ܡܺܐܡܪܳܐ ܕܰܬܡܳܢܺܝܢ

ܥܰܠ ܝܰܘܡܳܐ ܗܰܘ ܕܒܶܗ ܩܳܡ ܥܰܠ ܡܕܺܝܢ̱ܬܳܐ܆ ܘܰܒܪܶܡܙܳܐ ܕܰܐ‌ܠܳܗܳܐ ܐܶܫܬܘܺܝ ܠܟܺܝܪܽܘܛܽܘܢܺܝܰܐ. ܐܶܬܐܶܡܰܪ ܕܶܝܢ܆ ܒܒܰܝܬܳܐ ܕܒܶܝܬ ܨܠܽܘ ܕܩܰܕܺܝܫܳܐ ܣܳܗܕܳܐ ܪܽܘܡܢܘܤ. ܟܰܕ ܫܰܢ̱ܬܳܐ ܕܰܐܪܒܰܥ ܫܰܪܝܰܬ܆ ܡܺܐܡܪܳܐ ܩܰܕܡܳܝܳܐ.

80: ܐܳܦ ܐܶܢܳܐ ܠܝܰܘܡܳܐ ܗܳܢܳܐ܆ ܕܣܰܓܺܝ ܐܺܝܬܰܘܗ̱ܝ ܠܺܝ ܡܰܘܬܪܳܢܳܐ ܚܳܫܶܒ ܐ̱ܢܳܐ܆ ܗܰܘ ܕܒܶܗ ܩܳܡܶܬ ܥܠܰܝܟܽܘܢ܆ ܗܰܘ ܕܒܶܗ ܪܽܘܚܳܐ ܩܰܕܺܝܫܳܐ ܟܰܕ ܠܩܰܪܢܳܐ ܗܳܝ ܡܶܬܗܰܘܢܳܢܺܝܬܳܐ ܐܰܪܟܶܢ܆ ܠܺܝ ܠܰܙܥܽܘܪܳܐ ܒܰܡܫܺܝܚܽܘܬܳܐ ܗܳܝ ܕܪܺܝܫܽܘܬ ܟܳܗܢܽܘܬܳܐ ܡܫܰܚ܆ ܗܰܘ ܕܒܶܗ ܟܰܕ ܠܘܳܬ ܓܢܽܘܢܳܐ ܪܽܘܚܳܢܳܐ ܐܶܬܬܰܝܬܺܝܬ̣܆ ܠܥܺܕܬܳܐ ܗܳܝ ܕܩܰܕܡܳܝܬܳܐ ܠܰܫܡܳܐ ܕܰܟܪ̈ܺܝܣܛܝܳܢܶܐ ܒܰܕܡܽܘܬ ܨܶܒܬܳܐ ܡܶܕܶܡ ܡܥܰܠܝܳܐ ܘܡܰܠܟܳܝܳܐ 222ܐܶܬܥܰܛܦܶܬ^[1]܆ ܐܰܝܟ ܕܰܠܟܰܠܬܳܐ ܟܳܗܢܳܝܬܳܐ ܡܫܺܝܚܳܐ ܠܺܝ ܐܰܓܥܶܠ ܘܗܰܝܡܶܢ܆ ܗܰܘ ܡܚܰܬܢܳܢܳܐ ܕܰܚ̈ܠܽܘܠܳܐ ܕܕܰܐܝܟ ܗܳܠܶܝܢ ܘܰܕܙܽܘܘ̈ܳܓܶܐ ܠܳܐ ܡܶܬܚܰܒ̈ܠܳܢܶܐ܆ ܗܳܠܶܝܢ ܕܗܰܝܡܳܢܽܘܬܳܐ ܬܪܺܝܨܬܳܐ ܘܕܰܟܝܽܘܬܳܐ ܕܕܽܘܒܳܪ̈ܶܐ^[2] ܡܩܰܝܡܳܐ ܠܗܽܘܢ܆ ܘܰܠܗܳܝ ܕܰܠܓܰܒܪ̈ܶܐ ܕܺܝܠܳܗ̇ ܐܰܝܟ ܕܰܠܒܰܝ̈ܬܳܝܶܐ ܡܰܠܽܘܢ ܐܰܟܚܕܳܐ ܠܰܚܡܰܬ܆ ܐܰܝܟܰܢܳܐ ܕܗܳܢܽܘܢ ܕܚܳܙܶܝܢ ܢܺܐܡܪܽܘܢ܆ ܕܫܰܪܺܝܪܳܐܺܝܬ ܡܶܢ ܠܘܳܬ ܡܳܪܝܳܐ ܡܶܬܠܰܚܡܳܐ ܐܰܢ̱ܬܬܳܐ ܠܓܰܒܪܳܐ܆ ܗܳܝ ܕܰܐܝܟ ܕܰܠܢܽܘܟܪ̈ܳܝܶܐ ܫܕܳܬ ܐܶܢܽܘܢ ܡܶܢܳܗ̇ ܠܗܳܢܽܘܢ ܕܰܢܦܰܩܘ܆ ܘܰܕܕܰܓܳܠܳܐܺܝܬ ܥܳܡܪܺܝܢ ܗ̱ܘܰܘ ܥܰܡܳܗ̇ ܚܰܘܝܰܬ ܐܶܢܽܘܢ܆ ܐܰܝܟܰܢܳܐ ܕܢܶܬܬܰܢܚܽܘܢ ܐܳܦ ܗܳܢܽܘܢ ܕܰܐܝܟ ܝܽܘܚܰܢܳܢ ܡܰܥܡܕܳܢܳܐ ܐܺܝܬܰܝܗܽܘܢ ܒܪܽܘܚܳܐ܆ ܘܟܰܕ ܠܡܳܪܝܳܐ ܡܫܰܡܫܺܝܢ ܢܰܙܥܩܽܘܢ܆ ܕܠܳܐ ܫܰܠܺܝܛ ܠܳܟ ܕܬܶܩܢܶܝܗ̇^[3]܆ ܡܶܛܽܠ ܟܺܝܬ ܕܳܐܦ ܡܶܬܒܰܩܶܝܢ ܒܰܢ ܘܚܳܝܪܺܝܢ܆ ܘܰܥܕܰܟܺܝܠ ܡܶܛܰܢ ܛܳܢܶܝܢ ܠܡܳܪܝܳܐ ܐܰܚܺܝܕ ܟܽܠ. ܗܰܘ ܓܶܝܪ ܕܕܰܐܝܟ ܗܳܢܳܐ ܐܺܝܬܰܘܗ̱ܝ܆ ܘܳܐܦ ܟܰܕ ܡܶܣܬܒܰܪ ܕܥܰܡ ܟܰܠܬܳܐ ܐܺܝܬܰܘܗ̱ܝ܆ ܠܳܐ ܐܺܝܬܰܘܗ̱ܝ ܥܰܡܳܗ̇ ܒܰܫܪܳܪܳܐ܆ ܐܳܦܶܢ ܠܡܰܘܬܒܳܐ ܦܰܓܪܳܢܳܝܳܐ ܕܥܰܠ ܟܽܘܪܣܝܳܐ ܐܰܚܺܝܕ ܡܰܪܳܚܳܐܺܝܬ.

ܡܶܛܽܠܗܳܕܶܐ ܓܶܝܪ ܐܳܦ ܩܰܪܢܳܐ ܐܺܝܬܶܝܗ̇ ܗ̱ܘܳܬ܆ ܗܳܝ ܕܡܰܠܝܳܐ ܗ̱ܘܳܬ ܡܶܫܚܳܐ ܗܰܘ ܐ̱ܪܳܙܳܢܳܝܳܐ܆ ܗܳܝ ܕܛܽܘܦܣܳܢܳܐܺܝܬ ܡܶܢ ܩܕܺܝܡ ܡܳܫܚܳܐ ܗ̱ܘܳܬ ܠܪ̈ܺܝܫܰܝ ܟܳܗ̈ܢܶܐ ܟܺܝܬ ܘܰܠܡܰܠ̈ܟܶܐ܆ ܐܰܝܟܰܢܳܐ ܕܢܺܐܠܰܦ ܕܠܰܘ ܡܶܢ ܠܬܰܚܬ܆ ܘܳܐܦܠܳܐ ܡܶܢ ܛܰܝܒܽܘܬܳܐ ܐ̱ܢܳܫܳܝܬܳܐ܆ ܐܳܬܝܳܐ ܗܺܝ ܡܫܺܝܚܽܘܬܳܐ ܥܰܠ ܗܳܢܽܘܢ ܕܫܳܘܶܝܢ. ܐܶܠܳܐ ܡܶܢ ܠܥܶܠ ܢܳܚܬܳܐ܆ ܡܶܢ ܐܰܒܳܐ ܗܰܘ ܕܢܽܘܗܪ̈ܶܐ^[4] ܘܪܺܝܫܳܐ ܕܟܽܠ ܪܺܝܫܳܢܽܘܬܳܐ܆ ܕܫܽܘܠܛܳܢܳܐ ܟܺܝܬ ܘܚܰܝܠܳܐ^[5]. ܠܰܘ ܓܶܝܪ ܠܳܐ ܝܺܕܺܝܥܬܳܐ ܗ̱ܝ܆ ܕܩܰܪܢܳܐ ܝܰܬܺܝܪ ܪܳܡܳܐ ܘܰܡܥܰܠܝܳܐ ܠܥܶܠ ܡܶܢ ܪܺܝܫܳܐ܆ ܘܺܐܝܬܶܝܗ̇ ܗܰܕܳܡܳܐ ܗܰܘ ܕܛܳܒ ܪܺܝܫܳܝ܆ ܐܰܝܟ ܕܰܐ‌ܠܳܗܳܐ ܗܰܘ ܕܡܳܫܰܚ ܐܺܝܬܰܘܗ̱ܝ ܠܥܶܠ ܡܶܢ ܟܽܠ ܡܰܘܬܒܳܐ ܘܡܳܪܽܘܬܳܐ ܕܗܳܢܽܘܢ ܡܥܰܠܰܝ̈ܳܐ ܘܕܰܠܗܰܠ ܡܶܢܟܽܠ^[6]. ܡܶܛܽܠܗܳܕܶܐ ܐܳܦ ܗܳܢܽܘܢ ܕܒܰܡܫܺܝܚܽܘܬܳܐ ܗܳܝ ܪܺܝܫܽܘܬ ܟܳܗܢܳܝܬܳܐ ܐܶܬܡܫܰܚܘ܆ ܘܣܰܓܺܝ ܝܰܬܺܝܪܳܐܺܝܬ ܗܳܢܽܘܢ ܕܰܒܗܳܝ ܪܺܝܫܽܘܬ ܐܰܒܳܗܳܝܬܳܐ܆ ܘܒܳܗ̇ ܒܗܳܕܶܐ ܠܪܽܘܚܳܐ ܗܰܘ ܪܺܝܫܳܢܳܝܳܐ ܥܬܰܪܘ܆ ܘܒܳܗ̇ ܐܶܣܬܡܶܟܘ ܘܶܐܫܬܰܪܰܪܘ܆ ܕܟܽܠܗܽܘܢ ܗܳܢܽܘܢ ܕܰܐܚܺܝܕܺܝܢ ܛܶܟܣܳܐ ܕܪܺܝܫܳܐ܆ ܐܺܝܬܰܝܗܽܘܢ ܩܶܦܰܠܶܐܽܘܢ ܐܰܘܟܺܝܬ ܪܺܝܫܳܐ. ܗܳܢܽܘܢ ܕܳܐܦ ܩܰܪܢܳܐ ܕܦܽܘܪܩܳܢܳܐ ܕܣܶܕܪܳܐ ܕܰܩܪܳܒܶܗ ܕܡܳܪܝܳܐ ܘܕܰܦܠܰܓܳܐ ܪܽܘܚܳܢܳܝܬܳܐ܆ ܙܳܕܶܩ ܠܗܽܘܢ ܕܢܶܗܘܽܘܢ ܐܺܝܬܰܝܗܽܘܢ܆ ܟܰܕ ܩܳܕܡܺܝܢ ܡܩܰܪܒܺܝܢ ܩܕܳܡ ܥܰܡܳܐ܆ ܘܰܠܘܳܬ ܗܰܘ ܕܰܡܫܰܚ ܐܶܢܽܘܢ ܐܳܡܪܺܝܢ: ܒܳܟ ܠܰܒܥܶܠ̈ܕܒܳܒܶܐ ܕܺܝܠܰܢ ܢܕܰܩܰܪ܆ ܘܒܰܫܡܳܐ ܕܺܝܠܳܟ ܢܫܽܘܛ ܠܗܳܢܽܘܢ ܕܩܳܝܡܺܝܢ ܥܠܰܝܢ^[7].

ܕܡܶܢ ܗܳܪܟܳܐ ܐܳܦ ܡܽܘܫܶܐ ܒܒܽܘܪ̈ܟܳܬܳܐ ܟܰܕ ܠܪܺܝܫ ܐܰܒܳܗ̈ܳܬܐ ܝܰܘܣܶܦ ܡܒܰܪܶܟ ܗ̱ܘܳܐ܆ ܘܰܠܫܰܒ̈ܛܶܐ ܗܳܢܽܘܢ ܕܢܳܚܬܺܝܢ ܒܝܽܘܒܳܠܳܐ ܡܶܢ ܗܰܘ ܐܶܡܰܪ: ܫܽܘܦܪܳܐ ܕܺܝܠܶܗ ܕܶܐܣܒܰܪܟܳܐ. ܩܰܪ̈ܢܳܬܳܐ ܕܪܰܝܡܳܐ ܩܰܪ̈ܢܳܬܳܐ ܕܺܝܠܶܗ. ܒܗܶܝܢ ܠܥܰܡܡ̈ܶܐ ܢܕܰܩܰܪ ܐܰܟܚܕܳܐ܆ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ^[8].

ܗܳܠܶܝܢ ܕܶܝܢ ܬܰܫܥܺܝܬܳܢܳܐܺܝܬ ܡܰܢ ܘܛܽܘܦܣܳܢܳܐܺܝܬ܆ ܥܠ ܝܰܘܣܶܦ ܐܰܡܺܝܪ̈ܳܢ. ܢܒܺܝܳܐܺܝܬ ܕܶܝܢ܆ ܐܳܦ ܩܰܕܶܡ̈ܶܝܢ ܐܶܬܶܐܡܰܪ̈ܶܝܢ ܐܳܦ ܢܦܰܩ̈ܶܝܢ܆ ܥܰܠ ܡܫܺܝܚܳܐ ܗܰܘ ܕܛܽܘܦܣܶܗ ܐܺܝܬܰܘܗ̱ܝ ܗ̱ܘܳܐ ܝܰܘܣܶܦ܆ ܗܰܘ ܕܶܐܙܕܰܒܰܢ ܡܶܢ ܐܰܚܰܘ̈ܗ̱ܝ ܐܰܟܙܢܳܐ ܕܰܡܫܺܝܚܳܐ ܡܶܢ ܝܺܗܽܘܕܳܐ܆ ܗܰܘ ܕܶܐܬܪܡܺܝ ܒܓܽܘܒܳܐ ܘܰܣܠܶܩ ܐܰܟܙܢܳܐ ܕܝܶܫܽܘܥ ܒܩܰܒܪܳܐ ܘܩܳܡ. ܗܰܘ ܕܶܐܫܬܰܠܰܚ ܡܶܢ ܟܽܘܬܺܝܢܳܐ ܗܳܝ ܡܦܰܬܰܟܬܳܐ܆ ܐܰܝܟܰܢܳܐ ܕܳܐܦ ܦܳܪܽܘܩܰܢ ܡܶܢ ܟܽܘܬܺܝܢܳܐ ܗܳܝ ܠܳܐ ܚܺܝܛܬܳܐ܆ ܗܳܝ ܕܡܶܢ ܠܥܶܠ ‌ܐܺܝܬܶܝܗ̇ ܙܩܺܝܪܬܳܐ^[9]܆ ܗܰܘ ܕܠܺܐܓܽܘܦܛܽܘܤ ܢܚܶܬ ܐܰܝܟܰܢܳܐ ܕܥܰܡܰܢܽܘܐܶܝܠ ܠܥܳܠܡܳܐ ܗܳܢܳܐ܆ ܗܰܘ ܕܰܠܒܶܝܬ ܐܰܣܺܝܪ̈ܶܐ ܐܶܫܬܠܶܡ܆ ܘܰܠܫܳܩܝܳܐ ܘܥܰܒܕܳܐ ܕܦܶܪܥܽܘܢ ܕܰܚܒܺܝܫ ܗ̱ܘܳܐ ܐܰܦܶܩ܆ ܘܰܐܡܠܶܟ ܥܰܠ ܡܶܨܪܶܝܢ ܘܰܠܘܳܬ ܐܰܪܥܳܐ ܗܳܝ ܕܡܽܘܠܟܳܢܳܐ ܦܢܳܐ܆ ܘܬܽܘܒ ܠܡܶܨܪܶܝܢ ܢܚܶܬ ܐܰܝܟ ܡܳܪܰܢ ܕܒܰܐܬܪ̈ܰܘܳܬܳܐ ܕܰܫܝܽܘܠ ‌ܐܶܬܚܙܺܝ܆ ܘܬܰܪ̈ܥܶܐ ܕܰܢܚܳܫܳܐ ܬܰܒܰܪ ܘܡܽܘܟ̈ܠܶܐ ܕܦܰܪܙܠܳܐ ܪܰܥܪܰܥ^[10]܆ ܘܰܠܗܳܢܽܘܢ ܕܒܰܐܣܽܘܪ̈ܶܐ ܐܺܝܬܰܝܗܽܘܢ ܗ̱ܘܰܘ ܘܡܶܬܬܰܡܠܟܺܝܢ ܗ̱ܘܰܘ ܡܶܢ ܡܰܘܬܳܐ ܐܰܙܥܶܩ ܦܽܘܩܘ̱܆ ܘܰܠܗܳܢܽܘܢ ܕܰܒܚܶܫܽܘܟܳܐ ܐܶܬܓܠܰܘ^[11]܆ ܘܠܰܫܡܰܝܳܐ ܟܰܕ ܡܒܰܣܰܪ ܦܢܳܐ܆ ܗܰܘ ܕܠܳܐ ܦܰܓܪܳܢܳܐܺܝܬ ܘܠܳܐ ܡܶܣܬܰܝܟܳܢܳܐܺܝܬ ܠܟܽܠ ܡܳܠܶܐ܆ ܘܳܐܦܠܳܐ ܗܳܟܰܢܳܐ ܫܒܰܩ ܠܰܢ܆ ܐܶܠܳܐ ܐܶܡܰܪ ܠܬܰܠܡܺܝܕܰܘ̈ܗ̱ܝ܆ ܠܳܐ ܐܶ݀ܫܒܽܘܩܟܽܘܢ ܝܰܬܡ̈ܶܐ܆ ܐܳܬܶܐ ܐ̱ܢܳܐ ܠܘܳܬܟܽܘܢ^[12]܆ ܘܗܳܐ ܐܶܢܳܐ ܥܰܡܟܽܘܢ ܐܺܝܬܰܝ ܟܽܠܗܽܘܢ ܝܰܘ̈ܡܳܬܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ^[13].

ܗܽܘ ܥܰܠ ܢܰܦܫܶܗ ܡܰܠ̣ܝܳܗ̇܆ ܐܳܦ ܠܒܽܘܪܟܬܳܐ ܗܳܝ ܕܒܰܪܶܟ ܡܽܘܫܶܐ ܗܰܘ ܪܰܒܳܐ ܠܝܰܘܣܶܦ. ܘܰܐܟܚܕܳܐ ܘܒܳܗ̇ ܟܰܕ ܒܳܗ̇܆ ܠܕܶܚܠܰܬ ܫ̈ܺܐܕܶܐ ܗܳܝ ܐܰܒܳܗܳܝܬܳܐ ܕܥܰܡܡ̈ܶܐ ܕܰܥܕܰܡܳܐ ܠܣܰܘܦܳܗ̇ ܕܰܐܪܥܳܐ܆ ܐܰܝܟ ܕܰܒܩܰܪ̈ܢܳܬܳܐ ܚܰܪ̈ܺܝܦܳܬܳܐ܆ ܒܦܽܘܩ̈ܕܳܢܶܐ ܐܶܘܰܢ̈ܓܶܠܳܝܶܐ ܘܰܒܡܰܠ̈ܦܳܢܘܳܬܳܐ ܫܠܺܝܚ̈ܳܝܳܬܳܐ ܥܩܰܪ܆ ܘܰܐܟܙܢܳܐ ܕܡܶܢ ܫܶܪ̈ܫܶܝܗ̇ ܬܰܠܫܳܗ̇.

ܣܰܓܺܝ ܕܶܝܢ ܛܳܒܳܐܺܝܬ܆ ܩܰܪ̈ܢܳܬܳܐ ܕܪܰܝܡܳܐ ܩܪܳܐ ܐܶܢܶܝܢ܆ ܠܩܰܪ̈ܢܳܬܳܐ ܕܪ̈ܺܝܫܰܝ ܐܰܒܳܗ̈ܳܬܳܐ܆ ܘܰܕܗܳܢܽܘܢ ܕܡܶܢ ܐܰ‌ܠܳܗܳܐ ܡܶܬܡܰܫܚܺܝܢ. ܙܳܕܶܩ ܠܗܽܘܢ ܓܶܝܪ܆ ܕܳܐܦܶܢ ܒܳܐܕܫ̈ܶܐ ܣܰܓܺܝ̈ܶܐܐ ܕܰܡܝܰܬܪ̈ܳܬܳܐ ܢܶܗܘܽܘܢ ܥܰܒܺܝܛܺܝܢ܆ ܕܰܡܚܰܪܦܺܝܢ ܒܝܰܕ ܥܰܡ̈ܠܶܐ ܕܣܳܥܽܘܪܽܘܬܳܐ܆ ܘܰܕܪܺܝܫܳܐܺܝܬ ܡܥܰܢܘܶܝܢ ܘܰܦܠܺܝܚܺܝܢ܆ ܕܰܠܗܳܠܶܝܢ ܫܰܠ̈ܡܳܬܳܐ ܘܠܳܐ ܦܠܺܝ̈ܓܳܬܳܐ ܢܶܛܪܽܘܢ ܐܶܢܶܝܢ ܥܕܰܡܳܐ ܠܫܽܘܠܳܡܳܐ܆ ܐܰܝܟ ܚܕܳܐ ܩܰܪܢܳܐ ܕܪܰܝܡܳܐ ܚܰܝܠܬܳܢܺܝܬܳܐ ܟܺܝܬ ܘܠܳܐ ܡܶܙܕܰܟܝܳܢܺܝܬܳܐ. ܘܠܳܐ ܒܕܽܘܒܳܪܳܐ ܠܰܬܪܶܝܢ ܢܶܬܦܰܣܩܽܘܢ܆ ܘܰܢܢܰܣܽܘܢ ܕܠܰܐܠܳܗܳܐ ܘܰܠܡܳܡܽܘܢܳܐ ܢܶܦܠܚܽܘܢ ܥܰܒܕܽܘܬܳܐ^[14]܆ ܘܳܐܦܠܳܐ ܠܗܰܝܡܳܢܽܘܬܳܐ ܢܦܰܠܓܽܘܢ ܒܕܽܘܓ̈ܡܰܛܰܐ ܠܳܐ ܒܚܺܝܪ̈ܶܐ ܘܡܰܣ̈ܠܰܝܳܐ. ܘܠܳܐ ܐܰܝܟ ܦܰܩܪܽܘܬܶܗ ܕܰܐܪܺܝܽܘܤ܆ ܠܰܚܕܳܐ ܐܰ‌ܠܳܗܽܘܬܳܐ ܕܰܬܠܳܬܳܐ ܩܢܽܘܡ̈ܶܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ ܢܦܰܠܓܽܘܢ ܒܢܽܘܟܪ̈ܳܝܳܬܳܐ ܘܰܒܫܽܘܚ̈ܠܳܦܶܐ ܕܽܐܘܣܺܝ̈ܰܐܤ܆ ܐܳܦܠܳܐ ܒܣܰܟܺܝܢܳܐ ܝܽܗ̱ܘܕܳܝܬܳܐ ܕܢܶܣܛܽܘܪܺܝܽܘܤ܆ ܢܶܦܣܩܽܘܢ ܠܡܶܬܒܰܪܢܫܳܢܽܘܬܶܗ ܠܳܐ ܡܶܬܡܰܠܠܳܢܺܝܬܳܐ ܘܠܳܐ ܡܶܬܦܰܠܓܳܢܺܝܬܳܐ ܕܰܐ‌ܠܳܗܳܐ ܡܶܠܬܳܐ܆ ܒܰܥܦܺܝܦܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܘܳܐܦܠܳܐ ܐܰܝܟ ܐܘܛܘܟܶܐ ܗܰܘ ܕܠܳܐ ܐܰ‌ܠܳܗ܆ ܠܦܽܘܪܩܳܢܳܐ ܕܺܝܠܰܢ ܕܰܓܠܳܐ ܢܚܰܘܽܘܢ܆ ܘܰܒܫܶܢ̈ܶܐ ܕܪܽܘܫܥܳܐ ܢܢܰܬܫܽܘܢܳܝܗ̱ܝ ܡܶܢ ܦܳܪܽܘܩܰܢ ܘܳܐܣܝܰܢ܆ ܒܗܳܝ ܕܒܶܣܪܳܐ ܐܰܟܣܢܳܝܳܐ ܐܰܘ ܐܰܝܟ ܙܢܳܐ ܕܒܶܣܪܳܐ ܝܳܗܒܺܝܢ ܠܶܗ ܘܠܰܘ ܗܰܘ ܫܰܪܺܝܪܳܐ ܘܕܰܫܘܶܐ ܠܰܢ ܒܽܐܘܣܺܝܰܐ܆ ܘܕܰܡܚܰܪܰܪ ܘܰܕܟܶܐ ܡܶܢ ܟܽܠܳܗ̇ ܚܛܺܝܬܳܐ. ܘܠܳܐ ܒܰܕܡܽܘܬ ܐܰܦܽܘܠܺܝܢܰܪܺܝܽܘܤ ܗܰܘ ܥܰܢܳܬܳܐ ܘܚܰܣܺܝܪ ܗܰܘܢܳܐ܆ ܐܰܝܟ ܕܰܒܓܳܪܽܘܕܳܐ ܡܶܕܶܡ ܢܶܓܪܕܽܘܢܳܝܗ̱ܝ ܠܗܰܘܢܳܐ ܡܶܢ ܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ܆ ܘܒܰܡܢܳܬܳܐ ܗܳܝ ܠܳܐ ܡܶܬܐܰܣ̈ܝܳܢܶܐ ܢܶܫܒܩܽܘܢ ܠܰܢ܆ ܗܳܝ ܕܒܳܗ̇ ܒܨܰܠܡܳܐ ܕܰܐ‌ܠܳܗܳܐ ܗܘ̣ܰܝܢܰܢ܆ ܘܳܐܦܠܳܐ ܐܰܝܟ ܡܰܢܺܝ̈ܢܳܝܶܐ ܗܳܢܽܘܢ ܕܰܠܗܰܠ ܡܶܢ ܟܽܠܶܗ ܓܽܘܕܳܦܳܐ ܕܠܳܐ ܢܳܡܽܘܤ ܘܪܰܫܺܝܥܽܘܬܳܐ ܢܳܦܩܺܝܢ܆ ܠܬܰܪܬܶܝܢ ܪ̈ܺܝܫܳܢܘܳܬܳܐ ܠܒܺܝܫܬܳܐ ܟܺܝܬ ܘܰܠܛܳܒܬܳܐ܆ ܢܦܰܠܓܽܘܢܳܗ̇ ܠܡܶܬܬܰܝܳܬܢܽܘܬܶܗ^[15] ܟܺܝܬ ܘܰܠܩܽܘܝܳܡܶܗ ܕܗܳܢܳܐ ܟܽܠ܆ ܗܰܘ ܕܳܐܦ ܠܘܳܬ ܗܳܝ ܕܢܶܗܘܶܐ ܐܺܝܬܰܘܗ̱ܝ ܐܶܬܬܰܝܬܺܝ ܘܡܶܬܠܒܶܟ ܘܰܡܩܰܘܶܐ܆ ܡܶܢ ܚܰܕ ܡܳܪܝܳܐ ܛܳܒܳܐ ܘܥܳܒܽܘܕܳܐ ܘܰܐ‌ܠܳܗܳܐ ܐܰܚܺܝܕ ܟܽܠ.

ܗܳܠܶܝܢ ܓܶܝܪ ܟܽܠܗܽܘܢ ܟܰܕ ܩܰܪ̈ܢܳܬܳܐ ܡܦܰܠ̈ܓܳܬܳܐ ܐܺܝܬ ܠܗܽܘܢ܆ ܘܰܒܚܽܘ̈ܫܳܒܶܐ ܐ̱ܢܳܫܳܝ̈ܶܐ ܐܶܬܦܰܠܰܓܘ ܒܬܰܪܥܺܝܬܗܽܘܢ܆ ܠܰܡܦܰܠܳܓܽܘ ܠܗܰܝܡܳܢܽܘܬܳܐ ܗܳܝ ܦܫܺܝܛܬܳܐ ܘܰܠܚܽܘܕܳܝܰܬ ܐܳܕܫܳܐ ܘܠܳܐ ܡܶܬܦܰܠܓܳܢܺܝܬܳܐ ܐܰܡܪܰܚܘ ܐܶܠܳܐ ܗܰܘ ܕܰܒܛܰܝܒܽܘܬܳܐ ܗܳܝ ܕܡܶܢ ܠܥܶܠ ‌ܐܶܬܡܫܰܚ܆ ܘܰܠܗܳܕܶܐ ܕܟܺܝܬܳܐ ܢܰܛܪܳܗ̇܆ ܘܰܐܝܟ ܕܰܒܩܰܪܢܳܐ ܕܪܰܝܡܳܐ ܒܡܶܠܬܳܐ ܕܰܫܪܳܪܳܐ ܡܙܰܝܶܢ܆ ܙܳܢܶܩ ܠܗܽܘܢ ܠܚܺܐܦ̈ܶܐ ܕܰܩܪ̈ܳܒܶܐ ܕܗܳܠܶܝܢ܆ ܘܥܰܡ ܡܙܰܡܪܳܢܳܐ ܐܰ‌ܠܳܗܳܝܳܐ ܘܰܢܒܺܝܳܐ ܕܰܘܺܝܕ ܡܙܰܡܰܪ܆ ܐܶܢܳܐ ܕܶܝܢ ܐܶܪܘܰܙ ܠܥܳܠܰܡ. ܐܶܙܰܡܰܪ ܠܰܐܠܳܗܶܗ ܕܝܰܥܩܽܘܒ. ܘܰܠܟܽܠܗܶܝܢ ܩܰܪ̈ܢܳܬܳܐ ܕܪ̈ܰܫܺܝܥܶܐ ܐܶܪܰܥܪܰܥ܆ ܘܢܶܬܬܪ̈ܺܝܡܳܢ ܩܰܪ̈ܢܳܬܳܐ ܕܙܰܕܺܝ̈ܩܶܐ^[16]. ܘܡܰܘܕܶܐ ܘܰܡܗܰܝܡܶܢ ܒܚܰܕ ܐܰ‌ܠܳܗܳܐ ܐܰܒܳܐ ܥܳܒܽܘܕܳܐ ܟܺܝܬ ܘܡܳܪܝܳܐ ܕܗܳܠܶܝܢ ܕܺܐܝܬܰܝܗܶܝܢ܆ ܘܰܒܡܶܠܬܳܐ ܝܺܚܺܝܕܳܝܳܐ ܗܰܘ ܕܡܶܢܶܗ ܒܽܐܘܣܺܝܰܐ ܡܬܽܘܡܳܐܺܝܬ ܝܺܠܺܝܕ܆ ܘܰܒܝܰܘ̈ܡܳܬܳܐ ܐ̱ܚܪ̈ܳܝܶܐ ܠܳܐ ܡܶܫܬܰܚܠܦܳܢܳܐܺܝܬ ܒܰܚܕܳܝܽܘܬܳܐ ܩܢܽܘܡܳܝܬܳܐ܆ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܐܶܬܒܰܣܰܪ ܒܶܣܪܳܐ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ܆ ܕܚܰܕ ܐܺܝܬܰܘܗ̱ܝ ܘܳܐܦ ܟܰܕ ܡܒܰܣܰܪ܆ ܗܽܘ ܟܰܕ ܗܽܘ ܐܰ‌ܠܳܗܳܐ ܟܺܝܬ ܘܒܰܪܢܳܫܳܐ܆ ܐܰܝܟܰܢܳܐ ܕܰܒܗܳܝ ܡܰܢ ܠܰܐܠܳܗܳܐ ܐܰܒܳܐ ܢܶܗܘܶܐ ܐܺܝܬܰܘܗ̱ܝ ܫܘܶܐ ܒܽܐܘܣܺܝܰܐ ܒܗܳܝ ܕܶܝܢ ܠܰܢ܆ ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܰܪܬܶܝܢ ܘܳܐܦ ܡܶܢ ܒܳܬܰܪ ܚܕܳܝܽܘܬܳܐ܆ ܕܒܰܬܪܰܝܳܢܽܘܬܳܐ ܠܳܐ ܡܶܬܦܰܠܰܓ܆ ܘܰܒܪܽܘܚܳܐ ܩܰܕܺܝܫܳܐ ܗܰܘ ܕܺܐܝܬܰܘܗ̱ܝ ܫܘܶܐ ܒܽܐܘܣܺܝܰܐ ܠܰܐܒܳܐ ܘܠܰܒܪܳܐ܆ ܗܰܘ ܕܡܶܢ ܐܰܒܳܐ ܠܳܐ ܙܰܒܢܳܐܺܝܬ ܘܰܡܬܽܘܡܳܐܺܝܬ ܢܳܦܶܩ. ܐܰܝܟܰܢܳܐ ܟܺܝܬ ܕܰܬܠܺܝܬܳܝܽܘܬܳܐ ܡܫܰܡܠܰܝܬܳܐ ܘܰܓܡܺܝܪܬܳܐ ܬܶܗܘܶܐ ܐܺܝܬܶܝܗ̇܆ ܕܳܐܦܠܳܐ ܒܬܰܘܣܶܦܬܳܐ ܕܡܶܢܝܳܢܳܐ ܡܶܛܽܠ ܡܶܬܒܰܣܪܳܢܽܘܬܳܐ ܕܰܒܪܳܐ܆ ܐܳܦܠܳܐ ܬܽܘܒ ܒܒܽܘܨܳܪܳܐ ܡܶܕܶܡ ܐܰܘ ܫܽܘܚܠܳܦܳܐ܆ ܠܗܳܝ ܕܰܬܠܺܝܬܳܝܽܘܬܳܐ ܬܶܗܘܶܐ ܐܺܝܬܶܝܗ̇ ܐܰܘܒܕܰܬ܆ ܕܡܶܫܬܰܘܙܒܳܐ ܕܶܝܢ ܠܳܐ ܚܰܣܺܝܪܬܳܐ ܒܝܰܕ ܬܰܘܕܺܝܬܳܐ ܚܠܺܝܡܬܳܐ܆ ܡܰܠܽܘܢ ܕܶܝܢ ܕܢܳܛܪܳܐ ܘܰܡܫܰܘܙܒܳܐ ܠܗܳܢܽܘܢ ܕܗܳܟܰܢܳܐ ܡܰܘܕܶܝܢ ܠܳܗ̇.

ܡܳܕܶܝܢ ܠܳܚܡܳܐܺܝܬ ܐܶܡܪܶܬ܆ ܕܟܰܕ ܠܝܰܘܡܳܐ ܗܳܢܳܐ ܟܽܠ ܫܰܢ̱ܬܳܐ ܡܰܝܬܶܐ ܠܺܝ܆ ܝܽܘܬܪܳܢܳܐ ܣܰܓܺܝܳܐܐ ܥܳܦܶܐ ܐ̱ܢܳܐ ܡܶܢ ܗܳܪܟܳܐ܆ ܠܰܘ ܡܶܛܽܠ ܕܰܠܘܳܬ ܪܰܘܡܳܐ ܕܗܳܢܳܐ ܟܽܠܶܗ ܕܺܐܝܩܳܪܳܐ ܘܫܽܘܠܛܳܢܳܐ ܟܳܗܢܳܝܳܐ ܣܶܠܩܶܬ܆ ܐܶܠܳܐ ܡܶܛܽܠ ܕܣܰܓܺܝ ܡܶܢ ܫܽܘܘܕܳܝܳܐ ܕܪܺܝܫ ܟܳܗ̈ܢܶܐ ܚܰܣܺܝܪ ܐ̱ܢܳܐ܆ ܘܰܠܬܰܚܬ ܒܕܽܘܟ ܒܰܥ̈ܒܳܕܶܐ ܐܰܪ̈ܥܳܢܳܝܶܐ ܪܳܫܶܦ ܐ̱ܢܳܐ ܟܰܕ ܠܥܶܠ ܝܳܬܶܒ ܐ̱ܢܳܐ܆ ܘܚܰܝܳܒ ܗ̱ܘܺܝܬ ܕܰܠܘܳܬ ܫܡܰܝܳܐ ܐܶ݀ܗܘܶܐ ܡܶܬܬܪܺܝܡ ܗ̱ܘܺܝܬ ܒܓܶܦ̈ܶܐ ܕܰܡܝܰܬܪ̈ܳܬܳܐ. ܘܟܰܕ ܡܚܰܕܶܬ ܐ̱ܢܳܐ ܒܥܽܘܗܕܳܢܝ ܠܰܩܝܳܡ̈ܶܐ ܗܳܠܶܝܢ ܕܣܳܡܶܬ ܠܘܳܬ ܐܰ‌ܠܳܗܳܐ ܒܗܰܘ ܙܰܒܢܳܐ܆ ܘܡܶܬܚܰܫܰܒ ܐ̱ܢܳܐ ܕܚܰܝܳܒܳܐ ܐܺܝܬܰܝ ܕܗܳܠܶܝܢ ܐܶ݀ܡܰܠܶܐ܆ ܕܳܚܶܠ ‌ܐ̱ܢܳܐ ܘܪܳܥܶܠ ‌ܐ̱ܢܳܐ. ܘܟܰܕ ܒܨܺܝܪ ܩܰܠܺܝܠ ܕܠܳܐ ܢܶܫܡܬܳܐ ܗܳܘܶܐ ܐ̱ܢܳܐ ܡܶܢ ܕܶܚܠܬܳܐ܆ ܝܳܒܶܫ ܐ̱ܢܳܐ. ܡ̈ܶܠܶܐ ܓܶܝܪ ܗܳܠܶܝܢ ܕܶܐܬܶܐܡܰܪ̈ܶܝܢ ܒܰܩܪܳܝܬܳܐ܆ ܘܶܐܨܛܰܠܺܝ̣ܶܝ̣ܢ ܥܰܠ ܪܺܝܫܳܐ ܕܟܽܠ ܚܰܕ ܡܶܢ ܗܳܢܽܘܢ ܕܡܶܬܡܰܫܚܺܝܢ܆ ܚܰܝܠܳܐ ܕܰܩܝܳܡ̈ܶܐ ܐܺܝܬ ܠܗܶܝܢ. ܘܰܠܟܺܝܪܽܘܛܽܘܢܺܝܰܐ ܐܰܘܟܺܝܬ ܣܝܳܡ ܐܺܝܕܳܐ ܡܶܛܽܠ ܗܳܕܶܐ܆ ܡܳܪܳܢܳܐܺܝܬ ܢܶܩܪܶܐ ܐ̱ܢܳܫ܆ ܪܡܳܝ ܐܺܝܕܳܐ ܕܒܶܐܫܛܳܪܳܐ ܕܚܰܘܒܬܳܐ. ܠܢܰܚ̈ܬܶܐ ܓܶܝܪ ܗܳܠܶܝܢ ܪ̈ܽܘܚܳܢܶܐ ܕܡܶܬܥܰܛܰܦ ܐ̱ܢܳܫ܆ ܟܰܕ ܒܝܰܕ ܛܰܝܒܽܘܬܳܐ ܠܟܳܗܢܽܘܬܳܐ ܡܶܬܬܰܣܪܰܚ܆ ܠܗܳܠܶܝܢ ܕܙܳܕܶܩ ܠܶܗ ܕܰܒܢܶܣܝܳܢܳܐ ܢܶܬܥܰܛܰܦ ܐܶܢܽܘܢ܆ ܘܰܕܠܰܘ ܒܰܫܡܳܗ̈ܶܐ ܗܳܢܽܘܢ ܟܳܗ̈ܢܳܝܶܐ ܒܰܠܚܽܘܕ ܢܶܬܪܰܘܪܰܒ܆ ܥܰܪܛܶܠܳܝܳܐ ܕܶܝܢ ܢܶܬܚܙܶܐ ܒܣܽܘܥܪ̈ܳܢܶܐ܆ ܘܥܰܡ ܢܶܟܠܳܐ ܠܰܚܙܳܬܳܐ ܡܰܢ ܗܳܝ ܕܡܶܢ ܠܒܰܪ ܢܶܗܘܶܐ ܛܺܝܫ܆ ܒܗܳܠܶܝܢ ܕܶܝܢ ܕܰܠܓܰܘ ܒܺܝܫܳܐܺܝܬ ܢܶܗܘܶܐ ܣܺܝܡ܆ ܘܫܳܘܝܳܐܺܝܬ ܠܒܶܟܝܳܐ. ܡܰܢܽܘ ܓܶܝܪ ܕܰܢܚܰܘܶܐ ܒܡܶܠܬܳܐ ܠܪܰܒܽܘܬܳܗ̇ ܕܒܶܗܬܬ̣ܳܐ ܗܳܝ ܕܰܒܝܰܘܡܳܐ ܗܰܘ ܐ̱ܚܪܳܝܳܐ܆ ܗܳܝ ܕܒܳܗ̇ ܠܗܳܢܽܘܢ ܕܕܰܐܝܟ ܗܳܠܶܝܢ ܓܳܙܶܡ ܐܰ‌ܠܳܗܳܐ܆ ܒܝܰܕ ܡܰܢ ܐܶܫܰܥܝܳܐ ܢܒܺܝܳܐ ܟܰܕ ܗܳܟܰܢܳܐ ܐܳܡܰܪ: ܕܟܽܠ ‌ܐܶܤܛܠܳܐ ܕܰܡܟܰܢܫܳܐ ܒܢܶܟܠܳܐ ܘܟܽܠ ܡܳܐܢܳܐ^[17]܆ ܥܰܡ ܬܰܚܠܽܘܦܳܐ ܢܶܦܪܥܽܘܢ܆ ܗܳܢܰܘ ܕܶܝܢ ܟܰܕ ܐܳܦ ܠܶܐܤܛܠܳܐ ܗܳܝ ܕܺܐܝܩܳܪܳܐ ܕܨܰܥܰܪܘ ܫܳܠܚܺܝܢ ܡܨܰܥܪܳܐܺܝܬ܆ ܘܟܰܕ ܝܳܗܒܺܝܢ ܡܶܠܬܳܐ ܕܡܶܛܽܠ ܡܳܢܳܐ ܚܰܠܶܦܘ ܠܒܰܟܘ ܠܰܡܨܰܕܝܳܢܽܘܬܳܐ ܚܠܳܦ ܫܪܳܪܳܐ܆ ܒܶܐܘܰܢܓ̈ܶܠܺܝܰܐ ܕܶܝܢ ܟܰܕ ܓܰܠܝܳܐܺܝܬ ܡܰܙܥܶܩ ܒܦܽܘܚܪܳܐ^[18] ܗܰܘ ܛܽܘܒܬܳܢܳܐ܆ ܚܰܒܪܝ܆ ܐܰܝܟܰܢܳܐ ܥܰܠ̣ܬ ܠܗܳܪܟܳܐ܆ ܟܰܕ ܠܳܐ ܐܺܝܬ ܠܳܟ ܠܒܽܘܫܳܐ ܕܡܶܫܬܽܘܬܳܐ^[19].

ܠܳܐ ܐ̱ܢܳܫ ܓܶܝܪ ܡܶܢ ܡܫܺܝܚܽܘܬܳܐ܆ ܘܡܶܢ ܩܪܳܝܬܳܐ ܗܳܝ ܟܳܗܢܳܝܬܳܐ ܘܛܶܟܣܳܐ܆ ܪܰܒܬܳܐ ܢܶܬܪܰܥܶܐ. ܢܶܬܒܰܩܶܐ ܕܶܝܢ ܕܠܰܐܝܟܳܐ ܫܳܪܟܳܐ ܠܶܗ ܗܺܝ ܪܰܒܽܘܬܶܗ ܕܺܐܝܩܳܪܳܐ. ܘܰܕܟܰܕ ܠܰܘ ܫܰܘܝܳܐܺܝܬ ܐܶܬܕܰܒܰܪ܆ ܙܘ̈ܳܕܶܐ ܕܬܰܫܢܺܝܩܳܐ ܕܝܰܬܺܝܪ ܪܰܒ ܗܳܘܝܳܐ ܠܶܗ. ܗܰܘ ܡܰܢ ܓܶܝܪ ܕܺܐܝܬܰܘܗ̱ܝ ܙܥܽܘܪܳܐ܆ ܫܳܘܶܐ ܠܫܽܘܒܩܳܢܳܐ ܕܪ̈ܰܚܡܶܐ ܐܺܝܬܰܘܗ̱ܝ. ܚܰܝ̈ܠܬܳܢܶܐ ܕܶܝܢ ܚܰܝܠܬܳܢܳܐܺܝܬ ܢܶܬܬܰܒܥܽܘܢ^[20]܆ ܐܳܡܰܪ ܐ̱ܢܳܫ ܚܰܟܺܝܡܳܐ. ܘܰܕܥܰܠ ܥܰܫܺܝ̈ܢܶܐ܆ ܒܨܳܬܳܐ ܚܰܝܠܬܳܢܺܝܬܳܐ ܩܳܝܡܳܐ. ܐܳܦ ܚܰܙܩܺܝܐܶܝܠ ܕܶܝܢ ܗܰܘ ܢܒܺܝܳܐ܆ ܚܳܫܶܒ ܠܗܳܢܽܘܢ ܕܒܰܙܒܰܢ ܥܰܠ ‌ܐܰܪܥܳܐ ܐܶܚܰܕܘ ܪܺܝܫܳܢܽܘܬܳܐ܆ ܕܒܰܡܣܳܡ ܒܪ̈ܺܝܫܶܐ ܕܫܳܘܶܝܢ ܠܰܢܦܺܝܚܽܘܬܳܐ ܕܰܛܪܽܘܢܽܘܬܗܽܘܢ ܡܶܫܬܰܢܩܺܝܢ܆ ܘܰܠܓܽܘܡܨܳܐ ܗܰܘ ܕܰܠܬܰܚܬ ܡܶܬܬܰܘܒܠܺܝܢ܆ ܟܰܕ ܗܳܟܰܢܳܐ ܐܳܡܰܪ. ܬܰܡܳܢ ܐܰܬܘܰܪ ܘܟܽܠܳܗ̇ ܟܢܽܘܫܬܶܗ. ܘܬܽܘܒ. ܬܰܡܳܢ ܥܺܝܠܰܡ ܘܟܽܠܶܗ ܚܰܝܠܶܗ. ܗܳܢܽܘܢ ܕܝܰܗܒܘ ܕܶܚܠܰܬܗܽܘܢ ܥܰܠ ‌ܐܰܪܥܳܐ ܕܚܰܝ̈ܶܐ܆ ܘܩܰܒܶܠܘ ܫܽܘܢܳܩܗܽܘܢ ܥܰܡ ܗܳܢܽܘܢ ܕܢܳܚܬܺܝܢ ܠܓܽܘܡܳܨܳܐ. ܘܬܽܘܒ. ܬܰܡܳܢ ܐܶܬܺܝܗܶܒܘ ܡܽܘܫܘܟ ܘܬܘܒܠ܆ ܘܟܽܠܶܗ ܚܰܝܠܳܐ ܕܟܽܠ ܚܰܕ ܡܶܢܗܽܘܢ. ܘܰܫܟܶܒܘ ܥܰܡ ܓܰܢ̱ܒܳܪ̈ܶܐ ܗܳܢܽܘܢ ܕܰܢܦܰܠܘ ܡܶܢ 222ܥܳܠܰܡ܆ ܗܳܢܽܘܢ ܕܰܢܚܶܬܘ ܠܰܫܝܽܘܠ^[21].

ܘܠܳܐ ܠܶܗ ܗܳܟܺܝܠ ܠܗܰܘ ܕܰܒܫܽܘܠܛܳܢܳܐ ܐܶܬܝܰܩܰܪ ܘܰܒܪܺܝܫܳܢܽܘܬܳܐ ܡܶܕܶܡ܆ ܘܝܰܬܺܝܪܳܐܺܝܬ ܒܗܳܝ ܪܽܘܚܳܢܳܝܬܳܐ܆ ܕܰܢܡܰܫܰܚ ܗܽܘ ܠܶܗ ܒܟܽܠ ܝܽܘܡ ܠܽܘܩܒܰܠ ܪܰܒܽܘܬܳܗ̇ ܕܡܰܘܗܰܒܬܳܐ܆ ܘܰܕܠܳܐ ܒܦܰܢܛܰܣܺܝܰܐ ܗܳܝ ܕܡܶܢ ܠܒܰܪ ܢܨܰܕܪܺܝܘܗ̱ܝ ܠܗܰܘܢܶܗ. ܐܶܠܳܐ ܕܢܶܬܚܰܫܰܒ܆ ܘܕܰܐܝܟ ܗܰܘ ܕܣܰܝܦܳܐ ܬܠܶܐ ܠܥܶܠ ܡܶܢ ܪܺܝܫܶܗ܆ ܢܚܽܘܪ ܘܢܶܚܙܶܝܗ̇ ܠܡܰܗܦܟܽܘܬ ܐܰܦ̈ܶܐ ܘܰܠܪܽܘܓܙܳܐ ܕܰܐ‌ܠܳܗܳܐ܆ ܐܶܢܗܽܘ ܕܠܳܐ ܫܳܘܝܳܐܺܝܬ ܢܶܬܕܰܒܰܪ. ܘܰܩܕܳܡ ܟܽܠܗܶܝܢ ܟܺܝܬ܆ ܠܝܰܘܡܳܐ ܗܰܘ ܐ̱ܚܪܳܝܳܐ ܘܕܰܡܠܶܐ ܪܬܺܝܬܳܐ܆ ܘܠܰܡܣܳܡ ܒܪ̈ܺܝܫܶܐ ܘܬܰܒ̈ܥܳܬܳܐ ܗܳܠܶܝܢ ܕܰܒܗܰܘ܆ ܗܳܠܶܝܢ ܕܠܳܐ ܐ̱ܢܳܫ ܡܨܶܐ ܠܡܶܓܢܰܒ ܐܶܢܶܝܢ ܒܰܡܦܺܝܣܳܢܽܘܬܳܐ ܡܶܕܶܡ. ܕܒܳܬܰܪܗܶܝܢ܆ ܢܽܘܪܳܐ ܗܳܝ ܕܠܳܐ ܕܳܥܟܳܐ܆ ܘܒܺܝ̈ܫܳܬܳܐ ܗܳܢܶܝܢ ܠܳܐ ܡܶܣܬܰܝܒܪ̈ܳܢܝܳܬܳܐ ܘܰܕܠܳܐ ܫܽܘܠܳܡ. ܐܳܦ ܓܶܝܪ ܗܰܘ ܕܰܡܫܰܚ ܠܫܳܐܘܳܠ ܡܶܢ ܒܳܬܰܪܟܶܢ ܐܳܡܰܪ ܗ̱ܘܳܐ܆ ܐܶܬܬܘܺܝܬ ܕܰܡܫܰܚܬ̊ܶܗ ܠܫܳܐܘܳܠ ܡܰܠܟܳܐ. ܡܶܛܽܠ ܕܶܐܬܗܦܶܟ ܡܶܢ ܒܳܬܰܪܝ܆ ܘܠܳܐ ܐܰܩܺܝܡ^[22] ܡ̈ܶܠܶܐ ܕܺܝܠܝ. ܗܳܝ ܕܶܝܢ ܕܶܐܬܬܘܺܝܬ̣ ܟܬܺܝܒܳܐ܆ ܠܘܳܬ ܡܶܬܚܰܘܝܳܢܽܘܬܳܐ ܕܗܳܝ ܕܠܰܘ ܩܛܺܝܪ̈ܳܝܳܬܳܐ ܘܳܐ‌ܠܽܘܨ̈ܝܳܬܳܐ ܐܺܝܬܰܝܗܶܝܢ ܩܪ̈ܳܝܳܬܶܗ ܘܡܰܘܗ̈ܒܳܬܶܗ ܕܰܐ‌ܠܳܗܳܐ܆ ܘܰܠܫܰܠܺܝܛܽܘܬ ܒܝܳܬܳܐ ܠܳܐ ܕܳܒܪ̈ܳܢ ܒܰܩܛܺܝܪܳܐ. ܠܰܘ ܓܶܝܪ ܡܶܛܽܠ ܕܡܰܠܟܳܐ ܥܰܒ̣ܕܶܗ܆ ܐܳܦ ܕܒܰܐܢܰܢܩܺܐ ܢܶܥܒܕܺܝܘܗ̱ܝ ܛܳܒܳܐ ܙܳܕܶܩ ܗ̱ܘܳܐ. ܗܳܕܶܐ ܓܶܝܪ ܕܨܶܒܝܳܢܶܗ ܕܗܰܘ ܐܺܝܬܶܝܗ̇ ܗ̱ܘܳܬ. ܕܠܳܐ ܕܶܝܢ ܐܺܝܬ ܡܶܬܬܰܘܝܳܢܽܘܬܳܐ ܠܘܳܬ ܐܰ‌ܠܳܗܳܐ܆ ܗܰܘ ܕܰܠܟܽܠܗܶܝܢ ܝܳܕܰܥ ܩܕܳܡ ܕܢܶܗܘ̈ܝܳܢ. ܣܳܗܶܕ ܦܰܘܠܽܘܤ ܕܰܠܘܳܬ ܪ̈ܽܗ̱ܘܡܳܝܶܐ ܟܳܬܶܒ ܘܳܐܡܰܪ: ܕܠܳܐ ܡܶܬܬܰܘܝܳܢ̈ܶܐ ܐܺܝܬܰܝܗܽܘܢ ܫܽܘ̈ܟܳܢܶܐ ܘܰܩܪܳܝܬܶܗ ܕܰܐ‌ܠܳܗܳܐ^[23]. ܕܡܶܛܽܠܳܬܳܗ̇ ܟܺܝܬ ܕܗܳܕܶܐ܆ ܐܳܦ ܫܰܠܺܝܛ ܠܶܗ ܠܗܰܘ ܕܬܳܐܶܒ܆ ܕܢܶܗܦܽܘܟ ܢܶܦܢܶܐ ܠܺܐܝܩܳܪܳܐ ܗܰܘ ܕܡܶܢܶܗ ܢܦܰܠ. ܐܰܝܟܰܢܳܐ ܟܺܝܬ ܕܡܳܕܶܝܢ ܗܳܠܶܝܢ ܕܰܐ‌ܠܳܗܳܐ܆ ܩܒܺܝ̈ܥܳܬܳܐ ܡܰܢ ܡܩܰܘ̈ܝܳܢ܆ ܕܺܝܠܳܟ ܕܶܝܢ ܐܺܝܬܶܝܗ̇܆ ܐܰܘ ܕܰܒܝܰܕ ܡܝܰܬܪܽܘܬܳܐ ܬܒܰܝܬܶܐ ܐܰܢ̱ܬ ܠܳܟ ܠܗܳܠܶܝܢ܆ ܐܰܘ ܕܰܬܢܰܟܪܶܐ ܒܝܰܕ ܚܛܺܝܬܳܐ. ܡܶܛܽܠ ܕܳܐܦ ܡܶܢ ܫܽܘܪܳܝܳܐ ܟܰܕ ܥܰܒܕܶܗ ܠܒܰܪܢܳܫܳܐ܆ ܘܰܐܩܺܝܡܶܗ ܪܺܝܫܳܢܳܐ ܥܰܠ ܟܽܠܗܶܝܢ ܗܳܠܶܝܢ ܕܥܰܠ ‌ܐܰܪܥܳܐ܆ ܟܰܕ ܚܙܳܗ̇ ܠܒܺܝܫܽܘܬܳܐ ܕܣܶܓܝܰܬ̣܆ ܘܗܳܕܶܐ ܟܰܕ ܡܶܢ ܫܽܘܪܳܝܳܐ ܩܰܕܶܡ ܗ̱ܘܳܐ ܝܳܕܰܥ ܗ̱ܘܳܐ ܠܗܳܠܶܝܢ ܕܰܥܬܺܝ̈ܕܳܢ ܗ̱ܘܰܝ̈ ܕܢܶܗܘ̈ܝܳܢ. ܐܳܡܰܪ ܗ̱ܘܳܐ ܒܶܗ ܟܰܕ ܒܶܗ ܒܰܙܢܳܐ܆ ܟܰܕ ܠܚܺܐܪܽܘܬܳܐ ܗܳܝ ܐܰܚܺܝܕܰܬ ܗܺܝ ܠܳܗ̇ ܕܰܡܫܰܠܛܽܘܬ ܒܝܳܬܳܐ ܡܚܰܘܶܐ ܗ̱ܘܳܐ܆ ܐܶ݀ܥܛܶܐ ܠܒܰܪܢܳܫܳܐ ܗܰܘ ܕܥܶܒܕܶܬ ܡܶܢ ܦܰܪܨܽܘܦܳܐ ܕܰܐܪܥܳܐ. ܡܶܢ ܒܰܪܢܳܫܳܐ ܥܕܰܡܳܐ ܠܰܒܥܺܝܪܳܐ. ܡܶܢ ܪ̈ܰܚܫܳܐ ܥܕܰܡܳܐ ܠܦܳܪ̈ܚܳܬܳܐ ܕܰܫܡܰܝܳܐ܆ ܡܶܛܽܠ ܕܶܐܬܪܢܺܝܬ̣ ܕܥܶܒܕܶܬ ܐܶܢܽܘܢ^[24]. ܠܗܳܝ ܕܶܝܢ ܕܶܐܬܪܢܺܝܬ̣܆ ܐ̱ܚܪܺܢܳܐ ܡܶܢ ܡܦܰܫ̈ܩܳܢܶܐ܆ ܕܶܐܬܬܘܺܝܬ̣ ܐܰܫܠܶܡ.

ܙܳܕܶܩ ܕܶܝܢ ܕܰܠܡ̈ܶܠܶܐ ܗܳܠܶܝܢ ܕܦܰܐܝܽܘܬ ܐ̱ܢܳܫܳܐܺܝܬ ܐܰܡܺܝܪ̈ܳܢ܆ ܡܶܛܽܠ ܡܶܬܢܰܚܬܳܢܽܘܬܳܐ ܕܰܠܘܳܬܰܢ ܘܡܰܘܫܛܽܘܬ ܐܺܝ̈ܕܰܝܳܐ ܕܣܽܘܝܳܥܳܐ ܕܰܠܘܳܬ ܡܚܺܝܠܽܘܬܳܐ܆ ܕܰܒܬܰܪ̈ܥܝܳܬܳܐ ܦܰܐܝܰܬ ܠܰܐܠܳܗܳܐ ܘܰܕܙܳܕܩ̈ܳܢ ܢܠܰܚܶܡ ܐܶܢܶܝܢ ܠܰܐܠܳܗܳܐ. ܗܳܝ ܓܶܝܪ ܕܶܐܬܬܘܺܝܬ̣܆ ܐܳܦ ܠܪܶܚܡܬܳܐ ܕܚܽܘܒܶܗ ܕܰܐ‌ܠܳܗܳܐ ܕܰܠܘܳܬܰܢ ܡܚܰܘܝܳܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܡܶܛܽܠ ܫܦܺܝܥܽܘܬܳܐ ܕܒܺܝܫܽܘܬܳܐ ܕܺܝܠܟܽܘܢ܆ ܐܰܝܟ ܗܰܘ ܕܰܠܘܳܬ ܬܰܪܥܺܝܬܳܐ ܕܰܠܩܽܘܒܠܳܐ ܡܶܬܢܓܶܕ ܐ̱ܢܳܐ. 222ܟܰܦܬܳܐ ܓܶܝܪ ܗܳܝ ܕܟܺܐܢܽܘܬܳܐ܆ ܙܳܟܝܳܐ ܡܶܟܺܝܠ ܘܥܳܠܒܳܐ ܠܶܗ ܠܥܽܘܬܪܳܐ ܗܰܘ ܕܛܳܒܽܘܬܳܐ܆ ܗܳܝ ܕܰܕܠܳܐ ܫܳܘܶܝܢ ܐܢ̱ܬܽܘܢ ܠܳܗ̇ ܚܰܘܺܝܬܽܘܢ ܐܢ̱ܬܽܘܢ ܠܟܽܘܢ. ܘܡܳܢܳܐ ܐܳܡܰܪ ܐ̱ܢܳܐ ܠܫܳܐܘܳܠ. ܕܰܘܺܝܕ ܓܶܝܪ ܗܰܘ ܕܶܐܣܬܗܶܕ ܡܶܢ ܦܣܳܩܳܐ ܕܡܶܢ ܠܥܶܠ ܕܳܐܡܰܪ܆ ܕܶܐܫܟܚܶܬ ܠܕܰܘܺܝܕ ܗܰܘ ܒܪܶܗ ܕܺܐܝܫܰܝ ܓܰܒܪܳܐ ܐܰܝܟ ܠܶܒܝ܆ ܗܽܘ ܕܢܶܥܒܶܕ ܟܽܠܗܽܘܢ ܨܶܒ̈ܝܳܢܰܝ^[25]. ܟܰܕ ܐܰܣܟܶܠ܆ ܡܳܢܳܐ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܕܫܳܡܰܥ ܗ̱ܘܳܐ. ܐܶܢܳܐ ܡܫܰܚܬܳܟ ܠܡܰܠܟܳܐ ܥܰܠ ‌ܐܺܝܣܪܳܐܶܝܠ. ܘܶܐܢܳܐ ܦܰܨܺܝܬܳܟ ܡܶܢ ܐܺܝܕܳܐ ܕܫܳܐܘܳܠ܆ ܘܝܶܗܒܶܬ ܠܳܟ ܟܽܠܗܶܝܢ ܗܳܠܶܝܢ ܕܡܳܪܳܟ. ܘܢܶܫ̈ܶܐ ܕܺܝܠܶܗ ܒܥܽܘܒܳܟ. ܘܝܶܗܒܶܬ ܠܳܟ ܒܰܝܬܳܐ ܕܺܐܝܣܪܳܐܶܝܠ ܘܕܺܝܗܽܘܕܳܐ. ܘܶܐܢ ܙܥܽܘܪ̈ܝܳܬܳܐ ܐܺܝܬܰܝܗܶܝܢ ܗ̱ܘܰܝ̈ ܠܳܟ܆ ܐܰܘܣܦܶܬ ܠܳܟ ܐܰܟܘܳܬܗܶܝܢ܆ ܘܰܠܡܳܢܳܐ ܐܰܫܺܝܛܬ ܠܡܳܪܝܳܐ܆ ܠܡܶܥܒܰܕ ܕܒܺܝܫ ܩܕܳܡܰܘ̈ܗ̱ܝ. ܘܶܐ‌ܠܽܘ ܠܳܐ ܒܡܶܫܬܰܘܕܥܳܢܽܘܬܳܗ̇ ܕܰܚܛܺܝܬܳܐ܆ ܘܒܰܬܝܳܒܽܘܬܳܐ ܕܫܳܘܝܳܐ ܠܡܶܠܬܳܐ ܟܠܳܝܗ̱ܝ ܠܚܺܐܦܶܗ ܕܪܽܘܓܙܳܐ܆ ܘܠܳܐ ܡܶܕܶܡ ܡܰܘܬܪܳܐ ܗ̱ܘܳܬ ܠܶܗ ܣܳܗܕܽܘܬܳܐ ܗܳܝ ܩܰܕܡܳܝܬܳܐ ܘܰܡܫܺܝܚܽܘܬܳܐ ܕܡܰܠܟܽܘܬܳܐ܆ ܠܘܳܬ ܒܺܝܫܽܘܬܳܐ ܗܳܝ ܕܡܶܢ ܒܳܬܰܪܟܶܢ ܗܘ̣ܳܬ.

ܠܗܳܠܶܝܢ ܢܶܫܡܥܽܘܢ܆ ܘܰܒܕܶܚܠܬܳܐ ܘܒܰܪܬܺܝܬܳܐ ܢܶܬܩܰܦܣܽܘܢ܆ ܗܳܢܽܘܢ ܕܰܒܪܶܓܬܳܐ ܕܟܺܝܪ̈ܽܘܛܽܘܢܺܝܰܐܤ ܐܰܟܙܢܳܐ ܕܰܒܪܶܚܡܬܳܐ ܡܶܕܶܡ ܕܗܳܠܶܝܢ ܫܟܺܝܪ̈ܳܬܳܐ ܡܶܫܬܰܠܗܒܺܝܢ܆ ܘܒܳܬܰܪ ܐܺܝܩܳܪܳܐ ܒܰܠܚܽܘܕܰܘܗ̱ܝ ܘܒܳܬܰܪ ܬܽܘܪܣܳܝܳܐ ܗܰܘ ܕܡܶܢ ܗܳܪܟܳܐ ܘܠܰܘ ܒܳܬܪܶܗ ܕܰܥܒܳܕܳܐ ܪܳܕܦܺܝܢ܆ ܘܠܰܫܡܳܐ ܚܰܕܬ̣ܳܐ ܘܥܳܠܡܳܢܳܝܳܐ ܕܟܽܘܢܳܫܳܐ ܕܣܰܝܒܳܪܬܳܐ ܕܚܰܝ̈ܶܐ܆ ܠܳܐ ܝܳܕܰܥ ܐ̱ܢܳܐ ܡܶܢ ܐܰܝܟܳܐ ܡܰܦܩܺܝܢ ܡܰܝܬܶܝܢ ܠܰܢ܆ ܐܰܝܟ ܗܰܘ ܕܠܳܐ ܫܰܠܺܝܛ ܕܡܶܢ ܕܽܘܟܬܳܐ ܐ̱ܚܪܺܬܳܐ ܢܶܒܥܽܘܢ ܥܶܠ̈ܠܳܬܳܐ ܕܚܰܝ̈ܶܐ܆ ܟܰܕ ܒܩܰܝܢܳܝܽܘܬܳܐ ܐܰܘ ܒܢܰܓܳܪܽܘܬܳܐ ܡܚܰܩܠܺܝܢ ܐܰܘ ܒܽܐܘܡܳܢܽܘܬܳܐ ܡܶܕܶܡ ܐ̱ܚܪܺܬܳܐ܆ ܐܰܘ ܡܠܺܝܠܬܳܐ ܐܰܘ ܦܳܠܚܰܬ ܒܺܐܝ̈ܕܰܝܳܐ܆ ܐܶܠܳܐ ܡܶܢ ܐܰܢܰܢܩܺܐ ܐܺܝܬܶܝܗ̇܆ ܕܠܳܐ ܟܳܗܢܳܐܺܝܬ ܠܘܳܬ ܗܳܠܶܝܢ ܟܳܗ̈ܢܳܝܳܬܳܐ ܢܶܬܕܚܽܘܢ. ܘܟܰܕ ܛܳܒ ܟܺܝܬ ܦܳܠܚܳܐ ܕܰܚܕܳܐ ܥܰܝܢܶܗ ܐܰܘ ܚܓܺܝܪܳܐ܆ ܕܰܩܕܳܡ ܡܰܠܟܳܐ ܩܳܐܶܡ ܐܰܘ ܕܡܰܦܠܰܚ ܥܰܡܶܗ܆ ܠܳܐ ܡܬܽܘܡ ܚܳܙܶܝܢ ܚ̱ܢܰܢ. ܚܢܰܢ ܕܶܝܢ ܟܰܕ ܟܽܠܗܽܘܢ ܗܰܕܳܡ̈ܶܐ ܕܒܰܪܢܳܫܳܐ ܗܰܘ ܕܰܠܓܰܘ ܣܓܺܝ̈ܦܶܐ ܐܺܝܬ ܠܰܢ܆ ܕܰܢܩܽܘܡ ܘܕܰܢܫܰܡܶܫ ܩܕܳܡ ܡܰܠܟܳܐ ܗܰܘ ܫܡܰܝܳܢܳܐ ܘܰܐ‌ܠܳܗܳܐ ܡܰܡܪܚܺܝܢ ܚ̱ܢܰܢ. ܘܗܳܕܶܐ ܟܰܕ ܝܳܕܥܺܝܢ ܚ̱ܢܰܢ ܕܢܳܡܽܘܣܳܐ ܓܰܠܝܳܐܺܝܬ ܐܳܡܰܪ܆ ܕܒܰܪܢܳܫܳܐ ܚܓܺܝܪܳܐ ܐܰܘ ܥܘܺܝܪܳܐ܆ ܐܰܘ ܟܪܶܐ ܢܚܺܝܪܳܐ ܐܰܘ ܦܣܺܝܩ ܐܶܕܢܳܐ܆ ܐܰܘ ܒܰܪܢܳܫܳܐ ܗܰܘ ܕܢܶܗܘܶܐ ܐܺܝܬ ܠܶܗ ܒܶܗ ܬܒܳܪܳܐ ܕܺܐܝܕܳܐ ܐܰܘ ܬܒܳܪܳܐ ܕܪܶܓܠܳܐ܆ ܐܰܘ ܟܽܘܣܬܳܢܳܐ ܐܰܘ ܡܣܰܟܰܟ ܦܰܐܬܳܐ ܐܰܘ ܕܢܰܬ̣ܺܝܪܺܝܢ ܬܠܺܝ̈ܦܳܐ ܕܥܰܝܢܰܘ̈ܗ̱ܝ܆ ܐܰܘ ܒܰܪܢܳܫܳܐ ܗܰܘ ܕܢܶܗܘܶܐ ܐܺܝܬ ܒܶܗ 222ܚܶܟܬܳܐ ܕܒܰܪܳܐ܆ ܐܰܘ ܚܰܙܳܙܺܝܬܳܐ ܐܰܘ ܕܰܚܕܳܐ ܐܶܫܟܬܶܗ܆ ܟܽܠ ܒܰܪܢܳܫܳܐ ܗܰܘ ܕܢܶܗܘܶܐ ܐܺܝܬ ܒܶܗ ܡܽܘܡܳܐ ܡܶܢ ܙܰܪܥܶܗ ܕܰܐܗܪܽܘܢ ܟܳܗܢܳܐ܆ ܠܳܐ ܢܶܩܪܽܘܒ ܠܰܡܩܰܪܳܒܽܘ ܕܶܒ̈ܚܶܐ ܠܰܐܠܳܗܳܐ ܕܺܝܠܳܟ܆ ܡܶܛܽܠ ܕܡܽܘܡܳܐ ܒܶܗ^[26].

ܒܟܳܗܢܽܘܬܳܐ ܡܰܢ ܗܳܟܺܝܠ ܗܳܝ ܕܠܶܘܳܝ̈ܶܐ܆ ܗܳܠܶܝܢ ܚܰܫ̈ܶܐ ܦܰܓܪܳܢܳܐܺܝܬ ܡܶܬܒܰܩܪܺܝܢ ܗ̱ܘܰܘ. ܒܬܶܫܡܶܫܬܳܐ ܕܶܝܢ ܗܳܕܶܐ ܐܶܘܰܢܓܶܠܳܝܬܳܐ ܘܪܽܘܚܳܢܳܝܬܳܐ܆ ܒܢܰܦܫܳܐ ܡܶܬܥܰܩܒܺܝܢ ܡܶܬܗܰܘܢܳܢܳܐܺܝܬ. ܙܳܕܶܩ ܓܶܝܪ ܕܢܶܗܘܶܐ ܐܺܝܬܰܘܗ̱ܝ ܗܰܘ ܕܰܡܛܳܬ ܠܶܗ ܠܰܡܟܰܗܳܢܽܘ܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ. ܡܫܰܡܠܝܳܐ ܘܰܓܡܺܝܪܳܐ ܐܰܝܟ ܒܰܪܢܳܫܳܐ ܕܰܐ‌ܠܳܗܳܐ܆ ܕܰܒܟܽܠ ܥܒܳܕܳܐ ܛܳܒܳܐ ܡܫܰܡܠܰܝ^[27].

ܘܰܕܥܰܝ̈ܢܶܐ ܡܰܢ ܕܬܰܪܥܺܝܬܳܐ ܢܶܗܘܶܐ ܐܺܝܬ ܠܶܗ ܕܠܳܐ ܚܰܫܳܐ܆ ܘܰܕܠܳܐ ܣܳܟ ܡܶܬܚܰܦ̈ܝܳܢ ܡܶܢ ܥܰܪܦܶܠܳܐ ܥܳܠܡܳܢܳܝܬܳܐ܆ ܐܶܠܳܐ ܕܰܟܝܳܐܺܝܬ ܡܰܩ̈ܬ̣ܳܢ ܚܰܘܪܳܐ ܕܺܝܠܗܶܝܢ ܒܫܽܘܦܪ̈ܶܐ ܘܣܽܘܟܴ̈ܠܶܐ ܫܡܰܝܳܢ̈ܶܐ.

ܪ̈ܶܓܠܶܐ ܕܶܝܢ ܘܗܰܠ̈ܟܳܬܳܐ ܕܰܠܘܳܬ ܣܳܥܽܘܪ̈ܘܳܬܳܐ ܛܳܒ̈ܳܬܳܐ܆ ܬܪ̈ܺܝܨܳܬܳܐ ܘܰܚܠܺܝ̈ܡܳܬܳܐ ܘܰܕܠܳܐ ܡܶܙܕܰܥ̈ܙܥܳܢ ܐܰܘ ܡܚܰܓܪ̈ܳܢ. ܐܶܠܳܐ ܕܡܶܫܟ̈ܚܳܢ ܕܰܢܩܽܘܡ̈ܳܢ ܥܰܠ ܫܽܘܥܳܐ ܕܗܰܝܡܳܢܽܘܬܳܐ ܩܒܺܝܥܳܐܺܝܬ ܘܠܳܐ ܡܶܨܛܰܠܝܳܢܳܐܺܝܬ܆ ܘܰܕܢܶܪ̈ܗܛܳܢ ܠܽܐܘܪ̈ܚܳܬܳܐ ܗܳܠܶܝܢ ܕܦܽܘܩ̈ܕܳܢܶܐ. ܘܕܰܒܝܰܕ ܟܽܠܗܽܘܢ ܦܽܘܩ̈ܕܳܢܶܐ ܢܗܰܠ̈ܟܳܢ܆ ܘܠܳܐ ܕܗܰܘ ܡܰܢ ܢܡܰܠ̈ܝܳܢ܆ ܒܗܰܘ ܕܶܝܢ ܐ̱ܚܪܺܢܳܐ ܢܚܰܓܪ̈ܳܢ. ܐܶܠܳܐ ܐܳܦ ܠܡܰܒܐܫܳܢ̈ܘܳܬܳܐ ܗܳܠܶܝܢ ܕܦܳܣ̈ܩܳܢ ܘܬܳܟܣ̈ܳܢ ܠܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ ܘܰܕܗܰܝܡܳܢܽܘܬܳܐ ܬܪܺܝܨܬܳܐ ܢܣܰܝܒܪ̈ܳܢ܆ ܘܟܰܕ ܒܣܰܒܪܳܐ ܗܰܘ ܕܰܥܬܺܝܕ ܡܶܬܚܰܝ̈ܠܳܢ܆ ܕܠܳܐ ܥܽܘܟܳܪܳܐ ܢܶܪ̈ܗܛܳܢ܆ ܘܰܐܝܟ ܦܰܘܠܽܘܤ ܢܺܐܡܪ̈ܳܢ܆ ܗܳܟܰܢܳܐ ܪܳܗܶܛ ܐ̱ܢܳܐ܆ ܐܰܝܟ ܐܰܝܢܳܐ ܕܠܰܘ ܠܳܐ ܝܺܕܺܝܥܳܐܺܝܬ^[28]. ܘܡܶܢ ܒܳܬܰܪ ܫܽܘܠܳܡܳܐ ܕܥܰܡ̈ܠܶܐ܆ ܪܶܗܛܳܐ ܫܰܠܡܶܬ ܗܰܝܡܳܢܽܘܬܳܐ ܢܶܛܪܶܬ^[29].

ܙܳܕܶܩ ܕܶܝܢ ܕܳܐܦܠܳܐ ܟܽܘܣܬܳܢܳܐ ܢܶܗܘܶܐ ܐܺܝܬܰܘܗ̱ܝ. ܐܶܠܳܐ ܫܰܦܺܝܪ ܩܰܘܡܬܳܐ ܘܕܰܠܓܰܒܪܳܐ ܡܫܰܡܠܝܳܐ ܡܰܛܺܝ܆ ܘܠܰܡܫܽܘܚܬܳܐ ܕܩܰܘܡܬܳܐ ܡܶܬܗܰܘܢܳܢܺܝܬܳܐ ܕܡܽܘܠܳܝܶܗ ܕܰܡܫܺܝܚܳܐ^[30]܆ ܘܕܳܐܦܠܳܐ ܚܕܳܐ ܣܳܥܽܘܪܽܘܬܳܐ ܠܳܐ ܒܚܺܝܪܬܳܐ ܢܶܥܒܕ܆ ܐܰܘ ܠܘܳܬ ܗܳܠܶܝܢ ܕܠܳܐ ܙܳܕܶܩ ܢܶܪܕܶܐ. ܗܳܕܶܐ ܓܶܝܪ ܙܳܕܶܩ ܕܢܶܣܬܰܟܰܠ܆ ܠܰܬܒܳܪܳܐ ܕܺܐܝܕܳܐ܆ ܘܠܰܬܒܳܪܳܐ ܕܪܶܓܠܳܐ.

ܕܢܶܗܘܶܐ ܕܶܝܢ ܐܺܝܬܰܘܗ̱ܝ ܐܳܦ ܒܫܶܡܥܳܐ ܐܳܦ ܒܣܰܘܩܳܐ ܕܒܰܪܢܳܫܳܐ ܗܰܘ ܕܰܠܓܰܘ ܠܰܘ ܠܳܐ ܡܫܰܡܠܝܳܐ܆ ܕܰܦܫܺܝܩܳܐܺܝܬ ܕܶܝܢ ܡܩܰܒܶܠ ܘܡܰܪܓܶܫ ܒܒܰܣܺܝܡܽܘܬ ܪܺܝܚܳܐ ܪܽܘܚܳܢܳܝܬܳܐ ܘܰܒܓܶܠܝܳܢܳܐ ܐܰ‌ܠܳܗܳܝܳܐ. ܐܰܝܟܰܢܳܐ ܕܰܐܝܟ ܐܺܝܣܚܳܩ ܡܰܢ ܢܺܐܡܰܪ܆ ܗܳܐ ܪܺܝܚܳܐ ܕܰܒܪܳܐ ܕܺܝܠܝ܆ ܐܰܝܟ ܪܺܝܚܳܐ ܕܚܰܩܠܳܐ ܡܠܺܝܬܳܐ^[31]܆ ܗܳܝ ܕܒܰܪܟܳܗ̇ ܡܳܪܝܳܐ^[32]. ܐܰܝܟ ܫܡܽܘܐܝܠ ܕܶܝܢ ܟܰܕ ܡܶܢ ܠܥܶܠ ܡܶܬܩܪܶܐ܆ ܡܛܰܝܒܳܐܺܝܬ ܢܶܥܢܶܐ ܠܗܰܘ ܕܩܳܪܶܐ܆ ܡܰܠܶܠ ܡܳܪܝܳܐ ܡܶܛܽܠ ܕܫܳܡܰܥ ܥܰܒܕܳܐ ܕܺܝܠܳܟ^[33].

ܕܢܺܐܨܰܦ ܟܺܝܬ ܛܳܒ̈ܳܬܳܐ ܠܡܶܥܒܰܕ܆ ܠܰܘ ܒܰܠܚܽܘܕ ܩܕܳܡ ܐܰ‌ܠܳܗܳܐ ܐܶܠܳܐ ܐܳܦ ܩܕܳܡ ܒܢܰܝ̈ܢܳܫܳܐ^[34]܆ ܐܰܝܟܰܢܳܐ ܕܳܐܦ ܚܙܳܬܳܐ ܗܳܝ ܕܡܶܢ ܠܒܰܪ ܡܶܬܩܰܠܣܳܢܺܝܬܳܐ ܢܶܗܘܶܐ ܐܺܝܬܶܝܗ̇ ܠܶܗ܆ ܗܳܝ ܕܰܒܬܰܟܣܺܝܬܳܐ ܘܰܒܗܶܠܰܟܬܳܐ222܆ ܘܠܰܘ ܡܶܬܓܰܚܟܳܢܳܐ ܢܶܗܘܶܐ ܐܺܝܬܰܘܗ̱ܝ ܒܰܚܙܳܬܳܐ܆ ܐܰܝܟ ܐܰܝܠܶܝܢ ܕܺܐܝܬܰܝܗܽܘܢ ܗܳܢܽܘܢ ܕܰܒܦܰܪܨܽܘܦܳܐ ܒܰܕܡܽܘܬ ܣܶܟ̈ܶܐ^[35] ܡܰܝܬܶܝܢ ܢܶܦܩ̈ܶܐ ܡܶܕܶܡ܆ ܐܰܘ ܐܺܝܬܰܝܗܽܘܢ ܡܣܰܪ̈ܡܣܰܝ ܥܰܝ̈ܢܶܐ܆ ܐܳܦܠܳܐ ܬܽܘܒ ܐܰܝܟ ܕܰܒܚܰܙܳܙܺܝܬܳܐ 222ܘܰܒܚܶܟܬܳܐ ܕܒܰܪܳܐ ܢܶܗܘܶܐ ܚܳܐܶܟ ܠܘܳܬ ܗܳܢܽܘܢ ܕܝܰܬܺܝܪ ܦܫܺܝܛܺܝܢ܆ ܒܝܽܘܠ̈ܦܳܢܶܐ ܗܶܪ̈ܛܝܩܳܝܶܐ. ܠܗܳܠܶܝܢ ܓܶܝܪ ܩܪܳܐ ܐܶܢܶܝܢ ܦܰܘܠܽܘܤ܆ ܟܰܘ̈ܫܶܐ ܡܰܠ̈ܙܴܢܶܐ ܕܐ̱ܢܳܫܳܐ ܡܚܰܒ̈ܠܶܐ ܒܗܰܘܢܳܐ ܘܕܰܓܠܺܝܙܺܝܢ ܡܶܢ ܫܪܳܪܳܐ^[36].

ܐܳܦܠܳܐ ܠܳܐ ܡܰܘܠܕܳܢܺܝܬܳܐ ܢܶܗܘܶܐ ܡܰܦܶܩ ܠܳܗ̇ ܠܡܶܠܬܳܐ ܕܡܰܠܦܳܢܽܘܬܳܐ܆ ܒܰܕܡܽܘܬ ܗܳܢܽܘܢ ܕܰܒܗܰܕܳܡ̈ܶܐ ܗܳܠܶܝܢ ܡܰܥ̈ܒܕܰܝ ܝܰܠܕܳܐ ܒܚܰܫܳܐ ܡܶܕܶܡ ܒܰܠܺܝܥܺܝܢ܆ ܘܰܠܘܳܬ ܡܰܦܪܝܳܢܽܘܬ ܒܢܰܝ̈ܳܐ 222ܡܚܝܠܺܝܢ. ܐܶܠܳܐ ܕܰܠܣܽܘܓܳܐܐ ܡܪܰܒܝܳܐ ܠܶܗ ܠܡܶܢܝܳܢܳܐ ܕܥܶܪ̈ܒܶܐ܆ ܐܰܝܟܰܢܳܐ ܕܰܫܠܺܝܚܳܐܺܝܬ ܢܚܰܘܶܐ ܪܰܒܽܘܬ ܢܰܦܫܳܐ ܘܢܺܐܡܰܪ܆ ܐܰܝܟܰܢܳܐ ܕܟܰܕ ܬܶܣܓܶܐ ܛܰܝܒܽܘܬܳܐ ܒܝܰܕ ܣܰܓܺܝ̈ܶܐܐ܆ ܬܶܣܓܶܐ ܬܰܘܬ̣ܰܪ ܬܰܘܕܺܝܬܳܐ ܠܬܶܫܒܽܘܚܬܳܐ ܕܰܐ‌ܠܳܗܳܐ^[37].

ܐܶܬܒܰܩܰܘ^[38] ܕܶܝܢ ܐܰܝܟܰܢܳܐ ܠܰܘ ܒܰܠܚܽܘܕ ܠܗܳܢܽܘܢ ܕܪܰܘܪܒܺܝܢ ܡܶܢ ܚܰܫ̈ܶܐ ܡܥܰܩܒܳܐ ܡܶܠܬܳܐ܆ ܐܶܠܳܐ ܐܳܦ ܠܗܳܠܶܝܢ ܕܩܰܠܺܝܠܺܝܢ܆ 222ܠܚܶܟܬܳܐ ܕܒܰܪܳܐ܆ ܘܰܠܗܳܢܽܘܢ ܕܕܳܡܶܝܢ ܠܗܳܕܶܐ. ܘܠܳܐ ܐ̱ܢܳܫ ܢܶܣܒܰܪ ܕܰܡܚܰܪܪܳܐ ܐܺܝܬܰܘܗ̱ܝ ܡܶܢ ܗܳܠܶܝܢ܆ ܡܶܛܽܠ ܗܳܝ ܕܠܳܐ ܡܶܬܚܰܙ̈ܝܳܢ ܠܥܰܝ̈ܢܶܐ ܦܰܓܪ̈ܳܢܳܝܳܬܳܐ. ܐܶܢ ܓܶܝܪ ܒܡܰܚܙܺܝܬܳܐ ܗܳܝ ܕܬܺܐܪܬܳܐ ܢܶܬܒܰܩܶܐ܆ ܢܶܫܟܰܚ ܚܢܰܢ ܒܰܢ ܐܰܘ ܠܟܽܠܗܶܝܢ ܐܰܘ ܣܽܘܓܐܗܶܝܢ ܕܗܳܠܶܝܢ. ܡܰܢܽܘ ܗܳܟܺܝܠ ܠܳܐ ܢܕܰܡܰܥ ܥܰܠ ܗܳܠܶܝܢ ܘܢܶܬܬܰܢܰܚ܆ ܘܰܠܘܳܬ ܚܽܘܪܒܳܐ ܢܶܒܥܶܐ ܠܡܶܪܗܰܛ܆ ܘܬܰܡܳܢ ܢܶܒܥܶܐ ܐܽܘܠ̈ܝܳܬܳܐ ܕܡܶܫܟ̈ܚܳܢ ܠܡܰܓܡܳܪܽܘ ܠܡܽܘܡܳܐ ܗܰܘ ܕܚܰܫ̈ܶܐ ܫܟܺܝܪ̈ܶܐ.

ܒܗܳܠܶܝܢ ܡ̈ܶܠܶܐ ܘܣܽܘܟܴ̈ܠܶܐ ܐܶܢܳܐ ܨܳܒܶܐ ܗܘܺܝܬ܆ ܕܠܰܘ ܝܰܘܡܳܢܳܐ ܒܰܠܚܽܘܕ ܐܶܠܳܐ ܐܳܦ ܒܟܽܠ ܚܰܕ ܝܰܘܡܳܐ ܐܶ݀ܚܰܠܶܠ ܘܶܐܕܰܟܶܐ܆ ܘܶܐ݀ܚܰܕܶܬ ܠܰܡܫܺܝܚܽܘܬܳܐ ܕܺܝܠܝ ܘܰܠܟܳܗܢܽܘܬܳܐ܆ ܘܕܳܐܦܠܳܐ ܡܬܽܘܡ ܥܽܘܗܕܳܢܗܶܝܢ ܕܗܳܠܶܝܢ ܢܶܣܐܰܒ ܒܺܝ ܘܢܶܬܚܰܒܰܠ. ܐܳܦ ܓܶܝܪ ܘܰܟܬܳܒܳܐ ܟܳܗܢܳܝܳܐ܆ ܝܳܕܰܥ ܗܘ 222ܚ̈ܽܘܕܳܬܶܐ ܕܰܡܫܺܝܚܽܘܬܳܐ. ܘܡܰܘܕܰܥ ܫܡܽܘܐܝܠ ܕܰܚܕܳܐ ܙܒܰܢ ܡܰܫܚܶܗ ܗ̱ܘܳܐ ܠܫܳܐܘܳܠ ܠܡܰܠܟܳܐ܆ ܘܬܽܘܒ ܐܳܡܰܪ ܗ̱ܘܳܐ ܢܺܐܙܰܠ ܠܓܰܠܓܳܠܳܐ܆ ܘܰܢܚܰܕܶܬ ܬܰܡܳܢ ܡܰܠܟܽܘܬܳܐ. ܘܶܐܙܰܠ ܟܽܠܶܗ ܥܰܡܳܐ ܠܓܰܠܓܳܠܳܐ܆ ܘܰܡܫܰܚ ܬܰܡܳܢ ܫܡܽܘܐܝܠ ܠܫܳܐܘܳܠ ܠܡܰܠܟܳܐ ܩܕܳܡ ܡܳܪܝܳܐ^[39]. ܗܳܕܶܐ ܕܶܝܢ ܥܒܰܕ܆ ܐܰܟܚܕܳܐ ܡܰܢ܆ ܐܳܦ ܟܰܕ ܕܰܢܚܰܘܶܝܘܗ̱ܝ ܠܥܰܡܳܐ ܨܳܒܶܐ ܗ̱ܘܳܐ. ܐܰܟܚܕܳܐ ܕܶܝܢ܆ ܘܟܰܕ ܐܰܝܟ ܗܰܘ ܕܝܰܬܺܝܪ ܢܰܗܺܝܪܳܐܺܝܬ ܐܰܝܟ ܕܰܒܡܰܗܡܝܳܢܳܐ ܝܰܨܺܝܦ ܗ̱ܘܳܐ ܘܰܚܦܺܝܛ ܕܢܶܪܫܽܘܡ ܘܰܢܨܽܘܪܝܘܗ̱ܝ^[40] ܒܶܗ ܠܺܐܝܩܳܪܳܐ܆ ܐܰܝܟܰܢܳܐ ܕܠܳܐ ܢܶܛܥܶܐ. ܒܝܰܕ ܐܶܫܰܥܝܳܐ ܕܶܝܢ ܗܰܘ ܢܒܺܝܳܐ ܦܳܩܶܕ ܐܰ‌ܠܳܗܳܐ ܠܟܽܠܗܶܝܢ ܥܻ̈ܕܳܬܳܐ ܒܟܳܪܽܘܙܽܘܬܳܐ ܓܠܺܝܬܳܐ ܗܳܝ ܕܢܶܬܚ̈ܰܕܬܳܢ܆ ܟܰܕ ܠܘܳܬ ܓܳܙܪ̈ܳܬܳܐ ܡܰܙܥܶܩ^[41]. ܟܰܕ ܓܳܙܪ̈ܳܬܳܐ ܡܰܢ ܡܟܰܢܶܐ ܠܗܶܝܢ܆ ܡܶܛܽܠ ܗܳܝ ܕܡܶܢ ܕܶܚܠܰܬ ܫ̈ܺܐܕܶܐ ܗܳܝ ܡܰܠܺܝܚܬܳܐ ܘܡܰܪܺܝܪܬܳܐ܆ ܐܰܟܙܢܳܐ ܕܡܶܢ ܝܰܡܳܐ ܒܰܝܢܳܬ ܥܰܡܡ̈ܶܐ ܢܳܕܝ̈ܳܢ ܠܥܶܠ ܘܡܰܢܗܪ̈ܳܢ܆ ܘܰܠܡܳܐܢ̈ܶܐ ܫܠܰܝ̈ܳܐ ܘܢܺܝ̈ܚܶܐ ܕܕܶܚܠܰܬ ܐܰ‌ܠܳܗܳܐ ܡܰܘܫ̈ܛܳܢ ܠܗܳܢܽܘܢ ܕܥܰܠ ܠܳܐ ܗܰܝܡܳܢܽܘܬܳܐ ܕܛܳܥܝܽܘܬܳܐ ܣܳܚܶܝܢ^[42]. ܓܳܙܪ̈ܳܬܳܐ ܕܶܝܢ ܟܺܐܢܳܐܺܝܬ ܢܶܣ̈ܬܰܟܠܳܢ܆ ܐܳܦ ܡܶܛܽܠ ܗܳܝ ܕܡܶܢ ܟܽܠ ܕܽܘܟ ܡܶܬܢܰܩ̈ܫܳܢ ܘܡܶܬܛܰܪ̈ܝܳܢ ܒܚܽܘܕܪܳܐ܆ ܒܰܬܠܺܝܬܳܝ̈ܘܳܬ ܓܰܠ̈ܠܶܐ ܘܡܰܚ̈ܫܽܘܠܶܐ ܕܢܶܣ̈ܝܽܘܢܶܐ܆ ܘܒܰܡܣܰܝܒܪܳܢܽܘܬܳܐ ܘܰܒܚܺܐܦܳܐ ܘܦܶܓܥܳܐ ܘܣܰܒܪܳܐ ܕܫܽܘܥܳܐ ܠܪܽܘܥܬܳܐ ܦܰܠ̈ܗܶܕܝ̱ ܘܰܫܪ̈ܰܝ ܐܶܢܽܘܢ܆ ܗܰܘ ܟܺܝܬ ܕܺܐܝܬܰܘܗ̱ܝ ܡܫܺܝܚܳܐ܆ ܗܰܘ ܕܪܳܥܳܐ ܕܰܐܒܳܐ ܡܪܰܝܡܳܐ. ܐܳܦ ܠܗܳܕܶܐ ܬܽܘܒ ܗܽܘ ܗܰܘ ܕܒܶܐܫܰܥܝܳܐ ܡܡܰܠܶܠ ܡܚܰܘܶܐ ܠܳܗ̇܆ ܟܰܕ ܗܳܟܰܢܳܐ ܐܳܡܰܪ. ܠܺܝ ܓܳܙܪ̈ܳܬܳܐ ܢܣܰܟ̈ܝܳܢ܆ ܘܒܰܕܪܳܥܳܐ ܕܺܝܠܝ ܢܣܰܒܪ̈ܳܢ^[43].

ܙܳܕܶܩ ܠܰܢ ܗܳܟܺܝܠ ܕܰܒܟܽܠ ܫܳܥܬܳܐ ܐܰܝܟ ܕܰܠܡܺܐܡܰܪ ܢܶܬܚܰܕܰܬ܆ ܘܢܶܛܥܶܐ ܠܗܳܠܶܝܢ ܕܒܶܣܬܪܰܢ܆ ܢܶܫܬܰܘܫܰܛ ܕܶܝܢ ܠܘܳܬ ܗܳܠܶܝܢ ܕܰܠܩܰܕܡ̈ܶܐ^[44]. ܗܳܕܶܐ ܓܶܝܪ ܐܳܦ ܦܰܘܠܽܘܤ ܡܰܠܶܦ ܟܰܕ ܐܳܡܰܪ: ܐܶܢ ܐ̱ܢܳܫ ܒܰܡܫܺܝܚܳܐ ܐܺܝܬܰܘܗ̱ܝ܆ ܗܳܢܳܐ ܒܪܺܝܬܰܐ ܗ̱ܘ ܚܕܰܬܳܐ. ܗܳܢܰܘ ܕܶܝܢ ܕܗܰܘ ܕܕܰܡܫܺܝܚܳܐ ܐܳܡܰܪ ܗܽܘ ܠܶܗ܆ ܒܝܰܕ ܥ̈ܒܳܕܶܐ ܚ̈ܰܕܬܶܐ ܢܚܰܘܶܝܗ̇ ܠܗܳܕܶܐ܆ ܟܰܕ ܡܚܰܘܶܐ ܗܽܘ ܠܶܗ ܐܰܝܟ ܕܚܰܕܬ̣ܳܐܺܝܬ ܐܶܬܒܪܺܝ ܘܒܰܪܢܳܫܳܐ ܚܰܕܬܳܐ. ܠܗܳܝ ܟܺܝܬ ܕܳܐܦ ܒܗܳܠܶܝܢ ܕܒܳܬܰܪܟܶܢ ܐܰܘܕܥܳܗ̇ ܟܰܕ ܐܶܡܰܪ: ܗܳܠܶܝܢ ܥܰܬܺܝ̈ܩܳܬܳܐ ܥܒܰܪ̈ܝ̱ ܠܗܶܝܢ. ܗܳܐ ܗܘ̈ܰܝ ܟܽܠܗܶܝܢ ܚ̈ܰܕܬ̣ܳܬ̣ܳܐ^[45].

ܟܰܕ ܠܗܳܕܶܐ ܚܰܕܬܽܘܬܳܐ ܐܳܦ ܪܽܘܡܰܢܽܘܤ ܗܰܘ ܕܰܒܣܳܗ̈ܕܶܐ ܝܰܬܺܝܪ ܡܶܢ ܟܽܠܢܳܫ ܡܚܰܡܣܢܳܢܳܐ ܘܚܰܟܺܝܡܳܐ ܡܪܰܒܶܐ ܗ̱ܘܳܐ ܒܟܽܠܙܒܰܢ܆ ܡܝܰܬܪ̈ܳܬܳܐ ܡܰܢ ܐܰܝܠܶܝܢ ܕܶܐܬܩ̈ܢܺܝܶܢ ܠܶܗ ܒܝܰܕ ܥܰܡ̈ܠܶܐ ܣܰܓܺܝ̈ܶܐܐ܆ ܠܳܐ ܣܦ̈ܰܩܶܝܢ ܠܶܗ. ܠܘܳܬ ܣܳܗܕܽܘܬܳܐ ܕܶܝܢ ܡܶܣܬܰܪܗܰܒ ܗ̱ܘܳܐ܆ ܐܰܝܟ ܐܰܝܢܳܐ ܕܳܐܦܠܳܐ ܡܶܕܶܡ ܐܺܝܬ ܗ̱ܘܳܐ ܠܶܗ ܙܘ̈ܳܕܶܐ ܠܘܳܬ ܦܽܘܪܩܳܢܳܐ. ܘܟܰܕ ܒܝܰܕ ܨܠܽܘܬܳܐ ܠܓܰܘܙܰܠܬܳܐ ܗܳܝ ܕܰܡܛܰܝܒܳܐ ܗ̱ܘܳܬ ܠܶܗ ܕܰܥܶܟ ܒܡܶܛܪ̈ܶܐ܆ ܠܣܰܝܦܳܐ ܐܰܘܫܛܶܗ ܠܠܶܫܳܢܶܗ. ܟܰܕ ܡܶܬܚܪܶܐ ܗ̱ܘܳܐ ܕܣܳܗ̈ܕܘܳܬܳܐ ܣܰܓܺܝ̈ܳܐܬܳܐ ܢܚܰܘܶܝܘܗ̱ܝ ܠܚܰܕ ܐܰܓܽܘܢܳܐ܆ ܘܕܰܠܟܽܠ ܚܰܕ ܡܶܢ ܗܰܕܳܡܰܘ̈ܗ̱ܝ ܢܶܬܶܠ ܠܰܦܣܳܩܳܐ. ܘܟܰܕ ܐܳܦܠܳܐ ܒܗܳܕܶܐ ܒܳܛܶܠ ܗ̱ܘܳܐ ܘܫܳܠܶܐ ܡܶܢ ܡܰܣܰܩܬܳܐ܆ ܐܶܠܳܐ ܟܰܕ ܠܰܩܕܳܡܰܘܗ̱ܝ ܪܳܕܶܐ ܗ̱ܘܳܐ܆ ܘܟܰܕ ܠܰܕܝܰܬܺܝܪ ܪܰܘܪ̈ܒܳܢ ܪܳܐܶܓ ܗ̱ܘܳܐ. ܠܗܳܠܶܝܢ ܕܳܐܦ ܟܰܕ ܐܶܫܬܘܺܝ ܫܰܦܺܝܪ ܝܳܕܰܥ ܐ̱ܢܳܐ܆ ܕܰܠܒ̈ܳܥܘܳܬܳܐ ܕܰܚܠܳܦܰܝܢ ܡܰܣܶܩ܆ ܐܰܝܟܰܢܳܐ ܕܠܳܐ ܢܶܦܶܕ ܡܶܢ ܡܰܠܟܽܘܬܳܐ ܕܰܫܡܰܝܳܐ. ܒܰܡܫܺܝܚܳܐ ܝܶܫܽܘܥ ܡܳܪܰܢ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܷܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܰܬܡܳܢܺܝܢ܀

ܦܪܟܣܝܣ. 11: 26 [1]

[2] ܕܚܰܝ̈ܶܐ

ܡܬܝ. 14: 4 [3]

ܝܥܩܘܒ. 1: 17 [4]

ܩܘܠܣ̈ܝܐ. 2: 10  ܐܦ ܐܦܣ̈ܝܐ. 1: 21 [5]

ܩܘܠܣ̈ܝܐ. 1: 16 [6]

ܡܙܡܘܪ̈ܐ. 44: 5[7]

ܬܶܢܝܢ ܢܡܘܣܐ. 33: 17 [8]

ܝܘܚܢܢ. 19: 23 [9]

ܡܙܡܘܪ̈ܐ. 107: 16  ܐܦ ܐܫܥܝܐ. 45: 2 [10]

ܐܫܥܝܐ. 49: 9 [11]

ܝܘܚܢܢ. 14: 18 [12]

ܡܬܝ. 28: 20 [13]

ܡܬܝ. 6: 24  ܐܦ ܠܘܩܐ. 16: 13[14]

ܐܰܝܟ ܕܡܶܢ ܫܡܳܐ ܕܝܳܬܳܐ ܐܰܘ ܟܺܝܬ ܕܽܐܘܣܺܝܰܐ.[15]

ܡܙܡܘܪ̈ܐ. 75: 9 ـ 10[16]

ܐܫܥܝܐ. 9: 5 [17]

ܒܶܝܬ ܡܰܫܬܝܳܐ. ܒܒܶܝܬ ܡܰܫܬܝܳܐ.[18]

ܡܬܝ. 22: 12 [19]

 ܐܦ ܣܶܦܪܳܐ ܕܚܶܟܡܬܐ. 6: 7 ܢܶܬܒܰܚܢܽܘܢ.[20]

ܚܙܩܝܐܝܠ. 23: 22 ـ 27 [21]

 ܫܰܡܠܺܝ[22]

ܪ̈ܗܘܡܝܐ. 11: 29 [23]

ܣܶܦܪܐ ܕܒܪܝܬܐ. 6: 7 [24]

ܦܪܟܣܝܣ. 13: 22[25]

ܟܗ̈ܢܐ. 21: 18 ـ 23 [26]

ܒ. ܛܝܡܬܐܘܣ. 3: 17 [27]

ܐ. ܩܘܪ̈ܝܢܬܝܐ. 9: 26 [28]

ܒ. ܛܝܡܬܐܘܣ. 4: 7 [29]

ܐܦܣ̈ܝܐ. 4: 13 [30]

ܡܠܺܝܠܬܳܐ[31]

ܣܶܦܪܐ ܕܒܪܝܬܐ. 27: 27 [32]

ܐ. ܡܠ̈ܟܐ. 3: 10 [33]

ܪ̈ܗܘܡܝܐ. 12: 17  ܐܦ ܒ. ܩܘܪ̈ܝܢܬܝܐ. 8: 21[34]

[35] ܣܺܝܡܬܐ ܕܬܐܘܡܰܐ ܐܘܕܘ ܦܐܬ 145 ܐܳܡܰܪ. ܢܶܕ̥ܝ̈ܶܐ ܡܶܕܶܡ ܕܗܳܘܶܝܢ ܒܰܐܦ̈ܶܐ ܐܝܟ ܢܶܦܩ̈ܶܐ.

ܒ. ܛܝܡܬܐܘܣ. 6: 5 [36]

ܒ. ܩܘܪ̈ܝܢܬܝܐ. 4: 15 [37]

ܐܶܬܒܰܩܳܐ[38]

ܐ. ܡܠ̈ܟܐ. 11: 14 ـ 15 [39]

ܢܨܘܪܘܗܝ[40]

ܐܫܥܝܐ. 41: 1 [41]

 ܛܳܝܦܺܝܢ[42]

ܐܫܥܝܐ. 51: 5 [43]

ܦܝܠܝܦܣ̈ܝܐ. 3: 13[44]

ܒ. ܩܘܪ̈ܝܢܬܝܐ. 5: 17[45]