ܡܺܐܡܪܳܐ ܕܫܰܒܥܺܝܢ ܘܰܬܠܳܬܳܐ

ܥܰܠ ܩܰܕܺܝܫܳܐ ܣܳܗܕܳܐ ܒܰܪܰܠܰܗܰܐ.

73: ܡܶܣܬܒܰܪ ܠܺܝ܆ ܕܰܠܣܳܒܳܐ ܟܳܗܢܳܝܳܐ ܘܣܳܗܕܳܐ ܒܰܪܠܗܳܐ ܚܳܙܶܐ ܐ̱ܢܳܐ܆ ܕܚܰܪܺܝܦܳܐܺܝܬ ܡܶܕܶܡ ܚܳܐܰܪ ܒܺܝ܆ ܘܕܰܡܩܰܛܪܶܓ ܚܰܡܺܝܡܳܐܺܝܬ܆ ܘܠܰܘ ܚܰܡܺܝܡܳܐܺܝܬ ܒܰܠܚܽܘܕ܆ ܐܶܠܳܐ ܐܳܦ ܟܺܐܢܳܐܺܝܬ ܠܫܶܬܩܳܐ ܕܺܝܠܝ. ܕܰܡܩܰܛܪܶܓ ܕܶܝܢ ܗܳܟܰܢܳܐ ܘܳܐܡܰܪ: ܠܳܐ ܫܳܡܰܥ ܐܰܢ̱ܬ ܐܳܘ ܗܳܢܳܐ܆ ܠܦܰܘܠܽܘܤ ܫܠܺܝܚܳܐ ܕܰܡܫܰܪܰܪ ܘܳܐܡܰܪ: ܕܠܳܐ ܐܺܝܬ ܡܰܣܰܒ ܒܰܐܦ̈ܶܐ ܠܘܳܬ ܐܰ‌ܠܳܗܳܐ^[1]. ܐܰܝܟܰܢܳܐ ܗܳܟܺܝܠ ܟܰܕ ܠܰܐܪܒܥܺܝܢ ܣܳܗ̈ܕܶܐ ܗܳܢܽܘܢ ܕܗܰܝܟܠܳܐ ܗܳܢܳܐ ܩܰܕܺܝܫܳܐ ܥܰܡܝ ܐܰܟܚܕܳܐ ܡܛܳܐ ܠܗܽܘܢ܆ ܗܳܟܰܢܳܐ ܥܰܬܺܝܪܳܐܺܝܬ ܐܳܦ ܬܰܪܬܶܝܢ ܙܰܒ̈ܢܺܝܢ ܩܰܠܶܣܬ܆ ܡܶܢ ܬܰܟܬܽܘ̈ܫܶܐ ܕܺܝܠܝ ܐܰܗܡ̣ܺܝܬ܆ ܗܳܕܶܐ ܫܰܢ̱ܬܳܐ ܕܰܬܠܳܬ ܗܺܝ܆ ܟܰܕ ܐܳܦܠܳܐ ܚܕܳܐ ܡܶܠܬܳܐ ܡܩܰܠܣܳܢܺܝܬܳܐ ܫܰܟܶܢܬ ܠܺܝ܆ ܐܳܦܠܳܐ ܠܐ̱ܢܳܫ ܡܶܢ ܡܗܰܝܡ̈ܢܶܐ ܡܶܢ ܐܰܓܽܘ̈ܢܶܐ ܕܺܝܠܝ ܐܰܥ̣ܺܝܪܬ ܥܰܠ ܡܝܰܬܪܽܘܬܳܐ. ܐܳܦ ܓܶܝܪ ܠܰܘ ܠܩܽܘ̈ܠܳܣܶܐ ܪܳܚܶܡ ܐ̱ܢܳܐ܆ ܐܶܠܳܐ ܠܝܽܘܬܪܳܢܳܐ ܕܰܐܚܰܝ̈. ܝܰܠܺܝܦ ܐ̱ܢܳܐ ܗ̱ܘ ܓܶܝܪ ܕܶܐ݀ܙܡܰܪ ܠܘܳܬ ܐܰ‌ܠܳܗܳܐ ܗܰܘ ܣܳܐܶܡ ܐܰܓܽܘ̈ܢܶܐ ܥܰܡ ܢܒܺܝܳܐ ܕܰܘܺܝܕ: ܕܡܶܢ ܠܘܳܬܳܟ ܐܺܝܬܰܘܗ̱ܝ ܩܽܘܠܳܣܳܐ ܕܺܝܠܝ ܒܥܺܕܬܳܐ ܪܰܒܬܳܐ^[2]. ܥܺܕܬܳܐ ܕܶܝܢ ܪܰܒܬܳܐ܆ ܘܰܕܠܳܐ ܡܶܕܶܡ ܐܺܝܬ ܕܪܰܒ ܡܶܢܳܗ̇܆ ܗܳܝ ܕܰܥܬܺܝܕܳܐ ܕܬܶܬܟܰܢܰܫ ܒܝܰܘܡܳܐ ܗܰܘ ܕܕܺܝܢܳܐ ܐܺܝܬܶܝܗ̇܆ ܐܶܡܰܬܝ ܕܟܽܠܳܗ̇ ܒܪܺܝܬܳܐ ܡܠܺܝܠܬܳܐ ܟܢܺܝܫܳܐܺܝܬ ܐܰܟܚܕܳܐ ܥܰܡ ܕܶܚܠܬܳܐ ܬܩܽܘܡ ܩܕܳܡ ܕܰܝܳܢܳܐ܆ ܕܡܶܬܚܕܰܪ ܡܰܢ ܒܰܕܡܽܘܬ ܡܰܠܟܳܐ ܡܶܢ ܫܩܺܝ̈ܠܰܝ ܢܰܝܙܟ̈ܶܐ܆ ܡܶܢ ܡܰܠܰܐܟ̈ܶܐ ܘܪ̈ܺܝܫܰܝ ܡܰܠܰܐܟ̈ܶܐ ܘܡܶܢ ܟܽܠ ܛܶܟܣܳܐ ܡܶܬܗܰܘܢܳܢܳܐ. ܩܳܪܶܐ ܕܶܝܢ ܠܘܳܬܶܗ ܐܰܝܟ ܕܰܟܬܺܝܒ ܠܰܫܡܰܝܳܐ ܠܥܶܠ ܘܠܰܐܪܥܳܐ ܠܰܡܦܰܪܳܫܽܘ ܠܥܰܡܳܐ ܕܺܝܠܶܗ܆ ܗܳܢܰܘ ܕܶܝܢ ܕܰܡܦܰܪܶܫ ܠܗܳܢܽܘܢ ܕܗܳܢܶܝܢ ܫܡܰܝ̈ܳܢܝܳܬܳܐ ܣܥܰܪܘ܆ ܡܶܢ ܗܳܢܽܘܢ ܕܗܳܢܶܝܢ ܐܰܪ̈ܥܳܢܝܳܬܳܐ ܦܠܰܚܘ܆ ܘܰܠܗܳܢܽܘܢ ܡܰܢ ܝܳܗܶܒ ܢܝܳܚܳܐ ܘܕܽܘܝܳܪܳܐ ܗܰܘ ܕܰܠܥܶܠ^[3]܆ ܠܗܳܢܽܘܢ ܕܶܝܢ ܒܰܕܡܽܘܬ ܐܰܪܥܳܐ ܫܳܒܶܩ ܕܢܶܗܘܽܘܢ ܢܳܬܥܺܝܢ ܠܬܰܚܬ܆ ܘܰܠܘܳܬ ܢܽܘܪܳܐ ܕܓܺܗܰܢܳܐ ܢܶܬܓܰܪܪܽܘܢ ܘܢܶܬܛܰܒܥܽܘܢ.

ܐܶܢܳܐ ܕܶܝܢ ܟܰܕ ܗܳܠܶܝܢ ܫܳܡܰܥ ܐ̱ܢܳܐ܆ ܐܶ݀ܩܽܘܡ ܘܶܐ݀ܦܽܘܩ ܪܽܘܚܳܐ܆ ܠܗܰܘ ܕܣܶܐܒ ܘܺܐܝܬܰܘܗ̱ܝ ܡܰܠܝܳܐ ܡܶܢ ܝܰܘ̈ܡܳܬܳܐ ܗܳܢܽܘܢ ܕܒܰܡܝܰܬܪܽܘܬܳܐ ܘܡܶܢ ܗܳܢܽܘܢ ܕܚܰܝ̈ܶܐ ܫܰܪܺܝܪ̈ܶܐ܆ ܐܳܦ ܓܶܝܪ ܘܰܟܬܳܒܳܐ ܗܰܘ ܢܳܡܽܘܣܳܝܳܐ ܦܳܩܶܕ ܠܺܝ ܠܰܡܩܳܡ ܡܶܢ ܩܕܳܡ ܦܰܪܨܽܘܦܳܐ ܕܣܳܒܳܐ܆ ܘܠܰܡܝܰܩܳܪܽܘ ܠܦܰܪܨܽܘܦܳܐ ܕܩܰܫܺܝܫܳܐ^[4]܆ ܐܳܦ ܟܺܝܬ ܘܺܐ݀ܡܰܪ: ܐܳܦ ܐܶ݀ܥܒܕܺܝܘܗ̱ܝ ܐܰܟܚܕܳܐ ܠܡܰܦܰܩ ܒܪܽܘܚܳܐ ܩܽܘܠܳܣܳܐ.

ܝܳܕܰܥ ܐ̱ܢܳܐ ܐܳܘ ܐܰܒܽܘܢ܆ ܕܰܒܦܰܓܪܳܐ ܣܳܒܳܝܳܐ ܚܰܘܺܝܬ̣ ܚܘܺܝܚܽܘܬܳܐ ܙܪܺܝܙܬܳܐ ܘܰܥܠܰܝܡܳܝܬܳܐ܆ ܘܰܠܗܳܕܶܐ ܝܰܬܺܝܪ ܐܰܪܝܡܬܳܗ̇ ܠܥܶܠ ܒܰܡܚܰܡܣܢܳܢܽܘܬܳܐ܆ ܡܳܢܳܐ ܕܶܝܢ ܐ݀ܶܚܰܫ ܐܶܢܳܐ܆ ܕܰܒܪܶܒܽܘ ܡܰܪ̈ܢܝܳܬܳܐ ܥܦܶܐ ܐ̱ܢܳܐ ܘܡܶܬܬܰܠܰܙ ܐ̱ܢܳܐ܆ ܘܠܳܐ ܡܶܫܟܰܚ ܐ̱ܢܳܐ ܣܳܟ ܕܰܠܠܶܫܳܢܳܐ ܕܺܝܠܝ ܐܶ݀ܦܪܽܘܫ ܘܶܐ݀ܬܠܺܝܘܗ̱ܝ ܠܗܳܠܶܝܢ ܟܳܗ̈ܢܳܝܳܬܳܐ܆ ܐܳܦ ܕܳܚܶܠ ‌ܐ̱ܢܳܐ܆ ܕܕܰܠܡܳܐ ܡܶܛܽܠ ܗܳܕܶܐ ܝܰܬܺܝܪܳܐܺܝܬ ܕܰܡܒܰܨܰܪ ܐ̱ܢܳܐ ܐܶ݀ܣܬܒܰܪ܆ ܘܠܰܘ ܕܰܡܟܰܢܶܟ ܐ̱ܢܳܐ ܐܰܘܟܺܝܬ ܡܩܰܠܶܤ ܐ̱ܢܐ ܠܬܽܘܪ̈ܳܨܶܐ ܗܳܠܶܝܢ ܕܺܝܠܳܟ܆ ܡܶܛܽܠ ܟܺܝܬ ܕܰܡܦܳܤ ܐ̱ܢܳܐ ܗܰܘ ܕܪܰܒܽܘܬ ܦܰܐܝܽܘܬܳܐ ܕܰܐܬܠܺܝ̈ܣܘܳܬܳܐ ܗܳܠܶܝܢ ܕܺܝܠܳܟ܆ ܐܳܦܠܳܐ ܥܰܠ ܡܰܡܠܠܳܐ ܡܥܰܠܝܳܐ ܘܪܳܡܳܐ ܕܡ̈ܶܠܶܐ ܣܢܺܝܩܳܐ. ܐܶܠܳܐ ܕܣܳܦܩܳܐ ܗܳܝ ܕܰܠܗܳܢܽܘܢ ܕܫܳܡܥܺܝܢ ܠܰܫܡܰܝܳܐ ܬܥܱܠܶܐ܆ ܐܳܦ ܡܶܢܳܗ̇ ܕܺܝܠܳܗ̇ ܕܬܰܫܥܺܝܬܳܐ ܒܰܠܚܽܘܕܶܝܗ̇. ܗܳܠܶܝܢ ܡܰܢ ܓܶܝܪ ܕܙܳܕܶܩ ܗ̱ܘܳܐ ܠܳܟ ܕܬܺܐܡܰܪ܆ ܐܰܝܟ ܣܰܟܽܘܠܬܳܢܳܐ ܘܕܰܩܢܶܐ ܥܽܘܬܳܕܳܐ ܘܛܽܘܝܳܒܳܐ ܕܡܶܢ ܣܰܝܒܽܘܬܳܐ܆ ܐܶܡ̣ܰܪܬ ܕܠܳܐ ܒܽܘܨܳܪܳܐ. ܗܳܠܶܝܢ ܕܶܝܢ ܕܺܐܝܬܰܝܗܶܝܢ ܗ̄ܘܰܝ̈ ܕܺܝ̈ܠܳܝܳܬܳܐ ܕܛܰܠܝܽܘܬܳܐ ܘܠܰܘ ܕܺܝܠܳܟ܆ ܕܰܩܕܳܡ ܕܬܶܚܰܫ ܠܳܐ ܡܶܬܗܰܝܡ̈ܢܳܢ ܗ̱ܘܰܝ̈܆ ܘܢܳܩܦܳܐܺܝܬ ܢܽܘܟܪ̈ܳܝܳܬܳܐ ܕܣܳܒܳܐ ܡܶܣܬܰܒܪ̈ܳܢ ܗ̱ܘܰܝ̈܆ ܟܰܕ ܚܰܡܣܶܢܬ ܚܰܘܺܝܬ ܐܶܢܶܝܢ ܕܺܝܠܳܟ. ܐܳܦ ܓܶܝܪ ܠܰܘ ܕܛܰܠܝܽܘܬܳܐ ܒܰܠܚܽܘܕ ܐܺܝܬܶܝܗ̇ ܗ̄ܘܳܬ܆ ܕܠܳܐ ܬܣܰܝܒܰܪ ܐܶܢܽܘܢ ܠܫܶܢ̈ܕܶܐ ܗܳܢܽܘܢ܆ ܐܶܠܳܐ ܐܳܦ ܕܰܐܕܰܐܡܽܘܤ ܐܰܘ ܕܗܽܘܠܶܐ ܡܶܕܶܡ ܐ̱ܚܪܺܬܳܐ ܕܝܰܬܺܝܪ ܚܠܺܝܡܳܐ ܘܰܡܫܰܪܪܳܐ.

ܟܰܕ ܕܶܝܢ ܡܫܰܐܠ ܗ̱ܘܳܐ ܒܪܰܡ ܗܰܘ ܕܰܝܳܢܳܐ܆ ܕܡܳܢܳܐ ܐܺܝܬܶܝܗ̇ ܟܪܺܝܣܛܝܳܢܽܘܬܳܐ܆ ܗܰܘ ܚܰܟܺܝܡܳܐ ܒܪܽܘܚܳܐ ܘܣܳܒܳܐ ܒܣܰܟܽܘܠܬܳܢܽܘܬܳܐ ܡܦܰܢܶܐ ܗ̱ܘܳܐ܆ ܫܪܳܪܳܐ ܕܕܽܘܓ̈ܡܰܛܰܐ. ܘܥܽܘܬܳܕܳܐ ܕܚܰܝ̈ܶܐ ܢܰܨܺܝ̈ܚܶܐ. ܘܟܰܕ ܗܰܘ ܬܡܰܗ܆ ܘܬܽܘܒ ܨܳܒܶܐ ܗ̱ܘܳܐ ܠܡܺܐܠܰܦ܆ ܕܡܳܢܳܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܗܰܘ ܕܠܰܡܗܰܝܡܳܢܽܘ ܒܶܗ ܡܶܫܬܰܘܕܶܐ ܟܪܺܝܣܛܝܳܢܳܐ܆ ܐܶܡܰܪ: ܠܡܶܣܓܰܕ ܠܰܐܠܳܗܳܐ ܐܰܒܳܐ ܘܠܰܒܪܶܗ ܝܺܚܺܝܕܳܝܳܐ ܡܳܪܰܢ ܝܶܫܽܘܥ ܡܫܺܝܚܳܐ܆ ܘܰܠܪܽܘܚܳܐ ܩܰܕܺܝܫܳܐ. ܠܒܶܪ̈ܝܳܬܳܐ ܕܶܝܢ܆ ܠܳܐ ܣܳܟ ܢܶܬܪܡܶܐ ܠܡܶܣܓܰܕ܆ ܐܰܝܟ ܫܳܢܝܽܘܬܳܐ ܚܰܢܦܳܝܬܳܐ. ܘܟܰܕ ܗܳܕܶܐ ܐܶܬܐܰܡܪܰܬ܆ ܗܰܘ ܕܰܝܳܢܳܐ ܐܰܣܒܰܪ ܗ̱ܘܳܐ ܠܶܗ܆ ܕܰܣܢܺܐܓܪܽܘܬܳܐ ܐܺܝܬܶܝܗ̇ ܬܶܐܽܘܠܽܘܓܺܝܰܐ ܗܳܝ ܕܙܰܕܺܝܩܳܐ܆ ܕܛܳܥܝܽܘܬܳܐ ܒܰܝܬܳܝܬܳܐ ܗܳܝ ܕܺܝܠܶܗ. ܘܟܰܕ ܓܚܶܟ܆ ܐܶܡܰܪ. ܗܳܐ ܐܰܢ̱ܬ ܠܰܒܪܺܝܬܳܐ ܦܳܠܰܚ ܐܰܢ̱ܬ. ܐܳܦ ܓܶܝܪ ܕܠܰܒܪܳܐ ܡܶܢ ܒܳܬܰܪ ܐܰܒܳܐ ܣܳܓܶܕ ܐܰܢ̱ܬ ܐܰܘܕܺܝ̣ܬ܆ ܕܰܐ̱ܚܪܳܝܳܐ ܐܺܝܬܰܘܗ̱ܝ ܡܶܢ ܟܽܠ ܦܪܽܘܤ܆ ܘܕܶܐܬܒ̣ܪܺܝ ܡܶܢ ܐܰܒܳܐ ܕܺܝܠܶܗ. ܗܰܘ ܕܶܝܢ ܟܰܕ ܣܟܰܪ ܦܽܘܡܳܐ ܕܚܰܣܺܝܪܽܘܬ ܪܶܥܝܳܢܶܗ ܕܗܰܘ ܕܒܳܪܽܘܝܽܘܬܳܐ ܕܳܚܠܰܬ ܠܫ̈ܺܐܕܶܐ܆ ܠܣܰܓܺܝ̈ܶܐܐ ܒܢܰܝ̈ܳܐ ܘܰܐ‌ܠܳܗ̈ܶܐ ܕܰܒܙܰܒܢ̈ܶܐ ܡܫܰܚ̈ܠܦܶܐ ܐܶܬܺܝܠܶܕܘ ܣܳܓܶܕ ܗ̱ܘܳܐ܆ ܘܰܠܗܳܠܶܝܢ ܟܽܠܗܽܘܢ܆ ܟܡܳܐ ܕܡ̈ܰܬܠܶܐ ܨܳܒܶܝܢ܆ ܝܺܠܺܝܕܽܘܬܳܐ ܐܶܡܰܪ ܕܰܐ‌ܠܳܗܳܐ܆ ܕܠܳܐ ܙܰܒܢܳܐ ܘܰܕܠܳܐ ܫܽܘܪܳܝ ܐܶܬܚܰܫܒ ܐܳܘ ܕܰܝܳܢܳܐ. ܡܶܠܬܳܐ ܓܶܝܪ ܐܺܝܬܰܘܗ̱ܝ ܘܨܶܡܚܳܐ܆ ܕܠܳܐ ܡܶܬܚܫܶܒ^[5] ܥܰܡ ܒܶܪ̈ܝܳܬܳܐ. ܒܪܺܝܬܳܐ ܓܶܝܪ܆ ܠܰܘ ܝܰܠܕܳܐ ܗܝ.

ܒܗܳܠܶܝܢ ܢܶܬܪܕܽܘܢ ܐܰܪ̈ܝܰܐܢܽܘ܆ ܘܢܶܕܥܽܘܢ ܕܢܽܘܟܪ̈ܳܝܳܬܳܐ ܠܗܰܝܡܳܢܽܘܬܳܐ ܕܣܳܗ̈ܕܶܐ ܡܬ݀ܪܠܝܢ222.

ܒܗܳܠܶܝܢ ܕܟܰܕ ܐܶܙܕܟܺܝ ܗܰܘ ܕܗܳܝܕܶܝܢ ܕܳܐܶܢ ܗ̱ܘܳܐ܆ ܠܘܳܬ ܫܶܢ̈ܕܶܐ ܡܶܬܗܦܰܟ ܗ̱ܘܳܐ. ܘܟܰܕ ܡܰܪܺܝܪܳܐܺܝܬ ܢܰܓܶܕ ܗ̱ܘܳܐ ܠܙܰܕܝܩܳܐ܆ ܫܳܡܰܥ ܗ̱ܘܳܐ ܡܶܢܶܗ ܥܰܡ ܗܰܝܡܳܢܽܘܬܳܐ ܕܡܰܘ̈ܡܳܬܳܐ܆ ܕܡܶܢ ܡܰܟܶܐܒܳܢ̈ܝܳܬܳܐ ܗܳܠܶܝܢ܆ ܘܳܐܦܠܳܐ ܚܕܳܐ ܡܰܪܓܫܳܢܽܘܬܳܐ ܢܣܰܒ. ܘܡܶܢ ܒܳܬܰܪ ܗܳܕܶܐ ܟܰܕ ܒܛܶܦܪ̈ܶܐ ܡܫܰܢ̈ܩܳܢܝܳܬܳܐ ܦܩܰܕ ܕܢܶܬܢܰܬܰܫ܆ ܗܶܢܶܝܢ ܟܰܕ ܗܶܢܶܝܢ ܡ̈ܶܠܶܐ ܕܓܰܢ̱ܒܳܪܽܘܬܳܐ ܫܳܡܰܥ ܗ̱ܘܳܐ ܘܡܶܨܛܪܶܐ ܗ̱ܘܳܐ܆ ܘܰܕܢܶܬܬܠܶܐ ܗܰܘ ܚܰܝܠܬܳܢܳܐ ܥܰܠ ܩܰܝܣܳܐ ܬܽܘܒ ܦܳܩܶܕ ܗ̱ܘܳܐ. ܘܟܰܕ ܩܠܺܝܕܳܐ ܕܟܰܬܦܶܗ ܡܶܢ ܩܛܺܝܪܳܐ ܐܶܬܬܒܰܪ ܗ̱ܘܳܐ ܡܶܢ ܟܰܕܽܘ܆ ܘܫܰܪܟܳܐ ܕܓܰܪ̈ܡܶܐ ܡܶܢ ܡܠܰܚܡܽܘܬܗܽܘܢ ܗܳܝ ܟܝܳܢܳܝܬܳܐ ܢܦܰܠܘ ܗ̱ܘܰܘ܆ ܕܰܒܰܚ ܠܰܐܠܳܗ̈ܶܐ ܩܳܥܶܐ ܗ̱ܘܳܐ ܠܶܗ ܗܰܘ ܕܫܰܢܺܝ ܗ̱ܘܳܐ. ܘܗܰܘ ܕܚܳܐܶܫ ܗ̱ܘܳܐ ܒܗܳܝ ܕܠܳܐ ܡܰܪܓܶܫ ܗ̱ܘܳܐ܆ ܒܳܗ̇ ܒܰܕܡܽܘܬܳܐ܆ ܕܠܳܐ ܚܳܐܶܫ ܗ̱ܘܳܐ ܡܫܰܪܰܪ ܗ̱ܘܳܐ.

ܐܰܝܟܰܢܳܐ ܕܗܰܘ ܟܰܕ ܫܳܢܶܐ܆ ܐܳܦ ܬܚܽܘ̈ܡܶܐ ܕܰܟܝܳܢܳܐ ܢܶܣܥܶܐ ܠܡܶܥܒܰܪ ܒܦܽܘܩ̈ܕܳܢܶܐ ܕܠܳܐ ܗܰܘܢܳܐ. ܕܥܰܡܺܝܩܬܳܐ ܓܶܝܪ ܢܬܰܩܢܽܘܢܳܗ̇ ܠܦܶܣܬܳܐ ܕܺܐܝܕܶܗ ܐܳܦ ܟܰܕ ܠܥܶܠ ܬܠܶܐ ܗ̱ܘܳܐ ܦܳܩܶܕ ܗ̱ܘܳܐ܆ ܘܰܕܢܰܪܡܽܘܢ ܒܳܗ̇ ܒܗܳܕܶܐ ܚܕܳܐ ܡܶܢ ܓܽܘܡܪ̈ܶܐ ܕܡܶܫ̈ܬܰܠܗܒܳܢ܆ ܟܰܕ ܡܙܰܘܶܓ ܥܰܡܳܗ̇ ܠܝܒܢܘܢ222܆ ܘܰܕܢܶܗܘܶܐ ܣܺܝܡܳܐ ܡܶܢ ܠܬܰܚܬ ܥܠܳܬܳܐ. ܐܰܝܟܰܢܳܐ ܕܶܐܢ ܢܰܗܦܟܺܝܗ̇ ܠܺܐܝܕܶܗ܆ ܕܣܳܐܶܡ ܒܶܣ̈ܡܶܐ ܠܫ̈ܺܐܕܶܐ ܢܶܣܬܒܰܪ. ܐܶܠܳܐ ܡܛܰܝܰܒܬܳܐ ܐܺܝܬܶܝܗ̇ ܗ̱ܘܳܐ ܠܡܺܐܡܰܪ ܠܘܳܬܶܗ܆ ܘܰܐܝܟܰܢܳܐ ܡܶܫܟܚܳܐ ܐܳܘ ܣܪܺܝܩܳܐ܆ ܕܒܶܣܪܳܐ ܠܳܐ ܢܶܚܰܫ ܗܳܠܶܝܢ ܕܒܶܣܪܳܐ. ܐܶ‌ܠܽܘ ܓܶܝܪ ܟܰܕ ܝܳܩܕܳܐ ܗ̱ܘܳܬ ܐܺܝܕܶܗ܆ ܨܠ̣ܳܗ̇ ܐܰܘ ܩܰܦܣܳܗ̇܆ ܗܳܕܶܐ ܡܰܝܬܝܳܐ ܗ̱ܘܳܬ ܩܛܺܝܓܪܳܢܽܘܬܳܐ ܥܰܠ ܚܽܘܫܳܒܳܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܕܢܰܩܺܝ ܠܫ̈ܺܐܕܶܐ ܐܳܡܰܪ ܗ̱ܘܳܐ ܠܶܗ܆ ܡܶܛܽܠ ܟܺܝܬ ܕܰܕܡܳܐ ܕܦܰܓܪܶܗ ܟܰܕ ܪܳܕܶܐ ܗ̱ܘܳܐ܆ ܠܳܐ ܨܶܒܝܳܢܳܐܺܝܬ ܢܛܰܦ ܗ̱ܘܳܐ ܥܰܠ ܥܠܳܬܳܐ. ܣܳܗܕܽܘܬܳܐ ܓܶܝܪ܆ ܩܰܘܡܳܐ ܠܳܐ ܡܶܨܛܰܠܝܳܢܳܐ ܘܰܙܪܺܝܙܳܐ ܕܢܰܦܫܳܐ ܡܶܫܬܰܘܕܝܳܐ܆ ܘܠܰܘ ܠܳܐ ܚܳܫܽܘܫܽܘܬܳܐ ܕܒܶܣܪܳܐ. ܡܶܛܽܠܗܳܕܶܐ ܗܰܘ ܕܰܐܓܽܘ̈ܢܶܐ ܗܳܠܶܝܢ ܟܳܗ̈ܢܳܝܶܐ ܣܳܡ ܐܳܡܰܪ ܗ̱ܘܳܐ: ܠܳܐ ܬܶܕܚܠܽܘܢ ܡܶܢ ܐܰܝܠܶܝܢ ܕܩܳܛܠܺܝܢ ܠܦܰܓܪܳܐ܆ ܠܢܰܦܫܳܐ ܕܶܝܢ ܠܳܐ ܡܶܫܟܚܺܝܢ ܠܡܶܩܛܰܠ^[6]. ܒܪܰܡ ܗܽܘ ܣܳܗܕܳܐ ܟܰܕ ܝܰܠܺܝܦ ܗ̱ܘܳܐ ܕܰܠܘܳܬ ܗܳܝ ܕܰܡܝܰܬܪܳܐ ܥܰܡ ܥܩܺܝܡܳܐ ܢܶܬܦܰܬܰܠ܆ ܬܚܽܘܡܳܐ ܕܰܡܣܰܝܒܪܳܢܽܘܬܳܐ ܥܰܒ̣ܕܳܗ̇ ܠܰܡܥܰܩܡܽܘܬܶܗ ܕܦܽܘܩܕܳܢܳܐ. ܘܠܺܐܝܕܶܗ ܢܰܛܪܳܗ̇ ܠܳܐ ܡܶܨܛܰܠܝܳܢܺܝܬܳܐ܆ ܟܰܕ ܒܩܰܠܺܝܠ ܩܰܠܺܝܠ ܡܶܬܛܰܠܩܳܐ ܗ̄ܘܳܬ܆ ܘܠܳܐ ܡܶܙܕܰܟܝܳܐ ܗ̱ܘܳܬ ܒܗܳܝ ܓܡܽܘܪܬܳܐ.

ܢܶܬܪܕܶܐ ܗܳܟܺܝܠ ܚܢܰܢ ܡܶܢ ܗܳܕܶܐ ܐܺܝܕܳܐ ܠܳܐ ܡܶܬܗܰܦܟܳܢܺܝܬܳܐ܆ ܚܠܺܝܡܽܘܬܳܐ ܘܰܡܫܰܪܪܽܘܬܳܐ܆ ܘܠܳܐ ܡܶܙܕܰܥܙܥܳܢܽܘܬܳܐ ܕܬܰܪܥܺܝܬܳܐ. ܗܳܝ ܕܰܠܘܳܬܳܗ̇܆ ܡܳܢܳܐ ܢܺܐܡܪܽܘܢ ܒܝܰܘܡܳܐ ܕܕܺܝܢܳܐ܆ ܗܳܢܽܘܢ ܕܠܰܘ ܒܬܰܪܥܺܝܬܳܐ ܒܰܠܚܽܘܕ܆ ܐܶܠܳܐ ܐܳܦ ܒܺܐܝܕܳܐ ܟܦܰܪܘ ܒܫܰܦܺܝܪܽܘܬ ܕܶܚܠܬܳܐ܆ ܘܰܒܕܽܘܓ̈ܡܰܛܰܐ ܡܓܰܕܦܳܢ̈ܶܐ ܐܰܪܡܺܝܘ ܐܺܝܕܳܐ. ܠܗܳܕܶܐ ܐܺܝܕܳܐ ܡܟܰܠܠܳܢܺܝܬܳܐ ܕܣܳܗܕܳܐ ܢܦܺܝܤ܆ ܕܠܳܐ ܡܶܬܚܰܙܝܳܢܳܐܺܝܬ ܬܒܰܪܟܺܝܗ̇ ܠܥܺܕܬܳܐ܆ ܒܟܽܠ ܒܽܘܪܟܬܳܐ ܪܽܘܚܳܢܳܝܬܳܐ. ܡܰܠ̣ܝܳܐ ܓܶܝܪ ܪܶܒܽܘ ܛܳܒ̈ܳܬܳܐ܆ ܒܝܰܕ ܕܣܳܗܕܽܘܬܳܐ ܕܺܝܠܳܢܳܝܬܳܐ ܐܶܬܟܰܬܫܰܬ܆ ܤܛܰܪ ܡܶܢ ܫܰܪܟܳܐ ܕܟܽܠܶܗ ܦܰܓܪܳܐ.

ܠܗܳܢܳܐ ܡܺܐܡܪܳܐ ܐܳܘ ܐܰܒܽܘܢ܆ ܠܺܠܝܳܐ ܗܳܢܳܐ ܙܥܽܘܪܳܐ ܕܩܰܝܛܳܐ ܒܦܳܣܺܝ̈ܩܳܬܳܐ ܥܒܰܕ ܠܳܟ. ܗܰܘ ܓܶܝܪ ܕܰܐܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ ܕܣܰܬܘܳܝܳܐ ܐܺܝܬܰܘܗ̱ܝ܆ ܝܳܗܶܒ ܕܥܰܡ ܡܫܰܠܛܽܘܬܳܐ ܣܰܓܺܝܐܬܳܐ ܢܶܬܒܰܣܰܡ ܒܰܐܓܽܘ̈ܢܶܐ܆ ܘܰܠܘܳܬ ܐܰܪܺܝܟܽܘܬ ܡܰܡܠܠܳܐ ܢܶܡܬܽܘܚ ܐܶܢܽܘܢ ܠܡܺܐܡܪ̈ܶܐ. ܐܶܢܕܶܝܢ ܒܝܰܕ ܬܰܟܫ̈ܦܳܬܳܐ ܕܺܝܠܳܟ ܠܡܰܪ̈ܢܝܳܬܳܐ ܬܰ݀ܩ̣ܶܠ ܠܰܢ܆ ܘܰܣܦܺܝܩܽܘܬܳܐ ܐܺܝܡܳܡܳܝܬܳܐ ܬܙܰܡܶܢ ܠܰܢ܆ ܐܳܦ ܠܘܳܬ ܬܽܘܪ̈ܓܳܡܶܐ ܕܝܰܬܺܝܪ ܐܰܪܺܝܟܺܝܢ ܘܰܕܠܳܟ ܪܚܺܝܡܺܝܢ ܚܰܓܳܢܳܝ̈ܶܐ ܘܪ̈ܽܘܚܳܢܳܝܶܐ ܟܒܰܪ ܢܶܣܦܰܩ܆ ܠܬܶܫܒܽܘܚܬܳܐ ܕܰܡܫܺܝܚܳܐ ܐܰ‌ܠܳܗܳܐ ܦܳܪܽܘܩܳܐ. ܠܗܰܘ ܕܦܰܐܝܳܐ ܟܽܠ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܰܒܥܺܝܢ ܘܰܬܠܳܬܳܐ.

[1]ܪ̈ܗܘܡܝܐ. 2: 11  ܐܦ ܓܠܛܝ̈ܐ. 3: 25

[2]ܡܙܡܘܪ̈ܐ. 22: 26

[3]ܡܙܡܘܪ̈ܐ. 50: 4

[4]ܣܦܪܐ ܕܟܗ̈ܢܐ. 19: 32

[5]ܡܶܬܚܒܶܫ

[6]ܡܬܝ. 10: 28