ܡܺܐܡܪܳܐ ܕܫܰܒܥܺܝܢ ܘܚܰܡܫܳܐ
ܥܰܠ ܩܰܕܺܝܫܳܐ ܣܳܗܕܳܐ ܝܽܘܠܝܰܐܢܘܣ
75: ܠܺܝ ܛܳܒ ܡܶܢ ܗܳܝ ܕܰܠܣܳܗ̈ܕܶܐ ܐܶ݀ܩܰܠܶܤ܆ ܘܠܳܐ ܡܶܕܶܡ ܡܶܬܚܙܶܐ ܕܺܐܝܬܰܘܗ̱ܝ ܝܰܬܺܝܪ ܡܰܘܬܪܳܢܳܐ. ܡܰܠܽܘܢ ܕܶܝܢ ܐܳܦ ܗܺܝ ܗܳܝ ܒܰܠܚܽܘܕ ܕܢܶܬܥܰܗܰܕ ܠܣܳܗ̈ܕܶܐ܆ ܝܽܘܬܪܳܢܳܐ ܗܰܘ ܕܝܰܬܺܝܪ ܡܶܢ ܟܽܠ ܪܰܒ ܚܳܫܶܒ ܐ̱ܢܳܐ ܕܡܰܝܬܝܳܐ܆ ܘܕܳܐܦܠܳܐ ܐܺܝܬ ܠܡܺܐܡܰܪ ܕܰܟܡܳܐ ܐܺܝܬܰܘܗ̱ܝ. ܡܶܚܕܳܐ ܓܶܝܪ ܐܶܡܰܬܝ ܕܚܽܘܫܳܒ̈ܶܐ ܡܶܕܶܡ ܠܳܐ ܡܗܰܝܡ̈ܢܶܐ ܢܛܽܘܦܽܘܢ ܥܰܠ ܬܰܪܥܺܝܬܳܐ܆ ܟܰܕ ܒܰܪ̈ܓܺܝܓܳܬܳܐ ܡܰܢ ܙܰܒ̈ܢܳܝܳܬܳܐ ܡܚܰܬܚܬܺܝܢ ܠܳܗ̇܆ ܘܰܒܡܰܦܨܚܳܢ̈ܝܳܬܳܐ ܘܰܡܚܰܕܝܳܢ̈ܝܳܬܳܐ ܗܳܠܶܝܢ ܕܥܳܒܪ̈ܳܢ ܕܥܳܠܡܳܐ ܗܳܢܳܐ ܡܥܰܢܶܝܢ ܠܳܗ̇܆ ܡܶܢ ܛܳܒ̈ܳܬܳܐ ܕܶܝܢ ܗܳܠܶܝܢ ܕܰܥܬܺܝ̈ܕܳܢ ܘܩܳܝ̈ܡܳܢ ܘܠܳܐ ܡܶܙܕܰܥ̈ܙܳܢ ܡܰܪܚܩܺܝܢ ܠܳܗ̇܆ ܘܦܽܘܫܳܟܳܐ ܥܳܒܕܺܝܢ ܒܳܗ̇ ܘܰܕܬܶܬܦܰܠܰܓ ܘܬܶܚܓܰܪ ܡܥܰܬܕܺܝܢ ܠܳܗ̇܆ ܡܶܛܽܠ ܟܺܝܬ ܕܳܐܦܠܳܐ ܥܰܝܢܳܐ ܚܙܳܬ ܐܶܢܶܝܢ ܠܗܳܠܶܝܢ܆ ܘܠܳܐ ܐܶܕܢܳܐ ܫܶܡܥܰܬ ܐܶܢܶܝܢ܆ ܘܳܐܦܠܳܐ ܥܰܠ ܠܶܒܳܐ ܕܒܰܪܢܳܫܳܐ ܣܠܶܩ[1]. ܗܳܝܕܶܝܢ ܟܺܝܬ ܗܳܝܕܶܝܢ ܟܰܕ ܒܰܕܡܽܘܬ ܙܰܠܺܝܩܳܐ ܡܶܕܶܡ ܢܰܨܺܝܚܳܐ ܕܫܶܡܫܳܐ܆ ܚܽܘܫܳܒܳܐ ܕܗܳܠܶܝܢ ܐܰܬܠܺܝ̈ܛܶܐ ܟܳܗ̈ܢܰܝ ܙܳܟܽܘܬܳܐ ܢܶܦܶܠ ܥܠܶܝܗ̇ ܒܰܠܚܽܘܕ ܘܢܶܨܡܰܚ܆ ܐܰܝܟ ܕܰܠܥܰܪܦܶܠܳܐ ܫܪܳܐ ܘܦܰܠܗܕܶܗ ܠܦܽܘܫܳܟܳܐ܆ ܘܰܠܣܰܒܪܳܐ ܕܰܩܝܳܡܬܳܐ ܘܰܕܡܰܠܟܽܘܬܳܐ ܕܰܫܡܰܝܳܐ ܕܰܟܝܳܐ ܘܢܰܨܺܝܚܳܐ ܥܰܬܕܶܗ܆ ܐܰܝܟ ܕܰܒܡܶܨܥܰܬ ܛܰܗܪܳܐ ܨܰܚܺܝܚܳܐ. ܗܰܘ ܓܶܝܪ ܕܡܶܬܟܰܬܰܫ ܡܶܢ ܟܽܠ ܦܪܽܘܤ܆ ܠܰܘ ܥܰܠ ܠܳܐ ܝܺܕܺܝ̈ܥܳܬܳܐ ܡܶܬܟܰܬܰܫ. ܘܝܰܬܺܝܪܳܐܺܝܬ ܬܰܟܬܽܘ̈ܫܶܐ ܕܕܰܐܝܟ ܗܳܠܶܝܢ܆ ܗܳܢܽܘܢ ܕܰܥܕܰܡܳܐ ܠܰܕܡܳܐ ܩܳܝܡܺܝܢ. ܡܶܛܽܠܗܳܕܶܐ ܦܰܘܠܽܘܤ ܟܰܕ ܠܰܐܓܽܘܢܳܐ ܗܳܢܳܐ ܟܳܗܢܳܝܳܐ ܡܶܬܟܰܬܰܫ ܗ̱ܘܳܐ ܐܳܡܰܪ ܗ̱ܘܳܐ: ܗܳܟܰܢܳܐ ܪܳܗܶܛ ܐ̱ܢܳܐ܆ ܐܰܝܟ ܐܰܝܢܳܐ ܕܠܰܘ ܠܳܐ ܝܺܕܺܝܥܳܐܺܝܬ. ܗܳܟܰܢܳܐ ܡܶܬܟܰܬܰܫ ܐ̱ܢܳܐ܆ ܠܰܘ ܐܰܝܟ ܗܰܘ ܕܠܳܐܐܰܪ ܡܳܚܶܐ ܐ̱ܢܳܐ[2]. ܘܬܽܘܒ ܠܽܘܩܒܰܠ ܢܺܝܫܳܐ ܪܳܗܶܛ ܐ̱ܢܳܐ܆ ܠܘܳܬ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ ܕܰܐܠܳܗܳܐ܆ ܒܰܡܫܺܝܚܳܐ ܝܶܫܽܘܥ[3].
ܕܗܳܠܶܝܢ ܕܶܝܢ ܡ̈ܶܠܶܐ ܘܕܰܐܝܠܶܝܢ ܕܕܳܡܶܝܢ ܠܗܶܝܢ܆ ܐܶܢ ܐ̱ܢܳܫ ܒܗܽܘܢ ܒܰܥ̈ܒܳܕܶܐ ܢܶܨܒܶܐ ܠܡܶܚܙܳܐ ܝܽܘܩܢܳܐ ܕܝܰܬܺܝܪ ܡܶܢ ܟܽܠ ܚܰܬ̊ܺܝܬ̣܆ ܘܢܶܫܬܰܪܰܪ ܒܢܰܦܫܶܗ ܠܘܳܬ ܣܰܒܪܳܐ ܗܰܘ ܕܰܥܬܺܝܕ܆ ܠܰܘ ܐ̱ܚܪܺܢܳܐ ܢܶܫܟܰܚ ܕܰܡܝܰܬܰܪ ܛܳܒ ܡܶܢ ܐܰܬܠܺܝܣܽܘܬܶܗ ܓܰܢ̱ܒܳܪܬܳܐ ܘܚܰܝܠܬܳܢܺܝܬܳܐ ܕܝܽܘܠܝܰܐܢܽܘܤ܆ ܗܳܝ ܕܡܶܢܳܗ̇ ܐܺܝܬ ܠܡܶܬܪܕܳܝܽܘ ܘܰܠܡܺܐܠܰܦ ܐܰܟܚܕܳܐ܆ ܕܰܐܝܟܰܢܳܐ ܡܰܢ ܢܩܽܘܡ܆ ܡܳܢܐ ܕܶܝܢ ܢܺܐܡܰܪ: ܡܳܢܳܐ ܕܶܝܢ ܬܽܘܒ ܙܳܕܶܩ ܠܡܶܚܰܫ ܐܰܓܽܘܢܺܝܣܛܳܐ ܕܫܰܦܺܝܪܽܘܬ ܕܶܚܠܬܳܐ܆ ܘܢܰܗܺܝܪܳܐܺܝܬ ܒܗܽܘܢ ܒܰܥ̈ܒܳܕܶܐ ܢܶܚܙܶܝܘܗ̱ܝ ܠܰܡܫܺܝܚܳܐ ܕܰܡܡܰܠܶܠ܆ ܟܰܕ ܒܶܗ ܒܣܳܗܕܳܐ ܡܥܰܙܶܐ ܘܚܳܐܶܫ܆ ܠܗܰܘ ܕܶܐܡܰܪ: ܕܠܳܐ ܬܶܪܢܽܘܢ ܕܰܐܝܟܰܢܳܐ ܐܰܘ ܡܳܢܳܐ ܬܡܰܠܠܽܘܢ܆ ܢܶܬܺܝܗܶܒ ܠܟܽܘܢ ܓܶܝܪ ܒܗܳܝ ܫܳܥܬܳܐ ܕܡܳܢܳܐ ܬܡܰܠܠܽܘܢ[4]. ܠܺܝ ܓܶܝܪ ܡܶܣܬܰܒܪܳܐ܆ ܕܰܕܢܰܦܫܳܐ ܐܺܝܬܶܝܗ̇ ܝܰܬܺܝܪܳܐܺܝܬ ܣܳܗܕܽܘܬܶܗ ܕܗܰܘ܆ ܘܠܰܘ ܕܦܰܓܪܳܐ. ܡܶܛܽܠ ܕܳܐܦ ܕܣܰܟܽܘܠܬܳܢܽܘܬܳܐ ܕܰܒ̈ܡܶܠܶܐ ܡܶܬܚܰܘܝܳܢܽܘܬܳܐ ܣܰܓܺܝܐܬܳܐ ܥܒܰܕ.
ܟܰܕ ܓܶܝܪ ܝܳܬܶܒ ܗ̱ܘܳܐ ܗܰܘ ܕܗܳܝܕܶܝܢ ܕܳܐܶܢ ܗ̱ܘܳܐ ܕܰܫܡܶܗ ܗ̱ܘܳܐ ܡܰܪܩܺܝܰܐܢܽܘܤ܆ ܕܠܰܘ ܟܽܠܶܗ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܨܢܺܝܥܳܐ ܠܡܶܓܙܰܡ ܘܠܰܡܕܰܚܳܠܽܘ܆ ܟܡܳܐ ܕܒܰܫܟܳܚ̈ܳܬܳܐ ܠܡܶܓܢܰܒ ܘܰܠܡܰܛܥܳܝܽܘ܆ ܕܢܶܩܪܽܘܢܳܝܗ̱ܝ ܠܰܥܠܰܝܡܳܐ ܦܩܰܕ. ܥܠܰܝܡܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܒܬܰܪ̈ܬܰܝܗܶܝܢ. ܒܩܰܘܡܬܳܐ ܟܺܝܬ ܗܳܝ ܕܦܰܓܪܳܐ ܘܰܒܗܳܝ ܕܪܽܘܚܳܐ. ܟܰܕ ܐܶܬܩܪܺܝ ܕܶܝܢ ܡܫܰܐܶܠ ܗ̱ܘܳܐ ܠܶܗ܆ ܕܡܳܢܳܐ ܐܺܝܬܰܝܟ ܒܰܟܪ̈ܺܝܣܛܝܳܢܶܐ ܗܳܢܽܘܢ ܕܠܳܐ ܗܰܘܢܳܐ. ܗܽܘ ܕܶܝܢ ܡܦܰܢܶܐ ܗ̱ܘܳܐ ܟܪܺܝܣܛܺܝܰܐܢܽܘܤ. ܗܳܕܳܐ ܗ̱ܝ ܓܶܝܪ ܠܺܝ ܚܶܟܡܬܳܐ ܘܺܝܕܰܥܬܳܐ܆ ܗܳܝ 222ܕܰܩܪܰܝܬ ܐܰܢ̱ܬ ܚܰܣܺܝܪܽܘܬ ܗܰܘܢܳܐ. ܐܰܟܙܢܳܐ ܓܶܝܪ ܕܗܳܝ ܕܡܶܣܬܰܒܪܳܐ ܠܘܳܬ ܒܢܰܝ̈ܢܳܫܳܐ ܚܶܟܡܬܳܐ ܫܳܛܝܽܘܬܳܐ ܐܺܝܬܶܝܗ̇ ܠܘܳܬ ܐܰܠܳܗܳܐ[5]܆ ܗܳܟܰܢܳܐ ܚܶܟܡܬܳܐ ܗܳܝ ܕܰܐܠܳܗܳܐ܆ ܫܳܛܝܽܘܬܳܐ ܡܶܣܬܰܒܪܳܐ ܠܘܳܬܟܽܘܢ ܕܺܝܠܟܽܘܢ ܕܺܐܝܬܰܝܟܽܘܢ ܕܠܳܐ ܗܰܘܢܳܐ.
ܘܗܰܘ ܟܰܕ ܠܫܽܘܐܴܠܳܐ ܕܺܝܠܶܗ ܢܰܗܰܪ ܬܽܘܒ ܐܶܡܰܪ: ܗܳܕܶܐ ܡܫܰܐܶܠ ܐ̱ܢܳܐ ܠܳܟ. ܡܳܢܳܐ ܠܘܳܬ ܟܪ̈ܺܝܣܛܝܳܢܶܐ ܡܶܬܩܪܶܐ ܐܰܢ̱ܬ. ܩܰܫܺܝܫܳܐ ܐܰܘ ܡܫܰܡܫܳܢܳܐ. ܘܬܽܘܒ ܗܰܘ ܚܰܟܺܝܡܳܐ ܒܡܳܪܝܳܐ ܚܰܟܺܝܡܳܐܺܝܬ ܡܦܰܢܶܐ ܗ̱ܘܳܐ܆ ܟܰܕ ܠܰܡܬܰܚܬܳܝܽܘܬܳܗ̇ ܘܰܠܐ̱ܢܳܫܳܝܽܘܬܳܗ̇ ܕܬܰܪܥܺܝܬܶܗ ܕܗܰܘ ܕܰܡܫܰܐܶܠ ܗ̱ܘܳܐ ܨܳܒܶܐ ܗ̱ܘܳܐ ܠܡܰܬܗܳܪܽܘ܆ ܒܝܰܕ ܡܰܟܺܝܟܽܘܬܳܐ ܪܳܡܬܳܐ ܘܰܫܡܰܝܳܢܺܝܬܳܐ. ܠܳܐ ܬܶܣܒܰܪ ܐܳܘ ܗܳܢܳܐ[6]܆ ܠܩܰܫܺܝܫܳܐ ܐܰܘ ܠܰܡܫܰܡܫܳܢܳܐ܆ ܕܰܫܡܳܗ̈ܶܐ ܐ̱ܚܪܳܢܝܳܐܺܝܬ ܐܺܝܬܰܝܗܽܘܢ ܣܦܺܝ̈ܩܶܐ. ܐܶܠܳܐ ܣܽܘܥܪ̈ܳܢܶܐ ܡܰܠܽܘܢ܆ ܘܺܐܝܩܳܪܳܐ ܘܫܽܘܠܛܳܢܳܐ ܪܽܘܚܳܢܳܝܳܐ܆ ܕܡܶܢ ܠܥܶܠ ܐܳܬܶܐ ܥܰܠ ܗܳܢܽܘܢ ܕܺܐܝܬܰܝܗܽܘܢ ܒܚܺܝܪ̈ܶܐ ܘܰܒܩ̈ܰܝܳܐ ܒܰܡܝܰܬܪܽܘܬܳܐ. ܗܳܢܽܘܢ ܟܺܝܬ ܕܒܽܘܩܝܳܐ ܘܒܽܘܚܪܳܢܳܐ ܬܶܦܣܽܘܩ ܘܰܬܫܰܪܰܪ ܠܗܽܘܢ܆ ܣܳܗܕܽܘܬܳܐ ܟܺܝܬ ܕܰܒܢܰܝ̈ܢܳܫܳܐ܆ ܘܳܐܦ ܕܺܝܢܳܐ ܕܰܐܠܳܗܳܐ. ܠܺܝ ܕܶܝܢ ܒܪܰܡ ܪܰܒܳܐ ܗ̱ܝ܆ ܗܳܝ ܕܰܠܟܽܘܢܳܝܳܐ ܕܰܟܪܺܝܣܛܝܳܢܳܐ ܠܳܐ ܐܶܕܰܓܶܠ.
ܘܟܰܕ ܠܽܘܩܒܰܠ ܗܳܠܶܝܢ ܡ̈ܶܠܶܐ ܕܣܰܟܽܘܠܬܳܢܽܘܬܳܐ ܠܡܰܗܦܳܟܽܘ ܐܺܝܬ ܗ̱ܘܳܐ ܠܶܗ ܘܠܳܐ ܡܶܕܶܡ ܕܗܰܘܢܳܐ ܘܰܕܒܽܘܝܳܢܳܐ܆ ܕܰܒܰܚ ܠܰܐܠܳܗ̈ܶܐ ܩܳܥܶܐ ܗ̱ܘܳܐ ܠܳܐ ܡܠܺܝܠܳܐܻܝܬ. ܡܳܢܳܐ ܗܳܟܺܝܠ ܠܘܳܬ ܠܳܐ ܡܠܺܝܠܽܘܬܳܐ ܡܦܰܢܶܐ ܗ̱ܘܳܐ ܗܰܘ ܡܢܺܝܚܳܢܳܐ ܕܡܶܠܬܳܐ ܘܰܐܬܠܺܝܛܳܐ. ܟܰܕ ܟܪܺܝܣܛܝܳܢܳܐ ܚܕܳܐ ܙܒܰܢ ܐܰܘܕܺܝܬ̣ ܕܺܐܝܬܰܝ܆ ܩܰܕܶܡܬ ܠܺܝ ܐܳܡܰܪ ܐܰܪܡܺܝܬ̣ ܠܳܟ ܦܽܘܢܳܝ ܦܶܬܓܳܡܳܐ. ܗܰܘ ܓܶܝܪ ܕܗܳܕܶܐ ܐܺܝܬܰܘܗ̱ܝ܆ ܐܰܝܟܰܢܳܐ ܢܕܰܒܰܚ ܠܗܳܢܽܘܢ܆ ܗܳܠܶܝܢ ܕܠܳܐ ܡܰܣܒܰܪ ܥܠܰܝܗܽܘܢ ܕܺܐܝܬܰܝܗܽܘܢ ܐܰܠܳܗ̈ܶܐ. ܗܽܘ ܓܶܝܪ ܫܡܳܐ ܕܰܟܪܺܝܣܛܝܳܢܳܐ܆ ܕܰܠܩܽܘܒܠܳܐ ܐܺܝܬܰܘܗ̱ܝ ܕܣܰܓܺܝܽܐܘܬ ܐܰܠܳܗ̈ܶܐ. ܐܳܦ ܠܳܟ ܕܶܝܢ ܕܺܝܠܳܟ܆ ܕܠܰܘ ܒܠܶܫܳܢܳܐ ܡܰܠܽܘܢ܆ ܐܶܠܳܐ ܒܬܰܪܥܺܝܬܳܐ܆ ܣܽܘܠܽܘܩܺܝܣܳܐ ܥܳܒܶܕ ܐܰܢ̱ܬ ܡܚܰܘܶܐ ܐ̱ܢܳܐ ܘܰܡܫܰܪܰܪ ܐ̱ܢܳܐ܆ ܕܰܐܠܳܗ̈ܶܐ ܣܰܓܺܝ̈ܶܐܐ ܡܫܰܡܰܗ ܐܰܢ̱ܬ܆ ܟܰܕ ܐܰܠܳܗܳܐ ܫܰܪܺܝܪܳܐ ܚܰܕ ܐܺܝܬܰܘܗ̱ܝ܆ ܗܰܘ ܕܳܐܦ ܠܥܳܠܡܳܐ ܗܳܢܳܐ ܡܶܬܚܰܙܝܳܢܳܐ ܥܒܰܕ܆ ܘܥܰܠ ܗܳܢܳܐ ܐܰܩܺܝܡ ܒܰܕܡܽܘܬ ܡܰܠܟܳܐ ܠܒܰܪܢܳܫܳܐ.
ܒܳܬܰܪܟܶܢ ܗܰܘ ܟܰܕ ܠܡܰܟܣܳܢܽܘܬܳܐ ܗܳܝ ܕܥܰܡ ܨܰܕܘܳܐ ܐܰܟܚܕܳܐ ܘܥܰܡ ܚܶܟܡܬܳܐ ܠܳܐ ܡܣܰܝܒܰܪ ܗ̱ܘܳܐ܆ ܠܦܽܘܩܕܳܢܳܐ ܕܡܰܠ̈ܟܶܐ܆ ܘܠܰܐܢܰܢܩܺܐ ܗܳܝ ܕܡܶܢ ܬܰܡܳܢ ܓܳܙܶܡ ܗ̱ܘܳܐ ܠܶܗ. ܘܐ̱ܢܳܫ ܒܺܝܫ ܚܶܪܝܳܢܳܐ ܘܪܳܚܶܡ ܚܶܪܝ̣ܳܝ̣ܽܘܬܳܐ ܩܳܪܶܐ ܗ̱ܘܳܐ ܠܶܗ. ܘܰܠܩܰܘܡܳܐ ܗܰܘ ܠܒܺܝܒܳܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ܆ ܫܳܢܝܽܘܬܳܐ ܪܺܝܫܳܝܬܳܐ ܡܫܰܡܰܗ ܗ̱ܘܳܐ ܠܶܗ. ܟܰܕ ܕܶܝܢ ܠܘܳܬ ܗܳܠܶܝܢ ܫܳܡܰܥ ܗ̱ܘܳܐ܆ ܕܠܺܝ ܡܳܠܟܳܐ ܘܣܳܐܶܡ ܢܳܡܽܘܣܳܐ ܘܕܰܝܳܢܳܐ ܚܰܕ ܐܰܠܳܗܳܐ ܐܺܝܬܰܘܗ̱ܝ܆ ܕܠܳܟ ܕܰܝܳܢܳܐ ܕܒܰܪ ܝܰܘܡܶܗ܆ ܘܰܠܡܰܠ̈ܟܶܐ ܗܳܢܽܘܢ ܕܕܳܡܶܝܢ ܠܳܟ܆ ܘܠܰܐܠܳܗ̈ܶܐ ܗܳܢܽܘܢ ܕܟܺܐܦܳܐ܆ ܠܳܐ ܫܳܒܶܩ ܣܳܟ ܠܡܶܬܚܫܳܒܽܘ܆ ܕܢܶܬܡܬܰܚ ܪܒܺܝܥܳܐܺܝܬ[7] ܦܳܩܶܕ ܗ̱ܘܳܐ. ܘܟܰܕ ܗܳܟܰܢܳܐ ܠܓܶܢܣܶܗ ܕܙܰܕܝܩܳܐ ܡܥܰܩܶܒ ܗ̱ܘܳܐ܆ ܘܡܶܫܟܰܚ ܗ̱ܘܳܐ ܠܶܗ ܕܰܒܡܶܢܝܳܢܳܐ ܕܒܶܘܠܳܐ[8] ܟܬܺܝܒ܆ ܕܢܶܬܟܰܚܰܕ ܡܰܪܬܶܐ ܗ̱ܘܳܐ ܠܶܗ ܡܶܢ ܫܰܦܺܝܪܽܘܬ ܛܽܘܗܡܳܐ ܕܡܶܬܬܫܺܝܛܳܐ܆ ܘܡܶܬܚܰܝܒܳܐ ܢܶܓ̈ܕܶܐ ܘܫܺܝܛܽܘܬܳܐ ܕܡܶܢ ܗܳܪܟܳܐ܆ ܘܚܶܣܕܳܐ ܕܨܰܥܪܳܐ.
ܐܺܝܬ ܗ̱ܘܰܘ ܕܶܝܢ ܐܳܦ ܐ̱ܢܳܫܺܝ̈ܢ ܡܶܢ ܦܳܠ̈ܚܶܐ ܗܳܢܽܘܢ ܕܫܽܘܠܛܳܢܳܐ ܪܺܝܫܳܢܳܝܳܐ. ܗܳܢܽܘܢ ܡܰܢ ܕܥܰܠ ܢܰܨܺܝܚܽܘܬܳܐ ܕܓܶܢܣܶܗ ܣܳܗܕܺܝܢ ܗ̱ܘܰܘ܆ ܗܳܢܽܘܢ ܕܶܝܢ܆ ܕܳܐܦ ܥܰܠ ܩܰܘܡܬܶܗ ܚܳܝܣܺܝܢ ܗ̱ܘܰܘ܆ ܘܰܕܚܰܝܽܘܣܬܳܢܽܘܬܳܐ ܡܶܕܶܡ ܥܰܠ ܢܰܦܫܶܗ ܢܶܩܢܶܐ ܡܦܺܝܣܺܝܢ ܗ̱ܘܰܘ ܠܶܗ ܘܡܰܪܬܶܝܢ ܗ̱ܘܰܘ܆ ܐܰܝܟ ܕܠܰܐܝܢܳܐ ܕܶܐܬܬܰܛܥܺܝ. ܗܽܘ ܕܶܝܢ ܣܳܗܕܳܐ܆ ܟܰܕ ܩܰܠܺܝܠ ܡܰܢ ܠܥܶܠ ܡܶܢ ܐܰܪܥܳܐ ܡܬܺܝܚ ܗ̱ܘܳܐ܆ ܘܰܒܡܰܚ̈ܘܳܬܳܐ ܠܳܐ ܡܶܬܐܰܣܝܳܢ̈ܝܳܬܳܐ ܒܳܠܰܥ ܗ̱ܘܳܐ܆ ܗܳܠܶܝܢ ܕܰܚܕܳܐ ܡܶܢܗܶܝܢ ܒܰܠܚܽܘܕܶܝܗ̇ ܣܳܦܩܳܐ ܗ̱ܘܳܬ ܠܡܰܝܬܳܝܽܘ ܡܰܘܬܳܐ܆ ܐܰܟܙܢܳܐ ܓܶܝܪ ܕܬܰܘܪܳܐ ܡܶܢ ܐ̱ܢܳܫܺܝ̈ܢ ܛܰܒܳܚ̈ܶܐ ܗܳܟܰܢܳܐ ܡܶܬܡܚܶܐ ܗ̱ܘܳܐ܆ ܒܬܰܪܥܺܝܬܶܗ ܕܶܝܢ ܐܰܝܟ ܗܰܘ ܕܥܰܠ ܥܢܳܢ̈ܶܐ ܠܥܶܠ ܝܳܬܶܒ ܗ̱ܘܳܐ܆ ܠܗܳܢܽܘܢ ܡܰܢ ܐܰܫܺܝܛ ܐܰܝܟ ܕܠܰܐܝܠܶܝܢ ܕܰܣܪܺܝܩܳܐܺܝܬ ܒܳܓܠܺܝܢ ܗ̱ܘܰܘ ܘܨܳܒܪܺܝܢ. ܘܰܠܡܶܫܬܰܩ ܦܳܩܶܕ ܗ̱ܘܳܐ ܠܗܽܘܢ ܟܰܕ ܒܠܰܡ ܐܶܢܽܘܢ܆ ܘܰܕܢܶܫܬܰܘܕܥܽܘܢ ܠܛܶܟܣܳܐ ܒܰܝܬܳܝܳܐ ܕܺܝܠܗܽܘܢ܆ ܐܰܝܟ ܐܰܝܠܶܝܢ ܕܰܬܚܶܝܬ ܪܺܝܫܳܐ ܐܺܝܬܰܝܗܽܘܢ ܘܠܰܘ ܪ̈ܺܝܫܳܢܶܐ܆ ܠܘܳܬ ܕܶܝܢ ܕܰܝܳܢܳܐ ܐܶܡܰܪ: ܕܰܚܕܳܐ ܫܰܦܺܝܪܽܘܬ ܛܽܘܗܡܳܐ ܝܳܕܰܥ ܐ̱ܢܳܐ܆ ܒܰܝܬܳܝܽܘܬܳܐ ܕܰܠܘܳܬ ܐܰܠܳܗܳܐ܆ ܗܳܝ ܕܰܒܟܽܠ ܙܒܰܢ ܐܺܝܬܶܝܗ̇ ܚܰܝܳܐ܆ ܐܰܝܟ ܐܰܝ̇ܕܳܐ ܕܡܶܢ ܡܫܺܝܚܳܐ ܚܰܝܳܐ ܢܳܚܬܳܐ ܒܝܽܘܒܳܠܳܐ܆ ܗܰܘ ܕܰܗܘ̣ܳܐ ܒܰܡܕܰܒܪܳܢܽܘܬܳܐ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܐܐ[9]܆ ܠܗܳܝ ܕܝܰܬܺܝܪ ܚܰܬܺܝܬ̣ܬܳܐ ܘܫܰܪܺܝܪܬܳܐ ܡܩܺܝܡܳܐ ܠܳܗ̇܆ ܡܶܬܥܰܢܘܳܝܽܘܬܳܐ ܗܳܝ ܕܰܡܝܰܬܪ̈ܳܬܳܐ܆ ܘܰܡܕܰܡܝܳܢܽܘܬܳܐ ܕܰܠܘܳܬ ܗܳܝ ܕܰܡܝܰܬܪܳܐ. ܚܺܐܪܽܘܬܳܐ ܓܶܝܪ ܕܡܶܢ ܚܰܫ̈ܶܐ ܗܳܢܽܘܢ ܫܟܺܝܪ̈ܶܐ ܘܝܰܬܺܝܪ ܡܨܰܥܪ̈ܶܐ܆ ܡܳܪܳܢܳܐܺܝܬ ܐܺܝܬܶܝܗ̇ ܫܰܦܺܝܪܽܘܬ ܛܽܘܗܡܳܐ. ܐܰܝܟܰܢܳܐ ܕܶܝܢ ܐܳܦ ܫܳܢܝܽܘܬܳܐ ܠܕܶܚܠܬܳܐ ܕܺܝܠܝ ܗܳܝ ܫܰܦܺܝܪܰܬ ܕܶܚܠܬܳܐ ܩܳܪܶܐ ܐܰܢ̱ܬ܆ ܟܰܕ ܠܘܳܬ ܫܳܢܝܽܘܬܳܐ ܓܠܺܝܬܳܐ ܡܚܰܦܶܛ ܐܰܢ̱ܬ ܠܺܝ. ܐܰܘ ܓܶܝܪ ܠܘܳܬ ܫܳܢܝܽܘܬܳܐ ܗܳܝ܆ ܗܳܝ ܕܰܢܕܰܒܰܚ ܠܰܓ̈ܠܺܝܦܶܐ ܣܡܰܝ̈ܳܐ ܘܕܽܘ̈ܓܶܐ܆ ܗܳܢܽܘܢ ܕܡܳܢܳܐ ܕܝܰܬܺܝܪ ܪܰܒ ܢܫܰܟܢܽܘܢ ܠܺܝ ܟܰܕ ܢܶܬܝܰܩܪܽܘܢ܆ ܛܳܒ ܡܶܢ ܕܳܡܝܽܘܬܳܐ ܕܺܝܠܗܽܘܢ. ܐܶܢ ܕܶܝܢ ܐܶ݀ܬܕܰܡܶܐ ܠܗܽܘܢ܆ ܝܺܕܺܝܥܳܐ ܗ̱ܝ ܟܺܝܬ ܕܗܳܘܶܐ ܐ̱ܢܳܐ ܐܰܝܟ ܫܳܢܝܳܐ܆ ܐܰܝܟ ܡ̈ܶܠܶܐ ܗܳܠܶܝܢ ܕܺܝܠܳܟ. ܡܳܕܶܝܢ ܕܚܶܟܡܬܳܐ ܐܺܝܬܶܝܗ̇܆ ܗܳܝ ܕܠܰܐܠܳܗ̈ܶܐ ܗܳܢܽܘܢ ܕܰܐܝܟ ܗܳܟܰܢ ܒܥܶܠ̈ܕܒܳܒܶܐ ܢܶܚܫܽܘܒ ܐܶܢܽܘܢ܆ ܗܳܢܽܘܢ ܕܰܡܫܰܝܢܽܘܬܗܽܘܢ ܘܬܰܪܥܽܘܬܗܽܘܢ܆ ܡܙܰܡܢܳܢܺܝܬܳܐ ܕܠܳܐ ܡܰܪܓܫܳܢܽܘܬܳܐ ܗܳܘܝܳܐ. ܐܶܬܪܕܰܝ ܕܶܝܢ ܡܶܢ ܗܳܠܶܝܢ ܕܒܺܝ ܚܳܙܶܐ ܐܰܢ̱ܬ܆ ܐܰܝܟ ܬܚܽܘܡܳܐ ܕܰܫܠܺܝܚܳܐ ܦܰܘܠܽܘܤ܆ ܕܰܟܪܺܝܣܛܝܳܢܽܘܬܳܐ ܗܰܝܡܳܢܽܘܬܳܐ ܕܰܒܝܰܕ ܚܽܘܒܳܐ ܡܶܬܬܰܥܒܕܳܐ ܐܺܝܬܶܝܗ̇[10]. ܐܶܠܽܘ ܠܳܐ ܓܶܝܪ ܕܚܽܘܒܳܐ ܡܶܕܶܡ ܘܪܶܚܡܬܳܐ ܠܳܐ ܡܶܙܕܰܟܝܳܢܺܝܬܳܐ ܠܘܳܬ ܗܰܘ ܐܺܝܬ ܗ̱ܘܳܐ ܒܰܢ܆ ܗܰܘ ܐܰܝܢܳܐ ܕܒܶܗ ܗܰܝܡܶܢܢ܆ ܠܳܐ ܡܣܰܝܒܪܺܝܢ ܗ̱ܘܰܝܢ ܠܡܰܟܶܐܒܳܢܽܘܬܳܐ ܗܳܝ ܕܗܳܟܰܢܳܐ ܐܺܝܬܶܝܗ̇܆ ܘܠܰܥܡܺܝܠܽܘܬܗܽܘܢ ܘܩܰܫܝܽܘܬܗܽܘܢ ܕܫܶܢ̈ܕܶܐ. ܐܰܝܟܰܢܳܐ ܕܬܶܣܬܒܰܪ ܕܗܽܘ ܚܽܘܒܳܐ ܐܺܝܬܰܘܗ̱ܝ ܕܡܶܬܟܰܬܰܫ܆ ܘܠܳܐ ܗ̱ܘܳܐ ܡܚܺܝܠܽܘܬܶܗ ܕܦܰܓܪܳܐ܆ ܘܰܙܥܽܘܪܬܳܐ ܬܶܬܚܫܶܒ ܗܳܝ ܕܟܽܠܶܗ ܗܳܢܳܐ ܥܳܠܡܳܐ ܢܶܬܠ ܘܳܐܦ ܚܰܝ̈ܶܐ ܗܳܠܶܝܢ ܕܰܡܠܶܐ ܙܰܒܢܳܐ܆ ܠܘܳܬ ܗܳܝ ܕܰܠܗܰܘ ܕܡܶܬܪܚܶܡ ܢܶܫܬܘܶܐ. ܡܶܛܽܠ ܗܳܕܶܐ ܟܰܠܬܳܐ ܗܳܝ ܕܰܒܬܶܫܒܚܰܬ ܬܶܫܒ̈ܚܳܬܳܐ܆ ܟܰܕ ܠܰܢ ܠܥܺܕܬܳܐ ܩܳܕܡܳܐ ܗ̱ܘܳܬ ܡܛܰܦܣܳܐ ܐܳܡܪܳܐ ܗ̄ܘܳܬ܆ ܒܰܠܺܝܥܰܬ ܒܚܽܘܒܳܐ ܐܺܝܬܰܝ[11]. ܡܰܝ̈ܳܐ ܣܰܓܺܝ̈ܶܐܐ ܠܳܐ ܢܶܬܡܨܽܘܢ ܕܰܢܕܰܥܟܽܘܢܳܝܗ̱ܝ ܠܚܽܘܒܳܐ. ܘܢܰܗܪ̈ܰܘܳܬܳܐ ܠܳܐ ܢܶܓܪܦܽܘܢܳܝܗ̱ܝ . ܐܶܢ ܢܶܬܶܠ ܓܰܒܪܳܐ ܟܽܠܶܗ ܩܶܢܝܳܢܶܗ ܒܚܽܘܒܳܐ܆ ܡܰܣܠܳܝܽܘ ܢܰܣܠܽܘܢܳܝܗ̱ܝ [12]. ܗܳܢܽܘܢ ܓܶܝܪ ܕܩܰܕܶܡܘ ܐܰܚܶܒܘ ܘܰܛܥܺܝܡ ܠܗܽܘܢ ܚܽܘܒܳܐ܆ ܫܳܝܛܺܝܢ ܘܡܰܣܠܶܝܢ܆ ܘܰܐܝܟ ܠܳܐ ܡܶܕܶܡ ܕܳܝܢܺܝܢ ܠܳܗ̇܆ ܠܗܳܝ ܕܰܚܠܳܦ ܗܰܘ ܟܽܠ ܡܶܕܶܡ ܢܶܚܫܽܘܢ. ܗܰܘ ܓܶܝܪ ܕܠܳܐ ܛܥܺܝܡ ܠܶܗ܆ ܕܰܢܕܽܘܢ ܠܗܳܠܶܝܢ ܠܳܐ ܡܶܫܟܰܚ. ܡܳܢܳܐ ܗܳܟܺܝܠ ܬܡܺܝܗܳܐ܆ ܐܶܢ ܠܟܽܘܢ ܠܳܐ ܡܗܰܝܡ̈ܢܶܐ ܕܛܳܥܝܢ ܚ̱ܢܰܢ ܡܶܣܬܰܒܪܺܝܢ ܚ̱ܢܰܢ܆ ܚܢܰܢ ܗܳܢܽܘܢ ܕܰܒܡܶܬܬܨܺܝܕܳܢܽܘܬܳܐ ܗܳܝ ܐܰܠܳܗܳܝܬܳܐ ܨܺܝܕܺܝܢ ܚ̱ܢܰܢ܆ ܘܰܠܒܺܝܟܺܝܢ ܚ̱ܢܰܢ ܒܚܰܫܳܐ ܕܚܘܒܳܐ܆ ܘܰܒܢܽܘܪܳܐ ܕܠܳܐ ܕܳܥܟܳܐ.
ܟܰܕ ܗܳܠܶܝܢ ܕܶܝܢ ܡܡܰܠܶܠ ܗ̱ܘܳܐ ܗܽܘ ܣܳܗܕܳܐ܆ ܗܰܘ ܕܥܰܠ ܟܽܠܶܗ ܦܰܓܪܶܗ ܐܰܝܬܺܝ ܡܰܚ̈ܘܳܬܳܐ܆ ܥܰܠ ܦܰܣ̈ܶܐ ܕܪ̈ܶܓܠܰܘܗ̱ܝ ܦܳܩܶܕ ܗ̱ܘܳܐ ܕܢܶܒܠܰܥ. ܠܗܳܠܶܝܢ ܓܶܝܪ ܒܰܠܚܽܘܕ ܚܳܙܶܐ ܗ̱ܘܳܐ ܠܒܰܪ ܡܶܢ ܫܶܢ̈ܕܶܐ܆ ܒܗܳܝ ܕܰܠܘܳܬ ܐܰܪܥܳܐ ܡܶܬܛܰܫ̈ܝܳܢ ܗ̱ܘܰܝ̈ ܐܰܝܟ ܕܰܒܣܽܘܓܳܐܐ܆ ܘܠܰܘ ܡܢܳܬܳܐ ܓܠܺܝܬܳܐ ܐܺܝܬܰܝܗܶܝܢ ܕܦܰܓܪܳܐ. ܘܟܰܕ ܡܶܢ ܬܰܡܳܢ ܦܰܕ ܘܠܰܝܬ ܗ̱ܘܳܐ ܠܶܗ ܦܽܘܪܣܳܐ ܕܡܳܢܳܐ ܢܶܥܒܶܕ܆ ܘܺܐܝܬܰܘܗ̱ܝ ܗ̱ܘܳܐ ܒܰܕܡܽܘܬ ܗܰܘ ܕܰܫܢܺܝ܆ ܘܰܠܦܰܓܪܳܐ ܗܰܘ ܕܡܶܬܟܰܬܰܫ ܗ̱ܘܳܐ ܐܰܫܶܦ܆ ܠܘܳܬ ܢܰܦܫܳܐ ܡܰܥܒܰܪ ܠܶܗ ܠܰܩܪܳܒܳܐ. ܨܳܒܶܐ ܗ̱ܘܳܐ ܓܶܝܪ܆ ܕܰܠܚܽܘܫܳܒܶܗ ܕܣܳܗܕܳܐ ܢܶܠܒܽܘܟ. ܘܰܐܝܟ ܕܰܠܡܺܐܡܰܪ ܒܺܐܝܕܶܗ ܢܶܩܡܛܺܝܘܗ̱ܝ܆ ܒܰܕܡܽܘܬ ܗܰܕܳܡܳܐ ܡܶܕܶܡ ܕܦܰܓܪܳܐ܆ ܘܢܶܣܟܽܘܪ ܘܢܶܟܠܶܐ ܠܰܡܥܺܝܢܳܐ܆ ܗܳܝ ܕܡܶܢܳܗ̇ ܪܳܕܶܝܢ ܗ̱ܘܰܘ ܫܶܦ̈ܥܶܐ ܕܓܰܢ̱ܒܳܪܽܘܬܳܐ ܫܦܺܝܥܳܐܺܝܬ܆ ܘܰܡܒܰܣܪܳܢܽܘܬܳܐ ܕܥܰܠ ܟܺܐܒ̈ܶܐ ܕܒܶܣܪܳܐ. ܘܦܳܩܶܕ ܗ̱ܘܳܐ ܠܰܡܫܰܡ̈ܫܳܢܶܐ ܠܡܶܦܬܰܚ ܦܽܘܡܶܗ ܩܛܺܝܪܳܐܺܝܬ܆ ܘܰܠܡܰܪܡܳܝܽܘ ܒܶܗ ܚܰܡܪܳܐ ܘܒܶܣܪܳܐ ܡܶܢ ܕܶܒ̈ܚܶܐ ܘܢܽܘܩܳܝ̈ܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܡܣܰܝܒܺܝܢ.
ܘܟܰܕ ܗܳܕܶܐ ܗܘ̣ܳܬ܆ ܘܗܰܘ ܫܳܢܝܳܐ ܣܳܒܰܪ ܗ̱ܘܳܐ ܠܶܗ ܕܰܙܟܳܝܗ̱ܝ ܠܰܐܬܠܺܝܛܳܐ ܗܰܘ ܠܳܐ ܡܶܙܕܰܟܝܳܢܳܐ܆ ܟܰܕ ܓܚܶܟ ܗܰܘ ܙܰܕܝܩܳܐ ܥܰܠ ܚܰܣܺܝܪܽܘܬ ܗܰܘܢܶܗ ܐܶܡܰܪ. ܛܰܥܝܳܐ ܠܳܟ ܕܥܰܠ ܡܚܺܝ̈ܠܶܐ ܣܳܥܶܐ ܐܰܢ̱ܬ܆ ܥܕܰܟܺܝܠ ܥܰܡ ܦܰܓܪܳܐ ܡܰܩܪܶܒ ܐܰܢ̱ܬ. ܠܢܰܦܫܳܐ ܕܶܝܢ ܕܺܝܠܝ ܠܳܐ ܠܒ̣ܰܟܬ܆ ܘܳܐܦܠܳܐ ܬܽܘܒ ܬܶܠܒܽܘܟ ܡܬܽܘܡ. ܡܶܙܕܰܟܝܳܢܽܘܬܳܐ ܓܶܝܪ ܕܢܰܦܫܳܐ ܗܳܕܶܐ ܐܺܝܬܶܝܗ̇܆ ܗܳܝ ܕܬܶܨܒܶܐ ܕܬܶܣܥܽܘܪ ܡܶܕܶܡ ܕܰܠܒܰܪ ܡܶܢ ܢܳܡܽܘܣܳܐ. ܐܰܝܟܰܢܳܐ ܟܺܝܬ ܕܗܳܝ ܠܳܐ ܨܶܒܝܳܢܳܝܬܳܐ܆ ܠܰܘ ܡܶܬܟܰܒܫܳܢܺܝܬܳܐ ܗ̱ܝ܆ ܐܶܠܳܐ ܠܥܶܠ ܡܶܢ ܟܽܠ ܫܟܳܚܬܳܐ ܕܫܶܢ̈ܕܶܐ ܛܳܝܣܳܐ ܘܥܳܪܩܳܐ. ܘܰܐܟܙܢܳܐ ܕܠܳܐ ܡܰܨܝܳܐ ܠܳܟ܆ ܕܟܰܕ ܥܰܠ ܐܰܪܥܳܐ ܩܳܐܶܡ ܐܰܢ̱ܬ ܬܶܠܒܽܘܟ ܒܰܫܡܰܝܳܐ܆ ܒܶܗ ܟܰܕ ܒܶܗ ܒܰܙܢܳܐ ܕܠܳܐ ܦܽܘܪܣܳܐ ܐܺܝܬܶܝܗ̇܆ ܗܳܝ ܕܠܳܐ ܨܶܒܝܳܢܳܐܺܝܬ ܬܶܠܒܽܘܟ ܠܰܡܫܰܠܛܽܘܬ ܒܝܳܬܳܐ܆ ܡܰܠܽܘܢ ܕܶܝܢ ܠܬܰܪܥܺܝܬܳܐ ܫܡܰܝܳܢܺܝܬܳܐ. ܐܶܠܳܐ ܐܳܦܠܳܐ ܣܶܦ̈ܘܳܬܳܐ ܕܺܝܠܝ ܐܶܣܬܰܝܰܒ̈ܶܝܢ ܐܰܝܟܰܢܳܐ ܕܣܳܒܰܪ ܐܰܢ̱ܬ. ܐܳܘ ܢܕܺܝܕܳܐ ܘܣܰܡܝܳܐ ܒܬܰܪܥܺܝܬܳܐ. ܗܳܠܶܝܢ ܓܶܝܪ ܡܶܨܥܳܐܺܝܬ ܐܺܝܬ ܠܗܶܝܢ. ܐܳܦ ܕܰܡܝܰܬܪܽܘܬܳܐ ܐܺܝܬܰܝܗܶܝܢ ܐܽܘܪ̈ܓܰܢܶܐ ܘܳܐܦ ܕܒܺܝܫܽܘܬܳܐ. ܐܶܠܽܘ ܡܰܢ ܓܶܝܪ ܚܽܘܫܳܒܳܐ܆ ܟܰܕ ܒܕܶܚܠܬܳܐ ܕܫܶܢ̈ܕܶܐ ܐܶܙܕܟܺܝ܆ ܠܡܶܐܟܽܘܠܬܳܐ ܕܗܳܠܶܝܢ ܡܣܰܝ̈ܒܳܬܳܐ ܒܨܶܒܝܳܢܶܗ ܩܰܒܶܠ܆ ܡܫܰܡܫܳܢܺܝܬܳܐ ܕܒܺܝܫܽܘܬܳܐ ܗܳܘܝܳܐ ܗ̱ܘܳܬ ܗܺܝ ܛܥܳܡܬܳܐ܆ ܘܶܐܙܕܟ̈ܺܝܶܢ ܐܰܟܚܕܳܐ ܥܰܡ ܚܽܘܫܳܒܳܐ ܐܳܦ ܣܶܦ̈ܘܳܬܳܐ. ܐܶܢ ܕܶܝܢ ܠܳܐ ܡܶܨܛܰܠܝܳܢܺܝܬܳܐ ܩܰܘܝܰܬ̣ ܗܺܝ ܬܰܪܥܺܝܬܳܐ܆ ܩܰܘܝܰܬ ܡܳܕܶܝܢ ܐܳܦ ܛܥܳܡܬܳܐ ܟܰܕ ܠܳܐ ܡܣܰܝܒܳܐ. ܡܣܰܝܒܳܐ ܠܶܗ ܓܶܝܪ ܘܠܳܐ ܣܳܟ ܗܳܝ ܠܳܐ ܨܶܒܝܳܢܳܝܬܳܐ܆ ܐܳܦܶܢ ܕܡܳܐ ܘܒܶܣܪܳܐ ܢܫܽܘܦ ܐ̱ܢܳܫ ܩܛܺܝܪܳܐܺܝܬ ܥܰܠ ܣܶܦ̈ܘܳܬܳܐ. ܗܳܢܳܐ ܓܶܝܪ ܟܽܠܶܗ ܠܳܐ ܓܫܰܦ̈ܶܝܢ ܣܶܦ̈ܘܳܬܳܐ ܐܳܦ ܟܰܕ ܓܫܰܦ̈ܶܝܢ ܠܒܶܣܪܳܐ܆ ܟܡܳܐ ܕܠܳܐ ܨܒ̣̈ܰܝܶܢ. ܕܗܳܝ ܕܶܝܢ ܕܢܶܨܒܶܐ܆ ܘܠܳܐ ܐ̱ܢܳܫ ܡܶܢ ܒܢܰܝ̈ܢܳܫܳܐ ܐܺܝܬܰܘܗ̱ܝ ܡܳܪܳܐ ܠܒܰܪ ܡܶܢ ܚܽܘܫܳܒܳܐ ܗܰܘ ܕܒܰܢ. ܠܡܳܢܳܐ ܗܳܟܺܝܠ ܠܳܐ ܣܳܥܽܘܪ̈ܝܳܬܳܐ ܬܳܥܶܫ ܐܰܢ̱ܬ ܐܳܘ ܕܰܝܳܢܳܐ ܘܠܳܐ ܡܶܫܬܰܡ̈ܠܝܳܢܝܳܬܳܐ. ܘܟܰܕ ܒܗܳܠܶܝܢ ܬܽܘܒ ܡ̈ܶܠܶܐ܆ ܗܰܘ ܐܶܬܠܛܶܫ ܠܘܳܬ ܪܽܘܓܙܳܐ܆ ܒ̈ܓܶܠܕܐ ܦܰܛܺܝܪ̈ܶܐ ܘܰܩܫܰܝ̈ܳܐ ܠܳܐ ܡܶܬܐܰܣܝܳܢܳܐܺܝܬ ܘܰܕܠܳܐ ܚܰܘܣܳܢ ܦܳܩܶܕ ܗ̱ܘܳܐ ܕܢܶܬܡܚܶܐ.
ܘܟܰܕ ܙܢܰܝ̈ܳܐ ܟܽܠܗܽܘܢ ܕܚܰܪܡܽܘܬܳܐ ܒܦܳܣܺܝ̈ܩܳܬܳܐ ܠܡܺܐܡܰܪ ܐܶܬܟܣܶܣܘ܆ ܠܘܳܬ ܦܽܘܪܣܳܐ ܐ̱ܚܪܺܢܳܐ ܥܳܒܰܪ ܗ̱ܘܳܐ. ܟܰܕ ܡܰܣܒܰܪ ܗ̱ܘܳܐ ܕܰܐܝܟ ܕܰܠܥܰܒܕܳܐ ܕܫܽܘܒܚܳܐ ܣܪܺܝܩܳܐ܆ ܒܝܰܕ ܫܟܳܚܬܳܐ ܡܶܕܶܡ ܕܚܽܘܫܳܒܳܐ ܝܰܬܺܝܪ ܡܨܰܥܰܪܬܳܐ ܘܫܺܝܛܬܳܐ܆ ܘܰܒܝܰܕ ܗܳܠܶܝܢ ܕܰܡ̈ܟܳܢܳܢ ܠܡܰܒܗܳܬܽܘ܆ ܨܳܐܶܕ ܗ̱ܘܳܐ ܠܶܗ. ܦܩܰܕ ܗ̱ܘܳܐ ܓܶܝܪ ܠܰܡܫܰܡ̈ܫܳܢܶܐ ܕܰܐܝܟ ܕܰܠܒܳܒܽܘܣܳܐ ܕܳܐܙܶܠ ܠܒܶܝܬ ܣܳܦܪ̈ܶܐ ܥܰܠ ܟܰܬܦ̈ܳܬܗܽܘܢ ܢܶܛܥܢܽܘܢܳܝܗ̱ܝ ܆ ܘܢܶܓܠܽܘܢܳܝܗ̱ܝ ܠܰܐܬܠܺܝܛܳܐ ܡܦܰܪܣܝܳܐܺܝܬ܆ ܢܶܡܚܽܘܢܳܝܗ̱ܝ ܕܶܝܢ ܒܥܶܪܰܩܬܳܐ ܩܳܛܽܘܠܬܳܐ ܡܰܠܽܘܢ ܘܠܰܘ ܫܰܒܪܳܝܬܳܐ. ܘܠܰܘ ܒܰܚܕܳܐ ܒܰܠܚܽܘܕ܆ ܐܶܠܳܐ ܒܣܰܓܺܝ̈ܳܐܬܳܐ. ܗܰܘ ܕܶܝܢ ܟܰܕ ܠܟܽܘܠܳܗ̇ ܬܰܪܥܺܝܬܶܗ ܐܺܝܬ ܗ̱ܘܳܐ ܠܶܗ ܕܰܩܒܺܝܥܳܐ ܠܘܳܬ ܡܫܺܝܚܳܐ܆ ܕܰܡܥܰܕܪܳܢܳܐ ܗܘܰܝܬ ܠܺܝ ܘܳܐܦ ܟܰܕ ܠܳܐ ܝܳܕܰܥ ܐܰܢ̱ܬ ܐܶܡܰܪ ܐܳܘ ܡܰܪܩܺܝܰܐܢܶܐ܆ ܠܘܳܬ ܣܳܥܽܘܪܽܘܬܳܐ ܕܦܽܘܩܕܳܢܳܐ ܡܳܪܳܢܳܝܳܐ. ܐܶܬܗܰܦܰܟܬ ܓܶܝܪ ܒܝܰܕ ܫܟܳܚܬܳܐ ܕܚܽܘܫܳܒܳܟ ܕܺܝܠܳܟ ܐܶܘܰܢܓܶܠܳܐܺܝܬ ܘܰܗܘܺܝܬ̣ ܐܰܝܟ ܛܠܳܝ̈ܶܐ܆ ܘܶܐ݀ܥܽܘܠ ܡܶܢ ܟܽܠܦܪܽܘܤ ܠܡܰܠܟܽܘܬܳܐ ܕܰܫܡܰܝܳܐ. ܫܰܪܺܝܪܰܐ ܗ̱ܘ ܓܶܝܪ ܗܰܘ ܕܶܐܡܰܪ: ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܶܐܢ ܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܶܐ ܠܳܐ ܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ[13]. ܐܳܦ ܟܺܝܬ ܐܶܬܥܰܗܰܕ ܠܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ ܕܡܶܢ ܡܰܚ̈ܘܳܬܳܐ ܗܳܠܶܝܢ܆ ܐܰܟܙܢܳܐ ܕܒܳܒܽܘܣܳܐ ܐܰܘܟܺܝܬ ܕܛܰܠܝܳܐ܆ ܘܳܐܦ ܠܘܳܬ ܕܰܪ̈ܶܐ ܗܳܠܶܝܢ ܕܫܰܪܟܳܐ ܕܰܐܓܽܘܢܳܐ ܡܶܬܛܰܝܰܒ ܐ̱ܢܳܐ.
ܟܰܕ ܠܗܳܠܶܝܢ ܘܠܰܕܣܰܓܺܝ ܡܝܰܬܪ̈ܳܢ ܡܶܢ ܗܳܠܶܝܢ ܐܶܡܰܪ ܘܚܰܫ ܗܰܘ ܚܰܝܠܬܳܢܳܐ ܝܽܘܠܝܰܐܢܽܘܤ܆ ܠܒܶܝܬ ܐܰܣܺܝܪ̈ܶܐ ܗܰܘ ܕܰܒܦܰܠܰܐܒܺܝܰܐܤ܆ ܚܕܳܐ ܕܶܝܢ ܡܕܺܝܢ̱ܬܳܐ ܐܺܝܬܶܝܗ̇ ܗܳܕܶܐ ܡܶܢ ܐܰܦܐܪܺܟܺܝܰܐ ܕܩܺܝ̈ܠܺܝܩܳܝܶܐ ܡܶܫܬܰܕܰܪ ܗ̱ܘܳܐ܆ ܟܰܕ ܗܽܘ ܕܰܝܳܢܳܐ ܓܙܰܡ ܕܳܐܦ ܠܘܳܬ ܡܕܺܝܢ̈ܳܬܳܐ ܐ̱ܚܪ̈ܳܢܝܳܬܳܐ ܡܰܝܬܶܐ ܠܶܗ܆ ܐܰܝܟ ܕܰܒܒܽܘܙܳܚܳܐ ܫܟܺܝܪܳܐ܆ ܘܰܒܡܶܬܚܰܘܝܳܢܽܘܬܳܐ ܕܢܶܓ̈ܕܶܐ ܕܝܰܬܺܝܪ ܡܶܢ ܟܽܠ ܡܰܪܺܝܪܺܝܢ. ܠܘܳܬ ܗܰܘ ܕܗܽܘ ܣܳܗܕܳܐ ܥܠܰܝܡܳܐܺܝܬ ܐܶܡܰܪ ܘܫܰܪܺܝܪܳܐܺܝܬ܆ ܕܳܐܦ ܗܳܢܳܐ ܐܳܕܫܳܐ ܕܰܫܟܳܚܬܳܟ ܨܢܺܝܥܬܳܐ܆ ܥܰܠ ܩܰܪܩܰܦܬܳܟ ܢܶܬܗܦܶܟ ܠܳܟ. ܒܟܽܠ ܚܕܳܐ ܓܶܝܪ ܡܕܺܝܢ̱ܬܳܐ܆ ܩܳܝܶܡܬܳܐ ܟܬܺܝܒܬܳܐ ܕܢܶܨܚܳܢܳܐ ܕܺܝܠܝ ܙܪܺܝܙܳܐ ܬܩܺܝܡ܆ ܘܠܰܡܫܺܝܚܳܐ ܗܰܘ ܣܳܐܶܡ ܐܰܓܽܘܢܳܐ ܕܺܝܠܝ ܬܰܟܪܶܙ ܝܰܬܺܝܪ ܢܰܨܺܝܚܳܐܺܝܬ.
ܘܟܰܕ ܗܳܠܶܝܢ ܐܶܬܶܐܡܰܪ̈ܝ̱܆ ܠܘܳܬ ܗܳܝ ܕܰܐܢܰܐܙܐܪ̈ܒܝܐ ܡܫܰܢܶܝܢ ܥܳܒܪܺܝܢ ܗ̱ܘܰܘ܆ ܘܬܽܘܒ ܒܗܶܝܢ ܟܰܕ ܒܗܶܝܢ ܡܶܬܚܰܫܰܚ ܗ̱ܘܳܐ ܗܰܘ ܕܕܳܐܶܢ ܗ̱ܘܳܐ. ܘܬܽܘܒ ܝܽܘܠܝܰܐܢܽܘܤ ܒܪ̈ܶܓܠܶܐ ܚ̈ܰܕܬܳܬܳܐ ܠܪܶܗܛܳܐ ܕܰܡܚܰܡܣܢܳܢܽܘܬܳܐ ܪܳܗܶܛ ܗ̱ܘܳܐ. ܘܗܰܘ ܡܰܢ ܐܰܝܟ ܕܰܠܘܳܬ ܡܰܓܕܠܳܐ ܡܩܰܪܶܒ ܗ̱ܘܳܐ ܦܽܘܪ̈ܣܶܐ. ܗܰܘ ܕܶܝܢ ܝܰܬܺܝܪ ܡܫܰܪܪܳܐ ܘܰܚܠܺܝܡܳܐ ܘܠܳܐ ܡܶܙܕܰܥܙܥܳܢܳܐ ܐܺܝܬܰܘܗ̱ܝ ܗ̱ܘܳܐ. ܓܳܙܶܡ ܗ̱ܘܳܐ ܕܰܝܳܢܳܐ ܢܶܓ̈ܕܶܐ. ܒܡܰܚ̈ܘܳܬܳܐ ܕܡܶܢ ܗܳܠܶܝܢ ܡܒܰܣܒܶܤ ܗ̱ܘܳܐ ܠܶܗ. ܗܰܘ ܕܶܝܢ܆ ܐܰܘܣܶܦ ܐܶܢ ܨܳܒܶܐ ܐܰܢ̱ܬ ܐܳܦ ܐܰܣܽܘܪ̈ܶܐ ܘܳܐܦ ܢܽܘܪܳܐ ܘܳܐܦ ܣܰܝܦܳܐ ܡܰܙܥܶܩ ܗ̱ܘܳܐ. ܡܶܢ ܒܶܣܪܳܐ ܕܺܝܠܝ ܡܠ̣ܺܝ ܟܰܪܣܳܟ܆ ܘܰܣܒܰܥ. ܥܕܰܡܳܐ ܓܶܝܪ ܠܗܳܢܳܐ܆ ܗܳܠܶܝܢ ܕܺܝܠܳܟ ܢܩܽܘ̈ܡܳܢ. ܠܘܳܬ ܢܰܦܫܳܐ ܕܶܝܢ ܠܳܐ ܢܶܥܒܪ̈ܳܢ. ܘܰܒܗܳܠܶܝܢ ܬܽܘܒ ܠܪܽܘܓܙܳܐ ܕܺܝܠܶܗ ܢܰܒܪܶܫ.
ܘܟܰܕ ܪܘܳܐ ܗ̱ܘܳܐ ܒܗܰܘܢܶܗ܆ ܠܽܘܩܒܰܠ ܢܰܦܫܶܗ ܕܣܳܗܕܳܐ ܨܳܒܶܐ ܗ̱ܘܳܐ ܕܰܢܙܺܝܥ ܐܶܢܽܘܢ ܠܙܰܝ̈ܢܶܐ. ܦܳܩܶܕ ܗ̱ܘܳܐ ܓܶܝܪ܆ ܕܒܺܐܝܕܰܘ̈ܗ̱ܝ ܐܳܦ ܒܦܽܘܡܶܗ ܐܰܝܟ ܕܰܒܩܰܕܡܳܝܬܳܐ܆ ܢܶܬܪܡܶܐ ܩܛܺܝܪܳܐܺܝܬ ܢܽܘܩܳܝܳܐ ܕܠܳܐ ܢܳܡܽܘܤ ܘܕܶܒܚܳܐ ܛܰܡܳܐܐ. ܗܳܝ ܕܰܠܘܳܬܳܗ̇ ܬܽܘܒ ܗܽܘ ܐܰܬܠܺܝܛܳܐ܆ ܐܰܪܰܐ ܝܳܕܰܥ ܐܰܢ̱ܬ ܠܳܗ̇ ܐܶܡܰܪ ܠܗܳܕܶܐ܆ ܗܳܝ ܕܣܳܥܰܪ ܐܰܢ̱ܬ ܐܳܘ ܕܠܳܐ ܗܰܘܢܳܐ܆ ܕܰܫܟܳܚ̈ܳܬܳܐ ܓܶܝܪ ܕܺܝܠܳܟ܆ ܒܝܰܕ ܗܳܠܶܝܢ ܕܥܳܒܶܕ ܐܰܢ̱ܬ܆ ܫܰܦܠܽܘܬܳܐ ܡܶܬܚܰܝܰܒ ܐܰܢ̱ܬ. ܐܶܢܗܽܘ ܡܰܢ ܓܶܝܪ ܕܣܶܦܩܰܬ ܠܳܟ ܠܘܳܬ ܡܶܙܕܰܟܝܳܢܽܘܬܳܐ ܕܺܝܠܝ܆ ܗܳܝ ܕܰܚܕܳܐ ܙܒܰܢ ܩܛܺܝܪܳܐܺܝܬ ܬܶܐܫܽܘܕ ܒܦܽܘܡܝ ܢܽܘܩܳܝܳܐ܆ ܐܺܝܬ ܠܳܟ ܗܳܝ ܕܡܶܬܝܰܨܦܳܐ ܗ̱ܘܳܬ܆ ܘܰܠܡܳܢܳܐ ܬܰܪܬܶܝܢ ܙܰܒ̈ܢܺܝܢ ܡܶܛܽܠܳܬܗܶܝܢ ܟܰܕ ܡܶܛܽܠܳܬܗܶܝܢ ܣܪܺܝܩܳܐܺܝܬ ܥܳܡܶܠ ܐܰܢ̱ܬ. ܐܶܢܕܶܝܢ ܗܳܝ ܩܰܕܡܳܝܬܳܐ ܕܠܳܐ ܣܳܥܽܘܪܽܘܬܳܐ ܗܘܳܬ܆ ܐܳܦ ܗܳܝ ܕܬܰܪܬܶܝܢ ܡܶܢ ܟܽܠ ܦܪܽܘܤ ܕܠܳܐ ܦܽܘܪܣܳܐ ܗ̱ܝ. ܠܢܰܦܫܳܐ ܓܶܝܪ܆ ܫܽܘܪܳܐ ܐܺܝܬܶܝܗ̇ ܗܺܝ ܠܳܐ ܨܶܒܝܳܢܳܝܽܘܬܳܐ܆ ܕܰܠܟܽܠ ܡܣܰܝܒܽܘܬܳܐ ܙܳܢܶܩ ܘܫܳܕܶܐ ܡܶܢܳܗ̇. ܐܰܝܟܰܢܳܐ ܟܺܝܬ ܕܳܐܦ ܐܰܢ̱ܬ ܝܳܕܰܥ ܐܰܢ̱ܬ ܓܰܠܝܳܐܺܝܬ܆ ܕܶܐܢ ܨܳܒܶܐ ܐ̱ܢܳܐ܆ ܐܳܦ ܠܒܺܝܟ ܐ̱ܢܳܐ ܡܶܢ ܟܰܕܽܘ. ܟܰܕ ܕܶܝܢ ܠܳܐ ܨܳܒܶܐ ܐ̱ܢܳܐ܆ ܠܳܐ ܡܬܽܘܡ ܐܶ݀ܬܟܒܶܫ. ܐܳܦ ܓܶܝܪ ܠܦܰܐܠܰܐܕܺܝܽܘܤ ܘܠܰܐܢܛܽܘܢܺܝܘܤ ܗܳܢܽܘܢ ܕܶܐܡܰܪܬ ܕܶܐܬܬܦܺܝܣܘ ܠܳܟ܆ ܠܰܡܕܰܒܳܚܽܘ ܠܫ̈ܺܐܕܶܐ ܦܝܳܣܳܐ ܥܒܰܕܬ ܐܶܢܽܘܢ܆ ܘܗܳܝܕܶܝܢ ܙܟܰܝܬ ܐܶܢܽܘܢ. ܠܺܝ ܕܶܝܢ ܠܳܐ ܦܝܳܣܳܐ ܥܒܰܕܬ. ܡܳܕܶܝܢ ܠܳܚܡܳܐܺܝܬ ܐܳܡܰܪ ܐ̱ܢܳܐ܆ ܐܳܦܠܐ ܙܟܰܝܬ. ܢܽܘܚ ܗܳܟܺܝܠ ܡܶܢ ܕܰܠܡܰܩܪܳܒܽܘ ܥܰܡ ܢܰܦܫܳܐ܆ ܘܠܳܐ ܠܗܰܠ ܡܶܢ ܬܚܽܘ̈ܡܶܐ ܕܰܡܚܺܝܠܽܘܬܳܟ ܬܶܦܽܘܩ܆ ܐܳܦܠܐ ܬܰܛܥܶܐ ܐܰܢ̱ܬ ܠܳܟ. ܘܰܠܗܳܠܶܝܢ ܕܰܡܡܰܠܶܠ ܐܰܢ̱ܬ ܒܰܚܶܢ ܐܶܢܶܝܢ ܠܽܘܩܕܰܡ܆ ܘܠܳܐ ܡܛܰܝܒܳܐܺܝܬ ܘܰܡܣܰܪܗܒܳܐܺܝܬ ܬܺܐܡܰܪ ܗܳܝ ܕܳܐܬܝܳܐ. ܡܰܢܽܘ ܓܶܝܪ ܕܟܰܕ ܫܳܡܰܥ ܠܳܟ ܕܠܰܡܕܰܒܳܚܽܘ[14] ܠܰܐܦܽܘܠܽܘܢ ܦܳܩܶܕ ܐܰܢ̱ܬ ܠܳܐ ܢܶܓܚܰܟ܆ ܟܰܕ ܚܳܙܶܐ ܐܰܠܳܗܳܐ ܒܥܶܠ ܫܡܳܐ ܕܰܐܒܕܳܢܳܐ܆ ܘܰܕܡܶܢܶܗ ܕܰܫܡܶܗ ܠܗܳܢܽܘܢ ܕܩܳܪܒܺܝܢ ܠܘܳܬܶܗ ܡܰܙܥܶܩ܆ ܥܪܽܘܩܘ ܡܶܢ ܐܰܒܕܳܢܳܐ. ܠܡܶܦܪܰܩ ܓܶܝܪ ܐܰܦܽܘܠܽܘܢ܆ ܗܳܢܰܘ ܕܶܝܢ ܡܰܘܒܕܳܢܳܐ ܠܳܐ ܡܶܫܟܰܚ܆ ܟܰܕ ܠܟܽܘܢܳܝܳܐ ܕܶܝܠܶܗ ܡܕܰܓܶܠ.
ܗܰܘ ܕܶܝܢ ܟܰܕ ܠܩܰܘܡܶܗ ܘܠܰܡܥܰܙܝܳܢܽܘܬܶܗ ܚܳܙܶܐ ܗ̱ܘܳܐ܆ ܕܡܶܢ ܕܰܝܘܳܐ ܡܶܬܪܕܶܦ ܗ̱ܘܳܐ ܗܽܘ ܙܰܕܺܝܩܳܐ ܐܳܡܰܪ ܗ̱ܘܳܐ. ܘܰܠܘܳܬ ܗܳܕܶܐ ܫܳܡܰܥ ܗ̱ܘܳܐ܆ ܕܟܰܕ ܟܪܺܝܣܛܝܳܢܳܐ ܐܺܝܬܰܝ܆ ܕܰܝܘܳܐ ܡܰܢ ܠܳܐ ܐܺܝܬ ܠܺܝ܆ ܡܰܩܪܒܳܢܳܐ ܕܶܝܢ ܕܠܽܘܩܒܰܠ ܕܰܝ̈ܘܶܐ ܐܺܝܬܰܝ.
ܘܟܰܕ ܠܒܶܙܚܳܐ ܗܳܢܳܐ ܚܰܟܺܝܡܳܐ ܕܰܐܠܳܗ̈ܶܐ ܗܳܢܽܘܢ ܕܰܓ̈ܳܠܶܐ ܠܳܐ ܡܨܶܐ ܗ̱ܘܳܐ ܗܰܘ ܠܰܡܣܰܝܒܳܪܽܘ܆ ܠܰܐܓ̈ܰܐܤ ܡܫܰܢܶܐ ܗ̱ܘܳܐ܆ ܡܕܺܝܢ̱ܬܳܐ ܕܶܝܢ ܐܺܝܬܶܝܗ̇ ܐܳܦ ܗܳܕܶܐ ܕܩܺܝܠܺܝܩܺܝܰܐ. ܝܽܘܠܝܰܐܢܽܘܤ ܕܶܝܢ ܟܰܕ ܠܕܽܘܟ̈ܝܳܬܳܐ ܡܫܰܚ̈ܠܦܳܬܳܐ ܡܶܬܬܰܝܬܶܐ ܗ̱ܘܳܐ܆ ܠܗܰܘܢܶܗ ܡܶܢ ܡܕܺܝܢ̱ܬܳܐ ܗܳܝ ܕܰܠܥܶܠ ܐܽܘܪܶܫܠܶܡ ܠܳܐ ܐܰܪܚܶܩ. ܐܶܠܳܐ ܟܰܕ ܠܰܡܕܰܒܳܚܽܘ ܡܶܬܦܩܶܕ ܗ̱ܘܳܐ܆ ܟܽܠܳܗ̇ ܗܳܕܶܐ ܒܰܠܚܽܘܕ ܐܶܡܰܪ ܠܘܳܬ ܗܰܘ ܕܦܳܩܶܕ ܗ̱ܘܳܐ. ܕܙܳܕܶܩ ܗ̱ܘܳܐ ܠܳܟ ܡܰܢ ܐܰܝܟ ܢܳܡܽܘ̈ܣܶܐ ܐܰܬܠܺܝ̈ܛܳܝܶܐ܆ ܕܡܶܢ ܒܳܬܰܪ ܕܰܪܳܐ ܬܪܰܝܳܢܳܐ܆ ܬܰܘܕܶܐ ܡܶܙܕܰܟܝܳܢܽܘܬܳܐ܆ ܘܬܰܫܶܦ ܡܶܛܽܠ ܟܠܺܝܠܳܐ ܠܗܰܘ ܕܰܙܟܳܐ. ܒܪܰܡ ܕܶܝܢ ܠܳܐ ܐܶ݀ܥܪܽܘܩ܆ ܐܳܦܠܳܐ ܡܶܢ ܕܰܪܳܐ ܗܰܘ ܕܰܬܠܳܬܳܐ܆ ܠܺܐܝܩܳܪܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܐܳܦ ܓܶܝܪ ܗܽܘ ܟܰܕ ܗܽܘ ܐܶ݀ܗܘܶܐ܆ ܕܡܶܛܽܠܳܬܶܗ ܟܰܕ ܡܶܛܽܠܳܬܶܗ ܕܰܐܠܳܗܳܐ ܡܚܰܡܣܶܢ ܐ̱ܢܳܐ ܒܰܐܓܽܘ̈ܢܶܐ. ܗܽܘ ܓܶܝܪ ܒܺܝ ܠܗܳܠܶܝܢ ܬܪܶܝܢ ܕܰܪ̈ܶܐ ܙܟܳܐ. ܡܳܕܶܝܢ ܐܳܦ ܒܗܰܘ ܕܰܬܠܳܬܳܐ܆ ܠܳܐ ܢܶܙܕܟܶܐ.
ܘܟܰܕ ܗܰܘ ܒܰܓ̈ܙܳܡܶܐ ܡܶܬܪܰܘܪܰܒ ܗ̱ܘܳܐ܆ ܕܠܳܐ ܡܶܬܐܰܣ̈ܝܳܢܝܳܬܳܐ ܣܳܥܰܪ ܒܶܗ ܡܶܫܬܰܘܕܶܐ ܗ̱ܘܳܐ. ܘܗܰܘ ܚܰܝܠܬܳܢܳܐ ܬܽܘܒ ܟܰܕ ܠܰܢܦܺܝܚܽܘܬܳܐ ܕܪܽܘܓܙܶܗ ܒܰܕܡܽܘܬ ܒܰܥܒܽܘܥܺܝܬܳܐ ܫܳܪܶܐ ܗ̱ܘܳܐ ܘܰܡܦܰܠܗܶܕ܆ ܐܶܡܰܪ ܫܰܠܝܳܐܺܝܬ ܠܘܳܬܶܗ. ܗܰܘ ܕܰܠܢܶܣܝܳܢܳܐ ܕܩܰܫ̈ܝܳܬܳܐ ܣܰܝܒܰܪ ܐܶܡܰܪ ܠܺܝ܆ ܕܡܶܢ ܓܙܳܡ̈ܶܐ ܢܶܕܚܰܠ܆ ܒܪܰܡ ܐܶܬܬܪܺܝܡ ܘܶܐܬܢܦܰܚ ܘܶܐܫܬܩܶܠ ܒܰܓ̈ܙܳܡܶܐ܆ ܘܰܠܘܳܬ ܐܳܐܰܪ 222ܐܶܬܬܰܝܬܶܐ ܘܰܦܪܰܚ. ܠܬܰܚܬ ܝܽܘܠܝܰܐܢܽܘܤ ܡܣܰܟܶܐ[15] ܠܳܟ. ܘܟܰܕ ܢܶܬܥܰܪܙܰܠ ܒܕܰܪ̈ܶܐ܆ ܢܚܰܘܶܝܟ ܕܰܠܬܰܚܬ ܣܺܝܡ ܐܰܢ̱ܬ. ܗܰܘ ܓܶܝܪ ܕܰܡܟܰܠܶܠ ܠܳܗ̇ ܠܙܳܟܽܘܬܳܐ ܫܡܰܝܳܢܳܐ ܐܺܝܬܰܘܗ̱ܝ܆ ܘܰܕܝܰܬܺܝܪ ܪܳܡ ܛܳܒ ܡܶܢ ܓܙܳܡ̈ܶܐ ܕܺܝܠܳܟ.
ܘܟܰܕ ܠܗܳܠܶܝܢ ܡ̈ܶܠܶܐ܆ ܠܰܘ ܡ̈ܶܠܶܐ ܐܰܣܒܰܪ ܕܺܐܝܬܰܝܗܶܝܢ ܗܽܘ ܗܺܓܡܽܘܢܳܐ ܐܶܠܳܐ ܣܽܘܥܪ̈ܳܢܶܐ܆ ܐܺܝܬ ܗ̱ܘܳܐ ܠܶܗ ܓܶܝܪ ܬܰܚܘܺܝܬܳܐ ܡܶܢ ܗܳܠܶܝܢ ܕܩܰܕܺܝ̈ܡܳܢ ܗ̱ܘܰܝ̈ ܣܥܺܝܪ̈ܳܢ ܒܬܰܟ̈ܬܽܘܫܶܐ ܐ̱ܚܪ̈ܳܢܶܐ܆ ܡܶܚܕܳܐ ܒܰܪ ܫܳܥܬܶܗ ܛܥܳܐ ܐܶܢܽܘܢ ܠܰܓ̈ܙܳܡܶܐ܆ ܘܡܶܬܦܰܪܣܳܢܽܘܬܳܐ ܐ̱ܚܪܺܬܳܐ ܐܶܬܛܰܟܰܢ ܐܰܝܟ ܝܰܬܺܝܪ ܨܢܺܝܥܬܳܐ ܘܒܺܝܫܬܳܐ܆ ܠܰܡܪܰܟܳܟ̣ܽܘ ܘܠܰܡܙܰܥܙܳܥܽܘ ܐܳܦ ܠܢܰܦܫܳܐ ܕܰܐܕܰܐܡܽܘܤ. ܟܰܕ ܓܶܝܪ ܠܶܐܡܶܗ ܕܙܰܕܝܩܳܐ ܐܰܝܬܺܝ ܠܰܡܨܰܥܬܳܐ܆ ܕܰܬܦܺܝܤ ܠܰܒܪܳܗ̇ ܦܳܩܶܕ ܗ̱ܘܳܐ ܠܳܗ̇ ܠܗܳܝ ܒܰܪ̱ܬ ܐ̱ܢܳܫܳܐ. ܐܰܝܟܰܢܳܐ ܕܰܠܗܰܘ ܕܠܳܐ ܟܰܒܫܶܗ ܐܽܘܠܨܳܢܳܐ ܕܫܶܢ̈ܕܶܐ܆ ܠܗܳܢܳܐ ܟܝܳܢܐ ܢܶܙܟܶܝܘܗ̱ܝ ܢܫܰܚܠܦܺܝܘܗ̱ܝ܆ ܟܰܕ ܠܘܳܬ ܚܰܘܣܳܢܳܐ ܕܫܰܘܝܽܘܬ ܓܶܢܣܳܐ ܟܳܐܶܦ ܠܶܗ.
ܐܶܠܳܐ ܐܰܢ̱ܬܬܳܐ ܗܳܝ ܚܰܝܠܬܳܢܺܝܬܳܐ ܘܰܕܒܰܫܪܳܪܳܐ ܐܶܡܶܗ ܕܣܳܗܕܳܐ܆ ܐܳܦ ܠܦܽܘܩܕܳܢܶܗ ܕܕܰܝܳܢܳܐ ܡܚܰܘܝܳܐ ܗ̱ܘܳܬ ܕܰܥܒܳܕܳܐ ܡܨܰܕܝܳܢܳܐܺܝܬ. ܘܟܰܕ ܒܡ̈ܶܠܶܐ ܣܰܟܽܘܠ̈ܬܳܢܝܳܬܳܐ ܐܶܬܚܰܫܚܰܬ ܐܰܝܟ ܪܺܝܫ ܛܶܟܣܳܐ ܛܳܒܳܐ܆ ܝܰܬܺܝܪܳܐܺܝܬ ܐܰܥܺܝܪܬܶܗ ܠܰܒܪܳܗ̇ ܠܘܳܬ ܓܰܢ̱ܒܳܪܽܘܬܳܐ. ܐܶܡܪܰܬ ܠܶܗ ܓܶܝܪ܆ ܒܶܪܝ ܝܽܘܠܝܰܐܢܶܐ܆ ܒܡܰܪܕܽܘܬܳܐ ܕܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ ܫܰܘܬܶܦܬܳܟ. ܐܶܬܬܦܺܝܤ ܠܺܝ ܘܛܰܪ ܐܰܢ̱ܬ ܠܳܟ. ܡܳܢܳܐ ܡܶܢ ܗܳܠܶܝܢ ܡ̈ܶܠܶܐ ܐܶ݀ܩܰܠܶܤ. ܠܣܰܓܺܝܽܐܘܬܗܶܝܢ ܐܰܘ ܠܰܙܥܽܘܪܽܘܬܗܶܝܢ. ܠܓܰܠܝܽܘܬܗܶܝܢ ܐܰܘ ܠܠܳܐ ܓܰܠܝܽܘܬܗܶܝܢ. ܟܰܕ ܠܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ ܐܶܬܥܰܗܕܰܬ ܒܰܠܚܽܘܕ܆ ܡܰܠܦܳܢܽܘܬܳܐ ܕܛܳܒ ܪܘܺܝܚܳܐ ܣܳܡܰܬ ܩܕܳܡܰܘܗ̱ܝ. ܟܰܕ ܐܰܝܟ ܕܰܠܡܺܐܡܰܪ ܐܳܡܪܳܐ ܗ̱ܘܳܬ܆ ܠܳܐ ܬܰܒܗܶܬ ܠܡܰܪܕܽܘܬܳܐ ܗܳܝ ܕܶܐܬܪܕܺܝܬ̊. ܐܰܓܽܘܢܳܐ ܟܳܗܢܳܝܳܐ ܡܶܬܟܰܬܰܫ ܐܰܢ̱ܬ܆ ܡܶܛܽܠ ܗܳܕܶܐ ܠܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ ܥܶܗܰܕܬܳܟ. ܒܗܳܠܶܝܢ ܐܶܢ ܠܳܐ ܬܶܬܚܰܫܰܚ ܗܳܫܳܐ܆ ܒܡܳܢܳܐ ܗܳܟܺܝܠ ܢܰܘܬܪ̈ܳܢܳܟ ܗܳܠܶܝܢ ܕܡܰܪܕܽܘܬܳܟ. ܠܘܳܬ ܩܰܕܺܝ̈ܫܶܐ ܗܳܢܽܘܢ ܕܒܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ ܡܶܬܬܰܝ̈ܬܝܳܢ ܚܽܘܪ܆ ܘܰܒܒܽܘܩܝܳܐ ܕܗܳܢܽܘܢ ܛܰܢ ܗܰܘ ܕܰܒܚܰܫ̈ܶܐ. ܐܶܬܪܕܺܝܬ̊ ܓܶܝܪ ܐܰܝܟܰܢܳܐ ܕܬܶܛܰܢ. ܐܶܣܬܰܟܠ ܗܳܠܶܝܢ ܕܳܐܡܪܳܐ ܐ̱ܢܳܐ. ܢܶܬܶܠ ܠܳܟ ܓܶܝܪ ܡܳܪܝܳܐ ܣܽܘܟܳܠܳܐ ܒܟܽܠܗܶܝܢ[16]܆ ܐܳܡܰܪ ܦܰܘܠܽܘܤ. ܠܡܰܥܗܕܳܢܽܘܬܳܐ ܕܺܝܠܝ ܙܥܽܘܪܬܳܐ ܐܰܢ̱ܬ ܒܳܟ ܪܰܘܰܚ[17]܆ ܘܛܰܪ ܐܰܢ̱ܬ ܠܳܟ. ܐܰܢ̱ܬ ܠܳܟ ܐܶܡܪܶܬ ܛܰܪ܆ ܠܰܘ ܠܕܺܝܠܳܟ. ܚܢܰܢ ܓܶܝܪ ܐܺܝܬܰܝܢ ܡܳܪܳܢܳܐܺܝܬ܆ ܢܰܦܫܳܐ ܘܗܰܘܢܳܐ. ܦܰܓܪܳܐ ܕܶܝܢ ܠܰܘ ܚܢܰܢ܆ ܐܶܠܳܐ ܕܺܝܠܰܢ. ܛܰܪ ܗܳܟܺܝܠ ܕܠܳܐ ܣܽܘܓܦܳܢܳܐ ܠܢܰܦܫܳܐ܆ ܘܰܐܒܣܳܐ ܥܰܠ ܦܰܓܪܳܐ. ܟܰܕ ܕܶܝܢ ܠܡܰܪܬܝܳܢܽܘܬܳܐ ܕܶܐܡܳܐ ܚܰܟܺܝܡܬܳܐ ܐܶܣܬܰܟܰܠ ܒܪܳܐ ܚܰܟܺܝܡܳܐ܆ ܕܓܶܢܒܰܬ ܠܚܰܣܺܝܪܽܘܬ ܪܶܥܝܳܢܶܗ ܕܗܺܓܡܽܘܢܳܐ܆ ܠܗܳܝ ܓܶܝܪ ܕܛܰܪ ܐܰܢ̱ܬ ܠܳܟ ܟܰܕ ܝܰܬܺܝܪ ܥܰܒܝܳܐܺܝܬ ܘܠܳܐ ܝܰܠܺܝܦܳܐܺܝܬ ܫܰܡܥܳܗ̇ ܗܰܘ܆ ܣܳܒܰܪ ܗ̱ܘܳܐ ܥܠܶܝܗ̇ ܕܶܐܡܪܰܬ܆ ܕܠܳܐ ܬܰܘܒܶܕ ܐܰܢ̱ܬ ܠܳܟ ܒܫܶܢ̈ܕܶܐ܆ ܐܶܠܳܐ ܫܰܢܳܐ ܡܶܢ ܐܰܓܽܘܢܳܐ܆ ܟܰܕ ܒܗܳܠܶܝܢ ܐܳܦ ܗܽܘ ܥܒܰܕ ܐܶܣܟܺܡܳܐ ܡܨܰܕܝܳܢܳܐܺܝܬ܆ ܝܰܬܺܝܪ ܩܰܫܝܳܐܺܝܬ ܘܝܰܬܺܝܪ ܣܰܟܽܘܠܬܳܢܳܐܺܝܬ ܡܦܰܢܶܐ ܗ̱ܘܳܐ ܦܶܬܓܳܡܳܐ ܠܘܳܬܳܗ̇. ܟܰܕ ܗܳܝ ܕܺܝܠܶܟܝ ܣܥܽܘܪܝ̱ ܐܳܘ ܐܶܡܳܐ ܐܶܡܰܪ܆ ܘܰܠܡܰܦܰܩ ܒܪܽܘܚܳܐ ܗܰܘ ܕܺܝܠܶܟܝ܆ ܐܰܝܟ ܕܨܳܒܝܳܐ ܐܰܢ̱ܬܝ ܣܺܝܡ. ܕܗܳܠܶܝܢ ܓܶܝܪ ܕܺܝܠܝ܆ ܐܶܢܳܐ ܐ݀ܺܨܰܦ.
ܒܳܬܰܪܟܶܢ ܗܳܝ ܚܰܟܺܝܡܬܳܐ ܕܚܰܟܺܝܡܬܳܐ ܓܶܝܪ ܐܳܡܰܪ ܐ̱ܢܳܐ ܠܳܗ̇ ܠܳܐ ܐܶ݀ܫܠܶܐ܆ ܟܰܕ ܠܘܳܬ ܕܰܝܳܢܳܐ ܐܶܬܦܰܢܝܰܬ ܐܳܡܪܳܐ ܗ̱ܘܳܬ܆ ܚܳܙܶܐ ܐܰܢ̱ܬ ܕܠܳܐ ܡܶܬܬܦܺܝܣܳܢܳܐ ܐܺܝܬܰܘܗ̱ܝ ܘܥܰܣܩܳܐ ܒܰܙܢܳܐ ܗܽܘ ܛܰܠܝܳܐ܆ ܡܳܕܶܝܢ ܡܶܬܒܥܶܝܢ ܠܺܝ ܬܠܳܬܳܐ ܝܰܘ̈ܡܳܬܳܐ܆ ܐܰܝܟܰܢܳܐ ܕܰܒܡܰܪ̈ܬܝܳܢܘܳܬܳܐ ܐܶ݀ܩܰܪܒܺܝܘܗ̱ܝ ܠܺܝ܆ ܘܗܰܘ ܝܳܗܶܒ ܗ̱ܘܳܐ ܚܘܺܝܚܳܐܺܝܬ ܠܗܳܝ ܕܶܐܫ̣ܬܰܐܠܰܬ̣.
ܐܳܘ ܠܗܽܘܓܳܝܳܐ ܟܳܗܢܳܝܳܐ. ܐܳܘ ܠܰܐܚܝܳܢܽܘܬܳܐ ܪܽܘܚܳܢܳܝܬܳܐ. ܐܳܘ ܠܬܰܪܒܺܝܬܳܐ ܫܰܦܺܝܪܰܬ ܕܶܚܠܬܳܐ. ܡܰܢܽܘ ܠܗܳܠܶܝܢ܆ ܠܰܘ ܕܢܰܦ̈ܫܳܬܳܐ ܥܠܰܝ̈ܡܳܝܳܬܳܐ ܢܺܐܡܰܪ ܐܶܢܶܝܢ ܣܳܗ̈ܕܘܳܬܳܐ ܣܰܓܺܝ̈ܳܐܬܳܐ ܘܠܰܘ ܚܕܳܐ. ܐܶܠܳܐ ܢܶܬܒܰܩܶܐ ܐܰܝܟܰܢܳܐ ܐܶܡܳܐ ܗܳܝ ܫܰܦܺܝܪܰܬ ܕܶܚܠܬܳܐ ܘܪܳܚܡܰܬ ܐܰܠܳܗܳܐ܆ ܒܗܳܠܶܝܢ ܬܠܳܬܳܐ ܝܰܘ̈ܡܳܬܳܐ ܐܶܬܚܰܫܚܰܬ̣ ܒܡܰܪ̈ܬܝܳܢܘܳܬܳܐ. ܐܰܝܟܰܢܳܐ܆ ܐܰܝܟ ܕܗܽܘ ܡܰܦܩܳܢܳܐ ܚܰܘܺܝ. ܥܰܡ ܒܪܳܗ̇ ܓܶܝܪ ܐܰܟܚܕܳܐ ܐܶܬܟܰܬܰܫܬ̣ܶܗ ܠܰܐܓܽܘܢܳܐ. ܘܟܽܠܶܗ ܗܳܢܳܐ ܒܫܶܢ̈ܕܶܐ ܚܰܡܣܢܰܬ̣܆ ܐܰܝܟܰܢܳܐ ܕܢܶܦܣܽܘܩ[18] ܣܰܒܪܳܐ ܗܰܘ ܕܕܳܐܶܢ ܗ̱ܘܳܐ. ܘܰܠܗܳܝ ܡܰܢ ܢܰܪܦܶܐ܆ ܥܰܠ ܝܽܘܠܝܰܐܢܶܐ ܕܶܝܢ܆ ܣܰܩܳܐ ܘܚܰܝ̈ܘܳܬ ܫܶܢܳܐ ܢܶܦܣܽܘܩ ܓܙܳܪ ܕܺܝܢܳܐ܆ ܡܶܢ ܒܳܬܰܪ ܟܪ̈ܽܘܟܝܶܐ ܗܳܢܽܘܢ ܣܰܓܺܝ̈ܶܐܐ ܘܰܐܠܺܝ̈ܨܶܐ ܕܰܒܫܶܢ̈ܕܶܐ܆ ܗܳܢܽܘܢ ܕܟܰܕ ܬܠܳܬ ܙܰܒ̈ܢܺܝܢ ܪܗ̣ܶܛ ܐܶܢܽܘܢ ܠܳܐ ܐܰܫܦܶܠ. ܦܩܰܕ ܓܶܝܪ ܗܰܘ ܡܣܰܝܒܳܐ ܒܰܙܢܳܐ܆ ܕܢܶܬܚܒܶܫ ܐܰܟܚܕܳܐ ܒܣܰܩܳܐ ܥܰܡ ܚܰܝ̈ܘܳܬ ܫܶܢܳܐ܆ ܘܢܶܫܬܕܽܘܢ ܒܝܰܡܳܐ ܐܰܟܚܕܳܐ. ܘܟܰܕ ܠܗܳܕܶܐ ܡܰܘܒܠܳܐ ܟܳܗܢܳܝܬܳܐ ܘܰܐܟܣܢܳܝܬܳܐ ܩܰܒܶܠ ܝܰܡܳܐ܆ ܠܦܰܓܪܶܗ ܡܰܢ ܕܝܽܘܠܝܰܐܢܽܘܤ ܗܰܘ ܕܰܣܦܰܩ ܠܚܰܫ̈ܶܐ ܕܕܰܐܝܟ ܗܳܠܶܝܢ ܠܩܺܝܠ̈ܺܝ̈ܩܳܝܶܐ ܫܰܡܪܶܗ. ܠܢܰܦܫܶܗ ܕܶܝܢ ܠܘܳܬ ܫܡܰܝܳܐ ܐܰܣܶܩ.
ܒܙܰܒ̈ܢܶܐ ܡܰܢ ܓܶܝܪ ܗܳܢܽܘܢ ܥܰܬܺܝ̈ܩܶܐ܆ ܐܶܡܰܬܝ ܕܗܳܠܶܝܢ ܕܺܝܕܰܥܬܳܐ ܕܰܐܠܳܗܳܐ ܠܳܐ ܥܕܰܟܺܝܠ ܐܺܝܬܰܝܗܶܝܢ ܗ̱ܘܰܝ̈ ܡܦܰܬܝ̈ܳܬܳܐ܆ ܚܳܛܶܦ ܗ̱ܘܳܐ ܡܳܪܝܳܐ ܡܶܢ ܡܶܨܥܰܬ ܩܺܝܢ̈ܕܘܢܽܘ ܠܥܰܒ̈ܕܶܐ ܒܰܝ̈ܬܳܝܶܐ ܕܺܝܠܶܗ܆ ܐܰܝܟ ܕܰܠܕܳܢܺܝܐܶܝܠ ܡܶܢ ܓܽܘܒܳܐ ܗܰܘ ܕܰܐܪ̈ܝܰܘܳܬܳܐ܆ ܘܰܠܗܳܢܽܘܢ ܬܠܳܬܳܐ ܛܠܳܝ̈ܶܐ ܡܶܢ ܓܰܘܙܰܠܬܳܐ ܗܳܝ ܣܰܓܺܝܰܐܬ ܒܪ̈ܶܒܘܳܬܳܐ ܘܝܰܬܺܝܪ ܬܰܩܺܝܦܬܳܐ. ܡܶܢ ܒܳܬܰܪ ܕܶܝܢ ܡܶܐܬܺܝܬܳܐ ܕܺܝܠܶܗ ܕܒܰܒܣܰܪ܆ ܗܳܝ ܕܰܒܙܰܠܺܝ̈ܩܶܐ ܐܰܠܳܗܳܝ̈ܶܐ ܠܟܽܠܳܗ̇ ܡܶܬܥܰܡܪܳܢܺܝܬܳܐ ܐܰܢܗܪܰܬ܆ ܣܰܓܺܝ̈ܶܐܐ ܡܰܢ ܒܩܺܝܢ̈ܕܽܘܢܽܘ ܚ̣ܝܰܘ܆ ܐܰܟܙܢܳܐ ܕܬܰܩܠܰܐ ܗܳܝ ܙܪܺܝܙܰܬ ܡܶܢ ܟܽܠ܆ ܕܙܰܒ̈ܢܳܬܳܐ ܣܰܓܺܝ̈ܳܐܬܳܐ ܡܺܝܬ̣ܰܬ̣ ܘܠܳܐ ܐܶܬܦܰܪܫܰܬ̣ ܡܶܢ ܦܰܓܪܳܐ܆ ܣܰܓܺܝ̈ܶܐܐ ܕܶܝܢ܆ ܡܶܢ ܒܳܬܰܪ ܡܥܰܙܝܳܢܽܘܬܳܐ ܣܰܓܺܝܐܬܳܐ ܘܰܬܡܺܝܗܬܳܐ܆ ܠܘܳܬ ܕܽܘܝܳܪܳܐ ܗܰܘ ܕܬܰܡܳܢ ܫܰܢܺܝܘ܆ ܡܶܛܽܠ ܕܰܢܫܰܪܪܽܘܢ ܠܰܩܝܳܡܬܳܐ ܗܳܝ ܕܡܶܣܬܰܒܪܳܐ܆ ܗܳܝ ܕܰܚܠܳܦܶܝܗ̇ ܩܰܒܶܠܘ ܕܢܶܚܫܽܘܢ܆ ܟܰܕ ܬܰܪ̈ܬܰܝܗܶܝܢ ܐܰܟܚܕܳܐ ܚܰܘܺܝܘ. ܘܳܐܦ ܕܗܰܘ ܕܗܳܝ ܕܰܢܣܰܝܒܰܪ ܠܥܶܠ ܡܶܢ ܟܝܳܢܳܐ ܝܰܗܒ܆ ܝܳܗܶܒ ܗ̱ܘܳܐ ܟܺܝܬ ܦܫܺܝܩܳܐܺܝܬ ܐܳܦ ܓܗܳܝܬܳܐ ܡܫܰܡܠܰܝܬܳܐ ܕܡܶܢ ܡܰܘܬܳܐ܆ ܘܳܐܦ ܕܡܶܛܽܠ ܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܡܶܬܟܰܬܫܺܝܢ ܗ̱ܘܰܘ܆ ܘܰܠܘܳܬ ܗܳܢܽܘܢ ܡܣܰܪܗܒܺܝܢ ܗ̱ܘܰܘ.
ܗܳܕܶܐ ܡܢܳܬܳܐ܆ ܐܳܦ ܠܡܶܬܟܰܬܫܳܢܳܐ ܢܰܨܺܝܚܳܐ ܕܫܰܦܺܝܪܽܘܬ ܕܶܚܠܬܳܐ ܝܽܘܠܝܰܢܽܘܤ ܡܛܳܬ̣. ܗܰܘ ܕܳܐܦ ܟܰܕ ܒܗܰܕܳܡܳܐ ܡܶܕܶܡ ܡܶܢ ܦܰܓܪܳܐ ܒܰܝܬܳܝܳܐ ܗܰܘ ܕܺܝܠܶܗ ܩܰܕܫܶܗ ܠܗܰܝܟܠܳܐ ܗܳܢܳܐ܆ ܠܰܡܕܺܝܢ̱ܬܳܐ ܕܺܝܠܰܢ ܣܳܥܰܪ ܘܰܡܥܰܝܶܢ ܚܰܝܽܘܣܬܳܢܳܐܺܝܬ ܘܚܳܕܝܳܐܺܝܬ. ܟܰܕ ܪܡܶܐ ܐܰܝܟ ܩܰܬܳܪܳܐ ܡܶܕܶܡ ܪܰܒܳܐ ܘܥܰܫܺܝܢܳܐ ܐܳܦ ܩܕܳܡܰܝܗܽܘܢ ܕܬܰܪ̈ܥܶܐ ܕܫܽܘܪܳܐ. ܟܰܕ ܠܗܳܢܽܘܢ ܕܰܟܪܺܝܗܺܝܢ ܡܰܐܣܶܐ. ܟܰܕ ܠܗܳܢܽܘܢ ܕܰܚܠܺܝܡܺܝܢ ܡܢܰܛܰܪ. ܟܰܕ ܠܗܳܢܽܘܢ ܕܰܡܥܳܩܺܝܢ ܡܒܰܝܰܐ. ܝܰܬܺܝܪܳܐܺܝܬ ܕܶܝܢ܆ ܟܰܕ ܠܗܳܢܽܘܢ ܕܰܒܒܶܝܬ ܕܺܝ̈ܢܶܐ ܡܛܰܪܦܺܝܢ ܘܰܫܚܺܝܩܺܝܢ ܘܰܦܣܺܝܩ ܠܗܽܘܢ ܣܰܒܪܳܐ ܥܰܠ ܢܰܦܫܗܽܘܢ ܝܳܨܶܦ ܘܰܡܥܰܕܰܪ܆ ܘܺܐܝܬܰܘܗ̱ܝ ܠܪ̈ܺܝܫܳܢܶܐ ܘܰܠܕܰܝܳܢ̈ܶܐ ܕܚܺܝܠܳܐ ܘܰܟܚܺܝܕܳܐ܆ ܘܺܐܝܩܳܪܳܐ ܘܫܽܘܟܳܢܳܐ ܢܰܣܒܳܗ̇ ܠܗܳܕܶܐ ܡܶܢ ܐܰܠܳܗܳܐ܆ ܡܶܛܽܠ ܕܰܩܕܳܡ ܒܺܐܡ̈ܰܛܰܐ ܣܰܓܺܝ̈ܳܐܬܳܐ ܕܕܰܝܳܢ̈ܶܐ ܩܳܡ܆ ܟܰܕ ܡܶܬܟܰܬܰܫ ܗ̱ܘܳܐ ܒܣܳܗܕܽܘܬܳܐ. ܡܶܛܽܠܗܳܕܶܐ܆ ܐܳܦ ܠܚܰܫ̈ܶܐ ܗܳܠܶܝܢ ܕܕܳܡܶܝܢ ܠܗܳܢܽܘܢ ܕܺܝܠܶܗ ܨܳܒܶܐ ܠܡܰܥܳܠܽܘ ܪ̈ܰܚܡܶܐ.
ܡܶܢ ܚܰܝ̈ܘܳܬ ܫܶܢܳܐ ܕܗܳܢܳܐ ܘܡܶܢ ܣܰܩܳܐ ܢܶܬܚܰܡܨܽܘܢ܆ ܗܳܢܽܘܢ ܕܰܠܘܳܬ ܚܙܳܬܳܐ ܕܰܠܒܰܪ ܡܶܢ ܢܳܡܽܘܣܳܐ ܕܚܰܝ̈ܘܳܬ ܫܶܢܳܐ ܐܳܙܺܠ̱ܝܢ܆ ܘܥܰܠ ܒܶܣܪ̈ܶܐ ܫܰܘ̈ܝ̣ܰܝ̣ ܒܓܶܢܣܳܐ ܕܡܶܬܢܰܬܫܺܝܢ ܡܶܬܦܰܨܚܺܝܢ. ܠܶܐܡܳܐ ܚܰܝܠܬܳܢܺܝܬܳܐ ܕܣܳܗܕܳܐ ܢܶܬܥܰܗ̈ܕܳܢ ܐܶܡ̈ܗܳܬܳܐ܆ ܘܗܳܠܶܝܢ ܕܫܰܦܺܝܪ̈ܳܢ ܘܰܪ̈ܚܺܝܡܳܢ ܥܰܠ ܐܰܠܳܗܳܐ ܢܰܠ̈ܦܳܢ ܠܰܒ̈ܢܰܝܗܶܝܢ܆ ܐܰܝܟܰܢܳܐ ܕܠܳܐ ܕܰܚܛܺܝܬܳܐ ܕܺܝܠܗܽܘܢ ܡܶܠܬܳܐ ܢܶܬ̈ܠܳܢ. ܟܽܠܗܽܘܢ ܕܶܝܢ ܒܢܰܝ̈ ܐ̱ܢܳܫܳܐ܆ ܥܰܠ ܦܽܘܪܩܳܢܳܐ ܕܺܝܠܗܽܘܢ ܢܶܥܒܕܽܘܢ ܒܛܺܝܠܽܘܬܳܐ. ܡܶܛܽܠ ܗܳܠܶܝܢ ܓܶܝܪ܆ ܠܥܽܘܗ̈ܕܳܢܶܐ ܕܣܳܗ̈ܕܶܐ ܚܢܰܢ ܒܰܢ ܡܚܰܕܬܺܝܢ ܚ̱ܢܰܢ ܒܚܰܓ̈ܶܐ ܕܺܝܠܗܽܘܢ܆ ܠܬܶܫܒܽܘܚܬܳܐ ܕܰܡܫܺܝܚܳܐ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ. ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܰܒܥܺܝܢ ܘܚܰܡܫܳܐ.
[1]ܐ. ܩܘܪ̈ܝܢܬܝܐ. 2: 9
[2]ܐ. ܩܘܪ̈ܝܢܬܝܐ. 9: 26
[3]ܦܝܠܝܦܣ̈ܝܐ. 3: 14
[4]ܡܬܝ. 10: 19
[5]ܐ. ܩܘܪ̈ܝܢܬܝܐ. 3: 19
[6]ܐܢ̱ܬ
[7]ܪܒܺܝܥܳܐܺܝܬ ܒܺܐܝ̈ܕܰܘܗܝ ܘܰܒܪ̈ܶܓܠܰܘܗܝ ܐܶܡܰܪ.
[8]ܣܝܡܬܐ ܕܬܐܘܡܐ ܐܘܕܘ ܦܐܬܐ 64 ܒܶܘܠܳܐ ܐܝܬܘܗܝ ܕܘܟܬܐ ܕܡܘܬܒܐ ܕܪ̈ܝܫܢܐ ܘܕܰܡܕܒܪ̈ܢܐ ܕܡܕܝܢܬܐ ܐܘ ܕܐܬܪܐ.
[9]ܪ̈ܗܘܡܝܐ. 8: 29
[10]ܓܠܛܝ̈ܐ. 5: 6
[11]ܬܫܒ̈ܚܳܬ ܬܫܒ̈ܚܳܬܳܐ. 2: 5
[12] ܬܶܫܒ̈ܚܳܬ ܬܶܫܒ̈ܚܳܬܳܐ. 8: 7
[13]ܡܬܝ. 18: 3
[14]ܐܦܘܠܘܢ ܡܶܬܩܪܶܐ ܚܰܕ ܡܶܢ ܐܰܠܳܗ̈ܶܐ ܗܳܢܽܘܢ ܕܰܠܘܳܬ ܝܰܘ̈ܢܳܝܶܐ: ܘܗܰܘ ܕܡܰܘܒܶܕ. ܬܘܒ ܐܰܝܟ ܕܰܒܠܶܫܳܢܳܐ ܕܝܰܘ̈ܢܳܝܶܐ: ܐܦܘܠܘܢ ܡܶܬܶܐܡܰܪ.
[15]ܡܟܰܬܰܪ
[16]ܒ. ܛܝܡܬܐܘܣ. 2: 7
[17]ܦܰܬ̣ܳܐ
[18]ܕܢܶܙܩܽܘܦ ܨܶܒܥܳܐ