ܡܺܐܡܪܳܐ ܕܰܬܡܳܢܺܝܢ ܘܚܕ

ܥܰܠܗܳܝ ܕܰܟܬܺܝܒܳܐ ܒܶܐܘܰܢܓܶܠܺܝܽܘܢ ܕܡܰܬܰܝ܆ ܕܟܰܕ ܐܶܬܰܘ ܠܰܟܦܰܪܢܰܚܽܘܡ܆ ܩܪܶܒܘ ܗܳܢܽܘܢ ܕܫܳܩܠܺܝܢ ܬܪܶܝܢ ܙܽܘ̈ܙܺܝܢ ܠܘܳܬ ܦܶܛܪܽܘܤ ܘܶܐܡܰܪܘ: ܪܰܒܟܽܘܢ ܠܳܐ ܝܳܗܶܒ ܬܪܶܝܢ ܙܽܘ̈ܙܶܐ܆ ܘܗܳܠܶܝܢ ܕܫܰܪܟܳܐ.

81: ܒܡܶܠܬܳܐ ܗܳܝ ܟܳܗܢܳܝܬܳܐ ܕܰܒ̈ܡܰܬܠܶܐ ܡܶܬܬܰܝܬܝܳܐ܆ ܗܳܝ ܕܳܐܡܪܳܐ܆ ܫܽܘܒܚܳܐ ܕܰܐ‌ܠܳܗܳܐ ܠܰܡܛܰܫܳܝܽܘ ܡܶܠܬܳܐ^[1]܆ ܙܰܒ̈ܢܺܝܢ ܣܰܓܺܝ̈ܳܐܢ ܐܶܬܕܰܡܪܶܬ. ܘܰܐܝܟܰܢܳܐ ܟܒܰܪ ܬܺܐܡܰܪ ܡܰܝܬܝܳܐ ܫܽܘܒܚܳܐ ܠܰܐܠܳܗܳܐ܆ ܗܳܝ ܕܢܶܗܘܶܐ ܡܛܰܫ̈ܝܳܢ ܡܶܠܰܘ̈ܗ̱ܝ ܘܠܳܐ ܓܰܠ̈ܝܳܢ. ܕܰܐܝܟܰܢܳܐ ܬܶܕܰܥ ܓܰܠܝܳܐܺܝܬ܆ ܐܶܢ ܬܺܐܠܰܦ ܠܚܰܝܠܳܗ̇ ܕܡܶܠܬܳܐ. ܗܳܝ ܓܶܝܪ ܕܰܡܛܰܫܝܳܐ܆ ܠܰܘ ܒܨܳܬܳܐ ܕܥܽܘܬܪܳܐ ܗܰܘ ܕܣܺܝܡ ܒܡ̈ܶܠܶܐ ܐܰ‌ܠܳܗܳܝ̈ܳܬܳܐ ܡܚܰܦܛܳܐ ܠܳܟ. ܐܰܟܙܢܳܐ ܕܡ̈ܶܐܛܰܐܠܶܐ22 ܕܕܰܗܒܳܐ ܕܰܟܣܶܝܢ܆ ܟܰܕ ܚܳܠܳܐ ܡܶܕܶܡ ܕܰܗܒܳܢܳܝܳܐ ܠܘܳܬ ܐܰܦ̈ܶܐ ܒܰܪ̈ܳܝܳܬܳܐ ܕܰܐܪܥܳܐ ܐܶܬܚܙܺܝ܆ ܠܗܳܢܽܘܢ ܕܺܐܝܬܰܝܗܽܘܢ ܚܰܟܺܝ̈ܡܶܐ ܘܰܨܢܺܝ̈ܥܶܐ ܒܕܰܐܝܟ ܗܳܠܶܝܢ܆ ܠܘܳܬ ܗܳܝ ܕܢܶܚܦܪܽܘܢ ܐܰܝܬܺܝܘ ܐܶܢܽܘܢ. ܩܰܕܺܝܡܳܐ ܓܶܝܪ ܝܺܕܺܝܥܳܐ܆ ܕܗܳܝ ܕܰܡܛܰܫܝܳܐ ܐܺܝܬܶܝܗ̇ ܕܡܶܬܒܰܥܝܳܐ. ܗܳܝ ܕܶܝܢ ܕܰܕܟܽܠ ܟܽܠܶܗ ܟܰܣܝܳܐ ܘܰܥܒܺܝܕܳܐ ܠܳܐ ܡܶܬܚܰܙܝܳܢܺܝܬܳܐ܆ ܡܶܬܦܣܶܩ ܥܠܶܝܗ̇ ܣܰܒܪܳܐ܆ ܐܰܘ ܐܳܦܠܳܐ ܣܳܟ ܣܳܠܩܳܐ ܥܰܠ ܗܰܘܢܳܐ ܕܺܝܠܰܢ.

ܕܰܐܝܟ ܗܳܟܰܢܳܐ ܡܶܕܶܡ ܐܺܝܬܰܘܗ̱ܝ܆ ܐܳܦ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ. ܕܰܒܡܶܠܬܳܐ ܡܰܢ ܓܠܺܝܬܳܐ ܘܡܰܟܺܝܟܬܳܐ ܘܰܕܠܺܝܠܰܬ ܠܡܶܬܕܰܪܟܳܢܽܘܬܳܐ܆ ܘܰܒܣܽܘܟܳܠܳܐ ܒܰܪܳܝܳܐ ܘܛܰܝܳܦܳܐ ܘܰܦܫܺܝܩܳܐ܆ ܒܰܕܡܽܘܬ ܚܳܠܳܐ ܗܰܘ ܕܰܗܒܳܢܳܝܳܐ ܡܩܰܒܶܠ ܠܗܽܘܢ ܠܗܳܢܽܘܢ ܕܦܳܓܥܺܝܢ. ܒܰܡܫܰܪܬܚܽܘܬܳܐ ܕܶܝܢ ܣܰܓܺܝܐܬܳܐ ܘܰܡܛܰܫܝܽܘܬܳܐ ܕܬܶܐܽܘܪܺܝܰܐ܆ ܠܘܳܬ ܒܨܳܬܳܐ ܩܰܛܺܝܢܬܳܐ ܕܥܽܘܬܪܳܐ ܡܚܰܦܶܛ܆ ܘܕܰܐ‌ܠܳܗܳܐ ܢܶܫܬܰܒܰܚ ܡܥܰܬܶܕ ܒܝܰܕ ܡܰܕܪܟܳܢܽܘܬܳܐ. ܐܰܝܟܰܢܳܐ ܟܺܝܬ ܕܗܰܘ ܕܰܒܪܶܚܡܰܬ ܝܽܘܠܦܳܢܳܐ ܘܰܒܪܶܚܡܰܬ ܥܰܡܠܳܐ ܐܶܫܟܰܚ ܡܶܕܶܡ ܡܶܢ ܣܽܘܟܴ̈ܠܶܐ ܐܰ‌ܠܳܗܳܝ̈ܶܐ܆ ܘܰܐܝܟ ܚܰܝܠܶܗ ܒܫܽܘܦܪܳܐ ܡܡܰܫܚܳܐ ܕܬܶܐܽܘܳܪ̈ܺܝܰܐܤ ܐܶܬܢܰܗܰܪ܆ ܥܰܡ ܢܒܺܝܳܐ ܗܰܘ ܕܰܡܙܰܡܰܪ ܢܰܙܥܶܩ܆ ܘܰܢܫܰܒܰܚ ܠܰܐܠܳܗܳܐ^[2] ܗܰܘ ܕܰܠܕܰܐܝܟ ܗܳܠܶܝܢ ܓܳܠܶܐ ܘܢܺܐܡܰܪ܆ ܠܳܐ ܝܺܕܺܝ̈ܥܳܬܳܐ ܘܰܡܛܰܫ̈ܝܳܬܳܐ ܕܚܶܟܡܬܳܐ ܕܺܝܠܳܟ ܐܰܘܕܰܥܬ ܠܺܝ^[3]. ܡܶܛܽܠ ܗܳܕܶܐ ܦܳܪܽܘܩܰܢ ܠܝܽܗ̱ܘ̈ܕܳܝܶܐ ܕܰܥܕܰܡܳܐ ܠܰܟܬܺܝܒܬܳܐ ܩܳܝܡܺܝܢ ܐܳܡܰܪ ܗ̱ܘܳܐ: ܒܨܰܘ ܟܬܳܒ̈ܶܐ. ܡܶܛܽܠ ܕܰܐܢ̱ܬܽܘܢ ܒܗܽܘܢ ܣܳܒܪܺܝܢ ܐܢ̱ܬܽܘܢ ܕܺܐܝܬ ܠܟܽܘܢ ܚܰܝ̈ܶܐ ܕܰܠܥܳܠܰܡ. ܡܰܢܽܘ ܕܶܝܢ ܟܰܕ ܡܶܢ ܒܨܳܬܳܐ ܡܶܫܟܰܚ ܚܰܝ̈ܶܐ ܕܰܡܛܰܫܶܝܢ܆ ܘܰܠܗܳܠܶܝܢ ܕܰܠܥܳܠܰܡ܆ ܠܳܐ ܢܫܰܒܰܚ ܠܰܐܠܳܗܳܐ. ܗܳܟܰܢܳܐ ܫܽܘܒܚܳܐ ܡܰܝܬܝܳܐ ܠܰܐܠܳܗܳܐ܆ ܗܳܝ ܕܢܶܗܘܶܐ ܡܛܰܫ̈ܝܳܢ ܡ̈ܶܠܶܐ ܕܺܝܠܶܗ. ܗܳܝ ܓܶܝܪ ܕܰܦܫܺܝܩܳܐ ܠܡܰܕܪܟܳܢܽܘܬܳܐ܆ ܡܶܣܬܰܒܪܳܐ ܟܡܳܐ ܟܡܳܐ^[4]܆ ܕܰܕܠܺܝܠܰܬ ܠܡܶܬܒܰܣܝܳܢܽܘܬܳܐ ܐܺܝܬܶܝܗ̇. ܗܳܝ ܕܶܝܢ ܕܥܰܡ ܥܰܡ̈ܠܶܐ ܐܶܫܬܰܟܚܰܬ܆ ܡܶܬܢܰܛܪܳܐ ܡܰܢ ܐܰܝܟ ܩܶܢܝܳܢܳܐ ܒܰܝܬܳܝܳܐ ܝܰܨܺܝܦܳܐܺܝܬ܆ ܐܺܝܬ ܠܳܗ̇ ܕܶܝܢ ܦܽܘܪܥܳܢܳܐ ܕܪܶܚܡܰܬ ܥܰܡܠܳܐ. ܒܽܘܣܳܡܳܐ ܟܺܝܬ ܕܬܶܐܽܘܪܺܝܰܐ ܕܰܒܥܳܠܡܳܐ ܗܳܢܳܐ ܕܩܰܪܺܝܒ܆ ܘܛܽܘܒܬܳܢܽܘܬܳܐ ܗܳܝ ܕܰܒܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ܆ ܡܶܢ ܕܰܝܳܢܳܐ ܟܺܐܢܳܐ ܢܛܺܝܪܳܐ ܠܗܳܢܽܘܢ ܕܗܳܟܰܢܳܐ ܚ̣ܝܰܘ. ܡܶܛܽܠܗܳܕܶܐ ܐܳܦ ܐ̱ܢܳܫ ܡܶܢ ܢܒܺܝ̈ܶܐ܆ ܟܰܕ ܡܰܘܕܰܥ ܕܠܰܘ ܡܶܢ 222ܐܘܛܘܡܐܛܘܢ ܐܰܘܟܺܝܬ ܡܶܢ ܨܒܽܘܬ ܢܰܦܫܳܐ܆ ܐܶܠܳܐ ܡܶܢ ܒܨܳܬܳܐ ܒܥܰܡܠܳܐ ܗܳܘ̈ܝܳܢ ܒܰܢ ܗܳܠܶܝܢ܆ ܟܬܰܒ ܗܳܟܰܢܳܐ. ܐܰܢܗܰܪܘ ܐܰܢ̱ܬܽܘܢ ܠܟܽܘܢ ܢܽܘܗܪܳܐ ܕܺܝܕܰܥܬܳܐ ܥܰܕ ܐܺܝܬ ܙܰܒܢܳܐ ܥܕܰܟܺܝܠ. ܒܥܰܘ ܠܡܳܪܝܳܐ ܥܕܰܡܳܐ ܕܢܺܐܬܝ̈ܳܢ ܠܟܽܘܢ ܥܰܠ̈ܠܳܬܳܐ ܕܙܰܕܺܝܩܽܘܬܳܐ^[5]. ܡܰܢܗܰܪ ܕܶܝܢ ܐ̱ܢܳܫ ܗܽܘ ܠܶܗ ܢܽܘܗܪܳܐ ܕܺܝܕܰܥܬܳܐ܆ ܒܝܰܕ ܕܽܘܟܳܝܳܐ ܕܰܥ̈ܒܳܕܶܐ ܡܝܰܬܪ̈ܶܐ܆ ܘܰܒܝܰܕ ܐܰܡܺܝܢܽܘܬܳܐ ܟܺܝܬ ܘܟܰܘܫܳܐ ܕܒܰܟ̈ܬܳܒܶܐ ܟܳܗ̈ܢܳܝܶܐ܆ ܗܳܠܶܝܢ ܟܺܝܬ ܕܰܡܛܰܫܶܝܢ ܗܶܢܽܘܢ ܒܗܽܘܢ ܠܬܶܫܒܽܘܚܬܶܗ ܕܰܐ‌ܠܳܗܳܐ܆ ܘܡܶܢ ܬܶܫܒܽܘܚܬܶܗ ܟܰܕ ܡܶܬܓܰܠܝܳܐ ܘܡܶܬܚܰܙܝܳܐ ܡܶܬܟܰܣܶܝܢ ܬܽܘܒ܆ ܐܰܝܟܰܢܳܐ ܕܳܐܦܠܳܐ ܕܰܡܢܳܬܳܐ ܡܶܕܶܡ ܙܥܽܘܪܬܳܐ ܡܶܢܗܽܘܢ ܐܶܬܕܰܪܟܰܬ ܢܶܣܬܰܒܪܽܘܢ. ܐ̱ܢܳܫܺܝ̈ܢ ܕܶܝܢ ܡܶܢ ܗܳܢܽܘܢ ܕܦܰܫܶܩܘ܆ ܗܳܟܰܢܳܐ ܐܰܫܠܡܽܘܗ̱ܝ ܠܦܶܬܓܳܡܳܐ ܗܳܢܳܐ. ܫܽܘܒܚܳܐ ܕܰܐ‌ܠܳܗܳܐ ܡܟܰܣܶܐ ܡܶܠܬܳܐ. ܐܰܝܟܰܢܳܐ ܟܺܝܬ ܕܫܰܠܡܽܘܬܶܗ ܘܢܰܩܺܝܦܽܘܬܶܗ ܕܣܽܘܟܳܠܳܐ܆ ܒܬܰܪ̈ܬܰܝܗܶܝܢ ܡܶܫܬܰܘܙܒܳܐ.

ܝܽܗ̱ܘ̈ܕܳܝܶܐ ܡܰܢ ܗܳܟܺܝܠ ܟܰܕ ܟܬܳܒܳܐ ܐܺܝܬ ܠܗܽܘܢ܆ ܣܳܒܪܺܝܢ ܕܚܰܝ̈ܶܐ ܕܰܠܥܳܠܰܡ ܐܺܝܬ ܠܗܽܘܢ܆ ܟܰܕ ܠܰܝܬ ܠܗܽܘܢ. ܚܢܰܢ ܕܶܝܢ ܟܰܕ ܠܘܳܬ ܗܰܘܢܳܐ ܕܰܟܬܳܒܳܐ ܒܝܰܕ ܝܺܕܰܥܬܳܐ ܕܒܰܡܫܺܝܚܳܐ ܪܕܰܦܢܰܢ܆ ܚܰܝ̈ܶܐ ܗܳܢܽܘܢ ܫܰܪܺܝܪ̈ܶܐ ܘܰܕܠܳܐ ܫܽܘܠܳܡ ܡܶܢ ܬܰܡܳܢ 222ܥܳܦܶܝܢ ܚ̱ܢܰܢ. ܡܶܛܽܠܗܳܕܶܐ ܟܰܕ ܠܥܽܘܡܩܳܐ ܕܡܶܠܬܳܐ ܐܶܘܰܢܓܶܠܳܝܬܳܐ ܡܫܰܘܕܰܥ ܗ̱ܘܳܐ ܡܳܪܰܢ ܐܳܡܰܪ ܗ̱ܘܳܐ܆ ܠܳܐ ܬܶܬܠܽܘܢ ܩܽܘܕܫܳܐ ܠܟܰܠ̈ܒܶܐ܆ ܐܳܦܠܐ ܬܰܪܡܽܘܢ ܡܰܪ̈ܓܳܢܝܳܬܳܐ ܕܺܝܠܟܽܘܢ ܩܕܳܡ ܚܙܺܝܪ̈ܶܐ^[6]. ܩܽܘܕܫܳܐ ܕܶܝܢ ܠܣܰܓܺܝ̈ܶܐܐ ܛܳܥܶܐ܆ ܘܡܶܢ ܛܰܡ̈ܶܐܐ ܘܰܕܠܳܐ ܕܟܶܝܢ ܡܶܬܛܰܫܶܐ܆ ܘܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ. ܘܳܐܦ ܡܰܪܓܳܢܺܝܬܳܐ ܡܶܢ ܥܽܘܡܩܳܐ ܕܝܰܡܳܐ܆ ܘܡܶܢ ܚܠܺܝܙܽܘܢܳܐ ܟܰܕ ܠܳܐ ܝܺܕܺܝܥܳܐ ܗ̱ܘܳܬ ܡܶܬܢܰܓܕܳܐ. ܟܰܕ ܕܶܝܢ ܬܶܬܓܠܶܐ܆ ܠܟܽܠ ܡܶܕܶܡ ܡܰܒܪܩܳܐ ܘܡܰܢܗܪܳܐ܆ ܘܰܡܚܰܦܝܳܐ ܒܢܰܨܺܝܚܽܘܬܳܐ ܒܰܝܬܳܝܬܳܐ ܕܺܝܠܳܗ̇܆ ܘܰܡܥܰܬܕܳܐ ܫܽܘܒܚܳܐ ܠܰܐܠܳܗܳܐ ܗܰܘ ܕܥܰܒܕܳܗ̇.

ܢܶܚܙܶܐ ܗܳܟܺܝܠ ‌ܐܶܢ ܐܳܦ ܡܶܠܬܳܐ ܗܳܕܶܐ ܕܣܺܝܡܳܐ ܩܕܳܡܰܝܢ ܠܦܽܘܫܳܩܳܐ ܕܰܐܝܟ ܗܳܕܶܐ ܐܺܝܬܶܝܗ̇܆ ܘܫܽܘܒܚܳܐ ܕܰܐ‌ܠܳܗܳܐ ܐܺܝܬ ܠܳܗ̇ ܕܰܡܛܰܫܰܝ ܒܳܗ̇܆ ܘܬܶܐܽܘܪܺܝܰܐ ܡܰܘܬܪܳܢܺܝܬܳܐ.

ܟܰܕ ܓܶܝܪ ܐܶܬܰܘ ܐܳܡܰܪ ܠܰܟܦܰܪܢܰܚܽܘܡ܆ ܩܪܶܒܘ ܗܳܢܽܘܢ ܕܫܳܩܠܺܝܢ ܗ̱ܘܰܘ ܗܳܠܶܝܢ ܬܪܶܝܢ ܬܪܶܝܢ ܙܽܘ̈ܙܶܐ ܠܘܳܬ ܦܶܛܪܽܘܤ ܘܶܐܡܰܪܘ. ܡܰܠܦܳܢܳܐ ܕܺܝܠܟܽܘܢ܆ ܠܳܐ ܝܳܗܶܒ ܗܳܠܶܝܢ ܬܪܶܝܢ ܙܽܘ̈ܙܶܐ܆ ܐܳܡܰܪ ܐܺܝܢ^[7].

ܫܳܘܝܳܐ ܕܶܝܢ ܠܡܶܒܥܳܐ ܩܰܕܡܳܐܺܝܬ܆ ܕܡܳܢܳܐ ܗ̱ܝ ܓܒܺܝܬܳܐ^[8] ܕܗܳܠܶܝܢ ܬܪܶܝܢ ܙܽܘ̈ܙܶܐ܆ ܘܡܶܢ ܐܰܝܟܳܐ ܢܳܚܬܳܐ ܗܳܕܶܐ ܒܝܽܘܒܳܠܳܐ. ܠܗܳܕܶܐ ܕܶܝܢ ܐܶܢܳܐ ܐܺ݀ܡܰܪ. ܟܰܕ ܦܶܪܥܽܘܢ ܡܶܬܥܨܶܐ ܗ̱ܘܳܐ ܘܩܳܐܶܡ ܗ̱ܘܳܐ ܣܰܩܽܘܒܠܳܐܺܝܬ ܠܽܘܩܒܰܠ ܦܽܘܩܕܳܢܳܐ ܐܰ‌ܠܳܗܳܝܳܐ܆ ܘܠܳܐ ܨܳܒܶܐ ܗ̱ܘܳܐ ܕܢܰܪܦܶܐ ܐܶܢܽܘܢ ܠܰܒ̈ܢܰܝܳܐ ܕܺܐܝܣܪܳܐܶܝܠ ܡܶܢ ܥܰܒܕܽܘܬܳܐ ܡܰܪܺܝܪܬܳܐ܆ ܒܡܰܚ̈ܘܳܬܳܐ ܬܟܺܝ̈ܒܳܬܳܐ ܚܕܳܐ ܥܰܠ ܚܕܳܐ ܡܶܨܪܶܝܢ ܡܶܬܢܰܓܕܳܐ ܗ̱ܘܳܬ܆ ܟܰܕ ܘܠܳܐ ܒܡܶܕܶܡ ܕܰܡܝܰܬܰܪ ܐܰܘ ܕܰܡܫܰܚܠܰܦ ܡܶܢ ܕܗܰܘ ܣܺܝܡܳܐ ܗ̱ܘܳܬ. ܪܳܕܦܳܐ ܗ̱ܘܳܬ ܕܶܝܢ ܘܰܡܕܰܡܝܳܐ ܗ̱ܘܳܬ ܒܨܶܢܥ̈ܳܬܶܗ ܘܒܰܥ̈ܝܳܕܰܘܗ̱ܝ ܕܗܰܘ ܕܰܐܚܺܝܕ ܗ̱ܘܳܐ܆ ܘܰܡܫܰܡܫܳܐ ܗ̱ܘܳܬ ܠܦܽܘܩ̈ܕܳܢܰܘܗ̱ܝ ܩܫܰܝ̈ܳܐ ܘܕܰܠܒܰܪ ܡܶܢ ܡܶܠܬܳܐ. ܘܰܐ̱ܚܪܳܝܬܳܐ ܕܡܰܚ̈ܘܳܬܳܐ ܐܺܝܬܶܝܗ̇ ܗ̱ܘܳܬ ܡܶܬܩܰܛܠܳܢܽܘܬܳܐ ܕܒܽܘܟܪ̈ܶܐ܆ ܕܡܶܢ ܒ̈ܢܰܝ ܐ̱ܢܳܫܳܐ ܡܰܢ ܥܰܠ ܒܥܺܝܪܳܐ ܘܪ̈ܥܝܬܐ222 ܡܶܬܡܰܬܚܳܐ ܗ̱ܘܳܬ܆ ܡܶܬܦܰܓܕܳܐ ܗ̱ܘܳܬ ܕܶܝܢ ܘܠܳܐ ܓܳܫܦܳܐ ܗ̱ܘܳܬ ܠܒܽܘܟܪ̈ܶܐ ܕܰܒ̈ܢܰܝܳܐ ܕܺܐܝܣܪܳܐܶܝܠ. ܗܳܠܶܝܢ ܟܺܝܬ ܕܰܦܩܰܕ ܐܰ‌ܠܳܗܳܐ܆ ܕܠܶܗ ܐܳܦ ܢܶܬܦܰܪܫܽܘܢ ܘܢܶܬܝܰܗܒܽܘܢ ܐܳܦ ܚܰܪ̈ܡܶܐ. ܟܰܕ ܡܶܬܬܰܓܰܪ ܗ̱ܘܳܐ ܒܗܳܕܶܐ܆ ܕܠܳܐ ܢܶܗܘܶܐ ܐܺܝܬܰܘܗ̱ܝ ܥܰܡܳܐ ܕܺܝܠܶܗ ܠܳܐ ܡܶܬܥܰܗܕܳܢܳܐ ܕܥܽܘܕܪ̈ܳܢܰܘܗ̱ܝ ܐܰ‌ܠܳܗܳܝ̈ܶܐ. ܘܟܰܕ ܗܳܕܶܐ ܒܰܙܢܳܐ ܗܰܘ ܕܶܐܬܶܐܡܰܪ ܐܶܬܦܰܩܕܰܬ܆ ܒܳܬܰܪ ܩܰܠܺܝܠ ܦܩܰܕ ܠܶܗ ܠܡܽܘܫܶܐ ܒܡܰܕܒܪܳܐ܆ ܡܶܢ ܒܳܬܰܪ ܝܺܗܺܝܒܽܘܬܳܐ ܕܢܳܡܽܘܣܳܐ܆ ܘܛܽܘܟܳܣ̈ܐ^[9] ܕܕܶܒܚ̈ܶܐ ܘܰܕܬܶܫܡ̈ܫܳܬܳܐ ܟܳܗ̈ܢܳܝܳܬܳܐ܆ ܠܡܶܡܢܳܐ ܠܗܳܢܽܘܢ ܕܡܶܢܶܗ ܡܶܬܕܰܒܪܺܝܢ ܗ̱ܘܰܘ ܘܠܰܡܦܰܪܳܫܽܘ ܫܰܒ̈ܛܶܐ܆ ܘܕܰܢܛܰܟܶܤ ܘܰܢܣܺܝܡ ܕܒܰܐܝܢܳܐ ܛܶܟܣܳܐ ܙܳܕܶܩ ܠܡܰܫܩܳܠܽܘ^[10] ܘܰܠܡܶܫܪܳܐ܆ ܟܰܕ ܥܳܒܕܺܝܢ ܗ̱ܘܰܘ ܡܰܪܕܺܝܬܳܐ ܕܟܽܠܚܕ ܝܰܘܡܳܐ. ܗܳܝܕܶܝܢ ܟܺܝܬ ܗܳܝܕܶܝܢ ܠܫܰܒܛܳܐ ܕܠܶܘܺܝ܆ ܠܰܡܟܰܗܢܳܢܽܘܬܳܐ ܘܰܠܬܶܫܡ̈ܫܳܬܳܐ ܗܳܠܶܝܢ ܕܫܰܪܟܳܐ ܕܰܒܡܰܫܟܢܳܐ ܗܰܘ ܕܣܳܗܕܽܘܬܳܐ ܦܳܪܶܫ ܠܶܗ. ܟܰܕ ܐܳܡܰܪ ܕܰܠܗܳܢܳܐ ܚܠܳܦ ܒܽܘܟܪ̈ܶܐ ܦܳܪܶܫ ܠܶܗ ܗܽܘ ܠܶܗ. ܫܰܦܺܝܪܳܐ ܕܶܝܢ܆ ܕܳܐܦ ܠܗܶܝܢ ܠܰܒ̈ܢܳܬ ܩ̈ܳܠܶܐ ܕܰܟܬܺܝ̈ܒܳܬܳܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ ܢܣܺܝܡ. ܕܺܐܝܬ ܠܗܶܝܢ ܗܳܟܰܢܳܐ. ܘܡܰܠܶܠ ܡܳܪܝܳܐ ܠܘܳܬ ܡܽܘܫܶܐ ܟܰܕ ܐܳܡܰܪ܆ ܐܳܦ ܐܶܢܳܐ ܗܳܐ ܢܶܣܒܶܬ ܠܠܶܘܳܝ̈ܶܐ ܡܶܢ ܒܰܝܢܳܬ ܒܢܰܝ̈ ܐܺܝܣܪܳܐܶܝܠ܆ ܚܠܳܦ ܟܽܠ ܒܽܘܟܪܳܐ ܦܳܬܰܚ ܡܰܪܒܥܳܐ ܡܶܢ ܒ̈ܢܰܝ ܐܺܝܣܪܳܐܶܝܠ. ܦܽܘܪ̈ܩܳܢܶܐ ܕܺܝܠܗܽܘܢ ܢܶܗܘܽܘܢ. ܘܢܶܗܘܽܘܢ ܠܶܘܳܝ̈ܶܐ ܠܺܝ. ܠܺܝ ܓܶܝܪ ܟܽܠ ܒܽܘܟܪܳܐ. ܒܝܰܘܡܳܐ ܗܰܘ ܕܰܡܚܺܝܬ̣ ܠܟܽܘܠ ܒܽܘܟܪܳܐ ܒܰܐܪܥܐ ܕܡܶܨܪܶܝܢ܆ ܩܰܕܫܶܬ ܠܺܝ ܟܽܠ ܒܽܘܟܪܳܐ ܒܺܐܝܣܪܳܐܶܝܠ. ܡܶܢ ܒܰܪܢܳܫܳܐ ܥܕܰܡܳܐ ܠܰܒܥܺܝܪܳܐ ܠܺܝ ܢܶܗܘܽܘܢ^[11].

ܘܠܰܘ ܥܕܰܡܳܐ ܠܗܳܕܶܐ ܐܰܩܺܝܡܶܗ ܠܦܽܘܩܕܳܢܳܐ܆ ܘܳܐܦܠܳܐ ܦܫܺܝܛܳܐ ܡܶܕܶܡ ܥܰܒܕܶܗ ܠܚܽܘܠܳܦܳܐ. ܪ̈ܺܝܫܶܐ ܕܶܝܢ ܦܳܩܶܕ ܗ̱ܘܳܐ ܕܢܶܬܡܢܽܘܢ ܠܽܘܩܒܰܠ ܪ̈ܺܝܫܶܐ. ܘܟܰܕ ܫܰܒܛܳܐ ܗܰܘ ܕܠܶܘܳܝ̈ܶܐ ܥܶܣܪܺܝܢ ܘܰܬܪܶܝܢ ܐܰ‌ܠ̈ܦܰܝܳܐ ܐܶܬܡܢܺܝ܆ ܒܽܘܟܪ̈ܶܐ ܕܶܝܢ ܡܰܐܬܶܝܢ ܘܫܰܒܥܺܝܢ ܘܰܬܠܳܬܳܐ ܪ̈ܺܝܫܶܐ ܥܰܒܪܽܘܗ̱ܝ ܠܗܳܢܳܐ ܡܶܢܝܳܢܳܐ܆ ܐܰܦܶܤ ܕܦܽܘܪܩܳܢܗܽܘܢ ܕܗܳܠܶܝܢ܆ ܒܟܶܣܦܳܐ ܢܶܣܒܽܘܢ. ܟܰܕ ܐܳܡܰܪ ܗܳܟܰܢܳܐ. ܘܦܽܘܪ̈ܩܳܢܶܐ ܕܗܳܠܶܝܢ ܡܰܐܬܶܝܢ ܘܫܰܒܥܺܝܢ^[12] ܘܰܬܠܳܬܳܐ܆ ܗܳܢܽܘܢ ܕܣܰܓܺܝܐܺܝܢ ܝܰܬܺܝܪ ܡܶܢ ܠܶܘܳܝ̈ܶܐ܆ ܡܶܢ ܒܽܘܟܪ̈ܶܐ ܕܰܒ̈ܢܰܝܳܐ ܕܺܐܝܣܪܳܐܶܝܠ܆ ܬܶܣܰܒ ܚܰܡܫܳܐ ܣܝ̈ܩܠܘ222 ܠܟܽܠ ܪܺܝܫܳܐ܆ ܐܰܝܟ ܬܪܰܝܢܝ ܙܽܘ̈ܙܶܐ ܗܰܘ ܩܰܕܺܝܫܳܐ. ܬܶܣܰܒ ܥܶܣܪܺܝܢ ܐܽܘܒܽܘ̈ܠܘ222 ܕܣܺܝܩܠܘܤ܆ ܘܬܶܬܠܺܝܘܗ̱ܝ ܠܟܶܣܦܳܐ ܠܰܐܗܪܽܘܢ܆ ܘܠܰܒ̈ܢܰܝܳܐ ܕܺܝܠܶܗ܆ ܦܽܘܪ̈ܩܳܢܶܐ ܕܗܳܢܽܘܢ ܕܶܐܫܬܟܰܚܘ ܒܗܽܘܢ ܝܰܬܺܝܪܳܐ^[13].

ܠܡܶܕܰܥ ܕܶܝܢ ܙܳܕܶܩ ܕܰܬܪ̈ܰܝܢܝ ܙܽܘ̈ܙܶܐ 222ܘܣܺܝܩܠܘܤ ܗܽܘ ܟܰܕ ܗܽܘ ܐܺܝܬܰܘܗ̱ܝ. ܐܰܝܟܰܢܳܐ ܓܶܝܪ ܕܶܐܡܰܪ ܗܳܪܟܳܐ܆ ܕܥܶܣܪܺܝܢ 222ܐܽܘܒ̈ܘܠܘ ܢܶܗܘܽܘܢ ܕܣܺܝܩܠܘܤ܆ ܗܳܟܰܢܳܐ ܒܡܰܦܩܳܢܳܐ ܟܰܕ ܦܩܰܕ ܕܰܢܩܰܪܒܽܘܢ ܒ̈ܢܰܝܳܐ ܕܺܐܝܣܪܳܐܶܝܠ ܟܶܣܦܳܐ ܝܺܕܺܝܥܳܐ ܠܝܨܝܦܽܘܬܳܐ ܘܰܠܬܽܘܩܳܢܳܐ ܕܡܰܫܟܢܳܐ܆ ܕܥܶܣܪܺܝܢ ܐܽܘܒ̈ܘܠܘ222 ܢܶܗܘܶܐ ܐܺܝܬܰܘܗ̱ܝ ܬܪܰܝܢܝ ܙܽܘ̈ܙܶܐ ܬܰܚܶܡ. ܟܰܕ ܒܗܶܝܢ ܒܡ̈ܶܠܶܐ ܐܶܡܰܪ܆ ܕܥܶܣܪܺܝܢ ܐܽܘܒ̈ܘܠܘ222 ܢܶܗܘܶܐ ܐܺܝܬܰܘܗ̱ܝ ܬܪ̈ܰܝܢܝ ܙܽܘ̈ܙܶܐ^[14].

ܠܗܳܕܶܐ ܗܳܟܺܝܠ ܓܒܺܝܬܳܐ ܕܗܳܠܶܝܢ ܬܪ̈ܰܝܢܝ ܙܽܘ̈ܙܶܐ܆ ܗܳܝ ܕܰܚܠܳܦ ܗܳܢܽܘܢ ܡܰܐܬܶܝܢ ܘܫܰܒܥܺܝܢ ܘܰܬܠܳܬܳܐ ܦܰܪ̈ܨܽܘܦܶܐ ܕܣܰܓܺܝܐܝܢ ܗ̱ܘܰܘ ܝܰܬܺܝܪ ܡܶܢ ܠܶܘܳܝ̈ܶܐ܆ ܡܶܬܩܰܪܒܳܐ^[15] ܗ̱ܘܳܬ ܠܪ̈ܺܝܫܰܝ ܟܳܗ̈ܢܶܐ܆ ܠܰܒ̈ܢܰܝܳܐ ܕܰܐܗܪܽܘܢ ܡܰܣܩܺܝܢ ܗ̱ܘܰܘ ܠܳܗ̇ ܒܽܘܟܪ̈ܶܐ ܕܟܽܠܗܽܘܢ ܒܢܰܝ̈ܳܐ ܕܺܐܝܣܪܳܐܶܝܠ. ܟܰܕ ܐܶܬܦܰܠܓܰܬ܆ ܐܰܝܟ ܡܶܕܶܡ ܕܡܳܛܶܐ ܗ̱ܘܳܐ ܠܟܽܠ ܚܰܕ. ܚܰܡܫܳܐ ܬܪ̈ܰܝܳܢܰܝ ܙܽܘ̈ܙܶܐ ܐܰܘܟܺܝܬ ܣܝܩ̈ܠܘ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܡܳܐ ܕܰܚܠܳܦ ܟܽܠ ܚܰܕ ܪܺܝܫܳܐ ܡܶܢ ܗܳܢܽܘܢ ܡܰܐܬܶܝܢ ܘܫܰܒܥܺܝܢ ܘܰܬܠܳܬܳܐ ܐܶܬܬܣܺܝܡ ܢܳܡܽܘܣܳܐ ܠܡܶܬܓܒܳܝܽܘ.

ܗܳܕܶܐ ܕܶܝܢ ܐ̱ܪܳܙܳܐ ܪܰܒܳܐ ܪܳܡܙܳܐ܆ ܠܗܳܢܽܘܢ ܕܡܶܫܟܚܺܝܢ ܕܳܐܦܶܢ ܡܡܰܫܚܳܐܺܝܬ ܢܚܽܘܪܽܘܢ ܒܥܽܘܡ̈ܩܶܐ ܕܪܽܘܚܳܐ. ܟܽܠ ܓܶܝܪ ܒܽܘܟܪܳܐ܆ ܛܽܘܦܣܳܐ ܐܰܚܺܝܕ ܕܳܐܕܳܡ܆ ܕܗܰܘ ܕܺܐܝܬܰܘܗ̱ܝ ܗ̱ܘܳܐ ܩܰܕܡܳܝ ܓܒܺܝܠܬܳܐ ܘܒܰܕܡܽܘܬ ܩܰܕܡܳܝ ܝܰܠܕܳܐ ܐܰܘܟܺܝܬ ܒܽܘܟܪܳܐ ܕܓܶܢܣܳܐ ܕܺܝܠܰܢ܆ ܗܰܘ ܐܰܝܢܳܐ ܕܟܰܕ ܒܰܚܛܺܝܬܳܐ ܐܶܬܬܰܛܥܺܝ ܘܡܶܢ ܡܶܐܟܽܘܠܬܳܐ ܗܳܝ ܕܟܰܠܝܳܐ ܗ̱ܘܳܬ ܐܶܙܕܟܺܝ܆ ܒܚܰܡܫܳܬܰܝ̈ܗܽܘܢ ܪ̈ܶܓܫܶܐ ܙܰܢܺܝ܆ ܒܰܚܙܳܬܳܐ܆ ܒܫܶܡܥܳܐ܆ ܒܣܰܘܩܳܐ܆ ܒܰܛܥܳܡܬܳܐ܆ ܒܓܶܫܬܳܐ. ܐܳܦ ܓܶܝܪ ܐܳܦ ܗܽܘ ܐܰܟܙܢܳܐ ܕܚܰܘܳܐ܆ ܚܙܳܝܗ̱ܝ ܗ̱ܘܳܐ ܠܺܐܝܠܳܢܳܐ ܕܝܳܐܶܐ ܗ̱ܘܳܐ ܠܡܶܐܟܽܘܠܬܳܐ܆ ܘܰܕܫܰܦܺܝܪ ܗ̱ܘܳܐ ܠܥܰܝ̈ܢܶܐ ܠܡܶܚܙܳܐ܆ ܘܕܰܗܕܺܝܪܳܐ ܐܺܝܬܰܘܗ̱ܝ ܗ̱ܘܳܐ ܘܫܰܦܺܝܪܳܐ ܠܡܶܬܒܰܩܳܝܽܘ ܒܶܗ܆ ܘܟܰܕ ܢܣܰܒ ܟܰܕ ܗܳܝ ܝܳܗܒܳܐ ܗ̱ܘܳܬ܆ ܐܶܟܰܠ ܡܶܢ ܦܺܐܪܳܐ ܕܺܝܠܶܗ.

ܪܳܕܝܳܐ ܗܳܟܺܝܠ ܘܡܰܠܦܳܐ ܠܰܢ ܡܶܠܬܳܐ܆ ܠܰܢ ܗܳܢܽܘܢ ܕܚܰܝܳܒܺܝܢܰܢ ܕܢܶܬܶܐܡܶܢ ܠܘܳܬ ܬܶܫܡܶܫܬܳܐ ܟܳܗܢܳܝܬܳܐ܆ ܗܳܢܽܘܢ ܕܡܶܢ ܐܳܕܳܡ ܢܳܚܬܺܝܢ ܚ̱ܢܰܢ ܒܝܽܘܒܳܠܳܐ܆ ܘܰܒܗܳܠܶܝܢ ܚܰܡܫܳܐ ܪ̈ܶܓܫܶܐ ܦܳܠܚܺܝܢ ܚ̱ܢܰܢ ܥܰܒܕܽܘܬܳܐ ܠܰܚܛܺܝܬܳܐ܆ ܘܡܶܢ ܒܽܘܟܪ̈ܶܐ ܗܳܢܽܘܢ ܕܰܚܠܳܦ ܢܰܦܫܗܽܘܢ ܝܰܗܒܘ ܚܰܡܫܳܐ ܬܪ̈ܰܝܳܢܰܝ ܙܽܘ̈ܙܶܐ܆ ܐܰܘ ܚܰܡܫܳܐ 222ܣܝܩ̈ܠܘ ܡܩܰܪܒܺܝܢ ܗ̱ܘܰܘ ܠܡܳܪܝܳܐ܆ ܕܙܳܕܶܩ ܠܰܢ ܐܰܘ ܕܢܶܦܪܽܘܫ ܘܰܢܟܰܗܶܢ ܚܢܰܢ ܠܰܢ ܠܰܐܠܳܗܳܐ܆ ܐܘ ܕܚܰܡܫܳܐ ܣܺܝܩ̈ܠܘ222 ܕܟܶܣܦܳܐ ܢܶܬܶܠ. ܡܳܢܳܐ ܕܶܝܢ ܐܺܝܬܰܘܗ̱ܝ ܟܶܣܦܳܐ ܡܶܬܗܰܘܢܳܢܳܐ܆ ܐܶܠܳܐ ܐܶܢ ܒܽܘܚܪܳܢܳܐ ܘܥܰܡ̈ܠܶܐ ܕܰܡܝܰܬܪ̈ܳܬܳܐ ܕܰܠܪ̈ܶܓܫܶܐ ܡܕܰܟܶܝܢ. ܒܽܘܩܝܳܐ ܓܶܝܪ ܠܣܺܐܡܳܐ ܘܰܠܕܰܗܒܳܐ܆ ܒܽܘܚܪܳܢܳܐ ܕܢܽܘܪܳܐ^[16]܆ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ. ܐܰܝܟܰܢܳܐ ܕܗܰܘ ܟܺܝܬ ܕܠܰܘ ܗܳܟܰܢܳܐ ܐܺܝܬ ܠܶܗ܆ ܐܰܝܟ ܒܽܘܟܪܳܐ ܡܶܨܪܳܝܳܐ ܡܶܢ ܡܚܰܒܠܳܢܳܐ ܢܶܬܩܛܶܠ܆ ܟܰܕ ܠܰܡܨܺܝ̈ܕܳܬܳܐ ܕܡܰܘܬܳܐ ܐܺܝܬܰܘܗ̱ܝ ܡܚܰܝܒܳܐ.

ܠܗܳܢܳܐ ܗܳܟܺܝܠ ܫܶܩܠܳܐ ܢܳܡܽܘܣܳܝܳܐ ܕܰܬܪ̈ܰܝܳܢܰܝ ܙܽܘ̈ܙܶܐ ܡܶܬܬܒܰܥ ܗ̱ܘܳܐ ܐܳܦ ܡܫܺܝܚܳܐ܆ ܐܰܝܟ ܒܽܘܟܪܳܐ. ܗܳܕܶܐ ܓܶܝܪ ܝܺܕܺܝܥܳܐ ܗ̱ܘܳܬ ܠܟܽܠܢܳܫ ܕܒܽܘܟܪܳܐ ܐܺܝܬܰܘܗ̱ܝ ܗ̱ܘܳܐ܆ ܐܳܦܶܢ ܠܣܰܓܺܝ̈ܶܐܐ ܛܥܶܐ ܗ̱ܘܳܐ ܐ̱ܪܳܙܳܐ ܗܰܘ ܕܥܰܠ ܒܬܽܘܠܽܘܬܳܐ ܕܶܐܡܶܗ܆ ܐܳܦ ܩܕܳܡ ܝܰܠܕܳܐ ܐܳܦ ܡܶܢ ܒܳܬܰܪ ܝܰܠܕܳܐ. ܐܶܠܳܐ ܡܶܢ ܫܶܩܠܳܐ ܕܕܰܐܝܟ ܗܳܢܳܐ܆ ܒܰܙܢܰܝ̈ܳܐ ܣܰܓܺܝ̈ܶܐܐ ܐܺܝܬܰܘܗ̱ܝ ܗ̱ܘܳܐ ܡܚܰܪܪܳܐ.

ܩܰܕܡܳܐܺܝܬ ܡܰܢ܆ ܟܰܕ ܐܳܕܳܡ ܚܰܕܬܳܐ ܘܰܬܪܰܝܳܢܳܐ ܐܺܝܬܰܘܗ̱ܝ. ܕܰܫܘܶܐ ܒܓܶܢܣܳܐ ܡܰܢ ܐܺܝܬܰܘܗ̱ܝ ܘܰܫܘܶܐ ܒܽܐܘܣܺܝܰܐ ܠܗܰܘ ܩܰܕܡܳܝܳܐ܆ ܫܡܰܝܳܢܳܐ ܕܶܝܢ ܐܰܝܟ ܐܰ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܘܠܰܘ ܥܰܦܪܳܢܳܐ. ܗܳܢܰܘ ܕܶܝܢ܆ ܕܠܰܘ ܕܰܠܥܰܦܪܳܐ ܡܶܢ ܚܛܺܝܬܳܐ ܐܶܬܬܰܚܬܺܝ܆ ܘܰܫܡܰܥ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ^[17]܆ ܐܶܠܳܐ ܕܰܕܠܳܐ ܡܽܘܡܳܐ ܚܰܘܝܶܗ ܒܢܰܦܫܶܗ ܠܰܟܝܳܢܳܐ ܕܺܝܠܰܢ. ܚܛܺܝܬܳܐ ܓܶܝܪ ܠܳܐ ܥܒܰܕ܆ ܐܳܦܠܳܐ ܐܶܫܬܟܰܚ ܢܶܟܠܳܐ ܒܦܽܘܡܶܗ^[18]. ܐܰܝܟܰܢܳܐ ܗܳܟܺܝܠ ܗܰܘ ܕܠܳܐ ܐܺܝܬܰܘܗ̱ܝ ܗ̱ܘܳܐ ܡܫܰܥܒܕܳܐ ܬܚܶܝܬ ܚܛܺܝܬܳܐ܆ ܥܬܺܝܕ ܗ̱ܘܳܐ ܕܢܶܗܘܶܐ ܕܰܬܚܶܝܬ ܡܰܕܰܐܬܳܐ܆ ܠܰܬܪ̈ܰܝܳܢܰܝ ܙܽܘ̈ܙܶܐ ܗܳܠܶܝܢ ܕܡܶܛܽܠ ܚܛܺܝܬܶܗ ܕܳܐܕܳܡ ܗܰܘ ܓܒܺܝܠ ܩܰܕܡܳܝܳܐ ܘܰܐܒܽܘܢ ܩܰܕܡܳܝܳܐ ܐܶܬܬܒܰܥܘ. ܗܰܘ ܕܶܝܢ ܕܰܠܒܰܝܬܳܐ ܟܢܰܫ ܐܰܝܟ ܡܰܬܠܳܐ ܗܰܘ ܕܒܶܐܘܰܢܓ̈ܶܠܺܝܰܐ܆ ܗܳܢܰܘ ܕܶܝܢ ܕܰܠܥܳܠܡܳܐ ܕܰܟܺܝ ܒܰܕܡܳܐ ܕܺܝܠܶܗ ܘܠܰܫܪܳܓܳܐ ܐܰܢܗܰܪ܆ ܗܳܕܶܐ ܡܰܢ ܒܶܣܪܳܐ ܕܺܝܠܶܗ ܗܰܘ ܢܰܗܺܝܪܳܐ ܒܕܰܟܝܽܘܬܳܐ ܘܰܒܩܰܕܺܝܫܽܘܬܳܐ܆ ܗܳܕܶܐ ܕܶܝܢ ܠܦܽܘܩ̈ܕܳܢܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܢܰܗܺܝܪܺܝܢ ܘܶܐܘܰܢܓ̈ܶܠܺܝܰܐ܆ ܘܝܰܨܺܝܦܳܐܺܝܬ ܒܥܳܐ ܘܰܠܙܽܘܙܳܐ ܐܶܫܟܰܚ܆ ܠܨܰܠܡܳܐ ܗܰܘ ܐܰ‌ܠܳܗܳܝܳܐ ܘܡܰܠܟܳܝܳܐ ܕܢܰܦܫܳܐ ܕܺܝܠܰܢ ܕܰܒܥܰܦܪܳܐ ܣܰܓܺܝܳܐܐ ܕܚܰܫ̈ܶܐ ܛܡܺܝܪ ܗ̱ܘܳܐ܆ ܐܳܦ ܓܶܝܪ ܘܙܽܘܙܳܐ ܕܺܝܢܳܪܳܐ ܡܶܕܶܡ ܐܺܝܬܰܘܗ̱ܝ ܕܰܢܚܳܫܳܐ^[19]܆ ܕܡܰܝܬܶܐ ܡܰܢ ܝܽܘܩܢܳܐ ܡܰܠܟܳܝܳܐ܆ ܡܶܢ ܗܳܝ ܕܶܝܢ ܕܡܶܬܒܣܶܐ ܘܡܶܫܬܕܶܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܐܳܦ ܒܫܽܘܚܬܳܐ ܘܳܐܦ ܒܨܳܐܬ̣ܳܐ ܡܚܰܦܰܝ܆ ܘܩܳܪܶܐ ܐܰܟܚܕܳܐ ܠܰܫܒܳܒܰܘ̈ܗ̱ܝ ܠܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ ܕܒܰܫܡܰܝܳܐ ܗܳܠܶܝܢ ܕܳܐܦ ܩܰܪܺܝܒܺܝܢ ܘܰܡܫܰܡܫܺܝܢ ܠܶܗ^[20] ܘܳܐܡܰܪ: ܚܕܰܘ ܥܰܡܝ ܡܶܛܽܠ ܕܶܐܫܟܚܶܬ ܠܙܽܘܙܳܐ ܗܰܘ ܕܰܐܘܒܕܶܬ^[21]܆ ܐܰܝܟܰܢܳܐ ܟܺܐܢܳܐܺܝܬ ܐܶܬܬܒܰܥ ܗܳܠܶܝܢ ܬܪ̈ܰܝܳܢܰܝ ܙܽܘ̈ܙܶܐ.

ܕܬܰܪܬܶܝܢ ܕܶܝܢ܆ ܐܳܦ ܐܰܝܟ ܡܶܠܬܳܐ ܗܳܝ܆ ܡܶܢ ܗܳܢܳܐ ܫܶܩܠܳܐ܆ ܒܰܪܚܺܐܪ̈ܶܐ ܘܠܳܐ ܡܫܰܥܒܕܳܐ ܐܺܝܬܰܘܗ̱ܝ ܗ̱ܘܳܐ. ܐܶܢ ܓܶܝܪ ܟܶܣܦܳܐ ܗܰܘ ܕܡܶܢ ܒܽܘܟܪ̈ܶܐ ܡܶܬܟܰܢܰܫ ܗ̱ܘܳܐ ܠܪ̈ܺܝܫܰܝ ܟܳܗ̈ܢܶܐ ܡܶܬܺܝܗܶܒ ܗ̱ܘܳܐ܆ ܗܘ̣ܳܐ ܕܶܝܢ ܒܰܡܕܰܒܪܳܢܽܘܬܳܐ ܐܰܝܟ ܕܳܐܡܰܪ ܦܰܘܠܽܘܤ܆ ܫܠܺܝܚܳܐ ܘܪܺܝܫ ܟܳܗ̈ܢܶܐ ܕܬܰܘܕܺܝܬܳܐ ܕܺܝܠܰܢ^[22]܆ ܡܶܢ ܗܳܢܽܘܢ ܕܢܳܣܒܺܝܢ܆ ܘܠܰܘ ܡܶܢ ܗܳܢܽܘܢ ܕܝܳܗܒܺܝܢ ܡܰܕܰܐܬܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܟܽܠܦܪܽܘܤ܆ ܐܰܝܟ ܪܺܝܫ ܟܳܗ̈ܢܶܐ. ܒܳܬܰܪܟܶܢ ܕܶܝܢ܆ ܐܰܝܟܳܐ ܐܺܝܬܶܝܗ̇ ܡܶܢ ܗܳܠܶܝܢ ܕܘܳܠ̈ܝܳܢ܆ ܕܪܺܝܫ ܟܳܗ̈ܢܶܐ ܗܰܘ ܪܰܒܳܐ܆ ܗܰܘ ܕܰܠܥܳܠܰܡ ܐܰܝܟ ܛܶܟܣܳܐ ܕܡܰܠܟܺܝܙܕܶܩ܆ ܗܰܘ ܕܰܥܒܰܪ ܠܰܫܡܰܝܳܐ܆ ܘܰܕܝܰܬܺܝܪ ܪܳܡ ܡܶܢ ܟܽܠ ‌ܐܺܝܬܰܘܗ̱ܝ ܟܺܝܬ ܐܳܦ ܗܘ̣ܳܐ܆ ܠܗܳܢܽܘܢ ܕܰܒܡܰܫܟܢܳܐ ܥܒܺܝܕ ܒܺܐܝ̈ܕܰܝܳܐ ܡܫܰܡܫܺܝܢ܆ ܠܰܡܫܰܡ̈ܫܳܢܶܐ ܕܛܶܠܳܢܺܝܬܳܐ܆ ܠܗܳܢܽܘܢ ܕܒܰܡܠܶܐ ܙܰܒܢܳܐ ܡܟܰܗܢܺܝܢ܆ ܠܗܳܢܽܘܢ ܕܒܰܐܒܪܳܗܳܡ ܡܰܥܣܳܪ̈ܶܐ ܩܰܪܶܒܘ ܠܡܰܠܟܺܝܙܕܶܩ܆ ܢܶܬܶܠ ܡܰܕܰܐܬܳܐ.

ܕܰܬܠܳܬ ܕܶܝܢ ܐܳܦ ܐ̱ܚܪܳܢܝܳܐܺܝܬ܆ ܕܥܰܡܰܢܽܘܐܶܝܠ ܠܳܐ ܡܫܰܥܒܰܕ ܗ̱ܘܳܐ ܬܚܶܝܬ ܬܒܰܥܬܳܐ ܕܰܬܪ̈ܰܝܳܢܰܝ ܙܽܘ̈ܙܶܐ ܢܳܡܽܘܣܳܝ̈ܶܐ܆ ܟܕ ܥܬܺܝܕ ܗ̱ܘܳܐ ܕܰܚܠܳܦܰܝܢ ܢܶܪܡܶܐ ܠܡܰܘܬܳܐ ܬܪ̈ܰܝܳܢܰܝ ܙܽܘ̈ܙܶܐ ܡܶܬܗܰܘܢܳܢܳܐ܆ ܢܰܦܫܳܐ ܐܳܡܰܪ ܐ̱ܢܳܐ ܘܦܰܓܪܳܐ܆ ܘܢܶܩܒܽܘܥ ܡܰܢ ܒܰܨܠܺܝܒܳܐ ܠܶܐܫܛܳܪܳܐ ܕܰܚܛܺܝܬܳܐ ܗܰܘ ܕܥܰܠ ܟܽܠܶܗ ܓܶܢܣܳܐ ܐ̱ܢܳܫܳܝܳܐ܆ ܢܶܫܪܶܐ ܕܶܝܢ ܒܡܰܘܬܳܐ ܒܰܝܬܳܝܳܐ ܕܺܝܠܶܗ܆ ܠܡܰܘܬܳܐ ܗܰܘ ܓܰܘܳܢܳܝܳܐ ܘܰܕܥܰܠ ܟܽܠܶܗ ܥܳܠܡܳܐ ܐܶܬܥܰܫܰܢ. ܚܰܕ ܓܶܝܪ ܐܺܝܬܰܘܗ̱ܝ ܗ̱ܘܳܐ ܡܶܢ ܬܰܪܬܶܝܢ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܳܢܳܝܬܳܐ ܗܳܝ ܕܺܝܠܗܶܝܢ܆ ܕܡܶܢ ܒܳܬܰܪ ܚܕܳܝܽܘܬܳܐ ܐܳ‌ܠܨܳܐܺܝܬ ܘܢܳܩܦܳܐܺܝܬ ܒܰܬܪܰܝܳܢܽܘܬܳܐ ܠܳܐ ܡܶܬܦܰܠܰܓ. ܘܟܰܕ ܠܳܐ ܚܳܫܽܘܫܳܐܺܝܬ ܒܝܰܕ ܒܶܣܪܳܐ ܥܰܡ ܚܰܫܳܐ ܐܶܬܥܰܪܙܰܠ܆ ܐܰܝܟܰܢܳܐ ܕܠܰܢ ܢܙܰܡܶܢ ܠܳܐ ܚܳܫܽܘܫܽܘܬܳܐ ܒܝܰܕ ܩܝܳܡܬܳܐ܆ ܐܳܦ ܗܽܘ ܒܶܐܘܰܢܓ̈ܶܠܺܝܰܐ ܐܳܡܰܪ ܗ̱ܘܳܐ܆ ܒܰܙܒܰܢ ܡܰܢ܆ ܘܠܰܚܡܳܐ ܕܶܝܢ ܗܰܘ ܕܶܐܢܳܐ ܐܶ݀ܬܶܠ ܒܶܣܪܳܐ ܕܺܝܠܝ ܐܺܝܬܰܘܗ̱ܝ܆ ܗܰܘ ܕܶܐܢܳܐ ܐܶ݀ܬܶܠ ܚܠܳܦ ܚܰܝ̈ܶܐ ܕܥܳܠܡܳܐ^[23]. ܒܰܙܒܰܢ ܕܶܝܢ܆ ܢܰܦܫܳܐ ܕܺܝܠܝ ܣܳܐܶܡ ܐ̱ܢܳܐ ܚܠܳܦ ܥܶܪ̈ܒܶܐ^[24]. ܠܗܳܠܶܝܢ ܟܺܝܬ ܕܨܶܒܝܳܢܳܐܺܝܬ ܦܪܰܫ ܐܶܢܽܘܢ ܡܶܢ ܚ̈ܕܳܕܶܐ܆ ܟܰܕ ܠܡܰܘܬܳܐ ܕܺܝܠܰܢ ܛܥܶܡ. ܗܳܕܶܐ ܓܶܝܪ ܐܺܝܬܰܘܗ̱ܝ ܡܰܘܬܳܐ ܗܰܘ ܕܺܝܠܰܢ܆ ܦܽܘܪܫܳܢܳܐ ܕܢܰܦܫܳܐ ܡܶܢ ܦܰܓܪܳܐ. ܐܶܠܳܐ ܘܠܳܐ ܢܰܦܫܶܗ ܐܶܫܬܰܒܩܰܬ ܒܰܫܝܽܘܠ ‌ܐܰܝܟܰܢܳܐ ܕܰܟܬܺܝܒ^[25]: ܫܽܘܠܛܳܢܳܐ ܓܶܝܪ ܐܳܡܰܪ ܗ̱ܘܳܐ ܕܺܐܝܬ ܠܶܗ ܕܰܢܣܺܝܡܺܝܗ̇ ܘܰܕܫܽܘܠܛܳܢܳܐ ܐܺܝܬ ܠܶܗ ܬܽܘܒ ܕܢܶܣܒܺܝܗ̇܆ ܘܳܐܦܠܳܐ ܬܽܘܒ ܒܶܣܪܶܗ ܚܙܳܐ ܡܶܬܚܰܒܠܳܢܽܘܬܳܐ.

ܣܰܓܺܝ ܕܶܝܢ ܛܳܒܳܐܺܝܬ ܠܢܰܦܫܳܐ ܘܰܠܦܰܓܪܳܐ܆ ܬܪ̈ܰܝܳܢܰܝ ܙܽܘ̈ܙܶܐ ܡܶܬܗܰܘܢܳܢܳܐ ܐܶܡܰܪܢܰܢ. ܡܶܛܽܠ ܓܶܝܪ ܕܢܰܦܫܳܐ ܟܰܕ ܡܠܺܝܠܬܳܐ ܐܶܬܒ̣ܰܪܝܰܬ ܘܰܒܨܰܠܡܳܐ ܕܰܐ‌ܠܗܳܐ ܗܘ̣ܳܬ܆ ܘܰܡܩܰܒܠܳܢܺܝܬܳܐ ܐܺܝܬܶܝܗ̇ ܕܙܰܕܺܝܩܽܘܬܳܐ ܘܰܕܚܶܟܡܬܳܐ ܘܕܰܡܝܰܬܪ̈ܳܬܳܐ ܗܳܠܶܝܢ ܕܫܰܪܟܳܐ܆ ܠܝܽܘܩܢܳܐ ܡܰܠܟܳܝܳܐ ܡܰܝܬܝܳܐ ܒܰܕܡܽܘܬ ܙܽܘܙܳܐ܆ ܡܶܛܽܠ ܗܳܕܶܐ ܐܳܦ ܪ̈ܶܓܫܶܐ ܗܳܠܶܝܢ ܕܦܰܓܪܳܐ ܟܰܕ ܠܡܰܥ̈ܒܕܳܢܘܳܬܳܐ ܡܶܬܗܰܘ̈ܢܳܢܝܳܬܳܐ ܡܫܰܡܫܺܝܢ܆ ܡܠܺܝ̈ܠܶܐ ܡܶܕܶܡ ܐܺܝܬܰܝܗܽܘܢ ܐܳܦ ܗܶܢܽܘܢ ܒܰܙܢܳܐ ܡܶܕܶܡ܆ ܟܰܕ ܒܰܕܡܽܘܬ ܩܺܪܽܘܬܳܐ ܡܰܝܬܶܝܢ ܕܽܘܡܝܳܐ ܕܝܽܘܩܢܳܐ ܡܰܠܟܳܝܳܐ ܐܰܘܟܺܝܬ ܛܰܒܥܳܐ܆ ܘܰܠܘܳܬ ܕܽܘܡܝܳܐ ܕܗܰܘܢܳܐ ܩܢܰܘ ܐܰܝܢܳܝܽܘܬܳܐ. ܐܰܝܟܰܢܳܐ ܕܡܶܢ ܬܪ̈ܰܝܗܽܘܢ^[26] ܐܰܝܟ ܕܡܶܢ ܬܪ̈ܰܝܳܢܰܝ ܙܽܘ̈ܙܶܐ ܬܶܬܟܪܶܙ܆ ܕܰܒܨܰܠܡܳܐ ܕܰܐ‌ܠܳܗܳܐ ܥܒܺܝܕ ܒܰܪܢܳܫܳܐ܆ ܗܰܘ ܕܡܶܢ ܢܰܦܫܳܐ ܘܦܰܓܪܳܐ ܚܰܕ ܦܰܪܨܽܘܦܳܐ ܘܚܰܕ ܩܢܽܘܡܳܐ ܘܚܰܕ ܟܝܳܢܳܐ ܐܺܝܬܰܘܗ̱ܝ ܠܳܐ ܒܠܺܝܠܳܐܺܝܬ.

ܠܘܳܬ ܗܳܠܶܝܢ ܡܳܢܳܐ ܢܺܐܡܪܽܘܢ܆ ܐܰܪܺܝܽܘܤ ܗܰܘ ܕܰܦܩܺܝܪ ܘܰܐܦܽܘܠܺܝܢܰܪܺܝܽܘܤ ܗܰܘ ܕܒܰܫܪܳܪܳܐ ܐܶܬܟܪܰܗ ܚܰܣܺܝܪܽܘܬ ܗܰܘܢܳܐ܆ ܕܗܰܘ ܡܰܢ ܠܳܐ ܡܫܰܘܬܰܦܬܳܐ ܕܢܰܦܫܳܐ ܐܰܣܒܰܪ ܠܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ܆ ܗܰܘ ܕܶܝܢ ܠܳܐ ܡܫܰܘܬܰܦܬܳܐ ܕܗܰܘܢܳܐ. ܐܰܝܟܳܐ ܓܶܝܪ ܐܺܝܬܰܘܗ̱ܝ ܦܽܘܪܩܳܢܳܐ ܕܨܰܠܡܳܐ ܡܰܠܟܳܝܳܐ܆ ܟܰܕ ܐܰ‌ܠܳܗܳܐ ܡܶܠܬܐ ܒܶܣܪܳܐ ܒܰܠܚܽܘܕ ܚܰܝܶܕ ܠܶܗ ܐܰܘ ܢܰܦܫܳܐ ܕܠܳܐ ܗܰܘܢܳܐ. ܐܰܝܟܰܢܳܐ ܕܶܝܢ ܠܰܘ ܕܠܳܐ ܡܶܠܬܳܐ ܗܝ܆ ܕܡܶܠܬܳܐ ܢܶܛܥܶܐ ܠܗܳܝ ܡܠܺܝܠܬܳܐ܆ ܘܰܢܫܰܟܶܢ ܠܰܢ ܛܰܝܒܽܘܬܐ܆ ܕܰܒܗܳܠܶܝܢ ܕܡܶܢ ܟܽܠ ܪ̈ܺܝܫܺܝܢ ܚܰܣܺܝܪܳܐ.

ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܢܳܐ ܫܽܘܒܚܳܐ ܕܰܡܛܰܫܰܝ܆ ܐܰܒܪܶܩ ܠܰܢ ܒܢ̈ܳܬ ܩ̈ܳܠܶܐ ܗܳܠܶܝܢ ܕܶܐܘܰܢܓܶܠܺܝܽܘܢ܆ ܟܰܕ ܡܡܰܫܚܳܐܺܝܬ ܐܶܬܒ̈ܰܚܰܢܶܝܢ܆ ܠܳܐ ܗܳܟܺܝܠ ܢܶܪܚܰܩ. ܐܶܠܐ܆ ܢܟܰܬܰܪ ܒܶܗ ܒܒܽܘܚܳܢܳܐ. ܘܟܰܕ ܢܶܚܙܶܐ ܫܽܘܒܚܳܐ ܕܝܰܬܺܝܪ ܪܰܒ܆ ܕܥܳܒܰܪ ܘܰܡܥܰܠܰܝ ܠܥܶܠ ܡܶܢ ܗܰܘ ܕܩܰܕܶܡ ܐܶܬܥܰܩܰܒ܆ ܐܰܝܟ ܦܰܘܠܽܘܤ ܢܺܐܡܰܪ: ܕܠܳܐ ܡܫܰܒܚܳܐ ܗܳܝ ܕܰܡܫܰܒܚܳܐ ܒܗܳܕܶܐ ܡܢܳܬܳܐ܆ ܡܶܛܽܠ ܫܽܘܒܚܳܐ ܗܰܘ ܕܝܰܬܺܝܪ ܡܥܰܠܰܝ^[27].

ܟܰܕ ܓܶܝܪ ܡܶܫܟܰܚ ܗ̱ܘܳܐ ܦܳܪܽܘܩܰܢ ܕܥܶܠ̈ܠܳܬܳܐ ܗܳܠܶܝܢ ܕܩܰܕܶܡ ܐܶܬܶܐܡܰܪ̈ܝ̱ ܢܺܐܡܰܪ܆ ܕܰܡܚܰܘ̈ܝܳܢ ܗ̱ܘܰܝ̈ ܠܶܗ ܕܠܳܐ ܚܰܝܳܒ ܗ̱ܘܳܐ ܘܠܳܐ ܡܫܰܥܒܰܕ ܠܡܰܪܡܝܳܢܽܘܬܳܐ ܕܰܬܪ̈ܰܝܳܢܰܝ ܙܽܘ̈ܙܶܐ. ܕܳܐܕܳܡ ܟܺܝܬ ܚܰܕܬܳܐ ܐܺܝܬܰܘܗ̱ܝ ܘܪܺܝܫܺܝܬܳܐ ܚܕܰܬܳܐ ܡܶܕܶܡ ܘܰܕܠܳܐ ܡܽܘܡ ܕܓܶܢܣܳܐ ܕܺܝܠܰܢ܆ ܘܰܕܪܺܝܫ ܟܳܗ̈ܢܶܐ ܠܰܘ ܕܰܡܠܶܐ ܙܰܒܢܳܐ ܐܺܝܬܰܘܗ̱ܝ ܐܶܠܳܐ ܕܰܠܥܳܠܰܡ܆ ܘܰܕܟܰܕ ܬܪܰܝܳܢܳܝ ܙܽܘ̈ܙܶܐ ܡܶܬܗܰܘܢܳܢܳܐ ܡܶܬܬܰܪܡܶܐ ܡܶܢ ܚܛܺܝܬܳܐ ܢܶܙܒܰܢ ܠܰܢ܆ ܠܗܳܠܶܝܢ ܡܰܢ ܐܰܝܟ ܐܰܝܠܶܝܢ ܕܠܰܡܕܰܒܪܳܢܽܘܬܳܐ ܦܰܐܝ̈ܳܢ ܗ̱ܘܰܝ̈ ܥܳܒܰܪ ܘܫܳܬܶܩ܆ ܠܘܳܬ ܕܶܝܢ ܥܶܠܬܳܐ ܗܳܝ ܪܳܡܬܳܐ ܘܰܕܝܰܬܺܝܪ ܦܰܐܝܳܐ ܠܰܐܠܳܗܳܐ ܐܳܙܶܠ.

ܐܳܦ ܓܶܝܪ ܟܰܕ ܥ̣ܰܠܘ ܐܳܡܰܪ ܠܰܟܦܰܪܢܰܚܽܘܡ܆ ܗܳܝ ܐܰܝ̇ܕܳܐ ܕܡܶܣܬܰܒܪܳܐ ܗ̱ܘܳܬ ܕܰܡܕܺܝܢ̱ܬܳܐ ܕܺܝܠܶܗ ܐܺܝܬܶܝܗ̇ ܗ̱ܘܳܬ܆ ܡܶܛܽܠ ܗܳܝ ܕܰܣܒܺܝܣܳܐܺܝܬ ܬܰܡܳܢ ܟܳܐܶܫ ܗ̱ܘܳܐ ܘܰܡܕܰܝܰܪ ܗ̱ܘܳܐ ܒܳܗ̇. ܠܗܳܕܶܐ ܓܶܝܪ ܡܶܢ ܒܳܬܰܪ ܕܶܐܬܠܒܶܟ ܝܽܘܚܰܢܳܢ ܚܠܳܦ ܢܳܨܪܰܬ ܓܒܳܐ ܠܶܗ ܕܢܶܥܡܰܪ ܒܳܗ̇܆ ܟܰܕ ܡܰܬܰܝ ܟܬܰܒ ܗܳܟܰܢܳܐ܆ ܕܟܰܕ ܫܡܰܥ ܕܝܽܘܚܰܢܢ ܐܶܫܬܠܶܡ ܫܰܢܺܝ ܠܶܗ ܠܰܓܠܺܝܠܳܐ܆ ܘܟܰܕ ܫܰܒܩܳܗ̇ ܠܢܳܨܪܰܬ ܐܶܬܳܐ ܥܡܰܪ ܒܰܟܦܰܪܢܰܚܽܘܡ ܗܳܝ ܕܥܰܠ ܣܦܳܪ ܝܰܡܳܐ^[28]܆ ܗܳܝܕܶܝܢ ܩܪܶܒܘ ܗܳܢܽܘܢ ܬܳܒܽܘ̈ܥܶܐ ܕܰܬܪ̈ܰܝܳܢܰܝ ܙܽܘ̈ܙܶܐ܆ ܟܰܕ ܒܰܡܕܺܝܢ̱ܬܳܐ ܕܺܝܠܶܗ ܝܰܬܺܝܪܳܐܺܝܬ ܠܟܽܠܢܳܫ ܡܩܰܪܒܺܝܢ ܗ̱ܘܰܘ ܠܶܗ ܡܰܥܗܕܳܢܽܘܬܳܐ. ܘܰܩܪܶܒܘ ܥܰܡ ܟܽܠܳܗ̇ ܟܚܺܝܕܽܘܬܳܐ ܘܺܐܝܩܳܪܳܐ. ܘܠܰܘ ܡܶܚܕܳܐ ܠܶܗ ܡܰܠܶܠܘ ܐܰܘ ܦܓܰܥܘ ܒܶܗ܆ ܠܘܳܬ ܦܶܛܪܽܘܤ ܕܶܝܢ ܐܶܡܰܪܘ. ܠܰܘ ܚܬܺܝܪܳܐܺܝܬ ܒܰܕܡܽܘܬ ܬܳܒܽܘ̈ܥܶܐ܆ ܢܰܪܡܶܐ ܡܰܠܦܳܢܳܐ ܕܺܝܠܟܽܘܢ ܗܳܠܶܝܢ ܬܪ̈ܰܝܳܢܰܝ ܙܽܘ̈ܙܶܐ܆ ܐܶܠܳܐ ܢܺܝܚܳܐܺܝܬ ܡܰܠܽܘܢ ܘܡܰܟܺܝܟܳܐܺܝܬ. ܡܰܠܦܳܢܳܐ ܕܺܝܠܟܽܘܢ܆ ܠܳܐ ܝܳܗܶܒ ܗܳܠܶܝܢ ܬܪ̈ܰܝܳܢܰܝ ܙܽܘ̈ܙܶܐ^[29]. ܢܺܐܡܰܪ ܕܶܝܢ ܐ̱ܢܳܫ ܟܒܰܪ܆ ܐܳܦ ܕܨܰܕܘܳܐ ܡܶܕܶܡ ܩܰܠܺܝܠ ܚܠܺܝܛ ܗ̱ܘܳܐ ܒܶܗ ܒܫܽܘܐܴܠܳܐ. ܡܶܛܽܠ ܓܶܝܪ ܕܰܐܝܟܰܢܳܐ ܕܶܐܬܐܰܡܪܰܬ܆ ܠܪ̈ܺܝܫܰܝ ܟܳܗ̈ܢܶܐ ܡܶܬܓܒܶܐ ܗ̱ܘܳܐ ܗܽܘ ܫܶܩܠܳܐ ܗܰܘ ܕܰܬܪ̈ܰܝܳܢܰܝ ܙܽܘ̈ܙܶܐ܆ ܗܳܠܶܝܢ ܕܶܝܢ ܚܰܣܳܡܳܐܺܝܬ ܣܺܝܡܺܝܢ ܗ̱ܘܰܘ ܠܘܳܬ ܝܶܫܽܘܥ܆ ܘܰܐܝܟ ܕܒܰܐܝܢܳܐ ܕܥܳܒܰܪ ܥܰܠ ܢܳܡܽܘܣܳܐ ܡܶܬܥܰܕܠܺܝܢ ܗ̱ܘܰܘ ܒܶܗ܆ ܘܰܕܫܰܒܬܳܐ ܫܳܪܶܐ ܗ̱ܘܳܐ܆ ܟܒܰܪ ܐܳܦ ܗܳܢܽܘܢ ܕܬܳܒܥܺܝܢ ܗ̱ܘܰܘ ܠܶܗ ܠܫܶܩܠܳܐ ܗܳܢܳܐ܆ ܟܰܕ ܠܗܳܢܽܘܢ ܪ̈ܳܚܡܰܝ ܥܶܕܠܳܝ̈ܶܐ ܘܚܰܣ̈ܳܡܶܐ ܡܫܰܡܫܺܝܢ ܗ̱ܘܰܘ܆ ܘܰܒܩܰܕܺܝܡܽܘܬ ܡܶܬܬܰܚܕܳܢܽܘܬܳܐ ܠܒܺܝܟܺܝܢ ܗ̱ܘܰܘ܆ ܡܨܰܕܝܳܢܳܐܺܝܬ ܫܰܐܶܠܘ ܟܺܝܬ ܘܶܐܡܰܪܘ: ܕܡܰܠܦܳܢܳܐ ܕܺܝܠܟܽܘܢ ܠܳܐ ܝܳܗܶܒ ܗܳܠܶܝܢ ܬܪ̈ܰܝܳܢܰܝ ܙܽܘ̈ܙܶܐ. ܐܰܝܟ ܗܰܘ ܕܳܐܡܪܺܝܢ ܗ̱ܘܰܘ܆ ܠܡܳܐ ܐܳܦ ܒܗܳܕܶܐ ܥܳܒܰܪ ܠܶܗ ܠܢܳܡܽܘܣܳܐ܆ ܘܠܳܐ ܡܶܬܪܟܶܢ ܠܦܽܘܩ̈ܕܳܢܶܐ ܕܗܰܘ܆ ܐܳܦ ܓܶܝܪ ܘܗܺܝ ܗܳܝ ܕܡܰܠܦܳܢܳܐ ܕܺܝܠܟܽܘܢ܆ ܕܗܳܢܳܐ ܪܶܡܙܳܐ ܐܺܝܬ ܠܶܗ ܡܶܣܬܰܒܪܳܐ. ܡܳܢܳܐ ܗܳܟܺܝܠ ܦܶܛܪܽܘܤ. ܟܰܕ ܝܳܕܰܥ ܗ̱ܘܳܐ ܠܢܺܝܫܳܐ ܕܡܰܠܦܳܢܶܗ ܐܰܝܟ ܬܰܠܡܺܝܕܳܐ ܫܰܪܺܝܪܳܐ܆ ܕܠܳܐ ܪܶܚܡܰܬ ܟܶܣܦܳܐ ܪܳܕܶܐ ܗ̱ܘܳܐ ܘܡܰܠܶܦ܆ ܘܰܕܨܳܒܶܐ ܗ̱ܘܳܐ ܠܡܰܪܡܳܝܽܘ ܗܰܘ ܫܶܩܠܳܐ ܟܰܕ ܡܡܰܠܶܐ ܗ̱ܘܳܐ ܠܰܡܕܰܒܪܳܢܽܘܬܳܐ܆ ܡܦܰܢܶܐ ܗ̱ܘܳܐ ܦܶܬܓܳܡܳܐ ܠܗܳܢܽܘܢ ܕܫܰܐܶܠܘ܆ ܐܺܝܢ.

ܘܡܶܟܺܝܠ ܗܽܘ ܝܶܫܽܘܥ ܒܝܰܕ ܟܽܠܗܶܝܢ ܪ̈ܳܡܳܬܳܐ ܐܳܬܶܐ ܐܰܝܟ ܐܰ‌ܠܳܗܳܐ. ܟܰܕ ܓܶܝܪ ܥ̣ܰܠܘ ܗܶܢܽܘܢ ܠܒܰܝܬܳܐ܆ ܠܳܐ ܡܟܰܬܰܪ ܠܡܺܐܠܰܦ ܕܡܶܛܽܠ ܡܳܢܳܐ ܐܶܬܰܘ ܗܳܢܽܘܢ ܠܘܳܬܶܗ܆ ܟܰܕ ܠܟܽܠܗܶܝܢ ܝܳܕܰܥ ܗ̱ܘܳܐ܆ ܐܶܠܳܐ ܩܳܕܶܡ ܘܳܐܡܰܪ܆ ܡܳܢܳܐ ܡܶܬܚܙܶܐ ܠܳܟ ܫܶܡܥܽܘܢ. ܡܰܠ̈ܟܶܐ ܕܰܐܪܥܳܐ܆ ܡܶܢ ܡܰܢܽܘ ܢܳܣܒܺܝܢ ܫܶܩ̈ܠܶܐ ܐܰܘ ܡܰܕܰܐܬܳܐ ܕܰܐܪܥܳܐ܆ ܡܶܢ ܒܢܰܝ̈ܗܽܘܢ܆ ܐܰܘ ܡܶܢ ܢܽܘܟܪ̈ܳܝܶܐ. ܟܰܕ ܕܶܝܢ ܐܶܡܰܪ ܦܶܛܪܽܘܤ ܕܡܶܢ ܢܽܘܟܪ̈ܳܝܶܐ. ܐܳܡܰܪ ܠܶܗ ܬܽܘܒ ܗܽܘ܆ ܐܱܪܰܐ ܡܳܕܶܝܢ܆ ܒ̈ܢܰܝ ܚܺܐܪ̈ܶܐ ܐܺܝܬܰܝܗܽܘܢ ܒܢܰܝ̈ܳܐ^[30]. ܘܰܒܗܳܝ ܡܰܢ ܕܶܐܡܰܪ ܡܰܠ̈ܟܶܐ ܕܰܐܪܥܳܐ ܚܰܘܺܝ܆ ܕܗܽܘ ܦܪܺܝܫܳܐܺܝܬ ܕܡܰܠܟܳܐ ܫܡܰܝܳܢܳܐ ܐܺܝܬܰܘܗ̱ܝ ܒܪܳܐ܆ ܫܰܘܬܳܦܳܐ ܕܡܰܠܟܽܘܬܳܐ ܥܰܡܶܗ ܘܰܫܘܶܐ ܒܺܐܝܩܳܪܳܐ. ܒܗܳܝ ܕܶܝܢ ܕܶܐܡܰܪ ܕܡܶܢ ܒܢܰܝ̈ܳܐ ܐܰܘ ܡܶܢ ܢܽܘܟܪ̈ܳܝܶܐ ܚܰܘܺܝ܆ ܕܗܽܘ ܒܪܳܐ ܕܺܝܠܳܢܳܝܳܐ ܕܺܝܠܶܗ ܐܺܝܬܰܘܗ̱ܝ ܘܫܰܪܺܝܪܳܐ܆ ܐܰܝܟ ܐܰܝܢܳܐ ܕܒܰܟܝܳܢܳܐ ܘܒܽܐܘܣܺܝܰܐ ܡܶܢ ܐܰ‌ܠܳܗܳܐ ܘܰܐܒܳܐ ܐܶܬܺܝܠܶܕ. ܗܰܘ ܓܶܝܪ ܕܰܒܪܳܐ ܥܰܠܺܝܠܳܐ ܐܺܝܬܰܘܗ̱ܝ܆ ܒܰܣܝܳܡܳܐ ܒܰܠܚܽܘܕ ܡܶܬܩܪܶܐ ܒܪܳܐ. ܐܺܝܬܰܘܗ̱ܝ ܕܶܝܢ ܡܳܪܳܢܳܐܺܝܬ ܢܽܘܟܪܳܝܳܐ. ܐܰܝܟܰܢܳܐ ܗܳܟܺܝܠ ‌ܐܰܝܟ ܐܪܺܝܽܘܤ ܐܰܘ ܐܽܘܢܽܘܡܺܝܽܘܤ ܒܪܺܝܬܳܐ ܢܺܐܡܪܺܝܘܗ̱ܝ ܐܰܘ ܕܠܳܐ ܕܳܡܶܐ܆ ܠܗܰܘ ܕܡܶܛܽܠ ܗܳܝ ܕܰܒܪܳܐ ܐܺܝܬܰܘܗ̱ܝ܆ ܐܰܟܚܕܳܐ ܡܰܡܠܶܟ ܥܰܡ ܐܰܒܳܐ܆ ܘܠܰܘ ܢܽܘܟܪܳܝܰܐ ܗ̱ܘ ܐܶܠܳܐ ܕܺܝܠܳܢܳܝܳܐ ܕܺܝܠܶܗ ܘܫܰܪܺܝܪܳܐ. ܐܰܘ ܐܰܝܟܰܢܳܐ ܒܪܳܐ ܘܰܐ‌ܠܳܗܳܐ ܕܡܶܢ ܐܰ‌ܠܳܗܳܐ ܢܶܬܶܠ ܡܰܕܰܐܬܳܐ ܠܰܐܒܳܐ ܫܡܰܝܳܢܳܐ. ܐܶܬܝܰܕܥܰܬ ܕܶܝܢ ܢܰܗܺܝܪܳܐܺܝܬ ܡܶܢ ܗܳܪܟܳܐ܆ ܕܰܓܒܺܝܬܳܐ ܗܳܝ ܕܗܳܠܶܝܢ ܬܪ̈ܰܝܳܢܰܝ ܙܽܘ̈ܙܶܐ܆ ܫܶܩܠܳܐ ܢܳܡܽܘܣܳܝܳܐ ܐܺܝܬܶܝܗ̇ ܗ̱ܘܳܬ܆ ܐܰܝܟ ܗܳܠܶܝܢ ܕܗܳܫܳܐ ܐܶܬܶܐܡܰܪ̈ܶܝܢ ܘܠܰܘ ܪܽܗ̱ܘܡܳܝܳܐ. ܕܠܰܐܠܳܗܳܐ ܡܶܬܺܝܗܶܒ ܗ̱ܘܳܐ ܘܠܰܘ ܠܩܶܣܰܪ. ܡܶܢ ܟܽܠ ܦܪܽܘܤ ܓܶܝܪ ܐܶ‌ܠܽܘ ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܐܳܡܰܪ ܗ̱ܘܳܐ ܕܙܳܕܶܩ ܕܢܶܬܝܰܗ̈ܒܳܢ ܠܩܶܣܰܪ ܗܳܠܶܝܢ ܕܩܶܣܰܪ܆ ܘܠܰܘ ܗܳܝ ܕܰܐܪܰܐ ܡܳܕܶܝܢ ܒ̈ܢܰܝ ܚܺܐܪ̈ܶܐ ܐܺܝܬܰܝܗܽܘܢ ܒܢܰܝ̈ܳܐ. ܟܰܕ ܗܳܕܶܐ ܕܶܝܢ ܐܶܡܰܪ: ܐܳܦ ܠܣܳܗܕܽܘܬܳܐ ܗܳܝ ܕܦܶܛܪܽܘܤ ܫܰܪܰܪ܆ ܟܰܕ ܡܶܢ ܠܥܶܠ ܡܶܢ ܐܰ‌ܠܳܗܳܐ ܐܶܬܢܦܰܚ ܟܺܝܬ ܘܰܐܙܥܶܩ܆ ܐܰܢ̱ܬ ܐܺܝܬܰܝܟ ܡܫܺܝܚܳܐ ܗܰܘ ܒܪܶܗ ܕܰܐ‌ܠܳܗܳܐ ܚܰܝܳܐ^[31]. ܡܶܛܽܠ ܓܶܝܪ ܕܡܶܢ ܒܳܬܰܪ ܣܳܗܕܽܘܬܳܐ ܕܕܰܐܝܟ ܗܳܕܶܐ܆ ܠܘܳܬ ܩܰܕܺܝܡܽܘܬ ܡܶܠܬܳܐ ܗܳܝ ܕܡܶܛܽܠ ܨܠܺܝܒܳܐ ܘܡܶܛܽܠ ܚܰܫܳܐ ܦܳܪܽܘܩܳܝܳܐ ܐܶܬܬܙܺܝܥ ܘܰܕܚܶܠ܆ ܟܰܕ ܡܶܕܶܡ ܐ̱ܢܳܫܳܝܳܐ ܚܰܫ ܘܶܐܡܰܪ܆ ܚܳܤ ܠܳܟ ܡܳܪܝ ܠܳܐ ܬܶܗܘܶܐ ܠܳܟ ܗܳܕܶܐ܆ ܘܥܰܡ ܟܳܐܬܳܐ ܬܰܩܺܝܦܬܳܐ ܘܰܩܫܺܝܬܳܐ ܫܡܰܥ܆ ܙܶܠ ܠܳܟ ܠܒܶܣܬܰܪܝ ܤܳܛܳܢܳܐ^[32]. ܠܘܳܬ ܗܳܝ ܗܰܝܡܳܢܽܘܬܳܐ ܡܶܢ ܕܪܺܝܫ ܩܳܪܶܐ ܠܶܗ. ܟܰܕ ܐܳܡܰܪ ܗܽܘ ܠܶܗ ܕܰܒܪܳܐ ܕܺܝܠܳܢܳܝܳܐ ܕܺܝܠܶܗ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܘܟܰܕ ܡܚܰܘܶܐ ܕܰܒܝܰܕ ܗܳܝ ܟܳܐܬܳܐ܆ ܠܕܶܚܠܬܳܐ ܗܳܝ ܡܚܺܝܠܬܳܐ ܐܰܣܠܺܝ܆ ܘܠܰܘ ܠܣܳܗܕܽܘܬܳܐ ܗܳܝ ܐܰ‌ܠܳܗܳܝܬܳܐ܆ ܠܗܳܝ ܕܒܶܣܪܳܐ ܘܰܕܡܳܐ ܠܳܐ ܓܠܳܗ̇ ܠܶܗ܆ ܐܶܠܳܐ ܐܰܒܳܐ ܗܰܘ ܫܡܰܝܳܢܳܐ.

ܒܪܰܡ ܟܺܝܬ ܐܳܦ ܟܰܕ ܗܳܠܶܝܢ ܗܳܟܰܢܳܐ ܐܶܬܶܐܡܰܪ̈ܝ̱ ܘܶܐܬܚܰܘ̈ܺܝ܆ ܗܰܘ ܒܰܪܚܺܐܪ̈ܶܐ܆ ܗܰܘ ܒܪܳܐ ܕܺܝܠܳܢܳܝܳܐ ܕܰܐܒܳܐ ܘܰܐ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܡܳܢܳܐ ܐܳܡܰܪ. ܐܰܝܟܰܢܳܐ ܕܶܝܢ ܕܠܳܐ ܢܰܟܫܶܠ ‌ܐܶܢܽܘܢ܆ ܟܰܕ ܬܺܐܙܰܠ ܠܝܰܡܳܐ ܐܰܪܡܳܐ ܒܰܠܽܘܥܳܐ. ܘܰܠܢܽܘܢܳܐ ܗܰܘ ܕܣܳܠܶܩ ܩܰܕܡܳܝܳܐ ܣܰܒ. ܘܟܰܕ ܬܶܦܬܰܚ ܦܽܘܡܶܗ ܬܶܫܟܰܚ ܐܶܣܬܺܝܪܳܐ. ܟܰܕ ܠܗܳܝ ܬܶܣܰܒ܆ ܗܰܒ ܠܗܽܘܢ ܚܠܳܦܰܝ ܘܰܚܠܳܦܰܝܟ^[33].

ܗܳܝ ܕܶܝܢ ܕܰܐܝܟܰܢܳܐ ܕܠܳܐ ܢܰܟܫܶܠ ‌ܐܶܢܽܘܢ ܡܰܠܦܳܐ ܠܰܢ ܢܰܗܺܝܪܳܐܺܝܬ܆ ܕܰܒܗܳܠܶܝܢ ܕܚܳܝܪ̈ܳܢ ܠܘܳܬ ܡܰܘܗܰܒܬܳܐ ܕܕܰܗܒܳܐ܆ ܠܳܐ ܢܰܟܫܶܠ ܠܰܐܚ̈ܶܐ. ܐܶܠܳܐ ܢܶܒܣܶܐ ܥܰܠ ܡܰܪ̈ܗܳܛܶܐ. ܒܰܠܚܽܘܕ ܐܶܢ ܠܰܘ ܝܰܨܺܝܦܽܘܬܳܐ ܘܰܢܛܽܘܪܬܳܐ ܕܣܽܘܥܪ̈ܳܢܶܐ ܕܙܳܕܩܺܝܢ ܠܡܶܣ̈ܟܺܢܶܐ ܐܰܘ ܠܝܰܬܡ̈ܶܐ܆ ܐܰܘ ܠ̱ܐܢܳܫܺܝ̈ܢ ܐ̱ܚܪ̈ܳܢܶܐ ܡܗܰܝܡܢܺܝܢ ܚ̱ܢܰܢ. ܗܳܝ ܕܶܝܢ ܓܶܝܪ܆ ܠܳܐ ܙܳܕܶܩ ܕܰܢܩܰܒܠܺܝܗ̇ ܠܗܳܝ ܕܰܒܗܳܠܶܝܢ ܢܽܘܟܪ̈ܳܝܳܬܳܐ ܦܺܝܠܳܣܽܘܦܺܝܣܳܐ ܢܶܥܒܶܕ. ܐܶܠܳܐ ܙܳܕܶܩ ܕܫܰܘܝܽܘܬܳܐ ܢܺܐܨܰܦ ܐܰܝܟ ܬܚܽܘ̈ܡܶܐ ܕܟܺܐܢܽܘܬܳܐ܆ ܘܰܕܠܳܐ ܬܽܘܒ ܡܶܢ ܗܳܝ ܕܰܠܩܽܘܒܠܳܐ܆ ܒܶܐܣܟܺܡܳܐ ܕܫܰܦܺܝܪܽܘܬ ܕܶܚܠܬܳܐ ܢܶܬܚܪܶܐ ܕܠܳܐ ܫܽܘܠܳܡ܆ ܘܢܶܬܪܰܓܪܰܓ ܠܗܳܠܶܝܢ ܕܠܳܐ ܙܳܕܩ̈ܳܢ ܠܰܢ. ܝܳܠܦܺܝܢ ܚ̱ܢܰܢ ܕܶܝܢ ܡܶܢ ܗܳܪܟܳܐ܆ ܐܳܦ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܠܡܶܦܪܰܥ ܠܟܽܠܢܳܫ ܗܳܠܶܝܢ ܕܡܶܬܬܚܺܝ̈ܒܳܢ ܠܶܗ܆ ܠܗܰܘ ܕܡܰܕܰܐܬܳܐ ܡܰܕܰܐܬܳܐ܆ ܠܗܰܘ ܕܡܰܟܣܳܐ ܡܰܟܣܳܐ^[34]. ܐܶܢܕܶܝܢ ܐܰܝܟ ܕܰܒܨܰܕܘܳܐ ܐܰܝܟ ܕܶܐܡܪܶܬ ܗܳܢܽܘܢ ܕܬܳܒܥܺܝܢ ܗ̱ܘܰܘ܆ ܘܟܰܕ ܠܩܰܕܺܝܡܽܘܬ ܐܽܘܚܕܳܢܳܐ ܚܰܣܳܡܬܳܐ ܕܪ̈ܺܝܫܰܝ ܟܳܗ̈ܢܶܐ ܦܳܠܚܺܝܢ ܗ̱ܘܰܘ ܥܰܒܕܽܘܬܳܐ܆ ܐܰܝܟ ܕܡܶܛܽܠ ‌ܐܰܝܢܳܐ ܕܥܳܒܰܪ ܗ̱ܘܳܐ ܢܳܡܽܘܣܳܐ ܐܶܡܰܪܘ ܡܶܛܽܠܳܬܶܗ܆ ܕܡܰܠܦܳܢܳܐ ܕܺܝܠܟܽܘܢ ܠܳܐ ܝܳܗܶܒ ܗܳܠܶܝܢ ܬܪ̈ܰܝܳܢܰܝ ܙܽܘ̈ܙܶܐ܆ ܗܳܝ ܕܰܐܝܟܰܢܳܐ ܕܶܝܢ ܕܠܳܐ ܢܰܟܫܶܠ ‌ܐܶܢܽܘܢ܆ ܐܰܝܟܰܢܳܐ ܕܠܳܐ ܢܶܬܶܠ ܠܗܽܘܢ ܠܒܽܘܟܝܳܐ܆ ܐܰܘ ܥܶܠܬܳܐ ܕܥܶܕܠܳܝܳܐ ܕܺܐܝܬ ܠܳܗ̇ ܫܰܦܺܝܪܽܘܬ^[35] ܦܰܪܨܽܘܦܳܐ܆ ܬܶܣܬܰܟܰܠ. ܠܳܐ ܓܶܝܪ ܐܶܬܺܝܬ ܐܶܡܰܪ ܠܡܶܫܪܳܐ ܠܢܳܡܽܘܣܳܐ܆ ܐܶܠܳܐ ܠܰܡܡܰܠܳܝܽܘ^[36]. ܡܶܛܽܠ ܗܳܕܶܐ ܐܳܦ ܠܘܳܬ ܝܽܘܚܰܢܳܢ ܐܳܡܰܪ ܗ̱ܘܳܐ: ܫܒܽܘܩ ܗܳܫܳܐ. ܗܳܟܰܢܳܐ ܓܶܝܪ ܦܐܶܐ ܠܰܢ ܕܰܢܡܰܠܶܐ ܟܽܠܳܗ̇ ܟܺܐܢܽܘܬܳܐ^[37]. ܕܠܰܢܛܽܘܪܬܳܐ ܓܶܝܪ ܕܢܳܡܽܘܣܳܐ܆ ܟܺܐܢܽܘܬܐ ܐܺܝܬ ܥܝܳܕܳܐ ܠܡܶܩܪܳܐ ܠܰܟܬܳܒܳܐ ܐܰ‌ܠܳܗܳܝܳܐ܆ ܣܳܗܶܕ ܦܰܘܠܽܘܤ ܟܰܕ ܗܽܘ ܡܶܛܽܠ ܢܰܦܫܶܗ ܟܳܬܶܒ܆ ܕܰܒܙܰܕܺܝܩܽܘܬܳܐ ܗܳܝ ܕܰܒܢܳܡܽܘܣܳܐ ܗ̱ܘܺܝܬ ܕܠܳܐ ܥܶܕܠܳܝ^[38]. ܘܥܰܠ ܗܳܠܶܝܢ ܡܰܢ܆ ܗܳܟܰܢܳܐ ܐܶܡܰܪ ܡܳܪܰܢ ܘܰܣܥܰܪ. ܠܥܶܠ ܕܶܝܢ ܟܰܕ ܦܪ̈ܺܝܫܶܐ ܐܶܬܟܫܶܠܘ ܐܺܝܩܺܐ܆ ܕܰܢܫܺܝܛ ܐܶܢܽܘܢ ܦܳܩܶܕ ܗ̱ܘܳܐ. ܟܰܕ ܡܰܠܶܦ ܕܰܠܗܳܢܽܘܢ ܕܠܽܘܩܒܰܠ ܡܰܠܦܳܢܽܘܬܳܐ ܪܽܘܚܳܢܳܝܬܳܐ ܘܠܽܘܩܒܰܠ ܢܳܡܽܘ̈ܣܶܐ ܐܰ‌ܠܳܗܳܝ̈ܶܐ ܩܳܝܡܺܝܢ ܣܰܩܽܘܒܠܳܐܺܝܬ܆ ܐܳܦܠܳܐ ܡܶܚܫܰܒ ܢܶܚܫܽܘܒ ܐܶܢܽܘܢ. ܠܘܳܬ ܐܰ‌ܠܳܗܳܐ ܕܶܝܢ ܒܰܠܚܽܘܕ ܢܚܽܘܪ܆ ܘܰܠܗܳܢܽܘܢ ܢܶܫܒܽܘܩ ܠܡܶܬܬܰܢܳܚܽܘ.

ܗܳܝ ܕܶܝܢ ܕܟܰܕ ܬܺܐܙܰܠ ܠܝܰܡܳܐ ܐܰܪܡܳܐ ܒܰܠܽܘܥܳܐ܆ ܘܰܠܢܽܘܢܳܐ ܗܰܘ ܕܣܳܠܶܩ ܩܰܕܡܳܝܳܐ ܣܰܒ܆ ܘܟܰܕ ܬܶܦܬܰܚ ܦܽܘܡܶܗ ܬܶܫܟܰܚ ܐܶܣܬܺܝܪܳܐ܆ ܡܚܰܘܝܳܐ ܠܳܗ̇ ܕܳܐܦ ܕܝܰܡܳܐ ܐܳܦ ܕܗܳܠܶܝܢ ܕܒܶܗ܆ ܐܳܦ ܕܟܽܠ ‌ܐܶܤܛܽܘܟܣܳܐ ܥܳܒܽܘܕܳܐ ܘܒܳܪܽܘܝܳܐ ܐܺܝܬܰܘܗ̱ܝ ܘܡܳܪܝܳܐ܆ ܐܰܝܟ ܒܪܳܐ ܕܺܝܠܳܢܳܝܳܐ ܕܰܐ‌ܠܳܗܳܐ ܘܰܐܒܳܐ. ܘܳܐܦ ܒܗܳܕܶܐ ܕܶܝܢ܆ ܡܶܠܬܳܐ ܐ̱ܪܳܙܳܢܳܝܬܳܐ ܡܛܰܫܝܳܐ܆ ܕܡܰܝܬܝܳܐ ܕܰܛܥܺܝܢܳܐ ܬܶܫܒܽܘܚܬܳܐ ܠܰܐܠܳܗܳܐ ܗܰܘ ܕܰܐܡܪܳܗ̇ ܘܚܰܟܺܝܡܳܐ ܒܰܠܚܽܘܕܰܘܗ̱ܝ܆ ܕܝܳܗܶܒ ܠܡܶܣܬܰܟܳܠܽܘ ܡܶܢ ܛܽܘܦܬܳܐ ܙܥܽܘܪܬܳܐ ܕܡܰܕܪܟܳܢܽܘܬܳܐ ܕܺܝܠܰܢ ܕܕܰܐܝܟ ܐܰܝܢܰܐ ܗ̱ܘ܆ ܘܳܐܦܠܳܐ ܐܺܝܬ ܠܡܺܐܡܰܪ ܕܰܟܡܳܐ ܐܺܝܬܰܘܗ̱ܝ ܟܽܠܶܗ ܥܽܘܬܪܳܐ ܕܬܶܐܽܘܪܺܝܰܐ܆ ܗܰܘ ܕܰܒܡ̈ܶܠܶܐ ܟܳܗ̈ܢܳܝܳܬܳܐ ܣܺܝܡ ܘܠܶܗ ܡܶܬܺܝܕܰܥ. ܡܶܛܽܠ ܓܶܝܪ ܕܶܐܡܰܪ ܠܦܶܛܪܽܘܤ ܘܠܰܐܢܕܪܶܐܽܘܤ ܐܰܚܽܘܗ̱ܝ܆ ܬܰܘ ܒܳܬܰܪܝ ܘܶܐ݀ܥܒܶܕܟܽܘܢ ܨܰܝ̈ܳܕܶܐ ܕܰܒ̈ܢܰܝ ܐ̱ܢܳܫܳܐ܆ ܘܬܽܘܒ ܠܶܗ ܠܚܽܘܕܰܘܗ̱ܝ܆ ܠܳܐ ܬܶܕܚܰܠ܆ ܡܶܢ ܗܳܫܳܐ ܒܢܰܝ̈ܢܳܫܳܐ ܬܶܗܘܶܐ ܨܳܐܶܕ^[39]܆ ܬܰܚܘܺܝܬܳܐ ܕܨܰܝܳܕܽܘܬܳܐ ܬܡܺܝܗܬܳܐ ܕܕܰܐܝܟ ܗܳܕܶܐ܆ ܠܗܳܢܳܐ ܦܽܘܩܕܳܢܳܐ ܦܐܶܐ ܠܰܐܠܳܗܳܐ ܘܰܬܡܺܝܗܳܐ ܥܒܰܕ.

ܢܽܘܢܳܐ ܓܶܝܪ ܗܳܢܳܐ܆ ܛܽܘܦܣܳܐ ܕܥܺܕܬܳܐ ܐܰܚܺܝܕ܆ ܗܳܝ ܕܡܶܢ ܩܕܺܝܡ ܡܰܢ ܒܡܰܠܺܝܚܽܘܬܳܐ ܘܠܳܐ ܗܰܝܡܳܢܽܘܬܳܐ ܕܕܶܚܠܰܬ ܫ̈ܺܐܕܶܐ ܘܥܰܡܺܝܩܳܐܺܝܬ ܐܰܝܟ ܕܒܰܬܗܽܘܡܳܐ ܡܚܰܦܝܳܐ ܗ̱ܘܳܬ܆ ܘܒܰܕܠܽܘܚܝܳܐ ܘܰܫܓܽܘܫܝܳܐ ܕܰܪ̈ܓܺܝܓܳܬܳܐ ܥܳܠܡܳܢܳܝ̈ܳܬܳܐ ܡܛܰܒܥܳܐ ܗ̱ܘܳܬ܆ ܣܶܠܩܰܬ ܕܶܝܢ ܒܒܰܠܽܘܥܳܐ ܗܰܘ ܕܰܫܠܺܝ̈ܚܶܐ܆ ܒܡܶܠܬܳܐ ܗܳܝ ܡܰܠܦܳܢܺܝܬܳܐ ܘܨܰܝܕܳܝܬܳܐ ܘܕܰܠܘܳܬ ܝܺܕܰܥܬܳܐ ܕܰܐ‌ܠܳܗܳܐ ܨܳܝܕܳܐ܆ ܗܰܘ ܕܡܶܢ ܚܶܫܽܘܟܳܐ ܩܪܳܐ ܠܰܢ ܠܢܽܘܗܪܶܗ ܬܡܺܝܗܳܐ. ܕܡܶܛܽܠܳܬܳܗ̇ ܕܗܳܕܶܐ ܨܰܝܳܕܽܘܬܳܐ ܕܰܫܠܺܝ̈ܚܶܐ܆ ܐܳܦ ܐܶܪܰܡܝܳܐ ܡܶܬܢܰܒܶܐ ܗ̱ܘܳܐ ܟܰܕ ܐܳܡܰܪ: ܗܳܐ ܐܶܢܳܐ ܡܫܰܕܰܪ ܐ̱ܢܳܐ ܨܰܝ̈ܳܕܶܐ ܣܰܓܺܝ̈ܶܐܐ ܐܳܡܰܪ ܡܳܪܝܳܐ܆ ܘܰܢܨܽܘܕܽܘܢ ܐܶܢܽܘܢ.^[40] ܗܳܢܽܘܢ ܕܟܰܕ ܐܶܬܬܨܺܝܕܘ ܘܣܰܓܺܝ ܕܠܳܐ ܩܳܠܳܐ ܐܺܝܬܰܝܗܽܘܢ ܗ̱ܘܰܘ ܝܰܬܺܝܪ ܡܶܢ ܢܽܘ̈ܢܶܐ܆ ܘܶܐܬܬܰܪܬܺܝܘ ܒܡܶܠܬܳܐ ܕܰܫܪܳܪܳܐ܆ ܘܡܶܢܳܗ̇ ܐܶܬܦܬܰܚ ܦܽܘܡܳܐ ܕܺܝܠܗܽܘܢ܆ ܡܰܠ̈ܦܳܢܶܐ ܕܕܰܐܝܟ ܗܳܠܶܝܢ ܕܥܺܕܬܳܐ ܦܪܰܥܘ ܘܝܰܗܒܘ܆ ܐܰܝܟܰܢܳܐ ܕܥܰܠ ܣܶܦ̈ܘܳܬܗܽܘܢ ܢܶܗܘܽܘܢ ܛܥܺܝܢܺܝܢ ܡ̈ܶܠܶܐ ܕܝܰܬܺܝܪ ܡܝܰܩܪ̈ܳܢ ܛܳܒ ܡܶܢ ܕܰܗܒܳܐ ܘܣܺܐܡܳܐ. ܡܶܛܽܠܗܳܕܶܐ ܓܶܝܪ ܠܢܽܘܢܳܐ ܗܰܘ ܕܣܳܠܶܩ ܩܰܕܡܳܝܳܐ ܐܶܡܰܪ܆ ܐܰܝܟܰܢܳܐ ܕܰܒܝܰܕ ܡܰܢ ܗܳܝ ܕܣܳܠܶܩ܆ ܠܥܽܘܡܩܳܐ ܕܛܳܥܝܽܘܬܳܐ ܗܰܘ ܕܡܶܢܶܗ ܣܠܶܩܢܰܢ ܢܫܰܘܕܰܥ. ܒܝܰܕ ܕܶܝܢ ܗܳܝ ܕܩܰܕܡܳܝܳܐ܆ ܠܰܦܫܺܝܩܽܘܬܳܐ ܘܰܠܣܽܘܥܪܳܢܳܐ ܕܠܳܐ ܥܰܡܠܳܐ ܕܡܰܠܦܳܢܽܘܬܳܐ܆ ܕܥܰܡܳܗ̇ ܕܗܳܝ ܕܶܐܫܬܰܡܰܪ ܒܰܠܽܘܥܳܐ ܡܠܺܝܠܳܐ܆ ܡܶܚܕܳܐ ܢܩܶܦ ܨܰܝܕܳܐ ܗܽܘ ܡܶܢ ܢܰܦܫܶܗ. ܕܰܢܚܰܘܶܐ ܓܶܝܪ ܕܐ̱ܪܳܙܳܐ ܐܺܝܬܰܘܗ̱ܝ ܗ̱ܘܳܐ ܨܰܝܕܶܗ ܕܢܽܘܢܳܐ ܗܰܘ ܘܡܽܘܠܳܝܶܗ ܕܛܽܘܦܣܳܐ܆ ܘܠܰܘ ܬܶܕܡܽܘܪܬܳܐ ܒܰܠܚܽܘܕ܆ ܠܳܐ ܐܶܡܰܪ ܕܬܶܫܟܰܚ ܒܶܗ ܒܢܽܘܢܳܐ ܐܶܣܬܺܝܪܳܐ܆ ܕܗܳܐ ܡܶܢ ܟܰܕܽܘ ܐܶܬܒܰܠܥܰܬ ܠܳܗ̇ ܘܶܐܫܬܰܕܪܰܬ ܠܟܰܪܣܳܐ܆ ܐܶܠܳܐ ܕܟܰܕ ܬܶܦܬܰܚ ܦܽܘܡܶܗ ܬܶܫܟܰܚ. ܟܰܕ ܡܚܰܘܶܐ ܗ̱ܘܳܐ ܕܰܒܦܽܘܡܶܗ ܐܰܚܺܝܕ ܗ̱ܘܳܐ ܠܳܗ̇ ܠܶܐܣܬܺܝܪܳܐ܆ ܟܰܕ ܠܦܽܘܩܕܳܢܳܐ ܐܰ‌ܠܳܗܳܝܳܐ ܡܫܰܡܶܫ ܗ̱ܘܳܐ܆ ܟܽܠܗܶܝܢ ܓܶܝܪ ܡܶܬܡܰܨܝܳܢ̈ܝܳܬܳܐ ܐܺܝܬܰܝܗܶܝܢ ܠܰܐܠܳܗܳܐ܆ ܘܟܰܕ ܠܡܰܘܗܰܒܬܳܐ ܗܳܝ ܕܡܰܠܦܳܢܽܘܬܳܐ ܡܚܰܘܶܐ ܗ̱ܘܳܐ܆ ܗܳܝ ܟܺܝܬ ܕܰܥܬܺܝܕܺܝܢ ܗ̱ܘܰܘ ܕܥܰܠ ܦܽܘܡܗܽܘܢ ܢܶܗܘܽܘܢ ܛܥܺܝܢܺܝܢ܆ ܗܳܢܽܘܢ ܕܰܒܒܰܠܽܘܥܳܐ ܐܶܘܰܢܓܶܠܳܝܳܐ ܗܰܘ ܕܰܫܠܺܝ̈ܚܶܐ ܡܶܬܬܨܺܝܕܺܝܢ ܗ̱ܘܰܘ.

ܠܶܐܣܬܺܝܪܳܐ ܕܶܝܢ܆ ܐܳܕܫܳܐ^[41] ܡܶܕܶܡ ܕܕܺܝܢܳܪܳܐ ܐܰܘ ܕܕܰܗܒܳܐ ܐܰܘ ܕܣܺܐܡܳܐ܆ ܙܳܕܶܩ ܠܰܢ ܕܢܶܣܬܰܟܰܠ ܕܺܐܝܬܶܝܗ̇܆ ܕܰܠܫܶܩܠܳܐ ܕܰܚܠܳܦܰܘܗ̱ܝ ܘܰܚܠܳܦ ܦܛܪܘܤ ܡܡܰܠܶܐ. ܕܡܰܠܦܳܢܽܘܬܳܐ ܕܶܝܢ ܗܳܝ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ ܘܰܕܕܺܝ̈ܢܶܐ܆ ܠܕܰܗܒܳܐ ܘܰܠܣܺܐܡܳܐ ܡܣܰܒܗܳܐ܆ ܡܰܘܕܥܺܝܢ ܟܬܳܒ̈ܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ܆ ܕܒܰܙܒܰܢ ܡܰܢ ܐܳܡܪܺܝܢ܆ ܕܕܺܝ̈ܢܰܘܗ̱ܝ ܕܡܳܪܝܳܐ ܫܰܪܺܝܪ̈ܶܐ ܕܰܡܙܰܕܩܺܝܢ ܐܰܟܚܕܳܐ܆ ܕܰܪܓܺܝܓܺܝܢ ܝܰܬܺܝܪ ܡܶܢ ܕܰܗܒܳܐ ܘܣܰܓܺܝ ܝܰܬܺܝܪ ܛܳܒ ܡܶܢ ܟܺܐܦܳܐ ܡܝܰܩܰܪܬܳܐ^[42]܆ ܒܰܙܒܰܢ ܕܶܝܢ ܣܺܐܡܳܐ ܒܚܺܝܪܳܐ ܠܶܫܳܢܶܗ ܕܙܰܕܺܝܩܳܐ^[43]܆ ܘܡ̈ܶܠܶܐ ܕܡܳܪܝܳܐ ܡ̈ܶܠܶܐ ܕܰܟ̈ܝܳܬܳܐ܆ ܣܺܐܡܳܐ ܒܚܺܝܪܳܐ ܕܰܒܩܶܐ ܒܰܐܪܥܳܐ. ܗܳܝ ܕܶܝܢ ܕܰܐܡܺܝܪܳܐ܆ ܕܟܰܕ ܠܗܳܝ ܬܶܣܰܒ ܗܰܒ ܠܗܽܘܢ ܚܠܳܦܰܝ ܘܰܚܠܳܦܰܝܟ܆ ܡܫܰܘܕܥܳܐ ܕܳܐܦ ܦܛܪܘܤ ܒܽܘܟܪܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܡܫܰܥܒܕܳܐ ܒܳܗ̇ ܒܰܕܡܽܘܬܳܐ ܬܚܶܝܬ ܫܶܩܠܳܐ ܗܰܘ ܕܰܬܪ̈ܰܝܢܝ ܙܽܘ̈ܙܶܐ܆ ܠܗܰܘ ܕܰܐܟܚܕܳܐ ܥܰܡܶܗ ܛܰܟܣܶܗ ܡܰܠܦܳܢܶܗ܆ ܟܰܕ ܡܝܰܩܰܪ ܠܶܗ ܐܰܝܟ ܕܰܠܪܺܝܫܳܐ ܘܩܰܕܡܳܝ ܩܰܘܡܳܐ ܕܰܫܠܺܝ̈ܚܶܐ܆ ܐܰܟܚܕܳܐ ܕܶܝܢ ܐܳܦ ܟܰܕ ܝܳܗܶܒ ܕܰܕܝܰܬܺܝܪ ܪ̈ܳܡܳܢ ܢܶܬܪܰܥܶܐ ܐܳܦ ܡܶܛܽܠ ܗܳܠܶܝܢ. ܟܰܕ ܓܶܝܪ ܒܰܪ ܚܺܐܪ̈ܶܐ ܐܺܝܬܰܘܗ̱ܝ ܗ̱ܘܳܐ ܒܰܟܝܳܢܳܐ ܘܰܕܠܳܐ ܝܳܕܰܥ ܚܛܺܝܬܳܐ܆ ܘܕܰܒܟܽܠܗܶܝܢ ܠܳܐ ܚܰܝܳܒܳܐ ܐܺܝܬܰܘܗ̱ܝ܆ ܫܶܩܠܳܐ ܗܰܘ ܕܰܬܪ̈ܰܝܢܝ ܙܽܘ̈ܙܶܐ ܐܰܪܡܺܝ. ܟܰܕ ܓܳܠܶܐ ܗ̱ܘܳܐ ܕܳܐܦ ܡܰܘܬܳܐ ܥܬܺܝܕ ܗ̱ܘܳܐ ܕܢܶܣܒܽܘܠ ܒܰܒܣܰܪ. ܠܰܘ ܟܰܕ ܗܽܘ ܚܰܝܳܒ ܗ̱ܘܳܐ ܕܰܢܡܽܘܬ܆ ܐܶܠܳܐ ܟܰܕ ܠܰܡܕܰܒܪܳܢܽܘܬܳܐ ܕܰܚܠܳܦܰܝܢ ܡܡܰܠܶܐ ܗ̱ܘܳܐ. ܕܡܶܢ ܗܳܪܟܳܐ ܠܦܶܛܪܘܤ ܐܰܟܚܕܳܐ ܐܰ‌ܠܘܶܬ ܥܰܡܶܗ ܘܳܐܡܰܪ ܗ̱ܘܳܐ܆ ܕܰܠܗܳܝ ܟܰܕ ܬܶܣܰܒ܆ ܗܰܒ ܠܗܽܘܢ ܚܠܳܦܰܝ ܘܰܚܠܳܦܰܝܟ. ܟܰܕ ܒܺܐܝܕܰܘ̈ܗ̱ܝ ܕܺܝܠܶܗ ܕܛܽܘܦܣܳܐ ܡܰܙܥܶܩ ܗ̱ܘܳܐ܆ ܕܬܶܬܪܡܶܐ ܚܰܘܒܬܳܐ ܗܳܝ ܕܰܚܛܺܝܬܳܐ. ܚܠܳܦܰܝ ܡܰܢ ܡܕܰܒܪܳܢܳܐܺܝܬ܆ ܒܰܫܪܳܪܳܐ ܕܶܝܢ ܚܠܳܦܰܝܟ ܘܰܚܠܳܦ ܟܽܠܳܗ̇ ܐ̱ܢܳܫܽܘܬܳܐ. ܒܰܕܓܽܘܢ ܠܡܰܘܬܳܐ ܕܺܝܠܶܗ ܐܰܝܟ ܕܰܠܘܳܬܰܢ ܡܰܢ܆ ܚܰܘܒܬܳܐ ܩܳܪܶܐ ܠܶܗ ܟܬܳܒܳܐ ܐܰ‌ܠܳܗܳܝܳܐ. ܟܰܕ ܐܳܡܰܪ܆ ܕܶܐܫܛܳܪܳܐ ܕܰܚܛܺܝܬܳܐ ܡܶܢܶܗ ܐܶܬܬܰܠܰܚ^[44]. ܐܰܝܟ ܕܶܝܢ ܕܰܠܘܳܬ ܗܰܘ ܕܰܦܪܰܩ ܘܫܰܘܙܶܒ܆ ܛܺܝܡܳܐ. ܒܛܺܝܡ̈ܶܐ ܓܶܝܪ ܐܶܙܕܒܶܢܬܽܘܢ^[45] ܐܳܡܰܪ܆ ܠܳܐ ܬܶܗܘܽܘܢ ܥܰܒ̈ܕܶܐ ܕܰܒܢܰܝ̈ܢܳܫܳܐ.

ܨܳܒܶܐ ܗܘܺܝܬ̱ ܡܰܢ ܗܳܟܺܝܠ܆ ܕܳܐܦ ܠܘܳܬ ܗܳܠܶܝܢ ܒ̈ܢܳܬ ܩ̈ܳܠܶܐ ܕܫܰܪܟܳܐ ܕܶܐܘܰܢܓܶܠܺܝܽܘܢ ܐܶܪܕܶܐ. ܐܶܠܳܐ ܚܳܙܶܐ ܐ̱ܢܳܐ ܠܶܗ ܠܡܺܐܡܪܳܐ܆ ܕܢܳܦܶܩ ܠܶܗ ܡܶܢ ܡܡܰܫܚܽܘܬܳܐ. ܘܰܐܢ̱ܬܽܘܢ ܠܳܐ ܣܰܒܥܳܐܺܝܬ ܠܘܳܬ ܫܶܡܥܳܐ ܐܺܝܬ ܠܟܽܘܢ. ܡܰܪܬܶܐ ܠܰܢ ܕܶܝܢ ܐܳܦ ܡܰܬܠܳܐ܆ ܕܳܐܦ ܒܗܳܠܶܝܢ ܕܕܰܐܝܟ ܗܳܟܰܢ ܢܶܕܰܥ ܡܫܽܘܚܬܳܐ. ܟܰܕ ܐܳܡܰܪ܆ ܟܰܕ ܕܶܒܫܳܐ ܬܶܫܟܰܚ ܒܶܪܝ܆ ܐܰܟܽܘܠ ܡܣܳܬ̣ܳܟ܆ ܕܰܠܡܳܐ ܟܰܕ ܬܶܣܒܰܥ ܬܬܺܝܒܺܝܘܗ̱ܝ. ܟܰܕ ܕܶܝܢ ܗܳܝ ܡܰܥܗܶܕ ܐ̱ܢܳܐ ܠܟܽܘܢ܆ ܫܽܘܠܳܡܳܐ ܐ݀ܣܺܝܡ ܠܡܺܐܡܪܳܐ.

ܕܰܡܫܺܝܚܳܐ ܡܰܢ ܟܰܕ ܐܺܝܬܰܘܗ̱ܝ ܒܰܪ ܚܺܐܪ̈ܶܐ ܘܠܳܐ ܚܰܝܳܒܳܐ ܐܰܪܡܺܝ ܠܚܰܘܒܬܳܐ ܗܳܝ ܕܰܚܠܳܦܰܝܢ܆ ܘܳܐܦ ܒܛܽܘܦܣܳܐ ܗܰܘ ܕܰܬܪ̈ܰܝܢܝ ܙܽܘ̈ܙܶܐ܆ ܘܳܐܦ ܒܰܡܕܰܒܪܳܢܽܘܬܳܐ ܗܳܝ ܕܚܰܫܳܐ ܦܳܪܽܘܩܳܝܳܐ. ܚܢܰܢ ܕܶܝܢ ܟܰܕ ܠܪܶܒܽܘ ܚܰܘ̈ܒܳܬܳܐ ܐܺܝܬܰܝܢ ܚܰܝܳܒ̈ܶܐ܆ ܠܟܽܠܗܶܝܢ ܛܥܰܝܢܰܢ. ܫܳܒܶܩ ܐ̱ܢܳܐ ܠܡܺܐܡܰܪ܆ ܕܙܳܕܶܩ ܗ̱ܘܳܐ ܠܰܢ ܠܡܶܦܪܰܥ ܠܗܰܘ ܕܰܦܪܰܥ ܚܰܘܒܬܳܐ ܚܠܳܦܰܝܢ܆ ܠܗܰܘ ܕܰܙܒܶܢ܆ ܠܗܰܘ ܕܰܦܪܰܩ. ܠܗܳܝ ܕܶܝܢ ܠܳܐ ܚܳܙܶܝܢ ܚ̱ܢܰܢ܆ ܕܡܰܘܙܦܳܢ̈ܶܐ ܗܳܢܽܘܢ ܕܺܝܠܰܢ ܕܺܐܝܬܰܝܢ ܛܳܠܽܘܡ̈ܶܐ ܡܶܬܟܰܪܟܺܝܢ ܒܫܽܘܩܳܐ܆ ܠܰܘ ܟܰܕ ܟܬܳܒܽܘ̈ܢܶܐ ܕܫܽܘܘܕܳܥ̈ܶܐ ܕܰܒܓܽܘ̈ܢܘܳܬܳܐ ܐܰܘ ܒܰܫܩܳܩܽܘ̈ܢܶܐ ܐܰ‌ܠܺܝ̈ܨܶܐ ܟܬܺܝܒܺܝܢ ܐܺܝܬ ܠܗܽܘܢ ܐܰܝܟ ܕܰܠܘܳܬ ܡܚܰܘܝܳܢܽܘܬܳܐ ܕܝܰܙܦ̈ܳܬܳܐ܆ ܐܶܠܳܐ ܟܬܺܝ̈ܒܳܬܳܐ ܫܡܰܝܳܢ̈ܝܳܬܳܐ ܘܰܕܠܰܝܬ ܠܡܺܐܡܰܪ ܠܽܘܩܒܰܠܗܶܝܢ܆ ܕܡܰܙ̈ܥܩܳܢ܆ ܕܗܰܘ ܕܺܐܝܬ ܠܶܗ ܬܰܪ̈ܬܶܝܢ ܟܽܘܬܺܝ̈ܢܝܳܢ ܢܶܬܶܠ ܠܗܰܘ ܕܠܰܝܬ ܠܶܗ^[46]. ܐܰܢ̱ܬ ܕܶܝܢ ܟܰܕ ܣܰܓܺܝ̈ܳܐܬܳܐ ܐܺܝܬ ܠܳܟ܆ ܐܳܦܠܳܐ ܐܽܘܪܩܰܥܬܳܐ ܒܠܺܝܬܳܐ ܝܳܗܶܒ ܐܰܢ̱ܬ ܠܡܶܣܟܺܢܳܐ܆ ܒܰܡܦܰܬܟܽܘܬܳܐ ܕܶܝܢ ܕܢܰܚ̈ܬܶܐ ܕܡܶܬܚܰܠܦܺܝܢ܆ ܘܒܰܙܒܰܢ ܐ̱ܚܪܝܢ ܐ̱ܚܪ̈ܳܢܶܐ ܡܶܬܚܰܘܶܝܢ܆ ܨܳܒܶܐ ܐܰܢ̱ܬ ܕܬܶܗܘܶܐ ܐܺܝܬܰܝܟ ܚܰܙܝܳܐ ܘܰܫܒܺܝܚܳܐ. ܠܰܘ ܓܶܝܪ ܕܗܳܝ ܕܬܶܫܬܰܚܰܢ ܡܰܠܽܘܢ ܘܬܶܬܟܰܣܶܐ ܐܺܝܬ ܠܳܟ ܡܶܠܬܳܐ܆ ܐܶܠܳܐ ܕܗܳܝ ܕܬܶܬܚܙܶܐ. ܘܟܰܕ ܛܳܒ ܟܺܝܬ ܟܬܳܒܳܐ ܐܰ‌ܠܳܗܳܝܳܐ ܡܶܛܽܠ ܗܳܕܶܐ ܬܰܟܣ̈ܝܳܬܳܐ ܫܰܡܰܗ ܐܶܢܶܝܢ ܟܰܕ ܐܳܡܰܪ܆ ܕܟܰܕ ܐܺܝܬ ܠܰܢ ܕܶܝܢ ܬܽܘܪ̈ܣܳܝܶܐ ܘܬܰܟܣ̈ܝܳܬܳܐ ܗܳܠܶܝܢ ܢܶܣܦ̈ܩܳܢ ܠܰܢ^[47]܆ ܐܰܝܟܰܢܳܐ ܕܢܺܐܠܰܦ ܕܰܕܣܽܘܢܩܳܢܳܐ ܒܰܠܚܽܘܕ ܐܺܝܬܰܝܗܶܝܢ ܘܠܰܘ ܕܡܶܬܚܰܘܝܳܢܽܘܬܳܐ. ܐܶܠܳܐ ܕܡ̈ܶܠܶܐ ܡܰܢ ܐܰ‌ܠܳܗܳܝ̈ܳܬܳܐ܆ ܗܳܠܶܝܢ ܕܝܰܬܺܝܪ ܡܶܢ ܕܰܗܒܳܐ ܘܡܶܢ ܟܺܐܦܳܐ ܡܝܰܩܰܪܬܳܐ ܣܰܓܺܝ ܡܥܰܠ̈ܝܳܢ ܘܛܳܒ̈ܳܢ܆ ܘܚܰܙ̈ܝܳܢ ܘܢܰܗܺܝܪ̈ܳܢ ܝܰܬܺܝܪ ܡܶܢ ܣܺܐܡܳܐ܆ ܕܗܳܢܶܝܢ ܕܡܰܝܬܶܐ ܗ̱ܘܳܐ ܫܽܘܘܕܳܥܳܐ ܕܺܝܠܗܶܝܢ ܒܦܽܘܡܶܗ ܢܽܘܢܳܐ ܗܰܘ ܕܶܐܘܰܢܓ̈ܶܠܺܝܰܐ܆ ܘܠܳܐ ܒܩܶܪ̈ܝܳܢܶܐ ܘܣܽܘ̈ܟܳܠܶܐ ܥܳܒܶܕ ܐܰܢ̱ܬ ܡܶܠܬܳܐ܆ ܘܳܐܦܠܳܐ ܒܣܳܥܽܘܪ̈ܘܳܬܳܐ ܛܳܒ̈ܳܬܳܐ.

ܕܰܒܥܶܙܩ̈ܳܬܳܐ ܕܕܰܗܒܳܐ ܡܰܙܠܓܳܐ ܐܺܝܬ ܠܳܟ ܐܺܝܕܳܐ܆ ܠܗܳܝ ܕܰܐܝܟܰܢܳܐ ܬܛܰܫܶܝܗ̇ ܩܕܳܡ ܒܺܐܡܰܐ ܕܚܺܝܠܬܳܐ ܕܰܡܫܺܝܚܳܐ܆ ܟܰܕ ܠܥܳܠܽܘܒܽܘܬܳܐ ܕܺܝܠܳܟ ܡܰܟܣܳܐ܆ ܘܡܶܬܩܰܛܪܓܳܐ ܡܶܢ ܝܳܙܽܘܦ̈ܶܐ܆ ܡܶܢ ܗܳܢܽܘܢ ܕܰܐܢ̱ܬ ܗܳܫܳܐ ܟܰܕ ܥܰܪ̈ܛܶܠܳܝܶܐ ܐܺܝܬܰܝܗܽܘܢ ܡܰܗܡܶܐ ܐܰܢ̱ܬ. ܕܫܰܦܺܝܪܳܐ ܗܝ ܓܶܝܪ ܗܳܝ ܕܠܰܣܢܺܝ̈ܩܶܐ ܢܶܥܒܶܕ ܫܰܦܺܝܪ܆ ܠܳܐ ܛܰܥܝܳܐ ܠܳܟ. ܡܶܛܽܠܗܳܕܶܐ ܐܳܦ ܙܰܒ̈ܢܺܝܢ ܣܰܓܺܝ̈ܳܐܢ ܟܰܕ ܠܘܳܬ ܐ̱ܢܳܫ ܡܶܢ ܗܳܢܽܘܢ ܕܕܰܐܝܟ ܗܳܠܶܝܢ ܡܶܬܪܟܶܢ ܐܰܢ̱ܬ܆ ܠܘܳܬܝ ܡܰܝܬܶܐ ܐܰܢ̱ܬ ܠܶܗ ܘܳܐܡܰܪ ܐܰܢ̱ܬ ܗܰܒ ܠܶܗ. ܟܬܽܘܒܳܝܗ̱ܝ ܒܰܟܬܳܒܳܐ ܗܰܘ ܕܰܐܪ̈ܡܠܳܬܳܐ ܐܰܘ ܕܗܳܢܽܘܢ ܕܣܶܐܒܘ. ܕܫܰܦܺܝܪܽܘܬ ܕܶܚܠܬܳܐ ܐܺܝܬܶܝܗ̇. ܐܺܝܛܰܐ ܠܺܝ ܡܰܢ ܝܳܕܰܥ ܐܰܢ̱ܬ ܠܡܰܡܠܳܟ ܗܳܠܶܝܢ ܕܫܰܦܺܝܪܽܘܬ ܕܶܚܠܬܳܐ ܐܶܡܰܪ ܠܺܝ܆ ܠܢܰܦܫܳܟ ܕܶܝܢ ܘܠܳܐ ܣܳܟ܆ ܐܶܠܳܐ ܐܶܢܳܐ ܡܰܢ ܡܶܢ ܗܳܠܶܝܢ ܕܚܳܙܶܐ ܐܰܢ̱ܬ܆ ܠܳܐ ܣܢܺܝܩ ܐ̱ܢܳܐ ܥܰܠ ܡܶܠܟܳܐ ܕܺܝܠܳܟ. ܣܳܗܕܳܐ ܓܶܝܪ܆ ܓܽܘܕܳܐ ܕܡܶܣ̈ܟܺܢܶܐ ܗܳܢܽܘܢ ܕܰܒܟܽܠ ܫܳܥ ܩܳܝܡܺܝܢ ܚܕܳܪ̈ܰܝ. ܐܰܢ̱ܬ ܕܶܝܢ܆ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܠܘܳܬ ܡ̈ܶܠܶܐ ܕܺܝܠܳܟ ܣܳܟܰܪ ܐܰܢ̱ܬ ܠܡܰܫܡܰܥܬܳܟ܆ ܘܰܠܢܰܦܫܳܐ ܒܰܝܬܳܝܬܳܐ ܕܺܝܠܳܟ ܐܺܝܬܰܝܟ ܡܳܠܽܘܟܳܐ ܐܰܘ ܕܠܳܐ ܩܳܠܳܐ ܐܰܘ ܠܳܐ ܡܦܺܝܣܳܢܳܐ. ܐܰܘ ܓܶܝܪ ܟܽܠ ܟܽܠܶܗ ܐܳܡܰܪ ܐܰܢ̱ܬ ܠܳܗ̇ ܠܢܰܦܫܳܟ ܘܠܳܐ ܡܶܕܶܡ ܕܰܐܝܟ ܗܳܟܰܢ܆ ܐܰܘ ܟܰܕ ܐܳܡܰܪ ܐܰܢ̱ܬ ܠܳܐ ܡܶܫܬܡܰܥ ܐܰܢ̱ܬ܆ ܡܶܛܽܠ ܗܳܝ ܕܩܰܕܶܡܬ ܠܳܟ ܐܶܬܬܚܶܕܬ ܒܚܰܫܳܐ ܠܺܝܛܳܐ ܗܰܘ ܕܪܶܚܡܰܬ ܟܶܣܦܳܐ ܘܕܰܡܚܰܣܟܳܢܽܘܬܳܐ. ܘܟܰܕ ܛܳܒ ܟܺܝܬ ܐܶ‌ܠܽܘ ܩܰܢܳܝܽܘܬܳܐ ܡܶܕܶܡ ܟܰܗܺܝܢܬܳܐ ܐܺܝܬ ܗ̱ܘܳܐ ܠܳܟ ܕܬܶܙܒܰܢ܆ ܡܶܢ ܩܕܳܡ ܟܽܠ ܡܶܕܶܡ܆ ܐܰܢ̱ܬ ܠܳܟ ܡܩܰܕܶܡ ܗ̱ܘܰܝܬ ܡܝܰܩܰܪ ܗ̱ܘܰܝܬ. ܟܰܕ ܕܶܝܢ ܡܰܠܟܽܘܬܳܐ ܕܰܫܡܰܝܳܐ ܣܺܝܡܳܐ ܩܕܳܡܰܝܟ ܗܳܟܰܢܳܐ ܒܰܦܫܺܝܩܽܘܬ ܙܒܺܝܢܬܳܐ܆ ܠܘܳܬ ܡܶܠܟܳܐ ܕܠܰܐ̱ܚܪܺܢܳܐ ܐܳܙܶܠ ‌ܐܰܢ̱ܬ܆ ܘܡܰܗܡܶܐ ܐܰܢ̱ܬ ܡܶܢ ܗܰܘ ܕܺܝܠܳܟ.

ܗܳܠܶܝܢ ܕܶܝܢ ܐܶܬܰܐܠܨܶܬ̣ ܠܡܺܐܡܰܪ. ܠܰܘ ܐܰܝܟܰܢܳܐ ܕܰܐܘܩܰܪ ܥܠܰܝܟܽܘܢ. ܐܶܠܳܐ ܡܰܠܽܘܢ܆ ܐܰܝܟܰܢܳܐ ܕܡܶܢ ܝܽܘܩܪܳܐ ܐ݀ܰܓܗܶܝܟܽܘܢ ܗܰܘ ܕܪܽܘܓܙܳܐ ܕܰܥܬܺܝܕ܆ ܘܰܐ݀ܥܺܝܪܟܽܘܢ ܒܙܳܩ̈ܘܳܬܶܐ ܕܡܶܠܬܳܐ܆ ܠܘܳܬ ܥܽܘܬܳܕܳܐ ܘܛܽܘܝܳܒܳܐ ܕܚܰܝ̈ܶܐ ܗܳܢܽܘܢ ܕܰܠܥܳܠܰܡ. ܠܗܳܢܽܘܢ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ ܥܰܡ ܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܰܬܡܳܢܝܢ ܘܚܰܕ.

 ܡ̈ܬܠܐ. 25: 2 [1]

ܡܙܡܘܪ̈ܐ. 13: 6 [2]

ܡܙܡܘܪ̈ܐ. 51: 6 [3]

 ܐܰܝܟܰܢ ܕܗܽܘ[4]

ܗܘܫܳܥ. 10: 12 [5]

ܡܬܝ. 7: 6 [6]

ܡܬܝ. 17: 24 [7]

ܬܒܥܬܐ[8]

ܛܘܟܳܣܐ. ܛܘܦܳܣܐ.[9]

ܠܡܶܚܙܰܩ[10]

ܡܢܝܳܢܐ. 3: 11 ـ 13 [11]

 ܡܶܐܬܝܢ ܘܫܰܒܥܺܝܢ[12]

ܡܢܝܳܢܐ. 3: 46 ـ 48 [13]

ܡܦܩܢܐ. 30: 13 [14]

ܡܶܬܓܰܒܝܳܐ[15]

ܡ̈ܬܠܐ. 27: 21 [16]

ܣܶܦܪܐ ܕܒܪܝܬܐ. 3: 19 [17]

ܐܫܥܝܐ. 53: 9  ܐܦ ܐ. ܦܛܪܘܣ. 2: 22 [18]

ܕܰܢܚܳܫܳܐ ܗܳܪܟܳܐ ܟܒܰܪ܆ ܚܠܳܦ ܕܣܺܐܡܳܐ ܐܶܡܰܪ.[19]

ܡܬܝ. 4: 11 [20]

ܠܘܩܐ. 15: 8 ـ 9 [21]

ܥܒܪ̈ܝܐ. 3: 1 ܐܦ 4: 14 ܐܦ 5: 6 ܐܦ 7: 26 [22]

ܝܘܚܢܢ. 6: 52 [23]

ܝܘܚܢܢ. 10: 15 [24]

ܡܙܡܘܪ̈ܐ. 16: 10  ܐܦ ܦܪܟܣܝܣ. 2: 31 [25]

ܟܽܠ ܚܰܕ ܡܶܢܗܽܘܢ[26]

ܒ. ܩܘܪ̈ܝܢܬܝܐ. 3: 10 [27]

ܡܬܝ. 4: 12 ـ 13 [28]

ܡܬܝ. 17: 24[29]

ܡܬܝ. 17: 25 ـ 26 [30]

ܡܬܝ. 16: 16 [31]

ܡܬܝ. 16: 22 ـ 23 [32]

ܡܬܝ. 17: 26 ـ 27 [33]

ܪ̈ܗܘܡܝܐ. 13: 7 [34]

[35]ܠܚܡܘܬܐ.

ܡܬܝ. 5: 17 [36]

 ܡܬܝ. 3: 15 ܙܰܕܺܝܩܽܘܬܳܐ[37]

ܦܝܠܝܦܣ̈ܝܐ. 3: 6 [38]

ܡܪܩܘܣ. 1: 17  ܐܦ ܠܘܩܐ. 5: 10 [39]

 ܐܶܪܰܡܝܳܐ. 16. 16.[40]

[41]ܫܡܳܐ ܕܢܽܘܡܝܣܡܐ ܐܰܘܟܺܝܬ ܕܕܺܝܢܳܪܳܐ ܒܠܶܫܳܢܳܐ ܝܰܘܢܳܝܳܐ܆ ܠܰܘ ܒܰܠܚܽܘܕ ܥܰܠ ܚܽܘܫܒܳܢܳܐ ܕܕܰܗܒܳܐ ܡܶܬܬܣܺܝܡ܆ ܐܶܠܐ ܐܳܦ ܥܰܠ ܡܥ̈ܐ ܕܣܺܐܡܳܐ܆ ܘܳܐܦ ܥܰܠ ܗܳܠܶܝܢ ܕܰܢܚܳܫܳܐ ܡܶܬܶܐܡܰܪ ܒܰܚܫܳܚܬܳܐ ܕܡܰܡܠܠܐ.

ܡܙܡܘܪ̈ܐ. 19: 10 ـ 11 [42]

ܡ̈ܬܠܐ. 10: 20 [43]

ܩܘܠܣ̈ܝܐ. 2: 14 [44]

ܐ. ܩܘܪ̈ܝܢܬܝܐ. 6: 20  ܐܦ 7: 23[45]

ܠܘܩܐ. 3: 11 [46]

ܐ. ܛܝܡܬܐܘܣ. 6: 8[47]