ܡܺܐܡܪܳܐ ܕܰܬܡܳܢܺܝܢ ܘܰܬܪܶܝܢ
ܥܰܠ ܦܶܬܓܳܡ̈ܶܐ ܕܶܐܘܰܢܓܶܠܺܝܽܘܢ ܗܳܠܶܝܢ ܕܢܳܩܦܺܝܢ ܠܗܳܠܶܝܢ ܕܩܰܕܶܡܘ ܐܶܬܒܰܚܰܢܘ ܒܡܺܐܡܪܳܐ ܗܰܘ ܕܰܩܕܳܡ ܐܶܬܶܐܡܰܪ. ܒܗܰܘ ܝܰܘܡܳܐ ܩܪܶܒܘ ܬܰܠ̈ܡܺܝܕܶܐ ܠܘܳܬ ܝܶܫܽܘܥ ܟܰܕ ܐܳܡܪܺܝܢ: ܡܰܢܽܘ ܐܰܪܰܐ ܐܺܝܬܰܘܗ̱ܝ ܕܝܰܬܺܝܪ ܪܰܒ ܒܡܰܠܟܽܘܬܳܐ ܕܰܫܡܰܝܳܐ[1]܆ ܘܥܰܠ ܗܳܠܶܝܢ ܕܫܰܪܟܳܐ.
82: ܦܳܬܽܘܪܳܐ ܡܠܺܝܠܳܐ ܘܰܡܫܰܪܬܚܳܐ ܕܰܟܬܺܝ̈ܒܳܬܳܐ ܐܶܘܰܢܓܶܠܳܝ̈ܳܬܳܐ܆ ܬܽܘܒ ܠܘܳܬ ܒܽܘܣܳܡܳܐ ܡܚܰܦܶܛ ܠܺܝ ܕܣܽܘ̈ܟܳܠܶܐ ܐܰܠܳܗܳܝ̈ܶܐ ܗܳܢܽܘܢ ܕܒܰܒ̈ܢܳܬ ܩ̈ܳܠܶܐ ܟܳܗ̈ܢܳܝܳܬܳܐ ܣܺܝܡܺܝܢ. ܘܟܰܕ ܝܰܬܺܝܪܳܐܺܝܬ ܠܥܰܝܢܳܐ ܡܒܰܚܢܳܢܺܝܬܳܐ ܕܬܰܪܥܺܝܬܳܐ ܕܺܝܠܝ ܠܳܛܶܫ ܘܡܰܚܪܶܦ܆ ܡܰܙܥܶܩ ܠܘܳܬܝ ܠܡܰܪܬܝܳܢܽܘܬܳܐ ܗܳܝ ܡܰܬܠܳܢܳܝܬܳܐ ܟܰܕ ܐܳܡܰܪ: ܦܬܰܚ ܥܰܝ̈ܢܰܝܟ ܘܰܣܒܰܥ ܠܰܚܡܳܐ[2]. ܗܳܢܽܘܢ ܓܶܝܪ ܕܰܙܥܽܘܪ̈ܝܳܬܳܐ ܚܳܙܶܝܢ܆ ܒܚܰܠܒܳܐ ܡܶܬܬܰܪܣܶܝܢ. ܩܕܳܡ ܕܶܝܢ ܗܳܢܽܘܢ ܕܰܒܩܰܢܳܝܽܘܬܳܐ ܗܘ̣ܰܘ܆ ܘܰܐܝܟ ܗܰܘ ܕܡܶܫܟܚܺܝܢ ܠܡܰܦܬܳܝܽܘ ܘܰܠܡܶܦܬܰܚ ܠܥܰܝ̈ܢܶܐ ܕܺܝܠܗܽܘܢ ܡܶܬܗܰܘܢܳܢ̈ܝܳܬܳܐ܆ ܬܽܘܪܣܳܝܳܐ ܡܫܰܡܠܝܳܐ ܗܰܘ ܕܠܰܚܡܳܐ ܣܺܝܡ܆ ܕܰܒܬܶܐܽܘܪܺܝܰܐ ܡܬܰܪܣܶܐ܆ ܘܰܠܗܰܘܢܳܐ ܡܣܰܒܰܥ܆ ܘܠܰܘ ܠܟܰܪܣܳܐ ܡܫܰܡܶܢ. ܕܰܐܝܠܶܝܢ ܗܳܟܺܝܠ ܐܺܝܬܰܝܗܶܝܢ ܒ̈ܢܳܬ ܩ̈ܳܠܶܐ ܗܳܢܶܝܢ ܕܢܳܩ̈ܦܳܢ ܠܗܳܠܶܝܢ ܕܩܰܕܶܡ̈ܝ̱ ܐܶܬܒܰܚܰܢ̈ܝ̱ ܡܶܢܰܢ ܢܺܐܠܰܦ. ܒܗܰܘ ܝܰܘܡܳܐ ܩܪܶܒܘ ܬܰܠ̈ܡܺܝܕܶܐ ܠܘܳܬ ܝܶܫܽܘܥ ܟܰܕ ܐܳܡܪܺܝܢ: ܕܡܰܢܽܘ ܐܰܪܰܐ ܐܺܝܬܰܘܗ̱ܝ ܕܝܰܬܺܝܪ ܪܰܒ ܒܡܰܠܟܽܘܬܳܐ ܕܰܫܡܰܝܳܐ[3].
ܣܰܓܺܝ ܛܳܒܳܐܺܝܬ ܘܰܢܛܺܝܪܳܐܺܝܬ ܪܫܰܡܬܳܗ̇ ܡܶܠܬܳܐ ܠܗܳܝ ܕܰܒܗܰܘ ܝܰܘܡܳܐ܆ ܟܰܕ ܡܰܠܦܳܐ ܠܰܢ ܠܥܶܠܬܶܗ ܕܫܽܘܐܴܠܳܐ. ܡܶܛܽܠ ܓܶܝܪ ܕܝܰܩܪܶܗ ܦܳܪܽܘܩܰܢ ܠܦܶܛܪܽܘܤ ܒܡܰܪܡܝܳܢܽܘܬܳܐ ܗܳܝ ܕܗܳܢܽܘܢ ܬܪ̈ܰܝܳܢܰܝ ܙܽܘ̈ܙܶܐ܆ ܟܰܕ ܐܰܠܘܬܶܗ ܠܶܗ ܘܶܐܡܰܪ܆ ܗܰܒ ܠܗܽܘܢ ܚܠܳܦܰܝ ܘܰܚܠܳܦܰܝܟ[4]܆ ܡܶܚܕܳܐ ܒܰܪ ܫܳܥܬܶܗ ܐܳܦ ܒܶܗ ܒܝܰܘܡܳܐ ܗܰܘ܆ ܡܶܕܶܡ ܐ̱ܢܳܫܳܝܳܐ ܚܰܫܘ ܬܰܠ̈ܡܺܝܕܶܐ ܗܳܢܽܘܢ ܕܫܰܪܟܳܐ܆ ܟܰܕ ܐܶܫܬܰܪܓܰܠܘ ܠܘܳܬ ܚܰܫܳܐ ܕܰܛܢܳܢܳܐ. ܐܶܠܳܐ ܟܒܰܪ ܬܺܐܡܰܪ܆ ܙܶܠ ܠܗܰܠ. ܠܰܫ̈ܠܺܝܚܶܐ ܡܰܥܶܠ ܐܰܢ̱ܬ ܠܺܝ܆ ܕܶܐܙܕܟܺܝܘ ܡܶܢ ܚܰܫܳܐ܆ ܐܺܝܢ ܐܳܡܰܪ ܐ̱ܢܳܐ܆ ܟܰܕ ܠܳܐ ܣܳܟ ܒܳܗܶܬ ܐ̱ܢܳܐ. ܐܰܝܟܰܢܳܐ ܕܬܶܬܕܰܡܰܪ ܐܳܦ ܒܡܶܬܥܰܢܘܳܝܽܘܬܗܽܘܢ[5] ܟܺܝܬ ܘܒܰܡܝܰܬܪܽܘܬܗܽܘܢ ܕܬܰܠ̈ܡܺܝܕܶܐ܆ ܐܳܦ ܒܰܐܠܳܗܳܝܽܘܬܳܐ ܘܰܡܥܰܠܝܽܘܬܳܐ ܕܗܰܘ ܕܰܪܕܳܐ ܐܶܢܽܘܢ. ܒܢܰܝ̈ܢܳܫܳܐ ܓܶܝܪ ܐܳܦ ܗܶܢܽܘܢ ܐܺܝܬܰܝܗܽܘܢ ܗ̱ܘܰܘ ܒܰܟܝܳܢܳܐ܆ ܘܰܕܒܶܗ ܟܰܕ ܒܶܗ ܒܛܺܝܢܳܐ ܐܶܫܬܰܘܬܰܦܘ ܠܰܢ܆ ܘܠܳܐܕܳܡ ܐܺܝܬ ܗ̱ܘܳܐ ܠܗܽܘܢ ܐܰܒܳܐ ܩܰܕܡܳܝܳܐ. ܘܰܠܬܰܪܥܺܝܬܗܽܘܢ ܗܳܝ ܕܰܐܝܟ ܕܰܟܬܺܝܒ܆ ܝܰܨܺܝܦܳܐܺܝܬ ܣܺܝܡܳܐ ܗ̱ܘܳܬ ܥܰܠ ܒܺܝ̈ܫܳܬܳܐ ܡܶܢ ܛܰܠܝܽܘܬܳܐ܆ ܒܗܽܘܓܳܝܳܐ ܣܳܥܽܘܪܳܝܳܐ ܘܰܒܡܰܪ̈ܕܘܳܬܳܐ ܘܝܽܘܠ̈ܦܳܢܶܐ ܕܡܰܠܦܳܢܗܽܘܢ܆ ܒܩܰܠܺܝܠ ܩܰܠܺܝܠ ܡܶܢ 222ܫܥܺܝܢܳܐ ܢܬܰܦܘ ܐܰܣܩܽܘܗ̇܆ ܘܰܡܪܰܩܘ ܠܒܰܪܢܳܫܳܐ ܗܰܘ ܥܰܬܺܝܩܳܐ. ܘܰܠܘܳܬ ܗܳܢܳܐ ܟܽܠܶܗ ܪܰܘܡܳܐ ܪܕܰܦܘ ܘܰܣܠܶܩܘ܆ ܐܰܝܟܰܢܳܐ ܕܳܐܦܠܳܐ ܒܢܰܝ̈ܢܳܫܳܐ ܬܽܘܒ ܢܶܣܬܰܒܪܽܘܢ܆ ܐܳܦܠܳܐ ܡܰܦܰܩ ܒܪܽܘܚܳܐ ܡܶܕܶܡ ܬܽܘܒ ܢܶܫܒܩܽܘܢ ܠܰܢ ܠܰܒ̈ܢܰܝ ܓܶܢܣܗܽܘܢ܆ ܟܰܕ ܡܰܒܣܶܝܢ ܚ̱ܢܰܢ ܘܡܰܗܡܶܝܢ ܚ̱ܢܰܢ ܡܰܐܺܝܢܳܐܺܝܬ܆ ܘܠܰܘ ܠܘܳܬܳܗ̇ ܟܰܕ ܠܘܳܬܳܗ̇ ܕܰܡܫܽܘܚܬܳܐ ܡܶܬܡܰܛܶܝܢ ܚ̱ܢܰܢ܆ ܡܰܠܽܘܢ ܕܶܝܢ ܠܘܳܬ ܛܶܠܳܢܺܝܬܳܐ ܡܶܕܶܡ ܘܦܰܢܛܰܣܺܝܰܐ ܕܣܰܓܺܝ ܙܥܽܘܪܝܳܐ܆ ܕܡܰܪܕܺܝܬܳܐ ܕܰܠܘܳܬ ܗܳܠܶܝܢ ܕܰܠܥܶܠ. ܒܪܰܡ ܗܳܝܕܶܝܢ ܟܰܕ ܝܰܬܺܝܪ ܠܳܐ ܡܫܰܡܠܝܳܐܺܝܬ ܣܺܝܡܺܝܢ ܗ̱ܘܰܘ܆ ܕܰܚܣܰܡܘ ܒܦܶܛܪܺܘܤ ܡܶܛܽܠ ܐܺܝܩܳܪܶܗ ܐܶܣܬܒܰܪܘ. ܘܰܠܩܰܕܺܝܡܽܘܬ ܐܺܝܩܳܪܶܗ ܠܳܐ ܣܰܝܒܰܪܘ ܦܺܝܠܽܘܣܳܘܦܳܐܺܝܬ܆ ܗܳܢܽܘܢ ܕܡܶܢ ܒܳܬܰܪܟܶܢ ܠܘܳܬ ܟܽܠܳܗ̇ ܗܳܕܶܐ ܡܫܰܡܠܝܽܘܬܳܐ ܐܶܬܰܘ܆ ܐܰܝܟ ܕܳܐܦ ܡܳܟ̈ܣܶܐ ܘܨܰܝ̈ܳܕܶܐ ܟܬܺܝܒܳܐܺܝܬ ܗܶܢܽܘܢ ܠܗܽܘܢ ܢܰܘܕܽܘܢ܆ ܘܠܰܡܝܰܬܪ̈ܘܳܬܳܐ[6] ܕܰܫܠܺܝ̈ܚܶܐ ܚܰܒܪ̈ܰܝܗܽܘܢ ܐܰܟܙܢܳܐ ܕܥܰܠ ܩܳܝܶܡܬܳܐ ܢܶܓܠܦܽܘܢ ܒܰܟ̈ܬܺܝܒܳܬܳܐ.
ܒܰܕܓܽܘܢ ܠܡܰܪܩܽܘܤ ܐܶܘܰܢܓܶܠܺܝܣܛܳܐ ܕܺܐܝܬܰܘܗ̱ܝ ܬܰܠܡܺܝܕܳܐ ܕܦܶܛܪܽܘܤ܆ ܘܰܡܦܳܤ ܗ̱ܘܳܐ ܒܡܰܟܺܝܟܽܘܬܳܐ ܘܠܳܐ ܪܶܚܡܰܬ ܐܺܝܩܳܪܳܐ ܕܪܰܒܶܗ܆ ܡܶܫܟܚܺܝܢܰܢ ܠܶܗ ܕܫܰܬܶܩ ܐܶܢܶܝܢ ܠܪܰܘܪ̈ܒܳܬܳܐ ܗܳܠܶܝܢ ܕܗܰܘ܆ ܘܰܕܠܳܐ ܣܳܟ ܐܰܫܠܶܡ ܐܶܢܶܝܢ ܒܰܟܬܳܒܳܐ. ܕܰܐܝܟ ܐܰܝܟܰܢ. ܠܛܽܘܒܳܐ ܗܰܘ ܕܡܶܢ ܦܳܪܽܘܩܰܢ ܫܡܰܥ ܕܳܐܡܰܪ܆ ܛܽܘܒܰܝܟ ܫܶܡܥܽܘܢ ܒܰܪܝܰܘܢܳܐ܆ ܕܒܶܣܪܳܐ ܘܰܕܡܳܐ ܠܳܐ ܓܠܳܐ ܠܳܟ܆ ܐܶܠܳܐ ܐܳܒܝ ܗܰܘ ܕܒܰܫܡܰܝܳܐ. ܐܳܦ ܠܳܐ ܬܽܘܒ ܕܶܐܡܰܪ ܠܗܳܝ ܕܰܐܢ̱ܬ ܗ̱ܘ̣ ܦܶܛܪܽܘܤ ܐܰܘܟܺܝܬ ܫܽܘܥܳܐ܆ ܘܥܰܠ ܗܳܢܳܐ ܫܽܘܥܳܐ ܐܶ݀ܒܢܶܐ ܠܥܺܕܬܳܐ ܕܺܝܠܝ܆ ܘܳܐܦܠܳܐ ܕܶܐ݀ܬܶܠ ܠܳܟ ܩܠܺܝ̈ܕܶܐ ܕܡܰܠܟܽܘܬܳܐ ܕܰܫܡܰܝܳܐ[7]. ܘܳܐܦܠܳܐ ܕܟܰܕ ܐܶܬܦܩܶܕ ܗܰܠܶܟ ܥܰܠ ܝܰܡܳܐ܆ ܘܳܐܦܠܳܐ ܪܡܳܝܶܗ ܕܒܰܠܽܘܥܳܐ ܘܨܰܝܕܶܗ ܕܗܰܘ ܢܽܘܢܳܐ ܘܰܫܟܳܚܬܳܗ̇ ܕܶܐܣܬܺܝܪܳܐ܆ ܘܕܺܐܝܩܳܪܳܐ ܗܰܘ ܕܶܐܬܝܰܩܰܪ ܟܰܕ ܐܶܬܬܰܠܘܰܬ ܥܰܡ ܡܫܺܝܚܳܐ ܒܝܰܕ ܒܰܪ̱ܬ ܩܳܠܳܐ ܗܳܝ ܕܦܶܩܕܰܬ ܠܶܗ܆ ܕܰܠܗܳܝ ܗܰܒ ܚܠܳܦܰܝ ܘܰܚܠܳܦܰܝܟ[8]. ܘܟܰܕ ܠܟܽܠܗܶܝܢ ܗܳܠܶܝܢ ܕܰܡܪܰܡܪ̈ܡܳܢ ܥܒܰܪ܆ ܠܒܽܘܨܳܪ̈ܶܐ ܣܳܐܶܡ. ܕܶܐܬܟܰܐܐܺܝ ܒܶܗ ܟܺܝܬ ܘܰܫܡܰܥ ܕܙܶܠ ܠܳܟ ܠܒܶܣܬܰܪܝ ܤܳܛܳܢܳܐ[9]܆ ܘܰܕܡܶܢ ܐܰܡܬܽܘܢܺܝܬܳܐ ܚܕܳܐ ܕܚܶܠ ܘܰܟܦܰܪ ܬܠܳܬ ܙܰܒ̈ܢܺܝܢ.
ܐܶܠܳܐ ܒܪܰܡ ܗܳܢܽܘܢ ܕܕܰܐܝܟ ܗܳܟܰܢ ܘܰܕܕܰܐܝܟ ܗܳܠܶܝܢ܆ ܘܕܰܒܝܰܕ ܬܰܪܥܺܝܬܳܐ ܡܰܟܺܝܟܬܳܐ ܠܘܳܬ ܡܕܰܡܝܳܢܽܘܬܳܐ ܡܰܛܺܝܘ ܐܰܝܟ ܕܡܶܫܟܚܳܐ ܠܰܒܢܰܝ̈ܢܳܫܳܐ܆ ܕܝܶܫܽܘܥ ܦܳܪܽܘܩܳܐ ܐܰܠܳܗܳܐ܆ ܗܰܘ ܕܣܰܪܶܩ ܗܽܘ ܠܶܗ ܘܰܕܡܽܘܬܳܐ ܕܥܰܒܕܳܐ ܢܣܰܒ[10]܆ ܗܳܝܕܶܝܢ ܟܰܕ ܒܥܽܘܩܣܳܐ ܕܰܛܢܳܢܳܐ ܒܠܰܥܘ܆ ܡܶܛܽܠ ܗܳܝ ܕܰܫܡܰܥ ܦܶܛܪܽܘܤ ܕܰܠܗܳܝ ܗܰܒ ܚܠܳܦܰܝ ܘܰܚܠܳܦܰܝܟ܆ ܠܰܡܫܺܝܚܳܐ ܡܫܰܐܠܺܝܢ ܗ̱ܘܰܘ. ܕܡܰܢܽܘ ܐܰܪܰܐ ܐܺܝܬܰܘܗ̱ܝ ܗܰܘ ܕܝܰܬܺܝܪ ܪܰܒ ܒܡܰܠܟܽܘܬܳܐ ܕܰܫܡܰܝܳܐ.
ܚܙܺܝ ܠܺܝ ܕܶܝܢ ܐܰܝܟܰܢܳܐ ܐܳܦ ܒܽܘܨܳܪ̈ܶܐ ܗܳܢܽܘܢ ܕܺܝܠܗܽܘܢ܆ ܥܶܩ̈ܒܳܬܳܐ ܘܫܽܘܘ̈ܕܳܥܶܐ ܡܰܝܬܶܝܢ ܕܰܚܠܺܝܛܺܝܢ ܒܰܡܝܰܬܪܽܘܬܳܐ ܗܳܝ ܕܡܶܬܪܕܶܝܢ ܗ̱ܘܰܘ. ܡܶܬܚܪܶܝܢ ܓܶܝܪ ܡܶܛܽܠ ܩܰܕܡܳܝܽܘܬܳܐ ܘܡܶܛܽܠ ܛܶܟܣܳܐ ܗܰܘ ܕܝܰܬܺܝܪ ܪܰܒ܆ ܗܰܘ ܕܰܒܡܰܠܟܽܘܬܳܐ ܕܰܫܡܰܝܳܐ܆ ܟܰܕ ܚܢܰܢ ܡܡܰܪܝܳܢܽܘܬܳܐ ܣܰܩܽܘܒܠܳܝܬܳܐ ܘܒܺܝܫܬܳܐ ܠܘܳܬ ܚ̈ܕܳܕܶܐ ܡܡܰܪܶܝܢ ܚ̱ܢܰܢ܆ ܕܡܰܢܽܘ ܝܰܬܺܝܪܳܐܺܝܬ ܢܶܛܡܽܘܪ ܗܽܘ ܠܶܗ ܒܰܐܪܥܳܐ ܘܢܶܬܥܰܪܓܰܠ ܒܰܣܝܳܢܳܐ܆ ܘܰܠܟܽܘ̈ܒܶܐ ܕܝܰܨܺܝܦ̈ܘܳܬܳܐ ܥܳܠܡܳܢܳܝ̈ܳܬܳܐ ܢܪܰܒܶܐ܆ ܕܡܰܢܽܘ ܒܰܝܬܳܐ ܢܰܨܺܝܚܳܐ ܢܶܒܢܶܐ܆ ܘܥܰܠ ܗܰܘ ܕܺܐܝܬܰܘܗ̱ܝ ܗܰܘ ܕܠܳܐ ܐܺܝܬܰܘܗ̱ܝ ܢܰܘܣܶܦ܆ ܘܰܠܗܰܘ ܕܰܫܒܳܒܶܗ ܢܰܘܣܶܦ ܢܒܽܘܙ. ܕܡܰܢܽܘ ܢܶܚܛܽܘܦ ܢܽܘܡܺܐ ܕܩܰܢܳܝܽܘܬܳܐ ܗܳܝ ܕܠܳܐ ܙܳܕܩܳܐ ܠܶܗ܆ ܘܺܐܝܬ ܐܶܡܰܬܝ ܕܠܰܐܪܡܰܠܬܳܐ ܘܰܠܝܰܬܡܳܐ ܢܶܕܒܰܪ ܒܰܩܛܺܝܪܳܐ ܕܡܶܢ ܗܳܕܶܐ ܢܶܪܚܩܽܘܢ. ܠܦܽܘܪ̈ܓܳܝܶܐ ܓܶܝܪ ܘܰܠܡܰܨ̈ܘܳܬܳܐ ܪ̈ܳܚܡܳܬ ܚܶܪ̈ܝܳܢܶܐ ܗܳܢܶܝܢ ܕܰܒܚ̈ܙܘܳܢܶܐ ܕܪ̈ܰܟܫܳܐ ܘܕܰܒܡܰܫܟܢܳܐ܆ ܘܰܠܪ̈ܶܚܡܳܬܳܐ ܗܳܠܶܝܢ ܡܦܰܠ̈ܓܳܬܳܐ ܘܕܰܠܩܽܘܒ̈ܠܳܝܳܬܳܐ܆ ܐܳܦ ܕܺܐ݀ܡܰܪ ܡܶܬܚܰܡܰܨ ܐ̱ܢܳܐ. ܠܗܳܢܽܘܢ ܓܶܝܪ ܕܰܒܗܳܠܶܝܢ ܥܢܶܝܢ܆ ܘܪܰܘܳܝܽܘܬܳܐ ܗܳܝ ܥܰܡܺܝܩܬܳܐ ܪܘܶܝܢ܆ ܘܳܐܦܠܳܐ ܕܰܒܣܽܘܥܪ̈ܳܢܶܐ ܕܰܐܪܥܳܐ ܡܰܪܓܫܺܝܢ ܚܳܙܶܐ ܐ̱ܢܳܐ ܠܗܽܘܢ܆ ܫܒܽܘܩ ܕܰܒܡܰܠܟܽܘܬܳܐ ܕܰܫܡܰܝܳܐ ܢܶܪܓܫܽܘܢ.
ܐܶܠܳܐ ܝܶܫܽܘܥ ܗܰܘ ܐܳܣܝܳܐ ܘܥܳܒܽܘܕܳܐ ܕܢܰܦ̈ܫܳܬܳܐ ܕܺܝܠܰܢ܆ ܘܳܐܦܠܳܐ ܠܰܛܢܳܢܗܽܘܢ ܕܰܒܛܳܒ̈ܳܬܳܐ ܕܬܰܠ̈ܡܺܝܕܶܐ ܩܰܒܶܠ. ܙܳܕܶܩ ܓܶܝܪ ܕܢܶܛܰܢ ܡܰܢ ܒܛܳܒ̈ܳܬܳܐ ܘܠܰܩܕܳܡܰܝܢ ܢܶܪܗܰܛ. ܠܡܰܨܠ̈ܚܳܢܘܳܬܳܐ ܕܶܝܢ ܕܰܐܚܰܝ̈ܢ܆ ܒܰܝܬܳܝ̈ܳܬܳܐ ܕܺܝܠܰܢ ܢܶܚܫܽܘܒ ܕܺܐܝܬܰܝܗܶܝܢ. ܝܰܬܺܝܪܳܐܺܝܬ ܓܶܝܪ ܒܫܰܦܺܝܪ̈ܳܬܳܐ ܗܳܠܶܝܢ ܕܡܶܬܚ̈ܰܙܝܳܢ ܛܳܡܰܪ ܤܳܛܳܢܳܐ ܦܰܚ̈ܶܐ ܡܛܰܫ̈ܰܝܳܐ. ܡܶܛܽܠ ܕܳܐܦ ܩܳܐܺܝܢ܆ ܪܶܗܛܳܐ ܛܳܒܳܐ ܡܡܰܪܶܐ ܗ̱ܘܳܐ ܒܰܐܚܽܘܗ̱ܝ. ܕܶܒܚܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܘܡܰܘܗܰܒܬܳܐ ܕܰܐܠܳܗܳܐ ܘܩܽܘܪܒܳܢܳܐ܆ ܗܳܝ ܕܡܶܬܝܰܨܦܳܐ ܗ̱ܘܳܬ ܠܰܬܪ̈ܰܝܗܽܘܢ. ܐܶܠܳܐ ܡܶܢ ܛܢܳܢܳܐ ܛܳܒܳܐ ܘܡܶܢ ܡܡܰܪܝܳܢܽܘܬܳܐ ܗܳܝ ܕܰܠܘܳܬ ܗܳܠܶܝܢ ܕܰܡܝܰܬܪ̈ܳܢ܆ ܠܘܳܬ ܚܣܳܡܳܐ ܗܰܘ ܕܝܰܬܺܝܪ ܡܶܢ ܟܽܠ ܒܺܝܫ ܢܦܰܠ܆ ܗܰܘ ܟܺܝܬ ܕܰܠܩܶܛܠܳܐ ܩܰܕܡܳܝܳܐ ܝܺܠܶܕ܆ ܘܛܰܢܶܦ ܠܝܰܡܺܝܢܳܐ ܐܰܚܳܢܳܝܬܳܐ. ܗܳܝ ܟܺܝܬ ܕܠܳܐ ܚܳܐܶܫ ܗ̱ܘܳܐ܆ ܐܶܠܽܘ ܠܳܐ ܕܰܒܪܶܚܡܬܳܐ ܕܩܰܕܡܳܝܽܘܬܳܐ ܘܰܕܫܽܘܒܚܳܐ ܣܪܺܝܩܳܐ܆ ܠܩܽܘܠܳܣܳܐ ܗܰܘ ܕܗܳܒܺܝܠ܆ ܢܽܘܟܪܳܝܳܐ ܘܠܰܘ ܒܰܝܬܳܝܳܐ ܕܺܝܠܶܗ ܚܰܫܒܶܗ.
ܡܶܛܽܠܗܳܕܶܐ ܟܰܕ ܡܶܢ ܫܶܪ̈ܫܰܘܗܝ[11] ܨܳܒܶܐ ܗ̱ܘܳܐ ܡܫܺܝܚܳܐ ܠܡܶܬܠܫܶܗ ܠܚܰܫܳܐ ܡܶܢ ܠܶܒܳܐ ܕܬܰܠ̈ܡܺܝܕܶܐ܆ ܟܰܕ ܒܛܶܟܣܳܐ ܕܫܽܘܪܳܪܳܐ ܕܰܒܡܰܘ̈ܡܳܬܳܐ ܡܰܦܶܩ ܠܳܗ̇ ܠܡܶܠܬܳܐ ܐܳܡܰܪ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܶܐܢ ܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܶܐ[12]܆ ܠܳܐ ܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ[13]. ܡܳܢܳܐ ܕܶܝܢ ܐܺܝܬܶܝܗ̇ ܗܳܝ ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܐܰܡܺܝܢ ܟܰܕ ܡܶܢ ܥܶܒܪܳܝܳܐ ܠܠܶܫܳܢܳܐ ܝܰܘܢܳܝܳܐ ܡܶܬܦܰܫܰܩ܆ ܡܫܰܘܕܰܥ ܢܶܗܘܶܐ. ܗܳܕܶܐ ܗܳܟܺܝܠ ܨܳܒܝܳܐ ܗܳܝ ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܗܳܝ ܕܡܶܢ ܟܽܠܦܪܽܘܤ ܥܬܺܝܕܳܐ ܕܬܶܗܘܶܐ ܐܳܡܰܪ ܐ̱ܢܳܐ ܠܟܽܘܢ. ܢܳܩܦܳܐ ܓܶܝܪ ܠܡ̈ܶܠܶܐ ܕܺܝܠܝ܆ ܗܳܝ ܕܢܶܗܘܶܐ ܡܶܕܶܡ. ܘܣܳܗܕܳܐ ܐܳܦ ܒܳܪܽܘܝܽܘܬܳܐ ܘܥܳܒܽܘܕܽܘܬܳܐ ܗܳܝ ܕܰܒܫܽܘܪܳܝܶܗ ܕܥܳܠܡܳܐ ܗܳܢܳܐ܆ ܕܰܒܗܳܝ ܕܗܳܘܶܐ ܗ̱ܘܳܐ ܡܶܕܶܡ ܡܚܰܬܡܳܐ ܠܳܗ̇ ܠܡܶܠܬܳܐ ܐܰܠܳܗܳܝܬܳܐ. ܐܳܦ ܓܶܝܪ ܐܶܡܰܪ ܐܰܠܳܗܳܐ ܢܶܗܘܶܐ ܢܽܘܗܪܳܐ܆ ܘܰܗܘ̣ܳܐ ܢܽܘܗܪܳܐ. ܢܶܗܘܶܐ ܪܩܺܝܥܳܐ. ܢܶܗܘܽܘܢ ܢܰܗܺܝܪ̈ܶܐ. ܘܟܽܠܗܶܝܢ ܗܘ̈ܰܝ[14]. ܐܰܟܙܢܳܐ ܗܳܟܺܝܠ ܕܒܰܢܒܺܝ̈ܶܐ ܟܰܕ ܨܳܒܶܐ ܗ̱ܘܳܐ ܕܰܢܚܰܘܶܐ ܠܠܳܐ ܡܶܬܥܰܒܪܳܢܽܘܬܳܐ ܕܡ̈ܶܠܶܐ ܕܺܝܠܶܗ܆ ܘܰܠܗܳܢܽܘܢ ܕܫܳܡܥܺܝܢ ܗ̱ܘܰܘ ܢܰܪܡܶܐ ܒܕܶܚܠܬܳܐ܆ ܐܳܡܰܪ ܗ̱ܘܳܐ ܒܺܝ ܝܺܡܺܝܬ[15]܆ ܟܰܕ ܒܶܐܣܟܺܡܳܐ ܕܡܰܘ̈ܡܳܬܳܐ ܦܰܐܝܽܘܬ ܐ̱ܢܳܫܳܐܺܝܬ ܡܶܛܽܠܳܬܰܢ ܡܶܬܚܰܫܰܚ ܗ̱ܘܳܐ܆ ܗܳܟܰܢܳܐ ܐܳܦ ܗܳܪܟܳܐ܆ ܠܗܳܝ ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܚܠܳܦ ܗܳܝ ܕܰܒܡ̈ܶܠܶܐ ܕܺܝܠܝ ܝܳܡܶܐ ܐ̱ܢܳܐ ܣܳܡ܆ ܗܳܠܶܝܢ ܕܡܶܢ ܟܽܠ ܦܪܽܘܤ ܥܬܺܝ̈ܕܳܢ ܕܢܶܦ̈ܩܳܢ ܠܰܥܒܳܕܳܐ܆ ܗܳܠܶܝܢ ܕܰܐܝܟ ܕܠܰܐܝܠܶܝܢ ܕܗܳܐ ܡܶܢ ܟܰܕܽܘ ܗܘ̈ܰܝ ܠܗܶܝܢ ܙܳܕܶܩ ܠܟܽܘܢ ܕܰܬܗܰܝܡܢܽܘܢ ܐܶܢܶܝܢ܆ ܘܠܰܘ ܐܰܝܟ ܕܠܰܐܝܠܶܝܢ ܕܡܶܬܰܐܡܳܪܽܘ ܡܶܬܐܰܡܪ̈ܳܢ ܒܰܠܚܽܘܕ. ܡܶܛܽܠ ܗܳܕܶܐ ܐܦ ܚܢܰܢ ܠܗܰܘ ܐܰܡܺܝܢ܆ ܗܳܟܰܢܳܐ ܠܘܳܬ ܬܶܫܒܽܘܚܬܳܐ ܡܰܣܩܺܝܢ ܚ̱ܢܰܢ ܠܶܗ܆ ܟܰܕ ܠܟܽܠܗܶܝܢ ܗܳܠܶܝܢ ܕܡܶܢܶܗ ܐܳܦ ܕܰܗܘ̈ܰܝ ܐܳܦ ܕܰܥܕܰܟܺܝܠ ܗܳܘ̈ܝܳܢ ܚܳܙܶܝܢ ܚ̱ܢܰܢ܆ ܘܕܰܥܬܺܝ̈ܕܳܢ ܕܢܶܗ̈ܘܝܳܢ ܡܶܢ ܟܽܠܦܪܽܘܤ ܡܗܰܝܡܺܢܝܢ ܚ̱ܢܰܢ.
ܘܠܳܐ ܐܶܡܰܪ ܕܶܐܢ ܠܳܐ ܬܶܗܘܽܘܢ ܐܰܝܟ ܛܠܳܝ̈ܶܐ܆ ܐܶܠܳܐ ܕܶܐܢ ܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܶܐ[16]. ܗܳܝ ܕܶܝܢ ܕܶܐܢ ܠܳܐ ܬܶܬܗܰܦܟܽܘܢ܆ ܠܰܟܦܽܘܪܝܳܐ ܘܰܠܡܰܗܦܟܽܘܬ ܐܰܦ̈ܶܐ ܡܫܰܡܠܰܝܬܳܐ ܕܡܶܢ ܒܰܪܢܳܫܳܐ ܗܰܘ ܥܰܬܺܝܩܳܐ ܘܚܰܫܳܢܳܝܳܐ ܡܫܰܘܕܥܳܐ. ܠܗܳܝ ܕܶܐܢ ܠܰܘ ܡܫܰܡܠܝܳܐܺܝܬ ܢܶܛܥܶܝܗ̇ ܐ̱ܢܳܫ܆ ܕܢܶܗܘܶܐ ܐܰܝܟ ܒܳܒܽܘܣܳܐ ܠܳܐ ܡܶܫܟܰܚ. ܐܳܦ ܓܶܝܪ ܠܰܡܚܰܠܳܠܽܘ ܘܰܠܡܶܡܪܩܶܗ ܠܐܰܕܪܺܝܢܛܳܐ ܗܰܘ ܥܰܬܺܝܩܳܐ ܐܶܬܳܐ ܡܫܺܝܚܳܐ܆ ܘܰܕܚܰܕܬܳܐ ܢܚܰܘܶܝܘܗ̱ܝ ܠܰܟܝܳܢܳܐ ܕܺܝܠܰܢ܆ ܟܰܕ ܠܳܐ ܐܺܝܬ ܒܶܗ ܟܽܘܬܡܳܐ ܐܰܘ ܩܶܡܛܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ. ܡܶܛܽܠ ܗܳܕܶܐ ܦܰܘܠܽܘܤ ܐܳܡܰܪ ܗ̱ܘܳܐ: ܐܶܢ ܐ̱ܢܳܫ ܐܺܝܬܰܘܗ̱ܝ ܒܰܡܫܺܝܚܳܐ܆ ܒܪܺܝܬܰܐ ܗܘ ܚܕܰܬܳܐ. ܗܳܠܶܝܢ ܥܰܬܺܝ̈ܩܳܬܳܐ ܥܒܰܪ̈ܝ̱ ܠܗܶܝܢ. ܗܳܐ ܗܘ̈ܰܝ ܟܽܠܗܶܝܢ ܚ̈ܰܕܬ̣ܳܬ̣ܳܐ[17]. ܗܳܕܶܐ ܗܳܟܺܝܠ ܕܢܶܬܗܦܰܟ܆ ܗܳܝ ܕܢܶܛܥܶܐ ܠܰܥ̈ܝܳܕܶܐ ܥܰܬܺܝ̈ܩܶܐ ܘܒܺܝ̈ܫܶܐ ܐܺܝܬܶܝܗ̇. ܗܳܟܰܢܳܐ ܐܳܦ ܢܒܺܝܳܐ ܕܰܘܺܝܕ ܡܙܰܡܰܪ ܗ̱ܘܳܐ܆ ܕܠܳܐ ܬܶܬܕܟܰܪ ܠܠܳܐ ܢܳܡܽܘܣܳܝ̈ܘܳܬܳܐ ܕܺܝܠܰܢ ܥܰܬܺܝ̈ܩܳܬܳܐ[18]. ܕܗܳܝ ܓܶܝܪ ܕܢܶܬܗܦܶܟ܆ ܠܫܽܘܚܠܳܦܳܐ ܕܚܰܝ̈ܶܐ[19] ܚ̈ܰܕܬܶܐ ܡܰܘܕܥܳܐ܆ ܘܰܠܩܰܛܰܣܛܰܣܺܝܤ ܐ̱ܚܪܺܬܳܐ ܕܰܠܘܳܬ ܗܳܠܶܝܢ ܕܰܡܝܰܬܪ̈ܳܢ܆ ܐܰܘܕܰܥ ܐܰܠܳܗܳܝܳܐ ܫܡܽܘܐܝܠ ܟܰܕ ܠܫܳܐܘܳܠ ܐܳܡܰܪ ܗ̱ܘܳܐ܆ ܘܢܶܫܟܰܢ ܥܠܰܝܟ ܪܽܘܚܶܗ ܕܡܳܪܝܳܐ ܘܬܶܬܢܰܒܶܐ܆ ܘܬܶܬܗܦܶܟ ܠܓܰܒܪܳܐ ܐ̱ܚܪܺܢܳܐ[20]. ܠܗܳܝ ܟܺܝܬ ܕܳܐܦ ܟܬܳܒܳܐ ܗܰܘ ܟܳܗܢܳܝܳܐ ܟܰܕ ܡܫܰܪܰܪ ܠܳܗ̇ ܐܶܡܰܪ܆ ܘܫܰܚܠܶܦ ܠܶܗ ܐܰܠܳܗܳܐ ܠܶܒܳܐ ܐ̱ܚܪܺܢܳܐ[21]. ܐܺܝܬ ܗ̱ܘ ܕܶܝܢ܆ ܐܳܦ ܡܶܢ ܛܳܒܬܳܐ ܠܘܳܬ ܒܺܝܫܬܳܐ ܡܶܬܗܰܦܟܳܢܽܘܬܳܐ. ܕܩܰܕܡܰܬ ܡܰܢ ܐܶܬܛܰܦܣܰܬ ܡܶܢ ܐܰܢ̱ܬܬܶܗ ܕܠܽܘܛ܆ ܕܶܐܬܗܰܦܟܰܬ ܠܘܳܬ ܣܕܽܘܡ ܘܰܗܘܳܬ ܩܳܝܶܡܬܳܐ ܕܡܶܠܚܳܐ܆ ܐܶܬܦܰܪܓܠܰܬ ܕܶܝܢ ܘܶܐܬܦܰܩܕܰܬ ܠܬܰܠ̈ܡܺܝܕܶܐ܆ ܘܰܐܝܟ ܐܰܝ̇ܕܳܐ ܕܙܳܕܶܩ ܕܢܶܩܕܽܘܡ ܢܶܙܕܗܰܪ ܘܢܶܥܪܽܘܩ ܡܶܢܳܗ̇ ܐܶܬܬܣܺܝܡܰܬ ܡܶܢ ܡܫܺܝܚܳܐ ܟܰܕ ܗܳܟܰܢܳܐ ܐܳܡܰܪ܆ ܐܶܬܕܰܟܪܘ ܠܰܐܢ̱ܬܬܶܗ ܕܠܽܘܛ܆ ܘܬܽܘܒ܆ ܘܠܳܐ ܐ̱ܢܳܫ ܕܪܳܡܶܐ ܐܺܝܕܶܗ ܥܰܠ ܩܺܝܩܢܳܐ ܘܚܳܐܰܪ ܠܒܶܣܬܪܶܗ܆ ܚܳܫܰܚ ܠܡܰܠܟܽܘܬܳܐ ܕܰܐܠܳܗܳܐ[22].
ܟܰܕ ܡܶܬܗܰܦܟܳܢܽܘܬܐ ܣܰܩܽܘܒܠܳܝܬܳܐ ܕܗܳܕܶܐ ܐܶܬܗܦܶܟܘ ܫܠܺܝܚ̈ܶܐ܆ ܘܰܕܟܽܠ ܟܽܠܶܗ ܠܒܶܣܬܰܪܗܽܘܢ ܠܳܐ ܚܳܪܘ܆ ܘܰܠܘܳܬ ܡܶܕܶܡ ܕܺܐܝܬܰܘܗ̱ܝ ܕܚܰܝ̈ܶܐ ܗܳܢܽܘܢ ܥܰܬܺܝ̈ܩܶܐ ܘܨ̈ܳܐܶܐ ܠܳܐ ܐܶܬܦܢܺܝܘ܆ ܗܳܕܶܐ ܓܶܝܪ ܐܺܝܬܶܝܗ̇ ܗܳܝ ܕܢܶܬܗܰܦܟܽܘܢ ܘܢܶܗܘܽܘܢ ܐܰܝܟ ܛܠܳܝ̈ܶܐ܆ ܟܰܕ ܡܶܢ ܦܳܪܽܘܩܰܢ ܩܰܒܶܠܘ ܒܡܰܦܽܘܚܺܝܬܳܐ ܪܽܘܚܳܐ ܩܰܕܺܝܫܳܐ ܡܶܢ ܒܳܬܰܪ ܩܝܳܡܬܳܐ܆ ܘܡܶܟܺܝܠ ܠܘܳܬ ܒܰܪܢܳܫܳܐ ܚܰܕܬܳܐ ܡܰܢܰܥܘ܆ ܗܰܘ ܕܡܶܬܚܰܕܰܬ ܒܨܰܠܡܳܐ ܕܗܰܘ ܕܰܒ̣ܪܳܝܗ̱ܝ [23]܆ ܫܳܡܥܺܝܢ ܗ̱ܘܰܘ܆ ܛܠܳܝ̈ܶܐ܆ ܠܡܳܐ ܡܶܕܶܡ ܕܡܶܐܟܽܘܠܬܳܐ ܐܺܝܬ ܠܟܽܘܢ[24].
ܘܶܐܬܒܰܩܳܐ ܠܺܝ ܐܰܝܟܰܢܳܐ ܓܙܳܪܳܐ ܥܰܡܺܝܩܳܐ ܒܰܕܡܽܘܬ ܐܳܣܝܳܐ ܝܰܗ̱ܒ ܠܶܗ ܠܫܽܘܚܢܳܐ܆ ܐܰܝܟܰܢܳܐ ܕܳܐܦ ܠܳܐ ܚܕܳܐ ܢܽܘܡܺܐ ܕܺܐܝܬ ܒܳܗ̇ ܫܽܘܡܬܳܐ ܢܶܗܘܶܐ ܐܺܝܬ ܠܶܗ. ܠܳܐ ܓܶܝܪ ܐܶܡܰܪ ܕܗܰܘ ܐܰܝܢܳܐ ܕܢܶܬܗܦܶܟ ܘܢܶܗܘܶܐ ܐܰܝܟ ܛܰܠܝܳܐ ܗܳܢܳܐ܆ ܗܳܢܳܐ ܐܺܝܬܰܘܗ̱ܝ ܗܰܘ ܕܝܰܬܺܝܪ ܪܰܒ ܒܡܰܠܟܽܘܬܳܐ ܕܰܫܡܰܝܳܐ܆ ܐܶܠܳܐ ܕܶܐܢ ܠܳܐ ܬܶܬܗܰܦܟܽܘܢ܆ ܠܳܐ ܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ[25]. ܐܳܢ̱ܬܽܘܢ ܐܳܡܰܪ ܡܶܛܽܠ ܩܰܕܡܳܝܽܘܬܳܐ ܡܶܬܚܪܶܝܢ ܐܢ̱ܬܽܘܢ܆ ܘܰܠܛܶܟܣܳܐ ܩܰܕܡܳܝܳܐ ܡܶܬܗܰܓܓܺܝܢ ܐܢ̱ܬܽܘܢ. ܚܙܰܘ ܕܶܝܢ܆ ܕܕܰܠܡܳܐ ܥܰܠ ܕܽܘ̈ܥܬܶܐ ܣܰܓܺܝ̈ܳܐܬܳܐ ܣܢܺܝܩܺܝܢ ܐܢ̱ܬܽܘܢ܆ ܠܘܳܬ ܗܳܝ ܕܰܠܡܰܚܣܶܢ ܠܳܗ̇ ܠܡܰܥܰܠܬܳܐ ܠܚܽܘܕܶܝܗ̇ ܕܰܠܡܰܠܟܽܘܬܳܐ ܬܶܫܬܘܽܘܢ.
ܡܰܬܰܝ ܡܰܢ ܗܳܟܺܝܠ ܐܶܡܰܪ: ܕܰܡܫܰܐܳܠܽܘ ܫܰܐܠܽܘܗ̱ܝ ܬܰܠ̈ܡܺܝܕܶܐ܆ ܠܗܳܝ ܕܡܰܢܽܘ ܐܺܝܬܰܘܗ̱ܝ ܗܰܘ ܕܝܰܬܺܝܪ ܪܰܒ. ܠܽܘܩܳܐ ܕܶܝܢ܆ ܕܶܐܬܚܫܒܘ222. ܡܰܪܩܽܘܤ ܕܶܝܢ܆ ܕܰܠܘܬ ܚ̈ܕܳܕܶܐ ܡܡܰܠܠܺܝܢ ܗܘܰܘ[26]. ܘܰܡܫܰܚ̈ܠܦܳܬܳܐ ܡܰܢ ܐܺܝܬܰܝܗܶܝܢ ܗܳܠܶܝܢ ܕܶܐܬܶܐܡܰܪ̈ܝ̱ ܡܶܢ ܟܽܠܚܰܕ ܡܶܢܗܽܘܢ܆ ܫܰܪܺܝܪ̈ܳܬܳܐ ܕܶܝܢ ܬܠܳܬܰܝ̈ܗܶܝܢ܆ ܘܕܰܒܠܳܚܡܽܘܬܳܐ[27] ܘܰܒܛܶܟܣܳܐ ܗܘ̈ܰܝ. ܠܽܘܩܕܰܡ ܡܰܢ ܓܶܝܪ ܐܶܬܚܰܫܰܒܘ. ܕܬܰܪܬܶܝܢ ܕܶܝܢ ܠܘܳܬ ܚ̈ܕܳܕܶܐ ܐܰܝܟ ܗܰܘ ܕܰܡܒܰܚܢܺܝܢ ܗܘܰܘ ܐܰܟܚܕܳܐ ܘܰܡܥܰܩܒܺܝܢ ܡܰܠܶܠܘ. ܕܰܬܠܳܬ ܕܶܝܢ܆ ܠܘܳܬ ܗܳܝ ܕܰܢܫܰܐܠܽܘܢ ܐܶܬܬܰܝܬܺܝܘ. ܘܟܽܠ ܚܰܕ ܡܶܢ ܗܳܢܽܘܢ ܕܰܐܟܬܶܒܘ܆ ܟܰܕ ܚܕܳܐ ܒܰܠܚܽܘܕ ܡܶܢ ܗܳܠܶܝܢ ܕܰܢܩ̈ܰܦܶܝܢ ܚܕܳܐ ܒܳܬܰܪ ܚܕܳܐ ܐܶܫܬܰܥܺܝ܆ ܫܪܳܪܳܐ ܐܶܡܰܪ. ܠܰܘ ܓܶܝܪ ܩܛܺܓܪܳܢܽܘܬܳܐ ܕܕܰܓܳܠܽܘܬܳܐ ܐܺܝܬ ܠܳܗ̇܆ ܐܰܘ ܣܳܟ ܕܣܰܩܽܘܒܠܳܝܽܘܬܳܐ ܡܶܕܶܡ܆ ܠܗܳܝ ܕܚܰܣܺܝܪܳܐܺܝܬ ܘܰܡܒܰܨܪܳܐܺܝܬ ܢܺܐܡܰܪ ܐ̱ܢܳܫ ܡܶܕܶܡ. ܣܰܩܽܘܒܠܳܝܬܳܐ ܓܶܝܪ ܗܳܝ ܐܺܝܬܶܝܗ̇܆ ܗܳܝ ܕܢܶܗܦܽܘܟ ܐ̱ܢܳܫ ܗܳܠܶܝܢ ܕܠܰܐ̱ܚܪ̈ܳܢܶܐ ܐܰܡܺܝܪ̈ܳܢ܆ ܒܝܰܕ ܬܽܘܢܳܝܳܐ ܡܶܕܶܡ ܣܰܩܽܘܒܠܳܝܳܐ܆ ܘܠܰܘ ܗܳܝ ܕܢܺܐܡܰܪ ܗܰܘ ܡܳܐ ܕܠܰܐ̱ܚܪܺܢܳܐ ܡܒܰܨܰܪ. ܗܳܕܶܐ ܓܶܝܪ ܕܺܝܠܳܝܬܳܐ ܗ̱ܝ ܕܬܽܘܢܳܝ̈ܶܐ ܕܬܰܫܥ̈ܝܳܬܳܐ. ܐܰܝܟܰܢܳܐ ܕܙܰܒ̈ܢܺܝܢ ܣܰܓܺܝ̈ܳܐܢ ܗܽܘ ܟܰܕ ܗܽܘ ܐ̱ܢܳܫ ܠܶܗ ܟܰܕ ܠܶܗ ܠܬܽܘܢܳܝܳܐ܆ ܟܰܕ ܠܘܳܬ ܣܰܓܺܝ̈ܶܐܐ ܘܰܒܙܰܒ̈ܢܶܐ ܡܫܰܚ̈ܠܦܶܐ ܡܶܫܬܰܥܶܐ ܠܶܗ܆ ܠܰܘ ܠܟܽܠܗܶܝܢ ܠܳܐ ܡܒܰܨܪܳܐܺܝܬ ܢܶܬܶܥܗܶܕ ܒܟܽܠ ܙܒܰܢ̱ܬܳܐ. ܐܶܠܳܐ ܠܗܳܝ ܕܰܠܘܳܬ ܐ̱ܢܳܫ ܐܶܫܬܰܒܩܰܬ܆ ܠܘܳܬ ܐ̱ܚܪܺܢܳܐ ܢܰܘܣܶܦ. ܘܰܠܗܳܝ ܕܶܐܬܬܰܢܝܰܬ̣ ܓܪܺܝܕܳܐܺܝܬ ܒܥܶܕܳܢܳܐ ܐ̱ܚܪܺܢܳܐ܆ ܛܽܘܥܝ̣ܰܝ̣ ܬܚܰܦܶܝܗ̇ ܡܶܢ ܒܳܬܰܪ ܩܰܠܺܝܠ.
ܘܗܳܕܶܐ ܡܛܰܝܰܒܬܳܐ ܐܺܝܬܶܝܗ̇ ܕܰܢܚܰܘܶܐ܆ ܡܶܢ ܟܬܳܒܳܐ ܗܰܘ ܕܰܦܪܰܟܣܺܝܤ. ܠܽܘܩܳܐ ܓܶܝܪ ܟܰܕ ܬܠܳܬ ܙܰܒ̈ܢܺܝܢ ܒܳܗ̇ ܟܰܕ ܒܳܗ̇ ܒܡܰܟܬܒܳܢܽܘܬܳܐ ܐܶܬܥܰܗܕܶܗ ܠܬܽܘܢܳܝܳܐ ܗܰܘ ܕܒܽܐܘܪܚܳܐ ܗܳܝ ܕܰܠܘܳܬ ܕܡܰܪܩܽܘܣ[28]܆ ܘܒܰܙܒܰܢ ܡܰܢ ܟܰܕ ܗܽܘ ܡܶܫܬܰܥܶܐ ܠܶܗ܆ ܒܰܙܒܰܢ ܕܶܝܢ ܟܰܕ ܕܬܰܪ̈ܬܶܝܢ ܙܰܒ̈ܢܺܝܢ ܡܰܥܶܠ ܠܶܗ ܠܦܰܘܠܽܘܤ ܕܡܶܫܬܰܥܶܐ ܠܶܗ ܒܟܽܠ ܚܰܕ ܬܽܘܢܳܝܳܐ܆ ܫܰܠܡܳܐܺܝܬ ܡܰܢ ܒܗܽܘܢ ܟܰܕ ܒܗܽܘܢ ܒܣܽܘܥܪ̈ܳܢܶܐ ܐܳܬܶܐ܆ ܘܠܰܘ ܣܰܩܽܘܒܠܳܐܺܝܬ ܣܳܟ܆ ܡܒܰܨܰܪ ܕܶܝܢ ܐܰܘ[29] ܡܰܘܣܶܦ ܡܶܕܶܡ ܡܶܢ ܟܽܠ ܦܪܽܘܤ ܥܰܠ ܗܳܠܶܝܢ ܕܰܐܡܺܝܪ̈ܳܢ ܒܕܽܘܟܬܳܐ ܐ̱ܚܪܺܬܳܐ܆ ܕܠܳܐ ܡܶܕܶܡ ܡܣܰܓܶܦ ܠܶܗ ܠܰܫܪܳܪܳܐ܆ ܐܰܘ ܐܺܝܬ ܠܶܗ ܠܒܽܘܟܝܳܐ ܕܕܰܓܳܠܽܘܬܳܐ. ܒܰܙܒܰܢ ܡܰܢ ܓܶܝܪ ܟܬܺܝܒ܆ ܕܰܫܡܰܥ ܦܰܘܠܽܘܤ ܠܩܳܠܳܐ ܕܳܐܡܰܪ: ܐܶܢܳܐ ܐܺܝܬܰܝ ܝܶܫܽܘܥ ܗܰܘ ܕܰܐܢ̱ܬ ܪܳܕܶܦ ܐܰܢ̱ܬ. ܒܰܙܒܰܢ ܕܶܝܢ܆ ܕܶܐܢܳܐ ܐܺܝܬܰܝ ܝܶܫܽܘܥ ܗܰܘ ܢܳܨܪܳܝܳܐ[30]. ܒܰܙܒܰܢ ܕܶܝܢ܆ ܕܰܒܡܰܡܠܠܳܐ ܥܶܒܪܳܝܳܐ ܐܳܬܝܳܐ ܗ̱ܘܳܬ ܠܶܗ ܒܰܪ̱ܬ ܩܳܠܳܐ ܫܳܡܰܥ ܗ̱ܘܳܐ. ܘܒܰܙܒܰܢ ܡܰܢ ܗܳܟܰܢܳܐ ܦܫܺܝܛܳܐܺܝܬ܆ ܕܰܐܒܪܶܩ ܥܠܰܘܗ̱ܝ ܢܽܘܗܪܳܐ ܡܶܢ ܫܡܰܝܳܐ. ܒܰܙܒܰܢ ܕܶܝܢ ܕܒܰܡܨܰܥܬܶܗ ܕܝܰܘܡܳܐ܆ ܘܰܕܝܰܬܺܝܪ ܡܶܢ ܢܰܗܺܝܪܽܘܬܶܗ ܕܫܶܡܫܳܐ[31]. ܘܗܳܫܳܐ ܡܰܢ ܕܓܰܒܪ̈ܶܐ ܗܳܢܽܘܢ ܕܪܳܕܶܝܢ ܗ̱ܘܰܘ ܥܰܡ ܦܰܘܠܽܘܤ ܩܳܝܡܺܝܢ ܗ̱ܘܰܘ ܟܰܕ ܬܰܘܺܝܪܺܝܢ. ܟܰܕ ܫܳܡܥܺܝܢ ܗ̱ܘܰܘ ܡܰܢ ܠܩܳܠܳܐ܆ ܠܳܐ ܡܶܕܡ ܕܶܝܢ ܚܳܙܶܝܢ ܗ̱ܘܰܘ[32]. ܗܳܫܳܐ ܕܶܝܢ܆ ܕܰܠܢܽܘܗܪܳܐ ܡܰܢ ܚܙܰܘ ܘܰܗܘܰܘ ܒܕܶܚܠܬܳܐ܆ ܠܩܳܠܳܐ ܕܶܝܢ ܕܗܰܘ ܕܰܡܡܰܠܶܠ ܗ̱ܘܳܐ܆ ܠܳܐ ܫܳܡܥܺܝܢ ܗ̱ܘܰܘ. ܟܰܕ ܐ̱ܢܳܫܺܝ̈ܢ ܡܰܢ ܡܶܢ ܗܳܢܽܘܢ ܕܪܳܕܶܝܢ ܗ̱ܘܰܘ ܥܰܡܶܗ܆ ܒܩܳܠܳܐ ܡܰܢ ܐܰܪܓܶܫܘ܆ ܠܳܐ ܕܶܝܢ ܬܽܘܒ ܐܳܦ ܒܢܽܘܗܪܳܐ. ܐ̱ܢܳܫܺܝ̈ܢ ܕܝܢ ܒܢܽܘܗܪܳܐ ܠܳܐ ܕܶܝܢ ܬܽܘܒ ܐܳܦ ܒܩܳܠܳܐ܆ ܟܰܕ ܐܳܦ ܬܰܪ̈ܬܰܝܗܶܝܢ ܓܕܰܫ̈ܶܝܢ. ܗܳܠܶܝܢ ܓܶܝܪ ܘܕܰܐܝܟ ܗܳܠܶܝܢ ܡܟܳܢ̈ܳܢ ܡܰܢ ܐܰܝܟ ܕܰܒܣܽܘܓܳܐܐ ܕܢܶܗܘ̈ܝܳܢ ܒܬܽܘܢܳܝ̈ܶܐ. ܠܰܫܪܳܪܳܐ ܕܶܝܢ܆ ܘܳܐܦܠܳܐ ܒܚܰܕ ܙܢܳܐ ܡܥܺܝ̈ܩܳܢ. ܐܶܢ ܗܳܟܺܝܠ ܗܰܘ ܚܰܕ ܠܳܗ̇ ܟܰܕ ܠܳܗ̇ ܟܰܕ ܡܬܰܢܶܐ܆ ܗܳܟܰܢܳܐ ܡܫܰܚܠܦܳܐܺܝܬ ܐܶܫܬܰܥܝܳܗ̇ ܟܰܕ ܠܳܐ ܕܰܓܶܠ܆ ܡܳܢܳܐ ܬܡܺܝܗܳܐ܆ ܐܶܢ ܟܰܕ ܣܰܓܺܝ̈ܶܐܐ ܐܺܝܬܰܝܗܽܘܢ ܗܘܰܘ ܐܶܘܰܢܓ̈ܠܝܣܛܶܐ܆ ܗܳܝ ܕܡܶܢ ܐ̱ܚܪܺܢܳܐ ܐܶܬܒܰܨܪܰܬ ܐ̱ܚܪܺܢܳܐ ܐܰܟܬܒܳܗ̇܆ ܟܰܕ ܠܳܐ ܣܳܟ ܐܰܪܡܝܳܗ̇ ܘܥܰܕܠܳܗ̇ ܒܣܰܩܽܘܒܠܳܝܽܘܬܳܐ ܠܗܳܝ ܕܗܽܘ ܠܳܐ ܐܶܫܬܰܥܝܳܗ̇.
ܙܳܕܶܩ ܕܶܝܢ ܠܡܶܕܰܥ܆ ܠܘܳܬ ܓܶܝܪ ܗܳܝ ܕܩܰܕܺܝܡܳܐ ܣܺܝܡܳܐ ܡܶܟܺܝܠ ܐܶܦܰܢܶܐ ܐ݀ܰܣܩܺܝܗ̇ ܠܡܶܠܬܳܐ܆ ܕܡܰܪܩܽܘܤ ܘܠܽܘܩܳܐ ܟܬܰܒܘ ܕܶܐܡܰܪ ܝܶܫܽܘܥ ܠܬܰܠ̈ܡܺܝܕܶܐ: ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܗܰܘ ܕܠܳܐ ܢܩܰܒܶܠ ܡܰܠܟܽܘܬܳܐ ܕܰܐܠܳܗܳܐ ܐܰܝܟ ܛܰܠܝܳܐ܆ ܠܳܐ ܢܶܥܽܘܠ ܠܳܗ̇[33]. ܡܳܢܳܐ ܗܳܟܺܝܠ ܬܺܐܡܰܪ. ܐܰܝܟ ܥܶܪ̈ܒܶܐ ܕܦܳܥܶܝܢ ܒܳܥܶܐ ܠܰܢ ܕܢܶܗܘܶܐ ܐܺܝܬܰܝܢ܆ ܘܰܕܠܳܐ ܒܽܘܚܳܢܳܐ ܢܶܗܘܶܐ ܣܺܝܡܺܝܢ ܚ̱ܢܰܢ ܒܡ̈ܶܠܶܐ ܗܳܠܶܝܢ ܕܡܶܛܽܠ ܡܰܠܟܽܘܬܳܐ ܕܰܫܡܰܝܳܐ܆ ܘܠܳܐ ܟܽܠ ܟܽܠܶܗ. ܐܶܠܳܐ ܐܰܝܟ ܡܶܠܬܶܗ ܕܡܰܬܰܝ܆ ܡܶܬܓܠܶܐ ܓܶܝܪ ܘܡܶܬܢܰܗܰܪ ܚܰܝܠܶܗ ܕܦܽܘܩܕܳܢܳܐ[34] ܡܶܢ ܗܳܠܶܝܢ ܕܰܠܗܰܘ ܐܰܡܺܝܪ̈ܳܢ܆ ܒܳܥܶܐ ܠܳܟ ܕܬܶܬܗܦܶܟ܆ ܘܬܶܥܛܶܐ ܠܚܰܝ̈ܶܐ ܗܳܢܽܘܢ ܕܰܐܥܬܶܩܘ ܒܰܚ̈ܛܳܗܶܐ܆ ܘܰܕܬܰܪܥܺܝܬܳܐ ܡܶܕܶܡ ܒܳܒܽܘܣܳܝܬܳܐ ܘܰܚܕܰܬܳܐ ܘܕܰܐܝܟ ܗܰܘ ܕܺܐܝܬܶܝܗ̇ ܠܳܐ ܝܰܠܺܝܦܬܳܐ ܘܕܰܡܚܰܪܪܳܐ ܡܶܢ ܒܺܝܫܽܘܬܳܐ܆ ܬܶܗܦܽܘܟ ܬܶܣܰܒ ܡܶܢ ܕܪܺܝܫ ܒܝܰܕ ܥ̈ܒܳܕܶܐ ܚ̈ܰܕܬܶܐ ܕܙܰܕܺܝܩܽܘܬܳܐ. ܚܣܳܡܳܐ ܓܶܝܪ ܘܰܛܢܳܢܳܐ܆ ܘܪܶܚܡܬܳܐ ܕܫܽܘܒܚܳܐ ܣܪܺܝܩܳܐ܆ ܐܺܝܬܰܘܗ̱ܝ ܗ̱ܘܳܐ ܚܰܫܳܐ ܗܰܘ ܕܣܺܝܡ܆ ܗܰܘ ܕܰܠܡܰܐܣܳܝܽܘ ܨܳܒܶܐ ܗ̱ܘܳܐ. ܡܶܛܽܠ ܗܳܕܶܐ ܛܰܠܝܳܐ ܒܳܒܽܘܣܳܐ ܐܰܝܬܺܝ ܠܰܡܨܰܥܬܳܐ܆ ܕܣܰܓܺܝ ܒܩܰܘܡܬܶܗ ܙܥܽܘܪ. ܕܠܳܐ ܒܨܰܥܪܳܐ ܡܶܬܢܟܶܬ[35]܆ ܘܳܐܦ ܠܳܐ ܒܩܽܘܠܳܣ̈ܶܐ ܐܰܘ ܒܫܽܘܒܚܳܐ ܡܶܬܢܦܰܚ. ܕܡܶܢ ܗܳܪܟܳܐ ܟܰܕ ܡܚܰܘܝܳܢܳܐܺܝܬ ܐܳܡܰܪ ܗ̱ܘܳܐ ܟܰܕ ܒܺܐܝܕܰܘ̈ܗ̱ܝ ܐܰܚܺܝܕ ܗ̱ܘܳܐ ܠܶܗ܆ ܘܗܰܘ ܕܰܢܩܰܒܶܠ ܒܳܒܽܘܣܳܐ ܕܰܐܝܟ ܗܳܢܳܐ ܒܰܫܡܳܐ ܕܺܝܠܝ܆ ܠܺܝ ܡܩܰܒܶܠ. ܗܰܘ ܓܶܝܪ ܕܠܰܘ ܕܰܐܝܟ ܗܳܢܰܐ ܗܘ܆ ܘܰܕܥܰܒܺܝܪ ܠܗܳܕܶܐ ܩܰܘܡܬܳܐ ܘܠܰܦܫܺܝܛܽܘܬܳܐ ܕܢܰܦܫܳܐ܆ ܘܰܒܒܺܝܫܽܘܬܳܐ ܡܶܟܺܝܠ ܡܰܪܓܶܫ܆ ܫܒܺܝܩ ܠܶܗ ܡܰܢ ܨܰܠܡܳܐ ܕܒܳܒܽܘܣܳܐ܆ ܢܰܦܺܝܠ ܕܶܝܢ ܠܒܰܪ ܡܶܢ ܬܰܚܘܺܝܬܳܐ. ܛܳܒܳܐܺܝܬ ܕܶܝܢ ܐܶܡܰܪ ܕܠܺܝ ܡܩܰܒܶܠ. ܐܳܦ ܓܶܝܪ ܗܰܘ ܕܠܳܐ ܡܶܕܶܡ ܐܺܝܬ ܠܶܗ ܒܶܗ ܥܰܬܺܝܩܳܐ܆ ܐܶܠܳܐ ܐܰܝܟ ܛܰܠܝܳܐ ܡܚܰܕܶܬ ܢܰܦܫܶܗ ܒܰܡܝܰܬܪ̈ܳܬܳܐ܆ ܡܕܰܡܝܳܢܳܐ ܐܺܝܬܰܘܗ̱ܝ ܕܰܡܫܺܝܚܳܐ܆ ܐܰܝܟ ܦܰܘܠܽܘܤ ܗܰܘ ܕܳܐܡܰܪ: ܡܕܰܡܝܳܢ̈ܶܐ ܕܺܝܠܝ ܗܘܰܘ܆ ܐܰܝܟܰܢܳܐ ܕܶܐܢܳܐ ܕܰܡܫܺܝܚܳܐ.[36] ܘܰܐܝܟ ܝܽܘܚܰܢܳܢ ܕܟܳܬܶܒ܆ ܘܟܽܠ ܐܰܝܢܳܐ ܕܺܐܝܬ ܠܶܗ ܗܳܢܳܐ ܣܰܒܪܳܐ ܥܠܰܘܗ̱ܝ܆ ܡܕܰܟܶܐ ܗܽܘ ܠܶܗ܆ ܐܰܝܟܰܢܳܐ ܕܗܰܘ ܕܰܟܝܳܐ ܐܺܝܬܰܘܗ̱ܝ[37].
ܕܰܠܘܳܬ ܓܶܝܪ ܡܰܪܚܩܳܢܽܘܬܳܐ ܕܡܶܢ ܒܺܝܫܽܘܬܳܐ ܒܰܠܚܽܘܕ܆ ܘܰܠܘܳܬ ܗܳܝ ܕܰܢܩܰܦܰܚ ܠܪܳܡܽܘܬܳܐ܆ ܐܰܝܬܺܝ ܠܰܡܨܰܥܬܳܐ ܬܰܚܘܺܝܬܳܐ ܕܒܳܒܽܘܣܳܐ܆ ܘܠܰܘ ܠܘܳܬ ܣܰܟܽܘܠܬܳܢܽܘܬܳܐ ܘܚܶܟܡܬܳܐ܆ ܗܳܝ ܕܒܺܐܝ̈ܕܶܝܗ̇ ܙܳܕܶܩ ܠܡܶܬܩܰܪܳܒܽܘ ܠܡ̈ܶܠܶܐ ܕܗܰܝܡܳܢܽܘܬܳܐ܆ ܘܰܠܟܳܪܽܘܙܽܘܬܳܐ ܕܡܰܠܟܽܘܬܳܐ ܕܰܫܡܰܝܳܐ܆ ܐܰܘܕܰܥ ܗܽܘ ܕܓܰܠܝܳܐܺܝܬ ܗܳܪܟܳܐ ܦܰܪܶܫ ܘܶܐܡܰܪ: ܕܗܰܘ ܡܶܟܺܝܠ ܕܰܢܡܰܟܶܟ ܢܰܦܫܶܗ ܐܰܝܟ ܛܰܠܝܳܐ ܗܳܢܳܐ܆ ܗܳܢܳܐ ܐܺܝܬܰܘܗ̱ܝ ܗܰܘ ܕܝܰܬܺܝܪ ܪܰܒ ܒܡܰܠܟܽܘܬܳܐ ܕܰܫܡܰܝܳܐ.[38] ܒܕܽܘܟܬܳܐ ܕܶܝܢ ܐ̱ܚܪܺܬܳܐ܆ ܟܰܕ ܛܰܪܩܳܐܺܝܬ ܦܰܪܶܫ ܘܶܐܡܰܪ: ܗܘ̣ܰܘ ܚܰܟܺܝ̈ܡܶܐ ܐܰܝܟ ܚ̈ܘܰܘܳܬܳܐ܆ ܘܬܰܡܺܝ̈ܡܶܐ ܐܰܝܟ ܝܰܘ̈ܢܶܐ. ܡܶܛܽܠ ܪܺܝܫܳܐ ܓܶܝܪ ܗܰܘ ܕܺܐܝܬܰܘܗ̱ܝ ܗܰܝܡܳܢܽܘܬܳܐ܆ ܒܚܶܟܡܬܳܐ ܙܳܕܶܩ ܕܢܶܬܚܰܫܰܚ܆ ܒܰܕܡܽܘܬ ܚܶܘܝܳܐ ܕܡܶܙܕܗܰܪ ܕܠܳܐ ܢܶܒܠܰܥ ܥܰܠ ܪܺܝܫܶܗ܆ ܟܰܕ ܐܶܡܰܬܝ ܕܗܰܕܳܡ̈ܶܐ ܗܳܠܶܝܢ ܐ̱ܚܪ̈ܳܢܶܐ ܒܳܠܥܺܝܢ܆ ܠܰܘ ܗܳܟܰܢܳܐ ܝܳܨܶܦ. ܠܰܡܕܰܡܳܝܽܘ ܕܶܝܢ ܙܳܕܶܩ ܒܰܡܫܰܝܢܽܘܬܳܐ ܕܝܰܘܢܳܐ܆ ܒܡܰܪܚܩܳܢܽܘܬܳܐ ܐܰܝܟ ܕܶܐܡܪܶܬ ܕܡܶܢ ܒܺܝܫܽܘܬܳܐ܆ ܘܰܒܗܽܘ̈ܦܳܟܶܐ ܗܳܢܽܘܢ ܕܰܒܚܰܝ̈ܶܐ[39]. ܟܰܕ ܠܗܳܢܳܐ ܦܽܘܠܳܓܳܐ ܘܦܽܘܪܳܫܳܐ ܢܳܩܶܦ ܗ̱ܘܳܐ ܐܳܦ ܦܰܘܠܽܘܤ܆ ܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ܆ ܐܰܚ̈ܰܝ ܠܳܐ ܛܠܳܝ̈ܶܐ ܬܶܗܘܽܘܢ ܐܺܝܬܰܝܟܽܘܢ ܒܪ̈ܶܥܝܳܢܰܝܟܽܘܢ. ܐܶܠܳܐ ܠܒܺܝܫܽܘܬܳܐ ܫܰܒܪ̈ܶܐ ܗܘ̣ܰܘ. ܒܪ̈ܶܥܝܳܢܰܝܟܽܘܢ ܕܶܝܢ ܡܫܰܡ̈ܠܰܝܳܐ ܗܘ̣ܰܘ[40]. ܐܳܦܶܢ ܓܶܝܪ ܠܥܽܘܬܪܳܐ ܗܰܘ ܕܟܽܠܶܗ ܗܳܢܳܐ ܕܐ̱ܪܳܙܳܐ܆ ܛܰܫܝܶܗ ܡܰܢ ܡܶܢ ܚܰܟܺܝ̈ܡܶܐ ܘܣܰܟܽܘܠ̈ܬܳܢܶܐ܆ ܓܠܳܝܗ̱ܝ ܕܶܝܢ ܠܰܢ ܟܰܕ ܫܰܒܪ̈ܶܐ ܐܺܝܬܰܝܢ[41]܆ ܐܶܠܳܐ ܒܪܰܡ ܡܚܰܦܶܛ ܠܘܳܬ ܡܫܰܡܠܝܽܘܬܳܐ ܕܪ̈ܶܥܝܳܢܶܐ. ܡܶܛܽܠ ܕܳܐܦ ܚܶܟܡܬܳܐ ܟܰܕ ܠܰܐܓܳܢܳܐ ܕܡܰܠܦܳܢܽܘܬܳܐ ܡܶܙܓܰܬ ܘܰܠܦܳܬܽܘܪܳܐ ܡܠܺܝܠܳܐ ܛܰܝܒܰܬ̣܆ ܘܡܰܙܥܩܳܐ ܗ̱ܘܳܬ ܥܰܡ ܟܳܪܽܘܙܽܘܬܳܐ ܪܳܡܬܳܐ܆ ܗܰܘ ܕܺܐܝܬܰܘܗ̱ܝ ܣܰܟܠܳܐ ܢܶܣܛܶܐ ܠܘܳܬܝ܆ ܘܳܐܡܪܳܐ ܗ̱ܘܳܬ ܠܗܳܢܽܘܢ ܕܚܰܣܺܝܪܺܝܢ ܒܪ̈ܶܥܝܳܢܰܝܗܽܘܢ܆ ܬܰܘ ܐܰܟܽܘܠܘ ܡܶܢ ܠܰܚ̈ܡܶܐ ܕܺܝܠܝ܆ ܘܶܐܫܬܰܘ ܚܰܡܪܳܐ ܗܰܘ ܕܡܰܙܓܶܬ ܠܟܽܘܢ܆ ܠܰܘ ܕܒܳܗ̇ ܟܰܕ ܒܳܗ̇ ܒܚܰܣܺܝܪܽܘܬ ܗܰܘܢܳܐ ܢܩܽܘܡܽܘܢ ܗܳܢܽܘܢ ܕܶܐܬܩܪܺܝܘ ܦܳܩܕܳܐ. ܡܳܢܳܐ ܓܶܝܪ ܝܽܘܬܪܳܢܳܐ ܐܺܝܬ ܗ̱ܘܳܐ ܡܳܕܶܝܢ ܕܰܩܪܳܝܬܳܐ ܐܰܘ ܕܬܽܘܪܣܳܝܳܐ܆ ܐܶܠܳܐ ܡܰܘܣܦܳܐ܆ ܫܒܽܘܩܘ ܦܰܛܥܽܘܬܳܐ[42] ܘܰܚܝܰܘ[43]. ܘܰܒܥܰܘ ܚܶܟܡܬܳܐ ܐܰܝܟܰܢܳܐ ܕܬܺܚܽܘܢ. ܘܬܰܪܶܨܘ ܣܰܟܽܘܠܬܳܢܽܘܬܳܐ ܒܺܝܕܰܥܬܳܐ. ܐܰܝܟܰܢܳܐ ܓܶܝܪ܆ ܐܶܢ ܟܺܝܬ ܒܗܳܠܶܝܢ ܦܩܺܝܕܺܝܢ ܚ̱ܢܰܢ ܠܡܶܪܕܰܦ ܒܳܬܰܪ ܫܰܒܪܽܘܬܳܐ܆ ܥܬܺܝܕ ܗ̱ܘܳܐ ܦܰܘܠܽܘܤ ܠܡܺܐܡܰܪ: ܚܶܟܡܬܳܐ ܕܶܝܢ ܡܡܰܠܠܺܝܢ ܚ̱ܢܰܢ ܒܰܓܡܺܝܪ̈ܶܐ܆ ܘܚܶܟܡܬܳܐ ܒܐ̱ܪܳܙܳܐ ܗܳܝ ܕܰܡܛܰܫܝܳܐ[44]܆ ܘܰܚܢܰܢ ܕܶܝܢ ܗܰܘܢܳܐ ܕܰܡܫܺܝܚܳܐ ܐܺܝܬ ܠܰܢ܆ ܘܗܳܝ ܬܽܘܒ܆ ܗܳܝ ܕܰܠܘܳܬܳܗ̇ ܟܰܕ ܩܳܪܶܝܢ ܐܢ̱ܬܽܘܢ ܡܨܶܝܢ ܐܢ̱ܬܽܘܢ ܠܡܶܣܬܰܟܳܠܽܘ ܠܣܰܟܽܘܠܬܳܢܽܘܬܳܐ ܕܺܝܠܝ ܕܰܒܐ̱ܪܳܙܳܐ ܕܰܡܫܺܝܚܳܐ[45].
ܫܳܘܝܳܐ ܕܶܝܢ ܕܢܶܒܥܶܐ܆ ܕܡܶܛܽܠ ܡܳܢܳܐ ܠܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܠܳܐ ܣܶܦܩܰܬ ܠܶܗ ܠܡܺܐܡܰܪ ܕܶܐܢ ܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܶܐ܆ ܐܶܠܳܐ ܠܶܗ ܠܒܳܒܽܘܣܳܐ ܩܰܕܡܳܐܺܝܬ ܟܰܕ ܐܰܝܬܺܝ ܐܰܩܺܝܡܶܗ ܒܰܡܨܰܥܬܳܐ܆ ܘܗܳܟܰܢܳܐ ܡܶܬܚܰܫܰܚ ܗ̱ܘܳܐ ܒܡ̈ܶܠܶܐ. ܟܰܕ ܝܰܬܺܝܪ ܢܰܗܺܝܪܬܳܐ ܘܰܓܠܺܝܬܳܐ ܨܳܒܶܐ ܗ̱ܘܳܐ ܕܢܶܥܒܕܺܝܗ̇ ܠܗܽܘܢ ܠܡܰܠܦܳܢܽܘܬܳܐ ܒܗܳܠܶܝܢ܆ ܘܰܕܝܰܬܺܝܪܳܐܺܝܬ ܢܶܓܫܽܘܦ ܘܰܢܦܰܪܣܶܝܘܗ̱ܝ ܠܚܰܫܳܐ ܗܰܘ ܕܰܐܠܶܙ ܐܶܢܽܘܢ܆ ܘܰܕܠܰܩܕܳܡ ܥܰܝ̈ܢܶܐ ܢܰܝܬܶܝܗ̇ ܠܳܐܣܝܽܘܬܳܐ ܗܳܕܶܐ ܥܳܒܶܕ ܗ̱ܘܳܐ. ܐܳܦ ܓܶܝܪ ܘܠܰܢܒܺܝ̈ܶܐ ܡܶܛܽܠܳܬܳܗ̇ ܕܗܳܕܶܐ ܥܶܠܬܳܐ܆ ܕܙܰܒ̈ܢܺܝܢ ܣܰܓܺܝ̈ܳܐܢ ܥܒܰܕܘ ܗܳܠܶܝܢ ܕܰܐܝܟ ܗܳܟܰܢ ܐܺܝܬ ܠܡܶܚܙܳܐ. ܘܠܶܐܪܰܡܝܳܐ ܡܰܢ܆ ܕܡܳܐܢܳܐ ܕܚܶܨܦܳܐ ܬܳܒܰܪ[46]. ܟܰܕ ܚܳܙܶܝܢ ܗܘܰܘ ܗܳܢܽܘܢ ܕܰܠܘܳܬܗܽܘܢ ܚܳܝܪܐ ܗ̱ܘܳܬ ܡܶܠܬܳܐ ܕܰܢܒܺܝܽܘܬܳܐ܆ ܠܚܰܙܩܺܝܐܶܝܠ ܕܶܝܢ܆ ܕܒܰܙܒܰܢ ܡܰܢ ܥܰܠ ܠܒܶܢ̱ܬܳܐ ܨܳܐܰܪ ܠܳܗ̇ ܠܽܐܘܪܫܠܡ. ܒܰܙܒܰܢ ܕܶܝܢ܆ ܕܛܺܝܓܢܳܐ ܕܦܰܪܙܠܳܐ ܫܳܩܶܠ ܗ̱ܘܳܐ ܒܺܐܝܕܶܗ. ܒܰܙܒܰܢ ܕܶܝܢ ܐ̱ܚܪܺܝܢ ܬܽܘܒ܆ ܕܠܶܗ ܠܣܰܥܪܳܐ ܕܪܺܝܫܶܗ ܘܰܕܕܰܩܢܶܗ ܓܳܪܰܥ ܗ̱ܘܳܐ܆ ܘܰܡܢܳܬܳܐ ܡܰܢ ܚܕܳܐ ܡܰܫܠܶܡ ܗ̱ܘܳܐ ܠܢܽܘܪܳܐ܆ ܡܢܳܬܳܐ ܕܶܝܢ ܐ̱ܚܪܺܬܳܐ ܩܰܠܺܝܠ ܩܰܠܺܝܠ ܡܦܰܣܶܩ ܗ̱ܘܳܐ܆ ܡܢܳܬܳܐ ܕܶܝܢ ܐ̱ܚܪܺܬܳܐ ܒܳܐܰܐܪ ܫܳܕܶܐ ܗ̱ܘܳܐ[47]܆ ܠܘܳܬ ܗܳܝ ܕܰܟܒܽܘܫܝܳܗ̇ ܘܝܰܩܕܳܢܳܗ̇ ܕܽܐܘܪܶܫܠܶܡ ܢܚܰܘܶܐ ܗ̱ܘܳܐ ܘܩܶܛܠܳܐ ܕܗܳܢܽܘܢ ܕܥܳܡܪܺܝܢ ܗ̱ܘܰܘ ܒܳܗ̇܆ ܘܗܳܝ ܕܰܥܬܺܝܕܺܝܢ ܗ̱ܘܰܘ ܕܢܶܬܒܰܕܪܽܘܢ ܘܢܶܬܕܪܽܘܢ ܗܳܢܽܘܢ ܕܡܶܫܬܰܚܪܺܝܢ ܗ̱ܘܰܘ ܒܳܗ̇܆ ܒܟܽܠ ܕܽܘܟܳܐ ܟܢܺܝܫܳܐܺܝܬ ܠܡܺܐܡܰܪ ܕܣܰܘ̈ܦܶܝܗ̇ ܕܰܐܪܥܳܐ܆ ܐܳܦܶܢ ܕܫܳܥܬܳܐ ܗܽܘ ܡܳܪܝܳܐ ܝܰܗ̱ܒ ܗ̱ܘܳܐ ܠܗܽܘܢ ܡܶܛܽܠ ܛܳܒܽܘܬܶܗ ܦܽܘܢܳܝܳܐ ܗܰܘ ܕܡܶܢ ܒܳܒܶܠ. ܗܳܟܰܢܳܐ ܗܳܟܺܝܠ ܐܳܦ ܝܶܫܽܘܥ ܗܰܘ ܐܰܠܳܗܳܐ ܕܰܢܒܺܝ̈ܶܐ܆ ܠܒܳܒܽܘܣܳܐ ܐܰܩܺܝܡ ܒܰܡܨܰܥܬܳܐ܆ ܠܘܳܬ ܗܳܝ ܕܠܰܘ ܐܰܝܢܳܐ ܕܗܽܘ ܢܶܣܬܒܰܪ ܚܰܫܳܐ ܗܰܘ ܕܰܛܢܳܢܳܐ܆ ܐܶܠܳܐ ܒܠܶܨܽܘܨܺܝܬܳܐ ܗܳܝ ܕܰܠܟܽܠܳܗ̇ ܓܰܘܙܰܠܬܳܐ ܕܚܰܫ̈ܶܐ ܐܰܘܚܕܰܬ. ܡܶܢ ܗܳܪܟܳܐ ܓܶܝܪ ܚܣܳܡܳܐ ܘܩܶܛܠܳܐ܆ ܐܰܝܟܰܢܳܐ ܕܩܳܐܺܝܢ ܚܰܘܺܝ.
ܡܶܛܽܠܗܳܕܶܐ ܐܳܦ ܝܰܬܺܝܪ ܪܰܘܪܒܳܐܺܝܬ ܡܰܕܚܶܠ ܒܡܶܬܬܰܝܬܝܳܢܽܘܬܳܐ ܗܳܝ ܕܡܶܢ ܒܳܬܰܪܟܶܢ ܟܰܕ ܐܳܡܰܪ: ܕܗܰܘ ܕܶܐܢ ܢܰܟܫܶܠ ܠܚܰܕ ܡܶܢ ܙܥܽܘܪ̈ܶܐ ܗܳܠܶܝܢ܆ ܗܳܢܽܘܢ ܕܰܡܗܰܝܡܢܺܝܢ ܒܺܝ܆ ܦܰܩܳܚ ܠܶܗ ܕܪܰܚܝܳܐ ܕܰܚܡܳܪܳܐ ܬܶܬܬܠܶܐ ܒܰܩܕܳܠܶܗ ܘܢܶܬܛܒܰܥ ܒܥܽܘܡܩܳܐ ܕܝܰܡܳܐ[48]. ܛܢܳܢܳܐ ܡܰܢ ܐܳܡܰܪ ܗܰܘ ܒܺܝܫܳܐ܆ ܝܳܕܰܥ ܗ̱ܘ ܠܡܰܦܳܩܽܘ ܠܐܢܳܫ܆ ܐܳܦ ܠܘܳܬ ܩܶܛܠܳܐ ܐܰܚܳܝܳܐ[49]. ܐܶܢܳܐ ܕܶܝܢ ܐܳܡܰܪ ܐ̱ܢܳܐ܆ ܕܳܐܦܶܢ ܒܰܠܚܽܘܕ ܡܶܢ ܛܢܳܢܳܐ ܒܰܝܬܳܝܳܐ ܕܺܝܠܶܗ ܐܰܘ ܡܶܢ ܚܰܫܳܐ ܐ̱ܚܪܺܢܳܐ܆ ܢܰܟܫܶܠ ܐ̱ܢܳܫ ܠܰܐܚܽܘܗ̱ܝ ܘܢܶܥܒܕܺܝܘܗ̱ܝ ܕܢܶܬܬܩܶܠ܆ ܕܰܐܝܟ ܗܳܢܳܐ ܚܽܘܝܳܒܳܐ ܢܶܣܒܽܘܠ܆ ܐܰܝܟܰܢܳܐ ܕܰܕܝܰܬܺܝܪ ܩܰܠܺܝܠܬܳܐ ܐܺܝܬܶܝܗ̇ ܢܕܽܘܢܺܝܗ̇܆ ܠܗܳܝ ܕܪܰܚܝܳܐ ܒܰܩܕܠܳܐ ܕܺܝܠܶܗ ܬܶܬܬܠܶܐ ܘܢܶܫܬܕܶܐ ܒܝܰܡܳܐ܆ ܘܰܠܘܳܬ ܥܽܘܡܩܳܐ ܕܝܰܡܳܐ ܢܶܬܬܰܝܬܶܐ. ܒܗܳܕܶܐ ܓܶܝܪ ܬܰܚܘܺܝܬܳܐ ܐܶܬܚܰܫܰܚ܆ ܟܰܕ ܨܳܒܶܐ ܗ̱ܘܳܐ ܕܰܢܚܰܘܶܐ ܠܝܽܘܩܪܶܗ ܕܰܡܣܳܡ ܒܪܺܝܫܳܐ܆ ܗܰܘ ܕܰܥܬܺܝܕ ܕܢܶܬܬܰܝܬܶܐ ܥܰܠ ܗܰܘ ܕܺܐܝܬܰܘܗ̱ܝ ܒܺܝܫܳܐ ܘܰܕܗܳܘܶܐ ܥܶܠܬܳܐ ܕܟܶܫ̈ܠܶܐ. ܘܠܺܝ ܡܶܣܬܒܰܪ ܐܶܣܟܺܡܳܐ ܕܡܶܠܬܳܐ ܗܳܕܶܐ܆ ܕܰܠܗܳܝ ܐܺܝܬܰܘܗ̱ܝ ܕܕܳܡܶܐ܆ ܠܗܳܝ ܕܶܐܬܶܐܡܰܪ ܠܩܰܕܡܳܝ̈ܶܐ ܕܠܳܐ ܬܶܩܛܽܘܠ܆ ܗܰܘ ܕܶܝܢ ܕܢܶܩܛܽܘܠ܆ ܡܚܰܝܒܳܐ ܢܶܗܘܶܐ ܠܕܺܝܢܳܐ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܟܽܠ ܡܰܢ ܕܪܳܓܶܙ ܥܰܠ ܐܰܚܽܘܗ̱ܝ ܐܺܝܩܺܐ܆ ܡܚܰܝܒܳܐ ܢܶܗܘܶܐ ܠܕܺܝܢܳܐ[50]. ܡܶܛܽܠܗܳܕܶܐ ܕܶܝܢ ܐܶܡܰܪ ܕܰܙܥܽܘܪ̈ܶܐ ܗܳܠܶܝܢ܆ ܗܳܢܽܘܢ ܕܰܡܗܰܝܡܢܺܝܢ ܒܺܝ܆ ܠܰܘ ܐܰܝܟ ܡܰܢ ܕܰܕܠܳܐ ܩܺܝܢܕܽܘܢܽܘܤ ܐܺܝܬܶܝܗ̇ ܗܳܝ ܕܰܠܗܳܢܽܘܢ ܕܠܳܐ ܡܗܰܝܡܢܺܝܢ ܬܰܟܫܶܠ ܐܺܝܩܺܐ. ܙܳܕܶܩ ܓܶܝܪ ܐܰܝܟ ܣܳܝܽܘܡܽܘܬ ܢܳܡܽܘܣܳܐ ܕܦܰܘܠܽܘܤ܆ ܕܰܕܠܳܐ ܬܽܘܩܰܠܬܳܐ ܢܶܗܘܶܐ ܐܺܝܬܰܝܢ܆ ܐܳܦ ܠܝܽܗ̱ܘ̈ܕܳܝܶܐ ܐܳܦ ܠܚܰܢ̈ܦܶܐ ܐܳܦ ܠܥܺܕܬܳܐ ܕܰܐܠܳܗܳܐ[51]܆ ܐܶܠܳܐ ܐܰܝܟܰܢܳܐ ܕܠܰܩܛܺܓܪܳܢܽܘܬܳܐ ܕܬܰܠ̈ܡܺܝܕܶܐ ܢܰܘܪܶܒ ܘܢܶܡܬܽܘܚ. ܠܳܐ ܓܶܝܪ ܬܶܣܒܪܽܘܢ ܐܳܡܰܪ ܕܡܶܛܽܠ ܕܰܠܘܳܬ ܦܶܛܪܽܘܤ ܕܺܐܝܬܰܘܗ̱ܝ ܩܰܕܡܳܝ ܩܰܘܡܳܐ ܘܪܺܝܫܳܐ ܕܓܽܘܕܳܐ ܕܺܝܠܟܽܘܢ ܛܰܢܳܢܳܐܺܝܬ ܐܶܬܕܰܒܰܪܬܽܘܢ܆ ܫܚܺܝܩ ܐ̱ܢܳܐ ܘܰܡܣܳܡ ܒܪܺܝܫܳܐ ܕܰܐܝܟ ܗܳܢܳܐ ܡܬܰܚܶܡ ܐ̱ܢܳܐ. ܐܶܠܽܘ ܓܶܝܪ ܐܳܦ ܗܰܘ ܕܝܰܬܺܝܪ ܡܶܢ ܟܽܠ ܙܥܽܘܪ ܐܺܝܬܰܘܗ̱ܝ ܗ̱ܘܳܐ܆ ܡܶܢ ܗܳܢܽܘܢ ܕܶܝܢ ܕܰܡܗܰܝܡܢܺܝܢ ܒܺܝ ܒܪܰܡ܆ ܡܶܢ ܓܰܘܳܢܳܝܽܘܬܳܐ ܕܗܰܝܡܳܢܽܘܬܳܐ ܐܳܦܶܢ ܘܠܳܐ ܡܶܢ ܡܶܕܶܡ ܐ̱ܚܪܺܝܢ܆ ܙܳܕܶܩ ܗ̱ܘܳܐ ܠܡܶܬܚܰܡܳܨܽܘ. ܗܳܟܰܢܳܐ ܐܳܦ ܦܰܘܠܽܘܤ ܠܩܽܘܪ̈ܺܝܢܬܳܝܶܐ ܐܳܡܰܪ ܗ̱ܘܳܐ܆ ܡܶܛܽܠ ܡܳܢܳܐ ܠܳܐ ܗ̱ܘܳܐ ܝܰܬܺܝܪܳܐܺܝܬ ܡܶܬܥܰܠܒܺܝܢ ܐܢ̱ܬܽܘܢ܆ ܡܶܛܽܠ ܡܳܢܳܐ ܠܰܘ ܝܰܬܺܝܪܳܐܺܝܬ ܡܶܬܓܰܠܙܺܝܢ ܐܢ̱ܬܽܘܢ܆ ܐܶܠܳܐ ܐܰܢ̱ܬܽܘܢ ܥܳܠܒܺܝܢ ܐܢ̱ܬܽܘܢ ܘܓܳܠܙܺܝܢ ܐܢ̱ܬܽܘܢ. ܘܗܳܕܶܐ ܠܰܐܚ̈ܶܐ[52]. ܗܳܝ ܓܶܝܪ ܕܰܕܗܳܕܶܐ ܠܰܐܚ̈ܶܐ܆ ܝܰܬܺܝܪܽܘܬܳܐ ܕܰܩܛܺܓܪܳܢܽܘܬܳܐ ܐܺܝܬ ܠܳܗ̇܆ ܘܠܰܘ ܡܶܢ ܦܽܘܪܳܫܳܐ ܕܰܠܩܽܘܒܠܳܝܳܐ ܡܰܦܳܣܽܘ ܡܰܦܣܳܐ܆ ܕܰܒܗܳܢܽܘܢ ܕܠܳܐ ܐܺܝܬܰܝܗܽܘܢ ܐܰܚ̈ܶܐ ܢܰܥܘܶܠ܆ ܐܳܦܶܢ ܕܝܰܬܺܝܪ ܪܰܒ ܐܺܝܬܰܘܗ̱ܝ ܡܣܳܡ ܒܪܺܝܫܳܐ ܥܰܠ ܗܳܢܽܘܢ ܕܡܰܟܫܠܺܝܢ ܠܰܐܚ̈ܶܐ܆ ܐܰܝܟ ܡܰܢ ܕܳܐܦܠܳܐ ܡܶܢ ܓܰܘܳܢܳܝܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ ܐܰܠܳܗܳܝܬܳܐ܆ ܘܰܕܛܰܝܒܽܘܬܳܐ ܘܫܰܘܝܽܘܬ ܐܺܝܩܳܪܳܐ ܘܰܕܚܰܕ ܠܰܚܡܳܐ ܘܫܶܩܝܳܐ ܐ̱ܪܳܙܳܢܳܝܳܐ ܡܶܬܢܰܟܦܺܝܢ.
ܟܰܕ ܕܶܝܢ ܕܰܚܶܠ ܐܶܢܽܘܢ ܣܳܦܩܳܐܺܝܬ ܒܝܰܕ ܗܳܠܶܝܢ ܟܽܠܗܶܝܢ ܕܶܐܬܶܐܡܰܪ̈ܝ̱܆ ܘܠܰܘ ܠܗܽܘܢ ܒܰܠܚܽܘܕ܆ ܐܶܠܳܐ ܐܳܦ ܠܗܳܢܽܘܢ ܕܡܶܢ ܒܳܬܰܪܟܶܢ ܥܬܺܝܕܺܝܢ ܕܢܶܦܓܥܽܘܢ ܒܗܶܝܢ ܒܡ̈ܶܠܶܐ. ܬܽܘܒ ܡܪܰܒܶܐ ܠܳܗ̇ ܠܕܶܚܠܬܳܐ܆ ܘܓܶܢܣܳܢܳܝܳܐ ܡܶܕܶܡ ܥܳܒܶܕ ܠܶܗ ܠܰܓܙܳܡܳܐ. ܘܶܐܒܠܳܢܳܐܺܝܬ ܡܰܙܥܶܩ ܘܳܐܡܰܪ: ܘܳܝ ܠܥܳܠܡܳܐ ܡܶܢ ܟܶܫ̈ܠܶܐ. ܐܰܢܰܢܩܺܐ ܓܶܝܪ ܐܺܝܬܶܝܗ̇ ܕܢܺܐܬܽܘܢ ܟܶܫ̈ܠܶܐ. ܒܪܰܡ ܘܳܝ ܠܓܰܒܪܳܐ ܗܰܘ ܕܒܺܐܝܕܰܘ̈ܗ̱ܝ ܐܳܬܶܐ ܟܶܫܠܳܐ[53]. ܠܰܘ ܠܘܳܬܟܽܘܢ ܒܰܠܚܽܘܕܰܝܟܽܘܢ ܐܳܡܰܪ ܐܳܘ ܬܰܠ̈ܡܺܝܕܶܐ܆ ܙܰܒܢܰܐ ܗ̱ܘ ܠܺܝ ܠܡܺܐܡܰܪ ܗܳܠܶܝܢ܆ ܐܶܠܳܐ ܐܳܦ ܠܘܳܬ ܟܽܠܶܗ ܓܶܢܣܳܐ ܐ̱ܢܳܫܳܝܳܐ ܟܰܕ ܓܶܝܪ ܡܶܢ ܛܢܳܢܳܐ ܕܺܝܠܟܽܘܢ ܗܰܘ ܕܰܠܘܳܬ ܚ̈ܕܳܕܶܐ܆ ܡܥܰܠܶܐ ܐ̱ܢܳܐ ܡܰܣܶܩ ܐ̱ܢܳܐ ܠܳܗ̇ ܠܡܶܠܬܳܐ ܠܘܬ ܚܣܳܡܳܐ ܗܰܘ ܩܰܕܡܳܝܳܐ܆ ܘܰܠܘܳܬ ܫܽܘܪܰܥܬܳܐ ܕܺܝܠܶܗ ܕܰܟܝܳܢܳܐ ܐ̱ܢܳܫܳܝܳܐ܆ ܗܳܝ ܕܰܗܘܳܬ ܠܶܗ ܡܶܢ ܙܰܘܥܳܐ ܗܰܘ ܫܰܠܺܝܛ ܒܝܳܬܶܗ܆ ܡܶܬܶܐܒܶܠ ܐ̱ܢܳܐ ܘܳܐܠܶܐ ܐ̱ܢܳܐ. ܒܰܚܣܳܡܳܐ ܕܳܐܟܶܠܩܰܪܨܳܐ ܥ̣ܰܠ ܡܰܘܬܳܐ ܠܥܳܠܡܳܐ[54]܆ ܐܰܝܟܰܢܳܐ ܕܐ̱ܢܳܫ ܚܰܟܺܝܡܳܐ ܐܶܡܰܪ. ܐܳܦ ܓܶܝܪ ܘܳܐܕܳܡ ܒܰܪܢܳܫܳܐ ܗܰܘ ܩܰܕܡܳܝܳܐ܆ ܐܶܬܬܰܛܥܺܝ ܘܶܐܬܬܦܺܝܤ ܠܡܶܠܟܳܐ ܚܰܣܳܡܳܐ ܕܳܐܟܶܠܩܰܪܨܳܐ. ܘܰܐܟܙܢܳܐ ܕܰܐܢ̱ܬܽܘܢ ܟܰܕ ܡܶܢ ܚܰܫܳܐ ܕܫܽܘܒܚܳܐ ܣܪܺܝܩܳܐ ܐܶܬܬܙܺܝܥܬܽܘܢ܆ ܠܩܰܕܡܳܝܽܘܬܳܐ ܕܗܳܠܶܝܢ ܕܰܒܡܰܠܟܽܘܬܳܐ ܕܰܫܡܰܝܳܐ ܐܶܬܪܰܓܪܰܓܬܽܘܢ܆ ܗܳܟܰܢܳܐ ܐܳܦ ܗܰܘ ܠܗܳܢܶܝܢ ܕܝܰܬܺܝܪ ܪܰܘܪ̈ܒܳܢ ܐܶܬܪܰܓܪܰܓ܆ ܟܰܕ ܐܰܣܒܰܪ ܕܶܐܢ ܡܶܢ ܐܺܝܠܳܢܳܐ ܗܰܘ ܢܶܐܟܽܘܠ ܠܒܰܪ ܡܶܢ ܦܽܘܩܕܳܢܳܐ ܐܰܠܳܗܳܝܳܐ܆ ܢܶܗܘܶܐ ܐܰܝܟ ܐܰܠܳܗܳܐ܆ ܗܳܕܶܐ ܓܶܝܪ ܐܶܫܬܰܘܕܺܝ ܠܶܗ ܗܰܘ ܕܰܐܛܥܝܶܗ.
ܡܶܢ ܗܳܪܟܳܐ ܐܳܦ ܚܣܳܡܳܐ ܗܰܘ ܕܩܳܐܺܝܢ. ܟܰܕ ܓܶܝܪ ܐܶܬܓܢܶܒ ܒܪܶܚܡܬܳܐ ܕܫܽܘܒܚܳܐ ܣܪܺܝܩܳܐ܆ ܘܶܐܬܢܟܶܬ ܒܩܰܕܺܝܡܽܘܬ ܐܺܝܩܳܪܳܐ ܕܰܐܚܽܘܗ̱ܝ܆ ܠܘܳܬ ܟܶܫܠܳܐ ܕܚܰܣܳܡܽܘܬܳܐ ܐܶܫܬܰܪܓܰܠ܆ ܘܰܠܘܳܬ ܡܣܰܝܒܽܘܬ ܩܶܛܠܳܐ ܕܡܶܢ ܗܳܪܟܳܐ. ܟܶܫܠܳܐ[55] ܓܶܝܪ ܡܳܪܳܢܳܐܺܝܬ ܩܳܪܶܐ܆ ܠܦܰܘܕܳܐ ܘܡܶܬܒܰܝܕܠܳܢܽܘܬܳܐ ܕܪ̈ܶܓܠܶܐ ܕܡܶܢ ܐܽܘܪܚܳܐ ܬܪܺܝܨܬܳܐ ܕܗܳܘܝܳܐ ܡܶܢ ܙܰܘܥܳܐ ܡܶܕܶܡ ܚܰܫܳܢܳܝܳܐ܆ ܡܶܛܽܠ ܗܳܝ ܕܰܐܝܟ ܗܰܘ ܕܥܳܒܶܕ ܛܶܠܳܠܳܐ ܠܥܶܠ ܡܶܢ ܪ̈ܶܓܠܰܘܗ̱ܝ ܗܰܘ ܕܒܶܗ ܡܗܰܠܶܟ܆ ܘܩܺܝܢܕܽܘܢܽܘܣܳܐ ܥܳܒܶܕ ܕܰܠܘܳܬ ܓܽܘܡܳܨܳܐ ܢܶܚܽܘܬ ܟܰܕ ܡܶܫܬܰܪܓܰܠ. ܡܶܛܽܠܗܳܕܶܐ ܐܳܦ ܠܗܳܢܽܘܢ ܕܰܒܡܰܫܟܢܳܐ ܡܬܰܒܪܺܝܢ ܘܡܰܪܦܶܝܢ ܠܗܽܘܢ ܠܗܰܕܳܡ̈ܶܐ ܕܦܰܓܪܳܐ ܘܰܡܫܰܪܶܝܢ ܘܰܡܦܰܬܠܺܝܢ ܠܗܽܘܢ܆ ܗܳܠܶܝܢ ܕܰܬܪܺܝܨܳܐܺܝܬ ܒܰܟܝܳܢܳܐ ܐܶܬܓܒܶܠܘ܆ ܒܗܳܢܳܐ ܟܽܘܢܳܝܳܐ ܡܥܰܝܕܺܝܢ ܕܢܶܩܪܽܘܢ ܐܶܢܽܘܢ܆ ܗܳܢܽܘܢ ܕܰܒܗܳܠܶܝܢ ܕܰܐܝܟ ܗܳܟܰܢ ܥܢܶܝܢ. ܠܰܘ ܕܶܝܢ ܒܰܠܚܽܘܕ ܠܗܳܠܶܝܢ܆ ܐܶܠܳܐ ܐܳܦ ܠܗܳܢܽܘܢ ܕܥܰܠ ܚܰܒ̈ܠܶܐ ܕܰܡܬܺܝܚܺܝܢ ܒܳܐܰܐܪ ܡܗܰܠܟܺܝܢ܆ ܐܰܘ ܥܰܠ ܩܰܝܣܳܐ ܡܶܬܥܰܠܶܝܢ ܘܒܳܐܰܐܪ܆ ܘܰܚܕܳܐ ܥܰܠ ܚܕܳܐ ܣܒܺܝܣܳܐܺܝܬ ܫܳܘܪܺܝܢ ܠܥܶܠ ܘܰܡܩܰܝܙܺܝܢ܆ ܐܰܘ ܠܗܳܢܳܐ ܥܰܠ ܒܶܝܬ ܥܰܝ̈ܢܰܝܗܽܘܢ ܛܳܥܢܺܝܢ܆ ܗܳܟܰܢܳܐ ܡܫܰܡܗܺܝܢ ܠܗܽܘܢ. ܕܰܐܝܟ ܗܳܢܳܐ ܓܶܝܪ ܒܰܫܪܳܪܳܐ ܐܺܝܬܰܘܗ̱ܝ ܟܶܫܠܳܐ܆ ܕܡܶܢ ܟܽܠܕܽܘܟ ܡܰܦܽܘܠܬܳܐ ܐܺܝܬ ܒܶܗ ܘܩܺܝܢܕܽܘܢܽܘܤ܆ ܘܡܶܢ ܚܽܘܫܳܒ̈ܶܐ ܝܰܡܺܝ̈ܢܳܝܶܐ ܓܳܢܶܒ. ܐܰܟܙܢܳܐ ܕܰܠܩܳܐܺܝܢ ܕܡܶܢ ܩܽܘܪܒܳܢܳܐ ܘܡܶܢ ܗܳܝ ܕܢܶܪܰܓ ܠܒܰܝܬܳܝܽܘܬܳܐ ܕܰܐܠܳܗܳܐ܆ ܠܘܳܬ ܚܣܳܡܳܐ ܐܰܦܩܶܗ. ܘܡܶܢ ܗܳܠܶܝܢ ܣܶܡܳܠܳܝ̈ܳܬܳܐ܆ ܐܶܡܰܬܝ ܕܟܰܕ ܠܶܗ ܠܗܳܢܳܐ ܣܽܘܥܪܳܢܳܐ ܒܺܝܫܳܐ ܢܶܩܕܽܘܡ ܢܣܺܝܡ ܐ̱ܢܳܫ܆ ܢܶܟܠܳܐ ܡܛܰܫܝܳܐ ܢܶܬܚܰܫܰܒ ܥܰܠ ܩܰܪܺܝܒܶܗ܆ ܘܰܕܡܰܝܬܶܐ ܚܽܘܣܪܳܢܳܐ ܠܰܘ ܠܶܗ ܒܰܠܚܽܘܕ ܠܗܰܘ ܕܣܳܡܶܗ ܠܟܶܫܠܳܐ܆ ܐܶܠܳܐ ܙܰܒ̈ܢܺܝܢ ܣܰܓܺܝ̈ܳܐܢ ܐܳܦ ܠܗܰܘ ܕܰܠܩܽܘܒܠܶܗ ܡܶܬܬܣܺܝܡ. ܡܳܢܳܐ ܓܶܝܪ. ܐܶܠܽܘ ܟܰܕ ܡܶܢ ܚܣܳܡܳܐ ܩܳܢܶܛ ܗ̱ܘܳܐ ܗܳܒܺܝܠ ܩܰܕܶܡ ܩܰܛܠܶܗ ܠܰܐܚܽܘܗ̱ܝ܆ ܠܳܐ ܡܶܣܬܰܓܰܦ ܗ̱ܘܳܐ ܐܳܦ ܗܽܘ܆ ܟܕ ܙܳܟܽܘܬܳܐ ܒܺܝܫܬܳܐ ܙܟܳܝܗ̱ܝ ܠܚܰܣܳܡܳܐ܆ ܕܡܶܢ ܗܳܪܟܳܐ ܢܒܺܝܳܐ ܗܰܘ ܕܰܡܙܰܡܰܪ܆ ܐܰܝܟ ܗܰܘ ܕܰܡܦܰܫܶܩ ܠܶܗ ܠܟܶܫܠܳܐ ܐܶܡܰܪ: ܕܥܰܠ ܓܶܢ̱ܒ ܫܒܺܝܠܳܐ ܟܶܫ̈ܠܶܐ ܣܳܡܘ ܠܺܝ[56]. ܣܺܝܡܺܝܢ ܓܶܝܪ ܠܘܳܬ ܫܒܺܝܠܳܐ ܕܰܡܝܰܬܪ̈ܳܬܳܐ܆ ܘܰܦܫܺܝܩܳܐܺܝܬ ܡܥܰܪܩܠܺܝܢ܆ ܘܠܰܡܚܰܓܳܪܽܘ ܥܳܒܕܺܝܢ ܠܶܗ ܠܗܰܘ ܕܠܳܐ ܡܶܬܬܥܺܝܪ܆ ܟܰܕ ܙܰܒ̈ܢܺܝܢ ܣܰܓܺܝ̈ܳܐܢ ܡܶܣܬܰܟܡܺܝܢ ܛܳܒܬܳܐ܆ ܒܰܕܡܽܘܬ ܤܳܛܳܢܳܐ ܗܰܘ ܕܡܶܫܬܰܚܠܰܦ ܡܶܣܬܰܟܰܡ ܠܡܰܠܰܐܟܳܐ ܕܢܽܘܗܪܳܐ.
ܗܳܟܰܢܳܐ ܝܽܗ̱ܘ̈ܕܳܝܶܐ ܟܰܕ ܣܳܒܪܺܝܢ ܗ̱ܘܰܘ ܕܰܚܠܳܦ ܢܳܡܽܘܣܳܐ ܡܶܬܟܰܬܫܺܝܢ܆ ܘܰܕܚܽܘܝܳܒܳܐ ܕܓܽܘܕܳܦܳܐ ܦܳܣܩܺܝܢ ܗ̱ܘܰܘ ܥܰܠ ܝܶܫܽܘܥ܆ ܠܘܳܬ ܚܣܳܡܳܐ ܕܰܠܒܰܪ ܡܶܢ ܬܚܽܘܡܳܐ ܫܢܰܘ ܢܦܰܩܘ܆ ܕܡܶܢܶܗ ܨܠܺܝܒܳܐ ܗܘ̣ܳܐ ܘܡܰܘܬܳܐ ܐܰܝܟ ܕܣܳܒܪܺܝܢ ܗ̱ܘܰܘ ܠܳܐ ܡܶܬܥܰܪܩܢܳܐ ܠܽܘܩܒܰܠ ܐܰܠܳܗܳܐ ܗܰܘ ܕܶܐܬܒܰܣܰܪ܆ ܠܗܰܘ ܕܥܳܪܽܘܩܳܐ ܘܠܳܐ ܡܶܬܠܰܒܟܳܢܳܐ ܚܰܘܝܰܬ̣ܶܗ ܩܝܳܡܬܳܐ.
ܐܳܦ ܐܰܢܛܺܝܟܪܺܝܣܛܽܘܤ ܕܶܝܢ ܒܙܰܒܢܳܐ ܗܰܘ ܐ̱ܚܪܳܝܳܐ܆ ܘܒܰܩܛܳܦܶܗ ܕܥܳܠܡܳܐ ܗܳܢܳܐ܆ ܡܶܛܽܠ ܟܶܫ̈ܠܶܐ ܢܺܐܬܶܐ. ܢܶܦܟܰܗ ܓܶܝܪ ܚܽܘܒܳܐ ܕܣܰܓܺܝ̈ܶܐܐ[57] ܐܰܝܟ ܕܰܟܬܺܝܒ. ܐܳܦ ܗܽܘ ܒܝܰܕ ܟܶܫ̈ܠܶܐ ܢܗܰܠܶܟ܆ ܐܰܝܟܰܢܳܐ ܕܢܰܛܥܽܘܢ ܐܶܢ ܡܶܫܟܚܳܐ ܐܳܦ ܓܒ̈ܰܝܳܐ[58]. ܟܰܕ ܐܳܦ ܠܗܳܠܶܝܢ ܗܳܟܺܝܠ ܩܰܕܶܡ ܗ̱ܘܳܐ ܝܳܕܰܥ ܦܳܪܽܘܩܰܢ ܐܳܡܰܪ ܗ̱ܘܳܐ: ܘܳܝ ܠܥܳܠܡܳܐ ܡܶܢ ܟܶܫ̈ܠܶܐ܆ ܐܰܢܰܢܩܺܐ ܓܶܝܪ ܕܢܺܐܬܽܘܢ ܟܶܫ̈ܠܶܐ. ܘܶܐܢ ܐܰܢܰܢܩܺܐ ܐܺܝܬܶܝܗ̇ ܗ̱ܘܳܬ ܕܢܺܐܬܽܘܢ ܟܶܫ̈ܠܶܐ[59]܆ ܐܰܝܟܰܢܳܐ ܗܰܘ ܕܥܰܡ ܐܰܢܰܢܩܺܐ ܡܶܬܕܚܶܐ ܘܡܶܙܕܪܶܒ ܘܡܰܟܫܶܠ܆ ܐܺܝܬܰܘܗ̱ܝ ܬܚܶܝܬ ܥܶܕܠܳܝܳܐ. ܗܰܘ ܡܳܐ ܓܶܝܪ ܕܒܰܐܢܰܢܩܺܐ ܗܘ̣ܳܐ܆ ܫܳܘܶܐ ܠܫܽܘܒܩܳܢܐ ܐܺܝܬܰܘܗ̱ܝ܆ ܘܠܰܘ ܡܚܰܝܒܳܐ ܠܰܩܛܺܓܪܳܢܽܘܬܳܐ. ܡܶܛܽܠ ܟܺܝܬ ܕܠܰܐܢܰܢܩܺܐ ܕܟܶܫ̈ܠܶܐ܆ ܗܳܢܽܘܢ ܕܡܰܟܫܠܺܝܢ ܐܰܟܪܽܘܗ̇܆ ܟܰܕ ܥܶܠ̈ܠܳܬܳܐ ܕܟܶܫ̈ܠܶܐ ܩܰܕܶܡܘ ܐܰܪܡܺܝܘ܆ ܘܒܳܬܰܪ ܗܳܕܶܐ ܪܕܰܦܘ. ܐܰܟܙܢܳܐ ܕܶܐܢ ܐ̱ܢܳܫ ܐܳܣܝܳܐ ܟܰܕ ܚܳܙܶܐ ܠܰܟܪܺܝܗܳܐ ܕܰܠܨܶܒ̈ܘܳܬܳܐ ܡܰܥ̈ܒܕܳܬ ܟܽܘܪ̈ܗܳܢܶܐ ܝܰܗ̱ܒ ܥܶܠ̈ܠܳܬܳܐ ܘܒܶܐܫܳܬܳܐ ܬܰܩܺܝܦܬܳܐ ܡܶܙܕܪܶܒ܆ ܘܰܠܳܘܬ ܟܽܘܪܗܳܢܳܐ ܕܫܳܢܝܽܘܬܳܐ ܥܬܺܝܕ ܠܡܶܦܰܩ܆ ܢܺܐܡܰܪ܆ ܘܳܝ ܠܶܗ ܡܶܢ ܫܳܢܝܽܘܬܳܐ ܠܗܰܘ ܕܰܟܪܺܝܗ܆ ܐܰܢܰܢܩܺܐ ܓܶܝܪ ܕܬܺܐܬܶܐ ܫܳܢܝܽܘܬܳܐ܆ ܒܪܰܡ ܘܳܝ ܠܶܗ ܠܓܰܒܪܳܐ ܗܰܘ ܕܰܟܪܺܝܗ܆ ܗܰܘ ܕܒܺܐܝܕܰܘ̈ܗ̱ܝ ܗܺܝ ܫܳܢܝܽܘܬܳܐ ܐܳܬܝܳܐ. ܗܳܪܟܳܐ ܓܶܝܪ܆ ܠܰܘ ܒܰܐܢܰܢܩܺܐ ܕܟܽܘܪܗܳܢܳܐ ܗܰܘ ܩܰܫܝܳܐ ܙܳܕܶܩ ܠܡܶܬܥܰܕܳܠܽܘ܆ ܐܶܠܳܐ ܒܗܰܘ ܕܝܰܗ̱ܒ ܠܳܗ̇ ܥܶܠ̈ܠܳܬܳܐ. ܡܶܛܽܠ ܓܶܝܪ ܗܳܕܶܐ ܥܶܠܬܳܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܢܺܐܡܰܪ: ܕܥܰܡ ܟܝܳܢܳܐ ܕܺܝܠܰܢ ܐܰܟܚܕܳܐ ܣܺܝܡܳܐ ܒܦܶܣܳܐ ܘܰܒܡܰܘܠܳܕܳܐ ܗܺܝ ܐܰܢܰܢܩܺܐ ܕܟܶܫ̈ܠܶܐ܆ ܠܳܐ ܐܶܡܰܪ ܡܳܪܰܢ: ܘܳܝ ܠܓܶܢܣܳܐ ܕܰܒܢܰܝ̈ܢܳܫܳܐ܆ ܐܶܠܳܐ ܘܳܝ ܠܥܳܠܡܳܐ. ܥܳܠܡܳܐ ܓܶܝܪ ܥܝܳܕܳܐ ܐܺܝܬ ܠܶܗ ܠܰܟܬܳܒܳܐ ܐܰܠܳܗܳܝܳܐ ܠܡܶܩܪܳܐ܆ ܠܕܽܘܒܳܪܳܐ ܕܒܰܚ̈ܛܳܗܶܐ ܘܰܠܗܳܢܽܘܢ ܕܡܶܬܗܰܦܟܺܝܢ ܒܶܗ. ܡܶܛܽܠ ܗܳܕܶܐ ܐܳܦ ܠܬܰܠܡܺܝܕܰܘ̈ܗ̱ܝ ܐܳܡܰܪ ܗ̱ܘܳܐ܆ ܐܰܢ̱ܬܽܘܢ ܠܳܐ ܐܺܝܬܰܝܟܽܘܢ ܡܶܢ ܥܳܠܡܳܐ[60]. ܘܟܰܕ ܛܳܒ ܟܺܝܬ ܐܳܦ ܗܶܢܽܘܢ܆ ܡܢܳܬܳܐ ܐܺܝܬܰܝܗܽܘܢ ܗܘܰܘ ܕܰܒܢܰܝ̈ܢܳܫܳܐ ܗܳܢܽܘܢ ܕܚܰܝ̣ܺܝ̣ܢ ܒܥܳܠܡܳܐ. ܐܶܠܳܐ ܡܶܛܽܠ ܕܠܰܘ ܒܰܚ̈ܛܳܗܶܐ ܚܳܐܶܝܢ ܗ̱ܘܰܘ܆ ܠܳܐ ܐܺܝܬܰܝܗܽܘܢ ܗ̱ܘܰܘ ܡܶܢ ܥܳܠܡܳܐ. ܐܳܦ ܝܽܘܚܰܢܳܢ ܕܶܝܢ ܟܳܬܶܒ܆ ܕܟܽܠ ܗܰܘ ܡܳܐ ܕܰܒܥܳܠܡܳܐ ܐܺܝܬܰܘܗ̱ܝ܆ ܪܶܓܬܳܐ ܕܒܶܣܪܳܐ ܘܪܶܓܬܳܐ ܕܥܰܝ̈ܢܶܐ܆ ܘܰܡܫܰܩܠܽܘܬܳܐ ܕܥܳܠܡܳܐ[61]܆ ܠܳܐ ܐܺܝܬܰܝܗܶܝܢ ܡܶܢ ܐܰܒܳܐ܆ ܐܶܠܳܐ ܡܶܢ ܥܳܠܡܳܐ ܐܺܝܬܰܝܗܶܝܢ. ܘܬܽܘܒ. ܥܳܠܡܳܐ ܟܽܠܶܗ܆ ܒܒܺܝܫܬܳܐ ܣܺܝܡ[62]. ܡܶܛܽܠܗܳܕܶܐ ܐܳܦ ܐܰܚܺܝܕ ܥܳܠܡܳܐ ܐܶܬܟܰܢܺܝ ܐܳܟܶܠܩܰܪܨܳܐ܆ ܟܰܕ ܐܺܝܬܰܘܗ̱ܝ ܡܰܠܟܳܐ ܘܪܺܝܫܳܢܳܐ ܕܰܚܛܺܝܬܳܐ[63]. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܘ ܟܝܳܢܳܐ ܕܒܰܪܢܳܫܳܐ ܐܺܝܬܰܘܗ̱ܝ ܥܶܠܬܳܐ ܕܟܶܫ̈ܠܶܐ. ܐܶܠܳܐ ܥܳܠܡܳܐ. ܗܳܢܰܘ ܕܶܝܢ ܚܰܝ̈ܶܐ ܗܳܢܽܘܢ ܒܺܝ̈ܫܶܐ ܘܰܬܥܺܝ̈ܫܶܐ ܘܰܕܒܰܚ̈ܛܳܗܶܐ܆ ܘܰܟܪܺܝܗܽܘܬܳܐ ܕܚܽܘܫܳܒܳܐ ܫܰܠܺܝܛ ܒܝܳܬܶܗ. ܐܰܝܟܰܢܳܐ ܟܺܝܬ ܕܶܐܠܽܘ ܠܰܘ ܠܥܳܠܡܳܐ ܚܙܳܐ܆ ܐܶܠܳܐ ܠܰܒܢܰܝ̈ܢܳܫܳܐ ܐܰܝܟ ܕܶܐܬܒ̣ܪܺܝܘ܆ ܠܳܐ ܐܳܡܰܪ ܗ̱ܘܳܐ ܕܰܐܢܰܢܩܺܐ ܕܢܺܐܬܽܘܢ ܟܶܫ̈ܠܶܐ. ܐܳܦ ܓܶܝܪ ܘܦܰܘܠܽܘܤ ܟܰܕ ܣܶܕܩ̈ܶܐ ܚܙܳܐ ܒܩܽܘܪ̈ܺܝܢܬܳܝܶܐ܆ ܐܶܡܰܪ: ܕܙܳܕܶܩ ܕܳܐܦ ܐܶܪ̈ܶܣܺܝܤ ܢܶܗܘ̈ܝܳܢ ܒܟܽܘܢ[64]. ܡܶܢ ܓܶܝܪ ܙܰܪ̈ܥܶܐ ܡܶܢ ܟܽܠ ܦܪܽܘܤ ܗܺܝ ܡܰܘܥܺܝܬܳܐ ܫܳܘܚܳܐ. ܐܰܝܟܰܢܳܐ ܟܺܝܬ ܕܠܰܘ ܡܶܛܽܠ ܕܩܰܕܶܡ ܐܶܬܶܐܡܰܪ̈ܝ̱ ܗ̱ܘܰܝ̈ ܗܳܠܶܝܢ܆ ܐܶܠܳܐ ܡܶܛܽܠ ܕܰܥܬܺܝ̈ܕܳܢ ܗ̱ܘܰܝ̈ ܕܢܶܗܘ̈ܝܳܢ ܡܶܢ ܟܽܠܦܪܽܘܤ܆ ܩܰܕܶܡ ܐܶܬܶܐܡܰܪ̈ܝ̱.
ܗܳܝ ܕܶܝܢ ܕܗܰܘ ܕܒܺܐܝܕܰܘ̈ܗ̱ܝ ܐܳܬܶܐ ܟܶܫܠܳܐ[65]܆ ܚܠܳܦ ܗܳܝ ܕܗܰܘ ܕܡܶܢܶܗ ܟܶܫܠܳܐ܆ ܬܶܣܬܰܟܰܠ. ܣܰܓܺܝ̈ܳܐܬܳܐ ܓܶܝܪ ܕܕܰܐܝܟ ܗܳܠܶܝܢ ܣܺܝ̈ܡܳܢ ܒܰܟܬܳܒܳܐ. ܕܰܐܝܟ ܐܰܝܟܰܢ. ܗܳܝ ܟܺܝܬ ܕܶܐܡܪܰܬ ܚܰܘܳܐ ܟܰܕ ܝܶܠܕܰܬ ܠܩܳܐܺܝܢ܆ ܩܢܺܝܬ̣ ܒܰܪܢܳܫܳܐ ܒܝܰܕ ܐܰܠܳܗܳܐ܆ ܗܳܢܰܘ ܕܶܝܢ ܡܶܢ ܐܰܠܳܗܳܐ. ܐܳܦ ܝܰܘܣܶܦ ܥܰܠ ܦܫܳܪܳܐ ܗܰܘ ܕܚܶܠ̈ܡܶܐ ܐܶܡܰܪ: ܕܠܳܐ ܗ̱ܘܳܐ ܒܝܰܕ ܐܰܠܳܗܳܐ ܐܺܝܬܶܝܗ̇܆ ܡܶܬܢܰܗܪܳܢܽܘܬܳܐ ܕܺܝܠܗܽܘܢ[66].
ܡܶܛܽܠ ܕܶܝܢ ܕܦܳܪܽܘܩܰܢ ܟܰܕ ܠܘܳܬ ܛܢܳܢܳܐ ܗܰܘ ܕܬܰܠ̈ܡܺܝܕܶܐ ܡܳܬܰܚ ܗ̱ܘܳܐ܆ ܗܰܘ ܕܰܗܘ̣ܳܐ ܠܗܽܘܢ ܡܶܛܽܠ ܦܶܛܪܽܘܤ܆ ܠܡܶܠܬܳܐ ܗܳܝ ܕܡܶܛܽܠ ܟܶܫ̈ܠܶܐ ܐܶܡܰܪ: ܟܰܕ ܡܚܰܘܶܐ ܕܠܰܘ ܡܶܢ ܣܶܢܶܐܬܳܐ ܒܰܠܚܽܘܕ ܗܳܝ ܕܰܠܘܳܬ ܐܰܚ̈ܶܐ܆ ܐܶܠܳܐ ܐܳܦ ܡܶܢ ܪܳܚܡܽܘܬܳܐ ܒܺܝܫܬܳܐ ܢܳܒܥܺܝܢ ܟܶܫ̈ܠܶܐ܆ ܐܳܦ ܕܟܽܘܪܗܳܢܳܐ ܕܡܶܢ ܗܳܪܟܳܐ ܡܰܝܬܶܐ ܒܳܬܰܪܟܶܢ ܐܳܣܝܽܘܬܳܐ ܟܰܕ ܐܳܡܰܪ: ܕܶܐܢ ܕܶܝܢ ܐܺܝܕܳܟ ܐܰܘ ܪܶܓܠܳܟ ܡܰܟܫܠܳܐ ܠܳܟ܆ ܦܣܽܘܩ ܘܰܫܕܺܝܗ̇ ܡܶܢܳܟ. ܗܺܝ ܕܶܝܢ ܟܰܕ ܗܺܝ ܐܳܡܰܪ ܥܒܶܕ܆ ܘܶܐܢ ܥܰܝܢܳܟ ܡܰܟܫܠܳܐ ܠܳܟ[67]. ܗܳܕܶܐ ܕܶܝܢ܆ ܡܶܛܽܠ ܪ̈ܳܚܡܶܐ ܗܳܢܽܘܢ ܕܰܒܛܶܟܣܳܐ ܕܺܐܝܕܳܐ ܘܰܕܥܰܝܢܳܐ ܡܛܰܟܣܺܝܢ ܣܳܐܶܡ ܢܳܡܽܘܣܳܐ܆ ܘܠܳܐ ܗ̱ܘܳܐ ܠܰܢ ܕܺܝܠܰܢ ܡܙܰܝܶܢ ܠܽܘܩܒܰܠ ܗܰܕܳܡ̈ܶܐ ܒܰܝ̈ܬܳܝܶܐ ܕܺܝܠܰܢ. ܐܶܢ ܓܶܝܪ ܠܳܐ ܬܶܦܣܽܘܩ ܠܪܳܚܡܽܘܬܳܐ ܒܺܝܫܬܳܐ܆ ܐܳܦ ܠܢܰܦܫܳܟ ܬܰܘܣܶܦ ܬܰܘܒܶܕ܆ ܘܰܠܗܰܘ ܠܳܐ ܬܫܰܘܙܶܒ. ܕܰܒܛܶܟܣܳܐ ܓܶܝܪ ܕܗܰܕܳܡ̈ܶܐ ܐܺܝܬܰܝܢ ܠܰܚ̈ܕܳܕܶܐ܆ ܣܳܗܶܕ ܦܰܘܠܽܘܤ ܕܳܐܡܰܪ: ܕܺܐܝܬܰܝܢ ܗܰܕܳܡ̈ܶܐ ܕܰܚ̈ܕܳܕܶܐ[68]. ܘܡܳܢܳܐ ܬܡܺܝܗܳܐ܆ ܐܰܝܟܳܐ ܟܺܝܬ ܕܕܺܝܰܬܺܝܩܺܐ ܗܳܝ ܥܰܬܺܝܩܬܳܐ܆ ܚܠܳܦ ܢܰܦܫܳܐ ܕܺܝܠܳܢܳܝܬܳܐ ܕܟܽܠ ܚܰܕ ܠܪܳܚܡܳܐ ܡܬܰܚܡܳܐ܆ ܘܦܳܩܕܳܐ ܕܟܰܕ ܡܰܟܫܶܠ ܗܰܘ ܕܕܰܐܝܟ ܗܳܢܳܐ܆ ܠܰܘ ܕܬܶܦܣܩܺܝܘܗ̱ܝ ܒܰܠܚܽܘܕ܆ ܐܶܠܳܐ ܐܳܦ ܬܶܩܛܠܺܝܘܗ̱ܝ. ܒܬܶܢܝܳܢ ܢܳܡܽܘܣܳܐ ܓܶܝܪ ܟܬܰܒ ܡܽܘܫܶܐ܆ ܐܶܢ ܕܶܝܢ ܢܦܺܝܣܳܟ ܐܰܚܽܘܟ ܕܡܶܢ ܐܰܒܽܘܟ ܐܰܘ ܕܡܶܢ ܐܶܡܳܟ܆ ܐܰܘ ܒܪܳܟ ܐܰܘ ܒܰܪܬܳܟ܆ ܐܰܘ ܐܰܢ̱ܬܬܳܟ ܗܳܝ ܕܰܒܥܽܘܒܳܟ܆ ܐܰܘ ܪܳܚܡܳܟ ܗܰܘ ܕܰܫܘܶܐ ܠܢܰܦܫܳܟ ܟܰܕ ܡܛܰܫܝܳܐܺܝܬ ܐܳܡܰܪ: ܢܺܐܙܰܠ ܘܢܶܦܠܰܚ ܠܰܐܠܳܗ̈ܶܐ ܐ̱ܚܪ̈ܳܢܶܐ܆ ܗܳܢܽܘܢ ܕܠܳܐ ܝܳܕܰܥ ܗܘܰܝܬ ܐܰܢ̱ܬ ܘܰܐܒܳܗ̈ܶܐ ܕܺܝܠܳܟ܆ ܡܶܢ ܐܰܠܳܗ̈ܶܐ ܕܥܰܡ̱ܡ̈ܶܐ ܗܳܢܽܘܢ ܕܒܰܚܕܳܪ̈ܰܝܟܽܘܢ܆ ܗܳܢܽܘܢ ܕܩܰܪܺܝܒܺܝܢ ܠܳܟ ܐܰܘ ܕܪܰܚܺܝܩܺܝܢ ܡܶܢܳܟ܆ ܡܶܢ ܣܰܘ̈ܦܶܝܗ̇ ܕܰܐܪܥܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ܆ ܠܳܐ ܬܶܨܛܒܶܐ ܐܰܟܚܕܳܐ ܥܰܡܶܗ ܘܠܳܐ ܬܶܫܡܥܺܝܘܗ̱ܝ. ܠܳܐ ܬܚܽܘܤ ܥܰܝܢܳܟ ܥܠܰܘܗ̱ܝ. ܠܳܐ ܬܪܰܚܶܡ ܥܠܰܘܗ̱ܝ܆ ܐܳܦܠܳܐ ܬܣܰܬܰܪ ܥܠܰܘܗ̱ܝ. ܡܰܘܕܳܥܽܘ ܬܰܘܕܰܥ ܡܶܛܽܠܳܬܶܗ܆ ܘܺܐܝ̈ܕܰܝܳܐ ܕܺܝܠܳܟ ܢܶܗ̈ܘܝܳܢ ܥܠܰܘܗ̱ܝ ܒܩܰܕܡܳܝܬܳܐ ܠܡܶܩܛܠܶܗ[69].
ܗܳܠܶܝܢ ܐܺܝܬܰܝܗܽܘܢ ܗܰܕܳܡ̈ܶܐ ܗܳܠܶܝܢ ܕܰܦܩܰܕ ܦܳܪܽܘܩܰܢ ܠܡܶܦܣܰܩ ܟܰܕ ܡܰܟܫܠܺܝܢ. ܡܶܛܽܠ ܕܰܒܢܰܨܺܝܚܽܘܬܳܐ ܕܰܩܝܳܡܬܳܐ ܒܡܰܠܟܽܘܬܳܐ ܕܰܫܡܰܝܳܐ܆ ܗܳܝ ܕܰܡܫܰܡܠܝܳܐ ܢܶܣܰܒ ܟܝܳܢܳܐ. ܘܠܳܐ ܕܰܚܕܳܐ ܥܰܝܢܶܗ܆ ܘܠܳܐ ܚܓܺܝܪܳܐ ܐܰܘ ܕܰܒܦܰܓܪܶܗ ܡܚܰܒܰܠ܆ ܐܰܘ ܕܰܐ̱ܚܪܳܢܝܳܐܺܝܬ ܗܰܕܳܡ̈ܶܐ ܕܺܝܠܶܗ ܣܓܺܝܦܺܝܢ܆ ܢܶܗܘܶܐ ܐ̱ܢܳܫ ܬܰܡܳܢ. ܐܶܠܽܘ ܓܶܝܪ ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܫܰܪܺܝܟܳܐ ܗ̱ܘܳܬ ܕܣܳܗ̈ܕܶܐ ܕܗܰܕܳܡ ܗܰܕܳܡ ܐܶܬܦܰܣܰܩܘ܆ ܠܳܐ ܦܰܓܪ̈ܳܢܶܐ ܡܶܕܶܡ ܢܶܫܬܰܟܚܽܘܢ܆ ܘܥܰܪ̈ܛܶܠܳܝܶܐ ܡܶܢ ܒܶܣܪܳܐ. ܩܝܳܡܬܳܐ ܓܶܝܪ܆ ܦܽܘܢܳܝܳܐ ܕܡܶܢ ܕܪܺܝܫ ܕܰܠܗܳܝ ܩܰܕܡܳܝܬܳܐ ܐܺܝܬܶܝܗ̇. ܬܫܰܕܰܪ ܓܶܝܪ ܐܳܡܰܪ ܪܽܘܚܳܐ ܕܺܝܠܳܟ ܘܢܶܬܒܪܽܘܢ. ܘܰܬܚܰܕܶܬ ܡܶܢ ܕܪܺܝܫ ܠܦܰܪܨܽܘܦܳܗ̇ ܕܰܐܪܥܳܐ[70]. ܐܰܘ ܦܰܚܳܪܳܐ ܡܰܢ ܟܰܕ ܓܳܒܶܠ ܡܳܐܢܳܐ ܛܰܪܩܳܐܺܝܬ ܢܶܓܒܠܺܝܘܗ̱ܝ܆ ܐܰܠܳܗܳܐ ܕܶܝܢ ܟܰܕ ܡܶܢ ܕܪܺܝܫ ܓܳܒܶܠ ܠܶܗ ܠܰܥܒܳܕܳܐ ܕܺܝܠܶܗ܆ ܟܰܕ ܒܗܰܕܳܡ̈ܶܐ ܗܳܢܽܘܢ ܪ̈ܺܝܫܳܝܶܐ ܚܰܣܺܝܪ ܢܶܫܒܩܺܝܘܗ̱ܝ.
ܟܰܕ ܗܳܠܶܝܢ ܗܳܟܺܝܠ ܝܳܕܥܺܝܢ ܚ̱ܢܰܢ܆ ܢܶ݀ܥܪܽܘܩ ܡܶܢ ܚܣܳܡܳܐ ܘܡܶܢ ܪܶܚܡܬܳܐ ܕܫܽܘܒܚܳܐ ܣܪܺܝܩܳܐ܆ ܘܡܶܢ ܪ̈ܳܚܡܘܳܬܳܐ ܒܺܝ̈ܫܳܬܳܐ ܘܰܕܣܰܢ̈ܝܳܐܢ ܠܰܐܠܳܗܳܐ. ܐܰܝܟܰܢܳܐ ܕܟܰܕ ܡܶܢ ܟܽܠ ܕܽܘܟ ܡܶܢ ܟܶܫ̈ܠܶܐ ܡܶܬܚܰܪܪܺܝܢܰܢ܆ ܢܶ݀ܫܬܘܶܐ ܠܡܰܠܟܽܘܬܳܐ ܕܰܫܡܰܝܳܐ܆ ܒܰܡܫܺܝܚܳܐ ܝܶܫܽܘܥ ܡܳܪܰܢ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.
ܫܠܶܡ ܡܺܐܡܪܳܐ ܕܰܬܡܳܢܺܝܢ ܘܰܬܪܶܝܢ܀
[12] ܗܳܝ ܕܰܛܠܳܝ̈ܶܐ ܒܳܒܽܘ̈ܣܶܐ ܐܺܝܬܶܝܗ̇ ܝܰܘܢܳܐܝܬ܆ ܠܰܘ ܓܰܒܪ̈ܶܐ ܛܠܳܝ̈ܶܐ ܕܠܐ ܡܣܐܒ ܠܗܽܘܢ
ܣܶܦܪܐ ܕܒܪܝܬܐ. 1: 3. ܐܦ 6. ܐܦ 14.[14]
ܐܫܥܝܐ. 45: 23 ܐܦ ܐܪܡܝܐ. 22: 5 [15]
ܠܘܩܐ. 17: 32 ܐܦ ܠܘܩܐ. 9: 62 [22]
ܡܬܝ. 18: 1 ܐܦ ܠܘܩܐ. 9: 46 ܐܦ ܡܪܩܘܣ. 9: 33 [26]
ܡܪܩܘܣ. 10: 15 ܐܦ ܠܘܩܐ. 18: 17 [33]
ܚܙܩܝܐܝܠ. 4: 3 ܐܦ 5: 1 ـ 5 [47]
[55] ܠܰܫܡܳܐ ܗܰܘ ܕܟܶܫܠܳܐ ܕܡܶܬܶܐܡܰܪ ܠܘܳܬ ܝܰܘ̈ܢܳܝܶܐ ܣܩܐܢܕܐܠܘܢ ܐܶܡܰܪ ܡܰܠܦܳܢܳܐ ܗܳܪܟܳܐ: ܦܰܘܕܳܐ ܘܡܶܬܒܰܝܕܠܳܢܽܘܬܳܐ ܕܪ̈ܶܓܠܶܐ ܡܶܢ ܐܽܘܪܚܳܐ ܬܪܺܝܨܬܳܐ܆ ܘܠܰܘ ܠܰܫܡܳܐ ܗܳܢܳܐ ܕܟܶܫܠܳܐ ܕܰܠܘܳܬ ܣܽܘܪ̈ܝ̣ܳܝ̣ܶܐ. ܒܗܳܢܳܐ ܓܶܝܪ ܘܠܐ ܕܟܽܠ ܟܽܠܶܗ ܐܺܝܬ ܥܝܳܕܳܐ ܠܡܶܩܪܳܐ ܠܘܳܬ ܣܽܘܪ̈ܝ̣ܳܝ̣ܶܐ܆ ܠܦܰܘܕܳܐ ܕܪ̈ܶܓܠܶܐ. ܫܡܳܐ ܡܰܢ ܗܳܢܳܐ ܕܡܶܬܶܐܡܰܪ ܠܘܳܬ ܣܽܘܪ̈ܝ̣ܳܝ̣ܶܐ ܟܶܫܠܳܐ܆ ܡܥܺܝܩܳܢܽܘܬܳܐ ܡܰܐܠܘܢ ܡܚܰܘܶܐ ܘܠܰܘ ܦܰܘܕܳܐ ܕܪ̈ܶܓܠܶܐ. ܗܰܘ ܕܶܝܢ ܕܰܠܘܳܬ ܝܰܘ̈ܢܳܝܶܐ ܬܽܘܩܰܠܬܳܐ.