ܐܶܬܐܶܡܰܪ ܒܫܰܒܬܳܐ ܗܳܝ ܕܡܶܢ ܒܳܬܰܪ ܦܰܢܛܺܝܩܽܘܤܛܺܝ ܒܰܥܪܽܘܒܬܳܐ܆ ܟܰܕ ܐܺܝܬܰܘܗ̱ܝ ܗ̱ܘܳܐ ܨܰܘܡܳܐ ܐܰܝܟ ܥܝܳܕܳܐ܆ ܥܰܠ ܩܶܪܝܳܢܳܐ ܗܰܘ ܕܰܦܪܰܟܣܺܝܤ. ܕܺܐܝܬ ܒܶܗ ܗܳܟܰܢܳܐ. ܦܶܛܪܽܘܤ ܕܶܝܢ ܘܝܽܘܚܰܢܳܢ܆ ܣܳܠܩܺܝܢ ܗ̱ܘܰܘ ܠܗܰܝܟܠܳܐ ܠܫܳܥܬܳܐ ܕܰܨܠܽܘܬܳܐ ܗܳܝ ܕܰܬܫܰܥ. ܘܓܰܒܪܳܐ ܐ̱ܢܳܫ ܕܰܚܓܺܝܪܳܐ ܡܶܢ ܟܪܶܤ ܐܶܡܶܗ ܐܺܝܬܰܘܗ̱ܝ ܗ̱ܘܳܐ ܡܶܬܛܥܶܢ ܗ̱ܘܳܐ[1]܆ ܘܥܰܠ ܗܳܠܶܝܢ ܕܫܰܪܟܳܐ.
74: ܟܰܕ ܥܰܡ ܦܶܛܪܽܘܤ ܘܝܽܘܚܰܢܳܢ ܠܘܳܬ ܗܰܝܟܠܳܐ ܣܠܶܩܢܰܢ ܒܫܳܥܬܳܐ ܕܰܨܠܽܘܬܳܐ ܗܳܝ ܕܰܬܫܰܥ ܐܶܡܰܪ ܠܺܝ܆ ܢܶܫܬܽܘܩ ܠܰܢ܆ ܘܰܐܝܟܰܢܳܐ ܠܳܐ ܢܰܟܶܤ ܠܫܶܬܩܳܐ ܕܺܝܠܰܢ ܕܠܳܐ ܡܶܠܬܳܐ܆ ܚܓܺܝܪܳܐ ܗܰܘ ܕܥܰܡ ܡܶܠܬܳܐ ܡܩܰܝܶܙ ܘܰܡܫܰܒܰܚ ܠܰܐܠܳܗܳܐ܆ ܗܰܘ ܕܰܕܫܳܥܬܳܐ ܒܬܰܪ̈ܬܰܝܗܶܝܢ ܪ̈ܶܓܠܰܘܗ̱ܝ ܠܰܡܗܰܠܳܟܽܘ ܠܳܐ ܡܶܫܟܰܚ ܗ̱ܘܳܐ܆ ܘܡܶܢ ܐ̱ܚܪ̈ܳܢܶܐ ܡܶܬܛܥܶܢ ܗ̱ܘܳܐ܆ ܘܰܠܘܳܬ ܬܰܪܥܳܐ ܗܰܘ ܫܰܦܺܝܪܳܐ ܡܶܬܬܣܺܝܡ ܗ̱ܘܳܐ܆ ܗܰܘ ܕܫܰܦܺܝܪܳܐ ܐܰܝܟ ܕܒܰܫܪܳܪܳܐ ܗܽܘ ܥܳܒܶܕ ܗ̱ܘܳܐ ܠܶܗ܆ ܟܰܕ ܐܰܝܟ ܕܰܠܡܺܐܡܰܪ ܒܝܰܕ ܗܳܝ ܕܡܶܬܚܰܙܝܳܐ ܗ̱ܘܳܬ ܩܳܥܶܐ ܗ̱ܘܳܐ܆ ܕܰܨܠܽܘܬܳܐ ܘܡܰܥܰܠܬܳܐ ܕܰܠ̈ܒܳܬܶܐ ܟܳܗ̈ܢܳܝܶܐ܆ ܒܝܰܕ ܡܰܘܗܰܒܬܳܐ ܗܳܝ ܕܙܶܕܩܬܳܐ܆ ܫܰܦܺܝܪܬܳܐ ܠܥܰܝ̈ܢܶܐ ܕܰܐܠܳܗܳܐ ܘܰܪܚܺܝܡܬܳܐ ܡܶܬܚܰܙܝܳܐ܆ ܘܗܺܝ ܠܳܗ̇ ܫܳܛܚܳܐ ܘܡܶܬܗܰܠܟܳܢܺܝܬܳܐ ܗܳܘܝܳܐ ܠܗܳܢܽܘܢ ܕܥܳܐܠܺܝܢ. ܐܰܝܟܰܢܳܐ ܟܺܝܬ ܕܗܳܝ ܕܡܰܪܡܠܳܐ ܡܶܢ ܡܪܰܚܡܳܢܽܘܬܳܐ܆ ܐܰܝܟ ܗܰܘ ܕܰܒܥܰܡܛܳܢܳܐ ܡܟܰܣܝܳܐ܆ ܡܥܰܬܕܳܐ ܠܗܶܝܢ ܠܪ̈ܶܓܠܶܐ ܕܰܣܪܺܝܩܳܐܺܝܬ ܢܶܬܬܰܝ̈ܬܝܳܢ܆ ܘܟܰܕ ܡܶܬܦܰܫܟܳܢ̈ܝܳܬܳܐ ܘܠܰܘ ܩܒܺܝܥܳܐܺܝܬ ܕܳܪ̈ܟܳܢ܆ ܐܳܦܶܢ ܗܰܘ ܕܰܡܗܰܠܶܟ܆ ܒܗܳܠܶܝܢ ܡܝܰܬܪ̈ܳܬܳܐ ܐ̱ܚܪ̈ܳܢܝܳܬܳܐ ܕܫܰܪܟܳܐ܆ ܐܰܘ ܒܠܰܡܦܺܝܕܳܐ ܕܰܒܬܽܘܠܽܘܬܳܐ ܢܶܬܗܰܕܰܪ. ܘܡܰܘ̈ܕܥܳܢ ܗܳܕܶܐ܆ ܗܳܠܶܝܢ ܚܰܡܶܫ ܒܬܽܘܠ̈ܳܬܳܐ ܣܰܟ̈ܠܳܬܳܐ܆ ܕܰܒܫܽܘܦܪܳܐ ܡܰܢ ܕܡܰܒܪܶܩ ܕܕܰܟܝܽܘܬܳܐ ܡܰܢܗܪ̈ܳܢ ܗ̱ܘܰܝ̈܆ ܒܰܨܪܺܝܟܽܘܬܳܐ[2] ܕܶܝܢ ܕܰܡܪܰܚܡܳܢܽܘܬܳܐ ܕܰܥ̈ܟܳܢ ܗ̱ܘܰܝ̈ ܐܰܝܟ ܕܰܠܡܺܐܡܰܪ ܘܥܰܡܽܘ̈ܛܳܢ܆ ܘܠܳܐ ܥܳܐܠ̈ܳܢ ܗ̱ܘܰܝ̈ ܡܰܢ ܥܰܡ ܚܰܬܢܳܐ܆ ܡܶܬܬܚܶܕ ܗ̱ܘܳܐ ܕܶܝܢ ܒܰܐܦܰܝ̈ܗܶܝܢ ܬܰܪܥܳܐ ܕܒܶܝܬ ܓܢܽܘܢܳܐ ܗܰܘ ܡܶܬܗܰܘܢܳܢܳܐ. ܡܶܛܽܠ ܗܳܕܶܐ ܐܰܝܟ ܕܕܳܡܝܳܐ ܗܰܘ ܚܓܺܝܪܳܐ܆ ܐܳܦ ܠܦܶܛܪܽܘܤ ܘܰܠܝܽܘܚܰܢܳܢ ܫܳܐܶܠ ܗ̱ܘܳܐ܆ ܕܕܰܐܝܟ ܗܳܕܶܐ ܡܥܰܕܪܳܢܽܘܬܳܐ ܢܥܰܠܽܘܢ ܠܶܗ. ܟܰܕ ܡܚܰܘܶܐ ܗ̱ܘܳܐ܆ ܕܳܐܦ ܠܰܐܝܠܶܝܢ ܕܕܰܐܝܟ ܗܳܢܽܘܢ ܐܺܝܬܰܝܗܽܘܢ ܒܰܡܝܰܬܪܽܘܬܳܐ܆ ܟܰܕ ܠܰܨܠܽܘܬܳܐ ܥܳܐܠܺܝܢ܆ ܐܳܠܨܳܝܬܳܐ ܐܺܝܬܶܝܗ̇ ܚܰܝܽܘܣܬܳܢܽܘܬܳܐ ܘܰܡܪܰܚܡܳܢܽܘܬܳܐ ܗܳܝ ܕܥܰܠ ܣܢܺܝ̈ܩܶܐ.
ܐܳܦ ܐܰܢ̱ܬܽܘܢ ܗܳܟܺܝܠ܆ ܐܶܢܗܽܘ ܕܥܰܡ ܕܰܐܝܟ ܗܳܢܳܐ ܛܽܘܝܳܒܳܐ ܐܶܬܰܝܬܽܘܢ ܠܗܳܪܟܳܐ܆ ܘܰܠܗܳܢܽܘܢ ܕܡܶܣܟܺܢܺܝܢ ܐܺܝܕܳܐ ܕܪܶܚܡܰܬ ܐ̱ܢܳܫܽܘܬܳܐ ܐܰܘܫܶܛܬܽܘܢ܆ ܫܰܪܺܝܪܳܐܺܝܬ ܠܘܳܬ ܬܰܪܥܳܐ ܫܰܦܺܝܪܳܐ ܣܠܶܩܬܽܘܢ܆ ܘܠܳܐ ܕܰܓܶܠܬܽܘܢܳܗ̇ ܠܡܰܣܰܩܬܳܐ. ܐܳܦ ܓܶܝܪ ܐܳܦܠܳܐ ܠܦܶܛܪܽܘܤ ܫܰܠܺܝܛ ܗ̱ܘܳܐ ܠܶܗ ܠܡܺܐܡܰܪ܆ ܕܟܶܣܦܳܐ ܘܕܰܗܒܳܐ ܠܳܐ ܐܺܝܬ ܠܺܝ[3]܆ ܘܰܠܫܶܐܠܬܶܗ ܢܶܕܚܽܘܩ ܗ̱ܘܳܐ ܘܢܶܙܢܽܘܩ ܡܶܢܶܗ܆ ܟܰܕ ܠܳܐ ܩܰܕܶܡ ܫܠ̣ܰܚ ܗ̱ܘܳܐ ܠܗܳܠܶܝܢ ܕܺܐܝܬ ܗ̱ܘܰܝ̈ ܠܶܗ܆ ܘܗܳܠܶܝܢ ܕܰܥܕܰܡܳܐ ܠܰܡܨܺܝ̈ܕܳܬܳܐ ܘܰܠܩܰܪܩܽܘܪܽܘܢܺܝܬܳܐ ܙܥܽܘܪܬܳܐ ܘܠܰܩ̈ܢܰܝܳܐ ܨܰܝ̈ܕܳܝܶܐ ܡܶܬܬܰܚ̈ܡܳܢ ܗ̱ܘܰܝ̈܆ ܘܶܐܡܰܪ ܗ̱ܘܳܐ ܠܘܳܬ ܝܶܫܽܘܥ܆ ܗܳܐ ܚܢܰܢ ܫܒܰܩܢܰܢ ܟܽܠܡܶܕܶܡ ܘܰܢܩܶܦܢܳܟ[4]. ܗܰܘ ܓܶܝܪ ܕܺܐܝܬ ܠܶܗ ܐܳܦ ܗܰܘ ܡܳܐ ܕܣܰܓܺܝ ܙܥܽܘܪ܆ ܚܰܝܳܒܳܐ ܐܺܝܬܰܘܗ̱ܝ ܕܰܐܝܟ ܡܫܽܘܚܬܳܐ ܒܰܝܬܳܝܬܳܐ ܕܺܝܠܶܗ܆ ܢܰܘܫܶܛ ܐܺܝܕܳܐ ܠܡܶܣܟܺܢܳܐ.
ܠܳܐ ܐ̱ܢܳܫ ܓܶܝܪ ܢܺܐܡܰܪ ܠܺܝ܆ ܕܶܐ݀ܠܽܘܨ ܘܶܐ݀ܕܒܰܪ ܒܰܩܛܺܝܪܳܐ ܠܣܽܘܢܩܳܢܳܐ ܕܺܝܠܝ ܠܳܐ ܡܶܫܟܰܚ ܐ̱ܢܳܐ. ܩܰܕܡܳܐܺܝܬ ܡܰܢ ܓܶܝܪ܆ ܕܳܐܦܶܢ ܬܶܕܒܰܪ ܒܰܩܛܺܝܪܳܐ܆ ܕܰܩܛܺܝܪ̈ܳܢܶܐ ܐܺܝܬܶܝܗ̇ ܡܰܠܟܽܘܬܳܐ ܕܰܫܡܰܝܳܐ[5]. ܘܠܳܐ ܡܶܕܶܡ ܕܠܳܐ ܗܰܘܢܳܐ ܬܶܣܥܽܘܪ. ܐܶܠܳܐ ܘܰܕܣܰܓܺܝ ܐܺܝܬ ܠܶܗ ܗܰܘܢܳܐ܆ ܕܰܒܩܰܠܺܝܠ ܩܛܺܝܪܳܐ܆ ܠܩܶܢܝܳܢܳܐ ܕܕܰܐܝܟ ܗܳܢܳܐ ܙܳܒܶܢ ܐܰܢ̱ܬ. ܒܳܬܰܪܟܶܢ ܕܶܝܢ ܐܳܦ ܗܰܘ ܣܳܐܶܡ ܢܳܡܽܘܣܳܐ ܕܰܩܛܺܝܪܳܐ ܕܰܐܝܟ ܗܳܢܳܐ܆ ܚܳܙܶܐ ܠܶܗ ܠܰܩܛܺܝܪܳܐ܆ ܘܦܳܪܰܥ ܡܶܟܺܝܠ ܚܠܳܦܰܘܗ̱ܝ ܒܽܘܝܳܐܳܐ܆ ܘܥܰܠ̈ܠܳܬܳܐ222 ܥܰܬܺܝܪ̈ܳܬܳܐ ܕܗܳܝ ܕܫܰܦܺܝܪ ܬܺܚܶܐ܆ ܦܳܪܰܥ ܝܳܗܶܒ ܠܳܟ ܚܠܳܦܰܘܗ̱ܝ. ܠܰܘ ܓܶܝܪ ܥܰܘܳܠܳܐ ܐܺܝܬܰܘܗ̱ܝ ܐܰܠܳܗܳܐ܆ ܕܢܶܛܥܶܐ ܥ̈ܒܳܕܶܐ ܕܺܝܠܟܽܘܢ ܘܚܽܘܒܟܽܘܢ ܗܰܘ ܕܚܰܘܺܝܬܽܘܢ ܒܰܫܡܶܗ[6]܆ ܡܰܙܥܶܩ ܦܰܘܠܽܘܤ ܟܰܕ ܠܘܳܬ ܐ̱ܢܳܫܺܝ̈ܢ ܟܳܬܶܒ. ܐܘ ܐܰܢ̱ܬ ܡܰܢ ܠܒܰܪ ܒܰܝܬܳܟ ܐܶܢ ܬܶܚܙܶܝܘܗ̱ܝ ܕܰܠܒܰܪ[7] ܡܶܢ ܚܰܝܠܶܗ ܡܶܬܡܬܰܚ ܡܶܛܽܠ ܗܳܝ ܕܰܢܡܰܠܶܐ ܦܽܘܩ̈ܕܳܢܶܐ ܡܳܪ̈ܳܢܳܝܶܐ܆ ܢܝܳܚܳܐ ܡܶܬܦܰܪܰܤ ܐܰܢ̱ܬ ܘܦܳܪܰܥ ܐܰܢ̱ܬ ܠܶܗ ܐܰܝܟ ܕܠܰܐܝܢܳܐ ܕܥܳܡܶܠ܆ ܥܰܠ ܐܰܠܳܗܳܐ ܕܶܝܢ ܡܰܣܒܰܪ ܐܰܢ̱ܬ ܕܡܰܗܡܶܐ ܒܰܓܒܺܝܠܬܳܐ ܒܰܝܬܳܝܬܳܐ ܕܺܝܠܶܗ܆ ܕܡܶܛܽܠ ܣܝܳܡ ܢܳܡܽܘܣܳܐ ܕܺܝܠܶܗ ܡܶܙܕܰܪܒܳܐ ܗܺܝ ܒܨܶܒܝܳܢܳܗ̇܆ ܒܗܳܝ ܕܬܶܥܒܶܕ ܕܓܰܘܳܐ ܠܗܳܝ ܕܺܝܠܳܢܳܝܬܳܐ ܕܺܝܠܳܗ̇܆ ܠܘܳܬ ܗܰܘ ܕܰܣܢܺܝܩܳܐܺܝܬ ܐܺܝܬ ܠܶܗ܆ ܘܗܰܘ ܕܳܐܡܰܪ: ܒܥܰܘ ܕܶܝܢ ܠܽܘܩܕܰܡ ܡܰܠܟܽܘܬܶܗ ܕܰܐܠܳܗܳܐ ܘܙܰܕܝܩܽܘܬܶܗ܆ ܘܗܳܠܶܝܢ ܟܽܠܗܶܝܢ ܢܶܬܬܰܘܣ̈ܦܳܢ ܠܟܽܘܢ[8]܆ ܘܰܕܝܳܕܰܥ ܗܘ ܐܰܒܽܘܟܽܘܢ ܗܰܘ ܫܡܰܝܳܢܳܐ ܕܥܰܠ ܐܰܝܠܶܝܢ ܣܢܺܝܩܺܝܢ ܐܢ̱ܬܽܘܢ܆ ܩܕܳܡ ܕܰܐܢ̱ܬܘܢ ܬܶܫܶܐܠܽܘܢܳܝܗ̱ܝ [9].
ܐܶܢ ܓܶܝܪ ܟܰܕ ܠܗܳܠܶܝܢ ܢܶܫܒܽܘܩ ܐ̱ܢܳܫ܆ ܘܠܳܐ ܢܶܬܬܦܺܝܤ ܠܰܢܒܺܝܳܐ ܗܰܘ ܕܳܐܡܰܪ: ܫܕܺܝ ܨܶܦܬܳܟ ܥܰܠ ܡܳܪܝܳܐ ܘܗܽܘ ܢܬܰܪܣܶܝܟ[10]. ܠܣܽܘܢܩܳܢܳܐ ܗܰܘ ܕܺܝܠܶܗ ܢܰܟܺܝܠ ܐܰܝܟܰܢܳܐ ܕܠܶܗ ܫܳܦܰܪ܆ ܟܰܕ ܣܳܐܶܡ ܥܶܠ̈ܠܳܬܳܐ ܣܰܓܺܝ̈ܳܐܬܳܐ ܕܢܰܦ̈ܩܳܬܳܐ. ܙܥܽܘܪ̈ܝܳܬܳܐ ܠܗܳܠܶܝܢ ܕܺܐܝܬܰܝܗܶܝܢ ܠܶܗ ܢܶܚܫܽܘܒ܆ ܘܢܶܬܪܰܓܪܰܓ ܠܩܶܢܝܳܢܳܐ ܕܗܳܠܶܝܢ ܕܠܳܐ ܐܺܝܬܰܝܗܶܝܢ܆ ܘܢܰܗܡܶܐ ܡܶܢ ܡܶܣܟܺܢܳܐ. ܙܳܕܶܩ ܗܳܟܺܝܠ ܠܡܶܕܰܥ ܫܰܦܺܝܪ܆ ܕܰܩܕܳܡ ܣܽܘܢܩܳܢܳܐ ܕܺܝܠܰܢ ܙܳܕܶܩ ܠܰܢ ܕܰܢܩܰܕܶܡ ܢܝܰܩܰܪ ܠܰܣܢܺܝܩܽܘܬܳܐ ܕܡܶܣܟܺܢܳܐ܆ ܘܗܳܟܰܢܳܐ ܠܢܳܡܽܘܣܳܐ ܐܰܠܳܗܳܝܳܐ ܠܳܐ ܢܶܬܚܰܟܰܡ܆ ܡܶܛܽܠ ܗܳܕܶܐ ܓܶܝܪ܆ ܡܶܕܶܡ ܪܰܒܳܐ ܐܶܣܬܒܰܪ ܩܽܘܪܒܳܢܳܐ ܗܰܘ ܕܰܬܪܶܝܢ ܫܳܡܽܘ̈ܢܶܐ ܕܗܳܝ ܐܰܪܡܰܠܬܳܐ܆ ܡܶܛܽܠ ܕܰܒܣܽܘܢܩܳܢܳܗ̇ ܕܗܳܝ ܕܝܶܗܒܰܬ ܓܫܰܦ. ܠܟܽܠܗܽܘܢ ܓܶܝܪ ܚܰܝ̣ܶܝ̣̈ܗ̇ ܝܶܗܒܰܬ܆ ܕܰܒܗܳܠܶܝܢ ܬܪܶܝܢ ܫܳܡܽܘ̈ܢܶܐ ܒܰܠܚܽܘܕܰܝܗܽܘܢ ܡܶܬܗܰܦܟܺܝܢ ܗ̱ܘܰܘ.
ܒܪܰܡ ܘܳܐܦܠܳܐ ܠܶܗ ܠܦܶܛܪܽܘܤ ܣܶܦܩܰܬ ܠܶܗ܆ ܗܳܝ ܕܢܺܐܡܰܪ ܟܶܣܦܳܐ ܘܕܰܗܒܳܐ ܠܰܝܬ ܠܺܝ. ܐܶܠܳܐ ܐܰܘܣܦ܆ ܗܰܘ ܡܳܐ ܕܶܝܢ ܕܺܐܝܬ ܠܺܝ܆ ܗܳܢܳܐ ܝܳܗܶܒ ܐ̱ܢܳܐ ܠܳܟ[11]. ܟܰܕ ܡܰܠܶܦ ܕܙܳܕܶܩ ܡܶܢ ܟܽܠ ܦܪܽܘܤ܆ ܕܡܶܢ ܗܰܘ ܡܳܐ ܕܺܐܝܬ ܠܶܗ ܠܐ̱ܢܳܫ܆ ܡܶܢ ܗܳܢܳܐ ܢܶܬܶܠ ܠܗܳܢܽܘܢ ܕܰܣܢܺܝܩܺܝܢ܆ ܐܶܢ ܟܺܝܬ ܒܡܶܠܬܳܐ ܐܺܝܬܰܘܗ̱ܝ ܘܶܐܢ ܒܰܥܒܳܕܳܐ܆ ܘܠܰܘ ܕܺܝܠܳܢܳܝܳܐ ܕܺܝܠܶܗ܆ ܐܶܠܳܐ ܓܰܘܳܢܳܝܳܐ ܢܶܚܫܒܺܝܘܗ̱ܝ ܠܩܶܢܝܳܢܳܐ. ܘܗܰܘ ܕܝܳܗܶܒ ܢܶܬܚܰܫܰܒ ܘܰܠܢܰܦܫܶܗ ܢܶܠܚܽܘܫ ܘܢܺܐܡܰܪ: ܡܳܢܳܐ ܓܶܝܪ ܐܺܝܬ ܠܳܟ܆ ܗܰܘ ܕܠܰܘ ܡܶܣܰܒ ܢܣܰܒܬܳܝܗ̱ܝ[12]. ܒܗܳܕܶܐ ܬܰܪܥܺܝܬܳܐ ܬܽܘܒ ܗܽܘ ܦܶܛܪܽܘܤ ܟܰܕ ܠ̱ܐܢܳܫܺܝ̈ܢ ܟܳܬܶܒ ܡܰܪܬܶܐ ܗ̱ܘܳܐ܆ ܕܟܽܠ ܚܰܕ ܐܰܝܟܰܢܳܐ ܕܢܶܣܰܒ ܫܽܘܟܳܢܳܐ܆ ܟܰܕ ܐܰܢ̱ܬܽܘܢ ܒܟܽܘܢ ܘܰܥܠܰܝܟܽܘܢ ܡܫܰܡܫܺܝܢ ܐܢ̱ܬܽܘܢ ܠܶܗ܆ ܐܰܝܟ ܪ̈ܰܒܰܝ ܒ̈ܳܬܶܐ ܛܳܒ̈ܶܐ ܕܛܰܝܒܽܘܬܶܗ ܡܦܰܬܰܟܬܳܐ ܕܰܐܠܳܗܳܐ. ܐܶܢ ܐ̱ܢܳܫ ܡܡܰܠܶܠ܆ ܐܰܝܟ ܕܰܠܡ̈ܶܠܶܐ ܕܰܐܠܳܗܳܐ. ܐܶܢ ܐ̱ܢܳܫ ܡܫܰܡܶܫ܆ ܐܰܝܟ ܕܡܶܢ ܚܰܝܠܳܐ ܗܰܘ ܕܝܳܗܶܒ ܐܰܠܳܗܳܐ[13].
ܚܳܙܶܝܢ ܐܢ̱ܬܽܘܢ ܕܡܶܢ ܕܰܐܝܟ ܐܰܝܠܶܝܢ ܥܬܺܝܕ ܗ̱ܘܳܐ ܕܢܶܚܣܰܪ ܠܰܢ ܚܓܺܝܪܳܐ ܗܰܘ ܟܰܕ ܡܶܫܬܰܬܰܩ ܗ̱ܘܳܐ܆ ܘܠܳܐ ܡܶܬܓܫܶܫ ܗ̱ܘܳܐ ܪܽܘܚܳܢܳܐܺܝܬ. ܡܳܢܳܐ ܗܳܟܺܝܠ ܢܶܣ̈ܦܩܳܢ ܠܰܢ ܗܳܠܶܝܢ܆ ܘܠܳܐ ܡܶܕܶܡ ܐ̱ܚܪܺܢܳܐ ܝܰܬܺܝܪܳܐ ܙܳܕܶܩ ܕܰܢܥܰܩܶܒ܆ ܐܶܠܳܐ ܠܳܐ ܫܳܒܶܩ ܠܺܝ ܬܽܘܒ ܐܶ݀ܫܠܶܐ܆ ܟܰܕ ܠܘܳܬ ܗܰܝܟܠܳܐ ܪܗܶܛ ܘܰܫܘܰܪ ܥ̣ܰܠ܆ ܘܰܠܬܰܪܥܺܝܬܳܐ ܕܺܝܠܝ ܢܳܓܶܕ ܠܘܳܬ ܬܶܐܽܘܪܺܝܰܐ ܥܰܡܺܝܩܬܳܐ ܕܪܽܘܚܳܐ. ܗܳܠܶܝܢ ܓܶܝܪ ܕܬܰܫܥܺܝܬܳܢܳܐܺܝܬ ܓܕܰܫ̈ܝ̱܆ ܥܽܘܬܪܳܐ ܡܛܰܫܝܳܐ ܐܺܝܬ ܠܗܶܝܢ ܒܗܶܝܢ܆ ܕܚܶܟܡܬܳܐ ܗܳܝ ܕܥܳܒܪܳܐ ܠܥܶܠ ܡܶܢ ܟܽܠ ܗܰܘܢܳܐ ܟܰܕ ܐܰܝܟ ܕܡܰܨܝܳܐ ܡܶܬܒܰܨܝܳܐ܆ ܟܰܕ ܟܽܠ ܣܽܘܟܳܠܳܐ ܡܶܫܬܒܶܐ ܠܰܡܫܺܝܚܳܐ[14]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ.
ܡܶܣܬܒܰܪ ܓܶܝܪ ܚܓܺܝܪܳܐ ܗܳܢܳܐ܆ ܕܛܽܘܦܣܳܐ ܕܟܽܠܳܗ̇ ܐ̱ܢܳܫܽܘܬܳܐ ܐܰܚܺܝܕ. ܐܰܘܟܺܝܬ ܕܥܺܕܬܳܐ ܗܳܝ ܕܡܶܢ ܥܰܡ̱ܡ̈ܶܐ ܗܳܢܽܘܢ ܕܠܳܐ ܐܰܠܳܗ ܘܰܕܣܰܒܪܳܐ ܠܰܝܬ ܠܗܽܘܢ ܐܶܬܟܰܢܫܰܬ ܘܐܶܬܦܰܪܩܰܬ ܐܰܝܟ ܕܰܟܬܺܝܒ. ܠܗܳܝ ܐܰܝܕܳܐ ܕܟܰܕ ܡܺܝܬܬܳܐ ܡܰܢ ܐܺܝܬܶܝܗ̇ ܗ̱ܘܳܬ ܐܰܚ̣ܝܳܗ̇ ܡܫܺܝܚܳܐ܆ ܟܰܕ ܒܡܰܘܬܳܐ ܒܰܝܬܳܝܳܐ ܕܺܝܠܶܗ ܫܪܳܐ ܠܗܰܘ ܕܺܐܝܬ ܗ̱ܘܳܐ ܠܶܗ ܥܠܶܝܗ̇ ܐܽܘܚܕܳܢܳܐ ܕܡܰܘܬܳܐ܆ ܟܰܕ ܡܫܰܪܝܳܐ ܗ̱ܘܳܬ ܕܶܝܢ ܠܘܳܬ ܥ̈ܒܳܕܶܐ ܕܙܰܕܝܩܽܘܬܳܐ ܘܠܰܡܗܰܠܳܟܽܘ ܟܽܠ ܟܽܠܶܗ ܠܳܐ ܡܶܫܟܚܳܐ ܗ̄ܘܳܬ܆ ܐܶܠܳܐ ܒܕܶܚܠܰܬ ܫ̈ܺܐܕܶܐ ܘܒܰܥ̈ܝܳܕܶܐ ܐܰܒܳܗܳܝ̈ܶܐ ܡܣܰܟܟܳܐ ܗ̱ܘܳܬ ܘܰܐܣܺܝܪܳܐ܆ ܘܒܰܕܡܽܘܬ ܡܣܰܝܰܒܬܳܐ ܠܒܰܪ ܡܶܢ ܗܰܝܟܠܳܐ ܣܺܝܡܳܐ ܗ̱ܘܳܬ ܐܰܩܺܝܡܽܘܗ̇ ܫܠܺܝ̈ܚܶܐ܆ ܟܰܕ ܐܺܝܕܳܐ ܕܡܰܠܦܳܢܽܘܬܳܐ ܐܰܘܫܶܛܘ ܠܳܗ̇܆ ܟܰܕ ܣܺܐܡܳܐ ܡܰܢ ܘܕܰܗܒܳܐ ܠܳܐ ܝܰܗܒܘ ܠܳܗ̇ ܐܳܦܶܢ ܠܘܳܬ ܗܳܠܶܝܢ ܦܥܺܝܪ ܗ̱ܘܳܐ ܠܳܗ̇ ܚܶܟܳܗ̇܆ ܘܰܠܘܳܬ ܦܰܢܛܰܣܺܝܰܐ ܗܽܘܠܳܢܳܝܬܳܐ ܡܬܰܘܪܳܐ ܗ̄ܘܳܬ܆ ܠܬܰܪܥܳܐ ܕܶܝܢ ܗܰܘ ܫܰܦܺܝܪܳܐ ܟܽܠܶܗ ܦܬܰܚܘ ܠܳܗ̇܆ ܗܰܘ ܟܺܝܬ ܕܺܐܝܬܰܘܗ̱ܝ ܝܶܫܽܘܥ܆ ܗܰܘ ܕܰܗܕܺܝܪ ܡܰܢ ܘܰܦܐܶܐ ܒܫܽܘܦܪܳܐ ܝܰܬܺܝܪ ܡܶܢ ܒܢܰܝ̈ܢܳܫܳܐ ܐܰܝܟܰܢܳܐ ܕܰܢܒܺܝܳܐ ܐܳܡܰܪ: ܡܰܥܶܠ ܕܶܝܢ ܠܗܳܢܽܘܢ ܕܰܡܗܰܝܡܢܺܝܢ ܒܰܕܡܽܘܬ ܬܰܪܥܳܐ ܠܘܳܬ ܝܺܕܰܥܬܳܐ ܕܺܝܠܶܗ ܘܕܰܐܒܽܘܗ̱ܝ[15]. ܟܰܕ ܐܳܦ ܒܶܐܘܰܢܓ̈ܶܠܺܝܰܐ ܡܰܙܥܶܩ: ܐܶܢܳܐ ܐܺܝܬܰܝ ܬܰܪܥܳܐ܆ ܒܺܐܝ̈ܕܰܝ ܐܶܢ ܐ̱ܢܳܫ ܢܶܥܽܘܠ ܢܶܬܦܪܶܩ܆ ܘܢܶܥܽܘܠ ܘܢܶܦܽܘܩ ܘܪܶܥܝܳܐ ܢܶܫܟܰܚ[16].
ܐܶܠܳܐ ܢܶܚܙܶܐ ܐܰܝܟܰܢܳܐ ܒܛܽܘܦܣܳܐ ܕܗܰܘ ܚܓܺܝܪܳܐ ܐܰܩܺܝܡܽܘܗ̇ ܠܥܺܕܬܳܐ ܦܶܛܪܽܘܤ ܘܝܽܘܚܰܢܳܢ܆ ܘܰܫܠܺܝ̈ܚܶܐ ܗܳܢܽܘܢ ܕܫܰܪܟܳܐ܆ ܟܰܕ ܒܳܗ̇ ܒܰܕܡܽܘܬܳܐ ܠܘܳܬ ܝܺܕܰܥܬܳܐ ܕܰܐܠܳܗܳܐ ܡܶܢ ܩܕܺܝܡ ܡܚܰܓܪܳܐ ܗ̱ܘܳܬ܆ ܘܡܶܢ ܟܰܪܣܳܐ ܕܶܐܡܳܗ̇ ܒܰܚܛܺܝܬܳܐ ܡܫܰܪܝܳܐ ܗ̄ܘܳܬ܆ ܡܶܛܽܠ ܡܶܬܥܰܒܪܳܢܽܘܬܳܐ ܕܳܐܕܳܡ ܘܰܕܚܰܘܳܐ܆ ܘܳܐܡܪܳܐ ܗ̄ܘܳܬ܆ ܗܳܐ ܓܶܝܪ ܒܠܳܐ ܢܳܡܽܘܣܳܝܽܘܬܳܐ ܐܶܬܒܰܛܢܶܬ܆ ܘܒܰܚ̈ܛܳܗܶܐ ܒܛܶܢܬ̣ܰܢܝ ܐܶܡܝ[17]. ܡܳܢܳܐ ܗܳܟܺܝܠ ܐܶܡܰܪܘ ܠܘܳܬܳܗ̇ ܦܶܛܪܽܘܤ ܘܝܽܘܚܰܢܳܢ. ܟܰܕ ܡܚܰܓܪܳܐ ܡܰܢ܆ ܡܪܰܚܡܳܢܽܘܬܳܐ ܕܶܝܢ ܒܪܰܡ ܡܦܺܝܣܳܐ ܗ̱ܘܳܬ ܠܡܶܣܰܒ. ܚܽܘܪܝ̱ ܒܰܢ. ܬܶܣܦܰܩ ܠܶܟܝ ܐܳܡܪܺܝܢ ܠܡܰܠܦܳܢܽܘܬܳܐ ܘܰܠܚܽܘܠܡܳܢܳܐ ܕܡܶܢ ܗܳܕܶܐ ܘܰܠܬܽܘܪܳܨܳܐ ܕܡܶܢ ܕܪܺܝܫ܆ ܗܳܝ ܒܰܠܚܽܘܕ ܕܰܬܚܽܘܪܺܝܢ ܒܰܢ܆ ܗܳܢܽܘܢ ܟܺܝܬ ܕܟܰܕ ܟܽܠ ܡܶܕܶܡ ܫܒܰܩܢܰܢ ܘܰܫܩܰܠܢܰܢ ܨܠܺܝܒܳܐ܆ ܢܩܶܦܢܰܢ ܠܣܳܐܶܡ ܢܳܡܽܘܣܳܐ ܡܫܺܝܚܳܐ܆ ܗܰܘ ܕܳܐܦ ܠܰܢ ܟܰܕ ܒܫܶܢܬܳܐ ܥܕܰܟܺܝܠ ܝܰܩܺܝܪܺܝܢ ܗ̱ܘܰܝܢ ܘܰܡܛܰܒܥܺܝܢ ܘܰܠܘܳܬ ܐܰܪܥܳܐ ܡܶܨܛܠܶܝܢ ܗ̱ܘܰܝܢ܆ ܝܰܬܺܝܪ ܡܥܰܠܝܳܐܺܝܬ ܘܝܰܬܺܝܪ ܦܰܐܝܽܘܬ ܐܰܠܳܗܳܐܺܝܬ ܐܳܡܰܪ ܗ̱ܘܳܐ: ܐܶܡܰܬܝ ܕܰܠܘܳܬ ܚܰܫܳܐ ܗܰܘ ܦܳܪܽܘܩܳܝܳܐ ܫܩܰܠ ܗ̱ܘܳܐ ܚܺܐܦܳܐ܆ ܩܽܘܡܘ ܢܺ݀ܐܙܰܠ ܡܶܢ ܗܳܪܟܳܐ[18]. ܝܳܕܰܥ ܗ̱ܘܳܐ ܓܶܝܪ ܕܰܠܟܽܠ ܐ̱ܢܳܫ ܥܰܡܶܗ ܐܰܟܚܕܳܐ ܥܬܺܝܕ ܗ̱ܘܳܐ ܕܢܰܣܶܩ ܠܰܫܡܰܝܳܐ. ܡܶܛܽܠ ܗܳܕܶܐ ܐܳܦ ܐܳܡܰܪ ܗ̱ܘܳܐ܆ ܐܳܦ ܐܶܢܳܐ ܐܶܢ ܐܶ݀ܬܪܰܡܪܰܡ ܡܶܢ ܐܰܪܥܳܐ܆ ܠܟܽܠܢܳܫ ܐܶ݀ܓܶܕ ܠܘܳܬܝ[19]. ܐܰܪܦܳܝ ܗܳܟܺܝܠ ܐܳܘ ܚܓܺܝܪܬܳܐ ܠܘܳܬ ܫܰܦܺܝܪܽܘܬ ܕܶܚܠܬܳܐ ܠܣܺܐܡܳܐ ܘܰܠܕܰܗܒܳܐ܆ ܩܰܕܡܳܐܺܝܬ ܡܰܢ ܠܰܓܠܺܝ̈ܦܶܐ ܘܰܠܕܶܚ̈ܠܳܬܳܐ ܕܥܰܡ̱ܡ̈ܶܐ. ܦܬܰܟܪ̈ܶܐ ܓܶܝܪ ܕܥܰܡ̱ܡ̈ܶܐ ܣܺܐܡܳܐ ܘܕܰܗܒܳܐ܆ ܥ̈ܒܳܕܶܐ ܕܺܐܝ̈ܕܰܝܳܐ ܕܐ̱ܢܳܫܳܐ܆ ܗܳܠܶܝܢ ܟܺܝܬ ܕܰܐܝܟܰܢܳܐ ܕܰܐܢ̱ܬܝ ܪ̈ܶܓܠܶܐ ܐܺܝܬ ܠܗܽܘܢ ܘܠܳܐ ܡܗܰܠܟܺܝܢ܆ ܘܡܶܚܕܳܐ ܬܶܫܕܶܝܢ ܡܶܢܶܟܝ ܠܰܡܫܰܪܝܽܘܬܳܐ ܗܳܝ ܕܒܶܟܝ ܘܰܠܠܳܐ ܡܶܬܬܙܺܝܥܳܢܽܘܬܳܐ܆ ܥܰܡ ܦܬܰܟܪ̈ܶܐ ܗܳܢܽܘܢ ܠܳܐ ܡܶܬܬܙܺܝ̈ܥܳܢܶܐ ܘܰܡܫܰܪ̈ܰܝܳܐ. ܕܬܰܪܬܶܝܢ ܕܶܝܢ܆ ܠܪܶܚܡܰܬ ܟܶܣܦܳܐ ܗܳܝ ܟܺܝܬ ܕܺܐܝܬܶܝܗ̇ ܥܶܩܳܪܳܐ ܕܟܽܠ ܒܺܝܫܬܳܐ. ܘܗܳܟܰܢܳܐ ܒܰܫܡܶܗ ܕܝܶܫܽܘܥ ܡܫܺܝܚܳܐ ܗܰܘ ܢܳܨܪܳܝܳܐ ܩܽܘܡܝ̱ ܘܗܰܠܶܟܝ̱.
ܘܟܰܕ ܗܳܠܶܝܢ ܐܶܡܰܪܘ: ܟܰܕ ܠܒܰܟܘ ܠܺܐܝܕܳܐ ܕܺܝܠܳܗ̇ ܗܳܝ ܕܝܰܡܺܝܢܳܐ ܐܰܩܺܝܡܽܘܗ̇. ܠܳܐ ܓܶܝܪ ܡܶܫܟܚܳܐ ܗ̱ܘܳܬ ܕܣܳܥܽܘܪܽܘܬܳܐ ܡܶܕܶܡ ܝܰܡܺܝܢܳܝܬܳܐ ܘܕܰܠܘܳܬ ܡܝܰܬܪܽܘܬܳܐ ܡܰܝܬܝܳܐ ܬܶܥܒܶܕ ܗ̱ܘܳܬ܆ ܐܶܠܽܘܠܳܐ ܕܰܠܚܰܝܠܳܐ ܗܰܘ ܝܰܡܺܝܢܳܝܳܐ ܕܺܝܠܳܗ̇ ܘܰܟܝܳܢܳܝܳܐ ܒܡܰܠ̈ܦܳܢܘܳܬܳܐ ܚܰܝܶܠܘ ܘܰܐܚܠܶܡܘ ܫܠܺܝ̈ܚܶܐ܆ ܟܰܕ ܐܺܝܕܳܐ ܠܺܐܝܕܳܐ ܐܰܠܘܶܬܘ܆ ܘܡܶܚܕܳܐ ܒܰܪ ܫܳܥܬܶܗ ܐܶܫܬܰܪܰܪ̈ܶܝܢ ܦܰܣ̈ܶܐ ܕܪ̈ܶܓܠܶܝܗ̇ ܘܩܽܘܪ̈ܨܠܶܝܗ̇. ܐܰܩܺܝܡܰܬ ܓܶܝܪ ܪ̈ܶܓܠܶܝܗ̇ ܥܰܠ ܫܽܘܥܳܐ ܕܗܰܝܡܳܢܽܘܬܳܐ܆ ܘܰܬܩ̈ܰܢܶܝܢ ܗܰܠ̈ܟܳܬܳܐ ܕܺܝܠܳܗ̇[20]܆ ܗܳܝ ܕܳܐܡܰܪ ܕܰܘܺܝܕ. ܘܠܰܘ ܒܰܠܚܽܘܕ ܬܶܩܢܰܬ ܒܗܰܠ̈ܟܳܬܳܗ̇܆ ܐܶܠܳܐ ܐܳܦ ܡܫܰܘܪܳܐ ܗ̱ܘܳܬ܆ ܘܰܒܩܽܘ̈ܝܳܙܶܐ ܡܶܬܚܰܫܚܳܐ ܗ̄ܘܳܬ. ܟܰܕ ܕܳܝܨܳܐ ܗ̱ܘܳܬ ܒܣܽܘ̈ܟܳܠܶܐ ܐܰܠܳܗܳܝ̈ܶܐ܆ ܘܰܠܗܰܝܟܠܳܐ[21] ܥܰܡ ܫܠܺܝ̈ܚܶܐ ܥܳܐܠܳܐ ܗ̱ܘܳܬ܆ ܟܰܕ ܒܥܽܘܡ̈ܩܶܐ ܕܬܶܐܽܘܪܺܝܰܐܤ ܟܳܗ̈ܢܳܝܳܬܳܐ ܘܕܰܠܣܰܓܺܝ̈ܶܐܐ ܠܳܐ ܡܶܬܓܰܫ̈ܦܳܢ ܡܟܰܬܪܳܐ ܘܡܶܬܐܰܡܢܳܐ. ܘܗܺܝ ܡܶܟܺܝܠ ܗܳܝ ܕܰܠܩܽܘܒܳܠܳܐ ܠܒܺܝܟܳܐ ܠܗܽܘܢ ܠܰܫ̈ܠܺܝܚܶܐ܆ ܘܥܰܣܩܽܘܬ ܡܶܬܢܰܬܦܳܢܳܐܺܝܬ ܘܠܳܐ ܡܶܬܦܰܪܫܳܢܳܐܺܝܬ ܐܺܝܬ ܠܳܗ̇ ܠܘܳܬܗܽܘܢ܆ ܘܠܰܘ ܟܰܕ ܗܺܝ ܡܶܬܠܰܒܟܳܐ ܡܶܢܗܽܘܢ. ܐܳܡܰܪ ܓܶܝܪ ܟܬܳܒܳܐ ܟܳܗܢܳܝܳܐ ܡܶܛܽܠ ܚܓܺܝܪܳܐ ܗܰܘ ܕܩܳܕܶܡ ܗ̱ܘܳܐ ܡܛܰܦܶܤ ܠܥܺܕܬܳܐ ܗܳܝ ܕܡܶܢ ܥܰܡ̱ܡ̈ܶܐ ܗܳܟܰܢܳܐ. ܟܰܕ ܕܶܝܢ ܐܰܚܺܝܕ ܗ̱ܘܳܐ ܠܦܶܛܪܽܘܤ ܘܰܠܝܽܘܚܰܢܳܢ܆ ܪܗܶܛ ܗ̱ܘܳܐ ܠܘܳܬܗܽܘܢ ܐܰܟܚܕܳܐ ܟܽܠܶܗ ܥܰܡܳܐ܆ ܠܶܐܤܛܘܳܐ ܕܡܶܬܩܪܶܐ ܗ̱ܘܳܐ ܕܰܫܠܶܝܡܽܘܢ܆ ܟܰܕ ܬܰܗܺܝܪܺܝܢ[22].
ܐܰܝܟܰܢܳܐ ܓܶܝܪ ܠܰܘ ܕܕܽܘܡܳܪܳܐ ܘܰܕܬܶܡܗܳܐ ܐܺܝܬܶܝܗ̇ ܗ̱ܘܳܬ܆ ܕܗܳܝ ܕܡܶܢ ܩܕܺܝܡ ܪܰܡܝܳܐ ܗ̱ܘܳܬ ܘܥܰܠ ܗܰܘ ܕܰܥܬܺܝܕ ܗ̱ܘܳܐ ܕܰܢܩܺܝܡܺܝܗ̇ ܣܢܺܝܩܳܐ ܗ̱ܘܳܬ܆ ܥܰܡ ܫܠܺܝ̈ܚܶܐ ܒܶܐܤܛܘܳܐ ܕܰܫܠܶܝܡܽܘܢ ܬܗܰܠܶܟ܆ ܗܳܢܰܘ ܕܶܝܢ ܕܰܒܥܽܘܬܪܳܐ ܕܚܶܟܡܬܳܐ ܘܰܕܬܶܐܽܘܪܺܝܰܐ ܬܶܬܦܰܬܶܐ܆ ܗܳܢܳܐ ܓܶܝܪ ܣܽܘܟܳܠܳܐ ܡܰܘܕܰܥ ܐܶܤܛܘܳܐ ܗܰܘ ܕܰܫܠܶܝܡܽܘܢ܆ ܗܰܘ ܕܡܶܛܽܠܳܬܶܗ ܟܬܺܝܒ܆ ܘܝܰܗ̱ܒ ܡܳܪܝܳܐ ܝܺܕܰܥܬܳܐ ܠܰܫܠܶܝܡܽܘܢ ܘܚܶܟܡܬܳܐ ܣܰܓܺܝܐܬܳܐ ܣܰܓܺܝ܆ ܘܰܐܫܺܝܕܽܘܬܳܐ[23] ܕܠܶܒܳܐ ܐܰܝܟ ܚܳܠܳܐ ܗܰܘ ܕܥܰܠ ܝܰܡܳܐ܆ ܘܣܶܓܝܰܬ ܚܶܟܡܬܶܗ ܕܰܫܠܶܝܡܽܘܢ܆ ܝܰܬܺܝܪ ܡܶܢ ܚܰܟܡܬܳܐ ܕܟܽܠܗܽܘܢ ܒܢܰܝ̈ܢܳܫܳܐ ܥܰܬܺܝ̈ܩܶܐ[24]. ܫܒܽܘܩ ܕܗܳܢܳܐ ܫܠܶܝܡܽܘܢ ܛܽܘܦܣܳܢܳܝܳܐ ܠܰܡܫܺܝܚܳܐ ܫܠܶܝܡܽܘܢ ܗܰܘ ܫܰܪܺܝܪܳܐ ܩܳܕܶܡ ܗ̱ܘܳܐ ܨܳܐܰܪ. ܫܠܶܝܡܽܘܢ ܓܶܝܪ ܫܰܝܢܳܝܳܐ ܡܶܬܦܰܫܰܩ܆ ܡܫܺܝܚܳܐ ܕܶܝܢ ܐܺܝܬܰܘܗ̱ܝ ܫܰܝܢܳܐ ܕܺܝܠܰܢ[25]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܗܽܘ ܗܰܘ ܕܺܐܝܬܰܘܗ̱ܝ ܚܶܟܡܬܳܐ ܐܽܘܣܝ̣ܳܝ̣ܬܳܐ ܘܚܰܝܠܳܐ ܕܰܐܠܳܗܳܐ ܐܰܒܳܐ[26]܆ ܗܰܘ ܕܒܶܗ ܐܺܝܬܰܝܗܶܝܢ ܟܽܠܗܶܝܢ ܣܺܝ̈ܡܳܬܳܐ ܕܚܶܟܡܬܳܐ܆ ܘܡܰܛܫ̈ܝܳܬܳܐ ܕܺܝܕܰܥܬܳܐ ܗܳܝ ܕܰܠܘܳܬܰܢ ܐܳܬܝܳܐ[27].
ܒܗܳܠܶܝܢ ܐܶܬܦܰܛܡܰܬ̣ ܘܶܐܬܒܰܣܡܰܬ̣ ܥܺܕܬܳܐ܆ ܟܰܕ ܡܶܢ ܩܕܺܝܡ ܠܰܡܗܰܠܳܟܽܘ ܠܳܐ ܡܶܫܟܚܳܐ ܗ̱ܘܳܬ܆ ܐܳܦ ܟܰܕ ܥܰܡ ܫܠܺܝ̈ܚܶܐ ܐܰܟܚܕܳܐ ܗܰܠܟܰܬ̣. ܗܳܠܶܝܢ ܐܺܝܬܰܝܗܽܘܢ ܚܶܙܘܳܢ̈ܶܐ ܕܶܐܤܛܘܳܐ ܕܺܝܠܰܢ. ܕܰܠܡܳܐ ܡܶܕܶܡ ܕܰܐܝܟ ܗܳܟܰܢܳܐ ܐܰܘ ܕܟܽܠܶܗ ܗܳܢܳܐ܆ ܚܰܢ̈ܦܶܐ ܡܶܛܽܠ ܐܶܤܛܘܳܐ ܟܢܺܝܟܳܐ ܗܰܘ ܕܺܝܠܗܽܘܢ ܦܺܝܠܳܣܽܘܦܺܝܣܳܐ ܥܳܒܕܺܝܢ ܗ̱ܘܰܘ ܒܰܐܬܺܝ̈ܢܶܤ܆ ܕܰܠܡܳܐ ܚܓܺܝܪܳܐ ܐ̱ܢܳܫ ܕܰܐܝܟ ܗܳܢܳܐ ܐܰܩܺܝܡܘ̱܆ ܐܰܘ ܕܡܶܬܚܙܶܐ ܐܰܘ ܕܡܶܣܬܰܟܰܠ܆ ܘܠܳܐ ܣܳܟ. ܡܶܛܽܠ ܟܺܝܬ ܕܠܳܐ ܐܰܠܳܗܳܐ ܗܰܘ ܚܰܕ ܘܰܕܒܰܠܚܽܘܕܰܘܗ̱ܝ ܘܫܰܪܺܝܪܳܐܺܝܬ ܐܺܝܬ ܗ̱ܘܳܐ ܒܗܽܘܢ܆ ܐܳܦܠܳܐ ܐܺܝܬ ܗ̱ܘܳܐ ܠܗܽܘܢ ܛܽܘܝܳܒܳܐ[28] ܟܺܝܬ ܘܚܰܝܠܳܐ ܠܡܺܐܡܰܪ ܡܶܕܶܡ ܕܰܐܝܟ ܗܳܢܳܐ܆ ܕܰܐܝܟ ܐܰܝܟܰܢ܆ ܗܳܝ ܕܒܰܫܡܶܗ ܕܝܶܫܽܘܥ ܡܫܺܝܚܳܐ ܗܰܘ ܢܳܨܪܳܝܳܐ ܩܽܘܡ ܘܗܰܠܶܟ[29].
ܟܰܕ ܗܳܠܶܝܢ ܐܰܢ̱ܬܽܘܢ ܫܡܰܥܬܽܘܢ܆ ܘܠܳܐ ܣܳܟ ܡܶܣܬܰܒܪܺܝܢ ܐܢ̱ܬܽܘܢ ܠܺܝ ܕܡܶܬܥܰܣܩܺܝܢ ܐܢ̱ܬܽܘܢ. ܡܶܛܽܠ ܕܰܒܝܰܕ ܗܳܝ ܕܳܐܡܰܪ ܐ̱ܢܳܐ ܡܬܰܚܬ̊ܶܗ ܠܨܰܘܡܳܐ܆ ܘܰܡܥܺܝܩܳܐ ܗܳܕܐ ܠ̱ܐܢܳܫܺܝ̈ܢ. ܐܶܢܳܐ ܕܶܝܢ ܐܰܝܟ ܦܰܘܠܽܘܤ ܐܺ݀ܡܰܪ: ܘܡܰܢܽܘ ܐܺܝܬܰܘܗ̱ܝ ܗܰܘ ܕܰܡܚܰܕܶܐ ܠܺܝ܆ ܐܶܠܳܐ ܗܰܘ ܕܡܶܬܬܥܺܝܩ ܡܶܢܝ[30]. ܗܺܝ ܓܶܝܪ ܗܳܕܶܐ ܐܺܝܬܶܝܗ̇ ܕܡܶܬܦܰܪܰܤ ܐ̱ܢܳܐ ܕܢܶܬܡܬܰܚ ܡܺܐܡܪܳܐ܆ ܐܰܝܟܰܢܳܐ ܕܣܽܘܓܶܐܗ ܕܝܰܘܡܳܐ ܢܶܥܒܰܪ܆ ܘܠܳܐ ܐܶܕܰܓܠܺܝܘܗ̱ܝ ܠܰܟܬܳܒܳܐ ܕܳܐܡܰܪ: ܦܶܛܪܽܘܤ ܕܶܝܢ ܘܝܽܘܚܰܢܳܢ ܣܳܠܩܺܝܢ ܗ̱ܘܰܘ ܠܗܰܝܟܠܳܐ܆ ܠܘܳܬ ܫܳܥܬܳܐ ܕܰܨܠܽܘܬܳܐ ܗܳܝ ܕܰܬܫܰܥ[31]. ܕܣܳܠܩܺܝܢ ܗ̱ܘܰܘ ܫܳܡܰܥ ܐܰܢ̱ܬ. ܠܡܳܐ ܓܶܝܪ ܕܢܳܚܬܺܝܢ ܗ̱ܘܰܘ܆ ܐܰܢ̱ܬ ܕܶܝܢ ܐ̱ܚܪ̈ܳܢܝܳܬܳܐ ܒܳܥܶܐ ܐܰܢ̱ܬ ܠܰܢ ܕܢܰܟܪܶܙ ܘܢܶܩܪܶܐ܆ ܐ̱ܚܪ̈ܳܢܝܳܬܳܐ ܕܶܝܢ ܕܢܶܣܥܽܘܪ܆ ܘܰܕܗܳܠܶܝܢ ܕܣܰܩܽܘܒ̈ܠܳܝܳܢ ܠܣܽܘܥܪ̈ܳܢܶܐ ܢܚܰܘܶܐ.
ܐܰܘ ܠܳܐ ܝܳܕܰܥ ܐܰܢ̱ܬ ܕܝܰܘܡܳܐ ܗܳܢܳܐ ܕܝܰܘܡܳܢܳܐ ܗܳܕܶܐ ܡܶܫܬܰܘܕܶܐ܆ ܗܳܝ ܕܰܢܨܽܘܡ ܘܰܢܨܰܠܶܐ܆ ܘܰܕܠܰܡܫܺܝܚܳܐ ܕܰܟܦܶܢ ܢܬܰܪܣܶܐ܆ ܕܰܠܘܳܬ ܬܰܪ̈ܥܶܐ ܟܳܗ̈ܢܳܝܶܐ ܡܶܬܶܐܡܶܢ. ܠܡܳܢܳܐ ܗܳܟܺܝܠ ܟܰܕ ܗܳܠܶܝܢ ܕܺܝܠܶܗ ܕܝܰܘܡܳܐ ܫܳܒܶܩ ܐܰܢ̱ܬ܆ ܡܶܬܪܰܥܶܐ ܐܰܢ̱ܬ ܗܳܠܶܝܢ ܕܢܽܘܟܪ̈ܳܝܳܢ ܠܗܳܢܳܐ܆ ܥܶܕܳܢܳܐ ܩܰܠܺܝܠܳܐ܆ ܘܒܽܘ̈ܫܳܠܶܐ ܘܦܳܬܽܘܪܳܐ ܫܰܡܺܝܢܳܐ܆ ܘܕܰܠܨܰܘܡܳܐ ܠܳܐ ܦܐܶܐ. ܐܶܡܰܬܝ ܕܶܝܢ ܬܶܗܘܶܐ ܫܳܡܽܘܥܳܐ ܡܫܰܝܢܳܐ ܘܪܳܚܶܡ ܐ̱ܢܳܫܳܐ ܕܡ̈ܶܠܶܐ ܕܺܝܠܝ. ܐܶܢܗܽܘ ܓܶܝܪ ܕܰܒ̈ܥܺܐܕܶܐ ܡܰܢ ܠܘܳܬ ܡܶܐܟ̈ܠܳܬܳܐ ܚܳܐܰܪ ܐܰܢ̱ܬ ܘܰܠܘܳܬ ܟܰܪܣܳܐ ܝܰܥܢܬܳܐ܆ ܘܡܶܚܕܳܐ ܥܰܡܳܗ̇ ܕܗܳܝ ܕܰܠܘܳܬ ܥܺܕܬܳܐ ܐܳܬܶܐ ܐܰܢ̱ܬ܆ ܡܶܚܕܳܐ ܠܡܶܗܦܰܟ ܠܒܰܝܬܶܗ ܡܣܰܪܗܶܒ ܐܰܢ̱ܬ܆ ܒܨܰܘ̈ܡܶܐ ܕܶܝܢ ܩܳܝܡܳܐ ܥܠܰܝܟ ܡܶܪܬܳܐ ܐܽܘܟܳܡܬܳܐ܆ ܟܰܕ ܫܰܢ̱ܬܳܐ ܣܳܒܰܪ ܐܰܢ̱ܬ ܠܶܗ ܠܝܰܘܡܳܐ܆ ܠܶܐܡܰܬܝ ܐܶ݀ܡܰܠܶܠ ܠܳܟ ܐܶܡܰܪ ܠܺܝ܆ ܐܰܘ ܠܶܐܡܰܬܝ ܬܬܰܪܣܶܐ ܠܢܰܦܫܳܟ ܕܟܰܦܢܳܐ܆ ܟܰܕ ܒܟܽܠ ܙܒܰܢ ܡܠܰܚܶܫ ܐܰܢ̱ܬ܆ ܘܰܠܟܽܠ ܡܶܕܶܡ ܥܳܕܶܠ ܐܰܢ̱ܬ. ܐܶܢܳܐ ܕܶܝܢ ܝܳܕܰܥ ܐ̱ܢܳܐ ܐܰܝܟ ܡܶܠܬܶܗ ܕܩܽܘܗܠܰܬ܆ ܕܙܰܒܢܳܐ ܐܺܝܬ ܠܟܽܠ ܣܽܘܥܪܳܢܳܐ[32]. ܘܕܰܠܗܰܘ ܕܰܡܥܰܕܥܶܕ ܙܳܕܶܩ ܠܺܝ ܕܶܐ݀ܡܰܠܶܠ ܡܶܢ ܟܽܠ ܦܪܽܘܤ܆ ܕܰܐܝܟܰܢܳܐ ܘܳܠܶܐ ܠܶܗ ܕܰܢܥܰܕܥܶܕ. ܐܰܝܟܰܢܳܐ ܕܟܰܕ ܗܽܘ ܫܰܪܒܶܗ ܕܥܺܐܕܳܐ ܢܶܗܘܶܐ ܐܺܝܬܰܘܗ̱ܝ ܠܶܗ ܕܰܐܣܺܝܢ ܒܶܗ܆ ܘܰܠܡ̈ܶܠܶܐ ܕܡܶܛܽܠܳܬܶܗ ܡܥܰܩܶܒ ܐܳܦ ܥܠܰܘܗ̱ܝ ܕܦܳܬܽܘܪܳܐ ܘܳܐܦ ܥܰܡܶܗ ܕܒܽܘܣܳܡܶܗ܆ ܠܳܐ ܢܶܬܶܐܫܶܕ ܠܘܳܬ ܙܡܳܪ̈ܶܐ ܘܪܰܘܳܝܽܘܬܳܐ܆ ܘܰܠܘܳܬ ܓܽܘܚܟܳܐ ܠܳܐ ܟܢܺܝܟܳܐ. ܕܰܒܪܶܥܠܳܐ ܓܶܝܪ ܢܶܪܘܰܙ ܠܰܐܠܳܗܳܐ ܦܩܺܝܕܺܝܢܰܢ܆ ܘܰܕܠܳܐ ܡܬܽܘܡ ܢܶܗܘܶܐ ܐܺܝܬ ܠܰܢ ܢܰܦܫܳܐ ܕܰܣܦܺܝܩܳܐ ܕܒܰܛܺܝܠܳܐ ܡܶܢ ܕܶܚܠܬܶܗ ܘܡܶܢ ܥܽܘܗܕܳܢܶܗ. ܐܶܠܳܐ ܒܺܐܝ̈ܕܰܝܗܶܝܢ ܕܗܳܠܶܝܢ܆ ܢܶ݀ܬܟܽܘܤ ܠܚܺܐܦܳܐ ܗܰܘ ܕܰܠܘܳܬ ܚܛܺܝܬܳܐ. ܐܰܝܟܳܐ ܓܶܝܪ ܚܙܰܝܬ ܠܪܰܒ ܚܰܝܠܳܐ܆ ܕܡܶܢ ܒܳܬܰܪ ܣܶܕܪܳܐ ܕܰܩܪܳܒܳܐ ܦܺܝܠܳܣܽܘܦܺܝܣܳܐ ܥܳܒܶܕ ܠܘܳܬ ܦܳܠܚ̈ܶܐ ܡܶܛܽܠ ܝܽܘܠ̈ܦܳܢܶܐ ܗܳܠܶܝܢ ܕܛܶܟ̈ܣܶܐ܆ ܟܰܕ ܙܳܕܶܩ ܠܶܗ ܕܰܩܕܳܡ ܕܢܶܙܕܟܽܘܢ ܘܰܢܚܽܘܒܽܘܢ ܗܳܠܶܝܢ ܢܺܐܡܰܪ܆ ܐܰܘ ܠܰܡܢܰܦܳܩܽܘ ܛܠܳܝ̈ܶܐ܆ ܕܡܶܢ ܒܳܬܰܪ ܐܰܓܽܘ̈ܢܶܐ ܘܡܶܢ ܒܳܬܰܪ ܕܦܳܐܶܕ ܐܰܬܠܺܝܛܳܐ ܡܶܢ ܟܠܺܝܠܳܐ ܡܰܠܶܦ ܕܽܘܪܳܫܳܐ܆ ܐܰܘ ܕܗܳܘܶܐ ܡܺܐܡܪܳܐ ܕܥܺܐܕܳܐ ܒܳܬܰܪ ܥܺܐܕܳܐ܆ ܗܰܘ ܟܺܝܬ ܕܝܳܨܶܦ ܕܰܠܣܽܘܓܦܳܢܳܐ ܗܰܘ ܕܡܶܢ ܒܣܳܡܳܐ ܢܶܩܕܽܘܡ ܢܶܦܣܽܘܩ܆ ܘܕܰܒܡ̈ܶܠܶܐ ܘܰܒܣܽܘ̈ܟܳܠܶܐ ܐܰܠܳܗܳܝ̈ܶܐ ܢܶܥܢܶܝܗ̇ ܠܢܰܦܫܳܐ ܘܰܢܩܰܕܶܡ ܢܕܰܟܶܝܗ̇.
ܡܶܛܽܠ ܗܳܕܶܐ ܐܺܝܬܰܘܗ̱ܝ ܠܺܝ ܟܽܠܶܗ ܥܰܡܠܳܐ܆ ܘܠܰܝ̈ܠܰܘܳܬܳܐ ܕܠܳܐ ܫܶܢܬܳܐ ܡܶܬܛܰܠܩܺܝܢ܆ ܘܢܰܦܫܳܐ ܥܰܡ ܦܰܓܪܳܐ ܡܶܬܕܰܝܒܳܐ. ܘܰܐܢ̱ܬ ܣܳܒܰܪ ܐܰܢ̱ܬ ܟܒܰܪ ܕܪܳܐܶܓ ܐ̱ܢܳܐ ܠܩܽܘܠܳܣܰܝ̈ܟ܆ ܘܰܕܛܰܝܒܽܘܬܳܐ ܚܰܝܳܒ ܐ̱ܢܳܐ ܠܳܟ܆ ܕܰܡܚܰܡܣܶܢ ܐܰܢ̱ܬ ܘܰܡܟܰܬܰܪ ܐܰܢ̱ܬ ܚܕܳܐ ܫܳܥܬܳܐ ܠܘܳܬ ܫܶܡܥܳܐ. ܐܶܢܳܐ ܕܶܝܢ܆ ܘܳܐܦܠܳܐ ܚܕܳܐ ܡܶܠܬܳܐ ܥܳܒܶܕ ܐ̱ܢܳܐ ܕܩܽܘܠܳܣ̈ܶܐ ܕܕܰܐܝܟ ܗܳܠܶܝܢ܆ ܐܶܢ ܠܢܰܦܫܳܐ ܠܳܐ ܡܰܘܬܰܪ ܐ̱ܢܳܐ ܡܶܢ ܗܳܠܶܝܢ ܕܡܶܬܐܰܡܪ̈ܳܢ܆ ܐܰܝܟܰܢܳܐ ܕܢܰܘܕܶܐ ܫܳܡܽܘܥܳܐ ܕܶܐܬܥܰܕܰܪ. ܡܶܛܽܠܗܳܕܶܐ ܐܶܢܳܐ ܗܳܝ ܕܺܝܠܝ ܥܳܒܶܕ ܐ̱ܢܳܐ܆ ܐܳܦܶܢ ܠܳܐ ܐ̱ܢܳܫ ܗܰܘ ܕܫܳܡܰܥ ܢܶܗܘܶܐ ܐܺܝܬ. ܐܳܦ ܓܶܝܪ ܠܰܘ ܒܨܶܒܝܳܢܝ ܣܳܥܰܪ ܐ̱ܢܳܐ ܗܳܕܶܐ ܐܳܡܰܪ ܦܰܘܠܽܘܤ: ܐܶܠܳܐ ܚܰܘܒܬܳܐ ܡܡܰܠܶܐ ܐ̱ܢܳܐ܆ ܘܪܰܒܰܬ ܒܰܝܬܳܝܽܘܬܳܐ ܡܗܰܝܡܰܢ ܐ̱ܢܳܐ. ܐܰܝܢܳܐ ܗܳܟܺܝܠ ܐܰܓܪܳܐ ܐܺܝܬ ܠܺܝ[33]. ܗܳܝ ܕܬܺܐܪܬܳܐ ܠܳܐ ܡܶܬܩܰܛܪܓܳܢܺܝܬܳܐ ܬܶܗܘܶܐ ܐܺܝܬ ܠܺܝ ܒܗܳܕܶܐ܆ ܘܺܐ݀ܡܰܪ ܐܰܝܟ ܕܰܦܩܺܝܕ ܐ̱ܢܳܐ܆ ܥܰܒܕܳܐ ܠܳܐ ܚܳܫܚܳܐ ܐܺܝܬܰܝ[34]܆ ܗܳܝ ܕܡܶܫܟܚܳܢܺܝܬܳܐ ܐܺܝܬܶܝܗ̇ ܗ̱ܘܳܬ ܐܰܝܟ ܡܚܺܝܠܽܘܬܳܐ ܕܺܝܠܝ ܕܶܐ݀ܥܒܶܕ ܥܶܒܕܶܬ܆ ܗܳܝ ܓܶܝܪ ܕܢܺܐܡܪܽܘܢ ܕܗܰܘ ܡܳܐ ܕܘܳܠܶܐ ܗ̱ܘܳܐ ܠܰܢ ܕܢܶ݀ܥܒܶܕ ܥܒܰܕܢܰܢ܆ ܠܡܽܘ̈ܫܚܳܬܳܐ ܫܠܺܝ̈ܚܳܝܳܬܳܐ ܠܳܚܡܳܐ. ܐܶܢܳܐ ܕܶܝܢ ܠܢܰܦܫܝ ܝܳܕܰܥ ܐ̱ܢܳܐ܆ ܕܳܐܦܠܳܐ ܡܢܳܬܳܐ ܚܕܳܐ ܙܥܽܘܪܬܳܐ ܡܶܢ ܣܰܓܺܝ̈ܳܐܬܳܐ ܕܚܰܘܒܬܳܐ ܐܰܪܡܺܝܬ̣.
ܗܳܠܶܝܢ ܕܶܝܢ ܐܶܡܪܶܬ܆ ܠܰܘ ܐܰܝܟ ܡܰܢ ܕܰܒܡܰܐܺܝܢܽܘܬܳܐ ܥܳܕܶܠ ܐ̱ܢܳܐ ܠܟܽܘܢ ܠܳܐ ܬܶܗܘܶܐ܆ ܗܳܢܽܘܢ ܟܺܝܬ ܕܳܐܦ ܥܳܕܠܺܝܢ ܐܢ̱ܬܽܘܢ ܠܺܝ ܕܠܰܘ ܐܰܡܺܝܢܳܐܺܝܬ ܐܳܡܰܪ ܐ̱ܢܳܐ܆ ܘܟܽܠܗܽܘܢ ܗܳܠܶܝܢ ܡܶܬܟܰܢܫܺܝܢ ܐܢ̱ܬܽܘܢ܆ ܐܰܝܟ ܕܳܐܦܠܳܐ ܩܳܠܳܐ ܕܺܝܠܝ ܢܶܣܦܰܩ ܐܰܝܟ ܕܰܠܡܺܐܡܰܪ ܠܘܳܬ ܣܽܘܓܳܐܐ ܕܗܳܢܽܘܢ ܕܫܳܡܥܺܝܢ܆ ܐܶܠܳܐ ܡܶܛܽܠ ܬܠܳܬܳܐ ܐ̱ܢܳܫܺܝ̈ܢ ܐܰܘ ܐܰܪܒܥܳܐ܆ ܕܡܶܬܥܰܕܠܳܢܳܐܺܝܬ ܠܘܳܬ ܟܽܠܡܶܕܶܡ ܣܺܝܡܺܝܢ܆ ܘܡܶܨܛܰܪܶܝܢ ܡܶܛܽܠ ܥܺܕܬܳܐ ܕܡܶܬܒܰܢܝܳܐ ܘܪܳܕܝܳܐ ܒܕܶܚܠܬܳܐ ܕܡܳܪܝܳܐ܆ ܘܣܳܓܝܳܐ ܒܒܽܘܝܳܐܳܐ ܕܪܽܘܚܳܐ ܩܰܕܺܝܫܳܐ[35]܆ ܐܰܝܟܰܢܳܐ ܕܩܳܪܶܝܢ ܚ̱ܢܰܢ ܕܰܟܬܺܝܒ. ܗܳܢܽܘܢ ܕܣܳܦ̈ܩܳܢ ܠܗܽܘܢ ܠܫܽܘܢܳܩܳܐ ܗܳܠܶܝܢ ܕܶܐܬܶܐܡܰܪ̈ܶܝܢ. ܐܳܦܶܢ ܚܢܰܢ ܟܰܕ ܢܶܫܬܰܚܠܦܽܘܢ܆ ܕܰܠܘܳܬ ܝܽܘܬܪܳܢܳܐ ܢܶܗܘ̈ܝܳܢ ܠܗܽܘܢ ܗܳܠܶܝܢ ܡܨܰܠܶܝܢ ܚ̱ܢܰܢ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܰܒܥܺܝܢ ܘܰܐܪܒܥܳܐ.
[1]ܦܪܟܣܝܣ. 3: 1 ـ 2
[2] ܒܰܙܥܽܘܪܽܘܬܳܐ
[3]ܦܪܟܣܝܣ.3: 6
[4]ܡܬܝ. 19: 27 ܐܦ ܡܪܩܘܣ. 10: 28 ܐܦ ܠܘܩܐ. 18: 28
[5]ܡܬܝ. 11: 12
[6]ܥܒܪ̈ܝܐ. 6: 10
[7] ܕܰܠܥܶܠ
[8]ܠܘܩܐ. 12: 31 ܐܦ ܡܬܝ. 6: 33
[9]ܡܬܝ. 6: 8
[10]ܡܙܡܘܪ̈ܐ. 55: 22
[11]ܦܪܟܣܝܣ. 3: 6
[12]ܐ. ܩܘܪ̈ܝܢܬܝܐ. 4: 7
[13]ܐ. ܦܛܪܘܣ. 4: 10 ـ 11
[14]ܒ. ܩܘܪ̈ܝܢܬܝܐ. 10: 5
[15]ܡܙܡܘܪ̈ܐ. 65: 4
[16]ܝܘܚܢܢ. 10: 9
[17]ܡܙܡܘܪ̈ܐ. 51: 5
[18]ܝܘܚܢܢ. 14: 31
[19]ܝܘܚܢܢ. 12: 32
[20]ܡܙܡܘܪ̈ܐ. 40: 2
[21]ܠܗܰܝܟܠܳܐ ܝܰܘܢܳܐܝܬ ܟܳܗܢܳܝܳܐ ܫܰܡܰܗ܆ ܡܶܛܽܠܗܳܕܶܐ ܐܳܡܰܪ ܕܰܠܟܳܗ̈ܢܳܝܳܬܳܐ ܥܶܠܰܬ.
[22]ܦܪܟܣܝܣ. 3: 11
[23] ܘܰܪܘܺܝܚܽܘܬܳܐ
[24]ܐ. ܡܠܟ̈ܐ. 4: 29 ـ 30
[25]ܐܦܣ̈ܝܐ. 2: 14
[26]ܐ. ܩܘܪ̈ܝܢܬܝܐ. 1: 24
[27]ܩܘܠܣ̈ܝܐ. 2: 3
[28]ܥܽܘܬܳܕܳܐ
[29]ܦܪܟܣܝܣ. 3: 6
[30]ܒ. ܩܘܪ̈ܝܢܬܝܐ. 2: 2
[31]ܦܪܟܣܝܣ. 3: 1
[32]ܩܘܗܠܬ. 3: 1
[33]ܐ. ܩܘܪ̈ܝܢܬܝܐ. 9: 17 ـ 18
[34]ܠܘܩܐ. 17: 10
[35]ܦܪܟܣܝܣ. 9: 31