ܡܺܐܡܪܳܐ ܕܫܰܒܥܺܝܢ ܘܰܬܪܶܝܢ

ܥܰܠ ܣܝܳܡܳܐ ܗܰܘ ܕܰܗܘ̣ܳܐ ܒܒܰܝܬܳܐ ܗܰܘ ܕܡܶܬܩܪܶܐ ܕܡܺܝܟܳܐܶܝܠ܆ ܕܗܰܕܳܡ̈ܶܐ ܟܳܗ̈ܢܳܝܶܐ ܕܣܳܗ̈ܕܶܐ ܩܰܕܺܝ̈ܫܶܐ ܦܪܽܘܩܽܘܦܺܝܽܘܤ ܘܦܽܘܩܳܐ.

72: ܪܰܒ ܗ̄ܘ̣ ܚܰܝܠܳܐ ܕܡܶܐܬܺܝܬܶܗ ܕܒܰܒܣܰܪ ܕܰܡܫܺܝܚܳܐ ܘܰܕܕܶܢܚܶܗ ܐܰ‌ܠܳܗܳܝܳܐ. ܘܰܕܟܽܠܶܗ ܗܳܢܳܐ ܐܺܝܬܶܝܗ̇ ܚܰܝܠܬܳܢܽܘܬܶܗ ܘܫܰܪܺܝܪܽܘܬܶܗ܆ ܗܽܘ ܢܶܣܝܳܢܳܐ ܚܰܘܺܝ܆ ܐܰܝܟܰܢܳܐ ܕܡܶܢܗܽܘܢ ܕܣܽܘܥܪ̈ܳܢܶܐ ܐܳܦ ܢܽܘܟܪ̈ܳܝܶܐ ܕܗܰܝܡܳܢܽܘܬܳܐ ܥܰܡ ܦܰܘܠܽܘܤ ܢܰܙܥܩܽܘܢ܆ ܡܰܘܕܝܳܢܳܐܺܝܬ ܪܰܒܳܐ ܐܺܝܬܰܘܗ̱ܝ ܐ̱ܪܳܙܳܐ ܕܫܰܦܺܝܪܽܘܬ ܕܶܚܠܬܳܐ^[1].

ܐܳܦ ܓܶܝܪ ܘܰܠܝܽܗ̱ܘ̈ܕܳܝܶܐ ܢܶܫܟܰܚ ܐ̱ܢܳܫ܆ ܡܶܢ ܗܳܠܶܝܢ ܕܰܐܡܺܝܪ̈ܳܢ ܐܰܝܟ ܕܰܒܬܰܫܥܺܝܬܳܐ ܒܰܟܬܳܒܳܐ ܐܰ‌ܠܳܗܳܝܳܐ܆ ܗܰܘ ܕܳܐܦ ܠܘܳܬܗܽܘܢ ܡܰܢ ܡܶܬܩܪܶܐ ܠܳܐ ܕܶܝܢ ܡܶܬܺܝܕܰܥ܆ ܕܰܩܕܳܡ ܕܢܶܕܢܰܚ ܡܫܺܝܚܳܐ ܒܥܳܠܡܳܐ܆ ܣܒܺܝܣܳܐܺܝܬ ܠܘܳܬ ܦܽܘܠܚܳܢ ܦܬܰܟܪ̈ܶܐ ܫܪܰܥܘ܆ ܘܰܚܠܳܦ ܐܺܝܩܳܪܶܗ ܘܰܢܝܳܚܶܗ ܕܰܐ‌ܠܳܗܳܐ ܠܗܰܘ ܕܫ̈ܺܐܕܶܐ ܓܒܰܘ܆ ܘܰܕܙܰܒ̈ܢܳܬܳܐ ܣܰܓܺܝ̈ܳܐܬܳܐ ܐܶܬܪܕܺܝܘ ܒܚ̈ܺܐܦܶܐ ܘܓܰܝ̈ܣܶܐ ܕܰܫܒܳܒܰܝ̈ܗܽܘܢ܆ ܘܰܕܒܰܪܒܪ̈ܳܝܶܐ ܕܰܠܒܰܪ ܡܶܢ ܬܚܽܘܡܰܝ̈ܗܽܘܢ܆ ܘܰܕܠܳܐ ܐܶܫܬܰܚܠܰܦܘ ܐܰܘ ܫܰܢܺܝܘ ܡܶܢ ܛܳܥܝܽܘܬܗܽܘܢ. ܡܶܢ ܒܳܬܰܪ ܕܶܝܢ ܕܰܟܪܝܤܛܝܳܢܽܘܬܳܐ ܨܶܡܚܰܬ̣ ܘܶܐܚܕܰܬ ܕܽܘܒܳܪܳܐ܆ ܘܶܐܬܚܰܘܝܰܬ ܢܰܨܺܝܚܳܐܺܝܬ܆ ܕܡܳܪܳܢܳܐܺܝܬ ܘܫܰܪܺܝܪܳܐܺܝܬ ܐܺܝܬܶܝܗ̇ ܕܶܚܠܰܬ ܐܰ‌ܠܳܗܳܐ܆ ܕܰܒܦܽܘܚܳܡܳܐ ܗܰܘ ܕܰܠܘܳܬܰܢ ܒܳܗܬܺܝܢ܆ ܘܕܰܠܘܳܬ ܟܬܳܒܳܐ ܢܳܡܽܘܣܳܝܳܐ ܠܰܘ ܒܙܰܒܢܶܗ ܬܽܘܒ ܪܳܗܛܺܝܢ܆ ܘܰܠܘܳܬ ܚܰܕ ܐܰ‌ܠܳܗܳܐ܆ ܗܰܘ ܕܗܰܘܢܳܐ ܘܪܽܘܚܳܐ ܕܢܳܡܽܘܣܳܐ ܡܚܰܘܶܐ ܠܶܗ܆ ܕܒܰܠܚܽܘܕܳܝܽܘܬܳܐ ܘܒܰܬܠܺܝܬܳܝܽܘܬܳܐ ܡܶܬܺܝܕܰܥ܆ ܗܳܕܶܐ ܡܰܢ ܒܗܺܝܟܰܕܗܺܝܽܘܬܳܐ ܕܽܐܘܣܺܝܰܐ܆ ܗܳܕܶܐ ܕܶܝܢ ܒܦܽܘܪܳܫܐ ܘܠܳܐ ܒܠܺܝܠܽܘܬܳܐ ܕܰܩܢܽܘܡ̈ܶܐ. ܐܰܝܟܰܢܳܐ ܕܢܶܬܚܰܘܽܘܢ ܒܟܽܠ ܙܒܰܢ ܐܰܝܟ ܗܳܝ ܕܰܟܬܺܝܒܳܐ: ܕܠܽܘܩܒܰܠ ܪܽܘܚܳܐ ܩܰܕܺܝܫܳܐ ܡܰܩܪܒܺܝܢ ܘܩܳܝܡܺܝܢ ܣܰܩܽܘܒܠܳܐܺܝܬ^[2].

ܐܳܦ ܡܶܢ ܝܰܘ̈ܢܳܝܶܐ^[3] ܕܶܝܢ܆ ܦܫܺܝܩܳܐ ܠܡܶܚܙܳܐ ܠܦܺܝܠܳܣܽܘ̈ܦܶܐ ܕܺܝܠܗܽܘܢ ܗܳܢܽܘܢ ܕܝܰܬܺܝܪ ܡܶܢ ܟܽܠܗܽܘܢ ܚܰܟܺܝܡܺܝܢ܆ ܠܗܳܢܽܘܢ ܡܰܢ ܕܰܒܙܰܒ̈ܢܶܐ ܗܳܢܽܘܢ ܕܝܰܬܺܝܪ ܥܰܬܺܝܩܺܝܢ ܐܶܬܺܝܕܰܥܘ܆ ܕܰܒܪܺܝܫܳܐ ܓܰܠܝܳܐ ܦܽܘܠ̈ܚܳܢܶܐ ܘܬܶܫܡ̈ܫܳܬܳܐ ܫܟܺܝܪ̈ܳܬܳܐ ܘܡܰܬ̈ܠܳܢܳܝܳܬܳܐ ܐܰܥ̣ܶܠܘ܆ ܘܟܽܠܗܶܝܢ ܐܰܝܠܶܝܢ ܕܰܠܘܳܬ ܣܰܓܺܝܽܐܘܬ ܐܰ‌ܠܳܗ̈ܶܐ ܡܰܝ̈ܬܝܳܢ ܘܰܠܘܳܬ ܣܶܓܕܬܳܐ ܕܰܓܠܺܝ̈ܦܶܐ܆ ܠܗܳܢܽܘܢ ܕܶܝܢ ܕܡܶܢ ܒܳܬܰܪ ܕܕܶܚܠܬܳܐ ܕܰܟܪ̈ܝܣܛܝܳܢܶܐ ܗܰܒܒܰܬ ܘܫܶܘܚܰܬ ܝܺܥܰܘ܆ ܕܡܶܢ ܢܰܨܺܝܚܽܘܬܳܐ ܟܺܝܬ ܘܕܰܟܝܽܘܬܳܐ ܕܺܝܠܰܢ ܐܶܬܚܰܡܰܨܘ܆ ܒܰܢܕܺܝܕܽܘܬܳܐ ܕܗܳܢܶܝܢ ܕܰܠܘܳܬܗܽܘܢ ܡܶܫ̈ܬܡܠܝܳܢ ܗܘܰܝ̈ ܘܡܶܣܬܰܓ̈ܕܳܢ܆ ܘܕܰܒܚܽܘܟܳܡ̈ܶܐ ܡܫܰܥ̈ܝܳܢܶܐ ܘܒܰܐ̱ܚܪܳܢܝܽܘܬ ܦܽܘܫܳܩ̈ܶܐ ܝܺܨܶܦܘ܆ ܕܠܰܫܟܺܝܪܽܘܬܳܐ ܕܗܳܢܶܝܢ ܕܰܐܡܺܝܪ̈ܳܢ ܗ̱ܘܰܝ̈ ܠܗܳܢܽܘܢ ܕܡܶܢ ܩܕܳܡܰܝܗܽܘܢ ܢܚܰܦܽܘܢ܆ ܕܠܳܐ ܐܶܬܡܨܺܝܘ ܕܶܝܢ ܒܪܰܡ܆ ܕܰܠܣܰܓܺܝܽܐܘܬܳܗ̇ ܕܰܫܟܺܝܪܽܘܬܳܐ ܢܛܰܫܽܘܢ܆ ܘܰܡܡܰܫܚܳܐܺܝܬ ܒܰܡܦܺܝܣܳܢܽܘܬܳܐ. ܡܢܰܣܶܝܢ ܓܶܝܪ܆ ܕܡܶܢ ܫܪܳܪܳܐ ܕܰܠܘܳܬܰܢ ܝܽܘܩ̈ܢܶܐ ܡܶܕܶܡ ܢܶܣܒܽܘܢ܆ ܠܩܽܘܝܳܡܳܐ ܕܫܽܘܒܚܳܐ ܒܰܝܬܳܝܳܐ ܕܺܝܠܗܽܘܢ ܗܰܘ ܦܚܺܝܚܳܐ ܘܰܕܠܳܐ ܩܰܘܡܳܐ ܘܰܕܛܳܥܝܽܘܬܗܽܘܢ.

ܒܰܕܓܽܘܢ ܟܰܕ ܟܬܳܒܳܐ ܐܰ‌ܠܳܗܳܝܳܐ ܡܰܠܰܐܟ̈ܶܐ ܘܪ̈ܺܝܫܰܝ ܡܰܠܰܐܟ̈ܶܐ ܐܳܡܰܪ ܕܺܐܝܬ܆ ܚܰܝ̈ܠܰܘܳܬܳܐ ܘܫܽܘܠ̈ܛܳܢܶܐ܆ ܡܰܘܬܒ̈ܶܐ ܟܺܝܬ ܘܡܳܪ̈ܰܘܳܬܳܐ^[4]. ܘܰܐ̱ܚܪ̈ܳܢܶܐ ܫܡܳܗ̈ܶܐ ܕܛܟ̈ܣܶܐ ܡܶܬܗܰܘ̈ܢܳܢܶܐ܆ ܕܗܳܫܳܐ ܡܰܢ ܠܰܢ ܠܳܐ ܡܫܰܡܗܺܝܢ܆ ܒܥܳܠܡܳܐ ܕܶܝܢ ܗܰܘ ܕܰܥܬܺܝܕ ܐܳܦ ܥܬܺܝܕܺܝܢ ܕܢܶܫܬܰܡܗܽܘܢ ܟܒܰܪ ܘܢܶܬܝܰܕܥܽܘܢ܆ ܠܦܽܘܬ ܗܰܘ ܡܳܐ ܕܺܐܝܬ ܠܟܽܠܚܰܕ ܡܶܢ ܛܽܘܝܳܒܳܐ ܘܕܽܘܟܳܝܳܐ܆ ܟܰܕ ܒܥܰܡ̈ܠܶܐ ܕܡܶܢ ܗܳܪܟܳܐ ܕܰܡܝܰܬܪ̈ܳܬܳܐ ܩܰܕܶܡ ܐܶܬܕܰܟܺܝ܆ ܐܰܣܒܰܪܘ̱ ܠܗܽܘܢ ܕܰܣܢܺܐܓܪܽܘܬܳܐ ܐܶܫܟܰܚܘ̱܆ ܕܣܰܓܺܝܽܐܘܬ ܐܰ‌ܠܳܗ̈ܶܐ ܗܳܝ ܕܡܶܫܬܰܒܚܳܐ ܠܘܳܬܗܽܘܢ. ܟܰܕ ܥܰܠ ܗܳܠܶܝܢ ܡܰܢ ܡܰܬ̈ܠܳܢܳܝܳܬܳܐ܆ ܘܥܰܠ ܗܳܢܽܘܢ ܕܡܶܢ ܒܢܰܝ̈ܢܳܫܳܐ ܥܒܰܕܘ ܐܰ‌ܠܳܗ̈ܶܐ ܡܶܬܚܰܦܶܝܢ ܘܒܳܗܬܺܝܢ܆ ܘܰܡܛܰܫܝܳܐ ܐܺܝܬܰܘܗ̱ܝ ܠܗܽܘܢ ܪܽܘܫܥܳܐ܆ ܘܰܒܢܰܦܫܗܽܘܢ ܒܳܛܢܺܝܢ ܠܶܗ ܠܰܚܒܳܠܳܐ܆ ܗܰܘ ܕܳܐܦ ܐܳܟܶܠ ܠܗܽܘܢ ܐܰܝܟ ܕܰܠܟܰܪ̈ܣܳܬܳܐ ܕܳܐܟ̥ܕܢ̈ܶܐ܆ ܗܳܠܶܝܢ ܕܟܰܕ ܝܳܠ̈ܕܳܢ ܠܗܽܘܢ ܠܰܒ̈ܢܰܝܗܶܝܢ ܡܶܬܚܰܒ̈ܠܳܢ. ܠܡܰܠܰܐܟ̈ܶܐ ܓܶܝܪ ܕܶܝܢ ܐܰܝܟ ܕܠܰܐܠܳܗ̈ܶܐ ܣܳܓܕܺܝܢ܆ ܘܬܽܘܒ ܒܠܳܐ ܡܡܰܫܚܽܘܬܳܐ ܡܶܢ ܬܚܽܘܡ̈ܶܐ ܢܳܡܽܘ̈ܣܳܝܶܐ ܢܳܦܩܺܝܢ܆ ܘܠܶܐܣܟܺܡܳܐ ܒܰܪܳܝܳܐ ܕܫܰܦܺܝܪܽܘܬ ܕܶܚܠܬܳܐ ܐܺܝܬ ܠܗܽܘܢ ܬܰܚܦܺܝܬܳܐ ܕܕܶܚܠܰܬ ܫ̈ܺܐܕܶܐ. ܗܳܕܶܐ܆ ܐܳܦ ܣܰܓܺܝ̈ܶܐܐ ܡܶܢ ܗܳܢܽܘܢ ܕܡܰܘܕܶܝܢ ܥܰܠ ܢܰܦܫܗܽܘܢ ܕܰܟܪ̈ܺܝܣܛܝܳܢܶܐ ܐܺܝܬܰܝܗܽܘܢ ܟܪܺܝܗܶܝܢ܆ ܟܰܕ ܒܫܶܠܚܳܐ ܕܥܶܪܒܳܐ ܠܗܰܘܢܳܐ ܚܰܢܦܳܐ ܡܚܰܦܶܝܢ܆ ܘܠܳܐ ܝܳܕܥܺܝܢ ܠܳܗ̇ ܠܪܰܒܽܘܬ ܦܰܐܝܽܘܬܶܗ ܟܺܝܬ ܘܠܰܡܥܰܠܝܽܘܬܶܗ ܪܳܡܬܳܐ ܕܐ̱ܪܳܙܳܐ ܕܺܝܠܰܢ.

ܗܳܢܽܘܢ܆ ܕܟܽܠܶܗ ܗܳܢܳܐ ܪܰܚܺܝܩܺܝܢ ܚ̱ܢܰܢ ܡܶܢ ܗܳܝ ܕܢܶ݀ܣܓܽܘܕ ܠܡܰܠܰܐܟ̈ܶܐ܆ ܘܺܐܝܩܳܪܳܐ ܘܕܶܚܠܬܳܐ ܗܳܝ ܕܠܰܐܠܳܗܳܐ ܒܰܠܚܽܘܕܰܘܗ̱ܝ ܦܰܐܝܳܐ ܢܰܩܶܦ ܠܗܽܘܢ܆ ܕܳܐܦ ܩܪܳܒܳܐ ܕܠܳܐ ܬܰܪܥܽܘܬܳܐ ܓܒܰܝܢܰܢ ܠܰܢ ܠܘܳܬ ܐܰܪ̈ܺܝܰܐܢܽܘ܆ ܕܳܐܡܪܺܝܢ ܕܺܐܝܬ ܗ̱ܘܳܐ ܙܰܒܢܳܐ ܐܶܡܰܬܝ ܕܠܰܝܬܰܘܗ̱ܝ ܗ̱ܘܳܐ ܡܶܠܬܳܐ ܕܰܐ‌ܠܳܗܳܐ܆ ܗܰܘ ܕܺܐܝܬܰܘܗ̱ܝ ܒܪܺܝܫܺܝܬ܆ ܘܰܠܘܳܬ ܐܰ‌ܠܳܗܳܐ ܐܺܝܬܰܘܗ̱ܝ܆ ܘܰܐ‌ܠܳܗܳܐ ܐܺܝܬܰܘܗ̱ܝ^[5]. ܒܳܗ̇ ܒܰܕܡܽܘܬܳܐ ܕܶܝܢ ܐܳܦ ܠܪܽܘܚܳܐ ܡܬܽܘܡܳܝܳܐ ܘܩܰܕܺܝܫܳܐ܆ ܕܡܶܢ ܒܳܬܰܪ ܐܰܒܳܐ ܘܰܒܪܳܐ ܙܰܒܢܳܐܺܝܬ ܐܶܬܩܰܝܰܡ ܡܫܰܒܚܺܝܢ. ܟܽܠ ܓܶܝܪ ܗܰܘ ܡܳܐ ܕܠܰܘ ܕܰܟܝܳܢܳܐ ܠܳܐ ܒܰܪܝܳܐ ܐܰܘܟܺܝܬ ܐܽܘܣܺܝܰܐ ܐܺܝܬܰܘܗ̱ܝ܆ ܗܳܢܳܐ ܠܰܘ ܐܰ‌ܠܳܗܰܐ ܗ̱ܘ܆ ܐܳܦܶܢ ܩܕܳܡ ܗܳܠܶܝܢ ܒܶܪ̈ܝܳܬܳܐ ܐ̱ܚܪ̈ܳܢܝܳܬܳܐ ܐܺܝܬ ܠܶܗ ܗܳܝ ܕܢܶܗܘܶܐ. ܐܳܦ ܓܶܝܪ ܫܳܡܥܺܝܢܰܢ ܠܶܗ ܠܰܢܒܺܝܳܐ ܕܳܐܡܰܪ: ܠܳܐ ܢܶܗܘܶܐ ܒܳܟ ܐܰ‌ܠܳܗܳܐ ܚܰܕܬܳܐ܆ ܘܳܐܦܠܳܐ ܬܶܣܓܽܘܕ ܠܰܐܠܳܗܳܐ ܢܽܘܟܪܳܝܳܐ^[6]. ܚܰܕܬܰܐ ܗ̄ܘ ܕܶܝܢ ܗܰܘ ܡܳܐ ܕܠܰܘ ܒܟܽܠ ܙܒܰܢ ܐܺܝܬܰܘܗ̱ܝ܆ ܐܶܠܳܐ ܒܙܰܒܢܳܐ ܥܒܺܝܕ܆ ܐܰܘ ܒܰܡܢܳܬܳܐ ܕܥܳܠܡܳܐ ܡܶܕܶܡ܆ ܘܰܒܛܰܘܪܳܐ ܕܝܰܬܺܝܪ ܣܰܓܺܝ ܙܥܽܘܪ ܐܰܟܙܢܳܐ ܕܙܰܒܢܳܝܳܐ. ܡܰܙܥܶܩ ܓܶܝܪ ܦܰܘܠܽܘܤ܆ ܕܰܒܝܰܘ̈ܡܳܬܳܐ ܐ̱ܚܪ̈ܳܝܶܐ ܡܰܠܶܠ ܠܰܢ ܐܰܒܳܐ ܒܰܒܪܳܐ܆ ܗܰܘ ܕܒܺܐܝܕܰܘ̈ܗ̱ܝ ܐܳܦ ܠܥܳܠ̈ܡܶܐ ܥܒܰܕ^[7]. ܥܳܒܽܘܕܳܐ ܕܶܝܢ ܕܟܽܠܗܽܘܢ ܥܳܠ̈ܡܶܐ܆ ܐܰܝܟܰܢܳܐ ܠܰܘ ܒܟܽܠܙܒܰܢ ܐܺܝܬܰܘܗ̱ܝ ܗ̱ܘܳܐ܆ ܐܶܠܳܐ ܐܰܝܟ ܐܰܝܢܳܐ ܕܒܰܙܒܰܢ ܠܳܐ ܐܺܝܬܰܘܗ̱ܝ ܗ̱ܘܳܐ܆ ܒܰܡܢܳܬܳܐ ܕܥܳܠܡܳܐ ܡܶܕܶܡ ܗܘ̣ܳܐ.

ܐܳܦ ܠܡܰܠܰܐܟ̈ܶܐ ܗܳܟܺܝܠ ܘܰܠܟܽܘܠܗܽܘܢ ܚܰܝ̈ܠܰܘܳܬܳܐ ܕܒܰܫܡܰܝܳܐ ܗܳܠܶܝܢ ܕܶܐܬܡܢܺܝܘ܆ ܕܰܥܒܺܝܕܺܝܢ ܡܶܢ ܐܰ‌ܠܳܗܳܐ ܝܳܕܥܺܝܢܰܢ܆ ܕܠܳܐ ܕܶܝܢ ܐܺܝܬܰܝܗܽܘܢ ܐܰ‌ܠܳܗ̈ܶܐ܆ ܠܰܢ ܓܶܝܪ ܚܰܕ ܐܰ‌ܠܳܗܳܐ ܐܰܒܳܐ ܗܰܘ ܕܡܶܢܶܗ ܟܽܠ ܘܰܚܢܰܢ ܒܶܗ ܐܺܝܬ܆ ܘܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܕܟܽܠ ܒܺܐܝܕܰܘ̈ܗ̱ܝ ܘܰܚܢܰܢ ܒܺܐܝ̈ܕܰܘܗܝ^[8]. ܡܙܰܡܰܪ ܕܶܝܢ ܐܳܦ ܕܰܘܺܝܕ ܗܰܘ ܐܰ‌ܠܳܗܳܝܳܐ ܒܰܢ̈ܒܺܝܶܐ ܟܰܕ ܐܳܡܰܪ: ܠܘܳܬ ܐܰ‌ܠܳܗܳܐ ܕܟܽܠ܆ ܗܰܘ ܕܥܳܒܶܕ ܠܡܰܠܰܐܟ̈ܶܐ ܕܺܝܠܶܗ ܪ̈ܽܘܚܶܐ܆ ܘܠܰܡܫܰܡ̈ܫܳܢܶܐ ܕܺܝܠܶܗ ܢܽܘܪܳܐ ܕܡܶܫܬܰܠܗܒܳܐ.^[9] ܘܳܐܦ ܒܕܽܘܟܬܐ ܕܶܝܢ ܐ̱ܚܪܺܬܳܐ ܐܳܡܰܪ: ܒܰܪܶܟܘ ܠܡܳܪܝܳܐ ܟܽܠܗܽܘܢ ܡܰܠܰܐܟ̈ܶܐ ܕܺܝܠܶܗ܆ ܕܰܡܨܶܝܢ ܒܚܰܝܠܳܐ ܕܥܳܒܕܺܝܢ ܡܶܠܬܶܗ܆ ܠܡܶܫܡܰܥ ܩܳܠܳܐ ܕܡ̈ܶܠܶܐ ܕܺܝܠܶܗ. ܒܰܪܶܟܘ ܠܡܳܪܝܳܐ ܟܽܠܗܽܘܢ ܚܰܝ̈ܠܰܘܳܬܶܗ܆ ܡܫܰܡ̈ܫܳܢܶܐ ܕܺܝܠܶܗ ܕܥܳܒܕܺܝܢ ܨܶܒܝܳܢܶܗ^[10].

ܥܰܠ ܗܳܠܶܝܢ ܫܰܦܺܝܪܳܐ ܠܡܰܘܣܳܦܽܘ܆ ܐܳܦ ܗܳܝ ܕܰܐܡܺܝܪܳܐ ܠܰܫܠܺܝܚܳܐ ܡܶܛܽܠܳܬܗܽܘܢ. ܠܳܐ ܗ̱ܘܳܐ ܟܽܠܗܽܘܢ ܐܺܝܬܰܝܗܽܘܢ ܪ̈ܽܘܚܶܐ ܡܫܰܡ̈ܫܳܢܝܳܬܳܐ܆ ܕܰܠܬܶܫܡܶܫܬܳܐ ܡܶܫܬܰܕܪ̈ܳܢ ܡܶܛܽܠ ‌ܐܰܝܠܶܝܢ ܕܰܥܬܺܝܕܺܝܢ ܠܡܺܐܪܰܬ ܦܽܘܪܩܳܢܳܐ^[11]܆ ܪ̈ܽܘܚܶܐ ܗܳܟܺܝܠ ‌ܐܺܝܬܰܝܗܽܘܢ ܥܒܺܝ̈ܕܳܬܳܐ܆ ܘܒ̣ܰܪ̈ܝܳܬܳܐ ܡܶܬܗܰܘ̈ܢܳܢܝܳܬܳܐ ܘܰܕܠܳܐ ܓܫܽܘܡ. ܕܰܥܒܳܕܳܐ ܐܺܝܬ ܠܗܶܝܢ ܗܳܝ ܕܰܢܫܰܒ̈ܚܳܢ ܠܰܐܠܳܗܳܐ܆ ܘܕܰܢܩܰܒ̈ܠܳܢ ܦܽܘܩ̈ܕܳܢܶܐ ܐܰ‌ܠܳܗܳܝ̈ܶܐ܆ ܘܰܕܥܰܡ ܩܰܠܺܝܠܽܘܬܳܐ ܘܚܰܝܠܳܐ ܢܫܰܡ̈ܠܝܳܢ ܐܶܢܽܘܢ ܠܦܽܘ̈ܩܳܕܶܐ܆ ܐܺܝܬ ܠܗܶܝܢ ܓܶܝܪ ܚܰܝܠܳܐ ܕܠܳܚܶܡ ܠܗܳܠܶܝܢ ܕܡܶܬܦܰܩ̈ܕܳܢ. ܟܰܕ ܗܳܝ ܕܕܰܐܝܟ ܗܳܠܶܝܢ ܢܶܥܒܪ̈ܳܢ ܡܶܢ ܠܥܶܠ ܡܶܬܝܰܗܒܳܐ ܠܗܶܝܢ܆ ܐܳܦ ܟܰܕ ܠܘܳܬ ܬܶܫܡܶܫܬܳܐ ܕܦܽܘܪܩܳܢܳܐ ܕܺܝܠܰܢ ܡܶܫܬܰܕܪ̈ܳܢ܆ ܘܟܰܕ ܒܢܽܘܗܪܳܐ ܗܰܘ ܩܰܕܡܳܝܳܐ ܘܠܳܐ ܒܰܪܝܳܐ ܘܽܐܘܣܝ̣ܳܝ̣ܳܐ ܗܰܘ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܶܬܚܙܶܐ ܡܶܫ̈ܬܰܘܬܦܳܢ܆ ܘܡܶܢ ܬܰܡܳܢ ܡܶܬܢܰܗܪ̈ܳܢ.

ܡܶܛܽܠܗܳܕܶܐ ܐܳܦ ܡܰܠܰܐܟ̈ܶܐ ܕܢܽܘܗܪܳܐ ܐܶܬܟܰܢܺܝܘ܆ ܗܳܢܽܘܢ ܕܳܐܦ ܛܶܟ̈ܣܶܐ 222ܕܣܦܐܬܪ̈ܶܐ ܛܥܺܝ̈ܢܰܝ ܢܰܝ̈ܙܟܶܐ ܘܰܡܙܰܝ̈ܢܶܐ ܡܡܰܠܶܝܢ܆ ܠܰܘ ܟܰܕ ܒܶܐܣܟܺܡ̈ܶܐ ܕܕܰܐܝܟ ܗܳܠܶܝܢ ܐܺܝܬܰܝܗܽܘܢ܆ ܗܰܘ ܓܶܝܪ ܕܰܠܒܰܪ ܡܶܢ ܥܰܒܝܽܘܬܳܐ ܕܦܰܓܪܳܐ ܐܺܝܬܰܘܗ̱ܝ܆ ܡܶܢ ܟܽܠܦܪܽܘܤ ܒܕܽܘܟ ܐܳܦ ܕܠܳܐ ܐܶܣܟܺܡܳܐ ܐܺܝܬܰܘܗ̱ܝ܆ ܐܶܠܳܐ ܕܗܳܟܰܢܳܐ ܒܰܫ̈ܟܳܚܳܬܳܐ ܕܡܰܚܫܰܒܬܳܐ ܡܶܬܚܙܶܝܢ ܘܡܶܣܬܰܟܠܺܝܢ܆ ܒܝܰܕ ܫܡܳܗ̈ܶܐ ܟܺܝܬ ܘܣܽܘܥܪ̈ܳܢܶܐ ܗܳܢܽܘܢ ܕܰܠܘܳܬܰܢ ܝܺܕܺܝܥܺܝܢ܆ ܐܰܝܟܰܢܳܐ ܕܰܠܡܰܠܟܳܝܽܘܬܳܐ ܘܠܽܐܘܚܕܳܢܳܐ ܕܥܰܠ ܟܽܠ ܕܗܰܘ ܕܫܰܠܺܝܛ ܢܚܰܘܽܘܢ܆ ܗܰܘ ܟܺܝܬ ܕܳܐܦ ܡܳܪܝܳܐ ܕܚܰܝ̈ܠܰܘܳܬܳܐ ܐܳܦ ܡܳܪܝܳܐ ܨܒܰܐܘܽܬ ܡܶܫܬܰܡܰܗ܆ ܕܦܳܠܰܚ̈ܘܳܬܳܐ ܓܶܝܪ ܡܶܬܦܰܫܰܩ ܨܒܰܐܘܽܬ. ܡܶܛܽܠ ܗܳܕܶܐ ܐܳܦ ܠܽܘܩܐ ܐܶܡܰܪ: ܕܣܽܘܓܳܐܐ^[12] ܕܦܳܠܚܽܘܬܳܐ ܫܡܰܝܳܢܺܝܬܳܐ ܐܶܬܚܙܺܝ ܠܪ̈ܳܥܰܘܳܬܳܐ ܕܳܐܡܰܪ: ܫܽܘܒܚܳܐ ܠܰܐܠܳܗܳܐ ܒܰܡܪ̈ܰܘܡܶܐ. ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[13].

ܠܳܐ ܐ̱ܢܳܫ ܓܶܝܪ ܡܶܢ ܚ̈ܙܳܬܶܐ ܗܳܠܶܝܢ^[14] ܕܰܒܗܶܝܢ ܠܓܰܒܪ̈ܶܐ ܩܰܕܺܝ̈ܫܶܐ ܒܰܙܒܰܢ ܙܒܰܢ ܐܶܬܚܙܺܝܘ܆ ܢܕܽܘܢ ܗܳܠܶܝܢ ܕܰܥܠܰܝܗܽܘܢ. ܡܫܰܚ̈ܠܦܳܬܳܐ ܓܶܝܪ ܐܺܝܬܰܝܗܶܝܢ ܗܳܠܶܝܢ܆ ܘܕܰܒܙܰܒܢܳܐ ܐ̱ܚܪܺܢܳܐ ܐ̱ܚܪܳܢܝܳܐܺܝܬ ܐܶܬܚ̈ܙܺܝܶܢ܆ ܠܦܽܘܬ ܠܳܚܡܽܘܬܳܐ ܕܣܽܘܢܩܳܢܳܐ ܗܰܘ ܕܣܺܝܡ ܗ̱ܘܳܐ. ܘܰܒܕܰܐܝܟ ܗܳܠܶܝܢ ܐܶܣܟܺܡ̈ܶܐ܆ ܗܳܠܶܝܢ ܕܳܐܦ ܠܥܰܝ̈ܢܶܐ ܕܡܰܪ̈ܓܫܳܢܶܐ ܐܺܝܬܰܝܗܽܘܢ ܗܘܰܘ ܡܶܬܚܰܙ̈ܝܳܢܶܐ.

ܡܶܛܽܠ ܗܳܕܶܐ ܟܺܝܬ ܠܕܳܢܺܝܐܶܝܠ ܗܰܘ ܕܰܠܘܳܬ ܥܽܘܡ̈ܩܶܐ ܕܚܶܟܡܬܳܐ܆ ܘܰܠܘܳܬ ܫܽܘܦܪܳܐ ܡܶܬܗܰܘܢܳܢܳܐ ܕܚܶܙ̈ܘܶܐ ܐܰ‌ܠܳܗܳܝ̈ܶܐ ܒܰܠܺܝܥ ܗ̱ܘܳܐ ܒܢܰܦܫܶܗ܆ ܘܡܶܢܶܗ ܕܣܽܘܥܪܳܢܳܐ ܡܛܳܬ ܠܶܗ ܘܛܳܒ ܟܺܐܢܳܐܺܝܬ܆ ܗܳܝ ܕܓܰܒܪܳܐ ܕܰܪ̈ܓܺܝܓܳܬܳܐ ܢܶܫܬܰܡܰܗ^[15]. ܐ̱ܢܳܫܺܝ̈ܢ ܡܫܰܚ̈ܠܦܶܐ ܘܰܡܦܰܬܟ̈ܶܐ܆ ܘܰܐ̱ܚܪ̈ܳܢܶܐ ܒܰܙܒܰܢ ܐ̱ܚܪܺܝܢ ܒܶܐܣ̈ܟܺܡܶܐ ܡܶܬܚܙܶܝܢ ܗ̱ܘܰܘ܆ ܡܶܛܽܠ ܡܦܰܬܟܽܘܬܳܐ ܘܥܰܣܩܽܘܬ ܡܶܬܦܰܫܩܳܢܽܘܬܐ ܕܺܝܠܗܽܘܢ ܕܓܶܠ̈ܝܳܢܶܐ. ܘܒܰܙܒܰܢ ܡܰܢ܆ ܐܰܝܟ ܓܰܒܪܳܐ ܕܦܳܪܰܚ ܚܙܳܝܗ̱ܝ ܠܓܰܒܪܺܐܶܝܠ܆ ܘܰܡܫܰܘܕܰܥ ܗ̱ܘܳܐ ܒܝܰܕ ܗܳܠܶܝܢ ܕܳܐܡܰܪ: ܕܶܐܣܟܺܡܳܐ ܕܦܳܪܚܳܐ ܫܽܘܘܕܳܥܳܐ ܕܩܰܠܺܝܠܽܘܬܳܐ ܐܺܝܬܰܘܗ̱ܝ. ܒܫܽܘܪܳܝܳܐ ܓܶܝܪ ܕܒܳܥܽܘܬܳܟ ܐܳܡܰܪ ܢܶܦܩܰܬ ܡܶܠܬܳܐ܆ ܘܶܐܢܳܐ ܐܶܬܺܝܬ ܠܡܰܘܕܳܥܽܘ ܠܳܟ. ܒܰܙܒܰܢ ܕܶܝܢ ܬܽܘܒ܆ ܓܰܒܪܳܐ ܕܰܠܒܺܝܫ ܒܽܘܨܳܐ܆ ܘܰܟܣܳܣܬܶܗ ܐܰܣܺܝܪܳܐ ܒܕܰܗܒܳܐ 222ܐܘܦܙ^[16]. ܘܦܰܓܪܳܐ ܕܺܝܠܶܗ܆ ܐܰܝܟ ܬܰܪܫܺܝܫ. ܘܦܰܪܨܽܘܦܳܐ ܕܺܝܠܶܗ܆ ܐܰܝܟ ܚܶܙܘܳܐ ܕܒܰܪܩܳܐ. ܘܥܰܝܢܰܘ̈ܗ̱ܝ܆ ܐܰܝܟ ܠܰܡܦܺܝ̈ܕܶܐ ܕܢܽܘܪܳܐ. ܘܰܕܪ̈ܳܥܶܐ ܕܺܝܠܶܗ ܘܪ̈ܶܓܠܰܘܗ̱ܝ܆ ܐܰܝܟ ܚܶܙܘܳܐ ܕܰܢܚܳܫܳܐ ܕܡܰܒܪܶܩ. ܘܩܳܠܳܐ ܕܺܝܠܶܗ܆ ܐܰܝܟ ܩܳܠܳܐ ܕܥܰܡܳܐ ܣܰܓܺܝܳܐܐ. ܗܳܠܶܝܢ ܕܶܝܢ ܟܽܠܗܶܝܢ܆ ܠܥܰܣܩܽܘܬ ܦܽܘܪܳܫܳܐ ܘܥܰܣܩܽܘܬ ܡܶܬܕܰܪܟܳܢܽܘܬܳܐ ܕܺܝܠܗܽܘܢ ܕܚܶܙܘ̈ܶܐ ܡܚܰܘ̈ܝܳܢ ܗ̱ܘܰܝ̈܆ ܘܰܠܫܽܘܚܠܳܦܳܐ ܕܡܰܦܩܳܢ̈ܶܐ܆ ܕܳܐܦ ܠܥ̈ܶܕܳܢܶܐ ܕܙܰܒܢܳܐ ܕܰܥܬܺܝܕ ܡܦܰܠܶܓ ܠܘܳܬ ܡܰܠ̈ܟܘܳܬܳܐ ܣܰܓܺܝ̈ܳܐܬܳܐ. ܗܳܕܶܐ ܓܶܝܪ ܡܚܰܘܝܳܐ ܡܦܰܬܟܽܘܬܳܐ ܗܳܝ ܕܗܽܘ̈ܠܰܤ܆ ܘܩܳܠܐ ܗܰܘ ܡܒܰܠܒܠܳܐ ܘܠܳܐ ܝܺܕܺܝܥܳܐ ܕܥܰܡܳܐ ܣܰܓܺܝܳܐܐ. ܡܶܛܽܠ ܗܳܕܶܐ܆ ܐܳܦ ܥܰܠ ܣܽܘܟܳܠܳܐ ܣܢܺܝܩ ܗ̱ܘܳܐ ܠܘܳܬ ܗܳܠܶܝܢ ܕܡܶܬܐܰܡܪ̈ܳܢ ܗ̱ܘܰܝ̈. ܘܫܳܡܰܥ ܗ̱ܘܳܐ܆ ܐܶܣܬܰܟܠ ܒܡ̈ܶܠܶܐ ܗܳܠܶܝܢ ܕܶܐܢܳܐ ܡܡܰܠܶܠ ‌ܐ̱ܢܳܐ ܠܘܳܬܳܟ^[17].

ܐܶܢ ܕܶܝܢ ܠܦܽܘܬ ܚ̈ܙܳܬܶܐ ܗܳܠܶܝܢ ܕܡܶܬܚܰܙ̈ܝܳܢ ܗ̱ܘܰܝ̈ ܥܠܰܝܗܽܘܢ܆ ܢܶܣܒܰܪ ܕܺܐܝܬܶܝܗ̇ ܐܳܦ ܐܽܘܣܺܝܰܐ ܕܺܝܠܗܽܘܢ܆ ܐܰܢܰܢܩܺܐ ܕܳܐܦ ܡܦܰܬܟ̈ܶܐ ܢܶܣܒܰܪ ܕܺܐܝܬܰܝܗܽܘܢ ܘܗܽܘ̈ܠܳܢܳܝܶܐ. ܘܗܳܕܶܐ ܟܰܕ ܠܳܐ ܗܽܘ̈ܠܳܢܳܝܶܐ ܘܰܦܫܺܝ̈ܛܶܐ ܐܰܝܟ ܠܳܐ ܦܰܓܪ̈ܳܢܶܐ ܐܺܝܬܰܝܗܽܘܢ. ܪ̈ܽܘܚܶܐ ܓܶܝܪ ܡܫܰܡ̈ܫܳܢܝܳܬܳܐ ܐܺܝܬܰܝܗܽܘܢ ܟܽܠܗܽܘܢ܆ ܕܰܠܬܶܫܡܶܫܬܳܐ ܡܶܫܬܰܕܪ̈ܳܢ܆ ܡܶܛܽܠ ‌ܐܰܝܠܶܝܢ ܕܰܥܬܺܝܕܺܝܢ ܠܡܺܐܪܰܬ ܦܽܘܪܩܳܢܳܐ^[18]. ܐܰܘ ܠܰܘ ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܓܰܒܪܺܐܶܝܠ܆ ܕܡܶܛܽܠܳܬܰܢ ܗܳܢܽܘܢ ܕܰܥܬܺܝܕܺܝܢ ܗ̄ܘܰܝܢ ܕܢܶܗܘܶܐ ܝܳܪ̈ܬܶܐ ܡܰܢ ܕܰܐ‌ܠܳܗܳܐ ܒ̈ܢܰܝ ܝܳܪܬܽܘܬܳܐ ܕܶܝܢ ܕܰܡܫܺܝܚܳܐ܆ ܘܰܕܦܽܘܪܩܳܢܳܐ ܕܡܶܢ ܗܳܪܟܳܐ ܢܶܬܦܪܶܩ܆ ܠܘܳܬ ܣܽܘܒܳܪܳܐ ܕܝܳܠܕܰܬ ܐܰ‌ܠܳܗܳܐ ܡܰܪܝܰܡ ܡܶܫܬܰܕܰܪ ܗ̱ܘܳܐ. ܠܡܳܢܳܐ ܕܶܝܢ ܠܰܘ ܒܳܗ̇ ܒܕܳܡܝܽܘܬܳܐ܆ ܐܳܦ ܗܳܢܽܘܢ ܕܰܠܘܳܬ ܩܰܒܪܳܐ ܐܰ‌ܠܳܗܳܝܳܐ ܠܢܶܫ̈ܶܐ ܐܶܬܚܙܺܝܘ ܘܠܰܩܝܳܡܬܳܐ ܩܰܕܶܡܘ ܐܰܟܪܶܙܘ܆ ܗܳܢܽܘܢ ܕܳܐܦ ܠܳܚܡܳܐܺܝܬ ܠܢܽܘܗܪܳܐ ܕܺܝܕܰܥܬܳܐ ܕܰܐ‌ܠܳܗܳܐ ܗܰܘ ܕܡܶܢ ܒܳܬܰܪܟܶܢ ܐܰܨܡܰܚ܆ ܟܰܕ ܡܥܰܛܦܺܝܢ ܐܶܤ̈ܛܠܶܐ ܚܶܘܳܪ̈ܳܬܳܐ ܘܰܕܡܰܒܪ̈ܩܳܢ ܐܶܬܚܙܺܝܘ.

ܠܗܳܠܶܝܢ ܗܳܟܺܝܠ ܕܕܰܐܝܟ ܗܳܟܰܢ܆ ܠܰܘ ܛܽܘܒ̈ܬܳܢܶܐ ܢܶܚܫܽܘܒ ܐܶܢܽܘܢ܆ ܕܰܒܡܰܢܗܪܳܢܽܘܬܳܐ ܕܡܶܢ ܠܥܶܠ ܡܶܬܒܰܣܡܺܝܢ ܘܚܳܕܶܝܢ܆ ܘܰܠܦܽܘܩ̈ܕܳܢܶܐ ܐܰ‌ܠܳܗܳܝ̈ܶܐ ܡܫܰܡܫܺܝܢ. ܐܺܝܢ ܐܳܡܰܪ ܐ̱ܢܳܐ܆ ܡܶܛܽܠ ܕܳܐܦ ܟܰܕ ܣܰܓܺܝ ܬܟܺܝܠ ‌ܐ̱ܢܳܐ. ܘܰܢܝܰܩܰܪ ܐܶܢܽܘܢ ܟܺܝܬ ܟܽܠܶܗ ܗܳܢܳܐ܆ ܟܡܳܐ ܕܢܶܕܰܥ ܐܶܢܽܘܢ ܒܰܠܚܽܘܕ܆ ܕܰܡܫܰܡ̈ܫܳܢܶܐ ܫܰܪܺܝܪ̈ܶܐ ܕܰܐ‌ܠܳܗܳܐ ܛܳܒܳܐ ܘܡܳܪܳܐ ܘܰܡܕܰܝ̈ܠܳܢܶܐ ܡܶܕܶܡ ܛܳܒ̈ܶܐ ܐܺܝܬܰܝܗܽܘܢ܆ ܘܰܕܣܰܓܺܝ ܪܳܘܙܺܝܢ ܘܚܳܕܶܝܢ ܥܰܠ ܦܽܘܪܩܳܢܳܐ ܕܺܝܠܰܢ. ܕܚܰܕܽܘܬܳܐ ܓܶܝܪ ܗܳܘܝܳܐ ܒܰܫܡܰܝܳܐ ܥܰܠ ܚܰܕ ܚܰܛܳܝܳܐ ܕܬܳܐܶܒ܆ ܡܫܺܝܚܳܐ ܐܰ‌ܠܳܗܳܐ ܘܡܶܠܬܳܐ ܦܣܰܩ. ܝܺܕܺܝܥܳܐ ܗܳܟܺܝܠ܆ ܕܟܰܕ ܚܰܝ̈ܠܰܘܳܬܳܐ ܫܡܰܝܳܢ̈ܶܐ ܚܳܕܶܝܢ. ܟܰܕ ܓܶܝܪ ܥܳܐܶܦ ܠܳܗ̇ ܠܡܶܠܬܳܐ܆ ܝܰܬܺܝܪ ܢܰܗܺܝܪܳܐܺܝܬ ܐܶܡܰܪ܆ ܗܳܟܰܢܳܐ. ܐܳܡܰܪ ܐ̱ܢܳܐ ܠܟܽܘܢ܆ ܕܚܰܕܽܘܬܳܐ ܗܳܘܝܳܐ ܩܕܳܡ ܡܰܠܰܐܟ̈ܶܐ ܕܰܐ‌ܠܳܗܳܐ ܥܰܠ ܚܰܕ ܚܰܛܳܝܳܐ ܕܬܳܐܶܒ^[19]. ܘܬܽܘܒ܆ ܚܙܰܘ ܠܳܐ ܬܶܒܣܽܘܢ ܥܰܠ ܚܰܕ ܡܶܢ ܙܥܽܘܪ̈ܶܐ ܗܳܠܶܝܢ. ܐܳܡܰܪ ܐ̱ܢܳܐ ܠܟܽܘܢ ܓܶܝܪ܆ ܕܡܰܠܰܐܟ̈ܶܐ ܕܺܝܠܗܽܘܢ ܕܒܰܫܡܰܝܳܐ܆ ܒܟܽܠܙܒܰܢ ܚܳܙܶܝܢ ܦܰܪܨܽܘܦܶܗ ܕܳܐܒܝ ܗܰܘ ܕܒܰܫܡܰܝܳܐ^[20]. ܘܬܽܘܒ ܟܬܺܝܒ ܕܰܣܪ̈ܳܦܶܐ ܡܚܰܦܶܝܢ ܦܰܪܨܽܘܦܳܐ ܕܺܝܠܗܽܘܢ܆ ܡܶܛܽܠ ܠܳܐ ܡܶܬܚܰܙܝܳܢܽܘܬܳܐ ܕܫܽܘܒܚܳܐ ܐܰ‌ܠܳܗܳܝܳܐ^[21].

ܐܶܠܳܐ ܡܶܢ ܗܳܪܟܳܐ ܝܺܕܺܝܥܳܐ܆ ܕܰܠܦܽܘܬ ܬܰܪ̈ܥܝܳܬܳܐ ܕܣܺܝ̈ܡܳܢ܆ ܟܰܕ ܒܰܥܝܳܕܳܐ ܕܰܠܘܳܬܰܢ ܡܶܬܚܰܫܰܚ ܟܬܳܒܳܐ ܐܰ‌ܠܳܗܳܝܳܐ܆ ܡܣܰܟܶܡ ܠܳܗ̇ ܠܡܶܠܬܳܐ ܕܡܰܠܦܳܢܽܘܬܳܐ. ܘܥܰܠ ܣܪ̈ܳܦܶܐ ܡܰܢ܆ ܘܥܰܠ ܚܰܝ̈ܠܰܘܳܬܳܐ ܗܳܢܽܘܢ ܩܰܠ̈ܺܝܠܶܐ ܘܰܕܝܰܬܺܝܪ ܡܶܢ ܟܽܠ ܙܪܺܝܙܺܝܢ ܘܚܰܪܺܝܦܺܝܢ ܘܰܡܥ̈ܰܠܰܝܳܐ ܘܪ̈ܳܡܶܐ܆ ܗܳܕܶܐ ܓܶܝܪ ܡܚܰܘܝܳܐ ܓܰܠܝܳܐܺܝܬ ܣܰܓܺܝܽܐܘܬܗܽܘܢ ܕܓܶܦ̈ܶܐ܆ ܠܠܳܐ ܡܶܬܩܰܪܒܳܢܽܘܬܳܐ܆ ܘܰܠܠܳܐ ܡܶܬܚܰܙܝܳܢܽܘܬܳܐ ܟܽܠ ܟܽܠܶܗ ܕܫܽܘܒܚܳܐ ܗܰܘ ܡܥܰܠܝܳܐ ܡܰܘܕܰܥ. ܥܰܠ ܡܰܠܰܐܟ̈ܶܐ ܕܶܝܢ ܗܳܢܽܘܢ ܕܰܡܗܰܝܡܢܺܝܢ ܢܛܽܘܪܬܳܐ ܕܗܳܢܽܘܢ ܕܡܶܣܬܰܒܪܺܝܢ ܒܰܢ ܕܝܰܬܺܝܪ ܙܥܽܘܪܺܝܢ܆ ܗܳܢܽܘܢ ܕܰܒܟܽܠ ܙܒܰܢ ܚܳܙܶܝܢ ܦܰܪܨܽܘܦܳܐ ܕܰܐܒܳܐ ܫܡܰܝܳܢܳܐ܆ ܠܣܰܓܺܝܽܐܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ ܘܰܡܫܰܝܢܽܘܬܳܐ ܡܰܘܕܰܥ܆ ܗܳܝ ܕܡܶܛܽܠܳܬܳܗ̇ ܡܶܣܬܰܒܪܺܝܢ ܡܰܠܰܐܟ̈ܶܐ ܕܟܽܠܳܗ̇ ܗܳܕܶܐ ܦܰܪܶܗ̱ܣܺܝܰܐ ܐܺܝܬ ܠܗܽܘܢ܆ ܗܳܝ ܕܺܐܝܬ ܠܗܳܢܽܘܢ ܕܦܰܪܨܽܘܦܳܐܺܝܬ ܡܶܬܥܢܶܝܢ ܥܰܡ ܪ̈ܺܝܫܳܢܶܐ ܗܳܢܽܘܢ ܕܣܰܓܺܝ ܡܥܰܠܶܝܢ. ܗܳܟܰܢܳܐ ܐܳܦ ܥܠܰܝܢ ܐܺܝܬ ܠܡܶܫܟܳܚܽܘ ܕܡܶܣܬܰܟܡܳܐ ܡܶܠܬܳܐ. ܒܰܙܒܰܢ ܡܰܢ ܓܶܝܪ ܟܰܕ ܡܶܢ ܕܚܺܝܠܽܘܬܳܐ ܕܣܳܥܽܘܪܽܘܬܳܐ ܕܰܐ‌ܠܳܗܳܐ ܕܳܚܶܠ ܢܒܺܝܳܐ ܡܰܙܥܶܩ܆ ܐܰܗܦܶܟ ܦܰܪܨܽܘܦܳܐ ܕܺܝܠܳܟ ܡܶܢ ܚ̈ܛܳܗܰܝ^[22]. ܒܰܙܒܰܢ ܕܶܝܢ ܟܰܕ ܡܫܰܝܢܽܘܬܳܐ ܢܳܓܶܕ ܥܠܰܘܗ̱ܝ ܐܳܡܰܪ: ܐܰܕܢܰܚ ܦܰܪܨܽܘܦܳܐ ܕܺܝܠܳܟ ܥܰܠ ܥܰܒܕܳܟ܆ ܘܠܳܐ ܬܰܗܦܶܟ ܦܰܪܨܽܘܦܳܐ ܕܺܝܠܳܟ ܡܶܢ ܥܰܒܕܳܟ. ܡܶܛܽܠ ܕܡܶܬܶܐܠܶܨ ܐ̱ܢܳܐ ܒܰܥܓܰܠ ܥܢܺܝܢܝ^[23].

ܐܰܝܟ ܓܶܝܪ ܬܰܪ̈ܥܝܳܬܳܐ ܗܳܠܶܝܢ ܕܰܐܝܟ ܗܳܟܰܢ܆ ܡܫܰܚܠܦܳܐܺܝܬ ܙܳܕܶܩ ܠܡܶܣܰܒ ܦܰܪ̈ܨܽܘܦܶܐ ܕܰܐ‌ܠܳܗܳܐ܆ ܘܠܰܘ ܐܰܝܟ ܛܽܘܦܣܳܐ ܘܝܽܘܩܢܳܐ ܦܰܓܪܳܢܳܝܳܐ ܘܰܐܝܟ ܕܡܽܘܬܳܐ ܐ̱ܢܳܫܳܝܬܳܐ܆ ܗܳܝ ܟܺܝܬ ܕܕܰܟܝܳܢܳܐ ܕܠܳܐ ܓܫܽܘܡ ܐܰܘܟܺܝܬ ܐܽܘܣܺܝܰܐ܆ ܢܽܘܟܪܳܝܬܳܐ ܐܺܝܬܶܝܗ̇. ܗܳܟܰܢܳܐ ܡܰܠܰܐܟ̈ܶܐ ܡܶܬܐܰܡܪܺܝܢ ܕܚܳܙܶܝܢ ܒܟܽܠܙܒܰܢ ܦܰܪܨܽܘܦܳܐ ܕܰܐ‌ܠܳܗܳܐ܆ ܟܰܕ ܕܰܢܛܽܘܪܬܳܐ ܕܺܝܠܰܢ ܝܳܨܦܺܝܢ ܚܦܺܝܛܳܐܺܝܬ. ܘܰܟܒܰܪ܆ ܐܳܦ ܟܰܕ ܒܒܳܥ̈ܘܳܬܳܐ ܡܶܕܶܡ ܚܠܳܦܰܝܢ ܡܶܬܚܰܫܚܺܝܢ. ܕܕܰܐܝܟ ܗܳܢܳܐ ܡܶܕܶܡ ܡܰܘܕܰܥ܆ ܐܳܦ ܡܰܠܰܐܟܳܐ ܗܰܘ ܕܰܡܡܰܠܶܠ ܗ̱ܘܳܐ ܠܕܳܢܺܝܐܶܝܠ܆ ܟܰܕ ܐܰܝܟ ܕܒܰܙܢܳܐ ܡܶܕܶܡ ܕܰܥܒܺܝܕܽܘܬ ܦܰܪܨܽܘܦܳܐ ܘܰܒܪܶܡܙܳܐ܆ ܩܰܕܶܡ ܗ̱ܘܳܐ ܐܳܡܰܪ ܠܰܫܪܳܝܳܐ ܕܰܫܒܺܝܬܳܐ ܕܺܐܝܣܪܳܐܶܝܠ܆ ܟܰܕ ܗܳܟܰܢܳܐ ܐܳܡܰܪ: ܘܠܳܐ ܐܺܝܬ ܚܰܕ ܕܰܡܣܰܝܰܥ ܥܰܡܝ ܡܶܛܽܠ ܗܳܠܶܝܢ܆ ܐܶܠܳܐ ܐܶܢ ܡܺܝܟܳܐܶܝܠ ܪܺܝܫܳܢܳܐ ܕܺܝܠܟܽܘܢ^[24]. ܐܳܦ ܓܶܝܪ ܘܰܠܥܰܡ̱ܡ̈ܶܐ ܘܠܰܡܕܺܝܢ̱ܬܳܐ ܘܠܰܒܢܰܝ̈ܢܳܫܳܐ ܗܳܢܽܘܢ ܕܟܽܠܚܰܕ܆ ܘܝܰܬܺܝܪܳܐܺܝܬ ܠܗܳܢܽܘܢ ܕܕܳܚܠܺܝܢ ܠܡܳܪܝܳܐ^[25]܆ ܡܰܠܰܐܟ̈ܶܐ ܒܰܕܡܽܘܬ ܪ̈ܺܝܫܰܝ ܛܶܟܣ̈ܶܐ ܡܗܰܝܡ̈ܢܶܐ ܘܦܳܠ̈ܚܶܐ ܕܡܶܢ ܠܘܳܬ ܡܰܠܟܳܐ ܪܰܒܳܐ܆ ܝܺܗܺܝܒܺܝܢ ܢܳܛܽܘܪ̈ܶܐ. ܢܶܫܪܶܐ ܓܶܝܪ ܐܳܡܰܪ ܡܰܠܰܐܟܳܐ ܕܡܳܪܝܳܐ ܚܕܳܪ̈ܰܝ ܗܳܢܽܘܢ ܕܕܳܚܠܺܝܢ ܠܶܗ܆ ܘܰܢܦܰܨܶܐ ܐܶܢܽܘܢ. ܗܳܝ ܓܶܝܪ ܕܢܶܫܪܶܐ ܡܰܘܕܥܳܐ܆ ܕܥܽܘܕܪܳܢܳܐ ܕܚܰܕ ܡܰܠܰܐܟܳܐ܆ ܚܰܝܠܳܐ ܕܡܰܫܪܺܝܬܳܐ ܟܽܠܳܗ̇ ܘܰܕܣܶܕܪܳܐ ܕܰܩܪܳܒܳܐ ܐܰܚܺܝܕ.

ܐܶܠܳܐ ܠܰܘ ܡܶܛܽܠ ܗܳܕܶܐ܆ ܟܰܕ ܠܰܡܫܽܘܚܬܳܐ ܕܺܝܠܗܽܘܢ ܗܳܝ ܦܳܠܚܳܝܬܳܐ ܘܰܡܕܰܝܠܳܢܺܝܬܳܐ ܛܳܥܶܝܢ ܚ̱ܢܰܢ܆ ܡܶܢ ܛܳܥܝܽܘܬܳܐ ܚܰܢܦܳܝܬܳܐ܆ ܒܺܐܝܩܳܪ̈ܶܐ ܕܰܠܒܰܪ ܡܶܢ ܬܚܽܘܡܳܐ ܢܨܰܥܰܪ ܐܶܢܽܘܢ. ܨܰܥܪܰܐ ܗ̄ܘ ܓܶܝܪ ܠܗܳܢܽܘܢ܆ ܟܽܠ ܗܰܘ ܡܳܐ ܕܡܶܬܬܪܺܝܡ ܠܽܘܩܒܰܠ ܫܽܘܒܚܳܐ ܕܗܰܘ ܕܒܰܠܚܽܘܕܰܘܗ̱ܝ ܐܰ‌ܠܳܗܳܐ. ܗܳܟܰܢܳܐ ܡܰܠܰܐܟܳܐ ܗܰܘ ܕܰܠܘܳܬ ܡܢܽܘܚ ܡܡܰܠܶܠ ܗ̱ܘܳܐ ܐܳܡܰܪ ܗ̱ܘܳܐ: ܘܶܐܢ ܝܰܩܕܳܐ ܫܰܠܡܳܐ ܬܶܥܒܶܕ܆ ܠܡܳܪܝܳܐ ܬܰܣܩܺܝܘܗ̱ܝ^[26]. ܗܳܕܶܐ ܥܳܒܕܺܝܢ ܗ̱ܘܰܘ܆ ܐܳܦ ܥܰܒ̈ܕܶܐ ܗܳܢܽܘܢ ܡܗܰܝܡ̈ܢܶܐ ܐܰܝܟ ܡܰܠܰܐܟ̈ܶܐ ܒܰܪܢܰܒܰܐ ܘܦܰܘܠܽܘܤ܆ ܟܰܕ ܣܥܰܘ ܕܰܢܕܰܒܚܽܘܢ ܠܗܽܘܢ ܐܰܝܟ ܕܠܰܐܠܳܗ̈ܶܐ܆ ܗܳܢܽܘܢ ܦܳܠ̈ܚܰܝ ܠܫ̈ܺܐܕܶܐ ܕܰܒܠܽܘܩܽܘܢܺܝܰܐ. ܩܳܥܶܝܢ ܗ̱ܘܰܘ ܓܶܝܪ܆ ܓܰܒܪ̈ܶܐ ܠܡܳܢܳܐ ܗܳܠܶܝܢ ܥܳܒܕܺܝܢ ܐܢ̱ܬܽܘܢ. ܐܳܦ ܚܢܰܢ ܒܢܰܝ̈ܢܳܫܳܐ ܫܰܘ̈ܝ̣ܰܝ̣ ܒܚܰܫ̈ܶܐ ܠܟܽܘܢ ܐܺܝܬܰܝܢ ܕܰܡܣܰܒܪܺܝܢܰܢ ܠܟܽܘܢ ܕܡܶܢ ܗܳܠܶܝܢ ܣܪ̈ܺܝܩܳܬܳܐ ܬܶܗܦܟܽܘܢ܆ ܘܬܶܬܦܢܽܘܢ ܠܘܳܬ ܐܰ‌ܠܳܗܳܐ ܚܰܝܳܐ܆ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ ܘܝܰܡܳܐ ܘܟܽܠ ܕܺܐܝܬ ܒܗܽܘܢ^[27].

ܚܰܢ̈ܦܶܐ ܕܶܝܢ ܗܳܝ ܕܰܠܩܽܘܒܠܳܐ܆ ܒܪܶܒܽܘ ܦܽܘܪ̈ܣܶܐ ܡܶܬܚܰܫܚܺܝܢ ܗ̱ܘܰܘ܆ ܘܟܽܠ ܟܺܐܦܳܐ ܡܙܺܝܥܺܝܢ ܗ̱ܘܰܘ܆ ܕܠܰܥܠܳܬܐ ܢܶܫܬܘܽܘܢ. ܘܰܐ‌ܠܳܗ̈ܶܐ ܢܶܣܬܰܒܪܽܘܢ܆ ܕܛܰܝܒܽܘܬܐ ܐ̱ܢܳܫܳܝܬܳܐ ܐܰܘܟܺܝܬ ܫܰܦܺܝܪܽܘܬ ܣܳܥܽܘܪܽܘܬܳܐ ܣܥܰܪܘ^[28] ܒܰܡܕܺܝܢ̱ܬܳܐ ܡܶܕܶܡ. ܕܰܐܝܟ ܗܳܠܶܝܢ ܓܶܝܪ ܚܳܙܶܝܢ ܗ̱ܘܰܘ ܐܳܦ ܠܗܳܢܽܘܢ ܕܡܶܢ ܩܕܳܡܰܝܗܽܘܢ܆ ܕܕܰܓܳܠܳܐܺܝܬ ܡܶܢ ܒܢܰܝ̈ܢܳܫܳܐ ܐܶܣܬܒܰܪܘ ܕܺܐܝܬܰܝܗܽܘܢ ܐܰ‌ܠܳܗ̈ܶܐ. ܐܶܠܳܐ܆ ܠܰܘ ܕܰܐܝܟ ܗܳܠܶܝܢ ܐܺܝܬܰܝܗܶܝܢ܆ ܗܳܠܶܝܢ ܪ̈ܽܘܚܶܐ ܡܫܰܡ̈ܫܳܢܝܳܬܳܐ ܘܡܶܬܗܰܘ̈ܢܳܢܝܳܬܳܐ ܘܰܫܡܰܝܳܢ̈ܝܳܬܳܐ. ܟܽܠܶܗ ܗܳܢܳܐ ܓܶܝܪ ܐܺܝܬ ܠܗܶܝܢ ܒܗܶܝܢ ܕܶܚܠܬܳܐ ܥܰܙܺܝܙܬܳܐ܆ ܟܡܳܐ ܕܩܰܪ̈ܺܝܒܳܢ ܠܰܐܠܳܗܳܐ܆ ܘܡܶܢ ܡܥܰܠܝܽܘܬܳܐ ܕܚܰܝܠܳܐ ܕܺܝܠܶܗ ܪ̈ܳܥܠܳܢ. ܥܗܺܝ̈ܕܳܢ ܓܶܝܪ ܐܳܦ ܠܡܰܦܽܘܠܬܳܐ ܗܳܝ ܕܳܐܟܶܠܩܰܪܨܳܐ܆ ܕܡܶܢ ܩܕܺܝܡ ܡܶܢ ܛܶܟܣܳܐ ܕܺܝܠܗܽܘܢ ܐܺܝܬܰܘܗ̱ܝ ܗ̱ܘܳܐ. ܘܰܐܝܟ ܕܰܟܬܺܝܒ ܠܽܘܩܒܰܠ ܡܳܪܝܳܐ ܐܰܚܺܝܕ ܟܽܠ ‌ܐܰܪܺܝܡ ܨܰܘܪܶܗ܆ ܘܰܪܗܶܛ ܠܩܽܘܒܠܶܗ ܒܨܰܥܪܳܐ^[29]. ܐܶܠܳܐ ܐܺܝܕܳܐ ܗܳܝ ܡܰܪܳܚܬܳܐ ܕܨܰܝܳܪ̈ܶܐ ܘܢܳܡܽܘܣܳܝܰܬ ܢܰܦܫܳܗ̇܆ ܟܰܕ ܡܫܰܟܢܳܐ ܠܰܓܒܽܘ̈ܠܝܳܐ ܐܰܘ ܠܗܶܓܓ̈ܶܐ ܗܳܢܽܘܢ ܚܰܢ̈ܦܳܝܶܐ ܘܕܰܠܘܳܬ ܕܶܚܠܰܬ ܦܬܰܟܪ̈ܶܐ ܚܳܝܪܺܝܢ܆ ܘܟܽܠܗܶܝܢ ܡܶܛܽܠ ܝܽܘܬܪܳܢܳܐ ܡܶܬܦܰܪܣܐ222܆ ܠܡܺܝܟܐܝܠ ܘܰܠܓܰܒܪܐܝܠ ܒܰܕܡܽܘܬ ܛܪ̈ܽܘܢܶܐ ܡܶܕܶܡ ܐܰܘ ܡܰܠ̈ܟܶܐ܆ ܒܶܐܤܛܠܳܐ ܕܰܐܪܓܘܳܢܳܐ ܘܡܰܠܟܳܝܬܳܐ ܡܥܰܛܦܳܐ. ܘܒܰܟܠܺܝܠܳܐ ܡܨܰܒܬܳܐ ܠܗܽܘܢ܆ ܘܰܒܝܰܡܺܝܢܳܐ ܕܺܝܠܗܽܘܢ ܫܽܘܘܕܳܥܳܐ ܕܫܽܘܠܛܳܢܳܐ ܘܽܐܘܚܕܳܢܳܐ ܗܰܘ ܕܥܰܠ ܟܽܠ ܣܳܝܡܳܐ. ܡܶܛܽܠ ܗܳܠܶܝܢ ܘܰܕܕܰܐܝܟ ܗܳܠܶܝܢ܆ ܠܗܳܢܽܘܢ ܕܗܳܟܰܢܳܐ ܫܳܛܝܳܐܺܝܬ ܠܡܰܠܰܐܟ̈ܶܐ ܡܝܰܩܪܺܝܢ܆ ܘܰܠܥܺܕܬܳܐ ܫܳܒܩܺܝܢ ܘܰܠܢܳܡܽܘ̈ܣܶܐ ܕܗܳܕܶܐ ܥܳܒܪܺܝܢ܆ ܗܳܢܽܘܢ ܕܰܠܩܳܢܽܘ̈ܢܶܐ ܩܰܕܺܝ̈ܫܶܐ ܛܰܟܶܣܘ ܘܣܳܡܘ܆ ܬܚܶܝܬ ܚܶܪܡܳܐ ܐܰܪܡܺܝܘ ܐܶܢܽܘܢ.

ܘܳܐܦ ܚܢܰܢ ܡܶܟܺܝܠ ܟܰܕ ܠܚܰܬܺܝܬ̣ܽܘܬܳܐ ܕܗܳܢܽܘܢ ܢܳܩܦܺܝܢ ܚ̱ܢܰܢ܆ ܘܰܠܡܰܥ̈ܠܳܢܶܐ ܕܰܡܛܰܫܶܝܢ ܕܕܶܚܠܰܬ ܫ̈ܺܐܕܶܐ ܣܳܟܪܺܝܢ ܚ̱ܢܰܢ܆ ܠܒ̈ܳܬܶܐ ܗܳܢܽܘܢ ܕܒܰܫܡܳܐ ܕܡܰܠܰܐܟ̈ܶܐ ܐܶܬܒܢܺܝܘ܆ ܒܓܰܪ̈ܡܶܐ ܘܗܰܕܳܡ̈ܶܐ ܟܳܗ̈ܢܳܝܶܐ ܕܣܳܗ̈ܕܶܐ ܩܰܕܺܝ̈ܫܶܐ܆ ܐܰܘ ܒܕܰܚܺܝܚܳܐ ܗܰܘ ܛܥܺܝܢ ܙܳܟܽܘܬܳܐ ܘܕܰܐܬܠܺܝܛܳܐܺܝܬ ܝܺܩܶܕ ܟܽܠܶܗ ܘܰܗܘ̣ܳܐ ܕܶܒܚܳܐ܆ ܡܩܰܕܫܺܝܢ ܚ̱ܢܰܢ. ܟܰܕ ܒܶܗ ܒܣܽܘܥܪܳܢܳܐ ܡܰܙܥܩܺܝܢ ܚ̱ܢܰܢ܆ ܕܳܐܦ ܗܳܠܶܝܢ ܐܰܝܟ ܡܰܠܰܐܟ̈ܶܐ ܐܺܝܬܰܝܗܽܘܢ ܚܰܝ̈ܠܰܘܳܬܳܐ. ܗܘܰܘ ܓܶܝܪ ܐܳܦ ܗܶܢܽܘܢ܆ ܐܰܝܟܰܢܳܐ ܕܡܶܛܽܠ ܡܰܠܰܐܟ̈ܶܐ ܡܙܰܡܰܪ ܕܰܘܺܝܕ: ܕܰܡܨܶܝܢ ܒܚܰܝܠܳܐ ܕܥܳܒܕܺܝܢ ܡܶܠܬܶܗ. ܘܰܡܫܰܡ̈ܫܳܢܰܘܗ̱ܝ ܕܥܳܒܕܺܝܢ ܨܶܒܝܳܢܶܗ^[30]. ܘܗܳܕܶܐ ܟܰܕ ܒܒܶܣܪܳܐ ܐܰܣܺܝܪܺܝܢ܆ ܘܡܶܢ ܗܳܢܳܐ ܐܰܗܦܶܟܘ ܐܰܦܰܝ̈ܗܽܘܢ ܐܰܝܟ ܕܡܶܢ ܢܽܘܟܪܳܝܳܐ܆ ܘܠܳܐ ܦܰܓܪܳܢܳܐܺܝܬ ܐܶܬܕܰܒܰܪܘ܆ ܘܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܡܰܥܒܕܺܝܢ. ܒܪܰܡ ܠܰܘ ܡܶܛܽܠܗܳܕܶܐ ܠܰܡܫܽܘܚܬܳܐ ܕܥܰܒܕܽܘܬܳܐ ܛܥܰܘ. ܠܳܐ ܗܳܟܺܝܠ ‌ܐܳܦܠܳܐ ܠܡܰܠܰܐܟ̈ܶܐ ܡܶܕܶܡ ܐ̱ܚܪܺܢܳܐ܆ ܐܶܠܳܐ ܐܶܢ ܡܫܰܡ̈ܫܳܢܶܐ ܘܥܰܒ̈ܕܶܐ ܢܶܣܒܰܪ ܐܶܢܽܘܢ.

ܗܳܕܶܐ ܓܶܝܪ ܪܳܕܝܳܐ ܘܡܰܠܦܳܐ܆ ܗܳܝ ܕܰܚܠܺܝܛܺܝܢ ܣܳܗ̈ܕܶܐ ܒܗܳܠܶܝܢ. ܗܳܟܰܢܳܐ ܐܳܦ ܐܰ‌ܠܳܗܳܐ ܥܳܒܶܕ ܗ̱ܘܳܐ ܠܰܒ̈ܢܰܝ ܐܺܝܣܪܳܐܶܝܠ ܕܰܠܘܳܬ ܕܶܚܠܰܬ ܦܬܰܟܪ̈ܶܐ ܨܠܶܝܢ ܗ̱ܘܰܘ܆ ܟܰܕ ܫܳܒܶܩ ܗ̱ܘܳܐ ܠܗܽܘܢ ܕܰܢܕܰܒܚܽܘܢ܆ ܐܶܠܳܐ ܠܰܘ ܠܰܐ̱ܚܪܺܢܳܐ܆ ܐܶܠܳܐ ܐܶܢ ܠܶܗ ܒܰܠܚܽܘܕܰܘܗ̱ܝ܆ ܘܟܰܕ ܛܽܘܦ̈ܣܶܐ ܕܬܶܫܡܶܫܬܳܐ ܡܠܺܝܠܬܳܐ ܘܶܐܘܰܢܓܶܠܳܝܬܳܐ ܚܳܠܶܛ ܗ̱ܘܳܐ ܒܕܶܒܚ̈ܶܐ܆ ܘܫܳܒܶܩ ܗ̱ܘܳܐ ܡܶܕܶܡ ܩܰܠܺܝܠ ܡܶܢ ܥܝܳܕܳܐ ܥܰܬܺܝܩܳܐ܆ ܐܰܝܟܰܢܳܐ ܕܰܠܘܳܬ ܫܪܳܪܳܐ ܢܶܓܶܕ ܗ̱ܘܳܐ܆ ܘܢܶܓܢܽܘܒ ܠܗܳܢܽܘܢ ܕܶܐܫܬܰܒܩܰܬ ܠܗܽܘܢ ܗܳܝ ܕܰܥܝܳܕܳܐ܆ ܘܠܶܗ ܠܰܥܝܳܕܳܐ ܢܙܰܝܶܢ ܥܰܠ ܢܰܦܫܶܗ ܒܰܙܢܳܐ ܡܶܕܶܡ. ܡܶܛܽܠܗܳܕܶܐ ܪܳܕܶܝܢ ܘܡܰܠܦܺܝܢ ܠܰܢ ܣܳܗ̈ܕܶܐ ܟܰܕ ܥܰܡ ܡܰܠܰܐܟ̈ܶܐ ܐܰܟܚܕܳܐ ܡܙܰܘܓܺܝܢ܆ ܕܢܶܪܚܰܩ ܡܶܢ ܬܰܪܥܺܝܬܳܐ^[31] ܛܳܥܺܝܬܳܐ. ܟܰܕ ܚܰܕ ܥܒܳܕܳܐ ܐܺܝܬ ܠܗܽܘܢ ܠܗܳܠܶܝܢ ܟܺܝܬ ܘܰܠܗܳܢܽܘܢ܆ ܗܳܝ ܕܰܢܫܰܒܚܽܘܢ ܠܰܐܠܳܗܳܐ܆ ܘܠܶܗ ܢܫܰܡܫܽܘܢ ܠܘܳܬ ܦܽܘܪܩܳܢܳܐ ܕܺܝܠܰܢ.

ܐܳܦ ܓܶܝܪ ܐܳܦ ܒܰܫܡܰܝܳܐ܆ ܡܕܰܝܪ̈ܰܝ ܥܰܡ ܚ̈ܕܳܕܶܐ ܐܺܝܬܰܝܗܽܘܢ. ܘܣܳܗܶܕ ܦܰܘܠܽܘܤ܆ ܕܰܠܪ̈ܶܒܘܳܬܳܐ ܕܡܰܠܰܐܟ̈ܶܐ ܘܰܠܚܰܓܳܐ ܕܗܳܢܽܘܢ܆ ܡܰܠܘܶܬ ܠܥܺܕܬܳܐ ܕܒܽܘܟܪ̈ܶܐ ܗܳܢܽܘܢ ܕܰܟܬܺܝܒܺܝܢ ܒܰܫܡܰܝܳܐ^[32]. ܗܳܠܶܝܢ ܕܶܝܢ ܐܺܝܬܰܝܗܽܘܢ܆ ܗܳܢܽܘܢ ܕܰܒܝܰܕ ܗܰܝܡܳܢܽܘܬܳܐ ܘܰܒܝܰܕ ܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ ܠܣܳܝܽܘܡܽܘܬ ܒܢܰܝ̈ܳܐ ܥܬܰܪܘ܆ ܘܒܰܚܒܳܠܳܐ ܪܽܘܚܳܢܳܐ ܐܶܫܬܰܘܬܰܦܘ܆ ܗܰܘ ܕܡܶܢܶܗ ܘܠܳܐ ܐ̱ܢܳܫ ܐܺܝܬ ܕܰܬܪܰܝܳܢܳܝ ܒܝܰܠܕܳܐ܆ ܐܶܠܳܐ ܟܽܠܗܽܘܢ ܒܽܘܟܪ̈ܶܐ ܐܺܝܬܰܝܗܽܘܢ܆ ܡܶܛܽܠ ܚܕܳܐ ܡܰܠܝܽܘܬܳܐ ܕܛܰܝܒܽܘܬܳܐ ܘܫܰܘܝܽܘܬ ܐܺܝܩܳܪܳܐ. ܗܳܟܰܢܳܐ ܐܳܡܰܪ: ܐܳܦ ܓܪܺܝܓܽܘܪܺܝܽܘܤ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܒܚܰܕ ܡܶܢ ܡܺܐܡܪ̈ܶܐ. ܢܶܗܘܶܐ ܚܰܓܳܐ ܓܰܘܳܢܳܝܳܐ ܕܚܰܝ̈ܠܰܘܳܬܳܐ ܫܡܰܝܳܢ̈ܶܐ ܘܕܰܐܪ̈ܥܳܢܳܝܶܐ. ܡܶܬܬܦܺܝܤ ܐ̱ܢܳܐ ܓܶܝܪ ܕܳܐܦ ܗܳܢܽܘܢ ܐܰܟܚܕܳܐ ܪܳܘܙܺܝܢ ܥܰܡܰܢ܆ ܘܰܐܟܚܕܳܐ ܡܚܰܓܶܝܢ ܝܰܘܡܳܢܳܐ܆ ܐܶܢ ܟܺܝܬ ܪ̈ܳܚܡܰܝ ܐ̱ܢܳܫܳܐ ܐܺܝܬܰܝܗܽܘܢ ܘܪ̈ܳܚܡܰܝ ܐܰ‌ܠܳܗܳܐ.

ܒܗܳܕܶܐ ܬܰܪܥܺܝܬܳܐ ܠܣܳܗ̈ܕܶܐ ܥܰܡ ܡܰܠܰܐܟ̈ܶܐ ܠܰܚܕܳܐ ܡܰܝܬܶܝܢ ܚ̱ܢܰܢ܆ ܐܰܝܟ ܕܰܠܥܰܒ̈ܕܶܐ ܡܗܰܝܡܢ̈ܶܐ ܕܚܰܕ ܡܳܪܳܐ܆ ܘܕܺܐܝܬܰܝܗܽܘܢ ܚܰܕ ܚܰܓܳܐ ܪܳܚܶܡ ܐ̱ܢܳܫܳܐ ܘܪܳܚܶܡ ܐܰ‌ܠܳܗܳܐ. ܠܰܘ ܓܶܝܪ ܐܰܝܟܰܢܳܐ ܕܰܐܝܟ ܛܳܥܝܽܘܬܳܐ ܕܚܰܢ̈ܦܶܐ܆ ܒܝܰܕ ܗܰܕܳܡ̈ܶܐ ܕܺܝܠܗܽܘܢ ܩܰܕܺܝ̈ܫܶܐ ܐܰܝܟ ܕܕܰܐܝܠܶܝܢ ܕܰܩܛܺܝܪܳܐܺܝܬ ܡܺܝܬܘ܆ ܢܶܛܪܽܘܕ ܠܡܰܠܰܐܟ̈ܶܐ. ܐܶ‌ܠܽܘ ܓܶܝܪ ܐܺܝܬܶܝܗ̇ ܗ̱ܘܳܬ ܗܳܕܶܐ܆ ܠܰܘ ܠܘܳܬ ܩܰܒܪܶܗ ܕܗܰܘ ܕܶܐܨܛܠܶܒ ܡܰܠܰܐܟ̈ܶܐ ܟܳܝܫܺܝܢ ܗ̱ܘܰܘ ܘܰܡܕܰܝܪܺܝܢ܆ ܒܰܕܡܽܘܬ ܫܩܺܝ̈ܠܰܝ ܩܽܘܢܛܳܪ̈ܶܐ ܠܘܳܬ ܒܶܝܬ ܡܰܠ̈ܟܶܐ܆ ܘܰܠܢܶܫ̈ܶܐ ܐܳܡܪܺܝܢ ܗ̱ܘܰܘ: ܕܰܠܝܶܫܽܘܥ ܢܳܨܪܳܝܳܐ ܗܰܘ ܕܶܐܨܛܠܶܒ ܒܳܥ̈ܝܳܢ ܐܢ̱ܬܶܝܢ܆ ܠܰܝܬܰܘܗ̱ܝ ܬܢܳܢ܆ ܩܳܡ ܠܶܗ ܓܶܝܪ ܐܰܝܟܰܢܳܐ ܕܶܐܡܰܪ^[33].

ܗܳܢܽܘܢ ܗܳܟܺܝܠ ܕܰܠܗܰܘ ܕܶܐܨܛܠܶܒ ܝܰܩܰܪܘ܆ ܐܰܝܟܰܢܳܐ ܐܳܘ ܚܰܣܺܝܪ̈ܰܝ ܪܶܥܝܳܢܳܐ܆ ܡܶܢ ܗܳܢܽܘܢ ܕܰܚܠܳܦ ܗܰܘ ܚܰܫܘ ܘܶܐܬܟܰܬܰܫܘ ܒܰܐܓܽܘܢܳܐ ܬܶܢܰܕ ܠܗܽܘܢ܆ ܘܡܶܢ ܕܰܚܺܝܚܳܐ ܢܰܗܦܟܽܘܢ ܐܰܦܰܝ̈ܗܽܘܢ܆ ܕܗܰܕܳܡ̈ܶܐ ܗܳܢܽܘܢ ܕܥܰܡ ܕܰܟܝܽܘܬܳܐ ܘܢܰܟܦܽܘܬܳܐ ܘܥܰܡ ܟܽܠܳܗ̇ ܡܝܰܬܪܽܘܬܳܐ ܐܶܬܕܰܒܰܪܘ܆ ܗܰܘ ܕܰܒܟܽܠ ܝܽܘܡ ܐܺܝܬܰܘܗ̱ܝ ܥܳܒܽܘܕܳܐ ܕܳܐܣܺܝ̈ܘܳܬܳܐ ܕܟܽܠ ܓܢܶܤ܆ ܗܰܘ ܕܪܳܕܶܦ ܠܫ̈ܺܐܕܶܐ. ܗܳܠܶܝܢ ܒܦܰܠܶܣܛܺܝܢܺܐ܆ ܒܳܗ̇ ܒܩܶܣܰܪܺܝܰܐ ܐܺܝܬ ܠܡܶܚܙܳܐ ܕܣܳܥܰܪ ܬܡܺܝܗܳܐܺܝܬ ܦܪܘܩܘܦܝܘܤ܆ ܗܳܠܶܝܢ ܒܦܽܘܢܛܽܘܤ ܠܦܽܘܩܳܐ܆ ܗܰܘ ܕܓܰܠܝܳܐܺܝܬ ܐܳܦ ܠܗܳܢܽܘܢ ܕܰܒܝܰܡܳܐ ܡܶܬܛܰܪܦܺܝܢ ܡܶܬܚܙܶܐ ܘܰܐܟܚܕܳܐ ܛܳܐܶܦ ܥܰܡܗܽܘܢ܆ ܘܕܰܠܗܳܢܽܘܢ ܕܰܒܨܺܝܪ ܩܰܠܺܝܠ ܥܬܺܝܕܺܝܢ ܕܢܶܬܛܰܒܥܽܘܢ ܒܡܰܚ̈ܫܽܘܠܳܐ ܡܠܰܘܶܐ ܢܺܝܚܳܐܺܝܬ ܘܰܡܫܰܝܢܳܐܺܝܬ.

ܠܗܰܕܳܡ̈ܶܐ ܕܗܳܠܶܝܢ ܕܰܒܕܽܘܟܬܳܐ ܗܳܕܶܐ ܗܳܫܳܐ ܐܶܬܬܣܺܝܡܘ܆ ܩܰܪܺܝܒܺܝܢ ܡܰܠܰܐܟ̈ܶܐ ܘܰܡܚܰܒܒܺܝܢ. ܥܰܡ ܪ̈ܽܘܚܳܬܳܐ ܕܗܳܠܶܝܢ ܐܰܟܚܕܳܐ ܡܫܰܒܚܺܝܢ. ܡܝܰܩܪܺܝܢ ܓܶܝܪ ܠܗܳܢܽܘܢ ܕܠܳܐ ܦܰܓܪܳܢܳܐܺܝܬ ܘܒܳܗ̇ ܒܰܕܡܽܘܬܳܐ ܠܗܽܘܢ ܐܶܬܗܰܦܰܟܘ ܒܦܰܓܪܳܐ܆ ܘܡܶܢ ܡܺܝܬܽܘܬܳܐ ܕܗܳܢܽܘܢ ܕܒܰܡܝܰܬܪܽܘܬܳܐ ܚܝܰܘ܆ ܘܠܳܐ ܣܳܟ ܡܰܗܦܟܺܝܢ ܐܰܦܰܝ̈ܗܽܘܢ. ܘܡܳܢܳܐ ܬܡܺܝܗܳܐ ܐܶܢ ܥܰܠ ܣܳܗ̈ܕܶܐ ܗܳܟܰܢܳܐ܆ ܐܶܡܰܬܝ ܕܠܰܒ̈ܢܰܝܳܐ ܕܺܐܝܣܪܳܐܶܝܠ ܟܰܕ ܡܶܢ ܡܶܨܪܶܝܢ ܠܘܳܬ ܐܰܪܥܳܐ ܕܡܽܘܠܟܳܢܳܐ ܡܣܰܪܗܒܺܝܢ ܗ̱ܘܰܘ܆ ܘܡܺܝܬܳܐ ܫܩܺܝܠܺܝܢ ܗ̱ܘܰܘ ܠܦܰܓܪܶܗ ܕܝܰܘܣܶܦ܆ ܐܰ‌ܠܳܗܳܐ ܐܳܡܰܪ ܗ̱ܘܳܐ܆ ܗܳܐ ܡܫܰܕܰܪ ܐ̱ܢܳܐ ܡܰܠܰܐܟܝ ܩܕܳܡ ܦܰܪܨܽܘܦܳܟ ܕܰܢܢܰܛܪܳܟ ܒܽܐܘܪܚܳܐ^[34]܆ ܡܰܠܽܘܢ ܕܶܝܢ ܐܳܦ ܗܽܘ ܐܳܙܶܠ ܗ̱ܘܳܐ ܥܰܡܗܽܘܢ ܐܰܟܚܕܳܐ܆ ܟܰܕ ܡܽܘܫܶܐ ܐܳܡܰܪ ܗ̱ܘܳܐ: ܕܶܐܢ ܐܰܢ̱ܬ ܩܢܽܘܡܳܟ ܠܳܐ ܐܳܙܶܠ ‌ܐܰܢ̱ܬ ܥܰܡܰܢ ܠܳܐ ܬܰܣܩܰܢ ܡܶܢ ܗܳܪܟܳܐ܆ ܟܰܕ ܡܦܰܢܶܐ ܗ̱ܘܳܐ ܕܳܐܦ ܠܡܶܠܬܳܐ ܗܳܕܶܐ ܗܳܝ ܕܶܐܡܰܪܬ ܐܶ݀ܥܒܶܕ ܠܳܟ. ܐܶܫܟܰܚܬ ܓܶܝܪ ܛܰܝܒܽܘܬܳܐ ܩܕܳܡܰܝ܆ ܘܝܳܕܰܥ ܐ̱ܢܳܐ ܠܳܟ ܝܰܬܺܝܪ ܡܶܢ ܕܰܠܟܽܠܢܳܫ^[35]. ܘܗܳܠܶܝܢ ܗܳܝܕܶܝܢ܆ ܐܶܡܰܬܝ ܕܗܳܝ ܕܢܶܓܫܽܘܦ ܐ̱ܢܳܫ ܒܡܺܝܬܳܐ ܢܕܺܝܕܽܘܬܳܐ ܡܶܣܬܰܒܪܳܐ ܗ̄ܘܳܬ܆ ܐܰܝܟ ܦܽܘܩ̈ܕܳܢܶܐ ܫܰܒܪ̈ܳܝܶܐ ܕܢܳܡܽܘܣܳܐ܆ ܕܪܳܕܶܝܢ ܗ̱ܘܰܘ ܘܡܰܠܦܺܝܢ ܠܰܢ ܕܡܶܬܥܰܠܝܳܢܳܐܺܝܬ ܢܶܬܪܰܚܰܩ ܡܶܢ ܥ̈ܒܳܕܶܐ ܡܺܝ̈ܬܶܐ ܕܒܰܚ̈ܛܳܗܶܐ.

ܡܶܬܐܰܡܪܳܐ ܕܶܝܢ ܕܳܐܦ ܗܽܘ ܡܺܝܟܳܐܶܝܠ܆ ܠܰܩܒܽܘܪܬܳܐ ܕܦܰܓܪܶܗ ܕܡܽܘܫܶܐ ܫܰܡܶܫ܆ ܟܰܕ ܐܳܟܶܠܩܰܪܨܳܐ ܩܳܐܶܡ ܗ̱ܘܳܐ ܣܰܩܽܘܒܠܳܐܻܝܬ܆ ܟܰܕ ܐܰ‌ܠܳܗܳܐ ܫܳܒܶܩ ܗ̱ܘܳܐ܆ ܘܨܳܒܶܐ ܗ̱ܘܳܐ ܕܰܢܚܰܘܶܐ ܒܝܰܕ ܗܳܝ ܕܡܶܬܚܰܙܝܳܐ ܗ̱ܘܳܬ ܠܗܳܢܽܘܢ ܕܗܳܝܕܶܝܢ ܙܥܽܘܪ̈ܝܳܬܳܐ ܚܳܙܶܝܢ ܗ̱ܘܰܘ ܘܝܰܬܺܝܪ ܥܰܒܝܳܐܺܝܬ ܣܺܝܡܺܝܢ ܗ̱ܘܰܘ܆ ܗܳܝ ܕܠܳܐ ܡܶܬܚܰܙܝܳܐ ܗ̱ܘܳܬ܆ ܕܡܶܢ ܒܳܬܰܪ ܓܗܳܝܬܳܐ ܕܡܶܢ ܗܳܪܟܳܐ܆ ܩܳܝܡܺܝܢ ܣܰܩܽܘܒܠܳܐܺܝܬ ܠܽܘܩܒܰܠ ܢܰܦ̈ܫܳܬܳܐ ܕܺܝܠܰܢ܆ ܟܰܕ ܪܳܕܶܝܢ ܡܰܪܕܺܝܬܳܐ ܗܳܝ ܕܰܠܘܳܬ ܗܳܠܶܝܢ ܕܰܠܥܶܠ܆ ܐܳܟܶܠܩܰܪܨܳܐ ܟܺܝܬ ܘܚܰܝ̈ܠܰܘܳܬܐ ܒܺܝ̈ܫܶܐ ܕܥܰܡܶܗ܆ ܟܰܕ ܨܳܒܶܝܢ ܠܰܡܥܰܟܳܪܽܘ ܠܪܶܗܛܳܐ. ܘܰܠܗܳܢܶܝܢ ܕܗܳܢܽܘܢ ܕܰܦܠܰܚܘ ܒܺܝ̈ܫܳܬܳܐ ܚܳܣܢܺܝܢ. ܡܶܢ ܙܰܕܝ̈ܩܶܐ ܕܶܝܢ ܡܶܙܕܟܶܝܢ܆ ܒܝܰܕ ܡܣܰܝܥܳܢܽܘܬܳܐ ܡܰܠܰܐܟܳܝܬܳܐ. ܘܰܠܗܳܕܶܐ ܚܙܳܐ܆ ܐܳܦ ܐܰܢܛܽܘܢܺܝܽܘܤ ܗܰܘ ܪܰܒܳܐ ܒܥܳܢܘܳܝܽܘܬܳܐ ܘܰܒܚܰܝ̈ܶܐ ܡܰܠܰܐܟܳܝ̈ܶܐ. ܐܺܝܬ ܠܶܗ ܕܶܝܢ ܠܰܟܬܳܒܳܐ ܗܰܘ ܟܳܗܢܳܝܳܐ ܗܳܟܰܢܳܐ. ܡܺܝܟܳܐܶܝܠ ܕܶܝܢ ܗܰܘ ܪܺܝܫ ܡܰܠܰܐܟ̈ܶܐ܆ ܐܶܡܰܬܝ ܕܠܳܐܟܶܠܩܰܪܨܳܐ ܡܡܰܠܶܠ ܗ̱ܘܳܐ ܟܰܕ ܕܳܐܶܢ ܗ̱ܘܳܐ ܡܶܛܽܠ ܦܰܓܪܶܗ ܕܡܽܘܫܶܐ܆ ܠܳܐ ܐܰܡܪܰܚ ܕܢܰܝܬܶܐ ܥܠܰܘܗ̱ܝ ܕܺܝܢܳܐ ܕܓܽܘܕܳܦܳܐ. ܐܶܠܳܐ ܐܶܡܰܪ܆ ܢܶܓܥܽܘܪ ܒܳܟ ܡܳܪܝܳܐ^[36].

ܟܰܕ ܠܗܳܠܶܝܢ ܗܳܟܺܝܠ ‌ܐ̱ܪ̈ܳܙܶܐ ܐܶܫܬܘܺܝܢܰܢ܆ ܘܰܠܛܳܒ̈ܳܬܳܐ ܕܕܰܐܝܟ ܗܳܠܶܝܢ܆ ܢ݀ܫܰܒܰܚ ܠܰܡܫܺܝܚܳܐ ܐܰ‌ܠܳܗܗܽܘܢ ܕܡܰܠܰܐܟ̈ܶܐ ܘܰܕܣܳܗ̈ܕܶܐ. ܟܰܕ ܛܰܝܒܽܘܬܳܐ ܝܳܕܥܺܝܢ ܚ̱ܢܰܢ ܠܶܗ ܥܰܠ ܟܽܠܗܶܝܢ. ܗܰܘ ܕܠܶܗ ܦܰܐܝܳܐ ܟܽܠ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܰܒܥܺܝܢ ܘܰܬܪܶܝܢ.

[1]ܐ. ܛܝܡܳܬܶܐܘܣ. 3. 16 ـ

[2]ܦܪܟܣܝܣ. 7: 51

[3]ܚܰܢ̈ܦܶܐ

[4]ܐܦܣ̈ܝܐ. 1: 21

[5]ܝܘܚܢܢ. 1: 1

[6]ܡܙܡܘܪ̈ܐ. 81: 10

[7]ܥܒܪ̈ܝܐ.1: 2

[8]ܐ. ܩܘܪ̈ܝܢܬܝܐ. 8: 6

[9]ܡܙܡܘܪ̈ܐ. 104: 4

[10]ܡܙܡܘܪ̈ܐ. 103: 21

[11]ܥܒܪ̈ܝܐ. 1: 14

[12]ܟܶܢܫܳܐ ܕܓܽܘܕܐ

[13] ܠܘܩܐ. 2: 13 ـ 14

[14] ܗܳܢܶܝܢ

[15]ܕܢܝܐܝܠ. 9: 23

[16]ܕܢܝܐܝܠ. 10: 5 ـ 6

[17]ܕܢܝܐܝܠ. 10: 11

[18]ܥܒܪ̈ܝܐ. 1: 14

[19]ܠܘܩܐ. 15: 7

[20]ܠܘܩܐ. 15: 10 ܐܦ ܡܬܝ. 18: 10

[21]ܐܫܥܝܐ. 6: 2

[22]ܡܙܡܘܪ̈ܐ. 51: 9

[23]ܡܙܡܘܪ̈ܐ. 69: 17

[24]ܕܢܝܐܝܠ. 10: 21

[25]ܡܙܡܘܪ̈ܐ. 34: 8

[26]ܕܰܝܳܢ̈ܶܐ. 13: 16

[27]ܦܪܟܣܝܣ. 14: 14

[28] ܣܳܡܘ

[29]ܐܝܘܒ. 15: 26

[30]ܡܙܡܘܪ̈ܐ. 103: 21

[31]ܡܰܣܒ̣ܪܢܘܬܐ

[32]ܥܒܪ̈ܝܐ. 12: 22 ـ 23

[33]ܡܬܝ. 28: 5 ـ 6

[34]ܡܦܩܢܐ. 23: 20

[35]ܡܦܩܢܐ. 33: 15 ـ 17

[36]ܐܓܪܬܐ ܕܝܗܘܕܐ. 1: 9