ܡܺܐܡܪܳܐ ܕܰܬܡܳܢܺܝܢ ܘܰܐܪܒܥܳܐ

ܥܰܠ ‌ܐܰܒܳܐ ܒܰܣܶܝܠܺܝܽܘܤ ܘܥܰܠ ܬܶܐܽܘܠܽܘܓܽܘܤ ܓܪܺܝܓܽܘܪܺܝܽܘܤ. ܐܶܬܶܐܡܰܪ ܕܶܝܢ ܐܰܝܟ ܥܝܳܕܳܐ܆ ܒܒܰܝܬܳܐ ܕܒܶܝܬ ܨܠܽܘܬܳܐ ܕܰܠܒܺܝܫ ܠܰܐܠܳܗܳܐ ܣܳܗܕܳܐ ܐܺܝܓܢܰܐܛܺܝܽܘܤ.

84: ܐܰܟܙܢܳܐ ܕܰܥܝܳܕܳܐ ܐܺܝܬ ܠܡܰܠ̈ܟܶܐ܆ ܕܰܒܟܽܠ ܚܕܳܐ ܫܰܢ̱ܬܳܐ ܝܰܘܡܳܐ ܝܺܕܺܝܥܳܐ ܘܰܡܬܰܚܡܳܐ ܢܶܗܘܶܐ ܐܺܝܬ ܠܗܽܘܢ܆ ܘܗܽܘ ܟܰܕ ܗܽܘ ܒܟܽܠܙܒܰܢ ܡܶܬܟܪܶܟ ܒܰܟܪܽܘܟܝܳܐ ܕܙܰܒܢܳܐ܆ ܗܰܘ ܕܒܶܗ ܐܰܝܟ ܕܰܠܘܳܬ ܣܶܕܪܳܐ ܕܰܩܪܳܒܳܐ ܠܰܦܩܰܥܬܳܐ ܡܰܦܩܺܝܢ ܠܗܽܘܢ ܠܦܳܠ̈ܚܶܐ ܟܰܕ ܡܰܠܒܫܺܝܢ ܩܪܳܒܳܐܺܝܬ܆ ܘܰܠܕܽܘܪܳܫܳܐ ܘܗܽܘܓܳܝܳܐ ܕܛܶܟ̈ܣܶܐ ܕܰܩܪܳܒܳܐ ܡܰܥܗܕܺܝܢ܆ ܟܰܕ ܩܽܘܢܛܳܪܳܐ ܡܶܬܪܰܘܰܛ ܚܠܺܝܡܳܐܺܝܬ܆ ܩܶܫܬܳܐ ܟܺܝܬ ܟܰܕ ܡܶܬܡܰܬܚܳܐ ܫܰܦܺܝܪ ܐܽܘܡܳܢܳܐܺܝܬ܆ ܘܣܰܟܪܳܐ ܟܰܕ ܒܨܶܒܬܳܐ ܡܶܬܗܰܦܟܳܐ ܘܡܶܬܬܰܪܨܳܐ ܐܰܝܟ ܕܰܠܡܰܩܗܳܝܽܘ ܘܰܠܡܶܙܢܰܩ ܡܶܢܳܗ̇ ܠܫܰܕܝܳܐ ܩܪܳܒܳܝܳܐ܆ ܣܽܘܣܝܳܐ ܟܺܝܬ ܟܰܕ ܡܶܬܛܪܶܕ ܘܡܶܬܬܟܶܤ ܒܰܦܓܽܘܕܬܳܐ ܦܰܪܳܫܳܐܺܝܬ܆ ܒܶܗ ܟܰܕ ܒܶܗ ܒܰܙܢܳܐ ܚܢܰܢ ܡܗܰܝܡܢܺܝܢ ܚ̱ܢܰܢ ܕܕܳܒܰܪ ܡܳܪܝܳܐ ܗܰܘ ܕܰܒܚܶܟܡܬܳܐ ܟܽܠܗܶܝܢ ܥܳܒܶܕ ܘܡܰܦܶܩ܆ ܕܕܽܘܟܪܳܢܐ ܗܰܘ ܣܰܓܺܝ ܪܚܺܝܡܳܐ ܕܪܰܒܳܐ ܒܰܣܶܝܠܺܝܽܘܤ ܢܶܗܘܶܐ ܡܙܘܓ ܐܰܟܚܕܳܐ܆ ܘܰܐܝܟ ܗܰܘ ܕܰܒܬܰܪܥܳܐ ܘܡܰܥܰܠܬܳܐ ܐܺܝܬܰܘܗ̱ܝ ܥܰܡ ܫܽܘܪܳܝܳܐ ܕܝܰܪܚܳܐ ܩܰܕܡܳܝܳܐ ܕܫܰܢ̱ܬܳܐ ܗܳܝ ܕܰܐܝܟ ܢܳܡܽܘܣܳܐ ܗܰܘ ܕܰܠܘܳܬ ܪ̈ܗܽܘܡܳܝܶܐ܆ ܗܰܘ ܕܡܶܛܽܠܗܳܕܶܐ ܝܰܐܢܽܘܐܪܺܝܽܘܤ ܡܶܬܩܪܶܐ܆ ܡܶܛܽܠ ܟܺܝܬ ܕܝܰܐܢܘܰܐ ܡܶܬܟܰܢܶܐ ܬܰܪܥܳܐ ܐܰܝܟ ܠܶܫܳܢܳܐ ܕܺܝܠܗܽܘܢ܆ ܐܰܝܟܰܢܳܐ ܕܒܶܗ ܒܰܦܪܘܡܝܘܢ ܐܰܘܟܺܝܬ ܫܽܘܪܳܝܳܐ ܕܡܶܬܟܰܪܟܳܢܽܘܬܳܐ ܫܰܢ̱ܬܳܢܳܝܬܳܐ܆ ܟܰܕ ܩܳܐܶܡ ܥܠܰܝܢ ܒܝܰܕ ܕܽܘܟܪܳܢܶܗ ܪܺܝܫ ܟܳܗ̈ܢܶܐ ܗܰܘ ܪܽܘܚܳܢܳܝܳܐ ܘܰܐ‌ܠܳܗܳܝܳܐ܆ ܘܰܕܠܳܐ ܕܰܓܠܶܗ ܠܚܰܝܠܳܗ̇ ܕܰܡܫܺܝܚܽܘܬܳܐ ܗܳܝ ܩܰܕܺܝܫܬܳܐ܆ ܐܶܠܳܐ ܐܺܝܬܰܘܗ̱ܝ ܠܶܗ ܕܡܰܨܡܰܚ ܒܦܰܐܝܽܘܬܳܐ ܘܶܐܬܗܰܕܰܪ ܒܶܗ ܗܽܘ ܘܶܐܬܢܰܨܰܚ܆ ܢܶܗܘܶܐ ܛܰܥܺܝܢ ܘܡܰܝܬܶܐ ܒܽܘܪܟܬܳܐ ܠܗܳܢܽܘܢ ܕܡܶܬܥܰܗܕܺܝܢ ܠܶܗ܆ ܘܳܐܦ ܠܳܗ̇ ܕܶܝܢ ܠܡܰܠܟܽܘܬܳܐ ܕܪ̈ܽܘܡܳܝܶܐ܆ ܠܗܳܝ ܕܒܰܪܟܳܗ̇ ܡܶܠܬܳܐ ܗܰܘ ܕܰܐ‌ܠܳܗܳܐ ܝܶܫܽܘܥ ܡܫܺܝܚܳܐ܆ ܟܰܕ ܒܙܰܒ̈ܢܶܐ ܕܺܝܠܳܗ̇ ܐܶܬܳܐ ܒܰܒܣܰܪ. ܡܶܢ ܗܳܪܟܳܐ ܐܳܦ ܡܢܺܝܚܳܢܳܐ ܕܺܝܠܶܗ ܘܰܡܫܰܡܫܳܢܳܐ ܫܰܪܺܝܪܳܐ ܟܰܕ ܒܟܽܠ ܚܕܳܐ ܫܰܢ̱ܬܳܐ ܐܰܝܟ ܕܶܐܡܪܶܬ ܐܳܬܶܐ ܠܘܳܬܰܢ ܒܝܰܕ ܗܳܠܶܝܢ ܕܡܶܬܶܥܰܗܕ ܘܰܡܒܰܪܶܟ ܠܰܢ܆ ܒ̈ܢܳܬ ܩ̈ܳܠܶܐ ܗܳܠܶܝܢ ܕܡܳܪܰܢ ܐܳܡܰܪ܆ ܗܳܢܶܝܢ ܕܶܐܫܰܥܝܳܐ ܩܰܕܶܡ ܐܰܙܥܶܩ܆ ܪܽܘܚܶܗ ܕܡܳܪܝܳܐ ܥܠܰܝ܆ ܗܳܝ ܕܡܶܛܽܠܳܬܳܗ̇ ܡܰܫܚܰܢܝ ܡܳܪܝܳܐ. ܠܰܡܣܰܒܳܪܽܘ ܠܡܶܣ̈ܟܺܢܶܐ ܫܰܕܪܰܢܝ. ܠܡܰܐܣܳܝܽܘ ܠܗܳܢܽܘܢ ܕܰܬܒܺܝܪܺܝܢ ܒܠܶܒܗܽܘܢ. ܠܡܰܟܪܳܙܽܘ ܠܰܫ̈ܒܰܝܳܐ ܫܽܘܒܩܳܢܳܐ. ܘܠܰܣ̈ܡܰܝܳܐ ܚܙܳܝܳܐ. ܠܡܶܩܪܶܐ ܫܰܢ̱ܬܳܐ ܡܩܰܒܰܠܬܳܐ ܕܡܳܪܝܳܐ^[1].

ܡܳܕܶܝܢ ܠܰܘ ܠܳܐ ܝܺܕܺܝܥܬܳܐ ܗܝ܆ ܕܟܰܕ ܕܽܘܟܪܳܢܶܗ ܕܡܰܠܦܳܢܳܐ ܐܰ‌ܠܳܗܳܝܳܐ ܘܡܰܝܬܶܐ ܐ̱ܪ̈ܳܙܶܐ ܡܶܫܬܰܡܠܶܐ ܒܝܰܘܡܳܐ ܗܳܢܳܐ ܕܺܐܝܬܰܘܗ̱ܝ ܩܰܕܡܳܝܳܐ ܕܫܰܢ̱ܬܳܐ܆ ܘܙܰܪܥܳܐ ܕܒܽܘܪܟܬܳܐ ܡܰܪܡܶܐ܆ ܠܟܽܠܳܗ̇ ܫܰܢ̱ܬܳܐ ܡܒܰܪܰܟܬܳܐ ܡܫܰܡܠܶܐ ܠܳܗ̇܆ ܕܡܰܝܬܝܳܐ ܦܺܐܪ̈ܶܐ܆ ܠܗܳܢܽܘܢ ܕܰܒܡܰܪܓܫܳܢܽܘܬܳܐ ܡܚܰܓܶܝܢ ܡܶܬܥܰܗܕܳܢܽܘܬܳܐ܆ ܐܳܣܺܝ̈ܘܳܬܐ ܕܟܽܠ ܓܢܶܤ ܕܠܶܒܳܐ ܬܒܺܝܪܳܐ ܘܰܕܦܰܓܪܳܐ܆ ܠܗܳܢܽܘܢ ܕܫܶܒ̈ܝܶܐ ܗܘ̣ܰܘ ܡܶܢ ܚܛܺܝܬܳܐ܆ ܦܽܘܢܳܝܳܐ ܘܚܽܘܪܳܪܳܐ ܗܰܘ ܕܡܶܢ ܬܝܳܒܽܘܬܳܐ ܗܳܘܶܐ܆ ܠܰܣܡܰܝ̈ܳܐ ܘܰܕܠܰܥ̈ܒܳܕܶܐ ܕܚܶܫܽܘܟܳܐ ܣܳܥܪܺܝܢ܆ ܥܺܝܪܽܘܬܳܐ ܘܢܽܘܗܪܳܐ ܗܰܘ ܕܡܶܫܬܰܘܕܥܳܢܽܘܬܳܐ܆ ܐܰܝܟܰܢܳܐ ܕܟܽܠܳܗ̇ ܫܰܢ̱ܬܳܐ ܬܶܗܘܶܐ ܡܩܰܒܰܠܬܳܐ ܕܡܳܪܝܳܐ܆ ܗܳܢܰܘ ܕܶܝܢ ܡܶܬܩܰܒܠܳܢܺܝܬܳܐ ܘܗܰܢܺܝܐܬܳܐ ܘܰܕܫܳܦܪܳܐ܆ ܒܰܕܡܽܘܬ ܕܶܒܚܬܳܐ ܘܩܽܘܪܒܳܢܳܐ.

ܐܰܝܬܶܐ ܗܳܟܺܝܠ ܡܶܛܽܠ ܟܺܝܬ ܕܒܰܣܶܝܠܺܝܽܘܤ ܗܰܘ ܚܰܟܺܝܡܳܐ ܒܚܶܟܡܬܳܐ ܗܳܝ ܕܰܐ‌ܠܳܗܳܐ܆ ܗܰܘ ܒܥܶܠܫܡܳܐ ܕܡܰܠܟܽܘܬܐ ܗܳܝ ܕܰܫܡܰܝܳܐ܆ ܒܰܕܡܽܘܬ ܡܰܠܟܳܐ ܒܝܰܘܡܳܐ ܗܳܢܳܐ ܕܩܳܐܶܡ ܠܘܳܬ ܦܩܰܥܬܳܐ ܡܶܕܶܡ ܪܳܡܬܳܐ ܡܰܣܶܩ ܠܰܢ܆ ܗܳܢܰܘ ܕܶܝܢ ܠܘܳܬ ܪܰܘܡܳܐ ܘܰܡܥܰܠܝܽܘܬܳܐ ܕܡܰܠܦܳܢܽܘܬܳܐ ܕܺܝܠܶܗ܆ ܘܰܕܢܰܨܺܝܚܽܘܬܳܐ ܕܚܰܝ̈ܶܐ ܘܰܕܕܽܘܒܳܪܳܐ ܒܰܕܡܽܘܬ ܟܽܘܠܳܝܽܘܬ ܙܰܝܢܳܐ ܐܰܘ ܐܰܪܓܘܳܢܳܐ ܡܰܠܟܳܝܳܐ܆ ܠܒܺܝܫ ܘܡܰܥ̣ܛܶܦ ܠܰܓܪܺܝܓܽܘܪܺܝܽܘܤ ܬܶܐܽܘܠܽܘܓܽܘܤ ܕܡܶܫܬܰܘܬܰܦ ܠܶܗ ܒܕܽܘܟܪܳܢܳܐ܆ ܡܶܛܽܠ ܕܳܐܦ ܒܬܰܪܒܺܝܬܳܐ ܒܳܗ̇ ܟܰܕ ܒܳܗ̇ ܐܶܫܬܰܘܬܰܦ ܘܰܒܡܰܪ̈ܕܘܳܬܳܐ ܘܒܰܐܓܽܘ̈ܢܶܐ ܘܒܰܬܪܺܝܨܽܘܬܳܐ ܕܡܰܠܦܳܢܽܘܬܳܐ. ܚܰܕ ܓܶܝܪ ܪܽܘܚܳܐ ܒܰܬܪ̈ܰܝܗܽܘܢ ܡܰܥܒܶܕ ܗ̱ܘܳܐ܆ ܘܚܰܕ ܫܶܡܫܳܐ ܕܙܰܕܝܩܽܘܬܳܐ ܠܗܽܘܢ ܡܰܢܗܰܪ ܗ̱ܘܳܐ. ܠܳܐ ܡܶܕܶܡ ܫܰܦܠܳܐ ܢܶܣܥܽܘܪ܆ ܕܦܳܠ̈ܚܶܐ ܗܳܢܽܘܢ ܕܰܠܬܰܚܬ ܡܰܦܠܚܺܝܢ. ܐܶܠܳܐ ܟܽܠ ܚܰܕ ܡܶܢܰܢ ܗܰܘ ܡܳܐ ܕܺܐܝܬ ܠܶܗ ܙܰܝܢܳܐ ܪܽܘܚܳܢܳܐ܆ ܠܗܳܢܳܐ ܟܰܕ ܢܰܨܺܝܚܳܐܺܝܬ ܡܳܪܶܩ ܠܶܗ܆ ܘܰܒܫܰܦܺܝܪܽܘܬ ܥܽܘܛܳܦܳܐ ܠܳܒܶܫ ܘܰܡܚܰܙܶܩ ܠܶܗ ܥܠܰܘܗ̱ܝ܆ ܢܚܰܘܶܝܘܗ̱ܝ ܠܪ̈ܺܝܫܰܝ ܛܶܟ̈ܣܶܐ ܛܳܒ̈ܶܐ ܘܪ̈ܺܝܫܳܢܶܐ ܕܰܦܠܰܓܳܐ܆ ܗܳܝ ܕܠܰܘ ܠܘܳܬ ܕܡܳܐ ܘܒܶܣܪܳܐ ܡܶܙܕܰܝܢܳܐ܆ ܐܶܠܳܐ ܠܘܳܬ ܪ̈ܺܝܫܳܢܘܳܬܳܐ܆ ܠܘܳܬ ܫܽܘܠ̈ܛܳܢܶܐ܆ ܠܘܳܬ ܐܰܚܺܝ̈ܕܰܝ ܥܳܠܡܳܐ ܕܚܶܫܽܘܟܳܐ ܕܥܳܠܡܳܐ ܗܳܢܳܐ܆ ܠܘܳܬ ܪ̈ܽܘܚܶܐ ܕܒܺܝܫܽܘܬܳܐ^[2].

ܘܶܐܢ ܐ̱ܢܳܫ ܡܰܢ ܒܬܽܘܠܽܘܬܳܐ ܡܶܬܥܰܢܘܶܐ܆ ܘܠܳܐ ܚܠܺܝܛܽܘܬܳܐ ܟܽܠ ܟܽܠܶܗ ܕܫܰܘܬܳܦܽܘܬܳܐ ܕܙܽܘܘܳܓܳܐ܆ ܐܶܢ ܟܺܝܬ ܒܢܶܫ̈ܶܐ ܐܺܝܬܰܘܗ̱ܝ ܘܶܐܢ ܒܓܰܒܪ̈ܶܐ܆ ܠܰܢܛܽܘܪܬܳܐ ܢܶܡܬܽܘܚ܆ ܘܢܶܦܣܽܘܩ ܠܰܪ̈ܓܺܝܓܳܬܳܐ ܕܒܶܣܪܳܐ ܦܰܚ̈ܙܳܬܳܐ ܘܰܕܦܰܩܪ̈ܳܢ܆ ܒܥܰܪ̈ܩܶܐ ܐܰܘܟܺܝܬ ܒܰܦܓܽܘ̈ܕܶܐ ܕܰܡܚܰܡܣܢܳܢܽܘܬܳܐ܆ ܐܰܝܟܰܢܳܐ ܕܩܰܕܺܝܫܽܘܬܳܐ ܢܬܰܪܶܨ܆ ܐܰܝܟ ܡܰܪܬܝܳܢܽܘܬܳܐ ܫܠܺܝܚܳܝܬܳܐ܆ ܘܳܐܦ ܒܦܰܓܪܳܐ ܘܳܐܦ ܒܪܽܘܚܳܐ^[3].

ܐܶܢ ܕܶܝܢ ܐ̱ܢܳܫ ܒܙܽܘܘܳܓܳܐ ܟܢܺܝܟܳܐ ܘܕܰܟܝܳܐ ܐܰܣܺܝܪ܆ ܕܝܰܬܺܝܪ ܟܢܺܝܟ ܢܶܥܒܕܺܝܘܗ̱ܝ ܠܗܳܢܳܐ܆ ܟܰܕ ܡܦܰܠܶܓ ܙܰܒ̈ܢܶܐ ܝܺܕܺܝ̈ܥܶܐ ܠܡܰܫܟܒܳܐ ܕܫܰܠܡܽܘܬܳܐ܆ ܘܰܠܥܶܢܝܳܢܳܐ ܕܰܨܠܽܘܬܳܐ ܕܡܶܢ ܦܣܳܩܳܐ ܕܓܰܘܳܐ. ܐܰܝܟܰܢܳܐ ܕܗܳܝ ܕܗܳܘܝܳܐ܆ ܩܝܳܡܳܐ ܕܡܶܢ ܫܰܠܡܽܘܬܳܐ ܘܫܰܘܝܽܘܬ ܢܫܰܡܬܳܐ ܬܶܗܘܶܐ ܐܺܝܬܶܝܗ̇ ܕܰܡܙܰܘܓܽܘܬܳܐ ܢܰܟܦܬܳܐ܆ ܘܠܰܘ ܓܳܠܽܘܙܽܘܬܳܐ ܡܥܰܘܠܳܢܺܝܬܳܐ ܘܰܡܣܰܓܦܳܢܺܝܬܳܐ ܕܫܰܘܝܽܘܬ ܚܰܝ̈ܶܐ܆ ܕܚܳܒܠܳܐ ܦܽܘܪܫܳܐ ܩܛܺܝܪܳܝܳܐ. ܗܳܕܶܐ ܕܶܝܢ ܐܳܡܪܺܝܢܰܢ܆ ܠܰܘ ܐܰܝܟ ܡܰܢ ܕܠܰܡܛܰܡܽܐܘ ܡܟܢ ܚܽܘܠܛܳܢܳܐ ܗܰܘ ܢܳܡܽܘܣܳܝܳܐ܆ ܐܰܝܟܰܢܳܐ ܕܳܐܦ ܢܶܟܠܶܐ ܠܰܡܪܳܡܽܘ ܐܺܝ̈ܕܰܝܳܐ ܠܘܳܬ ܐܰ‌ܠܳܗܳܐ ܒܰܨ̈ܠܰܘܳܬܳܐ܆ ܐܰܝܟܰܢܳܐ ܓܶܝܪ ܙܽܘܘܳܓܳܐ ܗܰܘ ܡܝܰܩܪܳܐ ܘܡܰܫܟܒܳܐ ܗܰܘ ܕܰܟܝܳܐ ܡܛܰܡܶܐܝܢ܆ ܐܶܠܳܐ ܕܰܪܚܺܝܡܳܐ ܗ̱ܝ ܠܰܐܠܳܗܳܐ ܗܳܝ ܕܰܐܝܟ ܕܠܺܐܝܩܳܪܶܗ܆ ܕܳܐܦ ܡܶܢ ܗܳܠܶܝܢ ܕܢܳܡܽܘ̈ܣܳܝܳܢ ܡܰܢ ܗܰܢܺܝ̈ܳܐܢ ܕܶܝܢ ܙܰܒ̈ܢܺܝܢ ܣܰܓܺܝ̈ܳܐܢ ܢܶܬܪܰܚܰܩ܆ ܠܰܘ ܟܰܕ ܥܨܰܝܢܰܢ ܒܰܐܢܰܢܩܺܐ ܐܶܠܳܐ ܨܶܒܝܳܢܳܐܺܝܬ܆ ܘܠܳܐ ܢܶܗܘܶܐ ܝܗ̱ܝ ܒܺܝܢ ܚ̱ܢܰܢ ܚܢܰܢ ܟܽܠܰܢ ܠܰܪ̈ܓܺܝܓܳܬܳܐ. ܡܶܢ ܟܽܠ ܓܶܝܪ ܕܶܒܚܬܳܐ ܘܰܡܝܰܬܪܽܘܬܳܐ܆ ܝܰܬܺܝܪ ܟܳܗܢܳܝܳܐ ܘܝܰܬܺܝܪ ܪܚܺܝܡܳܐ ܠܶܗ ܡܚܰܡܣܢܳܢܽܘܬܳܐ ܕܥܳܢܘܳܝܽܘܬܳܐ. ܨܠܽܘܬܳܐ ܕܶܝܢ ܡܥܰܝܕܳܐ ܠܰܟܬܳܒܳܐ ܐܰ‌ܠܳܗܳܝܳܐ ܠܡܶܩܪܳܐ܆ ܠܰܘ ܒܰܠܚܽܘܕ ܠܬܰܟܫܶܦܬܳܐ ܘܒܳܥܽܘܬܳܐ ܗܳܝ ܕܡܶܫܬܰܕܪܳܐ ܒܡ̈ܶܠܶܐ܆ ܐܶܠܳܐ ܐܳܦ ܠܟܽܠ ܫܽܘܘܕܳܝܳܐ ܕܢܶܫܬܰܘܕܶܐ ܐ̱ܢܳܫ ܠܰܐܠܳܗܳܐ. ܐܰܝܟ ܗܳܝ ܕܨܰܠܰܘ^[4] ܘܰܦܪܽܘܥܘ ܠܡܳܪܝܳܐ ܐܰ‌ܠܳܗܳܐ ܕܺܝܠܰܢ^[5]܆ ܘܰܐܝܟ ܗܳܝ ܕܟܽܠ ‌ܐܶܡܰܬܝ ܕܰܬܨܰܠܶܐ ܨܠܽܘܬܳܐ ܠܰܐܠܳܗܳܐ܆ ܠܳܐ ܬܶܫܬܰܘܚܰܪ ܠܡܶܦܪܥܺܝܗ̇܆ ܘܛܳܒܳܐ ܗܝ ܗܳܝ ܕܠܳܐ ܬܨܰܠܶܐ܆ ܐܰܘ ܗܳܝ ܕܰܬܨܰܠܶܐ ܘܠܳܐ ܬܶܦܪܽܘܥ^[6].

ܐܶܠܳܐ ܘܶܐܢ ܐ̱ܢܳܫ ܐܺܝܬܰܘܗ̱ܝ ܐܰܒܳܐ ܕܰܒ̈ܢܰܝܳܐ܆ ܢܺܐܬܶܐ ܥܰܡܗܽܘܢ ܠܗܰܝܟܠܳܐ ܗܳܢܳܐ ܟܳܗܢܳܝܳܐ܆ ܘܰܢܚܰܘܶܐ ܠܪ̈ܰܒܰܝ ܚܰܝ̈ܠܶܐ ܪ̈ܽܘܚܳܢܶܐ܆ ܕܰܐܝܟ ܡܶܠܬܶܗ ܕܦܰܘܠܽܘܤ ܡܪܰܒܶܐ ܠܗܽܘܢ ܠܗܳܠܶܝܢ ܒܡܰܪܕܽܘܬܳܐ ܘܰܒܝܽܘܠܦܳܢܳܐ ܕܡܳܪܝܳܐ^[7]܆ ܘܰܢܙܰܡܶܢ ܠܗܽܘܢ ܫܰܦܺܝܪܽܘܬ ܚܰܝ̈ܶܐ ܕܒܽܘܪܟܬܳܐ ܕܟܽܠܳܗ̇ ܫܰܢ̱ܬܳܐ.

ܘܳܐܦ ܠܰܐܟܣ̈ܢܳܝܶܐ ܕܶܝܢ ܐܶܢ ܐ̱ܢܳܫ ܝܳܗܶܒ ܬܰܛܠܺܝܠܳܐ ܪܳܚܶܡ ܐ̱ܢܳܫܳܐ܆ ܘܣܳܐܶܡ ܩܕܳܡܰܝܗܽܘܢ ܦܳܬܽܘܪܳܐ ܚܽܘܒܳܢܳܝܳܐ܆ ܢܪܰܒܶܝܗ̇ ܠܰܡܝܰܬܪܽܘܬܳܐ ܘܢܺܐܡܰܪ ܥܰܡ ܐܺܝܘܒ. ܕܬܰܪܥܳܐ ܕܺܝܠܝ ܠܟܽܠ ܡܰܢ ܕܳܐܬܶܐ ܢܶܬܦܬܰܚ. ܘܰܠܒܰܪ ܕܶܝܢ ܠܳܐ ܢܒܽܘܬ ܐܰܟܣܢܳܝܳܐ. ܘܠܰܚܡܳܐ ܕܺܝܠܝ ܠܳܐ ܐܶ݀ܟܽܘܠ ܒܰܠܚܽܘܕܰܝ. ܘܶܐ݀ܟܰܣܶܐ ܠܥܰܪܛܶܠܳܝܳܐ܆ ܘܠܳܐ ܐܰ݀ܗܡܶܐ ܡܶܢ ܗܰܘ ܕܰܒܨܺܝܪ ܩܰܠܺܝܠ ܩܺܝܢܕܽܘܢܽܘܣܳܐ ܥܳܒܶܕ ܠܡܶܐܒܰܕ^[8].

ܘܶܐܢ ܐ̱ܢܳܫ ܩܳܝܽܘܡܳܐ ܐܺܝܬܰܘܗ̱ܝ܆ ܒܪܶܚܡܰܬ ܥܰܡܠܳܐ ܢܥܰܩܶܒ ܘܢܶܒܥܶܐ ܠܰܐܪ̈ܡܠܳܬܳܐ ܘܰܠ̈ܝܰܬܡܶܐ܆ ܘܠܳܐ ܢܶܫܒܽܘܩ ܠܐ̱ܢܳܫ ܕܢܶܗܘܶܐ ܐܺܝܬܰܘܗ̱ܝ ܕܠܳܐ ܛܥܺܝܡܳܐ ܠܶܗ ܐܰܘ ܕܠܳܐ ܫܩܺܝܠ ܠܶܗ ܢܶܣܝܳܢܳܐ ܕܩܳܝܽܘܡܽܘܬܶܗ. ܗܰܘ ܕܰܡܪܰܚܶܡ܆ ܐܰܝܟ ܐܰܝܢܳܐ ܕܥܰܠ ܣܰܒܪܳܐ ܙܳܪܰܥ^[9]܆ ܡܶܢ ܢܰܦܫܳܐ ܚܕܺܝܬܳܐ ܘܡܶܢ ܝܰܡܺܝܢܳܐ ܫܦܺܝܥܰܬ ܡܰܘܗܰܒܬܳܐ܆ ܟܽܘܠܳܗ̇ ܟܡܺܝܪܽܘܬܳܐ ܕܚܰܣܽܘܟܬܳܢܽܘܬܳܐ ܢܶܫܕܶܐ.

ܗܰܘ ܕܶܝܢ ܕܡܳܪܳܐ ܐܺܝܬܰܘܗ̱ܝ ܕܡܰܪ̈ܗܳܛܶܐ ܣܰܓܺܝ̈ܶܐܐ܆ ܟܰܕ ܐܺܝܬ ܠܶܗ ܚܰܝܳܒ̈ܶܐ ܕܠܳܐ ܣܳܦܩܺܝܢ ܠܘܳܬ ܦܽܘܪܥܳܢܽܘܬܳܐ ܕܚܰܘܒܬܳܐ܆ ܒܗܽܘܢ ܢܰܐܟܪܶܝܗ̇ ܠܰܨܠܽܘܬܳܐ܆ ܗܳܝ ܕܰܠܗܳܝ ܕܰܫܒܽܘܩ ܠܰܢ ܐܰܝܟܰܢܳܐ ܕܳܐܦ ܚܢܰܢ ܢܶܫܒܽܘܩ ܡܰܙܥܩܳܐ^[10]܆ ܠܘܳܬ ܗܰܘ ܕܥܰܬܺܝܪܳܐܺܝܬ ܘܰܫܦܺܝܥܳܐܺܝܬ ܗܳܦܶܟ ܡܶܟܺܝܠ ܫܽܘܒܩܳܢܳܐ.

ܐܶܢ ܕܶܝܢ ܘܐ̱ܢܳܫ ܕܽܘܒܳܪܳܐ ܕܰܝܪܳܝܳܐ ܡܶܬܥܰܢܘܶܐ܆ ܘܕܰܡܚܰܪܰܪ ܡܶܢ ܟܰܘܫܳܐ ܕܰܒܥܳܠܡܳܐ܆ ܘܰܒܡܰܕܒܪܳܐ ܥܳܡܰܪ܆ ܟܰܕ ܡܶܬܗܰܓܶܐ ܗܳܝ ܕܰܢܫܰܢܶܐ ܠܘܳܬ ܐܰܘ̈ܳܢܶܐ ܫܡܰܝܳܢ̈ܶܐ܆ ܕܰܟܝܳܐ ܢܶܗܘܶܐ ܒܠܶܒܳܐ܆ ܟܰܕ ܡܶܢ ܚܽܘܫܳܒ̈ܶܐ ܡܨܰܐܝ̈ܳܢܶܐ ܡܚܰܠܶܠ ܘܡܳܪܶܩ ܠܶܗ ܠܐܢܕܪܺܝܢܛܐ ܗܰܘ ܠܳܐ ܡܶܬܚܰܙܝܳܢܳܐ ܘܰܕܡܶܢ ܠܓܰܘ܆ ܐܰܝܟܰܢܳܐ ܕܰܕܢܶܚܙܶܐ ܠܰܐܠܳܗܳܐ ܢܶܫܟܰܚ.

ܘܶܐܢ ܠܘܳܬ ܬܶܐܘܳܪ̈ܺܝܐܤ ܪ̈ܽܘܚܳܢܳܝܳܬܳܐ ܣܳܠܶܩ܆ ܒܡܰܪܕܺܝܬܳܐ ܘܬܰܘܣܶܦܬܳܐ ܕܕܽܘܟܳܝܳܐ ܠܳܐ ܢܩܽܘܡ ܘܳܐܦܠܳܐ ܢܶܫܠܶܐ ܘܰܢܢܽܘܚ ܡܶܢ ܫܽܘܘܫܳܛܳܐ ܛܳܒܳܐ. ܠܘܳܬ ܕܶܝܢ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ ܕܰܐ‌ܠܳܗܳܐ ܢܶܪܕܽܘܦ܆ ܘܥܰܠ ܣܽܘܥܪ̈ܳܢܶܐ ܒܰܝ̈ܬܳܝܶܐ ܕܺܝܠܶܗ ܢܥܰܩܶܒ ܒܰܝܢܰܘܗ̱ܝ ܘܠܶܗ܆ ܒܡܰܟ̈ܬܒܳܢܘܳܬܳܐ ܕܒܰܣܶܝܠܺܝܽܘܤ ܗܳܠܶܝܢ ܕܥܰܠ ܕܰܝܪܳܝܽܘܬܳܐ܆ ܘܰܢܦܰܪܶܫ ܕܰܟܝܳܐܺܝܬ ܠܗܳܝ ܕܰܒܚܺܝܪܳܐ.

ܗܳܠܶܝܢ ܐܺܝܬܰܝܗܽܘܢ ܙܰܝ̈ܢܶܐ ܕܪܽܘܚܳܐ܆ ܗܳܠܶܝܢ ܟܺܝܬ ܕܰܠܟܽܘܢ ܨܳܒܶܐ ܐ̱ܢܳܐ ܕܬܶܙܕܰܝܢܽܘܢ ܝܰܘܡܳܢܳܐ ܝܰܬܺܝܪ ܢܰܨܺܝܚܳܐܺܝܬ܆ ܟܰܕ ܒܕܽܘܟܪܳܢܳܐ ܕܡܰܠ̈ܦܳܢܶܐ ܚܰܟܺܝ̈ܡܶܐ ܡܶܬܗܰܕܪܺܝܢ ܐܢ̱ܬܽܘܢ܆ ܘܰܐܝܟ ܗܰܘ ܕܥܰܠ ܦܩܰܥܬܳܐ ܡܶܕܶܡ ܡܶܙܕܰܝܢܺܝܢ^[11] ܐܢ̱ܬܽܘܢ ܘܣܳܠܩܺܝܢ ܐܢ̱ܬܽܘܢ܆ ܠܰܘ ܠܳܐ ܫܰܘܝܳܐܺܝܬ ܠܗܳܢܽܘܢ ܕܰܓܒܰܘ ܘܣܳܡܽܘܟܽܘܢ ܒܦܳܠܚܽܘܬܳܐ. ܕܰܐܝܟ ܗܳܟܰܢܳܐ ܓܶܝܪ ܐܺܝܬܰܘܗ̱ܝ ܐܰܬܪܳܐ ܕܰܡܝܰܬܪܽܘܬܳܐ. ܥܰܣܩܳܐ ܡܰܢ ܘܰܡܙܰܩܦܳܐ ܡܶܛܽܠ ܕܽܘ̈ܥܬܶܐ ܕܥܰܡ̈ܠܶܐ܆ ܦܰܬܝܳܐ ܕܶܝܢ ܒܰܕܡܽܘܬ ܦܩܰܥܬܳܐ܆ ܒܥܰܬܺܝܪܽܘܬܳܐ ܕܬܶܐܽܘܪܺܝܰܐ܆ ܘܰܒܒܽܘܣܳܡܳܐ ܕܗܳܠܶܝܢ ܫܡܰܝܳܢ̈ܝܳܬܳܐ.

ܡܶܛܽܠ ܗܳܟܺܝܠ ܕܰܐܢ̱ܬܘܢ ܗܳܟܰܢܳܐ ܐܶܙܕܰܝܰܢܬܽܘܢ܆ ܙܳܕܶܩ ܐܳܦ ܠܰܢ܆ ܕܢܰ݀ܥܶܠ ܡܶܕܶܡ ܠܚܰܓܳܐ܆ ܕܥܳܗܶܢ ܘܠܳܚܶܡ. ܡܳܢܳܐ ܗܳܟܺܝܠ ‌ܐܶ݀ܚܰܘܶܐ ܕܡܶܫܟܰܚ ܡܚܰܕܶܐ ܠܗܽܘܢ ܠܡܰܠ̈ܦܳܢܶܐ܆ ܟܰܕ ܐܳܦ ܐܶܢܳܐ ܡܶܣܬܒܰܪ ܐ̱ܢܳܐ ܕܛܶܟܣܳܐ ܕܗܳܝ ܕܰܐ݀‌ܠܶܦ ܐܰܚܺܝܕ ܐ̱ܢܳܐ܆ ܐܶܠܳܐ ܐܶܢ ܗܳܝ ܕܝܽܘܠܦܳܢܳܐ ܡܶܕܶܡ ܡܰܘܬܪܳܢܳܐ ܕܢܰܦܫܳܐ ܐܶ݀ܣܺܝܡ ܩܕܳܡܰܝܟܽܘܢ܆ ܕܡܶܢ ܡܥܺܝܢܳܐ ܡܰܢ ܡܰܠܦܳܢܺܝܬܳܐ ܕܗܳܢܽܘܢ ܪܳܕܶܐ܆ ܠܳܐ ܕܶܝܢ ܢܶ݀ܦܠ ܠܒܰܪ ܡܶܢ ܗܽܘܦܘܬܐܣܝܤ ܗܳܕܶܐ ܕܣܺܝܡܳܐ ܠܰܢ. ܡܳܕܶܝܢ܆ ܠܰܒ̈ܢܳܬ ܩ̈ܳܠܶܐ ܕܰܢܒܺܝܳܐ ܗܳܠܶܝܢ ܕܗܳܫܳܐ ܐܶܬܬܣܺܝ̈ܡܶܝܢ ܩܕܳܡܰܝܢ. ܙܳܕܶܩ ܕܰܢܢܰܗܰܪ ܒܥܶܕܳܢܗܶܝܢ.

ܪܽܘܚܶܗ ܕܡܳܪܝܳܐ ܥܠܰܝ. ܗܳܝ ܕܡܶܛܽܠܳܬܳܗ̇ ܡܰܫܚܰܢܝ ܡܳܪܝܳܐ^[12].

ܗܳܠܶܝܢ ܒܝܰܕ ܢܒܺܝܳܐ܆ ܡܫܺܝܚܳܐ ܡܶܠܬܶܗ ܕܰܐ‌ܠܳܗܳܐ ܗܰܘ ܕܡܶܛܽܠܳܬܰܢ ܐܶܬܒܰܣܰܪ ܘܶܐܬܒܰܪܢܰܫ ܐܳܡܰܪ. ܗܰܘ ܐܰܝܢܳܐ ܕܟܰܕ ܐܰ‌ܠܳܗܳܐ ܫܰܪܺܝܪܳܐ ܐܺܝܬܰܘܗ̱ܝ ܡܶܢ ܐܰ‌ܠܳܗܳܐ ܫܰܪܺܝܪܳܐ ܐܰܒܳܐ܆ ܘܟܰܕ ܠܳܐ ܫܪܰܥ ܡܶܢ ܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܳܦ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܘܫܰܪܺܝܪܳܐܺܝܬ ܗܘ̣ܳܐ ܒܰܪܢܳܫܳܐ܆ ܥܰܡܰܢ ܐܶܬܡܫܰܚ ܒܡܶܫܚܳܐ ܕܚܰܕܽܘܬܳܐ܆ ܟܰܕ ܪܽܘܚܳܐ ܩܰܕܺܝܫܳܐ ܥܰܠ ܝܽܘܪܕܢܳܢ ܐܶܬܳܐ ܥܠܰܘܗ̱ܝ ܒܰܚܙܳܬܳܐ ܕܝܰܘܢܳܐ. ܡܶܢ ܩܕܺܝܡ ܡܰܢ ܓܶܝܪ ܒܡܶܫܚܳܐ ܛܽܘܦܣܳܢܳܐܺܝܬ ܡܶܬܡܰܫܚܺܝܢ ܗܘܰܘ ܡܰܠ̈ܟܶܐ ܟܺܝܬ ܘܟܳܗ̈ܢܶܐ܆ ܟܰܕ ܫܰܘܬܳܦܽܘܬܳܐ ܡܶܕܶܡ ܕܩܰܕܺܝܫܽܘܬܳܐ ܡܶܢ ܗܳܢܳܐ ܝܳܬܪܺܝܢ ܗܘܰܘ. ܗܰܘ ܕܶܝܢ ܕܡܶܛܽܠܳܬܰܢ ܐܶܬܒܰܪܢܰܫ܆ ܒܡܶܫܚܳܐ ܡܶܬܗܰܘܢܳܢܳܐ ܕܚܰܕܽܘܬܳܐ^[13]܆ ܘܒܳܗ̇ ܒܡܰܓܢܳܢܽܘܬܳܐ ܕܪܽܘܚܳܐ ܐܶܬܡܫܰܚ. ܟܰܕ ܠܗܳܢܳܐ ܠܰܢ ܢܳܣܶܒ ܗ̱ܘܳܐ ܠܶܗ܆ ܘܠܰܘ ܠܶܗ. ܐܳܦ ܓܶܝܪ ܟܰܕ ܦܪܰܚ ܗ̱ܘܳܐ ܘܫܰܢܺܝ ܡܶܢܰܢ ܪܽܘܚܳܐ ܘܠܳܐ ܩܰܘܺܝ ܒܰܢ܆ ܡܶܛܽܠ ܗܳܝ ܕܺܐܝܬܰܝܢ ܗ̱ܘܰܝܢ ܒܶܣܪܳܐ^[14]܆ ܐܶܒܠܳܐ ܡܰܠܝܳܐ ܗ̱ܘܳܬ ܐܰܪܥܳܐ. ܐܰܝܟܰܢܳܐ ܓܶܝܪ ܠܳܐ ܥܬܺܝܕܐ ܗ̱ܘܳܬ ܗܳܕܶܐ܆ ܟܰܕ ܗܳܐ ܡܶܢ ܟܰܕܽܘ ܓܠܺܝܙܳܐ ܗ̱ܘܳܬ ܡܶܢ ܫܰܘܬܳܦܽܘܬܳܐ ܕܰܐ‌ܠܳܗܳܐ܆ ܘܚܰܕ ܒܰܠܚܽܘܕ ܒܕܽܘܟ ܢܒܺܝܳܐ ܐܰܘ ܐܳܦ ܗܰܘ ܕܰܬܪܶܝܢ ܒܰܙܒܰܢ ܙܒܰܢ ܡܶܫܬܟܰܚ ܗ̱ܘܳܐ܆ ܕܰܠܛܽܘܦܬܳܐ ܡܶܕܶܡ ܙܥܽܘܪܬܳܐ ܘܰܠܙܰܠܓܳܐ ܒܰܗܽܘܪܳܐ ܕܡܰܢܗܪܳܢܽܘܬܳܐ ܡܶܫܬܰܘܬܰܦ ܗ̱ܘܳܐ. ܡܶܛܽܠ ܗܳܟܺܝܠ ܕܪܽܘܚܳܐ ܗܰܘ ܕܶܐܬܳܐ ܥܰܠ ܡܫܺܝܚܳܐ܆ ܡܳܪܳܢܳܐܺܝܬ ܐܰܝܟ ܕܡܶܢ ܪܺܝܫܺܝܬܳܐ ܡܶܕܶܡ ܥܰܠ ܟܽܠܶܗ ܓܶܢܣܳܐ ܐܶܬܳܐ܆ ܘܰܫܪܳܝܗ̱ܝ ܠܶܐܒܠܳܐ ܗܰܘ܆ ܫܰܦܺܝܪ ܡܶܫܚܳܐ ܕܰܪܘܳܙܳܐ ܘܰܕܚܰܕܽܘܬܳܐ ܐܶܫܬܰܡܰܗ܆ ܟܰܕ ܪܶܚܡܰܬ ܐ̱ܢܳܫܽܘܬܳܐ ܐܺܝܬ ܠܶܗ ܒܶܗ ܘܬܰܪܥܽܘܬܳܐ ܓܰܘܳܢܳܝܬܳܐ܆ ܘܫܰܦܺܝܪܽܘܬ ܣܳܥܽܘܪܽܘܬܳܐ ܘܰܡܥܰܕܪܳܢܽܘܬܳܐ܆ ܘܰܕܥܰܠ ܟܽܠ ‌ܐ̱ܢܳܫ ܡܶܬܡܰܛܝܳܐ.

ܗܳܕܶܐ ܗܳܟܺܝܠ ‌ܐܺܝܬܶܝܗ̇ ܗܳܝ ܕܳܐܡܰܪ. ܪܽܘܚܶܗ ܕܡܳܪܝܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ ܒܽܐܘܣܺܝܰܐ ܕܶܝܢ ܐܺܝܬܰܘܗ̱ܝ ܒܺܝ܆ ܡܶܠܬܳܐ ܓܶܝܪ ܘܰܒܪܳܐ ܕܰܐܒܳܐ ܐܺܝܬܰܝ܆ ܗܘ̣ܳܐ ܥܠܰܝ ܡܶܛܽܠ ܕܶܐܬܒܰܣܪܶܬ܆ ܘܰܡܫܺܝܚܽܘܬܳܐ ܡܕܰܒܪܳܢܳܐܺܝܬ ܩܰܒܠܶܬ ܥܠܰܝ. ܐܶ‌ܠܽܘ ܓܶܝܪ ܠܳܐ ܢܶܚܬܶܬ̣ ܠܗܳܝ ܕܶܐ݀ܗܘܶܐ ܒܰܪܢܳܫܳܐ܆ ܣܰܓܺܝ ܢܽܘܟܪܳܝܬܳܐ ܐܺܝܬܶܝܗ̇ ܗ̱ܘܳܬ ܠܺܝ ܗܳܝ ܕܶܐ݀ܬܡܫܰܚ܆ ܟܰܕ ܐܰ‌ܠܳܗܳܐ ܐܺܝܬܰܝ ܒܰܟܝܳܢܳܐ.

ܪܽܘܚܶܗ ܕܡܳܪܝܳܐ ܥܠܰܝ. ܗܳܝ ܕܡܶܛܽܠܳܬܳܗ̇ ܡܰܫܚܰܢܝ ܡܳܪܝܐ܆ ܠܰܡܣܰܒܳܪܽܘ ܠܡܶܣ̈ܟܺܢܶܐ ܫܰܕܪܰܢܝ^[15]. ܠܗܳܢܽܘܢ ܓܶܝܪ ܕܺܝܕܰܥܬܳܐ ܕܰܐ‌ܠܳܗܳܐ ܡܶܣܟܺܢܺܝܢ܆ ܘܥܰܬܺܝܪܺܝܢ ܒܰܚ̈ܛܳܗܶܐ ܡܰܟܪܶܙ ܗ̱ܘܳܐ ܟܰܕ ܐܳܡܰܪ܆ ܬܽܘܒܘ ܩܶܪܒܰܬ̣ ܠܳܗ̇ ܡܰܠܟܽܘܬܳܐ ܕܰܫܡܰܝܳܐ^[16]. ܗܳܟܰܢܳܐ ܐܳܦ ܠܰܬܒܺܝܪ̈ܰܝ ܠܶܒܳܐ ܐܰܣܺܝ. ܐܰܟܪܶܙ ܐܳܦ ܠܰܫ̈ܒܰܝܳܐ ܫܽܘܒܩܳܢܳܐ. ܗܳܝ ܕܳܐܦ ܣܰܥܪܳܗ̇܆ ܟܰܕ ܐܰܣܪܶܗ ܠܚܰܣܺܝܢܳܐ^[17]܆ ܠܣܳܛܳܢܳܐ ܗܰܘ ܕܰܛܪܽܘܢܳܐܺܝܬ ܥܫܰܡ ܘܶܐܬܥܰܫܰܢ ܥܰܠ ܓܶܢܣܳܐ ܕܰܒܢܰܝ̈ܢܳܫܳܐ܆ ܘܠܰܢ ܠܡܳܐܢܰܘܗ̱ܝ ܒ̣ܰܙ. ܘܳܐܦ ܠܰܣܡܰܝ̈ܳܐ ܕܶܝܢ ܚܙܳܝܳܐ ܫܰܟܶܢ܆ ܟܰܕ ܕܢܰܚ ܠܗܳܢܽܘܢ ܕܰܒܚܶܫܽܘܟܳܐ ܕܠܳܐ ܝܺܕܰܥܬܳܐ ܘܰܒܛܶܠܳܠܳܐ ܕܡܰܘܬܳܐ ܝܳܬܒܺܝܢ ܗܘܰܘ^[18]. ܘܰܦܫܺܝܛܳܐܺܝܬ ܠܡܺܐܡܰܪ܆ ܩܪܳܐ ܫܰܢ̱ܬܳܐ ܡܩܰܒܰܠܬܳܐ ܕܡܳܪܝܳܐ. ܗܳܝ ܟܺܝܬ ܕܟܽܠܗܶܝܢ ܟܢܺܝܫܳܐܺܝܬ ܛܳܒ̈ܳܬܳܐ ܘܫܰܦܺܝܪ̈ܳܬܳܐ ܐܺܝܬ ܠܳܗ̇.

ܘܕܰܐܝܟܰܢܳܐ ܐܳ‌ܠܨܳܝܬܳܐ ܐܺܝܬܶܝܗ̇ ܠܡܺܐܡܰܪ. ܠܫܳܒܽܘܥܳܐ ܕܢܶܗܘܶܐ ܐܺܝܬܰܘܗ̱ܝ ܡܝܰܩܪܳܐ ܠܰܒ̈ܢܰܝܳܐ ܕܺܐܝܣܪܳܐܶܝܠ ܬܰܚܶܡ ܐܰ‌ܠܳܗܳܐ ܕܟܽܠ. ܡܶܛܽܠ ܕܟܰܕ ܒܶܫܬܳܐ ܝܰܘ̈ܡܺܝܢ ܥܰܒܕܶܗ ܠܥܳܠܡܳܐ ܗܳܢܳܐ ܡܶܬܚܰܙܝܳܢܳܐ܆ ܒܝܰܘܡܳܐ ܗܰܘ ܕܫܰܒܥܳܐ ܐܶܬܬܢܺܝܚ ܐܰܝܟ ܕܰܟܬܺܝܒ ܘܩܰܕܫܶܗ^[19]. ܘܰܠܗܳܢܳܐ ܦܩܰܕ ܕܰܢܟܰܗܢܽܘܢܳܝܗ̱ܝ ܠܶܗ܆ ܘܰܕܠܳܐ ܢܶܦܠܚܽܘܢ ܒܶܗ ܡܶܕܶܡ ܕܚܳܐܰܪ ܠܘܳܬ ܒܶܣܪܳܐ. ܟܽܠܗܶܝܢ ܕܶܝܢ ܐܰ‌ܠܳܗܳܝ̈ܳܬܳܐ ܘܪ̈ܽܘܚܳܢܳܝܳܬܳܐ܆ ܘܰܠܡܶܥܒܰܕ ܘܰܠܡܶܬܪܰܥܳܝܽܘ܆ ܡܶܛܽܠ ܟܺܝܬ ܕܠܳܐ ܡܶܫܟܚܺܝܢ ܗܘܰܘ ܟܰܕ ܩܫܰܝ̈ܳܐ ܡܶܕܶܡ ܐܺܝܬܰܝܗܽܘܢ ܗܘܰܘ ܘܥܰܣ̈ܩܰܝ ܠܡܶܬܥܰܠܳܝܽܘ ܠܘܳܬ ܡܝܰܬܪܽܘܬܳܐ܆ ܕܰܒܗܳܠܶܝܢ ܢܶܬܗܰܓܽܘܢ ܒܟܽܠ ܝܰܘܡܳܐ܆ ܗܳܕܶܐ ܓܶܝܪ ܐܳܦ ܪܚܺܝܡܳܐ ܠܰܐܠܳܗܳܐ.

ܗܳܠܶܝܢ ܕܶܝܢ ܕܺܐܝܩܳܪܳܐ ܕܫܳܒܽܘܥܳܐ ܐܰܘܟܺܝܬ ܕܫܰܒܬܳܐ܆ ܠܰܘ ܒܝܰܘ̈ܡܳܬܳܐ ܩܳܝ̈ܡܳܢ ܗ̱ܘܰܝ̈ ܒܰܠܚܽܘܕ. ܥܳܒܪ̈ܳܢ ܗ̱ܘܰܝ̈ ܕܶܝܢ ܐܳܦ ܠܘܳܬ ܡܶܢܝܳܢܳܐ ܕܰܫ̈ܢܰܝܳܐ. ܐܳܦ ܓܶܝܪ ܐܳܦ ܫܰܢ̱ܬܳܐ ܗܳܝ ܫܒܺܝܥܳܝܬܳܐ ܡܶܬܩܰܕܫܳܐ ܗ̱ܘܳܬ ܘܠܰܐܪܥܳܐ ܫܳܒܩܺܝܢ ܗܘܰܘ ܠܳܗ̇ ܠܳܐ ܙܪܺܝܥܬܳܐ ܘܠܳܐ ܟܪܺܝܒܬܳܐ. ܡܶܬܡܢܶܝܢ ܗ̱ܘܰܘ ܕܶܝܢ ܐܰܟܚܕܳܐ ܐܳܦ ܫܰܒܥܳܐ ܫܳܒܽܘ̈ܥܶܐ ܕܰܫܢܰܝ̈ܳܐ. ܐܰܝܟܰܢܳܐ ܕܒܰܙܢܳܐ ܡܶܕܶܡ ܒܝܰܕ ܡܶܢܝܳܢ̈ܶܐ ܕܝܰܬܺܝܪ ܐܺܝܬܰܝܗܽܘܢ ܡܣܰܝ̈ܟܳܢܶܐ ܘܰܕܗܳܦܟܺܝܢ ܡܶܬܟܰܪܟܺܝܢ ܒܝܰܕ ܬܰܪܒܺܝܬܳܐ܆ ܢܶܣܬܰܒܪ̈ܳܢ ܕܪ̈ܳܒܝܳܢ ܐܳܦ ܗܳܠܶܝܢ ܕܺܐܝܩܳܪܳܐ. ܐܶܠܳܐ ܕܢܳܩܦܳܐ ܐܺܝܬܶܝܗ̇ ܗܘܳܬ܆ ܕܫܰܢ̱ܬܳܐ ܗܳܝ ܕܰܐܪܒܥܺܝܢ ܘܰܬܫܰܥ ܬܶܬܩܰܕܰܫ ܗ̱ܘܳܬ. ܐܳܦ ܓܶܝܪ ܗܳܕܶܐ ܐܺܝܬܶܝܗ̇ ܐ̱ܚܪܳܝܬܳܐ ܕܫܳܒܽܘܥܳܐ ܗܰܘ ܫܒܺܝܥܳܝܳܐ ܕܰܫܢܰܝ̈ܳܐ. ܐܶܠܳܐ ܗܳܕܶܐ ܡܰܢ ܠܳܐ ܥܳܒܕܺܝܢ ܗ̱ܘܰܘ. ܡܩܰܕܫܺܝܢ ܗ̱ܘܰܘ ܕܶܝܢ ܠܗܳܝ ܕܚܰܡܫܺܝܢ^[20]. ܗܳܝ ܕܰܕܫܳܒܽܘܥܳܐ ܗܰܘ ܫܒܺܝܥܳܝܳܐ ܕܰܫܢܰܝ̈ܳܐ܆ ܬܡܺܝܢܳܝܬܳܐ ܐܺܝܬܶܝܗ̇ ܗ̱ܘܳܬ܆ ܕܛܽܘܦܣܳܐ ܐܰܚܺܝܕܳܐ ܗ̱ܘܳܬ ܕܝܰܘܡܳܐ ܗܰܘ ܕܺܐܝܬܰܘܗ̱ܝ ܬܡܺܝܢܳܝܳܐ ܘܰܐ̱ܚܪܳܝܳܐ ܕܙܰܒܢܳܐ ܗܳܢܳܐ ܕܪܳܕܶܐ ܘܥܳܒܰܪ܆ ܩܰܕܡܳܝܳܐ ܕܶܝܢ ܕܥܳܠܡܐ ܗܰܘ ܕܰܥܬܺܝܕ܆ ܗܰܘ ܟܺܝܬ ܕܺܐܝܬܰܘܗ̱ܝ ܚܰܕ ܘܰܕܠܳܐ ܫܽܘܠܳܡ. ܘܰܕܠܳܐ ܝܳܕܰܥ ܠܝܽܘܒܳܠܳܐ ܕܠܶܠܝܳܐ.

ܗܳܕܶܐ ܕܶܝܢ ܫܰܢ̱ܬܳܐ ܚܡܺܝܫܳܝܬܳܐ܆ ܝܽܘܒܝܠܐܘܤ ܡܶܬܩܰܪܝܳܐ ܗ̱ܘܳܬ܆ ܟܰܕ ܠܰܐܠܳܗܳܐ ܡܶܬܟܰܗܢܳܐ ܗ̱ܘܳܬ܆ ܘܺܐܝܬܶܝܗ̇ ܗ̱ܘܳܬ ܐܰܝܟ ܚܶܪܡܳܐ. ܝܽܘܒܺܝܠ^[21] ܓܶܝܪ ܐܺܝܬܰܘܗ̱ܝ܆ ܐܰܝܟ ܗܰܘ ܕܡܶܬܥܰܦܰܦ ܫܡܳܐ ܕܰܐ‌ܠܳܗܳܐ܆ ܘܡܶܬܶܐܡܰܪ ܐܰ‌ܠܳܗܳܐ ܐܰ‌ܠܳܗܳܐ. ܝܐܗܘ ܓܶܝܪ ܘܰܐ‌ܠܳܗܳܐ ܡܶܫܬܰܡܰܗ ܐܰ‌ܠܳܗܳܐ ܠܘܳܬ ܥܶܒܪ̈ܳܝܶܐ. ܐܰܝܟܰܢܳܐ ܕܡܶܢ ܗܳܕܶܐ ܬܺܐܠܰܦ܆ ܕܰܩܕܽܘܫ ܩܽܘ̈ܕܫܺܝܢ ܐܺܝܬܶܝܗ̇ ܫܰܢ̱ܬܳܐ ܗܳܝ܆ ܗܳܝ ܕܒܳܗ̇ ܚܽܘܪܳܪܳܐ ܐܺܝܬ ܗ̱ܘܳܐ ܘܫܽܘܒܩܳܢܳܐ ܕܡܶܢ ܟܽܠ ܫܽܘܥܒܳܕܳܐ ܘܚܰܘܒܬܳܐ܆ ܘܰܫܪܳܝܳܐ ܕܢܺܝܪܳܐ ܕܥܰܒܕܽܘܬܳܐ܆ ܘܦܽܘܢܳܝܳܐ ܕܩܳܢܝܽܘܬܳܐ ܕܰܐܪܥܳܐ ܕܡܶܙܕܰܒܢܳܐ ܗ̱ܘܳܬ܆ ܠܘܳܬ ܡܳܪ̈ܶܝܗ̇ ܩܰܕܡܳܝ̈ܶܐ܆ ܘܡܶܬܦܰܢܝܳܢܽܘܬܳܐ ܕܠܳܐ ܩܛܺܝܪܳܐ ܘܰܕܠܳܐ ܟܳܠܺܝܬܳܐ ܕܠܰܐܬܪܳܐ ܒܰܝܬܳܝܳܐ ܕܺܝܠܗܽܘܢ܆ ܠܗܳܢܽܘܢ ܕܡܶܢ ܗܳܢܳܐ ܢܦܰܠܘ.

ܠܗܳܕܶܐ ܗܳܟܺܝܠ ܫܰܢ̱ܬܳܐ ܚܰܡܫܺܝܢܳܝܬܳܐ܆ ܕܗܳܐ ܥܬܺܝܕܳܐ ܗ̱ܘܳܬ ܠܡܶܩܪܰܒ܆ ܡܰܟܪܙܺܝܢ ܗ̱ܘܰܘ ܒܝܰܪܚܳܐ ܗܰܘ ܫܒܺܝܥܳܝܳܐ ܕܫܰܢ̱ܬܳܐ ܗܳܝ ܕܰܐܪܒܥܺܝܢ ܘܰܬܫܰܥ܆ ܒܝܰܘܡܳܐ ܗܰܘ ܕܚܘܣܳܝܳܐ܆ ܘܩܳܕܡܺܝܢ ܗ̱ܘܰܘ ܡܫܰܘܕܥܺܝܢ ܗ̱ܘܰܘ ܠܳܗ̇ ܒܫܺܝܦܽܘܪܳܐ. ܡܶܛܽܠ ܗܳܟܺܝܠ ܕܰܡܫܺܝܚܳܐ ܒܝܰܘ̈ܡܳܬܳܐ ܐ̱ܚܪ̈ܳܝܶܐ ܐܶܬܳܐ܆ ܟܰܕ ܠܥܳܠܡܳܐ ܡܰܢ ܗܳܢܳܐ ܕܩܳܐܶܡ ܦܳܣܶܩ^[22]܆ ܡܫܰܢܶܐ ܕܶܝܢ ܡܰܥܒܰܪ ܠܰܢ ܠܘܳܬ ܝܰܘܡܳܐ ܗܰܘ ܬܡܺܝܢܳܝܳܐ܆ ܗܳܢܰܘ ܕܶܝܢ ܠܘܳܬ ܥܳܠܡܳܐ ܗܰܘ ܕܰܥܬܺܝܕ܆ ܗܰܘ ܕܒܶܗ ܐܺܝܬܶܝܗ̇ ܡܰܠܟܽܘܬܳܐ ܕܰܫܡܰܝܳܐ܆ ܟܰܕ ܠܙܰܒܢܳܐ ܗܰܘ ܕܡܶܬܒܰܪܢܫܳܢܽܘܬܳܐ ܒܰܝܬܳܝܬܳܐ ܕܺܝܠܶܗ ܠܗܰܘ ܡܰܠܘܷܬ ܠܶܗ܆ ܫܰܢ̱ܬܳܐ ܡܩܰܒܰܠܬܳܐ ܠܡܳܪܝܳܐ ܩܪܳܝܗ̱ܝ ܆ ܘܰܕܡܶܬܟܰܗܰܢ ܒܰܕܡܽܘܬ ܫܰܢ̱ܬܳܐ ܗܳܝ ܚܰܡܫܺܝܢܳܝܬܳܐ܆ ܗܳܝ ܕܡܶܬܐܰܡܪܳܐ ܗ̱ܘܳܬ ܝܽܘܒܺܝܠ. ܟܰܕ ܕܟܽܠ ܚܛܺܝܬܳܐ ܝܳܗܶܒ ܫܽܘܒܩܳܢܳܐ܆ ܘܚܽܘܪܳܪܳܐ ܕܡܶܢ ܥܶܕܠܳܝ̈ܶܐ ܥܰܬܺܝ̈ܩܶܐ. ܘܰܓܗܳܝܬܳܐ ܕܡܶܢ ܢܺܝܪܳܐ ܗܰܘ ܕܛܳܒ ܡܶܢ ܟܽܠ ܝܰܩܺܝܪ ܕܰܚܛܺܝܬܳܐ܆ ܘܦܽܘܢܳܝܳܐ ܕܰܠܦܰܪܕܰܝܣܳܐ ܐܰܬܪܳܐ ܩܰܕܡܳܝܳܐ ܘܰܡܕܺܝܢ̱ܬܳܐ ܕܒܰܪ ܐ̱ܢܳܫܐ. ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܚܽܘܣܳܝܳܐ ܕܰܚ̈ܛܳܗܶܐ ܕܺܝܠܰܢ^[23]܆ ܟܰܕ ܩܳܕܶܡ ܗ̱ܘܳܐ ܡܶܬܛܰܦܰܤ ܡܶܢ ܝܰܘܡܳܐ ܗܰܘ ܕܚܽܘܣܳܝܳܐ ܡܶܢ ܩܕܺܝܡ܆ ܗܰܘ ܕܒܶܗ ܫܰܢ̱ܬܳܐ ܗܳܝ ܚܰܡܫܺܝܢܳܝܬܳܐ ܩܳܕܡܳܐ ܗ̱ܘܳܬ ܡܶܫܬܰܘܕܥܳܐ܆ ܟܰܕ ܡܶܬܟܰܪܙܳܐ ܗ̱ܘܳܬ ܒܫܺܝܦܽܘܪܳܐ.

ܫܰܦܺܝܪ ܕܶܝܢ ܐܶܡܰܪ ܠܡܶܩܪܳܐ ܫܰܢ̱ܬܳܐ ܡܩܰܒܰܠܬܳܐ ܕܡܳܪܝܳܐ܆ ܘܠܰܘ ܠܡܰܟܪܳܙܽܘ. ܢܒܺܝ̈ܶܐ ܡܰܢ ܓܶܝܪ܆ ܡܶܢ ܙܰܒ̈ܢܶܐ ܣܰܓܺܝ̈ܶܐܐ ܡܰܟܪܙܺܝܢ ܗ̱ܘܰܘ ܠܳܗ̇ ܠܫܰܢ̱ܬܳܐ ܗܳܝ܆ ܘܰܒܫܺܝܦܽܘܪܳܐ ܢܒܺܝ̣ܳܝ̣ܳܐ ܩܳܕܡܺܝܢ ܗ̱ܘܰܘ ܡܰܙܥܩܺܝܢ ܠܳܗ̇. ܡܫܺܝܚܳܐ ܕܶܝܢ܆ ܠܳܗ̇ ܠܫܰܢ̱ܬܳܐ ܗܳܝ ܩܪܳܐ܆ ܘܰܕܬܶܗܘܶܐ ܩܳܝܡܳܐ ܘܩܰܪܺܝܒܳܐ ܥܰܒ̣ܕܳܗ̇. ܕܗܽܘ ܕܶܝܢ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܰܠܫܰܢ̱ܬܳܐ ܗܳܕܶܐ ܚܰܡܫܺܝܢܳܝܬܳܐ ܡܰܝܬܶܐ ܠܰܢ܆ ܗܳܝ ܕܛܳܒ̈ܳܬܳܐ ܣܰܓܺܝ̈ܳܐܬܳܐ ܡܰܠܝܳܐ܆ ܐܳܦ ܝܽܗ̱ܘ̈ܕܳܝܶܐ ܟܰܕ ܠܐ̱ܪܳܙܳܐ ܠܳܐ ܝܳܕܥܺܝܢ ܗܘܰܘ ܐܳܡܪܺܝܢ ܗܘܰܘ ܠܘܳܬܶܗ܆ ܚܰܡܫܺܝܢ ܫܢܰܝ̈ܳܐ ܠܳܐ ܥܕܰܟܺܝܠ ‌ܐܺܝܬ ܠܳܟ܆ ܘܠܰܐܒܪܳܗܳܡ ܚܙܰܝܬ^[24]܆ ܡܳܢܳܐ ܓܶܝܪ ܟܳܠܶܐ ܗ̱ܘܳܐ ܐܰܪܒܥܺܝܢ ܠܡܺܐܡܰܪ܆ ܟܰܕ ܡܫܺܝܚܳܐ ܒܩܰܘܡܬܳܐ ܕܒܰܒܣܰܪ ܛܠܶܐ ܗ̱ܘܳܐ܆ ܐܳܦܶܢ ܒܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ ܕܠܳܐ ܙܰܒܢܳܐ ܐܺܝܬܰܘܗ̱ܝ ܗ̱ܘܳܐ. ܟܰܕ ܓܶܝܪ ܒܰܪ ܬܠܳܬܺܝܢ ܫ̈ܢܺܝܢ ܐܺܝܬܰܘܗ̱ܝ^[25]܆ ܐܶܬܳܐ ܠܘܳܬ ܡܰܥܡܽܘܕܺܝܬܳܐ. ܡܶܫܟܚܺܝܢ ܗ̱ܘܰܘ ܕܶܝܢ ܘܟܰܕ ܠܘܳܬ ܥܰܬܺܝܩܽܘܬܶܗ ܕܰܐܒܪܳܗܳܡ ܚܳܝܪܺܝܢ ܗ̱ܘܰܘ ܕܢܺܐܡܪܽܘܢ܆ ܕܕܰܠܡܳܐ ܚܰܡܶܫܡܳܐܐ ܫܢܰܝ̈ܳܐ ܐܺܝܬ ܠܳܟ܆ ܐܰܘ ܐܰ‌ܠܦܳܐ ܐܶܢ ܬܶܓܕܰܫ܆ ܕܠܰܐܒܪܳܗܳܡ ܚܙܰܝܬ܆ ܗܳܕܶܐ ܓܶܝܪ ܝܰܬܺܝܪܳܐܺܝܬ ܐܺܝܬܶܝܗ̇ ܗ̱ܘܳܬ ܕܗܳܢܽܘܢ ܕܡܶܨܛܰܕܶܝܢ ܘܰܡܡܰܝܩܺܝܢ. ܐܶܠܳܐ ܠܚܰܡܫܺܝܢ ܫܢܺܝ̈ܢ ܐܶܬܶܥܗܰܕܘ܆ ܡܶܛܽܠ ‌ܐ̱ܪܳܙܳܐ ܗܰܘ ܕܩܰܕܺܝܡ ܐܰܡܺܝܪ. ܗܳܟܰܢܳܐ ܓܶܝܪ ܩܰܝܳܦܳܐ ܟܰܕ ܪܺܝܫ ܟܳܗ̈ܢܶܐ ܐܺܝܬܰܘܗ̱ܝ ܗ̱ܘܳܐ ܕܗܳܝ ܫܰܢ̱ܬܳܐ ܘܠܳܐ ܝܳܕܰܥ ܗ̱ܘܳܐ ܠܗܰܘ ܡܳܐ ܕܳܐܡܰܪ ܗ̱ܘܳܐ܆ ܕܶܐܡܰܪ ܟܬܺܝܒ܆ ܕܦܳܩܚܳܐ ܗܝ ܕܰܡܫܺܝܚܳܐ ܢܡܽܘܬ ܚܠܳܦ ܟܽܠܶܗ ܥܰܡܳܐ^[26]܆ ܟܰܕ ܛܳܥܶܝܢ ܗ̱ܘܰܘ ܠܶܗ ܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܡܰܫܘܰܚ ܡܶܢ ܡܰܘܬܐ ܗܰܘ ܠܟܽܠܶܗ ܥܳܠܡܳܐ.

ܡܶܣܬܰܒܪܳܐ ܠܺܝ ܕܶܝܢ܆ ܕܰܐ‌ܠܳܗܳܐܺܝܬ ܕܰܒܰܪ ܪܽܘܚܳܐ ܩܰܕܺܝܫܳܐ܆ ܕܰܕܚܰܡܫܺܝܢ ܢܶܬܪܫܶܡ ܡܰܙܡܽܘܪܳܐ ܗܰܘ܆ ܗܰܘ ܐܰܝܢܳܐ ܕܺܐܝܬ ܒܶܗ ܪ̈ܰܚܡܶܐ ܣܰܓܺܝ̈ܶܐܐ܆ ܘܰܥܛܳܝܳܐ ܕܠܳܐ ܢܳܡܽܘܣܳܝܽܘܬܳܐ܆ ܘܕܽܘܟܳܝܳܐ ܕܰܚܛܺܝܬܳܐ^[27]܆ ܒܰܕܡܽܘܬ ܫܰܢ̱ܬܳܐ ܗܳܝ ܝܽܘܒܺܝܠܳܝܬܳܐ܆ ܡܰܠܽܘܢ ܕܶܝܢ ܒܰܕܡܽܘܬ ܡܶܬܒܰܪܢܫܳܢܽܘܬܳܐ ܗܳܝ ܕܦܳܪܽܘܩܰܢ.

ܟܰܕ ܠܗܳܕܶܐ ܫܰܢ̱ܬܳܐ ܡܦܰܫܩܺܝܢ ܘܰܡܢܰܗܪܺܝܢ ܠܰܢ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ ܗܳܢܽܘܢ ܡܡܰܠ̈ܠܰܝ ܐܰ‌ܠܳܗܳܝ̈ܳܬܳܐ ܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܘܪ̈ܳܕܽܘܝܶܐ ܚܰܬܺܝ̈ܬ̣ܶܐ ܕܢܰܦ̈ܫܳܬܳܐ܆ ܫܰܘܝܳܐܺܝܬ ܒܪܺܝܫܳܗ̇ ܕܫܰܢ̱ܬܳܐ ܗܳܘܶܐ ܠܗܽܘܢ ܕܽܘܟܪܳܢܳܐ܆ ܟܰܕ ܠܟܽܠܶܗ ܟܪܽܘܟܝܳܐ ܕܫܰܢ̱ܬܳܐ ܡܒܰܪܟܺܝܢ. ܒܥܶܩܒܬܳܐ ܓܶܝܪ ܕܰܡܫܺܝܚܳܐ ܪܳܕܶܝܢ ܗܘܰܘ ܗܰܘ ܐܰ‌ܠܳܗܳܐ ܘܡܶܛܽܠܳܬܰܢ ܪܺܝܫ ܟܳܗ̈ܢܶܐ܆ ܟܰܕ ܡܣܰܒܪܺܝܢ ܠܡܶܣ̈ܟܺܢܶܐ܆ ܡܰܐܣܶܝܢ ܠܰܬܒܺܝܪ̈ܰܝ ܠܶܒܳܐ܆ ܟܰܕ ܡܰܟܪܙܺܝܢ ܠܰܫ̈ܒܰܝܳܐ ܫܽܘܒܩܳܢܳܐ܆ ܘܠܰܣ̈ܡܰܝܳܐ ܚܙܳܝܳܐ܆ ܘܰܒܝܰܕ ܗܳܠܶܝܢ ܠܟܽܠ ܚܕܳܐ ܫܰܢ̱ܬܳܐ ܥܳܒܕܺܝܢ ܠܳܗ̇ ܡܩܰܒܰܠܬܳܐ ܠܡܳܪܝܳܐ܆ ܗܳܢܽܘܢ ܕܰܐܝܟ ܡܽܘܫܶܐ ܟܽܠܳܗ̇ ܚܶܟܡܬܳܐ ܕܡܶܨܪ̈ܳܝܶܐ ܐܶܬܪܕܺܝܘ܆ ܘܠܳܐ ܐܰܪܚܶܩܘ ܡܶܢ ܩܰܪܩܰܦܬܳܐ ܕܛܽܘܪܳܐ ܕܣܺܝܢܰܝ܆ ܐܶܠܳܐ ܠܥܶܣܪܳܐ ܦܶܬܓܳܡܺܝ̈ܢ܆ ܗܳܠܶܝܢ ܕܡܶܢ ܬܰܡܳܢ ܐܶܬܺܝܗܶܒܘ ܒܰܟܬܳܒܳܐ ܕܠܽܘ̈ܚܶܐ ܗܰܘ ܕܡܶܢ ܠܒܰܪ ܘܡܶܢ ܠܓܰܘ ܟܰܕ ܣܰܓܺܝ ܫܰܦܺܝܪܳܐܺܝܬ ܐܶܣܬܰܟܰܠܘ܆ ܘܰܠܘܳܬ ܡܫܰܡܠܝܽܘܬܳܐ ܕܦܽܘܩ̈ܕܳܢܶܐ ܐܶܘܰܢ̈ܓܶܠܳܝܶܐ ܥܰܠܺܝܘ ܐܶܢܽܘܢ܆ ܘܰܠܘܳܬ ܚܕܳܐ ܙܡܺܝܪܬܳܐ ܘܡܰܠܦܳܢܽܘܬܳܐ ܠܰܚܶܡܘ ܐܶܢܶܝܢ ܠܡܶܢ̈ܶܐ ܕܡܶܢ ܬܪ̈ܰܝܗܽܘܢ ܓܰܒ̈ܶܐ܆ ܘܰܠܟܽܠܳܗ̇ ܫܳܛܽܘܪܽܘܬܳܐ ܕܕܽܘܓ̈ܡܰܛܰܐ ܚܰܢ̈ܦܳܝܶܐ ܘܰܣܪ̈ܺܝܩܶܐ܆ ܒܰܕܡܽܘܬ ܢܰܘܠܳܐ ܕܓܳܘܓܰܝ ܣܰܕܶܩܘ. ܘܗܳܟܰܢܳܐ ܕܩ̣ܘ^[28]܆ ܘܰܩܒܰܥܘ ܚܰܘܪܗܽܘܢ ܠܘܳܬ ܫܡܰܝܳܐ ܒܰܕܡܽܘܬ ܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ܆ ܘܰܒܫܽܘܦܪ̈ܶܐ ܕܰܠܥܶܠ ܡܟܰܬܪܺܝܢ ܘܡܶܬܐܰܡܢܺܝܢ܆ ܘܥܰܡ ܪ̈ܽܘܚܳܬܳܐ ܕܠܳܐ ܓܫܽܘܡ ܡܕܰܝܪܺܝܢ܆ ܘܰܠܒܰܪ ܡܶܢ ܒܶܣܪܳܐ ܐܺܝܬܰܝܗܽܘܢ ܘܳܐܦ ܒܒܶܣܪܳܐ. ܣܰܒ ܠܺܝ ܓܶܝܪ ܬܰܚܘܺܝܬܳܐ ܕܗܳܠܶܝܢ܆ ܡ̈ܶܠܶܐ ܕܺܝܠܶܗ ܕܗܰܘ ܕܰܐܝܟ ܕܒܰܫܪܳܪܳܐ ܠܒܺܝܫ ܠܰܐܠܳܗܳܐ. ܐܳܦ ܓܶܝܪ ܐܶܢܳܐ ܐܺܡܰܪ܆ ܠܰܘ ܡܶܛܽܠ ܕܰܐܣܺܝܪ ܐ̱ܢܳܐ܆ ܘܡܶܫܟܰܚ ܐ̱ܢܳܐ ܠܡܶܣܬܰܟܳܠܽܘ ܠܗܳܠܶܝܢ ܫܡܰܝܳܢܳܝ̈ܳܬܳܐ܆ ܘܠܰܐܬܪ̈ܰܘܳܬܳܐ ܕܡܰܠܰܐܟ̈ܶܐ ܘܩܰܘ̈ܡܶܐ ܗܳܠܶܝܢ ܕܪ̈ܺܝܫܳܢܘܳܬܳܐ܆ ܠܡܶܬܚܰܙܝܳܢ̈ܝܳܬܳܐ ܟܺܝܬ ܘܰܠܠܳܐ ܡܶܬܚܰܙܝܳܢ̈ܝܳܬܳܐ܆ ܡܶܢ ܗܳܕܶܐ ܗܳܐ ܡܶܢ ܟܰܕܽܘ ܐܳܦ ܬܰܠܡܺܝܕܳܐ ܐܺܝܬܰܝ. ܣܰܓܺܝ̈ܳܐܬܳܐ ܓܶܝܪ ܚܰܣܺܝܪ̈ܳܢ ܠܰܢ܆ ܐܰܝܟܰܢܳܐ ܕܡܶܢ ܐܰ‌ܠܳܗܳܐ ܠܳܐ ܢܶܗܘܶܐ ܚܰܣܺܝܪܺܝܢ ܚ̱ܢܰܢ.

ܚܙܰܝܬ ܠܪܰܘܡܳܐ ܕܬܶܐܽܘܪܺܝܰܐ܆ ܘܰܠܥܽܘܡܩܳܐ ܕܬܰܪܥܺܝܬܳܐ ܡܰܟܺܝܟܬܳܐ܆ ܕܰܒܫܰܘܝܽܘܬܳܐ ܘܰܡܫܽܘܚܬܳܐ ܫܘܺܝܬܳܐ܆ ܐܺܝܬܰܝܗܽܘܢ ܬܡܺܝ̈ܗܶܐ܆ ܐܰܝܢܳܐ ܦܺܝܠܘܣܽܘܦܳܐ ܚܰܢܦܳܐ ܐܶܬܗܰܓܰܓ ܡܶܕܶܡ ܕܰܐܝܟ ܗܳܟܰܢ ܠܡܺܐܡܰܪ ܐܰܘ ܠܡܶܣܬܰܟܳܠܽܘ܆ ܘܰܡܝܰܬܪܽܘܬܳܐ ܠܡܶܬܥܰܢܘܳܝܽܘ܆ ܘܰܠܘܳܬ ܡܡܰܠܠܽܘܬ ܐܰ‌ܠܳܗܽܘܬܳܐ ܠܡܶܣܰܩ܆ ܐܰܘ ܗܳܝ ܕܰܡܡܰܫܚܳܐ܆ ܕܰܠܡܶܬܒܰܝܢܳܢܽܘܬܳܐ ܝܺܕܰܥܬܳܢܳܝܬܳܐ ܗܳܝ ܕܫܰܪܟܳܐ܆ ܡܶܢ ܟܽܠ ܕܽܘܟ ܬܶܗܘܶܐ ܐܺܝܬܶܝܗ̇ ܠܶܗ ܙܗܺܝܪܬܳܐ. ܠܳܐ ܗ̱ܘܳܐ ܟܽܠܶܗ ܠܰܐܒܽܘܪܺܝܢܬܘܤ ܐܰܘܟܺܝܬ ܗܽܘܦܳܟ ܚܽܘܫܳܒ̈ܶܐ ܕܕܽܘܓ̈ܡܰܛܰܐ ܡܶܢ ܡܫܰܩܠܽܘܬܳܐ ܫܰܪܺܝ ܠܗܽܘܢ܆ ܘܒܰܚܬ̣ܝܪܽܘܬܳܐ ܘܪܳܡܽܘܬܳܐ ܫܰܟܠܶܠ܆ ܡܶܛܽܠ ܕܠܰܘ ܐܰ‌ܠܳܗܳܐ ܐܺܝܬ ܗ̱ܘܳܐ ܠܗܽܘܢ ܪܺܝܫܳܐ ܕܗܳܠܶܝܢ ܕܕܽܘܓܡܰܛܝܣܐ ܥܳܒܕܺܝܢ ܗܘܰܘ܆ ܟܰܕ ܠܡܰܣܒܪ̈ܳܢܘܳܬܳܐ ܕܰܚ̈ܕܳܕܶܐ ܫܳܪܶܝܢ ܗܘܰܘ܆ ܘܟܰܕ ܟܽܠ ܚܰܕ ܡܶܢܗܽܘܢ ܕܡܶܕܶܡ ܚܰܕܬ̣ܳܐ ܨܳܒܶܐ ܗ̱ܘܳܐ ܕܢܶܗܘܶܐ ܪܺܝܫܳܐ. ܚܢܰܢ ܗܳܟܺܝܠ ܟܰܕ ܡܫܺܝܚܳܐ ܐܺܝܬ ܠܰܢ ܪܺܝܫܳܐ ܘܡܰܠܦܳܢܳܐ ܘܠܰܘ ܒܰܪܢܳܫܳܐ^[29]܆ ܐܰܝܟܰܢܳܐ ܕܗܽܘ ܒܶܐܘܰܢ̈ܓܶܠܺܝܰܐ ܐܳܡܰܪ܆ ܢܶ݀ܬܛܰܝܰܒ ܠܘܳܬ ܡܰܠܟܽܘܬܳܐ ܕܰܫܡܰܝܳܐ܆ ܐܰܝܟ ܒܰܪ̱ܬ ܩܳܠܶܗ ܕܣܳܗܕܳܐ ܐܺܝܓܢܰܐܛܺܝܽܘܤ܆ ܐܰܝܟܰܢܳܐ ܕܡܶܢ ܐܰ‌ܠܳܗܳܐ ܠܳܐ ܟܽܠ ܟܽܠܶܗ ܢܶܗܘܶܐ ܚܰܣܺܝܪܝܢ ܚ̱ܢܰܢ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܰܬܡܳܢܺܝܢ ܘܰܐܪܒܥܳܐ.

ܐܫܥܝܐ. 61: 1 ـ 2[1]

ܐܦܣ̈ܝܐ. 6: 12 [2]

ܐ. ܩܘܪ̈ܝܢܬܝܐ. 7: 34 [3]

[4]ܢܕܽܘܪܘ̱. ܒܰܥܝܳܕܳܐ ܕܠܶܫܳܢܳܐ ܕܝܰܘܢܳܝ̈ܶܐ܆ ܒܚܰܕ ܫܡܳܐ ܩܳܪܶܝܢ ܠܠܘܨܬܐ (ܠܰܨܠܽܘܬܳܐ) ܘܰܠܢܶܕܪܳܐ. ܡܶܛܽܠ ܗܳܕܶܐ ܐܳܦ ܐܶܬܚܰܫܰܚ ܡܰܠܦܳܢܳܐ ܒܬܰܚ̈ܘܝܳܬܳܐ ܗܳܠܶܝܢ܆ ܠܦܽܘܬ ܗܳܝ ܕܰܢܚܰܘܶܐ ܕܰܫܡܳܐ ܗܰܘ ܕܦܪܘܣܐܘܟܐ ܐܰܘܟܺܝܬ ܨܠܽܘܬܳܐ܆ ܠܘ ܒܰܠܚܽܘܕ ܥܰܠ ܬܰܟܫܶܦܬܳܐ ܘܒܳܥܽܘܬܳܐ ܣܺܝܡ ܠܘܳܬ ܟܬܳܒܳܐ ܐܰ‌ܠܳܗܳܝܳܐ܆ ܐܶܠܐ ܐܳܦ ܥܰܠ ܟܽܠ ܫܽܘܘܕܳܝܳܐ ܘܢܶܕܪܳܐ ܕܢܳܕܰܪ ܐ̱ܢܳܫ ܒܰܠܚܽܘܕ.

ܡܙܡܘܪ̈ܐ. 76: 11 [5]

ܩܘܗܠܰܬ. 5: [6]

ܐܦܣ̈ܝܐ. 6: 4 [7]

ܐܝܘܒ. 31: 17. 19. 32.[8]

ܐ. ܩܘܪ̈ܝܢܬܝܐ. 9: 10 [9]

ܡܬܝ. 6: 12 [10]

ܡܙܰܝܢܺܝܢ [11]

ܐܫܥܝܐ. 61: 1 [12]

ܡܙܡܘܪ̈ܐ. 45: 7 [13]

ܣܶܦܪܐ ܕܒܪܝܬܐ. 6: 3 [14]

ܐܫܥܝܐ. 61: 1 [15]

ܡܬܝ. 3: 2 [16]

ܠܘܩܐ. 11: 22 [17]

ܠܘܩܐ. 1: 79[18]

ܣܶܦܪܐ ܕܒܪܝܬܐ. 2: 2 ـ 3  ܐܦ ܡܦܩܢܐ. 20: 11 [19]

ܕܟܗ̈ܢܐ. 25: 2 ـ 13 [20]

ܡܪܰܟܒܳܐ ܐܰܣܒܰܪ ܡܰܠܦܳܢܳܐ ܕܺܐܝܬܰܘܗ̱ܝ ܫܡܳܐ ܗܰܘ ܕܝܽܘܒܺܝܠ.[21]

ܡܰܥܒܰܪ ܩܰܠܺܝܠܳܐܝܬ[22]

ܐ. ܝܘܚܢܢ. 2: 2[23]

ܝܘܚܢܢ. 8: 57 [24]

ܠܘܩܐ. 3: 23 [25]

ܝܘܚܢܢ. 11: 50 [26]

ܡܙܡܘܪ̈ܐ. 51: 3 ـ 4 [27]

ܪܩ̣ܘ[28]

ܡܬܝ. 23: 10 [29]