ܕܐܦܝܬܪ̈ܢܝܘ ܕܥܰܠ ܛܠܳܝ̈ܶܐ ܗܳܢܽܘܢ ܕܡܶܢ ܗܶܪܽܘܕܺܝܤ ܐܶܬܩܰܛܰܠܘ܆ ܒܒܶܝܬ ܠܚܶܡ… ܩܰܕܺܝܫܳܐ ܡܳܪܝ ܣܶܐܘܺܪܶܐ ܦܐܛܪܝ[1].
1: ܡܶܬܕܰܡܪܺܝܢ ܐܢ̱ܬܽܘܢ ܡܶܢ ܟܽܠ ܦܪܽܘܤ ܒܦܽܘܩܕܳܢܳܐ ܕܫܳܢܝܽܘܬܳܐ ܕܗܶܪܽܘܕܺܝܤ ܕܠܽܘܩܒܰܠ ܫܰܒܪ̈ܶܐ ܗܳܢܽܘܢ ܕܠܳܐ ܥܶܕܠܳܝ܆ ܡܶܛܽܠ ܟܺܝܬ ܕܳܐܦ ܥܕܰܟܺܝܠ ܬܚܶܝܬ ܬܕܳܐ ܐܺܝܬܰܝܗܽܘܢ ܗ̱ܘܰܘ܆ ܕܰܦܣܳܩܳܐ ܚܰܪܡܳܐ ܕܡܰܘܬܳܐ ܡܰܝܬܶܐ ܗ̱ܘܳܐ. ܐܶܠܳܐ ܠܳܐ ܬܶܬܕܰܡܪܽܘܢ. ܕܫܳܢܝܽܘܬܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ. ܡܶܢ ܗܳܪܟܳܐ ܟܬܳܒܳܐ ܐܰܠܳܗܳܝܳܐ ܘܟܳܗܢܳܝܳܐ ܕܶܐܘܰܢܓܶܠܺܝ̈ܰܐ ܟܰܕ ܠܠܳܐ ܡܠܺܝܠܽܘܬܳܐ ܕܗܰܘ ܕܰܦܩܰܕ ܡܚܰܘܶܐ ܐܶܡܰܪ܆ ܐܶܬܚܰܡܰܬ݂. ܘܰܐܘܣܶܦ ܣܰܓܺܝ[2]. ܚܶܡܬܳܐ ܐܺܝܬܶܝܗ̇ ܗ̱ܘܳܬ ܐܳܡܰܪ܆ ܗܳܝ ܕܰܐܦܩܰܬ݂ ܠܰܓܙܳܪ ܕܺܝܢܳܐ܆ ܘܚܶܡܬܳܐ ܕܶܐܚܕܰܬ݂ ܠܡܰܚܫܰܒܬܳܐ. ܡܳܢܳܐ ܗܳܟܺܝܠ ܬܺܐܠܰܕ ܗ̱ܘܳܬ ܚܶܡܬܳܐ܆ ܐܶܠܳܐ ܐܶܢ ܫܳܢܝܽܘܬܳܐ ܘܰܐܫܺܝܕܽܘܬ݂ ܕܡܳܐ܆ ܘܡܰܪܳܚܽܘܬܳܐ ܕܚܰܝ̈ܘܳܬ ܫܶܢܳܐ.
2: ܟܰܕ ܗܳܠܶܝܢ ܕܶܝܢ ܫܳܡܰܥ. ܟܒܰܪ ܢܺܐܡܰܪ ܐ̱ܢܳܫ܆ ܕܛܳܒܳܐܺܝܬ ܡܰܢ ܟܰܕ ܠܡܶܠܬܳܐ ܘܰܠܥܶܠܬܳܐ ܕܩܳܛܽܘܠܽܘܬ݂ ܛܠܳܝ̈ܶܐ ܕܗܶܪܽܘܕܺܝܤ ܐܶܬܬܰܒܥܰܬ݂܆ ܠܠܳܐ ܡܠܺܝܠܽܘܬܳܐ ܕܡܶܢ ܪܽܘܓܙܳܐ ܝܶܗܒܰܬ. ܒܳܥܶܐ ܐ̱ܢܳܐ ܕܶܝܢ܆ ܕܡܶܛܽܠ ܡܳܢܳܐ ܫܒܰܩ ܡܫܺܝܚܳܐ܆ ܕܰܛܠܳܝ̈ܶܐ ܕܠܳܐ ܥܶܕܠܳܝ ܟܢܺܝܫܳܐܺܝܬ ܢܶܬܩܰܛܠܽܘܢ܆ ܘܰܥܒܳܕܳܐ ܕܫܳܢܝܽܘܬܳܐ ܕܗܰܘ ܢܶܗܘܽܘܢ. ܡܰܠܽܘܢ ܕܶܝܢ. ܥܒܳܕܳܐ ܕܠܳܐ ܒܘܳܠܺܝܬܳܐ. ܠܰܡܫܺܝܚܳܐ ܡܰܢ ܓܶܝܪ ܟܰܕ ܒܳܥܶܐ ܗ̱ܘܳܐ܆ ܛܳܒ ܓܰܠܝܳܐ ܕܰܠܡܶܫܟܳܚܽܘ ܠܳܐ ܡܨܶܐ ܗ̱ܘܳܐ܆ ܠܗܰܘ ܕܰܒܟܽܠ ܐܺܝܬܰܘܗ̱ܝ ܠܳܐ ܡܶܬܕܰܪܟܳܢܳܐ ܘܰܥܣܶܩ ܠܰܫܟܳܚܬܳܐ܆ ܘܰܕܨܶܒܝܳܢܳܐܺܝܬ ܡܶܛܽܠ ܦܽܘܪܩܳܢܳܐ ܕܺܝܠܰܢ ܐܶܬܬܰܕܪܰܟ ܘܶܐܨܛܠܶܒ܆ ܐܶܡܰܬܝ ܕܙܳܕܶܩ ܗ̱ܘܳܐ ܘܶܐܡܰܬܝ ܕܨܳܒܶܐ ܗ̱ܘܳܐ. ܚܠܳܦ ܕܶܝܢ ܒܥܳܬܳܐ ܕܡܶܛܽܠ ܗܰܘ܆ ܩܶܛܠܳܐ ܗܰܘ ܕܰܛܠܳܝ̈ܶܐ ܗܘ̣ܳܐ ܫܽܘܡܠܳܝܶܗ ܕܚܽܘܫܳܒܳܐ.
3: ܐܶܠܳܐ ܗܳܕܶܐ܆ ܕܬܰܪܥܺܝܬܳܐ ܗܳܝ ܕܰܙܥܽܘܪ̈ܝܳܬܳܐ ܚܳܙܝܳܐ܆ ܘܕܰܒܥܳܠܡܳܐ ܗܳܢܳܐ ܐܰܣܺܝܪܳܐ ܐܺܝܬܶܝܗ̇܆ ܗܳܝ ܕܥܰܠ ܩܶܛܠܳܐ ܗܰܘ ܕܰܛܠܳܝ̈ܶܐ ܬܶܫܬܓܶܫ܆ ܐܰܝܟ ܗܰܘ ܕܶܐܬܥܰܘܰܠ ܒܗܽܘܢ. ܐܰܪܰܐ ܓܶܝܪ܆ ܐܶܠܽܘ ܐ̱ܢܳܫ ܟܰܕ ܐܺܝܬܰܝܟ ܐܰܣܺܝܪܳܐ ܘܰܒܒܰܝܬܳܐ ܕܠܳܐ ܙܰܗܪܳܐ ܚܒܺܝܫ ܗ̱ܘܰܝܬ݁܆ ܘܰܒܟܰܦܢܳܐ ܡܶܕܶܡ ܢܰܓܺܝܪܳܐ ܘܰܡܬܺܝܚܳܐ ܡܶܬܥܰܨܰܪ ܗܘܰܝܬ݁܆ ܐܰܘ ܒܕܽܘܟ ܐܳܦ ܒܢܶܓ̈ܕܶܐ ܕܥܰܠ ܚܰܨܳܟ ܡܶܬܒܰܣܒܰܤ ܗ̱ܘܰܝܬ݁܆ ܡܶܫܬܰܘܕܶܐ ܗ̱ܘܳܐ ܠܳܟ ܕܰܒܝܰܕ ܚܕܳܐ ܢܶܟܣܬܳܐ ܠܘܳܬ ܐܰܬܪܳܐ ܢܰܗܺܝܪܳܐ ܡܫܰܢܶܐ ܗ̱ܘܳܐ ܠܳܟ܆ ܗܰܘ ܕܰܒܢܽܘܗܪܳܐ ܕܠܳܐ ܡܬܽܘܡ ܕܳܥܶܟ ܡܶܬܢܰܗܰܪ܆ ܘܺܐܝܬ ܒܶܗ ܬܽܘܪܣܳܝܳܐ ܕܠܳܐ ܫܳܪܶܟ ܠܰܚܒܳܠܳܐ܆ ܐܶܠܳܐ ܐܺܝܬܰܘܗ̱ܝ ܠܳܐ ܡܶܬܚܰܒܠܳܢܳܐ ܘܠܳܐ ܡܶܣܬܰܒܥܳܢܳܐ܆ ܘܕܰܒܢܶܨ̈ܒܳܬܳܐ ܡܶܕܶܡ ܡܶܬܗܰܘܢܳܢܝ̈ܳܬܳܐ܆ ܘܒܰܟ̈ܠܺܝܠܶܐ ܕܰܒܟܽܠܫܳܥ ܪܳܘܙܺܝܢ ܘܫܳܘܚܺܝܢ ܘܠܳܐ ܡܬܽܘܡ ܚܳܡܶܝܢ ܘܥܰܒܺܝܛ܆ ܠܰܘ ܡܛܰܝܒܳܐܺܝܬ ܠܣܰܝܦܳܐ ܨܰܘܪܳܟ ܡܰܪܟܶܢ ܗ̱ܘܰܝܬ݁܆ ܡܶܛܽܠ ܕܰܠܗܰܘ ܐܰܬܪܳܐ ܬܺܐܙܰܠ ܗܘܰܝܬ݁܆ ܘܰܡܥܰܕܪܳܢܳܐ ܘܠܰܘ ܩܳܛܽܘܠܳܐ ܩܳܪܶܐ ܗܘܰܝܬ݁܆ ܠܗܰܘ ܕܰܡܚܳܟ.
4: ܡܳܢܳܐ ܗܳܟܺܝܠ ܡܫܰܚܠܰܦ ܥܳܠܡܳܐ ܗܳܢܳܐ ܡܶܢ ܒܰܝܬܳܐ ܚܶܫܽܘܟܳܐ܆ ܗܰܘ ܕܠܶܗ ܡܶܛܽܠ ܚܛܺܝܬܳܐ ܡܶܢ ܕܽܘܒܳܪܳܐ ܗܰܘ ܢܰܨܺܝܚܳܐ ܕܦܰܪܕܰܝܣܳܐ ܢܚܶܬܢܰܢ܆ ܘܰܒܟܽܘܒ̈ܶܐ ܗܳܢܰܘ ܕܶܝܢ ܒܶܐܣܽܘܪ̈ܶܐ ܕܡܰܪ̈ܢܝܳܬܳܐ ܙܰܒܢܳܝ̈ܳܬܳܐ ܡܶܬܥܰܪܙܠܺܝܢܰܢ ܟܺܝܬ ܘܡܶܬܩܰܒܥܺܝܢ ܚ̱ܢܰܢ[3]܆ ܘܟܰܕ ܐܰܝܟ ܗܰܘ ܕܡܶܢ ܡܚܽܘܬܳܐ ܡܶܬܪܰܕܦܺܝܢ ܚ̱ܢܰܢ ܒܕܽܘܥܬܳܐ ܕܰܐܦ̈ܶܐ ܠܰܚܡܳܐ ܐܳܟܠܺܝܢܰܢ[4] ܐܰܝܟܰܢܳܐ ܕܰܒܝܰܕ ܡܰܪܕܽܘܬܳܐ ܥܡܺܝܠܬܳܐ ܕܰܐܝܟ ܗܳܕܶܐ ܡܝܰܬܪ̈ܶܐ ܢܶܗܘܶܐ.
5: ܡܳܢܳܐ ܕܶܝܢ ܐܶܣܬܰܓܰܦܘ ܛܠܳܝ̈ܶܐ܆ ܕܟܰܕ ܗܶܪܽܘܕܺܝܤ ܝܰܗ̱ܒ ܬܒܰܥܬܳܐ ܕܡܶܛܽܠ ܡܣܰܝܒܽܘܬ݂ ܩܶܛܠܳܐ ܗܳܝ ܕܺܝܠܶܗ ܘܝܳܗܶܒ ܝܰܬܺܝܪ ܩܰܫܝܳܐܺܝܬ܆ ܗܶܢܽܘܢ ܒܝܰܕ ܚܕܳܐ ܡܚܽܘܬܳܐ ܡܶܢ ܚܰܝ̈ܶܐ ܕܕܽܘܘܳܢܳܐ ܐܰܓܗܺܝܘ. ܘܰܠܘܳܬ ܫܽܘܠܳܡܳܐ ܗܰܘ ܛܽܘܒܬܳܢܳܐ ܘܰܕܠܳܐ ܫܽܘܠܳܡ ܫܘܰܪܘ ܥܒܰܪܘ. ܐܶܠܽܘ ܡܰܢ ܗܳܟܺܝܠ ܥܕܰܡܳܐ ܠܗܳܠܶܝܢ ܕܩܰܪ̈ܺܝܒܳܢ ܩܳܝ̈ܡܳܢ ܗ̱ܘܰܝ̈ ܗܳܠܶܝܢ ܕܺܝܠܰܢ܆ ܙܰܒܢܳܐ ܗܘ̣ܳܐ ܠܰܢ ܕܰܐܝܟ ܦܰܘܠܽܘܤ ܢܺܐܡܰܪ: ܕܶܐܢ ܒܗܳܠܶܝܢ ܚܰܝ̈ܶܐ ܒܰܠܚܽܘܕ ܡܣܰܒܪܺܝܢܰܢ ܒܰܡܫܺܝܚܳܐ܆ ܝܰܬܺܝܪ ܡܶܬܚܰܢ̈ܳܢܶܐ[5] ܐܺܝܬܰܝܢ܆ ܛܳܒ ܡܶܢ ܟܽܠܗܽܘܢ ܒܢܰܝ̈ܢܳܫܳܐ. ܐܶܢ ܕܶܝܢ ܡܫܺܝܚܳܐ ܩܳܡ ܡܶܢ ܒܶܝܬ ܡܺܝ̈ܬܶܐ ܪܺܝܫܺܝܬܳܐ ܕܗܳܢܽܘܢ ܕܰܫܟܶܒܘ[6]܆ ܘܦܽܘܪ̈ܥܳܢܶܐ ܕܰܡܝܰܬܪܽܘܬܳܐ ܘܰܡܣܳܡ ܒܪ̈ܺܝܫܶܐ ܕܒܺܝܫܽܘܬܳܐ܆ ܘܗܳܝ ܕܰܐܝܟ ܕܫܳܘܝܳܐ ܠܟܽܠܢܳܫ. ܒܡܰܣ̈ܰܐܬܶܐ ܘܰܒܡܰܬܩ̈ܳܠܶܐ ܕܝܰܬܺܝܪ ܟܺܐܢܺܝܢ ܕܥܳܠܡܳܐ ܕܰܥܬܺܝܕ. ܢܶܬܬܟܺܝܠܽܘܢ܆ ܠܳܐ ܐܶܬܥܰܘܰܠܘ ܛܠܳܝ̈ܶܐ ܡܶܢ ܡܫܺܝܚܳܐ. ܐܶܠܳܐ ܒܕܰܠܩܽܘܒܠܳܐ ܐܳܦ ܐܶܬܥܰܕܰܪܘ܆ ܟܰܕ ܠܩ̈ܶܛܠܶܐ ܡܰܢ ܕܗܶܪܽܘܕܺܝܤ ܐܶܫܬܠܶܡܘ܆ ܠܰܟ̈ܠܺܝܠܶܐ ܕܶܝܢ ܕܣܳܗܕܽܘܬܳܐ ܩܛܰܪܘ. ܗܳܢܽܘܢ ܕܰܠܗܽܘܢ ܡܶܢ ܒܳܬܰܪ ܕܽܘ̈ܥܬܶܐ ܣܰܓܺܝ̈ܳܐܬܳܐ ܐܶܫܬܘܺܝܘ. ܦܶܛܪܽܘܤ ܡܰܢ ܗܰܘ ܪܺܝܫܳܐ ܕܰܫܠܺܝ̈ܚܶܐ ܟܰܕ ܒܳܬܰܪ ܪܺܝܫܶܗ ܐܶܨܛܠܶܒ. ܦܰܘܠܽܘܤ ܕܶܝܢ ܘܝܰܥܩܽܘܒ ܟܰܕ ܒܣܰܝܦܳܐ ܐܶܬܪܡܺܝܘ[7]܆ܤܛܶܦܢܽܘܤ ܕܶܝܢ ܗܰܘ ܩܰܕܡܳܝܳܐ ܕܣܳܗܕ̈ܶܐ ܟܰܕ ܒܟܺܐܦ̈ܶܐ ܐܶܬܪܓܶܡ[8].
6: ܠܺܝ ܕܶܝܢ܆ ܠܡܶܬܕܰܡܳܪܽܘ ܐܶܬܺܝܬ݂ ܠܺܝ܆ ܒܡܰܘܗ̈ܒܳܬܳܐ ܦܰܐܺܝܬ ܠܰܐܠܳܗܳܐ ܕܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ܆ ܕܰܡܚܰܘܶܐ ܐܳܦ ܒܝܰܕ ܢܶܟܣܬܳܐ ܕܫܰܒܪ̈ܶܐ ܗܳܠܶܝܢ܆ ܕܰܠܓܶܢܣܳܐ ܐ̱ܢܳܫܳܝܳܐ ܗܰܘ ܕܰܢܚܶܬ݂ ܠܘܳܬ݂ ܩܰܘܡܬܳܐ ܠܳܐ ܡܫܰܡܠܰܝܬܳܐ ܘܫܰܒܪܳܝܬܳܐ܆ ܡܥܱܠܶܐ ܡܰܣܶܩ ܠܘܳܬ ܡܫܰܡܠܝܽܘܬܳܐ ܗܳܝ ܕܡܶܢ ܫܽܘܪܳܝܳܐ. ܡܫܰܡܠܝܳܐ ܓܶܝܪ ܒܫܽܘܪܳܝܳܐ ܓܰܒܠܶܗ ܠܳܐܕܳܡ܆ ܘܠܳܐ ܗ̱ܘܳܐ ܕܰܒܩܰܘ̈ܡܳܬܳܐ ܕܒܺܐܝܕܳܐ ܒܺܐܝܕܳܐ ܠܬܰܪܒܺܝܬܳܐ ܡܶܬܬܰܝܬܶܐ ܗ̱ܘܳܐ. ܡܶܚܕܳܐ ܓܶܝܪ ܬܪܺܝܨܳܐܺܝܬ ܦܽܘܠܚܳܢܳܐ ܕܦܰܪܕܰܝܣܳܐ ܗܰܝܡܢܶܗ܆ ܟܰܕ ܛܰܝܒܽܘܬܳܐ ܕܠܳܐ ܡܳܝܽܘܬܽܘܬܳܐ ܬܰܚܶܡ ܠܶܗ ܐܰܓܪܳܐ ܕܗܳܢܳܐ. ܡܶܛܽܠ ܕܶܝܢ ܕܰܠܡܰܘܬܳܐ ܫܪܰܥ ܘܰܢܦܰܠ ܒܝܰܕ ܡܰܛܥܝܳܢܽܘܬܳܐ܆ ܘܰܠܒܰܪ ܡܶܢ ܦܰܪܕܰܝܣܳܐ ܗܘ̣ܳܐ܆ ܘܠܰܡܫܰܡܠܝܽܘܬܳܐ ܫܕܳܐ ܡܶܢܶܗ܆ ܚܠܰܕ ܥ̣ܰܠ ܠܰܡܨܰܥܬܳܐ ܙܢܳܐ ܗܰܘ ܕܰܗܘܳܝܳܐ ܕܺܝܠܰܢ ܕܰܒܝܰܕ ܫܰܘܬܳܦܽܘܬܳܐ ܕܙܽܘܘܳܓܳܐ. ܘܡܶܟܺܝܠ ܟܰܕ ܫܰܒܪܳܐ ܡܶܬܺܝܠܶܕ ܗܽܘ ܒܰܪܢܳܫܳܐ܆ ܡܚܰܘܶܐ ܒܝܰܕ ܙܥܽܘܪܽܘܬܳܐ܆ ܠܚܽܘܣܪܳܢܳܐ ܕܰܡܫܰܡܠܝܽܘܬܳܐ ܗܳܝ ܕܡܶܢ ܫܽܘܪܳܝܳܐ. ܘܰܒܝܰܕ ܬܰܪܒܺܝܬܳܐ ܗܳܝ ܕܒܺܐܝܕܳܐ ܒܺܐܝܕܳܐ ܘܫܽܘܘܫܳܛܳܐ ܕܩܰܘ̈ܡܳܬܳܐ܆ ܡܚܰܘܶܐ ܠܳܗ̇ ܕܠܰܚܒܳܠܳܐ ܡܶܫܬܰܕܪܺܝܢ ܚ̱ܢܰܢ.
7: ܐܶܠܳܐ ܥܰܡܰܢܽܘܐܶܝܠ ܗܰܘ ܓܳܒܽܘܠܳܐ ܘܳܐܣܝܳܐ ܕܰܟܝܳܢܳܐ ܕܺܝܠܰܢ܆ ܠܠܳܐ ܡܫܰܡܠܝܽܘܬܳܐ ܡܰܢ ܗܳܝ ܕܺܝܠܰܢ ܒܰܝܬܺܝ ܠܶܗ܆ ܟܰܕ ܫܰܒܪܳܐ ܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ. ܠܫܰܒܪ̈ܶܐ ܕܶܝܢ ܘܰܠܓܶܢܣܳܐ ܕܺܝܠܰܢ܆ ܡܫܰܟܶܢ ܡܫܰܡܠܝܽܘܬܳܐ ܗܳܝ ܕܡܶܢ ܫܽܘܪܳܝܳܐ܆ ܡܰܠܽܘܢ ܕܶܝܢ ܗܳܝ ܕܺܝܠܶܗ ܘܰܕܝܰܬܺܝܪ ܐܰܠܳܗܳܝܳܐ܆ ܩܳܪܶܐ ܠܗܽܘܢ ܓܶܝܪ ܠܘܳܬ ܕܰܪ̈ܶܐ ܚܰܝܠ̈ܬܳܢܶܐ ܕܣܳܗܕܽܘܬܳܐ ܘܕܰܠܓܰܒܪ̈ܶܐ ܦܐܶܝܢ. ܡܶܢ ܗܳܪܟܳܐ ܐܳܦ ܒܶܐܘܰܢܓܶܠܺܝ̈ܰܐ ܡܰܙܥܶܩ ܟܰܕ ܡܰܘܕܰܥ܆ ܕܡܶܛܽܠ ܗܳܕܶܐ ܐܶܬܳܐ. ܗܘ̣ܰܘ ܗܳܟܺܝܠ ܐܰܢ̱ܬܽܘܢ ܐܳܡܰܪ ܡܫܰܡܠܰܝ̈ܳܐ܆ ܐܰܝܟܰܢܳܐ ܕܰܐܒܽܘܟܽܘܢ ܗܰܘ ܫܡܰܝܳܢܳܐ ܡܫܰܡܠܝܳܐ ܐܺܝܬܰܘܗ̱ܝ[9].
8: ܠܰܐܝܟܳܐ ܡܶܟܺܝܠ ܫܳܢܝܽܘܬܳܐ ܕܢܶܣܛܽܘܪܺܝܽܘܤ ܬܺܐܙܰܠ܆ ܕܳܐܡܰܪ ܓܽܘܡܕܳܢܳܐܺܝܬ ܡܶܛܽܠ ܐܰܠܳܗܳܐ ܗܰܘ ܕܶܐܬܒܰܣܰܪ܆ ܒܳܗܶܬ݂ ܐ̱ܢܳܐ ܕܰܠܫܰܒܪܳܐ ܬܪ̈ܰܝܳܢܰܝ ܝܰܪ̈ܚܶܐ ܘܰܬܠܺܝ̈ܬܳܝ݂ܰܝ̣ ܝܰܪ̈ܚܶܐ ܐܶܩܪܶܐ ܐܰܠܳܗܳܐ.
9: ܐܶܠܽܘ ܓܶܝܪ ܒܳܗܶܬ݂ ܗ̱ܘܳܐ ܗܽܘ ܠܡܶܬܩܪܳܝܽܘ ܫܰܒܪܳܐ܆ ܩܰܕܡܳܐܺܝܬ ܡܶܬܚܰܡܰܨ ܗ̱ܘܳܐ ܘܛܳܒ ܟܺܐܢܳܐܺܝܬ܆ ܒܗܳܝ ܕܢܶܗܘܶܐ ܠܳܐ ܡܫܬܰܚܠܦܳܢܳܐܺܝܬ ܒܰܪܢܳܫܳܐ ܡܶܛܽܠܳܬܰܢ ܐܶܢ ܕܶܝܢ ܠܠܳܐ ܡܫܰܡܠܝܽܘܬܳܐ ܡܰܢ ܗܳܝ ܕܫܰܒܪܳܐ ܡܩܰܒܶܠ ܥܠܰܘܗ̱ܝ ܡܶܛܽܠ ܡܕܰܒܪܳܢܽܘܬܳܐ܆ ܠܫܰܒܪ̈ܶܐ ܕܶܝܢ ܡܫܰܘܬܶܦ ܠܗܽܘܢ ܒܰܡܫܰܡܠܝܽܘܬܳܐ ܗܳܝ ܕܺܝܠܶܗ܆ ܘܣܳܗ̈ܕܶܐ ܡܫܰܡ̈ܠܰܝܳܐ ܥܳܒܶܕ ܠܗܽܘܢ ܟܰܕ ܡܶܣܬܗܶܕ ܡܶܢܗܽܘܢ ܐܰܝܟ ܐܰܠܳܗܳܐ܆ ܡܰܙܥܶܩ ܓܶܝܪ ܕܡܳܐ ܕܺܝܠܗܽܘܢ ܒܒܰܪ̱ܬ ܩܳܠܳܐ ܕܝܰܬܺܝܪ ܪܰܒܳܐ ܡܶܢ ܕܡܳܐ ܕܗܳܒܺܝܠ[10]܆ ܐܰܝܟܰܢܳܐ ܒܝܰܕ ܩܰܘܡܬܳܐ ܫܰܒܪܳܝܬܳܐ ܐܰܢ̱ܬ ܡܨܰܥܰܪ ܐܰܢ̱ܬ܆ ܠܗܰܘ ܕܳܐܦ ܒܳܗ̇ ܡܰܥܒܶܕ ܬܡܺܝܗܳܐܺܝܬ ܗܳܠܶܝܢ ܦܰܐܺܝܬ ܠܰܐܠܳܗܳܐ. ܘܦܳܣܶܩ ܐܰܢ̱ܬ ܠܶܗ ܠܰܬܪܶܝܢ ܟܝܳܢ̈ܶܐ ܠܗܰܘ ܚܰܕ. ܘܳܐܡܰܪ ܐܰܢ̱ܬ ܠܶܗ ܟܰܕ ܡܓܰܕܶܦ ܐܰܢ̱ܬ܆ ܘܰܕܫܰܒܪܳܐ ܐܺܝܬܰܘܗ̱ܝ ܘܰܕܡܳܪܶܗ ܕܫܰܒܪܳܐ܆ ܟܰܕ ܢܰܩܺܝܦܽܘܬܳܐ ܐ̱ܚܝܳܢܳܝܬܳܐ ܡܫܰܟܶܢ ܐܰܢ̱ܬ ܠܗܽܘܢ ܠܗܳܢܽܘܢ ܬܪܶܝܢ ܟܝܳܢ̈ܶܐ܆ ܘܰܐ̱ܚܪܺܢܳܐ ܡܰܢ ܡܰܥܶܠ ܐܰܢ̱ܬ ܡܳܪܳܐ܆ ܐ̱ܚܪܺܢܳܐ ܕܶܝܢ ܗܰܘ ܕܰܥܠܰܘܗ̱ܝ ܫܰܠܺܝܛ ܗ̱ܘ ܡܳܪܳܐ.
10: ܐܶܠܽܘ ܓܶܝܪ ܝܳܕܰܥ ܗ̱ܘܰܝܬ݁ ܡܶܢ ܬܰܪ̈ܬܰܝܗܶܝܢ ܠܳܐ ܡܶܬܦܰܠܓܳܢܳܐܺܝܬ܆ ܡܶܢ ܐܰܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ ܚܰܕ ܠܥܰܡܰܢܽܘܐܶܝܠ܆ ܠܳܐ ܗ̱ܘܳܐ ܕܗܽܘ ܥܰܠ ܢܰܦܫܶܗ ܫܰܠܺܝܛ ܐܳܡܰܪ ܗܘܰܝܬ݁ ܐܳܘ ܣܪܺܝܩܳܐ. ܫܰܠܺܝܛ ܡܰܢ ܓܶܝܪ ܥܰܠ ܟܽܠ܆ ܗܽܘ ܕܶܝܢ ܠܳܐ ܡܶܬܦܰܠܰܓ ܥܰܠ ܢܰܦܫܶܗ. ܐܶܠܳܐ ܐܺܝܬܰܘܗ̱ܝ ܗܽܘ ܟܰܕ ܗܽܘ ܡܳܪܳܐ܆ ܐܳܦ ܟܰܕ ܐܶܬܳܐ ܠܰܡܫܰܡܳܫܽܘ ܠܰܡܕܰܒܪܳܢܽܘܬܳܐ ܗܳܝ ܕܡܶܛܽܠܳܬܰܢ܆ ܘܡܶܛܽܠܗܳܕܶܐ܆ ܕܢܶܫܬܰܡܰܗ ܥܰܒܕܳܐ ܘܰܕܢܶܬܶܠ ܢܰܦܫܶܗ ܦܽܘܪܩܳܢܳܐ ܚܠܳܦ ܣܰܓܺܝ̈ܶܐܐ ܩܰܒܶܠ ܥܠܰܘܗ̱ܝ[11].
11: ܗܳܟܰܢܳܐ ܐܳܦ ܒܰܥܪܽܘܩܝܳܐ ܗܰܘ ܕܰܠܡܶܨܪܶܝܢ܆ ܗܰܘ ܕܡܶܛܽܠܳܬܶܗ ܬܽܘܒ ܠܰܬܪܶܝܢ ܡܦܰܠܶܓ ܐܰܢ̱ܬ ܠܶܗ܆ ܟܰܕ ܒܳܗܶܬ݂ ܐܰܢ̱ܬ ܒܣܽܘܪܳܩܶܗ ܗܰܘ ܨܶܒܝܳܢܳܝܳܐ܆ ܚܠܺܝܛܳܐ ܗ̱ܝ ܗܳܝ ܕܦܰܐܝܳܐ ܠܰܐܠܳܗܳܐ. ܡܙܺܝܥ ܓܶܝܪ ܠܰܥ̈ܒܺܝܕܰܝ ܒܺܐܝ̈ܕܰܝܳܐ ܕܡܶܨܪܶܝܢ܆ ܘܡܰܥܪܶܩ ܠܫܺܐܕ̈ܶܐ[12]. ܘܠܰܐܬܪܳܐ ܗܰܘ ܕܰܐܝܬܺܝ ܠܦܶܪܥܽܘܢ ܗܰܘ ܢܳܨܶܐ ܥܰܡ ܐܰܠܳܗܳܐ ܘܰܡܓܰܕܦܳܢܳܐ ܠܘܳܬ݂ ܝܺܕܰܥܬܳܐ ܪܺܝܫܳܝܬܳܐ ܕܰܐܠܳܗܳܐ܆ ܘܰܠܘܳܬ݂ ܗܰܝܡܳܢܽܘܬܳܐ ܬܪܺܝܨܬܳܐ. ܗܳܝ ܕܳܐܦ ܥܕܰܡܳܐ ܠܗܳܫܳܐ ܐܰܚܺܝܕܳܐ ܒܶܗ ܡܫܰܚܠܶܦ ܡܰܥܒܰܪ.
12: ܡܳܢܳܐ ܕܶܝܢ ܐܰܪܰܐ ܠܘܳܬ݂ ܗܳܕܶܐ܆ ܐܳܦ ܐܶܘܛܶܘܟ̥ܶܐ ܗܰܘ ܪܰܫܺܝܥܳܐ ܡܦܰܢܶܐ ܠܰܢ܆ ܗܰܘ ܕܶܐܫܬܺܝ ܬܶܛܪܳܐ ܕܠܺܝܚܳܐ ܕܪܰܫܺܝܥܳܐ ܘܰܐܠܢܛܝܢܘܤ ܘܰܕܡܰܢܺܝ̈ܢܳܝܶܐ ܘܕܰܐܰܦܽܘܠܺܝܢܰܪܺܝܽܘܤ. ܐܶܢ ܓܶܝܪ ܠܰܘ ܦܰܓܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ ܤܛܰܪ ܡܶܢ ܚܛܺܝܬܳܐ܆ ܚܰܝܶܕ ܠܶܗ ܗܽܘ ܡܶܠܬܳܐ ܐܰܠܳܗܳܐ ܒܰܩܢܽܘܡܳܐ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܣܰܓܺܝ ܝܰܬܺܝܪܳܐ ܐܺܝܬܰܘܗ̱ܝ ܗ̱ܘܳܐ ܫܽܘܢܳܝܳܐ ܗܰܘ ܕܰܠܡܶܨܪܶܝܢ. ܙܳܕܶܩ ܗ̱ܘܳܐ ܓܶܝܪ. ܕܰܐܝܟ ܕܥܰܠ ܗܰܓܳܓ̈ܘܳܬܳܐ܆ ܠܡܶܓܢܰܒ ܠܰܚܙܳܬܳܐ ܕܗܳܢܽܘܢ ܕܚܳܙܶܝܢ ܗ̱ܘܰܘ܆ ܘܠܳܐ ܡܶܬܚܰܙܝܳܢܳܐ ܢܶܗܘܶܐ܆ ܘܢܶܥܪܽܘܩ ܡܶܢ ܐܺܝܕܰܝ̈ܳܐ ܕܗܶܪܽܘܕܶܝܣ[13]. ܐܶܢ ܟܺܝܬ ܒܦܰܢܛܰܣܺܝܰܐ ܐܶܬܚܙܺܝ ܠܰܢ܆ ܘܦܰܓܪܳܐ ܫܡܰܝܳܢܳܐ ܐܰܘ ܐܳܐܱܪܳܝܳܐ ܐܰܝܬܺܝ ܠܶܗ܆ ܘܠܰܘ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ. ܐܶܠܳܐ ܠܗܳܕܶܐ ܡܰܣܒܪܳܢܽܘܬܳܐ ܡܣܰܝܰܒܬܳܐ ܘܰܕܠܳܐ ܐܰܠܳܗ ܙܳܢܶܩ ܘܫܳܕܶܐ ܠܪܽܘܚܩܳܐ܆ ܡܰܠܰܐܟܳܐ ܗܰܘ ܕܩܳܡ ܥܰܠ ܝܰܘܣܶܦ ܒܫܶܢܬܳܐ܆ ܟܰܕ ܐܳܡܰܪ: ܒܰܙܒܰܢ ܡܰܢ ܩܽܘܡ ܕܒܰܪ ܠܛܰܠܝܳܐ ܘܠܶܐܡܶܗ ܘܰܥܪܽܘܩ ܠܡܶܨܪܶܝܢ. ܒܰܙܒܰܢ ܕܶܝܢ܆ ܩܽܘܡ ܕܒܰܪ ܠܛܰܠܝܳܐ ܘܙܶܠ ܠܰܐܪܥܳܐ ܕܺܐܝܣܪܳܐܶܝܠ܆ ܡܺܝܬܘ ܠܗܽܘܢ ܓܶܝܪ ܗܳܢܽܘܢ ܕܒܳܥܶܝܢ ܗ̱ܘܰܘ ܠܢܰܦܫܶܗ ܕܛܰܠܝܳܐ[14].
13: ܠܗܰܘ ܕܳܐܦ ܐܰܢ̱ܬܽܘܢ ܚܠܳܦ ܫܰܦܺܝܪܽܘܬ݂ ܣܳܥܽܘܪܽܘܬܳܐ ܕܰܐܝܟ ܗܳܕܶܐ܆ ܦܪܽܘܥܘ ܛܰܝܒܽܘܬܳܐ ܗܳܕܶܐ. ܐܳܦ ܠܺܐܝܩܳܪܶܗ ܕܺܝܠܶܗ ܐܳܦ ܠܺܐܝܩܳܪܳܐ ܕܫܰܒܪ̈ܶܐ ܗܳܢܽܘܢ ܕܰܐܣܗܶܕܘ ܒܒܶܝܬ ܠܚܶܡ܆ ܐܰܝܟ ܡܰܪܬܝܳܢܽܘܬܶܗ ܕܦܰܘܠܽܘܤ. ܕܠܳܐ ܬܶܗܘܽܘܢ ܛܠܳܝ̈ܶܐ ܒܪ̈ܶܥܝܳܢܰܝܟܽܘܢ. ܐܶܠܳܐ ܠܒܺܝܫܽܘܬܳܐ ܡܰܢ ܗܘܰܝܬܽܘܢ ܫܰܒܪ̈ܺܝܢ܆ ܒܪ̈ܶܥܝܳܢܰܝܟܽܘܢ ܕܶܝܢ ܗܘ̣ܰܘ
ܡܫܰܡ̈ܠܰܝܳܐ[15]܆ ܐܰܝܟܰܢܳܐ ܕܬܶܣܒܽܘܢ ܒܰܡܫܺܝܚܳܐ ܗܳܝ ܕܰܡܫܰܡܠܝܳܐ܆ ܒܝܰܘܡܳܐ ܗܰܘ ܕܚܺܝܠܳܐ ܘܰܡܫܰܒܚܳܐ ܕܰܥܬܺܝܕ ܕܕܶܢܚܳܐ ܕܺܝܠܶܗ. ܕܠܶܗ ܬܶܫܒܽܘܚܬܳܐ܆ ܠܗܰܘ ܕܡܶܛܽܠܳܬܰܢ ܐܶܬܪܡܺܝ ܠܣܽܘܪܳܩܳܐ ܕܰܐܝܟ ܗܳܢܳܐ܆ ܘܰܕܗܳܟܰܢܳܐ ܪܳܚܶܡ ܐ̱ܢܳܫܳܐ ܘܠܳܐ ܡܶܫܬܰܚܠܦܳܢܳܐ ܘܰܕܠܳܐ ܦܰܢܛܰܣܺܝܰܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ܀
ܫܠܶܡ ܕܩܰܕܺܝܫܳܐ ܣܶܐܘܺܝܪܶܐ ܕܥܰܠ ܩܶܛܠܳܐ ܕܝܰܠ̈ܘܕܐ.
[1]ܕܩܰܕܺܝܫܳܐ ܡܳܪܝ ܣܶܐܘܺܝܪܶܐ. ܡܐܡܪܳܐ ܕܥܰܠ ܛܠܳܝ̈ܶܐ (ܕܰܐܢܛܺܝܽܘܟܺܝ =) ܕܐܢܛܝܘ (ܡܳܪܝ ܕܩܰܕܺܝܫܳܐ ܣܶܐܘܺܝܪܶܐ ܕܥܰܠ ܛܠܳܝ̈ܶܐ ܕܶܐܬܩܰܛܰܠܘ ܡܶܢ ܐܺܝܪܽܘܕܶܝܣ ܡܰܠܟܳܐ ܥܰܘܳܠܳܐ ܫܰܒܪ̈ܶܐ ܗܳܢܽܘܢ ܕܡܶܢ ܐܝܪܘܕܝܣ ܐܶܬܩܰܛܰܠܘ ܒܒܶܝܬ ܠܚܶܡ.