ܥܰܠ ܣܳܗ̈ܕܶܐ ܩܰܕܺܝ̈ܫܶܐ܆ ܛܰܐܪܰܐܟܽܘܤ܆ ܦܪܽܘܟܽܘܤ܆ ܐܰܢܕܪܽܘܢܺܝܩܽܘܤ.
78: ܐܰܝܟܰܢܳܐ ܐܶ݀ܫܬܽܘܩ܆ ܟܰܕ ܬܠܳܬܳܐ ܣܳܗ̈ܕܺܝܢ ܚܳܙܶܐ ܐ̱ܢܳܐ܆ ܕܰܐܝܟ ܚܰܕ ܓܰܒܪܳܐ ܫܰܠܡܳܐܺܝܬ ܚܕܳܐ ܣܳܗܕܽܘܬܳܐ ܐܶܬܟܰܬܰܫܘ܆ ܘܰܐܝܟ ܣܝܳܡ ܢܳܡܽܘܣܳܐ ܫܠܺܝܚܳܝܳܐ ܠܰܚܕܳܝܽܘܬܳܐ ܕܪܽܘܚܳܐ ܒܶܐܣܳܪܳܐ ܕܬܰܟ̈ܬܽܘܫܶܐ ܢܛܰܪܘ ܘܰܒܗܽܘܢ ܒܰܥ̈ܒܳܕܶܐ ܚܰܘܺܝܘ܆ ܘܒܰܕܡܽܘܬ ܟܽܘܠܳܝܽܘܬ ܙܰܝܢܳܐ ܠܒܶܫܘ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܟܳܗ̈ܢܳܝܳܬܳܐ ܕܦܰܘܠܽܘܤ: ܠܰܘ ܕܟܳܬܶܒ ܐܶܠܳܐ ܕܰܡܙܰܝܶܢ܆ ܚܰܕ ܦܰܓܪܳܐ ܘܰܚܕܳܐ ܪܽܘܚܳܐ ܐܰܝܟܰܢܳܐ ܕܳܐܦ ܐܶܬܩܪܺܝܬܽܘܢ ܒܚܰܕ ܣܰܒܪܳܐ ܕܰܩܪܳܝܬܳܐ ܕܺܝܠܟܽܘܢ܆ ܚܰܕ ܡܳܪܝܳܐ ܘܰܚܕܐ ܗܰܝܡܳܢܽܘܬܳܐ܆ ܚܕܳܐ ܡܰܥܡܽܘܕܺܝܬܳܐ[1]܆ ܘܢܳܩܦܳܐܺܝܬ ܚܬܰܡܘ ܘܫܰܪܰܪܘ܆ ܕܰܚܕܳܐ ܗܝ ܐܳܦ ܣܳܗܕܽܘܬܳܐ ܗܳܝ ܕܥܰܠ ܗܳܠܶܝܢ. ܡܳܕܶܝܢ ܣܦܺܝ̈ܩܶܐ ܘܚܰܪ̈ܒܶܐ ܡܶܢ ܡ̈ܶܠܶܐ ܗܳܠܶܝܢ ܐܺܝܬܰܝܗܽܘܢ܆ ܘܠܳܐ ܡܫܰܘܬܦ̈ܶܐ ܕܛܰܝܒܽܘܬܳܐ ܐܰܠܳܗܳܝܬܳܐ ܕܪܽܘܚܳܐ܆ ܗܳܢܽܘܢ ܕܳܐܦܠܳܐ ܗܶܢܽܘܢ ܠܢܰܦܫܗܽܘܢ ܫܳܠܡܺܝܢ܆ ܐܶܠܳܐ ܡܚܰܓܪܺܝܢ ܒܚܽܘܫܳܒ̈ܶܐ ܗܳܢܽܘܢ ܕܫܰܦܺܝܪܽܘܬ ܕܶܚܠܬܳܐ܆ ܘܒܰܙܒܰܢ ܡܰܢ ܗܳܠܶܝܢ ܕܫܰܦܺܝܪܽܘܬ ܕܶܚܠܬܳܐ ܘܡܶܬܩܰܠ̈ܣܳܢܝܳܬܳܐ ܐܳܦ ܡܰܘܕܶܝܢ ܐܳܦ ܟܳܬܒܺܝܢ܆ ܒܰܙܒܰܢ ܕܶܝܢ ܠܘܳܬ ܗܳܢܶܝܢ ܣܰܩܽܘܒ̈ܠܳܝܳܬܳܐ ܡܶܬܬܰܝܬܶܝܢ ܫܳܢܝܳܐܺܝܬ. ܘܗܳܫܳܐ ܡܰܢ ܣܳܥܽܘܪ̈ܘܳܬܳܐ ܗܳܠܶܝܢ ܕܰܡܫܺܝܚܳܐ܆ ܗܳܫܳܐ ܕܶܝܢ ܗܳܠܶܝܢ ܕܳܐܟܶܠܩܰܪܨܳܐ ܣܳܥܪܺܝܢ܆ ܘܰܕܒܰܚܕܳܐ ܡܰܢ ܥܰܝܢܳܐ ܠܘܳܬ ܫܡܰܝܳܐ ܕܳܒܪܺܝܢ ܒܰܩܛܺܝܪܳܐ ܠܰܡܚ̣ܳܪ. ܒܰܚܕܳܐ ܕܶܝܢ ܠܘܳܬ ܐܰܪܥܳܐ ܐܳܦ ܟܰܕ ܐܳܠܨܳܐܺܝܬ ܡܰܡܚܠܺܝܢ܆ ܘܰܠܘܳܬ ܗܳܠܶܝܢ ܕܰܠܬܰܚܬ ܐܰܣܺܝܪܺܝܢ ܘܰܩܒܺܝܥܺܝܢ܆ ܐܳܦܶܢ ܡܶܣܬܰܟܡܺܝܢ ܕܗܳܠܶܝܢ ܕܰܠܥܶܠ ܡܶܬܪܰܥܶܝܢ. ܐܰ݀ܝܬܶܐ ܗܳܟܺܝܠ ܕܰܠܘܳܬ ܣܳܗ̈ܕܶܐ ܢ݀ܚܽܘܪ܆ ܘܡܶܢܗܽܘܢ ܢܺ݀ܐܠܰܦ܆ ܕܡܶܛܽܠ ܚܰܕ ܘܗܽܘ ܟܰܕ ܗܽܘ ܐܰܠܳܗܳܐ܆ ܗܶܢܶܝܢ ܟܰܕ ܗܶܢܶܝܢ ܐܳܦ ܢܶܬܪܰܥܶܐ ܐܳܦ ܢܺܐܡܰܪ: ܘܕܰܥܠܰܝܗܶܝܢ ܟܰܕ ܥܠܰܝܗܶܝܢ ܢܩܽܘܡ܆ ܘܠܰܘ ܒܟܽܠ ܪܽܘܚܳܐ ܢܶܬܢܫܶܒ ܘܢܶܗܦܽܘܟ ܢܶܬܢܰܫܰܒ ܣܰܩܽܘܒܠܳܐܺܝܬ܆ ܘܒܰܕܡܽܘܬ ܩܢܰܝ̈ܳܐ ܦܫܺܝܩܳܐܺܝܬ ܠܰܬܪ̈ܰܝܗܽܘܢ ܓܰܒ̈ܶܐ ܢܶܨܛܠܶܐ.
ܬܠܳܬܳܐ ܐܺܝܬܰܝܗܽܘܢ ܗ̱ܘܰܘ ܐܰܝܟ ܕܶܐܡܪܶܬ ܗܳܢܽܘܢ ܚܰܝ̈ܠܬܳܢܶܐ ܒܡܶܢܝܳܢܳܐ܆ ܟܰܕ ܕܝܽܘܩܠܺܝܛܝܰܐܢܽܘܤ ܡܰܢ ܘܡܰܟܣܺܝܡܝܰܐܢܽܘܤ ܗܳܢܽܘܢ ܛܪ̈ܽܘܢܶܐ ܠܫܰܦܺܝܪܽܘܬ ܕܶܚܠܬܳܐ ܪܳܕܦܺܝܢ ܗ̱ܘܰܘ. ܡܰܟܣܺܝܡܝܰܐܢܽܘܤ ܕܶܝܢ ܐ̱ܢܳܫ ܗܺܓܡܽܘܢܳܐ ܒܛܰܪܣܽܘܤ ܕܩܺܝܠܺܝܩܺܝܰܐ ܗܳܠܶܝܢ ܩܰܕܡܳܝ̈ܳܬܳܐ ܕܳܐܶܢ ܗ̱ܘܳܐ܆ ܗܳܠܶܝܢ ܕܶܝܢ ܐ̱ܚܪ̈ܳܝܳܬܳܐ ܒܐܢܐܙܐܪܒܐ. ܡܰܠܽܘܢ ܕܶܝܢ ܣܳܐܶܡ ܗ̱ܘܳܐ ܐܰܓܽܘܢܳܐ ܐܰܝܟ ܕܣܳܒܰܪ ܗ̱ܘܳܐ ܝܰܬܺܝܪ ܩܰܫܝܳܐܺܝܬ. ܘܗܰܘ ܡܰܢ ܩܰܕܡܳܝܳܐ ܟܰܕ ܥܒܰܪ ܠܰܡܨܰܥܬܳܐ ܘܶܐܫܬܰܐܰܠ ܕܡܳܢܳܐ ܡܶܬܩܪܶܐ܆ ܟܪܺܝܣܛܝܳܢܳܐ ܐܰܘܕܺܝ ܗܽܘ ܠܶܗ. ܐܰܝܟ ܕܰܠܡܺܐܡܰܪ ܟܰܕ ܐܳܡܰܪ ܠܘܳܬ ܕܰܝܳܢܳܐ ܗܰܘ ܥܰܘܳܠܳܐ܆ ܕܗܰܘ ܡܳܐ ܕܰܐܢ̱ܬ ܪܳܕܶܦ ܐܰܢ̱ܬ ܐܰܝܟ ܥܶܕܠܳܝܳܐ܆ ܗܳܢܳܐ ܠܺܝ ܐܺܝܬܰܘܗ̱ܝ ܨܶܒܬܳܐ ܘܰܫܡܳܐ ܡܳܪܳܢܳܝܳܐ. ܗܰܘ ܓܶܝܪ ܕܡܶܢ ܐܰܒܳܗ̈ܰܝ ܐܶܬܩܪܺܝ܆ ܫܺܐܝܠܳܐ ܐܰܘܟܺܝܬ ܚܫܰܚܬܳܢܳܝܳܐ ܐܺܝܬܰܘܗ̱ܝ܆ ܘܰܠܦܽܘܬ ܗܰܘ ܡܳܐ ܕܰܠܗܳܢܽܘܢ ܡܶܣܬܒܰܪ ܗ̱ܘܳܐ܆ ܘܠܰܘ ܕܡܶܢܗܽܘܢ ܕܣܽܘܥܪ̈ܳܢܶܐ ܐܶܬܬܣܺܝܡ. ܡܶܛܽܠ ܕܶܝܢ ܕܰܠܡܺܐܠܰܦ ܐܳܦ ܠܗܳܢܳܐ ܡܶܬܚܪܶܐ ܐܰܢ̱ܬ܆ ܛܰܐܪܰܐܟܽܘܣ[2] ܡܶܫܬܰܡܰܗ ܐ̱ܢܳܐ܆ ܟܰܕ ܐܳܦܠܳܐ ܠܗܳܢܳܐ ܟܽܘܢܳܝܳܐ ܡܕܰܓܶܠ ܐ̱ܢܳܐ. ܟܰܕ ܓܶܝܪ ܦܳܠܚܳܐ ܐܺܝܬܰܝ܆ ܟܶܦܪܶܬ ܒܗܳܝ ܕܰܠܬܰܚܬ ܐܶ݀ܦܠܰܚ. ܡܶܛܽܠ ܟܺܝܬ ܕܙܰܝ̈ܢܶܐ ܕܺܝܠܰܢ ܟܪ̈ܺܝܣܛܝܳܢܶܐ܆ ܠܰܘ ܒܶܣܪ̈ܳܢܳܝܶܐ ܐܺܝܬܰܝܗܽܘܢ܆ ܐܶܠܳܐ ܚܰܝ̈ܠܬܳܢܳܐ ܠܰܐܠܳܗܳܐ[3]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܡܶܛܽܠ ܗܳܕܶܐ ܠܙܽܘܢܰܐ ܐܰܝܟ ܕܠܰܐܣܽܘܪܳܐ܆ ܨܶܒܝܳܢܳܐܺܝܬ ܫܕܺܝܬ̣ ܡܶܢܝ܆ ܟܰܕ ܫܳܡܰܥ ܐ̱ܢܳܐ ܠܶܗ ܠܕܰܘܺܝܕ ܕܰܡܙܰܡܰܪ: ܐܶܬܛܰܝܒܶܬ ܘܠܳܐ ܐܶܬܕܰܠܚܶܬ[4]. ܘܰܠܡ̈ܶܠܶܐ ܐ̱ܚܪ̈ܳܢܝܳܬܳܐ ܐܰܠܳܗܳܝ̈ܳܬܳܐ ܕܡܰܪ̈ܬܝܳܢ܆ ܡܶܢ ܕܶܚܠܰܬܗܽܘܢ ܕܶܝܢ ܠܳܐ ܬܶܕܚܠܽܘܢ ܐܳܦܠܐ ܬܶܬܕܰܠܚܽܘܢ܆ ܠܡܳܪܝܳܐ ܕܶܝܢ ܐܰܠܳܗܳܐ ܩܰܕܶܫܘ ܒܠܶܒܰܘ̈ܳܬܳܐ ܕܺܝܠܟܽܘܢ[5]. ܗܰܘ ܓܶܝܪ ܕܗܳܟܰܢܳܐ ܡܛܰܝܰܒ܆ ܡܰܗܦܶܟ ܡܰܥܒܰܪ ܠܶܗ ܠܰܕܠܽܘܚܝܳܐ ܥܰܠ ܗܳܢܽܘܢ ܕܡܰܣܒܪܺܝܢ ܕܡܰܕܚܠܺܝܢ܆ ܟܰܕ ܐܺܝܬ ܠܶܗ ܒܶܗ ܠܰܐܠܳܗܳܐ ܗܰܘ ܕܠܽܘܒܳܒܳܐ܆ ܗܰܘ ܕܶܐܡܰܪ ܠܬܰܠܡܺܝܕܰܘ̈ܗ̱ܝ܆ ܐܶܬܠܰܒܒܘ. ܐܶܢܳܐ ܙܟܺܝܬܶܗ ܠܥܳܠܡܳܐ܆[6] ܘܠܽܘܩܒܰܠ ܗܳܢܽܘܢ ܕܠܳܐ ܡܶܬܬܦܺܝܣܺܝܢ ܒܝܰܕ ܢܒܺܝܳܐ ܡܰܙܥܶܩ: ܘܶܐܢܳܐ ܐܰܝܟ ܕܠܽܘܚܝܳܐ ܠܰܐܦܪܶܝܡ܆ ܘܰܐܝܟ ܥܽܘܩܣܳܐ ܠܒܰܝܬܳܐ ܕܺܝܗܽܘܕܳܐ. ܣܥܽܘܪ ܗܳܟܺܝܠ ܗܰܘ ܡܳܐ ܕܨܳܒܶܐ ܐܰܢ̱ܬ. ܐܳܦ ܓܶܝܪ ܐܶ݀ܗܘܶܐ ܠܳܟ ܡܶܛܽܠ ܐܰܠܳܗܳܐ ܗܰܘ ܕܒܺܝ܆ ܐܳܦ ܥܽܘܩܣܳܐ܆ ܐܳܦ ܕܠܽܘܚܝܳܐ. ܘܠܳܐ ܠܚܶܘܳܪ̈ܳܬܳܐ ܘܰܠܣܰܝܒܽܘܬܳܐ ܕܺܝܠܝ ܐܰܝܟ ܡܶܬܚܰܢܳܢܺܝܬܳܐ ܬܰܥܶܗܕܰܝܢܝ܆ ܠܺܝ ܕܒܰܚܘܺܝܚܽܘܬܳܐ ܡܶܬܥܰܠܰܡ ܐ̱ܢܳܐ܆ ܘܳܐܦܠܳܐ ܠܛܳܥܝܽܘܬܳܐ ܕܶܚܠܰܬ ܠܫ̈ܺܐܕܶܐ ܕܡܰܠ̈ܟܶܐ ܕܺܝܠܳܟ܆ ܢܳܡܽܘܣܳܐ ܐܰܒܳܗܳܝܳܐ ܬܶܩܪܶܐ. ܚܰܕ ܓܶܝܪ ܐܺܝܬܰܘܗ̱ܝ ܐܰܒܳܐ ܕܺܝܠܰܢ ܘܫܰܪܺܝܪܳܐ܆ ܐܰܠܳܗܳܐ ܗܰܘ ܕܰܠܗܳܝ ܕܢܶܗܘܶܐ ܐܺܝܬܰܝܢ ܐܰܝܬܺܝ ܠܰܢ. ܡܳܕܶܝܢ ܢܳܡܽܘܣܶܗ ܕܗܰܘ ܐܺܝܬܰܘܗ̱ܝ ܐܰܒܳܗܳܝܳܐ ܘܒܰܠܚܽܘܕܰܘܗ̱ܝ. ܕܗܳܢܽܘܢ ܓܶܝܪ ܕܠܳܐ ܐܺܝܬܰܝܗܽܘܢ ܐܰܠܳܗ̈ܶܐ܆ ܐܶܠܳܐ ܒܩܰܝܣ̈ܶܐ ܡܩܰܝܡܺܝܢ ܘܰܒܟܺܐܦ̈ܶܐ܆ ܐܰܝܟܰܢܳܐ ܗܳܝ ܕܰܢܣܺܝܡܽܘܢ ܢܳܡܽܘܣܳܐ ܠܰܘ ܢܽܘܟܪܳܝܬܳܐ ܗ̱ܝ. ܘܟܰܕ ܒܗܳܠܶܝܢ ܓܰܘܙܠܶܗ ܠܪܽܘܓܙܶܗ ܕܕܰܝܳܢܳܐ܆ ܐܰܝܟ ܐܰܝܢܳܐ ܕܰܠܫ̈ܺܐܕܶܐ[7] ܘܰܠܡܰܠ̈ܟܶܐ ܡܨܰܥܰܪ܆ ܒܡܰܚ̈ܘܳܬܳܐ ܣܰܓܺܝ̈ܳܐܬܳܐ ܥܰܠ ܨܰܘܪܶܗ ܡܶܬܡܚܶܐ ܗ̱ܘܳܐ. ܕܗܳܠܶܝܢ ܕܰܚܙܳܬܗܶܝܢ ܒܰܠܚܽܘܕܶܝܗ̇܆ ܠܳܐ ܡܶܫܟܚܺܝܢ ܗ̱ܘܰܘ ܠܰܡܣܰܝܒܳܪܽܘ ܗܳܢܽܘܢ ܕܰܠܘܳܬܶܗ ܩܳܝܡܺܝܢ ܗ̱ܘܰܘ. ܡܶܛܽܠܗܳܕܶܐ ܐܳܦ ܕܢܰܪܬܽܘܢܳܝܗ̱ܝ ܡܢܰܣܶܝܢ ܗ̱ܘܰܘ܆ ܐܰܝܟܰܢܳܐ ܕܡܶܢ ܫܳܛܝܽܘܬܳܐ ܘܡܶܢ ܨܒܳܪܳܐ ܣܪܺܝܩܳܐ ܐܰܝܟ ܕܰܠܗܽܘܢ ܡܶܣܬܒܰܪ ܗ̱ܘܳܐ ܢܶܫܬܰܚܠܰܦ. ܗܳܢܽܘܢ ܕܰܠܘܳܬܗܽܘܢ܆ ܚܰܟܺܝܡܳܐܺܝܬ ܗܰܘ ܚܰܝܠܬܳܢܳܐ ܐܶܡܰܪ. ܒܟܽܠܗܶܝܢ ܗܳܠܶܝܢ ܫܬܺܝܢ ܫܢܰܝ̈ܳܐ ܕܚܰܝ̈ܶܐ ܕܺܝܠܝ܆ ܟܰܕ ܠܫܳܢܝܽܘܬܳܐ ܗܳܕܶܐ ܒܪܶܚܡܰܬ ܥܰܡܠܳܐ ܐܶܬܥܰܢܘܺܝܬ̣܆ ܒܫܳܥܬܳܐ ܚܕܳܐ ܠܗܰܘ ܡܳܐ ܕܰܒܙܰܒܢܳܐ ܐܰܪܺܝܟܳܐ ܐܶܬܩܢܺܝ܆ ܗܳܟܰܢܳܐ ܦܫܺܝܩܳܐܺܝܬ ܐܶ݀ܫܕܶܐ ܡܶܢܝ؟ ܘܟܰܕ ܗܳܠܶܝܢ ܐܶܡܰܪ: ܘܰܕܠܳܐ ܦܽܘܪܣܳܐ ܐܶܬܚܙܺܝ ܠܗܳܢܽܘܢ ܕܠܰܡܦܳܣܽܘܬܶܗ ܨܳܒܶܝܢ ܗ̱ܘܰܘ܆ ܟܰܕ ܒܦܽܘܩܕܳܢܳܐ ܕܕܰܝܳܢܳܐ܆ ܕܰܐܣܽܘܪ̈ܶܐ ܕܦܰܪܙܠܳܐ ܕܝܰܬܺܝܪ ܪܰܘܪܒܺܝܢ ܗ̱ܘܰܘ ܐܰܘ ܡܶܢ ܩܕܺܝܡ ܫܩܰܠ ܢܶܣܝܳܢܳܐ܆ ܠܒܶܝܬ ܚܒܽܘܫܝܳܐ ܐܶܬܬܰܘܒܰܠ.
ܐܶܬܩܰܪܰܒ ܕܶܝܢ ܗܰܘ ܕܺܐܝܬܰܘܗ̱ܝ ܗ̱ܘܳܐ ܬܪܰܝܳܢܳܐ ܒܩܰܘܡܬܶܗ܆ ܟܰܕ ܕܠܳܐ ܬܽܘܗܳܝܳܐ ܘܡܰܠܘܽܬܳܐܺܝܬ ܟܽܠܗܶܝܢ ܐܶܡܰܪ: ܐܰܝܟܰܢܳܐ ܕܠܳܐ ܢܰܘܚܰܪ ܠܡܶܚܰܫ. ܐܶܡܰܪ ܓܶܝܪ܆ ܟܽܘܢܳܝܳܐ ܡܰܢ ܗܰܘ ܐܰܠܳܗܳܝܳܐ ܘܰܡܥܰܠܝܳܐ ܡܶܬܩܪܶܐ ܐ̱ܢܳܐ ܟܪܺܝܣܛܝܰܐܢܽܘܤ. ܗܰܘ ܕܶܝܢ ܐ̱ܢܳܫܳܝܳܐ ܦܪܽܘܒܽܘܤ. ܬܰܪܰܐܩܳܝܳܐ ܐܺܝܬܰܝ ܒܓܶܢܣܳܐ. ܗܶܕܝܽܘܛܳܐ[8] ܒܥܳܠܡܳܐ[9]. ܕܠܺܐܝܩܳܪ̈ܶܐ ܕܡܰܠ̈ܟܶܐ ܘܰܠܗܳܠܶܝܢ ܕܺܝܠܳܟ ܐܳܘ ܕܰܝܳܢܳܐ! ܗܳܠܶܝܢ ܕܠܽܘܩܒܰܠ ܫܰܦܺܝܪܽܘܬ ܕܶܚܠܬܳܐ܆ ܫܳܐܶܛ ܐ̱ܢܳܐ. ܝܰܬܺܝܪܳܐܺܝܬ ܕܶܝܢ ܐܳܦ ܠܪܳܚܡܽܘܬܳܐ ܕܺܝܠܟܽܘܢ ܗܳܝ ܕܡܰܪܚܩܳܐ ܡܶܢ ܐܰܠܳܗܳܐ. ܒܡܶܕܶܡ ܓܶܝܪ ܣܰܓܺܝܳܐܐ ܙܒ̣ܰܢܬܳܗ̇ ܠܗܳܝ ܕܶܐ݀ܗܘܶܐ ܐܺܝܬܰܝ ܟܪܺܝܣܛܝܳܢܳܐ܆ ܟܰܕ ܥܰܠ ܟܽܠܗܶܝܢ ܗܳܠܶܝܢ ܕܺܐܝܬ ܗ̱ܘܳܐ ܠܺܝ ܕܠܰܘ ܙܥܽܘܪ̈ܝܳܬܳܐ ܐܺܝܬܰܝܗܶܝܢ ܗ̱ܘܰܝ̈ ܐܰܒܣܺܝܬ̣܆ ܡܶܛܽܠ ܦܽܘܩܕܳܢܶܗ ܕܪܽܘܚܳܐ. ܘܟܰܕ ܗܳܠܶܝܢ ܐܳܡܰܪ: ܟܰܕ ܐܶܬܶܐܣܰܪ ܟܰܝ ܘܶܐܬܡܬܰܚ܆ ܡܰܚ̈ܘܳܬܳܐ ܕܡܶܢܫܶܠܝ ܘܣܰܓܺܝ̈ܳܐܬܳܐ ܕܰܓ̈ܝܳܕܶܐ ܕܬܰܘܪ̈ܶܐ ܒܰܕܡܽܘܬ 222ܚ̈ܝܛܶܐ ܕܡܶܛܪܳܐ ܡܩܰܒܶܠ ܗ̱ܘܳܐ. ܘܟܰܕ ܒܰܕܡܳܐ ܡܶܫܬܰܩܝܳܐ ܗ̱ܘܳܬ ܐܰܪܥܳܐ܆ ܟܰܕ ܗܳܢܽܘܢ ܕܩܳܝܡܺܝܢ ܗ̱ܘܰܘ ܚܕܳܪ̈ܰܘܗ̱ܝ ܡܶܬܬܰܡܗܺܝܢ ܗ̱ܘܰܘ ܘܩܳܥܶܝܢ ܗ̱ܘܰܘ ܥܠܰܘܗ̱ܝ܆ ܚܙܺܝ ܠܪܶܕܝܳܐ ܗܳܢܳܐ ܕܰܚܺܝܠܳܐ ܘܚܽܘܤ ܥܰܠ ܢܰܦܫܳܟ܆ ܐܳܦ ܟܰܕ ܚܳܪ ܠܘܳܬܗܽܘܢ ܐܶܡܰܪ܆ ܐܳܦ ܡܶܫܚܳܐ ܕܚܺܝܨܽܘܬܳܐ ܐܰܘ ܡܽܘܪܽܘܢ ܚܳܫܶܒ ܐ̱ܢܳܐ ܠܶܗ ܠܰܕܡܳܐ ܗܳܢܳܐ. ܡܶܛܽܠ ܗܳܕܶܐ ܐܳܦ ܝܰܬܺܝܪܳܐܺܝܬ ܠܘܳܬ ܐܰܓܽܘ̈ܢܶܐ ܡܶܬܡܫܰܚ ܐ̱ܢܳܐ. ܘܰܒܪܺܝܚܳܐ ܡܶܬܚܰܝܰܨ ܐ̱ܢܳܐ ܒܚܽܘܫܳܒܝ. ܘܟܰܕ ܥܰܠ ܟܰܪܣܶܗ ܒܳܗ̇ ܒܰܕܡܽܘܬܐ ܐܶܬܡܚܺܝ܆ ܘܒܰܕܡܳܐ ܥܰܬܺܝܪܳܐܺܝܬ ܐܰܣܡܩܳܗ̇ ܠܰܐܪܥܳܐ܆ ܡܫܺܝܚܳܐ ܥܰܕܰܪܰܝܢܝ ܒܰܠܚܽܘܕ ܐܶܡܰܪ: ܘܟܰܕ ܗܶܓܡܽܘܢܳܐ ܐܶܡܰܪ ܕܶܐܠܽܘ ܡܥܰܕܰܪ ܗ̱ܘܳܐ ܠܳܟ܆ ܡܶܢ ܟܽܠ ܦܪܽܘܤ ܐܳܦ ܡܶܢ ܫܶܢ̈ܕܶܐ ܗܳܠܶܝܢ ܡܦܰܠܶܛ ܗ̱ܘܳܐ ܠܳܟ܆ ܢܰܟܦܳܐܺܝܬ ܐܶܡܰܪ: ܠܰܘ ܓܶܝܪ ܗܳܝ ܕܠܳܐ ܐܶ݀ܚܰܫ܆ ܐܶܠܳܐ ܗܳܝ ܕܶܐ݀ܣܰܝܒܰܪ ܐܶܢܽܘܢ ܠܚܰܫ̈ܶܐ ܒܳܥܶܐ ܐ̱ܢܳܐ ܡܶܢܶܗ. ܡܰܢܽܘ ܓܶܝܪ ܡܶܢ ܗܳܢܽܘܢ ܕܡܶܬܟܰܬܫܺܝܢ ܒܰܐܓܽܘܢܳܐ ܕܺܐܝܬ ܠܶܗ ܗܰܘܢܳܐ܆ ܢܶܫܐܰܠ ܕܢܶܬܦܰܨܶܐ ܡܶܢ ܐܰܓܽܘ̈ܢܶܐ܆ ܐܰܝܟܰܢܳܐ ܕܠܰܟܠܺܝܠܳܐ ܠܳܐ ܢܶܫܬܘܶܐ. ܛܳܥܶܐ ܐܰܢ̱ܬ ܗܳܟܺܝܠ ܐܰܢ̱ܬ ܠܳܟ܆ ܕܳܐܦ ܐܶܫܬܰܡܥܶܬ ܠܺܝ ܡܶܢ ܡܫܺܝܚܳܐ ܐܳܦ ܐܶܬܥܰܕܪܶܬ. ܐܳܦ ܓܶܝܪ ܟܰܕ ܠܳܐ ܡܶܬܬܦܺܝܤ ܐ̱ܢܳܐ ܠܳܟ ܡܟܰܬܰܪ ܐ̱ܢܳܐ܆ ܟܰܕ ܠܳܐ ܐܶܬܠܰܒܟܶܬ ܒܗܳܠܶܝܢ. ܒܝܰܕ ܐܰܝܠܶܝܢ ܕܣܳܒܰܪ ܗ̱ܘܰܝܬ ܕܠܳܒܶܟ ܐܰܢ̱ܬ ܠܺܝ܆ ܘܟܰܕ ܝܰܬܺܝܪ ܚܠܺܝܡܳܐܺܝܬ ܐܶܬܬܣܺܝܡܶܬ ܒܢܰܦܫܝ܆ ܡܶܢ ܡܰܟܶܐܒܳܢ̈ܝܳܬܳܐ ܗܳܢܶܝܢ ܕܦܰܓܪܳܐ. ܠܗܳܠܶܝܢ ܕܳܐܦ ܟܰܕ ܐܰܫܶܦ ܗܰܘ ܕܕܳܐܶܢ ܗ̱ܘܳܐ܆ ܕܰܒܦܰܪܙܠܳܐ ܡܰܢ ܢܶܬܶܐܣܰܪ܆ ܠܘܳܬ ܒܶܝܬ ܐܰܣܺܝܪ̈ܶܐ ܕܶܝܢ ܢܶܬܬܰܘܒܰܠ܆ ܒܰܐܪܒܥܳܐ ܕܶܝܢ 222ܢܶܩܪ̈ܶܐ ܕܩܰܝܣܳܐ ܗܰܘ ܕܫܶܢ̈ܕܶܐ܆ ܢܶܬܡܬܰܚ ܗܳܢܳܐ ܦܳܩܶܕ ܗ̱ܘܳܐ.
ܕܒܳܬܪܶܗ ܐܰܢܕܪܽܘܢܺܝܩܽܘܤ ܥܳܐܶܠ ܗ̱ܘܳܐ ܬܠܺܝܬܳܝܳܐ. ܕܛܰܠܝܳܐ ܡܰܢ ܐܺܝܬܰܘܗ̱ܝ ܗ̱ܘܳܐ ܒܦܰܓܪܳܐ܆ ܕܗܳܢܽܘܢ ܕܶܝܢ ܕܩܰܕܶܡܘ ܐܶܬܟܰܬܰܫܘ ܫܘܶܐ ܒܩܰܘܡܬܳܐ ܘܰܡܫܰܡܠܝܳܐ܆ ܘܕܰܪܗܶܛ ܐܰܝܟ ܡܶܠܬܶܗ ܕܦܰܘܠܽܘܤ ܠܘܳܬ ܡܫܽܘܚܬܳܐ ܕܡܽܘܠܳܝܶܗ ܕܰܡܫܺܝܚܳܐ[10]. ܡܶܛܽܠ ܗܳܕܶܐ ܠܰܡܥܰܙܝܳܢܽܘܬܳܐ ܠܦܰܪܶܗ̱ܣܺܝܰܐ ܠܡ̈ܶܠܶܐ܆ ܗܶܢܶܝܢ ܟܰܕ ܗܶܢܶܝܢ ܚܰܘܺܝ. ܟܰܕ ܗܳܝ ܐܶܡܰܪ ܠܘܳܬ ܗܶܓܡܽܘܢܳܐ܆ ܕܺܐܝܬܶܝܗ̇ ܗ̱ܘܳܬ ܝܰܬܺܝܪ ܚܕܰܬܳܐ ܘܰܕܝܰܬܺܝܪ ܫܰܪܺܝܪܳܐ܆ ܕܛܳܒܳܐܺܝܬ ܐܳܘ ܡܰܐܟܣܺܝܡܐ ܠܰܐܓܽܘ̈ܢܶܐ ܗܳܢܽܘܢ ܕܺܝܠܰܢ ܫܳܢܝܽܘܬܳܐ ܡܫܰܡܰܗ ܗ̱ܘܰܝܬ܆ ܐܶܠܽܘ ܡܶܢ ܣܰܒܪܳܐ ܡܰܪܡܠܺܝܢ ܗ̱ܘܰܘ. ܐܶܢܕܶܝܢ ܠܘܳܬ ܩܝܳܡܬܳܐ ܢܚܽܘܪ ܐ̱ܢܳܫ܆ ܗܳܝ ܕܡܶܠܬܳܐ ܦܳܪܽܘܩܳܝܬܳܐ ܐܶܫܬܰܘܕܝܰܬ. ܥܰܡ ܦܰܘܠܽܘܤ ܡܶܢ ܟܽܠܦܪܽܘܤ ܢܺܐܡܰܪ: ܗܳܝ ܕܠܳܐ ܫܳܘܶܝܢ ܚܰܫܰܘ̈ܗ̱ܝ ܕܙܰܒܢܳܐ ܗܳܢܳܐ ܕܗܳܫܳܐ܆ ܠܘܳܬ ܫܽܘܒܚܳܐ ܗܰܘ ܕܰܥܬܺܝܕ ܕܢܶܬܓܠܶܐ ܒܰܢ[11]. ܘܟܰܕ ܒܗܳܕܶܐ ܦܺܝܠܳܣܽܘܦܺܝܰܐ ܕܣܳܗܕܳܐ ܐܶܬܢܰܟܰܬ ܗܰܘ܆ ܘܰܠܡܶܠܰܘ̈ܗ̱ܝ ܨܒܳܐ ܕܢܰܟܶܤ ܕܠܰܘ ܡܶܕܶܡ ܐ̱ܚܪܺܢܳܐ ܐܺܝܬܰܝܗܶܝܢ ܐܶܠܳܐ ܐܶܢ ܡ̈ܶܠܶܐ܆ ܐܶܫܟܰܚ ܐܶܢܶܝܢ܆ ܕܰܒܗܽܘܢ ܒܣܽܘܥܪ̈ܳܢܶܐ ܡܶܣ̈ܬܰܗܕܳܢ. ܕܰܒܦܰܪܙܠܳܐ ܓܶܝܪ ܢܣܰܪܛܽܘܢ ܠܫܳܩܰܘ̈ܗ̱ܝ ܦܳܩܶܕ ܗ̱ܘܳܐ. ܒܳܬܰܪܟܶܢ ܠܶܐܠܥܰܘ̈ܗ̱ܝ 222ܕܰܒܙܳܩܽܘ̈ܬܶܐ ܡܶܕܶܡ ܕܣܰܓܺܝ ܚܰܪܺܝܦܺܝܢ ܢܬܰܦܫܽܘܢ ܘܰܢܒܰܙܥܽܘܢ܆ ܕܡܶܠܚܳܐ ܕܶܝܢ ܢܫܽܘܦܽܘܢ ܒܗܽܘܢ܆ ܘܰܒܚ̈ܶܨܦܶܐ ܢܶܚܪܓܽܘܢ ܐܶܢܽܘܢ ܠܫܽܘܚ̈ܢܶܐ܆ ܟܰܕ ܡܶܬܦܰܪܰܤ ܗ̱ܘܳܐ ܕܰܠܘܳܬ ܚܰܪܺܝܦܽܘܬܗܽܘܢ ܕܟܺܐܒ̈ܶܐ ܢܶܫܦܰܠ ܘܢܶܫܬܐܶܠ ܗܰܘ ܐܰܬܠܺܝܛܳܐ. ܗܰܘ ܕܶܝܢ ܐܳܡܰܪ ܗ̱ܘܳܐ܆ ܕܝܰܬܺܝܪ ܡܫܰܪܪܳܐ ܘܰܚܠܺܝܡܳܐ ܥܒܰܕܬ̣ܶܗ ܡܶܠܚܳܐ ܠܦܰܓܪܶܗ܆ ܐܰܝܟܰܢܳܐ ܕܳܐܦ ܠܘܳܬ ܗܰܘ ܡܳܐ ܕܫܳܪܶܟ ܡܶܢ ܐܰܓܽܘ̈ܢܶܐ ܢܶܫܟܰܚ ܠܡܶܣܦܰܩ. ܕܥܰܠ ܗܳܠܶܝܢ ܬܽܘܒ ܟܰܕ ܦܣܳܩ ܣܰܒܪܳܐ ܘܰܐܡܶܐܢ ܗܰܘ ܕܰܡܫܰܢܶܩ ܗ̱ܘܳܐ܆ ܒܰܙܢܳܐ ܕܕܳܡܶܐ ܐܳܦ ܠܗܳܢܳܐ܆ ܕܰܒܒܰܝܬܳܐ ܗܰܘ ܕܰܐܣܽܘܪ̈ܶܐ ܢܶܬܢܛܰܪ ܦܩܰܕ ܗ̱ܘܳܐ.
ܘܟܰܕ ܠܗܳܢܳܐ ܢܶܣܝܳܢܳܐ ܕܝܰܬܺܝܪ ܡܶܢ ܟܽܠ ܒܩܶܐ ܘܰܒܚܺܝܪ ܕܰܬܠܳܬܰܝ̈ܗܽܘܢ ܗܳܠܶܝܢ ܢܰܨܺܝ̈ܚܶܐ ܘܰܙܪ̈ܺܝܙܶܐ ܢܶܣܰܒ. ܡܶܚܕܳܐ ܬܽܘܒ܆ ܒܶܗ ܟܰܕ ܒܶܗ ܒܛܶܟܣܳܐ ܡܩܰܪܶܒ ܗ̱ܘܳܐ ܠܗܽܘܢ ܠܒܺܐܡܰܐ. ܘܬܽܘܒ ܛܰܐܪܰܐܟܽܘܤ ܐܺܝܬܰܘܗ̱ܝ ܗ̱ܘܳܐ܆ ܕܰܒܦܰܪܶܗ̱ܣܺܝܰܐ ܡܶܬܚܰܫܰܚ. ܕܡܰܟܶܤ ܗ̱ܘܳܐ ܠܶܗ ܠܗܺܓܡܽܘܢܳܐ. ܠܽܐܘܛܽܘܩܪ̈ܰܐܛܽܘܪܤ ܐܰܘܟܺܝܬ ܐܰܚܺܝ̈ܕܰܝ ܗܶܢܽܘܢ ܠܗܽܘܢ. ܠܰܐܠܳܗ̈ܶܐ ܕܺܝܠܗܽܘܢ ܗܳܢܽܘܢ ܕܝܰܬܺܝܪ ܡܶܢ ܟܽܠ ܡܚܺܝܠܺܝܢ. ܕܥܰܠ ܦܽܘܡܶܗ ܒܟܺܐܦ̈ܶܐ ܡܶܬܡܚܶܐ ܗ̱ܘܳܐ. ܕܫܶܢܰܘ̈ܗ̱ܝ ܡܶܬܥܰܩܪ̈ܳܢ ܗ̱ܘܰܝ̈. ܕܢܽܘܪܳܐ ܒܺܐܝܕܰܘ̈ܗ̱ܝ ܡܛܰܝܒܳܐܺܝܬ ܡܩܰܒܶܠ ܗ̱ܘܳܐ. ܕܒܳܬܰܪ ܪܺܝܫܶܗ ܡܶܬܬܠܶܐ ܗ̱ܘܳܐ. ܕܰܒܬܶܢܳܢܳܐ ܘܰܒܚܶܠܳܐ ܘܰܒܡܶܠܚܳܐ ܘܰܒܚܽܘܠ̈ܛܳܢܶܐ ܕܙܰܪ̈ܥܽܘܢܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܚܰܪܺܝܦܺܝܢ܆ ܒܰܢܚܺܝܪ̈ܰܘܗ̱ܝ ܡܥܰܙܶܐ ܗ̱ܘܳܐ ܘܰܡܣܰܝܒܰܪ. ܘܕܰܠܢܽܘܪܳܐ ܡܰܢ ܩܰܪܺܝܪܬܳܐ ܚܳܫܶܒ ܗ̱ܘܳܐ ܠܳܗ̇ ܒܦܽܘܚܳܡܳܐ ܕܢܽܘܪܳܐ ܗܳܝ ܕܰܠܥܳܠܰܡ܆ ܚܠܺܝܬܳܐ ܕܶܝܢ ܠܰܐܝܢܳܝܽܘܬܳܐ ܗܳܝ ܚܰܪܺܝܦܬܳܐ܆ ܘܗܳܟܰܢܳܐ ܠܘܳܬ ܒܶܝܬ ܐܰܣܺܝܪ̈ܶܐ ܡܶܬܬܰܘܒܰܠ ܗ̱ܘܳܐ.
ܐܶܠܳܐ ܐܳܦܠܳܐ ܦܪܽܘܒܽܘܤ ܐ̱ܚܪܺܢܳܐ ܐܶܬܚܙܺܝ ܠܶܗ ܠܕܰܝܳܢܳܐ ܐܶܠܳܐ ܐܶܢ ܦܪܽܘܒܽܘܣ[12]. ܟܰܕ ܡܒܰܙܰܚ ܗ̱ܘܳܐ ܡܰܢ ܒܰܐܠܳܗ̈ܶܐ ܗܳܢܽܘܢ ܡܶܬܓܰܚ̈ܟܳܢܶܐ܆ ܡܶܢ ܗܳܢܶܝܢ ܕܰܠܘܳܬ ܚܰܢ̈ܦܶܐ ܡܣܰܝܒܳܐܺܝܬ ܐܰܝܟ ܕܰܒܡ̈ܰܬܠܶܐ ܡܶܬܬܰܢܝ̈ܳܢ܆ ܕܡܰܠ̈ܟܶܐ ܕܶܝܢ ܗܳܢܽܘܢ ܐܰܚܺܝ̈ܕܰܝ ܗܶܢܽܘܢ ܠܗܽܘܢ܆ ܐܰܝܟ ܕܰܐܝܠܶܝܢ ܕܠܳܐ ܢܳܡܽܘܣ̈ܳܝܳܬܳܐ ܦܳܩܕܺܝܢ܆ ܘܠܳܐ ܚܕܳܐ ܡܶܠܬܐ ܥܳܒܶܕ ܗ̱ܘܳܐ. ܕܰܒܫܶܢ̈ܕܶܐ ܕܶܝܢ ܡܕܰܝܶܨ ܗ̱ܘܳܐ ܐܰܝܟ ܗܰܘ ܕܳܐܦ ܡܫܰܘܰܪ ܗ̱ܘܳܐ ܒܗܽܘܢ܆ ܐܰܝܟܰܢܳܐ ܕܳܐܦ ܥܰܠ ܦܰܪܙܠܳܐ ܕܡܶܚ̣ܰܡ ܒܢܽܘܪܳܐ ܢܩܽܘܡ ܚܰܝܠܬܳܢܳܐܺܝܬ. ܘܟܰܕ ܐܶܬܬܰܪܬ̣ܰܚ ܬܽܘܒ܆ ܝܰܬܺܝܪ ܬܰܩܺܝܦܳܐܺܝܬ ܬܽܘܒ ܢܶܕܪܽܘܟ ܥܠܰܘܗ̱ܝ ܘܰܢܟܰܬܰܪ ܥܠܰܝܡܳܐܺܝܬ܆ ܘܰܕܝܰܬܺܝܪ ܩܰܪܺܝܪ ܛܳܒ ܡܶܢ ܕܰܒܩܰܕܡܳܝܬܳܐ 222ܢܶܩܪܽܘܗܝ܆ ܘܢܶܓܚܰܟ ܗ̱ܘܳܐ ܒܰܫܟܳܚ̈ܳܬܶܗ ܕܗܰܘ ܕܕܳܐܶܢ ܗ̱ܘܳܐ. ܘܰܕܢܶܬܓܪܰܥ ܗ̱ܘܳܐ ܣܰܥܪܶܗ ܒܰܡܕܰܟܝܳܐ܆ ܘܕܰܥܠܰܝܗܶܝܢ ܕܨܶܕܥܰܘ̈ܗ̱ܝ ܐܰܝܟ ܕܰܠܡܺܐܡܰܪ ܢܩܰܒܶܠ ܗ̱ܘܳܐ ܓܽܘܡܪ̈ܶܐ ܕܢܽܘܪܳܐ܆ ܘܰܕܠܶܫܳܢܶܗ ܢܰܦܶܩ ܘܢܰܘܫܶܛ ܠܗܰܘ ܕܰܕܢܶܦܣܽܘܩ ܠܗܳܢܳܐ ܓܙܰܡ܆ ܘܢ̣ܰܫ ܘܰܐܡܶܐܢ ܠܘܳܬ ܡܛܰܝܒܽܘܬܳܐ. ܫܳܡܰܥ ܗ̱ܘܳܐ ܓܶܝܪ܆ ܕܺܐܝܬ ܗ̱ܘ̣ ܠܺܝ ܠܶܫܳܢܳܐ ܗܰܘ ܕܠܳܐ ܡܟܳܢ ܠܡܶܬܦܣܳܩܽܘ܆ ܘܕܰܐ̱ܚܪܳܢܝܳܐܺܝܬ ܠܳܐ ܡܳܝܽܘܬܰܐ ܗ̱ܘ܆ ܠܗܰܘ ܕܢܶܫܡܰܥ ܐܰܠܳܗܳܐ܆ ܗܰܘ ܕܳܐܦ ܠܒܰܪ̱ܬ ܩܳܠܳܐ ܕܰܕܡܶܗ ܕܗܳܒܶܝܠ ܕܓܳܥܝܳܐ ܗ̱ܘܳܬ ܐܶܡܰܪ ܕܫܳܡܰܥ[13].
ܡܶܢ ܗܳܪܟܳܐ ܡܰܟܣܺܝܡܽܘܤ ܟܰܕ ܠܘܳܬ ܐܰܢܕܪܽܘܢܺܝܩܽܘܤ ܐܰܠܳܗܳܝܳܐ ܥܒܰܪ܆ ܘܒܶܗ ܒܢܶܣܝܳܢܳܐ ܐܶܬܬܦܺܝܤ܆ ܕܟܽܠ ܐܳܕܫܳܐ ܕܫܶܢ̈ܕܶܐ ܕܠܳܐ ܝܽܘܬܪܳܢܳܐ ܢܶܗܘܶܐ ܐܺܝܬܰܘܗ̱ܝ ܠܶܗ ܘܰܕܠܳܐ ܣܳܥܽܘܪܽܘܬܳܐ܆ ܠܘܳܬ ܡܰܛܥܝܳܢܽܘܬܳܐ ܐܶܬܗܦܶܟ. ܐܳܦ ܟܺܝܬ ܐܶܡܰܪ ܠܘܳܬܶܗ: ܣܥܽܘܪ ܡܶܕܶܡ ܚܰܟܺܝܡܳܐ ܘܕܰܒܰܚ ܩܕܳܡ ܕܡܶܕܶܡ ܡܶܢ ܠܳܐ ܡܶܣܬܰܝܒܪ̈ܳܢܝܳܬܳܐ ܬܶܚܰܫ. ܗܳܢܽܘܢ ܓܶܝܪ ܕܰܗܘ̣ܰܘ ܒ̈ܢܰܝ ܡܶܠܟܳܟ܆ ܡܶܢ ܒܳܬܰܪ ܕܽܘ̈ܥܬܶܐ ܣܰܓܺܝ̈ܳܐܬܳܐ ܘܥܰܡ̈ܠܶܐ ܣܪ̈ܺܝܩܶܐ܆ ܐܶܫܬܡܰܥܘ ܠܦܽܘܩܕܳܢܳܐ ܕܡܰܠ̈ܟܶܐ܆ ܘܠܰܐܠܳܗ̈ܶܐ ܐܰܢܺܝܚܘ. ܡܳܢܳܐ ܕܶܝܢ ܠܘܳܬ ܗܳܠܶܝܢ ܗܰܘ ܣܳܗܕܳܐ ܕܰܡܫܺܝܚܳܐ. ܐܶܢܗܽܘ ܡܰܢ ܕܠܺܝ ܐܳܡܰܪ ܦܝܳܣܳܐ ܥܒ̣ܰܕܬ܆ ܐܳܦ ܠܗܳܢܽܘܢ ܐܰܟܚܕܳܐ ܥܰܡܳܟ ܐܳܡܰܪ ܐ̱ܢܳܐ ܐܳܦ ܐܶܢܳܐ ܕܶܐ݀ܬܬܦܺܝܤ ܠܳܟ. ܐܶܢ ܕܶܝܢ ܠܳܐ ܡܶܬܬܦܺܝܣܳܢܳܐ ܐܺܝܬܰܝ ܐܶܢܳܐ܆ ܠܳܐ ܓܶܝܪ ܡܬܽܘܡ ܐܶܦܽܘܩ ܐܶܢܳܐ ܡܶܢܝ܆ ܐܳܦܠܳܐ ܗܳܟܰܢܳܐ ܐܶ݀ܫܰܢܶܐ ܒܬܰܪܥܺܝܬܳܐ ܕܺܝܠܝ܆ ܐܺܝܬ ܠܺܝ ܡܶܫܟܳܢܳܐ ܕܫܰܦܺܝܪܽܘܬ ܩܰܘܡܳܐ ܕܗܳܢܽܘܢ. ܚܰܕ ܓܶܝܪ ܐܺܝܬܰܘܗ̱ܝ ܒܟܽܠܰܢ ܚܽܘܫܳܒܳܐ ܫܰܦܺܝܪ ܕܶܚܠܬܳܐ. ܐܰܘ ܠܳܐ ܫܳܡܰܥ ܐܰܢ̱ܬ ܠܦܰܘܠܽܘܤ ܕܰܠܘܳܬܰܢ ܟܳܬܶܒ: ܟܽܠܟܽܘܢ ܓܶܝܪ ܚܰܕ ܐܺܝܬܰܝܟܽܘܢ ܒܰܡܫܺܝܚܳܐ ܝܶܫܽܘܥ[14]. ܘܟܰܕ ܠܘܳܬ ܗܳܠܶܝܢ ܬܽܘܒ ܡܶܢ ܪܽܘܓܙܳܐ ܫܢ̣ܳܐ܆ ܒܫܶܢ̈ܕܶܐ ܠܳܐ ܡܥܰܝ̈ܕܶܐ ܓܙܰܡ ܠܶܗ ܕܢܶܡܚܶܝܘܗ̱ܝ. ܐܳܦ ܟܺܝܬ ܟܰܕ ܒܰܓ̈ܝܳܕܶܐ ܕܫܰܪܒܺܝܢ ܘܰܡܩܰܫܶܝܢ ܬܰܩܺܝܦܳܐܺܝܬ ܡܶܬܢܰܓܰܕ ܗ̱ܘܳܐ܆ ܟܰܕ ܓܚܶܟ ܐܶܡܰܪ ܗܽܘ ܙܰܕܺܝܩܳܐ܆ ܕܰܓܶܠܬ ܐܶܢܽܘܢ ܠܰܓ̈ܙܳܡܰܝܟ܆ ܟܰܕ ܠܘܳܬ ܢܶܓ̈ܕܶܐ ܗܳܠܶܝܢ ܕܰܥܝܳܕܳܐ ܐܶܫܬܰܪܓܰܠܬ܆ ܘܡܶܕܶܡ ܐܰܟܣܢܳܝܳܐ ܠܡܶܬܚܰܫܳܒܽܘ ܘܰܠܡܶܫܟܳܚܽܘ ܠܳܐ ܐܶܬܡ̣ܨܺܝܬ̊. ܐܶܠܳܐ ܐܳܦ ܟܰܕ ܡܶܠܚܳܐ ܦܳܩܶܕ ܐܰܢ̱ܬ ܕܰܢܒܰܕܪܽܘܢ ܥܠܰܝ ܠܳܐ ܡܨܰܪܶܦ ܐܰܢ̱ܬ ܠܺܝ܆ ܐܶܠܳܐ ܠܳܐ ܡܰܣܝܽܘܬܳܐ ܡܙܰܡܶܢ ܐܰܢ̱ܬ ܠܦܰܓܪܳܐ ܕܺܝܠܝ. ܡܰܠܽܘܢ ܕܶܝܢ ܐܳܦ ܗܳܕܶܐ ܝܰܬܺܝܪܬܳܐ ܗ̱ܝ. ܟܰܕ ܓܶܝܪ ܐܰܕܪܟܰܢܝ ܝܶܫܽܘܥ ܚܠܺܝܡܳܐ ܥܰܒܕܰܢܝ. ܗܳܐ ܚܙܰܝܬ ܓܶܝܪ ܕܟܰܕ ܟܽܠܺܝ ܐܺܝܬܰܝ ܗ̱ܘܺܝܬ ܡܡܰܚܝܳܐ ܡܶܢ ܡܰܚ̈ܘܳܬܳܐ ܗܳܠܶܝܢ ܩܰܕܡܳܝ̈ܳܬܳܐ܆ ܟܽܠܺܝ ܡܶܬܚܙܶܐ ܐ̱ܢܳܐ ܗܳܫܳܐ ܕܰܟܝܳܐ܆ ܕܳܐܦܠܳܐ ܚܕܳܐ ܟܽܘܬܰܡܬܳܐ ܡܰܝܬܶܐ ܐ̱ܢܳܐ ܐܶܢܳܐ ܒܺܝ. ܘܟܰܕ ܒܥܽܘܩܣܳܐ ܕܗܳܠܶܝܢ ܡ̈ܶܠܶܐ ܐܶܬܡܚܺܝ ܗܰܘ ܡܣܰܝܒܳܐ܆ ܠܘܳܬ ܦܳܠ̈ܚܶܐ ܡܶܫܬܚܶܩ ܐܰܘܟܺܝܬ ܡܶܬܥܰܙܰܙ ܗ̱ܘܳܐ܆ ܐܰܝܟ ܡܰܢ ܟܶܐܡܰܬ ܕܰܫܒܰܩܘ ܐܶܢܽܘܢ ܠܣܳܗ̈ܕܶܐ܆ ܕܢܶܫܬܘܽܘܢ ܠܝܰܨܺܝܦܽܘܬܳܐ ܡܛܰܫܰܝܬܳܐ ܕܡܶܢ ܐܳܣܰܘ̈ܳܬܳܐ. ܘܟܰܕ ܗܳܢܽܘܢ ܕܶܝܢ ܪ̈ܺܝܫܶܐ ܕܺܝܠܗܽܘܢ ܠܰܦܣܳܩܳܐ ܦܳܫܛܺܝܢ ܗ̱ܘܰܘ܆ ܐܶܢܗܽܘ ܕܡܶܕܶܡ ܕܰܐܝܟ ܗܳܢܳܐ ܢܶܬܬܨܺܝܕܽܘܢ ܕܰܣܥܰܪܘ܆ ܡܶܢ ܡܰܦܰܩ ܒܪܽܘܚܳܐ ܐܰܝܟ ܕܡܶܢ ܩܛܺܝܓܪܳܢܽܘܬܳܐ ܡܶܬܡܚܶܐ ܗ̱ܘܳܐ܆ ܘܩܰܫܝܳܐܺܝܬ ܡܶܬܬܥܺܝܩ ܗ̱ܘܳܐ܆ ܟܰܕ ܠܚܰܝܠܶܗ ܕܰܫܪܳܪܳܐ ܕܳܐܦ ܡܶܢ ܒܥܶܠ̈ܕܒܳܒܶܐ ܡܶܣܬܗܶܕ ܗ̱ܘܳܐ܆ ܠܳܐ ܡܣܰܝܒܰܪ ܗ̱ܘܳܐ ܠܡܶܚܙܳܐ. ܕܡܶܢ ܗܳܪܟܳܐ ܟܰܕ ܠܰܓ̈ܙܳܡܶܐ ܫܰܠܶܡ܆ ܠܫܰܪ̈ܟܳܢܶܐ ܕܰܐܓܽܘ̈ܢܶܐ ܠܝܰܘܡܳܐ ܗܰܘ ܐ̱ܚܪܳܝܳܐ ܢܛܰܪ ܐܶܢܽܘܢ.
ܘܟܰܕ ܕܰܬܠܳܬ ܙܰܒ̈ܢܺܝܢ ܝܺܬܶܒ ܥܰܠ ܒܺܐܡܰܐ܆ ܡܰܝܬܶܐ ܗ̱ܘܳܐ ܠܗܽܘܢ ܠܣܳܗ̈ܕܶܐ ܥܠܰܝܗܽܘܢ ܟܰܕ ܥܠܰܝܗܽܘܢ ܕܫܶܢ̈ܕܶܐ܆ ܐܰܝܟ ܗܰܘ ܕܰܪܦܳܣܳܐ ܕܰܒܚܽܘܕܪܳܐ ܡܶܬܟܰܪܟܺܝܢ ܗ̱ܘܰܘ. ܘܟܰܕ ܠܳܐ ܡܶܕܶܡ ܫܒܰܩ ܡܶܢ ܟܽܠܗܶܝܢ ܗܳܠܶܝܢ ܕܺܐܝܬܰܝܗܶܝܢ ܗ̱ܘܰܝ̈ ܕܫܰܓܽܘܫܬܳܢܽܘܬܳܐ ܠܳܐ ܚܺܐܪܳܝܬܳܐ ܐܰܘ ܕܰܨܢܺܝܥܽܘܬܳܐ ܡܰܛܥܝܳܢܺܝܬܳܐ܆ ܠܘܳܬ ܙܢܳܐ ܚܰܝܘܰܬ ܫܶܢܳܝܳܐ ܢܦܰܩ. ܘܰܒܫܶܢ̈ܕܶܐ ܕܒܺܐܝܕܳܐ ܒܺܐܝܕܳܐ ܠܒܶܣܪ̈ܰܝܗܽܘܢ ܕܩܰܕܺܝ̈ܫܶܐ܆ ܐܰܝܟ ܕܰܒܫܶܢ̈ܶܐ ܠܰܥܶܤ ܘܒܰܣܒܶܤ ܐܶܢܽܘܢ. ܕܗܰܘ ܡܰܢ ܟܰܕ ܠܡܶܫܟܳܐ ܕܪܺܝܫܶܗ ܢܫܰܛ ܘܰܩܛܰܥ ܠܪܺܝܫ ܣܶܦ̈ܘܳܬܶܗ. ܕܗܰܘ ܕܶܝܢ܆ ܟܰܕ ܠܥܰܝܢܰܘ̈ܗ̱ܝ 222ܥܨܳܐ. ܕܗܰܘ ܕܶܝܢ ܐ̱ܚܪܺܢܳܐ܆ ܟܰܕ ܠܠܶܫܳܢܶܗ ܦܣܰܩ. ܕܟܽܠܗܽܘܢ ܕܶܝܢ ܒܳܗ̇ ܒܰܕܡܽܘܬܳܐ ܠܰܬܕܰܝ̈ܗܽܘܢ ܠܓ̈ܰܒܰܝܗܽܘܢ ܠܫܳܩܰܝ̈ܗܽܘܢ ܠܡܶܨܥܰܬ ܨܶܒ̈ܥܳܬܗܽܘܢ܆ ܟܰܕ ܒܫܰܦܽܘ̈ܕܶܐ ܕܦܰܪܙܠܳܐ ܕܡܰܚܡܺܝܢ ܒܢܽܘܪܳܐ ܥܒܰܪ ܥܠܰܝܗܽܘܢ ܘܰܐܘܩܶܕ ܐܶܢܽܘܢ ܚܠܺܝܡܳܐܺܝܬ܆ ܘܰܥܕܰܡܳܐ ܠܗܽܘܢ ܠܓܰܪ̈ܡܶܐ.
ܘܰܠܚܰܪܬܳܐ ܟܰܕ ܚܙܳܐ ܕܟܽܠܗܶܝܢ ܐܶܬܟܣܶܤ ܘܰܠܠܳܐ ܡܶܕܶܡ ܢܦܰܩܘ ܟܽܠܗܽܘܢ ܦܽܘܪ̈ܣܶܐ ܕܫܶܢ̈ܕܶܐ܆ ܠܰܦܪܽܘܒܽܘܤ ܘܠܰܐܢܕܪܽܘܢܺܝܩܽܘܤ܆ ܕܰܡܢܳܬܳܐ ܡܶܢ ܒܶܣܪܳܐ ܗܰܘ ܕܥܰܠ ܥܠܳܬܳܐ܆ ܘܚܰܡܪܳܐ ܡܶܢ ܗܰܘ ܕܪܰܘܳܝܽܘܬܳܐ ܠܳܐ ܢܳܡܽܘܣܳܝܬܳܐ ܕܢܽܘܩܳܝ̈ܶܐ ܡܣܰܝ̈ܒܶܐ܆ ܢܰܪܡܽܘܢ ܠܗܽܘܢ ܩܛܺܝܪܳܐܺܝܬ ܦܳܩܶܕ ܗ̱ܘܳܐ. ܘܰܡܚܰܣܶܕ ܗ̱ܘܳܐ ܠܗܽܘܢ ܗܽܘ ܕܳܘܝܳܐ܆ ܐܰܝܟ ܕܠܰܐܝܠܶܝܢ ܕܡܶܢ ܗܳܠܶܝܢ ܕܠܳܐ ܢܳܡܽܘ̈ܣܺܝܢ ܛܥܶܡܘ. ܗܶܢܽܘܢ ܕܶܝܢ ܚܰܝ̈ܠܬܳܢܶܐ܆ ܟܰܕ ܐܰܪ̈ܺܝܟܳܬܳܐ ܥܰܠ ܚܰܣܺܝܪܽܘܬ ܗܰܘܢܶܗ ܕܗܰܘ ܓܚܶܟܘ ܐܶܡܰܪܘ ܠܘܳܬܶܗ. ܟܰܕ ܡܶܢ ܒܳܬܰܪ ܫܟܳܚ̈ܳܬܳܐ ܣܰܓܺܝ̈ܳܐܬܳܐ ܕܨܶܢ̈ܥܳܬܳܐ܆ ܘܰܟܪ̈ܽܘܟܝܶܐ ܕܫܶܢ̈ܕܶܐ ܣܰܓܺܝ̈ܰܐܝ ܙܢܰܝ̈ܳܐ ܠܙܰܝ̈ܢܶܐ ܫܕܰܝܬ܆ ܡܶܙܕܰܟܝܳܢܽܘܬܳܐ ܡܰܘܕܶܐ ܐܰܢ̱ܬ. ܥܕܰܡܳܐ ܓܶܝܪ ܠܗܳܢܳܐ ܪܦܳܦܳܐ ܙܥܽܘܪܳܐ ܕܥܶܕܳܢܳܐ܆ ܠܘܳܬ ܡܠܺܝܠܽܘܬܳܐ ܕܺܝܠܰܢ ܡܶܬܟܰܬܰܫ ܗ̱ܘܰܝܬ܆ ܘܰܠܘܳܬ ܫܰܠܺܝܛܽܘܬ ܒܝܳܬ̣ܳܐ ܕܢܰܦܫܳܐ܆ ܐܰܝܟܰܢܳܐ ܕܰܠܗܳܕܶܐ ܬܫܰܚܠܶܦ ܗ̱ܘܰܝܬ܆ ܠܘܳܬ ܗܰܘ ܡܳܐ ܕܠܳܟ ܡܶܣܬܒܰܪ ܗ̱ܘܳܐ. ܠܡܳܢܳܐ ܗܳܟܺܝܠ ܡܰܦܶܩ ܐܰܢ̱ܬ ܦܣܳܩܳܐ ܕܚܽܘܝܳܒܳܐ ܥܰܠ ܥܰܡ̈ܠܶܐ ܕܺܝܠܳܟ ܐܰܝܟ ܕܥܰܠ ܣܪ̈ܺܝܩܶܐ؟ ܐܳܦ ܓܶܝܪ ܐܶܢ ܗܳܕܶܐ ܐܺܝܬܶܝܗ̇ ܗ̱ܘܳܬ ܙܳܟܽܘܬܳܐ܆ ܗܳܝ ܕܠܳܐ ܨܶܒܝܳܢܳܐܺܝܬ ܠܦܽܘܡܳܐ ܕܺܝܠܰܢ ܬܩܰܪܶܒ ܕܶܒܚܬܳܐ܆ ܡܶܢ ܫܽܘܪܳܝܳܐ ܙܳܕܶܩ ܗ̱ܘܳܐ ܠܳܟ܆ ܕܬܶܥܒܶܕ ܗܽܘܦܳܟ ܚܽܘܫܳܒ̈ܶܐ ܕܰܓ̈ܳܠܶܐ ܠܽܘܩܒܰܠ ܗܳܝ ܕܫܰܪܺܝܪܳܐ ܘܬܶܣܒܰܪ ܠܳܟ ܕܙܳܟܶܐ ܐܰܢ̱ܬ܆ ܘܬܶܓܗܶܐ ܗ̱ܘܰܝܬ ܡܶܢ ܣܽܘܥܪ̈ܳܢܶܐ. ܡܶܛܽܠ ܕܶܝܢ ܕܰܠܚܽܘܫܳܒܳܐ ܕܺܝܠܰܢ ܒܳܥܶܐ ܗ̱ܘܰܝܬ ܕܬܶܠܒܽܘܟ܆ ܘܰܠܗܳܢܳܐ ܒܫܽܘܚܠܳܦܳܐ ܕܡܶܢ ܫܰܦܺܝܪܽܘܬ ܕܶܚܠܬܳܐ ܬܚܰܘܽܘܗ̱ܝ222 ܥܳܪܽܘܩܳܐ܆ ܡܶܛܽܠ ܗܳܕܶܐ ܟܽܠܶܗ ܥܰܡܠܳܟ ܕܡܶܛܽܠܳܬܰܢ ܐܶܬܛܰܠܰܩ ܠܶܗ ܠܳܟ. ܣܳܗܕܽܘܬܳܐ ܓܶܝܪ ܐܰܓܽܘܢܳܐ ܕܢܰܦܫܳܐ ܐܺܝܬܶܝܗ̇܆ ܒܝܰܕ ܡܶܨܥܳܝܽܘܬܳܐ ܕܗܳܠܶܝܢ ܐܽܘܠ̈ܨܳܢܶܐ ܥܡܺܝ̈ܠܶܐ ܕܦܰܓܪܳܐ. ܐܶܢ ܕܶܝܢ ܨܳܒܶܐ ܐܰܢ̱ܬ܆ ܐܳܦ ܢܳܡܽܘܣܳܐ ܢܶܩܪܶܐ ܠܳܟ ܡܶܛܽܠ ܗܳܕܶܐ ܕܰܐܠܳܗܳܐ ܕܺܝܠܰܢ ܕܳܐܡܰܪ: ܠܳܐ ܬܶܕܚܠܽܘܢ ܡܶܢ ܐܰܝܠܶܝܢ ܕܩܳܛܠܺܝܢ ܦܰܓܪܳܐ܆ ܠܢܰܦܫܳܐ ܕܶܝܢ ܠܳܐ ܡܶܫܟܚܺܝܢ ܠܡܶܩܛܰܠ[15]. ܠܡܳܢܳܐ ܗܳܟܺܝܠ ܠܒܰܪ ܡܶܢ ܚܶܦܪܳܐ ܕܒܶܝܬ ܕܰܪܳܐ ܡܶܬܬܰܝܬܶܐ ܐܰܢ̱ܬ܆ ܟܰܕ ܠܘܳܬ ܟܽܠܗܶܝܢ ܠܳܐ ܝܰܠܺܝܦܳܐ ܐܺܝܬܰܝܟ ܐܰܢ̱ܬ ܘܠܳܐ ܪܰܕܝܳܐ. ܗܺܝ ܓܶܝܪ ܟܰܕ ܗܺܝ ܥܳܒܶܕ ܐܰܢ̱ܬ܆ ܠܗܰܘ ܕܰܫܠܰܚ ܠܘܳܬ ܕܰܐܪܳܐ܆ ܘܰܚܠܰܛ ܥܰܡ ܒܥܶܠ ܬܰܟܬܽܘܫܶܗ܆ ܘܟܰܕ ܠܳܐ ܐܶܫܟܰܚ ܕܢܰܪܡܽܘܗ̱ܝ ܠܗܳܢܳܐ ܒܝܰܕ ܕܰܪ̈ܶܐ܆ ܙܰܝܶܢ ܒܣܰܝܦܳܐ ܠܝܰܡܺܝܢܶܗ. ܐܶܢܕܶܝܢ ܗܳܝ ܕܠܳܐ ܨܶܒܝܳܢܳܐܺܝܬ ܢܶܬܪܡܶܐ ܠܰܢ ܡܶܕܶܡ ܡܶܢ ܒܶܣܪܳܐ ܛܰܡܳܐܐ ܪܶܫܝܳܢܳܐ ܕܕܶܚܠܰܬ ܦܬܰܟܪ̈ܶܐ ܡܰܝܬܝܳܐ܆ ܡܶܫܟܰܚ ܐܰܢ̱ܬ ܗܘ܆ ܕܳܐܦ ܠܢܰܟܦܳܐ ܡܶܛܽܠ ܙܳܢܝܽܘܬܳܐ ܬܕܽܘܢ܆ ܐܶܢܗܽܘ ܕܙܳܢܺܝܬܳܐ ܐ̱ܢܳܫ ܓܽܘܡܕܳܢܳܐܺܝܬ ܟܰܕ ܠܳܐ ܨܳܒܶܐ ܒܺܐܝ̈ܕܶܝܗ̇ ܬܥܰܦܩܺܝܘܗ̱ܝ܆ ܐܳܦ ܕܰܠܟܺܐܢܳܐ ܡܶܛܽܠ ܚܛܽܘܦܝܳܐ ܬܚܰܝܶܒ܆ ܡܶܛܽܠ ܟܺܝܬ ܕܐ̱ܢܳܫ ܠܒܽܘܫܳܐ ܫܕܳܐ ܥܠܰܘܗ̱ܝ ܕܠܳܐ ܐܺܝܬܰܘܗ̱ܝ ܕܺܝܠܶܗ. ܡܶܢ ܓܶܝܪ ܐܰܝܢܳܝܽܘܬܳܗ̇ ܕܬܰܪܥܺܝܬܳܐ܆ ܘܡܶܢ ܗܳܝ ܕܡܶܢ ܨܶܒܝܳܢܳܐ ܡܶܬܬܕܺܝܢܺܝܢ ܚ̈ܛܳܗܶܐ. ܒܪܰܡ ܐܶܢ ܡܶܕܶܡ ܡܶܣܬܰܒܪܺܝܢܰܢ ܠܳܟ ܕܰܚܛܰܝܢܰܢ܆ ܐܰܪܺܝܡ ܐܶܢܶܝܢ ܠܣܶܦ̈ܘܳܬܰܢ܆ ܗܳܠܶܝܢ ܕܰܠܢܽܘܩܳܝ̈ܶܐ ܓܫܰܦ̈ܶܝܢ ܠܳܐ ܨܶܒܝܳܢܳܐܺܝܬ. ܠܘܳܬ ܟܽܠ ܡܶܕܶܡ ܓܶܝܪ ܐܺܝܬܰܝܢ ܡܛܰܝ̈ܒܶܐ܆ ܤܛܰܪ ܡܶܢ ܚܕܳܐ ܒܰܠܚܽܘܕ܆ ܗܳܝ ܕܰܢܕܰܒܰܚ ܠܫ̈ܺܐܕܶܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܟܰܠ̈ܝܳܢ ܢܶܥܒܶܕ. ܐܳܦ ܓܶܝܪ ܟܰܕ ܚܰܝ̈ܘܳܬܳܐ ܓܳܙܶܡ ܐܰܢ̱ܬ܆ ܡܙܺܝܥ ܐܰܢ̱ܬ ܠܰܢ ܘܠܳܐ ܣܳܟ. ܠܳܐ ܓܶܝܪ ܐܺܝܬ ܠܳܟ ܡܶܕܶܡ ܕܝܰܬܺܝܪ ܒܰܥܪܺܝܪܳܝ܆ ܛܳܒ ܡܶܢ ܢܰܦܫܳܟ ܕܺܝܠܳܟ܆ ܗܳܝ ܕܰܠܘܳܬܳܗ̇ ܐܶܬܟܰܬܰܫܢܰܢ.
ܘܟܰܕ ܠܗܳܠܶܝܢ ܫܡܰܥ܆ ܥܰܡ ܒܽܘܗܳܪܳܐ ܩܕܳܡ ܕܢܶܕܢܰܚ ܫܶܡܫܳܐ ܒܝܰܘܡܳܐ ܗܰܘ ܕܒܳܬܪܶܗ܆ ܠܘܳܬ ܬܶܐܰܛܪܽܘܢ ܗܳܝ ܕܰܠܒܰܪ ܡܶܢ ܡܕܺܝܢ̱ܬܳܐ ܦܳܩܶܕ ܗ̱ܘܳܐ ܕܢܶܬܛܰܥܢܽܘܢ ܘܢܶܬܬܰܝܬܽܘܢ ܗܶܢܽܘܢ ܚܰܝ̈ܠܬܳܢܶܐ܆ ܕܠܳܐ ܡܶܫܟܚܺܝܢ ܗ̱ܘܰܘ ܠܰܡܗܰܠܳܟܽܘ. ܐܳܦ ܟܺܝܬ ܟܰܕ ܐܶܬܬܣܺܝܡܘ̱ ܒܰܡܨܰܥܬܳܐ ܗܳܢܽܘܢ ܦܶܠܓܽܘ ܡܺܝ̈ܬܶܐ܆ ܗܳܢܽܘܢ ܕܰܡܦܰܣܩܺܝܢ ܗ̱ܘܰܘ ܪ̈ܺܝܫܰܝ ܗܰܕܳܡܰܝ̈ܗܽܘܢ܆ ܗܳܢܽܘܢ ܕܰܓܠܺܝܙܺܝܢ ܗ̱ܘܰܘ ܡܶܢ ܗܰܕܳܡ̈ܶܐ ܗܳܢܽܘܢ ܫܒܺܝ̈ܚܶܐ ܕܒܺܐܝ̈ܕܰܝܗܽܘܢ ܡܶܬܺܝܕܰܥ ܒܰܪܢܳܫܳܐ܆ ܘܰܡܛܰܠܩܺܝܢ ܗ̱ܘܰܘ ܒܦܽܘܣܳܩ̈ܶܐ ܘܰܒܝܰܩ̈ܕܳܢܶܐ܆ ܚܰܘܺܝܘ ܕܐ̱ܢܳܫ̈ܳܐ ܓܡܺܝܪ̈ܶܐ ܘܰܡܫܰܡܠܰܝ̈ܳܐ ܐܺܝܬܰܝܗܽܘܢ ܒܒܰܪܢܳܫܳܐ ܗܰܘ ܡܠܺܝܠܳܐ ܘܰܕܡܶܢ ܠܓܰܘ܆ ܗܰܘ ܕܰܗܘ̣ܳܐ ܒܨܰܠܡܶܗ ܕܗܰܘ ܕܰܒ̣ܪܳܝܗ̱ܝ܆ ܗܰܘ ܕܶܐܬܬܣܺܝܡ ܕܢܶܗܘܶܐ ܪܺܝܫܳܐ ܥܰܠ ܚܰܝ̈ܘܳܬܳܐ ܟܽܠܗܶܝܢ ܘܪ̈ܰܚܫܳܐ ܕܥܰܠ ܐܰܪܥܳܐ[16]. ܟܰܕ ܓܶܝܪ ܐܶܫܬܰܡܰܪ̈ܶܝܢ ܥܠܰܝܗܽܘܢ ܚܰܝ̈ܘܳܬܳܐ܆ ܒܦܰܓܪ̈ܶܐ ܩܰܕܺܝ̈ܫܶܐ ܠܳܐ ܓܫܰܦ̈ܶܝܢ. ܘܡܰܐܟܣܺܝܡܽܘܤ ܩܰܫܝܳܐܺܝܬ ܡܶܬܥܰܙܰܙ ܗ̱ܘܳܐ. ܘܟܰܕ ܓܙܰܡ ܩܺܝܢܕܽܘܢܽܘܤ ܕܡܰܘܬܳܐ ܥܰܠ ܗܰܘ ܕܩܳܐܶܡ ܗ̱ܘܳܐ ܥܰܠ ܝܰܨܺܝܦܽܘܬܳܐ ܕܚܰܝ̈ܘܳܬܳܐ܆ ܐܰܥܒܶܕ ܕܬܶܫܬܰܡܰܪ ܥܠܰܝܗܽܘܢ܆ ܕܶܒܳܐ ܚܕܳܐ ܩܳܛܠܰܬ̣ ܓܰܒܪ̈ܶܐ ܘܰܕܝܰܬܺܝܪ ܩܰܫܝܳܐ ܘܡܰܪܳܚܳܐ. ܘܰܕܚܳܕܝܳܐ ܒܰܕܡ̈ܶܐ. ܗܳܝ ܐܰܝ̇ܕܳܐ ܕܟܰܕ ܠܗܳܢܽܘܢ ܐ̱ܚܪ̈ܳܢܶܐ ܥܶܒܪܰܬ܆ ܠܘܳܬ ܚܰܣܝܳܐ ܐܰܢܕܪܽܘܢܺܝܩܽܘܤ ܐܳܬܝܳܐ ܗ̱ܘܳܬ. ܘܟܰܕ ܠܘܳܬܶܗ ܪܶܒܥܰܬ̣܆ ܠܪܶܗܠܳܐ ܗܰܘ ܕܰܚܒܳܪ̈ܳܬܶܗ ܡܠܰܟܚܳܐ ܗ̱ܘܳܬ ܒܠܶܫܳܢܳܗ̇. ܟܰܕ ܕܶܝܢ ܠܪܺܝܫܳܐ ܒܰܝܬܳܝܳܐ ܕܺܝܠܶܗ ܣܳܡ ܗܽܘ ܩܰܕܺܝܫܳܐ ܬܚܶܝܬ ܫܶܢܶܝ̈ܗ̇܆ ܕܰܠܘܳܬ ܚܶܡܬܳܐ ܢܥܺܝܪܺܝܗ̇ ܡܶܬܚܪܶܐ ܗ̱ܘܳܐ܆ ܟܰܕ ܡܶܐܟܽܘܠܬܳܐ ܕܗܳܝ ܒܰܥܪܺܝܪܳܝܬܳܐ ܘܠܳܐ ܡܫܰܝܰܢܬܳܐ ܚܦܺܝܛ ܗ̱ܘܳܐ ܕܢܶܗܘܶܐ܆ ܘܟܰܕ ܠܥܽܘܢܕܳܢܳܐ ܛܽܘܒܬܳܢܳܐ ܕܰܠܘܳܬ ܡܫܺܝܚܳܐ ܡܶܬܝܰܐܝܰܒ ܗ̱ܘܳܐ. ܗܳܝ ܕܶܝܢ ܡܶܬܟܰܪܟܳܐ ܗ̱ܘܳܬ ܐܰܟܚܕܳܐ ܥܰܡ ܗܰܘ ܕܳܐܠܶܨ ܗ̱ܘܳܐ ܘܕܳܒܰܪ ܗ̱ܘܳܐ ܠܳܗ̇ ܒܰܩܛܺܝܪܳܐ ܠܟܳܐ ܘܰܠܗܰܠ܆ ܘܰܕܡܶܫܬܥܶܐ ܗ̱ܘܳܐ ܥܰܡܳܗ̇ ܡܰܣܒܪܳܐ ܗ̱ܘܳܬ. ܘܠܰܟܝܳܢܳܐ ܒܰܥܪܺܝܪܳܝܳܐ ܐܰܝܟ ܗܰܘ ܕܰܛܥܳܬܶܗ. ܠܗܰܘ ܕܟܰܕ ܒܰܝܬܝܶܗ ܠܶܗ ܕܰܝܳܢܳܐ܆ ܩܶܛܠܳܐ ܦܣܰܩ ܗܰܘ ܡܠܺܝܠܳܐ ܥܰܠ ܗܳܝ ܠܳܐ ܡܠܺܝܠܬܳܐ܆ ܟܰܕ ܣܳܒܰܪ ܗ̱ܘܳܐ ܠܶܗ ܕܰܥܒܳܕܳܐ ܕܗܳܝ ܐܺܝܬܶܝܗ̇ ܗ̱ܘܳܬ ܗܳܝ ܕܰܗܘ̣ܳܬ܆ ܘܠܰܘ ܕܰܐܠܳܗܳܐ ܗܰܘ ܕܣܳܥܰܪ ܬܶܕܡܪ̈ܳܬܳܐ.
ܘܒܳܬܰܪ ܗܳܕܶܐ ܐܰܪܝܽܘܬܳܐ ܚܕܳܐ ܕܠܳܐ ܪ̈ܰܚܡܶܐ ܘܰܩܫܺܝܬܳܐ܆ ܐܰܝܟ ܕܥܰܠ ܡܰܩܪ̈ܒܳܢܶܐ ܥܰܣ̈ܩܰܝ ܠܡܶܬܟܒܳܫܽܘ܆ ܢܳܦܩܳܐ ܗ̱ܘܳܬ ܒܚܺܐܦܳܐ ܒܰܙܢܳܐ ܡܶܕܶܡ ܥܠܰܝܗܽܘܢ ܕܩܰܕܺܝ̈ܫܶܐ. ܘܟܰܕ ܒܰܓܣܳܪܳܐ ܪܰܒܳܐ ܘܩܰܫܝܳܐ ܠܟܽܠܶܗ ܬܶܐܰܛܪܽܘܢ ܐܰܙܺܝܥܰܬ܆ ܘܰܒܪܶܗܛܳܐ ܩܰܠܺܝܠܳܐ ܠܘܳܬܗܽܘܢ ܕܣܳܗ̈ܕܶܐ ܩܶܪܒܰܬ̣܆ ܡܦܰܓܕܳܐ ܡܰܢ ܗܺܝ ܠܳܗ̇ ܡܶܢ ܚܺܐܦܳܐ܆ ܣܳܓܕܳܐ ܕܶܝܢ ܠܪ̈ܶܓܠܰܝܗܽܘܢ ܕܩܰܕܺܝ̈ܫܶܐ. ܛܰܐܪܰܐܟܽܘܤ ܕܶܝܢ ܟܰܕ ܠܺܐܝܕܳܐ ܕܺܝܠܶܗ ܚܣܺܝܬܳܐ ܦܫܰܛ܆ ܗܳܝ ܣܳܗܕܬܳܐ ܘܕܰܒܚܰܫܳܐ ܕܰܚܠܳܦ ܡܫܺܝܚܳܐ ܐܶܫܬܰܡܠܝܰܬ̣܆ ܘܒܰܙܒܰܢ ܡܰܢ ܒܣܰܥܪܳܗ̇ ܒܰܙܒܰܢ ܕܶܝܢ ܒܶܐܕܢܳܗ̇ ܕܗܳܝ ܩܳܡܶܛ ܗ̱ܘܳܐ܆ ܢܳܓܶܕ ܗ̱ܘܳܐ ܠܳܗ̇ ܠܘܳܬܶܗ. ܗܳܝ ܕܶܝܢ ܟܰܕ ܠܳܗ̇ ܠܓܶܫܬܳܐ ܡܫܰܝܢܳܐܺܝܬ ܒܰܕܡܽܘܬ ܥܶܪܒܳܐ ܕܶܚܩܰܬ ܡܶܢܳܗ̇܆ ܘܰܠܘܳܬ ܬܰܪܥܳܐ ܪܶܗܛܰܬ܆ ܠܫܶܢܶܝ̈ܗ̇ ܒܕܰܦ̈ܶܐ ܩܶܒܥܰܬ ܐܶܢܶܝܢ܆ ܘܰܠܡܶܦܰܩ ܐܳܠܨܳܐ ܗ̱ܘܳܬ. ܘܠܳܐ ܐܰܪܦܝܰܬ̣܆ ܥܕܰܡܳܐ ܕܥܰܡܳܐ ܩܥܳܐ܆ ܕܰܠܒܰܪ ܬܶܗܘܶܐ ܗܳܕܶܐ. ܠܗܳܠܶܝܢ ܕܶܝܢ܆ ܠܳܐ ܐ̱ܢܳܫ ܠܳܐ ܢܗܰܝܡܶܢ܆ ܘܰܠܗܳܢܶܝܢ ܕܰܠܗܳܠܶܝܢ ܕܳܡ̈ܝܳܢ ܕܳܐܦ ܥܰܠ ܣܳܗ̈ܕܶܐ ܐ̱ܚܪ̈ܳܢܶܐ ܓܕܰܫ̈ܝ̱܆ ܟܰܕ ܠܶܐܓܰܪܬܳܐ ܗܳܝ ܕܰܟܬܰܒ ܐܺܝܓܢܰܐܛܺܝܽܘܤ ܗܰܘ ܠܒܺܝܫ ܠܰܐܠܳܗܳܐ ܠܪ̈ܽܘܡܳܝܶܐ ܩܳܪܶܐ܆ ܗܳܝ ܕܣܺܝ̈ܡܳܢ ܒܳܗ̇ ܗܳܠܶܝܢ. ܠܘܰܝ ܐܶ݀ܫܬܘܶܐ ܗ̱ܘܺܝܬ ܠܚܰܝ̈ܘܳܬܳܐ ܗܳܠܶܝܢ ܕܰܡܛܰܝ̈ܒܳܢ ܠܺܝ. ܗܳܠܶܝܢ ܕܳܐܦ ܡܨܰܠܶܐ ܐ̱ܢܳܐ܆ ܕܒܰܥܓܰܠ ܢܶܫ̈ܬܰܟܚܳܢ ܠܺܝ. ܠܗܳܠܶܝܢ ܕܰܡܫܰܓܶܫ ܐ̱ܢܳܐ ܠܗܳܠܶܝܢ܆ ܕܩܰܠܺܝܠܳܐܺܝܬ ܢܶܐܟ̈ܠܳܢܳܢܝ. ܠܰܘ ܐܰܝܟܰܢܳܐ ܕܟܰܕ ܕܚ̣ܶܠܷ̈ܝܢ ܠܳܐ ܓܫܰܦ̈ܶܝܢ ܒܐ̱ܢܳܫܺܝ̈ܢ. ܘܳܐܦܶܢ ܗܶܢܶܝܢ ܕܶܝܢ ܠܳܐ ܢܶܨܒ̈ܝܳܢ܆ ܐܶܢܳܐ ܐܶ݀ܕܒܰܪ ܐܶܢܶܝܢ ܒܰܩܛܺܝܪܳܐ.
ܟܰܕ ܒܝܰܕ ܗܳܠܶܝܢ ܗܳܟܺܝܠ ܬܶܕܡܪ̈ܳܬܳܐ ܘܬܰܟ̈ܬܽܘܫܶܐ ܐܰܢܗܰܪܘ̱ ܣܳܗ̈ܕܶܐ ܗܳܠܶܝܢ܆ ܕܰܒܣܰܝܦܳܐ ܢܶܓܗܽܘܢ ܡܶܢ ܗܳܠܶܝܢ ܚܰܝ̈ܶܐ ܐܶܬܚܰܝܰܒܘ ܡܶܢ ܡܰܐܟܣܺܝܡܽܘܤ. ܡܰܠܽܘܢ ܕܶܝܢ܆ ܕܰܠܘܳܬ ܚܰܝ̈ܶܐ ܫܰܪܺܝܪ̈ܶܐ ܢܶܥܒܪܽܘܢ܆ ܘܠܰܟ̈ܠܺܝܠܶܐ ܕܠܳܐ ܡܳܝܽܘܬܽܘܬܳܐ ܘܰܠܛܽܘܒܬܳܢܽܘܬܳܐ ܕܡܶܢ ܬܰܡܳܢ ܢܶܫܬܘܽܘܢ. ܐܶܠܳܐ ܕܰܝܳܢܳܐ ܗܰܘ ܚܰܣܳܡܳܐ ܘܕܰܡܣܰܝܰܒ ܝܰܬܺܝܪ ܡܶܢ ܟܽܠ܆ ܟܰܕ ܚܳܣܶܡ ܗ̱ܘܳܐ ܒܰܢ ܡܶܛܽܠ ܗܰܕܳܡ̈ܶܐ ܩܰܕܺܝ̈ܫܶܐ܆ ܠܦܰܓܪ̈ܰܝܗܽܘܢ ܕܣܳܗ̈ܕܶܐ܆ ܒܗܳܢܽܘܢ ܡܣܰܝ̈ܒܶܐ ܕܶܐܬܩܰܛܰܠܘ ܡܶܢ ܡܶܬܟܰܬܫ̈ܰܝ ܠܚܽܘܕܳܐܺܝܬ ܚܰܠܶܛ ܐܶܢܽܘܢ܆ ܘܰܠܥܶܣܪܳܐ ܤܛܪ̈ܰܛܺܝܽܘܛܶܐ ܕܢܶܛܪܽܘܢ ܐܶܢܽܘܢ ܠܗܳܠܶܝܢ ܦܩܰܕ. ܐܰܠܳܗܳܐ ܕܶܝܢ ܗܰܘ ܕܬܶܕܡܪ̈ܳܬܳܐ܆ ܟܰܕ ܢܳܛܽܘܪ̈ܶܐ ܐܳܟܠܺܝܢ ܗ̱ܘܰܘ ܘܫܳܬܶܝܢ ܘܢܽܘܪܳܐ ܩܕܰܚܘ ܠܗܽܘܢ܆ ܒܫܶܦܥܳܐ ܥܰܬܺܝܪܳܐ ܕܡܶܛܪܳܐ ܘܰܒܙܰܘܥܳܐ ܕܰܐܪܥܳܐ܆ ܠܗܳܝ ܡܰܢ ܐܰܕܥܶܟ܆ ܠܗܳܢܽܘܢ ܕܶܝܢ ܥܳܪ̈ܽܘܩܶܐ ܚܰܘܺܝ. ܘܟܰܕ ܦܰܓܪ̈ܶܐ ܗܳܢܽܘܢ ܚܣܰܝ̈ܳܐ ܚܠܺܝܛܳܐܺܝܬ ܥܰܡ ܗܳܢܽܘܢ ܐ̱ܚܪ̈ܳܢܶܐ ܣܺܝܡܺܝܢ ܗ̱ܘܰܘ ܘܠܳܐ ܡܶܬܝܰܕܥܺܝܢ ܗ̱ܘܰܘ ܡܶܛܽܠ ܚܶܫܽܘܟܳܐ܆ ܟܰܘܟܒܳܐ ܢܰܗܺܝܪܳܐ ܡܶܢ ܫܡܰܝܳܐ ܟܰܕ ܠܘܳܬ ܐܰܪܥܳܐ ܡܰܢܗܰܪ ܗ̱ܘܳܐ܆ ܘܥܰܠ ܟܽܠܚܰܕ ܡܶܢܗܽܘܢ ܕܦܰܓܪ̈ܶܐ ܩܳܐܶܡ ܗ̱ܘܳܐ܆ ܠܰܫܟܳܚܬܗܽܘܢ ܡܫܰܘܕܰܥ ܗ̱ܘܳܐ. ܟܰܕ ܡܶܬܕܰܡܶܐ ܗ̱ܘܳܐ܆ ܠܟܰܘܟܒܳܐ ܗܰܘ ܕܥܰܠ ܝܺܠܺܝܕܽܘܬܶܗ ܕܒܰܒܣܰܪ ܕܥܰܡܰܢܽܘܐܶܝܠ ܗܰܕܺܝ ܠܰܡܓܽܘ̈ܫܶܐ ܡܶܢܳܗ̇ ܕܦܳܪܶܤ܆ ܥܕܰܡܳܐ ܕܟܰܕ ܐܶܬܳܐ ܩܳܡ ܠܥܶܠ ܡܶܢ ܐܰܝܟܳܐ ܕܺܐܝܬܰܘܗ̱ܝ ܗ̱ܘܳܐ ܛܰܠܝܳܐ܆ ܐܰܝܟܰܢܳܐ ܕܰܟܬܺܝܒ[17]. ܐܳܦ ܓܶܝܪ ܗܳܟܰܢܳܐ ܘܰܠܢܳܛܽܘܪ̈ܶܐ ܗܳܢܽܘܢ ܕܣܳܗ̈ܕܶܐ ܒܙܰܘܥܳܐ ܛܪܰܕ܆ ܐܰܝܟܰܢܳܐ ܕܳܐܦ ܠܗܳܢܽܘܢ ܕܩܰܒܪܳܐ ܐܰܠܳܗܳܝܳܐ܆ ܗܰܘ ܕܰܠܥܰܒ̈ܕܶܐ ܒܰܝ̈ܬܳܝܶܐ ܕܺܝܠܶܗ ܡܝܰܩܰܪ ܒܺܐܝܩܳܪ̈ܶܐ ܕܕܳܡܶܝܢ.
ܗܳܠܶܝܢ ܕܶܝܢ ܗܘ̈ܰܝ܆ ܟܰܕ ܐ̱ܢܳܫܺܝ̈ܢ ܡܗܰܝܡ̈ܢܶܐ ܥܰܠ ܛܽܘܪܳܐ ܥܰܠ ܒܽܘܪ̈ܟܰܝܗܽܘܢ ܒ̣ܪܶܟܘ܆ ܘܡܶܬܟܰܫܦܺܝܢ ܗ̱ܘܰܘ ܠܡܳܪܝܳܐ܆ ܕܰܠܡܰܘܗܰܒܬܳܐ ܢܶܫܬܘܽܘܢ ܗܘܰܘ ܕܗܰܕܳܡ̈ܶܐ ܩܰܕܺܝ̈ܫܶܐ܆ ܗܳܢܽܘܢ ܕܰܥܒܰܕܘ ܐܰܬܠܺܝܛܽܘܬܳܐ ܚܠܳܦܰܘܗ̱ܝ. ܠܗܳܠܶܝܢ ܕܳܐܦ ܟܰܕ ܢܚܶܬܘ ܢܣܰܒܘ ܐܶܢܽܘܢ܆ ܘܡܶܛܽܠ ܕܶܚܠܬܳܐ ܕܗܺܓܡܽܘܢܳܐ܆ ܒܨܶܪܝܳܐ ܕܫܽܘܥܳܐ ܛܰܫܺܝܘ ܐܶܢܽܘܢ.
ܫܡܰܥܘ̱ ܗܳܢܽܘܢ ܕܰܒܥܺܕܬܳܐ ܕܰܬܣܺܝܡܽܘܢ ܒܽܘܪܟܳܐ ܠܰܨܠܽܘܬܳܐ ܡܡܰܐܢܺܝܢ ܐܢ̱ܬܽܘܢ܆ ܘܶܐܬܒܰܝܢܘ ܐܰܝܟܰܢܳܐ ܗܳܢܽܘܢ ܥܰܠ ܫܽܘ̈ܥܶܐ ܥܰܠ ܐܰܦܰܝ̈ܗܽܘܢ ܟܦܶܝܢ ܗ̱ܘܰܘ ܘܰܪܡܶܝܢ ܒܠܶܠܝܳܐ܆ ܟܰܕ ܒܡܶܛܪܳܐ ܬܟܺܝܒܳܐ ܡܶܨܛܰܒܥܺܝܢ ܗ̱ܘܰܘ. ܗܳܠܶܝܢ ܓܶܝܪ ܟܽܠܗܶܝܢ ܟܬܺܝ̈ܒܳܢ ܠܘܳܬ ܡܰܪܬܝܳܢܽܘܬܳܐ ܕܺܝܠܰܢ܆ ܐܰܝܟܰܢܳܐ ܕܢܶܛܰܢ ܒܛܳܒ̈ܳܬܳܐ. ܗܳܕܐ ܡܚܰܕܝܳܐ ܐܳܦ ܠܣܳܗ̈ܕܶܐ. ܗܳܕܶܐ ܐܳܦ ܠܰܡܫܺܝܚܳܐ ܐܰܠܳܗܗܽܘܢ ܕܣܳܗ̈ܕܶܐ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܰܒܥܺܝܢ ܘܰܬܡܳܢܝܳܐ.
[12]ܦܪܘܒܘܣ ܡܶܢ ܠܽܫܳܢܳܐ ܪܽܘܡܳܝܳܐ ܠܝܰܘܢܳܝܳܐ ܐܰܘ ܠܣܽܘܪܝ̣ܳܝ̣ܳܐ܆ ܒܚܺܝܪܳܐ ܐܰܘܟܺܝܬ ܒܰܩܝܳܐ ܡܶܬܦܰܫܰܩ. ܡܶܛܽܠܗܳܕܶܐ ܐܶܡܰܪ ܡܰܠܦܳܢܳܐ܆ ܕܳܐܦܠܳܐ ܦܪܘܒܘܣ ܐ̱ܚܪܺܢܳܐ ܐܶܬܚܙܺܝ ܐܶܠܐ ܐܶܢ ܦܪܘܒܘܣ܆ ܗܳܢܰܘ ܕܶܝܢ ܒܚܺܝܪܳܐ.