ܡܺܐܡܪܳܐ ܕܰܬܡܳܢܺܝܢ ܘܫܰܒܥܳܐ

ܥܰܠ ܨܰܘܡܳܐ܆ ܕܺܐܝܬܰܘܗ̱ܝ ܕܰܐܪܒܥܳܐ.

87: ܬܰܪܥܳܐ ܫܒܺܝܚܳܐ ܘܰܕܣܰܓܺܝ ܐܺܝܬܰܘܗ̱ܝ ܡܰܠܟܳܝܳܐ܆ ܨܰܘܡܳܐ ܣܺܝܡ ܩܕܳܡܰܝܢ ܗܳܫܳܐ܆ ܗܰܘ ܕܒܺܐܝܕܰܘ̈ܗ̱ܝ ܐܺܝܬܶܝܗ̇ ܕܗܰܘ ܕܥܳܐܶܠ ܒܶܗ ܢܶܚܙܶܐ ܠܡܰܠܟܳܐ ܕܬܳܫܒܽܘܚܬܳܐ^[1]܆ ܠܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ܆ ܐܰܝܟ ܕܡܰܨܝܳܐ ܠܰܒܢܰܝ̈ܢܳܫܳܐ ܠܡܶܚܙܳܐ. ܘܛܳܒ ܟܺܐܢܳܐܺܝܬ. ܛܽܘܒܰܝܗܽܘܢ ܓܶܝܪ ܐܳܡܰܪ ܠܰܐܝܠܶܝܢ ܕܰܕܟܶܝܢ ܒܠܶܒܗܽܘܢ ܕܗܶܢܽܘܢ ܢܶܚܙܽܘܢ ܠܰܐܠܳܗܳܐ^[2]. ܡܳܢܳܐ ܕܶܝܢ ܗܳܟܰܢܳܐ ܡܶܫܟܰܚ ܠܰܡܕܰܟܳܝܽܘ ܐܰܝܟ ܨܰܘܡܳܐ܆ ܕܠܰܪ̈ܓܺܝܓܳܬܳܐ ܡܰܢ ܡܫܰܠܗܒܳܢ̈ܝܳܬܳܐ ܕܒܶܣܪܳܐ ܡܫܰܗܶܐ ܘܡܰܩܗܶܐ܆ ܡܶܢ ܟܽܠ ܟܽܘܬܡܳܐ ܕܶܝܢ ܡܳܪܶܩ ܠܒܰܪܢܳܫܳܐ ܗܰܘ ܕܡܶܢ ܠܓܰܘ܆ ܐܰܝܟܰܢܳܐ ܕܡܰܙܗܪܳܐ ܘܰܡܪܺܝܩܳܐ ܢܶܗܘܶܐ ܐܺܝܬܰܘܗ̱ܝ ܗܰܘܢܳܐ ܘܕܰܡܚܰܪܰܪ ܡܶܢ ܥܰܪܦܶܠܳܐ ܗܳܝ ܥܰܬܺܝܩܬܳܐ܆ ܘܰܕܝܳܬܶܒ ܠܥܶܠ ܡܶܢ ܗܽܘܠܶܐ ܗܳܝ ܕܢܳܬܦܳܐ ܠܬܰܚܬ܆ ܘܕܰܡܛܰܝܶܒ ܠܘܳܬ ܡܶܣܬܰܟܠܳܢܽܘܬܳܐ ܕܗܳܠܶܝܢ ܕܰܠܥܶܠ ܘܰܫܡܰܝ̈ܳܢܝܳܬܳܐ܆ ܗܳܝ ܕܡܶܢܳܗ̇ ܗܳܘܝܳܐ ܗܳܝ ܕܢܶܬܩܰܪܰܒ ܠܰܐܠܳܗܳܐ܆ ܘܰܠܥܳܒܽܘܕܳܐ ܡܶܢ ܥ̈ܒܕܰܘ̈ܗ̱ܝ ܢܣܰܩܶܡ ܘܢܶܬܚܰܫܰܒ܆ ܘܢܶ݀ܬܓܡܰܪ ܡܶܢ ܣܽܘ̈ܟܳܠܶܐ ܗܳܠܶܝܢ ܘܰܒܗܽܘܢ ܢܶ݀ܬܬܰܪܣܶܐ܆ ܢܺܚܶܐ ܟܺܝܬ ܘܢܶܣܽܘܩ܆ ܘܳܐܦܠܳܐ ܡܶܕܶܡ ܐ̱ܚܪܺܝܢ ܐܶܠܳܐ ܐܶܢ ܠܰܐܠܳܗܳܐ ܒܰܠܚܽܘܕܰܘܗ̱ܝ ܢܶܬܗܰܓܰܓ܆ ܘܥܰܡ ܢܒܺܝܳܐ ܗܰܘ ܕܰܡܙܰܡܰܪ ܢܰܙܥܶܩ܆ ܢܶܦܩܰܬ ܢܰܦܫܝ ܒܳܬܪܳܟ܆ ܠܺܝ ܕܶܝܢ ܣܰܝܥܰܬ̣ ܝܰܡܺܝܢܳܟ^[3]. ܐܶܡܰܬܝ ܓܶܝܪ ܕܐ̱ܢܳܫ ܠܕܰܟܝܳܐ ܢܶܬܢܰܩܰܦ ܒܝܰܕ ܕܽܘܟܳܝܳܐ܆ ܡܶܢ ܝܰܡܺܝܢܶܗ ܕܗܰܘ ܡܶܟܺܝܠ ܡܶܬܬܰܝܬܶܐ. ܟܰܕ ܠܰܐܦܰܝ̈ ܠܬܰܚܬ ܠܳܐ ܡܶܬܶܐܫܶܕ܆ ܐܳܦܠܳܐ ܬܽܘܒ ܡܶܢ ܡܶܕܶܡ ܡܶܢ ܗܳܠܶܝܢ ܕܥܰܠ ‌ܐܰܪܥܳܐ ܡܶܬܓܰܪܪ̈ܳܢ ܡܶܬܬܰܝܬܶܐ.

ܡܳܕܶܝܢ ܠܘܳܬ ܬܰܪܥܳܐ ܗܳܢܳܐ ܢܶܪܗܰܛ܆ ܘܰܒܝܰܕ ܟܽܠ ܦܽܘܪܣܳܐ ܘܰܫܟܳܚܬܳܐ ܕܡܰܚܫܰܒܬܳܐ ܡܶܬܬܕܺܝܫܳܢܳܐ ܢܶܥܒܕܺܝܘܗ̱ܝ ܠܰܢ. ܘܠܰܘ ܒܰܠܚܽܘܕ ܗܳܕܶܐ܆ ܐܶܠܳܐ ܐܳܦ ܫܽܘܩܳܐ ܦܰܬܝܳܐ܆ ܟܰܕ ܘܠܳܐ ܒܡܶܕܡ ܡܶܢ ܟܽܠܗܶܝܢ ܗܳܢܶܝܢ ܕܰܡܟܳܢ̈ܳܢ ܕܢܶܣܟܪ̈ܳܢܳܝܗ̱ܝ ܡܰܗܡܶܝܢ ܚ̱ܢܰܢ. ܒܕܰܠܩܽܘܒܠܳܐ ܕܶܝܢ ܡܰܠܽܘܢ܆ ܐܳܦ ܟܰܕ ܓܳܪܦܺܝܢܰܢ ܘܫܳܕܶܝܢܰܢ ܠܒܰܪ ܒܕܽܘܟ ܘܰܠܪܽܘܚܩܳܐ. ܐܰܝܟܰܢܳܐ ܓܶܝܪ ܠܰܘ ܫܟܺܝܪܬܳܐ ܗܝ܆ ܕܟܰܕ ܡܰܠܟܳܐ ܡܰܢ ܥܬܺܝܕ ܕܢܺܐܬܶܐ ܠܰܡܕܺܝܢ̱ܬܳܐ ܡܶܕܶܡ܆ ܐܳܦ ܫܩܳܩ̈ܶܐ ܘܫܽܘ̈ܩܶܐ ܘܶܐܤܛ̈ܘܶܐ ܘܰܩܕܳܡ ܬܰܪ̈ܥܶܐ ܒܰܫܩܳܠ ܛܰܥܢܳܐ ܢܶܬܕܰܟܽܘܢ܆ ܘܟܽܠܗܽܘܢ ܒܢܰܝ̈ܢܳܫܳܐ ܟܢܺܝܫܳܐܺܝܬ ܒܓܶܢ̈ܣܶܐ ܘܰܒܩܰܘ̈ܡܳܬܳܐ ܠܘܳܬ ܡܰܥܰܠܬܶܗ ܐܰܟܚܕܳܐ ܢܶܪܗܛܽܘܢ܆ ܟܰܕ ܝܰܬܺܝܪ ܢܰܨܺܝܚܳܐܺܝܬ ܡܶܬܠܰܒܫܺܝܢ ܐܰܝܟ ܡܳܐ ܕܰܠܟܽܠܚܰܕ ܐܺܝܬ ܠܶܗ ܚܰܝܠܳܐ܆ ܐܰܝܟܰܢܳܐ ܕܳܐܦܠܳܐ ܠܳܐ ܫܰܘܝܳܐܺܝܬ ܢܶܐܪܥܽܘܢܳܝܗ̱ܝ ܆ ܘܳܐܦܠܳܐ ܚܙܳܬܶܗ ܢܶܚܣܪܽܘܢ܆ ܘܗܳܕܶܐ ܟܰܕ ܘܠܳܐ ܚܰܕ ܝܽܘܬܪܳܢܳܐ ܐܺܝܬ ܒܳܗ̇ ܕܰܠܘܳܬ ܢܰܦܫܳܐ ܥܳܒܰܪ܆ ܐܶܠܳܐ ܐܶܢ ܡܰܛܥܝܳܢܽܘܬܳܐ ܕܥܰܝ̈ܢܶܐ ܒܰܠܚܽܘܕ ܕܰܐܝܟ ܚܶܠܡܳܐ ܡܚܰܕܝܳܐ܆ ܘܰܐܟܚܕܳܐ ܟܺܝܬ ܐܳܦ ܐܶܬܚܰܙܝܰܬ ܐܳܦ ܥܳܒܪܳܐ܆ ܚܢܰܢ ܕܶܝܢ ܕܠܰܘ ܡܰܥܒܰܪܬܳܐ ܡܰܠܟܳܝܬܳܐ ܘܰܕܥܰܠ ‌ܐܰܪܥܳܐ ܡܗܰܠܟܳܐ ܡܣܰܟܶܝܢ ܚ̱ܢܰܢ܆ ܐܶܠܳܐ ܕܰܕܢܶܬܥܰܠܶܐ^[4] ܥܬܺܝܕܺܝܢܰܢ ܠܘܳܬܶܗ ܕܡܰܠܟܳܐ ܕܰܫܡܰܝܳܐ ܒܝܰܕ ܬܰܪܥܳܐ ܡܰܠܟܳܝܳܐ ܕܨܰܘܡܳܐ܆ ܐܰܝܟ ܕܶܐܡܪܶܬ ܢܶܒܣܶܐ܆ ܘܰܠܘܳܬ ܟܰܪܣܳܐ ܘܰܠܘܳܬ ܪ̈ܓܺܝܓܳܬܳܐ ܝܰܥ̈ܢܳܬܳܐ ܘܦܰܐܺܝܬ ܠܥܰܒ̈ܕܶܐ ܢܶܗܘܶܐ ܦܢܶܝܢ ܚ̱ܢܰܢ܆ ܘܠܳܐ ܗ̱ܘܳܐ ܒܟܽܠܳܗ̇ ܐܺܝܕܳܐ ܘܚܰܝܠܳܐ ܠܰܐܝܠܶܝܢ ܕܗܳܘ̈ܝܳܢ ܡܥܰܟܪ̈ܳܢܝܳܬܳܐ ܘܡܶܢ ܡܰܣܰܩܬܳܐ ܟܳܠ̈ܝܳܢ ܢܶܦܣܽܘܩ܆ ܟܰܕ ܠܰܘ ܒܰܚܙܳܬܳܐ ܫܚܺܝܡܬܳܐ ܒܰܠܚܽܘܕ ܡܣܰܒܪܺܝܢ ܚ̱ܢܰܢ ܕܢܶܬܒܰܣܰܡ܆ ܐܶܠܳܐ ܒܳܗ̇ ܒܫܰܘܬܳܦܽܘܬܳܐ ܘܢܰܩܺܝܦܽܘܬܳܐ ܘܒܰܝܬܳܝܽܘܬܳܐ ܕܗܰܘ ܡܰܠܟܳܐ ܕܡܰܠ̈ܟܶܐ ܘܡܳܪܳܐ ܕܡܳܪ̈ܰܘܳܬܳܐ܆ ܗܰܘ ܕܒܰܠܚܽܘܕܰܘܗ̱ܝ ܐܺܝܬ ܠܶܗ ܠܳܐ ܡܳܝܽܘܬܽܘܬܳܐ ܘܥܳܡܰܪ ܒܢܽܘܗܪܳܐ ܠܳܐ ܡܶܬܩܰܪܒܳܢܳܐ^[5]܆ ܕܗܰܘ ܕܳܐܦ ܐܺܝܩܳܪܶܗ ܘܽܐܘܚܕܳܢܶܗ ܡܬܽܘܡܳܝܳܐ ܗܰܘ ܘܕܰܠܥܳܠܰܡ܆ ܠܗܰܘ ܕܳܐܦ ܥܬܺܝܕܺܝܢ ܚ̱ܢܰܢ ܕܢܶܚܙܶܝܘܗ̱ܝ ܒܥܰܝ̈ܢܶܐ ܕܰܟ̈ܝܳܬܳܐ ܕܬܰܪܥܺܝܬܳܐ܆ ܟܰܕ ܥܺܐܕܳܐ ܗܰܘ ܣܓܺܝܕܳܐ ܘܰܡܝܰܩܪܳܐ ܕܚܰܫܳܐ ܘܕܰܩܝܳܡܬܳܐ ܡܥܰܕܥܕܺܝܢܰܢ.

ܠܰܘ ܟܰܕ ܥܰܠ ܙܰܘܓܳܐ ܕܟܽܘܕܰܢ̈ܘܳܬܳܐ ܝܳܬܶܒ܆ ܘܥܰܠ ܩܳܪܽܘܟ̣ܳܐ ܡܶܕܶܡ ܕܕܰܗܒܳܐ ܘܕܰܡܕܰܒ̈ܩܳܢ ܒܶܗ ܟܺܐܦ̈ܶܐ ܡܝܰܩܪ̈ܳܬܳܐ܆ ܘܳܐܦܠܳܐ ܬܽܘܒ ܕܰܡܥܰܛܰܦ ܒܪܽܘܩܰܥܬܳܐ ܕܰܐܪܓܘܳܢܳܐ ܘܡܰܙܗܰܪ ܒܣܽܐܘܢܳܐ ܣܽܘܡܳܩܳܐ܆ ܘܰܡܚܰܙܰܩ ܪܺܝܫܶܗ ܒܕܰܗܒܳܐ ܘܰܒܫܰܦܺܝܪܽܘܬ ܓܰܘܢܳܐ ܡܦܰܬܰܟܬܳܐ܆ ܘܒܰܡܙܰܝ̈ܢܶܐ ܣܰܓܺܝ̈ܶܐܐ ܘܰܛܥܺܝ̈ܢܰܝ ܩܽܘܢܛܪ̈ܶܐ ܡܶܬܚܕܰܪ܆ ܐܶܠܳܐ ܕܡܶܢ ܥܰܒܕܳܐ ܕܪܺܝܫ ܟܳܗ̈ܢܶܐ ܥܰܠ ܦܰܟܶܗ ܡܶܬܡܚܶܐ܆ ܐܰܝܟܰܢܳܐ ܕܠܰܢ ܢܙܰܡܶܢ ܚܺܐܪܽܘܬܳܐ ܒܫܽܘܩܳܦܳܐ ܗܰܘ ܕܨܶܒܝܳܢܳܐܺܝܬ ܐܶܬܩܰܒܰܠ܆ ܟܰܕ ܛܪܰܪ ܠܥܰܒܕܽܘܬܳܐ ܗܳܝ ܕܶܐܬܥܰܒܕܰܕܢܰܢ܆ ܟܰܕ ܐܶܙܕܰܒܰܢܰܢ ܡܶܢ ܚܛܺܝܬܳܐ ܠܒܺܝܫܳܐ. ܟܰܕ ܓܶܝܪ ܒܶܣܪܳܐ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܗܳܢܰܘ ܕܶܝܢ ܒܰܪܢܳܫܳܐ܆ ܘܟܽܠܶܗ ܗܳܢܳܐ ܤܛܰܪ ܡܶܢ ܚܛܺܝܬܳܐ܆ ܘܰܠܗܳܝ ܕܡܶܠܬܳܐ ܢܶܗܘܶܐ ܐܺܝܬܰܘܗ̱ܝ ܘܰܒܪܳܐ ܘܨܰܠܡܳܐ ܕܰܐܒܳܐ ܠܳܐ ܡܶܬܚܰܙܝܳܢܳܐ^[6] ܠܳܐ ܣܳܟ ܫܰܚܠܶܦ ܠܗܳܕܶܐ܆ ܐܶܠܳܐ ܩܰܘܺܝ ܩܒܺܝܥܳܐܺܝܬ ܘܰܡܫܰܪܪܳܐܺܝܬ ܒܗܳܠܶܝܢ ܕܺܐܝܬܰܘܗ̱ܝ ܗ̱ܘܳܐ ܒܗܶܝܢ܆ ܘܰܒܗܳܕܶܐ ܐܰܝܟ ܕܰܟܬܺܝܒ ܢܣܰܒ ܕܡܽܘܬܳܐ ܕܥܰܒܕܳܐ^[7]܆ ܐܳ‌ܠܨܳܐܺܝܬ ܬܚܶܝܬ ܚܰܫ̈ܶܐ ܕܥܰܒܕܽܘܬܳܐ ܕܺܝܠܝ ܚܠܰܕ ܥ̣ܰܠ܆ ܒܪܰܡ ܕܶܝܢ ܟܺܝܬ ܬܚܶܝܬ ܟܽܠܗܽܘܢ ܗܳܢܽܘܢ ܕܡܶܢ ܚܛܺܝܬܳܐ ܡܚܰܪܪܺܝܢ.

ܡܶܛܽܠ ܗܳܕܶܐ ܐܳܦ ܐܶܬܪܩܶܩ ܠܶܗ ܒܰܐܦܰܘܗ̱ܝ ܘܶܐܬܢܰܓܰܕ܆ ܟܰܕ ܠܒܶܗܬܬܳܐ ܕܳܐܕܳܡ ܡܪܺܝܡ܆ ܗܳܝ ܕܒܳܗܶܬ ܗ̱ܘܳܐ ܟܰܕ ܗܘ̣ܳܐ ܥܰܪܛܶܠܳܝܳܐ ܡܶܢ ܡܰܛܥܝܳܢܽܘܬܳܐ ܕܚܶܘܝܳܐ ܘܡܶܬܛܰܫܶܐ ܗ̱ܘܳܐ ܒܦܰܪܕܰܝܣܳܐ܆ ܘܳܐܡܰܪ ܗ̱ܘܳܐ ܠܘܳܬ ܐܰ‌ܠܳܗܳܐ܆ ܩܳܠܳܟ ܫܶܡܥܶܬ ܟܰܕ ܡܗܰܠܶܟ ܐܰܢ̱ܬ ܒܦܰܪܕܰܝܣܳܐ܆ ܘܕܶܚܠܶܬ ܕܥܰܪܛܶܠܳܝܳܐ ܐܺܝܬܰܝ ܘܶܐܬܛܰܫܺܝܬ̣^[8]. ܐܶܠܳܐ ܠܰܒ̈ܢܳܬ ܩܳܠܶܐ ܡܪ̈ܝܡܳܢܝܳܬܳܐ ܕܦܶܬܓܳܡ̈ܶܐ ܗܳܠܶܝܢ ܘܣܺܝܡ̈ܳܬ ܣܰܩܽܘܒܠܳܐܺܝܬ܆ ܗܽܘ ܡܫܺܝܚܳܐ ܒܝܰܕ ܐܶܫܰܥܝܳܐ ܢܒܺܝܳܐ ܩܰܕܶܡ ܐܰܙܥܶܩ܆ ܘܟܰܕ ܐܶܬܒܰܣܰܪ ܒܗܽܘܢ ܒܰܥ̈ܒܳܕܶܐ ܫܰܡܠܺܝ ܐܶܢܶܝܢ܆ ܕܺܐܝܬ ܠܗܶܝܢ ܗܳܟܰܢܳܐ. ܚܰܨܳܐ ܕܺܝܠܝ ܝܶܗܒܶܬ ܠܢܶܓ̈ܕܶܐ. ܦܰܟ̈ܶܐ ܕܶܝܢ ܕܺܝܠܝ ܠܫܽܘ̈ܩܳܦܶܐ. ܠܦܰܪܨܽܘܦܳܐ ܕܶܝܢ ܕܺܝܠܝ ܠܳܐ ܐܰܗܦܟܶܬ ܡܶܢ ܒܶܗܬܬܳܐ ܕܪ̈ܽܘܩܶܐ. ܘܡܳܪܝܳܐ ܡܥܰܕܪܳܢܳܐ ܕܺܝܠܝ ܗܘ̣ܳܐ. ܡܶܛܽܠ ܗܳܕܶܐ ܠܳܐ ܒܶܗܬܶܬ. ܐܶܠܳܐ ܣܳܡܶܬ ܦܰܪܨܽܘܦܳܐ ܕܺܝܠܝ ܐܰܝܟ ܫܽܘܥܳܐ ܡܫܰܪܪܳܐ^[9]. ܘܝܶܕܥܶܬ ܕܠܳܐ ܒܳܗܶܬ ܐ̱ܢܳܐ܆ ܡܶܛܽܠ ܕܩܰܪܝܒ ܗ̄ܘ̣ ܗܰܘ ܕܙܰܕܩܰܢܝ. ܐܳܦ ܓܶܝܪ ܙܳܕܶܩ ܗ̱ܘܳܐ ܐܰܝܟ ܕܒܰܫܪܳܪܳܐ܆ ܕܥܰܠ ܗܰܘ ܕܒܰܟܝܳܢܳܐ ܠܳܐ ܝܳܕܰܥ ܗ̱ܘܳܐ ܚܛܺܝܬܳܐ ܢܶܐܬܝ̈ܳܢ ܗܳܠܶܝܢ܆ ܐܰܝܟܰܢܳܐ ܕܠܳܐ ܣܳܥܽܘܪ̈ܝܳܬܳܐ ܢܩܺܝܡ ܐܶܢܶܝܢ ܘܠܳܐ ܡܰܥ̈ܒܕܳܢܝܳܬܳܐ. ܟܰܕ ܓܶܝܪ ܐܶܫܬܰܩܰܦܘ ܦܰܟܰܘ̈ܗ̱ܝ܆ ܐܶܬܪܩܶܩ ܠܶܗ ܟܺܝܬ ܒܰܐܦܰܘܗ̱ܝ ܐܳܦ ܐܶܬܢܰܓܰܕ܆ ܠܳܐ ܒܗܶܬ ܐܰܘܟܺܝܬ ܐܶܬܚܰܡܰܨ ܐܳܦܠܳܐ ܓܶܝܪ ܐܺܝܬ ܗ̱ܘܳܐ ܡܶܕܶܡ܆ ܗܰܘ ܕܡܰܒܗܶܬ ܠܶܗ. ܘܠܳܐ ܓܶܝܪ ܚܛܺܝܬܳܐ ܥܒܰܕ܆ ܘܳܐܦܠܳܐ ܢܶܟܠܳܐ ܐܶܫܬܟܰܚ ܒܦܽܘܡܶܗ ܐܰܝܟܰܢܳܐ ܕܰܟܬܺܝܒ^[10]. ܐܶܠܳܐ ܣܳܡ ܦܰܪܨܽܘܦܳܐ ܕܺܝܠܶܗ ܐܰܝܟ ܫܽܘܥܳܐ ܡܫܰܪܪܳܐ܆ ܐܰܝܟܰܢܳܐ ܕܰܢܚܰܘܶܐ ܠܳܐ ܚܳܫܽܘܫܽܘܬܳܐ. ܘܰܕܗܶܢܽܘܢ^[11] ܚܰܫ̈ܶܐ ܘܗܳܢܶܝܢ ܕܰܡܟܴ̈ܢܳܢ ܠܡܰܒܗܳܬܽܘ܆ ܐܰܩܪܶܒܘ ܡܰܢ ܐܰܫܦܶܠܘ ܕܶܝܢ ܘܰܠܘܳܬ ܢܰܦܫܗܽܘܢ ܚܒܰܛܘ ܘܰܐܪܙܶܦܘ ܘܶܐܬܦܰܠܗܰܕܘ܆ ܘܛܰܫܘ ܒܶܗ ܣܽܘܓܦܳܢܳܐ ܡܶܕܶܡ ܘܳܐܦ ܠܳܐ ܚܰܕ. ܗܰܘ ܓܶܝܪ ܕܰܠܫܽܘܥܳܐ ܡܫܰܩܶܦ܆ ܡܶܣܬܒܰܪ ܡܰܢ ܕܡܳܚܶܐ܆ ܗܽܘ ܕܶܝܢ ܗܳܦܶܟ ܡܶܬܡܚܶܐ ܡܶܢܶܗ ܒܰܫܪܳܪܳܐ.

ܗܳܝ ܕܶܝܢ ܕܚܰܨܝ ܝܶܗܒܶܬ܆ ܘܦܰܪܨܽܘܦܳܐ ܕܺܝܠܝ ܠܳܐ ܐܰܗܦܟܶܬ̣܆ ܠܗܳܝ ܕܨܶܒܝܳܢܳܐܺܝܬ ܠܘܳܬ ܗܳܠܶܝܢ ܐܶܬܳܐ ܡܚܰܘܝܳܐ. ܗܳܝ ܕܶܝܢ ܕܡܳܪܝܳܐ ܡܥܰܕܪܳܢܳܐ ܕܺܝܠܝ ܗܘ̣ܳܐ܆ ܘܗ̱ܝ ܕܩܰܪܺܝܒ ܗܘ̣ ܗܰܘ ܕܙܰܕܩܰܢܝ܆ ܡ̈ܶܠܶܐ ܕܦܰܐܝ̈ܳܢ ܠܰܡܕܰܒܪܳܢܽܘܬܳܐ ܗܳܝ ܕܒܰܒܣܰܪ ܐܺܝܬܰܝܗܶܝܢ. ܐܳܦ ܓܶܝܪ ܟܰܕ ܒܰܪܢܳܫܳܐ ܗܘ̣ܳܐ ܡܶܛܽܠܳܬܰܢ܆ ܐܳܦܶܢ ܒܰܟܝܳܢܳܐ ܐܺܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ܆ ܘܠܳܐ ܣܳܟ ܡܰܣܠܶܐ ܕܡ̈ܶܠܶܐ ܗܳܠܶܝܢ ܕܦܰܐܝ̈ܳܢ ܠܒܰܪܢܳܫܳܐ ܢܡܰܠܶܠ. ܘܶܐܢܕܶܝܢ ܠܳܐ ܗܳܕܶܐ܆ ܘܠܳܐ ܡܶܕܶܡ ܐ̱ܚܪܺܝܢ ܐܺܝܬܶܝܗ̇ ܗ̱ܘܳܬ܆ ܐܶܠܳܐ ܐܶܢ ܕܰܒܟܽܠܳܗ̇ ܡܕܰܒܪܳܢܽܘܬܳܐ ܢܶܟܦܽܘܪ. ܐܶܢ ܡܰܢ ܓܶܝܪ ܡܶܢ ܐܰܢܰܢܩܺܐ ܐܶܬܢܓܶܕ ܘܰܢܚܶܬ ܠܘܳܬ ܗܳܝ ܕܢܶܗܘܶܐ ܒܶܣܪܳܐ ܠܳܐ ܡܶܫܬܰܚܠܦܳܢܳܐܺܝܬ܆ ܘܟܰܕ ܒܰܩܛܺܝܪܳܐ ܐܶܬܕܒܰܪ܆ ܢܡܰܠܶܠ ‌ܐܳܦ ܐܰܝܟ ܚܰܕ ܡܶܢ ܣܰܓܺܝ̈ܶܐܐ܆ ܘܰܐܝܟ ܣܢܺܝܩܳܐ ܥܰܠ ܥܽܘܕܪܳܢܳܐ ܘܥܰܠ ܙܰܕܺܝܩܽܘܬܳܐ܆ ܐܳܦ ܕܰܡܚܺܝܠܽܘܬܳܐ ܢܶܗܘ̈ܝܳܢ ܗܳܠܶܝܢ ܡ̈ܶܠܶܐ. ܐܶܢܕܶܝܢ ܨܶܒܝܳܢܳܐܺܝܬ ܗܰܘ ܡܰܠܝܳܐ ܒܰܟܝܳܢܳܐ ܣܰܪܶܩ ܗܽܘ ܠܶܗ ܟܰܕ ܢܣܰܒ ܕܡܽܘܬܳܐ ܕܥܰܒܕܳܐ^[12]܆ ܡܶܛܽܠܳܬܰܢ ܬܽܘܒ ܨܶܒܝܳܢܳܐܺܝܬ܆ ܒܡ̈ܶܠܶܐ ܐ̱ܢܳܫܳܝ̈ܳܬܳܐ ܡܶܬܚܰܫܰܚ. ܚܢܰܢ ܓܶܝܪ ܐܺܝܬܰܝܢ ܗ̱ܘܰܝܢ܆ ܗܳܢܽܘܢ ܕܒܶܗ ܡܶܬܥܰܕܪܺܝܢ ܗ̱ܘܰܝܢ ܟܺܝܬ ܘܡܶܙܕܰܕܩܺܝܢ ܗ̱ܘܰܝܢ. ܐܰܝܟܳܐ ܓܶܝܪ ܣܢܺܝܩ ܗ̱ܘܳܐ ܥܰܠ ܥܽܘܕܪܳܢܳܐ܆ ܡܫܺܝܚܳܐ ܗܰܘ ܚܰܝܠܳܐ ܕܰܐ‌ܠܳܗܳܐ ܘܰܐܒܳܐ܆ ܐܰܘ ܐܰܝܟܳܐ ܒܣܽܘܢܩܳܢܳܐ ܕܗܳܝ ܕܢܶܙܕܰܕܰܩ ܐܺܝܬܰܘܗ̱ܝ ܗ̱ܘܳܐ ܒܝܰܕ ܚܰܫܳܐ܆ ܗܰܘ ܕܰܥܠܰܘܗ̱ܝ ܟܬܰܒ ܐܶܫܰܥܝܳܐ܆ ܕܰܩܕܳܡ ܕܢܶܕܰܥ ܛܰܠܝܳܐ ܛܳܒܬܳܐ ܐܰܘ ܒܺܝܫܬܳܐ܆ ܢܶܬܥܨܶܐ ܘܠܳܐ ܢܶܬܬܦܺܝܤ ܠܒܺܝܫܽܘܬܳܐ܆ ܠܡܶܓ̣ܒܳܐ ܛܳܒܬܳܐ^[13]. ܗܳܝ ܕܶܝܢ ܕܡܶܢܗܽܘܢ ܕܥܰܙܪܽܘܪ̈ܶܐ ܠܳܐ ܡܶܨܛܰܠܝܳܢܳܐܺܝܬ ܢܶܗܘܶܐ ܐܺܝܬ ܠܶܗ ܠܘܳܬ ܒܺܝܫܬܳܐ܆ ܘܰܕܢܶܗܘܶܐ ܡܣܰܬܰܬ̣ ܩܒܺܝܥܳܐܺܝܬ ܒܛܳܒܬܳܐ܆ ܕܗܰܘ ܕܺܐܝܬܰܘܗ̱ܝ ܙܰܕܺܝܩܳܐ ܒܽܐܘܣܺܝܰܐ ܐܺܝܬܶܝܗ̇ ܕܺܝܠܳܝܬܳܐ. ܗܳܝ ܕܺܐܝܬܶܝܗ̇ ܐܰ‌ܠܳܗܳܐ. ܒܢܰܝ̈ܢܳܫܳܐ ܓܶܝܪ܆ ܒܩܰܘܡܬܳܐ ܗܳܝ ܕܦܳܪܽܘܫܽܘܬܳܐ܆ ܨܶܒܝܳܢܳܐܺܝܬ ܓܳܒܶܝܢ ܠܛܳܒܬܳܐ ܚܠܳܦ ܒܺܝܫܬܳܐ. ܕܰܚܢܰܢ ܕܶܝܢ ܐܺܝܬܰܝܢ ܗ̱ܘܰܝܢ܆ ܗܳܢܽܘܢ ܕܒܰܡܫܺܝܚܳܐ ܡܶܙܕܰܕܩܺܝܢ ܚ̱ܢܰܢ ܒܨܶܒܝܳܢܳܐ ܕܰܐ‌ܠܳܗܳܐ ܘܰܐܒܳܐ܆ ܓܰܠܝܳܐܺܝܬ ܚܰܘܺܝ܆ ܚܰܟܺܝܡܳܐ ܦܰܘܠܽܘܤ ܟܰܕ ܠܩܽܘܪ̈ܝܢܬܳܝܶܐ ܗܳܟܰܢܳܐ ܟܬܰܒ܆ ܕܰܠܗܰܘ ܕܠܳܐ ܝܳܕܰܥ ܗ̱ܘܳܐ ܚܛܺܝܬܳܐ ܚܠܳܦܰܝܢ ܚܛܺܝܬܳܐ ܥܰܒܕܶܗ܆ ܐܰܝܟܰܢܳܐ ܕܰܚܢܰܢ ܢܶܗܘܶܐ ܒܶܗ ܙܰܕܝܩܽܘܬܳܐ ܕܰܐ‌ܠܳܗܳܐ^[14].

ܒܝܰܕ ܬܰܪܥܳܐ ܕܨܰܘܡܳܐ ܬܶܚܙܶܝܘܗ̱ܝ ܠܰܡܫܺܝܚܳܐ܆ ܐܳܦ ܕܟܰܠܢܺܝܕܺܝܢ ܣܽܘܡܳܩܬܳܐ ܡܶܬܥܰܛܰܦ܆ ܠܗܳܝ ܕܰܙܚܽܘܪܺܝܬܳܐ ܐܳܡܰܪ ܠܳܗ̇ ܟܬܳܒܳܐ ܗܰܘ ܟܳܗܢܳܝܳܐ܆ ܐܳܦ ܕܒܰܟܠܺܝܠܳܐ ܕܡܶܢ ܟܽܘܒ̈ܶܐ ܡܶܬܟܰܠܰܠ܆ ܘܰܕܩܰܢܝܳܐ ܚܠܳܦ ܣܩܺܝܦܶܛܪܽܘܢ ܐܰܘܟܺܝܬ ܫܰܒܛܳܐ ܡܰܠܟܳܝܳܐ ܡܩܰܒܶܠ. ܗܳܠܶܝܢ ܟܺܝܬ ܕܫܺܝܛܽܘܬܳܐ ܡܰܢ ܐܺܝܬ ܠܗܶܝܢ ܒܩܰܕܺܝܡܽܘܬ ܐܶܣܟܺܡܳܐ܆ ܐܳܣܝܽܘܬܳܐ ܕܶܝܢ ܕܒܺܝ̈ܫܳܬܳܐ ܕܺܝܠܰܢ܆ ܘܪܶܚܡܰܬ ܐ̱ܢܳܫܽܘܬܳܐ ܐܰ‌ܠܳܗܳܝܬܳܐ ܘܰܕܦܰܐܝܳܐ ܠܶܗ ܠܗܰܘ ܕܳܐܦ ܥܰܒ̣ܕܶܗ ܠܒܰܪܢܳܫܳܐ.

ܡܶܛܽܠ ܓܶܝܪ ܕܰܐܡܠܟܰܬ ܥܠܰܝܢ ܚܛܺܝܬܳܐ ܗܳܝ ܕܡܳܢܳܝܬܳܐ ܘܣܽܘܡܳܩܬܳܐ. ܘܡܰܘܬܳܐ ܗܰܘ ܕܡܶܢ ܗܳܕܶܐ ܐܶܬܺܝܠܶܕ܆ ܠܳܗ̇ ܠܗܳܕܶܐ ܟܽܠܳܗ̇ ܡܶܬܥܰܛܰܦ ܡܫܺܝܚܳܐ ܗܰܘ ܫܶܡܫܳܐ ܕܙܰܕܝܩܽܘܬܳܐ܆ ܟܰܕ ܡܡܰܠܶܐ ܘܳܐܡܰܪ ܒܗܽܘܢ ܒܣܽܘܥܪ̈ܳܢܶܐ ܒ̈ܢܳܬ ܩ̈ܳܠܶܐ ܬܽܘܒ ܗܳܠܶܝܢ ܕܰܒܝܰܕ ܐܶܫܰܥܝܳܐ܆ ܐܶܢ ܢܶܗܘܽܘܢ ܚ̈ܛܳܗܰܝܟܽܘܢ ܐܰܝܟ ܣܽܘܡܳܩܳܐ ܐܰܝܟ ܬܰܠܓܳܐ ܐܶ݀ܚܰܘܰܪܟܽܘܢ܆ ܐܶܢ ܕܶܝܢ ܢܶܗܘܽܘܢ ܐܰܝܟ ܙܚܽܘܪܺܝܬܳܐ ܐܰܝܟ ܥܰܡܪܳܐ ܐܶ݀ܚܰܘܰܪܟܽܘܢ^[15].

ܗܳܕܶܐ ܒܳܥܶܐ ܐܳܦ ܚܽܘܕܪܳܐ ܗܰܘ ܕܟܽܘܒ̈ܶܐ܆ ܕܡܶܬܬܣܺܝܡ ܥܰܠ ܪܺܝܫܳܐ ܗܰܘ ܕܠܳܐ ܚܛܳܗ. ܕܟܽܘܒܳܐ ܓܶܝܪ ܛܽܘܦܣܳܐ ܐܰܚܺܝܕ ܕܰܚܛܺܝܬܳܐ܆ ܐܳܦ ܢܒܺܝܳܐ ܗܰܘ ܕܰܡܙܰܡܰܪ ܡܰܘܕܰܥ ܟܰܕ ܐܳܡܰܪ܆ ܕܶܐܬܗܰܦܟܶܬ ܠܕܳܘܝܽܘܬܳܐ ܟܰܕ ܐܶܬܩܒܰܥ ܒܺܝ ܟܽܘܒܳܐ. ܚܛܺܝܬܳܐ ܕܺܝܠܝ ܐܰܘܕܰܥܬܳܟ܆ ܘܠܳܐ ܢܳܡܽܘܣܳܝܽܘܬܳܐ ܕܺܝܠܝ ܠܳܐ ܟܰܣܺܝܬ̣^[16]. ܡܶܬܐܰܡܪܳܐ ܗ̱ܘܳܬ ܕܶܝܢ ܒܦܽܘܩ̈ܕܳܢܶܐ ܢܳܡܽܘܣܳܝ̈ܶܐ ܗܳܢܽܘܢ ܕܰܒܝܰܕ ܡܽܘܫܶܐ ܐܶܬܺܝܗܶܒܘ ܡܶܢ ܐܰ‌ܠܳܗܳܐ܆ ܕܟܰܕ ܡܶܬܩܰܪܒܳܐ ܕܶܒܚܬܳܐ ܚܠܳܦ ܣܰܟܠܽܘܬܳܐ ܡܶܕܶܡ܆ ܐܰܘ ܐ̱ܚܪܳܢܝܳܐܺܝܬ ܒܡܰܘܗܰܒܬܳܐ ܕܫܽܘܟܳܢܳܐ ܘܒܰܫܡܳܐ ܕܩܽܘܪܒܳܢܳܐ ܘܰܕܗܳܝ ܕܡܶܬܐܰܡܪܳܐ ܡܩܰܪܒܽܘܬ ܦܺܐܪ̈ܶܐ܆ ܡܶܢ ܟܽܠܦܪܽܘܤ ܕܶܝܢ ܚܠܳܦ ܚ̈ܛܳܗܶܐ܆ ܠܳܐ ܓܶܝܪ ܡܰܨܝܳܐ ܕܟܰܕ ܒܢܰܝ̈ܢܳܫܳܐ ܐܺܝܬܰܝܗܽܘܢ ܕܠܳܐ ܢܶܚܛܽܘܢ܆ ܘܟܰܕ ܠܳܐ ܝܳܕܥܺܝܢ ܐܰܝܟ ܕܰܒܣܽܘܓܳܐܐ܆ ܕܰܢܣܺܝܡ ܐܝܕܰܘ̈ܗ̱ܝ ܗܰܘ ܕܰܡܩܰܪܶܒ ܥܰܠ ܩܽܘܪܒܳܢܳܐ ܘܕܶܒܚܳܐ܆ ܥܰܠ ܬܰܘܪܳܐ ܐܰܘ ܥܶܪܒܳܐ ܐܰܘ ܡܶܕܡ ܐ̱ܚܪܺܝܢ. ܟܰܕ ܗܽܘ ܣܝܳܡܳܐ ܕܺܐܝ̈ܕܰܝܳܐ ܡܰܙܥܶܩ܆ ܕܡܶܛܽܠ ܣܳܥܽܘܪ̈ܘܳܬܳܐ ܗܳܠܶܝܢ ܕܒܰܚ̈ܛܳܗܶܐ ܐܺܝܬܰܘܗ̱ܝ ܩܽܘܪܒܳܢܳܐ ܐܰܘ ܡܚܰܣܝܳܢܽܘܬܳܐ ܗܳܝ ܕܰܒܝܰܕ ܕܚ̣ܳܐ. ܕܺܐܝ̈ܕܰܝܳܐ ܕܶܝܢ ܫܽܘܘܕܳܥܳܐ ܐܺܝܬܰܝܗܶܝܢ ܕܡܰܥܒܕܳܢܽܘܬܳܐ ܣܳܥܽܘܪܳܝܬܳܐ܆ ܠܳܐ ܐ̱ܢܳܫ ܡܶܬܚܪܶܐ.

ܡܫܺܝܚܳܐ ܗܳܟܺܝܠ ܟܰܕ ܐܶܡܪܳܐ ܐܺܝܬܰܘܗ̱ܝ ܕܰܐ‌ܠܳܗܳܐ ܗܰܘ ܕܰܡܪܺܝܡ ܚܛܺܝܬܶܗ ܕܥܳܠܡܳܐ^[17]܆ ܚܽܘܕܪܳܐ ܕܶܝܢ ܕܥܳܠܡܳܐ܆ ܟܰܕ ܠܟܽܘ̈ܒܶܐ ܘܠܰܚ̈ܛܳܗܶܐ ܟܢܺܝܫܳܐܺܝܬ ܠܟܽܠܗܽܘܢ ܒܚܽܘܕܪܳܐ ܗܰܘ ܕܰܟܠܺܝܠܳܐ ܚܒܰܫ ܘܰܢܣܰܒ܆ ܥܰܠ ܪܺܝܫܳܐ ܕܺܝܠܶܗ ܐܰܝܬܺܝ ܐܶܢܽܘܢ ܒܰܕܡܽܘܬ^[18] ܕܶܒܚܳܐ ܘܢܶܟܣܬܳܐ܆ ܐܰܝܟܰܢܳܐ ܕܕܽܘܟܳܝܳܐ ܕܟܽܠܗܽܘܢ ܢܶܗܘܶܐ܆ ܘܗܳܕܶܐ ܐܺܝܬܶܝܗ̇ ܗܳܝ ܕܡܶܢ ܦܰܘܠܽܘܤ ܐܶܬܐܰܡܪܰܬ̣ ܘܡܶܢ ܠܥܶܠ ‌ܐܶܬܬܣܺܝܡܰܬ̣܆ ܕܰܠܗܰܘ ܕܠܳܐ ܝܺܕܰܥ ܚܛܺܝܬܳܐ܆ ܐܰ‌ܠܳܗܳܐ ܘܰܐܒܳܐ ܚܠܳܦܰܝܢ ܚܛܺܝܬܳܐ ܥܰܒܕܶܗ܆ ܐܰܝܟܰܢܳܐ ܕܰܚܢܰܢ ܢܶ݀ܗܘܶܐ ܒܶܗ ܙܰܕܝܩܽܘܬܐ ܕܰܐ‌ܠܳܗܳܐ^[19]. ܟܰܕ ܓܶܝܪ ܠܰܚ̈ܛܳܗܶܐ ܕܺܝܠܰܢ ܢܓܰܕ ܥܠܰܘܗ̱ܝ܆ ܐܰܝܟ ܗܰܘ ܕܗܽܘ ܐܺܝܬܰܘܗ̱ܝ ܗ̱ܘܳܐ ܡܚܰܝܒܳܐ ܚܰܫ ܒܰܒܣܰܪ. ܘܒܰܕܡܳܐ ܕܺܝܠܶܗ܆ ܙܰܕܝ̈ܩܶܐ ܘܠܳܐ ܡܚܰܝܒ̈ܶܐ ܚܰܘܺܝ ܠܰܢ. ܗܰܘ ܕܡܶܛܽܠܳܬܶܗ ܐܳܦ ܦܛܪܘܤ ܗܰܘ ܓܰܒܝܳܐ ܘܪܺܝܫ ܬܶܓܡܳܐ ܕܰܫ̈ܠܺܝܚܶܐ ܐܳܡܰܪ܆ ܗܰܘ ܕܠܰܚ̈ܛܳܗܶܐ ܕܺܝܠܰܢ ܗܽܘ ܐܰܣܶܩ ܒܦܰܓܪܶܗ ܥܰܠ ܩܰܝܣܳܐ܆ ܐܰܝܟܰܢܳܐ ܕܟܰܕ ܠܰܚ̈ܛܳܗܶܐ ܡܺܝܬܺܝܢ ܚ̱ܢܰܢ ܠܙܰܕܺܝܩܽܘܬܳܐ ܢܺܚܶܐ^[20]. ܠܪܺܝܫܶܗ ܡܰܢ ܓܶܝܪ ܕܡܰܠܟܳܐ ܒܰܪܢܳܫܳܐ ܡܝܰܩܪܳܐ ܡܚܰܘܶܐ ܠܶܗ܆ ܨܶܒܬܳܐ ܗܰܘ ܕܡܶܢ ܠܒܰܪ ܘܡܶܬܩܰܢܝܳܢܳܐ ܕܗܽܘ̈ܠܰܤ ܡܥܰܠ̈ܝܳܬܳܐ܆ ܟܰܕ ܡܶܢ ܡܦܰܬܟܽܘܬܳܐ ܕܓܰܘ̈ܢܶܐ ܡܶܬܟܰܢܰܫ܆ ܪܺܝܫܶܗ ܕܶܝܢ ܕܰܐ‌ܠܳܗܳܐ ܗܰܘ ܕܒܰܟܝܳܢܳܐ ܐܺܝܬ ܠܶܗ ܐܺܝܩܳܪܳܐ ܘܫܽܘܒܚܳܐ ܐܳܦܶܢ ܗܘ̣ܳܐ ܒܰܪܢܳܫܳܐ܆ ܐܳܦ ܠܗܳܠܶܝܢ ܕܰܡܟܳܢ̈ܳܢ ܠܡܰܒܗܳܬܽܘ ܘܠܰܡܨܰܥܳܪܽܘ܆ ܥܳܒܶܕ ܡܝܰܩܪ̈ܳܬܳܐ ܘܦܳܪ̈ܽܘܩܳܝܳܬܳܐ. ܗܳܟܰܢܳܐ ܟܺܝܬ ܒܰܟܠܺܝܠܳܐ ܗܰܘ ܕܟܽܘ̈ܒܶܐ܆ ܐܳܦ ܠܰܓܙܳܪ ܕܺܝܢܳܐ ܗܰܘ ܕܥܰܠ ‌ܐܳܕܳܡ ܫܪܳܐ܆ ܗܰܘ ܕܶܐܡܰܪ ܕܟܽܘ̈ܒܶܐ ܘܕܰܪܕܪ̈ܶܐ ܬܰܘܥܶܐ ܠܳܟ ܐܰܪܥܳܐ^[21]. ܐܳܦ ܓܶܝܪ ܗܳܢܽܘܢ ܕܫܰܪܺܝܪܳܐܺܝܬ ܢܩܶܦܘ ܠܶܐܘܰܢܓܶܠܺܝܽܘܢ܆ ܠܙܰܪܥܳܐ ܗܰܘ ܛܳܒܳܐ ܕܡܰܠܦܳܢܽܘܬܳܐ܆ ܠܰܘ ܒܟܽܘ̈ܒܶܐ ܒܡܰܪ̈ܢܝܳܬܳܐ ܥܳܠ̈ܡܳܢܳܝܳܬܳܐ ܐܳܡܰܪ ܐ̱ܢܳܐ ܩܰܒܠܽܘܗܝ܆ ܐܶܠܳܐ ܥܰܠ ‌ܐܰܪܥܳܐ ܛܳܒܬܳܐ. ܐܰܝܟܰܢܳܐ ܕܠܳܐ ܡܶܟܺܝܠ ܕܰܪܕܪ̈ܶܐ ܬܰܝܬܶܐ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ܆ ܐܶܠܳܐ ܦܺܐܪܳܐ ܡܬܰܪܣܝܳܢܳܐ܆ ܒܡܳܐܐ ܘܒܶܫܬܺܝܢ ܘܒܰܬܠܳܬܺܝܢ^[22].

ܘܳܐܦ ܫܰܒܛܳܐ ܕܶܝܢ ܗܰܘ ܕܩܰܢܝܳܐ܆ ܠܰܘ ܠܒܰܪ ܡܶܢ ܐ̱ܪܳܙܳܐ ܐܺܝܬܰܘܗ̱ܝ. ܡܶܛܽܠ ܓܶܝܪ ܕܶܝܢ ܕܟܰܕ ܒܨܰܠܡܳܐ ܕܰܐ‌ܠܳܗܳܐ ܡܠܻ̈ܝܠܶܐ ܗܘܰܝܢܰܢ܆ ܘܟܰܕ ܠܥܰܪ̈ܩܶܐ ܕܚܰܝ̈ܶܐ ܕܺܝܠܰܢ ܒܽܐܘܚܕܳܢܳܐ ܕܢܰܦܫܰܢ ܘܰܒܫܰܠܺܝܛܽܘܬ ܒܝܳܬ̣ܳܐ ܐܶܬܗܰܝܡܰܢܰܢ܆ ܠܚܰܫ̈ܶܐ ܫܟܺܝܪ̈ܶܐ ܐܶܬܪܟܶܢܰܢ܆ ܟܰܕ ܠܝܽܘܩܢܳܐ ܡܰܠܟܳܝܳܐ ܐܰܘܒܶܕܢܰܢ܆ ܘܠܳܐ ܬܽܘܒ ܡܶܟܺܝܠ ܚܢܰܢ ܠܰܢ ܡܕܰܒܪܺܝܢܰܢ܆ ܐܶܠܳܐ ܡܶܢ ܚܛܺܝܬܳܐ ܡܶܬܬܰܝܬܶܝܢ ܚ̱ܢܰܢ܆ ܡܩܰܒܶܠ ܠܶܗ ܡܫܺܝܚܳܐ ܠܫܰܒܛܳܐ ܗܰܘ ܡܫܰܪܝܳܐ ܘܰܕܠܺܝܠ ܠܰܬܒܳܪܳܐ ܘܰܡܪܰܥܪܥܳܐ ܐܰܝܟ ܐܢܳܫ ܢܺܐܡܰܪ ܕܡܰܠܟܽܘܬܳܐ ܕܺܝܠܰܢ ܠܩܰܢܝܳܐ. ܐܰܝܟܰܢܳܐ ܕܟܰܕ ܠܗܳܢܳܐ ܠܳܒܶܟ܆ ܡܫܰܪܪܳܐ ܘܚܰܝܠܬܳܢܳܐ ܢܶܥܒܕܺܝܘܗ̱ܝ܆ ܒܺܐܝܕܳܐ ܗܳܝ ܕܟܽܠ ܡܰܨܝܳܐ. ܟܰܕ ܓܶܝܪ ܒܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ ܘܰܒܢܰܦܫܳܐ ܡܠܺܝܠܬܳܐ ܐܶܫܬܰܘܬܰܦ܆ ܟܰܕ ܚܛܺܝܬܳܐ ܡܶܢ ܡܨܰܥܬܳܐ ܫܩܺܝܠܳܐ ܗ̱ܘܳܬ܆ ܠܰܢ ܠܟܽܠܰܢ ܕܰܟܺܝ ܡܶܢ ܕܪܺܝܫ ܘܚܰܝܶܠ܆ ܘܰܠܨܰܠܡܳܐ ܡܰܠܟܳܝܳܐ ܠܘܳܬ ܚܰܝܠܳܐ ܒܰܝܬܳܝܳܐ ܗܰܘ ܕܺܝܠܶܗ ܦܢܳܐ ܐܰܣܩܶܗ. ܡܰܠܽܘܢ ܕܶܝܢ܆ ܐܳܦ ܕܝܰܬܺܝܪ ܚܰܝܠܬܳܢ ܥܰܒܕܶܗ܆ ܟܰܕ ܪܺܝܫܺܝܬܳܐ ܕܬܰܪܬܶܝܢ ܕܓܶܢܣܳܐ ܕܺܝܠܰܢ ܗܘ̣ܳܐ܆ ܘܝܰܗ̱ܒ ܡܶܢ ܗܳܠܶܝܢ ܒܰܝ̈ܬܳܝܳܬܳܐ ܕܺܝܠܶܗ ܠܗܳܢܽܘܢ ܕܡܶܬܩܰܒܪܺܝܢ ܥܰܡܶܗ ܒܡܰܥܡܽܘܕܺܝܬܳܐ ܘܗܽܘ ܠܶܗ ܠܟܽܠܶܗ ܡܰܠܒܶܫ ܠܗܽܘܢ. ܟܽܠܟܽܘܢ ܓܶܝܪ ܗܳܢܽܘܢ ܕܒܰܡܫܺܝܚܳܐ ܥܡܰܕܬܽܘܢ܆ ܠܰܡܫܺܝܚܳܐ ܠܒܶܫܬܽܘܢ ܡܰܙܥܶܩ ܦܘܠܘܣ^[23].

ܒܳܬܰܪ ܗܳܠܶܝܢ܆ ܠܰܛܥܳܡܬܳܐ ܕܰܡܪܳܪܬܳܐ ܘܰܕܚܰܠܳܐ ܬܶܚܙܶܐ ܕܠܽܘܩܒܰܠ ܛܥܳܡܬܳܐ ܠܰܥܒܬܳܐ ܕܳܐܕܳܡ܆ ܘܺܐܝ̈ܕܰܝܳܐ ܕܰܒܩܰܝܣܳܐ ܡܶܬܩܰܒ̈ܥܳܢ܆ ܠܽܘܩܒܰܠ ‌ܐܺܝܕܳܐ ܗܳܝ ܠܳܐ ܙܗܺܝܪܬܳܐ ܕܗܰܘ܆ ܗܳܝ ܕܓܶܫܦܰܬ̣ ܒܦܺܐܪܳܐ ܗܰܘ ܕܰܟܠܶܐ ܗ̱ܘܳܐ. ܘܰܦܫܺܝܛܳܐܺܝܬ ܠܡܺܐܡܰܪ܆ ܕܥܰܠ ܨܠܺܝܒܳܐ ܡܶܬܬܪܺܝܡ ܝܶܫܽܘܥ܆ ܗܰܘ ܕܶܐܡܰܪ ܠܬܰܠ̈ܡܺܝܕܶܐ܆ ܘܶܐܢܳܐ ܐܶܢ ܐܶ݀ܬܬܪܺܝܡ ܡܶܢ ܐܰܪܥܳܐ܆ ܠܟܽܠܢܳܫ ܐܶ݀ܓܶܕ ܠܘܳܬܝ.^[24] ܡܶܚܕܳܐ ܓܶܝܪ ܫܶܡܫܳܐ ܡܰܢ ܠܙܰܠܺܝܩܳܐ ܩܳܦܶܤ ܗ̱ܘܳܐ ܒܟܽܠܳܗ̇ ܐܰܪܥܳܐ܆ ܗܳܝ ܕܳܐܦ ܢܳܝܕ̥ܳܐ ܗ̱ܘܳܬ. ܫܽܘ̈ܥܶܐ ܡܶܨܛܰܪܶܝܢ ܗ̱ܘܰܘ. ܘܰܠܟܽܠܗܶܝܢ ܗܳܠܶܝܢ ܕܡܶܬܚܰܙܝ̈ܳܢ ܚܶܫܽܘܟܳܐ ܡܟܰܣܶܐ ܗ̱ܘܳܐ. ܟܰܕ ܗܺܝ ܒܪܺܝܬܳܐ ܠܳܐ ܡܣܰܝܒܪܳܐ ܗ̱ܘܳܬ ܠܡܶܚܙܳܐ ܠܒܳܪܽܘܝܳܐ ܕܡܶܨܛܠܶܒ ܟܺܝܬ ܘܰܕܚܳܐܶܫ܆ ܘܗܳܕܶܐ ܒܰܒܣܰܪ ܐܳܦ ܓܶܝܪ ܠܳܐ ܡܰܨܝܳܐ ܗ̱ܘܳܬ ܕܰܐ̱ܚܪܳܢܝܳܐܺܝܬ. ܥܰܠ ܨܠܺܝܒܳܐ ܡܰܢ ܓܶܝܪ ܣܠܶܩ ܗܰܘ ܠܳܐ ܚܳܫܽܘܫܳܐ܆ ܐܶܠܳܐ ܕܰܡܒܰܣܰܪ. ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܰܪ̈ܬܶܝܢ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܐܰܝܟܰܢܳܐ ܕܗܽܘ ܟܰܕ ܗܽܘ ܟܰܕ ܒܗܰܘ ܡܳܐ ܕܰܡܟܳܢ ܠܡܶܚܰܫ ܠܗܳܝ ܕܢܶܚܰܫ ܡܩܰܒܶܠ܆ ܢܰܩܗܶܐ ܒܠܳܐ ܚܳܫܽܘܫܽܘܬܳܐ ܠܽܐܘܚܕܳܢܶܗ ܕܚܰܫܳܐ ܘܰܕܡܰܘܬܳܐ܆ ܕܠܳܐ ܡܶܫܟܰܚ ܠܡܶܓܫܰܦ ܒܠܳܐ ܚܳܫܽܘܫܳܐ܆ ܐܳܦܶܢ ܒܝܰܕ ܒܶܣܪܳܐ ܡܶܨܥܳܝܳܐ ܥܰܡ ܗܳܢܳܐ ܐܰܩܪܶܒ.

ܡܶܢ ܗܳܪܟܳܐ ܩܰܒܪ̈ܶܐ ܠܡܺܝ̈ܬܶܐ ܡܦܰܢܶܝܢ ܗ̱ܘܰܘ܆ ܘܰܚܠܳܦ ܗܰܘ ܚܰܕ ܣܰܓܺܝ̈ܶܐܐ ܝܳܗܒܺܝܢ ܗ̱ܘܰܘ. ܐܳܦ ܓܶܝܪ ܗܰܘ ܕܰܢܚܶܬ ܗ̱ܘܳܐ ܡܶܢ ܠܥܶܠ܆ ܠܘܳܬ ܐܰܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ ܐܳܙܶܠ ܗ̱ܘܳܐ^[25]. ܟܰܕ ܫܳܪܶܐ ܗ̱ܘܳܐ ܠܰܐܣܽܘܪ̈ܶܐ ܠܳܐ ܡܶܬܥܰܪ̈ܩܳܢܶܐ ܕܰܫܝܽܘܠ܆ ܟܰܕ ܡܩܰܕܶܡ ܗ̱ܘܳܐ ܡܰܪܡܶܐ ܒܟܽܠ ܕܽܘܟ ܙܰܪܥܳܐ ܕܰܩܝܳܡܬܳܐ ܕܺܝܠܰܢ܆ ܘܕܳܪܶܫ ܠܳܗ̇ ܐܽܘܪܚܳܐ ܩܰܕܡܳܝܳܐ܆ ܘܡܶܢ ܒܳܬܰܪ ܩܒܽܘܪܬܳܐ ܬܠܺܝܬܳܝܰܬ ܝܰܘ̈ܡܶܐ ܩܳܐܶܡ ܘܠܰܫܡܰܝܳܐ ܣܳܠܶܩ܆ ܘܥܰܠ ܬܪܽܘܢܘܤ ܕܫܽܘܒܚܳܐ ܝܳܬܶܒ܆ ܠܗܰܘ ܕܳܐܦܠܳܐ ܟܰܕ ܐܶܬܒܰܣܰܪ ܫܰܒܩܶܗ܆ ܟܰܕ ܠܟܽܠ ܡܳܠܶܐ ܠܳܐ ܦܰܓܪܳܢܳܐܺܝܬ ܘܰܐܝܟ ܐܰ‌ܠܳܗܳܐ.

ܚܳܙܶܐ ܐܰܢ̱ܬ ܠܰܐܝܟܳܐ ܡܫܰܕܰܪ ܠܳܟ ܬܰܪܥܶܗ ܕܨܰܘܡܳܐ܆ ܘܰܠܘܳܬ ܐܰܝܢܳܐ ܪܰܘܡܳܐ ܡܰܣܶܩ ܠܳܟ܆ ܠܗܳܢܳܐ ܗܳܟܺܝܠ ܠܳܐ ܙܳܕܶܩ ܠܰܢ ܠܰܡܕܰܟܳܝܽܘ܆ ܘܰܠܡܶܫܕܳܐ ܡܶܢܶܗ ܟܽܠ ܟܺܐܦܳܐ ܥܳܠܡܳܢܳܝܬܳܐ܆ ܐܰܝܟܰܢܳܐ ܕܠܳܐ ܒܗܳܕܶܐ ܢܶܬܬܩܶܠ ܘܟܰܕ ܢܶܦܶܠ ܠܡܰܥܰܠܬܳܐ ܕܗܳܟܰܢܳܐ ܐܺܝܬܶܝܗ̇ ܢܰܨܺܝܚܬܳܐ ܠܳܐ ܢܶܫܬܘܶܐ܆ ܡܳܢܳܐ ܕܶܝܢ ܐܳܡܰܪ ܐ̱ܢܳܐ ܠܰܡܕܰܟܳܝܽܘ. ܐܶܠܳܐ ܐܳܦ ܕܰܢܩܰܕܫܺܝܘܗ̱ܝ ܨܳܒܝܳܐ ܡܶܠܬܶܗ ܕܰܢܒܺܝܳܐ. ܩܰܕܶܫܘ ܓܶܝܪ ܨܰܘܡܳܐ ܐܳܡܰܪ^[26]. ܐܰܟܪܶܙܘ ܐܳܣܝܽܘܬܳܐ܆ ܐܰܙܥܶܩ ܝܘܐܝܠ ܚܰܕ ܡܶܢ ܬܪܶܥܣܰܪ ܢܒܺܝ̈ܶܐ. ܐܰܟܙܢܳܐ ܕܰܠܗܰܘ ܕܕܳܐܶܢ ܣܳܡ ܢܳܡܽܘܣܳܐ ܐܰ‌ܠܳܗܳܐ ܟܰܕ ܐܳܡܰܪ܆ ܕܟܺܐܢܳܐܺܝܬ ܒܳܬܰܪ ܗܳܝ ܕܟܺܐܢܳܐ ܬܶܪܕܽܘܦ܆ ܗܳܢܰܘ ܕܶܝܢ ܠܰܘ ܟܰܕ ܡܨܰܕܝܳܢܳܐܺܝܬ ܡܚܰܘܶܐ ܐܰܢ̱ܬ ܐܶܣܟܺܡܳܐ ܕܰܐܝܟ ܢܳܡܽܘܣܳܐ ܕܳܐܶܢ ܐܰܢ̱ܬ܆ ܐܶܠܳܐ ܥܰܡ ܬܰܪܥܺܝܬܳܐ ܕܣܰܓܺܝ ܟܺܐܢܳܐ ܘܢܺܝܫܳܐ ܕܣܰܓܺܝ ܬܪܺܝܨ܆ ܘܟܰܕ ܟܽܠ ܥܰܡܠܳܐ ܡܰܥܶܠ ‌ܐܰܢ̱ܬ܆ ܐܰܝܟܰܢܳܐ ܕܰܬܚܰܘܶܐ ܟܺܐܢܬܳܐ ܠܗܳܝ ܕܟܺܐܢܳܐ܆ ܗܳܟܰܢܳܐ ܐܳܦ ܠܰܡܩܰܕܳܫܽܘ ܨܰܘܡܳܐ ܦܩܰܕ. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܩܰܕܺܝܫܳܐ ܡܰܢ ܐܺܝܬܰܘܗ̱ܝ ܨܰܘܡܳܐ܆ ܕܰܡܕܰܟܶܐ ܟܺܝܬ ܘܰܡܩܰܕܶܫ܆ ܩܪܽܘܒ ܠܶܗ ܕܶܝܢ ܩܰܕܺܝܫܳܐܺܝܬ. ܐܰܝܟ ܗܰܘ ܕܰܠܡܶܕܶܡ ܕܩܰܕܺܝܫ ܡܩܰܕܶܫ ܐܰܢ̱ܬ܆ ܐܰܝܟܰܢܳܐ ܕܫܰܪܺܝܪܳܐܺܝܬ ܢܶܗܘܶܐ ܐܺܝܬܰܘܗ̱ܝ ܨܰܘܡܳܐ. ܗܳܕܶܐ ܕܶܝܢ ܬܶܗܘܶܐ. ܠܰܘ ܟܰܕ ܡܶܢ ܡܶܐܟܽܘܠܬܳܐ ܡܶܬܪܰܚܩܺܝܢܰܢ ܒܰܠܚܽܘܕ ܘܰܕܠܳܐ ܣܰܝܒܳܪܬܳܐ ܡܩܰܘܶܝܢܰܢ܆ ܐܶܠܳܐ ܐܳܦ ܟܰܕ ܡܶܢ ܟܽܠܳܗ̇ ܨܰܚܢܽܘܬܳܐ ܘܪܶܓܬܳܐ. ܕܰܢܨܽܘܡ ܓܶܝܪ ܙܳܕܶܩ ܡܶܢ ܒܺܝܫܬܳܐ܆ ܘܰܕܢܶܗܘܶܐ ܐܺܝܬܰܝܢ ܕܠܳܐ ܣܳܟ ܛܳܥܡܺܝܢ ܠܳܗ̇ ܠܒܺܝܫܽܘܬܳܐ.

ܕܡܶܢ ܗܳܪܟܳܐ ܐܶܢ ܐ̱ܢܳܫ ܒܝܰܘ̈ܡܳܬܳܐ ܕܨܰܘܡܳܐ܆ ܠܘܳܬ ܚܙܳܬܳܐ ܕܪ̈ܰܟܫܳܐ ܐܰܘ ܠܘܳܬ ܐ̱ܚܪܺܬܳܐ ܕܰܠܗܳܕܶܐ ܕܳܡܝܳܐ ܢܶܓܕܳܟ܆ ܐܶܡܰܪ ܠܘܳܬܶܗ܆ ܠܳܐ ܝܳܕܰܥ ܐܰܢ̱ܬ ܕܕܰܢܩܰܕܫܺܝܘܗ̱ܝ ܠܨܰܘܡܳܐ ܦܩܺܝܕܺܝܢ ܚ̱ܢܰܢ܆ ܘܰܠܓܰܘ ܡܶܢ ܫܽܘܪ̈ܶܐ ܩܰܕܺܝ̈ܫܶܐ ܕܺܝܠܶܗ ܐܺܝܬܰܝܢ܆ ܕܰܠܡܳܐ ܡܶܫܟܰܚ ܐ̱ܢܳܫ ܕܟܰܕ ܠܗܰܝܟܠܳܐ ܟܳܗܢܳܝܳܐ ܘܠܰܩܕܽܘܫ ܩܽܘ̈ܕܫܺܝܢ ܥܳܐܶܠ܆ ܕܰܐܟܚܕܳܐ ܢܶܚܙܶܐ ܚܶܙܘ̈ܳܢܶܐ ܫܟܺܝܪ̈ܶܐ ܘܠܳܐ ܟܢܺܝ̈ܟܶܐ ܕܤܳܛܳܢܳܐ܆ ܡܳܢܳܐ ܕܶܝܢ ܠܰܘ ܕܺܝܢܳܐ ܢܶܣܒܽܘܠ ܘܰܒܓܽܘܕܳܦܳܐ ܢܶܬܚܰܝܰܒ܆ ܕܰܒܗܳܠܶܝܢ ܟܳܗ̈ܢܳܝܳܬܳܐ ܘܩܰܕܺܝ̈ܫܳܬܳܐ ܚܳܠܶܛ ܠܗܳܠܶܝܢ ܡܣܰܝ̈ܒܳܬܳܐ ܘܠܳܐ ܟܳܗ̈ܢܳܝܳܬܳܐ܆ ܘܟܰܕ ܗܳܠܶܝܢ ܐܳܡܰܪ ܐܰܢ̱ܬ܆ ܐܳܦ ܠܗܰܘ ܒܕܶܚܠܳܐ ܬܰܪܡܶܐ܆ ܘܬܺܐܬܰܪ ܐܰܢ̱ܬ ܥܰܡ ܗܰܘ ܕܺܝܠܳܟ܆ ܐܳܦ ܠܦܽܘܪܩܳܢܳܐ ܗܰܘ ܕܰܐܚܽܘܟ.

ܘܶܐܢ ܚܽܘܫܳܒܳܐ ܡܶܕܶܡ ܢܕܽܘܠ ܒܳܟ ܟܰܣܝܳܐܺܝܬ܆ ܟܰܕ ܠܘܳܬ ܡܶܬܚܶܗ ܕܝܰܘܡܳܐ ܚܳܐܰܪ܆ ܘܰܠܫܳܥ̈ܶܐ ܗܳܠܶܝܢ ܕܫܰܪ̈ܺܝܟܳܢ ܣܰܓܺܝ̈ܳܐܬܳܐ ܪܳܫܶܡ ܠܳܟ܆ ܕܰܠܘܳܬ ܩܽܘܦܣ̈ܶܐ ܬܺܐܙܰܠ ܘܰܠܘܳܬ ܡܰܦܨܚܳܢܽܘܬܳܐ ܕܗܳܢܽܘܢ ܘܦܽܘܪܓܳܝܳܐ ܗܰܘ ܡܰܘܒܕܳܢܳܐ܆ ܐܰܝܟܰܢܳܐ ܕܠܳܐ ܟܰܕ ܠܘܳܬ ܪܰܡܫܳܐ ܐܰܝܟ ܡܰܢ ܕܰܡܫܰܘܚܪܳܐܺܝܬ ܐܳܬܶܐ ܬܶܬܩܛܰܦ ܠܳܟ܆ ܐܶܠܳܐ ܬܛܥܐ ܐܰܢ̱ܬ ܠܳܟ ܟܰܕ ܠܘܳܬ ܡܰܥܪ̈ܳܒܰܝ ܫܶܡܫܳܐ ܬܺܐܬܶܐ܆ ܬܽܘܒ ܐܶܡܰܪ ܠܘܳܬܶܗ܆ ܕܶܐ݀ܩܰܕܫܺܝܘܗ̱ܝ ܠܨܰܘܡܳܐ ܦܩܺܝܕ ܐ̱ܢܳܐ. ܦܺܐܪܳܐ ܕܶܝܢ ܕܩܽܘܦܣ̈ܶܐ ܠܰܘ ܩܽܘܕܳܫܰܐ ܗ̱ܘ܆ ܐܶܠܳܐ ܡܶܬܢܰܟܪܝܳܢܽܘܬܳܐ ܕܡܶܢ ܐܰ‌ܠܳܗܳܐ. ܥܰܡ ܓܶܝܪ ܓܰܪ̈ܡܶܐ ܗܳܢܽܘܢ ܕܰܡܨܰܝܪܺܝܢ ܒܢܽܘܩ̈ܙܶܐ܆ ܟܰܕ ܡܶܬܢܰܦܨܺܝܢ ܡܶܢ ܐܺܝܕܶܗ ܕܐ̱ܢܳܫ ܘܡܶܬܗܰܦܟܺܝܢ܆ ܡܰܥܒܕܳܢܽܘܬܳܐ ܡܶܕܶܡ ܕܫ̈ܺܐܕܶܐ ܐܰܟܚܕܳܐ ܩܳܛܝܳܐ ܘܡܶܬܟܰܪܟܳܐ ܥܰܡܗܽܘܢ܆ ܕܝܳܠܕܳܐ ܡܰܪܺܝܪܽܘܬܳܐ܆ ܚܶܡܬܳܐ܆ ܪܽܘܓܙܳܐ܆ ܩܥܳܬܳܐ܆ ܓܽܘܕܳܦܳܐ^[27]܆ ܘܟܽܠܗܶܝܢ ܗܳܠܶܝܢ ܕܰܡܢ̣ܳܐ ܦܰܘܠܽܘܤ܆ ܕܰܡܥܺܝ̈ܩܳܢ ܘܰܡܡܰܪܡܪ̈ܳܢ ܠܪܽܘܚܳܐ ܩܰܕܺܝܫܳܐ. ܫܳܬܶܩ ܐ̱ܢܳܐ ܓܶܝܪ܆ ܕܡܶܢ ܗܳܠܶܝܢ ܐܳܦ ܠܘܳܬ ܡܰܚ̈ܘܳܬܳܐ ܐܶܬܰܘ ܐ̱ܢܳܫܺܝ̈ܢ ܘܰܠܘܳܬ ܩ̈ܶܛܠܶܐ܆ ܘܳܐܦ ܠܘܳܬ ܡܰܦܽܘܠܬܳܐ ܕܡܶܢ ܡܰܪ̈ܗܳܛܰܝܗܽܘܢ܆ ܘܰܠܘܳܬ ܚܰܪ̈ܳܫܘܳܬܳܐ ܘܰܡܠܰܚ̈ܫܳܢܘܳܬܳܐ ܚܰܢ̈ܦܳܝܳܬܳܐ ܘܡܰܘܒ̈ܕܳܢܝܳܬܳܐ. ܘܰܠܘܳܬ ܟܽܘܠܗܶܝܢ ܐܰܝܠܶܝܢ ܕܺܐܝܬܰܝܗܶܝܢ ܝܽܘܠ̈ܦܳܢܶܐ ܕܫ̈ܺܐܕܶܐ.

ܕܰܢ݀ܩܰܕܶܫ ܗܳܟܺܝܠ ܠܨܰܘܡܳܐ ܙܳܕܶܩ ܠܰܢ. ܘܰܐܝܟܰܢܳܐ ܕܠܳܐ ܠܘܳܬ ܡܫܽܘܚܬܶܗ ܕܝܰܘܡܳܐ ܢܶܐܡܰܢ܆ ܠܥܺܕܬܳܐ ܢܶܪܗܰܛ. ܠܘܳܬ ܙܽܘܡܳܪܳܐ ܢܰܪܟܶܢ ܐܶܕܢܰܝ̈ܢ. ܢܶܬܢܬܰܦ ܗܰܢܺܝܳܐܺܝܬ ܒܢܰܦܫܰܢ ܠܘܳܬ ܕܶܡܥܳܐ܆ ܘܗܳܟܰܢܳܐ ܐܳܦ ܠܘܳܬ ܗܳܝ ܕܰܢܙܰܡܰܪ ܐܰܝܟ ܚܕܳܐ ܥܰܡ ܗܳܢܽܘܢ ܕܰܡܙܰܡܪܺܝܢ ܢܺܐܬܶܐ܆ ܟܰܕ ܥܰܡ ܕܰܘܺܝܕ ܐܳܡܪܺܝܢܰܢ܆ ܡܳܪܝܳܐ ܠܣܶܦ̈ܘܳܬܳܐ ܕܺܝܠܝ ܬܶܦܬܰܚ܆ ܘܦܽܘܡܝ ܢܰܘܕܰܥ ܬܶܫܒܽܘܚܬܳܐ ܕܺܝܠܳܟ^[28]܆ ܘܥܰܡ ܗܳܢܽܘܢ ܕܰܡܨܰܠܶܝܢ ܢܨܰܠܶܐ ܐܰܟܚܕܳܐ ܘܰܒܬܶܫܡ̈ܫܳܬܳܐ ܗܳܢܶܝܢ ܐ̱ܪ̈ܳܙܳܢܳܝܳܬܳܐ ܢܶܗܘܶܐ ܩܰܪܺܝܒܺܝܢ ܚ̱ܢܰܢ܆ ܘܰܙܥܽܘܪܳܐ ܢܶܚܫܒܺܝܘܗ̱ܝ ܠܝܰܘܡܳܐ܆ ܟܰܕ ܠܰܐܠܳܗܳܐ ܦܪܰܫܢܰܢ ܘܟܰܗܶܢܳܝܗ̱ܝ ܠܗܳܢܳܐ.

ܗܳܠܶܝܢ ܐܺܝܬܰܝܗܶܝܢ ܛܳܒ̈ܳܬܳܐ ܘܡܰܘܬܪ̈ܳܢܝܳܬܳܐ ܘܫܰܪܺܝܪ̈ܳܬܳܐ܆ ܗܳܠܶܝܢ ܝܳܠ̈ܕܳܢ ܢܺܝܚܽܘܬܳܐ ܬܰܪܥܺܝܬܳܐ ܡܡܰܫܰܚܬܳܐ ܘܡܰܟܺܝܟܬܳܐ ܡܰܗܦܟܽܘܬ ܐܰܦ̈ܶܐ ܕܡܶܢ ܪܳܡܽܘܬܳܐ ܘܰܡܫܰܩܠܽܘܬܳܐ܆ ܙܢܳܐ ܫܰܪܺܝܪܳܐ ܘܕܰܟܝܳܐ܆ ܘܰܕܠܳܐ ܡܛܰܫܝܳܐ ܠܰܢܟܺܝܠܽܘܬܳܐ ܕܒܰܣܺܝܡܽܘܬܳܐ ܓܒܺܝܠܬܳܐ ܘܰܒܡ̈ܶܠܶܐ ܪ̈ܰܟܺܝܟܳܬܳܐ ܘܡܰܛܥ̈ܝܳܢܝܳܬܳܐ. ܟܰܕ ܡܚܰܘܝܳܐ ܒܰܡܦܺܝܣܳܢܽܘܬܳܐ ܪܶܚܡܬܳܐ ܗܳܝ ܕܠܳܐ ܐܺܝܬܶܝܗ̇ ܠܪܶܚܡܬܳܐ ܢܕܺܝܕܳܐ ܘܠܺܝܛܳܐ ܘܣܰܢܝܳܐܐ ܠܰܐܠܳܗܳܐ ܘܰܕܝܰܬܺܝܪ ܐܺܝܬܶܝܗ̇ ܡܩܰܪܒܳܢܺܝܬܳܐ ܝܰܬܺܝܪ ܡܶܢ ܟܽܠ ܒܥܶܠܕܒܳܒܽܘܬܳܐ ܓܠܺܝܬܳܐ܆ ܘܰܕܩܰܕܺܝܡܳܐ ܡܶܬܟܰܪܙܳܐ܆ ܘܝܰܬܺܝܪ ܡܶܢ ܡܰܨܽܘܬܳܐ ܕܠܳܐ ܬܰܪܥܽܘܬܳܐ܆ ܘܰܕܝܰܬܺܝܪ ܩܰܫܝܳܐ ܘܚܰܪܡܳܐ ܝܰܬܺܝܪ ܡܶܢ ܟܽܠ ܚܰܝܘܰܬܫܶܢܳܐ. ܡܶܛܽܠ ܗܳܠܶܝܢ ܕܰܐܝܟ ܗܳܟܰܢ ܐܶܪܰܡܝܳܐ ܢܒܺܝܳܐ ܐܳܡܰܪ܆ ܠܽܘܠܺܝܬܳܐ ܕܒܳܙܥܳܐ ܐܺܝܬܰܘܗ̱ܝ ܠܶܫܳܢܳܐ ܕܺܝܠܗܽܘܢ܆ ܢܟܺܝ̈ܠܳܬܳܐ ܐܶܢܶܝܢ ܡ̈ܶܠܶܐ ܕܦܽܘܡܳܐ ܕܺܝܠܗܽܘܢ܆ ܠܩܰܪܺܝܒܶܗ ܡܡܰܠܶܠ ܡܫܰܝ̈ܢܳܬܳܐ܆ ܘܒܶܗ ܐܺܝܬ ܠܶܗ ܒܥܶܠܕܒܳܒܽܘܬܳܐ^[29]. ܘܬܽܘܒ. ܒܩܽܘܪܒܳܐ ܐܺܝܬܰܝܟ ܐܰܢ̱ܬ ܡܳܪܝܳܐ ܕܦܽܘܡܳܐ ܕܺܝܠܗܽܘܢ܆ ܘܰܒܪܽܘܚܩܳܐ ܡܶܢ ܟܽܘܠ̈ܝܳܬܗܽܘܢ^[30]. ܡܶܛܽܠ ܗܳܕܶܐ ܐܳܦ ܐ̱ܢܳܫ ܡܶܢ ܗܳܢܽܘܢ ܚܰܟܺܝ̈ܡܰܝ ܒܰܐܠܳܗܳܝ̈ܳܬܳܐ ܐܶܡܰܪ. ܕܰܒܗܳܠܶܝܢ܆ ܟܽܘܠ ܪܳܚܡܳܐ ܢܶܥܪܽܘܩ^[31].

ܗܳܠܶܝܢ ܕܶܝܢ ܬܢܺܝܬ̣܆ ܐܰܝܟܰܢܳܐ ܕܰܠܨܰܘܡܳܐ ܐܶ݀ܚܰܘܶܐ ܕܰܟܝܳܐ ܘܩܰܕܺܝܫܳܐ ܘܠܳܐ ܚܠܺܝܛܳܐ ܒܟܽܠ ܒܺܝܫܬܳܐ܆ ܘܕܰܒܚܽܘܒܳܐ ܡܶܬܟܰܠܰܠ ܗܰܘ ܕܺܐܝܬܰܘܗ̱ܝ ܩܦܰܠܶܐܘܳܢ ܕܟܽܘܠܗܶܝܢ ܛܳܒ̈ܳܬܳܐ. ܗܰܘ ܕܟܰܕ ܡܶܢܶܗ ܡܰܪܡܶܠ ܨܰܘܡܳܐ܆ ܡܶܕܶܡ ܣܪܺܝܩܳܐ ܘܰܣܦܺܝܩܳܐ ܡܶܬܚܙܶܐ. ܕܡܶܢ ܗܳܪܟܳܐ ܐܳܦ ܦܰܘܠܽܘܤ ܐܳܡܰܪ ܗ̱ܘܳܐ܆ ܕܳܐܦܶܢ ܐܰܘܟܶܠ ܠܟܽܠܗܶܝܢ ܗܳܠܶܝܢ ܕܺܐܝܬ ܠܺܝ܆ ܐܳܦܶܢ ܐܰܫܠܶܡ ܦܰܓܪܳܐ ܕܺܝܠܝ ܐܰܝܟܰܢܳܐ ܕܺܐ݀ܩܰܕ܆ ܚܽܘܒܳܐ ܕܶܝܢ ܠܳܐ ܢܶܗܘܶܐ ܐܺܝܬ ܒܺܝ܆ ܠܳܐ ܡܶܕܶܡ ܐܺ݀ܬܰܪ^[32].

ܙܳܕܶܩ ܕܶܝܢ ܕܳܐܦ ܡܰܟܺܝܟܽܘܬܳܐ ܘܢܺܝܚܽܘܬܳܐ ܢܶܬܥܰܢܘܶܐ ܠܘܳܬ ܟܽܠܢܳܫ܆ ܒܰܠܚܽܘܕ ܐܶܢ ܗܽܘ ܕܠܰܘ ܒܢܺܝܚܽܘܬܳܐ ܘܒܰܡܫܰܝܢܽܘܬܳܐ ܠܰܐܠܳܗܳܐ ܢܶܚܣܰܪ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܰܡܪ̈ܰܥܝܳܢ ܠܶܗ ܢܶܗܘܶܐ ܐܺܝܬܰܘܗ̱ܝ ܕܡܶܣܬܰܓܰܦ. ܒܗܳܕܶܐ ܓܶܝܪ ܕܩܺܝܢܕܘܢܘܤ ܐܺܝܬܶܝܗ̇ ܗܳܝ ܕܢܶܫܠܶܐ ܘܠܳܐ ܢܶܬܬܙܺܝܥ. ܐܳܡܪܳܐ ܓܶܝܪ ܒܕܽܘܟ ܡܶܠܬܳܐ ܢܒܺܝ̣ܳܝ̣ܬܳܐ܆ ܢܺܝܚܳܐ ܢܶܗܘܶܐ ܡܰܩܪܒܳܢܳܐ^[33]. ܘܰܒܕܽܘܟܬܳܐ ܐ̱ܚܪܺܬܳܐ ܦܳܩܶܕ ܐܰ‌ܠܳܗܳܐ ܠܰܒ̈ܢܰܝ ܐܺܝܣܪܳܐܶܝܠ܆ ܗܘܰܘ ܒܥܶܠ̈ܕܒܳܒܶܐ ܠܡܶܕܝܰܢܳܝ̈ܶܐ ܘܰܡܚܰܘ ܐܶܢܽܘܢ܆ ܡܶܛܽܠ ܕܰܒܥܶܠ̈ܕܒܳܒܶܐ ܐܺܝܬܰܝܗܽܘܢ ܠܟܽܘܢ ܗܶܢܽܘܢ ܒܰܢܟܺܝܠܽܘܬܳܐ. ܠܘܳܬ ܓܶܝܪ ܙܳܢܝܽܘܬܳܐ ܘܕܶܚܠܰܬ ܦܬܰܟܪ̈ܶܐ ܓܢܰܒܘ ܗ̱ܘܰܘ ܐܶܢܽܘܢ ܒܝܰܕ ܪܳܚܡܽܘܬܳܐ ܗܳܝ ܕܡܶܣܬܰܒܪܳܐ ܗ̱ܘܳܬ^[34].

ܗܳܟܰܢܳܐ ܟܺܝܬ ܐܳܦ ܦܰܘܠܽܘܤ. ܥܪܽܘܩܘ ܡܶܢ ܙܳܢܝܽܘܬܳܐ^[35] ܡܰܪܬܶܐ ܗ̱ܘܳܐ ܝܰܨܺܝܦܳܐܺܝܬ ܒܩܰܕܺܝܡܽܘܬ ܢܽܘܛܳܪܳܐ ܘܰܡܙܰܗܪܳܢܳܐܺܝܬ. ܠܗܳܝ ܕܙܳܕܶܩ ܕܢܶܛܪܽܘܢ ܠܰܘ ܗܳܢܽܘܢ ܕܰܒܩܰܘܡܬܳܐ ܒܰܠܚܽܘܕ܆ ܐܶܠܳܐ ܐܳܦ ܗܳܢܽܘܢ ܕܰܥܠܰܝܡܺܝܢ ܘܰܥܕܰܟܺܝܠ ܛܠܶܝܢ܆ ܡܶܫܟܰܚ ܗ̱ܘ̣ ܓܶܝܪ ܙܽܘܘܳܓܳܐ ܡܝܰܩܪܳܐ ܕܰܬܚܽܘܡܳܐ ܠܨܰܚܢܽܘܬܳܐ ܗܳܝ ܕܚܽܘܠܛܳܢܳܐ ܢܣܺܝܡ ܘܢܶܐܣܽܘܪ ܠܚܺܐܦ̈ܶܐ ܠܳܐ ܡܦܰܓ̈ܕܶܐ܆ ܕܕܰܠܡܳܐ ܟܰܕ ܒܪ̈ܶܚܡܳܬܳܐ ܕܠܳܐ ܢܳܡܽܘܤ ܘܠܳܐ ܕܰܟ̈ܝܳܬܳܐ ܢܶܬܥܰܪܓܠܽܘܢ܆ ܠܰܥܝܳܕܳܐ ܒܺܝܫܳܐ ܐܳܦ ܥܕܰܡܳܐ ܠܣܰܝܒܽܘܬܳܐ ܐ̱ܚܪܳܝܬܳܐ ܘܡܬܚܢܢܝܬܐ ܢܶܡܬܚܽܘܢܳܝܗ̱ܝ . ܩܫܺܝܬܳܐ ܓܶܝܪ ܘܥܰܣܩܰܬ ܠܡܶܙܕܰܟܝܳܢܽܘܬܐ ܐܺܝܬܶܝܗ̇ ܗܳܝ ܕܰܥܝܳܕܳܐ ܗܰܘ ܕܰܒܙܰܒܢܳܐ ܐܶܫܬܰܪܰܪ ܢܶܬܕܚܶܩ ܘܢܶܬܒܰܛܰܠ. ܫܒܽܘܩ ܗܳܢܽܘܢ ܕܟܰܕ ܠܨܰܘܡܳܐ ܫܰܪܺܝܪܳܐܺܝܬ ܡܝܰܩܪܺܝܢ܆ ܒܰܡܠܶܐ ܙܰܒܢܳܐ ܐܳܦ ܡܶܢ ܡܰܫܟ̣ܒܳܐ ܗܰܘ ܢܳܡܽܘܣܳܝܳܐ ܡܰܪܚܩܺܝܢ. ܒܬܽܘܠܬܳܐ ܬܺܐܡܰܪ ܕܨܰܘܡܳܐ ܐܰܚܳܐ^[36] ܕܺܝܠܳܗ̇ ܐܺܝܬܰܘܗ̱ܝ܆ ܐܰܝܟܰܢܳܐ ܕܳܐܡܪܳܐ ܡܶܠܬܳܐ ܕܡ̈ܰܬܠܶܐ. ܫܰܘܝܰܬ ܒܬܰܪܒܺܝܬܳܐ ܓܶܝܪ ܘܒܰܪ̱ܬ ܢܺܝܪܳܐ ܕܰܚܒܰܪܬܳܗ̇ ܐܺܝܬܶܝܗ̇^[37]܆ ܕܰܟܝܽܘܬܳܐ ܟܺܝܬ ܘܰܨܪܺܝܟܽܘܬܳܐ ܦܺܝܠܘܣܘܦܳܝܬܳܐ. ܗܳܝ ܕܰܬܚܶܝܬ ܢܺܝܪܳܐ ܢܶܗܘܶܐ ܐܺܝܬܰܘܗ̱ܝ ܠܳܗ̇ ܨܰܘܡܳܐ܆ ܡܥܰܝܢܳܢܳܐ ܛܳܒܳܐ ܕܥܰܠ ܒܰܝܬܳܐ܆ ܘܢܳܛܽܘܪܳܐ ܡܗܰܝܡܢܳܐ ܕܙܽܘܘܳܓܳܐ ܢܰܟܦܳܐ܆ ܘܰܕܝܳܗܶܒ ܠܶܗ ܠܓܰܒܪܳܐ ܗܳܝ ܕܢܶܬܬܟܶܠ.

ܟܽܠܟܶܝܢ ܕܶܝܢ ܒܳܗ̇ ܒܰܕܡܽܘܬܳܐ ܡܶܢ ܡܰܡܠܠܳܐ ܒܺܝܫܳܐ ܘܰܣܬ̣ܳܪܳܐ ܕܰܒ̈ܢܝ ܐ̱ܢܳܫܳܐ ܐܰܗܦܶܟ̈ܶܝܢ ܐܰܦܰܝ̈ܟܶܝܢ܆ ܘܡܶܢ ܗܳܝ ܕܰܬܥܰܩ̈ܒܳܢ ܘܰܬܥܰܪ̈ܦܠܳܢ ܢܽܘܟܪ̈ܳܝܳܬܳܐ. ܡܶܢ ܫܓܽܘܫ̈ܝܶܐ ܕܰܒܫܽܘܩ̈ܶܐ ܘܰܐܓܗܺܝܬܶܝܢ ܠܟܶܝܢ ܘܰܡܚܰܪܪ̈ܳܬܳܐ ܐܺܝܬܰܝܟܶܝܢ. ܘܡܶܫܟ̈ܚܳܢ ܐܢܬܶܝܢ ܗ̱ܘ̣ ܕܰܒܒܰܝܬܳܐ ܬܶܥܡܪ̈ܳܢ܆ ܘܰܬܟܰܘ̈ܫܳܢ ܐܰܝܟ ܕܰܒܒܰܝܬܽܘܢܳܐ^[38] ܕܦܺܝܠܘܣܘܦܘܬܐ. ܝܰܬܺܝܪܳܐܺܝܬ ܟܰܕ ܒܰܥ̈ܒܳܕܶܐ ܗܳܢܽܘܢ ܕܥܰܡܪܳܐ ܘܕܰܩܘܳܝ̈ܶܐ ܡܶܬܥܰܢ̈ܝܳܢ ܐܢ̱ܬܶܝܢ܆ ܘܡܰܙܡܽܘܪ̈ܶܐ ܥܰܡܗܽܘܢ ܐܰܟܚܕܳܐ ܚܳܠ̈ܛܳܢ ܐܢ̱ܬܶܝܢ܆ ܘܒܰܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ ܡܶܬܒܰܣ̈ܡܳܢ ܐܢ̱ܬܶܝܢ܆ ܘܰܡܢܳܬܳܐ ܦܳܠ̈ܓܳܢ ܐܢ̱ܬܶܝܢ ܐܳܦ ܠܦܽܘܪ̈ܢܳܣܶܐ ܕܚܰܝ̈ܶܐ ܕܰܠܓܰܘ܆ ܘܺܐܝܬܰܝܟܶܝܢ ܒܢ̈ܳܬ ܚܺܐܪ̈ܶܐ ܘܰܡܚܰܪܪ̈ܳܬܳܐ ܒܝܰܕ ܗܳܠܶܝܢ ܡܶܢ ܟܽܠܶܗ ܥܶܢܝܳܢܳܐ ܣܪܺܝܩܳܐ. ܒܶܛܠܳܢܳܐ ܓܶܝܪ ܐܶܡܳܐ ܕܟܽܘܠܗܶܝܢ ܒܺܝ̈ܫܳܬܳܐ ܐܺܝܬܰܘܗ̱ܝ. ܒܰܠܚܽܘܕ ܠܢܶܫ̈ܽܘܢܝܳܬܳܐ ܗܳܢܶܝܢ ܦܰܟܳܢܳܝ̈ܳܬܳܐ ܘܒܳܓܽܘ̈ܠܳܬܳܐ ܘܰܡܥܰܩ̈ܒܳܢܝܳܬܳܐ ܬܰܪ̈ܥܰܝܟܶܢ ܣܟܽܘܪ̈ܶܝܢ܆ ܘܠܳܐ ܬܶܫܒ̈ܩܳܢ ܐܶܢܶܝܢ ܕܠܰܣܝܳܢܳܐ ܕܫܳܛܽܘܪܽܘܬ ܡܰܡܠܠܳܐ ܘܨܳܒܽܘܪܽܘܬ ܠܶܫܳܢܳܐ ܢܰܪ̈ܡܝܳܢ ܒܡܰܫ̈ܡܥܳܬܳܐ ܕܺܝܠܟܶܝܢ. ܨܽܘܚܳܝܳܐ ܓܶܝܪ ܘܡܰܡܠܠܳܐ ܒܺܝܫܳܐ ܕܒܶܣܬܪܳܐ܆ ܐܰܟܙܢܳܐ ܕܓܰܘܪܳܐ ܘܗܶܠܝܢ ܚ̈ܛܳܗܶܐ ܐ̱ܚܪ̈ܳܢܶܐ ܪܰܘܪ̈ܒܶܐ܆ ܐܳܚܶܕ ܠܡܰܠܟܽܘܬܳܐ ܕܰܫܡܰܝܳܐ.

ܟܰܕ ܗܳܟܰܢܳܐ ܗܳܟܺܝܠ ܠܨܰܘܡܳܐ ܡܩܰܕܫ̈ܳܢ ܐܰܢ̱ܬܶܝܢ܆ ܘܰܒܝܰܕ ܗܳܠܶܝܢ ܐܰܟܚܕܳܐ ܥܰܡ ܓܰܒܪ̈ܰܝܟܶܝܢ ܪ̈ܰܚܡܶܐ ܡܰܥ̈ܠܳܢ ܐܢ̱ܬܶܝܢ ܠܗܳܢܽܘܢ ܕܡܶܣܟܺܢܺܝܢ܆ ܘܳܐܦ ܠܘܳܬ ܟܽܠ ܥܒܳܕܳܐ ܛܳܒܳܐ ܠܫܰܘ̈ܬܳܦܶܐ ܕܺܝܠܟܶܝܢ ܕܰܒܗܳܠܶܝܢ ܚܰܝ̈ܶܐ ܡܚܰܦ̈ܛܳܢ ܐܰܢܬܶܝܢ. ܘܶܐܢ ܐܺܝܬ ܐ̱ܢܳܫܺܝ̈ܢ ܕܚܰܝܳܒܺܝܢ ܠܟܽܘܢ ܚܰܘܒܬܳܐ܆ ܘܰܡܚܺܝܠܺܝܢ ܠܘܳܬ ܦܽܘܪܥܳܢܳܐ܆ ܝܰܬܺܝܪ ܪܶܚܡܰܬ ܐ̱ܢܳܫܳܐܺܝܬ ܬܒܰܥܘ ܐܶܢܽܘܢ. ܝܰܬܺܝܪܳܐܺܝܬ ܟܰܕ ܠܪ̈ܶܒܝܳܬܳܐ ܐܰܝܟ ܚܕܳܐ ܡܚܰܫܒܺܝܢ ܐܢ̱ܬܽܘܢ. ܡܳܢܳܐ ܓܶܝܪ ܣܰܢܝܳܐ܆ ܕܟܰܕ ܟܰܪܣܳܐ ܕܺܝܠܟܽܘܢ ܨܳܝܡܳܐ܆ ܢܨܽܘܡ ܐܳܦ ܪܶܗܛܳܐ ܕܪ̈ܶܒܝܳܬܳܐ܆ ܐܳܦ ܟܬܳܒܽܘܢ̈ܶܐ ܗܳܢܽܘܢ ܕܪ̈ܶܒܝܳܬܳܐ. ܕܗܳܠܶܝܢ ܬܽܘܒ ܝܰܬܺܝܪܳܐܺܝܬ ܡܶܬܗܰܕܰܪ ܨܰܘܡܳܐ. ܠܗܳܠܶܝܢ ܢܳܩܦܳܐ ܡܶܢ ܟܽܠ ܦܪܽܘܤ ܛܰܝܒܽܘܬܳܐ ܥܰܬܺܝܪܬܳܐ ܕܛܳܒ̈ܳܬܳܐ ܗܳܠܶܝܢ ܕܡܶܢ ܠܥܶܠ ܘܥܽܘܬܪܳܐ ܗܰܘ ܕܡܶܢ ܐܰ‌ܠܳܗܳܐ܆ ܘܒܽܘܪܟܬܳܐ ܕܰܠܗܳܠܶܝܢ ܟܺܝܬ ܕܺܐܝܬ ܡܪܰܒܝܳܐ܆ ܘܰܠܗܳܠܶܝܢ ܕܠܳܐ ܐܺܝܬܰܝܗܶܝܢ ܡܰܘܣܦܳܐ܆ ܘܰܠܘܳܬ ܒܢܰܝ̈ܳܐ ܡܶܫܬܰܕܪܳܐ܆ ܘܡܶܫܬܰܘܕܝܳܐ ܗܳܠܶܝܢ ܕܰܥܬܺܝ̈ܕܳܢ ܘܰܕܫܽܘܠܳܡܳܐ ܠܰܝܬ ܠܗܶܝܢ. ܒܽܘܪܟܬܳܐ ܓܶܝܪ ܥܰܠ ܪܺܝܫܶܗ ܕܗܰܘ ܕܝܳܗܶܒ^[39]܆ ܘܗܰܘ ܕܡܶܬܗܰܦܰܟ ܕܠܳܐ ܡܽܘܡ ܒܙܰܕܺܝܩܽܘܬܳܐ܆ ܛܽܘܒ̈ܬܳܢܶܐ ܢܶܫܒܽܘܩ ܐܶܢܽܘܢ ܠܰܒ̈ܢܰܘܗܝ^[40]܆ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ.

ܟܰܕ ܗܳܠܶܝܢ ܥܳܒܕܺܝܢ ܐܢ̱ܬܽܘܢ܆ ܡܶܬܩܰܕܰܫ ܡܰܢ ܨܰܘܡܳܐ ܡܫܰܡܠܝܳܐܺܝܬ܆ ܡܶܬܟܰܪܙܳܐ ܕܶܝܢ ܐܳܣܝܽܘܬܳܐ ܕܰܐ‌ܠܳܗܳܐ܆ ܟܰܕ ܗܶܢܽܘܢ ܐܰܝܟ ܕܰܠܡܺܐܡܰܪ ܣܽܘܥܪ̈ܳܢܶܐ ܩܳܠܳܐ ܡܫܰܡܪܺܝܢ܆ ܢܶܫܬܰܒܰܚ ܕܶܝܢ ܐܳܦ ܡܶܢ ܠܳܐ ܡܗܰܝܡ̈ܢܶܐ ܡܫܺܝܚܳܐ܆ ܗܰܘ ܣܳܐܶܡ ܢܳܡܽܘܣܳܐ ܘܪܺܝܫܳܐ ܕܗܳܠܶܝܢ. ܠܶܗ ܬܶܫܒܽܘܚܬܳܐ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܬܡܳܢܺܝܢ ܘܫܰܒܥܳܐ.

ܡܙܡܘܪ̈ܐ. 24: 7  ܐܦ 9 [1]

ܡܬܝ. 5: 8 [2]

ܡܙܡܘܪ̈ܐ. 63: 8 [3]

ܕܢܶܬܥܰܠܶܐ[4]

ܐ. ܛܝܡܬܐܘܣ. 6: 15 ـ 16[5]

ܩܘܠܣ̈ܝܐ. 1: 15 [6]

ܦܝܠܝܦܣ̈ܝܐ. 2: 7 [7]

ܣܶܦܪܐ ܕܒܪܝܬܐ. 3: 10 [8]

ܐܫܥܝܐ. 50: 6 ـ 8 [9]

ܐ. ܦܛܪܘܣ. 2: 22  ܐܦ ܐܫܥܝܐ. 53: 9 [10]

[11]ܒܰܕܡܽܘܬ ܓܰܠ̈ܠܶܐ ܩܫܰܝ̈ܳܐ ܕܝܰܡܳܐ ܕܛܳܪ̈ܝܳܢ ܒܫܽܘܥܳܐ ܡܫܰܪܪܳܐ ܘܰܩܒܺܝܥܳܐ: ܘܠܐ ܡܣܰܓܦܺܝܢ ܠܶܗ ܡܶܕܶܡ ܐܰܘ ܡܙܰܥܙܥܺܝܢ ܠܶܗ: ܐܶܠܐ ܗܶܢܽܘܢ ܟܰܕ ܛܳܪܦܺܝܢ ܥܠܰܘܗܝ ܘܰܡܪܙܦܺܝܢ܆ ܡܶܫܬܪܶܝܢ ܘܡܶܬܦܰܠܗܕܺܝܢ ܘܰܕܟܽܠ ܟܽܠܶܗ ܐܳܒܕܺܝܢ܆ ܗܳܟܰܢܳܐ ܐܳܡܰܪ ܡܰܠܦܳܢܳܐ ܕܛܪܘ ܒܰܡܫܺܝܚܳܐ ܚܰܫ̈ܶܐ ܗܳܢܽܘܢ ܟܝܳܢܳܝ̈ܶܐ ܕܒܶܣܪܳܐ ܘܰܥܕܺܝ̈ܠܶܐ ܘܗܳܠܶܝܢ ܕܰܡܟܳܢܺܝܢ ܠܡܰܒܗܳܬܽܘ܆ ܘܠܶܗ ܡܰܢ ܠܐ ܣܰܓܶܦܘ܆ ܠܐ ܓܶܝܪ ܐܶܫܟܰܚܘ ܠܗܽܘܢ ܒܶܗ ܐܰܬܪܳܐ܆ ܗܶܢܽܘܢ ܕܶܝܢ ܒܗܽܘܢ ܒܠܰܥܘ ܘܶܐܬܛܰܠܰܩܘ ܘܶܐܒܰܕܘ ܒܰܕܡܽܘܬܳܐ ܕܗܳܢܽܘܢ ܓܰܠ̈ܠܶܐ܆ ܘܡܶܟܺܝܠ ܗܘܰܘ ܠܐ ܡܰܥ̈ܒܕܢܶܐ ܐܳܦ ܠܘܳܬ ܣܰܓܺܝ̈ܐܐ ܡܶܢ ܗܳܢܽܘܢ ܕܗܰܝܡܶܢܘ ܒܰܡܫܺܝܚܳܐ܆ ܡܶܛܽܠ ܗܳܝ ܕܗܽܘ ܩܰܕܶܡ ܐܰܩܗܺܝ ܐܶܢܽܘܢ܆ ܘܟܰܕ ܬܽܘܒ ܡܥܰܕܰܪ

ܦܝܠܝܦܣ̈ܝܐ. 2: 7 [12]

ܐܫܥܝܐ. 7: 16 [13]

ܒ. ܩܘܪ̈ܝܢܬܝܐ. 5: 21 [14]

ܐܫܥܝܐ. 1: 18 [15]

ܡܙܡܘܪ̈ܐ. 32: 4 ـ 5[16]

ܝܘܚܢܢ. 1: 29 [17]

[18]ܐܳܦ ܠܥܶܪ̈ܒܶܐ ܕܡܶܬܢܰܟܣܺܝܢ ܗܳܫܳܐ: ܐܶܡܰܬܝ ܕܰܐܝܟ ܢܶܕܪ̈ܶܐ ܡܶܬܩܰܪܒܺܝܢ܆ ܡܥܳܕܺܝܢ ܐܶܢܽܘܢ ܕܰܢܣܺܝܡܽܘܢ ܠܗܽܘܢ ܟܠܺܝ̈ܠܶܐ.

ܒ. ܩܘܪ̈ܝܢܬܝܐ. 5: 21 [19]

ܐ. ܦܛܪܘܣ. 2: 24 [20]

ܣܶܦܪܐ ܕܒܪܝܬܐ. 3: 18 [21]

ܡܬܝ. 13: 8[22]

ܓܠܛܝ̈ܐ. 3: 27 [23]

ܝܘܚܢܢ. 12: 32 [24]

ܐܦܣ̈ܝܐ. 4: 9 [25]

ܝܘܐܝܠ. 1: 14[26]

ܓܠܛܝ̈ܐ. 5: 20 [27]

ܡܙܡܘܪ̈ܐ. 51: 17 [28]

ܐܪܡܝܐ. 9: 8 [29]

ܐܪܡܝܐ. 12: 2 [30]

ܩܘܗܠܰܬ. 9: 6[31]

ܐ. ܩܘܪ̈ܝܢܬܝܐ. 13: 3 [32]

ܝܘܐܝܠ. 3: 11 [33]

ܡܢܝܢܐ. 25: 17 ـ 18 [34]

ܐ. ܩܘܪ̈ܝܢܬܝܐ. 6: 18 [35]

[36]ܙܳܕܶܩ ܠܡܶܕܰܥ ܕܰܒܠܶܫܳܢܳܐ ܝܰܘܢܳܝܳܐ ܢܶܩܒܬܳܢܳܐܝܬ ܡܶܬܩܪܶܐ ܫܡܳܐ ܕܨܰܘܡܳܐ. ܡܶܛܽܠ ܗܳܕܶܐ܆ ܚܠܳܦ ܐܰܚܳܐ܆ ܚܳܬܳܐ ܙܳܕܶܩ ܗܘܳܐ ܕܬܺܐܡܰܪ ܒܬܽܘܠܬܳܐ ܠܨܰܘܡܳܐ ܐܰܝܟܰܢܳܐ ܕܣܺܝܡܳܐ ܡܶܠܬܳܐ ܝܰܘܢܳܐܝܬ. ܘܗܳܝ ܕܰܬܚܶܝܬ ܢܺܝܪܳܐ ܬܩܝܢܘܗܝ ܠܨܰܘܡܳܐ ܒܰܕܡܽܘܬ ܛܠܺܝܬܳܐ ܗܳܝ ܕܰܡܥܝܢܐ ܥܰܠ ܒܰܝܬܳܐ ܘܺܐܝܬܶܝܗ̇ ܢܛܘܪܬܐ ܕܙܽܘܘܳܓܳܐ ܢܰܟܦܳܐ ܘܰܕܝܳܗܒܳܐ ܠܶܗ ܠܓܰܒܪܳܐ ܕܰܕܠܐ ܩܶܢܛܳܐ ܢܶܬܬܟܶܠ܆ ܐܰܝܟܰܢܳܐ ܕܣܺܝܡܳܐ ܐܳܦ ܗܺܝ ܒܠܶܫܳܢܳܐ ܝܰܘܢܳܝܳܐ. ܡܶܛܽܠ ܗܳܕܶܐ ܟܽܠ ܡܰܢ ܕܒܳܥܶܐ܆ ܫܰܠܺܝܛ ܗܘ̣ ܠܶܗ ܕܢܶܩܪܶܐ ܢܶܩܒܬܳܢܳܐܝܬ

ܡ̈ܬܠܐ. 7: 4 [37]

ܕܰܒܩܶܠܺܝܬܽܘܢܺܝܬܳܐ ܕܕܰܝܪܳܝܽܘܬܳܐ[38]

ܡ̈ܬܠܐ. 11: 26 [39]

ܡ̈ܬܠܐ. 20: 7 [40]