ܡܺܐܡܪܳܐ ܕܰܬܡܳܢܺܝܢ ܘܚܰܡܫܳܐ
ܥܰܠ ܢܽܘܗܪ̈ܶܐ.
85: ܗܳܢܽܘܢ ܕܪܽܘܚܳܢܳܐܺܝܬ ܡܥܰܕܥܕܺܝܢ܆ ܟܰܕ ܒܟܽܠܙܒܰܢ ܒܥܰܝ̈ܢܶܐ ܚ̈ܰܕܬ̣ܳܬ̣ܳܐ ܕܬܰܪܥܺܝܬܗܽܘܢ ܡܶܬܒܰܩܶܝܢ ܒܚܰܝܠܳܐ ܕܰܐܝܠܶܝܢ ܕܡܶܫܬܰܡ̈ܠܝܳܢ܆ ܠܰܘ ܥܰܬܺܝܩܳܐܺܝܬ܆ ܐܶܠܳܐ ܚܰܕܬܳܐܺܝܬ ܡܥܰܕܥܕܺܝܢ. ܗܳܐ ܓܶܝܪ ܐܶܢܳܐ ܐܳܦ ܟܰܕ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܥܰܕܥܶܕܬ̊ܶܗ ܠܥܺܐܕܳܐ ܗܳܢܳܐ܆ ܟܰܕ ܐܰܟܣܢܳܐܺܝܬ ܗܳܫܳܐ ܡܶܬܩܰܪܰܒ ܐ̱ܢܳܐ ܠܶܗ܆ ܬܰܡܺܝܗ ܐ̱ܢܳܐ ܒܬܰܪܥܺܝܬܝ܆ ܘܰܠܘܳܬ ܝܽܘܪܕܢܳܢ ܡܶܬܬܰܘܒܰܠ ܐ̱ܢܳܐ܆ ܘܰܕܚܳܙܶܐ ܐ̱ܢܳܐ ܠܶܗ ܠܝܶܫܽܘܥ ܣܳܒܰܪ ܐ̱ܢܳܐ܆ ܕܩܳܐܶܡ ܒܰܡܨܰܥܬܶܗ ܕܪܶܕܝܳܐ ܕܢܰܗܪܳܐ.
ܘܰܠܣܽܘܟܳܠܳܐ ܕܺܝܠܶܗ ܕܰܫܡܳܐ܆ ܡܰܠܦܳܢܽܘܬܳܐ ܕܝܰܬܺܝܪ ܡܶܢ ܟܽܠ ܡܫܰܡܠܝܳܐ ܐܺܝܬܰܘܗ̱ܝ ܠܺܝ ܕܺܝܠܶܗ ܕܣܽܘܥܪܳܢܳܐ. ܐܶܢ ܓܶܝܪ ܝܶܫܽܘܥ ܦܽܘܪܩܳܢܳܐ ܕܰܐܠܳܗܳܐ ܐܺܝܬܰܘܗ̱ܝ ܘܳܐܣܝܽܘܬܳܐ܆ ܘܠܳܐ ܡܶܕܶܡ ܗܽܘ ܝܺܬ̣ܰܪ ܡܶܢ ܡܰܝ̈ܳܐ܆ ܘܳܐܦܠܳܐ ܡܶܕܶܡ ܐܰܘܣܶܦ ܢܣܰܒ ܟܰܕ ܥܡܰܕ܆ ܗܰܘ ܕܠܳܐ ܐܺܝܬܰܘܗ̱ܝ ܗ̱ܘܳܐ ܠܶܗ. ܐܰܝܟܰܢܳܐ ܓܶܝܪ ܗܰܘ ܕܰܐܠܳܗܳܐ ܐܺܝܬܰܘܗ̱ܝ ܒܽܐܘܣܺܝܰܐ܆ ܘܒܰܪܢܳܫܳܐ ܒܪܰܡ ܗܘ̣ܳܐ ܤܛܰܪ ܡܶܢ ܫܽܘܚܠܳܦܳܐ܆ ܘܰܕܠܳܐ ܝܳܕܰܥ ܚܛܺܝܬܳܐ. ܐܶܠܳܐ ܡܰܐܣ̈ܝܳܢܶܐ ܘܦܳܪ̈ܽܘܩܳܝܶܐ ܫܰܡܠܺܝ ܐܶܢܽܘܢ ܠܰܢ ܠܡܰܝ̈ܳܐ܆ ܟܰܕ ܒܗܽܘܢ ܒܰܥ̈ܒܳܕܶܐ ܐܰܙܥܶܩ ܠܒܰܪ̱ܬ ܩܳܠܳܐ ܗܳܝ ܕܶܐܠܺܝܫܳܥ ܢܒܺܝܳܐ܆ ܗܳܠܶܝܢ ܐܳܡܰܪ ܡܳܪܝܳܐ܆ ܐܰܣܺܝܬ̣ ܠܡܰܝ̈ܳܐ ܗܳܠܶܝܢ[1]. ܕܡܳܪܝܳܐ ܓܶܝܪ ܘܰܐܠܳܗܳܐ ܐܺܝܬܶܝܗ̇ ܗ̱ܘܳܬ ܗܳܕܶܐ ܒܰܫܪܳܪܳܐ ܕܺܝܠܳܝܬܳܐ ܕܢܺܐܡܰܪ܆ ܗܳܝ ܕܰܐܣܺܝܬ̣ ܠܡܰܝ̈ܳܐ ܗܳܠܶܝܢ.
ܫܰܦܺܝܪܳܐ ܗܝ ܕܶܝܢ܆ ܕܰܠܘܳܬܳܗ̇ ܕܬܰܫܥܺܝܬܳܐ ܢܶ݀ܪܗܰܛ ܢܶ݀ܣܰܩ܆ ܕܺܐܝܬ ܗ̱ܘܳܐ ܠܳܗ̇ ܛܽܘܦܣܳܐ ܓܰܠܝܳܐ ܕܐ̱ܪܳܙܳܐ ܗܰܘ ܕܰܥܬܺܝܕ ܗ̱ܘܳܐ. ܟܰܕ ܓܶܝܪ ܢܚܶܬ ܐܶܠܺܝܫܳܥ ܠܘܳܬ ܐܺܝܪܺܝܚܽܘ܆ ܡܕܺܝܢ̱ܬܳܐ ܕܶܝܢ ܐܺܝܬܶܝܗ̇ ܗܳܕܶܐ ܥܰܡܺܝܩܬܳܐ ܘܡܰܟܺܝܟܬܳܐ܆ ܘܕܰܠܬܰܚܬ ܡܶܢ ܐܽܘܪܶܫܠܶܡ ܣܺܝܡܳܐ܆ ܩܪܶܒܘ ܠܘܳܬܶܗ ܗܳܢܽܘܢ ܕܰܒܗܳܕܶܐ ܥܳܡܪܺܝܢ ܗ̱ܘܰܘ ܟܰܕ ܐܳܡܪܺܝܢ: ܗܳܐ ܟܺܝܬ ܡܰܥܡܪܳܐ ܕܰܡܕܺܝܢ̱ܬܳܐ ܗܳܕܶܐ ܛܳܒ܆ ܐܰܝܟܰܢܳܐ ܕܰܐܢ̱ܬ ܡܳܪܝ ܚܳܙܶܐ ܐܰܢ̱ܬ. ܘܡܰܝ̈ܳܐ ܒܺܝܫܺܝܢ ܘܰܡܓܰܙܶܝܢ ܡܶܢ ܒܢܰܝ̈ܳܐ. ܘܶܐܡܰܪ ܐܶܠܺܝܫܳܥ. ܣܰܒܘ ܠܺܝ ܗܳܟܺܝܠ ܩܽܘܠܺܝܣܬܳܐ ܚܕܰܬܳܐ܆ ܘܰܐܪܡܰܘ ܬܰܡܳܢ ܡܶܠܚܳܐ. ܘܰܢܣܰܒܘ ܠܶܗ܆ ܘܰܢܦܰܩ ܠܘܳܬ ܡܰܦܩܳܢܗܽܘܢ ܕܡܰܝ̈ܳܐ܆ ܘܰܫܕܳܗ̇ ܬܰܡܳܢ ܠܡܶܠܚܳܐ ܘܶܐܡܰܪ. ܗܳܠܶܝܢ ܐܳܡܰܪ ܡܳܪܝܳܐ. ܐܰܣܺܝܬ̣ ܠܡܰܝ̈ܳܐ ܗܳܠܶܝܢ. ܘܠܳܐ ܢܶܗܘܶܐ ܬܽܘܒ ܡܶܢ ܬܰܡܳܢ ܕܡܳܐܶܬ̣܆ ܘܳܐܦܠܳܐ ܕܡܶܬܓܰܙܝܳܐ ܡܶܢ ܒܢܰܝ̈ܳܐ ܡܶܛܽܠܳܬܗܽܘܢ[2].
ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܒܰܪܢܳܫܳܐ ܗܰܘ ܩܰܕܡܳܝܳܐ ܐܳܕܳܡ܆ ܕܰܐܝܟ ܗܰܘ ܕܡܶܢ ܡܕܺܝܢ̱ܬܳܐ ܡܶܕܶܡ ܕܣܰܓܺܝ ܪܳܡܳܐ ܘܰܡܥܰܠܝܳܐ܆ ܡܶܢ ܦܰܪܕܰܝܣܳܐ ܐܳܡܰܪ ܐ̱ܢܳܐ܆ ܘܰܕܫܰܝܢܳܐ ܕܰܐܠܳܗܳܐ ܐܺܝܬ ܠܳܗ̇ ܘܠܳܐ ܡܶܫܬܰܓܫܳܐ ܒܚܰܫ̈ܶܐ܆ ܗܳܕܶܐ ܓܶܝܪ ܐܺܝܬܶܝܗ̇ ܐܽܘܪܶܫܠܶܡ܆ ܢܚܶܬ ܠܰܐܪܥܳܐ ܗܳܕܶܐ ܥܰܡܺܝܩܬܳܐ ܘܕܰܠܪܽܘܚܩܳܐ ܡܰܒܥܕܳܐ ܡܶܢ ܐܰܠܳܗܳܐ. ܘܛܳܒܬܳܐ ܡܰܢ܆ ܟܽܠܗܶܝܢ ܓܶܝܪ ܗܳܠܶܝܢ ܕܡܶܢܶܗ ܗ̈ܘܰܝ ܫܰܦܺܝܪ̈ܳܢ ܘܣܰܓܺܝ ܫܰܦܺܝܪ̈ܳܢ[3]܆ ܡܶܢ ܡܰܘܬܳܐ ܕܶܝܢ ܡܶܬܩܰܦܚܳܐ ܗ̱ܘܳܬ ܘܡܶܬܥܰܫܡܳܐ ܗܰܘ ܕܰܐܫܘܚܰܬ̣ ܚܛܺܝܬܳܐ܆ ܘܰܕܢܶܣܚܶܐ ܘܢܶܫܬܰܦܰܥ ܥܰܠ ܟܽܠ ܥܒ̣ܰܕܬܶܗ ܐܰܫܺܝܕܽܘܬܳܐ ܗܳܝ ܕܚܰܝ̈ܶܐ ܪ̈ܰܛܺܝܒܶܐ. ܐܶܡܰܬܝ ܕܶܝܢ ܕܶܐܬܳܐ ܡܫܺܝܚܳܐ ܗܰܘ ܩܽܘܠܺܝܣܬܳܐ ܗܳܝ ܚܕܰܬܳܐ܆ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܒܬܽܘܠܬܳܐ ܗܳܝ ܠܳܐ ܡܛܰܘܰܫܬܳܐ ܦܰܓܪܳܐ ܗܰܘ ܚܰܕܬܳܐ ܢܣܰܒ ܘܠܳܐ ܡܶܬܓܰܫܦܳܢܳܐ ܡܶܢ ܚܛܺܝܬܳܐ ܗܳܝ ܥܰܬܺܝܩܬܳܐ܆ ܗܰܘ ܕܺܐܝܬ ܗ̱ܘܳܐ ܠܶܗ ܒܶܗ ܠܡܶܠܚܳܐ܆ ܒܶܗ ܓܶܝܪ ܐܺܝܬܰܝܗܶܝܢ ܗ̱̈ܘܰܝ ܟܽܠܗܶܝܢ ܣܺܝ̈ܡܳܬܳܐ ܡܛܰܫ̈ܝܳܬܳܐ ܕܚܶܟܡܬܳܐ[4] ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܗܳܝ ܕܳܐܦ ܐܶܬܚܰܠܛܰܬ ܒܗܽܘܢ ܒܡܰܝ̈ܳܐ ܒܝܰܕ ܡܰܚܰܬܬ̣ܶܗ ܕܰܠܗܽܘܢ܆ ܢܳܚ ܡܰܢ ܡܰܘܬܳܐ ܘܩܳܡ܆ ܗܶܢܽܘܢ ܕܶܝܢ ܡܰܝ̈ܳܐ܆ ܠܰܘ ܕܳܐܣܝܽܘܬܳܐ ܒܰܠܚܽܘܕ܆ ܐܶܠܳܐ ܐܳܦ ܡܰܝ̈ܳܐ ܕܡܰܘܠܕܽܘܬ ܒܢܰܝ̈ܳܐ ܗܘ̣ܰܘ. ܐܳܦ ܓܶܝܪ ܗܳܢܽܘܢ ܕܡܶܢ ܩܕܺܝܡ ܒܡܰܚܫܽܘܠܳܐ ܗܰܘ ܡܰܠܺܝܚܳܐ ܕܰܚ̈ܛܳܗܶܐ ܡܶܬܚܰܢܩܺܝܢ ܗܘܰܘ܆ ܘܺܐܝܬܰܝܗܽܘܢ ܗ̱ܘܰܘ ܒܢܰܝ̈ܳܐ ܕܡܰܘܬܳܐ܆ ܟܰܕ ܒܡܰܝ̈ܳܐ ܡܰܚ̈ܝܳܢܶܐ ܕܝܽܘܪܕܢܳܢ ܡܶܫܬܰܡܠܶܝܢ܆ ܒܢܰܝ̈ܳܐ ܕܰܐܠܳܗܳܐ ܗܳܘܶܝܢ܆ ܒܺܝܠܺܝܕܽܘܬܳܐ ܕܡܶܢ ܕܪܺܝܫ ܗܳܝ ܕܪܽܘܚܳܐ.
ܕܡܳܐܢܰܐ ܗ̱ܘ ܕܶܝܢ ܕܚܶܨܦܳܐ ܦܰܓܪܳܐ ܐ̱ܢܳܫܳܝܳܐ܆ ܣܳܗܶܕ ܦܰܘܠܽܘܤ ܟܰܕ ܠܩܽܘܪ̈ܝܢܬܳܝܶܐ ܟܳܬܶܒ܆ ܐܺܝܬ ܠܰܢ ܣܺܝܡܬܳܐ ܗܳܕܶܐ ܒܡܳܐܢ̈ܶܐ ܕܚܶܨܦܳܐ[5]. ܠܡܶܠܚܳܐ ܕܶܝܢ܆ ܕܛܽܘܦܣܳܐ ܐܰܚܺܝܕܳܐ ܕܚܶܟܡܬܳܐ ܐܽܘܣܝ̣ܳܝ̣ܬܳܐ ܕܰܐܠܳܗܳܐ܆ ܘܰܕܟܽܠܗܶܝܢ ܗܳܠܶܝܢ ܪ̈ܽܘܚܳܢܳܝܳܬܳܐ ܘܫܽܘ̈ܟܳܢܶܐ ܐܰܠܳܗܳܝ̈ܶܐ ܗܳܠܶܝܢ ܕܡܶܢ ܬܰܡܳܢ ܢܳܚܬܺܝܢ ܡܚܰܘܶܝܢ ܬܽܘܒ܆ ܟ̈ܬܳܒܶܐ ܢܦܺܝ̈ܚܰܝ ܡܶܢ ܐܰܠܳܗܳܐ܆ ܕܰܠܕܶܒܚ̈ܶܐ ܡܰܢ ܢܳܡܽܘ̈ܣܳܝܶܐ ܠܗܳܕܶܐ ܡܰܩܦܺܝܢ ܘܳܐܡܪܺܝܢ ܓܰܠܝܳܐܺܝܬ܆ ܟܽܠ ܕܶܒܚܬܳܐ ܒܡܶܠܚܳܐ ܬܶܬܡܠܰܚ[6]܆ ܥܰܠ ܠܰܚ̈ܡܶܐ ܕܶܝܢ ܗܳܠܶܝܢ ܕܰܩܕܳܡ ܐܰܦ̈ܶܐ ܒܳܗ̇ ܒܰܕܡܽܘܬܳܐ ܡܶܠܚܳܐ ܘܰܠܒܽܘܢܬܳܐ ܦܳܩܕܺܝܢ ܕܢܶܬܬܣܺܝ̈ܡܳܢ[7]܆ ܘܰܡܚܰܘܶܝܢ ܗ̱ܘܰܘ ܕܠܰܝܬܰܝܗܶܝܢ ܗ̱ܘܰܝ̈ ܫܚܺܝ̈ܡܳܬܳܐ ܘܕܰܣܦܺܝ̈ܩܳܢ ܡܶܢ ܐܰܠܳܗܳܐ܆ ܐܳܦ ܗܳܠܶܝܢ ܕܰܒܛܽܘܦ̈ܣܶܐ ܡܶܫܬܰܡ̈ܠܝܳܢ ܗ̱ܘܰܝ̈܆ ܘܛܶܠܳܢܳܐܺܝܬ ܪ̈ܳܫܡܳܢ ܗ̱ܘܰܝ̈ ܘܩܳܕܡ̈ܳܢ ܡܛܰܦ̈ܣܳܢ ܗ̱ܘܰܝ̈ ܠܰܫܪܳܪܳܐ. ܕܰܐܝܟ ܗܳܟܰܢ ܓܶܝܪ ܐܺܝܬܶܝܗ̇ ܐܰܠܳܗܽܘܬܳܐ܆ ܐܰܟܙܢܳܐ ܕܡܶܠܚܳܐ. ܙܰܗܪܺܝܪܬܳܐ ܘܚܶܘܳܪܬܳܐ ܘܗܽܘ ܢܽܘܗܪܳܐ. ܘܰܕܟܽܠܳܗ̇ ܬܰܡܣܽܘܬܳܐ ܘܪܶܗܠܳܐ ܕܰܚܛܺܝܬܳܐ ܛܳܪܕܳܐ. ܘܗܳܟܰܢܳܐ ܡܚܰܝܨܳܐ ܘܡܰܢܗܪܳܐ ܠܗܳܢܽܘܢ ܕܫܰܪܺܝܪܳܐܺܝܬ ܗܳܘܝܳܐ ܒܗܽܘܢ. ܟܰܕ ܠܗܳܕܶܐ ܡܶܠܚܳܐ ܐܶܫܬܰܘܬܰܦܘ ܫܠܺܝ̈ܚܶܐ܆ ܫܳܡܥܺܝܢ ܗܘܰܘ ܐܢ̱ܬܽܘܢ ܐܺܝܬܰܝܟܽܘܢ ܡܶܠܚܳܗ̇ ܕܰܐܪܥܳܐ[8]܆ ܐܰܟܙܢܳܐ ܕܫܳܡܥܺܝܢ ܗ̱ܘܰܘ ܐܳܦ ܗܳܢܽܘܢ ܕܠܰܐܠܳܗܳܐ ܐܺܝܬ ܗ̱ܘܳܐ ܠܗܽܘܢ ܕܥܳܡܰܪ ܒܗܽܘܢ܆ ܐܶܢܳܐ ܐܶܡܪܶܬ ܕܰܐܠܳܗ̈ܶܐ ܐܺܝܬܰܝܟܽܘܢ܆ ܘܰܒ̈ܢܰܝܳܐ ܕܰܡܪܰܝܡܳܐ ܟܽܠܟܽܘܢ[9]. ܗܳܟܰܢܳܐ ܐܳܦ ܠܒܽܘܢܬܳܐ܆ ܥܰܡ ܗܳܝ ܕܙܰܗܪܺܝܪܬܳܐ ܐܺܝܬܶܝܗ̇ ܘܚܶܘܳܪܬܳܐ܆ ܕܒܰܣܺܝܡܽܘܬ ܪܺܝܚܳܐ ܐܰܠܳܗܳܝܬܳܐ ܘܡܶܬܗܰܘܢܳܢܺܝܬܳܐ ܐܺܝܬܶܝܗ̇ ܫܽܘܘܕܳܥܳܐ. ܗܳܝ ܟܺܝܬ ܕܟܰܕ ܥܰܡ ܡܶܠܚܳܐ ܥܰܠ ܠܰܚ̈ܡܶܐ ܗܳܢܽܘܢ ܕܰܩܕܳܡ ܐܰܦ̈ܶܐ ܡܶܬܬܣܺܝܡܳܐ ܗ̱ܘܳܬ܆ ܩܳܕܡܳܐ ܗ̱ܘܳܬ ܡܫܰܘܕܥܳܐ܆ ܠܠܰܚܡܳܐ ܗܰܘ ܕܡܶܢ ܫܡܰܝܳܐ ܢܳܚܶܬ ܘܝܳܗܶܒ ܚܰܝ̈ܶܐ ܠܥܳܠܡܳܐ[10]܆ ܘܥܳܒܶܕ ܢܽܘܗܪܳܐ ܒܗܳܢܽܘܢ ܕܡܶܫܬܰܘܬܦܺܝܢ ܠܶܗ܆ ܘܰܒܝܰܕ ܪܺܝܚܳܐ ܐܰܠܳܗܳܝܳܐ ܡܰܓܗܶܐ ܠܗܽܘܢ ܡܶܢ ܣܰܪܝܽܘܬ ܪܺܝܚܳܐ ܕܚܰܫ̈ܶܐ.
ܕܗܳܠܶܝܢ ܓܶܝܪ ܕܰܠܘܳܬ ܐܰܠܳܗܽܘܬܳܐ ܡܶܬܚܰܙ̈ܝܳܢ ܒܬܶܐܽܘܪܺܝܰܐ܆ ܐܰܘ ܕܗܳܠܶܝܢ ܕܰܒܝܰܕ ܡܶܬܒܰܣܪܳܢܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܐܶܬܦܰܪ̈ܢܰܣܝ̱ ܡܶܛܽܠܳܬܰܢ ܠܳܐ ܣܳܦܶܩ ܗ̱ܘܳܐ ܚܰܕ ܣܽܘܥܪܳܢܳܐ ܟܰܕ ܛܽܘܦܣܳܢܳܐܺܝܬ ܡܶܬܢܣܶܒ ܗ̱ܘܳܐ܆ ܕܰܢܚܰܘܶܐ ܗ̱ܘܳܐ ܠܟܽܠܶܗ ܡܶܕܶܡ. ܡܶܢ ܗܳܪܟܳܐ ܠܰܘ ܥܰܠ ܡܶܠܚܳܐ ܒܰܠܚܽܘܕ܆ ܐܶܠܳܐ ܐܳܦ ܥܰܠ ܠܒܽܘܢܬܳܐ܆ ܘܳܐܦ ܥܰܠ ܐ̱ܚܪ̈ܳܢܝܳܬܳܐ ܣܰܓܺܝ̈ܳܐܬܳܐ ܦܷ̈ܠܳܐܬܳܢܳܝܳܬܳܐ ܡܚܰܘܝܳܢ̈ܝܳܬܳܐ ܕܗܳܝ ܕܰܥܬܺܝܕܳܐ܆ ܗܘ̣ܳܐ ܣܽܘܢܩܳܢܳܐ ܒܬܶܫܡܶܫܬܳܐ ܗܳܝ ܥܰܬܺܝܩܬܳܐ. ܕܗܳܠܶܝܢ ܕܰܠܡ̈ܶܠܶܐ ܕܺܝܠܗܶܝܢ ܐܰܝܟ ܕܡܶܫܟܚܳܐ܆ ܡܶܢ ܒܳܬܰܪ ܡܰܦܩܳܢܗܶܝܢ ܝܺܕܰܥܢܰܢ. ܘܠܰܘ ܟܽܠܰܢ܆ ܐܶܠܳܐ ܟܽܠܗܽܘܢ ܗܳܢܽܘܢ ܕܟܰܕ ܐܶܬܕܰܟܺܝܘ ܐܶܫܬܘܺܝܘ ܠܓܶܠܝܳܢܳܐ ܙܥܽܘܪܳܐ܆ ܒܝܰܕ ܛܰܝܒܽܘܬܳܐ ܕܡܶܢ ܠܥܶܠ.
ܦܰܓܪ̈ܶܐ ܡܰܢ ܗܳܟܺܝܠ ܕܺܝܠܰܢ܆ ܡܳܐܢ̈ܶܐ ܘܓܰܪ̈ܒܶܐ ܚܶܨܦܳܢܳܝ̈ܶܐ ܐܺܝܬܰܝܗܽܘܢ[11]܆ ܐܰܝܟܰܢܳܐ ܕܶܐܡܰܪ ܦܰܘܠܽܘܤ. ܗܰܘ ܕܶܝܢ ܕܰܡܫܺܝܚܳܐ܆ ܕܺܝܠܳܗ̇ ܡܰܢ ܟܰܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܗ̱ܘܳܐ ܐܰܟܘܳܬܰܢ ܘܚܶܨܦܳܢܳܝܳܐ܆ ܡܶܢ ܓܶܝܪ ܐܳܕܳܡ ܗܰܘ ܕܡܶܢ ܛܺܝܢܳܐ ܐܶܬܓܒܶܠ ܢܳܚܶܬ ܗ̱ܘܳܐ ܒܝܽܘܒܳܠܳܐ܆ ܐܳܦܶܢ ܐܰܠܳܗܳܝܳܐ ܐܺܝܬܰܘܗ̱ܝ ܗ̱ܘܳܐ܆ ܡܶܛܽܠ ܟܺܝܬ ܕܡܶܢ ܪܽܘܚܳܐ ܩܰܕܺܝܫܳܐ ܐܺܝܬܰܘܗ̱ܝ ܗ̱ܘܳܐ ܘܡܶܢ ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܘܰܤܛܰܪ ܡܶܢ ܚܛܺܝܬܳܐ܆ ܩܽܘܠܺܝܣܬܳܐ ܕܶܝܢ ܚܕܰܬܳܐ ܕܡܰܝ̈ܳܐ ܐܺܝܬܰܘܗ̱ܝ ܗ̱ܘܳܐ. ܡܚܰܝܕܺܝܢ ܗ̱ܘܰܘ ܠܶܗ ܓܶܝܪ ܩܢܽܘܡܳܐܺܝܬ ܟܰܕ ܒܢܰܦܫܳܐ ܡܠܺܝܠܬܳܐ ܡܢܰܦܰܫ ܗ̱ܘܳܐ܆ ܡܰܝ̈ܳܐ ܗܳܢܽܘܢ ܚܰܝ̈ܶܐ. ܡܶܠܬܳܐ ܗܰܘ ܕܰܐܠܳܗܳܐ. ܡܥܺܝܢܳܐ ܗܳܝ ܕܚܰܝ̈ܶܐ. ܗܰܘ ܕܳܐܡܰܪ ܗ̱ܘܳܐ ܒܶܐܘܰܢ̈ܓܶܠܺܝܰܐ܆ ܕܗܰܘ ܕܢܶܫܬܶܐ ܡܶܢ ܡܰܝ̈ܳܐ ܗܳܢܽܘܢ ܕܶܐܢܳܐ ܐܶ݀ܬܶܠ ܠܶܗ܆ ܠܳܐ ܢܶܨܗܶܐ ܠܥܳܠܰܡ܆ ܐܶܠܳܐ ܡܰܝ̈ܳܐ ܗܳܠܶܝܢ ܕܶܐ݀ܬܶܠ ܠܶܗ܆ ܢܶܗܘܽܘܢ ܒܶܗ ܡܥܺܝܢܳܐ ܕܡܰܝ̈ܳܐ ܕܢܳܒܥܺܝܢ ܠܚܰܝ̈ܶܐ ܕܰܠܥܳܠܰܡ[12].
ܣܰܓܺܝ ܕܶܝܢ ܛܳܒܳܐܺܝܬ ܩܽܘܠܺܝܣܬܳܐ ܐܶܡܰܪ ܘܠܰܘ ܩܽܘܠܬܳܐ. ܙܥܽܘܪܳܐ ܓܶܝܪ ܐܺܝܬܰܘܗ̱ܝ ܦܰܓܪܳܐ܆ ܘܳܐܦܠܳܐ ܐܺܝܬ ܠܡܺܐܡܰܪ ܕܰܟܡܳܐ ܣܰܓܺܝ ܙܥܽܘܪ܆ ܒܦܽܘܚܳܡܳܐ ܕܰܐܠܳܗܽܘܬܐ ܗܳܝ ܕܰܡܚܰܝܕܳܐ ܗ̱ܘܳܬ ܠܶܗ. ܗܳܕܶܐ ܕܶܝܢ܆ ܠܪܰܒܽܘܬܶܗ ܕܣܽܘܪܳܩܳܐ ܡܚܰܘܝܳܐ܆ ܕܗܰܘ ܟܺܝܬ ܕܟܽܠܶܗ ܗܳܢܳܐ܆ ܘܰܕܗܰܘ ܕܰܐܝܟ ܡܶܠܬܶܗ ܕܰܢܒܺܝܳܐ ܕܪܰܒܽܘܬܶܗ ܠܰܝܬ ܣܳܟܳܐ[13]܆ ܠܳܐ ܡܶܣܬܰܝܟܳܢܳܐܺܝܬ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܒܦܰܓܪܳܐ ܗܰܘ ܕܺܐܝܬܰܘܗ̱ܝ ܗ̱ܘܳܐ ܙܥܽܘܪܳܐ ܣܰܓܺܝ܆ ܘܕܰܡܣܰܝܰܟ ܗ̱ܘܳܐ ܒܰܡܫܽܘܚܬܳܐ ܙܥܽܘܪܬܳܐ ܘܰܒܕܰܐܝܟ ܗܳܕܶܐ ܕܡܽܘܬܳܐ.
ܗܺܝ ܗܳܟܺܝܠ ܩܽܘܠܺܝܣܬܳܐ ܗܳܝ ܕܡܰܝ̈ܳܐ܆ ܢܶܚܬܰܬ̣ ܠܝܽܘܪܕܢܳܢ. ܡܰܠܽܘܢ ܕܶܝܢ܆ ܡܰܝ̈ܳܐ ܗܳܢܽܘܢ ܚܰܝ̈ܶܐ܆ ܗܳܢܽܘܢ ܕܡܶܢܗܽܘܢ ܪܳܕܶܐ ܟܽܠ ܡܳܐ ܕܺܐܝܬܰܘܗ̱ܝ ܫܰܦܺܝܪܳܐ ܘܛܳܒܳܐ. ܠܗܳܝ ܟܺܝܬ ܕܳܐܦ ܙܟܰܪܝܳܐ ܗܰܘ ܢܒܺܝܳܐ ܐܳܡܰܪ܆ ܕܶܐܢ ܡܶܕܶܡ ܛܳܒܳܐ ܕܺܝܠܶܗ. ܘܶܐܢ ܡܶܕܶܡ ܫܰܦܺܝܪܳܐ ܕܺܝܠܶܗ[14]. ܡܶܛܽܠ ܗܳܕܶܐ ܐܳܡܰܪ ܗ̱ܘܳܐ܆ ܕܰܐܣܺܝܬ̣ ܠܡܰܝ̈ܳܐ ܗܳܠܶܝܢ܆ ܘܠܳܐ ܢܶܗܘܶܐ ܬܽܘܒ ܡܶܢ ܬܰܡܳܢ ܡܰܘܬܳܐ ܐܰܘ ܕܡܳܐܶܬ[15]. ܟܰܕ ܓܶܝܪ ܒܝܽܘܪܕܢܳܢ ܐܶܬܚܰܠܰܛܘ ܡܰܝ̈ܳܐ ܗܳܢܽܘܢ ܚܰܝ̈ܶܐ܆ ܪܰܨܶܨܘ ܠܪܺܝܫܶܗ ܕܬܰܢܺܝܢܳܐ[16] ܐܰܝܟܰܢܳܐ ܕܳܐܡܰܪ ܕܰܘܺܝܕ܆ ܐܰܘ ܐܰܝܟܰܢܳܐ ܕܶܐܫܰܥܝܳܐ܆ ܕܚܶܘܝܳܐ ܥܩܰܠܩܠܳܐ ܗܰܘ ܕܥܳܪܶܩ[17]܆ ܗܰܘ ܕܰܒܝܰܕ ܡܶܠܟܳܐ ܡܰܛܥܝܳܢܳܐ ܡܰܘܬܳܐ ܙܰܡܶܢ ܠܳܐܕܳܡ܆ ܘܰܫܪܰܘ ܠܟܽܠܶܗ ܚܰܝܠܳܐ ܕܫ̈ܺܐܕܶܐ ܗܳܢܽܘܢ ܕܰܬܚܽܘܬܰܘܗ̱ܝ. ܡܳܢܳܐ ܓܶܝܪ ܐ̱ܚܪܺܢܳܐ ܐܺܝܬ ܗ̱ܘܳܐ܆ ܐܶܠܳܐ ܐܶܢ ܕܥܳܪܽܘܩܳܐ ܢܶܗܘܶܐ ܗ̱ܘܳܐ܆ ܗܰܘ ܕܰܡܚܽܘܬܳܐ ܕܡܰܘܬܳܐ ܒܰܠܺܝܥ ܗ̱ܘܳܐ ܥܰܠ ܪܺܝܫܶܗ. ܡܶܛܽܠ ܓܶܝܪ ܕܡܰܝ̈ܳܐ ܕܝܽܘܪܕܢܳܢ܆ ܕܟܽܠ ܓܶܐܪܳܐ ܫܺܐܕܳܢܳܝܳܐ ܘܝܳܩܕܳܐ ܐܺܝܬܰܝܗܽܘܢ ܡܕܰܥܟ̈ܳܢܶܐ܆ ܙܳܡܰܪ ܗ̱ܘܳܐ ܕܰܘܺܝܕ ܟܰܕ ܐܳܡܰܪ܆ ܐܰܢ̱ܬ ܬܰܒ̣ܰܪܬ ܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܥܰܠ ܡܰܝ̈ܳܐ3. ܒܳܬܰܪܟܶܢ ܟܰܕ ܡܥܰܠܶܐ ܠܳܗ̇ ܠܡܶܠܬܳܐ ܡܶܢ ܕܪܺܝܫ ܐܳܡܰܪ܆ ܠܡܳܢܳܐ ܐܳܡܰܪ ܐ̱ܢܳܐ ܕܬܰܢܺܝ̈ܢܶܐ. ܕܺܝܠܶܗ ܕܗܰܘ ܬܰܢܺܝܢܳܐ ܪܺܝܫܳܢܳܝܳܐ ܐܳܟܶܠܩܰܪܨܳܐ܆ ܐܰܢ̱ܬ ܪܰܨܶܨܬ ܠܩܰܪܩܰܦܬܳܐ ܗܳܝ ܪܺܝܫܳܐ ܕܒܺܝܫܬܳܐ. ܡܶܛܽܠ ܗܳܕܶܐ ܠܳܐ ܐܺܝܬ ܡܰܘܬܳܐ ܒܡܰܝ̈ܳܐ܆ ܡܶܛܽܠ ܟܺܝܬ ܕܢܶܚܬܰܬ̣ ܠܗܽܘܢ ܡܥܺܝܢܳܐ ܕܚܰܝ̈ܶܐ. ܐܰܟܙܢܳܐ ܓܶܝܪ ܕܥܶܩܳܪ̈ܶܐ ܘܦܶܩ̈ܚܶܐ ܗܳܢܽܘܢ ܕܡܶܢ ܐܰܪܥܳܐ ܟܰܕ ܒܡܰܝ̈ܳܐ ܡܶܬܪܡܶܝܢ ܘܡܶܬܬܱܪܶܝܢ܆ ܠܘܳܬ ܓܰܘܢܳܐ ܒܰܝܬܳܝܳܐ ܕܺܝܠܗܽܘܢ ܡܫܰܚܠܦܺܝܢ ܥܳܒܕܺܝܢ ܠܗܽܘܢ ܠܗܳܠܶܝܢ܆ ܐܰܘ ܕܰܐܪܓܘܳܢܺܝܢ ܐܰܘ ܕܡܰܣܡܩܺܝܢ܆ ܗܳܟܰܢܳܐ ܡܶܛܽܠ ܕܺܐܝܬܰܘܗ̱ܝ ܝܶܫܽܘܥ ܚܶܟܡܬܳܐ ܘܚܰܝܠܳܐ ܕܰܐܠܳܗܳܐ ܘܰܐܒܳܐ܆ ܘܢܽܘܗܪܳܐ ܘܰܡܥܺܝܢܳܐ ܕܚܰܝ̈ܶܐ܆ ܘܙܰܕܝܩܽܘܬܳܐ ܘܩܰܕܺܝܫܽܘܬܳܐ ܘܦܽܘܪܩܳܢܳܐ܆ ܘܰܒܪܶܗ ܕܗܰܘ ܕܡܰܚܶܐ ܟܽܠ܆ ܟܰܕ ܒܫܶܦ̈ܥܰܘܗ̱ܝ ܕܝܽܘܪܕܢܳܢ ܥܡܰܕ܆ ܣܳܡ ܒܗܽܘܢ ܘܝܰܗ̱ܒ ܠܗܽܘܢ ܠܳܐ ܡܒܰܨܪܳܐܺܝܬ ܡܶܢ ܗܳܠܶܝܢ ܟܽܠܗܶܝܢ ܕܺܐܝܬܰܝܗܶܝܢ ܠܶܗ ܐܽܘܣܝܳܐܺܝܬ܆ ܘܰܥܒܰܕ ܐܶܢܽܘܢ ܡܰܝ̈ܳܐ ܡܰܢܗܪ̈ܳܢܶܐ܆ ܡܰܘ̈ܠܕܳܢܶܐ܆ ܡܰܚ̈ܝܳܢܶܐ܆ ܝܳܗܽܘ̈ܒܶܐ ܕܚܶܟܡܬܳܐ ܘܰܕܚܰܝܠܳܐ܆ ܘܰܕܩܰܕܺܝܫܽܘܬܳܐ ܘܰܕܦܽܘܪܩܳܢܳܐ ܘܰܕܙܰܕܺܝܩܽܘܬܳܐ.
ܢܦܰܫܩܽܘܢ ܠܰܢ ܗܳܟܺܝܠ ܒܢܰܝ̈ܳܐ ܕܢܶܣܛܽܘܪܺܝܽܘܤ. ܗܳܢܽܘܢ ܕܰܡܦܰܠܓܺܝܢ ܠܶܗ ܠܚܰܕ ܡܳܪܰܢ ܘܰܐܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ܆ ܐܰܝܟܰܢܳܐ ܗܰܘ ܕܰܒܝܽܘܪܕܢܳܢ ܥܽܘܬܪܳܐ ܕܟܽܠܗܶܝܢ ܗܳܠܶܝܢ ܛܳܒ̈ܳܬܳܐ ܣܳܡ܆ ܡܶܢ ܥܡܳܕܳܐ ܐܰܝܟ ܡܶܠܬܗܽܘܢ ܐܶܬܓܡܰܪ. ܡܶܢ ܟܽܠ ܦܪܽܘܤ܆ ܡܶܛܽܠ ܕܰܠܦܽܘܠܳܓܳܐ ܪܰܫܺܝܥܳܐ ܢܳܩܦܳܐ ܘܳܐܠܨܳܐܺܝܬ ܠܳܚܡܳܐ܆ ܗܳܝ ܕܰܠܒܰܪܢܳܫܳܐ ܕܺܝܠܳܢܳܐܺܝܬ ܢܩܰܪܒܺܝܘܗ̱ܝ ܠܰܥܡܳܕܳܐ܆ ܘܠܰܘ ܠܰܐܠܳܗܳܐ ܡܶܠܬܳܐ ܕܰܡܒܰܣܰܪ.
ܢܶ݀ܥܒܰܪ ܐܶܢ ܫܳܦܪܳܐ ܐܳܦ ܠܘܳܬ ܝܽܘܚܰܢܳܢ܆ ܘܢܶܫܟܚܺܝܘܗ̱ܝ ܕܓܰܠܝܳܐܺܝܬ ܡܰܟܶܤ ܠܶܗ ܠܪܽܘܫܥܳܐ. ܐܳܦ ܓܶܝܪ ܟܰܕ ܒܥܰܝ̈ܢܶܐ ܪ̈ܽܘܚܳܢܳܝܳܬܳܐ ܚܳܙܶܐ ܗ̱ܘܳܐ ܠܶܗ ܠܝܶܫܽܘܥ ܡܰܠ̣ܝܳܐ ܘܠܳܐ ܣܢܺܝܩܳܐ ܘܰܡܫܰܡܠܰܝ ܒܟܽܠ ܐܰܝܟ ܐܰܠܳܗܳܐ ܕܒܰܟܝܳܢܳܐ܆ ܘܕܰܒܣܽܘܢܩܳܢܳܐ ܕܡܶܕܶܡ ܠܳܐ ܐܺܝܬܰܘܗ̱ܝ܆ ܗܳܝ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܺ݀ܥܡܰܕ ܐܰܙܥܶܩ. ܒܰܐܝܠܶܝܢ ܕܰܣܢܺܝܩܺܝܢ ܐܳܡܰܪ܆ ܐܶܢܳܐ ܐܺܝܬ̣ܰܝ ܡܶܬܡܰܢܝܳܢܳܐ ܘܠܰܘ ܐܰܢ̱ܬ܆ ܐܳܦܶܢ ܗܘܰܝܬ ܒܰܪܢܳܫܳܐ ܐܰܟܘܳܬܰܢ. ܐܶܢ ܕܶܝܢ ܥܰܠ ܫܽܘܡܠܳܝܳܐ ܗܰܘ ܕܡܶܢ ܥܡܳܕܳܐ ܐܳܦ ܗܽܘ ܣܢܺܝܩ ܗ̱ܘܳܐ܆ ܐܰܝܟܰܢܳܐ ܕܡܶܠܬܗܽܘܢ ܕܪ̈ܰܫܺܝܥܶܐ ܨܳܒܝܳܐ܆ ܕܰܓܶܠ ܡܰܥܡܕܳܢܳܐ ܕܶܐܡܰܪ܆ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܺ݀ܥܡܰܕ܆ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ[18]. ܐܳܦ ܓܶܝܪ ܐܺܝܬܰܘܗ̱ܝ ܗ̱ܘܳܐ ܒܣܽܘܢܩܳܢܳܐ ܐܳܦ ܝܶܫܽܘܥ܆ ܐܶܢ ܟܺܝܬ ܡܶܢ ܥܡܳܕܳܐ ܥܬܺܝܕ ܗ̱ܘܳܐ ܕܢܶܫܬܰܘܬܰܦ ܒܰܡܫܰܡܠܝܽܘܬܳܐ.
ܐܶܠܳܐ ܡܰܝܬܶܐ ܦܣܳܩܳܐ ܕܫܰܠܡܽܘܬܳܐ ܗܰܘ ܠܳܐ ܕܰܓܳܠܳܐ ܥܰܠ ܡܶܠܱ̈ܘܗ̱ܝ ܕܡܰܥܡܕܳܢܳܐ܆ ܐܰܝܟ ܕܥܰܠ ܫܰܪܺܝܪ̈ܳܬܳܐ. ܠܳܐ ܓܶܝܪ ܐܶܡܰܪ ܕܳܐܦ ܐܶܢܳܐ ܥܰܠ ܥܡܳܕܳܐ ܕܺܝܠܳܟ ܣܢܺܝܩ ܐ̱ܢܳܐ. ܐܶܠܳܐ ܕܰܫܒܽܘܩ ܗܳܫܳܐ. ܗܳܟܰܢܳܐ ܓܶܝܪ ܦܰܐܝܳܐ ܠܰܡܡܰܠܳܝܽܘ ܟܽܠܳܗ̇ ܟܺܐܢܽܘܬܳܐ[19]. ܕܶܐ݀ܡܰܠܶܐ ܐܶܬܺܝܬ ܐܳܡܰܪ܆ ܘܠܰܘ ܕܶܐ݀ܬܡܰܠܶܐ. ܣܢܺܝܩ ܐ̱ܢܳܐ ܓܶܝܪ ܘܠܳܐ ܥܰܠ ܡܶܕܶܡ܆ ܟܰܕ ܡܰܠ̣ܝܳܐ ܐܺܝܬܰܝ܆ ܐܰܝܟܰܢܳܐ ܕܳܐܦ ܐܰܢ̱ܬ ܣܗܶܕܬ. ܟܽܠܳܗ̇ ܕܶܝܢ ܟܺܐܢܽܘܬܳܐ ܡܶܣܬܰܒܪܳܐ ܠܺܝ ܕܩܳܪܶܐ ܐܳܦ ܠܫܽܘܡܠܳܝܳܐ ܕܰܥܡܳܕܳܐ ܕܺܝܠܰܢ܆ ܗܰܘ ܕܰܥܬܺܝܕ ܗ̱ܘܳܐ ܕܢܶܨܽܘܒ ܒܡܰܝ̈ܳܐ ܡܶܢ ܡܰܚܰܬܬ̣ܳܐ ܕܺܝܠܶܗ. ܕܟܺܐܢܽܘܬܳܐ ܓܶܝܪ ܡܫܰܡܠܰܝܬܳܐ ܐܺܝܬܰܘܗ̱ܝ ܥܡܳܕܳܐ܆ ܕܰܠܟܽܠ ܥܶܩܒܬܳܐ ܐܰܝܟ ܕܰܠܡܺܐܡܰܪ ܕܟܽܘܬܡܳܐ ܗܰܘ ܕܡܶܢ ܚ̈ܛܳܗܶܐ ܡܕܰܟܶܐ܆ ܣܳܗܶܕ ܦܰܘܠܽܘܤ܆ ܟܰܕ ܗܳܟܰܢܳܐ ܡܶܛܽܠ ܐܰܝܠܶܝܢ ܕܥܳܡܕܺܝܢ ܐܳܡܰܪ. ܟܰܕ ܡܶܙܕܰܕܩܺܝܢ ܕܡܰܓܳܢ ܒܛܰܝܒܽܘܬܶܗ ܒܝܰܕ ܦܽܘܪܩܳܢܳܐ ܗܰܘ ܕܒܰܡܫܺܝܚܳܐ ܝܶܫܽܘܥ[20].
ܡܶܛܽܠ ܗܳܟܺܝܠ ܕܰܠܕܶܚܠܰܬ ܒܰܪܢܳܫܳܐ ܕܺܝܠܟܽܘܢ ܗܳܝ ܕܛܳܒ ܡܶܢ ܟܽܠ ܪܰܫܺܝܥܳܐ ܐܳܘ ܗܳܠܶܝܢ܆ ܕܚܰܩ ܡܰܢ ܝܽܘܪܕܢܳܢ ܟܰܕ ܩܰܒܶܠ ܠܡܰܝ̈ܳܐ ܚܰܝ̈ܶܐ܆ ܫܕܳܐ ܕܶܝܢ ܠܒܰܪ ܝܽܘܚܰܢܳܢ ܟܰܕ ܗܳܝ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ ܐܰܙܥܶܩ[21]܆ ܙܢܰܩ ܕܶܝܢ ܐܳܦ ܝܶܫܽܘܥ ܟܰܕ ܦܰܢܺܝ ܦܶܬܓܳܡܳܐ܆ ܘܕܰܡܡܰܠܶܐ ܚܰܘܺܝ ܗܽܘ ܠܶܗ ܘܠܰܘ ܕܡܶܬܡܰܠܶܐ܆ ܒܽܐܘܪܚܳܐ ܡܶܟܺܝܠ ܐܳܦ ܠܘܳܬ ܣܳܗܕܽܘܬܶܗ ܕܰܐܒܳܐ ܢܶܪܕܶܐ.
ܐܶܠܳܐ ܢܳܬܶܦ ܠܺܝ ܠܘܳܬܶܗ ܦܬܳܚܳܐ ܕܰܫܡܰܝܳܐ ܠܽܘܩܕܰܡ܆ ܘܕܽܘܡܳܪܳܐ ܣܰܓܺܝܳܐܐ ܡܶܛܽܠ ܪܶܚܡܰܬ ܐ̱ܢܳܫܽܘܬܳܐ ܕܠܳܐ ܣܳܟܳܐ ܡܳܠܶܐ ܠܺܝ. ܗܰܘ ܓܶܝܪ ܕܶܐܚܰܕ ܠܦܰܪܕܰܝܣܳܐ ܠܳܐܕܳܡ܆ ܘܰܐܩܺܝܡ ܠܰܟܪܽܘܒܳܐ ܘܠܰܫܢܳܢܳܐ ܕܫܰܠܗܶܒܺܝܬܳܐ ܕܡܶܬܗܰܦܰܟ ܠܡܶܛܰܪ ܐܽܘܪܚܳܐ ܕܐܺܝܠܳܢܳܐ ܕܚܰܝ̈ܶܐ܆ ܗܳܢܳܐ ܟܰܕ ܚܰܠ̣ܠܶܗ ܘܰܐܫܺܝܓܶܗ ܠܶܗ ܠܳܐܕܳܡ܆ ܘܚܰܕܬ̣ܳܐ ܚܰܘܝܶܗ ܒܶܗ܆ ܡܰܠܽܘܢ ܕܶܝܢ ܗܽܘ ܠܶܗ ܚܰܘܺܝ ܐܳܕܳܡ܆ ܚܠܳܦ ܦܰܪܕܰܝܣܳܐ ܗܳܫܳܐ܆ ܠܰܫܡܰܝܳܐ ܦܳܬܰܚ. ܟܰܕ ܡܚܰܘܶܐ ܓܰܠܝܳܐܺܝܬ܆ ܕܰܦܬܳܚܳܐ ܕܰܫܡܰܝܳܐ ܐܺܝܬܰܘܗ̱ܝ ܠܰܢ ܥܡܳܕܳܐ܆ ܘܡܰܪܕܺܝܬܳܐ ܕܝܰܬܺܝܪ ܡܛܰܝܒܳܐ ܠܘܳܬ ܗܳܠܶܝܢ ܕܰܠܥܶܠ. ܡܶܛܽܠ ܗܳܕܶܐ ܐܽܘܪܚܳܐ ܐܳܡܰܪ ܗ̱ܘܳܐ ܦܰܘܠܽܘܤ܆ ܕܚܰܕܶܬ ܠܰܢ ܐܽܘܪܚܳܐ ܚܕܰܬܳܐ ܘܚܰܝܬܳܐ[22]. ܐܶܠܽܘ ܠܳܐ ܓܶܝܪ ܕܰܠܡܰܠܟܳܐ ܫܰܪܺܝܪܳܐ ܘܰܒܪܳܐ ܕܒܰܟܝܳܢܳܐ ܕܰܐܠܳܗܳܐ ܘܰܐܒܳܐ ܚܙܰܘ ܬܰܪ̈ܥܶܐ ܕܰܫܡܰܝܳܐ܆ ܠܳܐ ܡܶܬܦܰܬܚܺܝܢ ܗܘܰܘ[23]. ܠܡܰܠ̈ܟܶܐ ܓܶܝܪ ܡܶܬܦܰܬܚܺܝܢ ܒܶܝܬ ܡܰܠ̈ܟܶܐ. ܡܶܟܺܝܠ ܕܶܝܢ ܟܰܕ ܠܰܫܡܰܝܳܐ ܦܬܰܚ ܝܶܫܽܘܥ܆ ܗܳܠܶܝܢ ܕܕܳܡ̈ܝܳܢ ܐܳܦ ܠܥܰܒ̈ܕܶܐ ܕܺܝܠܶܗ ܝܳܗܶܒ ܗ̱ܘܳܐ ܠܡܶܚܙܳܐ. ܡܶܛܽܠ ܗܳܕܶܐ܆ ܗܳܐ ܚܳܙܶܐ ܐ̱ܢܳܐ ܫܡܰܝܳܐ ܕܰܦܬܺܝܚܺܝܢ[24]܆ ܤܛܶܦܐܢܘܤ ܗܰܘ ܩܰܕܡܳܝܳܐ ܕܣܳܗ̈ܕܶܐ ܐܳܡܰܪ ܗ̱ܘܳܐ.
ܠܺܝ ܕܶܝܢ ܦܬܳܚܳܐ ܕܰܫܡܰܝܳܐ ܡܶܣܬܒܰܪ ܕܺܐܝܬܰܘܗ̱ܝ܆ ܐܳܦ ܡܶܬܪܰܓܫܳܢܳܐ ܡܰܢ ܡܶܕܶܡ܆ ܐܰܝܟ ܗܰܘ ܕܰܫܡ̈ܰܝܳܐ ܐܶܣܬܕܶܩܘ[25] ܐܰܝܟܰܢܳܐ ܕܡܰܪܩܽܘܤ ܐܶܡܰܪ. ܘܳܐܦ ܡܶܬܓܰܠܝܳܢܽܘܬܳܐ ܡܫܰܡܠܰܝܬܳܐ ܕܰܬܠܺܝܬܳܝܽܘܬܳܐ܆ ܘܺܝܕܰܥܬܳܐ ܕܠܰܫ̈ܡܰܝܳܢܶܐ ܦܰܐܝܳܐ. ܟܰܕ ܗܺܝ ܒܰܪ̱ܬ ܩܳܠܳܐ ܐܰܝܟ ܕܡܶܢ ܦܰܪܨܽܘܦܳܐ ܡܰܢ ܕܰܐܒܳܐ ܡܶܬܬܰܝܬܝܳܐ ܗ̱ܘܳܬ܆ ܘܰܡܚܰܘܝܳܐ ܗ̱ܘܳܬ ܠܰܢ ܠܰܩܢܽܘܡܳܐ ܗܰܘ ܕܺܝܠܶܗ ܕܰܐܒܳܐ. ܠܘܳܬ ܕܶܝܢ ܒܪܳܐ ܡܶܬܡܰܬܚܳܐ ܗ̱ܘܳܬ ܘܳܐܡܪܳܐ ܗ̱ܘܳܬ܆ ܐܰܢ̱ܬ ܐܺܝܬܰܝܟ ܒܪܳܐ ܕܺܝܠܝ ܗܰܘ ܚܰܒܺܝܒܳܐ[26]. ܘܡܰܟܪܙܳܐ ܗ̱ܘܳܬ ܠܫܰܪܺܝܪܽܘܬܳܐ ܐܰܟܚܕܳܐ ܘܰܠܫܰܘܝܽܘܬ ܐܽܘܣܺܝܰܐ ܕܰܐܠܳܗܽܘܬܳܐ܆ ܘܳܐܦ ܠܠܳܐ ܡܶܬܦܰܠܓܳܢܽܘܬܳܗ̇ ܕܰܚܕܳܝܽܘܬܳܐ ܗܳܝ ܕܰܠܘܳܬ ܒܶܣܪܳܐ. ܠܘܳܬ ܓܶܝܪ ܗܰܘ ܕܡܶܬܚܙܶܐ܆ ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܠܬܳܐ ܕܰܐܠܳܗܳܐ ܕܰܡܒܰܣܰܪ ܕܚܰܕ ܐܺܝܬܰܘܗ̱ܝ ܘܗܽܘ ܟܰܕ ܗܽܘ܆ ܘܠܰܘ ܐ̱ܚܪܺܢܳܐ ܠܒܰܪ ܡܶܢ ܗܰܘ ܕܰܡܛܰܫܰܝ ܐܰܝܟ ܕܰܠܢܶܣܛܽܘܪܺܝܽܘܤ ܡܶܣܬܰܒܪܳܐ܆ ܐܶܡܰܪ ܡܚܰܘܝܳܢܳܐܺܝܬ܆ ܗܳܝ ܕܰܐܢ̱ܬ ܘܗ̱ܝ ܕܰܒܪܳܐ ܕܺܝܠܝ. ܕܺܐܝܬܰܝܟ܆ ܘܠܰܘ ܕܰܗܘ̣ܰܝܬ. ܗܳܝ ܓܶܝܪ ܕܺܐܝܬܰܝܟ ܕܰܟܝܳܢܳܐ ܗܝ. ܗܳܝ ܕܶܝܢ ܕܰܗܘ̣ܰܝܬ܆ ܕܣܳܝܽܘܡܽܘܬ ܒܢܰܝ̈ܳܐ ܗܝ ܘܰܕܛܰܝܒܽܘܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ ܐܳܦ ܡܶܢ ܣܳܗܕܽܘܬܳܐ ܕܰܐܒܳܐ܆ ܠܒܰܪ ܡܶܢ ܫܪܳܪܳܐ ܢܰܦܺܝܠܺܝܢ ܣܽܘܦܝ̈ܣܡܛܐ ܐܰܘܟܺܝܬ ܚܽܘܟ̈ܡܶܐ ܗܳܢܽܘܢ ܕܪ̈ܰܫܺܝܥܶܐ.
ܪܽܘܚܳܐ ܕܶܝܢ ܩܰܕܺܝܫܳܐ ܢܚܶܬ ܡܰܢ ܒܰܚܙܳܬܳܐ ܕܝܰܘܢܳܐ܆ ܫܟ̣ܶܢ ܕܶܝܢ ܥܠܰܘܗ̱ܝ ܡܶܛܽܠܳܬܰܢ6. ܐܰܝܟܰܢܳܐ ܕܟܰܕ ܐܰܝܟ ܕܰܒܪܺܝܫܺܝܬܳܐ ܕܓܶܢܣܳܐ ܐܳܬܶܐ܆ ܢܶܥܒܰܪ ܐܳܦ ܥܰܠ ܫܰܘ̈ܝ̣ܰܝ̣ ܒܓܶܢܣܳܐ܆ ܟܰܕ ܡܶܫܬܰܡܠܶܝܢ ܒܰܥܡܳܕܳܐ ܐܰܠܳܗܳܝܳܐ. ܗܳܝ ܕܶܝܢ ܕܶܐܬܐܰܡܪܰܬ ܡܶܢ ܝܽܘܚܰܢܳܢ ܕܩܰܘܺܝ ܥܠܰܘܗ̱ܝ[27]܆ ܡܰܘܕܥܳܐ ܓܰܠܝܳܐܺܝܬ܆ ܕܕܺܝܠܶܗ ܐܺܝܬܰܘܗ̱ܝ ܗ̱ܘܳܐ ܗܽܘ ܪܽܘܚܳܐ ܘܠܰܘ ܢܽܘܟܪܳܝܳܐ. ܐܰܟܙܢܳܐ ܓܶܝܪ ܕܰܐܒܳܐ ܒܰܒܪܳܐ ܘܰܒܪܳܐ ܒܰܐܒܳܐ܆ ܗܳܟܰܢܳܐ ܐܳܦ ܪܽܘܚܳܐ ܩܰܕܺܝܫܳܐ ܒܰܐܒܳܐ ܘܒܰܒܪܳܐ܆ ܡܶܛܽܠ ܗܺܝܟܰܕܗܺܝܽܘܬܳܐ ܕܽܐܘܣܺܝܰܐ.
ܡܶܛܽܠ ܗܳܟܺܝܠ ܕܠܰܢ ܥܡܰܕ ܡܫܺܝܚܳܐ܆ ܟܰܕ ܢܽܘܗܪܳܐ ܘܚܰܝ̈ܶܐ ܘܩܰܕܺܝܫܽܘܬܳܐ ܡܳܠܶܐ ܠܰܥܡܳܕܳܐ ܕܺܝܠܰܢ܆ ܘܽܐܘܪܚܳܐ ܗܘ̣ܳܐ ܠܡܶܐܬܺܝܬܳܐ ܕܪܽܘܚܳܐ ܕܰܠܘܳܬܰܢ܆ ܐܳܦ ܠܰܢ ܐܶܬܕܒܰܪ ܠܡܰܕܒܪܳܐ ܡܶܢ ܪܽܘܚܳܐ. ܟܰܕ ܡܰܘܕܰܥ܆ ܕܗܳܢܽܘܢ ܕܰܥܬܺܝܕܺܝܢ ܕܰܢܗܰܝܡܢܽܘܢ ܒܶܗ ܘܢܶܥܡܕܽܘܢ܆ ܟܰܕ ܒܰܡܫܺܝܚܽܘܬܳܐ ܗܳܝ ܙܪܺܝܙܬܳܐ ܘܣܰܓܺܝ ܓܰܢ̱ܒܳܪܬܳܐ ܕܪܽܘܚܳܐ ܡܶܬܡܰܫܚܺܝܢ܆ ܘܒܰܕܡܽܘܬ ܐ̱ܢܳܫܺܝ̈ܢ ܐܰܬܠܺܝ̈ܛܶܐ ܒܡܶܫܚܳܐ ܕܛܰܝܒܽܘܬܳܐ ܡܶܬܡܰܫܚܺܝܢ[28]܆ ܠܘܳܬ ܤܛܰܐܕܝܘܢ ܪܳܡܳܐ ܘܣܰܓܺܝ ܒܚܺܝܪܳܐ ܕܢܶܣ̈ܝܽܘܢܶܐ ܥܬܺܝܕܺܝܢ ܕܢܶܬܬܰܝܬܽܘܢ܆ ܟܰܕ ܡܶܬܟܰܬܫܺܝܢ ܡܰܢ ܠܘܳܬ ܒܥܶܠܕܰܪܳܐ ܡܰܪܺܝܪܳܐ ܕܰܥܬܺܝܕ ܗ̱ܘܳܐ ܕܢܶܚܣܽܘܡ ܒܗܽܘܢ ܡܶܛܽܠ ܣܳܝܽܘܡܽܘܬ ܒܢܰܝ̈ܳܐ ܘܡܶܛܽܠ ܒܰܝܬܳܝܽܘܬܳܐ ܗܳܝ ܕܰܠܘܳܬ ܐܰܠܳܗܳܐ܆ ܥܰܘܠܳܐ ܓܶܝܪ ܢܶܚܙܶܐ ܘܢܶܪܓܰܙ܆ ܫܶܢܰܘܗ̱ܝ ܢܚܰܪܶܩ ܘܢܶܬܛܰܠܰܩ ܐܳܡܰܪ ܕܰܘܺܝܕ[29]܆ ܥܬܺܝܕ ܗ̱ܘܳܐ ܕܶܝܢ ܕܢܶܙܕܟܶܐ ܒܗܳܝ ܕܩܰܕܶܡ ܐܶܫܬܪܺܝ ܚܰܝܠܶܗ܆ ܒܝܰܕ ܩܰܕܺܝܡܽܘܬ ܬܰܟܬܽܘܫܳܐ ܗܳܝ ܕܰܚܠܳܦܰܝܢ ܡܫܺܝܚܳܐ ܠܘܳܬܶܗ ܩܰܕܶܡ ܐܶܬܟܰܬܰܫ. ܕܰܠܥܽܘܕܪܳܢܳܐ ܓܶܝܪ ܕܺܝܠܰܢ ܣܰܒܠܶܗ ܠܢܶܣܝܳܢܳܐ܆ ܐܰܘܕܰܥ ܓܰܠܝܳܐܺܝܬ ܦܰܘܠܽܘܤ ܕܶܐܡܰܪ܆ ܕܰܒܗܳܝ ܓܶܝܪ ܕܚܰܫ ܗܽܘ ܟܰܕ ܐܶܬܢܰܣܺܝ܆ ܡܶܫܟܰܚ ܠܰܡܥܰܕܳܪܽܘ ܠܗܳܢܽܘܢ ܕܡܶܬܢܰܣܶܝܢ[30]. ܥܽܘܕܪܳܢܳܐ ܐܳܡܰܪ ܕܚܰܝܠܳܐ܆ ܒܰܕܡܽܘܬ ܐ̱ܢܳܫ ܐܳܣܝܳܐ ܛܰܪܩܳܐ܆ ܢܶܣܝܳܢܳܐ ܕܺܝܠܶܗ ܕܢܰܦܫܶܗ ܠܗܳܢܽܘܢ ܕܰܥܬܺܝܕܺܝܢ ܕܢܶܬܢܰܣܽܘܢ ܩܰܕܶܡ ܬܰܩܶܢ܆ ܐܰܟܙܢܳܐ ܕܳܐܦ ܟܰܕ ܠܰܨܠܺܝܒܳܐ ܣܒܰܠ܆ ܙܰܝܢܳܐ ܕܚܰܝܠܳܐ ܝܰܗܒܶܗ ܠܰܢ ܠܗܳܢܳܐ ܠܽܘܩܒܰܠ ܒܥܶܠܕܰܪܳܐ.
ܡܳܢܳܐ ܗܳܟܺܝܠ ܚܢܰܢ ܢܶܒܗܰܬ ܡܶܢ ܡܰܝ̈ܳܐ ܗܳܢܽܘܢ ܕܕܽܘܟܳܝܳܐ܆ ܘܠܳܐ ܢܶ݀ܬܥܰܪܓܰܠ ܒܰܣܝܳܢܳܐ ܕܰܪ̈ܓܺܝܓܳܬܳܐ. ܢܶ݀ܪܥܰܠ ܡܶܢ ܦܬܳܚܳܐ ܕܰܫܡܰܝܳܐ܆ ܘܠܳܐ ܚܢܰܢ ܠܰܢ ܢܶܐܚܕܶܝܘܗ̱ܝ ܠܗܳܢܳܐ܆ ܟܰܕ ܠܳܐ ܡܶܕܶܡ ܡܶܬܪܰܥܶܝܢ ܚ̱ܢܰܢ ܕܰܫܡܰܝܳܐ܆ ܐܶܠܳܐ ܟܽܠܗܶܝܢ܆ ܕܰܐܪܥܳܐ. ܠܳܐ ܢܶܬܶܠ ܚ̈ܰܨܶܐ ܠܳܐܟܶܠܩܰܪܨܳܐ܆ ܘܰܢܚܰܘܶܐ ܕܰܣܪܺܝܩܳܐܺܝܬ ܐܶܬܢܰܣܺܝ ܡܫܺܝܚܳܐ ܚܠܳܦܰܝܢ. ܐܶܠܳܐ ܒܝܰܕ ܟܽܠܗܶܝܢ܆ ܢ݀ܝܰܩܰܪ ܠܗܰܘ ܕܨܶܒܝܳܢܳܐܺܝܬ ܟܽܠܗܶܝܢ ܡܶܛܽܠܳܬܰܢ ܣܰܝܒܰܪ. ܠܶܗ ܬܶܫܒܽܘܚܬܳܐ ܠܥܳܠܰܡ. ܐܰܡܺܝܢ.
ܫܠܶܡ ܡܺܐܡܪܳܐ ܕܥܰܠ ܢܽܘܗܪ̈ܶܐ.
ܟܗ̈ܢܐ. 2: 13 ܐܦ ܡܪܩܘܣ. 9: 49 [6]