ܡܺܐܡܪܳܐ ܕܰܬܡܳܢܺܝܢ ܘܰܬܠܳܬܳܐ

ܥܰܠ ܒܶܝܬ ܝܰܠܕܳܐ ܐܰܘܟܺܝܬ ܒܶܝܬ ܕܶܢܚܳܐ. ܕܺܐܝܬܰܘܗ̱ܝ ܕܰܐܪܒܥܳܐ. ܐܶܬܶܐܡܰܪ ܕܶܝܢ ܒܒܰܝܬܳܐ ܕܒܶܝܬ ܨܠܽܘܬܳܐ ܕܩܰܕܺܝܫܬܳܐ ܘܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܰܪܝܰܡ܆ ܡܶܢ ܒܳܬܰܪ ܕܶܐܬܪܰܘܰܚ ܟܰܕ ܐܶܬܬܰܩܰܢ ܡܶܢ ܫܦܺܝܥܽܘܬ ܡܰܘܗܰܒܬܳܐ܆ ܕܫܰܦܺܝܪ ܕܶܚܠܬܳܐ ܡܰܠܟܳܐ ܐܢܣܛܐܣܝܘܤ.

83: ܟܰܕ ܡܰܠܰܐܟ̈ܶܐ ܐܶܡܰܪ ܠܺܝ ܡܰܙܥܩܺܝܢ ܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[1]܆ ܢܶܫܬܽܘܩ ܚܢܰܢ܆ ܘܰܢܩܰܘܶܐ ܟܰܕ ܒܰܕܡܽܘܬ ܟܺܐܦ̈ܶܐ ܩܒܺܝܥܺܝܢ ܚ̱ܢܰܢ ܘܰܕܠܳܐ ܩܳܠܳܐ܆ ܘܰܐܝܟܰܢܳܐ ܠܰܘ ܕܠܳܐ ܡܶܠܬܳܐ ܗܝ܆ ܕܚܰܝ̈ܠܰܘܳܬܳܐ ܡܰܢ ܗܳܢܽܘܢ ܕܒܰܡܪ̈ܰܘܡܶܐ ܡܶܛܽܠܳܬܰܢ ܢܶܚܕܽܘܢ܆ ܚܢܰܢ ܕܶܝܢ ܗܳܢܽܘܢ ܕܡܶܛܽܠܳܬܗܽܘܢ ܗܝ ܚܰܕܽܘܬܳܐ܆ ܗܳܢܽܘܢ ܕܰܠܬܰܚܬ ܣܺܝܡܺܝܢ ܗ̱ܘܰܝܢ ܘܶܐܬܪܰܡܪܰܡܢܰܢ܆ ܬܽܘܒ ܠܬܰܚܬ ܢܶܗܘܶܐ ܣܺܝܡܺܝܢ ܚ̱ܢܰܢ ܒܬܰܪܥܺܝܬܰܢ܆ ܘܰܠܘܳܬ ܥܽܘܕܪܳܢܳܐ ܐܰ‌ܠܳܗܳܝܳܐ ܠܳܐ ܡܰܪܓܫܳܢܳܐܺܝܬ ܢܶܗܘܶܐ ܐܺܝܬ ܠܰܢ܆ ܘܠܰܘ ܥܰܡ ܦܳܠܚܽܘܬܳܐ ܗܳܝ ܡܶܬܗܰܘܢܳܢܺܝܬܳܐ ܘܰܕܠܳܐ ܓܫܽܘܡ ܕܰܡܫܰܡ̈ܫܳܢܶܐ ܗܳܢܽܘܢ ܕܢܽܘܗܪܳܐ ܢܶ݀ܬܬܪܺܝܡ ܐܰܟܚܕܳܐ ܘܰܢܫܰܒܰܚ ܠܰܐܠܳܗܳܐ܆ ܠܰܘ ܟܰܕ ܒܠܶܫܳܢܳܐ ܒܰܠܚܽܘܕ ܡܫܰܒܚܺܝܢ ܚ̱ܢܰܢ܆ ܐܶܠܳܐ ܘܟܰܕ ܒܗܰܘܢܳܐ ܡܶܬܒܰܩܶܝܢ ܚ̱ܢܰܢ ܒܪܰܒܽܘܬܗܶܝܢ ܕܡ̈ܶܠܶܐ ܕܗܳܝ ܬܶܫܒܽܘܚܬܳܐ܆ ܘܰܕܙܽܘܡܳܪܳܐ ܗܰܘ ܡܰܠܰܐܟܳܝܳܐ. ܕܡܳܢܳܐ ܓܶܝܪ ܨܳܒܝܳܐ ܗܳܝ ܕܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ ܢܺܐܠܰܦ.

ܠܰܘ ܓܶܝܪ ܡܶܛܽܠ ܕܰܠܬܰܚܬ ܗܘ̣ܳܐ ܐܳܡܪܺܝܢ ܡܶܛܽܠ ܪܶܚܡܰܬ ܐ̱ܢܳܫܽܘܬܳܐ܆ ܬܶܫܒܽܘܚܬܳܐ ܐ̱ܚܪܺܬܳܐ ܐܶܠܳܐ ܐܶܢ ܗܳܝ ܕܒܰܥܝܳܕܳܐ܆ ܠܳܗ̇ ܠܗܳܝ ܕܒܰܡܪ̈ܰܘܡܶܐ ܡܰܣܩܺܝܢ ܚ̱ܢܰܢ ܠܶܗ. ܐܶ‌ܠܽܘ ܡܰܢ ܓܶܝܪ ܟܰܕ ܢܚܶܬ ܠܰܐܪܥܳܐ܆ ܦܳܫ ܗ̱ܘܳܐ ܠܶܗ ܘܰܒܛܶܠ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܡܪܰܝܡܳܐ܆ ܡܶܢ ܟܽܠ ܦܪܽܘܤ ܐܳܦ ܚܢܰܢ ܥܳܒܕܺܝܢ ܗ̱ܘܰܝܢ ܡܰܫܦܳܢܽܘܬܳܐ ܡܶܕܶܡ ܘܫܽܘܚܠܳܦܳܐ܆ ܕܬܶܫܒܽܘܚܬܳܐ ܗܳܝ ܕܰܐܝܟ ܕܠܰܐܠܳܗܳܐ ܡܶܬܩܰܪܒܳܐ ܠܶܗ. ܐܶܢ ܕܶܝܢ ܘܟܰܕ ܦܰܓܪܳܢܳܐܺܝܬ ܐܶܬܳܐ ܠܰܐܪܥܳܐ܆ ܠܳܐ ܦܰܓܪܳܢܳܐܺܝܬ ܘܰܤܛܰܪ ܡܶܢ ܟܽܠܳܗ̇ ܡܶܣܬܰܝܟܳܢܽܘܬܳܐ ܠܗܳܠܶܝܢ ܕܒܰܡܪ̈ܰܘܡܶܐ ܡܳܠܶܐ܆ ܘܕܰܣܦܺܝܩ ܡܶܢܳܗ̇ ܟܽܠ ܟܽܠܶܗ ܘܠܳܐ ܡܶܕܶܡ ܐܺܝܬ܆ ܡܩܰܘܶܐ ܓܶܝܪ ܒܰܡ̈ܥܰܠܝܘܳܬܳܐ ܐܰ‌ܠܳܗܳܝ̈ܳܬܳܐ ܟܰܕ ܠܳܐ ܫܰܚܠܶܦ ܐܰܘ ܒܰܨܰܪ ܠܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܳܦ ܟܰܕ ܗܘ̣ܳܐ ܒܰܪܢܳܫܳܐ܆ ܡܩܰܘܶܝܢ ܚ̱ܢܰܢ ܐܳܦ ܚܢܰܢ ܒܳܗ̇ ܟܰܕ ܒܳܗ̇ ܒܬܶܫܒܽܘܚܬܳܐ ܘܰܒܬܶܫܡܶܫܬܳܐ܆ ܟܰܕ ܠܳܐ ܡܶܕܶܡ ܡܒܰܨܪܺܝܢ ܚ̱ܢܰܢ ܐܰܘ ܡܫܰܚܠܦܺܝܢ ܚ̱ܢܰܢ. ܐܶܠܳܐ ܐܰܝܟ ܗܰܘ ܕܰܠܘܳܬ ܟܽܘܪܣܝܳܐ ܗܰܘ ܡܰܠܟܳܝܳܐ ܘܰܡܥܰܠܝܳܐ ܩܳܝܡܺܝܢ ܚ̱ܢܰܢ܆ ܠܩܰܘܡܳܐ ܕܺܝܠܰܢ ܘܛܶܟܣܳܐ܆ ܠܳܐ ܛܳܥܶܝܢ ܚ̱ܢܰܢ. ܡܰܠܽܘܢ ܕܶܝܢ ܡܶܢ ܡܶܬܢܰܚܬܳܢܽܘܬܳܐ ܗܳܕܶܐ ܕܠܳܐ ܡܫܽܘܚܬܳܐ ܠܪܰܘܡܳܐ ܡܶܫܬܰܘܕܥܺܝܢܰܢ. ܟܰܕ ܬܰܚܘܺܝܬܳܐ ܓܠܺܝܬܳܐ ܕܗܳܕܶܐ ܥܳܒܕܺܝܢ ܚ̱ܢܰܢ܆ ܫܰܝܢܳܐ ܗܰܘ ܕܥܰܠ ‌ܐܰܪܥܳܐ܆ ܐܰܟܙܢܳܐ ܕܳܐܦ ܟܰܕ ܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ ܢܳܗܪܳܐ܆ ܠܳܐ ܡܶܫܟܚܳܢܺܝܬܳܐ ܐܺܝܬܶܝܗ̇ ܠܡܺܐܡܰܪ܆ ܕܠܳܐ ܕܳܢܰܚ ܫܶܡܫܳܐ.

ܕܕܰܐܝܟ ܐܰܝܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܗܽܘ ܩܪܳܒܳܐ ܢܶܚܙܶܐ܆ ܐܰܝܟܰܢܳܐ ܕܢܶܕܰܥ ܠܝܰܡܳܐ ܪܰܒܳܐ ܕܺܝܠܶܗ ܕܫܰܝܢܳܐ. ܐܰ‌ܠܳܗܳܐ ܡܰܗܦܶܟ ܗ̱ܘܳܐ ܠܶܗ ܐܰܦܰܘܗ̱ܝ ܡܶܢ ܓܶܢܣܳܐ ܐ̱ܢܳܫܳܝܳܐ. ܩܰܕܡܳܐܺܝܬ ܡܰܢ܆ ܟܰܕ ܐܳܕܳܡ ܥܒܰܪ ܥܰܠ ܦܽܘܩܕܳܢܳܐ ܘܰܠܒܰܪ ܡܶܢ ܦܰܪܕܰܝܣܳܐ ܗܘ̣ܳܐ܆ ܘܡܶܢ ܡܰܥܡܪܳܐ ܗܰܘ ܕܰܠܘܳܬ ܡܰܕܢܚܳܐ ܐܶܬܕܚܶܩ܆ ܘܰܠܪܽܘܚܩܳܐ ܐܰܪܚܶܩ ܡܶܢ ܡܰܢܗܪܳܢܽܘܬܳܐ ܐܰ‌ܠܳܗܳܝܬܳܐ܆ ܗܳܕܶܐ ܓܶܝܪ ܐܺܝܬܰܘܗ̱ܝ ܦܪܽܘܫܝܳܐ ܗܰܘ ܕܡܶܢ ܡܰܥܡܪܳܐ ܕܰܠܘܳܬ ܡܰܕܢܚܳܐ܆ ܘܡܶܬܛܰܫܶܐ ܗ̱ܘܳܐ ܘܠܳܐ ܡܶܫܟܚܳܢܳܐܺܝܬ ܐܺܝܬ ܗ̱ܘܳܐ ܠܶܗ ܠܡܶܬܩܰܪܳܒܽܘ ܠܰܐܠܳܗܳܐ ܘܳܐܡܰܪ ܗ̱ܘܳܐ܆ ܩܳܠܳܟ ܫܶܡܥܶܬ ܟܰܕ ܡܗܰܠܶܟ ܐܰܢ̱ܬ ܒܦܰܪܕܰܝܣܳܐ܆ ܘܕܶܚܠܶܬ ܡܶܛܽܠ ܕܥܰܪܛܶܠܳܝܳܐ ܐܺܝܬܰܝ ܘܶܐܬܛܰܫܺܝܬ̣^[2]܆ ܗܳܟܰܢܳܐ ܓܶܝܪ ܐܳܦ ܗܳܢܽܘܢ ܕܰܡܚܺܝܠܺܝܢ܆ ܡܥܰܡܨܺܝܢ ܠܥܰܝ̈ܢܰܝܗܽܘܢ ܠܘܳܬ ܪܡܳܝܳܐ ܕܙܰܠܺܝܩܳܐ ܫܶܡܫܳܢܳܝܳܐ܆ ܘܠܰܚܙܳܬܳܐ ܠܳܐ ܡܣܰܝܒܪܺܝܢ. ܒܳܬܰܪܟܶܢ ܕܶܝܢ ܘܟܰܕ ܚܛܺܝܬܳܐ ܐܶܬܥܰܫܢܰܬ ܘܚܰܫ̈ܶܐ ܕܨܰܥܪܳܐ ܚܰܦܝܘܗ̱ܝ ܠܗܰܘܢܳܐ܆ ܘܰܠܨܰܠܡܳܐ ܐܰ‌ܠܳܗܳܝܳܐ ܘܰܡܠܺܝܠܳܐ ܗܰܘ ܕܒܰܢ ܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܕܡܶܢ ܒܶܣܪܳܐ ܒܰܠܚܽܘܕ ܢܶܬܺܝܕܰܥ ܗ̱ܘܳܐ ܒܰܪܢܳܫܳܐ܆ ܡܰܠܽܘܢ ܕܶܝܢ ܟܰܕ ܡܶܢ ܗܳܪܟܳܐ ܐܰܘܒܶܕ ܗ̱ܘܳܐ ܠܗܳܝ ܕܢܶܬܺܝܕܰܥ ܒܰܪܢܳܫܳܐ܆ ܓܙܳܪ ܕܺܝܢܳܐ ܡܰܪܺܝܪܳܐ ܡܶܕܶܡ ܘܕܰܡܠܶܐ ܕܽܘܘܳܢܳܐ ܡܶܢ ܠܥܶܠ ܡܶܬܬܰܙܥܰܩ ܗ̱ܘܳܐ ܕܳܐܡܰܪ܆ ܠܳܐ ܬܶܥܡܰܪ ܪܽܘܚܝ ܒܰܒܢܰܝ̈ܢܳܫܳܐ ܗܳܠܶܝܢ ܠܥܳܠܰܡ܆ ܡܶܛܽܠ ܕܒܶܣܪܳܐ ܐܺܝܬܰܝܗܽܘܢ^[3].

ܐܱܪܰܐ ܙܥܽܘܪܐ ܐܺܝܬܰܘܗ̱ܝ ܗܳܢܳܐ ܩܪܳܒܳܐ܆ ܗܰܘ ܕܒܶܗ ܗܘ̣ܰܝܢܰܢ ܡܰܩܪ̈ܒܳܢܶܐ ܠܽܘܩܒܰܠ ‌ܐܰ‌ܠܳܗܳܐ܆ ܡܶܣܬܰܝܒܪܳܢܺܝܬܳܐ ܕܶܝܢ ܐܺܝܬܶܝܗ̇ ܠܗܳܢܽܘܢ ܕܺܐܝܬ ܠܗܽܘܢ ܡܰܪܓܫܳܢܽܘܬܳܐ ܠܡܶܫܡܰܥ ܗܳܝ ܕܠܳܐ ܬܶܥܡܰܪ ܪܽܘܚܳܐ ܕܺܝܠܝ ܒܰܒܢܰܝ̈ܢܳܫܳܐ ܗܳܠܶܝܢ܆ ܡܶܛܽܠ ܗܳܕܶܐ܆ ܛܰܘܦܳܢܳܐ ܕܓܳܪܶܦ ܒܡܳܡܽܘܠܳܐ܆ ܘܰܡܛܰܒܰܥ ܒܗܽܘܢ ܒܰܚ̈ܛܳܗܶܐ ܠܟܽܠܶܗ ܓܶܢܣܳܐ܆ ܤܛܰܪ ܡܶܢ ܢܽܘܚ ܘܰܒܢܰܝ̈ܳܐ ܕܺܝܠܶܗ܆ ܗܳܢܽܘܢ ܕܒܰܕܡܽܘܬ ܦܪܰܚܪ̈ܽܘܚܝܳܬܳܐ ܕܢܽܘܪܳܐ ܐܶܫܬܒܶܩܘ܆ ܐܰܝܟܰܢܳܐ ܕܰܠܗܰܘ ܡܳܐ ܕܰܕܥܶܟ ܬܽܘܒ ܡܶܢ ܕܪܺܝܫ ܢܰܕܠܶܩ ܘܢܶܡܠܶܝܗ̇ ܠܟܽܠܳܗ̇ ܐܰܪܥܳܐ. ܗܳܝ ܟܺܝܬ ܕܳܐܦ ܗܘ̣ܳܬ. ܐܶܠܳܐ ܬܽܘܒ ܛܽܘܥܝ̣ܰܝ̣^[4] ܕܪܶܚܡܰܬ ܐ̱ܢܳܫܽܘܬܶܗ ܕܰܐ‌ܠܳܗܳܐ܆ ܘܚܰܝܠܬܳܢܽܘܬܳܐ ܘܡܶܬܥܰܫܢܳܢܽܘܬܳܐ ܘܽܐܘܚܕܳܢܳܐ ܕܰܚܛܺܝܬܳܐ܆ ܘܟܽܠܶܗ ܟܢܽܘܫܝܳܐ ܕܒܺܝ̈ܫܳܬܳܐ܆ ܘܦܶܩ̈ܥܶܐ ܡܰܘܩ̈ܕܳܢܶܐ ܗܳܢܽܘܢ ܕܥܰܠ ܣܕܽܘܡ ܡܶܬܬܰܝܬܶܝܢ ܗ̱ܘܰܘ܆ ܘܫܽܘܢܳܩ̈ܶܐ ܐܰܚܰܝ̈ܗܽܘܢ ܕܗܳܠܶܝܢ. ܘܢܺܝܚܽܘܬܳܐ ܘܰܡܫܰܝܢܽܘܬܳܐ ܘܡܰܠܦܳܢܽܘܬܳܐ ܕܡܶܬܡܰܙܓܳܐ ܗ̱ܘܳܬ ܒܶܗ ܒܫܽܘܢܳܩܳܐ. ܡܰܘܫܛܽܘܬ ܐܺܝܕܳܐ ܢܳܡܽܘܣܳܝܬܳܐ ܕܰܟܬܺܝ̈ܒܳܬܳܐ ܗܳܠܶܝܢ ܕܰܒܝܰܕ ܡܽܘܫܶܐ. ܚܽܘܛܪܳܐ ܢܒܺܝ̣ܳܝ̣ܳܐ ܕܰܠܗܳܢܽܘܢ ܕܰܟܦܺܝܦܺܝܢ ܗ̱ܘܰܘ ܬܱܪܶܨ ܗ̱ܘܳܐ܆ ܘܰܡܫܰܪܰܪ ܗ̱ܘܳܐ ܠܡܰܪ̈ܬܝܳܢܘܳܬܳܐ ܒܩܰܕܺܝܡܽܘܬ ܡ̈ܶܠܶܐ ܢܒܺܝ̣ܳܝ̣̈ܳܬܳܐ܆ ܘܰܒܡܰܦܩܳܢܳܐ ܬܡܺܝܗܳܐ ܕܗܳܠܶܝܢ ܕܰܥܬܺܝ̈ܕܳܢ ܗ̱ܘܰܝ̈܆ ܘܰܒ̈ܢܳܬ ܩ̈ܳܠܶܐ ܕܰܐܒܳܐ ܪܳܚܶܡ ܒܢܰܝ̈ܳܐ ܕܰܠܘܳܬ ܥܰܒ̈ܕܶܐ ܛܳܠܽܘܡ̈ܶܐ ܘܰܕܟܺܐܢܳܐܺܝܬ ܣܢܺܝܐܺܝܢ܆ ܕܥܰܡ ܟܽܠܶܗ ܚܰܘܣܳܢܳܐ ܚܰܫܺܝܫܳܐ ܘܬܰܪܥܺܝܬܳܐ ܡܰܟܣܳܢܺܝܬܳܐ. ܥܰܡܳܐ ܕܺܝܠܝ܆ ܡܳܢܳܐ ܥܶܒܕܶܬ ܠܳܟ ܐܰܘ ܡܳܢܳܐ ܐܶ‌ܠܰܙܬܳܟ܆ ܦܰܢܳܐ ܠܺܝ.^[5]ܘܬܽܘܒ. ܐܶܬܦܢܰܘ ܠܘܳܬܝ ܘܬܶܬܦܰܪܩܽܘܢ ܗܳܢܽܘܢ ܕܡܶܢ ܣܰܘ̈ܦܶܝܗ̇ ܕܰܐܪܥܳܐ. ܐܶܢܳܐ ܐܺܝܬܰܝ ܐܰ‌ܠܳܗܳܐ܆ ܘܠܳܐ ܐܺܝܬ ܐ̱ܚܪܺܢܳܐ^[6]. ܫܽܘܡܥܽܘܢܝ ܗܳܢܽܘܢ ܕܰܐܘܒܶܕܘ ܠܶܒܗܽܘܢ܆ ܗܳܢܽܘܢ ܕܰܒܪܽܘܚܩܳܐ ܐܺܝܬܰܝܗܽܘܢ ܡܶܢ ܙܰܕܺܝܩܽܘܬܳܐ. ܩܰܪܶܒܬܳܗ̇ ܠܙܰܕܺܝܩܽܘܬܳܐ ܕܺܝܠܝ ܘܠܳܐ ܬܰܘܚܰܪ. ܘܰܠܦܽܘܪܩܳܢܳܐ ܗܰܘ ܕܡܶܢܝ ܠܳܐ ܐܶ݀ܫܰܘܚܰܪ^[7].

ܘܟܰܕ ܗܳܠܶܝܢ ܠܳܐ ܡܶܫ̈ܬܰܡܥܳܢ ܗ̱ܘܰܝ̈܆ ܘܺܐܝܬܰܝܗܶܝܢ ܗ̱ܘܰܝ̈ ܠܳܐ ܡܰܥ̈ܒܕܳܢܝܳܬܳܐ܆ ܘܰܡܥܰܨܶܝܢ ܗ̱ܘܰܘ ܘܫܳܘܪܺܝܢ ܗ̱ܘܰܘ܆ ܟܰܕ ܙܳܕܶܩ ܗ̱ܘܳܐ ܕܢܶܬܬܦܺܝܣܽܘܢ܆ ܡܶܚܕܳܐ ܬܽܘܒ ܐܳܕܫܳܐ ܐ̱ܚܪܺܢܳܐ ܕܰܒ̈ܢܳܬ ܩ̈ܳܠܶܐ ܡܶܬܬܰܝܬܶܐ܆ ܕܦܰܐܝܽܘܬ ܐ̱ܢܳܫܳܐܺܝܬ ܡܰܢ ܡܶܣܬܰܟܰܡ܆ ܐܶܒܠܳܢܳܝܳܐ ܕܶܝܢ ܒܪܰܡ ܘܕܰܠܗܳܢܽܘܢ ܕܠܳܐ ܟܳܐܶܒ ܠܗܽܘܢ ܩܳܪܶܐ ܡܶܢܕܪܺܝܫ܆ ܘܣܳܦܶܩ ܠܡܶܓܫܰܦ ܐܳܦ ܒܢܰܦܫܳܐ ܟܺܐܦܳܢܝܬܳܐ. ܬܡܰܗ ܫܡܰܝܳܐ ܥܰܠ ܗܳܕܶܐ܆ ܘܣܰܓܺܝܳܐܺܝܬ ܪܶܥܠܰܬ ܐܰܪܥܳܐ ܛܳܒ ܐܳܡܰܪ ܡܳܪܝܳܐ. ܡܶܛܽܠ ܕܬܰܪ̈ܬܶܝܢ. ܘܒܺܝ̈ܫܳܬܳܐ ܥܒܰܕ ܥܰܡܳܐ ܕܺܝܠܝ. ܠܺܝ ܫܒܰܩܘ ܡܰܒܽܘܥܳܐ ܕܡܰܝ̈ܳܐ ܚܰܝ̈ܶܐ܆ ܘܰܚܦܰܪܘ ܠܗܽܘܢ ܓܽܘ̈ܒܶܐ ܪ̈ܥܺܝܥܶܐ܆ ܗܳܢܽܘܢ ܕܠܳܐ ܢܶܫܟܚܽܘܢ ܠܡܶܩܒܳܐ ܡܰܝ̈ܳܐ^[8]. ܘܥܰܡ ܗܳܠܶܝܢ ܬܽܘܒ܆ ܕܰܠܡܳܐ ܡܰܕܒܪܳܐ ܗܘܺܝܬ̣ ܠܒܰܝܬܳܐ^[9] ܕܺܐܝܣܪܳܐܶܝܠ܆ ܐܰܘ ܐܰܪܥܳܐ ܒܰܝܳܪܬܳܐ܆ ܕܶܐܡܰܪ ܥܰܡܳܐ ܕܺܝܠܝ܆ ܠܳܐ ܢܶܗܘܶܐ ܬܚܶܝܬ ܡܳܪܽܘܬܳܟ܆ ܠܳܐ ܢܺܐܬܶܐ ܠܘܳܬܳܟ ܬܽܘܒ. ܕܰܠܡܳܐ ܬܶܛܥܶܐ ܟܰܠܬܳܐ ܠܨܶܒܬܳܐ ܕܺܝܠܳܗ̇܆ ܘܰܒܬܽܘܠܬܳܐ ܠܥܽܘܕܕܳܢܐ^[10] ܕܺܝܠܳܗ̇܆ ܥܰܡܳܐ ܕܶܝܢ ܕܺܝܠܝ ܛܥܳܢܝ ܝܰܘ̈ܡܳܬܳܐ܆ ܗܳܢܽܘܢ ܕܠܰܝܬ ܠܗܽܘܢ ܡܶܢܝܳܢܳܐ^[11].

ܟܰܕ ܗܳܠܶܝܢ ܕܶܝܢ ܘܕܰܐܝܟ ܗܳܠܶܝܢ܆ ܡܶܬܐܰܡܪ̈ܳܢ ܗ̱ܘܰܝ̈ ܡܰܢ܆ ܠܳܐ ܕܶܝܢ ܡܶܫܬܰܡ̈ܥܳܢ ܗ̱ܘܰܝ̈܆ ܘܰܢܒܺܝ̈ܶܐ ܡܶܬܬܰܥܒܕܺܝܢ ܗ̱ܘܰܘ ܘܡܶܫܬܰܕܪܺܝܢ ܗ̱ܘܰܘ ܒܟܽܠ ܙܰܒܢܳܐ܆ ܟܰܕ ܟܽܠܗܶܝܢ ܐܺܝܬܰܝܗܶܝܢ ܗ̱ܘܰܝ̈ ܒܰܛܺܝܠܴ̈ܬܳܐ ܘܰܕܠܳܐ ܝܽܘܬܪܳܢ܆ ܘܥܰܠ ܥܽܘܕܪܳܢܳܐ ܕܝܰܬܺܝܪ ܪܰܒ ܣܢܺܝ̈ܩܳܢ ܗ̱ܘܰܝ̈܆ ܗܰܘ ܕܰܡܫܰܕܰܪ ܗ̱ܘܳܐ ܠܰܢܒܺܝ̈ܶܐ ܐܶܫܬܰܕܰܪ܆ ܒܗܳܝ ܕܢܶܗܘܶܐ ܒܶܣܪܳܐ^[12] ܗܳܢܰܘ ܕܶܝܢ ܒܰܪܢܳܫܳܐ܆ ܘܢܺܐܬܶܐ ܠܥܳܠܡܳܐ ܦܰܓܪܳܢܳܐܺܝܬ܆ ܟܰܕ ܡܠܶܐ ܗ̱ܘܳܐ ܡܶܢܶܗ ܐܰ‌ܠܳܗܳܐܝܬ܆ ܡܰܠܽܘܢ ܕܶܝܢ ܡܶܬܬܰܝܬܶܐ ܗ̱ܘܳܐ ܡܶܢܶܗ ܘܡܶܬܠܒܶܟ܆ ܒܗܳܝ ܕܡܰܝܬܶܐ ܠܟܽܠ ܒܡܶܠܬܳܐ ܕܚܰܝܠܶܗ^[13]. ܗܳܟܰܢܳܐ ܓܶܝܪ ܘܰܠܕܺܝܠܶܗ ܐܶܬܳܐ ܟܬܺܝܒ܆ ܗܰܘ ܕܳܐܡܰܪ܆ ܕܰܠܬܰܥ̈ܠܶܐ ܢܶܩ̈ܥܶܐ ܐܺܝܬ ܠܗܽܘܢ܆ ܘܰܠܦܳܪ̈ܚܳܬܳܐ ܕܰܫܡܰܝܳܐ ܡܰܛ̈ܠܠܶܐ܆ ܠܰܒܪܶܗ ܕܶܝܢ ܕܐ̱ܢܳܫܳܐ ܠܰܝܬ ܠܶܗ ܕܰܐܝܟܳܐ ܢܶܣܡܽܘܟ ܪܺܝܫܶܗ^[14]܆ ܘܬܽܘܒ܆ ܟܰܕ ܫܰܒܪܳܐ ܐܺܝܬܰܘܗ̱ܝ ܗ̱ܘܳܐ܆ ܒܽܐܘܪܝܳܐ ܡܰܓܶܤ ܗ̱ܘܳܐ܆ ܡܶܛܽܠ ܗܳܝ ܕܠܳܐ ܐܶܫܬܰܟܚܰܬ ܗ̱ܘܳܬ ܕܽܘܟܬܳܐ ܒܗܰܘ ܒܶܝܬ ܡܰܫܪܝܳܐ^[15]. ܘܗܰܘ ܕܒܰܕܡܽܘܬܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܕܡܽܘܬܳܐ ܕܥܰܒܕܳܐ ܢܣܰܒ ܐܰܝܟ ܗܳܝ ܕܰܟܬܺܝܒܳܐ^[16]. ܟܰܕ ܒܳܗ̇ ܡܰܢ ܒܽܐܘܣܺܝܰܐ ܐܶܫܬܰܘܬܰܦ ܠܰܢ܆ ܘܶܐܬܚܰܝܰܕ ܠܒܶܣܪܳܐ ܩܢܽܘܡܳܐܺܝܬ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܒܟܽܠܗܶܝܢ ܕܶܝܢ ܤܛܰܪ ܡܶܢ ܚܛܺܝܬܳܐ ܒܰܠܚܽܘܕܶܝܗ̇^[17]܆ ܬܚܶܝܬ ܕܳܡܝܽܘܬܳܐ ܕܺܝܠܰܢ ܐܶܬܳܐ܆ ܥܕܰܡܳܐ ܐܳܦ ܠܶܗ ܠܶܐܣܟܺܡܳܐ ܘܠܰܡܡܰܫܚܽܘܬܳܐ ܕܗܰܕܳܡ̈ܶܐ ܘܠܰܗܠܰܟܬܳܐ܆ ܘܟܰܕ ܠܳܐ ܡܶܕܶܡ ܕܳܐܬܽܘܬܐ ܐܰܘ ܕܬܶܕܡܽܘܪܬܳܐ܆ ܐܰܘ ܕܰܡܫܚܠܰܦ ܐܰܘ ܕܝܰܬܺܝܪ ܣܰܓܺܝ ܪܰܒ ܒܦܰܓܪܳܐ ܐܺܝܬ ܠܶܗ܆ ܒܰܕܡܽܘܬ ܓܰܢ̱ܒܳܪ̈ܶܐ ܗܳܢܽܘܢ ܕܡܶܬܡܰܬܠܺܝܢ ܒܫܽܘ̈ܥܝܳܬܳܐ. ܠܗܳܝ ܕܳܐܦ ܦܰܘܠܽܘܤ ܡܚܰܘܶܐ ܠܳܗ̇ ܟܰܕ ܐܳܡܰܪ܆ ܕܒܰܕܡܽܘܬܳܐ ܕܰܒܢܰܝ̈ܢܳܫܳܐ ܗܘ̣ܳܐ܆ ܘܒܶܐܣܟܺܡܳܐ ܐܶܫܬܟܰܚ ܐܰܝܟ ܒܰܪܢܳܫܳܐ^[18]. ܐܰܪܦܳܐ ܠܺܝ ܓܶܝܪ ܠܳܐܬܘ̈ܳܬܳܐ ܐܰ‌ܠܳܗܳܝ̈ܳܬܳܐ ܗܳܠܶܝܢ ܕܰܡܫܰܡܠܶܐ ܗ̱ܘܳܐ܆ ܟܰܕ ܡܳܬܰܚ ܗ̱ܘܳܐ ܠܳܗ̇ ܐܰܟܚܕܳܐ ܠܡܶܬܚܰܘܝܳܢܽܘܬܳܐ ܕܰܐ‌ܠܳܗܽܘܬܶܗ܆ ܥܰܡ ܫܽܘܘܫܳܛܳܐ ܘܬܰܪܒܺܝܬܳܐ ܕܩܰܘܡܬܳܐ ܦܰܓܪܳܢܳܝܬܳܐ ܡܣܰܩܡܳܐܺܝܬ. ܐܰܟܙܢܳܐ ܓܶܝܪ ܕܰܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܘܒܰܫܪܳܪܳܐ ܒܰܪ ܐ̱ܢܳܫܐ܆ ܗܳܟܰܢܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܟܰܕ ܗܽܘ ܐܳܦ ܐܰ‌ܠܳܗܳܐ ܒܰܟܝܳܢܳܐ. ܘܳܐܦܠܳܐ ܠܬܶܕܡܪ̈ܳܬܳܐ ܠܘܳܬ ܡܶܬܬܪܺܝܡܳܢܽܘܬܶܗ ܘܒܽܘܛܳܠܶܗ ܕܒܶܣܪܳܐ ܢܩܰܒܶܠ ‌ܐܶܢܶܝܢ܆ ܘܳܐܦܠܳܐ ܠܡܽܘܫ̈ܚܳܬܳܐ ܐ̱ܢܳܫܳܝ̈ܳܬܳܐ ܘܰܠܡܶܣܟܺܢܽܘܬܳܐ ܨܶܒܝܳܢܳܝܬܳܐ܆ ܠܰܟܦܽܘܪܝܳܐ ܘܠܰܦܣܳܩܳܐ ܕܰܐ‌ܠܳܗܽܘܬܳܐ. ܠܗܳܢܳܐ ܓܶܝܪ ܦܽܘܠܳܓ ܝܳܪܬܽܘܬܳܐ ܒܺܝܫܳܐ ܘܪܽܘܫܥܳܐ ܡܦܰܠܓܳܐ܆ ܠܦܳܠ̈ܚܰܝ ܠܒܰܪܢܳܫܳܐ ܢܰܫܕܽܘܗ̱ܝ ܘܰܠܗܰܓܳܓܳܝ̈ܶܐ. ܚܢܰܢ ܕܶܝܢ ܒܰܡܨܰܥܬܳܐ ܕܽܐܘܪܚܳܐ ܡܰܠܟܳܝܬܳܐ ܢܶ݀ܪܕܶܐ܆ ܟܰܕ ܡܶܢ ܡܰܦ̈ܩܳܢܶܐ ܡܥܰܩ̈ܡܶܐ ܕܠܰܬܪ̈ܰܝܗܽܘܢ ܓܰܒ̈ܶܐ ܡܰܗܦܺܟܝܢ ܚ̱ܢܰܢ ܐܰܦܰܝ̈ܢ܆ ܘܟܰܕ ܝܳܕܥܺܝܢܰܢ ܕܗܰܘ ܪܳܡܳܐ ܘܕܺܐܝܬܰܘܗ̱ܝ ܒܰܟܝܳܢܳܐ ܒܰܫܒܺܝ̈ܚܘܳܬܳܐ ܗܳܠܶܝܢ ܦܰܐܺܝܬ ܠܰܐܠܳܗܳܐ܆ ܣܰܪܶܩ ܗܽܘ ܠܶܗ. ܘܗܰܘ ܕܰܡܫܰܕܰܪ ܗ̱ܘܳܐ ܒܢܰܝ̈ܢܳܫܳܐ ܕܰܡܫܰܡܫܺܝܢ ܗ̱ܘܰܘ ܠܘܳܬ ܬܽܘܪܳܨܳܐ ܕܺܝܠܰܢ܆ ܗܽܘ ܗܘ̣ܳܐ ܒܰܪܢܳܫܳܐ ܘܰܡܫܰܡܫܳܢܳܐ܆ ܘܗܽܘ ܩܢܽܘܡܶܗ ܗܘ̣ܳܐ ܥܳܒܽܘܕܳܐ ܕܦܽܘܪܩܳܢܳܐ ܕܺܝܠܰܢ. ܟܰܕ ܐܳܡܰܪ ܗ̱ܘܳܐ ܕܠܳܐ ܐܶܬܳܐ ܒܪܶܗ ܕܐ̱ܢܳܫܳܐ ܕܢܶܫܬܰܡܰܫ܆ ܐܶܠܳܐ ܕܰܢܫܰܡܶܫ. ܘܰܕܢܶܬܶܠ ܢܰܦܫܶܗ ܦܽܘܪܩܳܢܳܐ ܚܠܳܦ ܣܰܓܺܝ̈ܐܐ^[19]. ܘܗܰܘ ܕܰܒܝܰܕ ܢܒܺܝ̈ܶܐ ܠܡ̈ܶܠܶܐ ܗܳܠܶܝܢ ܐܰܪ̈ܺܝܟܳܬܳܐ ܘܰܕܡܰܠ̈ܝܳܢ ܗ̱ܘܰܝ̈ ܡܰܪܕܽܘܬܳܐ ܐܰ‌ܠܳܗܳܝܬܳܐ ܡܰܠܶܠ ܗ̱ܘܳܐ܆ ܠܘܳܬ ܗܳܢܽܘܢ ܕܠܳܐ ܡܶܬܰܐܣܝܳܢܳܐܺܝܬ ܐܺܝܬ ܗ̱ܘܳܐ ܠܗܽܘܢ܆ ܠܳܐ ܦܣܰܩ ܣܰܒܪܳܐ. ܐܶܠܳܐ ܐܰܣܓܺܝ ܥܰܬܺܝܪܳܐܺܝܬ ܠܛܳܒܽܘܬܶܗ ܐܳܦ ܟܰܕ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܗܰܘ ܡܳܐ ܕܰܚܢܰܢ܆ ܘܟܰܕ ܚܠܰܛ ܗܽܘ ܠܶܗ ܒܗܳܢܽܘܢ ܕܠܳܐ ܡܶܬܬܦܺܝܣܺܝܢ ܗ̱ܘܰܘ܆ ܠܒܰܪܬܩܳܠܳܐ ܗܳܝ ܕܰܒܝܰܕ ܐܶܫܰܥܝܳܐ ܩܰܕܶܡ ܐܰܡܪܳܗ̇ ܐܰܙܥܶܩ܆ ܗܳܝ ܦܳܪܽܘܩܳܝܬܳܐ ܘܰܕܝܰܬܺܝܪ ܡܶܢ ܟܽܠ ܪܶܚܡܰܬ ܐ̱ܢܳܫܳܐ܆ ܘܰܕܠܶܗ ܒܰܠܚܽܘܕܰܘܗ̱ܝ ܦܰܐܝܳܐ. ܐܶܢܳܐ ܗ̱ܘ ܗܰܘ ܕܰܡܡܰܠܶܠ ‌ܐ̱ܢܳܐ ܗܳܐ ܩܰܪܺܝܒ ܐ̱ܢܳܐ^[20].

ܡܰܢܽܘ ܗܳܟܺܝܠ ܫܰܘܝܳܐܺܝܬ ܢܫܰܒܰܚ ܠܛܰܝܒܽܘܬܳܐ ܗܳܝ ܕܠܳܐ ܡܫܽܘܚܬܳܐ ܕܫܰܦܺܝܪܽܘܬ ܣܳܥܽܘܪܽܘܬܳܐ ܕܕܰܐܝܟ ܗܳܕܶܐ܆ ܐܰܘ ܡܰܢܽܘ ܐܳܦ ܡܶܢ ܗܳܢܽܘܢ ܕܣܰܓܺܝ ܛܳܠܽܘܡܺܝܢ܆ ܕܢܶܫܟܰܚ ܕܰܢܚܽܘܪ ܣܰܩܽܘܒܠܴܐܺܝܬ ܠܽܘܩܒܰܠ ܒ̈ܢܳܬ ܩܴ̈ܠܶܐ ܗܳܠܶܝܢ ܕܗܳܟܰܢܳܐ ܓܰܠ̈ܝܳܢ ܘܢܰܗܺܝܪ̈ܳܢ ܕܰܟ̈ܬܳܒܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ. ܐܰܝܢܳܐ ܝܺܗܽܘܕܳܝܳܐ܆ ܐܶܢ ܟܺܝܬ ܡܰܫܡܰܥܬܶܗ ܠܳܐ ܣܳܟܰܪ ܢܶܬܚܪܶܐ ܟܰܕ ܐܳܡܰܪ܆ ܕܠܰܘ ܐܰ‌ܠܳܗܳܐ ܗܰܘ ܕܰܢܒܺܝ̈ܶܐ ܐܶܬܒܰܪܢܰܫ܆ ܟܰܕ ܗܰܘ ܕܰܒܗܽܘܢ ܡܡܰܠܶܠ ܗ̱ܘܳܐ ܐܶܡܰܪ܆ ܐܶܢܳܐ ܗ̱ܘ ܗܰܘ ܕܰܡܡܰܠܶܠ ‌ܐ̱ܢܳܐ ܗܳܐ ܩܰܪܺܝܒ ܐ̱ܢܳܐ.

ܫܰܦܺܝܪܳܐ ܗܝ ܕܶܝܢ ܕܳܐܦ ܠܳܗ̇ ܠܥܶܠܬܳܐ ܢܺ݀ܐܠܰܦ܆ ܗܳܝ ܕܡܶܢܳܗ̇ ܠܟܽܠܳܗ̇ ܗܳܕܶܐ ܪܶܚܡܰܬ ܐ̱ܢܳܫܽܘܬܳܐ ܢܚܶܬ. ܐܳܡܰܪ ܠܳܗ̇ ܓܶܝܪ ܘܡܰܘܕܰܥ ܠܳܗ̇ ܣܰܓܺܝ ܓܰܠܝܳܐܺܝܬ. ܠܐܝܣܪܳܐܶܝܠ ‌ܐܳܡܰܪ ܓܒܺܝܬ̣ ܠܺܝ ܥܰܡܳܐ ܡܶܢ ܟܽܠܗܽܘܢ ܥܰܡ̱ܡ̈ܶܐ^[21]. ܟܰܕ ܒܢܳܡܽܘܣܳܐ ܗܰܕܺܝܬܶ̊ܗ. ܟܰܕ ܒܓܶܠ̈ܝܳܢܶܐ ܢܒܺܝ̣ܳܝ̣̈ܶܐ ܐܰܪܰܙܬ̊ܶܗ. ܟܰܕ ܒܳܐܬܘ̈ܳܬܳܐ ܘܰܒܬܶܕܡܪ̈ܳܬܳܐ ܫܰܪܰܪܬܶܗ܆ ܐܰܝܟܰܢܳܐ ܕܒܺܐܝܕܰܘ̈ܗ̱ܝ ܐܳܦ ܠܘܳܬ ܒܢܰܝ̈ܢܳܫܳܐ ܗܳܢܽܘܢ ܐ̱ܚܪ̈ܳܢܶܐ܆ ܗܳܢܶܝܢ ܕܺܝܕܰܥܬܳܐ ܕܰܐ‌ܠܳܗܳܐ ܢܶܪ̈ܕܝܳܢ. ܠܗܳܝ ܕܰܠܩܽܘܒܠܳܐ ܕܶܝܢ ܢܶܦܩܰܬ ܟܽܠܳܗ̇. ܟܰܕ ܓܶܝܪ ܗܶܢܽܘܢ ܡܶܬܚܪܶܝܢ ܗ̱ܘܰܘ ܘܰܡܥܰܨܶܝܢ ܘܠܳܐ ܡܶܬܬܦܺܝܣܺܝܢ ܗ̱ܘܰܘ܆ ܘܡܶܬܩܪܶܝܢ ܗ̱ܘܰܘ ܘܠܳܐ ܥܳܢܶܝܢ ܗ̱ܘܰܘ܆ ܐܶܠܳܐ ܠܘܳܬ ܛܳܥܝܽܘܬܳܐ ܕܫ̈ܺܐܕܶܐ ܢܳܦܩܺܝܢ ܗ̱ܘܰܘ܆ ܝܰܬܺܝܪܳܐܺܝܬ ܫܡܳܐ ܕܺܝܠܝ ܡܶܬܓܰܕܰܦ ܗ̱ܘܳܐ ܒܶܝܬ ܥܰܡ̱ܡ̈ܶܐ. ܡܶܛܽܠ ܗܳܕܶܐ ܗܳܫܳܐ ܐܶܢܳܐ ܗܰܘ ܕܒܰܢܒܺܝ̈ܶܐ ܡܶܢ ܩܕܺܝܡ ܡܡܰܠܶܠ ܗ̱ܘܺܝܬ̣܆ ܗܳܐ ܩܰܪܺܝܒ ܐ̱ܢܳܐ. ܘܠܰܘ ܠܘܳܬ ܚܰܕ ܥܰܡܳܐ܆ ܐܶܠܳܐ ܠܘܳܬ ܟܽܠܗܽܘܢ ܒܢܰܝ̈ܢܳܫܳܐ. ܐܰܝܟܰܢܳܐ ܕܗܳܝ ܕܰܒܗܶܦܟܳܐ ܡܶܢ ܩܪܳܝܬܳܐ ܕܥܰܡ̱ܡ̈ܶܐ܆ ܢܶܕܰܥ ܥܰܡܳܐ ܕܷܺܝܠܺܝ ܫܡܳܐ ܕܺܝܠܝ.

ܐܳܡܰܪ ܕܶܝܢ܆ ܠܗܳܢܽܘܢ ܕܡܶܢ ܓܙܽܘܪܬܳܐ ܕܗܰܝܡܶܢܘ ܠܶܐܘܰܢܓܶܠܺܝܽܘܢ܆ ܗܳܢܽܘܢ ܕܡܶܢܗܽܘܢ ܟܽܠܚܰܕ ܡܶܢ ܫܠܺܝ̈ܚܶܐ܆ ܟܰܕ ܒܪ̈ܶܓܠܶܐ ܦܰܐܝ̈ܳܬܳܐ ܡܢܳܬܳܐ ܡܶܕܡ ܡܶܢ ܡܶܬܥܰܡܪܳܢܺܝܬܳܐ ܪܗܶܛ܆ ܣܰܒܰܪ ܫܰܝܢܳܐ܆ ܣܰܒܰܪ ܛܳܒ̈ܳܬܳܐ܆ ܠܰܘ ܟܰܕ ܒܝܰܕ ܐܽܘܪܚܳܐ ܡܶܕܶܡ ܫܦܺܝܬܳܐ ܘܰܫܘܺܝܬܳܐ ܐܳܬܶܐ ܗ̱ܘܳܐ܆ ܐܶܠܳܐ ܒܝܰܕ ܛܽܘܪ̈ܶܐ ܠܳܐ ܡܶܬܗܰܠ̈ܟܳܢܶܐ ܕܕܶܚܠܰܬ ܫ̈ܺܐܕܶܐ ܕܥܰܡ̱ܡ̈ܶܐ ܗܳܝ ܕܝܰܬܺܝܪ ܡܶܢ ܟܽܠ ‌ܐܺܝܬܶܝܗ̇ ܗ̱ܘܳܬ ܩܫܺܝܬܳܐ ܘܰܥܣܺܝܩܬܳܐ܆ ܘܰܒܝܰܕ ܥܝ̈ܳܕܶܐ ܥܰܣ̈ܩܰܝ ܠܡܶܫܬܰܚܠܳܦܽܘ ܕܛܳܥܝܽܘܬܳܐ ܐܰܒܳܗܳܝܬܳܐ܆ ܐܰܝܟܰܢܳܐ ܕܰܕܝܰܬܺܝܪ ܫܰܦܺܝܪܺܝܢ ܢܶܬܚܙܽܘܢ ܗܳܢܽܘܢ ܕܰܥܠܰܝܗܽܘܢ ܡܫܰܘܪܺܝܢ܆ ܘܡܶܢ ܐ̱ܚܪܺܢܳܐ ܠܘܳܬ ܐ̱ܚܪܺܢܳܐ ܡܫܰܢܶܝܢ ܥܳܒܪܺܝܢ܆ ܘܰܠܦܽܘܪܩܳܢܳܐ ܗܰܘ ܕܶܐܬܚܙܺܝ ܒܨܶܗܝܽܘܢ ܡܰܟܪܙܺܝܢ܆ ܘܠܰܐܠܳܗܳܐ ܗܰܘ ܕܒܳܗ̇ ܒܝܰܕ ܡܶܐܬܺܝܬܳܐ ܕܒܰܒܣܰܪ ܐܰܡܠܶܟ. ܒܗܳܢܽܘܢ ܓܶܝܪ ܕܡܶܫܬܰܘܕܥܺܝܢ ܠܶܗ܆ ܡܶܣܬܰܟܰܠ ܘܡܶܬܶܐܡܰܪ ܕܡܰܡܠܶܟ ܐܰ‌ܠܳܗܳܐ. ܐܰ݀ܝܬܶܐ ܕܶܝܢ ܐܶܢܳܐ ܠܰܡܨܰܥܬܳܐ ܐܳܦ ܒܗܶܝܢ ܒܡ̈ܶܠܶܐ܆ ܠܰܒ̈ܢܳܬ ܩܴ̈ܠܶܐ ܕܰܟ̈ܬܳܒܶܐ ܟܳܗ̈ܢܳܝܶܐ܆ ܕܝܰܬܺܝܪܳܐܺܝܬ ܡܰܨ̈ܝܳܢ ܕܢܶܒܪ̈ܩܳܢ ܒܟܽܘܢ ܠܥܽܘܬܪܳܐ ܕܛܳܒܽܘܬܳܐ܆ ܐܳܦ ܕܺܐܝܬ ܠܗܶܝܢ ܗܳܟܰܢܳܐ. ܗܳܠܶܝܢ ܐܳܡܰܪ ܡܳܪܝܳܐ. ܡܶܛܽܠܳܬܟܽܘܢ ܒܟܽܠ ܙܒܰܢ ܫܡܳܐ ܕܺܝܠܝ ܡܶܬܓܰܕܰܦ ܒܶܝܬ ܥܰܡܡ̈ܶܐ. ܡܶܛܽܠ ܗܳܕܶܐ ܢܶܕܰܥ ܥܰܡܳܐ ܕܺܝܠܝ ܠܰܫܡܳܐ ܕܺܝܠܝ ܒܝܰܘܡܳܐ ܗܰܘ܆ ܕܶܐܢܳܐ ܐܺܝܬܰܝ. ܗܽܘ ܗܰܘ ܕܰܡܡܰܠܶܠ ‌ܐ̱ܢܳܐ ܗܳܐ ܩܰܪܺܝܒ ܐ̱ܢܳܐ. ܡܳܐ ܦܰܐܝ̈ܳܢ ܥܰܠ ܛܽܘܪ̈ܶܐ ܪ̈ܶܓܠܰܘܗ̱ܝ ܕܗܰܘ ܕܰܡܣܰܒܰܪ ܫܶܡܥܳܐ ܕܫܰܝܢܳܐ܆ ܕܰܡܣܰܒܰܪ ܛܳܒ̈ܳܬܳܐ. ܡܶܛܽܠ ܕܰܫܡܺܝܥܳܐ ܐܶ݀ܥܒܕܺܝܘܗ̱ܝ ܠܦܽܘܪܩܳܢܳܐ ܕܺܝܠܶܟܝ. ܟܰܕ ܐܳܡܰܪ ܐ̱ܢܳܐ ܠܨܶܗܝܽܘܢ܆ ܢܰܡܠܶܟ ܥܠܰܝܟܝ ܐܰ‌ܠܳܗܳܐ ܕܺܝܠܶܟܝ^[22]. ܩܳܠܐ ܕܗܳܢܽܘܢ ܕܢܳܛܪܺܝܢ ܠܶܟܝ ܐܶܬܬܪܺܝܡ. ܘܥܰܡ ܩܳܠܳܐ ܡܶܚܕܳܐ ܐܰܟܚܕܳܐ ܢܶܚܕܽܘܢ܆ ܡܶܛܽܠ ܕܰܒܥܰܝ̈ܢܶܐ ܠܘܳܬ ܥܰܝ̈ܢܶܐ ܢܶܚܙܽܘܢ܆ ܐܶܡܰܬܝ ܕܰܢܪܰܚܶܡ ܡܳܪܝܳܐ ܥܰܠ ܨܶܗܝܽܘܢ. ܢܰܪ̈ܕܝܳܢ ܚܰܕܽܘܬܳܐ ܐܰܟܚܕܳܐ ܚܰܪ̈ܒܳܬܳܐ ܕܽܐܘܪܫܠܶܡ. ܡܶܛܽܠ ܕܪܰܚܶܡ ܡܳܪܝܳܐ ܥܰܠ ܥܰܡܶܗ܆ ܘܦܰܨܝܳܗ̇ ܠܽܐܘܪܶܫܠܶܡ^[23]. ܢܶܓܠܶܐ ܡܳܪܝܳܐ ܠܰܕܪܳܥܶܗ ܩܰܕܺܝܫܳܐ ܩܕܳܡ ܟܽܠܗܽܘܢ ܥܰܡ̱ܡ̈ܶܐ ܘܢܶܚܙܽܘܢ ܟܽܠܗܽܘܢ ܣܰܘ̈ܦܶܐ ܕܰܐܪܥܳܐ ܠܦܽܘܪܩܳܢܳܐ ܗܰܘ ܕܡܶܢ ܠܘܳܬ ܐܰ‌ܠܳܗܰܢ.

ܟܰܕ ܠܗܳܢܳܐ ܦܽܘܪܩܳܢܳܐ ܘܫܰܝܢܳܐ ܚܙܰܘ ܡܰܠܰܐܟ̈ܶܐ܆ ܥܰܡ ܗܰܢܺܝܽܐܘܬܳܐ ܡܶܕܶܡ ܫܡܰܝܳܢܺܝܬܳܐ ܘܡܰܠܝܰܬ ܩܺܝܢܬܳܐ܆ ܙܳܡܪܺܝܢ ܗ̱ܘܰܘ ܗܳܝ ܕܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ^[24]. ܠܘܳܬ ܓܶܝܪ ܗܳܢܽܘܢ ܕܠܳܐ ܡܶܬܬܦܺܝܣܳܢܺܝܢ ܗ̱ܘܰܘ ܘܰܡܥܰܨܶܝܢ. ܘܰܠܪܽܘܚܩܳܐ ܒܕܽܘܟ ܡܶܢܶܗ ܘܰܠܛܰܘܪܳܐ ܣܰܓܺܝܳܐܐ ܬܳܙܶܝܢ ܗ̱ܘܰܘ ܘܢܳܘܪܺܝܢ܆ ܗܽܘ ܡܶܢ ܨܶܒܝܳܢܶܗ ܐܶܬܳܐ܆ ܟܰܕ ܙܰܒ̈ܢܺܝܢ ܣܰܓܺܝ̈ܳܐܢ ܩܳܪܶܐ ܗ̱ܘܳܐ ܘܠܳܐ ܣܳܟ ܡܶܫܬܡܰܥ ܗ̱ܘܳܐ. ܘܩܳܠܳܐ ܕܗܳܢܽܘܢ ܕܢܳܛܪܺܝܢ ܠܳܗ̇ ܠܨܶܗܝܽܘܢ܆ ܗܳܢܳܐ ܕܶܝܢ ܐܺܝܬܰܘܗ̱ܝ ܗܰܘ ܕܰܢܒܺܝ̈ܶܐ܆ ܕܰܡܚܰܦܰܝ ܗ̱ܘܳܐ ܘܰܡܛܰܫܰܝ ܘܰܒܨܺܝܪ ܩܰܠܺܝܠ^[25] ܥܒܺܝܕ ܗ̱ܘܳܐ ܠܳܐ ܡܶܬܚܰܙܝܳܢܳܐ܆ ܐܶܬܬܪܺܝܡ ܒܝܰܕ ܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ܆ ܘܶܐܫܬܰܘܫܰܛ. ܘܰܥܒܰܪ ܠܘܳܬ ܥܰܡ̱ܡ̈ܶܐ. ܘܰܚ̣ܕܳܐ ܥܰܠ ܡܰܦܩܳܢܳܐ ܒܰܙܢܳܐ ܡܶܕܶܡ܆ ܘܕܳܨ ܘܰܫܘܰܪ܆ ܟܰܕ ܡܶܢ ܩܕܺܝܡ ܩܦܺܝܤ ܗ̱ܘܳܐ ܘܺܐܝܬܰܘܗ̱ܝ ܗ̱ܘܳܐ ܟܡܺܝܪܳܐ܆ ܒܗܳܝ ܕܡܶܢ ܝܽܗ̱ܘ̈ܕܳܝܶܐ ܠܳܐ ܡܶܬܗܰܝܡܰܢ ܗ̱ܘܳܐ ܘܠܳܐ ܡܶܫܬܡܰܥ ܗ̱ܘܳܐ. ܐܳܦ ܓܶܝܪ ܒܗܶܝܢ ܒܥܰܝ̈ܢܶܐ ܚܙܰܝܢܰܢ ܠܪ̈ܰܚܡܶܐ ܘܰܠܦܽܘܪܩܳܢܳܐ ܕܺܝܠܰܢ܆ ܘܰܐܝܟܰܢܳܐ ܕܳܐܡܰܪ ܝܽܘܚܰܢܳܢ܆ ܘܰܚܙܰܝܢ ܘܰܫܡܰܥܢ ܠܡܶܠܬܳܐ ܕܚܰܝ̈ܶܐ܆ ܐܳܦ ܐܺܝ̈ܕܰܝܳܐ ܕܺܝܠܢ ܓܰܫ̈ܶܝܢ^[26]. ܥܰܠ ‌ܐܰܪܥܳܐ ܓܶܝܪ ܗܰܘ ܠܳܐ ܡܶܬܚܰܙܝܳܢܳܐ ܐܶܬܚܙܺܝ܆ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟ ܟܰܕ ܗܘ̣ܳܐ ܒܰܪܢܳܫܳܐ. ܘܕܰܠܥܰܝ̈ܢܶܐ ܡܰܢ ܦܰܓܪ̈ܳܢܳܝܳܬܳܐ ܡܶܬܚܙܶܐ܆ ܥܰܝ̈ܢܶܐ ܕܶܝܢ ܕܺܝܕܰܥܬܳܐ ܒܗܳܢܽܘܢ ܕܰܡܗܰܝܡܢܺܝܢ ܪܳܡܶܐ܆ ܘܰܒܗܳܕܶܐ ܥܦܺܝܦܳܐܺܝܬ ܡܶܬܚܙܶܐ. ܗܳܕܶܐ ܓܶܝܪ ܐܺܝܬܶܝܗ̇܆ ܗܳܝ ܕܰܒܥܰܝ̈ܢܶܐ ܠܘܳܬ ܥܰܝ̈ܢܶܐ ܢܶܚܙܽܘܢ. ܘܽܐܘܪܫܠܡ ܗܳܝ ܕܚܰܪܒܬܳܐ ܡܶܟܺܝܠ ‌ܐܺܝܬܶܝܗ̇ ܗ̱ܘܳܬ. ܘܨܳܕܺܝܬܳܐ ܡܶܢ ܐܰ‌ܠܳܗܳܐ܆ ܒܰܕܡܽܘܬ ܟܺܐܦܳܐ ܗܳܝ ܕܡܶܢ ܩܕܺܝܡ ܒܡܰܕܒܪܳܐ ܐܶܬܬܰܪܥܰܬ̣܆ ܚܰܕܽܘܬܐ ܪܽܘܚܳܢܳܝܬܳܐ ܘܺܝܕܰܥܬܳܐ ܕܰܡܫܺܝܚܳܐ ܐܰܒܥܰܬ̣. ܗܳܝ ܐܰܝ̇ܕܳܐ ܕܳܐܦ ܪܕܳܬ̣܆ ܘܰܠܟܽܠܳܗ̇ ܡܶܬܥܰܡܪܳܢܺܝܬܳܐ ܐܰܛܺܝܦܰܬ. ܐܶܬܓܠܺܝ ܓܶܝܪ ܕܪܳܥܶܗ ܗܰܘ ܩܰܕܺܝܫܳܐ ܕܡܳܪܝܳܐ ܗܰܘ ܕܺܐܝܬܰܘܗ̱ܝ ܡܫܺܝܚܳܐ܆ ܝܰܡܺܝܢܳܐ ܘܚܰܝܠܳܐ ܕܰܐܒܳܐ ܩܕܳܡ ܟܽܠܗܽܘܢ ܥܰܡ̱ܡ̈ܶܐ. ܘܰܠܦܽܘܪܩܳܢܳܐ ܕܡܶܢ ܗܳܢܳܐ܆ ܚܙܰܘ ܟܽܠܗܽܘܢ ܥܶܒܪ̈ܶܝܗ̇ ܕܰܐܪܥܳܐ. ܘܳܐܦܠܳܐ ܓܶܝܪ ܚܕܳܐ ܕܽܘܟܬܳܐ ܗܘ̣ܳܬ ܕܠܳܐ ܫܶܡܥܰܬ ܠܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ ܘܦܳܪܽܘܩܳܝܬܳܐ. ܡܶܛܽܠ ܗܳܕܶܐ܆ ܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܡܶܛܽܠ ܕܥܰܠ ‌ܐܰܪܥܳܐ ܫܰܝܢܳܐ. ܠܰܘ ܥܰܠ ܚܰܕ ܥܰܡܳܐ ܐܰܘ ܚܕܳܐ ܕܽܘܟܬܳܐ܆ ܐܶܠܳܐ ܥܰܠ ܟܽܠܗܽܘܢ ܣܰܘ̈ܦܶܐ. ܫܳܡܥܺܝܢ ܗ̱ܘܰܘ ܓܶܝܪ ܫܠܺܝ̈ܚܶܐ܆ ܠܰܘ ܒܰܕܡܽܘܬ ܡܽܘܫܶܐ ܘܶܐܫܰܥܝܳܐ܆ ܙܶܠ ܠܘܳܬ ܥܰܡܳܐ ܗܳܢܳܐ^[27]܆ ܐܶܠܳܐ ܟܰܕ ܬܺܐܙܽܠ̱ܘܢ܆ ܬܰܠܡܶܕܘ ܠܟܽܠܗܽܘܢ ܥܰܡ̱ܡ̈ܶܐ. ܘܶܐܬܡܰܠܝܰܬ ܟܽܠܳܗ̇ ܐܰܪܥܳܐ ܗܳܝ ܕܢܶܕܥܽܘܢ ܠܡܳܪܝܳܐ܆ ܐܰܝܟ ܡܰܝ̈ܳܐ ܣܰܓܺܝ̈ܶܐܐ ܠܰܡܟܰܣܳܝܽܘ ܠܝܰܡ̱̈ܡܶܐ^[28]. ܪܰܡܪܡܰܬ ܕܶܝܢ ܝܰܬܺܝܪܳܐܺܝܬ ܐܳܦ ܒܡܰܠܰܐܟ̈ܶܐ ܘܳܐܦ ܒܰܢ ܠܬܶܫܒܽܘܚܬܶܗ ܕܰܡܪܰܝܡܳܐ܆ ܠܰܘ ܒܰܠܚܽܘܕ ܗܳܝ ܕܥܰܠ ‌ܐܰܪܥܳܐ ܗܘ̣ܳܐ ܫܰܝܢܳܐ܆ ܐܶܠܳܐ ܐܳܦ ܗܳܝ ܕܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ. ܠܰܘ ܓܶܝܪ ܒܰܠܚܽܘܕ ܐܰܝܟ ܕܠܰܒ̈ܥܶܠܕܒܳܒܶܐ ܐܶܬܪܰܥܺܝ ܠܰܢ܆ ܘܳܐܦܠܳܐ ܐܶܫܬܰܝܰܢ ܠܰܢ ܐܰܝܟ ܕܠܰܐܝܠܶܝܢ ܕܺܐܝܬܰܝܢ ܗ̱ܘܰܝܢ ܡܰܩܪ̈ܒܳܢܶܐ ܠܩܽܘܒܠܶܗ܆ ܒܰܩܪܳܒܳܐ ܗܰܘ ܕܗܳܟܰܢܳܐ ܐܺܝܬܰܘܗ̱ܝ ܗ̱ܘܳܐ ܕܠܳܐ ܬܰܪܥܽܘܬܳܐ܆ ܐܶܠܳܐ ܒܰܕܡܽܘܬ ܐ̱ܢܳܫ ܐܰܝܢܳܐ ܕܪܶܓܬܳܢܳܐܺܝܬ ܐܺܝܬ ܠܶܗ܆ ܘܰܒܪܶܚܡܬܳܐ ܪܳܕܶܦ ܠܗܳܢܽܘܢ ܕܙܳܕܶܩ ܗ̱ܘܳܐ ܠܡܶܣܢܳܐ܆ ܘܰܐܝܟ ܗܰܘ ܕܰܒܫܰܦܺܝܪ̈ܳܬܳܐ ܫܦܰܪܢܰܢ ܠܶܗ܆ ܒܰܪܢܳܫܳܐ ܗܘ̣ܳܐ ܡܶܛܽܠ ܬܽܘܪܳܨܶܗ ܕܰܟܝܳܢܰܢ. ܫܰܦܺܝܪܽܘܬ ܨܶܒܝܳܢܳܐ ܓܶܝܪ܆ ܗܳܝ ܕܛܳܒܳܐܺܝܬ ܫܶܦܪܰܬ ܘܶܐܣܬܰܒܪܰܬ ܐܺܝܬܶܝܗ̇܆ ܘܗ̱ܝ ܕܟܰܕ ܠܰܘ ܡܶܢ ܩܛܺܝܪܳܐ ܐܰܘ ܡܶܢ ܡܶܕܶܡ ܐ̱ܚܪܺܢܳܐ ܡܶܬܢܓܶܕ ܓܳܒܶܐ ܠܶܗ ܐ̱ܢܳܫ܆ ܐܶܠܳܐ ܡܶܢ ܗܳܝ ܕܗܽܘ ܒܩܳܐ ܘܰܒܚܰܪ ܠܗܳܝ ܕܣܰܓܺܝ ܫܰܦܺܝܪܳܐ ܘܰܪܚܺܝܡܳܐ. ܐܰܘ ܓܶܝܪ ܠܰܘ ܕܪܶܚܡܬܳܐ ܐܺܝܬܶܝܗ̇܆ ܗܳܝ ܕܡܶܢ ܩܕܺܝܡ ܡܰܢ ܠܨܰܠܡܳܐ ܐܰ‌ܠܳܗܳܝܳܐ܆ ܠܢܰܦܫܳܐ ܡܶܬܗܰܘܢܳܢܺܝܬܳܐ ܐܳܡܰܪ ܐ̱ܢܳܐ ܒܛܺܝܢܳܐ ܢܶܚܠܽܘܛ܆ ܘܚܰܝܽܘܬܳܐ ܡܠܺܝܠܬܳܐ ܢܶܥܒܶܕ ܠܒܰܪܢܳܫܳܐ܆ ܠܚܰܪܬܳܐ ܕܶܝܢ ܡܶܛܽܠܳܬܶܗ ܕܨܰܠܡܳܐ ܕܒܰܥܢܳܢܳܐ ܘܰܒܬܰܪܥܺܝܬܳܐ ܕܒܶܣܪܳܐ ܐܶܬܚܰܦܺܝ܆ ܗܽܘ ܩܢܽܘܡܶܗ ܠܳܐ ܡܶܫܬܰܚܠܦܳܢܳܐܺܝܬ ܢܶܗܘܶܐ ܒܶܣܪܳܐ܆ ܗܳܢܰܘ ܕܶܝܢ ܒܰܪܢܳܫܳܐ܆ ܘܠܰܓܒܺܝܠܽܘܬܳܐ ܕܡܶܢ ܒܬܽܘܠܬܳܐ ܢܶܬܪܡܶܐ܆ ܗܰܘ ܕܡܶܢ ܫܽܘܪܳܝܳܐ ܒܨܰܠܡܳܐ ܒܰܝܬܳܝܳܐ ܕܺܝܠܶܗ ܥܰܒܕܳܗ̇ ܠܰܓܒܺܝܠܬܳܐ.

ܕܗܽܘ ܓܶܝܪ ܐܺܝܬܰܘܗ̱ܝ ܗ̱ܘܳܐ ܗܰܘ ܕܡܶܢ ܒܬܽܘܠܬܳܐ ܐܶܬܺܝܠܶܕ܆ ܐܶܫܰܥܝܳܐ ܟܕ ܠܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ ܒܗܶܝܢ ܒܥܰܝ̈ܢܶܐ ܩܳܕܶܡ ܗ̱ܘܳܐ ܚܳܙܶܐ܆ ܘܡܶܢܶܗ ܕܗܰܘ ܙܰܒܢܳܐ ܐܰܝܟ ܕܰܠܡܺܐܡܰܪ ܒܨܶܒܥܳܐ ܡܚܰܘܶܐ ܗ̱ܘܳܐ ܠܳܗ̇ ܠܰܒܬܽܘܠܬܳܐ ܐܶܡܰܪ܆ ܗܳܐ ܒܬܽܘܠܬܳܐ ܒܟܰܪܣܳܐ ܬܶܣܰܒ ܘܬܺܐܠܰܕ ܒܪܳܐ. ܘܬܶܩܪܽܘܢ ܫܡܶܗ ܥܰܡܰܢܽܘܐܶܝܠ.^[29] ܥܰܡܰܢܽܘܐܶܝܠ ܕܶܝܢ܆ ܥܰܡܰܢ ܐܰ‌ܠܳܗܳܐ ܡܶܬܦܰܫܰܩ܆ ܐܰܝܟ ܒܰܪܬܩܳܠܐ ܕܡܰܠܰܐܟܳܐ ܗܰܘ ܕܶܐܬܚܙܺܝ ܒܚܶܠܡܳܐ ܠܝܰܘܣܶܦ. ܡܳܕܶܝܢ ܐܰ‌ܠܳܗܳܐ ܗܘ̣ܳܐ ܥܰܡܰܢ܆ ܗܰܘ ܕܡܶܢ ܒܬܽܘܠܬܳܐ ܐܶܬܺܝܠܶܕ. ܐܶܠܳܐ ܝܽܗ̱ܘ̈ܕܳܝܶܐ ܗܳܢܽܘܢ ܛܳܠܽܘܡ̈ܶܐ ܘܰܕܠܰܬܪ̈ܺܝܨܶܐ^[30] ܡܦܰܬܠܺܝܢ܆ ܘܕܰܒܗܳܕܶܐ ܠܽܘܩܒܰܠ ܪܽܘܚܳܐ ܩܰܕܺܝܫܳܐ ܩܳܝܡܺܝܢ ܐܳܡܪܺܝܢ܆ ܕܐ̱ܢܳܫܺܝ̈ܢ ܡܶܢ ܗܳܢܽܘܢ ܕܦܰܫܶܩܘ ܠܰܟ̈ܬܳܒܶܐ ܐܰ‌ܠܳܗܳܝ̈ܶܐ ܕܗܳܐ ܥܠܰܝܡܬܳܐ ܐܰܫܠܶܡܘ܆ ܘܠܰܘ ܕܗܳܐ ܒܬܽܘܠܬܳܐ ܒܟܰܪܣܳܐ ܬܶܣܰܒ. ܥܠܰܝܡܬܳܐ ܕܶܝܢ ܐܺܝܬܶܝܗ̇܆ ܐܰܢ̱ܬܬܳܐ ܗܳܝ ܕܶܐܙܕܰܘܓܰܬ̣ ܘܢܶܣܒܰܬ ܢܶܣܝܳܢܳܐ ܕܓܰܒܪܳܐ. ܐܶܠܳܐ ܝܰܬܺܝܪܳܐܺܝܬ ܡܰܢ ܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܐܳܦ ܠܰܒܬܽܘܠܬܳܐ ܩܳܪܶܝܢ ܥܠܰܝܡܬܳܐ܆ ܐܰܝܟ ܗܳܝ ܕܰܐܡܺܝܪܳܐ ܒܬܶܢܝܳܢ ܢܳܡܽܘܣܳܐ ܡܶܛܽܠ ܚܽܘܒܳܠܳܐ ܩܛܺܝܪܳܝܳܐ ܕܰܛܠܺܝܬܳܐ ܕܰܒܡܰܕܒܪܳܐ. ܐܰܝܠܠܰܬ̣ ܥܠܰܝܡܬܳܐ ܗܳܝ ܕܰܡܟܺܝܪܳܐ ܗ̱ܘܳܬ^[31]. ܘܗܰܘ ܕܰܥܬܺܝܕ ܗ̱ܘܳܐ ܕܰܢܥܰܕܪܺܝܗ̇ ܠܰܝܬ ܗ̱ܘܳܐ. ܡܰܝܠܠܳܐ ܗ̱ܘܳܬ ܓܶܝܪ ܝܺܕܺܝܥܳܐ ܗܝ܆ ܟܰܕ ܒܬܽܘܠܬܳܐ ܐܺܝܬܶܝܗ̇ ܗ̱ܘܳܬ܆ ܩܕܳܡ ܕܰܢܚܰܒܠܺܝܗ̇ ܗܰܘ ܕܕܰܒ̣ܪܳܗ̇ ܒܰܩܛܺܝܪܳܐ. ܘܳܐܦ ܒܕܰܝܳܢ̈ܶܐ ܕܶܝܢ܆ ܓܰܠܝܳܐܺܝܬ ܐܳܡܰܪ ܠܳܗ̇ ܠܗܳܕܶܐ. ܠܟܽܠ ܓܶܝܪ ܐܰܢ̱ܬܬܳܐ ܐܳܡܰܪ ܕܝܳܕܥܳܐ ܡܰܫܟܒܳܐ ܕܕܶܟܪܳܐ܆ ܬܰܚܪܡܽܘܢ. ܠܟܽܠ ܕܶܝܢ ܥܠܰܝܡܬܳܐ ܒܬܽܘܠܬܳܐ ܬܫܰܘܙܒܽܘܢ. ܘܶܐܫܟܰܚܘ ܒܗܳܢܽܘܢ ܕܥܳܡܪܺܝܢ ܒܝܒܝܫ ܕܓܶܠܥܳܕ܆ ܐܰܪܒܰܥܡܳܐܐ ܥܠܰܝ̈ܡܳܬܳܐ ܒܬܽܘ̈ܠܳܬܳܐ܆ ܗܳܢܶܝܢ ܕܠܳܐ ܝܳܕܥ̈ܳܢ ܓܰܒܪܳܐ ܒܡܰܕܡܟܳܐ ܕܰܐܢ̱ܬܬܳܐ^[32]. ܘܳܐܦ ܒܡܰܠ̈ܟܳܘܬܳܐ ܠܐܒܝܫܩ ܗܳܝ ܕܰܡܫܰܡܫܳܐ ܗ̱ܘܳܬ ܘܰܡܫܰܚܢܳܐ ܠܕܰܘܺܝܕ ܒܣܰܝܒܽܘܬܳܐ ܟܰܕ ܒܬܽܘܠܬܳܐ ܐܺܝܬܶܝܗ̇ ܗ̱ܘܳܬ܆ ܕܰܥܠܰܝܡܬܳܐ ܐܶܬܟܰܢܝܰܬ ܡܶܫܟܚܺܝܢܰܢ^[33]. ܒܳܬܰܪܟܶܢ ܕܶܝܢ܆ ܢܦܰܫܩܽܘܢ ܠܰܢ ܗܳܢܽܘܢ ܕܠܰܡܨܰܝܳܕܽܘ ܠܡ̈ܶܠܶܐ ܕܰܟܬܳܒܳܐ ܝܰܨܺܝܦܺܝܢ܆ ܘܳܐܦ ܡܶܢܶܗ ܥܰܡ ܣܽܘܟܳܠܶܗ ܦܳܕܶܝܢ܆ ܐܰܝܟܰܢܳܐ ܗܽܘ ܢܒܺܝܳܐ ܐܳܡܰܪ܆ ܡܶܛܽܠܗܳܕܶܐ ܗܽܘ ܡܳܪܝܳܐ ܢܶܬܶܠ ܠܟܽܘܢ ܐܳܬ̣ܳܐ^[34]܆ ܘܗܳܟܰܢܳܐ ܡܰܝܬܶܐ ܒܳܬܰܪܟܶܢ܆ ܗܳܝ ܕܗܳܐ ܥܠܰܝܡܬܳܐ ܒܟܰܪܣܳܐ ܬܶܣܰܒ. ܐܰܝ̇ܕܳܐ ܓܶܝܪ ܐܳܬ݀ܳܐ ܗܝ܆ ܗܳܝ ܕܰܐܢ̱ܬܬܐ ܕܶܐܙܕܰܘܓܰܬ̣ ܬܺܐܠܰܕ. ܐܳܬ̣ܳܐ ܓܶܝܪ܆ ܡܶܬܚܰܘܝܳܢܽܘܬܳܐ ܕܣܽܘܥܪܳܢܳܐ ܬܡܺܝܗܳܐ ܐܺܝܬܶܝܗ̇܆ ܕܢܳܦܶܩ ܡܶܢ ܬܚܽܘ̈ܡܶܐ ܕܰܟܝܳܢܳܐ. ܡܳܕܶܝܢ ܝܶܠܕܰܬ ܠܳܗ̇ ܒܬܽܘܠܬܳܐ ܐܳܦܶܢ ܠܳܐ ܨܳܒܶܝܢ ܐܢ̱ܬܽܘܢ܆ ܘܳܐܬ̣ܳܐ ܗܳܝ ܕܶܐܬܐܰܡܪܰܬ ܒܰܢܒܺܝܽܘܬܳܐ ܢܶܦܩܰܬ ܠܳܗ̇ ܠܰܥܒܳܕܳܐ܆ ܘܝܶܠܕܰܬ ܠܳܗ̇ ܠܥܰܡܰܢܽܘܐܶܝܠ. ܠܰܒܬܽܘܠܬܳܐ ܓܶܝܪ ܠܳܚܡܳܐ ܗ̱ܘܳܬ ܘܣܰܓܺܝ ܘܳܠܝܳܐܺܝܬ܆ ܕܰܠܝܰܠܕܳܐ ܐܰ‌ܠܳܗܳܝܳܐ ܕܰܐܝܟ ܗܳܢܳܐ ܬܺܐܠܰܕ܆ ܘܠܰܘ ܠܗܳܝ ܕܰܡܢܰܣܝܳܐ ܒܡܰܫܟܒܳܐ ܕܙܽܘܘܳܓܳܐ ܕܓܰܒܪܳܐ. ܬܟܰܚܶܕܟܽܘܢ ܗܳܟܺܝܠ ‌ܐܳܦ ܗܺܝ ܠܶܟܣܺܝܤ ܗܳܝ ܕܳܐܬ̣ܳܐ܆ ܘܳܐܦ ܗܽܘ ܟܽܘܢܳܝܳܐ ܗܰܘ ܕܥܰܡܰܢܽܘܐܶܝܠ܆ ܕܰܒܬܽܘܠܬܳܐ ܬܶܚܫܒܽܘܢ ܠܗܳܝ ܕܝܶܠܕܰܬ܆ ܘܰܐ‌ܠܳܗܳܐ ܕܰܡܒܰܣܰܪ ܠܗܰܘ ܕܶܐܬܺܝܠܶܕ. ܢܰܘܣ̈ܦܳܢ ܠܟܽܘܢ ܓܶܝܪ ܗܰܝܡܳܢܽܘܬܳܐ ܠܘܳܬ ܗܳܝ ܕܗܳܟܰܢܳܐ ܢܶܗܘܶܐ ܐܺܝܬ ܠܟܽܘܢ܆ ܐܳܦ ܡ̈ܶܠܶܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ ܕܺܝܠܳܗ̇ ܕܰܢܒܺܝܽܘܬܳܐ ܗܳܠܶܝܢ ܕܡܶܢ ܒܳܬܰܪܟܶܢ.

ܡܳܢܳܐ ܓܶܝܪ ܡܶܛܽܠ ܗܰܘ ܕܶܐܬܺܝܠܶܕ ܐܳܡܰܪ. ܚܶܐܘܬܳܐ ܘܕܶܒܫܳܐ ܢܶܐܟܽܘܠ^[35]. ܟܽܠ ܕܶܝܢ ܫܰܒܪܳܐ ܡܶܚܕܳܐ ܕܡܶܬܺܝܠܶܕ܆ ܟܰܕ ܠܰܬܕ̣ܐ ܕܶܐܡܶܗ ܠܳܒܶܟ ܒܚܰܠܒܳܐ ܕܗܳܝ ܡܶܬܬܰܪܣܶܐ܆ ܘܠܰܘ ܒܚܶܐܘܬܳܐ ܘܰܒܕܶܒܫܳܐ. ܚܶܐܘܬܳܐ ܗܳܟܺܝܠ ܘܕܶܒܫܳܐ܆ ܠܚܰܠܒܳܐ ܗܰܘ ܕܰܥܠܰܝܡܬܳܐ ܗܳܝ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܩܳܪܶܐ܆ ܠܗܰܘ ܥܠܰܝܡܳܝܳܐ ܘܰܙܪܺܝܙܳܐ ܘܚܰܝܠܬܳܢܳܐ ܘܕܰܩܒܺܝܥ܆ ܘܰܕܠܰܘ ܡܶܢ ܗܰܢܺܝܽܐܘܬܳܐ ܘܚܽܘܠܛܳܢܳܐ ܕܓܰܒܪܳܐ ܘܪܰܦܝܽܘܬܳܐ ܘܰܐܫܺܝܕܽܘܬܳܐ ܢܳܚܶܬ܆ ܘܳܐܦܠܳܐ ܡܶܕܡ ܡܰܪܺܝܪܳܐ ܐܺܝܬ ܒܶܗ ܡܶܢ ܚܛܺܝܬܳܐ ܘܡܶܢ ܡܶܪܬܳܐ ܘܡܶܢ ܡܰܛܥܝܳܢܽܘܬܳܐ ܕܚܶܘܝܳܐ܆ ܐܶܠܳܐ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܒܬܽܘܠܬܳܐ ܢܒܰܥ܆ ܗܳܠܶܝܢ ܕܡܶܢܗܽܘܢ^[36] ܫܘܰܚ ܝܰܠܕܶܗ ܕܥܰܡܰܢܽܘܐܶܝܠ. ܕܚܰܝܠܳܐ^[37] ܓܶܝܪ ܘܰܕܥܽܘܫܢܳܐ ܐܺܝܬܰܘܗ̱ܝ ܡܫܰܘܕܥܳܢܳܐ ܬܰܘܪܳܐ܆ ܐܰܝܟ ܗܳܝ ܕܰܟܬܺܝܒܳܐ ܒܡ̈ܰܬܠܶܐ܆ ܕܰܐܝܟܳܐ ܕܶܝܢ ܕܥܰܠ̈ܠܳܬܳܐ ܣܰܓܺܝ̈ܳܐܬܳܐ ܐܺܝܬ܆ ܬܰܡܳܢ ܓܰܠܝܳܐ ܐܺܝܬܰܘܗ̱ܝ ܚܰܝܠܶܗ ܕܬܰܘܪܳܐ^[38]. ܠܕܶܒܫܳܐ ܕܶܝܢ ܡܶܬܕܰܡܝܳܐ܆ ܐܰܝܢܳܝܽܘܬܳܐ ܘܰܛܥܳܡܬܳܐ ܕܡܶܐܟܽܘܠܬܳܐ ܪܽܘܚܳܢܳܝܬܳܐ. ܡܶܢ ܗܳܪܟܳܐ ܐܳܦ ܚܰܙܩܝܐܝܠ ܟܰܕ ܠܟܶܪܟܳܐ ܗܰܘ ܐܰ‌ܠܳܗܳܝܳܐ ܕܰܟܬܳܒܳܐ ܒܠܰܥ ܐܳܡܰܪ ܗ̱ܘܳܐ܆ ܘܰܗܘ̣ܳܐ ܒܦܽܘܡܝ ܐܰܝܟ ܕܶܒܫܳܐ ܚܰܠܝܳܐ^[39]. ܐܶܠܳܐ ܠܗܰܠ ܡܰܢ܆ ܡܶܬܗܰܘܢܳܢܳܐܺܝܬ ܗܽܘ ܢܒܺܝܳܐ ܐܶܟܰܠ. ܘܳܐܦܠܳܐ ܓܶܝܪ ܐܺܝܬ ܗ̱ܘܳܐ ܕܰܐ̱ܚܪܳܢܝܳܐܺܝܬ ܟܶܪܟܳܐ ܕܰܟܬܳܒܳܐ ܢܶܒܠܰܥ. ܗܳܪܟܳܐ ܕܶܝܢ ܡܶܬܪܰܓܫܳܢܳܐܺܝܬ ܘܒܰܫܪܳܪܳܐ ܐܶܬܬܰܪܣܺܝ ܒܚܰܠܒܳܐ ܥܰܡܰܢܽܘܐܶܝܠ܆ ܟܰܕ ܒܝܰܕ ܟܽܠܗܶܝܢ ܗܳܠܶܝܢ ܕܺܝܠܰܢ ܐܶܬܳܐ ܕܠܳܐ ܚܛܳܗ܆ ܐܰܝܟܰܢܳܐ ܕܡܶܢ ܟܽܠܗܶܝܢ ܡܰܢ ܢܛܰܠܶܩ ܘܢܶܣܪܽܘܚ ܠܰܚܛܺܝܬܳܐ ܘܰܠܠܰܘܛܬܳܐ܆ ܢܶܨܽܘܒ ܒܗܶܝܢ ܕܶܝܢ ܒܽܘܪܟܬܳܐ ܘܩܰܕܺܝܫܽܘܬܳܐ. ܠܳܐ ܗܳܟܺܝܠ ܦܫܺܝܩܳܐܺܝܬ ܗܳܢܽܘܢ ܕܗܰܓܳܓܽܘܬܳܐ ܟܪܺܝܗܶܝܢ ܥܰܠ ܗܳܢܶܝܢ ܕܶܐܬܶܐܡܰܪ̈ܝ̱ ܢܶܪܗܛܽܘܢ܆ ܟܰܕ ܒܟܽܠ ܕܽܘܟ ܠܰܫܪܳܪܳܗ̇ ܕܰܡܕܰܒܪܳܢܽܘܬܳܐ ܥܰܢܳܬܳܐܺܝܬ ܡܙܰܝܦܺܝܢ܆ ܐܰܝܟܰܢܳܐ ܕܡܶܢ ܦܽܘܪܩܳܢܳܐ ܫܰܪܺܝܪܳܐ ܢܶܦܕܽܘܢ.

ܠܰܘ ܕܶܝܢ ܠܒܰܪ ܡܶܢ ܢܺܝܫܳܐ ܗܝ܆ ܕܠܰܒܬܽܘܠܬܳܐ ܢܟܰܢܶܝܗ̇ ܐ̱ܢܳܫ ܐܰܪܥܳܐ ܗܳܝ ܕܡܰܪܕܝܳܐ ܚܰܠܒܳܐ ܘܕܶܒܫܳܐ܆ ܗܳܝ ܕܡܶܢܳܗ̇ ܐܳܕܳܡ ܗܰܘ ܚܰܕܬܳܐ ܐܶܬܓܒܶܠ܆ ܘܶܐܬܬܰܪܣܺܝ ܒܚܶܐܘܬܳܐ ܘܰܒܕܶܒܫܳܐ. ܗܰܘ ܕܡܶܛܽܠܳܬܶܗ ܐܳܦ ܗܳܠܶܝܢ ܐܰܝܬܺܝ ܒܳܬܰܪܟܶܢ ܗܽܘ ܢܒܺܝܳܐ. ܩܕܳܡ ܕܢܶܕܰܥ ܗܽܘ ܐܰܘ ܢܶܓܒܶܐ ܒܺܝ̈ܫܳܬܳܐ܆ ܢܶܓܒܶܐ ܛܳܒܬܳܐ. ܡܶܛܽܠ ܕܰܩܕܳܡ ܕܢܶܕܰܥ ܗܽܘ ܛܰܠܝܳܐ ܛܳܒܬܳܐ ܐܰܘ ܒܺܝܫܬܳܐ܆ ܡܰܣܠܶܐ ܒܺܝܫܬܳܐ ܠܡܶܓܒܳܐ ܛܳܒܬܳܐ^[40]. ܟܽܠ ܓܶܝܪ ܚܰܕ ܡܶܢܰܢ ܒܩܰܘܡܬܳܐ ܗܳܝ ܕܫܰܒܪܽܘܬܳܐ ܟܰܕ ܡܶܬܒܰܚܰܢ ܠܳܐ ܡܰܪܓܫܳܢܳܐܺܝܬ ܐܺܝܬ ܠܶܗ. ܒܛܳܒܬܳܐ ܟܺܝܬ ܘܰܒܒܺܝܫܬܳܐ. ܟܰܕ ܕܶܝܢ ܡܶܫܬܰܘܫܰܛ ܙܰܒܢܳܐ܆ ܠܰܡܦܰܪܳܫܽܘ ܠܗܳܠܶܝܢ ܡܶܟܺܝܠ ܡܫܰܪܶܐ. ܐܶܠܳܐ ܥܰܡܰܢܽܘܐܶܝܠ ܟܰܕ ܐܳܦ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܒܰܟܝܳܢܳܐ ܘܗ̱ܝ ܛܳܒܽܘܬܳܐ܆ ܐܳܦܶܢ ܗܘ̣ܳܐ ܥܽܘܠܳܐ ܒܰܡܕܰܒܪܳܢܽܘܬܳܐ܆ ܠܳܐ ܟܰܬܰܪ ܠܙܰܒܢܳܐ ܕܰܡܦܰܪܫܳܢܽܘܬܳܐ. ܐܶܠܳܐ ܡܶܢܗܽܘܢ ܐܳܡܰܪ ܕܥܰܙܪܽܘܪ̈ܶܐ܆ ܩܕܳܡ ܕܰܠܩܰܘܡܬܳܐ ܢܺܐܬܶܐ ܗܳܝ ܕܰܡܟܳܢܳܐ ܠܰܡܦܰܪܳܫܽܘ ܠܛܳܒܬܳܐ ܘܰܠܒܺܝܫܬܳܐ܆ ܐܰܣܠܺܝ ܡܰܢ ܘܠܳܐ ܐܶܬܬܦܺܝܤ ܠܒܺܝܫܽܘܬܳܐ܆ ܓܒܳܐ ܕܶܝܢ ܠܛܳܒܬܳܐ. ܗܳܝ ܕܶܝܢ ܕܰܐܣܠܺܝ ܘܠܳܐ ܐܶܬܬܦܺܝܤ܆ ܘܗ̱ܝ ܕܰܓܒܳܐ ܡܚܰܘ̈ܝܳܢ ܠܰܢ܆ ܕܡܶܠܬܳܐ ܗܰܘ ܕܰܐ‌ܠܳܗܳܐ܆ ܠܰܘ ܒܶܣܪܳܐ ܒܰܠܚܽܘܕ܆ ܐܶܠܳܐ ܐܳܦ ܢܰܦܫܳܐ ܨܶܒܝܳܢܳܝܬܳܐ ܟܺܝܬ ܘܰܡܠܺܝܠܬܳܐ ܚܰܝܶܕ ܠܶܗ ܩܢܽܘܡܳܐܺܝܬ܆ ܐܰܝܟܰܢܳܐ ܕܰܠܢܰܦ̈ܫܳܬܳܐ ܕܺܝܠܰܢ ܕܰܪܟܺܝܢܳܐܺܝܬ ܠܘܳܬ ܒܺܝܫܽܘܬܳܐ ܐܺܝܬ ܠܗܶܝܢ ܢܰܪܟܰܢ ܠܘܳܬ ܓܒܺܝܬܳܐ ܕܛܳܒܬܳܐ܆ ܘܰܠܘܳܬ ܡܰܗܦܟܽܘܬ ܐܰܦ̈ܶܐ ܕܡܶܢ ܒܺܝܫܽܘܬܳܐ. ܐܰ‌ܠܳܗܳܐ ܓܶܝܪ ܒܗܳܝ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܠܳܐ ܓܳܒܶܐ ܛܳܒܬܳܐ܆ ܟܰܕ ܒܽܐܘܣܺܝܰܐ ܐܺܝܬܰܘܗ̱ܝ ܛܳܒܳܐ. ܐܶܠܳܐ ܟܰܕ ܡܶܛܽܠܳܬܰܢ ܐܶܫܬܰܘܬܰܦ ܠܒܶܣܪܳܐ ܘܰܠܢܰܦܫܳܐ ܡܶܬܗܰܘܢܳܢܺܝܬܳܐ܆ ܠܰܢ ܣܳܥܰܪ ܗ̱ܘܳܐ ܠܶܗ ܠܬܽܘܪܳܨܳܐ. ܐܳܦ ܓܶܝܪ ܐܳܦ ܠܰܢ ܘܰܥܡܰܕ܆ ܟܰܕ ܕܰܟܝܳܐ ܘܗܽܘ ܕܽܘܟܳܝܳܐ ܐܺܝܬܰܘܗ̱ܝ. ܘܳܐܦ ܠܰܢ ܐܶܬܢܰܣܺܝ܆ ܟܰܕ ܗܽܘ ܥܰܠ ܢܶܣܝܳܢܳܐ ܠܳܐ ܣܢܺܝܩ ܗ̱ܘܳܐ܆ ܐܶܠܳܐ ܟܰܕ ܦܫܺܝܩ ܠܡܶܬܟܰܒܫܳܢܽܘܬܳܐ ܥܳܒܶܕ ܠܶܗ ܠܗܰܘ ܕܢܶܣܝܳܢܳܐ ܡܩܰܪܶܒ܆ ܠܗܳܢܽܘܢ ܕܰܥܬܺܝܕܺܝܢ ܠܡܶܬܟܰܬܳܫܽܘ ܠܘܳܬܶܗ. ܘܠܰܢ ܐܶܨܛܠܶܒ܆ ܟܰܕ ܠܳܐ ܐܺܝܬܰܘܗ̱ܝ ܡܚܰܝܒܳܐ ܕܰܚܛܺܝܬܳܐ. ܘܰܠܡܰܘܬܳܐ ܗܰܘ ܕܶܐܬܥܰܫܰܢ ܠܩܽܘܒܠܰܢ ܛܪܽܘܢܳܐܺܝܬ ܙܩܰܦ. ܘܠܰܢ ܐܶܬܩܒܰܪ܆ ܘܒܰܛܶܠ ܠܰܚܒܳܠܳܐ ܒܝܰܕ ܩܝܳܡܬܳܐ. ܗܳܠܶܝܢ ܟܺܝܬ ܕܟܽܠܗܶܝܢ܆ ܐܶܫܰܥܝܳܐ ܗܰܘ ܢܒܺܝܳܐ ܟܰܕ ܒܬܰܪܥܺܝܬܳܐ ܚܰܟܺܝܡܬܳܐ ܟܢܺܝܫܳܐܺܝܬ ܢܣܰܒ܆ ܒܪܰܒܽܘܬ ܒܰܪ̱ܬ ܩܳܠܳܐ ܐܰܟܪܶܙ ܐܶܢܶܝܢ܆ ܕܛܰܠܝܳܐ ܐܶܬܺܝܠܶܕ ܠܰܢ^[41]. ܠܰܢ ܓܶܝܪ ܐܶܬܺܝܠܶܕ܆ ܘܠܳܐ ܗ̱ܘܳܐ ܠܶܗ. ܟܽܠ ܓܶܝܪ ܒܰܪܢܳܫܳܐ܆ ܠܝܽܘܬܪܳܢܳܐ ܕܺܝܠܶܗ ܕܢܰܦܫܶܗ ܡܶܬܺܝܠܶܕ܆ ܠܘܳܬ ܗܳܝ ܕܢܶܫܬܰܘܬܰܦ ܒܗܳܢܳܐ ܢܽܘܗܪܐ܆ ܘܰܒܡܶܫܬܰܘܕܥܳܢܽܘܬܳܐ ܕܰܐ‌ܠܳܗܳܐ. ܡܫܺܝܚܳܐ ܕܶܝܢ ܗܰܘ ܢܽܘܗܪܳܐ ܫܰܪܺܝܪܳܐ܆ ܗܰܘ ܕܡܰܢܗܰܪ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ^[42]܆ ܘܳܐܦܠܳܐ ܕܚܰܕ ܝܽܘܬܪܳܢܳܐ ܐܺܝܬܰܘܗ̱ܝ ܗ̱ܘܳܐ ܣܢܺܝܩܳܐ܆ ܐܶܠܳܐ ܠܰܢ ܐܰܘܬܰܪ ܒܝܰܕ ܝܺܠܺܝܕܽܘܬܳܐ ܕܒܰܒܣܰܪ. ܕܡܶܢ ܗܳܪܟܳܐ ܗܽܘ ܢܒܺܝܳܐ ܡܳܢܳܐ ܐܳܡܰܪ ܐ̱ܢܐ ܐܶܢܳܐ ܐܳܡܰܪ܆ ܕܛܰܠܝܳܐ ܐܶܬܺܝܠܶܕ ܠܰܢ. ܗܽܘ ܟܰܕ ܗܽܘ ܐܳܦ ܒܪܳܐ ܐܶܬܺܝܗܶܒ ܠܰܢ¹. ܒܪܳܐ ܓܶܝܪ ܐܺܝܬܰܘܗ̱ܝ ܘܳܐܦ ܝܺܚܺܝܕܳܝܳܐ ܡܶܠܬܶܗ ܕܰܐ‌ܠܳܗܳܐ ܘܰܐܒܳܐ. ܣܰܓܺܝ ܕܶܝܢ ܠܳܚܡܳܐܺܝܬ ܠܗܳܝ ܕܰܒܪܳܐ܆ ܗܳܝ ܕܶܐܬܺܝܗܶܒ ܐܰܘܣܶܦ ܠܰܚܶܡ. ܡܰܘܗܰܒܬܳܐ ܓܶܝܪ ܐܺܝܬܶܝܗ̇ ܘܫܽܘܟܳܢܳܐ ܘܛܰܝܒܽܘܬܳܐ ܕܰܐ‌ܠܳܗܳܐ܆ ܗܳܝ ܕܰܒܪܳܐ ܘܡܶܠܬܳܐ ܥܰܠ ‌ܐܰܪܥܳܐ ܢܶܗܘܶܐ܆ ܘܢܶܬܺܝܠܶܕ ܛܰܠܝܳܐ ܡܶܢ ܐܰܢ̱ܬܬܐ܆ ܟܽܠ ܓܶܝܪ ܡܰܘܗܰܒܬܳܐ ܛܳܒܬܳܐ ܘܟܽܠ ܫܽܘܟܳܢܳܐ ܡܫܰܡܠܝܳܐ܆ ܡܶܢ ܠܥܶܠ ‌ܐܺܝܬܰܘܗ̱ܝ ܕܢܳܚܶܬ^[43]܆ ܐܳܡܰܪ ܟܬܳܒܐ ܟܳܗܢܳܝܳܐ.

ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܢܳܐ ܛܰܠܝܳܐ ܝܶܠܕܰܬ ܠܰܢ ܒܬܽܘܠܬܳܐ܆ ܘܰܠܘܳܬ ܐܰܝ̇ܕܳܐ ܦܰܬܝܽܘܬܐ ܕܣܽܘܟ̈ܳܠܶܐ ܐܰ‌ܠܳܗܳܝ̈ܶܐ ܐܰܦܩܰܬ ܠܰܢ܆ ܟܽܠܗܶܝܢ ܓܶܝܪ ܕܺܝܠܳܗ̇ ܦܰܬܝ̈ܳܬܳܐ ܘܰܕܥܳܒܪ̈ܳܢ ܠܚܰܝܠܳܐ ܕܺܝܠܰܢ. ܡܶܛܽܠܗܳܕܶܐ ܘܟܰܕ ܗܰܝܟܠܳܐ ܗܳܢܳܐ ܐܶܬܪܘܰܚ ܘܶܐܬܦܰܬܺܝ܆ ܒܺܐܝܕܳܐ ܥܰܬܺܝܪܬܳܐ ܕܫܰܦܺܝܪ ܕܶܚܠܬܳܐ ܘܪܳܚܶܡ ܐܰ‌ܠܳܗܳܐ ܡܰܠܟܳܐ܆ ܘܕܳܐܦ ܠܘܳܬ ܗܳܢܽܘܢ ܕܰܒܪܽܘܚܩܳܐ ܐܺܝܬܰܝܗܽܘܢ ܡܶܬܦܰܫܛܳܐ ܫܦܺܝܥܳܐܺܝܬ܆ ܘܟܶܢܫܳܐ ܕܗܳܢܽܘܢ ܕܰܐܟܚܕܳܐ ܡܶܬܟܰܢܫܺܝܢ ܠܳܗ̇^[44] ܬܽܘܒ ܥܕܰܟܺܝܠ ܥܳܠܶܒ ܘܥܳܒܰܪ ܠܪܰܒܽܘܬܳܗ̇ ܕܕܽܘܟܬܳܐ܆ ܘܡܺܐܡܪܳܐ ܕܺܝܠܝ ܡܶܣܬܒܰܪ ܕܰܥܒܰܪ ܠܰܡܫܽܘܚܬܳܐ܆ ܟܰܕ ܡܶܢ ܛܽܘܦܬܳܐ ܠܳܐ ܡܶܕܶܡ ܪܰܚܺܝܩ ܕܽܘܡܝܶܗ܆ ܠܘܳܬ ܥܽܘܬܪܳܐ ܠܳܐ ܡܶܣܬܰܝܟܳܢܳܐ ܕܣܽܘ̈ܟܳܠܶܐ. ܡܶܣܬܰܒܪܳܐ ܠܺܝ ܕܰܠܝܳܠܕܰܬ ܐܰ‌ܠܳܗܳܐ ܫܳܡܰܥ ܐ̱ܢܳܐ ܕܠܰܒ̈ܢܳܬ ܩܴ̈ܠܶܐ ܗܳܠܶܝܢ ܢܒܺܝ̣ܳܝ̣̈ܳܬܳܐ ܐܳܡܪܳܐ ܠܘܳܬܝ܆ ܐܰ‌ܠܺܝܨ ܗ̱ܘ̣ ܠܺܝ ܐܰܬܪܳܐ^[45]. ܐܰܘܣܶܦ ܕܶܝܢ ܕܳܐܦ ܡܺܐܡܪܳܐ ܗܰܘ ܕܺܝܠܳܟ. ܥܒܶܕ ܠܺܝ ܕܽܘܟܬܳܐ ܐܰܝܟܰܢܳܐ ܕܶܐ݀ܥܡܰܪ. ܗܳܝ ܡܰܢ ܗܳܟܺܝܠ ܕܢܦܰܬܶܝܗ̇ ܘܢܰܪܽܘܚܶܝܗ̇ ܠܕܽܘܟܬܳܐ܆ ܐܰܘ ܢܨܰܒܬܺܝܗ̇ ܒܝܰܕ ܡܥܰܠܝܽܘܬܳܐ ܕܗܽܘ̈ܠܰܐܤ܆ ܕܺܝܠܟܽܘܢ ܐܺܝܬܶܝܗ̇. ܕܬܰܟܫ̈ܦܳܬܳܐ ܕܶܝܢ ܕܺܝܠܳܗ̇ ܐܺܝܬܶܝܗ̇ ܥܒܳܕܳܐ. ܗܳܝ ܕܳܐܦ ܐܶܢܳܐ ܙܥܽܘܪܳܐ ܐܰܫܡܰܥ ܡܶܢ ܗܰܘ ܕܶܐܡܰܪ܆ ܦܰܬܳܐ ܦܽܘܡܳܟ ܘܶܐ݀ܡܠܶܝܘܗ̱ܝ^[46]܆ ܠܘܳܬ ܗܳܝ ܕܬܶܫܟܰܚ ܕܳܐܦ ܡܺܐܡܪ̈ܶܐ ܕܝܰܬܺܝܪ ܡܫܰܡܠܶܝܢ ܬܶܥܒܶܕ. ܟܽܠܰܢ ܕܶܝܢ ܒܪܰܡ ܟܰܕ ܠܳܐ ܡܶܙܕܰܪܒܺܝܢ ܚ̱ܢܰܢ ܡܶܛܽܠ ܚܰܬܺܝܬ̣ܽܘܬ̣ܳܐ ܕܦܽܘܩ̈ܕܳܢܶܐ ܐܶܘܰܢܓ̈ܶܠܳܝܶܐ܆ ܐܶܠܳܐ ܚܘܺܝܚܳܐܺܝܬ ܒܺܐܝ̈ܕܰܝܗܽܘܢ ܡܗܰܠܟܺܝܢܰܢ܆ ܥܰܡ ܗܰܘ ܕܰܡܙܰܡܰܪ ܢܺܐܡܰܪ ܠܘܳܬ ܐܰ‌ܠܳܗܳܐ ܗܰܘ ܕܶܐܬܒܰܣܰܪ ܘܰܦܪܰܩ ܠܰܢ܆ ܪܘܺܝܚܳܐ ܐܺܝܬܰܘܗ̱ܝ ܦܽܘܩܕܳܢܳܟ ܣܰܓܺܝ^[47]. ܘܰܐܪܘܰܚ̣ܬ ܦܣܳܥ̈ܳܬܳܐ ܕܺܝܠܝ ܬܚܽܘܬ̣ܰܝ܆ ܘܠܳܐ ܐܶܬܡܚ̣̈ܶܠܝܢ ܗܰܠ̈ܟܳܬܳܐ ܕܺܝܠܝ. ܐܶܪܕܽܘܦ ܠܰܒ̈ܥܶܠܕܒܳܒܶܐ ܕܺܝܠܝ ܘܰܐܕܪܶܟ ܐܶܢܽܘܢ܆ ܘܠܳܐ ܐܶ݀ܗܦܽܘܟ ܥܕܰܡܳܐ ܕܰܢܣܽܘܦܽܘܢ^[48]. ܒܥܶܠ̈ܕܒܳܒܶܐ ܕܶܝܢ ܕܺܝܠܰܢ ܐܺܝܬܰܝܗܽܘܢ܆ ܐܳܟܶܠܩܰܪܨܳܐ ܘܫ̈ܺܐܕܶܐ ܒܺܝ̈ܫܶܐ ܗܳܢܽܘܢ ܕܥܰܡܶܗ. ܢܶܪܕܽܘܦ ܐܶܢܽܘܢ ܠܗܳܠܶܝܢ܆ ܐܶܢܗܽܘ ܕܟܰܕ ܠܘܳܬ ܝܳܠܕܰܬ ܐܰ‌ܠܳܗܳܐ ܢܚܽܘܪ܆ ܓܰܒܪ̈ܶܐ ܡܰܢ ܠܚܰܝ̈ܶܐ ܢܰܟ̈ܦܶܐ ܘܰܟܢܺܝ̈ܟܶܐ ܢܝܰܩܰܪ܆ ܒܬܽܘ̈ܠܳܬܳܐ ܕܶܝܢ ܠܕܰܟܝܽܘܬܳܐ ܐܰܝܟ ܕܰܠܩܶܢܝܳܢܳܐ ܫܡܰܝܳܢܳܐ ܕܰܟܝܳܐ ܡܶܢ ܟܽܠܶܗ ܟܽܘܬܡܳܐ ܬܶܛܪ̈ܳܢ܆ ܗܳܠܶܝܢ ܕܶܝܢ ܕܰܬܚܶܝܬ ܢܺܝܪܳܐ ܕܙܽܘܘܳܓܳܐ܆ ܠܪܶܚܡܰܬ ܓܰܒܪ̈ܶܐ ܘܰܠܪܶܚܡܰܬ ܒܢܰܝ̈ܳܐ ܫܰܪܺܝܪܳܐܺܝܬ ܘܕܰܟܝܳܐܺܝܬ ܬܫܰܘ̈ܙܒܳܢ ܐܰܝܟܰܢܳܐ ܕܰܕܟܺܝܬܳܐ ܒܝܰܕ ܟܽܠܗܶܝܢ ܬܶܬܢܛܰܪ ܥܰܪܣܳܐ ܕܡܰܫܟܒܳܐ܆ ܣܳܥܽܘܪܽܘܬܳܐ ܕܶܝܢ ܓܰܘܳܢܳܝܬܳܐ ܬܶܗܘܶܐ ܘܰܠܓܰܒܪ̈ܶܐ ܘܰܠܢܶܫ̈ܶܐ܆ ܪܶܚܡܰܬ ܐ̱ܢܳܫܽܘܬܳܐ ܕܰܠܘܳܬ ܗܳܢܽܘܢ ܕܡܶܣܟܺܢܺܝܢ. ܚܰܕ ܗܘ ܓܶܝܪ ܤܛܰܐܕܝܘܢ ܕܰܡܝܰܬܪܽܘܬܳܐ ܠܟܽܠܢܳܫ܆ ܡܶܛܽܠ ܟܺܝܬ ܕܳܐܦ ܚܰܕ ܗ̱ܘ̣ ܦܽܘܪܩܳܢܳܐ ܘܚܰܕ ܣܰܒܪܳܐ܆ ܘܣܳܝܽܘܡܽܘܬ ܒܢܰܝ̈ܳܐ ܫܰܘܝܰܬ ܒܺܐܝܩܳܪܳܐ܆ ܘܳܐܦ ܠܕܶܟܪܳܐ ܘܳܐܦ ܠܢܶܩܒܬܳܐ܆ ܘܳܐܦ ܡܰܘܗܰܒܬܐ ܕܪܽܘܚܳܐ.

ܘܠܳܐ ܝܳܕܰܥ ܐ̱ܢܳܐ ܟܰܕ ܡܶܢ ܐܰܝܟܳܐ ܐ̱ܢܳܫܺܝ̈ܢ ܐܶܬܬܙܺܝܥܘ ܗܳܪܟܳܐ܆ ܡܶܢ ܗܳܝ ܕܢܺܐܡܪ̈ܳܢ ܫܽܘܒܚܳܐ ܒܬܶܫܡܶܫܬܳܐ ܕܡܰܙܡܽܘܪ̈ܶܐ ܟܠ̣ܰܘ ܐܶܢܶܝܢ ܠܢܶܫ̈ܶܐ. ܦܰܘܠܽܘܤ ܓܶܝܪ ܐܶܡܰܪ܆ ܠܡܰܠܳܦܽܘ ܕܶܝܢ ܠܰܐܢ̱ܬܬܳܐ ܠܳܐ ܡܰܦܶܤ ܐ̱ܢܳܐ^[49]. ܠܰܘ ܓܶܝܪ ܕܠܳܐ ܬܺܐܡܰܪ ܫܽܘܒܚܳܐ. ܐܶܢ ܓܶܝܪ ܡܶܢ ܗܳܝ ܕܢܺܐܡܪ̈ܳܢ ܫܽܘܒܚܳܐ܆ ܒܳܗ̇ ܟܰܕ ܒܳܗ̇ ܒܡܶܠܬܳܐ܆ ܘܳܐܦ ܡܶܢ ܗܳܝ ܕܰܢܙܰܡܪ̈ܳܢ ܢܶܬܟܰܠ̈ܝܳܢ. ܐܶܢܕܶܝܢ ܗܳܕܶܐ ܘܠܳܐ ܚܰܕ ܢܳܡܽܘܣܳܐ ܟܳܠܶܐ܆ ܐܳܦܠܳܐ ܥܰܠ ܗܳܝ ܢܶܬܚܰܣ̈ܡܳܢ. ܐܶܢܳܐ ܕܶܝܢ܆ ܐܳܦ ܕܳܐܡܪܳܐ ܫܽܘܒܚܳܐ ܐܰܢ̱ܬܬܳܐ ܐܶܚܰܘܶܐ ܠܳܟ ܒܰܟܬܳܒܳܐ ܐܰ‌ܠܳܗܳܝܳܐ. ܟܰܕ ܓܶܝܪ ܦܶܪܥܽܘܢ ܐܶܬܛܰܒܰܥ ܐܰܟܚܕܳܐ ܥܰܡ ܪ̈ܰܟܫܳܐ ܘܡܰܪ̈ܟܒܳܬܳܐ܆ ܙܳܡܰܪ ܗ̱ܘܳܐ ܡܽܘܫܶܐ܆ ܢ݀ܫܰܒܰܚ ܠܡܳܪܝܳܐ^[50]. ܡܫܰܒܚܳܐܺܝܬ ܓܶܝܪ ܡܫܰܒܰܚ. ܢܳܩܫܳܐ ܗ̱ܘܳܬ ܕܶܝܢ ܐܦ ܡܰܪܝܰܡ ܚܳܬܶܗ ܕܡܽܘܫܶܐ ܒܰܦܠܰܓܳܐ܆ ܟܰܕ ܗܺܝ ܟܰܕ ܗܺܝ ܐܳܡܪܳܐ ܗ̱ܘܳܬ ܘܰܡܥܰܢܝܳܐ ܗ̱ܘܳܬ ܩܕܳܡ ܓܽܘܕܳܐ ܕܢܶܫ̈ܶܐ܆ ܢܫܰܒܰܚ ܠܡܳܪܝܳܐ. ܡܫܰܒܚܳܐܺܝܬ ܓܶܝܪ ܡܫܰܒܰܚ^[51]. ܐܰܝܟܰܢܳܐ ܟܺܝܬ ܕܰܡܡܰܠܠܽܘܬ ܫܽܘܒܚܳܐ ܡܳܕܶܝܢ ܕܓܰܘܳܐ ܗܝ܆ ܘܠܳܐ ܗ̱ܘܳܐ ܕܺܝܠܳܝܬܐ ܗܝ ܕܓܰܒܪ̈ܶܐ ܒܰܠܚܽܘܕ. ܐܶܠܳܐ ܓܶܝܪ ܠܳܐ ܝܶܕܥܶܬ܆ ܕܰܐܝܟܰܢܳܐ ܟܰܕ ܠܢܶܫ̈ܶܐ ܨܳܒܶܐ ܐ̱ܢܳܐ ܕܶܐ݀ܥܰܕܰܪ܆ ܘܠܳܐ ܠܐ̱ܢܳܫ ܐ̱ܚܪܺܢܳܐ ܐܶܠܳܐ ܐܶܢ ܠܡܰܪܝܰܡ ܬܽܘܒ ܐܶܫܟܚܶܬ̣ ܣܢܺܐܓܪܳܐ. ܡܳܕܶܝܢ ܟܰܕ ܠܰܫܟܳܚ̈ܳܬܳܐ ܐ̱ܢܳܫܳܝ̈ܳܬܳܐ ܗܘ̣ܰܝ̈ܬܶܝܢ ܚܠܺܝ̈ܡܳܢ ܐܳܡܪܺܝܢ ܚ̱ܢܰܢ܆ ܠܢܳܡܽܘܣ̈ܶܐ ܐܰ‌ܠܳܗܳܝ̈ܶܐ ܢܶ݀ܬܬܦܺܝܤ܆ ܘܰܢ݀ܫܰܒܰܚ ܠܗܰܘ ܕܰܒܝܰܕ ܝܳܠܕܰܬ ܐܰ‌ܠܳܗܳܐ ܟܰܢܟܶܗ ܠܓܶܢܣܳܐ ܕܢܶܩ̈ܒܳܬܳܐ܆ ܘܠܺܝܠܺܝܕܽܘܬܳܐ ܕܺܝܠܰܢ ܒܰܪܶܟ. ܠܗܰܘ ܕܳܐܦ ܐܽܘܚܕܳܢܳܐ ܦܐܶܐ ܘܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܕܰܬܡܳܢܺܝܢ ܘܰܬܠܳܬܳܐ.

ܠܘܩܐ. 2: 14[1]

ܣܶܦܪܐ ܕܒܪܝܬܐ. 3: 10 [2]

ܣܶܦܪܐ ܕܒܪܝܬܐ. 6: 3 [3]

 ܡܶܬܢܰܫܝܳܢܽܘܬܳܐ[4]

ܡܝܟܐ. 6: 3 [5]

ܐܫܥܝܐ. 45: 22 [6]

ܐܫܥܝܐ. 46: 12 ـ 13 [7]

ܐܪܡܝܐ. 2: 12 ـ 13 [8]

ܠܡܰܕܒܪܳܐ[9]

 ܠܨܶܒܬܳܐ ܕܚܰܕܝܳܐ[10]

ܐܪܡܝܐ. 2: 31 ـ 32 [11]

 ܝܘܚܢܢ. 1: 14 [12]

ܥܒܪ̈ܝܐ. 1: 3 [13]

ܡܬܝ. 8: 20  ܐܦ ܠܘܩܐ. 9: 58 [14]

ܠܘܩܐ. 2: 7 [15]

ܦܝܠܝܦܣ̈ܝܐ. 2: 6 ـ 7[16]

ܥܒܪ̈ܝܐ. 4: 15 [17]

ܦܝܠܝܦܣ̈ܝܐ. 2: 7 [18]

ܡܬܝ. 20: 28  ܐܦ ܡܪܩܘܣ. 10: 45 [19]

ܐܫܥܝܐ. 52: 6 [20]

ܬܶܢܝܢ ܢܡܘܣܐ. 7: 6  ܐܦ 14: 2 [21]

ܐܫܥܝܐ. 52: 7 [22]

ܐܫܥܝܐ. 52: 5 ـ 10 [23]

ܠܘܩܐ. 2: 14 [24]

ܘܰܐܝܟ ܕܰܠܡܺܐܡܰܪ[25]

ܐ. ܝܘܚܢܢ. 1: 1 [26]

ܐܫܥܝܐ. 6: 9  ܐܦ ܡܦܩܢܐ. 19: 10 [27]

ܐܫܥܝܐ. 11: 9 [28]

ܐܫܥܝܐ. 7: 14 [29]

ܘܰܕܠܰܬܪ̈ܺܝܨܳܬܳܐ[30]

ܬܢܝܢ ܢܡܘܣܐ. 22: 27 [31]

ܕܰܝܳܢ̈ܶܐ. 21: 11 ـ 12 [32]

ܐ. ܡܠ̈ܟܐ. 1: 1 ـ 4[33]

ܐܫܥܝܐ. 7: 14 [34]

ܐܫܥܝܐ. 7: 15 [35]

 ܕܡܶܢܗܶܝܢ[36]

[37] ܚܶܐܘܬܐ ܒܠܶܫܳܢܳܐ ܝܰܘܢܳܝܳܐ܆ ܒܽܘܛܘܪܘܢ ܐܰܘ ܟܺܝܬ ܓܒܶܬܳܐ ܕܬܰܘܪ̈ܶܐ ܡܶܬܩܰܪܝܳܐ. ܡܶܛܽܠܗܳܕܶܐ ܐܰܝܬܺܝ ܡܰܠܦܳܢܳܐ ܗܳܪܟܳܐ ܥܽܘܗܕܳܢܳܐ ܕܬܰܘܪܳܐ.

ܡ̈ܬܠܐ. 14: 4 [38]

ܚܙܩܝܐܝܠ. 3: 3[39]

ܐܫܥܝܐ. 7: 15 [40]

ܐܫܥܝܐ. 9: 6 [41]

ܝܘܚܢܢ. 1: 9[42]

ܝܥܩܘܒ. 1: 17 [43]

 ܠܶܗ[44]

ܐܫܥܝܐ. 49: 20 [45]

ܡܙܡܘܪ̈ܐ. 81: 10 [46]

ܡܙܡܘܪ̈ܐ. 118: 96 [47]

ܡܙܡܘܪ̈ܐ. 18: 37 ـ 38 [48]

ܐ. ܛܝܡܬܐܘܣ. 2: 12 [49]

ܡܦܩܢܐ. 15: 1[50]

ܡܦܩܢܐ. 15: 21 [51]