ܡܺܐܡܪܳܐ ܕܫܰܒܥܺܝܢ ܘܬܶܫܥܳܐ

ܥܰܠ ܗܳܝ ܕܰܐܡܺܝܪܳܐ ܡܶܢ ܦܳܪܽܘܩܰܢ ܒܶܐܘܰܢܓ̈ܶܠܺܝܰܐ ܠܘܳܬ ܦܪ̈ܺܝܫܶܐ ܘܣܳܦܪ̈ܶܐ܆ ܐܢ̱ܬܽܘܢ ܕܶܝܢ ܐܳܡܪܺܝܢ ܐܢ̱ܬܽܘܢ܆ ܗܰܘ ܕܶܐܢ ܢܺܐܡܰܪ ܠܰܐܒܽܘܗ̱ܝ ܐܰܘ ܠܶܐܡܶܗ܆ ܩܽܘܪܒܳܢܳܐ ܐܺܝܬܰܘܗ̱ܝ ܗܰܘ ܡܳܐ ܕܶܐܢ ܬܺܐܬ̣ܰܪ ܡܶܢܝ܆ ܠܳܐ ܢܝܰܩܰܪ ܠܰܐܒܽܘܗ̱ܝ ܐܰܘ ܠܶܐܡܶܗ^[1]܆ ܘܕܰܐܝܟܰܢܳܐ ܙܳܕܶܩ ܠܡܶܣܬܰܟܳܠܽܘ܆ ܠܗܳܝ ܕܠܰܘ ܐܰܝܠܶܝܢ ܕܥܳܐܠ̈ܳܢ ܠܦܽܘܡܳܐ ܡܣܰܝ̈ܒܳܢ ܠܶܗ ܠܒܰܪܢܳܫܳܐ܆ ܐܶܠܳܐ ܗܳܠܶܝܢ ܕܢܳܦ̈ܩܳܢ ܡܶܢ ܦܽܘܡܳܐ^[2]܆ ܘܰܠܘܳܬ ܗܳܢܽܘܢ ܕܬܳܠܶܝܢ ܥܠܰܝܗܽܘܢ ܗܳܠܶܝܢ ܕܡܶܬܩܪܶܝܢ ܦܽܘܠܰܐܩܛܺܝܪ̈ܳܝܶܐ ܐܰܘܟܺܝܬ ܩܡܺܝ̈ܥܶܐ.

79: ܣܰܓܺܝ ܗ̱ܘ ܙܰܒܢܳܐ܆ ܡܶܢ ܐܶܡܰܬܝ ܕܰܒܥܺܕܬܳܐ ܠܳܐ ܡܰܠܠܶܬ̣ ܠܟܽܘܢ܆ ܒܝܰܕ ܕܒܰܩܪܳܒܳܐ ܘܬܰܟܬܽܘܫܳܐ ܕܰܠܘܳܬ ܗܶܪ̈ܛܺܝܩܽܘ ܥܢܶܐ ܗ̱ܘܺܝܬ̣܆ ܡܰܠܽܘܢ ܕܶܝܢ ܠܘܳܬ ܗܳܢܽܘܢ ܕܡܶܬܚܪܶܝܢ^[3] ܠܽܘܩܒܰܠ ܦܽܘܡܶܗ ܕܡܳܪܝܳܐ^[4]܆ ܕܰܐܝܟ ܗܳܝ ܕܰܟܬܺܝܒܳܐ ܐܺ݀ܡܰܪ ܝܰܬܺܝܪ ܒܰܝܬܳܐܺܝܬ. ܙܳܕܶܩ ܗ̱ܘܳܐ ܠܺܝ ܕܶܝܢ ܐܶ‌ܠܽܘ ܚܰܝܠܬܳܢܳܐ ܐܺܝܬܰܝ ܗ̱ܘܺܝܬ ܒܡܶܠܬܳܐ܆ ܐܰܝܟܰܢܳܐ ܕܣܳܝܽܘܡܽܘܬ ܢܳܡܽܘܣܳܐ ܕܦܰܘܠܽܘܤ ܐܳܡܪܳܐ: ܘܕܰܠܟܽܘܢ ܐܰ݀ܦܺܝܤ ܗܘܺܝܬ ܘܶܐ݀ܒܰܝܰܐ ܒܡܰܠܦܳܢܽܘܬܳܐ ܚܠܺܝܡܬܳܐ܆ ܘܕܰܠܗܳܢܽܘܢ ܕܡܶܬܚܪܶܝܢ ܐܰ݀ܟܶܤ ܗ̱ܘܺܝܬ ܐܰܟܚܕܳܐ^[5]. ܡܶܛܽܠ ܕܳܐܦ ܒܰܒ̈ܢܰܝܳܐ ܕܺܐܝܣܪܳܐܶܝܠ ܟܰܕ ܡܶܢ ܫܶܒܝܳܐ ܕܒܳܒ̈ܠܳܝܶܐ ܦܢ̣ܰܘ^[6]܆ ܘܥܳܡܠܺܝܢ ܗ̱ܘܰܘ ܘܰܚܦܺܝܛܺܝܢ ܒܟܽܠܳܗ̇ ܐܺܝܕܳܐ ܘܚܰܝܠܳܐ܆ ܕܰܠܗܰܝܟܠܳܐ ܗܰܘ ܟܳܗܢܳܝܳܐ ܢܶܒܢܽܘܢ ܗ̱ܘܰܘ ܡܶܢ ܕܪܺܝܫ ܘܰܠܫܽܘܪܳܐ ܕܽܐܘܪܫܠܶܡ܆ ܟܰܕ ܚܳܣܡܺܝܢ ܗ̱ܘܰܘ ܒܰܪܒܪ̈ܳܝܶܐ ܗܳܢܽܘܢ ܕܒܰܚܕܳܪ̈ܰܝܗܽܘܢ ܥܳܡܪܺܝܢ ܗ̱ܘܰܘ. ܩܰܕܡܳܐܺܝܬ ܡܰܢ܆ ܨܳܒܶܝܢ ܗ̱ܘܰܘ ܕܢܶܫܬܰܘܬܦܽܘܢ ܗ̱ܘܰܘ ܒܶܗ ܒܰܥܒܳܕܳܐ܆ ܟܰܕ ܡܚܰܘܶܝܢ ܗ̱ܘܰܘ ܡܨܰܕܝܳܢܳܐܺܝܬ ܫܰܦܺܝܪܽܘܬ ܕܶܚܠܬܳܐ ܗܳܝ ܕܠܳܐ ܐܺܝܬܶܝܗ̇ ܗ̱ܘܳܬ܆ ܘܓܳܢܒܺܝܢ ܗ̱ܘܰܘ ܒܗܳܕܶܐ ܠܨܶܢܥܬܳܐ ܕܺܝܠܗܽܘܢ ܒܺܝܫܬܳܐ. ܘܫܳܡܥܺܝܢ ܗ̱ܘܰܘ܆ ܕܠܳܐ ܠܟܽܘܢ ܘܠܰܢ ܗܳܝ ܕܢܶܒܢܶܐ ܒܰܝܬܳܐ ܠܰܐܠܳܗܳܐ ܕܺܝܠܰܢ. ܒܳܬܰܪܟܶܢ ܕܶܝܢ܆ ܐܳܦ ܠܡܶܙܕܰܝܳܢܽܘ ܥܠܰܝܗܽܘܢ ܓܽܘܡܕܳܢܳܐܺܝܬ ܘܰܠܡܰܩܪܳܒܽܘ ܣܳܥܶܝܢ ܗ̱ܘܰܘ܆ ܘܰܠܡܶܟܠܳܐ ܐܶܢܽܘܢ ܡܶܢ ܚܦܺܝܛܽܘܬܗܽܘܢ. ܐܶܠܳܐ ܡܶܫܟܚܺܝܢ ܗ̱ܘܰܘ ܠܗܽܘܢ܆ ܘܕܳܐܦ ܠܡܶܒܢܳܐ ܝܳܕܥܺܝܢ ܗ̱ܘܰܘ ܐܰܟܚܕܳܐ ܘܳܐܦ ܠܡܰܩܪܳܒܽܘ܆ ܐܰܝܟܰܢܳܐ ܕܣܳܗܶܕ ܟܬܳܒܳܐ ܟܳܗܢܳܝܳܐ܆ ܟܰܕ ܐܶܡܰܪ ܗܳܟܰܢܳܐ. ܘܗܳܢܽܘܢ ܕܫܳܩܠܺܝܢ ܗ̱ܘܰܘ ܫܩܽܘܠܬܳܐ ܥܰܠ ܟܰܬܦܴ̈ܬܳܐ܆ ܡܙܰܝ̈ܢܶܐ ܐܺܝܬܰܝܗܽܘܢ ܗ̱ܘܰܘ. ܒܰܚܕܳܐ ܐܺܝܕܶܗ ܥܳܒܶܕ ܗ̱ܘܳܐ ܥܒܳܕܳܐ܆ ܘܒܰܚܕܳܐ ܐܰܚܺܝܕ ܗ̱ܘܳܐ ܙܰܝܢܳܐ. ܘܰܒ̈ܢܰܝܳܐ܆ ܟܽܠ ܓܰܒܪܳܐ ܣܰܝܦܶܗ ܥܰܠ ܚܰܨܰܘ̈ܗ̱ܝ ܐܰܣܺܝܪ ܗ̱ܘܳܐ ܘܒܳܢܶܝܢ.

ܐܰܝܬܶܐ ܗܳܟܺܝܠ܆ ܡܶܛܽܠ ܟܺܝܬ ܕܰܚܢܰܢ ܠܳܐ ܐܶܬܚܙܺܝܢܰܢ ܕܣܳܦܩܺܝܢܰܢ ܠܡܶܥܒܰܕ ܬܰܪ̈ܬܰܝܗܶܝܢ ܒܚܰܕ ܙܰܒܢܳܐ܆ ܘܳܐܦ ܠܡܰܩܪܳܒܽܘ ܘܰܠܡܶܣܬܰܕܳܪܽܘ ܒܣܶܕܪܳܐ ܕܰܩܪܳܒܶܗ ܕܡܳܪܝܳܐ܆ ܘܳܐܦ ܠܥܺܕܬܳܐ ܠܡܶܒܢܳܐ ܒܡܰܠ̈ܦܳܢܘܳܬܳܐ ܘܰܒܡܰܪ̈ܬܝܳܢܘܳܬܳܐ܆ ܕܗܳܫܳܐ ܐܶܡܰܬܝ ܕܫܶܠܝܳܐ ܡܶܕܶܡ ܢܣܰܒܢܰܢ܆ ܚܰܣܳܡܳܐ ܓܶܝܪ ܢܶܪܚܰܩ ܡܶܢ ܡܶܠܬܳܐ܆ ܢܶܦܬܰܚ ܦܽܘܡܳܐ ܕܬܰܪܥܺܝܬܳܐ܆ ܐܰܝܟܰܢܳܐ ܕܢܰܓ̣ܶܕ ܪܽܘܚܳܐ^[7]܆ ܘܗܳܟܰܢܳܐ ܐܳܝܟ ܡܶܠܬܶܗ ܕܦܰܘܠܽܘܤ ܡܶܠܬܳܐ ܙܥܽܘܪܬܳܐ ܘܰܕܗܰܘܢܳܐ ܢܡܰܠܶܠ ܘܰܕܠܰܐ̱ܚܪ̈ܳܢܶܐ ܡܶܫܟܚܳܐ ܠܡܰܪܬܳܝܽܘ^[8]܆ ܘܠܰܘ ܣܰܓܺܝܐܬܳܐ ܘܕܺܐܝܩܺܐ ܪܳܕܝܳܐ܆ ܘܕܰܣܪܺܝܩܳܐܺܝܬ ܒܠܶܫܳܢܳܐ ܡܰܫܡܥܳܐ ܩܳܠܳܐ. ܗܳܐ ܓܶܝܪ ܡܶܢ ܟܰܕܽܘ ܐ̱ܢܳܫܺܝ̈ܢ ܟܰܕ ܒܫܶܬܩܳܐ ܕܺܝܠܰܢ ܡܶܬܥܰܕܠܺܝܢ܆ ܘܰܠܗܳܢܳܐ ܐܰܝܟ ܕܰܠܠܳܐ ܡܠܺܝܠܳܐ ܨܳܒܶܝܢ ܠܡܰܟܳܣܽܘ܆ ܫܽܘ̈ܐܴܠܶܐ ܣܒܺܝ̈ܣܶܐ ܠܘܳܬܰܢ ܡܳܬܚܺܝܢ. ܗܳܢܽܘܢ ܡܰܢ܆ ܫܰܒܪ̈ܳܝܶܐ. ܗܳܢܽܘܢ ܕܶܝܢ ܟܡܳܐ ܟܡܳܐ܆ ܕܝܰܬܺܝܪ ܐܰܬܺܝ̣ܺܝ̣ܢ ܠܩܰܘܡܬܳܐ ܩܰܠܺܝܠ ܛܳܒ ܡܶܢ ܗܳܠܶܝܢ ܘܰܕܝܰܬܺܝܪ ܚܠܺܝܡܺܝܢ܆ ܘܕܰܐܘ ܥܰܠ ܚܰܠܒܳܐ ܐܰܘ ܥܰܠ ܩܰܨܝܳܐ ܕܠܰܚܡܳܐ ܣܢܺܝܩܺܝܢ܆ ܘܥܰܠ ܗܳܢܳܐ ܟܰܕ ܡܶܬܦܰܬܦܰܬ ܘܡܶܬܩܨܶܐ ܩܰܠܺܝܠ ܩܰܠܺܝܠ. ܠܗܳܢܽܘܢ ܕܙܳܕܶܩ ܗ̱ܘܳܐ ܠܗܽܘܢ܆ ܕܪ̈ܶܓܫܶܐ ܕܰܡܕܰܪܫܺܝܢ ܘܰܡܢܰܦܩܺܝܢ ܡܶܢ ܟܰܕܽܘ ܒܡܰܠܦܳܢܽܘܬܳܐ ܝܺܨܺܝܦܬܳܐ ܢܶܗܘܶܐ ܐܺܝܬ ܗ̱ܘܳܐ ܠܗܽܘܢ܆ ܘܕܰܡܩܰܒ̈ܠܳܢܶܐ ܢܶܗܘܽܘܢ ܐܺܝܬܰܝܗܽܘܢ ܗ̱ܘܰܘ ܕܬܽܘܪܣܳܝܳܐ ܡܫܰܡܠܝܳܐ^[9]. ܘܕܶܚܠܬܳܐ ܐܺܝܬܶܝܗ̇܆ ܕܕܰܠܡܳܐ ܟܰܕ ܫܳܬܩܺܝܢ ܚ̱ܢܰܢ܆ ܐܰܬܪܳܐ ܢܶܬܶܠ ܠܽܐܘܠܺܝܬܶܗ ܕܶܐܪܰܡܝܳܐ ܕܳܐܡܪܳܐ: ܕܒܶܩ ܠܶܫܳܢܳܐ ܕܗܰܘ ܕܝܳܢܶܩ ܠܰܫ̈ܡܰܝ ܚܶܟܶܗ ܒܨܶܗܝܳܐ܆ ܫܰܒܪ̈ܶܐ ܫܶܐܠܘ ܠܰܚܡܳܐ܆ ܘܗܰܘ ܕܩܳܨܶܐ ܗ̱ܘܳܐ ܠܗܽܘܢ ܠܰܝܬ ܗ̱ܘܳܐ^[10].

ܡܳܕܶܝܢ܆ ܕܠܰܡܨܰܥܬܳܐ ܢܰܝܬܶܐ ܫܰܦܺܝܪܳܐ܆ ܚܰܕ ܡܶܕܶܡ ܡܶܢ ܗܳܠܶܝܢ ܕܕܺܝܠܳܢܳܐܺܝܬ ܠ̱ܐܢܳܫܺܝ̈ܢ ܐܶܬܦܰܫ̈ܰܟܶܝܢ ܡܶܢܗܽܘܢ ܘܰܠܗܽܘܢ. ܘܰܠܗܳܢܳܐ ܒܪܶܚܡܰܬ ܥܰܡܠܳܐ ܢܶܦܠܚܺܝܘܗ̱ܝ܆ ܘܬܽܘܪܣܳܝܳܐ ܓܰܘܳܢܳܝܳܐ ܢܣܺܝܡܺܝܘܗ̱ܝ ܠܫܶܡܥܳܐ ܩܕܳܡ ܥܺܕܬܳܐ.

ܒܚܰܕܒܫܰܒܳܐ ܗܳܢܳܐ ܕܰܥܒܰܪ܆ ܟܰܕ ܠܩܶܪܝܳܢܳܐ ܟܳܗܢܳܝܳܐ ܕܶܐܘܰܢܓܶܠܺܝܽܘܢ ܠܰܘ ܡܫܳܟ̣ܳܐܺܝܬ ܫܡܰܥܘ̱ ܐ̱ܢܳܫܺܝ̈ܢ܆ ܡܫܰܐܠܺܝܢ ܗ̱ܘܰܘ܆ ܕܡܳܢܳܐ ܨܳܒܝܳܐ ܗܳܝ ܕܡܶܢ ܡܳܪܰܢ ܠܘܬ ܣܳܦܪ̈ܶܐ ܘܰܦܪ̈ܺܝܫܶܐ ܐܶܬܐܰܡܪܰܬ܆ ܐܰܢ̱ܬܽܘܢ ܕܶܝܢ ܐܳܡܪܺܝܢ ܐܢ̱ܬܽܘܢ܆ ܕܗܰܘ ܕܶܐܢ ܢܺܐܡܰܪ ܠܰܐܒܽܘܗ̱ܝ ܐܰܘ ܠܶܐܡܶܗ܆ ܕܩܽܘܪܒܳܢܳܐ ܐܺܝܬܰܘܗ̱ܝ ܗܰܘ ܡܳܐ ܕܶܐܢ ܬܺܐܬܰܪ ܡܶܢܝ܆ ܠܳܐ ܢܝܰܩܰܪ ܠܰܐܒܽܘܗ̱ܝ ܐܰܘ ܠܶܐܡܶܗ^[11].

ܩܰܠܺܝܠ ܕܶܝܢ ܡܶܢ ܠܥܶܠ ‌ܐܶ݀ܫܰܪܶܐ. ܠܢܳܡܽܘܣܳܐ ܗܰܘ ܕܡܽܘܫܶܐ ܡܶܬܝܰܨܦܳܐ ܗ̱ܘܳܬ܆ ܕܟܰܕ ܝܰܬܺܝܪ ܥܰܒܝܳܐܺܝܬ ܣܺܝܡܺܝܢ ܗ̱ܘܰܘ ܒܢ̈ܰܝ ܐܺܝܣܪܳܐܶܝܠ܆ ܘܒܰܥ̈ܝܳܕܶܐ ܒܰܪܒܪ̈ܳܝܶܐ ܐܳܡܰܪ ܐܢ̱ܳܐ ܕܶܝܢ ܒܺܐܓܽܘ̈ܦܛܳܝܶܐ ܐܶܬܪܰܒܺܝܘ܆ ܘܠܳܐ ܡܶܫܟܚܺܝܢ ܗ̱ܘܰܘ ܕܢܺܐܠܦܽܘܢ ܒܝܰܕ ܣܝܳܡ ܢܳܡܽܘܣܳܐ ܠܕܰܟܝܽܘܬܳܐ ܗܳܝ ܕܰܒܬܰܪܥܺܝܬܳܐ܆ ܒܝܰܕ ܕܽܘܟܳܝ̈ܶܐ ܦܰܓܪ̈ܳܢܳܝܶܐ ܢܰܝܬܶܐ ܗ̱ܘܳܐ ܐܶܢܽܘܢ ܠܰܩܕܳܡܰܝܗܽܘܢ. ܐܰܝܟܰܢܳܐ ܕܗܰܘ ܕܡܶܢ ܗܳܝ ܕܒܶܣܪܶܗ ܢܶܣܬܰܝܰܒ ܥܳܪܶܩ ܗ̱ܘܳܐ܆ ܡܫܰܘܚܪܳܐܺܝܬ ܒܕܽܘܟ ܐܶܡܰܬܝ ܕܗܽܘ ܢܺܐܠܰܦ ܗ̱ܘܳܐ܆ ܕܳܐܦ ܡܶܢ ܟܽܘܬܡܬ̣ܳܐ ܕܢܰܦܫܳܐ ܬܶܢܰܕ ܠܶܗ܆ ܘܡܶܢ ܥ̈ܒܳܕܶܐ ܡܺܝ̈ܬܶܐ ܗܳܠܶܝܢ ܕܒܰܚ̈ܛܳܗܶܐ ܢܶܬܪܰܚܰܩ. ܡܶܛܽܠܳܬܳܗ̇ ܟܺܝܬ ܕܗܳܕܶܐ ܡܦܰܩܶܕ ܗ̱ܘܳܐ ܡܰܢ ܗܘ ܟܰܕ ܐܳܡܰܪ: ܕܗܰܘ ܕܓܳܫܶܦ ܒܰܫ̈ܠܰܕܶܐ ܐܰܘܟܺܝܬ ܒܦܰܓܪ̈ܶܐ ܡܺܝ̈ܬܶܐ ܛܰܡܳܐܐ ܢܶܗܘܶܐ^[12]. ܕܰܘܺܝܕ ܕܶܝܢ ܟܰܕ ܠܰܩܕܳܡܰܘܗ̱ܝ ܪܳܕܶܐ ܗ̱ܘܳܐ ܘܡܶܫܬܰܘܫܰܛ܆ ܘܰܠܘܳܬ ܗܰܘܢܳܐ ܘܪܽܘܚܳܐ ܕܗܳܠܶܝܢ ܦܽܘܩ̈ܕܳܢܶܐ ܡܶܬܥܰܠܶܐ ܗ̱ܘܳܐ ܘܣܳܠܶܩ ܡܶܢ ܟܬܺܝܒܬܳܐ ܡܙܰܡܰܪ ܗ̱ܘܳܐ܆ ܐܰܣܓܳܐ ܐܰܫܺܝܓܰܝܢܝ ܡܶܢ ܠܳܐ ܢܳܡܽܘܣܳܝܽܘܬܳܐ ܕܺܝܠܝ܆ ܘܡܶܢ ܚܛܺܝܬܳܐ ܕܺܝܠܝ ܕܰܟܳܢܝ. ܘܠܶܒܳܐ ܕܰܟܝܳܐ ܒ̣ܪܺܝ ܒܺܝ ܐܰ‌ܠܳܗܳܐ^[13].

ܐܶܠܳܐ ܩܰܫܺܝ̈ܫܶܐ ܕܥܰܡܳܐ ܟܰܕ ܒܪܽܘܚܩܳܐ ܡܶܢ ܗܳܕܶܐ ܬܰܪܥܺܝܬܳܐ ܐܺܝܬܰܝܗܽܘܢ ܗ̱ܘܰܘ܆ ܘܶܐܣܬܰܡܺܝܘ ܗ̱ܘܰܘ ܒܰܟܬܺܝܒܬܳܐ܆ ܝܰܬܺܝܪ ܒܛܺܝܠܳܐܺܝܬ ܘܝܰܬܺܝܪ ܣܰܓܺܝ ܡܥܰܩܒܳܢܳܐܺܝܬ ܡܥܰܙܶܝܢ ܗ̱ܘܰܘ ܘܩܳܝܡܺܝܢ ܥܰܠ ܢܛܽܘܪ̈ܳܬܳܐ ܦܰܓܪ̈ܳܢܳܝܳܬܳܐ ܕܢܳܡܽܘܣܳܐ܆ ܐܰܝܟܰܢܳܐ ܕܳܐܦ ܥܰܠ ܗܳܠܶܝܢ ܨܶܒ̈ܘܳܬܳܐ ܡܶܕܶܡ ܩܰܪܺܝܪ̈ܳܬܳܐ ܢܶܦܩܽܘܢ܆ ܘܢܶܬܒܥܽܘܢ ܠܡܶܬܕܰܟܳܝܽܘ ܐܰܘܟܺܝܬ ܠܡܶܬܬܫܳܓܽܘ ܘܰܠܡܶܥܡܰܕ܆ ܐܳܦ ܥܰܪܣܳܐ ܐܳܦ ܥܰܦܪܳܐ܆ ܐܳܦ ܣܰܠܳܐ ܐܳܦ ܡܰܚܡܳܐ܆ ܐܶܢ ܡܶܕܶܡ ܒܗܳܠܶܝܢ ܡܶܢ ܗܳܢܶܝܢ ܡܺܝ̈ܬܳܬܳܐ ܢܶܦܶܠ܆ ܐܰܘ ܒܰܓܫܳܦܳܐ ܕܰܕܝܳܒܳܐ ܐܰܘ ܕܦܰܓܪܳܐ ܡܶܕܶܡ ܐ̱ܚܪܺܢܳܐ ܕܰܐܝܟ ܗܳܢܳܐ ܢܶܣܬܰܝܒܽܘܢ.

ܕܕܰܐܝܟ ܗܳܢܳܐ ܕܶܝܢ ܡܶܕܶܡ ܐܺܝܬܶܝܗ̇ ܗ̱ܘܳܬ܆ ܐܳܦ ܗܳܝ ܕܒܺܐܝ̈ܕܰܝܳܐ ܠܳܐ ܡܫ̈ܳܓܳܬܳܐ ܠܳܐ ܫܰܠܺܝܛ ܗ̱ܘܳܐ ܠܗܽܘܢ ܠܡܶܐܟܰܠ. ܘܰܠܗܳܠܶܝܢ ܟܽܠܗܶܝܢ ܟܢܺܝܫܳܐܺܝܬ܆ ܒܳܐܕܫܰܝ̈ܗܶܝܢ ܠܟܽܠ ܚܕܳܐ܆ ܐܶܘܰܢܓܶܠܺܝܣܛܳܐ ܡܰܪܩܽܘܤ ܐܶܬܶܥܗܶܕ ܐܶܢܶܝܢ܆ ܟܰܕ ܗܳܟܰܢܳܐ ܟܬܰܒ. ܐܳܦ ܓܶܝܪ ܦܪ̈ܺܝܫܶܐ ܘܟܽܠܗܽܘܢ ܝܽܗ̱̈ܘܕܳܝܶܐ܆ ܐܶܢ ܠܳܐ ܢܫܺܝܓܽܘܢ ܐܺܝ̈ܕܰܝܗܽܘܢ ܒܙܰܘܪ̈ܰܝܗܽܘܢ ܠܳܐ ܐܳܟܠܺܝܢ܆ ܐܰܝܟ ܡܰܫܠܡܳܢܽܘܬܳܐ ܗܳܝ ܕܩܰܫܺܝ̈ܫܶܐ. ܘܡܶܢ ܫܽܘܩܳܐ ܟܰܕ ܢܶܣܩܽܘܢ܆ ܐܶܢ ܠܳܐ ܢܶܥܡܕܽܘܢ ܠܳܐ ܐܳܟܠܺܝܢ. ܘܰܐ̱ܚܪ̈ܳܢܝܳܬܳܐ ܣܰܓܺܝ̈ܳܐܬܳܐ ܐܺܝܬܰܝܗܶܝܢ܆ ܗܳܠܶܝܢ ܕܩܰܒܶܠܘ ܠܡܶܠܒܰܟ. ܡܰܥܡܽܘܕܝ̈ܳܬܳܐ ܕܟܳܣ̈ܶܐ ܘܰܕܩܶܣ̈ܛܶܐ ܘܰܕܩܰܪ̈ܕܠܶܐ܆ ܘܰܕܥܰܪ̈ܣܳܬܳܐ^[14]. ܗܳܠܶܝܢ ܕܶܝܢ ܠܩܰܫܺܝ̈ܫܶܐ܆ ܘܠܰܦܪ̈ܺܝܫܶܐ ܛܰܢܳܢ̈ܶܐ ܕܗܳܠܶܝܢ܆ ܘܰܠܣܳܦܪ̈ܶܐ ܡܶܬܝܰܨ̈ܦܳܢ ܗ̱ܘܰܝ̈. ܩܰܕܡܳܐܺܝܬ ܡܰܢ܆ ܡܶܛܽܠ ܝܽܘܬܪܳܢܳܐ ܛܰܢܦܳܐ. ܐܰܝܟܰܢܳܐ ܕܗܳܢܽܘܢ ܕܰܒܚ̈ܰܒܠܶܐ ܕܩܰܛܺܝܢܽܘܬ ܡܶܠܬܳܐ ܕܕܰܐܝܟ ܗܳܕܶܐ ܡܶܬܥܰܪܙܠܺܝܢ܆ ܣܒܺܝܣܳܐܺܝܬ ܢܶܗܘܽܘܢ ܐܳܙܺܠ̱ܝܢ ܠܘܳܬܗܽܘܢ ܐܰܝܟ ܐܰܝܠܶܝܢ ܕܶܐܣܬܰܝܰܒܘ. ܐܰܘ ܟܰܕ ܡܩܰܪܒܺܝܢ ܚܠܳܦ ܕܽܘܟܳܝܳܐ܆ ܐܰܘ ܟܰܕ ܡܫܰܐܠܺܝܢ ܘܡܶܬܝܰܠܦܺܝܢ܆ ܐܳܦ ܐܰܓܪܳܐ ܡܰܪܡܶܝܢ ܚܠܳܦ ܡܰܠܦܳܢܽܘܬܳܐ ܡܥܰܩܒܳܢܺܝܬܳܐ ܕܡܶܢ ܝܰܬܺܝܪܽܘ. ܡܶܛܽܠ ܗܳܕܶܐ ܗܽܘ ܡܳܪܰܢ܆ ܥܰܠ ܗܳܢܽܘܢ ܕܕܰܐܝܟ ܗܳܠܶܝܢ ܡܕܰܡܰܥ ܗ̱ܘܳܐ ܟܰܕ ܐܳܡܰܪ: ܘܳܝ ܠܟܽܘܢ ܣܳܦܪ̈ܶܐ ܘܰܦܪ̈ܺܝܫܶܐ ܡܨܰܕܝܳܢ̈ܶܐ܆ ܕܰܡܕܰܟܶܝܢ ܐܢ̱ܬܽܘܢ ܒܰܪܶܗ ܕܟܳܣܳܐ ܘܰܕܙܳܒܽܘܪܳܐ܆ ܡܶܢ ܠܓܰܘ ܕܶܝܢ ܡܠܶܝܢ ܚܛܽܘܦܝܳܐ ܘܛܰܢܦܽܘܬܳܐ. ܦܪܺܝܫܳܐ ܣܰܡܝܳܐ܆ ܕܰܟܳܐ ܠܽܘܩܕܰܡ ܓܰܘܶܗ ܕܟܳܣܳܐ ܘܰܕܙܳܒܽܘܪܳܐ܆ ܐܰܝܟܰܢܳܐ ܕܢܶܗܘܶܐ ܐܳܦ ܒܰܪܗܽܘܢ ܕܰܟܝܳܐ^[15]. ܒܳܬܰܪܟܶܢ ܕܶܝܢ ܣܰܓܺܝܐܬܳܐ ܐܺܝܬܶܝܗ̇ ܗ̱ܘܳܬ ܠܗܽܘܢ ܡܶܠܬܳܐ܆ ܐܳܦ ܕܗܳܝ ܕܰܢܨܺܝܕܽܘܢ ܠܗܽܘܢ ܫܽܘܒܚܳܐ ܣܪܺܝܩܳܐ܆ ܘܳܐܦ ܗܳܝ ܕܢܶܣܒܪܽܘܢ ܕܰܒܝܰܕ ܦܽܘ̈ܩܳܕܶܐ ܘܡܰܫ̈ܠܡܳܢܘܳܬܳܐ܆ ܐܺܝܩܳܪܳܐ ܘܫܽܘܠܛܳܢܳܐ ܕܣܳܝ̈ܡܰܝ ܢܳܡܽܘܣܳܐ ܚܳܛܦܺܝܢ ܠܗܽܘܢ.

ܟܰܕ ܒܗܳܢܳܐ ܗܳܟܺܝܠ ܙܢܳܐ ܬܥܺܝܫܳܐܺܝܬ ܘܕܳܘܝܳܐܺܝܬ ܣܺܝܡܺܝܢ ܗ̱ܘܰܘ܆ ܩܪܶܒܘ ܠܘܳܬ ܝܶܫܽܘܥ ܣܳܦܪ̈ܶܐ ܘܰܦܪ̈ܺܝܫܶܐ ܗܳܢܽܘܢ ܕܡܶܢ ܐܽܘܪܶܫܠܶܡ ܟܰܕ ܐܳܡܪܺܝܢ: ܡܶܛܽܠ ܡܳܢܳܐ ܬܰܠ̈ܡܺܝܕܶܐ ܕܺܝܠܳܟ ܥܳܒܪܺܝܢ ܥܰܠ ܡܰܫܠܡܳܢܽܘܬܳܐ ܕܩܰܫܺܝ̈ܫܶܐ. ܠܳܐ ܓܶܝܪ ܡܫܺܝܓܺܝܢ ܐܺܝ̈ܕܰܝܗܽܘܢ ܐܶܡܰܬܝ ܕܳܐܟܠܺܝܢ ܠܰܚܡܳܐ^[16].

ܕܡܳܢܳܐ ܕܶܝܢ ܨܳܒܝܳܐ ܗܳܝ ܕܬܰܘܣܶܦܬܳܐ܆ ܫܳܘܝܳܐ ܕܢܰܘܕܰܥ. ܐܰܝ̇ܕܳܐ ܗ̱ܝ ܗܳܟܺܝܠ ܗܳܕܶܐ܆ ܗܳܝ ܕܶܐܡܰܪ ܗܳܢܽܘܢ ܕܡܶܢ ܐܽܘܪܶܫܠܶܡ܆ ܘܠܰܘ ܦܫܺܝܛܳܐܺܝܬ ܗܳܟܰܢܳܐ ܣܳܦܪ̈ܶܐ ܘܰܦܪ̈ܺܝܫܶܐ. ܡܶܛܽܠ ܕܟܰܕ ܬܪܶܥܣܰܪ ܫܰܒ̈ܛܶܐ ܐܺܝܬܰܝܗܽܘܢ ܗ̱ܘܰܘ܆ ܘܰܒ̈ܦܶܨܶܐ ܒܰܐܪܥܳܐ ܗܳܝ ܕܡܽܘܠܟܳܢܳܐ ܡܦܰܠܓܺܝܢ ܗ̱ܘܰܘ܆ ܫܰܒܛܳܐ ܗܰܘ ܕܺܝܗܽܘܕܳܐ ܘܗܰܘ ܕܒܶܢܝܳܡܺܝܢ܆ ܠܰܡܢܳܬܳܐ ܗܳܝ ܕܰܚܕܳܪ̈ܰܝ ܐܽܘܪܶܫܠܶܡ ܐܰܚܺܝܕܺܝܢ ܗ̱ܘܰܘ. ܟܰܕ ܗܳܠܶܝܢ ܥܶܣܪܳܐ ܫܰܒ̈ܛܶܐ ܐ̱ܚܪ̈ܳܢܶܐ܆ ܒܗܳܠܶܝܢ ܡܢܰܘ̈ܳܬܳܐ ܕܫܰܪܟܳܐ ܒܕܺܝܪܺܝܢ ܗ̱ܘܰܘ܆ ܘܰܤܛܰܘ ܐܰܟܚܕܳܐ ܘܰܐܪܚܶܩܘ ܡܳܪܽܘܕܳܐܺܝܬ ܥܰܡ ܝܽܘܪܰܒܥܰܡ܆ ܐܶܡܰܬܝ ܕܫܳܠܽܘܡܽܘܢ ܡܰܡܠܶܟ ܗ̱ܘܳܐ܆ ܘܰܠܘܳܬ ܥܶܓ̈ܠܶܐ ܕܕܰܗܒܳܐ ܠܣܶܓܕܬܳܐ ܕܰܐ‌ܠܳܗܳܐ ܫܰܚܠܶܦܘ̱. ܐܶܠܳܐ ܐܳܦ ܡܶܢ ܒܳܬܰܪ ܫܶܒܝܳܐ ܗܰܘ ܕܢܰܒܽܘܟ̥ܳܕܢܰܨܰܪ܆ ܘܡܶܬܬܰܘܒܠܳܢܽܘܬܗܽܘܢ ܕܰܠܒܶܝܬ ܐܳܬܽܘܪ̈ܳܝܶܐ ܘܦܽܘܢܳܝܗܽܘܢ ܕܡܶܢ ܬܰܡܳܢ܆ ܗܳܢܽܘܢ ܕܡܶܢ ܝܺܗܽܘܕܳܐ ܘܒܶܢܝܡܝܢ܆ ܕܺܝܠܗܽܘܢ ܟܰܕ ܕܺܝܠܗܽܘܢ ܕܦ̈ܶܨܶܐ ܐܺܝܬܰܝܗܽܘܢ ܗ̱ܘܰܘ ܐܳܚ̈ܽܘܕܶܐ܆ ܘܕܺܝܠܳܗ̇ ܕܰܡܕܺܝܢ̱ܬܳܐ ܢܳܩܦܳܐܺܝܬ ܐܽܘܪܶܫܠܶܡ܆ ܘܳܐܦ ܐܺܝܬ ܗ̱ܘܳܐ ܠܗܽܘܢ ܝܰܨܺܝܦܽܘܬܳܐ ܕܚܰܬܺܝܬܽܘܬܳܐ ܕܢܳܡܽܘܣܳܐ ܘܕܰܥ̈ܝܳܕܶܐ ܐܰܒܳܗ̈ܳܝܶܐ. ܠܗܳܠܶܝܢ ܕܶܝܢ ܥܶܣܪܳܐ ܫܰܒ̈ܛܶܐ ܐ̱ܚܪ̈ܳܢܶܐ܆ ܒܝܰܘ̈ܡܰܝ ܗܽܘܫܳܥ ܒܪܶܗ ܕܺܐܝܠܰܐ ܡܰܠܟܳܐ ܕܺܐܝܣܪܳܐܶܝܠ܆ ܟܰܕ ܫܰܒܳܝ̈ܶܐ ܐܰܘܒܶܠ ‌ܐܶܢܽܘܢ ܫܰܐܠܡܰܢܰܥܣܰܪ ܗܰܘ ܐܳܬܽܘܪܳܝܳܐ܆ ܒܰܬܚܽܘܡ̈ܶܐ ܕܡܳܕ̣ܝ̈ܶܐ ܐܰܥܡܰܪ ܐܶܢܽܘܢ. ܘܰܠܘܳܬ ܐܰܪܥܳܐ ܗܳܝ ܕܺܝܠܗܽܘܢ܆ ܡܶܢ ܒܳܒܠ ܘܡܶܢ ܥܰܡܡ̈ܶܐ ܘܰܐܬܪ̈ܰܘܳܬܳܐ ܫܒܳܒܰܝ̈ܗܽܘܢ܆ ܫܰܕܰܪ ܓܰܒܪ̈ܶܐ ܚܠܳܦܰܝܗܽܘܢ. ܗܳܢܽܘܢ ܟܺܝܬ ܕܡܶܢ ܚܰܝ̈ܘܳܬ ܫܶܢܳܐ ܡܶܬܛܰܠܩܺܝܢ ܐܰܘܟܺܝܬ ܡܶܬܩܰܛܠܺܝܢ ܗ̱ܘܰܘ ܘܡܶܬܚܰܪܒܺܝܢ܆ ܥܕܰܡܳܐ ܕܶܐܬܳܐ ܠܘܳܬܗܽܘܢ ܐ̱ܢܳܫ ܡܶܢ ܟܳܗ̈ܢܶܐ ܗܳܢܽܘܢ ܕܡܶܢ ܫܒܺܝܬܳܐ܆ ܕܡܰܠܶܦ ܠܗܽܘܢ ܢܳܡܽܘܣܳܐ ܕܡܽܘܫܶܐ. ܗܳܢܽܘܢ ܕܳܐܦ ܚܠܺܝܛܳܐܺܝܬ ܠܰܐܠܳܗܳܐ ܕܢܳܡܽܘܣܳܐ܆ ܘܳܐܦ ܠܫ̈ܺܐܕܶܐ ܦܳܠܚܺܝܢ ܗ̱ܘܰܘ܆ ܐܰܝܟܰܢܳܐ ܕܳܐܦ ܟܬܳܒܳܐ ܗܰܘ ܟܳܗܢܳܝܳܐ ܐܳܡܰܪ. ܘܺܐܝܬܰܝܗܽܘܢ ܗ̱ܘܰܘ ܥܰܡܡ̈ܶܐ ܗܳܠܶܝܢ܆ ܕܕܳܚܠܺܝܢ ܠܡܳܪܝܳܐ܆ ܘܠܰܓ̈ܠܺܝܦܶܐ ܕܺܝܠܗܽܘܢ܆ ܦܳܠܚܺܝܢ ܗ̱ܘܰܘ. ܐܳܦ ܟܺܝܬ ܒܢܰܝ̈ܳܐ ܕܺܝܠܗܽܘܢ ܘܰܒ̈ܢܰܝܳܐ ܕܰܒܢܰܝ̈ܗܽܘܢ܆ ܐܰܝܟܰܢܳܐ ܕܰܥܒܰܕܘ ܐܰܒ̈ܳܗܶܐ ܕܺܝܠܗܽܘܢ ܗܶܢܽܘܢ ܥܳܒܕܺܝܢ ܥܕܰܡܳܐ ܠܝܰܘܡܳܐ ܗܳܢܳܐ^[17]. ܐܰܝܟܰܢܳܐ ܕܳܐܦ ܟܽܠܗܽܘܢ ܗܳܢܽܘܢ ܕܡܶܢ ܒܳܬܰܪܟܶܢ܆ ܒܗܳܠܶܝܢ ܐܰܬܪ̈ܰܘܳܬܳܐ ܕܰܐܪܥܳܐ ܗܳܝ ܥܳܡܪܺܝܢ ܗ̱ܘܰܘ ܘܕܽܘܝܳܪܳܐ ܥܳܒܕܺܝܢ ܗ̱ܘܰܘ܆ ܥܰܒܝܽܘܬܳܐ ܘܰܚܠܺܝܛܽܘܬܳܐ ܡܕܰܘܰܕܬܳܐ܆ ܘܠܳܐ ܡܦܰܪܫܽܘܬܳܐ ܕܣܶܓ̈ܕܳܬܳܐ ܐܳ‌ܠܨܳܐܺܝܬ ܟܪܺܝܗܺܝܢ ܗ̱ܘܰܘ. ܗܳܕܶܐ ܗܳܟܺܝܠ ܡܫܰܘܕܥܳܐ ܗܳܝ ܬܰܘܣܶܦܬܳܐ܆ ܕܗܳܝ ܕܗܳܝܕܶܝܢ ܩܳܪܒܺܝܢ ܠܘܳܬ ܝܶܫܽܘܥ ܗܳܢܽܘܢ ܕܡܶܢ ܐܽܘܪܶܫܠܶܡ܆ ܗܳܢܰܘ ܕܶܝܢ ܗܳܢܽܘܢ ܕܡܶܢܳܗ̇ ܕܡܺܝܛܪܽܘܦܽܘܠܺܝܤ ܐܰܘܟܺܝܬ ܐܶܡܳܐ ܕܰܡܕܺܝܢ̈ܳܬܳܐ܆ ܐܰܝܟܳܐ ܕܗܰܝܟܠܳܐ܆ ܐܰܝܟܳܐ ܕܕܶܒܚܬܳܐ ܢܳܡܽܘܣܳܝܬܳܐ܆ ܘܛܶܟܣܳܐ ܗܰܘ ܕܫܰܪܟܳܐ ܕܰܡܕܰܟܝܳܢܽܘܬܳܐ ܘܕܽܘܝܳܪܳܐ ܗܰܘ ܕܰܒܩܽܘ̈ܕܫܶܐ. ܗܳܢܽܘܢ ܕܰܠܚܰܬܺܝܬ̣ܽܘܬ̣ܳܐ ܡܪܰܘܪܒܺܝܢ ܘܰܡܒܰܓܒܓܺܝܢ܆ ܘܠܰܓܒܺܝܢܳܐ ܗܰܘ ܕܡܶܢ ܬܰܡܳܢ ܠܥܶܠ ܡܪܺܝܡܺܝܢ܆ ܘܰܠܡܰܫܠܡܳܢܽܘܬܳܐ ܕܩܰܫܺܝ̈ܫܶܐ ܣܰܓܺܝ ܟܢܺܝܟܳܐܺܝܬ ܡܫܰܡܗܺܝܢ܆ ܘܰܠܗܳܝ ܕܒܺܐܝ̈ܕܰܝܳܐ ܠܳܐ ܡܫܳܓ̈ܳܬܳܐ ܢܶܐܟܽܘܠ ‌ܐ̱ܢܳܫ^[18]܆ ܐܰܝܟ ܥܶܕܠܳܝܳܐ ܕܣܰܓܺܝ ܪܰܒ ܡܚܰܝܒܺܝܢ ܘܰܡܬܰܪܨܺܝܢ.

ܡܳܢܳܐ ܗܳܟܺܝܠ ܝܶܫܽܘܥ ܐܰ‌ܠܳܗܳܐ܆ ܗܰܘ ܡܶܠܬܳܐ܆ ܗܰܘ ܚܶܟܡܬܳܐ ܕܰܐܒܳܐ܆ ܡܦܰܢܶܐ ܦܶܬܓܳܡܳܐ ܘܳܐܡܰܪ: ܠܰܘ ܓܰܠܝܳܐܺܝܬ ܫܳܪܶܐ ܠܳܗ̇ ܠܡܰܪܫܽܘܬܳܐ܆ ܟܰܕ ܡܶܫܟܰܚ ܗ̱ܘܳܐ ܠܡܺܐܡܰܪ ܠܗܽܘܢ܆ ܕܠܳܐ ܐܺܝܬ ܠܗܽܘܢ ܣܽܘܢܩܳܢܳܐ ܠܬܰܠ̈ܡܺܝܕܶܐ ܠܰܡܫܳܓܽܘ ܐܺܝ̈ܕܰܝܳܐ ܕܦܰܓܪܳܐ ܟܰܕ ܠܰܨܠܺܝܒܳܐ ܕܺܝܠܗܽܘܢ ܫܩܰܠܘ ܘܰܢܩܶܦܘ ܒܳܬܰܪܝ܆ ܘܡܶܢ ܟܽܠܶܗ ܦܽܘܠܚܳܢܳܐ ܒܺܝܫܳܐ ܕܟܶܝܢ܆ ܘܠܺܐܝ̈ܕܰܝܳܐ ܡܶܬܗܰܘܢܳܢ̈ܝܳܬܳܐ ܕܠܶܒܳܐ ܐܰܫܺܝܓܘ ܒܕܰܟܝܽܘܬܳܐ܆ ܘܚܰܝ̈ܶܐ ܕܠܳܐ ܐܽܘܡܳܢܽܘ ܘܰܦܫܺܝ̈ܩܶܐ ܘܰܕܩܰܠܺܝܠܳܐܺܝܬ ܡܶܢ ܢܰܦܫܗܽܘܢ ܡܶܫܬܰܟܚܺܝܢ ܐܰܝܟ ܕܳܐܬܝܳܐ ܚܳܐܶܝܢ܆ ܐܰܝܟܰܢܳܐ ܕܳܐܦ ܫܶܒ̈ܠܶܐ ܐܺܝܬ ܐܶܡܰܬܝ ܢܶܡܠܓܽܘܢ܆ ܘܗܳܟܰܢܳܐ ܢܡܰܠܽܘܢ ܐܳ‌ܠܨܳܝܽܘܬܶܗ ܕܬܽܘܪܣܳܝܳܐ. ܠܳܐ ܗܳܟܺܝܠ ܟܺܐܢܳܐܺܝܬ ܪܳܫܶܐ ܐ̱ܢܳܫ ܠܗܳܢܽܘܢ ܕܰܐܝܟ ܗܳܠܶܝܢ܆ ܕܟܰܕ ܠܳܐ ܡܫܺܝܓܺܝܢ ܐܳܟܠܺܝܢ܆ ܐܰܝܟܰܢܳܐ ܕܳܐܦܠܳܐ ܠܦܳܪ̈ܚܳܬܳܐ ܕܰܡ̈ܠܰܩܛܳܢ ܙܰܪ̈ܥܽܘܢܶܐ. ܟܰܕ ܓܶܝܪ ܒܰܡܥܰܠܝܽܘܬܳܐ ܕܰܡܝܰܬܪܽܘܬܳܐ ܣܚܰܘ܆ ܘܡܶܢ ܟܽܠܳܗ̇ ܒܺܝܫܽܘܬܳܐ ܐܰܫܺܝܓܘ ܘܰܡܪܰܩܘ ܠܒܰܪܢܳܫܳܐ ܕܰܠܓܰܘ܆ ܝܰܬܺܝܪ̈ܶܐ ܚܰܘܺܝܘ ܐܶܢܽܘܢ ܠܡܰܝ̈ܳܐ ܗܳܢܽܘܢ ܕܡܰܫܠܡܳܢܽܘܬܳܐ ܕܩܰܫܺܝ̈ܫܶܐ܆ ܗܳܢܽܘܢ ܕܠܺܐܝ̈ܕܰܝܳܐ ܕܡܶܢ ܠܒܰܪ ܡܫܺܝܓܺܝܢ. ܗܳܟܰܢܳܐ ܓܶܝܪ ܐܳܦ ܦܶܛܪܽܘܤ ܫܳܡܰܥ ܗ̱ܘܳܐ. ܗܰܘ ܕܰܣܚܶܐ܆ ܠܳܐ ܐܺܝܬ ܠܶܗ ܣܽܘܢܩܳܢܳܐ ܠܰܡܫܳܓܽܘ. ܐܶܠܳܐ ܟܽܠܶܗ ܕܰܟܝܳܐ ܐܺܝܬܰܘܗ̱ܝ^[19].

ܐܶܠܳܐ ܬܰܠ̈ܡܺܝܕܶܐ ܡܰܢ ܐܳܡܰܪ: ܠܡܰܫܠܡܳܢܽܘܬܳܐ ܠܳܐ ܥܒܰܪܘ ܐܰܝܟܰܢܳܐ ܕܰܐܢ̱ܬܽܘܢ ܐܳܡܪܺܝܢ ܐܢ̱ܬܽܘܢ. ܐܳܦ ܓܶܝܪ ܠܰܘ ܟܰܕ ܡܰܒܣܶܝܢ܆ ܐܳܦܠܳܐ ܪܰܦܝܳܐܺܝܬ ܘܡܰܪܗܝܳܐܺܝܬ ܘܟܰܕ ܒܰܒܣܳܡܳܐ ܚܳܐܝܶܢ܆ ܥܰܒܪܽܘܗ̇ ܠܗܳܕܶܐ. ܐܶܠܳܐ ܒܰܡܥܰܠܝܽܘܬܳܐ ܕܢܰܨܺܝܚܽܘܬܳܐ ܗܳܝ ܕܰܒܢܰܦܫܳܐ܆ ܚܰܦܝܽܘܗ̇ ܠܰܙܥܽܘܪܽܘܬ ܦܰܐܝܽܘܬܳܐ ܕܺܝܠܳܗ̇܆ ܗܳܝ ܕܰܥܕܰܡܳܐ ܠܕܽܘܟܳܝܳܐ ܕܦܰܓܪܳܐ ܒܰܠܚܽܘܕ ܩܳܝܡܳܐ܆ ܐܰܟܙܢܳܐ ܕܳܐܦ ܗܰܘ ܕܶܐܬܦܰܩܰܕ ܕܠܳܐ ܢܶܪܓܰܙ ܘܢܳܛܰܪ ܠܶܗ ܠܦܽܘܩܕܳܢܳܐ܆ ܝܰܬܺܝܪܳܐ ܡܚܰܘܶܐ ܠܶܗ ܠܦܽܘܩܕܳܢܳܐ ܗܰܘ ܕܳܐܡܰܪ܆ ܕܠܳܐ ܬܶܩܛܽܘܠ^[20]. ܗܰܘ ܓܶܝܪ ܕܰܠܘܳܬ ܪܽܘܓܙܳܐ ܠܳܐ ܢܳܦܶܩ܆ ܐܰܝܟܰܢܳܐ ܠܘܳܬ ܩܶܛܠܳܐ ܐܳܬܶܐ.

ܗܳܠܶܝܢ ܡܰܢ ܗܳܟܺܝܠ ܒܳܗ̇ ܒܡܶܠܬܳܐ ܠܳܐ ܐܶܡܰܪ ܡܳܪܰܢ. ܪܳܡܶܙ ܠܗܶܝܢ ܕܶܝܢ ܒܝܰܕ ܗܳܠܶܝܢ ܕܰܠܩܽܘܒܠܳܐ܆ ܐܰܝܟܰܢܳܐ ܕܰܡܚܰܘܶܝܢ ܚ̱ܢܰܢ ܟܰܕ ܡܶܫܬܰܘܫܛܳܐ ܡܶܠܬܳܐ܆ ܟܰܕ ܩܳܐܶܡ ܡܰܢ ܠܘܳܬ ܡܰܦܰܩ ܒܪܽܘܚܳܐ ܕܥܶܕܠܳܝܳܐ ܗܰܘ ܕܶܐܬܬܰܝܬܺܝ ܥܰܠ ܬܰܠ̈ܡܺܝܕܶܐ ܡܶܢ ܦܪ̈ܺܝܫܶܐ ܘܣܳܦܪ̈ܶܐ܆ ܟܰܕ ܗܳܦܶܟ ܕܶܝܢ ܗܽܘ ܥܳܕܶܠ ܠܗܽܘܢ ܘܣܰܓܺܝ ܩܰܫܝܳܐܺܝܬ. ܟܰܕ ܓܶܝܪ ܗܳܢܽܘܢ ܠܡܰܫܠܡܳܢܽܘܬܳܐ ܕܩܰܫܺܝ̈ܫܶܐ ܐܰܝܬܺܝܘ ܠܰܡܨܰܥܬܳܐ܆ ܠܳܐ ܐܶܡܰܪ ܡܶܛܽܠ ܡܳܢܳܐ ܐܳܦ ܗܶܢܽܘܢ ܩܰܫܺܝ̈ܫܶܐ ܥܳܒܪܺܝܢ ܥܰܠ ܦܽܘܩܕܳܢܳܐ ܕܰܐ‌ܠܳܗܳܐ܆ ܡܶܛܽܠ ܡܰܫܠܡܳܢܽܘܬܳܐ ܕܺܝܠܗܽܘܢ. ܘܶܐܢ ܕܶܝܢ ܠܳܐ܆ ܡܶܣܬܰܒܪܺܝܢ ܗ̱ܘܰܘ ܠܗܽܘܢ ܗܶܢܽܘܢ ܦܪ̈ܺܝܫܶܐ܆ ܕܠܰܘ ܚܠܳܦ ܚܰܫܳܐ ܒܰܝܬܳܝܳܐ ܕܺܝܠܗܽܘܢ ܥܳܒܕܺܝܢ ܗ̱ܘܰܘ ܬܒܰܥܬܳܐ܆ ܐܶܠܳܐ ܕܰܚܠܳܦ ܐ̱ܚܪ̈ܳܢܶܐ ܥܳܒܕܺܝܢ ܗ̱ܘܰܘ ܣܢܺܐܓܪܽܘܬܳܐ. ܘܰܒܗܳܕܶܐ ܠܗܳܢܽܘܢ ܕܫܳܡܥܺܝܢ ܗ̱ܘܰܘ܆ ܠܘܳܬ ܣܽܘܝܳܥܗܽܘܢ ܢܳܓܕܺܝܢ ܗ̱ܘܰܘ. ܐܶܠܳܐ ܐܶܡܰܪ܆ ܡܶܛܽܠ ܡܳܢܳܐ ܐܳܦ ܐܰܢ̱ܬܽܘܢ ܥܳܒܪܺܝܢ ܐܢ̱ܬܽܘܢ^[21]܆ ܟܰܕ ܠܟܽܠܳܗ̇ ܩܛܺܓܪܳܢܽܘܬܳܐ ܥܠܰܝܗܽܘܢ ܡܰܗܦܶܟ ܗ̱ܘܳܐ ܠܳܗ̇܆ ܘܟܰܕ ܥܳܪܶܩ ܗ̱ܘܳܐ ܡܶܢ ܗܳܝ ܕܥܰܠ ܩܰܫܺܝ̈ܫܶܐ ܐܳܦ ܟܰܕ ܪܰܚܺܝܩܺܝܢ ܢܶܙܩܽܘܪ ܥܶܕܠܳܝܳܐ ܘܢܰܦܶܩ ܦܣܳܩܳܐ.

ܡܳܢܳܐ ܗܳܟܺܝܠ ‌ܐܺܝܬܰܘܗ̱ܝ ܗ̱ܘܳܐ ܗܽܘ ܥܒܽܘܪܝܳܐ ܕܦܽܘܩܕܳܢܳܐ ܢܶܚܙܶܐ. ܐܰ‌ܠܳܗܳܐ ܐܳܡܰܪ ܦܩܰܕ ܟܰܕ ܐܳܡܰܪ: ܝܰܩܰܪ ܠܰܐܒܽܘܟ ܘܠܶܐܡܳܟ܆ ܘܗܰܘ ܕܰܡܨܰܚܶܐ ܠܰܐܒܳܐ ܐܰܘ ܠܶܐܡܳܐ܆ ܒܡܰܘܬܳܐ ܢܡܽܘܬ. ܐܰܢ̱ܬܽܘܢ ܕܶܝܢ ܐܳܡܪܺܝܢ ܐܢ̱ܬܽܘܢ. ܕܗܰܘ ܕܶܐܢ ܢܺܐܡܰܪ ܠܰܐܒܳܐ ܐܰܘ ܠܶܐܡܳܐ܆ ܩܽܘܪܒܳܢܳܐ ܐܺܝܬܰܘܗ̱ܝ ܗܰܘ ܡܳܐ ܕܡܶܢܝ ܬܺܐܬ̣ܰܪ܆ ܠܳܐ ܢܝܰܩܰܪ ܠܰܐܒܽܘܗ̱ܝ ܐܰܘ ܠܶܐܡܶܗ܆ ܘܒܰܛܶܠܬܽܘܢ ܠܦܽܘܩܕܳܢܳܐ ܕܰܐ‌ܠܳܗܳܐ ܡܶܛܽܠ ܡܰܫܠܡܳܢܽܘܬܳܐ ܕܺܝܠܟܽܘܢ^[22]. ܚܳܙܶܐ ܐܰܢ̱ܬ ܐܰܝܟܰܢܳܐ ܠܥܶܠ ܘܰܠܬܰܚܬ܆ ܠܘܳܬܗܽܘܢ ܡܳܬܰܚ ܠܳܗ̇ ܠܡܶܠܬܳܐ ܕܰܩܛܺܓܪܳܢܽܘܬܳܐ܆ ܒܰܙܒܰܢ ܡܰܢ ܟܰܕ ܐܳܡܰܪ ܐܰܢ̱ܬܽܘܢ ܕܶܝܢ ܐܳܡܪܺܝܢ ܐܢ̱ܬܽܘܢ܆ ܒܰܙܒܰܢ ܕܶܝܢ ܬܽܘܒ ܡܶܛܽܠ ܡܰܫܠܡܳܢܽܘܬܐ ܕܺܝܠܟܽܘܢ܆ ܟܰܕ ܘܠܳܐ ܣܳܟ ܐܶܬܥܰܗܰܕ ܠܩܰܫܺܝ̈ܫܶܐ.

ܐܶܠܳܐ ܟܒܰܪ ܬܺܐܡܰܪ ܕܡܶܣܬܰܒܪܳܐ ܠܺܝ܆ ܕܳܐܦܠܳܐ ܚܕܳܐ ܠܳܚܡܽܘܬܳܐ ܢܳܛܪ̈ܳܢ ܗܳܠܶܝܢ ܕܰܟܬܺܝ̈ܒܳܢ. ܡܳܢܳܐ ܓܶܝܪ ܡܫܰܘܬܰܦ ܠܡܰܪܫܽܘܬܳܐ ܗܳܝ ܕܰܦܪ̈ܺܝܫܶܐ ܘܰܕܣܳܦܪ̈ܶܐ ܕܡܶܬܥܰܕܠܳܐ ܘܪܳܫܝܳܐ ܥܰܠ ܠܳܐ ܡܶܬܬܫܺܝܓܳܢܽܘܬܳܐ ܕܺܐܝ̈ܕܰܝܳܐ܆ ܦܽܘܩܕܳܢܳܐ ܗܰܘ ܕܦܳܩܶܕ ܕܙܳܕܶܩ ܕܢܶܬܝܰܩܪܽܘܢ ܐܰܒܳܗ̈ܶܐ. ܐܶܠܳܐ ܐܶܢܗܽܘ ܕܰܬܟܰܬܰܪ܆ ܬܶܚܙܶܐ ܕܣܰܓܺܝ ܐܺܝܬܶܝܗ̇ ܫܰܠܡܽܘܬܗܶܝܢ ܕܗܳܠܶܝܢ ܕܶܐܬܶܐܡܰܪ̈ܝ̱ ܘܰܕܣܰܓܺܝ ܩܰܪ̈ܺܝܒܳܢ܆ ܘܕܳܐܦܠܳܐ ܣܳܟ ܪ̈ܰܚܺܝܩܳܢ.

ܟܰܕ ܓܶܝܪ ܒܪܶܚܡܰܬ ܟܶܣܦܳܐ ܐܰܝܟ ܕܶܐܡܪܶܬ ܟܪܺܝܗܺܝܢ ܗ̱ܘܰܘ ܩܰܫܺܝ̈ܫܶܐ ܘܰܦܪ̈ܺܝܫܶܐ ܘܣܳܦܪ̈ܶܐ܆ ܚܳܕܶܝܢ ܗ̱ܘܰܘ ܒܰܡܥܰܩܒܳܢܽܘܬܳܐ ܕܡܶܛܽܠ ܡܰܫ̈ܠܡܳܢܘܳܬܳܐ. ܘܟܰܕ ܚܳܙܶܝܢ ܗ̱ܘܰܘ ܕܰܡܣܰܓܶܦ ܗ̱ܘܳܐ ܠܗܽܘܢ ܦܽܘܩܕܳܢܳܐ ܗܰܘ ܕܳܐܡܰܪ ܕܝܰܩܰܪ ܠܰܐܒܳܐ ܘܠܶܐܡܳܐ^[23]܆ ܘܰܠܝܽܘܬܪܳܢܳܐ ܗܰܘ ܕܡܶܬܺܝܨܶܦ ܗ̱ܘܳܐ ܠܗܽܘܢ ܦܳܣܶܩ ܗ̱ܘܳܐ܆ ܡܳܢܳܐ ܡܶܬܦܰܪܣܺܝܢ ܘܠܰܐܝܟܳܐ ܢܳܦܩܺܝܢ܆ ܐܶܬܒܰܩܳܐ. ܣܳܟܪܺܝܢ ܓܶܝܪ ܘܰܡܩܺܝܡܺܝܢ ܠܩܽܘܒܠܶܗ ܐܰܝܟ ܕܠܰܫܪܳܝܶܗ܆ ܠܦܽܘܩܕܳܢܳܐ ܗܰܘ ܕܝܰܬܺܝܪ ܪܰܒ ܒܛܶܟܣܳܐ ܘܰܒܚܰܝܠܳܐ ܝܰܬܺܝܪ ܡܶܢ ܟܽܠܗܽܘܢ܆ ܗܰܘ ܕܣܳܡ ܢܳܡܽܘܣܳܐ ܘܰܦܩܰܕ: ܕܬܶܪܚܰܡ ܠܡܳܪܝܳܐ ܐܰ‌ܠܳܗܳܐ ܕܺܝܠܳܟ ܡܶܢ ܟܽܠܶܗ ܠܶܒܳܟ^[24]. ܒܢܰܝ̈ܳܐ ܓܶܝܪ܆ ܟܽܠܗܶܝܢ ܗܳܠܶܝܢ ܕܶܐܢ ܩܢܶܝܢ ܗ̱ܘܰܘ܆ ܠܰܐܒܳܗܰܝ̈ܗܽܘܢ ܡܰܘܣܦܺܝܢ ܥܳܒܕܺܝܢ ܗ̱ܘܰܘ ܝܽܘܬܪܳܢܳܐ܆ ܟܰܕ ܝܳܗܒܺܝܢ ܗ̱ܘܰܘ ܠܗܶܝܢ ܠܗܽܘܢ. ܐܰܝܟܰܢܳܐ ܕܢܶܣܬܰܒܪ̈ܳܢ ܕܰܕܗܳܢܽܘܢ ܡܰܠܽܘܢ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܕܶܐܬܩ̈ܢܺܝ̣ܶܢ܆ ܘܠܰܘ ܕܺܝܠܗܽܘܢ ܕܢܰܦܫܗܽܘܢ. ܗܳܝ ܟܺܝܬ ܕܳܐܦ ܪܺܝܫ ܐܰܒܳܗ̈ܳܬܳܐ ܝܰܥܩܽܘܒ ܐܰܘܕܰܥ. ܫܶܡܥܽܘܢ ܓܶܝܪ ܘܠܶܘܺܝ ܠܰܡܕܺܝܢ̱ܬܳܐ ܫܳܟܺܝܡ ܚܪܰܒܘ܆ ܟܰܕ ܒܢܳܡܽܘܣܳܐ ܕܰܩܪܳܒܳܐ ܢܰܣܒܽܘܗ̇ ܠܗܳܕܶܐ. ܠܗܳܝ ܕܟܰܕ ܡܳܐܶܬ ܐܰܒܽܘܗܽܘܢ܆ ܐܰܝܟ ܗܰܘ ܕܡܶܢܶܗ ܐܶܬܩܰܢܝܰܬ܆ ܠܝܰܘܣܶܦ ܫܰܒܩܳܗ̇ ܟܰܕ ܐܳܡܰܪ: ܐܶܢܳܐ ܝܳܗܶܒ ܐ̱ܢܳܐ ܠܳܟ ܠܰܫܟܺܝܡ ܡܢܳܬܳܐ ܝܰܬܺܝܪܬܳܐ܆ ܝܰܬܺܝܪ ܡܶܢ ܐܰܚ̈ܶܐ ܕܺܝܠܳܟ. ܠܗܳܝ ܕܰܢܣܰܒܬܳܗ̇ ܡܶܢ ܐܺܝܕܳܐ ܕܳܐܡܽܘܪ̈ܳܝܶܐ܆ ܒܣܰܝܦܳܐ ܘܰܒܩܶܫܬܳܐ ܕܺܝܠܝ^[25]. ܒܪܰܡ ܕܶܝܢ ܗܶܢܽܘܢ ܒܢܰܝ̈ܳܐ܆ ܘܠܳܐ ܡܶܕܶܡ ܡܶܢ ܝܽܘܬܪ̈ܳܢܶܐ ܒܰܝ̈ܬܳܝܶܐ ܘܬܶܐܓܪ̈ܳܬܳܐ ܕܺܝܠܗܽܘܢ܆ ܣܳܒܪܺܝܢ ܗ̱ܘܰܘ ܕܺܐܝܬܰܘܗ̱ܝ ܕܺܝܠܳܢܳܝܳܐ ܕܺܝܠܗܽܘܢ. ܥܰܠ ܟܽܠܗܶܝܢ ܕܶܝܢ܆ ܠܰܐܒܳܐ ܘܠܶܐܡܳܐ ܡܰܫܦܶܝܢ ܗ̱ܘܰܘ. ܟܰܕ ܕܰܚܺܝܠܺܝܢ ܗ̱ܘܰܘ܆ ܕܕܰܠܡܳܐ ܒܕܽܘܟ ܒܗܳܕܶܐ ܢܩܽܘܡܽܘܢ ܠܽܘܩܒܰܠ ܢܳܡܽܘܣܳܐ ܗܰܘ ܕܨܳܒܶܐ ܕܗܳܠܶܝܢ ܢܶܬܝܰܩܪܽܘܢ.

ܡܳܢܳܐ ܗܳܟܺܝܠ ܠܘܳܬ ܗܳܠܶܝܢ܆ ܡܰܫܠܡܳܢܽܘܬܳܐ ܗܳܝ ܟܢܺܝܟܬܳܐ ܕܩܰܫܺܝ̈ܫܶܐ. ܐܰܦܣܰܬ ܠܰܒ̈ܢܰܝܳܐ܆ ܕܠܰܐܒܳܐ ܘܠܶܐܡܳܐ ܢܩܰܕܡܽܘܢ ܢܰܟܪܙܽܘܢ ܘܰܢܩܰܕܡܽܘܢ ܢܣܰܗܕܽܘܢ ܒܰܙܢܳܐ ܡܶܕܶܡ ܘܢܺܐܡܪܽܘܢ܆ ܟܽܠ ܗܰܘ ܡܳܐ ܕܶܐܢ ܬܶܬܗܰܢܶܐ܆ ܗܳܢܰܘ ܕܶܝܢ ܕܬܺܐܬ̣ܰܪ ܡܶܢܝ^[26]܆ ܘܕܺܐܝܬܰܘܗ̱ܝ ܕܝܽܘܬܪܳܢܳܐ ܕܺܝܠܳܟ ܬܶܚܫܒܺܝܘܗ̱ܝ܆ ܗܳܢܳܐ ܩܽܘܪܒܳܢܳܐ ܐܺܝܬܰܘܗ̱ܝ ܕܗܳܐ ܡܶܢ ܟܰܕܽܘ ܐܶܬܺܝܗܶܒ ܡܶܢܝ܆ ܘܶܐܬܦܪܶܫ ܘܶܐܬܟܰܗܰܢ ܠܰܐܠܳܗܳܐ. ܘܡܶܟܺܝܠ ܡܶܫܬܰܟܚܺܝܢ ܗ̱ܘܰܘ ܐܰܒܳܗ̈ܶܐ ܕܡܶܢ ܐܽܘܠܨܳܢܳܐ ܕܺܝܠܗܽܘܢ܆ ܠܽܘܩܒܰܠ ܢܳܡܽܘܣܳܐ ܗܰܘ ܡܝܰܬܪܳܐ ܘܪܰܒܳܐ ܡܶܬܟܰܬܫܺܝܢ ܗ̱ܘܰܘ܆ ܗܰܘ ܕܨܳܒܶܐ ܕܡܶܢ ܩܕܳܡ ܟܽܠ ܡܶܕܶܡ ܐܰ‌ܠܳܗܳܐ ܢܶܬܝܰܩܰܪ. ܘܡܶܢ ܐܳ‌ܠ̈ܨܳܬܳܐ ܡܰܫܦܶܝܢ ܗ̱ܘܰܘ܆ ܟܰܕ ܐܳܦܠܳܐ ܠܡܶܓܫܰܦ ܡܰܡܪܚܺܝܢ ܗ̱ܘܰܘ܆ ܒܗܳܠܶܝܢ ܕܩܰܕܶܡ̈ܶܝܢ ܐܶܬܺܝ̈ܗܶܒܶܝܢ ܒܫܽܘܘܕܳܝܳܐ܆ ܘܶܐܬܦܪ̈ܶܫܶܝܢ ܚܶܪܡܳܐ ܐܰܝܟ ܟܳܗ̈ܢܳܝܳܬܳܐ. ܘܰܒܗܳܢܳܐ ܦܽܘܪܣܳܐ ܨܢܺܝܥܳܐ܆ ܟܰܕ ܠܰܐܒܳܗܰܝ̈ܗܽܘܢ ܓܳܠܙܻܝܢ ܗ̱ܘܰܘ ܒܢܰܝ̈ܳܐ ܡܶܢ ܚܰܘܒܬܳܐ ܗܳܝ ܢܳܡܽܘܣܳܝܬܳܐ܆ ܒܫܶܩ̈ܠܶܐ ܗܳܢܽܘܢ ܠܳܐ ܚܣܰܝ̈ܳܐ܆ ܠܩܰܫܺܝ̈ܫܶܐ ܡܶܫܬܰܘܬܦܺܝܢ ܗ̱ܘܰܘ.

ܡܰܪܩܽܘܤ ܕܶܝܢ܆ ܝܰܬܺܝܪ ܓܠܺܝܬܳܐ ܥܰܒܕܳܗ̇ ܠܗܳܝ ܕܰܐܡܺܝܪܳܐ ܗ̱ܘܳܬ ܠܡܰܬܰܝ܆ ܟܰܕ ܟܬܰܒ܆ ܐܰܢ̱ܬܽܘܢ ܕܶܝܢ ܐܳܡܪܺܝܢ ܐܢ̱ܬܽܘܢ܆ ܩܽܘܪܒܳܢ ܗܰܘ ܕܺܐܝܬܰܘܗ̱ܝ ܩܽܘܪܒܳܢܳܐ ܐܰܘܟܺܝܬ ܡܰܘܗܰܒܬܳܐ܆ ܐܺܝܬܰܘܗ̱ܝ ܗܰܘ ܕܶܐܢ ܡܶܢܝ ܬܺܐܬ̣ܰܪ. ܩܽܘܪܒܳܢ ܕܶܝܢ ܒܠܶܫܳܢܳܐ ܥܶܒܪܳܝܳܐ܆ ܩܽܘܪܒܳܢܳܐ ܡܫܰܘܕܰܥ܆ ܡܰܘܗܰܒܬܳܐ ܗܳܝ ܕܶܐܬܦܰܪܫܰܬ ܘܶܐܬܟܰܗܢܰܬ ܠܰܐܠܳܗܳܐ. ܕܡܶܛܽܠܳܬܳܗ̇ ܟܺܝܬ ܕܗܳܕܶܐ ܐܳܦ ܪ̈ܺܝܫܰܝ ܟܳܗ̈ܢܶܐ ܗܳܢܽܘܢ ܕܰܠܡܰܫܠܡܳܢܽܘܬܳܐ ܕܰܡܫܺܝܚܳܐ ܗܳܝ ܢܳܨܝܰܬ ܥܰܡ ܐܰ‌ܠܳܗܳܐ ܙܒܰܢܘ ܡܶܢ ܝܺܗܽܘܕܳܐ܆ ܘܠܳܐ ܐܶܫܬܰܘܬܰܦܘ ܒܛܰܢܦܽܘܬܳܐ܆ ܡܶܛܽܠ ܗܳܠܶܝܢ ܬܠܳܬܺܝܢ ܕܟܶܣܦܳܐ ܐܳܡܪܺܝܢ ܗ̱ܘܰܘ܆ ܠܳܐ ܫܰܠܺܝܛ ܠܡܰܪܡܳܝܽܘ ܐܶܢܽܘܢ ܒܩܽܘܪܒܢ^[27]܆ ܡܶܛܽܠ ܕܛܺܝܡܳܐ ܕܰܕܡܳܐ ܐܺܝܬܰܝܗܽܘܢ^[28]. ܟܰܕ ܩܽܘܪܒܳܢ܆ ܠܒܶܝܬ ܓܰܙܳܐ ܐܰܘ ܟܺܝܬ ܠܩܺܒܽܘܬܳܐ ܗܳܝ ܕܩܽܘܪ̈ܒܳܢܶܐ ܘܡܰܘܗ̈ܒܳܬܳܐ ܗܳܠܶܝܢ ܕܡܶܬܩܰܪܒܺܝܢ ܗ̱ܘܰܘ ܠܰܐܠܳܗܳܐ ܡܫܰܡܗܺܝܢ ܗ̱ܘܰܘ.

ܕܳܐܦ^[29] ܗܳܝ ܕܶܝܢ ܕܗܰܘ ܡܳܐ ܕܶܐܢ ܬܶܬܗܰܢܶܐ ܡܶܢܝ܆ ܗܰܘ ܡܳܐ ܕܶܐܢ ܬܺܐܬ̣ܰܪ ܡܶܢܝ ܐܺܝܬܶܝܗ̇܆ ܘܝܽܘܬܪܳܢܳܐ ܗܶܢܝܳܢܳܐ܆ ܐܰܡܺܝܪܳܐ ܗ̱ܝ. ܘܳܐܦ ܗܳܕܶܐ ܡܛܰܝܰܒܬܳܐ ܐܺܝܬܶܝܗ̇ ܠܡܶܣܰܒ ܡܶܢ ܟܬܳܒܳܐ ܐܰ‌ܠܳܗܳܝܳܐ. ܒܰܚܕܳܐ ܓܶܝܪ ܡܶܢ ܐܶܓܪ̈ܳܬܳܐ ܗܳܠܶܝܢ ܕܡܶܬܩܰܪ̈ܝܳܢ ܩܰܐܬܽܘܠܺܝ̈ܩܰܐܤ܆ ܒܗܳܝ ܕܺܝܗܽܘܕܳܐ ܐܳܡܰܪ ܐ̱ܢܳܐ ܟܬܺܝܒ ܡܶܛܽܠ ‌ܐ̱ܢܳܫܺܝ̈ܢ܆ ܗܳܟܰܢܳܐ. ܘܳܝ ܠܗܽܘܢ܆ ܡܶܛܽܠ ܕܒܽܐܘܪܚܳܐ ܕܩܳܐܺܝܢ ܗܰܠܶܟܘ. ܘܰܠܛܳܥܝܽܘܬܶܗ ܕܒܶܠܥܰܡ ܒܰܐܓܪܳܐ ܐܶܬܶܐܫܶܕܘ^[30]. ܘܒܳܬܰܪ ܙܥܽܘܪ̈ܝܳܬܳܐ ܬܽܘܒ܆ ܗܳܠܶܝܢ ܐܺܝܬܰܝܗܽܘܢ ܡܪ̈ܰܛܢܳܢܶܐ ܪ̈ܳܚܡܰܝ ܥܽܘ̈ܕܳܠܶܐ܆ ܕܒܰܪ̈ܓܺܝܓܳܬܳܐ ܕܺܝܠܗܽܘܢ ܡܗܰܠܟܺܝܢ. ܘܦܽܘܡܗܽܘܢ ܡܡܰܠܶܠ ܪܰܘܪ̈ܒܳܬܳܐ. ܕܢܳܣܒܺܝܢ ܒܰܐܦ̈ܶܐ ܡܶܛܽܠ ܝܽܘܬܪܳܢܳܐ^[31].

ܡܶܛܽܠ ܗܳܟܺܝܠ ܕܗܳܠܶܝܢ ܐܰܝܟ ܕܡܶܫܟܚܳܐ ܗ̱ܘܳܬ ܐܶܬܢܰܗܰܪ ܡܶܢܰܢ܆ ܚܙܺܝ ܠܺܝ ܡܶܟܺܝܠ ‌ܐܰܝܟܰܢܳܐ ܦܳܪܽܘܩܰܢ ܠܳܚܡܳܐܺܝܬ ܒܝܰܕ ܗܳܠܶܝܢ ܕܰܗܦܰܟ ܥܕܰܠ ܘܰܪܫܳܐ܆ ܠܘܳܬ ܩܛܺܓܪܳܢܽܘܬܳܐ ܕܰܦܪ̈ܺܝܫܶܐ ܢܦܰܩ ܪܽܘܚܳܐ܆ ܐܳܦܶܢ ܡܰܛܫܝܳܐܺܝܬ. ܐܳܦ ܓܶܝܪ ܟܰܕ ܗܳܢܽܘܢ ܡܶܬܥܰܕܠܺܝܢ ܗ̱ܘܰܘ ܒܬܰܠ̈ܡܺܝܕܶܐ ܐܰܝܟ ܕܒܰܐܝܠܶܝܢ ܕܠܳܐ ܐܺܝܬܰܝܗܽܘܢ ܕܟܰܝ̈ܳܐ܆ ܡܶܛܽܠ ܗܳܝ ܕܒܺܐܝ̈ܕܰܝܳܐ ܕܠܳܐ ܡܫܳܓ̈ܳܢ ܐܳܟܠܺܝܢ ܗ̱ܘܰܘ܆ ܡܚܰܘܶܐ ܗܘ ܕܡܶܢ ܕܰܟܝܽܘܬܳܐ ܫܰܪܺܝܪܬܳܐ ܡܰܪܡܠܺܝܢ ܗ̱ܘܰܘ ܗܳܢܽܘܢ܆ ܒܗܳܝ ܕܡܶܛܽܠ ܪܶܚܡܰܬ ܟܶܣܦܳܐ ܫܳܪܶܝܢ ܗ̱ܘܰܘ ܠܶܗ ܠܦܽܘܩܕܳܢܳܐ ܕܰܐ‌ܠܳܗܳܐ. ܟܰܕ ܬܰܠ̈ܡܺܝܕܶܐ ܠܰܘ ܒܰܠܚܽܘܕ ܒܳܬܰܪ ܗܳܝ ܕܠܳܐ ܢܶܗܘܽܘܢ ܪ̈ܳܚܡܰܝ ܟܶܣܦܳܐ ܪܳܕܦܺܝܢ ܗ̱ܘܰܘ܆ ܐܶܠܳܐ ܐܳܦ ܒܳܬܰܪ ܗܳܝ ܕܰܕܟܽܠ ܟܽܠܶܗ ܢܶܗܘܽܘܢ ܐܺܝܬܰܝܗܽܘܢ ܡܣܰܪ̈ܩܶܐ. ܕܗܰܘ ܓܶܝܪ ܕܗܳܟܰܢܳܐ ܐܺܝܬ ܠܶܗ܆ ܗܽܘ ܐܺܝܬܰܘܗ̱ܝ ܗܰܘ ܕܰܕܟܶܐ ܒܺܐܝܕܰܘ̈ܗ̱ܝ. ܫܡܰܥܳܝܗ̱ܝ ܠܶܐܫܰܥܝܳܐ ܢܒܺܝܳܐ ܕܳܐܡܰܪ: ܕܣܳܢܶܐ ܥܰܘܳܠܽܘܬܳܐ ܘܠܳܐ ܢܳܡܽܘܣܳܝܽܘܬܳܐ܆ ܘܰܕܠܺܐܝܕܰܘ̈ܗ̱ܝ ܢܳܦܶܨ ܡܶܢ ܫܽܘܚܕܳܐ^[32].

ܘܳܐܦ ܡܶܢ ܬܰܡܳܢ ܕܶܝܢ ܬܽܘܒ܆ ܫܰܦܺܝܪܽܘܬ ܠܳܚܡܽܘܬܳܐ ܕܡܰܦܰܩ ܒܪܽܘܚܳܐ ܡܛܰܫܝܳܐ ܡܶܬܚܰܙܝܳܐ. ܐܶܢ ܓܶܝܪ ܐܰܢ̱ܬܽܘܢ ܐܳܡܰܪ ܐܳܘ ܦܪ̈ܺܝܫܶܐ ܘܣܳܦܪ̈ܶܐ ܒܣܰܓܺܝܽܐܘܬܳܐ ܕܒܺܝܫܽܘܬܳܐ܆ ܡܶܢ ܦܽܘܩܕܳܢܳܐ ܗܰܘ ܕܝܰܬܺܝܪ ܪܰܒ ܕܦܳܩܶܕ ܕܰܠܡܳܪܝܳܐ ܐܰ‌ܠܳܗܳܟ ܬܶܪܚܰܡ^[33]. ܠܗܰܘ ܕܰܙܥܽܘܪ ܡܶܢܶܗ ܕܨܳܒܶܐ ܕܰܐܒܳܗ̈ܶܐ ܢܶܬܝܰܩܪܽܘܢ ܐܶܬܦܰܪܰܣܬܽܘܢ ܠܰܡܚܰܦܳܝܽܘ܆ ܟܰܕ ܒܝܰܕ ܡܰܫܠܡܳܢܽܘܬܳܐ ܪܳܚܡܰܬ ܝܽܘܬܪ̈ܳܢܶܐ ܐܳܡܪܺܝܢ ܐܢ̱ܬܽܘܢ܆ ܕܗܰܘ ܕܶܐܢ ܢܺܐܡܰܪ ܠܰܐܒܳܐ ܐܰܘ ܠܶܐܡܳܐ܆ ܩܽܘܪܒܳܢܐ ܗ̱ܘ ܗܰܘ ܡܳܐ ܕܡܶܢܝ ܬܺܐܬ̣ܰܪ܆ ܠܳܐ ܢܝܰܩܰܪ ܠܰܐܒܽܘܗ̱ܝ ܐܰܘ ܠܶܐܡܶܗ^[34]. ܐܰܝܟܰܢܳܐ ܠܳܐ ܫܳܒܩܺܝܢ ܐܢ̱ܬܽܘܢ ܠܗܽܘܢ ܐܰܢ̱ܬܽܘܢ ܠܬܰܠ̈ܡܺܝܕܶܐ܆ ܕܒܰܡܫܰܪܬܚܽܘܬܳܐ ܘܣܰܓܺܝܽܐܘܬܳܐ ܕܰܡܝܰܬܪܽܘܬܳܐ ܕܟܶܝܢ ܒܒܰܪܢܳܫܳܐ ܗܰܘ ܕܰܠܓܰܘ܆ ܠܰܡܚܰܦܳܝܽܘ ܠܡܰܫܠܡܳܢܽܘܬܳܐ ܗܳܝ ܕܺܝܠܟܽܘܢ܆ ܗܳܝ ܕܨܳܐܳܐ ܒܰܫܪܳܪܳܐ܆ ܘܡܶܣܬܰܒܪܳܐ ܕܰܡܫܺܝܓܳܐ ܠܺܐܝ̈ܕܰܝܳܐ ܕܦܰܓܪܳܐ܆ ܘܰܠܘܳܬ ܡܟܰܠܫܽܘܬܳܐ ܕܡܶܢ ܠܒܰܪ ܩܳܝܡܳܐ܆ ܕܗܳܠܶܝܢ ܕܶܝܢ ܕܰܠܓܰܘ ܐܳܦܠܳܐ ܚܕܳܐ ܡܶܠܬܳܐ ܥܳܒܕܳܐ܆ ܐܰܟܙܢܳܐ ܕܥܰܠ ܩܰܒܪ̈ܶܐ܆ ܗܳܢܽܘܢ ܕܒܰܚܙܳܬܗܽܘܢ ܡܰܢ ܒܰܪܳܝܬܳܐ ܡܨܰܒܬܺܝܢ܆ ܡܶܢ ܠܓܰܘ ܕܶܝܢ ܡܠܶܝܢ ܓܰܪ̈ܡܶܐ ܕܡܺܝ̈ܬܶܐ ܘܟܽܠܳܗ̇ ܛܰܡܽܐܘܬܳܐ^[35]܆ ܗܳܝ ܕܳܐܡܰܪ ܒܕܽܘܟܬܳܐ ܐ̱ܚܪܺܬܳܐ ܟܬܳܒܳܐ ܗܰܘ ܕܶܐܘܰܢܓ̈ܶܠܺܝܰܐ.

ܘܟܰܕ ܒܗܳܠܶܝܢ ܡ̈ܶܠܶܐ܆ ܠܰܘ ܒܰܠܚܽܘܕ ܫܪܳܐ ܝܶܫܽܘܥ ܠܰܩܛܺܓܪܳܢܽܘܬܳܐ ܕܰܦܪ̈ܺܝܫܶܐ܆ ܐܶܠܳܐ ܐܳܦ ܚܰܘܺܝ ܐܶܢܽܘܢ ܕܰܐܚܺܝܕܺܝܢ ܒܗܳܠܶܝܢ ܕܰܡܩܰܛܪܓܺܝܢ. ܘܚܰܟܺܝܡܳܐܺܝܬ ܘܰܐ‌ܠܳܗܳܐܺܝܬ ܓܫܰܦ ܒܗܽܘܢ܆ ܘܚܰܘܺܝ ܕܡܶܢ ܠܶܒܳܐ ܡܶܬܬܕܺܝܢܳܐ ܗܳܝ ܕܕܰܟܝܳܐ ܘܰܕܠܳܐ ܕܰܟܝܳܐ܆ ܘܠܰܘ ܡܶܢ ܣܚܳܬܳܐ ܗܳܝ ܕܡܶܢ ܠܒܰܪ܆ ܡܰܝܬܶܐ ܠܰܡܨܰܥܬܳܐ ܐܳܦ ܠܶܐܫܰܥܝܳܐ ܢܒܺܝܳܐ ܕܙܳܩܰܪ ܥܰܡܶܗ ܐܰܟܚܕܳܐ ܠܰܩܛܺܓܪܳܢܽܘܬܳܐ ܘܳܐܡܰܪ܆ ܡܨܰܕܝ̈ܳܢܶܐ܆ ܫܰܦܺܝܪ ܐܶܬܢܰܒܺܝ ܡܶܛܽܠܳܬܟܽܘܢ ܐܶܫܰܥܝܳܐ ܟܰܕ ܐܳܡܰܪ܆ ܕܩܰܪܺܝܒ ܠܺܝ ܥܰܡܳܐ ܗܳܢܳܐ ܒܦܽܘܡܳܐ ܕܺܝܠܗܽܘܢ܆ ܘܰܒܣܶܦ̈ܘܳܬܳܐ ܡܝܰܩܰܪ ܠܺܝ܆ ܠܶܒܳܐ ܕܶܝܢ ܕܺܝܠܗܽܘܢ ܒܪܽܘܚܩܳܐ ܪܰܚܺܝܩ ܡܶܢܝ܆ ܣܪܺܝܩܳܐܺܝܬ ܕܶܝܢ ܕܳܚܠܺܝܢ ܠܺܝ܆ ܟܰܕ ܡܰܠܦܺܝܢ ܡܰܠ̈ܦܳܢܘܳܬܳܐ܆ ܦܽܘܩ̈ܕܳܢܶܐ ܕܰܒܢܰܝ̈ܢܳܫܳܐ^[36]. ܒܳܬܰܪܟܶܢ ܟܰܕ ܚܰܘܝܶܗ ܠܰܢܒܺܝܳܐ܆ ܕܰܠܡܰܠ̈ܦܳܢܘܳܬܳܐ ܡܰܢ ܕܰܦܪ̈ܺܝܫܶܐ ܦܽܘܩ̈ܕܳܢܶܐ ܕܰܒܢܰܝ̈ܢܳܫܳܐ ܩܪܳܐ ܐܶܢܶܝܢ܆ ܕܠܳܐ ܡܶܕܶܡ ܐܺܝܬ ܒܗܶܝܢ ܕܺܝܨܺܝܦ ܠܢܳܡܽܘܣܳܐ ܘܰܐ‌ܠܳܗܳܝܳܐ^[37]܆ ܐܶܠܳܐ ܟܽܠܗܶܝܢ ܐ̱ܢܳܫܳܝ̈ܳܬܳܐ ܐܺܝܬܰܝܗܶܝܢ܆ ܘܳܐܦ ܕܥܰܡܳܐ ܕܶܝܢ ܥܒܰܕ ܥܽܘܗܕܳܢܳܐ܆ ܡܶܚܕܳܐ܆ ܠܘܳܬ ܥܰܡܳܐ ܒܙܰܒܢܳܗ̇ ܡܰܥܒܰܪ ܠܳܗ̇ ܠܡܶܠܬܳܐ. ܟܰܕ ܡܰܠܶܦ ܠܰܢ ܐܰܝܟ ܗܳܝ ܕܰܟܬܺܝܒܳܐ܆ ܕܰܒܕܺܝܢܳܐ ܢܕܰܒܰܪ ܐܶܢܶܝܢ ܠܡ̈ܶܠܶܐ. ܟܰܕ ܓܶܝܪ ܩܪܳܐ ܠܟܶܢܫܳܐ ܐܶܡܰܪ ܠܗܽܘܢ. ܫܡܰܥܘ ܘܶܐܣܬܰܟܠܘ. ܠܰܘ ܗܰܘ ܡܳܐ ܕܥܳܐܶܠ ܠܦܽܘܡܳܐ ܡܣܰܝܶܒ ܠܶܗ ܠܒܰܪܢܳܫܳܐ. ܐܶܠܳܐ ܗܰܘ ܡܳܐ ܕܢܳܦܶܩ ܡܶܢ ܦܽܘܡܳܐ܆ ܗܳܢܳܐ ܡܣܰܝܶܒ ܠܶܗ ܠܒܰܪܢܳܫܳܐ^[38].

ܦܪ̈ܺܝܫܶܐ ܡܰܢ ܐܳܡܰܪ ܟܰܕ ܚܳܝܪܺܝܢ ܒܦܽܘܩ̈ܕܳܢܶܐ ܐ̱ܢܳܫܳܝ̈ܶܐ ܕܩܰܫܺܝ̈ܫܶܐ܆ ܡܶܬܥܰܕܠܺܝܢ ܗ̱ܘܰܘ ܘܰܡܫܰܐܠܺܝܢ܆ ܕܡܶܛܽܠ ܡܳܢܳܐ ܬܰܠ̈ܡܺܝܕܶܐ ܒܺܐܝ̈ܕܰܝܳܐ ܕܠܳܐ ܡܫܳܓ̈ܳܢ ܐܳܟܠܺܝܢ^[39]. ܐܶܢܳܐ ܕܶܝܢ ܠܰܘ ܒܰܠܚܽܘܕ ܕܰܠܥܶܠ ܡܶܢ ܗܳܠܶܝܢ ܕܕܰܐܝܟ ܗܳܟܰܢ ܡܥܰܠܶܝܢ ܘܣܰܠܺܝܩܺܝܢ ܗܶܢܽܘܢ ܬܰܠ̈ܡܺܝܕܶܐ ܐܳܡܰܪ ܐ̱ܢܳܐ: ܐܶܠܳܐ ܕܙܰܒܢܳܐ ܐܺܝܬܰܘܗ̱ܝ܆ ܕܳܐܦ ܡܶܢ ܡܰܠܦܳܢܽܘܬܳܐ ܗܳܝ ܫܰܒܪܳܝܬܳܐ ܘܰܕܝܰܬܺܝܪ ܥܰܒܝܳܐ ܕܢܳܡܽܘܣܳܐ ܗܳܝ ܕܡܶܛܽܠ ܡܶܐܟ̈ܠܳܬܳܐ ܢܰܗܡܶܐ. ܦܳܩܶܕ ܓܶܝܪ ܢܳܡܽܘܣܳܐ܆ ܕܡܶܕܶܡ ܡܶܕܶܡ ܡܰܢ ܢܶܐܟܽܘܠ܆ ܡܶܢ ܡܶܕܶܡ ܡܶܕܶܡ ܕܶܝܢ ܢܶܬܪܰܚܰܩ܆ ܠܰܘ ܡܶܛܽܠ ܕܡܶܐܟ̈ܠܳܬܳܐ ܐܺܝܬܰܝܗܶܝܢ ܗ̱ܘܰܝ̈ ܥܳܒܽܘܕܳܝ̈ܳܬܳܐ ܕܕܰܟܝܽܘܬܳܐ ܗܳܝ ܕܰܒܬܰܪܥܺܝܬܳܐ ܐܰܘ ܕܠܳܐ ܕܰܟܝܽܘܬܳܐ܆ ܐܶܠܳܐ ܐܰܝܟܰܢܳܐ ܕܠܳܐ ܒܰܕܡܽܘܬ ܚܰܝ̈ܘܳܬ ܫܶܢܳܐ ܠܘܳܬ ܟܽܠ ܡܶܕܶܡ ܒܦܽܘܡܳܐ ܠܳܐ ܡܦܰܓܕܳܐ ܢܶܬܬܰܝܬܶܐ܆ ܐܳܦܠܳܐ ܠܗܰܢܺܝܽܐܘܬܳܐ ܫܽܘܠܳܡܳܗ̇ ܕܡܶܐܟܽܘܠܬܳܐ ܢܶܥܒܶܕ. ܡܶܛܽܠܗܳܕܶܐ ܐܳܦ ܐܳܡܰܪ ܗ̱ܘܳܐ܆ ܟܽܠ ܬܰܪܒܳܐ ܘܟܽܠ ܕܡܳܐ ܠܳܐ ܬܶܐܟܠܽܘܢ^[40]. ܠܗܰܘ ܡܰܢ܆ ܐܰܝܟ ܐܰܝܢܳܐ ܕܰܡܫܰܡܶܢ ܠܦܰܓܪܳܐ܆ ܘܰܠܘܳܬ ܦܰܚܙܽܘܬܳܐ ܡܰܦܶܩ. ܠܗܰܘ ܕܶܝܢ܆ ܐܰܝܟ ܚܰܝܘܰܬ ܫܶܢܳܐ ܡܶܕܶܡ ܘܒܰܥܪܺܝܪܳܝܳܐ. ܟܰܕ ܕܶܝܢ ܡܶܠܬܳܐ ܐܶܘܰܢܓܶܠܳܝܬܳܐ ܠܘܳܬ ܦܳܪ̈ܚܳܬܳܐ ܕܰܫܡܰܝܳܐ ܦܳܩܕܳܐ ܕܰܢܚܽܘܪ^[41]܆ ܘܒܳܬܰܪ ܬܽܘܪܣܳܝܳܐ ܫܚܺܝܡܳܐ ܘܠܳܐ ܡܥܰܩܒܳܐ ܗܰܘ ܕܡܶܢ ܙܰܪ̈ܥܶܐ ܒܰܕܡܽܘܬ ܗܳܢܶܝܢ ܢܶܪܗܰܛ܆ ܝܰܬܺܝܪܬܳܐ ܗ̱ܝ ܡܶܟܺܝܠ܆ ܗܳܝ ܕܡܶܛܽܠ ܫܽܘܚ̈ܠܳܦܶܐ ܕܡܶܐܟ̈ܠܳܬܳܐ ܢܥܰܩܒܶ. ܗܰܘ ܡܳܐ ܓܶܝܪ ܕܥܳܐܶܠ ܠܦܽܘܡܳܐ ܐܳܡܰܪ ܠܳܐ ܡܣܰܝܶܒ ܠܶܗ ܠܒܰܪܢܳܫܳܐ܆ ܐܶܠܳܐ ܗܳܠܶܝܢ ܕܢܳܦ̈ܩܳܢ ܡܶܢ ܦܽܘܡܳܐ^[42]܆ ܗܳܠܶܝܢ ܟܺܝܬ ܕܡܶܢ ܠܶܒܳܐ ܢܳܦ̈ܩܳܢ܆ ܡܶܢ ܠܶܒܳܐ ܓܶܝܪ ܢܳܦܩܺܝܢ ܚܽܘܫܳܒ̈ܶܐ ܒܺܝ̈ܫܶܐ. ܩ̈ܶܛܠܶܐ. ܓܰܘܪ̈ܶܐ. ܙܳܢܺܝ̈ܘܳܬܳܐ. ܓܰܢܳܒ̈ܘܳܬܳܐ. ܣܳܗ̈ܕܘܳܬܳܐ ܕܰܓܳܠ̈ܳܬܳܐ. ܓܽܘ̈ܕܳܦܶܐ^[43]. ܡܳܢܳܐ ܗܳܟܺܝܠ ܬܰܘܬܰܪ ܐܳܘ ܦܪܺܝܫܳܐ ܕܬܰܪܒܳܐ ܡܰܢ ܠܳܐ ܐܳܟܶܠ ‌ܐܰܢ̱ܬ܆ ܠܘܳܬ ܕܶܝܢ ܪ̈ܓܺܝܓܳܬܳܐ ܢܳܦܶܩ ܐܰܢ̱ܬ܆ ܗܳܠܶܝܢ ܟܺܝܬ ܕܡܶܢ ܠܶܒܳܐ ܢܳܦ̈ܩܳܢ܆ ܘܰܡܣܰܝ̈ܒܳܢ ܠܶܗ ܠܒܰܪܢܳܫܳܐ. ܡܶܢ ܓܶܝܪ ܠܶܒܳܐ ܐܺܝܬܰܘܗ̱ܝ܆ ܚܺܐܦܳܐ ܩܰܕܡܳܝܳܐ ܘܨܶܒܝܳܢܳܝܳܐ ܗܰܘ ܕܪܶܚܡܰܬ ܗܰܢܺܝܽܐܘܬܳܐ. ܐܰܘ ܡܳܢܳܐ ܝܽܘܬܪܳܢܳܐ ܕܡܶܬܪܰܚܩܳܢܽܘܬܳܐ ܕܡܶܢ ܕܡܳܐ ܕܚܰܝ̈ܘܳܬܳܐ ܗܳܢܶܝܢ ܕܠܳܐ ܡܶܠܬܳܐ܆ ܐܶܡܰܬܝ ܕܡܶܬܒܰܥܪܰܪ ܐܰܢ̱ܬ ܐܰܝܟ ܚܰܝܘܰܬ ܫܶܢܳܐ܆ ܘܳܐܫܶܕ ܐܰܢ̱ܬ ܕܡܳܐ ܐ̱ܢܳܫܳܝܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܛܳܥܶܐ ܠܳܟ ܨܶܒܝܳܢܶܗ ܕܢܳܡܽܘܣܳܐ܆ ܕܰܠܗܳܠܶܝܢ ܕܥܳܐܠ̈ܳܢ ܠܦܽܘܡܳܐ ܠܳܐ ܡܣܰܝ̈ܒܳܢ ܠܒܰܪܢܳܫܳܐ ܡܥܰܩܶܒ ܐܰܢ̱ܬ܆ ܒܗܳܠܶܝܢ ܕܶܝܢ ܕܢܳܦ̈ܩܳܢ ܘܰܡܣܰܝ̈ܒܳܢ ܠܶܗ ܠܳܐ ܡܰܪܓܶܫ ܐܰܢ̱ܬ. ܡܶܛܽܠ ܓܶܝܪ ܗܳܠܶܝܢ ܕܢܳܦ̈ܩܳܢ܆ ܐܶܬܬܣܺܝܡ ܠܳܟ ܢܳܡܽܘܣܳܐ ܡܶܢ ܫܽܘܪܳܝܳܐ ܘܶܐܬܦܩܶܕ ܠܳܟ܆ ܐܳܦ ܟܶܠܝܳܢܳܐ ܕܡܶܢ ܗܳܠܶܝܢ ܕܥܳܐܠ̈ܳܢ.

ܐܶܢ ܕܶܝܢ ܢܺܐܡܰܪ ܐ̱ܢܳܫ܆ ܡܳܢܳܐ ܗܳܟܺܝܠ܆ ܐܶܢ ܗܳܠܶܝܢ ܕܥܳܐܠ̈ܳܢ ܠܦܽܘܡܳܐ ܠܳܐ ܡܣܰܝ̈ܒܳܢ܆ ܐܳܦ ܠܣܳܗ̈ܕܶܐ ܙܳܕܶܩ ܗ̱ܘܳܐ ܠܗܽܘܢ ܕܡܶܢ ܕܶܒܚ̈ܶܐ ܚܰܢ̈ܦܳܝܶܐ ܢܶܛܥܡܽܘܢ܆ ܛܥܳܐ ܗܽܘ ܠܶܗ ܗܰܘ ܕܕܰܐܝܟ ܗܳܢܳܐ܆ ܕܡܶܐܟܽܘܠܬܳܐ ܐܶܬܥܗܶܕ ܠܰܘ ܠܚܽܘܕܳܝܰܬ ܐܳܕܫܳܐ܆ ܐܶܠܳܐ ܕܥܰܡ ܓܽܘܕܳܦܳܐ ܐܰܟܚܕܳܐ ܡܥܰܪܙܠܳܐ܆ ܘܕܰܡܣܰܝܒܳܐ ܠܒܰܪܢܳܫܳܐ ܠܰܘ ܡܶܛܽܠ ܕܺܐܝܬܶܝܗ̇ ܗ̱ܘܳܬ ܡܶܐܟܽܘܠܬܳܐ܆ ܐܶܠܳܐ ܡܶܛܽܠ ܕܰܡܓܰܕܦܳܢܺܝܬܳܐ ܗ̱ܝ ܘܛܰܡܰܐܬܳܐ. ܕܓܽܘܕܳܦܳܐ ܕܶܝܢ ܡܶܢ ܠܶܒܳܐ ܢܳܦܶܩ܆ ܩܰܕܺܝܡܳܐ ܗܝ ܝܺܕܺܝܥܳܐ. ܐܶ‌ܠܽܘܠܳܐ ܓܶܝܪ ܕܩܰܕܶܡ ܦܪܰܫ ܐ̱ܢܳܫ ܠܰܡܫܰܠܡܽܘܬܶܗ ܠܰܐܠܳܗܳܐ܆ ܘܰܕܢܶܗܘܶܐ ܣܺܝܡ ܡܓܰܕܦܳܢܳܐܺܝܬ܆ ܡܶܢ ܕܶܒܚܬܳܐ ܡܣܰܝܰܒܬܳܐ ܠܳܐ ܛܳܥܶܡ ܗ̱ܘܳܐ. ܕܠܰܘ ܓܶܝܪ ܡܶܐܟܽܘܠܬܳܐ ܗܺܝ ܡܶܢܳܗ̇ ܘܠܳܗ̇ ܝܳܕܥܳܐ ܠܰܡܣܰܝܳܒܽܘ܆ ܐܶܠܳܐ ܐܰܝܢܳܝܽܘܬܳܐ ܕܬܰܪܥܺܝܬܳܐ ܕܢܰܦܫܳܐ܆ ܗܳܝ ܕܥܰܡܳܗ̇ ܡܶܬܐܰܟܠܳܐ ܗܺܝ ܡܶܐܟܽܘܠܬܳܐ܆ ܣܳܗܶܕ ܦܰܘܠܽܘܤ܆ ܕܰܠܩܽܘܪ̈ܝܢܬܳܝܶܐ ܟܳܬܶܒ ܘܳܐܡܰܪ: ܐܶܢ ܕܶܝܢ ܐ̱ܢܳܫ ܩܳܪܶܐ ܠܟܽܘܢ ܡܶܢ ܠܳܐ ܡܗܰܝܡ̈ܢܶܐ ܘܨܳܒܶܝܢ ܐܢ̱ܬܽܘܢ ܠܡܺܐܙܰܠ܆ ܟܽܠ ܗܰܘ ܡܳܐ ܕܡܶܬܬܣܺܝܡ ܩܕܳܡܰܝܟܽܘܢ܆ ܐܰܟܽܘܠܘ܆ ܟܰܕ ܠܳܐ ܡܶܕܶܡ ܡܥܰܩܒܺܝܢ ܐܢ̱ܬܽܘܢ ܡܶܛܽܠ ܬܺܐܪܬܳܐ܆ ܐܶܢ ܕܶܝܢ ܐ̱ܢܳܫ ܢܺܐܡܰܪ ܠܟܽܘܢ ܕܗܳܢܳܐ ܕܶܒܚܳܐ ܕܰܦܬܰܟܪ̈ܶܐ ܐܺܝܬܰܘܗ̱ܝ ܠܳܐ ܬܶܐܟܠܽܘܢ܆ ܡܶܛܽܠܳܬܶܗ ܕܗܰܘ ܕܫܰܘܕܰܥ ܠܟܽܘܢ ܘܡܶܛܽܠ ܬܺܐܪܬܳܐ^[44]. ܡܶܛܽܠ ܕܳܐܦ ܡܰܩ̈ܒܳܝܶܐ܆ ܛܳܒܳܐܺܝܬ ܘܢܳܡܽܘܣܳܐܺܝܬ ܐܶܬܟܰܬܰܫܘ ܒܰܐܓܽܘܢܳܐ܆ ܟܰܕ ܡܶܢ ܒܶܣܪܳܐ ܕܰܚܙܺܝܪܳܐ ܒܰܥܒܽܘܪܝܳܐ ܕܢܳܡܽܘܣܳܐ ܠܡܶܐܟܰܠ ܡܣܰܝܒܳܐܺܝܬ ܠܳܐ ܨܒܰܘ. ܥܕܰܟܺܝܠ ܓܶܝܪ ܗܳܠܶܝܢ ܕܛܶܠܳܢܺܝܬܳܐ ܐܰܚܺܝ̈ܕܳܢ ܗ̱ܘܰܝ̈܆ ܘܕܰܟܬܺܝܒܬܳܐ ܢܳܡܽܘܣܳܝܬܳܐ ܐܺܝܬܰܘܗ̱ܝ ܗ̱ܘܳܐ ܕܽܘܒܳܪܳܐ. ܟܽܠ ܓܶܝܪ ܐܰܝܢܳܐ ܕܰܠܗܰܘ ܡܳܐ ܕܰܟܠܶܐ ܐܳܟܶܠ܆ ܡܶܬܛܰܡܰܐ ܘܡܶܣܬܰܝܰܒ. ܠܰܘ ܡܶܛܽܠ ܕܡܶܐܟܽܘܠܬܳܐ ܐܶܟܰܠ܆ ܐܶܠܳܐ ܡܶܛܽܠ ܕܗܰܘ ܡܳܐ ܕܰܟܠܶܐ ܗ̱ܘܳܐ. ܟܰܕ ܕܶܝܢ ܡܫܺܝܚܳܐ ܐܶܬܳܐ܆ ܘܰܫܪܳܐ ܡܰܢ ܠܰܟܬܺܝܒܬܳܐ܆ ܫܰܪܰܪ ܕܶܝܢ ܠܪܽܘܚܳܐ ܕܢܳܡܽܘܣܳܐ ܒܝܰܕ ܚܰܝ̈ܶܐ ܐܶܘܰܢܓܶܠܳܝ̈ܶܐ ܘܰܡܥܰܠܰܝ̈ܳܐ܆ ܘܦܰܓܶܕ ܡܰܢ ܠܗܳܠܶܝܢ ܕܢܳܦ̈ܩܳܢ ܡܶܢ ܦܽܘܡܳܐ ܘܳܐܦ ܡܶܢܶܗ ܕܠܶܒܳܐ ܘܰܡܣܰܝ̈ܒܳܢ ܠܒܰܪ ܐ̱ܢܳܫܐ܆ ܘܰܠܚܰܘܪܳܐ ܡܰܢ ܪܰܝܽܘܓܬܳܢܳܐ ܒܰܬܒܰܥܬܳܐ ܗܳܝ ܕܓܰܘܪܳܐ ܫܰܢܶܩ. ܠܙܰܘܥܳܐ ܕܶܝܢ ܪܰܓܽܘܙܬܳܢܳܐ ܒܗܳܝ ܕܩܶܛܠܳܐ܆ ܡܶܟܺܝܠ ܗܳܠܶܝܢ ܕܥܳܐܠܴ̈ܢ ܠܦܽܘܡܳܐ܆ ܠܒܰܪܢܳܫܳܐ ܠܳܐ ܡܣܰܝ̈ܒܳܢ. ܫܰܪܝܳܐ ܗ̱ܝ ܓܶܝܪ ܢܛܽܘܪܬܳܐ ܢܳܡܽܘܣܳܝܬܳܐ ܕܡܶܐܟ̈ܠܳܬܳܐ܆ ܠܗܰܘ ܕܶܐܘܰܢܓܶܠܴܐܺܝܬ ܘܰܡܥܰܠܝܳܐܺܝܬ ܚܳܝܶܐ ܒܰܡܫܺܝܚܳܐ.

ܠܰܦܪ̈ܺܝܫܶܐ ܕܶܝܢ ܕܗܳܝܕܶܝܢ ܠܳܐ ܥܳܪܶܝܢ ܗ̱ܘܰܘ ܠܳܗ̇ ܠܡܶܠܬܳܐ܆ ܐܶܠܳܐ ܕܟܽܠܳܗ̇ ܢܛܽܘܪܬܳܐ ܕܢܳܡܽܘܣܳܐ ܒܡܶܐܟ̈ܠܳܬܳܐ ܚܳܫܒܺܝܢ ܗ̱ܘܰܘ ܕܺܐܝܬܶܝܗ̇ ܘܡܶܬܟܰܫܠܺܝܢ ܗ̱ܘܰܘ܆ ܗܺܝ ܕܶܝܢ ܟܰܕ ܗܺܝ ܘܳܐܦ ܠܬܰܠ̈ܡܺܝܕܶܐ ܕܗܳܕܶܐ ܚܰܫܘ܆ ܡܶܢ ܒܳܬܰܪ ܕܫܰܡܠܺܝ ܡܶܠܬܳܐ ܕܡܶܛܽܠ ܗܳܕܶܐ܆ ܢܺܝܚܳܐܺܝܬ ܗܳܟܰܢܳܐ ܘܫܰܠܝܳܐܺܝܬ ܐܶܬܕܰܒܰܪ ܥܰܡܗܽܘܢ ܟܰܕ ܐܶܡܰܪ ܠܚܰܪܬܳܐ: ܗܳܝ ܕܶܝܢ ܕܒܺܐܝ̈ܕܰܝܳܐ ܕܠܳܐ ܡܫܳܓ̈ܳܢ ܢܶܐܟܽܘܠ܆ ܠܳܐ ܡܣܰܝܒܳܐ ܠܶܗ ܠܒܰܪܢܳܫܳܐ. ܐܰܝܟܰܢܳܐ ܕܢܶܣܬܒܰܪ ܗ̱ܘܳܐ ܕܡܶܛܽܠ ܗܳܕܶܐ ܒܰܠܚܽܘܕ ܡܰܠܶܠ ܗ̱ܘܳܐ܆ ܘܠܰܘ ܡܶܛܽܠ ܢܛܽܘܪܬܳܐ ܕܡܶܐܟ̈ܠܳܬܳܐ.

ܕܳܐܦ ܓܶܝܪ ܘܰܠܬܰܠ̈ܡܺܝܕܶܐ ܥܰܣܩܬܳܐ ܡܶܬܚܰܙܝܳܐ ܗ̱ܘܳܬ ܗܳܕܶܐ ܡܶܢ ܫܽܘܪܳܝܳܐ܆ ܐܰܘܕܰܥ ܦܶܛܪܽܘܤ ܒܰܦܪܰܟܣܺܝܤ܆ ܟܰܕ ܠܚܶܙܘܳܐ ܗܰܘ ܕܡܳܐܢܳܐ ܕܟܶܬܳܢܳܐ ܚܙܳܐ ܗ̱ܘܳܐ܆ ܗܰܘ ܟܺܝܬ ܕܰܡܠܶܐ ܗ̱ܘܳܐ ܟܽܠܗܶܝܢ ܦܳܪ̈ܚܳܬܳܐ ܘܰܪ̈ܒܺܝܥܳܝ̣ܰܝ̣ ܪ̈ܶܓܠܶܐ ܘܪܰܚܫܳܐ܆ ܘܰܫܡܰܥ ܕܩܽܘܡ ܦܰܛܪܶܐ ܟܽܘܤ ܘܰܐܟܽܘܠ܆ ܘܰܥܢܳܐ ܘܶܐܡܰܪ: ܚܳܤ ܠܺܝ ܡܳܪܝ܆ ܡܶܛܽܠ ܕܠܳܐ ܡܬܽܘܡ ܐܶܟܠܶܬ ܟܽܠ ܗܰܘ ܡܳܐ ܕܰܡܣܰܝܰܒ ܘܰܛܡܰܐ^[45]. ܘܳܐܦ ܗܶܢܽܘܢ ܗܳܪܟܳܐ ܟܰܕ ܐܶܡܰܪܘ܆ ܕܝܳܕܰܥ ܐܰܢ̱ܬ ܕܰܦܪ̈ܺܝܫܶܐ ܟܰܕ ܫܰܡܥܽܘܗ̇ ܠܡܶܠܬܳܐ ܐܶܬܟܫܶܠܘ܆ ܚܰܘܺܝܘ ܪܶܡܙܳܢܳܐܺܝܬ ܕܰܐܝܟ ܕܡܶܢ ܡܢܳܬܐ܆ ܐܳܦ ܗܶܢܽܘܢ ܕܰܟܫܺܝܠܺܝܢ ܐܺܝܬܰܝܗܽܘܢ ܗ̱ܘܰܘ. ܡܶܛܽܠ ܗܳܕܐ ܐܳܦ ܝܰܬܺܝܪ ܩܰܫܝܳܐܺܝܬ ܦܓܰܥ ܒܗܽܘܢ ܝܶܫܽܘܥ ܟܰܕ ܐܳܡܰܪ܆ ܕܟܽܠ ܢܶܨܒܬܳܐ ܗܳܝ ܕܳܐܒܝ ܗܰܘ ܫܡܰܝܳܢܳܐ ܠܳܐ ܢܰܨܒܳܗ̇ ܬܶܬܥܩܰܪ. ܐܰܪܦܰܘ ܐܶܢܽܘܢ. ܡܗܰܕܝܳܢ̈ܶܐ ܓܶܝܪ ܣܡܰܝ̈ܳܐ ܐܺܝܬܰܝܗܽܘܢ ܕܰܣܡܰܝ̈ܳܐ. ܣܰܡܝܳܐ ܕܶܝܢ ܠܣܰܡܝܳܐ ܐܶܢ ܢܗܰܕܶܐ܆ ܬܪ̈ܰܝܗܽܘܢ ܒܓܽܘܡܳܨܳܐ ܢܶܦܠܽܘܢ^[46]. ܢܶܨܒܬܳܐ ܕܶܝܢ ܕܠܳܐ ܝܺܕܺܝܥܳܐ^[47] ܠܰܐܠܳܗܳܐ ܩܪܳܐ܆ ܠܣܰܪ̈ܥܶܦܝܳܬܳܐ ܗܳܠܶܝܢ ܕܡܰܫ̈ܠܡܳܢܘܳܬܳܐ ܦܪ̈ܺܝܫܳܝܳܬܳܐ܆ ܗܳܠܶܝܢ ܕܚܶܪܝܳܐܺܝܬ ܘܰܣܪܺܝܩܳܐܺܝܬ ܕܠܳܐ ܒܙܰܒܢܳܐ ܡܩܰܘ̈ܝܳܢ ܒܰܟܬܺܝܒܬܳܐ܆ ܘܠܰܘ ܠܶܗ ܠܢܳܡܽܘܣܳܐ܆ ܗܰܘ ܕܡܶܢ ܐܰ‌ܠܳܗܳܐ ܐܶܬܺܝܗܶܒ ܠܳܐ ܬܶܗܘܶܐ. ܠܳܐ ܓܶܝܪ ܢܶܚܟܽܘܢ222 ܒܗܳܕܶܐ ܡܰܢܺܝ̈ܢܳܝܶܐ ܪ̈ܰܫܺܝܥܶܐ܆ ܠܠܶܫܳܢܰܝ̈ܗܽܘܢ ܡܣܰܝ̈ܒܶܐ ܘܢܳܨ̈ܝ̣ܰܝ̣ ܥܰܡ ܐܰ‌ܠܳܗܳܐ. ܡܶܛܽܠ ܕܡܶܛܽܠ ܗܳܕܶܐ ܣܡܰܝ̈ܳܐ ܩܪܳܐ ܐܶܢܽܘܢ ܠܰܦܪ̈ܺܝܫܶܐ܆ ܐܰܝܟ ܡܰܢ ܕܰܠܘܳܬ ܟܬܺܝܒܬܳܐ ܩܰܒܥܽܘܗ̇ ܠܥܰܝܢܗܽܘܢ܆ ܘܠܳܐ ܨܳܒܶܝܢ ܗ̱ܘܰܘ ܕܰܠܘܳܬ ܪܽܘܚܳܐ ܢܚܽܘܪܽܘܢ܆ ܘܰܠܘܳܬ ܗܰܘܢܳܐ ܗܰܘ ܕܡܶܢ ܠܓܰܘ. ܡܶܢ ܐܰܝܟܳܐ ܕܳܐܦ ܟܰܕ ܕܠܳܐ ܡܶܠܬܳܐ ܐܶܬܟܫܶܠܘ܆ ܕܰܢܫܽܘܛܽܘܢ ܐܶܢܽܘܢ ܦܳܩܶܕ ܗ̱ܘܳܐ. ܟܰܕ ܐܳܡܰܪ ܗ̱ܘܳܐ: ܐܰܪܦܰܘ ܠܗܽܘܢ. ܘܚܰܘܺܝ ܕܩܺܝܢܕܽܘܢܽܘܤ ܪܰܒܳܐ ܐܺܝܬܶܝܗ̇܆ ܗܳܝ ܕܒܰܡܗܰܕܝܳܢ̈ܶܐ ܣܡܰܝ̈ܳܐ ܢܶܬܚܰܫܰܚ^[48]܆ ܠܘܳܬ ܐܽܘܪ̈ܚܳܬܳܐ ܕܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ܆ ܐܰܝܟܰܢܳܐ ܕܳܐܦ ܠܟܶܢܫܳܐ ܢܰܪܚܶܩ܆ ܡܶܢ ܡܰܠܦܳܢܽܘܬܳܐ ܗܳܝ ܡܰܘܒܕܳܢܺܝܬܳܐ ܕܰܦܪ̈ܺܝܫܶܐ. ܐܶܡܰܬܝ ܕܶܝܢ ܟܺܝܬ ܕܗܳܢܽܘܢ ܕܬܳܒܥܺܝܢ ܗ̱ܘܰܘ ܬܪܶܝܢ ܙܽܘ̈ܙܶܐ ܕܒܽܘܟܪܽܘܬܳܐ ܐܳܡܪܺܝܢ ܗ̱ܘܰܘ ܠܘܳܬ ܬܰܠ̈ܡܺܝܕܶܐ ܕܺܝܠܶܗ܆ ܕܪܰܒܟܽܘܢ ܠܳܐ ܝܳܗܶܒ ܬܪܶܝܢ ܙܽܘ̈ܙܰܘܗ̱ܝ܆ ܟܰܕ ܚܰܘܺܝ ܗܽܘ ܠܶܗ ܒܰܪ ܚܺܐܪ̈ܶܐ ܘܠܳܐ ܡܫܰܥܒܕܳܐ ܕܡܰܕܰܐܬ̣ܳܐ܆ ܐܰܝܟ ܒܪܳܐ ܫܰܪܺܝܪܳܐ ܕܡܰܠܟܳܐ ܘܰܐ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܐܳܡܰܪ ܠܶܗ ܠܦܶܛܪܽܘܤ. ܕܠܳܐ ܕܶܝܢ ܢܰܟܫܶܠ ‌ܐܶܢܽܘܢ܆ ܗܰܒ ܠܗܽܘܢ^[49]. ܟܰܕ ܡܰܠܶܦ ܠܰܢ܆ ܕܰܒܣܽܘܥܪ̈ܳܢܶܐ ܡܰܢ ܥܳܠ̈ܡܳܢܳܝܶܐ܆ ܘܰܒܟܽܠܗܶܝܢ ܗܳܠܶܝܢ ܕܰܠܘܳܬ ܩܶܢ̈ܝܳܢܶܐ ܘܡܰܪ̈ܗܳܛܶܐ ܚܳܝܪ̈ܳܢ܆ ܠܳܐ ܢܰܒܣܶܐ ܥܰܠ ܗܳܢܽܘܢ ܕܡܶܬܟܰܫܠܺܝܢ. ܕܗܳܢܽܘܢ ܕܶܝܢ ܕܚܳܣܡܺܝܢ ܒܡܰܠܦܳܢܽܘܬܐ ܐܰ‌ܠܳܗܳܝܬܳܐ ܐܰܝܟ ܦܪ̈ܺܝܫܶܐ ܘܰܡܥܰܟܪܺܝܢ ܘܬܳܟܣܺܝܢ ܠܳܗ̇܆ ܐܳܦܠܳܐ ܚܕܳܐ ܡܶܠܬܳܐ ܢܶܥܒܶܕ ܟܰܕ ܡܶܬܟܰܫܠܺܝܢ ܣܪܺܝܩܳܐܺܝܬ. ܐܳܦ ܓܶܝܪ ܠܰܘ ܡܶܛܽܠ ܕܰܒܟܳܪܽܘܙܽܘܬܳܐ ܕܰܨܠܺܝܒܳܐ܆ ܐܳܦ ܝܽܗ̱ܘ̈ܕܳܝܶܐ ܐܳܦ ܚܰܢ̈ܦܶܐ ܡܶܬܟܰܫܠܺܝܢ ܗ̱ܘܰܘ ܘܓܳܚܟܺܝܢ܆ ܘܡܶܛܽܠ ܗܳܕܶܐ ܫܳܬܶܩ ܗ̱ܘܳܐ ܦܰܘܠܽܘܤ. ܐܶܠܳܐ ܒܕܰܠܩܽܘܒܠܳܐ ܐܳܡܰܪ ܗ̱ܘܳܐ: ܚܢܰܢ ܕܶܝܢ ܡܰܟܪܙܺܝܢ ܚ̱ܢܰܢ ܡܫܺܝܚܳܐ ܟܰܕ ܨܠܺܝܒ^[50]. ܠܝܽܗ̱ܘ̈ܕܳܝܶܐ ܡܰܢ ܟܶܫܠܳܐ܆ ܠܥܰܡܡ̈ܶܐ ܕܶܝܢ ܫܳܛܝܽܘܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ ܠܣܳܥܽܘܪ̈ܘܳܬܳܐ ܗܳܠܶܝܢ ܪ̈ܽܘܚܳܢܳܝܳܬܳܐ ܘܰܐ‌ܠܳܗܳܝ̈ܳܬܳܐ ܙܳܕܶܩ ܗ̱ܘܳܐ ܕܢܶܥܒܶܕ܆ ܐܳܦܶܢ ܚܰܢ̈ܦܶܐ ܘܝܽܗ̱ܘ̈ܕܳܝܶܐ ܟܰܕ ܡܶܬܟܰܫܠܺܝܢ ܢܶܬܬܰܪܙܽܘܢ܆ ܘܶܐܢ ܐ̱ܢܳܫ ܐ̱ܚܪܺܢܳܐ ܕܥܰܡ ܐܰ‌ܠܳܗܳܐ ܡܰܩܪܶܒ.

ܙܳܕܶܩ ܕܶܝܢ ܕܳܐܦ ܡܶܢ ܡܰܫ̈ܠܡܳܢܘܳܬܳܐ ܕܰܦܪ̈ܺܝܫܶܐ ܢܶܬܪܰܚܰܩ܆ ܘܳܐܦ ܡܶܢ ܐܰܝܠܶܝܢ ܕܰܠܗܳܠܶܝܢ ܕܳܡ̈ܝܳܢ. ܗܳܠܶܝܢ ܕܡܶܢܗܶܝܢ܆ ܐܳܦ ܗܳܠܶܝܢ ܕܡܶܬܐܰܡܪܺܝܢ ܦܽܘܠܰܐܩܛܺܝܪ̈ܳܝܶܐ ܐܰܘܟܺܝܬ ܩܡܺܝ̈ܥܶܐ ܡܢܰܛܪ̈ܳܢܶܐ ܢܳܚܬܺܝܢ ܒܝܽܘܒܳܠܳܐ܆ ܐܳܦ ܗܳܝ ܕܦܶܪ̈ܩܶܐ ܕܰܡܥܰܪܙܠܺܝܢ ܘܰܩܛܺܝܪܺܝܢ ܒܚܽܘ̈ܛܶܐ ܐܰܘܟܺܝܬ 222ܒܓܶܕ̈ܕܶܐ ܕܟܶܬܳܢܳܐ܆ ܢܶܗܘܽܘܢ ܐ̱ܢܳܫܺܝ̈ܢ ܬܳܠܶܝܢ ܒܰܩ̈ܕܳܠܰܝܗܽܘܢ ܐܰܘ ܒܗܰܕܳܡ̈ܶܐ ܐ̱ܚܪ̈ܳܢܶܐ. ܡܶܛܽܠܳܬܗܽܘܢ ܓܶܝܪ ܐܳܡܰܪ ܡܳܪܰܢ ܒܶܐܘܰܢܓ̈ܶܠܺܝܰܐ܆ ܡܰܦܬܶܝܢ ܕܶܝܢ ܠܦܽܘܠܰܐܩܛܺܝܪ̈ܳܝܶܐ^[51] ܐܰܘܟܺܝܬ ܠܬܶܟܠ̈ܝܳܬܳܐ ܕܺܝܠܗܽܘܢ܆ ܘܡܰܘܪܟܺܝܢ ܟܶܢ̈ܦܳܬܳܐ ܕܡܰܪ̈ܛܽܘܛܰܝܗܽܘܢ^[52]. ܟܬܺܝܒ ܕܶܝܢ ܒܬܰܫܥܺܝܬܳܐ ܒܰܟܬܳܒܳܐ ܕܰܦܪܰܟܣܺܝܤ܆ ܕܳܐܦ ܣܽܘܕܳܪ̈ܶܐ ܐܰܘܟܺܝܬ ܦܶܪ̈ܩܶܐ ܡܶܢ ܗܳܠܶܝܢ ܕܥܰܠ ܓܽܘܫܡܶܗ ܕܦܰܘܠܽܘܤ܆ ܟܰܕ ܥܰܠ ܗܳܢܽܘܢ ܕܰܟܪܺܝܗܺܝܢ ܡܶܬܬܣܺܝܡܺܝܢ ܗ̱ܘܰܘ܆ ܛܳܪܕܺܝܢ ܗ̱ܘܰܘ ܠܗܽܘܢ ܠܟܽܘܪ̈ܗܳܢܶܐ^[53]. ܐܶܠܳܐ ܗܳܕܶܐ ܕܰܥܝܳܕܳܐ ܕܺܝܠܶܗ ܕܥܰܡܳܐ ܐܺܝܬܶܝܗ̇ ܗ̱ܘܳܬ ܟܰܕ ܠܳܐ ܝܳܕܰܥ ܗ̱ܘܳܐ ܦܰܘܠܽܘܤ܆ ܘܠܰܘ ܕܡܰܠܦܳܢܽܘܬܶܗ ܕܗܰܘ. ܡܶܛܽܠ ܕܠܰܟܬܳܒܳܐ ܐܰ‌ܠܳܗܳܝܳܐ܆ ܗܳܕܶܐ ܒܰܠܚܽܘܕ ܡܶܫܟܚܺܝܢ ܚ̱ܢܰܢ ܕܡܰܦܶܤ. ܟܪܺܝܗ ܒܟܽܘܢ ܐ̱ܢܳܫ܆ ܢܶܩܪܶܐ ܠܩܰܫܺܝ̈ܫܶܐ ܕܥܺܕܬܳܐ ܘܰܢܨܰܠܽܘܢ ܥܠܰܘܗ̱ܝ. ܟܰܕ ܡܳܫܚܺܝܢ ܠܶܗ ܒܡܶܫܚܳܐ ܒܰܫܡܶܗ ܕܡܳܪܰܢ. ܘܰܨܠܽܘܬܳܐ ܕܗܰܝܡܳܢܽܘܬܳܐ^[54] ܬܶܦܪܩܺܝܘܗ̱ܝ ܠܗܰܘ ܕܰܟܪܺܝܗ܆ ܘܰܡܩܺܝܡ ܠܶܗ ܡܳܪܰܢ. ܘܶܐܢ ܚ̈ܛܳܗܶܐ ܥܒܺܝܕܺܝܢ ܠܶܗ܆ ܢܶܫܬܒܶܩ ܠܶܗ^[55]. ܚܳܙܶܐ ܐܰܢ̱ܬ܆ ܕܡܶܫܚܳܐ ܕܩܰܕܺܝ̈ܫܶܐ ܕܢܳܡܽܘܣܳܐܺܝܬ ܡܶܬܩܰܪܰܒ܆ ܠܰܘ ܒܰܠܚܽܘܕ ܡܶܢ ܟܽܘܪ̈ܗܳܢܶܐ܆ ܐܶܠܳܐ ܐܳܦ ܡܶܢ ܣܽܘܓܳܐܐ ܕܰܚ̈ܛܳܗܶܐ ܡܫܰܟܶܢ ܓܗܳܝܬܳܐ. ܠܡܳܢܳܐ ܗܳܟܺܝܠ ܠܗܰܘ ܡܳܐ ܕܫܰܠܺܝܛ ܠܡܶܥܒܕܶܗ ܫܰܦܺܝܪ܆ ܘܰܠܡܺܐܬܰܪ^[56] ܝܽܘܬܪܳܢܳܐ ܕܟܽܠܶܗ ܗܳܢܳܐ܆ ܥܰܡ ܚܛܺܝܬܳܐ ܘܚܽܘܣܪܳܢܳܐ ܥܳܒܶܕ ܐܰܢ̱ܬ ܠܶܗ܆ ܟܰܕ ܒܦܶܪ̈ܩܽܘܢܶܐ ܚܳܕܶܐ ܐܰܢ̱ܬ܆ ܘܰܒܚܽܘ̈ܛܶܐ ܐܰܘܟܺܝܬ ܥ̈ܰܙܠܶܐ ܗܳܢܽܘܢ ܕܰܚܕܳܪ ܐܺܝܕܳܐ ܘܰܚܕܳܪ ܩܕܳܠܳܐ. ܐܰܢ̱ܬ ܡܰܢ ܓܶܝܪ ܟܒܰܪ܆ ܟܰܕ ܡܶܢ ܩܰܕܺܝ̈ܫܶܐ ܢܣܰܒܬ܆ ܬܴܠܶܐ ܐܰܢ̱ܬ ܥܠܰܝܟ. ܐ̱ܚܪ̈ܳܢܶܐ ܕܶܝܢ܆ ܡܶܢ ܠܽܘܬܳܟܳܐ ܫܺܐܕܳܢܳܝܳܐ ܘܡܶܢ ܠܽܘܚܰܫܬܳܐ. ܡܶܢ ܐܰܝܟܳܐ ܗܳܟܺܝܠ ‌ܐܶܢܳܐ ܠܫܽܘܚܠܳܦܳܐ ܐܶ݀ܫܬܰܘܕܰܥ܆ ܘܶܐ݀ܟܠܶܐ ܠܚܽܘܣܪܳܢܳܐ. ܐܳܦܶܢ ܓܶܝܪ ܐܰܢ̱ܬ ܠܳܐ ܚܳܣܰܪ ܐܰܢ̱ܬ ܐܰܝܟܰܢܳܐ ܕܳܐܡܰܪ ܐܰܢ̱ܬ܆ ܐܶܠܳܐ ܠܰܐ̱ܚܪ̈ܳܢܶܐ ܝܳܗܶܒ ܐܰܢ̱ܬ ܥܶܠܬܳܐ ܕܢܶܣܬܰܓܦܽܘܢ ܒܝܰܕ ܬܰܚܘܺܝܬܳܐ. ܡܶܛܽܠ ܗܳܕܶܐ ܦܰܘܠܽܘܤ ܟܰܕ ܐ̱ܢܳܫܺܝ̈ܢ ܟܪ̈ܺܝܣܛܝܳܢܶܐ ܒܩܽܘܪܺܝܢܬܽܘܤ܆ ܠܰܘ ܒܕܶܚܠܬܳܐ ܕܰܦܬܰܟܪ̈ܶܐ܆ ܐܶܠܳܐ ܡܶܢ ܥܝܳܕܳܐ ܕܠܳܐ ܡܶܠܬܳܐ܆ ܠܘܳܬ ܡܰܫ̈ܬܝܶܐ ܚܰܢ̈ܦܳܝܶܐ ܐܳܙܺܠ̱ܝܢ ܗ̱ܘܰܘ܆ ܘܓܳܢܶܝܢ ܗ̱ܘܰܘ ܒܗܰܝ̈ܟܠܶܐ ܘܳܐܡܪܺܝܢ ܗ̱ܘܰܘ ܕܠܳܐ ܡܶܣܬܰܓܦܺܝܢ܆ ܐܰܝܟܰܢܳܐ ܕܳܐܦ ܐܰܢ̱ܬܽܘܢ܆ ܟܳܬܶܒ ܗ̱ܘܳܐ ܗܳܟܰܢܳܐ. ܐܶܢ ܓܶܝܪ ܐ̱ܢܳܫ ܢܶܚܙܶܝܟ ܠܳܟ ܕܺܐܝܬ ܠܳܟ ܝܺܕܰܥܬܳܐ ܕܰܒܒܶܝܬ ܦܬܰܟܪ̈ܶܐ ܓܢܶܐ ܐܰܢ̱ܬ܆ ܠܳܐ ܗ̱ܘܳܐ ܗܳܐ ܬܺܐܪܬܶܗ ܕܗܰܘ ܕܰܟܪܺܝܗܳܐ ܐܺܝܬܰܘܗ̱ܝ܆ ܡܶܬܒܰܢܝܳܐ ܠܳܗ̇ ܠܘܳܬ ܗܳܝ ܕܕܶܒܚ̈ܶܐ ܕܰܦܬܰܟܪ̈ܶܐ ܢܶܐܟܽܘܠ܆ ܘܳܐܒܶܕ ܐܰܚܽܘܟ ܗܰܘ ܕܰܟܪܺܝܗ ܒܡܶܐܟܽܘܠܬܳܟ ܕܺܝܠܳܟ܆ ܗܰܘ ܕܡܶܛܽܠܳܬܶܗ ܡܫܺܝܚܳܐ ܡܺܝܬ^[57]. ܟܰܕ ܗܳܟܰܢܳܐ ܕܶܝܢ ܚܳܛܶܝܢ ܐܢ̱ܬܽܘܢ ܒܰܐܚܰܝ̈ܟܽܘܢ܆ ܘܰܡܡܰܚܶܝܢ ܐܢ̱ܬܽܘܢ ܠܬܺܐܪܬܳܐ ܕܺܝܠܗܽܘܢ ܕܰܟܪܺܝܗܳܐ܆ ܒܰܡܫܺܝܚܳܐ ܚܳܛܶܝܢ ܐܢ̱ܬܽܘܢ.

ܙܳܕܶܩ ܠܰܢ ܗܳܟܺܝܠ܆ ܕܢܶ݀ܬܟܽܘܤ ܘܢܶ݀ܦܣܽܘܩ ܐܶܢܽܘܢ ܠܰܥ̈ܝܳܕܶܐ ܗܳܢܽܘܢ ܕܠܳܐ ܡܶܠܬܳܐ. ܟܰܕ ܝܳܕܥܺܝܢܰܢ܆ ܕܳܐܦ ܣܽܘܓܦܳܢܳܐ ܕܰܐ̱ܚܪ̈ܳܢܶܐ܆ ܡܶܠܬܳܐ ܝܳܗܒܺܝܢ ܚ̱ܢܰܢ. ܗܳܠܶܝܢ ܕܶܝܢ ܐܶܡܪܶܬ܆ ܠܰܘ ܐܰܝܟܰܢܳܐ ܕܡܰܚܢܽܘܩܺܝܬܳܐ ܐܰܪܡܶܐ ܠܟܽܘܢ. ܐܶܠܳܐ ܐܰܝܟܰܢܳܐ ܕܟܰܕ ܬܺܐܠܦܽܘܢ܆ ܒܳܚܽܘܪ̈ܶܐ ܘܡܳܪ̈ܰܝܳܐ ܐܶ݀ܥܒܶܕܟܽܘܢ ܕܗܳܝ ܕܘܳܠܝܳܐ ܕܬܶܣܬܥܰܪ. ܘܰܦܝܳܣܳܐ ܐܶ݀ܥܒܶܕܟܽܘܢ܆ ܕܠܳܐ ܩܕܳܡ ܙܰܒܢܳܐ ܬܕܽܘܢܽܘܢ ܘܬܺܐܡܪܽܘܢ܆ ܕܦܰܛܪܝܰܪܟܳܐ ܗܳܢܳܐ ܡܶܕܶܡ ܦܩܰܕ ܐܰܝܟ ܣܰܓܺܝ ܝܰܩܺܝܪܳܐ ܘܩܰܫܝܳܐ. ܡܶܬܬܰܘܣܦܳܐ ܗ̱ܘܳܬ ܓܶܝܪ ܐܳܦ ܪܰܒܽܘܬܶܗ ܕܰܫܡܳܐ܆ ܐܰܝܟܰܢܳܐ ܕܠܰܩܛܓܪܳܢܽܘܬܳܐ ܕܺܝܠܝ ܬܪܰܒܶܐ ܝܰܬܺܝܪܳܐܺܝܬ. ܐܶܢܳܐ ܕܶܝܢ ܫܶܠܝܳܐ ܡܰܝܬܶܐ ܗ̱ܘܺܝܬ܆ ܟܰܕ ܠܙܰܒܢܳܐ ܕܗܳܝ ܕܶܐ݀ܡܰܠܶܠ ܡܟܰܬܰܪ ܗ̱ܘܺܝܬ ܘܰܡܣܰܟܶܐ܆ ܐܰܝܟ ܡܶܠܬܶܗ ܕܩܽܘܗܠܰܬ ܕܳܐܡܰܪ: ܙܰܒܢܳܐ ܠܡܶܫܬܰܩ ܘܙܰܒܢܳܐ ܠܰܡܡܰܠܳܠܽܘ^[58]. ܟܽܠܗܶܝܢ ܓܶܝܪ ܗܳܠܶܝܢ ܕܥܳܒܕܺܝܢ ܚ̱ܢܰܢ܆ ܒܚܰܘܣܳܢܳܐ ܕܥܰܠ ܢܰܦ̈ܫܳܬܳܐ ܕܺܝܠܟܽܘܢ ܥܳܒܕܺܝܢ ܚ̱ܢܰܢ܆ ܘܰܐܝܟܰܢܳܐ ܕܟܰܕ ܠܗܳܝ ܕܫܰܦܺܝܪܳܐ ܠܰܘ ܒܰܩܛܺܝܪܳܐ ܣܳܥܪܺܝܢ ܐܢ̱ܬܽܘܢ ܠܳܗ̇ ܐܶܠܳܐ ܨܶܒܝܳܢܳܐܺܝܬ܆ ܡܫܰܡ̈ܠܰܝܳܐ ܘܰܓܡܺܝܪ̈ܶܐ ܬܶܗܘܽܘܢ܆ ܐܰܝܟܰܢܳܐ ܕܰܐܒܽܘܟܽܘܢ ܗܰܘ ܫܡܰܝܳܢܳܐ ܡܫܰܡܠܝܳܐ ܐܺܝܬܰܘܗ̱ܝ^[59]. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܡܫܺܝܚܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܫܰܒܥܺܝܢ ܘܬܶܫܥܳܐ.

ܡܬܝ. 15: 5 ـ 6 [1]

ܡܬܝ. 15: 11 [2]

ܕܰܡܡܰܠܠܺܝܢ ܫܽܘܦܪܳܢܳܐܝܬ ܠܽܘܩܒܰܠ ܦܽܘܡܶܗ ܕܡܳܪܝܳܐ[3]

ܝܫܘܥ ܒܪ ܢܘܢ. 1: 18 [4]

ܛܝܛܘܣ. 1: 9 [5]

ܐ. ܕܒܪܝܡܝܢ. 4: 3 [6]

ܡܙܡܘܪ̈ܐ. 118: 131 [7]

ܐ. ܩܘܪ̈ܝܢܬܝܐ. 14: 19 [8]

ܥܒܪ̈ܝܐ. 5: 12 ـ 14 [9]

ܐܘܠ̈ܝܳܬܶܗ ܕܐܪܡܝܐ. 4: 4[10]

ܡܬܝ. 15: 5 [11]

ܡܢܝܢܐ. 19: 11 [12]

ܡܙܡܘܪ̈ܐ. 51: 2  ܐܦ 51: 10 [13]

ܡܪܩܘܣ. 7: 3 ـ 4 [14]

ܡܬܝ. 23: 25 ـ 26[15]

ܡܬܝ. 15: 1 ـ 2 [16]

ܒ. ܡܠ̈ܟܐ. 17: 41 [17]

ܡܬܝ. 15: 1[18]

ܝܘܚܢܢ. 13: 10 [19]

ܡܦܩܢܐ. 20: 13 [20]

ܡܬܝ. 15: 3 [21]

ܡܬܝ. 15: 4 ـ 6 [22]

ܡܦܩܢܐ. 20: 12 [23]

ܬܶܢܝܢ ܢܡܘܣܐ. 6: 5 [24]

ܣܶܦܪܐ ܕܒܪܝܬܐ. 48: 22 [25]

ܡܪܩܘܣ. 7: 11 [26]

^[27] ܙܳܕܶܩ ܠܡܶܕܰܥ ܕܰܠܘܬ ܝܰܘ̈ܢܳܝܶܐ܆ ܒܶܐܘܢܓܠܝܘܢ ܡܰܢ ܗܰܘ ܕܡܰܪܩܘܣ܆ ܒܒܰܪ̱ܬ ܩܳܠܳܐ ܥܶܒܪܳܝܬܳܐ ܣܺܝܡ ܫܡܳܐ ܗܰܘ ܕܩܽܘܪܒܳܢܳܐ܆ ܗܳܝ ܕܺܐܝܬܶܝܗ̇ ܩܽܘܪܒܳܢ. ܒܡܰܬܰܝ ܕܶܝܢ܆ ܠܟܣܝܣ ܝܰܘܢܳܝܬܳܐ ܣܺܝܡܳܐ. ܗܳܝ ܕܺܐܝܬܶܝܗ̇ ܕܽܘܪܘܢ. ܗܳܝ ܟܺܝܬ ܕܰܡܫܰܘܕܥܳܐ ܐܳܦ ܩܽܘܪܒܳܢܳܐ. ܐܳܦ ܡܰܘܗܰܒܬܳܐ.

ܡܬܝ. 27: 6 [28]

[29] ܠܡܶܕܰܥ ܙܳܕܶܩ܆ ܕܠܐ ܡܰܨܝܳܐ ܕܢܶܬܢܛܰܪ ܗܰܘܢܳܐ ܕܡ̈ܶܠܶܐ ܗܳܠܶܝܢ ܕܰܒܕܽܘܟܬܳܐ ܗܳܕܶܐ ܐܰܝܟ ܢܺܝܫܶܗ ܕܡܰܠܦܳܢܳܐ. ܒܗܳܝ ܕܰܒܠܶܫܳܢܳܐ ܝܰܘܢܳܝܳܐ܆ ܬܪܶܝܢ ܫܡܳܗ̈ܶܐ ܐܺܝܬ.  ܕܰܬܪ̈ܰܝܗܽܘܢ ܝܽܘܬܪܳܢܳܐ ܡܶܬܦܰܫܩܺܝܢ ܠܣܽܘܪܝ̣ܳܝ̣ܳܐ܆ ܘܰܥܠܰܝܗܽܘܢ ܫܩܰܠ ܡܰܠܦܳܢܳܐ ܕܢܺܐܡܰܪ. ܕܚܰܕ ܐܺܝܬܰܘܗ̱ܝ ܐܘܦܠܝܐ܆ ܘܚܰܕ ܐܺܝܬܰܘܗ̱ܝ ܩܐܪܕܘܣ. ܐܰܝܟ ܕܡܶܢ ܡ̈ܶܠܶܐ ܕܰܬܪ̈ܰܝܗܽܘܢ ܐܳܡܰܪ. ܕܬܺܐܬ̣ܪ ܗܳܝ ܕܬܺܐܬ̣ܪ ܐܺܝܬܶܝܗ̇. ܗܳܟܰܢܳܐ ܐܺܝܬܶܝܗ̇ ܡܶܠܬܳܐ ܒܝܰܘܢܳܝܳܐ܆ ܘܠܰܘ ܡܶܢ ܗܶܢܝܳܢܳܐ ܣܺܝܡܳܐ.

ܐܓܪܬܐ ܕܺܝܗܽܘܕܳܐ. 11 [30]

ܐܓܪܬܐ ܕܝܗܘܕܐ. 16 [31]

ܐܫܥܝܐ. 33: 15 [32]

ܬܶܢܝܢ ܢܡܘܣܐ. 6: 5 [33]

ܡܬܝ. 15: 5 ـ 6 [34]

ܡܬܝ. 23: 27[35]

ܡܬܝ. 15: 7 ـ 9 [36]

 ܠܐ ܐ̱ܢܳܫ ܢܬܦܫܟ ܗܳܪܟܳܐ܆ ܫܰܦܺܝܪ ܣܺܝܡ.[37]

ܡܬܝ. 15: 10 ـ 11 [38]

ܡܬܝ. 15: 2 [39]

ܟܗ̈ܢܐ. 3: 17 [40]

ܡܬܝ. 6: 26 [41]

ܡܬܝ. 15: 11 [42]

ܡܬܝ. 15: 19[43]

ܐ. ܩܘܪ̈ܝܢܬܝܐ. 10: 27 ـ 28 [44]

ܦܪܟܣܝܣ. 10: 11 ـ 14[45]

ܡܬܝ. 15: 13 ـ 14 [46]

ܕܛܳܥܝܳܐ[47]

ܡܬܝ. 15: 14 [48]

ܡܬܝ. 17: 27 [49]

ܐ. ܩܘܪ̈ܝܢܬܝܐ. 1: 23 [50]

[51]ܡܶܛܽܠ ܕܰܐܝܟ ܕܰܒܣܽܘܓܐܐ ܡܶܢ ܡܳܐܢܳܐ ܗܰܘ ܕܬܟܠܬܐ ܥܳܒܕܺܝܢ ܗ̱ܘܰܘ ܦܪ̈ܺܝܫܶܐ ܠܦܘܠܐܩܛܝܪ̈ܝܐ ܕܺܝܠܗܽܘܢ: ܬܟܠܬܐ ܐܰܘܟܺܝܬ ܠܰܩܡܝ̈ܥܐ ܡܢܰܛܪ̈ܳܢܶܐ ܗܳܢܽܘܢ ܕܬܳܠܶܝܢ ܗ̱ܘܰܘ ܥܠܰܝܗܽܘܢ܆ ܬܟ̈ܠܝܬܐ ܐܶܬܥܰܝܰܕܘ ܣܽܘܪ̈ܝ̣ܝ̣ܐ ܕܢܶܩܪܽܘܢ ܐܶܢܽܘܢ. ܠܡܶܩܪܳܐ ـ ܬܟܺܝܠ̈ܬܐ ـ ܐܺܝܬܰܘܗܝ ܓܰܘܢܳܐ ܗܰܘ ܕܰܩܢ̣ܥܐ ܐܰܘ ܕܩܢܟܐ؟ (Violet)

ܡܬܝ. 23: 5 [52]

ܦܪܟܣܝܣ. 19: 12 [53]

 ܘܗܰܝܡܳܢܽܘܬܳܐ[54]

ܝܥܩܘܒ. 5: 14 ـ 15 [55]

ܘܰܠܡܺܐܪܰܬ[56]

ܐ. ܩܘܪ̈ܝܢܬܝܐ. 8: 10 ـ 12 [57]

ܩܘܗܠܰܬ. 3: 7 [58]

ܡܬܝ. 5: 48[59]