ܡܺܐܡܪܳܐ ܕܰܬܡܳܢܺܝܢ ܘܰܬܡܳܢܝܳܐ

ܥܰܠ ܩܰܕܺܝܡܽܘܬ ܥܽܘܬܳܕܳܐ ܕܰܐܝܟ ܥܝܳܕܳܐ ܕܡܰܥܰܠܬܳܐ ܕܰܠܒܶܝܬ ܡܰܥܡܽܘܕܺܝܬܳܐ.

88: ܡܶܣܬܰܒܪܳܐ ܠܺܝ ܗܳܫܳܐ ܡܥܺܝܢܳܐ ܗܳܝ ܕܝܽܘܪܕܢܳܢ܆ ܕܰܠܘܳܬ ܝܰܘܡܳܐ ܗܰܘ ܣܓܺܝܕܳܐ ܕܰܩܝܳܡܬܳܐ ܡܶܬܥܰܬܕܳܐ܆ ܘܕܳܐܚܕܳܐ ܘܟܳܠܝܳܐ ܡܶܛܽܠ ܗܳܕܶܐ ܠܡܰܥܰܠܬܳܐ ܕܰܠܘܳܬܳܗ̇ ܒܰܕܡܽܘܬ ܐܶܡܳܐ ܐ̱ܢܳܫ ܡܶܕܶܡ܆ ܐܺܝܬܶܝܗ̇ ܓܶܝܪ ܐܰܝܟ ܕܒܰܫܪܳܪܳܐ ܐܳܦ ܐܶܡܳܐ ܪܽܘܚܳܢܳܝܬܳܐ܆ ܕܰܠܟܽܘܢ ܒܢܰܝ̈ܳܐ ܫܰܪܺܝܪ̈ܶܐ ܕܺܝܠܳܗ̇ ܬܫܰܕܰܪ ܠܟܰܪܡܶܗ ܕܨܰܘܡܳܐ܆ ܟܰܕ ܒܡܳܪܶܗ ܕܟܰܪܡܳܐ ܡܶܬܕܰܡܝܳܐ ܘܳܐܡܪܳܐ܆ ܙܶܠܘ ܘܰܦܠܽܘܚܘ܆ ܘܠܰܘ ܟܰܕ ܡܦܰܪܩܳܐ ܥܰܡܟܽܘܢ ܕܺܝܢܳܪܳܐ ܒܝܰܘܡܳܐ܆ ܐܰܘ ܟܰܕ ܡܬܰܚܡܳܐ ܕܗܰܘ ܡܳܐ ܕܶܐܢ ܢܶܗܘܶܐ ܕܙܳܕܶܩ ܐܶ݀ܬܶܠ ܠܟܽܘܢ^[1]܆ ܠܰܘ ܓܶܝܪ ܐܰܓܺܝܪ̈ܶܐ ܐܺܝܬܰܝܟܽܘܢ ܐܢ̱ܬܽܘܢ܆ ܐܶܠܳܐ ܒܢܰܝ̈ܳܐ ܕܢܽܘܗܪܳܐ ܡܶܢ ܟܰܕܽܘ ܗܘܰܝܬܽܘܢ. ܠܘܳܬ ܒܢܰܝ̈ܳܐ ܕܶܝܢ ܐܶܡܳܐ܆ ܠܳܐ ܡܦܰܪܩܳܐ ܐܰܓܪܳܐ. ܐܶܠܳܐ ܠܟܽܘܠܶܗ ܥܽܘܬܪܳܐ ܕܩܶܢ̈ܝܳܢܶܝܗ̇܆ ܠܝܰܠ̈ܕܶܐ ܕܟܰܪܣܳܐ ܕܺܝܠܳܗ̇ ܡܟܰܢܫܳܐ ܘܣܳܝܡܳܐ܆ ܘܢܳܛܪܳܐ ܣܰܓܺܝ ܝܰܨܺܝܦܳܐܺܝܬ܆ ܘܰܫܦܺܝܥܳܐܺܝܬ ܘܰܡܫܰܪܬܚܳܐܺܝܬ ܟܽܠܗܶܝܢ ܠܗܽܘܢ ܡܫܰܟܢܳܐ.

ܐܶܬܕܰܟܪܘ ܗܳܟܺܝܠ ܕܡܶܢ ܐܶܡܟܽܘܢ ܠܦܽܘܠܚܳܢܳܐ ܕܟܰܪܡܳܐ ܐܶܫܬܰܕܰܪܬܽܘܢ܆ ܘܥܰܡ ܟܽܠܳܗ̇ ܚܘܺܝܚܽܘܬܳܐ܆ ܘܰܒܟܽܠܶܗ ܚܰܝܠܟܽܘܢ ܠܘܳܬ ܦܽܘܠܚܳܢܳܐ ܙܶܠܘ. ܗܳܕܶܐ ܓܶܝܪ ܐܺܝܬܶܝܗ̇ ܕܺܝܠܳܝܬܳܐ ܕܰܒ̈ܢܰܝܳܐ. ܕܰܐܓܺܝܪ̈ܶܐ ܕܶܝܢ܆ ܗܳܝ ܕܢܡܫܟܘܢ ܒܰܠܚܽܘܕ ܘܢܶܨܛܰܕܽܘܢ ܒܗܰܘ ܕܶܐܓܰܪ ܐܶܢܽܘܢ܆ ܟܰܕ ܡܚܰܘܶܝܢ ܐܶܣܟܺܡܳܐ ܕܦܳܠܚܺܝܢ܆ ܘܒܰܩܛܺܝܪܳܐ ܘܒܰܐܢܰܢܩܺܐ ܢܶܥܡܠܽܘܢ ܒܣܰܒܪܳܐ ܕܰܐܓܪܳܐ܆ ܘܰܠܡܰܥܒܰܪܬܶܗ ܕܝܰܘܡܳܐ ܢܶܫܬܪܰܓܪܓܽܘܢ. ܒܢܰܝ̈ܳܐ ܕܶܝܢ ܗܳܟܺܝܠ ܫܰܦܺܝܪ̈ܰܝ ܬܰܪܥܺܝܬܳܐ܆ ܐܳܦ ܟܰܕ ܠܫܰܦܺܝܪܽܘܬ ܓܶܢܣܳܐ ܕܶܐܡܳܐ ܕܺܝܠܗܽܘܢ ܕܟܺܝܬܳܐ ܘܠܳܐ ܕܰܓܳܠܬܳܐ ܡܫܰܘܙܒܺܝܢ܆ ܓܰܠܝܳܐܺܝܬ ܝܳܕܥܺܝܢ ܕܳܐܦܶܢ ܟܽܠܗܶܝܢ ܢܶܥܒܕܽܘܢ ܠܦܽܘܬ ܢܝܳܚܳܐ ܕܗܳܝ ܕܺܝܠ̣ܶܕܬܗܽܘܢ܆ ܘܠܳܐ ܡܶܕܶܡ ܕܫܳܘܶܐ ܠܒܰܛܢܳܗ̇ ܐܰܘ ܠܚܶܒ̈ܠܶܐ ܐܰܘ ܠܥܰܡܠܳܐ܆ ܡܶܫܟܚܺܝܢ ܕܢܶܦܪܥܽܘܢܳܗ̇. ܘܰܐܝܟ ܕܰܒܚܰܘܒܬܳܐ ܝܰܬܺܝܪܳܐܺܝܬ ܕܡܶܢ ܟܽܠܗܶܝܢ ܚܰܘ̈ܒܳܬܳܐ ܕܛܳܒ ܟܺܐܢܳܐ܆ ܗܽܘ ܢܝܳܚܳܐ ܕܶܐܡܳܐ ܐܺܝܬܰܘܗ̱ܝ ܘܠܰܘ ܕܛܰܝܒܽܘܬܳܐ. ܐܬܒܥܘ ܕܶܝܢ ܐܢ̱ܬܽܘܢ ܕܰܐܝܠܶܝܢ ܚܠܳܦ ܐܰܝܠܶܝܢ܆ ܟܰܕ ܐܶܡܳܐ ܪܽܘܚܳܢܳܝܬܳܐ ܒܶܗ ܢܶܣܒܰܬܟܽܘܢ ܒܶܛܢܰܬ ܒܶܗ ܒܝܰܘܡܳܐ ܘܚܶܒܠܰܬ̣ ܘܝܶܠܕܰܬ̣.

ܐܶܠܳܐ ܐܶܢ ܫܳܦܪܳܐ ܡܶܢ ܫܠܺܝܚܳܐ ܢܺܐܠܰܦ ܠܚܰܝܠܳܐ ܕܗܳܠܶܝܢ ܚܶܒ̈ܠܶܐ ܐܰ‌ܠܳܗܳܝ̈ܶܐ܆ ܘܰܠܫܽܘܚܠܳܦܳܐ ܕܡܶܢ ܫܶܠܝ ܕܗܳܢܽܘܢ ܕܶܐܬܒܛܶܢܘ ܐܰܟܚܕܳܐ ܘܶܐܬܪܰܒܺܝܘ ܒܟܰܪܣܳܐ ܘܶܐܬܺܝܠܶܕܘ. ܡܳܢܳܐ ܗܳܟܺܝܠ ‌ܐܳܡܰܪ. ܐܺܝܬܰܝܢ ܗ̱ܘܝܢ ܓܶܝܪ ܒܰܙܒܰܢ ܐܳܦ ܚܢܰܢ ܕܠܳܐ ܗܰܘܢܳܐ. ܠܳܐ ܡܶܬܬܦܺܝ̈ܣܳܢܶܐ ܘܛܳܥܶܝܢ ܗ̱ܘܰܝܢ܆ ܕܦܳܠܚܺܝܢ ܗ̱ܘܰܝܢ ܥܰܒܕܽܘܬܐ ܠܰܪ̈ܓܺܝܓܳܬܳܐ ܘܰܠܗܰܢܺܝܽܐܘܬܳܐ ܡܫܰܚܠܰܦܬܳܐ܆ ܟܰܕ ܒܒܺܝܫܽܘܬܳܐ ܘܒܰܚܣܳܡܳܐ ܡܶܬܕܰܒܪܺܝܢ ܗ̱ܘܰܝܢ ܣܢܺܝ̈ܐܶܐ܆ ܕܣܳܢܶܝܢ ܠܰܚ̈ܕܳܕܶܐ. ܐܶܡܰܬܝ ܕܶܝܢ ܕܒܰܣܺܝܡܽܘܬܶܗ ܘܪܶܚܡܰܬ ܐ̱ܢܳܫܽܘܬܶܗ ܕܰܐ‌ܠܳܗܳܐ ܦܳܪܽܘܩܰܢ ܐܶܬܕܰܢܚܰܬ ܥܠܰܝܢ܆ ܠܰܘ ܡܶܢ ܥ̈ܒܳܕܶܐ ܗܳܢܽܘܢ ܕܰܒܙܰܕܺܝܩܽܘܬܳܐ ܚܢܢ ܥܒܰܕܢܰܢ܆ ܐܶܠܳܐ ܐܰܝܟ ܪ̈ܰܚܡܶܐ ܕܺܝܠܶܗ܆ ܦܰܪܩܰܢ ܒܝܰܕ ܣܚܳܬܳܐ ܕܡܰܘܠܳܕܳܐ ܕܡܶܢܕܪܺܝܫ ܘܚܽܘܕܳܬܳܐ ܕܡܶܢ ܕܪܺܝܫ ܕܪܽܘܚܳܐ ܩܰܕܺܝܫܳܐ܆ ܗܰܘ ܕܰܐܫܦܰܥ ܥܠܰܝܢ ܥܰܬܺܝܪܳܐܺܝܬ ܒܝܰܕ ܝܶܫܽܘܥ ܡܫܺܝܚܳܐ ܦܳܪܽܘܩܰܢ. ܐܰܝܟܰܢܳܐ ܕܟܰܕ ܒܛܰܝܒܽܘܬܶܗ ܕܗܰܘ ܕܶܐܙܕܰܕܰܩܢܰܢ܆ ܝܳܪ̈ܬܶܐ ܢܶܗܘܶܐ ܒܣܰܒܪܳܐ ܕܚܰܝ̈ܶܐ ܕܰܠܥܳܠܰܡ. ܫܳܡܰܥ ܐܰܢ̱ܬ ܣܚܳܬܳܐ ܕܡܰܘܠܳܕܳܐ ܕܡܶܢ ܕܪܺܝܫ. ܫܳܡܰܥ ܐܰܢ̱ܬ ܚܽܘܕܳܬܳܐ ܕܡܶܢ ܕܪܺܝܫ ܕܪܽܘܚܳܐ܆ ܐܺܝܬ ܠܳܟ ܡܰܢ ܬܰܡܳܢ ܣܽܘܟܳܠܳܐ ܡܶܢܗܶܝܢ ܕܡ̈ܶܠܶܐ. ܟܰܕ ܓܶܝܪ ܐܰܣܚܝܰܬ ܐܶܡܳܐ ܘܡܶܪܩܰܬ ܝܶܠܕܰܬ. ܠܳܐ ܐܰܣܚܝܰܬ ܒܰܠܚܽܘܕ܆ ܐܶܠܳܐ ܐܳܦ ܝܶܠܕܰܬ. ܕܰܣܚܳܬܳܐ ܡܰܢ ܓܶܝܪ ܕܺܝܠܳܝܬܳܐ ܐܺܝܬܶܝܗ̇܆ ܕܰܠܨܳܐܬܳܐ ܕܒܺܝܫܽܘܬܳܐ ܢܫܺܝܓ. ܕܝܠܕܐ ܕܶܝܢ܆ ܗܳܝ ܕܳܐܦ ܠܝܽܘܩ̈ܢܶܐ ܕܛܰܝܒܽܘܬܳܐ ܢܶܪܫܽܘܡ ܘܰܢܫܰܘܕܰܥ ܘܰܢܣܺܝܡ ܒܗܳܢܽܘܢ ܕܡܶܬܝܰܠܕܺܝܢ܆ ܐܰܝܟ ܕܺܝܠ̈ܳܝܴܬܳܐ ܟܝܳܢܳܝ̈ܳܬܳܐ. ܡܶܛܽܠ ܗܳܕܶܐ ܐܳܦ ܠܘܳܬ ܡܶܬܚܰܘܝܳܢܽܘܬܳܗ̇ ܕܗܳܕܶܐ܆ ܠܗܳܢܽܘܢ ܕܒܶܗ ܒܫܽܘܪܳܝܳܐ ܐܶܫܬܰܡܠܺܝܘ ܡܶܢ ܫܠܺܝ̈ܚܶܐ ܒܰܥܡܳܕܳܐ ܐܰ‌ܠܳܗܳܝܳܐ ܡܶܫܟܚܺܝܢ ܚ̱ܢܰܢ܆ ܕܥܰܡܳܗ̇ ܕܡܰܣܰܩܬܳܐ ܕܡܶܢ ܡܰܝ̈ܳܐ ܡܡܰܠܠܺܝܢ ܗܘܰܘ ܒܠܶܫܳܢ̈ܶܐ ܘܡܶܬܢܰܒܶܝܢ ܗܘܰܘ^[2]܆ ܘܰܕܫܽܘܘ̈ܕܳܥܶܐ ܕܝܰܠܕܳܐ ܐܶܡܗܳܝܳܐ ܡܰܝܬܶܝܢ ܗ̱ܘܰܘ܆ ܘܰܒܗܳܠܶܝܢ ܡܰܨܡܚܺܝܢ ܗ̱ܘܰܘ. ܗܳܝܕܶܝܢ ܓܶܝܪ ܐܳܦ ܙܰܒܢܳܐ ܕܳܐܬܘ̈ܳܬܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܕܟܳܪܽܘܙܽܘܬܐ ܕܶܐܘܰܢܓܶܠܺܝܽܘܢ ܬܶܬܦܰܬܶܐ ܘܰܠܫܽܘܘܫܳܛܳܐ ܬܺܐܬܶܐ܆ ܘܬܶܚܒܽܘܫ ܠܟܽܘܠܗܽܘܢ ܥܰܡ̱ܡ̈ܶܐ ܕܰܠܘܳܬ ܕܶܚܠܰܬ ܫ̈ܺܐܕܶܐ ܐܰܒܳܗܳܝܬܳܐ ܪܟܺܝܢܺܝܢ ܗ̱ܘܰܘ܆ ܘܥܰܣ̈ܩܰܝ ܠܡܶܬܦܪܳܩܽܘ ܐܺܝܬܰܝܗܽܘܢ ܗ̱ܘܰܘ܆ ܘܠܳܐ ܡܶܬܬܙܺܝܥܳܢܳܐܺܝܬ ܐܺܝܬ ܗ̱ܘܳܐ ܠܗܽܘܢ ܗܳܝ ܕܝܰܬܺܝܪ ܫܰܪܺܝܪܳܐ ܠܡܺܐܡܰܪ. ܐܶܠܳܐ ܡܶܢ ܟܺܐܦ̈ܶܐ ܗܳܠܶܝܢ ܕܕܰܐܝܟ ܗܳܟܰܢ ܬܶܕܡܪ̈ܳܬܳܐ ܘܳܐܬܘ̈ܳܬܳܐ ܬܡܺܝܗܳܐܺܝܬ ܐܩܝ̈ܡܢ ܒܢܰܝ̈ܳܐ ܠܰܐܒܪܳܗܳܡ^[3]. ܐܳܬܘ̈ܳܬܳܐ ܓܶܝܪ ܘܫܽܘ̈ܟܳܢܶܐ ܗܳܢܽܘܢ ܕܡܶܢ ܪܽܘܚܳܐ ܩܰܕܺܝܫܳܐ ܠܘܳܬ ܣܽܘܢܩܳܢܳܐ ܡܶܬܬܰܥܒ̈ܕܳܢ܆ ܘܠܰܘ ܠܘܳܬ ܡܶܬܚܰܘܝܳܢܽܘܬܳܐ. ܡܶܛܽܠ ܕܳܐܦ ܗܳܫܳܐ ܗܺܝ ܟܰܕ ܗܺܝ ܛܰܝܒܽܘܬܳܐ ܐܺܝܬܶܝܗ̇. ܡܫܰܡܠܰܝܬܳܐ ܟܺܝܬ ܘܠܳܐ ܚܰܣܺܝܪܬܳܐ܆ ܘܕܳܐܦ ܠܳܐ ܒܡܶܕܶܡ ܡܫܰܚܠܦܳܐ. ܘܶܐ‌ܠܽܘ ܩܳܪܶܐ ܗ̱ܘܳܐ ܙܰܒܢܳܐ܆ ܡܶܢ ܟܽܠ ܦܪܽܘܤ ܗܳܢܽܘܢ ܕܥܳܡܕܺܝܢ ܗ̱ܘܰܘ ܐܳܦ ܐܳܬܘ̈ܳܬܳܐ ܘܚܰܝ̈ܠܶܐ ܡܰܥܒܕܺܝܢ ܗ̱ܘܰܘ. ܟܰܕ ܠܰܡܫܺܝܚܳܐ ܠܒܺܝܫܺܝܢ ܘܪܽܘܚܶܗ ܐܺܝܬ ܠܗܽܘܢ܆ ܗܰܘ ܕܟܽܘܠܗܶܝܢ ܡܰܥܒܶܕ ܘܰܡܫܰܡܠܶܐ. ܙܰܒܢܳܐ ܓܶܝܪ ܕܟܽܠ ܣܽܘܥܪܳܢܳܐ^[4] ܐܰܝܟ ܡܶܠܬܶܗ ܕܩܽܘܗܠܰܬ. ܐܳܦ ܓܶܝܪ ܠܰܘ ܦܰܘܠܽܘܤ ܐܺܝܬܰܘܗ̱ܝ ܐܰܘ ܐܦܰܘܠܽܘܤ ܗܰܘ ܕܡܰܥܡܶܕ܆ ܐܶܠܳܐ ܗܽܘ ܐܰ‌ܠܳܗܳܐ^[5].

ܟܰܕ ܗܳܟܺܝܠ ܡܶܢ ܡܰܘܠܕܳܐ ܗܳܢܳܐ ܪܽܘܚܳܢܳܐ ܗܘ̣ܰܝܬܽܘܢ܆ ܗܰܘ ܕܺܝܠܶܕܬܟܽܘܢ ܡܥܺܝܢܳܐ ܗܳܝ ܐ̱ܪܳܙܳܢܳܝܬܳܐ ܕܝܽܘܪܕܢܳܢ܆ ܚ̈ܰܕܬ̣ܶܐ ܡܶܕܶܡ ܚܠܳܦ ܥܰܬܺܝ̈ܩܶܐ܆ ܡܶܢ ܠܳܐ ܡܶܬܬܦܺܝܣܳܢܽܘܬܳܐ ܡܗܰܝܡ̈ܢܶܐ܆ ܡܶܢ ܥܰܒܕܽܘܬܳܐ ܕܰܚܛܺܝܬܳܐ ܒܢܰܝ̈ܳܐ ܘܥܰܒ̈ܕܶܐ ܕܰܐ‌ܠܳܗܳܐ܆ ܡܶܢ ܛܳܥܝܽܘܬܳܐ ܫܰܪܺܝܪ̈ܶܐ܆ ܚܠܳܦ ܣܳܓ̈ܕܰܝ ܠܰܥ̈ܒܳܕܶܐ ܣܳܓ̈ܕܰܝ ܠܥܳܒܽܘܕܳܐ܆ ܡܶܢ ܢܽܘܟܪ̈ܳܝܶܐ ܝܳܪ̈ܽܘܬܶܐ ܕܰܐܒܳܐ ܫܡܰܝܳܢܳܐ܆ ܘܰܒ̈ܢܰܝ ܝܳܪܬܽܘܬܳܐ ܕܰܡܫܺܝܚܳܐ܆ ܒܰܐܝܠܶܝܢ ܦܽܘܪ̈ܥܳܢܶܐ ܕܫܳܘܶܝܢ ܬܶܫܟܚܽܘܢ ܠܡܶܦܪܰܥ ܠܶܐܡܳܐ ܗܳܝ ܕܗܳܟܰܢܳܐ ܐܺܝܬܶܝܗ̇ ܫܰܦܺܝܪܰܬ ܒܢܰܝ̈ܳܐ܆ ܫܰܦܺܝܪܳܐ ܕܶܝܢ ܠܡܰܘܣܳܦܽܘ ܐܳܦ ܣܰܓܺܝܰܐܬ ܒܢܰܝ̈ܳܐ. ܐܳܦ ܓܶܝܪ ܐܺܝܬܶܝܗ̇ ܬܰܪ̈ܬܰܝܗܶܝܢ ܐܰܟܚܕܳܐ. ܦܽܘܪܥܳܢܳܐ ܗܳܟܺܝܠ ܡܰܢ ܕܰܫܘܳܐ܆ ܐܳܦܠܳܐ ܚܰܕ ܡܶܫܟܰܚ ܐ̱ܢܳܫ.

ܣܰܓܺܝ ܕܶܝܢ ܡܚܰܕܝܳܐ ܠܳܗ̇܆ ܗܳܝ ܕܬܶܪܗܛܽܘܢ ܠܰܘ ܡܶܢ ܥܳܩܬܳܐ ܐܰܘ ܡܶܢ ܐܰܢܰܢܩܺܐ ܠܘܳܬ ܟܰܪܡܳܐ ܕܨܰܘܡܳܐ܆ ܐܶܠܳܐ ܒܦܰܪܨܽܘܦܳܐ ܚܰܕܳܝܳܐ ܘܰܕܓܳܚܶܟ ܘܰܒܪܶܥܝܳܢܳܐ ܦܨܺܝܚܳܐ. ܠܚܰܕܳܝܳܐ ܓܶܝܪ ܠܰܘ ܠܝܳܗܽܘܒܳܐ ܒܰܠܚܽܘܕ ܪܳܚܶܡ ܐܰ‌ܠܳܗܳܐ^[6]܆ ܐܶܠܳܐ ܐܳܦ ܠܥܰܒܕܳܐ ܐܰܘ ܟܺܝܬ ܦܳܥܠܳܐ. ܫܳܒܶܩ ܐ̱ܢܳܐ ܓܶܝܪ ܠܡܺܐܡܰܪ ܕܗܰܘ ܕܠܶܐܡܶܗ ܦܳܠܰܚ܆ ܠܢܰܦܫܶܗ ܦܳܠܰܚ ܝܰܬܺܝܪܳܐܺܝܬ܆ ܐܰܘ ܕܰܠܗܳܝ ܥܳܡܶܠ ܡܶܣܬܒܰܪ. ܩܰܕܡܳܐܺܝܬ ܡܰܢ܆ ܟܰܕ ܡܣܰܟܶܐ ܠܰܡܩܰܒܠܳܢܽܘܬܳܐ ܕܝܳܪܬܽܘܬܳܐ ܐܶܡܗܳܝܬܳܐ. ܒܳܬܰܪܟܶܢ ܕܶܝܢ܆ ܘܟܰܕ ܠܒܽܘܪܟܬܳܐ ܡܶܚܕܳܐ ܝܰܬܺܝܪܳܐܺܝܬ ܥܳܦܶܐ. ܕܒܽܘܪܟܬܳܐ ܓܶܝܪ ܕܶܐܡܳܐ ܣܳܡܟܳܐ ܠܒ̈ܳܬܶܐ ܕܰܒ̈ܢܰܝܳܐ܆ ܠܡܶܠܬܳܐ ܐܰ‌ܠܳܗܳܝܬܳܐ ܫܡܰܥ ܕܳܐܡܪܳܐ^[7].

ܟܰܕ ܗܳܟܺܝܠ ܠܓܰܘ ܡܶܢ ܟܰܪܡܳܐ ܕܨܰܘܡܳܐ ܗܘ̣ܰܝܬܽܘܢ܆ ܐܳܦ ܓܶܝܪ ܠܳܐ ܐܰ݀ܪܚܶܩ ܡܶܢ ܗܳܢܳܐ ܫܡܳܐ ܟܰܕ ܠܥܶܠ ܘܰܠܬܰܚܬ ܟܰܪܡܳܐ ܩܳܪܶܐ ܐ̱ܢܳܐ܆ ܐܰܝܟܰܢܳܐ ܕܠܳܐ ܬܶܗܘܽܘܢ ܠܳܐ ܥܳܗ̈ܕܶܐ ܕܦܽܘܠܚܳܢܳܐ܆ ܟܰܕ ܒܕܺܝܩܶܠܰܐ ܕܰܡܚܰܡܣܢܳܢܽܘܬܳܐ ܚܳܦܪܺܝܢ ܐܢ̱ܬܽܘܢ ܠܡܰܪ̈ܢܝܳܬܳܐ ܐܰܪ̈ܥܳܢܳܝܳܬܳܐ ܥܕܰܡܳܐ ܠܥܽܘܡܩܳܐ܆ ܠܰܒܪ ܡܶܢ ܥܶܩܳܪ̈ܶܝܗ̇ ܕܣܰܬܐ ܥܒܰܕܘ ܐܶܢܶܝܢ܆ ܟܰܕ ܠܟܽܠ ܡܽܘܢ ܕܺܐܝܬܰܘܗ̱ܝ ܡܰܘܠܕܳܢܳܐ ܘܡܰܘܬܪܳܢܳܐ ܡܒܰܝܬܶܝܢ ܐܢ̱ܬܽܘܢ ܠܳܗ̇ ܒܰܠܚܽܘܕ܆ ܟܽܠܡܳܐ ܕܶܝܢ ܕܺܐܝܬܰܘܗ̱ܝ ܠܳܗ̇ ܠܳܐ ܡܰܦܪܚܳܐ ܘܥܳܒܽܘܕܳܐ ܕܟܽܘ̈ܒܶܐ ܐܰܘ ܕܩܽܘܪ̈ܛܒܶܐ܆ ܡܫܰܘܪܺܝܢ ܐܢ̱ܬܽܘܢ ܘܫܳܕܶܝܢ ܐܢ̱ܬܽܘܢ ܡܶܢܳܗ̇ ܠܪܽܘܚܩܳܐ. ܘܟܰܕ ܠܡܰܓܠܳܐ ܕܶܝܢ܆ ܠܦܳܪܽܘܫܽܘܬܳܐ ܐܳܡܰܪ ܐ̱ܢܳܐ ܗܳܝ ܪܽܘܚܳܢܳܝܬܳܐ ܫܰܦܺܝܪ ܠܳܛܫܺܝܢ ܐܢ̱ܬܽܘܢ. ܟܽܠܗܶܝܢ ܡܰܢ ܗܳܠܶܝܢ ܕܺܐܝܬܰܝܗܶܝܢ ܫܒܶܫ̈ܬܶܐ ܕܠܳܚ̈ܡܳܢ ܠܝܰܩܕܳܢܳܐ ܘܺܐܝܬܰܝܗܶܝܢ ܫܓܳܪܳܐ ܕܢܽܘܪܳܐ ܕܓܺܗܰܢܳܐ ܗܳܝ ܕܰܓܙܺܝܡܳܐ܆ ܬܰܪ̈ܥܝܳܬܳܐ ܚܰܫܳܢܳܝ̈ܳܬܳܐ ܘܚܽܘܫܳܒ̈ܶܐ ܨ̈ܳܐܶܐ ܘܰܢܕܺܝ̈ܕܶܐ. ܠܗܳܠܶܝܢ ܣܰܓܺܝ ܝܰܕܽܘܥܬܳܢܳܐܺܝܬ ܦܣܽܘܩܘ. ܟܰܕ ܫܳܒܩܺܝܢ ܐܢ̱ܬܽܘܢ ܒܰܠܚܽܘܕ ܗܳܠܶܝܢ ܕܡܶܫܟ̈ܚܳܢ ܠܡܰܝܬܳܝܽܘ ܦܺܐܪ̈ܶܐ. ܗܳܠܶܝܢ ܕܶܝܢ ܐܺܝܬܰܝܗܶܝܢ ܫܩܳܠ ܛܰܥܢܳܐ ܝܨܝܦܬܐ ܕܰܡܝܰܬܪ̈ܳܬܳܐ. ܙܳܕܶܩ ܕܶܝܢ ܡܶܟܺܝܠ ‌ܐܳܦ ܒܡܰܝ̈ܳܐ ܕܪܶܚܡܰܬ ܡܶܣ̈ܟܺܢܶܐ ܢܰܫܩܶܝܗ̇ ܥܰܬܺܝܪܳܐܺܝܬ ܠܰܓܦܶܬܳܐ. ܡܫܺܝܚܳܐ ܕܶܝܢ ܐܺܝܬܰܘܗ̱ܝ ܓܦܶܬܳܐ܆ ܗܰܘ ܕܠܰܫ̈ܒܶܫܬܶܐ ܗܳܠܶܝܢ ܕܰܡܝܰܬܪ̈ܳܬܳܐ ܡܒܰܝܬܶܐ ܠܶܗ ܘܳܐܡܰܪ܆ ܐܶܢܳܐ ܐܺܝܬܰܝ ܓܦܶܬܳܐ܆ ܐܢ̱ܬܽܘܢ ܕܶܝܢ ܫܒܶܫ̈ܬܶܐ^[8]. ܡܶܛܽܠ ܗܳܕܶܐ ܘܟܰܕ ܥܰܬܺܝܪܳܐܺܝܬ ܡܶܬܬܰܫܩܶܐ ܐܳܡܰܪ ܬܽܘܒ ܠܗܳܢܽܘܢ ܕܡܰܫܩܶܝܢ܆ ܨܗܺܝܬ̣ ܘܰܐܫܩܺܝܬܽܘܢܳܢܝ^[9].

ܬܶܬܣܺܝܡ ܕܶܝܢ ܠܘܳܬ ܪܶܚܡܰܬ ܥܰܡ̈ܠܶܐ܆ ܐܳܦ ܬܶܫܡܶܫܬܳܐ ܥܺܝܪܬܳܐ ܕܙܽܘܡܳܪܳܐ ܕܢܳܛܪܳܐ ܒܠܶܠܝܳܐ܆ ܕܕܰܠܡܳܐ ܐܳܟܶܠܩܰܪܨܳܐ ܗܰܘ ܓܰܢܳܒܳܐ ܒܺܝܫܳܐ ܘܫܺܐܕܳܐ ܚܰܣܳܡܳܐ܆ ܢܢܰܣܶܐ ܒܝܰܕ ܦܽܘܪ̈ܳܣܶܐ ܡܶܕܶܡ ܨܢܺܝ̈ܥܶܐ ܘܰܟܣܰܝ̈ܳܐ ܠܰܡܚܰܠܳܨܽܘܬܶܗ ܠܰܣܓܽܘܠܳܐ.

ܢܶܗܘܶܐ ܐܺܝܬ ܠܟܽܘܢ ܕܶܝܢ܆ ܐܳܦ ܠܰܢ ܕܥܰܡܟܽܘܢ ܐܰܟܚܕܳܐ ܫܳܗܪܺܝܢܰܢ ܘܰܐܟܚܕܳܐ ܢܳܛܪܺܝܢܰܢ܆ ܒܰܠܚܽܘܕ ܠܘܳܬ ܗܳܝ ܬܰܚܘܺܝܬܳܐ ܠܳܐ ܬܶܛܥܽܘܢ܆ ܕܗܳܢܽܘܢ ܕܰܒܫܳܥܬܳܐ ܬܠܺܝܬܳܝܬܳܐ ܘܗ̱ܝ ܫܬܺܝܬܳܝܬܳܐ ܘܗ̱ܝ ܕܰܬܫܰܥ ܘܗ̱ܝ ܕܰܚܕܰܥܶܣܪ̈ܶܐ ܩܳܝܡܺܝܢ ܗ̱ܘܰܘ ܒܰܛܺܝ̈ܠܶܐ ܒܫܽܘܩܳܐ^[10]܆ ܘܗܳܝܕܶܝܢ ܐܶܙܰܠܘ ܠܟܰܪܡܳܐ܆ ܘܰܬܣܰܟܽܘܢ ܕܬܰܪ̈ܬܶܝܢ ܐܰܘ ܬܠܳܬ ܫܰܒ̈ܶܐ ܐܰܘ ܐܳܦ ܣܰܓܺܝ̈ܳܐܬܳܐ ܢܶܥܒܪ̈ܳܢ ܡܶܢ ܨܰܘܡܳܐ܆ ܘܗܳܟܰܢܳܐ ܒܦܽܘܠܚܳܢܳܐ ܐܰܘ ܟܺܝܬ ܒܰܡܚܰܡܣܢܳܢܽܘܬܳܐ ܬܫܰܪܽܘܢ. ܗܰܘ ܓܶܝܪ ܕܰܨܢܺܝܥܳܐܺܝܬ ܠܗܳܕܶܐ ܥܳܒܶܕ ܟܰܕ ܡܶܬܛܰܟܰܢ܆ ܠܣܳܐܶܡ ܢܳܡܽܘܣܳܐ ܠܳܐ ܛܳܥܶܐ. ܕܳܐܦ ܐܺܝܬܰܘܗ̱ܝ ܕܕܳܡܶܐ܆ ܠܗܳܢܽܘܢ ܕܳܐܡܪܺܝܢ ܕܢܶܥܒܶܕ ܒܺܝ̈ܫܳܬܳܐ܆ ܐܰܝܟܰܢܳܐ ܕܢܶܐܬܝ̈ܳܢ ܥܠܰܝܢ ܛܳܒ̈ܳܬܳܐ܆ ܕܗܳܢܽܘܢ ܕܕܺܝܢܗܽܘܢ ܟܺܐܢܳܐ ܐܺܝܬܰܘܗ̱ܝ^[11] ܐܰܝܟܰܢܳܐ ܕܳܐܡܰܪ ܦܰܘܠܽܘܤ. ܗܳܐ ܓܶܝܪ ܩܳܕܶܡ ܐ̱ܢܳܐ ܐܳܡܰܪ ܐ̱ܢܳܐ ܠܟܽܘܢ ܕܰܠܟܽܠܗܽܘܢ ܝܰܘ̈ܡܳܬܳܐ ܕܨܰܘܡܳܐ ܐܰܝܟ ܫܳܥܬܳܐ ܚܕܳܐ ܗܳܝ ܕܰܚܕܰܥܶܣܪ̈ܶܐ ܚܫܽܘܒܘ ܠܗܽܘܢ܆ ܘܥܰܡ ܚܺܝܨܽܘܬܳܐ ܐܶܬܚܰܦܛܘ܆ ܘܡܶܢ ܥܰܡ̈ܠܶܐ ܡܰܘܬܪ̈ܳܢܶܐ ܠܳܐ ܬܶܦܕܽܘܢ. ܐܳܦ ܓܶܝܪ ܐܶܢ ܟܰܕ ܨܗܶܝܢ ܐܢ̱ܬܽܘܢ ܡܶܢ ܥܰܡ̈ܠܶܐ ܕܰܐܪܥܳܐ ܘܕܳܥܬܺܝܢ ܐܢ̱ܬܽܘܢ ܬܡܰܢܥܽܘܢ ܠܘܳܬ ܝܰܘܡܳܐ ܕܰܩܝܳܡܬܳܐ܆ ܬܶܚܙܽܘܢܳܗ̇ ܠܶܐܡܳܐ ܡܥܺܝܢܳܐ ܗܳܝ ܕܝܽܘܪܕܢܳܢ ܚܳܕܝܳܐܺܝܬ܆ ܕܡܰܒ̣ܥܳܐ ܡܰܝ̈ܳܐ ܕܰܚܠܺܝܛܺܝܢ ܠܳܐ ܡܶܬܚܰܙܝܳܢܳܐܺܝܬ ܥܰܡ ܪܽܘܚܳܐ. ܘܟܰܕ ܐܰܦܰܝ̈ܟܽܘܢ ܣܳܝܡܺܝܢ ܐܢ̱ܬܽܘܢ ܥܠܶܝܗ̇ ܘܝܳܗܒܺܝܢ ܐܢ̱ܬܽܘܢ ܠܳܗ̇ ܫܠܳܡܳܐ܆ ܬܶܬܦܰܝܓܽܘܢ ܘܬܶܣܒܽܘܢ ܢܝܳܚܬܳܐ ܕܥܰܡ̈ܠܶ‍ܐ ܕܺܝܠܟܽܘܢ܆ ܟܰܕ ܗܳܘܶܝܢ ܐܢ̱ܬܽܘܢ ܡ̈ܠܰܝܳܐ ܡܶܢ ܒܽܘܪ̈ܟܳܬܳܐ ܕܡܶܢ ܬܰܡܳܢ. ܬܶܪܘܽܘܢ ܕܶܝܢ ܐܳܦ ܒܟܳܣܳܐ ܕܰܕܡܳܐ ܗܰܘ ܕܪܰܘܳܝܽܘܬܳܐ ܕܝܰܬܺܝܪ ܡܶܢ ܟܽܠ ܥܰܫܺܝܢܳܐ ܘܚܰܝܠܬܳܢܝܳܐ ܡܰܪܘܶܐ܆ ܐܰܝܟܰܢܳܐ ܕܰܡܙܰܡܰܪ ܕܰܘܺܝܕ. ܕܚܰܝܠܳܐ ܓܶܝܪ ܐܺܝܬܰܘܗ̱ܝ ܟܳܣܳܐ^[12]. ܪܰܘܳܝܽܘܬܳܐ ܡܰܢ ܓܶܝܪ ܗܳܝ ܕܡܶܢ ܠܳܐ ܡܡܰܙܓܽܘܬܶܗ ܕܚܰܡܪܳܐ܆ ܕܰܡܫܰܪܝܽܘܬܳܐ ܐܺܝܬܶܝܗ̇ ܘܕܰܡܪܰܦܝܽܘܬܳܐ. ܗܳܝ ܕܶܝܢ ܕܫܶܩܝܳܐ ܪܽܘܚܳܢܳܐ܆ ܕܥܽܘܫܢܳܐ ܘܰܕܚܰܝܠܳܐ. ܠܽܘܩܒܰܠ ‌ܐܳܟܶܠ ܩܰܪܨܳܐ ܘܫ̈ܺܐܕܶܐ܆ ܘܠܽܘܩܒܰܠ ܚܰܫ̈ܶܐ ܗܳܢܽܘܢ ܕܨܰܥܪܳܐ. ܡܶܢ ܗܳܢܽܘܢ ܕܳܐܦ ܢܶܬܦܰܨܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܟܽܠ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܡ ܡܐܡܪܐ ܕܬܡܢܝܢ ܘܬܡܢܝܐ.

ܡܬܝ. 20: 2 ـ 5 [1]

ܦܪܟܣܝܣ. 19: 6 [2]

ܡܬܝ. 3: 9 [3]

ܩܘܗܠܰܬ. 3: 1 [4]

ܐ. ܩܘܪ̈ܝܢܬܝܐ. 3: 8[5]

ܒ. ܩܘܪ̈ܝܢܬܝܐ. 9: 7 [6]

ܩܘܗܠܰܬ. 3: 11 [7]

ܝܘܚܢܢ. 15: 5 [8]

ܡܬܝ. 25: 35 [9]

ܡܬܝ. 20: 3 ـ 6 [10]

ܪ̈ܗܘܡܝܐ. 3: 8[11]

ܡܙܡܘܪ̈ܐ. 23: 5 [12]