ܡܺܐܡܪܳܐ ܕܫܰܒܥܺܝܢ ܘܫܰܒܥܳܐ

ܕܺܝܠܶܗ ܟܰܕ ܕܺܝܠܶܗ. ܡܺܐܡܪܳܐ ܕܫܰܒܥܺܝܢ ܘܫܰܒܥܳܐ. ܥܰܠ ܕܟܰܕ ܘܠܳܐ ܡܶܕܶܡ ܗܘ̣ܰܘ ܕܰܠܩܽܘܒܠܳܐ. ܐܰܪܒܥܳܬܰܝܗܽܘܢ ܐܶܘܢܓ̈ܠܝܣܛܶܐ܆ ܡܫܰܚܠܦܳܐܺܝܬ ܐܰܟܬܶܒܘ. ܐܰܝܠܶܝܢ ܕܰܓܕܰܫ̈ܝ̱ ܒܰܩܝܳܡܬܶܗ ܕܰܡܫܺܝܚܳܐ ܐܰ‌ܠܳܗܳܐ ܘܦܳܪܽܘܩܳܐ. ܗܳܠܶܝܢ ܕܳܐܦ ܒܟܽܠ ܚܰܕܒܫܰܒܳܐ ܒܠܶܠܝܳܐ ܩܳܪܶܝܢܰܢ.

ܟܽܠ ‌ܐ̱ܢܳܫ ܡܰܢ ܐܰܝܟ ܕܰܠܡܺܐܡܰܪ ܡܩܰܒܶܠ܆ ܠܗܰܘ ܩܶܪܝܳܢܳܐ ܕܰܒܠܶܠܝܳܐ ܕܚܰܕܒܫܰܒܳܐ܆ ܗܰܘ ܕܠܳܚܡܳܐܺܝܬ ܥ̣ܰܠ ܡܶܢܰܢ܆ ܡܶܛܽܠ ܩܝܳܡܬܶܗ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܐ̱ܢܳܫܺܝ̈ܢ ܕܶܝܢ܆ ܗܳܝ ܡܰܢ ܕܡܶܬܥܰܕܪܺܝܢ ܡܰܘܕܶܝܢ. ܒܗܳܝ ܕܶܝܢ ܕܣܳܒܪܺܝܢ ܕܩܰܛܺܝܢܳܐܺܝܬ ܫܳܡܥܺܝܢ܆ ܐܳܡܪܺܝܢ ܕܡܶܫܬܰܓܫܺܝܢ܆ ܟܰܕ ܗܳܢܽܘܢ ܐܶܘܰܢܓ̈ܶܠܺܝܣܛܶܐ. ܠܰܘ ܗܶܢܶܝܢ ܟܰܕ ܗܶܢܶܝܢ ܐܳܡܪܺܝܢ. ܡܶܛܽܠܳܬܶܗ ܕܺܝܠܶܗ ܕܣܽܘܥܪܳܢܳܐ܆ ܐܶܠܳܐ ܕܰܠܩܽܘܒܠܳܐ ܘܰܠܫܳܡܽܘ̈ܥܶܐ ܠܘܳܬ ܠܳܐ ܗܰܝܡܳܢܽܘܬܳܐ ܝܰܬܺܝܪܳܐܺܝܬ ܡܰܝܬܶܝܢ. ܡܰܢܽܘ ܠܰܡ ܓܶܝܪ ܢܗܰܝܡܶܢ ܠܡܰܬܰܝ ܕܰܟܬܰܒ ܕܰܩܝܳܡܬܳܐ ܒܪܰܡܫܳܐ ܕܫܰܒ̈ܶܐ ܗܘ̣ܳܬ ܐܰܘ ܠܝܽܘܚܰܢܳܢ ܕܰܐܟܬܶܒ ܕܗܺܝ ܗܳܕܶܐ ܓܶܕܫܰܬ ܒܨܰܦܪܳܐ܆ ܟܰܕ ܥܕܰܟܺܝܠ ܚܶܫܽܘܟܐ ܐܺܝܬܰܘܗ̱ܝ ܗ̱ܘܳܐ. ܐܰܘ ܠܠܽܘܩܳܐ ܘܰܠܡܰܪܩܽܘܤ܆ ܕܗܰܘ ܡܰܢ ܨܰܦܪܳܐ ܥܰܡܺܝܩܳܐ ܫܰܡܗܶܗ ܠܶܗ ܟܰܕ ܠܶܗ ܠܥܶܕܳܢܳܐ܆ ܗܰܘ ܕܶܝܢ ܡܰܕܢܳܚܰܘ̈ܗ̱ܝ ܕܫܶܡܫܳܐ. ܠܘܳܬ ܗܳܟܺܝܠ ܫܪܳܝܳܗ̇ ܕܰܒܥܳܬܳܐ ܗܳܕܶܐ ܕܣܺܝܡܳܐ܆ ܘܰܕܗܳܠܶܝܢ ܐ̱ܚܪ̈ܳܢܝܳܬܳܐ ܕܰܬܚܶܝܬ ܒܥܳܬܳܐ ܢܳܒ̈ܥܳܢ܆ ܐܰܝܟ ܥܽܘܩܳܒܗܽܘܢ ܕܦܶܬܓܳܡ̈ܶܐ ܕܢܶܬܬܥܺܝܪ ܙܳܕܶܩ ܡܶܢ ܐܰ‌ܠܳܗܳܐ ܗܰܘ ܕܩܳܡ܆ ܟܰܕ ܛܳܒ ܡܚܺܝ̈ܠܶܐ ܐܺܝܬܰܝܢ ܚܢܰܢ. ܘܠܶܗ ܠܦܽܘܫܳܩܳܐ ܢܚܰܘܶܝܘܗ̱ܝ ܢܰܗܺܝܪܳܐ. ܐܳܦ ܓܶܝܪ ܗܰܘ ܕܠܶܗ ܠܙܰܪܥܳܐ ܕܩܶܪܝܳܢܳܐ ܐܰܪܡܺܝ܆ ܘܠܶܗ ܠܗܳܢܳܐ ܪܘܳܚ ܒܺܐܝ̈ܕܰܝܳܐ ܕܟܽܠܢܳܫ܆ ܟܺܐܢ ܐܺܝܬܰܘܗ̱ܝ܆ ܕܳܐܦ ܠܫܽܘ̈ܐܴܠܶܐ ܕܰܢܒܰܥܘ ܡܶܢ ܗܳܪܟܳܐ ܢܶܬܶܠ ܡܶܠܬܳܐ. ܗܳܕܶܐ ܕܶܝܢ ܘܰܡܢܰܣܶܐ ܐ̱ܢܳܐ ܠܡܶܥܒܰܕ܆ ܘܳܐܦ ܕܗܳܠܶܝܢ ܕܶܐ݀ܬܥܣܶܩ ܐܶ݀ܥܒܶܕ ܫܪܳܝܳܐ ܓܰܠܝܳܐ.

ܠܳܐ ܓܶܝܪ ܐܶܡܰܪܘ ܗܳܠܶܝܢ ܡܰܟ̈ܬܒܳܢܶܐ ܕܶܐܘܢܓ̈ܠܺܝܰܐ ܩܰܕܺܝ̈ܫܶܐ܆ ܕܰܐܘ ܟܰܕ ܥܳܒܰܪ ܣܽܘܓܶܐܗ ܕܠܶܠܝܳܐ܆ ܐܰܘ ܬܽܘܒ ܕܰܠܡܰܓ̈ܗܶܐ܆ ܐܰܘ ܡܶܢ ܒܳܬܰܪ ܙܰܠܺܝܩܳܐ ܕܫܶܡܫܳܐ ܩܳܡ ܗܽܘ ܡܳܪܝܳܐ. ܗܳܟܰܢܳܐ ܓܶܝܪ ܣܰܩܽܘܒܠܳܝܽܘܬܳܐ ܐܺܝܬܶܝܗ̇ ܗܘܳܬ܆ ܕܚܰܕ ܣܽܘܥܪܳܢܳܐ ܗܳܢܽܘܢ ܕܰܐܟܬܶܒܘ܆ ܕܠܰܘ ܝܰܬܺܝܪܳܐܺܝܬ ܒܚܰܕ ܥܶܕܳܢܳܐ ܐܶܠܳܐ ܒܰܡܫܰܚ̈ܠܦܶܐ ܐܰܟܬܶܒܘ ܕܰܗܘ̣ܳܐ. ܐܶܠܳܐ ܠܗܶܝܢ ܠܢܶܫ̈ܶܐ ܟܬܰܒ[ܘ] ܕܰܐܚܪܳܢܝܳܐܺܝܬ ܒܥܶܕܳܢܳܐ ܐܶܙܰܠ̈ܶܝܢ ܠܘܳܬ ܩܰܒܪܳܐ ܘܠܰܘ ܒܶܗ ܟܰܕ ܒܶܗ ܒܥܶܕܳܢܳܐ. ܐܰܝܟܰܢܳܐ ܓܶܝܪ ܡܶܫܟܚܳܐ ܡܳܕܶܝܢ܆ ܗܳܢܶܝܢ ܕܰܡܫܰܚܠܦܳܐܺܝܬ ܐܶܬܰܝ̈ ܕܟܽܠܗܶܝܢ ܫܰܘܝܳܐܺܝܬ ܫܡܰܥ̈ܝ̱ ܡܶܛܽܠ ܦܳܪܽܘܩܰܢ ܕܩܳܡ ܠܶܗ ܠܰܝܬܰܘܗ̱ܝ ܗܳܪܟܳܐ܆ ܟܰܕ ܠܳܐ ܐܶܬܬܰܘܣܦܰܬ ܗܳܝ ܕܶܐܡـ[ܬܝ] ܩܳܡ܆ ܐܰܝܟܰܢܳܐ ܕܰܒܗܰܘ ܡܰܢ ܠܶܠܝܳܐ ܐܰ‌ܠܳܗܳܝܳܐ ܫܰܪܺܝܪܳܐܺܝܬ ܘܰܒܫܰܠܡܽܘܬܳܐ ܗܘ̣ܳܬ ܩܝܳܡܬܳܐ. ܘܠܳܐ ܕܶܝܢ ܚܰܕ ܡܶܢܗܽܘܢ ܐܰܘܕܰܥ܆ ܗܳܝ ܕܰܠܐ̱ܢܳܫ ܠܳܐ ܝܺܕܺܝܥܳܐ܆ ܤܛܰܪ ܡܶܢ ܕܠܰܐܠܳܗܳܐ ܗܰܘ ܕܩܳܡ܆ ܘܠܰܐܒܳܐ ܗܰܘ ܕܗܽܘ ܒܰܠܚܽܘܕܰܘܗ̱ܝ ܝܳܕܰܥ ܠܶܗ ܠܰܒܪܳܐ܆ ܐܰܝܟܰܢܳܐ ܕܳܐܦ ܗܽܘ ܝܺܕܰܥ ܠܰܐܒܳܐ܆ ܘܰܠܪܽܘܚܳܐ ܩܰܕܺܝܫܳܐ܆ ܗܰܘ ܕܟܽܠܡܶܕܶܡ ܒܳܨܶܐ ܘܥܰܡܺܝ̈ܩܳܬܶܗ ܕܰܐ‌ܠܳܗܳܐ.

ܡܰܬܰܝ ܓܶܝܪ ܐܳܡܰܪ ܕܡܰܪܝܰܡ ܗܳܝ ܡܰܓܕܠܳܝܬܳܐ ܘܡܰܪܝܰܡ ܗܳܝ ܐ̱ܚܪܺܬܳܐ ܒܪܰܡܫܳܐ ܕܫܰܒ̈ܶܐ ܐܶܬܰܝ̈ ܠܰܚܙܳܬܶܗ ܕܩܰܒܪܳܐ ܘܙܰܘܥܳܐ ܪܰܒܳܐ ܗܘ̣ܳܐ ܘܡܰܠܰܐܟܶܗ ܕܡܳܪܝܳܐ ܢܚܶܬ ܡܶܢ ܫܡܰܝܳܐ܆ ܘܒܰܚܙܳܬܶܗ ܡܰܢ ܕܳܡܶܐ ܠܒܰܪܩܳܐ܆ ܐܶܤܛܠܶܗ ܕܶܝܢ ܕܳܡܝܳܐ ܠܬܰܠܓܳܐ܆ ܕܰܒܕܶܚܠܬܳܐ ܡܰܢ ܢܣܰܪܶܕ ܠܢܳܛܽܘܪ̈ܶܐ܆ ܗܳܢܽܘܢ ܕܟܰܕ ܠܳܗ̇ ܠܰܚܙܳܬܳܐ ܠܳܐ ܣܦܰܩܘ܆ ܒܨܺܝܪ ܩܰܠܺܝܠ ‌ܐܶܒܰܕܘ ܗ̱ܘܰܘ܆ ܘܰܗܘܰܘ ܡܺܝ̈ܬܶܐ ܡܶܢ ܕܶܚܠܬܳܐ. ܒܢܽܘܗܪܳܐ ܕܶܝܢ ܩܪܳܐ ܐܶܢܶܝܢ ܠܢܶܫ̈ܶܐ܆ ܘܠܽܘܒܳܒܳܐ ܥܒܰܕ ܒܗܶܝܢ. ܒܗܳܠܶܝܢ ܕܒܰܟܝܳܢܳܐ ܡܶܬܙܺܝ̈ܥܳܢܝܳܬܳܐ ܐܺܝܬܰܝܗܶܝܢ ܘܕܰܚܽܘܠ̈ܬܳܢܝܳܬܳܐ ܘܠܰܩܝܳܡܬܳܐ ܒܶܗ ܒܶܐܣܟܺܡܳܐ ܚܳܕܝܳܐܺܝܬ ܫܰܘܕܰܥ܆ ܥܰܠ ܕܡܶܛܽܠܳܬܗܶܝܢ ܕܗܳܠܶܝܢ ܐܶܫܬܰܕܰܪ. ܟܰܕ ܓܶܝܪ ܠܟܺܐܦܳܐ ܥܰܪܓܶܠ. ܐܶܫܟܚܶܗ ܠܡܳܪܝܳܐ ܕܩܳܡ ܠܶܗ ܘܟܰܕ ܐܰܚܺܝܕ ܩܰܒܪܳܐ ܘܛܰܒܥܳܐ ܐܺܝܬ܆ ܘܰܗܘ̣ܳܬ ܥܠܰܘܗ̱ܝ ܙܗܺܝܪܽܘܬܳܐ܆ ܘܒܰܢܛܺܝܪܽܘܬܳܐ ܕܦܳܠ̈ܚܶܐ ܡܶܬܢܛܰܪ ܗ̱ܘܳܐ܆ ܫܰܒܩܶܗ ܘ[ܩ]ܡ ܐܰܝܟ ܕܰܦܐܶܐ ܠܰܐܠܳܗܳܐ܆ ܒܗܰܘ ܙܢܳܐ ܕܟܰܕ ܐܰܚܺܝܕܺܝܢ ܬܰܪ̈ܥܶܐ܆ ܠܓܰܘ ܡܶܢ ܒܰܝܬܳܐ ܗܘܳܐ܆ ܘܒܰܝܢܳܬ ܬܰܠ̈ܡܺܝܕܶܐ ܩܳܡ. ܡܶܛܽܠܗܳܕܶܐ ܘܳܐܦ ܐܳܡܰܪ ܗ̱ܘܳܐ ܗܽܘ ܡܰܠܰܐܟܳܐ܆ ܠܰܝܬܰܘܗ̱ܝ ܗܳܪܟܳܐ܆ ܐܶܠܳܐ ܩܳܡ ܠܶܗ. ܘܡܰܘܕܰܥ ܗ̱ܘܳܐ܆ ܕܰܩܕܳܡ ܡܶܐܬܺܝܬܶܗ ܐܶܣܬܰܥܪܰܬ ܒܬܶܕܡܽܘܪܬܳܐ ܩܝܳܡܬܶܗ ܕܦܳܪܽܘܩܰܢ܆ ܗܳܝ ܕܰܐܝܟ ܐܰ‌ܠܳܗܳܐ ܒܚܰܝܠܳܐ ܕܺܝܠܶܗ ܡܰܠܺܝ܆ ܘܠܰܡܕܰܒܪܳܢܽܘܬܳܐ ܣܥܰܪ܆ ܘܥܰܠ ܚܰܝܠܳܐ ܕܡܰܠܰܐܟ̈ܶܐ ܠܳܐ ܐܶܣܬܢܶܩ. ܐܶ‌ܠܽܘ ܓܶܝܪ ܗܳܕܶܐ ܠܳܐ ܐܺܝܬܶܝܗ̇ ܗ̱ܘܳܬ܆ ܐܳܡܰܪ ܗܘܳܐ. ܗܳܐ ܩܳܐܶܡ. ܗܳܝ ܕܡܶܚܕܳܐ ܗܳܘܝܳܐ܆ ܡܶܛܽܠ ܕܩܰܕܡܰܬ ܗ̱ܘܳܬ ܘܰܗܘ̣ܳܬ܆ ܟܰܕ ܒܙܰܒܢܳܐ ܗܰܘ ܕܰܥܒܰܪ ܡܶܬܚܰܫܰܚ ܐܳܡܰܪ: ܠܳܐ ܐܺܝܬܰܘܗ̱ܝ ܗܳܪܟܳܐ. ܩܳܡ ܠܶܗ. ܘܗ̱ܝ ܕܶܝܢ ܐ̱ܚܪܺܬܳܐ܆ ܡܶܢ ܗܳܕܶܐ ܡܶܬܝܰܕܥܳܐ ܓܰܠܝܳܐܺܝܬ. ܕܰܫ̈ܠܺܝܚܶܐ ܟܰܕ ܡܰܟܪܙܺܝܢ ܗ̱ܘܰܘ ܠܶܐܘܰܢܓܶܠܺܝܽܘܢ ܐܳܡܪܺܝܢ ܗ̱ܘܰܘ: ܕܰܡܫܺܝܚܳܐ ܡܶܢ ܐܰ‌ܠܳܗܳܐ ܩܳܡ. ܕܡܶܛܽܠ ܟܪܺܝܗܽܘܬܳܐ ܕܗܳܢܽܘܢ ܕܫܳܡܥܺܝܢ܆ ܕܡܶܬܩܰܒܠܳܢܺܝܬܳܐ ܢܶܥܒܕܽܘܢܳܗ̇ ܗܘܰܘ ܠܳܗ̇ ܠܡܶܠܬܳܐ. ܡܰܠܰܐܟܳܐ ܕܶܝܢ ܗܰܘ ܕܩܰܕܡܳܝܳܐ܆ ܠܒܰܪ̱ܬ ܩܳܠܳܐ ܗܳܝ ܕܡܶܣܬܰܒܪܳܐ ܩܰܕܡܳܝܬܳܐ. ܐܳܡܰܪ ܟܰܕ ܓܰܠܝܳܐܺܝܬ ܡܚܰܘܶܐ ܠܶܗ ܠܫܽܘܠܛܳܢܳܐ ܦܐܶܐ ܠܰܐܠܳܗܳܐ ܕܗܰܘ ܕܩܳܡ܆ ܡܰܙܥܶܩ ܗ̱ܘܳܐ ܠܰܝܬܰܘܗ̱ܝ ܗܳܪܟܳܐ ܐܶܠܳܐ ܩܳܡ ܠܶܗ. ܐܳܦ ܗܳܝ ܕܶܝܢ ܕܡܶܬܐܰܡܪܳܐ ܕܡܶܢ ܐܰܒܳܐ ܩܳܡ܆ ܠܰܟܪܺܝܗܽܘܬܗܽܘܢ ܡܰܢ ܕܗܳܢܽܘܢ ܕܫܳܡܥܺܝܢ܆ ܐܰܝܟ ܕܶܐܡܪܶܬ ܡܕܰܒܪܳܐ ܗ̱ܘܳܬ. ܗܽܘ ܕܶܝܢ ܟܰܕ ܗܽܘ ܗܰܘܢܳܐ ܩܰܢܝܳܐ܆ ܘܠܰܘ ܐ̱ܚܪܺܢܳܐ. ܒܡܰܢܽܘ ܓܶܝܪ ܡܰܥܒܶܕ ܗ̱ܘܳܐ ܐܰܒܳܐ. ܝܺܕܺܝܥܳܐ ܕܰܒܚܰܝܠܶܗ. ܡܰܢܽܘ ܕܶܝܢ ܐܺܝܬܰܘܗ̱ܝ ܚܰܝܠܶܗ ܕܰܐܒܳܐ܆ ܘܠܳܐ ܐ̱ܢܳܫ ܐ̱ܚܪܺܢܳܐ ܐܶܠܳܐ ܡܫܺܝܚܳܐ. ܡܫܺܝܚܳܐ ܓܶܝܪ ܘܚܰܝܠܶܗ ܕܰܐ‌ܠܳܗܳܐ ܘܚܶܟܡܬܶܗ ܕܰܐ‌ܠܳܗܳܐ. ܡܳܕܶܝܢ ܗܽܘ ܠܶܗ ܐܰܩܺܝܡ ܡܫܺܝܚܳܐ. ܐܳܦ ܐܶܢ ܡܶܬܐܰܡܪܳܐ ܕܡܶܢ ܐܰܒܳܐ ܩܳܡ.

ܗܳܝ ܕܶܝܢ ܕܰܒܪܰܡܫܳܐ ܕܫܰܒ̈ܶܐ܆ ܠܰܘ ܪܰܡܫܳܐ ܗܰܘ ܕܡܶܢ ܒܳܬܰܪ ܡܰܥܪ̈ܳܒܰܝ ܫܶܡܫܳܐ ܡܰܘܕܰܥ. ܠܰܘ ܓܶܝܪ ܚܕܳܢܳܐܺܝܬ ܐܳܡܰܪ ܒܪܰܡܫܳܐ ܕܫܰܒܬܳܐ. ܐܶܠܳܐ ܣܰܓܺܝܳܐܢܳܐܺܝܬ ܒܪܰܡܫܳܐ ܕܫܰܒ̈ܶܐ. ܫܰܒ̈ܶܐ ܕܶܝܢ܆ ܠܟܽܠܳܗ̇ ܫܰܒܬܳܐ ܐܺܝܬ ܥܝܳܕܳܐ ܠܥܶܒܪ̈ܳܝܶܐ ܠܡܶܩܪܳܐ܆ ܡܶܛܽܠܗܳܕܶܐ ܗܳܟܺܝܠ ܗܳܢܽܘܢ ܐܶܘܰܢܓ̈ܶܠܺܝܣܛܶܐ܆ ܒܚܰܕ ܒܫܰܒ̈ܶܐ ܐܳܡܪܺܝܢ. ܘܟܰܕ ܘܠܳܐ ܗ̱ܘܳܐ ܕܰܒܝܰܘܡܳܐ ܩܰܕܡܳܝܳܐ ܕܫܰܒܬܳܐ ܢܺܐܡܪܽܘܢ܆ ܗܳܟܰܢܳܐ ܓܶܝܪ ܘܒܰܥܝܳܕܳܐ ܡܶܬܚܰܫܚܺܝܢ ܚ̱ܢܰܢ܆ ܟܰܕ ܬܪܶܝܢ ܕܰܒܫܰܒܬܳܐ ܘܰܬܠܳܬܳܐ ܕܫܰܒܬܳܐ ܐܳܡܪܺܝܢ ܚ̱ܢܰܢ܆ ܠܝܰܘܡܳܐ ܕܰܬܪܶܝܢ ܘܕܰܬܠܳܬܳܐ ܕܫܰܒܬܳܐ. ܠܳܐ ܐܳܡܰܪ ܗܳܟܺܝܠ ܒܬܰܘܚܰܪܬܳܐ ܕܫܰܒܬܳܐ܆ ܐܰܘ ܒܪܰܡܫܳܐ ܕܫܰܒܬܳܐ܆ ܐܰܝܟ ܕܰܢܫܰܘܕܰܥ ܪܰܡܫܶܗ ܕܝܰܘܡܳܐ ܗܰܘ. ܐܶܠܳܐ ܒܬܰܘܚܰܪܬܳܐ ܕܫܰܒ̈ܶܐ܆ ܗܳܢܰܘ ܕܶܝܢ ܒܫܽܘܠܳܡܳܐ. ܡܶܛܽܠ ܕܰܠܬܰܘܚܰܪܬܳܐ ܕܫܰܒܬܳܐ ܘܰܕܣܰܓܺܝ ܡܰܥܒܕܳܐ ܢܚܰܘܶܐ. ܐܳܦ ܗܳܟܰܢܳܐ ܓܶܝܪ ܐܺܝܬ ܠܰܢ ܥܝܳܕܳܐ ܠܡܺܐܡܰܪ. ܒܬܰܘܚܰܪܬܳܐ ܕܡܶܢ ܙܰܒܢܳܐ ܐܰܝܬܺܝܬ̣. ܒܬܰܘܚܰܪܬܳܐ ܕܡܶܢ ܫܳܥܬܳܐ. ܒܬܰܘܚܰܪܬܳܐ ܕܡܶܢ ܨܒܽܘܬܳܐ. ܟܕ ܠܰܘ ܠܪܰܡܫܳܐ ܘܰܠܙܰܒܢܳܐ ܕܡܶܢ ܒܳܬܰܪ ܡܰܥܪ̈ܳܒܰܝ ܫܶܡܫܳܐ ܡܰܘܕܥܺܝܢ ܚ̱ܢܰܢ. ܐܶܠܳܐ ܠܬܰܘܚܰܪܬܳܐ ܕܒܳܬܰܪ ܣܽܘܥܪܳܢܳܐ ܘܙܰܒܢܳܐ ܗܘܳܬ. ܒܗܳܢܳܐ ܙܢܳܐ ܡܰܘܕܥܺܝܢ ܚ̱ܢܰܢ. ܗܳܟܰܢܳܐ ܘܗܳܝ ܕܰܒܪܰܡܫܳܐ ܕܫܰܒ̈ܶܐ܆ ܠܥܶܕܳܢܳܐ ܕܡܶܢ ܒܳܬܰܪ ܫܰܒܬܳܐ ܕܥܒܪܬ ܡܰܘܕܥܳܐ. ܡܶܫܬܰܡܠܝܳܐ ܕܶܝܢ ܫܰܒܬܳܐ܆ ܒܡܰܥܪ̈ܳܒܰܝ ܫܶܡܫܳܐ ܡܶܢ ܒܳܬܰܪ ܫܰܒܬܳܐ. ܗܳܟܰܢܳܐ ܕܟܰܕ ܡܰܘܕܰܥ ܡܰܬܰܝ܆ ܗܰܘ ܕܣܰܓܺܝ ܪܰܚܺܝܩܳܐ ܗ̱ܘܳܬ ܡܶܢ ܥܶܕܳܢܳܐ. ܕܫܽܘܠܳܡܳܐ ܕܫܰܒܬܳܐ ܕܶܐܫܬܰܡܠܝܰܬ܆ ܐܰܝܟ ܗܰܘ ܕܰܡܦܰܫܶܩ ܗܽܘ ܠܳܗ̇܆ ܐܰܝܬܺܝ ܒܳܬܪܶܗ ܕܢܳܓܰܗ ܚܰܕ ܒܫܰܒܳܐ. ܥܒܰܪ ܠܶܗ ܐܳܡܰܪ ܠܶܠܝܳܐ ܗܳܢܳܐ ܟܽܠܶܗ܆ ܐܰܝܟܰܢܳܐ ܕܢܶܗܘܶܐ ܙܰܒܢܳܐ ܕܰܩܥܳܬܳܐ ܕܬܰܪܢܳܓܠܳܐ܆ ܒܗܳܝ ܕܰܠܢܽܘܗܪܳܐ ܕܺܐܝܡܳܡܳܐ ܗܰܘ ܕܰܥܬܺܝܕ ܩܳܕܡܳܐ ܡܫܰܘܕܥܳܐ. ܡܶܛܽܠܗܳܕܶܐ ܗܳܟܺܝܠ ܘܰܒܙܰܒܢܳܐ ܗܳܢܳܐ܆ ܠܰܘ ܒܪܰܡܫܳܐ ܕܡܶܢ ܒܳܬܰܪ ܫܰܒܬܳܐ܆ ܫܳܪܶܝܢ ܚ̱ܢܰܢ ܠܨܰܘܡܳܐ ܘܰܡܫܰܪܶܝܢ ܚ̱ܢܰܢ ܒܚܰܕܽܘܬܳܐ܆ ܟܰܕ ܥܝܳܕܳܐ ܗܰܘ ܕܥܰܠ ܟܽܘܠ ܠܳܒܶܟ܆ ܘܗܳܘܶܐ ܣܢܺܐܓܪܳܐ ܠܣܽܘܥܪܳܢܳܐ.

ܟܰܕ ܗܳܟܺܝܠ ܥܶܕܳܢܳܐ ܗܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܡܰܪܝܰܡ ܗܳܝ ܡܰܓܕܠܳܝܬܳܐ ܘܗܳܝ ܒܰܥܠܰܬ ܫܡܳܗ̇܆ ܠܘܳܬ ܩܰܒܪܳܐ ܐܶܬܰܝ̈ ܗ̱ܘܰܝ̈. ܘܰܠܡܰܠܰܐܟܳܐ ܗܰܘ ܕܰܢܚܶܬ ܡܶܢ ܫܡܰܝܳܐ܆ ܒܙܰܒܢܳܐ ܗܰܘ ܕܶܐܬܶܐܡܰܪ ܡܶܢ ܠܥܶܠ܆ ܚ̈ܙܰܝ ܕܥܰܪܓܶܠ ܟܺܐܦܳܐ ܕܰܥܠܶܝܗ̇ ܝܳܬܶܒ ܗ̱ܘܳܐ. ܘܡܶܢܶܗ ܐܶܬܩܪ̈ܺܝܶܢ܆ ܕܰܚ̈ܙܳܝܶܢ ܠܕܽܘܟܬܳܐ ܗܳܝ ܕܒܳܗ̇ ܣܺܝܡ ܗ̱ܘܳܐ ܗܽܘ ܡܳܪܝܳܐ. ܘܟܰܕ ܐܶܬܦ̈ܩܶܕܝ̱ ܠܡܶܪܗܰܛ ܘܠܰܡܣܰܒܳܪܽܘ ܠܬܰܠ̈ܡܺܝܕܶܐ܆ ܢܦܰܩ̈ܶܝܢ ܩܰܠܺܝܠܳܐܺܝܬ ܡܶܢ ܩܰܒܪܳܐ܆ ܘܰܪ̈ܗܶܛܝ ܗ̱ܘܰܝ̈. ܘܟܰܕ ܪ̈ܳܗܛܳܢ܆ ܦܓܰܥ ܒܗܶܝܢ ܝܶܫܽܘܥ܆ ܘܶܐܡܰܪ ܠܗܶܝܢ: ܚ̈ܕܳܝܶܢ. ܐܳܦ ܓܶܝܪ ܙܳܕܶܩ ܗ̱ܘܳܐ ܕܓܶܢܣܳܐ ܕܢܶܫ̈ܶܐ܆ ܠܰܩܝܳܡܬܳܐ ܢܶܣܬܰܒܰܪ ܡܶܢ ܡܰܠܰܐܟܳܐ. ܘܰܠܡܳܪܝܳܐ ܢܶܚܙܶܐ܆ ܘܒܰܪ̱ܬ ܩܳܠܳܐ ܩܰܕܡܳܝܬܳܐ ܡܶܢܶܗ ܢܶܫܡܰܥ܆ ܗܳܝ ܕܰܚ̈ܕܳܝܶܢ ܡܶܛܽܠ ܕܳܐܦ ܠܰܐܢ̱ܬܬܳܐ ܪܺܝܫܳܐܺܝܬ ܠܡܰܛܥܝܳܢܽܘܬܳܐ ܕܚܶܘܝܳܐ ܫܶܡܥܰܬ܆ ܘܰܚܙܳܬ ܠܳܐ ܢܳܡܽܘܣܳܐܺܝܬ ܠܦܺܐܪܶܗ ܕܺܐܝܠܳܢܳܐ܆ ܗܰܘ ܕܰܡܦܰܪܓܠܺܝܢ ܗ̱ܘܰܘ ܡܶܢܶܗ. ܘܰܒ̈ܥܳܩܳܬܳܐ ܐܶܬܚܰܝܒܰܬ. ܡܶܛܽܠܗܳܕܶܐ ܘܰܕܬܶܣܓܽܘܕ ܘܰܕܬܶܐܚܽܘܕ ܪ̈ܶܓܠܰܘܗ̱ܝ ܫܒܰܩ ܡܫܺܝܚܳܐ ܐܰܝܟ ܐܰܝ̇ܕܳܐ܆ ܕܩܰܕܡܳܝܬܳܐ ܢܶܦܠܰܬ ܘܶܐܬܢܰܟܪܝܰܬ ܠܶܗ. ܘܕܰܬܣܰܒܰܪ ܚܰܕܽܘܬܳܐ ܠܬܰܠ̈ܡܺܝܕܶܐ ܦܩܰܕ ܗ̱ܘܳܐ ܠܳܗ̇. ܟܰܕ ܨܳܒܶܐ ܗ̱ܘܳܐ ܕܰܡܣܰܒܪܳܢܳܐ ܕܚܰܕܽܘܬܳܐ ܐܰܢ̱ܬܬܳܐ ܬܶܗܘܶܐ ܠܓܰܒܪܳܐ܆ ܗܳܝ ܕܰܗܘܳܬ ܠܳܐܕܳܡ ܡܫܰܡܫܳܢܺܝܬܳܐ ܕܥܳܩܬܳܐ܆ ܘܰܠܗܳܠܶܝܢ ܕܰܠܩܽܘܒܠܳܐ ܒܕܰܠܩܽܘܒܠܳܐ ܡܰܐܣܶܐ ܗ̱ܘܳܐ. ܟܰܕ ܐܳܙ̈ܳܠ̱ܢ ܗ̱ܘܰܝ̈ ܗܳܟܺܝܠ ܠܰܡܣܰܒܳܪܽܘ ܠܬܰܠ̈ܡܺܝܕܶܐ ܗܳܐ ܐ̱ܢܳܫܺܝ̈ܢ ܡܶܢ ܩܶܣܛܽܘܢܳܪ̈ܶܐ ܐܶܬܰܘ ܠܰܡܕܺܝܢ̱ܬܳܐ. ܘܰܐܘܕܰܥܘ ܠܪ̈ܰܒܰܝ ܟܳܗ̈ܢܶܐ ܟܽܘܠܗܶܝܢ ܗܳܠܶܝܢ ܕܰܗܘ̈ܰܝ. ܘܶܐܬܟܰܢܰܫܘ ܥܰܡ ܩܰܫܺܝ̈ܫܶܐ ܘܰܢܣܰܒܘ ܡܶܠܟܳܐ. ܘܟܶܣܦܳܐ ܕܣܳܦܶܩ ܝܰܗܒܘ̱ ܠܶܐܤܛܪ̈ܰܛܺܝܽܘܛܶܐ ܘܶܐܡܰܪܘ̱ ܠܗܽܘܢ܆ ܕܶܐܡܰܪܘ ܕܬܰܠܡܺܝܕܰܘ̈ܗ̱ܝ ܒܠܶܠܝܳܐ ܐܶܬܰܘ ܓܰܢܒܽܘܗ̱ܝ ܟܰܕ ܕܰܡܟܺܝܢ ܚ̱ܢܢ. ܘܶܐܢ ܡܶܫܬܰܡܥܳܐ ܗܳܕܶܐ ܩܕܳܡ ܗܺܓܡܽܘܢܳܐ. ܚܢܰܢ ܢܦܺܝܣܺܝܘܗ̱ܝ܆ ܘܰܠܟܽܘܢ ܕܠܳܐ ܡܰܪܢܺܝܬܳܐ ܥܳܒܕܺܝܢ ܚ̱ܢܰܢ. ܗܶܢܽܘܢ ܕܶܝܢ ܫܰܩܠܽܘܗ̱ܝ ܠܟܶܣܦܳܐ܆ ܘܰܥܒܰܕܘ̱ ܐܰܝܟ ܕܶܐܬܝܰܠܰܦܘ̱. ܘܰܢܦܰܩ ܛܶܒܳܗ̇ ܕܡܶܠܬܳܐ ܗܳܕܶܐ ܠܘܳܬ ܝܽܗ̱ܘ̈ܕܳܝܶܐ ܥܕܰܡܳܐ ܠܝܰܘܡܳܢܳܐ.

ܗܺܝ ܕܶܝܢ ܡܰܪܝܰܡ ܐ̱ܚܪܺܬܳܐ܆ ܗܳܕܶܐ ܕܶܝܢ ܕܝܳܠܕܰܬ ܐܰ‌ܠܳܗܳܐ ܐܺܝܬܶܝܗ̇܆ ܢܳܩܦܳܐ ܠܰܡܗܰܝܡܳܢܽܘ. ܡܶܛܽܠ ܕܠܳܐ ܐܶܬܪܰܚܩܰܬ ܡܶܢ ܚܰܫ̈ܶܐ ܐܶܠܳܐ ܕܩܳܝܡܳܐ ܗ̱ܘܳܬ ܠܘܳܬ ܨܠܺܝܒܳܐ ܐܰܝܟ ܕܝܽܘܚܰܢܳܢ ܐܰܟܬܶܒ܆ ܠܗܳܝ ܕܳܐܦ ܦܰܐܝ̈ܳܢ ܗ̱ܘܰܝ̈ ܡܣܰܒܪ̈ܳܢܘܳܬܳܐ ܕܚܰܕܽܘܬܳܐ܆ ܕܥܶܩܳܪܳܐ ܕܚܰܕܽܘܬܳܐ ܐܺܝܬܶܝܗ̇܆ ܘܫܰܦܺܝܪ ܫܶܡܥܰܬ ܗܳܝ ܕܰܚܕܳܝ ܡܰܠ̣ܝܰܬ ܚܰܕܽܘܬܳܐ. ܟܰܕ ܠܦܽܘܩܕܳܢܶܗ ܕܡܳܪܝܳܐ ܡܡܰܠܝܳܐ܆ ܠܬܰܠ̈ܡܺܝܕܶܐ ܐܰܡܺܝܢܳܐܺܝܬ ܣܰܒܪܰܬ ܠܳܐ ܓܶܝܪ ܫܰܠܺܝܛ ܗ̱ܘܳܐ܆ ܕܠܳܐ ܬܶܬܡܰܠܶܐ ܒܰܡܣܰܒܪ̈ܳܢܶܐ ܗܳܝ ܕܗܳܟܰܢܳܐ ܚܰܟܺܝܡܳܐܺܝܬ ܐܶܬܦܰܪܢܣܰܬ ܘܶܐܬܦܰܩܕܰܬ. ܐܳܦܶܢ ܠܳܐ ܗܰܝܡܶܢܘ ܗܳܢܽܘܢ ܕܰܫܡܰܥܘ. ܡܶܛܽܠ ܕܢܳܩܦܳܐ ܗܳܕܶܐ ܟܡܳܐ ܙܰܒ̈ܢܺܝܢ܆ ܠܬܶܕܡܪ̈ܳܬܳܐ ܗܳܠܶܝܢ ܕܰܠܥܶܠ ܡܶܢ ܡܶܠܬܳܐ ܥܳܒܪ̈ܳܢ ܟܰܕ ܡܶܣܬܰܒܪ̈ܳܢ܆ ܠܳܐ ܓܶܝܪ ܦܳܝܫܺܝܢ ܗ̱ܘܰܘ ܒܰܛܺܝ̈ܠܶܐ ܐܶ‌ܠܽܘ ܗܰܝܡܶܢܘ. ܗܳܝ ܕܶܝܢ ܡܰܓܕܠܳܝܬܳܐ܆ ܟܰܕ ܐܳܙܳܠ̱ܐ ܥܰܡ ܝܳܠܕܰܬ ܐܰ‌ܠܳܗܳܐ܆ ܘܰܠܘܳܬ ܣܽܘܒܳܪܳܐ ܒܳܗ̇ ܒܰܕܡܽܘܬܳܐ ܚܦܺܝܛܳܐ ܗ̱ܘܳܬ܆ ܣܶܒܠܰܬ ܐܳܦ ܡܶܕܶܡ ܐ̱ܢܳܫܳܝܳܐ. ܐܰܟܙܢܳܐ ܓܶܝܪ ܕܟܰܕ ܦܛܪܘܤ ܡܶܢ ܗܪܘܕܤ ܐܶܬܠܒܶܟ. ܘܰܒܝܰܕ ܡܰܠܰܐܟܳܐ ܫܺܫ̈ܠܳܬܳܐ ܡܰܢ ܐܶܫܬܪ̈ܺܝ ܡܶܢ ܢܰܦܫܗܶܝܢ܆ ܘܰܠܒܰܪ ܡܶܢ ܒܶܝܬ ܐܰܣܺܝܪ̈ܶܐ ܗܘܳܐ ܘܣܰܓܺܝ ܗܰܠܶܟ. ܐܰܝܟܰܢܳܐ ܕܳܐܦ ܠܬܰܪܥܳܐ ܕܰܡܕܺܝܢ̱ܬܳܐ ܢܶܥܒܰܪ܆ ܠܳܐ ܣܳܒܰܪ ܗ̱ܘܳܐ ܠܶܗ ܫܰܪܺܝܪܬܳܐ ܠܗܳܝ ܕܰܗܘ̣ܳܬ. ܐܶܠܳܐ ܣܳܒܰܪ ܗ̱ܘܳܐ ܕܚܶܠܡܳܐ ܚܳܙܶܐ. ܗܳܟܰܢ ܐܳܦ ܗܳܕܶܐ. ܠܪܰܒܽܘܬܳܗ̇ ܕܬܶܕܡܽܘܪܬܳܐ ܕܰܩܝܳܡܬܳܐ܆ ܐܰܝܟ ܕܠܰܨܒܽܘܬܳܐ ܥܰܣ̣ܩܰܬ ܠܡܶܗܘܳܐ ܚܶܫ̣ܒܰܬ ܘܡܶܚܕܳܐ ܕܡܰܢܰܥܘ ܗܳܢܽܘܢ ܢܳܛܽܘܪ̈ܶܐ܆ ܘܫܰܪܺܝܘ ܥܰܡ ܪ̈ܰܒܰܝ ܟܳܗ̈ܢܶܐ ܕܰܥܫܽܘܩܝܳܐ ܥܰܠ ܩܝܳܡܬܳܐ ܢܥܰܬܕܽܘܢ ܘܰܐܪܓܫܰܬ ܕܡܶܕܶܡ ܕܰܐܝܟ ܗܳܟܰܢܳܐ ܡܶܬܠܚܶܫ܆ ܠܚܽܘ̈ܫܳܒܶܐ ܕܰܡܦܰܫܟܽܘܬܳܐ ܩܰܒܠܰܬ. ܘܟܰܕ ܐܰܡܺܝܢܳܐܺܝܬ ܒܣܽܘܒܳܪܳܐ ܘܰܒܦܽܘܩܕܳܢܳܐ ܦܳܪܽܘܩܳܝܳܐ܆ ܠܘܳܬ ܩܰܒܪܳܐ ܡܫܰܢܝܳܐ ܗ̱ܘܳܬ ܒܨܰܦܪܳܐ܆ ܟܰܕ ܥܕܰܟܺܝܠ ܚܽܘܫܳܒܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܕܝܽܘܚܰܢܳܢ ܐܶܡܰܪ. ܐܰܝܟܰܢܳܐ ܓܶܝܪ ܕܰܐܪܦܺܝ ܗܽܘ ܡܳܪܝܳܐ܆ ܕܡܶܢ ܠܳܐ ܗܰܝܡܳܢܽܘܬܳܐ ܢܺܐܡܰܪ ܬܽܐܘܡܰܐ܆ ܕܶܐܠܳܐ ܚܳܙܶܐ ܐ̱ܢܳܐ ܒܺܐܝܕܰܘ̈ܗ̱ܝ ܕܽܘܟ̈ܝܳܬܳܐ ܕܨܶܨ̈ܶܐ܆ ܘܪܳܡܶܐ ܐ̱ܢܳܐ ܨܶܒܥܝ ܒܕܽܘܟܬܳܐ ܕܨܶܨ̈ܶܐ܆ ܘܪܳܡܶܐ ܐ̱ܢܳܐ ܐܺܝܕܝ ܒܕܰܦܢܶܗ ܠܳܐ ܡܗܰܝܡܶܢ ܐ̱ܢܳܐ^[1]܆ ܘܰܒܝܰܕ ܠܳܐ ܗܰܝܡܳܢܽܘܬܶܗ ܕܗܰܘ ܣܰܓܺܝܽܐܘܬ ܥܽܘܩܳܒ̈ܶܐ ܘܓܶܫܬܳܐ܆ ܚܢܰܢ ܒܗܰܝܡܳܢܽܘܬܳܐ ܐܶܫܬܰܪܰܪܢܰܢ܆ ܕܰܒܗܰܘ ܦܰܓܪܳܐ ܕܚܰܫ ܥܰܡܰܢܽܘܐܶܝܠ܆ ܒܶܗ ܡܗܰܝܡܢܺܝܢ ܚ̱ܢܰܢ ܕܳܐܦ ܩܳܡ܆ ܘܙܳܢܩܺܝܢ ܚ̱ܢܰܢ ܫܽܘܥ̈ܝܳܬܳܐ ܕܗܰܓܳܓܽܘܬܳܐ܆ ܒܶܗ ܟܰܕ ܒܶܗ ܒܢܺܝܫܳܐ܆ ܘܰܠܡܰܪܝܰܡ ܡܰܓܕܠܳܝܬܳܐ ܕܰܠܘܳܬ ܠܳܐ ܗܰܝܡܳܢܽܘܬܳܐ ܫܰܢܝܰܬ܆ ܝܰܬܺܝܪܳܐܺܝܬ ܗܳܕܶܐ ܓܕܰܫܬܳܗ̇. ܠܳܐ ܓܶܝܪ ܐܺܝܬܶܝܗ̇ ܠܳܐ ܝܺܕܺܝܥܬܳܐ܆ ܕܠܺܝܠܽܘܬ ܫܽܘܪܰܥܬܳܐ ܕܰܟܝܳܢܳܐ ܐ̱ܢܳܫܳܝܳܐ܆ ܡܰܗܡܶܐ ܗܘܳܐ ܓܶܝܪ ܕܰܒܝܰܕ ܒܥܳܬܳܐ ܝܰܬܺܝܪܬܳܐ܆ ܛܳܒ ܢܚܰܘܶܝܗ̇ ܡܗܰܝܡܰܢܬܳܐ ܠܬܶܕܡܽܘܪܬܳܐ ܕܰܩܝܳܡܬܳܐ܆ ܡܶܛܽܠ ܕܰܠܥܶܠ ܡܶܢ ܒܨܳܬܳܐ ܕܺܝܕܰܥܬܳܐ ܘܰܠܒܰܪ ܡܶܢ ܚܽܘܫܳܒ̈ܶܐ ܐܺܝܬܶܝܗ̇. ܘܟܰܕ ܥܰܡ ܗܳܢܳܐ ܦܽܘܫܳܟܳܐ ܕܬܰܪܥܺܝܬܳܐ ܐܶܬܳܬ܆ ܘܰܚܙܳܬ ܒܰܠܚܽܘܕ ܠܟܺܐܦܳܐ ܕܰܡܥܰܪܓܠܳܐ ܡܶܢ ܬܰܪܥܶܗ ܕܩܰܒܪܳܐ܆ ܘܠܰܘ ܬܽܘܒ ܠܡܰܠܰܐܟܳܐ ܕܝܳܬܶܒ ܗ̱ܘܳܐ ܥܠܶܝܗ̇ ܐܰܝܟ ܕܡܶܢ ܩܕܺܝܡ܆ ܘܝܶܗܒܰܬ ܠܠܳܐ ܗܰܝܡܳܢܽܘܬܳܗ̇ ܗܳܝ ܕܬܶܠܒܽܘܟ ܒܪܶܥܝܳܢܳܗ̇܆ ܘܦܰܢܛܰܣܺܝܰܐ ܐܰܣܒܰܪܬܳܗ̇ ܠܰܚܙܳܬܳܐ ܩܰܕܡܳܝܬܳܐ܆ ܘܬܶܡܗܳܐ ܕܰܓܳܠܳܐ ܕܰܠܩܽܘܒܠܳܐ܆ ܪܶܗܛܰܬ ܠܘܳܬ ܦܶܛܪܽܘܤ܆ ܘܰܠܘܳܬ ܗܰܘ ܬܰܠܡܺܝܕܳܐ ܐ̱ܚܪܺܢܳܐ܆ ܗܰܘ ܕܪܳܚܶܡ ܗ̱ܘܳܐ ܠܶܗ ܝܶܫܽܘܥ. ܘܡܰܙܥܩܳܐ ܗ̱ܘܳܬ ܘܳܐܡܪܳܐ: ܫܰܩܠܽܘܗ̱ܝ ܠܡܳܪܝ ܡܶܢ ܩܰܒܪܳܐ. ܘܠܳܐ ܝܳܕܥܳܐ ܐ̱ܢܳܐ ܐܰܝܟܳܐ ܣܳܡܽܘܗܝ^[2]. ܚܳܙܶܐ ܐܰܢ̱ܬ܆ ܕܡܶܢ ܐܰܝܠܶܝܢ ܕܶܐܬܡܰܠ̈ܠܰܝ̱ ܡܶܢ ܝܽܗ̱ܘ̈ܕܳܝܶܐ܆ ܡܶܢ ܒܳܬܰܪ ܗܳܝ ܕܶܐܬܰܐܡܪܰܬ ܡܶܢ ܢܳܛܽܘܪ̈ܶܐ܆ ܘܫܶܡܥܰܬ ܡܶܕܶܡ ܕܕܰܐܝܟ ܗܳܟܰܢܳܐ܆ ܐܶܫܬܰܚܠܦܰܬ ܒܚܽܘܫܳܒܳܗ̇܆ ܘܣܶܒܪܰܬ̣ ܕܰܒܥܶܠ̈ܕܒܳܒܶܐ ܟܰܕ ܐܶܬܬܪܺܝܡܰܬ ܟܺܐܦܳܐ ܓܢܰܒܘ ܦܰܓܪܶܗ ܕܝܶܫܽܘܥ܆ ܕܠܳܗ̇ ܠܓܰܢܳܒܽܘܬܳܐ ܥܰܠ ܫܠܺܝ̈ܚܶܐ ܢܰܛܒܽܘܢܳܗ̇܆ ܒܪܰܡ ܗܽܘ ܦܶܛܪܽܘܤ ܘܝܽܘܚܰܢܳܢ ܡܛܰܝܒܳܐܺܝܬ ܩܳܡܘ܆ ܘܰܠܘܳܬ ܩܰܒܪܳܐ ܪܗܶܛܘ. ܠܳܐ ܓܶܝܪ ܬܡܺܝܗܳܐ ܗ̱ܘܳܬ. ܗܳܝ ܕܠܳܐ ܢܗܰܝܡܢܽܘܢ ܗ̱ܘܰܘ ܠܡܶܠܬܳܐ ܕܡܶܬܐܰܡܪܳܐ ܗ̱ܘܳܬ ܡܶܛܽܠ ܩܝܳܡܬܳܐ. ܝܰܬܺܝܪܳܐܺܝܬ ܕܶܝܢ ܐܳܦ ܡܶܬܗܰܝܡܢܳܐ ܗ̱ܘܳܬ ܕܠܳܐ ܩܳܡ. ܘܠܳܐ ܡܰܒܥܕܳܐ ܗ̱ܘܳܬ ܡܶܢ ܒܺܝܫܽܘܬܗܽܘܢ ܕܺܝܗܽܘ̈ܕܳܝܐ. ܕܢܶܓܢܒܽܘܢ ܘܰܕܢܶܥܫܩܽܘܢ. ܕܠܳܐ ܕܶܚܠܳܐ ܐܳܙܺܠ̱ܝܢ ܗ̱ܘܰܘ ܫܠܺܝ̈ܚܶܐ ܠܘܳܬ ܩܰܒܪܳܐ. ܒܝܕ ܕܫܶܠܝܳܐ ܐܺܝܬܰܘܗ̱ܝ ܗ̱ܘܳܐ܆ ܟܰܕ ܥܕܰܟܺܝܠ ܚܶܫܽܘܟܳܐ ܐܺܝܬܰܘܗ̱ܝ ܗ̱ܘܳܐ܆ ܘܡܶܢ ܐܰ‌ܠܳܗܳܐ ܗܳܝ ܕܢܶܬܠܰܒܒܽܘܢ ܢܣܰܒܘ.

ܐܶܠܳܐ ܟܰܕ ܐܶܬܰܘ ܐܶܫܟܰܚܘ ܐܳܬܘ̈ܳܬܳܐ ܫܰܪܺܝܪ̈ܳܬܳܐ ܕܰܩܝܳܡܬܳܐ܆ ܚܳܙܶܝܢ ܗ̱ܘܰܘ ܓܶܝܪ ܒܩܰܒܪܳܐ ܟܶܬܳܢ̈ܶܐ ܕܣܺܝܡܺܝܢ^[3]. ܗܳܕܶܐ ܕܶܝܢ ܠܳܐ ܡܬܽܘܡ ܗܳܘܝܳܐ ܗ̱ܘܳܬ. ܐܶ‌ܠܽܘ ܐܶܬܓܢܶܒ ܦܰܓܪܳܐ. ܒܩܰܕܡܳܐ ܡܰܢ ܓܶܝܪ ܥܝܳܕܳܐ ܐܺܝܬ ܠܓܰܢܳܒ̈ܶܐ ܕܢܰܫܠܚܽܘܢ ܢܰܚ̈ܬܶܐ. ܒܳܬܰܪܟܶܢ ܕܶܝܢ܆ ܗܳܝ ܕܩܰܠܺܝܠܳܐܺܝܬ ܛܳܒ ܢܶܣܥܪܽܘܢܳܗ̇ ܠܓܰܢܳܒܽܘܬܳܐ܆ ܕܠܳܐ ܢܶܬܬܨܺܝܕܽܘܢ ܘܢܶܣܒܠܽܘܢ ܟܽܠ ܒܺܝ̈ܫܳܢ. ܡܶܛܽܘܠ ܕܶܝܢ ܦܰܓܪܶܗ ܕܝܶܫܽܘܥ ܟܬܰܒ ܝܽܘܚܰܢܳܢ ܗܳܟܰܢܳܐ ܘܟܰܪܟܽܘܗ̱ܝ ܒܟ̈ܶܬܳܢܶܐ ܥܰܡ ܗܶܪ̈ܽܘܡܶܐ. ܐܰܝܟ ܕܺܐܝܬ ܥܝܳܕܳܐ ܠܝܽܗ̱ܘ̈ܕܳܝܶܐ ܠܡܶܩܒܰܪ^[4]. ܐܰܝܟܰܢܳܐ ܗܳܟܺܝܠ ܠܳܐ ܥܰܣܩܳܐ ܗ̱ܘܳܬ ܠܗܳܢܽܘܢ ܕܓܳܢܒܺܝܢ܆ ܗܳܝ ܕܢܶܫܪܽܘܢ ܩܶܛܪ̈ܶܐ܆ ܘܰܠܦܰܓܪܳܐ ܢܰܫܠܚܽܘܢ ܡܶܢ ܟ̈ܶܬܳܢܶܐ ܕܕܰܒܺܝܩܺܝܢ܆ ܘܥܰܣ̈ܩܰܝ ܠܡܶܬܦܪܳܩܽܘ ܐܺܝܬܰܝܗܽܘܢ܆ ܕܰܩܕܳܡ ܕܢܶܫܬܰܠܚܽܘܢ ܡܶܬܬܰܠܚܺܝܢ. ܒܚܽܘܢܛܬܳܐ ܓܶܝܪ ܕܥܰܠܘܰܝ ܘܰܕܡܽܘܪܳܐ ܐܶܬܕܒܶܩܘ܆ ܗܳܝ ܕܰܐܝܬܺܝ ܗ̱ܘܳܐ ܢܺܝܩܽܘܕܺܝܡܽܘܤ. ܐܶܠܳܐ ܘܣܽܘܕܳܪܳܐ ܗܰܘ ܕܺܐܝܬ ܗ̱ܘܳܐ ܥܰܠ ܪܺܝܫܶܗ܆ ܕܠܰܘ ܟܰܕ ܣܺܝܡ ܥܰܡ ܟ̈ܶܬܳܢܶܐ ܐܶܫܬܟܰܚ܆ ܐܶܠܳܐ ܠܰܣܛܰܪ ܒܰܚܕܳܐ ܕܽܘܟܳܐ܆ ܘܰܡܟܰܪܰܟ. ܘܳܐܦ ܠܳܐ ܚܕܳܐ ܪܗܺܝܒܽܘܬܳܐ ܡܰܘܕܰܥ ܗ̱ܘܳܐ܆ ܐܰܝܟ ܕܥܰܠ ܓܰܢܳܒ̈ܶܐ ܕܢܰܣܒܽܘܗ̱ܝ ܠܦܰܓܪܳܐ. ܐܰܝܟܰܢܳܐ ܓܶܝܪ ܐܺܝܬ ܗ̱ܘܳܐ ܣܽܘܦܩܳܢܳܐ ܠܓܰܢܳܒ̈ܶܐ܆ ܘܕܰܐܝܟ ܗܳܕܶܐ ܡܫܰܠܛܽܘܬܳܐ܆ ܕܳܐܦ ܠܬܰܟܣܺܝܬܳܐ ܕܪܺܝܫܳܐ ܒܛܶܟܣܳܐ ܢܟܰܪܟܽܘܢ ܘܰܢܣܺܝܡܽܘܢ ܠܰܣܛܰܪ. ܡܳܕܶܝܢ ܐܳܦ ܡܚܰܘܝܳܐ ܗ̱ܘܳܬ ܢܰܗܺܝܪܳܐܺܝܬ ܠܰܫܪܳܪܳܗ̇ ܕܰܩܝܳܡܬܳܐ. ܐܰܟܚܕܳܐ ܕܶܝܢ ܐܳܦ ܠܐ̱ܪܳܙܳܐ ܦܐܶܐ ܠܰܐܠܳܗܳܐ ܡܚܰܘܝܳܐ ܗ̱ܘܳܬ ܕܪܺܝܫܳܐ ܛܶܟܣܳܐ ܕܰܐ‌ܠܳܗܽܘܬܳܐ ܐܰܚܺܝܕ ܐܰܝܟ ܗܳܝ ܕܪܺܝܫܶܗ ܕܶܝܢ ܕܰܡܫܺܝܚܳܐ ܐܰ‌ܠܳܗܰܐ ܗ̱ܘ܆ ܘܰܕܡ̈ܶܠܶܐ ܕܡܶܛܽܠܳܬܶܗ ܡܩܰܘ̈ܝܳܢ ܐܳܦ ܡܶܢ ܒܳܬܰܪ ܡܶܬܒܰܪܢܫܳܢܽܘܬܳܐ܆ ܐܰܝܟ ܡܟܰܬܪ̈ܳܢܝܳܬܳܐ ܘܠܳܐ ܡܶܫܬܰܪ̈ܝܳܢܝܳܬܳܐ. ܐܳܦ ܐܶܢ ܗܳܠܶܝܢ ܕܰܠܬܰܚܬ. ܘܰܐܝܠܶܝܢ ܕܡܶܛܽܠ ܡܕܰܒܪܳܢܽܘܬܳܐ ܕܒܰܒܣܰܪ܆ ܘܗܽܘܦܳܟܶܗ ܕܥܰܠ ‌ܐܰܪܥܳܐ ܕܥܰܡ ܒ̈ܢܰܝ ܐ̱ܢܳܫܳܐ܆ ܗܳܠܶܝܢ ܕܺܐܝܬܰܝܗܽܘܢ ܗ̱ܘܰܘ ܛܽܘܦܣܗܽܘܢ ܟ̈ܶܬܳܢܶܐ܆ ܐܶܫܬܪܺܝ ܐܰܝܟ ܕܡܶܫܟܚܳܐ ܘܶܐܬܓܫܶܫ.

ܟܰܕ ܗܳܠܶܝܢ ܚܙܰܘ ܗܳܠܶܝܢ ܕܒܶܝܬ ܦܶܛܪܽܘܤ ܗܰܝܡܶܢܘ. ܠܰܘ ܫܚܺܝܡܳܐܺܝܬ ܒܰܠܚܽܘܕ܆ ܐܶܠܳܐ ܟܰܕ ܒܗܰܘܢܳܐ ܡܥܰܠܝܳܐ ܘܰܫܠܺܝܚܳܝܳܐ ܚܙܰܘ. ܡܶܛܽܠ ܕܗܳܟܰܢܳܐ ܡܠܶܐ ܗ̱ܘܳܐ ܗܽܘ ܩܰܒܪܳܐ ܢܽܘܗܪܳܐ܆ ܐܰܝܟܰܢܳܐ ܕܟܰܕ ܠܶܠܝܳܐ ܥܕܰܟܺܝܠ ‌ܐܺܝܬܰܘܗ̱ܝ ܗ̱ܘܳܐ܆ ܥܦܺܝܦܳܐܺܝܬ ܢܶܚܙܽܘܢ ܠܗܳܠܶܝܢ ܕܰܠܓܰܘ܆ ܘܡܶܬܪܰܓܫܳܢܳܐܺܝܬ ܘܪܽܘܚܳܢܳܐܺܝܬ܆ ܐܶܢ ܓܶܝܪ ܢܽܘܗܪܳܐ ܠܙܰܕܺܝ̈ܩܶܐ ܐܰܝܟ ܕܰܟܬܺܝܒ ܒܟܽܠܙܒܰܢ ܐܺܝܬܰܘܗ̱ܝ܆ ܟܡܳܐ ܝܰܬܺܝܪܳܐܺܝܬ ܠܰܐܠܳܗܗܽܘܢ ܕܙܰܕܺܝ̈ܩܶܐ. ܠܳܐ ܗܰܝܡܶܢܘ ܕܶܝܢ ܐܶܡܰܪ. ܡܶܛܽܠ ܕܠܳܐ ܝܳܕܥܺܝܢ ܗ̱ܘܰܘ ܠܶܗ ܠܰܟܬܳܒܳܐ ܕܳܐܡܰܪ: ܕܙܳܕܶܩ ܠܶܗ ܠܰܡܩܳܡ ܡܶܢ ܒܶܝܬ ܡܺܝ̈ܬܶܐ^[5]. ܘܗܳܐ ܝܳܕܥܺܝܢ ܗ̱ܘܰܘ ܒܝܰܕ ܕܦܳܪܽܘܩܰܢ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܩܰܕܶܡ ܐܶܡܰܪ ܠܗܽܘܢ ܕܩܳܐܶܡ. ܐܶܠܳܐ ܠܳܐ ܥܕܰܟܺܝܠ ܝܳܕܥܺܝܢ ܗ̱ܘܰܘ܆ ܐܰܝܟ ܐܰܝܠܶܝܢ ܕܰܡܦܳܣܺܝܢ ܡܶܢ ܟ̈ܬܳܒܶܐ܆ ܘܡܶܢ ܓܶܠܝܳܢܳܐ ܕܡܶܢ ܬܰܡܳܢ ܐܳܬܶܐ. ܗܳܢܽܘܢ ܕܠܳܐ ܕܶܝܢ ܡܰܨܝܳܐ ܗ̱ܘܳܬ ܕܠܳܐ ܢܶܫܬܰܪܪܽܘܢ. ܐܶܠܳܐ ܡܶܢ ܠܳܐ ܗܰܝܡܳܢܽܘܬܳܐ ܚܓܺܝܪܺܝܢ ܗ̱ܘܰܘ.

ܡܚܰܘܝܳܐ ܕܶܝܢ ܗܳܝ ܕܥܰܪܛܶܠܳܝܳܐ ܩܳܡ ܡܫܺܝܚܳܐ ܤܛܰܪ ܡܶܢ ܟ̈ܶܬܳܢܶܐ܆ ܠܽܘܩܕܰܡ ܗܳܝ ܕܠܳܐ ܡܬܽܘܡ ܬܽܘܒ ܒܰܒܣܰܪ ܡܶܬܺܝܕܰܥ܆ ܟܰܕ ܥܰܠ ܬܽܘܪܣܳܝܳܐ ܐܰܘ ܫܶܩܝܳܐ ܡܶܣܬܢܶܩ ܐܰܘ ܥܰܠ ܠܒܽܘܫܳܐ ܐܰܘ ܬܰܟܣܺܝܬܳܐ ܐ[ܦܢ ܟܕ] ܡܕܰܒܪܳܢܽܘܬܳܐ [ܡܡܰܠܶܐ] ܗ̱ܘܳܐ܆ ܠܗܳܠܶܝܢ ܨܶܒܝܳܢܳܐܺܝܬ ܫܰܥܒܶܕ ܗܽܘ ܠܶܗ. ܐܰܝܟ ܡܰܢ ܕܒܶܗ ܟܰܕ ܒܶܗ ܒܰܟܝܳܢܳܐ ܐܶܫܬܰܘܬܰܦ ܠܰܢ. ܒܳܬܰܪܟܶܢ ܕܶܝܢ ܡܰܘܕܥܳܐ܆ ܠܦܽܘܢܳܝܶܗ ܕܳܐܕܳܡ ܕܰܠܗܳܝ ܪܺܝܫܺܝܬܳܐ܆ ܟܰܕ ܥܰܪܛܶܠܳܝܳܐ ܐܺܝܬܰܘܗ̱ܝ ܗ̱ܘܳܐ ܒܦܰܪܕܰܝܣܳܐ ܘܠܳܐ ܒܳܗܶܬ ܗ̱ܘܳܐ. ܡܶܟܺܝܠ ܓܶܝܪ ܐܰܝܟ ܐܰ‌ܠܳܗܳܐ ܐܳܦ ܐܶܢ ܡܒܰܣܰܪ ܒܫܽܘܒܚܳܐ ܦܐܶܐ ܠܰܐܠܳܗܳܐ ܡܥܰܛܰܦ ܗ̱ܘܳܐ. ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܗܰܘ ܕܶܐܬܟܰܣܺܝ ܢܽܘܗܪܳܐ ܐܰܝܟ ܡܰܪܛܽܘܛܳܐ^[6]܆ ܐܰܝܟ ܕܶܐܡܰܪ ܕܰܘܺܝܕ ܢܒܺܝܳܐ.

ܐܶܠܳܐ ܗܽܘ ܡܰܢ ܦܶܛܪܽܘܤ ܘܝܽܘܚܰܢܳܢ܆ ܟܰܕ ܐܶܫܬܰܪܰܪܘ ܡܶܢ ܐܰܝܠܶܝܢ ܕܶܐܬܚ̈ܙܺܝ ܡܫܰܢܶܝܢ ܗ̱ܘܰܘ ܠܒܰܝܬܳܐ܆ ܠܡܰܪܝܰܡ ܕܶܝܢ ܐܶܡܰܪܘ ܘܠܳܐ ܡܶܕܶܡ. ܡܦܰܪܢܶܤ ܗ̱ܘܳܐ ܓܶܝܪ ܗܰܘ ܚܰܟܺܝܡܳܐ ܒܰܠܚܽܘܕܰܘܗ̱ܝ܆ ܕܰܐܝܟ ܠܰܐܝ̇ܕܳܐ ܕܠܳܐ ܗܰܝܡܢܰܬ܆ ܕܡܶܢ ܚܙܳܬܳܐ ܢܩܰܪܒܺܝܗ̇ ܝܰܬܺܝܪܳܐܺܝܬ. ܐܰܘ ܓܶܝܪ ܡܶܢ ܫܶܡܥܳܐ. ܩܳܝܡܳܐ ܗ̱ܘܳܬ ܗܳܟܺܝܠ ܠܘܳܬ ܩܰܒܪܳܐ܆ ܘܺܐܝܬܶܝܗ̇ ܠܒܰܪ. ܘܰܐܕܺܝܩܰܬ ܘܰܚܙܳܬ ܬܪܶܝܢ ܡܰܠܰܐܟ̈ܶܐ܆ ܕܡܰܚܘܪܺܝܢ ܒܶܐܤ̈ܛܠܶܐ ܘܡܰܙܗܪܺܝܢ. ܕܝܳܬܒܺܝܢ ܚܰܕ ܡܶܢ ܐܶܣܴ̈ܕܶܐ. ܘܚܰܕ ܡܶܢ ܪ̈ܶܓܠܶܐ܆ ܐܰܝܟܳܐ ܕܣܺܝܡ ܗ̱ܘܳܐ ܦܰܓܪܳܐ ܕܝܶܫܽܘܥ^[7]. ܘܟܰܕ ܙܳܕܶܩ ܗ̱ܘܳܐ ܕܠܶܐܒܠܳܐ ܠܚܰܕܽܘܬܳܐ ܬܫܰܚܠܦܺܝܘܗ̱ܝ܆ ܡܶܢ ܒܶܟܝܳܐ ܠܳܐ ܫܶܠܝܰܬ̣. ܐܰܝܟܰܢܳܐ ܕܡܰܠܰܐܟ̈ܶܐ ܐܰܝܟ ܕܒܰܟܐܳܬܳܐ ܢܺܐܡܪܽܘܢ ܐܰܢ̱ܬܬܳܐ ܡܳܢܳܐ ܒܳܟܝܳܐ ܐܰܢ̱ܬܝ^[8]. ܐܰܝܟ ܗܳܝ ܕܢܺܐܡܪܽܘܢ ܗ̱ܘܰܘ. ܐ̱ܢܳܫܳܝ̈ܳܬܳܐ ܐܺܝܬܰܝܗܶܝܢ ܕܶܡ̈ܥܶܐ ܗܳܠܶܝܢ܆ ܘܠܰܘ ܕܗܰܘܢܳܐ ܚܰܟܺܝܡܳܐ܆ ܐܰܝܟܳܐ ܓܶܝܪ ܐܺܝܬ ܐܰܬܪܳܐ. ܕܡܶܢ ܒܳܬܰܪ ܚܙܳܬܳܐ ܕܰܐܝܟ ܗܳܕܶܐ ܠܡܶܬܐܰܒܳܠܽܘ. ܘܗܺܝ ܟܰܕ ܒܗܳܝ ܕܺܝܠܳܗ̇܆ ܗܰܘ ܒܠܳܐ ܗܰܝܡܳܢܽܘܬܳܐ ܐܰܚܺܝܕܳܐ܆ ܡܶܬܡܬܰܚ ܗ̱ܘܳܐ ܓܶܝܪ ܗܽܘ ܚܰܫܳܐ܆ ܡܶܛܽܘܠ ܕܒܰܐܝܠܶܝܢ ܕܰܒܩܰܠܺܝܠ ܩܰܠܺܝܠ ܡܶܬܬܰܘܣ̈ܦܳܢ ܗ̱ܘܰܝ̈ ܠܰܡܗܰܝܡܳܢܽܘ܆ ܡܶܢ ܠܳܐ ܗܰܝܡܳܢܽܘܬܳܐ ܕܶܝܢ ܡܫܰܡܠܝܳܐܺܝܬ ܬܶܬܚܰܪܰܪ. ܐܶܡܪܰܬ ܠܘܳܬܗܽܘܢ ܕܫܰܩܠܽܘܗ̱ܝ ܠܡܳܪܳܐ ܕܺܝܠܝ܆ ܘܠܳܐ ܝܳܕܥܐ ܐ̱ܢܳܐ ܐܰܝܟܳܐ ܣܳܡܽܘܗܝ܆ ܘܟܰܕ ܗܳܠܶܝܢ ܐܶܡܪܰܬ܆ ܐܶܬܦܰܢܝܰܬ ܠܒܶܣܬܪܳܗ̇. ܘܰܚܙܳܬܶܗ ܠܝܶܫܽܘܥ ܕܩܳܐܶܡ. ܘܠܳܐ ܝܶܕܥܰܬ ܕܝܶܫܽܘܥ ܐܺܝܬܰܘܗ̱ܝ^[9]. ܚܕܳܐ ܡܰܢ. ܕܡܶܢ ܕܶܡ̈ܥܶܐ ܓܗܺܝܪܳܐ ܗ̱ܘܳܬ ܘܒܰܕܡܽܘܬ ܥܰܪܦܶܠܳܐ ܛܥܺܝܢܳܐ ܗ̱ܘܳܬ ܝܽܘܩܪܳܐ. ܐ̱ܚܪܺܬܳܐ ܕܶܝܢ ܕܳܐܦ ܗܽܘ ܝܶܫܽܘܥ ܕܫܳܥܬܳܐ ܡܦܰܪܢܶܤ ܗ̱ܘܳܐ܆ ܗܳܝ ܕܠܳܐ ܢܶܬܺܝܕܰܥ ܠܶܗ. ܡܶܛܽܠ ܗܳܕܶܐ ܘܳܐܦ ܐܶܡܰܪ. ܐܰܢ̱ܬܬܳܐ ܠܡܳܢܳܐ ܒܳܟܝܳܐ ܐܰܢ̱ܬܝ ܘܰܠܡܰܢܽܘ ܒܳܥܝܳܐ ܐܰܢ̱ܬܝ ܗܳܝ ܕܶܝܢ ܟܰܕ ܡܰܣܒܪܳܐ ܕܓܰܢܳܢܳܐ ܐܺܝܬܰܘܗ̱ܝ ܐܳܡܪܳܐ ܠܶܗ. ܡܳܪܝ ܐܶܢ ܐܰܢ̱ܬ ܐܰܪܺܝܡܬܳܝܗ̱ܝ ܐܶܡܰܪ ܠܺܝ ܐܰܝܟܳܐ ܣܳܡܬܳܝܗ̱ܝ ܘܶܐܢܳܐ ܫܳܩܠܳܐ ܐ̱ܢܳܐ ܠܶܗ^[10]. ܟܒܰܪ ܕܶܝܢ ܠܰܘ ܠܒܰܪ ܡܶܢ ܗܳܝ ܕܦܰܐܝܳܐ܆ ܓܰܢܳܢܳܐ ܐܰܣܒܪܰܬ ܕܺܐܝܬܰܘܗ̱ܝ ܝܶܫܽܘܥ. ܒܰܫܪܳܪܳܐ ܓܶܝܪ܆ ܗܽܘ ܐܺܝܬܰܘܗ̱ܝ ܗ̱ܘܳܐ ܢܳܨܽܘܒܶܗ ܕܦܰܪܕܰܝܣܳܐ. ܗܰܘ ܠܳܐ ܡܳܝܽܘܬܳܐ ܘܫܰܪܺܝܪܳܐ܆ ܕܰܒܓܰܢܬܳܐ ܕܩܰܒܪܳܐ ܐܰܝܟ ܕܰܒܦܰܪܕܰܝܣܳܐ ܡܬܰܪܶܨ ܗ̱ܘܳܐ ܠܰܐܢ̱ܬܬܳܐ܆ ܗܳܝ ܕܡܶܢ ܠܳܐ ܗܰܝܡܳܢܽܘܬܳܗ̇܆ ܠܳܐܕܳܡ ܓܰܢܳܢܳܐ ܐܰܛܥܝܰܬ. ܗܳܟܰܢܳܐ ܐܺܝܬܰܝܗܶܝܢ ܗ̱ܘܰܝ̈ ܟܽܠܗܶܝܢ ܐ̱ܪ̈ܳܙܴܢܳܝܳܬܳܐ܆ ܘܰܕܡܰܠ̈ܝܳܢ ܡܶܢ ܡ̈ܶܠܶܐ ܐܰ‌ܠܳܗܳܝ̈ܳܬܳܐ ܘܪ̈ܳܡܳܬܳܐ.

ܐܶܠܳܐ ܟܰܕ ܗܳܠܶܝܢ ܐܶܡܪܰܬ ܡܰܪܝܰܡ ܘܰܠܘܳܬ ܥܽܘܩܳܒܶܗ ܕܦܰܓܪܳܐ ܠܗܺܝܩܳܐ ܗ̱ܘܳܬ܆ ܘܗܶܦܟܰܬ ܐܰܝܟ ܕܰܠܡܺܐܙܰܠ܆ ܟܰܕ ܚܙܳܗ̇ ܕܣܰܦܺܝܩܳܐܺܝܬ ܐܶܬܪܰܕܝܰܬ܆ ܡܶܠܬܳܐ ܗܰܘ ܕܡܶܬܡܰܛܶܐ ܥܕܰܡܳܐ ܠܦܽܘܠܳܓܳܐ ܕܢܰܦܫܳܐ ܘܰܕܪܽܘܚܳܐ܆ ܘܰܕܫܳܪ̈ܝܳܬܳܐ ܘܰܕܡܽܘܚܳܐ܆ ܘܺܐܝܬܰܘܗ̱ܝ ܕܰܝܳܢܳܐ ܕܡܰܪ̈ܢܝܳܬܳܐ ܘܰܕܡܰܚ̈ܫܒܳܬܳܐ ܕܠܶܒܳܐ܆ ܒܩܳܠܐ ܚܰܕ ܦܰܣܩܳܗ̇ ܠܠܳܐ ܗܰܝܡܳܢܽܘܬܳܗ̇܆ ܘܰܠܣܽܘܟܳܠܳܗ̇ ܕܰܐܢ̱ܬܬܳܐ ܩܰܛܶܢ ܐܰܝܟ ܕܰܠܫܽܘܘܕܳܥܳܐ ܟܰܕ ܐܳܡܰܪ ܒܰܠܚܽܘܕ܆ ܐܰܝܟ ܕܗܽܘ ܝܳܕܰܥ ܗ̱ܘܳܐ ܡܰܗܦܟܴܢܳܐܺܝܬ. ܡܰܪܝܡ. ܘܪܰܒܽܘܢܺܝ ܩܪܳܬܶܗ ܗܰܘ ܕܡܶܬܶܐܡܰܪ ܡܰܠܦܳܢܳܐ ܘܰܠܪ̈ܶܓܠܶܐ ܗܳܠܶܝܢ ܩܰܕܺܝ̈ܫܳܬܳܐ ܒܳܥܝܳܐ ܗ̱ܘܳܬ ܕܬܶܐܚܽܘܕ ܘܫܶܡܥܰܬ ܕܠܳܐ ܬܶܬܩܰܪܒܺܝܢ ܠܺܝ. ܠܳܐ ܓܶܝܪ ܥܕܰܟܺܝܠ ܣܶܠܩܶܬ ܠܘܳܬ ܐܳܒܝ.^[11] ܒܳܬܰܪ ܠܰܡ ܓܶܝܪ ܕܰܠܗܳܕܶܐ ܛܰܝܒܽܘܬܳܐ ܡܶܢ ܟܰܕܽܘ ܐܶܫܬܘܺܝܬܝ̱܆ ܘܰܩܪܶܒܬܝ̱ ܠܺܝ ܥܰܡ ܗܳܝ ܡܰܪܝܰܡ ܐ̱ܚܪܺܬܳܐ܆ ܘܰܣܓܶܕܬܝ̱ ܘܪ̈ܶܓܠܰܝ ܠܒܰܟܬܝ̱܆ ܐܰܒܣܺܝܬ ܐܰܝܟܰܢܳܐ ܕܳܐܦ ܠܳܐ ܬܗܰܝܡܢܺܝܢ. ܘܳܐܦ ܠܳܐ ܡܶܕܶܡ ܕܪܰܒ ܐܶܬܪܰܥܺܝܬ̊ܝ̱ ܡܶܛܽܘܠܳܬܝ܆ ܐܶܠܳܐ ܥܕܰܟܺܝܠ ܠܰܐܦ̈ܰܝ ܩܰܒܪܳܐ ܒܳܟܝܳܐ ܐܰܢ̱ܬܝ ܠܗܰܘ ܕܰܥܕܰܟܺܝܠ ‌ܐܰ‌ܠܳܗܳܐܺܝܬ ܠܘܳܬ ܐܰܒܳܐ ܐܺܝܬܰܘܗ̱ܝ܆ ܗܳܫܳܐ ܠܳܐ ܬܶܬܩܰܪܒܺܝܢ ܠܺܝ܆ ܐܶܢ ܒܳܗ̇ ܟܰܕ ܒܳܗ̇ ܒܬܰܪܥܺܝܬܳܐ܆ ܗܳܝ ܕܰܠܘܳܬ ܐܰܒܳܐ ܐܶ݀ܣܰܩ ܒܰܒܣܰܪ܆ ܣܳܒܪܳܐ ܐܰܢ̱ܬܝ ܕܚܰܣܺܝܪܳܐ ܠܺܝ. ܠܳܐ ܓܶܝܪ ܐܺܝܬܰܝ ܐܰܝܟ ܕܡܶܢ ܨܶܐܕܰܝܟܝ ܠܘܳܬ ܐܳܒܝ. ܙܶܠܝ ܠܘܳܬ ܐܰܚܰܝ̈ ܘܶܐܡܰܪܝ ܠܗܽܘܢ ܣܳܠܶܩ ܐ̱ܢܳܐ ܠܘܳܬ ܐܳܒܝ ܘܰܐܒܽܘܟܽܘܢ. ܘܰܐ‌ܠܳܗܝ ܘܰܐ‌ܠܳܗܟܽܘܢ. ܡܶܛܽܠ ܠܰܡ ܓܶܝܪ ܕܰܗܘܺܝܬ ܒܰܒܣܰܪ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ܆ ܠܰܘ ܠܺܝ ܗܳܫܳܐ܆ ܐܶܠܳܐ ܠܟܽܘܢ ܠܰܐܚܰܝ̈ ܦܰܓܪܳܢܳܐܺܝܬ܆ ܣܳܠܶܩ ܐ̱ܢܳܐ ܠܘܳܬ ܐܳܒܝ ܘܰܐܒܽܘܟܽܘܢ܆ ܘܰܐ‌ܠܳܗܝ ܘܰܐ‌ܠܳܗܟܽܘܢ. ܐܶ‌ܠܽܘ ܠܳܐ ܓܶܝܪ ܕܕܺܝܠܝ ܐܰ‌ܠܳܗܳܐ ܐܶ݀ܫܬܰܡܰܗ܆ ܟܰܕ ܒܺܝ ܗܳܝ ܕܠܳܐ ܡܽܘܡ ܕܰܟܝܳܢܳܐ ܐ̱ܢܳܫܳܝܳܐ܆ ܡܶܛܽܠ ܕܠܳܐ ܝܳܕܰܥ ܐ̱ܢܳܐ ܚܛܺܝܬܳܐ܆ ܐܰܝܟ ܕܰܒܪܺܝܫܺܝܬܳܐ ܕܰܟܝܳܢܳܐ ܚܙܶܐ܆ ܠܰܘ ܕܺܝܠܟܽܘܢ ܡܶܬܩܪܶܐ ܗ̱ܘܳܐ ܐܰ‌ܠܳܗܳܐ ܐܰܘ ܐܰܒܳܐ܆ ܕܗܳܢܽܘܢ ܕܺܐܝܬܰܝܗܽܘܢ ܡܢܰܟܪ̈ܰܝܳܐ ܡܶܢܶܗ. ܡܶܛܽܠܗܳܕܶܐ ܘܐܦ ܦܰܘܠܽܘܤ ܟܰܕ ܡܶܛܽܠܗܳܕܶܐ ܠܥܶܒܪ̈ܳܝܶܐ ܟܳܬܶܒ ܐܳܡܰܪ ܗ̱ܘܳܐ܆ ܠܰܘ ܓܶܝܪ ܠܒܶܝܬ ܩܽܘܕܫ̈ܶܐ ܕܰܥܒܺܝܕ ܒܺܐܝ̈ܕܰܝܳܐ ܥ̣ܰܠ ܡܫܺܝܚܳܐ܆ ܛܽܘܦܣܳܐ ܕܗܳܢܽܘܢ ܫܰܪܺܝܪ̈ܶܐ. ܐܶܠܳܐ ܠܳܗ̇ ܠܰܫܡܰܝܳܐ ܥ̣ܰܠ ܗܳܫܳܐ܆ ܕܢܶܬܚܙܶܐ ܠܦܰܪܨܽܘܦܶܗ ܕܰܐ‌ܠܳܗܳܐ ܕܢܶܬܚܙܶܐ ܚܠܳܦܰܝܢ.

ܐܶܬ̣ܳܬ̣ ܗܳܟܺܝܠ ܡܰܪܝܰܡ ܗܳܝ ܡܰܓܕܠܳܝܬܳܐ܆ ܘܶܐܫܬܰܥܝܰܬ ܠܬܰܠ̈ܡܺܝܕܶܐ ܕܰܚܙܳܬܶܗ ܠܡܳܪܰܢ. ܘܰܕܗܳܠܶܝܢ ܐܶܡܰܪ ܠܳܗ̇. ܟܰܕ ܕܶܝܢ ܐܶܙܰܠ̱ܬ̣ ܘܶܐܡܪܰܬ ܠܗܽܘܢ. ܬܽܘܒ ܐܶܫܟܚܰܬ ܠܡܰܪܝܰܡ ܗܳܝ ܕܝܰܥܩܽܘܒ܆ ܘܰܠܝܽܘܚܰܢ ܘܠܰܐܚܪ̈ܳܢܝܳܬܳܐ ܥܰܡܗܶܝܢ^[12]܆ ܕܥܰܡ ܥܽܘܬܳܕܳܐ ܕܗܶܪ̈ܽܘܡܶܐ ܘܒܶܣ̈ܡܶܐ܆ ܠܘܳܬ ܩܰܒܪܳܐ ܡܣܰܪ̈ܗܒܳܢ ܗ̱ܘܰܝ̈ ܠܡܺܐܙܰܠ܆ ܟܰܕ ܚܶܫܽܘܟܳܐ ܫܰܢܺܝ܆ ܘܡܰܓܗܳܐ ܥܰܡܺܝܩܳܐ ܐܺܝܬܰܘܗ̱ܝ ܗ̱ܘܳܐ^[13]܆ ܗܳܢܰܘ ܕܶܝܢ ܚܰܬܺܝܬܳܐ܆ ܘܰܕܗܳܫܳܐ ܩܰܕܡܳܝܰܬ ܫܰܪܺܝ܆ ܐܰܝܟܰܢܳܐ ܕܳܐܦ ܠܽܘܩܳܐ ܐܶܡܰܪ. ܘܟܰܕ ܚܶܠܛܰܬ ܥܠܰܝܗܶܝܢ܆ ܥܰܡܗܶܝܢ ܐܳܙܳܠ̱ܐ ܗ̱ܘܳܬ܆ ܡܶܛܽܠ ܪܶܬܚܳܐ ܕܚܽܘܒܳܗ̇ ܕܰܠܘܳܬ ܝܶܫܽܘܥ. ܘܕܺܐܝܬܶܝܗ̇ ܗ̱ܘܳܬ ܠܗܶܝܢ ܪܺܝܫܳܐ ܡܶܣܬܰܒܪܳܐ ܗ̱ܘܳܬ܆ ܘܩܰܕܡܳܝܬܳܐ ܡܶܢ ܐܶܘܢ̈ܓܠܝܣܛܶܐ ܡܶܬܡܰܢܝܳܐ܆ ܡܶܛܽܠ ܝܺܕܺܝܥܽܘܬܳܐ ܕܡܶܢ ܗܳܪܟܳܐ. ܕܡܶܬܪܰܓܪ̈ܓܳܢ ܓܶܝܪ ܐܳܦ ܗܶܢܶܝܢ܆ ܕܠܰܘ ܡܶܢ ܐܰܝܠܶܝܢ ܕܡܶܢܳܗ̇ ܘܡܶܢ ܗܳܝ ܡܰܪܝܰܡ ܐ̱ܚܪܺܬܳܐ ܫܳܡܥܺܝܢ܆ ܐܶܠܳܐ ܡܶܢܳܗ̇ ܕܰܚܙܳܬܳܐ ܐܰܘ ܒܓܶܠܝܳܢܳܐ ܕܡܰܠܰܐܟ̈ܶܐ܆ ܢܶܫܬܰܪܪ̈ܳܢ ܠܘܳܬ ܩܝܳܡܬܳܐ. ܘܺܐܝܬܶܝܗ̇ ܗ̱ܘܳܬ ܥܰܡܗܶܝܢ܆ ܘܫܰܬܺܝܩܳܐ ܗ̱ܘܳܬ ܚܰܟܺܝܡܳܐܺܝܬ܆ ܘܠܳܐ ܐܳܡܪܳܐ ܗ̱ܘܳܬ ܠܗܶܝܢ ܡܶܕܶܡ ܟܰܕ ܡܥܰܩ̈ܒܳܢ. ܐܶܠܳܐ ܠܳܗ̇ ܠܣܳܗܕܽܘܬܳܐ ܕܣܽܘܥܪܳܢܳܐ ܡܟܰܬܪܳܐ ܗ̱ܘܳܬ܆ ܟܰܕ ܡܗܰܝܡܢܳܐ ܕܳܐܦ ܠܗܳܠܶܝܢ܆ ܒܗܶܝܢ ܒܥܰܝ̈ܢܶܐ ܡܶܬܺܝܗܶܒ ܦܝܳܣܳܐ ܝܺܕܺܝܥܳܐ. ܘܟܰܕ ܟܺܐܦܳܐ ܕܰܡܥܰܪܓܠܳܐ ܚ̈ܙܰܝܶܢ܆ ܒܓܰܘܶܗ ܕܩܰܒܪܳܐ ܗܘ̈ܰܝ. ܘܟܰܕ ܠܳܐ ܐܶܫܟܰܚ̈ܝ̱ ܠܦܰܓܪܶܗ ܕܝܶܫܽܘܥ ܡܶܬܥܰܣ̈ܩܳܢ ܗ̱ܘܰܝ̈܆ ܘܚܳܙܝ̈ܳܢ ܓܰܒܪ̈ܶܐ ܬܪܶܝܢ ܕܩܳܡܘ ܠܥܶܠ ܡܶܢܗܶܝܢ܆ ܕܡܰܒܪܩܺܝܢ ܒܶܐܤ̈ܛܠܰܝܗܽܘܢ^[14]. ܘܫܳܡ̈ܥܳܢ ܗ̱ܘܰܝ̈ ܡܶܢܗܽܘܢ: ܠܡܳܢܳܐ ܒܳܥ̈ܝܳܢ ܐܢ̱ܬܶܝܢ ܠܚܰܝܳܐ ܥܰܡ ܡܺܝ̈ܬܶܐ. ܠܰܝܬܰܘܗ̱ܝ ܗܳܪܟܳܐ ܐܶܠܳܐ ܩܳܡ ܠܶܗ^[15]. ܘܗܳܠܶܝܢ ܕܫܰܪܟܳܐ. ܘܟܰܕ ܗܦܰܟ̈ܶܝܢ ܠܰܡ ܡܶܢ ܩܰܒܪܳܐ܆ ܐܶܫܬܰܥ̈ܺܝ̱ ܗܳܠܶܝܢ ܟܽܠܗܶܝܢ ܠܰܚܕܰܥܣܰܪ܆ ܘܰܠܟܽܘܠܗܽܘܢ ܗܳܠܶܝܢ ܕܫܰܪܟܳܐ. ܐܶܠܳܐ ܐܰܝܟ ܡܰܢ ܕܣܰܓܺܝ̈ܶܐܐ ܐܺܝܬܰܝܗܽܘܢ ܗ̱ܘܰܘ܆ ܠܳܐ ܗܰܝܡܶܢܘ. ܘܰܠܗܳܝ ܕܶܐܬܐܰܡܪܰܬ܆ ܡܙܰܛܡܺܝܢ ܗ̱ܘܰܘ ܘܫܳܝܛܺܝܢ. ܡܶܬܚܰܙ̈ܝܳܢ ܗ̱ܘܰܝ̈ ܓܶܝܪ ܐܰܝܟ ܫܳܛܝܽܘܬܳܐ ܡܶܠܰܝ̈ܗܶܝܢ܆ ܘܠܳܐ ܡܗܰܝܡܢܺܝܢ ܗ̱ܘܰܘ ܠܗܶܝܢ. ܐܰܝܟܰܢܳܐ ܕܦܶܛܪܽܘܤ ܟܕ ܐܶܬܬܥܺܝܪ ܠܘܳܬ ܠܳܐ ܗܰܝܡܳܢܽܘܬܗܽܘܢ ܕܗܳܢܽܘܢ܆ ܘܰܒܨܺܝܪ ܩܰܠܺܝܠ‌ ‌ܐܳܦ ܗܽܘ ܐܶܬܪܗܶܒ ܘܶܐܙܕܰܥܙܰܥ܆ ܬܽܘܒ ܠܘܳܬ ܩܰܒܪܳܐ ܪܗܶܛ܆ ܘܰܚܙܳܐ ܬܽܘܒ ܠܟܶܬܳܢ̈ܶܐ ܕܣܺܝܡܺܝܢ ܗܳܠܶܝܢ ܕܟܰܕ ܥܰܠ܆ ܚܙܳܐ ܗ̱ܘܳܐ ܡܶܢ ܟܰܕܽܘ ܛܳܒ ܚܰܬܺܝܬ̣ܳܐܺܝܬ^[16]. ܒܰܕܓܽܘܢ ܟܰܕ ܣܶܦܩܰܬ ܠܶܗ ܗܳܝ ܕܰܐܕܺܝܩ ܒܰܠܚܽܘܕ܆ ܘܡܶܕܶܡ ܡܫܰܚܠܦܳܐ ܠܳܐ ܚܙܳܐ܆ ܐܶܙܰܠ ܟܰܕ ܡܶܬܕܰܡܰܪ ܘܬܰܡܺܝܗ ܒܗܳܝ ܕܰܗܘ̣ܳܬ. ܘܰܡܫܰܒܰܚ ܠܗܰܘ ܕܗܳܠܶܝܢ ܦܰܪܢܶܤ.

ܘܬܽܘܒ ܗܳܝ ܡܰܪܝܰܡ ܡܰܓܕܠܳܝܬܳܐ܆ ܐܰܝܟܰܢܳܐ ܕܥܰܡ ܗܳܠܶܝܢ ܕܒܶܝܬ ܝܽܘܚܰܢ܆ ܒܨܰܦܪܳܐ ܥܰܡܺܝܩܳܐ ܐܶܙܰܠ̱ܬ̣܆ ܟܰܕ ܛܥܺܝ̈ܢܳܢ ܗ̱ܘܰܝ̈ ܒܶܣ̈ܡܶܐ܆ ܘܗܶܪ̈ܽܘܡܶܐ ܗܳܠܶܝܢ ܕܛܰܝܶܒ̈ܝ̱ ܗ̱ܘܰܝ̈ ܩܕܳܡ ܫܰܒܬܳܐ܆ ܒܶܗ ܟܰܕ ܒܶܗ ܒܰܙܢܳܐ܆ ܘܥܰܡ ܫܳܠܽܘܡ ܐܰܢ̱ܬܬܳܐ ܐܰܟܣܢܳܝܬܳܐ܆ ܠܒܰܪ ܡܶܢ ܗܳܠܶܝܢ ܕܶܐܫܬܰܡܰܗ܆ ܕܰܡܫܰܘܚܕܳܐܺܝܬ^[17] ܡܰܢ܆ ܙܶܒܢܰܬ ܕܶܝܢ ܒܪܰܡ ܗܶܪ̈ܽܘܡܶܐ ܐ̱ܚܪ̈ܳܢܶܐ ܡܶܢ ܒܳܬܰܪ ܫܰܒܬܳܐ܆ ܕܠܳܐ ܡܰܐܺܝܢܽܘܬܳܐ ܒܳܗ̇ ܟܰܕ ܒܳܗ̇ ܒܬܰܪܥܺܝܬܳܐ ܪܳܗܛܳܐ ܗ̱ܘܳܬ܆ ܟܰܕ ܕܶܒܪܰܬ ܥܰܡܳܗ̇ ܘܰܠܡܰܪܝܰܡ ܗܳܝ ܕܝܰܥܩܽܘܒ܆ ܐܰܝܟܰܢܳܐ ܕܬܶܣܬܒܰܪ ܕܶܐܫܬܰܘܬܦܰܬ ܐܳܦ ܒܳܗ̇ ܒܰܙܒܺܝܢܬܳܐ ܕܗܶܪ̈ܽܘܡܶܐ. ܐܰܝܟ ܕܶܐܫܬܰܘܬܰܦ̈ܶܝܢ ܓܶܝܪ ܒܽܐܘܪܚܳܐ܆ ܟܽܠܳܗ̇ ܝܰܨܺܝܦܽܘܬܳܐ ܓܰܘܳܢܳܝܬܳܐ ܥܒܰܕܢܳܗ̇. ܘܰܒܨܰܦܪܳܐ ܕܚܰܕܒܫܰܒܳܐ܆ ܐܶܬܰܝ̈ ܠܘܳܬ ܩܰܒܪܳܐ ܬܽܘܒ܆ ܗܳܝ ܓܶܝܪ ܕܬܽܘܒ܆ ܒܰܨܚܳܚ̈ܶܐ ܐܰܝܠܶܝܢ ܕܛܳܒ ܚܰܬܺܝܬ̣ܺܝܢ ܣܺܝܡܳܐ. ܘܡܰܘܕܥܳܐ ܕܰܐܝܟ ܕܥܰܡ ܗܳܠܶܝܢ ܕܡܶܢ ܟܰܕܽܘ. ܐܳܦ ܗܺܝ ܡܶܐܙܰܠܬܗܶܝܢ ܕܢܶܫ̈ܶܐ ܕܰܠܩܰܒܪܳܐ ܗܘ̣ܳܬ. ܗܳܝ ܕܶܝܢ ܕܰܒܨܰܦܪܳܐ܆ ܛܳܒ ܡܢܰܗܰܪ ܡܰܪܩܽܘܤ. ܒܗܳܝ ܕܡܰܘܣܶܦ ܕܰܣܠܶܩ ܫܶܡܫܳܐ܆ ܘܳܐܡܪ̈ܳܢ ܗ̱ܘܰܝ̈ ܠܰܡ ܠܘܳܬ ܢܰܦܫܗܶܝܢ܆ ܡܰܢܽܘ ܢܥܰܪܓܶܠ ܠܰܢ ܟܺܐܦܳܐ ܡܶܢ ܬܰܪܥܶܗ ܕܩܰܒܪܳܐ. ܘܟܰܕ ܚܳܪ̈ܝ̱ ܚ̈ܙܰܝ̈ܶܢ ܠܳܗ̇ ܠܟܺܐܦܳܐ ܕܰܡܥܰܪܓܠܳܐ. ܐܺܝܬܶܝܗ̇ ܗ̱ܘܳܬ ܓܶܝܪ ܪܰܒܬܳܐ ܕܛܳܒ. ܟܰܕ ܕܶܝܢ ܗܺܝ ܫܳܠܽܘܡ ܐܳ‌ܠܨܳܐܺܝܬ ܪܗܺܝܒܳܐ ܗ̱ܘܳܬ܆ ܐܰܝܟ ܡܰܢ ܕܰܥܕܰܟܺܝܠ ܠܳܐ ܐܶܙܰܠ̱ܬ̣ ܠܘܳܬ ܩܰܒܪܳܐ܆ ܘܰܥܠܰܝܗܶܝܢ ܕܗܳܠܶܝܢ ܕܰܩܝܳܡܬܳܐ ܠܰܐܝܠܶܝܢ ܕܰܡܗܰܠ̈ܟܳܢ ܗ̱ܘܰܝ̈ ܥܰܡܳܗ̇ ܡܫܰܐܠܳܐ ܗ̱ܘܳܬ. ܗܳܠܶܝܢ ܒܫܶܬܩܳܐ ܐܺܝܬܰܝܗܶܝܢ ܗ̱ܘܰܝ̈. ܒܢܺܝܫܳܐ ܗܰܘ ܕܰܐܡܺܝܪ ܡܶܢ ܠܥܶܠ. ܘܟܰܕ ܐܰܪ̈ܺܝܡܝ̱ ܥܰܝ̈ܢܰܝܗܶܝܢ܆ ܒܚܶܘܳܪ̈ܶܐ ܠܚ̈ܰܙܳܝܶܐ ܕܺܝܠܗܶܝܢ ܡܰܠ̣ܶܠ̈ܝ. ܗܺܝ ܕܶܝܢ ܟܺܐܦܳܐ ܕܰܡܥܰܪܓܠܳܐ܆ ܡܶܬܚܰܙܝܳܐ ܗ̱ܘܳܬ ܩܕܳܡ ܥܰܝ̈ܢܶܐ. ܡܶܛܽܠ ܕܶܝܢ ܡܰܪܕܺܝܬܳܐ ܕܽܐܘܪܚܳܐ ܗܳܝ ܚܕܳܐ ܘܓܰܘܳܢܳܝܬܳܐ ܕܗܳܠܶܝܢ ܟܬܺܝܒ ܕܰܠܘܳܬ ܚ̈ܕܳܕܶܐ ܡܶܬܥܰܣ̈ܩܳܢ ܗ̱ܘܰܝ̈ ܘܰܡܡ̈ܰܠܠܳܢ. ܡܳܕܶܝܢ܆ ܟܰܕ ܠܘܳܬ ܫܪܳܪܳܗ̇ ܕܬܰܫܥܺܝܬܳܐ ܘܰܟܝܳܢܳܐ ܕܺܝܠܗܽܘܢ ܕܣܽܘܥܪ̈ܳܢܶܐ ܚܢܰܢ ܚܳܝܪܺܝܢܰܢ܆ ܡܦܰܪܫܺܝܢܰܢ ܕܰܐܝ̇ܕܳܐ ܡܶܢܗܶܝܢ ܐܺܝܬܶܝܗ̇ ܗ̱ܘܳܬ ܗܳܝ ܕܶܐܬܥܰܣܩܰܬ܆ ܕܗܳܠܶܝܢ ܓܶܝܪ ܕܡܶܢ ܟܰܕܽܘ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܕܰܡܥܰܪܓܠܳܐ ܚ̈ܙܰܝܳܗ̇ ܠܟܺܐܦܳܐ܆ ܡܶܛܽܠܗܳܕܶܐ ܢܺܐܨܦ̈ܳܢ ܗ̱ܘܰܝ̈܆ ܕܠܳܐ ܦܝܳܣܳܐ ܐܺܝܬܶܝܗ̇ ܗ̱ܘܳܬ. ܐܶܠܳܐ ܡܶܛܽܘܠ ܕܥܰܡ ܢܶܫ̈ܶܐ ܗܳܠܶܝܢ ܕܰܒܡܰܪܩܽܘܤ܆ ܗܳܝ ܕܛܰܥܝܳܐ ܗ̱ܘܳܬ ܥܰܠ ܦܰܪܨܽܘܦܳܗ̇ ܕܫܳܠܽܘܡ ܣܳܐܶܡ܆ ܕܠܳܐ ܚܶܪܝܳܢܳܐ ܐܺܝܬ ܠܳܗ̇ ܠܡܶܠܬܳܐ ܦܝܳܣܳܐ. ܕܳܐܦ ܡܶܛܽܠ ܗܳܝ ܐ̱ܚܪܺܬܳܐ܆ ܠܳܗ̇ ܢܳܩܦܳܐ ܗ̱ܘܳܬ ܠܡܺܐܡܰܪ. ܕܡܰܢܽܘ ܢܥܰܪܓܶܠ ܠܰܢ ܟܺܐܦܳܐ܆ ܟܰܕ ܝܽܗ̱̈ܘܕܳܝܶܐ ܛܒ̣ܰܥܘ ܡܰܥܰܠܬܶܗ ܕܩܰܒܪܳܐ ܘܰܢܛܽܘܪ̈ܳܬܳܐ ܕܶܐܤܛܪ̈ܰܛܺܝܽܘܛܶܐ ܣܳܡܘ. ܟܰܕ ܓܶܝܪ ܥܒܰܪ ܝܰܘܡܳܐ ܕܰܥܪܽܘܒܬܳܐ܆ ܠܘܳܬ ܦܺܝܠܰܛܽܘܤ ܐܶܡܰܪܘ ܗܳܢܽܘܢ ܛܰܢ̈ܦܶܐ܆ ܐܶܬܥܗܕܢܰܢ ܠܗܰܘ ܡܰܛܥܝܳܢܳܐ ܕܳܐܡܰܪ ܟܰܕ ܥܕܰܟܺܝܠ ܚܰܝ܆ ܕܒܳܬܰܪ ܬܠܳܬܳܐ ܝܰܘ̈ܡܳܬܳܐ ܩܳܐܶܡ ܐ̱ܢܳܐ^[18]. ܐܶܢ ܗܳܟܺܝܠ ܝܳܕܥܴ̈ܢ ܗ̱ܘܰܝ̈ ܢܶܫ̈ܶܐ ܬܶܕܡܽܘܪܬܳܐ ܗܳܝ ܕܰܗܘܳܬ ܒܝܰܕ ܡܰܠܰܐܟ̈ܶܐ܆ ܘܫܽܘܢܳܝܳܗ̇ ܕܟܺܐܦܳܐ ܘܡܺܝܬܽܘܬܗܽܘܢ ܕܢܳܛܽܘܪ̈ܶܐ܆ ܘܫܽܘܢܳܝܗܽܘܢ ܕܡܶܢ ܕܶܚܠܳܐ܆ ܐܰܝܟܰܢܳܐ ܡܶܬܥܰܣ̈ܩܳܢ ܗ̱ܘܰܝ̈ ܡܶܛܽܠ ܗܳܝ ܕܬܶܬܥܰܪܓܰܠ ܟܺܐܦܳܐ. ܐܶܢ ܕܶܝܢ ܛܰܥܝܳܐ ܗ̱ܘܳܬ ܠܗܶܝܢ ܬܶܕܡܽܘܪܬܳܐ ܠܡܰܛܰܪܬܳܐ ܗܳܕܶܐ ܕܪ̈ܽܗ̱ܘܡܳܝܶܐ ܙܳܕܶܩ ܗ̱ܘܳܐ ܕܢܶܬܪ̈ܰܢܝܳܢ܆ ܘܠܳܐ ܢܶܬܦܰܠ̈ܓܳܢ ܒܰܦܬܳܚܶܗ ܕܩܰܒܪܳܐ. ܐܶܠܳܐ ܐܰܝܟ ܕܶܐܡܪܶܬ܆ ܠܫܳܠܽܘܡ ܐܳܦ ܗܳܕܐ ܛܰܥܝܳܐ ܗ̱ܘܳܬ܆ ܘܕܺܝܠܳܗ̇ ܠܚܽܘܕܶܝܗ̇ ܐܺܝܬܰܝܗܶܝܢ ܗ̱ܘܰܝ̈ ܡ̈ܶܠܶܐ. ܡܰܪܝܰܡ ܕܶܝܢ ܡܰܓܕܠܳܝܬܳܐ܆ ܘܡܰܪܝܰܡ ܗܳܝ ܐ̱ܚܪܺܬܳܐ܆ ܝܳܬܒ̈ܳܢ ܗ̱ܘܰܝ̈ ܠܰܡ ܠܩܽܘܒܠܶܗ ܕܩܰܒܪܳܐ ܐܰܝܟ ܕܡܰܬܰܝ ܐܰܟܬܶܒ^[19]܆ ܘܰܒܪܶܚܡܰܬ ܥܰܡܠܳܐ ܐܺܝܬܰܝܗܶܝܢ ܗ̱ܘܰܝ̈ ܬܰܡܳܢ. ܘܰܠܛܰܒ̈ܥܶܐ ܕܺܝܗ̈ܽܘܕܳܝܶܐ ܘܠܰܢܛܽܘܪܬܳܐ ܕܰܡܙܰܝ̈ܢܶܐ܆ ܒܰܚܙܳܬܳܐ ܩܒ݀ܠ. ܟܰܕ ܥܶܠܰܬ ܕܶܝܢ ܫܳܠܽܘܡ ܥܰܡ ܬܰܪ̈ܬܰܝܗܶܝܢ ܡܰܪܝܰܡ܆ ܥܠܰܝܡܳܐ ܚܰܕ ܕܝܳܬܶܒ ܡܶܢ ܝܰܡܺܝܢܳܐ܆ ܘܰܡܥܰܛܰܦ ܐܶܤܛܠܳܐ ܚܶܘܳܪܬܳܐ ܚܙܳܬ̣. ܘܶܐܬܬܙܺܝ̈ܥܝ̱ ܟܽܠܗܶܝܢ. ܗܳܝ ܡܰܢ܆ ܐܰܝܟ ܐܰܝ̇ܕܳܐ ܕܚܰܣܺܝܪܳܐܺܝܬ ܐܺܝܬ ܗ̱ܘܳܐ ܠܶܗ ܗܰܝܡܳܢܽܘܬܳܐ܆ ܘܐ̱ܢܳܫܳܐܺܝܬ ܛܳܒ ܐܺܝܬܶܝܗ̇ ܗ̱ܘܳܬ. ܗܶܢܶܝܢ ܕܶܝܢ ܐܰܝܟ ܐܰܝܠܶܝܢ ܕܶܐ݀ܬܶܐܡܶܢ̈ܝ ܬܟܺܝܒܳܐܺܝܬ ܠܘܳܬ ܩܰܒܪܳܐ܆ ܘܰܐܝܟ ܐܰܝܠܶܝܢ ܕܰܠܒܰܪ ܡܶܢ ܗܳܝ ܕܘܳܠܝܳܐ܆ ܡܶܣܬܰܒܪ̈ܳܢ ܕܣܰܓܺܝܳܐܺܝܬ ܡܥܰܩ̈ܒܳܢ ܠܳܗ̇ ܠܰܩܝܳܡܬܳܐ. ܡܶܛܽܠ ܗܳܕܶܐ ܓܶܝܪ ܘܰܥܠܰܝܡܳܐ ܐܶܬܚܙܺܝ ܠܗܶܝܢ܆ ܕܰܢܙܺܝܥ ܒܪܰܒܽܘܬܳܐ ܘܕܶܚܠܬܳܐ ܕܢܶܥܒܶܕ ܡܨܶܐ. ܘܰܢܚܰܠܶܛ ܒܗܳܝ ܕܕܰܚܺܝܠܳܐ ܗܳܝ ܕܰܦܨܺܝܚܳܐ. ܒܝܰܕ ܚܶܘܳܪܽܘܬܳܐ ܕܶܐܤܛܠܶܗ ܐܰܝܟ ܕܰܒܥܺܐܕܳܐ. ܘܡܶܛܽܠ ܕܠܳܐ ܢܺܐܒ̈ܫܳܢ ܡܶܢ ܙܰܘܥܬܳܐ܆ ܘܥܰܙܺܝܙܳܐܺܝܬ ܕܶܝܢ ܡܡܰܠܶܠ ܠܗܶܝܢ܆ ܟܰܕ ܪܳܕܶܐ ܠܗܶܝܢ ܒܝܰܕ ܐܰܝܠܶܝܢ ܕܳܐܡܰܪ: ܕܡܶܢ ܒܳܬܰܪ ܚܙܳܬܳܐ ܕܙܰܒ̈ܢܺܝܢ ܣܰܓܺܝ̈ܳܐܢ ܠܳܐ ܢܶܗܘ̈ܝܳܢ ܒܳܨ̈ܝܳܢ ܡܥܰܩܒܳܢܳܐܺܝܬ. ܡܫܰܪܪܳܐܺܝܬ ܕܶܝܢ ܝܰܬܺܝܪܳܐܺܝܬ ܥܰܠ ‌‌ܐܰܝܠܶܝܢ ܕܰܚ̈ܙܰܝ ܢܩܽܘ̈ܡܳܢ. ܙܶܠ̈ܶܝܢ ܠܰܡ ܓܶܝܪ ܐܶܡܰܪ̈ܶܝܢ ܠܬܰܠܡܺܝܕܰܘ̈ܗ̱ܝ ܘܰܠܦܶܛܪܽܘܤ܆ ܠܬܰܠ̈ܡܺܝܕܶܐ ܡܰܢ܆ ܐܰܝܟ ܕܠܰܐܝܠܶܝܢ ܕܙܰܒ̈ܢܳܬܳܐ ܣܰܓܺܝ̈ܳܐܬܳܐ ܠܳܐ ܗܰܝܡܶܢܘ. ܠܦܶܛܪܽܘܤ ܕܶܝܢ܆ ܐܰܝܟ ܕܠܰܐܝܢܳܐ ܕܥܰܡܶܗ ܕܺܝܠܶܗ ܕܣܰܓܝܽܐܘܬ ܥܽܘܩܳܒܟܶܝܢ܆ ܬܰܪܬܶܝܢ ܙܰܒ̈ܢܳܬܳܐ ܐܶܬܳܐ ܠܒܶܝܬ ܩܒܽܘܪܳܐ܆ ܕܗܳܐ ܩܳܕܶܡ ܠܟܽܘܢ ܠܰܓܠܺܝܠܳܐ. ܬܰܡܳܢ ܬܶܚܙܽܘܢܳܝܗ̱ܝ ܐܰܝܟܰܢܳܐ ܕܶܐܡܰܪ ܠܟܶܝܢ ܠܢܶܫ̈ܶܐ܆ ܟܰܕ ܒܪܰܡܫܳܐ ܕܫܰܒ̈ܶܐ ܕܢܳܓܰܗ ܚܰܕܒܫܰܒܳܐ ܐܶܬܚܙܺܝ. ܐܰܝܟܰܢܳܐ ܕܡܰܬܰܝ ܟܬܰܒ. ܠܬܰܠ̈ܡܺܝܕܶܐ ܓܶܝܪ܆ ܠܳܐ ܡܬܽܘܡ ܡܶܬܚܙܶܐ ܕܳܐܡܰܪ ܕܡܶܢ ܒܳܬܰܪ ܩܝܳܡܬܳܐ ܒܰܓܠܺܝܠܳܐ ܡܶܬܚܙܶܐ ܠܗܽܘܢ. ܐܶܠܳܐ ܐܶܢ ܕܰܠܡܳܐ ܗܳܝ ܕܳܐܡܰܪ ܐ̱ܢܳܫ܆ ܕܡܰܬܰܝ ܘܡܰܪܩܽܘܤ ܟܬܰܒܘ܆ ܕܡܶܢ ܒܳܬܰܪ ܚܫܳܡܺܝܬܳܐ ܗܳܝ ܐ̱ܪܳܙܳܢܳܝܬܳܐ܆ ܟܰܕ ܢܦܰܩܘ ܠܛܽܘܪܳܐ ܕܙܰܝ̈ܬܶܐ ܕܰܢܫܰܒܚܽܘܢ^[20]. ܐܶܬܰܐܡܪܰܬ ܡܶܢ ܡܫܺܝܚܳܐ ܗܳܟܰܢܳܐ܆ ܡܶܢ ܒܳܬܰܪ ܕܶܝܢ ܕܩܳܐܶܡ ܐ̱ܢܳܐ܆ ܩܳܕܶܡ ܐ̱ܢܳܐ ܠܟܽܘܢ ܠܰܓܠܺܝܠܳܐ^[21]. ܟܰܕ ܢܳܦ̈ܩܳܢ ܕܶܝܢ ܡܶܢ ܩܰܒܪܳܐ܆ ܡܰܪܝܰܡ ܘܡܰܪܝܰܡ ܘܫܳܠܽܘܡ܆ ܘܰܐܚܺܝ̈ܕܳܢ ܒܙܰܘܥܬܳܐ ܘܒܰܪܬܺܝܬܳܐ܆ ܥܳܪ̈ܽܘܩܝܳܬܳܐ ܕܶܝܢ ܗܘ̈ܰܝ܆ ܘܡܶܕܶܡ ܘܠܳܐ ܠܐ̱ܢܳܫ ܐܶܡܰܪ̈ܶܝܢ. ܕܰܚܺܝ̈ܠܳܢ ܗ̱ܘܰܝ̈ ܓܶܝܪ. ܚܕܳܐ ܡܶܛܽܘܠ ܕܚܺܝܠܽܘܬܶܗ ܕܰܥܠܰܝܡܳܐ. ܐ̱ܚܪܺܬܳܐ ܕܶܝܢ܆ ܡܶܛܽܠ ܕܺܐܝܡܳܡܳܐ ܡܶܢ ܟܰܕܽܘ ܩܪܶܒ ܘܡܶܣܬܰܒܪܳܐ ܗ̱ܘܳܬ ܕܝܽܗ̱ܘ̈ܕܳܝܶܐ ܩܳܛܽܘ̈ܠܶܐ܆ ܠܟܳܐ ܘܰܠܟܳܐ ܡܶܬܟܰܪܟܺܝܢ ܗ̱ܘܰܘ.

ܒܰܨ̈ܚܳܚܶܐ ܡܰܢ ܗܳܟܺܝܠ ܕܛܳܒ ܚܰܬܺܝܬ̣ܺܝܢ܆ ܠܶܐܘܰܢܓܶܠܺܝܽܘܢ ܕܡܰܪܩܽܘܤ ܥܕܰܡܳܐ ܠܗܳܝ ܕܕܰܚܺܝ̈ܠܳܢ ܗ̱ܘܰܝ̈ ܓܶܝܪ ܐܺܝܬ ܠܶܗ ܫܽܘܠܳܡܳܐ. ܒܰܐܚܪ̈ܳܢܶܐ ܕܶܝܢ ܣܺܝ̈ܡܳܢ ܒܬܰܘܣ̈ܦܳܬܳܐ ܐܳܦ ܗܳܠܶܝܢ. ܟܰܕ ܩܳܡ ܕܶܝܢ ܒܨܰܦܪܳܐ ܕܚܰܕܒܫܰܒܳܐ܆ ܐܶܬܚܙܺܝ ܩܰܕܡܳܝܰܬ ܠܡܰܪܝܰܡ ܡܰܓܕܠܳܝܬܳܐ܆ ܗܳܝ ܕܡܶܢܳܗ̇ ܐܰܦܶܩ ܫܰܒܥܳܐ ܫ̈ܺܐܕܺܝܢ. ܗܳܕܶܐ ܕܶܝܢ ܣܰܩܽܘܒܠܳܝܽܘܬܳܐ ܡܶܕܶܡ ܡܶܣܬܰܒܪܳܐ ܕܺܐܝܬ ܠܳܗ̇܆ ܠܘܳܬ ܗܳܠܶܝܢ ܕܡܶܢ ܩܕܳܡܶܝܗ̇ ܐܰܡܺܝܪ̈ܳܢ ܠܰܢ. ܟܰܕ ܓܶܝܪ ܫܳܥܬܳܐ ܕܠܶܠܝܳܐ ܠܳܐ ܝܺܕܺܝܥܬܳܐ ܐܺܝܬܶܝܗ̇܆ ܕܒܳܗ̇ ܩܳܡ ܦܳܪܽܘܩܰܢ. ܐܰܝܟܰܢܳܐ ܗܳܪܟܳܐ ܒܨܰܦܪܳܐ ܟܬܺܝܒ ܕܩܳܡ. ܐܶܠܳܐ ܘܠܳܐ ܚܕܳܐ ܣܰܩܽܘܒܠܳܝܽܘܬܳܐ ܡܶܬܚܙܶܐ ܒܦܶܬܓܳܡܳܐ ܗܳܢܳܐ ܐܶܢ ܗܽܘ ܕܥܰܡ ܝܺܕܰܥܬܳܐ ܩܳܪܶܝܢܰܢ ܠܶܗ. ܐܳܦ ܓܶܝܪ ܠܡܶܦܣܰܩ ܣܰܟܽܘܠܬܳܢܳܐܺܝܬ ܙܳܕܶܩ ܠܰܢ ܗܳܟܰܢܳܐ ܟܰܕ ܩܳܡ ܕܶܝܢ ܘܗܳܝܕܶܝܢ ܢܰܝܬܶܐ ܒܳܬܪܳܗ̇ ܕܰܒܨܰܦܪܳܐ ܕܚܰܕܒܫܰܒܳܐ ܐܶܬܚܙܺܝ ܠܽܘܩܕܰܡ ܠܡܰܪܝܰܡ ܡܰܓܕܠܳܝܬܳܐ. ܐܰܝܟܳܢܳܐ ܕܗܳܝ ܡܶܢ ܕܩܳܡ ܬܶܗܘܶܐ ܠܳܗ̇ ܡܥܰܠܝܳܢܽܘܬܳܐ ܫܰܠܡܳܐܺܝܬ ܠܡܰܬܝ ܠܘܳܬ ܥܶܕܳܢܳܐ ܗܰܘ ܕܰܥܒܰܪ. ܗܳܝ ܕܶܝܢ ܕܰܒܨܰܦܪܳܐ܆ ܠܘܳܬ ܚܙܳܬܳܐ ܗܳܝ ܕܰܗܘܳܬ ܠܘܳܬ ܡܰܪܝܰܡ ܕܬܶܬܺܝܕܰܥ ܕܩܰܕܡܳܝܬܳܐ ܥܰܡ ܗܳܝ ܡܰܪܝܰܡ ܐ̱ܚܪܺܬܳܐ܆ ܘܬܽܘܒ ܠܚܽܘܕܶܝܗ̇ ܚܙܳܬܶܗ ܠܡܳܪܝܳܐ. ܨܰܦܪܳܐ ܓܶܝܪ ܐܺܝܬܰܘܗ̱ܝ܆ ܟܽܠܶܗ ܛܰܘܪܳܐ ܗܰܘ ܕܡܶܢ ܒܳܬܰܪ ܩܥܳܬܳܐ ܕܬܰܪ̈ܢܳܓܠܶܐ.

ܟܰܕ ܗܳܟܺܝܠ ‌ܐܰܪܒܥܳܐ ܥܶܕܳܢ̈ܶܐ ܐܺܝܬܰܝܗܽܘܢ܆ ܘܗܳܟܰܢܳܐ ܐܳܦ ܡܶܐܬܺܝܬܳܐ ܕܰܒܗܶܝܢ ܗܶܢܶܝܢ ܢܶܫ̈ܶܐ ܐܶܬܰܝ̈ ܠܘܬ ܩܰܒܪܳܐ܆ ܠܟܽܠ ܚܰܕ ܡܶܢ ܐܶܘܰܢܓ̈ܶܠܺܝܣܛܶܐ܆ ܚܰܕ ܥܶܕܳܢܳܐ ܦܰܪܢܶܤ ܕܢܶܟܬܽܘܒ ܪܽܘܚܳܐ ܩܰܕܺܝܫܳܐ. ܘܡܰܬܰܝ ܡܰܢ. ܠܗܳܢܶܝܢ ܕܰܒܪܰܡܫܳܐ ܐܶܬܰܝ̈ ܠܘܳܬ ܩܰܒܪܳܐ ܟܬܰܒ. ܘܚܰܕ ܡܰܠܰܐܟܳܐ ܕܰܢܚܶܬ ܡܶܢ ܫܡܰܝܳܐ܆ ܘܟܺܐܦܳܐ ܕܰܡܥܰܪܓܠܳܐ. ܝܽܘܚܰܢܳܢ ܕܶܝܢ ܕܡܰܪܝܰܡ ܡܰܓܕܠܳܝܬܳܐ ܐܶܬ̣ܳܬ̣ ܒܚܶܫܽܘܟܳܐ܆ ܗܽܘ ܕܰܩܕܳܡ ܕܶܢܚܳܐ ܟܬܰܒ. ܘܕܰܬܪܶܝܢ ܡܰܠܰܐܟ̈ܶܐ ܠܓܰܘ ܒܩܰܒܪܐ ܚܙܳܬ̣. ܠܽܘܩܳܐ ܕܶܝܢ ܐܰܘܣܶܦ ܕܝܽܘܚܰܢ ܘܰܐ̱ܚܪ̈ܳܢܝܳܬܳܐ ܒܨܰܦܪܳܐ. ܡܰܪܩܽܘܤ ܕܶܝܢ ܫܳܠܽܘܡ ܟܰܕ ܣܠܶܩ ܫܶܡܫܳܐ ܟܰܕ ܚܠܺܝ̈ܛܳܢ ܥܰܡܳܗ̇ ܘܰܐ̱ܚܪ̈ܳܢܝܳܬܳܐ ܗܳܠܶܝܢ ܕܡܶܢ ܟܰܕܽܘ ܐܶܬܰܝ̈ ܗ̱ܘܰܝ̈܆ ܘܗܳܢܶܝܢ ܡܰܢ ܕܶܐܡܰܪ ܠܽܘܩܳܐ܆ ܬܪܶܝܢ ܓܰܒܪ̈ܺܝܢ ܚ̈ܙܰܝܶܢ ܕܩܳܝܡܺܝܢ ܠܥܶܠ ܡܶܢܗܶܝܢ^[22]. ܗܳܢܶܝܢ ܕܶܝܢ ܕܶܐܡܰܪ ܡܰܪܩܽܘܤ ܥܠܰܝܡܳܐ ܕܝܳܬܶܒ ܡܶܢ ܝܰܡܺܝܢܳܐ ܚ̈ܙܰܝܶܢ܆ ܟܽܠܗܽܘܢ ܕܶܝܢ ܒܶܐܤ̈ܛܠܶܐ ܚܶܘܳܪ̈ܳܬܳܐ ܡܥܰܛܦܺܝܢ^[23]. ܐܰܝܟܰܢܳܐ ܕܢܶܫܟܰܚ ܐ̱ܢܳܫ ܕܟܰܕ ܐܰܝܟ ܛܶܟܣܳܐ ܕܥܶܕܳܢ̈ܶܐ ܠܰܐܝܠܶܝܢ ܕܡܶܢ ܟܽܠ ܚܰܕ ܡܶܢܗܽܘܢ ܐܶܬܟܬܶܒ ܢܣܺܝܡ ܡܰܢ ܪܽܘܟܳܒܳܐ܆ ܘܚܰܕ ܦܰܓܪܳܐ ܕܟܽܠܳܗ̇ ܬܰܫܥܺܝܬܳܐ ܢܶܥܒܶܕ܆ ܐܰܝܟ ܗܰܘ ܕܚܰܕ ܠܟܽܠܗܶܝܢ ܐܰܟܬܶܒ܆ ܚܳܙܶܐ ܘܠܰܘ ܣܰܓܺܝ̈ܶܐܐ. ܐܶ‌ܠܽܘ ܡܰܢ ܓܶܝܪ ܠܰܚܕܳܐ ܡܶܐܬܺܝܬܳܐ ܕܺܝܠܗܶܝܢ ܕܢܶܫ̈ܶܐ܆ ܕܰܒܚܰܕ ܥܶܕܳܢܳܐ ܗܘ̣ܳܬ܆ ܐܰܪ̈ܒܥܳܬܰܝܗܽܘܢ ܐܶܘܰܢܓ̈ܶܠܺܣܛܶܐ ܐܶܬܥܗܰܕܘ܆ ܘܰܕܗܶܢܽܘܢ ܟܰܕ ܗܶܢܽܘܢ ܡܰܠܰܐܟ̈ܶܐ ܐܶܡܰܪܘ ܕܶܐܬܚܙܺܝܘ܆ ܐܰܘ ܟܰܕ ܚܰܕ ܘܗܽܘ ܟܰܕ ܗܽܘ ܚܶܙܘܳܐ ܘܓܶܠܝܳܢܳܐ ܐܶܡܰܪܘ ܐܰܪ̈ܒܥܳܬܰܝܗܽܘܢ܆ ܠܶܗ ܠܗܳܢܐ ܐܶܡܰܪܘ: ܕܰܒܥܶܕܳܢ̈ܶܐ ܡܫܰܚ̈ܠܦܶܐ ܗܘ̣ܳܐ܆ ܘܠܰܘ ܟܽܠ ܚܰܕ ܡܶܢܗܽܘܢ ܐܶܬܥܰܗܰܕܘ ܚܰܕ ܥܶܕܳܢܳܐ ܥܶܕܠܳܝܳܐ ܕܠܳܐ ܫܰܠܡܽܘܬܐ ܐܺܝܬ ܗ̱ܘܳܐ ܒܳܗ̇ ܒܡܶܠܬܳܐ. ܐܶܢ ܕܶܝܢ ܒܥܶܕܳܢ̈ܶܐ ܘܰܒܦܰܪ̈ܨܽܘܦܶܐ ܡܫܰܚ̈ܠܦܶܐ܆ ܘܚ̈ܳܙܽܘܝܶܐ ܕܗܳܢܽܘܢ ܕܶܐܬܚܰܘܺܝܘ܆ ܘܠܰܘ ܗܶܢܽܘܢ ܟܰܕ ܗܶܢܽܘܢ܆ [ܟ]ـܕ [ܨܒـ]ܐ ܐܰ‌ܠܳܗܳܐ ܕܰܒܢܺܝ̈ܫܶܐ [ܣܰܓܺ]ܝ̈ܐܐ. ܢܫܰܪܪܺܝܗ̇ [ܠܬ]ܕܡܽܘܪܬܳܐ ܥܰܣܩܰܬ [ܠܰܡ]ܗܰܝܡܳܢܽܘ ܕܰܩܝܳܡܬܳܐ. [ܘܗܳ]ܝ ܕܡܶܢ ܐܶܘܰܢܓܶܠܺܣܛܳܐ [ܐ̱ܚ]ܪܢܐ ܠܳܐ ܐܶܬܟܰܬܒܰܬ܆ [ܐ̱ܚ]ܪܢܐ ܐܶܫܬܰܥܝܳܗ̇. [ܐ]ܝܟܰܢܳܐ ܠܳܐ ܐܺܝܬܶܝܗ̇ [ܟـ]ܠܳܗ̇ ܬܰܫܥܺܝܬܳܐ ܕܟܺܝܬܳܐ܆ ܘܕܰܡܚܰܪܪܳܐ ܡܶܢ ܥܶܕܠܳܝܳܐ.

ܡܶܛܽܘܠ ܕܶܝܢ ܕܰܕܡܰܪ̈ܝܡ ܣܰܓܺܝ̈ܳܐܬܳܐ ܒܶܐܘܰܢܓܶܠܺܝܽܘܢ ܐܶܬܳܐ ܥܽܘܗܕܳܢܳܐ܆ ܕܰܬܠܳܬ ܐܺܝܬܰܝܗܶܝܢ ܟܽܠܗܶܝܢ ܙܳܕܶܩ ܠܰܢ ܕܢܶܕܰܥ܆ ܠܗܳܢܶܝܢ ܕܝܽܘܚܰܢܳܢ ܟܢܺܝܫܳܐܺܝܬ ܡܢ̣ܳܐ ܐܶܢܶܝܢ [ܟܕ] ܐܶܡܰܪ ܕܩܳܝ̈ܡܳܢ ܗ̱ܘܰܝ̈ ܠܘܳܬ ܙܩܺܝܦܶܗ [ܕ]ܝܫܘܥ ܐܶܡܶܗ ܘܚܳܬܳܗ̇ [ܕܶ]ܐܡܶܗ. ܘܡܰܪܝܰܡ ܗܳܝ ܕܰܩܠܶܝܽܘܦܰܐ ܘܡܰܪܝܰܡ [ܡـ]ܓܕܠܳܝܬܳܐ^[24]. ܡܰܪܝܰܡ ܓܶܝܪ ܗܳܝ [ܕܶ]ܐܡܳܐ ܕܝܥܩܘܒ [ܘ]ܕܝܘܣܐ [ܠܘܬ] ܗܳܠܶܝܢ ܐܶܘܢ̈ܓܠܣܛܐ ܐ̱ܚܪ̈ܳܢܶܐ ܡـ[ܫܡܗ]ܐ܆ ܝܳܠܕܰܬ ܐܰ‌ܠܳܗܳܐ ܗܰܝܡܢܶܬ [ܕܺܐܝ]ܬܶܝܗ̇ ܘܠܰܘ ܐ̱ܚܪܺܬܳܐ. ܐܰܝ[ܟ ܙܢܳܐ] ܓܶܝܪ ܕܡܶܛܽܠ ܡـ[ܕܒـ]ـܪܳܢܽܘܬܳܐ܆ ܕܗܳܝ [ܕ]ܢܶܬܟܰܣܶܐ ܝܰܠܕܳܐ ܐܰ‌ܠܳܗܳܝܳܐ ܘܠܳܐ ܢܶܬܓܠܶܐ ܠܩܳܛܽܘܠܳܐ ܛܰܡ̈ܶܐܐ ܝܽܗ̱ܘ̈ܕܳܝܶܐ ܒܶܗ ܒܙܰܒܢܳܐ [ܟܕ] ܥܬܺܝܕܳܐ ܗ̱ܘܳܬ ܕܠܰܓܢܽܘܢܳܐ ܬܺܐܬܶܐ ܗܝ ܒܬܽܘܠܬܳܐ܆ ܗܳܝ ܕܡܶܢ ܪܽܘܚܳܐ ܩܰܕܺܝܫܳܐ ܒܶܛܢܰܬ܆ ܟܬܺܝܒ ܕܓܰܒܪܳܗ̇ ܕܗܳܕܶܐ ܐܶܫܬܰܡܰܗ ܝܘܣܶܦ܆ ܘܰܐܒܽܘܗ̱ܝ ܕܝܶܫܽܘܥ܆ ܒܶܗ ܦܕ ܒܶܗ ܒܰܙܢܳܐ܆ ܘܰܕܝܽܘܣܺܐ ܘܰܕܝܰܥܩܽܘܒ ܒ̈ܢܰܘ̈ܗ̱ܝ ܕܝܰܘܣܶܦ ܗܰܘ ܢܰܓܳܪܳܐ܆ ܕܩܰܘܡܬܳܐ ܕܛܰܠܝܽܘܬܳܐ ܐܺܝܬ ܠܗܽܘܢ܆ ܘܡܶܢ ܙܽܘܘܳܓܳܐ ܩܰܕܡܳܝܳܐ ܘܡܶܢ ܐܰܢ̱ܬܬܳܐ ܕܩܰܕܡܰܬ ܡܺܝܬ̣ܰܬ̣܆ ܐܶܡܗܽܘܢ ܡܶܬܐܰܡܪܳܐ ܗ̱ܘܳܬ. ܘܡܶܣܬܰܒܪܳܐ ܗ̱ܘܳܬ ܗܳܝ ܝܳܠܕܰܬ ܠܰܐܠܳܗܳܐ. ܡܶܛܽܠ ܗܳܕܶܐ ܗܳܟܺܝܠ܆ ܟܰܕ ܡܓܰܕܦܺܝܢ ܗ̱ܘܰܘ ܝܽܗ̱̈ܘܕܳܝܶܐ ܥܰܠ ܦܳܪܽܘܩܰܢ ܐܳܡܪܺܝܢ ܗ̱ܘܰܘ. ܠܰܘ ܗܳܢܳܐ ܐܺܝܬܰܘܗ̱ܝ ܗܰܘ ܒܪܶܗ ܕܢܰܓܳܪܳܐ܆ ܠܳܐ ܐܶܡܶܗ ܡܶܬܩܰܪܝܳܐ ܡܰܪܝܰܡ. ܘܰܐܚܰܘ̈ܗ̱ܝ ܝܥܩܘܒ ܘ[ܝܘܣ]ܐ ܘܫܶܡܥܽܘܢ ܘܺܝܗܽܘܕܳܐ^[25]܆ ܡܶܛܽܠ ܗܳܕܐ ܡܰܢ ܗܽܘ ܝܽܘܚܰܢܳܢ ܘܟܰܕ ܠܘܳܬ ܙܩܺܝܦܳܐ ܩܳܝܡܳܐ ܗ̱ܘܳܬ ܐܰܝܟ ܡܰܢ ܕܥܰܡ [ܦܰܪ]ܗܣܺܝܰܐ ܡܡܰܠܶܠ ܐܰ‌ܠܳܗܳܝ̈ܳܬܳܐ ܕܡܶܢܶܗ ܕܠܶܗ ܕܰܫܪܳܪܳܐ ܐܶܡܶܗ ܕܝܶܫܽܘܥ [ܫܰ]ܡܗܳܗ̇. ܗܳܠܶܝܢ ܕܶܝܢ ܐܶܘܰܢ̈ܓܶܠܺܣܛܶܐ ܕܫܰܪܟܳܐ ܡܶܛܽܘܠ ܕܰܐܝܟ ܕܰܒܣܽܘܓܳܐܐ ܠܘܳܬ ܡܕܰܒܪܳܢܽܘܬܳܐ ܐܶܬܥܢܺܝܘ܆ ܡܕܰܒܪܳܢܳܐܺܝܬ ܐܶܡܶܗ ܕܝܽܘܣܺܐ ܘܰܕܝܰܥܩܽܘܒ ܫܰܡܗܽܘܗ̇. ܗܳܠܶܝܢ ܓܶܝܪ ܐܺܝܬܰܝܗܽܘܢ ܗ̱ܘܰܘ ܪ̈ܺܝܫܳܝܶܐ ܘܺܝܕܺܝܥ̈ܶܐ ܒ̈ܢܰܘܗ̱ܝ ܕܝܰܘܣܶܦ܆ ܟܰܕ ܗܳܕܶܐ ܡܰܘܕܥܳܐ ܗ̱ܘܳܬ ܡܶܠܬܳܐ ܓܰܠܝܳܐܺܝܬ܆ ܕܥܰܡ ܗܳܕܶܐ ܡܕܰܒܪܳܢܽܘܬܳܐ܆ ܐܳܦ ܡܶܢ ܡܰܣܒܪܳܢܽܘܬܳܐ ܕܡܶܢ ܗܳܪܟܳܐ܆ ܕܠܳܐ ܩܺܝܢܕܽܘܢܽܘܤ ܠܚܰܫܳܐ ܦܳܪܽܘܩܳܝܳܐ ܩܰܪܺܝܒܳܐ ܗ̱ܘܳܬ. ܐܶ‌ܠܽܘ ܓܶܝܪ ܒܬܽܘܠܬܳܐ ܝܺܕܺܝܥܳܐ ܗ̱ܘܳܬ ܠܣܰܓܺܝ̈ܶܐܐ ܐܳܒܕܳܐ ܗ̱ܘܳܬ ܡܶܢ ܝܽܗ̱̈ܘܕܳܝܶܐ ܚܰܣܳܡ̈ܶܐ. ܐܺܝܬ ܕܶܝܢ ܠܡܶܫܟܳܚܽܘ ܠܘܳܬ ܐܶܘܢ̈ܓܠܣܛܐ܆ ܕܳܐܦ ܡܰܢ ܚܰܕ ܒܰܠܚܽܘܕ ܡܶܢ ܒܢܰܘ̈ܗ̱ܝ ܕܝܰܘܣܶܦ܆ ܡܶܫܬܰܡܗܳܐ܆ ܡܰܪܝܰܡ ܗܳܝ ܕܝܰܥܩܘܒ ܘܡܰܪܝܰܡ ܗܳܝ ܕܝܽܘܣܺܐ. ܡܰܪܩܽܘܤ ܕܶܝܢ ܕܝܰܥܩܽܘܒ ܗܰܘ ܙܥܽܘܪܳܐ ܘܰܕܝܽܘܣܺܐ ܐܰܡܪܳܗ̇ ܐܶܡܳܐ. ܡܶܛܽܠ [ܟܺܝܬ ܕܐ]ܝܬ ܗ̱ܘܳܐ ܐ̱ܚܪܺܢܳܐ ܝܥܩܘܒ ܗܰܘ ܒܰܪܚܰܠܦܰܝ ܘܡܶܛܽܠ [ܗܳܕܶܐ] ܐܺܝܬܰܘܗ̱ܝ ܪܰܒܳܐ ܕ[ܥܰܡ] ܫܠܺܝ̈ܚܶܐ ܗܳܠܶܝܢ ܬܪܶܥܣܰܪ ܡ̇ܢܶܐ̣ ܗ̱ܘܳܐ. ܗܰ[ܘ] ܕܶܝܢ ܙܥܽܘܪܳܐ ܠܳܐ ܐܺܝܬܰܘܗ̱ܝ ܗ̱ܘܳܐ ܒ[ܗ] ܒܡܶـ]ܢܝܳܢܗܽܘܢ.

ܟܺܐܢܳܐܺܝܬ ܕܶܝܢ ܐܺܝܬܶܝܗ̇ ܗܳܝ ܕܢܶܒܥܶܐ ܐ̱ܢܳܫ܆ ܕܰܐܝܟܰܢܐ ܗܽܘ ܦܳܪܽܘܩܰܢ܆ ܟܰܕ ܠܬܰܠܡܺܝܕܰܘ̈ܗ̱ܝ ܐܶܫܬܰܘܕܺܝ܆ ܐܺܝܬ ܡܰܢ ܐܶܡܰܬܝ ܕܰܒܝܰܕ ܡܰܠܰܐܟ̈ܶܐ. ܐܺܝܬ ܕܶܝܢ ܐܰܝܟܳܐ ܕܰܒܝܰܕ ܒܰܪ̱ܬ ܩܳܠܳܐ ܕܺܝܠܶܗ܆ ܕܳܐܙܶܠ ܠܰܓܠܺܝܠܳܐ ܘܡܶܬܚܙܶܐ ܠܗܽܘܢ. ܩܰܕܡܶܗ ܠܫܽܘܘܕܳܝܶܗ܆ ܘܒܽܐܘܪܶܫܠܶܡ. ܐܰܝܟ ܕܠܽܘܩܳܐ ܡܰܢ ܐܶܡܰܪ: ܒܶܗ ܒܝܰܘܡܳܐ ܕܰܩܝܳܡܬܳܐ܆ ܠܗܽܘܢ ܠܰܚܕܰܥܣܰܪ ܟܰܕ ܟܢܺܝܫܺܝܢ ܐܶܬܚܙܺܝ. ܝܽܘܚܰܢܳܢ ܕܶܝܢ ܘܒܶܗ ܒܝܰܘܡܳܐ ܘܳܐܦ ܒܗܰܘ ܕܰܬܡܳܢܝܳܐ ܥܒܰܕ ܓܶܠܝܳܢܶܗ܆ ܟܰܕ ܩܳܡ ܒܰܝܢܳܬܗܽܘܢ ܘܳܐܡܰܪ܆ ܫܠܳܡܳܐ ܥܰܡܟܽܘܢ. ܘܰܠܬܽܐܘܡܰܐ ܫܒܰܩ ܗ̱ܘܳܐ ܕܰܢܓܽܘܫܺܝܘܗ̱ܝ. ܐܶܠܳܐ ܗܳܕܶܐ ܠܥܽܘܬܪܳܐ ܕܰܫܦܺܝܥܽܘܬ ܡܪܰܚܡܳܢܽܘܬܳܐ ܡܚܰܘܝܳܐ. ܘܠܰܘ ܕܰܩܛܺܓܪܳܢܽܘܬܳܐ ܕܕܰܓܳܠܽܘܬܳܐ ܐܺܝܬ ܠܳܗ̇. ܠܳܐ ܓܶܝܪ ܐܶܡܰܪ ܕܒܰܓܠܺܝܠܳܐ ܠܚܽܘܕ ܬܶܚܙܽܘܢܳܢܝ. ܘܳܐܦ ܠܳܐ ܟܰܕ ܐܶܬܚܰܘܺܝ ܒܽܐܘܪܶܫܠܶܡ ܠـ[ܐ] ܐܶܬܚܙܺܝ ܒܰܓܠܺܝܠܳܐ [ܐܰܝܟ] ܕܶܐܫܬܰܘܕܺܝ ……………………………………….[ܐܢ] ܕܶܝܢ ܘܰܕܒܽܐܘܪܶܫܠܶܡ܆ [ܟܕ] ܚܒܺܝܫܺܝܢ ܒܒܰܝܬܳܐ [ܡܶܛܽܠ] ܕܶܚܠܬܳܐ ܕܺܝܗܬܘ̈ܕܳܝܶܐ܆ [ܐܬ]ܚܙܺܝ ܠܗܳܢܽܘܢ ܕܰܣܢܺܝܩܺܝܢ [ܥܰܠ] ܠܽܘܒܳܒܶܗ܆ ܘܰܠܫܽܘܘܕܳܝܶܗ [ܡܰܠܺܝ ܟܕ] ܐܶܬܚܰܘܺܝ [ܒܰܓܠܺܝܠܳܐ ܥܳܪ̈ܩܳܢ ܡܶܢ ܟܽܠ] ܩܛܺܓܪܳܢܘܳܬܐ ܬܰܪ̈ܬܰܝܗܶܝܢ܆ ܕܰܗܘ̈ܰܝ ܡܪܰܚܡܳܢܳܐܺܝܬ ܐܰܟܚܕܳܐ ܘܫܰܪܺܝܪܳܐܺܝܬ.

ܠܺܝ ܕܶܝܢ ܡܶܬܚܰܙܝܳܐ ܕܣܰܓܺܝ ܩܪܺܝܚܳܐܺܝܬ ܐܺܝܬܶܝܗ̇ ܗܳܝ ܕܶܐܬܐܰܡܪܰܬ ܡܶܢ ܡܰܬܰܝ ܡܶܛܽܠ ܬܰܠ̈ܡܺܝܕܶܐ܆ ܗܳܝ ܕܢܺܐܙܽܠ̱ܘܢ [ܠܰܓܠـ]ܝܠܐ ܘܳܐܦ ܬܰܡܳܢ ܢܶܚܙܽܘܢܳܢܝ^[26]. ܟܰܕ ܓܶܝܪ ܓܶܠ̈ܝܳܢܶܐ ܣܰܓܺܝ̈ܶܐܐ ܥܬܺܝܕܺܝܢ ܗ̱ܘܰܘ ܕܢܶܗܘܽܘܢ ܠܘܳܬܗܽܘܢ܆ ܠܘܳܬ ܚܕܳܐ ܐܰܝܟ ܝܰܬܺܝܪܬܳܐ ܘܺܝܕܺܝܥܬܳܐ ܠܒܰܪ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ ܚܳܝܪ̈ܳܢ ܗܳܠܶܝܢ ܕܫܽܘܘܕܳܝܳܐ܆ ܒܗܳܝ ܕܰܥܬܺܝܕ ܗ̱ܘܳܐ ܕܥܰܠ ܛܽܘܪܳܐ ܢܶܬܚܙܶܐ ܠܗܽܘܢ܆ ܗܳܝܕܶܝܢ ܩܪܶܒܘ ܘܰܣܓܶܕܘ ܠܶܗ. ܘܟܰܕ ܐ̱ܢܳܫܺܝ̈ܢ ܐܶܬܦܪܶܫܘ (ܐܶܬܦܰܫܰܟܘ)܆ ܒܫܽܘܠܛܳܢܳܐ ܦܐܶܐ ܠܰܐܠܳܗܳܐ ܐܶܡܰܪ܆ ܐܶܬܺܝܗܶܒ ܠܺܝ ܟܽܘܠ ܫܽܘܠܛܳܢܳܐ܆ ܒܰܫܡܰܝܳܐ ܘܥܰܠ ‌ܐܰܪܥܳܐ^[27]. ܐܰܝܠܶܝܢ ܓܶܝܪ ܕܺܐܝܬ ܗ̱ܘܳܐ ܠܶܗ ܟܺܐܢܳܐܺܝܬ ܐܰܝܟ ܐܰ‌ܠܳܗܳܐ܆ ܠܗܳܠܶܝܢ ܡܶܬܶܐܡܰܪ ܕܰܢܣܰܒ ܐܰܝܟ ܡܰܢ ܕܰܗܘ̣ܳܐ ܒܰܪ ܐ̱ܢܳܫܳܐ ܡܕܰܒܪܳܢܳܐܺܝܬ. ܡܶܛܽܠ ܗܳܕܶܐ ܐܳܦ ܐܶܡܰܪ ܗ̱ܘܳܐ ܫܰܒܰܚܰܝܢܝ ܐܰܢ̱ܬ ܐܰܒܳܐ ܠܘܳܬܳܟ ܒܫܽܘܒܚܳܐ ܗܰܘ ܕܺܐܝܬ ܗ̱ܘܳܐ ܠܺܝ ܠܘܳܬܳܟ. ܩـ[ܕܡ] ܕܢܶܗܘܶܐ ܥܳܠܡܳܐ^[28]. ܐܶ‌ܠܽܘ ܠـ[ܐ ܓܶـ]ܝܪ ܕܺܐܝܬܰܘܗ̱ܝ ܗ̱ܘܳܐ ܗܳ[ܢܳܐ] ܕܺܝܠܶܗ ܐܰܝܟ ܐܰ‌ܠܳܗܳܐ ܡܶܢ ܠܳܐ ܡܶܬܡܰܨ̈ܝܳܢܝܳܬܳܐ ܐܺܝܬܶܝܗ̇ ܗ̱ܘܳܬ [ܕܰܠܗܳܢܳܐ] ܢܶܣܒܺܝܘܗ̱ܝ ܐܰܝܟ [ܕܰܠܢܽܘܟܪܳܝܳܐ] ܟܰܕ ܐܰ‌ܠܳܗܳܐ ܒ[ܝܕ ܢܒܺܝܳܐ] ܐܶܡܰܪ܆ ܕܫܽܘܒܚܳ[ܐ ܕܺܝܠܝ] ܠܰܐ̱ܚܪܺܢܳܐ ܠܳܐ [ܐܶ݀ܬܶܠ]^[29] ܘܡ̈ܶܠܶܐ ܡܶܟܺܝܠ [ܕܒܺܐܝ̈ܕܰܝܗܶܝܢ] ܥܬܺܝܕܺܝܢ ܗ̱ܘܰܘ [ܗܶܢܽܘܢ] ܫܠܺܝ̈ܚܶܐ܆ ܕܰܠܟܽܠܳܗ̇ [ܬܒܝܠ] ܢܨܽܘܕܽܘܢ܆ ܘܕܰ[ܒܗܶܝܢ] ܐܺܝܬܰܘܗ̱ܝ ܗ̱ܘܳܐ [ܟܽܠܶܗ] ܐ̱ܪܴܙܳܐ ܕܕܶܚܠܰܬ ܐܰ‌ܠܳܗܳܐ ܡܰܘܣܶܦ ܡܶܟܺܝܠ ܘܳܐ[ܡܰܪ] ܠܗܽܘܢ ܙܶܠܘ ܬܰܠـ[ـܡܶܕܘ] ܠܟܽܠܗܽܘܢ ܥܰܡܡ̈ܶܐ܆ [ܟܕ] ܡܰܥܡܕܺܝܢ ܐܢ̱ܬܽܘܢ ܠܗ[ܘܢ] ܒܰܫܡܳܐ ܕܰܐܒܳܐ ܘܕܰܒ[ܪܳܐ] ܘܰܕܪܽܘܚܳܐ ܩܰܕܺܝܫܳܐ ܘܡܰـ[ܠܦܺܝܢ] ܐܢ̱ܬܽܘܢ ܠܡܶܛܰܪ ܠܟܽܘܠܗܶܝܢ ܐܰܝܠܶܝܢ ܕܦܰܩܶܕܬܟܽܘܢ^[30] ܘܡܰܘ[ܣܶܦ] ܡܶܟܺܝܠ ‌ܐܰܝܠܶܝܢ ܕܰܠܫܽܘܠـ[ܡܳܐ] ܘܡܰܦܩܳܢܳܐ ܕܡ̈ܶܠܶܐ ܗܳ[ܠܶܝܢ] ܘܰܡܫܰܪܰܪ. ܘܗܳܐ ܐܶܢـ[ܐ] ܥܰܡܟܽܘܢ ܐܺܝܬܰܝ ܟܽܠܗܽ[ܘܢ] ܝܰܘ̈ܡܳܬܳܐ ܥܕܰܡܳܐ ܠܫܽܘܠܳܡܶܗ ܕܥܳܠܡܳܐ^[31]. ܡܶܛܽܠ ܗܳܠܶܝܢ ܐܶܡܰܪ ܗ[ܘܳܐ] ܠܢܶـ[ܫ̈ܶܐ]܆ ܐܶܡܰܪ̈ܶܝܢ ܠܰܐܚܰܝ̈ ܕܢܺܐܙܽܠ̱ܘܢ ܠܰܓܠܺܝܠܳܐ܆ ܘܳܐܦ ܬܰܡܳܢ ܢܶܚܙܽܘܢܳܢܝ. ܠܘܳܬ ܗܳܕܶܐ ܚܙܳܬܳܐ ܐܰܝܟ ܕܰܠܚܽܘܕܳܝܬܳܐ ܡܶܕܶܡ ܘܰܡܝܰܬܪܽܘܬܳܐ܆ ܐܰܝܟ [ܗܰܘ ܕܶܐ]ܬܶܐܡܰܪ ܡܰܝܬܶܐ. ܗܳܝ ܕܰܠܗܳܢܽܘܢ ܝܰܬܺܝܪܳܐܺܝܬ ܐܳܦ ܒܝܰܕ ܡ̈ܶܠܶܐ ܐ̱ܚܪ̈ܳܢܝܳܬܳܐ ܩܰܕܶܡ ܗ̱ܘܳܐ ܡܰܘܕܰܥ. ܐܰܝܠܶܝܢ ܕܒܰܟ̈ܬܺܝܒܳܬܳܐ ܕܶܐܘܰܢܓܶܠܺܝܽܘܢ ܠܳܐ ܣܺܝ̈ܡܳܢ. ܐܶ‌ܠܽܘ ܠܳܐ ܓܶܝܪ ܕܗܳܟܰܢܳܐ ܐܺܝܬܶܝܗ̇ ܗ̱ܘܳܬ܆ ܠܳܐ ܐܳܡܰܪ ܗ̱ܘܳܐ ܡܰܬܰܝ ܕܗܶܢܽܘܢ ܕܶܝܢ ܕܰܚܕܰܥܣܰܪ ܬܰܠ̈ܡܺܝܕܶܐ ܐܶܙܰܠܘ ܠܰܓܠܺܝܠܳܐ܆ ܠܛܽܘܪܳܐ ܗܰܘ ܕܦܰܩܶܕ ܐܶܢܽܘܢ ܝܶܫܽܘܥ. ܟܰܕ ܘܠܳܐ ܒܕܽܘܟ ܒܶܐܘܰܢܓܶܠܺܝܽܘܢ ܟܬܺܝܒ ܕܥܰܠ ܛܽܘܪܳܐ ܐܶܫܬܰܘܕܺܝ ܡܳܪܝܳܐ ܕܢܶܥܒܶܕ ܓܶܠܝܳܢܶܗ. ܡܶܛܽܠ ܕܰܩܕܳܡ ܗܳܕܶܐ ܚܙܳܬܳܐ ܗܳܝ ܕܰܒܛܽܘܪܳܐ܆ ܘܥܰܠ ܝܰܡܳܐ ܕܛܺܒܶܪܺܝܽܘܤ ܗܰܘ ܕܰܓܠܺܝܠܳܐ ܐܶܬܚܙܺܝ ܠܗܽܘܢ ܟܰܕ ܐܺܝܬܰܝܗܽܘܢ ܒܡܶܢܝܳܢܳܐ ܫܰܒܥܳܐ. ܦܛܪܘܤ ܘܬܽܐܘܡܰܐ ܘܢܰܬܰܢܰܐܶܝܠ ܘܰܒ̈ܢܰܘܗ̱ܝ ܕܙܰܒܕܰܝ ܘܰܬܪܶܝܢ ܐ̱ܚܪ̈ܳܢܶܐ ܡܶܢ ܬܰܠ̈ܡܺܝܕܶܐ ܐܰܝܟܰܢܳܐ ܕܰܟܬܰܒ ܝܽܘܚܰܢܳܢ^[32]. ܐܶܠܳܐ ܠܘܳܬ ܛܽܘܪܳܐ [ܚܳܐܰ]ܪ ܗ̱ܘܳܐ ܝܶܫܽܘܥ ܐܰܝܟܰܢܳܐ ܕ[ܦܩـ]ܕ ܗܳܝ ܕܳܐܦ ܬܰ[ܡܳܢ] ܢܶܚܙܽܘܢܳܢܝ [ܗܳ]ܢܰܘ ܕܶܝܢ ܕܰܐܝܟ ܦܐܶܐ ܠܰܐܠܳܗܳܐ [ܡܦـ]ܩܕ ܐ̱ܢܳܐ. ܕܙܶ[ܠܘ] ܬܰܠܡܶܕܘ ܠܟܽܠܗܽܘܢ ܥܰܡܡ̈ܶܐ ܟܰܕ ܥܳܡܕܺܝܢ ܐܢ̱ܬܽܘܢ ܠܗܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ. ܐܳܦܠܳܐ ܓܶܝܪ [ܡܶܢ ܠܒܰܪ] ܢܺܝܫܳܐ ܡܶܬܚܰܙܝܳܐ ܠܺܝ ܗܳܝ ܕܰܒܛܽܘܪܳܐ ܕܰܓܠܺܝܠܳܐ ܘܠܰܘ ܒܕܽܘܟܬܳܐ ܐ̱ܚܪܺܬܳܐ ܗܳܠܶܝܢ ܡ̈ܶܠܶܐ ܐܶܬܶܐܡܰܪ̈ܝ̱. ܓܠܺܝܠܳܐ ܓܶܝܪ ܐܰܚܰܝ̈܆ ܡܶܬܥܰܪܓܠܳܢܺܝܬܳܐ ܒܠܶܫܳܢܳܐ ܝܰܘܢܳܝܳܐ ܡܶܬܦܰܫܩܳܐ. ܡܶܛܽܠ ܗܳܢܳܐ ܐܳܦ ܓܰܠܓܰܠ ܡܶܫܬܰܡܗܳܐ ܓܠܺܝܠܳܐ^[33]. ܐܰܝܟ ܗܰܘ ܗܳܟܺܝܠ ܕܡܶܢ ܛܽܘܪܳܐ ܪܳܡܳܐ ܡܶܢ ܗܰܘ ܦܽܘܡܳܐ ܦܳܪܽܘܩܳܝܳܐ ܢܦܰܩ̈ܝ̱ ܗܳܠܶܝܢ ܡ̈ܶܠܶܐ܆ ܘܒܰܕܡܽܘܬ ܡܶܕܶܡ ܓܠܺܝܠܳܐ ܐܶܬܥܰܪܓܰܠ ܒܟܽܠܳܗ̇ ܬܺܒܶܝܠ܆ ܘܰܒܟܽܘܠܳܗ̇ ܪܗܶܛܘ ܬܰܠ̈ܡܺܝܕܶܐ. ܘܰܐܥܡܶܕܘ ܟܽܘܠܗܽܘܢ ܒܥܰܡܡ̈ܶܐ ܘܒܰܡܕܺܝܢ̈ܳܬܳܐ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ. ܐܶܠܳܐ ܟܰܕ ܗܳܠܶܝܢ ܡ̈ܶܠܶܐ ܫܡܰܥܘ ܗܶܢܽܘܢ ܬܰܠ̈ܡܺܝܕܶܐ ܠܘܳܬ ܘܠܳܐ ܚܰܕ ܥܰܡܳܐ ܐܶܙܰܠܘ ܡܶܚܕܳܐ. ܐܶܠܳܐ ܡܩܰܘܶܝܢ ܗ̱ܘܰܘ ܒܽܐܘܪܫܠܶܡ ܥܕܰܡܳܐ ܠܦܰܢܛܺܩܽܘܤܛܺܐ܆ ܟܰܕ ܡܣܰܟܶܝܢ ܠܡܶܐܬܺܝܬܳܐ ܕܪܽܘܚܳܐ܆ ܗܰܘ ܕܒܰܕܡܽܘܬ ܠܶܫܳܢ̈ܶܐ ܕܢܽܘܪܳܐ ܫܟܶܢ ܥܠܰܝܗܽܘܢ. ܟܰܕ ܗܳܟܰܢܳܐ ܓܶܝܪ ܐܰܪܒܥܺܝܢ ܝܰܘ̈ܡܳܬܳܐ ܡܫܰܚܠܦܳܐܺܝܬ ܠܗܽܘܢ ܡܶܬܚܰܘܶܐ ܗ̱ܘܳܐ ܘܳܐܟܶܠ ‌ܐܰܝܟ ܕܶܐܡܰܪ ܒܪܺܝܫܳܐ ܕܰܦܪܰܟܣܺܝܤ ܗܽܘ ܠܽܘܩܳܐ ܡܦܰܩܶܕ ܗ̱ܘܳܐ ܘܳܐܡܰܪ ܡܶܢ ܐܽܘܪܶܫܠܶܡ ܠܳܐ ܬܶܦܪܩܽܘܢ܆ ܐܶܠܳܐ ܣܰܟܰܘ ܠܫܽܘܘܕܳܝܶܗ ܕܰܐܒܳܐ ܗܰܘ ܕܰܫܡܰܥܬܽܘܢ ܡܶܢܝ ܕܝܽܘܚܰܢܳܢ ܡܰܢ ܐܰܥܡܶܕ ܒܡܰܝ̈ܳܐ܆ ܐܰܢ̱ܬܽܘܢ ܕܶܝܢ ܬܰܥܡܕܽܘܢ ܒܪܽܘܚܳܐ ܩܰܕܺܝܫܳܐ^[34]. ܘܛܳܒ ܕܶܝܢ ܫܰܦܺܝܪ ܗܳܝ ܕܠܳܐ ܬܶܦܪܩܽܘܢ܆ ܗܳܢܰܘ ܕܶܝܢ ܕܠܳܐ ܠܪܽܘܚܩܳܐ ܬܫܰܢܽܘܢ ܘܠܳܐ ܡܶܢ ܛܽܘܪܳܐ ܬܶܗܘܽܘܢ. ܘܠܳܐ ܐܶܡܰܪ ܕܠܳܐ ܬܶܦܩܽܘܢ ܣܳܟ ܡܶܢ ܐܽܘܪܶܫܠܶܡ. ܐܰܝܟܰܢܳܐ ܓܶܝܪ ܥܬܺܝܕ ܗ̱ܘܳܐ ܗܳܕܶܐ ܠܡܺܐܡܰܪ܆ ܗܰܘ ܕܰܦܩܰܕ ܠܗܽܘܢ ܠܰܓܠܺܝܠܳܐ ܠܡܶܐܬܳܐ. ܘܗܳܝ ܕܶܝܢ ܕܰܐܡܺܝܪܳܐ ܠܠܽܘܩܳܐ ܒܫܽܘܠܳܡܳܐ ܕܶܐܘܰܢܓܶܠܺܝܽܘܢ܆ ܘܰܗܘ̣ܳܐ ܕܟܰܕ ܗܽܘ ܡܒܰܪܶܟ ܠܗܽܘܢ ܐܰܪܚܶܩ ܡܶܢܗܽܘܢ ܘܡܶܬܥܰܠܶܐ ܗ̱ܘܳܐ ܠܰܫܡܰܝܳܐ^[35]. ܒܳܗ̇ ܕܶܝܢ ܒܰܕܡܽܘܬܳܐ܆ ܐܳܦ ܗܳܝ ܕܰܟܬܺܝܒܳܐ ܠܡܰܪܩܽܘܤ܆ ܗܽܘ ܡܰܢ ܗܳܟܺܝܠ ܡܳܪܝܳܐ ܡܶܢ ܒܳܬܰܪ ܕܡܰܠܶܠ ܠܗܽܘܢ ܐܶܬܥܰܠܺܝ ܠܶܗ ܠܰܫܡܰܝܳܐ܆ ܘܺܝܬܶܒ ܡܶܢ ܝܰܡܺܝܢܳܐ ܕܰܐ‌ܠܳܗܳܐ. ܢܶܣܬܰܟܰܠ ܕܰܒܝܰܘܡܳܐ ܗܰܘ ܕܰܐܪܒܥܺܝܢ ܗܘ̣ܳܬ܆ ܐܰܝܟܰܢܳܐ ܕܒܰܦܪܰܟܣܺܝܤ ܟܬܺܝܒ. ܐܰܝܠܶܝܢ ܓܶܝܪ ܕܟܰܕ ܡܣܰܝ̈ܟܳܢ ܟܬܒـ[ܘ] ܒܶܐܘܰܢܓܶܠܺܝܽܘܢ ܗܳܠܶܝܢ ܒܰܪܘܺܝܚܽܘܬܳܐ ܕܣܽܘܥܪܳܢܳܐ ܡܶܬܦܰܪ̈ܣܳܢ ܘܡܶܬܓܰܠ̈ܝܳܢ.

ܗܳܠܶܝܢ ܐܶܢܶܝܢ ܗܳܠܶܝܢ ܕܺܐܝܬ ܒܩܶܪ̈ܝܳܢܶܐ ܕܶܐܘܰܢܓ̈ܶܠܺܝܰܐ ܕܠܶܠܝܳܐ ܕܚܰܕܒܫܰܒܳܐ ܘܰܕܡܰܪ̈ܗܒܳܢ ܠܗܰܘ ܕܠܳܐ ܝܳܕܰܥ. ܐܰܝܠܶܝܢ ܕܰܐܝܟ ܚܰܘܒܬܳܐ ܚܢܰܢ ܦܪܰܥܢܰܢ. ܐܰܢ̱ܬܽܘܢ ܕܶܝܢ ܐܰܝܠܶܝܢ ܝܰܨܺܝܦܺܝܢ ܐܢ̱ܬܽܘܢ ܠܡܶܥܒܰܕ܆ ܟܰܕ ܗܳܠܶܝܢ ܫܳܡܥܺܝܢ ܐܢ̱ܬܽܘܢ܆ ܡܶܬܢܰܟܰܦ ܐ̱ܢܳܐ ܠܡܺܐܡܰܪ. ܟܰܕ ܪܗܳܛܳܐ ܕܰܠܒܶܝܬ ܚܶܙ̈ܘܳܢܶܐ܆ ܘܦܰܩܪܽܘܬܳܐ ܕܣܰܓܺܝ̈ܶܐܐ ܡܶܬܚܰܫܰܒ ܐ̱ܢܳܐ. ܢܶܬܶܠ ܠܟܽܘܢ ܓܶܝܪ ܗܽܘ ܡܳܪܝܳܐ ܚܰܝܠܳܐ܆ ܠܗܳܝ ܕܬܶܤܛܽܘܢ ܡܶܢ ܒܺܝܫܬܳܐ ܐܰܝܟ ܕܰܟܬܺܝܒ. ܘܬܶܥܒܕܽܘܢ ܛܳܒܬܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ.

ܦܪܰܣܢܰܢ ܘܰܦܪܰܥܢܰܢ^[36] ܐܶܢܶܝܢ ܠܟܽܘܢ. ܐܰܢ̱ܬܽܘܢ ܕܶܝܢ ܕܰܐܝܠܶܝܢ ܚܰܝܳܒܺܝܢ ܐܢ̱ܬܽܘܢ ܠܡܶܥܒܰܕ܆ ܟܰܕ ܗܳܠܶܝܢ ܫܳܡܥܺܝܢ ܐܢ̱ܬܽܘܢ܆ ܡܶܬܚܰܡܰܨ ܐ̱ܢܳܐ ܕܺܐ݀ܡܰܪ܆ ܟܰܕ ܠܪܶܗܛܳܐ ܕܰܠܘܳܬ ܚܶܙ̈ܘܳܢܶܐ ܘܰܠܦܰܩܪܽܘܬܳܐ ܕܣܰܓܺܝ̈ܶܐܐ ܡܶܬܚܰܫܰܚ ܐ̱ܢܳܐ. ܢܫܰܟܶܢ ܠܟܽܘܢ ܕܶܝܢ ܡܳܪܰܢ ܚܰܝܠܳܐ܆ ܠܡܰܣܛܳܝܽܘ ܡܶܢ ܒܺܝܫܬܳܐ ܐܰܝܟ ܗܳܝ ܕܰܟܬܺܝܒܳܐ܆ ܘܰܠܡܶܥܒܰܕ ܛܳܒܬܳܐ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܰܒܥܺܝܢ ܘܫܰܒܥܳܐ.