ܡܺܐܡܪܳܐ ܕܰܬܡܳܢܺܝܢ ܘܫܬܐ

ܥܰܠ ܩܰܕܺܝܫܳܐ ܐܰܢܛܘܢܝܘܤ܆ ܗܰܘ ܕܰܒܡܶܨܪܶܝܢ ܫܰܪܺܝ ܩܰܕܡܳܝܳܐ ܘܰܗܘ̣ܳܐ ܪܺܝܫܳܐ ܕܚܰܝ̈ܶܐ ܗܳܢܽܘܢ ܕܺܝܚܺܝܕܳܝܽܘܬܳܐ ܘܡܰܕܒܪ̈ܳܝܶܐ.

86: ܠܕܽܘܒܳܪܳܐ ܡܰܢ ܕܰܐܢܛܘܢܝܘܤ ܗܰܘ ܐܰ‌ܠܳܗܳܝܳܐ ܫܰܘܝܳܐܺܝܬ܆ ܐܰܬܢܣܝܘܤ ܗܰܘ ܪܰܒܳܐ܆ ܗܰܘ ܓܰܒܪܳܐ ܫܠܺܝܚܳܝܳܐ ܘܕܰܡܫܺܝܚܳܐ ܐܺܝܬ ܗ̱ܘܳܐ ܠܶܗ ܒܶܗ ܕܰܡܡܰܠܶܠ^[1]܆ ܪܳܕܽܘܝܳܐܺܝܬ ܐܰܟܚܕܳܐ ܘܬܰܫܥܺܝܬܳܢܳܐܺܝܬ ܐܰܟܬܒܶܗ. ܘܺܐܝܬܰܘܗ̱ܝ܆ ܬܰܫܥܺܝܬܳܐ ܕܡܰܝܬܝܳܐ ܗܺܝ ܒܳܗ̇ ܡܰܪܕܽܘܬܳܐ ܘܩܰܕܺܝܡܽܘܬ ܪܽܘܫܡܳܐ ܘܝܽܘܩܢܳܐ ܕܦܺܝܠܘܣܽܘܦܺܝܰܐ. ܕܡܰܢܽܘ ܓܶܝܪ ܐܺܝܬܶܝܗ̇ ܗ̱ܘܳܬ܆ ܐܶܠܳܐ ܐܶܢ ܕܰܐܬܢܣܝܘܤ ܗܰܘ ܡܰܠܦܳܢܳܐ ܕܠܳܐ ܡܳܝܽܘܬܽܘܬܐ ܗܳܝ ܕܰܒܡܰܠܟܽܘܬܳܐ ܕܰܫܡܰܝܳܐ܆ ܕܠܐܰܕܪܺܝܢܰܛܳܐ ܕܰܡܝܰܬܪ̈ܳܬܳܐ ܗܰܘ ܠܳܐ ܡܳܝܽܘܬܳܐ ܢܨܽܘܪ ܠܰܢ܆ ܟܰܕ ܒܠܳܐ ܐܽܘܡܳܢܳܝܽܘܬܳܗ̇ ܘܠܳܐ ܡܨܰܒܬܽܘܬܳܗ̇ ܕܡܶܠܬܳܐ ܐܶܘܰܢܓܶܠܳܝܬܳܐ܆ ܘܰܒܬܽܘܢܳܝܳܐ ܕܰܟܝܳܐ ܘܫܰܪܺܝܪܳܐ ܕܣܽܘ̈ܟܳܠܶܐ܆ ܐܰܝܟ ܕܰܒܡܰܚܙܺܝܬܳܐ ܫܰܪܺܝܪܳܐܺܝܬ ܘܠܳܐ ܙܺܐܦܳܢܳܐܺܝܬ ܡܪܺܝܩ ܘܡܰܙܗܰܪ. ܠܰܫܪܳܪܳܐ ܓܶܝܪ ܕܣܽܘܥܪ̈ܳܢܶܐ ܗܳܕܶܐ ܠܳܚܡܳܐ܆ ܗܳܝ ܕܰܒܝܰܕ ܡ̈ܶܠܶܐ ܫܰܪܺܝܪ̈ܳܬܳܐ ܘܰܕܠܳܐ ܡܨܰܒ̈ܬܳܢ ܒܪܽܘܪܳܒ ܡܰܡܠܠܳܐ ܘܰܡܦܺܝ̈ܣܳܢܝܬܳܐ ܢܶܬܟܪܶܙ܆ ܘܰܒܢܰܦ̈ܫܳܬܳܐ ܕܗܳܢܽܘܢ ܕܫܳܡܥܺܝܢ ܟܝܳܢܳܐܺܝܬ ܘܠܳܐ ܩܛܺܝܪܳܐܺܝܬ ܗܳܠܶܝܢ ܕܝܽܘܬܪܳܢܳܐ ܢܶܩܒܽܘܥ ܡܕܰܡܝܳܢܳܐܺܝܬ܆ ܘܥܰܡ ܐܰܝܢܳܝܽܘܬܳܐ ܘܕܽܘܡܝܳܐ ܕܗܳܠܶܝܢ ܕܡܶܬܬܰܢܝ̈ܳܢ ܢܶܥܒܕܺܝܘܗ̱ܝ ܠܗܰܘܢܳܐ ܕܢܶܗܘܶܐ ܣܺܝܡ ܒܬܰܪܥܺܝܬܶܗ܆ ܘܰܐܝܟ ܗܰܘ ܕܰܩܢܶܐ ܓܽܘܫܡܳܐ ܘܓܰܘܢܳܐ ܕܺܝܠܗܶܝܢ.

ܐܶܢܳܐ ܕܶܝܢ ܡܶܛܽܠ ܗܳܕܶܐ ܒܰܠܚܽܘܕ ܥܶܒܪܶܬ ܠܰܡܨܰܥܬܳܐ܆ ܕܶܐ݀ܫܰܒܰܚ ܠܡܶܠܬܳܐ ܕܰܐ‌ܠܳܗܐ܆ ܗܰܘ ܕܰܒܝܰܕ ܡܶܬܒܰܪܢܫܳܢܽܘܬܶܗ ܐܰ‌‌ܠܳܗܳܝܬܳܐ ܘܪܳܚܡܰܬ ܐ̱ܢܳܫܳܐ܆ ܠܰܟܝܳܢܳܐ ܕܺܝܠܰܢ ܗܰܘ ܕܶܐܬܩܒܰܥ ܒܰܐܪܥܳܐ ܘܰܛܡܺܝܪ ܗ̱ܘܳܐ ܒܚܰܫ̈ܶܐ ܗܳܢܽܘܢ ܫܟܺܝܪ̈ܶܐ ܘܰܕܝܰܬܺܝܪ ܡܶܢ ܟܽܠ ܡܨܰܥܪܺܝܢ܆ ܠܘܳܬ ܪܰܘܡܳܐ ܫܡܰܝܳܢܳܐ ܐܰܩܺܝܡ܆ ܘܠܰܒ̈ܢܳܬ ܩ̈ܳܠܶܐ ܗܳܠܶܝܢ ܕܒܶܐܘܰܢ̈ܓܶܠܺܝܰܐ ܗܳܢܽܘܢ ܟܳܗ̈ܢܳܝܶܐ ܣܺܝ̈ܡܳܢ܆ ܕܟܺܐܢܳܐܺܝܬ ܠܳܐ ܡܶܬܗܰܝܡ̈ܢܳܢ ܗ̱ܘܰܝ̈ ܡܶܢ ܩܕܺܝܡ܆ ܫܰܪܰܪ ܒܝܰܕ ܐܰܝܠܶܝܢ ܕܶܐܬܗܰܦܰܟܘ ܒܗܶܝܢ ܕܰܟܝܳܐܺܝܬ ܘܶܐܬܥܰܢܘܺܝܘ ܘܺܝܠܶܦܘ ܐܶܢܶܝܢ. ܘܕܰܐܝܟܰܢܳܐ ܐܳ‌ܠܨܳܝܬܳܐ ܗܝ ܠܡܺܐܡܰܪ. ܐܰܡܺܝܪܳܐ ܗ̱ܘܳܬ ܠܘܳܬ ܫܠܺܝܚ̈ܶܐ܆ ܘܒܺܐܝ̈ܕܰܝܗܽܘܢ ܠܘܳܬ ܗܳܢܽܘܢ ܕܡܶܢ ܒܳܬܰܪܟܶܢ ܪܳܗܛܺܝܢ ܠܘܳܬ ܡܶܠܬܳܐ ܕܰܫܪܳܪܳܐ܆ ܕܗܳܐ ܡܫܰܕܰܪ ܐ̱ܢܳܐ ܠܟܽܘܢ܆ ܐܰܝܟ ܥܶܪ̈ܒܶܐ ܒܡܶܨܥܰܬ ܕܺܐܒ̈ܶܐ. ܘܳܐܦ ܠܘܳܬ ܗܶܓܡܽܘܢ̈ܶܐ ܘܡܰܠ̈ܟܶܐ ܬܶܬܬܰܝܬܽܘܢ ܡܶܛܽܠܳܬܝ. ܠܣܳܗܕܽܘܬܳܐ ܠܗܽܘܢ܆ ܘܰܠܥܰܡܡ̈ܶܐ^[2]. ܘܳܐܦ ܢܰܫܠܶܡ ܕܶܝܢ ܐܰܚܳܐ ܠܰܐܚܽܘܗ̱ܝ ܠܡܰܘܬܳܐ܆ ܘܰܐܒܳܐ ܠܰܒܪܶܗ. ܘܰܢܩܽܘܡܽܘܢ ܒܢܰܝ̈ܳܐ ܥܰܠ ‌ܐܰܒܳܗܰܝ̈ܗܽܘܢ ܘܰܢܡܺܝܬܽܘܢ ܐܶܢܽܘܢ^[3]. ܘܠܳܐ ܬܶܕܚܠܽܘܢ ܡܶܢ ܗܳܢܽܘܢ ܕܩܳܛܠܺܝܢ ܠܦܰܓܪܳܐ܆ ܠܢܰܦܫܳܐ ܕܶܝܢ ܠܳܐ ܡܶܫܟܚܺܝܢ ܠܡܶܩܛܰܠ^[4].

ܡܰܢܽܘ ܓܶܝܪ ܥܰܠ ܡ̈ܶܠܶܐ ܗܳܠܶܝܢ ܩܕܳܡ ܢܶܣܝܳܢܳܐ ܠܳܐ ܦܳܣܶܩ ܗ̱ܘܳܐ ܕܠܳܐ ܡܰܨܝܳܐ ܕܢܶܗܘ̈ܝܳܢ܆ ܐܰܘ ܐ̱ܚܪܳܢܝܳܐܺܝܬ ܕܰܕܠܳܐ ܦܝܳܣܳܐ ܐܺܝܬܰܝܗܶܝܢ܆ ܘܳܐܡܰܪ ܟܺܝܬ ܟܰܕ ܡܶܬܦܰܠܰܓ ܘܠܳܐ ܡܗܰܝܡܶܢ. ܐܰܝܟ ܥܶܪ̈ܒܶܐ ܗܳܟܺܝܠ ܒܰܝ̈ܢܰܝ ܕܺܐܒ̈ܶܐ ܢܶܦܶܠ܆ ܘܡܳܢܳܐ ܐ̱ܚܪܺܢܳܐ ܢܶܓܕܰܫ ܠܰܢ܆ ܐܶܠܳܐ ܐܶܢ ܕܢܶܬܐܶܟܶܠ ܘܢܺܐܒܰܕ. ܥܶܪܒܳܐ ܓܶܝܪ܆ ܡܶܐܟܽܘܠܬܳܐ ܡܛܰܝܰܒܬܳܐ ܐܺܝܬܰܘܗ̱ܝ ܕܕܺܐܒܳܐ܆ ܘܨܰܝܕܳܐ ܕܡܶܢ ܨܒܽܘܬ ܢܰܦܫܶܗ ܠܫܶܢ̈ܶܐ ܒܰܥܪܺܝܪ̈ܳܝܳܬܳܐ. ܐܰܒܳܗ̈ܶܐ ܕܶܝܢ ܐܶܡܰܪ ܠܺܝ܆ ܢܶܛܥܽܘܢ ܠܪܶܚܡܬܳܐ ܗܳܝ ܕܰܠܘܳܬ ܒܢܰܝ̈ܳܐ܆ ܘܢܶܙܕܰܝܢܽܘܢ ܠܽܘܩܒܰܠ ܪ̈ܚܽܘܡܰܝܗܽܘܢ܆ ܒܢܰܝ̈ܳܐ ܕܶܝܢ܆ ܐܳܦܶܢ ܘܠܳܐ ܥܰܠ ܡܶܕܶܡ ܐ̱ܚܪܺܝܢ܆ ܥܰܠ ܚܶܘܳܪ̈ܳܬܳܐ ܕܗܳܢܽܘܢ ܕܺܝܠܶܕܘ ܐܶܢܽܘܢ܆ ܠܳܐ ܢܰܪܚܡܽܘܢ܆ ܠܳܐ ܕܶܝܢ ܢܶܕܚܰܠ ‌ܐ̱ܢܳܫ ܡܶܢ ܡܰܘܬܳܐ܆ ܗܰܘ ܕܣܰܓܺܝ ܛܳܒ ܡܶܢ ܟܽܠ ‌ܐܺܝܬܰܘܗ̱ܝ ܕܚܺܝܠܳܐ܆ ܐܰܝܟ ܕܥܰܠ ܚܶܬ̊ܬܳܐ^[5] ܕܶܝܢ ܕܠܳܐ ܢܰܦܫܳܐ܆ ܢܶܒܣܶܐ ܐ̱ܢܳܫ ܥܰܠ ܦܰܓܪܶܗ܆ ܟܰܕ ܣܳܐܶܡ ܠܶܗ ܠܳܐ ܡܰܪܓܫܳܢܳܐܺܝܬ܆ ܘܰܬܚܶܝܬ ܡܰܚ̈ܘܳܬܳܐ ܘܰܬܚܶܝܬ ܦܣ̈ܳܩܶܐ܆ ܠܳܐ ܢܶܬܦܢܶܐ ܕܶܝܢ ܐ̱ܢܳܫ܆ ܠܘܳܬ ܢܽܘܗܪܳܐ ܗܳܢܳܐ ܚܰܠܝܳܐ ܘܰܕܣܰܓܺܝ ܪܓܺܝܓ ܠܥܰܝ̈ܢܶܐ.

ܐܶܠܳܐ ܠܗܳܠܶܝܢ ܟܽܠܗܶܝܢ܆ ܠܗܳܝ ܕܰܠܩܽܘܒܠܳܐ ܐܰܗܦܶܟ ܐܰܩܺܝܡ ܐܶܢܶܝܢ܆ ܡܶܬܗܰܝܡ̈ܢܳܢܝܳܬܳܐ ܥܒܰܕ ܐܶܢܶܝܢ ܠܗܳܠܶܝܢ ܕܡܶܢܩܕܺܝܡ ܠܳܐ ܡܶܬܗܰܝܡ̈ܢܳܢܝܳܬܳܐ܆ ܡܶܢܝܳܢܐ^[6] ܗܰܘ ܣܰܓܺܝܳܐܐ ܘܚܰܝܠܬܳܢܳܐ ܕܣܳܗ̈ܕܶܐ܆ ܟܰܕ ܠܣܰܓܺܝ̈ܶܐܐ ܡܰܢ ܡܶܢ ܕܺܐܒ̈ܶܐ ܠܰܡܫܰܝܢܽܘܬܳܐ ܕܥܶܪ̈ܒܶܐ ܫܰܚܠܶܦ܆ ܚܘܺܝܚܳܐܺܝܬ ܕܶܝܢ ܠܘܳܬ ܣܳܗܕܽܘܬܳܐ ܒܰܕܡܽܘܬ ܪܓܶܠܬܳܐ ܣܰܬܘܳܝܬܳܐ ܡܶܬܬܰܝܬܶܐ ܗ̱ܘܳܐ܆ ܠܽܘܩܒܰܠ ܪܶܚܡܬܳܐ ܕܶܝܢ ܗܳܝ ܕܰܟܝܳܢܳܐ ܐܰܩܺܝܡ܆ ܠܪܶܚܡܬܳܐ ܐܰ‌ܠܳܗܳܝܬܳܐ ܘܠܳܐ ܡܶܙܕܰܟܝܳܢܺܝܬܳܐ ܕܥܳܒܽܘܕܳܐ ܕܰܟܝܳܢܳܐ ܘܰܐܒܳܐ ܫܰܪܺܝܪܳܐ܆ ܕܒܶܣܪܳܐ ܕܶܝܢ ܘܰܕܢܽܘܗܪܳܐ ܗܳܢܳܐ ܕܰܡܠܶܐ ܙܰܒܢܳܐ ܙܥܽܘܪ̈ܝܳܬܳܐ ܝܺܨܶܦ܆ ܐܰܝܟ ܐܰܝܢܳܐ ܕܰܚܕܳܐ ܙܒܰܢ ܠܥܰܝ̈ܢܶܐ ܕܬܰܪܥܺܝܬܳܐ܆ ܐܰܩܶܬ ܒܢܽܘܗܪܳܐ ܡܶܬܗܰܘܢܳܢܳܐ ܘܰܕܠܳܐ ܫܽܘܠܳܡ ܕܙܰܠܺܝܩܳܐ ܕܰܩܝܳܡܬܳܐ ܗܳܝ ܕܡܶܣܬܰܒܪܳܐ܆ ܕܗܳܝ ܕܡܶܫܟܳܢܳܐ ܐܺܝܬܰܝܗܶܝܢ ܗܘ̈ܰܝ ܡ̈ܶܠܶܐ ܗܳܠܶܝܢ ܕܗܰܘ ܕܶܐܡܰܪ܆ ܗܳܝܕܶܝܢ ܙܰܕܺܝ̈ܩܶܐ ܢܶܢܗܪܽܘܢ ܐܰܝܟ ܫܶܡܫܳܐ ܒܡܰܠܟܽܘܬܶܗ ܕܰܐܒܽܘܗܽܘܢ܆ ܗܰܘ ܕܺܐܝܬ ܠܶܗ ܐܶܕܢ̈ܶܐ ܕܢܶܫܡܰܥ ܢܶܫܡܰܥ^[7].

ܐܶܠܳܐ ܗܰܘ ܕܗܳܠܶܝܢ ܐܶܡܰܪ܆ ܘܶܐܕܢ̈ܶܐ ܒܳܥܶܐ ܗ̱ܘܳܐ ܕܰܥܬܺܝ̈ܕܳܢ ܕܢܶܫܡ̈ܥܳܢ܆ ܡܶܛܽܠ ܡܙܰܠܗܙܽܘܬܳܐ ܘܰܙܥܽܘܪܽܘܬܳܐ ܕܰܡܝܰܬܪܽܘܬܳܐ܆ ܠܡܰܫܡܰܥܬܳܐ ܕܡܰܪܓܫܳܢܽܘܬܳܐ ܕܗܳܢܽܘܢ ܕܒܶܗ ܗܰܝܡܶܢܘ ܗܳܟܰܢܳܐ ܡܶܢ ܒܳܬܰܪܟܶܢ ܦܬܰܚ܆ ܐܰܝܟܰܢܳܐ ܕܣܰܓܺܝ̈ܶܐܐ ܐܰܝܟ ܕܰܠܘܳܬ ܚܰܝ̈ܶܐ ܢܶܣܬܰܪܗܒܽܘܢ ܠܘܳܬ ܐܰܓܽܘܢܳܐ ܕܫܰܦܺܝܪܽܘܬ ܕܶܚܠܬܳܐ ܘܡܰܘܬܳܐ܆ ܘܥܰܡ ܦܰܘܠܽܘܤ ܢܺܐܡܪܽܘܢ ܒ̈ܢܳܬ ܩ̈ܳܠܶܐ ܗܳܠܶܝܢ ܕܰܒܝܰܕ ܕܰܘܺܝܕ ܩܰܕܶܡ ܐܶܬܶܐܡܰܪ̈ܝ̱܆ ܕܡܶܛܽܠܳܬܳܟ ܡܳܝܬܺܝܢ ܚ̱ܢܰܢ ܟܽܠܶܗ ܝܰܘܡܳܐ܆ ܐܶܬܚܫܶܒܢܰܢ ܐܰܝܟ ܥܶܪ̈ܒܶܐ ܕܢܶܟܣܬܳܐ܆ ܐܶܠܳܐ ܒܗܳܠܶܝܢ ܟܽܠܗܶܝܢ ܝܰܬܺܝܪ ܙܳܟܶܝܢ ܚ̱ܢܰܢ ܒܝܰܕ ܗܰܘ ܕܰܐܚܒܰܢ^[8].

ܐܳܦ ܟܺܝܬ ܘܟܰܕ ܣܰܓܺܝ ܙܟܰܘ ܗܳܢܽܘܢ ܠܟܳܠ ܫܟܳܚܬܳܐ ܘܰܙܢܳܐ ܕܫܶܢ̈ܕܶܐ܆ ܕܶܥܟܰܬ ܡܶܢ ܫܶܠܝ ܟܽܠܳܗ̇ ܡܓܽܘܫܽܘܬܳܐ ܕܫ̈ܺܐܕܶܐ ܘܫܽܘܡܠܳܝ ܥܻ̈ܐܕܶܐ ܘܫܳܢܝܽܘܬܳܐ ܘܦܰܩܪܽܘܬܳܐ܆ ܘܫܽܘܦܳܥܳܐ ܕܰܕܡ̈ܶܐ ܛܰܡ̈ܶܐܐ ܘܣܽܘܦ̈ܳܛܶܐ ܕܡܳܐܢܰܝ̈ ܓܰܘܳܐ ܘܰܕܟܰܒ̈ܕܳܬܳܐ܆ ܘܫܽܘܡ̈ܠܳܝܶܐ ܕܫܳܢܝܽܘܬܳܐ ܘܐ̱ܪ̈ܳܙܶܐ ܕܠܳܐ ܐܰ‌ܠܳܗ ܘܰܕܠܳܐ ܫܳܘܶܝܢ ܕܢܶܬܡܰܠܠܽܘܢ܆ ܘܰܕܩܶܛܠܳܐ ܢܳܫܡܺܝܢ ܘܰܐܒܕܳܢܳܐ ܕܢܰܦ̈ܫܳܬܳܐ ܡܠܺܝ̈ܠܳܬܳܐ. ܐܰܝܟܰܢܳܐ ܕܫ̈ܺܐܕܶܐ ܥܳܪ̈ܽܘܩܶܐ ܢܶܗܘܽܘܢ܆ ܘܰܠܨܶܢܬܳܐ ܗܳܝ ܕܕܶܒܚ̈ܶܐ ܐܳܦ ܟܰܕ ܠܳܐ ܨܳܒܶܝܢ ܒܰܕܡܽܘܬ ܟܰܠ̈ܒܶܐ ܢܶܫܒܩܽܘܢ܆ ܘܳܐܦ ܒܶܝܬ ܩܶܨ̈ܡܶܐ ܢܶܫܬܰܬܩܽܘܢ. ܗܳܢܽܘܢ ܕܰܩܕܳܡ ܕܢܺܐܬܶܐ ܒܶܣܪܳܢܳܐܺܝܬ ܡܶܠܬܶܗ ܕܰܐ‌ܠܳܗܳܐ܆ ܐܺܝܬܰܝܗܽܘܢ ܗܘܰܘ ܡܡܰܠ̈ܠܳܢܶܐ ܘܰܨܒܳܪ̈ܶܐ ܕܟܽܠܳܗ̇ ܒܳܓܽܘܠܽܘܬܳܐ܆ ܘܰܕܠܳܐ ܡܬܽܘܡ ܫܬܶܩܘ. ܐܰܝܟܳܐ ܓܶܝܪ ܐܺܝܬܰܘܗ̱ܝ ܟܰܐܠܩܝܘܢ ܐܰܘܟܺܝܬ ܡܰܚܡܳܐ ܕܰܢܚܳܫܳܐ ܗܰܘ ܨܒܳܪܳܐ ܘܒܳܓܽܘܠܳܐ ܕܒܕܘܕܘܢܐ܆ ܐܰܘ ܐܰܝܟܐ ܗܘ ܛܪܺܝܦܘܕܐ ܕܒܕܐܠ̈ܦܘ ܕܰܐܦܘܠܘܢ܆ ܗܰܘ ܕܺܐܝܬܰܘܗ̱ܝ ܒܰܛܺܝܢܳܐ^[9] ܕܩܶܨ̈ܡܶܐ ܙܠܺܝ̈ܡܶܐ܆ ܘܰܙܠܺܝܡܳܐ ܥܳܒܶܕ ܗ̱ܘܳܐ ܠܶܗ ܠܗܰܘܢܳܐ ܕܗܳܢܽܘܢ ܕܡܶܬܬܦܺܝܣܺܝܢ ܗ̱ܘܰܘ ܠܶܗ܆ ܘܰܡܣܰܡܶܐ ܗ̱ܘܳܐ ܠܶܗ ܠܘܳܬ ܓܒܺܝܬܳܐ ܕܗܳܠܶܝܢ ܕܦܳܩ̈ܚܳܢ. ܐܰܝܟܳܐ ܗܳܠܶܝܢ ܒܶܝܬ ܩܶܨܡ̈ܶܐ ܐ̱ܚܪ̈ܳܢܶܐ ܕܰܡܠܶܝܢ ܗ̱ܘܰܘ ܟܽܠܳܗ̇ ܡܰܛܥܝܳܢܽܘܬܳܐ܆ ܘܦܽܘܪ̈ܣܶܐ ܗܳܢܽܘܢ ܨܢܺܝ̈ܥܶܐ ܘܠܽܘܚ̈ܫܳܬܳܐ܆ ܗܳܠܶܝܢ ܕܒܰܡܫܽܘܚܬܳܐ ܕܦܶܬܓܳܡ̈ܶܐ ܓܳܢ̈ܒܳܢ ܗ̱ܘܰܝ̈ ܠܗܳܢܽܘܢ ܕܫܳܡܥܺܝܢ܆ ܐܰܝܟ ܐܰܝܠܶܝܢ ܕܺܐܝܬܰܝܗܶܝܢ ܗ̱ܘܰܝ̈ ܡ̈ܶܠܶܐ ܗܳܠܶܝܢ ܟܰܠ̈ܕܳܝܳܬܳܐ ܘܣܰܓܺܝ̈ܳܐܬ ܛܽܘܒܳܒܳܐ܆ ܕܰܒܝܰܕ ܓܒܺܝܢܳܐ^[10] ܚܰܢܦܳܝܳܐ ܘܥܳܒܽܘܕܽܘܬ ܐܳܬܘ̈ܳܬܳܐ ܡܶܕܶܡ ܕܰܓܳܠ̈ܳܬܳܐ܆ ܐܰܝܟ ܨܶܒ̈ܘܳܬܳܐ ܡܶܕܶܡ ܪܰܘܪ̈ܒܳܬܳܐ ܡܶܬܛܰܒ̈ܒܳܢ܆ ܘܰܒܟܐܪ̈ܐܩܛܝܪܤ ܐܰܘܟܺܝܬ ܚܶܪ̈ܩܶܐ ܥܰܣ̈ܩܶܐ ܘܰܡܨܰܢ̈ܥܶܐ ܘܰܕܡܰܠ̈ܝܳܢ ܟܽܠܳܗ̇ ܚܰܪܳܫܽܘܬܳܐ܆ ܐܳܣܪ̈ܳܢ ܐܰܘ ܫܳܓ̈ܡܳܢ ܡܰܛܥܝܳܢܳܐܺܝܬ ܠܪ̈ܽܘܚܶܐ ܕܒܺܝܫܽܘܬܳܐ ܘܰܠܫ̈ܺܐܕܶܐ܆ ܘܠܰܐܝܠܶܝܢ ܕܡܶܬܚܰܫܚܺܝܢ ܒܗܶܝܢ ܡܰܕܚ̈ܠܳܢ ܘܫܳܢ̈ܝܶܐ ܥܳܒ̈ܕܳܢ ܠܗܽܘܢ.

ܗܳܠܶܝܢ ܟܽܠܗܶܝܢ ܫܶܬܩܳܐ ܡܫܰܡܠܝܳܐ ܩܰܒ̈ܶܠܶܝܢ ܘܶܐܬܒ̈ܠܶܡܶܝܢ ܒܰܟܐܳܬܳܐ܆ ܘܠܳܐ ܣܳܥܽܘܪ̈ܝܳܬܳܐ ܡܩܰܘ̈ܝܳܢ ܘܠܳܐ ܡܰܥ̈ܒܕܳܢܝܳܬܳܐ܆ ܟܰܕ ܒܰܕܡܽܘܬ ܝܰܡܳܐ ܗܰܘ ܕܒܶܐܘܰܢ̈ܓܶܠܺܝܰܐ ܕܡܶܬܓܰܠܰܠ ܗ̱ܘܳܐ ܘܡܶܢ ܪ̈ܽܘܚܶܐ ܡܶܬܥܰܪܰܡ ܗ̱ܘܳܐ ܘܡܶܬܢܦܰܚ܆ ܫܡܰܥ̈ܶܝܢ ܗܳܝ ܕܰܫܠ̈ܳܝܷܢ ܙܓܺܝܪ̈ܳܢ ܐܰܢ̱ܬܶܝܢ. ܘܫ̈ܺܐܕܶܐ ܗܳܢܽܘܢ ܕܡܶܢ ܩܕܺܝܡ ܪܳܚܡܺܝܢ ܗܘܰܘ ܕܰܢܟܰܘܫܽܘܢ ܒܰܫ̈ܩܳܩܶܐ ܘܰܒܒ̣ܶܪ̈ܝܳܬܳܐ ܘܰܒܫܽܘ̈ܩܶܐ ܗܳܢܽܘܢ ܕܙܶܒܢܳܐ ܘܙܽܘܒܳܢܳܐ܆ ܘܰܒܡܶܨܥܰܬ ܡܕܺܝܢ̱ܬܳܐ ܥܰܡ ܫܽܘܠܛܳܢܳܐ ܣܰܓܺܝܳܐܐ ܡܶܬܦܰܩܪܺܝܢ ܗܘܰܘ܆ ܘܡܶܬܝܰܩܪܺܝܢ ܗܘܰܘ ܒܰܥ̈ܠܰܘܳܬܳܐ ܘܒܰܕܡ̈ܶܐ ܘܰܒܗܰܝܟ̈ܠܶܐ ܘܰܒܚܶܪ̈ܡܶܐ܆ ܟܰܕ ܠܰܛܪ̈ܽܘܢܶܐ ܣܰܓܺܝ̈ܶܐܐ ܘܗܶܓܡܽܘܢ̈ܶܐ ܙܰܝܶܢܘ ܠܽܘܩܒܰܠ ܕܶܚܠܰܬ ܐܰ‌ܠܳܗܳܐ܆ ܘܰܐܥܒܶܕܘ ܒܰܒ̈ܢܰܝܳܐ ܕܠܳܐ ܡܶܬܛܦܺܝܣܳܢܽܘܬܳܐ ܐܰܝܟ ܕܰܟܬܺܝܒ^[11]܆ ܘܰܠܚܶܡܬܳܐ ܕܺܝܠܗܽܘܢ ܐܰܝܟ ܕܚܰܝ̈ܘܳܬ ܫܶܢܳܐ ܠܘܳܬ ܒܰܥܪܺܝܪܳܝܽܘܬܳܐ ܠܛܰܫܘ܆ ܘܰܒܢܳܡܽܘ̈ܣܶܐ ܘܰܒܦܽܘܠܝܛܝܐ ܘܰܒܫܶܢ̈ܕܶܐ ܕܟܽܠ ܙܢܺܝ̈ܢ ܡܶܬܒܰܣܡܺܝܢ ܗ̱ܘܰܘ ܒܣܽܘܝܳܥܳܐ ܕܺܝܠܗܽܘܢ܆ ܠܘܳܬ ܗܳܝ ܕܬܶܐܚܽܘܕ ܛܳܥܝܽܘܬܳܐ܆ ܠܚܰܪܬܳܐ ܡܶܢ ܡܚܰܡܣܢܳܢܽܘܬܳܐ ܕܣܳܗ̈ܕܶܐ ܐܶܙܕܟܺܝܘ܆ ܘܰܠܘܳܬ ܕܽܘܟ̈ܝܳܬܳܐ ܚܰܪ̈ܒܳܬܳܐ ܘܠܳܐ ܡܶܬܥܰܡܪ̈ܳܢܝܳܬܳܐ ܥܪܰܩܘ܆ ܒܰܕܡܽܘܬ ܐ̱ܢܳܫܺܝ̈ܢ ܕܰܡܢܰܓܕܺܝܢ^[12] ܒܡܰܚ̈ܘܳܬܳܐ܆ ܘܥܰܒ̈ܕܶܐ ܗܳܢܽܘܢ ܕܝܰܬܺܝܪ ܒܺܝܫܺܝܢ ܘܝܰܬܺܝܪ ܪܰܫܺܝܥܺܝܢ܆ ܟܰܕ ܥܰܠ ‌ܐܰ‌ܠܳܗܳܐ ܡܳܪܗܽܘܢ ܐܶܬܬܪܺܝܡܘ܆ ܘܠܺܐܝܩܳܪܶܗ ܕܗܰܘ ܠܘܳܬܗܽܘܢ ܠܡܶܚܠܰܛ ܚܶܪܝܳܐܺܝܬ ܐܳ‌ܠܨܺܝܢ ܗܘܰܘ.

ܘܟܰܕ ܗܳܠܶܝܢ ܗܳܟܰܢܳܐ ܐܺܝܬܰܝܗܶܝܢ ܗ̱ܘܰܝ̈܆ ܘܰܒܗܽܘܢ ܒܰܥ̈ܒܳܕܶܐ ܐܳܙ̈ܳܠ̱ܢ ܗ̱ܘܰܝ̈ ܘܪ̈ܳܒܝܳܢ ܟܽܠܝܽܘܡ ܒܢ̈ܳܬ ܩ̈ܳܠܶܐ ܗܳܠܶܝܢ ܕܶܐܘܰܢܓܶܠܺܝܽܘܢ܆ ܐܶܬܳܐ ܠܗܳܢܳܐ ܥܳܠܡܳܐ܆ ܐܰܢܛܘܢܝܘܤ ܗܰܘ ܕܒܰܫܪܳܪܳܐ ܪܰܒܳܐ. ܗܰܘ ܕܟܰܕ ܡܶܢ ܛܰܠܝܽܘܬܶܗ ܡܶܢܶܗ ܕܪܽܘܚܳܐ ܐܰ‌ܠܳܗܳܝܳܐ ܡܶܬܗܰܕܶܐ ܗ̱ܘܳܐ܆ ܘܳܐܦܠܳܐ ܕܢܺܐܙܰܠ ܠܒܶܝܬ ܣܶܦܪ̈ܶܐ ܩܰܒܶܠ ܥܠܰܘܗ̱ܝ ܘܰܕܢܶܫܬܰܘܬܰܦ ܒܝܽܘܠܦܳܢܳܐ ܕܰܟܬܺܝ̈ܒܳܬܳܐ. ܗܳܕܶܐ ܡܰܢ܆ ܟܰܕ ܡܶܢ ܥܶܢܝܳܢܳܐ ܘܟܰܘܫܳܐ ܗܰܘ ܕܥܰܡ ܛܠܳܝ̈ܶܐ ܥܳܪܶܩ ܗ̱ܘܳܐ܆ ܗܰܘ ܕܰܐܝܟ ܕܰܒܣܽܘܓܳܐܐ ܠܳܐ ܡܛܰܟܣܳܐ ܐܺܝܬܰܘܗ̱ܝ܆ ܘܡܶܢ ܗܳܕܶܐ ܒܳܬܰܪ ܙܢܳܐ ܘܰܥܝܳܕܳܐ ܗܰܘ ܝܺܚܺܝܕܳܝܳܐ ܘܠܳܐ ܚܠܺܝܛܳܐ ܪܳܗܶܛ ܗ̱ܘܳܐ. ܗܳܕܶܐ ܕܶܝܢ܆ ܐܳܦ ܒܰܡܕܰܒܪܳܢܽܘܬܳܐ ܐܰ‌ܠܳܗܳܝܬܳܐ܆ ܡܶܛܽܠ ܟܺܝܬ ܕܰܥܬܺܝܕ ܗ̱ܘܳܐ ܕܰܒܝܰܕ ܥܳܢܘܳܝܽܘܬܳܐ ܕܰܡܝܰܬܪ̈ܳܬܳܐ܆ ܠܘܳܬ ܒܰܪܢܳܫܳܐ ܗܰܘ ܢܶܣܰܩ܆ ܗܰܘ ܕܡܶܢ ܫܽܘܪܳܝܳܐ ܐܶܬܓܒܶܠ ܘܰܡܫܰܡ̈ܠܝܳܬܳܐ ܐܺܝܬ ܗ̱ܘܳܐ ܠܶܗ ܠܡܰܥܒ̈ܕܳܢܘܳܬܶܗ ܕܗܰܘܢܳܐ܆ ܘܰܠܪ̈ܶܓܫܶܐ ܕܦܰܓܪܳܐ ܕܠܳܐ ܣܽܘܓܦܳܢܳܐ܆ ܘܒܡܰܪ̈ܓܶܐ ܕܦܰܪܕܰܝܣܳܐ ܡܕܰܝܰܪ ܗ̱ܘܳܐ܆ ܘܥܰܠ ܢܳܡܽܘܣܳܐ ܟܬܺܝܒܳܐ ܠܳܐ ܐܶܣܬܢܶܩ ܠܘܳܬ ܬܳܐܪܽܘܬܳܐ܆ ܐܶܠܳܐ ܠܳܐ ܟܬܺܝܒܳܐܺܝܬ ܘܟܰܕ ܠܳܐ ܝܰܠܺܝܦ܆ ܒܙܰܘܥܳܐ ܟܝܳܢܳܝܳܐ ܕܢܰܦܫܳܐ ܠܘܳܬ ܦܽܘܩܕܳܢܳܐ ܐܰ‌ܠܳܗܳܝܳܐ ܡܶܬܬܰܝܬܶܐ ܗ̱ܘܳܐ. ܒܰܕܓܽܘܢ ܟܰܕ ܗܳܟܰܢܳܐ ܐܺܝܬ ܗ̱ܘܳܐ ܠܶܗ ܒܬܰܪܥܺܝܬܶܗ ܠܐܢܛܘܢܝܘܤ܆ ܐܳܦ ܡܶܢ ܒܳܬܰܪ ܥܽܘܢܕܳܢܳܐ ܕܰܐܒܽܘܗ̱ܝ ܘܕܶܐܡܶܗ܆ ܠܥܺܕܬܳܐ ܒܰܠܚܽܘܕ ܐܳܙܶܠ ܗ̱ܘܳܐ. ܘܟܰܕ ܩܶܪܝܳܢܳܐ ܕܰܟܬܳܒ̈ܶܐ ܟܳܗ̈ܢܳܝܶܐ ܫܳܡܰܥ ܗ̱ܘܳܐ܆ ܠܳܐ ܗ̱ܘܳܐ ܐܰܝܟ ܕܠܰܒܢܰܝ̈ܢܳܫܳܐ ܕܩܳܪܶܝܢ܆ ܐܶܠܳܐ ܐܰܝܟ ܕܠܰܐܠܳܗܳܐ ܕܣܳܐܶܡ ܢܳܡܽܘܣܳܐ ܫܳܡܰܥ ܗ̱ܘܳܐ܆ ܘܰܠܗܰܘ ܡܶܬܚܰܫܰܒ ܗ̱ܘܳܐ܆ ܘܰܕܚܰܝܳܒܳܐ ܐܺܝܬܰܘܗ̱ܝ ܕܰܢܡܰܠܶܐ ܢܳܡܽܘ̈ܣܶܐ ܡܶܬܪܰܥܶܐ ܗ̱ܘܳܐ. ܟܰܕ ܐܳܡܰܪ܆ ܕܶܐܢ ܠܳܐ ܢܶܬܡܰܠܽܘܢ ܡܶܢܰܢ܆ ܡܳܕܶܝܢ ܣܪܺܝܩܳܐܺܝܬ ܐܶܬܟܬܶܒܘ. ܐܶܢ ܓܶܝܪ ܠܰܘ ܠܡܶܣܥܰܪ܆ ܘܳܐܦܠܳܐ ܠܡܶܫܡܰܥ ܘܠܳܐ ܠܰܢ.

ܡܶܢ ܗܳܪܟܳܐ ܟܰܕ ܫܳܡܰܥ ܗ̱ܘܳܐ ܠܶܗ ܠܦܰܘܠܽܘܤ ܕܳܐܡܰܪ܆ ܕܰܡܟܰܒܶܫ ܐ̱ܢܳܐ ܠܶܗ ܠܦܰܓܪܝ ܘܰܡܫܰܥܒܶܕ ܐ̱ܢܳܐ^[13] ܘܰܒܥܰܡܠܳܐ ܘܰܒܠܶ‍ܐܘܬܳܐ܆ ܘܰܒܫܰܗܪܳܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܘܰܒܨܰܘ̈ܡܶܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܒܟܰܦܢܳܐ ܘܰܒܨܶܗܝܳܐ܆ ܒܩܽܘܪܫܳܐ ܘܰܒܥܰܪܛܶܠܳܝܽܘܬܳܐ^[14]܆ ܒܝܰܕ ܥܰܡ̈ܠܶܐ ܕܒܶܣܪܳܐ ܡܕܰܪܶܫ ܗ̱ܘܳܐ ܗܽܘ ܠܶܗ. ܟܰܕ ܨܰܝܳܡܳܐ ܡܩܰܘܶܐ ܗ̱ܘܳܐ ܟܽܠܶܗ ܝܰܘܡܳܐ܆ ܘܛܳܥܶܡ ܗ̱ܘܳܐ ܐܶܡܰܬܝ ܕܟܰܘܟܒܳܐ ܗܰܘ ܪܰܡܫܳܝܳܐ ܕܳܢܰܚ ܗ̱ܘܳܐ. ܘܟܰܕ ܠܳܐ ܡܶܬܬܰܪܣܝܳܢܽܘܬܳܐ ܡܶܬܥܰܢܘܶܐ ܗ̱ܘܳܐ܆ ܠܳܐ ܡܰܣܚܽܘܬܳܐ܆ ܡܰܓܣܳܐ ܕܥܰܠ ‌ܐܰܪܥܳܐ܆ ܫܰܗܪܳܐ܆ ܒܰܨ̈ܠܰܘܳܬܳܐ ܘܰܒܬܶܫܒ̈ܚܳܬܳܐ ܘܰܒܡܰܙܡܽܘܪ̈ܶܐ. ܠܗܳܠܶܝܢ ܢܳܩܦܳܐ ܗ̱ܘܳܬ ܡܣܰܪܩܽܘܬܳܐ. ܫܳܡܰܥ ܗ̱ܘܳܐ ܓܶܝܪ܆ ܙܰܒܶܢ ܟܽܠ ܡܶܕܶܡ ܕܺܐܝܬ ܠܳܟ܆ ܘܗܰܒ ܠܡܶܣ̈ܟܺܢܶܐ ܘܬܶܗܘܶܐ ܠܳܟ ܣܺܝܡܬܳܐ ܒܰܫܡܰܝܳܐ^[15].

ܘܟܰܕ ܠܗܳܠܶܝܢ ܒܢ̈ܳܬ ܩ̈ܳܠܶܐ ܫܡܰܥ ܚܦܺܝܛܳܐܺܝܬ܆ ܨܳܒܶܐ ܗ̱ܘܳܐ ܕܒܶܗ ܒܢܶܣܝܳܢܳܐ ܢܺܐܠܰܦ܆ ܕܡܳܢܰܐ ܗ̄ܘ ܚܰܝܠܳܐ ܕܡ̈ܶܠܶܐ ܗܳܠܶܝܢ ܕܰܫܠܺܝܚܳܐ ܕܳܐܡܰܪ܆ ܕܠܳܐ ܐܺܝܬܰܘܗ̱ܝ ܠܰܢ ܕܰܪܳܐ ܠܘܳܬ ܕܡܳܐ ܘܒܶܣܪܳܐ܆ ܐܶܠܳܐ ܠܘܳܬ ܪ̈ܺܝܫܳܢܘܳܬܳܐ܆ ܠܘܳܬ ܫܽܘܠ̈ܛܳܢܶܐ܆ ܠܘܳܬ ܐܰܚܺܝ̈ܕܰܝ ܥܳܠܡܳܐ ܕܚܶܫܽܘܟܳܐ ܕܥܳܠܡܳܐ ܗܳܢܳܐ܆ ܠܘܳܬ ܪ̈ܽܘܚܶܐ ܕܒܺܝܫܽܘܬܳܐ^[16]. ܘܰܐܕܪܶܟ ܒܢܰܦܫܶܗ ܘܰܦܪܰܫ܆ ܕܟܽܠ ܦܽܘܠܚܳܢܳܐ ܕܰܡܝܰܬܪܽܘܬܳܐ܆ ܫ̈ܺܐܕܶܐ ܒܰܥ̈ܠܰܝ ܕܰܪܳܐ ܐܺܝܬ ܠܶܗ܆ ܕܥܰܡ ܚܰܫ̈ܶܐ ܕܒܶܣܪܳܐ ܚܳܒܨܺܝܢ ܥܠܰܝܢ܆ ܘܒܰܐܣܽܘܪ̈ܶܐ ܗܽܘ̈ܠܳܢܳܝܶܐ ܘܒܽܐܘܠ̈ܨܳܢܶܐ ܥܳܠ̈ܡܳܢܳܝܶܐ ܚܳܠܕܺܝܢ ܘܗܳܘܶܝܢ ܥܽܘܟܪܳܐ܆ ܘܰܠܚܺܝܨܽܘܬܳܐ ܓܰܢ̱ܒܳܪܬܳܐ ܕܢܰܦܫܳܐ ܡܪܰܦܶܝܢ. ܐܶܠܳܐ ܒܝܰܕ ܨܶܒ̈ܘܳܬܳܐ ܡܶܕܶܡ ܡܶܨ̈ܥܳܝܳܬܳܐ܆ ܘܠܰܘ ܐܰܝܟ ܕܐ̱ܢܳܫ ܢܺܐܡܰܪ ܒܳܗ̇ ܒܰܚܙܳܬܳܐ܆ ܘܟܰܕ ܐܺܝܬܰܝܗܽܘܢ ܥܰܪ̈ܛܶܠܳܝܶܐ ܡܶܢ ܬܰܚܦ̈ܝܳܬܳܐ ܕܡܶܢ ܠܒܰܪ. ܪܰܒܳܐ ܡܰܢ ܓܶܝܪ ܐܺܝܬܰܘܗ̱ܝ ܗ̱ܘܳܐ ܘܰܥܡܺܝܠܳܐ ܐܳܦ ܬܰܟܬܽܘܫܳܐ ܗܰܘ ܕܣܳܗܕܽܘܬܳܐ܆ ܘܰܠܘܳܬܶܗ ܕܺܝܠܶܗ ܕܳܐܟܶܠܩܰܪܨܳܐ ܐܺܝܬܰܘܗ̱ܝ ܗ̱ܘܳܐ ܐܰܓܽܘܢܳܐ. ܐܶܠܳܐ ܠܰܘ ܥܰܪܛܶܠܳܝܬܳܐ ܐܺܝܬܶܝܗ̇ ܗ̱ܘܳܬ ܗܳܕܶܐ. ܐܺܝܬ ܗ̱ܘܳܐ ܠܳܗ̇ ܓܶܝܪ ܛܪ̈ܽܘܢܶܐ܆ ܕܒܰܫ̈ܟܳܚܳܬܳܐ ܡܦܰܬܟ̈ܳܬܳܐ ܕܫܶܢ̈ܕܶܐ ܡܫܰܡܫܺܝܢ ܗ̱ܘܰܘ ܠܳܗ̇. ܒܪܰܡ ܒܝܰܕ ܩܰܘܡܳܐ ܚܺܝܨܳܐ ܘܰܙܪܺܝܙܳܐ ܕܰܐܬܠܺܝ̈ܛܶܐ܆ ܡܚܰܪܪ̈ܳܬܳܐ ܡܰܢ ܗܘ̈ܰܝ ܡܕܺܝܢ̱ܬܳܐ ܡܶܢܶܗ ܟܺܝܬ ܘܡܶܢ ܪܺܝܫܳܢܽܘܬܳܐ ܗܳܝ ܕܫ̈ܺܐܕܶܐ܆ ܟܰܕ ܗܰܝܟ̈ܠܶܐ ܐܶܬܥܩܰܪܘ ܘܰܦܬܰܟܪ̈ܶܐ ܐܶܬܚܰܒܰܠܘ܆ ܠܘܳܬ ܕܶܝܢ ܐܰܬܪ̈ܰܘܳܬܳܐ ܚܰܪ̈ܒܶܐ ܘܠܳܐ ܡܶܬܬܕܺܝ̈ܫܳܢܶܐ ܥܪܰܩܘ. ܐܶܢܳܐ ܕܶܝܢ ܐܳܡܰܪ ܚܳܙܶܐ ܐ̱ܢܳܐ ܠܶܗ ܠܰܫܠܺܝܚܳܐ܆ ܕܠܳܐ ܦܰܓܪܳܢܳܐ ܪܳܫܶܡ ܠܶܗ ܠܺܝ ܠܕܰܪܳܐ ܕܰܠܘܳܬܗܽܘܢ. ܘܨܳܒܶܐ ܐ̱ܢܳܐ ܕܰܥܠܰܝܗܽܘܢ ܕܡܰܩܪ̈ܒܳܢܶܐ ܘܰܕܥܰܪܺܝܩܺܝܢ ܐܶܦܽܘܩ. ܐܺܝܬ ܠܺܝ ܛܽܘܦܣܳܐ ܫܰܦܺܝܪܳܐ ܕܗܳܢܳܐ ܬܰܟܬܽܘܫܳܐ܆ ܠܡܳܪܝܳܐ ܕܺܝܠܝ ܘܰܐ‌ܠܳܗܳܐ ܝܶܫܽܘܥ ܡܫܺܝܚܳܐ܆ ܕܰܐܝܟ ܕܰܠܝܽܘܠܦܳܢܳܐ ܕܺܝܠܝ ܨܶܒܝܳܢܳܐܺܝܬ ܠܘܳܬ ܡܰܕܒܪܳܐ ܐܶܬܕܒܰܪ܆ ܘܰܠܢܶܣܝܳܢܳܐ ܕܳܐܟܶܠܩܰܪܨܳܐ ܐ̱ܢܳܫܳܐܺܝܬ ܡܰܢ ܩܰܒܶܠ ܥܠܰܘܗ̱ܝ܆ ܐܰ‌ܠܳܗܳܐܺܝܬ ܕܶܝܢ ܙܟܳܝܗ̱ܝ . ܥܰܠ ܗܰܘ ܬܟܺܝܠ ‌ܐ̱ܢܳܐ܆ ܥܰܠ ܗܰܘ ܕܰܚܠܳܦܰܝ ܐܶܬܢܰܣܺܝ. ܗܽܘ ܢܰܪܡܶܝܘܗ̱ܝ ܠܡܶܬܟܰܬܫܳܢܳܐ ܕܰܠܩܽܘܒܠܳܐ ܘܠܰܘ ܐܶܢܳܐ.

ܟܰܕ ܗܳܠܶܝܢ ܘܰܕܕܳܡ̈ܝܳܢ ܠܗܳܠܶܝܢ ܐܶܬܪܰܥܺܝ܆ ܡܦܺܝܤ ܗ̱ܘܳܐ ܠܐ̱ܢܳܫ ܣܳܒܳܐ ܕܺܐܝܬܰܘܗ̱ܝ ܗ̱ܘܳܐ ܣܰܓܺܝ ܒܚܺܝܪܳܐ ܕܰܒܥܰܡ̈ܠܶܐ ܕܰܡܚܰܡܣܢܳܢܽܘܬܳܐ ܣܶܐܒ ܗ̱ܘܳܐ܆ ܕܝܳܬܶܒ ܗ̱ܘܳܐ ܠܒܰܪ ܡܶܢ ܩܪܺܝܬܳܐ܆ ܠܳܐ ܓܶܝܪ ܡܰܡܪܰܚ ܗ̱ܘܳܐ ܐ̱ܢܳܫ܆ ܕܬܽܘܒ ܝܰܬܺܝܪܳܐ ܢܶܬܪܰܚܰܩ܆ ܕܰܢܣܰܝܥܶܝܘܗ̱ܝ ܒܰܚܘܺܝܚܽܘܬܳܐ ܗܳܕܶܐ. ܐܳܦ ܓܶܝܪ ܠܝܽܘܬܪܳܢܳܐ ܪܳܐܶܓ ܗ̱ܘܳܐ܆ ܘܰܠܗܳܝ ܕܰܢܕܰܟܶܐ ܢܰܦܫܶܗ܆ ܘܠܰܘ ܠܫܽܘܒܚܳܐ ܣܪܺܝܩܳܐ܆ ܐܰܝܟܰܢܳܐ ܟܺܝܬ ܕܢܶܣܬܒܰܪ ܕܒܰܠܚܽܘܕܰܘܗ̱ܝ ܐܽܘܪܚܳܐ ܠܳܐ ܕܪܺܝܫܬܳܐ ܪܳܕܶܐ ܠܘܳܬ ܡܰܕܒܪܳܐ. ܐܶܠܳܐ ܗܰܘ ܡܰܢ ܐܰܫܦܶܠ ‌ܐܰܝܟ ܣܳܒܳܐ. ܗܰܘ ܕܶܝܢ ܙܪܺܝܙܳܐ܆ ܕܺܐܝܬ ܗ̱ܘܳܐ ܠܶܗ ܒܶܗ ܠܡܳܪܝܳܐ ܗܰܘ ܕܚܰܝܠܳܐ ܠܳܐ ܐܡ̣ܐܢ.

ܐܶܠܳܐ ܟܰܕ ܒܩܰܒܪܳܐ ܡܶܕܶܡ ܥܰܬܺܝܩܳܐ ܚܒܰܫ ܗܽܘ ܠܶܗ ܕܰܒܪܽܘܚܩܳܐ ܡܰܒܥܰܕ ܗ̱ܘܳܐ ܣܰܓܺܝ܆ ܘܺܐܝܬܰܘܗ̱ܝ ܗ̱ܘܳܐ ܚܰܪܒܳܐ ܘܰܣܦܺܝܩܳܐ ܟܽܠ ܟܽܠܶܗ܆ ܬܰܡܳܢ ܒܰܠܚܽܘܕܰܘܗ̱ܝ ܡܕܰܝܰܪ ܗ̱ܘܳܐ܆ ܟܰܕ ܗܰܒܳܒ̈ܶܐ ܡܦܰܬܟ̈ܶܐ ܕܬܶܐܽܘܪܺܝܰܐ ܡܟܰܢܶܫ ܗ̱ܘܳܐ܆ ܘܟܰܟܳܪ̈ܝܳܬܳܐ ܕܦܽܘܠܚܳܢܳܐ ܪܽܘܚܳܢܳܝܳܐ ܒܰܕܡܽܘܬ ܕܶܒܽܘܪ̈ܝܳܬܳܐ ܚܰܟܺܝ̈ܡܳܬܳܐ ܒܳܢܶܐ ܗ̱ܘܳܐ. ܘܰܐܟܚܕܳܐ ܐܰܝܟ ܕܰܠܕܶܒܽܘܪ̈ܶܐ ܒܰܥܪܺܝܪ̈ܳܝܶܐ܆ ܠܫ̈ܺܐܕܶܐ ܕܒܳܥܶܝܢ ܗ̱ܘܰܘ ܕܰܢܚܰܒܠܽܘܢ ܠܥܰܡ̈ܠܰܘܗ̱ܝ ܛܳܪܶܕ ܗ̱ܘܳܐ. ܘܰܦܫܺܝܩܬܳܐ ܡܰܢ ܐܺܝܬܶܝܗ̇ ܗ̱ܘܳܬ ܟܒܰܪ܆ ܐܶ‌ܠܽܘ ܐܰܝܟ ܕܶܒܽܘܪ̈ܶܐ ܡܩܪܒܝܢ ܗ̱ܘܰܘ. ܗܳܫܳܐ ܕܶܝܢ ܠܳܐ ܢܚܘ. ܒܰܙܒܰܢ ܡܰܢ܆ ܟܰܕ ܠܒܰܝܬܽܘܢܳܐ ܗܰܘ ܡܶܣܬܰܒܪܺܝܢ ܗ̱ܘܰܘ ܕܡܰܪܥܠܺܝܢ ܥܠܰܘܗ̱ܝ. ܒܰܙܒܰܢ ܕܶܝܢ܆ ܟܰܕ ܒܩ̈ܳܠܶܐ ܘܒܰܢ̈ܩܳܫܶܐ ܠܳܐ ܡܥܰܝ̈ܕܶܐ ܣܳܥܶܝܢ ܗ̱ܘܰܘ ܠܰܡܕܰܚܳܠܽܘܬܶܗ. ܠܚܰܪܬܳܐ ܕܶܝܢ܆ ܘܟܰܕ ܒܰܚ̈ܙܳܬܶܐ ܣܰܓܺܝ̈ܳܐܬܳܐ ܘܰܐܟܣ̈ܢܳܝܳܬܳܐ ܕܚܰܝ̈ܘܳܬ ܫܶܢܳܐ ܘܰܕܪ̈ܰܚܫܳܐ ܐܶܣܬܰܟܰܡܘ ܘܳܐܬܶܝܢ ܗ̱ܘܰܘ ܥܠܰܘܗ̱ܝ ܒܚܺܐܦܳܐ܆ ܟܰܕ ܠܰܘ ܕܢܶܟܬܽܘܢܳܝܗ̱ܝ ܆ ܐܶܠܳܐ ܕܢܶܒܠܥܽܘܢܳܝܗ̱ܝ ܪܳܓܶܝܢ ܗ̱ܘܰܘ. ܘܗܰܘ ܡܰܢ ܕܰܐܪܝܳܐ ܡܶܣܬܒܰܪ ܕܺܐܝܬܰܘܗ̱ܝ܆ ܐܰܝܟ ܗܰܘ ܕܪܳܐܶܓ ܗ̱ܘܳܐ ܠܡܶܚܛܰܦ ܘܓܳܣܰܪ ܗ̱ܘܳܐ. ܗܰܘ ܕܶܝܢ ܕܕܺܐܒܳܐ ܐܰܘ ܕܶܒܳܐ ܐܰܘ ܢܶܡܪܳܐ ܐܰܘ ܬܰܢܺܝܢܳܐ܆ ܟܰܕ ܐܳܬܶܝܢ ܗ̱ܘܰܘ ܥܠܰܘܗ̱ܝ ܒܚܺܐܦܳܐ ܘܙܰܘܥܳܐ ܚܰܝܘܰܬܫܶܢܳܝܳܐ ܘܰܕܠܳܚܶܡ ܗ̱ܘܳܐ܆ ܗܰܘ ܕܺܐܝܬ ܗ̱ܘܳܐ ܡܶܢ ܟܝܳܢܳܐ ܠܟܽܠ ܚܕ ܡܶܢܗܽܘܢ.

ܘܰܠܗܳܠܶܝܢ ܟܽܠܗܶܝܢ ܓܰܢ̱ܒܳܪܳܐܺܝܬ ܡܣܰܝܒܰܪ ܗ̱ܘܳܐ܆ ܟܰܕ ܠܳܐ ܡܶܙܕܰܥܙܥܳܢܳܐܺܝܬ ܩܳܐܶܡ ܗ̱ܘܳܐ܆ ܘܟܰܕ ܡܙܰܡܰܪ ܗ̱ܘܳܐ ܠܽܘܩܒܰܠܗܽܘܢ ܘܳܐܡܰܪ܆ ܟܽܠܗܽܘܢ ܥܰܡܡ̈ܶܐ ܚܰܕܪܽܘܢܝ܆ ܘܒܰܫܡܶܗ ܕܡܳܪܝܳܐ ܐܰܣܺܝܦܶܬ ܐܶܢܽܘܢ܆ ܘܶܐܢ ܬܶܣܬܕܰܪ ܥܠܰܝ ܡܰܫܪܺܝܬܳܐ ܠܳܐ ܢܶܕܚܰܠ ܠܶܒܝ^[17]܆ ܘܥܰܡ ܗܳܠܶܝܢ ܡܡܰܝܶܩ ܗ̱ܘܳܐ ܘܰܡܒܰܙܰܚ ܒܰܡܚܺܝܠܽܘܬܗܽܘܢ. ܐܶ‌ܠܽܘ ܓܶܝܪ ܐܳܡܰܪ ܚܰܝ̈ܠܬܳܢܶܐ ܐܺܝܬܰܝܟܽܘܢ ܗ̱ܘܰܝܬܽܘܢ܆ ܘܠܰܘ ܠܘܳܬ ܦܰܢܛܰܣܺܝܰܐ ܒܰܠܚܽܘܕܶܝܗ̇ ܚܳܝܪ̈ܳܢ ܗ̱ܘܰܝ̈ ܗܳܠܶܝܢ ܕܺܝܠܟܽܘܢ܆ ܣܳܦܩܳܐ ܗ̱ܘܳܬ ܐܳܦ ܚܕܳܐ ܚܰܝܘܰܬ ܫܶܢܳܐ ܕܰܕܠܳܐ ܢܶܫܡܬܳܐ ܬܶܥܒܕܰܢܝ܆ ܘܬܰܘܒܫܰܢܝ ܒܕܶܚܠܬܳܐ ܟܰܕ ܬܶܬܚܙܶܐ܆ ܘܬܶܩܛܠܰܢܝ ܟܰܕ ܐܳܬܝܳܐ ܥܠܰܝ. ܐܶܠܳܐ ܣܽܘܓܳܐܐ ܗܰܘ ܕܰܫܪܰܓܪ̈ܳܓܝܳܬܳܐ܆ ܐܺܝܬܰܘܗ̱ܝ ܠܺܝ܆ ܬܰܚܘܺܝܬܳܐ ܕܣܰܓܺܝ ܣܳܦܩܳܐ ܕܰܡܚܺܝܠܽܘܬܟܽܘܢ. ܘܦܽܘܪ̈ܳܣܶܐ ܕܕܽܘܚܳܠܳܐ ܗܳܠܶܝܢ ܕܰܐܢ̱ܬܘܢ ܠܽܘܩܒܰܠܝ ܡܶܬܦܰܪܣܶܝܢ ܐܢ̱ܬܽܘܢ܆ ܗܳܘܶܝܢ ܠܺܝ ܙܘ̈ܳܕܶܐ ܕܠܽܘܒܳܒܳܐ.

ܗܳܕܶܐ ܕܶܝܢ ܝܰܬܺܝܪܐܺܝܬ ܡܰܬܘܪܳܐ ܗ̱ܘܳܬ ܠܶܗ ܠܳܐܟܶܠ ܩܰܪܨܳܐ ܘܡܰܬܡܗܳܐ ܗ̱ܘܳܬ܆ ܘܚܳܢܩܳܐ ܗ̱ܘܳܬ ܠܗܽܘܢ ܠܫ̈ܺܐܕܶܐ. ܗܳܝ ܕܰܥܬܰܪ ܐܰܢܛܘܢܝܘܤ ܛܰܝܒܽܘܬܳܐ ܗܳܝ ܕܦܽܘܪܳܫܳܐ ܕܪ̈ܽܘܚܶܐ܆ ܘܥܰܡ ܚܽܘܫܳܒܳܐ ܥܺܝܪܳܐ܆ ܫܳܪܶܐ ܗ̱ܘܳܐ ܠܳܐ ܬܰܘܺܝܪܳܐܺܝܬ ܘܠܳܐ ܡܕܰܘܕܳܐܺܝܬ ܠܦܽܘܪ̈ܣܰܝܗܽܘܢ ܣܰܓܺܝ̈ܰܐܝ ܥܽܘܪ̈ܙܳܠܶܐ ܘܰܕܝܰܬܺܝܪ ܡܶܢ ܟܽܠ ܨܢܺܝܥܺܝܢ܆ ܘܡܶܢ ܪܽܘܚܩܳܐ ܡܰܪܓܶܫ ܗ̱ܘܳܐ ܒܗܳܠܶܝܢ܆ ܘܥܰܡ ܦܰܘܠܽܘܤ ܐܳܡܰܪ ܗ̱ܘܳܐ܆ ܠܳܐ ܓܶܝܪ ܛܰܥ̈ܝܳܢ ܠܰܢ ܡܰܚܫ̈ܒܳܬܶܗ^[18]. ܡܶܛܽܠܗܳܕܶܐ ܟܰܕ ܩܕܳܡ ܗܳܢܳܐ ܢܶܣܝܳܢܳܐ܆ ܘܠܳܐ ܡܶܢ ܕܽܘܟ ܡܶܫܟܚܺܝܢ ܗ̱ܘܰܘ ܕܰܢܥܰܪܩܠܽܘܢܳܝܗ̱ܝ ܘܢܰܒܪܟܽܘܢܳܝܗ̱ܝ ܆ ܘܡܶܬܬܥܺܝܩܺܝܢ ܗ̱ܘܰܘ ܩܰܫܝܳܐܺܝܬ ܘܡܶܬܕܰܒܨܺܝܢ ܗ̱ܘܰܘ܆ ܕܰܐܝܟ ܗܳܠܶܝܢ ܡܰܚ̈ܘܳܬܳܐ ܩܰܫ̈ܝܳܬܳܐ ܐܰܝܬܺܝܘ ܥܰܠ ܦܰܓܪܶܗ܆ ܐܰܝܟܰܢܳܐ ܕܦܶܠܓܽܘ ܡܺܝܬܳܐ ܢܶܫܬܒܶܩ. ܘܰܒܨܺܝܪ ܩܰܠܺܝܠ ܡܺܝܬܳܐ ܢܶܗܘܶܐ ܣܺܝܡ ܗ̱ܘܳܐ܆ ܟܰܕ ܠܳܐ ܡܶܫܟܰܚ ܗ̱ܘܳܐ ܟܺܐܒܶܗ ܕܢܶܬܦܰܚܰܡ ܠܢܶܓ̈ܕܶܐ ܗܳܢܽܘܢ ܕܡܶܢ ܒܢܰܝ̈ܢܳܫܳܐ ܡܶܬܬܰܝܬܶܝܢ܆ ܐܳܦ ܗܳܝܕܶܝܢ ܒܰܠܚܽܘܕ ܬܶܬܗܰܝܡܰܢ ܗ̱ܘܳܬ܆ ܕܳܐܦ ܦܰܓܪܳܢܳܐܺܝܬ ܟܺܝܬ ܡܶܫܟܚܺܝܢ ܗܳܟܰܢܳܐ ܫ̈ܺܐܕܶܐ ܠܡܶܡܚܳܐ.

ܐܶܠܳܐ ܟܰܕ ܒܛܺܝܠܽܘܬܳܐ ܕܰܐ‌ܠܳܗܳܐ ܦܰܪܢܣܰܬ܆ ܗܳܝ ܕܳܐܦ ܫܶܒܩܰܬ ܕܳܐܦ ܥܕܰܡܳܐ ܠܗܳܕܶܐ ܢܶܬܒܩܶܐ ܘܢܶܬܢܰܨܰܚ ܐܰܬܠܺܝܛܳܐ܆ ܐܶܬܳܐ ܗ̱ܘܳܐ ܠܘܳܬܶܗ ܗܰܘ ܕܡܶܢ ܥܶܕܳܢܳܐ ܙܰܒܢܳܝܳܐ ܡܬܰܚܡܳܐ ܘܰܡܡܰܫܚܳܐ ܡܰܝܬܶܐ ܗ̱ܘܳܐ ܠܶܗ ܠܰܚܡܳܐ. ܘܟܰܕ ܐܶܫܟܚܶܗ ܠܬܰܪܥܳܐ ܕܰܦܬܺܝܚ܆ ܐܳܦ ܗܳܕܶܐ ܓܶܝܪ ܥܒܳܕܳܐ ܕܺܝܠܳܗ̇ ܟܰܕ ܕܺܝܠܳܗ̇ ܕܰܒܛܺܝܠܽܘܬܳܐ ܐܺܝܬܶܝܗ̇ ܗ̱ܘܳܬ܆ ܚܙܳܝܗ̱ܝ ܕܰܐܝܟܰܢܳܐ ܪܡܶܐ ܗ̱ܘܳܐ ܗܰܘ ܪܰܒܳܐ ܪܰܘܪܒܳܐܺܝܬ ܕܡܶܕܶܡ ܦܽܘܐܺܝܛܳܐܺܝܬ ܐܺ݀ܡܰܪ܆ ܗܰܘ ܐܰܓܽܘܢܺܝܣܛܳܐ ܙܪܺܝܙܳܐ ܘܚܰܝܠܬܳܢܳܐ܆ ܕܰܠܦܰܓܪܶܗ ܡܰܠܽܘܢ ܛܥܳܐ܆ ܐܰܘ ܠܰܣܕܺܝܪܽܘܬ ܩܪܳܒܳܐ ܕܰܠܘܳܬ ܫ̈ܺܐܕܶܐ܆ ܘܰܓܒܳܐ ܕܰܢܡܽܘܬ ܒܫܶܢ̈ܕܶܐ܆ ܐܰܘ ܕܢܶܥܪܽܘܩ ܡܶܢ ܤܛܰܐܕܝܘܢ. ܘܟܰܕ ܟܺܝܬ ܛܰܥܢܶܗ ܠܗܳܢܳܐ ܒܰܕܡܽܘܬ ܡܺܝܬܳܐ܆ ܠܥܺܕܬܳܐ ܕܰܩܪܺܝܬܐ ܐܰܝܬܝܶܗ. ܘܟܰܕ ܣܰܓܺܝ̈ܶܐܐ ܩܳܝܡܺܝܢ ܗ̱ܘܰܘ ܠܘܳܬܶܗ ܐܰܝܟ ܕܰܠܘܳܬ ܦܰܓܪܳܐ ܕܠܳܐ ܢܰܦܫܳܐ܆ ܘܝܰܬܺܝܪܳܐܺܝܬ ܗܳܢܽܘܢ ܕܰܒܓܶܢܣܳܐ ܩܰܪܺܝܒܺܝܢ ܗ̱ܘܰܘ ܠܶܗ܆ ܘܰܡܕܰܡܥܺܝܢ ܗ̱ܘܰܘ ܘܒܳܟܶܝܢ܆ ܠܶܠܝܳܐ ܗܘ̣ܳܐ ܒܰܡܨܰܥܬܳܐ܆ ܘܟܰܕ ܕܰܡܺܝܟܺܝܢ ܟܽܠܗܽܘܢ܆ ܟܰܕ ܐܶܬܢܰܦܰܫ ܩܰܠܺܝܠ ܠܰܐܦܰܝ̈ ܦܶܠܓܶܗ ܕܠܶܠܝܳܐ ܒܕܽܘܟ ܘܩܳܡ ܗܽܘ ܐܰܢܛܘܢܝܘܤ܆ ܡܦܺܝܤ ܗ̱ܘܳܐ ܠܶܗ ܠܗܰܘ ܕܰܠܘܳܬ ܣܽܘܢܩܳܢܳܐ ܕܠܰܚܡܳܐ ܡܫܰܡܶܫ ܗ̱ܘܳܐ ܠܶܗ܆ ܕܒܶܗ ܟܰܕ ܒܶܗ ܒܰܙܢܳܐ ܢܶܛܥܢܺܝܘܗ̱ܝ ܟܰܣܝܳܐܺܝܬ܆ ܘܰܠܘܳܬ ܩܰܒܪܳܐ ܗܰܘ ܚܰܪܒܳܐ ܘܕܰܡܠܶܐ ܣܽܘܪܳܕܳܐ ܢܰܘܒܠܺܝܘܗ̱ܝ܆ ܘܕܰܢܣܺܝܡܺܝܘܗ̱ܝ ܒܶܗ.

ܘܟܰܕ ܗܳܕܶܐ ܗܘ̣ܳܬ܆ ܐܳܦ ܓܶܝܪ ܐܳܦ ܗܰܘ ܡܫܰܡܫܳܢܳܐ ܡܛܰܝܒܳܐ ܐܺܝܬܰܘܗ̱ܝ ܗ̱ܘܳܐ ܠܶܗ ܘܰܕܠܳܚܶܡ ܗ̱ܘܳܐ ܠܘܳܬ ܗܳܠܶܝܢ܆ ܟܰܕ ܠܰܘ ܡܫܰܡܫܳܢܳܐ ܕܦܰܓܪܶܗ ܐܺܝܬܰܘܗ̱ܝ ܗ̱ܘܳܐ ܡܰܠܽܘܢ܆ ܐܶܠܳܐ ܡܣܰܝܥܳܢܳܐ ܕܬܰܟܬܽܘܫ̈ܶܐ ܗܳܢܽܘܢ ܕܥܳܢܘܳܝܽܘܬܳܐ܆ ܟܰܕ ܐܶܬܬܚܶܕ ܬܰܪܥܳܐ ܐܰܝܟ ܥܝܳܕܳܐ܆ ܪܡܶܐ ܗ̱ܘܳܐ ܟܰܕ ܡܙܰܡܰܪ ܗ̱ܘܳܐ ܠܽܘܩܒܰܠ ܫ̈ܺܐܕܶܐ ܘܰܡܨܰܠܶܐ ܗ̱ܘܳܐ܆ ܠܰܡܩܳܡ ܓܶܝܪ ܠܳܐ ܡܶܫܟܰܚ ܗ̱ܘܳܐ ܥܕܰܟܺܝܠ܆ ܘܟܰܕ ܪܰܘܪܒܳܐܺܝܬ ܡܰܙܥܶܩ ܗ̱ܘܳܐ܆ ܕܗܳܪܟܳܐ ܐܺܝܬܰܝ܆ ܘܰܐܬܳܝ ܐ̱ܢܳܐ ܬܽܘܒ ܥܠܰܝܟܽܘܢ ܐܶܢܳܐ ܐܰܢܛܘܢܝܘܤ܆ ܟܰܕ ܒܢܰܦܫܳܐ ܠܳܐ ܐܶܬܪܰܚܩܶܬ. ܐܳܦܶܢ ܓܶܝܪ ܐܳܡܰܪ ܒܢܶܓ̈ܕܶܐ ܠܟܽܠܶܗ ܦܰܓܪܝ ܡܚܰܝܬܽܘܢ܆ ܚܕܳܐ ܡܚܽܘܬܳܐ ܥܳܪܽܘܩܬܳܐ܆ ܠܳܐ ܒܶܠܥܶܬ ܥܰܠ ܚܰܨܝ ܐܰܝܟ ܥܳܪܽܘܩܳܐ. ܐܶܠܳܐ ܟܽܠܗܶܝܢ ܓܰܠ̈ܝܳܬܳܐ ܘܰܐܝܟ ܕܥܰܠ ܚܰܕ̣ܝܳܐ ܛܥܺܝܢ ܐ̱ܢܳܐ ܠܗܶܝܢ. ܕܡܰܙܥ̈ܩܳܢ ܓܰܠܝܳܐܺܝܬ ܘܰܚܠܳܦ ܟܬܺܝ̈ܒܳܬܳܐ ܡܚܰܘ̈ܝܳܢ܆ ܕܠܳܐ ܡܶܕܶܡ ܢܶܦܪܫܰܢܝ ܡܶܢ ܚܽܘܒܶܗ ܕܰܡܫܺܝܚܳܐ^[19]. ܟܰܕ ܓܶܝܪ ܚܕܳܐ ܙܒܰܢ ܐܶܬܥܰܪܙܠܶܬ ܥܰܡܟܽܘܢ܆ ܠܒܶܣܬܰܪܝ ܦܰܪܨܽܘܦܝ ܠܳܐ ܐܰܗܦܟܶܬ.

ܘܟܰܕ ܗܳܠܶܝܢ ܫܳܡܥܺܝܢ ܗ̱ܘܰܘ ܐܰܝܟ ܡܰܪܺܝܪ̈ܶܐ ܘܣܳܢ̈ܝ̣ܰܝ̣ ܒܢܰܝ̈ܢܳܫܳܐ܆ ܗܳܝܕܶܝܢ ܡܶܟܺܝܠ ܦܰܢܛܰܣܺܝܰܐ ܕܚܰܝ̈ܘܳܬ ܫܶܢܳܐ ܗܳܝ ܕܰܐܡܺܝܪܳܐ ܡܶܢ ܠܥܶܠ ‌ܐܰܩܺܝܡܘ ܥܠܰܘܗ̱ܝ. ܥܰܠ ܗܳܝ ܕܰܚܠܳܦ ܕܢܶܕܚܰܠ ܡܶܢܳܗ̇. ܚܳܕܝܳܐܺܝܬ ܓܚܶܟ܆ ܘܰܡܒܰܙܰܚ ܗ̱ܘܳܐ ܘܰܡܡܰܝܶܩ ܒܣܽܘܓܳܐܐ ܕܗܳܢܽܘܢ ܕܶܐܬܰܘ ܥܠܰܘܗ̱ܝ. ܟܰܕ ܫܽܘܘܕܳܥܳܐ ܕܰܡܚܺܝܠܽܘܬܳܐ ܚܰܫܒܳܗ̇܆ ܘܦܰܢܛܰܣܺܝܰܐ ܕܰܒ̈ܛܶܠܳܢܝܳܬܳܐ ܡܬܰܘܗܳܐ^[20]. ܘܗܳܠܶܝܢ܆ ܟܰܕ ܩܰܫܝܳܐܺܝܬ ܡܶܢ ܡܰܚ̈ܘܳܬܳܐ ܗܳܠܶܝܢ ܘܫܶܢ̈ܕܶܐ܆ ܘܡܶܢ ܚܺܐܦ̈ܶܐ ܘܰܩܪ̈ܳܒܶܐ ܕܕܰܐܝܟ ܗܳܠܶܝܢ ܘܰܡܫܰܚ̈ܠܦܶܐ܆ ܚܳܐܶܫ ܗ̱ܘܳܐ ܘܡܶܬܢܰܘܰܠ ܒܟܺܐܒܳܐ. ܐܶܠܳܐ ܡܶܚܕܳܐ ܟܰܕ ܡܶܢ ܫܶܠܝ ܐܰܝܟ ܗܰܘ ܕܬܰܛܠܺܝܠܳܐ ܗܰܘ ܐܶܬܦܠܰܓ܆ ܙܰܠܺܝܩܳܐ ܕܢܽܘܗܪܳܐ ܠܳܐ ܡܶܬܡܰܠܠܳܢܳܐ ܟܰܕ ܡܶܢ ܬܰܡܳܢ ܥ̣ܰܠ ܘܰܐܙܠܶܓ ܥܠܰܘܗ̱ܝ܆ ܠܕܰܝ̈ܘܶܐ ܡܰܢ ܠܳܐ ܡܶܬܚܰܙܝܳܢ̈ܶܐ ܥܒܰܕ ܐܶܢܽܘܢ. ܒܶܗ ܕܶܝܢ ܚܰܕܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܘܚܰܝܠܳܐ ܕܠܽܘܒܳܒܳܐ ܐܰܥܒܶܕ. ܘܟܰܕ ܫܰܐܶܠ ܕܡܶܛܽܠ ܡܳܢܳܐ ܡܶܢ ܫܽܘܪܳܝܳܐ ܠܳܐ ܥܰܕܰܪܬܳܢܝ܆ ܩܳܠܐ ܫܡܰܥ ܕܳܐܡܰܪ܆ ܕܠܳܐ ܐܰܪܚܩܶܬ ܘܳܐܦܠܳܐ ܦܶܪܩܶܬ ܡܶܢܳܟ. ܐܶܠܳܐ ܡܟܰܬܰܪ ܗ̱ܘܺܝܬ̣ ܠܡܶܚܙܳܐ܆ ܠܒܽܘܩܝܳܐ ܕܬܰܟܬܽܘܫ̈ܶܐ ܕܺܝܠܳܟ.

ܘܡܶܢ ܗܳܪܟܳܐ ܟܰܕ ܐܶܬܚܰܝܰܠ ܘܶܐܬܚܠܶܡ܆ ܪܶܚܡܬܳܐ ܕܕܰܪ̈ܶܐ ܕܝܰܬܺܝܪ ܪܰܘܪܒܺܝܢ ܥܳܠܳܐ ܠܶܗ܆ ܘܰܠܡܰܕܒܪܳܐ ܗܰܘ ܓܰܘܳܝܳܐ ܘܰܕܣܰܓܺܝ ܐܺܝܬܰܘܗ̱ܝ ܚܰܪܒܳܐ ܘܠܳܐ ܡܫܰܝܢܳܐ ܪܳܐܶܓ ܗ̱ܘܳܐ܆ ܘܰܠܘܳܬܶܗ ܡܶܬܬܰܝܬܶܐ ܗ̱ܘܳܐ. ܘܡܶܨܥܳܝܳܐ ܡܶܕܶܡ ܠܰܝܬ ܗ̱ܘܳܐ܆ ܕܰܚܘܺܝܚܽܘܬܳܐ ܘܕܰܣܥܳܝܳܐ. ܐܶܠܳܐ ܗܳܝ ܕܶܐܬܒܰܩܝܰܬ̣ ܕܛܳܒܳܐܺܝܬ ܐܺܝܬ ܠܳܗ̇܆ ܥܒܳܕܳܐ ܐܺܝܬܶܝܗ̇ ܗ̱ܘܳܬ.

ܘܟܰܕ ܟܺܝܬ ܗܳܟܰܢܳܐ ܚܺܝܨܳܐܺܝܬ ܡܣܰܪܗܶܒ ܗ̱ܘܳܐ ܠܘܳܬ ܗܰܘ ܡܳܐ ܕܡܶܬܪܚܶܡ܆ ܗܰܘ ܕܶܐܡܰܪ ܠܦܳܪܽܘܩܰܢ ܕܗܳܠܶܝܢ ܟܽܠܗܶܝܢ ܠܳܟ ܐܶ݀ܬܶܠ ‌ܐܶܢܶܝܢ ܐܶܢ ܟܰܕ ܬܶܦܶܠ ܬܶܣܓܽܘܕ ܠܺܝ^[21]܆ ܦܰܢܛܰܣܺܝܰܐ ܕܦܺܝܢܟܳܐ ܕܣܺܐܡܳܐ ܚܰܘܺܝ ܠܶܗ ܕܰܫܕܶܐ ܥܰܠ ‌ܐܰܪܥܳܐ. ܘܟܰܕ ܥܰܒܪܶܗ ܠܗܳܢܳܐ ܒܪܶܗܛܳܐ ܠܒܶܣܬܪܶܗ ܫܰܒܩܶܗ܆ ܟܰܕ ܒܶܗ ܒܰܥܒܳܕܳܐ ܐܰܙܥܶܩ ܠܒܰܪܬܩܳܠܳܐ ܗܳܝ ܕܡܳܪܰܢ܆ ܙܶܠ ܠܳܟ ܠܒܶܣܬܰܪܝ ܤܳܛܳܢܳܐ^[22]. ܡܶܢ ܩܕܳܡ ܥܰܝܢܰܘ̈ܗ̱ܝ ܓܶܝܪ ܒܦܳܣܺܝ̈ܩܳܬܳܐ ܠܡܺܐܡܰܪ܆ ܚܙܳܐ ܒܥܰܝܢܳܐ ܚܰܪܺܝܦܬܳܐ ܕܦܳܪܽܘܫܽܘܬܳܐ܆ ܘܰܦܪܰܫ ܘܝܰܕܥܳܗ̇ ܠܡܰܛܥܝܳܢܽܘܬܳܗ̇ ܕܰܚܙܳܬܳܐ. ܘܡܰܚܫܰܒܬܶܗ ܕܙܰܕܺܝܩܳܐ܆ ܒܰܕܡܽܘܬ ܫܶܡܫܳܐ ܕܢܳܦܶܠ ܥܰܠ ܥܰܪܦܶܠܳܐ܆ ܗܳܟܰܢܳܐ ܫܪܳܬܳܗ̇ ܠܦܰܢܛܰܣܺܝܰܐ. ܘܦܺܝܢܟܳܐ ܗܰܘ ܐܺܝܬܰܘܗ̱ܝ ܗ̱ܘܳܐ ܠܳܐ ܡܶܬܚܰܙܝܳܢܳܐ.

ܐܶܠܳܐ ܐܳܦ ܒܙܰܒܢܳܐ ܐ̱ܚܪܺܢܳܐ ܟܰܕ ܕܰܗܒܳܐ ܣܰܓܺܝܳܐܐ ܐܶܬܚܙܺܝ ܒܡܰܕܒܪܳܐ܆ ܐܰܘ ܕܫܰܪܺܝܪܳܐܺܝܬ ܐܺܝܬܰܘܗ̱ܝ ܐܰܘ ܕܡܶܣܬܒܰܪ܆ ܐܰܘ ܟܰܕ ܐܰ‌ܠܳܗܳܐ ܒܳܩܶܐ ܗ̱ܘܳܐ ܠܶܗ܆ ܐܰܘ ܟܰܕ ܫ̈ܺܐܕܶܐ ܡܰܛܥܶܝܢ ܗ̱ܘܰܘ ܘܰܡܫܰܕܠܺܝܢ ܠܶܗ܆ ܠܳܐ ܐܰܛܥܝܳܗ̇ ܠܰܚܙܳܬܶܗ܆ ܫܒܽܘܩ ܟܺܝܬ ܕܰܠܬܰܪܥܺܝܬܶܗ ܢܰܛܥܶܐ. ܐܶܠܳܐ ܐܰܝܟ ܕܰܠܓܰܘܙܰܠܬܳܐ ܕܢܽܘܪܳܐ܆ ܒܓܶܦ̈ܶܐ ܩܰܠܺܝ̈ܠܶܐ ܦܪܰܚ ܘܰܥܒܰܪ ܠܥܶܠ ܡܶܢ ܗܳܢܳܐ. ܡܰܙܥܶܩ ܗ̱ܘܳܐ ܓܶܝܪ ܒܶܗ ܒܰܥܒܳܕܳܐ ܠܘܳܬ ܦܳܪܽܘܩܰܢ ܡܫܺܝܚܳܐ܆ ܕܛܳܒ ܠܺܝ ܢܳܡܽܘܣܶܗ ܕܦܽܘܡܳܟ ܝܰܬܺܝܪ ܡܶܢ ܐܰ‌ܠ̈ܦܶܐ ܕܕܰܗܒܳܐ ܘܰܕܣܺܐܡܳܐ^[23].

ܘܗܳܠܶܝܢ ܐܺܝܬܰܝܗܶܝܢ ܗ̱ܘܰܝ̈ ܠܶܗ ܕܽܐܘܪܚܳܐ ܕܰܐܪ̈ܶܐ ܕܰܡܫܳܟ̣ܳܐ܆ ܟܰܕ ܠܘܳܬ ܡܰܕܒܪܳܐ ܪܳܕܶܦ ܗ̱ܘܳܐ. ܟܰܕ ܕܶܝܢ ܕܽܘܟܬܳܐ ܚܕܳܐ ܐܶܫܟܰܚ܆ ܫܘܺܝܬܳܐ ܡܰܢ܆ ܕܡܰܠܝܳܐ ܗ̱ܘܳܬ ܕܶܝܢ ܪ̈ܰܚܫܳܐ ܣܰܓܺܝܳܐܐ ܪ̈ܳܡܝ̣ܰܝ̣ ܡܶܪܬܳܐ܆ ܐܰܩܺܝܡܶܗ ܠܪܶܗܛܶܗ. ܘܟܰܕ ܡܰܥܡܪܳܐ ܦܺܝܠܘܣܘܦܳܝܳܐ ܩܒܰܥ ܬܰܡܳܢ܆ ܠܪ̈ܰܚܫܳܐ ܡܰܢ ܠܳܐ ܡܶܬܚܰܙ̈ܝܳܢܶܐ ܥܒܰܕ ܐܶܢܽܘܢ܆ ܟܰܕ ܒܦܶܪܣܬܳܐ ܕܪܶܓܠܶܗ ܐܰܝܟ ܕܒܰܡܚܽܘܬܳܐ ܐܶܬܪܕܶܦܘ. ܒܰܠܚܽܘܕܰܘܗ̱ܝ ܕܶܝܢ ܠܓܰܘ ܡܛܰܫܰܝ ܗ̱ܘܳܐ.

ܘܟܰܕ ܙܰܒܢܳܐ ܣܰܓܺܝܳܐܐ ܟܳܫ ܬܰܡܳܢ ܘܡܶܬܒܰܣܰܡ ܗ̱ܘܳܐ ܒܬܶܐܽܘܪܺܝܰܐ܆ ܘܰܠܕܰܐܪܳܐ ܗܰܘ ܕܰܠܘܳܬ ܪ̈ܽܘܚܶܐ ܕܒܺܝܫܽܘܬܳܐ ܥܰܫܺܝܢܳܐܺܝܬ ܙܳܟܶܐ ܗ̱ܘܳܐ܆ ܬܽܘܒ ܐܰܩܺܝܡ ܥܠܰܘܗ̱ܝ ܒܢܰܝ̈ܢܳܫܳܐ܆ ܗܰܘ ܕܰܠܘܳܬ ܫܠܺܝ̈ܚܶܐ ܐܶܡܰܪ܆ ܕܢܶܢܗܰܪ ܢܽܘܗܪܟܽܘܢ ܩܕܳܡ ܒܢܰܝ̈ܢܳܫܳܐ܆ ܐܰܝܟܰܢܳܐ ܕܢܶܚܙܽܘܢ ܥ̈ܒܳܕܰܝܟܽܘܢ ܛܳܒ̈ܶܐ܆ ܘܰܢܫܰܒܚܽܘܢ ܠܰܐܒܽܘܟܽܘܢ ܗܰܘ ܕܒܰܫܡܰܝܳܐ^[24]. ܙܳܕܶܩ ܓܶܝܪ ܕܠܰܐ̱ܚܪ̈ܳܢܶܐ ܢܶܢܗܰܪ ܘܠܰܘ ܗܽܘ ܠܶܗ ܠܚܽܘܕܰܘܗ̱ܝ ܗܰܘ ܕܡܰܕܠܶܩ ܫܪܳܓܳܐ ܕܰܡܝܰܬܪ̈ܳܬܳܐ. ܡܶܛܽܠ ܗܳܕܶܐ ܣܰܓܺܝ̈ܶܐܐ ܠܘܳܬ ܢܽܘܗܪܳܐ ܕܬܽܘܪ̈ܳܨܰܘܗ̱ܝ ܪܳܗܛܺܝܢ ܗ̱ܘܰܘ܆ ܕܰܡܛܰܫܰܝ ܗ̱ܘܳܐ ܡܰܢ܆ ܡܰܢܗܰܪ^[25] ܗ̱ܘܳܐ ܕܶܝܢ ܐܳܦ ܠܗܳܢܽܘܢ ܕܡܶܢ ܪܽܘܚܩܳܐ. ܘܟܰܕ ܡܶܬܩܰܪܒܺܝܢ ܗ̱ܘܰܘ ܒܰܠܚܽܘܕ ܠܬܰܪܥܳܐ ܕܒܰܝܬܽܘܢܶܗ܆ ܡܶܢ ܟܽܘܪ̈ܗܳܢܶܐ ܕܟܽܠ ܓܢܶܤ ܡܰܓܗܶܝܢ ܗ̱ܘܰܘ. ܘܰܐܝܟܰܢܳܐ ܕܠܳܐ ܚܕܳܐ ܚܕܳܐ ܐܺ݀ܡܰܪ ܐܶܢܶܝܢ܆ ܐܰܝܟ ܐܰܝܠܶܝܢ ܘܰܐܝܟ ܡܳܐ ܕܳܐܡܪܳܐ ܬܰܫܥܺܝܬܳܐ ܕܰܐܚܠܶܡܘ ܫ̈ܠܺܝܚܶܐ ܐܺܝܬܰܝܗܽܘܢ ܗ̱ܘܰܘ. ܟܰܕ ܕܶܝܢ ܟܳܝܫܺܝܢ ܗܘܰܘ ܘܰܡܟܰܬܪܺܝܢ ܠܘܳܬܶܗ܆ ܡܦܺܝܤ ܗ̱ܘܳܐ ܠܗܽܘܢ ܕܠܳܐ ܢܰܠܙܽܘܢܳܝܗ̱ܝ ܆ ܟܰܕ ܘܠܳܐ ܠܐ̱ܢܳܫ ܟܽܠ ܟܽܠܶܗ ܡܩܰܒܶܠ ܗ̱ܘܳܐ ܕܢܶܥܽܘܠ ܠܓܰܘ ܩܶܠܳܝܬܶܗ. ܗܳܢܽܘܢ ܕܶܝܢ ܒܠܶܠܝܳܐ ܘܒܺܐܝܡܳܡܳܐ ܫܳܡܥܺܝܢ ܗ̱ܘܰܘ܆ ܐܰܝܟ ܗܰܘ ܕܟܶܢܫܳܐ ܣܰܓܺܝܳܐܐ ܕܡܰܩܪ̈ܒܳܢܶܐ ܡܶܣ̣ܬܕܰܩ ܗ̱ܘܳܐ܆ ܫܓܽܘܫܝܳܐ ܣܰܓܺܝܳܐܐ ܘܩܴ̈ܠܶܐ ܘܰܢܩ̈ܳܫܶܐ ܘܺܝ̈ܠܠܳܬܳܐ܆ ܘܰܐ̱ܚܪ̈ܳܢܶܐ ܕܽܘܚ̈ܳܠܶܐ ܕܰܐܝܟ ܗܳܠܶܝܢ܆ ܐܰܝܟܰܢܳܐ ܕܡܰܠ̈ܝ̣ܰܝ̣ ܕܶܚܠܬܳܐ ܢܶܗܘܽܘܢ ܘܢܶܪܥܠܽܘܢ ܘܰܢܙܽܘܥܽܘܢ܆ ܕܕܰܠܡܳܐ ܡܶܕܶܡ ܡܶܢ ܩܰܫ̈ܝܳܬܳܐ ܘܠܳܐ ܡܶܬܐܰܣ̈ܝܳܢܝܳܬܳܐ ܢܶܚܰܫ ܗܽܘ ܢܰܨܺܝܚܳܐ ܘܰܙܪܺܝܙܳܐ܆ ܟܰܕ ܒܰܠܚܽܘܕܰܘܗ̱ܝ ܡܶܬܟܰܬܰܫ ܗ̱ܘܳܐ ܠܘܳܬ ܟܽܠܗܽܘܢ ܗܳܠܶܝܢ. ܘܟܰܕ ܒܕܶܒܩ̈ܶܐ ܕܬܰܪܥܳܐ ܕܡܶܢ ܙܰܒܢܳܐ ܣܰܓܺܝܳܐܐ ܦܰܪܺܝܩܺܝܢ ܗ̱ܘܰܘ܆ ܐܰܘ ܒܢܶܩ̈ܒܶܐ ܐ̱ܚܪ̈ܳܢܶܐ ܠܥܰܝ̈ܢܰܝܗܽܘܢ ܡܰܩܬ̣ܶܝܢ ܗ̱ܘܰܘ܆ ܕܳܝܩܺܝܢ ܗ̱ܘܰܘ ܘܡܶܬܒܰܩܶܝܢ ܗ̱ܘܰܘ ܕܢܶܚܙܽܘܢ ܠܗܳܢܽܘܢ ܕܰܠܓܰܘ ܐܰܝܟ ܕܣܳܒܪܺܝܢ ܗ̱ܘܰܘ. ܐܶܠܳܐ ܘܠܳܐ ܠܐ̱ܢܳܫ ܟܽܠ ܟܽܠܶܗ ܚܳܙܶܝܢ ܗ̱ܘܰܘ܆ ܐܶܠܳܐ ܐܶܢ ܠܰܐܢܛܽܘܢܝܘܤ ܒܰܠܚܽܘܕܰܘܗ̱ܝ. ܕܡܶܬܟܰܬܰܫ ܗ̱ܘܳܐ ܡܰܢ ܠܘܳܬ ܒܥܶܠ̈ܕܒܳܒܶܐ ܠܳܐ ܡܶܬܚܰܙܝ̈ܳܢܶܐ܆ ܡܦܺܝܤ ܗ̱ܘܳܐ ܕܶܝܢ ܠܗܽܘܢ ܕܠܳܐ ܡܶܕܶܡ ܢܺܐܨܦܽܘܢ ܡܶܛܽܠܳܬܶܗ܆ ܘܰܕܢܺܐܙܽܠ̱ܘܢ ܒܫܰܝܢܳܐ ܠܒܳܬܰܝ̈ܗܽܘܢ܆ ܘܰܠܡܳܪܝܳܐ ܒܰܠܚܽܘܕ ܢܨܰܠܽܘܢ. ܐܳܦ ܓܶܝܪ ܡܰܙܥܩܺܝܢ ܗ̱ܘܰܘ ܗܶܢܽܘܢ ܫ̈ܺܐܕܶܐ ܒܰܕܡܽܘܬ ܠܶܓ̣ܝܽܘܢ ܗܰܘ ܕܒܶܐܘܰܢ̈ܓܶܠܺܝܰܐ^[26]. ܕܡܳܢܳܐ ܠܰܢ ܘܠܳܟ ܐܢ̱ܬܽܘܢܝܳܐ. ܫܰܢܳܐ ܘܰܫܒܽܘܩܳܝܗ̱ܝ ܠܡܰܕܒܪܳܐ. ܐܰܪܚܶܩ ܡܶܢ ܕܽܘܝܳܪܳܐ ܕܗܳܪܟܳܐ. ܠܳܐ ܡܶܫܟܰܚ ܐܰܢ̱ܬ ܠܰܡܣܰܝܒܳܪܽܘ ܠܡܰܟ̈ܝܳܢܘܳܬܰܢ. ܠܳܐ ܣܳܦܶܩ ܐܰܢ̱ܬ ܥܕܰܡܳܐ ܠܫܽܘܠܳܡܳܐ. ܐܶܠܳܐ ܟܰܕ ܡܚܰܡܣܶܢ ܗ̱ܘܳܐ ܡܚܰܘܶܐ ܗ̱ܘܳܐ ܠܗܽܘܢ ܐܰܝܟ ܥܝܳܕܶܗ ܕܰܓ̈ܳܠܶܐ ܘܰܡܚܺܝ̈ܠܶܐ.

ܟܰܕ ܕܶܝܢ ܣܰܓܺܝ̈ܶܐܐ ܡܶܟܺܝܠ ‌ܐܰܝܟ ܕܠܰܡܕܺܝܢ̱ܬܳܐ ܠܡܰܕܒܪܳܐ ܘܰܕܠܳܐ ܫܰܠܘܳܐ ܐܳܬܶܝܢ ܗ̱ܘܰܘ܆ ܘܰܐ̱ܚܪ̈ܳܢܶܐ ܠܰܐ̱ܚܪ̈ܳܢܶܐ ܐܰܝܟ ܕܰܒܝܽܘܒܳܠܳܐ ܡܩܰܒܠܺܝܢ ܗ̱ܘܰܘ܆ ܘܗܳܠܶܝܢ ܡܰܢ ܡܫܰܢܶܝܢ ܗ̱ܘܰܘ܆ ܗܳܠܶܝܢ ܕܶܝܢ ܐܳܬܶܝܢ ܗ̱ܘܰܘ܆ ܗܳܐ ܕܶܝܢ ܡܶܢ ܟܰܕܽܘ ܐܳܦ ܣܽܘܓܳܐܐ ܕܕܰܝܪ̈ܳܝܶܐ ܠܘܳܬ ܛܢܳܢܳܐ ܕܕܳܡܶܐ ܡܶܣܬܰܪܗܒܺܝܢ ܗ̱ܘܰܘ ܘܡܶܬܢܰܓܕܺܝܢ ܗ̱ܘܰܘ ܒܬܰܚܘܺܝܬܳܐ ܛܳܒܬܳܐ ܘܳܐܬܶܝܢ ܗ̱ܘܰܘ܆ ܐܰܝܟ ܕܰܠܘܳܬ ܡܰܠܦܳܢܳܐ ܘܡܰܥܡܪܳܢܳܐ ܕܰܐܪܥܳܐ ܠܳܐ ܡܝܰܬܰܒܬܳܐ ܘܪܺܝܫܳܐ ܕܚܰܝ̈ܶܐ ܕܚܺܝ̈ܠܶܐ ܘܠܳܐ ܡܶܬܬܰܡܪ̈ܚܳܢܶܐ܆ ܐܶܬܐܠܨ ܕܢܶܦܽܘܩ܆ ܘܰܕܢܶܬܬܦܺܝܤ ܠܢܳܡܽܘܣܳܐ ܫܠܺܝܚܳܝܳܐ ܕܦܳܩܶܕ܆ ܕܠܰܘ ܗܳܝ ܕܺܝܠܶܗ ܢܶܗܘܶܐ ܐ̱ܢܳܫ ܚܳܙܶܐ ܒܰܠܚܽܘܕ. ܐܶܠܳܐ ܐܳܦ ܗܳܝ ܕܰܐ̱ܚܪܺܢܳܐ^[27]. ܘܗܳܟܰܢܳܐ ܐܶܬܚܙܺܝ܆ ܒܰܕܡܽܘܬ ܡܰܠܰܐܟܳܐ ܡܶܕܶܡ ܕܳܐܬܶܐ ܡܶܢ ܫܡܰܝܳܐ܆ ܘܰܒܝܰܕ ܐܶܣܟܺܡܳܐ ܗܰܘ ܕܡܶܢ ܠܒܰܪ ܡܝܰܩܶܢ ܠܒܰܪܢܳܫܳܐ ܗܰܘ ܕܡܶܢ ܠܓܰܘ܆ ܘܺܐܝܬ ܠܶܗ ܪ̈ܶܓܫܶܐ ܠܳܐ ܕܠܺܝ̈ܚܶܐ ܘܕܰܡܠܶܝܢ ܡܫܰܝܢܽܘܬܳܐ܆ ܘܒܰܙܢܳܐ ܡܶܕܶܡ ܐܳܦ ܙܰܘܥܳܐ ܦܰܓܪܳܢܳܝܳܐ ܠܳܐ ܗܽܘܠܳܢܳܐܺܝܬ ܡܶܬܬܙܺܝܥ܆ ܘܕܺܐܝܬܰܘܗ̱ܝ ܠܒܰܪ ܡܶܢ ܒܶܣܪܳܐ ܡܶܣܬܒܰܪ. ܘܰܐܝܟ ܕܡܶܢ ܗܰܝܟܠܳܐ ܕܰܡܩܰܕܰܫ ܡܶܢ ܦܰܓܪܶܗ ܡܚܰܘܶܐ ܠܗܰܘܢܳܐ ܗܰܘ ܕܩܰܕܺܝܡ ܝܰܬܺܝܒ ܒܶܗ ܐܰܝܟ ܪܺܝܫܳܐ܆ ܕܶܐܬܰܐܠܰܗ ܟܽܠܶܗ ܒܬܶܐܽܘܪܺܝܰܐ܆ ܘܰܒܢܰܩܺܝܦܽܘܬܳܐ ܗܳܝ ܕܰܠܘܳܬ ܐܰ‌ܠܳܗܳܐ. ܐܰܝܟܰܢܳܐ ܕܟܰܕ ܒܰܝܢܳܬ ܕܰܝܪ̈ܳܝܶܐ ܣܰܓܺܝ̈ܶܐܐ ܐܺܝܬܰܘܗ̱ܝ܆ ܟܰܕ ܠܳܐ ܐ̱ܢܳܫ ܡܚܰܘܶܐ ܠܶܗ ܠܗܳܢܽܘܢ ܕܠܳܐ ܝܳܕܥܺܝܢ ܠܶܗ܆ ܡܶܢܳܗ̇ ܕܰܚܙܳܬܳܐ ܡܶܬܺܝܕܰܥ.

ܐܳܦ ܓܶܝܪ ܙܰܒ̈ܢܺܝܢ ܣܰܓܺܝ̈ܳܐܢ ܣܳܥܰܪ ܗ̱ܘܳܐ ܠܗܳܢܽܘܢ ܕܕܽܘܒܳܪܳܐ ܦܺܝܠܘܣܘܦܳܝܳܐ ܘܡܰܕܒܪܳܝܳܐ ܓܒܰܘ ܘܩܰܒܶܠܘ ܥܠܰܝܗܽܘܢ. ܘܟܰܕ ܡܓܰܒܶܐ ܗ̱ܘܳܐ ܠܗܽܘܢ ܘܰܡܟܰܢܶܫ ܠܰܚܕܳܐ ܕܽܘܟܳܐ܆ ܘܦܳܬܰܚ ܗ̱ܘܳܐ ܦܽܘܡܶܗ ܗܰܘ ܕܗܳܠܶܝܢ ܕܣܳܥܽܘܪܽܘܬܐ ܘܗܳܠܶܝܢ ܕܬܶܐܽܘܪܺܝܰܐ ܡܡܰܠܶܠ ܗ̱ܘܳܐ܆ ܝܳܗܶܒ ܗ̱ܘܳܐ ܦܽܘ̈ܩܳܕܶܐ ܡܰܠ̈ܦܳܢܳܝܶܐ ܘܳܐܣ̈ܝ̣ܳܝ̣ܶܐ ܘܦܽܘܪ̈ܓܳܠܶܐ ܗܳܠܶܝܢ ܕܝܳܗܶܒ ܪܰܒܚܰܝܠܳܐ܆ ܟܰܕ ܗܳܠܶܝܢ ܕܠܳܚ̈ܡܳܢ ܠܡܽܘܫ̈ܚܳܬܳܐ ܕܟܽܠ ܚܰܕ ܪܳܕܶܐ ܗ̱ܘܳܐ ܘܡܰܠܶܦ. ܐܰܝܟ ܛܽܘܦܣܳܐ ܡܰܢ ܫܠܺܝܚܳܝܳܐ܆ ܕܟܽܠܗܽܘܢ ܒܳܗ̇ ܒܰܕܡܽܘܬܳܐ ܥܒܳܕܳܐ ܕܺܐܝ̈ܕܰܝܳܐ ܢܶܗܘܽܘܢ ܡܚܰܩܠܺܝܢ܆ ܘܠܳܐ ܟܰܕ ܐܺܝܬܰܝܗܽܘܢ ܒܰܛܺܝ̈ܠܶܐ ܢܶܐܟܠܽܘܢ. ܐܶܠܳܐ ܐܝܟ ܦܰܘܠܽܘܤ ܒܪܰܒܽܘܬ ܬܰܪܥܺܝܬܳܐ ܢܺܐܡܪܽܘܢ܆ ܕܗܳܟܰܢܳܐ ܙܳܕܶܩ܆ ܕܟܰܕ ܥܳܡܠܺܝܢ ܚ̱ܢܰܢ ܘܦܳܠܚܺܝܢܰܢ܆ ܢܣܰܝܰܥ ܠܗܳܢܽܘܢ ܕܰܡܚܺܝܠܺܝܢ. ܕܢܶܬܕܰܟܪܽܘܢ ܟܺܝܬ ܠܡܶܠܱ̈ܘܗ̱ܝ ܕܡܳܪܰܢ ܝܶܫܽܘܥ܆ ܡܶܛܽܠ ܕܗܽܘ ܐܶܡܰܪ܆ ܕܛܽܘܒܬܳܢܺܝܬܳܐ ܐܺܝܬܶܝܗ̇ ܡܰܠܽܘܢ ܗܳܝ ܕܢܶܬܶܠ. ܐܰܘ ܗܳܝ ܕܢܶܣܰܒ^[28]. ܘܕܰܠܣܽܘܢ̈ܩܳܢܶܐ ܕܺܝܠܝ܆ ܘܰܠܗܳܢܽܘܢ ܕܺܐܝܬ ܗ̱ܘܳܐ ܥܰܡܝ܆ ܫܰܡܶܫ ܗܳܠܶܝܢ ܐܺܝ̈ܕܰܝܳܐ^[29]. ܐܰܟܚܕܳܐ ܕܶܝܢ ܕܒܰܟ̈ܬܳܒܶܐ ܐܰ‌ܠܳܗܳܝ̈ܶܐ ܢܶܬܗܰܓܽܘܢ܆ ܘܕܰܢܬܰܪܣܽܘܢ ܠܗܰܘܢܳܐ ܒܬܶܐܽܘܪܺܝܰܐ܆ ܘܰܠܚܽܘܫܳܒ̈ܶܐ ܨ̈ܳܐܐ ܘܥܰܬܺܝ̈ܩܶܐ ܢܶܙܢܩܽܘܢ ܡܶܢܗܽܘܢ܆ ܘܕܰܒܟܽܠ ܫܳܥ ܢܫܺܝܓܽܘܢ ܒܡܰܝ̈ܳܐ ܕܚܰܕܬ̣ܽܘܬ̣ܳܐ܆ ܘܰܒܗܳܠܶܝܢ ܡܰܢ ܚܽܘܫܳܒ̈ܶܐ܆ ܢܶܗܦܟܽܘܢ ܘܰܢܒܰܛܠܽܘܢ ܠܫܰܥܺܝܥܽܘܬܳܗ̇ ܘܪܰܦܝܽܘܬܳܗ̇ ܕܪܶܓܬܳܐ܆ ܒܗܳܠܶܝܢ ܕܶܝܢ ܠܘܳܬ ܫ̈ܺܐܕܶܐ ܗܳܢܽܘܢ ܕܰܡܕܰܚܠܺܝܢ܆ ܢܺܐܪܥܽܘܢ. ܘܰܠܒܺܝܒܽܘܬܳܐ ܢܶܩܢܽܘܢ ܠܽܘܩܒܰܠܗܽܘܢ ܘܢܶܬܥܰܗܕܽܘܢ ܠܦܰܘܠܽܘܤ ܕܶܐܡܰܪ. ܕܠܳܐ ܝܰܗ̱ܒ ܠܰܢ ܐܰ‌ܠܳܗܳܐ ܪܽܘܚܳܐ ܕܕܶܚܠܬܳܐ܆ ܐܶܠܳܐ ܕܚܰܝܠܳܐ^[30].

ܡܰܘܣܶܦ ܗ̱ܘܳܐ ܕܶܝܢ ܕܳܐܦ ܒܳܐܬܘ̈ܳܬܳܐ ܡܶܕܶܡ ܙܳܕܶܩ ܠܰܡܦܰܪܳܫܽܘ ܘܰܠܡܶܕܰܥ ܠܡܶܐܬܺܝܬܳܐ ܗܳܝ ܕܫ̈ܺܐܕܶܐ ܘܰܠܗܳܝ ܕܡܰܠܰܐܟ̈ܶܐ. ܕܡܶܫܬܰܚܠܦܺܝܢ ܓܶܝܪ ܘܡܶܣܬܰܟܡܺܝܢ ܡܫܰܚܠܦܳܐܺܝܬ ܗܳܢܽܘܢ ܡܰܛܥ̈ܝܳܢܶܐ ܠܡܰܠܰܐܟ̈ܶܐ ܕܢܽܘܗܪܳܐ܆ ܘܳܐܦ ܠܰܫܠܺܝܚܳܐ ܘܳܐܦ ܠܗܳܢܽܘܢ ܕܰܫܩܰܠܘ ܢܶܣܝܳܢܳܐ ܕܗܳܕܶܐ܆ ܐܶܬܝܰܕܥܰܬ ܘܶܐܬܬܕܺܝܢܰܬ܆ ܕܙܳܕܩܳܐ ܕܶܝܢ ܐܳܡܰܪ ܗ̱ܘܳܐ܆ ܕܠܳܐ ܢܶܗܘܶܐ ܒܳܥܶܝܢܰܢ ܐܰܘ ܓܶܠܝܳܢܳܐ ܐܰܘ ܢܒܺܝܽܘܬܳܐ ܐܰܘ ܡܶܬܚܰܘܝܳܢܽܘܬܳܐ ܕܳܐܬܘ̈ܳܬܳܐ܆ ܘܳܐܦܠܳܐ ܐܶܢ ܠܗܳܠܶܝܢ ܢܶܫܬܘܶܐ܆ ܪܰܒܬܳܐ ܢܶܬܪܰܥܶܐ ܐܰܘ ܢܶܬܬܪܺܝܡ. ܗܳܠܶܝܢ ܕܶܝܢ ܕܗܰܘ ܕܝܰܗ̱ܒ ܐܺܝܬܰܝܗܶܝܢ ܘܠܰܘ ܕܺܝܠܰܢ. ܘܰܠܘܳܬ ܝܽܘܬܪܳܢܳܐ ܕܰܐ̱ܚܪ̈ܳܢܶܐ ܡܶܬܦܰܪ̈ܢܣܳܢ܆ ܘܠܰܘ ܕܰܢܬܰܪ̈ܣܝܳܢ ܠܰܡܫܰܩܠܽܘܬܳܐ ܕܺܝܠܰܢ. ܡܫܰܩܠܽܘܬܳܐ ܗܝ ܓܶܝܪ ܗܳܝ ܕܰܒܗܳܠܶܝܢ ܕܰܠܥܶܠ ܡܶܢ ܚܰܝܠܳܐ ܕܺܝܠܰܢ܆ ܐܰܝܟ ܕܒܰܐܝܠܶܝܢ ܕܺܐܝܬܰܝܗܶܝܢ ܕܺܝ̈ܠܳܢܳܝܳܬܳܐ ܕܺܝܠܰܢ ܢܶܬܟܰܢܰܟ ܘܢܶܫܬܰܒܗܰܪ. ܕܰܐܝܠܶܝܢ ܕܶܝܢ ܕܡܶܬܥܰܢܘܶܝܢ ܒܚܰܝ̈ܶܐ ܕܕܰܝܪܳܝܽܘܬܳܐ ܐܺܝܬܶܝܗ̇ ܕܺܝܠܳܝܬܳܐ܆ ܕܰܢܚܰܡܣܢܽܘܢ ܒܥܰܡ̈ܠܶܐ܆ ܘܗܳܕܶܐ ܟܰܕ ܐܰ‌ܠܳܗܳܐ ܡܥܰܕܰܪ܆ ܘܰܠܦܰܢܛܐܣܝ̈ܤ ܕܡܰܚ̈ܫܒܳܬܳܐ ܗܳܢܶܝܢ ܕܰܡܣܰܝ̈ܒܳܢ ܠܳܗ̇ ܠܬܰܪܥܺܝܬܳܐ ܐܰܟܣܽܘܪ̈ܺܝܣܶܐ ܢܶܥܒܕܽܘܢ܆ ܘܰܕܠܳܐ ܢܶܛܥܽܘܢ ܠܚܰܙܩܺܝܐܝܠ ܡܰܢ ܗܰܘ ܢܒܺܝܳܐ ܕܡܶܛܽܠ ‌ܐܽܘܪܶܫܠܶܡ ܐܳܡܰܪ܆ ܕܰܒܟܽܠܗܶܝܢ ܡܰܚ̈ܫܒܳܬܳܗ̇ ܐܶܣܬܰܝܒܰܬ^[31]܆ ܠܦܰܘܠܽܘܤ ܕܶܝܢ ܕܟܳܬܶܒ܆ ܠܰܘ ܒܰܠܚܽܘܕ ܗܳܝ ܕܫܰܒܰܚܘ ܠܰܐܠܳܗܳܐ ܒܦܰܓܪܟܽܘܢ^[32]܆ ܐܶܠܳܐ ܐܳܦ ܗܳܝ ܕܚܽܘܫܳܒ̈ܶܐ ܡܩܰܛܪܓܺܝܢ ܐܳܦ ܢܳܦܩܺܝܢ ܪܽܘܚܳܐ ܒܝܰܘܡܳܐ ܗܰܘ ܐܶܡܰܬܝ ܕܕܳܐܶܢ ܐܰ‌ܠܳܗܳܐ ܟܰܣ̈ܝܳܬܳܐ ܕܰܒܢܰܝ̈ܢܳܫܳܐ^[33]. ܘܗ̱ܝ ܕܰܚܢܰܢ ܕܶܝܢ ܗܰܘܢܳܐ ܕܰܡܫܺܝܚܳܐ ܐܺܝܬ ܠܰܢ^[34].

ܘܟܰܕ ܗܳܠܶܝܢ ܡܰܠܶܦ ܗ̱ܘܳܐ ܐܰܢܛܘܢܝܘܤ ܩܰܛܺܝܢܳܐܺܝܬ ܘܰܓܪܺܝܕܳܐܺܝܬ܆ ܘܟܰܕ ܡܶܢܶܗ ܕܢܶܣܝܳܢܳܐ ܝܰܠܺܝܦ ܗ̱ܘܳܐ܆ ܡܶܚܕܳܐ ܐܳܦ ܦܫܺܝܩܽܘܬܳܐ ܕܬܽܘܪܳܨܳܐ ܕܰܡܝܰܬܪ̈ܳܬܳܐ ܡܰܪܬܶܐ ܗ̱ܘܳܐ ܘܡܰܠܶܦ܆ ܟܰܕ ܙܢܰܝ̈ܳܐ ܘܦܽܘܪ̈ܳܣܶܐ ܚܰܟܺܝ̈ܡܶܐ ܡܚܰܘܶܐ ܗ̱ܘܳܐ܆ ܘܟܰܕ ܝܰܠܺܝܦ ܡܶܢ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ^[35]܆ ܗܳܝ ܕܳܐܡܰܪ ܫܠܺܝܚܳܐ. ܒܰܕܓܽܘܢ ܐܳܦ ܟܰܕ ܠܘܳܬ ܡܰܕܒܪܳܐ ܗܰܘ ܕܡܶܨܪ̈ܳܝܶܐ ܗܳܢܽܘܢ ܬܶܐܒ̈ܳܝܶܐ ܨܳܒܶܐ ܗ̱ܘܳܐ ܕܢܶܦܪܰܚ ܢܶܣܰܩ܆ ܘܕܰܝܪܳܐ ܐ̱ܚܪܳܝܬܳܐ ܒܳܥܶܐ ܐܰܝܟ ܡܶܠܬܶܗ ܕܶܐܪܰܡܝܳܐ^[36]܆ ܘܒܳܬܰܪ ܕܽܘܟܬܳܐ ܕܣܳܟ ܠܳܐ ܝܺܕܺܝܥܳܐ ܠܰܒ̈ܢܰܝ ܐ̱ܢܳܫܳܐ ܪܳܗܶܛ ܗ̱ܘܳܐ܆ ܩܳܠܳܐ ܒܰܠܚܽܘܕܰܘܗ̱ܝ ܕܰܒܛܺܝܠܽܘܬܳܐ ܕܰܐ‌ܠܳܗܳܐ ܟܠܳܝܗ̱ܝ . ܘܰܐܝܟܰܢܳܐ ܕܰܡܥܳܕ ܗ̱ܘܳܐ ܟܰܕ ܐܶܬܩܪܺܝ܆ ܩܰܠܺܝܠܳܐܝܬ^[37] ܫܡܰܥ.

ܘܟܰܕ ܠܘܳܬ ܛܽܘܪܳܐ ܡܶܕܶܡ ܕܰܪܚܺܝܡ ܗ̱ܘܳܐ ܠܶܗ ܘܠܳܚܶܡ ܗ̱ܘܳܐ ܐܶܬܬܰܝܬܺܝ܆ ܬܰܡܳܢ ܫܰܠܡܶܗ ܠܪܶܗܛܳܐ ܕܰܡܝܰܬܪ̈ܳܬܳܐ܆ ܘܰܠܘܳܬ ܐܰܘ̈ܳܢܶܐ ܫܡܰܝܳܢ̈ܶܐ ܦܪܰܚ܆ ܟܰܕ ܟܽܠܶܗ ܗܘ̣ܳܐ ܗܰܘܢܳܐ܆ ܘܰܐܝܟ ܕܰܒܓܶܦܳܐ ܡܶܟܺܝܠ ܩܰܠܺܝܠܳܐ܆ ܘܠܰܘ ܐܰܝܟ ܕܒܶܐܣܳܪܳܐ ܡܶܬܚܰܫܰܚ ܗ̱ܘܳܐ ܒܒܶܣܪܳܐ. ܠܢܶܨ̈ܚܳܢܰܘܗ̱ܝ ܕܶܝܢ ܘܬܰܟܬܽܘ̈ܫܰܘ̈ܗ̱ܝ ܙܪ̈ܺܝܙܶܐ ܕܠܽܘܩܒܰܠ ܫ̈ܺܐܕܶܐ ܘܙܳܟ̈ܘܳܬܶܗ ܕܰܒܗܰܘ ܛܽܘܪܳܐ܆ ܐܘ ܠܐܳܣܺܝ̈ܘܳܬܳܐ ܕܗܳܢܽܘܢ ܕܰܟܪܺܝܗܶܝܢ ܐܰܘ ܠܰܢܒܺܝܰܘܴ̈ܬܳܐ܆ ܡܰܢܽܘ ܫܰܘܝܳܐܺܝܬ ܢܶܫܬܰܥܶܐ ܐܶܢܶܝܢ܆ ܘܰܠܟܽܠܗܶܝܢ ܐܰܝܠܶܝܢ ܕܰܠܘܳܬ ܗܳܢܽܘܢ ܕܰܠܘܳܬܶܗ ܐܳܬܶܝܢ ܗ̱ܘܰܘ܆ ܘܳܐܦ ܠܪ̈ܺܝܫܳܢܶܐ ܘܳܐܦ ܠܰܫܚܺܝ̈ܡܶܐ ܒܰܕܡܽܘܬ ܓܶܠܝܳܢܳܐ ܡܶܕܶܡ ܡܡܰܠܶܠ ܗ̱ܘܳܐ ܘܡܰܪ̈ܬܝܳܢܘܳܬܳܐ ܘܝܽܘܠ̈ܦܳܢܶܐ ܕܟܽܠܗܽܘܢ ܚܰܝ̈ܶܐ ܐܺܝܬ ܗ̱ܘܳܐ ܒܗܶܝܢ.

ܡܶܛܽܠ ܗܳܕܶܐ ܠܟܽܘܠܗܶܝܢ ܗܳܠܶܝܢ ܫܶܒܩܶܬ ܗܳܢܶܝܢ ܐܺܡܰܪ܆ ܕܰܐܝܟܰܢܳܐ ܟܽܘܠܶܗ ܙܰܘܥܳܐ ܕܬܰܪܥܺܝܬܶܗ ܠܘܽ ܕܽܘܟܳܝܳܐ ܕܢܰܦܫܶܗ ܥܢܶܐ ܗ̱ܘܳܐ܆ ܘܰܠܡܰܪܢܺܝܬܳܐ ܕܰܐܝܟ ܗܳܕܶܐ ܓܶܠ̈ܝܳܢܶܐ ܕܠܳܚܡܺܝܢ ܘܥܳܗܢܺܝܢ ܓܳܠܶܐ ܗ̱ܘܳܐ ܠܶܗ ܡܫܺܝܚܳܐ. ܟܰܕ ܓܶܝܪ ܥܬܺܝܕ ܗ̱ܘܳܐ ܒܰܙܒܰܢ ܠܡܶܐܟܰܠ ܘܗܳܕܶܐ ܐܰܝܟ ܐܰܝܢܳܐ ܕܥܰܒܕܽܘܬܳܐ ܡܡܰܠܶܐ ܗ̱ܘܳܐ ܘܠܰܐܢܰܢܩܺܐ ܕܦܰܓܪܳܐ ܡܶܫܬܰܥܒܰܕ ܗ̱ܘܳܐ܆ ܟܰܕ ܩܳܡ ܠܡܶܦܫܰܛ ܐܝܕܰܘ̈ܗ̱ܝ ܠܰܨܠܽܘܬܳܐ܆ ܐܶܬܚܛܶܦ ܒܢܰܦܫܶܗ. ܘܰܐܣܒܰܪ ܕܰܗܘ̣ܳܐ ܠܶܗ ܠܒܰܪ ܡܶܢ ܦܰܓܪܳܐ܆ ܘܕܰܠܘܳܬ ܐܳܐܰܪ ܐܳܙܶܠ ܗ̱ܘܳܐ ܘܰܠܥܶܠ ܡܶܬܬܰܝܬܶܐ ܗ̱ܘܳܐ܆ ܟܕ ܐ̱ܢܳܫܺܝ̈ܢ ܐܳܙܺܠ̱ܝܢ ܗ̱ܘܰܘ ܩܕܳܡܰܘ̈ܗ̱ܝ ܘܰܡܠܰܘܶܝܢ ܗ̱ܘܰܘ ܠܶܗ. ܟܰܕ ܕܶܝܢ ܡܢܳܬܳܐ ܡܶܕܶܡ ܡܶܢ ܡܰܪܕܺܝܬܳܐ ܫܰܡܠܺܝ܆ ܚܙܳܐ ܐ̱ܢܳܫܺܝ̈ܢ ܡܰܪܺܝܪ̈ܶܐ ܘܠܳܐ ܡܫܰܝ̈ܢܶܐ ܘܰܕܚܰܪܺܝܦܳܐܺܝܬ ܘܰܕܚܺܝܠܳܐܺܝܬ ܚܳܝܪܺܝܢ ܗ̱ܘܰܘ܆ ܕܰܐܝܟ ܗܰܘ ܕܒܳܐܐܰܪ ܩܳܝܡܺܝܢ ܗ̱ܘܰܘ ܘܗܳܘܶܝܢ ܗ̱ܘܰܘ ܠܶܗ ܡܥܰܟܪ̈ܳܢܶܐ܆ ܘܟܳܠܶܝܢ ܗ̱ܘܰܘ ܠܡܰܣܰܩܬܶܗ. ܟܰܕ ܕܶܝܢ ܡܶܬܟܰܬܫܺܝܢ ܗ̱ܘܰܘ ܠܽܘܩܒܰܠܗܽܘܢ ܗܳܢܽܘܢ ܕܣܳܠܩܺܝܢ ܗ̱ܘܰܘ ܥܰܡܶܗ܆ ܘܰܠܡܶܛܪܰܕ ܠܗܳܢܽܘܢ ܕܟܳܠܶܝܢ ܗ̱ܘܰܘ ܠܶܗ ܡܢܰܣܶܝܢ ܗ̱ܘܰܘ܆ ܝܰܬܺܝܪ ܓܽܘܡܕܳܢܳܐܺܝܬ ܡܶܬܬܣܺܝܡܺܝܢ ܗ̱ܘܰܘ ܥܠܰܘܗ̱ܝ ܟܰܕ ܐܳܡܪܺܝܢ: ܢܶܐܚܕܺܝܘܗ̱ܝ ܐܰܝܟ ܕܠܰܐܝܢܳܐ ܕܺܐܝܬܰܘܗ̱ܝ ܚܰܝܳܒܳܐ ܠܗܳܢܶܝܢ ܕܺܝܠܰܢ. ܘܟܰܕ ܟܺܝܬ ܨܳܒܶܝܢ ܗ̱ܘܰܘ ܕܰܠܙܰܒܢܳܐ ܕܡܶܢ ܝܺܠܺܝܕܽܘܬܶܗ ܢܟܰܣܽܘܢ܆ ܗܳܢܽܘܢ ܕܰܡܠܰܘܶܝܢ ܠܶܗ ܠܐܢܛܘܢܝܘܤ ܐܶܡܰܪܘ܆ ܕܰܠܗܳܠܶܝܢ ܕܡܶܢ ܝܺܠܺܝܕܽܘܬܶܗ ܣܥܺܝܪ̈ܳܢ ܗ̱ܘܰܝ̈܆ ܐܰܝܟܰܢ ܕܗܽܘ ܕܺܐܝܬܰܝܗܶܝܢ ܗ̱ܘܰܝ̈ ܫܒܰܩ ܐܶܢܶܝܢ ܡܳܪܝܳܐ. ܫܰܠܺܝܛ ܕܶܝܢ ܠܡܶܬܚܰܫܳܒܽܘ ܘܠܰܡܒܰܚܳܢܽܘ܆ ܠܗܳܢܶܝܢ ܕܡܶܢ ܚܰܝ̈ܶܐ ܕܕܰܝܪܳܝܽܘܬܳܐ܆ ܘܡܶܢ ܟܰܕ ܐܶܫܬܰܘܕܺܝ ܬܝܳܒܽܘܬܳܐ ܠܰܐܠܳܗܳܐ. ܘܟܰܕ ܗܳܢܽܘܢ ܡܶܟܺܝܠ ‌ܐܶܬܬܦܺܝܣܘ܆ ܘܰܠܗܳܠܶܝܢ ܕܡܶܢ ܒܳܬܰܪ ܫܽܘܢܳܝܶܗ ܕܡܶܢ ܕܽܘܒܳܪܳܐ ܥܳܠܡܳܢܳܝܳܐ ܡܥܰܩܒܺܝܢ ܗ̱ܘܰܘ ܣܰܓܺܝܳܐܺܝܬ܆ ܘܰܒܛܶܟܣܳܐ ܕܰܩܛܺܝܓܪ̈ܳܢܶܐ ܡܰܪܺܝܪ̈ܶܐ ܡܶܬܥܰܕܠܺܝܢ ܗ̱ܘܰܘ ܡܰܢ܆ ܠܳܐ ܡܟܰܣܶܝܢ ܗ̱ܘܰܘ ܕܶܝܢ܆ ܒܚܺܝܪܬܳܐ ܡܶܕܶܡ ܐܶܬܚܰܙܝܰܬ܆ ܘܗܳܟܰܢܳܐ ܒܰܪ̱ܬ ܚܺܐܪ̈ܶܐ ܘܠܳܐ ܡܶܬܟܰܠܝܳܢܺܝܬܳܐ ܡܰܥܒܰܪܬܶܗ ܕܰܐܢܛܘܢܝܘܤ. ܟܰܕ ܗܳܢܽܘܢ ܕܰܐܚܺܝܕܺܝܢ ܗ̱ܘܰܘ ܘܟܳܠܶܝܢ ܗ̱ܘܰܘ ܠܶܗ ܐܰܝܟ ܬܶܢܳܢܳܐ ܐܶܬܦܰܠܗܰܕܘ܆ ܘܟܰܕ ܢܒܺܝܽܘܬܶܗ ܕܶܐܫܰܥܝܳܐ ܐܳܦ ܥܠܰܘܗ̱ܝ ܐܶܬܡܰܠܝܰܬ ܗܳܝ ܕܳܐܡܪܳܐ. ܟܽܘܠ ܡܳܐܢܳܐ ܡܶܬܚܰܒܠܳܢܳܐ ܥܠܰܝܟ ܠܳܐ ܢܶܨܠܰܚ܆ ܘܟܽܠ ܩܳܠܳܐ ܗܰܘ ܕܰܢܩܽܘܡ ܥܠܰܝܟ ܠܕܺܝܢܳܐ܆ ܠܟܽܘܠܗܽܘܢ ܬܶܙܟܶܐ^[38]. ܘܗܳܝܕܶܝܢ ܬܽܘܒ ܐܶܣܬܰܒܪܰܬ ܠܶܗ ܕܰܦ̣ܢܳܐ ܠܘܳܬ ܦܰܓܪܳܐ. ܘܕܺܐܝܬܰܘܗ̱ܝ ܗ̱ܘܳܐ ܟܽܠܶܗ ܗܽܘ ܒܶܗ. ܘܟܰܕ ܕܬܶܡܗܳܐ ܗܳܢܳܐ ܗܘ̣ܳܐ ܒܡܰܚܫܰܒܬܶܗ܆ ܘܡܶܬܕܰܡܰܪ ܗ̱ܘܳܐ ܒܗܰܘ ܡܳܐ ܕܶܐܬܚܙܺܝ ܠܶܗ܆ ܘܡܶܬܚܰܫܰܒ ܗ̱ܘܳܐ ܕܥܰܡ ܕܰܐܝܟ ܐܰܝܠܶܝܢ ܘܥܰܡ ܟܡܳܐ ܒܰܥ̈ܠܰܝ ܕܰܐܪܳܐ ܥܬܺܝܕܳܐ ܢܰܦܫܳܐ ܠܡܶܬܥܰܪܙܳܠܽܘ ܟܰܕ ܡܶܬܦܰܪܫܳܐ ܡܶܢ ܦܰܓܪܳܐ܆ ܘܰܕܣܶܢܐܬܳܐ ܡܰܪܺܝܪܬܳܐ ܐܺܝܬܶܝܗ̇ ܕܫ̈ܺܐܕܶܐ ܠܩܽܘܒܠܰܢ ܘܰܒܥܶܠܕܒܳܒܽܘܬܳܐ ܕܠܳܐ ܫܰܝܢܳܐ܆ ܛܥܳܗ̇ ܠܡܶܐܟܽܘܠܬܳܐ܆ ܟܰܕ ܩܗܳܐ ܥܽܘܩܣܶܗ ܕܟܰܦܢܳܐ܆ ܘܰܚܡ̣ܳܬ̣ ܪܶܓܬܳܐ ܗܳܝ ܟܝܳܢܳܝܬܳܐ.

ܠܗܳܕܶܐ ܕܶܝܢ ܬܶܐܽܘܪܺܝܰܐ ܠܳܚ̈ܡܳܢ܆ ܐܳܦ ܗܳܠܶܝܢ ܕܰܐܡܺܝܪ̈ܳܢ ܠܰܟܬܳܒܳܐ ܐܰ‌ܠܳܗܳܝܳܐ. ܕܢܰܦܫܳܐ ܓܶܝܪ ܟܰܕ ܡܶܬܦܰܪܫܳܐ ܡܶܢ ܦܰܓܪܳܐ܆ ܡܶܢ ܡܰܠܰܐܟ̈ܶܐ ܡܶܬܬܰܘܒܠܳܐ. ܐܰܘܕܰܥ ܡܰܬܠܐ ܗܰܘ ܕܠܳܥܳܙܳܪ. ܟܰܕ ܦܳܪܽܘܩܰܢ ܐܶܡܰܪ ܗܳܟܰܢܳܐ. ܗܘ̣ܳܐ ܕܶܝܢ ܕܰܢܡܽܘܬ ܗܰܘ ܡܶܣܟܺܢܳܐ܆ ܘܰܕܢܶܬܬܰܘܒܰܠ ܡܶܢ ܡܰܠܰܐܟ̈ܶܐ ܠܥܽܘܒܶܗ ܕܰܐܒܪܳܗܳܡ^[39]. ܘܰܕܗܳܢܽܘܢ ܕܠܳܐ ܣܥܰܪܘ ܦܘܩ̈ܕܳܢܶܐ ܡܶܢ ܫ̈ܺܐܕܶܐ ܡܶܬܠܰܒܟܺܝܢ܆ ܘܠܰܡܢܳܬܳܐ ܥܰܡܗܽܘܢ ܝܳܪܬܺܝܢ܆ ܚܰܘܺܝ ܗܽܘ ܟܰܕ ܗܽܘ ܡܳܪܰܢ ܕܶܐܡܰܪ܆ ܙܶܠܘ ܠܟܽܘܢ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ܆ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ^[40]. ܚܢܰܢ ܕܶܝܢ ܐܰܝܟ ܗܰܘ ܕܢܰܦ̈ܫܳܬܳܐ ܕܰܚܙܺܝܪ̈ܶܐ ܐܰܘ ܕܰܚܡܳܪ̈ܶܐ ܐܺܝܬ ܠܰܢ܆ ܘܠܳܐ ܥܬܺܝܕܺܝܢܰܢ ܐܰܝܟ ܡܠܺܝ̈ܠܶܐ ܕܢܶ݀ܬܬܒܰܥ ܡܶܠܬܳܐ ܕܗܳܠܶܝܢ ܕܶܐܬܕܒܰܪܢܰܢ܆ ܠܳܐ ܡܰܪܓܫܳܢܳܐܺܝܬ ܘܰܕܠܳܐ ܟܺܐܒܳܐ ܚܳܐܝܶܢܰܢ܆ ܐܰܝܟ ܐܰܝܠܶܝܢ ܕܠܳܐ ܡܶܕܶܡ ܕܒܺܝܫ ܥܬܺܝܕܺܝܢ ܚ̱ܢܰܢ ܕܢܶܚܰܫ ܡܶܢ ܒܳܬܰܪ ܓܗܳܝܬܳܐ ܕܡܶܢ ܗܳܪܟܳܐ. ܘܰܐܝܟܰܢܳܐ ܠܰܘ ܠܽܐܘܠ̈ܝܳܬܳܐ ܫܳܘ̈ܝܳܢ ܗܳܠܶܝܢ ܘܰܠܬܶܢܚ̈ܳܬܳܐ܆ ܐܶܠܳܐ ܠܰܘ ܗܳܟܰܢܳܐ ܗܰܘ ܪܰܒܳܐ ܐܰܢܛܽܘܢܝܘܤ. ܐܶܠܳܐ ܟܰܕ ܒܟܽܠܙܒܰܢ ܠܰܐܟܣܺܝܽܘܡܳܐ ܐܰܘ ܟܺܝܬ ܐܺܝܩܳܪܳܐ܆ ܗܰܘ ܕܶܐܫܬܰܘܝܰܬ ܠܶܗ ܢܰܦܫܳܐ ܗܳܝ ܡܶܬܗܰܘܢܳܢܺܝܬܳܐ ܘܕܰܒܨܰܠܡܳܐ ܕܰܐ‌ܠܳܗܳܐ ܐܶܬܒܰܪܝܰܬ ܡܶܬܚܰܫܰܒ ܗ̱ܘܳܐ܆ ܒܡܰܪ̈ܢܝܳܬܳܐ ܡܛܰܠܶܩ ܗ̱ܘܳܐ ܠܶܗ ܠܦܰܓܪܳܐ ܗܰܘ ܕܣܶܐܒ ܘܰܒܥܳܢܘܳܝܽܘܬܳܐ ܐܶܬܟܰܬܰܫ. ܘܰܒܪܶܚܡܰܬ ܥܰܡܠܳܐ ܡܥܰܩܶܒ ܗ̱ܘܳܐ ܘܰܡܒܰܚܶܢ܆ ܕܒܰܐܝܠܶܝܢ ܐܰܪܰܐ ܗܳܠܶܝܢ ܕܢܰܦܫܳܐ ܢܶܗ̈ܘܝܳܢ܆ ܡܶܢ ܒܳܬܰܪ ܦܽܘܪܫܳܢܳܐ ܕܡܶܢ ܦܰܓܪܳܐ.

ܘܰܒܚܰܕ ܡܶܢ ܠܰܝ̈ܠܰܘܴܬܳܐ ܡܶܢ ܗܰܘ ܕܰܡܥܰܝܕܳܐܺܝܬ ܩܳܪܶܐ ܗ̱ܘܳܐ ܠܶܗ ܫܳܡܰܥ ܗ̱ܘܳܐ ܡܶܢ ܠܥܶܠ ‌ܐܢ̱ܬܽܘܢܝܐ܆ ܗܰܠܶܟ ܦܽܘܩ ܘܰܚܙܺܝ. ܘܟܰܕ ܠܒܰܪ ܗܘ̣ܳܐ܆ ܚܙܳܐ ܐ̱ܢܳܫ ܐܰܪܺܝܟܳܐ. ܕܡܳܛܶܐ ܗ̱ܘܳܐ ܡܰܢ ܒܽܐܘܪܟܳܐ ܥܕܰܡܳܐ ܠܰܥ̈ܢܳܢܶܐ܆ ܕܚܺܝܠܳܐ ܕܶܝܢ ܘܰܡܫܰܟ̣ܪܳܐ ܒܰܚܙܳܬܳܐ܆ ܐܰܝܟܰܢܳܐ ܕܠܳܐ ܢܶܗܘܶܐ ܐܺܝܬ ܡܫܽܘܚܬܳܐ ܕܥܳܒܪܳܐ ܠܣܰܢܝܽܘܬܶܗ ܘܠܳܐ ܗܰܢܺܝܽܐܘܬܶܗ. ܘܰܠ̱ܐܢܳܫܺܝ̈ܢ ܕܰܒܓܶܦ̈ܶܐ ܡܶܬܬܪܺܝܡܺܝܢ ܗ̱ܘܰܘ ܠܡܶܬܬܰܝܬܳܝܽܘ ܠܘܳܬ ܐܳܐܰܪ. ܘܰܠܡܶܢܗܽܘܢ ܡܰܢ ܕܟܰܕ ܡܶܢ ܡܶܬܚܳܐ ܗܰܘ ܐܰܪܺܝܟܳܐ ܕܺܐܝ̈ܕܰܝܳܐ ܕܗܳܝ ܐܳܬܽܘܬܳܐ ܕܚܺܝܠܬܳܐ ܡܶܬܡܚܶܝܢ ܗ̱ܘܰܘ܆ ܡܶܬܕܚܶܝܢ ܗ̱ܘܰܘ ܠܬܰܚܬ܆ ܠܡܶܢܗܽܘܢ ܕܶܝܢ ܕܦܳܪܚܺܝܢ ܗ̱ܘܰܘ ܠܥܶܠ ܡܶܢܶܗ ܘܦܳܛܪܺܝܢ ܗ̱ܘܰܘ ܡܶܢ ܠܒܽܘܟܝܳܐ ܗܰܘ ܕܣܰܓܺܝ ܐܺܝܬܰܘܗ̱ܝ ܗ̱ܘܳܐ ܡܰܩܪܒܳܢܳܝܳܐ ܘܰܒܥܶܠܕܒܳܒܳܝܳܐ܆ ܘܰܕܠܳܐ ܡܰܪܢܺܝܬܳܐ ܡܶܟܺܝܠ ܡܶܬܥܰܠܶܝܢ ܗ̱ܘܰܘ. ܘܗܳܟܰܢܳܐ ܗܰܘ ܨܰܝܳܕܳܐ ܚܰܣܳܡܳܐ ܥܰܠ ܗܳܢܽܘܢ ܡܰܢ ܕܰܠܬܰܚܬ ܢܳܦܠܺܝܢ ܗ̱ܘܰܘ ܚܳܕܶܐ ܗ̱ܘܳܐ ܘܡܶܬܗܰܢܶܐ. ܥܰܠ ܗܳܢܽܘܢ ܕܶܝܢ ܕܦܳܪܚܺܝܢ ܗ̱ܘܰܘ ܘܥܳܒܪܺܝܢ ܠܥܶܠ ܡܶܢܶܗ܆ ܡܫܰܪܶܩ ܗ̱ܘܳܐ ܫܶܢܰܘܗ̱ܝ ܘܡܶܨܛܪܶܐ ܗ̱ܘܳܐ. ܘܟܰܕ ܗܳܕܶܐ ܐܶܬܚܰܙܝܰܬ܆ ܡܶܚܕܳܐ ܠܘܳܬ ܐܰܢܛܘܢܝܘܤ ܡܫܺܝܚܳܐ ܗܰܘ ܡܰܠܦܳܢܳܐ ܕܰܐܬܠܺܝܣܽܘܬܳܐ ܘܣܳܐܶܡ ܐܰܓܽܘܢܳܐ ܕܕܰܐܪܳܐ ܗܰܘ ܡܶܬܗܰܘܢܳܢܳܐ ܐܶܡܰܪ܆ ܐܶܣܬܟܰܠ ܒܗܰܘ ܡܳܐ ܕܡܶܬܚܙܶܐ. ܘܰܠܣܽܘܟܳܠܶܗ ܕܚܶܙܘܳܐ ܓܳܠܶܐ ܗ̱ܘܳܐ. ܘܡܶܚܕܳܐ ܐܶܣܬܰܟܰܠ܆ ܕܡܰܥܒܰܪܬܳܐ ܕܢܰܦ̈ܫܳܬܳܐ ܐܺܝܬܶܝܗ̇ ܗ̱ܘܳܬ ܗܳܕܶܐ. ܘܗܰܘ ܡܰܢ ܐܰܪܺܝܟܳܐ ܐܺܝܬܰܘܗ̱ܝ ܗ̱ܘܳܐ܆ ܐܳܟܶܠ ܩܰܪܨܳܐ ܗܰܘ ܪܺܝܫܳܢܳܐ ܕܫܽܘܠܛܳܢܳܐ ܕܳܐܐܰܪ܆ ܗܰܘ ܗܶܓܡܽܘܢܳܐ ܕܪ̈ܽܘܚܶܐ ܗܳܠܶܝܢ ܐܳܐܱܪ̈ܳܝܳܬܳܐ^[41]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ. ܗܳܢܽܘܢ ܕܶܝܢ ܕܠܰܐܦܰܝ̈ ܠܬܰܚܬ ܡܶܬܢܰܬܥܺܝܢ ܗ̱ܘܰܘ ܘܢܳܚܬܺܝܢ܆ ܐܰܝܠܶܝܢ ܕܰܒܢܶܫܒܳܐ ܕܰܚ̈ܛܳܗܶܐ ܩܰܕܶܡܘ ܐܶܬܥܰܪܩܰܠܘ ܘܶܐܬܬܨܺܝܕܘ܆ ܘܗܳܢܽܘܢ ܩܰܠܺܝ̈ܠܶܐ ܘܦܳܪ̈ܽܘܚܶܐ܆ ܐܰܝܠܶܝܢ ܕܰܒܒܽܘܚܪܳܢܳܐ ܗܰܘ ܕܰܡܝܰܬܪ̈ܳܬܳܐ܆ ܠܝܽܘܩܪܳܐ ܘܠܰܐܪܥܳܢܳܝܽܘܬܳܐ ܕܚܰܫ̈ܶܐ ܫܕܰܘ ܡܶܢܗܽܘܢ.

ܟܰܕ ܒܗܳܠܶܝܢ ܝܽܘܠ̈ܦܳܢܶܐ ܕܡܰܪܕܽܘܬܳܐ ܐܰܘ ܬܰܟܬܽܘܫ̈ܶܐ ܕܰܐܢܛܘܢܝܘܤ܆ ܐܰܘ ܡܰܪ̈ܐܙܳܢܘܳܬܳܐ ܐܰ‌ܠܳܗܳܝ̈ܳܬܳܐ ܠܡܺܐܡܰܪ ܝܰܬܺܝܪ ܒܰܝܬܳܐܺܝܬ܆ ܚܳܝܪܺܝܢ ܗܳܢܽܘܢ ܕܰܒܡܶܨܪܶܝܢ ܕܽܘܒܳܪܳܐ ܗܰܘ ܕܰܝܪܳܝܳܐ ܦܺܝܠܳܣܽܘܦܺܝܣܳܐ ܥܳܒܕܺܝܢ܆ ܐܰܝܟ ܙܢܳܐ ܕܰܒܩܳܝܡ̈ܳܬܳܐ ܡܢܰܦ̈ܫܳܬܳܐ ܬܳܟܣܺܝܢ ܠܙܰܘ̈ܥܶܐ ܕܗܰܘܢܳܐ ܗܳܢܽܘܢ ܕܪܳܥܶܝܢ ܒܗܽܘܠܶܐ܆ ܘܰܠܘܳܬ ܡܰܪܓܳܐ ܕܣܽܘ̈ܟܳܠܶܐ ܫܡܰܝܳܢ̈ܶܐ ܡܰܥܒܪܺܝܢ ܠܗܽܘܢ. ܟܰܕ ܠܟܽܠ ܗܰܘ ܡܳܐ ܕܺܐܝܬܰܘܗ̱ܝ ܥܰܬܺܝܩܳܐ ܘܰܡܣܰܝܒܳܐ ܠܪܽܘܚܩܳܐ ܣܳܝܡܺܝܢ܆ ܐܰܝܟ ܕܡܶܢ ܕܽܘܟ̈ܝܳܬܳܐ ܟܳܗ̈ܢܳܝܳܬܳܐ ܘܠܳܐ ܡܶܬܬܕܺܝ̈ܫܳܢܝܳܬܳܐ ܕܗܰܝܟܠܳܐ܆ ܐܰܝܟܰܢܳܐ ܕܰܒܟܽܠܗܽܘܢ ܚܰܝ̣ܰܝ̣̈ܗܽܘܢ ܢܶܣܬܰܒܪܽܘܢ ܡܰܠܽܘܢ ܕܰܡܟܰܗܢܺܝܢ ܠܰܐܠܳܗܳܐ܆ ܐܰܘ ܕܚܰܝ̈ܶܐ ܗܳܠܶܝܢ ܕܥܰܠ ‌ܐܰܪܥܳܐ ܚܳܐܝܶܢ. ܡܶܢ ܐܰܝܟܳܐ ܕܳܐܦ ܠܟܽܠ ܣܳܥܽܘܪܽܘܬܳܐ ܡܝܰܬܰܪܬܳܐ܆ ܒܬܰܪܥܺܝܬܳܐ ܡܰܟܺܝܟܬܳܐ ܡܛܰܫܶܝܢ ܠܳܗ̇. ܟܰܕ ܕܶܝܢ ܚܕܳܐ ܙܒܰܢ ܐܶܬܝܰܕܥܰܬ̣ ܠܳܗ̇ ܠܰܒܢܰܝ̈ܢܳܫܳܐ܆ ܕܰܗܘ̣ܳܐ ܠܗܽܘܢ ܚܽܘܣܪܳܢܳܐ ܘܕܰܐܘܒܕܽܘܗ̇ ܣܳܒܪܺܝܢ. ܡܶܢ ܓܶܝܪ ܫܽܘܒܚܳܐ ܣܪܺܝܩܳܐ܆ ܐܰܝܟ ܕܡܶܢ ܡܰܚܢܽܘܩܺܝܬܳܐ ܬܳܙܺܝܢ ܘܫܳܘܪܺܝܢ. ܘܰܠܚܽܘܝܳܒ̈ܶܐ ܘܡܰܟ̈ܣܳܢܘܳܬܳܐ ܕܚܽܘܫܳܒܰܝ̈ܗܽܘܢ ܩܕܳܡ ܥܰܝ̈ܢܰܝܗܽܘܢ ܐܺܝܬ ܠܗܽܘܢ ܠܡܰܟܣܳܢܽܘܬܳܐ ܡܰܪܺܝܪܬܳܐ ܕܫ̈ܺܐܕܶܐ. ܠܰܣܕܺܝܪܽܘܬ ܩܪܳܒܳܐ ܣܰܩܽܘܒܠܳܝܬܳܐ܆ ܕܡܶܛܽܠ ܡܰܪܕܺܝܬܳܐ ܕܠܰܐܦܰܝ̈ ܠܥܶܠ. ܠܝܰܘܡܳܐ ܗܰܘ ܐ̱ܚܪܳܝܳܐ ܕܕܺܝܢܶܗ ܕܰܡܫܺܝܚܳܐ. ܠܒܺܐܡܰܐ ܗܳܝ ܠܳܐ ܡܶܬܬܛܰܥܝܳܢܺܝܬܳܐ ܘܠܳܐ ܡܶܬܥܰܪܩܳܢܺܝܬܳܐ. ܠܢܰܓܺܝܪܽܘܬܗܽܘܢ ܕܰܕܠܳܐ ܫܽܘܠܳܡ ܕܬܰܫܢܺܝ̈ܩܶܐ ܗܳܢܽܘܢ ܕܰܓܙܺܝܡܺܝܢ.

ܐܶܠܳܐ ܒܪܰܡ ܐܰܢܛܘܢܝܘܤ ܗܰܘ ܕܰܕܚܰܝ̈ܶܐ ܗܳܠܶܝܢ ܕܠܳܐ ܓܫܽܘܡ ܘܶܐܘܰܢ̈ܓܶܠܳܝܶܐ ܘܚܰܬܺܝ̈ܬܶܐ ܗܘ̣ܳܐ ܪܺܝܫܳܐ܆ ܐܰܝܟ ܐܰܝܢܳܐ ܕܠܳܐ ܡܶܕܶܡ ܐܺܝܬ ܠܶܗ ܙܘ̈ܳܕܶܐ ܕܦܽܘܪܩܳܢܳܐ܆ ܟܰܕ ܡܰܐܟܣܝܡܝܢܘܤ ܪܳܕܶܦ ܗ̱ܘܳܐ ܠܕܶܚܠܰܬ ܐܰ‌ܠܳܗܳܐ܆ ܠܘܳܬ ܡܕܺܝܢ̱ܬܶܗ ܕܰܐ‌ܠܶܟܣܢܕܪܘܤ ܢܚܶܬ. ܟܰܕ ܪܳܐܶܓ ܗ̱ܘܳܐ ܠܡܶܫܬܰܘܬܳܦܽܘ ܠܣܳܗ̈ܕܶܐ ܒܚܰܫ̈ܶܐ܆ ܘܡܳܫܰܚ ܗ̱ܘܳܐ ܠܰܐܬܠܺܝ̈ܛܶܐ ܠܘܳܬ ܬܰܟܬܽܘ̈ܫܶܐ܆ ܘܰܡܚܰܝܶܨ ܗ̱ܘܳܐ ܒܰܪܘܺܝܚܽܘܬܳܐ ܠܗܳܢܽܘܢ ܕܰܪܦܶܝܢ ܗ̱ܘܰܘ܆ ܘܟܰܕ ܒܠܶܒܳܐ ܕܠܳܐ ܙܳܐܰܥ ܩܳܡ ܩܕܳܡ ܕܰܝܳܢ̈ܶܐ ܕܪܽܘܫܥܳܐ. ܐܶܠܳܐ ܡܳܪܝܳܐ ܢܳܛܰܪ ܗ̱ܘܳܐ ܠܶܗ. ܘܟܰܕ ܒܨܶܒܝܳܢܳܐ ܐܰܣܗܶܕ ܗ̱ܘܳܐ ܠܶܗ܆ ܠܘܳܬ ܡܰܕܒܪܳܐ ܡܶܢ ܕܪܺܝܫ ܐܰܦܢܝܶܗ. ܡܶܛܽܘܠ ܟܺܝܬ ܕܰܕܣܳܗ̈ܕܶܐ ܡܰܢ܆ ܬܰܚ̈ܘܝܳܬܳܐ ܣܰܓܺܝ̈ܳܐܬܳܐ ܐܺܝܬ ܗ̱ܘܳܐ. ܕܦܝܠܘܣܘܦܝܐ ܕܶܝܢ ܕܰܐܢܛܘܢܝܘܤ ܘܰܕܕܽܘܒܳܪܶܗ ܡܰܠܰܐܟܳܝܳܐ ܘܠܳܐ ܚܕܳܐ܆ ܕܗܰܘ ܕܰܒܟܽܠ ܩܪܳܒܳܐ ܕܫ̈ܺܐܕܶܐ ܣܳܗ̈ܕܘܳܬܳܐ ܣܰܓܺܝ̈ܳܐܬܳܐ ܬܰܩܺܝ̈ܦܳܬܳܐ ܐܶܬܟܰܬܰܫ܆ ܘܰܕܗܳܢܳܐ ܟܽܠܶܗ ܐܺܝܬܰܝܗܶܝܢ ܗ̱ܘܰܝ̈ ܝܰܬܺܝܪ ܩܰܫ̈ܝܳܬܳܐ ܘܡܰܪܺܝܪ̈ܳܬܳܐ܆ ܟܡܳܐ ܕܺܐܝܬܰܝܗܽܘܢ ܫ̈ܺܐܕܶܐ ܝܰܬܺܝܪ ܩܫܰܝ̈ܳܐ ܘܒܺܝ̈ܫܶܐ ܝܰܬܺܝܪ ܡܶܢ ܒܢܰܝ̈ܢܳܫܳܐ.

ܘܳܐܦ ܟܰܕ ܐܰܪ̈ܝܐܢܘ ܕܶܝܢ ܓܳܒܠܺܝܢ ܗ̱ܘܰܘ ܘܳܐܡܪܺܝܢ ܥܠܰܘܗ̱ܝ܆ ܕܰܠܪܽܘܫܥܳܐ ܕܺܝܠܗܽܘܢ ܗܰܘ ܕܠܳܐ ܐܰ‌ܠܳܗ ܫܳܠܶܡ ܗ̱ܘܳܐ܆ ܟܰܕ ܐܶܬܬܙܺܝܥ ܒܚܶܡܬܳܐ ܟܺܐܢܬܳܐ ܘܪܳܚܡܰܬ ܐܰ‌ܠܳܗܳܐ܆ ܐܶܬܬܪܺܝܡ ܒܓܶܦܳܐ ܕܰܛܢܳܢܳܐ ܠܘܳܬ ܡܕܺܝܢ̱ܬܶܗ ܕܰܐ‌ܠܶܟܣܰܢܕܪܘܤ ܬܽܘܒ ܦܪܰܚ ܢܚܶܬ. ܘܟܰܕ ܩܳܡ ܒܰܡܨܰܥܬܳܐ܆ ܠܗܶܪܣܝܤ ܗܳܝ ܢܳܨܝܰܬ ܥܰܡ ܡܫܺܝܚܳܐ܆ ܡܰܟܪܰܙܬܳܐ ܘܡܰܣܠܝܬܐ ܥܰܒܕܳܗ̇. ܟܰܕ ܡܒܰܙܶܚ ܗ̱ܘܳܐ ܠܬܰܪܥܺܝܬܳܗ̇ ܗܳܝ ܡܓܰܕܦܳܢܺܝܬܳܐ܆ ܘܟܰܕ ܡܰܠܶܦ ܗ̱ܘܳܐ ܠܰܘ ܕܢܶܥܪܽܘܩ ܒܰܠܚܽܘܕ ܡܶܢ ܗܳܝ ܕܗܳܟܰܢܳܐ ܢܶܬܪܰܥܶܐ܆ ܐܶܠܳܐ ܐܳܦ ܕܠܳܐ ܢܶܫܬܰܘܬܰܦ ܠܗܳܢܽܘܢ ܕܰܠܒܰܪ ܡܶܢ ܗܰܘ ܡܳܐ ܕܙܳܕܶܩ ܡܶܬܪܰܥܶܝܢ܆ ܡܰܠܽܘܢ ܕܶܝܢ ܫܳܛܪܺܝܢ ܒܬܰܪܥܺܝܬܗܽܘܢ. ܫܰܘܝܳܐ ܗܝ ܓܶܝܪ ܒܡܶܠܬܳܐ ܕܪܽܘܫܥܳܐ܆ ܟܽܠ ܚܕܳܐ ܡܶܢܗܶܝܢ.

ܗܳܝܕܶܝܢ ܐܳܦ ܟܶܢܫܳܐ ܣܰܓܺܝܳܐܐ ܕܚܰܢ̈ܦܶܐ ܐܰܝܟ ܚܕܳܐ ܪܳܗܶܛ ܗ̱ܘܳܐ ܠܡܶܚܙܳܐ ܠܰܐܢܛܘܢܝܘܤ܆ ܐܰܝܟ ܕܰܠܚܶܙܘܳܐ ܡܶܕܶܡ ܐܰܟܣܢܳܝܳܐ. ܟܰܕ ܐܳܡܪܺܝܢ ܗܘܰܘ܆ ܢܶ݀ܪܗܰܛ ܘܢܶ݀ܚܙܶܐ ܠܒܰܪܢܳܫܳܐ ܕܰܐ‌ܠܳܗܳܐ. ܐܳܦ ܟܺܝܬ ܠܰܚܙܳܬܶܗ܆ ܠܬܶܐܽܘܪܺܝܰܐ ܕܡܶܛܽܠ ܕܶܚܠܰܬ ܐܰ‌ܠܳܗܳܐ ܢܳܣܒܺܝܢ ܗ̱ܘܰܘ ܠܳܗ̇܆ ܟܰܕ ܚܳܙܶܝܢ ܗ̱ܘܰܘ ܠܚܰܘܪܶܗ܆ ܠܰܗܠܰܟܬܶܗ ܘܰܠܟܽܠܗܽܘܢ ܗܰܕܳܡܰܘ̈ܗ̱ܝ܆ ܕܰܡܠܶܝܢ ܗ̱ܘܰܘ ܡܫܰܝܢܽܘܬܳܐ ܣܰܓܺܝܐܬܳܐ܆ ܘܰܐܝܟ ܗܰܘ ܕܙܰܘܥܳܐ^[42] ܡܶܕܶܡ ܡܶܬܗܰܘܢܳܢܳܐ ܘܫܰܦܺܝܪ ܛܶܟܣܳܐ ܐܺܝܬ ܗ̱ܘܳܐ ܒܗܽܘܢ܆ ܐܰܝܟܰܢܳܐ ܕܡܶܢ ܗܳܪܟܳܐ ܢܕܡ̇ܘܢ ܘܢܶܣܒܽܘܢ ܐܳܬܳ݀ܐ܆ ܕܣܰܓܺܝ ܒܺܝܕܰܥܬܳܐ ܝܰܬܺܝܒ ܥܰܠ ܗܰܕܳܡܰܘ̈ܗ̱ܝ ܗܰܘܢܳܐ ܗܰܘ ܗܶܢܝܽܘܟܳܐ܆ ܘܰܒܗܳܢܳܐ ܬܽܘܒ ܡܕܰܝܰܪ ܐܰ‌ܠܳܗܳܐ. ܟܰܕ ܕܶܝܢ ܐܳܦ ܠܫ̈ܺܐܕܶܐ ܕܡܶܬܢܰܓܕܺܝܢ ܗ̱ܘܰܘ ܡܶܢܶܗ ܘܡܶܬܛܰܪܕܺܝܢ ܚܳܙܶܝܢ ܗ̱ܘܰܘ܆ ܘܝܳܠܦܺܝܢ ܗ̱ܘܰܘ ܡܶܢ ܗܳܢܶܝܢ ܕܗܳܢܽܘܢ ܡܰܙܥܩܺܝܢ ܗ̱ܘܰܘ܆ ܕܰܠܗܳܢܽܘܢ ܕܗܶܢܽܘܢ ܒܝܰܕ ܕܶܒ̈ܚܳܬܳܐ ܕܚܺܝ̈ܠܳܬܳܐ ܘܢܽܘ̈ܩܳܝܶܐ ܡܶܬܟܰܫܦܺܝܢ ܠܗܽܘܢ ܟܪ̈ܺܝܣܛܝܳܢܶܐ ܠܗܳܠܶܝܢ ܐܰܝܟ ܥܰܒ̈ܕܶܐ ܒܺܝ̈ܫܶܐ ܕܰܡܢܰܓܕܺܝܢ ܘܒܰܠܺܝܥܺܝܢ܆ ܒܺܝܫܳܐܺܝܬ ܛܳܪܕܺܝܢ ܠܗܽܘܢ܆ ܡܰܓܚܟܺܝܢ ܗܘܰܘ ܒܳܗ̇ ܒܛܳܥܝܽܘܬܗܽܘܢ܆ ܘܰܠܘܳܬ ܫܰܦܺܝܪܽܘܬ ܕܶܚܠܬܳܐ ܠܰܘ ܚܰܕ ܐܰܘ ܬܪܶܝܢ ܒܓܶܢ̈ܣܶܐ ܕܶܝܢ ܟܽܘ̈ܠܳܢܳܝܶܐ ܘܰܒ̈ܒܳܬܶܐ ܗܶܢܽܘܢ ܡܶܢ ܨܶܒܝܳܢܗܽܘܢ ܐܳܬܶܝܢ ܗ̱ܘܰܘ ܘܗܳܦܟܺܝܢ ܗ̱ܘܰܘ ܘܡܶܫܬܰܚܠܦܺܝܢ ܗ̱ܘܰܘ. ܘܟܰܕ ܚܳܙܶܝܢ ܗ̱ܘܰܘ ܠܶܗ ܠܰܐܢܛܽܘܢܝܘܤ܆ ܕܰܒܣܽܘܓܳܐܐ ܕܟܶܢܫܳܐ ܕܗܳܢܽܘܢ ܕܡܶܬܟܰܢܫܺܝܢ ܗ̱ܘܰܘ ܥܠܰܘܗ̱ܝ ܡܶܬܚܒܶܨ ܗ̱ܘܳܐ ܡܰܢ ܘܡܶܙܕܥܶܦ ܠܟܳܐ ܘܰܠܟܳܐ܆ ܠܳܐ ܕܶܝܢ ܡܶܫܬܓܶܫ ܗ̱ܘܳܐ ܐܰܘ ܡܶܬܬܙܺܝܥ ܗ̱ܘܳܐ ܠܘܳܬ ܗܳܝ ܕܠܳܐ ܡܥܰܝܕܳܐ܆ ܟܰܕ ܡܶܬܕܰܡܪܺܝܢ ܗ̱ܘܰܘ ܫܳܡܥܺܝܢ ܗ̱ܘܰܘ ܡܶܢܶܗ܆ ܕܠܳܐ ܐܺܝܬܰܝܗܽܘܢ ܣܰܓܺܝ̈ܶܐܐ ܒܢ̈ܰܝ ܐ̱ܢܳܫܳܐ ܗܳܢܽܘܢ ܕܩܳܝܡܺܝܢ ܗ̱ܘܰܘ ܚܰܕܪܽܘܗܝ܆ ܝܰܬܺܝܪ ܡܶܢ ܫ̈ܺܐܕܶܐ ܗܳܢܽܘܢ ܕܡܰܩܪܒܺܝܢ ܥܰܡܶܗ ܒܛܽܘܪܳܐ.

ܫܳܬܶܩ ܐ̱ܢܳܐ ܕܶܝܢ ܕܰܐܝܟܰܢܳܐ ܟܰܕ ܝܳܬܶܒ ܗ̱ܘܳܐ ܒܗܰܘ ܛܽܘܪܳܐ܆ ܠܡܶܚܙܝܶܗ ܡܶܬܪܰܓܪܓܺܝܢ ܗ̱ܘܰܘ ܐܳܦ ܦܝܠܘܣܽܘ̈ܦܶܐ ܗܳܢܽܘܢ ܕܚܰܢ̈ܦܶܐ܆ ܟܰܕ ܠܘܳܬ ܐܰܪܺܝܟܽܘܬܳܗ̇ ܕܽܐܘܪܚܳܐ ܠܳܐ ܡܡܰܐܢܝܢ ܗ̱ܘܰܘ. ܗܳܢܽܘܢ ܕܟܰܕ ܡܰܠܶܠ ܥܰܡܗܽܘܢ ܡܶܢ ܚܽܘܫܳܒ̈ܶܐ ܟܝܳܢܳܝ̈ܶܐ܆ ܘܡܶܢ ܓܢܳܢܽܘܬܳܐ ܐܰ‌ܠܳܗܳܝܬܳܐ ܕܪܽܘܚܳܐ ܩܰܕܺܝܫܳܐ܆ ܘܠܳܐ ܗ̱ܘܳܐ ܒܥܽܘܪ̈ܙܳܠܶܐ ܕܓܶܐܘܡܛܪܝܰܐ܆ ܐܰܘ ܒܦܽܘܪ̈ܣܶܐ ܡܚܰܘ̈ܝܳܢܶܐ ܕܗܽܘܦܳܟ ܚܽܘܫܳܒ̈ܶܐ ܕܰܐܪܝܣܛܘܛܠܝܤ. ܗܰܘ ܕܠܳܐ ܩܳܠܳܐ^[43] ܚܰܘܺܝ ܐܶܢܽܘܢ܆ ܐܰܝܟܰܢܳܐ ܕܰܢܫܰܒܚܽܘܢ ܠܗܰܘ ܕܩܳܪܶܐ ܗ̱ܘܳܐ^[44]܆ ܠܰܡܫܺܝܚܳܐ ܗܰܘ ܕܰܡܡܰܠܶܠ ܗ̱ܘܳܐ ܒܶܗ^[45]. ܡܶܛܽܠ ܗܳܕܶܐ ܠܗܳܠܶܝܢ ܡܰܡ̈ܠܠܶܐ ܕܰܥܒܰܕ ܠܘܳܬܗܽܘܢ ܠܳܐ ܣܳܡܶܬ ܒܡܺܐܡܪܳܐ ܗܳܢܳܐ ܕܩܰܪܺܝܒ܆ ܒܰܕܠܳܐ ܨܳܒܶܐ ܐ̱ܢܳܐ ܕܰܠܫܽܘܦܪܳܐ ܕܺܝܠܶܗ ܗܰܘ ܕܡܶܢ ܟܝܳܢܳܐ܆ ܐܰܥܡܶܛ ܒܝܰܕ ܡܶܠܬܳܐ ܕܺܝܠܝ. ܐܶܬܢܣܝܘܤ ܓܶܝܪ ܒܰܠܚܽܘܕܰܘܗ̱ܝ܆ ܗܰܘ ܕܠܶܗ ܟܰܕ ܠܶܗ ܠܪܽܘܚܳܐ ܥܰܬܺܝܪ ܗ̱ܘܳܐ܆ ܗܰܘ ܣܰܓܺܝܳܐܐ ܒܡܰܠ̈ܦܳܢܶܐ ܘܰܡܚܰܡܣܢܳܢܳܐ ܒܗܳܢܽܘܢ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܐܶܬܟܰܬܰܫܘ܆ ܐܰܝܟܰܢܳܐ ܕܶܐܬܡ̈ܠܠܝܢ ܬܪܺܝܨܳܐܺܝܬ ܘܠܳܐ ܕܰܓܳܠܳܐܺܝܬ ܐܶܬܥܰܗܕ ܐܶܢܶܝܢ. ܡܶܛܽܠܗܳܕܶܐ܆ ܠܘܳܬ ܟܬܳܒܶܗ ܕܗܰܘ ܡܫܰܕܰܪ ܐ̱ܢܳܐ ܠܟܽܘܢ ܕܛܳܒ̈ܳܬܳܐ ܣܰܓܺܝ̈ܳܐܬܳܐ ܡܠܶܐ.

ܐܶܢܳܐ ܕܶܝܢ ܒܝܰܕ ܗܳܠܶܝܢ ܕܶܐܬܶܐܡܰܪ̈ܝ̱ ܡܶܢܝ ܥܶܗܕܶܬ ܒܰܠܚܽܘܕ. ܕܡܳܢܰܘ ܚܣܳܡܳܐ ܕܫ̈ܺܐܕܶܐ ܠܘܳܬ ܓܶܢܣܳܐ ܕܰܒ̈ܢܰܝ ܐ̱ܢܳܫܳܐ܆ ܘܰܕܡܳܢܳܐ ܗܝ ܣܕܺܝܪܽܘܬ ܩܪܳܒܳܐ ܕܺܝܠܗܽܘܢ. ܘܰܕܓܰܒܪ̈ܶܐ ܗܳܢܽܘܢ ܕܰܐܝܟ ܐܶܘܰܢܓܶܠܺܝܽܘܢ ܐܶܬܕܰܒܰܪܘ܆ ܒܶܗ ܒܢܶܣܝܳܢܳܐ ܚܰܘܺܝܘ܆ ܕܰܐܝܟܰܢܳܐ ܚܰܝܠܶܗ ܕܰܨܠܺܝܒܳܐ ܡܚܺܝ̈ܠܶܐ ܥܒܰܕ ܐܶܢܽܘܢ ܠܫ̈ܺܐܕܶܐ܆ ܗܳܢܽܘܢ ܕܰܐܝܟ ܕܠܰܐܠܳܗܳܐ ܣܳܝܡܺܝܢ ܗ̱ܘܰܘ ܠܗܽܘܢ ܚܰܢ̈ܦܶܐ ܒܶܣ̈ܡܶܐ ܘܰܡܢܰܩܶܝܢ ܗ̱ܘܰܘ. ܐܳܟܶܠܩܰܪܨܳܐ ܓܶܝܪ ܗܰܘ ܕܠܳܐܕܳܡ ܒܙܰܒܢܳܐ ܙܥܽܘܪܳܐ ܐܰܛܥܺܝ ܒܰܚܕܳܐ ܛܥܳܡܬܳܐ܆ ܘܥܰܒܕܶܗ ܐܰܟܣܢܳܝܳܐ ܕܦܰܪܕܰܝܣܳܐ܆ ܠܰܐܢܛܽܘܢܝܘܤ ܗܰܘ ܕܡܶܢ ܩܰܘܡܬܳܐ ܛܰܠܝ̣ܳܝ̣ܬܳܐ ܗܘ̣ܳܐ ܕܰܝܪܳܝܳܐ܆ ܘܡܳܐܐ ܘܚܰܡܶܫ ܫܢܺܝ̈ܢ ܚ̣ܝܳܐ܆ ܟܰܕ ܟܽܠܗܽܘܢ ܦܽܘܪ̈ܳܣܶܐ ܨܢܺܝ̈ܥܶܐ ܐܰܙܺܝܥ܆ ܘܰܒܟܽܠܗܽܘܢ ܙܰܝ̈ܢܶܐ ܐܶܣܬܕܰܪ ܠܩܽܘܒܠܶܗ ܒܰܩܪܳܒܳܐ܆ ܠܳܐ ܐܶܬܡܨܺܝ ܕܡܶܢ ܛܽܘܪܳܐ ܗܰܘ ܕܦܝܠܘܣܘܦܝܐ ܢܰܚܬܶܗ. ܘܦܰܪܕܰܝܣܳܐ ܡܰܢ܆ ܠܚܰܕ ܡܕܺܝܢܳܝܳܐ ܡܕܰܝܪܳܢܳܐ ܒܝܰܕ ܡܰܛܥܝܳܢܽܘܬܳܐ ܐܰܘܒܶܕ. ܡܰܕܒܪܳܐ ܕܶܝܢ܆ ܠܣܰܓܺܝ̈ܶܐܐ ܡܕܺܝ̈ܢܳܝܶܐ ܡܕܰܝܪ̈ܳܢܶܐ ܒܝܰܕ ܡܚܰܡܣܢܳܢܽܘܬܶܗ ܕܰܐܢܛܽܘܢܝܘܤ ܩܰܒܶܠ܆ ܘܶܐܬܚܰܪܰܪ ܡܶܢ ܐܳܟܶܠܩܰܪܨܳܐ ܘܡܶܢ ܫ̈ܺܐܕܶܐ ܕܥܳܡܪܺܝܢ ܗ̱ܘܰܘ ܒܶܗ. ܡܰܢܽܘ ܓܶܝܪ ܠܳܐ ܝܳܕܰܥ ܠܕܶܚܠܰܬ ܫ̈ܺܐܕܶܐ ܕܡܶܨܪܶܝܢ ܗܳܝ ܕܡܶܢ ܩܕܺܝܡ ܐܰܚܺܝܕܳܐ ܗ̱ܘܳܬ܆ ܐܰܝܟܰܢܳܐ ܕܳܐܦ ܠܗܳܢܶܝܢ ܕܣܰܓܺܝ ܝܰܬܺܝܪ ܡܶܢ ܟܽܠ ܡܶܕܶܡ ܫܺܝ̈ܛܳܢ ܘܰܡܨܰܥܪ̈ܳܢ ܕܪ̈ܰܚܫܳܐ ܦܝܣܐ ܬܶܥܒܶܕ ܐܶܢܽܘܢ ܕܢܶܣܓܕܽܘܢ ܘܰܠܕܶܚܠܰܬ ܐܰ‌ܠܳܗܳܐ ܗܳܝ ܕܡܶܢ ܒܳܬܰܪ ܡܫܺܝܚܳܐ ܬܰܡܳܢ ܐܶܚܕܰܬ ܐܳܦ ܥܕܰܟܺܝܠ ‌ܐܰܚܺܝܕܳܐ܆ ܒܰܬܪܺܝܨܽܘܬܳܐ ܟܺܝܬ ܕܕܽܘܓܡ̈ܰܛܰܐ ܘܰܒܬܰܘܕܺܝܬܳܐ ܕܗܰܝܡܳܢܽܘܬܳܐ ܚܠܺܝܡܬܳܐ܆ ܘܰܒܓܰܒܪ̈ܶܐ ܕܰܒܝܰܕ ܚܰܝ̈ܶܐ ܕܕܰܝܪܳܝܽܘܬܳܐ ܡܡܰܠܶܝܢ ܠܶܗ ܒܰܥܒܳܕܳܐ ܠܶܐܘܰܢܓܶܠܺܝܽܘܢ܆ ܘܗܳܠܶܝܢ ܕܰܫ̈ܠܺܝܚܶܐ ܡܚܰܘܶܝܢ܆ ܒܛܰܝܒܽܘܬܳܐ ܥܰܬܺܝܪܬܳܐ ܕܪܽܘܚܳܐ.

ܙܳܕܶܩ ܗܳܟܺܝܠ ‌ܐܳܦ ܠܰܢ ܕܝܳܕܥܺܝܢ ܚ̱ܢܰܢ ܕܰܠܘܳܬ ܐܳܟܶܠܩܰܪܨܳܐ ܘܫ̈ܺܐܕܶܐ ܐܺܝܬܰܘܗ̱ܝ ܕܰܐܪܳܐ ܠܟܽܠܗܽܘܢ ܟܪ̈ܺܝܣܛܝܳܢܶܐ܆ ܕܢܰܟܦܳܐܺܝܬ ܢܺܚܶܐ܆ ܘܰܢܬܰܪܶܨ ܦܽܘܩ̈ܕܳܢܶܐ ܐܰܝܟ ܕܡܶܫܟܚܳܐ. ܐܰܝܟܰܢܳܐ ܕܟܰܕ ܡܶܢ ܦܰܓܪܳܐ ܡܰܓܗܶܝܢܰܢ ܘܢܳܦܩܺܝܢܰܢ ܡܶܢ ܗܳܢܳܐ ܥܳܠܡܳܐ܆ ܢܶܗܘܶܐ ܐܺܝܬ ܠܰܢ ܡܰܠܰܐܟ̈ܶܐ ܕܩܳܕܡܺܝܢ ܐܳܙܺܠ̱ܝܢ ܩܕܳܡܰܝܢ܆ ܘܰܕܡܰܩܪܒܺܝܢ ܚܠܳܦܰܝܢ ܠܽܘܩܒܰܠ ܦܠܰܓܳܐ ܒܺܝܫܬܳܐ܆ ܕܰܒܥܶܠ̈ܕܒܳܒܶܐ ܗܳܢܽܘܢ ܐܳܐܰܪ̈ܳܝܶܐ ܘܠܳܐ ܡܶܬܚܰܙܝܳܢ̈ܶܐ܆ ܘܕܰܠܘܳܬ ܐܰܬܪ̈ܰܘܳܬܳܐ ܕܢܽܘܗܪܳܐ ܡܰܘܒܠܺܝܢ ܠܰܢ ܥܕܰܡܳܐ ܠܝܰܘܡܳܐ ܕܰܩܝܳܡܬܳܐ܆ ܗܰܘ ܕܒܶܗ ܟܰܕ ܠܦܰܓܪܳܐ ܢܩܰܒܶܠ܆ ܢܩܽܘܡ ܡܰܢ ܠܕܺܝܢܳܐ܆ ܟܰܕ ܕܶܝܢ ܠܳܐ ܡܚܰܝ̈ܒܶܐ ܢܶܫܬܟܰܚ ܒܰܦܣܳܩܳܐ ܟܺܐܢܳܐ ܕܕܰܝܳܢܳܐ ܗܰܘ ܠܳܐ ܡܶܬܬܰܛܥܝܳܢܳܐ܆ ܢܶܫܬܘܶܐ ܠܡܰܠܟܽܘܬܳܐ ܕܰܫܡܰܝܳܐ܆ ܘܠܰܐܘ̈ܳܢܶܐ ܗܳܢܽܘܢ ܕܰܠܥܳܠܰܡ ܘܰܡܫܰܚ̈ܠܦܶܐ ܕܒܳܗ̇܆ ܐܰܝܟ ܡܳܐ ܕܰܠܟܽܠܚܰܕ ܐܺܝܬ ܡܶܢ ܛܽܘܝܳܒܳܐ ܘܡܶܢ ܣܳܥܽܘܪܽܘܬܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܥܰܠ ܩܰܕܺܝܫܳܐ ܐܰܢܛܘܢܝܘܤ.

ܒ. ܩܘܪ̈ܝܢܬܝܐ. 13: 3[1]

ܡܬܝ. 10: 16 ـ 18 [2]

ܡܬܝ. 10: 21 [3]

ܡܬܝ. 10: 28 [4]

[5]ܣܝܡܬܐ ܕܬܐܘܡܐ ܐܘܕܘ ܦܰܐܬܳܐ 384 ܚܶܬܳܐ: ܐܰܘ ܚܶܬ̊ܬܳܐ (ܢܩܒ) ܟܺܝܣܳܐ. ܬܰܪܡܳܠܳܐ. ܬܽܘܒ ܦܪܽܘܣܬܕܳܐ ܥܶܠܳܝܳܐ ܘܓܫܪ̈ܐ ܕܥܰܠ ܥܰܡܽܘ̈ܕܶܐ. ܩܳܪܺܝܬܳܐ ܪܰܒܬܳܐ ܕܡܶܬܬܣܺܝܡܳܐ ܒܶܝܬ ܥܰܡܽܘܕܳܐ ܠܥܡܘܕܐ ܘܛܳܥܢܳܐ ܩܳܪ̈ܝܳܬܳܐ ܕܬܰܛܠܺܝܠܳܐ.

ܟܢܫܐ[6]

ܡܬܝ. 13: 43 [7]

ܡܙܡܘܪ̈ܐ. 44: 22  ܐܦ ܪ̈ܗܘܡܝܐ. 8: 36 ـ 37[8]

ܐܰܝܟ ܐܰܢ̱ܬܬܳܐ ܕܒܰܛܢܳܐ[9]

 ܡܫܰܩܠܽܘܬܐ[10]

ܐܦܣ̈ܝܐ. 2: 2 [11]

ܒܰܠܺܝܥܺܝܢ[12]

ܐ. ܩܘܪ̈ܝܢܬܝܐ. 9: 27 [13]

[14]ܒ. ܩܘܪ̈ܝܢܬܝܐ. 11: 27

[15]ܡܬܝ. 19: 21  ܐܦ ܡܪܩܘܣ. 10: 21  ܐܦ ܠܘܩܐ. 18: 22

ܐܦܣ̈ܝܐ. 6: 12[16]

ܡܙܡܘܪ̈ܐ. 27: 3 [17]

ܒ. ܩܘܪ̈ܝܢܬܝܐ. 2: 11[18]

ܪ̈ܗܘܡܝܐ. 8: 39 [19]

ܡܬܗܘܐ[20]

ܡܬܝ. 4: 9 [21]

ܡܬܝ. 4: 10 [22]

ܡܙܡܘܪ̈ܐ. 118: 72 [23]

ܡܬܝ. 5: 16 [24]

ܡܶܬܚܙܶܐ[25]

ܡܪܩܘܣ. 5: 7 ـ 9 [26]

ܐ. ܩܘܪ̈ܝܢܬܝܐ. 10: 24 [27]

ܦܪܟܣܝܣ. 20: 35 [28]

ܦܪܟܣܝܣ. 20: 34[29]

ܐ. ܛܝܡܬܐܘܣ. 1: 7 [30]

ܚܙܩܝܐܝܠ. 20: 31 [31]

ܐ. ܩܘܪ̈ܝܢܬܝܐ. 6: 20 [32]

ܪ̈ܗܘܡܝܐ. 2: 15 ـ 16 [33]

ܐ. ܩܘܪ̈ܝܢܬܝܐ. 2: 16 [34]

ܐܦܣ̈ܝܐ. 4: 21 [35]

ܐܪܡܝܐ. 9: 2 [36]

 ܡܥܰܝܕܳܐܝܬ[37]

ܐܫܥܝܐ. 54: 17 [38]

ܠܘܩܐ. 16: 22 [39]

ܡܬܝ. 25: 41[40]

ܐܦܣ̈ܝܐ. 2: 2[41]

 ܙܪܥܐ[42]

ܠܐ ܚܰܟܺܝ̈ܡܶܐ[43]

[44]ܗܳܕܶܐ ܠܟܣܝܣ ܕܣܺܝܡܳܐ ܗܳܪܟܳܐ܆ ܕܩܳܪܶܐ ܗܘܳܐ. ܠܐ ܗܘܳܐ ܡܶܢ ܩܪ̈ܝܬܐ ܐܺܝܬܶܝܗ̇܆ ܐܶܠܐ ܡܶܢ ܩܶܪܝܳܢܳܐ ܕܰܟܬܳܒܳܐ. ܥܝܳܕܳܐ ܓܶܝܪ ܐܺܝܬ ܗܘܳܐ ܕܰܠܗܰܘ ܕܩܳܪܶܐ ܒܰܟܬܳܒܳܐ ܡܶܢ ܒܳܬܰܪ ܕܰܡܫܰܠܶܡ ܢܫܰܒܚܽܘܢܳܝܗܝ ܐܶܢ ܗܽܘ ܕܝܳܕܰܥ ܛܳܒܳܐܝܬ. ܡܶܛܽܠ ܗܳܕܶܐ ܐܶܡܰܪ ܡܰܠܦܳܢܳܐ܆ ܐܰܝܟܰܢܳܐ ܕܰܢܫܰܒܚܽܘܢ ܠܗܰܘ ܕܩܳܪܶܐ ܗ̱ܘܳܐ

ܒ. ܩܘܪ̈ܝܢܬܝܐ. 13: 3[45]