ܡܺܐܡܪܳܐ ܕܫܰܒܥܺܝܢ ܘܫܬܐ

ܟܰܕ ܕܽܘܟܪܳܢܳܐ ܘܒܳܥܽܘܬܳܐ ܡܶܫܬܰܡܠܝܳܐ ܗ̱ܘܳܬ ܐܰܝܟ ܥܝܳܕܳܐ܆ ܥܰܠ ܟܽܠܗܽܘܢ ܡܶܣ̈ܟܺܢܶܐ ܘܰܐܟܣ̈ܢܳܝܶܐ ܗܳܢܽܘܢ ܕܶܐܬܩܒܰܪܘ ܒܗܳܢܽܘܢ ܕܡܶܬܩܪܶܝܢ ܦܰܐܢܕܰܩ̈ܛܰܐܤ ܐܰܘ ܟܺܝܬ ܡܩܰܒ̈ܠܰܝ ܟܽܠ܆ ܘܳܐܦ ܗܳܫܳܐ ܥܕܰܟܺܝܠ ܡܶܬܩܰܒܪܺܝܢ. ܘܟܰܕ ܣܰܓܺܝ̈ܶܐܐ ܣܰܓܺܝ ܠܳܐ ܐܶܬܰܘ܆ ܐܶܬܶܐܡܰܪ ܗܽܘ ܡܺܐܡܪܳܐ ܡܶܢ ܒܳܬܰܪܟܶܢ.

76: ܟܰܕ ܠܘܳܬ ܒܺܝܫܽܘܬܶܗ ܕܙܰܒܢܳܐ ܗܳܢܳܐ ܚܳܐܰܪ ܐ̱ܢܳܐ ܘܰܠܘܳܬ ܫܽܘܘܫܳܛܳܐ ܕܰܚ̈ܛܳܗܶܐ܆ ܒܗܳܝ ܕܡܶܬܝܰܨ̈ܦܳܢ ܡܶܢ ܗܰܢܺܝ̈ܐܘܳܬܳܐ ܕܦܰܓܪܳܐ܆ ܒܰܣܝܳܐ ܕܶܝܢ ܝܰܨܺܝܦܽܘܬܳܐ ܕܢܰܦܫܳܐ܆ ܘܟܽܠܳܗ̇ ܐܽܘܪܚܳܐ ܕܫܰܦܺܝܪܽܘܬ ܕܶܚܠܬܳܐ ܒܦܳܣܺܝ̈ܩܳܬܳܐ ܠܡܺܐܡܰܪ܆ ܕܳܢܶܬ ܠܡܶܫܬܰܩ܆ ܘܕܰܠܘܳܬ ܢܰܦܫܝ ܐܰ݀ܦܢܶܝܘܗ̱ܝ ܠܗܰܘܢܳܐ܆ ܟܰܕ ܥܰܠ ܦܽܘܠܚܳܢܳܐ ܣܰܓܺܝܳܐܐ ܣܢܺܝܩ܆ ܡܶܛܽܠ ܗܳܝ ܕܟܽܘܒ̈ܶܐ ܣܰܓܺܝ̈ܶܐܐ ܡܰܝܬܶܐ222 ܕܰܣܢܺܝܩܺܝܢ ܕܢܶܬܦܰܣܩܽܘܢ ܒܟܽܠ ܝܽܘܡ܆ ܒܨܰܘܡܳܐ ܘܰܒܫܰܗܪܳܐ ܘܰܒܙܽܘܡܳܪܳܐ ܘܒܰܨܠܽܘܬܳܐ܆ ܘܰܒܣܰܡ̈ܡܳܢܶܐ ܗܳܢܽܘܢ ܕܫܰܪܟܳܐ ܘܰܥܡܺܝ̈ܠܶܐ ܕܰܬܝܳܒܽܘܬܳܐ܆ ܘܳܐܕܫ̈ܶܐ ܕܥܳܢܘܳܝܽܘܬܳܐ. ܠܡܰܚܣܶܢ ܓܶܝܪ ܗܳܟܰܢܳܐ ܢܶܦܓܕܺܝܘܗ̱ܝ ܐ̱ܢܳܫ ܠܚܺܐܦܶܗ ܕܒܶܣܪܳܐ.

ܟܰܕ ܗܳܠܶܝܢ ܕܶܝܢ ܡܶܬܚܰܫܰܒ ܐ̱ܢܳܐ܆ ܘܰܠܘܳܬ ܢܰܦܫܝ ܐܰܝܟ ܕܶܐܡܪܶܬ ܚܳܐܰܪ ܐ̱ܢܳܐ܆ ܘܦܺܝܠܳܣܽܘܦܺܝܣܳܐ ܥܳܒܶܕ ܐ̱ܢܳܐ܆ ܠܗܳܝ ܕܰܒܟܽܠܳܗ̇ ܢܛܽܘܪܬܳܐ ܬܶܛܰܪ ܠܠܶܒܳܐ ܕܺܝܠܳܟ ܐܰܝܟ ܕܰܟܬܺܝܒ^[1]. ܡܶܠܬܳܐ ܢܒܺܝ̣ܳܝ̣ܬܳܐ ܡܰܙܥܩܳܐ ܠܺܝ ܡܰܟܣܳܢܳܐܺܝܬ܆ ܐܳܘ ܪ̈ܳܥܰܘܳܬܳܐ ܕܺܐܝܣܪܳܐܶܝܠ. ܕܰܠܡܳܐ ܪܳܥܶܝܢ ܪ̈ܳܥܰܘܳܬܳܐ ܗܶܢܽܘܢ ܠܗܽܘܢ܆ ܠܳܐ ܗ̱ܘܳܐ ܠܥܶܪ̈ܒܶܐ ܪܳܥܶܝܢ ܪ̈ܳܥܰܘܳܬܳܐ^[2]. ܐ̱ܚܪܺܢܳܐ ܕܶܝܢ ܐ̱ܢܳܫ ܘܳܐܦ ܗܽܘ ܢܒܺܝܳܐ܆ ܠܫܶܬܩܳܐ ܕܟܳܗ̈ܢܶܐ ܡܩܰܛܪܶܓ܆ ܐܰܝܟ ܐܰܝܢܳܐ ܕܩܳܛܶܠ ܠܰܒ̈ܢܰܝܢܳܫܳܐ܆ ܘܰܒܗܳܝ ܕܠܳܐ ܡܰܠܶܦ܆ ܡܛܰܫܶܐ ܠܽܐܘܪܚܳܐ ܕܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ. ܐܳܡܰܪ ܓܶܝܪ܆ ܛܰܫܺܝܘ ܟܳܗ̈ܢܶܐ ܐܽܘܪܚܳܐ. ܩܛܰܠܘ ܠܰܫܟܺܝܡ܆ ܡܶܛܽܠ ܕܠܳܐ ܢܳܡܽܘܣܳܝܽܘܬܳܐ ܥܒܰܕܘ^[3]. ܕܰܐܝܟ ܗܳܢܳܐ ܐܺܝܬܰܘܗ̱ܝ ܥܰܒܕܳܐ ܗܰܘ ܕܶܐܬܗܰܝܡܰܢ ܗܳܝ ܟܰܟܪܳܐ܆ ܘܠܳܗ̇ ܠܗܳܝ ܕܶܐܬܗܰܝܡܢܰܬ ܛܰܡܪܳܗ̇ ܒܰܐܪܥܳܐ܆ ܘܫܳܡܰܥ ܗ̱ܘܳܐ ܠܰܓܙܳܪ ܕܺܝܢܳܐ ܗܰܘ ܕܚܺܝܠܳܐ ܕܳܐܡܰܪ: ܕܰܠܥܰܒܕܳܐ ܗܰܘ ܠܳܐ ܚܳܫܚܳܐ ܐܰܦܩܽܘܗ̱ܝ ܠܚܶܫܽܘܟܳܐ ܒܰܪܳܝܳܐ܆ ܬܰܡܳܢ ܢܶܗܘܶܐ ܒܶܟܝܳܐ ܘܚܽܘܪܳܩܳܐ ܕܫܶܢ̈ܶܐ^[4]. ܥܰܡܽܘܤ ܕܶܝܢ ܗܰܘ ܢܒܺܝܳܐ܆ ܐܳܦ ܐܰܝܟ ܕܒܳܐܕܫܳܐ ܕܪܽܘܓܙܳܐ ܫܶܬܩܳܐ ܕܰܐܝܟ ܗܳܢܳܐ ܓܳܙܶܡ܆ ܕܡܰܘܬܳܐ ܣܰܓܺܝܳܐܐ ܡܰܥܒܶܕ ܟܰܕ ܐܳܡܰܪ: ܒܝܰܘܡܐ ܗܰܘ ܐܳܡܰܪ ܡܳܪܝܳܐ܆ ܣܰܓܺܝܳܐܐ ܢܶܗܘܶܐ ܗܰܘ ܕܢܰܦܺܝܠ ܒܟܽܠ ܕܽܘܟܬܳܐ^[5]. ܐ݀ܶܫܕܶܐ ܫܶܬܩܳܐ.

ܐܰܢܰܢܩܺܐ ܗܳܟܺܝܠ ‌ܐܺܝܬܶܝܗ̇܆ ܐܰܝܟܰܢܳܐ ܕܠܳܐ ܢܶܣܬܒܰܪ ܕܰܚܢܰܢ ܠܰܢ ܪܳܥܶܝܢ ܚ̱ܢܰܢ ܘܠܰܘ ܠܟܽܘܢ܆ ܘܕܰܡܛܰܫܶܝܢ ܚ̱ܢܰܢ ܠܽܐܘܪܚܳܐ ܡܰܠܦܳܢܺܝܬܳܐ ܕܗܳܠܶܝܢ ܕܦܳܩ̈ܚܳܢ܆ ܘܫܰܬܺܝܩܺܝܢܰܢ ܫܶܬܩܳܐ ܡܙܰܡܢܳܢܳܐ ܕܡܰܦܽܘܠܬܳܐ ܘܰܕܡܰܘܬܐ܆ ܕܺܐ݀ܡܰܪ ܗܳܠܶܝܢ ܕܰܐܥܒ̈ܰܕܶܝܢ ܒܺܝ ܥܳܩܬܳܐ܆ ܘܗܳܠܶܝܢ ܕܰܠܒܰܪ̱ܬ ܩܳܠܳܐ ܕܺܝܠܝ ܠܒܺܝ̈ܟܳܢ ܗ̱ܘܰܝ̈܆ ܐܰܝܟܰܢܳܐ ܕܶܐ݀ܙܱܡܰܪ ܚܢܺܝܓܳܐܺܝܬ ܥܰܡ ܢܒܺܝܳܐ ܕܰܘܺܝܕ܆ ܗܳܝ ܕܚܶܪܫܶܬ ܘܶܐܬܡܰܟܟ̣ܶܬ ܘܫܶܬܩܶܬ ܡܶܢ ܛܳܒ̈ܳܬܳܐ܆ ܘܟܺܐܒܳܐ ܕܺܝܠܝ ܐܶܬܚܰܕܰܬ̣^[6]. ܡܳܢܳܐ ܓܶܝܪ ܐ̱ܢܳܫ ܢܺܐܡܰܪ܆ ܐܶܡܰܬܝ ܕܟܰܕ ܪܰܩܕܽܘܬܳܐ ܘܰܚܙܳܬܳܐ ܗܳܝ ܕܪ̈ܰܟܫܳܐ ܘܰܕܚܰܝ̈ܘܳܬ ܫܶܢܳܐ ܟܰܗܝ̈ܢܳܢ܆ ܘܒܰܕܡܽܘܬ ܪܶܕܝܳܐ ܕܢܰܗܪܳܐ ܡܩܰܒ̈ܠܳܢ ܠܟܶܢܫܳܐ ܣܰܓܺܝܳܐܐ ܘܰܕܠܳܐ ܣܳܟܳܐ ܕܳܐܙܶܠ ܠܘܳܬܗܶܝܢ܆ ܚܳܙܶܐ ܠܟܶܢܫܳܐ ܕܥܺܕܬܳܐ ܕܰܒܩܰܠܺܝܠ ܩܰܠܺܝܠ ܒܰܕܡܽܘܬ ܗܰܒܳܒܳܐ ܢܳܬܰܪ ܟܺܝܬ ܘܚܳܡܶܐ܆ ܘܟܽܠܶܗ ܗܳܢܳܐ܆ ܐܰܝܟܰܢܳܐ ܕܰܩܕܳܡ ܗܳܠܶܝܢ ܚܰܡܫܳܐ ܝܰܘ̈ܡܳܬܳܐ ܕܰܩܕܳܡ ܩܰܠܺܝܠ ܥܒܰܪܘ܆ ܟܰܕ ܡܶܫܬܰܡܠܝܳܐ ܗ̱ܘܳܬ ܒܳܥܽܘܬܳܐ ܘܕܽܘܟܪܳܢܳܐ ܗܰܘ ܕܣܰܓܺܝ ܐܺܝܬܰܘܗ̱ܝ ܕܫܰܦܺܝܪܽܘܬ ܕܶܚܠܬܳܐ܆ ܗܰܘ ܕܰܠܘܳܬܶܗ ܟܽܠ ‌ܐ̱ܢܳܫ ܙܳܕܶܩ ܗ̱ܘܳܐ ܠܡܶܪܗܰܛ ܐܰܟܚܕܳܐ ܘܰܠܡܶܬܟܰܢܳܫܽܘ܆ ܐܳܦܠܳܐ ܠܚܰܕ ܐ̱ܢܳܫ ܐܰܝܟ ܕܰܠܡܺܐܡܰܪ ܡܶܢ ܗܳܢܽܘܢ ܕܰܒܥܰܡܳܐ ܡܶܬܡܢܶܝܢ ܢܶܚܙܶܐ܆ ܐܶܠܳܐ ܕܰܚܢܰܢ ܒܰܠܚܽܘܕܰܝܢ ܢܶܗܘܶܐ ܐܺܝܬܰܝܢ ܗ̱ܘܰܝܢ܆ ܗܳܢܽܘܢ ܕܰܒܬܶܫܡ̈ܫܳܬܳܐ ܐܰ‌ܠܳܗܳܝ̈ܳܬܳܐ ܡܰܟܬܒܺܝܢ ܚ̱ܢܰܢ܆ ܕܰܡܫܰܡܠܶܝܢ ܗ̱ܘܰܝܢ ܟܺܝܬ ܘܰܕܡܶܫܬܰܡܠܶܝܢ܆ ܘܕܰܚܢܰܢ ܠܰܢ ܡܕܰܒܪܺܝܢ ܗ̱ܘܰܝܢ ܡܰܠܽܘܢ܆ ܐܰܘ ܕܰܒܪܺܝܫܳܐ ܕܰܐ̱ܚܪ̈ܳܢܶܐ ܐܳܙܺܠ̱ܝܢ ܗ̱ܘܰܝܢ܆ ܘܕܰܒܬܰܟܫ̈ܦܳܬܳܐ ܗܳܠܶܝܢ ܕܒܳܥ̈ܘܳܬܳܐ ܚܢܰܢ ܡܫܰܪܶܝܢ ܗ̱ܘܰܝܢ܆ ܘܰܒܗܳܠܶܝܢ ܬܽܘܒ ܚܢܰܢ ܥܢܶܝܢ ܗ̱ܘܰܝܢ܆ ܘܰܠܟܽܠ ܚܰܕ ܛܶܟܣܳܐ ܡܡܰܠܶܝܢ ܗ̱ܘܰܝܢ܆ ܒܠܳܐ ܡܨܰܒܬܽܘܬܳܐ ܡܶܕܶܡ ܘܒܶܐܣܟܺܡܳܐ ܡܶܬܓܰܚܟܳܢܳܐ.

ܕܡܳܢܳܐ ܕܶܝܢ ܐܺܝܬܶܝܗ̇ ܗ̱ܘܳܬ ܐܳܦ ܗܺܝ ܥܶܠܬܳܐ ܕܺܝܠܳܗ̇ ܕܒܳܥܽܘܬܳܐ ܘܰܕܚܰܓܳܐ ܢܶܚܙܶܐ. ܕܽܘܟܪܳܢܳܐ ܕܓܰܒܪ̈ܶܐ ܡܶܣ̈ܟܺܢܶܐ ܘܰܐܟܣ̈ܢܳܝܶܐ ܗܳܢܽܘܢ ܕܰܒܙܰܒܢܳܐ ܣܰܓܺܝܳܐܐ ܗܰܘ ܕܰܥܒܰܪ ܥܕܰܡܳܐ ܠܝܰܘܡܳܢܳܐ ܫܰܠܶܡܘ ܚܰܝ̣ܰܝ̣̈ܗܽܘܢ܆ ܘܫܶܢܬܳܐ ܗܳܝ ܐ̱ܚܪܳܝܬܳܐ ܘܰܕܠܰܝܬ ܠܡܶܫܬܐܳܠܽܘ ܡܶܢܳܗ̇ ܕܡܶܟܘ܆ ܘܰܒܩܰܒܪܳܐ ܚܰܕ ܘܓܰܘܳܢܳܝܳܐ ܐܰܝܟ 222ܕܰܒܦܽܘܛܩܳܐ ܫܪܰܘ܆ ܘܰܠܒܶܣܪܳܐ ܗܰܘ ܕܡܶܢ ܛܺܝܢܳܐ ܐܶܬܓܒܶܠ ܘܶܐܬܶܐܣܰܪ ܐܰܟܚܕܳܐ ܥܰܡ ܢܰܦܫܳܐ ܡܠܺܝܠܬܳܐ ܘܕܰܒܨܰܠܡܳܐ ܕܰܐ‌ܠܳܗܳܐ ܐܶܬܒܰܪܝܰܬ ܐܰܓܥܶܠܘ ܠܰܐܪܥܳܐ. ܕܗܳܢܳܐ ܕܽܘܟܪܳܢܳܐ܆ ܠܰܘ ܠܶܐܣܟܺܡܳܐ ܢܶܚܙܶܐ ܒܰܠܚܽܘܕ܆ ܐܶܠܳܐ ܠܗܰܘܢܳܐ ܗܰܘ ܕܣܺܝܡ ܒܶܗ ܢܒܰܚܶܢ. ܗܳܢܽܘܢ ܓܶܝܪ ܕܡܶܢ ܫܽܘܪܳܝܳܐ ܣܳܡܘ ܢܳܡܽܘܣܳܐ ܕܢܶܫܬܰܡܠܶܐ܆ ܟܰܕ ܝܳܕܥܺܝܢ ܗ̱ܘܰܘ ܢܰܗܺܝܪܳܐܺܝܬ܆ ܕܟܽܠ ܕܽܘܟܪܳܢܳܐ ܕܗܳܢܽܘܢ ܕܒܰܡܫܺܝܚܳܐ ܫܟܶܒܘ܆ ܠܘܳܬ ܩܝܳܡܬܳܐ ܐܺܝܬ ܠܶܗ ܡܶܬܥܰܠܝܳܢܽܘܬܳܐ ܘܰܠܘܳܬ ܚܰܝ̈ܶܐ ܗܳܢܽܘܢ ܕܡܶܣܬܰܟܶܝܢ܆ ܘܕܰܡܫܺܝܚܳܐ ܠܰܘ ܚܠܳܦ ܗܳܠܶܝܢ ܐ̱ܢܳܫܺܝ̈ܢ ܘܰܚܠܳܦ ܗܳܠܶܝܢ ܐܶܠܳܐ ܚܠܳܦ ܟܽܠܗܽܘܢ ܒܢܰܝ̈ܢܳܫܳܐ ܡܺܝܬ܆ ܘܰܠܟܽܠܗܽܘܢ ܩܳܡ ܟܰܕ ܕܟܽܠܗܽܘܢ ܝܳܨܶܦ ܐܰܝܟ ܥܳܒܽܘܕܳܐ ܕܟܽܠ܆ ܟܰܕ ܗܳܠܶܝܢ ܕܢܳܩ̈ܦܳܢ ܠܡܳܪܳܐ ܒܰܝܬܳܝܳܐ ܕܺܝܠܗܽܘܢ ܡܶܬܪܰܥܶܝܢ ܗ̱ܘܰܘ܆ ܘܰܠܝܽܘܬܪܳܢܳܐ ܓܰܘܳܢܳܝܳܐ ܕܥܽܘܕܪܳܢܳܐ ܐܰ‌ܠܳܗܳܝܳܐ܆ ܒܺܐܝ̈ܕܰܝܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ ܡܰܟܪܙܺܝܢ ܗ̱ܘܰܘ܆ ܕܟܽܠܗܽܘܢ ܟܢܺܝܫܳܐܺܝܬ ܗܳܢܽܘܢ ܕܡܶܢ ܟܽܠܳܗ̇ ܫܰܘܝܽܘܬ ܓܶܢܣܳܐ ܘܒܰܝܬܳܝܽܘܬܳܐ ܗܳܝ ܒܶܣܪܳܢܳܝܬܳܐ ܐܶܬܓܠܶܙܘ܆ ܛܰܦܶܣܘ ܘܬܰܚܶܡܘ ܕܢܶܫܬܰܡܠܶܐ ܕܽܘܟܪܳܢܳܐ܆ ܟܰܕ ܠܘܳܬ ܗܰܘ ܟܢܽܘܫܝܳܐ ܚܳܝܪܺܝܢ ܗ̱ܘܰܘ܆ ܗܰܘ ܕܟܰܕ ܠܘܳܬܶܗ ܚܳܐܰܪ ܗ̱ܘܳܐ ܦܰܘܠܽܘܤ ܐܳܡܰܪ ܗ̱ܘܳܐ: ܐܰܝܟܳܐ ܕܠܰܝܬ ܝܰܘܢܳܝܳܐ ܘܝܽܗ̱ܘܕܳܝܳܐ܆ ܓܙܽܘܪܬܳܐ ܘܥܽܘܪܠܽܘܬܐ܆ ܒܰܪܒܪܳܝܳܐ܆ ܣܩܽܘܬܳܝܳܐ܆ ܥܰܒܕܳܐ܆ ܒܰܪ ܚܺܐܪ̈ܶܐ܆ ܐܶܠܳܐ ܟܽܠܗܽܘܢ ܘܰܒܟܽܠܗܽܘܢ ܡܫܺܝܚܳܐ^[7].

ܙܳܕܶܩ ܗ̱ܘܳܐ ܗܳܟܺܝܠ܆ ܕܠܽܘܩܕܰܡ ܡܰܢ ܡܶܛܽܠܳܬܳܗ̇ ܕܓܰܘܳܢܳܝܽܘܬܳܐ ܕܰܟܝܳܢܳܐ ܢܶܬܟܰܢܰܫ ܐܰܟܚܕܳܐ܆ ܘܗܳܕܶܐ ܛܰܝܒܽܘܬܳܐ ܢܰܥܶܠ ܠܰܩܒܽܘܪܬܳܐ ܚܣܺܝܬܳܐ ܕܗܳܢܽܘܢ ܕܩܰܕܶܡܘ ܐܶܙܰܠܘ܆ ܗܳܝ ܕܳܐܦ ܠܰܢ ܐ̱ܚܪ̈ܳܢܶܐ ܢܰܥܠܽܘܢ ܡܶܢ ܒܳܬܰܪܟܶܢ. ܕܬܰܪܬܶܝܢ ܕܶܝܢ܆ ܕܡܶܢ ܢܳܡܽܘܣܳܐ ܗܰܘ ܕܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܕܥ̈ܺܕܳܬܳܐ ܢܶܬܟܰܚܰܕ ܗ̱ܘܰܝܢ܆ ܘܡܶܢ ܥܽܘܕܪܳܢܳܐ ܕܰܡܫܺܝܚܳܐ ܗܰܘ ܕܰܚܠܳܦ ܟܽܠܢܳܫ ܡܺܝܬ ܘܩܳܡ܆ ܘܢܶܬܚܰܫܰܒ ܐܳܦ ܗܳܝ ܠܳܚܡܳܐܺܝܬ܆ ܕܗܽܘ ܡܫܺܝܚܳܐ ܬܽܘܒ ܐܺܝܬܰܘܗ̱ܝ ܗܰܘ ܕܰܒܝܰܕ ܡܶܣ̈ܟܺܢܶܐ ܘܰܐܟܣ̈ܢܳܝܶܐ ܡܶܬܝܰܩܰܪ܆ ܗܰܘ ܕܳܐܡܰܪ܆ ܕܰܟܡܳܐ ܕܰܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܐܰܚ̈ܶܐ ܕܺܝܠܝ ܙܥܽܘܪ̈ܶܐ܆ ܠܺܝ ܥܒܰܕܬܽܘܢ^[8]. ܘܰܠܘܳܬ ܬܰܪܥܺܝܬܳܐ ܕܶܝܢ ܗܳܝ ܕܝܰܬܺܝܪ ܪܳܡܳܐ ܢܶܬܥܰܠܶܐ ܘܢܶܣܰܩ܆ ܘܰܠܡܺܝ̈ܬܶܐ ܗܳܠܶܝܢ ܗܳܢܽܘܢ ܕܡܶܣܬܰܒܪܺܝܢ ܫܺܝ̈ܛܶܐ܆ ܢܶܫܟܰܚ ܐܶܢܽܘܢ ܕܰܒܨܰܠܡܳܐ ܘܺܐܝܩܳܪܳܐ ܐܰ‌ܠܳܗܳܝܳܐ ܡܝܰܩܪܺܝܢ. ܡܫܺܝܚܳܐ ܓܶܝܪ ܗܰܘ ܡܶܠܬܳܐ ܕܰܐ‌ܠܳܗܳܐ܆ ܗܰܘ ܥܳܒܽܘܕܳܐ ܕܗܳܢܳܐ ܟܽܠ ܘܡܳܪܳܐ ܕܟܽܠ܆ ܒܰܕܡܽܘܬ ܐܰܟܣܢܳܝܳܐ ܘܡܶܣܟܺܢܳܐ ܒܝܰܕ ܡܶܐܬܺܝܬܶܗ ܗܳܝ ܕܒܰܒܣܰܪ ܐܶܬܳܐ ܠܘܳܬܰܢ. ܡܶܛܽܠ ܟܺܝܬ ܕܰܠܕܺܝܠܶܗ ܐܶܬܳܐ܆ ܘܗܳܢܽܘܢ ܕܺܝܠܶܗ ܠܳܐ ܩܰܒܠܽܘܗܝ^[9]܆ ܗܳܝ ܕܳܐܡܰܪ ܟܬܳܒܳܐ ܟܳܗܢܳܝܳܐ. ܘܡܶܛܽܠܳܬܰܢ ܐܶܬܡܰܣܟܰܢ ܟܰܕ ܥܬܺܝܪܳܐ ܐܺܝܬܰܘܗ̱ܝ܆ ܐܰܝܟܰܢܳܐ ܕܰܚܢܰܢ ܒܡܶܣܟܺܢܽܘܬܶܗ ܕܗܰܘ ܢܶܥܬܰܪ. ܘܟܽܠܶܗ ܗܳܢܳܐ ܐܶܬܡܰܣܟܰܢ܆ ܐܰܝܟܰܢܳܐ ܕܢܰܙܥܶܩ ܕܰܠܬܰܥ̈ܠܶܐ ܢܶܩ̈ܥܶܐ ܐܺܝܬ ܠܗܽܘܢ܆ ܘܰܠܦܳܪ̈ܚܳܬܳܐ ܕܰܫܡܰܝܳܐ ܡ̈ܛܰܠܠܶܐ܆ ܠܰܒܪܶܗ ܕܶܝܢ ܕܐ̱ܢܳܫܳܐ ܠܰܝܬ ܠܶܗ ܐܰܝܟܳܐ ܕܢܶܣܡܽܘܟ ܪܺܝܫܶܗ^[10]. ܘܗܳܝ ܕܰܬܡܺܝܗܳܐ܆ ܠܡܰܓܣܶܗ ܗܰܘ ܐ̱ܚܪܳܝܳܐ ܕܡܶܢ ܒܳܬܰܪ ܨܠܺܝܒܳܐ܆ ܗܰܘ ܐܳܡܰܪ ܐ̱ܢܳܐ ܕܰܒܩܰܒܪܳܐ. ܠܰܘ ܓܶܝܪ ܒܩܰܒܪܳܐ ܕܺܝܠܶܗ ܐܶܬܬܣܺܝܡ܆ ܐܶܠܳܐ ܝܰܘܣܶܦ ܗܰܘ ܕܡܶܢ ܪܳܡܬܳܐ ܒܩܰܒܪܳܐ ܒܰܝܬܳܝܳܐ ܕܺܝܠܶܗ ܐܰܝܟ ܕܠܰܐܟܣܢܳܝܳܐ ܩܰܒܠܶܗ. ܘܟܰܕ ܥܰܪܛܶܠܳܝܳܐ ܐܺܝܬܰܘܗ̱ܝ ܗ̱ܘܳܐ܆ ܒܬܰܟܣܺܝܬܳܐ ܕܟܶܬܳܢܳܐ ܟܰܪܟܶܗ܆ ܘܰܐܫܠܡܶܗ ܠܰܩܒܽܘܪܬܳܐ ܗܳܝ ܕܗܳܟܰܢܳܐ ܐܶܬܦܰܪܢܣܰܬ܆ ܘܰܥܕܰܡܳܐ ܠܗܳܕܶܐ ܐܶܬܡܰܟܟܰܬ.

ܟܰܕ ܗܳܠܶܝܢ ܫܳܡܥܺܝܢ ܐܢ̱ܬܽܘܢ ܐܶܬܒܰܩܰܘ܆ ܕܠܰܘ ܒܡܺܝ̈ܬܶܐ ܐܰܝܠܶܝܢ ܕܗܽܘ ܐܰܒܣܺܝܬܽܘܢ܆ ܐܶܠܳܐ ܒܶܗ ܒܰܐܠܳܗܳܐ ܗܰܘ ܕܡܶܛܽܠܳܬܰܢ ܨܶܒܝܳܢܳܐܺܝܬ ܚܰܫ ܒܰܒܣܰܪ ܘܡܺܝܬ. ܡܰܢܽܘ ܗܳܟܺܝܠ ‌ܐܰܪܰܐ ܡܶܢ ܐܰܝܠܶܝܢ ܕܠܰܘ ܣܰܓܺܝ ܐܺܝܬ ܠܗܽܘܢ ܠܳܐ ܡܰܪܓܫܳܢܳܐܺܝܬ^[11] ܢܕܰܡܰܥ܆ ܕܟܰܕ ܡܶܢ ܛܳܒ̈ܳܬܳܐ ܕܕܰܐܝܟ ܗܳܠܶܝܢ ܐܶܬܓܠܶܙܬܽܘܢ܆ ܘܠܰܟ̈ܢܽܘܫܝܶܐ ܐܰ‌ܠܳܗܳܝ̈ܶܐ ܗܳܠܶܝܢ ܗܘ̣ܰܘ ܚܠܺܝܡܺܝܢ ܐܶܡܰܪܬܽܘܢ܆ ܘܰܠܘܳܬ ܪ̈ܰܟܫܳܐ ܘܰܠܘܳܬ ܚܰܝ̈ܘܳܬ ܫܶܢܳܐ܆ ܘܰܠܘܳܬ ܚܙܳܬܳܐ ܕܓܽܘܚܟܳܐ ܘܰܕܪܰܦܝܽܘܬܳܐ ܡܬܰܘܪܺܝܢ ܗ̱ܘܰܝܬܽܘܢ ܘܰܦܥܺܝܪܺܝܢ ܐܢ̱ܬܽܘܢ܆ ܗܳܢܶܝܢ ܕܙܰܒ̈ܢܺܝܢ ܣܰܓܺܝ̈ܳܐܢ ܡܰܠܠܶܬ ܠܟܽܘܢ ܡܶܛܽܠܳܬܗܶܝܢ. ܘܕܰܐܝܟܰܢܳܐ ܐܺܝܬܰܝܗܶܝܢ ܝܰܬܺܝܪ ܡܶܢ ܟܽܠ ܡܶܕܶܡ ܕܰܒܥܶܠ̈ܕܒܳܒܺܝܢ ܘܣܰܢܝ̈ܳܐܢ ܠܰܐܠܳܗܳܐ܆ ܘܕܰܠܢܰܦܫܳܐ ܒܚܰܫ̈ܶܐ ܗܳܢܽܘܢ ܕܨܰܥܪܳܐ ܛܳܡܪ̈ܳܢ܆ ܒܝܰܕ ܣܰܓܺܝ̈ܳܐܬܳܐ ܚܰܘܺܝܬ̣. ܘܳܐܦ ܡܶܢܗܶܝܢ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ ܫܰܪܰܪܬܳܗ̇ ܒܬܰܚ̈ܘܝܳܬܳܐ܆ ܘܰܐܘܬ̣ܪܶܬ̣ ܘܠܳܐ ܡܶܕܶܡ ܝܰܬܺܝܪܳܐ. ܐܶܠܳܐ ܠܘܳܬ ܗܳܠܶܝܢ ܡܰܢ ܣܰܓܺܝܳܐܐ ܐܺܝܬܰܘܗ̱ܝ ܪܶܗܛܳܐ܆ ܘܰܫܩܳܠܛܰܥܢܳܐ ܚܺܝܨܳܐ ܥܰܡ ܕܽܘܥܬܳܐ ܡܶܕܶܡ ܘܰܐ‌ܠܺܝܨܽܘܬܳܐ܆ ܐܰܝܟܰܢܳܐ ܕܳܐܦܠܳܐ ܡܶܢ ܡܢܳܬܳܐ ܗܳܝ ܕܝܰܬܺܝܪ ܡܶܢ ܟܽܠ ܙܥܽܘܪܝܳܐ ܕܦܽܘܪܓܳܝܳܐ ܗܰܘ ܡܰܘܒܕܳܢܳܐ ܬܶܦܕܽܘܢ. ܕܥܺܕܬܳܐ ܕܶܝܢ ܩܰܕܺܝܫܬܳܐ ܐܳܦ ܗܳܝ ܕܰܬܕܽܘܫܽܘܢ ܐܶܣܟܽܘܦܬܳܗ̇ ܡܶܟܺܝܠ܆ ܡܫܳܟܳܐ ܚܳܫܒܺܝܢ ܐܢ̱ܬܽܘܢ. ܡܶܢ ܗܳܪܟܳܐ ܒܶܛܠܳܢܳܐ ܘܪܶܚܡܰܬ ܟܰܪܣܳܐ܆ ܘܰܫܪܺܝܚܽܘܬܳܐ ܕܗܳܠܶܝܢ ܗܰܢܺܝ̈ܐܘܳܬܳܐ ܐ̱ܚܪ̈ܳܢܝܳܬܳܐ܆ ܘܚܰܣܺܝܪܽܘܬܳܐ ܕܢܰܦܩ̈ܳܬܳܐ܆ ܘܗܳܠܶܝܢ ܕܫܰܪܟܳܐ ܫܳܬܶܩ ܐ̱ܢܳܐ܆ ܕܕܰܠܡܳܐ ܐܶ݀ܣܬܒܰܪ ܕܰܢܒܺܝܳܐ ܕܒܺܝ̈ܫܳܬܳܐ ܐܺܝܬܰܝ. ܛܰܥܝܳܐ ܠܰܢ ܓܶܝܪ ܕܰܕܗܳܠܶܝܢ ܪܳܡܶܝܢ ܚ̱ܢܰܢ ܙܰܪ̈ܥܶܐ ܒܝܰܕ ܗܳܢܶܝܢ ܕܫܰܪܺܝܢ ܚ̱ܢܰܢ ܠܡܶܣܥܰܪ܆ ܕܗܳܢܶܝܢ ܕܳܐܦܠܳܐ ܫܶܡܥܗܶܝܢ ܚܳܫܒܺܝܢ ܚ̱ܢܰܢ ܕܺܐܝܬܰܘܗ̱ܝ ܡܶܣܬܰܝܒܪܳܢܳܐ. ܠܗܳܠܶܝܢ ܡܰܢ ܗܳܟܺܝܠ ܕܰܥܬܺܝ̈ܕܳܢ܆ ܐܰ‌ܠܳܗܳܐ ܢܶܬܟܽܘܤ. ܠܗܳܢܶܝܢ ܕܶܝܢ ܕܰܥܒܰܪ̈ܶܝܢ ܚܢܰܢ ܢܰܥܗܶܕܟܽܘܢ. ܝܳܕܥܺܝܢ ܐܢ̱ܬܽܘܢ ܗ̱ܘ̣ ܕܰܒܙܰܒܢܳܐ ܗܰܘ ܕܰܥܒܰܪ ܕܣܰܬܘܳܐ܆ ܓܙܳܡ̈ܶܐ ܕܕܰܐܝܟ ܐܰܝܠܶܝܢ ܡܰܚ̈ܘܳܬܳܐ ܬܠܶܝܢ ܗ̱ܘܰܘ ܠܥܶܠ ܡܶܢܰܢ܆ ܟܶܠܝܳܢܳܐ ܕܡܶܛܪ̈ܶܐ ܘܟܰܘܪܳܢܳܐ܆ ܘܙܰܘܥܳܐ ܕܠܳܐ ܡܫܽܘܚܬܳܐ ܕܰܐܪܥܳܐ ܠܰܘ ܚܕܳܐ ܙܒܰܢ ܐܶܠܳܐ ܣܰܓܺܝ̈ܳܐܬܳܐ܆ ܕܣܳܦܶܩ ܗ̱ܘܳܐ ܕܢܰܪܥܠܺܝܗ̇ ܘܢܶܥܩܪܺܝܗ̇ ܠܰܡܕܺܝܢ̱ܬܳܐ ܘܰܕܥܰܡ ܓܰܒܪ̈ܶܝܗ̇ ܢܰܪܡܶܝܗ̇^[12]. ܐܰܝܟ ܕܳܐܦܠܳܐ ܕܗܳܘܶܐ ܠܶܗ ܡܬܽܘܡ ܬܶܬܺܝܕܰܥ ܗ̱ܘܳܬ܆ ܫܳܢܝܽܘܬܳܐ ܘܦܰܩܪܽܘܬܳܐ ܗܳܝ ܕܫ̈ܺܐܕܶܐ܆ ܕܰܠܟܽܠ ܩܰܘܡܬܳܐ ܡܰܢ ܪܳܥܝܳܐ ܗ̱ܘܳܬ܆ ܡܶܢ ܐ̱ܢܳܫܺܝ̈ܢ ܕܶܝܢ ܒܰܡܨܰܕܝܳܢܽܘܬܳܐ ܐܰܝܟ ܕܰܒܡܰܫܟܢܳܐ ܗܘ̣ܳܬ ܒܶܐܫܬܥܶܢܝܳܐ܆ ܡܶܛܽܠ ܝܽܘܬܪܳܢܳܐ ܛܰܢܦܳܐ ܘܗܽܘܓܳܝܳܐ ܕܰܩܪܳܒܳܐ ܫܰܪܒܬܳܢܳܝܳܐ ܘܕܰܫܓܽܘܫܝܳܐ܆ ܘܕܰܚܛܽܘܦܝܳܐ ܕܢܽܘܟܪ̈ܳܝܳܬܳܐ ܐܰܝܟ ܕܰܒܦܽܘܠܳܓܳܐ ܕܒ̈ܶܙܬܶܐ.

ܐܶܬܕܰܟܪܘ̱ ܠܒܳܥ̈ܘܳܬܳܐ ܗܳܢܶܝܢ ܟܽܘ̈ܠܳܝܳܬ ܟܶܢ̈ܫܶܐ܆ ܠܗܳܢܽܘܢ ܒܶܟ̈ܝܶܐ܆ ܠܗܳܢܶܝܢ ܬܰܟܫ̈ܦܳܬܳܐ. ܠܗܳܠܶܝܢ ܢܶ݀ܩܕܽܘܡ ܢܰ݀ܥܶܠ ܩܕܳܡ ܗܳܠܶܝܢ ܕܰܥܬܺܝ̈ܕܳܢ. ܠܳܐ ܠܢܶܣܝܳܢܳܐ ܕܺܝܠܗܶܝܢ ܕܒܺܝ̈ܫܳܬܳܐ ܢ݀ܟܰܬܰܪ܆ ܗܰܘ ܕܰܚܛܰܦ ܘܦܰܠܶܛ ܠܰܢ ܡܶܢܶܗ ܗܰܘ ܪܳܚܶܡ ܐ̱ܢܳܫܳܐ܆ ܕܰܠܡܳܐ ܐܳܦ ܥܠܰܝܢ ܬܶܬܡܰܠܶܐ ܡܶܠܬܳܐ ܐܰ‌ܠܳܗܳܝܬܳܐ ܗܳܝ ܕܳܐܡܪܳܐ܆ ܕܶܐܡܰܬܝ ܕܩܳܛܶܠ ܗ̱ܘܳܐ ܠܗܽܘܢ ܒܳܥܶܝܢ ܗ̱ܘܰܘ ܠܶܗ^[13]܆ ܘܰܐ̱ܚܪܺܬܳܐ ܬܽܘܒ ܗܳܝ ܕܰܒܝܰܕ ܢܒܺܝܳܐ ܐ̱ܚܪܺܢܳܐ ܐܶܬܐܰܡܪܰܬ܆ ܡܚܺܝܬܟܽܘܢ ܒܫܰܘܒܳܐ ܘܰܒܝܰܪܩܳܢܳܐ^[14] ܘܰܐܣܓܺܝܬܽܘܢ ܠܡܰܪܫܳܥܽܘ. ܘܬܽܘܒ܆ ܫܰܕܪܶܬ ܒܟܽܘܢ ܡܰܘܬܳܢܳܐ ܒܽܐܘܪܚܳܐ ܕܡܶܨܪܶܝܢ ܘܩܶܛܠܶܬ̣ ܒܚܰܪܒܳܐ ܥܠܰܝ̈ܡܰܝܟܽܘܢ ܥܰܡ ܫܶܒܝܳܐ ܕܪ̈ܰܟܫܳܐ ܕܺܝܠܳܟ^[15]܆ ܘܰܐܣܩܶܬ ܒܢܽܘܪܳܐ ܠܡܰܫܪ̈ܝܳܬܳܐ ܕܺܝܠܟܽܘܢ ܒܪܽܘܓܙܳܐ ܕܺܝܠܝ܆ ܘܳܐܦܠܳܐ ܗܳܟܰܢܳܐ ܐܶܬܦܢܺܝܬܽܘܢ ܠܘܳܬܝ ܐܳܡܰܪ ܡܳܪܝܳܐ. ܛܳܐܟܳܐ222 ܕܶܝܢ ܠܡ̈ܶܠܶܐ ܗܳܠܶܝܢ܆ ܒܙܰܒܢܗܶܝܢ ܐܶܬܥܰܗܰܕܢܰܢ ܐܶܢܶܝܢ. ܡܰܘܣܶܦ ܗ̱ܘܳܐ ܕܶܝܢ ܣܺܝܡ ܥܠܰܝܢ ܥܰܡ ܗܳܠܶܝܢ ܒܺܝ̈ܫܳܬܳܐ ܕܶܐܬܓ̈ܙܶܡܶܝܢ ܠܰܢ܆ ܐܳܦ ܚܺܐܦܳܐ ܘܓܰܝܣܳܐ ܕܒܰܪܒܪ̈ܳܝܶܐ܆ ܕܶܐ‌ܠ̣ܰܨ ܠܰܐܬܪ̈ܰܘܳܬܳܐ ܕܰܫܒܳܒܰܝ̈ܢ܆ ܘܰܥܒܰܕ ܩܶܛܠܳܐ ܕܛܰܠܝܽܘܬܳܐ ܚܠܺܝܛܳܐܺܝܬ ܘܰܕܣܰܝܒܽܘܬܳܐ܆ ܘܕܰܒ̈ܢܰܝ ܐ̱ܢܳܫܳܐ ܗܳܢܽܘܢ ܕܒܰܐܪܥܳܐ ܦܳܠܚܺܝܢ ܗ̱ܘܰܘ ܠܒܰܪ ܡܶܢ ܡܶܠܬܳܐ. ܗܳܢܽܘܢ ܕܰܥܠܰܝܗܽܘܢ܆ ܕܢܶܗܘܶܐ ܐܺܝܬ ܠܺܝ ܒܗܰܘܢܝ ܙܳܕܶܩ܆ ܠܡ̈ܶܠܶܐ ܕܡܳܪܰܢ ܕܳܐܡܰܪ ܒܶܐܘܰܢ̈ܓܶܠܺܝܰܐ ܗܳܟܰܢܳܐ. ܣܳܒܪܺܝܢ ܐܢ̱ܬܽܘܢ܆ ܕܗܶܢܽܘܢ ܚܰܝܳܒܺܝܢ ܗ̱ܘܰܘ ܝܰܬܺܝܪ ܡܶܢ ܟܽܠܗܽܘܢ ܒܢܰܝ̈ܢܳܫܳܐ܆ ܠܳܐ ܐܳܡܰܪ ܐ̱ܢܳܐ ܠܟܽܘܢ. ܐܶܠܳܐ ܐܶܢ ܠܳܐ ܬܳܝܒܺܝܢ ܐܢ̱ܬܽܘܢ܆ ܟܽܠܟܽܘܢ ܒܳܗ̇ ܒܰܕܡܽܘܬܳܐ ܐܳܒܕܺܝܢ ܐܢ̱ܬܽܘܢ.

ܠܳܐ ܓܶܝܪ ܬܒܰܣܰܪ ܥܰܠ ܥܽܘܬܪܳܐ ܕܒܰܣܺܝܡܽܘܬܳܐ ܐܰ‌ܠܳܗܳܝܬܳܐ܆ ܐܳܦܠܳܐ ܬܺܐܡܰܪ ܐܰܝܟܰܢܳܐ ܕܐ̱ܢܳܫ ܡܶܢ ܚܰܟܺܝ̈ܡܶܐ ܕܒܰܐܠܳܗܳܝ̈ܳܬܳܐ ܟܬܰܒ܆ ܚܛܺܝܬ̣ ܘܡܳܢܳܐ ܗܘ̣ܳܐ ܠܺܝ܆ ܡܳܪܝܳܐ ܓܶܝܪ ܢܰܓܺܝܪ ܪܽܘܚܳܐ ܐܺܝܬܰܘܗ̱ܝ܆ ܡܶܛܽܠ ܚܽܘܣܳܝܳܐ ܠܳܐ ܕܠܳܐ ܕܶܚܠܬܳܐ ܬܶܗܘܶܐ܆ ܠܡܰܘܣܳܦܽܘ ܚܛܺܝܬܳܐ ܥܰܠ ܚܛܺܝܬܳܐ. ܘܠܳܐ ܬܺܐܡܰܪ ܕܪ̈ܰܚܡܰܘܗ̱ܝ ܣܰܓܺܝ̈ܶܐܐ܆ ܠܣܽܘܓܳܐܐ ܕܰܚ̈ܛܳܗܶܐ ܕܺܝܠܝ ܢܚܰܣܽܘܢ. ܪ̈ܰܚܡܶܐ ܓܶܝܪ ܘܪܽܘܓܙܳܐ ܠܘܳܬܶܗ܆ ܘܥܰܠ ܚܰܛܳܝ̈ܶܐ ܢܢܺܝܚ ܚܶܡܬܶܗ. ܠܳܐ ܬܟܰܬܰܪ ܠܡܶܬܦܢܳܝܽܘ ܠܘܳܬ ܡܳܪܝܳܐ܆ ܐܳܦܠܐ ܬܶܬܥܰܟܰܪ. ܝܰܘܡܳܐ ܡܶܢ ܝܰܘܡܳܐ. ܡܶܢܫܶܠܝ ܓܶܝܪ ܢܶܦܽܘܩ ܪܽܘܓܙܶܗ ܕܡܳܪܝܳܐ. ܘܰܒܙܰܒܢܳܐ ܕܰܬܒܰܥܬܳܐ ܬܺܐܒܰܕ^[16].

ܘܰܕܙܳܕܶܩ ܡܰܢ ܠܡܶܕܚܰܠ ܡܶܢ ܗܳܝ ܕܠܳܐ ܝܺܕܺܝܥܳܐ܆ ܘܡܶܢ ܒܺܝ̈ܫܳܬܳܐ ܗܳܠܶܝܢ ܕܙܰܒ̈ܢܺܝܢ ܣܰܓܺܝ̈ܳܐܢ ܡܶܬܬܰܝ̈ܬܝܳܢ ܒܥܳܠܡܳܐ ܗܳܢܳܐ܆ ܘܕܰܒܟܽܠ ܙܒܰܢ ܠܡܶܣܬܰܪܳܕܽܘ ܘܰܠܡܶܪܥܰܠ ܘܰܠܡܶܬܛܰܝܳܒܽܘ܆ ܩܰܕܺܝܡܳܐ ܝܺܕܺܝܥܳܐ. ܠܺܝ ܕܶܝܢ ܐܶܬܗܦܶܟ ܠܺܝ ܗܰܘܢܝ܆ ܠܘܳܬ ܐ̱ܚܪܺܬܳܐ ܠܳܐ ܝܺܕܺܝܥܽܘܬܳܐ ܕܝܰܬܺܝܪ ܕܚܺܝܠܳܐ. ܡܳܢܳܐ ܓܶܝܪ ܢܶܥܒܕܽܘܢ ܗܳܢܽܘܢ ܕܰܠܘܳܬ ܪܰܩܕܽܘܬܳܐ ܩܒܺܝܥܺܝܢ ܘܰܐܣܺܝܪܺܝܢ܆ ܟܰܕ ܬܚܽܘ̈ܡܶܐ ܕܚܰܝ̈ܶܐ ܫܩܰܠܘ ܣܳܟܳܐ܆ ܐܶܡܰܬܝ ܕܡܰܘܬܳܐ ܢܺܐܬܶܐ ܥܠܰܝܗܽܘܢ܆ ܘܟܰܕ ܠܳܐ ܩܰܕܶܡܘ ܚܙܰܘ ܢܶܬܬܰܘܒܠܽܘܢ܆ ܟܰܕ ܢܰܦܫܳܐ ܡܰܪܦܝܳܐ ܘܰܫܩܺܝܠܳܐ ܒܳܗ̇ ܝܽܘܩ̈ܢܶܐ ܘܦܰܢܛܰܣ̈ܝܰܐܤ ܕܪܶܚܡܬܳܐ ܫܟܺܝܪܬܳܐ܆ ܘܡܶܢ ܫ̈ܺܐܕܶܐ ܡܰܢ ܗܳܢܽܘܢ ܕܗܳܠܶܝܢ ܪ̈ܚܺܝܡܳܢ ܥܠܰܝܗܽܘܢ ܡܶܬܠܰܒܟܳܐ܆ ܓܠܺܝܙܳܐ ܕܶܝܢ ܡܶܢ ܣܽܘܝܳܥܳܐ ܡܰܠܰܐܟܳܝܳܐ܆ ܘܡܶܬܢܰܛܪܳܐ ܥܰܡܗܽܘܢ ܕܝܽܘܩ̈ܢܶܐ ܘܗܶܓ̈ܓܶܐ܆ ܠܒܺܐܡܰܐ ܗܳܝ ܠܳܐ ܡܶܬܬܰܛܥܝܳܢܺܝܬܳܐ ܕܕܰܝܳܢܳܐ. ܒܰܕܡܽܘܬ ܢܰܚܬܳܐ ܓܶܝܪ ܠܳܐ ܡܶܬܩܰܦܠܳܢܳܐܺܝܬ ܐܰܝܟܰܢܳܐ ܕܐ̱ܢܳܫ ܢܺܐܡܰܪ܆ ܡܥ̈ܰܛܦܳܢ ܢܰܦ̈ܫܳܬܳܐ ܠܩܳܢܺܝ̈ܘܳܬܳܐ ܐܰܘܟܺܝܬ ܠܬܰܪ̈ܥܝܳܬܳܐ ܗܳܠܶܝܢ ܒܺܝ̈ܫܳܬܳܐ܆ ܐܰܝܟܰܢܳܐ ܟܺܝܬ ܕܳܐܦ ܠܗܳܠܶܝܢ ܛܳܒ̈ܳܬܳܐ. ܠܗܳܠܶܝܢ ܢܶܫ̈ܡܥܳܢ܆ ܐܳܦ ܡܰܢ ܢܶܫ̈ܶܐ ܟܽܠܗܶܝܢ ܗܳܢܶܝܢ ܕܠܳܐ ܒܳܗ̈ܬܳܢ ܘܕܰܠܘܳܬ ܛܽܘܪܳܐ ܣܳܠ̈ܩܳܢ܆ ܘܕܳܝ̈ܩܳܢ ܗܳܠܶܝܢ ܕܰܒܬܶܐܰܛܪܽܘܢ ܡܶܫܬܰܡܠܶܝܢ. ܚܰܒܺܝܒܳܐ ܗ̱ܝ ܓܶܝܪ ܘܫܳܘܝܰܬ ܠܰܨܠܽܘܬܳܐ ܐܺܝܬܶܝܗ̇ ܨܒܽܘܬܳܐ܆ ܐܶܢ ܐܳܦ ܟܰܕ ܒܒܰܝܬܳܐ ܚܒܺܝܫܳܐ ܘܟܰܕ ܠܥܺܕܬܳܐ ܐܳܙܳܠ̱ܐ܆ ܘܳܐܦ ܗܳܕܶܐ ܢܛܺܝܪܳܐܺܝܬ܆ ܢܰܟܦܬܳܐ ܬܶܗܘܶܐ ܐܰܢ̱ܬܬܳܐ܆ ܫܒܽܘܩ ܟܺܝܬ ܟܰܕ ܚܳܙܝܳܐ ܗܳܠܶܝܢ ܕܠܳܐ ܢܳܡܽܘܣܳܝ̈ܳܢ. ܡܶܛܽܠ ܗܳܕܶܐ ܩܽܘܗܠܰܬ ܐܳܡܰܪ ܗ̱ܘܳܐ܆ ܘܒܰܪܢܳܫܳܐ ܚܰܕ ܡܶܢ ܐܰ‌ܠܦܳܐ ܐܶܫܟܚܶܬ܆ ܘܰܐܢ̱ܬܬܳܐ ܒܟܽܠܗܽܘܢ ܗܳܠܶܝܢ ܠܳܐ ܐܶܫܟܚܶܬ^[17]. ܗܳܟܰܢܳܐ ܡܶܢܫܶܠܝ܆ ܟܽܠܗܽܘܢ ܗܳܢܽܘܢ ܕܥܳܡܪܺܝܢ ܒܳܗ̇ ܒܰܡܕܺܝܢ̱ܬܳܐ ܫܢܰܘ ܘܰܦܩܰܪܘ. ܘܳܐܦ ܗܳܢܽܘܢ ܕܡܶܢ ܩܕܺܝܡ ܙܳܡܪܺܝܢ ܗ̱ܘܰܘ ܒܫܽܘܩܳܐ܆ ܗܳܫܐ ܙܳܡܪܺܝܢ ܙܡܺܝܪ̈ܳܬܳܐ ܫ̈ܺܐܕܳܢܳܝܳܬܳܐ ܘܙܰܢܳܝ̈ܳܬܳܐ܆ ܘܶܐܙܰܠܘ ܒܡܰܚ̈ܫܒܳܬܳܐ ܕܠܶܒܗܽܘܢ ܒܺܝܫܳܐ܆ ܘܰܗܘܰܘ ܒܗܳܠܶܝܢ ܕܒܶܣܬܪܳܐ܆ ܘܠܰܘ ܒܗܳܠܶܝܢ ܕܰܠܩܰܕ̈ܡܶܐ^[18]܆ ܐܳܡܰܪ ܐܶܪܰܡܝܳܐ.

ܬܶܗܘܶܐ ܓܶܝܪ ܕܰܨܒܰܝܬܽܘܢ ܘܰܓܒܰܝܬܽܘܢ ܠܟܽܘܢ ܕܬܺܐܙܽܠ̱ܘܢ ܠܘܳܬ ܚܶܙܘ̈ܳܢܶܐ. ܠܡܳܢܳܐ ܡܶܢ ܟܢܽܘ̈ܫܝܶܐ ܕܥ̈ܺܕܳܬܳܐ ܡܰܗܦܟܺܝܢ ܐܢ̱ܬܽܘܢ ܐܰܦܰܝ̈ܟܽܘܢ ܓܡܺܝܪܳܐܺܝܬ؟ ܡܶܛܽܠܗܳܕܶܐ ܟܰܕ ܠܪ̈ܽܘܡܳܝܶܐ ܟܳܬܶܒ ܗ̱ܘܳܐ ܦܰܘܠܽܘܤ ܐܳܡܰܪ ܗ̱ܘܳܐ: ܐ̱ܢܳܫܳܐܺܝܬ ܐܳܡܰܪ ܐ̱ܢܳܐ ܡܶܛܽܠ ܡܚܺܝܠܽܘܬܳܐ ܕܒܶܣܪܟܽܘܢ^[19]. ܐܰܟܙܢܳܐ ܓܶܝܪ ܕܰܐܩܺܝܡܬܽܘܢ ܗܰܕܳܡ̈ܶܐ ܕܺܝܠܟܽܘܢ ܥܰܒ̈ܕܶܐ ܠܛܰܡܽܐܘܬܳܐ ܘܰܠܠܳܐ ܢܳܡܽܘܣܳܝܽܘܬܳܐ^[20]܆ ܗܳܟܰܢܳܐ ܗܳܫܳܐ ܐܰܩܺܝܡܘ ܗܰܕܳܡ̈ܶܐ ܕܺܝܠܟܽܘܢ ܥܰܒ̈ܕܶܐ ܠܙܰܕܝܩܽܘܬܳܐ܆ ܠܘܳܬ ܩܰܕܺܝܫܽܘܬܳܐ. ܙܳܕܶܩ ܗ̱ܘܳܐ ܡܰܢ ܓܶܝܪ ܐܳܡܰܪ: ܕܰܠܥܰܒܕܽܘܬܳܐ ܕܰܐ‌ܠܳܗܳܐ ܗܳܝ ܕܰܒܙܰܕܝܩܽܘܬܳܐ ܘܰܒܡܶܬܥܰܢܘܳܝܽܘܬܳܐ ܕܰܡܝܰܬܪܽܘܬܳܐ ܡܶܬܬܰܪܨܳܐ܆ ܒܳܗ̇ ܒܡܶܠܬܳܐ ܩܰܕܡܳܝܬܳܐ ܬܶܓܒܽܘܢ܆ ܘܪܰܝܽܘܓܬܳܢܳܐܺܝܬ ܢܶܗܘܶܐ ܣܺܝܡܺܝܢ ܐܢ̱ܬܽܘܢ ܠܘܳܬ ܛܳܒܬܳܐ. ܡܶܛܽܠ ܕܶܝܢ ܕܟܰܕ ܠܘܳܬ ܚܰܫ̈ܶܐ ܕܒܶܣܪܳܐ ܐܶܬܬܰܚܬܺܝܬܽܘܢ܆ ܡܚܺܝܠܺܝܢ ܐܢ̱ܬܽܘܢ ܠܘܳܬ ܓܒܺܝܬܳܐ ܗܳܝ ܕܦܳܩܚܳܐ ܠܟܽܘܢ܆ ܡܶܕܶܡ ܐ̱ܢܳܫܳܐܺܝܬ ܐܳܡܰܪ ܐ̱ܢܳܐ. ܗܳܢܰܘ ܕܶܝܢ܆ ܠܰܘ ܦܣܳܩܳܐ ܕܕܺܝܢܳܐ ܐܰ‌ܠܳܗܳܝܳܐ܆ ܐܶܠܳܐ ܚܽܘܫܳܒܳܐ ܡܳܝܽܘܬܳܐ ܘܰܕܡܶܢ ܣܽܘܥܪ̈ܳܢܶܐ ܐ̱ܢܳܫܳܝ̈ܶܐ ܥܳܐܶܠ. ܠܪܶܚܡܬܳܐ ܘܰܠܝܰܨܺܝܦܽܘܬܳܐ ܗܳܝ ܕܰܡܚܰܘܶܝܢ ܐܢ̱ܬܽܘܢ ܡܶܛܽܠ ܚܛܺܝܬܳܐ܆ ܠܘܳܬ ܐܰ‌ܠܳܗܳܐ. ܘܰܠܘܳܬ ܦܽܘܠܚܳܢܳܐ ܕܙܰܕܝܩܽܘܬܳܐ 222ܫܰܢܰܘ ܐܰܥܒܪܽܘܗ̇. ܠܘܳܬܟܽܘܢ ܟܰܕ ܗܳܘܶܝܢ ܐܢ̱ܬܽܘܢ ܕܰܝܳܢ̈ܶܐ. ܢܶܗܘܶܐ ܐܺܝܬ ܠܶܗ ܠܰܐܠܳܗܳܐ ܗܳܠܶܝܢ ܕܫܰܘ̈ܝܳܢ ܠܘܳܬ ܚܛܺܝܬܳܐ. ܘܠܳܐ ܢܶܬܥܠܶܒ ܡܶܢܳܗ̇܆ ܐܳܦܠܳܐ ܠܟܽܠܶܗ ܢܶܙܠܳܐ^[21] ܕܡܰܣܰܐܬܳܐ܆ ܬܶܨܠܽܘܢ ܘܬܰܗܦܟܽܘܢܳܝܗ̱ܝ ܠܘܳܬ ܗܳܝ ܚܕܳܐ ܟܰܦܬܳܐ. ܐܰܝܟܰܢܳܐ ܟܺܝܬ ܕܟܰܕ ܗܳܕܶܐ ܥܳܒܕܺܝܢ ܐܢ̱ܬܽܘܢ܆ ܘܰܕܠܳܐ ܡܫܽܘܚܬܳܐ ܠܘܳܬ ܚܛܺܝܬܳܐ ܡܶܬܬܰܝܬܶܝܢ ܐܢ̱ܬܽܘܢ܆ ܡܰܘܕܥܺܝܢ ܐܢ̱ܬܽܘܢ ܓܰܠܝܳܐܺܝܬ ܐܰܝܟ ܡܶܠܬܳܐ ܕܶܐܘܰܢܓܶܠܺܝܽܘܢ܆ ܕܠܳܐ ܐ̱ܢܳܫ ܡܶܫܟܰܚ ܠܰܬܪܶܝܢ ܡܳܪ̈ܰܝܳܐ ܠܡܶܦܠܰܚ ܥܰܒܕܽܘܬܳܐ. ܐܰܘ ܓܶܝܪ ܠܚܰܕ ܢܶܣܢܶܐ ܘܰܠܗܰܘ ܐ̱ܚܪܺܢܳܐ ܢܶܪܚܰܡ܆ ܐܰܘ ܠܚܰܕ ܢܺܐܨܰܦ ܘܥܰܠ ܗܰܘ ܐ̱ܚܪܺܢܳܐ ܢܶܒܣܶܐ^[22]. ܡܳܕܶܝܢ ܢܝܰܩܰܪ ܘܢܶܐܚܽܘܕ ܒܰܐܠܳܗܳܐ ܙܳܕܶܩ܆ ܘܢܶܒܣܶܐ ܥܰܠ ܤܳܛܳܢܳܐ. ܗܳܝ ܓܶܝܪ ܕܢܰܗܦܟܺܝܘܗ̱ܝ ܠܛܶܟܣܳܐ܆ ܐܳܦ ܕܢܺܐܡܪܺܝܗ̇ ܓܽܘܕܳܦܳܐ ܗ̱ܝ܆ ܫܒܽܘܩ ܟܺܝܬ ܕܗܳܝ ܕܢܶܥܒܕܺܝܗ̇ ܠܳܐ ܢܳܡܽܘܣܳܝܽܘܬܳܐ ܗ̱ܝ.

ܝܳܕܰܥ ܐ̱ܢܳܐ ܓܶܝܪ ܓܰܠܝܳܐܺܝܬ܆ ܕܟܰܕ ܗܳܠܶܝܢ ܐܳܡܰܪ ܐ̱ܢܳܐ܆ ܠܣܰܓܺܝ̈ܶܐܐ ܡܥܺܝܩ ܐ̱ܢܳܐ܆ ܘܨܳܒܶܐ ܗ̱ܘܺܝܬ̣ ܐܳܦ ܐܶܢܳܐ ܫܰܦܺܝܪ ܕܰܥܘ܆ ܕܗܳܠܶܝܢ ܕܰܡܠܰܒ̈ܒܳܢ ܘܰܡܦܰܪ̈ܓܝܳܢ ܘܡܳܫ̈ܚܳܢ ܠܟܽܘܢ ܐܺ݀ܡܰܪ ܠܘܳܬܟܽܘܢ. ܐܶܠܳܐ ܐܶܢܗܽܘ ܕܟܰܕ ܐܰܢ̱ܬܽܘܢ ܡܶܢ ܢܰܦܫܟܽܘܢ ܠܘܳܬ ܗܰܢܺܝ̈ܐܘܳܬܳܐ ܐܳܙܺܠ̱ܝܢ ܐܢ̱ܬܽܘܢ܆ ܘܟܰܕ ܠܒܺܝܫܽܘܬܳܐ ܒܳܥܶܝܢ ܐܢ̱ܬܽܘܢ ܐܶ݀ܡܫܽܘܚ ܐܰܘ ܟܺܝܬ ܐܶ݀ܛܪܶܐ^[23]܆ ܕܳܚܶܠ ‌ܐ̱ܢܳܐ ܡܶܢ ܗܳܝ ܕܰܒܝܰܕ ܚܰܙܩܺܝܐܶܝܠ ‌ܐܶܬܓܰܙܡܰܬ̣ ܠܰܢ̈ܒܺܝܶܐ ܕܰܓ̈ܳܠܶܐ. ܕܺܐܝܬܶܝܗ̇ ܗܳܟܰܢܳܐ. ܐܰܛܥܺܝܘ ܠܥܰܡܳܐ ܕܺܝܠܝ܆ ܟܰܕ ܐܳܡܪܺܝܢ ܫܰܝܢܳܐ ܫܰܝܢܳܐ ܘܠܰܝܬ ܗ̱ܘܳܐ ܫܰܝܢܳܐ. ܘܗܽܘ ܒܳܢܶܐ ܐܶܣܬܳܐ܆ ܘܗܶܢܽܘܢ ܫܳܝܥܺܝܢ ܠܳܗ̇܆ ܐܶܢ^[24] ܬܶܦܶܠ. ܐܶܡܰܪ ܠܘܳܬ ܗܳܢܽܘܢ ܕܫܳܝܥܺܝܢ ܠܳܗ̇܆ ܕܡܶܦܰܠ ܬܶܦܶܠ. ܘܢܶܗܘܶܐ ܡܶܛܪܳܐ ܕܓܳܪܶܦ. ܘܶܐ݀ܬܶܠ ܟܺܐܦ̈ܶܐ ܪ̈ܳܡܝܳܬ ܫܽܘ̈ܥܶܐ ܒܶܐܣܳܪ̈ܶܐ ܕܺܝܠܗܽܘܢ ܘܢܶܦܠܽܘܢ. ܘܪܽܘܚܳܐ ܕܥܰܠܥܳܠܳܐ ܬܺܐܬܶܐ ܘܬܶܬܪܰܥ܆ ܘܗܳܐ ܢܶܦܠܰܬ ܐܶܣܬܳܐ. ܘܰܐܪܰܐ ܠܳܐ ܢܺܐܡܪܽܘܢ ܠܘܳܬܟܽܘܢ܆ ܐܰܝܟܳܐ ܐܺܝܬܰܘܗ̱ܝ ܫܝܳܥܳܐ ܕܺܝܠܟܽܘܢ܆ ܗܰܘ ܕܫܳܥ̣ܬܽܘܢ܆ ܕܰܐܝܟ ܗܳܠܶܝܢ ܐܺܝܬܰܝܗܽܘܢ ܐܰܡܢ̈ܶܐ ܕܒܺܝܫܽܘܬܳܐ. ܘܗܳܢܽܘܢ ܕܡܶܛܽܠ ܗܰܢܺܝܽܐܘܬܳܐ ܘܛܰܝܒܽܘܬܳܐ ܗܳܝ ܕܒܰܡܠܶܐ ܩܰܠܺܝܠ ܘܒܰܪ ܫܳܥܬܶܗ܆ ܡܶܢ ܗܳܝ ܕܡܰܘܬܪܳܐ ܠܗܽܘܢ ܥܳܒܪܺܝܢ܆ ܡܶܢ ܫܽܘܠܳܡܗܽܘܢ ܡܶܬܕܰܪܟܺܝܢ ܘܡܶܬܬܨܺܝܕܺܝܢ ܘܡܶܬܟܰܣܣܺܝܢ. ܘܟܰܕ ܢܺܐܬܶܐ ܪܽܘܓܙܳܐ ܡܶܟܺܝܠ܆ ܡܶܬܬܘܶܝܢ ܗܳܢܽܘܢ ܕܶܐܬܬܰܛܥܺܝܘ ܡܶܢ ܗܰܢܺܝܽܐܘܬܳܐ܆ ܘܡܶܢ ܗܰܘ ܕܰܠܘܳܬ ܗܳܝ ܕܗܰܢܺܝܐܳܐ ܫܰܟܶܢ ܠܗܽܘܢ܆ ܐܰܝܟ ܕܡܶܢ ܡܚܰܒܠܳܢܳܐ ܢܳܕܳܐ ܠܗܽܘܢ.

ܙܳܕܶܩ ܗܳܟܺܝܠ ܕܗܳܠܶܝܢ ܕܦܳܩ̈ܚܳܢ ܢܰܪܬܶܐ܆ ܐܳܦ ܢܥܺܝܩ܆ ܐܶܢ ܟܺܝܬ ܥܰܠ ܗܳܕܶܐ ܢܶܗܘܶܐ ܣܽܘܢܩܳܢܳܐ. ܥܳܩܬܳܐ ܓܶܝܪ ܗܳܝ ܕܒܰܐܠܳܗܳܐ܆ ܡܶܬܬܰܘܝܳܢܽܘܬܳܐ ܠܳܐ ܡܶܬܬܰܘܝܳܢܺܝܬܳܐ ܣܳܥܪܳܐ ܠܦܽܘܪܩܳܢܳܐ. ܘܰܐܘ ܠܗܳܢܽܘܢ ܕܰܛܥܰܘ ܡܰܦܢܝܳܐ ܡܶܢ ܛܳܥܝܽܘܬܳܐ܆ ܐܰܘ ܠܗܳܢܽܘܢ ܕܩܳܝܡܺܝܢ܆ ܠܳܐ ܡܶܙܕܰܥ̈ܙܥܳܢܶܐ ܥܳܒܕܳܐ. ܗܳܠܶܝܢ ܕܡܶܛܽܠܳܬܗܶܝܢ܆ ܐܳܦ ܠܡܺܐܡܪܳܐ ܗܳܢܳܐ ܐܰܩܺܝܡܶܬ. ܕܺܝܠܝ ܓܶܝܪ ܗܳܝ ܕܰܐ݀‌ܠܶܦ ܘܰܐ݀ܥܗܶܕ ܐܺܝܬܶܝܗ̇. ܗܳܝ ܕܶܝܢ ܕܰܠܗܳܢܽܘܢ ܕܫܳܡܥܺܝܢ ܦܝܳܣܳܐ ܢܶܥܒܶܕ ܘܢܶܣܡܽܘܟ ܘܰܢܫܰܪܰܪ܆ ܕܰܡܫܺܝܚܳܐ ܐܺܝܬܶܝܗ̇. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܰܒܥܺܝܢ ܘܫܬܐ.

ܡ̈ܬܠܐ. 4: 23 [1]

ܚܙܩܝܐܝܠ. 34: 2 [2]

ܗܘܫܥ. 6: 9 [3]

ܡܬܝ. 25: 30 [4]

ܥܡܘܣ. 8: 3 [5]

ܡܙܡܘܪ̈ܐ. 39: 2[6]

ܩܘܠܣ̈ܝܐ. 3: 11 [7]

ܡܬܝ. 25: 40 [8]

ܝܘܚܢܢ. 1: 11 [9]

ܡܬܝ. 8: 20  ܐܦ ܠܘܩܐ. 9: 58 [10]

ܠܐ[11]

ܢܩܛܠܝܗ̇ [12]

ܡܙܡܘܪ̈ܐ. 78: 33 [13]

ܥܡܘܣ. 4: 9  ܐܦ ܚܓܝ. 2: 18 [14]

ܥܡܘܣ. 4: 10[15]

ܩܘܗܠܰܬ. 5: 4 ـ 9 [16]

ܩܘܗܠܰܬ. 7: 29 [17]

ܐܪܡܝܐ. 7: 24 [18]

ܪ̈ܗܘܡܝܐ. 6: 19 [19]

ܠܘܳܬ ܠܐ ܢܳܡܽܘܣܳܝܽܘܬܳܐ[20]

 ܢܶܬܥܳܐ[21]

ܡܬܝ. 6: 24 [22]

 ܐܶܫܽܘܥ[23]

[24] ܥܝܳܕܰܐ ܗܘ ܗܳܢܳܐ ܠܰܟܬܳܒ̈ܶܐ ܕܥܶܒܪ̈ܳܝܶܐ ܕܢܺܐܡܪܽܘܢ: ܕܶܐܢ ܢܶܗܘܶܐ ܙܦܠܢ: ܚܠܳܦ  ܗܳܝ ܕܠܐ ܢܶܗܘܶܐ. ܡܳܕܶܝܢ ܗܳܝ ܕܶܐܢ ܬܶܦܶܠ: ܚܠܳܦ ܕܠܐ ܬܶܦܶܠ ܣܺܝܡܳܐ.