܡܶܢ ܫܽܘܒܚܳܐ ܣܪܺܝܩܳܐ ܐܳܘ ܪ̈ܳܚܡܶܐ ܘܰܐܚ̈ܶܐ܆ ܘܰܒܟܽܠ ܫܳܥܳܐ ܢܶܕܰܥ ܚܢܰܢ ܠܰܢ. ܗܳܢܽܘܢ ܓܶܝܪ ܕܝܳܕܥܺܝܢ ܗܶܢܽܘܢ ܠܗܽܘܢ. ܚܰܟܺܝ̈ܡܶܐ ܐܺܝܬܰܝܗܽܘܢ܆ ܐܰܝܟܰܢܳܐ ܕܡܰܬܠܳܐ ܐܳܡܰܪ܆ ܘܒܺܐܝܩܳܪ̈ܶܐ ܕܗܳܪܟܳܐ ܗܳܢܽܘܢ ܕܥܳܒܪܺܝܢ ܢܰܗܡܶܐ܆ ܘܰܠܘܳܬ݂ ܗܳܠܶܝܢ ܕܰܥܬܺܝ̈ܕܳܢ ܘܠܳܐ ܡܶܙܕܰܥܙ̈ܥܳܢ ܢܚܽܘܪ܆ ܗܳܐ ܓܶܝܪ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ ܗܳܢܽܘܢ ܡܡܰܠܠܰܝ̈ ܐܰ‎ܠܳܗܳܝ̈ܳܬܳܐ܆ ܟܰܕ ܐܰܒܣܺܝܘ ܥܰܠ ‌ܐܺܝܩܳܪ̈ܶܐ ܗܳܠܶܝܢ ܕܰܡܠܶܐ ܙܰܒܢܳܐ܆ ܘܰܕܠܳܐ ܫܳܘܶܝܢ ܚܳܫܒܺܝܢ ܗ̱ܘܰܘ ܗܶܢܽܘܢ ܠܗܽܘܢ ܠܺܐܝܩܳܪܳܐ ܗܰܘ ܕܶܐܬܗܰܝܡܰܢܘ܆ ܡܶܢ ܒܳܬܰܪ ܓܗܳܝܬܳܐ ܕܡܶܢ ܗܳܪܟܳܐ܆ ܕܟܽܠܳܗ̇ ܡܶܬܥܰܡܪܳܢܺܝܬܳܐ ܐܺܝܬܰܝܗܽܘܢ ܐܶܦܝܣܩܽܘ̈ܦܶܐ ܘܡܰܠ̈ܦܳܢܶܐ.

 23: ܚܳܙܶܝܢ ܐܢ̱ܬܽܘܢ ܕܬܽܘܒ ܐܶܬܓܢܶܒܢܰܢ ܡܶܢ ܚܺܐܦܳܐ ܟܺܝܬ ܘܡܶܬܬܰܝܬܝܳܢܽܘܬܳܐ ܕܡ̈ܶܠܶܐ܆ ܘܟܰܕ ܠܩܽܘ̈ܠܳܣܶܐ ܐܰܪܦܺܝܢܰܢ܆ ܠܘܳܬ ܡܰܠܦܳܢܽܘܬܳܐ ܗܳܝ ܡܰܪܬܝܳܢܺܝܬܳܐ ܕܡܶܛܽܠ ܕܽܘܒܳܪ̈ܶܐ ܐܶܬܗܰܦܰܟܢܰܢ܆ ܘܰܠܘܳܬ݂ ܡܶܫܬܰܘܕܥܳܢܽܘܬܳܐ ܕܺܝܠܰܢ܆ ܐܶܠܳܐ ܠܳܐ ܬܶܬܚܰܢܛܽܘܢ ܗܳܕܶܐ ܪܚܺܝܡܳܐ ܠܗܳܢܽܘܢ ܕܡܶܬܩܰܠܣܺܝܢ܆ ܘܗܳܢܳܐ ܚܳܫܒܺܝܢ ܩܽܘܠܳܣܳܐ ܒܰܝܬܳܝܳܐ ܕܺܝܠܗܽܘܢ܆ ܫܽܘܘܫܳܛܳܐ ܕܺܝܠܰܢ ܕܰܠܘܳܬ݂ ܗܳܝ ܕܰܡܝܰܬܪܳܐ. ܠܗܰܘ ܕܬܶܗܘܶܐ ܕܢܶ݀ܫܬܘܶܐ ܟܽܠܰܢ ܘܰܒܣܰܓܺܝܽܐܘܬܳܐ܆ ܒܛܰܝܒܽܘܬܳܐ ܘܰܒܪܶܚܡܰܬ݂ ܐ̱ܢܳܫܽܘܬܳܐ ܕܰܐ‎ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ. ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܕܩܰܕܺܝܫܳܐ ܡܳܪܝ ܣܶܐܘܺܝܪܶܐ ܕܥܰܠ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ‌܀

ܡܙܡܘܪ̈ܐ. 1: 2 [1]

ܐ. ܩܘܪ̈ܝܢܬܝܐ. 4: 1[2]

ܡܙܡܘܪ̈ܐ. 18: 10 [3]

ܦܝܠܝܦ̈ܣܝܐ. 2: 7[4]

ܥܶܒܪ̈ܝܐ. 4: 14 [5]

ܡܙܡܘܪ̈ܐ. 24: 7 ـ 9 [6]

ܛܰܝܳܦܳܐ ܘܰܦܫܺܝܛܳܐ[7]

ܐ. ܩܘܪ̈ܝܢܬܝܐ. 2: 4 [8]

ܩܰܕܡܳܝܽܘܬܳܐ[9]

ܦܝܠܝܦܣ̈ܝܐ. 3: 8 [10]

ܦܪܟܣܝܣ. 18: 3 [11]

ܐ. ܛܝܡܬܐܘܣ. 3: 16 [12]

ܬܶܢܝܳܢ ܢܳܡܽܘܣܳܐ. 6: 4 [13]

ܣܶܦܪܐ ܕܰܒܪܺܝܬܐ. 1: 1 [14]

 ܡܣܒܪ̈ܢܘܬܐ[15]

ܡܙܡܘܪ̈ܐ. 146: 4[16]

ܪܒܐ ܡܪܢ ܘܪܒܐ ܚܝܠܐ ܕܝܠܗ[17]

 ܢܳܫܒܐ[18]

ܐܰ‌ܠܺܝܠܽܘܬܐ[19]

ܐ. ܩܘܪ̈ܝܢܬܝܐ. 12: 8 [20]

ܡܬܝ. 5: 14 ـ 15 [21]

ܕܰܝܳܢ̈ܶܐ. 15: 14 [22]

ܒ. ܫܡܘܐܝܠ. 7: 8 [23]

ܐܦܣ̈ܝܐ. 6: 13 [24]

ܨܒܰܥ[25]

ܡܬܝ. 28: 19[26]

ܐܦܣ̈ܝܐ. 4: 5[27]

ܡܬܝ. 23: 27 [28]