ܡܺܐܡܪܳܐ ܕܰܬܡܳܢܝܢ ܘܬܶܫܥܳܐ

ܥܰܠ ܡܰܬܠܳܐ ܗܰܘ ܕܒܶܐܘܰܢܓܶܠܺܝܽܘܢ ܩܰܕܺܝܫܳܐ ܕܠܽܘܩܳܐ܆ ܗܰܘ ܕܺܐܝܬܰܘܗ̱ܝ ܪܺܝܫܶܗ܆ ܒܰܪܢܳܫܳܐ ܢܳܚܶܬ ܗ̱ܘܳܐ ܡܶܢ ܐܽܘܪܶܫܠܶܡ ܠܺܐܝܪܺܝܚܽܘ ܘܰܢܦܰܠ ܒܰܝܢܳܬ ܓܰܝܳܣ̈ܶܐ^[1]܆ ܘܰܠܘܳܬ ܗܳܢܽܘܢ ܕܰܐܝܟ ܥܝܳܕܳܐ ܒܡܶܨܥܰܬ ܨܰܘܡܳܐ܆ ܠܳܐ ܫܕܰܘ ܦܶܪ̈ܩܶܐ ܕܟܶܬܳܢܳܐ ܠܘܳܬ ܐܳܣܝܽܘܬܳܐ ܕܗܳܢܽܘܢ ܕܡܶܬܐܰܠܨܺܝܢ ܒܫܽܘܚ̈ܢܶܐ ܕܰܐܪܝܳܢܽܘܬܳܐ܆ ܐܰܘ ܕܰܐ̱ܚܪܺܢܳܐ ܚܰܫܳܐ ܡܶܕܶܡ.

89: ܣܰܓܺܝ ܚܶܫܶܬ̣ ܒܢܰܦܫܝ. ܘܰܒܥܽܘܡܩܳܐ ܒܶܠܥܶܬ̣ ܘܰܒܥܳܩܬܳܐ ܐܶܬܛܰܒܥܶܬ܆ ܕܰܚܙܺܝܬ̣ܟܽܘܢ ܒܚܰܕܒܫܰܒܳܐ ܗܰܘ ܕܰܩܕܳܡ ܗܳܢܳܐ܆ ܕܰܠܩܶܪܝܳܢܳܐ ܟܳܗܢܳܝܳܐ ܘܰܐ‌ܠܳܗܳܝܳܐ ܘܶܐܘܰܢܓܶܠܳܝܳܐ ܡܫܳܟ̣ܳܐܺܝܬ ܫܡܰܥܬܽܘܢ܆ ܘܒܶܐܕܢ̈ܶܐ ܫܚܺܝ̈ܡܳܬܳܐ ܥܒܰܪܬܽܘܢܳܝܗ̱ܝ ܠܚܰܝܠܳܐ ܕܗܳܠܶܝܢ ܕܰܟܬܺܝ̈ܒܳܢ܆ ܘܠܳܐ ܣܳܡܬܽܘܢ ܠܶܒܟܽܘܢ ܐܰܟܚܕܳܐ ܥܰܡܗܶܝܢ ܕܡ̈ܶܠܶܐ. ܐܶܠܳܐ ܐܰܝܟܰܢܳܐ ܕܠܳܐ ܟܰܕ ܒܡܰܪ̈ܫܘܳܬܳܐ ܡܶܢ ܫܽܘܪ̈ܳܝܶܐ ܡܟܰܬܰܪ ܐ̱ܢܳܐ܆ ܝܰܩܺܝܪܬܳܐ ܐܶܥܒܕܺܝܗ̇ ܠܡܶܠܬܳܐ܆ ܠܽܘܩܕܰܡ ܟܰܕ ܠܗܳܠܶܝܢ ܕܶܐܬܩܪ̈ܺܝ̱ ܡܰܥܗܶܕ ܐ̱ܢܳܐ ܠܟܽܘܢ܆ ܘܰܠܗܳܠܶܝܢ ܡܢܰܗܰܪ ܐ̱ܢܳܐ ܡܡܰܫܚܳܐܺܝܬ ܐܰܝܟ ܕܡܶܫܟܰܚ ܐ̱ܢܳܐ܆ ܒܳܬܰܪܟܶܢ ܐܳܦ ܠܘܳܬ ܡܰܟܣܳܢܽܘܬܳܐ ܕܺܝܠܳܗ̇ ܕܰܩܛܺܝܓܪܳܢܽܘܬܳܐ ܐ݀ܺܬܶܐ܆ ܟܰܕ ܐܰܝܟ ܕܠܰܐܚ̈ܶܐ ܠܘܳܬ ܗܳܠܶܝܢ ܕܰܡܝܰܬܪ̈ܳܢ ܡܦܺܝܤ ܐ̱ܢܳܐ ܠܟܽܘܢ܆ ܐܶܠܳܐ ܠܰܘ ܟܰܕ ܣܳܒܶܟ ܐ̱ܢܳܐ ܥܠܰܝܟܽܘܢ ܐܰܘ ܣܳܥܶܐ ܐ̱ܢܳܐ ܕܰܝܳܢܳܐܺܝܬ ܐܰܝܟ ܕܥܰܠ ܡܚܰܝ̈ܒܶܐ.

ܕܰܐܝܠܶܝܢ ܗܳܟܺܝܠ ‌ܐܺܝܬܰܝܗܶܝܢ ܗ̱ܘܰܝ̈ ܡ̈ܶܠܶܐ ܗܳܠܶܝܢ ܕܶܐܘܰܢܓ̈ܶܠܺܝܰܐ ܢܶ݀ܚܙܶܐ. ܘܡܳܢܳܐ ܐܺܝܬܰܘܗ̱ܝ ܗ̱ܘܳܐ ܗܰܘܢܳܐ ܗܰܘ ܕܣܺܝܡ ܗ̱ܘܳܐ ܒܗܳܠܶܝܢ ܢܶܬܒܰܝܰܢ. ܢܽܘܡܺܝܩܳܐ ܐ̱ܢܳܫ܆ ܗܳܢܰܘ ܕܶܝܢ ܗܰܘ ܕܰܒܦܽܘܩ̈ܕܳܢܶܐ ܕܢܳܡܽܘܣܳܐ ܕܡܽܘܫܶܐ ܡܶܬܗܰܓܶܐ ܗ̱ܘܳܐ܆ ܘܰܠܗܳܠܶܝܢ ܠܡܰܠܳܦܽܘ ܠܗܳܠܶܝܢ ܕܠܳܐ ܝܳܕܥܺܝܢ ܡܶܫܬܰܘܕܶܐ ܗ̱ܘܳܐ܆ ܡܫܰܐܶܠ ܗ̱ܘܳܐ ܐܰܝܟ ܕܰܒܢܶܣܝܳܢܳܐ ܠܝܶܫܽܘܥ܆ ܕܟܰܕ ܡܳܢܳܐ ܥܳܒܶܕ ܐ̱ܢܳܐ ܐܺܪܰܬ ܚܰܝ̈ܶܐ ܕܰܠܥܳܠܰܡ. ܘܟܰܕ ܦܳܪܽܘܩܰܢ ܐܶܡܰܪ ܕܗܳܕܶܐ ܒܢܳܡܽܘܣܐ ܟܬܺܝܒܳܐ܆ ܘܰܐܘܣܶܦ ܕܰܐܝܟܰܢܳܐ ܩܳܪܶܐ ܐܰܢ̱ܬ܆ ܐܰܝܟܰܢܳܐ ܕܰܢܚܰܘܶܝܘܗ̱ܝ ܠܫܰܒܗܪܳܢܳܐ܆ ܕܠܰܐ̱ܚܪ̈ܳܢܶܐ ܡܰܢ ܩܳܪܶܐ܆ ܗܽܘ ܠܶܗ ܕܶܝܢ ܠܳܐ ܫܳܡܰܥ܆ ܬܽܘܒ ܗܰܘ ܟܰܕ ܡܶܢ ܪܰܒܽܘܬ ܬܰܪܥܺܝܬܳܐ ܐܶܬܬܪܺܝܡ܆ ܠܦܽܘܩ̈ܕܳܢܶܐ ܒܝܰܕ ܠܶܫܳܢܶܗ ܡܰܝܬܶܐ ܗ̱ܘܳܐ܆ ܟܰܕ ܣܰܓܺܝ ܟܢܺܝܟܳܐܺܝܬ ܠܦܽܘܡܶܗ ܡܦܰܬܶܐ ܗ̱ܘܳܐ ܘܳܐܡܰܪ ܗ̱ܘܳܐ܆ ܕܬܶܪܚܰܡ ܠܡܳܪܝܳܐ ܐܰ‌ܠܳܗܳܟ ܡܶܢ ܟܽܠܶܗ ܠܶܒܳܟ ܘܡܶܢ ܟܽܠܶܗ ܚܰܝܠܳܟ ܘܡܶܢ ܟܽܠܳܗ̇ ܢܰܦܫܳܟ ܘܡܶܢ ܟܽܠܳܗ̇ ܬܰܪܥܺܝܬܳܟ܆ ܘܰܠܩܰܪܺܝܒܳܟ ܐܰܝܟ ܕܰܠܢܰܦܫܳܟ^[2]. ܘܟܰܕ ܗܳܠܶܝܢ ܬܢܳܐ ܥܰܡ ܪܶܥܝܳܢܳܐ ܪܳܡܳܐ܆ ܗܰܘ ܡܰܠܦܳܢܳܐ ܚܰܟܺܝܡܳܐ ܘܰܐ‌ܠܳܗܳܐ ܕܺܝܠܰܢ ܝܶܫܽܘܥ܆ ܢܺܝܚܳܐܺܝܬ ܡܰܢ ܡܰܟܣܳܢܳܐܺܝܬ ܕܶܝܢ܆ ܕܢܶܥܒܶܕ ܗܳܠܶܝܢ ܕܶܐܡܰܪ ܦܳܩܶܕ ܗ̱ܘܳܐ ܠܶܗ. ܟܰܕ ܐܶܡܰܪ ܬܪܺܝܨܳܐܺܝܬ ܦܰܢܺܝܬ̊. ܗܳܕܶܐ ܥܒܶܕ ܘܬܺܚܶܐ^[3].

ܟܰܕ ܕܶܝܢ ܡܫܰܐܶܠ ܗ̱ܘܳܐ ܬܽܘܒ ܗܽܘ ܢܽܘܡܺܝܩܳܐ܆ ܘܰܐܝܟ ܗܰܘ ܕܥܶܠܬܳܐ ܕܪܶܚܡܰܬ ܝܽܘܠܦܳܢܳܐ ܥܳܒܶܕ ܗ̱ܘܳܐ܆ ܒܳܥܶܐ ܗ̱ܘܳܐ ܕܰܠܡܰܢܽܘ ܙܳܕܶܩ ܕܢܶܬܚܰܫܰܒ ܕܺܐܝܬܰܘܗ̱ܝ ܩܰܪܺܝܒܳܐ܆ ܗܰܘ ܕܰܠܟܽܠ ‌ܐ̱ܢܳܫ ܦܳܩܶܕ ܗ̱ܘܳܐ ܢܳܡܽܘܣܳܐ ܕܢܶܪܚܰܡ ܐܰܝܟ ܕܰܠܢܰܦܫܶܗ. ܘܡܶܟܺܝܠ ܗܽܘ ܦܳܪܽܘܩܰܢ ܟܰܕ ܐܰܝܟ ܕܰܒܡܰܬܠܳܐ ܣܳܐܶܡ ܗ̱ܘܳܐ ܠܳܗ̇ ܠܡܶܠܬܳܐ ܕܡܶܛܽܠܗܳܕܶܐ ܐܶܡܰܪ܆ ܐܳܙܶܠ ܗ̱ܘܳܐ ܐ̱ܢܳܫ ܡܶܢ ܡܕܺܝܢ̱ܬܳܐ ܠܰܡܕܺܝܢ̱ܬܳܐ ܐ̱ܚܪܺܬܳܐ. ܘܟܰܕ ܓܰܝܳܣ̈ܶܐ ܐܶܬܰܘ ܥܠܰܘܗ̱ܝ܆ ܐܶܬܠܒܶܟ. ܘܟܰܕ ܡܶܢ ܢܰܚ̈ܬܰܘܗ̱ܝ ܐܶܫܬܰܠܰܚ܆ ܘܰܒܠܰܥ ܟܺܝܬ ܘܰܗܘ̣ܳܐ ܡܡܰܚܝܳܐ. ܦܶܠܓܽܘ ܡܺܝܬܳܐ ܪܡܶܐ ܗ̱ܘܳܐ. ܠܗܳܢܳܐ ܟܳܗܢܳܐ ܚܙܳܐ ܘܰܐܗܡܺܝ ܘܰܥܒܰܪ. ܘܠܶܘܳܝܳܐ ܚܙܳܝܗ̱ܝ ܡܰܢ܆ ܠܳܐ ܕܶܝܢ ܣܰܥܪܶܗ܆ ܟܰܕ ܠܳܐ ܚܰܫܺܝܫܳܐܺܝܬ ܘܟܰܕ ܠܳܐ ܟܐܰܒ ܠܶܗ ܥܰܒܪܳܗ̇ ܠܰܚܙܳܬܳܐ ܗܳܝ ܕܝܰܬܺܝܪ ܡܶܢ ܟܽܠ ‌ܐܺܝܬܶܝܗ̇ ܗ̱ܘܳܬ ܡܬܚܢܢܝܬܐ. ܐ̱ܢܳܫ ܕܶܝܢ ܫܳܡܪܳܝܳܐ ܟܰܕ ܒܽܐܘܪܚܳܐ ܐܳܙܶܠ ܗ̱ܘܳܐ ܩܳܡ ܥܠܰܘܗ̱ܝ. ܘܠܰܘ ܒܥܰܝ̈ܢܶܐ܆ ܐܶܠܳܐ ܒܚܽܘܫܳܒ̈ܶܐ ܘܰܒܪ̈ܰܚܡܶܐ܆ ܕܠܶܒܶܗ ܝܰܬܺܝܪܳܐܺܝܬ ܐܶܬܒܰܩܺܝ ܒܗܰܘ ܕܰܪܡܶܐ ܗ̱ܘܳܐ. ܘܟܰܕ ܐܶܬܓܗܶܢ ܥܠܰܘܗ̱ܝ܆ ܐܳܣܝܽܘܬܳܐ ܕܠܳܚܡܳܐ ܗ̱ܘܳܬ ܩܰܪܶܒ ܠܡܰܚ̈ܘܳܬܶܗ. ܟܰܕ ܚܰܡܪܳܐ ܘܡܶܫܚܳܐ ܡܢܰܨܶܠ ܗ̱ܘܳܐ ܠܗܶܝܢ܆ ܘܟܰܕ ܒܰܥ̈ܨܳܒܶܐ ܡܚܰܝܶܨ ܗ̱ܘܳܐ ܠܗܽܘܢ ܝܰܨܺܝܦܳܐܺܝܬ. ܘܟܰܕ ܥܰܠ ܚܡܳܪܳܐ ܐܰܪܟܒܶܗ ܠܘܳܬ ܦܽܘܬܩܳܐ ܐܰܘܒܠܶܗ܆ ܘܰܠܝܰܨܺܝܦܽܘܬܳܐ ܣܰܓܺܝܐܬܳܐ ܬܰܡܳܢ ܐܰܫܘܝܶܗ^[4].

ܗܳܪܟܳܐ ܐܶܡܰܪ܆ ܠܳܐ ܬܚܽܘܪ ܠܺܝ ܡܥܰܩܒܳܢܳܐܺܝܬ ܘܦܽܘܠܪܐܺܝܬ ܐܳܘ ܢܽܘܡܺܝܩܳܐ܆ ܕܡܰܢܽܘ ܐܺܝܬܰܘܗ̱ܝ ܠܳܟ ܩܰܪܺܝܒܳܐ܆ ܐܶܠܳܐ ܕܡܰܢܽܘ ܠܗܰܘ ܕܰܣܢܺܝܩ ܗ̱ܘܳܐ ܥܰܠ ܗܳܝ ܕܫܰܦܺܝܪ ܢܶܚܰܫ܆ ܒܗܽܘܢ ܒܰܥ̈ܒܳܕܶܐ ܗܘ̣ܳܐ ܩܰܪܺܝܒܳܐ. ܐܰܢ̱ܬ ܡܰܢ ܓܶܝܪ ܙܰܒ̈ܢܺܝܢ ܣܰܓܺܝ̈ܳܐܢ ܒܠܳܐ ܝܰܠܺܝܦܽܘܬܳܐ ܡܰܣܒܰܪ ܐܰܢ̱ܬ܆ ܕܗܰܘ ܕܒܳܗ̇ ܟܰܕ ܒܳܗ̇ ܒܕܶܚܠܬܳܟ ܐܰܘ ܒܥܰܡܳܟ ܡܫܰܘܬܰܦ ܠܳܟ܆ ܐܺܝܬܰܘܗ̱ܝ ܩܰܪܺܝܒܳܟ. ܐܶܢܳܐ ܕܶܝܢ ܠܗܰܘ ܕܒܶܗ ܟܰܕ ܒܶܗ ܒܰܟܝܳܢܳܐ ܡܫܰܘܬܰܦ ܘܺܐܝܬܰܘܗ̱ܝ ܒܰܪܢܳܫܳܐ܆ ܐܳܡܰܪ ܐ̱ܢܳܐ ܘܰܡܬܰܚܶܡ ܐ̱ܢܳܐ ܕܺܐܝܬܰܘܗ̱ܝ ܩܰܪܺܝܒܳܐ. ܐܳܦ ܓܶܝܪ ܐܰܝܟ ܕܚܳܙܶܐ ܐܰܢ̱ܬ܆ ܗܰܘ ܕܰܒܕܳܡܝܽܘܬ ܦܰܪܨܽܘܦܳܐ ܕܟܳܗܢܽܘܬܳܐ ܡܪܺܝܡ ܗ̱ܘܳܐ ܓܒܺܝܢܳܐ܆ ܘܗܰܘ ܕܰܒܟܽܘܢܳܝܳܐ ܕܠܶܘܳܝܳܐ ܡܶܫܬܰܒܗܰܪ ܗ̱ܘܳܐ܆ ܘܬܶܫܡ̈ܫܳܬܳܐ ܕܦܽܘܠܚܳܢ ܟܳܗܢܽܘܬܳܐ ܒܗܳܠܶܝܢ ܕܡܶܬܟܰܗ̈ܢܳܢ ܗ̱ܘܰܝ̈ ܐܰܝܟ ܢܳܡܽܘܣܳܐ ܡܡܰܠܶܐ ܗ̱ܘܳܐ܆ ܗܳܢܽܘܢ ܕܝܳܕܥܺܝܢ ܠܦܽܘܩ̈ܕܳܢܶܐ ܐܰ‌ܠܳܗܳܝ̈ܶܐ ܡܶܫܬܰܒܗܪܺܝܢ ܗ̱ܘܰܘ ܐܰܟܙܢܳܐ ܕܳܐܦ ܐܰܢ̱ܬ܆ ܠܗܰܘ ܫܘܶܐ ܒܓܶܢܣܳܐ܆ ܠܗܰܘ ܥܰܪܛܶܠܳܝܳܐ܆ ܠܗܰܘ ܕܠܳܐ ܡܶܬܐܰܣܝܳܢܳܐܺܝܬ ܒܰܠܺܝܥ ܗ̱ܘܳܐ܆ ܠܗܰܘ ܕܰܪܡܶܐ ܗ̱ܘܳܐ܆ ܠܗܰܘ ܕܡܶܚܕܳܐ ܥܬܺܝܕ ܗ̱ܘܳܐ ܕܰܢܡܽܘܬ܆ ܐܳܦܠܳܐ ܐܰܝܟ ܕܰܠܒܰܪܢܳܫܳܐ ܚܰܫܒܽܘܗ̱ܝ ܕܺܐܝܬܰܘܗ̱ܝ. ܐܶܠܳܐ ܐܰܝܟ ܕܥܰܠ ܟܺܐܦܳܐ ܐܰܘ ܩܰܝܣܳܐ ܕܰܣܪܺܝܩܳܐܺܝܬ ܫܕܶܐ ܒܰܣܰܪܘ ܥܠܰܘܗ̱ܝ. ܗܰܘ ܕܶܝܢ ܫܳܡܪܳܝܳܐ܆ ܗܰܘ ܕܰܠܦܽܘܩ̈ܕܳܢܶܐ ܢܳܡܽܘܣܳܝ̈ܶܐ ܠܳܐ ܝܳܕܰܥ ܗ̱ܘܳܐ܆ ܗܰܘ ܕܫܰܢܝܳܐ ܘܠܳܐ ܪܰܕܝܳܐ ܠܳܘܬܟܽܘܢ ܡܶܣܬܒܰܪ܆ ܗܳܟܰܢܳܐ ܓܶܝܪ ܐܳܦ ܐ̱ܢܳܫ ܚܰܟܺܝܡܳܐ ܐܶܡܰܪ܆ ܗܳܢܽܘܢ ܕܝܳܬܒܺܝܢ ܒܛܽܘܪܳܐ ܕܫܳܡܪܺܝܢ ܦܠܶܫ̈ܬܳܝܶܐ܆ ܘܥܰܡܳܐ ܫܰܢܝܳܐ ܗܰܘ ܕܥܳܡܰܪ ܒܰܫܟܺܝܡ܆ ܐܶܫܬܰܘܕܥܶܗ ܠܰܟܝܳܢܳܐ܆ ܘܶܐܣܬܰܟܰܠ ܕܡܰܢܽܘ ܐܺܝܬܰܘܗ̱ܝ ܩܰܪܺܝܒܳܐ܆ ܘܰܗܘ̣ܳܐ ܒܩܽܘܪܒܳܐ ܠܗܰܘ ܕܰܣܢܺܝܩ ܗ̱ܘܳܐ ܥܰܠ ‌ܐܳܣܝܽܘܬܳܐ܆ ܗܰܘ ܕܰܠܘܳܬܟܽܘܢ ܕܰܝܳܢ̈ܶܐ ܒܪܽܘܚܩܳܐ ܡܰܒܥܰܕ. ܠܳܐ ܗܳܟܺܝܠ ܬܶܚܒܽܘܫ ܒܡܶܣܟܺܢܽܘܬܳܐ ܝܺܗܽܘܕܳܝܬܳܐ ܘܰܒܡܽܘܫ̈ܚܳܬܳܐ ܐܰ‌ܠܺܝ̈ܨܳܬܳܐ ܠܰܬܚܽܘܡܳܐ ܗܰܘ ܕܩܰܪܺܝܒܳܐ^[5]܆ ܟܰܕ ܠܒܰܝ̈ܬܳܝܶܐ ܕܙܰܪܥܳܟ ܐܰܝܟܰܢܳܐ ܕܳܐܡܰܪ ܐܶܫܰܥܝܳܐ ܢܒܺܝܳܐ ܣܳܒܰܪ ܐܰܢ̱ܬ ܒܰܠܚܽܘܕܰܝܗܽܘܢ ܕܺܐܝܬܰܝܗܽܘܢ ܒܩܽܘܪܒܳܐ. ܟܽܠܡܰܢ ܓܶܝܪ ܕܡܶܬܦܰܫܛܳܐ ܠܘܳܬܶܗ ܬܰܪܥܺܝܬܳܐ ܗܳܝ ܪܳܚܡܰܬ ܐ̱ܢܳܫܳܐ܆ ܩܰܪܺܝܒܳܐ ܐܺܝܬܰܘܗ̱ܝ.

ܗܳܠܶܝܢ ܡܰܢ ܗܳܟܺܝܠ ܕܡܰܬܠܳܐ ܗܳܢܳܐ ܕܣܺܝܡ ܩܕܳܡܰܝܢ܆ ܐܰܝܟ ܣܽܘܟܳܠܳܐ ܦܫܺܝܩܳܐ ܘܕܰܩܕܳܡ ܐܺܝܕܳܐ܆ ܗܳܢܳܐ ܗܰܘܢܳܐ ܐܺܝܬ ܠܗܶܝܢ ܘܦܽܘܫܳܩܳܐ ܕܢܳܩܶܦ ܘܠܳܚܶܡ ܠܗܶܝܢ ܠܡ̈ܶܠܶܐ܆ ܡܶܢ ܚܙܳܬܳܐ ܒܰܪܳܝܬܳܐ ܘܛܰܝܳܦܬܳܐ܆ ܬܶܐܽܘܪܺܝܰܐ ܕܶܝܢ ܡܶܕܶܡ ܥܰܡܺܝܩܬܳܐ ܘܰܕܝܰܬܺܝܪ ܐ̱ܪܳܙܳܢܳܝܳܐ ܐܺܝܬ ܒܗܶܝܢ܆ ܠܗܳܢܽܘܢ ܕܪܽܘܚܳܢܳܐܺܝܬ ܐܰܝܟ ܕܡܰܨܝܳܐ ܕܬܶܬܕܪܶܟ ܡܶܫܟܚܺܝܢ ܕܢܶܬܒܰܩܽܘܢ ܒܗܶܝܢ ܒܠܶܟܣܝܤ. ܟܽܠ ܚܕܳܐ ܡܶܢܗܶܝܢ ܓܶܝܪ ܡܠܺܝܬܳܐ܆ ܘܰܐܝܟ ܗܰܘ ܕܰܒܛܶܢܬܳܐ ܕܣܽܘܟܴ̈ܠܶܐ ܐܺܝܬܶܝܗ̇. ܡܶܛܽܠ ܕܳܐܦ ܕܰܐܝܟ ܗܳܟܰܢܳܐ ܐܺܝܬܰܘܗ̱ܝ ܐܳܕܫܳܐ ܕܡ̈ܰܬܠܶܐ. ܕܰܙܥܽܘܪ̈ܝܳܬܳܐ ܡܰܢ ܢܶܓܠܶܐ ܘܰܢܚܰܘܶܐ܆ ܗܳܠܶܝܢ ܕܰܠܟܽܠܢܳܫ ܐܺܝܬܰܝܗܶܝܢ ܓܰܠ̈ܝܳܬܳܐ܆ ܘܡܶܢ ܬܰܡܳܢ ܐܺܝܬ ܠܗܶܝܢ ܡܶܬܕܰܪܟܳܢܽܘܬܳܐ܆ ܘܰܥܠܰܝܗܶܝܢ ܢܳܓ̈ܕܳܢ ܠܗܳܢܽܘܢ ܕܫܳܡܥܺܝܢ܆ ܕܣܰܓܺܝ̈ܳܐܬܳܐ ܕܶܝܢ ܢ݀ܛܰܫܶܐ ܘܰܢܣܰܬܰܪ ܒܣܽܘܟܴ̈ܠܶܐ܆ ܕܥܽܘܩܣܳܐ ܕܪܶܓܬܳܐ ܪ̈ܳܡܝܳܢ ܠܘܳܬ ܒܨܳܬܳܐ. ܡܶܛܽܠ ܗܳܕܶܐ ܥܝܳܕܳܐ ܐܺܝܬ ܗ̱ܘܳܐ ܠܗܽܘܢ ܠܬܰܠ̈ܡܺܝܕܶܐ ܠܡܺܐܡܰܪ ܠܘܬ ܦܳܪܽܘܩܰܢ܆ ܢܰܗܰܪ ܠܰܢ ܡܰܬܠܐ ܗܰܘ ܕܙܺܝ̈ܙܳܢܶܐ ܘܕܰܐܓܽܘܪܣܳܐ^[6]. ܘܬܽܘܒ ܦܶܛܪܘܤ ܐܶܡܰܪ܆ ܦܰܫܶܩ ܠܰܢ ܡܰܬܠܐ ܗܳܢܳܐ^[7]. ܘܬܽܘܒ ܙܒܰܢ̱ܬܐ ܐ̱ܚܪܺܬܳܐ܆ ܟܰܕ ܟܽܠܗܽܘܢ ܬܰܠ̈ܡܺܝܕܶܐ ܫܰܐܶܠܘ܆ ܕܡܶܛܽܠ ܡܳܢܳܐ ܒܡ̈ܰܬܠܶܐ ܡܡܰܠܶܠ ‌ܐܰܢ̱ܬ ܠܟܶܢ̈ܫܶܐ܆ ܗܽܘ ܝܶܫܽܘܥ ܡܦܰܢܶܐ ܗ̱ܘܳܐ܆ ܕܰܠܟܽܘܢ ܝܗ̱ܝ ܒ ܠܡܶܕܰܥ ܐ̱ܪ̈ܳܙܶܐ ܕܡܰܠܟܽܘܬܳܐ ܕܰܫܡܰܝܳܐ^[8]. ܡܳܕܶܝܢ ܐܳܦ ܥܰܠ ܡܰܬܠܳܐ ܗܳܢܳܐ ܕܒܺܐܝ̈ܕܰܝܳܐ ܕܩܰܕܺܝܡ ܣܺܝܡ ܠܰܢ ܠܦܽܘܫܳܩܳܐ^[9]܆ ܠܘܳܬ ܗܳܠܶܝܢ ܐ̱ܪ̈ܳܙܳܢܳܝܳܬܳܐ ܘܰܡܛܰܫ̈ܝܳܬܳܐ ܕܣܽܘܟܴ̈ܠܶܐ ܢܶܪܗܰܛ܆ ܟܰܕ ܫܳܐܠܺܝܢ ܚ̱ܢܰܢ ܡܶܢ ܪܽܘܚܳܐ ܐܰ‌ܠܳܗܳܝܳܐ ܗܰܘ ܕܰܡܦܰܠܶܓ ܠܟܽܠܢܳܫ ܕܺܝܠܳܢܳܝ̈ܳܬܳܐ ܘܒܰܝ̈ܬܳܝܳܬܳܐ ܐܰܝܟ ܡܳܐ ܕܨܳܒܶܐ^[10]܆ ܕܰܠܦܽܘܬ ܡܫܽܘܚܬܳܐ ܕܰܡܚܺܝܠܽܘܬܰܢ ܢܶܓܠܶܐ ܠܰܢ ܗܳܠܶܝܢ ܕܡܰܨ̈ܝܳܢ܆ ܘܢܶܗܘ̈ܝܳܢ ܡܰܘܬܪ̈ܳܢܝܳܬܳܐ ܠܗܳܢܽܘܢ ܕܢܳܣܒܺܝܢ ܠܗܶܝܢ܆ ܟܰܕ ܠܳܐ ܡܣܰܓ̈ܦܳܢ ܒܰܡܥܰܠܝܽܘܬܗܶܝܢ.

ܡܳܢܳܐ ܗܝ ܗܳܟܺܝܠ ܬܰܫܥܺܝܬܳܐ ܗܳܝ ܕܺܝܠܶܗ ܕܡܰܬܠܳܐ.

ܒܰܪܢܳܫܳܐ ܐ̱ܢܳܫ ܢܳܚܶܬ ܗ̱ܘܳܐ ܡܶܢ ܐܽܘܪܫܠܡ ܠܺܐܝܪܺܝܚܽܘ^[11]. ܫܰܦܺܝܪ ܒܟܽܘܢܳܝܳܐ ܕܓܶܢܣܳܐ ܐܶܬܚܰܫܰܚ܆ ܘܠܳܐ ܐܶܡܰܪ ܕܢܳܚܶܬ ܗ̱ܘܳܐ ܐ̱ܢܳܫ܆ ܐܶܠܳܐ ܒܰܪܢܳܫܳܐ ܐ̱ܢܳܫ. ܡܶܛܽܠ ܓܶܝܪ ܟܽܠܳܗ̇ ܐ̱ܢܳܫܽܘܬܳܐ ܐܺܝܬܶܝܗ̇ ܗ̱ܘܳܬ ܡܶܠܬܳܐ܆ ܗܳܝ ܟܺܝܬ ܕܰܒܝܰܕ ܥܒܳܪ ܦܽܘܩܕܳܢܳܐ ܕܳܐܕܳܡ܆ ܡܶܢ ܕܽܘܝܳܪܳܐ ܗܰܘ ܪܳܡܳܐ ܘܰܡܥܰܠܝܳܐ ܘܠܳܐ ܡܶܫܬܰܓܫܳܢܳܐ ܘܰܕܠܳܐ ܚܰܫܳܐ ܘܰܐ‌ܠܳܗܳܝܳܐ ܕܦܰܪܕܰܝܣܳܐ܆ ܕܽܐܘܪܶܫܠܶܡ ܛܳܒ ܠܳܚܡܳܐܺܝܬ ܒܙܰܒܢܶܗ ܐܶܫܬܰܡܰܗ܆ ܗܳܝ ܟܺܝܬ ܕܫܰܝܢܳܐ ܕܰܐ‌ܠܳܗܳܐ ܡܫܰܘܕܥܳܐ܆ ܠܘܳܬ ܐܺܝܪܺܝܚܽܘ ܗܳܝ ܕܺܐܝܬܶܝܗ̇ ܥܰܡܺܝܩܬܳܐ ܘܰܡܫܰܦܰܠܬܳܐ ܘܚܳܢܽܘܩܬܳܐ ܒܚܽܘܡܳܐ ܫܶܪܥܰܬ. ܡܰܘܕܥܳܐ ܕܶܝܢ ܠܚܰܝ̈ܶܐ ܚܰܫܳܢܳܝ̈ܶܐ ܕܗܳܢܳܐ ܥܳܠܡܳܐ܆ ܕܦܳܪܫܺܝܢ ܡܶܢ ܐܰ‌ܠܳܗܳܐ ܘܰܠܬܰܚܬ ܡܰܚܬܺܝܢ܆ ܘܰܒܫܰܠܗܶܒܺܝܬܳܐ ܕܰܪ̈ܓܺܝܓܳܬܳܐ ܫܟܺܝܪ̈ܳܬܳܐ ܚܢܽܘܩܝܳܐ ܥܳܒܕܺܝܢ܆ ܘܰܡܥܺܝܩܺܝܢ ܘܩܳܛܠܺܝܢ.

ܗܳܝ ܕܰܠܘܳܬܳܗ̇^[12] ܟܰܕ ܚܕܳܐ ܙܒܰܢ ܐܶܫܬܰܪܓܠܰܬ ܠܳܗ̇ ܘܶܐܣܬܰܚܦܰܬ̣ ܘܰܠܬܰܚܬ ܡܶܬܢܰܓܕܳܐ ܗ̱ܘܳܬ܆ ܘܡܺܟܺܝܠ ܒܺܐܝܕܳܐ ܒܺܐܝܕܳܐ ܠܒܶܝܬ ܬܰܚܬܺܝܢ ܘܠܰܐܦܰܝ̈ ܠܬܰܚܬ ܡܶܬܬܰܝܬܝܳܐ ܗ̱ܘܳܬ ܐܰܝܟ ܕܶܐܡܪܶܬ ܗܺܝ ܐ̱ܢܳܫܽܘܬܳܐ܆ ܒܰܕܡܽܘܬ ܣܺܝܥܬܳܐ ܕܠܶܣ̈ܛܳܝܶܐ܆ ܟܶܢܫܳܐ ܕܫ̈ܺܐܕܶܐ ܒܰܥܪܺܝܪ̈ܳܝܶܐ ܣܳܡ ܥܠܶܝܗ̇. ܘܡܶܢ ܢܰܚ̈ܬܶܐ ܕܰܡܝܰܬܪܽܘܬܳܐ ܫܰܠܚܽܘܗ̇. ܟܰܕ ܘܠܳܐ ܕܓܰܢ̱ܒܳܪܽܘܬܳܐ ܘܠܳܐ ܕܢܰܟܦܽܘܬܳܐ܆ ܘܠܳܐ ܕܙܰܕܝܩܽܘܬܳܐ ܘܠܳܐ ܕܚܶܟܡܬܳܐ ܫܒܰܩܘ ܠܳܗ̇ ܥܶܩܒܬܳܐ܆ ܘܳܐܦܠܳܐ ܕܡܶܕܶܡ ܡܶܢ ܗܳܠܶܝܢ ܕܰܡܝܰܩ̈ܢܳܢ ܠܨܰܠܡܳܐ ܐܰ‌ܠܳܗܳܝܳܐ. ܘܗܳܟܰܢܳܐ ܒܡܰܚ̈ܘܳܬܳܐ ܣܒܺܝ̈ܣܳܬܳܐ ܕܰܚ̈ܛܳܗܶܐ ܡܦܰܬܟ̈ܶܐ ܢܰܟ̣ܣܽܘܗ̇ ܘܩܰܛܠܽܘܗ̇܆ ܟܰܕ ܣܳܡܽܘܗ̇ ܒܦܳܣܺܝ̈ܩܳܬܳܐ ܠܡܺܐܡܰܪ ܦܶܠܓܽܘ ܡܺܝܬ̣ܬܳܐ. ܐܳܦ ܗܳܕܶܐ ܟܺܝܬ ܝܰܬܺܝܪܳܐܺܝܬ ܡܚܰܘܝܳܐ܆ ܕܰܠܘܳܬ ܬܶܐܽܘܪܺܝܰܐ ܚܳܝܪܳܐ ܟܽܠܳܗ̇ ܡܶܠܬܳܐ. ܠܠܶܣ̈ܛܳܝܶܐ ܓܶܝܪ ܘܰܠܓܰܢܳܒ̈ܶܐ ܥܝܳܕܳܐ ܐܺܝܬ܆ ܕܡܰܚ̈ܘܳܬܳܐ ܠܽܘܩܕܰܡ ܢܰܝܬܽܘܢ. ܐܰܝܟܰܢܳܐ ܕܟܰܕ ܠܗܰܘ ܕܒܳܠܰܥ ܡܚܺܝܠܳܐ ܥܳܒܕܺܝܢ܆ ܢܫܰܠܚܽܘܢܳܝܗ̱ܝ ܒܳܬܰܪܟܶܢ ܡܶܢ ܢܰܚ̈ܬܰܘܗ̱ܝ. ܡܶܛܽܠ ܗܳܕܶܐ ܡܶܚܕܳܐ ܕܳܐܚܽܘ̈ܕܶܐ ܕܢܰܚ̈ܬܶܐ ܗܳܘܶܝܢ܆ ܕܗܳܝ ܕܢܶܡܚܽܘܢ ܡܶܟܺܝܠ ‌ܐܰܝܟ ܕܰܒܣܽܘܓܳܐܐ܆ ܡܶܠܬܳܐ ܐܺܝܬ ܠܗܽܘܢ ܘܠܳܐ ܚܕܳܐ. ܠܫ̈ܺܐܕܶܐ ܕܶܝܢ܆ ܠܠܶܣ̈ܛܳܝܶܐ ܡܶܬܗܰܘ̈ܢܳܢܶܐ܆ ܠܳܐ ܐܺܝܬ ܠܗܽܘܢ ܣܳܟ ܦܫܺܝܩܽܘܬܳܐ ܕܗܳܝ ܕܢܶܡܚܽܘܢ. ܐܶܢ ܠܳܐ ܢܩܰܕܡܽܘܢ ܢܚܰܠܨܽܘܢ ܠܰܠܒܽܘ̈ܫܶܐ ܕܰܡܝܰܬܪ̈ܳܬܳܐ. ܘܡܶܢ ܒܳܬܰܪ ܗܳܕܶܐ ܡܳܚܶܝܢ ܠܳܐ ܚܰܝܽܘܣܬܳܢܳܐܺܝܬ ܘܰܥܕܰܡܳܐ ܠܡܰܘܬܳܐ. ܠܰܘ ܓܶܝܪ ܠܢܰܚ̈ܬܶܐ ܪܳܓܶܝܢ܆ ܐܶܠܳܐ ܠܰܐܒܕܳܢܳܐ ܟܺܝܬ ܕܺܝܠܰܢ ܘܰܠܩܶܛܠܰܢ. ܡܶܛܽܠ ܗܳܕܶܐ ܚܰܟܺܝܡܳܐܺܝܬ ܐܶܡܰܪ ܡܳܪܰܢ. ܕܰܐܫܠܚܽܘܗ̱ܝ ܘܒܳܬܰܪܟܶܢ ܡܚܰܐܘܽܗܝ^[13].

ܟܰܕ ܪܰܡܝܳܐ ܗ̱ܘܳܬ ܗܳܟܺܝܠ ‌ܐ̱ܢܳܫܽܘܬܳܐ ܘܗܳܐ ܒܨܺܝܪ ܩܰܠܺܝܠ ܡܰܘܦܝܳܐ ܗ̱ܘܳܬ ܢܰܦܫܳܗ̇ ܘܡܰܝ̣ܺܝ̣ܬܳܐ܆ ܚܙܳܗ̇ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ. ܠܗܳܢܳܐ ܓܶܝܪ ܪܳܫܡܺܝܢ ܟܳܗܢܳܐ ܟܺܝܬ ܐܳܦ ܠܶܘܳܝܳܐ. ܡܰܠܦܳܢܳܐ ܓܶܝܪ ܐܺܝܬܰܘܗ̱ܝ ܢܳܡܽܘܣܳܐ ܕܟܳܗܢܽܘܬܳܐ ܗܳܝ ܠܶܘܳܝܬܳܐ. ܐܶܠܳܐ ܚܙܳܗ̇ ܡܰܢ܆ ܐܰܫܦܶܠ ܕܶܝܢ ܘܶܐܬܡܚܶܠ. ܘܰܠܘܳܬ ܐܳܣܝܽܘܬܳܐ ܡܫܰܡܠܰܝܬܳܐ ܠܳܐ ܣܦܰܩ܆ ܘܳܐܦܠܳܐ ܐܰܩܝܡܳܗ̇ ܟܰܕ ܪܰܡܝܳܐ ܗ̱ܘܳܬ. ܘܟܰܕ ܐܰܫܦܶܠ ‌ܐܳ‌ܠܨܳܐܺܝܬ ܫܰܢܺܝ܆ ܒܪܶܓܠܳܐ ܠܳܐ ܣܳܥܽܘܪܬܳܐ. ܕܶܒܚ̈ܶܐ ܓܶܝܪ ܘܩܽܘܪ̈ܒܳܢܶܐ ܒܺܐܝܕܰܘ̈ܗ̱ܝ ܡܶܬܩܰܪܒܺܝܢ ܗܘܰܘ ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܕܠܳܐ ܡܶܫܟܚܺܝܢ ܗ̱ܘܰܘ ܠܰܡܫܰܡܠܳܝܽܘ ܐܶܢܽܘܢ ܒܬܺܐܪܬܳܐ ܠܗܳܢܽܘܢ ܕܰܡܫܰܡܫܺܝܢ ܗ̱ܘܰܘ^[14]. ܡܶܛܽܠ ܕܳܐܦ ܠܳܐ ܡܶܫܟܚܳܢܺܝܬܳܐ ܐܺܝܬܶܝܗ̇ ܗ̱ܘܳܬ܆ ܕܰܕܡܳܐ ܕܬܰܘܪ̈ܶܐ ܘܰܕܬܰܝ̈ܫܶܐ ܡܫܰܡܠܝܳܐܺܝܬ ܢܪܺܝܡ ܚ̈ܛܳܗܶܐ. ܡܶܛܽܠܗܳܕܶܐ ܠܳܐ ܐܶܡܰܪ ܡܳܪܰܢ܆ ܕܟܳܗܢܳܐ ܘܠܶܘܳܝܳܐ ܟܰܕ ܚܙܳܝܗ̱ܝ ܠܦܶܠܓܽܘ ܡܺܝܬܳܐ ܕܰܪܡܶܐ ܥܒܰܪ. ܐܶܠܳܐ ܕܰܗܦܰܟ ܥܒܰܪ ܡܶܢ ܠܩܽܘܒܠܶܗ. ܠܳܐ ܥܰܒܪܶܗ ܐܳܡܰܪ ܟܰܕ ܫܰܒܩܶܗ ܠܳܐ ܡܶܬܚܰܙܝܳܢܳܐ. ܐܶܠܳܐ ܩܳܡ ܘܰܚܙܳܐ. ܘܰܕܢܰܐܣܶܐ ܐܶܬܚܰܫܰܒ ܘܰܓܫܰܦ. ܘܟܰܕ ܠܘܳܬ ܐܳܣܝܽܘܬܳܐ ܠܳܐ ܐܶܬܡܨܺܝ܆ ܘܰܒܚܰܣܺܝܢܽܘܬܳܐ ܕܡܰܚ̈ܘܳܬܳܐ ܐܰܘ ܟܺܝܬ ܕܚܰܫ̈ܶܐ ܐܶܙܕܟܺܝ܆ ܠܒܶܣܬܪܳܐ ܬܽܘܒ ܗܦܰܟ ܪܗܶܛ. ܗܳܕܶܐ ܓܶܝܪ ܡܚܰܘܝܳܐ ܗܳܝ ܕܰܗܦܰܟ ܥܒܰܪ ܡܶܢ ܠܩܽܘܒܠܶܗ^[15].

ܘܰܠܚܰܪܬܳܐ ܫܳܡܪܳܝܳܐ ܐ̱ܢܳܫ ܕܳܐܙܶܠ ܗ̱ܘܳܐ ܒܽܐܘܪܚܳܐ܆ ܐܶܬܳܐ ܠܰܐܝܟܳܐ ܕܺܐܝܬܰܘܗ̱ܝ ܗ̱ܘܳܐ. ܘܰܚܙܳܝܗ̱ܝ . ܘܶܐܬܪܰܚܰܡ ܥܠܰܘܗ̱ܝ. ܘܰܩܪܶܒ ܘܣܰܥܪܶܗ. ܘܰܢܨܰܠ ܠܶܗ ܚܰܡܪܳܐ ܘܡܶܫܚܳܐ ܘܰܥܨܰܒ ܠܫܽܘܚ̈ܢܰܘܗܝ^[16]. ܫܳܡܪܳܝܳܐ ܕܶܝܢ ܗܳܪܟܳܐ܆ ܠܳܚܡܳܐܺܝܬ ܩܪܳܐ ܗܽܘ ܠܶܗ ܡܫܺܝܚܳܐ. ܡܶܛܽܠ ܓܶܝܪ ܕܰܠܘܳܬ ܢܽܘܡܺܝܩܳܐ ܐܺܝܬܶܝܗ̇ ܗ̱ܘܳܬ ܠܶܗ ܡܶܠܬܳܐ܆ ܗܰܘ ܕܥܰܠ ܢܳܡܽܘܣܳܐ ܪܰܘܪܒܳܐܺܝܬ ܡܶܫܬܰܒܗܰܪ ܗ̱ܘܳܐ ܒܢܰܦܫܶܗ܆ ܕܰܢܚܰܘܶܐ ܒܝܰܕ ܗܳܠܶܝܢ ܕܡܶܬܐܰܡܪ̈ܳܢ ܗ̱ܘܰܝ̈ ܝܺܨܶܦ܆ ܕܠܳܐ ܟܳܗܢܳܐ ܘܠܳܐ ܠܶܘܳܝܳܐ܆ ܘܳܐܦܠܳܐ ܗܳܢܽܘܢ ܦܫܺܝܛܳܐܺܝܬ ܠܡܺܐܡܰܪ ܕܰܐܝܟ ܦܽܘܩ̈ܕܳܢܰܘܗ̱ܝ ܕܡܽܘܫܶܐ ܣܳܒܪܺܝܢ ܗ̱ܘܰܘ ܕܡܶܬܕܰܒܪܺܝܢ܆ ܐܶܠܳܐ ܗܽܘ ܐܶܬܳܐ ܕܰܢܡܰܠܶܐ ܨܶܒܝܳܢܶܗ ܕܢܳܡܽܘܣܳܐ܆ ܘܕܰܒܗܽܘܢ ܒܰܥ̈ܒܳܕܶܐ ܢܚܰܘܶܐ܆ ܕܡܰܢܽܘ ܟܺܝܬ ܐܺܝܬܰܘܗ̱ܝ ܩܰܪܺܝܒܳܐ܆ ܘܡܳܢܳܐ ܗܝ ܗܳܝ ܕܰܠܗܳܢܳܐ ܢܰܚܶܒ ܐ̱ܢܳܫ ܐܰܝܟ ܢܰܦܫܶܗ. ܠܗܰܘ ܕܟܰܕ ܡܨܰܥܪܺܝܢ ܗ̱ܘܰܘ ܠܶܗ ܝܽܗ̱ܘ̈ܕܳܝܶܐ ܐܳܡܪܺܝܢ ܗ̱ܘܰܘ܆ ܫܳܡܪܳܝܳܐ ܐܺܝܬܰܝܟ ܘܕܰܝܘܳܐ ܐܺܝܬ ܠܳܟ^[17]. ܒܗܰܘ ܕܰܣܒܺܝܣܳܐܺܝܬ ܡܶܬܥܰܕܠܺܝܢ ܗ̱ܘܰܘ ܒܶܗ܆ ܐܰܝܟ ܡܰܢ ܕܢܳܡܽܘܣܳܐ ܟܶܐܡܰܬ ܫܳܪܶܐ ܗ̱ܘܳܐ.

ܘܰܐܝܟ ܕܰܒܬܰܪܥܺܝܬܳܐ ܕܶܝܢ ܐ̱ܚܪܺܬܳܐ܆ ܠܟܽܘܢܳܝܳܐ ܕܫܳܡܪܳܝܳܐ ܥܰܠ ܡܫܺܝܚܳܐ܆ ܠܰܘ ܕܠܳܐ ܠܳܚܶܡ ܡܶܫܟܰܚ ܠܶܗ ܐ̱ܢܳܫ܆ ܐܳܦܶܢ ܡܨܰܥܪܳܢܳܐܝܬ^[18] ܐܰܝܟܰܢ ܕܗܽܘ ܡܶܣܬܒܰܪ. ܟܰܕ ܓܶܝܪ ܠܺܐܝܣܪܳܐܶܝܠ ܫܶܒܝܳܐ ܐܰܘܒܠܶܗ ܫܠܡܢܥܣܪ ܗܰܘ ܐܳܬܽܘܪܳܝܳܐ܆ ܘܓܰܠܘܝܶܗ ܠܘܳܬ ܢܰܗܪ̈ܰܘܳܬܳܐ ܗܳܢܽܘܢ ܕܒܶܝܬ ܡܳܕ̣ܝ̈ܶܐ܆ ܐܰܝܟܰܢܳܐ ܕܰܒܗܳܝ ܕܰܐܪܒܰܥ ܕܡܰܠ̈ܟܘܳܬܳܐ ܟܬܺܝܒ܆ ܥܳܡܽܘܪ̈ܶܐ ܕܰܐܪܥܳܐ ܟܰܕ ܡܶܢ ܒܳܒܶܠ ܫܰܕܰܪ ܚܠܳܦ ܗܳܢܽܘܢ ܕܶܐܫܬܒܺܝܘ܆ ܒܰܡܕܺܝܢ̱ܬܳܐ ܗܳܠܶܝܢ ܐܰܘܬܶܒ ܐܶܢܽܘܢ^[19]. ܡܶܛܽܠ ܕܶܝܢ ܕܰܠܗܳܠܶܝܢ ܐܰܪ̈ܝܰܘܳܬܳܐ ܡܩܰܛܠܺܝܢ ܗ̱ܘܰܘ܆ ܐܰܝܟ ܕܠܰܐܝܠܶܝܢ ܕܠܰܘ ܒܰܥ̈ܝܳܕܶܐ ܐܰܒܳܗܳܝ̈ܶܐ ܚܳܐܶܝܢ ܗ̱ܘܰܘ ܕܗܳܢܽܘܢ ܕܰܒܢܳܡܽܘܣܳܐ ܕܡܽܘܫܶܐ ܡܶܬܕܰܒܪܺܝܢ ܗ̱ܘܰܘ܆ ܡܶܢܗܽܘܢ ܕܗܳܢܽܘܢ ܫܶܒܝ̈ܶܐ ܫܰܕܰܪ ܚܰܕ ܐ̱ܢܳܫ܆ ܡܶܢ ܟܳܗ̈ܢܶܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܗܳܢܳܐ܆ ܗܰܘ ܕܰܠܗܳܠܶܝܢ ܥ̈ܝܳܕܶܐ ܡܰܠܶܦ ܗ̱ܘܳܐ ܠܗܽܘܢ܆ ܘܗܳܟܰܢܳܐ ܐܶܚܰܕܘ ܐܶܢܶܝܢ ܠܰܡܕܺܝܢ̱ܬܳܐ ܗܳܠܶܝܢ܆ ܟܰܕ ܫܳܡܪ̈ܳܝܶܐ ܡܶܬܩܪܶܝܢ ܗ̱ܘܰܘ܆ ܐܰܝܟ ܡܰܢ ܕܢܳܛܽܘܪ̈ܶܝܗ̇ ܕܰܐܪܥܳܐ ܐܺܝܬܰܝܗܽܘܢ ܗ̱ܘܰܘ܆ ܡܶܛܽܠ ܟܺܝܬ ܕܳܐܦ ܫܽܘܡܳܪ ܐܰܝܟ ܠܶܫܳܢܳܐ ܥܶܒܪܳܝܳܐ܆ ܡܶܫܬܰܡܗܳܐ ܢܛܽܘܪܬܳܐ ܘܢܳܛܽܘܪܬܳܐ^[20]. ܕܰܡܫܺܝܚܳܐ ܕܶܝܢ ܐܺܝܬܰܘܗ̱ܝ ܢܳܛܽܘܪܳܐ ܫܰܪܺܝܪܳܐ ܕܟܽܠܳܗ̇ ܐܰܪܥܳܐ ܘܕܰܠܟܽܠ ‌ܐܰܚܺܝܕ܆ ܗܰܘ ܕܒܶܗ ܐܳܦ ܚܢܰܢ ܚܳܐܶܝܢ ܚ̱ܢܰܢ ܘܡܶܬܬܙܺܝܥܺܝܢ ܚ̱ܢܰܢ ܐܳܦ ܐܺܝܬܰܝܢ. ܡܰܢܽܘ ܢܶܬܚܪܶܐ^[21].

ܠܡܶܕܰܥ ܕܶܝܢ ܙܳܕܶܩ܆ ܕܳܐܦ ܐܰܝܟ ܡܶܠܬܳܐ ܐ̱ܚܪܺܬܳܐ ܐܳܡܪܺܝܢ ܐ̱ܢܳܫܺܝ̈ܢ ܕܡܶܬܩܪܶܝܢ ܫܳܡܪ̈ܳܝܶܐ܆ ܗܳܢܽܘܢ ܕܥܳܡܪܺܝܢ ܒܰܐܪܥܳܐ ܕܺܐܝܣܪܳܐܶܝܠ܆ ܡܶܛܽܠ ܗܳܝ ܕܰܐܚܺܝܕܺܝܢ ܠܛܽܘܪܳܐ ܕܫܳܡܪܺܝܢ ܟܶܐܡܰܬ܆ ܗܰܘ ܕܰܩܢܳܝܗ̱ܝ ܥܰܡܪܺܝ ܡܰܠܟܳܐ ܕܺܐܝܣܪܳܐܶܝܠ ܟܰܕ ܒܬܰܪܬܶܝܢ ܟܰܟܪ̈ܶܐ ܕܟܶܣܦܳܐ ܙܰܒܢܶܗ ܡܶܢ ܫܽܘܡܺܝܪ ܡܳܪܶܗ ܕܛܽܘܪܳܐ ܐܰܝܟ ܕܰܟܬܺܝܒ^[22].

ܒܪܰܡ ܚܢܰܢ ܟܰܕ ܣܽܘܟܳܠܳܐ ܕܠܳܚܶܡ ܠܗܳܠܶܝܢ ܕܣܺܝ̈ܡܳܢ ܩܕܳܡܰܝܢ ܠܦܽܘܫܳܩܳܐ ܡܶܢ ܫܡܳܐ ܥܦܶܝܢ ܚ̱ܢܰܢ܆ ܡܶܛܽܠ ܫܽܘܘܕܳܥܳܐ ܡܫܰܚܠܦܳܐ ܐܰܘ ܟܺܝܬ ܥܶܠܬܳܐ ܗܳܝ ܕܡܶܢܳܗ̇ ܗܘ̣ܳܬ ܗܺܝ ܩܪܳܝܬܳܐ܆ ܠܳܐ ܡܶܕܶܡ ܢܶܬܚܪܶܐ. ܐܺܝܬ ܠܳܗ̇ ܓܶܝܪ ܠܟܽܠ ܚܕܳܐ ܡܶܢܗܶܝܢ܆ ܗܳܝ ܕܰܡܦܺܝܣܳܢܝܳܐ ܐܰܟܚܕܳܐ ܘܫܰܪܺܝܪܳܐ.

ܫܳܡܪܳܝܳܐ ܗܳܟܺܝܠ ܗܰܘ ܕܳܐܙܶܠ ܗ̱ܘܳܐ ܒܽܐܘܪܚܳܐ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ܆ ܚܙܳܝܗ̱ܝ ܠܗܰܘ ܕܰܪܡܶܐ ܗ̱ܘܳܐ. ܐܳܦ ܓܶܝܪ ܒܽܐܘܪܚܳܐ ܐܰܬܺܝ ܗ̱ܘܳܐ ܫܰܪܺܝܪܳܐܺܝܬ܆ ܘܠܰܘ ܡܶܥܒܰܪ ܥܳܒܰܪ ܗ̱ܘܳܐ܆ ܟܰܕ ܠܳܗ̇ ܠܗܳܕܶܐ ܥܒܰܕ ܗ̱ܘܳܐ ܥܶܠܬܳܐ ܕܽܐܘܪܚܳܐ܆ ܗܳܝ ܕܠܰܢ ܢܶܣܥܽܘܪ܆ ܗܳܢܽܘܢ ܕܡܶܛܽܠܳܬܗܽܘܢ ܐܳܦ ܢܚܶܬ ܠܰܐܪܥܳܐ܆ ܗܳܢܽܘܢ ܕܳܐܦ ܫܪܳܐ ܠܘܳܬܗܽܘܢ. ܠܰܘ ܓܶܝܪ ܐܶܬܚܙܺܝ ܒܰܠܚܽܘܕ܆ ܐܶܠܳܐ ܐܳܦ ܐܶܬܗܰܦܰܟ ܥܰܡ ܒܢܰܝ̈ ܐ̱ܢܳܫܳܐ܆ ܟܰܕ ܒܰܫܪܳܪܳܐ ܘܰܤܛܰܪ ܡܶܢ ܫܽܘܚܠܳܦܳܐ ܘܦܰܢܛܰܣܺܝܰܐ ܗܘ̣ܳܐ ܒܰܪܢܳܫܳܐ. ܗܳܕܶܐ ܓܶܝܪ ܕܺܝܠܳܝܬܳܐ ܐܺܝܬܶܝܗ̇ ܕܳܐܣܰܘ̈ܳܬܳܐ ܗܳܢܽܘܢ ܫܰܪܺܝܪ̈ܶܐ ܘܰܡܪ̈ܰܚܡܳܢܶܐ܆ ܗܳܝ ܕܰܐܟܚܕܳܐ ܢܶܬܗܰܦܟܽܘܢ ܥܰܡ ܗܳܢܽܘܢ ܕܰܟܪܺܝܗܶܝܢ܆ ܘܠܳܐ ܢܶܪܚܩܽܘܢ ܡܶܢܗܽܘܢ ܩܕܳܡ ܕܢܶܬܚܰܠܡܽܘܢ.

ܕܡܶܢ ܗܳܪܟܳܐ ܐܳܦ ܟܰܕ ܚܰܡܪܳܐ ܠܫܽܘܚ̈ܢܶܐ ܡܢܰܨܶܠ ܗ̱ܘܳܐ܆ ܠܡܶܠܬܳܐ ܡܰܠܦܳܢܺܝܬܳܐ ܘܕܰܡܨܰܪܦܳܐ܆ ܐܳܦ ܓܶܝܪ ܐܰܫܩܺܝ ܠܰܢ ܚܰܡܪܳܐ ܕܡܶܬܬܰܘܝܳܢܽܘܬܳܐ^[23] ܐܰܝܟܰܢܳܐ ܕܰܢܒܺܝܳܐ ܗܰܘ ܕܰܡܙܰܡܰܪ ܐܳܡܰܪ܆ ܡܶܛܽܠ ܟܺܝܬ ܕܠܳܐ ܡܨܶܝܢ ܗ̱ܘܰܝܢ ܕܟܰܕ ܠܳܐ ܡܙܺܝܓ ܢܣܰܝܒܪܺܝܘܗ̱ܝ܆ ܠܳܐ ܓܶܝܪ ܡܣܰܝܒܪܳܐ ܗ̱ܘܳܬ ܠܡܰܨܪܦܳܢܽܘܬܳܐ ܣܰܓܺܝܐܬܳܐ܆ ܩܰܫܝܽܘܬܳܐ ܘܒܺܝܫܽܘܬܳܐ ܘܠܳܐ ܡܶܬܐܰܣܝܳܢܽܘܬܳܐ ܗܳܝ ܕܰܚܒܳܪ̈ܳܬܳܐ܆ ܒܡܶܫܚܳܐ ܡܰܙܓܶܗ ܠܗܳܢܳܐ. ܡܶܛܽܠܗܳܕܶܐ܆ ܐܳܦ ܥܰܡ ܚܰܛܳܝ̈ܶܐ ܘܥܰܡ ܡܳܟ̈ܣܶܐ ܐܰܟܚܕܳܐ ܡܶܣܬܡܶܟ ܗ̱ܘܳܐ. ܘܰܠܘܳܬ ܦܪ̈ܺܝܫܶܐ ܗܳܢܽܘܢ ܪ̈ܳܚܡܰܝ ܥܶܕ̈ܠܳܝܶܐ ܘܕܰܡܩܰܛܪܓܺܝܢ ܗ̱ܘܰܘ ܠܶܗ܆ ܘܕܰܠܪܶܚܡܰܬ ܐ̱ܢܳܫܽܘܬܳܐ ܡܰܪܫܽܘܬܳܐ ܥܳܒܕܺܝܢ ܗ̱ܘܰܘ ܠܶܗ ܐܳܡܰܪ ܗ̱ܘܳܐ܆ ܙܶܠܘ ܝܺܠܰܦܘ܆ ܡܳܢܳܐ ܐܺܝܬܶܝܗ̇ ܪ̈ܰܚܡܶܐ ܒܳܥܶܐ ܐ̱ܢܳܐ ܘܠܰܘ ܕܶܒܚܬܳܐ^[24].

ܠܗܰܘ ܗܳܟܺܝܠ ܕܗܳܟܰܢܳܐ ܐܶܬܺܝܨܶܦ ܒܳܐܣܝܽܘܬܳܐ܆ ܐܳܦ ܥܰܠ ܒܥܺܝܪܳܐ ܐܳܡܰܪ ܐܰܪܟܒܶܗ. ܡܶܛܽܠ ܟܺܝܬ ܕܰܐܝܟ ܕܰܟܬܺܝܒ ܒܰܪܢܳܫܳܐ ܕܟܰܕ ܒܺܐܝܩܳܪܳܐ ܐܺܝܬܰܘܗ̱ܝ ܗ̱ܘܳܐ ܠܳܐ ܐܶܣܬܰܟܰܠ܆ ܐܶܠܳܐ ܐܶܬܦܰܚܰܡ ܠܰܒܥܺܝܪܳܐ ܗܳܝ ܕܠܳܐ ܗܰܘܢܳܐ ܘܶܐܬܕܰܡܺܝ ܠܳܗ̇^[25]܆ ܘܟܽܠܳܗ̇ ܪܶܓܬܳܐ ܒܥܺܝܪܳܝܬܳܐ ܘܨܰܚܢܬܳܐ ܐܶܬܟܪܰܗ܆ ܟܰܕ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܗܘ̣ܳܐ ܡܫܺܝܚܳܐ ܗܰܘ ܕܠܳܐ ܝܳܕܰܥ ܚܛܺܝܬܳܐ܆ ܗܽܘ ܒܶܗ ܒܰܩܢܽܘܡܶܗ ܒܢܰܦܫܶܗ ܒܩܰܕܡܳܐ ܚܰܘܺܝ܆ ܕܰܠܥܶܠ ܡܶܢ ܚܰܫ̈ܶܐ ܗܳܠܶܝܢ ܒܥܺܝܪ̈ܳܝܶܐ ܟܰܕ ܟܒܰܫܢ ܐܶܢܽܘܢ ܣܠܶܩܢܰܢ ܘܶܐܬܥܰܠܺܝܢܰܢ. ܗܽܘ ܓܶܝܪ ܠܰܡܚܺܝ̈ܠܘܳܬܰܢ ܫܩܰܠ ܘܰܠܟܽܘܪ̈ܗܳܢܰܝܢ ܛܥܶܢ^[26]. ܡܶܛܽܠܗܳܕܶܐ ܐܶܡܰܪ܆ ܕܰܠܗܰܘ ܕܶܐܫܬܘܺܝ ܠܳܐܣܝܽܘܬܳܐ܆ ܥܰܠ ܚܡܳܪܳܐ ܕܺܝܠܶܗ ܐܰܪܟܒܶܗ. ܗܽܘ ܒܶܗ ܒܰܩܢܽܘܡܶܗ ܓܶܝܪ ܛܥܺܝܢ ܗ̱ܘܳܐ ܠܰܢ܆ ܡܶܛܽܠ ܕܗܰܕܳܡ̈ܶܐ ܕܦܰܓܪܳܐ ܕܺܝܠܶܗ ܐܺܝܬܰܝܢ^[27].

ܐܶܠܳܐ ܬܽܘܒ ܐܳܦ ܠܦܽܘܬܩܳܐ ܐܰܘܒܠܶܗ^[28]. ܦܰܐܢܕܽܘܩܝܘܢ ܕܶܝܢ ܐܰܘ ܟܺܝܬ ܦܽܘܬܩܳܐ ܗܰܘ ܕܡܶܬܦܰܫܰܩ ܡܩܰܒܶܠ ܟܽܠ܆ ܠܥܺܕܬܳܐ ܩܳܪܶܐ܆ ܗܳܝ ܕܰܗܘܳܬ ܡܩܰܒܠܳܢܺܝܬܳܐ ܘܰܕܥܳܪܝܳܐ ܠܟܽܠܗܽܘܢ ܒܢܰܝ̈ܢܳܫܳܐ. ܠܳܐ ܬܽܘܒ ܓܶܝܪ ܐܰܝܟ ܐܰ‌ܠܺܝܨܽܘܬܳܐ ܕܛܶܠܳܢܺܝܬܳܐ ܗܳܝ ܢܳܡܽܘܣܳܝܬܳܐ ܘܰܕܦܽܘܠܚܳܢܳܐ ܗܰܘ ܕܰܒܛܽܘܦܣ̈ܶܐ ܫܳܡܥܺܝܢ ܚ̱ܢܰܢ܆ ܕܠܳܐ ܢܶܥܽܘܠ ܥܰܡܽܘܢܳܝܳܐ ܘܡܽܘܐܒܳܝܳܐ ܠܥܺܕܬܳܐ ܕܡܳܪܝܳܐ^[29]. ܐܶܠܳܐ ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡܡ̈ܶܐ܆ ܟܰܕ ܡܰܥܡܕܺܝܢ ܐܢ̱ܬܽܘܢ ܠܗܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ^[30]. ܘܕܰܒܟܽܠ ܥܰܡܳܐ܆ ܗܰܘ ܕܕܳܚܶܠ ܠܶܗ ܘܦܳܠܰܚ ܠܶܗ ܙܰܕܺܝܩܽܘܬܳܐ܆ ܡܶܬܩܰܒܠܳܢܳܐ ܐܺܝܬܰܘܗ̱ܝ ܠܶܗ^[31].

ܘܟܰܕ ܐܰܘܒܠܶܗ ܠܦܽܘܬܩܳܐ^2: ܠܝܰܨܺܝܦܽܘܬܳܐ ܕܝܰܬܺܝܪ ܪܰܒܳܐ ܐܰܫܘܝܶܗ. ܐܳܦ ܓܶܝܪ ܟܰܕ ܐܶܬܟܰܢܫܰܬ ܥܺܕܬܳܐ ܡܶܢ ܥܰܡܡ̈ܶܐ ܗܳܢܽܘܢ ܕܰܒܣܰܓܺܝܽܐܘܬ ܐܰ‌ܠܳܗ̈ܶܐ ܡܰܝ̣ܺܝ̣ܬܺܝܢ ܗ̱ܘܰܘ܆ ܗܽܘ ܡܫܺܝܚܳܐ ܐܺܝܬܰܘܗ̱ܝ ܗ̱ܘܳܐ ܒܳܗ̇ ܕܥܳܡܰܪ ܘܕܰܡܗܰܠܶܟ ܐܰܝܟ ܕܰܟܬܺܝܒ^[32]܆ ܘܰܕܟܽܠ ܛܰܝܒܽܘܬܳܐ ܪܽܘܚܳܢܳܝܬܳܐ ܡܫܰܟܶܢ.

ܕܡܶܢ ܗܳܪܟܳܐ ܐܳܦ ܠܗܰܘ ܕܰܒܪܺܝܫ ܦܽܘܬܩܳܐ ܩܳܐܶܡ ܗ̱ܘܳܐ܆ ܢܶܣܬܰܟܰܠ ܕܶܝܢ ܗܳܢܳܐ ܕܛܽܘܦܣܳܐ ܐܰܚܺܝܕ ܕܰܫܠܺܝ̈ܚܶܐ ܘܰܕܪ̈ܳܥܰܘܳܬܳܐ ܘܡܰܠܦܳܢ̈ܶܐ ܗܳܢܽܘܢ ܕܡܶܢ ܒܳܬܰܪܗܽܘܢ܆ ܟܰܕ ܠܰܫܡܰܝܳܐ ܣܳܠܶܩ ܗ̱ܘܳܐ܆ ܬܪܶܝܢ ܕܺܝܢܳܪ̈ܶܐ ܝܰܗ̱ܒ ܗ̱ܘܳܐ܆ ܟܰܕ ܕܢܶܬܝܨܦ ܐܰܟܺܝܦܳܐܺܝܬ ܗܰܘ ܕܰܟܪܺܝܗ ܗ̱ܘܳܐ ܦܩܰܕ ܗ̱ܘܳܐ܆ ܘܰܐܘܣܶܦ ܕܶܐܢ ܡܶܕܶܡ ܝܰܬܺܝܪܳܐ ܬܰܘܣܶܦ ܬܰܦܶܩ܆ ܐܶܢܳܐ ܐܶܡܰܬܝ ܕܦܳܢܶܐ ܐ̱ܢܳܐ ܐܳܬܶܐ ܐ̱ܢܳܐ ܐܶܦܪܥܳܟ^[33]. ܬܪܶܝܢ ܕܺܝܢܳܪ̈ܶܐ܆ ܠܬܰܪ̈ܬܶܝܢ ܕܝܰܬܺܝܩ̈ܰܐܤ ܐܳܡܰܪ. ܠܥܰܬܺܝܩܬܳܐ ܘܠܰܚܕܰܬܳܐ. ܠܗܳܝ ܟܺܝܬ ܕܰܒܝܰܕ ܢܳܡܽܘܣܳܐ ܕܡܽܘܫܶܐ ܘܰܢܒܺܝ̈ܶܐ܆ ܘܰܠܗܳܝ ܕܰܒܝܰܕ ܐܶܘܰܢܓ̈ܶܠܝܐ ܐܶܬܝܰܗܒܰܬ ܘܰܒܝܰܕ ܦܽܘܩ̈ܳܕܶܐ ܫܠܺܝܚ̈ܳܝܶܐ܆ ܕܬܰܪ̈ܬܰܝܗܶܝܢ ܕܚܰܕ ܐܰ‌ܠܳܗܳܐ ܐܺܝܬܰܝܗܶܝܢ܆ ܘܚܰܕ ܨܰܠܡܳܐ ܕܗܰܘ ܚܰܕ ܡܰܠܟܳܐ ܕܰܠܥܶܠ ܡܰܝ̈ܬܝܳܢ ܐܰܝܟܰܢܳܐ ܕܕܺܝܢܳܪ̈ܶܐ܆ ܘܠܶܗ ܟܰܕ ܠܶܗ ܠܝܽܘܩܢܳܐ ܡܰܠܟܳܝܳܐ ܒܠܶܒܰܘ̈ܳܬܳܐ ܕܺܝܠܰܢ ܒܝܰܕ ܡ̈ܶܠܶܐ ܟܳܗ̈ܢܳܝܳܬܳܐ ܛܳܒ̈ܥܳܢ ܘܰܡܛܰܦ̈ܣܳܢ܆ ܡܶܛܽܠ ܟܺܝܬ ܕܳܐܦ ܚܰܕ ܘܗܽܘ ܟܰܕ ܗܽܘ ܪܽܘܚܳܐ ܡܰܠܶܠ ‌ܐܶܢܶܝܢ.

ܢܶܬܚܰܒܰܠ ܕܶܝܢ ܡܰܐܢܺܝ܆ ܘܡܶܢ ܩܕܳܡܰܘ̈ܗ̱ܝ ܡܰܐܪܩܝܘܢ܆ ܗܳܢܽܘܢ ܕܠܳܐ ܐܰ‌ܠܳܗ܆ ܕܠܰܐܠܳܗ̈ܶܐ ܡܫܰܚ̈ܠܦܶܐ ܡܦܰܠܓܺܝܢ ܠܗܶܝܢ ܠܗܳܠܶܝܢ. ܕܚܰܕ ܓܶܝܪ ܡܰܠܟܳܐ ܐܺܝܬܰܝܗܽܘܢ ܗ̱ܘܰܘ ܗܳܠܶܝܢ ܬܪܶܝܢ ܕܺܝܢܳܪ̈ܶܐ܆ ܘܕܰܐܟܚܕܳܐ ܘܰܒܫܰܘܝܽܘܬ ܐܺܝܩܳܪܳܐ ܐܶܬܺܝܗܶܒܘ ܡܶܢ ܡܫܺܝܚܳܐ ܠܗܰܘ ܕܰܒܪܺܝܫ ܦܽܘܬܩܳܐ ܩܳܐܶܡ ܗ̱ܘܳܐ. ܠܗܳܠܶܝܢ ܟܺܝܬ ܕܟܰܕ ܢܣܰܒܘ ܐܶܢܽܘܢ ܪ̈ܳܥܰܘܳܬܳܐ ܗܳܢܽܘܢ ܕܥ̈ܺܕܳܬܳܐ ܩܰܕܺܝ̈ܫܳܬܳܐ܆ ܘܥܰܡ ܥܰܡ̈ܠܶܐ ܘܕܽܘ̈ܥܬܶܐ ܒܡܰܠ̈ܦܳܢܘܳܬܳܐ ܦܰܬܺܝܘ ܐܶܢܽܘܢ܆ ܘܡܶܢ ܕܺܝܠܗܽܘܢ ܐܰܘܣܶܦܘ ܐܰܦܶܩܘ܆ ܘܰܒܝܰܕ ܢܦܰܩܬ̣ܳܐ ܝܰܬܺܝܪܳܐܺܝܬ ܪܰܒܺܝܘ ܐܶܢܽܘܢ܆ ܕܰܐܝܟ ܗܳܟܰܢܰܐ ܗ̱ܘ ܓܶܝܪ ܟܶܣܦܳܐ ܗܰܘ ܡܶܬܗܰܘܢܳܢܳܐ܆ ܕܡܶܢ ܗܳܠܶܝܢ ܕܡܶܬܢܰܦ̈ܩܳܢ ܠܰܘ ܡܶܙܥܰܪ ܙܳܥܰܪ ܐܶܠܳܐ ܡܶܣܓܳܐ ܣܳܓܶܐ ܘܪܳܒܶܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܡܶܠܬܳܐ ܗܳܝ ܕܡܰܠܦܳܢܽܘܬܳܐ܆ ܟܰܕ ܦܳܢܶܐ ܐܳܬܶܐ ܡܳܪܰܢ ܒܝܰܘܡܳܐ ܗܰܘ ܐ̱ܚܪܳܝܳܐ ܢܺܐܡܪܽܘܢ ܟܽܠܚܰܕ ܡܶܢܗܽܘܢ܆ ܡܳܪܝ ܬܪܶܝܢ ܕܺܝܢܳܪ̈ܶܐ ܝܰܗ̱ܒܬ ܠܺܝ. ܗܳܐ ܟܰܕ ܡܶܢ ܕܺܝܠܝ ܐܰܘܣܦܶܬ ܐܰܦܩܶܬ̣܆ ܬܪܶܝܢ ܕܺܝܢܳܪ̈ܶܐ ܝܰܬܪܶܬ̣܆ ܗܳܠܶܝܢ ܕܒܺܐܝ̈ܕܰܝܗܽܘܢ ܪܰܒܺܝܬ̣ ܘܰܐܣܓܺܝܬܳܗ̇ ܠܡܰܪܥܺܝܬܳܐ. ܘܟܰܕ ܢܶܥܢܶܐ ܢܺܐܡܰܪ ܠܶܗ ܫܰܦܺܝܪ܆ ܥܰܒܕܳܐ ܛܳܒܳܐ ܘܰܡܗܰܝܡܢܳܐ܆ ܥܰܠ ܙܥܽܘܪ̈ܝܳܬܳܐ ܐܺܝܬܰܝܟ ܗ̱ܘܰܝܬ ܡܗܰܝܡܢܳܐ܆ ܥܰܠ ܣܰܓܺܝ̈ܐܬܐ ܐ݀ܰܩܺܝܡܳܟ. ܥܽܘܠ ܠܚܰܕܽܘܬܶܗ ܕܡܳܪܳܟ^[34].

ܟܰܕ ܗܳܠܶܝܢ ܗܳܟܺܝܠ ‌ܐܶܬܩܪ̈ܶܝܢ ܡܶܢ ܩܕܺܝܡ܆ ܐܰܝܟ ܡܰܫܠܡܳܢܽܘܬܳܐ ܕܰܐܒܳܗ̈ܳܬܳܐ. ܐܳܬܶܐ ܐ̱ܢܳܐ ܠܺܝ ܓܶܝܪ ܡܶܟܺܝܠ ܠܘܳܬ ܡܶܠܬܳܐ ܗܳܝ ܕܡܰܪܫܽܘܬܳܐ܆ ܐܰܙܥܶܩ ܠܟܽܘܢ ܟܳܪܽܘܙܳܐ ܗܰܘ ܟܳܗܢܳܝܳܐ܆ ܟܰܕ ܡܚܰܦܶܛ ܠܟܽܘܢ ܕܰܒܦܶܪ̈ܩܽܘܢܶܐ ܕܟܶܬܳܢܳܐ ܬܶܦܪܥܽܘܢܳܗ̇ ܠܡܶܐܬܺܝܬܳܐ ܕܰܡܫܺܝܚܳܐ ܗܳܝ ܕܟܽܠܶܗ ܗܳܢܳܐ܆ ܠܘܳܬ ܐܳܣܝܽܘܬܳܐ ܘܰܢܝܳܚܳܐ ܕܗܳܢܽܘܢ ܕܰܒܟܺܐܒܳܐ ܕܰܐܪܝܳܢܽܘܬܳܐ ܥܡܺܝܠܺܝܢ܆ ܘܰܐܝܟ ܕܰܠܩܰܒܪܳܐ ܕܰܪܕܳܐ ܪܶܗܠܳܐ ܘܣܰܪܝܽܘܬ ܪܺܝܚܳܐ ܡܰܟܪܟܺܝܢ ܠܶܗ ܠܦܰܓܪܗܽܘܢ܆ ܐܰܘ ܕܗܳܢܽܘܢ ܕܰܒܟܽܘܪܗܳܢܳܐ ܡܶܕܶܡ ܐ̱ܚܪܺܢܳܐ ܡܶܬܩܰܦܚܺܝܢ܆ ܘܰܒܦܳܣܺܝ̈ܩܳܬܳܐ ܠܡܺܐܡܰܪ܆ ܘܠܳܐ ܐ̱ܢܳܫ ܡܶܢܟܽܘܢ ܐܰܣܒܰܪ ܕܫܰܡܥܳܗ̇ ܠܟܳܪܽܘܙܽܘܬܳܐ. ܐܶܠܳܐ ܚܕܳܐ ܐܰܘ ܬܰܪܬܶܝܢ ܒܕܽܘܟ ܢܶܫܽܘ̈ܢܝܳܬܳܐ܆ ܟܰܕ ܡܶܢ ܢܰܚ̈ܬܶܐ ܥܰܬܺܝ̈ܩܶܐ ܘܰܒ̈ܠܰܝܳܐ܆ ܩܶܛܥ̈ܶܐ ܡܶܕܶܡ ܘܫܰܪ̈ܟܳܢܶܐ ܕܨܳܐܺܝܢ ܘܰܕܣܰܓܺܝ ܡܬܰܠܚܺܝܢ ܫ̈ܕܰܝ܆ ܐܶܣܬܰܒܪܰܬ ܠܗܶܝܢ ܕܗܳܝ ܕܣܳܦܩܳܐ ܠܢܳܡܽܘܣܳܐ ܥܒ̈ܰܕܶܝܢ܆ ܘܰܕܟܰܕ ܡܚܰܘ̈ܝܳܢ ܐܶܣܟܺܡܳܐ ܡܨܰܕܝܳܢܳܐܺܝܬ ܒܰܠܚܽܘܕ ܕܫܳܕ̈ܝܳܢ ܦܶܪ̈ܩܶܐ܆ ܡܫܰܡ̈ܠܝܳܢ ܠܳܗ̇ ܠܗܳܝ ܕܰܥܝܳܕܳܐ.

ܘܟܰܕ ܛܳܒ ܡܫܺܝܚܳܐ ܡܶܢ ܒܳܬܰܪ ܢܳܡܽܘܣܳܐ ܘܰܢܒܺܝ̈ܶܐ܆ ܟܰܕ ܐܶܬܦܣܶܩ ܗ̱ܘܳܐ ܠܶܗ ܥܠܰܝܢ ܣܰܒܪܳܐ܆ ܘܗܳܐ ܡܶܢ ܟܰܕܽܘ ܐܶܬܚܫܰܒܢ ܗ̱ܘܰܝܢ ܠܰܢ ܥܰܡ ܗܳܢܽܘܢ ܕܡܰܝ̣ܺܝ̣ܬܺܝܢ܆ ܠܳܐ ܐܰܗܡܺܝ ܡܶܢܰܢ. ܐܶܠܳܐ ܡܶܢ ܪܰܘܡܳܐ ܢܚܶܬ܆ ܘܟܰܕ ܒܳܗ̇ ܟܰܕ ܒܳܗ̇ ܒܽܐܘܣܺܝܰܐ ܠܰܢ ܐܶܫܬܰܘܬܰܦ ܤܛܰܪ ܡܶܢ ܚܛܺܝܬܳܐ܆ ܘܰܬܚܶܝܬ ܗܳܝ ܕܢܶܗܘܶܐ ܠܳܐ ܡܶܫܬܰܚܠܦܳܢܳܐܺܝܬ ܒܰܪܢܳܫܳܐ ܐܶܫܬܰܥܒܰܕ܆ ܐܰܝܟܰܢܳܐ ܕܳܐܦ ܕܰܨܠܺܝܒܳܐ ܘܕܰܩܒܽܘܪܬܳܐ ܘܰܕܡܰܚܰܬܬ̣ܳܐ ܕܠܰܫܝܽܘܠ ܢܶܣܰܒ ܢܶܣܝܳܢܳܐ܆ ܘܗܳܕܶܐ ܟܰܕ ܐܺܝܬܰܘܗ̱ܝ ܐܰ‌ܠܳܗܳܐ ܒܰܟܝܳܢܳܐ܆ ܟܕ ܒܗܳܝ ܕܰܗܘ̣ܳܐ ܒܰܪܢܳܫܳܐ ܣܒܰܠ ܟܽܠܗܶܝܢ܆ ܘܠܳܐ ܚܳܫܽܘܫܳܐܺܝܬ ܐܳܦ ܒܝܰܕ ܟܽܠܗܶܝܢ ܐܶܬܳܐ܆ ܗܳܠܶܝܢ ܕܡܶܢܗܶܝܢ ܙܳܕܶܩ ܗ̱ܘܳܐ ܠܡܰܣܩܽܘܬܰܢ ܕܢܰܦܺܝܠܺܝܢ ܗ̱ܘܰܝܢ܆ ܕܗܳܢܽܘܢ ܕܰܡܒܰܕܪܺܝܢ ܗ̱ܘܰܘ ܓܰܪ̈ܡܰܝܢ ܠܘܬ ܫܝܽܘܠ^[35] ‌ܐܰܝܟܰܢܳܐ ܕܳܐܡܰܪ ܢܒܺܝܐ ܕܰܘܺܝܕ. ܡܶܛܽܠ ܓܶܝܪ ܕܠܳܐ ܡܨܶܝܢ ܗ̱ܘܰܝܢ ܚܢܰܢ ܕܰܢܩܽܘܡ ܟܰܕ ܠܬܰܚܬ ܒܕܽܘܟ ܛܡܺܝܪܝܢ ܗ̱ܘܰܝܢ܆ ܘܰܠܡܳܢܳܐ ܐܳܡܰܪ ܐܢܐ ܕܰܢܩܽܘܡ. ܕܰܢܪܺܝܡ ܒܰܠܚܽܘܕ ܥܰܝܢܳܐ ܠܘܳܬܶܗ ܕܰܫܡܰܝܳܐ܆ ܗܽܘ ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܟܰܕ ܠܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ ܢܚܶܬ^[36]܆ ܡܶܢ ܬܰܡܳܢ ܢܓܰܕ ܐܶܢܽܘܢ ܠܗܳܢܽܘܢ ܕܳܐܦܠܳܐ ܚܰܕ ܣܰܒܪܳܐ ܕܦܽܘܪܩܳܢܳܐ ܐܺܝܬ ܗ̱ܘܳܐ ܠܗܽܘܢ܆ ܟܰܕ ܣܰܓܺܝ ܒܩܽܘܪܒܳܐ ܗܘ̣ܳܐ܆ ܠܗܳܢܽܘܢ ܕܣܰܓܺܝ ܒܪܽܘܚܩܳܐ ܐܺܝܬܰܝܗܽܘܢ ܗ̱ܘܰܘ. ܡܶܛܽܠ ܗܳܕܶܐ ܡܫܰܐܶܠ ܠܶܗ ܠܢܽܘܡܺܝܩܳܐ ܗܰܘ܆ ܟܰܕ ܠ‍ܠܳܐ ܡܶܣܬܰܝܟܳܢܽܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ ܗܳܝ ܕܥܳܒܪܳܐ ܠܟܽܠ ܡܚܰܘܶܐ ܗ̱ܘܳܐ܆ ܕܡܰܢܽܘ ܡܶܢ ܗܳܠܶܝܢ ܬܠܳܬܳܐ ܡܶܣܬܒܰܪ ܠܳܟ ܕܰܗܘ̣ܳܐ ܩܰܪܺܝܒܳܐ܆ ܕܗܰܘ ܕܰܢܦܰܠ ܒܓܰܝܳܣ̈ܶܐ^[37].

ܐܶܠܳܐ ܚܢܰܢ ܗܳܢܽܘܢ ܕܗܳܠܶܝܢ ܫܳܡܥܺܝܢܰܢ܆ ܡܰܠܽܘܢ ܕܶܝܢ ܗܳܢܽܘܢ ܕܰܠܗܳܠܶܝܢ ܐܶܫܬܘܺܝܢܰܢ܆ ܘܳܐܦܠܳܐ ܪܽܘܩܰܥܬܳܐ ܕܟܶܬܳܢܳܐ ܒܠܺܝܬܳܐ ܝܰܗܒܢܰܢ ܠܶܗ. ܗܽܘ ܓܶܝܪ ܐܺܝܬܰܘܗ̱ܝ ܗ̱ܘܳܐ ܗܰܘ ܕܫܳܐܶܠ ܗ̱ܘܳܐ܆ ܗܰܘ ܕܳܐܡܰܪ ܗ̱ܘܳܐ ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܰܟܡܳܐ ܕܰܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܐܰܚܰܝ̈ ܙܥܽܘܪ̈ܶܐ܆ ܠܺܝ ܥܒܰܕܬܽܘܢ^[38]. ܐܰܝܟܰܢܳܐ ܓܶܝܪ ܐܶܡܰܪ ܠܺܝ܆ ܠܝܰܘܣܶܦ ܡܰܢ ܝܳܗܒܺܝܢܰܢ ܛܽܘܒܳܐ܆ ܠܗܰܘ ܕܡܶܢ ܪܳܡܬ̣ܳܐ܆ ܠܗܰܘ ܒܽܘܠܽܘܛܺܐ܆ ܕܫܶܐܠ ܡܶܢ ܦܺܝܠܛܘܤ܆ ܕܢܰܫܶܦ^[39] ܠܶܗ ܠܡܶܟܪܟܶܗ ܠܦܰܓܪܶܗ ܡܰܥܒܶܕ ܚܰܝ̈ܶܐ ܕܝܶܫܽܘܥ܆ ܘܗܳܟܰܢܳܐ ܒܡܰܪܛܽܘܛܳܐ ܕܟܶܬܳܢܳܐ ܟܰܣܝܶܗ. ܛܳܥܝܳܐ ܠܰܢ ܕܶܝܢ ܕܟܰܕ ܫܰܠܺܝܛ ܗ̱ܘ̣ ܐܳܦ ܠܰܢ ܕܠܶܗ ܟܰܕ ܠܶܗ ܠܺܐܝܩܳܪܳܐ ܘܠܽܘܩܒܰܠ ܛܰܝܒܽܘܬܳܐ ܢܶܫܬܘܶܐ ܐܰܟܘܳܬܶܗ ܐܰܘ ܠܰܕܪܰܒ ܡܶܢܶܗ܆ ܟܡܳܐ ܕܗܳܫܳܐ ܒܫܽܘܠܛܳܢܳܐ ܐܺܝܬܶܝܗ̇ ܠܰܢ ܕܰܢܢܺܝܚܺܝܘܗ̱ܝ ܘܢܶܥܨܒܺܝܘܗ̱ܝ ܠܰܡܫܺܝܚܳܐ ܟܰܕ ܡ̇ܠܶܐ̣ ܫܽܘܚ̈ܢܶܐ ܘܰܡܡܰܚܰܝ܆ ܚܢܰܢ ܠܰܢ ܒܗܳܠܶܝܢ ܪ̈ܺܝܫܳܝܳܬܳܐ ܡܣܰܓܦܺܝܢ ܚ̱ܢܰܢ܆ ܘܰܠܝܽܘܬܪܳܢܳܐ ܕܟܽܠܶܗ ܗܳܢܳܐ ܫܳܕܶܝܢ ܚ̱ܢܰܢ ܡܶܢܰܢ. ܘܶܐ‌ܠܽܘ ܡܰܢ ܐ̱ܢܳܫ ܡܰܠܟܳܐ ܫܪܳܐ ܠܘܳܬܰܢ܆ ܠܟܽܠܗܽܘܢ ܢܰܚ̈ܬܶܐ ܕܺܐܝܬ ܗ̱ܘܰܘ ܠܰܢ ܒܒܰܝܬܳܐ܆ ܘܠܰܠܒܽܘܫܳܐ ܕܫܺܝܪܳܝܳܐ ܐܶܢ ܬܶܓܕܰܫ ܡܶܢ ܩܰܒ̈ܘܳܬܳܐ ܟܰܕ ܡܰܦܩܺܝܢ ܗ̱ܘܰܝܢ܆ ܝܳܗܒܺܝܢ ܗ̱ܘܰܝܢ ܠܶܗ ܕܢܶܬܥܰܪܓܰܠ ܒܗܽܘܢ ܘܕܰܢܕܰܝܶܫ ܐܶܢܽܘܢ܆ ܘܰܕܢܶܬܚܰܫܰܚ ܒܗܽܘܢ ܠܒܰܪ ܡܶܢ ܘܳܠܺܝܬܳܐ ܘܳܐܦ ܕܢܶܣܰܒ ܐܶܢܽܘܢ܆ ܒܣܒܪܐ ܕܺܐܝܩܳܪܳܐ ܡܶܕܶܡ ܕܰܡܠܶܐ ܙܰܒܢܳܐ. ܡܫܺܝܚܳܐ ܕܶܝܢ ܗܰܘ ܡܰܠܟܳܐ ܕܪ̈ܽܘܚܳܬܳܐ ܗܳܠܶܝܢ ܕܰܠܥܶܠ ܘܰܕܫܽܘܠ̈ܛܳܢܶܐ ܘܰܕܚܰܝ̈ܠܰܘܳܬܳܐ܆ ܕܣܺܝܡ ܩܕܰܡܰܝܢ ܟܰܕ ܡܡܰܚܰܝ ܒܟܽܠܶܗ ܦܰܓܪܶܗ܆ ܘܰܚܠܳܦ ܪܽܘܩܰܥܬܳܐ ܙܥܽܘܪܬܳܐ ܡܰܠܟܽܘܬܐ ܕܰܫܡܰܝܳܐ ܡܶܫܬܰܘܕܶܐ ܠܡܶܬܠ܆ ܟܰܕ ܠܳܐ ܣܥܺܝܪ ܠܶܗ ܡܶܕܶܡ ܐܳܙܶܠ. ܚܙܰܘ ܠܰܫܟܺܝܪܽܘܬܳܐ ܕܰܟܡܳܐ ܗܝ ܘܕܰܐܝܟ ܐܰܝ̇ܕܳܐ. ܘܰܠܘܳܬ ܒܰܪ ܓܶܢܣܰܢ ܘܕܰܥܡܺܝܠ ܒܟܺܐܒܳܐ ܐܶܬܪܟܶܢܘ.

ܘܠܳܐ ܐ̱ܢܳܫ ܢܺܐܡܰܪ ܠܺܝ܆ ܕܝܰܘܡܳܐ ܗܰܘ ܕܒܶܗ ܙܳܕܶܩ ܗ̱ܘܳܐ ܕܢܶܫܕܶܐ ܦܶܪ̈ܩܶܐ ܥܒܰܪ ܠܶܗ. ܐܶܢ ܓܶܝܪ ܒܢܳܡܽܘܣܳܐ ܦܩܺܝܕ ܗ̱ܘܳܐ ܠܡܶܥܒܰܕ ܦܶܣܟܳܐ ܒܝܰܪܚܳܐ ܩܰܕܡܳܝܳܐ ܗܰܘ ܕܰܠܘܳܬ ܥܶܒܪ̈ܳܝܶܐ܆ ܘܶܐܢ ܐ̱ܢܳܫ ܡܶܛܽܠ ܥܶܠܬܳܐ ܕܠܳܚܡܳܐ ܘܟܺܐܢܳܐ ܦܳܫ ܡܶܢ ܥܺܐܕܳܐ܆ ܫܰܠܺܝܛ ܗܘ ܕܰܒܝܰܪܚܳܐ ܗܰܘ ܕܰܬܪܶܝܢ ܢܶܕܒܽܘܚ ܕܶܒܚܬܳܐ ܗܳܝ ܕܦܶܣܟܳܐ^[40]܆ ܐܰܝܟܰܢܳܐ ܠܰܘ ܕܠܳܐ ܡܶܠܬܳܐ ܗܝ܆ ܕܒܰܡܫܰܘܬܦܳܢܽܘܬܳܐ ܕܪ̈ܰܚܡܶܐ܆ ܐܰܝܟܳܐ ܕܟܽܠ ܙܰܒܢܳܐ ܕܺܐܝܬ ܕܠܳܚܶܡ ܘܥܳܗܶܢ ܐܺܝܬܰܘܗ̱ܝ܆ ܒܡܰܥܒܰܪܬܶܗ ܕܝܰܘܡܳܐ ܢܶܬܚܒܶܫ ܘܢܶܬܟܠܶܐ ܡܶܢ ܗܳܝ ܕܘܳܠܝܳܐ܆ ܟܰܕ ܟܬܳܒ̈ܐ ܟܳܗ̈ܢܳܝܶܐ ܐܳܡܪܺܝܢ܆ ܕܠܳܐ ܬܶܬܟܠܶܐ ܠܡܶܥܒܰܕ ܫܰܦܺܝܪ ܠܰܣܢܺܝܩܳܐ܆ ܠܰܡܥܰܕܳܪܽܘ ܐܶܡܰܬܝ ܕܺܐܝܬ ܒܳܗ̇ ܒܺܐܝܕܳܟ܆ ܠܳܐ ܬܺܐܡܰܪ ܕܡܶܦܢܳܐ ܬܶܦܢܶܐ ܬܺܐܬܶܐ ܠܰܡܚܳܪ ܘܶܐ݀ܬܶܠ ܠܳܟ^[41]܆ ܟܰܕ ܡܶܫܟܰܚ ܐܰܢ̱ܬ ܠܡܶܥܒܰܕ ܫܰܦܺܝܪ܆ ܠܳܐ ܓܶܝܪ ܝܳܕܰܥ ܐܰܢ̱ܬ ܡܳܢܳܐ ܢܺܐܠܰܕ ܝܰܘܡܳܐ ܗܰܘ ܕܳܐܬܶܐ ܒܳܬܰܪܟܶܢ. ܠܳܐ ܗܳܟܺܝܠ ܠܫܰܢܬܳܐ ܕܒܳܬܰܪܟܶܢ ܬ݀ܬܗܘܢ ܐܶܢܶܝܢ ܠܡ̈ܶܠܶܐ ܕܺܝܠܝ. ܐܶܠܳܐ ܐܰܣܒܰܪܘ ܕܗܳܐ ܝܰܘܡܳܢ ܩܳܐܶܡ ܚܰܕܒܫܰܒܳܐ ܗܰܘ ܕܰܥܒܰܪ܆ ܘܟܽܠ ܚܰܕ ܡܶܢܟܽܘܢ ܢܶܫܕܶܐ ܠܦܰܩܝܳܠܐ^[42] ܗܰܘ ܕܰܬܠܶܐ ܒܰܩܕܳܠܶܗ܆ ܗܰܘ ܕܒܶܗ ܐܺܝܬ ܥܝܳܕܳܐ ܠܰܡܟܰܦܳܪܽܘ ܢܚܺܝܪ̈ܶܐ. ܘܰܐܢ̱ܬܝ ܐܰܢ̱ܬܬܳܐ ܒܦܶܪܩܳܐ ܗܰܘ ܕܥܰܠ ‌ܐܺܝܕܳܐ ܡܶܬܬܰܝܬܶܐ ܐܰܫܶܦ ܠܰܡܫܺܝܚܳܐ. ܗܳܠܶܝܢ ܓܶܝܪ ܠܫܳܡܽܘ̈ܢܶܐ ܙܥܽܘܪ̈ܶܐ ܐܺܝܬܰܝܗܶܝܢ ܕܫܳܘ̈ܝܳܢ܆ ܐܰܓܪܳܐ ܕܶܝܢ ܫܡܰܝܳܢܳܐ ܡܙܰܡ̈ܢܳܢ܆ ܘܡܶܢ ܟܽܠ ܟܽܘܪܗܳܢܳܐ ܘܰܡܚܽܘܬܳܐ ܡܚܰܪܪ̈ܳܢ܆ ܘܳܐܦ ܠܟܽܘܢ ܘܳܐܦ ܠܰܒ̈ܢܰܝܟܽܘܢ܆ ܕܗܳܠܶܝܢ ܕܰܕܦܽܘܪܩܳܢܗܽܘܢ ܫܰܦܺܝܪ ܝܳܕܰܥ ܐ̱ܢܳܐ ܕܣܰܓܺܝ ܝܰܨܺܝܦܺܝܢ ܐܢ̱ܬܽܘܢ. ܐܳܦ ܓܶܝܪ ܐܶܢܗܽܘ ܕܰܤܛܰܪ ܡܶܢ ܟܶܬܳܢ̈ܶܐ ܗܳܠܶܝܢ ܕܶܐܬܶܐܡܰܪܘ ܬܶܗܦܟܽܘܢ ܠܒܳܬܰܝ̈ܟܽܘܢ܆ ܟܶܢܫܳܐ ܕܡܰܠܰܐܟ̈ܶܐ ܢܶܗܘܶܐ ܐܺܝܬ ܠܟܽܘܢ ܕܰܐܟܚܕܳܐ ܥܳܐܶܠ ܥܰܡܟܽܘܢ ܘܰܠܒܰܝܬܳܐ ܢܳܛܰܪ܆ ܘܳܐܦ ܠܶܗ ܕܶܝܢ ܠܟܽܠܶܗ ܡܫܺܝܚܳܐ ܡܳܪܗܽܘܢ ܕܡܰܠܰܐܟ̈ܶܐ ܕܰܠܓܰܘ ܐܺܝܬܰܘܗ̱ܝ.

ܘܠܳܐ ܬܶܣܒܪܽܘܢ ܕܡܶܕܶܡ ܪܰܒܳܐ ܥܒܰܕܬܽܘܢ ܟܰܕ ܗܳܕܶܐ ܥܒܰܕܬܽܘܢ. ܐܳܦ ܓܶܝܪ ܓܶܕܥܽܘܢ܆ ܕܰܝܳܢܳܐ ܕܶܝܢ ܐܺܝܬܰܘܗ̱ܝ ܗܳܢܳܐ ܕܺܐܝܣܪܳܐܶܝܠ܆ ܟܰܕ ܠܡܶܕܝܰܢܳܝ̈ܶܐ ܐܰܘ ܟܺܝܬ ܠܺܐܝܫ̈ܡܰܥܺܠܳܝܶܐ ܕܶܐܙܕܰܝܰܢܘ ܘܶܐܬܰܘ ܥܠܰܘܗ̱ܝ ܙܟܳܐ܆ ܡܶܢ ܒܳܬܰܪ ܙܳܟܽܘܬܳܐ ܠܗܳܢܽܘܢ ܕܡܶܢܶܗ ܐܶܬܦܪܶܩܘ܆ ܘܥܰܡܶܗ ܐܰܟܚܕܳܐ ܐܶܣܬܕܰܪܘ ܠܰܩܪܳܒܳܐ ܐܶܡܰܪ܆ ܫܶܐܠܬܳܐ ܫܳܐܶܠ ‌ܐ̱ܢܳܐ ܡܶܢܟܽܘܢ܆ ܘܗܰܒܘ ܠܺܝ ܓܰܒܪܳܐ ܩܕܳܫܳܐ ܚܰܕ ܡܶܢ ܒܶܙܬܶܗ. ܡܶܛܽܠ ܕܰܩܕܳܫ̈ܶܐ ܐܺܝܬ ܗ̱ܘܰܝ̈ ܠܗܽܘܢ ܣܰܓܺܝ̈ܳܐܬܳܐ܆ ܡܶܛܽܠ ܕܺܐܝܫ̈ܡܰܥܺܠܳܝܶܐ ܐܺܝܬܰܝܗܽܘܢ ܗ̱ܘܰܘ. ܘܶܐܡܰܪܘ ܠܶܗ. ܡܶܬܰܠ ܢܶܬܶܠ. ܘܰܦܬܰܚ ܓܒܰܪ ܡܳܐܢܶܗ܆ ܘܰܫܕܳܐ ܬܰܡܳܢ ܩܕܳܫܳܐ ܕܕܰܗܒܳܐ ܡܶܢ ܒܶܙܬܶܗ^[43]. ܐܶܢ ܗܳܟܺܝܠ ܗܳܢܽܘܢ ܠܪܺܝܫܳܢܳܐ ܕܰܩܪܳܒܳܐ܆ ܘܗܳܕܶܐ ܟܰܕ ܥܰܡܶܗ ܐܰܟܚܕܳܐ ܐܶܣܬܕܰܪܘ ܠܰܩܪܳܒܳܐ܆ ܡܶܛܽܠ ܕܡܶܢ ܥܰܒܕܽܘܬܳܐ ܕܰܡܠܶܐ ܙܰܒܢܳܐ ܐܰܓܗܺܝܘ܆ ܕܰܗܒܳܐ ܝܰܗܒܘ ܟܽܠܶܗ ܗܳܢܳܐ܆ ܪܰܒܳܐ ܗܝ ܗܳܝ ܕܰܚܢܰܢ ܟܶܬܳܢ̈ܶܐ ܙܥܽܘܪ̈ܶܐ ܢܶ݀ܬܶܠ ܠܰܡܫܺܝܚܳܐ܆ ܠܗܰܘ ܕܡܶܢ ܐܳܟܶܠܩܰܪܨܳܐ ܘܡܶܢ ܫ̈ܺܐܕܶܐ ܒܥܶܠ̈ܕܒܳܒܶܐ ܗܳܢܽܘܢ ܕܠܳܐ ܫܰܝܢܳܐ ܘܠܳܐ ܡܶܬܪ̈ܰܥܝܳܢܶܐ ܠܟܽܠܶܗ ܓܶܢܣܳܐ ܕܺܝܠܰܢ ܚܰܪܰܪ܆ ܘܰܙܟܳܐ ܠܰܩܪܳܒܳܐ ܗܰܘ ܕܰܚܢܰܢ ܠܡܰܩܪܳܒܽܘ ܠܳܐ ܡܶܫܟܚܺܝܢ ܚ̱ܢܰܢ܆ ܠܗܰܘ ܕܳܐܦ ܚܰܝ̈ܠܰܘܳܬܳܐ ܗܳܢܽܘܢ ܕܒܰܫܡܰܝܳܐ܆ ܟܰܕ ܡܶܢ ܒܳܬܰܪ ܚܰܫܳܐ ܦܳܪܽܘܩܳܝܳܐ ܘܰܩܝܳܡܬܳܐ ܫܰܢܺܝ ܠܘܳܬ ܪ̈ܰܘܡܶܐ܆ ܐܶܫܬܰܘܕܥܽܘܗ̱ܝ ܕܡܶܢ ܩܪܳܒܳܐ ܦܳܢܶܐ ܗ̱ܘܳܐ ܘܕܰܙܟܳܐ܆ ܟܰܕ ܐܳܡܪܺܝܢ ܗ̱ܘܰܘ܆ ܡܳܪܝܳܐ ܥܰܫܺܝܢܳܐ ܘܚܰܝܠܬܳܢܳܐ܆ ܡܳܪܝܳܐ ܚܰܝܠܬܳܢܳܐ ܒܰܩܪܳܒܳܐ^[44]܆ ܠܪܺܝܫܳܢܳܐ ܓܶܝܪ ܗܰܘ ܕܚܶܫܽܘܟܳܐ ܘܰܕܒܺܝܫܽܘܬܳܐ܆ ܥܰܡ ܦܳܠܚܽܘܬܳܐ ܕܺܝܠܶܗ ܒܺܝܫܬܳܐ ܫܦܰܕ^[45] ܒܰܨܠܺܝܒܳܐ^[46]. ܠܗܳܢܽܘܢ ܕܰܐܝܟܰܢܳܐ ܕܳܐܡܰܪ ܦܰܘܠܽܘܤ܆ ܐܳܦ ܦܰܪܣܺܝ ܟܰܕ ܒܦܰܪܶܗܣܺܝܰܐ ܒܰܙܰܚ ܐܶܢܽܘܢ ܒܶܗ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܰܬܡܳܢܺܝܢ ܘܬܶܫܥܳܐ.

ܠܘܩܐ. 10: 30[1]

[2]ܠܘܩܐ. 10: 25 ـ 27  ܐܦ ܬܶܢܝܢ ܢܡܘܣܐ. 6: 5  ܐܦ ܬܢܝܢ ܢܡܘܣܐ. 11: 13 ܐܦ ܟܗ̈ܢܐ. 19: 18

ܠܘܩܐ. 10: 28 [3]

ܠܘܩܐ. 10: 29 ـ 35 [4]

ܐܫܥܝܐ. 58: 7[5]

ܡܬܝ. 13: 36 [6]

ܡܬܝ. 15: 15 [7]

ܡܬܝ. 13: 10 ـ 11[8]

ܠܦܪܘܫܐ. ܠܦܘܪܫܐ[9]

ܐ. ܩܘܪ̈ܝܢܬܝܐ. 12: 11 [10]

ܠܘܩܐ. 10: 30 [11]

[12]ܙܳܕܶܩ ܠܡܶܕܰܥ ܕܰܒܠܶܫܳܢܳܐ ܝܰܘܢܳܝܳܐ܆ ܫܡܳܐ ܕܚܰܝ̈ܶܐ ܚܕܳܢܳܐܝܬ ܘܢܶܩܒܬܳܢܳܐܝܬ ܡܶܬܩܪܶܐ. ܗܳܢܽܘܢ ܕܰܠܘܳܬܗܽܘܢ ܠܗܰܘ ܕܣܳܡܶܗ ܡܰܠܦܳܢܳܐ ܥܰܠ ܦܽܘܫܳܩܳܐ ܕܰܡܕܺܝܢ̱ܬܳܐ ܡܫܰܦܰܠܬܳܐ ܐܺܝܪܺܝܚܽܘ܆ ܟܰܕ ܐܳܡܰܪ ܕܰܡܫܰܘܕܥܳܐ ܠܚܰܝ̈ܶܐ ܬܥܺܝ̈ܫܶܐ ܕܗܳܢܳܐ ܥܳܠܡܳܐ. ܐܺܝܪܺܝܚܽܘ ܚܕܳܢܳܐܝܬ ܘܢܶܩܒܬܳܢܳܐܝܬ܆ ܘܚܰܝ̈ܶܐ ܗܽܘ ܗܳܟܘܳܬ ܚܕܳܢܳܐܝܬ ܘܢܶܩܒܬܳܢܳܐܝܬ. ܒܳܬܰܪܟܶܢ ܐܰܝܬܺܝ ܗܳܝ ܕܰܠܘܳܬܶܗ܆ ܚܕܳܢܳܐܝܬ ܘܢܶܩܒܬܳܢܳܐܝܬ. ܐܰܝܟܰܢܳܐ ܕܡܶܟܺܝܠ ܫܰܠܺܝܛ ܠܩܳܪܽܘܝܳܐ ܕܰܐܝܟܰܢܳܐ ܕܨܳܒܶܐ ܢܶܩܪܶܐ. ܘܟܰܕ ܐܳܡܰܪ ܗܳܝ ܕܰܠܘܳܬܶܗ܆ ܘܟܰܕ ܐܳܡܰܪ ܗܳܢܽܘܢ ܕܰܠܘܳܬܗܽܘܢ

ܠܘܩܐ. 10: 30 [13]

ܥܒܪ̈ܝܐ. 9: 9 [14]

ܠܘܩܐ. 10: 31 ـ 32 [15]

ܠܘܩܐ. 10: 33 ـ 34 [16]

ܝܘܚܢܢ. 8: 48 [17]

ܡܨܰܥܪܳܢܳܐ[18]

ܒ. ܡܠ̈ܟܐ. 17: 6  ܐܦ 17: 25 ـ 28 [19]

ܘܢܛܘܪܘܬܐ[20]

ܦܪܟܣܝܣ. 17: 28 [21]

ܐ. ܡܠ̈ܟܐ. 16: 24 ـ 25 [22]

ܡܙܡܘܪ̈ܐ. 60: 3 [23]

ܡܬܝ. 9: 13 [24]

ܡܙܡܘܪ̈ܐ. 49: 13  ܐܦ 49: 20[25]

ܐܫܥܝܐ. 53: 4 [26]

ܐܦܣ̈ܝܐ. 5: 30 [27]

ܠܘܩܐ. 10: 34 [28]

ܬܢܝܢ ܢܡܘܣܐ. 23: 3 [29]

ܡܬܝ. 28: 19 [30]

ܦܪܟܣܝܣ. 10: 35 [31]

ܒ. ܩܘܪ̈ܝܢܬܝܐ. 6: 16 [32]

ܠܘܩܐ. 10: 35[33]

ܡܬܝ. 25: 22 ـ 23 [34]

ܡܙܡܘܪ̈ܐ. 140: 7 [35]

ܐܦܣ̈ܝܐ. 4: 9 [36]

ܠܘܩܐ. 10: 36 [37]

ܡܬܝ. 25: 40 [38]

ܢܰܦܶܣ؟[39]

ܡܢܝܢܐ. 9: 10 ـ 11 [40]

ܡ̈ܬܠܐ. 3: 27 ـ 28 [41]

ܡܰܥܦܪܐ (ܢܰܚܬܳܐ ܐܰܝܟ ܦܰܝܢܳܐ)[42]

ܣܦܪ ܕܰܝܳܢ̈ܶܐ. 8: 24 ـ 25 [43]

ܡܙܡܘܪ̈ܐ. 24: 8 [44]

ܕܓܰܫ. ܕܩܰܪ ܒܫܰܦܽܘܕܳܐ[45]

ܩܘܠܣ̈ܝܐ. 2: 14 ـ 15 [46]